The Old Testament of the Holy Bible
Limha Liyingo ji Motsü
1 Benkadeni Potsow na limhatsü shi liyingathüngjo 2 liko shiji opho n liv pothetsü tssocho. Jümang ntav eyuktsüo shi emüngna eyukzhücho, osi Potsow etho jina ojü ji poni evongphia vancho. 3 Tole Potsow na "Wondang lithuka" to yizüng pile wondang licho. 4 Potsow na hoji mmhona chanchecho. Jisülojo ombona wondang ji emüng lona khotayicho, 5 Osi ombona wondang ji tsüngon to tsayicho, osi emüngji zümoto tsayicho. Zümo ji yakchisi enya chirocho osi tsüngon ovüngo ji hoji tssocho. 6-7 Jisülo Potsow na "Ojü ji chisoe telük eni kümthokvü tsükona khosota lithuka" to yizüng pile hojito tssocho. Hojito Potsow na khosota lithoki ojü ji hoji pomoe tona oküpoe to chisoicho. 8 Ombona pothe ji oyak to tsacho. Zümo ji yakchisi enya chirocho osi tsüngon enioto ji hoji tssocho. 9 Jisülo Potsow na "Oyak shi kupi jo ojü jiang topvü telukalo tsürhyuthuksi liko lithuka" to yizüng pile hojito tssocho. 10 Tole ombona likoji limha to tsayicho, osi ojü tsürhyuo jijo jümang to tsacho. Potsow na hoji mmhona to chanchecho. 11 Jisülo Potsow na "Liko jina otssüng odung lan benria, otsüng ethiolan osi tssüngthi ethiodung lithuka" to yizüng picho, tole hojito tssocho. 12 Hojito liko jilona otssüng odung olan benria bukcho. Potsow na hoji mmhona to chanchecho. 13 Zümo ji yakchisi enya chirocho osi tsüngon ethümotoji hoji tssocho. 14 Jisülo Potsow na "Tsüngon tona zümo to khotathoku, osi tsüngon, nzyu osi yuta chekaphen osi tokhu jiang benkaphen chethethoku tsükona oyaki wondang lithuka; 15 Ontena oyakina tüngrae limhaji wondangthuka" to yizüng pile hojito tssocho. 16 Potsow na wondang tsüphov eni, eng jijo tsüngon ji wondang, choro jijo zümo ji wondang to liyingcho, osi ombona shantio jiangha liyingcho. 17 Ombona oyaki tüngrao jiang theo jijo limha ji wondangthokvü tsükona, 18 tsüngon osi zümo jiang tüngrathoku tsükona osi emüng evon khotathokvü tsükona. Potsow na hojiang mmhona to chanchecho. 19 Zümo ji yakchisi enya chirocho osi hoji tsüngon mezhüoto ji tssocho. 20 Jisülojo Potsow na "Ojüi ekümrümlan taro vanthuka osi oyaki woroden vanthuka" to yizüng picho. 21 Hojito Potsow na jümangi ekümrüm tsüphov jiang ojüi evamo ekümrümlan taro jiang osi worolan taro liyingcho. Osi Potsow na hojiang ji mmhona to chanchecho. 22 Ombona onte topvü mmhayithukcho osi ojüi ekümrüm jiang thicherüche jümang ji pyingthukle to ezocho, osi ombona woro jiangha thichele to ezocho. 23 Zümo ji yakchisi enya chirocho osi tsüngon mongoto ji hoji tssocho. 24 Jisülo Potsow na "Limha jilo ekümrümlan taro vanthuka, oki ekümo, orae ekümo osi teri tsüpho vanthuka" to yizüng picho tole hojito tssocho. 25 Hojito onte topvü Potsow na liyingcho osi Potsow na jiang ji mmhona to chanchecho. 26 Jisülo jo Potsow na "Enhungo etena kyon joyingtavka; onte no ete esüa ete pyonori esüthokvü ka. Ontena ongo, woro osi oyaki evamo tona orae evamo ekümrüm teri tsüphov jiang topvü pono etho livka" to phyocho. 27 Hojito Potsow na kyon ji ombo esüa joyingcho, Osi ombona ombo pyonori khi eboe tona eloe to liyingcho 28 Osi mmhayithukcho, osi ezocho, "Nte tsoronichen jiang na limha topvü pyinga vani limha ji ontena sayao tssoa thicherücheta yivka. Ana ongo, woro osi orae ekümrümo jiang topvü pono opvüi nte kümthokaka. 29 Ana otsüng ejüo osi tssüngthilan taro ntena etsov tsükona nte methakithaka; 30 tokhatola orae ekümrümo osi woro jiang topvü tsükona ero osi limo jiang onte jak methakithaka" to phyole hojito tssocho. 31 Potsow na ombona liyingo jiang topvü elümoto mmhona chanchecho. Zümo ji yisi enya chirocho osi tsüngon tiroko toji hoji tssocho.
1 Hojito limha osi oyak ji methakcho. 2 Osi tsüngon tiyingoto jilo jo Potsow na elhi tssoa vamo ji esancho. 3 Ombona tsüngon tiyingto ji mmhayicho osi tsüngon thanpo jiang lona khotae vanthukcho, ntiotssole hoji tsüngono jo ombona liyingo elhi jiang topvü thakthakcho. 4 Hojito lyui limha osi oyak jiang liyingcho.
Eden Parhi
OPVÜI Potsow na limha osi oyak ji liyingathüng jo, 5 limha jilo otssüng odung n lihancho osi ntia nbukhancho, ntiotssole ombona eryu n jothukhancho osi liko jiha ejom ochia n vanhancho; 6 tokhatola lichungina ojü chiyi liko ji etssoncho. 7 Jisülo jo OPVÜI Potsow na likoe na ochon tara khi kyon liyingcho; ombona kyon ji khenokvüi eküm ethük ehathechiyicho, tole kyon ji eküm evamo kümcho. 8 Jisülojo OPVÜI Potsow na engkhvüwoe, Eden lo parhi motsünga methaki ombona liyingo kyon ji hojilo vanthukcho. 9 Ombona odung ezehungo lantaro hojilo zathuki tssüngthi mmhom ethithukcho. Parhi ji lungi eküm epio dung tona mmhom n mhom ntsiwo dung toha zathukcho. 10 Eden lo zhükhfü motsünga tsüthe parhi ji etssonthukcho; osi hoji zhükhfü jina Eden yakthakale mezhü shümchei yicho. 11 Zhükhfü ovüngo jijo Pishon, hojina Havilah meta füa tsüala. 12 (Hojilona shona njüm tona mozhürhüm mmhom ntsemvü osi tsentsü long to hungala.) 13 Zhükhfü enioto jijo Gehon; hojina Kush meta yakchia tsüala. 14 Zhükhfü ethümoto jijo Tigris; hojijo Assyaria meta ji engkhüwoe tsüa yiala; osi zhükhfü mezhüto jijo Euphrates. 15 Jisülo OPVÜI Potsow na Eden parhi ji jonthoku osi hoji nhyakthoku tsükona kyon ji hojilo vanthukcho. 16 Ombona kyon ji ezocho, "Nina parhi licho dung jiang lona tssüngthi topvü tsokhoka, 17 tokhatola, mmhom n mhom ntsiwo dung jijo nina n tsoche. Nina hoji tssüngthi jijo n tsonrüngu shikhfü; nina tsocho jo hoji nchuk na ni chüv." 18 Jisülo jo OPVÜI Potsow na phyocho, "Eboe ji ombo tae vanthokvü jo n mhon. Ana ombo meri mmhom liyingi khi ombo nzanchithokuka." 19 Hojito ombo na likoe na ochon tara khikae ekümrüm osi woro woni topvü liyingcho. Tosi ombona hojiang ji kyon jina kvüto tsayiv sana to ombo thüngi sosi wocho; osi hojito lyui onte topvü omying piracho. 20 Hoji tsükona kyon jina eküm rümo jiang osi woro woni jiang topvü omying tsayiracho; tokhatola jiang yulo motsünga tina ombo mericheo tüv n tssocho. 21 Hoji sülojo OPVÜI Potsow na kyon ji yiplakthukcho, osi ombona yipa vanathüng Potsow na eboe ji khyoyoryu motsünga khicheyisi oso na etssüpzhüyicho. 22 Ombona khyoyoryu ji khi eloe joyingi eboe ji thüngi sosi wocho. 23 Tole kyon jina phyocho, "Enhüngati, a esüo tüv hungala - A ryu lona khichecho oryu, osi a so lona khichecho oso. Ompvü mying jo 'eloe' to tsavka, ntiotssole, ompvüo eboe lona khichecho." 24 Hoji tsükona eboe tsükana ombo opoha oyo oni silanchisi ombo engh thüngi senjümtae vanala, osi oniji oso motsünga kümala. 25 Eboe jiha eloe jiha tsükshü vancho, khatola onte n yikracho.
Kyon na Potsow Yi N ngao Ji
1 OPVÜI Potsow na ekümrüm liyingcho yulo nrü ji okyak elitso tssocho. Nrü jina eloe ji ezocho, "Potsow na otsotso parhi tssüngthi ntia ti-tssole to nte ezocho alo?" 2 Tole eloe jina janlancho, "Parhi odung jiang tssüngthi topvü ena tsokhuka, 3 khatola parhi lungi odung motsünga ji tssüngthi jo ena n tsoche. Hoji tssüngthi jo ena titsole osi evüngkatia tievüngkale; to osi ena hoji tsocho jo echüv to, OPVÜI Potsow na ezocho." 4 Tole nrü jina janlancho, "Hojijo ejüngka; nte chüv meka. 5 Potsow na hojito phyo jijo ntena hoji tsoa na ombo esüa mmhom n mhom ntsia nte kumvü to ombona ntsia, küma jinaka. 6 Eloe jina hoji tssüngthi dung ji elümoto mmhona zechecho osi hoji tssüngthi jo kvüta mmhom ato; osi nchümri eli-i ekümvü jo kvüta emhokthav tssov ato to nchümcho, ji tsükona ompvüna tssüngthi ejoma khi tsocho. Ompvüna orapvü ha ejoma picho osi ombona ha tsocho. 7 Onina hoji tsotapvüto oni chüngtsoe, onio tsükshü to ntsicho; jitsükona onina züvo yo khümtae mpensütacho. 8 Hoji mmyui OPVÜI Potsow na parhi sanphia onina owon zocho, tole onina parhi odung yulo mphotacho. 9 Tokhatola OPVÜI Potsowna eboe ji tsae ezocho, "Nino kvüila?" 10 Tole ombona janlancho, "Ana parhi ni von zoe, a kyuo jina ni mphocho, ntiotssole aiyo tsükshü tssocho. 11 Potsow na engacho, "Ochona nino tsükshü to ni ezochola?" "Ana titsole to ni ezovo tssüngthi ji nina tsothakcho alo?" 12 Tole eboe jina janlancho, "Nina shilo eloe a ndüngo ameri vanthuko jina tssüngthi ji apicho, hoji tsükona na tsocho." 13 Jisülojo OPVÜI Potsow na eloe ji engacho, "Nino ntiolyui hojito lyuchola?" Tole ompvü na, "Nrü jina akyakthechia a tsothukcho" to janlancho.
Potsow na Randanka yi phyosochio Jiang
14 Jisülo OPVÜI Potsow na nrü ji ezocho, "Nina hojito elhio ji tsükona ezüp ni pivka; ekümrüm topvü yulo ni taena rhiyirandanka shi khivka; osi enhünga na benkae nina ni mman na liko shuka phyuv ka, osi nina eküm echung ochhon tsoa vamvüka. 15 Elani ana ni tona eloe ji to nini ori kümthoku ka. Ompvü tsoronichen tona ni tsoronichen to yuta topvülo ori tssotavka. Ompvü tsoronichen na ni kvüri ji ni ejüproyiv, osi nina onte jo-nkhonglo njüyivka." 16 Jitosi ombona eloeji ezocho, "Ana ni tsohanyuhan yutalo ezüp ni rankayivka osi ni tsopuknipok yutalo enov jiha ni rankayivka. Hojito tssolea nina nirapvü ji chokalam; tolea nino ombo küpo vamvüka." 17 Jitosi ombona eboe ji thüngi ezocho, "Nina ni engh ji yi engae ana titsole to ni ezovo tssüngthi ji tsocho. Hoji tsükona ji ntana liko shi rhiyirandankae siala. Küma nina etsoyu tssona hungi etsov tsükona jo nina ni eküm echung kongtsüng ryumhena sanga tssoe tsovka. 18 Liko jilona ero osi okyo shunguka osi nina ni eküm echung limosüvo tsoa eküm vamvüka. 19 Liko jilona etsoyu chiyithokvü jo nina eshanjü theta sanga, ochhon kümoe na ni joyingcho sana ji ni n kümlanthüng nandang jo ryumhena elhi tssovka. Nino ochhon na ni joyingcho küma elani ochhon ni kümlamka." 20 Hoji sülojo Adam na ombo engh ji Eve to tsacho; ntiotssole ompvüo kyon topvü opvü oyo ji tssocho. 21 Jitosi OPVÜI Potsow na ekümrümo fü na osü methaki Adam ha ombo; eloe Eve to oni ekathukcho.
Adam ha Eve Oniji Eden Parhina Phanchukchi Sioji
22 Jisülo OPVÜI Potsow na phyocho, "Enhungo kyon jiha ete esüa kümthaka, mmhom n mhom chekathaka. Omboji eküm dung ji tssüngthi tsothoka kümali eküm vanthoku meka." 23 Hojito OPVÜI Potsow na ombo ji Eden parhi na phanchukchi sia ochhon kümoe na ombo joyingcho sana ji joni tsolo yithukcho. 24 Hoji sülojo ombona parhi ji engkhüwoe jo eküm evamo ekumrümo tona milon yonri nken akvülo nlüphicheo tüv doni vacho. Hojijo ochinaha eküm epio dung jilo n rochethokvü tsükona.
Kain Tona Abel to
1 Hoji sülojo Adam na ombo engh Eve thüngi ponilan tssocho, osi ompvü ji otsük n jüngu sicho. Ompvüna tsokhying buki heto phyocho, "OPVÜI nzan lona ana tsokhying hungthaka" osi ompvüna Kain to ombo tsacho. 2 Elani ompvüna Abel buklancho. Osi Abel jo olyu enhyang Kümcho, osi Kain jo lijon kümcho. 3 Tsüngona lo Kain na ombo joncho-rücho lona khiche Potsow thano hansi wocho. 4 Tole Abel na ombo olyu jiang yulo mmhontso ji khi hansi owo lüngthae oso mmhontso ji OPVÜI thancho. Tole OPVÜI na ombo thüngi osi ombo than jilo emathayicho; 5 tokhatola Kain tona ombo than jito jo n khichoyicho. Hojina Kain ji lüm tsukachi sicho. 6 Hoji tsükona OPVÜI na Kain ezocho, "Nino ntiolyui nilüm tsukala osi ni mha ji nzhüala? 7 Nina elhi mmhom tssocho salivo, nino enhünga jo menseta vamvü, khatola nina n mhom tsso jina mmen jina ni kipüng tsenkathaka. Hojina ni sayav tssoala, khatola nina hoji ekhyov ekhyo tssov shikhfvü." 8 Tole Kain na onyuro Abel ji ezocho, "Olivoe sanphia wotavkalo." Osi onina kvüthüng oli wotacho sana Kain na onyuro Abel ji sakae lüngthacho. 9 Hojisüi jo OPVÜI na Kain engacho, "Ninyuro Abel jo kvüla?" Tole mbona janlancho, "Ana n tsika. Ana a nyuro tsükona wongkhyuv lichoke?" 10 Hoji sülojo OPVÜI na ombo ezocho, "Nino ntio tsükona ekhenthav elhi hetüv tssochola? Ni nyuro ejen jina omüng nlile to tüngkachia esüa likoe na athüngi kyakachia vanthaka. 11 Nino rhiyirandankae ni sithaka, osi nina enhungo liko ji n jonlanche. Nina ninyuro lüngthao jithüngji liko jina ombo khichoa esüa likoji küngsoe ombo ejen ji khi rethukthaka. 12 Küma nina benrolea liko jina ntia ethiv mek; osi niji limha shilo oson oki nlina khyutsokhyua vamvüka." 13 Tole Kain na OPVÜI ezocho, "Ezüp shijo ana n hankhoko tsükshikhünga. 14 Nina meta shilona phani a siala osi ni vanhya lona a kontathukala. Aiyo limha shilo oson oki n lina rhümphia evan tssov sala, osi ochona a hunga sana jina alüngthav." 15 Tokhatola OPVÜI na janlancho, "Hojito tssov meka, ochona ni lüngthata sana, ni müng jitüv tiying khi nlilamvüka. Hoji tsükona kyon ochinaha ombo tilüngthale to Kain pono chekav ejüpkayicho. 16 Jitopvüto Kain na OPVÜI thüngina pyontae Eden na engkhüwoe "Khyuphi rümphi" to tsa meta jilo yicho.
Kain Tsoronichen
17 Kain omboena otsoe tsüka buki Enokh to tsacho. Hoji sülojo Kain na yantsü motsünga tssokachicho osi hoji ombo tsoe ji myingo tsakata tsacho. 18 Enokh lona otsoe tsüka buki Irad to tsacho, ombo Mehujael opo tssocho, osi Mehujael na otsoe buklani Methushael to tsacho osi ombo Lamekh opo. 19 Lamekh na eloe eni Adah tona Zillah to tsa soa vancho. 20 Adah na otsoe tsüka Jabal to tsa vancho osi ombo lona chencheo jiango sükilo vani ekümrümo ekümi etsoeden küma yicho. 21 Ombo ojenio jo Jubal, ombo tsoronichen jiango, khendenphen, Phyululyu, tona khendenzhü to tsütsaeden kümcho. 22 Zillah na Tubal Kain bukcho osi Tubal Kain jo yungmen tona yonjak to khi ebensü ejoe kümcho. Ombo oyilov jo Naamah tssocho. 23 Lamekh na ombo eloe jiang ezocho, "Adah ha Zillah oni, engatava, khyingroe tsükana atacho lona ana ombo lüngthathaka. 24 Osi Kain lüngthacho eküm tiying khiyiv tssona, a lüngthacho jo eküm ekhatiyingsi tiying khiyiv."
Seth ha Enokh Oni
25 Adam omboena tsokhying thanpo buklancho. Tole Eve na phyocho, "Kain na lüngthao Abel ji tongche Potsow na otsoe epithaka" osi ompvüna Seth to ombo tsacho. 26 Seth na otsoe buki Enokh to tsacho. Hojithüng na benkae kyon jiangna khümta thüng OPVÜI ntho mying ji tsütsatacho.
Adam Tsoronichen Jiang
1 Adam tsoronichen jiang ji heto rena yicho: (Potsow na kyon joyingo ji ombo esüa joyingcho. 2 Ombona eboe tona eloe to joyingi onte mmhayisi, "Kyon" to onte tsacho.) 3 Adam na nzyu nzoasi thümro tssoathüng ombo esüa tsokhying tsüka vani ombona Seth to tsacho. 4 Hoji sülojo, Adam na nzyu nzo tiza vanlancho. 5 Ombona otsoeoro thanpoe ha vancho osi nzyu nzo tokusi thümro vansi chücho. 6 Seth na nzyu nzoasi mongo tssoathüng tsokhying tsüka vani Enosh to tsacho. 7 Osi elani nzyu nzo tizasi tiying vanlansi chücho. Ombona otsoeoro thanpoha vancho 8 osi ombo nzyu nzo tokusi taro enilo ombo chücho. 9 Enosh na nzyu ekha toku tssoathüng tsokhying tsüka vani Kenan to tsacho, 10 osi ombo na elani nzyu nzo tizasi taro mongo vancho. Ombona otsoeoro thanpoe ha vancho, 11 osi nzyu nzo tokusi mongo lo ombo chücho. 12 Kvüthüng Kenan na ombo nzyu ekha tiying tssocho sana jithüng tsokhying tsüka vancho osi ombona Mahalalel to tsacho, 13 osi ombona elani nzyu nzo tizasi zhüro vanlancho. Ombona Otsoeoro thanpoe ha vancho, 14 osi ombo nzyu nzo tokusi taro lo ombo chücho. 15 Mahalalel na nzyu 65 tssoathüng otsoe tsüka vancho, osi Jared to tsacho, 16 osi elani nzyu nzo tizasi thümro vanlancho. Ombona otsoeoro thanpoe ha vancho, 17 osi ombo nzyu nzo tizasi ekha tokusi mongo lo ombo chücho. 18 Jared na ombo nzyu 162 lo otsoe vancho osi Enokh to tsacho, 19 osi elani nzyu 800 vanlancho. Ombona otsoero thanpoe ha vancho, 20 ombo nzyu 962 lo chücho. 21 Enokh nzyu 65 lo otsoe tsüka vancho osi Methuselah to tsacho. 22 Jisülo jo Enokh na Potsow thüngi khümshümta nzyu 300 vanlancho osi otsoeoro thanpoeha vancho. 23 Ombo nzyu 365 vancho. 24 Ombona ombo eküm echung Potsow khümshüm lo vancho osi jisüi jo ombo n hungu sicho, ntiotssole omboji Potsow na khi hansi yi sicho. 25 Methusalah na ombo nzyu 187 tssoathüng tsokhying tsüka vancho, osi Lamekh to tsacho, 26 osi hoji sülo ombona nzyu 782 vanlancho. Ombona otsoeoro thanpoe ha vancho, 27 osi ombo nzyu 969 lo ombo chücho. 28 Elani Lamekh na ombo nzyu 182 lo tsokhying tsüka vancho, 29 osi ombona phyocho, "Potsow na randankao likotsük shilona ngaro shina esangmmuk jiang topvü epoyivka." Hoji tsükona ombona Noah to ombo tsacho. 30 Lamekh na elani nzyu 595 vanlancho. Osi Ombona otsoeoro thanpoe ha vancho. 31 Osi ombo nzyu 777 tssoathüng ombo chücho. 32 Noah na ombo nzyu 500 tssosanati, ombona otsoe nchyu ethüm bukcho, osi onteno Shem, Ham, tona Japheth to tsacho.
Kyon N thanri Jiang
1 Kyon na limha pyinga osi loroe bukcheta yiale, 2 potsüwoe evan eboe ejoma na limhalo loroe jiang opyon mmhona zechecho, osi ontena jüpomo jiang soa vantacho. 3 Hoji süijo OPVÜI jina phyocho, "Ana kyon jiang ji kümali n vanthukche; tolea onteno echüo tssov. Enhüngana benkae ontena nzyu nzoasi mekyu lo sikata vamvü meka." 4 Hoji yuta jilo tssolea, mekana ji süloha to limha shilo eloena bukcho jiang tssolea potsüwoe kyon tssolea kyonpvüden osi etho ejüi vanracho. Hojiang jo nkolo ekhyo ekhüngden osi thüngche jiang tssocho. 5 Kvüthüng OPVÜI jina limha shilo kyon otsük akvü onte nchümri jiang yuta topvü lo n mhon osi n thanri na pyingcho to hungcho sana, 6 Ombona onte joyingi limha shilo onte vanthuko ji worhyucho saka to etho jaka nchümcho. Osi omboji elümoto etho jako ji tsükona, 7 "Ana joyingi evao kyon shiang topvüto phyaklüpi siv osi ekümrümo tona worowoni to jiang ha monthoku, ntiotssole ana onte joyingo ji tajo man to nchüma a etho jaka" to phyocho. 8 Tokhatola OPVÜI na Noah thüngi jo emathacho. 9-10 Noah motsü jijo heto: Ombona otsoe otsük ethüm, Shem, Ham tona Japheth to vancho. Noah lo ntia phyochorüchov n licho osi ombo echungren jilo jo kyon mmhom ji ombo tae tssocho. Ombona Potsow thüngi khümshümta vancho. 11 Khatola kyon thanpoe jo ochia mmhom n vancho, osi meta topvü tolo jenpukta tae tssocho. 12 Osi Potsow na limha ji chani zele n mhom tae na pyingi lia hungcho, ntiotssole kyon jiang topvüna eküm n mhom vantacho. 13 Potsow na Noah thüngi ezocho, "Ana kyon topvüto montokvü methakthaka. Limha ji jenpukta elhina pyingthaka, küma ana onte monthokvü ka. 14 Ni tsanthephen orhung motsünga shana, osi tsüngpyak mmhom khi shani hoji chungroe, opon ochung onyi na rizhüi khia. 15 Orhung ji esüi metre 133 elani etsüi meter 22 ntssoni meter 13 to tssothuka. 16 Orhung ji mhonki ha epfükata osi mhonki tona echung to jiang yutalo centemetre 44 hae khi vata. Orhung ji echungta ethüm tssoa osi echung jilo kipüng motsünga hae vata. 17 Ana limha ji ojüna phyonchüthoki olantaro monthoku saka. Limha shilo vancho topvü chüvka, 18 tolea ni thüngi jo ana ntsata vav. Orhung jilo ni engh, ni tso eden, osi onte engh to jiang sosi rheyia. 19-20 Ni nzo orhungi ekümrüm olan akvü opong okyu, elani orolan akvü hanpong hankyu to sonhya, eküm onte vanthokvü tsükona. 21 Osi ni tona onte to tsükona etsoyulan taro ha khi hana." 22 Potsow na ezo jiang topvü Noah na tssocho.
Jüvaktsü Ji
1 OPVÜI na Noah ezocho, "Ni wopan topvü sosi orhungi rheyia; limha heteralo elamo etssoe jo nitae to ana ntsithaka. 2 Khümkvükhümtsalo ethelan tssochewo ekümrümo tüv jo poni jo tiying ren theta tolea n tssüngrüng ekümrüm poni jo olan motsünga ren tae thenhya. 3 Osi orolan akvü ponilan tiying theta. Shiang yakchia ekümrümo na limha reni yilanthoku tsükona onte sonhya. 4 Henasüi tsüngon tiying sülojo ana zümo zhüro, eng zhüro to eryu jothoki ana joyingo eküm evamo topvü monthoku sala." 5 OPVÜI na ombo ezo jiang topvü Noah na tssocho. 6 Noah na ombo nzyu nzo tirok tssoathüng limhalo jüvaktsü ji rothukcho. 7 Ombo tona ombo engh, ombo tsoe osi onte engh jiang to topvü jüvak jilona tsanchov tsükona orhung jilo rheyitacho. 8 Ekümrüm olan akvü osi worolan akvüto ntho osi n tho ekümrümo topvü poni ponina, 9 Potsow yi ji ephan Noah nzo orhungi rheyithukcho. 10 Jitosi tsüngon tiying sülojo jüvaktsü ji rocho. 11 Noah na nzyu nzo tirok tssoathüng choro enioto jilo tsüngon tarosi tiyingoto lichungi jüvaktsü jiang pokrhüprae, osi oyaki ojü thangphen jiang chonchirae, 12 limhalo eng zhüro, zümo zhüro to eryu jocho. 13 Hoji tsüngon tsük jilo Noah na ombo osi ombo engh tona ombo tsoe Shem, Ham, osi Japheth tona onte engh jiang to orhungi rheyitacho. 14 Onte nzo orae osi oki evamo ekümrümo teri tsüpho tona worowonilan taro to rheyicho. 15 Potsow na ezo ji ephan eküm evamo to etsa jo obung okyu topvü Noah nzo orhungi rheyitacho. 16 Tosi OPVÜI na Noah sülami na kipüng ji khani sicho. 17 Ojü ji tsüngon zhüro düngajo orhung ji phfükachicho. 18 Ojü ji jungkata yicho osi orhung jina jüponina ehaphicho, 19 ojü ji elümoto jungo jina phunglan ntsontso jiangha ndüngzhücho; 20 osi ndünga vani phunglan jiang kvüri metre tiying chüngia ndüngcho. 21 Limha lo eküm evamo topvü chüracho woro topvü, ekümrümo osi kyon topvü chücho. 22 Limha lo echenkoa evan topvü chüracho. 23 Limha lo evan ekümrüm topvü OPVÜI na monthukcho kyon, ekümrümo osi worowoni topvü. Enhyokacho jo Noah tona ombo ndüngo sonhyao jiang to tae tssocho. 24 Ojü jina tsüngon nzoasi tinyan nandang n nghav vancho.
Ojü ji Esamo Ji
1 Potsow na Noah osi ombo ndüngo etssoe jiang n mhechohancho, ombona npung venthukcho osi ojü ji nghata joyiv benkacho. 2 Lichungi jükvü osi oyaki jülan jiang khancho. Eryu ji esancho, 3 osi ojü jina tsüngon nzoasi tinyan khia nghacho. 4 Choro tiyingoto jilo tsüngon tarosi tiyingoto lo orhungji Ararat jilo oyi esancho. 5 Ojü jina ngha vani choro taroto tsüngon ovüngo jilojo phunglan yondon jiang hungracho. 6 Tsüngon zhüro sülo Noah na orhung jilo kheriki ji chonchi, 7 yivan motsünga chivothukcho, tole yivan jina elani n yina ojü ji n nghathüngjo pyaphia vani sicho. 8 Jithüngji Noah na ojüji nghenghahancho sana to zelo yukhyu motsünga chivothukcho. 9 Tokhatola meta topvü ojü tae tssojina yukhyu jina eshonphen n hungcho. Ombona kholani pya yicho osi Noah na yonchukchia rhümae khithecho. 10 Ombona tsüngon tiying nhyaklansi yukhyu ji chivolanthukcho. 11 Tole myulani ti olive wo eyii nkyansi kholani yicho. Tole ojüji nghathaka to Noah na ntsicho. 12 Jisülo ombona tsüngon tiying nhyaklansi yukhyu ji chiwolanthukcho, tole jithüngjo kholani n yilam sicho. 13 Noah na nzyu nzo tiroksi ekha tssoathüng choro ovüngo jilo tsüngon ovüngoto lo ojüji nghacho. Noah na orhungji chonchi eyingole limhaji kyingsochia vanthakcho. 14 Choro enioto jilo tsüngon mekyu tiying tssoajo limhaji mmhona kyingcho. 15 Potsow na Noah ezocho, 16 "Ni engh, ni tssoeden osi onte engh jiang sosi orhungina chiyitava. 17 Ni ndüngo ekümrüm osi woro jiang vachia osi rotssoronithuki limha nzüa yithuka." 18 Tole Noah na ombo engh, ombo tsoeden osi onte engh jiang sosi orhungina chiyicho. 19 Ekümrümo osi woro topvüna onte olan akvüna oten tssoe sanchokcho.
Noah na Erungthan Piala
20 Noah na OPVÜI thanphensa roncho; ombona ekhümo etheo ntho ekümrüm motsünga tona woro motsünga to khi othan tssoa thanphensa jilona mpüm tona rungcho. 21 Erungthanji rhüm jina OPVÜI ji emathacho, osi ombona heto phyocho, "Enhungo ana kvüthüngha lea kyon etssophyo zesi limha ji rhiyirandankav meka; kyon nchümrijo ombo nongothüngna n mhon to ana ntsia. Nchüng shi esüajo ana elani eküm evamo topvü monthukvü meka. 22 Limha shi elithüng nandangjo mojü ethe yuta osi liri yuta lithukvüka. Etssük elüm, vami nzyu osi zümo eng jiang linrhüvka."
Noah Thüngi Potsow Ntsata
1 Potsow na Noah tona ombo tsoeden to jiang mmhayithuka ezocho, "Ni tsoronichen na limha pyingi evamo tssoa otsoeoro khosha lia yikhe. 2 Ekümrümo topvü, woro woni osi ongo jiang topvüna nikyua eküm vamvüka. Onte topvü ni küpo vanthukvüka. 3 Nina shiang osi limosüo jiang tsokhuka; ana ni tswothukvü tsükona shiang topvü ni piala. 4 Tolea ejen n kyingkavjo oso ji titsoa; ekümji ejenlo ejüo jina ana hoji khanala. 5 Ochona kyon eküm khiyiana ezüp ombo piv. Eküm kvümoena kyon eküm khiyiana ana chüthuka ezüp ombo piv. 6 Kyon jo Potsow esüa joyingcho, ji tsükona ochona kyon lüngthata sana omboha thanpoena ombo lüngthav. 7 "Ni tsoronichen na limha pyingthukvü tsükona, nina otsoe oro khosha liv shikhfü." 8 Potsow na Noah tona ombo tsoe jiang to thüngi ezocho, 9 "Ana ni osi ni tsoronichen thüngi, osi eküm evamo topvü, 10 woro woni osi ekümrümo topvü thüngiorhungina kvüta nte nzo chiyicho sana jiang topvü thüngi a ntsata vatala. 11 Ana nte thüngi heto phyoa a ntsata ji vatala: Enhungo ana kvüthüngha eküm evamo topvü ojüna monthukvü meka, osi kvüthüngha ojüna limha shi monthuklamvü meka. 12 Ana ni osi eküm evamo topvü thüngi kümali ntsata methako ji chekaphen tssoa, 13 ana eluk yulo a süngrüka ji khyingthukala. Hojijo limhaji thüngi a ntsataji chekaphen ji tssovka. 14 Kvüthüng elukna oyak ji eyuki hojilo süngrüka khyinga sana, 15 ana kvüto ni osi eküm evamo topvü thüngi elani ojüna limhalo eküm jiang n monthuk to phyochakcho sana ji nchümchevka. 16 Kvüthüng süngrüka ji eluki hunga sana ana limhalo eküm jiang topvü thüngi kümali ntsata vao ji nchümchev. 17 Hojijo ana eküm evamo topvü thüngi ntsata vaoji chekaphen ji."
Noah Osi Ombo Tsoeden
18 Noah tsoeden orhungina chiyio jiango Shem, Ham tona Japheth to. (Ham jo Kannan opo). 19 Noah tsoe otsük ethüm shiango limhalo kyon topvü pyimtsü motsüi jiang. 20 Noah jo lijon tsso jina limhalo jününgrothi li jondemo ji. 21 Ombona jününgrojü tara yucho, tole ombo kinocho, osi ombo mpensü jiang khikhani vasi ombo süranki tsükshü yipa vancho. 22 Kannan opo Ham na opo Noah na tsükshü yipa vamoji hungi chiwo ombo ojenio otsük eni jiang ezocho. 23 Tole Shem ha Japheth onina osü khi sülamoe na bentasi sülamoe eseta süranki rhowo opo mpenthuktacho, osi ombo tsükshü ji n zetav tsükona onina omha nlüpi sicho. 24 Noah ji chüngtsoe ombo tsoe wokhao jina ntio tssocho sana ji ntsiale, 25 ombona phyocho, "Kannan echi jo n mhonthukvüka! Ombo otae jiang nri ombo kümthukvüka. 26 Shem Potsow OPVÜI ji mying thüngia! Kannan jo Shem nri tssovka. 27 Potsow khi Japheth thicherüchethukvüka! Ombo tsoronichen jiangji Shem kyon jiang nzo vanthuka! Kannan jo Japheth nri tssovka." 28 Noah ji ojüna meta moncho sülo nzyu nzo ethümsi tinyan vanlancho, 29 osi ombo nzyu nzo tokvüsi tinyan lo ombo chücho.
Noah Tsoe Jiang Tsoronichen Jiang
1 Noah tsoeden, Shem, Ham tona Japheth to tsoronichen jiango shiang, ojüna limha moncho sülo onthüm tsoe jiang. 2 Japheth tsoeden jo, Gomer, Magog, Madae, Javan, Tubal, Meesheech tona Tiras to shiang ji onte mying lo tsakao kyon jiang pyimtsümotsüiden kümracho. 3 Gomer tsoronichen jiango Ashkenza, Riphath, tona Togarmah, to kyon jiang. 4 Javan tsoronichen jiango Elishah, Spain, Cyprus, tona Rhodes to tssocho; 5 Onteno jütssae osi jüyi lo evan kyon jiang omotsüiden kümcho. Shiango Japheth tsoronichenden, onteno jipo osi meta khotae okho akvüna yisanpo nsana evan jiang. 6 Ham tsoeden jiango Kush, Ejip, Lipya, tona Kanaan to shiang onte mying ejani evan kyon jiang motsüi kümracho. 7 Kush tsoronichen jiango, Seba. Havilah, Sabtah, Ramakh tona Subtua to jiang tssocho. Osi Ramaah tsoronichen jiang jo Sheba tona Dedan to kyon jiang tssocho. 8 Kush na Nimrod to tsa otsoe tsüka vancho. Ombo limhalo rikhyoe tsüphoe yulo ovüngtso ji. 9 Ombo OPVÜI ekyo-erung yakchia shikari tsüphoe tsüka tssocho, hoji tsükona, kyon na, "OPVÜI khi Nimrod esüa shikari tsüphoe ni kümthokuka!" to yijaktala. 10 Ovüngthüngjo ombo ekhüngyan ji Babylon, Erekh, tona Akkad to shiang phata tssocho osi meta onthümata Babylon lo tssocho. 11 Hoji metajilona ombona Assyria lo owo Nineveh, Rchoboth Ir, Kalah, 12 tona Nineveh ha Kalah oni yutalo elio Resen yantsü ji to yantsü shiang tssocho. 13 Ejip tsoronichen jiango, Lydia, Anam, Lehab, Naphtub, 14 Pathrus, Lasluh tona Philistine jiang omotsüi Kapthor tolo evamo kyon jiang. 15 kanaan tsoeden jo Sidon erantso ji, tona Heth to osi onte mying ejana vana vamo kyon jiang omotsüiden. 16 Kanana jo Jebusite, Amorites, Girashite, 17 Hivite, Arkite, Sinite, 18 Aravadite, Zemarite tona Hamathite to kyon jiang omotsüi ha tssocho. Kanaan kyon jipo jiang echümpo echümpo nzonsorae, 19 Kanan erü ji jolowoe Gaza ndüngo Gerar jana joyicho, osi engkhüwoe jo Sodom, Gomorrah, Adimah, Lasha, ndüngo Zeboim to. 20 Shiango Ham tsoronichenden onte jipo tona metapoe vantawo jiang to, osi okho akvü yisanpo nsantao jiang. 21 Japheth ota eramo Shem jo Hebrew jiang topvü omotsüi ji. 22 Shem otsokhyongo, Elam, Ashur, Arpachshad, Lud, tona Aram to shiango onte mying ejani evamo kyon jiang omotsüiden kümcho. 23 Aram tsoronichen jiango Uz, Hul, Gether tona Meshak to. 24 Arpachshad jo Eber opo Shelah ji opo. 25 Eber na otsoe otsük eni vancho, tsüka jo Peleg to tsacho, ntiotssole ombo echungo limha ji chisocho, osi thanpoe jijo Joktan to tsacho. 26 Joktan tsoronichen jiango Almodad, Sheleph, Hazar maveth, Jerah, 27 Hadoram, Uzal, Diklah, 28 Obal, Abimeal, Sheba, 29 Ophir, Havilah, tona Jobab tolo kyon jiang. Onte topvü Joktan lona thichecho. 30 Ontena vamo meta jijo engkhüwoe Mesha lona Sephar nandang. 31 Shiango Shem tsoronicheden onte jipo osi metapoe vanta yisanpo nsanta vamo jiang. 32 Kyon shiang topvüto Noah lona thichecho tae, onte topvü motsürüi echümpo echümpoena osi jipo echümpo echümpoe na. Ojüna limha monsi sülojo limhalo jipolan topvü Noah lona thichechoden.
Babylon Yaki Jiang
1 Benkadeni jo limhalo yisanlan topvü motsünga tssocho, osi yitsüka tsütsatacho. 2 Ontena engkhüwoe khyuta oyi Babylon hayi jilo vanjüng tssocho. 3 Osi ontena phyotacho, "Yitava! etena ochhon rungi karakthuki khitav kalo." (yita) Hojito ontena ochhon kholung rungi hojiang züptsütaphen ha licho. 4 Ontena phyotacho, "Etena oyak etssunga yantsü motsünga tssokachitavkalo, to tssona ete mying liv osi limha ezoni e n yithuktavkalo." 5 Tole kyon jiang na etsso yantsü ji OPVÜI na joro zecho, 6 osi phyocho, "shiang hetopvü okho motsünga osi ontena oyi motsünga nsantala; ontena ntio tssov sana enhüngati benkatala. N sungu ontena ntio tssohunga na tssota yiv! 7 Etena jowo onte yi ji khotayia onte ji n thyutacheo kümthuktavka lo." 8 OPVÜI na onte ji limhatsü ezoni yithukcho osi yantsü ji ntssotav esani sicho. 9 OPVÜI na yanmying ji Babylon to tsacho, ntiotssole hojilona OPVÜI na kyon yisan echümpotathukcho, osi jilona ombona kyon jiang limha topvü lo ezonroe sithukcho.
Shem Tsoronichen
10 Shem tsoronochen jo shiang. jüvaktsü yisi nzyu eni sülo Shem na nzyu nzoa tssoathüng otsoe tsüka bukcho osi Arpachshad to tsacho. 11 Hoji sülo ombona nzyu nzo mongo vanlancho osi otsoe oro thanpo ha valancho. 12 Arpachshad na nzyu thümrosi mungo tssoathüng, otsoe tsüka buki Shelah to tsacho; 13 jisülo ombona nzyu 430 vanlancho osi otsoe oro thanpo ha vanlancho. 14 Shelah na nzyu thümro tssoathüng, otsoe tsüka buki Eber to tsacho; 15 jisülo ombona nzyu nzo mezhüsi ethüm vanlansi, otsoe oro thanpo ha vanlancho. 16 Eber na nzyu thümrosi mezhü tssoathüng, otsoe tsüka buki Peleg to tsacho; 17 jisülo ombona nzyu nzo mezhüsi ethüm vanlansi otsoe oro thanpo ha vanlancho. 18 Peleg na nzyu thümro tssoathüng, otsoe tsokhying tsüka buki, Reu to tsacho; 19 jisülo ombona nzyu nzo enisi tuku vanlansi, otsoe oro thanpo ha vanlancho. 20 Reu na nzyu thümrosi eni tssoathüng, otsoe tsüka buki, Serug to tsacho; 21 jisülo ombona nzyu nzo enisi tiying vanlansi, otsoe oro thanpo ha vanlancho. 22 Serug na nzyu thümro tssoathüng, otsoe tsüka buki Nahor to tsacho; 23 jisülo ombona nzyu nzo eni vanlansi, otsoe oro thanpo ha vanlancho. 24 Nahor na nzyu mekyu tuku tssoathüng, otsoe tsüka buki Terah to tsacho; 25 jisülo ombona nzyu nzoasi taro tuku vanlansi otsoe oro thanpo ha vanlancho. 26 Terah na nzyu ekhatiying tssosanati Abram, Nahor tona Haran to opo kümcho.
Terah Tsoronichen
27 Abram, Nahor tona Haran to opo Terah tsoronichen jo shiang. Haran jo Lot opo, 28 osi Haran jo Babylon lo ombo ebuk yantsü Ur lona opo n chüthüngna chücho. 29 Abram na Sarai soa vancho, osi Nahor na Haran otsolov Milach soa vancho. Haran jo Iscah opo ha tssocho. 30 Sarai na jo otsoe oro n vancho. 31 Terah na ombo tsoe Abram, tona tsorüi Lot, Haran tsoe ji tona orüv Sarai Abram engh ji to shiang sosi Kannan metae owo vantav tsükona Babylon metalo Ur yantsü ji sisi khochitacho. Ontena Haran jana owo hojilo vanjüngtacho. 32 Terah jo nzyu nzo enisi mungo tssoathüng hoji meta jilona chücho.
Potsow na Abram Tsao Ji
1 OPVÜI na Abram ezocho, "Ni ebuk meta, opankitsük osi nipo ki jiang sisi meta motsünga ana ni ejüvka hoji yia. 2 Ana tsoronichen khosha ni pivka osi onte ji jipo tsüphov kümka. Ana ni mmhyia ni thüngchethukuka, osi nino mmhao tssovka. 3 Ochoangna ni mmhayitoka sana ana onte mmhayiv, tolea ochoangna ni rhiyirandankata sana anaha onte rhiyikav, osi ni yakchia ana jipo topvü mmhayivka." 4 Abram na ombo nzyu ekhatiying si mungo tssoathüng OPVÜI yi ji ephan Haran lona khochukcho; osi Lot na ombo phana wocho. 5 Abram na ombo engh Sarai tona ombo tsorüi Lot, tona ejüeli osi nriden ontena Haran lona tsütsata vamo jiang topvü sokhansi Kannan metae yitacho. 6 Ontena Kannan janthakale Abram na khyua owo Shechem lo ntho meta Moreh jilo chivocho, (jithüng jo Kannan kyon jiang na meta jilo vantapvü tssocho.) 7 OPVÜI na Abram nduki ezocho, "Ana ni tsoronichen jiang pivsa evamo metaji shi." Tole Abram na, ombona nduko OPVÜI ji tsükona thanphensa hojilo ronkachicho. 8 Jisüijo Ombona jolowoe jovo Bethel yantsüna engkhvüwoe phunglanro meta jianglo engrhelamoe Bethel tona engkhvüwoe Ai to yutalo vancho. Hojilo ha ombona thanphensa ronkachi OPVÜI khümcho. 9 Jisüijo ombona meta motsünga lona motsüngae to khyuphia Kannan metawoe jowocho.
Ejip Metae Abram
10 Tole Kannan metalo otsi vara lio jina Abram na konkata jolowoe Ejip metae vanyalo jowocho. 11 Ombona Ejip erü nkyakvü sathüng ombo engh Sarai ezocho, "Nino opyon mmhom eloe. 12 Ejip kyon jiangna ni hungana nino a engh to nchümtav osi a lüngthasi ni vanthukvü. 13 Jitsükona nino a oyilovka to phyokhe, tona ana eküm vanchevka." 14 Ombona erü nkyakthakale Ejip kyon jiang na ombo engh ji opyon mmhona zechecho. 15 Mesao ki evan ejoma na ompvü pyon mmhom ji hungi mesao ezocho, tole mesaki ombo sosi wocho. 16 Ompvü tsükona mesao jina Abram nzana olyuden, Nyanyan, mangsü, Gadho, phajae osi Ut to ombo picho. 17 Khatola mesao jina Sarai khio ji tsükona OPVÜI na ombo osi ombo mesaki kyon jiang pono ekhenthav nochonori rothukcho. 18 Tole mesao jina Abram tsathoki engacho, "Nino ntio a ezochola? ompvüo ni engh to ntioli a n zochola? 19 Ompvüo ntiolui ni oyilov to a ezoa a engh a tssothukchola? Ni engh shi sosi tsani yia!" 20 Mesao jina ombo kyon jiang ezoa Abram tona ombo engh, ombo ejüeli jiang to hansi meta jilona yithukcho.
Abram ha Lot Oni Khosotala
1 Abram na ombo engh osi ejüeli topvü hansi Ejip lona khoe khümkiwoe Kannan jolowoe yicho, osi Lot naha ombo phana yicho. 2 Abram jo ejüeli tssocho, olyu, nyanyan, mangsü tona shona janti toha licho. 3 Ombona hojiang vanthuksi meta khyua Bethel meta jiwoe wocho. 4 Ombona Bethel tona Ai to yutalo ovüngthüng OPVÜI thanphensa roni vao jilo chiyicho. Osi ombona jilona OPVÜI khümcho. 5 Lot ha olyu, nyanyan osi mangsüden vancho, osi ombo wopan tona phajaeden toha vanracho. 6 Jitsükona oni nzo vani ekümrümo jiang yantsothukphen eroyo tssona n licho, ntiotssole oni ekümrümo jiangji khosha tssocho. 7 Jitsükona Abram ekürümo eze tona Lot ekümrümo eze to onte khontacho. (Jithüng jo Kannan kyon tona Perizzite kyon to meta jilo van cho.) 8 Tole Abram na Lot ezocho, "Enio okilo, ni kyon tona a kyon to khontav n li. 9 Hoji tsükona eni khotae vantavka. Ni chokao meta ji nipopo ethüngi khia. Nina meta esanawoe yina, aiyo phokomoe yivka." 10 Lot na eyingoe zesi Jordan hayi, Zoar woe eolan meta ji OPVÜI phari ji esüa osi Ejip meta esüa ojü pvülyua chanchecho. (Hojijo OPVÜI na Sodom osi Gomorrah yantsü jiang n monthukthüng.) 11 Jitsükona Lot na Jordan hayi totona hoe khicho osi engkhvüwoe yicho. Hojito lyui oniji pyontacho. 12 Abram jo Kannan meta lo vancho, osi Lot jo hayitsüi yantsü jiang yulo Sodom ndüngo vancho, 13 hojiang lo kyon jiango nthae OPVÜI mhadungo mmen etssoeden tssocho.
Abram na Hebron Lo Yiala
14 Lot na yithakale, OPVÜI na Abram ezocho, "Nina evamo jilona hepi hepi tüngochünga engophi zeta. 15 Nina hungwo meta shiang hetopvü ana ni osi ni tsoronichen thüngi pivsala, osi hojijo kümali ni echi tssovka. 16 Ana tsoronichen nipivsa vamo jiango kyon ochinaha n khakhamo tssov, limhalo hajang jiang ekhav elaro tata ni kümthukvü! 17 Enhungo, owo meta topvü chani zeta ana hojiang topvü ni piravsaka." 18 Jitsükona Abram na ombo vanphen eseni Hebron lo Mamre ntho dung jiang ndüngo vanjüng tssocho, osi ombona hojilo OPVÜI thanphen tssocho.
Abram na Lot Shanchoala
1 Mesao otsük mezhü, Babylonia meta Amraphel, Ellasar lo mesao Ariokh, Elam lo mesao chedorlaomer, tona Goiim lo mesao Tidal, 2 to shiangna mesao thanpoe otsük mungo, Sodom lo Bera, Gomorrah lo Birsha, Admah lo Shinah, Zeboiim lo Shemeber tona Bela lo mesao ji to thüngi ori tssotav khochicho. 3 Mesao otsük mungo shina onte shentae rasan jiang khümtsütae, enhünga echü jümang to tsao Siddim hayilo vancho. 4 Onteji Chedorlaomer küpo nzyu taro eni vancho khatola nzyu taro ethümo to jilo jo ontena ombo panlana ori tssocho. 5 Nzyu taro mezhüo to jilojo Chedorlaomer tona ombo lo khümkao rasan jiang to nzo tssoe Ashteroth Karnaim lo Rephaim, Ham lo Suzim, Kiriathaim hayilo Emim, 6 osi Edom phunglani Horite kyon jiang to khyoe lijüng tssae Elparan jana phanchicho. 7 Jisülojo ontena Kadesh lo kholancho. (Jithüng jo Enmishpat to tsacho.) Ontena Amalekites meta topvü khyosi Hazazon Tamar lo evamo Amorite jiang khyocho. 8 Tole Sodom, Gomorrah, Admah, Zeboiim tona Bela to lo mesao jiangna onte rasan jiang ekhvürhyui Sidiim hayi lona, 9 Elam mesao, Goiim mesao, Babylonia tona Ellasar mesao to omezhü thüngi omungona ori tssocho. 10 Hayitsü ji totona rinyik sokvü na pyingcho, osi Sodom tona Gomorrah to mesao jiangna tsamvü khilato tssole sokvüi elungtheracho, khatola mesao thanpoe otsük ethümjo tsani phunglani yiracho. 11 Mesao otsük mezhü jina Sodom Gomorrah lo licho topvü, etsoyu jiang phata khi hantasi yicho. 12 Abram tsorüi Lot jo jilo vana vancho, ji tsükona ontena ombo ejüeli ha khiyicho. 13 Tokhatola kyon tsükana tsani oyi Hebrew kyon Abram ochona Amorite kyon Mamre ji echhi ntho dung jiang yulo vancho sana ji oyi yirücho. Mamre tona ojeniden Esheol ha Aner onio Abram shomden tssocho. 14 Abram na ombo tsorüi Lot rhümao ji zoale ombo vanpheni ritsso kyon jiang onte nzo ethümsi taro tiza tsarhyui mesao otsük mezhü ji Dan jana phanchicho. 15 Hojilona ombona ombo kyon jiang chitae ori jiang ji zümolo hatae khyothechicho. Ombona Damaskas khümkiwoe Habah ji jana onte phanchicho, 16 osi ejüeli rechothako jiang phancholancho. Ombona tsorüi Lot tona ombo ejüeli elani eloeden osi evüngki evan ejoma to shanchocho.
Melkhizedek na Abram Mmhayiala
17 Abram na Chedorlaomer tona mesae thanpoe jiang to khyosi yia vanathüng Sodom mesao jina chiwo Shaveh hayi lona ombo ndukcho. (Mesao hayi toha tsala.) 18 Osi Salem lo mesao Melchizedek, ntssontso Potsow pvüti jina hümri tona eyuo to hansi owo Abram ndukcho. 19 Osi ombo mmhayithuka ezocho, "Ntssontso Potsow ochona oyak osi liko joying cho sana jina Abram mmhayithuka! 20 Ntssontso Potsow ochona niri pono ekhyo ni picho sana hoji thüngtathuka." Tole Abram na ombona phancholamo ejüeli jiang topvü lona tarochia khichei Melchizedek picho. 21 Sodom roza jina Abram ezocho, "Nina phancho jiang khisi a kyon jiango a pilana." 22 Tole Abram na janlancho, "Ana otsotso OPVÜI, ntssontso Potsow, oyak osi limha joyingo ji mhadungo phyoala, 23 ana ni tsütsaelan ntia khiv meka, oying esünga mekana, jokhüpzhü motsünga lea khiv meka. Osi ninaha 'Ana Abram lithukchoka' to phyov meka. 24 Ana ntia a echi tssoa khiv meka. Ana a kyon jiang na tsütsathako jiang tae khiv, khatola a shomden, Aner, Asheol osi Mamre tojo onte ejan khithuka."
Abram Thüngi Potsow Ntsata
Hoji sülo Abram na müngdüng hungcho osi OPVÜI na heto ombo ezoa zocho, "Tikyua, Abram. Ana ekyusü lona ni nkohavka osi yantso tsüphov ni pivka." 2 Tokhatola Abram na janlancho,
"Sandamo OPVÜI, aiyo otsoeoro n van küma ni mmha ji ntio lyuvla? A tsentso jo Damaskas kyon Eliezer vamo ji tae. 3 Nina otsoeoro a n pi küma a ezii yulo tsükana a tsentso tssoa yiv." 4 Jisülo jo OPVÜI na heto ombo ezoa zolancho, "Phajae Elizer shina ni tsentso kümvü meka, ni tsoe na ni tsentso kümvüka." 5 Elani OPVÜI na hapoe ombo sosi chivo ezocho, "Oyaki zekachia, Shantio jiang khae zev ekhyo tssoe zeta, ni tsoronichen ha hojitata tssovka." 6 Abram na OPVÜI lo longtsükacho, hoji tsükona OPVÜI na ombo khichocho, ntiotssole OPVÜI na ombo thüngi ematha licho. 7 Hoji süijo OPVÜI na ombo ezocho, "Ana meta shi ni epiv tsükona Babylon meta Ur lona ni sochukcho, osi OPVÜI ji a ka." 8 Tokhatola Abram na phyocho, "Sandamo OPVÜI, meta shiji a echi tssov to ana kvütoli ntsivla?" 9 Tole ombona ezocho, "Mangsü, Nyanyan, tona Olyuro to onte top vü nzyu ethüm ro jitüv hansi oyi apia, elani vefü motsünga tona yukhyu motsünga toha apia." 10 Hoji tsükona Abram na ekümrümo jiangtopvü hansi oyi, hojiang ji eni tansokhani onte chanchitao oren eni tssoe vancho, tokhatola woro jiango ombona n rhonsona vacho. 11 Hojiang ji tsolo müngtsov na jorocho khatola Abram na phani sicho. 12 Eng rhetale Abram na yiptheta yicho, osi ekhen nsüp na ombo pyingcho. 13 Hoji sülojo OPVÜI jina ombo ezocho, "Ni tsoronichen jiang ji oyam metae omoatsi kyonden kümvüka; onteji hojilo eziiden tssoa nzyu nzo mezhü vantav osi onte ji elümoto nshümoa tsütsav. 14 Tokhatola ochoang na ezii onte tssothokcho sana ji jipo jiha ana ezüp piv; osi ontena oyam meta ji sisi yia na ontena ejüeli elümoto hungi hansi yivka. 15 Nino ni sontsünga harishia ni vamvü osi noyingroa ni chüi ni shothev. 16 Osi ni tsoronichen jiang na echungren mezhü süloti shilo elani yivka, ntiotssole Amorite kyon jiang ji elümoto jancho n zov n kümthüng jo ana ezüp onte pia phani onte siv mek." 17 Kvüthüng eng ji. rhe münga yicho sana omi phungphen ophfü motsünga tona milon motsünga to esüngaro taena chiro ekümrümo tansoe evao jiang yuta lona yakchia yicho. 18 Hojithüng hojilona Potsow na Abram thüngi ntsatacho. Osi ombona phyocho, "Ejip erü lona benkae Euphrates zhükhfü nandang meta shi, 19 Kenite meta, Kenizite meta, Kadmona kyon jiang, 20 Hittitites jiang, Perezite jiang, Rephaim jiang, 21 Osi Amorite kyon, Kanaan kyon, Girgashite kyon jiang, Gebusite kyon to topvü jüa meta shi ni tsoronichen jiang piv to ana phyochakala."
Hagar Tona Ishmael To
1 Abram engh Sarai na otsoe n vancho. Khatola ompvü na Ejip kyon phajae tsüka Hagar to tsa eloe vancho, 2 tole Sarai na Abram ezocho, "OPVÜI na otsoe evamvü etho a n pi. Hoji tsükona nina aphajae eloe ji nini nzo yipvo, ompvüna otsoe abukiv mpa tssov." Sarai na ephyo ji Abram na engayicho. 3 Osi ompvü na Hagar ji Abram yingaloroe tssothoku picho. (Shijo Abram na Kanaan meta lo vansi nzyu taro sülo tssocho.) 4 Abram na Hagar thüngi ponilan tssocho osi Hagar ji otsük n jüngu sicho. Osi ompvüna kvüthüng ngaro hanthaka to ompvübo ntsicho sana, kanchana Sarai ji nkhanzicho. 5 Tole Sarai na Abram ezocho, "Hagar na atssako shijo ni ori lona. Ompvü ji ana ni thüngi ni picho, osi ompvüna kvüthüng ngaro hanthaka to ntsicho sana jilona benkae atssakcho. Hoji tsükona ni elan alo a elan sana OPVÜI khi zethuka!" 6 Tole Abram na janlancho, "Mmhonka, ntsoto, ompvüo ni phajae küma ompvüo ni küpo; nina kvüto ompvü eküm hunga sana ni etso tssoa." Hoji süijo Sarai na Hagar ji elümoto ekümshaka eküma jo Hagar na tsani sicho. 7 Tole OPVÜI lanben na Shur lani jükvü jilona Hagar nduki ezocho, 8 "Sarai phajae Hagar, nino küina rosi küi yiala?" Tole ompvüna janlancho, "Aiyo a kipvüo ji thüngina tsani yiaka." 9 Tole ombona ezocho, "Ompvü thüngi yilana, osi ompvü phajae ji to tssoa." 10 Osi ombona elani heto ezolancho, "Ana tsoronichen kyon ochinaha nkhacheo tata ni pivka. 11 Nina tsokhying buku sala, osi nina Ishmael to ombo tsav ntiotssole nina nungra kyao ji OPVÜI na zothaka. 12 Khatola nitsoe jina romhon kurü esüa eküm vamvü, ombona otsük akvü panlamka osi hojito otsük akvüna ombo panlamka. Elani ombona ombo wopan topvü thüngina khotae vamvü." 13 Hagar na ompvübo engacho, "Ana otsotso Potsow hungthakcho alo osi ombo tsükona ephyov eküm vanalo?" Hoji tsükona Potsow ochona ompvü jancho sana ji Potsow ji ompvüna, "Hunga evamo Potso" to tsacho. 14 Hoji tsükona jükha Kadesh tona Be red to yutalo elio jijo kyon na "Eküm evamo Potsow ochona ahunga vancho sana ji jükha" to tsatala. 15 Hagar na Abram tsoe tsüka vancho osi ombona Ishmael to tsacho. 16 Hojithüngjo Abram jo nzyu ekha tizasi tirok tssothakcho.
Ntsatao Ji Chekaphen tssoa, Tsemo Ji
1 Abram ji nzyu ekha tokusi toku tssaothüng OPVÜI na ombo thüngi oro ezocho, "Aiyo Thotsü Potsow jika. Ayi enga, yuta topvülo elan ji tssoa vankhe. 2 Ana ni thüngi ntsatavka osi tsoronichen elümoto ni pivka." 3 Tothüngji Abram na ombo mha ji liko jana nkhümthecho, tole Potsow na ombo ezocho, 4 "Ana ni thüngi ntsata heto vav; Nino jipolan elümoto omotsüi tssov to ana phyochakala. 5 Ni mying jo enhungo Abram to mekna Abraham to ni tsavka, ntiotssole ana jipo khosha omotsüi ni kümthukala. 6 Ana tsoronichen khosha ni pivka osi onte yulo ejoma jo mesaeden tssov. Ni tsoronichen khosha kümi jipo khosha küma yiv. 7 "Kümali ntsata lithokvü tsükona ana ni osi sülami ni tsoronichen thüngi phyochak shiang benthoku. Aiyo ni osi ni tsoronichen Potsow tssovka. 8 Nina enhünga tsanthan esüa evamo meta shiji ana ni osi ni tsoronichen thüngi pivka. Osi Kanaan meta shiji kümali tsükona mpüm totona ni tona ni tsoronichen to echi tssovka, Osi Aiyo onte Potsow tssovka." 9 Potsow na Abraham ezocho, "Ninaha a thüngi ntsata evav tsükona ni lüm na rüngu lia, osi sülami ni tsoronichen jiang topvüna. 10 Ni osi ni tsoroichen jiang topvü na eboe to etsa tseniv lia. 11-12 Enhünga na benkae khi ntena eboeroro topvü vansi tsüngon tizao tolo tsenivka; osi ni phajae nikina buko jiang tssolea metapoe na sosi eyio phanjae jiang tssolea topvü tsenivka. Hojijo eni yutalo ntsata lia toji chekaphen ji. 13 Otsük akvü tseniv osi hojijo, eni yutalo kümali ntsata lioji oponina hungi nchümchephen. 14 Eboe ocho n tsenicho sana jijo a kyon to khav meka, ntiotssole ombona a thüngi ntsata n vacho." 15 Potsow na Abraham thüngi ezocho, "Nina enhungo ni engh ji Sarai to tsav meka, enhüngana benkae ompvü mying jo Sarah to tsavka. 16 Ana ompvü mmhayivka osi ompvü yakchia ana otsoe ni pivka. Ana ompvü mmhayiv osi ompvüo jipotsü oyo kümvüka; osi ompvü tsoronichen yulo mesaeden jüvka." 17 Abraham na ombo mha jina liko jana nkhümthecho, khatola ombona heto nchüma emahungcho, "Kyon tsükana nzyu nzoa tssosanati otsoe lichevke? Osi Sarah nzyu ekha toku tssosanati otsoe lichevalo?" 18 Ombona Potsow engacho, "Ntio tsükona Ishmael na jo a tsentso n tssochevla?" 19 Tole Potsow na ezocho, "meka ni engh Sarah na otsoe bukuka, osi nina Isaak to ombo tsavka. Ana ombo osi ombo tsoronichen thüngi kümali ntsata vavka. Osi hojijo kümali evamo ntsata tssovka. 20 Nina Ishmael tsükona jonjiwo ji ana zothaka, ana ombo mmhayithokuka osi otsoeoro osi tsoronichen khosha ombo pivka. Ombo mesatso otsük taro eni opo ombo kümvüka osi ombo tsoronichen jiang ji ana jipo tsüphov kümthokvü. 21 Tokhatola ana a ntsata jijo ni tsoe Isaak thüngi vavka, omboji nzyu etsao jilo yuta heto-thüng Sarah lona bukuka." 22 Potsow na heto Abraham ezothakale ombo sisi yi sicho. 23 Hoji tsüngono Abraham na Potsow yi enga ombo tsoe Ishmael ji tsenicho osi ombo ki wopan elani eziden eshio jiang elani ombo kina bukcho jiang to topvü tseniracho. 24 Abraham jo nzyu ekha tokusi toku loti tsencho; 25 Osi ombo tsoe Ishmael jo nzyu taro ethümoto lo tsenicho. 26 Oniata tsüngonalo tsentacho, 27 Osi Abraham eziden jiang ha hoji tsüngono tsenracho.
Abraham Thüngi Otsoe Epiv Phyochako Ji
1 OPVÜI na Mamre lo ntho dung jiang yulona Abraham ndukcho. Abraham na eng etsso tso yuta jilo ombo süranki kipüngo khoka vanathüng, 2 ombona engokae zekachile kyon otsük ethüm phanti vana hungchicho. Ombona onte hungchipvü zakto yungchuki onte ndukcho. Ombona kvüri jina liko jana n khümthei phyocho, 3 "Tsüphoeden, nzansi aki n khokthev jo tiyakchitava; ana nte benkavka. 4 Nte jo jiang nte epyoyiv tsükona ana ojü tara hansi yivka, odung shi kupi esana vantava. 5 Ana etsoyuha tara yani hansi yiv osi hojina etho jükae nte yentsathoku. Ntena aki roji yakchia amying chüngithukthaka, hoji tsükona ana nte sochobenchovka. Ontena ezocho, "Montsoka, hojito tssov jijo e mathata." 6 Jitopvü Abraham na ombo süranki yunga oyi ombo engh Sarah ezocho, "Zakto, hümri rüngphen ohüm mmhomtsowlo yachei khi hümri tara rünga." 7 Tothakale ombona yunglana owo tsideni mangsüro belevü tüv khi phajae tsüka pia zaktole nonthukcho. 8 Ombona elani ethyu tara, shirojü tara elani oso ji to khi ekvüi tssitso hantssoe khi yentsae jiang vayicho. Osi jilo odung jiang küpina ombona tssilonhanlona onte tsothukcho. 9 Ontena "Ni engh Sarah jo kvüla" to ombo engacho. Tole ombona, "Ompvüo süranki chungi vana" to onte ezocho. 10 Onte yulo tsükana phyocho, "Ana choro toku sülo elani rolamka osi ni engh Sarah na otsoe bukuka." Tothüngjo Sarah jo ombo sülani süranki kipüng jilona enga vancho. 11 Abraham tona Sarah to woniata elümoto sonthako jina, Sarah jo ompvü tathi choro mmen tia n tssov sithakcho. 12 Jitsükona Sarah na ompvübo emakata phyocho, "Enhungo aiyo sonpvüro akümthak na kvütoli ana ponilan tssov choka li khi otsoe hamvüla? Jitae mekna arapvü ha sontsüngthaka." 13 Hoji süijo OPVÜI jina Abraham ezocho, "Ntioli Sarah na ompvübo emakata, 'Otsotso sonpvüro a kümsanati ana otsoe vankhukchoke?, "' to phyochola? 14 OPVÜI tsükona ekhüngu tsotso tüv ntio sana lichoalo? Ana phyothako ji esüa, choro toku sülo ana elani rolamka osi Sarah na otsoe bukuka." 15 Tole Sarah na kyua nchümo jina, ekhirana "Ana n maka" to phyocho. Tole "Meka, nina ema nrüngchoka" to ezocho.
Abraham na Sodom Tsükona Jonjiala
16 Jisüijo kyon otsük ethüm jiang na khochi oyi meta motsünga lona Sodom ji zechochicheo tüv lo yitacho, osi Abraham ha onte phana olani onte sochilo wocho. 17 Tole OPVÜI na ombobo heto phyocho, "Ana ntio tssov zikacho sana ji ana Abraham mphov meka. 18 Ombo tsoronichen jo thotsü eli jipo osi tsüphov kümvüka, osi ombo yakchia ana jipo jiang mmhayivka. 19 Ana ombo ethüngcheo jijo ombo khi ombo tsaoronichen jiang ji ayi engtale to ezoa ntio jo ntsa osi elan sana jiang lo sokathoku tsükona. Ontena hojito tssona ana ntio phyochaki ombo vayicho sana jiang topvü benthokuka." 20 Hoji süijo OPVÜI na Abraham ezocho, "Sodom tona Gomorrah to nlan ekhenthav lithaka, osi onte mmen ji elümoto kyungthaka to phyotala. 21 Otssotso memekcho sana ana jowo zevka." 22 Hoji sülojo kyon otsük eni jina khochi Sodom towoe wotacho, tole OPVÜI jijo Abraham ndüngo vancho. 23 Tole Abraham na engokae OPVÜI ji engacho, "Nino otsotso kyon mmhom jiang ha kyon n mhomo jiang nzo monthoku sake? 24 Yantsü jilo ntsanthoe otsük tinyan tia vanwo nina yantsü ji memonthokula? Tinyan ji nkoho lona tia nina yantsü ji n monthoku alo? 25 Otsotso, nina ntsanthoe jiang ji n mhon jiang nzo monthoku jo meku tssov. Hojijo n tssochewo! Nina hojito n tssochenrüng. Nina hojito tssoana, ntsanthoe jiangha n mhom jiang nzo chüthokala. Tojo n tssochewo elhi. Limha shi mpümto yitssoe jina jo ntsa lona tssov lia." 26 OPVÜI na janlancho, "Ana Sodom lo ntsanthoe otsük tinyan tia yancheta tssona onte tsükona tia yantsü ji nkohochev." 27 Tole elani Abraham na ezolancho, "Nzansi ana lüm tssona ni jana vamo ji n lan a siyia OPVÜI, aiyo kyonshae, osi ntia ephov elan nli, 28 Ntosito tinyan meklea, otsük zhüromongo tia ntsanthoe vancho sao, mongona m pemo jina nina yantsü totona monthoku alo?" Tole OPVÜI na janlancho, ntsanthoe otsük zhüro mongo tia hunga tssona ana yantsü ji monthokvü meka. 29 Abraham na phyolancho, "Tole zhüro tae vancho sao" Tole ombona janlancho, "Zhüro tia vana tssona jiang nkoho lona lea yantsü ji n monthuk." 30 Elani Abraham na phyocho, "OPVÜI yo, nzansi lüm titsuk khe, ana phyolamka, "Tole, thümro tae vancho sawo kvüto tssov?" Ombona phyocho, "Thümro tia vanwo n monthuk." 31 Abraham na phyocho, OPVÜI ana lüm tssoni ni jana vamo shi nlan a siyia. Kvütoli sana tia mekyu vancho salivo?" Ombona phyocho, "Ana mekyu tia yanchevo yantsü ji monthukvü meka." 32 Abraham na phyocho, "OPVÜI ana enhungo yenjoa tae phyovka lüm titsuk khe. Taro tia yanchevo kvüto tssovla?" Ombona phyocho, "Taro tia vanvo ana yantsü ji n monthuk." 33OPVÜI na Abraham thüngi oyi shiang nsanrathakale yi sicho, osi Abraham ha ombo ki yicho.
Sodom Mmen Jiang
1 Hoji mmyu lanben otsük eni jina Sodom yan jilo role Lot jo yantsü kipüngi khoka vancho. Ombona onte hungpvü phanthi owo onte ndukcho. Ombona onte mhadungo nkhümthei, 2 ezocho, "Tsüphoeden, ana nte benkav tsükona methaki vanka, nzansi a ki rotava. Ntena ojo epyotasi nchüng zümojo shilo yiptava. Enyathüng jo ntena nyazüngina phanthi khochi yikhuka." Tokhatola ontena janlancho, "Meka, ena nchüngo yanlungi lea yiptavka." 3 Tole ombona onte tsa mungcho, osi sülamijo ontena ombo phana oki yitacho. Lot na ombo phajae jiang ezoa yentsae jiang tsükona hümri mmhom rüngthukcho. Osi methakthakale ontena tsotacho. 4 Yentsae jiangna yipkachipvü Sodom kyon jiangna oki ji hayacho. Yantsü jilo kyon ngaro eran hojilo rocho. 5 Ontena Lot tsachuki ezotacho, "Nchüng zümo ni ki yentsae nchemo jiang kvülo vanchola? E thüngi sosi chiyia!" Sodom kyon jiangna yentsae jiang thüngi ponilan tssotav nchümcho. 6 Lot na haphoe chivo kipüng ji khani sicho. 7 Osi ombona onte ezocho, "Oshomden, hojitüv ntha elhi ti-tssotale to ana jonjiala! 8 Zetava, ana a tsolov loroe otsük eni vanka sosi chiyi nte pivka nte lümcho onte thüngi tssotava. Osi kyon shiang thüngi jo ntia ti-tssotava; onteno a lankonden küma ana onte nkohachev." 9 Tole ontena ombo ezocho, "Oh tsanthan, e mhadungona tsana! Ena ntio tssov sana nina ezovke? E nkachia, to mekana jiang thüngina tsükshika ni tssoyivka." Ontena Lot ji khyalanchisi kipüng ji rakrhüplo chongotacho. 10 Tokhatola kichungi yentsae jiangna yonchukchia Lot süthesi oki ji khancho. 11 Jitosi ontena haphoe evamo kyon jiang topvü omhyik jukrae sithukcho, hoji tsükona ontena kipüngji n yanchecho.
Lot na Sodom Lona Khoe Yiala
12 Yentsae otsük eni jina Lot ezocho, "Nina wopan thanpoe tsokhying, tsolo, orüiden osi kyon thanpoe ni wopan yantsü shilo vancho tssona tsachuka, 13 ntiotssole ena meta shi monthukvü sala. Kyon shiang n lan ekyuthav jiang OPVÜI na zothaka. Osi OPVÜI na Sodom monthuko erothukcho." 14 Tole Lot na otsolov engae elio orüo jiang thüngi yunga owo ezocho, "OPVÜI na meta shi monthukvü saka zakto shilona tsani yitava." Tokhatola ombona ngashüa tsayia ontena nchümtacho. 15 Wonchiale lanben jiangna Lot ji ekhyolakle to ezocho, "Zakto! Ni engh tona ni tsolov otsük eni ji to sosi tsana, to tssona yantsü shi monthukathüng nte eküm monhyav meka." 16 Lot na woewolancho. Khatola OPVÜI na ombo khonzana nchümcho; jitsükona lanben jiangna omboe tona otsolov otsük eniji to okhe lona erüi yantsüi na süchokcho. 17 Jisüi jo lanben tsüka jina ezocho, "Nte eküm tsükona yunga tsantava! Sülani tizechitava osi hayi jiang loha titamangtava. Nte n chüthukvü tsükona yingsüng jianglo tsani yitava." 18 Tole Lot na ezocho, tsüphoe yo, hojito e titssothuka, 19 Nina e nzana eküm e shanchoyithaka, khatola yingsüng ji eyivjo kontia; ezüp jilona n tsanchov hoji n jam achüv. 20 Oyan teriv lio ji nina hehungchi? hojijo enhyanka hojilo a yithuka jijo oyan teriv osi hoji lojo tsanchoa vancheta. 21 Ombona janlancho, "Ana lüm na rüngka, toka ana hojijo monthukvü meka. 22 Zakto! hojilo tsana yia! nina hoji n jam jo ana ntia sakav meka." Lot na oyan teriv to tsao jina oyan ji Zoar to tsacho.
Sodom Gomorrah Monthuko Ji
23 Lot na Zoar jana jo eng rheta vanthakcho. 24 Jitopvü OPVÜI na omi müngzüv kholong jothuki Sodom tona Gomorrah to yantsü jiang osi, 25 hayitsü osi jiang lo kyon vamo jiang tona liko poni zacho topvü monthukcho. 26 Tole Lot eloe jijo sülani engolani zechiwo jina madurhyu kümi sicho. 27 Ojyuato nyazüngina Abraham na ombona OPVÜI nduko meta jilo wocho. 28 Ombona Sodom tona Gomorrah, osi hayitsü jiwoe zechile mikyu tsüphov lona phunga esüa miphong chiyia hungcho. 29 Khatola OPVÜI na hayitsü jilo Lot na vamo yantsü jiang monthukathüng Abraham n mhechocho osi Lot tsanchothukcho.
Moab Kyon Tona Ammon Kyon Jiangto Bukcheo Ji
30 Lot na kyua Zoar lo n vanhungo jina ombo tona otsolov otsük eni ji to yingsüng jianglo oyi longkvüi vantacho. 31 Otsolov eramo jina nungo ji ezocho, "Apo jo sonala osi enina yanpi otsoe oro vanthukvü tsükona limha shilo eboe ochia n van. 32 Yia, Apo kinothuki enina ombo nzo yipsi otsoe bokthuktavkalo." 33 Hoji zümo jilo onina soko ombo yuthukcho osi otsolov eramo jina opo thüngi yipsi ponilan tssotacho. Tokhatola ombo kinotsüngo jina hoji n tsicho. 34 Ochyuato jo eramo jina oka ezocho, "Ana nsümo jo ombo thüngi yipcho, nchüngha ombo kinothuktavka, osi nina ombo thüngi yipa. Tona enita na apo tsoe bukvüka." 35 Hoji tsükona hoji zümo ha onina ombo kinothukcho osi otsolov nungo jina ombo thüngi yipsi ponilan tssocho. Toaha ombo kinotsüngo jina hoji n tsilancho. 36 Hojitolyui Lot otsolov woniata na opo ngaro hanracho. 37 Otsolov eramo jina tsokhying bukcho. Osi ompvüna Moab to ombo tsacho. Ombo nchüng tsüngono Moab kyon shiang omotsüi ji ombo kümcho. 38 Otsolov nungo jinaha tsokhying buki ompvüna Benammi to ombo tsacho. Ombo nchüng tsüngono Ammon kyon shiang omotsüi ji kümcho.
Abraham Tona Abimeilek To
1 Abraham na Mamre lona Kanaan jolowoe oyi Kadesh tona Shur to yutalo vancho. Sülami jo ombona Gerar lo vanale, 2 Ombo na ombo engh ji ombo oka to ejancho. Tole mesao Abimelek na Sarah ji ombo thüngi tsacho. 3 Tole zümo motsünga lo Potsow na ombo nduki ezocho; "Nina eloe shi khio jina ni chüv sala, ntiotssole ompvüo yanpithaka." 4 Tokhatola Abimelek na ompvü ndüngo n vohamo jina phyocho, "OPVÜI a nlan n lika, nina a osi a kyon shiang memonthokula? 5 Abraham na ombo oka to phyocho osi ompvü na ha hojito phyocho. Ana ntio tssocho sana abobo chetünga ntsia, osi ntia woricho n li." 6 Potsow na omüngina ombo janlancho, "Hoka, nina chetünga hojito tssocho ana ntsia, hoji tsükona a mhadungo mmen ni n tssothoku tsükona ompvü ni n vüngkathukcho. 7 Enhungo eloe ji ompvü orapvü thüngi yithokuka. Ombo Potsow yi elonpvüi, ombona ni randaniv osi ni chüv mek. Tokhatola nina ompvü n yithuka tssona ana ni ezoala, ni chüvka osi ni kyon jiang ha chüravka." 8 Hojito etsso ji Abimelek na nyazüngi na ombo küpo lhisae jiang topvü tsae ezocho. Tole onte ekhentsüngracho. 9 Tole Abimelek na Abraham tsae engacho, "Nina e pono ntio tssothakchola? Ana ni mhadungo ntio woricho lona akyon pono osi a ekhüngyano hetüv yichola? Nina tssothaka to kyon ochinaha etssov n li. 10 Nino ntiolyui hojito elhichola?" 11 Abraham na janlancho, "Ana jo meta shilo Potsow ekyui ochia n vancho tsaya kyon jiang na a lüngthasi a engh ji khiv tsayicho. 12 Ompvüo otsotso aka, ompvüo apo otsolov khatola ayo otsolov meka, osi ana ompvü soa vancho. 13 Jitsükona Potsow na apo kina khochoku a ezoathüng ana ompvü ezocho, nina a lo longtsükata vamo ji chekav esüa oyam thüngi jo aiyo ni opyao to ezoa." 14 Tole Abimelek na Sarah ji Abraham thüngi yithukcho, osi ombona olyuden, mangsüden, osi eziiden toha ombo picho. 15 Ombona Abraham ezocho, "Shiang hetopvü a likoka, ni lümcholo vana." 16 Ombona Sarah ezocho, "Ni n lan n li, to ni nzo etssoe jiang chekathoku tsükona ana ni pyao ji janti rang wothüng motsünga piala. Hojilona kyon topvü na nino n lan n li to chekavka." 17-18 Abraham engh Sarah thüngi ntio tssocho sana ji yakchia Potsow na Abimelek mesaki evan ochia otsoeoro n picho. Ji tsükona Abraham na Abimelek randanile Potsow na ombo emiyicho. Ombona ombo engh ji osi eloe thanpoe ombo eziiden jiang ha otsoeoro ehungu tsükona to randanicho.
Isaak Buko Ji
1 OPVÜI na ombo phyochak yi ji ephan Sarah mmhayicho, 2 Osi ompvü na Abraham esoniti otsoe hani bukcho. Eboeroro ji Potsow na kokao tsüngon jilo bukcho. 3 Abraham na Isaak to ombo tsacho, 4 Osi Isaak ji tsüngon tiza tssoale Abraham na Potsow yizüng ephan ombo tsenicho. 5 Isaak bukajo Abraham nzyu nzoa tssothakcho. 6 Sarah na phyocho, "Potsow na ematha osi longshi a hungthukthaka. Yithen shi ezoe topvü na a emathakyov." 7 Jitosi Ompvü na phyolancho, "Sarah na ngaro nijüpvüto ochona Abraham ezokhukchola? Tokhatola ombo esonlani ana tsokhying ombo bukithaka." 8 Ngaro ji rankacho, osi ombo khakchi tsüngon jilo Abraham na tokhu tsüphov methakcho.
Hagar ha Ishmael Oni Yithukala
9 Ejip kyon Hagar lona buko Abraham tsoe Ishmael na tsüngona lo Sarah tsoe Isaak oni khürita vancho. 10 Tole Sarah na oni hungi Abraham ezocho, "Phajapvüi shi tona ompvü tsoe ji to woniata yi sitoka, osi ni ejüeli a tsoe Isaak ejan jilo eloe shi tsoe jina ntia khichev meka." 11 Hojina Abraham ji elümoto n vanthev sicho, ntiotssole Ishmael ha ombo tsoe tsso jina. 12 Khatola Potsow na Abrham ezocho, "Ni ezii Hagar tona tsokhying ji to tsükona ti-wongkhyua, Sarah na ntio ni ezoa na ji ephan tssoa, ntiotssole ana phyochako tsoronichen jiang Isaak lona chiyithoku. 13 Ni ezii ji tsoe jiha ana tsoronichen elümoto piv sala, osi onte lona jipo motsünga phanthiv. Omboha ni tsoe." 14 Ojyuato nyazüngina Abraham na etsoyu tara tona ojü sofü sükvü motsünga to picho. Ombona ompvü tsoe ji ompvü pvüthuksi yithokcho. Ompvü na khochoki oyi Beersheba romhoni khyuphia vancho. 15 Ojü ji yurathakale ompvü na tsokhying ji rannuk kupi vanthuksi 16 hoji lona metre nzoa harümi owo khokthei vancho. ompvüna phyocho, "A tsoe ji zeta n chüthokkhok." Ompvüna hojilo khokthei kya vancho. 17 Otsoe jina kyao ji Potsow na zocho osi Potsüwoe lanben na Hagar ezocho, "Ntiona ni emhukelüma la Hagar? Tikyua, Potsow na ngaro ji ekya ji zothaka. 18 Phanthi, owo ombo tsakae ejichoa. Ana ombo tsoronichen lona jipo tsüphov chiyithokuka." 19 Tole Potsow na ompvü mhyik pochiyicho osi ompvüna jükha motsünga hungcho. ompvüna owo ojü woe sofü sükvü jilo yeni otsoe jiha yuthukcho. 20 Otsoe ji rankatathüng Potsow na ombo ndüngo tssocho; Ombona Paran romhoni vani elümoto tssothimoria sophanyiphani etsoe kümcho. 21 Oyo na ombo eloe etssov Ejip kyon tsüka yani picho.
Abraham ha Abimelek Oni Ntsata
22 Hojithüng Abimelek na ombo rasan esopvüi Phikol nzo owo Abraham ezocho, "Ni elhi topvü lo Potsow na ni kyoala. 23 Hoji tsükona Potsow mhadungo shilona nina a osi a tsoronichen jiang n jithechi to phyochaka. Ana ni longtsükata vanthaka, hoji esüa ninaha a osi nina vamo meta, shilo kyon thüngi longtsüka lia vana." 24 Abraham na phyocho, "Ana phyochakala." 25 Abraham jüka motsünga, Abimelek phajae na rechoe khicho yilan Abimelek thüngi ezocho. 26 Abimelek na ezocho, "Ochona hojito tssocho sana ana n tsi, ninaha hojitüv yilan a n zo, aiyo enhüngati zoala." 27 Tole Abraham na olyu osi mangsü tara to Abimelek picho, osi oni yutalo ntsata vatacho. 28 Abraham na ombo olyuden jilona olyu tiying khichecho, 29 tole Abimelek na ezocho, "Nino ntioli hojito lyuato?" 30 Abraham na janlancho, "Olyuro tiying shi khia. Osi hoji yakchia, jükha shijo ana shanchoto chethei khia." 31 Ji tsükona meta ji Bersheba to tsacho, ntiotssole onina hojilona ntsatacho. 32 Onina Bersheba lona hojito ntsata si Abimelek ha Phikol onina Philistia lo yitacho. 33 Tosi Abraham na Bersheba lo Tamarik odung chümi kümali Potsow OPVÜI ji khümtacho. 34 Abraham na Philistia lo sunga vancho.
Isaak ji Othan Tssole To Potsow na Abraham Ezoala
1 Yuta tara sülo Potsow na Abraham ojang tssocho, Ombona, "Abraham!" to tsacho. Tole Abraham na, "Hao, OPVÜI, shilo a vanka!" to ezocho. 2 Tole Potsow na ezocho, "Nitsoe, tsonthi Isaak, ni nzantso ji sosi Moriah metae yia. Hojilo ana meta motsünga ni ejüvka, jilona ombo khi a thana." 3 Ojyuato jo Abraham na nyazüngina thanphen otssüng tara oroe ombo Gadho ji hanthuksi, Isaak tona phajae otsük eni to sonhyasi Potsow na ejüo meta jilo wotacho. 4 Osi tsüngon ethümoto jilo jo Abraham na meta ji hungchicho. 5 Tole ombona phajae jiang ezocho, "gadho ji nzo shilo vantava, a tsoe shi enina owo khümtasi elani nte thüngi yitavka." 6 Hojito phyoa Abraham na erung tssüng ha ji Isaak hanthuksi ombo yonri tona tssokachiphen michüm to bencho. Osi onina yita vanathüng ji, 7 Isaak na, "Apo!" to tsacho. Tole Abraham na "Hao, Otsoe, Kvütola?" to ezocho. Jisüijo Isaak na ezocho, "Nina otssüng omi jo hana khatola olyuro jijo kvülo khi thantav sala?" 8 Abraham na janlancho, "Potsow na ombobo motsünga apivka," to ezoa yita vancho. 9 Osi kvüthüng Potsow na ombo ezovo meta ji jancho sana, Abraham na thanphen sa roni otssüng ji hankachicho. Jisülojo ombona ombo tsoe ji chhüngi thanphen sa jilo otsüng jiang poni ekachicho. 10 Osi ombona Isaak ji lüngthav tsükona ombo yonri ji süngkacho, 11 Tole OPVÜI lanben na Potsüwoe na "Abraham, Abraham!" to ombo tsaphicho. Ombona, "Hao, shilo a vanka" to yichocho. 12 Hoji süijo Lanben jina ezocho, "Eboeroro ji timeyana, osi ntia tilyuia." "Nina Potsow kyuala osi ombo yi engala to ana che kathaka, ntiotssole nina ni tsonthi jitia n valanchina ombo kyuchiala." 13 Jithüngji Abraham na engokae zele, olyu motsünga khyonrho na shiyae vancho hungcho. Hoji tsükona ombona hoji owo khi ombo tsoe ji ethan thung ji olyu jina erung than tssoa thancho. 14 Osi hoji metaji Abraham na, "OPVÜI na epiala" to tsayicho. Nchüng jana kyon na "OPVÜI na phunglani na epiala" to phyotala. 15 OPVÜI lanben jina Potsüwoe na Abraham tsae ezocho, 16 "Ana a mying khi phyochakala OPVÜI na phyoala Ana emhokthav ni mmhayivka. Ntiotssole nina heto tssothaka, osi a thüngina nitsoe jitia n valanchicho. 17 Hoji tsükona ana echüma ni ezoala, 'Ni tsoronichen jo shantio jiang tata osi jürani hajang to thichthukuka. Osi ni tsoronichen jiangna onte ri jiang khyoa wovka.' 18 Ana ni tsoronichen jiang mmhayio ji esüa onte mmhayile to jipo topvüna chontav ntiotssole nina a yizüng jiang topvü engacho." 19 Abraham na ombo phajae jiang thüngi elani yicho osi Abraham vanphen Beersheba lo onte nzo yitacho.
Nahor Tsoronichen Jiang
20 Yuta tara sülojo Milka na ombo ojenio Nahor ji otsoeoro otsük tiza bukithaka to Abraham na zocho. 21 Otsoe ovüngo ji Uz, ombo onyuro Buz, Aram opo Kenuei, 22 Chesed, Hazo, Phildash, Jidlah tona 23 Rebeka opo Bethuel to otsoe otsük tiza shiang shi Milka na Abraham ojenio Nahor bukicho. Nahor shom loroe 24 Reumah na Tebah, Gaham, Tahash, tona Makha to vancho.
Sarah Chüala Osi Abraham na Müngsiphen Shiala
1 Sarah na nzyu nzoasi mekyu vancho. 2 Ompvüji kanaan meta Hebron lona chücho, osi ompvü chüo ji Abraham na nungraicho. 3 Ombona ombo engh echümüng ji vasi owo Hittite kyon jiang ezocho, 4 "Aiyo nte yulo tsanthan tssoa vanaka, a engh ji shothev tsükona meta a shituktava." 5 Ontena janlancho, 6 "Tsüphoeyo, ena ni ezovka engachia, "Nino esopvüi tssokhong tsüka to ena ntsia, liko shianglo ni chokao lo ni engh ji shotheta. E yulo ntinsana liko ni pia ni engh ji ni shothetukuka." 7 Tole Abraham na onte mhadungo nkhümthei phyocho, 8 "Ntena a engh shi shilo a shothethuka tssona, nzansi Zoar tsoe Ephron ezoa, 9 Machpelah longkvü ji a shithuka, hojijo ombo litssae ka. Oman shenthi ji a khiyia nte mhadungona a shithukle to ezoa, tona ana hoji müngsiphen khivka." 10 Ephron na Hittite thanpoe jiang nzo yantsü pikhfü jilo oyan etssikhophen jilo khoka vancho, osi ombona hojilo evan topvü na zoa janlancho, 11 "Tsüphoeyo, ana a kyon shiang mhadungona Machpelah longkvü ji totona ni shithukuka, osi hojilo ni engh ji ni shothethokuka." 12 Khatola Abraham na Hittite jiang mhadungo epyakthe topvü na zoa, 13 Ephron ezocho, "Ana oyi motsünga jonjikhukchoalo? Ana oli ji totona shivka nzansi oman shi a khiyia, tona ana a engh ji jilo shothevka." 14 Ephron na janlancho, 15 "Tsüphoeyo, liko ji man ji jantirang nzo mezhü tae küma jitüv jo eni tsükona jo ntia meka. Ni engh ji nra hojilo shotheta." 16 Ephron na nzontsü na zoa ephyo jantirang nzo mezhü ji Abraham na shishoe füphen shenthi lona fücho. 17 Hojitolyui Mamre na engkhüwoe Machpelah lo evan Ephron meta ji Abraham echhi kümcho. Hojilo oli ji, longkvü ji, elani litssa jana otssüng odung jiang to jücho. 18 Hojilo sanrhyuo Hittite kyon jiang topvü na liko ji Abraham echhi to chekacho. 19 Hoji tsükona Abraham na ombo engh Sarah ji Kanaan meta longkvü jilo shothecho. 20 Hojitolyui Hittite jiang liko osi longkvü ji Abraham echhi müngsiphen kümcho.
Isaak Engh
1 Enhungo Abraham ji elümoto sonthakcho osi OPVÜI na ombo elhi topvü lo ombo mmhayithukcho. 2 Ombona phajae yulo erantso ochona ejüeli topvü zechecho sana ji ezocho, "A jo ophi jiang yutalo nyimkae phyochaka. 3 Nina atsoe ji engh ji Kanaan meta shilona n khithuk to Potsüo osi limha OPVÜI Potsow myingo na ni a phyochakthuk hungala. 4 Nina a tsoe Isaak engh ji a ebuk metae a wopan jiang yulo owo yani soa vanthokuka." 5 Tole phajae jina engacho, "Tole loroe jina meta ji sisi hepi a phana n yina kvüto lyuvla? Ana ni tsoe ji ni ebuk metae elani yithuklam alo?" 6 Abraham na ezocho, "Nina a tsoe ji hoji tiyilanthuka! 7 Potsüwoe OPVÜI Potsow na apo meta osi a wopan jiang metae na tsanchuki hepi a yithukcho, osi ombona meta shi a tsoronichen jiang epiv tsükona tüngochünga phyochakcho. Nina a tsoe ji engh yancheo tssoa Potsow na ni vüngina lanben wothukuka. 8 Loroe jina ni phana n yia tssona ana ni phyochakthuko shina ni ti-wongkhyua. Khatola nti lanka lonaha nina atsoe ji meta ji elani n yithukche." 9 Tole phajae jina, ombo OPVÜI Abraham phi yutalo nimkae Abraham na phyo jiang topvü tssovto phyochakcho. 10 Abraham ejüeli ezepvüi phajae jina ombo pvüi ji Odh jiang yulona taro khichei sosi Nahor na vamo meta mesopotomia khümkiwoe wocho. 11 Ombona kvüthüng hoji jancho sana Odh jiang yantsü tssae jükha motsüngalo esanrathukcho. Osi jithüng jo mmyua vanthako jina eloeden na ojü olo rota vanthakcho. 12 Ombona heto randancho, "OPVÜI, apvüi Abraham Potsow. Nchüng a elhi shiang a bencheyia, osi a pvüi Abraham thüngi ni phyochak ji benthuka. 13 Aiyo yantsü shilo loroe shiangna ojü ophen jüka shilo vana. 14 Osi ana onte yulo tsüka thüngi, 'Nzansi jümvüru ji vachochia ojü ayuthuka' to ezov sala. Ompvüna, Tua, osi ni Odh ji tsükona ha ana ojü ranlani hansi yivka' to phyona, ompvü ji ana ni nri Isaak engh tssothuku ka. Osi hojito tssona nina apvüi ji thüngi phyochako ji benthukcho to ana longtsüv." 15 Ombona randan ji n thakvü Rebieka na epvülo jümvüru ejümkachi hansi rocho. Ompvüo Abraham ojenio Nahor ha ombo engh Miikan oni tsokhying Bethuel ji otsolov tssocho. 16 Ompvüo elümoto opyon mmhona osi njüm loroe tssocho, osi ompvüna jükhae jowo mvüru jina ojü rankae hansi yicho. 17 Tole phajae jina yunga owo olani na ompvü nduki ezocho, "A nzansi ni mvüru lona ojü a yuthuka, " 18 Ompvüna, "Yua, tsüphoe yo" to ezoa epvüi na mvüru ji khichoe ejümsi ombo yuthukcho. 19 Ombona yuthakale, ompvüna phyocho, "Ana ni odh jiang tsükona ha ojü hana yivka onte etsson yuthuka" 20 Tosi zaktole ompvüna ojü ji odh yuphen opvü jilo lithesi onte topvü n yuchyuthüng nandang jo ojü woe hansi oyi yuthukcho, 21 OPVÜI na ombo bebencheyiv sana to yingto ompvü cheta vancho. 22 Ompvüna odh jiang yuthukrathakale ombona tsentsü shona yingrüm ehamo jiang khichei ompvü kheno lo nkonkayisi shona tivü eni khilani ompvü evon lo phungtheyicho. 23 Jisüijo ombona ezocho, "nzansi nipojo ocho sana a ezoa. Osi ombo ki a tona a nzo etssoe shiang to nchüng zümo tsükona nchenphen lilivla?" 24 Tole ompvüna, "Apo jo Nahor ha Milcha oni tsoe Bethuel jika. 25 Osi eki nchenphen ha elani mavü ekümrümo jak ha to elümoto lia." to ezocho. 26 Hoji süijo phajae jina khuktseni OPVÜI khümcho. 27 Osi ombona phyocho, "Apvüi Abraham Potsow ochona ombo phajae ji thüngi ombo phyochak ji benchethuka sana hoji OPVÜI ji thünga. OPVÜI na a pvüi wopan jiang thüngi a sosi rothaka." 28 Loroe jina oki yunga oyi motsü ji topvü oyo rüa ezocho. 29 Rebieka na opyao Laban to tsa vancho, osi ombona jükhae Abraham phajae ji thüngi yunga wocho. 30 Laban na oyulov shona yingrünm tona tivü to jiang topvü hungcho, osi phajae jina kvüto ompvü ezothakcho sana jiha zothakcho. Osi ombona Abraham phajae jina ombo odh jiang nzo mangta evamo jilo wocho, 31 osi ezocho, "Aphana oki roa, nino OPVÜI na mmhayio kyon tsüka. Nino ntiolyui shilo manga vanala? Ana aki ni tona ni odh to jiang tsükona nchenphen methaki nte vayithaka." 32 Tole kyon jina oki wocho osi Laban na odh jiang ha jiang lanchoe vayisi mavü tona ojak to onte picho. Tosi ombona Abraham phajae ji tona ombo razhü to jiang ojo epyothoku ojü hansi chiyicho. 33 Tosi etsoyu hansi chiyile Abraham phajae jina phyocho, "Ana ntio ephyov zicho sanaji n phyov jo etsoyu n tso." Laban na ezocho, "Ntio phyov sana phyoa." 34 Ombona benkae nsancho, "Aiyo Abraham phajae, 35 OPVÜI na apvüi ji emhokthav mmhayithaka, osi ombo ejüeli tsüka. Ombona olyuden, osi mangsüden, kurüden osi shonajanti elani miden eboe eloeden to ombo mmhayithaka. 36 A pvüiji esonlani ombo engh Sarah jina esonlani otsoe ombo vanicho, osi apvüi na ombo ejüeli topvü ombo pithaka. 37 Apvüi na phyochak motsünga avathukcho. Osi ombona phyocho, 'Atsoe ji engh jo Kanaan meta shilona tikhikhe. 38 Jithüngina jo a metae owo a wopan jiang yulo ombo engh yanikhe.' 39 Tole ana apvüi ji engacho, 'Loroe jina aphana n yina kvüto lyuvla?' 40 Tole ombona phyocho, 'Ana yuta topvülo oyi engayio Potsow jina ombo lanben khi ni phana rwothukvü ka, osi ni bencheyivka. Nina a tsoe ji engh ji a metae a wopan jiang yulo na ethüngivka.' 41 Phyochak shilona nkacheo lanka jo ni tsükona motsünga tae lia; hojijo nina a wopan jiang thüngi osi ontena ni nkhichona, ana ni ezo ji ephan n tssolea ntia n tsso." 42 Ana nchüng jükha jilona oro randancho, "OPVÜI, apvüi Abraham Potsow, a elhi shiang lo etho apia, 43 ana jükha shilo vana loroe tsükana ojü olo rona ana ompvü mvüru jilona ojü a yuthukle to ezov sala. 44 Osi ompvüna a yuthuksi a odh jiangha yuthuka tssona, ompvü ji nina a pvüi tsokhying ji engh ethüngchecho tssovalo?" 45 Tole ana randan jitia n. chev Rebieka na epvüi jümvüru ekachi bensi jükhae oju olo rheyi cho. Ana "Anzansi ojü ayuthuka" to ompvü ezole, 46 ompvüna zakto jümvüru ji khichoe bensi "Yua, ana ni odh jiangha yuthokuka" to phyocho. Hoji tsükona ana yucho osi odh jiangha yuthukcho. 47 Ana, 'Nipojo ochola?' to ezole ompvüna, 'Apojo Nahor ha Milka omboe tsokhying Bethuel jika' to ompvüna a ezocho. Hoji tsükona ana yingrüm ji ompvü khenolo nkonkayisi tivü jiha ompvü evono, phungtheyicho. 48 Ana jilo na khuktseni OPVÜI khümcho. Osi ana apvüi Abraham Potsow ji thüngcho. Ntiotssole ombona apvüi wopan jiang yulo asosi oro apvüi tsokhying ji engh a yanchethukcho. 49 Enhungo ntena apvüi thüngi etssov elio ji tssoa elamo lona ombo nzana tssona, anzansi ntena a ezoa, mekana ana kvüto lyuv sana ji a ezoa." 50 Laban ha Bethuel onina janlancho, "Yilan shi OPVÜI thüngina chiyio jina ena ntia methaku n li. 51 Rebieka ji shika OPVÜI na phyo ji esüa nra sosi oyi nipvüi tsokhying ji engh tssothuka." 52 Abraham phajae jina hoji zoale ombona nkhümthei OPVÜI khümcho. 53 Tosi ombona janti osi shona oyuk osen jiang khichei Rebieka picho. Ombona ompvü oyo tona opyao to oni thüngi ha tssentsü man yantso picho. 54 Jisüijo Abraham phajae ji tona ombo razhü jiang tona etsoyu tssotacho osi hoji zümo jo hojilo yiptacho. Ontena enyathüng phan thiale ombona phyocho, "Enhungo apvüi thüngi a yithuka." 55 Tole Rebieka oyo ha opyao onina phyocho, "Loroe shi e ndüngo tsüngon tiying mekana taro tia vanthuksi sosi yia." 56 Tole ombona ezocho, "Eti vanlanthuka, OPVÜI na eyentsa shi e mmhayithaka enhungo apvüi thüngi kholani a yithuka." 57 Ontena janlancho, "Toka loroe jina jo kvüto phyov sana tsae engae zetava." 58 Ontena Rebieka tsae engatacho, "Nina kyon shi phana ni yeyihungula?" Tole ompvüna 'Yivka" to phyocho. 59 Jisüi jo Rebieka ha onte phajae eson jito ji Abraham phajae ji phana yithukcho. 60 Osi ontena heto phyoa Rebieka randankacho. "Oyuloe, nino kongdung opvü oyo, ni kümthokuka! Ni tsoronichen jiangna niri jiang yantsü jiang khyothokvuka!" 61 Hojisüi jo Rebieka tona ombo ndüngo loroeden to jiangna odh jianglo tsankarae Abraham phajae ji nzo khochitacho. 62 Isaak na romhon meta motsünga, "Ahunga evamo eküm evamo Potsow ji jükha" to tsao jilo oro Kanaan jolowoe vancho, 63 Ombona mmyulamoe sanphia oli jianglo wole Odh jiang tsata hungchicho. 64 Rebieka na Isaak hungchiale Odh jilona tsukjoe, 65 Abraham phajae ji engacho, "Oli na ete thüngoe etsao jijo ochola?" Tole phajae jina "Ombo apvüi jika" to ezocho, tole ompvüna zakto kvüri eyuk ji khi omha shüngi zicho. 66 Phajae jina ombona elhi tsoa yithako jiang topvü Isaak rüa ezocho. 67 Hoji süijo Isaak na Rebieka ji sosi oyi oyo Sarah na vansi eyio süranki jilo sothecho, osi ombo engh ompvü kümthukcho. Isaak na Rebieka nzancho, osi oyo chüo ji nungra ji kyimjoa yicho.
Abraham Tsoronichen Thanpo Jiang
1 Abraham na eloe thanpo Keturah to tsa soa vanlancho. 2 Ompvü lona Zimran, Joksham, Medan, Midian, Ishbak tona Shuah to bukcho. 3 Joksham na Sheba ha Dedan oni opo kümcho, osi Dedan tsoronichen jo Asshurim jiang, Letushim jiang tona Luemmim to jiang tssocho. 4 Midian tsoeden Ephah, Epher, Hanoch, Abida, tona Eldaah to tssocho. Shiang hetopvü Keturah tsoronichen tae. 5 Abraham na ombo ejüeli topvü Isaak vayicho. 6 Khatola ombo n chüthüngna ombo engh thanpoe jiang lona buko tsoe jiang ha yantso piracho. Tosi onte topvüto Isaak nkachoa engkhüwoe yirathukcho.
Abraham Chüoji Osi Shotheo Ji
7-8 Abraham jo ranbena nzyu nzoasi ekhatiyingsi mongo vansi chücho. 9 Ombo tsoeden Isaak ha Ishmael onina Machpelah longkvü Mamre na engkhüwoe Hittite kyon Zoar otsokhyongo Ephron tsoe ji echhi jilo ombo shothecho. 10 Hojijo Abraham na Hittite jiang thüngi shio ji, osi Abraham ha Sarah ompoeta hojilo shothecho. 11 Abraham chüsi sülo Potsow na Isaak ji mmhayicho osi "A hunga evamo eküm Potsow ji jükha" to tsao jilo vancho.
Ishmael Tsoronichen Jiang
12 Sarah phajae Ejip eloe Hagar lona buko Abraham tsoe Ishmael, 13 jina otsoe vamo jiang eranina etsüngcho heto: Nebaith, Kedar, Adbeel, Mibsam, 14 Mishma, Dumah, Massa, 15 Hadad, Tema, Jetur, Napish tona Kedemah to, 16 onteno pvüji taro eni omotsüiden osi onte mying jo ontena vana ewo oyan jianglo likhancho. 17 Ishmael jo nzyu nzoasi thümro tiyinglo chücho. 18 Ishmael tsoronichen jiang na Havila tona Shur to meta yuta lo vancho, jijo Assyria lani Ejip na engkhüwoe. Ontena Abraham tsoronichen thanpoe jiang thüngina kontae vancho.
Esau ha Jakob oni Buko Ji
19 Abrham tsoe Isaak motsü ji heto: 20 Isaak na Bethuel Aramee ji otsolov osi Laban oyulov Rebieka ji soa vanathüng jo ombo nzyu zhüro tssocho. 21 Rebieka na otsoe n buko jina Isaak na OPVÜI thüngi ompvü randanicho, tole OPVÜI na ombo randan engae khi Rebieka na ngaro hani sicho. 22 Ompvüna nshümtso hancho osi oni n bukthüng na mmanina oni khonta vancho, osi ompvüna phyocho, "Ntio hetüv a lona tssoato?" Jitsü kona ompvüna OPVÜI engalo wocho. 23 Tole OPVÜI na ompvü ezocho, "Ni mmani jipolan eni jüa; Nina n ratao jipo eni bukuka. Tolea tsüka ji etho ejüvo tssovka; Osi eramo jina nungo ji benkavka." 24 Hojitoli ompvüna tsobuk yuta jani nshümtso ji bukcho, 25 eramo jijo rakia osi hümpvüa tüv tssocho, ji tsükona Esau to tsacho. 26 Enioto jijo Esau jonkhuk ji tsükyasi bukcho, ji tsükona Jakob to tsacho. Kvüthüng onte vancho sana Isaak jo nzyu rokro benthakcho.
Esau na Ombo Eran yenala
27 Eboerworo woniata mmhona rankacho osi Esau jo hapo kyon yantso ranben lo tssothimori kümcho, tokhatola Jakob jo kichungi yingto evan tüv kümcho. 28 Isaak na Esau chokacho, ntiotssole ombona Esau na riromo ji tsoa vamo ji tsükona, tokhatola Rebieka najo Jakob nzamo tssocho. 29 Tsüngon motsüngalo Jakob na orho hanjü vüpa vanle, Esau na ranbeno osi yicho. Osi ombo wondomo jina, 30 ombona Jakob ezocho, "A khangtsünga ka; nina rakia vüpa vamo ji tara apia." (jitsükona Edom to ombo tsacho.) 31 Tole Jakob na janlancho, "Nina ni eran ji apina anaha shi ni pivka." 32 Esau na ezocho, "Toka ni pivka, achüv sathüng aiyo eran ji ntio lyuvla?" 33 Jakob na ezocho, "Nina ni elan jiang apiv to echüma a ezodena." Hoji tsükona Esau na echümchaka ombo eran ji Jakob picho. 34 Hoji süijo Jakob na hümri tara tona hanjü to ombo picho. Ombona tsoyusi phanti yicho. Esau na ombo eran elan ji hojito tsütsasoracho.
Isaak na Gerar lo Vanala
1 Abraham echungo meta jilo otssi vara yithako jilo elani thanpo otssi vara lilancho. Isaak na Philistia mesao Abimelekh thüngi Gerar lo wocho. 2 OPVÜI na Isaak nduki heto ombo ezocho licho, "Ejip metae tiyia, ana vanle to ni ezovo meta shilo vana. 3 Shilo vana tona anaha ni ndüngo vamvü osi ni mmhayivka. Meta shiang hetopvü ana ni osi ni tsoronichen thüngi piv sala. Ana nipo Abraham thüngi phyochako ji benthokvüka. 4 Oyaki shantio kvüta sana jitata ni tsoronichen vanthukuka, osi meta shi hetopvü ana onte thüngi piv. Ana ni tsoronichen thüngi mmhayio ji esüa onte mmhayile to jipo topvü na chontav. 5 Abraham na ajancho zoa a yizüng osi shikhfü jiang topvü benphiwo ji tsükona ana ni mmhayivka." 6 Hojito lyui Isaak na Gerar lo vancho. 7 Hojilo evamo kyon jiangna kvüthüng ombo engacho sana ombona ombo engh ji ombo oyulovka to onte ezocho. Ombona ombo engh ka to n phyohungo jijo Rebieka ji elümoto opyon mmhomo ji tsükona ontena ombo lüngthasi ompvü khiv esüka to nchümo jina. 8 Isaak na hojilo yuta tara vansi sülo mesao Abimelekh na ombo kherüki na zechochile Isaak ha Rebieka oni jünata nzanta hungchochicho. 9 Hoji tsükona Abilemekh na Isaak tsathuki ezocho," Ompvüo ni engh la! Ntio tsükona ni oyulov ka to phyoala?" Tole ombona ezocho, "A engh ka to phyochocho a lüngthav esü küma to nchümo jinaka." 10 Abimelekh na phyocho, "Nino ntiolui ethüngi heto elhiala? A kyon ochona sana ompvü thüngi yipcho salivo nlan ji epono tssov." 11 Jisüijo Abimelekh na kyon topvü thüngi ezocho, "Ochona kyon shi tona ombo engh to jaktona sana chüthoku ka." 12 Isaak na meta jilo mojü thecho, tole hoji nzyu jo ombona mojü theo ji tata nzoa poni richocho, ntiotssole OPVÜI na ombo mmhayicho. 13 Omboji nkhon mmha lia elümoto ejüeli kümcho. 14 Ombona olyu osi mangsü elani phajaeden elümoto vamo jina Philistia kyon jiangna ombo pono omhyik rakia yicho. 15 Jitsükona ontena opo Abraham ekümo ombo phajae jiang na shani vao jükha jiang topvü hanzhüi sitacho. 16 Abimelekh na Isaak ezocho, "Ni ji e lona etho likata ni kümthaka, e meta sisi tsana." 17 Jitsükona Isaak na hoji lona eseni oyi Gerar hayi jilo yuta tara vancho. 18 Osi Abraham ekümo jükha shancho Philistine jiangna Abrham chüale hanzhüi siwo jiang ombona shanlancho. Isaak na jükha jiang topvü opona tsayio mying jiang topvü tsalancho. 19 Isaak phajae jiangna hayi jilo jükha shanle ojü yanchecho. 20 Gerar lo olyu enhyang jiang na Isaak olyu enhyang jiang thüngi khonta "Shijo e jükha ka" to phyotao jina Isaak na jükha ji "Khontaphen" to tsacho. 21 Isaak phajae jiangna thanpo motsünga shanlanle hoji lona ha khontao jina hojijo ombona "Nkhyingta" to tsayicho. 22 Ombona hojilona eseni oyi thanpo motsünga shanle hojilo jo n khontao jina hojijo "Etancho" to tsacho. Osi ombona phyocho, "Enhungo OPVÜI na etancho epithaka, küma shilona e jüolia ekümcheta yiv." 23 Isaak na meta ji sisi Beersheba lo yicho. 24 Osi hoji zümo jilo OPVÜI na ombo nduki heto ombo ezocho, "Aiyo nipo Abraham Potsow jika, ti-kyua; Ana nithüngi vamvüka. Aphajae Abraham thüngi a phyochak jiang benthokvü tsükona, ana ni mmhayiv osi tsoronichen khosha ni piv." 25 Tole Isaak na hojilo thanphen roni OPVÜI khümcho. Ombona hojilo vanphen tssocho osi ombo phajae jiang na jükha motsünga shanlancho.
Abimelekh Tona Isaak To Ntsata
26 Abimelekh na Gerara lona ombo ndungntssungpvüi Ahuzaah tona rasantsü esopvüi ji to sosi Isaak thüngi wocho. 27 Isaak na ombo engacho, "Ntena ovüngthüng jo athüngi n khyingtav vancho osi nte metaena a tsanthukcho, tona ntiolui enhünga jo a nduko rotachola?" 28 Ontena janlancho, "OPVÜI na ni ndüngo vana to ena ntsithaka, osi ete yutalo ntiona methak vatav to ena nchümala. Ena kvüto ni ntachicho sana jito ninaha en tachi to ni e chümchakthuk hungala. 29 Ena ntia ni n tssoyiv noyinga ni yithukcho. Osi OPVÜI na ni mmhayithaka to ena mmhona chethethaka." 30 Isaak na etsoyu methaki onte picho osi ontena tsoyutacho. 31 Ojyuato nyazüngi na otsük akvüna phyochak vatasi phyochak jiang echümchak theta methaktacho. Tothakale Isaak na pyonta salüm onte pia oshom ejoena pyontacho. 32 Hoji tsüngon jilo Isaak phajae jiang na ontena jükha shantao ji motsü ji rüa ombo ezotacho. Osi ontena phyocho, "Etena ojü shanrhüpthaka" 33Tole ombona jükha ji "Echümchak" to tsayicho. Hojito lyui yantsü ji mying ji Beersheba to tsayicho.
Esau Engh Metapoe Kyon Jiang
34 Esau na ombo nzyu zhüro tssoathüng ombona Hittite loroe otsük eni soa vancho, onteno Beeri otsolov Judith tona Elon otsolov Basemath to. 35 Ontena Isaak ha Rebieka oni eküm ji enungrathao eküm kümthukcho.
Isaak na Jakob Mmhayiala
1 Isaak ji sontsüngi omhyik juki sicho, ombona otsoe eramo Esau ji owo tsathuki, ombona "Atsoe yo!" to tsale, "Hao" to ombo yichocho. 2 Isaak na phyocho, "Enhungo a sonthako ji nina ntsia, osi nsungu achüv. 3 Ni lotssi osi lotsüng jiang bensi orae owo oso kotsüngi a hanisi yia. 4 Osi ana achokao so tara eküi oyi apia. Ana hoji tsosi a nchüthüng a mmha wokhao ji ni randankavka." 5 Isaak na hojito Esau ezoa vamo ji Rebieka na enga vancho. Ji tsükona Esau na sophano khochithakale, 6 ompvüna Jakob thüngi ezocho, "Nipona Esau ezo ji ana zothaka, 7 owo oso kotsüngi eküi hansi oyi apia, tona ana a nchüthüng OPVÜI mhadungo na ni randankavka to ezochoka. 8 A tsoeyo ana ntio ni ezov sana ji enga. 9 Owo nyanyanden jilo belev eni tatsüngi hansi yia, tona ana nipona chokatso tüv eküyivka. 10 Nina hoji khi hansi owo nipo pia tsothuka tosi ombo n chüthüng mmha ni randankaithuka." 11 Tokhatola Jakob na oyo ezocho, "Esau jo hümpvüa osi aiyo ofü enipa to nina ntsia. 12 Apo na a epyanphisi ana ombo ejithechiala to ntsia na mmha mekna abobo rhirandanka mpa yanchev." 13 Tole oyona janlancho, "Rhirandanka jo topvü a echi tssothoku ka, otsoeyo, yingto ana ni ezoato owo nyanyanro eni ji hana oyi apia." 14 Ombona owo khi hansi oyi pile ompvüna opona chokao han ekvüicho. 15 Tosi ompvüna Esau mpensü mmhontssov vayio jiang khi Jakob hanthukcho. 16 Elani ompvüna nyanyan fü jiang khi Jakob evono tona evüngo otsan n pao jianglo to phungtheyicho. 17 Hoji sülojo etsoyu mmhom tsoyani evao ji tona ompvüna hümri rungi evao jiang to khi Jakob picho. 18 Hojisüi jo Jakob na etsoyu jiang bensi owo "Apo" to tsacho. Tole ombona "Hao" "Nino a tsoe kümoe jila?" to engacho. 19 Jakob na ezocho, "Aiyo ni tsoe eramo Esau jika, nina a ezowo ji ephan tssothaka. Khokthei ana etsoyu ni methakio shi tsosi a randania." 20 Isaak na, "Nino kvütolui tata tssüsoa hungchola a tsoe?" to ezole Jakob na "Ni Potsow, OPVÜI na akyochichoka" to ezocho. 21 Isaak na Jakob ezocho, "A thüngi sena roa, ana epyanphi ni zevka, nino otsotso Esau memek?" 22 Jakob na opo thüngi sena wole opona ombo epyanphisi "Ni won ji Jakob esüa tolea ni evon shiango Esau evon esüa." 23 Ombona Jakob n chethecho, ntiotssole ombo evon jianglo Esau esüa otssan khyingo jina. Ombona randankav vanathüng elani 24 "Nino otsotso Esau memek? to engalancho." Tole ombona, "Aiyo Esau ka" to ombo ezocho. 25 Isaak na phyocho, "Etsoyu tara hansi oyi apia, ana tsosi ni randankavka." Jakob na hansi oyi picho osi ombona zükhi ha tara hana oyi picho. 26 Tole opo na ezocho, "A tsoeyo, sena oro a emanphia." Ombona opo emanphilo sena wole Isaak na osü jiang rhüm ji zoe ombo randankacho. 27 Ombona phyocho, "A tsoe shi sü rhüm mmhom shijo OPVÜI na a mmhayio oli ji rhüm esüa. 28 Potsow na potsüwoe na yentso rümjothoki ni li jiang mmhayithokuka, osi lizü kümthokuka! Ombona otssuk ozü osi tssüngthijü pvülyua ni pithokuka! 29 jipo thanpoe jiango ni phajaeden tssothuka, osi kyon khi ni mhadungo epyakthethuka, osi niyo tsoronichen topvüna ni mhadungo nkhümthevka. Ni n zehungo jiango rhyirandankathuka, osi ni nzamo jiango mmhayithuka."
Esau na Isaak Mmha Chonala
30 Isaak na mmha randanka ji thaki, Jakob na khoe yipvüto, Esau na oraena yicho. 31 Osi ombona ha etsoyu mmhom tssoyani hansi opo thüngi wocho. Ombona opo ezocho, "Apo, ni khi mmha a randankayithoku tsükona ana etsoyu tara hansi oro lika, nzansi khokthei tsoa." 32 Tole Isaak na, "Nino ochola?" to engacho. Tole ombona "Ni tsoe eramo Esau jika," to ezocho. 33 Hoji süijo Isaak na otsük mpümna enetsünga phyocho, "Tona enhr üngati ekümrümro lüngthae oro a tsothuko jijo ochola? Nina apipüngrolo ana hoji tsothaka. Osi ana a randan wokhao ji ombo randanka thaka, hoji tsükona enhungo kümali ombo echi tssothaka." 34 Esau na hoji zoale emhena owon chuka kya phyocho, "Athüngi ha ni mmhaji apia, apo!" 35 Tokhatola Isaak na janlancho, "Ninyuro jina oro a ejiphia ni mmha ji khithaka." 36 Esau na phyocho, "Yenjo enioto ombona a ejithechiala. Heto tsso jina Jakob to ombo tsacho sayia. Ombona a eran jiha akhiyicho tona kvütoli nchüngha a mmha ji akhiyiala. Nina a tsükona mmha enhyokae a n vayichoke?" 37 Isaak na janlancho, "Ana ombo wopan topvü phajaeden ni khümthukthaka. Ana tssukromümro osi tssüngthijü topvü ombo mmhayithaka. Enhungo ntia ni tssoyicheo tüv n lika, a tsoeyo!" 38 Toaha Esau na opo thüngi heto jonjia mungcho, "Apo, nina mmha motsünga tae vachoke? Anaha a mmhayia, apo!" to phyoa kyacho. 39 Jisülojo Isaak na ombo ezocho, "Ni tsükona potsüwoe na yentso n li, Osi ni tsükona lizü liha nli. 40 Nina yonri yakchia eküm vamvüka, ninyuro ezii tssoa. Tokhatola nina panlana tssona, ombona ni etancholo ni vachivka." 41 Opona mmha ji Jakob pi esio jina, Esau na Jakob tssakcho. Osi ombona nchümcho, "Apo chüi nungrata etünga, küma ana jithüng Jakob lüngthavka." 42 Tokhatola, Rebieka na Esau etüm ezi ji zoale, ompvüna Jakob thüngi kyon wothuka ezothukcho, "Nita Esau na ni sakav osi ni lüngthav methaka vanka. 43 Jitsükona a tsoeyo, ana ntio ni ezoana ji enga. Osi zakto apyao Laban thüngi Harani tsani yia, 44 Osi yuta tarajo jilo vansi, nina ntio elhicho sana ji nitana 45 mhechoa lüm n tssukrothüng nandangjo jilo vana. Jisüiti ana ochosana rothuka ni tsathukvüka. Ana enga taena a tsoe woniata monthukvü mek."
Isaak na Jakob Ji Laban Thüngi Yithukala
46 Rebieka na Isaak ezocho, "Esau engh jipopoe shiang a laka zechethaka. Jakob na ha Hittite eloe shiang ochosana soa vanchojo chüi lea asihungu."
1 Isaak na Jakob tsae monkhüm pisi ezocho, "Kanaan eloe soa tivankhe. 2 Ji thüngina jo Mesopotamia metae owo ni motsüi Bethuel thüngi owo nimo Laban otsolov yulo tsüka soa vana. 3 Thotsü Potsow khi ni yapiyanthan ji mmhayithuki ni tsoronichen vanthuki jipo elümoto opo ni kümthukvüka! 4 Ombona Abraham mmhayio ji esüa ni osi ni tsoronichen jiang mmhayithuka, osi Potsow na Abraham pio meta ntena evamo shi ni echi tssothuka!" 5 Isaak na Jakob ji Mesopotamia lo Aramia kyon Bethuel ji tsoe osi Esau ha Jakob oni oyo Rebieka opyao ji thüngi yithukcho.
Esau na Engh Thanpo Khilanala
6 Isaak na Jakob mmhayisi Mesopotamia lo engh yana yithukthaka to Esau na ntsicho. Elani Isaak na Jakob mmhayisi Kanaan eloe soa tivanle to tangcho toha Esau na zocho. 7 Osi Jakob na opoha oyo oni yi enga Mesopotamia lo yithaka toha ombona zocho. 8 Ji tsükona opona Kanaan eloe thüngi n mathatala to Esau na engathecho. 9 Hoji tsükona ombona Abraham tsoe Ishmael thüngi ovo otsolov Mahalath, Nebaioth oyenio ji soa vancho.
Jakob na Bethel Lona Omüng Emhala
10 Jakob na Beersheba lona khochi Harani yia vancho. 11 Osi eng rhetale ombona ntho meta motsünga jani hojilo esancho. Ombona olung nkhümsi yipa yicho. 12 Tole ombona omüngiji phopha motsünga na potsüo jana ronkachicho hungcho, osi lanbenden na hojilona jorochüngi tssoata vana hungcho. 13 Osi hojilo OPVÜI na ombo ndüngo phanthi vancho. OPVÜI na ombo ezocho, "Aiyo, Abraham ha Isaak oni Potsow OPVÜI jika. Nina vamo meta shiji ana ni osi ni tsoronichen thüngi pivka. 14Onteno limha shilo livero hetata to tssovka. Ontena onte meta ji nken akvüwoe tsükarankata yithoku, osi ni tona onte to yakchia ana jipo topvü mmhayiv. 15 Osi nchümchekhe, nina kümoe woana ana ni ndüngo tssov osi ni nkochei khi meta shilo ni sosi yilamvü. Ana ni epiv ephyo shiang n benkhamvü jo ana ni siv meka." 16 Jakob na yipjüngchi phyocho, "OPVÜI ji helo vana! Ombo shilo vana, osi aiyo hoji n tsiv vancho!" 17 Ombona kyua heto phyocho, "Shijo ntio ekyuthav meta hetüv ato? Potsow ki ji shi tssokhuka, osi Potsüwoe chüngiphen kipünglan ji shi tssokhuka." 18 Jakob na ojyuato jo nyazüngi na phanthi ombona nkhümo long ji tsakae nchümchephen long tssoa chümi vacho. Osi ombona hoji OPVÜI echi to khochaku tsükona hojilo oli ve thyujü ha phyangkacho. 19 Ombona meta ji Bethel to tsacho."Hojilo yantsü jijo nkolojo Luz to tsacho" 20 Osi Jakob na OPVÜI thüngi heto phyochak vacho: "Nina a ndüngo vani ana yentsa vamo shilo etsoyu, nipensü apia ankoha tssona, 21 osi ana apoki mmhona elani yilanchena, nino a Potsow tssovka. 22 Ana chekaphen long chümi lio shilojo ni khümphen ji tssovka, osi nina ntio apia sana jiang topvü lona ana tarochia ni pilamvü."
Jakob na Laban ki Janala
1 Jakob na yentsa lana owo engkhüwoe chivocho. 2 Tole jitopvü oli olyuden ethüm na jükha motsünga ji nkonchaki yipta vancho tüvlo chiwocho. Jüka ji emeni olong tsüphov na lhüpi jilona olyuden jiang ojü pia tüv jükha tssocho. 3 Olyu jiang topvü na sanrhyuana olyu enhyang jiang na longpyak ji seriphi ojü ranchei onte yuthukcho, osi olung jina khanlani vatacho. 4 Jakob na olyunhyang jiangji, "Okhümoden, nteno ntio meta lona rotachola?" to engacho. Tole ontena, "Eyio Harani na ka" to janlancho. 5 Jisüijo ombona "Ntena Nahor tsoe Laban ji ntsicho alo?" to engacho. Ontena, "Ho, ena ntsika" to ezocho. 6 Ombona elani "Ombo mmhona ve van?" to engalanle, Ontena "mmhona vanka" osi, "Zeta ombo otsolov Rachel ji shilo olyu rhükia roa vanaje" to ombo ezocho. 7 Tole Jakob na onte ezocho, "Enhüngajo nmyuhan osi olyu jiang phanrhyuv yuta n janhan küma ntena ojü onte yuthuktasi elani yantsolo sosi n wothuklamke?" 8 Tole ontena phyocho, "Olyu topvü shilo n vanra, osi olung ji khoe n sidem jo ena ojü n yuthukche." 9 Jakob na hojito onte thüngi janta vanathüng Rachel na olyuden ji phana chiyicho. 10 Kvüthüng Rachel na Laban olyu jiang phana chiyia Jakob na hungcho sana, ombona jükha jilo owo, olung ji seriphi sisi olyu jiang ojü yuthukcho. 11 Hojisülo jo ombona ompvü ntsüpsi ematha lona ekyav benkacho. 12 Osi ombona ompvü ezocho, "Aiyo nipo wopan ka, Rebieka otsokhyongo jika." Jisülojo ompvüna opo ezolo yunga yicho osi 13 ombona orüo Jakob won zoale yunga oro ombo nduki khayae ntsüpsi oki sosi yicho. Osi kvüto tssocho sana jiang topvü Jakob na Laban ezole, 14 Laban na phyocho, "Otsotsoka, nino a ejen oso motsünga ka." Jakob na hojilo choroa vancho.
Jakob na Rachel Tona Leah To tsükona Laban Benkatala
15 Laban na Jakob ezocho, "Niji a wopan tssoji ndani tajo elhijo ni n tssothuk. Ni jokheman jo kvütata tssovla?" 16 Laban na otsolov otsük eni vancho; eramo jijo Leah to tsacho osi nungo jijo Rachel to. 17 Leah jo omhyik ji eze mmhona tüv, tolea Rachel jo osak ophung mmhona opyon mmhoncho. 18 Jakob na Rachel jüpona nzana vamo jina, ombona heto phyocho, "Nina Rachel soa avanthuk na ana nzyu tiying elhi ni tssoyivka." 19 Tole Laban na ezocho, "Ana ni yaka thanpoe a n pihungala, küma shilo a thüngi vana." 20 Jakob na Rachel soa vamvü tsükona nzyu tiying elhi tssoyicho. Khatola Rachel ji ombo nzamo jina esüngaro tae vanchecho. 21 Jisüijo Jakob na Laban ezocho, "Yuta ji benthaka; küma nitsolov ji soa a vanthuka." 22 Tole Laban na yanpithan tokhu methaki otsük akvüto tsacho. 23 Tokhatola hoji zümo jilo ombona Rachel mekna Leah ji Jakob thüngi sosi wocho, osi Jakob na ompvü thüngi yipcho. 24 (Laban na Leah ezii Zilpah ha vancho osi hoji Leah phajae tssothoku picho.) 25 Ompvüo Leah toji Jakob na enyathüngti ntsicho. Hoji tsükona ombona Laban thüngi owo ezocho, "Nino ntiolui heto elhichola, aiyo Rachel lom yaka elhi ni tssoyicho. Tona ntioli a ejithechichola?" 26 Laban na janlancho, "Meta shilo shikfü ephan jo ota ji vüngina onyuro ji n yanpithukala. 27 Yanpithan tokhu hopta ji ben thuksa, tosanati ana zesi nina nzyu tiying lomyaklamvü to tssona Rachel ji ni pivka." 28 Jakob na hoji khichocho, osi yanpithan tokhu ji thakale, Laban na ombo otsolov Rachel ji Jakob engh tssothoku picho. 29 (Laban na ombo eziiloroe Bilhah jiha Rachel phajae tssothoku tsükona picho.) 30 Jakob na Rachel thüngina ponilan tssocho osi ombona Leah thünginajo Rachel nzamo tssocho. Jitsosi ombona Rachel lomyak ndana nzyu tiying Laban elhi tssoyilancho.
Jakob Tsoeoro Jiang
31 Jakob na Leah ji lümato n chokana Rachel ekyungo nzanala to OPVÜI na ntsiale, OPVÜI na Leah jo otsoeoro lithuksi, Rachel jo otsoe n lithukcho. 32 Leah na ngaro hani tsokhying bukcho. Ompvüna phyocho, "OPVÜI na a ezüp ji hungthaka, küma enhungo arapvü na anzamvü tssovka"; to phyoa ompvüna Reuben to tsacho. 33 Ompvüna ngaro hanlani tsokhying vanlancho. Ompvü na, "Aiyo a tssakcho to OPVÜI na ntsiwo jina ombona otsoe shiha apilanthaka" to phyoa Simon to tsacho. 34 Elani ompvüna ngaro hanlani tsokhying buklancho. Ompvüna, "Enhungo ana tsokhying otsük ethüm vanithako jina a rapvüna chüng chüngkata a nzamvü, to phyoa Levi to ombo tsacho. 35 Elani ompvüna ngaro hanlani tsokhying tsüka buklancho. Osi ompvüna 'Nchüng shilo jo ana OPVÜI thüngu' to phyoa Juda to ombo tsacho. jitosi jo ompvüna ngaro n vamvü sicho."
1 Tokhatola Rachel na jo Jakob tsoe nbukcho. jitsükona ompvüna ota omhyik rakia, Jakob ezocho, "Otsoeoro apia, to mekna chüi sivka." 2 Tole Jakob na Rachel thüngi lüm tsuka phyocho, "Ana Potsow thung jo n tssoche. Ombona otsoe ni n piala." 3 Ompvüna phyocho, "shilo a ezii Bilhah vanka, shi thüngi yipsi ompvü khi atsokhying a bukithuka. Hojitolui ompvü yakchia ana opvü-oyo kümvü." 4 Hojito phyoa ompvüna Bilhah ji ombo thüngi pia ombona khi ponilan tssothukcho. 5 Bilhah na ngaro hani Jakob tsokhying bukicho. 6 Tole Rachel na phyocho, "Potsow na athüngoe thethaka. Ombona arandan engae otsoe apithaka." Jitsükona ompvüna Dan to ombo tsacho. 7 Bilhah na ngaro hanlani Jakob tsoe enioto buklancho. 8 Jitsükona Rachel na phyocho, "Ana ayenio thüngi khonda etssov khon tacho khatola ana khyothaka." to phyoa Naphatali to ombo tsacho. 9 Leah na otsoe n liv sithaka to ompvübo ntsiale ompvü na phajae Zilpah ji Jakob engh tssothuk cho. 10 Tole Zilpah na Jokob tsokhying bukicho. 11 Leah na, "Ana ha oton lia" to phyoa ompvü na Gad to tsayicho. 12 Zilpah na otsoe Jakob bukicho, 13 tole Leah na "aiyo kvüta a emathacho ato, enhungo eloe topvüna emathae to a tsav" to phyoa Asher to ombo tsacho. 14 Omüm li eri etüngathüng Reuben na oli wole ngaro ehamo tüv tssüngthi wo (Mandrakes) hungcho osi ombona oyi oyo Leah picho. Rachel na Leah ji, "Nzansi ni tsoe ji oha tara apia" to ezocho. 15 Tole Leah na janlancho, "Nina a rapvü a rechoyisi elani a tsoe ji oha ji ha chonlanake?" Rachel na janlancho, "Nina ni tsoe ji oha ji apina nchüng zümo jo Jakob thüngi ni yipthukvüka." 16 Jakob na mmyulani olina yia vanle Leah na chivo ombo nduki ezocho, "Nchüng zümo jo nino a thüngi yipvü sala, ana a tsoe ji oha ji khi ni shithaka." Tole ombona hoji zümo jilo ompvü thüngi ponilan tssocho. 17 Potsow na Leah randan ji engae ompvüna ngaro hancho, osi Jakob tsokhying mongo to bukicho. 18 Leah na, "Potsow na a yantsothaka, ntiotssole ana a phajapvüi ji a rapvü picho." to phyoa Issakhar to ombo tsacho. 19 Leah na ngaro hanlani otsoe tiroko to Jakob bukicho. 20 Ompvüna phyocho, "Potsow na yantso mmhom a pithaka. Enhungo ana tsokhying tirok ombo bukithako jina a rapvüna kyongkata a nzamvüka." Osi ompvüna Zebulum to ombo tsacho. 21 Okhao jo ompvüna tsolo tsüka buki Dinah to ompvü tsacho. 22 Jisüi jo Potsow na Rachel nchümchecho; ombona ompvü randan engayia ngaro ehamo etho ompvü picho. 23 Ompvüna ngaro hani tsokhying bukcho. Ompvüna phyocho, "Potsow na otsoe a pia a n bennzi osi yikra ji khi a siyithaka. 24 OPVÜI khi tsokhying thanpo a pilanthukvüka; hojito phyoa ompvüna Joseph to ombo tsacho."
Laban Thüngina Jakob Khakchiala
25 Joseph bukcho süi Jakob na Laban ezocho, "Ana oki elani yivka ayithuka. 26 Ana elhi ni tssoyia mmyochothako a engden osi otsoeden jiang apia ayithuka. Ana kvütata elhi mmhona ni tssoyithakcho sana ji nina ntsia." 27 Tole Laban na ombo ezocho, "Ana heto phyovka; Nina vamo ji yakchia OPVÜI na ammhayithaka to ana ratsen yakchia ntsithaka, 28 Ana ni jokheman jiang etsüngi ni pivka." 29 Jakob na janlancho, "Ana kvüta elhi ni tssoyithakcho sana osi ana zecho yakchia ni tssiden kvüta rankathakcho sana ji nina ntsia. 30 Ana n yithüng nina ejükaro lioji emhokthav rankathaka, osi ana küwoe khochia na topvü lona OPVÜI na ni mmhayithaka. Enhungo anaha a echi eyamvü yuta janthaka." 31 Laban na "Ana ntio ni pivla?" to engacho, tole Jakob na "Ana ntia jokheman ethev n li; nina shi engana elani ana ni tssiden jiang ni zeyilamvü; 32 Nchüngo ana tssiden jiang yana osi olyu enikvü tona Nyanyan baraku to kvüta jüana khichevka. Hojiang tae ana jokheman tssoa khivka. 33 Aiyo ntsa lona evan memekana nina sülamiti ntsivka. Nina ajokheman ji zeta roathüng hojilo nyanyanro n barako osi olyu n yiko jitüv jüa tssona jiang jo ana efücho to ntsi khia." 34 Tole Laban na "Hoto tssona, nina phyoji ephan tssotavka" to phyocho. 35 Tokhatola hoji tsüngono jo Laban na ombo tssiden jilo nyanyan opung baraku mekana tsükrhav jiang tona okyu pyakrhüv osi olyu enyiku jiang topvü khiche sicho. Osi ombona hojiang ji ombo tsoe jiang zeyata vanthuksi 36 tssiden thanpo jiang sosi Jakob nkachoa metapoe nchuk ethüm yentsa woe sicho. Osi jilo enhyo tsiden jiango Jakob na zeyata vancho. 37 Jakob na almond khero tona thanpo khero to ekhüpi ejoma nrhaki sisi baraka kümthukcho. 38 Ombona hojiang ji olyu jiangna ojü yuphen ojen jiang mhadungo vayicho. Ombona hojilo evao jijo ekümrüm jiang na kvüthüng ojü yulo jilo roa sana jithüng phankatao jina hojilo vayicho. 39 Ntiotssole la tona nyanyan jiangna khero barako jiang ndüngo na phankatae nronjüa na woro jiang ji baraku nrocho. 40 Jakob na olyu jiang ji nyanyan jiang lona khotae vanthukcho, osi olyu jiang ji Laban tssiden lo enyikvü osi baraku jüwo jiang thüngoe zechiwo vanthukcho. Hojitolui ombona ombo tssiden thichethukcho; osi Laban tssiden lona khotae vanthukcho. 41 Ekümrüm belev jiang na phankata hunga na Jakob na zakto khero jiang ji onte yuphen jüjen ji mhadungo vayicho, hojitolui khero jiang yulona ontena phankatacho. 42 Khatola ekümrümo kvüritsangrio jiang ndüngo jo ombona khero jiang n vayicho. Osi yuta esüngaro tae tssoa Laban tssiden jo ekümrümo kvüritsangrio jiang tae kümi sicho, osi Jakob ekümrümo jo beleo jiang tae kümi si to tssocho. 43 Hojito lyui omboji elümoto ejüeli kümcho; osi Ombona tssiden elümoto vancho, elani phajaeden osi odh, Gadho toha elümoto vancho.
Jakob na Laban Thüngina Tsani Yiala
1 Laban tsoe jiangna "Jakob na opo eli topvü khithaka, osi ombona elio jiang topvü opo eli lona khichecho" to phyota Jakob na zocho. 2 Laban na ovüngthüng esüa ombo thüngi n mathav zechecho, 3 osi OPVÜI na ombo ezocho, "Ana ni ndüngo tssovka, nipo osi ni wopan jiang metae yia." 4 Hoji tsükona Jakob na Leah ha Rachel oni ji oli ombo tssiden vamo jilona oro ombo ndukle to ezocho. 5 Ombona onte ezocho, "Nipona ovüngthüng esüa a n khyingu sithaka to ana zechethaka; khatola apo Potsow jina a ndüngo vana. 6 Ana etho topvü theta nipo elhi tssoyicho to niniata na ntsia. 7 Toaha ombona a ejithechia a jokheman ji yenjo taro dungphithaka. Khatola Potsow na ombo khi a n tachithukcho. 8 Laban na kvüthüng 'Nyanyan baraku jiang ni jokheman tssovka' to phyoana tssiden topvüna baraku nrocho. Elani ombona 'Nyanyan serav jiango ni jokheman tssovka' to phyoa na tssiden topvü na serav nrocho. 9 Hojitolui Potsow na nipo tssiden lona tssiden khiche apicho." 10 Ekümrümo jiang phankata yutalo ana omüng emhacho, Nyan yan obung jiang topvü baraka osi serav tae hungcho. 11 Potsow lanben na omüngi na heto a ezocho, "Jakob, ana 'Hao' to yichole ombona a ezolancho, 12 'Zeta, phantalo ewoe nyanyan obung jiang topvü baraku osi serav tae.' Shiang hetopvü ana tssoala, ntiotssole Laban na ni thüngi ntio tssoa sana ana topvü ntsithaka. 13 Aiyo nina Bethel lona nduko Potsow ji, Nina nchümchephen olung chümi olive thyujü phyangkata nthoche vasi echümchak evao ji. Enhungo ni ebuk meta jilo eyiv tsükona methaka." 14 Rachel ha Leah onina Jakob janlancho, "Apo thüngina ena ehungo ntia n liv sithaka. 15 Ombona jipopoe esüa e zetala. Ombona e yencho, osi e man jiha topvü ombona ezikhanthaka. 16 Enhungo Potsow na apo ejüeli lona khicheo ejüeli jiang shiango topvü ete echi, jitsükona, Potsow na ntio ni ezocho sana ji ephan tae tssoa." 17-18 Jitsükona Jakob na Kanaan lo opo metae eyiv tsükona methakcho. Ombona ombo tsoeden osi ombo engh jiang odh mankvüi tsankathukcho, osi ombo tssiden topvü osi ombona Mesopotamia lona hungwo ejüeli topvü ovüngna yia vanthukcho. 19 Laban na ombo olyu jiang tssan mmyaelo woathüng Rachel na opo ohalong jiang efüicho. 20 Jakob na mphoa khochi tsamo jina Laban ejithechicho. 21 Ombona ombo echi topvü hansi zaktole yi sicho. Ombona Euphrates zhükvü ji bankae phunglan meta Gilead lo yicho.
Laban na Jakob Phanala
22 Tsüngon ethüm süloti Jakob na yithako ji Laban na zocho. 23 Ombona ombo kyon jiang sosi tsüngon tiying phani owo Gilead lona phayacho. 24 Hoji zümo Potsow na omüngina Laban ezocho, "Nti lonaha Jakob ti-ekhenthukle." 25 Jakob na phunglani oyi tsankae vancho. Osi Laban jo ombo kitsük nzo Gilead phunglani meta jiang lo vancho. 26 Laban na Jakob ezocho, "Nino ntio tssona a ejithechia atsolov jiang ritssolona rhümhacho esüa sosi tsanchola? 27 Ntiotssona nino a ejithechia a n zona mphoa tsanchola? Nina azocho saliwo ana khendenzhü osi tsüngrüngu won theta longshita olani ni phana rov. 28 Nina a orüo jiang, osi atsolov jiang tia emanphia pyonta salüm a npithukcho. Jijo zhüva elhi! 29 Ana ni tssatssothoku etho lia, tokhatola nsümo nipo Potsow jina kvütoliha ni tiekhenthukle to a tangcho. 30 Nina oki eyiv nhyaktsüka vamo jina tsanchoto ana ntsia, khatola nino ntio tssona oha long jiang efüchola?" 31 Jakob na janlancho, "Nina nitsolov jiang akhiyiv tsaya akyucho. 32 Tokhatola e yulo ochona sana ni oha long jiang hancho tssona chüthok-khuka. Ena ni echi ntia khekhicho sana shilo eboetso shiang ehungo na yana." Rachel na Laban oha long jiang efüio ji Jakob na ntsicho. 33 Laban na owo Jakob süranki jiang shyui zecho, osi ombona Leah süranki tona phaj apvüi otsük eni ji süranki to zeyicho, toaha ombo Potsow jiang n yanchecho. Jisüijo ombona Rachel süranki wocho. 34 Rachel na oha long jiang efücho osi ompvüna odh mankvüi khokthephen jiang kupi vae khokthezhüi vancho. Laban na süranki topvü yanrhyua ha n yanchecho. 35 Rachel na opo ezocho, "Tsüphoe, a thüngi lüm ti-tsuka, aiyo mmen yia vamo ji tsükona ni mhadungo n phanthichetaka." Laban na yanaha ombo oha long jiang n yanchecho. 36 Tole Jakob lüm tsuki phyocho, "Ana ntio nlan tsüphov tssochola?" Ana ntio shikhfü yesocho nina heto araphanala. 37 Nina a tsüitsailan topvü shyui zewo jilona ni echi ntio shyuchechola? Shilo khichuka, tona ni kyon tona akyon tona zesi eni ocho elan sana phyothukuka. 38 Ana nzyu mekyu ni thüngi vancho osi ni olyu, nyanyan jiang na rotssoroni n tümjakhan, osi ana ni tssiden lona ntia khiche n tsohan. 39 Orae ekümo na olyu rümana hojijo ana ekhyimcho. Ana a nlan mek to phyoa hoji oyi ni ejücho mek. Nina zümolo lea engo lea ntio mona sana ana ekhyimle to achonicho. 40 Yuta elümoto lo ana eng etsso zalanchia osi etssük zümo zalanchicho. Ana eyipvü tia n hungcho. 41 Ana nzyu mekyu ni thüngi vamoji hotüv ekümo vancho. Ni tsolov onyeni man nzyu taro mezhü za lomyakcho osi ni tssiden jiang nzyu tiruk rhükicho. Toaha nina a jokheman ji yenjo taro dungphicho. 42 Amotsüi jiang Potsow osi Abraham Potsow jina a ndüngo n vancho salivo, nina khejüng a yithukthakvü. Tokhatola Potsow na a ezüp osi ana ntio tssochosana ji hungthaka, osi nsümo ombona ombo yitsso ji rothukcho.
Jakob ha Laban Oni Ntsatala
43 Laban na Jakob ezocho, "Eloe shiango a tsolovden, onte ngaro jiango a echi osi tssiden shiangha a echi. Otsotso phyotana shilo hunga vancho topvü a echi tae. Khatola ana a tsolov osi onte tsoe jiang vasi ntia ethev n lio jina, 44 ana ni thüngi ntsata a vahungala. Ete ntsata ji chekaphen olong penrhyui vatavka." 45 Tole Jakob na olong khi nchümchephen tssoa chümi vacho. 46 Ombona ombo kyon jiang ezoa olong hanrhyuthuki nshakachi vathukcho osi hoji ndüngona etsoyu tssotacho. 47 Laban na hoji Jagar Sahadutha to tsacho, khatola Jakob najo Galeed to tsacho. 48 Laban na heto Jakob ezocho, "Olong nsharyuo shijo enita tsükona nchümchephen tssovka." Ji tsükona meta ji Galeed to tsacho. 49 Laban na hetoha phyocho, "Eni pyontae vanathüng lea OPVÜI mhyik ji ete pono vanthukvüka. Ji tsükona meta ji Mizpah to ha tsacho. 50 Laban na elani heto phyocho, "Ana ni n hung lea nina a tsolov shiang khangshia osi eloe thanpoe soa vanchojo Potsow na ezeta vanka. 51 Ana eni yutalo olong nshae vao jiang shiangka osi shijo nchümchephen long jika. 52 Olong nshao shiang osi nchümchephen long jo shi heto shiang yakchia nchümchetavka. Ana kvüthüngha shi yaki ni halo chirov meka, osi nina ha shi yaki a halo rhorov meka. 53 Abraham Potsow osi Nahor Potsow jina eni yuta lo oyi etssoyivka." Tole opo Isaak na khümo Potsow ji myingona Jakob na hoji ntsata ji benphiv to phyochakcho. 54 Ombona ekümrümo lüngthae phunglan jilona othan pisi ombo kyon jiang etsoyu tssolo tsacho. Ontena tsotasi ji zümo jo phunglan jilo yiptacho. 55 Ojyuato jo Laban na nyazüngina orüo jiang tona otsolov jiang to pyonta salüm emanphisi, kholani oki yicho.
Jakob na Esau Nduku Methakala
1 Jakob na yia vanathüng, olani na lanben ejoma na ombo ndukcho. 2 Ombona kvüthüng onte hungcho sana ombona phyocho, "Shijo Potsow esanphen"; ji tsükona ombona meta ji Mahanaim to tsacho. 3 Jakob na Edom metae ota nduko ovüngna yithenpvüi wothukcho, 4 osi ombona heto phyole to onte ezocho, "Ni jancho ezoe ni phajae a Jakob shina a pvüi Esau thüngi heto ni ezoala, ana Laban thüngi vana vansi zakto n yichev enhüngati yiala. 5 Ana mangsü, Gadho, Olyu tona Nyanyan elani phajaeden to vanra. Tsüphoeyo, nina athüngi mmhontav to eyiloa yithenpvüi yithukala." 6 Tole yithenpvüi jiangna Jakob thüngi elani oyi ezocho, "Ena nita Esau thüngi wotale ombona olani na ni nduko roa vanthakcho. Ombona kyon owo nzo mezhü sosi tsata." 7 Jakob na hoji zoe ekhentsünga wongkhyucho, osi ombona ombo razhü jiang, Mangsü, Olyu, Nyanyan tona Odh to jiang ji okho eni chichecho. 8 Ombona nchüm cho, "Esau na oro razhü ovüngo ji haa tssona enioto jina tia tsanchov." 9 Jitosi Jakob na randancho, "Amotsü Abraham Potsow, apo Isaak Potsow, a randan a engayia! Potsow, ninajo a metae a wopan jiang thüngi yile to a ezocho, osi nina olan topvü mmhonthoku to phyocho. 10 Nina ni nri a thüngi khonzan osi longtsüka a ejüthako ji ana mancho na meka. Ana Jordan zhükhfü ji ntia n thena jarung taena pankacho. Osi enhungo ana razhü eni shi sosi elani yithaka. 11 Ana randanala, ata Esau khe lona a shanchoa, ombona e topvü elo nungoe osi nungori shiang nzo roe esilo tsacho tssov. 12 Nina a tsükona olan topvü mmhonthoku osi, ochinaha n khacheo tsoronichen jürani hajang tata a mmhayiv to phyochak ji ti-mhechoa." 13-15 Ombona jilo zümoa yipsi ota Esau epiv tsükona ombo tssideni na, olyu okyu nzo eni tona obung mikyu, Odh roso thümro, mangsü zhüro elani mangsübung taro, Gadho okyu mikyu tona obung taro to khichecho. 16 Osi ombona hojiang ji oden chicherae oden akvüto phajae tsüka rhükithukcho. Ombona onte ezocho, "Avüngina yitava, osi oden jiang yutalo pothe vatava." 17 Ombona phajae ovüngo ji heto yizüng picho, "Ata Esau na nte nduki 'nte pvüi jo ochola? nteno kvüi yitala? osi nte mhadungi ekümrüm shiang OPVÜI jo ochola to nte engana, ntena heto janlantakhe, 18 "Shiango ni phajae Jakob echi. Ombona ombo pvüi Esau thüngi yantso tssoa shiang hanthukala. Jakob ha e sülani tsata." 19 Hoji esüa tssiden enioto jiha, ethümoto ji tona oden topvü ezei jiang thüngi hojito ezoracho."Shi heto shiji ntena kvüthüng Esau nduka sana ombo ezonrüngvüka. 20 Ntena, "Hoka, ni phajae Jakob ha e sülani tsaka." Jakob na jo, "Ayantso jiang khi ata emathathokuka osi ana kvüthüng ombo nduka sana nlan asiyiv tssov," to nchümcho. 21 Hojito ombona yantso jiang ovüng na yithuksi zümo ji hojilo yipchocho.
Peniel Lona Jakob na Eyatala
22 Hoji zümo Jakob na phanthi ombo engh otsük eni ji, osi ombo yingaloroe eni ji elani ngaro otsük taro ekha jiang to sosi Jabbok zhükfü ji pankatacho. 23 Tolea ombona onte topvü onte pankatadenthuksi elani ombona ehamo osi eso jiang topvü chiyithukcho, 24 ombo sülani ombo tae vancho. Tole kyon tsükana zümo tona ombo thüngi oro wonchi jana eyatacho. 25 Tole kyon jina ombona n khyoala to ntsiale Jakob ji phijümta lo ejüpthechiyicho, tole chüngta lukphiyicho. 26 Hoji süi jo kyon jina, "Wonchiaka ayithuka" to phyocho. Tole Jakob na, "Nina a n mmhayithüng jo ni n yithuk" to ezocho. 27 Kyon jina "Ni mying jo ochola" to ombo engacho. Tole ombona "Jakob ka" to janlancho. 28 Tole kyon jina "Nimying jo enhungo Jakob tssov meka. Nina Potsow thüngi osi kyon thüngi rotathaka; osi nina khyothaka; jitsükona nimyingjo enhungo Israel tssovka" to ezocho. 29 Jisüijo Jakob na "Enhungo ni mying ji a ezoa" to ezocho. Tole kyon jina, "Nino ntiolui a mying ji ni ntsihungala?" to phyosi ombona Jakob mmhayicho. 30 Jakob na phyocho, "Ana omha omha Potsow thüngi nduktathaka, toaha ana elani eküm vanala"; hojito phyoa ombona meta ji Peniel to tsacho. 31 Jakob na Peniel lona khochiale eng chirocho, osi ombo ji ophina eno jina ojo esunga yicho. 32 Jakob ji phijümtalo ekayio jina enhünga jana lea Israel shiango phiso ozü jijo n tsoala.
Jakob Na Esau Ndukala
1 Esau na ombo kyon nzo mezhü sosi etsao ji Jakob na hungchi ombo ngaro jiang ji Leah, Rachel tona ombo yingaloroe nchyu eni jiang to jantayia zethukcho. 2 Ombona ovüngtssoa yingaloroe jiang vüngthukcho, jisülo Leah tona ompvü ngaro jiang, jisülojo wokhao tssoa Rachel tona ompvü tsoe Joseph to tssothukcho. 3 Jakob na ota ndukale zaktole ovüngna owo likoe yenjo tiying epyakthecho. 4 Tokhatola Esau na yunga oro ombo nduki ombo khayacho, osi eyulo ntssüpicho. Jisülojo woniatana kyatacho. 5 Esau na eyingoe zele eloe jiang tona ngaro jiangto hungcho, hoji tsükona ombona, "Ni nzo eyio shiango ochoangla?" to engacho. Jitsükona Jakob na ezocho, "Tsüphoeyo, shiango Potsow na anzana a mmhayicho ngarodenka," 6 Tole yingaloroe jangna onte ngaro jiang nzo sana oyi epyakthei yikrachitacho; 7 Jisülo Leah tona ompvü nargo jiang to yicho, osi wokhao tssoa Rachel tona ompvü tsoe Joseph tona chiyi epyak thetacho. 8 Tole Esau na engacho, "Tona razhü thanpo ana nduktemo jiango kvütola, osi ntio etssola?" Jakob na ezocho, "Ni khi emathata ekhichothuku tsükona ka." 9 Tole Esau na phyocho, "Anaha etsson lika, onyuro, to nina tssona vata." 10 Jakob na ezocho, "Meka, nina athüngi ni emathacho tssona nzansi ana ni yantso jiang khia. Ana ni mha hungwo shijo a tsükonajo Potsow mha hungcho esüa tüvka, osi enhungo nina heto athüngi mmhontao jijo elümoto mmhona. 11 Nzansi ana ni hanio yantso shiang khichoa; Potsow na a nzankhünga ana lio shiang hetopvü ombona a pichoka." to phyoa Ombona n khithüng jo Jakob na rikata pia mungcho. 12 Esau na phyocho, "Etena methaki yitavka, ana nte vüngi na yivka." 13 Jakob na janlancho, "Ngaro jiango n khyohan, elani tssiden jiang lo olyuro osi nyanyanro jiang ha nchünmchev lia. Onte ji enga tia khangshia olan tsathukana chürav. 14 Nzansi a vüngi na yia vana etonandang tssiden shiang osi ngaro jiang nzo oyi Edom lona ni phayavka." 15 Esau na ezocho, "Toka a kyon ejoma ni nzo tsswothukvüka." Tole Jakob na janlancho, "Ntia hojitüv ti wonkhyua, ana eyilo jijo ni emathathuku ji tae." 16 Jitsükona hoji nchuk Esau na khochi Edom lo yicho. 17 Tokhatola Jakob na ombo tona otsoeden jiang to mmhiphen Sukkoth lo oki tssolo yicho. Jitsükona meta ji Sukkoth to tsacho. 18 Jakob na Mesopotamia lona kholani yio ji oyi Kanaan meta lo Shechem yantsü ji mmhona jani yantsü ji tssalo oli motsünga lo vancho. 19 Ombona hoji liko ji shechem opo Hamor thüngi janti rang nzoa na shicho. 20 Ombona hojilo khümphen roni Israel Potsow El, ji mying tsayicho.
Dinah Thüngi Worio Ji
1 Tsüngon motsüngalo Jakob ha Leah oni otsolov Dinah na Kanaan eloe ejoma janthechilo wocho. 2 Hoji meta jilo OPVÜI tsüka Hivite kyon Hamor tsoe Shechem jina ompvü hungale, ompvü rhümae n lan tssocho. 3 Tole loroe ji elümoto opyon mmhona ombona zecheo jina ompvü khi ombo nzanthukvü lanka yana yicho. 4 Osi ombona opo ezocho, "Nina loroe shi a eng etssov a khiyia." 5 Ombona otsolov yikrathuko ji Jakob na zoaha, ombo tsoe jiang topvü oli tssiden jiang rhükita vamo jina onte n yithüng jo yingto vancho. 6 Shechem opo Hamor na Jakob thüngi thyutalo wocho, 7 tole hojithüng Jakob tsoe jiang na olina yita vancho. Ontena hoji yivon zoale, Shechem na Jakob otsolov ji thüngi n lan tssoa Israel kyon jiang n khanzio jina elümoto lüm tsuktacho. 8 Hamor na Jakob ezocho, "A tsoe Shechem na ni tsoe ji thüngi nzantae sika; nzansi oni vantathuka. 9 Ni kyon tona a kyon to lolan tssotao tüv ntsata vatavka. 10 To tssona nina e meta shilo, helo lea helo lea ni vanhungo lo vancheta, osi ni etancho shisho khophia ejüeli vakuka." 11 Shechem na Dinah opo ha opyao jiang to ha ezocho, "Ntena a yi a engayina nte phyocho nte piv. 12 Ntena ntio yantso khihunga na a zoa, osi oman ji nte eto ntssona a ezoa; ntena tae ompvü soa a vanthukna ntena ntio phyoana nte pivka." 13 Shechem na onte oyuloe Dinah ji yikrathuko jina Jakob tsoeden jiang na Shechem tona Hamor to ji kyakthechia janlancho. 14 Ontena ezocho, "Ena e oyulov ji tseni n siwo jipo thüngi yanpithukvü jo yikra lia. 15 Jitsükona nina ni kyon eboetso tsenia e esüa kümvü to phyochak na ntena phyoji engavka. 16 Hojito tssona ete lo lolan tssotavka. Ena nte yulo vamka osi ete ji khümtsüng motsünga kümvüka. 17 Khatola ena phyo shi ntena khichoa tseni n sia tssona ena ompvü sosi helona khoe yiv." 18 Hoji ntsata ji mmhona to Hamor ha Shechem ombotsoe na nchümcho, 19 osi khyingroe jina ntsata ji ephan zakto ntio phyatacho sana tssocho, ntiotssole ombona Jakob otsolov ji lüma vancho. Ombo wopan lo ethelan eli kyon ji ombo tssocho. 20 Hamor ha Shechem ombo tsoe na yantsü pikhfü ji ndüngo etssirhyuphen jilo owo oyamo kyon jiang ezocho. 21 "Kyon shiango oshomden ka, ete metalo noyinga vanthuka osi rümphithuka. Metana ha etssonka. Etena onte otsolov jiang soa vam, etena ha onte thüngi yanpithuk to tssovka. 22 Tokhatola kyon shiangna ete yolo vani lolan tssotav jo etena eboetso tseni onte tssolan esüa benphi sanati tssochev. 23 Onte ekümrümo tona ejüeli topvü to ete echi tssovsa mekchoke? Hoji tsükona ontena ete ndüngo vancheo methak-tava." 24 Yantsü jilo evan topvü na Hamor ha Shechem onina phyoji khichocho; osi eboetso topvüna tseni sitacho. 25 Tsüngon ethüm sülojo eboe jiang tseni sioji okhvü jiang tia n poham Dinah opyao, Jakob tsoe Simon ha Levi onina ochinaha oni ntsina yonri bentasi yantsüi owo eboe topvü, 26 Hamor ha Shechem oni phata lüngtharae sicho. Osi ontena Shechem kina Dinah ji khi sotasi tsani sitacho. 27 Hojito lüngtharasi Jakob tsoe thanpoe jiang na onte oyulov yikrathuko ji nlia yantsü ji shyui khitacho. 28 Ontena yantsüi osi oli tssiden, mangsü kurü tona thanpo ntio liana topvü khitacho. 29 Ontena oman elio tsütsailan topvü khitacho, eloe tona ngaro to jiangha rhümhakhani khitasi oki jianglo licho topvü khitacho. 30 Jakob na Simeon ha Levi onita ezocho, "Ntena a ezüp yanchethaka, enhungo Kanaan kyon, Perisite kyon osi meta shilo kyon topvü na a tssaku. Ana kyon khosha n van; ji tsükona onte topvü khümtsütae a sakacho jo ete wopan topvüto emom." 31 Tole onina janlancho, "Ena e oyuloe ji eloesha esüa thama kyon khi n tsütsathukche."
Potsow na Bethel Lona Jakob Mmhayiala
1 Potsow na Jakob ezocho, "Zakto Bethel lo woa osi hojilo vana. Nina nita Esau thüngina tsana vanathüng nduko Potsow shi tsükona thanphensa ronkachia." 2 Jitsükona Jakob na ombo ndüngo etsso osi ombo wopan jiang topvü thüngi ezocho, "Ntena jipopoe Potsow elio jiang sirava, osi ntepopo ntssüngche mpensü ethan ekatava. 3 Etena meta shilona khochi Bethel lo yitavka, osi Potsow ochona a ezüp yutalo a nzana osi ana kui woana a ndüngo vanpvü sana hoji thanphen hojilo ronkachivka." 4 Hoji tsükona ontena jipopoe Potsow varao jiang osi jiangna ehamo oyuk-osen jiang topvü Jakob pitacho. Jakob na hojiang ji Shechem ndüngo lümro dung ji kupi shothei siracho. 5 Osi Jakob tona ombo tsoeden to jiang na khochiale, hoji nkonjano yantsü jianglo kyon jiang ekhentsüngracho, osi ontena onte n phancho. 6 Jakob na ombo kyonden jiang nzo Kanaan meta Luz lo chiyicho, hojijo enhüngajo Bethel. 7 Ombona hojilo thanphen roni Bethel Potsow mying tsayicho, ntiotssle ombona ota thüngina tsana vanathüng Potsow na hoji lona ombo ndukcho. 8 Elani Rebika nijüpo Deborah ji chüi Bethel jolowoe lümro dung ji kupi shothecho. Jitsükona hoji dung jijo "Ekya lümro dung" to tsacho. 9 Jakob na Mesopotomea lona kholani yiathüng ha Potsow na ombo nduki mmhayicho. 10 Potsow na ombo ezocho, "Ni mying jo Jakob khatola enhungo Israel to tsavka." Hojito Potsow na Israel to ombo tsacho. 11 Potsow na ombo ezocho, "Aiyo Thotsü Potsowka. Otsoeoro elümoto lia yikhe. Ni lona jipo elümoto chiyivka, osi mesao elümoto motsüi ni kümvüka. 12 Ana Abraham osi Isaak epio meta ji ni pivka, osi ni chücho sülo lea ana hoji ni tsoronichen thüngi pivka." 13 Hoji sülo jo Potsow na ombo sisi yicho. 14 Osi Potsow na meta kvülo na ombo jancho sana jilo Jakob na nchümchephen lung chümkachi hoji zükhi tona olive thyujü to renkata nthochecho. 15ombona meta ji Bethel to tsacho.
Rachel Chüo Ji
16 Jakob tona ombo wopan to jiang na Bethel lona khoe yicho, osi ontena Ephrata ejam tara liathüng Rachel na otsoe ebuku yuta jancho, osi elümoto ompvü noa vancho. 17 Ompvü eno tsükshio yuta lo ompvü ezei jina ompvü ezocho, "Tivwongkhyua, Rachel, eboeroro vanlam saka." 18 Tokhatola ompvü chüa vancho, osi ompvü echüpüngrolo ompvüna tsokhying ji Benoni to tsacho, khatola opo najo Benjamin to tsacho. 19 Hojito Rachel ji chüi Ephrata lantssae shothecho, enhünga jo meta jijo Bethlehem to tsala. 20 Jakob na hojilo nchümchephen lung chümcho, hojina nchüng jana Rachel lüp ji chekatala. 21 Jakob na khochi oyi Eder zenki na phokowoe vancho.
Jakob Tsokhying Jiang
22 Jakob na meta jilo vanathüng, Reuben na ombo loroe tsüka Bilhah ji thüngi ponilan tssocho; Jakob na hoji zoe elümoto lüm tsukcho. Jakob na tsokhying taro eni vancho. 23 Leah tsokhying jo Reuben (Jakob tsoe erantso ji) Simeon. Levi, Issakhar tona Zebulum to. 24Rachel tsokhying jo Joseph tona Benjamin to oni. 25 Rachel phajapvüi Bilhah tsokhying jo Dan tona Nephatali to oni. 26 Le ah phaj apvüi Zilphah tsokhying jo Gad tona Asher to; tsokhying shiango Mesopotamea lona bukcho.
Isaak Echüo Ji
27 Jakob na Hebron lo Abraham ha Isaak onina vamo meta mamre lo opo Isaak thüngi wocho. 28 Isaak na nzyu nzoasi ekha tiza vansi sonsanati chücho; 29 osi ombo tsoe Esau ha Jakob onina ombo shothecho.
Esau Tsoronichen Jiang
1 Esau ocho Edom toha tsacho sana ji tsoronichen jo shiang. 2 Esau na Kanaan eloe shiang soa vancho: Hittite kyon Elon otsolov Adah, Hivite kyon Zibeon otsokhyongo Anah otsolov Oholibamah; 3 Ishmael otsolov Basemath, Nebaioth otsolov ji. 4 Adah na Eliphaz bukcho, Basematha na Reul bukcho; 5 Osi Ohalibahmah na Jeush, Jalum tona Korah to bukcho. Tsokhying shiang topvü Kanaan meta lona bukcho Esau tsoeden. 6 Tole Esau na ombo engh jiang, otsoe jiang osi otsolov jiang tona ombo ki kyon topvü, elani ombona Kanaan meta lona hungcho tsiden osi ejüeli jiang topvü hansi onyuro Jakob thüngina pyontae metapoe yicho. 7 Ombo tona Jakob to na evamo meta jina onte n tsomo jina ombona metapoe yicho; ntiotssole ontena tsiden khosha evamo jina onte rt vantachyuv sicho. 8 Jitsükona Esau na Edom yingsüng metae vancho. 9 Edom kyon jiang omotsü Esau tsoronichen jo shiang: 10-13 Esau engh Adah na tsokhying tsüka Eliphaz bukcho, osi Eliphaz na tsokhying mongo vancho; jiango, Teman, Omar, Zepho, Gatam, tona kenaz to. Osi engh thanpoe Timna naha tsokhying Amalek vancho. Esau engh Basemath na tsokhying tsüka Reuel bukcho, osi Reuel na tsokhying mezhü, Nahath, Zerah, Shammah tona Mizzah to vancho. 14 Esau engh Oholibamah, Zibeon tsoe Anah otsolov jina tsokhying ethüm, Jehu, Jalam tona Korah to bukcho. 15 Esau lona bukcheo pvüji ji shiang. Esau tsoe ovüngo Eliphaz ji shiang omotsüi kümcho, Teman, Omar, Zepho, Kenaz, 16 Korah, Gatam tona Amalek to shiang hetopvüto jo Esau engh Adah tsoronichenden tssocho. 17 Esau tsoe Reuel ji shiang omotsüi kümcho; Nahath, Zerah, Shammah tona Mizzah to shiang hetopvüto Esau engh Basemath ji tsoronichen. 18 Pvüji shiang Esau engh Oholibamah, Anah otsolov lona chiyicho, Jesush, Jalam tona Korah to. 19 Pvüji shiango Esau lona chiyicho.
Sier Tsoronichen Jiang
20-21 Edom lo vanjüng etssoe kyon jiang ji pvüjilan chirorae yicho osi onte omotsüi jiango Horite kyon Sier tsoronichen jiango shiang; Lotan, Shobal, Zibeon, Dishon, Ezer tona Dishan to. 22 Lotan jo Hori tona Heman to omotsüi kümcho. (Lotan na oyuloe Timna vancho) 23 Shoban jo Alvan, Manahath, Ebal, Shepo tona Onam to omotsüi kümcho. 24 Zibeon na tsokhying otsük eni, Ajah ha Anah oni vancho. (Shijo romhonina opo olyu rhüki tssoathüng jülüm bukphen yancheo Anah ji) 25-26 Anah jo Hemdan, Eshban, Ithran, tona Cheran to pvüji omotsüi Dishon opo kümcho. Anah na otsolov Oholibamah to tsa vancho. 27 Ezer jo Bilhan, Zaavan, tona Akan to pvüji omotsüi kümcho. 28 Dishan jo Uz tona Aran to omotsüi kümcho. 29-30 Edom lo Horite jipo shiang vancho: Lotan, Shobal, Zibeon, Anah, Dishon Ezer tona Dishan to.
Edom Mesao Jiang
31-39 Israel lo mesao. ochia n vanthüng na mesao. shiang na chungta Edom meta ji satacho: Dinhabath kyon Boer tsoe Bela, Bozrah kyon Zerah tsoe Jobab, Teman kyon Husham, Avith kyon Bedad tsoe Hadad (ombona Moab metae na rotathüng Midian kyon jiang khyocho.) Mazerekah kyon Samlah, Rchoboth lo zhükhvü metae na Shaul, Achobor tsoe Baal Hanan Pau kyon Hadad (Ombo engh jo Matred otsolov osiMezahab orüv Mehetabel) to tssocho. 4043 Esau jo Edom kyon pvüji shiang omotsüi kümcho: Timna, Alvah, Jetheth, Oholibamah, Elah, Pinon, Kenaz, eman, Mibzar, Magdiei tona Iram to. Kyon shiangna vantawo meta jiango onte jipo jianglo tsakata tsaracho.
Joseph tona Ojenioden Jiang To
1 Jakob na opo vanphen Kanaan lo vana vancho, 2 Jakob wopan motsü jijo heto: Joseph nzyu taro tiying jina opo yingaloroe Bilhah tona Zilbah to tsokhying ojenio jiang nzo olyu, nyanyan, rhükia vancho. Ombona ojenio jiang elhi yivon n mhon jiang opo hanjancho. 3 Jakob na ombo tsoe thanpoe jiang lona kyongkata Joseph ji nzancho, ntiotssole ombo esolani tsoe etsso jina. Ombona osü phungnrhüo okhe siphoa tüv ombo vüicho. 4 Opo na onte lona kyongkata Joseph nzamo ji tsükona hoji ntsiale Joseph ji ziza n jantav sicho. 5 Osi zümo motsüngalo Joseph na omüng emhacho, osi ombona omüng ji ojenio jiang thüngi rüa ezole kyongkata ombo tsaktacho. 6 Ombona phyocho, "Amüng ji engtava. 7 Ete topvüna oli tssukvüng chüngta vancho, tole a tssukchüng jina phanthi mangcho. Tole nte tssukchüng jiang na hoji nkonphia reni hoji yikrachitacho." 8 Ojenio jiang na ombo ezocho, "Nina e yulo mesao osi ezOPVÜI tssoe esav to zialanüng?" Hoji tsükona ombo müng ji tona ombona onte tsükona ntio phyocho sana ji to yakchia ontena kyongkata ombo tssaktacho. 9 Jisüloha Joseph na omüng thanpo emhalani hoji ojenio jiang rüa ezolancho; "Ana omüng thanpo emhalancho, Eng, Choro tona shantio taro ekha tona nkhümthei a khüma emhacho." 10 Ombona omüng ji opo ha rüa ezole opona ombo makcho, "Ntio müng jitüvla? Ninajo, niyo, nijenioang elani a to tssoe ni khümtav tsayia alo?" 11 Joseph ji ojenio jiang na ombo n zekhoku vancho, khatola opo na hoji nchüma zia vancho.
Joseph ji yeni Ejip metae Sosi Yiala
12 Tsüngonalo Joseph ojenio jiang na Shechem lo tssiden jiang rhüki lo otale, 13 Jakob na Joseph ezocho, "Nijenio jiangna olyu rhükita vamo ji Shechem lo ni a wothuk hungala." Tole Joseph na ezocho, "Ana evov methakala." 14 Opona "Nijenioang ji kvüto vancho sana osi tssiden jiang mmhona vevantana owo zesi oyi a ezoa. Hojito ezoa opona Hebron hayi lona ombo wothukcho." 15 Joseph na Shechem jani oli sanphia vanle kyon tsükana ombo hungi ezocho, "Nino ntio yanala?" 16 Ombona janlancho, "Aiyo ajenio olyu rhükita vamo jiang yanala. Onteno kvüi vancho sana nina a ezokhukcho alo?" 17 Tole kyon jina phyocho, "onteno khoe yirathaka, Dothan lo yitav to phyota zoa." Tole Joseph na phana owo ojenio jiang Dothan lona ndukcho. 18 Ontena ekonina ombo hungchicho. Osi ovüngna ombo chüthoku okyak tssota khyimta vancho. 19 Ontena phyotacho, "Omüng emhae ji rothaka. 20 Etena ombo lüngthae echü müng ji jükha nghachecho tüv lo thechi sitavka lo. Orae ekümrümo na ombo rümcho to etena phyocheta. Tosi ombo müng ji bebem sana zetavka." 21 Reuben na hoji zoe Joseph shancho hunga ekhyo tssocho. Osi ombona "Etena ombo ji n lüngthatala" to onte ezocho. 22 "Rhomoni jükha jilo thechi ombo sitvaka osi ombo timeyanthuka" to phyolancho. Ombona jo shanchoe opo thüngi yilanthuk hunga hojito phyocho. 23 Joseph na ojenioang jana chiroale ontena ombo phongnrhüo sü okhe siphowo ji shaki khiyitasi, 24 Jükha ekyingu tüv lo thechi ombo sicho. 25 Ontena etsoyu tsota vanathüng zaktole Ishmael kyon Gilead lona Ejip metae yita hungcho. Onte odh jiang ji topvü wohanlo etheo rhüm tona tssüngthi nkong to hanthukcho. 26 Juda na ojenio jiang thüngi ezocho, "Etena ete nyui ji lüngthasi hoji mphoana ete tajo ntio lichola? 27 Jithüngona jo Ishmalite kyon shiang thüngi ombo yentavkalo? To tssona etena ombo meyam mek, phyolea ombo ete nyui, etena ejen oso motsünga." Tole ojenio jiangna hoji engacho. 28 Osi Midian shishoeden hojilo chiracho, ontena Joseph ji jükhae na süchei Ishmael kyon shishoe jiang thüngi janti rang mekyu na yentacho osi ontena Ejip metae ombo sosi yicho. 29 Reuben na jükha jilo oro zethechile Joseph n vana jo ombo mpensü jiang reroa nungracho. 30 Ombona ojenio jiang oyi ezocho, "Nungori ji jilo n van, aiyo kvüto lyuvla?" 31 Ontena nyanyan lüngthae Joseph phukthesi ji hojilo jümthechicho. 32 Osi ontena phukthesü ji hansi opo thüngi oyi phyotacho, "Ena shi khyochola, ni tsoe ji echi memek?" 33 Ombona hoji chetheo jina phyocho, "Ho, shijo ombo süka! Ora ekümrümo na ombo rümthaka. A tsoe Joseph ji mpvüroe sithaka!" 34 Hojito phyoa Jakob na nungra lona ombo sü jiang reroe sisi posta sü ekacho. Ombona ombo tsoe ji tsükona elümoto sunga nungracho. 35 Ombo tsoe osi otsolov jiang topvüna oro ombo ejichocho khatola ombona nngacho, osi phyocho; "Ana a tsoe ji tsükona nungrao shi hansi echüli rheyivka." Hojito ombo tsoe Joseph tsükona nungra mungcho. 36 Hojithüng Ejip lona Midian kyon jiangna Joseph ji mesao küpo tsüphoe tsüka Potiphar, mesaki enhyang jiang esopvüi ji thüngi yenchenlancho.
Juda ha Tamar Oni
1 Hoji yuta harümo Juda na ojenio jiang sisi Adullam yantsü kyon Hirah thüngi vanwo yicho. 2 Hoji lona Juda na Shua otsolov, Kanaan loroe tsüka nduki ombona ompvü soa vancho, 3 osi otsoe tsüka buki Er to tsacho. 4 Elani ompvüna ngaro hanlani tsokhying vanlancho osi hojijo Onan to tsacho. 5 Elani ompvüna tsokhying vanlamo jina ombo Shelah to tsacho. Tsokhying ji vanathüng jo Juda jo Achzib lo vancho. 6 Juda na ombo tsoe eramo Er ji engh etssov Tamar yanchecho. 7 Tokhatola Er etsophyo n mhomo ji tsükona OPVÜI na n mathacho, osi OPVÜI na ombo lüngthacho. 8 Tole Juda na Er ojenio Onan ezocho, "Owo nijenio emi ji thüngi yipa. Ompvü orhan elhi ntio licho sana nina tssoa, hojito tssona ni jenio na tsoronichen vamvüka." 9 Khatola otsoeoro lilea ombo echi tssov meka to Onan na ntsiwo jina ombona omi thüngi ponilan tssoana ojenio tsoronichen n thichethoku tsükona ombona oponi ethangi sithukcho. 10 Ombona hojito lyuo jina OPVÜI na ombo thüngi n mathav OPVÜI na omboha chüthokcho. 11 Tole Juda na orüv Tamar thüngi ezocho, "A tsoe Shelah ji n khyochethüng jo nipoki oyi emia vana." Ombona hojito phyo jijo Shelah ha ojenio jiang chüo ji esüa chüi siv küma to kyua phyocho. Jitsükona Tamar na opo ki elani yicho. 12 Yuta tara sülojo Juda engh ji chücho. Ombona nungra ji pükthakale ombo shom Adullah kyon Hira oni olyu tssan tssüpheüi Timnah lo wotacho. 13 Ombona Timnah lo ombo olyu jiang tssüilo yiala to ochona sana Tamar ezocho. 14 Tole ompvüna zaktole emi mpensü jiang sisi ompvü mha ji eyuksi Timnah lani Enaim yantsü ji pikhfü lo khothei vancho. Juda tsoe Shelah ji khyochethaka ha oni n vanthukala toji ompvü na mmhona ntsicho. 15 Juda na ompvü hungale ompvü mhashüng ji zesi lonsülonphyoe eloe tsayicho, ntiotssole ompvüna mhashüngi vancho. 16 Ombona lantssae ompvü thüngi chivo engacho, "Kvütola, kvüta khiyiala?" (ombo orüv jika to ombona n tsicho) tole ompvüna "Nina ntio a pivla?" to ezocho. 17 Tole ombona, "Ana atssideni na nyanyanro ni hanthokuka" Tole ompvüna janlancho, "Toka nina hoji a n pithüng ntiosana apiyae vata." 18 "Ana ntio ni piyae vavla?" Tole ompvüna ezolancho, "Nimying ejüpkaphen ji tona hojilo wozhü khyingo ji, elani ni khelo jarung ji to avayia." Ombona hojiang topvü pisi oni ponilan tssotacho osi ompvüna ngaro hancho. 19 Hoji süijo Tamar na oki oyi mhashüng ji khi vasi emi mpensü ji ekalancho. 20 Tothakale Juda na ombo shom Hirah jenchia nyanyanro ji tona ombona echümchak ndana ombo tsütsailan eloe ji thüngi elio ji to khilo wothukcho, khatola Hira na ompvü n hungcho. 21 Ombona Enaim lo kyon ejoma engacho, "Shilo lantssae lonsülonphyoe eloe jijo kvüla?" Tole ontena, "Shilo kvüthüng ha lonsülonphyoe eloe n vanhan" to ombo ezocho. 22 Hoji tsükona ombona kholani oyi "Ompvü nyancheka" to ombo ezocho. Osi hojilo kyon evamo jiang na kvüthüngha meta jilo lonsülonphyoe eloe n vanhan to phyoala to ombo ezocho. 23 Tole Juda na oyam khi e n makathuk hungka "tsütsailan jiang ji to ompvü vathuka" to phyocho. Anajo ompvü elov nchümcho khatola nina ompvü n hung küma totae. 24 Jito tssosi choro ethüm harümo jo ochona sana Juda thüngi ezocho, "Nirüv Tamar jo lonsülonphyoe kümi vana osi ompvüo ngaro hanthaka" Tole Juda na "süchoki rungtsüngi ompvü sia" to yidan picho. 25 Tole ompvü süchokathüng ji ompvüna omo thüngi heto oyi yencho, "Ana tsütsailan lio ji pvüi jina ngaro a hanthukchoka, zeta shiango ocho echi sana, omying ejüpkaphen ji tona wozhü shi, elani jarung shi to." 26 Juda na tsütsailan jiang chethei phyocho, "Ompvüna phyoji elana. Ana ompvü thüngi elhi n tssojam lia. Ana ompvü ji atsoe Shelah khi soa vanthoku likasi n tssojancho." Jitosi jo Juda na ompvü thüngi ponilan ntssov sicho. 27 Ompvüna ngaroji evamvü ji yuta janale nshümtso vamvü sala to ntsicho. 28 Ompvü na noa vanathüng ji ngaro tsüka ji khe ji njüpcho tole, zaktole ebuknilo ezei jina süporo emyom okhelo ntssükayia "Shijo tsokhfü jika" to phyocho. 29 Tole ombona okhe ji tssüngthelani siajo ojenio ji bukdencho, tole ebukni ezei jina "Nino hetoli tssürhüpi chiyiake!" to ezocho. Hoji tsükona ombo Peres to tsacho. 30 Hoji sülojo onyuro ji okhelo süporo emyom ji khyinga bukcho, tole Zerah to tsacho.
Joseph Tona Potiphar Engh Ji To
1 Ishmael kyon jiang na Joseph ji Ejip metae sosi oyi mesao küpo tsüphoe tsüka, mesaki enhyang jiang esopvüi ji thüngi yenthakcho. 2 OPVÜI na Jospeh thüngoe thei etho ombo pia vancho. Ombona Ejip kyon ombo pvüi ochona, 3 Potsow na Joseph etho pia olan topvü lo kyochiala to chethecho sana ji khelo vana vancho. 4 Potiphar na ombo emathayia ombo phajae tssothukcho. Ji tsükona ombona ombo ki osi ejüeli jiang topvü pono OPVÜI ombo tssothuka vancho. 5 Jithüngna benkae Joseph vamo jina OPVÜI na Ejip kyon osi ombo wopan elani ombo ejüeli jiang topvü lo mmhayicho. 6 Potiphar na ombo ejüeli topvü Joseph khelo thei siyisi ombo etsov jilo yaka ntia n wongkhyucho. 7 Joseph ji osak ophung mmhona opyon mmhomo jina yuta tara sülo jo ombo. pvüi ji engh jina ombo chokae oni nzo yiptav ombo ezocho. 8 Toaha ombona ekhirana ompvü ezocho, "Zeta, apvüi na avamo ji yakchia ntia ongkyu n liala. Ombona eli topvü a khelo atheyithaka. 9 Oki shilo ombo tona a to etho kheti, ombona ni yaka jo topvü a khelo a theyithaka. Tona kvütoli ana hojitüv n lan tssoe Potsow mhadungo mmen tssovla?" 10 Ompvüna eng akvüto Joseph ji khyima ha Joseph na ompvü n yipkyocho. 11 Tokhatola tsüngona lo Joseph na oki ombo elhi tssolo rheyile jithüng jo phajae ochia n vancho. 12 Ompvüna ombo phukthesü lona süyae ezocho, "oyi ayipkyoa" tole ombo phukthesü ji silanchia hapoe chiyile, 13 kvüthüng ombo mpensü ji silanchia chyithaka to ompvüna hungcho sana, 14 ompvüna oki jilo phajae jiang, topvü tsae ezocho."Zetava, a rapvü na oki sosi eyio Hebrew kyon shina omying e mmeniaka. Ombona a yipheni rhoro athüngi nlan tssov tssoaha ana owon tssoa tüngkachicho. 15 Ana erona zoale ombona phukthesü shi shaki sia tsani chiyicho." 16 Ompvüna Joseph pvüi ji eyi nandang phukthesü ji ompvü thüngi vacho. 17 Tosi ompvüna motsü ji heto ombo ezocho: "Nina Hebrew ezii sosi eyio jina a yipheni rhoro a nkhanzicho. 18 Osi ana eronale ombo phukthesü ji shaki a ndüngo sia hapoe chiyicho." 19 Joseph pvüi jina lüm tsukchei, 20 Joseph ji rhümhae mesao khe lona Joseph ji vüngpheni thechicho, osi ombona jilo vancho. 21 Khatola OPVÜI na Joseph thüngoe thecho osi evüngki ezei jinaha ombo nzancho. 22 Ombona Joseph ji evüngki evan topvü ombo pono vayicho. 23 Joseph na n tsicho jitüv evüngki ezei jina wongkhyuo tüv n licho; ntiotssole OPVÜI na Joseph thüngoe thei olan topvü lo mmhom ombo tssochethukcho.
Joseph na Evüngki Evan ji Müng Yichak Ezoala
1 Yuta tara sülo Ejip mesao zükhi echanpvüi jiha ombo hümri erüngpvüo ji wonina mesao lüm etsuko tüv elhi tssosoracho. 2 Ombona tsüphoe otsük eni shi pono lüm tsukcho, 3 hoji tsükona oniji Joseph vüngi elio jilo enhyang esopvüi ji ki thechicho. 4 Ontena evüngki elümoto sunga vantacho osi enhyang esopvüi jina Joseph ji onte phajae esüa tssothukcho. 5 Zümoalo jo zükhichan jiha hümri erüng ji woniata na omüng emhacho, osi omüng jiang yichak ji echümpotacho. 6 Joseph na enya thüng oni ndukle oni nungra vana huungcho. 7 Ombona oni engacho, "Ntio tssocho nchüngo hetata nini nungrala?" 8 Onina ezocho, "Eniatana omüng emhacho kasi ochina ha hoji yichak ji ezoe n van." Joseph na ezocho, "Omüng jiang yichak jo Potsow na etho pia khophithukala. Omüng jiang ntio sana a ezotava." 9 Tole zükhichan jina phyocho, "Omüngi ji a mhadungo jününgro zhü khero ethüm khyinga tüv licho. 10 Osi hojina owo jiang chenpvüto thera ebeni tssüngthi ethicho. 11 Ana mesao pvü ji bencho osi ana tssüngthi jiang hojilo zümthei ombo pia emhacho." 12 Joseph na ezocho, "Yichak ji heto; khero ethüm jijo tsüngon ethüm. 13 Mesao na tsüngon ethüm sülo ni vachiv, nlan ni siyiv osi ni elhi jilo ni kyochilam, ovüngthüng nina ombo zükhichan tsso ji esüa ombo pvüji elani ombo pilamka. 14 Tokhatola ni echi mmhonthakna a nzansi a nchümchekhe. Ana ha shilona chiyichev tsükona mesao thüngi a phyoyiv a nchümchekhe. 15 Otsotso tssoana aiyo Hebrew metae na rhümae a sosi yicho, osi shilo Ejip loha ana ntia woricho n li, toaha aiyo vüngpheni vanala." 16 Hümri erüng jina zükhichan ji yichak ji mmhona to ntsiale omboha Joseph thüngi heto ezocho, "Anaha heto emhacho. Ana hümri tekho ethüm echungtae a kvürina hansi yia vancho. 17 Tekho omhawoe jilojo mesao echi hümrilan taro jücho, tole woro jiang na hojiang ji tsota emhacho." 18 Joseph na janlancho, "Yichak ji heto; tekho ethüm jijo tsüngon ethüm. 19 Mesao na tsüngon ethüm sülo ni vachiv osi kvüri ji ni voniv! osi ni tsük ji oyaki donkachi ni siyiv osi ni so jiang worona ni tsoyiv." 20 Tsüngon ethümo tolo mesao jina ombo ebuk tsüngono tukhü nsüngri ombo küpo tsüphoe jiang tsacho; 21 ombona ombo zükhichan ji ombo elhilo rheyithuklancho, 22 Tolea hümri erüng jijo chüthukcho. Hojiang topvü Joseph na phyo ji benkhancho. 23 Tokhatola zükhichan jina Joseph ji ntia n chümphiv mhecholangi ombo sicho.
Joseph na Mesao Müng ji Khophiala
1 Nzyu eni sülo jo Ejip mesao na omüngi ji Nile zhükhfü tssae mangi vana emhacho, 2 hojithüng mangsü beleta pherüo tüv tiying zhükhfüi na chiyi eroyoe yantsota vancho. 3 Jithüng mangsü thanpo kvüria oryu njüpa tüv tiying chiyilancho. 4 Ontena chiyi zhükhfü tssae mangsü beleo jiang nzo yantsota vansi beleo tiying jiang rumi tsoe sitacho. Jithüng mesao ji yipjungchicho. 5 Ombona yiplanle omüng thanpo emhalancho. Otssuk dunga lona ethi tiying khyingi rani licho. 6 Tole ethi thanpo lijüng ezhü rhecho epyimra tüv tiying chiyi hojiang na ranbenthako jiang tsoe sicho. 7 Mesao jina yipjüngchile ombona omüng emhao jiang nchümchecho. 8 Ombo wongkhyuo jina enyathüng ji Ejip lo methevüjae topvü tsacho. Ombo na omüng ji onte ezoaha ochina ha eroroe ombo n zochecho. 9 Tole zükhichan jina mesao ezocho, "Ana orithako ji phyochakala. 10 Nina nilüm tsuki hümri erüng ji eni enhyang esopvüi ji ki vüngpheni e thechicho. 11 Zümoa jo enita na omüng emhacho osi yichak echümpo tssocho. 12 Hojilo Hebrew eboeroro, enhyang esopvüi ji phajae ha vüngi vancho. Ena omüng jiang ombo ezotale ombona yichak jiang e zocho. 13 Tole ombona phyoji benkhancho: nina a vanphen ji apilansi, hümrirüng jijo chüthukcho." 14 Mesao jina Joseph tsalo wothukcho, osi ombo ji zaktole vüngpheni na sosi yicho. Ombona kvüri tssüi sisi mpensü dungphisi mesao mhadungo chiwocho. 15 Mesao na ombo ezocho, "Ana omüng emhale ochina ha yichak ji a n zoala. Nina omüng yichak ntsia to ana zocho." 16 Joseph na ezocho, "Tsüphoeyo, ana jo n tssoche, tolea Potsow na etho a piv." 17 Mesao jina phyocho, "Ana omüngi ji Nile jürani manga vanle, 18 mangsü beleta pherüv tiying zhükhvü jilona chiyi eroyoe yantsota vancho. 19 Jithüng ji mangsü thanpo kvüria oryu njüpa tüv tiying chiyilancho. Hojiango ana Ejip lo hungthakcho yolo mangsü nkungratsowo jiang. 20 Mangsü kvürio jiangna beleo jiang nzhüi sicho, 21 tokhatola tathi vanphen ji esüa kvürio jina ochina ha hoji ntsicho. Jithüng a yipjüngchicho. 22 Ana hetoha emhacho, Tssuk dung motsüngalo ethi ranbencho tiying khyingcho. 23 Tole ethi thanpo lijüng ezhüna echükrocho epyimra tüv tiying chiyicho, 24 Osi tssukdung kirothako jiangna beleo jiang nzhürae sicho. Ana omüng ji methevüjae jiang ezole ontena yichak ji a n zokhukcho." 25 Joseph na mesao ji ezocho, "omüng enita yichak motsünga tae, Potsow na ntio tssov sa sana ombona ni ezothaka. 26 Mangsü belev tiying jijo nzyu tiying, elani otsukdung ranbencho tiying jiangha nzyu tiying, onte yichak jo kheti. 27 Mangsü kvüriv tiying sülani chiyio jiang tona tsukdung lijüng ezhü na echükrocho tiying to jiango otssi vara nzyu tiying. 28 Ana ni ezothako ji esüa Potsow na ntio tssov sa sana hoji ni ejücho. 29 Ejip meta topvülo emhokthav pvülyuhanlyu nzyu tiying livka. 30-31 Jisülo jo otssi vara nzyu tiying livka osi hojina meta ji yantsathako jina nzyu tiying mmhonthako ji mpato mhechoe siv. 32 Nimüng ji esüta emhalamo jijo, Potsow na n sungu hoji benthoku, osi yuta ji ombona kokathako ji tsükona." 33 Nina hungjan-rüjan lia kichuk ejüi kyon ethüngcherae meta shi zethuka. 34 Nina tsüphoe ejoma ethüngchelani pvülyu nzyu jianglo joncho-rücho lona mongochia khachei varhyuthuka. 35 Pvü lyu nzyu jianglo otssuk omüm jiang yantsü akvülo hantherae hoji nhyaktao tüv etho pia. 36 Hoji etssov jiango Ejip meta topvüto otssi vara nzyu tiying etsao jilo echi nkümi vathuka. Hojito tssona kyon jiang khangu meka.
Joseph ji Ejip lo Esapvüi Kümthukala.
37 Mesao jina ombo tsüphoe jiang nzo tssoe hoji madang ji khichocho, 38 osi onte ezocho, "Etena kvüthüngha Joseph lo mmhonkao kyon hungu meka, Potsow mon ejüi kyon tsüka ka." 39 Mesao jina Joseph ezocho, "Potsow na shiang ji ejüthako jina nilo hungjan-rüjan osi nchümri likao ochia n van to zechethaka. 40 Ana a meta shi ezepvüi ni kümthokuka, osi a meta kyon topvüna ni yi engavka. Ni etho jo a küpo tsotso ji tssovka. 41 Ana Ejip lo esapvüi ni kümthukala." 42 Mesao jina ombo yingro lo mesa mying ejüpkaphen yingrüm ji phachei Joseph yingro lo phungtheyicho. Ombona sünyipvü phungthesü mmhom ombo hanthuksi evüngo shona zhü eyikthukcho. 43 Ombona mesao zotoro enioto ji ombo pia tsankathuksi, ombo enhyang jiang khi ombo vüngi na wothuka, "Olan vayia! Olan vayia!" to tünga wothukcho. Hojito Joseph ji Ejip esapvüi kümthukcho. 44 Mesao jina ombo ezocho, "Aiyo mesao jika Ejip lo kyon ochinaha ni yizüng n khiv okhe osi ojo lea tsakav meka." 45-46 Ombona Joseph ji Ejip mying Zaphenath Paniah to tsayicho. Osi Helipolis lo pvüti Potiphera otsolov Asenath ji ombo engh tssothukcho. Joseph na Ejip mesao küpo esae kümo jithüng jo ombo nzyu thümro tssothakcho. Ombona mesao kina khochi meta topvü khyua wocho. 47 Nzyu tiying mmhom jithüng joncho-rücho elümoto licho. 48 Osi Joseph na hojiang hanrhyue yantsü jilo varhyucho. Yantsü akvü nkonphia oli jiang lona richo jiang ombona hoji yantsü jilo hanrhyucho. 49 Otssukomüm khosha richo jina Joseph na n madangrao tsso jina madangi n zev sicho jümangi hajang tata tssocho. 50 Otssi vara nzyu jiang n yithüng Joseph na Asenath lona otsoe otsük eni vancho. 51 Ombona phyocho, "Potsow na a ezüp yuta jiang osi a wopan jiang a mhechothukthaka", jitsükona ombona otsoe ovüngo ji Manasseh to tsacho. 52 Ombona hetoha phyocho, "Potsow na a ezüp meta shilona otsoeoro apithaka." to phyoa tsokhying enioto ji Ephraim to tsacho. 53 Ejip na pvülyu nzyu tiying ji yakracho, 54 osi Joseph na phyo ji esüa otssi vara nzyu tiying benkhancho. Meta thanpo topvülo vara licho, khatola Ejip lojo etsoyu etsson licho. 55 Ejip kyon jiang na khangale ontena mesao thüngi etsoyu chona kyatacho. Jitsükona Joseph thüngi wotale osi ombona phyo ji ephan tssotale to onte ezocho. 56Vara ji tsükshikata meta topvülo rankata yicho, jitsükona Joseph na oson jiang chonchi Ejip kyon jiang etsoyu shithukracho. 57 Vara ji tsükshio jina limha topvü lona etsoyu shiilo Ejip metae roracho.
Joseph Ojenio Jiangna Ejip Metae Etsoyu Shiilo Yiala
1 Ejip metae etsoyu lia to Jakob na zoale ombona otsoe jiang ezocho, "Ntena heto lyutava, 2 Ejip metalo etsoyu lia to yivon zoka, owo etsoyu shitava, to mekana khangtsüi echüvka. 3 Jitsükona Joseph ojenio otsük taro jiangna Ejip metae etsoyu shiilo wotacho, 4 khatola Jakob na Ben jamin jo olani na tssolüp phyolüp kyua n wothukcho." 5 Kanaan loha vara lio jina Jakob tsoeden jiangha oyam nzo etsoyu shiilo Ejip metae wotacho. 6 Ejip esapvüi Joseph na limha topvü thüngi etsoyu sithoka vancho. Jitsükona Joseph ojenio jiangna oro ombo mhadungo nkhümthei khümtacho. 7 Joseph na ojenio jiang hungale ombona onte chethecho, khatola ombona n tsicho esüa etsophyocho. Osi ombona haruka esüa onte engacho, "Nteno meta kvülona rotachola?" Ontena janlancho, "Eiyo Kanaan lona etsoyu shilo rotachoka." 8 Joseph na ojenio jiang chekataha ontena jo ombo n chethecho. 9 Ombona emhao müng ji nchümchei onte ezocho, "Nteno chepyimdenla, ntena e meta kvülo n penri lichosana ji chelo rotachola" 10 Tole ontena ezotacho, "Meka tsüphoeyo, ena ni phajaeden kümi etsoyu shilo rotachoka. 11 Eiyo topvü jeni motsünga tae osi e topvü ntsae kyonden." 12 Joseph na onte ezocho, "Meka, nteno e meta kvülo n benri lichosana ji chelo rotachoka." 13 Ontena ezocho, "Tsüphoeyo, eiyo Kanaan lo kyon tsüka tsoeden ejeni taro eni vancho, khatola ejeni tsüka chüthaksi wokhatso jijo oki apo thüngi vanka." 14 Joseph na onte ezocho, "Ana nte ezothaka to" "Nteno chepyimden, 15 Ana hetoli ojang nte tssovka: Ana mesao myingona echümchakala, ntena nte onyuro wokhao ji shilo n rothuk thüng nandang jo ana nte yithokvü meka. 16 Nte yulo tsüka na oyi ombo sosi roa. Jilo enhyo jiango ntena phyoji otsotso to n tsithüngjo enhyang khelo nte vanthokuka, To n tssona ana, mesao eküm vamo ji esüa, nteno chepyimden tae" 17 Jitosi ombona tsüngon ethüm onte vüngcho. 18 Tsüngon ethümoto lo Joseph na onte ezocho, "Aiyo Potsow ekyui kyon, jitsükona ntsata motsünga vatasi eküm nte shanchoyivka. 19 Ntena phyo jiang ntsa to ntsiv tsükona nte yulo tsüka na vüngpheni vansi enhyo jiang na etsoyu shithako jiang hansi oyi nte wopan khangta evamo jiang tsothuka. 20 Tosi ntena nte onyuro wokhao ji athüngi sosi rotava. Hojilona ntena ntsa phyoala to ji chethevka, osi ana nte chüthoku meka." Ontena hoji khichocho osi phyotacho, 21 "Oh, etena enhünga ezüpta vamo shijo etena ete ojenio tsüka ji thüngi ntio elhitacho sana hoji man ezüptala, ombona ezüp tsüphovlo vani nzanchiv yanaha etena n ngayicho. Jitsükona eteno ezüp shilo vana." 22 Reuben na phyocho, "Ombo timeyanta to ana nte ezocho, khatola ntena n gacho. Enhungo eteno ombo chüthoko jokheman ji hungala." 23 Ontena phyotao jiang Joseph na ntsia, khatola ontenajo hoji n tsicho, ntiotssole ontena oyi elon yakchia ombo thüngi janta evamo ji tsükona. 24 Joseph na onte nkachoe kyacho. Ombona oyi nsanchelanale elani chivo, Simeon tsachuki onte mhadungona chüngcho.
Joseph Ojenio Jiangna Kanaan lo Elani Yiala
25 Joseph na ojenio jiang sükvü jianglo etsoyu etsson lenile osi elani olani etsoyuvha pile to yizüng picho osi hoji esüa tssocho. 26 Ontena etsoyu shithako jiang khi onte Gadho jiang poni oha tssoe khochitacho. 27 Ontena olani yiptao meta jilona, onte yulo tsükana oha ji lanphe Gadho ji phiv ojak khichele ombo rang ji oponi thei lia hungcho. 28 Ombona ojenio jiang tsae ezocho, "Arangji apilancho." "Shilo ahae jüa!" Tole ontena ekhena phyotacho, "Potsow na ete thüngi ntio etssoyithakcho to!" 29 Ontena Kanaan lo opo thüngi chiyiale onte opono ntio tssocho sana jiang topvü rüa ombo ezotacho. 30 "Ejip lo esapvüi jina eiyo chepyimden ombo meta chelo rotacho to phyoa elümoto haruka ejancho. 31 Ena eiyo echepyim mek, kyon mmhomden ka to ezotacho. 32 Eiyo jeni taro eni osi opo motsünga tsoeden, khatola tsüakjo chüthaka osi wokhao jijo Kanaan lo apo thüngi vana to ezotacho." 33 Tole ombona phyocho, "Nte ji kyon mmhomden toji ana hetoli ntsivka. Nte yulo tsüka na andüngo vana osi enhyo jiango etsoyu hantasi oyi nte wopan khangta evamo jiang tsothuka. 34 Osi nte ojenio wokhao ji sosi a thüngi rotava, to tssona nte ji chepyimden mek, tolea kyon mmhomden to ana ntsiv. Ana nte ojenio wokhao ji nte pilam osi ntena shilo vani shishoe kümrakhoka." 35 kvüthüng ontena oha jiang lichetacho sana otsük akvüna ombo rangtsen ji ohae jücho nungracho; osi ontena orang jiang hungale onte osi opo Jakob topvü ekhentsüngracho. 36 Opo na onte ezocho, "Ntena atsoe topvü a monikhanthoku ke? Joseph monthaka! Simeon ha monthaka, enhungo ntena Benjamin hansi yitav sala. Shiang hetopvüto epüp jo ana khiala!" 37 Reuben na opo ezocho, "Ana Benjamim ji ni thüngi sosi n yilana tssona, nina atsoe otsük eni jiang lüngthae sia. A pono tssothuka, tona ana ombo sosi yilamka." 38 Tokhatola Jakob na phyocho, "A tsoe shina nte phana rochev meka, ojenio ji chüthaka osi ombo tae vana. Olanina ntiosana ombo tssochojo, aiyo eson küma ntena anungrathoko jina a chüv."
Joseph Ojenio Jiangna Benjamin sosi Ejip lo Yitala
1 Kanaan lo otssi vara ji tsükshikacho, 2 Osi Jakob wopan na Ejip metae na etsoyu hansi eyio jiang tsokhanthakale, Jakob na ombo tsoe jiang ezocho, "owo ete etsoyu tara shitalana." 3 Tole Juda na phyocho, "Esapvüi jina e jenio wokhao ji n sonhyav jo ombo ndüngo e nrothuk to rarünga ezocho. 4 Küma nina enyuro ji ephana rothukna owo etsoyu ni shiyivka. 5 Osi nina ombo sosi e n wothukna eiyo wov meka, ntiotssole kyon jina e nyuro ji n jüv jo kvüthüngha ombo thüngi e n rothuk to phyocho." 6 Jakob na ezocho, "Nteno ntio tssona nte onyuro vanlana to ombo ezotasi hetata ezüp apitala?" 7 Ontena ezotacho, "Kyon jina ete wopan motsü tae enga mongo jina, nipo eküm vevan? nte ojenio thanpo vevelan?" to enga mongo jina ena ombo janlamo tssoe sicho. Ombona enyuro ji sosi role to ezov to ena kvütoli ntsivla? 8 Juda na opo ezocho, "Nongori ji ephana rothuka ena zakto khochivka, to tssona ete ochia khangtsüngi echüv meka. 9 Ana a eküm na züngchak vatala, osi nina ombo tsükona jo to apono avayia. Ana ombo ji ephyoerüv n khyingna ni thüngi solansi n yia tssona eküm echung n lan ji ana hamvüka. 10 Etena shi nhyakta n vanvo, etena hoji osi yenjo enilea yilanthaku." 11 Opona onte ezocho, "Toka jito tssona, ete metalo yantso mmhontso jiang ohae thei hantasi esapvüi ji yantsotava; tssüngthi nkyicho tara, Ohanrhüm, nothi tsüng, elani Almond to hantava. 12 Orangha ovüngthüng tata eni hantava, ntena ohae shyucheo rang ji woricho tssokhuka, to tssona hoji ha pilanchevka. 13 Nte onyuro ji sosi zakto khochitava. 14 Thotsü Potsow khi nte khonzanthoki kyon ji khi Benjamin tona nte ojenio tsüka ji to nte pilanthokuka. A tsükona jo atsoe emon licho tssona mom." 15 Jeniden jiangna yantso jiang hanta, orang ji ovüngthüng tata eni hanta tosi elani Benjamin sota tosi Ejip metae khochitacho. ontena owo Joseph mhadungo chivotacho. 16 Joseph na onte razhülo Benjamin hungale ombo ki ezeo phajae ji ezocho, "Kyon shiang sosi aki yitava, onteno nchüngo aki tsovka, ekümrümo tatsüngi etsoyu methaka." 17 Phajae jina hoji ephan tssocho osi jeniden jiang ji Joseph ki sosi yicho. 18 Oki onte sosi yiale ontena kyua heto nchümtacho, "Yenjo ovüngo jilo orang ji tsükona shilo esosi yicho. Ontena e sakae Gadho shiang khitasi onte phajae ekümthoku sala." 19 Jitsükona ontena kibüng jilona phaje ezepvüi ji ezotacho, 20 "Tsüphoeyo, ena ovüngthüngha etsoyu shiilo yenjoa rotathaka. 2i Ena oki yiathüng olani nchentasi e ha jiang shyui zetale otsük akvü na ombobo rang ji ombobo hae eben jüa hungcho. Jitsükona ena hoji nte thüngi hantasi rolantacho. 22 Ena elani etsoyu shilantav tsükona ha orang tara hana. Ochona erang jiang e hae theracho sana ena n tsi." 23 Phajae jina phyocho, "Tiwongkhyutava, osi ti-kyutava. Nte Potsow osi nte opo Potsow jina orang jiang nte thelanicho tssovka. Anaha oman jo nte khiyicho, tosi ombona Simeon sosi onte thüngi chiyicho." 24 Phajae jina jeniden jiang oki sothecho. Ombona ojo epyov ojüha onte pisi onte Gadho jiangji ojak phiyicho. 25 Ontena Joseph nzo etsoyu tssotav sala to phaje jina onte ezowo jina Joseph na englongjüngo oki yile ontena yantso jiang ombo piv methaki vantacho. 26 Joseph na oki rheyile ontena yantso jiang bentasi oki rhowo Joseph mhadungo nkhümthetacho. 27 Ombona onte yentsa yivon engasi phyocho, "Ntena nte opo vana to a ezotacho, ombo kvüto vana, ombo mmhona eküm vanpvü memek?" 28 Ontena ezotacho, "Ni phajae teritso, e opo ji enhüngha vana osi mmhona vana." Tosi ontena nkhuk tseni ombo khümtacho. 29 Joseph na onyuro Benjamin hungale phyocho, "Tona nte onyuro wokhaotso ji shi nüng? ntena ombo motsü a ezoji Potsow khi ni mmhayithokuka, a tsoe." 30 Jitosi Joseph na zakto chiyi sicho. Ntiotssole ombo ongo tsükona ombo lümbüm ji nzan enyip na pyingcho. Ombona kyahungo jina ombo yipheni chiyi kyacho. 31 Ombona omha mmyosi chiyi ombobo sayata, etsoyu jiang hansi chiyile to choncho. 32 Joseph jo tssisaro motsüngalo ekachiyisi ojenio jiang tssisaro thanpoe ekachiyicho. Hojilo tsanhyao Ejip kyon jiang ha saro thanpolo ekachiyicho, ntiotssole onteno Hebrew jiang nzo tsorhyutav jo teriv esüa nchümcho. 33 Jeniden jiango Joseph zechiwo eranina etsüngi nungotso jinandang reni tsotacho. Hojitolyui khukthetao ji ontena ntsaile onte omhae zekachita emhuktacho. 34 Onte ji Joseph tssisa jilona onte tssichanhanchancho, osi Benjamin jo thanpoe jiang shayio jitata mungo shayicho. Osi ontena Joseph nzo tsoyutasi onte kinoracho.
Opvü Momo Ji
1 Joseph na ombo ki ezeo phajae ji ezocho, "Kyon shiang haa jianglo onte hankhuk etsoyu lenia, osi onte otsük akvü rang ji oha poni lenkayia. 2 A janti pvüi ji onte yulo nungotso ji haalo otssuk rang oman ji nzo lenia." Phajae jina ombo ezoji ephan tssocho. 3 Nyazüngina jeniden jiang na onte Gadho jiang nzo khochitacho. 4 Ontena yantsüi na tara tae yihana Joseph ana ombo ki phaje ji ezocho, "Zakto kyon jiang phana woa. Nina onte phayana ezoa, ntio tsükona mmhom nte tssoyile n mhom khi pilanala? 5 Ntiolyui nteno apvüi pvü ji efütachola? Hojijo ombo yuphen osi methephen ji. Ntena nlan tsüphov tssothaka!" 6 Phajae jina onte phayatale hojito onte ezolancho. 7 Ontena ombo ezotacho, "Ntio etsso e ezoala, tsüphoe? Ena hojito n tsso to echümala. 8 Nina ntsia, ena orang ehae jüwo jiang ji Kanaaan metae na hanlansi oro ni picho. Tona kvütoli ena janti mekana shona ni efüyivla? 9 Tsüphoeyo, e yulo hoji hancho shyuchetana ombo chüthuka, osi e topvü na ni phajae kümvüka." 10 Ombona phyocho, "Hotoka, tolea opvü hamo jitae na a phajae kümvüka, osi thanpoe jiango yikhuka." 11 Ontena zakto onte haa jiang ejümchorae ombobo haa ji shyue zetacho. 12 Joseph phajae jina onte yulo erantso jilona benkae shyui zeyicho, osi opvü ji Benjamin hae na shyuchecho. 13 Jeniden jiangna nungra lona mpensü jiang reroe sita oha jiang tssolani hantasi yantsüi jiwoe elani yilantacho. 14 Juda tona jeniden jiang tona Joseph ki chiyile ombona hojilo vanpvü tssocho. ontena ombo mhadungo nkhümthetacho, 15 tole Joseph na ezocho, "Nteno ntio elhitachola, a esüa tsüphoe na methei nte n yanchev tsayichoke?" 16 Juda na janlancho, "Tsüphoeyo, ena ntio ni ezovla? Ena kvüto ekhiramla osi ebobo kvütoli ntsachevla? Potsow na e nlan ji oponi chiyithukthaka. Ocho hae opvü jücho sana ji tae mek, e topvü ni phajae ekümthukthaka." 17 Joseph na ezocho, "meka, ana kvüthünga hojito lyuiv meka! A pvü hamo jitaena a phajae kümvüka. Nteno mmhona nipo thüngi yitava."
Juda na Benjamin Tsükona Jonjiala
18 Juda na Joseph thüngi chungo ezocho, 'Tsüphoeyo, nzansi ni thüngi etancho a nsanthuka. A thüngi lüm ti-tsuka, nino mesao ji nini khetika. 19 Tsüphoeyo nina epo osi ojenio thanpo vevancho sana to e engacho. 20 Tole ena ni ezocho, 'Ena e opo eson vana osi e onyui tsüka apo esonlani bukcho tsüka vana to. Nungori ji ota jo chüthaka, osi oyo motsünga tso jo ombo tae vana, opo na elümoto ombo nzanalana. 21 Tsüphoeyo, tole nina ombo zehungilato ombo sosi role to e ezocho, 22 tole nungori jina opo yaki n voche, ombona woana opo ji chüv to ni ezocho. 23 Tole nina hoji n sov jo enhungo ni thüngi e n rothuk to phyocho.' 24 Ena e opo thüngi kholani oyi nina ezo jiang ezotacho. 25 Tole ombona oro etsoyu tara shitalanle to e ezocho. 26 Tole ena ezocho, "Ena n oche, ena e onyuro wokhao ji n sov jo kyon ji mhadungo n chiwoche. Ni tsoe nungotso jina e phana rosanati ena ochev." to ombo ezotacho. 27 Tole e opona e ezocho, "A eloe Rachel na bukcho jo otsoe eni tae to ntena ntsia. 28 Onilo tsüka na a sisi yithaka, omboji orae ekümrümo na rüngroe sicho tssov, ntiotssole ombona khochisi ana ombo n hunghan. 29 Enhungo ntena shi a thüngi na sosi osi ombolo ntiosana tssochojo, eson a hetüv jo ntena anungrathuko jinalea a chüv." 30-31 Juda na ezolancho, "Enhungo, tsüphoeyo, ana a nyui shi n sov oki yicho jo apo na ahungpvüto ombo chüv, ntiotssole ombo eküm jo nungori jina sayasi vanala. Hoji tsükona nungori ji n sona eson küma nungra lona lea ombo chü khukka. 32 Ji ekalo a eküm na apo thüngi ntsatae rocho, ana nungori shi sosi n yilana tssona nlan ji eküm echung apile to. 33 Jitsükona tsüphoeyo, nungori ji thung ji ana ni phaje tssoa shilo vamvüka, ombo ojenio jiang nzo ombo yithuka. 34 Nungori ji n jüv ana kvütoli apo thüngi chiyilamvüla? Hojitüv emhukelüm apona ndukujo ana n zekhuk."
Joseph na Ombo Ochosana Ojenioang Ezoala
1 Joseph na ombo lümbüm chungina nchüma vamo ji n rümkhoku sithako jina ombona phajae jiang topvü hapoe chiyithukcho. Joseph na ombo ocho sana ojenio jiang ezoathüng ombo ndüngo ochia n vancho. 2 Ombona elüm emhena kyao jina Ejip kyon jiang na zoracho, osi yithen jina mesaki jancho. 3 Joseph na ojenio jiang ezocho, "Aiyo Joseph ka. Apo eküm vananüng? Khatola ojenio jiang na shi zoale ekhentsüngrae ombo n janlanchecho. 4 Tole Joseph na ezocho 'Nzansi sena yitava' ontena sena wotale ombona ezocho, "Aiyo nte onyuro Joseph ntena Ejip metae yentao jika. 5 Ntena hepi a yentao ji khi etho tijaktava, osi nte bobo nlan tipitava. Potsow na kyon eküm shanchothoku tsükona nte vüngina hepi a rothukchoka. 6 Meta shilo otssi vara yisi nzyu eni tae tssohan, elani nzyu mongo jo oli ejom osi eriv n lio yuta lihana. 7 Potsow na hetüv ezüp lona nte shanchoe nte tsoeroro jiang kümchethoku tsükona ovüngna hepi ayithukchoka. 8 Jitsükona hepi ayithoko jijo ntena mek. Khatola Potsow na. Ombona mesao küpo thanpoe tsüphoe jiang yulo ntssontso ji akümthukthaka. Aiyo ombo meta totona ezepvüiji. Aiyo Ejip mpüm esapvüi ji. 9 Enhungo zakto apo thüngi oyi ombo tsoe Joseph na heto phyoala to ezotava: 'Potsow na Ejip meta mpüm lo esapvüi a kümthukthaka; zakto athüngi roa. 10 Nteno a ndüngo Goshen metalo vankhuka, nte tsoeoro, tsorüiden, nte olyuden, nyanyanden, mang süden osi nte ejüeli topvü hansi hepi yitava. n Ntena Goshen lo vana tssona ana nte zejamvü. Otssi vara nzyu mongo lilanhan ji tsükona ana nte, nte wopan osi ekümrümo jiang, nte n khangthukhungala." 12 Joseph na phyolancho, "Enhungo nte topvüna, Benjamin naha aiyo Joseph to a ntsithaka. 13 Aiyo Ejip lo kvüta etho eli-i sana apo ezoa osi ntena ntio hungthakcho sana jiang topvü mbo ezoa, osi zakto ombo sosi hepi yitava." 14 Ombona Benjamin epvülo vonyasi kyacho, Benjamin naha ombo khayasi kyacho. 15 jitosi ombona kya ojenio jiang otsük akvü khayae ntsüphia wocho. Jisülojo ojenio jiangna ombo thüngi thyuda yicho. 16 Joseph ojenio jiang rochoto yithen jina mesaki janale mesao osi tsüphoe topvüna longshitacho. 17 Ombona Joseph ezocho, "Ni jenio jiang ezoa, ekümrümo lo oha tssoe Kanaan metae yitava to ezoa. 18 Onte opo osi wopan jiang sotasi hepi yitava to ezoa. Ana Ejip lo meta mmhontso ji onte pivka, osi onte eküm süphiv tsükona etsson hunguka. 19 Ejip lona zotoro khi hantasi oyi onte tsoeni, ngaro osi opo ha to hojianglo thei sotasi yitale to onte ezoa. 20 Ontena tsütsailan n hanrav silanchilea tiwongkhyuta to ezoa, Ejip lo liko mmhontso ji onte echi tssovka." 21 Jakob tsokhying jiangna onte ezo ji esüa tssotacho. Joseph na mesao yi ji ephan zotoro tona olani etsoyu to onte picho. 22 Ombona onte otsük akvü mpensü tongphiphen tajo onte piracho, tokhatola Benjamin jo ombona janti rang nzo ethüm tona osü sülan mongo to ombo picho. 23 Ombona ombo echi ha Ejip lo tsütsailan mmhontsov tona Gadho taro, tsünghanrho, hümri tona olani etsoyu to Gadho taro hanthukcho. 24 Ombona ojenio jiang khochithuksi, "Olanina ti-khontale" to onte ezocho. 25 Ontena Ejip lona khoe Kanaan metae opo thüngi yitacho. 26 Ontena opo ezotacho, "Joseph jo eküm vana!" "Ombo Ejip meta mpüm tolo esapvüi ji!" tole Jakob ji ngangtsüngi sisi onte n longtsü khukcho. 27 Khatola Joseph na onte ezo jiang topvü ontena ombo ezotacho, Joseph na ombo sosi yile zotoro hanthuko jiang hungale ekhemo ji mmhoni sicho. 28 Ombona phyocho, "A tsoe Joseph ji eküm vanchoke!" "Ana nte engakhuko ji jitae! Ana a n chüthüng owo ombo ndokuka."
Jakob Tona Ombo Wopan to Ejip Metae Yitala
1 Jakob na ombo eli topvü oha tssoe hansi Beersheba lo owo opo Isaak Potsow thüngi erungthan picho. 2 Potsow na zümolo ombo hungthuki, "Jakob" to ombo tsacho. Tole ombona, "Hao aiyo helo vanka" to janlancho. 3 Potsow na ezocho, "Aiyo Potsow, nte opoang Potsow jika," Ejip lo ewov ti-kyua; ana hojilo na tsoronichen jiang jipo tsüphov kümthukvüka. 4 Ana ni nzo Ejip lo wovka osi ana ni tsoronichen jiang meta shilo sosi yilamka. Ni nchüthüng Joseph na ni ndüngo vamka." 5 Jakob na Beersheba lona khochicho. Ombo tsoe jiangna ombo, onte ngaro jiang tona onte engh jiang to Ejip mesao na hanthuko zotoro jilo rheyithukcho. 6 Ontena ekümrümo jiang tona kanaan lona ejüeli hungwo jiang to hantasi Ejip lo yitacho. Jakob na ombo tsoronichen topvü sonhyacho: 7 ombo tsoe jiang, tsorüi jiang, tsolo jiang tona orüv jiang to. 8 Jakob wopan ombo nzo Ejip lo yio jiango, ombo tsokhying eramo Reuben 9 Reuben tsokhyingden: Hanoch, Pallu, Hezron, tona Carmi to, 10 Simeon tona ombo tsokhyingden: Jamuel, Jamin, Ohae, Jachin, Zohar, Kanaan eloe tsokhying Shaul to. 11 Levi tona ombo tsokhyingden: Gershon, Kohath, tona Merari to. 12 Juda tona ombo tsokhyingden: Shelah, Perez tona Zerah to. (Juda tsokhying thanpo jo; Er, Onan to jo Kanaan lona chücho.) Perez tsokhy ingden jo Hezron tona Hamui to. 13 Issakhar tona ombo tsokhyingden: Tola, Puah, Jashub, tona Shimron. 14 Zebulun tona ombo tsokhyingden: Sered, Elon, tona Jahleel to. 15 Shiang jo Lea na Mesopotamea lona otsolov Dinah ephalo Jakob bukio tsokhying jiang. Leah yakchia ombo tsoronichen licho tssotsüi thümrosi ethüm. 16 Gad tona ombo tsokhyingden: Zephon, Haggi, Shuni, Ezbon, Eri, Arod tona Areli to. 17 Asher tona ombo tsokhyingden: Imnah, Ishvah, Ishvi, Beriah, tona onte oyuloe Serah to. Beriah tsoeden jo Heber tona Malchiel. 18 Otsük taro tiruk shijo Laban na otsolov Leah pio ezipvüi Zilpah lona Jakob tsoronichen jiang. 19 Jakob eloe Rachel na tsokhying otsük eni ombo bukicho. Joseph tona Benjamin to. 20 Ejip metae na Joseph na tsokhying eni vancho, Manasseh tona Ephraim to Heliopolis lo pvüti Potiphera otsolov Asenath lona bukcho. 21 Benjamin tsokhyingden jiango, Bela, Becher, Ashbel, Gera, Naaman, Ehi, Rosh, Muppim, Huppim tona Ard to. 22 Otsük taro mezhü shijo Rachel lona Jakob tsorochen 23 Dan tona ombo tsoe Hushim. 24 Naphtali tona ombo tsoeden: Jahzeel, Guni, Jezer, tona Shellem. 25 Otsük tiying shijo Laban na otsolov Rachel pio eziipvüi Bilhah lona Jakob tsoronichen. 26 Jakob tsoronichen Ejip metae yio jiango tssotsüi rukrosi tiruk, jilo jo ombo tsoe jiang engh jiang n khanhya. 27 Ejip lona Joseph tsoe otsük eni bukcho, hojiang thenhyae tssotsüi Jakob wopan Ejip metae yicho ekhatiying.
Ejip lo Jakob Tona Ombo Wopan to
28 Jakob na Joseph khi oro Goshen lona onte ndukthukvü tsükona Juda ji ovüngna wothukcho. 29 Ontena janale Joseph na kurü zotoro lo tsankae opo nduko Goshen lo wocho. Onte nduktale Joseph na opo evüngo khayae sunga kya mungcho. 30 Jakob na phyocho, "Ana ni hungthako jina osi ni eküm vana to ntsithako jina enhungo echüv methakthaka." 31 Tole Joseph na ombo jeniden osi wopan kyon thanpoe jiang thüngi ezocho, "Ana owo mesao ji a jenio jiang osi apo wopan Kanaan metalo vamo jiang a thüngi yitathaka to ezov lia. 32 Ana nteno olyu rhükiden osi ekümrümo ekümden osi ntena nte tssiden osi ejüeli topvü hansi rothaka to ezov. 33 Mesao na nte tsae nteno ntio elhi tssoa evanden sana nte engana ti-mhechotana, 34 nteno nte motsüi jiang esüa e eküm echung ekümrüm rhükia evanden ka to ezotava, tona ombona Goshen lo nte vanthukvü." Ejip kyon jiang na olyu rhüki thüngi ntia khetsü n li to ntsiwo jina Joseph na hoto onte ezocho.
1 Joseph na ojenio otsük mungo sosi mesao ji thüngi owo ezocho, "Apo tona a jeniden to jiang Kanaan metae na onte ekümrüm tssiden osi ejüeli topvü hanrasi yithaka. Onteno enhünga jo Goshen metalo vana." 2 Tosi ombona ojenio jiang ji mesao thüngi ejücho. 3 Tole mesao jina onte engacho, "Nte elhilan jo ntiola?" Ontena ezocho, 'Tsüphoeyo, e motsüi jiang esüa enaha olyu rhükiden ka. 4 Kanaan lo vara ji tsükshio jina yantsophen n li küma ena meta shilo vantav rotachoka. Nzansi Goshen metalo evanthuka." 5 Mesao jina Joseph ezocho, "Nipo tona nijenio jiang to chirothako ji tsükona Ejip meta shijo onte echika. 6 Meta shilo mmhontsowo Goshen lo onte vanjüngthuka. Osi onte yulo ekhyo etoe jüna a tssiden jiang ha onte zethuka." 7 Tole Joseph na opo Jakob sosi oro mesao ji ejücho. Jakob na mesao ji mmhayithukcho, 8 Tole mesao jina, "Nino nzyu kvüta tssothaka?" to ombo engacho. 9 Jakob na janlancho, "A rümphi eküm ji nzyu nzoasi thümro tssothaka. A motsüi jiang na nzyu sunga rümphia vamo ji ephan jo a nzyu jiango mataroa osi ekhüngu tae." 10 Jakob na mesao ji pyonta mmha pisi yicho. 11 Tole mesao jina methako ji ephan Joseph na opo osi ojenio jiang ji Ramases yantsü ndüngo liko mmhontso ji picho. 12 Joseph na opo, ojenioang osi opo wopan lo nungotso ji nandang etsoyu picho.
Otssi Vara Ji
13 Otssi vara ji elümoto tsükshio jina meta kvüloha etsoyu n licho, osi Ejip kyon tona Kanaan kyon to jiang ekhang lona elümto mikamishüa kümracho. 14 Ontena etsoyu shitao rang ji Joseph na khyarhyui mesaki hansi wocho. 15 Ejip tona Kanaan to metalo orang topvü ezikhanthakale, Ejip kyon jiangna Joseph thüngi oro ezotacho, "Etsoyu epia, e ti chüthoka, ntiosana lanka yana, e rang jiang ezikhanthaka." 16 Tole Joseph na ezocho, "Nte rang jiang ezikhanthak na nte ekümrümo jiang sosi rotava, ji man etsoyu nte pivka." 17 Tole ontena ekümrümo jiang sosi Joseph thüngi rotale Joseph na onte kurü, Olyu, nyanyan, mangsü tona Gadho to jiang man etsoyu onte picho. Hoji nzyu jo ombona onte ekümrümo jiang man etsoyu onte picho. 18 Thüngkümto jo ontena oro ezotalancho, "Tsüphoeyo, ena ntsa ji n phona ni zov, e rang jiang topvü ezikhanthaka osi ekümrümo jiang ha ni echhi. Enhungo e tsük shiang tona e liko to shiang yaka ntia ni piv n li. 19 Eti chüthoka. Ntiosana lanka yana! E li jiang e ti shithuka. Etsoyu man e osi eli jiang khia. Ena mesao ji phajae tssovka osi eli jiang mesao echhi tssovka. Eküm evanthoku etsoyu epia osi eli jiang lo ethev mojü epia." 20 Joseph na Ejip lo liko topvü mesao echhi shiyicho. Otssi vara ji tsükshio jina Ejip kyon otsük akvüto liko jiang eyemo tssoe sicho, osi liko topvü mesao echhi kümcho. 21 Joseph na Ejip meta nkeni na nken phoko jana kyon jiang ji phaje etssov shiracho. 22 Ombona n shirhyucho liko jo pvüti jiang liko jiang tae tssocho. Onteno mesao na tajo theta tsoyuthoku ji tsükona liko jiang n yenlea vanchecho. 23 Joseph na kyon jiang ezocho, "Nte tona nte liko jiang to ana mesao echhi shirathaka. 24 Nte li shiang lo eyingu mojü shiang khitava, osi oli riana ntena mongochia mesao pivka. Hojilo enhyo jiango ntena mojü osi wopan etsov khikhuka." 25 Ontena janlancho, "Nina a eküm a shanchoyithaka. Osi nina ethüngi elhi mmhom tssothaka, tsüphoeyo, eiyo mesao phajaeden tssovka. 26 Hojito Joseph na Ejip meta topvü lona joncho rücho mongochia mesao piv to shikhfü methakcho. Shikhfü shi nchüng jana tsütsatala. Pvüti meta jiang tae mesao echhi n kümcho."
Jakob Jonji Okhao Ji.
27 Israel kyon jiangna Ejip lo Goshen metalo vantacho, hoji lona onte ji eli-i küma otsoeoro elümoto vancho. 28 Jakob na nzyu nzoasi zhüro nandang Ejip lo nzyu taro tiying vancho. 29 Ombo echü tsüngon enhyanale ombona Joseph tsae ezocho, "Ni khe ji aphi yutalo nyimkae echüma, nina a echü müng ji Ejip lo a n si to. 30 Apoang kvülo shothecho sana jilo a shothehungala. Ejip lona a hansi oyi onte ndüngo a shotheta." Joseph na janlancho, "Nina phyoji esüa ana tssovka." 31 Jakob na phyocho, "Nina hojito tssovto echümchaka" Joseph na echümcho, osi Jakob na belüngi na montso picho.
Jakob na Ephraim Tona Manasseh To Randaniala
1 Yuta tara sülo jo opo ra vana to Joseph na zocho. Hoji tsükona ombona otsoe otsük eni Manasseh tona Ephraim to sosi Jakob nduko wocho. 2 Ombo tsoe Joseph na ombo nduko rotacho to Jakob na zoale ombona ekhyo tssoe phanthi belüngi khukthecho. 3 Jakob na Joseph ezocho, "Thotsü Potsow na Kanaan Luz lona a nduki a mmhayicho. 4 Ombona a ezocho, 'Ana otsoeoro khosha ni piv, osi ni tsoronichen jiang na jipo khosha kümvüka; ana meta shi ni tsorinichen jiang pivka osi kümali onte echi tssovka.' " 5 Jakob na phyolancho, "Joseph, ana hepi n rothüng Ejip meta shilona nina tsokhying eni Manasseh tona Ephraim to oni buko jiango a echika, onio Reuben ha Simeom oni esüa a tsoeden ka. 6 Nina otsoe thanpo lilanlea jiango a echi tssov meka, onteno Manasseh ha Ephraim oni yakchia tssentso kümka. 7 Ana heto tsso shijo niyo Rachel tsükona tssoala. Ana Mesopotamea lona kholani yia vanathüng, Ephrath lona enhyano Kanaan meta lona nungra sotheta chücho. Ana hojilo Ephrath lantssae ompvü shothecho." (Ephrath jo enhungo Bethlehem to tsala.) 8 Jakob na Joseph tsokhying jiang hungale onteno ochoang sanato ombo engacho. 9 Joseph na ezocho, "Shiango Potsow na Ejip lona a mmhayio tsoeden ka." Jakob na phyocho, "Ana onte mmhayivka onte sosi a thüngi yia." 10 Jakob ji sontsüngo jina ombo myik jiang monlyua mmhona n hungcho. Joseph na ombo tsoe jiang sosi yile ombona khayae onte ntssüphicho. 11 Jakob na Joseph ezocho, "Ana jo ni tia ni hungu to eyilo n liv vancho, tole Potsow na ni tsoe jiang mpato a hungthukthaka." 12 Jitosi Joseph na Jakob phi lona onte ejümchoe ombo mhadungo nkhümthecho. 13 Joseph na Ephraim ji Jakob ayiwoe, Manasseh ji amimoe to vanthukcho. 14 Tole Jakob na ombo khe jiang onlontathuki ombo amimoe ji Ephraim kvürilo, ombo nungo khatola, osi ombo khe ayio ji Menasseh, eramo ji kvürilo to nyimkaecho. 15 Jitosi ombona heto phyoa Joseph Randankacho: "Apoang, Abraham osi Isaak na benkao Potsow jina tsokhying shiang mmhaithuka! Potsow ochona nchüng tsüngon jana a sothak cho sana ji khi onte mmhaithuka! 16 Lanben ochona ekyusü topvü lona a shanchocho sana jina onte mmhaithukvüka! A mying, osi apo Abraham, Isaak to jiang ji tsokhying shiang yakchia lea yithukvüka! Ontena otsoeoro khosha lithukvüka, tsoronichen khosha lithukvüka!" 17 Opona ombo khe amimoe ji Ephraim kvürilo nyimkayio ji hungale Joseph na n mathav sicho, jitsükona ombona opo khe ji Ephraim kvüri lona khi Manasseh kvüri lo nyimkathukcho. 18 Ombona opo ezocho, "hojito meka apo, eramo ji shika ni khe amimoe ji ombo kvüri lo nyimkata." 19 Tole opona ekhirana phyocho, "Ana ntsia otsoe, Manasseh tsoronichen ha jipo tsüphov kümvü, tolia ombo onyuro jo ombo lona tsükao tssov, ombo tsoronichen jo jipo tsüphov kümrav." 20 Hojito ombona hoji nchuk onte mmhayia phyocho, "Israel kyon jiang na mmha randana na nte phyophivka. Ontena, "Potsow khi Ephraim ha Manasseh oni esüa nte mmhaithukvüka' to phyotav. Hojito Jakob na Ephraim ji Manasseh vüngi tssothukcho." 21 Jitosi Jakob na Joseph ezocho, "Nina hunga aiyo achü etünga, tolia Potsow na ni ndüngo vam ka osi ombona ni pyimtsü motsüi metae ni sosi yivka. 22 Ana Shechem ji ni jenio jiang thüngi mekna ni pivka. Hoji meta jijo lizü meta ana Amorite kyon jiang thüngina yonri osi lotssi theta khi vacho."
Jakob Yi Okhao Jiang
1 Jakob na ombo tsoe jiang tsarhyui ezocho, "Etssirhyutava, ana nte mhadung ji kvütüv tssov sana nte ezovka: 2 Tsenrungtava, Jakob tsoeden, nte opo Israel na phyo ji engatava." 3 "A tsokhvü Reuben, a etho jo nika A jalithüng tsoe, A tsoe yulo etho ejütso osi kanchantso ji. 4 Nino jükyo ndav esüa tüv, Tokhatola ni ji opvütsotso ji tssov mek, ntiotssole nina a yinga loroe ji thüngi yipcho osi nipo belüng mmenthukcho." 5 "Simeon ha Levi onio jeni. Onina oni epenesü jiang jenpokta lo tsütsatacho. 6 Ana onte mpho thyuta jianglo n rhovo, osi onte sanrhyuta jianglo ha ana wov mek, ntiotssole ontena lüm etsuk lona kyon jiang lüngthacho osi ontena ngashiphen tsükona tssipong jiang ojo jakitacho." 7 Onte lüm etsuk jiang tsükshi khünga, onte rhiyirandankata, ntiotssole onte mhathen shüthen jiang ji' ntakhünga. Ana Israel meta topvülo nzonsorae onte sivka osi Israel kyon yulo nzithechi onte sivka. 8 Juda ni jenio jiangna ni thüngtavka. Nina ni ri jiang evüngona tssenyatala. Ni jenio jiangna ni mhadungo epyakthev. 9 Juda jo hengho esüa, hingho na ekümrüm tatsüngi sisi oshüpi kholani yio ji tüv, Ombona ombo tsük ji rüngi yipala. Osi ochinaha ombo n khetsükhukala. 10 Juda na mesa jarung ji süvka, osi ombo tsoronichen tae na yansavka. Jipo jiangna kyuchitssen ombo lov osi ombo yi enga ombo mhadungo epyakthev. 11 Ombona ombo gadho ro jiang jününgrozhü lo shenkatala, topvülo jününgrozhü mmhontso jilo shenkatala. Ombona ombo sü jiang jününgrojü lona etssüala. 12 Ombona Jününgrojü yuchona mhyiktsüng jiang ejen to rakiala. Ombona shirojü yuchona oho mpato emhümtsüala. 13 "Zebulun jo jümang tssae vamvüka. Ombo jüran jo orhung esanphen tssovka. Osi ombo meta jo Sidon jana tssovka." 14 Tssakhar jo gadho lona mmhonkav meka, gadho na khokthephen sakayiv tsükona rüngpvü süi nhyaka tüv tssov. 15 Khatola esanphen ji mmhona to ombona ntsiv Osi meta jilo etsov jüa to ombona chethev. Jitsükona ombona echen ji eyaki oha ji hanala Osi ombo ji phajae esüa rikata elhithukala. 16 'Dan jo ombo kyon jiang esapvüi tssovka. Onteno Israel jipo thanpoe jiang esüa tssovka. 17 Dan jo lantssa nrü esüa tssovka, Osi lantssae mozhü n mhom nrü tssovka, Hojina kurü ji jolo njüyi khi tsankao ji sülamoe ekhyuchukchi sithukala." 18 "OPVÜI, ana ni shancho ji nhyakala." 19 "Gad ji retsoreyui razhüna hayav, Khatola ombona kholani onte phanlamvü." 20 "Asher liko lona etsoyu mmhom chiyiv, Ombona mesao na lia tsokhoko jitüv etsoyu chiyithukvü." 21 "Naphtali jo siano na etancho yungphia tüv tssov, Hojina siano ro mmhom hana." 22 "Joseph jo jünhyo ndüngo orae gadho esüa tüv, Osi yingsüng tssae orae gadho ro. 23 Ombo ri jiang na ntav tssoa ombo hayatala Osi ontena lotssi tona yonri to bentasi ombo phantala. 24 Tolia ombo lotssi ji khyonga vanala, Osi ombo evon jiang etho khyongthukcho Hojijo Jakob Potsow Thotsü ji etho lona, Osi Israel enhyang osi nkohoe ji etho lona. 25 Nipo Potsow jina ni kyochiala, Thotsü Potsow jina oyakina eryu khi ni mmhayithukala, Osi lichungina ojü khichuki ni mmhayithukala, Otsoeoro osi ekümrümo mmha khosha , 26 Tsünghonrho osi thera mmha, Nkolo phunglan ehen jiang mmha, Kümali evamo yingsüng jiang lona ejüpomo tsütsaelan mmha. Mmha jiang jo Joseph kvüri lo esanthukala, Ojenio jiang thüngina jo ombo oton elio tssothukala." 27 "Bejamin jo ranfü therüng tüv. Ombona enyanyu rüngi tsoala." 28 Shiango Israel pvüji taro eni jiang, osi onte opona pyonta yilan oyi enüngu onte otsük akvü ezoathüng phyocho.
Jakob Chüi Shotheo Ji
29 Jisülo jo Jakob na ombo tsoe jiang ezocho, "Enhungo ana achüi a kyon jiang thüngi eyi etüngo jina apoang ndüngo Kanaan lo Mamre na engkhvüwoe,30 Machpelah Hitite kyon Ephron li longkvü jilo a shotheta. Hojijo Abraham na müngsüphen etssov tsükona Ephron thüngi shicho. 31 Hojilo ontena Abraham tona ombo engh Sarah to shothecho. Isaak tona ombo engh Rebeka to ha hojilo shothecho; osi ana Leah ha hojilo shothecho. 32 Oli ji tona longkvü ji tojo Hittite kyon jiang thüngi shicho. Hojilo a shotheta." 33 Jakob na ombo tsoe jiang ezov elio jiang ezorasi yipkachilani chüi sicho.
1 Joseph na ombo vankae kya ombo mha lo ntssüpicho. 2 Jisülo jo ombona opo echümüng ji thyujü nzüyile to yizüng picho. 3 Thanpothüng esüa thyujü na echümüng ji nzüyiv ji tsüngon zhüro khicho. Ejip kyon jiang na ombo tsükona tsüngon ekhatiying kyatacho. 4 Ekya yuta ji yakale Joseph na mesao küpo tsüphoe jiang ezocho, "Nzansi yithen shi mesao ezotava: 5 Apona ombo echü etüngathüng ana ombo ji Kanaan metae ombona okhüp methaki elio jilo ombo juthev to a phyochakthukcho. Ji tsükona nzansi a vothuka ana oyi Apo shothesi elani yivka.' " 6 Mesao jina ezocho, "Nina tssov to phyochako ji esüa ovo nipo shotheta." 7 Tole Joseph na opo shothelo yicho. Mesao ji küpo tsüphoe topvü, ombo mesaki eramoe topvü, osi Ejip lo esopvüiden topvüna Joseph phana wocho. 8 Ombo opan, ombo ojenio jiang tona opo wopan topvü tona ombo phana wocho. Osi onte ngaro eniro jiang, olyu, nyanyan osi mangsü jiang to taena Goshen meta lo vancho. 9 Kyon jiang na kurü zotoro osi kurü manküi na ha wocho osi razhü tsüphov tssocho. 10 Ontena Jordan na engkhüwoe Atad lo litssenphen jilo chiyile, hoji lona sunga kyata mungcho, osi Joseph na müngkya tssolanphyolan tsüngon tiying tssocho. 11 Atad lona ontena kyatao ji Kanaan kyon jiang na hungi phyotacho, "Ejip kyon shiangna müngkya tssolanphyolan mmhom emüngyana khitala!" Jitsükona meta ji Abel Mizraim to tsacho. 12 Hojito Jakob tsoe jiangna ombona ezo ji esüa tssotacho. 13 Ontena ombo müng ji hantasi Kanaan metae oyi Mamre na enhkhüwoe Mechpelah lo longkvüi Abraham na Hittite kyon Ephron thüngi müngsiphen shii evao jilo ombo shothecho. 14 Joseph na opo shothethakale ombona ojenio jiang tona kyon kvütata müngsilo ombo phana ocho sana jiang nzo Ejip lo kholani yicho.
Joseph na Ojenio Jiang Ntsaka Pilanala
15 Onte opo ji chüthakale Joseph ojenio jiangna phyocho, "Joseph na etena kvütata ombo thüngi syulyuo tssocho sana ji e nlilam zia vanchojo kvüto lyutav to!" 16 Jitsükona ontena Joseph thüngi yithen heto yithukcho, "Apo nchüthüng ombona ni ezole to heto ezocho, 17 'Nijenio jiangna ni thüngi worhyua syulyuo tssoji nzansi nlan esiyile. Jitsükona ni opo Potsow phajaeden e shina ntio nlan tssocho sana nzansi e siyia.' Joseph na hojito yithen ji hungale kyacho." 18 Ombo jenio jiangna oro ombo mhadungo epyakthetacho."Ena shilo ni mhadungo ni phajaeden ejoena chirothaka" to ezotacho. 19 Tole Joseph na onte ezocho, "Tikyutava, ana Potsow vanphen ji khiyiv meka. 20 Ntena jo apono n mhom tssocho khatola Potsow na hoji mmhom kümthokcho, hojijo, ji yakchia nchüng eküm vamo kyon shiang khosha eküm shanchoyiv tsükona ombona tssocho. 21 Ntena ntia ekyuv n lika. Ana nte osi nte ngaro jiang nte ntanknshomka." hojito ombona onte lümbümo erhako nzan yi khi onte ntsakata ezocho.
Joseph Chüo Ji
22 Joseph na opo wopan jiang nzo Ejip lo vana vancho. Ombo nzyu nzoasi taro lo ombo chücho. 23 Ombona Ephraim tsoeoro osi tsoronichen jiang hungjana eküm vancho. Osi ombona Manasseh tsoe Makhir tsoronichen jiang ha hungjana eküm vancho. 24 Ombona ojenio jiang ezocho, "Aiyo achüv saka, tolea Potsow na nte nzanrünguka osi meta shilona nte sochokuka, ombona Abraham Isaak osi Jakob thüngi tüngochüa phyochakcho. 25 Jisülo jo ombona ombo kyon jiang phyochakthukcho. Ombona phyocho, 'Kvüthüng Potsow na meta shilona nte socheta sana ntena a echümüng ji hansi nte nzo yiv' to phyochaktava." 26 Joseph na nzyu nzaosi tarolo Ejip metaena chücho. Ontena ombo echümüng ji thyujüna nzüyisi echü bakos lo thechitacho.
Ejip lo Israel Jiang Khangshiala
1 Jakob tsokhying jiang na onte wopan jiang sorasi Jakob nzo Ejip metae yio jiango, 2 Reuben, Simeon, Levi, Juda, 3 Issakhar, Zebuln, Benjamin, 4 Dan, Nephtali, Gad, tona Asher to. 5 Jakob lona tondüng thichecho, jiang topvü tssotsüi owo ekha tiying. Ombo tsoe Joseph jo Ejip lo vancho. 6 Sülani jo Joseph osi ojenio jiang osi onte echungren kyon jiang chüracho, 7 tokhatola onte tsoronichen Israel jiang na etsoeoro elümoto thiche otsson kümi Ejip meta pyingcho. 8 Jisüi jo Ejip lo Joseph n tsio mesao ethan na echungcho. 9 Ombona ombo kyon jiang ezocho, "Israel kyon shiang otsson kümthako jina ete tsükona ekyuv lithaka. 10 Ritsso chiyiana ontena ete ri jiang thüngoe tssoe esakasi meta shilona tsanrae yikhoka. Jitsükona onte ji owo n kyungkathukvü etena lanka yantav lia." 11 Jitsükona onte ji ntssonshi khi lüm terithukvü tsükona Ejip kyon jiang na ez-i rhükiden ethüngcherae onte rhükia elhi tssothukcho. Israel jiang na Pithom tona Ramases to yantsü ji, mesao ji tsükona echenlonphen lungjüng kümthukvü tssokachitacho. 12 Tokhatola Ejip kyon jiang na kvüta khangshiana Israel jiang ranka rankana yicho osi meta ji nzüpyinga yicho. Ejip kyon jiang na Israel kyon jiang kyuo jina 13-14 elhi ekhüngu onte tssothuka eziiden kümthukcho. Ontena Israel kyon jiang ji oki etsso thüngoe, oli elhi thüngoe, khangshia elhithukcho. 15 Jitosi Ejip mesao jina Hebrew eloe jiang tsobuk nibuk lo nzanchi eloeden Shiphrah tona Pauh to oni ji ezocho. 16 "Ntena Hebrew eloe jiang tsobuk lo nzanchiathüng eboeroro bukna lüngthae sirayia osi eloeroro tssona to vanthuka." 17 Tokhatola elopvüi jiang na Potsow kyusi mesao ji yi n ngayicho, jithüngona jo ontena eboeroro jiang kümchethukcho. 18 Jitsükona mesao jina elopvüi oni ji tsae ezocho, "Nteno ntiolyui heto elhita eboeroro jiang vanthukchola?" 19 Ontena janlancho, "Hebre eloe jiango Ejip eloeden tüv mek, eni ochina owo onte n jam ontebobo buki siala." 20-21 Eloepvüi jiangna Potsow kyuo jina Potsow na onte wopan ha bukchethukcho, osi Israel kyon jiang n tümjakvü rankacho osi etho khyunga kümcho. 22 Okhao tssoa mesao jina ombo kyon topvü heto yizüng picho: "Hebre eboeroro bukpamo jiang topvü khi Nile zhükhfüi thechi sitava, osi eloeroro jiang tae vanthuka."
Moses Buko Ji
1 Yuta jilo Levi jipo eboe tsüka na ombo jipo eloe tsüka soa vancho. 2 Osi ombona tsokhying tsüka ombo bukicho. Tsokhying ji elümoto mmhom tsso jina, choro ethüm jo mphoa vancho; 3 Tokhatola ompvüna ombo n phokhoku siale, ompvü na terüm na tükcho dekho motsünga khi nitsü na raying jiang rizhücho. Ompvüna ngaro ji hojilo thei zhükhfü tsae ero ntssomu lio jiang poni ekachicho. 4 Jitosi ngaro ji oyulov jina kvüto tssoa sana to ekonina cheta vancho. 5 Tole mesao otsolov jina zhükhfüi tsükalo joroathüng ompvü phajae jina zhükhfütsa tsünga wocho. Jithüng ji esüngaro taena ompvü na zhükhfü tssae ero siphov elio jiang poni dekho ji hungi ompvü phaj apvüi tsüka ezoa owo tsakathukcho. 6 Mesao tsolo jina elhichi zele hojilo eboeroro jücho. Ombona kya vamo jina ompvüna nzana nungra nchümcho. Ompvü na, "Shijo Hebrew ngaro jiang yulo tsüka ka" to phyocho. 7 Tole ngaro oyulov jina ompvü ezocho, "Ana owo Hebrew eloe tsüka tsae nijüpthuka ne?" 8 Tole ompvüna, "Nzansi owo a tsayia" to ezocho. Tole oyulov jina ngaro ji oyo ji tsae sosi yicho. 9 Mesao tsolo jina eloe ji ezocho, "Ngaro shi khi a nijüpia, tona ana jokheman ni pivka" tole ompvüna ngaro ji khi nijüpcho. 10 Sülani jo, ngaro ji khyochetale ompvüna ombo sosi mesao otsolov ji thüngi wocho, tole ompvüna otsoe tssoa ombo vanthukcho. Osi ompvübo heto phyocho, "Ana ojüina ombo süchukcho küma Moses to ombo tsavka."
Moses na Midian Metae Tsanthetala
11 Moses na ombo khyochetale ombo kyon Hebrew jiang zethechia wole onte ji kvüta rikata elhi ekhüngu tssothuka sana ji hungcho. Ejip kyon tsükana Moses jipo Hebrew tsüka lüngthata ha ombona hungcho. 12 Moses na eyingosi ochia n hungale zakto Ejip kyon ji lüngthae omüng ji hajang lo shothei sicho. 13 Ojyua to ombona olanle Hebrew otsük eni khonta hungcho. Ombona onilo worio tsüka ji thüngi ezocho, "Nino ntiolyui ni kyon ji heto taala?" 14 Tole kyon jina janlancho, "Ochona e pono esapvüi yitssoe ni tssothukchola? Nina Ejip kyon ji lüngthata to anaha a lüngthav tssoalo?" Tole Moses na kyua "A elhi ji kyon na ntsithaka" to phyocho. 15-16 Hoji yivon ji mesao jina zoale ombona Moses ji lüngthav yancho, tokhatola Moses na Midian metae tsanthei sicho. Tsüngona lojo Moses na jükha motsünga lo khokthei vanle Midia lo pvüti Jethro otsolov nchyu tiyingna opo olyu, nyanyan jiang tsükona jüyuphen jiang lo ojü othelo engo rotacho. 17 Tole olyu enhyang ejoma na Jethro otsolov jiang phani sitacho. Tole Moses na onte nkoyae onte ekümrümo jiang ojü yuthokcho. 18 Ontena opo thüngi elani yitale ombona onte engacho, "Nchüngo nteno ntio tata tsüsoa yitachola?" 19 Ontena ezocho, "Ejip kyon tsükana olyu enhyang jiang khelona e shanchocho. Ombona ojü mpato woe ete ekümrümo jiang e yuthokicho." 20 Ombona otsolov jiang engacho, "Ombo kvülo vanchola?" Nteno "Kvütolui ombo jilo sitachola? owo tsae ete nzo etsoyu tssotava." 21 Tole Moses na hojilo vamvü lüm na rüngcho, osi Jethro na ombo otsolov Zepporah ji ombo engh tssov picho, 22 tole ompvü na tsokhying tsüka ombo bukicho. Moses na ombobo phyocho, "Aiyo meta shilo tsanthan küma Gershom to ombo tsavka." 23 Nzyu tara sülojo Ejip mesao ji chücho, tokhatola Israel jiango ezii tssoa eronta ekyo-erung yanta vanpvü tssocho. Onte ekya ji Potsow na zocho, 24 Potsow na onte ekyaji zoe ombona Abraham, Isaak osi Jakob thüngi ntsata vao ji nchümchecho. 25 Ombona Israel jiang oyam eziiden kümi vamo ji hungi onte tsükona wongkhyucho.
Potsow na Moses Tsala
1 Tsüngon na lo Moses na omo Jethro, Midian lo pvüti ji olyu, nyanyan to jiang rhükia vanathüng ombo na tssiden ji sosi lijüng ji pankae ntho phunglan Sinae jilo wocho. 2 Hoji lona OPVÜI lanben na ranuk lona omi kisochia ombo jancho. Moses na ranuk ji omi kiaha n rongu hungcho. 3 Ombona nchümcho, "Shijo emhokthav motsünga, ntiolyui ranuk ji n ronga to, ana sena owo zev." 4 Moses na sena roa OPVÜI na hungale ombona ranuk ji longina, "Moses! Moses!" to tsacho, Tole ombona, "Hao, Shilo a vanka" to ezocho. 5 Tole Potsow na ezocho, "Hojilo enhyankata tiroa. Ni jokhüp ji phungcheta, ntiotssole nino ntho liko lo phanthi vana. 6 Aiyo ni motsüi Abraham, Isaak osi Jakob to jiang Potsow ji." Jitsükona Moses na ombo thüngoe n zechikhokvü kyua ombo mha ji shüngi sicho. 7 Jitosi OPVÜI na phyocho, "Ejip lo a kyon jiang kvüta khangshia vancho sana ana hungthaka; ontena ezii rhüki jiang khelona shanchole to phyoa kyatao ji ana zothaka. Ontena ezüpa vamo jiang ana ntsithaka. 8 Hoji tsükona ana onte shancholo rocho, Ejip kyon jiang khelona onte shanchoe lizü osi ejüeli meta motsünga Kanaan kyon, Hittite kyon, Amorite kyon, Perizzite kyon, Hivite kyon osi Jebusite kyon jiang na enhunga vana evamo meta ngazao ji onte piv. 9 Otsotso ana a kyon jiang na kyatao jiang zothaka, osi Ejip kyon jiang na kvüto onte khangshia sana ana hungthaka. 10 Ana a kyon jiang ni sochethoku tsükona Ejip mesao thüngi ni wothukala." 11 Tole Moses na Potsow ezocho, "Aiyo ochona a ntsicho, kvütoli ana mesao thüngi owo Israel kyon jiang Ejip lona sosi chiyichevla?" 12 Potsow na ezocho, "Ana ni ndüngo tssovka osi nina Ejip lona a kyon jiang sochukthakana phunglan shi lona a khümvüka. Ana ni wothukcho toji hoji lona chethev." 13 Tole Moses na janlancho, "Ana Israel kyon jiang thüngi owo 'nte motsüi Potsow jina nte thüngi a rothukcho ka' to ezoana ontena, "Ombo myingjo ochola?' to a engav, küma aiyo kvüto onte ezovla?" 14 Potsow na phyocho, "Aiyo ocho sana ji a ka. Osi ocho jo 'A ka to tsacho sana jina nte thüngi a rothukchoka to onte thüngi ezoa.' 15 Israel jiang thüngi OPVÜI, 'A, onte pyimtsümotsüi jiang, Abraham, Isaak osi Jakob Potsow jina niji onte thüngi ni rothukcho to ezoa. A mying jo Kümali hoto tssovka; osi echungren etsao jiang naha hojito a tsavka. 16 Owo Israel esopvüi jiang tsarhyui onte motsüi Abraham, Isaak osi Jakob Potsow a shina ni ndukcho to onte ezoa. A, OPVÜI na onte thüngi rothaka to ezoa osi Ejip kyon jiang na ntio onte tssoyia vancho sana ana hungthaka to ezoa. 17 Ejip metae na onte khangshia vamo jilona onte sochoku ana methakthaka osi ejüeli, lizü meta Kanaan kyon, Hittite kyon, Amorite kyon, Perizzite kyon, Hivite kyon tona Jebusite kyon tona enhünga vamo meta jilo onte sosi yiv sala to onte ezoa. 18 "Nina ntio onte ezoa na a kyon jiang na engavka. Jitosi nina Israel esopvüi jiang nzo Ejip mesao thüngi owo 'Hebre jiang Potsow, OPVÜI jina e hungthaka. Jitsükona OPVÜI e Potsow othan pilo evov tsükona tsüngon ethüm yentsa lijüngi e wothuka' to ezotava. 19 Ombona rikacho yaka Ejip mesao na nte n wothuk to ana ntsia. 20 Tokhatola ana a ethotsütsae emhokthav elhi tssoa Ejip kyon jiang khangshivka. Jisülo jo ombona nte yithokvü ka." 21 "Ana Ejip kyon jiang khi nte yikrachithuki ntena khochuka na khejüng khochitokvü meka. 22 Israel eloe otsük akvüna ompvü kiren Ejip kyon jiang thüngi osi Ejip eloe thama thüngi owo mpensü, Shona, Janti, oyuk-osen nsothokuka. Osi hojiang ji Israel kyon jiang na onte tsokhying tsolo jiang ekathuksi Ejip ejüeli jiang hansi yithokvü ka."
Potsow na Moses Ji Emhukthao Etho Piala
1 Tole Moses na OPVÜI ezocho, "Tole Israel jiang na a nlongtsükav ana ntio phyoana ji n nga tssona kvüto lyuvla. Nina a n duk to ontena phyona kvüto lyuvla?" 2 OPVÜI na ezocho, "Nina bemo jijo ntiola?" Tole ombona "Jarung ka" to ezocho. 3 Tole OPVÜI na ezocho, "Likoe shümchochia." Moses na jarung ji shümchochile hojina nrü kümi sicho, tole ombona hoji mhadungo tsancho. 4 Tole OPVÜI na Moses ezocho, "Nkhfüthei emhi lona tsakata." Moses na nkhfüthei emhi lona tsakale jarung kümlani sicho. 5 Tole OPVÜI na ezocho, "Hoji esüa tssoe Israel jiang ejüa tona ontena onte motsüi Abraham, Isaak osi Jakob Potsow a shina ni ndukcho to chekathuka." 6 OPVÜI na Moses ezolancho, "Ni khe ji ni phukthesü kupi yonthechia." Moses na yonthechisi khichele, okhe ji porüp na eyukcho to nochonori khyingi sicho. 7 Tole OPVÜI na ni khe ji elani ni phukthesü kupi yonthechia to ezocho. Ombona yonthechisi khichele tathi ji esüa poe sithakcho. 8 OPVÜI na ezocho, "Ontena chethev ovüngo ji n longtsüna, enioto shina onte longtsüthukvüka. 9 Osi chethev enio shi ontena n longtsüa tssona osi nina phyo jiang n longtsüna, Nile zhükhfüi na ojü wokae likoe phyangchochia, tona hojina ejen kümka, " 10 Tole Moses na phyocho, "Meka, OPVÜI a ti wothuka, ana kvüthüng ha okhen oyi mmhom n sanchehan, nina a jam benkasi sülo tia oyi nsanthia a n kümhan. Aiyo okhen oyi lo n tssothi, zünyoa osi titoteria." 11 OPVÜI na ombo ezocho, "Ochona kyon ji obüng lyukayiala? Ochona nobüng osi eyim ombo kümthukala? Ochona ombo hungthukchola mekana mhyikjung ombo kümthukchola? OPVÜI, a shina memek. 12 Tona, khochia! Ana ni kyochia ni nsanthukvüka, osi ntio phyovsana ni ezovka." 13 Tole Moses na ezocho, "Meka, OPVÜI, thanpoe ochosana jenjia." 14 Tole OPVÜI na lüm tsoka ombo ezocho, "Ni nyuro Aaron, Levite kyon jijo kvütola? Ombona mmhona nsanthia to ana ntsia. Osi ombona ni nduko tsata osi ni ndukvü ji emathatala. 15 Nina ombo thüngi thyuta ntio phyovsana ombo enga. Ana ninita thüngi phyov osi ntio elhiv sana nte ezovka. 16 Ombona ni nsanpvüi tssoe ni thungtssoa kyon jiang thüngi nsamka. Nino Potsow esüa tssoe ntio phyov sana ombo ezovka. 17 Jarung shi bena; shina chethev elhi tssovka."
Moses na Ejip Lo Yiala
18 Tole Moses na omo Jethro thüngi oyi ezocho, "Nzansi Ejip metae oyi a wopan jiang thüngi eküm vevana na a zethuka." Tole Jethro na pyonta salüm pia ombo yithukcho. 19 Moses na Midia lona khochiathüng OPVÜI na ombo ezocho, "Ejip metae yilana, ntiotssole ni lüngthav eyamo jiang topvü chüthaka." 20 Jitsükona Moses tona ombo engh tona otsoe jiang to gadho lo tsankathuki Potsow na ben to ezowo jarung ji bensi Ejip metae khochicho. 21 OPVÜI na elani Moses ezocho, "Nina Ejip metae yia vamo jina ana chethev elhi etssov etho ana ni pio jiang topvü Ejip mesao ji mhadungo tssovka. Khatola ana mesao ji lümbüm khüngthuki a kyon jiang vachithukvü meka. 22 Osi OPVÜI a shina heto phyoala to nina ezovka, 'Israel jo a tsokhfü, tsokhying ji. 23 A tsoe ji vachi a khümthukle to ana ni ezole nina ekhirancho. Jitsükona enhungo ana ni tsokhfü topvü lüngthav sala.'" 24 Ejip lani nchenathüng OPVÜI na Moses nduki ombo lüngthav ekhyo tssocho. 25"26 Tole ombo engh Zipporah na olung erov khi ompvü tsoe ji tseni siyisi olong erov ji khi Moses jo lo evüngkayicho. Ompvüna Moses ezocho, "Nino ejen lona a orapvü." Hojitolyui OPVÜI na Moses eküm ji nkochecho. 27 Jithüng OPVÜI na Aaron ezocho, "Lijüngi owo Moses nduka." Tole ombona ntho phunglani na owo ombo ndukcho; osi ndukale ombo ntssüpcho. 28 Tole Moses na OPVÜI na Ejip metae yilanle to ombo ezo jithüng ntio ombo ezochosana topvü Aaron ezocho. OPVÜI na chethev elhi tssole to ombo ezo jiang ha ombona Aaron ezocho. 29 Jitsükona Moses ha Aaron onina Ejip metae owo Israel esopvüiden topvü tsarhyucho. so OPVÜI na ntio kvüto Moses ezocho sana topvü Aaron na onte ezocho, osi Moses na chethev jiang topvü kyon jiang mhadungo tssoe ejücho. 31 Tole ontena longtsücho, osi OPVÜI na onte thüngi rothaka osi kvüto onte khangshia sana ombona hungthaka to ezoale ontena nkhümtherae khümtacho.
Ejip Mesao Mhadungo Moses Ha Aaron Oni
1 Moses ha Aaron onina Ejip mesao ji thüngi owo ezotacho, "Israel Potsow OPVÜI jina phyoala, 'A kyon jiang vachia oyi lijüngi na tokhü tssota a yikrachithuka.' " 2 Tole mesao jina "OPVÜI jijo ochola?" "Ana ntiolyui ombo yi engae Israel jiang vachivla? Ana OPVÜI ji n tsi, osi ana Israel jiang n vachi." 3 Moses ha Aaron onina janlancho, "Hebre jiang Potsow jina ombobo e hungthukthaka. Lijüngi tsüngon ethüm yentsa oyi e OPVÜI ji othan piv tsükona e vachia. Ena hojito n tssoana ombona nochonori na mekana ritsso khi e chürathukvü." 4 Mesao jina Moses ha Aaron oni ezocho, "Kyon jiang onte elhi lona esanthukvü jo ntio etsso phyotala? Zakto ezi-i jiang elhi sakathuka!" 5 Nte kyon jiang Ejip kyon lona wotssonka kümthaka. Enhungo ntena elhi lona onte esanthuk hunga vanthaka!" 6 Hoji nchukna Ejip mesao na ezii rhüki jiang tona Israel ezepvüi jiang to ezocho, 7 "Kyon jiang na kitssolong nsüngrüv ntena mavü onte tipitava, onte khi owo yanpani nsüngrüthuka. 8 Tolea ontena enga-a lo kvüta nsüngrüphen sana jilo motsünga lea n matakana nsüngrüchevka. Onte ji elhi tssona n piküma vachi oyi onte Potsow thüngi othan pithukle to a ezota mongala! 9 Kyon shiang ji elhi khosha pia ntssochov vanthuka tona ontena onbung yibung jiang engav yuta liv meka." 10 Ezii rhüki jiang tona Israel ezepvüi jiang to na owo Israel jiang ezocho, "Mesao na nte ji enhungo mavü nte n pi to phyocho. 11 Ombona nte bobo mavü yanpani elhitale osi thanpothüng methakphen jilo mpüma lea ti mataka na methakle to phyoala." 12 Jitsükona kyon jiangna Ejip meta topvü lo mavü yanta wotacho. 13 Osi ezii rhüki jiang na onte yuta thanpothüng mavü onte piathüng methakphen jilona kitssolong motsünga lea n matakathukna engakvü bena nsüngrüle to rikacho. 14 Ejip kyon ezii rhüki jiang na Israel ezepvüi jiang ha ekhoesükcho. Ontena "Ntiolyui nte kyon shiango kitssolong ovüng thüng chiyiphen tata n chiyithukala?" to ezocho. 15 Tole rhükipvüi jiangna mesao thüngi owo erenjantacho, "Yikrachio tsüphoe, nino ntiolyui heto etssoyichola? 16 Mavü e npi na kitssolong nsüngrüv ezoala! Elümoto ekho-esükala osi shijo nte kyon jiang nlanka." 17 Mesao na janlancho, "Nte ji etho n jüi tsso jina elhi nte n tssohung küma nte vachia oyi OPVÜI thüngi othan nte pithukle to a ezotala. 18 Zakto oyi elhi tssotava! Ntia mavü nte piv meka, tolea thanpothüng methakphen tata methakvüka."19 Mavü n pina kitssolong thanpothüng methakphen tata methak to onte ezoale elhi rhükipvüi jiangna onte ji ezüp lithaka to nchümtacho. 20 Ontena yita vanle, Moses ha Aaron oni na onte nhyakta vamo jiang ndukcho. 21 Ontena Moses ha Aaron oni ezocho, "Nini na ntio elhitacho sana OPVÜI na hungthaka, osi nini elhi yakchia mesao osi ombo küpo tsüphoe jiang khi etssaktuko ji tsükona OPVÜI na nte khangrivka."
Moses na OPVÜI Thüngi Erenjanala
22 Tole Moses na OPVÜI thüngi owo ezocho, "OPVÜI nino ntiolyui ni kyon shiang heto khangriala? Nina ntiolyui hepi a rothukchola? 23 Ana mesao ji thüngi owo ni thung tssoa phyopvüto ombona haruka onte tsütsatala. Osi nina onte nzanchiwo ntia n tssohan!"
1 Tole OPVÜI na Moses ezocho, "Enhungo ana mesao ji thüngi kvüto lyuvsana nina hunguka. Ana a kyon jiang yithukvü ombo khüng kavsala. Ombona rikata phani onte siwo tüv ana ombo tsswothukvü sala."
Potsow na Moses Tsala
2 Potsow na Moses ezocho, "Aiyo OPVÜI ji. 3 Ana Abraham, Isaak osi Jakob thüngi aiyo Thotsü Potsow ji to hungthukcho, tokhatola ana a ntho mying OPVÜI ji yakchia onte khi a ntsithukcho mek. 4 Elani ana ontena yentsae esüa vana vamo Kanaan meta ji onte piv phyochaka onte thüngi ntsata vacho. 5 Osi ana Israel jiang na Ejip jiang eziiden tssoe kyata vamo jiang zothaka, osi onte thüngi a ntsata ji ana nchümchethaka. 6 Hoji tsükona ana heto phyoala to Israel jiang ezoa, 'Aiyo OPVÜI jika; ana nte shanchoe Ejip kyon jiang küpo ezii eküm ji lona nte vachivka. Ana a khe tsakae ekhenthao ezüp onte pia onte khe lona nte shanchoka. 7 Ana a kyon nte kümthukvüvka, osi aiyo nte Potsow tssovka. Ana Ejip kyon jiang khelo ezii eküm jilo ha nte vachiana ntena aiyo OPVÜI ji to ntsivka. 8 Ana nte piv to Abraham, Isaak osi Jakob thüngi tüngochüa phyochako meta ji ana nte piv; osi hoji nte echi tsotso tssoa ana nte piv. Aiyo OPVÜI ji ka.' " 9 Moses na shiang hetopvü Israel jiang ezoaha onte lümbüm jiang ezii eküm lona rokhanthako ji tsükona ontena ombo yi n ngacho. 10 Tole OPVÜI na Moses ezocho, 11 "Ejip mesao ji owo ezoa, ombona meta shilo na Israel jiang vachi nrüngle to." 12 Tole Moses na phyocho, "Israel jiangna lea a yi n ngav kvütoli mesao na engavla? Aiyo oyi n nsanthi tsüka." 13 OPVÜI na Moses ha Aaron oni ezocho: "Ana Israel kyon jiang Ejip lona sochuko nte wothukcho to Israel jiang tona mesao ji to ezotava."
Moses ha Aaron Oni Wopan Kitsük
14 Jakob tsokhfü Reuben na tsokhying mezhü vancho: Hanoch, Pallu, Hezron, tona Garmi to, onteno onte mying ejana eyio pvüji jiang omotsüiden kümcho. 15 Simeon na tsokhying tirok vancho: Jemuel, Jamin, Ohad, Jachin, Zohar, tona Shaul, Kanaan eloe tsoe ji to; onte ha onte mying ejana yio pvüji jiang omotsüiden kümcho. 16 Levi na tsokhying ethüm vancho: Gershon, Kohath, tona Merari to; Onteno onte mying ejana yio pvüji jiang omotsüiden kümcho. Levi na nzyu nzoasi thümro tiying vancho. 17 Gershon na tsokhying eni vancho: Libni tona Shimei to, osi ontena tsoronichen elümoto vancho. 18 Kohath na tsokhying mezhü vancho: Amram, Izhar, Hebron, tona Uzziel to. Konath na nzyu nzoasi thümro vancho. 19 Me rari na tsokhying eni vancho: Mahli tona Mushi to. Shiang hetopvü Levi pvüji tona onte tsoronichen jiang to. 20 Amram na opo oyilov Jochebed soa vancho, osi onina Moses ha Aaron oni bukcho. Amram na nzyu nzoasi thümro tiying vancho. 21 Izhar na tsokhying ethüm vancho: Korah, Nepheg, tona Zichri to. 22 Uzziel naha tsokhying ethüm vancho: Mishael, Elzaphan, tona Sithri to 23 Aaron na Amminadab otsolov osi Nahshon oyilov Elisheba ji soa vancho: ompvüna Nadab, Abihu, Eleazar, tona Ithamar to bukcho. 24 Korah na tsokhying ethüm vancho: Assir, Elanah tona Abiasaph to; onteno Korah pvüji chiroe yio jiang omotsüi jiang. 25 Aaron tsoe Eleazer na Putiel otsolov soa vancho, osi ompvüna Phinehas bukcho. Shiang jo Levi pvüjiden jiang osi wopan lo eramoe jiang. 26 Aaron ha Moses onio OPVÜI na, "Israel pvüji jiang Ejip lona sochoka" to ezo jiang. 27 Onteno Israel jiang vachile to Ejip mesao ezoe jiang.
Moses ha Aaron Oni Thüngi Yizüng
28 OPVÜI na Ejip metaena Moses thüngi heto ezocho, 29 "Aiyo OPVÜI jika, ana ntio ni ezothakcho sana topvü Ejip mesao ji ezoa." 30 Tole Moses na ezocho, "Aiyo oyi n santhi küma kvütoli mesao jina a engayivla?"
1 OPVÜI na phyocho, "Ana mesao ji mhadungo ni ji Potsow esüa ni tsswothukvüka, osi nijenio Aaron jo ni yi ephyoe tsswothukvüka. 2 Ana ntio ni ezoasana topvü Aaron ezoa, tona ombona mesao ji ezoa Israel jiang ombo metae na khochithukuka. 3
ana Ejip pono ezüp ntav piv osi Israel pvüji jiang meta jilona sochokvüka. 5 Ana a khe khikae onte panlana Israel jiang onte metae na sochukathüng ti Ejip kyon jiang na OPVÜI ji a ka to chethevka." 6 OPVÜI na ntio yizüng picho sana Moses ha Aaron onina ji ephan tssocho. 7 Ontena mesao thüngi thyutao jithüng jo Moses nzyu ekhatiza, Aaron nzyu ekhatiza si ethüm to tssocho.
Aaron Jarung Ji
8 OPVÜI na Moses ha Aaron oni ezocho, 9 "Ntena chethev tssoe ombo ejüle to mesao na chona tssona, Aaron ezoa ombo jarung ji mesao mhadungo shümchithuka, tona hojina nrü kümvüka." 10 Tole Moses ha Aaron oni na owo OPVÜI na onte ezo ji ephan tssotacho. Aaron na ombo jarung ji mesao osi ombo lhisae tsüphoe jiang mhadungo shümchile hojina nrü kümi sicho. 11 Tole mesao jina ombo küpo ozen ntsiwo jiang tsae hoji esüa tssothukcho. 12 Ontena onte jarung jiang shümchochira le, jarung jiangna nrü kümracho. Tokhatola Aaron jarung jina onte jarung jiang nzhüracho. 13 To tssoaha, mesao jina lüm khüngi vancho, osi OPVÜI na phyoji esüa ombona Moses ha Aaron oni yi n ngacho.
Ejen Vara na Ejip Rhakala
14 Tole OPVÜI na Moses ezocho, "Mesao ji lüm elümoto khünga, osi kyon jiang n yithuk to ekhiranala. 15 Jitsükona ombona enyathüng Nile zhükhfüi jowoathüng owo ombo nduka nrü kümcheo jarung ji bensi jowo jürani na ombo nhyaka vana. 16 Tosi mesao ji heto ezoa, 'Ni khi Hebrew jiang vachia oyi lijüngi na ombo khümtatho kle to ni ezolo Hebrew jiang Potsow jina a rothukcho. Tole enhünga jana hoji n ngahan. 17 Jitsükona, yikrachio tsüphoe, enhungo nina OPVÜI jo ocho sana chetheo tssoa OPVÜI na elhi tssovsala. Zeta, ana jarung shina ojü poni evakthechiana ojü topvü ejen kümi sivka. 18 Ongo jiang chürav, osi ojü ji nnanphfüphfü na kümi Ejip kyon na hoji n yuchev siv." 19 Tole OPVÜI na Moses ezocho, "Aaron ezoa ombo jarung ji khi Ejip meta lo zhükhfü, jülan, osi wozhü jiang pono khikae bensi vanthuka. Tona ojü topvü, otssüng osi olong na shamo jüjen jiang lo jüwo jiang mpato ejen kümkhani sivka." 20 Tole Moses ha Aaron onina OPVÜI na ezoji esüa tssocho. , Mesao ji osi ombo küpo lhisae tsüphoe jiang topvü mhadungo na Aaron na jarung ji tsakae jüponi evakthechicho, tole ojü topvü ejen kümracho. 2l Ojüi ongo jiang chürae nnantsüi Ejip kyon jiangna ojü ji n yuchev sicho. Ejip meta topvü lo ejen na pyingcho. 22 Tole mesao küpo ozen ntsiwo jiang naha hoji esüa tssochecho. tolea mesao jina lüm khüngi vanpvü tssocho. OPVÜI na phyoji esüa mesao jina Moses ha Aaron oni yi ji n ngayicho. 23 Hoji chethev ji tia n chekav ombo mesaki kholani yi sicho. 24 Ejip kyon jiang na zhükhfü jü ji n yucheo jina jürani ojü eyuv jükha shanracho. 25 OPVÜI na zhükhfü jilo okhe thesi tsüngon tiying tssothakcho.
Ovüden
1 OPVÜI na Moses ezocho, "OPVÜI na heto phyoala to owo mesao ji ezoa, 'A kyon jiang vachi, onte khi a khümthuka. 2 Nina ekhirana tssona ana ovüden vachi ni meta lo ezüp rwothukvüka. 3 Nile zhükhfü ji ovü taena phyingkachisi jilo na sanchuki ni mesa ki, ni yippheni, ni belüngi, ni küpo tsüphoe jiang osi ni kyon jiang ki topvü lo, osi ni tssoyan ki osi hanpvüi mpato ovü taena pyinguka. 4 Onte na ni osi ni kyon jiang, osi ni tsüphoe jiang topvü tsukzhüv." 5 OPVÜI na Moses ezocho, "Aaron ji ombo jarung ji khi zhükhfü jiang, jülan osi wozhü jiang poni nsüchi bensi ovü jiang sanchothuki Ejip meta ji eyukthukle to ezoa." 6 Aaron na jüponi nsüchi benle ovü jiang na sanchoki meta ji pyingi sicho. 7 Tole ozen ntsiwo jiangna ha onte ozen etho lona ovü meta jilo chiyithukchecho. 8 Tole mesao jina Moses ha Aaron oni tsae ezocho, "Ovü shiang monthukvü tsükona OPVÜI thüngi randantava, tona ana nte kyon jiang vachia oyi OPVÜI thana khümthukvü ka." 9 Moses na ezocho, "Ni randaniv tsükona a emathata. Kvüthüng ni osi ni tsüphoeden osi ni kyon jiang tsükona randam sana yuta koe a pia. Tona ovü shiang na nkachorae Nile zhükhfüi tae vani siv, osi ni noyinguka." 10 Mesao jina janlancho, "Ojyua a randania." Tole Moses na ezocho, "Nina phyoji esüa ana tssovka, osi OPVÜI e Potsow OPVÜI ji yaka thanpo Potsow kvüloha n van to nina ntsivka." 11 Ni osi ni tsüphoeden osi kyon jiang topvü thüngina ovü jiang tsanrae Nile zhükhfüi tae vamka. 12 Moses ha Aaron onina mesao thüngina khochi yicho, osi oyi Potsow thüngi ombona mesao thüngi ovü rothuko jiang khilani siyile to Moses na randancho. 13 Moses na randamo ji esüa OPVÜI na tssocho, osi oki hapho osi oli jiang topvü lona ovü jiang chürae sicho. 14 Ejip kyon jiang na hojiang hanrhyui meta topvü nnana kyoncho. 15 Ovü jiang chürathaka to mesao jina ntsiale mesao ji lüm khüngi silancho, osi OPVÜI na phyoji esüa, mesao jina Moses ha Aaron oni yi n ngacho.
Pyatük
16 OPVÜI na Moses ezocho, "Aaron ji ombo jarung jina liko lo sathechile to ezoa, tona Ejip metalo livero topvü pyatük kümkham ka." 17 Tole Aaron na ombo jarung ji khi liko ji sacho, osi Ejip lo livero topvü pyatük kümi sicho. Osi hojiang na kyon osi ekümrümo jiang sanzhüi sicho. 18 Ozen ntsiwo jiang naha pyatük chiyithukvü ekhyo tssotacho khatola n tssochecho. Meta topvü pyatük na pyingcho. 19 Osi ozen ntsiwo jiang na mesao ezocho, "Shijo Potsowna tssocho!" Tokhatola mesao ji lüm khüngi vancho. Osi OPVÜI na phyoji esüa ombona Moses ha Aaron oni yi n ngacho.
Benoden
20 OPVÜI na Moses ezocho, "Ojyua riyazüngi na owo mesao jina zhükhfüi yia vanathüng nduki OPVÜI na heto phyoala to ezoa, 'A kyon jiang vachi oyi a khümthuka. 21 Nina ekhirana tssona ana ni osi ni tsüphoeden, ni kyon topvü to thüngi benoden rwothukvü to ni ezoaka. Ejip kyon jiang ki topvü beno na pyinguka osi liko topvü beno na eyukuka. 22 Khatola a kyonden na vamo Goshen meta jijo ana nkoyav ka, osi jilo jo beno rhowov meka. Nte khi A, OPVÜI na meta shilo elhi tssoala to chethethukvü tsükona ana hojito tssovka. 23 Ana a kyon tona ni kyon to khotathukuka. Chethev shi ojyua tssov.' " 24 OPVÜI na mesaki tona ombo tsüphoe jiang vanpheni to benodentsü sanchukthukcho. Hoji tolyui Ejip meta topvü lo beno jiang na ezüp picho. 25 Tole mesao jina Moses ha Aaron oni tsae ezocho, "Meta shilo na owo nte Potsow othan pitava." 26 Moses na ezocho, "Hojito etssov jo etüm n li, ntiotssole ena ekümrümo khi e OPVÜI Potsow thamo jina Ejip kyon jiang lüm tssatssov. Ena Ejip kyon jiang ehungo na ekümrüm shiang othan picho jo onte lüm tsuki olong na ephyatsünguv. 27 Ena e Potsow ji ombo na phyo ji ephan othan piv jo tsüngon ethüm yentsa lijüngi na oyi thanchev." 28 Mesao jina phyocho, "Ntena elümoto ekoni n yia tssona ana nte yithuka lijüngi na nte Potsow nte khümthukuka, a randanitava." 29 Moses na janlancho, "Ana khochipvü ojyuana ni osi ni tsüphoe tona kyon jiang to thüngina beno jiang khi sile to randamka. Tokhatola nina ejiphilana kyon jiang khümo n yithukvü ti sikhe." 30 Moses na mesao ji sisi oyi OPVÜI thüngi randancho, 31 tole OPVÜI na Moses randan engayicho. Beno jiangna mesao, ombo tsüphoe jiang osi kyon jiang nkachoe yicho, osi motsünga tia n vam sicho. 32 Tole jithüng ha mesao jina lüm khüngi sicho, osi kyon jiang n yithukvü sicho.
Ekümrümo Echü
1 OPVÜI na Moses ezocho, "Mesao ji owo ezoa, Hebrew jiang Potsow OPVÜI jina phyoala, 'A kyon jiang vachi a khümthuka. 2 Nina ekhiralana onte n yithuka tssona, 3 ana ni ekümrümo topvü pono ekyuthav vara rothuki ni ezüpthukuka ni kurü jiang, gadho, odh, olyu osi nyanyan topvü pono rwothukvüka. 4Ana Israel jiang ekümrümo jiang tona Ejip kyon jiang ekümrümo jiang to khotathukvüka, osi Israel jiang ekümrümo motsünga lea chüv meka. 5 A OPVÜI na ojyua tsüngon kokae shi benthukvüka.' " 6 Ojyuato jo OPVÜI na ombona phyo ji esüa tssocho, osi Ejip kyon jiang ekümrümo topvü chücho, toaha Israel jiang ekümrümo jo motsünga tia n chücho. 7 Mesao jina kvüto tssocho sana to ethümi zele Israel jiang ekümrüm jo motsünga tia n chü to zocho. Khatola ombo lüm khüngi kyon jiang n yithukcho.
Vela
8 Tole OPVÜI na Moses ha Aaron oni ezocho, "Mitssopheni na mibuk tara khichei; Moses na mesao ji mhadungo ezhüi venkachia. 9 Hojiang na makvüro enyipvü esüa Ejip meta ji eyukvüka, osi meta topvü lo ontena vela kümi kyon osi ekümrümo jianglo emho khyingrav ka." 10 Tole onina mibuk tara yae bentasi mesao mhadungo phanthi Moses na ezhüi vakachile hojiangna kyon osi ekümrümo jiang emhotsüngracho. 11 Ozen ntsiwo jiangha Ejip kyon thanpoe jiang esüa emho khyingrao jina ontena Moses mhadungo n chiwochecho. 12 Khatola OPVÜI na mesao ji lüm khüngthukcho, osi OPVÜI na phyo ji esüa mesao jina Moses ha Aaron oni yi n ngacho.
Sheryu
13 Tole OPVÜI na Moses ezocho, "Ojyua nyazüngi na mesao ji nduki Hebrew jiang Potsow OPVÜI jina heto phyoala to ezoa, 'A kyon jiang vachi oyi a khümtathuka. 14 Nchüng shilojo ana ni tsüphoeden osi kyon jiang tae mek na niha ni khangshivka, osi hojilona nina limha shilo a esüa ochia n van to a ntsivka. 15 Ana a khe süngkae khi nochonri na ni tona ni kyon jiang to pono rothukvo nte topvü rorüpi nte sithakvü, 16 tokhatola a etho ni ejüv tsükona osi a mying ji meta topvülo pyinga yithoku tsükona tae nte vanthukcho. 17 Toaha nina kangtsüa a kyon jiang süyasi vana. 18 Ojyua heto-thünga ana Ejip meta lo echungatia n tssohancho jitüv motsü rütaphen sheryu jothokuka. 19 Jitsükona enhungo ni ekümrümo kvüta hapoe vancho sana ranki tsathei vanthukle to yizüng pia. Kyon osi ekümrümo hapoe vana tssona jiang topvü sheryu na echüktsüngi chüthokuka.' 20 Mesao tsüphoeden ejoma jo OPVÜI na phyoji kyuo jina onte phajaeden osi ekümrümo jiang oki sothei vanthukcho. 21 Tokhatola thanpoe jiango OPVÜI na phyo ji nngayiv onte phajae jiang tona ekümrümo jiang to hapoe vanthukcho.'" 22 Tole OPVÜI na Moses ezocho, "Ni khe ji oyaki rükachia tona sheryu na Ejip meta topvüto pyinguka osi hojina kyon, ekümrümo osi oli yolanhanlan topvü eyukuka." 23 Jitsükona Moses na ombo jarung ji oyaki rükachicho tole OPVÜI na tharak osi sheryu rothukcho osi liko ji tsüngjocho. 24 OPVÜI na sheryu echhiv jothuka sülan mhadung potsüo nlüpthukcho. Hojijo Ejip lo n lihan jo jitüv ekhenthav sheryu jocho. 25 Osi Ejip meta topvü tolo hapoe vancho to etsa kyon osi ekümrümo mekana thanpolipo tssolea topvü monthukcho. Oli yulanhanlan osi otsüng odung topvü echhüki sicho. 26 Goshen meta kvülo Israel kyon jiang na vancho sana jilo tae sheryu ji n jocho. 27 Tole mesao jina Moses ha Aaron osi tsae ezocho, "Nchüng shilojo ana mmen tssothaka; OPVÜI elan lia, osi a kyon tona a tonlan lia. 28 OPVÜI thüngi randantava! Ena tharak osi sheryu etsson hungthaka. Ana nte yithoku phyochakala, ntena helo vanlamvü meka." 29 Moses na ombo ezocho, "Ana yantsü shi yaki yipvüto a khe yonkachia OPVÜI thüngi randamvüka. Tharak shi esamka osi sheryu jolam meka, osi liko shijo OPVÜI echhi to nina ntsivka. 30 Khatola ni osi ni tsüphoe shiangna OPVÜI Potsow n kyuhan to ana ntsia." 31 Osi wozhü odung jiang pvüpüma osi omüm jiang ethiche mhena to vamo ji tsükona jiang roe sicho. 32 Khatola n mhenhamo tssüngthi jiango ntia n tssocho. 33 Moses na mesao thüngi na khochi yantsü ji pankae chiyi okhe yonkachi OPVÜI thüngi randancho. Tole tharak, sheryu, osi eryu jiang topvü esanracho. 34 Hojito tssoji mesao na ntsiale ombona elani mmen tssocho. Ombo osi ombo tsüphoe jiang topvü na ovüngthüng esüa lüm khünglani sicho. 35 Osi OPVÜI na Moses yakchia phyoe elio ji esüa mesao jina Israel kyon jiang n vachicho.
Khomung Vara Ji
1 Jisüi jo OPVÜI na Moses ezocho, "Owo mesao ji nduka. Ana ombo osi ombo tsüphoe jiang lüm khüngthukcho, hojijo ana onte yulo chethev elhi tssov tsükona osi 2 ana chethev elhi tssoe kvüto Ejip kyon jiang ejithechicho sana hoji ntena nte tsoronichen jiang ezotathoku tsükona. Aiyo OPVÜI ji to nte topvüna ntsivka." 3 Jitsükona Moses ha Aaron onina mesao thüngi owo ezotacho, "Hebrew jiang Potsow OPVÜI jina phyoala, 'Nina ayi n ngana kvütenhyaka ekhirana vanala? A kyon jiang vachia a kümthuka. 4 Nina ekhirana munga tssona ana ojyua meta shilo khomungden rwothukvüka. 5 Ontena liko ji mpato eyuki sia jitüv rwothukvüka. Sheryu jina n rov enhyokao jiang, odung hakao jiang mpato khomung jiang na tsoe sivka." 6 Ontena ni mesaki osi ni tsüphoeden osi kyon jiang ki topvü sanzhüvka. Osi onte motsüi jiang na hungthakcho topvü lona tsükshikata tüv tssovka. Tole mesao jina mmilani yi sicho. 7 Mesao küpo tsüphoden jiangna ombo ezotacho, "Kyon shina kvütenhya ekhetsüv sato? Israel jiang vachi oyi onte Potsow ji khümthuka. Ejip meta shijo moni sithako shi nino n tsichoke?" 8 Tole Moses ha Aaron oniji mesao thüngi sosi yicho, osi mesao jina oni ezocho, "Ntena oyi nte Potsow ji khümkhuka, tole otsotso ochoang yithoku sala? 9 Moses na janlancho, 'E topvüna yivka, e tsoeoro osi pvüchiporan topvü sosi yivka. Ena e tsokhying tsolo jiang, olyu nyanyan jiang, mangsü jiang to sonhyav, ntiotssole ena e pvüi Potsow yikrachia tokhu khitav." 10 Mesao jina ezocho, "Ana Potsow myingona echümala, ana kvüthüngha nte eloe osi ngaro jiang sosi nte n yithuk! Ntena a panlantav khentala to ana ntsithaka. 11 To n tssoche! Nte yihungna eboetso tae na oyi OPVÜI khümtava." Hojito ezoa Moses ha Aaron oni ji mesao thüngina phanchukchi sicho. 12 Tole OPVÜI na Moses ezocho, "Ejip metalo khomungden chiyithuku tsükona ni khe ji rükachia. Tona ontena sana chiyi benro osi thanpo kvüta sheryu jina enykacho sana jiang tsoe sithokuka." 13 Tole Moses na ombo jarung ji rükachile OPVÜI na engkhüwoe na mpung chiyithuki hoji tsüngon osi zümo totona venthukcho. Enyathüng jo hojina khomungden jiang sochukcho. 14 Ontena oden tssoe rüma oyi meta ji eyuki sicho. Hoji khomungden jijo kvüthüngha n hunghan osi n hunglamo jitüv tssocho. 15 Ontena liko ji mpato nyika eyuki sicho. Sheryu jina halanchicho ntio licho sana ontena tsoracho osi odungi tssüngthi jiang ha tsoracho. Ejip meta topvü lo limo mmyaku n liv tsorae sicho. 16 Tole mesao jina zaktole Moses ha Aaron oni tsae ezocho, "Ana nte Potsow osi nte mhadungo mmen tssothaka. 17 A mmen jiang nlan a siyitava, osi OPVÜI khi echüo vara shi khi a siyithuku randantava." 18 Moses na mesao thüngi na yicho, osi OPVÜI thüngi randancho. 19 Tole OPVÜI na engkhüwoe ezhü ji engrhelamoe ezhü kümthoki sicho osi hoji ezhü jina khomung jiang sosi Suez jünken jiwoe yithukcho. Ejip lo khomung motsünga tia n züpkav sicho. 20 Tokhatola OPVÜI na mesao ji lüm khüngthuki ombona Israel jiang n vachicho.
Emüng
21 Jisüijo OPVÜI na Moses ezocho, "Ni khe ji potsüwoe rükachia, tona emüng echhiv epyanphyata tüv na Ejip meta ji eyuki sivka." 22 Moses na ombo khe ji potsüwoe rükachile emüng na tsüngon ethüm eyuki sicho. 23 Ejip kyon jiang na onte tia n hungtacho, osi yuta jilo jo ontena oki yaki n chivochecho. Khatola Israel jiango ontena vamo jilo jo wondang licho. 24 Mesao na Moses tsae ezocho, "Oyi nte Potsow ji khümtava, eloe osi ngaro jiangha sosi yitava. Tokhatola nte olyuden osi nyanyan osi mangsü jiango vanthuktava." 25 Moses na ezocho, "To tssona ena othan osi erungthan OPVÜI epiv ji nina ekümrüm epichev. 26 Meka, ena ekümrümo jiang sonhyachev, motsüngalea n valanchiche. Ena ekümrümo kumoe khi OPVÜI thamvü sana e bobo ethüngu lia. Osi ena meta ji oyi n jamu jo kvütüv na thamvü sana ntsiv mek." 27 OPVÜI na mesao ji lüm khüngthukcho, osi ombona kyon jiang n yithukcho. 28 Ombona Moses ezocho, "A ehungo na tsani sia, ana ni nduklamvü meka! Ana tsüngon kvülo ni hungana ji tsüngono ni chüthokuka!" 29 Moses na ezocho, "Nina ha n duklan to phyo ji elanthata," "Nina elani ahunglam meka"
Tsokhying Ovüngo Ji Echüv Ji Moses na Tüngsochiala
1 Tole OPVÜI na Moses ezocho, "Ana Ejip mesao osi ombo kyon jiang thüngi ezüp olan motsünga tae piv lika. Jisülo jo ombona nte yithukuka. Ombona phani nte yithukuka. 2 Jitsükona Israel kyon jiang topvü ezoa, onte phinakiren thüngi shona janti oyuk-osen nsorathuka." 3 OPVÜI kyak yakchia Ejip kyon jiangna Israel jiang longtsükacho. Tsüphoe jiangna mpato, Moses ji elümoto tsüphoe to longtsükacho. 4 Tole Moses na mesao ezocho, "OPVÜI na phyoala, 'Zümolongo ana Ejip yakchia wovka, 5 osi Ejip metalo tsokhying ovüngo jiang topvü mesao tsokhying yansa tssentso tssovsa evamo ji lona benkae tsüngonrho enhying eloe ji tsokhying ovüngo ji nandang chüvka. Tssiro mangsü jiang oro ovüngo jiangha chüravka. 6 Ejip meta topvü lona kyatanrungta won zovka osi kvüthüng ha hojito n tssohan osi n tssowo jitüv sükhying tssovka. 7 Tokhatola Israel jiang osi onte ekümrümo jiango füro na tia rhyuv meka. Osi A, OPVÜI shina Israel kyon jiang tona Ejip kyon jiang to khotathukala to ntena chethevka.' " 8 Moses na wokhao tssoa heto ezocho, "Ni küpo tsüphoe topvü na a thüngi oro epyakthie a khüma a kyon jiang sosi yirale to chontavka. Tosanati ana yivka." Tosi Moses na elümoto lüm tsuka mesao thüngina yi sicho. 9 OPVÜI na heto Moses ezoe licho, "Ana Ejip lo chethev elhi elümoto etssowo tssoa mesao jina sunga ni tanglanchia munguka." 10 Moses ha Aaron onina chethev shiang hetata shi mesao ji mhadungo tssocho, khatola OPVÜI na ombo lümbüm ji khüngthuki Israel kyon jiang n vachithukcho.
Yakchi Tokhu Ji
1 OPVÜI na Ejip metae na Moses ha Aaron oni ezocho, 2 "Choro shijo nte tsükona nzyualo choro ovüngtso ji tssovka. 3 Israel kyon topvü thüngi heto engathethuka, choro shilo tsüngon taro to jilo otsük akvüna ombo wopan ji tsükona olyuro mekana nyanyanro motsünga ethüngchei vanthuka. 4 Ombo wopan jina ekümrüm mpüm jo n tsorao tüv wozana to tssona ombo phinakiren oni motsünga shümta tatsüngthuka, kyon tsükana kvüta tsokhukvü sana ji ephanina. 5 Ntena olyu lea nyanyan lea khikhuka, tolea nzyuatso osi obong ntia ephyo erüv n khyingo tüv khivka. 6 Jitosi choro jilo tsüngon taro mezhüo to ji mmyulani Israel topvüna ekümrümo jiang tatsüngthuka. 7 Ontena ejen tara ranchei oki kvülona oso ji tsotav sana ji kipüng tyurhyu lo osi kipüng mhalo koküngo esekae vathuka. 8 Hoji zümo oso ji rii limo ekhov tona ebung mozhü to n thena rüngcho hümri nzo tsotathuka. 9 Oso ji eshüi na mekana ekvüi ti-tsotava, tolia mpüm totona ojo, kvüri osi pokchung jiang theta rii tsotava. 10 Hojilo na ntia tsonhyoe enyathüng jana tivatava, ntio enhyoana rungi sitava. 11 Ntena zakto tsoyutav lia ntiotssole nte yentsa tsükona mpensü ekata, ojolo jokhüp osi okhelo jarung to ehamvü lia. Shijo OPVÜI, A, shi a yikrachiv tsükona yakchi tokhü. 12 "Ana hoji zümo Ejip meta yakchia ezüp pia kyon lea ekümrümo lea tsokhfü osi obong topvü chüthuka Ejip potsow jiang ezüp pia ovsala. Aiyo OPVÜI ji, 13 kibüng tyurhyu lo ejen ji yakchia nte evan ki to chethevka. Ana hojiang hungana nte yakchia yi sivka osi Ejip kyon jiang kangshiathüng nteno nte nkoyavka. 14 OPVÜI A, shina ntio elhicho sana ntena nchümcheo tssoa ntena tokhü shi nte ekhümlan tokhü tssoa benphitavka. Yuta topvülo shi benphia wotava."
Vüm-mhi Mozhü Ntheo Hümri Tokhu
15 OPVÜI na phyocho, "Ntena tsüngon tiyingo jo ebung mozhü etheo hümri tsov meka ebung mozhü n thecho tüv tae tsotava. Tsüngon ovüngo jilo jo nte kilo ebung mozhü topvü sitava, ntiotssole tsüngon tiying yuta jilo ochona ebung mozhü etheo hümri tsoana enhungo ombo ji a kyon to n khanhya. 16 Tsüngon ovüngo jilo tona tsüngon tiyingo to jilo to ntena nduktae khümtava, hoji tsüngon jianglo ntena tssoyanmori yaka ntia elhi tssov meka. 17 Tokhü shi benphia wotava, ntiotssole tsüngon shilo ana nte jipo shi Ejip meta lona nte sochecho, yuta topvülo ntena tsüngon shi ji tokhü tssoa benphia wotava. 18 Choro shilo tsüngon taro mezhüo toji mmyuina benkae tsüngon ekhao toji mmyui nandang ntena ebung mozhü thecho hümri tsov meka. 19-20 Tsüngon tiying nandang nte kilo ebung mozhü lithoku meka, ntiotssole meta kyon tssolea, metapoe kyon tssolea ochona ebung mozhü theta rüngcho hümri tsoa na a kyon to n khanhya."
Yakchi Tokhü Ovüngo Ji
21 Moses na Israel esopvüi topvü tsarhyui ezocho, "Nte otsük akvüna olyuro lea, nyanyanro lea motsünga ethüngchei lüngthavka, osi nte wopan akvüna yakchi tokhü khivka. 22 Limo ovüng ntsanchoe hoji ekümrümo ejen etheo ophi jilo jümthechi ejen ji nte kibüng tyurhyupvü ji tona koküng tolo esekae vatava. N vonchithüng nandang nte ochinaha oki yaki chiwov meka. 23 OPVÜI na Ejip kyon jiang chüthoka Ejip yakchiathüng nte kibüng tyurhyupvü tona koküng tolo ejen ji zesi echü lanben ji ezoa nte ki jo rhoro nte n lüngthathuk. 24 Nte osi nte tsoronichen jiangna shikhfü shiang kümali benphivka. 25 OPVÜI na nte piv phyochako meta jilo ntena kvüthüng rheyia sana shi benphitava. 26 Shio ntio etsso benphitala, to nte tsoronichen jiang na nte engana? , ntena, 27 'Shijo OPVÜI yikrachi tsükona yakchi tokhü jika, ntiotssole ombona Ejip metae na Israel jiang ki jiang yakchicho, ombona Ejip kyon jiang chüthoksi eteno e shanchocho to ezotava.' " Tole Israel kyon jiangna nkhuk tseni khümtacho. 28 Osi ontena oyi OPVÜI na Moses ha Aaron onina ezovo ji ephan benphitacho.
Eboe tsokhfü Jiang Chüo Ji
29 OPVÜI na zümo longo Ejip lo eboe tsokhfü topvü chüthokcho, mesa vantsü tsentso tssov sa vamo mesatso jilona benkae vüngphen ki vamo ji tsoe nandang lüngthacho, osi ekümrümo nrodemo jiang ha topvü chüthokcho. 30 Hoji zümo mesao ji, ombo küpo tsüphoe jiang osi Ejip kyon thanpoe jiang topvü nthechiracho. Hoji zümolo Ejip meta topvülo kyatanrungta licho, ntiotssole oki kvüloha otsoe nchücho n licho. 31 Hoji zümo mesao na Moses ha Aaron oni tsathuki ezocho, "Nte osi Israel topvü tsatava. A meta shi sisi yitava! Osi ntena phyo ji esüa nte pvüi ji khümtava. 32 Nte olyuden, nyanyanden, osi mangsü jiang sotasi tsantava. Osi a tsükona ha mmha a randanitava." 33 Ejip kyon jiang na Israel jiang ji zakto meta jilona khoe yitale to rikata ezocho."Ntena khoe n yia na e topvü echükhamvü." 34 Jitsükona kyon jiang na onte hümri rüngphen jiang, ebung mozhü n thena ohüm nhyoncho osi tssüngpyak jiang to thei onte sü jiang na ejei epvüina ejümtasi yicho. 35 Moses na ezoji esüa Israel jiang na Ejip kyon jiang shona janti, oyuk-osen tona mpensü to nsorae licho. 36 OPVÜI etho lona Ejip kyon jiangna Israel jiang longtsüka khukcho. Osi Ontena ntio chona na pithukcho. Hojitolui Israel jiang na Ejip kyon jiang eli jiang hansi yitacho.
Israel Jiangna Ejip Lona Khochiala
37 Israel jiangna ojoena Ramases lona khochi Sukkoth lo yitacho. Onte ji eloe osi nongori n khana owo wothüng nzo tiruk khochitacho. 38 Kyon thanpoeden okho tsüphov osi olyuden, nyanyanden, osi mangsüden to onte khochitacho. 39 Ontena Ejip metaena tssüngpyak hantao jiang lona ebung mozhü n theo hümri rungi tsotacho, ntiotssole esüngaro taena tssüka onte phanchukchio jina etsoyu osi ebung mozhü n theo hümri n rüngchocho. 40 Israel kyon jiangna Ejip lo nzyu nzo mezhüsi thümro vanthakcho. 4l Nzyu nzo mezhüsi thümro ji eben tsüngon jilona OPVÜI kyon pvüji topvü na Ejip meta lona khochicho. 42 OPVÜI na Israel jiang zeyata chiyithuko jijo zümothüng tssocho; hoji zümotsük jijo Israel jiangna khochaki OPVÜI pia yuta topvülo Israel jiangna enhyak zümo tssothukala.
Yakchi Tokhü Tssolan Shikhfü Jiang
43 OPVÜI na Moses ha Aaron oni ezocho, "Yakchi tokhü ji tsükona lanso heto lika: Metapoe kyon ochinaha yakchi tokhü etsoyu ji tsov meka, 44 tokhatola nina ezii shicho vana tssona, osi nina ombo tsenicho tssona ombona jo tsokhuka. 45 Nina esüngaro vanthukcho yingae osi nchenbae ochinaha tsov meka. 46 Etsoyu ji oki kvülona methakcho sana hoji lona topvü tsoravka; osi hoji lona hapoe hansi chivov meka. Elani, ekümrümo jiang ryu jiang ntia jakiv meka. 47 Israel okho topvü na tokhü shi benphivka, 48 tolea tseni n siwo kyon ochinaha tsov meka. Tsanthan ochoang sana nte yulo vanjüng tssoa vancho tüvna tokhü shi benphi OPVÜI yikrachi hunga tssona ntena ovüng tssoa opo kilo eboetso topvü tseni siyidemka. Jisüi jo omboji Israel kyon esüa yanchi kyon to khakhuka osi ombona tokhü ji tsokhuka. 49 Shikhfü tsük shi Israel jiang pono osi tsanthan vanjüng tssoa yio jiang ponoha benphivka." 50 Israel topvü na oyi engacho osi Moses ha Aaron onina phyoji esüa tssotacho. 51 Hoji tsüngono OPVÜI na Israel pvüji topvü Ejip lona sochukcho.
Tsokhfü Jiang Khochaki OPVÜI Pioji
1 OPVÜI na Moses ezocho, 2 "Eboe tsokhfü topvü khochaki a thüngi pitava, ntiotssole Israel eboe tsokhfü akvü osi onte ekümrümo nrodemo jiang topvü a echi."
Ebung Mozhü Ntheo Hümri Tokhü
3 Moses na kyon jiang ezocho, "Ntena Ejip lona khochio tsüngon shi nchümchetva, Ejip meta kvülo ntena oyam ezii tssota vancho sana shi lona khochio ji tsüngon shilo OPVÜI na ombo etho tsüphov ji khi nte sochukcho. Ebung mozhü n theo hümri tsonrüngu meka. 4 Ntena choro ovüngo Abib shilo nchüng Ejip lona khochiala. 5 OPVÜI na meta motsünga Kanaan kyon, Hittite, Amorite, Hivites osi Jebusite jiang na vamo ji nte piv to nte omotsüi jiang thüngi phyochaki lia. Ntena eli osi lizü meta hojilo kvüthüng rheyiasana nzyu akvü choro ovüngo jilo shi tokhü shi benphivka. 6 Ntena tsüngon tiyingjo ebung mozhü n theo hümri tsoa vansi tsüngon tiyingo to jilo jo OPVÜI yikrchia tokhü shi khitava. 7 Tsüngon tiying ntena ebung mozhü etheo hümri ti-tsotava; meta jilo ebung mozhü osi ebung mozhü etheo hümri lithoku meka. 8 Ntena tokhü shi benkata na nte tsoe jiang thüngi ntio tsükona tokhü shi khia sana ezotava, OPVÜI na Ejip lona nte vachio jithüng ntio kvüto tssocho sana ezotava. 9 Shi benphiwo shijo ntena ntiosana nte khe mekana otonlo khüngkae hancho esüa elaro nchümchephen tssovka; shi yakchia ontena OPVÜI yizüng jiangha yantav osi lümbümina khatav nte nchümchethokuka, ntiotssole OPVÜI na ombo etho tsüphov ji khi Ejip lona nte sochecho. 10 Nzyu akvü yuta eben lo tokhü shi khitava.
Tokhu Jiang
11 "OPVÜI na Kanaan kyon jiang meta kvümoe ombona nte motsüi jiang thüngi epiv tongochüa phyochaki vacho sana hojilo nte sothechivka. Ombona hojilo nte sothechiana, 12 ntena eboe tsokhfü topvü khochaki OPVÜI pivka. Nte ekümrümo obung ovüngo jiang topvü OPVÜI pitava, 13 tokhatola gadho obung nrodemo jiango olyu worona wothung tssoa pitasi rhanchoe vatava. Osi gadhoro jiang nte n rhancho hunga tssona evüng ji jakisi vanthuka. Ntena eboe tsokhfü jiang topvü rhanchoe vanthukvü shikhfü. 14 Henasüi nte tsoe jiangna ntio etsso shi benphia sana to nte engana ezotava, "OPVÜI na ombo etho tsüphov khi etena Ejip lo ezii tssota vamo jilona esochokcho. 15 Ejip mesao jina lüm khünga Israel jiang e n vachio jina OPVÜI na Ejip eboe tsokhfü akvü chüthukcho, ekümrümo obung nrodemo jiangha chüthukcho. Jitsükona etena ekümrümo obung nrodemo jiang topvü OPVÜI thansi ete tsokhfü jiang rhanchoala." 16 Heto benphiwo shijo ntiosana ete khe osi otono khüngkae hancho esüa e nchümchethukvü, OPVÜI na ombo etho tsüphov theta Ejip lona e sochokcho to e nchümchethukvü tsükona.' " 17 Ejip mesao na kyon jiang yithukathüng Potsow na onte ji jütssa dunga Philistin woe jiyio ji lan ji enhyantso khatola jiwoe na mekna onte socho. Potsow na nchümcho, "Ana kyon shiang olani na ori tssothuka na ontena elani Ejip metae yilanhungu, " 18 Jitsükona ombona onte ji lijüng rhüa jümyon jümang jiwoe socho. Israel jiango ritsso ebensü benriracho. 19 Moses na Joseph echümüng ji hancho, ntiotssole Joseph na onte na hoto tssotale to Israel jiang echümchakthukcho. Joseph na heto onte ezoe licho, "Potsow na nte rhanchoa na ntena a müng shi meta shilona hansi yitakhe." 20 Israel jiangna Sukkoth lona khoe Etham meta lijüng tssa jilo chiyicho. 21 Engo jo OPVÜI na olan onte esov tsükona onte mhadungi na eluk kholong khi socho, osi zümolo jo ombona omi kholüng khi onte mhadungi na wondang pia onte socho, hojitoli ontena zümolo ha yentsachecho. 22 Engo jo eluk kholung jina yuta topvü lo onte mhadungi tssocho, osi zümolo jo omi kholung na onte mhadungi tssocho.
Jümyon Jümang Yakchio Ji
1 Hojisüi jo OPVÜI na Moses ezocho, 2 "Ntena kholani Baal Zephon ndüngo jümyon jümang jiha Migdol oni yutalo Pi Harioth lo esantale to Israel jiang ezoa. 3 To tssona mesao jina Israel jiang ji lijüng jina nhyonyae meta ji n yakvü khyuphita vancho tsayiavka. 4 Osi ana ombo lüm khüngthuklani omb khi nte phanthoku ka, osi ana mesao ji tona ombo rasan jiang to khyoe a mying tsükathuku ka. To tssona Ejip kyon jiangna aiyo OPVÜI ji to antsivka." Israel kyon jiangna hoji esüa tssotacho. 5 Kvüthüng kyon jiang ji yithaka to Ejip mesao ezocho sana, ombo osi ombo tsüphoeden jiangna lümbüm tongphi phyotacho, "Etena ntio elhitachola? Etena Israel jiang yithukthaka osi ezii n vamvü epüpi sithaka." 6 Mesao jina ombo ritsso zotoro jiang tona rasan jiang to methakcho. 7 Ombona ombo ritsso zotoro mmhontso nzo tirok ji ephalo zotoro thanpo jiang topvü tsüphoeden jiang khi sothuksi khochithukcho. 8 OPVÜI na mesao ji lüm khüngthuki Israel jiangna ekhyoe tssoa yita vamo jiang phanthukcho. 9 Ejip rasan jiangna kurü jiang, zotoro jiang, zotoro esoeden jiang topvü nzo tssoe phana owo pi Harioth tona Baal Zephon to ndüngo jümyon jümang jilona owo phayacho. 10 Israel jiangna mesao osi ombo rasan jiangna onte phana la to ntsiale onte ekhenrhüka kyochile to OPVÜI thüngi randantacho. 11 Osi ontena Moses ezotacho, "Ejip metae jo olüp n lichoalo? Lijüng shilona echüthoku nina e sosi yichoke? Lijüng shilona echüthukvü nina e sosi yichoke? Zeta, nina Ejip metae na esosi oyi ntio lyuchechola! 12 Etena n khochithüng na ena hetvüti tssovka to ni zezo? Ena e ti khetsüna to Ejip metae eziiden tssoa e vanthukle to ni ezocho. Hepi lijüngi na echüv jo hojina echüo ji mmhomo tssov." 13 Moses na ezocho, "Tikyuta, tisenphina vantava, OPVÜI na nchüng ntio elhi tssoe nte shanchov sana ntena ntsivka, ntena Ejip kyon jiang kvüthüngha hunglam meka. 14 OPVÜI na nte thung tssoa rotavka, osi ntena etssowo ntia liv meka." 15 OPVÜI na Moses ezocho, "Nino ntiolyui ekyorung chona tüngkachiala? Mhadungoe khochile to kyon jiang ezoa. 16 Ni jarung ji khyokae jümangoe rüchi bena. Ojü ji chisoe sivka osi Israel jiangna likying yakchia yichevka. 17 Ana Ejip kyon jiang lümbüm khüngthuki Israel jiang sürüa santhethukuka osi ana elani mesao ji osi ombo rasanden, ritsso zotoro osi hojiang esüi jiang to pono ekhyo khi, myingthüng khivka. 18 Ana onte khyoana aiyo OPVÜI ji to Ejip kyon jiangna chethevka." 19 Potsow lanben Israel rasantsü mhadungi tssoa vamo jina ha nkanphi sülamoe wocho. Eluk tyurhyu jina ha nkanphi 20 Ejip kyon tona Israel jiang to yutalo rheyicho. Osi Ejip jiango emüng chungi tssothukcho, khatola wondang jo Israel jiang picho, osi rasan jiangna zümo tona onte enhyanta ha n duktachecho. 21 Moses na ombo jarung ji jüponi rüchi bencho tole OPVÜI na engkhvüwoe ezhü soa chiyi ojü ji khyanlanchi sicho. Osi zümo tona veni ojüji chisoe sicho, 22 osi Israel jiangna jümang ji hayi hamen ojü echung jiang yutalo na likying yakchia chiyicho. 23 Ejip kyon jiangna onte phana ritsso zotoro, ritsso kurü osi hojiang esoe jiang to Israel jiang sü rüa rhowotacho. 24 Wonchibüngo OPVÜI na eluk tyurhyu osi omi tyurhyu jiang ponina zechochisi Ejip kyon jiang ekya nungra lo thechicho. 25 Ombona zotoro khoro jiang rhyuyae sithuksi n senphiphov sithukcho. Tole Ejip kyon jiangna phyotacho, "OPVÜI na Israel jiang thung tssoa ete thüngi rotala. Etena shilona chiyi sitav kalo!" 26 OPVÜI na Moses ezocho, "Ni jarung ji jüponi rüchi bena tona ojü jina kholani rheyi Ejip kyon jiang, onte ritsso zotoro tona hojiang esoe jiangto monthukuka." 27 Moses na jarung ji jüponi rüchi benle wonchibüngo jo ojü jina ombo vanphen jilo rheyilancho. Ejip kyon jiangna ojü ji mhadungo tsanhungcho khatola OPVÜI na jülongi onte thechicho. 28 Ojü jina kholani ritsso zotoro jiang, esoe jiang tona Ejip rasan kvüta na Israel jiang phana jümangi rhowocho sana jiang to eyuki sicho, osi onte tsüka tia n nhyokacho. 29 Tokhatola Israel jiango hayi hamen ojüna chungsi likyingina yakchicho. 30 Hoji tsüngono OPVÜI na Israel jiang Ejip kyon jiang khelona shanchocho, osi Ejip kyon jiango jürani chüi erichirae lia Israel jiangna hungcho. 31 OPVÜI na etho tsüphov khi Ejip jiang khyoji Israel jiangna hungale ontena OPVÜI kyucho, osi OPVÜI tona ombo nri Moses to lo longtsüka tacho.
Moses Khen Ji
1 Tole Moses ha Israel kyon jiang to na OPVÜI heto denkatacho: "Ana OPVÜI denkav, ntiotssole ombona khyotsü khyothaka; ombona kurü jiang to na tsankae jiang to jümangi shümthechirathaka. 2 OPVÜI jo a nkohapvüi thokhyong ji, a shanchowo ji ombo, ombo a Potsow ana ombo thüngüv. Osi ombo a motsüi jiang Potsow, ana ombo tsüpho ji nsikata dem. 3 OPVÜI jo rikhyoe; ombo mying jo OPVÜI." 4 "Ombona Ejip rasan jiang , tona ritsso zotoro jiang to jümangi shümthechicho; osi ombo tsüphoe mmhontso jiang, jümyon jümangi rheyithukcho. 5 Jümang ejungu jina onte eyukzhücho; osi olong esüa jümang lazae onte elungthecho." 6 "OPVÜI, ni khe amimoe jijo ekhenthav etho jüa; hojina ori jiang echükroala. 7 Nina thotsü ekhyo lona ni ri jiang khyothechiala; ni lüm etsuk ji kisochiala osi mavü esüa onte rungala. 8 Nina jümangi mhvüthechicho tole ojü jina oyaki evakachicho; ojü jina echung esüa mangi sicho; jümang jilo ejungtso jiha kholongi sicho. 9 Ori jina phyocho, 'Ana onte phani rhümavka; Ana onte ejüeli jiang chiroe ana chokao jiang khivka; Ana a yonri tssüngchei onte ejüeli topvü khiyivka.' 10 Khatola OPVÜI, nina yenjoa echenkochona, Ejip kyon jiang ojüi rheyikhancho; onte ji shisha esüa ojüi ekyuthav jilo jüngtheracho." 11 "OPVÜI, potsow jiang yulo ni esüa ocho jücho ato? Nino emhukthav ntho, ochona ni esücho ato? Ochona ni esüa chethev osi emhuko elhi tssochecho ato? 12 Nina ni khe amimoe ji rüchile, liko jina e ri jiang nzhücho. 13 Nina phyochako ji longtsüka lia, nina shancho kyon jiang nina sochokcho. Ni etho khi nina ntho meta jilo onte sochicho. 14 Jipo jiangna zothaka, osi ontena ni ekyu lona enetala; Philistian jiang ekhenrhükala. 15 Edom esopvüi jiangha ekhentsüngala; Moab ekhyo ekhüng jiang enetsüngala; Kanaan kyon jiang etho mmyimthaka. 16 Ekhenlong osi ekyusü na onte pyingthaka. OPVÜI, ontena ni etho ji zetasi yutaloe ezüpa vancho ni kyon jiangna onte yakchia n yithüngjonina ezii eküm lona vachio kyon jiang. 17 Nina onte sothei ni phunglani onte chümcho, hojijo nina ni ki tssov ekyochei vao meta ji, osi nina nipopo tssovo khümphen ji. 18 OPVÜI, nino kümali, kümali mesao tssov."
Miriam Khen
19 Israel jiangna jümang ji likying esüa yakchicho. Tokhatola Ejip ritsso zotoro jiang osi onte kurü tona kurü esoe jiang to na jümang jilo rhovole, OPVÜI na ojü jiang sothelani onte eyukzhüthukcho. 20 Aaron oyulov Miriam, zenkhying jina ompvü pyapiro ji tsakale, eloetsü na ompvü sürüa pyapiro jiang ekhophita sharitacho. 21 Miriam na heto onte denicho: "OPVÜI nsikata, ombona khyotsü khyothaka; Ombona kurü jiang osi jilo tsankae jiang topvü jümangi eyithechirathaka."
Ojü Ekhov
22 Jisüi jo Moses na Israel kyon jiang jümyon jümang jilona sosi Shur lijüngi yicho. Ontena lijüng ji yakchia tsüngon ethüm yentsata ha ojü n hungcho. 23 Jisüi jo ontena meta motsünga Marah to tsa jilo chiyicho, khatola hojio ojü ji elümoto kho jina ontena n yuchecho. Hoji tsükona meta ji Marah to tsacho. 24 Kyon jiang na Moses nhyenchoa phyotacho, "Eteno ntio yutavla?" 25 Moses na OPVÜI thüngi tüngochüa randancho, tole OPVÜI na otssüng wochoro motsünga ombo ejüle ombona hoji khi ojüi shümthechicho; tole ojü ji yucheo kümcho. Hoji lona OPVÜI na vana evov shikhfü ha pi, nna elani chyui ha onte ze to tssocho. 26 Ombona ezocho, "Ntena otsotso ana ntio elan to zichetana jiang benphia osi a yizüng jiang enga a jancho zov to tssona, nochonori kümoe ana Ejip kyon jiang pono picho sana jiang khi jo ezüp nte n pila. Aiyo OPVÜI ji, ochona nte emiyia sanaji." 27 Jisülo jo ontena Elam meta, kvüloshi jünhyo taro eni nna Palm dung ekha tiying to licho sana jilo chiyicho; osi hojilo jütssae esantacho.
Mana Tona Piluku To
1 Israel khümtsüng totona Elam lona khochuki, ontena Ejip lona khochisi choro eni si tsüngon taro mongo to jilo ontena Sin to tsao lijüng jilo chiyicho, hojijo Sinai tona Elam to yutalo. 2 Hoji lijüng jilona ontena Moses ha Aaron oni nhyenchoa phyotacho, 3 "OPVÜI na Ejip metaena e chüthokcho salivo to ena nchüma vanthaka. Hoji metaejo ena khukthei tia oso osi thanpo etsoyu etsson tsoyuchecho. Khatola ntena lijüng hetüv lo esochukchi khangtsüngi echüthoku sala." 4 OPVÜI na Moses ezocho, "Ana oyaki na nte etsoyu jothoku sala. Kyon jiang na eng akvü hoji nchuk etsov ji chivo khyorhyuvka. Hojitolui ontena a yi ngengav sana to chyui zevka. 5 Tsüngon tiruko to jilo jo ontena chivo tsüngon eni etsov khyoe methaki vavka." 6 Jitsükona Moses ha Aaron onina Israel kyon jiang topvü ezocho, "Ejip lona onte sochuko ji OPVÜI na toji ntena nchüng mmyulani ntsivka. 7 Enyathüng jo OPVÜI vanrhyu jina tsünglüpo ji ntena hunguka. Ntena ombolo phyochophyorio jiang ombona zothaka, ntiotssole ena ombo ndungntssung engae tae tssoala." 8 Jisülo Moses na phyocho, "OPVÜI na mmyulani etsov oso nte piv osi enyathüng etsov ha hümri etsson nte piv, ntiotssole ntena ombo pono phyochophyorio jiang ombona zothaka; ntiotssole ntena epono phyochophyorio jijo OPVÜI thüngi phyochophyoricho." 9 Moses na Aaron ezocho, "Okho totona shilo oro OPVÜI mhadungo mangtale to ezoa, ombona nte phyochophyori jiang zothaka." 10 Aaron na kyon okho ji hojito ezole ontena lijüngi zechitacho, tole jitopvü OPVÜI wondang ji tsünglüpa elukina rachochia onte hungthukcho. 11 OPVÜI na Moses ezocho, 12 "Ana Israel jiang phyochophyori jiang zothaka. Onte ezoa, nchüng eng rhev engkhvü mmyonathüng ontena etsov hunguka, osi enyathüng etsov tsükona ha onte tsokhuk hümri pivka. Jitosanati ontena aiyo OPVÜI onte Potsow ji to antsivka." 13 Mmyuale piluku onten tsüphov rümchukchicho, osi hojiang na nchenphen meta ji pyingkachicho osi enyathüng jo nchenphen jiang topvü porüp na pyingcho. 14 Porüp jiang phyoni ethük shungi chüngithakale lijüng ji poni ntiosana porov tssiyoro esüa liracho. Hojiang ji porüp kholung esüa mpümroa tüv liracho. 15 Israel kyon jiangna hojiang hungi ntiosana n tsiküma onte yulo "Shijo ntioato?" to engatacho. Tole Moses na onte ezocho, "Shijo nte etsov tsükona OPVÜI na nte piojika. 16 OPVÜI na nte otsük akvü nte ethelan ephan, wopan kyon tsükalo opvü eni ejan khyorhyutale to nte ezoala." 17 Israel jiang na hoji esüa ejoma na khosha ejoma na tara to khyorhyutacho. 18 Khatola ontena etüki zetale khosha khyorhyuo jiang naha onte tssochyu jilo na tajoa n tssocho, osi mataroa khyorhyuo jiang ha n tsoyucho mataroa to n tssocho. Otsük akvüna onte ekyan tae khyocho tssocho. 19 Moses na onte ezocho, "Nte ochinaha ojyua echi vav meka" 20 Khatola onte ejoma na Moses yi ngav enhyoe vacho. Tole ojyuato jo jiang topvü ora rhei kyoni orhüm tssothakcho osi Moses na onte thüngi lüm tsukcho. 21 Enya akvü onte otsük akvüna ombobo ethelen eli ephan khyotacho, osi eng rancheta na likoe enhyoe siwo jiango phyonkhani sicho. 22 Tsüngon tiruko to jilojo ontena eng eni etsov khyotacho, tsükalo opvü mezhü ejan khyotacho. Okho jilo esopvüiden jiangna owo Moses yirütacho, tole ombona onte ezocho, 23 "Ojyua jo ntho esan tsüngon, ombo tsükona khochaki evao tsüngon tssov to OPVÜI na phyothaka. 24 Ntena ntio tsonhyoa sana jijo ojyua echi vanthuka. Moses na ezovo ji esüa ontena enhyo jiango ojyua to tsükona vatacho, osi hojijo n yeso elani ora ha n van to tssocho. 25 Moses na ezocho, "Nchüngo shi tsotava, nchüngo esanmung ji, OPVÜI lo khochaki vao esan tsüngon ji osi ntena hapoe ntia etsoyu hungu meka. 26 Ntena nchyuk tiruk jiang lojo eng akvü etsoyu yani vav, khatola tsüngon tiyingo to jilojo esan tsüngon küma etsoyu ntia yamvü liv meka." 27 Tsüngon tiyingo to jilo kyon ejoma na etsoyu yana hapoe chivoa ha ntia n licho. 28 Tole OPVÜI na Moses ezocho, "O kyonden, ntena kvütenhyaka ayi nngav ngangtapamvüla? 29 A, OPVÜI shina esan tsüngon nte piala toji nte nchümchethuku tsükona, nchuk tiroko to jilo jo nchuk eni tsükona etsoyu etsson nte picho. Hoji tsükona tsüngon tiyingo to jilo jo otsük akvüna oki yaki n ona vamuka." 30 Hoji tsükona tsüngon tiyingo to jilojo kyon jiangna elhi ntia n tssotacho. 31 Israel kyon jiangna hoji etsoyu ji Manna to tsacho. Hoji jo ntio sana otsüng ehüma tüv, osi tsakijüna hümri rüngcho tsoa to tssocho. 32 Moses na phyocho, "OPVÜI na phyoala, Ombona Ejip metae na esochetathüng etena lijüngina ntio tsotacho sana ete tsoerüi jiang ejüphen Manna tara nkümi vatale to". 33 Moses na Aaron ezocho, "Mvüru motsünga khi jilo manna opvü eni etüktheta osi hoji ete tsoerüi jiang ejüv tsükona OPVÜI vanrhyu meta jilo vata." 34 OPVÜI na Moses ezoji esüa Aaron na hoji khi ntsata vaphen bakos jilo vacho. 35 Hoji sülo nzyu zhüro jo Israel jiangna Kanaan n janthung nandang manna tsotacho. Jisüi jo Kanaan lo vani sitacho. 36 (Hojithüng otse etükphen shenthi jijo enhünga etükpvü mekana litre mekyu ethe tssocho.)
Longpvü Lona Ojü
1 Israel okho totona Sin lijüng lona OPVÜI yizüng ephan meta motsünga lona thanpoe to khyuta yitacho. Ontena Rephidim lo nchentacho, tole hoji lo eyuvjü n jücho. 2 Ontena Moses thüngi erenjanta "Eyuvjü e pia." to ezotacho. Tole Moses na ezocho, "Nteno ntiolyui erenjantala? Nteno ntiolyui OPVÜI ojang tssotala?" 3 Khatola kyon jiang elümoto eratsüngo jina Moses thüngi erenjantapvü tssocho. Ontena phyotacho, "Nino ntiolyui Ejip metae na e sochukchola? E ngaro osi ekümrümo shiang nzo eratsüngi echüthukvü to alo?" 4 Moses na OPVÜI thüngi tüngkachia randana phyocho, "Aiyo kyon shiang kvüto lyuvto, ontena a ephyatsüngu sala." 5 OPVÜI na Moses ezocho, "Israel jiang yolo nina ejoma sosi kyon jiang vüngi wotava. Nina Nile zhükhfüi sathechio jarung jiha bena. 6 Ana Sinai phunglani longpvü motsünga poni mangi nte mhadungi vamka. Hoji longpvü ji erhüpa tona kyon jiang eyuv hojilo na ojü joyivka." Moses na Israel esopvüi jiang mhadungo na hojito tssocho. 7 Meta ji Massah tona Meribah to tsacho, ntiotssole Israel jiangna hoji lona erenjanta osi OPVÜI ojang tssoa, "OPVÜI ji ete yolo vevanchoto?" to phyotacho.
Amaleket Jiang Thüngi Ritsso
8 Amaleket jiangna oro Rephidim lona Israel jiang hatacho. 9 Tole Moses na Joshua ezocho, "Ojyua owo Amaleket jiang thüngi rotav tsükona kyon ejoma ethüngcheta. Ana yingsüng kvüri phanthi OPVÜI na a hanthuko jarung ji bensi vamka." 10 Moses na ombo ezoji esüa Joshua na Amaleket jiang thüngi rotalo wocho, osi Moses, Aaron tona Hur to jo yingsüng kvüri chüngitacho. 11 Moses na jarung ji ekhyonkae ebenthüng nandang jo Israel jiangna khyocho, osi Moses na vachochiana Amalekite jiangna khyocho. 12 Moses khe jiang jakratana Aaron ha Hur onina olong hanayi Moses khukthethuksi onina ombo mphyima phanthi ombo khe jiang sayitasi eng n rhethüng jo zatacho. 13 Hojito lyui Joshua na Amalekite jiang khyothechi sicho. 14 Jisüi jo OPVÜI na Moses ezocho, "Ekhyo shi nchümcheta wothukvü tsükona shi motsü ji erani vata. Ana Amalekite jiang khyothechi sivka to Joshua ezoa." 15 Moses na thanphensa roni "OPVÜI jo a Riven to tsacho." 16 Ombona phyocho, "OPVÜI riven ji ntssona ekhyonkae bena! OPVÜI na Amelekite jiang thüngi nchüngkhonto n tümjakna rotavka!"
Jethro na Moses Ndukala
1 Potsow na Moses tona Israel kyon jiang to Ejip lona sochokathüng kvüto elhi tssocho sana jiang motsü topvü Moses omo Jethro, Midian lo pvüti jina zocho. 2 Jitsükona ombona Moses engh Zipporah, ombo thüngi valanchio ji tona ompvü, 3 tsoeden Gershom ha Elizer oni to sosi Moses thüngi rocho. (Moses na "Aiyo oyam metae yentsae tssoa vanala"; to phyoa otsoe tsüka ji Gershom to tsacho. 4 Ombona hetoha phyocho, "Apo Potsow jina Ejip mesao na e lüngthav lona e kyochia e shanchocho" otsoe thanpo ji Eliezer to tsacho.) 5 Jethro na Moses engh ji tona ompvü tsoe otsük eni ji to sosi lijüngi Moses na ncheni vamo ntho phunglan jilo rocho. 6 Ontena tsata to ombona Moses thüngi oyi yemo jina, 7 Moses na ombo nduko chiwo, ombo mhadungo nkhümthecho, osi ombo ntssüpcho. Ontena kvüto vantala to onte ethümta engatasi Moses süranki rheyitacho. 8 Potsow na Israel kyon jiang shanchov tsükona Ejip kyon jiang osi mesao thüngi ntio elhi tssocho sana topvü Moses na Jethro ezocho. Elani Israel jiangna ezüp khio jiang tona OPVÜI na kvütoli onte shanchocho sana jiang topvü ezocho. 9 Jethro na shiang zoale, ombona emathata phyocho, 10 "Potsow thünga, ochona Ejip mesao osi kyon jiang khelona nte shanchocho sana ji! Potsow thünga, ombona ombo kyon jiang ezii eküm lona shanchothaka! 11 Enhungo ana ntsithaka, OPVÜI jo Potsow thanpo jiang topvü lona tsükata, ntiotssole Ejip kyon jiangna Israel jiang ji etssangkung kümthuka vanathüng ombona heto elhi tssocho." 12 Jisüi jo Jethro na erungthan totona erungo tona othan thanpo jiang to OPVÜI tham hansi rocho; osi Aaron tona Israel esopvüi thanpoe jiang topvüna ntho etsoyu ji tsota Potsow khümmo ombo nzo khochicho.
Yitssoeden Ethüngcheo Ji
13 Ojyuato jo Moses na kyon jiang ekhiranta jiang nlan nsüngu oyi tssoyia, enyathüng na mmyu jana n tssochov vancho. 14 Moses na etssov lio jiang Jethro na ntsiale, ombona ezocho, "Nina kyon shiang tsükona tssoa vamo shiango ntio etssola? Ntiolyui nibotina elhi tssoa kyon shiangna nyazüngina mangrae ni ngatüng ngaria mungthukala?" 15 Moses na ezocho, "Kyon shiangna Potsow lüm erüng ji ntsiv tsükona a thüngi roala, jitsükona ana shiang etssov licho. 16 Kvüthüng otsük eni yutalo ekhiranta liasana ontena a thüngi roala, tona ana ocho elan sana ezoala osi Potsow shikhfü yizüng jiang onte ezoala." 17 Tole Jethro na ezocho, "Nina lanka elamoe na mekna tssoala. 18 Nibobo ni sangtsüngi siv osi kyon shiang ha mmuki siv. Nina shiang shi ni botina tssov jo oha mmyingtia. 19 Enhungo ana lanka ni ejüvka osi Potsow na ni ndüngo tssovka. Nina etssov elamo jijo Potsow mhadungo nina kyon jiang thung chiwov ji osi onte ekhiranta jiang ombo mhadungo hansi ewov ji. 20 Nina Potsow yizüng jiang onte püngnov lia, osi ontena kvüto vamsana osi ntio elhi tssov sana onte engathethukvü lia. 21 Elani nina kyon jiang yolona ekhyoetoe ethüngcherae kyon jiang esopvüiden tsswothukvü lia, wothüng, nzoa, tinyan osi taro to pono esopvüiden. Onteno Potsow ekyuiden osi ekhüp n tsoeden osi longtsüka eliden tssov shikhfü. 22 Onte khi kyon jiang yitssoyiv elhi lo shera zathuka. Oyi mmyinguv jo ontena ni thüngi hansi rokhuka tolia oyi teriv jo ontena methakthuka. Ontena hojito ni hankyona ni tsükona elaro tssovka. 23 Potsow na heto ni tssothukhungo ji esüa nina hojito tssona, nibobo ni mmukvü meka, osi kyon shiang topvüna onte ekhiranta jiang senjümtae sisi yirav." 24 Moses na Jethro ndungntssung yi ji engae, 25 Israel jiang yolo ekhyoetoeden ethüngcheracho. Ombona onte ji wothüng, nzoa, tinyan osi taro pono esopvüiden tssothukcho. 26 Ontena kyon jiangna ekhiranta chiyiathüng mmyantayi elhilo shera zacho osi oyi teriv jiang jo ontena tssoyisi oyi mmyinguv jo Moses thüngi hansi wocho. 27 Jisülo jo Moses na Jethro ji pyonta salüm pia yithukcho osi Jethro naha ombo ki yicho.
Sinai Phunglani Israel Jiang
1 Israel jiangna Rephidim lona khochicho osi ontena Ejip lona khochisi choro ethümoto jilo tsüngon ovüngo jilo Sinai lijüng jilo chiyicho. Ontena Sinai phunglani jothe lo nchenphen ranki tssoe vasi, 3 Moses na Potsow nduko phunglan jilo chungocho. OPVÜI na phunglani na ombo tsae Jakob tsochen Israel jiang heto ezole to ombo ezocho, 4 "OPVÜI A, shina Ejip kyon jiang thüngi ntio elhi tssocho sana nina ntsia osi ana kvütoli mungshiro na ompvü ro jiang echo küpina hanphia to nte sosi a thüngi shilo nte yithukcho sana ji nina ntsia. 5 Jitsükona ntena ayi enga a yizüng jiang benphina nteno a kyonden tssovka. Limha shi topvü a echi, tokhatola nteno ana ethüng cheo kyonden tssovka. 6 A lo tae khochaki evamo kyonden, osi ntena pvütiden esüa abenkavka." 7 Tole Moses na joyi kyon jiang esopvüiden jiang tsarhyui OPVÜI na ntio ombo ezocho sana topvü onte ezocho. 8 Tole kyon jiang topvüna rümto janlancho, "OPVÜI na ntio phyocho sana jiang topvü ena tssovka", Tole Moses na hoji OPVÜI ezocho. 9 OPVÜI na Moses ezocho, "Ana eluk echhiv lungina ni thüngi rovka, tona ana ni jamo ji kyon jiangna zov osi ontena ni longtsüa yivka." Kyon jiangna janlamo ji Moses na OPVÜI ezocho, 10 tole OPVÜI na ombo ezocho, "Kyon jiang thüngi oyi nchüng tona ojyua to jo Potsow ekhümvü tsükona ntssüng-rüngta mungle to ezoa. Onte mpensü jiang tssülatssütüngta mungtasi, 11 rajyuo methaki vantale to ezoa. Hoji nchuk jo kyon topvüna ahungo tssoa ana Sinai phunglani jorovka. 12 Phunglan jilo kyon yaki n rhovocheo erü süngi vata, osi phunglan jilo tichungotale osi ndüngolea ti-otale to kyon jiang ezoa. ochona hojilo khotheta sana ombo chüthokvü; 13 Hojitüv kyon jo okhena n vüngka na olungna ephyatsüngi mekana lotssi na kotsüngi sivka. Kyon lea ekümrüm tssole hojitolyui chüthoka. Tokhatola tatara ji khvüa na kyon jiangna phunglani chungovka." 14 Jisülo jo Moses na phunglani na joyi kyon jiang ji ekhüm tsükona methaktale to ezocho. Tole ontena onte sü jiang etssütale Moses na ezocho, 15 "Rajyuo methaki vantakhe, osi hoji n janthüng ochina ha ponilan tssov meka." 16 Rajyuto enyathüng jo Potsow nlüpa osi tharaka, phunglan jilo eluk echhiv jorocho osi tatara won zocho. Tole nchenphen jilo vancho topvü ekyu lona enetsüngcho. 17 Moses na nchenki na onte sochuki Potsow nduko phunglan yenjo jilo wotacho. 18 OPVÜI na omi lona joro jina Sinai phunglan totona miphungna eyukcho. Miphung jina mijen lona phungato chüngicho. 19 Tatara won ji ntsanka ntsanka na yicho. Moses na oyi nsancho osi Potsow na tharak won lona ombo janlancho. 20 OPVÜI na Sinae phunglan kvüri joro Moses ji phunglan kvüri tsakacho. Moses na chungocho 21 tole OPVÜI na ombo ezocho, "Jowoa osi kyon jiang ochinaha eru ji yaki rhoro a tizeie to ezoa, ontena hojito tssoana onte elümoto chüv. 22 Pvüti na lea ochoang na a thüngi roa sana onte bobo ntssungrüngchev, to mekna ana onte ezüpthoku." 23 Moses na OPVÜI ezocho, "Kyon jiang na n chungroche, ntiotssole nina phunglan shi ntho tssothukle to yizüng apia erü süngchaki vacho." 24 OPVÜI na janlancho, "Jowo Aaron ji ni nzo sosi chungroa. Tolea pvüti jiang tona kyon jiang to ochinaha erü ji yaki athüngi rov meka, to mekna ana ezüp onte piv." 25 Tole Moses na kyon jiang thüngi OPVÜI na ntio phyocho sana jiang ezocho.
Yizüng taro Ji
1 Potsow na oyi shiang phyocho: 2 "Aiyo ntena Ejip metae oyam ezii tssota vanathüng, nte sochuko OPVÜI nte Potsow ji. 20 3 "A yaki jo potsow thanpo ti-khümtava. 4 "Ntena nte tsükona potsüo, limhalo osi lichungi jümang jiang lo licho tüv kisü ntia ti-nsüngrütava. 5 Nti kisü mhadungo ha ti-epyakthetava osi ti-khümtava, ntiotssole OPVÜI nte Potsow ji A, osi ana a yaki jo ochia a n vanthuk hungala. Ochoang na a tsaka sana jiang thüngi a na onte tsoronichen pochung ethüm mezhü jana ana ezüp piala. 6 Tokhatola ochoang na a nzana a shikhfü jiang benphia sana jiango ana pochung wothüng wothüng jana a nzan ejüala. 7 "A mying ji khi n mhom thüngoe ti tsütsata, ntiotssole OPVÜI nte Potsow A, shina a mying tsütsasorae jiang ezüp piv. 8 "Esanmung ji lithuka osi nthoa vanthuka. 9 Ntena nte elhi etssov tsüngon tiruk liala, 10 tokhatola tsüngon tiyingo to jijo esan tsüngon a tsükona khochaki vanthuka. Tsüngon jilo ochinaha elhi tssov meka nte tssolea, nte ngaroden, eziiden, nte ekümrümoden, osi nte metalo metapoe kyon vamo jiang ochinaha elhi tssov meka. 11 OPVÜI, A, shina tsüngon tiruk lo limha, woyak, jümang, osi jianglo evamo jiang topvü liyingcho, tokhatola tsüngon tiyingoto jilo jo ana esancho. Jitsükona OPVÜI, A, shina esanmungji lithukcho osi hoji ntho tssothukcho. 12 "Nipo osi niyo yikrachia, to tssona ana nte pio meta jilo ntena harishia vamvüka. 13 "Oyam ti-lüngthata. 14 "Efürama ti-tssoa. 15 "Ti-efüa. 16 "Ejüngona oyam n lan ti-pia. 17 "Oyam ki ti-jüpona; ombo engh jiha ti-jüponia, ombo ezii, mangsü, kurü osi ombo ejüeli ntia ti-jüponia."
Kyon Jiang Ekyu
18 Kyon jiangna tharak won osi tatara won jiang zoa phunglan jilona potsüo nlüpa omi phungo jiang hungale ekyu lona enetsüngrae ekonina zechita vancho. 19 Ontena heto Moses ezotacho, "Nina e thüngi ntio phyoana, ena engav; tokhatola Potsow na ethüngi oyi nsana na echüv küma ekyuala." 20 Moses na ezocho, "Tikyutava; ntena mmen n tssovo tssoa ombo kyuchia tae nte vanthoku tsükona Potsow na ojang tssoe nte zelo rochoka." 21 Toaha kyon jiangna ekonina mangta vantacho osi eluk emüngo ji küpo Potsow vamo ji ndüngo jo Moses tae na wocho.
Thanphensa Jiang lo Shikhfü
22 Potsow na Israel jiang heto ezole to Moses ezocho: "OPVÜI A, shina potsüwoe na nte thüngi oyi nsamo ji ntena hungthaka. 23 Ntena a ephalo khümphen tssoa shona janti na kisü potsoden nsüngrüi tivatava. 24 Ntena a tsükona ochon khi thanphensa nsüngrüi ji pono nte olyu osi mangsü jiang khi othan tssoa rongthuka osi khümshümta than tssothuka. A khümle to ana meta kvülo khochaki nte vayiana ana jilo na oro nte mmhayithukuka. 25 Ntena olungna thanphensa nsüngrüta tssona titukrona rontava, ntiotssole ntena longthenphen theo lung jiango a tsükona tsütsav n tüm. 26 Phopha shankao thanphensa ha a ti ronitava; ntiotssole ntena hojilo chungoa thüng nte chanchev.
Ezii Jiang Tsükona
1 "Israel jiang thüngi shikhfü md JL shiang benphiv tsükona pia: 2 Nina Hebrew ezii shia tssona ombona nzyu tiruk ni benkavka. Tolea nzyu tiyingo jilojo ntia tikhiyina vachia. 3 Ombona ni ki yiathüng yanpiyanthan n tssov yicho tssona yanpiyanthan n tssona yivka, khatola ombona engh sosi yicho tssona ombona yiathüngha engh ji sosi yivka. 4 Ombo pvüi jina yanpiyanthan tssoyicho tssona osi otsoeoro vancho tssona, eloe jiha ngaro jiangha OPVÜI ji echhi osi ombo tae elani yivka. 5 Tolea ezii jina ombo pvüi osi ombo engh elani otsoeoro jiang nzanala to phyochaka etancho vana n yihungna, 6 ombo pvüi jina khümpheni ombo sosi owo kibüngo durhyupvü jilo enghokae vanthuksi eno ji veyivka. Jisülojo ezii jina eküm echung ombo ezii tssoa vamvüka. 7 "Kyon ochona sana ombo otsolov ji ezii etsovlo yena tssona ompvüo eboe ezii vachia to vachiv meka. 8 Ompvü ji oyam engh etssov yenle eboe jina ompvü n jüpomvü sina OPVÜI jina khilani ompvü opo thüngi yenlamka; metapoe thüngi yemu meka; ntiotssole ombona ntsa shikhfü lona meku ompvü ekümthaka. 9 Kyon ochona ombo tsokhying echii eloe ezii shia sana ombona ompvü ji otsolov esüa vanthokuka. 10 Osi kyon ochona sana lothan ekata tssona ombona lohemü jiha mpensü osi etsoyu kheti pivka osi ovüng thüng ompvü elan lio jiangha topvü pivka. 11 Ombona ompvü thüngi heto etssov lio shiang ntssoa tssona ombona ompvü ji ntia n khiyina etancho vachivka.
Meyanta thüng Shikhfü
12 "Kyon ochona oyam yonkae chüthuka sana omboha chüthoku lia. 13 Tokhatola okyak n tssoaha tssolüpi meyantacho tssona ombona ana etssyukae epio meta motsünga lo oyi tsanthei vankhuka to tssona omboji nkohachev. 14 Tokhatola kyon ochona lüm etsukona etana na oyam chüthuka sana ombona a thanpheni oyi tsankalea ombo chüthoku lia. 15 "Ochona opo mekana oyo yonkata sana ombo chüthoku lia. 16 Ochona oyam tssolea mekana ezii tssothoku tsükona tssolea kyon efüi khia sana ombo chüthoku lia. 17 "Ochona opo osi oyo etssorandankata sana hojiha chüthoku lia. 18-19 "Khontathüng tsükana olong mekana okhena tsüka ji yonkata ha n chüna ombo ezüp epiv n li. okhvü hamo kyon jina belüngi ezüpa vansi sülamiti jarung süsi sanphia tssona, hojito yuta ezio ji manji ochona ombo meyancho sana jina loyivka osi n mhonphithüng nandang jo tanünguka. 20 "Kyon ochona sana ombo ezii eloe tssolea eboe tssolea erhüpi jilona chüthuka sana hoji kyon mo ji ezüp piv lia. 2i Tokhatola ezii ji engania yutalo nchüa tssona tona OPVÜI ji ezüp epiv n li, ombo ejüeli emomo jina chüngtakhuka. 22 "Eboe khontathüng eloe ngarohan tachi ompvü ngaro ji yesoe sina, tolea ompvü eküm ntia n tssona orapvüna echha rüngwo ji yitssoe na khichoyio ji ephan ochona meyancho sana ji echha khiyivka. 23 Tokhatola eloe jiha meyancho tssona nlilam man ji eküm man eküm, 24 omhyik man omhyik, oho man oho, okhe man okhe, ojo man ojo, 25 omi khü man omi khü, wontssa man wontssa, tamüngcho man tamüngi to tssovka. 26 "Kyon ochona sana ombo ezii eloe lea eboe lea omhyiko tayi omhyik ji yesoe sia sana ombona omhyik ji man ezii ji etancho yithokuka. 27 Ombona oho tachiyi cho tssona oho ji man ezi ji vachivka.
Ehopvüo Jiang Ejan Elhi
28 "Tssibung na ocho sana shüngi chüthoka tssona, tssibung ji ephyatsüngi sivka osi oso jiha ochinaha tsov meka; tolea mangsüpvüo jijo ezüp epiv n li. 29 Twokha tola tssibung ji oyam tssatssophen tssoe hoji sheni evav ezoaha n ngacho tssona, hojina kyon shüngtsünga na mangsü jiha opvüo jiha chüthoku lia. 30 Tokhatola opvüo jina ombo eküm shancho hunga elo pia tssona kvüta man sana topvü lokham lia. 31 Ji esüa tssibung jina eloeroro mekana eboeroro shüngtsünga tssona jiha hoji esüa lovka. 32 Tssibung jina ezii eloe lea eboe lea shüngtsüng na mangsü pvüo jina ezii ji pvüi ji janti rang thümro losi tssibung ji tatsüngi sivka. 33 "Kyon ochona sokvü elhüp lae sisi mekana sokvü jui n lhüpna tssibung lea gadho lea hojilo rhethuka sana, 34 ombona ekümrümo ji tsen ji lovka. Ombona ekümrümo ji man ji losi ekümrüm chüthako jiha khivka. 35 kyon tsüka mangsü na oyam mangsü shüngtsüng na tssibung eküm ji yeni OPVÜI otsük eni jina chitasi tssibung echüo ji so jiha chitavka. 36 Tokhatola tssibung ji oyam tssatssophen tssoe hoji sheni evav ezoaha n ngav hojito meyancho tssona opvüo jina tssibung eküm na losi echü ji khikhuka.
Lolantav Shikhfü Jiang
"kyon ochona sana mangsü mekana olyu efüi tatsünglea, yenlea mangsü motsüngalo mangsü mongo, olyu motsüngalo olyu mezhü to opvüo ji pilamka. 24 Ombona efüo ji man lochev, osi ombo ejüeli ntia n licho tssona ezii ejoena ombo yeni efüo ji man lovka. Osi efüo ekümrüm ji mangsü tssolea gadho tssolea, olyu tssolea nchüv eküm vancho tssona motsüngalo eniren pilamka. "Efüi tsüka na zümolo oki pharhüpa vanathüng ombo rachei lüngthalea lüngthapvüo jijo münghan nlan piv meka. Tokhatola engo hojito tssocho jo münghan nlan piv. 5 "Kyon tsükana ombo li mekana jününgroli ombo ekümrümo yantsothuka thüng khyumhi oyam li benro za vamo jiang tsoyina hoji man ji ombo li osi jününgroli elio benro jiang khi lovka. 6 'Tiyon tsükana ombo li omi tssoe jina oyam li benro za vamo jiang mekana oyo-ohan yanyoe nshae evao jiang rungina omi themo jina hojiang topvü lovka. 7 "Kyon tsükana oyam rang mekana tssentsüman vayiathüng ombo kina efüina khiyina, osi efüi ji rhüma na efüi jina hotata eni lov. 8 Tokhatola efüi ji n rhümata tssona evapvüo ji khümpheni sosi owo ombona oyam tsütsailan n khi to echümthoku. 9 "Ejüeli lona pangta chiyina, mangsü tsükona tssolea, gadho, olyu, mpensü mekana monkvü monyo tsütsailan tsükona tssolea pangtao ji woniatana khümpheni wotav osi Potsow na ocho nlan pia sana jina tsükao ji hojitata eni pilam. 10 "kyon tsükana oyam gadho, mangsü mekana olyu mekana thanpo ekümrümo ekümiv methakle, ekümrümo ji chüa lo, meyana lo mekana oyam na rechoe hansi sana yiaha ehungpvüi n vana tssona, 11 kyon jina khümpheni owo ombona oyam ekümrümo n khi to echümvüka. Osi ombona ekümrümo ji n fücho tssona OPVÜI ji epüp tae, osi eküma vamo jina elov n li; 12 tokhatola ekümrümo ji efüicho tssona ombona opvüo ji lovka. 13 Ekümrümo ji orae ekümrüm na rümcho tssona, eküma vamo jina rajak ji hansi oyi ejüv, osi orae ekümrümo na rümchojo ombona elov n li. 14 "Kyon tsükana oyam ekümrümo nsole opvüo jina n hungathüng meyana alo chüa sana tssona kyon jina lochev. 15 Tokhatola opvüo ji ehungo na hojito tssona elov n li. Osi ekümrümo ji engochocho tssona engocho man jina chüngtav.
Ntsanrük osi Ekhümlan thüngoe Shikhfülan Jiang
16 "Eboe tsükana loroe oyam na nkohan jitüv eküm yesoyina, ombona loro man ji losi ompvü soa vamvüka. 17 Tokhatola loroe ji opona oni n vantathuk to phyona eboe jina loro man ji tata loroe ji opo ji lovka. 18 "Eloe ochona oyam sorisotüka mekana jaktona sana chüthuka. 19 "Eboe ochona ekümrümo thüngi ponilan tssoa sana chüthoka. 20 "Kyon ochona OPVÜI a yaka potsow thanpo erungthan pia sana chüthoki sia. 21 "Lankonlansi jiang tijaktona osi tikhangshia, nteha Ejip metae lankonden tssoa vancho to ji ti-mhechotava. 22 Emi osi opvüpoe n vamo jiang tikhangshia. 23 Ntena onte khangshia na ontena kyochile to ayirüv küma OPVÜI ana onte janlam, 24 osi a lüm tsuki ritsso lona nte chüthoku. Nte engh jiang emi kümkhamvü osi nte tsoeoro jiang opo n vanden kümkhamvü. 25 "Ntena a kyon ochoang sana yantsae tüv orang nona rangvae jiang etsso tssoa eran tikhiyia. 26 Ntena ochhi loyaro tssoa ochoang sana mpensü khi vata tssona eng n rhethüng pilana, 27 ntiotssole ombo tsük lümthukphen ji hoji tae. Ombona ntio mpensi yipvüla? Ombona nzanchile to athüngi chona na ana janlam, ntiotssole aiyo khonzanti to etssoe. 28 "Potsow tachia oyi n mhom tiphyoa, osi nte kyon esopvüi jiang ti-rhiyikata. 29 "Ntena nte tsonghonrho osi zükhi, nte thyujü jiang lona khichei yuta ebenlo a thantava. Ntena nte tsokhfü jiang apitava. 30 Nte mangsü osi olyu nrodemo jiang apitava. Obung nrodemo ji tsüngon tiying opvü ndüngo vanthuksi tizaoto lojo a thantava. 31 "Nteno a kyonden, jitsükona ntena orae ekümrümo na rümcho rajak jiang tsov meka; tolea hotüv jo füro jiang phitava.
Ntsanrük Osi Elan
1 "Ejüng onpungyipung tihanphia, osi nlan etssoe tsüka ejüng ehungpvüi tssoyia tikyochia. 2 Wokyongona silyuo tssoa osi ntsa monthuko elhi tssoathüng tiphankata. 3 Yantsae ji oyi tssoyiathüng omhyik theta titssoyia. 4 "Ni ri ji mangsü mekana gadho tsanmhicho hunga tssona opvüo ji thüngi sosi owo pia. 5 Ni riji ekümrümo mangsü mekana gadho jina oha mmyingo ji n tov epyakthe vana tssona sükata; zeta yakchi yi tisia. 6 "Yantsae jina yitssoki roathüng ombo elan lio jiang n piv tisia. 7 Ejüngo na nlan tishakata osi ntsa evan ji tichüthoka, ntiotssole ochona hojito n mhom tssoana ana nlan piv. 8 Ekhüp tikhia ntiotssole ekhüp jina kyon ji ntsa jiwoe omhyik jukiala osi nlan n lio kyon jiang elan jiang moni siyiala. 9 "Lankonlansi jiang tikhangshia; ntiotssole nteha Ejip metae lankonden tssoa vancho osi Iankon jo kvütüv sana ntena ejyueranthaka.
Nzyu Tiyingoto Ji tona Tsüngon Tiyingo to Ji to
10 "Nte li jianglo nzyu tiruk tsükona benrotava, osi ji lona joncho-rücho jiang hanthetava. 11 Tokhatola nzyu tiyingo to jilo jo hae sia, osi hojilona ntio ethi-ebena sana ti khia. Hojilona ethi-ebenmo jiango yantsae jiang na tsovka, osi jilona enhyo jiango orae ekümrümo na tsovka. Hoji esüa nte jününgrothi jiang tona olive dung to jiang tsükona ha benphitava. 12 "Hopta lo tsüngon tiruk elhi tssotava, osi tsüngon tiyingo tojilo jo elhi ti tssotava, to tssona nte eziiden osi lankonden nte ki elhi tssota evamo jiangha esan hungu, osi nte ekümrümo jiangha esan hungu. 13 "A, OPVÜI shina, nte ezowo jiang topvü engtava. potsow thanpo thüngi tirandantava; onte mying jiang tia tiphyophitava.
Tokhu Tsüphov Ethüm Jiang
14 "Ntena ayikrachiv tsükona tokhu ethüm shiang tssotava. 15 Ntena Ejip metae na khochio ji choro Abib jilo jo ebung mozhü n theo tokhü ji ana nte ezovo ji lankaewoe na khitava. Shilo tsüngon tiying tokhü jilo jo ebung mozhü thecho hümri tsov meka. Akhümo roathüng ntia othan npem jo tironrüngtava. 16 "Ntena nte benro jiang eriv benkata na liri tokhvü ji khitava. "Ntena linhyangthüng nte jününgroli osi tssüngthili jiang lona tssüngthi lhoathüng ranki tokhü ji khitava. 17 Nzyu akvü tokhu ethüm shilo eboetso topvü na oro OPVÜI nte Potsow a khümtavka. 18 "Ntena ekümrümo na athantathüng ebung mozhü etheo hümri na tithantava. Tokhu shianglo athancho ekümrüm jiang ethyu jiang ojyuto enya jana vav meka. 19 "Nzyu akvü ntena khichodemo otsuk-omüm jiang nte Potsow ki hansi rotava. "Nyanyanro osi olyuro jiang opvü shyurojü lona tiekvüa.
Phyochak Osi Püngnoyi
20 "Ntena yentsatathüng ana nte vüngina lanben wothuka nte nkohathokuka, osi ana methako meta jilo nte sochukchivka. 21 Ombolo lüm thetava osi oyi engayitava. Ombo tipanlantava, ntiotssole ana ombo rothukcho osi ombona hojito panlan jiang nlan siyiv mek. 22 Tokhatola ntena ombo yi enga ana ntio phyoa sana ji benphita tssona nte ri jiang topvü thüngi ana rotavka. 23 A lanben na nte mhadungi na owo Amorite jiang, Hittite jiang, Perizzite jiang, Kanaan kyon jiang, Hittite kyon osi Jebusite jiang metae nte sosi yivka, osi ana onte monthukravka. 24 Onte potsow jiang mhadungo epyaktheta osi khümta to ti-tssotava, osi ekhümlan tssolanphyolan jiang tibenphitava. Onte potsow jiang roe sitava osi onte ntho long dyurhyu jiang roe sitava. 25 Ntena OPVÜI nte Potsow a khümta tssona, ana etsoyu osi ojü nte mmhayithukuka. Osi nte nkyipnrüp jiang topvü khi nte siyivka. 26 Nte meta lo eloe ochinaha ngaro yesoe sia mekana otsoeoro n liv tüv liv meka osi harishia nte vanthokuka. 27 "Nte panlamo kyon jiang khi a kyuthuka, osi ntena ori tssoa vamo jiang ana hamathukuka, osi nte mhadungo onte tsanthokuka. 28 Ana nte ri jiang ekhenrhükthoku, osi ntena kvütata vüngtsana yiana jitata ana Hivites kyon, Kanaan kyon elani Hittite kyon to jiang phani siv. 29 Ana nzyua yuta lona jo phani onte n si; to tssoa na meta ji yingsiyingloe siv osi orae ekümrümo na elüm nte khetsüv. 30 Jitsükona ana tara tara na onte yithoka vani meta ji sayakhuka nte santhethoku. 31 Ana nte meta erü jiang Aquba jünken lona benkae Euphrates zhükvü nandang, tona Mediterranean jümang lona lijüng ji nandang lo tsükathoku. Meta pvüo jiang pono ana etho nte piv osi ntena rakhoa na ontena tsamvü. 32 Onte thüngi osi onte potsow jiang thüngi ntia ntsa tae tivatava. 33 Kyon jiang nte meta loha tivanthuka; ntena hojito tssoa na, ontena athüngi mmen nte tssothoku. Ntena onte potsow jiang khümcho jo echü tsirhi lona nte sav."
Ntsata Shikhfü Ji Methaktala
1 OPVÜI na Moses ezocho, "Phunglani chungrotava, ni tona Aaron, Nadab, Abihu tona Israel esopvüiden ekhatiying to, osi ntena chungro ejam tara liathüng na epyakthei khümtava. 2 Ni yaka, thanpoe na a ndüngo rochev meka. Kyon jiango phunglani tia chungrov meka." 3 Moses na OPVÜI yi jiang osi yitan jiang oyi kyon jiang ezocho, tole kyon topvüna nzo tssoe heto phyotacho, "OPVÜI na phyothako jiang topvü etena benphivka." 4 Moses na OPVÜI yizüng jiang topvü erancho. Ojyuato to nyazüngi na ombona phunglan ji jothelo thanphen roni Israel pvüji taro eni ji nkhen olong taro eni chümcho. 5 Jisüi jo ombona khyingroeden ejoma wothuka mangsü tara khi OPVÜI thüngi khümshümta than pithukcho. 6 Moses na ekümrümo jiang ejen chiso khi ophilo thesi chiso jijo thanphen jilo chükae sicho. 7 Jisülo jo ombona OPVÜI yizüng eramo ntsata kako ji khi kyon jiang na zoa ekhyoto khacho. Tole kyon jiangna phyotacho, "Ena OPVÜI yi engav, osi ombona phyo jiang topvü benphiv." 8 Jisülo jo Moses na ophi lona ejen ji khi kyon jiang poni erhikacho. Osi ombona phyocho, "OPVÜI na yizüng shiang nte piathüng nte thüngi ntsatao ji cheka ejen ji shi." 9 Moses, Aaron, Nadab, Abihu tona Israel esopvüiden ekhatiying jiang 10 to phunglani chung wotacho 10 tole ontena Israel Potsow ji hungcho. Ombo jonpho kupi jo tssentsü long ejüm pyon, oyak shi esüo tüv na roncho esüa hungcho. 11 Israel kyon esopvüiden opvü odung etssoe shiang ji OPVÜI na nmeyancho; Ontena Potsow hungcho osi ontena tsoyutacho.
Sinai Phunglani Moses
12 OPVÜI na Moses ezocho, "A thüngi phunglani chungroa, tona nina hepi vanathüng ana kyon jiang püngnoyi yizüng topvü ana erankacho longpyak eni ni pivka." 13 Moses tona ombo kyochi Joshua to onina methaki, Moses na khochi phunglani chungocho. 14 Moses na esopvüi jiang ezocho, "Ena n joyithüng jo helona nhyakta vantava. Nte ndüngo Aaron ha Hur oni vamka, jitsükona nte yolo ochoangna pangtarüta liana oni thüngi wotava." 15 Moses na Sinai phunglani chungole, eluk na phunglan ji eyukcho. 16-17 OPVÜI phfütsson tsünglüpo jina phunglan jilo jorocho. Osi hoji wondang ji Israel jiang na jo phunglan kvüri jilona omi kiato hungcho. Eluk jina phunglan ji tsüngon tiruk eyuki vansi tsüngon tiyingo to jilo jo OPVÜI na eluk longina Moses tsacho. 18 Moses na phunglani eluk ji longi chungocho. Osi hojilo tsüngon zhüro, zümo zhüro to vancho.
Ntho Süki Than Jiang
1 OPVÜI na Moses ezocho, 2 "Israel kyon jiang thüngi othan a pitale to ezoa. Kyon jiangna lüm joa ntio thana sana khichoyia. 3 Othan jiangjo: shona, janti, yongmenyonjak; 4 Sünyipvü; ejümsü; khonthyupyon, osi tssansü emyom, nyanyan tssansü; 5 olyufü emyom na jümcho; sofü enyipvü; akaciatssüng; 6 mii on lo thephen thyujü; otsük nzüphen thyujü lo thephen orhüm mmhom; 7 tssentsü long emyom tona thanpo tssentsü long to pvüti tsüphoe ji phukthesü tona teki eyuk tolo khümkaphen to jiang. 8 Kyon jiang khi a tsükona ntho sükiro tssothuka, tona ana onte yolo vamka. 9 Süranki ji heto tssov to ana onte ejüo ji ephan tssothuka.
Ntsata Bakos
10 "Akacia-tssüng na Bakos esi centimetre 110, etssüi centimetre 66, ntssoni centimetre 66 to shanthuka. 11 Bakos ji opon ochung shona njüm na esezhüa osi ochüm jiangha shona na nkhon nsüngrükata. 12 Shona nkon mezhü nko ni ojo mezhü ji nkhen ejümphen theta, to tssona phokolo nkon eni khyingüv. 13 Akaciatssüng na khora thei shona khi esezhüa 14 tolyui Bakos ji phukoatalo khatheta. 15 Khora jiango nkhon jianglo khathepvü vavka, khichov meka. 16 Tothakana ana yizüng jiang erankacho longpyak eni ji ni pivka, osi Bakos jilo hoji thei vavka. 17 "Bakos ji elhüp ji esi centimetre 110, etsüi centimetre 66 to shona njüm na phyonzhüa nsüngrüa. 18 Elhüp ji ochüm tsonkho ekümrümo echo eni mpao tüv shona na eni joe züpkata, 19 osi eni ji chüngtana oni ji wozhü motsünga kümka. 20 Ekümrümo eni ji elhüp ji ponina zechitao tssov osi oni echo jiangna elhüp ji eyukzhüv. 21 Longpyak eni ji Bakos jilo thei elhüp jina lhüpzhüa. 22 Ana hoji lona ni ndukvüka osi ekümrümo ji echo eni yuta lona ana Israel jiang a yizüng topvü pivka.
Potsow Thamo Hümri Ji Ekachiphen Saro
23 "Akaciatssüng khi saro motsünga nsüngrüa, esi centimetre 88, etsüi centimetre 44, ntssoni centimetre 66 to. 24 Osi shona njüm khi phyonzhüa, osi nkhon rhüa shona zümkata. 25 Hoji rhüa nkhon motsünga millimetre 75 nzoa tüv otssa rhüa shona rikae saro ji rhüa theta. 26 Osi shona na ejümphen nkon mezhü nsüngrüi ojo mezhü jiang eren nken jianglo theta. 27 Khora khathephen nkon jiangji nkhon ndüngo theta. 28 Khoro jiangjo akaciatssüng khi nsüngrüa osi shona khi nzukzhüa. 29 Zükhi thanphen ji tsükona ophi, opvü tona phikok to shiang hetopvü shona njüm na nsüngrüvka. 30 Saro jijo Ntsata thephen Bakos ji mhadungo vavka, osi saro ji poni jo yuta topvülo ntho hümri ji ekachi vavka.
Milon Ekachiphen Ji
31 "Shona njüm khi milondung nsüngrüa. Ndungkaphen ji tona odung ji tojo shona na joe khia; osi hojilo merithukvü thera eki tona pvübüm to nsüngrükata. 32 Hoji ayi amen khero tiruk ethümthüm ren nsüngrükata. 33 Khero motsüngtsüng lo merithukphen thera ethüm ren eki tona pvübüm to almond kicho esüa thevka. 34 Milondung jilo almond kicho esüa merithukvü thera mezhü eki tona pvübüm to nsüngrükavka. 35 Khero ethüm remo jiang akvü küpo pvübüm motsüngtsüng thevka. 36 Pvübüm jiang, khero jiang tona milondung to jiang topvü shona jocho kholong tae tssovka. 37 Milondung jilo evav milon tiying nsüngrüi mhadungoe tüngrachio vata. 38 Hojilo myakaphen tona phikukro to jiango shona njüm na nsüngrüa. 39 Milondung ji tona hojilo nsüngrükao to jiang tsükona shona seri thümrosi mongo tsütsata. 40 Hoji kvüto nsüngrüv sana ana phunglani na ni ezoji ephan nsüngrüa.
OPVÃœI Vanrhyu Ranki Ji
1 "A vanphen ntho ranki ji kichungi jo sünyipvü sütsük taro khi tssansü ejüm tona müngzhüv, emyom to lo tüktsüi zona. Osi jilo echo mpao ekümrüm kisü khümkarata. 2 Sütsük akvü esi metre taro eni, etsüi metre eni to ren kheti tssothuka. 3 Sütsük mongo ji sütsüka kümthuka vütsüa osi thanpo sütsük mongo jiha vütsüa. 4 Mongo vütsüo sükvü ji akvü otssawoe jo ejüm ying khi nkoncho pikata. 5 Vütsücho sütsük ovüngo jilo nkon tinyan vükata osi hojiang chanwonta sütsüka jilo ha tinyan vükata. 6 sütsük eni ji yitsütav tsükona shona khi yikaphen tinyan joe yitsütae sütsü ka kümthuka. 7 "Ranki ji eyukphen nyanyan tssansü sütsük taro ekha nsüngrüa. 8 Osü jiang topvü esi metre taro ethüm tona etsüi metre eni to ren tssothuka. 9 Sükvü mungo na sütsüka kümthuk, sükvü tiruk jina sütsüka kümthuk to tssoa. Tiruk vütsüo sü ji eni chüpchei ranki ji mhadungoe ji eyuka. 10 Sütsük ovüngo jilo sükvü otamo ji chüm rhüa nkonka tinyan vükata osi sütsük motsüng ao jiha ochüm rhüa tinyan vükata. 11 yongmen yonjak na yikaphen tinyan joe sütsük eni ji yitsütae eyuk motsünga kümthuka. 12 Sükvüa tajo jijo ranki ji sülamoe zona. 13 Osi sütsük enita lona esiwoe metre tinyan ren tajo jiango ranki ji kikhyo tsungkho zonzhüphen tssothuka. 14 "Eyuk eni nsüngrülana, motsünga jo olyu tssan emyom na jümcho khi nsüngrüa, osi motsünga jo sofü mmhom na nsüngrüi eyuk opomo ji tssothuka. 15 '"Ranki ji ronri tssov tsükona akacia tssüng na ndungkachio ronria. 16 Ronri motsünga lo esi metre mezhü, etsüi centimetre rokro tiruk to tssothuka, 17 osi ronri akvülo rafüp kheti tssokata, toli ronri jiang mmyanta chüngtathuka. Ronri akvüto lo rafüp khyingthuka. 18 Ranki ji jolowoe tsükona ronri mekyu nsüngrüa 19 osi hojiang ndungkaphen janti na zhüro joe ronri motsünga lo ndungkaphen eni ren tssothuki rafüp eni ji sayathuka. 20 Ranki ji khümkiwoe tsükona ronri mekyu nsüngrüa 21 osi motsünga lo jantai ndungkaphen eni ren zhüro tssothuka. 22 Engrhewoe ranki ji sülamoe ronri tiruk, 23 tona nken jilo ronri eni to theta. 24 Nkeni echi ronri jiango ojowoe na chüngtae hojina mhonki janthuki khia. Nken jilo ronri eni jiha hotoli khia. 25 Hojito ronri tiza ji tsükona ndungkaphen taro tiruk tssovka. 26 "Akacia tssüng khi nkho taro mongo eraktae khia, ranki esanawoe tsükona mongo, 27 esanawoe tsükona mongo elani engrhewoe sülamoe jilo mongo to theta. 28 Nkho olungo kvüwoe na ronri jiang renso jana chüngiv sana jijo ranki ji ochüm esanawoe na esanawoe jana khia. 29 Ronri jiang shona khi phyonzhüa osi hojiang lo nkho jiang sayaphen shona na nken jokarava, osi hojiang ha shona na phyonzhüi khia. 30 Ranki ji ana phunglani na nizo ji ephan tssokachia. 31 "Tssansü ejüm, müngzhüv osi emyom to tüktsücho khi zonchak sü nsüngrüa. Osi hojilo ekümrümo echo mpao kisü vükata. 32 Hoji zonphen akacia tssüng na tyurhyu mezhü chümi shona na nzüi yikaphen lyukarae hoji janti ndungkaphen mezhülo ndungkae khia. 33 Ranki ji mhonki jilo yikaphen rencho kosüng jilo zonchaksü ji zona, osi sülamoe jo longpyak eni ejüo Ntsata Bakos ji vata. To tssona zonchak sü jina ntho meta jiha nthotsowo meta ji woni khosotavka. 34 Ntsata Bakos jilo elhüp ji theta. 35 Nthotsowo meta ji pomoe jo thanphen saro ji ranki jina jükiwoe vata osi milondung jijo ranki ji jolowoe vata. 36 "Ranki ji kipüng zonchakphen jo sünyipvü opyon ejüm, müngzhüv tona emyom to tüktsücho lo kisü vükaracho tüv khia. 37 Zonchaksü shi tsükona ha acacia tssüng na tyurhyu mongo methaki shona na nzuki jilo shona yikaphen therae hojiang ndungkaphen jo pyontsü yonjak na jocho mongo na tssothuka.
Thanphen Sa Ji
1 "Akacia tsüng khi thanphen sa nsüngrüa. Osi thanphen ji nken mezhü khetitathuka, etsüi ha metre eni si tsyuka eni, esi ha metre enisi tssyuka eni, osi ntssoni jo metre motsüngasi tssyuka ethüm tssothuka. 2 Nken mezhü ji akvü rafüp khyingthuka. Hojiang topvü tssotsüi thanphen ji opho motsünga tssothuka, osi yongmen na eyukzhüa. 3 Thanphen jilo mipok yingsüv thoncho jiang thephen ophfü, khotherang, phikuk, oyii tona nghiriphfü to methaka. Shiang hetopvü yongmen yonjak na nsüngrüa. 4 Yongmen yonjak khi raying theta hankhan esüa nsüngrüi nken mezhü jilo nkonka mezhü theta. 5 Raying theo elhüp ji thanphen ji nkho ji kupi thei thanphen ji ntsson ji riso eyukachithuka. 6 Osi akacia tssüngna khoro nsüngü rhyui yongmen na eseta, 7 osi thanphen ji ejüma na khora jiang ji nkonka jianglo sokthei ejümtava. 8 Thanphen ji tssüngpyak eporov na nsüngrüa osi okuk khyingthuka, ana phunglani na ni ezo ji ephan nsüngrüa.
OPVÃœI Vanrhyu Ranki Ji Epichak
9 "A vanrhyu ranki ji eyukzhü jo sünyipvü na zonchakvüka. Jolowoe jo zonchak ji esi metre 44. 10 Osi hoji yongmen yonjak mekyu poni yongmen durhyu mekyu chümi sayathuka, osi hojilo yikaphen jiang tona khathephen mekyu tojo janti na jovka. 11 Eyuk ji jükiwoe ha hoji esüa thevka. 12 Engrhewoe jo zonchak sü esi metre 22 ji ndungkaphen taro zathuki sayathuka. 13 Engkhüwoe kibüng khyingo jiwoe ha zonchak sü esi metre 22 tssothuka,14-15 Kibüng ji hayiamen zonchak sü metre 6.6 tüv ndungkaphen ethum lo durhyu ethüm zathukcho ren thevka. 16 kibüng ji zonchak jo esi metre 9 tüv sünyipvü lo tssansü ejüm, müngzhüv tona emyom to tüktsücho osi kisü pikaracho tüv khivka. Hojijo ndungkaphen mezhü pono durhyu mezhü chümi sayathuku. 17 Ranki ji epichak jilo durhyu jiang topvü janti khyimro na shentsüthuka, osi yithephen jiango janti, osi durhyu jiango yongmen to tssothuka. 18 Epichak ji esi metre 44, etsüi metre 22, ntssoni metre 2.2 to khia. Zonchaksü jiango sünyipvü na osi ndungkaphen epyako jiango yongmen to khia. 19 Ranki jilo tsütsao tsakalan topvü, osi eshentan jiang topvü yongmen na nsüngrüvka.
Milon Ji Ntangshon
20 "Milon ji mmyu akvü njükae vav tsükona mijü jo olive thyujü mmhontso ji oro ni pile to Israel jiang ezoa. 21 Eyukzhü ji pomoe a vanrhyu ranki, Ntsata Bakos ji zechiwo tssoe lio jilo Aaron tona ombo tsoe jiang to na milon ji vavka. Hoji na a vanrhyu lona mmyui na benkae enyathüng jana kia vamüka. Shi yizüng shijo Israel jiang tona onte tsoronichen to jiangna nchüngkhon to benphia wovka.
Pvüti Jiang Mpensü
1 "Nijenio Aaron tona ombo tsoeden, Nadab, Abihu, Eleazar and Ithamar to jiang tsarhyua. Ontekhi pvütiden elhi tssoa a benkathukvü tsükona Israel jiang yolona tsanchuki vanthuka. 2 Ni jenio Aaron ji pvüti mpensü methakia osi ombo ji yjkrachi osi opyon jüthuka. 3 Ana etho pio tssiyanmori jiang topvü tsae Aaron mpensü nsüngrüithuka, osi ombo ji a elhi lo pvüti to khochaki vanthuka. 4 Onte khi tekiekhüp, epvü eyuk, phok-nrhüo, phokthesü thera pikacho, kvüri eyuk toha ryuphan-sü to methakithuka. Ontena pvüti mpensü shiang ji ni jenio Aaron tona ombo tsoe jiang to echi methakia onte khi pvüti elhi lo a benkathuka. 5 Tssiyan jiangna tssansü ejüm, müngzhüv tona emyom elani shona ying osi sünyipvü to khi methakithuka. 6 "Epvüeyuk sü ji tssansü ejüm, müngzhüv tona emyon elani shona ying osi sünyipvü to khi tüki kisü pikatathuka. 7 Epvü khüngo sü eni jina eyuksü ji khüngzhüa hayiamin thevka. 8 Ryukhüngzhü ha hotüv na nsüngrüi eyuksü jilo khümkae sütsüka kümthuka. 9 Tssentsülong myonshüv eni khi jilo Jakob tsoe taro eni jiang mying, 10 nzyu eran ephanina, motsünga lo tiruk ren erankata. 11 Jakob tsoe jiang mying thenkav jo thera ejoe tssothimori yani olong eni jilo thenkathuka, osi olong eni ji shona kholong lo ndungkata. 12 Osi longpyak eni ji eyuksü jilo theo epvülo zonka sü jianglo vükae Israel pvüji taro eni jiang echanthuka. Hojitoli onte mying jiang epvülo ephfükae hamka, tona ana yuta topvülo a kyon jiang nchümchevka. 13 Shona na ndungkaphen eni nsüngrüa 14 osi shona zhü eni nsüngrüi eritsütae longpyak jiang ndungkaphen jianglo shenkathuka.
Teki Eyuk Ji
15 'Pvüti tsüpho ji tsükona Potsow lüm erüng yani zephen tssov tsükona teki eyuk methakia. Hoji ha eyuksü nsüngrüo tsütsaelan tsük jiangna nsüngrüi hojito opyon lyukarae khia. 16 Hojijo nken mezhü ekhyingo osi eni chüpchei ekhio tssoa esi centimetre 22, etsüi centimetre 22 to khia. 17 Hojilo tssentsülong myonshüv, hakhiu tona myontsangüv to khia; 18 oren enio to jilojo tssentsülong mmyakvü, ejüm tona tsünglüpvü to rena; 19 oren ethümoto jilo jo tssentsülong shakya pyon, tssentsülong humphokvü tona müngzhüv pyon to khia; 20 oren mezhüo to jilo jo tssentsülong mmyakvü, myonshiv tona hakhfü to reni khia, shiang hetopvü shona phyonkacho poni chümkavka. 21 Olong taro eni shiang akvülo Jakob tsoe taro eni jiang yolo tsüka mying khyingthuki Israel pvüji jiang echanthuka. 22 Teki eyuk jilo shenkaphen shona njüm na wozhü eritsütae khia. 23 Shona nkonka eni joe teki eyuk ji ochüm omhawoe jianglo shenkae, 24 shona zhü eni ji nkonka eni jilo shenkata. 25 Osi shona zhü ochüm phokowoe eni jijo ndungkaphen jilo shenkae, eyuksü jilo epvülo zonkasü ji woni mhadungoe tssothuka. 26 Shona nkonka eni joe eyuksü ji ndüngo teki eyuk ji ochüm ochungo jilo shenkata. 27 Shona nkonka eni jolani ryukhüng seseo ji mhalo süchüm ji ndüngo eyuksü jilo epvüsü eni mhadungi zonchochio ji woni chümi oküpo eni jilo shenkata. 28 Teki eyuk jilo nkonka jiang tona eyuksü jilo nkonka jiang tojo ejüm zhüna shentsüa, to tssona teki eyuk jina ryukhüng jilo ndungkav osi chüngchüngüv. 29 "Aaron na ntho meta jilo rhowoa na Israel pvüji mying thenkao teki eyuk ji hamka, tona OPVÜI, A, shina a kyon jiang yuta topvülo nchüchev. 30 Phalyu zephen füfo jiang teki eyuk jilo chüm kata, tosi Aaron na hoji hansi a ntho vanpheni rhorothuka. Hotüv yuta lojo ombona teki eyuk ji hanpvü na vamvüka, tona Israel kyon jiang tsükona a lüm erüng ji ombona ntsivka.
Pvüti Mpensü Thanpo Jiang
31 "Eyuksü ji pono phuknrhüo jijo tssansü ejüm taena nsüngrüka. 32 Hojilo kvüri phungthephen epo havka, osi epo ji reta n yithoku büngshüng vükavka. 3334 Hoji süjüm oküpo ji dungowo tssansü ejüm, müngzhüv, emyom to khi tsarümthiphen kisü vükata osi hojianglo shona khyingtsü kisü theta. 35 Aaron na pvüti elhi tssoana shi hamuka. Ombona a ntho vanpheni rhoroathüng osi yiathüng khyingtsü won ji zov küma ombo lüngthav mek. 36 Shona njüma na oyuk-osen joe hojilo "OPVÜI lo khochaki picho" to erankata. 37 Kuri eyuk ji mhadungoe hoji ejüm zhü na khüngkata. 38 Aaron na hoji oton lona hansi kyon jiang than jiang pina, kyon jiangna thanathüng tara ori nandang jo ana khichoyivka. 39 "Aaron phukthesü jo sünyipvü na tükia, osi kuri eyuk ha sünyipvü na nsüngrüyia, elani ombo ryuphansü jiha kisü tükaracho tüv nsüngrüyia. 40 "Aaron tsoe jiang monkhüm lia opyon jüthoku tsükona phukthesü, ryuphansü tona kikho to methakirava. 41 Osü shiang nijenio Aaron tona ombo tsoe jiang to mpensüthoka. Jitosi onte khi pvüti elhi lona a benkathoku tsükona oliv thyujü onte nzüyia elhilo khochaki onte vanthuka. 42 Sünyipvü khi eryu lona ophi ejan eyuko sü onte methakia tona onte tsük jiang hungu meka. 43 Aaron osi ombo tsoe jiang na kvüthüng a vanrhyu ranki jilo rhowoa osi thanphen ji ndüngo pvüti elhilo woa sana hojiang hamvüka, tona onte tsük jiang chanchev mek, osi onte chüthoku mek. Shikhfü tsük shijo Aaron tona ombo tsoronichen to tsükona n senphina tsütsavka.
Aaron Tona Ombo Tsoeden Jiang To Pvüti Elhilo Etsa Lanso
1 "Nina Aaron tona ombo tsoeden to jiang ji a elhilo pvüti khochaki tssothukathüng ji heto tssovka. Mangsü tssibungro motsünga tona olyu opung eni to ome n khyingo tüv khia. 2 Otsüng chencho lo vümhi n thena olive thyujü khi hümri tara rünga, osi ejoma jo thyujü n theo ha rünga, ejomajo thyujü tara tae esekacho tüv ha rünga. 3 Hümri jiang loksa lo theta osi nina kvüthüng tssibung ji tona olyu jiang to a thana sana hojiang nzo a thana. 4 "Aaron tona ombo tsoeden jiang to sosi a vanrhyu ranki kibüngo rothuka, osi nthocheta tsükatale to onte ezoa. 5 Jisülojo Aaron ji pvüti mpensü jiang phukthethuksi ji eyuksü ji, eyuksü poni phuknrhüo ji, teki eyuk ji tona ryukhüng ji to ekathuka. 6 Kikho ji ombo hanthuka osi hoji poni "OPVÜI lo khochaki picho" to eramo ji khüngkayia. 7 Jitosi thyujü ji khi kvüri lo ombo phyangkayia ombo nzüyia, 8 "Ombo tsoe jiangha sosi oyi phukthesü jiang hanthuka; 9 osi onte eryulo ryukhüng jiang khüngia osi kvürilo kikho jiang hanthuka. Hojito nina Aaron tona ombo tsoe jiang to khochaki vavka. Onte osi onte tsoronichen topvü na nchüngkhonto pvüti elhi lona a benkavka. 10 "Tssibung ji a vanrhyu ranki ji kibüngo süsi roa, osi Aaron tona ombo tsoe jiang to okhe jiang tssibung ji kvürilo nyimkale to ezoa. 11 Osi hoji lo a ntho vanrhyu jilo, ranki ji kibüngo na tssibung ji tatssünga. 12 Jisüi jo tssibung ji ejen tara khi thanphen jilo edyukao jianglo ni khena erhikata. Tosi ejen enhyoe elio ji khi thanphen jilo lazae chükata. 13 Tothakana pokchung eyuko ethyu jiang tona, nthen jilo mmhontso ji tsücho, okhfü eni ji ethyu jiang khyinga khicho toli thanphen jilona rungi a thana. 14 Osi tssibung ji so ji tona ofü jiang tona erü jiang tojo epina pomoe na chivo runga. Hoji jo pvüti jiang mmen jiang siyiv tsükona thamo ji. 15 "Olyu motsünga ji khi Aaron tsoe jiang khe jiang ji kvürilo nyimkathuka. 16 Tosi olyu ji lüngthae ejen ji khi thanphen ji nken mezhü jilo phyangkata. 17 Jisüi jo olyu ji rhonroa, osi pokchung jiang tona ojo sülamoe jiang to etssüi oso thanpo jiang poni ekachia. 18 Tothakana hoji totona etsoyu than tssoa thanphen sa jilona runga. Hoji than ji rhüm jina a ematha-thukala. 19 "Olyu thanpo khochak elhilo tsütsao ji khi Aaron tona ombo tsoe jiang khe jiang to hoji kvürilo nyimkathuka. 20 Jisülojo olyu ji tatsüngi, ejen tara khi Aaron tona ombo tsoe jiang to eno amimoe nomüng jilo eseyia, elani onte khe amimoe yingpvü jianglo tona joyingpvü amimoe jianglo to eseyia. Tothakana ejen enhyo ji khi thanphen sa ji haphia erhikata. 21 Thanphen jilo ejen ji tara tona, nzüphen thyujü tara to khi Aaron tona ombo tsoe jiang to mpensü jianglo erhyikayia. To tssona ombo tsoe jiang tona onte sü jiang toji khochaki apivka. 22 "Olyu jiang ethyu jiang emhilo ethyu ji, pokchung eyuko ethyu ji, nthen jilo etsov mmhomo ji, okhfü eni ethyu na eyuko ji totona tona ophi amimoe to ji khichoe vata. 23 Othan apithako hümri ji lona hümri olan motsüngtsüng khicho, hümri olive thyujü na rüngcho motsünga, thyujü n thena rüngcho motsünga elani thyujü tara tae esekata rüngcho motsünga to khicheta. 24 Etsoyu shiang topvü Aaron tona ombo tsoe jiang to khelo theyia osi echümporo tssoa nthoche a thanle to ezoa. 25 Jitosi onte thüngi na khi erungthan ji poni ekachi etsoyu than tssoa a thana. Hoji than ji rhüm jina amathathukala. 26 "Aaron khochak elhilo tsütsao olyu ji shyuro ji khichoe echümporo than tssoa a pisi hoji nina khia, hojijo ni ejanka. 27 "Kvüthüng pvüti khochak elhi tssoa sana hojilo olyu tsütsao ji shyuro ji tona ophi ji tojo echümporo tssoa a pisi hojijo pvüti jiang ejan tssovka. 28 Yuta topvülo akyon jiangna kvüthüng khümshümta than apia sana solan shiango pvüti jiang ejan tssovka. 29 "Aaron chüana ombo sü jiango ombo tsoe jiang pia onte khochaka thüng hanthuka. 30 Aaron tsoe ochona ombo echunga sana hojina a vanrhyu ranki ntho meta jilo pvüti elhilo rhowoathüng pvüti sü jiang tsüngon tiying hamuka. 31 "Aaron tona ombo tsoe jiang to nthochak lo tsütsao olyu ji so ji khi ntho meta lona ejkvüa. 32 Oso ji tona loksalo hümri jüwo jiang to toji Aaron ha ombo tsjoe jiang tona a vanrhyu ranki kibjüngo na tsovka. 33 Ana nthochaka thüng nlan sita elhilo tsütsao ji tssovka. Shijo ntho hoji tsükona pvüti taena tsovka. 34 Etsoyu mekana oso n tsorav enyathüng jana lio jiango rungi sia, hoji jo ntho küma tsov meka. 35 "Aaron tona ombo tsoe jiang to nthochak elhi ji ana ni ezowo ji ephan tsüngon tiying khia. 36 Eng akvü nina mmen siyi than tssibung motsünga thamuka. Hojina thanphen ji nthochev. Jisülo jo olive thyujü khi nzüa nthocheta. 37 Hojito tsüngon tiying tssoa tona thanphen ji ntho tsotso kümvüka, osi hoji ochona mekana ntiona sana evüngkata sana hojilo ntho etho jina tssatssov.
Eng Akvü Than Jiang
38 "Nchünkhon tsükona enga akvü thanphen jilo olyuro nzyua tso tüv eni thana. 39 Olyu motsünga ji enyathüng than motsünga jijo mmyui than to tssoa. 40 Olyuro ovüngo ji ohüm chencho seri motsünga lo olive thyujü njüm seri motsünga nzii thana. Zükhi seri motsüngato othan tssoa phyangkata. 41 Olyu motsünga jijo mmyulani thana osi hojilo ha ohüm tona olive thyujü, zükhi to enyathüng ji esüa kheti theta thana. Shijo OPVÜI athüngi etsoyu than thanala osi hoji rhüm jina amathathukala. 42 Othan shijo yuta topvülo a mhadungo a vanrhyu ranki ji kibüngo na thana wovka. Ana hoji lona a kyon jiang nduku osi ana ni thüngi ni jamu. 43 Ana hoji lona akyon Israel jiang nduku osi a phfütson tsünglüpo meta ji ntho kümthoku. 44 Ana ranki ji tona thanphen ji to ntho kümthoku osi Aaron tona ombo tsoeden jiang to pvüti elhi lona abenkav tsükona nthochaku. 45 Ana Israel kyon jiang nzo vamvü osi aiyo onte Potsow tssov. 46 Ana onte ndüngo vamvü tsükona Ejip metaena onte sochukcho to ontena ntsiv. Aiyo OPVÜI onte Potsow ji.
Orhüm Mmhom Rungphen Thanphen Ji
1 "Orhüm mmhom rungphen thanphen sa Akacia tsüng khi nsüngrüa. 2 Thanphen ji nken mezhü mmyana tüv osi essi centimetre 45, etsüi centimentre 45, nna ntssoni centimetre 90 to khia. Hoji nken mezhü jiang lo edyuka jiangha thanphen jilo lyutsüi khia. 3 Hoji opomoe, otssawoe osi khümchio jiang topvü shona njüm na phyonzhüi nkhon jiang ha rhüa shona zümkae khia. 4 Shona khi ejümphen nkonka eni joe nkhon eni ji küpo nsüngrükae ejümphen khora jiang khathephen tssothuka. 5 Khora jiangha Akacia tsüng khia osi shona na phyonzhüia. 6 Thanphen shijo Ntsata vaphen bakos ji mhadungoe osü zomo ji pomoe vata. Ana hoji lona ni ndukuka. 7 Enya akvü Aaron na milon ji methako roathüng hojilo orhüm mmhom runguka. 8 Ombona mmyulani milon ji tekatahüng ha hojito tssovka. Orhüm mmhom than shijo ntinaha n khetsüthukna yuta topvülo lia wothuka. 9 Thanphen shijo jo orhüm thamo shiang osi ekümrüm than jiang elani benro-niro than jiang osi zükhi to ekachiv meka. 10 Aaron na nzyualo yenjoa mmen than piathüng ekümrümo ejen ji khi thanphen khümchio mezhü jianglo esekata thanphen ji nthochevka. Nzyu akvü heto tssoa yuta topvü lo benphia wovka. Thanphen shijo ntho tsotso, OPVÜI A, tsükona khochaki vanthuka."
OPVÜI vanrhyu Ranki ji Tsükona Tssenkhya
11 OPVÜI na Moses ezocho, 12 "Nina Israel owo kha na eboe tso otsük akvüna ombo eküm man tssenkhya apivka, to tssona owo khathüng ombolo ntia ejak era liv meka. 13 Owo khata jilo thenhyae otsük akvüna shikhfü lona tssenchako ji eben orang thevka. Otsük akvü na athüngi othan shi apivka. 14 Eboe nzyu mekyu pomoe kvüta wokhata lo jüa na topvüna tssenkhya shi thevka. 15 Onte eküm tsükona otssen shi thetathüng ejüeli jina ha kyongkata thev meka. 16 Otssen shi kyon jiang thüngi na khyae a vanrhyu ranki jilo ethüng ezi tsükona tsütsata. Otssen shijo onte eküm tssen tssovka osi ana onte nkochev nchümchevka."
Yongmen Phikuk Ji
17 OPVÜI na Moses ezocho, 18 'Yongmen yonjak khi ophi joa osi laza jiha yongmen khia. Osi hoji jo ranki ji tona thanphen ji to yutalo vae khi ojü yena. 19 Aaron tona ombo tsoe jiangna a vanrhyu ranki jilo rhowoathüng osi thanphen jilo etsoyu than pilo rhovov sathüng 20 hoji lona okhe tona ojo to epyovka. to tssona onte lüngthav meka. 21 Onte n lüngtha thoku tsükona onte khe jiang tona ojo jiang to epyovka. Shikhfü shijo onte tona onte tsoronichen jiang topvü na benphia wovka."
Nzüphen Thyujü Ji
22 OPVÜI na Moses ezocho; 23 "Mozhürhüm mmhontsov heto methaka: Myrrh rhüm seri tiruk, sangsuryu orhüm mmhom seri ethüm, Süngbenjü orhüm mmhom seria, 24 tona Akacia orhüm mmhom seri ethüm, (shiang hetopvü shikhfü lona tssenchako ji ephan füi thev.) olive thyujü seri mezhü to thei 25 nzüphen ntho thyujü thanpoe thyujü mmhom esüa nzitsüa. 26 Hoji rhüm mmhom ji khi a vanrhyu ranki tona Ntsata thephen ji tolo nzükata. 27 Thanphen saro ji osi jilo tsakalan jiang, milondung ji tona jilo tsakalna jiang, orhüm mmhom thanphen ji, 28 Othan rungphen osa ji tona hojilo tsakalan jiang, epyophen phikuk ji tona hoji laza ji to nzüa. 29 Shiang shi hetolyui nthochaki a tsükona vanthuka tona ntho tsotso kümvüka, osi ntiona hojilo evüngkata sana ntho etho jina tssatssov. 30 Osi Aaron tona ombo tso ejiang to a elhi tsükona pvüti kümthoku nzüyia khochaki vanthuka. 31 'Ntho nzüyi thyujü shi a elhilo nchüngkhon tsütsavka to Israel jiang ezoa. 32 Hoji jo kyon shae lo phyangkav meka, osi mozhüsha nsüngrüathüng jo hoto benribenyov meka. Shijo ntho, jitsükona nina ntho to vanthuka. 33 Ochona hetüv thyujü nsüngrüa sana osi hojitüv khi kyon shae pvüti meko tüv nzüa sana jijo a kyon to khanhyav meka.' "
Orhüm Mmhom Ji
34 OPVÜI na Moses ezocho, "Orhüm mmhom olan olan shiang kheti theta benria tssütsserhüm mmhom, tssüngfürhüm mmhom tona Galbanum rhüm tonma onijü rhüm njüm to theta benria. 35 Shiang benria theta mozhürhüm mmhom esüa nzinzoe orhüm nzüngrüa. Hoji ntssünga osi nthoa vanthuku tsükona oma theta. 36 Hoji lo tara khichei enhyikroe owo a vanrhyu ranki Ntsata thephen jilo erhikata. 37 Orhüm mmhom shi ntho tsotso esüa tsütsata osi orhüm mmhom shi esüa ni tsükona jo tinsüngrüa. Tole shijo a lo khochaki picho ntho to vanthuka. 38 Ochona mozhürhüm nsüngrüathüng hoji esüa benria sana a kyon to khanhyav meka."
OPVÃœI Vanrhyu Ranki Ji Etssoeden
1 OPVÜI na Moses ezocho, 2 "Ana Juda pvüji kyon Hur tsorüi Besalel, Uri tsoe ji ethüngchei, 3 a etho na pyingthukthaka. Ana elhilan taro thüngoe engathe, tssothimori osi etho ombo pithaka, 4 shona janti osi yongmen elhilo nchümri lia, haton hari thüngoe, 5 elani oyuk-osen zentüng zenri chümkav tsükona tssothimori, elani otssüng eshan thüngoe, ji yaka tssiyanmori topvü thüngoe tssothimori ombo pithaka. 6 Ana Dan pvüji lonaha Abisamah tsoe Oholiab ha ombo nzo elhi tssothoku ethüngchethaka. Ana elhi etssoe thanpoe jiangha topvu tssothimori pirathaka, hoji jo ana ntio nsüngrüv methakcho sana jiang etssov tsükona; 7 a vanrhyu ranki ji, Ntsata thephen ji tona elhüp ji, ranki ji lo benribenyoyiv jiang, 8 saro ji tona jilo ethelan jiang, shona njüm milondung ji tona jilo ethelan jiang, tona orhüm mmhom rungphen thanphen ji to. 9 Erungthan thanphensa ji tona jilo tsakalan jiang, ojo okhe epyophen phikuk ji tona hoji laza ji, 10 Aaron tona ombo tsoeden to na pvüti elhi tssoathüng mpensü jiang, 11 nzüphen thyujü ji tona ntho meta jilo echi orhüm mmhom ji to shiang hetopvü nsüngrüv tsükona ontena ana ni ezowo ji ephan tssovka."
Esanmung, Esan tsüngon Ji
12 Israel kyon jiang ezole to OPVÜI na Moses ezocho, 13 "A esan tsüngon esanmung ji lithuka, ntiotssole hojijo nchünkhon tsükona a tona nte to yutalo chekataphen motsünga, a opvüo shina a kyon nte kümthukcho to chekaphen ji. 14 Esan tsüngon ji ntena benphivka, ntiotssole shijo ntho. Hoji tsükona ochona tsüngon jilo elhi tssoa sana chüthokvüka. 15 Ntena nte elhi etssov tsüngon tiruk liala, tokhatola tsüngon tiyingo to jijo tsüngon tsüphov tssoa alo khochaki vatava. Ochona tsüngon jilo elhi tssoa sana chüthokvüka. 16 Israel kyon jiangna tsüngon shiji Ntsata ji chethephen tssoa vanthukuka. 17 Hoji jo a tona Israel kyon to yutalo chekaphen tssoa nchünkhon, vavka, ntiotssole a opvüo na oyak osi limha shiang tsüngon tiruk lo lyuyingcho, osi tsüngon tiyingo to jilo jo ana elhi vachochisi esancho." 18 Potsow na Moses ji Sinai phunglani na hojito ezorathakale, ombona longpyak eni jilo Potsow na ombo yizüng jiang erankao ji picho.
Shona Mangsüpong Kisü Ji
1 Moses na phunglani na n joyiv sunga vanale kyon jiang na Aaron ndüngo sanrhyui heto ombo ezotacho, "Ejip metae na esochuko Moses to tsao kyon tsük shi kvüto lyucho sana n tsiv sika olan esothoku tsükona Potsow motsünga e nsüngrüiyia." 2 Aaron na onte ezocho, "Nte enghden osi tsokhying tsoloden na ekao shona thera jiang phungi hansi yi apitava." 3 Hoji tsükona kyon topvüna onte shona thera jiang phungrae hansi oro Aaron pitacho. 4 Tole ombona thera jiang khi shüngi phyonthuki okuk lo phyangthei shona mangsübung nsüngrücho. Tole kyon jiangna phyotacho, "Shijo Ejip metae na e sochuko ete potsow jika!" 5 Jisülo jo Aaron na Shona mangsübung ji mhadungo thanphen nsüngrüi vasi phyocho, "Ojyua jo OPVÜI kyuchi tokhu khitavka," 6 Tole ojyuato jo nyazüngina kyon jiang na ekümrüm sheni sütasi erungthan pilo roracho, osi ejoma jo khümshümta than tssoa tsoyutav tsükona roracho. Kyon jiangna tokhuta tsoyutav tsükona khoktheracho tokhatola tsoyuva zhüva tona lonsülonphyo to kholuk kümcho. 7 OPVÜI na Moses ezocho, "Zakto joyia, ntiotssole ni kyonden nina Ejip metae na sochuko jiangna mmen tssoa khaki a sithaka. 8 Ana ejüo ji lan ji ontena n dungu sithaka, osi ontena shona phyoni mangsübung nsüngrüi hoji khümta osi othan pita yithaka. Osi hoji potsow jina Ejip metae na onte sochukcho to phyotala. 9 Kyon shiang ji kvüta lümbüm khüngcho sana ana ntsia. 10 Enhungo a ti panga, ana onte thüngi alüm tsukala küma moni onte sithokvüsala. Tosi ana ni tona ni tsoronichen to jiang jipo tsüphov kümthokuka." 11 Tokhatola Moses na heto phyoa OPVÜI thüngi jonjicho, "OPVÜI, nina ntioli ni kyonden nina Ejip metae na etho tsüphov theta so chuko jiang thüngi ni lüm tsukala? 12 Ntioli Ejip kyon jiang khi nina ni kyon jiang phunglani na chüthokrae siv tsükona Ejip metae na sochukracho saka to phyothokvü la? Ni lüm etsuk ji kyimjothuka osi ni kyon jiang thüngi hetüv ekya nungra n lithoku tsükona nchümi ni lüm dungphia. 13 Ni phajaden Abraham, Isaak osi Jakob jiang nchümcheta osi nina onte thüngi phyochak tsüphov onte vayio ji osi onte tsoronichen jo oyaki shantio tata thichethoku osi nina meta onte piv phyochako ji kümali onte echhi tssov to ezoji nchümcheta." 14 Jitsükona OPVÜI na ombona tümkao ji dungphicho, osi kyon jiang pono ezüp n yithukcho. 15 Moses na longpyak eni pondüng tsungkho lo yizüng erankao ji bensi phunglani na elani joyicho. 16 Longpyak jiang Potsow na nsüngrüi yizüng jiangha ombona hojilo thenkacho. 17 Kyon jiangna tüngratüngrita Joshua na zoe Moses ezocho, "Ana nchenpheni khonta rota won zoala" 18 Tole Moses na phyocho, "Hojijo rikhyo won osi n khyocho won mek, tolea okhen denta cho on." 19 Kvüthüng Moses na nchenphen ji enhyano na oyi mangsübung ji tona kyon jiangna sharitao ji hungcho sana ombona lüm tsukcho. Osi ombona bensi joyia vamo longpyak ji phunglan jothei jilo vachochia vanroe sicho. 20 Osi ontena mangsübung kisü nsüngrüo ji khi, rungi phyoni, ohüm küma enhyikroe ojülo nzithechi sicho. Osi ombona Israel kyon jiang ji hoji yuthukcho. 21 Tosi ombona Aaron ezocho, "Kyon shiang na ntio ni thüngi ni tssoyicho na ekhenthav mmen hetüv tssothukcho la?" 22 Tole Aaron na janlancho, "A thüngi lüm ti tsuka, kyon shiangna mmen etssov kvüta mhanka licho sana nina ntsia. 23 Ontena heto a ezocho, 'Ejip lona esocheo Moses ji ntio küma yithakcho sana ena n tsi; jitsükona e lansoe etssov Potsow ejoyia.' 24 Hoji tsükona ana onte shona yukosen jiang apile to ezocho, tole ontena phungcherae hansi oro apicho. Ana oyuk-osen jiang omi thechile hetüv mangsübung chiyicho!" 25 Aaron na kyon jiang n sayajamvü onte bobo ori mhadungo na ejithechithaka to Moses na zechecho. 26 Hoji tsükona ombona nchenphen kibüngona mankachi heto tüngcho, "Ochoang kvüta na OPVÜI thüngoe tssov sana helo yirava!" Tole Levi kyon jiang topvüna ombo füchüma sanrhyu cho, 27 osi ombona heto onte ezocho, "Israel Potsow OPVÜI jina nte topvüna yonri hanrümle osi kibüng shi lona nchenpheni rhowo nte ojenio jiang, oshom osi phinakiren jiang lüngthae sile to yizüng nte piala." 28 Tole Levi kyon jiangna hoji engae hoji nchuk tae na wothüng ethüm harüma lüngthae sicho. 29 Tole Moses na Levi jiang ezocho, "Ntena nchüng nte tsoe osi ojenio jiang lüngthae sia nte OPVÜI lo khochaki pia pvüti kümala, hoji tsükona OPVÜI na ombo mmha ji nte pithaka." 30 Ojyuato jo Moses na kyon jiang thüngi ezocho, "Ntena ekhenthao mmen tssothaka, tokhatola ana elani OPVÜI nduko phunglani chongovka, ana OPVÜI thüngi nlan siyi nte jonjiyiv mpato tssovka." Sl Jisülo jo Moses na OPVÜI thüngi chungo heto ezocho, "Kyon shiangna ekhenthao mmen tssothaka. Ontena shona khi potsow nsüngrüi hoji khümtathaka. 32 Nzansi n lan onte siyia, tokhatola nina nlan onte n siyia na a mying ji nina ni kyon jiang mying erankao jilona mhei a siyia. 33 Tole OPVÜI na janlancho, "Ochoangna a mhadungo mmen tssoa sana jiang mying tae ana khi siyivka. 34 Enhungo oyi kyon jiang sosi ana ni ezowo meta jilo yitava. A lanben na ni sovka, hoji ti-mhechoa, osi kyon shiang jo ana onte mmen man onte ezüpthoku yuta ji tsathaka." 35 Ontena Aaron khüngkata mangsübung kisü nsüngrüthuko jina OPVÜI na kyon jiang pono nochonori vara rothukcho.
OPVÃœI na Sinai Lona Yile to Israel Jiang Ezoala.
1 OPVÜI na Moses ezocho, "Ni tona nina so kyon jiang to meta shilona khoe ana Abraham, Isaak osi Jakob tona onte tsoronichen to jiang thüngi pio meta jiwoe yitava. 2 Ana olan onte sothokvü tsükona lanben rothuka ka osi ana nte meta jilo vamo kanaan kyon, Amorite, Hittite, Perisite, Hivite tona Jebusite to jiang phani sivka. 3 Nteno lizü osi ejüeli metae yiaka, tolea nteji lümbüm ekhüngden küma ana olani na mpa nte chüthokrav küma ana nte phana rov meka." 4 Kyon jiangna hoji zoale nungratacho osi oyuk-osen n katav sicho, 5 OPVÜI na Moses ezoa heto phyothukcho, "Nteno lümbüm ekhüngden, ana shanlana tia nte phana rochojo nte chüthukrav. Nte oyuk-osen jiang khichorava. Ana kvüto nte lyuyiv sana zevka." 6 Hojito ontena Sinai phunglan yaki yithakale Israel kyon jiangna oyuk-osen nkatav sicho.
OPVÃœI Vanrhyu Ranki Ji
7 Israel jiang na nchenki kvüthüng tssoa sana Moses na OPVÜI vanrhyu ranki ji khi nchenpheni na nkachoa vacho. Hoji jo OPVÜI vanrhyu ranki to tsacho osi ochona OPVÜI thüngi thyutav lia sana hojilo wocho. 8 Moses na hojilo woana kyon jiangna süki kibüngi mangrae Moses na n rhowothüng nandang zeta vancho. 9 Moses na rheyithaka na eluk durhyu jina joro vanrhyu kibüngo vani OPVÜI na hoji yakchia Moses thüngi jantacho. 10 Kvüthüng eluk durhyu jina ranki kibüngo vana hunga sana kyon jiang na epyakhetacho. 11 Hoji lona OPVÜI na Moses thüngi omha omha nduktae oshom thyuta to thyutacho. Jisülojo Moses na ombo ranki kholani yicho. Tokhatola ombo nzanchi khyingroe Joshua Nun tsoe jina ranki jilo vancho.
OPVÜI na Ombo Kyon Jiang Ndüngo Tssov To Phyochakala
12 Moses na OPVÜI ezocho, "Otsotso nina kyon jiang sosi meta jilo yile to a zochoka, tokhatola a nzo ocho rothoku sana nina a n zo. Nina mmhona a ntsia osi alo ni ematha lia to nina a ezocho. 13 Hoji tsükona ni vancho tssona ni etüm ezi jiang antsithuka, tona ana mmhona ni benkachev osi ni emathathoku. Nina kyon shiang ji ni kyon etssov ethüngchecho toji ti-mhechoa." 14 OPVÜI na ezocho, "Ana ni nzo khochivka, osi ana ekhyo nte pivka." 15 Tole Moses na ezocho, "Nina e nzo n roa tssona meta shi e tiyakthuka. 16 Nina e nzo n roana kvütoli nina ni kyon jiang osi a thüngi ni emathatala to ntsivla? Nina e nzo ro ji tae na e tona jipopoe jiang to echümpota ji ntsiv." 17 Tole OPVÜI na Moses ezocho, "Nina chomo jiang ana tssovka, ntiotssole ana mmhona ni ntsia osi ni thüngi a ematha lia." 18 Tole Moses na jonjia, "A nzansi ni vanrhyu pfütsson ji a hungthuka" to ezocho. 19 OPVÜI na janlancho, "Ana a pfütsson wondang ji ni mhadungo osi ni vanhya lona yakchithoku osi a ntho mying ji ni ezov. Aiyo OPVÜI ji osi ana a kyon jiang thüngi khonzan ejüv. 20 Tolea a mha jo ni hungthoku meka, ntiotssole ochinaha a hungsi eküm n vanlanche, 21 tokhatola nina a ndüngo meta shilo mangphen longpvü shi lia. 22 A vanrhyu wondang tsünglüpo jina yakchia na ana olong ji kui ni rheyithoki a khena e phoe ni vasi yakchithokuka. 23 Jisülo jo ana a khe ji khiv küma nina a mankvü ji hunguka tolea a mha jo hungu meka."
Longpyak Enioto Ji
1 OPVÜI na Moses ezocho, "Ovüngthüng ji esüa longpyak eni thencholana. Ana hojilo ovüngthüng yilan ni picho nina vanroe siwo jiang erankalamka. 2 Ojyua enyathüng jo methaki a thüngi Sinai phunglani chongroa. 3 Osi kyon ochia ni nzo chongrov meka, ochinaha phunglan ji phuko lea hungu shikhfü n lika, osi olyu mangsü naha phunglan ji yenjoe yantsov meka." 4 Tole Moses na OPVÜI yizüng ephan longpyak eni theni phunglani hansi chongolancho. 5 OPVÜI na emhenjü lona joro ombo ndüngo mangi ombo ntho mying "OPVÜI ji" to phyocho. 6 Hojisüi jo OPVÜI na ombo mhadungoe na oro ezocho, "Aiyo OPVÜI, Osi Potsow khonzan osi khonzantharo eli, zakto lüm n tsukna nzan tsüphov osi longtsüka eli ji. 7 Ana a phyochak jiang eclmngren wothüng jana vatala osi mmen n mhom jiang nlan siyiala, tokhatola opvüpoe mmen man ji onte tsoero tsochenrüchen jiang ji echungren ethüm mezhü jana onte n züpthoku siv mek." 8 Jitopvü Moses na likoe nkhümthei khümcho. 9 Osi ombona phyocho, "OPVÜI yo, otsotso nina alo ni ematha licho tssona, nina e nzo role to jonjiala. Kyon shiang jo lümbüm ekhüngden, tokhatola e nlan osi n mhom jiang nlan esiyisi, ni kyon to e khichoa."
Ntsata ji Ntssachoala
10 OPVÜI na Moses ezocho, "Enhungo ana Israel kyon jiang thüngi ntsata methaku ka. Ana onte mhadungona limha lo jipo ochi thüngiha n tssohancho tüv tssovka. Ana ekhenthao elhi nte tssoyivka osi kyon topvüna hojiang hunguka. 11 Ana nchüng yizüng nte pio shiang engatava tona ana Amor kyon, Kanaan kyon, Hittite, Perizite tona Jebusite to shiang nte mhadungona phani sia yivka. 12 Ntena rheyia vamo meta kyon jiang thüngi ntsata tivatava, ntiotssole hojijo nte echüo tsirhi mpato kümvü. 13 Jithüngina jo onte khümphen jiang roe siyia osi onte Potsow Ashera kisü ji roe siyia." 14 Potsow thanpo ntia ti khümtava, ntiotssole jiang ji a n vanthuk hungala. 15 Meta jilo kyon jiang thüngi mmhontae tivantava, ntiotssole ontena onte potsow jiang khüma othan pia na jilo rotale to nte tsav, osi ontena potsow thamo etsoyu jiang nte tsoyu hunga yiv. 16 Nte tsoe jiangna jipopoe loroe jiang soa vana yivka osi eloe jiangna onte potsow onte khümthuka a thüngina kontae yikhuka. 17 Yonjak na potsow ti n süngrütava osi hojiang ti khümtava. 18 "Ebung mozhü n theo hümri tokhu ji vatava. Ana nte ezo ji esüa Abib chorolo jo tsüngon tiying jo ebung mozhü n theo hümri tsotava. Ntiotssole ntena hoji chorolo Ejip lona khochicho." 19 "Otsoe tsokhfü, okilo ekümrümo nrodemo jiang topvü a echi tssothuvka. 20 Tokhatola ntena gadho nrodemo thungjo olyuro na wothüng tssoa pisi khitava. Ntena hoji rhani n khia tssona evüng ji jaki siyia. otsoe tsokhfü topvü rhanchoe khitava "Ochinaha a mhadungo othan n pem rov meka. 21 "Ntena elhi etssov tsüngon tiruk lia tokhatola tsüngon tiyingo jilo jo elhi ti tssotava, lichen lirilo tssolea lirhonthüng tssolea tsüngon jilo jo elhi ti tssotava. 22 "Ntena otssuk ridemo jilo liri tokhu lithuka, osi ntena pvüthehanthe thaka ranki tokhu ji khitava. 23 "Israel eboetso topvüna nzyualo yenjo ethüm OPVÜI Israel Potsow a khümtavka. 24 Ana nte mhadungi na jipopoe jiang phani sithaka na osi nte meta nte tsükayithakana jipopoe ochinaha tokhu ethüm ji yutalo jo nte thüngi ori tssov meka. 25 "Ntena ekümrümo a thana na jilo ebung mozhü etheo hümri n thena a thana. Yakchi tokhu lo lüngthao olyuro ji so ji ojyuato enyathüng jana ti vata. 26 "Nzyu akvü ntena otssuk omüm richodemo jiang lona khi OPVÜI ki oro thana. "Olyuro osi nyanyan ro jiang opvü shirojü lona ti kvüa." 27 OPVÜI na Moses ezocho, "Oyi shiang eranrhyua, ntiotssole ana oyi shianglo ndongkae ni tona Israel topvüto thüngi ntsata methakala." 28 Moses na jilo etsoyu n tssov tsüngon zhüro zümo zhüro to OPVÜI ndüngo vancho, ombona longpyak jilo ntsata yilan Yizüng Taro ji erankacho.
Moses na Sinai Phunglani na Joyiala
29 Moses na Sinai phunglani na yizüng taro ji bensi joyile, ombo mha ji wondangkiri tssocho ntiotssole ombona OPVÜI thüngi thyuta vancho; tokhatola ombona hoji n tsicho. 30 Aaron osi thanpoe topvü na Moses mha ji tüngra hungcho osi onte kyua ombo mhadungo n votacho. 31 Tole Moses na Aaron tona kyon jiang to tsasanati ontena ombo thüngi wotacho osi ombona onte jancho. 32 Hoji süloti kyon topvüna ombo hazhüa sanrhyucho osi Moses na OPVÜI yizüng Sinai phunglani na khicho ji onte ezocho. 33 Moses na onte ezokhanthakale osü khi ombo mha ji eyuki sicho. 34 Kvüthüng Moses na OPVÜI thüngi thyutalo vanrhyu ranki rhowoa na ombo mhashüng ji khi sicho. Ombona hapoe chiyiana OPVÜI na ombo ezo jiang topvü kyon jiang ezoracho, 35 tona ontena ombo mha ji tüngra hungcho. Hoji süijo ombona OPVÜI thüngi n wothüng nandang jo mhashüng ji hancho.
Esanmung Tsükona Shikhfü Jiang
1 Moses na Israel kyon topvüto tsarhyui ezocho, "OPVÜI na heto etssov yizüng nte picho: 2 Ntena nte elhi etssov tsüngon tiruk lia, tokhatola tsüngon tiyingoto jijo ntho tsüngon OPVÜI a tsükona vanthukuka, ochona tsüngon shilo elhi tssoana hojijo chüthukvü. 3 Esanmung jilojo nte ki omi tssokachiv tia ti tssotava."
Ntho Ranki Ji Tsükona Othan
4 Moses na Israel kyon topvü ezocho, "OPVÜI na heto yizüng nte picho: 5 OPVÜI thüngi othan pia. Ochona hojito othan pihunga sana shona, janti, yongmen; 6 Sünyipvü, ejüm, Müngzhüv, tssansü emyom, nyanyan tssansü; 7 olyu tssan emyom na jümcho; sofü enyi pvü, akacia tssüng; 8 milon thyujü, thyujü nzüphen jilo tona orhüm enüngüv jilo thephen orhüm; 9 pvüti ntssomo ji epvüsü tona tekisü tolo züpkaphen, tsünglüpvü long to shiang khi thanthuka.
OPVÜI Vanrhyu Ranki Jilo Tsütsaelan
10 "Nte yulo tssiyanthi topvü na oro OPVÜI na phyo ji ephan heto tssiyantava. 11 Süranki ji, hoji eyukphen opon ochung yikaphen tona ronri to jiang, khyanrongphen, durhyu tona khora osi jilo thephen topvü, osi eshendan jiang; 12 Ntsata Bakos, hoji durhyu jiang elhüp ji osi hoji eyuksü; 13 saro ji, hoji durhyu jiang osi hojilo tsakalan topvü, hümri than Potsow pio jiang; 14 milon tsükona milon dung tona jilo thephen jiang, milon jianglo thyuj:u yencho; 15 tssütsse erungthan tsükona thanphen tona hoji khora jiang, nzüphen thyujü jiang, tssütsse rhüm enüngo ji, raki kipüng zonlanchi ji; 16 othan rungphen thanphensa ji, hojilo ndungthephen yongmen nrakao ji, jilo khora tona thephen topvü, okhen ntsükphen ophi ji, tona hojiang ndungthephen jiang; 17 fülanchiphen süzon jiang, hoji durhyu tona nsükaphen to jiang, fülanchio jilo rhowolani zolanchiphen ji; 18 fülanchiphen tona ranki ji lo eshendan tona wozhü jiang; 19 elani pvüti jiangna ntho meta jilo elhi tssoathüng mpensüphen ratsao jiang, Aaron pvüti osi ombo tsoe jiang nthosü jiang, to topvü nsüngrütava."
Kyon Jiang na Onte Than Hansi Roala
20 Israel kyon topvü na khochicho, 21 osi ochoangna than hungcho sana jiangna OPVÜI vanrhyu ranki ji etssov tsütsaelan hansi roracho. Ekhümlo osi pvüti sü jilo ethelan jiang topvü ontena hansi rocho. 22 Eboe ha eloe ha ochoang na chokacho sana jiangna eze mmhom ntsükaphen thera, ying rüm, yoko tona shona oyuk osen lan taro hantasi oro khochaki OPVÜI pitacho. 23 Ochoang na sünyipvü licho sana, ejüm, Müngzhüv, osi tssansü emyom, nyanyan tssansü, olyu fü emyom na jümcho, osi sofü enyipvü to lio jiang na hantasi rocho. 24 Ochoang na janti osi yongmen thekhukcho sana jiangna ha hansi OPVÜI thüngi rocho, ochoangna akacia tssüng lichosana jiangna ha ranki jilo ethelan hansi rocho. 25 Tssiyanthi eloe topvüna sünyipvü tükphen oying, ejüm osi khonthyu pyon, tssansü emyom to ontena tssiyamo jiang hansi rotacho. 26 Ontena nyanyan tssan na nsüngrücho oying ha hansi rocho. 27 esopvüi jiangna tsünglüpvü tona oyuk-osen thanpo to ntho epvüsü tona tekisü to lo tükaphen hansi rocho, 28 Osi orhüm mmhom tona milon thyujü to, nzükaphen thyujü tona orhüm mozhü toha hansi rocho. 29 OPVÜI na Moses ezowo elhi ji etssov tsükona Israel kyon topvü na ochoang na chokacho sana ji ephan OPVÜI than hansi rocho.
OPVÃœI Vanrhyu Ranki Jilo Tssiyanthi Jiang
30 Moses na Israel jiang ezocho, "OPVÜI na Uri tsoe, Hur tsorüi Bezalel ji Juda pvüji lona ethüngchethaka. 31 Potsow na ombo etho khi ombo pyingthuki tssothio kyak osi engathe to shiang elhilan taro tsükona ombo picho, 32 elhi ekhüngu matangu tsükona osi shona, janti tona yongmen to ejov thüngoe; 33 tssentsülong züpkaphen rhüchov thüngoe, otssüng eshan osi tssiyanlan taro thüngoe. 34 OPVÜI na ombo tona Dan pvüji kyon Ahisamakh tsoe Oholiab to oni ji onte tssothimori jiang oyam shikacheo etho picho. 35 Ombona thenkav elhi tssothi mori, opyon haton elhi, sünyipvü etük elhi, tssansü ejüm, müngzhüv tona emyom osi thanpo sü etükvü lo tssothimori to oni picho. Onina elhilan topvü tssothicho osi opyon hatonhari lo elümoto mmhon cho.
1 "Bezalel, Ohaliab, osi tssiyanthi thanpoe ochoang OPVÜI na tssothi mori osi engathewo etho picho sana, osi ochoang na ntho ranki ji etssov lo ethelan topvü tssothicho sana jiangna olan topvü OPVÜI na ezo ji ephan nsüngrüv ethev lia."
Kyon Jiang na Othan Khosha Hanrhyuala
2 Moses na Bezalel, Ohaliab, ji yaka OPVÜI na tssothimori epi thanpoe ochoang na nzanchi elhi tssohunga vancho sana jiang topvüna elhi ji sakale to ezocho. 3 Israel jiangna ntho ranki ji etssov tsükona othan oro theo jiang Moses na khi kitssoe jiang picho. Khatola kyon jiangna n tümjak na engakvü othan oro Moses khelo pitacho. 4 Tole kitssoe jiangna owo Moses ezotacho, 5 "OPVÜIna ranki etssov ezo jilo ethelan lo tajoa kyon jiangna oro thanala." 6 Tole Moses na nchenpheni kyon topvü thüngi ochinaha hojilo na kyongkata ti thantale to ezocho, tole kyon jiangna othan ji esancho. 7 Ntio kvüta hanrhyuthakcho sana hojina elhi ji thaksi enhyo tüv tssothakcho.
OPVÃœI Vanrhyu Ranki Ji Tssoala
8 Elhi etssoe jiang yolo tssothitso jiangna OPVÜI vanrhyu ranki ji tssocho. Ontena ranki ji sünyipvü sütsük taro lo tssansü ejüm, müngzhüv tona emyom to tüktsücho osi echo khyingo ekümrüm kisü tükacho tüv na tssocho. 9 Sükvü akvüto etsüi, esi kheti, esi metre taro eni, etsüi metre eni to. 10 Ontena sükvü mongo mongona sütsük eni vüchecho. 11 Ontena mongo vütsüo jiang akvülo süchüm otssawoe ejüm sü na nkon vükaracho. 12 Ontena sütsük motsünga jilo nkonka tinyan vükasi hojiang titüngta sütsüka jiloha tinyan vükatacho. 13 Ontena sütsük eni jilo yitsütaphen shona nkonka tinyan vükacho. 14 Jisülo jo ontena ranki ji eyukphen jo nyanyan tssansü na sükvü kheti taro ekha vütsüi khicho. 15 sükvü akvü kheti, esi metre tarosi ethüm tona etsüi metre eni ren to khicho. 16 Ontena sükvü mongona sütsüka, sükvü tiruk na sütsüka to vütsütacho. 17 Ontena sütsüka jilo sükvü otamoe jilo nkon tinyan, sütsüka jilo ha sükvü otamo ji süchümi tinyan to vükatacho. 18 Ontena sütsük eni khümtsütae sütsüka kümthukvü tsükona yongmen na yikaphen tinyan vükacho. 19 Eyuk opomo ji tsswothukvü tsükona olyufü na sütsüka, sofü enyiprov na sütsük to vütacho. 20 Ontena ranki jilo ethev tsükona akacia tssüng na ronri zakachio nsüngrücho. 21 Ronri akvü metre mezhü, etsüi centimetre rokrosi tiruk, 22 jilo ronri akvülo chüngtaphen edyuka eni ren khyingcho. Ronri akvülo edyuka ji khyingracho. 23 Ontena ranki ji jüjowoe echung tsükona ronri mekyu tona hojiang ndungkaphen janti na zhüro, 24 ronri motsüngalo edyuka eni khyingo ji nken jianglo chüngkav nsüngrücho. 25 Ontena ranki ji jükiwoe echung ji tsükona ha nsü mekyu nsüngrüi, 26 nsü motsüngalo edyuka eni ji echi janti na ndungkaphen zhüro nsüngrücho. 27 Ontena engrhewoe echung ji sülani ethev tsükona nsü tiruk tona 28 nkeni ethev eni to nsüngrücho. 29 Nkeni nsüng shiango oküpoe na chüngtae myo jana chüngtae khicho. Nken eni shilo nsü eni etheo jiang ji hetoli khicho. 30 Hojito nsü tiza jilo janti ndungkaphen taro tiruk, nsü motsüngalo eni ren thecho. 31 Ontena akacia tssüngna nsü tarosi mongo ranki kikhyo esanawoe nsü jiang tsükona mongo, 32 kikhyo esanawoe nsü jiang tsükona mongo, sülamoe engrhewoe nsü jiang tsükona mongo to methakcho. 33 Olungo nsü kvümoe na ronri jiang ntssoni rensoa chüngicho sana jijo ranki ji ochüm phokowoe na phokowoe jana khicho. 34 Ontena ronri jiang shona na phyonkacho osi shona nkon therhyui nsü jiang sayathukcho osi nsü jiang ha shona na nzukcho. 35 Ontena sünyipvüna zonchaksü motsünga, tssansü ejüm, mü ngzhüv tona emyom to tüktsücho ekümrümo echo ekhyingo tüv kisü lyukaracho tüv khümtsüi nsüngrü cho. 36 Ontena akacia tssüngna dyurhyu mezhü nsüngrüi zoncha ksü ji thecho osi dyurhyu jiang shona na phyonkae elani shona yikaphen nsüngrüi theracho. Dyurhyu jiang ndungkaphen ha janti na mezhü nsüngrücho. 37 Ran ki ji kipüng zonchak jo sünyipvü tona tssansü ejüm, müngzhüv tona emyom to tüktsücho tüv lo kisü lyukacho tüv khicho. 38 Zonchaksü shi tsükona dyurhyu mongolo yikaphen therae mmyoe tona yika phen nsü jiang to shona na nzuki dyurhyu jiang ndungkaphen jo yo ngmen na mongo nsüngrüi khicho.
Ntsata Bakos Ji Nsüngrüala
1 Bezalel na Ntsata Bakos ji akacia tsüng khi nsüngrücho, hoji esi centimetre 110 nzoe 66, ntssoni 66 to. 2 Ombona hoji opon ochung phyonzhücho osi ochüm jiang ha shona na khfüpüngcho. 3 Ombona hoji ejümpiien nkonka mezhü nsüngrüi ojo mezhü jilo phokolo eni ren lyukacho. 4 Ombona akacia tssüng na ejümphen khora mezhü nsüngrüi, shona na nzuki, 5 hayi amen nkonka jiang lo khathecho. 6 Hoji elhüp ha ombona shona njüm na esi centimetre 110, nzoe centimetre 66 to nsüngrücho. 7 Ombona shona ekümrümo echo mpao tüv eni joe, 8 elhüp ji ochüm esanawoe lo motsüng tsüng thecho. Hojiang ha elhüp jilo oso motsüng a esüa lyutsüi khicho. 9 Echo mpao ekümrümo jiang na elhüp ji ponina zechitao osi onte echo jiangna elhüp ji eyuko tssothukcho.
Potsow Thamo Ji Ekachiphen Saro Nsüngrüala
10 Ombona saro ji akacia tssüng na nsüngrücho, hoji esi centimetre 88, nzoe centimetre 44, ntssoni centimetre 66, to khicho. 11 Ombona hoji shona njüm na nzukcho osi ochüm jiangha shona na khfüpüngi khicho. 12 Ombona hoji nkona nkhon millimetre 75, lyukae hoji tssa jiang ha shona na khfüpüngzhüi khicho. 13 Ombona hojilo ejümphen mezhü shona na lyukae ojo chümkao nken mezhü jianglo, 14 saro ji ejümphen khora khathephen nkonka shiang ji nkhon ji ndüngo lyukacho. 15 Om bona khora jiang akacia tssüng na nsüngrüi shona phyonkacho. 16 Ombona saro ji poni okong ophi jiangha shona njüm tae na nsüng rücho; ophi jiang, opvü jiang, mvüru jiang, osi zükhi thanphen ophi jiang topvü to.
Milondung Ji Nsüngrüala
17 Ombona milondung ji shona njüm na nsüngrücho. Ombona ndungkaphen tona odong ji tojo shona joe khicho, hojilo merithukvü thera eki osi pvüpüm khyingo jiha hojilo oso motsünga tssoa lyutsüi khicho. 18 Dungpvü jilona khero tiruk yangroe yicho, 19 khero akvü lo merithukvü thera almond eki esüa pvübüm tona eki to khyingracho. 20 Milondung jilo ha merithukvü thera almond eki esüa mezhü pvübüm tona eki to khyingcho. 21 Khero ethüm nkhük ji akvü kupi pvüpüm motsünga tssothukcho. 22 Pvübüm osi khero jiang milondung ji to topvü shona na oso motsünga jotsüi khicho. 23 Ombona milondung jilo echi milon tiying nsüngrücho, osi hojilo mmyaphen tona phikokro ji tojo shona njüm na nsüngrücho. 24 Ombona milondung ji tona jilo ethev topvüto tsükona shona seri thümrosi mongo ezicho.
Orhüm Rungphen Thanphen Ji Nsüngrüala
25 Ombona orhüm rungphen akacia tssüng na thanphen roncho. Hoji jo nken mezhüata khetita nzoe centimetre 45, esi centimetre 45, nna ntssoni centimetre 90 to khicho. Hojilo nken mezhü jiang lona edyuka mezhü khyingo jiang ha hojilo soa tssothuki khicho. 26 Ombona hoji opomoe, otssa nkonphia shona na phyonkae ochümi ha shona na khfüpüngi khicho. 27 Hoji ejümphen khora jiang khathephen ha ombona shona na nkonka eni otani lyukae khicho. 28 Ombona khora jiang ha akacia tssüng na nsüngrüi shona phyonkae khicho.
Nzükaphen Thyujü Ji Tona Orhüm to Nsüngrüala
29 Ombona ntho nzükaphen thyujü jiha methakcho osi orhüm mmhom jiha benria nzitae khicho.
Othan Rungphen Saphang Ji Nsüngrüala
1 Othan rungphen tsükona ombona akacia tssüng na thanphen motsünga roncho. Hoji jo ombona nken mezhü khetita esi metre 2. 2, etsüi metre 2. 2, osi ntssoni metre 1. 3 to khicho. 2 Ombona nken mezhü jianglo edyuka khyingrathuki soa tssüng kümthukcho. hoji topvü yongmen na phyonzhüi khicho. 3 Ombona thanphen jilo etheo thanpo shiang ha methakcho: nghiphen phfü, thanphiphen, phikuk, yiphiphen tona miron thanthephen ji to. Shiang hetopvü to yongmen na nsüngrücho. 4 Ombona yongmen na saro nrhangi thanphen ji nkhon kupi thechicho, osi hoji na than phen ji renso nandang vankachicho. 5 Ombona ejümphen nkonka mezhü joe nken mezhü jiang lo thecho. 6 Ombona akacia tssüng na khora nsüngrürae yongmen na phyonkacho, 7 osi thanphen ji otssa tsungkho nkonka jianglo khathecho. Thanphen ji ombona olungi jo okuk tssoa chungi khicho.
Yongmen Phikuk Nsüngrüala
8 Ombona yongmen phikuk ji tona ndungkaphen yongmen ji to jiang OPVÜI vanrhyu ki ji kipüngo elhi etssoe eloeden jiang mhachanphen jiang khi nsüngrücho.
OPVÜI Vanrhyu Ranki Ji Ekvüzhü
9 OPVÜI vanrhyu ranki ji chungchak jo ombona sünyipvü khi zonchakcho. Jüjowoe jo zonchak sü ji esi metre 44, 10 ji yongmen durhyu mekyu, yongmen ndungkaphen mekyu lo ndungkathuki jianglo janti na yikaphen tona khathephen nsü to lyukarae khicho. 11 Jükiwoe ha hojito lyui chungcho. 12 Engrhewoe jo zonchak sü jo esi metre 22 ji yongmen ndungkaphen taro zathuki, jianglo janti na yikaphen tona khathesü to lyukarae khicho. 13 Engkhfüwoe kipüng etheo jiwoe ha zonchak jo hotoli khicho. 14-15 Kipüng ji hayi hamen zonchak sü esi metre 6.6, tüv durhyu ethüm ndungkaphen ethüm poni ndungkarae khicho. 16 Epichako ji rhüa zonchak topvü sünyipvü na nsüng rücho. 17 Durhyu jiang ndungka jiango yongmen na joracho osi yikaphen, kathe-nsü tona durhyu mmyo eyuk to jo janti khicho. Zonchak ji rhüa durhyu jiang topvü janti na jocho khathensü na chüng kae khicho. 18 Epichak jirhowolan jilo zonchak jijo sünyipvü lo tssansü ejüm, müngzhüv tona emyom to tüktsüi jilo kisü na opyon therae khicho. Hoji jo epichak jilo zonlanchi ji esüa esi metre 9, ntssoni metre 2 to khicho. 19 Hoji jo yongmen ndungkaphen mezhü poni yongmen durhyu mezhü zathuki jilo zonkae khicho. Hojiang lo oyii jiang khathe nsü tona durhyu mmyoe eyuk tojo janti khicho. 20 Ranki ji eshentan tona epichak ji es hentan to jiang topvü yongmen khicho.
OPVÜI Vanrhyu Ranki Jilo Tsütsao Yonjak Jiang
21 Yizüng taro ji erankao longpyak eni evao OPVÜI vanrhyu ranki jilo yonjak hetata tsütsacho. Shiang ethev ji Moses na eranrhyui Aaron pvüti ji tsoe Ithamar na ndungntssung pia Levi jiangna elhi tssocho. 22 Juda pvüji kyon Hur ji tsoe Uri ji tsokhying Bezalel na OPVÜI na ntio ezocho sana ji ephan tssoracho. 23 Ombo nzanchi Dan pvüji kyon Ahisamach tsoe Ohaliab, ombo nzanchiwo jijo otssüng olongo thenkalo tssothia, ophowoluk hanton lo tssothia osi sünyipvü tona tssantsü ejüm, müngzhüv, emyom to tükathia tüv tssocho. 24 Ntho ranki ji ndana shona kvüta OPVÜI lo khochaki thecho sana topvü tssotsüi shikhfü ephan fücho seri wothüng motsünga. 25 Janti jo seri 3,430, jiha shikhfü ephan fücho. 26 Shijo wokhata lo kvüta jücho sana jiangna shikhfü eben füi theo ji jitata tsso cho. Jilo nzyu mekyu na omhawoe eboetso owo 603,550 na wokhata lo thecho. 27 janti jiang lona seri 3,400 jo ntho ranki jilo zonchaksü ji tsükona ndungkaphen nzoa jocho, osi ndungkaphen motsüngalo seri 34 ren tssocho. 28 Seri thümro enhyo jijo Bezalel na kathe nsü jiang, durhyu lo oyi jiang tona durhyu mmyu jiang phyonzhüv tsütsacho. 29 OPVÜI khochaki picho yongmen topvü tsotsüi seri othüng eni si nzo mezhü si mekyu mongo tssocho. 30 Ombona hoji khi OPVÜI vanrhyu ranki kipüngo ndungka jiang, yongmen na roncho thanphensa yongmen na phyo nkao ji tona thanphen jilo tsakalan jiang,3l epichak jilo ndungkaphen theo jiang, epichak kipüngo ndungka jiang, epichak jilo osi ranki jilo eshentan jiang to tsükona tsütsacho.
Pvüti Jiang Mpensü Methako ji
1 Pvüti jiangna ntho meta jilo elhi tssaothüng hanphen ontena tssansü ejüm, müngzhüv, tona emyom to methakitacho. Ontena Aaron pvüti mpensü jianglo OPVÜI na Moses ezoji ephanina ratsa methakitacho. 2 Ontena epv üi eyuksü ji sünyipvü tona tssansü ejüm, müngzhüv, emyom tona sho na ying to tüktsüi khicho. 3 Ontena shona ji eporoa joe tsenroe sünyipvü ji tona tssansü ejüm, müngzhüv tona emyom tolo tüktsüi khicho. 4 Ontena epvülo zonkasü jilo mhadungoe khümkav sü müng eni tükcho. 5 OPVÜI na Mos es ezoji esüa rulankhüng jiha hojitüv tsütsailan khi tükacho. 6 Onte na tssentsülong emyom methaki osü jilo shona jianglo chümkaracho. 7 Hojilo Jakob tsoe otsük taro eni jiang mying ji elümoto mmhona erankacho. OPVÜI na Mo ses ezo ji esüa Israel pvüji taro eniji wochanphen tssoa epvü lo sü ji poni sümüng jilo chümkatacho.
Teki Sü ji Nsüngrüala
8 Ontena tekisü jiha epvülo sü jilo theo jiang esüa tüv tsütsailan osi thera niro theta benritacho. 9 Tekilo osü jijo etsüi osi esi kheti tüv eni chüpchecho, esi centimetre 22 tona nzoe centimetre 22 to khi cho. 10 Hoji poni jo tsentsülong oren mezhü chümkacho: Oren ovüngo jilo jo myonshiv, hakfü tona myontsangü to thecho; 11 Oren enio jilo jo mmyaku, ejüm tona tsünglüpvü long to thecho; 12 oren ethümto jilo jo shakya pyon, mhümphoku, müngzhüv to thecho; 13 osi oren mezhüoto jilo jo mmyaku, myonshiv tona hakfü to reni khicho. Shiang hetopvü shona poni chümkae khicho. 14 Israel pvüji taro eni ji wochanphen tssoa longtsüng akvülo Jakob tsoe taro eni jiang yulo tsüka mying thetacho. 15 Teki ekhüp jilo jo ontena shona zhüshentata joe eritsüi khicho. 16 Ontena shona kholung eni tona nkon eni to methaki shona nkon eni ji teki ekhüp ji nken omhawoe lyukae khicho. 17 Ontena shonazhü shenta eniji ochüm esanawoe shona nkonka eni jilo shenka, 18 osi ochüm phoko jiang ji shona kholung jianglo shenka toli epvü sü ji poni sümüng jiang mhadungoe tssothuki khicho. 19 Ontena shona nkon eni joe epvü sü ji ndüngo teki ekhüp ji ochüm oküpoe osi ochungoe shenkae khi cho. 20 Ontena shona nkon eni jolani ryukhüng ji mhalo epvü sü ji poni sümüng eni ji chüm jianglo vükatacho. 21 OPVÜI na Moses ezoji ephan ontena teki khüp jilo nkon jiang epvü sü jilo nkon jiang onte na ejüm zhüna shentsütae teki eyuk ji ryukhüng jilo khüngünga wokae khicho.
Pvüti Mpensü Thanpo Jiang Nsüngrüala
22 Epvü sü ji poni phuknrhüo jijo metsüka tssansü ejüm na tükcho. 23 Osü jilo evüngkvü jijo reta n yithoku tsükona püngshüngi khicho. 24-26 Osü ji ojowoe ochüm rhüa sünyipvü tona tssansü ejüm, müngzhüv tona emyom to khi tsarümthiben kisü lyukaracho, osi OPVÜI na Moses ezoji esüa tsarümthiben jiang yuta akvülo shona khyingtsü kisü na nchaei khicho. 27 Ontena Aaron tona ombo tsoe jiang to tsükona phukthesü methaktacho, 28 Osi OPVÜI na Moses ezoji ephan kvüri ekhüng, kikho, sünyipvü ryuphan, 29 tona yizonphen sümüng ji tojo sünyipvü tona tssansü ejüm, müngzhüv, emyom to tüktsüi ji poni kisü pikarae khicho. 30 Ontena khochaki epi ntho chekaphen oyuk-osen jijo shona njüm na joe ji poni "OPVÜI lo khochaki piala" to erankacho. 31 Ontena hojiha OPVÜI na Moses ezoji ephan ejümzhüna kvüri ekhüng jilo khüngkae khicho.
Elhi Ji Methakala
32 OPVÜI vanrhyu ranki jilo elhi topvü wokhao tssoa methakcho. OPVÜI na Moses ezoji esüa Israel jiang na tssoracho. 33 Ontena ranki ji tona jilo tsakalan topvü yikaphen jiang, ronri jiang, nsu jiang, durhyu jiang, tona nzükaphen jiang; 34 olyufü na eyukphen emyom jümo ji: sofü eyuk ji; nna chunglanchiphen ji; 35 Longpyak eni jüwo Ntsata Bakos ji; hoji ejümphen khora tona elhüp jiang; 36 Saro ji tona jilo tsakalan jiang, Potsow thamo hümri ji; 37 Shona njüm na nsüngrüo milon ekachiphen ji, milon jiang, jilo tsakalan topvü, osi milon jiang echi thyujü; 38 shona thanphen sa ji; nzüphen thyujü ji; orhüm mmhom mozhü ji; ranki kipüng zonchak ji; 39 yongmen na roncho thanphen osi yongmen mironsa ji, hoji ejümphen khora tona jilo tsakalan topvü; jüpvü tona hoji ekachiphen ji; 40 epichak jilo zonphen tona jilo ndungkaphen jiang; epichak ji kipüngo zonchak ji tona jilo wozhü jiang; ranki eshentan jiang; ranki jilo tsütsaelan topvü; 41 pvüti jiangna ntho metae hanphen mpensü ratsav jiangAaron pvüti tona ombo tsoe jiang to mpensü jiang topvü kyon jiangna Moses thüngi hansi rocho. 42 OPVÜI na kvüto Moses ezocho sana ji ephan Israel jiangna elhi topvü tssoracho. 43 Moses na jiang topvü zele OPVÜI na phyo ji esüa tssorathakcho. Jitsükona Moses na mmha onte randankacho.
OPVÃœI Vanrhyu Ranki Ji Tssokachi Nthochetala
1 OPVÜI na Moses ezocho, 2 "Choro ovüngo ji tsüngon ovüngo jilo OPVÜI vanrhyu ranki ji tssokachia. 3 Hojito yizüng taro ejüo Ntsata Bakos ji vata osi mhadungoe zonchak ji theta. 4 Saro ji süsi rheyi hoji poni tsütsaelan jiang vata. Elani milon ekachiphen jiha hansi rheyi milon jiang jilo ekachia. 5 Shona sa thanphen mozhü rhüm rungphen ji hansi rheyi Ntsata Bakos ji mhadungoe vata osi kipüngo zonchak ji theta. 6 Ranki ji mhadungo orhüm mmhom than rungphen sa ji vata. 7 Ntsüknlükphen phikuk ji ranki tona thanphen ji yuta lo vae ojü yena. 8 Epichak ji theta osi hoji kipüng zonchak sü jiha theta. 9 "Jisülo jo ranki tona hojilo jüwo jiang tolo thyujü erhikata nthocheta tona ntho kümvüka. 10 Jisülo jo hojilo tsakalan jiang topvü thyujü nzüa nthocheta tona topvü nthotsotso kümvüka. 11 Hojito ntsüknlükphen phi ji tona ndungkaphen ji toha nthocheta. 12 "Aaron tona ombo tsoeden jiang to ji kipüngi oro ntssüngcheta tsükathuka. 13 Tosi Aaron ji pvüti mpensü ekathuka osi thyujüna ombo nzüyia pvüti elhilo khochaki vanthuka. To tssona ombo na pvüti elhi lona a benkavka. 14 Ombo tsoe jiang ha sosi oro phukthesü jiang ekathuka. 15 Onte opo ji nzüyio ji esüa onte ha nzüyia khochaki pvüti elhilo vanthuka. Hojito nzüyio shi yakchia nchüngkhon tsükona pvüti onte kümvüka." 16 OPVÜI na ezo ji esüa Moses na tssoracho. 17 Ontena Ejip lona khochisi nzyu enio to jilo choro ovüngo jilo tsüngon jantemo jilo OPVÜI vanrhyu raki ji tssokachicho. 18 Moses na ndungkaphen jiang nsüi, etsen jiang ndungkae, nsü jiang ekae durhyu jiang chümcho. 19 Ombona raki ji eyuk ji thesi jilo eyuk opomo ji thelancho, hojijo OPVÜI na Moses ezo ji ephan tssocho. 20 Jisülo jo ombona longpyak eni ji khi Ntsata Vaphen jilo thecho. Ombona Ntsata Bakos jilo nkonka jianglo khora jiang sukthei, elhüp jina lhüpcho. 21 Jisülo jo ombona Bakos ji ranki vasi nkoha zonchak ji thecho. Hojito OPVÜI na ezo ji ephan Ntsata Bakos ji nkohae vacho. 22 Ombona saro ji ranki chungi jükiwoe zonchak ji pomoe vacho, 23 osi OPVÜI na ezo ji esüa hoji poni hümri than ji vacho. 24 Ombona milondung ji ranki chungi jolowoe saro ji mha chunga vacho. 25 Osi OPVÜI na phyo ji ephan ombona hojilo OPVÜI vanrhyu lona milon jiang dekacho. 26 OPVÜI na ezo ji ephan ombona shona sa thanphen ji ranki chungi zonchak ji mhadungoe vacho. 27 Osi jilona orhüm mmhom than ji rüngcho. 28 Ombona ranki ji kipüngo zonchak ji thei, 29 hoji mhadungo erungthan thanphen sa ji vacho. OPVÜI na phyo ji ephan ombona hoji poni erungthan tona benro niro to than jiang thancho. 30 Ombona ntsüknlükphen phikuk ji ranki ji tona thanphen ji yutalo vacho osi hojilo ojü yencho. 31 OPVÜI na phyo ji ephan Moses Aaron osi ombo tsoe jiangna 32 ranki jilo mekana thanphen sa jilo rhowo akvüto hojilo na ojo okhe epyotacho. 33 Moses na ranki ji tona thanphen ji to rhüa epichak ji thecho osi hoji kipüngo zonchak ji thecho. Hojito ombona elhi topvü thakcho.
OPVÃœI Vanrhyu Ranki Ji Poni Eluk
34 Eluk na ranki ji eyukcho osi OPVÜI vanrhyu jina hoji tüngrazhücho. 35 Hojito tsso jina Moses na ranki jilo n rhowochecho. 36 Eluk ji ranki jilona shaki yisanati Israel jiangna eseni oyi meta thanpoe nchentacho. 37 Eluk jina hojilo evanthüng jo ontena meta jilona n yicho. 38 Onte yentsa yuta hetenya ji ontena engo jo eluk ji, zümolo jo ranki poni omi tüngrao ji to yakchia OPVÜI vanrhyu ji hungcho.
Totona Erung Than
1 OPVÜI vanrhyu ranki jilona OPVÜI na Moses tsacho, 2 osi Israel jiang na ekümrüm than piathüng shikhfü jiang heto tssov to ezocho. Kyon tsükana ekümrüm than piathüng ombo mangsü mekana olyu mekana nyanyan tssiden lona khichekhuka. 3 Ombona mangsü yolona khiche erungthan pia tssona ephyorüv n khyingo mangsübung tüv khivka. OPVÜI na ombo khichwothukvü tsükona ombona mangsübung ji OPVÜI vanrhyu kipüngo süsi chiwovka. 4 Kyon jina ombo kheji mangsübung ji kvürilo nyimkav, tona hoji ombo mmen jiang khi esio than to khichoyiv. 5 Ombona hoji lona mangsü ji lüngthav osi Aaron wopan pvüti jiangna ejen ji khi OPVÜI vanrhyu kipüngo lio thanphen sa ji nken mezhü jianglo phyangkavka. 6 Jisüijo ombona ekümrümo ji ofü shaki rhomvü, 7 tona pvüti jiangna thanphen jilo otssüng nsüngkae omi tssovka. 8 Ontena oso lümchak jiang, kvüri osi ethyu jiang to topvü omi thechiv. 9 Ethanpvüo jina bukchung jiang tona ojo sülamoe eni jito etssüv osi shen dung pvüti jina totona thanphen poni ekachi rungüv. Etsoyu than shi rhüm shina OPVÜI emathathukala. 10 Kyon jina ombo olyu mekana nyanyan tssideni na khi thana tssona ntia ephyo erüv n pao obung tüv khivka. 11 Ombona thanphen ji jükiwoe na ekümrümo ji tatsüngüv osi ejen ji pvüti jiangna khi thanphen sa nken mezhü jiang lo phyangkavka. 12 Kyon jina kvüri osi ethyu jiang jüa solan topvü omi jilo thechivka. 13 Ethanpvüo jina pokchung jiang tona ojo sülamoe jiang to etsüthaka na pvüti jina othan ji OPVÜI piv osi totona thanphen sa jilona runguv. Etsoyu than shina OPVÜI emathathukvü. 14 Kyon jina woro khi erung than pia tssona yukhyu mekana vefü khivka. 15 Pvüti jina hoji khi thanpheni ekachi evüng ji erüpi si kvüri ji thanphen poni na runguka. Woro ji ejen jo thanphensa ji tssae zani sithukvüka. 16 Ombona jakje ji tona jilo jüwo jiang to thanphen jina engkhfüwoe mibuk siphen jiwoe sivka. 17 Ombona echo jiang lona rhümasi otsük ji thanrhüpvü, echo jiang nrüngchona, osi totona thanphen ponina rungu. Etsoyu than shi rhüm jina OPVÜI emathathukvü.
Otssuk Omüm Than
1 Kyon ochona otssuk omüm than piasana ombona ovüngtssoa cheni ohüm kümthukdemka. Hojito olive thyujü tona orhüm mozhü to thei 2 bensi Aaron wopan pvüti jiang thüngi hansi rovka. Shendung pvüti jina ohüm ezüma, thyujü ji tona orhüm ji to bensi OPVÜI thancho to chekathukvü thanphen ponina rungu ka. Osi etsoyu than shi rhüm jina OPVÜI emathathukuka. 3 Jilo enhyoe lio than jijo pvüti ji echi tssovka, osi hoji jo OPVÜI thancho lona khicheo ji tsükona elümoto ntho tssovka. 4 Othan ji hümri rüngpheni na rüngcho hümri tssona ebung mozhü n thena rüngcho tssovka. Hoji jo olive thyujü theta hümri echiv rüngcho tssovka mekana olive thyujü esephi ehüngcho tae lia tssovka. 5 Othan ji ngheriphfü lona rüngcho hümri tssona ebung mozhü n thena olive thyujü lona rüngcho tssovka. 6 Nina hoji thanpheni hansi woana mpvüroe hoji lo thyujü tara phyangkae thamvüka. 7 Othan ji rungphen teriv lona rüngcho tssona ohüm tona olive thyujü tona rüngcho tssovka. 8 OPVÜI than tssoa hoji nina bensi oro pvüti ji pia tona ombona thanpheni hansi wovka. 9 Hoji jo OPVÜI thancho to chekav tssoa pvüti jina kyochia thanphen jilona rungüvka. Etsoyu than shi rhüm jina OPVÜI emathathukuka. 10 Hojilo enhyo than jijo pvüti jiang echi tssovka osi hoji jo OPVÜI than jilona khicheo jina elümoto ntho tssovka. 11 Nina otssuk omüm khi OPVÜI thamo jiang lo kvülo ha ebung mozhü thev meka. Nina OPVÜI thancho etsoyu kvülo ha ebung mozhü tona tssakijü to thev meka. 12 Nzyu akvü nina rakchodemo tsüngonrho ji OPVÜI thüngi othan hansi rovka, tolia jijo thanpheni na rungu meka. 13 Otssuk omüm than akvü lo oma theta ntiotssole oma ji chekav jo Potsow nte yutalo ntsata lio ji. (Ntena othan topvülo oma thev shikhfü.) 14 Ntena tsüngonrho ovüngtso ji kvüthüng OPVÜI thana sana omina ri mekana cheni ohüm kümthuki thana. 15 Hoji lo olive thyujü tona orhüm to theta. 16 Pvüti jina thyujü osi orhüm theo chekaphen than ji tona orhüm topvü to khi etsoyu than tssoa OPVÜI thamvüka.
Khümshümta Than
1 Ochona ombo mangsü yolona khichei khümshümta than piasana obung tssolea okyu tssolea ephyorüv n pao tüv khivka. 2 Kyon jina ekümrümo ji kvüri lo okhe nyimkasi OPVÜI vanrhyu kipüngo na tatsünguka. Aaron wopan pvüti jiang na ejen ji khi thanphen ji nken mezhü ji phyangkasi 3 solan shiang khichei etsoyuthan tssoa OPVÜI pivka: Bukchung jiang lo ethyu topvü, 4 Okhfü jiang tona jianglo ethyu jiang, nthen jilo mmhomtsow ji khichoe thev to tssovka. 5 Erungthan ji ephalo shiang tssotsüi pvüti jiangna thanphen jilona runguvka. Etsoyu than shi rhüm jina OPVÜI emathatala. 6 Khümshümta than tsükona olyu mekana nyanyan khia tssona obung tssolea okyu tssolea ephyorüv n pao tüv khivka. 7 Ochona olyu thanana jina ombo khe ji, 8 Olyu ji kvüri lo nyimkasi OPVÜI vanrhyu ki ji hapo lona tatsünguka. Pvüti jiangna ejen ji khi thanphen ji nken mezhü jianglo phyangchisi 9 solan shiang khichei etsoyuthan tssoa OPVÜI pivka: emhilo ethyu ji chenryu ndüngona tssachov elani bukchung eyuko ethyu jiang topvü, 10 okhfü jiang tona jilo ethyu jiang elani nthen jilo mmhontso ji khiche toli thevka. 11 Shiang hetopvü shendung pvüti jina khi etsoyuthan tssoa thanphen jilona runguvka. 12 Ochonasana nyanyan thana tssona, 13 Ombona ombo khe ji ekümrümo ji kvüri nyimkasi süki ji hapoena tatsüngüvka. Osi pvüti jiangna ejen ji khi thanphen ji nken mezhü jianglo phyangkasi 14 solan shiang khi etsoyuthan tssoa OPVÜI pivka; bukchung jianglo ethyu jiang topvü, 15 okhfü jiang tona jianglo ethyu jiang tona nthen jilo mmhontso ji khiche toli thevka. 16 Pvüti jina shiang topvü khi OPVÜI emathathuko etsoyuthan tssoa thamvüka. Ethyu topvü OPVÜI echi tssovka. 17 Israel kyon ochina ha ethyu osi ejen tsov meka, shikhfü shijo nchünkhon tsükona Israel jiangna kvülo vana na benphia wovka.
N tsiv Tssomhio Mmen Than Jiang
1 OPVÜI na Moses ezoa 2 Israel kyon jiang ji ochona etana na mekana n tsiv OPVÜI shikhfü jiang yolo motsünga tia yesoa sana heto tssovka to ezothukcho. 3 Pvüti tsüpho jina mmen tssoe kyon jiang pono nlan hansi yia tssona, ombona ephyoerüv n pao tssipungro tüv khi ombo mmen tsükona OPVÜI thamka. 4 Ombona tssipungro ji süki ji kipüngo hansi oro ombo khe ji hoji kvürilo nyimkasi OPVÜI vanrhyu lona tatsünguka. 5 Tona pvüti tsüpho jina ejen tara khi süki ji chungi hansi rhowovka. 6 Osi ombona ombo yingro ji ejen jilo tssyuthechisi ejen ji ntho süzonchak jilo yenjo tiying erhikavka. 7 Tosi ombona ejen ejoma ji khi süki chungi rungphen thanphensa nken edyukao jiang lo esevka, Tosi ejen enhyoe elio jijo süki ji kipüngo erungthan thanphen sa ji oküpoe phyangkavka. 8 Ombona tssipung shilona ethyu topvü khichov, bukchung. jianglo ethyu jiang, 9 okhfü jiang osi jiang lo ethyu jiang, tona nthen jilo mmhontso ji to khicho toli thevka. 10 Tosi pvüti jina ethyu shiang khi erungthan thanphen sa jilona runguka. Elani khümshümta than tssoa tatsüngo ekümrüm ji ethyu ji tsütsao ji esüa tsütsavka. 11 Osi ombona ofü ji, oso ji topvü, kvüri ji, ojo jiang, erü jiang osi bukchung topvü, 12 to shiang hansi pikhfü pomoe kvülo mibuk thani sisi ntho vata sana jilona otssüng poni vae runguka. 13 Israel jipo totona n tsiv mmen tssoe OPVÜI shikhfü yesoe nlan li sina, 14 mmen ji ntsitapvüto zakto okho jina tsipung khi mmen than pivka. Ontena tsipung ji OPVÜI vanrhyu ki kibüngo süsi wovka, 15 osi okho esopvüi jiangna onte khe jiang tsipungro ji kvürilo nyimkasi hojilona tatsünguka. 16 Tona pvüti tsüpho jina ejen ejoma khi süki ji chungi hansi rhowo 17 ombo yingro ji ejen jilo jümthechi si zonchaksü jilo yenjo tiying erhikavka. 18 Tothakana ombona orhüm than rungphen osa jilo nken edyukao jianglo thesi enhyo jijo süki ji kipüngo erungthan vaphen ji kupi phyangkavka. 19 Jisülojo ethyu topvü ombona khi thanphen jilona runguvka. 20 Ombona tsipung shiha mmen than lo theo tsipung ji tsütsao ji esüa kyon jiang mmen ji tsükona thamka, tona kyon jiang nlan jiang siyivka. 21 Jisülo jo ombona tsipung ji yantssae hansi chivo ombo mmen than tsipung than rungo ji esüa runguvka. Shijo kyon jiang mmen ji khi siyiv tsükona mmen than pioji. 22 Yansapvüi na n tsiv mmen tssoe OPVÜI yizüng yesao n lan rhüka na, 23 mmen ji ombona ntsipvü zakto nyanyanpung ephyo erüv n pao tüv hansi oro thamka. 24 Ombona ombo khe ji ekümrümo ji kvürilo nyimkasi thanphensa ji jükiwoe erungthan ekümrüm tatsüngphen jilona tatsünguka, Shijo mmen khi esio than. 25 Pvüti jina ekümrüm ji ejen jilo ombo yingro ji jümthechisi thanphen ji nken edyukao jianglo esesi enhyo jijo thanphen ji oküpoe phyangkavka. 26 Tosi ombona khümshümta than ethyu rungo ji esüa ethyu jiang ji topvü thanphen sa jilo na runguvka. Hojitoli pvüti jina yansae ji nlan than ji thamka osi nlan ombo siyiv. 27 Elani kyon shae tsükana n tsiv mmen tssoe, OPVÜI yizüng yesoa nlan rhüka na, 28 ombona mmen ji chekapvüto ombo than tssoa ephyo erüv n pao tüv nyanyan okyuro motsünga pivka. 29 Ombona ombo khe ji nyanyan ji kvürilo nyimkasi thanphen ji jükiwoe erungthan thanphen jilona tatsünguka. 30 Tona pvüti jina ombo yingro ji ejen jilo tssyuthechisi thanphen ji nken jianglo edyukao jianglo nzükasi ejen enhyo jijo thanphen ji oküpoe phyangi sivka. 31 Jisülo jo ombo na ethyu topvü khümshümta than jilona khichoa to khichoe thanphen jilona rungi OPVÜI emathathukukai Hojitoli pvüti jina kyon ji mmen than ji piyivka osi kyon ji nlan siyivka. 32 Kyon tsükana mmen than olyu hansi rona, ephyo erüv n pao okyuro tüv tssovka. 33 Ombona ombo khe ji olyu ji kvürilo nyimkasi thanphen ji jükiwoe erungthan tatsüngphen jilona tatsünguka. 34 Pvüti jina ombo yingro ji ekümrümo ji ejen jilo tssyuthechisi, thanphen ji nken. edyukao jianglo esesi enhyo jijo thanphen ji oküpoe phyangkavka. 35 Jisülo jo ombona ethyu topvü khümshümta than olyu jilona khichoa to khichoe etsoyuthan ji nzo OPVÜI thamka. Hojitoli pvüti jina kyon ji mmen than ji piyivka osi kyon ji nlan siyivka.
Mmen Than Epiv Elio Lanka Jiang
1 Mmen than jo shiang hetüv ndam lo piv ethev lia. Kyon tsüka ji ombona hungwo osi ezo jiang ehungpvüi pilo nzontsü mhadungo tsale ehungpvüi n pia tssona hojina ezüp shicheo ji ombona hamvü. 2 Ochona sana n tsiv n thono evüngkata tssona, ejyukae na echümüng esüa, ombona hoji chethepvü to nlan ombo piv. 3 Ombona kyon lona chiyicho nthono ntiona n tsiv evüngkata tssona, ombona hoji nchümchepvü nlan piv. 4 Ochona sana n tangshom echümchak vata tssona hetüv tsükona tssolea hetüv tsükona tssolea, ombona hoji nchümchepvü nlan ombo piv. 5 Kyon tsüka jina nlan tssona ombona nlan ji phyochakvü shikhfü, 6 osimmen etsso ji echa olyu mekana nyanyan okyu khi OPVÜI thamvü. Kyon ji mmen ji tsükona pvüti jina othan pivka. 7 Kyon tsükana olyu osi nyanyan n pikhuka tssona ombo mmen ji man ombona yukhyu eni mekana vefü eni khi motsünga jina mmen than, motsünga jina erungthan to pivka. 8 Ombona pvüti ji thüngi hansi rona pvüti jina ovüng tssoa mmen than ji pitemka. Ombona woro ji kvüri ji n jakthukna evüng ji jakthuki 9 ejen ejoma khi thanphen ji tssae erhikavka. Osi ejen enhyo jijo thanphen ji küpoe zankae sithukvüka. Shijo mmen khi sithuko than tssovka. 10 Jisülo jo ombona woro enioto ji khi tssolan shikhfü ephani na erungthan tssoa pivka, hojito pvüti jina kyon ji mmen than pivka osi nlan ombo siyivka. 11 Kyon tsükana yukhyu eni mekana vefü eni n pikhuka tssona ombona ohüm chencho seri motsünga hansi oro mmen than pivka. Ombona ohüm jilo olive thyujü osi orhüm ntia thev meka, ntiotssole jijo mmen than, etsoyuthan mek. 12 Ombona pvüti ji thüngi hansi rona topvü OPVÜI thancho to chekav tssoa pvüti jina ohüm ezüma khi etsoyuthan tssoa thanphen jilona rungüv. Shijo mmen khi esio than. 13 Hojitoli pvüti jina kyon ji mmen siyio than piv, tona nlan siyiv. Osi Otssuk omüm than jilo esüa enhyo jijo pvüti ji ejan tssovka.
Lolanta Than Jiang
14 OPVÜI na shikhfü shiang Moses picho. 15 Ochona sana OPVÜI lo nthoa epiv lio jiang n tsiv n pichev sina ombona pilan than olyu mekana nyanyan obung ephyorüv m pao tüv hansi oro thamka. Ekümrümo ji man jo tssenchaki evao ji shikhfü ephanina matangi khivka. 16 Ombona epiv liaha n piv siwo ji ephalo nzoalo mekyu thei pivka. Ombona hoji pvüti ji khelo pina pvüti jina eküm rümo ji khi kyon jiang mmen thanpiyivka, tona kyon ji nlan siyivka. 17 Ochona sana n tsiv OPVÜI yizüng motsünga tia yesona ombo nlan lia osi hoji man echa piv lia. 18 Ombona lolan than tssoa olyu mekana nyanyan ephyorüv n pao tüv thamka. Ekümrümo ji than jo tssenchaki evao ji ephan matangi khivka. Pvüti jina kyon ji mmen than piyivka, tona kyon ji nlan jiang siyivka. 19 Shijo ombona
OPVÃœI tachia mmen tsso ji lolan than.
1 OPVÜI na shikhfü shiang Moses picho. 2 Kvüthüng Israel kyon tsükana Israel thanpoe thüngi tsütsaelan epiv liathüng piya tssen tssolea, efü tsütsaelan tssolea, ejithechi khicho tsütsaelan tssolea 3 moncho tsütsaelan khyoe echüng echüma khilea, hotüv tsütsaelan jiang n pilamo ji yakchia OPVÜI thüngi mmen tssona hoji ntana othan pivka. 4"5 Ochona hotüv mmen tssoana n tsa lona khio tsütsaelan jiang pilamka. Hojito elhia ombo racheo ji tsüngon tsük jilo tsütsaelan ji epen lo nzoalo mekyu ekalani pilamka. 6 Osi ochii elov than nyanyan mekana olyu obung ephyorüv n khyingo tüv khi OPVÜI etham tsükona süsi oro pvüti ji pivka. Osi hoji tssen jo mmen than matangi lio jina ejyui zevka. 7 Pvüti jina kyon ji mmen tsükona othan piyina kyon ji nlan siyivka.
Totona Erungthan
8 Erungthan tsükona Moses na shikhfü shiang 9 Aaron tona ombo tsoeden jiang thüngi pile to OPVÜI na yizüng picho. Erungthan ji thanphen jilo zümo totona ekachi vav osi omi jiha kia vanthukvüka. 10 Tothakana pvüti jina ombo sünyipvü phoktheo ji tona ryuphamo ji to ekasi thanphen jilo rüngtse pyotükvü elio jiang khi thanphen tssae esekae vav. 11 Jitosi ombona osü tongphisi myukyu jiang hansi pikhfü pomoe ntssüngchethako meta jiwoe wovka. 12 Thanphen jilo omi jijo m mhetukna kia vanthuknrüvka. Enyakvü pvüti jina otssüng njükthechiv osi hoji poni erungthan ji ekachi khümshümta than jilo ethyu jiang runguka. 13 Thanphen jilo omi jijo kvüthüngha m mhetukna kia vanthukvüka.
Otssuk Omüm Than Jiang
14 Otssuk omüm thanathüng shikhfü shiang benphivka. Aaron wopan pvüti na otssuk omüm ji khi thanphen ji mhadungo hansi wovka. 15 Jitosi ombona ohüm jilona ezüma khichei thyujü ji tona tssütsse rhüm ji khi toli topvü OPVÜI thancho to chekav tssoa hojilo na runguka. Hoji than ji rhüm jo OPVÜI na chokao rhüm. 16-17 Hojilo enhyo jiango pvüti jiangna tsovka osi enhyo jiang khi ebung mozhü n theo hümri rungi ntho meta, OPVÜI vanrhyu ranki hapho jilona tsotavka. Hojijo OPVÜI na etsoyuthan jilo pvüti jiang ejan tssoa picho. Hojijo mmen than mekana pilanthan esüa elümoto nthoa. 18 Hojijo yuta topvü lo etsoyu na OPVÜI thamo jilo Aaron tsoronichen jiang etsov ejan tssoa wovka. Thanpoe ochona etsoyuthan evüngkata sana hoji ntho ji etho jina tssatssovka. 19 OPVÜI na shikhfü shiang Moses picho, 20 Aaron wopan pvüti elhilo nthochakathüng tssolan phyolan jiango heto tssovka. Ombo nthochako ji tsüngono ombona ohüm seri motsünga (engakvü otssuk omüm than pio tata) ji enyathüng chiso mmyu chiso to OPVÜI thamvüka. 21 Hojilo thyujü nzüi erüngphfü lona rüngi hoji mpvüroe OPVÜI emathao rhüm tssoa thamka. 22 Echungren topvülo Aaron wopan ochona pvüti tsüphoe tssoasana heto thana wovka. OPVÜI than tssothuka totona runguka. 23 Otssuk omüm than pvüti na thamo jilo jo ntia khichei tsov meka, tolea totona rungkhamka.
Mmen Than Jiang
24 Mmen than tsükona shikhfü shiang: 25 OPVÜI na Aaron tona ombo tsoe jiang to ezole to Moses thüngi yitan picho. Mmen than ekümrüm ji khi thanphen ji jükiwoe erungthan tatsüngphen jilona tatsüngüvka. Shijo elümoto ntho than. 26 Othan epio pvüti jina OPVÜI vanrhyu ranki ji hapho lo ntho meta jilona tsovka. 27 Hoji ekümrümo so jina kyon ocho osi nrio tsütsaelan evüngkata sana ombo ntho etho jina tssatssov. Tsütsaelan osi mpensü kvümoe hoji ejen jina tümkata sana ntho meta lona etssüi sivka. 28 Chonphfü lona oso ji ekvücho tssona ophfü ji varhüpi sivka osi yonjak phfü lona ekvücho tssona shuki sisi ojü na evakphi sivka. 29 Pvüti wopan eboe thama na shi tsocheta; shijo elümoto ntho. 30 Tokhatola ranki jilo ejen hansi rhowo mmen epyo elhi tssocho tssona ekümrümo ji n tsov shikhfü; hojijo mpüm na rungi thanchev.
Lolan Than Jiang
1 Lolan than tsükona shikhfü heto lia, 2 Othan shilo ekümrümo jijo thanphen ji jükiwoe erungthan tatsüngphen jilona tatsünguka osi ejen ji khi thanphensa ji nken mezhülo phyangkavka. 3 Ethyu jiang topvü khichei thanphensae na thamvüka; emhi jilo ethyu ji, bukchung eyuko ethyu jiang, 4 okhfü jiang tona hojiang eyuko ethyu jiang, tona nthen jilo mmhontso ji to, 5 Pvüti jina ethyu shiang topvü khi etsoyu than tssoa OPVÜI tamvüka. Shijo jo lolan than tssov. 6 Hoji so jijo pvüti wopan eboetso topvü na tsokhuka, tolea ntho meta lona tae tsochev, ntiotssole shijo elümoto ntho. 7 Mmen than tona lolan than tolo tsütsao shikhfü motsünga heto lia; jijo oso ji ochona thana sana hoji pvüti ji echhi tssov. 8 Erungthan lo theo ekümrüm ji ofü jiha thanio pvüti ji ejan tssovka. 9 Otssuk omüm than rungphen lona tssolea, ophfü lona rüng cho tssolea mekana nghriphfü lona tssolea jiang topvü pvüti ocho na thanicho sana ji echhi tssovka. 10 Tokhatola omi poni na n rünghamu otssuk omüm than enhyoe elio jiango Aaron pvüti wopan jiang na kheti jantae khivka.
Khümshümta Than
11 Khümshümta than OPVÜI piathüng shikhfü jo heto lia. 12 Kyon tsükana montsso than tssoa othan Potsow pina ombona oso ji ephalo ebung mozhü n theo hümri, ohüm lo olive thyujü theta rüngcho tssolea, hümri porov olive thyujü eseta rüngcho tssolea to. 13 Hoji ephalo ombona vümhi n theo hümri ha thamvüka. 14 Ombona echümporo ekhya tssoa hümrilan akvü lona echhia khichei OPVÜI thamvüka; hoji ekhya jijo pvüti ochona ejen ji khi nken mezhü jianglo phyangkacho sana ji echhi tssovka. 15 Othan tssovo ekümrümo jijo thamo ji tsüngono na tsoe sivka, ntia enhyoe ojyuato jana vav meka. 16 Kyon tsükana phyochak than lo tssolea erung than lo tssolea benthoku tsükona khümshümta than hansi rona hoji topvüto hoji tsüngono na tsorale to mek, enhyo jiango ojyuato tsokhuka. 17 Tolea rajyu to jana elio so jiang topvü khi rungi sivka. 18 Hojilo enhyo ji rajyuto ti tsoana hoji Potsow na n khichoyi. Elani othan ji ombo thüngoe khakae n vayi osi hoji jo n tho to khanhyav, osi ochona hoji tsoana hoji man ji ombona ezüp hunguka; 19 Oso jina n thono tsütsailan lo evüngkathaka na, hoji jo n tsov shikhfü, tolea totona rungi sivka. Etsükria ntsüngrünga evamo jiang na jo oso ji tsokhuka, 20 tokhatola n sarisapvüo tüv kyon na oso ji tsocho jo; ombo ji Potsow kyon to n khanhyav siv. 21 Elani ochona na sana n thono ekümrümo tssolea, kyon tssolea evüngkasi oso ji tsocho jo, hoji kyomo jijo potsow kyon to n khanhyav sivka. 22 Israel kyon jiang tsükona, 23 Potsow na shikhfü shiang Moses picho, Mangsü, olyu osi nyanyan shiang ethyu jiang tsov meka. 24 Ekümrümo kirana chücho mekana orae ekümrümo na rümcho jiang ethyu jo tsov meka tolea thanpo ethelan lojo tsütsakhuka. 25 Kyon ochona OPVÜI etsoyu thanlo theo ekümrümo ethyu jiang tsoa sana jijo Potsow kyon lo khanhyav meka. 26 Israel jiang na helo vanlea helo vanlea ontena kvüthüngha ekümrümo osi woro ejen jiang tsov meka. 27 Shikhfü shi yeso kyon jijo Potsow kyon to khanhyav meka. 28 OPVÜI na shikhfü shiang ji 29 Israel kyon jiang tsükona Moses picho. Ochona khümshümta than picho sana hojilo tara khakchei echümporo than tssoa OPVÜI pivka; 30 osi hoji ombo khena bensi oro etsoyu than tssoa OPVÜI pivka. 31 Tona ethyu ji pvüti jina thanphensa jilo na rungu osi enhyo jijo pvüti jiang ejan tssovka. 32 pvüti ochona ethyu tona ejen to khi khümshümta than piyia sana, 33 ekümrümo ji ojo hamimo ji khi echümporo hanyan tssoa khivka. 34 Osi ekümrümo ji shyuro jijo echümporo yantso osi ojo hamimo jijo echümporo hanyan to tssoa OPVÜI na Israel kyon jiang thüngi na khichei pvüti jiang picho. Shi jo Israel kyon jiang na yuta topvülo pvüti jiang echümporo yantso esüa pia wovka. 35 Shijo OPVÜI thamo ekümrüm jilo khichei Aaron tona ombo tsoeden to jiang pvüti elhilo onte nthochaka thüng onte pio ji. 36 Hoji tsüngon no OPVÜI na hojito khichei onte pile to kyon jiang ezocho. yizüng shijo Israel jiang na yuta topvülo benphia ewov picho. 37 Shiang hetopvü ji erung than, otssuk omüm than, mmen than, pilan than, nthochak than osi khümshümta than to tsükona shikhfü methako jiang. 38 Shiang hetopvüto OPVÜI na lijüng metae Sinai phunglanina Israel jiang othan epi tsükona Moses ezoathüng shikhfü picho tae.
Aaron Tona Ombo Tsoe Jiang to Nthochak Tsükona
1 OPVÜI na Moses ezocho, 2 "Aaron tona ombo tsoe jiang to sosi a vanrhyu ranki kibüng jilo woa osi pvüti mpensü jiang, nzüyiphen thyujü ji, mmen than tsükona na tssibungro ji, olyu obung eni, vümhi n theo hümri luksa ji to hansi woa. 3 Tothakana kyon kholuk jiangha hojilo tsarhyua." 4 OPVÜI na ezoji esüa Moses na tssocho osi kyon jiang sanrhyuthakale ombona onte ezocho, 5 "Enhünga ana ntio tssov sa sana jijo OPVÜI na a ezovo ji ephan tsovka" 6 Moses na Aaron tona ombo tsoe jiang to sosi chiyi shikhfü ephan tsükav ezocho. 7 Ombona phukthesü ji tona phuknrhüo ji, ryukhüng ji to Aaron ekathukcho. Ombona epvü eyuksü jiha khi Aaron ekathuksi hojilo ryukhüng enyipvü khi jina eryu chüngchünga khüngicho. 8 Elani ombona tekikhüp ji khi ekathuksi phyalyu zephen jiha jilo khümkayicho. 9 Jitosi OPVÜI na yizüng pio ji ephan kvüri ekhüng ji ekathuksi jilo ntho khochak chekaphen shona oyuk-osen jiangji mhadungoe khümkayicho. 10 Jisülo jo Moses na nzüphen thyujü ji khi OPVÜI vanrhyu ranki süki jilo osi ji chungi ntio kvüta liana topvütolo nzücho osi ombona hojitolui tOPVÜI ji OPVÜI lo khochaki vacho. 11 Ombona thyujü tara khi thanphen sa jilo osi jilo etheo tsütsailan jiang topvülo tona jüpvü jilo osi hoji küpo to yenjo tiying erhikata topvü ji OPVÜI lo khochaki vacho. 12 Ombona thyujü tara khi Aaron kvürilo phyangkayia nthochecho. 13 Jisülo jo Moses na Aaron tsoe jiang ha mahdungi sosi oyi OPVÜI yizüng ephanina onte topvü phukthesü ekathuksi, eryu khüngisi onte kvürilo kikho venthukcho. 14 Jisülo jo Moses na mmen than tsükona tssibung ji süsi yicho osi Aaron tona ombo tsoeden to jiang na onte khe ji ekümrümo ji kvürilo lo nyimkaracho. 15 Tole Moses na thanphen sa ji nthochev tsükona ekümrüm ji tatsüngi ejen jilo omb yingro tssyuthechi jina thanphen ji tssae edyuka jianglo esecho. Jisülo jo ejen enhyo ji ombona thanphen ji küpoe phyangkacho. Hojitoli ombona thanphen ji ntssüngcheta nthochecho. 16 Moses na bukchungi ethyu jiang topvü khicheracho, elani nthen mmhontso ji, okhfü jiang tona jilo ethyu eyuk jiang: to khiche thanpheni na rüngcho. 17 Ombona mangsü ji so enhyoe elio ji, ofü, oso, erü to jiang khi OPVÜI na phyo ji esüa vanphen hapowoena rüngcho. 18 Jisülo jo Moses na olyu bung ji sosi yile Aaron tona ombo tsoeden to jiang na onte khe jiang hoji kvürilo nyimkaracho. 19 Jisülo jo Moses na hoji lüngthae ejen ji khi thanphen sa nken mezhü jianglo phyangkacho. 20-21 Tosi ombona olyubung ji rhonrocho osi bukchung jiang tona ojo sülamo jiang to etssüi, OPVÜI na ezoji esüa, kvüri ji, ethyu jiang khi toli mpüm totona thanphen sa jilo na rüngcho. Othan shijo etsoyu than tssoa picho osi etsoyurhüm jina OPVÜI emathathukcho. 22 Jisüi jo Moses na pvüti nthochaklo thanphen tsükona olyubung enioto süsi yilancho. Osi Aaron tona ombo tsoeden to jiangna onte khe jiang olyu bung ji kvürilo nyimkatacho. 23 Tole Moses na hoji tatsüngo ejen ji khi okhe hamimoe yingpvü jilo, ojo hamimoe yingpvü jilo to ejen esecho. 24 Jisü lojo ombona Aaron tsoe jiang sosi oyi onte nomüng jiang lo tona onte hamimoe yingpvü jianglo tona ojo hamimoe yingpvü jiang lo to ejen eseyicho. Jisülo jo ejen enhyo ji khi Moses na thanphen nken mezhü jianglo phyangkacho. 25 Ombona ethyu jiang, emhilo ethyu jiang, bukchunglo ethyu jiang, nthen jilo mmhontso ji, nna okhfü jiang to elani jilo ethyu jiang tona ojo sülamo amimo ji to khichecho. 26 Jisülo jo ombona vümhi n theo hümri luksa lo thei OPVÜI lo khochaki evao jilona hümri motsünga khichei, thyujü theta rüngcho hümri motsünga khiche, hümriro motsünga khichelan toli jiang ji ethyu ji tona ojo sülamo ji to poni ekachicho. 27 Ombona etsoyu shi heto benri Aaron tona ombo tsoeden to jiang pia OPVÜI thüngi echümporo than tssoa pithukcho. 28 Tole Moses na etsoyu ji khichoe nthochak than tssoa erungthan ji poni ekachi thanphen sa jilona rüngcho. Shijo etsoyuthan osi orhüm jina OPVÜI emathacho. 29 Tole Moses na shyuro so ji khichoe echümporo than tssoa OPVÜI picho. Hoji jo nthochak than lo etheo olyu bung jilo Moses ejan ji. Moses na shiang hetopvü OPVÜI yizüng ephan tssocho. 30 Moses na nzüphen thyujü tara thanphen ejen jilo tara to khichei Aaron tona ombo tsoe jiang to erhikacho. Osi onte mpensü jianglo ha erhikayicho. Hoji toli ombona onte osi onte mpensü jiang OPVÜI lo nthochaki vanthukcho. 31 Moses na Aaron tona ombo tsoe jiang to ezocho, "Oso ji hansi OPVÜI vanrhyu ranki kipüng jilona owo ekvüi OPVÜI na yizüng epio ji ephani na nthochak than loksa jilo jüwo hümri jiang nzo tsotava. 32 Oso tssolea, hümri tssolea enhyo jiango rungi sia. 33 Nte nthochak elhi jiang n thakthüng jo ntena OPVÜI vanrhyu ranki kipüng jilo tsüngon tiying vamka. 34 Nchüng etena tssothako shiangjo nte mmen khi nte siyiv tsükona OPVÜI na phyo ji ephan tssotacho. 35 OPVÜI na phyo jiang ephan ntena OPVÜI vanrhyu kipüngo zümo eng tsüngon tiying vamka. Hoji to n tssona nte chüvka. Shijo OPVÜI yizüng ephan." 36 Tole Aaron ha ombo tsoeden to jiangna OPVÜI na Moses yakchia yizüng pio ji ephan tssotacho.
Aaron na Othan Piala
1 Nthochak elhi jiang thaksi ojyuato jo Moses na Aaron, ombo tsoe jiang tona Israel esopvüiden jiang to tsachukcho. 2 Ombona Aaron ezocho, "Tssibungro motsünga tona olyu motsünga to ome n khyingo tüv khi tssibungro jijo mmen than tsso, nna olyu jo erungthan to tssoa OPVÜI thana. 3 Jitosi Israel jiang ezoa heto thanthuka, mmen than tsükona nyanyan bung motsünga, mangsüro nzyuatso tüv motsünga, olyu nzyuatso tüv motsünga ome n khyingo tüv motsünga tojo erung than tssothuk, 4 Tssibung motsünga tona olyu motsünga tojo khümshümta than khümshümta than to tssoa thanthuka. Shiang topvü otssuk omüm than jilo tssotsüi thyujü nzükae OPVÜI thamka. OPVÜI na nchüng onte thüngi rov sala jitsükona ontena shiang etssov lia." 5 Moses na ezo jiang topvü ontena hansi OPVÜI vanrhyu ranki ji hapoe rocho, osi kyon topvüna OPVÜI khümvü tsükona jilo sanrhyucho. 6 Moses na ezocho, "OPVÜI na shiang hetopvü etssov nte ezo jijo ombo vanrhyu phfütsson wondang ji nte hungthukvü tsükona." 7 Tosi ombona Aaron ezocho, "Ni mmen osi kyon jiang mmen jiang khi esiv tsükona thanpheni owo mmen than tona erungthan to pia. OPVÜI na phyo ji esüa kyon jiang mmen jiang khi siyithukvü tsükona othan shi pia." 8 Aaron na thanpheni na owo ombo mmen than tssibung ji tatsüngcho. 9 Ombo tsoe jiangna ejen ji hansi yile ombona jilo yingro ji tsyuthechisi thanphen jilo otssae edyukao jianglo tara esesi enhyo jijo thanphen ji kupi phyangkacho. 10 Jitosi ombona thanphen ponina ethyu ji okhfü jiang nthen jilo mmhotso ji to khichei OPVÜI na phyo ji esüa rungi thancho. 11 Tokhatola ofü ji tona oso ji tojo ombona yantssae na rüngcho. 12 Ombona ombo erungthan ekümrümo ji lüngthacho osi ombo tsoe jiangna ejen ji hansi yile ombona thanphen sa ji nken mezhü jianglo phyangkacho. 13 Ontena kvüri jiang tona solan thanpo jiang to ombo pile ombona thanphen ponina rungi thancho. 14 Jisüi jo ombona bukchung jiang tona ojo sülamoe jiang to etssüi erung than ejoma jiang poni ekachi rüngcho. 15 Hoji sülojo ombona kyon jiang than jiang piyicho osi ombona ombo tsükona thamo ji esüa nyanyan ji khi lüngthae kyon jiang mmen than picho. 16 Ombona erung than ekümrümo jiha han si oyi shikhfü ephani na thancho. 17 Ombona otssuk omüm than ji khi ohüm tara yachei thanphen ponina rüngcho. (Shijo engakvü than ji ephalo thancho.) 18 Ombona kyon jiang khümshümta than tssoa mangsü bung ji tona olyu jito lüngthacho. Ombo tsoe jiangna ejen ji oyi ombo pile ombona thanphen ji nken mezhü topvülo erhikacho. 19 Aaron na mangsü pung ji tona olyu ji to ethyu jiang shyuro jiang 20 poni ekachi thanpheni hansi wocho. Ombona ethyu ji thanpheni na rüngcho. 21 Osi Moses na phyoji esüa shyuro jiang tona ojo hamimoe sülamoe jiang to echümporo tssoa OPVÜI picho. 22 Aaron na othan topvü methaksi ombo khe jiang kyon jiang pono rükachi onte mmhayithuksi khichocho. 23 Moses ha Aaron onina OPVÜI vanrhyu ranki rhowosi chiyi kyon jiang mmha randankayithakale OPVÜI vanrhyu phfütsson wondang ji kyon jiangna hungcho. 24 Jitopvü OPVÜI na omi rothukcho, osi hojina erungthan ji tona ethyu jiang to rungkhancho. Kyon jiangna hoji hungale topvüna tüngkachia onte mha nkhümtheracho.
Nadab Tona Abihu to Mmen Ji
1 Aaron tsoeden Nadab ha Abihu onina mironphfü ji bentasi jilo miron thei, tssütsse rhüm thei toli OPVÜI thancho. Tokhatola hoji jo. ntho mekcho ntiotssole hoji thanle to OPVÜI na onte n zohancho. 2 Jitopvü Potsüwoe na omi joroe OPVÜI mhadungo na rungtsüngi oni sicho. 3 Tole Moses na Aaron ezocho, "Heto etssov shi OPVÜI na heto phyoe vacho, 'A benkae topvüna a ntho ji yikrachivka; Ana a phfütsson ji kyon jiang hungthukvüka.'" Tokhatola Aaron na yingto vani sicho. 4 Jisülo jo Moses na Aaron oporo Uzziel tsoeden Mishael tona Elzaphan oni tsae ezocho, "Oro ni jenio shiang müng jiang ntho ranki jilona ejümi vanphen pomoe chiwo sitava." 5 Tole Moses na ezoji esüa ontena owo echümüng jiang osü lona ejümtasi vanphen pomoe chiwo sitacho. 6 Tole Moses na Aaron tona ombo tsoeden Eleazar ha Ethamar oni thüngi ezocho, "Ntena nungrala to n tsithukvü ji nte tssan jiang n khev osi osü jiang reroa to ti tssotava. Ntena hojito tssochojo nte chüvka osi OPVÜI na okho topvü poni lüm tsukvüka. Tokhatola Israel shilo okho kyon topvüna nchüng OPVÜI na omi rothuki rungtsüng thuko jiang tsükona nungratava. 7 Nteno OPVÜI thyujü na nte nzüyithako jina ntena ranki kipüng shi yaki ti wotava, to tssochojo nte chüvka." Tole ontena Moses na ezo ji esüa tssotacho.
Pvüti Jiang Tsükona Shikhfü
8 OPVÜI na Aaron ezocho, 9 "Ni osi ni tsoeden jiangna soko yusi a vanrhyu ranki rhorov meka; ntena hoto lyuchojo nte chüvka. Shiji nte tsoronichen topvüna tsütsao shikhfü tssovka. 10 Ntena ntiojo nzontsüna tsütsao, ntiojo Potsow echi to sana khota lithukvü shikhfü, ntiojo shikhfü na nthothuk, ntiojo ntho to sana khotathukvü. 11 Ana Moses ezoa yizüng nte pio jiang topvü nina Israel kyon jiang püngnovka." 12 Moses na Aaron tona ombo tsoe otsük eni enhyoe vamo jiang, Eleazar tona Ithamar to ezocho, "OPVÜI thamo etsoyu jilona enhyoe otssuk omüm than ji khi hojina vümhi n theo hümri rüngi thanphensa ji tssae na tsotava, ntiotssole othan shijo elümoto nthoa. 13 Hoji khi ntho meta jilona tsoa; ntiotssole hoji jo OPVÜI thamo jilona khicheo, ni osi ni tsoe jiang ejan ji OPVÜI na hojito yizüng a picho. 14 Tokhatola pvüti jiang ejan echümporo yantso osi ekhya tssoa OPVÜI thamo ekümrümo ji shyuro osi ojo hamimo sülamoe jiang toha ni osi ni wopan na tsokuka. Ntena hojiang khi ntho meta thama lona tsokhokka. Othan shiango Israel jiangna khümshümta than pio jilona ni osi ni tsoeden jiang ejan khichecho. 15 Ontena ethyu ji etsoyu than OPVÜI thamo ji yuta jilo shyuro ji tona ojo hamimoe sülamoe jiang to hansi yivka. Shijo OPVÜI na phyo ji esüa nchünkhon ni osi ni wopan ejan tssoa wovka." 16 Moses na mmen than nyanyan ji ethümle rungthaka to zocho. Tole hojina ombo lüm tsuki Eleazar tona Ithamar to oni engacho, 17 "Ntena ntio tsükona mmen than ji ntho metae na n tsotachola? Hoji jo elümoto nthoa osi OPVÜI na okho topvü mmen khi siyiv tsükona nte picho. 18 Hoji ejen ji ntho ranki hansi n rheyi küma oso jijo jilona tsov shikhfü, ana nte ezo ji ephan." 19 Tole Aaron na janlancho, "Ana mmen than ji nchüng tsovo, OPVÜI na hoji khekhichov la? Zeta nchüng kyon jiangna onte mmen than jiang OPVÜI pithaka, osi erungthan jiangha hansi rothaka, toaha hetüv ezüp ejan thaka." 20 Moses na hoji zoale lümbüm pükcho.
Etsowo Ekümrümo Jiang
1 Israel kyon jiang tsükona OPVÜI na shikhfü shiang 2 Moses ha Aaron oni picho. Limha lo vancho ekümrümo 3 Jonkhfü ekhyingo osi nkhichi njaklamo jiang topvü ntena tsokhuka,4"6khatola odh, mekana lishüso osi lishüso terio jiang tojo ti tsotava. Hojiango n ntho ntiotssole onteno nkhichi tssoa khatola jonkhfü n khying. 7 Woko ha ti tsotava, onteno jonkhfü khyinga khatola njaktse n tssoala. 8 Shiang hetopvü n tssüngrüng ekümrümo tae, hoji tsükona ti tsotava osi hotüv echü ha ti evüngkata. 9 Ntena ngolüp osi chokon nokori ekhyingo ngo jiang tsotava, 10 tokhatola ojüi evan kvümoe na chokon nokon osi ngolüp n khyinga sana jiango ti tsotava. 11 Hotüv ekümrüm jo n tho. Ntena hojiang ti tsotava osi echü jiang ha ti vüngkatava. 12 Ojüi evamo kvüwoe na olüp osi choko nokon n khyinga sana jiango ntena tsov meka. 13-19 Ntena hetüv woro shiang ha ti tsotava: nhyavam, velungu, müngshitsü, müngshiro, kyorhü, Müngtsov, kyashak, josi-woro, jümang-woro, jü-woro, nhyayoworo, jütssa-woro, ngotso-woro, tona sosiro to. 20 Tsuki eyio jiang yaka jo, 21 echo ekhyingo ora oben topvü n tho. 22 Ntena khomung, shüngrü osi shilungu to jiango tsokhuka. 23 Tokhatola thanpo ora oben kvümoe na echo khyinga osi epvüa sana jiango n tho to khanhyala. 24-28 Ochoangna ekümrümo shiang echü evüngkata sana jiango mmyu nandang n tho to khayiv: jonkhfü ekhyingo topvü, jonkhfü shümrosi nkhichi etsoe yaka jo sariv, elani ojo mezhü mpao ekümrümo jiang topvü yolo jompho khyingo jiang to. Hetüv ekümrümo chücho ochona hansi woa sana ombo sü jiang etsüi siv tolea mmyu jana ombo sariv. 29-30 Lipvüso, zhüro, zütssünaro osi süngrüm to jiango n tho to khanhya. 31 Hojiang evüngkae osi hotüv echü jiang evüngkae jo mmyu jana n tho. 32 Hotüv echüna ntio tsütsaelan lo evüngkata sana jiangha n tho. Hotüv tsütsaelan otssüng, osu, sofü, sükvü shiang hetüv lo tssüthelea, thechi lea n tho kümvü. Hotüv jiango ojüi jümthechiv tolea mmyu nandang n tho to vamvü. 33 Hotüv echü chonphfü lo elungtheta tssona jilo ntio jüana topvü n tho kümvü osi ophfü ji varoe siv shikhfü. 34 Potsow etsoyulan kvümoe ojü ji hotüv n tho phfü lona khi yencho sana n tho kümvü osi hotüv phfülo ojü eyuv vao jiha n tho. 35 Ntio tsütsaelan lo echü na evüngkata sana n tho kümvü, ochon mijen osi tssoyanphen jiang ha roe sithuka; 36 tokhatola jünhyo osi jüpvü jiango nthoa tae vamvü, thanpoe tsütsaelan jiang ji echü na evüngkata na sarita lea. 37 Mojü mono eyingu vacho tüv lo echü evüngkacho ha ntia n tsso. 38 Tokhatola mojü ji ojüi jümi vacho tüv lo echü elungkachojo n tho kümvü. 39 Etso ekümrümo chücho tüv ochona evüngkata sana mmyu nandang sariv. 40 Osi ochona sana hoji ekümrümo ji so tsona ombona ombo mpensü jiang etssüi siv tolea mmyu jana n tho to ombo sariv, ochona echü ji hanphia sana jina ha mpensü jiang etssüv, tolea mmyu jana ombo sariv. 41 Ntena likoe epvüphio ekümrümo terio jiang ntia ti tsoa, 42 epvüphio jiang tssolea, ojo mezhüna sanphio jiang tssolea mekana ojo khosha mpao tssolea, 43 shiang hetüv tsoe khi n tho ti kümtava. 44 Aiyo OPVÜI nte Potsow ji osi ana ntho ji esüa nteha nthoa vam shikhfü. 45Aiyo OPVÜI nte Potsow, Nte Potsow etssov tsükona Ejip metae na nte socheo ji. Ana ntho ji esüa nteha nthov shikhfü. 46 Tona oro, ojüi osi limhae evamo ekümrümo to jiang tsükona shikhfü ji shiang. 47 Ntena ntiojo shikhfü ephan ntssüng, ntio jo n tssüng to sana khotachev shikhfü, elani etso tona n tso to eküm rümo jiangha khotav shikhfü.
Tsobuknibuk Sülo Eloe Nthoche Elhi
1 Israel jiang tsükona OPVÜI na shikhfü shiang Moses picho 2 Eloe tsükana tsokhying buksi tsüngon tiying nandang jo ompvü ji shikhfü ephani na n tho tssothukala, ompvü choro mmen eyi yuta lo esüa. 3 Osi tsüngon tizao tolo ngaro ji tsenia mvüchuku. 4 Jisülo ompvü ejen yio jilona n thochethüng tsüngon thümrosi ethüm jo n tho to vamvü. Ompvü nthoche yuta ji m pem jo ompvüna ntho tsütsaelan evüngkav meka osi ntho süranki jiloha rhowov meka. 5 Eloe na tsolo buksi tsüngon taro mezhü jo n tho tssoa vamvü, ompvü choro mmen eyi yutalo esüa. Jisülo ompvü ji tsüngon rukrosi tiruk süloti ejen yio jilona nthochev. 6 Tsokhying tssolea tsolo tssolea ompvü nthoche elhilan ji benrithakana ompvüna OPVÜI vanrhyu ranki ji kipüngo evamo pvüti ji thüngi olyu nzyuatso tüv erungthan tsükona tona vefü mekana yukhyu motsünga to mmen than tsükona hansi oro pivka. 7 Pvüti jina OPVÜI mhadungo hansi osi ompvü n thono ji khi siyiv tsükona thaniv tona ompvü nthochev. Shi heto shijo eloe na tsobuk nibukcho sülo benphivka. 8 Eloe jina olyuro n pikhuka tssona ompvüna vefü eni mekana yukhyu eni, motsünga jo mmen than motsünga jo erungthan to tssov tsükona thev, tona pvüti jina elhilan tssoe n thono ji khi siyia ompvü nthochev.
Ratsü Enoe Tsükona Shikhfü
1 OPVÜI na Moses ha Aaron oni thüngi shikhfü shiang picho. 2 Kyon ocho sana ofü lo emho, vela mekana runga eno tüv osi hoji na rathia eyio tüv ofü nochonori khyingna Aaron pvüti wopan thüngi sosi owo zethuka. 3 Pvüti jina zesi ombo emho jilo otssan jiang emhüma osi okhfü ji jungcho tssona ratsü eno to pvüti jina phyov, osi kyon ji saritavka. 4 Tokhatola emho jiang osi jilo otssan jiang n hüma tssona kyon ji pvüti jina tsüngon tiying echümpo vanthoki zev. 5 Tsüngon tiyingto jilo pvüti jina ombo zelan si emho ji rankata n yiv vanphen ji to tae tssona elani tsüngon tiying echümpo vanthuklam ka. 6 Tsüngon tiyingo to jilo pvüti jina ombo zelan si emho ji pozhüa yia tssona hoji jo emho sha tsso jina kyon ji ntssünga to phyochev. Kyon jina ombo sü jiang etssüi sithaka na ntssüngchethaka. 7 Tokhatola pvüti jina ntssünga to phyocho sülo emho ji rankata yia tssona ombona elani pvüti ji owo zethukalam. 8 Tona pvüti jina zesi emho ji rankacho tssona ratsü eno tsso jina ombo ji n tssüng to phyoyiv. 9 Kyon ocho sana ratsü khyingna ombona pvüti thüngi oro zethokvü. 10 Emho ji ehüma osi hojilo otssan jiang ehüm na osi emho ji jencho tssona 11 jilo ratsü eno ji mhoran tssothakcho tssov. 12 hojito chancheta ntsiwo jiango echümpo vanthuki ezev ethev n lio jina pvüti jian zesi n tho to phyoyiv. Ratsü eno na kyon ocho kvüri na ojo jana khyinga sana ombo zeyilam, 13 osi enov jina otsük eyukzhüthaka na enhungo ekyuv n li pvüti jina kyon ji ntssünga to phyoyiv. Osi ombo fü topvü ehümtsüthakcho tssona kyon ji ntssüng chethaka to phyoyiv. 14 Tokhatola chancheta emho khyinga tssona n tho to sariv. 15 Pvüti jina ombo zeyilansi emho ji opon tssoa khyinga tssona n tho to ombona phyoyiv. Opon tssoa emho khyingo jijo ratsü eno tssov, hoji tsükona n tho kyon tssov. 16 Tokhatola emho ji poe ehüm ma küma na ombona pvüti ji thüngi elani wolam, 17 tona pvüti jina ombo zeyilam. Emho ji ehüm thakna ombo ji ntssüngthaka to pvüti jina phyoyiv. 18 Kyon ochona sana velasi pothaka ha 19 sülani hojilo ehüma pumkana mekana okhfü jilo rakiv tona ehüm to khyingna ombona pvüti ji thüngi owo ejüv. 20 Pvüti jina ombo zeyisi okhfü ji nkonphia jianglo na jungka na osi hojilo otssa jiang ehüma tssona ombo ji n tho to pvüti jina phyoyiv. Ntiotssole vela khfühen jilo ratsü eno sothethakcho tssov. 21 Tokhatola pvüti jina zele okhfü jilo otssan jiang ehüma n kümvü, osi okhfü ji nkonjan jianglo n jungka khatola okhfü ji evona zechena pvüti jina tsüngon tiying omboti vathuki zev. 22 Okhfü ji nzüa yia tssona ombo ji nochonori khyingo jina pvüti jina n tho to phyoyiv. 23 Tokhatola okhfü ji n rankav vanphen ji tae vana tssona mhorak tae tsso jina pvüti jina ntssünga to ombo phyoyiv. 24 Kyon ocho sana omina rungchile okhfü ji ehüma osi rakina, 25 pvüti jina ombo zeyiv. Okhfü jilo otssan jiang ehüma osi nkonjan jiang lona jungkata tssona omi khü jilona ratsü eno benkathakcho tssov. Hoji tsükona pvüti jina n tssüng to phyoyiv. 26 Tokhatola otssa ji n hüm elani okhfü ji nkonjan jianglo na n jungka to tssolea okhfü ji evona to tssona pvüti jina tsüngon tiying echümporo ombo vanthoku. 27 Pvüti jian tsüngon tiyingo to jilo ombo zesi emho ji tsükata yia tssona kyon ji n tho to phyoyiv. 28 Tokhatola okfü ji ombo vanphen ji vanpvü tssona osi okhfü ji evonroa to tssona ratsü eno mek. Hoji tsükona pvüti jina nthothaka to ombo phyoyiv, ntiotssole hoji jijo omi khü ji mhorak tae. 29 Eboe tssolea eloe tssolea ocholo kvüri emho osi khoka lo emho khyinga na, 30 pvüti jina zeyiv. Okhfü ji nkonjan jianglo jungkata osi hakhfüa to tssona jijo ratsü eno, hoji tsükona pvüti jina omboji n tho to phyoyiv. 31 Pvüti jina zele okhfü ji n junglea jilo otssan shenthi tüv n khyingcho jo ombo ji tsüngon tiying echümpo vanthoki zev. 32 Pvüti jina tsüngon tiying jilo zeyile emho rankaji rankata n yiv, okhfü ji n jungu osi jilo otssan jiang n hakhfü na, 33 kyon jina okhfü ji rhüa tssüi siv. Osi pvüti jina tsüngon tiying omboti vathuklani zev. 34 Tsüngon tiyingo jilo pvüti jina ombo zeyilam, osi emho ji n rankav osi okhfü ji nkonjan jiang lona n jungka na pvüti jina kyon ji ntho to phyoyiv. Kyon jina ombo mpensü jiang etssüi sithak na ombo ntssüngchethaka 35 Tokhatola ombo ntssünga to phyosana ti emho ji ranka na, 36 pvüti jina ombo zelaniv. Emho ji nzüa yia tssona ombona otssan hakhfüo tüv n hunglea; kyon ji n tssüngcho tssov. 37 Tokhatola emho ji n tsükav osi jilona otssan shunga tssona emho ji pothakcho tssov. Hoji tsükona ombo ntssüngchethaka to pvüti jina phyoyiv. 38 Eboe tssolea eloe tssolea, otsüko ehümu paraka khyingna, 39 pvüti jina ombo zeyiv. Osi okhfü ji mmia ehümcho tssona jijo thama parhüpcho tae tssov; hoji tsükona kyon ji ntssünga. 40-41 Kyon tsüka odoni tssole sikvüwoe tssolea otssan vülea jina n tssüngu kümcho mek. 42 Tolea parhüp ji myonshia ehümrhüp na jijo ratsü eno tssov. 43 Pvüti jina ombo zeyisi emho myonshia mhumphuka khying na ratsü eno tsso jina, 44 pvüti jina ombo ji n tssüng to phyoyiv, ombo kvüri mara ekhyingo ji tsükona. 45 Kyon ochona ratsü eno hana sana ombona mpensü jiang rethechi hansi, otssan ji shyuroe han, emen eyuk tosi "Ntssüng, ntssüng!" to tüngakachia vam. 46 Ombo osi ompvü nochonori ji ekhyingthüng nandang jo n tho to vam, osi oyam nkachoa pikhfü tssae ombo vanthoku.
Phümtson Pvükao Jiang Shikhfü
47 Kvüthüng tssansülo tssolea, sünyipvülo tssolea, 48 mekana tssansü osi sünyipvülo rechocholo lea, sofü lo osi sofü na nsüngrücho tsütsaelan lo lea, phümtson khyinga tssona, 49 hoji mmyakvü osi rakishuka tssona jijo phümtson ji nzüa yia vamo jina hansi owo pvüti zethoku. 50 Pvüti jina zesi tsütsaelan ji echümporo vasi tsüngon tiying zev. 51 Tsüngon tiyingo jilo zelan si phümtson ji rankata tssona tsütsaelan ji n tho to phyov. 52 Hotüv tsütsaelan jijo phümtson nzüa vamo jina pvüti jina rungi siv. 53 Tokhatola pvüti jina zele phümtson ji nzüa n yihan na, 54 Osü ji etssüi tsüngon tiying echümporo valani zev. 55 Hoji sülo phümtson ji nzüa n yihanlea opyon n dungphina vanpvü tssocho jo pvüti jina n tho to phyov osi tsütsaelan ji mhadungoe kyoncho tssolea sülamoe tssolea omina rungi sile to yidan pia rungi sithoku. 56 Tokhatola pvüti jina phümtson ji monthakcho tssona osü mekan sofü ji nken kvülo phümtson khyingcho sana jitae rechoe siv. 57 Osi phümtson ji nzüa yia tssocho jo OPVÜI jina hoji rungi siv. 58 Tolea tsütsaelan ji etssüi zele phümtson ji mona tsona elani etssülam tona hojijo ntssüngthakcho tssov. 59 Shiang jo osü lo phümtson khyingcho shikhfü, osü ji sümyon na tükcho tssolea, sünyipvüna tükcho tssolea mekana sofü na nsüngrücho tsütsaelan tssolea, topvü hojito tssov.
Ratsü Eno sülo nthoche
1 Ratsü enoe pocho sülo nthoche shikhfü: 2 OPVÜI na Moses yakchia heto picho, ombo nthoche tsüngon no jo pvüti ji thüngi sosi rov, 3 tona pvüti jina pikhfü tssae ombo sosi chiwozeyiv. Osi nochonori ji mmhonthakcho tssona, 4 pvüti jina ntho woro eni yani hansi yile to kyon ji ezov, hoji nzo cedar tssüng wochoro motsünga, oying emyom motsünga, kherang motsünga to hansi yiv. 5 Tosi chonphfü motsünga lo ojü ntssüngu yenthei ji poni na woro motsünga ji tatsüngu. 6 Tosi woro motsünga ji khi, hoji nzo cedar tssüng wochoro tona, oying emyom tona kherang ji to topvü khi woro ji ejen jilo jümthechiv. Tosi pvüti jina khi yenjo tiying kyon ji erhika si ombo ntssüngthaka to phyov. 7 Jitosi ombona woro motsünga ji phenmngi phyachi siv. 8 Kyon jina ombo sü jiang topvü etssüi sisi kvüri tssan ji tssüi sisi tsükae siv; to tssona omboji shikhfü ephan ntssüngchethaka. Ombona oyani rheyikhuka, khatola ranki n rheyi sana tsüngon tiying hapoe vam. 9 Tsüngon tiyingo to jilo elani ombona kvüri ji tssülam, menhüm osi mhyiktssan jiang, tona otsüko otssan topvü to tssükhani siv, tosi ombona osü jiang etssüi sisi tsükae sithak na shikhfü ephan ombo ntssüngthaka. 10 Tsüngon tizao to lojo ombona olyuro obung eni okyu motsünga to ephyorüv m pao nzyuatso tüv, ohüm chencho seri ethüm olive thyujü lo nzüka, jilo olive thyujü etükpvü echi ethümo echia harüma to thev. 11 Pvüti jina othan shiang tona kyon ji to sosi OPVÜI vanrhyu ji kipüngo wov. 12 Tosi pvüti jina olyuro obung motsünga tona thyujü etükpvü ethümo echia harüm ji to khi lolan than tssoa piv. Ombona othan jiang echümporo than tssothuka OPVÜI tham. 13 Ombona olyuro ji ntho meta kvülo na mmen to ekümrüm rungphen sana jilona lüngthae thamka. Ombona hojito tham shikhfü ntiotssole lolan than shiha mmen than ji esüa pvüti ji ejan tsso jina elümoto ntho tssothukala. 14 Pvüti jina olyuro ji ejen tara khi kyon ocho nthochev sana ji eno hamimoe jilo esev, okhe hamimo yingpvü jilo esev, ojo hamimo yingpvü jilo eseyiv. 15 Pvüti jina thyujü tara khi ombo khe hayiwoe mmyokvüi thei, 16 ombo khe hamimo yingro motsünga tssyu thechisi OPVÜI vanrhyu jilo yenjo tiying erhikav. 17 Ombona ombo khelo jüwo thyujü ji lona tara, olyuro ji ejen tara, to khichei kyon ocho nthochev vancho sana ji nomüng hamimoe jilo theyi, okhe hamimo yingpvü jilo tona joyingpvü hamimo jilo to eseyiv. 18 Jitosi ombo khelo thyujü enhyoe bemo ji kyon ji kvüri lo theyia nthoche elhi ji tssoyivka. 19 Jisülo jo pvüti jina mmen than ji thana ntho elhi tssoyiv. Jisülo ombona erungthan ekümrümo ji tatsüngi 20 oyohan than jilo tsotsüi rungu. Hoji to lyui pvüti jina nthoche elhi tssoyia kyon ji nthochev. 21 Kyon ji yantsae tssoe ethüng ezi n tssokhuk na ombona olyuro obung motsünga tae hana oro ombo lolan than tssoa pvüti ji yakchia OPVÜI thüngi echümporo than piv. Ombona oyohan than tssoa ohüm seri motsünga olive thyujü lo nzi, elani olive thyujü serialo ethümchia to hansi rovka. 22 mbona mmen than tona erung than to tsükona yukhyu mekana vefü eni hansi rovka. 23 Osi nthoche elhi tsüngon tizao to jilo OPVÜI vanrhyu kipüng jilo pvüti ji thüngi hansi rovka. 24 pvüti jina olyuro ji tona olive thyujü ji to khi pvüti ji yakchia echümporo than OPVÜI pivka. 25 Pvüti jina olyuro ji lüngthae ejen tara khi kyon ji eno mmyo hamimoe jilo theyi, yingpvü hamimo jilo tona joyingpvü hamimoe to theyiv. 26 Pvüti jina thyujü tara khi ombo mmyokvü hayiwoe thev, 27 osi yingro hamimo na ejen ji OPVÜI vanrhyu jilo yenjo tiying erhikav. 28 Ombona thyujü ha tara khi OPVÜI vanrhyu jilo esev, kyon ji eno hamimoe, kheyingpvü hamimoe tona joyingpvü hamimoe to. 29 Osi pvüti ji khe hamimoe thyujü jijo kyon ji kvüri lo theyi tolyui nthoche elhi ji benriv. 30 Jitosi ombona yukhyu mekana vefü motsünga jo mmen than, 31 motsünga jo erung than to piv. Hojito pvüti jina nthoche elhi ji benriv. 32 Shijo ratsü enoe ochona ombo ntssüngchethukvü tsükona othan shenthi n pikhuka sana ji tsükona.
Oki Phümtson Jiang
33 Oki phümtson pvükatathüng elhilan jiang tsükona 34-35 OPVÜI na Moses ha Aaron oni heto shikhfü picho. (Osi shikhfü shiangjo OPVÜI na phyochako meta Kanaan jilo Israel jiangna rheyicho sülo benphile to picho.) Kyon ochona ombo ki phümtson pvükathukcho hunga sana hoji owo pvüti ji ezov. 36 Tona pvüti jina oki ji zelo n rhowothüng tsütsaelan topvü hapoe hanchukchi vale to ezov; to n tssoana oki jilo ntio lia na n tho to khanhyayiv. hojito oki ji lichesanati pvüti jina rhowo 37 phümtson ji kvütüv sana zev. phümtson jilo myakvü osi myonshiv jüa oki echung jiang tsoroa vanchojo, 38 ombona oki jilona chiyi tsüngon tiying tsükona oki ji khani siv. 39 Tsüngon tiyingo to jilo elani oro oki ji chonchi zelam. Osi phümtson ji rankata lia tssona 40 olong kvülona buki phümtson ji pvüa sana hoji lae pikhfü tssae shümchukchi sithukvü. 41 Osi kyimchung ochungo jiwoe topvü opon ji nshaki thonjo jiang hansi pikhfü tssae sithukvü. 42 Jitosi olong ethan na echung ji nlichoe echungji ethan tssoe mosilani siv. 43 Echung jiang ethan tssoe moksika sanati elani phümtson pvükalana tssona, 44 Pvüti jina owo zelam osi phümtson pvülana tssona, oki ji n tssüng to phyoyiv. 45 Hoji ki jijo phii siv, osi otssüng olong osi moksio jiang topvü hansi pikhfü tssae n tho metae chiwo siv. 46 Oki ji khani vatathüng yuta jilo ochona jilo rhowoa sana kyon mo jiha mmyu n janthüng jo n tssüng to vanthukvü. 47 Kyon ochona oki jilo yipkachia osi jilo na etsoyu tssoana jina ombo mpensü jiang topvü etssüi sivka. 48 Tokhatola echung jiang tongphicho sülo pvüti jina owo zele phümtson ji n pvükalana tssona oki jijo shikhfü ji ephani na ntssüngthaka to phyoyiv. Ntiotssole phümtson ji n khyingu sithaka. 49 Oki ji nthochev tsükona pvüti jina woro eni cedar tssüng tara, oying emyom tona kherang to methakvü. 50 Ombona ochon phi lo ebukjü ntssüngu the vao ji poni na woro motsünga tatsüngüv. 51 Jitosi ombona cedar tssüng ji, kherang ji, oying emyom ji tona woro eküm ji to khi woro ejen jilo jümthechiv osi ojü ntssüngo jilo jümthechi to tssov, tosi oki jilo yenjo tiying to erhikav. 52 Hojito pvüti jina yenjo tiying erhikav woro ji ejen, ebukjü ntssüngu, woro eküm ji, cedar tssüng tona oying emyom ji to khi oki ji nthochev. 53 Jitosi ombona woro eküm evamo ji khi yantsü pikhfü pomoe oli pyachi siv. Hojito pvüti jina oki nthoche elhi ji bencheyi sanati oki ji shikhfü ephan ntssüngthaka to phyoyiv. 54 Shiang hetopvü jo ratsü eno; 55-56 emho, vela, runga eno tona oki osi mpensü lo phümtson pvükao jiang to tsükona shikhfü pio jiang. 57 Shikhfü shiangna ntssüng n tssüng ji etsiv.
Otsüki na Mmen yiathüng Shikhfü
1 Israel kyon jiang tsükona OPVÜI na Moses ha Aaron oni 2 heto shikhfü picho. Eboe ocho lona mmen yiasana jijo mmen to tssothuku, 3 mmen ji yiathüng tssolea esancho sülo tssolea. 4 belüng kvülo ombona yipa osi khoktheta sana hoji ha mmen to khav. 5 Kyon thanpoe ochona ombo khokthepheno khoktheta osi belüng ji evüngkata sana, 6 jina ombo mpensü jiang zakto etssüi sia tsükae sivka, osi mmyu jana mmen to vamuka. 7 Otsüki na mmen yia vamo kyon tsük ji ochona evüngkata sana ombona ha tsükae sia osü jiang etssüi sivka, tokhatola n myuthüng jo mmen to vam. 8 Mmen yia vamo kyon jina ocho njüna nchukata sana kyon mo jina ha osü etssüi sia tsükae siv, khatola n myuthüng nandang jo mmen to vam. 9 Mmen yio kyon jina khoktheo jiha mmen to khav. 10 Kyon mo jina khoktheo ji evüngkao kyon jiha n myuthüng jo mmen to vam. Kyon jina khokthecho lona ntio sana thei hanphio kyon jiha mpensü etssüi sisi n myuthüng jo mmen to vam. 11 Mmen yia vamo kyon jina okhe ntsük lea kyon ocho evüngkata sana kyon jina mpensü jiang etssüi sia tsükasi n myuthüng nandang jo mmen to vam. 12 Mmen yia vamo jina evüngkao chonphfü jijo varoe siv, osi tssüngphi evüngkao jiang jo süi siv shikhfü. 13 Mmen yio ji mmhoncho sülo tsüngon tiying nhyaksi mpensü etssüi sia, ebukjü ntssüngu na tsükae sia ntssüngchev. 14 Tsüngon tizao to jilo ombona yukhyu mekana vefü eni hansi owo OPVÜI vanrhyu ranki kipüng jilo pvüti ji piv. 15 Tona pvüti jina woro motsünga ji mmen than pisi motsünga jo erung than piv. Hojito Pvüti jina shikhfü ephan kyon ji ntssüngchev. 16 Eboe tsükana eboe tathi tsükjü yina otsük totona tsükae sisi n myuthüng jo mmen to vam. 17 Osü osi sofü tsütsaelan ntiolo hotüv tsükjü esekata sana etssüi sisi n myuthüng jo hoji mmen to vanthukvü. 18 Eboe tona eloe to ponilan tssotasi sülo woniata na tsükae siv osi n myuthüng nandang jo onitana mmen to. vam. 19 Eloe tsükana ompvü tathi mmen yiana tsüngon tiying mmen to vam. Ompvü evüngkae kyon topvü n myuthüng jo mmen to vam. 20 Ompvüna hoji yutalo ntiolo erikachia osi khoktheta sana topvü mmen to khav. 21-23 Ochona ompvü belüng osi khokthephen evüngkata sana jina mpensü etssüi sia tsükae siv osi n myuthüng jo mmen to vam. 24 Ompvü mmen eyi yutalo eboe ochona ompvü thüngi ponilan tssoa sana ombo tsüngon tiying mmen to vam osi ombo yiphen jiha mmen to khanhyav, 25 Eloe ocho lo tathi yuta jilo tajoa sunga mmen yia vana sana, ompvü tathi yutalo mmen to vamo ji esüa ejen ji n santhüngjo mmen to vam. 26 Hotüv yutalo ompvü belüng osi khokthephen jiang ha mmen to vam. 27 Kyon ochona hotüv vanphensanphen evüngkatana mpensü etssüi sia tsükae sisi n myuthüng jo mmen to vam. 28 Ompvü ejen ji esan si sülo tsüngon tiying nhyaksi süloti ntssüngchethaka to khanhyav. 29 Tsüngon tizao jilo ompvüna yukhyu mekana vefü eni bensi OPVÜI vanrhyu ji kipüng jilo pvüti ji thüngi hansi wov. 30 Pvüti jina woro motsünga jo erung than motsünga jo mmen than to piyia shikhfü ephan ompvü nthochev. 31 Israel kyon jiangna onte mmen myak jiang tüngochüngtale to OPVÜI na ntangshon yi Moses picho, ntiotssole onte vanphen lungi OPVÜI vanrhyu ranki ji n menthukvü tsükona. Ontena hoji mmenthuka na onte chüthukvü 32 Shikhfü shiang jo eboena mmen yia osi onte tsükjü chiyiathüng tona, 33 eloena ompvü tathi mmen yiathüng osi hotüv eloe thüngi eboena ponilan tssoathüng to tsükona.
Thungthan Tsüngon
1 Aaron tsoe otsük eni ji ontena n thomi na OPVÜI thana thüng chüthoko ji sülo OPVÜI na Moses heto ezocho. 2 "Nijenio Aaron ji zonchak chungi vanphen jilo jo yuta eben jilo rhowochev meka to ezoa, ntiotssole jilo jo ana elukina oro Ntsata vaphen Bakos ji elhüp ji poni vanphen ji. Ombona hoji n ngachojo ombo chüthokuka. 3 Ombona mmen than tssibungro tona erungthan olyuro to bensi tham tsükona yakajo nthotsowo vanphen jilo rhowov meka." 4 Jisülo jo OPVÜI na heto shikhfü pilancho. Aaron na nthotso jilo n rhowothüng ombona tsükae sisi pvüti mpensü jiang ekav: sünyipvü phuknrhüo ji tona sütukaro jiang, ryukhüng tona kiven to jiang. 5 Israel khümtsüng na mmenthan nyanyan bung eni tona olyu bung motsünga to Aaron piv. 6 Aaron na ombo mmen tona ombo opan mmen to khi siv tsükona tsibung motsünga tham. 7 Tona ombona nyanyan bung eni ji khi süsi OPVÜI vanrhyu ranki kibüngi wov. 8 Ombona hojilona phyalu zev, osi olung eni khi motsünga jo "OPVÜI echi" to eranka motsünga jo "Azazel echi" to eranka toli tsakae zev. 9 OPVÜI echi to tsako ji khi Aaron na mmen than tssoa piv. 10 Azazel to erankacho tsakao jijo eküm na OPVÜI thansi, lijüngi Azazel thüngi yithokvü. Hoji jo kyon jiang mmen jiang khi siyiv tsükona. 11 Kvüthüng Aaron na ombo tona ombo wopan to tsükona mmenthan tssibung thana sana, 12 ombona miron thanphen motsünga lo miron epying thanthei jilo tssütsserhüm khezüm eni thei nthotsowo chungchak jilo hansi rhowovka. 13 hojito OPVÜI vanrhyu lona ombona tssütsse ji rungi miphung jina Ntsata Vaphen elhüp ji eyukzhüthoku, to n tssoa na ombona hoji hungi ombo chüv. 14 Ombona tssibung ji ejen tara khi Ntsata Vaphen elhüp ji poni erhika, tosi Ntsata Bakos mhadungoe ha yenjo tiying erhikav. 15 Jisülo jo ombona kyon jiang mmenthan nyanyan ji lüngthae ejen ji khi nthotsowo chungchak jilo hana rhowo Ntsata Vaphen elhüp jilo erhika, Bakos ji mhadungoe erhika to, tssibung ji ejen ji erhikao ji esüa erhikav. 16 Hojitolyui ombona nthotsowo chungchak ji Israel jiang n thono osi mmen topvü lona nthochev. OPVÜI vanrhyu ranki ji ombona hoto nthocheo jijo ranki ji mmen kyon ochoang jo shikhfü ephan n tssüngchehancho sana jiang ndüngo tssokachio ji tsükona. 17 Hojito Aaron nthoche elhilo rhowo ji lona benkae kholani n chiyithüng nandang ochinaha vanrhyu ranki jilo khothev meka. Ombona, ombo wopan osi kyon jiang nthoche elhi ji thakthakana 18 elani ombona erungthan tsükona thanphen ji owo nthochev. Ombona tssibung ji ejen tara, nyanyan ji ejen tara to khi owo thanphen ji nken jianglo esekav. 19 Tothakana ombona ombo yingro jina edyuka akvülo yenjo tiying erhikav, osi ombona hojitoli Israel kyon jiang mmen lona thanphen ji nthochev.
Thungtssoe Nyanyan Ji
20 Aaron na nthotsowo chungchak ji, OPVÜI vanrhyu ranki ji tona thanphen ji to ntssüngche elhi jiang thakthaka na, Azazel tsükona vao nyanyan ji OPVÜI thüngi piv. 21 Ombona khetsungkhona nyanyan ji kvürilo nyimkae Israel jiang n mhon, mmen osi Potsow panlamo etso-ephyo jiang topvü phyochaku, tona hojiang topvü nyanyan jina hansi yiv. Jisülo jo nyanyan ji phana evov zikae vao kyon jina phana owo lijüngi phanchi siv. 22 Tona nyanyan jina kyon jiang mmen jiang hansi kyon n van metae rhomoni yi siv. 23 Jisülo jo Aaron na pvüti pipo hansi nthotsowo vanphen jilo rhowo mpensü jiang phungche. OPVÜI vanrhyu ranki jilo vav. 24 Tothakana ombo na ntho metae na tsüka si ombo mpensü jiang ekav. Hoji süloti ombona chiwo ombo mmen osi kyon jiang mmen tsükona erungthan ji piv. 25 Ombona mmen than ekümrümo ji ethyu ji thanpheni na runguka. 26 kyon ochona nyanyan ji Azazel thüngi phanchilo ocho sana jina ombo mpensü jiang etssüi sia tsüka sanati nzontsü vanpheni rheyivka. 27 Jisülo jo tssibung osi nyanyna kumoe nthotsowo vanphen jilo ejen na mmen than picho sana ji so jijo erü tssae hansi chivo runguka. 28 Kyon ochona hoji rüngcho sana ombona nzontsü vanpheni n rheyithüng ombo mpensü jiang etssüi sia tsükae sidemka.
Thungthan Tsüngon Mungyanchi
29 Nchünkhon tsükona shikhfü oküpoe elio shiang benphivka. Choro tiyingo jilo tsüngon taroto jilo jo Israel osi onte nzo evan metapoe kyon jiang topvüna ekhang khivka osi elhi ha ntia tssov meka. 30 Hoji tsüngon no jo mmen lona onte nthochev tsükona tssolanphyolan jiang tssovka. 31 Hoji jo onte tsükona elümoto ntho tsüngon, ontena elhi n tsso na ekhang ekhiv tsüngon. Hojiang shikhfü ji nchüngkhon benphia ewov lia. 32 Pvüti tsüphoe ocho jo opo echungcho khuka nthochaki benri vanthukcho sana jina nthoche tssolan jiang tssovka. Ombona pvüti mpensü hansi 33 nthotsowo vanphen ji, OPVÜI vanrhyu ranki ji, thanphen ji, pvüti jiang osi khümtsüng kyon topvü tsükona nthoche elhi ji tssovka. 34 Shikhfü shiango nchüngkhon tsütsata wovka. Tssolan shijo Israel kyon jiang mmen lona nthochev tsükona nzyualo yenjoa tssovka. Hojito OPVÜI na ezoji esüa Moses na tssocho.
Ejen Jo Ntho
1 OPVÜI na Moses ezoa 2 shikhfü shiang Aaron tona ombo tsoeden osi Israel kyon topvü to thüngi pithukcho. 3-4 Israel kyon ochona OPVÜI etham tsükona mangsü tssolea, nyanyan tssolea OPVÜI vanrhyu ranki ji kibüngo na yaka meta thanpoe na lüngthata sana jina shikhfü yesothaka. Ombona ejen zanthuko ji tsükona enhungo Potsow kyon jiang yolo tsüka to ombo n khanhya. 5 Shikhfü shi yichak jo Israel jiang na hapoe na thama ekümrüm lüngthata vamo jiang ha topvü OPVÜI thüngi hansi rov tsükona. Ontena enhungo ekümrümo jiang hansi oro OPVÜI vanrhyu kibüngo pvüti ji thüngi hansi oro khümshümta than tssoa tatsünguka. 6 Pvüti jina ejen ji khi vanrhyu ranki kibüngo thanphen ji nkonphia phyangkasi ethyu jiang rungi OPVÜI chokao rhüm. tssothuku ka. 7 Enhungo Israel kyon jiangna OPVÜI n longtsüka elhi esüa meta thama lona ekümrümo lüngthae mmen mon jiang thüngi othan piv meka. Israel jiang na shikhfü shiang nchüngkhon benphia wovka. 8 Israel tssolea pvüjipoe tssolea Israel okho lo vana evan ochona erungthan osi thanpo than jiang, 9 OPVÜI vanrhyu kibüngo na yaka OPVÜI thana sana kyon mo jijo Potsow kyon to khanhyav meka. 10 Israel kyon na tssolea jipopoe okholo vancho tüv na tssolea ochona oso ejen n kyingkav tsoa sana ji OPVÜI na ombo khomvü osi Potsow kyon yolo khanhyav meka. 11 Eküm evamo jiang topvü eküm ji ejen jilo jüala. Hoji tsükona OPVÜI na kyon mmen khi siyiv jo othan jilo ejenji khi thanphen jilo chükale to yizüng picho. Ejen jo eküm tsso jina mmen epyoe sichetala. 12 Hoji tsükona OPVÜI na Israel jiang ezocho, onte tssolea yentsae onte thüngi vancho tüv tssolea ejen khyinga oso tsov meka to. 13 Israel kyon tssolea onte ndüngo jipopoe vancho tssolea ochona oso phano woe mekana woro khümo woe tsohunga sana ejen jijo likoe zanthuki ochon na thanzhüi sivka. 14 Eküm evamo eküm topvü ji ejen jilo jüwo ji tsükona OPVÜI na Israel jiang ji ejen khyinga oso ti-tsole to ezocho. Ochona ejen khyinga oso tsoana ombo kyon to nkhanhyav siv. 15 Elani Israel kyon tssolea thanpoe kyon tssolea ochona ekümrümo chücho mekana orae ekümrümo na rümcho jitüv rajak tsoa osi evüngkata sana jina mpensü etssüi sia tsükae siv lia tolea n myuthüng ji mmen to vam. 16 Ombo na hojito n tssoana hoji man ombona ezüp tssükav.
Ponilan Lo Sariv Lanka Jiang
OPVÜI na Moses yakchia, 2 Israel jiang heto ezocho, "Aiyo OPVÜI, nte Potsow jika. 3 Ntena ovüngthüng nte nzo vamo Ejip kyon jiang etso-ephyo, osi ana nte epiv phyochako Kanaan meta jilo evamo kyon jiang etso-ephyo jiang tihungchotava. 4 Tolea ana ntio nte ezoa na ji engata a yizüng jiang benphitava. Aiyo OPVÜI nte Potsow jika. 5 Ana shikhfü osi tssolanphyolan nte pio jiang tsütsatava; hojito tssona jina nte eküm shanchovka. Aiyo OPVÜI ji." 6 OPVÜI na shikhfü shiang ha picho. Nte wopan ndüng jiang thüngi ponilan ti-tssotava. 7 Niyo thüngi ponilan tssoe nipo tiyikrathuka osi omying ti mmenia. Nina niyo ha n yirathuku shikhfü. 8 Nipo eloe jiang yulo tsüka thüngilea ponilan tssoe nipo ti-yikrathuka. 9 Ni kina süphichecho tssolea hojitüv meklea, ni yulov ndüng tssolea, ni yuloe nshoni tssolea to jiang thüngi ponilan ti-tssoa. 10 Ni tsorüv jiang thüngi ponilan ti-tssoa. Hojito tsso jijo nibobo mmenala. 11 Jipo motsünga chungi ni yulov jiang thüngi ponilan ti-tssoa; hojiang ha niyuolovden ka. 12-13 Nino thüngi ponilan ti-tssoa, mekana niyoro jiang thüngi ha ti-tssoa. 14 Niporo tsoeni thüngiha ponilan ti-tssoa; hojiha niyo ka. 15 Ni tsokhyongo tsoeni thüngi ponilan ti-tssoa, 16 mekana ni jenio tsoeni thüngiha ponilan ti-tssoa. 17 Nina ponilan tssoa ero eloe ji otsolov mekana hoji tsorüv tüv thüngiha ponilan ti-tssoa, onte ji ni opan, ejen motsünga tssokhuka, hoji tsükona hojitüv jo okilo worhyutacho tssoala. 18 Ni engh ji eküm evanthüng nandang jo nirahm ji ni tsoeni ti-tssoa. 19 Eloe na men yiathüng ponilan ti-tssoa, ntiotssole ompvüontssüng-rüng yutalo vana. 20 Oyam tsoeni thüngi ponilan ti-tssoa; hojina ni mmenhyav. 21 Ni ngaro ochia Molekh Potsow khümpheni othan tssoa ti-pia; ntiotssole hojijo OPVÜI Potsow yikrathuko elhi. 22 Eboe ochi naha eboe thanpoe thüngi ponilan ti-tssoa, hojitüv elhi jo Potsow na tsakala. 23 Eloe na tssolea eboe na tssolea ekürümo thüngi ponilan elhi ti-tssoa; hojitüv phola elhina ni mmenala. 24 Shiang hetopvü khi nte timmenthuka, ntiotssole tssolanphyolan shiango Kanaan lo evan n longtsüi ochoang OPVÜI na phani sisi nte vanthukcho sana jiangna benphia onte popo mmentao jiang elhi. 25 Onte etso-ephyo jiang na meta ji mmenhtuko jina OPVÜI na meta ji khi kyon jiang phani sithoku tsükona meta ji jaktoncho. 26-27 Ontena etssakthao shiang tssota meta ji mmenthukcho khatola ntena jo hojito tssov meka. Nte topvü na Israel kyon tssolea, thanpoe nte ndüngo vamo jiang na tssolea jiang topvü na OPVÜI yizüng jiang benphivka, 28 hojito tssona meta jina ntena n yithüng kyon jiang khoe esio ji esüa nte siv meka. 29 Kyon ochona etssakthav elhi shiang tssoa sana Potsow na ombo kyon yolo n khanhya to ji ntena ntsia. 30 OPVÜI na heto phyocho, "Ana nte pio yizüng shiang enga benphitava; osi nte vüngi na evamo kyon jiang etso-ephyo ti phankatava. N mhon hetüv motsünga lea benphi nte popo timmentava. Nte OPVÜI, Potsow jo A ka."
Ntho Osi Ntsanrük Shikhfü
1 OPVÜI na Moses yakchia Israel kyon jiang thüngi heto ezothukcho, 2 "Ntena nthoa vantava, ntiotssole A, nte OPVÜI Potsow jo Aiyo ntho. 3 Nte otsük akvüna opo osi oyo yikrachitava, osi ana nte ezo ji esüa esanmung ji benphitava. Aiyo OPVÜI nte Potsow jika." 4 A khaki sisi kisü khümta ti-woa, yonjakna ha potsow nsüngrüi ti khümtava. Aiyo OPVÜI nte Potsow jika. 5 Ntena khümshümta than etssov tsükona ekümrümo tatsünga thüng ana nte pio shikhfü jiang ephan tssotava, tona othan ji ana nte khichoyivka. 6 Ekümrümo ji lüngthao ji nchük mekana ojyuato na oso ji tsorav shikhfü. Tsüngon ethümo to jana oso enhyo jiango rungi siv lia, 7 ntiotssole hojijo shikhfü ephanina n tho, hoji tsükona ochona hojitüv tsoana jijo ana khichoyiv meka. 8 Ochona othan kümoe khochaki pithakcho tüv tsoana hojina othan ji ata-sha kümthukala, küma ombo a kyon yolo khanhyav meka. 9 Ntena oli riana mvüthan jiang etsümkata ri ti-khia, osi mosü jiangha yana ti-olana. 10 Ntena jününgrothi lhoathüngha enhyokao jiang ti-khilana, osi likoe elongcho jiang ti-khyoa. Hojiang topvü yantsae osi metapoe kyon yentsae jiang echi vayia. Aiyo OPVÜI nte Potsow jika. 11 Ti-füa, ti ejethechia osi ejüng ti phyoa. 12 Nina benphiv to n zikav jo a myingo na ti echüma; hojina a mying mmenala. Aiyo OPVÜI nte Potsow ji. 13 Oyam n tssocho benta lo ti bupthuka, osi ti efüyia. Nina mmyolo so ji jokheman ji zümoa tia ti valanchiyia. 14 Nobüng jiang ti rhiyia osi mhyikjung jiang nshüphithukvü ntia mhadungoe ti vayia. A kyutava, aiyo OPVÜI nte Potsow ji ka. 15 Ntena yitssolo methak khiathüng ntsa nrük osi chimyan theta methak-tava. Yantsae jiang thüngoe thelanga mekana ejüeli jiang kyua ti tssotava. 16 Oyam echi ejüng ti bukcheyia, ochona sana yitssopheni van na nina ehungpvüi phyo jina ombo zenzanchikhuka na zetena. Aiyo OPVÜI ji ka. 17 Ochi thüngi ha oyi rhükae ti lithuka, hoji tüv lia sayilea mmyantae siv yana, tona ombo tsükona nina mmen tssov meka. is Ochia ti nlilana, mekana sunga oyam tssaka ti vana. Ni phinakishü jiang ji nipopo nzana esüa nzana. Aiyo OPVÜI jika. 19 A yizüng jiang engatava. Oki ekümrümo echümpotao tüv khi ti phankatathuka. Oli motsünga lo mojülan eni ha ti theta. Sülan eni khümtsütacho ha ti mpentava. 20 Kyon tsükana ombo ezi eloeroro ji yingaloroe tssoa eküma vansi hoji man ntia ompvü n pihan, vachiha n vachihan, to tssoa vanathüng ji eboe thanpoe na ompvü thüngi ponilan tssona ezüp oni piv, tolea chüthukvü jo n tüm, ntiotssole ompvüo ezii tssoa vanpvü. 21 Tokhatola ombona lolan than a vanrhyu kipüngona tham tsükona olyu bung hansi rovka. 22 Tona pvüti jiangna hoji khi nthoche elhi tssoyiv. Tona nlan ombo siyivka. 23 Ntena Kanaan meta jilo kvüthüng rheyi tssüngthi yinga sana nzyu ethüm nandang jo tssüngthi jiang n tho to ntsitava. Hoji yutalo tssüngthi ethio jiango ntena n tsov shikhfü. 24 Nzyu mezhüo to jilo jo tssüngthi lonphen topvü khi a thamvüka, ntiotssole aiyo OPVÜI ji. 25 Nzyu mongoto loti ntena tssüngthi ji tsokhuka. Ntena hojito benphina nte tssüngthidung jiangna elümoto ethiv. Aiyo OPVÜI nte Potsow ji. 26 Ntena oso lo ejen n kyingkav ti tsotava. Oyam sori-s otük elhi ti tssotava. 27 Nte enojüp tssungkhoata lo otssan jiang ti tssütava, mekana men-hüm jiang ha ti tssütava 28 otssuk jiha eranroe ti hantava osi echü kyatathüng ha otsüko ti phothechitava. Aiyo OPVÜI ji ka. 29 "Nte otsolov jiang khümpheni lonsü lonphyo elhi etssov lo ti wothuka, ntena hoji to tssochojo potsow thanpo yanta yiv osi lonsü lonphyo na meta ji pyingüv. 30 Esanmung ji mmhona benphitava osi a khümphen meta jiang kyuchitava. Aiyo OPVÜI ji ka." 31 "E chüi mon jiang thüngi thyutae jiang thüngi na ndungntssung ti khia. Ntena hojito tssochojo nteha n tho nte kümvü. Aiyo nte OPVÜI Potsow ji. 32 "Eran jiang yikrachi kyuchitava. Aiyo OPVÜI ji ka, A kyuchitava. 33 "Metapoe kyon nte yulo vana vamo jiang ti khangshitava. 34 Ontena Israel kyonden nzana to nzantava osi nte popo nzana to nzantava. Nteha tsüngona lojo Ejip metae jipopoe tssoa vancho to ti mhechotava. Aiyo nte Potsow OPVÜI jika. 35 "Oyam ejiphia etsi-konphen, efü-seri, osi etük jiang phephia ti tsütsatava. 36 Efü-seri, duki-long, osi etük jiang ntsanrüka benphitava. Aiyo OPVÜI nte Potsow ochona Ejip metae na nte sochokcho sana hoji. 37 A yizüng osi shikhfü topvü enga benphitava. Aiyo OPVÜI ji ka."
Jancho N zo Man Ezüp Ntssonshi
1 OPVÜI na Moses yakchia Israel kyon jiang heto ezothukcho, 2 "Nte ochona sana, osi nte ki evan Iankon ochona ngaro khi Molekh ekhümvü lo pithuka sana topvü na sani kyon ji ephyatsüngi sia. 3 Ochona ombo ngaro khi Molekh potsow pia a ntho ki mmenthuka sana osi a ntho mying mmenthuka na ana kyon mo ji zevka osi a kyon to khanhyav meka. 4 Tokhatola okho jina n hung ntan tssosi n chüthuka tssona, 5 ana a bobo kyon mo ji, ombo wopan osi thanpoe ochoang na ombo khümkae a yenchoa Molekh khümta yiasana topvü ana zevka. Ana onte ji a kyonden to n khanhyav sivka. 6 "Kyon ochona echüi mon thüngi ngatüngari lo woasana ana ombo zevka osi a kyon to khanhyav meka. 7 Aiyo OPVÜI nte Potsow ji ka, ntena nthoa vantava. 8 A yizüng benphitava, ntiotssole aiyo nte nthotoko OPVÜI ji." 9 OPVÜI na shikhfü shiang picho. Ochona opo osi oyo rhiyikata sana ombo chüthukvü; osi ombo chülea ombobo chüthukcho tssoala. 10 Ochona ombo shom Israel kyon thanpoe engh thüngi worhyuta na eloe jiha eboe jiha chüthuka. 11 Kyon ochona opo engh thüngi worhyuta na eloe ji wonita chüthukvü, ntiotssole ombona opo yikrathukala. Oni chüo ji woni bobo yancho. Ohaji wonina ham. 12 Eboe ochona ombo tsoeji engh thüngi worhyuta na onita chüthukvü. Ntiotssole onteno okilo worhyutacho osi oni chüo ji wonibobo yancho tae. 13 Eboe ochona eboe thanpoe thüngi ponilan tssoa sana onina enkongthao elhi tssothaka, hoji tsükona woniata chüthuka. Oni chüo ji woni pono tae. 14 Eboe ochona eloe ompvütsoeata ombo engh etssov khirhüma sana onthümata rungtsüngi sia; nte yulo jo hotüv tssotav meka. 15 Eboe ochona ekümrümo thüngi ponilan tssoa sana woniata chüthuka. 16 Eloe ochona ekümrümo thüngi ponilan tssoa sana jiangha woniata chüthuka. Onte chüo ji haji woni pono. 17 Eboe ochona oyilov osi oporo ota ndüng tsolo soa vanasana oniji okho lona yikrathuksi okho lona phanchukchi sia. Ombona oyuloe worhyuo jina hoji man ji ezüp khivka. 18 Eboe ochona eloe mmen eyi yutalo ponilan tssaosana, onita okho lona phani sia, ntiotssole ntssüng-rüng shikhfü yesothaka. 19 Eboe ochona oporo ota engh thüngi worhyua sana ombona oporo otaji yikrathukala, hoji tsükona eloe ji wonita na ezüp khivka. Osi woniata otsoe oro n liv chüvka. 20 Eboe ochona ojenio engh soa vanasana woniata otsoe oro n liv chüv. 21 Ombona ojenio yikrathukala, osi mmen ntho shikhfü yesothukala. 22 OPVÜI na phyocho, "A shikhfü yizüng jiang benphitava, to tssona ana nte sothechia evamo Kanaan meta jina nte siv meka. 23 Meta jilo evan jiang etssophyo ti khitava, ntiotssole ana nte vanthukvü tsükona n longtsüi jiang phani siv sala. Ontena etsso-ephyo n mhoncho lona a lüm tsukthukthaka. 24 Tokhatola meta lizü mmhom hetüv nte piv phyochako ji nte pivsala. Aiyo OPVÜI nte Potsow ji, hoji tsükona jipo topvü yulona tsachoki echümpo nte vanthukthaka. 25 Hoji tsükona ana woro osi ekümrümo ha ntio jo ntho ntiojo n tho sana khotathukthaka, ntena hojiang khota lia benphitava. N tho ekümrümo osi woro jiang ti tsotava. Ana n tho to phyothako jiang ntena tsochojo n tho nte kümala. 26 Ntena nthoa vansi a thüngoe tae vamka, ntiotssole aiyo OPVÜI ji osi nthoa. Ana jipo thanpoe jiang yulona nte khochaki vao jijo a echi tae nte kümthukvü tsükona". 27 "Eboe tssolea eloe tssolea ochona echüi mon jiang thüngi thyutav yanasana ntena ephyatsüngi sia. Ombo osi ompvü chüo ji onte pono."
Pvüti Jiang Ntsa Ntho
1 OPVÜI na Moses yakchia Aaron pvüti okho jiang heto ezothukcho, "Pvüti ochina ha, ombo oyo, opo, tsokhying, tsolo, ojenio 2 mekana oyuloe n yanpiv ombo ki vana vancho jiang echü yaka wopan thanpoe chüathüng, 3 talüngo woe ombobo n tho kümthukvü meka. 4 Lolanta thüngoe na opantao tüv echü zelo osi ombobo n tho kümthukvü meka. 5 "Pvüti ochina ha echü nongra chekaphen tssoa kvüri tssüa, menhüm tssüa osi otsüko tsüthechia to tssov meka. 6 Ombona nthoa vam shikhfü osi a mying n menthukvü shikhfü. Ombona etsoyu than a piala, hoji tsükona nthoa vamvü lia. 7 Pvüti jijo ntsennthoa, hoji tsükona ombona eloe lonsü lonphyoa vanthakcho mekana sichicho tüv soa vam meka. 8 Pvüti jina ha etsoyu than jiang a piala, hoji tsükona kyon jiangna ha ombo ji nthoa to ombo nchümiv lia. Aiyo OPVÜI ji, aiyo ntho tsso jina ana a kyon jiang ntho kümthukala. 9 Pvüti otsolov na lonsülonphyoe küma tssona om bona opo yikrathukala, hoji tsükona omina rungtsüngi chüthuka. 10 "Pvüti tsüphoe jijo kvüri lo thyujü nzüyia khochaki pvüti pipo hanthukcho, hoji tsükona ombona echü nongra yuta ka to ejüv tsükona kvüri n khev osi osü reroe sia to ti tssoa. 11-12 Omboji a lo nthochaki vanthukthako jina ombobo n tho ti kümthuka, osi ombo opo oyo mpato chülea hojiang zethachisi a ntho süranki ji ti mmenthuka. 13 Ombo ntsennthoa evan loroe tüv soa vamka, 14 Oyam na sichicho, emi mekana lonsü lonphyoe tüv soa vam meka. Ombona ombo pvüji lo ntsa-nthoa evan tüv soa vamka. 15 Hojito n tssoana ombo ngaroden ochoang ntho tssov shikhfü sana jiangha n tho tssoala. Aiyo OPVÜI ji osi a pvüti tsüphoe ombo tsswothukvü ana khochaki ombo vanthukcho. 16 OPVÜI na Moses yakchia Aaron ezocho, 17 "Ni tsoronichen yulo otsük oso n pennzii ochinaha etsoyu than a piv meka. Shijo nchüngkhon tsükona. 18 Mhyikjung, jojang, omha odon yesocho osi lyusoracho ochinaha etsoyuthan ji a tham meka. 19 Ojo mekana okhe n mhohvtüy, 20 echen nkhfüi osi n rankae, omhyik mekana ofü nochonori eli, elani bokyu-lokyu ochina ha etsoyu than a piv meka. 21 Aaron pvüti ji tsoronichen yulo otsük osolo n pen-nzio ochina ha etsoyu than ji apiv meka. 22 Hojitüv kyon na etsoyuthan ntho jiang mekana nthotsowo' etsoyu than jiang tsokhuka, 23 tokhatola onteno otsük osolo n pen-nzio jina: ntho chungchak ji ndüngo osi thanphen ji ndüngo jo rochev meka. Ombona ntho tsütsaelan shiang miiienthukvü m'eka, ntiotssole aiyo ntho osi ana nthoa onte vanthukala." 24 Shiang hetopvü Moses na Aaron thüngi, Aaron tsoe jiang osi Israel topvü thüngi ezocho.
Othan Ji Ntho
1 Opvü1 na Moses yakchia 2 Aaron tona ombo tsoe jiang to ezothukcho, "Ntena a ntho mying ji ti mmenthuka, Israel kyon jiangna a thüngi ntho than a pio jiang nthoa vanthuka. 3 Ni tsoronichen ochona n thono yutalo, Israel kyon jiangna ntho than a piathüng ndüngo roa sana jina elani jo kvüthüngha thanpheni elhi tssolam meka. Shijo nchünkhon tsükona shikhfü. Aiyo OPVÜI ji ka. 4 "Aaron tsoronichen ochina ha ratsü noathüng osi otsüko mmen yiathüng ntho than jiang tsov meka. Pvüti ochona echü evüngkacho lona n tho kümthuko tüv tsütsaelan evüngkata sana, osi tsük-jü yia, 5 mekana ekümrümo osi kyon echü evüngkata sana jithüng jo ombo n tho. 6 Pvüti ocho n tho sana jijo n myuthüng nandang jo n tho to vamvü, osi tsükasanati ntho than jiang tsov. 7 Engrheta na ombo nthochetala, tosanati etsoyu nthothan jiang ombona tsovka; 8 Ekümrümo chücho osi rajak so to jiango ombona tsov meka. Hotüv na n: tho ombo kümvü. Aiyo OPVÜI ji. 9 "Pvüti topvü na ana pio shikhfü jiang benphivka, to mekana ontena nlan rhükae jina onte chüvka, ntiotssole ontena ntho shikhfü yesocho. Aiyo OPVÜI ji, ana hojiang nthoa vanthukala. 10 "Pvüti wopan kyon taena ntho than jiang tsokhuka, ji yaka ochina ha n tsokhuk; pvüti ndüngo evan osi pvüti jina engochoe vanthuko jiangna ha n tsokhuk. 11 Tokhatola pvüti rang na shicho phajae osi ombo kina bukcho phajae na jo pvüti na khio etsoyu jiang tsokhuka. 12 Pvüti otsolov pvüti mekcho tüv thüngi yanpio jina ha ntho than jiang n tsokhuk. 13 Tokhatola pvüti ji otsolov yanpicho emi küm na osi sichitae ngaro n vam oyi opolo enhyikae vancho tüv tssona ompvüna jo opona pvüti etsoyu khichowo jiang tsokhuka. Pvüti wopan kyon jiang taena ntho than jiang tsokhuka. 14 "Pvüti wopan mekcho tüv na ntho than jiang n tsiv tsorhak na tsothako jilo mekyu chia ekae pilam. 15 Pvüti jina ntho etsoyu jiang 16 kyon shae tsothuki mmen rhukvü n li, ntiotssole hoji ome ji kyon jilo kav. Aiyo OPVÜI ji, ana othan jiang nthoa vanthukala." 17 OPVÜI na Moses yakchia 18 Aaron, Aaron tsoe osi Israel jiang heto shikhfü picho, "Israel osi Israel lo evan jipopoe na phyochaki vancho than lea erungthan lea kvüthüng erungthan pia sana, ekümrümo ji ntia ome n khyingo tüv pivka. 19 Ntia ome n khyingo tüv ekümrümo obung tüv than sanati elonchoyivka. 20 Ntena ekümrümo ome ekhyingo tüv thancho jo OPVÜI na e khichoyiv mek. 21 Ochona sana phyochak than lea, erungthan lea, khümshümta than piana ekümrümo ji ome n khying sanati khichoyiv. 22 Eküm rümo mhyikjung, ojeokhe n penri osi tssatssocho, elani emho tsünga vancho, elani ofü jenrhüpcho khyingo tüv OPVÜI n tham shikhfü. 23 Lüm erungthan jo ekümrümo n bentso tüv lea thankhuka, tolea phyochaki vacho than jo hojitüv jo n thanche. 24 Ekümrümo obung otsüng ji yesocho tüv osi jilo okhfü khyingo tüv ha tithana. Hotüv jo nte meta shilo shikhfü lo nli. 25 Metapoe kyon thüngina khicho ekümrümo khi etsoyuthan ti-tssoa. Hojitüv ekümrümo jo ephyoerüv lia, osi n khichoche. 26-27 Kvüthüng mangsüro, olyuro, osi nyanyan ro nroa sana tsüngon tiying n tssov jo opvü ji thüngi na khi hansi yiv meka, tokhatola hoji sülo jo etsoyuthan khikhuka. 28 Mangsü ompvüroni lea, olyuompvüroni lea, nyanyan ompvüroni lea enga yuta lona ompvüroniata jo thamvü meka. 29 Ntena OPVÜI othan piana shikhfü shiang ephani na thana, tona nte khichoyivka; 30 osi tsüngon tsük jilo tsoe sia, ojyuato jana tilithuka. 31 OPVÜI na phyocho, "Aiyo OPVÜI jika; A yizüng benphitava. 32 A ntho mying ji timmenthuka; Israel kyon topvü na ntho to a chethev shikhfü. Aiyo OPVÜI ji osi ana ntho nte kümthukcho; 33 Ana nte Potsow etssov tsükoan Ejip metae na nte sochecho. Aiyo OPVÜI ji."
Ekhüm Tokhu Jiang
1 Israel jiangna khümtav sanrhyuta thüng tsükona, 2 ekhüm tokhu lo tssolanphyolan jiang OPVÜI na Moses yakchia picho. 3 Ntena nte elhi etssov tsüngon tiruk lia, tokhatola tsüngon tiying to jijo esanmung ka toji ti-mhechotava. Hoji tsüngono jo elhi ti-tssotava tolea sanrhyui khümtava. Ntena shilo vanlea shilo vanlea esanmung tsüngon jijo OPVÜI echhi. 4 Oküpoe tokhu shiang yuta eben lo khitava.
Yakchi Tokhu Tona Vümhi Ntheo Hümri To
5 Yakchi tokhu, OPVÜI Phfütsonthoku tokhu jijo choro ovüngo jilo tsüngon taro mezhüoto ji eng rhecho sülo benkatala. 6 Tsüngon taro mezhüto jilojo vümhi n theo hümri tokhu ji benkatala osi tsüng won tiying jo ntena vümhi thecho hümri tsov meka. 7 Tsüngon shianglo ovüngo jilo jo ntena nte elhi ntia tssov meka tolea sanrhyui khümtavka. 8 Nte etsoyu than jiang tsüngon tiying OPVÜI thantava. Osi tsüngon tiyingo to jilo jo ntena nte eng akvü elhi jiang tssov meka, tolea ntena sanrhyutae khümtavka. 9-10 Kvüthüng OPVÜI na nte pia vamo liko jilo oyi oli joni riana tssukchüng ovüngo jijo owo pvüti pia. 11 Ombona hoji khi echümporo than tssoa OPVÜI pivka, tona ni khichoyivka. Esanmungo ji ojyuato pvüti jina hoji OPVÜI pivka. 12 Ntena ethi-eben than pio ji tsüngono olyuro obung ephyoerüv n pao tüv ha erungthan tssoa OPVÜI pivka. 13 Hoji nzo ntena ohüm ha seri eni Olive thyujü lona nzii etsoyuthan tssoa pivka. Othan ji rhüm jina OPVÜI emathathukala. Elani ntena hoji nzo zükhi ha etükpvü motsünga thantava. 14 Osi ntena OPVÜI n thanthüng jo ethi-eben ethan. jiang, eshü tssolea, richo tssolea mekana vüpi tssolea ti-tsotava. Shijo nte jipo kyon topvü na nchünkhon to benphia evov shikhfü.
Liri Tokhu Ji
15 Ntena tssukchüng OPVÜI thamo ji tsüngon no na hopta tiying eben etsünga. 16 Osi tsüngon tinyamo to esanmung tiyingo to ji sülo tsüngon jilo ethi-eben than OPVÜI pitava. 17 Wopan akvüna hümri eni hansi echümporo than tssoa OPVÜI pivka. Hümri motsüngalo ohüm seri eni ni ren na rüngcho osi ebung mozhü theta rüncgho tüv khi ethi-eben lhochodemo than tssoa OPVÜI pitava. 18 Okho jinaha hoji nzo ephyoerüv n khyingo tüv olyuro nzyua tso, mangsübung motsünga, nyanyan eni to thamka. Shiang ji ethi-eben than ji nzo thamka. Othan shi rhüm ji OPVÜI na chokatala. 19 Elani mmenthan nyanyan bung motsünga, khümshümta than nyanyanro obung nzyua tso tüv eni to thamka. 20 Hojijo OPVÜI echümporo than tssothuka, pvüti jina olyuro eni ji tona hümri ji to thamka. 21 Hoji tsüngono jo nte elhi jiang ti-tssotana sanrhyui khümtava. Nte tsoronichen jiang na kvülo vana sana shikhfü shiang nchünkhon benphivka. 22 Ntena olina ethi-eben jiang lhoathüng litssae elio ethi-eben jiango hae sitava, osi hojiang yana ti-olana; hojiang jo yantsae tona tsan than to jiang echi vanthuktava.
Nzyu Ethan Tokhu
23-24 Choro tiyingo to jilo tsüngon ovüngo jijo echümporo esan tsüngon tssoa mungtava; osi tatara won ji zoana ekhümvü tsü, kona sanrhyutava. 25 Hoji tsüngono jo etsoyuthan ha OPVÜI pitava osi nte elhi jo ti-tssotava.
Thungthan Tsüngon Ji
26-27 Choro tiyingo jilo tsüngon taro to jijo kyon jiang mmen khi siv tsükona nzyua jilo tssolanphyolan opvü ji tssov. Hoji nchuk jo ntena ntia tsov meka; tokhatola sanrhyui khümta etsoyuthan OPVÜI pitava. 28 Hoji nchuk jo nte elhiha ti-tssotava, ntiotssole hoji jo mmen khi esio than epi tsüngon. 29 Ochona hoji nchuk ntiosana tia tsoyua sana ana akyon to khanhyav meka. 30 Elani ochona hoji nchuk elhi tssoa na OPVÜI na ombo chüthoku. 31 Shikhfü shiang jo nte tsoronichen jiangna kvülo vana yiana me ta topvü lona benphivka. 32 Tsüng won tokuoto ji eng erhe lona benkae tsüngon taro to ji eng erhe nandang jo ntia etsoyu n tssona esan tsüngon tssoa mungtavka.
Ranki Tokhu
33-34 Ranki tokhu ji choro tiyingo to jilo tsüngon mongo to jilo na benkae tsüngon tiying khiv. 35 Tokhu ji tsüngon ovüngo jilo jo elhi ntia tssov meka, tolea sanrhyui khümtakhe. 36 Tsüngon tiying ji akvüto ntena etsoyuthan pivka. Osi tsüngon tizao to jilo jo sanrhyutalani khümta etsoyuthan pitavaka. Hojijo ekhüm tsüngon etsso jina ntena ntia elhi tssov meka. 37 (Tsüngon shiang jo ntena ekhümlan tokhu khita, etssyurhyui khümta, etsoyuthan pita, erungthan, ethi-eben than pita ekümrüm than osi zükhi than pita to eng akvüto tssotakhe. 38 Tokhu shiang jo nte tathi than jiang, phyochak than jiang, osi lüm erüng than pitaphen jiang ephalo epio than ka.) 39 Ntena oli jiang rithakana choro tiyingo to jilo tsüngon taro mongoto jilo na benkae tokhu shiang khitava. tsüngon ovüngo jijo esan tsüngon tssovka. 40 Hoji nchuk jo nte tssüngthi dung jiang lona tara lho, Palm wo ndonchaki va, owo khoshao tüv dung lona khero ekhüp toli theta Potsow phfütssonthuko tokhu khitava. 41 Hojito tsüngon tiying tokhutava. Shikhfü shiango nte tsoronichen jiang na kvülo vana sana jilona yuta topvülo benphia wovka. 42 Israel topvü na hoji yutalo tsüngon tiying ranki vamka; 43 hojito tssona Israel tsoronichen jiang na Potsow na Ejip metae na nte sochetathüng hojito ranki nchenta chiyichoka to chekathoku tsükona. Ombo nte OPVÜI Potsow ji. 44 Hetolui Israel kyon jiang na ekhüm tokhu khio jiang yakchia OPVÜI phfütssonthokvü tsükona Moses na kyon jiang thüngi shikhfü shiang picho.
Milon Jiang Kiavanthuka
1 OPVÜI na Moses yakchia shikhfü shiang 2 Israel jiang thüngi picho: Süranki milonpvü jianglo olive thyujü njüm thei milon ji to kia vanthuka. 3 Mmyu akvü Aaron na milon jiang njükatava, osi nthotso meta jilo Ntsata vaphen Bakos ji zonchak ji pomoe OPVÜI vanrhyu jilo enyathüng jana kia vanthuka. Shikhfü shinag jo yuta topvü lo benphia wovka. 4 Shona njüm milondung jilo omi ji Aaron na zeyata OPVÜI vanrhyu jilo kiyata vanthokuka.
Potsow Thamo Hümri Ji
5 Ohüm seri taro eni khi hümri taro eni rünga. 6 Hümri jiang khi OPVÜI vanrhyu jilo shona njüm na eyuko saro ji poni otssa phukowoe tiruk, otssa phukowoe tiruk to reni vata. 7 Oren eniato lo OPVÜI thüngi etsoyuthan chekaphen tssoa tssütsserhüm njüm khi hümri jianglo theta. 8 Nchüngkhonto, esanmung akvü OPVÜI vanrhyu jilo hümri ji vavka. Shijo Israel jiang na nchüngkhonto tssoa evov tsükona. 9 Hümri jijo pvüti jiang tsükona OPVÜI thüngi etsoyuthan pio jiang lo ntsotso ji tsso jina Aaron tona ombo tsoronichen to ejan tssovka.
Ntsa Osi Elan Lona Ezüp Piojiang Ejyuka
10-11 Tsüngonalo kyon tsüka, opo jo Ejip kyon osi oyo jo Israel kyon Dan pvüji Dibri ji otsolov Shelomith to tsa vancho. Ombona okho vanpheni na Israel kyon tsüka thüngi khontacho. Osi khontathüng ombona Potsow rhiyio jina kyon na ombo sotasi Moses thüngi wocho. 12 Osi enhyang küpo ombo vanthuksi OPVÜI na kvüto ombo lyuyiv sana to nhyakta vancho. 13 OPVÜI na Moses ezocho, 14 'Vanpheni na kyon ji sochuka. Osi kyon kvütata na ombona rhiyia zochosana jiang topvüna nlan ombo piv tsükona onte khe jiang ombo kvürilo nyimkata, tosi kyon topvü na ephyatsüngi ombo sia. 15 jitosi Israel jiang ezoa, kyon ochona Potsow rhiyia na hojito khangshia chüthoku ka to. 16 Israel osi pvüjipoe Israel metalo vancho ochona OPVÜI rhiyia na kyon topvüna ephyatsüngi sivka. 17 "Ocho na omüng hana sana ji chüthoku, 18 osi ochona oyam ekümrümo chüthoka na ombo lothoku. Shikhfü ephanina eküm thung eküm khiyiv. 19 "ochona sana oyam tssatssoa tssona ombona ntio tssoyicho sana hoji ephan ombo thüngiha tssoyiv. 20 Oryu motsünga jakina ombo ryu ha motsünga jakiv, omhyik motsünga jukicho tssona ombo mhyik jiha motsünga jukiv, ombona oho motsünga elungicho tssona omboha motsünga ombo elungiv. Ombona kvüto oyam tssatssoyia sana hojito ombo tssoyilam. 21 Ochona ekümrümo lüngthayia sana hoji nliche pithoku, tokhatola ochona kyon eküm khiyia sana ombo chüthokvü. 22 Aiyo OPVÜI nte Potsow ji, shikhfü shijo nte topvü thüngi osi Israel metalo pvüjipoe vamo jiang topvü thüngi benphivka." 23 Moses na Israel kyon jiang thüngi shiang ezole, ontena kyon ji süchoki ephyatsüngi sitacho. Hojito OPVÜI na Moses ezoji esüa Israel jiang na tssotacho.
Nzyu Tiyingo Toji
1 OPVÜI na Sinai phunglani na Moses thüngi ezoa shikhfü shiang Israel jiangna benphiv pile to ezocho. 2 OPVÜI na nte pia evamo meta jilo ntena kvüthüng rheyia sana OPVÜI yikrachi chekav esüa nzyu tiyingo to jilo jo liko ji n jon na hae sivka. 3 Ntena nzyu tiruk jo mojü theta jününgro li jiang nrücheta joncho rücho hanrhyuvka. 4 Tokhatola nzyu tiyingo to jijo esantsü nzyu, OPVÜI lo khochaki evao nzyu tssothuka. Hoji nzyu jo mojü ti thetava osi jüngüngro li jiang ha ti nrüchetava. 5 Ntena n theo okyo lona buko jiang lea ti ria, osi ntena nrücheo jününgro zhü lona ethio jiangha ti-lhotava; nzyu jijo liko ji esantsü nzyu tssovka. 6 Hoji nzyu liko ji n jonlea liko jina etsov chiyithuki nte osi nte phajae jiang, nte yingae jiang, lankon nte nchen kae vamo jiang, 7 nte ekümrümo jiang tona nte li oso woro jiang to tswothukvü. Hojilona ntio chiyia sana tsokhuka.
Rilanta Nzyu
8 Nzyu tiying tüv tiying etsüngi nzyu zhüro si tuku tssothuka. 9 Jisülo jo choro tiyingo to jilo tsüngon taroto ji, rhancho tsüngon jilo kyon tsükana meta nken akvü thenjana tatara khfüa wothuka. 10 Hojito lyui ntena nzyu tinyamo to ji khochaki vanthuka osi meta jilo kyon topvü thüngi etancho lithukvü yithen pivka. Yuta shilojo ejüeli osi tsütsaelan yenthako jiang OPVÜI ovüngo ji khelo mekana tsoronichen jiang khelo yilanthuka, osi ezii yemo jiangha onte wopan thüngi elani yilanthukvüka. 11 Ntena nte li benro thev meka osi ombobo buko jiangha lhov meka elani ntena nrücheo jününgro zhü jiang lona ha tssüngthi lhov meka. 12 Nte tsükona jo nzyu totona nte nthoa vanthukvüka, osi oli jilona ntio tathi chiyia sana jitae tsotavka. 13 Nzyu shilo jo ovüngthüng yenthako tsütsaelan jiang topvü rilani OPVÜI ovüngo ji khelo chiyithukuka. 14 Hoji tsükona ntena kvüthüng kyon Israel thanpoe thüngi shisho khophita sana ntsanrük benphitava. 15 Liko shitao ji man jo shitao jilona benkae rilanta nzyu owo n janthüng kvüta jonchoe tsovsana hoji madangi shitava. 16 Nzyu khosha joni tsophen tssona oman ji tssükav osi nzyu tara tae joni tsov tssona oman ji matarov, ntiotssole oli jilona richowo ji ephan oman khitav. 17 Nte Israel kyon thanpoe jiang ti ejiphitava, osi OPVÜI kyutava.
Nzyu Tiyingo to Jilo Etsov Ji
18 OPVÜI shikhfü yizüng jiang topvüto enga benphitava tona ntena meta jilo noyingroa vanchevka. 19 Liko jina etsson ethiebem ka osi ntena ethev lio jiang benria joncho-rüchovka osi noyinga vanchevka. 20 Nzyu tiyingo to jilo jo ntio tsotavto to ochona sana emhukhoka, ntiotssole hoji nzyu jo mojü n the osi oli n ri. 21 OPVÜI na nzyu tiruko to jilo liko jilona tssona nte mmhayithukvü. 22 Ntena nzyu tizao to ji jonathüng ha nzyu tiruko to jilo richo jiang tsoa jontav, osi hoji nzyu ethi-eben n janthüng jo tssona etsov livka.
Tsütsaelan Pilanta
23 Liko ntena lio jijo nchünkhon nte echi mek, Hoji tsükona nchünkhon tsükona ti yena, liko jijo Potsow echi osi ntena yentsaeden esüa esüngaro hoe tsütsacho tae. 24 Kvüthüng liko yena sana tsüngona lojo OPVÜI jina hoji shilam elan lio ji chekatava. 25 Israel kyon ochosana yantsa lona liko eyamo tssona ombo okilo kyon na shii vav. 26 Hoji shii vayio tüv kyon n vamo jina lea tsüngona lojo pvülyua kümi hoji shicholana likhuka. 27 To tssoa na ombona ovüngthüng khiyio man jilona owo rilanta tsüngon ejam nzyu kvüta liana jilona joncho-rüchov elio ji man ji khakchei siyisi rilamka. 28 Tokhatola ombona rilanta man ji orang tssona n lia tssona owo rilanta nzyu n janthüng jo eshio ji khelo vanthuka. Rilanta nzyu loti opvüo ji khelo chiyilamka. 29 Kyon tsükana yantsü epi chungi oki yena tssona, nzyua süloti rilani khikhuka. 30 Tokhatola ombona nzyua yuta jilo n rilankhuka tssona ombona rilam elan lio ji monala, osi oki ji eshipvüo ji osi ombo tsoronichen jiangna nchünkhon onte echi tssov. Hojijo rilanta nzyu lea n rilanche. 31 Tokhatola epi n lio jiang lo oki yenchocho liko yencho shikhfü onte kheti tssovka. Hotüv jo OPVÜI ovüngo jina rilani khikhuka osi rilanta tsüngono jo OPVÜI ovüngo ji khelo chiyivka. 32 Tokhatola pvüti jipo jiangna jo epichakcho yantsü chungi lea oki jiang yuta thamalo rilani khikhuka, yantsü ji ontena elhi tssoji yantsü jilo tssona. 33 Yantsü motsüngalo pvüti jipo tsükana oki yena tssona osi rilani n khikhuka tssona, owo rilanta nzyu jilojo pvüti jipo ji pilamka, ntiotssole pvüti jiangna Israel kyon jiang yolo oki lio jiango nchünkhon to onte echi to vamvü. 34 Tokhatola pvüti jipo jiangna vamo yantsü ji nkona ero yantsophen li lio jiango kvüthüng ha yem meka, hojiango nchünkhon to onte echi.
Yantsae Epvünomo Jiang
35 Nte Israel kyon yulo ochosana yantsa lona ombo büng tia n chhoa tssona ombo ji nte yingae esüa tsonhya yunhyav lia, tona nte ndüngo vanchevka. 36 Ntia ti khiyina, Potsow kyuchia nte kyon thanpoe jiangji nte ndüngo vanthuka. 37 Ombona orang eno jiloha eran ti khiyia osi nina etsoyu ombo shithuko jilona ha ntia ekhak ti khiyia. 38 Shiang jo Ejip metae na nte sochuko Potsow ochona meta ji nte pia sana osi nte Potsow tssoa sana ji thüngina shikhfü yizüng.
Ezii Jiang Vachi
39 Nte Israel kyon ochosana yantsa lona ombobo ni thüngi ezii etssov yena tssona nina ezii elhi jiang ombo ti tssothuka. 40 Ombona ni yingae ejoe na rilanta tsüngon ji n janthüng nandang jo ni ndüngo vamka. 41 Hoji tsüngono jo ombo osi ombo wopan na niki sisi onte pyimtsü motsüi son oki yana yivka. 42 Israel jipo jo OPVÜI eziiden, OPVÜI na Ejip metae na onte sochukcho, hoji tsükona ezii ejoena onte yemvü meka. 43 Onte ti makshak khonshaka, tolea nte Potsow yi engatava. 44 Ntena ezii ethev lina nte nkonphia evamo jipopoe jiang shitava. 45 Ntena jipopoe nte tsankae vamo jiang ngaro jiangha shikhuka. Hojito jipopoe ngaro nte meta lona buko jiango nte echi tssocheta, 46 osi nte tsorinichen jiang echi vayikhuka. To tssona ontena nchünkhon ezii tssoa nte tsoronichen jiang benkav. Tokhatola nte Israel kyon jiang yolo jo haruk-hashüa ti tsütsatava. 47 Ntonsinato nte yolo evan jipopoe jina eli kümsi Israel kyon tsüka jijo yantsae kümi ombona lea mekana ombo wopan tssolea jipopoe ji ezii küma tssona. 48 Ombo yencho sülo lea rhanlani evam ombo elan lia. Ombo ejenio na, ombo opo ojenio na 49 Ombo opo ojenio na mekana ombo wopan kitsük ochona sana ombo rhancho kuka. To mekana ombona ombobo tssona mmyochoa tssona ombobo rhanchoe etancho vankuka. 50 Ombona ombo eshio kyon ji thüngi engatheta rilanta nzyu ji jamvü nzyu kvüta lia na hoji yuta jilo yingae tsüka ji kvüta epiv etümcho sana hoji tata pilansi etancho vana yiv. 5152 Ombona nzyu enhyoe lio ji ephanina oman ejoma pilansi yivka, 53 Hojijo nzyu nzyu engochoman pia vana rocho ejoena. Ombo OPVÜI jina haruk hasha ombo tsütsav meka. 54 Ombo ji lanka shiang kvütowoe na ha n vachicheta tssona owo rilanta tsüngono ti ombo osi ombo wopan jiang vachiv ka. 55 Israel kyon tsüka ji nchünkhon ezii tssoa yem meka, ntiotssole Israel jipo jo OPVÜI eziiden, ombona Ejip metaena onte sochecho; Ombo onte OPVÜI Potsow ji.
Jancho Ezo Lo Mmha Jüo Ji
1 OPVÜI na phyocho, "Kisü ti nsüngrütava, mekana khümphen tssüng olong ti ndungkachitava osi olong ha duki ti khümtava. Nte Potsow OPVÜI jijo a ka. 2 Nte ekhümlan tokhu jiang lithuka osi a khümphen meta jiang yikrachitava. Aiyo OPVÜI ji ka. 3 "Ntena a shikhfü ephan vana tssona osi a yizüng jiang benphina, 4 ana eryu jiang yuta epen lo nte joyithukvü, hojito lyui liko jina yuta ebenlo ethiebem osi odung jiangna tssüngthi ethiv. 5 Nte joncho rücho pvülyuv osi ntena jününgrothi elhov yuta jana tsünghanrho tssoa vamvü osi tsünghanrho etsso jana jüngüngrothi tsojana vamvü. Ntena etsoyu etsson livka osi nte meta lo noyingroa vanchevka. 6 "Ana nte metalo noying lithukuka, osi ntena ntia n kyuna yipvüka. Ana ekümrümo ekyuthao jiang esani sithukvü osi ritsso ha meta jilo lithukvü meka. 7 Ntena ori pono ekhyo hunguv ka; 8 Nte otsük mongo tssoana ori nzoa khyov osi nte nzoa tssona ori wothüng taro khyovka. 9 Ana otsoeoro elümoto nte mmhayivka; Osi ana ntio phyochaki nte vayicho sana jiang benrathukvü. 10 Ntena elümoto tssukro mümroa richov, osi nzyua etso yaka richoe ethan hanthetathüng ehen jiang hanchukchi siv. 11 Ana ntho ranki jilona nte vanrhyuv osi nte thüngi na yaki yiv meka. 12 Ana nte ndüngo vam osi aiyo nte Potsow tssov, osi nteno a kyonden tssovka. 13 A OPVÜI shina, Ejip metae na nte sochokcho, hoji tsükona enhungo ezii nte n kümlanthuk. Nte sayao etho ji ana tanchi nte siyisi omha khokae nte sanphithukvüka.
Jancho N zo Ji Man
14 OPVÜI na phyocho, "Ntena a yizüng jiang n benphina, nte ezüpthukvü. 15 Ana yizüng nte pio jiang ntena n benphiv osi ete ntsatao ji yesoa tssona, 16 ana nte ezüpthukvü. Ana nte pono tssorophyoro rwothukvü n pocheo nochonori khi omhyik nte jukia osi sangtsüngi esio nochonori nte piv. Ntena mojü thev tolea oman liv mek, ntiotssole nte ri jiangna nte khyoe ntena benro jiang ontena tsov. 17 Ntena oyam n khyo tssoa ana nte lona nkae yivka, osi nte etssak nkong jiangna nte yansavka; osi nte ekhentsüngo jina ochinaha nte n phanlea etsan tae tsamvü ka. 18 "Heto tssoaha ntena elani jancho a nzoyilana tssona, nte ezüp jiang ji yenjo tiying rankathukvüka. i9Ana nte ngangshi ngangri ji nte rosochiyiv; osi meta jilo eryu jwothukvü meka, osi liko jiha yonjak to kyingi karaki sithukvüka. 20 Ntena sanga elhi tsso jiang ntia oman liv meka, ntiotssole nte li jiang lona ntia ethi ebem mek osi odung jiangna ha bentssov mek. 21 "Ntena jitosi süi ha a panlana a yi n nga tssona, ana elani nte ezüp ji yenjo tiying rankalanthokvüka. 22 Ana nte yolo ekyuthav ekümrü rothuki jiangna nte ngaro jiang rümthukvü, nte tssiden jiangha roe sithukvü, osi wozanro tae nte enkhyokae nte lantsü jiang sirhaki sithukvü. 23 "Shiang hetopvü süloha ntena a yi ngav ngangshia tssona, 24 tona ana nte pono phanthi nte ezüpthuk thako tata tiying nte ezüpthuk lamvü. 25 Ntena ete ntsata ji yesoa tssona ana ritsso chiyithuki nte ezüpthukvü osi ntena nlhichov khilato yantsü jiang lo tsantheta tssona ana n pocheo nochonori yithuki nte khangshiv osi nte ri mhadungo epyaktheo nte kümthukvü. 26 Ana nte etsoyu jiang matathuki eloe otsük taro lea mijen motsünga lona tae tssoyancheo tata tae kümthukvü. Ontena nte jantayiv khatola hoji tsothaka na nte wontonlam ka. 27 "Shiang hetopvü sülo lea ntena ngangilana a yi n ngana, 28 ana nte thüngi lüm tsuklani nte ezüp jiang yenjo tiying n mhonkao kyungkalantukvü. 29 Nte wonton era kyongkhüngo ji yakchia ntena nte ngaro jiang tsotav. 30 Ana phunglani nte khümphen jiang roe nte siyiv, osi nte tssütsserhüm rungphen jiangha roe nte siyiv, osi nte echümüng jiang ji nte khümphen kisü jianglo hankae nte siyiv. 31 Ana nte yantsü jiang roe nte siyisi, nte khümphen meta jiangha roe nte siyiv, osi nte than jiangha nte n khichoyi. 32 Ana nte meta ji n pen n khio roe nte siyiv küma nte ri ochoang na nte meta ji phanchoe vanasana jiangna mpato emhoka zev. 33 Ana ntelo ritsso chiyithuki metapoe nzonsorae nte siv. Nte metaji sinki siv, osi nte yantsü jiangha roe ekachi siv. 3435 Jitosi meta jina ntena npio esan ji nzyu sunga esanphyav; nte ji ori khelo vüngi vanathüng na liko jina ha esan khia vamvü. 36 "Nte ochoang oyam khelo vancho sana jiang yolo ana nsüp ekyu rheyithuki mbungna lomoro venphichona lea ritssolo tsanta to nte tsanthoku. Osi ori nte ndüngo n vanlea nte ekhenrhüki nte ekhüngüv. 37 Ochinaha nte n phanlea nte nte sümtsüngta tsam, osi ntena ori kumoe ha n khyo. 38 Nte ji metapoe nte shotherav, osi meta jina nte nzhükham. 39 Nte ri jiang metae nte ejoma enhyokao jiangha nte mmen osi nte pyimtsümotsüi mmen yakchia nte chürav. 40 "Tokhatola nte tsoronichen jiango nte mmen osi nte pyimtsümotsüi ochoangna a panlana mmen tssocho sana osi alüm tsukthoki 41 onte wori jiang metae yithukcho sana jiang mmen jiang phyochaku. , Sülamiti nte tsoronichen jiang na onte bobo teriv kümsanati, osi onte mmen osi panlan manji ezüp sanati, 42 ana Jakob, Isaak osi Abraham thüngi a ntsata ji ntssachoe ana phyochako meta ji nte piv. 43 Tolea ovüng tssoa, meta jilo evamo kyon jiang phani sisi meta ji esan pisav, osi ontena a yizüng n khicho ji man onte ezüpthuksav. 44 To mpa to tssolea, ontena onte ri metae vanathünglea ana jo mhecholangi onte n si osi monrathukijo onte n si. Ntiotssole heto tssoana ana onte thüngi ntsatao ji moni sicho esüa tssoala, ntiotssole aiyo onte Potsow ji. 45 Osi ana onte Potsow tssov tsükona Ejip metae na onte sochuka limha ji a etho ejüo jithüng ana onte pyimtsümotsüi jiang thüngi ntsata vao ji ntssachovka." 46 Shiang hetopvü ji Israel kyon jiang tsükona OPVÜI na Sinai phunglani na Moses pio yizüng jiang.
OPVÜI Than Tsükona Shikhfü Jiang
1 Israel kyon jiang tsükona OPVÜI na shikhfü shiang Moses picho. 2 Kvüthüng kyon tsüka na echümporo tssoa OPVÜI epiv tsükona echümchak vata sana, hoji kyon mo jina orang pita shikhfü shiang ephanina pisanati. 3-7 etancholo vachiv: Eboe eranküm, nzyu mekyu lona rukro nandang: janti rang tinyan eloe eranküm: janti rang thümro Khyingroe, nzyu mongo lona mekyu nandang: Janti rang mekyu Loroe: janti rang taro eboeroro nzyu mongo kupi cho: janti rang mongo eloeroro: janti rang ethüm Eboe eranküm nzyu rokro pomoe: janti rang taro mongo osi eloe eranküm nzyu rokro pomoe: janti rang taro to thev. 8 Kyon tsüka na echümchak vacho khatola yantsa lona shikhfü benria n benchekhuk na pvüti ji thüngi sosi ov, tona pvüti jina zesi kyon jina pikhoko tüv ejo nsüngrüyiv. 9 Echümchak ji ekünirümo ethev zikae vacho tssona, OPVÜI etham vao jiang topvü ntho tsso jina, 10 kyon jina hoji nliche ekümrümo thanpo khi benchev meka. Ombona hojito tssohungna ekümrümo onita OPVÜI echi tssovka. 11 Tokhatola echümchaki vao ekümrümo ji OPVÜI than lo n theo ome khyinga tssona ekümrümo ji hansi owo pvüti ejüa. 12 Tona pvüti jina zesi ekümrümo ji ephan oman tssenchaku küma ji ephan tssovka. 13 Kyon jina hoji shilan hungna oman jilo nzoalo mekyuchia ekalani thesi khivka. 14 Ochona sana ombo kiji OPVÜI than tssoa pina pvüti jina zesi oki ji ephan oman tssenchaku küma hoji ephan khivka. 15 Kipvüo jina oki ji shilani khihungna pvüti jina methako man jiilo nzoalo mekyuchia ekae thesi khivka. 16 Ochona sana ombo liko erüchoe OPVÜI thana tssona pvüti jina kvüta echhen sana zesi hoji ephan oman methaku, mojü seri mekyu echhen lo janti rang taro ren ejoe na methaku. 17 Osi ombona liko jo rhancholan nzyu ji yakchipvü thechicho tssona oman shera tssov. 18 Tokhatola sülaniti thecho tssona pvüti jina zesi rhancholan nzyu ejam kvüta liana ji ephan oman methaku. 19 Liko ji thamo kyon jina shilan hunga tssona oman jilo nzoalo mekyuchia ekae thesi khivka. 20 Tolea Ombona OPVÜI thüngina n shilam oyam thüngi yenchenlani sina ombona shilancheo elan ji moni siala. 21 Rhancholan nzyu etsao jilo jo liko jijo nchünkhon tsükona OPVÜI echi tssothako ji tsükona; liko jijo pvüti jiang na khivka. 22 Kyon tsükana ombona shicho liko OPVÜI thana tssona, 23 pvüti jina rhanlan nzyu ji ejam nzyu kvüta liana ji ephanina oman tssechaku osi kyon jina hoji nchuk na orang ji OPVÜI thamuka, ntiotssole hoji liko man jijo OPVÜI echi. 24 Rhancholan nzyu ji jana na liko ji opvüo ji khelo mekana ombo tsoronichen khelo theyilamvü. 25 Oman topvü shikhfü lo licho ephan tae tssenchakvü. 26 Ekümrümo nrodemo jijo OPVÜI echi to vanthokwo jina hojitüv jo erungthan etssov n li. Olyuro, mangsüro osi nyanyanro nrodemo jiang jo OPVÜI echi, 27 tokhatola n tho ekümrüm nrodemo jiang jo opvüo jina rhancho tsen thesi jilo nzoalo mekyu ekae thesi khikhuka. Osi hoji opvüo jina nshilana tssona shinhung thama na tssenchako tsen jina shikhuka. 28 Kyon lea, ekümrümo osi liko tssolea khochaklangi thei sithako jiango ochinaha n shilanche. Hotüv jo nchünkhonto OPVÜI echi tssothaka. 29 Hojito khochaklangi thethako jiang jo kyonlea shilani n khiche; tolea chüthoki esiv lia. 30 Otssukomüm lea, tssüngthi lonphen oli jilona chiyicho tarochia jijo OPVÜI echi. 31 Ochona sana hojitüv shilani khihung na tssenchaki lio man jilo mekyuchia ekae khiyivka. 32 Oki ekümrümo jiang topvü lona taro yolo motsünga jo OPVÜI echi. 33 Ethanpvüo jinaha ekümrümo thanthako ji mmhon n mhon ethümi ezev n li, elani dongphiv ha n h, osi dongphi hunga tssona onita ntho than OPVÜI picho to vanthuka, osi hojitüv jo shilani n khiche. 34 Shiang jo OPVÜI na Israel kyon jiang tsükona Sinai phunglani na Moses picho.
Israel Jiang Wokhata Ovüngo Ji
1 Israel jiangna Ejip lona yisi nzyu enisi choro enioto tssoa thüng tsüngon ovüngo jilo, Sinai lijüngi na OPVÜI na ombo vanrhyu ranki na Moses ezocho. 2 "Aaron, nina Israel jiang wopan osi jipo ephani na owo khatava. Eboe tso nzyu mekyuna mhawoe 3 rasan elhi tssokhong kvüta vana na omying eranrhyua. 4 Jipo akvü lo na esopvüi tsük tsük zikae ni nzan chito ka." 5-16 Jipo akvü lona esopvüi ethüngcheo jiang mying ji shiang. Jipo Jipo esopvüiden Reuben Shedeur tsoe Elizur Simeon Zurishaddai tsoe Shelumiel Juda Amminadab tsoe Nashon Issachar Zuar tsoe Nathanel Zebulun Helon tsoe Eliab Ephraim Ammihud tsoe Elishama Manasseh Pedahzur tsoe Gammaliel Benjamin Gideoni tsoe Abidan Dan Ammishaddai tsoe Ahiezer Asher Ochran tsoe Pagiel Gad Deuel tsoe Eliasaph Naphatali Enan tsoe Ahira 17 Otsük taro eni shiang na kyochia Moses ha Aaron onina choro enioto tsüngon ovüngo jilo Israel 18 pvüji topvü tsarhyui jipo osi wopan jiang eranrayicho. Nzyu mekyu na pomoe eboe tso topvü 19 OPVÜI yizüng ephan omying erani owo khatacho. Hoji jo Sinai lijüngi na Moses na omying erantao ji. 20-46 Jakob tsokhying erantso Reuben lona benkae, wopan osi jipo ephanina eboe tso nzyu mekyu pomoe rasan elhi tssokhung topvü omying eranicho. Hojiang topvü tsotsüi hetata tssocho. Jipo Owo Rebuen 46,500 Simeon 59,300 Gad 45,650 Juda 74,600 Issachar 54,400 Zebulun 57,400 Ephraim 40,500 Manasseh 32,200 Benjamin 35,400 Dan 62,700 Asher 41,500 Naphtali 53,400 Tsotsüi: 603,550 47 Levi jipo jo oyam nzo n ranhyacho, 48 ntiotssole OPVÜI na heto Moses ezocho, 49 "Nina kvüthüng rasan elhilo rhowothukvü kyon kha sana Levi jipo jo ti-khanhya. 50 Levi jipo jiango a vanhya ranki ji tona jilo tsakalan jiang to ezeden vanthuka. Ontena hoji hanphitavka osi hojilo elhi tssotavka, osi hoji nkonphia nchenphen tssoa wovka. 51 Ntena kvüthüng oyan jilona eseni yia sana Levi jiang na süranki ji luki oyi nchenphen yanthan tssokachilamka. Kyon thanpoe ochoang na süranki ji ndüngo woasana chüthokvü ka. 52 Levi meko Israel jiango okho okho na ombo ombo okho ji riven donkachi vantavka. 53 Tokhatola kyon ochinaha süranki jilo woe a lüm etsuk lona okho topvü n sithokvü tsükona Levi jipo jiang na süranki ji rhüa nchenphen tssoe nhyakta vamvüka." 54 Hojito OPVÜI na Moses yizüng pio jiang ephan Israel kyon jiangna tssocho.
Nchenphen Jiang Lo Pvüji Jiang Nlansüng
1 Moses ha Aaron oni thüngi OPVÜI na heto ejü-rünyo picho. 2 Kvüthüng Israel jiang na nchenphen tssoa sana eboetso otsük akvü na ombo ombo khümtsüng riven ji kupi nchenphen jiang tssovka. Nchenphen jiang ji süranki ji füchüma tssovka. 3-9 Engkhüwoe jo Juda khümtsüng riven ji küpo nchenphen jiang onte esopvüi shiang nzi etssirhyuvka. Jipo esopvüi Owo Juda Amminadab 74,600 tsoe Nashur Issakhar Zura tsoe 54,400 Nathanel Zebulun Helon tsoe 57,400 Eliab Tsotsüi: 186,400 Juda rasan na ovüngo ji tssoa khochivka. 10-16 Jüjowoe jo Reuben khümtsüng riven ji küpo etssoe jiang na onte esopvüi shiang nzo etssirhyuvka: jipo esopvüi Owo Reuben Shedeur 46,500 tsoe Elizur Simeon Zurishaddai 59,300 tsoe Shelumeil Gad Deuel tsoe 45,650 Eliasaph Tsotsüi: 151,450 Reuben rasan na okho enioto ji tssovka. 17 Hojito rasantsü rakho ovüngo eni ji tona sülamo eni ji to yutalo Levi jipo tssothuki a vanrhyu ranki ji ejümtavka. Rasantsü okho akvü na kvüto etsünga nchencho sana ji ephan etsüngi ombo ombo riven küpo na khochivka. 18-24 Engrhewoe jo Ephraim jipo riven ji küpo etssoe jiang na ombo ombo esopvüi nzo shiang ephanina nchemka: Jipo esopvüi Owo Epharaim Ammihud 40,500 tsoe Elishama Manasseh Pedahzur 32,200 tsoe Gamaliel Benjamin Gideoni tsoe 35,400 Abidan Tsotsüi: 108,100 Okho ethümo toji jo Ephraim rasantsü na tssovka. 2531 Jükiwoe jo Dan jipo riven ji küpo etssoe jiang na ombo ombo esopvüi jiang nzo nchemka. Onte esopvüi jiang küpo kyon jiang ji shiang esüa tssocho: Jipo esopvüi Owo Dan Ammishaddai 62,700 tsoe Ahiezer Asher Ochran tseo 41,500 Pagiel NaphtahEnan tsoe 53,400 Ahira Tsotsüi: 157,600 Dan okho rasantsü jina sülantso ji tssoa khochivka. 32 Khümtsüng khümtsüng na owo khatacho Israel rasan topvü tsotsüi 603,550 tssocho. 33 OPVÜI na Moses yizüng pio ji ephan Levi jipo jiango Israel thanpoe jiang nzo omying n ranhyacho. 34 Hojito OPVÜI na Moses ezowo jiang topvü Israel kyon jiangna tssotacho. Onte topvüna ombo ombo riven küpo nchentacho, osi ombo ombo jipo ephan khochicho.
Aaron Tsokying Jiang
1 OPVÜI na Sinai lona Moses thüngi jantao jithüng Moses ha Aaron oni wopan vamo jiang shiang. 2 Aaron na tsokhying mezhü vancho: Nadab jo erantso ji, Abihu, Eleazar, tona Ithamar to. 3 Onte ji pvüti etssov tsükona thyujü nzüyia nthochaki vacho, 4 tokhatola Nadab ha Abihu onio Sinai lijüngi na n tho mi khi OPVÜI thancho ndana chüthokcho. Oni chüche tsokhying n vamo jina Aaron evanthüng nandang jo Eleazar ha Ithamar onina pvüti tssocho.
Pvüti Jiang Phajae Tssothokvü Levi Jiang Ethüngchecho
5 OPVÜI na Moses ezocho, 6 "Levi pvüji ji sosi oyi pvüti Aaron phajae tssothuka. 7 Ontena a vanrhyu ranki jilo tsakasüka elhi jiang tssovka osi pvüti jiang tona kyon topvü to tsükona elhi tssovka. 8 Süranki jilo tsakalan topvü ontena sayata hojilo elhi topvü ontena Israel topvü tsükona tssoyivka. 9 Levi jiang elhi jo Aaron tona ombo tsoe jiang to benkav jitae. 10 Nina Aaron tona ombo tsoe jiang to pvüti elhi etssov zikata osi kyon thanpoe ochona hoji tssoa sana chüthokvü." 11 OPVÜI na Moses ezocho, 12-13 "Enhungo Levi kyon jiang a echi ka. Ana Ejip metalo tsokhfü jiang chüthoka thüng Israel wopan akvü lona tsokhying ovüngo ji tona ekümrümo nrodemo jiang tojo a echi tssoa khochaki vacho. Enhungo hojiang dungche jo ana Levi kyon jiang hoe vatala; Onteno a echi tssovka. Aiyo OPVÜI ji."
Levi Jiang Owo Khata
14 Levi jiang ombo ombo wopan osi jipo ephani na owo khae 15 eboetso choroa tona jilona rankathako to etsa omying eranile to OPVÜI na Sinai lijüngi na Moses ezocho, 16 osi Moses na hojito tssocho. 17-20 Levi na tsokhying onthüm vancho: Gershon, Kohath, tona Merari to, shiang jo pyimtsümotsüi mying ejamo khümtsüng jiang. Gershon na tsokhying oni vancho: Libni tona Shimei to; Kohath na tsokhying mezhü vancho: Amram, Izhar, Hebron, tona Uzziel to; Osi Merari na tsokhying eni vancho: Mahli tona Mushi to. Shiang jo wopan onte mying ejana motsüiden jiang. 21 Gershon jipo jo Libni wopan tona Shimei wopan to tsotsüi kümcho. 22 Eboetso choroa lona ranka cho tsotsüi 7,500 erantacho. 23 Jipo jijo engrhewoe, süranki ji sülamoe nchemo tssocho, 24 osi onte yolo jiporan jo Lael tsoe Eliasaph tssocho. 25 Onteno süranki ji tanünga ezev elhi jancho, hojilo eyuk ochungo tona eyuk opomo, elani kipüng zonchak ji, 26 ranki ji hapoe füa zonchako ji, thanphen sa zonchak tona, hapoe füa zonchak jilo kipüng zonchako ji to. Shiang hetopvü ezev ji onte enhikacho. 27 Kohath jipo jo Amram, Izhar, Hebron tona Uzziel to wopan jiang tsotsüi kümcho. 28 Eboetso chorao osi ji pomoe jiang topvü tsotsüi 8,600 erantacho. 29 Jipo shi jo süranki ji jolowoe nchemvü ezocho, 30 osi onte jiporan jo Uzziel tsoe Elizaphan tssocho. 31 Onte elhi jo Ntsata thephen Bakos ji, saro ji, milondung ji, thanphen sa jiang, pvüti jiangna ntho chungchaki tsütsao oyo-opvü jiang, tona nthotsowo jilo rhowolani zonchak ji to. Shiang hetopvü ethelan jiang zeyav zikacho. 32 Levi jiang yolo OPVÜI jo pvüti Aaron tsoe Eleazar ji. Ombo ntho chungchak jilo lhitssoe jiang ezepvüi ji. 33 Merari jijo Mahli tona Mushi to wopan jiang tsotsüi kümcho. 34 Eboetso choroa tona ji pomoe to jiang tsotsüi 6,200 erantacho. 35 Jipo shijo süranki ji khümkiwoe nchemvü ezocho osi onte jiporan jo Abihaiel tsoe Zuriel ji tssocho. 36 Onteno süranki khiron jiang, nkho jiang, durhyu jiang, ephyu jiang tona hojiang topvü chüngta jiang to. Shiang hetopvülo ethelan jiang onte zikacho. 37 Elani onteno zonchak opomo jilo durhyu, ephyu, lendan tona shenzhü to jiangha ezev zikacho. 38 Moses tona Aaron to na ombo tsoeden tojo engkhüwoe, süranki ji mhadungoe nchemvü ezocho. Onteno Israel kyon jiang tsükona elhi ntho chungchak jilona etssov jiang zikacho. Thanpoe ochona elhi shi tssoana chüthokvü licho. 39 Levi kyon eboetso choroa tona ji pomoe to Moses na OPVÜI yizüng ephan jipo ephani na eranrhyuo jiang tsotsüi 22,000 tssocho. Levi Jiangna Tsokhfü Jiang Thung ji Tssocho 40-41 OPVÜI na Moses ezocho, "Israel tsokhying tsokhfü to etsa a echi tssovka. Hoji tsükona Israel tsokhying tsokhfü topvü choroa tona hoji mhawoe to jiang eranrhyua. Tokhatola onte thung ji Levi kyon topvü a echi tssovka! Aiyo OPVÜI ji! Elani ana tsibung nrodemo jiang thung tssoa Levi jiang topvü a echi tssoala." 42 Moses na hoji engae tsokhfü topvü choroa 43 tona ji pomoe to etsa erancho tsotsüi 22,273 tssocho. 44 OPVÜI na Moses ezocho, 45 "Israel tsokhfü topvü thung ji Levi jipo jiang a echi tssoa nthochaki a vayia, elani Israel jiang tssibung nrodemo ji thung tssoa tssiden topvü methaki nthochaki a vayia. 46 Israel tsokhfü topvü tsotsüo ji owo 273 na Levi jiang lona kyungkao ji tsükona enhyo jiango nina rhanlani vavka. 47 Shikhfü lo lio ji ephan tsükalo janti rang mongo ren, zii orang ji Aaron tona ombo tsoe jiang to pia." 48 Moses na hoji engayicho osi 49 janti rang tsotsüi 50 1,365 ji khi 51 Aaron tona ombo tsoe jiang to picho.
Kohath Tsochen Levi Jiang Elhi
1 Kohath tsochen Levi jiang ji, 2 wopan osi nkhük ephanina eboetso nzyu thümro tona tinyan to yutalo 3 kvüta na OPVÜI vanrhyu jilo elhi tssokhoka na jiang owo khae omying eranile to OPVÜI na Moses ezocho. 4 Onte elhi jo elümoto ntho elhi thenhya tüv jancho. 5 OPVÜI na Moses ji heto tssole to ezocho. Kvüthüng nchenyan esena sana jithüng Aaron tona ombo tsoe jiang to na süranki jilo rhovo Ntsata Bakos ji mhadungoe zonchak ji khichoe Bakos ji eyukvü ka osi 6 hoji poni sofü enyipvü eyukae ji pomoe ejümsü eyukalani tosanati ejümphen khora jiang thevka. 7 Tosi hümri khi OPVÜI thana thüng ekachiphen saro jilo ontena ejümsü sakae ji poni ophi jiang, tssütse rungphen phikuk jiang, othan thephen phikuk jiang, zükhi thephen ojen jiang to ekachivka. Saro ji poni yuta topvü lo hümri ekachi vanrhüv ka. 8 Ontena shiang poni sümyon eyukae ejümphen khora jiang thevka. 9 Ontena ejümsü khi milondung ji tona milon jiang, mmyakaphen jiang, elonphen phi jiang, tona olive thyujü pvü jiang to topvü tsotsüi eyukvü ka. 10 Ontena hojilo tsakalan topvü benria thei sofü enyipvü na eyuki ejümphen ronrio jilo thevka. 11 Hoji sülo jo ontena shona thanphen sa jilo ejümsü eyukav, ji poni sofü enyipvü khi eyukav tosi khora jiang thechiv. 12 Ontena ritho chungchak jilo oyo-opvü jiang khi ejümsü na eyuki, ji poni sofü enyipvü eyukae ejümphen ronri jilo thev. 13 Ontena thanphen sa jilo live valako jiang shae sisi ji poni sümüngzhüv eyukae siv. 14 Thanphen sa jilo tsütsao oyo-opvü jiang, nghiriphfü jiang, yichukphen jiang, thanphiphen jiang tona jükuk jiang to sümüngzhüv ji poni ekachivka. 15 jitosi ontena ji poni sofü enyipvü eyukae tosanati khora jiang thevka. Osi nchenyan senphia na Aaron ha ombo tsoe jiang to na ntho tsütsaelan jiang tona jilo tsakalan jiang to mmhona eyuksanati Kohath pvüji na oro hoji ejümtavka, Kohath pvüji kyon najo ntho tsütsaelan jiang n vüngkache, ontena evüngkacho jo onte chüvka. Süranki ji senphia Kohath pvüji elhi jo hojiang tssovka. 16 Aaron tsoe Eleazar ji elhi jo süranki ji totona, milon jiang, thyujü jiang, tssütsserhüm jiang, otsuk-omüm than jiang, nzüyiphen thyujü ji tona süranki jilo tsütsaelan kvüta OPVÜI lo nthochaki vacho sana jiang topvü ezev ji. 17 OPVÜI na Aaron ha Moses oni ezocho, 18 "Kohath pvüji jiang ji ntho tsütsaelan shiang, 19 ndüngo rocho jo chüvka ti-rothuka. Osi shi tanglanchiv jo Aaron tona ombo tsoe jiang to na süranki rhovo Kohath pvüji jiangna otsük akvüna ntio ejümvü sana ezoa, 20 tokhatola ontena rhowo ntho tsütsaelan jiang senphiv oha tssoa vamo jiang hunga tssona, onte chüv."
Gershon Tsochen Levi Jiang Elhi
21 OPVÜI na Geshori tsochen Levi pvüji kyon jiang, 22 opan nkhük ephani na owo khale to Moses ezocho, osi nzyu thümro tona tinyan to yuta jilo 23 eboetso kvüta OPVÜI vanrhyu süranki jilo elhi tssokhuka na jiang eranrhyule to ezocho. 24 Onteno tsütsaelan shiang ejümvü zikatala. 25 Süranki ji, hoji eyuk ochungo ji, eyuk opomo ji, ji poni sofü enyipvü eyukaphen ji, rhowolani zonchaksü ji, 26 süranki jiha, thanphen jiha oni füa epichako jilo wozhü tona zonchaksü jiang, epichak jilo rhowolan jiang zonchaksü jiang, hoji zonathüng eshentan osi thanpo tsakalan jiang to ejümvüka. Shiang hetopvü tsükona elhi jiang ontena tssovka 27 Elani Aaron tona ombo tsoe jiang to na onte zikao jiang, Gershon kyon jiang na tssetssoa sana ji Moses ha Aaron onina zevka. 28 Süranki jilo Gershon kyon jiang elhi jo shiang tssovka, ontena Aaron tsoe Ithamar ji lanso ephan shiang topvü tssovka.
Merari Tsochen Levi. Jiang Elhi
29 OPVÜI na Moses ji Merari tsochen jiang wopan nkhük ephani ha owo khale osi eboetso nzyu thümro tona tinyan to yutalo 30 kvüta OPVÜI vanrhyu süki jilo elhi tssokhuka vancho sana omying eranile to ezocho. 31 Ontena süranki jilo ejümphen ronrio jiang, nsü jiang, durhyu tona ela jiang, 32 elani füchak opomo jilo durhyu, ela, eshentan, tona füchak jilo wozhü, jiang elani hojiang zonkachiv lo tsakalan topvü to ejümvü ji onte elhi tssovka. 33 Süranki ji ejümtathüng Merari pvüji ji elhi jo heto tssovka, osi ontena pvüti Aaron tsoe Ithamar lanso küpo na shiang tssovka.
Levi Jiang Wokhata
34-48 OPVÜI yizüng ephani na Moses, Aaron tona okho lo esopvüi jiang to na Levi pvüti ethüm, Kohath, Gershon, tona Merari to jiang owo khatacho. Ontena wopan nkhük ephani na owo khae hojilo eboetso nzyu thümro lona tinyan yutalo kyon kvüta na OPVÜI vanrhyu ranki jilo elhi tssokhokcho sana jiang ji hetata khachecho. Pvüji Owo Kohath 2,750 Gershon 2,630 Merari 3,200 Tsotsüi: 8,580 49 OPVÜI na ezo ji ephan eboetso topvü erantacho, osi OPVÜI na Moses ezoji ephan otsük akvü ombo ombo elhi, ejümvü mekana benka elhi jiang jantayicho.
N thono Kyon
1 OPVÜI na Moses ezocho, "Israel kyon jiang ezoa, 2 kyon ochona ratsü na eno mekana otsüko mmen eyi yuta osi echümüng to jiang evüngkata sana jiang topvü pikhfü pomoe phanchukchi sitoka. 3 Ana vanrhyuo nchenyan ji n menthoku tsükona n tho kyon hetüv jiang phanchukchi sia."4 Israel jiang na OPVÜI yi enga hotüv kyon topvü phanchukchi sicho.
Wori Elhi Jiang Tsükona Lolan
5 OPVÜI na Israel kyon jiang tsükona shikhfü heto picho. 6 Kyon ochona OPVÜI jancho n zov oyam tachia woricho sana, 7 ombona ombo mmen ji phyochaksi ombona ocho tachia woricho sana ji thüngi hoji tssen-nli jilo nzoalo mekyu ekae pilamka. 8 Tokhatola ombona tachio kyon ji chüthaksi hoji wopan ha n van na tssona otssen ji pvüti jiang echi tssothokvü tsükona OPVÜI thani sivka. Otssen shijo ori pvüo kyon ji, nthoche elhilo theo olyubung ji ephalo ekata thev. 9 Elani Israel kyon na echümporo ekhya kvüta OPVÜI piana jiha pvüti jiang echi tssovka. 10 Pvüti otsük akvüna ombo khelo etheo than ji ombo echi tssoa khivka.
Orapvü Jiangna Engh Jianglo Hungkarenka Liathüng
11 OPVÜI na Israel kyon jiang thüngi püngnoyi shiang 12-14 pile to Moses ezocho. Engh jina orapvü ji n yikarchiv oyam thüngi ori khi ompvüpo mmenthaka to orapvü jina hungkarenka likhuka. Tokhatola engh jina mphoa vamo jina osi ochinaha ehungpvüi n piyi, elani hojitüv elhi tssoa ochinaha ompvü n rhüma to etsso jina orapvü jina mmhona n tsiv vankhuka. Mekana ompvü na nlan n tssolea orapvü jina hungkarenkata vankhuka. 15 Tolea otsotso tssolea, ejüng hungkalea, eboe jina eloe ji sosi pvüti thüngi wov. Ombona shikhfü lo lio ji esüa ohüm chencho ha seri motsünga hamvü, tokhatola hojilo thyujü mekana tssütsserhüm ntia n thev shikhfü, ntiotssole hoji jo hungkarenka lia evan orapvü tsüka na ntsa ji oponi chiyithokvü othan picho tae tsso jina. 16 Pvüti jina eloe ji sosi owo thanphen sa ji mhadungo mangthukvü. 17 Ombona chonphfü lo ntho jü tara thei, OPVÜI vanhyu ranki tapvüi na ochon tara khi jilo thei ojü ji ekhov kümthokvü. 18 jisülo jo ombona eloe ji tssan ji lanpheyisi ohüm than ji ompvü khelo theyiv. Pvüti jina ojü ekhov kümoe na rhiyikao etho licho sana hoji ombo khena bemvü. 19 Jitosi pvüti jina heto echümchakyi khi eloe ji elonchotokvü, "Nina efürama n tssocho tssona ojü shina ni tssatssov meka. 20 Tokhatola nina efürama benphicho tssona, 21 OPVÜI khi ni mying ji okholo rhiyikao mying kümthuka. Osi ombona ni tsobukphen ji epyimkae sithuksi ni mman ji bümkachitokvüka. 22 Ojü ekhov shina ni mmani rheyi ni mman ji bümachithuksi ni tsobukphen ji epyimkae sithuka." Tona eloe jina phyov, "Ana hoji khichoala; OPVÜI na hojito tssothuka." 23 Jitosi pvüti jina rhiyirandanka yi shiang erankae, hoji ojü ekhov jilona epyothechivka. 24 Osi pvüti jina ojü kümoe na eloeyuthoksi jina mman na ompvü nnothuthüng, 25 pvüti jina eloe ji khelo ohüm than bemo ji khi OPVÜI nthochaki pia ekhyonkae bensi thanphen ji poni ekachiv ka. 26 Jitosi ombona othan jilo na ezüma khichei cheka' than tssoa thanphen ponina rungi OPVÜI thamvüka. Osi wokhao tssoa ombona ojü ekhov ji eloe ji yuthokvüka. 27 Ompvüna efürama tssocho tssona, ojü ekhov jina mman na eno benkav, ompvü mman ji büma osi tsobukphen ji epyimkae siv. Osi Ompvü mying ji ompvükyon jiang yolo rhiyikao mying kümi siv. 28 Tokhatola ompvü ntsa licho tssona, ompvü n tssatsso osi ompvü na ezüp n lina otsoero liv. 29-30 Shijo orapvü jina omhyik rakia engh ji hungkarenka liathüng tsükona shikhfü. Eloe ji OPVÜI vanrhyu ranki ndüngo mangthuki pvüti jina shiang elhi tssoe epyochethokvü osi pvüti jina tssolan shiang benchev. 31 Orapvü jijo n lan n pi, tokhatola eloe jina n lan lichocho ompvü na ezüp ji khiv.
Nazerite Kyon Kümvü Tsükona Shikhfü
1 OPVÜI na ejü-rünyo Israel jiang pile to Moses ezocho, 2 Eboe osi eloe ochona eküm khochaki Nazerite kyon kümi OPVÜI benkav echümchaka sana 3 ombona soko osi tssüngthijü züran ntia yuv meka. Ombona jününgrothi jü ntia yuv meka osi jününgrothi ha eyi lea nkongcho lea ntia tsov meka. 4 Ombona Nazerite to ejani evanthüng nandang jo jününgrothi lona chiyicho ofü osi otsüng lea ntia tSoyuv meka. 5 Ombona Nazerite echümchak ji küpo evanthüng nandang jo otssan ha n tssü, menhüm ha n tssü tona vamvüka. Ombo yuta ere OPVÜI lo khochaki vamka osi ombo otssan tona menhüm tOPVÜI hamka. 6"7 Ombona Potsow lo khochaki vana vamoji chekav jijo otssan ji, hoji tsükona ombona echümüng ndüngo woe ombobo mmemvü meka, opo echümüng lea, oyo, ojenio, opyae osi oka ota echümüng to lea ndüngo wov meka. 8 Ombona Nazerite to evanthüng jo ombo OPVÜI lo khochaki vanala. 9 Nazerite jina kyon thama na chücho tüv ndüngo woe ombo tssan ji mmenthuka tssona tsüngon tiying sülo otssan ji, menhüm ji to tssüi sivka, tona ombo ntssüngchevka. 10 Tsüngon tizaoto jilo ombona yukhyu eni mekana vefü eni hansi oro OPVÜI vanrhyu kipüng jilona pvüti ji pivka. 11 Pvüti jina woro motsünga ji mmen than piyiv osi motsünga jo erungthan piyiv, hojito lyui ombona echü ndüngo owo ji ntssüngchei ombo siyiv. Hoji tsüngonona kyon jina ombo tssan ji nthochak lani 12 ombo yuta topvülo Nazerite to khochaki pilamvü. Ombona ovüngthüng khochaki vamo jijo n khayi ntiotssole ombona otssan nthochako ji mmenthuko jina. Osi worio ji than tssoa ombona olyu oro nzyuatso tüv khi thamka. 13 Kvüthüng Nazerite tsükana ombo echümchak ji benthaka sana shikhfülo tssolan elio jiang tssovka. Ombona OPVÜI vanrhyu kipüng jilo owo ekümrümo ethüm thevka. 14 Erungthan tssoa olyuro obung nzyuatso ephyorüv n pao tüv khiv, mmen than etssov tsükona olyu okyuro nzyuatso, khümshümta than to tsükona olyu obung tüv to khivka. 15 Ombona hümri ha vümhi n thena rüngcho tüv loksa motsünga thamvüka; Hojijo hümri jiha chilüma olive thyujü theta rüngcho tona porov olive esekata rüngcho to ephalo tsünghanrho tona zükhi thathi thanphen ji to thamka. 16 Pvüti jina shiang hetopvü khi OPVÜI pia mmen than tona erungthan to ji thamvüka. 17 Ombona olyu obung ji khi khümshümta than tssoa hümri jiang to nzo thamka, jitosi ombona tsünghanrho tona zükhi to than jiang ha pivka. 18 Nazerite jina oro OPVÜI vanrhyu ji kipüngona ombo tssan ji tssüi khümshümta than runga vamo jilo thechi runguka. 19 Kvüthüng olyu obung ji epvüso ji mhena sana pvüti jina khichei, hümri chilümo ji tona poro motsünga to loksa jilo na khichei Nazerite ji khelo theyivka. 20 Tosi pvüti jina hoji khi echüporo than tssoa OPVÜI piv, osi shiang jo othan echümporo tssoa pvüti ji pio ji. Shijo olyu obung ji shyuro ji tona ojo jiang to thathi pvüti ejan ji ephalo pio ji. Hoji sülojo Nazerite jina zükhi yukhuka. 21 Shiang jo Nazerite tsükona shikhfü jiang, tokhatola Nazerite jina ombona thamvü elio ji pomoe epiv phyochak licho tssona hoji benthuka.
Pvüti na Mmha Randanka
22 Aaron tona ombo tsoe to jiangna 23 Israel kyon jiang mmha randankatathüng heto randanle to ezole to OPVÜI na Moses ezocho: 24 OPVÜI na nte mmhayia osi nte zeyathukvüka; 25 OPVÜI khi nte nzana nte khonzanthukuka; 26 OPVÜI na nzan khi nte zekata noying nte pithukvüka. 27 OPVÜI na phyocho, "Ontena kyon mmhayiv a mying theta randankata tssona ana onte mmhayivka."
esopvüi Jiang Than
1 Moses na OPVÜI vanrhyu ranki ji tssokachioji tsüngon jilo ombo na ranki totona jilo tsakalan jiang, thanphensa ji tona jilo tsakalan jiang to topvü thyujü nzükata nthochaki vacho. 2 Jitosi jiporan ochoang na Israel pvüji lo esopvüi tssocho sana osi owo khata lo ezepvüiden tssocho sana jiangna, 3 onte yantso shiang hantasi OPVÜI thüngi wotacho: zotoro tiruk osi tssibung tari eni, esopvüi otsük eni lo zotoro motsünga tona tsükalo tssibung motsünga to. Ontena hojiang thanthaka na, 4 shiang ji khichoe OPVÜI vanrhyu ki jilo ethelan tsükona vale to 5 Levi jiang otsük akvü elhi ji ephan zesi jiang pile to, OPVÜI na Moses ezocho. 6 Hoji tsükona zotoro jiang tona tssibung jiang to Levi jiang picho. 7 Moses na zotoro eni, tssibung mezhü to Gershon jiang picho, osi 8 zotoro mezhü osi tssibung tiza to Merari jiang picho. Osi onte elhi topvü ji Aaron tsoe Ithamar na olan soa tsswothukvü ezocho. 9 Tokhatola Moses na Kohath kyon jiango ntia n picho, ntiotssole ntho tsütsaelan jiang ezev osi onte epvüi na ejümo tüv zikao jina. 10 esopvüi jiangna elani thanphensa ji nthochev ha tsütsaelan hansi rotacho. Ontena onte yantso jiang thanpheni evav methakale OPVÜI na, 11 heto Moses ezocho, "Tsüngon taro eni tsükona esopvüi tsükalo engakvüto yantso pia than phen ji nthoche elhi tssothuka." 12-83 Ontena othan jiang heto hansi rotacho: Tsüngon Jipo esopvüi Ovüngo Juda Amminadab jilo tsoe Nahshon Enio to Issachar Zuar tsoe Nathenel Ethümo Zebulun Helon tsoe to Eliab Mezhüo Reuben Shedeur to tsoe Elizur mongo to Simeon Zurishaddai tsoe Shelumiel Tiruko to Gad Deuel tsoe Eliasaph tiyingo Ephraim Ammihud to tsoe Elishama Tizao to Manasseh Pedahzur tsoe Gamaliel Tukvüo Benjamin Gideoni to tsoe Abidan Taro to Dan Ammishaddai tsoe Taro ekhao to Taro enio to Ahiezer Asher Ochran tsoe Pagiel Naphtali Enan tsoe Ahira Otsük akvü than ji esüta hansi roracho; Janti pvü seri 1.5 mmyinga tüv, tona janti phikuk 800 to shikhfü lo lio ji ephan füi onita ji ohüm tona thyujü to nzitsücho na pyingthukrae otssuk omüm than etssov vav; shona phi mmyingi gram 110 ji tssitsserhüm na pyingthuk; tssibungro motsünga, olyubung motsünga, olyu nzyuatso to, mmen than tsükona nyanyan motsünga, khümshümta than tsükona tssibung eni, olyu bung mongo, tona nzyuatso olyuro mongo to hansi rov. 84-88 esopvüi otsük taro eni jina thanphensa ji nthochev yantso hansi ro jiang tssotsüi: janti pvü taro eni tona janti phi taro eni to tssotsüi mmyingi seri 27.6 shona phi taro eni, mmyingi tssotsüi seri 1.32, topvü tssütsserhüm na pyingi Tssibung taro eni, olyubung taro eni, nzyuatso olyuro taro eni tona nzo otssuk omüm than thei erungthan piv ji mmen than tsükona nyanyan tari eni, tssibung mekyusi mezhü, olyubung rukro, nyanyan rukro, olyuro nzyuatso rukro, to tssoe khümshümta than piv ji 89 Moses na OPVÜI thüngi thyutalo ranki rhowole, echo khyingo ekümrümo ji woni yuta lo Ntsata Bakos ji elhüp ji poni na OPVÜI na ombo jana Moses na zocho.
Milon Ji Evav
1 OPVÜI na Moses ozocho, 2 "Aaron na kvüthüng milon tiying ji ndungkachia sana omi jina mhadungoe tüngrachio tssoa ndungle to ezocho." 3 Aaron na hoji ephan milon ji ndungkaphen jiwoe zechiwo vacho. 4 Milondung jijo OPVÜI na Moses ezowo ji ephanina mmyoe na ndüng ejan shona na jocho.
Levi Kyon Jiang Nthoche Osi Nthochak
5 OPVÜI na Moses ezocho, 6 "Israel jiang yolo na Levi jiang khochak thuki heto nthochei onte vanthuka 7 nthoche jü onte erhikata osi onte tsüko otssan topvü tssüi sisi mpensü jiang etssüi sitale to ezoa, tona onteno shikhfü ephan ntssüngchethaka. 8 Jitosi ontena mangsübung oro motsünga khi, ethi-eben than ohüm jilo thyujü nzükae, elani mmen than tssibung motsünga khilam ka. 9 Tothakana Israel woro topvü etssirhyuthuki Levi jiango a vanrhyu ji ki mhadungo mangrav ka. 10 Israel kyon jiang topvü na onte khe ji Levi jiang kvüri lo nyimkavka, 11 Jitosi Aaron na Levi jiang ji Israel kyon jiang thüngi na echümporo yantso a picho esüa nthochaki a elhi tssoa vanthukvüka. 12 Tothakana Levi jiangna onte khe jiang tssibung eni jiang kvüri lo nyimkayisi motsünga jo mmen than, motsünga jo erung than to pia Levi jiang nthochevka. 13 "Levi kyon jiango a tsükona echümporo yantso esüa vanthuksi Aaron tona ombo tsoe jiang to khi onte ezepvüi tssothuka. 14 Levi jiang ji Israel jiang yulona hetolui khochaki a echi to vanthuka. 15 Ntena hojito nthochei khochaki vanthuk sanati ontena a vanrhyu ranki elhi tssovka. 16 Israel jiang tsokhfü jiang thung tssoa ana onte hoe vatala hoji tsükona onteno a echi tae tssovka. 17 Ana Ejip lo tsokhfü jiang topvü chüthukathüng Israel jiang wopan lo tsokhfü tona onte ekümrümo nrodemo to jiang a echi hoe vacho. 18 Enhungo ana Israel jiang tsokhfü jiang thung ji Levi shiang khiala, 19 osi ana Levi jiang ji Israel jiang thüngi na echümpo a yantso cho esüa Israel jiang tsükona a vanrhyu ranki jilo elhi etssov, osi Israel jiangna ntho meta jilo roathüng onte tssatssov lona onte nkochev tsükona ana onte ji Aaron tona ombo tsoe jiang to khelo theyiala." 20 Hojito OPVÜI na Moses ezo ji ephan, Moses tona Israel kyon topvü to tssoe Levi jiang nthochaki vatacho. 2i Levi jiangna onte popo nthochei mpensü jiang etssütasi sülo jo Aaron na onte ji OPVÜI tsükona echümporo yantso tssoa nthochaki vanthukcho. Ombona onte nthoche tssolan lio jiangha tssocho. 22 OPVÜI na Levi jiang tsükona ntio Moses ezocho sana topvü kyon jiangna tssocho. Hojito Levi jiang ji Aaron tona ombo tsoe jiang to küpo na OPVÜI elhi etssov etümthukcho. 23 OPVÜI na Moses ezocho, 24 "Nzyu mekyu mongo lona benkae Levi otsük akvü na a vanrhyu ranki jilo elhi tssosi, 25 nzyu tinyan lojo esamka. 26 Jisülojo ombona Levi thanpoe jiangna vanrhyu ranki elhi tsso jiang nzanchikuka, tokhatola ombona jo ombobo jo elhi ntia tssov meka. Hojito ntena Levi elhi jiang nsüngivka."
Yakchi Tokhu Enioto Ji
1 Israel kyon jiangna Ejip metae na khochisi nzyu enioto choro ovüngo jilo OPVÜI na Sinai lijüngi na Moses thüngi heto ezocho. 23 "Choro shilo tsüngon taro mezhüoto jilo eng erhe lona benkae Israel jiangna yakchi tukhü ji tssolan jiang ephanina khivka." 4 Hojito Moses na kyon jiang thüngi choro enioto ovüngo jilo tsüngon taro mezhüoto jilo 5 Sinai lijüngi na yakchi tokhü ji khitale to ezocho. Tole kyon jiangna OPVÜI na kvüto Moses ezocho sana topvü hoji ephan tssocho. 6 Tokhatola onte yolo n tssüngrüng ha jüracho ntiotssole ontena echümüng evüngkatacho, hoji tsükona ontena owo Moses ha Aaron oni owo ezotacho, 7 "Ena echümüng evüngkao jina eyio e n tho, tokhatola ntiotssona Israel thanpoe jiang esüa ena OPVÜI othan epiv ji n tssochev la?" 8 Tole Moses na onte ezocho, "Ana OPVÜI thüngina lanso nhung thüng nandang jo nhyaktava." 9 OPVÜI na Israel jiang heto ezole to Moses thüngi ezocho, 10 "Nte yolo ochosana mekana nte tsoronichen ochona sana echümüng evüngkae n thov vana tssona, mekana yentsalo ewov titünga khatola yakchi tokhu ji khihungna, 11 choro enioto jilo tsüngon taro mezhüoto jilo mek lea choroa sülo khikhuka. Tokhu ji vümhi n theo hümri tona lomo ekhov to theta khitava. 12 Etsoyu jiang ojyua enyathüng jana ntia ti vatava, osi ekümrümo ryu jiangha ti jakia. Shikhfü lo lio ji tssolan phyolan ephan tokhu ji khitava. 13 Tokhatola ochona sari yuta mekvü osi yentsalo n woaha tokhu ji n khia sana jijo a kyon ekhalo n the, ntiotssole ombona othan ji yuta eben lo a n picho. Ombona ombo mmen man ji hamvüka. 14 "Lankon nte nchenkae evan tüv na tokhu ji khihungna tssolan shikhfü lo lio jiang ephan khithuka. Shikhfü tsük ji lankon na tssolea metapvüi na tssolea kheti benphivka."
Omieluk Durhyu Ji
15-16 OPVÜI vanrhyu ranki ji tssokachio ji tsüngono eluk kholung na oyi hoji eyuki sicho osi emüngo jo eluk ji omi esüa zechecho. 17 Kvüthüng eluk jina vanphen esena sana Israel jiangna ha nchenphen eseni eluk ji vanpheno tssolancho. Osi eluk jina metapoe n yithüng jo hojilo ranki jiha to vanthukcho. 18 Kyon jiangna OPVÜI yizüng ephani na nchenyan jiang luki ombo yi ephani na tssokachilancho osi eluk jina süranki ji poni evanthüng jo ontena nchenyan tsük jilo vantacho. 19 Eluk jina ranki jiang poni sunga vana na kyon jiangna OPVÜI yi enga kichungi vantacho. 20 Kvüthüngna jo eluk jina süranki ji poni yuta tara tae vancho, tokhatola OPVÜI na ezo ji ephan ontena ochungi na vantacho, mekana senphicho. 21 Kvüthüng najo eluk jina mmyu na benkae enyathüng nandang tae vancho, osi eluk jina shaki yipvüto ontena ha nkanphitacho. Osi kvüthüng eluk jina shaki yiasana ontena khochi yitacho. 22 Tsüngo eni tae tssolea, choroa tssolea, nzyu mekana sungkalea eluk ji süranki ji poni elithüng jo onte n senphicho, tokhatola eluk jina shaki yisanati ontena khochicho. 23 Ontena nchenyan pyoni eyiv lea, mekana tssokachiv lea OPVÜI na Moses ezo ji ephanina tae tssotacho.
Janti Tatara Jiang
1 OPVÜI na Moses thüngi ezocho, 2 "Kyon jiang tsarhyuphen osi ncheyan pyonthukphen tsükona janti tatara eni joe vata. 3 Kvüthüng tatara woniata na sunga sünga khüa sana kyon topvüna a vanrhyu ranki ji kipüngo ni hachüma sanrhyuvka. 4 Osi kvüthüng tatara motsünga taena khvüa sana wopan esopvüi jiang taena ni hachüma sanrhyuvka. 5 Tolea kvüthüng tatara ji chentuka khvüa sana engkhfüwoe nchenkao jipo jing sanrhyuvka. 6 Kvüthüng yenjo enioto chentuka tatara khfüa sana jüjowoe nchenkao jipo jina sanchukvü. Hojito owon chentuka khvüana nchenphen pyonthukvü tsükona tssov. 7 Tokhatola owon ji sünga khfüana okho etssirhyuthukvü tsükona. 8 Tatara jiangjo Aaron tona ombo tsoeden jiang to pvüti jiangna khvüv. "Shikhfü shiang nchünkhon tsütsata wotava. 9 Ntena nte meta lo vanathüng oyam na ori nte tsso cho rolanchiv tssoana ritsso benkav ji tatara khvüsochia. OPVÜI nte Potsow a shina nte khyovka osi ori khe lona nte shanchovka. 10 Hoji esüa nte ematha yutalo, chothan tokhu jiang lo osi ekhüm lan thüngoe tokhu jiang loha tatara khvütava. Erungthan osi khüm shümta than piathüng ha tatara khvütava. To tssona nte nzanchivka. Aiyo nte OPVÜI Potsow ji."
Israel Jiang Nchenyan Pyonala
11 Israel jiangna Ejip metae na khochisi nzyu enisi choro enioto jilo tsüngon mekyuoto jilo OPVÜI vanrhyu ranki poni eluk ji shaki yicho, 12 osi Israel jiang na Sinai lijüngina khochi onte yentsa benkacho. Tole eluk jina Paran ronmhoni oro esancho. 13 OPVÜI na Moses yakchia yizüng pio ji ephan ontena khochicho, 14 osi ontena vanphen eseni khochi akvü ovüngthüng renphen ji esüa reni khochicho. Juda jipo riven küpo etsso jiang ji Amminadab tsoe Nashon na sokata razhü razhü na khochicho. 15 Issakhar jipo jo Zuar tsoe Nethanel na socho, 16 osi Zebulen jipo jo Helon tsoe Eliab na socho. 17 Jitosi süranki ji luki hoji ejümden Gershon tona Merari to pvüji na khochidencho. 18 Jisülo jo Reuben jipo na esowo rasan okho ji riven küpo etssoe jiangna okho okhona khochiv osi jijo Shedeur tsoe Elizur na sov. 19 Simeon jipo jo Zurishaddai tsoe Shelumiel na socho, 20 osi Gad jipo jo Deuel tsoe Eliasaph na socho. 21 Jisülo jo Kohath tsochen Levi jipo jiangna ntho tsütsaelan jiang bensi khochivka. Ontena nchenyan ethamo ji oyi jana jo jilo süranki ji tssokachithajkcho. 22 Jisülo jo Epharaim jipo na esowo rasan okho ji riven küpo etssoe jiangna, kholuk kholuk na khochiv osi hoji jo Ammihud tsoe Elishama na sov. 23 Pedahzur tsoe Gamaliel jo Manasseh jipo ji socho, 24 osi Gideon tsoe Abidan jo Benjamin jipo ji socho. 25 Okhao tssoa Dan jipo na esowo rasankho ji riven küpo etssoe sülamoe jiangna okho okho na khochiv, osi Ammishaddai tsoe Ahiezer na sov. 26 Ochran tsoe pegiel na Ahier jipo socho, 27 osi Enan tsoe Ahira na Aapthali jipo ji socho. 28 Hojito kvüthüng Israel jiangna nchenyan eseni khochia na shi esüa etüngi rasancho. 29 Moses na Midian kyon Jethro tsawoe Habab, onüng ji heto ezocho, "Ena OPVÜI na kokae epio meta ji ejamo tssoa khochiv sala. OPVÜI na Israel jiang tsükarankathüki etsson elüm epiv phyochaki lika, ephana roa, tona ena ejüeli ni chinhyavka." 30 Tole Hobab na janlancho, "Mo, aiyo a metae elani yiala." 31 Moses na ezocho, "E nzansi e sisi tiyia, ena kvülo nchemvü sana nina ntsika e lansoe tssoa. 32 Nina ephana rona OPVÜI na kvüta e mmhayia sana jiang ena ni shümnhyav ka."
Kyon Jiangna Khochiala
33 Kyon jiangna Sinai ntho phunglan jilona khochi tsüngon ethüm yentsatacho. Yuta topvü lo OPVÜI Ntsata Bakos jina ovüng na nchenyan onte yania yia vancho. 34 Ontena nchenyan jiangTlona khochi akvü engo jo OPVÜI eluk jina onte socho. 85 Ntsata Bakos jina khochiana Moses na heto phyonrhücho, "OPVÜI, Phanthi ni ri jiang ezonsorae sia, osi ni etssang jiang tsankhanthuka." 36 Elani kvüthüng hojina esana sana ombona heto phyonrhücho, "OPVÜI, Israel wopan wothüng wothüng shiang yolo elani yia."
Teberah To Tsao meta Ji
1 Kyon jiangna ezüpale OPVÜI thüngi erinjanta phanthicho. OPVÜI na onte erinjanta ji zoale ombona lüm tsuki onte pono omi jorothukcho. Omi jina onte yolo na kisochi, nchenyan ji nken phuko rungi sicho. 2 Tole kyon jiangna nzanchile to Moses thüngi jonjitacho. Osi Moses na OPVÜI thüngi randanle omi ji mhe sicho. 3 Hoji tsükona meta ji Taberah to tsacho, ntiotssole jilona OPVÜI mi ji onte yolona kicho.
Moses na esopvüi Ekhatiying Ethüngchetala
4 Hojilo lankon ejoma ha Israel jiang nzo yentsata vancho. Onte na n rümkhoku oso etsora chiyicho, tole Israel jiang naha heto erinjantav benkacho, "Etena oso jükaro tia tsophyawo mmhona! 5 Ejip metae jo ete tsokhuk ongo tsotacho osi kiaman tsotacho. Lishakthi, Mhelithi, Lasen, Pyaz, Sanran to etena tsotao jiang chenchümcheta? 6 Tokhatola enhungo ete etho monkhani sithaka. Enhungo ntia etsov n li; mana shiang eng akvü tsota vamo shi tae!" 7 (Manna jo hümphuka osi hakfhüshuka otsüng teriv esüa tüv. 8-9 Hojiang ji zümo lo yentsso nzo jochou. Ojyuato enyathüng jo kyon jiangna khyorhyua woe ohüm esüa cheni vüpi hümri epyaku rungi tsotacho. Osi hoji jo olive thyujüna hümri rüngcho esüa tsochecho.) 10 Kyon jiangna onte kibüngo mangrae erinjanta vanathüng Moses na zocho. OPVÜI na kyon jiang thüngi lüm tsuko ji Moses na nungracho. 11 Osi ombona OPVÜI ezocho, "Nino ntioli athüngi heto n mhom tssoala OPVÜI? Ntioli athüngi ni lüm tsukala? Ntio tsükona kyon shiang hetata poni elhi shiang apichola? 12 Ana onte joyingcho meka, osi ana onte bukthukcho mek. Nina kvütolui onte ji ngaro esüa epvüina ajümthuksi nijüpa onte motsüi jiang epiv ezowo meta ji ayithukvüka? 13 On te hetata tsükona aiyo oso kvülo khivla? 14 Kyon hetata tsükona ana oha ji n khichokhuk, a tsükona oha shi mmyingtia. 15 Nina heto a tssothuka tssona anzansi a chüthoka: tona enhungo ni lüm etsuk ha ana hamvü meka." 16 OPVÜI na Moses ezocho, "Israel esopvüiden to chekao jiang onte ekhatiying etssirhyuthuka, onte ji avanrhyu ranki jilo ni hachüma etsssirhyuthuka. 17 Ana joro hoji lona onte thüngi ezovka, osi ana ni pio mon jilo tara khichei onte ha pivka. Tona ontena kyon shiang sayalo ni kyochivka, to tssona ni taena onte ha ji hamvü meka. 18 Kyon jiang heto ezoa, "Nte bobo ntssüngchetava, ojyua jo ontena oso tsophyavka, ntena oso tara tia tsophyavo osi Ejip metae vanpvü savo to erinjantao ji OPVÜI na zothaka. Enhungo OPVÜI na oso nte pivka osi ntena hoji tsovka. 19 Ntena tsüngon motsünga eni, mekana mongo, taro, mekana mukyu tsükona tae tsov meka, 20 tokhatola choro totona, nte enoe na mpato chiyia osi hoji na nte laki nte n khetsü thüng jo tsotavka. Hojijo ntena erenjanta, ombona nte yolo vanpvü na nte bobo Ejip meta ji yaki n yitacho savo to epilanchita phyotao ji tsükona hojito tssovka. 21 Moses na OPVÜI ezocho, "Ana kyon 600,000 soala, osi nina choroa tsükona oso etsson tssothoku phyochakcho, 22 tona mangsü osi olyu onte tsochyua vancho alo? jümangi ongo topvü na lea onte tsochyuv alo? 23 OPVÜI na ezocho, "A etho ochüm licho alo? Ana phyoji bebenchev sana ji nina n sungu hunguka!" 24 Tole OPVÜI na ntio phyocho sana jiang topvü Moses na chivo kyon jiang ezocho. Ombona esopvüiden ekha tiying jiang tsarhyui vanrhyu ranki ji hachüma etssithukcho. 25 Tole OPVÜI na eluki na joro ombo thüngi thyudacho. Ombona Moses pithako mon jilona tara khichei esopvüi ekha tiying jianglo theyicho. Omon jina ontelo roale ontena zenkhyingden esüa nshata benkacho, tokhatola hoji sunga n tssocho. 26 esopvüi ekha tiying jiang yolo otsük eni jo ranki ji nvotav oki vancho. Tole hojilo ha omon jina oro onte pyingcho, osi oninaha zenkhyingden esüa nshatav benkacho. 27 Tole onina ntio tssoa vancho sana hoji hungi khyingroe tsüka na yunga owo Moses ezocho. 28 Tole Nun tsoe Joshua, nungothüng na Moses nzanchia evan jina Moses ezocho, "Tsüphoeyo, onte esanthuka!" 29 Tole Moses na ombo ezocho, "Ana nchümo ji nina a ntsijanicho alo? Aiyo OPVÜI mon na kyon topvü pyingi zenkhying den esüa tisantawo to nchümala!" 30 Jisüijo Moses tona esopvüiden onte ekha tiying to jiang na nzo nchenpheni yitacho.
OPVÃœI na Piluku Rothukala
31 OPVÜI na esüngaro taena jümangina mpüng chiyithuki piluku sonhya venthukcho, osi onteji liko ponina eryu harüma lona rüma yicho. Piluku jiangji nchenyan osi hojiang poni onte nkonphia jiang lo elümoto pyatheracho. 32 Tole hoji tsüngon ji totona, ojyuato jana kyon jiangna piluku tae rümta mongcho osi tsükalo seri wothüng poni rhümaracho. Osi ontena nchenyan ji füchüma nkitacho. 33 Ontena etsoyu etsson licho khatola OPVÜI na lüm etsuk lona onte yolo vara yithukcho. 34 Hoji meta jijo, "Tssüphiyangphi müngshiphen" to tsacho, ntiotssole hojilo ontena etsoyuv tsükona tssüphi yangphio jiang shothei sitacho. 35 Ontena hoji lona khochi Hazeraoth lo oyi nchenyan tssotacho.
Miriam Ezüp Picho
1Moses na Kushite eloe soa vancho, tole Miriam ha Aaron onina ombo ekhirancho. 2 Ontena phyotacho, "OPVÜI na Moses yakchia tae nsana ke? Ombona e yakchia jo n sanake?" Tole onina hoto phyotao ji OPVÜI na zocho. 3 (Moses jo limha lo vancho yolo emirotsowo kyon ji tssocho.) 4 OPVÜI na jitopvü Aaron, ha Miriam, oni ezocho, "Ninthümata a vanrhyu süki jilo chirotava." ontena chiwotale, 5 OPVÜI na eluk durhyu lona joro ombo van-rhyu süki kipüngo mangi "Aaron! Miriam!" to omying rüki tsachukcho, tole onina sena chiwole, 6 OPVÜI na oni ezocho, "Ana nte ezov lio ji shi! Nte yolo zenkhying vanthuka na ana abobo onte hungthukala osi omüngina ana onte janala. 7 Tokhatola a phajae Moses thüngi jo ana a kyon Israel topvü ezepvüi tssothukala. 8 Jitsükona ana ombo thüngi jo omha omha tsentae tontüng ombo ezoala, ana ombo thüngi mphoyi ejungu lona n zoala. Ombona wo sak ophong kvütüv sana jiha hungthaka. Tona ntena ntio tsükona a phajae tachia nsantala?" 9 OPVÜI na oni thüngi lüm n tssocho; jitsükona OPVÜI na oni yaki yipvüto 10 osi eluk jina süki ji yaki yipvüto Miriam tsük topvü ratsü eno khyingi sicho osi sheryu esüa ehüma pholüp khyingi sicho. Aaron na ompvü nochonori ji hungi, 11 Moses ezocho, "Tsüphoeyo, nzansi, e zhüva mmen lilea hetüv ezüp jo e ti khyingthuka. 12 Ompvü ji ntiosana echü buki otsük phoko tsothakcho esüa ti kümthuka." 13 Tole Moses na OPVÜI thüngi randancho, "O Potsow, ompvü emiyia!" 14 OPVÜI na janlancho, "Ompvü opo na omhalo ompvü nchuka-yi-cho sawo ompvü na yikra ji tsüngon tiying hansi vam. Hoji tsükona ompvü ji ncheyan pomoe tsüngon tiying vanthük sanati yanehungi ompvü sosi rheyia." 15 Tole Miriam ji tsüngon tiying yantssae vanthukcho, osi Miriam na n rheyithüng jo okho jina nchenphen eseni n yiv vancho. 16 Jisüloti Hazeroth lona khochi oyi Paran romhoni nchentacho.
Chepyim Jiang
1 OPVÜI na Moses ezocho, 2 "Jipo taro eni jiang akvü lona esopvüi jiang yolo tsük-tsük ethüngchei ana Israel kyon jiang pia evamo meta Kanaan jilo chepyim lo wothuka." 3-15 Moses na hoji ephan Paran romhoni na esopvüi shiang wothukcho; Jipo esopvüi Reuben Zaccur tsoe Shammua Simeon Hori tsoe Shaphat Huda Jephunneh tsoe Caleb Issachar Joseph tsoe Igal Ephraim Nun tose Hoshea Benjamin Raphu tsoe Palti Zebulun Sodi tsoe Gaddiel Manasseh Susi tsoe Gaddi Dan Gemalli tsoe Ammiel Asher Michael tsoe Sethur Naphtali Vophsi tsoe Nabbi Gad Machi tsoe Geuel 16 Echepyim shiang ji Moses na Kanaan meta ji khyui zelo wothukcho. Ombona Nun tsoe Hoshea ji Joshua to omying dungphiyicho. 17 Moses na heto onte ezoa khochithukcho, "Shilona khochi owo Kanaan meta Juj owoe chiwotava osi jilona elani yingsüng jiang lo rhowotava. 18 Meta jilo rhowo meta ji kvütüvsana, kyon kvüta vana sana osi onteno kvüta etho jüchosana chei zetava. 19 Meta ji mhemmhomcho sana osi hojilo kyon jiango pikhfü tssoe vana alo hapolo vana sana zetava. 20 Meta jilo liko ji lizü memekana osi enung eran liliana zetava. Osi meta jilona ethicho tssüngthi ejoma lhoe hansi yitava." (Hojithüng jo jününgro emhen etünga vancho.) 21 Tole ontena meta ji jükiwoe rhowo Zin rhomhoni na benkae jükiwoe Hamat rasanlan ji ndüngo Rchob jana khyui zetacho. 22 Ontena ovüngtssoa jüjowoe rhowoe oyi Hebron metalo thojüi jipo Anakim to tsao jiang tsoronichen Ahiman, Sheshai tona Talmai to pvüji na vamo jilo chiwocho. (Hebron jo Ejip metalo Zoan ji n tssothüng nzyu tiying vüngina tssocho.) 23 Ontena Eshcol hayi chiwo jününgro khero motsüngalo tssüngthi otsük enina khathei ejümo tata ethicho tüv etssae khora thei ejümtasi yicho. Ontena tsarümthipen tona züwothi ha tara hantasi yicho. 24 Hoji metaji Ashcol to tsao jijo Israel jiangna jilona jününgrothi etssacho ji tsükona. 25 Meta ji tsüngon zhüro khyui zetasi 26 ontena Moses, Aaron tona Israel topvü to thüngi kholani Paran romhoni. Kadesh lo yitacho. Metaji ontena hungthaka to ezoa ontena jüngüngrothi vüng ji hana oyi ejücho. 27 Ontena Moses ezotacho, "Ena meta ji khyui zethaka osi meta ji lizü, ejüeli meta osi meta jilo tssüngthi ejoma jo shiang je. 28 Tokhatola metapvüi jiang jo elümoto etho jüa osi ontena pikhfü tssoe vanala osi onte yantsü jiangha tsüphoa osi pikhfü mmhona tssocho. Hoji ekalo meta jilo kyonpvü thojüi jipo ha vanlana. 29 Meta ji jüjowoe jo Amalik jiangna vanala, phunglan jiang lojo Hittite, Jebusite tona Amorite to jipo jiangna vanala, tosi Kanaan jipo jo Mediterranean jümang tssae tona Juda tssae to vantala." 30 Kyon jiangna Moses thüngi phyocho-rüchota vamo ji Kaleb na jükrübi onte vanthuksi ezocho, "Etena enhungo owo onte sakae meta ji khyoe khitavka, eteji onte ekhyowo tüv etho jüa." 31 Tokhatola Kaleb ndüngo etsso kyon jina phyocho, "Meka, eteno onte sakao tüv ete etho na n toka, metapvüi jiang ji ete lona etho elümoto etho jükata. 32 Ontena hungwo metaji tsükona heto yibung ejüng elümoto Israel jiang ezotacho. Ontena phyocho, "Meta jilona chiyichojo metapvüi jiang tia n süphichyu ka, kyon ha ena hungwo jiang topvü ntssonnron tae, 33 elani meta jilo Anak tsoronichen kyonpvü thojüi jiang mpato hungra. Onte zena eteno khomungden esüa tüv, ontena hojito e zechecho tssov."
Kyon Jiangna Erenjantala
1 Kyon jiangna lüm n tssov zümotona kyatathüngcho. 2 Ontena Moses ha Aaron oni nhyenchoa phyotacho, "Ejip metae na alo hepi lijüng sana echüi sivo ji mmhomo! 3 Ntioli OPVÜI na Kanaan metae e sosi yiala? Ritsso lona echürae e tsoeni osi e ngaro jo oyam na rumi khivlo. Tona Ejip metae kholani yicho mmhomo mekchoke?" 4 Osi ontena onte yolo heto phyotacho, "Ete esopvüi ethüngi Ejip metae kholani yitavkalo!" 5 Tole Moses ha Aaron onina kyon jiang mhadungo na likoe nkhümthetacho. 6 Tosi chepyim wothuko, Nun tsoe Joshua tona Jephunneh tsoe Kaleb to onina nungra lona oni mpensü jiang reroe sia, 7 kyon jiang ezocho, "Ena owo chei zewo meta jijo emüngyanthav meta. 8 OPVÜI na ete thüngi emathana hoji meta lizü osi ejüeli meta ji epiv. 9 OPVÜI panlan ti-tssotava osi meta jilo evamo kyon jiang ti-kyutava. Etena elaro onte khyovka. OPVÜI na ete thüngoe vana osi ombona meta jilo potsow onte nkohao jiang khyothaka; jitsükona ti-kyutava." 10 Kyon topvüna oni ephyatsüngu tssocho tole jitopvü süranki ji poni OPVÜI vanrhyu phfütsson ji ontena hungcho.
Moses na Kyon Jiang Tsükona Randanala
11 OPVÜI na Moses ezocho, "Kyon shiang na kvütenhyaka a sinkivla? Ana onte yulo chethev elhi hetata tssoe ejüaha ontena kvütenhyaka n longtsüka na vanpamvüla? 12 Ana vara rothuki onte chürüpthoku ka, tolea nino ana ontelo longtsükao jipo pono opo ni tssothokvüka." 13 Tole Moses na OPVÜI ezocho, "Nina kyon shiang ni etho na Ejip metae na sochukcho. Osi nina ni kyon jiang pono elhi tssothako shi Ejip kyon jiang na zoana, 14 ontena shilo metapvüi jiang ezov. OPVÜI nina e ndüngo vanato kyon shiangna zothaka, ni eluk na e pono esamo ji lona chancheta ni hungala osi engo ni eluk kholung jina e vüngina esoji elani zümolo ni mi kholung jina e soji, kyon shiangna zothaka. 15 Hoji tsükona nina enhünga ni kyon jiang chüthokcho jo kyon thanpoe ochoangna ni myingthüng zothakcho sana jiangna jo 16 nina ni kyon jiang lijüngi na sochokchio etho n licho lona chüthoki sicho to phyotav. 17 Hoji tsükona enhungo, OPVÜI, nina ni etho ji ejüa osi nina heto phyochakp ji benthukvo to ana randanala. 18 'Aiyo OPVÜI Potsow, osi elaro lüm n tsuk, osi ana nzan tsüphov benphia kyon mmen osi panlan jiang nlan siyiala. Tokhatola ana opvüpoe mmen tsükona tsoronichen jiang pochung ethüm mezhü jana khangshinrüngu.' 19 Osi enhungo, OPVÜI, ni n tongphio nzan tsüphov ji ephanina nlan siyia to ana randanala, ontena Ejip metaena khochipvü nina nlan onte siyipvü." 20 OPVÜI na janlancho, "Nina randamo ji esüa ana nlan onte siyivka. 21 Tolea ana vana osi a vanrhyu na limha pyingo ji tsükona kyon ochoangna a vanrhyu ji hunga osi Ejip lo a elhi jiang hungsi elan elani lüm afüphiyia ayi n ngasana, 22 onte tsüka na lea ana onte motsüi thüngi phyochak pio meta jilo rheyiv nhyakcheta eküm vamvü meka. 23 Ayi nngae ochinaha ana onte pyimtsümotsüi piv phyochako meta jilo rheyichev meka. 24 Tokhatola a phajae kaleb jo nchümribo tssoa alo longtsüka lia vamo jina, 25 ombona owo khyui zewo meta ji hayitsü kvülo Amalek tona Kanaan kyon to na enhünga vancho sana jilo ombo sochukchivka, osi ombo tsoeworo jiangna jilo vamvüka. ojyua kholani yia osi Aqaba jünken jiwoe lijüng jilo yia."
Kyon Jiang Erenjan Man ji OPVÃœI na Tssoriala
26 OPVÜI na Moses ha Aaron oni ezocho, 27 "Kyon shiangna kvütenhyaka a thüngi erinjantapamvüla? Hetüv erinjan shina azolakthaka! 28 Enhungo heto ezoa, 'Ana vamo shi esüa chetünga ana phyochakala, kyon shiangna chontao ji ana pivka. A, OPVÜI na phyoala. 29 Nte chüravka osi nte müng jiangna lijüng shi nzüpyingu ka. Ntena erinjantao ji tsükona nte yolo nzyu mekyu pomoe kyon ochia meta jilo rheyichev meka. 30 Ana meta jilo nte vanthoku phyochakcho, tokhatola kaleb ha Joshua oni yaki tsükalea jilo rheyi chev meka. 3i Ntena nte ngaro jiang oyam na nte rhümayiv to kyutala, tokhatola ana phyochak pio ji esüa meta jijo onte echi tssovka. 32 Nteno lijüng shilona nte chüravka. 33 Nte yolo wokhao ji jana n chürathüng jo nte jancho n zo man ji ngaro jiangna nzyu zhüro lijüngi ezüpa khyuta vamvüka. 34 Ntena nte mmen ji man nzyu zhüro ezüpvü, hojijo nte metaji khyui zev tsüngon zhüro khio tsüngon ji tsüngonala nzyua ren ezüpvüka. Ana nte thüngoe n tssov nte ri küma na, kvüto tssov sana ntena jilona engathevka. 35 Nte ochoang na sanrhyui a panlantacho sana jiang thüngi heto tssoyiv to ana phyochakala. OPVÜI a, shina phyothaka, nte otsük akvü romhoni na nte chüvka.' " 36-37 Moses na meta ji chelo wothuko kyon jiangna oyi ejüngj üng ehungpvüi pio ji yakchia kyon jiangna OPVÜI thüngi erinjantav benkacho. Hoji tsükona OPVÜI na enoera n mhom khi onte khyingthuki chüthokcho. 38 Echepyim onte taro eni ji yolo Joshua ha kaleb oni tae enhyokacho.
Metaji Khyov Sakademo Ji
39 OPVÜI na phyoji Moses na Israel jiang ezole ontena nungrata kyatacho. 40 Ontena nyazüngi na meta ji heto phyoa sakatacho, "Enhungo OPVÜI na phyochak epio meta jilo yitala, otsotso etena mmen tssothaka." 41 Tole Moses na onte ezocho, "Tona nteno ntioli OPVÜI jancho n zotala? Ntena ochüm echhev meka. 42 Ti-otava. OPVÜI na nte thüngoe thev meka, orina nte chüravka. 43 Ntena Amalek tona Kanaan to kyon jiang thüngi rota na ralina nte chüravka, ntena ombo sü rüv ekhiramo jina OPVÜI na nte thüngoe n tssov sithaka." 44 Tolea ontena ryua yingsüng jiwoe wotacho osi Ntsata Bakos ji tona Moses tojo nchenphen ji yaki n wocho. 45 Tole Amalek tona kanaan kyonden to jilo vamo jiangna onte ryulanchia Hormah jana onte phanchicho.
Othan Epi Shikhfü
1 OPVÜI na onte epio jilo vanathüng 2 Israel jiangna benphia ewov tsükona shikhfü Moses yakchia heto picho. 3 Mangsübung, olyubung, olyu mekana nyanyan to khi erungthan, mekana phyochakthan mekana, lüm erungthan, mekana ekhümlo tathi thanphen to tssoa OPVÜI pithoka, hoji than ji rhüm jina OPVÜI emathathukala. 4-5 Ochona olyu mekana nyanyan khi erungthan piasana ekümrümo ji akvü nzo ohüm seri motsüngalo olive thyujü etükpvü motsünga nhyonkae ethi-eben than tssothuka osi jilo zükhi opvü motsünga oro thana. 6 Kvüthüng olyubung thana sana ji nzo ohüm seri eni olive thyujü opvü motsünga si chiso nhyonkae benrothan tssothuksi, 7 hoji nzo zükhi opvü motsünga si lungta ekae thana. Othan shi rhüm jina OPVÜI emathavka. 8 Kvüthüng mangsübung khi erungthan mekana phyochak than, mekana khümshümta than OPVÜI pia sana, mangsübung akvü nzo benrothan tssoa 9 ohüm seri ethüm lo olive thyujü opvü eni nhyonkae, 10 jilo zükhi opvü eni thephae khümvüka. Othan shi rhüm jina OPVÜI emathavka. 11 Hojito mangsübung akvü, olyubung, olyu osi nyanyan akvü nzo thamvüka. 12 Osi ekümrüm motsünga lo kyungkata thana tssona hoji ephan benrothan jiangha rankathokuka. 13 Israel kyon otsük akvüna etsoyuthan khi orhüm mmhona OPVÜI emathathukathüng heto thamuka. 14 Osi kvüthüng na lankon nte nzo evan esüngaro nchenyalea sunga evanlea, tüv na etsoyuthan khi orhüma na OPVÜI emathathoku thana tssona omboha shikhfü shiang ephan thamka. 15 Nchünkhon tsükona nte osi lankon jiang tsükona shikhfü shi benphivka. OPVÜI mhadungo jo nte osi onte topvü kheti; 16 Shikhfü tsük jina nte osi onte satsüala. 17 OPVÜI na onte pia vamo meta jilo vanathüng 18 Israel jiangna benphiv tsükona OPVÜI na Moses heto shikhfü shiang picho. 19 kvüthüng meta jilona chiyicho etsoyu tsoa sana ovüngna tara khichei vasi echümporo tssoa OPVÜI tham vüka. 20 Ntena tsünghanro ethan na hümri rüngdemo jilona nyakchodemo ji khi echümporo than tssoa OPVÜI pivka. Shijo ntena tsünghanro jilona echümpoto thamo ji esüa thamvüka. 21 Ntena rüngwo hümri jilo khichei thamo shi jo nchünkhon benphia wovka. 22 Tokhatola OPVÜI na Moses pio shikhfü shiang ochona sana n tsiv woria tssona, 23 osi khümtsüng totona sülami jo OPVÜI na Moses pio shikhfü shiang n benphiv vanta yia tssona, 24 osi hoji n tsiv okho na woricho tssona, ontena mangsübung khi erungthan OPVÜI thamvüka, hoji rhüm jina OPVÜI emathathokuka. Hoji nzo benrothan tona zükhi than to etüm elan ephanina pivka. Hoji ephalo onte mmen than tssoa nyanyan bung khi thamvüka. 25 Pvüti jina okho topvü tsükona nthoche elhi jiang tssoyiv osi onte nlan jiang OPVÜI na siyiv, ntiotssole onte wori ji etama na mek osi ontena mmen than ji etsoyuthan tssoa OPVÜI picho. 26 israel khümtsüng osi onte yanki nchenkae evan jiang topvüna worio ji tsükona onte topvü nlan siyiv. 27 Kijaena n tsiv mmen tssona ombona nyanyan okyuro nzyuatso khi mmenthan pivka. 28 Pvüti jiang thanpheni na nthoche elhi tssoa kija ji mmen lona nthochevka osi nlan ji ombo siyivka. 29 Israel tssolea, nchenkae vancho lankon tssolea shikhfütsük ji tsütsavka. 30 Tokhatola metapvüi tssolea lankon tssolea ochona etana na mmen tssoa sana ombona OPVÜI ji etssakthav kümthoki ji yakchia nlan tsso jina ombo chüthoku, 31 ntiotssole OPVÜI na phyo jiang ombona khi sia etana na ombo yizüng yesoyio ji tsükona ombo chüo ji ombo pono tae.
Esanmung Shikhfü Yeso Kyon Ji
32 Israel jiangna lijüngi vanathüng emung motsünga lo kyon tsükana otssüng woa vancho. 33 Tole ombo ji Moses, Aaron osi Israel topvü mhadungo sosi wocho, 34 osi omboji kvüto lyuyiv sana n tssüngcheo jina nhyakyata vanthukcho. 35 Tole OPVÜI na Moses ezocho, "Kyon tsük ji chüthokvü lia, ombo ji nchenphen tssae sosi chivo okho toto khi ephyatsüngi sitoka." 36 Hoji tsükona OPVÜI na phyoji ephan nchenphen tssae sosi chivo ephyatsüngi sitacho.
Süjüm Ntssüka Shikhfü
37 Israel jiang thüng heto ezole to OPVÜI na Moses yizüng picho, 38 "Nte mpensü otssae nken akvülo süjüm ntssükatava osi ntssü akvü ejüm na sechaktava. Ntena heto nchünkhon benphitava. 39 Süjüm ntssüo jiangna a yizüng jiang nte nchümchethukvüka, ntena kvüta hojiang hunga sana a yizüng topvü nchümchei benphivka, to tssona ntena a mhechoe sisi nte etancho etssophyov meka. 40 Süjüm jiangna a yizüng jiang topvü nte nchümchethukvü osi nteno a kyonden to vamvüka. 41 Aiyo OPVÜI nte Potsow tssoa Ejip metae na nte sochukcho. Aiyo OPVÜI Potsow ji."
Korah, Dathan Tona Abiram To na Panlamo Ji
1 Kohath lo Levi jipo Izhar tsoe Korah jina lüm tssoni Moses panlancho. Ombo tephfüden jo Reuben pvüji lo Eliab tsoeden Dathan, Abiram, Peleth tsoe On tona Isreal thanpoe onte 250 to, okhona ethüngcheo esopvüi thüngche jiang. 3 Ontena Moses ha Aaron oni hachümi phyotacho, "Elümoto nte woyakthaka! okholo kyon topvü OPVÜI echi osi OPVÜI na ete ndüngo vana. Tona Moses, nino ntiolyui OPVÜI kyon okho pono nibobo OPVÜI tssoala?" 4 Moses na hoji zoale likoe vanthei randancho. 5 Ombona Korah tona ombo sürüi jiang to ezocho, "Ojyua enyathüng OPVÜI na ombo kyon ochosana e hungthukvüka, ombona ombo kyon, ombona ochoang ethüngchecho sana hoji khi thanpheni na ombo ndukthukvü ka. 6-7 Ojyua enya jo ni tona ni sürüi jiang to tssoe mitssophfü lo miron thei, tssütsserhüm thei toli benrasi thanphen jilo wotava. Tona etena OPVÜI ethüngche kyon ji chekavka. Nte Levi na woyakcho ka!" 8 Moses na Korah ezolancho, "Engatava, Levi kyonden! 9 Israel Potsow na nzontsüi na khochaki ombona nte ndukthukvü, OPVÜI vanrhyu ki jilo elhi nte tsswothukvü osi kyon jiang eshanlanga onte benkav nte ethüngcheo jijo thama tsayia nchümta alo? 10 Ombona nte osi Levi thapoe jiang topvü mying tsüphov hetüv pile enhungo pvüti elhi jiha ntena hoe khilam alo! 11 Ntena Aaron thüngi erinjantao jijo ni osi ni sürüi jiangna OPVÜI thüngi panlana erinjantacho tae." 12 Tosi Moses na Dathan ha Abiram oni tsalo wothukle, oni na phyocho, "Ena rov meka! 13 Nina Ejip meta lizü jitüv lona e tsachuki lijüng hetüv lo e chüthukvü e sosi yio jina lea mmhonthaka. Tona nina e pono ha OPVÜI tssolam ke? 14 Nina liko mmhom osi e li, osi jününgro li e picho n lihan, osi enhungo ejithechiv sala. Ena rov meka!" 15 Moses na lüm tsuki heto phyocho, "Kyontsük shiangna hana rocho than ntia ti-khichoyia. Ana onte ochia n tachihan; ana onte kurü ro motsünga tia n khiyihan." 16 Moses na Korah ezocho, "Ojyua ni tona ni sürüi 250 ji to OPVÜI vanrhyu ki jilo rotava; Aaron ha rovka. 17 Nte Otsük akvüna mitssophfü ji bensi hojilo tssütsserhüm thei OPVÜI thanpheni hansi rovka." 18 Tole otsük akvüna ombombo mitssophfü jilo miron tona tssütsserhüm to therae bensi oro Moses ha Aaron oni nzo OPVÜI vanrhyu kipüngo mangcho. 19 Tole Korah na kyon jiang topvü tsarhyui oro OPVÜI vanrhyu kipüngo na Moses ha Aaron oni zechiwo mangracho. Tole jitopvü OPVÜI vanrhyu phfütsson jina tsünglüpkirina kyon jiang pono rakacho. 20 Osi OPVÜI na Moses ha Aaron oni ezocho, 21 "Kyon shiang yolona esenlani yitava ana okho totona monthukvü saka." 22 Tokhatola Moses ha Aaron onina nkhümthei phyotacho? "O, Potsow nino eküm topvü epipvüi ji. Kyon tsükana mmen tssona okho topvü monthukvü ke?" 23 OPVÜI na Moses thüngi ezocho, 24 "Kyon jiang ji Korah, Dathan tona Abiram to ranki na nkachoe yira to ezoa." 25 Tole Moses tona Israel esopvüi jiang to na Dathan tona Abiram to thüngi wotacho. 26 Ombona kyon jiang ezocho, "Nthae kyon shiang ranki na nkachoe yitava osi onte tsütsaelan ntia ti tsüngkatava to mekana onte mmen man ji nte topvü nte monnhy. avka." 27 Tole ontena Korah, Dathan tona Abiram to ranki na nkachoe yiracho. Dathan tona Abiram to na onte ngaro osi eloe jiang nzo chiro kipüngi mangrae vancho. 28 Moses na kyon jiang ezocho, "Shiang hetopvü yakchia aiyo OPVÜI na a ethüngchecho elhi tssoakha a etancho tssoa mek to ntena chekav ka. 29 Kyon shiang ji OPVÜI thüngi na ezüp n hungu tathi echü chüna a ji OPVÜI na a ethüngchecho mekcho tssovka. 30 Tokhatola OPVÜI na onte lo ntiosana n tssophen tssothuki liko ji küngsoe onte osi onte ejüeli jiang nzo ekümi na onte suktherae echüli onte rheyia tssona ontena OPVÜI n khichocho to ntena engathevka." 31 Moses na hojito phyopvüto, liko ji küngsoe Dathan, Abiram tona onte opan, 32 Korah tona ombo sürüi jiang osi onte ejüeli jiang to liko ekük jilo suktherae sicho. 33 Hojito onte topvü ji onte ejüeli jiang nzo ekümi na echüli rheyiracho. Liko jina züptalani onte monrathukcho. 34 Ontena kyatao ji zoale hojilo evamo Israel jiangna tsanrae sicho. Ontena, "Tsantava! liko jina eteha e nzhüv ka!" to phyotacho. 35 Tole OPVÜI na omi jorothuki tssütsserhüm erungo otsük 250 jiang rungtsüngrae sithukcho.
Mitssophfü Jiang
36 Tole OPVÜI na Moses thüngi ezocho, 37 "Aaron tsoe pvüti Eleazar ji ezoa, kyon rungtsüngo jiang khelo yongmen mitssophfü jiang khyarhyui jianglo miron jüwo jiang nzüroe sithuka, ntiotssole mitssophfü jiango ntho. 38 Hojiang ji OPVÜI thanpheno thanthako jina ntho kümcho. Hoji tsükona rungtsüngo kyon jiang khelona khi hojiang ji poroa jocholani thanphensa ji lhüphen tssothuka. Hoji na Israel kyon jiang ntangshon piphen kümka." 39 Tole Eleazar pvüti jina hojiang khyarhyui thanphen ji elhüp jocho. 40 Hoji yakchia Israel kyon jiangna engathev jijo Aaron tsoronichen na yaka ochina ha thanpheni oro erungthan piv meka to. Ochona hojito tssoana ombo ha Korah tona ombo kyon den to monthuko ji esüa monthukvüka. Shiang hetopvü to OPVÜI na Moses yakchia Eleazar thüngi ezoji ephan tssocho.
Aaron na Kyon Jiang Shanchoala
41 Ojyuato jo kyon topvüna Moses ha Aaron oni thüngi heto erinjantacho, "Ntena OPVÜI kyon ejoma chüthukthaka." 42 Ontena sanrhyui Moses ha Aaron oni thüngi erinjantathakale, ontena OPVÜI vanrhyu ranki jiwoe zechitale eluk jina ranki ji eyuka vancho osi OPVÜI vanrhyu phfütsson jina razhüa vancho. 43 Moses ha Aaron onina owo ranki ji mhadungo mangcho, 44 tole OPVÜI na ezocho, 45 "Kyon shiang yolona nkachotava, ana enhünga onte rungtsüngthukvü ka!" Tole onina liko woe nkhümthei vanathüng, 46 Moses na Aaron ezocho, "Ni mitssophfü ji khi thanpheni na miron tsachei jilo theta, osi miron jiang poni tssütsserhüm tara theta. Jitosi kyon jiang thüngi tsüsoa owo shikhfü ephan onte nthoche elhi tssoyia. Zakto tssoa! OPVÜI lüm etsuk ji chiyithaka osi echü vara benkathaka." 47 Aaron na hoji ephan mitssophfü ji bensi zakto kyon jiang etssi vamo jilo wocho. Vara ji benkathaka to ombona hunga jo zaktole miron jilo tssütsse thei kyon jiang nthoche elhi ji tssocho. 48 Hojina vara ji esanicho osi ombo echüi jiang tona eküm vamo jiang to yutalo phanthi vancho. 49 Hojilo kyon chüo jiango 14,700,' shi jo Korah panlan jilo chüthuko jiang n khanhya. 50 Vara ji esanthaka le, Aaron na OPVÜI vanrhyu kipüngi Moses thüngi kholani yicho.
Aaron Jarung Ji
1 OPVÜI na Moses ezocho, 2 "Israel kyon jiang ji pvüji akvü esopvüi thüngi jarung motsüng tsüng ren, jarung taro eni ni, pile to ezoa. Jarung akvülo esopvüi ji mying erankata. 3 Levi pvüji jarung jilo jo Aaron mying erankata. Jipo esopvüi tsükalo jarung motsünga ren tssovka. 4 Hojiang hansi a vanrhyu ranki Ntsata bakos ji mhadungo ana ni ndukphen jilo vanthuka. 5 To tssona ana ethüngcheo esopvüi ji jarung jijo rüni chenkae livka. Hojitoli Israel ochoangna nipono phyochophyoria sana jiang ana esanthokuka." 6 Moses na Israel jiang ezocho, osi onte esopvüi otsük akvüna jarung motsüng tsüng, tsotsüi taro eni ombo picho, osi Aaron jarung jiha jilo thecho. 7 Tole Moeses na jarung jiang topvü Ntsata Bakos ji ndüngo varhyucho. 8 Ojyuato jo Moses na süranki jilo wole Levi pvüji lo Aaron jarung jina shungkae ebeni almond ethi mheni licho. 9 Moses na jarung jiang khirae Israel kyon jiang ejüracho. Osi ontena hojito tssoji hungale, esopvüi jiang otsük akvüna onte jarung jiang khilantacho. 10 OPVÜI na Moses ezocho, "Aaron jarung ji Ntsata Bakos ji mhadungi vanthuka. Hoji jo erinjana vamo Israel jiang ji onte erinjan ji esani n siana onte chüv to püngnophen ji tssovka." n Moses na OPVÜI yi ephan tssocho. 12 Israel kyon jiangna Moses ezotacho, "Toana echümtan ji hoji tssovla! 13 Hoji ndüngo ewoe topvü chüv tssona e topvü echükhancho tüv."
Pvüti Tona Levi To Elhi Jiang
1 OPVÜI na Aaron ezocho, "A vanrhyu ranki shilo elhingo jiango ephyorüv tssochechojo nlan jiang ni, ni tsoeden, osi Levi jiang na hamvüka, tokhatola pvüti elhi lo ephyoverüv tssochecho jo nlan jo ni tona nitsoe jiang to taena hamvüka. 2 Ni kitsük kirhyu Levi jiang sosi oro ni tona ni tsoe jiang to na vanrhyu ranki jilo elhi tssoathüng ni nzanchithuka. 3 Ontena nte thüngi etssov lio jiang osi vanrhyu ranki jilo etssov lio jiang tssokhuka tokhatola Ntho meta jilo osi thanphen jilo Ntho tsütsaelan jiang ndüngo ewov jo n li. Ontena hoto tssocho jo onte osi nte topvü chüravka. 4 Ontena nte nzo elhi tssoa osi vanrhyuki jilo onte elhi jiang tssokhuka, tokhatola n tüm kyon ochinaha nte nzo elhi n tssoche. 5 A lüm etsuk ji Israel topvü pono n chiyilamo tssoa ni tona ni tsoeden jiang to taena ntho meta osi thanphen jilo elhi tssovka. 6 Nte wopan Levi jiang ethüngche yantso esüa nte pio ji ana. Ontena vanrhyuki jilo elhi etssov tsükona ana khochaki onte vanthukcho. 7 Tokhatola ni tona ni tsoe jiang to tae na nthotsowo meta jilo tona thanphen jilo to elhi jiang tssovka. Ana pvüti elhi ji khi nte yantsoa esüa pithako ji enhungo shiang jo nte elhi kümthaka. N tüm kyon ochona Ntho tsütsaelan jiang ndüngo roana chüthoku ka."
Pvüti Jiang Ejan Ji
8 OPVÜI na Aaron ezocho, "Erungthan mekna echümporo than apio jiang topvü ana nte piala toji nchümchetava. Ni tona ni tsoronichen to jiang thüngi ana nchünkhon tsükona nthochaki elhi nte zikao jiang ndana nte piala. 9 Thanphen sa jilona n rungo than ntholo nthotsowo jiang ji ana heto shiang nte piala: Otsukomüm than jiang, mmenthan jiang, osi lolan than jiang to. Hojito ntho than kvüta athancho sana jiango ni tona ni tsoronichen to jiang echi tssovka. 10 shiang topvüto eboe taena, ntho meta lona tsovka, osi hojiang topvüto ntho tssothuka tsütsavka. 11 "Israel jiangna echümporo than apio jiang ephalo, othan kvüta athana sana jiang topvü nte echika. Hojiang ji ana nchüngkhon tsükona ni tona ni tsokhying osi tsoloden to jiang thüngi piala. Ni wopan yolo ochoangna tssolan shikhfü ephani na ntssüngchethakcho sana jiang topvü na tsokhuka. 12 "Israel jiangna ontena hungdemo than mmhontso nzyu akvüto a thüngi apio shiang topvü ana nte piala: Olive thyujü mmhontso, zükhi osi otsuk-omüm mmhontsowo jiang topovüto. 13 Hojiang topvü nte echika. Ni wopan yolo ochoang jo shikhfü ephanina ntssüngchethakcho sana jiang na tsokhuka. 14 "Israel jiang na ntio kvütata ndam nlina khochaki apicho sana jiangha topvü nte echi tssovka. 15 "Onte tsokhfü jiang tssolea, mekana ekümrümo nrodemo jiang tssolea, Israel jiangna kvüta a thana sana jiang topvü nte echi tsssovka. Elani tsokhfü thancho shilamo jiang tssolea, mekana ekümrümo nrodencho kvütata shikhfü ephanina n tssüngchehancho shilana sana jiang man jiang topvü to ntena khichovka. 16 Ngaro jiang topvü choroa tssoathüngna shikhfü ephanina tssenchaki evao janti rang mongo taena rhanlani khivka. 17 Tokhatola mangsü, olyu tona nyanyan to nrodemo jiango rhanlani khiv meka, hojiango topvü a echi nrünga tsso jina khochaki a thamvüka. Osi ejen jiango thanphen sa jilo erhikasi ethyu jiang rungi orhüm ji khi a emathathokuka. 18 Tolea hojilo oso jiango nte echi, shyuro so, ojo sülamoe amimoe echümporo than tssoa a pio jiango jiang topvü nte echi tssovka. 19 "Israel jiangna echümporo than tssoa athamo jiang topvü nchünkhon tsükona ni osi ni tsokhyingden osi tsoloden jiang thüngi ana nte piala. Shijo bej aki n siwo tssoa ni thüngi tona ni tsoronichen to jiang thüngi ntsatala." 20 OPVÜI na Aaron thüngi ezocho, "Ninajo nti ejüeli ha tsentso tssoa khiv meka, elani Israel liko lo ni ejan tssoa ntia khiv meka. Nina ethev elio jijo, A, OPVÜI shi taeka."
Levi Pvüti Jiang Ejan Ji
21 OPVÜI na phyocho, "Israel jiangna tarochia apio jiang topvü ana Levi jiang pithaka. Shijo ontena a vanrhyuki jilo elhi etsso ji jokheman. 22 Israel thanpoe najo vanrhyu ki jilo woe onte popo echü rhükav meka. 23 Nchüng nandang na süranki jilo elhi jiang topvü Levi jiang pono tae tssovka. Shijo echümporo tssoa nte tsoronichen' jana benphia ewov shikhfü. Levi jiangna Israel lo onte ejüeli vajüng ntia tssov meka, 24 ntiotssole onte ejan jo Israel jiang na echümporo yantso tssoa tarochia apio ji ana onte pithaka. Hoji tsükona ontena jo Israel lo onte ejüeli vajüng tssoa ntia khiv meka."
Levi Jiang Than
25 OPVÜI na Levi jiang ezole to heto Moses yizüng picho, 26 "Kvüthüng ntena Israel jiang thüngina OPVÜI yantso tarochia ji hunga sana jilona taro chia khichei echümporo than tssoa OPVÜI pivka, 27 echümporo than shijo lijon jina benro ethan osi zükhi ethan lona khichei thamo ji woni kheti tssovka. 28 Hoji esüa nteha Israel thüngina tarochia yantso hungwo jiang lona echümporo than OPVÜI pivka. Osi echümporo than shi ntena pvüti Aaron khelo theyivka. 29 Hoji jo ntena hungcho yulo mmhontso jilona khichei thana. 30 Mmhontso ji khichei thanthaka na enhyo jijo lijon jiang na mmhontso ji thansi enhyo jijo ontena khio ji esüa ntena khitava. 31 Hoji lona enhyo ji ni osi ni wopan na kvülona nte tsohungana tsocheta, ntiotssole jijo ntena vanrhyuki elhi tsso ji jokheman. 32 Ntena hoji lona mmhontso ji khichei thansi sülojo enhyo ji etsov ntia nlan n li. Tokhatola ti-mhechotava, yantso kvoeha mmhontso ji khichei n thandem jo ti-tsotava, to tssocho jo nte chüthoku ka."
Mangsü Emyom Rungo Mibuk Jiang
1 OPVÜI na shikhfü shiang Israel jiang pile to 2 Moses ha Aaron oni ezocho. Mangsü emyom ntia ome n khyingo osi elhi n tssothukhamo tüv, 3 motsünga hansi oro pvüti Eleazar pia. Hojijo pikhfü pomoe süsi chiwo ombo mhadungo na tatsünguka. 4 Eleazar na hoji ejen ji tara khi, ombo yingro na yenjo tiying süranki jiwoe erhichivka. 5 Osi ekümrümo ji totona, ofü, oso, ejen osi erü jiang theta pvüti ji mhadungona runguvka. 6 Jisülo jo pvüti jina cedar tssüng tara khi, jümkaphen tona oying emyom to tara thei omi jilo thechivka. 7 Hojisülo jo ombona mpensü jiang etssüi sisi tsükasi nchenpheni rheyivka, tokhatola ombo ji mmyu nandang jo ntho to vamvü. 8 Mangsü ji erungo kyon jiha ombo mpensü jiang etssüi sisi tsükae sivka, tokhatola mmyu nandang jo omboha n tho to vam. 9 Jitosi shikhfü ephani na nthochethako tüv kyon tsükana mangsü rungo ji mibuk ji khi pikhfü pomoe meta ntssüngchethako tüv lo vavka. Hoji jo Israel jiangna ojü mmen tüv ntssüngche elhi tssoathüng tsütsav tsükona vavka. Hoji elhilan jijo mmen nthochephen osi mmen khi esiv tsükona nthoche elhi. 10 Kyon ochona mibuk ji hanrhyucho sana ombona mpensü jiang etssüi sivka, tokhatola omboha mmyu n janthüng jo n tho to vamka. Shikhfü shiang jo yuta topvülo Israel osi metapoe onte yolo vamo jiang topvüna benphia ewov tsükona.
Echümüng Phyao Ji (Evüngkao ji)
11 Ochona echümüng evüngkatana tsüngon tiying n tho to vamka. 12 Ombona nthoche jü khi tsüngon ethümo to jilo tona tsüngon tiyingo to jilo nthoche sanati ombo ntssüngchevka. 13 Ombona echümüng evüngkasi nthoche jü na n thochethüng jo n tho to vamvü, ntiotssole nthoche ji' ombolo n phyangkahan. Hoji tsükona ombona OPVÜI vanrhyu ki ji mmenthukala osi ombo ji OPVÜI kyon to ombo n khanhya. 14 Ochosana raki chungi na chüna hojithüng ranki chungi evamo kyon ji mekana hojithüng ranki jilo ochona rhowoa na jina tsüngon tiying n tho to vamvü. 15 Ranki jilo ophfü ophi kvüta elhüp n thev licho sana jiang lea n tho to khav. 16 Kipüng pomoe na oyam na lüngthacho mekana tathi echü chücho tüv ochona evüngkata sana, mekana kyon ryu osi olüp evüngkata sana ombo ji tsüngon tiying n tho to vamvü. 17 Hotüv n thono khi esiv jo mangsü emyom mmen khi siphen rungo ji mibuk ji ophfülo thei jilo ojü ntssüngu chüthechivka. 18 Ovüngo jo nthoe ochona sana erhikaphen khi ojüi jümthechi ranki jilo erhikav, jilo tsütsaelan kvüta lichosana jiang topvülo erhikavka. Enioto jo, nthoe kyon tsükana, ojü ji khi kyon ochona echü ryu mekana echümüng osi olüp evüngkacho sana ji erhikav. 19 Nthowo kyon jina ojü ji tsüngon ethümo to jilo tona tiyingo to jilo to n tho kyon ji erhikavka. Tsüngon tiyingo to jilo jo ombona kyon ji nthochethakana kyon jina ombo sü ji etssüi sisi tsükae sithakana eng rhecho sülojo ombo nthochev. 20 Kyon ochona n thono evüngkasi ombo n thochena vana sana ombo n thoe to vam, ntiotssole ntho jü ji ombo n rhikahan. Ombona OPVÜI vanrhyu ki ji mmenthukala osi ombo ji Potsow kyon to ombo n khanhyav siv. 21 Shikhfü shi ntena yuta topvülo benphia wovka. Ochona oyam nthocheta sana jina ha ombo mpensü jiang etssüi siv lia, osi ochona ojü ji evüngkata sana jiha mmyu n janthüng jo n tho to vamvü. 22 N tho kyon jina ntio evüngkata sana jiha n tho tsütsaelan kümala hoji tsükona hotüv evüngkae kyon ha mmyu n janthüng jo n tho to vamvü.
Kadesh Lo Tssocho
1 Choro ovüngo jilo Israel khümtsüng topvü Zin lijüngi oyi Kadesh lo nchentacho. Hojilo na Miriam chüi jilo shothecho. 2 Ontena nchemo jilo ojü n jüwo jina kyon jiangna Moses ha Aaron oni hazhüi 3 heto erinjantacho: "Ete ji OPVÜI vanrhyu ranki mhadungo na Israel thanpoe jiang ete nzo echüvo ji mmhomo tssov kasi. 4 Ntioli nino lijüng hetüv lo esosi yichola? Shilona e tona e ekümrümo shiang to echürathukvü tssocho alo? 5 Nteno ntioli Ejip metae na esochuki ntia n zao lijüng hetüv lo esochukchicho la? Helo tsünghanro, züwothi, jününgrothi osi tsarümthipen ntia n li. Elani ojü eyuv tia ntia n jü." 6 Moses ha Aaron onina nkachoe oyi vanrhyu ranki ji kipüngo vancho. Onina oni mha ji likoe nkhümtheta le OPVÜI vanrhyu wondang jina oni rakacho. 7 OPVÜI na Moses ezocho, 8 "Ntsata Bakos ji mhadungoe jarung ji khi bensi kyon jiang topvü tsarhyua. Osi onte topvü mhadungo na jilo longpvü lio ji ezoa tona hoji lona ojü tsüchukvüka. Hojitoli nina kyon jiang osi onte ekümrümo jiang eyuv ojü hunguvka." 9 Tole OPVÜI na ezowo ji esüa Moses na owo jarung ji khicho. 10 Aaron onina kyon topvü oni mhadungo etssi vanthuksi Moses na phyocho, "Engatava oyam panlanden! Ena olong shilona ojü chiyi nte yuthukvü alo?" 11 Jitosi Moses na jarung ji sükae longpvü ji yenjo eni erhüpcho, tole jilona ojü tsüchuki kyon jiang tona onte ekümrümo jiang to topvüna yutacho. 12 Tokhatola OPVÜI na Moses ha Aaron oni khona ezocho, "Nini na kyon jiang mhadungo na a ntho etho ji chekata n chüo jina niniha ana nte piv phyochako meta ji jana onte sov meka." 13 Shijo Meribah lo tssocho, kyon jiangna OPVÜI thüngi erinjantao jina OPVÜI na ombo ntho to onte hungthukcho.
Edom Lo Mesao Jina Israel Jiang Nkachi N yithukala
14 Moses na Kadesh lona Edom mesao thüngi yithenpvüi wothukcho. Yithenpvüi jiangna ezocho, "Yithen shijo ni ejaworo Israel jiang thüngina ka. Ena ezüpthako ji nina ntsia, 15 e pyimtsümotsüi jiangna Ejip metae oyi nzyu elümoto ezüpta vancho. Osi Ejip kyon jiangna e pyimtsümotsüi jiang osi e topvü to elümoto ekangshicho, hoji tsükona 16 ena e nzanchile to OPVÜI thüngi randantacho. Ombona e randan jiang engae lanben tsüka rothuki, Ejip lona esochukcho. Enhunga jo ena ni meta ndüngo Kadesh yan janthaka. 17 E nzansi ni meta yakchia e yithuka. E osi e ekümrümo jiangna lantssa kathev meka osi nte li lo osi jününgroli jianglo nhyethev meka, nte jükha jü lona ha yuv meka. Ena ni meta n yakthüng jo lanjüngi taena yitavka." 18 Tokhatola Edom kyon jiangna ezocho, "Ena e meta yakchiv nte khanala! Ntena ngangia yakchicho jo ena sani nte rokav." 19 Israel jiangna phyocho, "Ena olani taena yiv, osi e ekümrümo jiang nte jükha jü yuana oman nte piv, ena ethev lio jijo yakchia yiv ji tae." 20 Edom kyon jiangna phyolancho, "Ena nte n yakchithukala!" Tosi ontena Israel jiang sakav tsükona rasan etho elitsov chirothukcho. 21 Tole Edom jiangna hojito khalanchio jina Israel jiangna kholani lanpoe na yitacho.
Aaron Chüo Ji
22 Israel khümtsüng topvü Kadesh lona sani oyi, 23 Edom erüi Hor phunglan ji jancho. Hoji lona OPVÜI na Moses ha Aaron oni ezocho, 24 "Aaron jo ana Israel epiv phyochako meta jilo rheyichev meka, helona ombo chüv saka ntiotssole ninina Meribah lona a yizüng panlancho. 25 Aaron ha ombo tsoe Eleazar oni sosi Hor phunglani chungoa, 26 0si hojilo na Aaron na ekao pvüti mpensü jiang phungi Eleazar ekathuka. Aaron jo jilona chüvsaka." 27 OPVÜI na ezo ji esüa Moses na tssocho. Osi ontena kyon topvü ehungo na phunglani chungotacho, 28 osi Moses na Aaron mpensü jiang topvü phungi Eleazar ekathukcho. Hoji phunglan kvürina Aaron ji chücho osi Moses ha Eleazar onio elani joyitacho. 29 Aaron chüthaka to topvüna zoe ontena tsüngon thümro nungratacho.
Kanaan Kyon Jiang Khyo Ji
1 Israel jiangna Atharim lamoe na tsata to Kanaan jolowoe mesao Arad na zoale owo onte hae ejoma rhümacho. 2 Tole Israel jiangna OPVÜI mhadungo echümchaktacho: "Nina kyon shiang e khyothukna ena onte osi onte yantsü jiang nilo khochaki vasi roe siv." 3 Tole OPVÜI na onte randan engayia onte nzanchia Kanaan kyon jiang khyothukcho. Israel jiangna yantsü jiang rokhani siyia onte lüngthakhancho osi meta ji Hormah to tsacho.
Yongmen na Nrü Nsüngrücho
4 Edom meta nkona yakchiv tsükona Israel jiangna Hor na khoe Aqaba jü nken jiwoe yio lan ji dunga yitacho. Tokhatola olani jo kyon jiangna erüm n tov, 5 Potsow tona Moses to thüngi erinjantacho. Ontena phyotacho, "Nino ntioli Ejip metae na esochuki etsoyu osi ojü n jüwo lijüng hetüv lo yitachola? Ena enhungo yantsa etsoyu hetüv n tsokhukvü sithaka!" 6 Tole OPVÜI na nrü n mhom rothuki Israel jiangji onte elümoto njütsüngrathukcho. 7 Kyon jiangna Moses thüngi oro phyotacho, "Ena OPVÜI osi ni thüngi erinjantao ji yakchia mmen tssothaka. Hoji tsükona nrü shiang khi esiyiv OPVÜI thüngi randana." Hoji tsükona Moses na kyon jiang tsükona randancho. 8 Tole OPVÜI na Moses ji yongmen yonjak khi nrü joe tssüngpüm lona donkachile to ezocho, hoji jo kvüthüng nrü na kyon jiang njüa sana ontena hojilo zekana onte emiyiv tsükona. 9 Hoji tsükona Moses na yonjakna nrü nsüngrüi tssüngpüm lo donkachicho osi nrü na ocho njüa sana yonjak nrü jilo zekachina emi siwo tssocho.
Hor Phunglani na Moab Jiang Hayitsüi
10 Israel jiangna khochi Oboth lo oyi nchentacho. 11 Ontena jilona khoe Moab meta engkhfüwoe lijüng jilo Abarim roe elio jilo oyi nchentacho. 12 Jisülo jo ontena Zered hayitsüi nchentacho. 13 Ontena jilona khochilani oyi Amon zhükhfü khümkiwoe lijüng na Amorite meta jana yio jilo nchentacho. (Amon jo Moab jiang tona Amorite jiang to yutalo erü ji.) 14 Hoji tsükona, OPVÜI Ritsso To Tsao Kako Jilona Heto Phyoala "... Subhah metalo Waheb yantsü jiang osi hayitsü jiang, Amon zhükhfü ji,15osi Ar yantsü tona Moab erü to jana eyio hayitsü liphyuro jiang to." 16 Hojilo na oyi ontena "Jükhayo" to tsao meta ji jani OPVÜI na Moses ezocho, "Kyon jiang tsarhyua tona ana ojü onte pivka." 17 Hojithüng Israel jiangna okhen shi dencho: "Jükhaden, ojü ndüngtava; Tona ena okhen onte denkavka18 Mesatso osi Israel esopvüiden na Jükha shancho jükhaden, Mesa jarung osi etsi na ejyuo jükhaden." Ontena lijüngina Mattanah lo chiyi, 19 hojilona Nahaliel lo chiyi, 20 jilona Bamoth lo, Bamoth lona Pisgah phunglan kvüri, hayi chanchiphen ji yenjo lo Moab kyon metae hayitsü jilo chiyitacho.
Mesae Sihon Tona Og To Oni Khyo Ji
21 Israel jiangna Amorite mesao Sihon thüngi heto yithen picho; 22 "Ni meta e yakchithuka. E osi e ekümrümo shiangna lanpvü yaki nte li osi jününgroli rhowov meka, osi ena nte jükhae na ojü yuv meka; ena nte meta n yakrathüng jo ena lanpvü yakvü meka." 23 Tokhatola Sihon na Israel jiang ombo meta n yakchithuk hungcho. ombona ombo rasan jiang erhümi lijüngi Jahaz meta jilona owo Israel jiang sakacho. 24 Tokhatola Israel jiangna onte ri jiang elümoto lüngtharae sisi onte meta khümkiwoe Amon zhükhfü lona Amorite jiang meta Jabbok nandang vanzhüi sicho, ntiotssole Ammon meta jijo mmhona nhyakyae licho. 25 Hojito Israel jiangna Ammon jiang yantsü topvü, osi hoji nkonjan yantsü topvü rechoe jilo vantacho. 26 Heshbon jo Ammon jiang mesao Sihon, ochona Moab mesao ehemo ji thüngi rotae hoji meta ji Amon zhükhfü jana khichicho sana ombo yantsü ji hoji tssocho. 27 Hoji tsükona chungyi eran jiangna heto dentacho; "Heshbon, Sihon mesao yantsü jilo rotale! Ena yantsü ji tssocholana ezehungala. 28 Tsüngona lojo Heshbon yantsü shilona Sihon rasan jiangna omi bukata khochicho; Hojina Moab lo Ar yantsü ji roe sicho Osi Amon khümkiwoe yingsüng jiang khyocho. 29 Moab kyonden, nte tsükona kvüta ekhenthao ato! Chemosh ekhüm, nte topvüto nte monthukthaka! Nte Potsow jina kyon jiang tsanthan kümthukala, Osi eloe jiang topvü Amorite mesao evüngki rheyirathaka. 30 Tokhatola enhungo nte tsoronichen jiango monrathukthaka, Heshbon lona Dibon jana, Hashim lona Medeba ndüngo Nophah jana monthukthaka." 31 Hojito Israel jiangna Amorite metalo vancho, 32 osi Moses na Jazer yantsü hav tsükona lanyka mmhom hungi kyon wothukcho. Israel jiangna yantsü ji tona hoji nkojan jiang to khyoe Amorite jiang phani siracho. 33 Jisülo jo Israel jiangna khophi Bashan lan dunga yitacho, tole Bashan mesao Og na ombo rasan sosi owo Edrei lona Israel jiang sakacho. 34 Tole OPVÜI na Moses ezocho, "Ombo ti-kyua. Ana ombo tona ombo meta ji osi kyon jiang to ni khyothukuka. Nina Amorite mesao Sihon ochona Heshbon sachosana ji tssoyiwo ji esüa ombo tssoyia." 35 Tole Israel jiangna Og tona ombo tsoe jiang osi ombo kyon jiang to ochia n hyokav lüngtharae sisi meta jilo vantacho.
Moab Lo Mesao Jina Balaam Tsalo Wothukala
1 Israel kyon jiangna khochi oyi Jeriko zechilo Jordan na engkhüwoe Moab hayitsü jilo nchentacho. 2 Kvüthüng Zippor tsoe Balak, Moab lo mesao jina Israel jiang na Amorite jiang thüngi ntio tssoyichosana osi onte ji owo kvüta sana ji zoale, 3 ombo osi ombo kyon jiang topvü na ekhentsüngracho. Moab kyon jiangna Media kyon eramoe jiang ezocho, "Razhütsük shina nsungu hetopvü ete hakono ntio liana 4 mangsübung na ero tümi tsoa to rorüpi e sivsala." Tole Moab mesao Balak na Amaw metalo Euphrates zhükhfü ji ndüngo Pethro lo vamo Beor tsoe 5 Balaam ji tsalo yithenpvüi wothukcho. Ontena owo heto ombo ezotacho, "Ana heto ni ntsithuk hungala, Ejip lona jipo motsünga oyi meta topvü pyinga yia vana, osi ete meta shiha ekhiyiv ekhenthukala. 6 Ontena ete jipo kyon shiang e sanzhüv sala, hoji tsükona nina oro onte etanglanchiyia rhiyikata. Tona etena onte khyoe ete meta lona phani sichev mpa tssov. Ana ntsia, nina mmha randankao kyon jiangna mmha hungala, osi nina rhiyikao kyon jiango rhiyikao kyon kümala." 7 Hoji tsükona Moab kyon tona Median to esopvüi jiangna owo rhiyika tssen ji Balaam pia Balak yithen ji ombo ezotacho, 8 Tole Balaam na onte ezocho, "Nchüngo hepi yiptava, tona OPVÜI na ntio a ezoa sana ana ojyua nte ezovka." Hoji tsükona Moab esopvüi jiangna Balaam thüngi yipchotacho. 9 Potsow na Balaam oro engacho, "Ni thüngi ncheni vamo shiango ochoangla?" 10 Ombona ezocho, "Balak mesao na a tsalo yithenpvüi athüngi rothukcho, 11 Ejip lona jipo motsünga sani oyi meta shi nzüpyingthaka to phyoala osi ombona hojiang khyothechi phanchukchi sicheo tssoa onte rhiyikale to a ezoala." 12 Potsow na Balaam ezocho, "Kyon shing phana ti-woa osi Israel jipo jiang ti-rhiyikata, ntiotssole onteno a mmha randankacho kyon." 13 Ojyuato Balaam na Balak yithenpvüi jiang ezocho, "OPVÜI na nte ti-phankale to a tangala, ntena elani yitava." 14 Tole ontena elani oyi Balaam na onte phana n yiala to Balak ezotacho. 15 Tole Balak na razhü ovüngo jilona kyungkao osi ethelan likao kyon wothuklancho. 16 Ontena Balaam ji heto yithen pitacho, "Nina athüngi erov ji ntinaha ti-khatüngle to jonjiala! 17 Ana yantso tsüphov ni pia nina ntio phyoa na ni engayivka. Nzansi oro kyon shiang rhiyikata." 18 Tokhatola Balaam na janlancho, "Balak na ombo mesaki shona janti topvüto apilea ana kvüthüngha a OPVÜI Potsow yi tssantsüng tera lea n ngav n siche. 19 Tolea razhü ovüngo jiang esüa nte ha shilo yipchotava, OPVÜI na ntia a ezolamu lilicho sana zetavka." 20 Potsow na hoji zümo Balaam thüngi oro ezocho, "Kyon shiangna nitsalo rocho tssona phana woa, tokhatola ana ntio ni ezoana ji ephan tae tssoa." 21 Hoji ephan Balaam na ojyuato jo ombo kurü jilo tsankae Moab esopvüi jiang phana wocho.
Balaam Tona Ombo kurü ji To
22 Balaam na khochiale Potsow na lüm tsukcho osi Balaam na ombo kurü jilo tsankae ombo tepfü otsük eni jiang nzo yita vanathüng OPVÜI na lanben na olan lungi mangchaki ombo khalanchicho. 23 Kurü jina lanben lanlungi yonri bensi manga vamo ji hungale, lantssae kathei oli rheyicho. Tole Balaam na kurü ji erhüpa lanlungi rheyithuklancho. 24 Tole lanben jina jününgroli olongna epicho yuta lo olan kvütssümvü tüv lo mangkachilancho. 25 kurü jina lanben ji hunglanale lantssae kathelani olong eshemo jiang lona Balaam jo ji eshüpkacho. Hoji tsükona Balaam na kurü ji talancho. 26 Tole lanben jina lankvütssüm kvümoe ha khophi n yicheo tüv lona manglani vancho. 27 Osi kurü jina lanben ji hungale ephathei sicho. Tole Balaam na lüm tsuki ombo etsi ji khi kurü ji erhüplancho. 28 Tole OPVÜI na kurü ji oyi nsancheo etho picho, osi Balaam ezocho, "Ana ntio ni tssocheyichola? Osi ntio tsükona yenjo ethümoto atachola?" 29 Tole Balaam na ezocho, "Nina a n khanzio jina ni tacho, ana yonri hancho savo ni lüngthathaku." 30 Hoji tsükona kurü jina heto janlancho, "Aiyo nina ni eküm echung tsankae rümphio kurü ji mekchoke? Ana kvüthüng sana heto ni etsso-ephyoyithakcho alo?" Ombona, "Meka" to janlancho. 31 Tothüng ji OPVÜI na lanben yonri bensi lanpvüi manga vamo ji Balaam hungthukcho; toajo Balaam na jitopvü omha nkhüma likoe vanjoe sicho. 32 Jithüng lanben jina ezocho, "Nino ntioli ni kurü ji yenjo ethüm erhüpchola? Nina hetüv elhilo khochiv n lio jina ana oro olan ni khanicho. 33 Tokhatola ni kurü jina ahungi yenjo ethüm kholancho. Kurü jina n kholancho savo ana ni lüngthasi kurü ji eküm vanthoku." 34 Balaam na janlancho, "Ana mmen tssothaka, nina akhalanchiv olani na vana to n tsicho, tokhatola ana khochiv elan n li to tssona ana kholani oki yivka." 35 Tokhatola lanben jina ezocho, "Kyon shiang nzo woa, tolea ana ni ezocho ephan tae phyovka." Hoji tsükona Balaam na kyon jiang phana wocho.
Balak na Balaam Elonchoala
36 Balaam tsata to Balak na zoale ombona owo olani Moab erüi Amon zhükhfü tssalo Ar yantsü jilona ombo ndukcho. 37 Balak na ombo ezocho, "Ana ni tsalo rothukdemo jithüng na ntioli n rochola? Ana jo tssona ni n yantsochev tsayicho alo?" 38 Balaam na janlancho, "Ana rothaka, n rochoke? tolea enhungo a etho n li, OPVÜI na ntio phyole to a ezoa sana jitae ana phyov." 39 Balaam na Balak phana Huzoth yantsü jilo wotacho, 40 Osi Balak na jilona mangsü tona olyu to tatsüngi oso ejoma Balaam tona ombo ndüngo esopvüiden to jiang picho.
Balaam Zenkhyingyi Ovüngo Ji
41 Ojyuato enyathüng jo Balak na Balaam sosi Bamoth Baal jilo chungo Israel kyon ejoma jiang Balaam hungthukcho.
1 Balaam na Balak ezocho, "Shilo thanphen tiying a ronia osi tssibung tona olyu obung tiying to süsi yia." 2 Balak na hoji esüa süsi oyi onina thanphen akvü tssibung motsünga tona olyu bung motsünga to ren thantacho. 3 Balaam na Balak ezocho, "Ni erungthan shi ndüngo manga vana, ana OPVÜI na athüngi tenduktav sana zevka. Osi ombona ntio a ntsithukana ji ni ezovka." Jitosi ombona phunglan kvüri omboti chungocho, 4 tole Potsow na ombo ndukcho. Balaam na Potsow ezocho, "Ana thanphen tiying roni motsünga lo tssibung motsünga tona olyu bung motsünga to ren thanthaka." 5 OPVÜI na ntio kvüto phyov sana ji Balaam ezocho osi ombo yithen ji Balak pile to ezocho. 6 Ombona elani joyile Balak jo Moab esopvüi jiang nzo erungthan ji ndüngo mangpvü vancho. 7 Balaam na heto zenkhyingcho, "Maob mesoa Balak na engkhüwoe phunglan jianglo Syria lo na a sosi yicho. Ombona 'oro a nsania,' osi Israel kyon jiang pono 'a rhyikayia' to phyocho. 8 Tokhatola, Potsow na n rhyikayio jiang ana kvütoli rhyikayivla, mekana OPVÜI na monthoku n phyov kvütoli ana n mhom phyovla?" 9 Ana phunglan ntssonina onte hungala; Ana yondon jiang lona onte zechochiala. Onteno onte poti evan jipo; Onteji jipo thanpoe lona rankata onte mmhayithukcho to ontena ntsia. 10 Israel tsoronichen jo hajang tata; N khacheo tata, onte okyunga."Anaha Potsow kyon tsüka to ochüm echeta a vanthuka; Osi ntsanthoe jiang esüa noyinga a chüthoka." 11 Tole Balak na Balaam ezocho, "Nino ntio elhi a tssoyiala? Aiyo a ri shiang rhyikalo ni tsale, nina mmha onte randankathaka." 12 Balaam na janlancho, "OPVÜI na ntio phyole to a ezoana ji tae ana phyovka."
Balaam na Ye Njo Enito Zenkhyingala
13 Balak na Balaam ezocho, "Elani aphana rolana, meta motsünga lona nina Israel jiang ejoma tae hungwo tüv lo wotavka. Osi hojilona nina a tsükona onte rhiyikata." 14 Hojito phyoa ombona Balaam sosi Pisgah phunglan kvüri Zophim li jilo chungotacho. jiloha ombona thanphen tiying roni hojiang akvülo tssibung motsünga olyubung motsünga to thancho. 15 Balaam na Balak ezocho, "Ana owo ojilona Potsow ndukuka. Shilo ni erungthan shi ndüngo na vana." 16 Tole OPVÜI na Balaam ndukcho, osi ombona ntio kvüto phyov sana ji ezocho, osi Balak thüngi yithen pia yithukcho, 17 Ombona kholani yile Balak jo Moab esopvüi jiang nzo thanphen ji ndüngo mangkachipvü vancho. Balak na OPVÜI na ntio ombo ezocho sana to engacho, 18 osi Balaam na zenkhyingyi shiang shi phyochicho: "Zippor tsoe Balak, shilo yia, Osi ana ntio phyov licho sana ji enga. 19 Potsow jo kyon esüa, ejüng ephyoe mek; Ombo kyon na ombo lümbüm tongphia vamo ji esüa tüv mek. Tolea ombona ntio phyochaka sana ji, tssoala; Ombona phyochiana hojito benchetala. 20 Ana mmhayile to a ezocho, Osi Potsow na mmhayithuko ji ana n phüplanche. 21 Israel jiangna ochyu wo vüngi sükhying n mhom osi ezüp licho ntia n hungchi. Onte OPVÜI Potsow jina onte yolo vana; Ombo onte mesao to ontena thenchoala. 22 Potsow na onte ji Ejip metae na sochukcho, Osi ombona onte tsükona mikulyu esüa rotayiala. 23 Okyak n mhon osi ratsenrapvü elhi ntia Israel jiang pono etsso tüv n li. Enhungo kyon na Israel jiang motsü rütav, "Zeta Potsow na ntio tssothakcho sana to!" 24 Israel jipo jo hingho etho ejüi tüv: Ombona mpvüroe tsoe n sithüng jo jüngtheta n vanala, osi ombona rümo jiang ejen ji n yuthüng jo yingto n vanala. 25 Tole Balak na Balam ezocho, "Nina Israel jiang rhiyikav ekhirana tssona toka mmha jo ti-randankayia!" 26 Balaam na ezocho, "OPVÜI na a ezo jiang ephan tae ana tssov, to ana ni n zocho ke?"
Balaam na Yenjo Ethümoto Zenkhyingala
27 Balak na phyocho, "Ana meta thanpoe ni sosi wolam ka roa. Nkhontsi Potsow na a tsükona Israel jiang ni rhyikathoku mpa tssov." 28 Ombona Balaam sosi lijüng ji hungcho chiwo tssoa Peor phunglan kvüri chungotacho. 29 Balaam na ombo ezocho, "Shilo thanphen tiying a ronia, osi tssibung tiying tona olyubung tiying to süsi yia." 30 Balak na hoji esüa tssocho, osi thanphen akvü tssibung motsünga, olyu motsünga to ren thancho.
1 Jithüng jo Potsow na Balaam ji Israel jiang mmha randankathuk hungala to ombona engathecho, hoji tsükona ombona ovüngthüng esüa phyalyu zepam ethev n licho 2 ombona lijüngoe zechile Israel jiang ji pvüji pvüjina kupa ncheni vana hungcho. Jithüng Potsow mon na ombo sayae heto phyocho: 3 "Yithen shijo Beor tsoe Balaam, Ochona ntssünga hungasana ji thüngina yicho yi, 4 Osi Potsow na phyocho ezowo kyon ji. Ana omhyik nrüngi Thotsü Potsow hungthuk ji müngtüngina zetala. 5 Israel jiang ranki jiango ezev mmhona, 6 Palm dung rencho tüv Mekana zhükhfü tssae phari licho tüv, Mozhürhüm mmhom dung OPVÜI na chümcho tüv Mekana zhükhfü tssae cedar zacho tüv. 7 Erhyu tssona onte jochochiyiv Osi ojü sothechicho likolo ontena mojü thev. Onte mesao jijo Agag lona tsükao tssov, Osi ombo yansa jo kona nzoa tssov. 8 Potsow na Ejip metae na onte sochukcho; Ombona onte tsükona tssibung ntav esüa rotayiala. Ontena onte ri jiang nzhüala, Onte ri jiang ha ejüproe siala, Osi lotssi jiang roe sitala. 9 Jipo shijo hengho esüa tüv; Hojina yipa vana na ochinaha n thechikuk. Ochona Israel mmhayia na ombo mmhayiv, Osi ochona Israel rhiyiana ombo rhiyikav." 10 Balak na ombo kheji zümi lüm tsuka phyocho, "Aiyo onte rhiyiv ni tsale ji sisi nina yenjo ethüm onte mmhyithaka. 11 Enhungo oki yi sia! Ana yantso ni piv phyochakcho khatola OPVÜI na yantso ji ni n khithukala." 12 Tole Balaam na janlancho, "Ntena a thüngi rothuko yithenpvüi jiang ana ezochola 13 nina ni mesaki jilo licho shona janti jiang topvü a pile ana a etancho tssoa OPVÜI yi n ngav n tssoto. OPVÜI na a ezo jiang tae phyovto ni zochola."
Balaam na Okhao Tssao Zenkhyingala
14 Balaam na Balak ezocho, "Enhungo aiyo a kyon jiang thüngi kholani yiala tokhatola ana n yithüng ntangshon ekyuv heto ni zov, jijo Israel jiangna ni kyon jiang thüngi kvüto tssoyiv sana ji." 15 Ombona zenkhying yi heto phyocho: "Beor tsoe Balaam, ntssüng-rünga ehungo kyon ji yithen ji heto, 16 Potsow na phyo jiang ezoe kyon Osi Ntssontso Potsow thüngina ntsiran ehungo kyon. Ana Thotsü Potsow hungthuk mungtüngi na hungwo ji rüki zetala. 17 Ana mhadungi zechile, ana Israel jipo jiang hungala. Shantio wondanga esüa tüv mesao jipo jilona chiyiv. Ombona ngazo sünga esüa Israel lona chiyiv. Ombona Moab lo esopvüi jiang tathechiv Osi Seth kyon jiang tathechi siv. 18 Ombona Edom lo ombo ri jiang khyov Osi onte meta jiang ombo echi tssoe siv, Osi Israel na ekhyo tae khia yia vam. 19 Israel jipo na onte tssethechirav Osi wokhae enhyokao jiang mpato phüpi siv." 20 Balaam na mungtüngi na Amelek kyon jiang hungi phyocho: "Amelek jo topvülo etho elitso jipo tssocho, Tokhatola wokhae jo n phanthilamo moni sivka." 21 Ombona mungtüngi na Kenite jipo jiang hungi phyocho: "Ntena vamo meta jijo nkocheta noyinga phunglan poni oshüp tssokae licho tüv, 22 Tokhatola Assyria kyon jiangna rumi nte vünga na nte Kenite jipo ji moni siv." 23 Balaam na heto zenkhying yi phyocho: "Jükiwoe etsseni vamo shiango ochoangla? 24 Cyprus lona ritssoeden roravka; Ontena Assyria tona Eber to khyov, Tokhatola onteha kümali onte monlam." 25 Jitosi Balaam na methaki ombo kiwoe kholani yicho osi Balak ha yi sicho.
Israel Jiang Peor Lo
1 Israel jiangna Akacia hayi lo nchenathüng, eboe jiangna Moab eloe meta jilo vamo jiang thüngi rama tssotacho. 2 Eloe jiangna Moab Potsow khümphen jianglo ekümrüm than tokhutao jianglo Israel eboe jiang tsanhyatacho. 3 Hojito Israel jiangna hotüv etsoyu tsotasi Peor lo Baal potsow ji khümtacho. Hoji tsükona OPVÜI na lüm tsuki Moses ezocho 4 "Israel esopvüi jiang tsarhyui a yizüng ephanina engo kyon na hungra chüthuka, tona ana kyon jiang thüngi lüm tsukvü meka." 5 Tole Moses na tsüphoe jiang ezocho, "Nte pvüji lo eboe kvüta Peor lo Baal ji khümchosana lüngtharae sia." 6 Kyon topvü OPVÜI vanrhyu ranki kipüngo na nungrata vanathüng Israel eboe tsükana Moses tona kyon topvü na hungra Midian eloe tsüka sosi ochungi rheyicho. 7 Kvüthüng Aaron pvüti ji orüo Eleazar tsoe Phinehas na hoji hungchosana okho lona phanthi yi sicho, 8 osi ombona oyi otsso khi bensi ranki rhowo, 9 wotssona eboe jiha eloe ji woni kavüa chenlangi sicho. Hojitoli nochonori vara Israel lo lio ji esancho. Tokhatola tothüng jo kyon otsük wothüng mekyu mezhü chüthakcho. 10 OPVÜI na Moses ezocho, 11 "Phinehas na ntio elhicho sana ji yakchia enhungo ana Israel kyon jiang thüngi lüm etsuk n li. Ombona a yaka potsow thanpo ekhüm jiangji n rümkhukcho. Hoji tsükona ana lüm etsuk lona kyon jiang roe n sicho. 12 Hoji tsükona ombo ezoa, ana yuta topvü tsükona ombo thüngi ntsata methakvüka. 13 Ombo tona ombo tsoronichen to jiang ji nchünkhon tsükona pvüti elhi tsswothukvüka, ntiotssole a yaka Potsow thanpo ekhüm ji ombona n rümkuko ji yakchia kyon jiang mmen siyicho." 14 Midea eloe ji nzo lüngthae siwo Israel eboe jijo Simeon pvüji lo wopan motsünga lo kvüri Salu tsoe Zimri to tsacho. 15 Eloe ji mying jo Kozbi, osi opo Zur jo Midia pvüji lo okho motsünga pono OPVÜI. 16 OPVÜI na Moses ezocho, 17 'Peor lo vara jilo chüthuko eloe Kozbi etssophyo osi, 18 Midian jiang na elhi n mhom lona nte ejithechio ji tsükona onte thüngi ori tssoe monthuka."
Wokhata Enioto Ji
1 Vara ji sülo jo OPVÜI na Moses tona Aaron tsoe Eleazar to ezocho, 2 "Israel khümtsüng topvü wopan opan na eboetso nzyu mekyu na omhawoe rasan elhi tssokukthang topvü owo khatava." 3-4 Moses ha Eleazar onina hoji ephan eboetso kvüta hoji yingaren sana khatacho. Kyon jiangna Jeriko lo Jordan bankae Moab hayi jilo etssirhyucho. Ejip lona chiyio Israel kyon jiang shiang: 5 Jakob tsokhying ovüngo Reuben, tona ombo tsoe jiang Hanoch lona bukcheo wopan jiang; Pallu lona bukcheo wopan jiang, 6 Hezron lona bukcheo jiang tona Carmi lona bukcheo jiang to, 7 Shiang jo Reuben lona bukcheo jiang osi onte tssotsüi eboetso 43,730. 8 Pallu lona bukchecho 9 Eliab tona ombo tsoeden Nemuel, (Nathan tona Abiram to okho na ethüngchecho. Onte OPVÜI panlana Moses ha Aaron oni sisi Korah sürüiden kümcho. 10 Onteji liko küngsoe onte nzhüi sicho osi Korah tona ombo sürüi jiang to omi na kyon 250 chüthuko jithüng onte chüracho, osi onte ji kyon na ekyu yilan ejyukaphen kümcho. 11 Tokhatola Korah tsoe jiango n chüthukcho.) 12 Simeon jipo jo Nemuel pvüji, Jamin pvüji, Jachin pvüji, 13 Zerah tona Shaul to pvüji to. 14 Onte tssotsüi eboetso 22,200. 15 Gad jipo jo, Zephon, Haggi pvüi; Shuni pvüji; 16 Ozni pvüji, Eri pvüji, 17 Arod tona Areli to pvüji. 18 Pvüji shiang eboetso tssotsüi 40,500. 19-21 Juda jipo jo, Shelah pvüji, Perez pvüji, Zerah pvüji, Hezron tona Hamui pvüji to. (Juda tsoeden Er tona Onan tojo Kanaan meta lona chücho.) 22 Pvüji Pvüji shianglo eboetso tssotssüi 76,500. 23 Issakhar jipo jo: Tola pvüji, Puah pvüji, 24 Jashub pvüji tona Shimron pvüji to 25 Pvüji shiang lo eboetso tssotssüi 64,300. 26 Zebulun jipo jo: Sered pvüji, Elon pvüji tona Jahleel pvüji to. 27 Pvüji shianglo eboetso tssotsüi 60,500. 28 Joseph jipo jo, Ombo tsoe Manasseh ha Ephrim oni. 29 Manasseh jipo jo: Gilead opo Manasseh ji tsoe Machir, osi tsoronichenden jo shiang: 30 lezer pvüji, Helek pvüji, 31 Asriel pvüji, Shechem pvüji, 32 Shemida pvüji, tona Hepher pvüji to. 33 Hepher tsoe Zelophehad jo otsoe n vancho tolea otsolovden vancho; onte mying jo Mahlah, Noah, Hoglah, Milka tona Tirzah to. 34 Pvüji shilo eboetso tssotsüi 52,700. 35 Ephraim jipo jo, Shuthelah pvüji, Bechar pvüji, tona Tahan pvüji to. 36 Eran pvüji jo Shuthelah rüiden lo rükatala. 37 Pvüji shiang lo eboetso tssotsüi 32,500. Joseph lona bukcheo pvüji jiang shiang. 38 Benjamin jipo jo: Bela pvüji, Ashbel pvüji, Ahiram pvüji, 39 Shephupham tona Hupham pvüji to. 40 Ard tona Naaman to pvüji shiang jo Bela trüiden to yanchetala. 41 Pvüji shiang lo eboetso tssotsüi 45,600. 42 Dan jipo lona jo Hushim pvüji, 43 osi eboetso tssotsüi 64,400. 44 Asher jipo jo: Imnah pvüji, Ishvi pvüji, tona Beriah pvüji to. 45 Heber tona Malchiel to pvüji jo Beriah rüiden to. 46 Asher na Serah to tsa tsolo vancho. 47 Pvüji shiang lo eboetso tssotsüi 53,400. 48 Naphtali jipo: Jahzeel pvüji, Guni pvüji, 49 Jezer pvüji, tona Shillem pvüji to. 50 Pvüji shiang jo eboetso tssotsüi 45,400. 51 Israel eboetso tssotsüi jo 601,730. 52 OPVÜI na Moses ezocho, 53 "Meta ji jipo mata ekyung ephan erüsotayia. 5456 Phyalyu fuki zesi meta ji jipo wokyungo jiango tsüpo pi, jipo wozamo jiango teriv pi to erütayia." 57 Levi jipo jo Gershon pvüji, Kohath pvüji, tona Merari pvüji to. 58 Onte rüiden yolo jo pvüji nkhükro Libni, Hebon, Mahli, Mushi tona Karah to jura. Kohath jo Amram opo, 59 ombona Levi otsolov Jochebed Ejipi na vamo ji soa vancho. ompvüna Amram tsokhying eni Moses ha Aaron onjeni tona tsolo tsüka Miriam to bukcho. 60 Aaron na tsokhying mezhü Nadab, Abihu, Eleazar, tona Ithamar to vancho. 61 Nadab ha Abihu onio n thomi OPVÜI thansoracho lona chücho. 62 Levi tsoronichen eboetso nzyua pomoe jo 23,000 tssocho. Onteno Israel lo ejüeli n pio jina Israel yolo nthena echümporo khae vanthukcho. 63 Pvüti shiang hetopvü to Moses ha Eleazar onina Jeriko lo Jordan pankae Moab hayitsü lona wokhata khiathüng eranrhyucho. 64 Moses ha Aaron onina Sinai phunglani na wokhata khidemo jithüng eboetso erantao jiangjo OPVÜI na phyoe licho 65 osi Jephunneh tsoe Kaleb tona Nun tsoe Joshua to yaki jo topvü jüracho.
Zelophehad Otsolov Jiang
1 Hepher tsoe Zelophehad otsolovden jo, Mahlah, Noah, Hoglah, Milcah, tona Tirzah to, osi Hepher opo jo Gilead, Gilead opo jo Machir, Machir opo jo Manasseh, Manasseh opo jo Joseph. 2 Onteno OPVÜI vanrhyu ji kipüngo Moses tona pvüti Eleazar osi esopvüiden to tsokhying jiang osi kyon okho topvü mhadungo chivo heto phyotacho, 3 "E opo jo otsoe n vamvü lijüngina chüi sithaka. Ombo Korah ochona OPVÜI panlansi chücho sana ji sürüi mek tolea ombo mmen tsükona ombo chücho. 4 Ombona tsokhying n vancho tsükona tae jo kvütoli Israel yolo na ombo mying khi siyichola? E opo kitsük jiang yolo enaha e ejan ejüeli epia." 5 Ontena chomo ji OPVÜI thüngi jonjiyile, 6 OPVÜI na ombo ezocho, 7 "Zelophehad otsolov jiang na jonjiwo ji elanthata, onte opo kitsük jiang yolo onteha ejüeli pia. Ombo ejüeli jiang onte pono ha janta yithuka. 8 Israel jiang ezoa, kvüthüng kyon tsükana tsokhying n vam chüa sana ombo ejüeli jiang otsolov na hovka. 9 Ombona otsolovha n vana tssona, opo ojeni jiangna tssentso tssovka. 10 Ombona ojenio n vana tssona, opo ojenio jiangna tssentso tssovka. 11 Ombona ojeni osi opo ojenio ha n vana tssona ombo wopan ndüngta enhyamo jina tssentso tssoe ombo eli to hovka. A, OPVÜI na yizüng nte pio shi esüa Israel kyon jiangna shikhfü ephan tssoa heto benphia wovka."
Moses Echungchov Joshua Ethüngchetala
12 OPVÜI na Moses ezocho, "Abarim phunglani chungoe ana Israel shiang pia vamo meta ji chani zeta. 13 Nina hoji hungthaka na ni jenio Aaron esüa niha ni chüvka, 14 ntiotssole nini na Zin lijüngi na a panlantacho. Meribah lona kyon topvüna a thüngi erinjantao jithüng ninina a etho ji ehungpvüi n tssocho." (Meribah ji Zin lijüngi Kadesh lo jükvü ji) 15 Moses na heto randancho, 16 "OPVÜI Potsow, eküm topvü bukchephen, ana randanala, okho shiang sokhüka, 17 osi ritssolo onte ekievong khuko kyon tüv ethüngcheta to tssona ni kyon shiang ji rhüki n vamo olyuden to tssov meka." 18 OPVÜI na Moses ezocho, "Nun tsoe Joshua tssochyui kyon ji khi nina kvürilo nyimkayia. 19 Ombo ji pvüti Elezar osi kholok topvü pono phanthithuka, osi topvü mhadungo na ombo ji ni echungchoe to phyothuka. 20 Ni etho tara ombo tsütsathuka, tona Israel topvü na oyi ombo engayivka. 21 Ombo ji pvüti Eleazar ocho a lüm erüng ji phyalui zesi chethev sana ji pono enhikae vanthuka. Hojito Eleazar na Joshua osi Israel kyon topvü nkankvü topvülo olan sovka." 22 OPVÜI na ezoji esüa Moses na tssocho. Ombona Joshua ji pvüti Eleazar osi kholok ji mhadungo mangthukcho. 23 OPVÜI na yizüng pio ji esüa Moses na Joshua kvürilo nyimkayisi ombo echungchoe to phyoyicho.
Eng Akvü Epio Than Jiang
1 OPVÜI na Moses thüngi ezoa, 2 Israel jiang ji OPVÜI na emathao etsoyu than jiang yuta kokae elio ji ephan thantale to ezothukcho. 3 Etsoyu than OPVÜI epiv elio jiang shiang: Eng akvü erungthan tsükona olyuro obung nzyu eni osi ntia ome n khyingo tüv eni, 4 motsünga ji enyathüng, eniotoji mmyulani to, 5 osi enya mmyu than akvüto ohüm chencho seri motsüngalo olive thyujü mmhontsov etükpvü motsünga nhyontsüi thana. 6 Shijo totona erungo etsoyu than orhüm mmhom OPVÜI emathathoku tsükona ovüng tssoa Sinai phunglani na thamo than tsük ji. 7 Olyuro tsokhfü ji nzo thanphen zükhi than jijo thanphen jilo etükvpvü motsünga phyangkata. 8 Mmyui ha enyathüng thamo jito olyuro enioto ji khi zükhi than theta thana. Hojiha etsoyu than, orhüm mmhom jina OPVÜI emathathoku thana.
Esanmung Than Ji
9 Esanmung tsüngono jo olyuro obung eni ntia ome n khyingo tüv khi, ohüm seri enilo olive thyujü nhyontsüi otsuk omüm than tssoa thana. 10 Erungthan shijo enya mmyu than jianglo ekaro tssoa esanmung akvü thamka.
Choro Ovüngo Jilo Tsüngon Ovüngo lo Etham Jiang
11 Choro benkaden akvü erungthan pia: mangsübung tssiniro eni, olyubung motsünga, olyubung nzyuatso tüv tiying to ntia ome n khyingo tae thamvüka. 12 Otssukomüm than tssoa ohüm lo olive thyujü nhyonkae thana: Tssibung akvülo ohüm seri ethüm, olyubung akvü lo seri eni; 13 Olyuro akvülo seri motsünga to ekae thana. Erungthan shiango orhüm mmhom khi OPVÜI emathathoko etsoyu than. 14 Zükhi than tsotso jijo tssibung motsüngalo zükhi etükpvü eniren, olyubung akvülo etükpvü motsünga si chiso ren, olyuro akvülo opvü motsünga to thei thamo ji. Shijo nzyu totona choro benkaden akvü tsüngon ovüngo jilo erungthan pio ji. 15 Eng akvü erungthan osi zükhi than to jilo ekata mmen than tssoa nyanyanbung motsünga thana.
Vümhi N theo Hümri Tokhu Jilo Othan Jiang
16 OPVÜI yikrachio tssoa Yakchi Tokhu ji choro ovüngo jilo tsüngon taro mezhüo to jilo khivka. 17 Tsüngon taro mongo to jilo jo ekhümlan tokhu benkav osi tsüngon tiying khiv osi hoji yuta lojo vümhi n thena rüngcho hümri tae tsovka. 18 Tokhu ji benka nchuk jo ntena ekhüm tsükona sanrhyutavka osi ntia elhi tssov meka. 19 Etsoyuthan tssoa erung than OPVÜI thantava: Tssibung eni, olyubung motsünga, nzyuatso olyubung tiying to ntia ome n khyingo tüv thamvüka. 20 Otssukomüm than shenthi lo ohüm chencho lo olive thyujü nhyontsüo ji thana: Tssibung akvülo ohüm seri ethüm, olyubung akvülo ohüm seri eni ren, 21 olyuro akvülo seri motsünga to ren thei thana. 22 Mmen than tssoa ha nyanyanbung ha motsünga to thana. Hojitoli kyon jiang nthocheta. 23 Shiang hetopvü ji enga akvüto thanphen jiang akvülo thamvüka. 24 Hoji OPVÜI emathathoku etsoyu rhüm than ji tsüngon tiying tsükona thana. Shi ji eng akvü erungthan osi zükhi than jiang ekalo thana. 25 Tsüngon tiyingo to jilo jo ekhümvü tsükona sanrhyutava osi ntia elhi ti-tssotava.
Liri Tokhu lo Thamo Ji
26 Liri tokhu tsüngon ovüngo jilo ntena ovüngo ethi-eben than thanathüng ntena sanrhyui khümtavka, osi ntia elhi tssov meka. 27 OPVÜI emathao rhüm than tssoa heto thana: Tssibungro eni, olyubung motsünga, olyuro obung nzyuatso tüv tiying to ntia ome n khyingotüv khi thamka. 28 Otssukomüm than shenthi jilo ohüm tona olive thyujü nhyontsüo ji thana: Tssibung akvülo ohüm seri ethüm, olyubung akvülo seri eni, 29 olyuro akvülo seri motsünga to ren thei thamka. 30 Jilo ekata mmen than tssoa nyanyanbung motsünga khi thanna kyon jiang nthoche tssolan jiang berithuka. 31 Othan shiang jo eng akvüto erungthan osi otssuk-omüm than jiang ekalo thantava.
Nzyu Ethan Tokhu Than Jiang
1 Choro tiyingo to jilo tsüngon ovüngo jilo jo ntena elhi ntia ti tssotana sanrhyui khümtava. Hoji nchuk jo tatara khfütava. 2 Erungthan orhüm mmhom thani OPVÜI emathathuka: mangsü obungro motsünga, olyubung motsünga, olyuro obung nzyuatso tüv tiying, to shiang topvü ephyoerüv n pao tae khi thantava. 3 Otssuk omüm than ohüm lo olive thyujü nzükao jiha thei thana: mangsü obungro jilo ohüm seri ethüm, olyubung jilo ohüm seri eni, 4 olyuro akvülo ohüm seri motsünga. 5 Elani mmen than tssoa myanyan bung motsünga thaii toli kyon jiang ntssüngcheo elhi jiang benrithuka. 6 Choro jilo tsüngon ovüngo jilo otssuk-omüm than ji ephalo tathi engakvü than lio jiha thana, osi engakvü erungthan tona otssuk-omüm than jiha zükhi than ji to. Etsoyu than shiang jo OPVÜI emathao rhüm mmhom.
Thungthan Tsüngon Jilo Othan Jiang
7 Choro tiyingoto jilo tsüngon taroto jilo jo etsoyu ti tsotana sanrhyutae khümtava. 8 OPVÜI emathao rhüm erungthan heto pitava: mangsü obung motsünga, olyubung motsünga, olyuro obung nzyutso tüv tiying to shiang hetopvü ome n khingo tüv khivka. 9 Tathi thanphen otssuk-omüm than ohüm lo olive thujü nzükao ji heto thana: mangsübung ji nzo ohüm seri ethüm, olyubung ji nzo ohüm seri eni, 10 olyuro akvülo ohüm seri motsünga. 11 Hoji ephalo mmen than tssoa nyanyanbung motsünga thana, elani hoji ephalo kyon jiang nthoche than, tona engakvü than otssü-omüm than tona zükhi than toji thana.
Rankiro Tokhu Jilo Othan Jiang
12 Choro tiyingoto jilo tsüngon taro mongoto jilo jo sanrhyui khümtava. OPVÜI yikrachi tsükona tokhu shi ji tsüngon tiying khitava osi elhi ti tssotava. 13 Tsüngon ovüngo shilojo etsoyu rhüm mmhon khi OPVÜI thani emathathuka: mangsü obungro taro ethüm, olyubung eni, olyuro obung nzyuatso tüv taro mezhü, to shiang hetopvü ome n khyingo tüv khivka. 14 Tathi thanphen otssuk-omüm tham ohüm lo olive thyujü nzükao ji heto thamka. Tssibung akvü ohüm seri ethüm, olyubung akvü ohüm seri eni, 15 olyuro akvü ohüm seri motsünga to shiang khi zükhi than jiang lo thephae thamka. 16 Hoji ephalo mmen than nyanyanbung motsünga thamka. Shiang hetopvü ji engakvü than jianglo otssuk-omüm osi zükhi than jiang nzo thamka. 17 Tsüngon enioto jilo mangsübung teriv eni, olyubung eni, olyuro obung nzyuatso tüv taro mezhü to ome n khyingo tüv tae thamka. 18-19 Shiang hetopvü ji tsüngon ovüngo jilo tathi thanphen jiang ekalo thamka. 20 Tsüngon ethümo jilo jo mang sü obung taro ekha, olyubung eni, olyu obungro nzyuatso tüv taro mezhü to topvü ome n khyingo khi thamka. 21-22 Shiang ji engakvü tathi thanphen jiang ephalo thana. 23 Tsüngon mezhüoto jilo jo mangsü obungro taro, olyubung eni, olyu obungro nzyuatso tüv taro mezhü to shiang hetopvü ome n khyingo tüv khivka. 24-25 Shiang ji tsüngon ovüngo jilo ethamvü elio jiang nzo thamka. 26 Tsüngon mongoto jilo jo mangsü obungro tokvü, olyubung eni, olyu obungro nzyuatso tüv taro mezhü to shiang hetopvü ome n khyingo tüv khi thamka. 27-28 Shiang ephalo tsüngon ovüngo thanphen jiang topvü thephae thamka. 29 Tsüngon tiruko to jilo jo mangsü obungro tiza, olyubung eni, olyu obungro nzyuatso tüv taro mezhü shiang hetopvü ome n khyingo tüv khi thamka. 30-31 Shiang topvü ji tsüngon ovüngo jilo thanphen jiang ephalo thamka. 32 Tsüngon tiyingoto jilo jo mangsü obungro tiying, olyubung eni, olyubung nzyuatso tüv taro mezhü to ome n khyingo tüv khi thamka. 33-34 Shiangji tsüngon ovüngo to jilo thanphen jiang ephalo thamka. 35 Tsüngon tizaoto jilo jo elhi ti tssotana sanrhyui khümtava. 36 Etsoyu orhüm mmhom OPVÜI emathao than tssoa erungthan heto pivka; mangsü obungro motsünga, olyubung motsünga, olyu obungro nzyutso tüv tiying to ome n khyingo tüv khi thamka. 3738 Shiang jo tsüngon ovüngo to jilo thanphen jiang ephalo thamka. 39 Shiangjo erungthan, otssuk-omümthan, zükhi than tona khümshümta than to ntena tokhu jianglo OPVÜI ethamvü jiang tsükona lanso. Shiang jo ntena phyochak than osi lüm erungthan to pio jiang ephalo othan jiang. 40 Hojito OPVÜI na Moses yizüng epio jiang topvü Moses na Israel jiang ezocho.
Phyochak Than Tsükona Püngnoyi
1 Israel lo pvüji jiang ezOpvüiden jiang thüngi Moses na püngnoyi picho. 2 Kvüthüng kyon tsükana OPVÜI othan epiv phyochaka sana osi etso-ephyo esiv phyochaka sana ombo echümchak ji n yesothukna ombo yi ji ephan tssov shikhfü. 3 Kvüthüng n yanpihan loroe opvüpoe ki evan tsükana OPVÜI ethamvü mekana etssophyo esiv phyochaka sana, 4 opona hoji zoe ekhirancho yakajo ompvüna phyochako ji ephan benthukvü shikhfü. 5 Tokhatola ompvü opona hoji zoe ekhirachocho ompvü phyo chak ji ephan n tssolea Potsow na nlan ompvü siyiv, ntiotssole opona hojito n tssothuko jina. 6 N yanpihan eloena etamana tssolea n tangshon yakchia süsoroa etssophyo esiv phyochaksi hoji süloti yanpiyanthan tssona, 7 orapvüna ntsi ekhirancho yakajo hoji benthukvü shikhfü. 8 Tokhatola orapvü jina hoji zoe ompvü ekhirana tssona n benchev silea OPVÜI na nlan ompvü siyiv. 9 Lorana evan mekana sichithako eloe jina phyochak vao jiang mekana etssophyo esiv phyochako jiang ji ompvü yi jiang ephan benphiv shikhfü. 10 Yanpicho eloe tsükana ntiosana phyochak lina osi etssophyo esiv phyochakna, 11 orapvüna hoji zoe ekhirancho yakajo ompvü yi jiang ephan benthukvü shikhfü. 12 Tokhatola orapvüna shiang bethukvü ompvü ekhirancho tssona ompvüna n bethuklea nlan ompvü n pi. 13 Ompvüna phyochak vao jiang ji n benchethukvü tangi esio etho orapvü na lia. 14 Tokhatola orapvü na ezowo ji tsüngon jilo ntia ekhiran n lio ji yichak jo ombona lüm na rüngcho. 15 Tokhatola ombona sülaniti ekhirana tssona hoji phyochak ji n benchev siwo ji ome ji ombo khyingu. 16 Shiangji n yanpihan osi yanpi orapvü kilo evan eloe echümchak yi jiang tsükona Moses na Israel jiang pio yizüng jiang.
Midian Jiang Thüngi Ntho Ritsso
1 OPVÜI na Moses ezocho, 2 "Midian jiangna Israel jiang thüngi etssophyo ji tsükona nina onte khangshia. Hoji sülojo ni chüvka." 3 Tole Moses na kyon jiang ezocho, "Ntena ritsso tsükona methak-tava, osi owo Midian jiangna OPVÜI thüngi ntio tssochosana ji man onte hatava. 4 Israel pvüji akvü lona kyon ovo wothüng motsüng tsüng wothuki ori tssotava." 5 Hojito pvüji akvü lona ethüngcheo ji wothüng taro enina khochiv methakcho. 6 Razhü ji esov tsükona Moses na ntho tsütsaelan ezepvüi osi tatara won epipvüi Phinahas, Eleazar pvüti tsoe ji ethüngchecho. 7 Moses na onte ezo ji ephani na ontena Midian eboetso topvü, 8 Mesaeden otsük mongo: Evi, Rekem, Zur, Hur, tona Reba to jiang phata lüngtharae sicho. Ontena Beor tsoe Balaam ha lüngthacho. 9 Israel jiangna Midian eloe jiang, ngaro jiang tona onte mangsü, olyu to jiang hayae khiyicho osi onte ejüeli topvü re khiyisi onte yantsü, 10 osi nchenphen jiang topvü rungi siyicho. 11 Ontena rechowo monrantsan jiang tona ekümrümo jiang to hantasi yicho, 12 osi Moses ha Eleazar oni tona Israel okho ji to Jordan pankawoe Moab hayilo ncheni vamo jilo yitacho.
Rasan Jiang Kholani Yicho
13 Moses, Eleazar tona Israel esopvüi jiang to na nchenki na khochi rasan jiang nduko chiwotacho 14 Tole Moses na rasan esopvüiden, nzoa yolo esopvüi osi othüng motsüngalo OPVÜI jiangna ritssolo na kholani yio jiang thüngi lüm tsukcho. 15 Ombona onte ezocho, "Nteno ntiolyui eloe topvü nkachitacho la? 16 Eloeden jiango Poer lona Balaam yi engae kyon jiang ji OPVÜI thüngi na n kachoe yithuko ji ntena n tsicho alo? Hoji yakchia Potsow kyon jjangyolo vara yichola. 17 Hoji tsükona khyingroe osi eloe kvütana rama benphithakcho sana lüngtharae sia, 18 osi loroe kvütana rama n tssohancho sana jiango nte echi vatava. 19 Nte kvütana kyon lüngthata osi echümüng evüngkacho sana topvüna nchenki tssae tsüngon tiying vamka. Osi tsüngon ethümo jilo tona tiyingoto jilo tojo onte osi ontena rama tsso eloe jiang to nthochetava. 20 Nte tsakalan akvü, mpensü osi sofüna nsüngrücho nyanyantssan osi otssüngna nsüngrücho topvü nthochevka." 21 Pvüti Eleazar na eboetso ritsso lona yio jiang ezocho, "Shikhfü shiang jo OPVÜI na Moses picho. 22-23 N rungo tsütsaelan sho na, janti, yongmen osi yonjak, mekana shisha shiangjo omina evangi sia nthocheta. jiang yaka thanpo jo nthoche jü khi nthocheta. 24 Tsüngon tiyingoto jilo jo ntena mpensü jiang etssüi sitava, to tsso na nte ji shikhfü ephan nthochecho tssov osi nchenki rheyichev."
Phancho Jiang Chitao Ji
25 OPVÜI na Moses ezocho, 26 "Ni tona Eleazar, elani okho esopvüi jiang to tssoe phanchowo tsütsaelan osi morantsan jiang, ekümrümo jiang to khae zetava. 27 Phanchocho topvü ji echi eni chichei echia jo rasan jiang pia, echia jo kyon okho jiang pia. 28 Rasan jiang ejan jilo na morantsan nzo mongo lo tsüka ren khiche, hoji esüa mangsü, kurü, olyu osi nyanyan jiang lona ha hoji ephan khicherae OPVÜI ekhya tssen vayia. 29 Hojiang jo OPVÜI thüngi echümporo yantso tssoa pvüti Eleazar pia. 30 Nzontsü okho ejan jilona morantsan otsük tinyan akvü lona tsüka khichei, mangsü, kurü, olyu osi nyanyan jiang lona ha hoji ephan khicheta tolyui OPVÜI vanrhyu ki enhyang Levi jiang pia." 31 Tole Moses ha Eleazar onina OPVÜI yizüng ji ephan tssocho. 32-35 Onte ndüngo vanthako jianglo ekata elani rasan jiangna shiang shi phancho cho: olyu tona nyanyan to tsotsüi 675,000, ekümrümo thanpo 72,000; kurü 61,000; elani loroe eboe n tsihan tüv 32,000 to. 36-40 Osi phancho jiang olan akvüto lona chiso jo rasan jiang ejan tssoa heto picho: Olyu tona nyanyan to tsotsüi 337,500; jilo 675 jo ontena OPVÜI thüngi tssenkhya tssoa picho, ekümrümo thanpo 36,000 jilo 72 jiha OPVÜI echi tsenkhya thecho; kurü 30,500 rasan jiang ejan pio jilona ontena 61 jo OPVÜI echi tssenkhya thecho; elani loroe onte ejan 16,000 jilona ontena 32 jo OPVÜI thüngi tssenkhya tssoa thecho. 41 Hoji tsükona OPVÜI yizüng ephanina kvüta tsenkhya tssoa thecho sana jiang ji topvü Moses na Eleazar pvüti picho. 42-46 Hojito okho jiang ejan jo rasan jiang pio ji esüa chiso ji heto picho: Olyu tona nyanyan to tsotsüi 337,000; tssiden thanpo 36,000; kurü 30,500; elani loroeden 16,000 to tssocho. 47 Israel kholuk ejan shi lona Moses na OPVÜI yizüng ephanina ombo ejan tssoa morantsan tona ekümrümo topvü to lona tinyan yolo motsünga ren khichei Levi kyon OPVÜI vanrhyuki jilo elhi etssoeden jiang picho. 48 Jitsosi rasan tsüphoe jiang na owo Moses ezocho, 49 "Tsüphoe yo, e küpo rasan jiang ji ena khatae zele ochia n mom vankhana. 50 Hoji tsükona ena phanchowo shona thera, tivü, tekikhüp, yingrüm, eno thera osi yoko jiang to hansi tsata. OPVÜI khi e eküm e nkohayithoku ena shiang topvü hansi oro OPVÜI thanala." 51 Moses ha Eleazar onina shona thera niro jiang topvü khicho cho. 52 Rasan jiangna theo jiang topvü tssotsüi seri nzo eni bencho. 53 Tsüphoe meko jiango ontena phanchowo jiang ombo mbo na khitacho. 54 Hojito OPVÜI khi Israel kyon jiang eküm jiang nkocheyithukvü tsükona Moses ha Eleazar onina shona than jiang owo OPVÜI vanrhyu ki thetacho.
Jordan na Engkhfüwoe Jipo Jiang
1 Reuben jipo tona Gad jipo to na tssiden elümoto vancho. Jazer tona Gilead to meta ji onte tssiden jiang vanphen mmhona to ontena zechetale 2 Ontena Moses, Eleazar osi okho esopvüi thanpoe jiang thüngi owo ezotacho. 3-4 "OPVÜI na Israel jiang nkohae khithuko, yantsü Ataroth, Dibon, Jazer, Nimrah, Heshbon, Elealeh, Sibmah, Nebo, tona Beon to shiang jüwo meta shijo tssiden tsükona meta mmhona osi ena tssiden elümoto vana. 5 Hoji tsükona e nzansi Jordan pankae e ti chiyithukna meta shi e pia e echi tssothuka." 6 Tole Moses na janlancho, "Ete shom Israel thanpoe jiangna ritssolo woathüng nteno helo nte vanhunga ke? 7 Ntena kvütoli Jordan pankawoe meta Potsow na Israel pio ji chiyiv tsükona Israel jiang lümbüm terikatayiala. 8 Ana Kadesh Barnea lona meta ji khyui zelo nte pyimtsü motsüi jiang wothukathüng ha ontena hojito oyam lüm terikayicho. 9 Ontena Eschol hayi jana chiwocho, khatola ontena kholani yithakale kyon jiang ji lüm teriyia OPVÜI na pio meta jilo n rheyithukcho. 10 Hoji tsüngon jilo OPVÜI na lüm tsuki heto echümchaka phyocho. 11 'Ana phyochakala, ontena a longtsükata n vamo jina Ejip metae na chiyio jiang nzyu mekyu na omhawoe kyon ochia ana Abraham, Isaak, Jakob to pio meta jilo rheyiv meka.' 12 Otsük akvü hojina rhakcho osi Kenizite kyon Jephunneh tsoe Kaleb tona Nun tsoe Joshua to onina OPVÜI longtsükata vamo jina oni taena meta jilo rheyicho. 13 OPVÜI na onte thüngi lüm tsuko jina hoji mharen ji n chükhanthüng jo nzyu zhüro lijüngi khyuta vanthukcho. 14 Hoji tsükona enhungo hoji esüa ntena nte motsüi jiang etssophyo khia mmen etssoe echungren ethan chiyilani Israel pono lüm etsuk rolanthukvü sala. 15 Hoji tsükona nte Reuben osi Gad jipo na OPVÜI n phanka na ombona elani kyon shiang topvü khoe silam küma onte emomo ji nte pono tssov." 16 Tole ontena Moses thüngi ezotacho, "Ovüngtssoa shilo e olyu shiang ekvülanchi eshem tona elo-nongoe shiang tsanthephen to olong na eshenlanchiv yuta epia. 17 To tssosanati ena e shom Israel thanpo jiang nzo owo ori tssov osi ena sokata ori tssoe onte meta jilo onte rheyithukvü. Hojithüng jo e eloe, nongori jiangna ekvülanchio jiang lo vani kyon jiang nkachov. 18 Israel jiang topvüna OPVÜI na onte epio meta jilo n rheyithüng jo ena oki yiv meka. 19 Eiyo Jordan na hepiwoe na e ejan ejüeli jiang khithako jina Jordan pankawoe jo onte khetsüv meka." 20 Moses na ezocho, "Nteno otsotso phyoa tssona shilo OPVÜI mhadungona methaki ritssolo khochitava. 21 Nte yolo ritssoe jiang topvüna Jordan pankae chiwo OPVÜI lanso küpo na ori tssoe khithukvüka. 22 Hoji süiti ntena OPVÜI thüngi osi nte shom Israel jiang thüngi nte ejan elhi ji methaki nte ki yitakhuka. Hojito tssona Jordan na engkhüwoe meta shijo nte echito OPVÜI na chekav. 23 Tokhatola ntena nte yi ephan n tssochojo ntena OPVÜI thüngi mmen tssoala to ana ekyu yi nte piala. Ntia ti worhyutava, ntena mmen tssochojo nte ezüpthukvüka. 24 Hoji tsükona nte yantsü jiang tssotava osi olyu vanphen jiang eshentava, tokhatola nte phyochak jijo benthuka." 25 Gad tona Reuben to kyon jiangna phyotacho, "Tsüphoeyo, nina phyo jito ena tssovka. 26 E eloe osi ngaroden, e olyu, mangsü jiang Gilead lo yantsü jianglo vanthukvüka. 27 Tokhatola e topvüna OPVÜI lanso küpona ori tssovka. Nina phyo ji esüa ena Jordan pankae owo ori tssovka." 28 Moses na Eleazar, Joshua, tona Israel esopvüi thanpoe jiang to thüngi heto ezocho, 29 "Reuben tona Gad to kyon na Jordan pankae OPVÜI lanso küpona ritssolo ewov methaka tssona osi onte kyochi yakchia ntena meta ji khyoa tssona Gilead metajo onte echi tssoa pia. 30 Tokhatola ontena Jordan pankae chiro nte nzo ori n tssona onteha nte nzo Kanaan meta jilo janhyavka." 31 Gad tona Reuben to kyon jiangna janlancho, "Tsüphoeyo, OPVÜI na phyo ji ephan ena tssovka." 32 Ombo lanso küpona ena Jordan pankae owo Kanaan lo owo ori tssoka, osi eyio ejüeli jo Jordan na engkhfüwoe ji khivka. 33 Hoji tsükona Moses na Amorite mesao Sihon metaji topvü tona Bashan lo Og mesao meta, tona hojiang nkonjano yantsü osi meta jiang toji Gad jipo, Reuben jipo tona Manasseh jipo chiso to ejan picho. 34 Gad jipo na Dibon, Ataroth, Aroer, S5 Atroth shophan, Jazer, Jogbehah, 36 Beth Nimrah tona Beth Haran to yantsü shiang pikhfü jiang tssochotacho. 37 Reuben jipo na Heshbon, Elealeh, Kiriathan, 38 Nebo, Baal, Meon tona Sibmah to shiang omying ethan pitacho. 39 Manasseh tsoe Machir pvüji jina Gilead meta ji khyoe jilo evamo Amorite jiang phani sisi jilo vantacho. 40 Hoji tsükona Moses na Gilead metaji Malchir pvüji pia jilo vanthukcho. 41 Manasseh jipo lo Jair na oyan tara hae khyoe khi "Jair yan" to myingthan piracho. 42 Noabah na Kenath meta tona jilo oyan jiang to khyoe meta ji Nobah to myingthan picho.
Ejip Lona Moab Ejan Yentsa
1 Israel jiangna jipo jipona Moses ha Aaron oni lanso ephan Ejip lona khochi meta kvülo kvülo nchena yicho sana meta mying ji shiang. 2 OPVÜI yizüng ephanina Israel jiangna meta kvüta nchena yicho sana jiang mying ji Moses na erani vacho. 3 Israel jiangna Ejip lona yakchi tokhu ovüngo ji khisi ojyuato nzyu jilo choro jandemo tsüngon taro mongo to jilo khochicho. Ontena OPVÜI nkoho khi Rameses yantsü kvülo shi otsoe tokhfü chüo jiang jutheta vancho sana jiang hunga yantsü jilona khochitacho. 4 Osi ontena eyio jiha Ejip kyon jiang topvü na onte zeta vana khochi yitacho. Hojito tsso ji yakchia OPVÜI na ombo Ejip potsow jiang lona tsüphokata toji ejücho. 5 Israel jiangna Ramases lona khochi Sukkoth jancho. 6 Jisülo jo lijüng ji tssae Etham lo oyi nchentacho. 7 Jilona oyi ontena Baal Zephon na engkhüwoe Pi Hahiroth lo kholani oyi Migdol ndüngo nchentacho. 8 Ontena PiHahiroth lona khochi Jümyon ji yakchia oyi Shur lijüngi chiyicho, osi tsüngon ethüm yentsata oyi ontena Marah lo nchentacho. 9 Hoji lona oyi Elim jancho osi ontena jilo nchentacho, ntiotssole jilo jünhyo taro eni tona Pam dung ekhatiying to licho. 10 Ontena Elim lona khoe oyi Suez jüyi jancho. 11 Jisülo jo oyi Sin lijüngi nchentacho. 12 jisülo jo Dopkhah jancho, 13 Jisülo jo Alush jancho, 14 Jisülo jo eyuv jü n jüwo meta Rephidim lo chiyicho. 15-37 Ontena Rephidim lona Hor phunglan ejam jilo meta shiang lo nchentacho. Sinai lijüng; Kibroth Hattaavath (Tssüphi yangphi lüp) Hazeroth, Rithmah, Rimmon Perez, Libnah, Rissah, Kehelathah, Shepher phunglan, Haradah, Makheloth, Tahat, Terah, Mithkah. Hashmonah, Moseroth, Bene Jaakan, Hor, Haggidgad, Jotbathah, Abronah, Eziongeber, Zin lijüng, (jijo Kadesh ji) osi jilona Edom meta tssae Hor phunglan jilo chiyicho. 38-39 OPVÜI yizüng ephanina pvüti Aaron na Hor phunglani chungocho. Ombo nzyu 123 tssoathüng Israel jiangna Ejip lona khosi nzyu zhüro to jilo choro ovüngo jilo phunglani jilo na ombo chücho. 40 Israel jiangna tsata to kanaan jolowoe Arad lo mesao jina zocho. 41-49 Hor phunglan jilona Moab hayi ejan ji Israel jiangna meta shianglo nchentacho: Zalmonah, Punon, Oboth, Moab lo Abarim roe sithako metaji; Dibon Gad, Almon Diblathaim, Nebo phunglan ndüngo Abarim phunglan osi Jordan pankae hayitsü jilo; jilona beth Jeshimoth tona Akacia hayi to yutalo lio ji tolo nchentacho.
Jordan N pankathüng Lanso yi Ezo Jiang
50 Jeriko lona Jordan pankawoe Moab hayi lona 51 OPVÜI na Israel jiang tsükona heto Moses ezocho, "Ntena Jordan pankae kanaan lo rheyiathüng, 52 meta jilo evan jiang topvü phani sitava. Onte khümphen olung osi yonjak kisü jiang tona khümphen jiang toha roe siyitava. 53 Meta ji ana nte piaka hoji hoe vantava. 54 Meta ji jipolan pvüji jana jantao tssoa phyalyu füki zesi erütae, jipo khoshao jiang meta tsüpho pi, terio jiango meta teriv pi to jantava. 55 Tothakana ntena meta jilo kyon jiang phani n siracho jo onte ji nte mhyiki kihav jücho to osi nte jo-nhye lo okyo lichoto nte khetsüvka; osi ontena nte thüngi rota nrhüvka. 56 Ntena phani onte n sicho jo onte roe esithung ji ana roe nte sivka, "
Meta ji ErüNkon Jiang
1 Israel jiang tsükona OPVÜI na heto Moses ezocho, 2 "Ana nte pio Kanaan meta jilo ntena rheyiana, erü-ekük ji heto tssovka. 3 Jolowoe jo Zin lijüngina benkae Edom erü dunga yivka. Echü jümang ji jolowe echephen jilo eng chirolamoe na benkav. 4 Hoji lona jolowoe Akrabbim eyak jiwoe joyi Zin yakchia jolowoe Kadesh Barnea jana joyivka. Jilona engrhe khümkiwoe Hazzar Adar jiwoe chungi Azmon lona 5 Ejip erü lo hayi lio jiwoe oyi Medeterranean jümangina echevka. 6 "Engrhewoe erü jo Medeterranean jümang ji tsovka. 7 "Khümkiwoe erü jo Medeterranean lona dungi, 8 Hor phunglani oyi Hamath eyak jilo chiyivka. Hoji lona Zadad tona 9 Ziphron, osi jilona oyi Hazar Enan lo echevka. 10 "Engkhfüwoe erü jo Hazar Enan lona dungi oyi Shephan lo yivka. 11 Hoji lona jolowoe joyi Ain engkhfüwoe Harbel, oyi Galillee jüran na engkhfüwoe phunglan jianglo echevka. 12 Hoji lona jolowoe Jordan zhükhfü ji dungi oyi echü jümangoe joyiv. "Hojito nte meta ji erü mezhü ji hojito tssovka." 13 Hoji tsükona Moses na Israel jiang ezocho, "Shijo OPVÜI na phyalyu fuki zetasi nte jipo tokusi chiso ji chitale to nte pio ji. 14 Reuben tona Gad to jipo tona Manasseh chiso engkhfüwoe vamo jiang to jo Jeriko zechi jilo Jordan na engkhfüwoe, 15 wopan na jantao meta ji pithaka."
Meta Ji Jantav Enhikao esopvüi Jiang
16 OPVÜI na Moses ezocho, 17 "Pvüti Eleazar tona Nun tsoe Joshua to onina kyon jiang yolo meta ji jantayivka. 18 Jipo akvü lona esopvüi tsük tsük ethüngchei nzanchithuka erüsotayia." 19-28 OPVÜI na ethüngcheo kyon jiango shiang: Jipo esopvüi Juda Jephunneh tsoe kaleb Simeon Ammihud tsoe Shelumiel Benjamin Chisolon tsoe Elidad Dan Jogli tsoe Bükki Manasseh Ephod tsoe Hanniel Ephraim Shiphtan tsoe Kemuel Zebulun Parnah tsoe Elizaphan Issachar Azzan tsoe Pakltiel Asher Shelomi tsoe Ahihud Naptali Ammihud tsoe Pedahel 29 Kyon shiango OPVÜI na Kanaan metalo liko ramüng jantav enhikao jiang.
Levi Jiang Pio yantsü Jiang
1 Jeriko lona Jordan pankae Moba hayi jilona OPVÜI na Moses ezocho, 2 "Israel jiang heto ezoa, ontena enhungo meta jilona yantsü khicherae Levi jiang pia, osi yantsü jiang haphia yantsophen tüv ha vayitava. 3 yantsü shiang jo Levi jiang echhi tssovka osi ontena jianglo vamka, phenlung jiango onte tssiden osi ekümrümo thanpo jiang tsükona tssovka. 4 Phenlung jiang ji yantsü jiang lona nkona metre 450 nandang tssovka. 5 Osi yantsü ji tssae etsüi esii metre 900 tssosi yantsü jijo olungi tssovka. 6 Elani ontena n tsiv oyam lüngthata thüng tsanthephen yantsü tiruk onte vayia. Hoji ephalo yantsü zhüro eni tona jilo phenlung yantsophen jiang thepha toli, 7 tsotsüi yantsü zhüro tiza onte pia, 8 Jipo akvülo yantsü kvüta tssov sana jo jipo jina meta kvütera hunga na ji ephan tssovka."
Tsanthephen yantsü Jiang
9 OPVÜI na Israel jiang ezole to Moses ezocho, 10 "Ntena Jordan pankae kanaan meta lo rheyia na, 11 tsanthephen yantsü ethüngche vatava, tona ochona sana kyon lüngthata thüng tsanthephen tssovka. 12 Tona wopan na omüng n-liv yamo jilona tsanchov. Münghan jiang ji okho mhadungo na oyi n tssoyiv jo n chüthokche. 13 Jitsükona yantsü tiruk ethünga, 14 Yantsü ethüm jo Jordan na engkhüwoe, ethüm jo Kanaan meta lo to. 15 Yantsü shinag jo israel jiang osi metapoe kyon nte kholo esüngaro tssolea sunga lea evamo jiangna n tssiv omüng hanathüng tsanthephen. N tssiv omüng ehan otsük akvüna yantsü shiang yolo motsüngalo tsanthekhuka. 16-18 'Tokhatola ochona yonjak, olong osi otssüng khi oyam chüthoka sana ombona omüng hanthaka, hoji tsükona ombo chüthokvü lia. 19 Echüo ji wopan ndüngtso jina omüng ji n-liv shikhfü. Ombona kvüthüng münghan ji nduka sana chüthoki siv shikhfü. 20 "Kyon tsükana ocho sana khyanchüchüi meka na ntiona sana ephaye, 21 mekana ombo khena cheni chüthoka sana ombona omüng hanthaka, hoji tsükona omboha chüthokvü lia. Echüo ji wopan ndüngtso jina omüng ji n-liv lia, osi kvülo na münghan ji hunga sana lüngthae siv lia. 22 'Tokhatola ochona sana thanphoe tsüka ji etssak lona khyanchüchüi mekana ntiona sana ephyae chüthukcho mekna n tssiv chüthoka tssona, 23 mekana ombona n hungu olongna ochonasana ombona n tssako tüv ephyatsüng na, 24 hojitüv yuta lojo okho topvü na meyamo ji wopan jilo mekna n tsiv meymo ji yilo theyiv lia. 25 Okho jina kyon ochona woria omüng hansi tsana vancho sana ji shanchoe omboji tsanthei yantsü jilo owo vanthoku. Osi ombona pvüti tsüpho ji nchüthüng nandang jo jilo vanchev. 26 Tokhatola ombona tsantheo yantsü jilona khochoki chiwo, 27 ombo n-liv yana vamo jina ombo lüngtha na jijo münghan elhi to n kha. 28 Pvüti tsüpho ji nchüthüng jo ombona tsanthei yani vamvü osi pvüti ji chüsanati ombona kholani ombo yani yikhuka. 29 Shikhfü shijo ntena kvülo vana sana nte osi nte tsoronichen jiang na benphia wov. 30 "Omüng ehan ji otsük eni mekana jilo kyongkata na ehungpvüi tssosanati chüthokcheta, tsükana ehungpvüi tssocho taena jo münghan n tanche. 31 Münghan jo chüthokvü shikhfü, N lan shijo ombona orangna locho na n büktache. 32 Ochona tsanthei yani yiana ombona pvüti tsüpho ji nchüthüng jo orangna n lolanchiche. 33 Ntena hojito orang khicho jo nte evan meta ji mmenala, osi münghan ji chüthoki siwo ji yaka ntinaha omüng jotao meta ji nthocheo tüv lanka n li. 34 Aiyo OPVÜI ji osi ana Israel kyon jiang yolo vanala, hoji tsükona ntena evamo meta ji münghanta khi timmenthuka."
Yanpithako Eloe Jiang Tssentso
1 Machir tsoe, Gad pvüji lo jiporan ji tona Joseph tsoe Manasseh rüi ji tona Moses to na esopvüi thanpoe jiang to thüngi owo heto ezotacho. 2 "OPVÜI na phyalyu fuki meta ji Israel jiang chirotayile to OPVÜI na nte ezocho. OPVÜI na e wopan Zelophehad ejüeli ji ombo otsolov jiang jantayile toha e ezocho. 3 Tokhatola ti-mhechotava, ontena jipopoe thüngi yanpitacho jo ejüeli jiang jipopoe echhi kümvü, toana e ejüeli jiang matarokav. 4 Ejüeli shitao jiang topvü rilanta nzyu jilo opvüo jiang khelo chiyilana na Zelophehad otsolov jiang ejüeli jo jipopoe jiang khelo rankata tae vamvü osi e jipo epüp tssoa yiv." 5 Hoji tsükona Moses na Israel jiang thüngi OPVÜI yizüng heto picho, "Manasseh jipo na phyo ji elanthata, 6 hoji tsükona OPVÜI na phyoala, Zelophehad otsolov jiangna onte jüpomo thama eboe thüngi yanpicheta tokhatola onte jipo thüngi tae yanpichev. 7 Israel otsük akvü tsütsaelan jo ombombo jipo echhika to lia vamvüka. 8 Tssentso ekhi eloe otsük akvüna ompvüpo jipo eboe thüngi yanpivka. Hojitoli Israel otsük akvüna ombombo motsüi ejüeli ji hovka, 9 osi ejüeli jiang jipo motsünga lona motsüngae hana yiv meka. Jipo akvüna ombombo ejüeli honrhüa yivka." 10-11 Zelophehad otsolov jiang, Mahalah, Tirzah, Hoglah, Milka, tona Noah to shiang na Moses thüngi ezoji esüa onte pyaro-niroe jiang thüngi yanpitacho. 12 Ontena Joseph tsoe Manasseh jipo chungi tae yanpitacho osi onte ejüeli jiang ji onte pyimtsümotsüi ejüeli to lia vanthukcho. 13 Shikhfü shiang jo Jeriko lona Jordan pankae Moab hayi jilona OPVÜI na Moses yakchia Israel jiang pio jiang.
1 Oyi shiang jo Jordan zhükhfü Onteno Suph ndüngo Jordan hayi na engkhfüwoe lijüngi na esanawoe Paran yantsü tona Moses na Isreal jiang ezocho. esanawoe Tophel, Laban, Hazaroth tona Dizahab to yutalo vancho. 2 (Sinai phunglani na Kadesh Edom phunglan meta jiang yakchia Kadesh Barnea ejam jo tsüngon taro ekha khiala.) 3 Ontena Ejip metae na khosi nzyu zhüro si choro taro ekhaoto tsüngon ovüngo jilo OPVÜI na kyon jiang ezole to ombo ezo jiang Moss na ezoracho. 4 Shiangjo Heshbon yantsü lo esapvüi Amorite mesae Sihon tona Ashtaroth yantsü tona Edrei yantsü lo esapvüi Bashan mesae Og to OPVÜI na khyocho sülo. 5 Israel jiangna Jordan engkhfüwoe Moab metalo vanathüng Moses na OPVÜI yizüng jiang onte ezocho. ombona ezocho, 6 "Etena Sinai phunglani vanathüng OPVÜI na e zocho, 'Ntena phunglan shilo sungtia vanthaka. 7 Enhungo nchenphen eseni khochia. Ntena khochi Amorite meta phunglanro nkonjan, Jordan hayi, phunglan osi hayi jiang jolowoe osi Mediterranean jüran jianglo wotava. Kanaan meta osi Lebanon phunglan jiang osi Euphrates zhükhfü tsüpho ji jana wotava. 8 Shiang hetopvü OPVÜI ana nte motsüi Abraham, Isaak, tona Jakob osi onte tsoronichen jiang epiv phyochako meta jika. Owo hojilo vantava.' "
Moses na Yitssoeden Ethüngchetala
9 Moses na kyon jiang ezocho, "Ana Sinai phunglanina nte ezo ntsacho, 'Ana nte esopvüi etssov ji elhi kyongtia. A taena jo n tssoche. 10 Nte OPVÜI Potsow na nte ji oyaki shantio tata nte kümthukthaka. 11 OPVÜI nte pyimtsü motsüi Potsow na phyochako ji esüa nte ji hetata wothüng wothüng bena thicherae nte mmhayithukthaka. 12 Tokhatola kvütolyui a taena nte emhukelüm shiang nte nsüngichev la? 13 Nte pvüji akvü lona nchümri eli, engathe eli osi ejyueran eliden ethüngchetava tona ana nte esopvü onte tsswothukvüka. 14 Ana hoto nte ezole ntena hojito etssov jo mmhona to nte lüm na rüngcho. 15 Hoji tsükona ana nte yolo nchümri eli osi ejyueran eli jiang ethüngi nte esopvüiden tssothukcho. Ochoangna jo wothüng pono esopvüi, ochoangna jo nzoa esopvüi, ochoangna jo tinyan, ochoangna jo taro yolo esopvüiden to. Elani ana pvüji topvülo esopvüi thanpoe ha ethüngcheracho. 16 "Hojithüng ana nte ezoracho, 'Nte khümtsüng lo pangtarüta chiyio jiang engatava. Yilan akvüto ntsanrüka tssoyitava, nte yolo tssolea, nte tona nte nchenkae evan lankon to yolo tssolea. 17 Nte methak jiang lo omha eze ti-tssotava; shi tssolea shi tssolea otsük akvüto yitssolan motsünga kheti tssoyia. Ochia ti kyutava, ntiotssole ntena methako jijo Potsow thüngina yicho methak. Yilan kvümoe ntena n methakuka sana jijo a thüngi yithuka, ana methakvüka.' 18 Hojithüngti ntena ntio etssov liana topvü ana nte ezoracho.
Kadesh Barnea Lona Echeepyim Wothukala
19 OPVÃœI ete Potsow na ntio etssov ezochosana topvü ena tssoratacho. Ena Sinai phunglan lona khochi ekyuthao lijüngtsü ji yakchia Amorite meta phunglanro jianglo chiyitacho. Etena Kadesh Barnea janale ana phyocho, 20-21 "Enhungo etena Amorite meta phunglanro kvümoe OPVÃœI ete pyimtsümotsüi jiang Potsow na epicho sana hoji janala. Zechitava, o-jika. Ombona ezoji esüa owo meta ji hoe khitava. Titoteria osi kyua to ti-tssotava." 22 "Tole ntena oro a ezotacho, 'Ete vüngina kyon wothuka owo zethuksi meta jilo ntio yantsü lichosana osi olan kvüwoe na wotav sana ezothuka.' 23 "Tole hoto etssov ji elana zechei ana pvüji akvü lona tsük-tsük, taro eni ethüngchecho. 24 Tole ontena phunglan meta jianglo owo, Eshkol hayi jana zetasi yicho. 25 Ontena meta jilona tssüngthi lhoe hantasi oyi 'OPVÜl na epio metaji elümoto lizüa' to phyotacho. 26 "Tokhatola ntena OPVÃœI yizüng jiang panlantasi meta jilo n rheyitacho. 27 Nte yolo heto phyota erinjantacho: 'OPVÃœI na etssakala. Ombona Ejip metae na esosi chiyi Amorite shiang khi elüngthatukvü sana. 28 Etena ntiolyui meta jilo rhowotavla? E kyuala. Etena chelo wothuko jiangna ezo ji ephanjo meta jilo evamo kyon jiango ete lona etho jükata osi siphokata, onte yantsü pikhfü jiango oyak etssunga epikachi vantalato osi kyonpvü elümoto vana hungi lato!' 29 "Tole ana nte ezocho, 'Kyon jiang ti-kyutava. 30 Nte OPVÃœI Potsow na nte sovka osi ntena Ejip metae na osi lijüngi na hungthako ji esüa ombona nte tsükona rotayivka osi 31 ombona kvüto ntangshona nte sosi, opona otsoe ejüma to nte ejümsi meta shilo chiyithukcho sana ji ntena hungthaka.' 32 Tokhatola ana hoto phyoaha osi ombona nte vüngina nte nchenphen methaki nte vayia ha 33 ntena OPVÃœI ji n longtsücho. Olan nte sov tsükona ombona nte mmhadungi zümolo jo midurhyu, engo jo eluk kholung to khi nte socho.
OPVÃœI na Israel jiang khangshiala
34 "OPVÃœI na nte erinjanta ji zoe lüm tsuka phyochakcho, 35 £Nte mharen n mhom shilo tsüka na lea meta mmhom ana nte pyimtsümotsüi piv phyochako jilo rheyiv meka. 36jephunneh tsoe Kaleb taena hojilo rheyivka. Ombona a lo longtsükata vamo ji tsükona ana ombona chei zewo metaji ombo osi ombo tsoronichen jiang pivka.' 37 Nte tsükona OPVÃœI na athüngi lüm tsuka phyocho, 'Moses, nina tia meta jilo rheyiv meka. 38 Tokhatola ni jokyim Nun tsoe Joshua mhanka jilo nzanchia. Ombo na Israel jiang sosi meta jilo rheyivka. 39 "Jisüi jo OPVÃœI na ete topvü to ezocho, 'Nte ngaroden elan n lan n chethehamo jiangjo meta jilo rheyiv ka. Ntena jo nte ngaro jiang ji ori na rechoe nte khiyiv to phyotacho. Khatola ana metaji onte pivka, osi hojilo ontena vamka. 40 Tokhatola nte tsükona jo khophilani osü rüa lijüngi Aquba jünken jilo rheyitava.' 41 "Tole ontena phyotacho, 'Moses, ena OPVÃœI thüngi mmen tssothaka. Enhungo ena OPVÃœI na phyoji esüa owo kyon jiang thüngi rotavka.' Jitosi nte otsük akvüna phunglanro meta ji elaro khyov tsayia nchümta rotalo wov methaktacho. 42 "Tokhatola OPVÃœI na a ezocho, 'Owo ori ti-tssotale to onte ezoa, ntiotssole ana onte kyochiv meküma, onte ri jiangna onte khyovka.' 43 OPVÃœI na phyo ji ana nte ezole, ntena n ngacho. Ntena ombo panlana nte kanchan lona khochi phunglanro meta ji wotacho. 44 Tole meta jilo vamo Amorite jiangna otssak ryua to sani nte hacho. Ontena Hormah jana nte phani Edom meta phunglanro jilo na nte khyothechicho. 45 Tole ntena OPVÃœI thüngi kyata jonjita ha ombona nte n kyochicho.
Lijüngi Yentsatao Nzyu Jiang
46 "Hojito lyui, etena Kadesh lo sunga vantacho,
1 Osi etena tae to khochi Aquba jünken lan ji dunga OPVÜI yizüng ephan khochi Edom meta phunglanro jianglo sunga yentsatacho. 2 "Jisüijo ena phunglanro jianglo sunga vanthako jina 3 OPVÜI na khümkiwoe khochitale to ezocho. 4 Ombona heto nte ezole to a ezocho: 'Enhungo ntena Esau rüiden nte wopan kitsük vanphen Edom meta phunglanro jiwoe khochiv sala. Ontena nte kyuvka tolea, 5 Onte thüngi ori ti-tssotale, ntiotssole ana onte metaji phata meta jitera nte piv meka. 6 Edom metajo ana Esau tsoronichen jiang pithaka.' 7 "Ntena ntio tssoana topvü lo OPVÜI na nte mmhayithuko ji nchümchetava. Ntena lijüng hetara yentsata vanathüng OPVÜI na nte zeyacho. Nzyu zhüro hetenhya shi ombona nte ndüngo thei nte ethelan topvüto nte pithaka. 8 "Hoji tsükona etena Elath to na Eziongeber to lan yakchia echü jümangoe yio lan ji sisi engkhfü khümkiwoe yitacho. 9 Tole OPVÜI na phyocho, 'Lot tsoronichenden Moab lo vamo jiang ti-khetsütava mekana onte thüngi ori ti-tssotava. Ana Ar yantsü ji onte pithaka, hoji tsükona ana yantsü jiang nte piv meka.' " 10 (Ai lojo Emim to tsao kyonpvü thojüi jiang vanracho. Onteno Anakim jiang esüa ntssonnrona. 11 Thojüi kyon Anakim jiang tsao ji esüa onteha Rephaim toha tsacho, tokhatola Moab kyon jiangna Emim to onte tsacho. 12 Horite kyon jiangna Edom lo vancho khatola Esau tsoronichen jiangna phani onte sia jipo ji monthuksi hojilo ontena vani sicho, Israel jiangna OPVÜI na onte pio meta jilona metapvüi jiang phana to phani sicho.) 13 "Jitosi OPVÜI na phyo ji esüa etena Zered zhükhfü ji pankacho. 14 Shijo etana Kadesh Barnea lona khosi nzyu thümrosi tiza lo tssocho. OPVÜI na phyoji esüa meta jilo ritsso kyon jiang chürathakcho. 15 Onte topvü n chürathüng jo OPVÜI na onte panlana mongcho. 16 "Onte topvü chürathakale, 17 OPVÜI na e ezocho, 18 'Ntena nchüngo Ar lamoe na Moab meta yakchivka. 19 Hojitüng ntena Lot Tsoronichenden meta Amorite jiang meta yakchivka. Hoji tsükona onte ti-khetsütava osi ori onte ti-tssotava, ntiotssole ana onte pithako meta jiang ana khi nte pilam mek.' " 20 (Meta shijo Rephaim jiang meta toha tsacho, hoji jo jilo vamo kyon jiang mying ji; tole Amorite jiangna jo onte ji Zamzummim to tsacho. 21 Onteno Anakim jiang esüa siphoa. Onte ji khosha osi otsson jipo tssocho. Tokhatola OPVÜI na onte monthuksi metaji Amonite jiang picho. 22 Edom phunglanro jianglo evamo Esau rüiden jiang thüngi ha OPVÜI na hoto tssocho. Meta jilo evamo Horite jiang monthuksi Edom kyon jiang hojilo vanthukcho osi enhünga jana hojilo vana. 23 Mediterranean jütssa dunga jütssa jilo Crete jüyi lo evan kyon jiangna vanthakcho. Ontena Avvim kyon jiang khyothechisi onte meta ji jolowoe Gaza jana khichochicho.) 24 "Etena Moab yakchithakale OPVÜI na ezocho, 'Enhungo khochi Amon zhükhfü yakchitava. Ana Sihon tona Heshbon lo Amorite mesao ji, ombo meta jiang to nte khelo rheyithukvüka. Ombo thüngi ori tssoe ombo meta ji khitava. 25 Ana nchüng tsüngon lona benkae kyon topvü na nte kyuthukvüka. Otsük akvüna nte mying zoa na eneta kyuvka.
Israel Jiang na Sihon Meta Khyoala
26 "Jisüi jo ana Kedemoth lijüngina Heshbon mesao Sihon thüngi mmhonta yithen heto picho; 27 'Ni meta yakchia e yithuka. Ena lantssa n khathena saksak olan dunga yivka. 28 Ena etsoyu osi ojü tsütsao jiang manjo nte lovka. Ena ethev lio jijo ni meta yakchiv jitaeka. 29 Jordan zhükhfü yakchia OPVÜI Potsow na epio meta jilo rheyiv tsükona taeka. Edom lo Esau tsoronichen jiang tona Ar lo Moab kyon jiang tojo onte meta yakchiv echonchithaka.' 30 "Tokhatola Sihon mesao na ombo meta yakchia e n yithoku tssocho. Nte Pvüi Potsow na ombo lüm khüngthoki ete khi ombo khyothoki ombo meta ji ekhithoko jina etena hojilo enhünga jana vanala. 31 "Jisülojo OPVÜI na a ezocho, 'Ana Sihon mesao tona ombo meta to ji ntena ekhyowo nte pithaka; ombo khyoe meta ji khiyitava.' 32 Tole Sihon na ombo woro jiang sosi ori etssov tsükona Jahaz yantsü ndüngo chirocho, 33 tokhatola OPVÜI na ombo ji ete küpo tssothuki etena ombo, ombo tsoe jiang osi ombo woro jiang to lüngthacho. 34 Tothüng etena yantsü jiang roe siyicho osi eboe, eloe tona ngaro topvü lüngtharacho. Etena ochia enhyokae n vanthukcho. 35 Etena mangsü jiang khiyia yantsü jiang retsoyitacho. 36 Ete OPVÜI Potsow na e kyoa Amon hayi tssa lo Aroer yantsü lona hayitsü ji lungi yantsü ji to Gilead jana khyoe khi ekhithukcho. Nti yantsü pikhfü naha e n zalanchikhukcho. 37 Tokhatola etena Amorite jiang meta Jakuk zhükhfü tssa mekana phunglanro meta jianglo yantsü jiang osi meta kvülo OPVÜI na ti-rhowota to phyocho sana jiang lojo, ji ndüngo tia n wotacho.
Israel Jiangna Og Mesao Khyoala
1 "Jisülo etena khümkiwoe Bashan metawoe chüngitale Og mesao na ori etssov ombo woro topvü sosi Edrei yantsü ndüngo na enhyaka vancho. 2 Tokhatola OPVÜI na a ezocho, 'Ombo ti-kyua, ana ombo tona ombo woro topvüto ni khelo rheyithokvü ka. Nina Heshbon lo Amorite mesao Sihon thüngi tssoato tssoa.' 3 "Hojito OPVÜI na Og mesao tona ombo woro jiang toha ete khelo rheyithuki etena topvü onte lüngthacho. 4 Jithüng etena onte yantsü jiang khiyiraecho osi yantsü kvüiha n khio n licho. Topvü tsotsüi etena yantsü rokro khicho, jijo Orgob metaro kvülo Bashan mesao Og na sa vancho sana topvü. 5 Yantsü shiang topvü pikhfü ntssom, kipüngtsü osi khanphen tsüphov na khanracho. Tokhatola pikhfü n lio yan ha elümoto liracho. 6 Etena Heshbon lo Sihon mesao thüngi tssoato eboe, eloe osi ngaro topvü lüngtharacho. 7 Etena mangsü jiang khiyisi yantsü jiang retsoyicho. 8 "Hojithüng etena Amorite mesao eni ji khelo na Jordan engkhüwoe metaji, Amon zhükhfü lona Hermon phunglan na ndang. 9 (Hermon phunglan jijo Sidon kyon najo Sirion to tsa, nna Amorite jiangna jo Siner to tsacho.) 10 Etena Bashan mesao Og ji meta shiang topvü khiyicho: Yondon jianglo yantsü jiang, Gilead tona Bashan to meta jiang ji Salekha tona Edrei to yantsü jana khiyicho." 11 (Og mesao jo Rephaim thojüi jiang yolo wokhao ji. Ombo khüp jo olongna esi metre mezhü, etsüi metre eni to shikhfü ephan etsiphen ji ephan tssocho. Nchüng jana ombo khüp ji Amorite yantsü Rabbah lo lia.)
Jordan Engkhfüwoe Vamo Pvüji Jiang
12 "Etena meta ji khithakale ana Reuben pvüji tona Gad pvüji to ejan jo Amon zhükhfü ndüngo Aroer yan ji khümkiwoe ji tona Gilead meta phunglanro ejoma tona jilo yantsü jiang to picho. 13 Manaseh pvüji ejoma jo ana Gilead meta enhyoe lioji tona Bashan meta topvü, Og mesao na sawo meta Argob meta to topvü to picho." (Bashan jo thojüi Rephaim jiang meta to tsacho. 14 Manasseh pvüji lo Jair to tsao jina Ardob meta topvü, Bashan topvü, Gershur tona Maakah to erü jana khicho. Ombona oyan jiang ji ombo mying pio jina nchüng jana Jair to tsacho.) 15 "Gilead jo ana Manasseh pvüji lo Machir picho. 16 Reuben tona Gad to pvüji jiang jo ana Gilead meta lona Amon zhükhfü nandang meta ji picho. Zhükhfü ji olongo jo onte meta jolowoe erü ji tssocho osi khümkiwoe erü jo Jabbok zhükhfü osi jinaha Amorite erü riso tssoala. 17 Engrhelamoe jo onte erü jina Jordan zhükhfü jancho, khümkiwoe jo Galillee wozhü osi jilona jolowoe echü jümang jana osi Pisgah phunglan jo engkhüwoe tssocho. 18 "Osi ana heto onte engathethukcho: OPVÜI ete Potsow na Jordan na engkhüwoe meta shi nte pithaka. Enhungo nte rasan jiang ebensü benrithuksi Israel pvüji thanpoe jiang thüngina Jordan pankae chiwoe onte nzanchia meta jilo rheyithuka. 19 Ntena tssiden elümoto vana to ana ntsia, hoji tsükona nte eloe jiang, ngaro jiang tona tssiden jiang tojo nte metae vanthuksi khochitava. 20 Ntena nte shom Israel thanpoe jiangna kyochia owo Jordan engrhelamoe meta ji khithoki onteha ntena noyinga vana to OPVÜI khi noyinga onte vanthokvü nzanchitava. Hoji süiti ntena ana nte pio meta jilo elani rheyitava.' 21 "Jisülo jo ana heto Joshua engathethukcho: 'OPVÜI nte Potsow na mesao Sihon ha Og oni thüngi ntio tssocho sana ji ntena hungthaka; hoji esüa nte na kyon kvüta thüngi ori tssoana topvü thüngi OPVÜI na hojito tssoyiv. 22 Tikyutava, nte OPVÜI Potsow na nte tsükona rotavka.'
Moses Jo Kanaan Lo N Rheyithukala
23 "Hojithüng ana lüm joa randancho, 24 'Sandamo OPVÜI, nina ntio etho osi chethev tssov vancho sana jiang yolo benkaphen jiang tae a hungthukhan to ana ntsia. Limha osi Potsüwoe kvüloha nina chethev elhi tssothaka to etssoe potsow n van! 25 OPVÜI, Jordan pankae owo lizü meta osi phunglanro merio jiang tona Lebanon phunglan jiang to a hungthuka.' 26 "Tokhatola nte tsükona OPVÜI lüm tsuki a randan a n gayicho. Jithüngina jo ombona a ezocho, 'Jitae na mmhona! Elani hoji ti-phyolana! 27 Pisgah phunglan kvüri chungoe jolo khümki osi engrhelan osi engkhülamoe ji eyingoe chhani zeta. Nina hungwo jiang chetheta zei khia, ntiotssole nina kvüthüngha Jordan panke ochev meka. 28 Nina hungwo meta jilo rheyiv tsükona Joshua na kyon jiang sosi rheyiv ka, to ombo engathethuka lüm tssonkayia.' 29 "Hoji tsükona etena Bethpeor yantsü ji zechi hayi jilo vantacho."
Moses na Israel Jiang Jancho Ezov Ntssungala
1 Jisüloj Moses na kyon jiang ezocho, "Ana nte püngnoa vamo shikhfü shiang topvü benphitava tona nte motsüi jiang Potsow OPVÜI jina nte pia vamo meta jilo ntena rheyichevka. 2 Ana nte ezowo shiang lo ntia ti-thepahatava osi khiha ti-sitava. OPVÜI yizüng ana nte pithako shiang engatava. 3 OPVÜI na Peor phunglani na ntio tssocho sana nte mhyikna hungthaka. Hojilo Baal ekhüm jiang otsük akvüto ombona monthukcho, 4 tokhatola longtsüka eli nte shiang jo nchüng jana vanra. 5 "OPVÜI na a ezoji ephan ana yizüng topvü nte püngnothaka. Shikhfü jiang ji ntena rheyiv sa vamo ji meta jilona benphitava, 6 tona nteno nchümri lia to limhalo jipopoe jiangna engathevka. Shikhfü shiang hetopvüto ontena zoana phyotav, 'Jipo tsüphov shi kyon shiang jo kvütoli hetata nchümjan zijan licho ato!' 7 "Jipo tsüpho lea, jipo thanpo kvüina ha ontena ethev liathüng ete Potsow na ete ndüngo vana to ndüngo vancho n li. Etena kvüthüng nzanchi ethev lia chona sana ombona e janlanala. 8 Ana nchüng ntio nte püngnothakcho sana ntsa shikhfü jitüv jipo kvümoe naha n li. 9 Tüngochüngtava! Ntena nchüng ntio hungthakcho sana ntena eküm echunglea n mhechov tsükona. Nte ngaroden osi tsoerüiden jiang ezotava, 10 ntena tsüngona lo kvüto Sinai phunglani na OPVÜI mhadungo mangtacho sana osi OPVÜI na heto a ezocho sana, 'Kyon jiang sanrhyuthuka. Ana ezovsa shi onte eküm echung a engathuk hungala osi onte tsoe jiang a püngnothuk hungala.' 11 "Ntena kvüto phunglan kvüri miphung enyikvü elukna eyukzhüi omina oyaki tüngrakachia vancho sana jilo ehungo ejyueramo ji nte tsoeden jiang ezotava. 12 OPVÜI na milungina kvüto nte jancho sana ezotava. 13 Ombona nte thüngi ntsata methako ji kvolyui benphiv sana ombona nte ezochowombona olong epyakvü eni lo yizüng taro erankao ji ntena engav lia. 14 OPVÜI na shikhfü jiang topvü nte püngnole to a ezocho, ombona nte pia vamo meta jilo ntena vanathüng benphiv shikhfü jiang.
Kisü Ekhüm Ntangshon Yi
15 "OPVÜI na Sinai phunglani na omi lungi na nte jancho khatola ntena ombo tsük ntia n hung. 16 Hoji tsükona nte echi mmhonthukvü tsükona ntena kisü ntia khümi ntena mmen ti-tssotava 17-18 eboe tssolea eloe tssolea, ekümrümo tssolea worowoni tssolea, epvüphio osi ongo tssolea nsüngrüi n khümtav shikhfü. 19 Ntena oyaki ntio hunganaeng tssolea choro tssolea shantio tssolea n khümtav ekhyo tssotava. 20 Tokhatola nteno ombona omi esüo Ejip khelona shanchowo jiang. Ntena nchüng kvüto vancho sana ji esüa ombo kyon nte kümthukvü tsükona ombona nte shanchocho. 21 Nte tsükona OPVÜI Potsow lüm tsuki aiyo Jordan pankae lizü meta ombona nte pia vamo jilo n rheyiche to phyochakthaka. 22 Aiyo zhükhfü ji n pankav helona a chüv sala, osi nteno hoji pankae lizü meta jilo rheyiv sala. 23 OPVÜI nte Potsow na nte thüngi methaktao ntsata ji n mhechotav ekhyo tssotava. Ombo yi engatava nti kisü ha nsüngrüi ti-khümtava, 24 ntiotssole OPVÜI nte Potsow jo omi eki tüv; ombona ombo yaka thanpo Potsow ntia n zekukala. 25 "Ntena meta jilo sunga vani ngaro osi tsoronichen vana yilia kisü ntia khümi mmen ti-tssotava. Hotüv jo OPVÜI mhadungo jo mmen tsso jina OPVÜI na n mathatala. 26 Ntena a jancho n zoana limha shilo na moni nte siv to ehungpvüi esüa ana oyak osi limha shi nchüng tsarhyuala. Ntena Jordan pankae meta jilo vamsa vamo jilo sunga vam meka. Nte ji monrae nte sivka. 27 OPVÜI na limhalo jipo jiang yolo nzonrorae nte sivka osi nte tararo tae nte enhyovka, 28 Tothüng jo ntena kyon khena nsüngrücho otssüng osi olung potsow khümtavka, ehungha n hung, ezo ha nzo to potsow jiang osi etsoyu n tssowo osi orhüm n zowo potsow jiang khümtavka. 29 Jithüng ntena OPVÜI nte Potsow yantav osi ntena nte lümbüm topvü na ombo yana tssona ombo yanchev. 30 Nte ji ezüp nduki ezüp jiang topvü yiana ntena wokhao tssoa OPVÜI thüngi khophi ombo yi engatavka. 31 Ombo khonzanthao Potsow. Ombona nte siv meka osi nte sinkiv meka, osi nte monthukvü meka osi ombona nte thüngi ntsata methako ji ombona mhechov meka. 32 "Nkolo yuta jiang etsüngi zetava, nte n bukthüng osi Potsow na limha lo kyon lyuyingo jithüng yuta ji etsüngi zetava. Limha hetopvü zii zetava. kvüthüng ha nchüng shi esüa tsüphov tssoa rothakcho alo? 33 Ntena Potsow na milungi na nsana zosi eküm vanala to ochoangna sana tssoa rothakcho alo? 34 OPVÜI nte Potsow na Ejip metae na nte thüngi tssoji esüa potsow ochona sana limhalo jipo motsünga ethüngchei ombo kyon tssothukcho licho alo? Nte mhyikna hunga ombona etho tsüphov tsütsacho; vara osi ritsso rothukcho, emhuko elhi tssoe ejücho, osi ekhenthao tssoa yithukcho. 35 Shiang hetopvü OPVÜI nte Potsow na, Potsow jo ombo tae osi thanpoe Potsow n van to nte ejüv tsükona tssocho. 36 Ombona nte püngnov tsükona potsüwoe na owon tssoe nte zothukcho; osi limha lona ombo ntho mi ji nte hungthuka jilona oyi nsani nte zothukcho. 37 Ombona nte motsüi jiang nzamo jina nte ethüngchecho, osi ombona ombo etho tsüpho ji khi Ejip meta lona nte sochukcho. 38 Ntena mhadungoe khochiale, ombona ntelona tsüphokao jipo jiang mpato phani nte siyia nte sosi onte meta enhünga ntena vamo shi nte picho. 39 Hoji tsükona nchüng nehümehetava, OPVÜI jo oyaki osi limhae Potsow jika. potsow thanpo n vanka. 40 Ana nchüng nte pio ombo shikhfü shiang topvü benphitava, tona nte tsükona osi nte tsoronichen tsükona lanka topvü lo mmhomka. OPVÜI na kümali echi nte pia vamo meta jilo ntena sunga vana wovka."
Jordan Engkhfüwoe Tsankaphen Yantsü Jiang
41 Jisülo jo Moses na Jordan engkhfüwoe yantsü ethüm khyochei vacho 42 jijo ochona sana ombo ri meko tüv woria lüngthatathüng tsankaphen yantsü. Ombona yantsü shiang motsünga lo tsanthe na ombo n chüthuk. 43 Reuben pvüji tsükona jo Bezer yantsü jo, lijüngi yondonro lo lio ji; Gad pvüji tsükona Gilead meta lo Ramoth; Manasseh pvüji tsükona Bashan meta lo Golan yantsü.
Potsow Yizüng Epiv lo Yizüng
44 Moses na Israel jiang thüngi yizüng osi püngo yi jiang picho. 4546 Ontena Ejip lona chiyi sanati osi Jordan na engkhfüwoe hayi jilo Bethpoer zechi jilo vanathüng yizüng shiang picho. Shijo Heshbon lo yansae Amorite kyon Sihon mesao ji metae vanathüng tssocho. Moses tona Israel jiang to na Ejip lona chiyiathüng ombo khyothechicho. 47 Ontena ombo meta ji tona Amorite mesao thanpoe Bashan lo Og mesao, Jordan engkhfüwoe vamo ji meta to khiyicho. 48 Meta shijo Amon zhükhfü tssalo Aroer yantsü ji lona benkae khümkiwoe Sirion phunglan jana, jijo Hermon phunglan ji chüngicho. 49 Elani Jordan engkhfüwoe meta jiang, jolowoe echü jümang tona Pisgah phunglan jothe jina engkhfüwoe to meta jiang jana jüa.
Yizüng Taro Jiang
1 Moses na Israel kyon topvü tsanrhyui ezocho, "Israel kyonden, ana nchüng nte pio yizüng shiang topvü engatava. Engathei khitasi benphiv ekhyo tssotava. 2 OPVÜI ete Potsow na Sinai phunglani na ete motsüi jiang tae mekna 3 ete nchüng eküm evan topvü thüngi ntsata picho. 4 Hoji lona OPVÜI na omi theta nte thüngi tontüng nsancho. 5 Hojithüng ana nte tona OPVÜI to yutalo mangi ombona phyo jiang eloni nte ezocho, ntiotssole ntena omi ji nte kyusi phunglani n chungotacho. 6 "OPVÜI na phyocho, 'Aiyo ntena Ejip metae eziiden tssoa vanathüng, nte shanchowo OPVÜI nte Potsow ji ka. 7 Jijo " 'A yaka Potsow thanpo ti-khümtava. 8 Jijo " 'Potsowoe osi limhalo, ojüi osi liko chungi ntia khi nte Potsow ti-nsüngrütava. 9 Kisü mhadungo ti nkhümthetava osi ti-khümtava, ntiotssole aiyo nte Potsow ji, osi ana Potsow thanpoe n khayiala. A tssako kyon jiang osi onte tsoronichen echungren ethüm mezhü jana ana ezüp piala. 10 Tokhatola ochoangna a nzana a yi enga sana jiang tona onte echungren wothüng wothüng jana tojo ana a nzan ejüala. 11" 'Elhi n mhom tsükona a mying titsütsatava, OPVÜI nte Potsow A, shina a mying tsütsasorao jiang ezüp piala. 12 " 'OPVÜI nte Potsow A, shina nte ezothako ji esüa esanmung ji nthoa vanthuktava. 13 Ntena elhi etssov tsüngon tiruk lia, 14 tokhatola tsüngon tiyingo to jijo a echi to khochaki vanthuka. Hoji nchukjo nte ochina ha elhi tssov meka, ntiotssole nte ngaroden, nte ezii jiang nte ekümrümo jiang osi nte metalo lankon ncheni vamo jiang naha tssov meka. Ntena esanato nte ezii jiangna ha esamka. 15 Ntena Ejip metae eziiden tssota vancho OPVÜI nte Potsow A, shina etho tsüphov theta nte sochecho toji ti-mhechotava. Hoji tsükona emung ji lithukvü ana nte yizüngala. 16 " 'Nte pvüpoe jiang yikrachitava, tona nte tsükona sükhying topvü mmhomka, osi ana nte pia vamo meta jilo ntena harishia vamka. 17 " 'Omüng ti-hana. 18 " 'Efürama ti-tssoa. 19 " 'Ti-füa. 20 " 'Ejüngona oyam nlan ti-pia. 21 " 'Kyon thanpoe tsoeni ti-jüpona; ombo ki ji, ombo likoramüng, nri jiang, ekümrümo jiang, kurü mekana ombo ejüeli ntia ti-jüponia.' 22 "Yizüng shiang jo ntena phunglan jilo etssirhyui vanathüng OPVÜI na nte pio jiang. Ombona omi osi eluk echhiv lungina emhokthav ovon tssoa nsamo jithüng yizüng shiang nte picho, thanpoe na nte picho mek. Jitosi ombona yizüng shiang longpyak enilo erankae a picho.
Kyon Jiangna Kyuala
23 "Kvüthüng phunglan ji omina pyingi emüng longina ovon chiyia ntena zocho sana nte esopvüden tona jipo lo ekhüng jiang to na a thüngi oro phyotacho, 24 ena OPVÜI na omi longina nsana zo jithüng ombo etho tsüphov osi phfütsson ji hungcho! Ena nchüng hungthaka, enhungo Potsow na jancho sülo lea kyon jina eküm vanlanala. 25 Tokhatola etena ntioli echü yantavla? Ekhenthao mi jina e monthukvü. OPVÜI ete Potsow na nsana etena zolancho jo e chünrünguka. 26 Eküm evamo Potsow na omi na jancho sülo kyon ochona sana eküm vanlam alo? 27 Elani yia, Moses, osi OPVÜI na ntio phyoana topvü enga. Osi elana oro OPVÜI na phyo jiang e zoa. Tona ena jiang engavka.' 28 "OPVÜI na shiang zoale a thüngi heto a ezocho, 'Kyon shiangna phyo jiang ana zothaka osi ontena phyo ji elanthata. 29 Ontena yuta topvülo heto nchümo mmhona! Ontena yuta topvülo heto a yikrachia a yi engao, olan topvü nchüngkhon to onte mmhoniv osi onte tsoronichen jiang ha mmhonhyav. 30 Owo kyon jiang onte süranki yirale to ezoa. 31 Tokhatola, Moses, nino helo a thüngi vana, ana a yizüng jiang ni pivka. Kyon jiang ji a yizüng jiang püng woa osi ana nte pia vamo meta jilo vanathüng hojiang benphithuka.' 32 "Israel kyonden, OPVÜI na nte ezowo jiang topvü enga benphitav ti-mhechotava. Ombo yizüng kvüwoe ha n ngav ti-sitava. 33 Nte tsükona olan taro mmhom tssoa, osi ana nte pia vamo meta jilo sunga vancheo tssoa yizüng shiang topvü engatava.
Yizüng Tsüphov Ji
1 "OPVÃœI nte Potsow na nte püngnole to a pio yizüng jiang shiang. Ntena rheyiv vamo meta jilo vanathüng benphitava. 2 Ntena eküm evanthüng nandang nte osi nte tsoronichen topvüna ana nchüng nte pio yizüng shiang benphia OPVÃœI kyuchitav lia, tona ntena meta jilo sunga vanchevka. 3 Yizüng shiang engatava, osi benphitava, Israel kyonden! tona nte tsükona olantaro mmhom ka osi ete motsüi Potsow jina phyochako ji esüa nte ji jipo etssom thichei lizü meta jilo vanchevka. 4 "Israel, shi nchümchetava! OPVÃœI ji osi OPVÃœI tae ete Potsow ka. 5 Ni PVÜI Potsow ji ni lümbüm totona, ni eküm totona osi ni etho totona nzana. 6 Ana nchüng nte pio yizüng shiang kvüthüngha ti-mhachotava. 7 Nte ngaro jiang shiang püngnotava. Ntena oki vanathüng osi hapoe woathüng, ntena elhi tssoathüng osi esana vanathüng topvü lo shiang khatava. 8 Nte nchümchethukphen tssoa eono phankae hantava, osi otono ha phankae hantava. 9 Nte ki kipüng durhyu jianglo osi pikhfü rheyilano erankae vatava.
Jancho N zo Man Ekyuv
10 "OPVÜI nte Potsow na nte pyimtsümotsüiden Abraham, Isaak osi Jakob ezoji esüa ombona ntena n tssocho yantsü tsüphov osi ejüeli yantsü nte pivka. 11 Oki jiangha ntena n vacho tsütsaelan mmhom na pyingcho tssovka, ntena n shancho jükha osi ntena n chümcho jününgroli osi olive tssüng li liravka. OPVÜI na meta shilo nte rheyithuka na, osi nte tsoyuhungo jiang topvü benria hungana, 12 jithüng OPVÜI ochona ntena Ejip metae eziiden tssota vanathüng nte sochecho sana hoji ti-mhechotakhe. 13 Nte Potsow OPVÜI kyutava, ombo tae khümtava osi ombo myingo taena nte phyochak vatava. 14 Potsow thanpo ti-khümtava, nte hachüma evamo kyon jiang potsow kvüwoe ha ti-khümtava. 15 Nteno Potsow na omi esüa nte thüngi lüm tsuki mpüm na nte monthukvüka, ntiotssole OPVÜI nte Potsow ochona nte ndüngo vanchosana jina ombo ephfü potsow ochia n vanthukhungala. 16 "Ntena Massah lona tssoa to OPVÜI nte Potsow ojang ti-tssotava. 17 Ombona nte pio yizüng jiang topvü benphitav ekhyo tssotava. 18 OPVÜI na ntiojo mmhona osi elana to phyoasana jiang tssotava tona nte tsükona olan taro mmhomka. Tona OPVÜI na nte thüngi phyochako lizü meta ji ntena hochevka. 19 Osi ombona phyo ji esüa ntena ori jiang phani sichevka. 20 "Okholi jo nte ngaro jiangna heto nte engav, 'OPVÜI ete Potsow na ntioli yizüng jiang engav ezochola?' 21 Hojithüng ezotava, 'Eteno Ejip mesao eziiden tssocho, tole OPVÜI na ombo etho tsüphov khi erhanchocho. 22 Emhyikna hunga ombona Ejip kyon jiang, mesao ji tona ombo tsüphoe jiang to thüngi ekhenthav chethemothev elhi tssocho. 23 Ombona Ejip metae na evachi esosi oyi ombona ete motsüi thüngi phyochako ji meta shi epicho. 24 Jisülo jo OPVÜI ete Potsow na yizüng shiang hetopvü benphiv osi ombo kyuchiv ezocho. Etena hojito ombo yi engana ombona ete jipo shi e nhyakyata e mmhayithukvü to phyocho. 25 Potsow na ezo jiang topvü etena enga benphina ombona ete thüngi emathav.'
OPVÃœI Kyon Jiang
1 "Ntena rheyia vamo meta ji OPVÜI na nte pivka osi ombona jilona jipo elümoto phani sivka. Ntena rheyiathüng OPVÜI na nte lona tsükao osi etho jükao jipo tiying shiang phani siv. Hittite jiang, Girgashite jiang, Amorite jiang, Kanaanite jiang, Perizzite jiang, Hivite jiang tona Jebusite jiang to. 2 OPVÜI na kyon shiang nte khelo theyia ntena khyoana ntena onte chürathukvü shikhfü. Onte thüngi ti yenkitava osi khonzan ti ejütava. 3 Ntena ha onte ochia soa ti-vana osi nte tsoe jiangna ha onte soa tivanthuka, 4 Ntena to tssoana ontena nte ngaro jiang ji potsow thanpo ekhümden kümthukvü. Hojito tssoana OPVÜI na nte thüngi lüm tsuki jitopvü nte chürathukvü. 5 Hoji tsükona onte khümphen jiang roe siyitava, onte ntho long jiang vanroe siyitava, onte potsow Asherah kisü ji tanchüchüi rungi siyitava. 6 Nteno OPVÜI nte Potsow echi tsso jina hojito etssov lia. Limhalo kyon topvü yolona nte ethüngchei ombona ombo kyon nte tssothukala. 7 "Ntena oyam jipo lona kyung kacho lona opvüi na nte ethüng checho mek; ntena limhalo jipo teritso ji. 8 Tokhatola OPVÜI na nte nzancho osi ombona nte motsüi thüngi phyochako ji nte pihungcho. Hoji tsükona ombona elhi tsüphov theta nte shanchocho osi Ejip mesao khe lona nte vachicho. 9 OPVÜI nte Potsow ji tae Potsow osi ombo longtsüka eli-i ombona ombo phyochak jiang vatala. Osi ombo yi engae kyon jiang thüngi echungren wothüng wothüng jana nzana vanala. 10 Tokhatola ombo tssako kyon jiang jo ombona zaktole ezüp piala. 11 Hoji tsükona enhungo ombona ntio nte ezothakcho sana ji engatava; ana nchüng nte pithako yizüng jiang topvü engatava.
Oyi Engao Jilo Mmha
12 "Ntena yizüng shiang engae longtsükata benphina, tona OPVÜI na ombo ntsata ji vav osi ombona nte pyimtsümotsüi thüngi phyochako ji esüa n tümjakna nte nzamvüka. 13 Ombona nte nzana nte mmhayivka, ombona nte li jiang nte mmhayia khosha ethi-ebenthukvüka, jününgro osi olive jiang rankathukvü, osi mangsü, olyu nte rankayithukvüka. Shiang hetopvüto ombona nte motsüi thüngi phyochako mmha jiang, ntena meta jilo rheyiathüng hunguka. 14 Limhalo nti jipo ha nte mmhayia to tssona mmhayiv meka. Nte ochia osi nte tssiden kvümoe ha oro n rowo tüv vam meka. 15 OPVÜI na nochonori lan taro lona nte nkochev osi ntena Ejip metae na hungwo nochonori n mhon jiang ntina ha nte kav meka, tokhatola ombona nochonori jiang jo nte ri jiang khyingthukvüka. 16 OPVÜI nte Potsow na nte khelo theyio jipo jiang topvü roe monthuki sitava, osi ntia khonzan onte ti-ejütava. Onte potsow jiang ti-khümtava, ntena khümchojo nte chüthukvüka. 17 "Jipo shiang ji ntelo kyongkata osi ntena onte phani esiv jo n to to ti-phyotava. 18 Onte ti-kyutava, OPVÜI na Ejip mesao thüngi osi Ejip kyon jiang thüngi ntio tssoyicho sana ji ti-mhechotava. 19 Ntena hunga ekhenthao vara rothuko jiang nchümchetava, emhokthao elhi osi chetheo elhi jiang, osi OPVÜI na etho tsüphov khi nte vachio ji ti-mhechotava. Ombona Ejip kyon jiang monthukato nte ri ntena kyua vamo shiangha monthukvüka. 20 Ombona onte yolo ekhenrhük sotheyiv osi tsani eyio jiang ha mwothukvü. 21 Hoji tsükona kyon shiang ti-kyutava. OPVÜI nte Potsow na nte ndüngo vamka; ombo Potsow tsüpho ji küma ombo kyuchiv na lia. 22 Ntena mhadungoe khochia yiana, ombona ori jiang phani sia yivka. Ntena yenjoa taena onte rorüpi sichev meka, to tssoana orae ekümrümo jiang rankav küma nte tsükona ekyusü rankavka. 23 OPVÜI na nte ri jiang ekhenthuki nte khi roe onte sithukvü. 24 Ombona onte mesao jiang nte küpo kümthukvü. Ntena onte lüngthav osi mhechoe onte siv. Ochinaha nte n tanglanchiche osi ntena topvü monthukvü. 25 Onte kisü khümphen jiang ntena rungi siyia. Osi onte ki jiang lo shona janti lio jiang tijüpontava, osi ti-khitava. Ntena khichocho nte chüvka, ntiotssole OPVÜI na kisü ekhüm ji tssakala. 26 Kisü shiang nte ki hansi ti-rheyia, to mekana onte randankao ji nte kavka. Kisü khümphen shiango OPVÜI na randankae siwo jina ntena ha tssakvü na lia.
Meta Mhom Hoe Ekhiv
1 "Ana nchüng nte pithako yizüng jiang ntsanrüka benphitava, tona ntena eküm vanchev, nte thicherüchev osi OPVÜI na nte pyimtsümotsüi piv phyochako meta ji ntena khiv. 2 OPVÜI nte Potsow na longtsükata lijüngi na nzyu zhüro sunga nte sothakcho sana, osi ojang ekhüngu khi füi nte zeta, ntena ntio tssov sana osi ombo yizüng jiang engav sana to nte zecho. 3 Ombona nte wontonthuksi mana etsov nte picho, nte osi nte motsüi na n tsohancho etsoyu. Ombona shi nte pio jijo kyon na hümri taena eküm n vanala to ejüv tsükona, tokhatola OPVÜI yi jiangha theta eküm vanala to ejüv tsükona. 4 Nzyu zhüro yuta shilo nte mpensü jiang n kehan, nte jo jiangha n püm. 5 Opona otsoe thangshio ji esüa OPVÜI nte Potsow na nte elanchoyia ntssonshiala to nchümchetava. 6 Hoji tsükona OPVÜI na nte ezoa to benphitava; ombo shikhfü jiang benphia ombo kyutava. 7 OPVÜI nte Potsow na lizü meta nte piv sala, meta kvülo osi zhükhfü, jünhyo liracho sana osi lichungi jükvü jiangna liponi hayi osi phunglan jiang lona bokchukchia vancho sana, 8 meta kvülona otssuk-omüm, jününgrothi, züwothi, tsarümthiben, olive osi tssakijü lichosana ji nte piv sala. 9 Hojilo jo ntena kvüthüngha nte n vonton osi ezüpa n van. Meta jilo longro jianglo yonjak jüa, osi phunglanro jiang lona yongmen jyuchev. 10 Ntena nte tsoyuhungo jiang topvü benria hungu osi OPVÜI na lizü meta nte pio ji tsükona ntena OPVÜI montsson nte pihungüv.
OPVÃœI Mhecho Jilo Ekyu Jiang
11 "Ntena OPVÜI nte Potsow n mhechov tsükona tüngochüngtava. Ana nchüng ombo shikhfü nte pia vamo shiang benphiv ti mhechotava. 12 Ntena etsoyu topvü ben ria hungsi evam oki tssotathaka na 13 Osi nte mangsü osi olyu, nte janti osi shona osi nte ejüeli topvü rankathaka na kangtsü lona, 14 OPVÜI nte Potsow n mhechov tsükona tüngochüngtava, ombona nteji Ejip metae eziiden tssota vanathüng nte sochecho. 15 Ombona ekhenthao lijüng tsüphov jilo nrü osi züthem evan meta jiang yakchia nte sochecho. Hojitüv likying lijüng metae mpa ombona olong lona ojü bukthuki nte yuthukcho. 16 Lijüngina ombo na mana joe nte tsothukcho, hojitüv etsoyu jo nte motsüi jiangna ha kvüthüngha n tsohan. Ombona ojang esüa ezüp nte picho osi ochümi jo mmhom khi nte mmhayithukcho. 17 Hoji tsükona ntena nte etho lona nte popo eli-iden kümcho to ti-nchümtava. 18 OPVÜI nte Potsow na ejüeli nte kümthukcho to ti-mhechoa. Ombo na hoto tsso jijo nkolo ombona nte motsüi jiang thüngi ntsatao ji om bona vao ji tsükona. 19 OPVÜI nte Potsow ji kvüthüng ha ti-mhecho tava, osi potsow than pokhüma ti-yitava. Ntena hojito tssoana nte monthukvüka to nchüng ana ekyu yivon nte piala. 20 Ntena ombo yi n ngana kvüto ombona nte mha dungo ori jiang roe sia nte ejücho sana ji esüa roe nte siv.
Kyon Jiang Jancho Nzo Ji
1 "Engatava Israel kyonden! Nchüngo ntena Jordan zhükhfü ji pankae ntelo etho jükao osi khyungkao jipo jiangna vamo meta ji khivsala. Onte yantsü jiango pikhfü oyak etssunga tüv na epicho. 2 Kyon jiang siphov osi thojüi tae osi kyon ochina ha onte n zalanchikuk to ntena zothaka. 3 Tokhatola nte mhyikna hunga OPVÜI nte Potsow na nte mhadungi na omi ntav esüa khochivsala. Ntena khochiana ombona nte thung tssoa nte khyoyiv osi ombona phyochako ji esüa zaktole onte khyothechiv. 4 "OPVÜI na nte thung tssoa onte ji phanchukchi sithakana ntena mancho tsükona meta jilo rheyi vanala to ti-phyotale. Ntiotssole kyon jiangji nthao ji tsükona OPVÜI na phani onte siala. 5 Nte ji mmhoncho osi ombo yi engacholona OPVÜI na onte meta ji nte picho meka. Onteji n thao ji tsükona osi OPVÜI na nte motsüi Abraham, Jakob osi Isaak thüngi phyochako ji benthukvü tsükona phani sicho tae. 6 Ntena mancho na OPVÜI na lizü hetüv shi nte pia mek toji ntena mmhona ntsinrüngu lia. Mek, nteno lümbüm ekhüng osi harung kyonden. 7 "Ntena kvütoli khi lijüngina nte OPVÜI Potsow ji lümbüm tsukthukcho sana ji ti-mhechotava. Ntena Ejip metae na khochio ji tsüngon na benkae meta shilo oyi n janthüng nandang ntena OPVÜI panlantacho. 8 Sinai phunglani na mpato nteno OPVÜI lümbüm tsukthukcho; nte roe esio tüv sükhying nandang lüm tsukthukcho. 9 OPVÜI na nte thüngi ntio ntsata vachosana hoji longpyak eni lo erankao ji khilo ana phunglani chungocho. Ana hojilo ntia n tsoyu na tsüngon zhüro, zümo zhüro to vancho. 10 Hoji süloti OPVÜI na ombo khena erankao longpyak eni kvülo ntena phunglan ji yenjoe sanrhyutathüng milungina nte thüngi ombona ntio nte ezochosana jiang erankao ji a picho. 11 Ho; tsüngon zhüro zümo zhüro to süloti OPVÜI na ombona ntsata erankao longpyak eni ji a picho. 12 "Hoji sülojo OPVÜI na a ezocho, 'Zaktole phunglani na joyia, ntiotssole ni kyonden nina ochoang Ejip lona sosi chiyicho sana jiangji mmenthaka. Osi ontena n mhom tssothaka. Ana yizüng onte pio jilona nkae yithaka, osi onte khümphen tsükona kisü nsüngrüthaka.' 13 "OPVÜI na a ezocho, 'Onteji kvüta lümbüm khüngcho sana ji ana ntsia. 14 A tssünglam ekhyo ti-tssoa. Ana totona rorüpi onte siv tsükona nchümala, hojito tssona henavüngi jo ochinaha onte nchümchelamvü mek. Hoji sülojo ana onte lona etho jüka osi jipo tsüphokao jitüv nsüngrüv.' 15 "Hoji tsükona ana kholani ntsata erankao longpyak ji bensi joyicho. Phunglan jilona omi eki chiyia vancho. 16 OPVÜI na ete ezowo jiang n ngav ntena mmen tssothaka to osi ntena yonjak na tssibung joe khümta yithaka to ana ntsithakcho. 17 Hoji tsükona ana nte mhadungo na longpyak jiang shümchochi vanroe sicho. 18 "Jisülojo ana a mha shi likolo nkhümkae tsüngon zhüro, zümo zhüro to etsoyu n tsov vancho. Ana hoto tsso jijo ntena OPVÜI mhadungo mmen tssoe ombo lüm tsukthuko jina. 19 OPVÜI na elümoto lüm tsuko ji tsükona ombona nte monthukvü to ana ntsia. Tokhatola ombona a yi engalancho. 20 OPVÜI na Aaron thüngi ha elümoto lüm tsuka ombo chüthukvü tssocho, hoji tsükona ana Aaron tsükona randancho. 21 Ntena mmen elhi yonjak khi tssibung joe vao ji ana khi omi thechi sicho. Jitosi ana hoji ejüproe ohüm küma mmyaroe zhükhfü phunglani na tsüa joyia vamo jilo thechi sicho. 22 "Ntena Tabera, Massah, Kibroth tona Hattaava to shiang lona ha OPVÜI nte Potsow ji lüm tsukthukcho. 23 Ombona Kadesh Barnea lona nte thüngi ombona meta nte pia vamo ji owo hoe khitale to nte ezowo jiha ntena n ngav ombo panlancho. Ntena ombo loha n longtsüka, ombo yi ha n ngayi to tssocho. 24 Ana nte ntsipvüto ntena OPVÜI panlana nte hungpvü. 25 "Hojito OPVÜI na nte monthukvü methako jina ana a mha ji liko lo nkhümkae tsüngon zhüro, zümo zhüro to etsoyu n khiv vancho. 26 Osi ana randancho, 'Thotsü Potsow, nina Ejip metae na ni etho tsüphov osi thokhyung theta sochuko ni kyon jiang ji ti-monthuka. 27 Nina ni miden Abrahan, Isaak osi Jakob to jiang nchümi zesi kyon shiang lümbüm ekhüng osi mmen jiang to siyia. 28 Hoto n tssoana Ejip kyon jiangna nina ni kyon jiang sochukchi nina phyochako meta ji onte n pito nchümtavka. Nina ni kyon jiang tssako jina sosi oyi lijüngi na chüthuki sicho to Ejip kyon jiangna phyotavka. 29 Totae mek tolea kyon shiang ji nina ni kyon tssov ethüngchei ni etho theta Ejip metae na onte sochukcho.'
Moses na Elani Yizüng Jiang Khichoala
1 "Jisüi jo OPVÜI na a ezocho, 'Ovüngthüng ji esüa longpyak eni thenchoa osi hojiang thei vaphen Bakos shana. Osi phunglan jilo a phana chungroa, 2 tona nina vanroe sithako longpyak jiang lo ana ntio erankacho sana hoji ana erankalamka, osi longpyak jiang ji nina Bakos jilo thei vavka.' 3 "Hoji tsükona ana akacia tssüng khi bakos shanlani longpyak ethan eni thenchoe hansi phunglani chungocho. 4 Tole OPVÜI na long pyak jianglo ombona phunglani nte sanrhyuthuki omi yakchia yizüng taro nte pio jiang ovüngthüng erankao ji esüa erankalancho. 5 OPVÜI na longpyak jiang a picho osi phunglani na azoji esüa ana longpyak jiang Bakos jilo thei vao ji nchüng jana lipvü." 6 (Israel jiangna Jaakan kyon jiang jükha jilona khochi Moserah lo yicho. Hoji lona Aaron chücho osi jilo ombo shothecho, osi ombo tsoe Eleazar na pvüti elhi ji ombo echungcho. 7 Hoji lona ontena Gudgodah lo yicho, elani jilona Jotbathah, meta ojü tssona jüwo jilo yicho. 8 Phunglan jilona OPVÜI na Levi jipo khi Ntsata Bakos ji ezepvüiden osi pvüti elhi ombo tssoyiv osi kyon jiang thüngi ombo myingona mmha randankaeden ethüngchecho. Nchüng jana onte elhi jo hojiang. 9 Hoji tsükona Levi jipo jo jipo thanpoe jiangna hungwo ji esüa meta liko n pi; onte ejan jo OPVÜI nte Potsow na phyochako ji esüa ombona pvüti elhi etssov lo mmha picho.) 10 "Ana ovüngthüng esüa phunglani tsüngon zhüro, zümo zhüro to vancho. Osi OPVÜI na elani a randan engae nte n monthuk to phyocho. 11 Hoji sülo jo ombona nte motsüi piv phyo metaji nte khithukvü nte sosi wole to a ezocho.
Potsow na Ntio Rüngala
12 "Enhungo, Israel kyonden, OPVÜI nte Potsow na ntio yizüng nte piasana shi engatava: OPVÜI khümtava osi ombona nte ezowo jiang topvü tssotava. Ombo nzantava, nte lümbüm topvü theta ombo benkatava osi ombo yi topvü engatava, 13 nte echhi mmhomo tsswothukvü tsükona ana yizüng shiang nchüng nte piaka. 14 topvülo ntssontso oyak shiang, liko shi nte osi jilo ntio lichosana topvüto OPVÜI echi. 15 Tokhatola OPVÜI na nte motsüi jiang emhokthav nzamo ji tsükona ombo kyon to onte ethüngchecho osi nchüng jana nte shiango ombo kyonden. 16 Hoji tsükona nchüng tsüngon lona OPVÜI yi engatava osi lümbüm ti khüngtava. 17 OPVÜI nte Potsow jo potsow topvü pono osi etho topvü pono ventan ji. Ombo tsüphoa, thotsü osi ombo yi engav lia. Ombona omhyik eze elhi n tsso osi ekhüp n khi. 18 Ombona nrimphen osi emi-nloe jiang ntsanrük epiv chokatala; ombona ete ndüngo lankon vankae vamo jiang nzanala, osi etsoyu mpensü onte piala. 19 Hoji tsükona tsanthan jiang nzantava, ntiotssole ntena tsanthan esüa Ejip metae vantacho. 20 OPVÜI nte Potsow jancho zotava osi ombo tae khümtava. Ombo lo longtsüka ji ti senphina vatava osi nte echümchak jiang ombo myingona tae vatava. 21 Ombo nte Potsow ka ombo mying tae thüngtava, ombona nte tsükona ekhenthao elhi osi elhi tsüphov tsso jiang ntena hungthaka. 22 Nte motsüi jiangna Ejip metae yio jithüng jo onte owo ekhatiying tae yicho. Tokhatola enhunga jo OPVÜI nte Potsow na n khacheo tata oyaki shantio jiang esüa nte thichethukthaka.
OPVÜI Tsüpho Ji
1 "OPVÜI nte Potsow nzantava osi yuta topvülo ombo yizüng jiang engatava. 2 Ntena ombo thüngina ntio ejyu-eranchethakcho sana nchüng nchümchetava. Nte ngaro jiangna mek, ntena OPVÜI thüngina ejyu-erancho. Ntena OPVÜI tsüpho ji hungcho, 3 ombona etho, ekhüng osi chethev elhi jiang tssoa ntena hungcho, elani ombona Ejip mesao ji thüngi osi meta jilo ntio tssochothukcho sana jiang ntena hungthaka. 4 Ejip rasan jiangna nte phanathüng jümyon jümang jilona onte kurü tona zotoro to jiang nzo onte monthuko ji ntena hungthaka. 5 Ntena shilo n rheyithüng OPVÜI na lijüngina ntio nte tssoyithakcho sana ntena ntsia. 6 Ombona Reuben pvüji Eliab ji tsoeden Dathan tona Abiram to oni thüngi OPVÜI na ntio tssoyicho sana ntena nchümchev tssov. Kyon topvüna hunga onte wopan topvü, onte ranki, onte phajaeden, osi ekümrümo jiang nzo liko küngsoe nzhüi zicho. 7 OPVÜI na hetüv elhi tsüphov tsso jiang ehungo kyon ji nte shi.
Phyochak Meta Jilo Mmha Jiang
8 "Ana nchüng nte pithako yizüng shiang topvü benphitava. To tssona ntena rheyivsa vamo meta jilo zhükhfü pankae rheyichevka. 9 To tssona OPVÜI na nte motsüi osi onte tssoronichen jiang phyochaki vayio eli osi lizü meta jilo rheyichevka osi harishia vamka. 10 Ntena rheyiv sa vamo meta jijo ntena vansi yio Ejip meta ji esüa meka. Hoji lojo ntena mojü thetana elümoto ezüpa jülan nrhüi ojü sothechicho; 11 Tokhatola ntena rheyia vamo meta jijo phunglan tona hayi to nzitacho osi eryujü na etsonala. 12 OPVÜI nte Potsow na meta shi zeyatala osi nzyu totona ombona ntangshona vanthukala. 13 "Hoji tsükona ana nchüng nte pio yizüng shiang benphitava; nte OPVÜI Potsow nzantava osi nte lümbüm totona Ombo benkatava. 14 Hojito tssona ntena ethev liathüng OPVÜI na eryu jothuki tsüngkying nzyu topvülo nte li jiangna otssuk-omüm, jününgrothi, olive tssüngthi to ethithukvü, 15 osi nte ekümrümo jiang tsükona limo chenthukvü. Ntena ethelan elio etsoyu topvü ntena hunguka. 16 OPVÜI thüngi na kontae potsow thanpo khüma eyio tüv nte ti sosorathuka. 17 Ntena hoto tssona OPVÜI na nte thüngi lümbüm tsukvüka. Ombona eryu jwothukvü mek osi liko ji likyingi sisi ntia zav mek. Hojito OPVÜI na meta mmhom nte pilea jilo na khangtsüngi nte chüv. 18 "Yizüng shiang ti mhechona nchümcheta vantava. Nte evono phankae hantava osi nte ton no khüngkae hantasi nchümchetava. 19 Hoji khi nte ngaro jiang püngnotava osi ntena oki vanathüng tssolea, haphoe vanathüng tssolea, esana vanathüng tssolea mekana elhi tssoathüng tssolea hojiang yilan jjiang phyotava. 20 Nte ki durhyu lo osi kipüngo erankae vatava. 21 Hoto tssona nte osi tsoronichen jiang OPVÜI na nte pyimtsümotsüi piv phyochako meta jilo sunga vamka. 22 "Ana nte pithako yizüng topvü longtsükata benphitava, OPVÜI nte Potsow nzantava; Ombona nte ezo jiang topvü benphitava, osi ombo lo longtsükata vantava. 23 Hoto tssona ntena khochiathüng na OPVÜI na jipo topvü phani sisi nte pomoe etho jükao jipo jiang meta ji nte pivka. 24 Ntena yakchicho meta topvü nte echi tssovka. Nte metajo jolowoe lijüng jilona khümkiwoe Lebanon phung lan nandang, engkhfüwoe Euphrates zhükhfü lona engrhewoe Mediterranean jümang nandang tssovka. 25 Meta jilo jo ntena kvülo woana OPVÜI na kyon jiang khi nte kyuthukvüka, ombona phyochako ji esüa osi kyon ochina ha nte tanglanchiv meka. 26 "Nchüngo ana mmha tona rhiyirandanka to lona ethüngi ekhiv nte piala 27 ana nchüng OPVÜI nte Potsow yizüng nte pio shiang engana mmha tssov; 28 tokhatola ntena yizüng shiang n ngav potsow thanpo ntena n khümhancho tüv khümta yiana rhiyika ji nte pono liv. 29 Ntena khivsa vamo meta jilo OPVÜI na nte sothechiana ntena Gerizim phunglan lona mmha randamvüka osi Ebal phunglan lona rhiyika randamka. 30 (Phunglan eni shijo Jordan hayi evamo Kanaan kyon jiang metalo Jordan na engrhelamoe. Shiang jo Gilgal yan ndüngo Moreh lo ntho dung lona lümha n kom tüv lo.) 31 OPVÜI na nte pio meta ji khiv tsükona ntena Jordan pankae rheyiv sala. 32 Nte na Jordan pankae rheyiv meta jilo rheyiana ana nchüng nte pia vamo yizüng shiang ti mhechotava.
Khümphen Motsünga Ji
1 "OPVÜI, nte motsüi Potsow na nte pio jilo evanthüng nandang tsükona yizüng shiang benphia vantale to nte piala. Hojiang engatava. 2 Ntena rheyia vamo meta jilo kyon jiangna onte potsow khümphen phunglan osi yontoni, odung mmyakvü kupi lio jiang topvü roe sitava. 3 Onte thanphensa jiang phiroe sitava osi onte ntho long jiang vanroe sitava. Onte potsopvüi Asherah kisü jiang tona onte kisü jiang n khümthuklamo tssoa roe siyitava. 4 "Ntena OPVÜI nte Potsow khümo ji kyon shiangna onte potsow khümo ji esüa ti khümtava. 5 Nte pvüji meta jiang lona OPVÜI khümphen meta motsünga etssyukae kyon jiang khi ombo eshüpo osi tarochia jiang, phyochak than jiang, 6 lüm erungthan jiang tona nte tssiden lona nrodemo jiang to thamka. 7 Hojito, OPVÜI nte Potsow ochona nte osi wopan topvü mmhayithukcho sana, hoji vanrhyu lona ntena sangchowo tssüngthi jiang tsovka. 8 "Hoji yuta ji jana na ntena, enhünga esüa etssophyov meka. Enhünga nandang jo ntena nte etancho khümta vantala, 9 ntiotssole ntena OPVÜI nte Potsow na nte pio meta jilo rheyi noyinga n vanhan. 10 Ntena Jordan zhükhfü pankathakana, OPVÜI nte Potsow na meta ji hoe nte vanthukvü. Ombona nte ri jiang thüngina tsan choe noyinga nte vanthukvü. 11 OPVÜI na meta motsünga etssyukae nte khi ombo khümthukvüka, hojilo ntena ana nte ezowo than jiang topvü hansi rovka; nte erungthan tona othan thanpo jiang, nte tarochia osi othan jiang tona ntena OPVÜI lo phyochako echümporo than jiang to hojilo na thamka. 12 Hojilo ombo vanrhyu lona nte ngaro jiang nzo, nte phajaeden osi nte metalo pvüti jiang nzo longshitava; Levi jiango onte ejan liko n li toji ti mhechotava. 13 Ntena nte than jiang nte etancho meta lona tham meka; 14 nte pvüji meta jiang yolona OPVÜI na meta motsünga ethüngcheo jilo taena thantavka. Hojilo taena ntena erungthan jiang pivka. Osi ana nte pio yizüng jiang esüa tssovka. 15 "Tokhatola ntena kvülo vana na jilona ntena nte ekümrümo jiang lüngthae tsokhuka. OPVÜI na kvüta nte piana ntena tsokhuka. Nte topvü na shikhfü ephan ntssüng lea mekana n tssüng yutalo lea thanpo so, sepvü siano so tsoato tsokuka. 16 Tokhatola onte ejan jiang ntena n tsov shikhfü, tokhatola ojü chüa esüa likoe chüi siv shikhfü. 17 Ntena OPVÜI thamo jiangjo nte vanphen lona tsov meka. Ntena ethi-eben tarochia thamo jilea, nte jününgro jü tssolea, olive thyujü tssolea, nte tssiden osi olyu lona bukden than tssolea, OPVÜI yantsov phyochako ji tssolea, nte lüm erungthan osi othan thanpo kvüwoe ha ntena vamo jilo na tsov meka. 18 Nte osi nte ngaroden, nte phajaeden, nte metalo Levite vamo jiang na tssolea othan shiang ji nte OPVÜI Potsow na hokao khümphen meta ombo vanrhyu jilo na tae tsocheta. Osi hoji lona ntena ntio tssoasana ji khi nte emathav shikhfü. 19 Ntena meta jilo evanthüng nandang jo ntena Levite jiang ti mhechotava. 20 "OPVÜI na phyochako ji esüa ombona nte meta ji nte rankayia na, ntena kvüthüng nte tsohunga na oso tsokuka 21 Khümphen meta ji okina koncho tssona, ana nte ezothako ji esüa ntena OPVÜI na nte pio ekümrümo jiang thama tatsüngi nte kina tsokuka. 22 Nte topvü nthoa evan osi n tholo evah topvüna sepvü-siano so tsoato tsokuka. 23 Oso jiang lo ejen jüpvüna ti-tsotava, ntiotssole ejen jilo eküm jüa. 24 Ejen jiang jo etsoyu tssoa ti tsotava, ojü esüa likoe chüi sitava. 25 Ntena shiang engana OPVÜI na nte emathayivka. Osi nte tona nte tsoronichen to echi mmhomka. 26 Nte than osi phyochak yantso jiang ji khümphen meta motsünga jilo hansi wotava. 27 Hojilo na nte mbüm na erungthan jiang OPVÜI thanphensa lo thantava. Osi ntena ejen etso so jiangha thantasi ejen jiang jo thanphen jilo phyangkae sitava: 28 OPVÜI na ezothako jiang topvü longtsükata benphitava tona nte osi nte tsoronichen jiang echi kümali mmhomka, ntiotssole ntena ntio jo elancho sana osi OPVÜI nte Potsow emathao sana hojiang tssov.
Kisü Ti Khümtale To Ntangshonala
29 "Ntena jipo poe jiang ori tssoana OPVÜI na onte monthuksi onte meta ji nte pia nte vanthukvü. 30 OPVÜI na jipo jiang roe sithaka na ntena onte ekhümlan jiang ti phankatava, to tssoana nte chüvka. Ontena onte Potsow jiang kvütoli khümtasana to ti ethümtava, tosi ontena khümo ji esüa ti phankatava. 31 Ntena OPVÜI nte Potsow khümathüng onte potsow khümato ti khümtava, ntiotssole ontena OPVÜI na etssako elümoto tssoala. Ontena onte ngaro jiang mpato thanpheni omi jilo thechi thanala. 32 "Ana nte ezothako shiang topvü tssotava; hojiang lo ntia tithephata osi ntia khi tisia.
1 "Zenkhying mekana müngyi ephyoe na ntena n khümhancho potsow nte khümthukvü, 2 chethev elhi nte ejüv phyochakuka. Ombona phyo jiang bencheta nte ejülea, 3 ombo ti longtsütava. OPVÜI na ojang nte tssov tsükona ombo tsütsatala, ntena lümbüm totona ombo zenzana sana nte zev tsükona. 4 OPVÜI phankata osi ombo kyutava; ombo yi enga ombo yizüng jiang benphitava; ombolo longtsüka lia ombo khümtava. 5 Tokhatola ntena Ejip metae eziiden tssoa vanathüng nte socheo Potsow ji thüngi na kontav nte ezowo zenkhying osi omüngyi ephyoe jiango chüthuktava. Hojitüv kyon jo n mhon etssoe osi OPVÜI na evam nte ezowo eküm jilona nte sosorav ekhyo etssoe. Hoji tüv n mhon lona tsanchov tsükona, ombo chüthuki siv lia. 6 "Nte jeni osi tsokhying mekana tsolo, nte nzamo engh osi oshom ndüng jiangna mpato nte osi pyimtsümotsüi na n khümhancho potsow khüma yiv, osi mphoena nte sosorakuka. 7 Onte yolo ochosana ntena vanrhyuo kyon jiang potsow jiang mekana metapoe potsow jiang ekhümvü nte ezokuka. 8 Tokhatola ombo khi nte ti enayathuka; ji sisi enga tia ti engayia. Ombo nzana osi nkocheta ti vana. 9 Lüngthae ombo sia! Nina vünga ombo ephyadena osi otsük akvüna ombo ephyatsüngthuka. 10 Ephyatsüngi ombo chüthuka! Ombona nte ji ntena Ejip metae ezii tsota vanathüng nte socheo Potsow ji thüngsina nte sosora hungala. 11 To tssona Israel topvüna hoto etsso ji ntsivka, osi onte kyui ochina ha hotüv n lan tssov meka. 12 "OPVÜI nte Potsow na yantsü nte pio jianglo ntena vana na yanpoe ochoang na jo 13 kyon ejoma sosorae ntena n khümhancho potsow khüma yithukcho yiwon zovska. 14 Ntena hotüv yiwon ethan zoana tüngochüa ethümi zetava, osi otsotso tssona hotüv yantsü jilo, 15 kyon jiangna osi onte tssiden jiang lüngtharüpi sitava. Yantsü jiha roe sitava. 16 Yantsü jilo eli jiang yanlungi hanrhyui vasi yantsü ji totona rungi OPVÜI than esüa kümthuka. Yantsü ji kümali roe kvüthüng ha n tssocholamo kümthuka. 17 Hotüv yantsü lona ntia khichei ti khitava tona OPVÜI na ombo lüm etsuk ekhenthao ji lona khophi nte khonzam. Ombona nte khonzani ombona nte motsüi thüngi phyochako ji esüa owo elümoto nte thichethukvü ka, 18 Hojijo ana nchüng ombo yizüng nte pio shiang topvü benphia ombo yi engasanati tssochev.
Nungralan Khanio Jiang
1 "Nteno OPVÜI Potsow kyonden. Hoji tsükona ntena echüi kyatathüng oyam esüa nte bobo osolo tsüthechia mekana dontssan tssüi sita to ti-tssotava. 2 Nteno OPVÜI Potsow kyonden. Ombona limha lo kyon topvü yolo na nte ethüngchei ombo kyon nte tssothukcho.
Shikhfü Enioto Ntho Osi N Tho Ekümrümo
3 "OPVÜI na n tho to tsacho ntia ti tsotava. 4 Ntena shiang tsokuka: mangsü, olyu, nyanyan, 5 siano, ora olyu, ora nyanyan osi tsiyo to 6 ekümrüm kvüwoe na jokhyan khyinga osi nkhichi tsoa yipa sana jiang tsokuka. 7 Tokhatola ekümrüm kvüwoe jokhyan n khyingu osi nkhichi n tsoana jiango ti-tsotava. Oat, lishüso osi sethan to shiang jo ti-tsotava. Shiang jo n tho, ntiotssole ontena nkhichi tsoa khatola jokhyan n khying. 8 Woko ti tsotava, Woko jo n tho, onteno jokhyan khyinga khatola nkhichi n tsoala. Hojitüv ekümrümo ntia ti tsotava osi hotüv echüha ti vüngkatava. 9 "Ntena ongo chokonoko tona ngolüp to khyingo jiang topvü tsokhuka, 10 tokhatola ojüi evan ngolüp osi chokonoko n khyingo tüv ntia ti tsotava; hotüv jo n tho to khanhyala. 11 "Ntena woro ntssüngu topvü tsokuka. 12-18 Tokhatola woro shiang hetüv jo ti tsotava: mungshitsü, velungu, mungshiro, kyorhü; müngtsov, kyashak, josiorojüoro, jüphotük; jü-ngangav; sosiro to shiang. 19 "Echo mpao oraoben topvü n tho, hojitüv ti tsotava. 20 Ntena oraoben nthov jo tsokuka. 21 "Ekümrüm tathi echü ti tsotava. Hotüv jo ntena lankon nte yolo vamo jiang tsothuka mekana lankon thanpoe shithuka. Tokhatola nteno OPVÜI nte Potsow kyonden, nteno ombo echi. Nyanyaro osi olyuro jiang ji opvü shyurojü lona ti kvüa.
Tarochia Epi Shikhfü
22 "Nte li na nzyuakvü chiyio jiang lona tarochia khichei vatava. 23 Jisülojo OPVÜI khümphen meta hokao jilo owo OPVÜI vanrhyu jilona nte tsünghanro, jününgrothi, olive thyujü, tarochia osi nte mangsü olyu nrodemo jiang to tsotava. Ntena OPVÜI nte Potsow ji kümali yikrachio tssoa hoto benphitava. 24 Khümphen meta ji nte jina ekoni tssoe OPVÜI na nte mmhayio jilo na tarochia jiang hansi ewov ezüp lina, heto lyutava: 25 Nte than jiang yeni orang ji khümpheni hansi woa. 26 Hoji lona owo ntiolona nte ezi hungana eziamangsüso, olyu, tssüngthijü, zükhi-to shi, nte wopan nzo OPVÜI vanrhyu lona longshita tsoyutava. 27 "Nte yani Levi kyon vamo jiang ti khachotava, onteno ejüeli n lika. 28 Nte joncho-rücho jilona tarochia jiang nzyu ethümo yenjoa hanrhyui nte yantsüi vatavka. 29 Etsoyu shiang jo Levi jiang tsükona tssov, ntiotssole onteno ejüeli ntia n li, elani lankon, nrinphen osi emi jiang to nte yantsüi vamo shiang echi tssovka. Ontena oro onte ethelan ephan khivka. Shiang esüa tssotana OPVÜI nte Potsow na nte elhingo topvülo nte mmhayivka
Nzyu Tiyingoto Ji
1 "Nzyu tiying akvüto oyam na orang ochi nte epiv elio jiang ntena siyitavka. 2 Hojijo hetowoe na tssov. Kyon ochona Israel thanpoe orang noe liana ochi ji siyiv, ombona orang ji khislaniv mek, ntiotssole OPVÜI na siyithaka. 3 Lankon na nte epiv elio jiango khiyikuka tolea Israel kyon na nte epiv elio jiango ti khiyia. 4 "OPVÜI nte Potsow na nte pia vamo meta jilona ombona nte mmhayiv, nte yolo kyon tsüka lea yantsav meka, 5 ntena ombo yi enga ana nchüng nte ezo shiang benphia tssona. 6 OPVÜI na phyochako ji esüa ombona nte mmhayiv. Ntena jipo elümoto sav khatola jipo kvüina ha nte sav meka. 7 "OPVÜI na nte pia vamo meta jilo oyan kvülo yantsae vana na ntena tajo elüm lona n zanchiv ti sitava. 8 Jithüngina jo lungphyata ombo eno-rürontava, ombo ethelan eli ji ephanina. 9 Ochi siyita nzyu ji enhyani lato yantsae jiang epvüeno n piv n norürom ti sitava. Hojitüv nchümri n mhom na nte ti pyingthuka. Nina enov ekhirana na ombona OPVÜI thüngi kyakachiv osi ni n lan tssov. 10 tinkyim na ombo pia osi tajo tilüm na pia, to tssona nina ntio tssoa na jilo OPVÜI na ni mmhayiv. 11 Yuta topvü lo Israel yantsae osi ethev eli kyon vamka hoji tsükona onte thüngi lungphyatale to nte ezoala.
Ezii Jiang Tsükona Ntsata
12 "Nte Israel ochosana yantsa lona eboe lea eloe lea ombobo ni thüngi yena tssona, Ombona nzyu tiruk ni benkasi sülo ombo, ompvü vachivka. Nzyu tiyingoto jilo jo nina ombo ji etancho vachivka. 13 Nina ombo vachiana ombo ji khejüng ti yithuka. 14 OPVÜI na olyu, otssuk-omüm osi jününgrothi ni mmhayio jilona lungphya ombo pia yithuka. 15 Ntena Ejip metae eziiden vancho OPVÜI nte Potsow na nte sochukcho toji ti mhechotava; hoji tsükona enhünga yizüng shi nte piala. 16 "Tokhatola ni ezii jina n yihungu mpato tssov; ombona ni osi wopan chokata elani vanlanhungu mpato tssokuka. 17 To tssona ombo sosi ni durhyu jilona owo eno ji ombo veyia, to tssona ombona eküm echung ni ezii tssovka. Eloe ezii jiangha hoji esüa ekümtava. 18 Ntena ezii vachiana n chokav to ti tssotava, ntiotssole ombona jokheman chiso lona nzyu tiruk ni benkathaka. Shi esüa tssoa tona OPVÜI nte Potsow na nte elhi topvülo nte mmhayiv.
Mangsü Osi Olyu Nrodemo Jiang
19 "Nte olyu osi mangsü obung nrodemo jiang OPVÜI lo khochaki vatava; shiang jo elhi lo ti tsütsata osi otssan ha ti reyia. 20 Nzyu akvü nte osi wopan topvüna khümphen meta OPVÜI vanrhyu ki jilona hojiang tsotavka. 2i Tokhatola ekümrümo jianglo ojo okhe n benriv mekana omhyik juka osi ephyoeriv khyingna hotüv jo OPVÜI nte Potsow ti thantava. 22 Hojitüv ekümrümo jo ntena okina tsotava. nte topvüna, n tholo yutalo tssolea hojiang ji sepvüsian so tsoato tsotava. 23 Tokhatola ntena ejen jo etsoyu tssoa tsov meka, ji thüngona jo ojü esüa likoe chüi sitava.
Yakchi Tokhu Ji
1 "Abib choro lo yakchi tokhu ji OPVÜI monkhüm yikrachia khitava; hoji choro zümo motsüngalo OPVÜI na Ejip lona nte sochukcho. 2 Khümphen meta motsünga jilona owo nte OPVÜI Potsow yikrachiv tsükona nte olyu mekana mangsü ji lüngthatava. 3 Ntena tokhu shi tssotana hümri jiang vümhi ti thena rüngtava osi kvüto Ejip lona khochukathüng süsoa tsotacho sana ji esüa tsüngon tiying vümhi n theo hümri tsotavka. Hotüv hümri tsotavahojijo ezüp hümri to tsavka. Hojitoli ntena evanthüng jo ezüp meta Ejip lona ntena chiyio ji nchümchetavka. 4 Tsüngon tiying tsükona nte ochina ha oki lo vümhi vav meka, osi tsüngon ovüngo ji zümolo ekümrümo lüngthao ji hoji zümolo tsoravka. 5-6 "Yakchi tokhu ekümrümo ji khümphen meta jilona lüngthata OPVÜI na nte pio meta jilo meta thanpo kvülona ha lüngthav meka. Ntena Ejip lona khochio jithüng ntio yutalo khochicho sana ji yuta tsük jilo engrhetathüng shi tssotava. 7 Oso ji vüpi khümphen meta motsünga jilona tsotasi, ojyuato enyathüg oki yitava. 8 Jisülo tsüngon tiruk jijo ntena vümhi n theo hümri tsotava, osi tsüngon tiyingo to jilo jo sanrhyui OPVÜI nte Potsow khümtava osi tsüngon jilo jo elhi ti tssotava.
Liri Tokhu
9 "Ntena liri benkao jilona hopta tiying etssünga, 10 osi OPVÜI na nte mmhayio ji ekyan erungthan bentasi OPVÜI phfiitssonthuka tokhutava. 11 OPVÜI vanrhyu lona nte wopan jiang nzo ngaro, phajae osi Levi, lankonden, opvüpoe n van osi emiden nte yantsüi vamo jiang nzo longshitava. Shiang ji khümphen meta motsünga jilona tssotava. 12 Ntena yizüng shiang engav ti-mhechotava. Nteno Ejip metae eziiden to ti-mhechotava.
Ranki Tokhu
13 "Ntena nte tssuk jiang tseni vasi jününgro jiang zümrathaka na ranki tokhu ji tsüngon tiying khitava. 14 Tokhu ji nte ngaroden, phajeden, Levi jiang, lankonden, opvüpoe n van osi emiden to nte yantsüi vamo jiang nzo longshitava. 15 Khümphen meta motsünga jilona tsüngon tiying tokhu khita nte OPVÜI Potsow yikrachitava. Longshitava, ntiotssole OPVÜI na nte elhi osi liri ji mmhayithukcho. 16 "Khümphen meta motsünga jilo nte jipo lo eboetso topvü na nzyualo yenjo ethüm rovka; yakchi tokhu lo, liri tokhulo tona ranki tokhulo to. 17 Eboe otsük akvüna OPVÜI na ombo mmhayio jilo na ombona thankhoko ji ephanina yantso hansi OPVÜI thüngi rovka.
Ntsanrük Yansasa
18 "OPVÜI nte Potsow na nte pio yantsü akvü lo yitssoe osi tsüphoeden ethüngche vatava. Ontena kyon jiang omhyik n thena savka. 19 Onte yitsso jiang lo n tsa nrük osi mhyikthe n lina tssovka; ontena ekhüp ha khiv meka, ntiotssole nchümri eli osi ntsanrük jileha yantso na omhyik eyukicheta osi silyuo methak khikhoka. 20 OPVÜI nte Potsow na nte pia vamo meta ji ntena khi hojilo harishia evam tsükona yuta topvülo ntssüng-rünga osi ntsanrüka etsso-ephyotava. 21 "Ntena nte OPVÜI Potsow thanphensa ronta na hoji tssae Ashera potsow kisü shani tivanthuka. 22 Elani kisü khümu tsükona olongha chümkachi ti vatava; OPVÜI na hojitüv tssakala.
1 "OPVÜI nte Potsow thüngi ekümrümo ephyoerüv khyingo tüv ti thantava; OPVÜI na hoji tssakala. 2 Ntena oyan kvülo sana eboe eloe mekana ochona sana OPVÜI tachio mmen tssoa osi 3 ombo ntsata ji yesoa potsow thanpo khüma, eng mekana choro shantio khüma OPVÜI yizüng yesocho zokhuka. 4 To tssona ntena tüngochüa ethümoe zetava. Osi otsotso Israel yolona hojito etssoe vana tssona, 5 yantssae ombo sosi chiwo ephyatsüngi sia. 6 Tokhatola ombo ji ehungpvüi otsük eni mekana kyongkao na ehungpvüi piyi sanati chüthoku; tsüka taena ehungpvüi tssoyicho jo n chüthokche. 7 Enhungpvüi jiangna olong ovüngo ji shümchidensi, kyon topvüna ephyatsüngi sia; hetüv mmen nkachotava. 8 "Kvülona jo metaro jilo yitssoe jiangna n methakcheo yilan ekhüngu ha chiyikhoka, ejyukaena tsütsaelan chov, otsüko tssatssorükhü mekana münghan alo tssatssota sana to n khotao yilan ha chiyikhuka. Hotüv yilan chiyia na OPVÜI na khümphen hokao meta jilo owo, 9 Levi pvüti ji tona jithüng yitssoe ji to yenjani hoji ephan tssoa. 10 Ontena onte methak jiang nte ntssithoku osi ontena nte ezoji ephan tae tssov. 11 Onte yitan ji khichoa osi ontena phyo ji ephan yitsüng akvü tssoa. 12 Ochona yitssoe ji mekana pvüti ji methak ji n khichoa sana chüthoki sia; hojitoli n mhom ji Israel yolona khi sia. 13 To tssona otsük akvüna zoe hoji ekyu lona n mhom tssov meka.
Mesao Tsükona Lanso
14 "Ntena OPVÜI nte Potsow na nte pia vamo meta jilo rheyi vanthakana, nteha jipopoe nte nkonphia vamo jiang esüa mesao nte vanthokhungu. 15 Hoji tsükona ntena OPVÜI lüm erüngo mesao ji ethüngu ti-mhechotava. Ombo ji nte kyon yolona ethüngchevka; jipopoe khi nte mesao titssothuka. 16 Mesao jina ombo rasan tsükona kurü khosha ethev n li, osi ombona kurü shilo Ejip metae ha wothoku n li; ntiotssole ntena kvüthüngha Ejip metae ti-olantale to OPVÜI na phyocho. 17 Mesao jina engh elümoto vanthoku meka, ntiotssole to tssoana ombona OPVÜI mhechoe siv; elani ombona shona janti khosha vae eli kümvü meka. 18 Ombona mesao küma na, OPVÜI yizüng kako ndüng motsünga pvüti jiang na vao ji khi zeta eranthoki vavka. 19 Ombona kako ji ombo ndüngo vasi, ombo eküm echung kha hojilo ntio erancho sana topvü benphia OPVÜI kyuchivka. 20 Hojito tssona ombona ombo, Israel kyon thanpoe jiang lona ombo tsükacho esüa nchümvü meka; osi OPVÜI shikhfü jiang n ngav siv meka. To tssona ombona Israel pono sunga sav osi ombo tsoronichen jiangna echungren sunga Israel savka.
Pvüti Jiang Ejan
1"Pvüti jipo jiangna Israel lo liko onte ejan liv meka; onteno othan osi thanpo yantso OPVÜI pio jiang tsoa vamka. 2 Onteno jipopoe jiang esüa liko hov meka; onteno OPVÜI na phyochako ji esüa OPVÜI pvüti tsso ji lona ematha lia vamka. 3 "Kvülo mangsü osi olyu thana sana pvüti jiang jo worhyo-o ji, okan ji tona mman ji to pivka. 4 Ontena tsünghanro, jününgro, olive thyujü osi tssansü ovüngo jiang pivka. 5 Nte jipo topvü yolona OPVÜI na kümali ombo benkathukvü Levi pvüji ethüngchecho. 6 "Israel lo oyam kvülo Levi tsükana oro OPVÜI elhi tssohunga sana khümphen jilo Levi vamo jiang 7 esüa onte ha pvüti elhi tssoa ombo OPVÜI Potsow benkakuka. 8 Omboha Levi thampo jiang esüa othan jiang kheti hunguka, tolea ombo hanthuko jiangjo ombona vakhuka.
N longtsüi Etssophyo Jiang N tssov Tsükona Ntangshom
9 "OPVÜI nte Potsow na nte pia vamo meta jilo ntena rheyiana hojilo metapoe vamo jiang etssophyo etssakthao jiang ti phankatava. 10 Nte thanphen mi jianglo nte ngaro jiang ti thechitava; elani ntena ratssen rapvüi ti lithuka, phyalyu eze randankae jakton mekana 11 oha benphita osi echüi müngyi tssoe thüngi ngatüngngari ti lithuka. 12 OPVÜI nte Potsow na hetüv etssophyo e nkongthao shiang tssako jina hetüv benphiwo jiang phani sisi nte rheyithukala. 13 OPVÜI lo tae chüngchünga longtsükatava."
Zenkhying Rwothukvü Phyochak
14 Jisülo Moses na phyocho, "Ntena rheyia vamo meta jilo jo kyon jiangna ratssenta phyalyu zetala, tokhatola OPVÜI nte Potsow na jo shiang nte n tssothukala. 15 Jithüngo najo ombona a esüa zenkhying tsüka rwothukvü osi ntena ombo yi engav. 16 "Ntena Sinai phunglani sanrhyuo ji nchuk jo ntena Potsow mha omi esüo ji hungi nte chüv nte kyua enhungo OPVÜI na nte ti janthukle to jonjitacho. 17 Hoji tsükona OPVÜI na a ezocho, 'Ontena elanthata jonjithaka. 18 Ana onte yolona ni esüa zenkhying tsüka khyo chei onte thüngi wothukvüka; ana ntio phyole to ombo ezoana ombona kyon jiang thüngi ezoravka. 19 Ombona a myingona phyov osi ochona ombo yi n ngasana ana ezüp piv. 20 Tokhatola zenkhying ochona ana n zov a myingona nsana sana ombo chüthukvü, hoji esüa potsow thanpo myingona nsamo zenkhying jiang ha chüthukvü.' 21 "Kvüthüng zenkhying ji yi ji OPVÜI thüngi na meka sana, kvüto phyov sana n tsiv nte emhukvü. 22 Zenkhying tsükana OPVÜI myingona nsamo ji nbencheta tssona ombo OPVÜI yithen hanphi mek. Hoji zenkhying jina ombo etancho nsancho tssoala osi ntena ombo ekyuv n li.
Tsanthephen Yantsü
1 "OPVÜI nte Potsow na kyon jiang monthuki sisi onte yantsü jiang nte pia onte ki jianglo ntena vanana, 2-3 metaji kheti ethüm erüsoe osi echi akvü lo lungjüngo, yantsü motsüngtsüng zikae vata. Tona oyam lüngthae jiangna hotüv yantsü lo tsanthei nlhichoa vam. 4 Ochona sana ori meko tüv oyam tssatssoana ombona yantsü shiang motsüngalo tsanthei nlhia vankhoka. 5 Ejyukae na otsük eni otssüng volo wotale tsüka ji pvüji esuki tsüka ji meyani sina ombona yantsü ethüm ji yolo motsüngalo tsanthei sikhoka. 6 Yantsü ji motsünga tae tssocho jo kontio jina n tsancham echüo ji wopan ocho sana nlilam tsükona n lan n lio kyon ji lüngthakuka. Ntiotssole ombo ri mek khatola n tsiv tssatssotacho. 7 Hoji tsükona ana yantsü ethüm kokae vale to nte ezoala. 8 "OPVÜI nte Potsow na nte motsüi jiang ezoji esüa nte yantsü jiang nte tsüka rankayia na, osi ombona phyo meta jiang topvü nte pithakana, 9 ntena yantsü jiang nte ethüngchelam. (Ana nchüng nte ezo shiang ntena enga benphina osi OPVÜI püngnoyi ephani na eküm vanta tssona opvüi na meta shi nte pivka.) 10 Shijo OPVÜI na nte pio meta jilona ntena noying kyon thama na n chüthukvü tsükona. 11 "Tokhatola ochona sana ombo ri jina yingto vanathüng etana na lüngthana osi yantsü shianglo tsantheta tssona. 12 Münghan ji wopan jiangna yantsü jilo owo ombo rhümae sosi oyi echüo ji wopan khelo theyia ombo chüthukvü shikhfü. 13 Hotüv kyon jo khonzan ti jüa, Israel yolo hojitüv kyon tivanthuka, tona nte sükhying mmhona vamka. 14 "OPVÜI nte Potsow na nte pio meta jilo nkolo ntio liko erü chümtacho sana jiang ti lukphia.
Ehungpvüi Tsükona
15 "Kyon tsüka ji nlan epiv tsükona jo ehungpvüi tsüka taena n tssochyu, matacho otsük eni na ehungpvüi pia nlan piv shikhfü. 16 Ochona sana ejüngona nlan oyam shakav ekhyo tssona, 17 woniatana khümphen meta motsünga jilo owo hoji lo yitssoe osi pvüti ochoang sana jiang khi oyi tssothuka. 18 Yitssoe jiangna mmhona yani zesi kyon jina ejüngona nlan oyam shakacho tssona, 19 nlan etssoe na ekhio ezüp ji ombo piv shikhfü. Hojito lyui ntena n mhom ji khi sichev. 20 Hojito tssona otsük akvüna hoji zoe onte kyuv osi ochina ha hojitüv nlan tssov mek. 2l Hojitüv yilan lojo khonzan ti-ejütava, jokheman ji eküm man eküm, omhyik man omhyik, oho man oho, okhe man okhe osi ojo man ojo to pia.
Ritsso Tsükona
1 "Ntena kvüthüng ritssolo khochia sana kurü osi zotoro mekana rasan nte lona kyungkao hunglea ti kyutava. OPVÜI nte Potsow ochona Ejip metae na nte sochecho sana jina nte ndüngo vamka. 2 Ntena ritsso n sakathüng pvüti tsükana chiro nte rasan jiang heto ezovka, 3 'Israel kyonden, engachitava! Nchüngo ntena ritsso lo yiaka. Nte ri jiang ti kyutakhe osi etho mmyima ekhenrhüka to ti tssotava. 4 OPVÜI nte Potsow na nte nzo yiala, osi ombona ekhyo nte pivka.' 5 "Jisülo jo tsüphoe jiangna kyon jiang heto ezovka, 'Shilo ochosana oki ethan tssoe vasi n thocheham vancho alo? Hotüv kyon jüna oki elani yia. To n tssov rali na ombo chücho jo kyon thanpoe na ombo ki ji nthochei siv. 6 Shilo ocho sana jününgro li joni vasi tssüngthi n lhohan tüv jücho alo? Hotüv jüna oki yithuka. To n tssov ralina ombo chücho jo kyon thanpoe na ombo tssüngthi jü ji yuv. 7 Shilo ochosana lojilongae vasi vancho jücho alo? To tssona, oki ombo yithuka. Rali na ombo chücho jo ombona engae vao eloe ji oyam na khiv.' 8 "Tsüphoe jiangna heto ha kyon jiang ezovka, 'Shilo ochosana nsüp-nrüp tüv jücho alo? To tssona, oki ombo yithuka. Ombona thanpoe jiang lüm etsson ji moniv.' 9 Tsüphoe jiangna hoto ezorathak na kholukro akvülo esopvüiden ethüngcheta. 10 Ntena yantsü halo woana, ovüngtssoa yantsü jilo kyon jiang ontebobo nte küpo rheyio yuta pitena. 11 Ontena pikhfü chonchi nte küpo rheyiana onte topvü nte eziiden kümi nte benkav. 12 Tokhatola yantsü jilo kyon jiangna nte küpo n rheyina rotav methaka tssona yantsü ji nte rasan na nkonyata. 13 Tosi OPVÜI nte Potsow na etho nte pia nte khyothukna jilo eboe vancho topvü lüngthae sitava. 14 Tokhatola elopvüi jiang, ngaro jiang osi ekümrümo tona yantsü jilo lio jiang tojo nte echi khikuka. Nte ri jiang echi topvü ntena tsütsakuka. OPVÜI na hojiang nte pithaka. 15 Hojito ntena vamo meta jilona ekoni yantsü jiang lo ntena hoto tssoyivka. 16 "Tokhatola OPVÜI nte Potsow na nte pia vamo meta jilo yantsü jiang phanchoana jilo vancho kyon topvü lüngthae sitava. 17 OPVÜI na nte ezo ji esüa kyon topvü: Hittite, Amorite, Kanaan kyon, Perizzite, Hivite tona Jebusite to topvü roe sitava. 18 Ontena onte Potsow jiang khümtao etssakthao elhilan jiang nte sokae OPVÜI mhadungo mmen nte n tssothuko tssoa rorüpi sitava. 19 "Ntena yantsü khyoe khivsana jilo, tssüngthi dung jiango sunga. ori tssotalea roe ti sitava. tssüngthi jiang tsotava osi odung jiango tani ti sitava. Odung jiango nte ri mek. 20 Odung thanpo jiango ntena tani ritsso yutalo jo pikhfü tssoa yantsü ji n khyothüng nandang tsütsakhoka.
Münghan N yancheo Jiang
1 "Ejyukaena OPVÜI nte Potsow na nte pia vamo meta jilo oli motsünga lo ochosana lüngthae licho hungna osi ochona lüngthacho sana ji nina n tsi na, 2 nte yitssoeden osi esopvüiden jiang na owo omüng lio jilona oyan kvülo enhyamo sana etsi zev. 3 Jitosi hojilo oyan enhyantso jilo evan jjiangna mangsüro oli ejom lo n tsütsahan tüv ethüngchev. 4 Ontena mangsüro ji süsi zhükhfüro kvüthüngha n nghao jitüv ndüngo osi oli ochina ha n johan tüv lona evüng ji jakiv. 5 Levi pvüti jiangna hojilo ha wov ntiotssole jenbukta yi topvülo ontena oyi tam. OPVÜI nte Potsow na ombo benkav osi ombo myingona nte mmhayithukvü onte ethüngchecho. 6 Jitosi omüng lio ji meta jilona oyan enhyantso jilo kyon jiangna mangsü ji poni na onte khe jiang ntsükvü 7 osi phyotav, 'Ena kyon ji n lüngtha, osi ochona lüngthacho sana ena n tsi. 8 OPVÜI nina Ejip metae na socheo Israel kyon jiang n lan siyia, ochona ntsa kyon shi lüngthacho sana ontena n tsika.' 9 Hojito OPVÜI na lümbüm na erüngo ji tssotava tona münghan ji nte ntam meka.
Eloe Morantsan Tsükona
10 "OPVÜI nte Potsow na ritssolo ekhyo nte piana osi ntena ritssolo na morantsan sosi yina, 11 ntena jiang yolona loroe opyon mmhom nte soa vanhungo tüv zechekhuka. 12 Tona ompvü sosi nte ki oyi otssan tssüyia, yenkyip jiang lümia, 13 osi ompvü sü jiang dungphiyia. Ompvü na nte ki vani choroa tsükona ompvü pvüpoe jiang tsükona nungravka; hoji sülo jo nina ompvü soa vankhuka. 14 Sülani jo nina ompvü n jübon na tssona vachi yithuka. Nina ompvü ji rikata ponilan tssotao ji tsükona, ompvü ji ezii esüa n tsütsache osi ompvü n yenche.
Tsokhfü Ji Tssentso
15 "Kyon tsükana eloe eni soa vani otsoe otsük eni vanle, tsokhfü ji ombona tata n jüpomo eloe jina vankhuka. 16 Tolea ombona otsoe jiang yolo eli jantayia na ombo nzamo eloe jina buko ji nzan lona otsoe thanpoe ji elan ji n yesoyiche. 17 Ombo nzantso eloe ji tsoe meklea tsokhfü jijo ejan eni piv lia. Kyon na ombo tsoe ovüngo ji chekav na lia osi shikhfü ephan ombo ejan lio ji piv shikhfü.
Otsoe Jancho N zoe Tsükona
18 Kyon tsükana otsoe n thacheo tüv vankhuka, ombo ji ezüp pia püngnolea jancho n zoe vankhuka. 19 Tona ombo pvüpoe jiangna ombo sosi oyan jilo esopvüi jiang mhadungo owo ombo mangthuki oyi jantayiv. 20 Opvüpoe jiangna esopvüi jiang heto ezov, 'E tsoe shijo lüm ekhüng osi ena n püngnoche, ombo na orang elümoto eziala osi sukona kinoe tsüka.' 21 Tona yantsü jilo kyon jiangna olung na ombo ephyatsüngi chüthukvü. Hojitoli ntena hetüv shikhfü n mhon lona tsanchov. Ntio tssocho sana shi Israel otsük akvü na zoe kyuv.
Shikhfü Lantaro
22 "Kyon tsüka ji ombo n lan lona chüthuki donkachi sina, 23 Hojilo zümoa yipchoa ti lithuka. Omüng ji hoji nchuk jyuthei siv shikhfü, ntiotssole echümüng donkachi lio ji yakchia Potsow na meta ji rhiyikatala. OPVÜI nte Potsow na nte pio meta ji n menthukvü tsükona omüng ji khi shothei sia.
1 Nina Israel thanpoe mangsü mekana olyu tsanmona hungna yingto vani tisia; rhümae OPVÜI ji thüngi sosi yia. 2 Tokhatola OPVÜI ji ekoni evan tssona osi OPVÜI n thümchena ni thüngi sosi oyi vanthuka. OPVÜI jina yana rona ombo pia. 3 Nina gadhoro hunglea, osü khyolea mekana thanpo tsütsaelan Isreal kyon na monlea hojito tssovka. 4 "Israel kyon na ochosana gadho mekana mangsü ekhünga hungna to tisia; owo ekümrümo ji sükata. 5 "Eloe na eboe mpensü ekav meka, eboe na ha eloe mpensü ekav meka; OPVÜI na hotüv elhi tssakala. 6 "Ntena oyaki tssolea, likoe tssolea oroshüp hungathüng opvü jina ejü mekana oro lea shüpa van na opvü ji khiyiv meka. 7 Ntena woro jiang khikuka tokhatola opvü jijo vachiv shikhfü tona ni harishia mmhona vamvüka. 8 "Ntena oki tssoana mhonki tssa füchüma eraklanchi epikatava. To tssona ochosana ni mhonki na elungi chülea ni pono mek. 9 "Oli motsüngalo jününgrothi tona thanpo to yingtsüv meka, to tssocho jo benro kvüwoe ha ntena tsochev meka. 10 Oli jom tsükona gadho tona mangsübung to ti shentsüa. 11 Tssansü tona sünyipvü to khümtsüi ti mpena. 12 "Nte sü nken mezhü jianglo süchüm vükae ungjoe hantava.
Ntsanthoa Evam
13 Eboe tsüka na eloe soa vansi ombo n chokav sikhuka. 14 Ompvü ji yanpiyanthan n tssothüng lonsülonphyo lia to orapvüna hungka renkakhuka. 15 "Hoto tssona eloe ji pvüpoe jiangna yanpithan sü mmen ji khi owo oyan jilo yitssoe jiang ejüa onte tsolo ji ntsanrük phyoyiv. 16 Opo jina heto phyov, 'Ana a tsolov ji shi thüngi yanpithukle, ombona yanpithan ntsanrük n lito ntana n jüpomvü sithaka. 17 Tokhatola a tsolov ji ntsanrük ejüv tsükona yanpithan sü shilo ejen evükao shi hansi oro nte zethukala!' 18 Tona oyan jilo esopvüi jiangna orapvü ji süyae tav. 19 Ontena orapvü ji echa janti rang nzoa khi eloe jiang pvüpoe jiang piv, ntiotssole eboe jina Israel eloeroro tsüka omying mme nio ji tsükona. Osi elani ompvüna orapvü ndüngo tsoeni tssoa vamvü, osi ombo eküm evanthüng jo ompvü n sichiche. 20 "Tokhatola otsotso eloe ji ntsanrük n licho tssona, 21 esopvüiden jiangna ompvü pvüpoe jiang kipüngina ompvü süchuki oyan kyon topvüna olong khi ephyatsüngi ompvü siv. Ompvüna opvüpoe ki n yanpiv vanathüng lonsülonphyoe khi ete jipo mying mmenthuka yikra nduktacho. Hojito lyui ntena n mhom hetüv shiang nkachovka. 22 "Eboe ochona oyam eloe thü ngi nlan lia rhümata sana woniata chüthuki sivka. Hojito lyui n mhom hetüv shiang nkachotava. 23 "Yantsüi na eboe ochona sana loroe oyam na engae vacho tüv thüngi nlan tssoathüng rhümakhuka. 24 Tona ntena woniata yantssae sosi chiwo ephyatsüngi sivka. Eloeroro jijo yantsüi kyon khosha yolo khatola ompvüna nzanchile to n romo jina chüthukvü. Eboe jijo oyam na engae vacho eloe worhyuo ji ntana chüthukvü. Hojitolyui ntena n mhom hetüv lona nkachotava. 25 "Eboe tsükana oyam na engae vacho eloe yantssae na retso-rama tssona eboe ji tae chüthukvü; 26 ntiotssole eloe jijo echüo tüv nlan ntia n tsso. Eboe tsükana thanpoe thama na lüngthatathüng ha hojito thungoena oyi tssoyiv; 27 Eboe jina eloe ji yanjoe na retso-ramao ji tsükona ompvüna eron lea oyam na zoe n zanchicheo tüv tsso ji tsükona. 28 "Eboe tsükana oyam na n ngahan loroe tüv thüngi retso-rama tssokuka. 29 To tssona ombona loroe man ji janti rang tinyan khi eloe ji opo losi oni vantae sithuka, ntiotssole ombona ompvü rikata nlan tsso ji tsükona. Ombo n chüthüng jo ompvü n sichiche. 30 "Eboe ochina ha opo eloe jiang ochi thüngi ha ori elhi tssoe opo yikrathukvü meka.
OPVÃœI Kyonden Yolona Phani Esiv
1 "Eboe ocho otsüng ji yesoe sithakcho mekana echiehan ji rhae sithakcho sana jiang jo OPVÜI kyon jiang yolo khanhyav meka. 2 "Kyon ocho efürama lona bukcho sana osi hojitüv tsoronichen jiang echungren taro süi tsoeoro jiang lea OPVÜI kyon yolo khanhyav meka. 3 "Ammonite mekana Moabitejiango ochia echungren taro tsochen lea OPVÜI kyon yolo khanhyav meka. 4 Ntena Ejip metae na chiyiathüng ojü osi etsoyu nte n picho, osi ontena Mesopotamia lo Pethor yantsü jilo Beor tsoe Balaam ji engochoe nte rhiyikathukcho. 5 Tokhatola OPVÜI nte Potsow na Balaam yi n ngacho; ji thüngina jo ombona nte nzamo ji tsükona rhiyi ji mmha kümthuki sicho. 6 Ntena jiponchüngi evanthüng nandang jo jipotsük shiang nti lanka lona ha ti nzanchitava mekana onte ji mmhom ti kümthuktava. 7 "Edom kyon jiango ti tssaktava, onteno nte opanden ka. Ejip kyon jiang ha ti tssaktava, yuta motsünga lojo ntena onte ndüngo vansi yicho. 8 Onte tsoronichen jiangha echungren ethümoto lona benkae OPVÜI kyon yolo khanhyakuka.
Rasan Vanphen Ji Ntssüngrüng
9 "Ritsso yutalo ntena rasan kyingi vanathüng jo olan taro lona ntebobo ntssüngcheta vantava. 10 Eboe ochona sana hojilo yipathüng phola yipjüngchina nchenphen ji pikhfü na pomoe chiwo vanthuka. 11 mmyulani jo ombona tsükae sisi engrhecho süiti nchenpheni rheyikhuka. 12 "Ntena esanchochiv ethev liathüng echi nte nchenphen na pomoe ranki tssoe vatava. 13 Ntena sanphiathüng jo jarung sütava, ntiotssole obuk yesoe nyalo ona jarung jina jyui shozhüi sia. 14 Nte nchenphen jiang olan topvü lona nthoa vanthuktava, ntiotssole OPVÜI nte Potsow na nte vanrhyui nte nkoa nte ri jiang nte khyothukala. Ntena ntia n mhon tssoe OPVÜI ji nte thüngina yi ti sithuka.
Shikhfülantaro Jiang
15 "Ezii tsükana ombo pvüi ji thüngina tsani oyi ni tsankana, ombo ti yilanthuka. 16 Ombona nte yantsü ntinsalo vankhuka tolea ntena ombo ntssonshia ti vanthuka. 17 "Israel ochina ha eboe lea eloe lea, khümpheni lonsülonphye kümvü meka. 18 Elani hotüv elhi lona orang mmyocho jiang khi echümchak than piv meka. OPVÜI na khümpheni lonsülonphyo elhi ji tssakala. 19 "Ntena Israel thanpo jiang thüngi orang osi tsütsaelan noa tssona eran ti khiyina notava. 20 Ntena lankon thüngi no jiang lojo eran khiyikuka. Tokhatola Israel kyon thüngi eno pio jiang jo eran ti khitava. Yizüng shiang benphitava tona OPVÜI nte Potsow na nte pio meta jilo evanthüng jo ntena ntio tssoana topvülo nte mmhayivka. 21 "Ntena OPVÜI nte Potsow thüngi phyochak vao jiang ntia n penthukvü ti sitava; OPVÜI na nte echümchak jiang nte vayia vamvü osi hojiang n penthuko jijo mmen. 22 OPVÜI thüngi echümchak n vao jilojo mmen n jü, 23 tokhatola ntena lüm erüng lona echümchak vata tssona hojijo benthuka. 24 "Ntena oyam jününgrothili yakchiathüng nte tsohung na nte choka nandang tsokhuka, tokhatola hoji thephen lo lhothei hansi ti yia. 25 Ntena oyam tsonghanro li yakchiathüng nte tsohungna nte khena rakchoe tsokhuka, tokhatola lepukro najo ti tsona.
Sichita Tona Yanpiyanthan Tssolam to Yilan
1 "Ejyukaena eboe tsüka na eloe soa vanle sülami jo eloe jilo ombo n chokao ntiosana zechei ombo n mathav sikoka. To tssona ombona sichita kako erani ompvü pia ombo kina ompvü yithokcho. 2 Tole ompvüna eboe thanpoe thüngi yanpilanle, 3 hoji eboe jina ha ompvü n chokav sichi kako jiang erani ompvü pia yithukuka. Mekana ompvü orapvü enioto ji chükhuka. 4 Heto tssocho sülo jo eboe ehemo jina ompvü soa n vanlanche," tolea ombona n thono thüngoe ompvü tsswothukvü. Ombona ompvü soa vanlancho jo OPVÜI nshüthukala. OPVÜI nte Potsow na nte pia vamo meta jilona jo hetüy ekhentao mmen ti tssotava.
Shikhfü lantaro Jiang
5 "Yanpiyanthan tssopamo eboe ji rasan elhi mekana nzontsü elhilo ti thechia, ombona oki vani eloe ji emathathuku tsükona nzyua esan pia. 6 "Ntena oyam epvü noathüng nkoho tssen tsükona ombo tsünghanro enhyikphen long ji ti khiyia. To tssocho jo wopan eküm saya etsoyu nsüngrüphen ji khiyiala. 7 "Israel ochona Israel thanpo rhümae ezii tssoa eküma sana mekana ezii tssov yeni sia sana ombo chüthuka. Hojitüv nlan jo hojitoli nkachotava. 8 "Nte ji ratsü-eno na nte kana Levi pvüti jiangna nte ezoji ephan tssotava; ana onte pio lanso jiang ephan tssotava. 9 Ntena Ejip lona chiyiathüng OPVÜI nte Potsow na Miriam thüngi tssoji nchümchetava. 10 "Nina ochosana ntiona noa tssona nkoho tssen ombo phokthesü ji khilo oki ti woa, 11 nina haphoe na nhyaka vansi ombo khi hansi oro ni pithuka. 12 Ombo ji yantsae tssona zümo yipchoa ti vayia; 13 mmyua akvü ombo pilana zümothüng mpensi yipthuka. Tona ombona montsso ni pio jina OPVÜI nte Potsow na ni emathayiv. 14 "Yantsae ezüpa evan osi mmyotsoe jiang ti-ejiphia, omboji Israel kyon tssolea, lankon nte yantsüi vana vancho tüv tssolea. 15 Engakvü eng n rhethüng hoji tsüngon jokheman ji ombo pia. Ombona orang ji ethev lia zinhyae vathako jina. Nina ombo jokheman ji picho jo ombona kyao ji OPVÜI na zoana ni nlan mmen tssov. 16 "Ngaro jiangna mmen tssocho tsükona opvüpoe jiang ti chüthuka; opvüpoe na mmen tssocho man ha ngaro jiang ti chüthuka. Otsük akvü ombo mbona mmen tsso ji tsükona tae chüthuka. 17 "Opvüpoe nvan jiang osi lankon jiang ji onte elan jiang ti monia; osi emi ji mpensü khi eno nkoha tssen ti tssothuka. 18 Nteno Ejip metae eziiden vancho OPVÜI nte Potsow na nte sochecho toji ti mhechotava, hoji tsükona ana yizüng shi nte pithaka. 19 "Ntena oli riathüng otssuk omüm ejoma n hanrav sina hojiang khilo ti wolana; hojiang jo tsanthan, opvüpoe nvan, emi to jiang echi tssothuki OPVÜI nte Potsow na emathata nte elhi lan taro lo nte mmhayithuka. 20 Ntena olive yenjoa lhothaka na elani enhyo jijo ti lholantava; enhyo jiang jo tsanthan, opvüpoe nvan osi emi jiang echi tssothuka. 2i Ntena nte jününgrothi jiang yenjoa lhothakana jününgrozhü jiang lona lholo ti olantava; enhyowo jününgrothi jiango tsanthan osi opvüpoe n van tona, emi to jiang ejan tssovka. 22 Nteno Ejip metae jo eziiden tssota vanchoto ti mhechotava. Hoji tsükona ana yizüng shiang nte piala.
1 "Ejyukaena Israel otsük eni yitssolo yitssopheni wotacho, tole tsüka jo noying kyon to yanchesi tsüka jo nlan lia to yanche kuka. 2 Nlan elio kyon ji erhüpvü methaka tssona yitssoe jina omboji nkhümo yipthüki erhüpvü. Rüpüm kvüta erhüpvü sana jo ombo nlan ji ephan tssov. 3 Omboji rüpüm zhüro mandang erhüpkuka osi jilo kyongkata na ombo ji nzontsü pono na yikrathukcho tssoala. 4 "Ntena tssibung ji oli tsenthukathüng ombo emen ji ti mmania.
Ojenio Chüthako Ji Tsükona Elhi Tssoyiv
5 "Jeni otsük eni tssentso motsünga tssole tsüka ji tsokhying n vam chüna ombo emi opanpoe jo yanpithukvü meka; echüo ji ojenio jina ompvü soa vamvü shikhfü. 6 Osi oni lona tsokhying vandemo jijo echüo ji tsokhying ejanthuki echüo ji wopan motsü ji Israel jipo yolo lia vanthukvüka. 7 Tokhatola echüo ji eloe ji ojenio jina soa n vanhungna ompvüna oyan jilo ephyo-esan jiang mhadungo owo phyov, 'A rapvü ojenio jina ombo ojenio echüo ji motsü ji Israel yolo lia n vanthuk hungla.' 8 Tona oyan jilo esopvüi jiangna ombo ji tsae thyutav, 9 To tssoa ha ombona emi ji soa n van to ekhirana tssona esopvüi jiang mhadungo na jokhüp motsünga phongisi ombo mhalo nchukayisi phyov, 'Kyon ochona ombo jenio ji tssentso tssoyiv ekhia sana kyomo jijo heto tssovka.' 10 Ombo wopan jijo 'jokhüp phongio kyon ji wopan to Israel jiang yolo phyota wovka.'
Yizüng Thanpo Ejoma
11 "Eboe otsük eni khontale tsüka ji eloe jina orapvü kyoa lato eboe thanpoe ji nzhü-ngophen jilona tümi süna, 12 ompvü nzana ti nchüm na okhe ji epania. 13-14 "Ntena efü-seri tsütsatathüng oyam ti-ejiphia. 15 OPVÜI nte Potsow na nte pio meta jilo harishia evamo tssoa efü-seri ntsanrüka benphitava. 16 Oymn ejiphi jiango OPVÜI na tssakala.
Amalekite Jiang Chüthukvü Yizüng Ji
17 "Ntena Ejip metae na yiathüng Amelekite jiangna nte thüngi tssoji ti mhechotava. i§ Ontena Potsow ekyu n tsi, hoji tsükona nte ryusang mmokathüng ontena sülami na nte hatacho osi sülani etssoe jiang lüngtharacho. 19 Hoji tsükona OPVÃœI nte Potsao na meta ji nte pithoksi hojilo evamo ori jiang thüngina tsanchoe noyinga nte vanthuko jina Amalekite jiang lüngtharae sisi ochina ha onte n chümchev sithuka. Ntena hoji elhi etssov ji ti mhechotava!
Liri Than Jiang
1 "OPVÜI nte Potsow na nte pia vamo meta jilo rheyi vanjüngthaka na, 2 nte otsük akvüna tsüngthi lhochodemo ji luksalo thei bensi khümphen meta motsünga jilo wovka. 3 Hoji lo elhi jamo pvüti ji thüngi owo ezoa, 'OPVÜI na a pyimtsümotsüi thüngi epiv phyochako meta jilo ana rheyithaka to ana ehungpvüi tssoala.' 4 "Tona pvüti jina luksa ji khi OPVÜI nte Potsow thüngi thanphen jilo hansi wovka. 5 Tosi OPVÜI vanrhyu lona nina heto phyovka: 'A motsüi jo Aramean yentsae, oson-oki n liv tsanthan tssoa ombo wopan sosi Ejip metae vanwo yicho. Ontena hoji yiathüng jo onte wozanro khatola jilona otsson osi etho eli jipo kümcho. 6 Ejip kyon jiangna e khangshia eziiden esüa elhi ekhungu khüngkata e tssothukcho. 7 Tole ena e kyochile to kyata e motsüi Potsow thüngi chontacho. Tole ombona e ezüp osi enungrathav sükhying ji e ntsiyicho osi e randan e ngayicho. 8 Ombo ethojo tsüphov ji khi ombona Ejip kyon jiang khe lona e shanchocho. Ombona chethemothev elhi tssocho. 9 Ombona shilo e sosi oyi lizü meta shi e picho. 10 Hoji tsükona ana OPVÜI mhadungo ombona a pio liri ovüngo ji lona ovüngo ji khichei hansi OPVÜI thüngi roala.' "Hoji to OPVÜI vanrhyu jilo luksa ji vachochi ombo khümvüka. 11 OPVÜI nte Potsow na ni wopan lo ntio nte pithakcho sana ji khi OPVÜI thünga; osi Levite tona amoatssi kyon nte yolo vamo jiang toha tukhu jilo thethuka. 12 "Nzyu ethüm thümo nte chonchorücho tarochia ji Levite, amoatssiden, opvüpoe n van jiang, osi emi jiang pia, tona okho akvü lona onte etsoyu jiang hunguka. Ntena hojito tssothaka na, 13 heto OPVÜI ezoa, 'Ntho tarochia jiang kvüwoe ha a ki valanchi n li, ana tarochia ji Levite, , amoatssi, opvüpoe n van osi emi jiang ni yizüng ephan pithaka. Tarochia tsükona ni yizüng jiang ana n mhecho osi n ngav n si. 14 Ana a nungra yutalo hoji tsoe n sihan; ana a n thono yutalo ana hoji a kina n khichuk; elani echüi than tssoa ana hoji n tsütsa. Ana ni yi engathaka OPVÜI. Ana tarochia shikhfü nina a pio jiang benphirathaka. 15 Ni ntho vanpheni na zechochia Israel jiang mmhayia, elani nina e motsüi thüngi phyochaki vayio ji esüa e pithako meta lizü eli meta shiha mmhayia.'
OPVÃœI Kyon Jiang
16 "Nchüng OPVÜI nte Potsow na ombo yizüng jiang topvü engatale to nte ezoala, hoji tsükona nte lümbüm topvü na ombo yi engatava. 17 Nchüng ntena OPVÜI ji nte Potsow to khichothaka; ntena ombo yi engav phyochakthaka, ombo yizüng topvü benphiv toha phyochakthaka. 18 OPVÜI na phyochako ji esüa nchüng nte ji ombo kyonden to nte khichothaka, osi ombona ombo yi topvü engatale to nte ezothaka. 19 Ombona lyuyingcho jipo topvü yolo jipo tsü photsowo ji nte kümthukvü, osi ntena ombo mying thüngu osi phfiits son lithukvü. Ombona phyo chako ji esüa nteno ombo kyonden tssov."
Potsow Yizüng Olong Lo Erancho
1 Jisülo jo Moses tona Israel esopvüiden to tssoe kyon jiang ezotacho, "Ana nchüng püngnoyi nte pio shiang topvü engatava. 2 Ntena tsüngon kvülo Jordan zhükhfü yakchia OPVÜI Potsow na nte pia vamo meta jilo rheyia sana hoji tsüngono olong tsüphov tara khi süporo na eyukra 3 hojiang poni püngnoyi shiang erankatava. Nte pyimtsümotsüi Potsow OPVÜI jina eli meta osi lizü meta nte pio jilo rheyithaka na, 4 osi Jordan pankawoe vanta na olong shiang ana nchüng nte ezoa esüa süporo na eyuki Ebal phunglani chümkachitava. 5 Yonjak ebensü na n tsyuka hamo long tüv khi thanphensa rontava, 6 ntio tssole ntena OPVÜI thanphen kvü lo nsüngrüa sana topvü olong n vanrohan omh khi nsüngrüvka. Hojiang poni erungthan jiang topvü thamka, 7 ntena hojiang poni khümshümta than jiang thamka osi hojiang tsota OPVÜI nte Potsow vanrhyu lona montsso pitavka. 8 Süporo na eyuko long jiang poni Potsow yizüng jiang yitsüng akvü ntssüng-rünga erankavka." 9 Jisülo jo Moses tona Levi pvüti jiang to nzo tssoe Israel kyon jiang topvü heto ezovka, "Israel kyonden ntena eno ndungi engatava, nchüng tsüngon lona benkae nte ji Potsow kyonden nte kümthaka; 10 hoji tsükona ana nchüng nte pio yizüng shiang engatava."
Jancho N zoji Rhiyirandanka
11 Jisülo jo Moses na Israel kyon jiang ezocho, 12 "Ntena Jordan pankae rheyi mmha nte randankata na pvüji shiangna Gerizim phunglani manguka: Simeon, Levi, Juda, Issakhar, Joseph tona Benjamin to. 13 Elani rhiyika yuta jilo jo pvüji shiangna Ebal phunglani manguka: Reuben, Gad, Asher, Zebulun, Dan tona Naphtali to. 14 Levite shiangna yilan shiang tüngkachia phyovka: 15 " 'Kyon ochona olong, otssüng osi yonjak na kisü nsüngrüi mphoa hotüv khüma sana Potsow na rhiyikatala; ntiotssole kisü ekhüm jo OPVÜI na tssakala.' "Hojithüng kyon topvü na, 'Amen!' to janlamka. 16 " 'Kyon ochona ombo opo osi oyo n kha-nyikra sana hoji pono Potsow na rhiyi randankatala.' "Osi hojithüng kyon topvüna, 'Amen!' to janlamka. 17 " 'Kyon ochona ombo phinakiren erü-ekük sephia sana hoji pono Potsow na rhiyikatala.' "Hojithüng kyon topvü na, 'Amen!' to janlamka. 18 " 'Kyon ochona mhyikjüng ji olan sulyuoe soa sana hoji pono Potsow na rhiyikatala.' "Hojithüng kyon topvü na, 'Amen!' to janlamka. 19 " 'Kyon ochona lankon lansi, opvüpoe n van osi emi-nloe jiang elan jiang khi siyia sana ji pono Potsow na rhiyikatala.' "Hojithüng kyon topvü na, 'Amen!' to janlam. 20 " 'Kyon ochona opo engh jiang thüngi rama tssoe opo yikrathuka na ji pono Potsow na rhiyikatala.' "Hojithüng kyon topvü na, 'Amen!' to janlam. 21 " 'Ochona ekümrümo thüngi rama tssoa sana ji pono Potsow na rhiyikatala.' "Hojithüng kyon topvüna, 'Amen!' to janlam. 22 " 'Kyon ochona oyuloe ndüng thüngi osi oyuloe thanpoe thüngi rama tssoa sana hoji Potsow na rhiyikatala.' "Hojithüng kyon topvüna, 'Amen!' to janlam. 23 " 'Kyon ochona ombo engh ji oyo thüngi rama tssoa sana hoji Potsow na rhiyikatala.' "Hojithüng kyon topvü na, 'Amen!' to janlam. 24" 'Kyon ochona mphoena omünghana sana hoji pono Potsow na rhiyikatala.' "Hojithüng kyon topvü na, 'Amen!' to janlam. 25 " 'Kyon ochona noying kyon lüngtha man mphoa orang khia sana hoji pono Potsow na rhiyikatala.' "Hojithüng kyon topvü na, 'Amen!' to janlam. 26 " 'Kyon ochona Potsow yizüng osi püngno jiang topvü n nga sana hoji pono Potsow na rhiyikatala." "Hojithüng kyon topvü na, 'Amen!' to janlam.
Jancho Zoji Man Mmha
1 "Ntena OPVÜI nte Potsow yi enga ana ombo yizüng kvüta nchüng nte pia sana jiang enga tssona ombona limhalo jipo topvü pono tsüphokao nte kümthukvü. 2 "OPVÜI nte Potsow yi enga tona mmha shiang hetopvü nte echi tssovka. 3 "OPVÜI na nte yan jiang osi nte li jiang mmhayithukvü ka. 4 "OPVÜI na otsoeoro elümoto nte mmhayiv, osi joncho-rücho elümoto nte mmhyiv, elani olyu mangsü ha nte mmhayiv. 5 "OPVÜI na nte tsünghanro li jiang osi hojiang lona etsoyu methako jiang nte mmhayivka. 6 OPVÜI na nte elhicho topvülo mmha nte theyivka. 7 "Nte ri jiangna nte hayatathüng OPVÜI na nte ri jiang khyothechiv. Ontena lankvüa lona nte hav, tokhatola lankvü akvü lona ntena tsanravka. 8 "OPVÜI nte Potsow na nte elhi jianglo nte mmhayivka osi nte son jiang otssuk na hanpyingthukvüka. Ombona nte pia vamo meta jilona nte mmhayivka. 9 "Ntena OPVÜI nte Potsow yi engatana osi ombo yizüng jiang topvü ephan tssota tssona, ombona phyo ji esüa ombo kyonden nte kümthukvü. 10 To tssona limhalo kyon topvüna ombona nte ethüngchei ombo kyon nte tssothukala to chethev osi ontena nte kyuv. 11 OPVÜI nte Potsow na nte pyimtsümotsüi jiang piv phyochako meta jilona otsoeoro, tssiden, osi otssuk omüm elümoto nte mmhayivka. 12 Ombona potsüwoe ombo ejüeli ki jilona eryu jothuki nte elhi jianglo nte mmhayi khi nte khi jipopoe jiang norü-ronthuksi ntena jo onte thüngi enowo tüv liv meka. 13 OPVÜI nte Potsow na nte ji oyam phankaeden mekna esopvüiden nte kümthukvüka; osi ana nchüng ombo yizüng nte pia vamo shiang ntena enga tssona nteno olan tarolo mmha tssovka osi ebüp liv meka. 14 Hojiang yolo kvüwoe ha n ngav ti sitava osi thanpo Potsow benkata ti khümtava.
Jancho N zo Man
15 "Tokhatola ana nchüng ombo yizüng nte pio shiang ntena nnga tssona sükhying n mhom jiang nte jamvüka. 16 "OPVÜI na nte yan osi oli jiang rhiyikavka. 17 "OPVÜI na nte tsünghanro li jiang rhiyikavka osi jiang lona ntena etsoyu nsüngrüo jianglo nte rhiyikayiv. 18 "OPVÜI na etssorandankae otsoe oro tara tae nte mmhayiv, joncho rücho matarwothukvü osi mangsü jiang mataroa nte mmhayithukvü. 19 "Ntena okhe thecho topvü OPVÜI na rhiyikav. 20 "Ntena n mhom tssoe OPVÜI khaksia na OPVÜI na nte ji zakto n monthukthüng jo ntena tsso jiang topvülo tssorophyoro, hamahatük osi ezüp rhükav. 21 Ombona nochonori motsünga sülo motsünga to rheyithuki ntena rheyivsa vamo meta jilo ochia enhyokae rheyiv mek. 22 OPVÜI na katao nochonori rheyithuki ehüm osi era nte kathukvü. Ombona eng azüm osi ezhü etssov rothuki nte benro jiang roe nte siyiv. Epüp shiang ji nte eküm evanthüng jo lia vam. 23 Nti eryu ha jov meka osi liko pon ji yonjak to karaki siv. 24 Eryu ejov thung khorü erita tona hajang even to nte n chüthüng nandang vem. 25 "OPVÜI na nte ri jiang nte pono ekhyo piv. Ntena lankvüa lona onte hav, tokhatola ntena lankvü elümoto lona onte thüngina tsam, hojitoli ntena ntio ezüp ndukcho sana hojina limhatsü ekhentsüngu. 26 Nte chüana orae ekümrümo na nte müng ji tsov, osi ochina ha onte ephamo tüv n van. 27 OPVÜI na Ejip kyon jiang pono vela rothuko ji esüa nte pono ha rwothukvü. Ombona nte tsük jiang emho taena pyingthukvü. Nthük nrük na nte pyingu osi epov lanka liv mek. 28 OPVÜI na nte lümbüm monthukvü. Ombona mhyikjuk tona ochyuta to rothuku. 29 Engo lea ntena mhyikjung esüa ephophitav osi ntena nte lan ji ephochev mek. Ntena ntio elhia na mmhom elhichev mek. Yuta topvülo nte khangshia nte kyakthachiv, osi nte retsoyiv, tolea ochina ha nte nzam mek. 30 Ntena loroe engae valea kyonpoe na soa vam. Ntena oki tssov khatola jilo vanphyav mek. Ntena jününgrothi li jom khatola ntena tsophyav mek. 31 Nte ehungona nte mangsü jiangna tsanrov tolea hojiang so ntena tsophyav mek. Ntena zeta vana nte gadho jiang süsi yiv osi nte pilam mek. Nte olyu jiang nte ri jiang piv, khatola nte nzanchi ochia vam meka. 32 Ntena zeta vana nte tsokhying tsolo jiang sosi eziiden esüa amoatssi jiang thüngi piv. Engakvü nte mhyikna noa zechia eyilov khatola nte tsoeden jiang elani yiv meka. 33 Ntena esang mmoka joni vao benro jiang jipopoe na lhoe tsov osi nteno n tümjak na khangshi ezüp ji yaka ntia nte ejan liv meka. 34 Nte ezüp yakchia nchümri moni siv. 35 OPVÜI na nte jo jianglo enov osi emho n powo tüv khi pyingthukvü osi vela na ojoe na kvüri nandang nte eyukvü. 36 "OPVÜI na nte osi nte mesao jiang metapoe sosi yithukvü, ntena osi nte motsüi na n van hamo tüv metae. Hoji meta jilona ntena tssüng olong potsow benkatav. 37 OPVÜI na nte phanchio jilo evan jiangna nte sükhying ji zesi ngangtsünga ekhem, osi ontena nte yikvü emakav. 38 "Ntena khosha yinglea tara tae richov, ntiotssole khomung na nte li jiang tsoe siv. 39 Ntena jününgro chümi jonchev khatola orana wozhü jiang tsochi sisi ntena tssüngthi lhophyav mek osi tssüngthijü ha n yurhak. 40 Olive na nte li jianglo zav khatola ethi jiang vükhani siv osi ntena tsophyav mek. 41 Ntena tsokhying tsolo vam khatola nte ndüngo vam mek, ntiotssole oyam na morantsan tssoa evüngki sosi yirav. 42 Nte tssüng odung osi oyo-ohan topvü orana tsoe siv. 43 "Nte metalo jipopoe vamo jiangna etho khyongkata yisi nteno etho mona yiv. 44 Ontena orang nte nov khatola ntena jo onte enov ntia liv mek. Okhao tssoa ontena nte esapvüi kümvü. 45 "Epüp nungra shiang hetopvü nte pono rov osi nte n chürathüng jo liv, ntiotssole ntena OPVÜI nte Potsow yi n ngacho osi ombona yizüng nte pio jiang ntena n benphicho. 46 Hojiang jo nte pono osi nte tsoronichen pono Potsow yitsso nchünkhon chethephen ji. 47 OPVÜI na olan tarolo nte mmhayithukcho, khatola ntena lümbümi na longshyua ombo n penkao ji tsükona hojito tssocho. 48 Hoji tsükona OPVÜI na nte thüngi rothuko ori jiang ntena benkavka. Nteji wonton era, mpensü hungi n kav olan topvü lona nte n pentav siv. Nte n monrathüng jo OPVÜI na elümoto nte khangriv. 49 OPVÜI na limha chümina jipopoe sosi oyi nte rokathukvü, ntena oyi n tsio jipo jipopoeden. Ontena mungshitsü esüa nte pono eyukav. 50 Ontena ngaro eran ochi thüngi ha khonzan ejüv mek tolea tssolüp phyolüm kyonden tssov. 5i Ontena nte ekümrümo osi oli jiang tsov osi nteno khangtsüngi nte chüv. Ontena nte tsünghanro, tssüngthijü, olive thyujü, mangsü osi olyu ntia enhyoe nte vayiv mek, osi nte chürav. 52 OPVÜI na nte pia vamo meta jilo yantsü topvü ontena hae khyov, osi ntena longtsükata evamo pikhfü jiang topvü eyarae siv. 53 "Nte ri jiangna nte yan jiang hata na nteno tssikhang hakhang ekhenthao ji yakchia nte ngaro OPVÜI na nte pio jiang ntena tsotav. 54-55 Nte yolo elümoto tssochyu mochyui kyon jina mpato etsoyu ntsen yakchia ombo ngaro jiang tsov. Ombona ojenio tssolea, ombo nzamo engh ji osi ngaro enhyoe vamo jiang tia n pina tsov. 56-57 Nte yolo elümoto tssochyu mochyui eloe jina ovüngthüng jo ejüeli tsso jina olan tia n tsav rocho khatola jina ha hojito etssophyoa yiv. ori jiangna ompvü yan jiang hayatana tssikhang hangkhang lona ompvü ngaro vanpamo ji mphoena tsoe siv. Ompvüna ompvü nzamo orapvü osi ompvü ngaro jiang ochia n pina tsov. 58 "Potsow püngoyi shiang kako shilo erankao shiang ntena n benphi osi OPVÜI nte Potsow emhokthav mying ji n yikrachicho. 59 Ombona nte osi tsoronichen pono ekhenthao osi n powo nochonori rwothukvü. 60 Ntena vara ekhenthao Ejip metaena nduko jiang elani nte thüngi yithuklam, osi kvüthüng ha pov mek. 6i Ombona Potsow yizüng kako shilo n jücho vara osi nochonori ha rwothukvü osi nte monthukvü. 62 Nte ji oyaki shantio tata nte kümthuklea nte tara tae enhyokav, ntiotssole ntena nte OPVÜI Potsow yi n ngacho. 63 OPVÜI nte Potsow na kvüto nte thicherüchethukcho sana ji esüa ombona nte monthukvü osi nte yeswothukvü loha chokav ka. Ntena rheyivsa vamo meta jilona ombona monthuki nte sithukvü. 64 "OPVÜI na limha chümi na ochüm jana nzüroe nte siv, nte osi nte motsüi jiangna kvüthüngha n khümhancho potsow otssüng olong khümtav. 65 Ntena meta kvüloha noyinga vanchev mek osi nte meta ka to tsao tüv liv mek. OPVÜI na nkhenrak, eyilo n li, osi ekhen emhok na nte pyingthukvü. 66 Nte eküm jo yuta topvü lo ekyuetssina pyingu. Zümo eng ekyutssina nte pyingu osi echüv ekyuna nte pyingrhüv. 67 Ntena ntio hungana jiang nte kyua lümbüm thokthokvü. Enya akvü mmyu ji elaro yivo to nchümtav osi mmyu akvüto enya ji zakto yivo to nchümtav. 68 OPVÜI na orhungina Ejip metae nte yilanthukvü, ombona hoji nte n yilanthuk to phyocho khatola. Hojilo jo ntena nte ri jiang thüngi ezii esüa ntepopo nte yenhungu khatola ochinaha nte shiv mek."
Moab Metae na OPVÜI na Israel Thüngi Ntsata
1 OPVÜI na Moab meta lona Israel jiang thüngi Ntsata methaki Moses pia kyon jiang thüngi ezothoko ji heto; shiang jo OPVÜI na Sinai lona ntsatathako ji ephalo picho. 2 Moses na Israel kyon topvü tsarhyui ezocho; "OPVÜI na Ejip mesao thüngi, osi ombo tsüphoeden jiang thüngi elani ombo meta lo ntio tssoyicho sana ji nte topvüna hungthaka. 3 Ntena ekhenthao vara jiang, chethev elhi jiang, osi OPVÜI na emhokthav tüv tsso jiang hungrathaka. 4 Tokhatola ombona nchüng tsüngon jana hojiang nte n chethethuka han. 5 OPVÜI na nte soa ntena lijüngi nzyu zhüro yentsata ha nte jokhüp osi mpensü jiang n rocho. 6 Ntena hümri hungi n tso, jününg rojü ha hungi n yu, tokhatola OPVÜI na ombo nte Potsow ji, toji nte chethethuku nte ethelan eli-i topvü nte benriyicho. 7 Osi etena meta shilo chiyile Hebron mesao Sihon, Bashan mesao Og to onina chiro ete thüngi rotacho. Tokhatola etena khyocho, 8 osi onte meta ji khi Gad tona Reuben to pvüji chiso tona Manasseh pvüji na chiso to jantaecho. 9 Hoji tsükona ntena ntio tssoa sana topvü lo mmhonthoku tsükona ntsata shi longtsüka lia engae benphitava. 10 "Nchüngo nteno nte OPVÜI Potsow vanrhyulo phanthi vanante topvü, nte esopvüiden, 11 eloeden, ngaroden, osi tsanthan kvüta nte thüngi vani otssüng ojü nte tssoyia sana jiang topvü OPVÜI vanrhyu lo vara. 12 Nchüngo nteno topvüna OPVÜI ntsata jilo rheyi hojina rüngwo ji ephan evam ntsata lo rheyivsala. 13 To tssona OPVÜI na nchüng nteji ombo kyonden to nte ntsakae ombona nte Potsow kümvü. Hojijo ombona nte, nte pyimtsümotsüi, Abraham, Isaak, osi Jakob to thüngi ntsatao ji ephanina. 14 OPVÜI na ombo ntsata osi jilo elhi jüwo jiang ji nte thüngi tae ntsata mek, 15 Ombona ete shilo mangi evamo shiang hetopvü thüngi osi ete tsoronichen n bukhamo jiang to topvü thüngi nchüng ntsata shi methakala. 16 "Ntena Ejip metae vamo ji tona ntena meta yakchia yia vamo meta shilo yentsav tojo kvütüv sana ntena ejyuchethaka. 17 Ntena onte etssakthao kisü, otssüng, olong, osi shona janti na nsüngrüo jiang hungthaka. 18 Nchüng shilo zae evan-eboe eloe osi wopan osi pvüji kvüwoenaha OPVÜI sisi jipopoe potsow yana yiv meka. Hojito etssov jo tssüngyingna odung mozhüm n mhom ejüo ekho tüv chenkav sünga to tssovka. 19 Nchüng shilo zae evan ochinaha ombona OPVÜI yizüng mmhom shiang zosi ombona lümbüm khünga tsani yilea ombo sükhying mmhomka to nchüma evan ti-jüthoka. Hojito tssocho jo nte mmhom, n mhom topvü nte monkham. 20 OPVÜI na hojitüv kyon jo nlan siyiv meka. OPVÜI na ombo lüm etsuk omi to tsso ji ombo kikavka, osi yizüng kako shilo ekyuv erani elio shiang topvü ombo lo khyingthoki ombo monthokuka. 21 Hojitüv kyon jo OPVÜI na Israel topvü thüngi ejyukaphen esüa kümthoku, osi OPVÜI püngno kako shilo ntsata jüwo jianglo ekyuv jüwo jiang topvüna ombo khyingthokvü. 22 "OPVÜI na nte metalo rhiyika rothoko jiang nte tsoronichen vanpam osi ekoni jipopoe to jiang na hunguka. 23 Oli jiang ji lijüng kümi olong osi oma kholong na pyingi siv, osi ntia benrochev meka osi ero tia zav mek. Nte meta ji Sodom tona Gomorrah to esüa, Admah tona Zebulun to OPVÜI lüm etsuk ekyi yutalo moni sithokvü ji esüa tssovka. 24 To tssona limhatsü na phyotav, 'OPVÜI na ntiolyui onte meta ji heto tssoyichola? Ntio tsükona heto omi kia lüm tsukchola?' 25 Hoji janlan jo, 'Ontena onte pyimtsümotsüi Potsow OPVÜI ochona Ejip metae na onte sochuki onte thüngi ntsata methakcho sana ji yesoyio ji tsükona. 26 Ontena ovüngthüng n khümhancho potsow khümta yicho, hojiang ekhümvü jo OPVÜI na onte khancho. 27 Hoji tsükona OPVÜI na ombo kyon jiang thüngi lüm tsuki kako shilo jüwo vara shiang onte metalo rothukcho. 28 OPVÜI na emhokthav lüm tsuki, onteji onte metae na oyingi na süchoki oyam metae thechi nchüng jana onte vanthukala.' 29 "OPVÜI na mphoe evao tüv ntiosana jo lia; tokhatola ombo yizüng jiang jo entsithukthaka, osi ete tona ete tsoronichen to na nchüngkhon enga benphiv lia.
Mmhonlanthoku osi Mmhayiv lo Ethelan to
1 "Ana mmha tona rhyika to eni jilo ethüngi ekhiv nte pithaka. Shiang hetopvü tssoana osi OPVÜI nte Potsow na jipopoe yolo nzonroe nte vanthokwo jilo vana na ntena ana ethüngu nte pio jiang nchümchevka. 2 Nte osi nte tsoronichen na OPVÜI lo khophi oyi ana nchüng ntio yizüng nte pia sana jiang benphina, 3 tona OPVÜI nte Potsow na ntelo khonzan livka. Ombona jipopoe yolo nzithechi nte siwo jilona nte sochuklani nte mmhonlanthoku ka. 4 Nteji limha ehüm ekontso jiwoe mpato nte yithukcho tssolea OPVÜI nte Potsow na nte sochuklamka, 5 osi nte motsüi jiang na vanthako meta ji ntena hoe vanlamka. Osi ombona nte motsüi jiang na kvüthüngha n hunghamo tata ejüeli osi wokyong nte kümthoku ka. 6 OPVÜI nte Potsow na ntena lümbüm totona ombo nzamo tssoa osi meta jilo harishia evamo tssoa jancho ezo lümbüm nte theyivka. 7 Ombona rhiyika shiang topvü nte ri jiang kae sithoksi, 8 nteno ana nchüng yizüng nte pia vamo shiang enga nte benphithoku. 9 Ntena ntio tssoa sana topvülo OPVÜI na tssochyu mmhom nte piv; ntena otsoeoro elümoto vamvü osi tssiden elüm vamvü osi oli ronsyu rov. Ombona nte motsüi jiang mmhonithako ji esüa nte mmhonithoku, 10 tokhatola ntena ombo püngnoyi shikhfü niro erankao kako shilo jüwo jiang enga benphi nte lümbüm totona ombo piv lia. 11 "Ana nchüng nte pia vamo yizüng shiang jo elüm khüngcho mek; mekana ntena n tssochewo mek. 12 Hojiang ji oyak etssunga ntssonacho meka. Ntena, 'Ochona ehungo khi hansi joyi e engathoki etena hoji engao tssov la? to engao tüv liv meka.' 13 Mekana hoji jümang pankawoe licho mek. Küma ntena, 'Ochona jümang ji pankata chiwo khi hansi oyi engathoki etena hoji ephan tssovla? to engatao tüv liv meka.' 14 Meka, hojijo nte ndüngo lika. Ntena ntsia osi yizüng jiang ji enhüga lea phyocheta, hoji tsükona enga benphitava. 15 "Ana nchüng mmhom tona n mhom to ethüngu osi eküm tona echü to ethüngu nte pithaka. 16 Ntena ana nchüng OPVÜI yizüng nte pia vamo shiang enga tssona, ntena ombo nzana, oyi engayina osi ombo yizüng jiang benphina, nteji nte thicherüchev osi jipo tsüphov nte kümvü. Ntena rheyia vamo meta jilo na OPVÜI nte Potsow na nte mmhayivka. 17 Tokhatola ntena ombo yi n ngav osi ombo yi shiang n zoyina osi Potsow thanpo khümta yiana, 18 ana shilona nchüng nte ezoala n teji moni nte sithoku. Ntena rheyivsa vamo Jordan pankae meta jilo ntena sunga harishia vamvü meka. 19 Enhünga ana echü eküm tona mmha osi rhiyika tolo ethüngi ekhiv nte piala osi ana oyak tona liko to enhungpvüi tssothukala. Eküm ji ethüngi khitava. 20 OPVÜI nte Potsow nzan tava, osi ombo jancho zoa longtsükata vantava, to tssona ombona nte motsüiden Abraham, Isaak osi Jakob to epiv phyochako meta jilo nte osi nte tsoronichen na sunga harishia vamüka."
Joshua na Moses Echungala
1 Moses na Israel kyon jiang elani ezolancho, 2 "Enhungo aiyo nzyu nzoasi mekyu tssothaka osi nte esopvüi n tssokhokvü sithaka. Hojilo ekata OPVÜI na aiyo Jordan pankav meka to a ezothaka. 3 OPVÜI nte Potsow na nte mhadungi na owo meta jilo vamo jipopoe kyon jiang rorüpi siv; osi ntena meta ji khiv, osi OPVÜI phyochak ephanina nte esopvüi jo Joshua tssovka. 4 OPVÜI na kvüto Amorite mesaeden, Sihon ha Og oni khyoe onte metaji roe siyicho sana ji esüa kyon shiangha roe siv. 5 OPVÜI na onte pono ekhyo nte piv, osi ana kvüto nte ezocho sana ji ephan ntena onte tsütsavka. 6 Tümkae lüm tssontava. Ti kyutava, OPVÜI nte Potsow na nte nzo tssovka. Ombona nte n zev siv mek osi nte sinkiv meka." 7 Jisülojo Moses na Joshua tsae Israel topvü mhadungo na ezocho, "Mhankata osi lüm tssona, OPVÜI na onte motsüi phyochak pio meta jilo nina kyon shiang sochukchivka. 8 OPVÜI na olan ni sovka osi ni ndüngo tssovka. Ombona ni n zev siv meka, osi ni sinkiv meka, lümbüm titeria osi ti-kyua."
Yizüng ji Nzyu Tiying Akvüto Khav
9 Hoji tsükona Moses na Potsow yizüng jiang erankae Levi pvüti ochoang pvüti Ntsata jiang ji ezev zikacho sana jiang tona esopvüi jiang to picho. 10 Ombona onte ezocho, "Nzyu tiying akvülo ochhi siyita nzyu, ranki tokhu jianglo, ntena sanrhyutae yizüng shiang ji owon chuka khatava. 11 Israel kyon jiangna khümphen meta jilo sanrhyuta thüng onte ezolo na khavka. 12 Eboe, eloe, osi ngaroden, osi nte yantsüi omoatssi vamo jiang topvü tsarhyua. Toli otsük akvüna zoe benphi OPVÜI nte Potsow yikrachia longtsüka lithoka. 13 Hojitolyui nte tsoronichen ochoangna OPVÜI yithen ji kvüthüngha n zohancho sana jiang na zov. Osi hojito tssona ontena Jordan pankae meta jilo vanathüng ji OPVÜI kyuchiv ntsiv."
Moses Thüngi OPVÜI na Thakchiyi Piala
14 Jisülo OPVÜI na Moses ezocho, "Nina enhungo sunga vamvü meka. Joshua tsae süranki sosi roa, tona ana ombo thüngi lanso rünyo pivka." Moses ha Joshua onina otale, 15 OPVÜI na eluk durhyu esüa süranki ji kipüngo ndungi vancho. 16 OPVÜI na Moses ezocho, "Nino n sungu ni chüv osi ni echüsüi jo kyon jiangna a n longtsüv ana nchüng pia vamo ntsata shi yesov. Ontena a sisi ana pio meta ontena rheyia vamo jilo potsow jiang khümta yiv. 17 Hojito tssoana ana onte thüngi alüm tsuki; ana onte siv küma, onte monkhamvü. Osi onte pono ekhentav vara rov osi ontena onte Potsow ana onte ndüngo n vamo jina hojito tssoala to nchümchev. 18 Tokhatola ana onte nzanchiv mek, ntiotssole ontena potsow thanpo khümta mmen tssoa yiv. 19 "Enhungo, okhen shi erankata. Osi ontena jancho n zo ji chekav esüa lithokvü onte shikae vata. 20 Ana onte pyimtsümotsüi ezothako ji esüa ana onte sosi hojilo rheyivka. Hojilo ontena etsoyu topvü hungi tsoa emathata vamvüka. Tokhatola ontena tsani potsow thanpo khüma yivka. Ontena a siv osi a ntsata ji yesov, 21 osi onte pono ekhenthao vara rov. Tokhatola okhen shijo denta vam osi onte ehungpvü esüa vam. Enhünga na, ana onte pio meta jilo n rheyithüng na ontena ntio nchümta vancho sana ana ntsia." 22 Hoji nchuk Moses na okhen ji erankae Israel jiang shikacho. 23 Jisülo jo OPVÜI na Nun tsoe Joshua ezocho, "Lüm tssona mmhanka vata. Nina kyon jiang sosi ana pio metae rheyiv ka osi ana ni ndüngo tssovka." 24 Moses na Potsow yizüng jiang ji ntia n khacho na kakolo erankae vacho. 25 Ombona eranrathakle OPVÜI Ntsata Bakos ezeiden Levi pvüti jiang khelo theyicho, 26 "Potsow yizüng kako shi khi OPVÜI nte Potsow ntsata Thephen ji Bakos ji ndüngo vata, tona kyon jiang ehungpvüi tssoa lia vam ka. 27 Onteno kvüta lüm khünga oyam panlana sana ana ntsia. A eküm evanthüng ontena OPVÜI panlancho hoji esüa a chüthakana kyungkata tssov. 28 Nte pvüji esopvüi topvü osi tsüphoe topvü a mhadungo sanrhyutava, tona ana shiang onte ezovka. Ana a ehungpvüi tsswothukvü oyak osi liko shiang tsavka. 29 A chüthakana kyon jiangna nthae kümrae ana püngno jiang n ngav siv to ana ntsia. Osi yuta etsao jilo jo ontena vara ndukvü, ntiotssole ontena OPVÜI na tango ji tssoe OPVÜI lüm tsukthukvü."
Moses Khen
30 Israel kyon tOPVÃœI sanrhyui engata vana Moses na okhen ji heto engocho. (Yilan 32 lo lio ji)
Moses Khen Ji
1 "Liko osi woyak, a yi shiang zotava, ana ntio phyoa sana tüngochüa engatava. 2 A püngoyi jiang eryu esüa joe likoe yentsso renkav. A yi jiangna odung eniro lo eryu jokachoto tssov, osi eroyo enyipvü lo eryu enyipvü jokacho to tssov. 3 Ana OPVÜI mying thünga, osi ombo kyon jiangna ombo etho tsüpho ji phyotav. 4 "OPVÜI jo ni nkochepvüi etho tsüphov, osi olan topvülo njüm osi ntsa; Nte Potsow jo longtsüka lia osi ntsa; Ombona elamo osi ntssüngo ji tssoala. 5 Tokhatola nteno longtsüka n liden, osi ombo kyonden etssov etüm n liden, mmen etssoe osi kyakthechi jipo. 6 Ntena OPVÜI jo hetowoe na tsütsatake, O zhüvae, osi nchümri nli kyonden? Ombo nte opo, nte lyuyingpvüi ji, ombona jipo tsüphov nte kümthukcho. 7 "Yuta sunga yithako ji zi zetava; kvüto tssoa rocho sana nte opo jiang engae zetava, eson jiang thüngina kvüto tssoa rochosana engae khitava. 8 Ntssontso Potsow na jipo topvü onte meta kokae picho; kyon jiangna kvülo vam sana ombona zikae picho. Ombona jipo akvü potso motsünga picho, 9 tokhatola Jakob tsoronichen jiang jo ombona ombobo ethüngi vayicho. 10 "Ombona onte ji lijüngi khyuta hungcho, mbungna echüko yingsi yinglo metae sanphita hungcho. Ombona onte nkochei ombobo nkoa esüa onte nkohachecho. 11 Mungshiro na woro jiang epyav shika to, osi ombo echo jilo eshonthuka to, OPVÜI na ha Israel jiang n lungthukvü sayacho. 12 OPVÜI taena Potsow thanpoe n thena ombo kyon jiang socho. 13 "Ombona onteji meta ntssomo jiang sathukcho, osi olina ntio chiyiasana hoji ontena tsotacho. Ontena olong yolona ora tssakijü hungcho; onte olive dung jiang olung poni mpato zacho. 14 Onte mangsü osi nyanyan jiangna shyurojü etsson picho; ontena olyu, mangsü osi nyanyan mmhontsowo jiang vancho, hümri osi tssüngthijü mmhontso jiang licho. 15 "OPVÜI kyon jiang eliden kümcho, tokhatola, OPVÜI thüngi n khyingtacho; onteno beleta osi etsoyu na mmhitsüngcho. Ontena onte lyuyingpvüi Potsow sinkicho osi emhokthao onte shanchopvüi ji khoe sicho. 16 Onte kisükhüm jina OPVÜI ji omhyik rakithukcho; ontena n mhom tsso jina ombo lüm tsukthukcho. 17 Ontena potsow meko jiang thüngi erungthan pitacho, hojiango onte motsüi na n tsihancho, osi Israel na kvüthüng ha n khümhancho potsoden, IS Ontena onte Potsow etho ejüo shanchopvüi ji mhechocho, eküm onte pio ji mhechoe sitacho. 19 "OPVÜI na shi hungale, ombo lüm tsuki ombo tsolo osi tsokhying jiang khoe sicho. 20 Ombona phyocho; 'Ana enhungo onte nzanchiv meka; osi kvütüv onte kümsana ana zevka, onteno lüm ekhüng, longtsüka nlio kyonden. 21 Hoji tsükona ana jipo motsünga khi onte lüm tsukthukvüka, ontena potsow to tsatao potsow meko jiang thüngi omhyik a rakithukcho. Hoji tsükona ana jipo motsünga khi onte lüm tsukthukvü ka; ana onte ji zhüva jipo tüv khi onte jüponthukvü ka. 22 A lüm etsuk na omi esüa tssovka osi limha lo ntio liana rungi sivka. Omi jina lichung jani phunglan ying jiang rungu ka. 23 " 'Ana onte thüngi ochüm n lio tssoro phyoro rwothukvü osi lotssi topvüto onte thüngoe yonphiv. 24 Onte ji ekhang osi nochonori lona chürav; onte ji nochonori ekhenthav lona chürav. Ana ora ekümrümo khi onte rokathukvü, osi nrü n mhom khi onte njüthukvü. 25 Ritsso na lantsüi echü sothev; ekhen emhok na oki jiang rhakvü. Loroe osi khyingroe jiang chürav; ngaro osi esoneran jiang ha enhyokav meka. 26 Ana onte ji totona monthuknrüngi sithukvüka, to tssovo ochina ha onte nchümchev mek. 27 Tokhatola onte ri jiang khi a kyon khyothechicho to kangtsüa a nvan thukhungala, ntiotssole ana onte monthukcho kha onte ri jiangna mek.' 28 Israel jo nchümri n li jipo; onteno ntia nchümri n lirüng. 29 Onteno ntiolyui oyam n khyocho sana onte popo n tsio jipo; ntio tssoa yicho sana ontena n ngathecho. 30 Ntio tsükona wothüng motsünga ji tsüka taena khyochola, osi wothüng taro ji otsük eni taena khyochola? OPVÜI, onte Potsow na onte siwo jina; onte Thotsü Potsow na onte sithaka. 31 Ori jiangna ha onte potsow jiango etho mataroa to ntsia, Israel Potsow esüa etho n jü to ntsia. 32 Onte ri jiango, Sodom Gomorrah esüa ntha, osi tssüngthi mozhü n mhom ethio jününgro esüa tüv. 33 Osi nrü mozhü na tssüngthijü nsüngrücho tüv. 34 "Onte ri jiangna ntio tssocho sana, OPVÜI na nchümchetala; osi ombona onte khangriv tsükona yuta eben ji nhyaka vanala. 35 OPVÜI na onte nnlilana onte ezüpthukvü; onte elungu yuta ji rov; onte monthukvü yuta ji enhyanthaka. 36 Kvüthüng onte etho monasana, OPVÜI na ombo kyon jiang shanchov. Ontena ntia nzanchi n liv vanathüng, ombona onte khonzam. 37 Hojithüng OPVÜI na ombo kyon jiang engav, 'Ntena longtsükao potsow jiango kvüi vanrachola? 38 Ntena nte than ethyu jiang khi onte süphicho osi tssüngthijü yuthuka onte thancho. Onte khi oro enhünga nte nzanchithuka, osi onte lo tsankatava. 39 " 'Potsow ji A, osi A tae; thanpo potsow jiango otsotso mek. Ana chüthukala, osi eküm piala, ana meyanthuksi ana emiyiala, osi ana ntio tssoa sana ochinaha n panlanche. 40 A ji kvüto eküm evamo Potsow ji tssocho, sana ji esüa ana a khe yonchi echümala, 41 Ana a yonri ji ntssae, ntsanrük lithukvü lo tsütsav. Ana a ri jiang nnlilam, osi a tssako jiang ezüp piv. 42 A lotssi lona onte ejen zhüchov, osi a panlamo jiang topvü a yonri na chüthukvü. Athüngi khontae ochia ana enhyokathukvü meka, tssatsso jiang osi evüngki vamo jiang mpato chüthukvüka.' 43 "Jipoden, ntena OPVÜI kyon jiang omying thüngitav na lia, onte lüngthao jiang topvü ombona ezüpthukala. Ombona ombo ri jiang nnlilana la, osi ombo kyon jiang mmen jo siyiala." 44 Moses ha Nun tsoe Joshua onina okhen shia khae Israel kyon jiang engathukcho.
Moses Ndungtssong Okhao Jiang
45 Moses na Potsow püngnoyi jiang kyon jiang pithakale heto ezocho, 46 "Ana nchüng yizüng nte pio shiang engav ti mhechotava. Nte ngaro jiang thüngi ha shiang khae ezotasi onte khi Potsow püngnoyi jiang topvü longtsükata engathuka. 47 Püngnoyi shiang jo ejüng tüv mek; tokhatola nte eküm ji shilo jüa. Shiang enga benphitava, tona ntena Jordan pankae rheyivsa vamo meta jilo harishia vamvüka." 48 Hoji tsüngono OPVÜI na Moses ezocho, 49 "Jeriko zechilo Moab metae Abarim phunglan jilo woa; osi Nebo phunglan jilo ehungo ana Israel kyon jiang pivsa evamo Kanaan meta ji chani zeta. 50 Ni jenio Aaron ji Hor phunglani na chüo ji esüa niha Nebo phunglani na ni chüvka, 51 ntiotssole ninita na Israel jiang mhadungo na a n longtsükav etssophyotacho. Ntena Zin lijüng ndüngo Kadesh yantsü ndüngo Meribah jü jilona nina kyon jiang mhadungona a mying a mmenicho. 52 Nina meta ji ekoni na zechivka, tokhatola ana Israel pia vamo meta jilo jo nina rheyiv meka."
Moses na Israel Jipo Jiang Mmhayiala
1 Potsow kyon Moses na ombo n chüthüng Israel jiang mmha randankao ji shiang. 2 OPVÜI na Sinai phunglani na chirocho, Ombona Edom ponina eng esüa chiroe, Paran phunglani na ombo kyon jiang pono onkacho. Ombo ndüngo lanben othüng taro sosi, ombo khe amimoe na milon bensi chirocho. 3 OPVÜI na ombo kyon jiang nzanala osi ombo kyon jiang nkochetala, hoji tsükona etena ombo jolo epyakthei, ombo yi jiang engatala. 4 Moses na epio yizüng jiang etena engatala, osi jiang jo ete jipo ejüeli tsentssü ji. 5 Kvüthüng Israel pvüji jiang osi, esopvüi jiang sanrhyutacho sana, OPVÜI na ombo kyon jiang mesae kümcho. 6 Moses na Reuben pvüji tsükona heto phyocho: "Reuben pvüji ji wozanro tssolea, kvüthüng ha ti-monthuka." 7 Ombona Juda pvüji tsükona phyocho: "OPVÜI, ontena nzanchile to randamo ji engayaia. Onteji pvüji thanpoe jiang thüngi mmyantalania, Onte tsükona nina rotayia OPVÜI, onte ri jiang mhadungona onte nzanchia. 8 Ombona Levi pvüji tsükona phyocho: "OPVÜI ni lüm erüng ji phyalu yakchia ehungthuka. Osi ni longtsüka phajae Levi jiang yakchia e ntsithuka; Nina Massah lona ojang onte tssocho, Osi Meriba jü lona ntsaka to onte ejyuchecho. 9 Ontena opvüpoe, ojenio osi otsoero , thüngina jo ni thüngi tsüphowo longtsükacho, Osi ontena ni yizüng jiang engae, Ni ntsata jiang longtsükata vacho. 10 Ontena ni kyon jiang ni yizüng engav püngnov; Osi ontena ni thanpheni othan piv. 11 OPVÜI onte pvüji etho ji rankav lo nzanchia: Ontena ntio tssoa sana jilo emathayia. Onte ri jiang topvü rorüpi siyisi, Onte ti-phanthilanthuka." 12 Ombona Benjamin pvüji tsükona phyocho; "Shijo OPVÜI na nzana nkohao pvüji. Ombona eng totona onte nkohoala, osi ombona onte yolo vanala. 13 Ombona Joseph pvüji tsükona phyocho, "OPVÜI na onte meta jilo eryu jothoki, mmhayithuka Osi lichungi na ojü buki mmhayithuka. 14 Onte meta ji engna mhenicho tssüngthi mmhayithuka, osi oküm akvü tssüngthi mmhontsov khi mmhayithuka. 15 Onte motsüi phunglan jiang ji tssüngthi mmhontsowo na pyingthuka. 16 Onte meta ji mmhom topvü khi pyinghtuka, OPVÜI ochona mikio ranuk lona nsancho sana, hoji mmhon khi meta ji mmhayithuka. Shiang mmha shi Joseph pvüji lo lithuka, Ntiotssole ombo ojenio jiang yolo esopvüi ji ombo. 17 Joseph jo tssibung etho tata jüa, Osi mukyulu ejü etho esüa hana. Ombo ejü jiango Manasseh na wothüng to tsaoji Osi Ephraim na wothüng taro to tsatao ji, Ombona ejü jiang khi jipo jiang shüngala, Osi limha chümi khyanchi onte siala." 18 Ombona Zebulun tona Issakhar to pvüji tsükona heto phyocho: "Zebulun jiangji onte jümangi shisho jianglo mmhayithuka, Osi Issakhar ki jilo mmha rankayia. 19 Ontena onte phungalan jilo metapoe kyonsothetala Osi jilo othan elanthao jiang thanala. Ontena ejüeli jiang jümangi na hungala Osi jüran dunga hajang jiang lona hungala." 20 Ombona Gad pvüji tsükona phyocho: "OPVÜI ochona onte meta ji tsükayicho sana omying thüngia. Gad na hengho esüa okhe mekana Kvüritssan shaki siyiv nhyaka vanala 21 Ontena meta jilo mmhontsowo ji onte ejan tssoa khiala; Onte ji esopvüi ejan onte picho. Israel esopvüi jiang etssirhyuathüng, Ontena OPVÜI yizüng osi shikhfü jiang engacho." 22 Ombona Dan pvüji tsükona phyocho: "Dan jo hengho-ro ka; Ombona Bashan lona tsukchukala." 23 Ombona Naphtali pvüji tsükona phyocho: "Naphtali jo OPVÜI ematha mmhon jina tssochyua onte mmhayicho; Onte meta jo Galilee jümang lona benkae jolowoe jana joyicho." 24 Ombona Asher tsükona phyocho: "Asher jo pvüji thanpoe jiang lona kyongka mmhayicho. Ombo ojenio jiang yolo chokatsowo ji kümthaka, Osi ombo meta ji olive dung na phyingthuka. 25 Ombo yantsü jiang ji yonjak hankan na nkothuka. Osi ombo yuta topvülo nkoho lia noyinga vanthuka." 26 Israel kyonden, nte Potsow esüa Potsow n van, ombona phfütsson lona oyak dunga sanphiala, osi eluk jiang yakchia sanphia nte nzanchilo roala. 27 Potsow jo yuta topvülo nte nkohae tssoa vanpvü; ombo kümali evon jiang khi etho nte piala. Ntena khochiathüng ombona nte ri jiang phani nte siyicho, osi onte topvü monthukle to nte ezocho. 28 Hojito Jakob tsoronichen jiangna noyinglo vanala, oyakina yentsso joe liko etsomo osi tsünghanro tona tssüngthijü to pvülyuo meta jilo, noyingroa vanala. 29 Israel nino kvüta ematha licho ato! Kvüloha ni esüa OPVÜI na, shanchowo jipo n van. OPVÜI na ombobo ni tsung otsso yonri tssoa, ni nkocheta ekhyo ni piala. Ni ri jiangna khonzan chona rov, osi nina onte sümroe siv.
Moses Chüo Ji
1 Moses na Moab hayi na Nebo phunglani, Jeriko engkhfüwoe Pisgah phunglani chungocho, osi jilo OPVÜI na metaji topvü ombo ejücho: Gilead meta lona benkae khümkiwoe Dan yantsü jana; 2 Naphtali meta topvü osi Ephraim tona Manasseh, Juda meta lona engrhewoe Mediterranean jümang; 3 Juda meta jolowoe; osi Zoar lona mitssüngyo yantsü Jeriko jana hayitsü ji to. 4 Jisülo jo OPVÜI na Moses ezocho, "Shijo ana Abraham, Isaak osi Jakob to thüngi onte tsoronichen jiang thüngi piv phyochako meta ji. Ana ni hungthukthaka, tokhatola ana jilo ni rheyithukvü meka." 5 Hojito OPVÜI nri Moses ji OPVÜI na phyoe vao ji esüa Moab meta lona chücho. 6 OPVÜI na omboji Bethpeor yantsü zechilo Moab hayitsü jilo ombo shothecho, tokhatola nchüng jana meta kvülo ombo shothecho sana mekata jo ochina ha n tsi. 7 Moses jo chüathüng nzyu nzoasi mekyu tssocho; ombo nchünkhon kheti etho chücho, osi ombo mhyik jiangha mmhompvü na chücho. 8 Israel kyon jiangna Moab hayi lona ombo echüo ji tsüngon thümro nongrata müngyanchitacho. 9 Nun tsoe Joshua jo nchümri mmhom na pyingcho, ntiotssole Moses na ombo echung ombo ethüngchecho. Israel kyon jiangna Joshua yi engatacho osi OPVÜI na Moses yakchia yizüng epio jiang topvü enga benphitacho. 10 Israel lo Moses esüo tüv zenkhying kvüthüng ha n vanhan, OPVÜI na ombo thüngi tontüng jahtacho. 11 Opvüi na Ejip mesao, ombo tsüphoeden osi meta jilo kyon topvü hungthukvü Moses yakchia chethemothev tsso jiang esüa zenkhying ochina ha n tssohan. 12 Moses na Israel topvü mhadungo elhi tsüphov osi ekhenthav tsso jiang esüa zenkhying ochina ha n tssochehan.
Potsow na Joshua Thüngi Kanaan ji Khyole to Yizüng Piala
1 OPVÜI phajae Moses ji chücho sülo Nun tsoe Joshua, Moses nzanchia eroji thüngi OPVÜI na ezocho, 2 "A phajae Moses ji chüthaka. Enhungo nina Israel jiang sosi ana onte pio meta jilo rheyiv tsükona methaki Jordan pankae rheyitava. 3 Ana Moses ezothako ji esüa ana ni osi kyon jiang thüngi ntena yakchiv sa evamo meta ji topvü nte pithaka. 4 Nte erü ekük jo, jolowoe lijüng jilona khümkiwoe Lebanon phunglan jiang, engkhfüwoe Euphrates zhükhfü jiang lona Hittite meta ji yakchia oyi engrhewoe Mediterannean jümang nandang tssovka. 5 O Joshua, ni evanthüng jo ochinaha ni khyov meka. Ana Moses thüngoe theo ji esüa ni thüngoe tssovka. Ana yuta topvü lo ni nzo vamka; osi ana kvüthüng ha ni sinkiv meka. 6 Mhankae lüm tssona vana, ntiotssole ana onte motsüi jiang ezowo meta jilo rheyiana Israel jiang nina sovka. 7 Mhankae lüm tae tssona osi a phajae Moses na ni pio yizüng jiang tüngochüa benphia. Nina yizüng jiang motsünga tia ti-lhasana benphia tona nina kvümoe woana ekhyo hunguka. 8 Nte ekhüm topvü lo yizüng jiang khatav ti-mhechotava. Yizüng jiang zümo eng kha osi jilo erancho ntia tikhachona benphitava. To tssona nte tssochyu-mochyua wov osi ekhyo hunguka. 9 Ana mhanka osi lüm etsson vale to ni ezowo ji timehchoa. Tikyua osi lüm tiesuka, ntiotssole ni Potsow OPVÜI A, shina nina kvüi woana ni ndüngo vamvü."
Joshua na Kyon Jiang Yizüng Piala
10 Tole Joshua na esopvüi jiang ezoa owo kyon jiang ezothukcho, 11 "OPVÜI nte Potsow na nte pia vamo meta jilo rheyiv tsüngon ethüm tae lika etsoyu tara methakta vantava." 12 Joshua na Reuben pvüji ji, Gad pvüji tona Manasseh pvüji chiso to thüngi ezocho. 13 "OPVÜI phajae Moses na nte ezowoji nchümchetava, OPVÜI nte Potsow na Jordan engkhfüwoe meta ji nte vanphen tssov nte piala to nte ezocho. 14 Nte engh jiang, ngaro jiang tona nte tssiden jiang to shilo vanthuka osi nte rasan kvüta na ritssolo ewov pipothakcho sana jiango Israel thanpoe jiang vüngina khoe owo Israel jiang na 15 Jordan engrhewoe OPVÜI na pio meta jilo n khothethüng nandang rakonia nzanchia vamka, Hojito ombona Israel jiang nkoyae noyingthukthaka na nteno elani oyi Jordan engrhewoe OPVÜI phajae Moses na nte pio shilo vani sikhuka." 16 Onte na Joshua janlancho, "Nina e zowo jiang topvü ena tssovka, osi nina kvüwoe eothuka na wovka. 17 Ena yuta topvülo Moses yi engayio ji esüa ni yi engavka osi OPVÜI ni Potsow na Moses ndüngo vamo ji esüa ni ndüngoha vanthokvü ka! 18 Ochona ni yizüng ekhirana sana osi nnga sana chüthoki sivka. Mhankata osi lüm tssona!"
Joshua na Jeriko lo Chepyim Wothukala
1 Jisülo jo Joshua na Akasia nchenphen jilona otsük eni ethüngche Kanaan meta ji chelo, osi opvü tssoa Jeriko yantsü ji chelo wothukcho. Onina yantsü jilo owo lonsülonphyoe eloe tsüka Rahab ki nchentacho. 2 Israel kyon chepyim Jeriko lo oro vana to Jeriko mesao na zoe, 3 Rahab thüngi oyi yencho: "Niki kyon nchemo jiango Jeriko yantsü shi chelo rochoka! Onte sosi chiyia!" 4-6 Ompvüna janlancho, "Kyon ochoang sana aki jo rochoka," "Tokhatola onteji kvüina rocho sana jijo ana n tsi." Ontena eng erhe yutalo pikhfü n khanthüng na kvüi sana yitacho. Ontena kvüi yitacho sana ana n tsi, khatola nina enhünga phana tssona phayav tssov." (Jithüng jo Rahab na oni ji phfüki chungithoki oying na shazhüi mphoe vanthukcho.) 7 Mesao rasan jiang na yantsü pikhfü ji khani sisi khochuki chiwocho. Ontena Israel chepyim jiang yanta Jordan kyakao lan ji nandang chivotacho. 8 Chepyim onina n yipthüng Rahab na phfüki ehungo oni ezocho, 9 "OPVÜI na meta shi nte pithaka to ana ntsia. Meta shilo kyon otsük akvüna eneta nte kyuala. 10 Ntena Ejip lona yiathüng OPVÜI na jümyon jümang ji kyingthuko ji ena zothaka. Ntena Jordan engkhfüwoe Amorite mesao Sihon ha Og oni lüngthao jiha ena zothaka. 11 Ena hoji zopvüto ekyutsüngcho osi nte tsükona e lüm etsson topvü monthaka. OPVÜI nte Potsow jo oyaki osi liko shilo Potsow. 12 Hoji tsükona ana kvüto nte kyochithakcho sana ji esüa a wopan thüngi a nzanchitav to ombo myingona echümchak apitava, osi ana nte longtsükao tüv chekav apitava. 13 Ntena apo osi ayo, apyaeden osi yeni jiang tona onte wopan topvü to nkochev to phyochak a pitava! E ti chüthuktava!" 14 Kyon jiang na ompvü ezocho, "Ena phyo ji esüa ena n tssoana Potsow khi echüthoka! Osi ena ntio tssoa vancho sana jiang nina oyam e n zoyina, kvüthüng OPVÜI na meta shi epiasana ni wopan jo nte nkohavka." 15 Rahab jo yantsü ji pikhfü lo oki tssokae vamo jina ompvü na wozhü khi süngchochi bani ji mmyia opomoe chiyithukcho. 16 Osi ompvüna oni ezocho, "Phunglanro metaji yi sitava, mesao kyon jiang na nini rhümav ka. Ontena kholani n yithüng jo jilo tsüngon ethüm aria mphoe vantava. Tosi jisülo jo nte eyi yitava." 17 Onina ompvü ezocho, "Nina e phyochakthuko ji ena vavka, 18 tolea nina heto tssov shikhvü, ena nte meta shi ori tssoa na nina evachochio kipüngro jilo sümyon ntssükae vata. Tosi nipo, niyo osi ni pyae jiang osi wopan topvü ni ki vanrathuka. 19 Ocho na hapoe chiroa sana ombo chülea ombo pono tae, oyi n li; tokhatola ni nzo kipüngi evan ocho sana meyancho jo epono tssov. 20 Tokhatola ena ntio tssoa yia vancho sana ji nina oyam ezocho jo nina ephyochakthuko shiang ena benphiv meka." 21 Ompvüna oyi ji khichoa onte yithukcho. Onte yithakale ompvüna kipüngro mekana kherüki jilo sümyon ji shenkae vacho. 22 Osi chepyim oni jina phunglanro jilo owo mphoe vantacho. Mesao wworo jiangna tsüngon eni ethüm yanta ha n hungwo jina elani Jeriko lo kholani yitacho. 23 Tole chepyim onina phunglani na joyi, zhükhfü ji yakchia Joshua thüngi yitacho. Osi ntio kvüto tssocho sana topvü onina Joshua ezotacho, 24 osi onina phyocho, "Meta ji OPVÜI na epithaka to ji etena mmhona ntsithaka. Meta jilo kyon topvüna ekhentsünga ekyuta vana."
Israel Jiangna Jordan Pankatala
1 Ojyuato enyathüng jo Joshua tona kyon topvü tona nyazüngi na phanthi Akacia nchenphen lona khochi Jordan lo owo zhükhfü ji pankav tsükona ncheni vantacho. 2 Osi tsüngon ethüm sülojo esopvüiden jiang na nchenpheni evan topvü 3 heto ezocho, "Pvüti jiang na OPVÜI nte Potsow Ntsata Bakos ji ejümtasi yakchiana nchenphen eseni onte phana wotava. 4 Ntena meta shilo n rohan küma onte na olan ji nte ejüvka. Tokhatola Ntsata Bakos ji ndüngo jo ti-otava, tolea kilometre bena sülamoe na vantava. 5 Joshua na kyon jiang ezocho, "Ojyua Potsow na nte yolo chethemothev elhi tssov saka, nte bobo ntssüngchetava." 6 Jisülo jo ombona pvüti jiang ji Ntsata Bakos ji bentasi kyon jiang mhadungi na yita vanle to ezocho. Tole ontena hojito tssocho. 7 OPVÜI na Joshua ezocho, "Ana nchüng ntio tssoasana ji yakchia Israel kyon topvüna ni ji kyon tsüphoe tsüka to ni chethevka, osi ana Moses thüngoe tssoji esüa ni ndüngo tssoala to ontena engathevka. 8 Ntsata Bakos ejümo pvüti jiang ji zhükhfüi khothei jürani mangi vanrale to ezoa." 9 Jisülo jo Joshua na kyon jiang ezocho, "Sena oro OPVÜI nte Potsow na ntio phyov sana ji engatava. 10 Ntena khochia na ombona Kanaan kyon jiang, Hittite kyon jiang, Hivites jiang, Perizzite jiang, Girgashite jiang, Amorite tona Jebusite jiang to phani sivka. 11 Kvüthüng limha topvü Potsow ji Ntsata Bakos jina nte mhadungina Jordan zhükhfü ji yakchia sana eküm evamo Potsow ji nte ndüngo vana to ntena ntsivka. 12 Israel pvüji akvü lona tsük tsük, ethüngi otsük taro eni ethüngcheta. 13 Kvüthüng limha topvü Potsow Ntsata Bakos ji pvüti jiangna ejümtasi ojüi khotheta sana Jordan jü jina n tzüv siv osi ojü tzüa vamo ji meta motsüngalo tzsürhyui siv." 14-15 Yuta jijo liri yutalo tssocho osi zhükhu ji phyonchüa tsüa vancho. Kvüthüng kyon jiang na Jordan ji pankav tsükona khochicho sana pvüti jiangna onte vüngi na Ntsata Bakos ji ejümtasi khochicho. 16 Pvüti jiang na ojüi khothepvü ojü jina omhawoe Zarethan yantsü Adam jilona tüngchaki vani sicho. Ojü ji echü jümangoe tsütheta vamo ji esani sisi Israel jiang na Jeriko ndüngo na zhükhfü ji yakchicho. 17 Kyon jiangna likying ji yakchiathüng pvüti jiangna Ntsata Bakos ji ejümtasi kyon jiangna n yakchi thüng nandang jo zhükhfü lungi likying jilo mangi vantacho.
Nchümche Long Chümtacho
1 Israel jipo topvüna yakchithakale OPVÜI na Joshua ezocho, 2 "Pvüji akvü lona tsük-tsük ren otsük taro eni ethüngcheta, 3 osi zhükhfü ji lungi pvüti jiangna mangi vamo jilona olung taro eni khyokatale to ezoa. Olong ji bentasi oyi ntena nchüng zümo kvülo nchenta sana jilo vatale to ezoa." 4 Tole Joshua na otsük taro eni ethüngcheo jiang tsae ezocho, 5 "Jordan zhükhfüi OPVÜI Ntsata Bakos ji mhadungo wotava. Nte otsük akvüna Israel pvüji akvü tsükona olong motsüngtsüng epvüi ejümkachi bentava. 6 OPVÜI na ntio tssothakcho sana jiang nchümchephen jo olong shiang tssov ka. Osi ochyu-ovüngi nte ngaro jiangna olong shiang yichak nte enga na, 7 OPVÜI Ntsta Bakos jina zhükhfü ji yakchiale Jordan jü jina n tsüv esani sicho to ezovka. Osi shilo ntio tssocho sana jiang ji olong shiangna Israel jiang ji nchünkhon nchümchethokvüka." 8 Kyon jiang na Joshua yi engatacho osi Jordan lungina olong taro eni Israel pvüji akvü thung khyokae hansi oyi nchenpheni vatacho. 9 Joshua naha pvüti jiangna Ntsata Bakos ji ejümtasi zakachi vamo zhükhfü lungjüng jilo olong taro eni chümkachicho. (Olong jiango enhüngalea jilo lira) 10 OPVÜI na Joshua ezoa kyon jiang na etssov pio jiang n tssorathüng jo pvüti jiangna zhükhfü lungi zakachipvü vantacho. Shijo Moses na yizüng pi ntsae vacho. Kyon jiangna tsütsoa zhükhfü ji pankatacho. 11 Kyon jiangna juran pankae vanthakale pvüti jiang na vüngsi Ntsata Bakos ji bentasi jüran esanawoe chiyitacho. 12 Reuben pvüji kyon, Gad kyon tona Manasseh pvüji chiso to jo Moses na ezoji ephan ritssoeden tsso jina kyon jiang vüngina khochicho. 13 OPVÜI vanrhyu lona ritssoe wothüng zhüro harüma na zhükhfü ji pankae Jeriko ndüngo hayitsü jilo chiyicho. 14 Hoji nchuk elhi jiang zesi kyon jiangna Joshua ji kyon tsüphoe tsüka to chethecho. Osi ontena Moses yikrachio ji esüa Joshua ha ombo eküm echung yikrachitacho. 15 Jisülo jo OPVÜI na Joshua ezoa, 16 pvüti jiangna Ntsata Bakos ji bentasi vamo ji bentasi zhükhfüina chiyitale to ezothukcho. 17 Tole Joshua na pvüti jiang ezoe, 18 ontena chirathakale jitopvü zhükhfü jina tzüa chiyi jüran jiang pyinglani sicho. 19 Kyon jiangna choro jandemo osi tsüngon taro to jilo Jordan ji pankae chiyi Jeriko na engkhüwoe Gilgal lo nchentacho. 20 Hojilo Jordan lona khicheo olong taro eni ji Joshua na chümcho. 21 Ombona Israel kyon jiang ezocho, "Ochyuovüngi nte ngaro jiang na olong shiang yichak jo ntiola to nte enga na, 22 ntena Jordan ji ngachei pankao ji motsü ji rüa ezotava. 23 OPVÜI nte Potsow na kvüto ete tsükona jümoyon jümang ji kyingthuki e pankathukcho sana ji esüa Jordan jiha kyingchei nte pankathuko ji rüa ezotava. 24 Shi tsükona kyon jiangna limhalo Potsow etho ji kvüta tsüphocho sana ntsivka osi ntena eküm, echung ombo kyuchivka."
1 Jordan engrhewoe Amorite mesao topvü na osi Mediterannean jümang mphyima vamo mesao jiang topvü na OPVÜI na Jordan kyingthuki ombo kyon Israel jiangna n yakchithüng jo nghae siwo ji yivon zocho. Israel jiang tsükona onte kyua lüm etsson moni sicho.
Gilgal Lona Tsenio Ji
2 Jisüijo OPVÜI na Joshua ezocho, "Olong eporov nsüngrüi khi Israel eboe jiang tseni siyia." 3 Tole OPVÜI na ezoji esüa Joshua na tssocho, osi ombona tseniphen phunglan to tsao jilona Israel jiang tsenicho. 4-6 Tokhatola ontena nzyu zhüro lijüngi yentsatathüng yuta jilo ngaro buko jiang ochia n tsenihancho. Elani jithüng jo Ejip lona khochi ritssolo wothuko jiango chürathakcho, ntiotssole ontena OPVÜI jancho n zocho. Ombona phyoji esüa OPVÜI na onte pyimtsümotsüi jiang thüngi phyochako meta lizü ejüeli meta ji onte n hungthukhancho. 7 Hoji echungren ethan jilo ngaro jiang ji n tsenihamo jina Joshua na topvü tseniracho. 8 Tothakale topvü na okhfü jiang npothüng jo nchenpheni vantacho. 9 OPVÜI na Joshua ezocho, "Ejip lo ezii tssotao ji yikraji ana nchüng tsüngon shilo khi nte siyiala." Hoji tsükona meta jijo nchüng jana Gilgal to tsala. 10 Israel jiangna Jeriko ndüngo hayi jilo ncheni vantathüng choro jilo tsüngon taro mezhüoto jilo yakchi tokhu ji khitacho. 11 Hoji ojyuato jo ontena kanaan lona chiyicho sülo etsoyu tsoden ji tsotacho. Ethieben jiang rungi tsotacho osi ebung mozhü n theo hümri rungi tsotacho. 12 Osi jitopvü mana jiang n jov esani sicho. Osi Israel jiangna elani hotüv n hungu sicho. Hoji yuta jilona benkae ontena Kanaan lona ethi-ebencho tsota yicho.
Joshua Tona Yonri Ebemo Kyon Ji To
13 Joshua na Jeriko janale ombo mhadungo yonri eben tsüka mangi vana hungcho. Tole Joshua na owo ombo engacho."Nino e rasan yolo tsüka alo eri la?" 14 Tole kyon jina phyocho, "Aiyo ori ha mek, nte rasaan ha mek, tokhatola OPVÜI rasan jiang esopvüi ka." Tole Joshua na likoe vanthei ombo khüma ezocho, Tsüphoeyo, aiyo ni phajae ka, nina ntio a tssothokvüla?" 15 Tole OPVÜI rasan esopvüi jina phyocho, "Nino ntho metalo zae vanka, ni jokhüp ji phungcheta" Tole ombo ezoji esüa Joshua na tssocho.
Jeriko Khyo Ji
1 Israel jiang n rhowothukvü tsükona Jeriko pikhfü ji khalanchi nhyakyae vancho. Ochina ha yantsü jilo n rhowoche osi jilona ha n chiyichecho. 2 OPVÜI na Joshua ezocho, "Ana Jeriko yantsü jilo mesao jiang. rasan lüm etsson jiang toji ni khyothokvü ni piala. 3 Ni tona ni ransan jiang to na yantsü ji enga lo yenjoa füchokchia tsüngon tirok füphitava. 4 Pvüti otsük tiying na tatara bensi Ntsata Bakos ji mhadungo wovka. Tsüngon tiyingo to jilo jo ni tona ni rasan jiang to na yantsü ji yenjo tiyingo to füathüng pvüti jiang na tatara khüa vamka. 5 Osi ontena tatara won motsünga jo sunga süngkachiv osi hojithüng ni tona ni rasan jiang to na elümoto ntssana horateritavka to tssona jithüng pikhfü yantsü ji eyavka. Tothakana rasantsü topvü na yantsü jilo rhowovka." 6 Joshua na pvüti jiang tsarhyui ezocho, "Ntsata thephen ji khi hoji mhadungi nte otsük tiying na tatara bensi khochia." 7 Jisülo jo ombona OPVÜI Ntsata Thephen ji vüngi lanvüng wothuka ombo rasan topvü khochithukcho. 8-9 Joshua na ezoji esüa pvütiden tatara ekhfüi jiang na mhadungi wocho osi jisülo jo Ntsata Bakos ejümo pvüti jiangna tssosi onte sülo enhyang razhüna etsüng kae khochitacho. Shiang yuta topvülo tatara jo owon tssoa vancho. 10 Tokhatola Joshua na ombona yizüng n pithüng jo owon ti-tssole to ombo woro jiang ezocho. 11 Ombona okho ji ezoa OPVÜI Ntsata bakos ji bensi yantsü ji yenjoa füthukcho. Jisülojo ontena nchenpheni elani oyi hoji zümo jo jilo esantacho. 12-13 Joshua na nyazüngi na phanthi tsüngon ovüngo jilo rentao ji esüa pvüti jiang tona rasan jiang to rentae yenjo enioto yantsü ji fütacho. Ovüngoe jo lanvüng jiang, jisülo jo tatara ekhfüiden pvüti otsük tiying jiang, wokhao tssoa jo sülani enhyang jiang to tssocho. Yuta hetopvü lo tatara jiang na owon tssoa vancho. 14 Hojito tsüngon enioto jiloha ontena yantsü ji yenjoa fülantasi elani nchenpheni yitacho. Hoji esüa tsüngon tiruk tssotacho. 15 Hoji esüa tsüngon tiyingoto jiloha ontena vonchipvü phanthi yantsü ji yenjo tiying fütacho, tsüngon shilo tae ontena yenjo tiying fütacho. 16 Yenjo tiyingo to jilo pvüti jiangna tatara owon tssovsathüng Joshua na heto phyoa ombo woro jiang horateritale to ezocho, "OPVÜI na yantsü ji nte pithaka! 17 Yantsü ji tona jilo licho topvü OPVÜI thancho esüa rorüpi sitava. Rahab lonsülonphyoe ji tona ompvü wopan to tae hakae vanthuka, ntiotssole ompvüna ete echepyim jiang mphoe vathukcho. 18 Tokhatola ntiojo roe esiv licho sana jiang ntia ti-khitava, ntena hojitüv khitacho jo ntena Israel kholo ezüp sothevka. 19 Janti na jocho, shona, yongmen osi yonjak na nsüngrücho topvü OPVÜI echi vata, hojiang topvü OPVÜI ejüeli vapheni vatava." 20 Hoji tsükona. pvüti jiangna tatara jiang khfütacho. Osi kyon jiangna hoji zopvüto tüngkachia ratetacho, tole yantsü pikhfü ji eyae sicho. Jitopvü rasan jiang topvü na phunglanro ji chungoe yantsü ji khyoe khicho. 21 Ontena yonri jiang khi yantsü jilo evan topvü, eboe, eloe, ngaro eran topvü rorüpi sicho. Ontena olyu, mangsü osi kurü jiangha rorüpi sitacho. 22 Jisülojo Joshua na echepyim otsük eni ji ezocho, "Ntena phyochak pio ji esüa lonsülonphyoe ji ki owo ompvü wopan topvü sosi chiyia." 23 Onina owo Rahab, opo, oyo, opyae osi wopan jilo evan to jiang topvü sosi yicho. Osi onte wopan topvü sosi oyi Israel nchenphen ndüngo noyingroa vanthukcho. 24 Jisülojo ontena yantsü jilo omi thei yantsü jilo licho topvü rungi sitacho, tokhatola shona janti osi yongmen tona yonjak tsütsaelan to jiango OPVÜI echhi tssoa khitacho. 25 Tokhatola lonsü lonphyoe Rahab tona ompvü wopan tojo Joshua na nkümfüche vanthukcho, ntiotssole ombona wothuko otsük eniji ompvüna mphoe vanthukcho. (Ompvü tsoronichen jiang nchüng jana Israel lo vanala.) 26 Hojithüng Joshua na ntangnshon yilan opvü picho, "Kyon ochona yantsü shi tssokachilam yana sana OPVÜI rhiyikaphen tssovka. Kyon ochona tssokaphen soyinga sana ombo tsoe ovüngo ji chüvka; Osi ochona yantsü pikhfü ji tssochoa na ombo tsoe wokhao ji chüvka. 27 Hojito OPVÜI na Joshua thüngoe thecho osi ombo myingthüngna meta ji pyingcho.
Akhan Mmen Ji
1 OPVÜI na Jerikolo ntio liana roe sivkha ti-khile to ezoji n ngayicho. Osi Akhan to tsa kyon tsükana hoji yizüng ji yesoji tsükona OPVÜI na Israel jiang thüngi elümoto lüm tsukcho. Akhan jo Karmi tsoe osi omotsü Zabdi osi Juda jipo chungi Zerah pvüji kyon. 2 Joshua na Bethaven ndüngo Bethel na engkhfüwoe Ai yantsü ji khyui zelo kyon ejoma wothukcho, 3 tole ontena osi oyi Joshua ezotacho: "Ai khyolo otsük akvüna ewov n li, wothüng eni mekana ethüm tae wothuka. Yantsü ji tsüphov meka rasan totona jo tiothuka." 4 Hojito wothüng ethüm harüma wothukcho khatola ejomajo elani yithukcho. 5 Ai yamo kyon jiangna pikhfü pomoe longranyo phunglan jiang jana onte phanlanchia chiwo phunglanro jiang jana joyiathüng otsük thümrosi tiruk harüma onte lüngthacho. Tole Israel jiangna lümbüm teria kyutacho. 6 Tole Joshua tona Israel esopvüiden to jiang na nungra lona odono live shakae hantasi onte mpensü jiang reroe sia OPVÜI Ntsata Bakos ji mhadungo vanthei nungratacho. 7 Joshua na phyocho, 'Thotsü OPVÜI! Nina ntioli Jordan pankae esosi chirochola? Amorite jiang khelo erheyithokvü tsükona alo? Emonkhanthokvü tsükona alo? 8 Ntiolyui eteno zhükhfü esanawoe n vantachola? Enhungo Israel na ori jiang mhadungona tsani yithako jina eiyo kvüto lyuvla? 9 Kanaan kyon osi meta shilo kyon otsük akvüna hoji yilan ji zov. Osi ontena ehayae otsük akvü elüngthav. Tona nina ni myingthüng ji lithuka vamvü tsükona kvüto lyuvla? 10 OPVÜI na Joshua ezocho, "Phanthia, nino ntioli hetoli vanthei vanala? 11 Israel na mmen tssothaka! Ana onte ezoji ontena nngav sithaka. Roe sile to onte ezo jiang yolona tsütsailan ejoma onte na khithaka. Ontena ejüng phyotao jiang ji khi onte tsütsaelan lo nzi vathaka. 12 Hoji tsükona Israel jiangna onte ri jiang mhadungo zalanchikhoku meka. Ontena ori mhadungo tsanala ntiotssole onteji monthoki esiv jianglo khanhyathaka. Ana roe sile to ezo jiang tsütsaelan ejoma nte ndüngo lio jiang roe n sithüng jo ana nte ndüngo vamvü meka! 13 Phanthia! Osi kyon jiang nthoche a thüngi rothuka. Israel Potsow A shina heto phyov lika, 'ojyua jo a thüngi rwothukvü tsükona kyon shiang methaka, Israel kyonden, ana roe sile to nte ezocho yolo ejoma ntena hoe vae lia. Ntena hojiang khi n sithüng nandang jo nte ri mhadungo phanthikhoku meka!' 14 Hoji tsükona enyathüng jo nteji pvüji ephanina sosi chiyia. Tona ana khyocheo pvüji ji tsitso khümtsüng ephanina mhadungi chirothokvü ka. Elani ana khyocheo khümtsüng ji wopan lo kyon tsük-tsük na chiyilanthuka. 15 Osi ana khyocheo kyon ji khelo roe esiv yizüng pio tüv tsütsaelan yanchecho jo kyon moji, tona ombo wopan osi ejüeli topvü nzo rungi sivka; ntiotssole ombona Israel pono emhokthav yikra nungra hansi yithaka." 16 Ojyua to jo Joshua na Israel jiang ji pvüji motsüngtsüng na sosi chiyicho osi Juda pvüji khyochecho. 17 Ombona Juda pvüji khyochei jilo khümtsüng ji wopan ephan khyochelancho osi Zerah khümtsüng khyochecho. Ombona Zerah khümtsüng ji wopan opan na khyochei Zabdi wopan khyochelancho. 18 Elani Zabdi wopan jilo kyon tsüka khyochei jilo Akhan, Zabdi tsoe karmi ji tsoe ji khyochecho, 19 Joshua na Akhan ezocho, "A tsoeyo, Israel Potsow OPVÜI mhadungo ntsa phyoa, osi ni nlan phyochaka. Nina ntio tssocho sana ji a ezoa osi mphoa ti-vana." 20 Tole Akhan na phyocho, "Otsotsoka, ana Israel Potsow mhadungo mmen tssothaka osi ana heto tssocho. 21 Etena phancho jiang yolo ana Babylon kyon phukthesü motsünga, janti seri eni, shona seri chiso harüma to elümoto a jüpomo ji tsükona ana khi vacho. Hojiang ji süranki chungi janti jina küpsi juthei lia." 22 Joshua na kyon ejoma wothuka süranki ji owo zethukle otsotso janti jina küpsi jyuthei licho tsütsaelan jiang yanchecho. 23 Ontena süranki na khichei hansi oyi Joshua tona Israel esopvüi to jiang mhadungo OPVÜI vanrhyu lo ekachicho. 24 Tole Joshua tona Israel esopvüi jiang to nzo tsoe Akhan tona janti, shona osi phukthesü toji, elani Akhan tsokhying tsolo jiang, ombo mangsü kurü, olyu osi ombo süranki jilo ombo tsütsaelan topvü to jiang khi hantasi "Ezüp hayi" to tsao jilo wotacho. 25 Joshua na ezocho, "Nino ntioli e pono ezüp hansi yichola? OPVÜI na nipono enhünga ezüp yithokvüka!" Jitopvü Israel topvüna sani Akhan ji ephyatsüngi sicho osi ejüeli tona ombo wopan tojo rungi sicho. 26 Ontena ombo müng jilo olong elümoto penkae sioji nchüng jana lia. Hoji tsükona meta jijo nchüng jana Ezüp Hayi to tsala. Hoji sülojo OPVÜI ji lüm n tsukvü sicho.
Ai Yantsü Khyoe Monthoki Sio Ji
1 OPVÜI na Joshua ezocho, "Rasan topvü sosi Ai lo chüngia. Lümbüm teria kyua ti-vana. Ana Ai mesao pono ekhyov ni pivka, osi yantsü jiha liko jiha ni echhi tssovka. 2 Nina Jeriko osi jilo mesao ji thüngi tsso ji esüa, Ai osi jilo mesao thüngiha tssovka, tokhatola shilojo nina onte tsütsaelan osi ekümrümo jiang nte echhi tssoa khitava. Yantsü ji mphoe na sülamoe na hav methaka." 3 Joshua na Ai lo evov tsükona ombo rasan jiang methakcho. Ombona rasan mmhontsov wothüng thümro ethüngi heto ezoa zümothüng khochithukcho, 4 'Yantsü ji esanawoe mphoa vantava osi yantsüi na tata nkon na vantava tolea yantsü ji hav tsükona methak-tava. 5 Ana a kyon sosi yantsüi rhorovka. Osi kvüthüng Ai kyon jiangna chiro ephana sana ovüngthüng esüa etena tsamka. 6 Etena yantsü ji nkachoa tsani yiv osi ontena e phanrhüv. Tona ovüngthüng etena tssoji esüa etena tsana tsayia ontena epham. 7 Hojithüng ntena sanchuki yantsü ji khyoe khivka. OPVÜI nte Potsow na yantsü ji nte khelo nte theyivka. 8 Ntena yantsü ji khyothakana hojilo omi thei sia, ntiotssole OPVÜI na hojito nte ezocho." 9 Hojito Joshua na onte chiwothukcho osi ontena owo Ai tona Bethel to yutalo Ai na engrhewoe onte mphophen jilona owo nhyakta vancho. Joshua na hoji zümo jo nchenpheni vancho. 10 Joshua na nyazüngi na phanthi rasan jiang tsarhyucho osi ombo tona Israel esopvüiden to na onte sosi Ai lo wotacho. 11 Rasan jiang na onte nzo yantsü pikhfü opvü jilo owo jükiwoe hayitsü jina onte yutalo tssoa nchentacho. 12 Ombona onte wothüng mongo harüma sosi yantsü jina engrhewoe Ai tona Bethel to yutalo owo mphoa vanthukcho. 13 Rasan jiango yantsü jina jükiwoe rotav tsükona methaki vasi kyon thanpoe jiango engrhewoe vanthukcho. Joshua jo hoji zümo jo hayitsü jilo vancho. 14 Ai yantsü mesao jina Joshua woro jiang hungale zaktole nthinlümcho. Osi sülamoe na ombo halanchiv to n tsiv Ai mesao na ombo rasan jiang sosi Israel jiang sakalo Jordan hayitsüi khochuktacho. 15 Joshua tona ombo woro ejoma to jiangna okyaki na tsana esüa lijüng jiwoe sana yia ejücho. 16 Toajo yantsü jilo kyon jiang topvü nzo tssoe Israel jiang ji konka konka na phanta yi sicho. 17 Osi Ai lo eboetso topvü na Israel jiang phanta yi sicho osi yantsü jijo ochinaha n hyakvü chonchitsüi sicho. 18 Tole OPVÜI na Joshua ezocho, "Ni tssoji Ai lo etssyuchia; Ana yantsü ji ni piala." Joshua na hoji esüa tssocho. 19 Osi ombona okhe khikatale züma vamo kyon jiangna zaktole phanthirae yantsü ji khyoe khicho. Jitopvü ontena yantsü jilo omi thei sicho. 20 Ai kyon jiangna yantsüi zechitale miphung taena yantsü ji eyukzhüa chüngia hungcho. Ontena tsanchophen lanka n licho, ntiotssole lijüngoe tsana ejüo Israel jiangna mmilani onte phanlancho. 21 Yantsü ji Israel jiangna khithaka osi omi thethaka to Joshua tona ombo kyon jiang to na ntsiale ontena Ai kyon jiang lüngthtav benkacho. 22 Jithüng ji yantsüi vamo Israel jiang na sanchuklani rota jilo thecho. Ai kyon jiang ji onte tsanthephen n-liv hazhüi topvü lüngtharae sicho. Ochinaha tsanchuko n licho osi hoji yakchia eküm n vancho, 23 tokhatola Ai mesao jitae enhyokacho. Mesao jijo rhümae Joshua thüngi sosi wocho. 24 Israel jiang na Ai kyon lijüngina onte phanchia ewo jiang lüngtharacho. Osi yantsüi ha owo kyon topvü lüngtharacho. 25-26 Joshua na ombo tssoji Ai woe etssyuchi vanthukcho osi yantsü jilo kyon topvü n lüngthathüng jo n vachicho. Hoji nchuk Ai lo evan oro ojü eboe eloe topvü tsotsüi wothüng taro eni lüngthacho. 27 OPVÜI na Joshua ezoji ephan Israel jiangna phanchowo tssiden osi yantsü jilo tsütsailan jiang jo ontena khitacho. 28 Joshua na Ai ji rungi roe sicho. Yantsü ji nchüng jana roe ekachi lipvü. 29 Ombona Ai mesao ji odungina na doni sisi ombo müng ji mmyu ejan hojilo vanthukcho. Eng rhetahakale Joshua na omüng ji khichoe yantsü pikhfü rheyipheni sile to yizüng picho. Ontena omüng ji olong tsüpho tsüpho tüv na byenzhüi siwo ji nchüng jana lia.
Ebal Phunglani na Yizüng ji Khala
30 Tole Johsua na Ebal phunglan jilo OPVÜI Israel Potsow ji thanphen tssokachicho. 31 Ombona thanphen ji OPVÜI phajae Moses na ezoji ephan osi yizüng kakolo lioji ji esüa tssocho, "Ochina ha yonjank n thenkahancho thanphen." Hoji lona ontena erungthan osi khümshümta than pitacho. 32 Hoji jo Israel jiang na Joshua zeta vana Moses na eramo yizüng ji olong jilo thenkacho. 33 Israel jiang na onte esopvüiden, tsüphoeden, yitssoeden osi onte nchenkae evan tsanthan topovü na OPVÜI Ntsata Bakos ji otssa tsungkho reni hoji ejümo pvüti jiang zechia vantacho. Kyon ovo chisona Gerizim phunglan ji mankvü na philanchi, chiso na Ebal phunglanji mankvüna philanchi toli vantacho. Ontena kvüthüng mmha ji hunga sana ontena hojitoli vantale to OPVÜI phajae Moses na onte e zocho licho. 34 Jisülo Joshua na mmha topvü osi rhiyika jiang topvü ji eramo ji ephan kharae engatacho. 35 Hojilo evan topvü eloe osi ngaro, elani tsanthan topvü thüngi Joshua na yizüng jiang topvü khae engathukcho.
Gibeon Kyon Jiangna Joshua Ejithechiala
1 Israel jiang ekhyo yivon ji Jordan na engrhewoe evan mesae topvü na zocho, hayi, phunglani osi phunglan yenjoe evanden osi Mediterranean jütssae hayi vamo jiang topvü na osi Lebanon phunglan jükiwoe, Hittite mesaeden jiang, Amorite mesaeden, Kanaan mesaeden, Perizite mesaeden, Hivite osi Jebusite mesaeden jiang topvü na zocho. 2 Onte topvüna mmyantae Joshua osi Israel thüngi ori tssotacho. 3 Tokhatola Gibeon kyon Hivite jiangna Joshua na Jeriko tona Ai to lo ntio tssothakcho sana ji zoe, 4 ontena ombo ejithechitav methaktacho. Ontena owo etsoyu yani sükhfü ekye osi sofü jüpvü ekye khümcho tüv lo therae gadho jiang hanthuktacho. 5 Ontena mpensü ekye osi jokhüp ethacho tüv ekatacho. Ontena hümri hamo jiangha kyingseruk na zümrocho tüv tssocho. 6 Hojitoli ontena Gilgal lo owo Joshua osi Israel jiang ezotacho, "Eiyo ekoni na rocho osi nte thüngi e mmhonta hungala." 7 Tole Israel jiangna ezocho, "Ntioli ena nte thüngi mmhontav la? Nteno enhyano evanden mpato tssov." 8 Tole ontena Joshua ezocho, "Eiyo nte benkav methaki vana." Joshua na onte ezocho, "Nteno ochoang osi meta kvüi na rotachola?" 9 Tole ontena motsü shi ombo ezocho, "Eiyo ekoni na rochoka tsüphoe yo, ntiotssole nte Potsow OPVÜI ji motsü ji ena zothaka. Ombona Ejip lo ntio tssocho sana jiang topvü ena zothaka 10 osi Jordan engkhfüwoe Amorite mesao otsük eni ji thüngi ntio tssochosana jiha ena zothaka, Ashtaroth lo vamo Heshbon mesao Sihon tona Og mesao Bashan lo vamo ji to motsü ji. 11 E kyonden esopvüiden osi e nzo evan topvüna etsoyu methaki hansi oro nte ndukleto ezocho. Osi nte phajae etssov osi nte thüngi mmhontav ezoa erothukcho. 12 E hümri jiang zetava. Ena nte nduko okina khochiathüng jo hümri jiang lüma vancho. Tokhatola enhungo kyingseruk osi emerothaka. 13 Ena jüpvü shianglo tssüngthijü yenathüngjo ethan khatola sükhfü shiang ekyethaka. Yentsalo na e mpensü osi jokhüp shiang ekerathaka." 14 Israel jiangna onte khelona etsoyu tara khichecho khatola hoji tsükona ontena OPVÜI thüngi n thyutacho. 15 Joshua na Gibeon kyon jiang thüngi mmhontacho osi onte hakae vanthukcho. Israel esopvüiden jiangna ha mmhontav onte echümchak vacho. 16 Mmhontav methaktasi tsüngon ethüm sülo jo Gibeon kyon jiang ji enhyano evanden to Israel jiangna ntsicho. 17 Hoji tsükona Israel jiangna sani owo tsüngon ethüm sülo jo Gibeon jiang vanphen jancho. Hojilo jo Gibeon, Che phirah, Beeroth osi Kiriath Jearim to vanphen tssocho. 18 Tokhatola Israel jiangna onte n lüngthakukcho ntiotssole onte esopvüi jiangna Israel Potsow myingona ntsatae vathakcho. Shi tsükona kyon topvüna onte thüngi phyochophyoritacho, 19 khatola ontena janlancho, "Ena Israel OPVÜI Potsow myingona onte thüngi mmhon ta methaktae lia. 20 Enhungo etena onte vanthukvü lia. To n tssoa na Potsow na ekhangshiv. 21 To onte vanthuka, tokhatola onteno ete tssüngvo jüwoeden tssovka." Hojito esopvüi jiangna ezocho. 22 Joshua na Gibeon kyon jiang ombo thüngi sosi yithuki ezocho, "Nteno ntioli e ejithechia meta ekoni evanden to phyotachola? Nteno shilo evanden la. 23 Ntena hojito ejiphio ji tsükona Potsow na nlan nte pithaka. Nteno nchünkhon eziiden tssoa a Potsow thanpheni tssüngvo jüwoeden tssovka. 24 Ontena janlancho, "Tsüphoe yo hoto tsso jijo ena heto zio jinaka, OPVÜI nte Potsow na Moses ji meta shi totona nte pileto osi ntena khochiathüng yakchio jiang topvü lüngtharale to. Ena ekhenthao ji tsükona osi e eküm emomvü ekyuo jina hoto tssochoka. 25 Eiyo enhungo nte etho küpo, ntena ntio mmhona to zecheta sana hoji e thüngi tssoa." 26 Tole Joshua na heto lyuicho; ombona onte nkochei Israel jiang khi n lüngthathukcho. 27 Tokhatola ombona eziiden onte kümthuka Israel jiang tsükona osi OPVÜI thanphen ji tsükona tssüngvo jüwoeden onte kümthukcho. Nchüng tsüngon jana ontena OPVÜI na ethüngcheo khümphen jilo elhitsük shi tssota vanala.
Amorite Jiang Khyola
1 Joshua na Jeriko tona jilo mesao ji to lo ntio tssocho sana ji esüa Ai jiha hayae jilo mesao ji lüngthae sisi yantsü ji roe sithaka to Jerusalem mesao Adonizedek na zocho. Elani Gibeon kyon jiangna Israel jiang thüngi mmhontae onte nzo vantala to ha ombona zocho. 2 Jerusalem kyon jiangna ekhentsüngcho ntiotssole Gibeon jo yantsü thanpo mesao evan jiang esüa elümoto tsüpoa osi jilo kyon jiango ritssolo mmhon tae. 3 Hoji tsükona Adonizedek na yithen heto mesao jiang thüngi picho, Hebron mesao Hoham thüngi, Jarmuth mesao Piram, Lachish mesao Japhia, Eglon mesao Debir to thüngi: 4 "Gibeon kyon jiangna Joshua tona Israel to jiang thüngi mmhontae sithaka, ntena onte thüngi ori etssov oro a kyochia." 5 Tole Amorite mesaden otsük mongo, Jerusalem mesao, Hebron mesao, Jarmuth mesao, Lachish mesao tona Eglon mesao to shiang na mmyantae Gibeon ji hayae ori tssotacho. 6 Tole Gibeon kyon jiangna Joshua na Gilgal lo ncheni vanathüng heto ezochicho: "Tsüphoe yo, e ti-nsinkia! oro e kyoa! osi e shanchoa! Phunglanroe. Amorite mesao jiang topvüna mmyantae ori etssoala!" 7 Hoji tsükona Joshua na ombo rasan topvü sosi ritssolo mmhontso jiang sonhyasi Gilgal lona khochicho. 8 OPVÜI na Joshua ezocho, "Onte ti kyua, ana onte topvü ni khelo ni theyithaka. Onte ochina ha ni zalanchiv meka." 9 Joshua tona ombo rasanden to jiangna zümo thüma sani Gibeon woe khochicho osi ontena Amorite jiangna n tsiv vanathüng owo hayacho. 10 Amorite jiangna Israel jiang hungale OPVÜI na onte ekhenrhükthukcho. Israel jiangna Gibeon lona onte lüngthasi elani phunglan yenjo Beth Horon eyak jana onte phanchochisi, jolowoe Azekah tona Makkeda to jana roa jowocho. 11 Amorite jiangna Israel jiang mhadungo tsana eyak ji joyiathüng ontena Azekah ejan nandang OPVÜI na sheryu tsüphov jothuki Israel jiangna onte lüngthao jilona kyungkao onte ji ephyatsüngthukcho. 12 OPVÜI na Israel khi Amorite jiang khyothuko tsüngon jilo Joshua na OPVÜI thüngi thyutacho osi Israel jiang topvü yolona phyocho, "Eng, Gibeon jiang poni manga; Choro, Aijalon hayi ji pono mangi sia." 13 Tole eng jina mangi sicho osi ontena ori n khyothüng nandang jo choro jina n kanphiv sicho. Shi motsü jo Jashar kako lo erani lia. Eng jina potsüo longjüngo mangi sicho osi tsüngon ji n yiv sicho. 14 Hoji nchuk OPVÜI na kyon phyocho engayio ji esüa kvüthüngha n tssohancho. OPVÜI na Israel thüngoe thei ori tssocho! 15 Hoji sülojo Joshua tona ombo rasanden to jiangna onte nchenphen Gilgal lo yicho.
Joshua na Amorite Otsük Mongo Jiang Hayatala
16 Tole Amorite mesao otsük mongo jiango kvütoli sana tsanchoe Makkedah lo longkvüi mphota vancho. 17 Tole ochona sana onte yanchei, onte mphophen ji Joshua ezoyicho. 18 Ombona Joshua ezocho, "Longkvü kipüng jilo olong tsüphov erichochia. Hojilo enhyang tara vanthuka, Khatola nino hojilo ti vana, 19 ori jiang etsüngkata phana osi onte yantsüi ti tsanthethuka! OPVÜI nte Potsow na onte ji ni khelo etssov ekhyo ni pithaka." 20 Joshua tona Israel to jiangna onte lüngtharacho toaha ochoangna jo kvütoli sana tsanchoe onte yantsü pikhfü chungi rheyi siracho. 21 Jitosi Joshua woro topvü ntia n tssona nchenphen Makkedah lo chiyiracho. Meta jilo ochina ha Israel jiang echirütav tia n licho. 22 Joshua na phyocho, "Longkvü rhowolan jiang chonchi mesao otsük mongo jiang a thüngi sosi yia." 23 Tole longpvü kipüng ji chonchi Jerusalem mesao, Hebron mesao, Jarmuth mesao, Lachish mesao tona Eglon mesao toji sosi 24 Joshua thüngi yicho. Tole Joshua na Israel kyon jiang tsarhyui jilo tsüphoe jiang topvü na mesao otsük mongo jiang evüng lo nhyekayita to ezocho. Tole ontena hojito tssocho. 25 Joshua na ombo küpo tsüphoe jiang ezocho, "Tikyu tava osi lüm ti teritava. Mmhankae longtsüka litava ntiotssole OPVÜI na nte ri topvü thüngi heto tssovsala." 26 Jitosi Joshua na mesao otsük mongo ji lüngthae odungo onte müng jiang doni mmyu jana vacho. 27 Eng rhetale onte müng jiang khichoe ontena longkvüi mphoe vanthuko jilo süthechirae sile to Joshua na yizüng picho. Longkvü kipüng jianglo longpyak tsüphov lhüpkarae sicho osi hojiang ji nchüng jana lia.
Joshua na Amorite Meta Khiyilanala
28 Hoji nchuk Jashua na Makkedah yan ji hae jilo mesao ji rhümacho. Hojilo vancho topvü lüngthacho osi ochia n valanchicho. Ombona Jeriko mesao thüngi tssoyiato Makkedah mesao thüngi ha tssoyicho. 29 Hoji sülo Joshua tona ombo rasan to jiangna Makkedah lona owo Libna yantsü ji hatacho. 30 OPVÜI na yantsü shi osi jilo mesao jiha Israel jiang khelo theyicho. Ontena ochia enhyokae n vav topvü lüngtharüpcho. Ontena Jeriko mesao thüngi tssoji esüa yantsü shilo ha tssocho. 31 Hoji sülo, Joshua tona ombo rasanden to jiangna Libnah lona Lachish lo owo hoji hatacho. 32 Tsüngon enioto rotacho sülo OPVÜI na Israel jiang pono ekhyo picho. Ontena Libnah lo tssoji esüa yantsü shiloha ochia enhyokae n vav lüngtharacho. 33 Gezer lo mesao Heram na Lachish kyolo rocho khatola Joshua na onte ochia n nhyokav lüngthae sicho, 34 Jisülo jo Joshua tona ombo rasan to jiang na Lachish lona Eglon lo owo yantsü ji hatacho. 35 Lachish lo ontena tsso ji esüa hoji nchuk na onte rhümae lüngtharae sicho. 36 Hoji sülo Joshua tona ombo rasan to jiangna Eglon lona phunglani Hebron jilo owo yantsü ji hatacho. 37 Ontena hojilo mesao osi jilo evan topvü osi yanren jilo evan topvü lüngthae siracho. Joshua na Eglon lo tssoji esüa jilo ha yantsü ji roe sisi kyon topvü lüngthae sicho. Yantsü jilo tsüka tia n nhyokacho. 38 Tosi Joshua na ombo rasan jiang sosi oyi Debir ji hae khyocho. 39 Joshua na Eglon lo tssoji esüa jilo ha yantsü ji roe sisi kyon topvü lüngtharae sicho. Yantsü jilo tsüka tia n nhyokacho. Joshua na Hebron tona Libnah osi jilo mesao ji thüngi ntio tssocho sana ji esüa Debir yantsü tona jilo mesao jiang to thüngi tssocho. 40 Joshua na meta ji topvü khyocho, osi ombona phunglanro jianglo, engkhfüwoe meta jianglo, osi engrhewoe meta tona jolowoe likying jianglo mesaoden to jiang khyoracho. Ombona ochia n valanchiv lüngtharae sicho. Hojijo OPVÜI Israel Potsow na yizüng pioji ephanina tssocho. 41 Joshua na ritsso ji, jolowoe Kadesh Barnea lona benkae jütssawoe Gaza lona Goshen meta jiang tona oyi khümkiwoe Gibeon to jana rhakcho. 42 OPVÜI Israel Potsow na Israel kyon jiang kyochio jina Joshua na meta shiang osi jilo mesao jiang ji rajo motsünga tae na khyoe khicho. 43 Hoji sülojo Joshua tona Ombo rasan to jiangna Gilgal lo kholani yicho.
Joshua na Jabin Tona Ombolo Shenkae Evan To Jiang Khyoala
1 Israel ekhyo yivon jiang Hasor mesao Jabin na zoale ombona Madon lo Jobab mesao, Shimron mesao tona Achshaph mesao, 2 elani phunglani mesao jiang, Galilee wozhü jolowoe Jordan hayi mesao ji, phunglan yenjo mesao osi Dor ndüngo jütssae mesao to jiang thüngi yithen pichicho. 3 Ombona elani Jordan ayi amen lo Kanaan kyon jiang, Amorite jiang, Hittete jiang, Periz zite jiang tona phunglani Jebusite jiang elani Mizpah metae Hebron phunglan yenjoe vamo Hivite jiang to ha yithen piracho. 4 Ontena onte rasan jiang topvü jürani hajang tata sani rocho. Ontena kurü tona ritsso zotoro toha elümoto liracho. 5 Mesao shiang topvü khyentae Merom zhükhfü tsalo oro ncheni Israel jiang thüngi ori etssov methakcho. 6 OPVÜI na Joshua ezocho, "Onte ti-kyua. Ojyua heto-thüng jo ana Israel tsükona onte lüngtharathakuka. Nina onte kurü jiang ojo jakiv osi onte ritsso zotoro jiang rungi siyivka." 7 Hoji tsükona Joshua tona ombo rasan to jiangna Merom zhükhfü jilona onte hatacho. 8 Osi OPVÜI na Israel jiang khi onte khyothukcho. Israel jiang na onte ji hae Misrethpoth Maim tona Sidon to jana osi engkhüwoe Mizpah hayi jana onte phanchicho. Ori jiang tsüka tia n hyokav n chüthung jo ritsso ji n sancho. 9 OPVÜI na kvüto yizüng picho sana ji ephan Joshua na tssocho: osi onte kurü jiango ojo jakisi zotoro jiango rungi siyicho. 10 Hoji sülojo Joshua na osü elani oyi Hasor yantsü ji hayae jilo mesao ji lüngthacho. (Hoji yutalo jo ekhüngyan jiang topvü lo Hasor etho elio vancho.) 11 Ontena hojilo evan topvü ochia eküm n valanchina chüthukcho, osi yantsü ji rungi sicho. 12 OPVÜI phajae Moses na ezoji ephan Joshua na yantsü shiang hetopvü hayae onte mesao jiang chüthukracho. 13 Tokhatola Israel jiangna Hozor yantsü Joshua na erungo ji yakajo phungdunglo tssokao yantsü jiang kui ha roe n sicho. 14 Israel jiangna yantsü shiang lona tssentsü kikyo nikyo osi ekümrüm jiang topvü ontena khitacho. Tokhatola ontena kyon jo topvü chüthuksi tsükatia n valanchicho. 15 OPVÜI na ombo yizüng jiang Moses picho osi Moses na Joshua pilacho osi Joshua na hojiang benphicho. OPVÜI na Moses ezo jiang topvü Joshua na benphicho.
Joshua Na Khio Meta Ro Jiang
16 Joshua na phunglan, hayi, jolo khümki, Goshen meta osi hojiang jolowoe likying meta jiang osi Jordan hayi topvü khyoe khicho. 17-18 Jolowoe Edom ndüngo Halak phunglan nandang, osi jükiwoe Baalgad nandang, Hermon phunglan jolowoe Lebanon hayi jana khicho. Joshua na metaro shilo mesao ji thüngi sunga ori tssoa vancho, khatola ombona khyocho osi onte topvü hayae lüngtharacho. 19 Israel thüngi mmhontae evan yantsü jo Gibeon tae, Gibeon lo jo Hivite kyon ejoma vancho. Ji yakajo thanpoe topvü khyothechiracho. 20 Onte ji Israel thüngi ori tssothoki nzan n lina onte topvü monthoku tsükona OPVÜI na onte lümbümi Israel thüngi rotav tssohungthukcho. Hojijo OPVÜI na Moses ezoe vacho. 21 Hoji yutalo Joshua na Anakim to tsa thojüi jipo phunglan Hebron, Debir, Anab, osi Juda tona Israel to lo phunglan jianglo evamo jiang topvü owo rorüpi sicho. Joshua na onte rorüpi sisi yantsü jiang roe siyicho. 22 Israel lo kvüloha Anakim jiang n hyokav sicho, khatola onte tara jo Gaza, Gath Ashdoth to shianglo vancho. 23 OPVÜI na Moses ezoji esüa Joshua na meta topvü khicho. Joshua na meta ji totona Israel jiang picho osi ontena pvüji ephan chitae khicho. Jisülojo kyon jiangna ritsso lona esantacho.
Moses Na Ekhyowo Mesao Jiang
1 Israel jiang na Jordan engkhüwoe meta jiang topvü khyothakcho. Amon hayi lona benkae Jordan hayi jiwoe chüngicho osi jükiwoe ha Hermon phunglan jana khyocho. Ontena mesao otsük eni khyocho, 2 tsüka jo Amorite mesao Heshbon lo esopvüi Sihon. Ombo ekhüngyan jo Gilead chiso jüa; (Amon hayi tssae) Aroer lona benkae hoji hayitsü ji lungjüngi Amon erü Jabbok jana; 3 Ombo ekhüngyan jilo Jordan hayi ha Galilee wozhü lona benkae echü jümangoe Beth Jeshimoth, elani jilona Pisgah phunglan jana yicho. 4 Ontena Rephaim jiang yolo wokhatssowo Bashan mesao Og ha khyocho. Ombona Ashtaroth tona Edrei to sa vancho. 5 Ombo ekhüngyan jo Hermon phunglan ji, Salekah, Bashan meta topvü Deshur ha Maakah oni erü jana osi Gilead chiso jüa osi Heshbon lo mesoa Sihon meta jiha jüa. 6 Mesao heto onio Moses tona Israel to na khyocho. OPVÜI phajae Moses na ote meta ji khi Reuben, Gath tona Manasseh pvüji chiso to onte echhi tssothoku picho.
Joshua Na Ekhyo Mesao Jiang
7 Joshua tona ombo woro to jiangna Jordan engrhewoe meta jiang osi mesao jiang topvü Lebanon hayitsü Baalgad lona benkae jolowoe Edom ndüngo Halak phunglan nandang khyocho. Joshua na meta shi Israel jiang yolo chitayia nchünkhon onte echhi tssothukcho. 8 Ontena khyo meta ji phunglanro jiang tona engrhewoe phungdung jiang, Jordan hayi tona hoji phunglan jothe, engchirolamoe liphyu jiang tona jolowoe likying jiang toha jüa. Meta shiang jo Hittite jiang, Amorite jiang, Kanaan kyon jiang, Perizzite jiang, Hivite jiang tona Jebusite meta jiang to. 9 Israel jiang na yantsü shianglo mesao jiang khyocho: Jeriko, Ai, (Bethel ndüngo), 10 Jerusalem, Hebron, 11 Jarmuth, Lachish, 12 Iglon, Gizer, 13 Debir, Gedar, 14 Hormah, Arad, 15 Libnah, Adullam, 16 Makkedah, Bethel, 17 Tappuah, Heper, ig Aphek, Lasharon, 19 Ma don, Hazor, 20 Shimron Meron, Achshap, 21 Tannakh, Megiddo, 22 Kadesh, Jokneam, (Karmel lo), 23 Dor, (jütssae ji) Goiim (Galilee lo),24Tirzah to tssotsüi mesao otsük thümro si ekha tssocho.
Meta N khihamo Jiang
1 Joshua ji elümoto sonthakcho. Osi OPVÜI na heto ombo ezocho, "Elümoto ni sonthaka, khatola meta elümoto n khirahan, 2 Philistia tona Gesher to meta jiang, 3 Jolowoe Avim meta jiang. (Shihor zhükhfü lona benkae Ejip meta erü ji jana osi khümkiwoe Ekron jana Kanaan meta tssocho; Philistia mesao jiangna Gaza lo, Ashdod lo, Ashkelon lo, Gath lo tona Ekron lo to vantacho. 4 Elani kanaan kyon jiang meta ji topvü lihana, elani Sidon kyon meta Mearah ji to lihana, jilona Amorite erüi Aphek jana;5 elani Gibalite jiang metaji, Lebanon topvü osi engrhewoe ejan, Hermon phunglan jolowoe Baalgad hojilona Hamath to eyak nandang. 6 Hojilo Sidon kyon Lebanon phunglan tona Misrephoth Maim to yutalo vamo jiang meta topvü jüa. Ana shiang hetopvüto phankhani sisi Israel kyon jiang rheyitoka yivka. Tona ana ni ezothako ji esüa nina meta jianglo Israel kyon renthetoka yivka. 7 Enhungo meta shiji Israel pvüji thanpo tokvü jiang tona Manasseh pvüji chiso to yolo jantayia."
Jordan Engkhfüwoe Meta Jiang Chisotao Ji
8 Rebuen pvüji, Gad pvüji, tona Manasseh pvüji chiso to jo OPVÜI phajae Moses na onte pio ji esüa liko ji pithakcho, hojijo Jordan zhükhfüna engrhewoe tssocho. 9 Onte ejan meta ji (Amon hayi tssae) Areor tona hoji hayi lungjüngi yantsü ji, elani Medeba lona Dibon yuta jilo phungdungro osi hayi jiang topvü to jüa. 10 Meta jina Amon jana yicho osi Amorite mesao Sihon, Heshbon lo yansae jina sanhyao meta topvü jüa. 11 Hojilo Gilead, Gesheur tona Maakah, Hermon phunglan, topvü tona Bashan topvü osi Salekah jana yicho. 12 Hojijo Rephaim yolo wokhao Og ochona Ashtaroth tona Edrei to sacho sana ji ekhüngyan ha jüa. Moses na hojilo kyon jiang khyothechi phani sithakcho. 13 Tokhatola Israel jiangna Gesehur tona Maakah to kyon jiango phani n sicho, ontena nchüng jana Israel lo vanala. 14 Levi pvüji jo Moses na liko n picho. OPVÜI na Moses ezoji ephan onte ejan jo kyon jiangna Israel Potsow thüngi othan hansi oro thanphensae na rungo jilo onte ejan jüa.
Reuben Pio Meta Ji
15 Reuben pvüji lo wopan jiang thüngi Moses na liko tara pithakcho. 16 Onte meta ji Amon hayi tssae Areor ji jana osi hayitsü lungjüngi yantsü ji tona Medeba füa phungdung jiang to jüa. 17 Hojilo Heshbon tona phungdung jianglo yantsü jiang topvü: Dibon, Bamoth Baal, Beth Baalmeon, 18 Jahaz, Kedemoth, Mephaath, 19 Kiriathaim, Sibmah, Zerethshahar, 20 Pisgah phunglan yenjo ji tona, Beth Jeshimoth to. 2l Hojilo phungdung jianglo yantsü topvü tona Heshbon yansao Amorite mesao Sihon ekhüngyan ji to jüa. Sihon jo Moses na khyocho, elani Midian esaeden Evi, Rekem, Zur, Hur, tona Reba toha Moses na khyocho. Onte topvüna Sihon mesao ekhüngyan ji sathakcho. 22 Israel jiang na lüngthao jiang yolo Balaam ratssen, Beor tsoe jiha jücho. 23 Reuben pvüji ji meta engrhewoe jo Jordan tssocho. Shiang jo Reuben pvüji thüngi pio meta jilo yantsü osi meta jüwo jiang.
Gad Pio Meta Ji
24 Moses na Gad wopan ha onte ejan jiko picho. 25 Onte meta ji Jazer tona Gilead lo yantsü topvü Ammon meta chiso jina Rabbah meta engrhewoe Aroer ejan; 26 onte meta ji Heshbon lona Ramath Mizpeh tona Betonim nandang, Mahanaim lona Lodebar erü nandang tssocho. 27 Jordan hayi jilo jo Beth Haram, Bethmimrah, Sukkoth tona Saphon to Heshbon kyon Sihon mesao ekhüngyan ji to jüa. Onte meta ji engrhewoe erü jo Jordan zhükhfü jina Galilee wozhü jana chüngicho. 28 Shiang jo Gad wopan epio meta jilo yantsü osi yanro jiang.
Engkhfüwoe Manasseh Ejan Meta Ji
29 Moses na Manasseh pvüji chiso wopan jiang ha meta picho. 30 Onte meta jo Mahanaim jüa osi Bashan meta topvü jüa, Bashan mesao Og ekhüngyan ji tona Bashan lo Jair yan rukro jüa. 31 Gilead meta ha chiso jüa, Ashtaroth tona Bashan mesao Og yanpvü Edrei to jüa. Shiang hetopvü Manasseh tsoe Machir tsoronichen jiang owo chiso ejan tssoa picho. 32 Hojitoli Moses na Moab lo vanathüng Jeriko engrhewoe meta tona Jordan to ji jantayicho. 33 Tokhatola Moses na Levi jiango ntia meta n picho. Ombona ezocho, onte ejan jo Israel Potsow thamo jilo jüa to.
Jordan Engrhewoe Meta Ji Chitao Ji
1 Shi sülo motsü shijo Kanaan meta Jordan engrhewoe meta ji Israel jiang jantayio ji. Pvüti Eleazar, Nun tsoe Joshua tona Israel pvüji jianglo esopvüi jiang to na meta ji Israel woro jiang yolo chitayicho. 2 OPVÜI na Moses ezoji esüa Jordan engrhewoe pvüji tukvü si chiso jiang meta jijo phyalyu fuki jantacho. 34 Jordan engrhewoe meta jijo Moses na pvüji enisi chiso jiang pithakcho. (Joseph tsoronichen jo Manasseh tona Ephraim to eni chichie yicho.) Tokhatola Moses na Levi jiang jo liko n chinhyacho. Levite jiango yantsü piracho. Yantsü jianglo onte phari pikhfü osi ekümrümo ekümcheta picho. 5 OPVÜI na Moses ezo ji ephanina Israel kyon jiangna liko ji jantacho.
Hebron Ji Kaleb Picho
6 Tsüngon motsünga lo Juda pvüji lona kyon ejoma na oro Gilgal lo Joshua ndukcho. Onte yolo Kenizzite kyon Jephunneh tsoe Kaleb jina Joshua ezocho, "OPVÜI na Potsow kyon Moses thüngi Kadesh Barnea lona eni tsükona ezoji nina ntsia. 7 OPVÜI phajae Moses na meta shi chelo Kadesh Barnea lona a rothuko jithüng jo aiyo nzyu zhüro tssocho. Ana a zeche ephan ntsa yithen oyi ombo picho. 8 Tokhatola atepfü etssowo jina ete topvü ekyuthoko ehungpvüi picho. Tokhatola aiyo longtsüka lia OPVÜI yi engacho. 9 Ana hojito tsso jina Moses na ana yakchio meta topvü a tona a tsoronichen jiang piv to phyochaki lia. 10 Tokhatola OPVÜI na hojito Moses ezosi nzyu zhüro mongo tssothaka. Hojithüng jo Israel na lijüng yakchia vancho osi OPVÜI na ombo phyochak ephanina eküm avanthukpvü. A zeta, aiyo nzyu ekhatiza si mongo tssothaka, khatola aiyo Moses na a wothuko jithüng etho jüwo ji esüa enhüngaha etho jüa. 11 Ana nchüng jana ritsso osi olan topvü tsükona ekhyo eto lihan. 12 Hoji tsükona a osi a kyon jiangna yithen hansi oyi apio jithüng OPVÜI na phyoji ephan phunglanro meta ji nchüng apia. Ena hojithüng ni ezocho, thojüi pvüji Anakim to tsao jiangna yantsü jiang pikhfü tssoe lioji OPVÜI na phyo ji esüa ombona akyochia hojiang ji ana phani sikhok ka." 13 Joshua na Jepunneh tsoe Kaleb ji mmhaithukcho osi Hebron yantsü ji ombo ejan tssov picho. 24 Nchüng jana Hebron jo Kenizzite kyon Jepunneh tsoe Kaleb tona Ombo tsoronichen to ejan, ntiotssole ombo na Israel Potsow OPVÜI ji longtsüka lia oyi engayicho. 15 Hoji vüngoe jo Hebron jo Arba yantsü to tsacho. (Arba jo Anakim jiang yolo tsüphotso ji tssocho.) Enhungo meta jilo noying licho.
Juda Pio Meta Ji g gr Juda pvüji lo wopan jiangna meta shiang hungcho:
Onte meta jina Edom erüi Zin lijüng jolowoe ochüm jana jowocho. 2 Jolowoe erü shina echü jümang jolowoe na oyi,3joloe Akrabim eyak lona Zin lo yicho. Hoji lona Kadesh Barnea Jolowoe joyi Hezron yakchia Addar lo yisi jilona Karkawoe oyi 4Azmon lo oyi Ejip erü lo zhükhfü ji dunga oyi Mediterranean jümang woe oyi ochüm tssocho. 5 Engrhewoe erü jijo echü jümang jilona chungi Jordan tsüthephen jina nandang tssocho. Khümkiwoe erü jijo hoji lona benkae 6 oyi Beth Hoglah jani jilona khümkiwoe yingsüng ji jani Jordan hayi chanchochi nandang tssocho. Hoji lona Bohan lung to tsao ji chungi (Bohan jo Reuben tsoe tsüka), 7 Ezüp hayi ji lona Debir nandang, elani oyi jilona, khümkiwoe Gilgal nandang, jilona hayitsü ji jolowoe Adumim eyak ji chanka ji nandang to tssocho. 8 Hoji lona Enshemesh jüpukphen jianglo oyi Enrogel lo phunglanro lio Jebusite yantsü Jerusalem tssoji jolowoe chiyicho. 9 Hoji lona Nephroah jüro jiang lona oyi Ephron phunglan ndüngo yantsü jianglo chiyicho. Hoji lona Baalah (Kiriath Jearim toha tsacho) woe oyi 10 Baalah engrhewoe na Seir phunglanro jilo chiyi Jearim (Chesalon) phunglani na oyi Beth Shemesk woe joyi Timnah yakchia yicho. 11 Hojilona phunglanro jianglo chiyi Ekron jükiwoe chüngilani Shikkeron woe oyi Baalah phunglan yakchia Jamnia woe yicho. Hoji lona oyi Mediterranean jümang jilo 12 chiyi engrhewoe erü jilo echecho. Erü shiang chungi Juda pvüji vancho.
Kaleb na Hebron Tona Debir to Khyoala
13 OPVÜI na Joshua ezoji ephan meta motsünga jo Juda pvüji lo Jepuneeh tsoe Kaleb ji picho. Ombona Anak opo Arba yantsü Hebron ji khicho. 14 Kaleb na Anak tsoronichen jiang ji yantsüi na phani sicho. Sheshai pvüji, Ahimam tona Talmai to pvüji jiang. 15 Ombona hoji lona Debir lo evamo kyon jiang owo hacho (yantsü shijo Kiriath Sepher to tsata rocho) 16 Kaleb na phyocho, "Ochona Kiriath Sepher yantsü ji khyoana ana a tsolov Achsah ji pivka." 17 Tole Kaleb ojenio Kenaz ji tsoe Othniel na yantsü ji khyo jina ombo otsolov Achsah ji ombo picho. IS Yanpiyanthan tsüngono Othniel na Achsah ji opo thüngi liko chonle to ezocho. Ompvüna Gadho manküina joyile Kaleb na ntio ompvü jümponasana to engacho. 19 Ompvüna janlancho, "Nina liko apio ji likying küma ana jükha ethev lia." Tole Kaleb na jolo khümki jünhyo jiang ompvü picho.
Juda Yantsü Jiang
20 Juda pvüji wopan jiangna onte meta hungwo ji shiang. 21 Edom erü ndüngo yantsü oküptso jiango Kabzeel, Eder, Jagur, 22 Kinah, Dimonah, , Adadah, 23 Kedesh. Hozor, Ithnah, 24 Zip, Telem, Bealoth, 25 Hazor, Hadattah, Kerioth Hezron, (mekana Hazor) 26 Amam, Shema, Moladah, 27 Hazar Gaddah, Hesmon, Bethpelet, 28 Hazar Shual, Beersheba, Biziothiah, 29 Baalah, Lim, Ezem, 30 Eltolad, Chesil, Hormah, 31 Ziklag. Madmannah, Sansannah, 32 Leboath, Shilhi, , Ain, tona Rimmon to: topvü tssotsüi yantsü mekyu tokvü tona jiang nkonphia oyan jiang to. 33 Phunglan jothe lo yantsü jiango, Eshtaob, Zorah, Ashanah, 34 Zanoah, Engannim, Tappuah, Enam, 35 Jrmuth, Adullam, Sokoh, Azekah, 36 Shaaraim, Adithaiam, Gederah tona Gederothaim to: topvü tssotsüi yantsü taro mezhü tona jiang nkonphia jianglo oyan jiang to. 37 Hoji ephalo Zenah, Hadashah, Migdalgad, 38 Dilean, Mizpah, oktheel, 39 Lachish, Bozkath, Eglon, 40 Kabbon, Lahmam, Chitlish,4i Gederoth, Bethdagon, Naamah, tona Makkedah: topvü tssotsüi yantsü taro tiruk tona hoji nkonphia oyan jiang to. 42 Elani Libnah, Ether, Ashan, 43 Iphtah, Ashnah, Nezib, 44 Keilah, Achzib, tona Mareshah to: tsotsüi yantsü tokvü tona hoji nkonphia oyan to. 45 Elani Ekron tona jilo yanro yantsü jiang, 46 tona Ashdod ndüngo yanro yantsü jiang to, osi elani Ekron lona Mediterranean jümang nandang to. 47 Elani Ashdod tona gaza to ephalo yanro yantsü jiang na Ejip erüi zhükhfü ji ejan tona Mediterranean jümang tssa ejan to. 48 Phunglanro meta jianglo yan tsü Shamir, Jattir, Sokoh, 49 Dannah, Kiriath Sepher (Debir), 50 Anab, Eshtemoa, Anim, 51 Goshen, Holon, tona Giloh to yantsü taro ekha osi hojiang nkonjano yanro jiang to. 52 Elani yantsü toku Arab, Dumah, Eshan, 53 Janim, Beth Tappuah, Aphekah, 54 Humtah, Hebron, tona Zior to tsotsüi yantsü tokvü osi shiang ephalo yanro jiang, 55 elani yantsü taro Hoan, Karmel, Ziph, Juttah, 56 Jezebel, Jokdeam, Zanoah, 57 Kain, Gibeah, tona Timnah osi shiang nkonjano yanro jiang to. 58 Elani Hulhul, Bethzur, Gedor, 59 Maarath, Bethanoth tona Elketekon to yantsü tiruk shiang tona hojiang nkonphia yanro jiang to. 60 Elani Kiriath Baal (Kiriath Jearim) tona Rabbaj to yantsü eni ji tona jiang nkona yanro lio jiang to. 61 Lijüngi Beth Arbah , Middin, Seokakah, 62 Nibshan, oma yantsü ji tona Engedi to yantsü tiruk tona jiang nkonphia yanro jiang to. 63 Tokhatola Juda kyon jiang na Jebusite kyon Jerusalemi vamo jiang phani n sikhukcho. Hoji tsükona nchüng jana Jebusite kyon jiango Juda kyon jiang nzo Jerusalem lo vanala.
Ephraim Pio Meta Tona Manasseh Engrhewoe Jito
1 Joseph tsoronichen jiang pio meta ji jolowoe erü ji jo Jerikondüngo Jordan lo Jeriko jüpukphen jina engrchoe na lijungoe rheyicho. Hoji lona Jeriko oena phunglan metawoe na Bethel jana chüngicho. 2 Tosi Bethel lona Achites jiang vanphen yakchia Luz woe yicho. 3 Hoji lona engrhewoe Japhletites jiang metawoe Beth Horon oküpo ji jana yicho. Hoji lona Gezer woe oyi Mediterrenean jümangoe yicho. 4 Joseph tsoronichen, Ephraim jipo tsoronichen tona Manassegh engrhewoe evan jiang to na meta shi onte ejan tssoa hungcho.
Ephraim
5 Ephraim wopan meta jo shi: Onte erü jo Ataroth addar lona engkhüwoe Beth Horon omhao ji jana yicho. 6 Osi jilona Mediterranean jümang jana yicho. Michemethath jo onte khümkiwoe tssocho. Hoji lona engrhewoe na erü ji khuki Zanaath shiloh lo rheyi hoji yakchia oyi Janoah engkhüwoe chiyicho. 7 Jitosi Janoah lona benkae Ataroath tona Naarah tolo oyi Jeriko jani jilona Jordan lo echecho. 8 Erü jina Tappuah lona engrhewoe oyi kanak zhükhfüro ji yakchia Mediterannean jümang lo echecho. Shijo Epharaim wopan jiang pio meta shi ephalo Manasseh metae chungi 9 yanro yantsü tara thephae picho. 10 Tokhatola Gezer lo vamo kanaan kyon jiango ontena phani n sicho. Hoji tsükona nchüng jana Kanaan kyon jiang na Epharaim kyon jiang nzo vana khatola onteji rikata onte nriden tssothukala.
Engrhewoe Manasseh Ji
1 Jordan na engrhewoe meta jijo Joseph tsoe eramo Manasseh tsoronichen jiang picho. Manasseh tsoe eramo jo Gilead opo Machir, rasan esopvüi ekhüng tsso jina Jordan engrhewoe Gilead tona Bashan tojo ombo picho. 2 Jordan engrhewoe meta jijo Manasseh wopan ejoma shiang picho: Abiezer, Helek, Asriel, Schechem, Hepher, tona Shemida to. Shiango Joseph tsoe Manasseh tsokhying jiang osi wopan lo OPVÜI etssoe jiang. 3 Manasseh tsoe Machir, jitsoe Gilead, jitsoe Heper. jitsoe Zelophehad jo tso khying n van na tsolo tae vancho. Onte mying jo Mahlah, Noah, Hoglah, Milkah, tona Tirza to. 4 Ontena pvüti Eleazar tona Nun tsoe Joshua osi esopvüiden to jiang thüngi owo ezotacho, "OPVÜI na e osi eboe e wopan ha meta chichoe epile to Moses yizüng picho lia." Hoji tsükona OPVÜI na phyo ji ephan onte osi onte wopan eboe jiang to meta chichoe picho. 5 Hojito Manasseh jo Jordan engkhüwoe Gilead tona Bashan to ephalo ejan taro hungcho. 6 Hojijo ombo tso khying tona tsolo to jiangna ejan hungroa jina. Osi Gilead meta jo Manasseh wopan enhyoe vamo jiang picho. 7 Manasseh meta jina Asher lona Sechem engkhüwoe Michmeth jancho. Jisülo jo erü jana jolowoe joyi Entappuah kyon jiang nkonhyacho. 8 Tappuah nkonphia meta jijo Manasseh ejan, tokhatola erü lo Tappuah yantsü jijo Ephraim echhi. 9 Jisülo jo erü jina oküpoe Kanah zhükhfüro jiwoe joyicho. Zhükhfüro ji jolowoe yantsü jiango Manasseh meta khatola Ephraim ejan. 10 Ephraim jo jolowoe osi Manasseh jo khümkiwoe toli Mediteranean jümang jo engrhewoe erü ji tssocho Asher jo engrhe khümkiwoe osi Issakhar jo engkhfüwoe to tssocho 11 Issakhar tona Asher to metae Manasseh na Bath Shan tona Ibleam, hojiang nkonphia yantsü jiang, jütssae Dor, Endor, Taanacho, Megiddo tona onte nkonphia yantsü jiang to. 12 Tokhatola Manasseh kyon jiangna jilo vamo kyon jiang phani n sikhukcho, hoji tsükona Kanaan kyon jiangna jilo vanala. 13 Israel jiangna heto etho jüa kümaha ontena Kanaan jiang topvü phani n sicho, tokhatola ontena Kanaan kyon jiang ji onte nriden tssothukcho.
Ephraim Tona Engrhe Manasseh To na Meta Chonphatala
14 Joseph tsoronichen jiang na Joshua ezocho, "Nino ntio tssona eiyo meta motsünga tae epichola? OPVÜI na e mmhayio ji ephan e ji owo elüm tssothaka." 15 Joshua na ezocho, "Nteji owo khoshasi phunglan meta jina nte n tssona tssona Perizzite tona Rephaim to meta ji owo nte popo eran danrhüpi vantava." 16 Ontena janlancho, "Phunglan meta jina e n tsson, khatola hayitsüi evamo Kanaan kyon Beth Shan tona hoji nkonjano evan elani Jezreel hayi evan to jiangna yonjak zotoro elümoto lia." 17 Joshua na Ephraim jipo tona engrhe Manasseh to thüngi ezocho, "Otsotso nte ji woro wotsson osi elümoto etho jüa. Nteno meta motsünga tae mekna nte jamka. 18 Phunglan meta jiha nte ejan tssovka. Hoji jo erantsü khatola ntena danrhüpi litssa esanawoe na esanawoe jana hoe vantava. Kanaan kyon jiang jo ontena yonjak zotoro lia etho jülia phani onte sitava."
Meta Enhyoe Lio Ji Jantao ji
1 Israel jiangna metaji khyothakale onte topvüna Shiloh lo etsseni OPVÜI vanrhyu süranki ephokachitacho. 2 Israel jipo yolo pvüji tiying jo meta chitao ji n janhancho. 3 Hoji tsükona Joshua na Israel jiang ezocho, "Nte motsüi Potsow OPVÜI jina nte epio meta jilo rheyi meta chov tsükona ntena ntio nhyakta mungala? 4 Pvüji akvülo na otsük ethüm ren ethüngi rothuka. Ana onte chiwothuka onte jüpomo meta jiang owo nkoe vathukvüka. Jitosi ontena a thüngi elani yithukvüka. 5 Metaji echi tiying chiroe pvüji tiying ji pivka; Juda jo jolowoe onte meta jilo vamka, Joseph ha jükiwoe onte meta jilo vamka. 6 Hojito pvüji tiying ji meta jiang erani oyi a pitava. Tona ana ete Potsow lüm erüng ji yamvü tsükona phyalyu tssoe zevka. 7 Tokhatola Levi jiango nte nzo ejan jo hungu meka, ntiotssole onte ejan jo onteno OPVÜI pvütiden tssoe ombo benkav ji. Gad, Beuben, engkhfü Manasseh to jo OPVÜI phajae Moses na Jordan engkhfüwoe onte pirathaka." 8 Joshua na heto onte ezothakale ethüngche wworo jiangna chiwo meta jiang erükontacho: "Chio meta topvü rashi zetava osi hokarae vatasi, a thüngi yitava. Tona ana shiloh shilona nte tsükona OPVÜI thüngi thyutavka." 9 Tole kyon jiangna chiwo onte metaji echi tiying jantao ji, yantsü jiang jüa eranrhyutacho. Jisülojo ontena Shiloh lo Joshua thüngi yitacho. 10 Joshua na Shiloh lona OPVÜI thüngi jantasi pvüji tiying jiang meta piracho.
Benjamin Pio Meta Ji
11 Benjamin pvüji jamo metaji ovüngo picho. Onte meta jo Juda tona Joseph to meta yuta lo tssocho. 12 Jükiwoe onte erü jo Jordan lona benkae Jeriko jükiwoe tssalüpro jilona engrhewoe oyi phunglanro jiang yakchia oyi Bethaven lijüng ji jana yicho. 13 Jisülojo erü jina Luz jolowoe Beth Horon (Bethel to tsa), oküpo ji jolowoe phunglan Ataroth Addar ji joyicho. 14 Jisülojo erü jina phukowoe yicho, osi phunglanro shi engrhewoe na oyi jolowoe Kiriath BaaKKiriath Jearim), Juda echi jiwoe joyicho. Hoji jo engrhewoe erü ji. 15 Jüjowoe erü jina Kiriath Jearim tssalona benkae Nephtoah jünhyo jilo yicho. 16 Jilona joyi Hinnom hayi chanchochio phunglan Rephaim hayitsü tssalo lio ji jothelo joyicho. Jisülo jo jüjowoe Hennom hayitsü yakchia joyi Enrogel woe Jebusite yingsüng ji jüjowoe chiyicho. 17 Jilona jükiwoe Enshemesh lo chungi jilona Adummim eyak ji zechilo Geliloth jilo chiyicho. 18 Jilona Bohan longpvü to tsao jilo joyicho (Bohan jo Reuben tsoe) toli Jordan hayi chanchochio yingsüng jilo chüngicho. 19 Jilona hayitsü jiwoe Beth Hoglah yingsüng ji jükiwoe na joyi echü jümangi tsüthei jükiwoe Jordan na tsütheta vamo jilo echecho. Hojijo jüjowoe erü ji. 20 Jordan na engrhewoe erü ji. Shiang jo Benjamin wopan ejan tssoa pio meta ji erü jiang. 21 Benjamin pvüji pio yantsü jiango Jeriko, Beth Hoglah, Emek Keziz, 22 Beth Arabah, Zemaraim, Bethal 23 Aim, Parah, Ophrah, 24 Chepharammoni, Ophni, tona Geba: to yantsü taro eni shiang tona jiang nkonphia yanpvü jiang to. 25Elani Gibeon, Ramah, Beeroth, 26 Mizpah, Chephirah, Mozah, 27 Rekem, Irpeel, Taralah, 28 Zela, Haeleph, Jebus, (mekana Jerusalem), Gibeah, tona Kiriath Jearim to yantsü taro mezhü shiang tona onte nkonphia yanro shiang tojo Benjamin pvüji wopan jiangna hungwo meta ji.
Simeon Pio Meta Ji
1 Meta janta enioto jilo jo Simeon pvüji wopan jiang picho. Onte meta jina Juda meta jana wocho. 2 Hojilo Beersheba, Sheba, Moladah, 3 Hazar Shual, Balah, Ezem, 4 Eltolad, Bethul, Hormah, sziklag, Beth Marcaboth, Hazar Susah, 6 Beth Lebaoth, tona Sharuhen: heto yantsü taro ethüm shi tona hojiang nkonphia oyan jiang to. 7 Ji ephalo Ain, Rimmon, Ether, tona Ashan to: yantsü mezhü shiang tona hojiang nkonphia oyan jiang to. 8 Yantsü jiang tona hojiang nkono oyan jiang to jina jüjowoe Baalath Beer (Ramah), jana joyicho. Simeon pvüji lo o pan jiangna onte echi meta hungwo ji shi. 9 Juda jo onte ethelan eli lona tsükata meta hungwo jina ejoma jo erüchoe Simeon pvüji picho.
Zebulun Pio Meta Ji
10 Meta janta ethümoto jijo Zebulun pvüji lo wopan jiang ejan tssocho. Ontena hungwo meta jina Sarid jancho. 11 Erü jina hojiloha engrhewoe Mareal oyi Dabbesheth tona Jokneam zhükhfü to rhaka yicho. 12 Sarid esanawoe jo erü jina engrhewoe Chisoloth Tabor erüi jana jilona oyi Daberath lo oyi Japhia jana yicho. 13 Hoji lona engkhüwoe Gath Heper tona Ethkazin to jana oyi Rimmon lamoe Neah jiwoe na fin' yicho. 14 Jükiwoe jo erü jina Hannathon woe oyi Iphtahel lo echecho. 15 Hoji lo Kattath, Nahalal, Shimron, Idalah, tona Bethlene: to yantsü taro eni tona onte nkonphia oyan jiang to. 16 Yantsü shiang tona jilo yanro shenkao jiang to topvü Zebulun pvüji lo wopan jiangna hungwo meta jilo jüa.
Issakhar Pio Meta Ji
17 Meta janta mezhüo toji jo Issakhar pvüji wopan jiang picho. is Hojilo Jezereel, Chesulloth, Shunem, 19 Haparaim, Shion, Anaharath, 20 Rabbith, Kishion, Ebez 21 Remeth, Engnnim, Enhad dath, tona Bethpazzez to jüa. 22 Erü jina Tabor, Shahazuma, tona Beth Shemesh to rhaka oyi Jordan lo echecho. Hojilo yantsü taro tiruk tona jiang nkonphia yanro jiang to jüa, 23 Yantsü shiang tona jilo yanro shenkao jiang tojo Isaakhar pvüji wopan jiang na hungwo meta jilo jüa.
Asher Pio Meta Ji
24 Meta janta mongo toji jo Asher pvüji lo wopan jiang picho. 25 Onte meta jilo Helkath, Hali, Beten, Achshaph, 26 Allam Melek, Amad, tona Mishal to. Engrhewoe jo erü jina Karmel tona Shior Libnath to rhaka yicho. 27 Erü jina engrhewoe yio jiwoe jo Bethdagon woe yicho osi Zebulun tona Iphtahel to rhaka oyi Bethemek tona Neil to jükiwoe yicho. Hoji lona jükiwoe Kabul, 28 Ebron, Hammon tona Kanah to lona Sidon jana yicho. 29 Hoji lona erü ji Ramah woe oyi pikhfüo yantsü Tyre woe na echecho. Jilo Mahalab, Achizib, 30 Ummah, Aphek tona Rchob to yantsü miku eni tona jiang nkonphia yanro jiang to. 31 Yantsü osi yanro shiang ji Asher pvüji lo wopan jiang meta jilo jüracho.
Naphatali Pio Meta Ji
32 Meta chita tiruko jijo Naphtali pvüji wopan jiang picho. 33 Onte erü jana Helep lona benkae Zaanannim, lo lümro dung ji nandang, elani jilona Adaminekeb, jilona Jamnia osi Lakkkum jana oyi Jordan lo echecho. 34 Jilona erü ji engrhewoe Aznoth Tabor, woe oyi jilona Hokkok lo oyi jolowoe Zebulun rhak, nna engrhewoe Asher rhak, engkhüwoe Jordan rhak to yicho. 35 Pikhfü theo yantsü jo Ziddim, Zir, Hammath, Rakkath, Chinneerth, 36 Admah, Ramah, Hazor, 37 Kedesh, Edrei, Enhazor,38Yiron, Migdalel, Horim, Bethanath, tona Beth Shemesh: to tsotsüi yantsü taro toku jiang tona onte nkonphia yanro jiang to. 39 Yantsü osi yanro shi ang hetopvü Naphtali pvüji lo opan jiangna hungwo meta jilo jüa.
Dan Pvüji Pio Meta Ji
40 Meta janta tiyingo to jijo Dan pvüji lo wopan jiang picho. 41 Onte meta jilo Zoro, Eshtaol, Leshemesh, 42 Shaalbim, Aijalon, Ithlah,43Elon, Timnah, Ekron, 44 Eltekeh, Gibbethon, Baalath, 45 Jehud, Beneberak, Gathrimmon,46Mejarkon, tona Rakkon, elani Joppa nkonphia meta jiang to. 47 Dan jipo na onte meta ji monale owo Laish ji ori tssoe jilo kyon jiang lüngtharae sisi meta ji onte echhi to hoe khicho. Ontena jilo vankae Laish ji Dan to tsae khicho, jijo onte motsüi Dan myingo tsakacho. 48 Yantsü osi jilo yanro jiang topvü Dan pio meta jilo jücho.
Meta Jantakhao Ji
49 Israel jiang na meta ji jantarasi ontena Joshua ha meta picho. 50 OPVÜI yizüng ephanina ontena ombo na echomo yantsü ji picho: Timnath Serah tsao Ephraim phunglanro jilo yantsü ji ombo picho. Ontena hojito meta ji jantacho. 51 Nun tsoe Joshua, elani Eleazar pvüti, osi Israel to pvüji lo kvüri esopvüi jiang na Shiloh lona OPVÜI mhadungo süki kipüng lona onte thüngi ngatüngngarisi sülo phylyu fuksi meta ji hetowoe na chitae picho.
Tsanthe Yantsü Jiang
1 Jisülo jo OPVÜI na heto Joshua ezoa Israel jiang ezothukcho, 2 "Ana nte ezole to Moses ezowo tsanthe yantsü jiang ethüngi khilana. 3 Kyon ochona sana n tsiv ochosana lüngtha na ombo nlilam yana vamo ji mhadungo tsani yantsü jianglo tsanthevka. 4 Ombona yantsü jiang motsüngalo tsana rheyi kipüngo yitssophen jilo esopvüiden vamo jiang thüngi kvütolyui tssatssotacho sana ji yirüvka. Tona ontena ombo sosi yantsüi rheyi meta motsünga ombo pia vanthukvü. 5 Omüng nlipvüi jina yantsüi rolia kyon jiangna münghan ji ombo khelo theyiv meka. Ombona kyon ji etana na lüm etsuk yakchia meyancho mek tolea n tsiv meyamo ji tsükona ontena ombo ji ezüpi thechiv meka. 6 Ombo yitsso n yakthüng jo osi jilo pvüti ji n chüthüng jo yantsü jilo vamvüka. Jisüi ti ombona ombo yani kholani yivka." 7 Hoji tsükona Jordan na engrhewoe jo ontena phunglan meta Naphtali lo Galilee jilo Kedesh, phunglan meta Ephraim lo Shechem, tona phunglan meta Juda lo Hebron to ethüngchecho. 8 Jeriko engkhfüwoe lijüng phungdungro Jordan na engkhfüwoe jilo, Reuben metae na Bezer to ethüngchecho. Gad meta Gilead lona Ramoth ethüngchecho osi Manasseh meta Bashan lona Golan ethüngchecho. 9 Yantsü shiang jo Israel topvü tsükona osi onte yolo evan tsanthan jiang tsükona ethüngcheo yantsü jiang. Kyon ochona n tssiv oyam lüngthata na ombo n-liv yana vamo ji mhadungo na tsani yantsü jianglo tsanthekhoka; ombo ji nzontsü mhadungo na oyi n tssoyithüng jo n lüngthache.
Levite Yantsü Jiang
1 Levite wopan esopvüi jiangna pvüti Eleazar tona Nun tsoe Joshua osi Israel topvü lo jiporan jiang to thüngi wotacho. 2 Ontena jilo Kanaan meta Shiloh lona onte ezotacho, "OPVÜI na enaha vanphen yantsü epile to Moses ezocho lia osi yantsü ji nkonphia e ekümrümo yantsophen eroyo meta epiv phyoe lia." 3 Hoji tsükona Israel jiangna OPVÜI yizüng ephani na onte ejan lo khichei Levite jiang yantsü tona jiang nkonphia eroyo meta to picho. 4 Levite pvüji lo Kohath wopan jiang ovüngo pidencho. Aaron pvüti lona thicheo wopan jiango Juda, Simeon tona Benjamin to meta lona yantsü taro ethüm khichei picho. 5 Kohath pvüji enhyoe vamo jiango Ephraim, Dan, tona engrhe Manasseh to lona yantsü taro khichei picho. 6 Gershon pvüji jo Issachar, Asher, Naphtali tona engkhfüwoe Manasseh to lona yantsü taro ethüm picho. 7 Merari pvüji lo wopan jiango Gad, Reuben tona Zebulun to meta lona yantsü taro eni khichei picho. 8 OPVÜI na Moses yakchia phyoe vao ji ephan Israel jiangna yantsü shiang tona eroyo meta jiang to phyalyu zetasi Levite jiang pitacho. 9 Yantsü shiang jo Juda tona Simeon to meta erüi na khichei, 10 Aaron tsoronichen lo Kohath pvüji Levi lona bukcheo jiang pio yantsü mying jiang: meta shiang ji ovüng tssoa onte pidencho. 11 Ontena Juda phunglanro lo Arba yantsü (Arba jo Anak opo), enhünga Hebron to tsao ji tona hoji füa eroyo jiang to picho. 12 Tokhatola yantsü jilo oli jiang tona yanro shenkao jiang to jo Jephunneh tsoe Kaleb ji pithakcho. 13 Hebron (tsanthe yantsü yolo motsünga), ji ephalo yantsü shiang jo Aaron pvüti tsoronichen jiang picho; Libnah, 14 Jattir, Eshtemoa, 15 Holon, Deber, i6Ain, Juttah, tona Beth Shemesh to yantsü tukvü shiang tona jianglo eroyo jiang to jo Juda tona Simeon to lona khichecho 17 Benjamin meta lona yantsü mezhü: Gibeon, Geba, i8Anathoth, tona Almon jilo eroyo jiang to. 19 Hojito Aaron pvüti tsoronichen jiang ji yantsü taro ethüm jilo eroyo jiang to picho. 20 Aaron tsoronichen Kohath wopan ejoma jiango Ephraim meta lona yantsü ejoma picho. 21 Onteno yantsü mezhü: Ephraim phunglanro Shechem tona jilo eroyo jiang (tsanthe yantsü yolo motsünga), Gezer, 22 Kibzaim tona Beth Horon, elani jilo eroyo jiang to picho. 23 Elani Dan meta lona yantsü mezhü onte picho: Eltekeh, Gibbethon, 24 Aijalon, tona Gathrimmon osi jilo eroyo jiang to picho. 25 Engrhewoe Manasseh lona ha yantsü eni onte picho: Taanakh tona Gathrimmon tona jilo eroyo jiang to. 26 Hojito Kohath pvüji wopan jiangna yantsü taro tona jianglo eroyo jiang to hungcho. 27 Levi thanpoe Gershon wopan jiango, engrhe Manasseh lo yantsü eni; Bashan lo Golan yantsü (tsanthe yantsü motsünga) ji tona Beeshterah yantsü to jiang ji yantsophen meta jiang phanhya hungcho. 28 Elani Issakhar erüwoe na benkae yantsü mezhü: Kishon, Daberath, 29 Jarmuth tona Engannim to jiang ji yantsophen meta jiang nzo picho. 30 Jiang ephalo Asher erüwoe yantsü mezhü: Mishal, Abdon, 31 Helkath, tona Rchob to jiang ji onte yantso li eroyo jiang phata picho. 32 Naphtali erüwoe ha yantsü ethüm: Galilee lo Hedesh (tsanthe yan yolo motsünga), jiha yantso' li ji thenhya hungcho, elani Hammoth Dor, tona Kartan to jiang ha onte yantso li jiang phanhya hungcho. 33 Gershon khümtsüng wopan jiangna ehungo jiang ji tssotsüi yantsü taro ethüm onte yantso li eroyo jiang phanhya hungcho. 34 Levi khümtsüng enhyolani evamo, Merari jiango Zebulun erüwoe yantsü mezhü: Jokneam, Kartah, 35 Dimnah tona Nahalal to ji yantso li eroyo jiang thenhya hungcho. 36 Reuben erüwoe jo yantsü mezhü: Bezer, Jahaz, 37 Kedemoth tona Mephaath to ji yantso li jiang phanhya hungcho. 38 Gad wopan jiango yantsü mezhü: Gilead lo Ramoth (tsanthe yan motsünga), Mahanaim, 39 Heshobon tona Jazer to jiang topvü ji onte yantso li jiang thenhya jancho. 40 Merari khümtsüng wopan ejamo jiango tssotsüi yantsü taro eni jancho. 41-42 Israel jiangna liko ekhio jiang lona tssotsüi yantsü zhüro tiza tona hojiang nkonphia yantso li jiang to ji Levi jiang picho.
Israel Jiangna Meta Ji Hoe Khiala
43 Hojilo OPVÜI na onte pyimtsü motsüi jiang thüngi epiv tsükona tüngochünga phyochako jiang topvüto Israel jiang picho. Ontena kvüthüng hojiang ji hoe khicho sana, ontena hojiang lo vanjüng tssoe sicho. 44 Ombona onte pyimtsü motsüi jiang thüngi phyochaki vao ji esüa, OPVÜI na meta topvüto lo noying onte picho. OPVÜI na Israel jiang ji onte ri jiang topvü pono ekhyo pithako ji tsükona, onte ri jiang yolo motsünga ti naha onte n zalanchikhukcho. 45 OPVÜI na ombona phyochako jiang ji motsünga tia n valanchina topvüto Israel jiang thüngi bencheyicho.
Engkhfüwoe Pvüji Jiang Joshua na Oki Yithukala
1 Jisülo jo Joshua na Reuben pvüji, Gad pvüji tona engrhewoe Manasseh pvüji to kyon jiang tsarhyucho. 2 Ombona onte ezocho, "OPVÜI phajae Moses na nte ezowo jiang osi ana nte ezowo jiang topvüto ntena engae tssorathaka. 3 Yuta shiang hetopvü yakchia ntena nte Israel kyon jiang n sihan. Ntena OPVÜI nte Potsow yi jiang engae benphithaka. 4 Enhungo OPVÜI nte Potsow na ombo püngzüng ephan Israel jiang noying pithaka. Enhungo ntena OPVÜI phajae Moses na nte pio meta Jordan na engkhfüwoe ntena hoe vao jilo yitava. 5 Moses na nte pio shikhfü jiang benphitav ti mhechotava: OPVÜI nte Potsow nzantava, ombo rüngcho tssoyitava, ombo yizüng jiang benphitava, ombolo longtsükata vantava osi nte lümbüm osi eküm topvü na ombo benkatava." 68 Joshua na ombo mmha onte randankata heto ezoa yithukcho: "Nteno ejüeliden kümi oki yitala, tssiden khosha vanthaka, shona, janti, yongmen osi yonjak tona mpensü elümoto lithaka. Ntena ori khelona shiang hungwo ji oyi nte oshomden thüngi chitakhe." Jisülo jo ontena oki yitacho. Moses na Manasseh pvüji phoko jo Jordan engkhfüwoe meta ji picho, tokhatola onte ejoma jo pvüji thanpo jiang nzo Jordan engrhewoe picho. 9 Hojito Reuben, Gad, tona engrhe Manasseh to pvüji jiangna onte ki yiracho. Ontena Israel kyon ejoma jiang Kanaan lo Shiloh lo silanchia onte meta Gilead, OPVÜI na Moses yakchia phyoe vacho onte pio jilo yitacho.
Jordan ndüngo Thanphen ji
10 Rebuen, Gad, tona engküwoe manasseh to na Geliloth lo chiyicho osi jijo Jordan engrhewoe. Ontena jilo thanphen sa elümoto mmhom tssokachicho. 11 Tole Israel kyon thanpoe jiang na ezocho, "Zetava, Israel kyonden, Reuben, Gad tona engkhüwoe Manasseh pvüji kyon na Jordan na onte metawoe thanphen tssokachithaka!" 12 Israel thanpoe jiangna hoji zoale onte topvüna Shiloh lo sanrhyutae engkhüwoe evamo pvüji jiang thüngi ori tssolo evov sanrhyutacho. 13 Tole Israel kyon jiangna Eleazar pvüti ji tsoe Penehas ji Gilead meta lo Reuben, Gad tona engkhüwoe Manasseh to pvüji kyon jiang thüngi wothukcho. 14 Pinehas nzo otsük taro, engrhewoe pvüji jiang akvü lona esopvüi tsük-tsük tona khümtsüng akvü lona jiporan tsük-tsük to wothukcho. 15 Ontena Gilead meta ji owo jani OPVÜI kyon topvü thung tssoa Rebuen, Gad tona engrhe Manasseh to kyon jiang thüngi ezocho, 16 "Nteno ntioli Israel Potsow mhadungo hetüv nlan tssochola? Ntena nte echhi thanphen tssoji yakchia OPVÜI nlümo tssothaka! Enhungo nteno ombo sürüiden mek! 17 Ntena Peor lona mmen tssoe OPVÜI na vara rothuko ji zeta. Eteno nchüng jana hoji ndana ezüpi vana. Hoji mmen jina e n tssonchoke? 18 Nteno ombo sürüiden etssov ekhiranta alo? Ntena nchüng OPVÜI panlana tssona ombona ojyua jo Israel topvü thüngi lüm tsukvü. 19 Hoji tsükona rite meta jilona ekhümvü nte n tsson na OPVÜI metae ombo süranki tssoe elio jilona oro khümtava. Ete yolona liko chontava. Tokhatola OPVÜI panlana osi ete yolo n myanta chancheta khümphen thanpo ti-tssotava. 20 Zerah tsoe Akhan na kvüto roe esiv tsütsailan jiang tsükona oyi nngav Israel okho topvüna ezüp ndukcho sana ji zetava. Akhan mmen ji tsükona ombo tae chücho mek." 21 Reuben, Gad tona engkhüwoe Manasseh to pvüji kyon jiangna engrhewoe pvüji eramoe jiang ji heto janlancho, 22 "Tokhamo jijo Potsow! Ombo OPVÜI ji! Thotsü jo Potsow! Ombo OPVÜI ji! Ena ntio tsükona hoto tssocho sana ji ombona ntsia osi ena nteha nte ntsithukhungala! Ena OPVÜI panlana ombo n longtsüv sia tssona eküm e ti vanthuka! 23 Ena ebobo thanphen tssoe jilona erungthan piv, benro than osi khümshümta than piv tssocho tssona OPVÜI khi ezüp epithuka. 24 Meka! Ena hoji tsso jijo sülani nte tsoronichen na heto e ezov ekyu lona tssocho, 'Nteno OPVÜI Israel Potsow thüngi ntio tssov lia? 25 Ombona e tona Reuben, Gad, woro to nte yutalo erü ji Jordan tssothukcho. Ntena OPVÜI thüngi ekhiramo n li.' to ezokhuka. To tssona nte tsoronichen jiang tona e tsoronichen jiang jina OPVÜI n khümvü sikhoka. 26 Hoji tsükona ena erungthan pia, othan thanpo piv tsükona thanphen tssocho mek, 27 tokhatola e kyon osi nte kyon to chekaphen tsükona osi ete sülani echungren jiang tsükona, osi enaha erungthan tona khümshümta than hansi OPVÜI ntho süranki lona ombo khümala to chethephen ena tssocho. Shijo ena OPVÜI n tsi to nte tsoronichen jiang khi e n phyoyithokvü tsükona tae. 28 Hoji to e phyoyio yuta chiyiathüng e tsoronichen jiang na 'O, e motsüi jiangna ha OPVÜI thanphen ji esüa heto tssokachicho. Jijo othan rung phen osi ekümrümo thanphen mek, khatola e kyon tona nte kyon to chethetaphen.' to phyothoku etüm ena vasi tssocho. 29 Ena kvüthüngha thanpoe tssoe erungthan osi benro than pia OPVÜI tachio osi ombo n longtsüv siv tsükona mek. OPVÜI vanrhyu ranki mhadungo thanphen lio ji yaka ena thanphen thanpo etssov etümezi n li." 30 Pvüti Penehas tona okho esopvüiden otsük taro engrhewoe pvüji jiang yolo wopan lo eramo jiang to jiang na Reuben, Gad osi engkhfü Manasseh to kyon jiangna phyoji engasi lüm pükcho. 31 Pvüti Eleazar tsoe Penehas na onte ezocho, "Enhungo OPVÜI nte ndüngo vana to ena chethethaka. Ntena ombo panlancho mek, hoji tsükona ntena Israel kyon jiang ji OPVÜI na ekhom lona shanchothaka." 32 Jisülo Penehas tona esopvüiden to jiangna Gilead metalo Reuben tona Gad, to kyon jiang sisi Kanaan metae Israel kyon jiang thüngi oyi ezotacho. 33 Tole Israel jiangna lüm püki OPVÜI thüngtacho. Jisüi jo ontena Ruben tona Gad to vanphen meta ji owo ori tssoe meta ji roe esiv n phyotav sicho. 34 Reuben tona Gad to kyon jiangna phyotacho, "Thanphen shijo ete topvü thüngi OPVÜI jo Potsow to e chethethukphen." Hoji tsükona ontena metaji "Ehungpvüi" to tsacho.
Joshua Thakchi Yi
1 Sülani jo OPVÜI na Israel jiang nkonphia ori vamo jiang khelona onte shanchocho. Jithüng jo Joshua ji elümoto sonthakcho, 2 hoji tsükona ombona Israel jiang topvü, eramoeden, esopvüiden, yitssoeden tona tsüphoeden to jiang tsae ezocho, "Enhungo aiyo a sonthaka. 3 OPVÜI nte Potsow na nte tsükona jipo thanpo shiang thüngi ntio tssothakcho sana ntena hungthaka. OPVÜI nte Potsow na nte tsükona rotapvü. 4 Jipopoe Jordan zhükhfü lona benkae Mediterranean jümang nandang vamo jiang ana khyothaka osi n khyorav enhyoe lio jiang topvü meta ji nte pvüji echi etssov ana nte pithaka. 5 OPVÜI nte Potsow na onte ji nte thüngi na tsanthukvüka. Osi nte mhadungi na ombona onte phani sia yivka. OPVÜI nte Potsow na phyochako ji esüa onte meta ji nte echi tssovka. 6 Hoji tsükona tüngochüa oyi engata, Moses yizüng lo erani lio jiang topvü benphiv ekhyo tssotale. Hoji lo erani lio jiang ejükaro tia ti khaksitava. 7 Nte ndüngo jipopoe enhyoe vamo shiang thüngi ti khümshümtava, onte Potsow jiang mying khi ha ti echümtava osi hojiang khümta onte mhadungo ti epyakthetava. 8 Jithüngi na jo nchüng jana heto nte vanthuko shi OPVÜI thüngta vantava. 9 Ntena khochiathüng OPVÜI na nte mhadungi na etho ejüi jipo jiang phankhani nte siyicho osi ochina ha ombo n zalanchikhuk. 10 OPVÜI nte Potsow na ombo phyochak ephanina nte tsükona ori tssoa vana, hoji tsükona nte ri wothüng motsünga na nte yolo tsüka mhadungo tsamka. 11 Hoji tsükona OPVÜI nte Potsow yi engayiv ti mhechotava. 12 Nte lo longtsüka yesoa nte yolo jipopoe vamo shiang yolo theta nte yolo lolan tssota yicho jo, 13 ntena khochiathüng opvüi na nte mhadungi na ori shiang phani siv mek to engathe khitava. Jithüngina jo, onte ji nte tsirhi nte vayicho esüa osi sokvü nrhüi nte vayicho esüa ekyuv lia kümvüka, osi mankvüi nte erhüpicho to nte noa, nte mhyiki okyo jücho esüa tssovka. Osi hotüv ekyutssi ji nte tsükalea meta mmhom OPVÜI na nte pio shilo na n chürathüng jo livka. 14 "Enhungo a echüv tsüngon janthaka. OPVÜI nte Potsow na mmhom nte piv phyochako jiang topvü nte pithaka to nte otsük akvü lümbümi na ntsia. Ombona phyochakcho topvü motsünga tia n khachov benthukthaka. 15 Tokhatola ombona mmha phyochaki vao jiang topvü nte pithako ji esüa ekyuv nte pio jiang ha topvü benthukvü. 16 OPVÜI nte Potsow na ntsata benphiv nte vayio jiang ntena n benphia tssona, osi ntena Potsow thanpo benkata khüma tssona, ombo lüm etsuk lona nte ezüpthukvüka, osi ombona meta mmhom nte pithako shilo nte ochina ha vanphyav meka."
Joshua na Shechem Lo Kyon Jiang Ezoala
1 Joshua na Israel lo pvüji topvü Shechem lo tsarhyucho. Ombona eramoe jiang, esopvüi jiang, yitssoe jiang tona tsüphoe jiang to tsacho osi ontena OPVÜI vanrhyu lo rotacho. 2 Joshua na kyon topvü ezocho, "OPVÜI, Israel nte Potsow na heto phyov elio ji: 'Nkolo jo nte motsüi jiangna Euphrates zhükhfü na pankae vani thanpo Potsow khümtacho. Hojiang yolo tsüka jo Abraham ha Nahor oni opo Terah. 3 Hojithüng ana nte motsüi Abraham ji Euphrates zhükhfü pankae na tsachuki sosi Kanaan meta topvü yakchia ombo socho. Ana tsoronichen elümoto ombo picho. Ana Issak ombo picho, 4 osi Isaak lona Esau ha Jakob oni bukcho. Ana Esau ji Edom meta phunglanro ji picho, tokhatola nte motsüi Jakob tona ombo tsoeoro jiang to jo Ejip metae yi sicho. 5 Sülani jo ana Moses ha Aaron oni wothukcho, osi Ejip lo ezüp elümoto rheyicho. Tokhatola ana nte sochukcho; 6 ana nte motsüi jiang Ejip lona sochukcho, tole Ejip kyon jiangna ritsso zotoro osi rasan theta onte phancho. Tokhatola nte motsüi jiangna jümyon jümang ji tssükae 7 hoji tona onte ri jiang to yutalo n nhyai kyata vancho. Tole ana jümang ji shüi Ejip kyon jiang eyukzhüi onte rhekhanthukcho. Ana hoto Ejip kyon jiang tssoyiwo ji ntena ntsia. Ntena lijüngi sunga vancho. 8 Jitosi ana nte sosi Jordan engrhewoe Amorite meta jilo nte chiyithukcho. Ontena nte rolanchia ha ana onte pono ekhyo nte picho. Ntena onte meta ji khicho osi nte khochi mhadungro lona ana onte monthuka yicho. 9 Tole Moab lo mesao Balak, Zepor tsoe jina nte rolanchicho. Ombona Beor tsoe Balam ji nte rhiyikale to oyi yencho. 10 Tokhatola ana Balaam yi n ngayicho, hoji tsükona ombona nte mmhayithukcho. Hojitoli ana Balak khelo na nte shanchocho: 11 Ntena Joradan pankae Jeriko lo chiyicho. Amorite, Perizzite, Kanaan, Hittite, Giegashite, Hivite to jiang na nte rolanchio ji esüa Jeriko lo kyon jiangna ha nte rolanchicho. Tokhatola onte khelona ha ana ekhyo nte picho. 12 Ntena khochiale ana onte yolo ekhenrhük sotheyi Amorite mesao otsük eni ji phani sicho. Onte ekhyo jijo nte yonri osi lotssi na mek. 13 Ana ntena n joncho tüv li nte picho, yantsü jilo vani ntena n chümcho Jününgrozhü lona lhoe tsotala, ntena n chümcho dung lona olive tsotala. 14 "Hoji tsükona enhungo," OPVÜI yikrachita osi longtsüka lia ombo benkatava. Nte motsüi jiangna Mesopotamea osi Ejip lona khümo jiang sitasi OPVÜI khümtava. 15 Ntena ombo n benkahung na ocho benkav sana nchüng methak-tava, nte motsüi jiangna Mesopotamea lona khümo jiang alo ntena enhünga vamo meta shilo Amorite jiang Potsow jiang khümtav la. Tokhatola a tona a wopan to na jo eyio OPVÜI benkavka." 16 Tole kyon jiangna janlancho, "Ena kvüthüng ha OPVÜI sisi Potsow thanpo khümvü meka! 17 OPVÜI ete Potsow na ete opo jiang osi ete ji Ejip metalo ezii eküm lona e sochukcho osi ombona chethev elhi tsso jiang etena hunga. Etena jipo lantaro kyon yakchiathüng topvü lo ombona e nkochecho. 18 Etena meta shilo rheyiathüng ha OPVÜI na meta shilo evamo Amorite jiang phani e siyicho. Hoji tsükona ena ha OPVÜI khümvüka; ombo ete Potsow." 19 Joshua na kyon jiang ezocho, "Tolea ntena OPVÜI n benkakhokvü mpato tssov. Ombo ntho Potsow küma ombona nte mmen n siyikhokvü mpato tssov. Ombona ombo yaka Potsow thanpo zekhukvü mek, 20 osi ntena ombo sisi metapoe Potsow khümta yicho jo ombona nte khangshiv. Ombona ovüngthüng nte thüngi mmhoncho mpato tssolea nte chüthukvü." 21 Tole kyon jiangna Joshua ezocho, "To tssov meka! Ena OPVÜI benkavka." 22 Tole Joshua na ezocho, "Ntena OPVÜI khümvü methako ji ehungpvüi ji nteka." "Ontena janlancho, "Hoka," E ehungpvüi jo e ka." 23 Joshua na ezolancho, "Jito tssona ntena lio metapo potsow jiang sitasi OPVÜI khümvü echümchaktava, Israel Potsow lo longtsükav phyochaktava." 24 Tole kyon jiangna Joshua ezocho, "Ena ete OPVÜI Potsow benkav ka. Ombo yizüng jiang engavka." 25 Tole Joshua na hoji nchuk kyon jiang thüngi ntsata methakcho osi jithüng Shechem lona shikhfü lanso onte picho. 26 Yizüng shiang Joshua na Potsow yizüng kako lo erankacho. Hojito ombona olong khi OPVÜI ntho meta jilo Nitsüdung ji kupi chümkachicho osi heto phyocho. 27 "Ete ehungpvüi ji olong shi tssovka. OPVÜI na e jamo yilan jiang topvü olong shina zothaka. Hoji tsükona nte khi OPVÜI n panlanthukvü ehung pvüi ji olong shi tssovka." 28 Jisülo jo Joshua na kyon jiang yirathukcho, osi otsük akvü na ombo mbo metae yiracho.
Joshua ha Eleazar Oni Chüala
29 Jisülo jo, Nun tsoe Joshua OPVÜI nri ji nzyu nzoasi taro lo chücho. 30 Ontena ombo müng ji Ephraim phunglan meta Gaash phunglan ji jükiwoe Timnath Serah jilo shothecho. 31 Joshua evanthüng nandang osi esopvüi ochoang na Potsow na Israel tsükona chethev tssowo jiang hungchosana jiang evanthüng jo Israel kyon jiangna OPVÜI khümcho. 32 Israel jiangna Ejip lona hansi yio Joseph echümüng ji Shechem lo meta Jakob na jantirang nzoa na Shechem opo Hamor tsoe jiang thüngi shio jilo shothetacho. Meta shijo Joseph tsoeworo jiangna hoe khicho. 33 Aaron tsoe Eleazar ha chücho osi ombo müng jo Ephraim phunglanro meta jilo ombo tsoe Phinehas pio yantsü Gibeah lo shothetacho.
Juda Tona Simeon to Pvüji na Adonibezek Khyoala
1 Joshua chücho sülo kyon jiangna OPVÜI engacho, "E pvüji jiang yolo kvümoena owo Kanaan sakademla?" 2 Tole OPVÜI na janlancho, "Juda pvüji na khochidemka. Ana meta ji onte khelo theyiala." 3 Juda kyon jiangna Simeon kyon jiang ezocho, "E pio meta jilo ete nzo owo Kanaan kyon jiang thüngi ori tssotavka. E phana rotava; tona enaha nte meta jilo ori nte tssokyuvka. Hojito Juda 4 tona Simeon to pvüji nzo tssoe owo ori tssotacho. OPVÜI na Kanaan kyon tona Perizzite kyon jiang to pono ekhyo onte picho, osi ontena Bezek lona kyon wothüng taro khyothechicho. 5 Hoji lona ontena Adonibezek nduki ombo thüngi rotacho. 6 Ombona yunga tsancho khatola ontena ombo phani rhümae ombo yingpvü tona joyingro to jiang tanchoe siyicho. 7 Tole Adonibezek na ezocho, "Yingpvü tona joyingro to n khyingo mesae ekha tiying na a tssisa kupi khyotsokhyoyua vancho küma enhungo OPVÜI na hoji esüa anaha a nlilanthaka." Jisüi jo Jerusalem mi ombo sosi yicho osi jilona ombo chücho.
Juda Pvüji na Jerusalem Tona Hebron To Khyoala
8 Juda kyon jiangna Jerusalem ji hae khyoe khicho. Ontena hojilo yanchi kyon jiang lüngtharae sisi yantsü ji rungi sicho. 9 Hoji sülojo ontena jüjowoe phunglan metae, phunglan yenjoe osi likyingi to evamo Kanaan kyon jiang thüngi owo rotacho. 10 Ontena Kiriath Arba to tsao Hebron yantsü jilo Kanaan kyon vamo jiang thüngi owo rotacho. Hojilo ontena Sheshai, Ahiman, tona Talmai to pvüji jiang owo khyothechicho.
Othniel na Debir Yantsü khyoala
11 Hoji lona Juda kyon jiangna Debir yantsü (hojithüng jo Kiriath Sepher to tsacho) ji sakalo wocho. 12 Onte yolo Kaleb to tsao jina phyocho, "Khyingroe ochona Kiriath Sepher khyoa sana ana atsolov Achsah ji soa vanthoku ka." 13 Tole Kaleb ongo Kenaz ji tsoe Othneil na owo khyo jina Kaleb na ombo otsolov Achsah ji soa vanthukcho. 14 Yanpiyanthan tsüngono jo Othneil na Achsah ji ompvü opo thüngi oli motsünga chonle to ompvü ezocho. Ompvüna Gadho ji lona joyile opona ntio ompvü jüpona sana to ompvü engacho, 15 tole ompvüna ezocho, "Ana jükha tara ajüponala. Nina apio jijo likying tsso jina." Tole Kaleb na jüpokphen jolowoe osi khümkiwoe woniata ompvü picho.
Juda Tona Benjamin to Pvüji Ekhyo Jiang
16 Moses omo Kenite kyon ji tsoronichen jiangna Jeriko lo mitssüngyo yantsü to tsao jilona Juda kyon jiang nzo khochi Juda jüjowoe lijüng meta Arad lo wotacho. Ontena hojilo Amalikite jiang yolo vanjüngi sicho. 17 Tole Juda kyon jiangna Simeon kyon jiang nzo tssoe owo Zephath yantsü lo vamo Kanaan kyon jiang khyoe khicho. Onte na yantsü ji rhiyikata roe sitacho osi Hormah to tsacho. 18-19 OPVÜI na Juda kyon jiang kyochicho osi ontena phunglan meta ji khicho. Tokhatola onte na Gaza, Ashkelon meka na Ekron to jiang nkonphia yanro jiang tojo n khicho. Meta shianglo kyon jütssa rhüa vamo jiang na yinjak zotoro mmhom lirao jina Juda kyon jiangna phani onte n sikhokcho. 20 Moses na phy woe vao ji ephan Hebron ji Kaleb picho. Ombona Anak tsoronichen yantsü jilo vamo jiang phani sisi vancho. 21 Tokhatola Juda kyon jiangna Jerusalem lo vamo Jebusite jiang jo phani n siwo jina onte na Benjamin kyon jiang onte nzo vantacho.
Manasseh Tona Ephraim to Pvüji na Bethel Khyoala
22-23 Epharaim tona Manasseh to pvüji na Bethel yantsü (Jithüng jo Luz to tsacho) ji halo wotacho. Tole OPVÜI na onte kyocho. Onte na yantsü ji chelo chepyim wothukcho, 24 tole chepyim jiangna kyon tsüka yantsüi na tsana vancho nduki ontena heto ombo ezocho, "Yantsü jilo kvütoli rhowov sana ji nina e zona ena ni meyam meka." 25 Ombo na onte ejüle Ephraim tona Manasseh to kyon jiangna kyon tsüka tona ombo wopan to tae hakasi yantsü jilo evan topvü lüngthae siracho. 26 Hoji sülo jo ombo na Hittite jiang metae owo yantsü tssoe yantsü ji Luz to tsacho, ji enhünga jana lia.
Israel Jiangna Phani N siwo Kyon Jiang
27 Manasseh pvüji na Beth Shan, Taanach, Dor, Ibleam, Megido to yantsü shiang osi jiang nkonphia oyan jiang tolo vamo kyon jiang phani n si; Kanaan kyon jiangna to jilo vani sicho. 28 Kvüthüng Israel jiang etho lia yicho sana ontena Kanaan kyon jiang phani n si tokhatola onte phajae tssothukcho. 29 Ephraim pvüji na Gezer yantsü lo vamo Kanaan kyon jiang phani nsi, hoji tsükona ontena Israel jiang nzo vantacho. 30 Zebulun pvüji naha Kitron tona Nahalal to yantsü lo vamo jiang phani n si; hoji tsükona onteha Israel jiang nzo vani Israel kyon jiang phajae tssotacho. 31 Asher pvüji naha Akko, Sidon, Ahlab, Achzib, Helpah, Aphek tona Rchob to yantsü lo vamo kyon jiang phani n si; 32 Asher kyon jiang na phani onte n siwo ji tsükona onte nzo vantacho. 33 Naphtali pvüji naha Beth Shemesh tona Bethanath to yantsü lo vamo jiang phani n si. Naphtali kyon jiang na Kanaan kyon jiang phani n siwo ji tsükona onte nzo vancho khatola Israel jiangna Kanaan kyon jiang rikata onte phajae tssothukcho. 34 Amorite jiang na Dan pvüji kyon jiang ji phunglan metae phankachi sisi hayi n joyithukcho. 35 Amorite jiang na Aijalon, Shaalbim tona Heres phunglan to lo vancho, khatola Ephraim tona Manasseh to kyon jiangna onte shikhfü küpo vanthuksi onte phajaeden tssothukcho. 36 Edom erü jo Sela jükiwoe Akrabbim eyak lona yakchi yicho.
Bochim Lo OPVÃœI Lanben ji
1 OPVÜI lanben jina Gilgal lona Bochim lo owo Israel jiang ezocho, "Ana Ejip lona nte sochuki ana nte motsüi jiang piv phyoe vao meta jilo nte sochukchicho. Ana phyocho, 'Ana kvüthüngha nte thüngi a ntsata ji yesov meka. 2 Ntena meta shilo kyon shiang thüngi kvüthüngha ntsata vav meka. Ntena onte thanphen jiang roe siyitav shikhfü.' Tokhatola nte na ana nte ezoji n tssohan. Jithüngina jo ntena engang silyuo elhi tssothaka! 3 Hoji tsükona ana enhünga nte ezoala, ana nte mhad ungina na ori jiang phani nte siyiv meka. Onteno nte ri tssovka osi nteji onte potsow jiang nte khümthokvü nte süyavka." 4 Lanben jina hojito phyoale, Isreal kyon jiang topvüna kyatav benkacho,5hoji tsükona metaji Bochim to tsacho. Ontena hoji lona OPVÜI thantacho.
Joshua Chüo Ji
6 Joshua na Israel kyon jiang wothuka onte otsük akvüna ombombo ejan liko khithukcho. 7 Joshua evanthüng nandang jo Israel jiangna OPVÜI benkacho. Osi onte esopvüi ochoangna OPVÜI na Israel thüngi elhi tsüphov tsso jiang onte mhyik na hungcho sana jiang evanthüng jo ontena OPVÜI benkacho. 8 Nun tsoe Joshua, OPVÜI phajae ji nzyu nzoasi taro lo chücho. 9 Ombo echümüng jo Gaash phunglan jükiwoe Ephraim phunglan meta jianglo Timnath Serah lo ombo likolo shothecho. 10 Hoji echungren jijo moni sicho, osi hoji echungren ethan kyon jiangna jo OPVÜI na Israel tsükona ntio tssoa rocho sana ji n tsiv sitacho.
Israel Jiangna OPVÜI Ekhümvü Ji Esanala
11 Jisülojo Israel jiang na Baal khümta OPVÜI mhadungo mmen tssocho. 12 Ontena onte pyimtsümotsüi OPVÜI Potsow ochona Ejip metae na onte sochukcho sana ji mhechoe sisi potsow thanpo, onte nkonjano vamo jiang potsow jiang khümta yicho. Ontena hojiang mhadungo nkhümthei khüma OPVÜI lüm tsukthukcho. 13 Ontena OPVÜI ekhümvü ji sisi Baal tona Astartes to khümta yicho. 14 Jitsükona OPVÜI na lüm tsuki onte ri jiang khi onte sakathukcho osi onte retsoyithukcho. Ombona onte nkonphia ori jiang topvü khi onte sakathukcho osi Israel jiangna onte bobo n kochekhoku sicho, 15 OPVÜI na phyoji esüa ontena ritssolo ewo akvüto ombona onte ryulanchicho. Hoji tsükona ontena elümoto emhokekhentacho. 16 Tole OPVÜI na Israel jiang ji ori khelo na onte shanchoe esopvüiden onte picho. 17 Tokhatola Israel jiangna onte esopvüi jiang lo longtsüka moni sisi potsow thanpo khümta yicho, Onte pyimtsümotsüi jiang na jo OPVÜI yi engacho khatola echungren shilo kyon jiangna hojito n tssov sicho. 18 OPVÜI na kvüthüng esopvüi ethüngcheta sana ombona ethüngcheo esopvüi ji evanthüng nandang jo OPVÜI na kyochia Israel jiangna ori khyocho. Israel jiang na ezüp vara hansi eronta na OPVÜI na khonzan to tssocho. 19 Tokhatola esopvüi ji chüa na Israel jiangna onte eküm eheni kholani echungren ovüngo jiang lona n mhonkao etsso-ephyotacho. Ontena potsow thanpo khümta onte etsophyo n mhom jiang esiv ekhirantacho. 20 To tssoana OPVÜI na lüm tsuki phyocho, "Jipo shina ana onte motsüi jiang thüngi ntsatao ji yesothaka. Ontena ayi n ngao ji tsükona. 21 Joshua chüathüngna onte metalo vamo ri jiang ana phani siv meka. 22 Onte motsüi jiangna ayi engao ji esüa tssetsso sana ana onte ri shiang soa ojang onte tssovka. 23 Hojito jipopoe jiang OPVÜI na onte metalo vanthukcho, onte ekhyov ha Joshua etho n pi; elani Joshua chüpvüto ha süsoa phani onte n si to tssocho.
Meta Jilo Vanlamo Jipopoe Jiang
1 Hojito OPVÜI na Israel ritssolo n thehamo jiang ojang etssov tsükona meta jilo jipopoe vanthukcho. 2 Shijo OPVÜI na Israel jiang ritsso lona ojang etssov tsükona, opvü tssoa ovüngthüng yenjao tia ritssolo n ohamo jiang onte yolo vanthukcho. 3 Meta jilo vanthuko jipopoe jiango, Philistine yantsü mongo jiang: Kanaan kyon topvü, Sidon kyon jiang tona Baal Hermon phunglan lona Hamath eyak nandang Lebanon phunglan lo vamo Hivite jiang to. 4 Onte vanthuko jijo OPVÜI na Moses yakchia Israel jiang yizüng pioji ontena bebenphia sana to ojang tssophen tsükona. 5 Hoji tsükona Israel jiangna Kanaan kyon jiang, Hittite jiang, Amorite jiang, Perizzite jiang, Hivite jiang, tona Jebusite jiang to nzo vantathukcho. 6 Ontena jipopoe shiang thüngi lolan tssotacho osi onte potsow jiang khümtacho.
Othneil
7 Israel jiang na OPVÜI onte Potsow mhechocho, ontena ombo mhadungo mmen tssoa Baal tona Ashera to kisü khümtacho. 8 Hoji tsükona OPVÜI na onte pono lüm tsuki Kushan Rishathaim to tsao Mesopotamea mesao ji khi onte khyothoki nzyu tiza onte sathukcho. 9 Jisüi jo Israel jiangna OPVÜI thüngi kyata jonjitale OPVÜI na onte shanchoe kyon chiyithukcho. Hojijo Kaleb onyuro Kenaz tsoe Othneil. 10 OPVÜI mon ji ombolo joro vani Israel esopvüi kümcho. Othneil na ritssolo wocho osi OPVÜI na Mesopotamea mesao pono etho ombo picho. 11 Jisülo jo Israel lo nzyu zhüro noying yicho osi Othneil ha chüi sicho.
Ehud
12 Israel jiangna elani mmen tssolancho. hoji tsükona OPVÜI na Moab mesao Eglon ji onte pono etho jükata kümthukcho. 13 Eglon na Ammonite jiang tona Amalekite to jiang erhümi Israel thüngi ori tssoe onte khyocho osi mitssüngyo yantsü Jeriko ji khiyicho. 14 Israel jiang na Eglon khelo nzyu tiza vantacho. 15 Tole Israel jiangna OPVÜI thüngi kyata jonjitacho osi OPVÜI na kyon tsüka, Benjamin pvüji kyon Ehud to tsao Gera tsoe hayina yonphio ji ethüngchecho. Israel jiangna Ehud ji yantso hanthuksi Moab mesao Eglon thüngi wothukcho. 16 Ehud na ombo ebem yonri tsungkho erov khejüa bena tüv joe licho. Ombona hoji ombo tsük amimoe süküpi khüngkae hancho. 17 Ombona Eglon beleo ji thüngi yantso ji hansi wocho. 18 Ombona yantso ji pithakale yantso ehamo kyon jiang tsasi kholani yitacho. 19 Tokhatola Gilgal ndüngo olong thenkacho lio jilona Ehud na kholani owo Eglon ezocho, "Tsüphoe yo, ana ni tsükona mphoyi hana." Tole Eglon mesao na ombo phajae jiang topvü hapoe chiyirale to ezocho. 20 Tole mesao jina ombo mhonki mmyimo jilo khuka vanathüng, Ehud na owo ombo ezocho, "Ana Potsow thüngina yithen ni hanisi rocho." Tole mesao jina phanthicho. 21 Tothüng ji Ehud na ombo hamimoe yonri hamo ji okhe hayio na tssüngchei mesao ji mmano ekhyipthechiyicho. 22 Yon ri ji mpüm na, nhyapüng ji mpato rheyia ekhyipicho. Osi ethyu tae na hoji eyukzhüi sicho. Ehud na yonri ji n tssüngche na sicho. 23 Jisüi jo Ehud na chiyi hapoe na kipüngji khalanchia yi sicho. 24 Mesao phajae jiangna oyi kipüng khani elio ji hungcho khatola ontena jo mesao jina ombombo khalanchi esana vancho tsayi cho. 25 Ontena etüm nandang nhyaki zetaha mesao jina chiro n chonchio jina ontena japi ji khi oki ji chonchitacho. Tole onte pvüi ji tapvüi erichi chüi lia hungcho. 26 Ontena nhyakta vanathüng Ehud na yi sicho. Ombona olong thenkacho lio jiang yakchia Seirah lo tsana rheyi sicho. 27 Ombona jilo Ephraim phunglan metaro jilo chiyi Israel jiang ritssolo etsa won tatara ji khükachicho, osi ombona onte sosi phunglani na joyicho. 28 Ombona ezocho, "OPVÜI na nte ri Moabite jiang pono ekhyo nte pithaka aphana rotava." Ontena Ehud phana joyi Moabite jiangna jordan kyakav vamo metaji khyoe khicho. Ontena Moabite jiang tsükatia Jordan n pankathukcho. 29 Hoji nchuk ontena Moabite rasan jiang yolo mmhontsov otsük wothüng taro harüma lüngthacho, onte ochia n tssanchothukcho. 30 Hoji nchuk Israel jiangna Moab khyocho osi Israel lo nzyu ekha tiza noying licho.
Shamgar
31 Israel esopvüi ethümo to jijo Anath tsoe Shamgar. Omboha Philistine nzo tiruk ji mangsü kyanryu khi lüngthae sisi Israel jiang shanchocho.
Deborah Tona Barak To
1 Ehud chüthakale Israel kyon jiangna OPVÜI tachia mmen tssolancho. 2 Hoji tsükona OPVÜI na onteji Hozor yantsü esao Kanaan mesao Jabin ji khi onte khyothukcho. Ombo rasan esopvüi jo pvüjipoe meta Harosheth lo vamo Sisera to tsao ji tssocho. 3 Jabin na ritsso zotoro yonjak na jocho nzo tokvü licho osi Israel jiang nzyu mekyu haruka sacho. Jisülo jo Israel jiangna OPVÜI thüngi kyochile to kyatacho. 4 Lappidoth engh Deborah jo zenkhying tssocho osi yuta jilo jo Israel lo yitssoe tssoa vancho. 5 Ompvüna Ephraim phunglanroe Ramah ha Bethel oni yutalo mitssüng dung kupi khokthei tae vanrhücho, osi Israel jiang na ompvü methak yilan jiang engalo hojilo wotacho. 6 Tsüngona lo ompvü na Naphatali Kedesh yantsü lo vamo Abinoam tsoe Barak ji thüngi heto oyi yencho, "OPVÜI, Israel Potsow na heto ezoala: 'Naphtali tona Zebulun to lona wothüng taro sosi Tabor phunglani woa. 7 Ana Jabin rasan esopvüi Sisera sosi oro Kishon zhükhfü lona ni thüngi ori tsswothukvüka. Ombona ritsso zotoro osi kurü soa khatola ana ni khi ombo khywothukvüka.' " 8 Tole Barak na janlancho, "Nina a nzo ona anaha wovka, osi nina a nzo n rona anaha wov meka." 9 Tole ompvüna janlancho, "Toka ana ni phana rovka, tolea nina ekhyo lo therhakvü meka, ntiotssole OPVÜI na Sisera ji eloe tsüka khelo theyiv sala." Hojito Deborah na Barak nzo Kedesh lo wotacho. 10 Barak na Naphtali tona Zebulun pvüji to jiang Kedesh lo tsarhyucho osi eboe wothüng taro na ombo phana wocho. Deborah ha ombo phana wocho. 11 Jithüng ji Kenite kyon Heber na Kedesh ndüngo Zanannim lo lümro dung ji ndüngo nchenphen tssae vancho. Ombona Kenite kyon thanpoe, Moses onüng Hobab ji tsoronichen jiang thüngina nkachoe vancho. 12 Barak na Tabor phunglani chüngithaka to Sisera na ntsiale, 13 ombona ombo ritsso zotoro yonjak na jowo jiang tona ombo rasan jiang to topvü pvüjipoe meta Harosheth lona Kishon zhükhfüi yithukcho. 14 Jisülo jo Deborah na Barak ezocho, "Woa, OPVÜI na ni soaka, nchüng ombona Sisera ekhyov ni pithaka." Tole Barak na Tabor phunglani na ombo rasan wothüng taro ji sosi khochicho. 15 Barak na ombo rasan sosi ritsso sakatale OPVÜI na Sisera tona ombo rasan osi ritsso zotoro jiang hamatsüi sithukcho. Sisera na ombo ritsso zotoro lona joyi ojoe na tsancho. 16 Barak na ritsso zotoro tona rasan to jiangji pvüjipoe meta Harosheth jana phanchicho, osi rasan topvü lüngtharacho. Tsüka tia n nhyokacho. 17 Sisera na Kenite kyon Heber ji engh Jael to tsao ji süranki tsani yicho, ntiotssole Hozor me sawo Jabin na Heber wopan thüngi khyingta vancho. 18 Jael na Sisera chiwo nduki ezocho, "Rheyia, tsüphoe yo, a süranki rheyia osi ti kyua." Ombona rhowole ompvüna zonchaksü sülami ombo mphothukcho. 19 Ombona ompvü ezocho, "A eratsünga ka nzansi ojü a yuthuka." Ompvüna sofü sükvü lo shirojü jücho khichei ombo yuthuksi ombo mphothuklancho. 20 Jisülojo ompvüna ombo ezocho, "Süranki kipüngi mangi vana, osi ochona sana ranki chungi vevan to ni engana n van to ezoa." 21 Sisera ji mmoktsüngi yipi sicho. Tole Jael na lendan tona eshenphen to bensi yingto ehungo lendan ji ombo kvüri esanawoe na esheni likoe eshenkae ombo chüthukcho. 22 Barak na Sisera yana role Jael na chiwo nduki ezocho, "Roa, nina yana vamo kyon ji ana ni ejüvka." Ombona ompvü phana rhowole Sisera ji lendan na kvüri lona likoe eshenkae chüi lia hungcho. 23 Hoji tsüngono OPVÜI na Israel jiang khi Kanaan mesao Jabin ji khyothukcho. 24 Ontena ombo n chüthukthüng jo ekhyoka ekhyoka na ombo tssethukcho.
Deborah ha Barak Oni Khen Ji
1 Hoji nchuk Deborah ha Abinoam tsoe Barak onina okhen shi dentacho: 2 OPVÜI Thünga! Israel jiangna ori tssov methakthaka; kyon jiangna emathata ontebobo khichothaka. 3 Engatava, nte mesaeden! Engatava, Yanasaronden! Ana Israel Potsow OPVÜI ji thüngi okhen dena khenzhü rhüv. 4 OPVÜI, nina Seir phunglan lona khochiathüng, osi nina Edom metae na chiyiathüng, Limha shi enhyokcho osi oyaki na eryu jocho. Ho, eluk jiang lona ojü phyangchocho. 5 Sinai lo OPVÜI ji mhadungo phunglan jiang enhyokcho, OPVÜI, Israel Potsow nhadungo. 6 Anath tsoe Shamgar tsüngono, Jael tsüngono, yentsae jiang na yenlan n tssov sicho; osi yentsae jiangna erhülan tae dungtacho. 7 O, Deborah ni n chiyithüng jo Israel yantsü jiang eyinga sirhaki vancho. Tole Israel oyo esüa nina chiyicho. 8 Israel jiang na potsow ethan jiang ethüngche khümale, meta jilo ritsso rheyicho. Israel lo ritssoe wothüng zhüro jiang, ochona sanatia otsso lebuk n bencho alo? 9 Alümbüm jo Israel rasansoe jiang thüngi lia, emathata ontebobo khochio jiang pono lia. OPVÜI thünga! 10 Hoji phyotava, wo kurü ehümvü mankvüi etssoeden, mankvüi ejonka jianglo khothei den, osi yuta topvülo ojoena etssoeden. 11 Engatava! Jükha jiang nkona ontssotao jiang, topvüna OPVÜI ekhyo ji tüngtala; Israel kyon jiang ekhyo ji dentala. Tole OPVÜI kyon jiangna onte yantsüi na khochukracho. 12 Sosi woa, Deborah, Sosi khochia! Sosi woa, khendena soa! Mhadungi woa, Abinaom tsoe Barak, nina khyo jiang sosi yia! 13 Tole longtsüka eli jiangna onte esopvüi jiang yana joyiracho. OPVÜI kyon jiangna ori etssov methaki ombo yana yiracho. 14 Ontena Ephraim lona hayitsüi jorocho; osi Benjamin pvüji tona ombo kyon jiang to sülami etssüngkacho. Rasan esopvüi jiangna Machir lona jorocho, osi tsüphoe jiangna Zebulun lona khochukcho. 15 Issakhar esopvüi jiangna Deborah nzo rocho, ho, Isakhar tona Barak to rocho osi ontena ombo phana hayitsüi wotacho. Tokhatola Reuben pvüji jo chirorae sicho, ontena khekhochiv sana n tsiv sicho. 16 Ontena ntioli olyu jiang nzo sülami vanchola? olyunhyang jiangna olyu tsatao jiang engata vancho alo? Ho, Reuben pvüji ha chirotacho osi ontena khekhochukvü sana n methaku sicho. 17 Gad pvüji na Jordan engkhüwoe vancho, Osi Dan pvüji na orhung jianglo vantacho, Asher pvüji na jümang tssae vanracho osi ontena jüran rhüa vantacho. 18 Tokhatola Naphtali tona Zebulun to kyon jiango onte eküm thana ritssolo wocho. 19 Mesao jiang na Megiddo zhükhfüro tssae oro Tannach lona rotacho." Kanaan mesae jiangna rotacho, tokhatola ontena janti ntia n khicho. 20 Shantio jiangna oyaki na rotacho; Ontena oyakina sanphita, Sisera thüngi ori tssotacho. 21 Kishon jüvak na onte phfüa yiracho Kishon zhükhfü ojü tssomo jina. Ana khochiv, etho jükae khochiv! 22 Jisüi jo kurü jiangna tsukta roracho, onte nkhfü jiangna liko ji ekyima roracho. 23 "Meroz rhiyikata" to OPVÜI lanben na phyoala, "rhiyia, jilo evan jiang ji n mhom rhiyikata. Ontena OPVÜI kyochilo n rocho, rasan esüa oro OPVÜI tsükona n rota." 24 Eloe yolo odon elitso jo Jael, Kenite kyon Heber engh ji- Süranki evan eloe jiang yolo odon elitso ji. 25 Sisera na ojü chonle, ompvü na shurojü ombo picho; ompvü na opvü ezehungu lona shurojü bonshüng thei hana yicho. 26 Ompvü na okhe esana na ranki lentan bencho; kheta na vümphen bencho; Ompvü na Sisera vümi kvüri ji ejüproyicho; ompvü na ombo kvüri ji kavüyicho. 27 Tole ombona khoktseni evümthei sicho, evümthei ompvü jo küpina jükrüpi sicho. Ombona khoktseni ompvü jo lo evümthecho; osi likoe vanthei, chücho. 28 Sisera oyona kherki na zechukchile; ompvü na erakzhüo jiang lona chechukchicho."Ntioli ombo ritsso zotoro jiang sülana n chiyiato?" to ompvüna phyocho."Ntioli ombo kurü jiang heto sülana n chiyiato." 29 Ompvü küpo eloe nchümri elio jiangna ezotacho, osi hoji ompvüna elan elani phyocho, 30 "Ontena tsütsaelan phanchoe chitav yanta vana tssovka, rasan otsük akvü echhi loroe tsük tsük, mekana eniren tona Sisera echhi tssentsü sü, osi mesali tsükona yoko thera lyukacho yanta vana tssov." 31 O OPVÜI, ni ri jiang topvüto hojito chürathuka, tokhatola ni shom jiang jo eng chirocho to tüngrathuka! Hoji sülo meta jilo nzyu zhüro noying licho.
Gideon
1 Israel jiangna elani mmen tssolancho, toli OPVÜI na Midian kyon jiang küpo nzyu tiying onte vanthukcho. 2 Midian kyon jiang ji Israel kyon jiang lona etho jükao jina Israel jiangna longkvü osi phunglani nlhyiphen mmhom jiang lo nlhyitacho. 3 Kvüthüng Israel jiangna mojü yinga sana Midian kyon jiangna Amalekite jiang sosi oro onte hayatacho. 4 Ontena oro jianglo nchenkae mojü thei elio jiang ji jolowoe Gaza jana roe sitacho. Ontena olyu, mangsü, kurü jiang topvü khikhani si Israel jiango ntia enhyoe n vayicho. 5 Ontena onte ekümrümo jiang sosi süranki jiang hantasi khomung rümato khosha sani rocho. Onte osi onte ut jiang topvü n khacheo tata rocho. Ontena oro meta ji tsorüpi siwo jina, 6 Israel jiango ezüp sothe sicho. 7 Tole Israel jiangna Midian kyon jiang khe lona onte shanchole to OPVÜI thüngi randana kyatacho, 8 tole ombona zenkhying tsüka, Israel Potsow OPVÜI yithen heto hansi onte thüngi wothukcho: "Ana Ejip lo ezii eküm lona nte sochechoka. 9 Ana Ejip kyon jiang khelona nte shanchocho, elani meta shilo nte thüngi ori tssoa vamo jiang khelo na nte shanchocho. Nte mhadungi khochi akvü ana ori jiang phani nte siyia yicho osi onte meta jiang nte picho. 10 Aiyo OPVÜI nte Potsow jika to ana nte ezocho osi ntena vamo meta shilo Amorite potso jiang ti khümtale to nte ezocho. Tokhatola ntena a yi n ngacho." 11 Jisülo jo OPVÜI lanben na Ophrah yan jilo joro Abiezer pvüji kyon Joash ji mhadung lümrodung ji kupi khukthei vancho. Ombo tsoe Gideon jo tssüngthijü mmyaphen lo Midian jiang mphoa tssüngthijü mmya vancho. 12 OPVÜI lanben jina ombo thüngi oro ezocho, "O lüm etsson etho ejüi kyon, OPVÜI na ni ndüngo vanka!" 13 Tole Gideon na ombo ezocho, "Tsüphoe yo, ana heto engakhukcho alo? OPVÜI na a ndüngo vana tssona kvütoli shiang hetüv e pono yiala? Nkolo OPVÜI na chethev elhi tssoe Ejip metae e motsüi jiang sochukocho motsü e pvüpoe na ezowo jiango kvütola? OPVÜI na Midian jiang khelo thechi e sisi enhungo e n zev sithaka." 14 Tole OPVÜI na ombo ezocho, "Ana ni wothuka ka, ni etho tsüphov ji khi owo Midian jiang khelo na ni kyon jiang shanchoa." 15 Gideon na ezocho, "Tole ana kvütoli Israel jiang shanchochevla? Manasseh pvüji lo a wopan teritso osi aiyo wopan yolo ethev n litso ji." 16 OPVÜI na janlancho, "Ana ni kyov küma nina tssokhuka. Nina Midian jiang ji kyon tsüka tae esüa meyani sivka." 17 Gideon na ezocho, "Nina a thüngi ematha na nino OPVÜI jito chethev ntio sana a jüa. 18 Ana etsoyu than tara ni nthan thüngjo ti yisa." Tole ombona ezocho, "Nina kholani n yithüng jo ana shilo vamvüka." 19 Gideon na okina nyanyan oro motsünga ekvüi jilo ohüm seri taro khi ebung mozhü n theo hümri rüngcho. Ombona oso ji luksalo thei, sohanjü ji OPVÜIo thei toli, hansi OPVÜI lanben na lümrodung kupi khokthei vamo jilo hansio picho. 20 Tole lanben jina ombo ezocho, "Oso ji tona hümri jiang to longphi shi poni vae jilo sohanjü ji phyangkata." Tole Gideon na hojito tssocho. 2l Tole OPVÜI lanben jina ombona bemo jarung ji khi yonchia oso tona hümri ji to evüngkacho. Tole oyaki na omi joroe oso ji tona hümri ji to rungi sicho. 22 Tole Gideon na jisüiti kyon jijo OPVÜI lanben saya to chethecho osi okhen heto engocho, "Sandamo OPVÜI!, ana ni lanben a mhyik na hungthaka!" 23 Tole OPVÜI na ezocho, "Noyinga vana, Tikyua, ni chüv meka." 24 Gideon na jilo thanphen tssoe heto tsacho, "OPVÜI jo noying." (Hoji jo nchüng jana Abiezer wopan meta Ophrah lo lia) 25 Hoji zümo OPVÜI na Gideon ezocho, "Nipo tssibung ji tona tssibungro thanpo nzyu tiying tüv to khi vasi nipo na Baal thanphen ji roe sia, hoji tssalo Ashera kisü lio jiha roe siyia. 26 Yondonro shi kvüri OPVÜI ni Potsow thanphen chüngchünga tssoyia. Tosi tssibungro enioto ji khi Asher kisü nina roe siwo tssüng jina rungi mpüm than tssoa OPVÜI thana." 27 Gideon na ombo phajae otsük taro sosi OPVÜI na ombo ezowo ji ephan tssocho. Ombona engo hoji etsosv ji ombo wopan tona yantsü jilo kyon jiang to kyuo jina zümoloti tssocho. 28 Yantsü jilo kyon jiangna ojyuato phanthi zetale Baal thanphen ji, hoji tssalo Ashera kisü ji to roe sisi jilo thanphen ethan tssokachi tssibungro enioto ji thancho hungcho. 29 Ontena, "Ochona heto lyuchola?" to phyota emhuktacho. Ontena ethümoe zetale Joash tsoe Gideon na tssocho to zocho. 30 Tole ontena Joash ezotacho, "Ni tsoe Gideon ji shilo sosi yia, ena ombo lüngthav ka. Ombona Baal thanphen ji phiroe sisi ji tssalo Ashera kisü ji roe sicho." 31 Tole Joash na hojilo ombo ryukata vamo jiang topvü ezocho, "Nteno Baal thüngoe theta ke? Nteno ombo phyocheta ke? Ochona ombo yilo theta na ojyua n vonchiv ombo chüvka. Baal ji Potsow tssona ombobo nkohathuka. Ombo thanphen roe esio ji shi." 32 Hoji lona benkae Gideon ji Jerubaal to tsacho, ntiotssole Joash na phyocho, "Baal ha ombobo nkohachethuka, ombo thanphen roe sichoka." 33 Tole Midian kyon jiang, Amalekite tona lijüng kyon jiang to etssirhyui Jordan zhükhfü ji khyingkae Jereel hayi nchentacho. 34 Jithüng OPVÜI mon jina Gideon lo vanyae Gideon na tatara khüa Abiezer pvüji kyon jiang ji ombo sü rüle to tsacho. 35 Ombona Manasseh meta lo yithenpvüi wothuka onte tsathuki ombo thüngoe rothukcho. Ombona Asher pvüji, Zebulun tona Naphatali to kyon jiang tsacho osi ontenaha rocho. 36 Tole Gideon na Potsow ezocho, "Nina a etho khi Israel shanchov to phyocho. 37 Ana eli tsenphen jilo tsansü tara vachochi vavka. Tosi enyathüng jo lenthümsü jilo tae ronren renkae lisi likoe n renkacho hungna, nina Israel shanchov tsükona atsütsatala to ana ntsi khivka." 38 Tole hojito tondüng tssocho. Gideon na ojyua to phanthi zele ombo na tsansü jilo na ojü opvü pyinga zümchocho. 39 Jisülo Gideon na Potsow ezocho, "Athüngi lüm titsukna yenjao aphyolanthuka. Tssansü ji khi yenjao ojang tssolani a zethuka. Enhünga jo lenthümsü ji kyingthuksi liko ji njüi lithuka." 40 Hoji zümo Potsow na hojito tssocho. Ojyuato enya jo tssansü ji kyingserunk na licho osi liko jo njüa vancho.
Gideon na Midian Jiang Khyoala
1 Tsüngona lo Gideon tona ombo woro jiang to na nyazüngi na phanthi Herod jünhyo ndüngo nchentacho. Midian kyon jiang jo Moreh phunglan ndüngo onte Jükiwoe ncheni vancho. 2 OPVÜI na Gideon ezocho, "Nina sonhyao kyon jiang Midian jiang khyov jo kyungtia. Ontena onte otssomo jina khyocho tsayia a etho ji nchekav siv. 3 Thenchoa, 'Kyon jiang yolo ochona nsüpa na oki kholani yile to, osi etena shilo Gilead phunglani vamka to ezoa.' " Tole wothüng mekyu eni kholani yisi wothüng taro enhyoe vancho. 4 OPVÜI na Gideon ezolancho, "Enhünga ha nte kyungtihan, kyon jiang zhükhfüi sanchothuka tona ana jilona ni khosotayivka. Kyon ocho nina sonhya to ana phyoana jina rovka, osi ochojo ana ni phana ti role to ana ezoana jina jo rov meka." 5 Gideon na kyon jiang sosi ojüi jowole OPVÜI na ezocho, "Kyon ochona ojü yuathüng füro na yuato mmyaka yuana jiang tona ochoangna khoktseni yuana jiang to khotathuka." 6 Tole otsük nzo ethüm na onte khena wokae fürona yuato yucho, osi thanpoe jiango khoktseni yuracho. 7 OPVÜI na Gideon ezocho, "Otsük nzo ethüm na ojü okhena wokae yuo jiang khi ana Midian jiang ni khywothukvüka. Thanpoe topvü oki yitale to ezoa." 8 Tole Gideon na otsük nzo ethüm ochoangna etsoyu osi tatara ethelan eli jiang vachosana jiang tae vanthuksi thanpoe topvü oki yithukcho. Midian jiang nchenphen jo onte küpoe hayitsü jilo tssocho. 9 Hoji zümo OPVÜI na Gideon ezocho, "Phanthi onte nchenphen ji hayatava; ana ekhyo ni piv saka. 10 Tokhatola ni kyua to tssona ni phajae Purah sosi onte nchenpheni jowoa. 11 Tona ontena phyotao jiang nina zoe ni lüm tssonkae onte havka." Tole Gideon na ombo phajae Purah sosi ori jiang nchenphen ji tssae jowocho. 12 Tole Midian jiang, Amalekite jiang tona lijüng jipo kyon jiang to hayitsü jilo khomung rümkachoto tüngi vancho, osi onte ut jiango jümang tssae hajang tata vancho. 13 Gideon na hojilo chiwole kyon tsükana ombo müng rüa oshom ezoa vancho, jijo heto, "Ana omüngi ji, omüm hümri motsünga eria oyi ete nchenpheni süranki lo vümkale süranki ji vanthei likoe epyakthei sia emhacho." 14 Ombo shom jina janlancho, "Hojijo Joash tsoe Gideon, Israel kyon ji yonri jika, thanpo tssov meka! Potsow na Midian jiang tona ete rasan topvüto ekhyov etho ombo pithaka!" 15 Gideon na kyon ji müng ji yichak ji zoale, khoktseni Potsow khümcho. Ombona Israel jiang nchenpheni oyi phyocho, "Phanthitava! OPVÜI na Midian rasan jiang ekhyov nte pithaka!" 16 Ombona rassan nzo ethüm ji okho ethüm chirotae otsük akvü tatara tona mvüryu lo milon thei toli piracho. 17 Ombona ezocho, "Ana ori nchenphen ji tsssae chiwoa na a zeta vantasi ana ntio tssoana hojito tssotava. 18 A tona a nzo etssoe to na tatara khfütana nte topvüna nchenphen ji nkonzhüa nte tatara jiang mhümtava osi heto phyotava, 'OPVÜI osi Gideon tsükona!' " 19 Gideon tona ombo nzo otsük nzoa jiang tona zümo longo enhyang tongphitapanthüng ori nchenphen ji tssalo chiwocho. Ontena tatara jiang khfükachia mvüryu bemo jiang tarhüptacho, 20 tole okho eni jiangna ha hojito tssocho, onte topvüna hayiwoe na milon ji bentasi hamimoe na tatara ji benta tosi tüngkachitacho, "OPVÜI tona Gideon to tsükona yonri!" 21 Otsük akvüna ori nchenphen ji hachüma ombo ombo zaphen lo zacho osi rasan jiangna eronta tsanroe sicho. 22 Gideon wworo jiangna tatara khfüale OPVÜI na ori jiangji onte bobo yonrina lüngthatao nsüngrücho. Ontena Zarethan metawoe Beth Shittah jana osi Tabbath ndüngo Abel Mcholah yantsü jana tsantacho. 23 Jisülo jo Naphtali pvüji, Asher, tona Manasseh meta enita lona kyon tsanchukrae onte topvüna Midian jiang phantacho. 24 Gideon na yithenpvüi wothuka Ephraim phunglan meta topvülo heto ezorathukcho, "Joro Midian jiang thüngi ori tssotava. Jordan zhükhfü tona jüro jiang to topvü Bethbarah jana nkonyae vanthuka." 25 Ontena Median ekhüng otsük eni Oreb tona Zeeb to rhümae Oreb ji Oreb longroyo lona chüthuk, Zeeb ji Zeeb tssüngthijü mmyaphen ji ndüngona chüthuk to tssocho. Ontena Midian jiang phanlana wotacho osi Oreb ha Zeeb oni kvüri ji Gideon thüngi Jordan engrhewoe hansi yitacho.
Midian Jiang Khyothechikhao Ji
1 Ephraim kyon jiangna Gideon ezocho, "Ntena Midian jiang thüngi ori tssoathüng ntioli e n tsanhyatachola? Ntena ntioli heto etsütsatala?" Ontena hojito phyoa elümoto erinjantacho. 2 Tole Gideon na ezocho, "Ana ntio tssocho sana jijo ntena etsso jilo etsitana ntia meka. Nte Ephraim kyon na ejükaro tsso jijo a jipo topvüna tsso jilona kyongkata. 3 Ntena Potsow etho yakchia Midian ekhüng otsük eni Oreb ha Zeeb oni lüngthacho. Ana jo hoji esüa elhi tsüphov kvülo tssohanchola?" Ontena hoji zoale tata lüm n tsukvü sicho. 4 Hojithüng jo Gideon tona ombo woro nzo ethüm jiang to na Jordan zhükhfü ji oro jani zhükhfü pankae vanthakcho. Onte ji sangtsüngrathakcho, khatola ori jiang phanta vanpvü tssocho. 5 Ontena Sukkoth lo chiwo Gideon na yantsü jilo kyon jiang ezocho, "Nzansi a woro shiang hümri tara pitava. Onte ji mmuktsüngra thaka, osi ena Midian mesao Zalmunna ha Zebah oni phanala." 6 Tole Sukkoth esopvüi jiangna phyotacho, "Ntioli ena ni rasan jiang etsoyu pivla? Ntena Zebah ha Zalmunna oni n rhümahan." 7 Tole Gideon na ezocho, "Toka OPVÜI na Zebah ha Zelmunna oni rhümav etho a pithakana ana lijüngi yiza osi okyo khfüi nte erhüpvüka!" 8 Gideon na Penuel loha owo yilantsük ji jonjicho tole ontena ha Sukkoth kyon jiangna phyo ji esüa phyocho. 9 Tole Gideon na ezocho, "Ana mmhona kholani yilamka, osi ana nte rizümphen zenki jiang vanchüchüi nte siyivka!" 10 Zebah ha Zalmunna onio oni rasan sosi Karkor lo vancho. Lijüng rasan topvü tssotsüi wothüng taro mungo harüma tae enhyoe vancho; osi rasan wothüng nzoasi mekyu jo lüngthathakcho. 11 Gideon na Nobah tona Jogbehah to engkhfüwoe lijüng ji tssa rhüa owo ori jiang mphoa vükthechicho. 12 Midian mesae otsük eni, Zebahha Zalmunna onina tsantacho khatola ombona phani oni rhümale oni rasan jiang ekhenrhükcho. 13 Gideon na rotapheni na khoe Heres eyaklan jilona chiyi Sukkoth yamo khyingroe tsüka rhümae engacho. 14 Tole khyingroe jina Sukkoth lo ephyo esan otsük ekhatiyingsi tiying mying erani Gideon picho. 15 Tole Gideon na owo Sukkoth lo kyon jiang ezocho, "Ntena a kyochiv ekhiramo ji chenchümche? Ntena a rasan khangtsünga vamo jiangji ana Zebah ha Zalmunna oni n rhümav jo etsoyu n pi to phyotacho. Onio shiang je!" 16 Tothakale ombona lijüngi na okyo osi yiza khero khi Sukkoth kyon jiang erhüpcho. 17 Ombona Penuel lo rizümphen jiha vanroe siyisi oyan jilo kyon jiangha lüngtharae sicho. 18 Jitosi Gideon na Zebah ha Zalmunna oni ezocho, "Ntena Tabor lona lüngthao kyon jiango kvütola?" Ontena ezocho, "Onteha nte esüa tüv otsük akvü mesao tsoe esüa tüv." 19 Gideon na phyocho, "Onteno a jeniden, ayo tsoeden. Ana otsotso echümala, ntena onte n lüngtha to tssona anaha nte n lüngtha." 20 Tosi ombona ombo tsoe erantso Jether ji heto ezocho, "Owo onte lüngthata!" Tokhatola khyingroe jina yonri n süchukcho. Ombo ji nunghori tsso jina ombona titocho. 21 Tole Zebah ha Zalmunna onina Gideon ezocho, "Nina oro e lüngthata, eboe elhijo eboena tssov lia." Tole Gideon na onte lüngthasi onte ut evüngo oyuk-osen jiang khiyicho. 22 Hoji sülo Israel jiangna Gideon ezocho, "Ni osi ni tsoronichen na e sOPVÜI tssotava. Ntena Midian jiang khelona eshanchothaka." 23 Gideon na ezocho, "A osi a tsoe na nte esopvüi tssov meka. OPVÜI na nte savka." 24 Ombona ezocho, "Nte otsük akvüna eno thera khio jiang a pitava." (Lijüng kyon thanpoe jiang esüa Midian kyon jiangna thera enocho.) 25 Kyon jiangna janlancho, "Ena emathata ni pivka." Ontena osü sachi jilo otsük akvüna ontena khio thera jiang thetacho. 26 Gideon na shona thera khio jiang tssotsüi seri mekyu bencho, jilojo Midian mesao jiangna enowo osi onte ut na eyiko oyok-osen jiang n khanhya. 27 Gideon na shona jiang khi kisü nsüngrüi ombo yantsü Ophrah jilo vacho. Tole Israel topvüna Potsow ji mhechoe sisi kisü khümo hojilo wocho. Hojijo Gideon tona ombo wopan to tsükona tsirhi esüa tssocho. 28 Hojito Midian ji Israel jiangna khyoe sisi ekyuv n liv sicho. Gideon na n chüthüng nandang meta jilo nzyu zhüro noying licho.
Gideon Chüo Ji
29 Gideon na ombo ki elani oyi vani sicho. 30 Ombona eloe khosha vamo jina otsoe ekhatiying van cho. 31 Ombona Shechem loha yingalore vancho. Osi ompvüna ha otsoe buki Abimelek to tsacho. 32 Gideon ji sontsüngi chücho osi Abeizer pvüji yantsü Ophrah jilo opo Joash khüp jilo ombo shothecho. 33 Gideon chüthakale Israel jiangna elani OPVÜI jancho n zov Baal khümta yicho. Ontena Baal ji onte potsow kümthukcho, osi 34 OPVÜI ochona onte ri khelona onte shanchocho sana ji n khümtav sicho. 35 Osi Gideon na Israel tsükona kvüta elhi tssochosana ji wopan thüngi ha montsso to n tssocho.
Abimelekh
1 Gideon tsoe Abimelek na Shechem yani owo, oyo wopan vamo jilo eboe jiang heto 2 ezole to ezocho, "Nteno Gideon tsoe otsük ekhatiying topvüna nte sathukhunga alo? Tsüka taena nte sathukhugala? Abimelek jo nte ejenoso motsünga to ti mhechotava." 3 Tole oyo wopan jiangna ombo wopan tssoa Shechem ky won jiang thüngi hojito ezoyicho. Tole Shechem kyon jiangna Abimelek küpo tssov methakcho, ntiotssole onte wopan tsso jina. 4 Ontena Baal khümphenina janti rang ekhatiying khi ombo pile ombona hoji ethev n lio nthae kyon shirhyui ombo thüngoe tssothukcho. 5 Ombona Ophrah lo opo ki owo olong motsünga ponina ojenio ekhatiying Gideon tsoe jiang lüngtharacho. Tokhatola Gideon tsoe wokhao Jotham jo mphoe vamo jina n lüngthacho. 6 Tole Shechem tona Bethmillo to kyon jiang tssotsüi owo Shechem lo ntho lümrodung jilona Abimelek ji mesao kümthukcho. 7 Jotham na hoji zoale Gerizim phunglan kvüri eshoni heto onte tüngcho, "O Shechem kyonden, ana phyo shi engatava, tona Potsow na nte yi engayivka! 8 Tsüngnalo odung jiangna onte mesao ethüngu etsirhyutacho. Ontena olive dung ji onte mesae tssole to ezotacho. 9 Tole olivedung jiangna phyocho, 'Ana nte esopvüi tssoa na Potsow osi kyon yikrachi ejüphen thyujü chiyithukvü mek.' 10 Tole odung jiangna züwodung ji owo ezotacho, 'Oro e mesao tssoa.' 11 Tole züwodung jina phyocho, 'Ana nte esopvüi tssoana a tssüngthi enüngu ji n thithukchev siv.' 12 Tole odung jiangna jününgrozhü ji ezotacho, 'Nina oro e mesao etssoyia.' 13 Tole jününgrozhü jina ezocho, 'Ana nte esopvüi tssoana ana yuphen mmhom chiyithuki Potsow osi kyon emathathuko ji n tssochev siv.' 14 Tole odung topvüna okyodung ji ezotacho, 'Nina oro e mesao etssoyia.' 15 Okyodung jina ezocho, 'Ntena otsotso nte mesae a tssothuk hungna oro a kupi khümcho nlhyitava, to n tssoana a okyo khero jiang lona omi buki Lebanon lo cedar dung jiang rungi sivka.' 16 Jisüi jo Jotham na heto ezocho, "Hoji tsükona, ntena Abimelek ji nte mesae tssothuko ji otsotso lüm joa tssocho alo? Ntena Gideon nchümchei yikrachia ombo elhi mmhom ji man ombo wopan jiang yikrachialo? 17 Apona nte tsükona ori tsso jiang ti mhechotava. Ombona Midian jiang khelona nte shanchov tsükona ombo eküm epi njan rotacho. 18 Tokhatola ntena nchüngo apo wopan thüngi ori kümthaka. Ntena ombo tsoeden otsük ekhatiying, bokhying jiang olong motsünga ponina lüngthacho, osi apo yingalore ji tsoe Abilemek oyo ji nte wopan tsso jitaena ntena omboji Shechem lo mesao kümthukcho. 19 Hoji tsükona ntena Gideon tona ombo wopan to thüngi tssothako ji elanthata to tssona Abimelek thüngi emathata vantava. Osi omboha nte thüngi emathathuka. 20 Jito mekcho tssona jiha Abimelek lona omi chiyi Shechem tona Bethmillo to kyon jiang tona Abimelek to rungtsüngi sithuka." 21 Jitosi ojenio Abimelek kyuo jina Jotham na tsani oyi Beer lo vancho. 22 Abimelekh na nzyu ethüm Israel sacho. 23 Tole Potsow na Abimelekh tona Schechem kyon to ori kümthukcho osi ontena Potsow thüngi ha n khyingtav sicho. 24 Heto tsso shijo Abimelekh tona Schechem kyon ochoangna ombo ntssungi Gideon tsoe jiang lüngthathukcho sana jiang to jokheman piv tsükona tssocho. 25 Shechem kyon jiangna phunglan kuri na Abimelekh zümta vansi kyon kvüta yakchiana retsoyi tacho. Osi hoji Abimelekh thüngi ezocho, 26 Jithüng Ebed tsoe Gaal na ojenio jiang sosi Shechem lo rotale Shechem kyon jiang na ombo longtsükacho. 27 Onte topvüna onte jününgroli owo tssüngthi lhorae oyi hojina zükhi nsüngrüi vatasi tokhu tssotacho. Ontena onte potsow khümphenina owo tsoyutasi Abimelekh thüngi karangtacho. 28 Gaal na phyocho, "Ete Shechem kyon jo kvütüv tae ato? Eteno ntioli Abimelekh küpo vanta to? Ombo ocho yila wole? Gideon tsoe lojo! Zebul na ombo yizüng engayiala, tokhatola etena ntioli ombo benkavla? Nte motsüi Hamor, nte pvüji chenkaphen ji yikrachitava! 29 Ana kyon shiang esopvüi salivo to nchüma! Tovo ana Abimelekh ji khi siv je! Osi heto ombo ezov, "Ni rasan jiang ekhfürhyua, osi chiyi ori tssotava!' " 30 Yantsü ji esae Zebul na, Gaal na phyo yi ji zoe lüm tsukcho. 31 Hoji tsükona ombona Arumah lo Abimelekh thüngi heto owo ezole to ezoa yithenpvüi wothukcho, "Ebed tsoe Gaal na ombo ojenio jiang sosi oro Shechem lo vana osi ontena yantsüi ni n rhowothuk to phyotala, 32 hoji tsükona ni woro jiang sosi zümo na sani oyi oli mphotava. 33 Osi ojyua engchirobüngo phanthi zakto yantsü ji hatava. Osi kvüthüng Gaal na tona ombo woro jiang tona nte rokalo chiroa sana, nte eto onte ekayitava!" 34 Hoji tsükona Abimelekh tona ombo woro to jiangna zümolo sani chiyi okho mezhü chichei Shecehm tssae mphoe vatacho. 35 Osi Abimelekh tona ombo woro to jiangna chiro yantsü pikhfü lo manga vana hungale ontena mphopheni na phanthiracho. 36 Gaal na onte hungi Zebul ezocho, "Zeta, phunglan kvüri na kyon sanjoa vana!" Tole Zebul na ezocho, "hojiang jo kyon mek, phunglan ji khümcho tae." 37 Gaal na phyocho, "Zeta, phunglan kvüri na kyon joyira vanka, onte razhü khosha, osi razhüa jo methevüjaphen lümrodung jilona olan dunga tsata!" 38 Tole Zebul na ombo ezocho, "Enhungo ni kangtsü ji kvüla? Abimelekh shi ochona benkav la? to ephyo ji ni. Shiango nina tssaka zewo kyon jiang je. Nra khochi owo onte thüngi rotava." 39 Gaal na Shechem kyon jiang sochuki Abimelekh thüngi rotacho. 40 Gaal na tsancho osi Abimelekh na ombo phancho. Osi yantsü ji kibüngona mpa kyon elümoto meyancho. 41 Abimelekh na Aruma lo vancho osi Gaal tona ombo ojenio to jiang ji Shechem lona phani sicho osi jilo onte n vanlanthukcho. 42 Ojyuato jo Shechem kyon jiang na Oliwoe yitav sala to Abimelekh na ntsicho, 43 hoji tsükona ombona ombo woro jiang sosi okho ethüm chichei oli owo mphoe nhyakta vancho. Kyon jiangna yantsüi na chiyia hungale ombona onte lüngthalo chiwocho. 44 Osi Abimelekh tona ombo woro jiang to na yantsü pikhfü ji nkoyalo yiathüng oli kyon okho eni mphoe vamo jiang na kyon jiang hayae lüngtharacho. 45 Osi onteji eng totona rotacho. Abimelekh na yantsü ji hayae, kyon jiang lüngtharae sisi, yantsü ji roe sisi liko ji oma na eyepyingi sicho. 46 Shechem lo rizümphen jilona kyon opvü etssoe jiangna shi zoale ontena Baal khümpheni tsanthei mphotav yancho. 47 Onte ji jilo etsseni vana to Abimelekh na zoale, 48 ombona ombo woro jiang nzo Zalmon phunglani chungocho. ji lona ombona opvü khi odung khero motsünga etssachochi ombo epvülo ekachicho. Osi ombo woro jiangha zakto hojito tssole to ezocho. 49 tole onte otsük akvüna khero etssachoe ontena Abimelekh sülo etssüngkata khero jiang ji rizümphen jilo hankatacho. Hojitolyui ontena rizümphen jilo omi thecho osi hoji chungi evan eboe, eloe to tsotsüi otsük wothüng bena chücho. 50 Jisülo jo Abimelekh na Thebez lo owo yantsüji hacho. 51 Tole hojilo zenki chüngchüngu licho osi eboe, eloe elani esopvüiden to jilo santaiei vancho. Ontena ontebobo khalanchi mhonki sankacho. 52 Osi Abimelekh na hoji hayalo roathüng ji jilo omi thev tsükona kibüngo wocho. 53 Tole jithüng eloe tsüka na hümchenphen long vachochia kvürilo ombo vaniajo kvüri ji kherhüpcho. 54 Tole ombona zakto ombo yonri ehamo khyingroe ji tsae ezocho, "Eloe na alüngthacho tojo a nphyohungka zakto ni yonri ji khichei a lüngthae sia." Tole khyingroe jina ekhyiptsüngi ombo chüthukcho. 55 Abimelekh chüthaka to yivon zoale Israel jiangna oki sani yiracho. 56 Hojito lyui Abimelekh ji ombona ojenio ekha tiying lüngthao ji Potsow na ombo nlilancho. 57 Gideon tsoe Jotham jina rhiyikata thüng phyo ji esüa Potsow na Shechem lo kyon jiang ji onte ntha man ezüp picho.
Tola
1 Abimelekh chücho sülojo Dodo tsorüi osi Puah tsoe Tola na Israel jiang vachiv tsükona chiyicho. Ombo Issakhar pvüji kyon osi Ephraim phunglan meta Shamir lo evan tssocho. 2 Ombona Israel esopvüi nzyu mekyusi ethüm tssocho. Jisülo jo ombo chüi Shamir lo shothecho.
Jair
3 Tola echü süijo Gilead lona Jair chiyicho. Ombona ha nzyu mekyusi eni Israel sacho. 4 Ombo na tsokhying thümro vancho osi onte na kurü thümro lo tsankacho. Onte na Gilead metalo yantsü thümro licho osi hojiang ji nchüng jana Jair yan to tsatala. 5 Jair ji chüi Kamon lo shothecho.
Jephthah
6 Israel jiang na elani Baal tona Astrate to khüma OPVÜI mhadungo mmen tssocho. Ontena Syria, Sidon, Moab, Amon tona Philistia to potsow ha khümta yicho. Osi ontena OPVÜI ekhümvü ji esani sita ombo khaki sitacho. 7 Hoji tsükona OPVÜI na Israel jiang thüngi lüm tsuki Philistine jiang tona Amorite to jiang khi onte khyothukcho 8 Gilead lo Jordan zhükhfü engrhewoe Amorite metalo Israel vamo jiang nzyu taro tiza khangricho. 9 Amorite jiangna Jordan ji mpa bankae chiro Juda, Benjamin toha Ephraim to thüngi ori tssocho. Hojito Israel ji elümoto ezüpcho. 10 Tole Israel jiangna OPVÜI thüngi kyata phyotacho, "Ena e Potsow ni sisi Baal potsow khümta ni mhadungo mmen tssothaka." 11 OPVÜI na heto janlancho, "Ejip kyon jiang, Amorite jiang, Ammonite, Philistine, 12 Sidon jiang, Amalek tona Moab kyon jiang tona ovüngthüng nte khangshicho. Tole ntena athüngi kyata jonjitacho. Hoji tsükona ana hojiang khelona nte n shanchocho ke? 13 Tokhatola ntena a sisi potsow thanpo khümtacho, hoji tsükona ana nte shancholam meka. 14 Ntena ethüngi khio potsow ji thüngi owo kyatava. Nte ezüp yutalo onte khi nte shanchothuka." 15 Tole Israel jiangna OPVÜI ezocho, "Ena mmen tssothaka, nina ni etancho tssoa, tokhatola nchüngo e shanchoa."16 Tole ontena jipopoe potsow jiang sisi OPVÜI khümcho; tole ombona Israel ezüp ji sisi wongkhyua nchümcho. 17 Jisülo jo Amon rasanden jiangna ritsso tsükona Gilead lo vanphen methakta vancho. Israel jiang ha Gilead lo Mizpah jilo vanphen methakta vancho. 18 Israel esopvüiden osi kyon jiangna heto engata benkacho, "Amon kyon jiang thüngi rotav ochona e sovla? Ochona esopvüi tssoana jina Gilead lo evan topvü sovka."
1 Jephthah to tsao Gilead yamo rasan lüm etsson jijo lonsülonphyoe tsoe tssocho. 2 Opo Gilead na ombo engh tsotso ji nga ro elüm vamo jina onte khyochetale Jephthah ji okina phani sicho. Ontena ombo ezocho, "E opo thüngina nina ntia tssentso hungu meka; nino eloe thanpoe tsoeka." 3 Jephthah na ojenio jiang thüngina tsani oyi Tob metalo vancho. Hojilo ombona ethelan n li kyon okho motsünga tssüngyae ombo phanphithukcho. 4 Jitosi yuta tara süloti Amon kyon jiangna Israel thüngi ori tsso cho. 5 Hojito tssoale Gilead lo eso pvüi jiangna owo Jephthah ji Tob meta lona sosi yicho. 6 Ontena heto onte ezoa tsatacho, "Oyi nina esoa Amon jiang thüngi ori tssotava." 7 Tokhatola Jephthah na janlancho, "Ntena a tssaka apo kina phani a sicho, tona ntioli nte ezüp yuta loti oro atsatala?" 8 Tole Israel jiangna ezocho, "Ena ni thüngi ro jijo ni khi esoa Ammon kyon jiang thüngi ori tssotav tsükona osi Gilead lo esopvüi ni kümthukvü tsükona ka." 9 Tole Jephthah na onte ezolancho, "Ntena asosi oyi ori tssotale OPVÜI na etho a pia ntena toa tssona ana nte esopvüi tssovka." 10 Tole ontena janlancho, "Ena hotoji e lümna rünga, OPVÜI jo e hungpvüi ka." 11 Jephthah na Gilead esopvüi jiang phana o cho. Osi ontena omboji onte esopvüi osi esapvüi kümthukcho. Jephthah na ombo etümezi jiang OPVÜI mhadungo Mizpah lona phyoe engathukcho. 12 Jisüi jo Jephthah na yithenpvüi wothuka Ammon mesao ji heto ezothukcho, "Nino ntio ntana a thüngi khontala? Ntio tsükona e meta thüngi ori tssoala?" 13 Ammon mesao na Jephthah yithenpvüi ji heto janlancho, "Israel jiangna Ejip lona chiyiathüng a meta ji Amon zhükhfü lona Jabbok zhükhfü tona Jordan zhükhfü to nandang a khiyicho. Enhungo ntena hoji noying lona a pilantava." 14 Jephthah na elani heto ezoa yithenpvüi wothuklancho 15 Israel na Ammon metae osi Moab meta khicho n li, hojijo ejüng. 16 Oyi ji heto: Israel jiangna Ejip lona khochi Aqaba jüyi jiang lona lijüng yakchia Kadesh lo rheyicho. 17 Jisülo jo ontena Edom mesao thüngi ombo meta onte yakchithukle to yithenpvüi wothukcho. Tole Edom mesao jina onte n yakchithukcho. Ontena Moab mesao ha hojito engataha onte n yakchithukcho. Hoji tsükona Israel jiangna Kadesh lo vani sicho. 18 Jitsükona ontena Edom tona Moab to lijüng yakchia oyi Amon jütssa esanawoe Moab na engkhfüwoe chiyicho. Ontena jilo vancho khatola Amon n yakchicho, ntiotssole hojijo Moab erü tssocho. 19 Jisüi jo Israel jiangna Heshbon lo Amorite mesao Sihon thüngi onte meta yakchia yithukle to chonthukcho. 20 Tole Sihon na Israel jiang n yakchithukcho. Ombona ombo rasan sosi oro Jahaz lo vani Israel thüngi ori tssocho. 21 Tokhatola, OPVÜI Israel Potsow na Israel jiang ekhyo pia Sihon tona ombo rasan jiang to khyothukcho. Hoji tsükona Israel na Amor kyon na vamo meta jianglo vani sicho. 22 Israel na Amor meta topvü, Jüjowoe Amon lona benkae jükiwoe Jabbok nandang, tona engrhewoe lijüng jilona Jordan na engrhewoe nandang to khicho. 23 Hojito Israel Potsow OPVÜI jina ombo kyon Israel jiang tsükona Amorite kyon jiang phani sicho. 24 Ntena hoji nte khilanhunga alo? Ntena nte potsow Ghemosh na nte pio jiang vavka. Tokhatola e OPVÜI Potsow na epio jiango topvü ena vav. 25 Nteno Zippor tsoe Balak, Moab mesao jilona mmhonkata to nchümata alo? Ombona kvüthüngha Israel merang cho n li, toalo merang chola? Ombona ethüngi ori tssocho alo? 26 Israel na Heshbon, Areor tona hojiang nkonphia oyan jiang elani Amon zhükhfü tssalo yantsü shiang tolo nzyu nzo ethüm vanthaka. Tona ntena hetenhya meta jiang n khilan na vanta choke? 27 Meka, ana ntia nte n lümo nte n tssoyihan ka. Ntena a thüngi ori tssoa a nlümo a tssoyicho taeka. Ehungpvüi esüa OPVÜI vana, ombona nchüng Israel tona Ammonite to yutalo methak khivka." 28 Tokhatola Jephthah thüngina yithen eyio shiji Ammon mesao na n ngayicho. 29 Hojisüi jo OPVÜI mon jina Jephtah lo oro vancho. Osi ombona Gilead tona Manasseh tolo osi Gilead lo Mizpah jilo oyi elani Ammon lo wocho. 30 Jephthah na OPVÜI thüngi phyochakcho; "Nina Ammon jiang pono ekhyo apia tssona, 31 a kina ochona chiro a ndukdena sana ji rungi ni thamka, Osi ana hoji kyon tsük ji erungthan tssoa ni thamka." 32 Osi Jephthah na Ammon jiang thüngi ori tssolo zhükhfüi bankae khochicho, osi ekhyo ji ombo picho. 33 Ombona Aroer lona onte nduki rotacho osi Minnith hakon jiang jana yantsü mekyu jiang osi Abel Keramin jana hayacho. Hojithüng kyon elümoto lüngthacho osi Israel jiangna Ammon jiang khyocho.
Jephthah Otsolov Ji
34 Kvüthüng Jephthah na Mizpah lo ombo ki kholani yicho sana jithüng ombo otsolov jina sharia tsüngrüngu ekhophia ombo nduko chirocho. Ompvüo Jephthah otsolov nthi ji. 35 Ombona ompvü hungchiale ombo nungra lona ombo sü jiang nthyuroe sia phyocho, "O atsolov, nina alümbüm a royithaka! Kvütoli nina a lümbüm a royio tssochechola? Ana OPVÜI thüngi phyochak mmyingu vathaka, osi ana hoji n kilanche!" 36 Ompvüna ombo ezocho, "OPVÜI na niri Ammon jiang ni nlilathukthako ji tsükona nina phyochaki vao ji ephan tssoa." 37 Tokhatola ompvüna opo thüngi heto ezocho, "A tsükona shi a tssoyia, choro eni yuta apia a shom jiang nzo phunglani na ehungo loro ekümona echüv ji a nungrathuksa." 38 Hoji tsükona ombona choro eni tsükona wole to ompvü ezocho. Ompvüna oshom jiang nzo phunglani ehungo n yanpina osi otsoe n boku chüv ji tsükona nungratacho. 39 Choro eni sülojo ompvüna opo thüngi joyicho. Osi ombona OPVÜI thüngi phyochako ji ephan tssocho; osi ompvü ji loro ekümo na chücho. Hoji lona benkae Israel lo loroe jiangna 40 nzyualo tsüngon mezhü jo okina hapoe khochoki owo Gilead lo Jephthah otsolov ji müngyanchitala.
Jephthah Tona Ephraim Jiang To
1 Ephraim lo eboetso na ritsso tsükona methakcho. Ontena Jordan zhükhfü pankae Zaphon lo owo Jephthah ezotacho."Nino ntioli e n tsav Ammon jiang ori tssolo Jordan pankae ochola? Nina vamo kiji rungi ni siyivka!" 2 Tole Jephthah na onte ezocho, "Ana a kyon jiang thüngi Ammon jiang tsükona elümoto khontacho. Ana nte tsacho khatola ntena onte khelona a n shanchohungcho. 3 Ntena a n zanchi to ana zecheo jina ana a popo a eküm na thana Jordan pankae chiwocho, tole OPVÜI na onte ekhyov a picho. Tona ntena ntioli enhüngati oro khontala?" 4 Jisüi jo Jephthah na Gilead kyon topvü erhümi sosi Ephraim kyon jiang thüngi rotacho, osi onte khyocho. (Ephraim kyon jiangna heto phyotacho, "O Gilead lo kyon Ephraim tona Manasseh to lo evanden, nteno Ephraim lona tsanthei evanden ka!")5 Ephraim jiang chakyav tsükona Gilead kyon jiangna Jordan khyingkaphen jiang topvü lona zümta vancho. Ephraim kyon na oyi zhükhfü ji khyingkav engale Gilead kyon jiangna engalancho, "Nino Ephraim kyon alo?" 6 Tosi ombona "mek," to phyoa na ontena "Shibboleth" to phyole to ezocho; tona ombona "Sibboleth" to phyocho, ntiotssole ombona hoji mmhona n phyochecho. To tssoana ontena ombo rhümae Jordan zhükhfü khyingkaphen motsünga ndüngona owo ombo lüngthae sitacho. Hojithüng Ephraim kyon wothüng zhüro eni lüngthacho. 7 Jephthah na ombo kyon Israel jiang nzyu tiruk socho osi ombo chüi ombo meta Gilead lo shothecho.
Ibzan, Elon Tona Abdon To
8 Jephthah sülo jo Bethlehem kyon Ibzan na Israel socho. 9 Ombona tsokhying thümro, tsolo thümro to vancho. Ombona tsolo jiang ji onte pvüji pomoe kyon thüngi yanpithuksi tsokhying jiangji onte pvüji tüv loroeden soa vanthukcho, osi loroe otsük thümro sosi yicho. Ibzan na nzyu tiying Israel sacho, 10 jisüijo ombo chüi Bethlehem lo shothecho. 11 Ibzan sülojo, Zabulun kyon Elon na nzyu taro Israel sacho. 12 Jisülo jo ombo chüi Zebulun metae Aijalon lo shothecho. 13 Elon sülojo Pirathon kyon Hillel tsoe Abdon na Israel sacho. 14 Ombona otsoe otsük zhüro tona orüi otsük thümro to jiangna kurü ekhatiying lo tsankathung vancho. Osi Abdon na Israel jiang nzyu tiza sacho. 15 Jisüi jo ombo chüi Amalek phunglanro metalo Ephraim metae Pirathon lo ombo shothecho.
Samson Buko Ji
1 Israel jiangna OPVÜI mhadungo mmen tssolancho, hoji tsükona OPVÜI na onte ji Philistine jiang küpo nzyu zhüro thechi sicho. 2 Hojithüng ji Zorah yamo Manoah to tsa vancho. Ombo Dan pvüji kyon. Ombo eloe jina otsoe n vanham vancho. 3 Tole OPVÜI lanben na ompvü thüngi oro heto ezocho, "Nina kvüthüngha ngaro n vanhan, khatola n sungu nina ngaro hani tsokhying tsüka bukvü ka. 4 Suko osi zükhi ntia ti-yukhe, osi sario tüv etsoyu ntia titsole. 5 Osi nitsoe ji bukthaka na ombo tssan ji kvüthüngha titsenia, ntiotssole ombo buklena echümchak tsoe (Nazirite) to khochaki vanthokvü. Osi ombona Philistine jiang khe lona Israel jiang shanchov elhi ji benkav ka." 6 Tole eloe jina orapvü thüngi owo heto ezocho, "Potsow kyon tsü ka athüngi rocho osi omboji OPVÜI lanben esüa ekhena zecheta tüv. Ombona kvüina rocho sana ji ana engae n ze, osi ombo mying jo ocho sana jiha a n zo. 7 Tokhatola ana ngaro hani otsoe buku to ombona a ezocho. Ombo na suko osi zükhi ntia tiyule osi sario etsoyu ntia ti-tsoyule to a ezocho, ntiotssole eboeroro ji ombo eküm echung Nazirite to Potsow lo khochaki vanthokvü to phyocho." 8 Manoah na OPVÜI thüngi heto randancho, "OPVÜI, nina nzansi Potsow kyon ethüngi rothuko ji elani rothuklani nagro ji bukna kvüto lyuvsana e zothuka." 9 Manoah na chomo ji esüa Potsow na ombo lanben ji rothuka eloe jina oli vanathüng oro ndukthukcho. Hojithüng jo orapvü Manaoh jo ompvü ndüngo n van, 10 hoji tsükona ompvüna yunga owo orapvü thüngi ezocho, "Hei, zeta! nchuka a thüngi erowo kyon ji elani rolanthaka." 11 Manoah na phanthi ombo engh ji phana wocho. Osi ombona owo kyon ji heto ezocho, "Nino a eloe ji thüngi thyutao kyon mo ji me-mek?" Tole kyon jina, "Ho, a ka" to ezocho. 12 Tole Manoah na ezocho, "Ni yi ji bena otsoe ji buka tssona ombona kvüto lyuvla? osi ombona kvütüv eküm vamvü lichola?" 13 Tole OPVÜI lanben jina janlancho, "Ana ni eloe ji ezowo jiang ombona tssonrüngu lia. 14 Ombona jününgrozhü lona chiyicho ntia tsov meka; suko osi zükhi ntia yuv meka, elani sario etsoyu ntia tsoyuv meka. Ana ompvü ezowo jiang topvü benphivka." 15-16 Hoji jo lanben to Manoah na ntsicho, hoji tsükona ombona ezocho, "Nzansi ti yisa, ni tsükona nyanyanro ekvütavka." Tokhatola lanben jina phyocho, "Ana n yina vanlea, ni etsoyu tsov meka. Tokhatola nina ni methakhungna OPVÜI thüngi erungthan pia." 17 Manoah na ezocho, "Ni mying ji ezoa, tona niyi ji benchetathüng ena ni monkhümyikrachivka." 18 Lanben jina janlancho, "Nino ntiolyui a mying ji ni ntsihungala? A mying jo e mhuko tüv myingka." 19 Jisüi jo Manoah na nyanyanro motsünga khi nna otsüngha tara khi toli, emhokthav elhi etssowo OPVÜI ji thüngi olong thanphen sa jilona thancho. 202l Thanphen jilona omi evakachile OPVÜI lanben ji milungi na potsüwoe chüngia Manoah omboe na hungcho. jithüngti kyon jijo lanben saya to Manoah na ntsicho osi omboeata na nkhümo likoe vanthetacho. Tosijo onina lanben ji n hunglam sicho. 22 Manoah na ombo engh ji ezocho, "Enina Potsow hungthak küma echünrünguka!" 23 Tole ombo eloe jina ezocho, "OPVÜI na echüthoko sawo eni than ji e khichoyiv mek, osi enhünga shiang hetopvüto ehungthuka ezothokvü mek." 24 Eloe jina tsokhying buki Samson to tsacho. Ngaro ji rankata yicho. Osi OPVÜI na ombo mmhayicho. 25 Osi ombona Zorah tona Eshtaol to yutalo Dan lo ncheni vanathüng OPVÜI na etho ombo jükayiv benkacho.
Samson Tona Timnah Loroe Ji To
1 Tsüngona lo Samson na Timnah lo jowocho tole hojilo loroe tsüka vana ombona hungcho. 2 Ombona oki elani oyi opoha oyo oni thüngi ezocho, "Timnah lo Philistine elororo tsüka a zehungo tüv vana. Ompvü soa a vanhungka, owo sosi yitava." 3 Tokhatola opoha oyo onina ombo ezotacho, "Eloe jo n longtsüi Philistine jiang yolo owo yanake? Ete pvüji chungi, osi ete kyon yolo na nina loroe n yanchecho nüng?" Tokhatola Samson na opo ezolancho, "Ajüpomo ji ompvü, hoji tsükona ntena ompvü sosi oyi a thüngi vanthuktava." 4 Samson ji OPVÜI na olan soa elhi heto tssothuka evamo ji opvü-opo jiangna n tsicho, ntiotssole OPVÜI na Philistine jiang thüngi ori tssov lanka yana vancho. Shi yuta shiang lojo Philistine jiangna Israel sa vancho. 5 Hoji tsükona Samson na opoha oyo oni phana Timnah lo jo wocho. Ontena jününgroli yakchiathüng hinghoro vantüngro tüv na erhyua ombona zocho. 6 Jitopvü OPVÜI na etho ombo pi, hinghoro ji nyanyanro esüa kheshü taena nshyuroe sicho. Tokhatola ombona ntio tssocho sana ji opoang n zocho. 7 Jitosi ombona loroe ji thüngi owo thyutae zele, ombona ompvü chokae sicho. 8 Tsüngon tara sülojo Samson na ompvü soa vamvü tsükona wocho. Osi olani woa thüng ombona lüngthae esio hingho ji zelo wole hingho ji müng jilo otssak rhei tssakijü tara jüa jo ombo emhokcho. 9 Hoji tsükona ombona tssakijü ji khichei olan dunga tsoa wocho. Jisülojo ombona opo ha oyo oni thüngiha owo tara picho. Ontena na tsotacho, khatola hingho tsükina khichecho to Samson na onte n zocho. 10 Opo na loroe jiang ki wocho, osi Samson na hoji lona tokhu tsüphov picho. Hoji jo khyingroe jiangna hojito etssov shikhfü lio jina. 11 Philistine jiangna ombo hungale khyingroe otsük thümro ombo ndüngo owo vanthokucho. 12-13 Tole Samson na onte ezocho, "Ana janlanmo ekhüngu nte engavka. Osi ntena yanpiyanthan yuta tokhu tsüngon tiying ji n yakthüng a n janlanchena nte otsük akvüto sünyipvü thümro tona osü mmhom thümro to nte khiyivka, osi ntena ajalancheta tssona anaha hojito nte pivka." Tole ontena ombo ezotacho, "Toka ntio sana phyoe engathuka." 14 Ombona ezocho, "Oyam etsoe jilona ntiosana etsov chiyicho; Etho ejüi jilona ntiosana enüngu chiyicho." Nchuk ethümoto yiaha ontena engao ji n jalanchecho. 15 Osi tsüngon mezhüoto jilojo ontena Samson engh ji ezotacho, "Nirapvü khi ntio kyak sana ji ezothuka. To mekana ena nipo ki shilo omi thei jilo rungnhyae ni sivka. Nimboe tssoe e retsoyiv to etsatachola, nüng?" 16 Tole Samson eloe jina esü elonga orapvü thüngi owo ezocho, "Nina a n zan! Tolea nina otsotso a tsakala! Nino a shom jiang engao chüksi ntio yichak sana ji aiyo a nzoake!" Tole ombona ezocho, "Zeta, hojijo ana apoha ayo onitia n zohan, Tona ana kvütoli hoji ni ezov la?" 17 Hoji tsükona ompvüna yanpiyanthan tokhü tsüngon tiying jo hoji tsükona kya vancho. Tokhatola eloe jina tsükshia ombo thüngi erinjana ombo khetsüo jina tsüngon tiyingo to jilojo ntio sanaji ombona ezoe sicho. Jisüijo ompvü na Philistine jiang ezocho. 18 Hojito tsüngon tiyingo to jilojo Samson na yipheni n rheyithüng kyon jiangna heto ombo ezocho, "Tssakijü lona nüngka jo ntio tssovla? Hingho lona etho jüka jo ntio tssovla?" Samson na janlancho, "Ntena amangsü ji nzo oli n rhontavo, ntena nchüng lea janlan ji n tsina vamvü." 19 Jitopvü OPVÜI etho jina Samson pyingi ombona jowo Ashkelon kyon nchyu thümro lüngthae sünyipvü jiang shaki hana oyi ochoangna phyochecho sana jiang elo picho, 20 hoji sülojo Samson na emhokthav lüm tsuka oki yicho osi ombo engh jijo yanpiyanthan lo ombo khümshümo ji picho.
1 Yuta tara sülo, liri etüngathüng Samson na nyanyanro hansi eloe ji janthechilo wocho. Ombona eloe ji opo ji ezocho, "Ana a eloe ji yipheni a rhowo hungala." Tokhatola omo jina Samson ji n rhowothukcho. 2 Tole heto ezocho, "Nina ompvü tssaka sicho tsaya ana ompvü ji nikhümo pithaka. Tolea oka ji opyon mmhomoka, nina ompvü khikhuka." 3 Samson na ezocho, "Nchüng shilo jo ana Philistine jiang thüngi ntio tssov sana ji apono mek!" 4 Tosi ombona owo shaeli nzo ethüm rhümhae emhi lona enini na ntsütsütae ntssü jilo milon khüngkayicho. 5 Tosi milon jiang njükayia shaeli jiang ji philistine jiang tsünghanro li phanthechicho. Hoji toli tsünghanro ranthako jiang tae mekna n ranhamo jiang, olive tssüngthili jiang toji Samson na rungi siyicho. 6 Ochona heto elhicho sana to Philistine jiang na ethümtae zele, Samson na to ethümchecho. Timnah lo Samson omo jina Samson eloe ji ombo shom thüngi yithoki siwo jina Samson na heto elhicho to ethümchecho. Tole Philistine jiang na owo eloe ji rungtsüngi sitasi ompvü opo ki jiha rungi siyitacho. 7 Tole Samson na onte ezocho, "Nteno heto elhitake! Ana nte n lirathüng jo esam meka!" 8 Tosi ombona elümoto haruka onte sakacho osi elümoto onte lüngthacho. Tosi ombona Etam lo longkvü sürhen jilo owo tsanthei vani sicho.
Samson na Philistine Jiang Khyothechiala
9 Philistine jiangna Juda lo oro nchenkae Lehi yantsü ji hacho. 10 Tole Juda kyon jiangna, "Nteno ntio tsükona e hatala?" to ezocho. Tole ontena "Ena Samson ji, ombona etsütsao ji esüa khangshiv tsükona rochoka to phyocho. 11 Tole Juda kyon wothüng ethüm na Etam sürheni longkvü jilo owo heto Samson ezotacho, "Philistine jiango ete esopvüiden to nina n tsichoke? Nina e thüngi ntio tssochola?" Samson na janlancho, "Ontena ntio a tssoyicho sana jito tae ana tssoyicho." 12 Ontena ezocho, "Ena ni rhümae chungi onte khelo ni thechilo rocho." Tole Samson na ezocho, "Toka ntena jo a n lüngtha to phyochak a pia." 13 Ontena phyocho, "Toka enajo ni lünthav meka," "Ena ni rhümae ni chungi onte khelo tae ni thechivka." Hojito ontena wozhü ethan eni khi ombo chungi longkvüi na ombo khichecho. 14 Ombona Lehi oyi janale, Philistine jiangna tüngkachia ombo thüngoe roracho. Jitopvü OPVÜI ethona ombo pyingi okhe chüngzhü jiangji mikyu esüa enato pheroe sicho. 15 Jisüi jo ombona Gadho kanryu sangchepancho tüv hungcho. Ombona nkhfüthei hoji tsakae hojina wothüng motsünga bena onte lüngthacho. 16 "Osi Samson na heto okhen dencho, Ana gadho kanryu khi kyon wothüng lüngthacho; Gadho kanryu khi ana onte müng jiang nshakachi sicho." 17 Jisüi jo ombona kanryu ji shümthei sicho. Heto tsso meta jijo Ramath Lehi to tsacho. 18 Jisüi jo Samson ji elümoto eratsüngi ombona OPVÜI ezocho, "Nina ekyo tsüphov hetüv a pithaka, tona enhungo eratsüngi Philistine shiang khelona a chüvke?" 19 Tole Potsow na Lehi lo liko küngsothuki hoji lona ojü chiyithukcho. Tole Samson na hoji yusi mmhona yicho. Osi Hoji jübukphen jijo Hakkore to tsacho; osi nchüng jana Lehi lo lia. 20 Philistine jiangna meta ji sathüng Samson na nzyu mekyu Israel jiang sacho.
Gaza Lo Samson
1 Tsüngnona lo Samson na Philistine yantsü Gaza to tsao jilo owo losülonphyoe eloe nduki ompvü thüngi yipcho. 2 Philistine jiangna Samson ji hojilo yipa vana to ntsi yantsü kipüngona zümo tona ombo nhyaktacho. Ontena heto nchümta jükrüpi vantacho, "Ombo ha wonchiana chiyivka küma etena ombo lüngthavka." 3 Tokhatola Samson na zümo riso tae yipsi phanthi yantsü ji pikhfü khanphen ji totona hankhan, ji durhyu phanhya rukchecho. Ombona hoji ejümsi Hebro ni chanchio phunglan ji chüngicho.
Samson Tona Delilah To
4 Hoji sülo Samson na Sorek hayi lo evan eloe tsüka Delilah to tsao ji lümcho. 5 Tole Philistine mesae otsük mungo jiangna Delilah thüngi owo ezotacho, "Samson ji kvütoli etho jüa sana osi ena kvütoli ombo rhümae chungi sisi ombo khyovsana ji mphoa ni ezothuka. tona ena otsük akvüna ranpyak nzo taro ekha ren ni pivka." 6 Tole Delilah na Samson ezocho, "Ntiona ni etho jüthuka sana ji nzansi a ezoa. Ochona sana ni chungi etho n liv ni sithukvü jo kvütoli tssochevla?" 7 Samson na ezocho, "Lokozhü n kyingkahan ethan tiying na a chüngchojo, anaha thanpoe esüa a etho n liv siv." 8 Tole Philistine mesao jiangna olozhü n kyinghancho tüv tiying khi Samson chüngle to Delilah picho. 9 Ompvüna chechünga sana ji zeta kyon ejoma nhyaka vanthukcho, osi tüngkachicho, "Samson! Philistine jiang tsata!" Tole wozhü jiang omina oying dyucho tüpato enato tüproe sicho. Osi ombo etho ejü ji ontena n yanchehancho. 10 Delilah na Samson ezocho, "Nina a ejiphia kha otsotso a nzoala. Nzansi ochona sana ni chüngüv jo kvütolyuv sana a zoa." 11 Ombona ezocho, "Ozhü n tsütsahan ethan tüv na a chünguvo anaha kyon thanpoe esüa to tae tssov." 12 Tole Delilah na wozhü ethan khi Samson chungi vasi ezocho, "Samson! Philistine jiang tsathaka!" Kyon jiangna chungchak esanawoe na ombo nhyakta vancho khatola ombona wozhü jiang oying tüpato ethüngroe sicho. 13 Tole Delilah na Samson ezolancho, "Nina enhünga ha otsotso a n zohan osi a ejiphiala. Ochona sana ni chüngvo kvütolyui ni chüngna tssochevla." Samson na ezocho, "Nina a tssan npyo-tiying ji pitsütae lentan khi hojilona a eshenhyavo anaha kyon thanpoe etho totae tssov." 14 Tole Delilah na Samson ji ejichoe yipthuksi ombo tssan npyo-tiying ji pitsütae hojilona eshentani vasi, "Samson! Philistine jiang tsata!" to tüngcho. Tole ombona phanthi ombo tsan ntssüo ji enato tssüngchei sicho. 15 Tole ompvüna ezocho, "Nina a nzanala to phyosi kvütoli hoji ephan mekchola? Nina yenjo ethüm a ejiphithaka osi enhünga jana ntiona ni etho jüthuka sana ji otsotso a n zohan." 16 Ompvüna engakvü ombo engamongo jina Samson ji nyinyangtsüngi sülani jo ntsaji ezocho, 17 "A tssan shi yenjoa tia n tssühan. a ebuk lona benka Nazirite to Potsow lo khochaki lia. A tssan shi tssüi sivo a etho ejü ji moni sisi anaha thanpoe esüa totae tssov." 18 Samson na otsotso ompvü ezochoto Delilah na zechetale ompvüna yithen heto pia Philistine mesae jiang tsachithukcho, "Echunga rotalana, ombona otsotso ji a ezothaka." Tole ontena orang ji hantasi rotacho. 19 Delilah na Samson ji ejichoa ompvü philo yipthuksi kyon tsüka tsae Samson tssan mpyo jiang tssüi siyithukcho. Jisülo jo ombo ethoji monthako jina ompvüna ombo khangriv benkacho. 20 Ompvüna phyocho, "Samson! Philistine jiang tsata!" Ombona yipjüngchi nchümcho, "Thanphothüng esüa nchüngha tsanchovka to." OPVÜI na ombo sithako jina ombona n tsicho. 21 Philistine jiangna ombo rhümae omhyik jiang khanchokchi ombo siyicho. Ontena Gazae ombo sosi oyi yongmen yonjakzhü na ombo chüngcho, osi vüngpheni ombo thechi hümchen long ombo khorithukcho. 22 Tole ombo tssan ji chenlana phanthicho.
Samson Chüo Ji
23 Philistine mesae jiang na sanrhyutae onte potsow Degon ji othan pia tokhutav methakcho. Ontena heto dentacho: "E potsow na e ri Samson ekhyov etho epicho!" 24-25 Ontena heto phyota ngangota vancho, "Samson tsae khfüri ejüthoka!" Samson ji vüngpheni na tsachuki khfüri onte ejüthukcho osi ontena durhyupvü eni yutalo zae ombo vanthukcho. Kyon jiangna ombo zetasi onte potsow thünga heto dentacho: "Ete potsow na ete ri ochona ete meta roe sia elümoto elüngthacho sana hoji ekhyov epithaka!" 26 Samson na okhe lona ombo süa vamo eboeroro ji ezocho, "Oki shi tsenkachio durhypvü jiang a epyanphithuki ze, ana jianglo enghokavka." 27 Oki ji eboe osi eloe na etsseni pyingi licho osi mhonki ha eboe osi eloe wothüng ethüm bena sankae Samson na khfüri onte ejüthoka vancho. Osi philistine mesao onte otsük mongo ha jilo vancho. 28 Tole Samson na heto randancho, "Limha sakhamo OPVÜI, a nzansi a nchümcheta; a nzansi, Potsow, a etho ji yenjoa apilana tona ana echunga yonphina Philistine ochoangna a mhyik shiang a khanchukchiyicho sana jiang nlilamka." 29 Jitosi Samson na oki tsenkachio durhyu eni ji rhümacho. Okhe nkhenta durhyupvü jiang nyimkae khyana ombona heto tüngcho, 30 'Philistine shiang nzo a chüthoka!" Ombona durhyu eni ji ombo pvükhyong khyanle, oki totona vanjoe Philistine mesao otsük mongo jiang tona jilo vamo kyon jiang topvü to chüracho. Hojitolyui Samson na ombo eküm vanathüng lüngthao jiang lona kyong kata ombo echü lo chünhyathukcho. 31 Ombo ojenio jiang tona wopan jiang to na ombo müng ji khilo jo wotacho. Ontena ombo müng ji khi hansi oyi Zorah ha Eshtaol oni yuta lo onte opo Manoah khüp jilo ombo shothetacho. Samson na nzyu mekyu Israel esopvüi tssocho.
Mikha Kisü Jiang
1 Ephraim phunglan meta jianglo Mikha to tsa kyon tsüka vancho. 2 Ombona oyo heto ezocho, "Ochona sana rangpyak othüng taro ekha ni efüile nina efüi ji rhiyicho. Nina rhiyia ana zocho. Tolea ana efüchoka, küma orang ji shikalo." Tole oyona ezocho, "OPVÜI khi ni mmhayithukvüka otsoeyo!" 3Ombona orang ji oyo pilanle ompvüna ezocho, "Ana randankao ji atsoe jilo n khyingthukvü tsükona ana orang shi OPVÜI piala. Orang shi khi otssüngna kisü shani janti na eyukthuka. Hojito enhungo ana jantirang shi ni pilanaka." 4 Hojito ombona orang ji oyo pilancho. Tole ompvüna rangpyak nzo eni khi yonjak ejoe pia otssüng na kisü shanthoki, hoji janti jina eyukthukcho. Osi hoji Mikha ki vacho. 5 Mikha na ombo khümphen meta licho. Ombona kisü tara shancho osi pvüti sümüng tükcho osi ombo tsoe yolo tsüka ombo pvüti tssothukcho. 6 Hojithüng jo Israel lo mesae ochia n vancho; jitsükona otsük akvüna ombobo etancho vantacho. 7 Hojithüng Juda meta Bethlehem lo Levi khyingroe tsüka vancho. 8 Ombona Bethlehem sisi metapoe evamvü tsükona yana wocho. Ombona yentsa woathüng Ephraim phunglanro metae Mikha ki chiwocho. 9 Tole Mikha na "Nino kvüina rochola?" to ombo engacho. Tole ombona janlancho, "Aiyo Juda meta Bethlehem yamo Levi kyon ka. Ana kvülo sana vanphen yanala." 10 Tole Mikha na ezocho, "A ndüngo vana. A pvüti tssoe a ndungntssunga vana, tona ana nzyualo jantirang rangpyak taro, elani mpensü tona etsoyu to ni pivka." 11 Levi khyingroe jina Mikha thüngi ombo tsoe esüa vamvü methakcho. 12 Osi Mikha na ombo pvüti tssothuka ombo ki vanthukcho. 13 Mikha na ezocho, "Enhungo ana Levi tsüka pvüti tssothukala, küma OPVÜI na a sükhying topvü a mmhonithokvüka."
Mikha Tona Dan Pvüji To
1 Hoji yuta lojo Israel lo mesao n vancho. Hojithüng ji Dan pvüji jina Israel pvüji jiang yolo onteno meta n lihamo jina meta hoe vav ekhyo tssota vancho. 2 Hoji tsükona Dan kyon jiangna wopan topvü yolo na ethüngche woro eboe otsük mongo ethüngi Zorah tona Eshtaol to yantsü lona khochi meta ji khyui zelo wothukcho. Ontena Ephraim phunglan meta jilo chiwo Mikha ki nchentacho. 3 Ontena jilo ncheni vanathüng Levi khyingroe jilo vamo ji yi nsan ji zoe ontena ombo engacho, "Nino shilo ntio elhi tssoala?" 4 Tole ombona ezocho, "Aiyo Mikha thüngi ntsatae, ombo pvüti tssoa jokheman khia shilo vanaka." 5 Tole ontena ombo ezocho, "Ena yentsata vamo shi oman liliv sana nzansi potsow thüngi engae ezeyi, " 6 Pvüti jina onte ezocho, "Ntena ntia wongkhyuv n lika, Nte yentsa shilo Potsow na nte soa vanka." 7 Jisüi jo otsük mongo jina khochi Laish yantsüi wotacho. Ontena hojilo kyon jiangna Sidon kyon jiang esüa vanta hungcho. Onteno noyingroa onte yolo khonta rota n liv vantacho osi onte ethelan eli topvü benria liracho. Onteno Sidon kyon jiang lona kontae vancho osi kyon thanpoe ochi thüngi ha shenta n licho. 8 Otsük mongo jiangna Zorah tona Eshtaol to lo kholani yile ontena kyon jiangna ntio hungcho sana to onte engacho. 9 Tole ontena phyotacho, "Rotava," "owo Laish ji hayatav ka! Meta ji elümoto mmhona. Shilo elhi n tssona ti vantava. Zakto khochi owo meta ji hayatava! 10 Ntena jilo ona kyon jiangna ntia oyam hungka renka n lio ji ntsivka. Meta ji elümoto tsüphoa osi kyon na jüpomo tüv topvü hungkhuka. Potsow na hoji nte pithaka." 11 Hoji tsükona Zorah tona Eshtaol to lona otsük nzo tiruk na ritssolo khochicho. 12 Ontena khochi owo Juda lo Kiriath Jearim lo engrhewoe nchentacho. Hoji tsükona meta jijo enhünga lea Dan kyon nchenphen to tsala. 13 Ontena jilona khoe Ephraim phunglan metae Mikha ki yitacho. 14 Otsük mongo Laish zelo wo jiangna onte shom jiang ezotacho, "Meta shilo oki motsüngalo otssüng kisü motsünga janti na eyukcho lio ji tsintsita? Jitae mek, kisü thanpo osi pvüti sü ha lira, küma etena kvüto lyutavla?" 15 Ontena Mikha ki rhowo Levi khyingroe ji thüngi kvüto vanala to engatacho. 16 Hojithüng ji Dan pvüji lona ritssoe otsük nzo tiruk jina ritsso sakav pikhfülo zae vanthakcho. 17 Echepyim otsük mongo jina oki rhowo otssüng kisü ji, kisü thanpo jiang tona pvüti sü ji to khitacho. Hojithüng jo pvüti jijo otsük nzo tiruk jiang nzo pikhfülo zae vancho. 18 Kyon jiangna Mikha ki rhowo ntho tsütsaelan jiang khiale pvüti jina onte engacho, "Nteno ntiolyutala?" 19 Tole ontena janlancho, "Yingto vana osi oyi motsünga lea ti nsana. Ephana oyi e pvüti osi e ndungntssungpvüi tssoa. Kyon tsüka wopan lo pvüti tssoji thüngina jo Israel pvüji topvü pono pvüti ni n tssohunga ke?" 20 Hoji zoe pvüti ji emathacho osi ombona ntho tsütsaelan jiang khi hansi onte phana yicho. 21 Ontena khophi onte ngaro jiang, ekümrümo jiang tona ejüeli to jiang hantasi khochicho. 22 Ontena kona yithakale Mikha na ombo yankho jiang ritssolo tsachukcho. Ontena 23 Dan kyon jiang phayae tüngtacho, tole Dan kyon jiangna khophilani Mikha ezocho, "Ntio tssochola, kyon okho shijo ntiolo tsachola?" 24 Tole Mikha na ezocho, "Ntio tssochola to jo ntiola? Ntena a pvüti ji tona ana nsüngrüo potsow jiang to khithaksi aiyo ntia enhyokae n li." 25 Tole Dan kyon jiangna phyocho, "Ntena kyon jiang lüm tsukthuki nte sakathukvü yana mekna ntia ti phyotava. To mekcho jo ni osi ni wopan topvü chürav." 26 Tole ontena yi sicho. Onte ji elüm etho jüa to Mikha na ntsiale ombona oki yi sicho. 2728 Dan kyon jiangna pvüti ji rhümae Mikha na nsüngrüo tsütsaelan jiang khiyidensi sülojo Laish yantsü Bethrchob lo noyinga vamo kyon jiang lüngthasi yantsü ji rungi sicho. Laish jo Sidon lona ekomo ji tsükona ochina ha onte n shanchochev sicho, elani ontena ha oyam thüngi shenta lia n vancho. Dan kyon jiangna yantsü ji tssochoe jilo vani sicho. 29 Ontena Laish to tsao ji süsi Jakob tsoe onte motsüi Dan mying ji oyan ji mying tsatacho. 30 Dan kyon jiangna onte khümphen kisü nsüngrütacho. Osi Gershon tsoe Jonathan, Moses orüo jina Dan pvüji jilo pvüti tssocho, osi Babylon vüngpheni n yithüng nandang jo ombo tsoronichen jiangna pvüti tssotacho. 31 Potsow khümphen ji Shiloh lo elithüng nandang jo jilo lia evamo kisü Mikha na nsüngrüo ji ontena chümkachitacho.
Levi Tona Ombo Lothanro To
1 Israel mesao n vanathüng yuta jilo Ephraim phunglanro jilo Levi tsüka vancho. Ombona Juda meta lo Bethlehem lona lothanro tsüka yani vanthukle, 2 ompvüna ombo thüngi lüm tsuki opo ki Bethlehem lo oyi choro mezhü vancho. 3 Tole ombona owo enia ompvü tsa elani yilanle to ezocho. Ombona ombo phajae ji tona gadho eni to sosi yicho. Loroe jina opo ki ji onte ejücho osi opo na khyingroe ji hungale emathata elonchocho. 4 Loroe ji opona khyingroe ji oki nchetale to ezoji tsükona ontena tsüngon ethüm hojilo vantacho, khyingroe jiha loroe ji omboe na etsoyu tssotasi zümo ethüm hojilo yipchotacho. 5 Tsüngon mezhüoto jilo enyathüng ontena phanthi yitav methakcho. Tole loroe ji opona ezocho, "Ntiosana tia tsoyuta si yitava. Tona hoji mmhomo tssovka. Ntena hoji sülotilea yitacheta." 6 Tole eboe otsük eni jina khukthe tsoyutacho. Tole loroe ji opona ombo ezocho, "Zümo shi helo yipsi nibobo longshi khia." 7 Levi jina yiv tsükona phanthile loroe ji opo na vansale to ombo ntssungo jina ombona zümoa vanlancho. 8 Tsüngon mongoto ji nyazaüngi na Levi na yitav phanthile loroe ji opona ezocho, "Nzansi etsoyu tssotasa. Tara sülani ti yitava." Tole otsük eni jina etsoyu tssotacho. 9 Eboe ji, ombo lothanro tona ombo phajae ji to na khochiv phanthitale loroe ji opona ezocho, "Zetava mmyuthak küma zümo shi yipchosi yitava. Enhünga münguka jüngtheta helo yiptava. Ntena ojyua nyazüngina phanthi khochitava." 10-11 Tokhatola eboe jina hojilo zümo n yipcholan hungwo jina ombo lothanro ji, ombo phajae ji tona gadho eni ji to sosi khochicho. Ontena Jebus (Jerusalem) oyi janale mmyui sicho, Hoji tsükona phajae jina OPVÜI ji ezocho, "Ntioli etena Jebusite yantsü shilo n yiptala?" 12-13 Tole OPVÜI jina ezocho, "Etena Israel meko kyon tüv yantsüi nchentav meka. Etena tara oyi Gibeah mekana Ramah lo nchentavka." 14 Ontena Jebus yaki yitacho. Ontena Benjamin pvüji yantsü Gibeah ji janale eng rheta vancho. 15 Ontena yentsa ji esani hojilo yiptav methakcho. Ontena yantsüi rhowo esanpheni khuk the vantaha ochina ha zümo jilo oki onte n sothecho. 16 Ontena jilo vanathüng eran tsüka olina mmuka yia vancho. Ombo Ephraim phunglan metae evan khatola jithüng jo Gibeah lo vancho. (Hojilo kyon thanpo vamo jiango Benjamin pvüji kyonden.) 17 Eson jina yantsüi yentsae jiang hungi engacho, "Nteno kvülona rotachola? Osi kvüi yitala?" 18 Levite jina janlancho, "Eiyo Bethlehem Juda lo wotacho, osi enhungo phunglan meta Ephraim lungjüngi yitale, zümo shilo ochina ha e n chenthukala. 19 Etsoyu jo hümri, zükhi tojo a loroe ji eni ejan osi a phajae ji ejan elani Gadho jiang tsükona mavü to topvüto ena hana. Ena ethev elio jiang topvü hana." 20 Tole eson jina ezocho, "A ki nte nchethukvüka! Ana nte sheküpvüka; yantsüi ti yiptava." 21 Ombona onte sosi oki oyi onte gadho jiang phicho. Ombo lankon jiangha ojo epyotasi etsoyu tssotacho. 22 Ontena hojito tsoyuta vanathüng yantsüi na lomo esüi sana oro oki ji hachümi kipüng chenphita eson ji ezotacho, "Ni ki lankon ro ji kvüla, ombo sosi chiyia! Ena ombo thüngi rama e tssohungala!" 23 Tole eson jina hapoe chiwo onte ezocho, "Meka, oshomden! Nzansi! Elhi n mhom jitüv ti tssotava! Kyon shijo a lankon ka. 24 Zetava! Ombo loroe ji shi osi a tsolov shiha loroe om, küma ntena onte khitava osi onte thüngi nte etancho tssotava. Tokhatola kyon shi thüngi jo hojito elhi n mhom ti tssotava!" 25 Tokhatola kyon jiangna ombo yi n ngayio jina Levi jina ombo yingaloroe ji tsachuki hapoe vanthukcho. Tole ontena zü mo totona enyathüng jana ompvü thüngi retso rama tssotacho. 26 Wonchiale loroe jina oyi orapvü ndüngo eson ji kipüngi vanthecho. Eng onsochia ompvü na jilo vancho. 27 Orapvü na enyathüng phanthi elhilo wovkato hapoe chiwole hojilo ompvü khe jiangna kipüngo yonchio vanthe vancho. 28 Ombona ezocho, "Phanthia. Yitavka." Tole ntia ombo n janlancho. Hoji tsükona Ombona ompvü müng ji gadho ji mankvüi ompvü sükachi hansi oki yicho. 29 Ombona oki janale, oki rheyi lebukro khi loroe ji müng ji taro eni tsüroe, Israel pvüji taro eni jiang lümchak motsüngtsüng picho. 30 Hoji ehungo jiang topvüna phyotacho, "Israel jiang na Ejip lona khochi yisi, ena kvüthüngha hetüv motsü n zohan! Etena shi tsükona kvütosana tssochev! Kvüto lyutavla?"
Israel Na Ritssolo Eov Methakala
1 Israel topvü, khümkiwoe Dan lona jolowoe Beersheba, engkhfüwoe Gilead nandang na etsa won ji zocho osi methaktacho. Ontena kholok tssoe Mizpah lo OPVÜI vanrhyu lona nduktacho. 2 Potsow kyonden sarhyuo shilo Israel pvüji akvü esopvüi tsük-tsük jücho, osi liko rasan 400,000 jücho. 3 Hojithüng Israel pvüji jiang Mizpah lo sanrhyuala to Benjamin pvüji na zocho. Israel jiangna phyotacho, "Kvütoli hetüv elhi n mhom tssochecho sana e zoa?" 4 Levi ocho loroe lüngthayicho sana jina phyocho, "Ana a loroe ji sosi Benjamin metae Gibeah lo zümoa tsükona wotacho. 5 Tole Gibeah kyon jiangna a sakalo oro zümolo oki ji hachümcho. Ontena a lüngthav rocho; khatola a loroe ji thüngi n lan tssotasi ompvü chüthukcho. 6 Jisüi jo ana ompvü müng ji khi rhonroe Israel pvüji akvü lümchaka picho. Kyon shiangna ete thüngi n mhom elhitacho. 7 Nte topvü Israel kyonden küma kvüto lyutavsana?" 8 Tole kyon topvüna phanthi phyotacho, "Ete ochina ha, ranki evanlea mekana oki evanlea, ochina ha oki kholani yiv meka. 9 Etena heto lyuvka: Etena kyon tara ethüngchei Gibeah ji owo hatavka. 10 Israel owo tarochia na etsoyu elomka, osi hojilo enhyo jiangna owo Gibeah ji havka, ntiotssole ontena Israel lo elhi n mhom hetüv tssocho." 11 Hojito Israel lo eboetso topvü na yantsü ji halo etssirhyucho." 12 Israel jiangna Benjamin meta topvülo heto ezoa wothukcho, "Nteno ntio n lan tsüphov hetüv tssochola? 13 Gibeah lo elhi n mhom etsso jiang rhümae e pia tona ena onte lüngthasi elhi n mhom shiang Israel lona esanthukvüka." Tokhatola Benjamin kyon jiangna hoji yithen ji n zontan tssotacho. 14 Benjamin yantsü jiang lona ontena sanchuki Israel thanpoe jiang thüngi ori tssotacho. 15-16 Ontena hoji nchuk onte yantsüi na owo wothüng mekyu tiruk tsachukcho. Hoji ephalo Gibeah lona ethüngche woro hayapvüi otsük nzo tiying ethüngchecho. Onte otsük akvüna olong yui shümehio ji otssan tera lea n khachov rhakcho. 17 Israel thanpoe jiango rasan thangshi pithakcho 400,000 ethüngchecho.
Benjamin Kyon Thüngi Ritsso Ji
18 Israel jiangna Bethel lo khümphen jilona owo Potsow thüngi heto chontacho, "Ochoang jipo na Benjamin jiang sakademla?" Tole OPVÜI na janlancho, "Juda jipo na vünga." 19 Ojyuato jo Juda jipo na enyathüng khochi owo Gibeah yantsü ndüngo nchentacho. 20 Ontena Benjamin rasan jiang sakalo owo rasan jiang yantsüwoe zechiwo methaki vantacho. 21 Benjamin rasan jiangna yantsüi na chiro hoji nchuk Israel wothüng mekyu eni lüngthacho. 22-23 Tole Israel jiangna khümphenina owo mmyu jana OPVÜI thüngi nungratacho. Ontena phyotacho, "Ena e ojenioden Benjamin kyon jiang thüngi elani ori tssolam alo?" Tole OPVÜI na "Ho" to ezocho. Israel jiang ji lüm tssonkae elani hoji nchuk ha rasan jiang ovüngthüng esüa reni vanthukcho. 24 Ontena Benjamin rasan jiang thüngi rotav yenjo enioto khochilancho. 25 Tole Benjamin kyon jiangna chirolani Israel rasan thangshithako jiang wothüng taro tiza lüngthacho. 26 Tole Israel topvüna hojilo owo OPVÜI vanrhyulo khukthei mmyu jana etsoyu n tssov vantacho. Ontena khümshümta than tona mpümna erungthan to OPVÜI vanrhyu lona thantacho. 27-28 Hojithüng jo OPVÜI Ntsata Bakos ji Bethel lo licho osi Eleazar tsoe Phinehas, Aaron orüo jina hoji enhyang tssoa vancho. Kyon jiangna OPVÜI engatacho, "Ena e ojenioden Benjamin kyon jiang thüngi wolam alo; to esani sivla?" OPVÜI na janlancho, "Ori tssolantava, ana ojyua jo ekhyo nte pivka." 29 Israel jiangna rasan ejoma Gibeah tssae mphoe vanthukcho. 30 Ontena ovüngthüng esüa yenjo ethümoto khochi owo Gibeah yantsü ji zechiwo rasan jiang renthukcho. 31 Benjamin kyon jiangna rotalo yantsüi na chirocho osi ovüngthüng esüa Israel jiang Bethel lani tona Gibeah lani to vamo jiang lüngthata benkacho. Ontena Israel otsük thümro harüma lüngthacho. 32 Ontena phyotacho, "Etena nchüngha onte chüthuka vanthaka." Tokhatola Israel jiangna okyak nsüngrüi vao jijo yantsüi na olani onte sosi chiyiv methakcho. 33 Kvüthüng Israel rasan ekyungo na esenlani Baal Tamar lo etssencho sana, Gibeah yantssae longroyo jianglo mphoe vamo jiangna sanchukcho, 34 Israel lo ethüngche woro wothüng taro na Gibeah ji hayacho osi elümoto kyoryukata rotacho. Tole Benjamin kyon jiangna jo onte chürav sala to n tsicho. 35 OPVÜI na Israel jiang ji Benjamin ekhyov etho picho. Israel jiangna hoji nchuk onte ri wothüng mekyu mongosi nzoa lüngthacho. 36 Osi onte khyothaka to Benjamin jiangna engathecho.
Israel Jiangna Kvütoli Khyochola
37 Israel wokyungo na Benjamin kyon jiang thüngina esenlani yio jijo ontena Gibeah nkonphia mphoe vanthuko rasan jiang lo enhyikao jina. Mphoe vamo jiangna yantsüi nzoni otsük akvü lüngtharae sicho. 38 Israel ejoma tona mphoe evan jiang to chekav okyak pitae vacho. Ontena eluk tsüphov esüa miphong yantsü ji poni hungana, 39 ritssopheni na opomoe evamo Israel jiangna khophi ori jiang nkonchakvü to phyotacho. Hojithüng jo Benjamin jiangna Israel otsük thümro lüngthathakcho. Ontena "nchüng ha etena onte lüngthata vanthaka" to phyota vancho. 40 Tole chekaphen ji hungcho, miphung tsüphov yantsü ji poni chüngia hungcho. Osi Benjamin kyon jiangna onte sülamoe zechile yantsü ji topvü omi küma hungchi onte emhukcho. 41 Jitopvü Israel jiangna Benjamin jiang phani onte ekhenrhükthukcho; ntiotssole onte monkhamsala to ontena nchümchecho. 42 Ontena Israel jiang mhadungona tsani hapoe chiyicho khatola n tsanchov sicho. Onte ji Israel rasan ejoma mphoe vansi chiyio jiang tona yantsüi na kholani chiyia vamo jiang to yutalo halachi sicho osi onte chüracho. 43 Israel jiangna onte ri jiang chaklanchi phana owo Gibeah engrhewoe hathechi tsanathüng lüngtharae sicho. 44 Hoji lona Benjamin rasan mmhontsov wothüng taro tiza chüthokcho. 45 Thanpoe jiango meta ngazao jiwoe tsana chiyi Rimmon longpvü jiwoe tsana yitacho. Onte wothüng mongo jo olan dunga lüngthacho. Israel jiang na Gidom ejoma jiang phani 2000 lüngthacho. 46 Hoji nchuk tssotsüi Benjamin rasan lüm etsson wothüng mekyu lüngthacho. 47 Tokhatola onte nzo tiruk jo meta ngazao jiwoe tsana chiyi Rimmom longpvü jiwoe yicho osi ontena jilo choro mezhü vancho. 48 Israel jiangna Benjamin ejomae jiang phani lüngtharacho osi topvüeboe, eloe, ngaro osi ekümrümo topvü lüngtharacho. meta jilo yantsü topvü to ontena rungi sitacho.
Benjamin Pvüji Enghden Jiang
1 Israel jiang na Mizpah lo sanrhyui OPVÜI thüngi echü mchak tsüphov khitacho."Ete ochinaha ete otsolov jiang Benjamin kyon thüngi yanpithoku meka." 2 Israel jiang na hojito Bethel lo OPVÜI vanrhyu lo owo mmyu jana khukta vancho. Osi ontena elümoto tüngkachia heto kyatacho. 3 "OPVÜI Israel Potsow, kvütoli heto lyuchechoto? Kvütoli Benjamin jipo ji Israel pvüji lona khi siwo tssovla?" 4 Nyazüngina kyon jiang na hojilo khümshümta than tona erungthan mpüm ejoma to pitacho. 5 Ontena heto engatacho, "Israel pvüji jiang yolo kvüi na jo Mizpah OPVÜI vanrhyu lo sanrhyutao jilo n jücho alo?" (Ochona Mizpah lo n woa sana jijo chüthoku to ontena mmyinga echümchaktacho licho) 6 Israel kyon jiangna onte jenioden Benjamin kyon jiang tsükona nungrata phyotacho, "Israel na nchüng jipo motsünga monthaka. 7 Benjamin eboe enhyoe vamo jiang tsükona etena eloe kvülo khitavla? Etena ete tsolo jiang ochia onte n pi to OPVÜI mhadungo na echümtathaka." 8 Ontena Israel jipo yolo ochinaha Mizpah lo sanrhyu jilo n woe vevana na to ethümtale Gilead lo Jabesh lona jo ochinaha n wocho yanchecho, 9 ntiotssole rasan omying tsatao jilo Jabesh kyon ochia njücho. 10 Hoji tsükona okho jina onte rasan lüm etsson wothüng taro eni wothuka heto ezocho, "Owo Jabesh lo evan topvü, eboe, eloe, osi ngaro jiang phata lüngthae sitava. 11 Eboe topvü lüngthae sia osi loroe jiangha eboe ntsithako jiango topvü lüngthae sia." 12 Jabesh kyon jiang yolo ontena loroe wothüng mezhü yanchecho, küma ontena hojiang sosi Kanaan meta Shiloh lo nchenki jilo yitacho. 13 Jisüi jo okho jina Rammon longpvü jilo vamo Benjamin kyon jiang thüngi ritsso esanle to yithen wothukcho. 14 Tole Benjamin kyon jiang yicho osi Israel jiangna loroe sosi oyi vao jiang onte picho. Tokhatola onte n jantacho. 15 OPVÜI na Israel okho ji chiroyio jina Israel jiangna Benjamin kyon jiang tsükona nungratacho. 16 Hoji tsükona okho esopvüi jiangna phyotacho, "Benjamin jipo lo loroe n vam sithaka. Etena onte eboe enhyoe vamo jiang tsükona engh kvülo khiyitavla? 17 Israel na ombo pvüji taro eni jilo motsünga tia monthukvü n li. Etena Benjamin pvüji ji motsü rümoni n sithukvü nzanchitav lia, 18 tokhatola ete ochona ete tsolov jiang onte thüngi vanthukana rhiyikae lia küma ete tsolov jiang ha onte n piche." 19 Jisüi jo ontena nchümcho, "Nzyuakvü OPVÜI myingona Shiloh lona tokhu tssotao ji nsungu yiv." (Shiloh jo Bethel khümkiwoe osi Lebanon jolowoe, os Bethel ha Shechem. oni yutalo olan jina engkhfüwoe.) 20 Ontena Benjamin kyon jiang ezocho, "Owo jününgroli mphoe 21 cheta vantava. Osi Shiloh loroe jiangna tokhu jilo sharita chiroana ntena jününgro li na chiyitava. Nte otsük akvüna loroe tsük-tsük rechoe sosi Benjamin metae yitava. 22 Onte pyae mekana opo jiangna lüm tsuka nte yana rona heto ezotava, 'Nzansi e thüngi onte vanthuka, onte ji ena ritssolona nte khelona rechoe e eloe tssothuka meka. Osi ntena e picho meküma ntena phyochak yesochoha meka.' " 23 Benjamin kyon jiangna hojito tssocho osi Shiloh lo sharitao jilo na onte otsük akvü na loroe tsük-tsük sosi onte metae yicho. Osi ontena onte metae oyi onte yantsü jiang tssochoe vantacho. 24 Israel ejoma jiang ha otsük akvüna ombo mbo jipo, wopan osi ejüeli yana yilancho. 25 Hojithüng jo Israel lo mesae n van. Otsük akvüna ombo mbo etancho vantacho.
1 Elimelekh Tona Ombo Wopan To na Moab Lo Yiala 1 Nkolo Israel lo mesao n vanthüng, meta jilo otssi vara licho. Jithüng kyon tsüka Elimelekh, Ephrath pvüji kyon Bethlehem Juda lo evan jina ombo engh Noami tona otsoe Mahlon ha Chilion to oni sosi Moab lo esünga ro vanwo yitacho. Ontena jilo vantathüng, 3 Elimelekh chüi sisi Noami tona tsokhying eni totae enhyokacho. 4 Osi woniata na Moab loroe Orphah ha Ruth oni soa vancho. Nzyu taro harüma sülojo 5 Mahlon ha Chilion woniata chücho osi Noami jo orapvü osi tsokhying n vamvü ompvü tae kümi sicho.
Noami ha Ruth Onina Bethlehem lo Elani Yiala
6 Yuta tara sülojo OPVÜI na ombo kyon jiang joncho-rücho mmhayithaka to Noami na zocho; hoji tsükona ompvüna orüv jiang sosi Moab meta lona khochiv methakcho. 7 Ontena Juda lo yitav khochitacho, osi olani na 8 ompvüna oni ezocho, "Nte metae elani oyi nini oyo ndüngo vantava. Nini na a osi chüa yithako jiang thüngi mmhon ejüo ji esüa OPVÜI khi nini mmhayithokvü ka. 9 OPVÜI khi niniata yanpiothoklani oki küma nte yithoku ka." 10 Noami na pyonta salüm oni eyolo ntssüpicho, tole woniata na kyata phyotacho, "Meka ena ni phana nte kyon jiang thüngi yivka." 11 Noami na ezocho, "A tsolovden, nini na elani yichevka. Ninio ntioli athüngi nte yita hungala? Ana otsoe vanlani nini soa vanthuklam alo? 12 Ana esonlani yanpilanchev meka, oki elani yitava. Yanpilanchev ana eyilo lea osi nchüng zümo yanpi otsoe buklea 13 nini na erankümthoku nhyakta vam alo? Hoto tssole ninina thanpoe jo n yanpichev alo? Meka a tsolovden, hojito n tssocheka. OPVÜI na athüngi n mathav sithaka osi nini tsükona anungrala." 14 Tole onina kyatalancho. Tosi Orpah na ono ji pyonta salüm eyolo ntssüpisi kholani oki yicho, tokhatola Ruth jo ono n vachicho. 15 Noami na ompvü ezocho, "Ruth, niyenio jijo kholani okiwoe ompvü wopan osi ompvü potsow yana yithaka. Nina ha ompvü phana okiwoe yia." 16 Tole Ruth na ezocho, "Ni sisi eyiv a ti-zoa! Tolea ni phana arothuka. Nina kvüi yiana anaha ji phana yivka, osi nina kvülo vana sana anaha jilo vamuka. Ni kyon jo a kyon tssovka, osi ni Potsow jo a Potsow tssovka. 17 Nina kvülona chüa sana anaha jilona chüvka, osi anaha jilo ashothevka. Osi ana echü lona yaka thanpo lona ana ni sia tssona OPVÜI khi ezüp mmyinga apithuka." 18 Ruth na ompvü phana yinrüngu methaki lia to Noami na zechetale, ntia n phyov sicho. 19 Onina Bethelehem n janthüng jo n sanna yitacho. Osi onina oyi Bethlehem janale kyon topvüna emathatsüngi phyotacho, "Otsotso shijo Noami alo?" 20 Ompvüna onte ezocho, "Noami to a ti tsatava, Narah to atsatava, ntiotssole thotsü Potsow na a eküm ji ekhov kümthukthaka. 21 Ana shilona khochia thüngjo ejüeli elümoto licho tokhatola ana jina khoe yiale alo ntia n li. OPVÜI thotsü Potsow na khoe asia hetüv ezüp a pia tssona ntioli Noami to atsatala?" 22 Hojito Noami na ompvü orüv Moab loroe Ruth ji sosi yicho. Onina Bethlehem oyi janathüng jo liri yutalo tssocho.
Ruth Na Boaz Li Elhi Tssoala
1 Noami na ompvü orapvü Elimelek wopan Boaz to tsa ejüeli osi okholo ephyo-esan tüv vancho. 2 Tsüngona lojo Ruth na Noami ezocho, "Ana oli owo liriden jiang mosü yamvüka. Ana longtsüla ochona sana jo ombo nzo elhi a tssothoku to." Tole Noami na ezocho, "Otsolov, nraoa." 3 Ruth na oli owo oyam ngoza sülami rümphia mosü jiang yancho. Tole hoji jo Boaz li tssocho. 4 N sungu Boaz na Bethlehemi na oli oro liri jiang salüm pia, "OPVÜI khi nte ndüngo vanthuku ka." to ezoa wocho. 5 Boaz na yinga esopvüi ji ezocho, "Loroe shijo ochola?" 6 Tole ombona janlancho, "Ompvüo metapoe eloe Moab lona Noami phana yio jika. 7 Ompvüna liri jiang sülami na mosü yanthuk to a engacho. Ompvüna enyathüng na elhi tssopvüto osi enhüngati khümchoe esanala." 8 Jisüijo Boaz na Ruth ezocho, "Ana tara lanso ni pivka. Litsük shilo yaka oli thanpoe ti-okhe, osi shilo eloe jiang nzo elhi tssokhe; 9 Ontena kvülo ria sana zeta vansi jilo owo mosü yana. Ni ti Jikarükale osi ni ti-jalale to ana eboe jiang ezothaka. Ni eratsünga na ontena yeni vao jüpvü jianglo na yukhe." 10 Ruth na ompvü mha ji likoe nkhümthei liko tssyukata Boaz ezocho, "Nino kvütoli a tsükona tata wongkhyuala? Nino kvütoli metapoe eloe thüngi hetata nzan ejüala?" 11 Boaz na ezocho, "Nirapvü chüpvüto nina nino thüngi ntio mmhom tssoa vancho sana ana yivon zoa vanpvüka. Nina kvütoli ni pvüpoe osi ni meta sisi nina n tsio kyon thüngi yicho sana ana ntsia. 12 Nina ntio tssocho sana ji tsükona OPVÜI khi ni mmhayithuka. Israel Potsow ocho nina yana oyi tsankacho sana ji khi benria ni yantsothuk ka!" 13 Ruth na janlancho, "Tsüphoeyo, nino elümoto nzan lia. Aiyo ni phajae tsüka esüa tae khatola nina oyi mmhom hetata enyipina ajana a emathathukala." 14 Etsoyu yutalo Boaz na Ruth ezocho, "Oyi hümri tsakae shilo jümthechi tsoa." Tole ompvüna lhitssoe jiang nzo khukthele Boaz na otsüng nghicho tara ompvü vachiyicho. Ompvüna etsson tsosi enhyolancho. 15-16 Ompvüna phan thi mosü yano khochithakle Boaz na yingae jiang ezocho, "Ompvüna khina tssukchüng jiang ndüngo lea khikathuka, ntia ompvü ti-zotava. Hoji ekalo tssukchüng lona tara tssüngche ompvü vayia khithuka." 17 Ruth na mmyu jana mosü yancho, osi ompvüna tsenrhyue zele seri taro bena yanchecho. 18 Ompvüna otssuk ji hansi oyani oyi ono ejücho. Tole ono na etsoyu enhyoe licho ompvü picho. 19 Noami na ompvü engacho, "Nino shijo kvülo owo yanrhyuchola? Ocho li owo yanchola? Ochona ni chokata ni nzancho sana Potsow khi ombo nzathuku ka!" Tole Ruth na kyon tsüka Boaz to tsao ji li owo khicho to Noami ezocho. 20 Noami na phyocho, "OPVÜI na Boaz nzanthoku ka. OPVÜI na ombo phyochak jiang echüi, eküm, topvü pono benthoku ka." Ompvüna phyolancho, "Kyon jijo ete wopan ndüng ka, ombona ete topvü e nijüpvü ka." 21 Tole Ruth na phyocho, "topvülo mmhontso jijo ombo liri jiang na n rirathüng jo mosü yanle to aezoa a yanthukcho." 22 Tole Noami na Ruth ezocho, "Hoka, a tsolov, ni ji Boaz li eloe jiang yolo elhi etssovo ji mmhontsowo tssovka. Nina thanpoe li ochojo oyam na ni jükarükata ni jalav mpato tssov." 23 Ruth na otssuk omüm eri yuta n yakrathüng jo onte nzo elhi tssocho. Osi ompvüna ono ndüngo vancho.
Ruth Na Orapvü Yanchetala
1 Yuta tara sülo Noami na Ruth ezocho, "Nina ni ki yancheo tssoa ana orapvü ni yanivka. 2 Nina eloe nzo elhi tssoa vamo jiang OPVÜI Boaz jo ete wopan ndungka. Enga, nchüng mmyui ombona omüm tsena vamvüka. 3 Tsükae sisi mozhürhüm mmhom thesi ni pipo mmhontso ji ekata. Osi ombona oli tsena vamo jilo woa. Tokhatola ombona etsoyu n tsorathüng jo ni tihungthuka. 4 Ombona yipo ji cheta vansi ombo yipthe thakana yingto owo ombo sü ji shyukae ombo jowoe yipa. Tona kvüto lyuv sana ombona ni ezovka." 5 Ruth na phyocho, "Nina ntio a zoana topvü ana tssovka." 6 Ruth na litssenpheni owo ono na ezoji ephan tssocho. 7 Boaz na etsoyu tssothakale emathacho. Osi ombona omüm nshae lio jilo owo yipi sicho. Ruth na yingto owo osü ji shakae ombo jolo yipcho. 8 Tole zümolo ombona zaktole yipjüngchi ombo ndüngo eloe yipa vamo ji hungi emhukcho. 9 Ombona engacho, "Nino ochola?" Ruth na ezocho, "Aiyo Ruth ka tsüphoeyo, nino ete wopan tsso jina a ezev lia. Hoji tsükona nina a soa vana." 10 Ombona ezocho, "OPVÜI khi ni mmhayithoku ka. Nina nino thüngi tsso jilona kyongkata ete wopan ka to n vachina heto longtsüka lia vanala. Oyam sawo nina khyingroe yantsae lea, eli lea yana yithaku khatola nino hotüv mek. 11 Hoji tsükona oyan shilo kyon topvü na nino eloe mmhom to ni ntsia, küma ana ni phyocho bena ni soa vamvüka, ti wongkhyua. 12 Otsotso ka aiyo ete wopan ndungka, küma ni zenhyav lika, tolea a lona ndüngkao tüv wopan tsüka vanka. 13 Nchüng zümo jo to shilo yipchoa, osi wonchia na ombona ni zezevsana owo engae zetavka. Ombona ni tsakana jiha mmhona; osi ombona ni n ze to phyona ana Eküm Potsow myingona ni ezoala, ana ni tsakav ka. Nchüng zümo jo shilo to yipchoa." 14 Ompvüna jilo yipchocho khatola Boaz na hoji ochia n tsithukhungo jina ompvüna nyazüngina phanthi yicho. 15 Boaz na ompvü ezocho, "Ni sü ji sachia" Tosi Boaz na omüm seri mekyu bena chütheyicho osi ompvü mankvüi ejümkachiyia yithukcho. Tole ompvüna hoji hansi yantsüi yicho. 16 Ompvüna oki janale ono na engacho, "Otsolov, nino kvüto dungo-oa yichola?" Tole Boaz na ompvü nzamo jiang topvü Ruth na ono rüa ezocho. 17 Ompvüna ezocho, "Ombona a ji khejüng ni thüngi n yithuk to phyoa omüm shi apicho." 18 Noami na ompvü ezocho, "Yingto erüm toa vana, nchüng Boaz na phyo yi jiang n methakrav jo jüngtheta vamvü meka."
Boaz na Ruth Soa Vanala
1 Boaz na yantsü kipüngo sanrhyu ki jilo owo khukthei vancho. Tole Elimelek, Boaz na ephyo wopan ndüng ji rocho osi Boaz na ezocho, "Oshom, oro shilo khuktheta." Jitsükona ombona oro khuthecho. 2 Boaz na yantsü jilo esopvüi yolo otsük taro tsaphae khukthethukcho. Ontena khuktherathakale, 3 ombona ombo wopan ji ezocho, "Noami ha Moab metae na yithaka, osi ompvü na ete wopan Elimelek liji yenhungala, 4 osi ana nchümala ntena hoji ntsiv tssov. Nina ni shihungna oshom shiang mhadungona phyoa. Osi ni n chokana jiha phyoa, ntiotssole hoji eshiv elan ji ni jandenala, os jisüloto a janala." Kyon jina phyocho, "Ana shivka." 5 Boaz na ezocho, "Tona elüm mmhonka, tolea nina oli ji Noami thüngina shia tssona Moab eloe emi Ruth ha shinhyavka, ntiotssole oli ji echüo ji wopan khelo linrhüa yiv shikhfü." 6 Kyon jina janlancho, "Hojito tssona ana jo oli ji n shii. Osi to tssona a tsoeoro jiang naha oli ji n khi. Ana jo n shiala, küma nina shia." 7 Hoji tsüngon jilo jo tsütsaelan eyen osi oman etsüngta yutalo jo opvüo jina ombo jokhüp ji phungche eshipvüo ji epiv tüv shikhfü licho. Hojijo Israel jiangna oyi ji methakphen chethev jito tssotacho. 8 Hoji tsükona kyon jina Boaz ji, "Nina shia." to ezo jithüng ombo jokhüp ji phungi Boaz picho. 9 Tole Boaz na esopvüi jiang tona jilo evan topvü to ezocho, "Ana nchüng Noami thüngina Elimelek tona ombo tsoe Chilion tona Mahlon to oni ejüeli jiang topvü shithaka to enhugpvüi ji nteka. 10 Hoji ephalo, Mahlon emi Moab eloe Ruth ji a eloe kümala. Hojitoluyi echüo ji ejüeli ji ombo wopan lo lilana wovka. Osi ombo wopan jiang ji ombo kyon osi ombo yantsü jianglo vana wovka. Nte topvüna nchüng ehungpvüi tssoala." 11 esopvüiden osi thanpoe jiangna phyotacho, "Hoka, eiyo ehungpvüiden ka. OPVÜI khi ni engh ji Rachel ha Leah onina Jakob tsoe khosha vanio ji esüa tssothuka. Ni ji Ephrath pvüji yolo osi Bethlehem lo thüngche ni kümthokuka. 12 OPVÜI na loroe ni pio shi yakchia otsoeoro buki Juda ha Tamar oni tsoe Perez wopan esüa kümthoka."
Boaz Tona Ombo Tsoronichen To
13 Boaz na Ruth ji ombo engh tssoa oki sosi yicho. OPVÜI na ompvü mmhayicho osi omppvü na ngaro hani otsoe bukcho. 14 Eloe jiangna Noami ezocho, "OPVÜI thünga, ombona ni ezepvüi orüo ni pithaka. Tsokhying shi Israel lo thüngche kümthukvüka! 15 Nirüv shina ni nzanala osi ompvüna tsokhying tiying lona kyungkata ni mmhonithukthaka. OPVÜI na ni esonlani nirüo bukthuki ni nijüpa eküm ethan ni piala."16 Noami na ngaro ji tsakae, khayae, ombo nijüpcho. 17 Yankho jilo eloeden jiangna tsokhying ji Obed to tsatacho. Ontena otsük akvü ezotacho, "Noami tsükona tsokhying bukthaka!" Obed lona Jesse bukcho osi Jesse lona David bukcho. 18-22 Perez lona David nandang bochung ji heto tssochoPerez, Hezron, Ram, Amminaddab, Nahshon, Salmon, Boaz, Obed, Jesse tona David to.
Shiloh Lo Elkanah Tona Ombo Wopan To
1 Ephraim jipo lo Elkanah to tsa tsüka vancho, osi ombo Ephraim phunglan metae Ramah yantsü lo vancho. Ombo Elihu tsoe Jeroham ji tsoe, osi Zuph pvüji lo Tohu wopan lona tssocho. 2 Elkanah na engh otsük eni, Hannah ha Peninnah oni vancho. Peninnah jo otsoe vancho, khatola Hannah jo otsoe n van. 3 Shiloh lo Thotsü Potsow khümphen jilo Eli tsoe Hophni ha Pinehas onina OPVÜI pvüti tssota vamo jilo Elkanah na nzyu akvüto Ramah lona khochi OPVÜI khümo wocho. 4 Elkanah na kvüta OPVÜI thanasana ji akvüto echia jo Peninnah pi, echia jo ompvü ngaro jiang pi to tssocho. 5 Elkanah na Hannah elümoto nzana khatola OPVÜI na otsoeoro ompvü n pio jina Elkanah na othan jilo echi motsünga tae ompvü picho. 6 Hannah jo OPVÜI na otsoeoro ompvü n vanthuko jina ompvü ri Peninnah na ompvü yikvüa ompvü khangshicho. 7 Hojito nzyu sunga tssoa vancho, osi ontena OPVÜI khümo kvüta ota na Peninnah na Hannah emakao jina Hannah jo lüm n tssov etsoyu tia n tssov kya tae wocho. 8 Tole orapvüna heto engacho, "Hannah, nino ntioli kyala, osi ntioli etsoyu n tssoala? Nino ntioli yuta topvülo ni nungrala? Otsoe otsük taro thüngina jo ana ni nzamo mekcho ke?"
Hannah ha Eli Oni
9-10 Tsüngona lo Shiloh lo OPVÜI kina ontena etsoyu tssotacho sülo Hannah na phanthicho. Ompvü ji elümoto nungrao jina elümoto kya OPVÜI thüngi randan cho. Hojithüng ji pvüti Eli na kipüngo ombo vanphen jilo khothei vancho. 11 Hojithüng Hannah na phyochak tsüphov OPVÜI thüngi heto phyochakcho: 'Thotsü Potsow, ni nripvüi athüngi zechia! A nungra shi a zesi a nchümcheta! A ti mhechoa. Nina tsokhying tsüka apina ana omboji ni elhilo khochaki pivka osi ombo tssanji kvüthüngha tssüyiv meka." 12 Hannah na OPVÜI thüngi sunga randancho osi Eli na ompvü menfü jiang zeyia vancho. 13 Ompvüna menfü tae jelüpa owon n tssona randana vancho. 14 Tole Eli na hoji hungi soko na kino cho tsayia ezocho, "Ni kino zhüva etsophyo ji esana! Kino kiri lona esani chüngtsoe vana!" 15 Ompvüna ezocho, "Meka tsüphoeyo, a kinocho meka. Aiyo soko yua vancho meka! Aiyo elümoto nungra hansi a nungra jiang OPVÜI thüngi ezoaka. 16 Aiyo ethelen n li eloe to a tinchümia, a sükhying ji enungrathav etsso jina heto randana vanpvüka." 17 Tole Eli na ezocho, "Noyingroa oki yia," "osi nina ombo thüngi chomo ji Israel Potsow khi ni pithoku ka." 18 Ompvüna ezocho, "Ni khi yuta topvülo a nzana nchümchethoku ka." Tosi Hannah na oki yicho, osi ompvüna etsoyu tara tsosi nungra ji esani sicho.
Samuel Buki Khochako Ji
19 Ojyua enyathüng to jo Elkanah wopan na phanthi opvüi khümtasi Ramah lo oki yitacho. Elkannah na ombo engh Hannah thüngi ponilan tssocho osi OPVÜI na ompvü randan engayicho. 20 Hojitoli ompvüna ngaro hani tsokhying bukcho. Ompvüna otsoe ji Samuel to tsacho osi hoji yichak jo, "Ana OPVÜI thüngi choncho" to ompvüna phyocho. 21 Elani Elkanah wopan na nzyu akvü ekhüm osi ombona phyochako than jiang pilo Shiloh lo wotacho. 22 Tokhatola hojithüng jo Hannah na n wocho osi orapvü ji heto ezocho, "Ngaro shi khakpvü to ana ombo sosi owo OPVÜI ki eküm echung ombo vanthoku ka." 23 Elkanah na ezocho, "Toka nina zesi elamo ji tssoa; tolea ekhak n düngthüng jo okina vana. Osi OPVÜI khi ni randan ni bencheyithoku ka." Hoji tsükona Hannah na oki vani ngaro ji nijüpcho. 24 Ompvüna ngrao ji khakthakale sosi mangsübung nzyu ethüm tso motsünga, ohüm chencho seri taro tona zükhi sofü sükvü motsünga to hansi Shiloh lo wocho. Hojito ompvüna Samuel ji hgarothüng na Shiloh lo OPVÜI ki sosi wocho. 25 Ontena mangsü ji tatsüngthakale Samuel ji sosi Eli thüngi wotacho. 26 Hannah na ombo ezocho, 'Tsüphoe yo, nina a chechethe la? Aiyo shilo mangi OPVÜI thüngi randana nina a hungwo eloe jika. 27 Ana ngaro shi OPVÜI thüngi choncho osi ana chomo ji ombona a picho. 28 Hoji tsükona ana ombo ji OPVÜI lo khochaki piala. Ombo eküm evanthüng nandang jo ombo OPVÜI echi tssovka." Tosi ontena hoji lona OPVÜI khümtacho.
Hannah Randan
1 Hannah na randancho: "OPVÜI na longshi khi a lüm pyingithukthaka; Ombona a tsükona tsso ji khi kvütata a emathacho ato! Ana a ri jiang emakav; Potsow na anzanthako jina ayio kvüta a emathacho ato! 2 "Ochia OPVÜI esüa nthoe n van; ochia ombo esüa n van. Ete Potsow esüa e n kohoe n van. 3 Nte kangtsü jiang esantava; ote kangtsü yi jiang jükrüptava. Ntiotssole OPVÜI jo ntsikhamo Potsow ji, osi kyon na tsso jiang topvü ombona ejyui zeyiala. 4 Thokhyung rasan jiang lotssi jiango jakthaka, tolea etho n liv vamo jiango etho piala. 5 Ochoang na mmhia tsoa vancho sana jiango enhungo mman mmyotsoa yithaka; tokhatola wondona vamo jiango mmhithuk thaka. Otsoe n lio eloe jina otsük tiying bukthaka. Tokhatola ngaro khoshao oyo jijo enhungo ochia n vam sithaka. 6 OPVÜI na chüthukala osi kümthukala; ombona kyon jiang echüli rheyithukala, osi sochelanala. 7 Ombona ochoang sanao yantsathukala osi ochoang najo elii kümthukala. Ombona ochoangnao terithuk, ochoangnao tsüphothuk to tssoala. 8 Ombona yantsae jiang ji ochon lona sükatala osi ethelan lia yana vamo jiang ji onte nungra lona sükatala. Ochona mesatso yolo onte rhowothukala osi myingthüng vanphen lo onte thechiala. Limha shi tssokaphen jiango OPVÜI echi; Ombona jiang poni limha shi tssokacho. 9 "Ombona ombo longtsükao jiang eküm ntangnshoniala, tokhatola n thae jiango emüngina moni siala; kyon na ombo etho lona ekhyo hunga mek. 10 OPVÜI ri jiango monthokvü; Ombona potsüwoe na tharaki onte monthukala. OPVÜI na limhatsü oyi tssoyiv; Ombona ombo mesao ji etho piv, ombona ethüngcheo mesao ji ombona ekhyo piv." 11 Jisülo jo Elkanah na Ramah lo omboti oki yicho; tokhatola Samuel jo Eli pvüti ndüngo Shiloh lo OPVÜI elhi tssoa vancho.
Eli Tsokhying Jiang
12 Eli tsoe jiango n thae osi ethelan nliden tssocho. Ontena OPVÜI loha lüm n the; 13 mekana pvüti na kyon jiang thüngina echom lio shikhfü jiang loha lüm n the to tssocho. Jithüngina jo, ochona sana erungthan pina pvüti ji phajae jina ekyukphen eshüm bensi rocho; osi oso ji ekvüa vanathüng na, 14 ombona ekhyuphen ji sohanphfü jilo ekhyuthechi jina ntio sücheta sana ji pvüti ji ejan tssoa khicho. Israel kvüta na Shiloh lo othan pilo roasana jiang topvü thüngi hojito tssoyicho. 15 Hoji ephalo othan jiang lona ethyu jiang tia n shakchothüng na pvüti phajae jina oro heto ezocho, "Pvüti jina ri etsov oso tara a pia; ekvücho jo ombona n khiala, pvüti jina soshu chonala." 16 Hojithüng kyon jina heto ezona, "Shikhfü ephan ethyu ji rungtademka, hoji süloti nina ethev elio jiang khia," tona pvüti phajae jina phyocho, "Meka! Enhünga apia! Nina a n pina, ana a etancho khivka." 17 Eli tsoe jiang na heto mmen tsso jijo OPVÜI mhadungo emhokthav n lan; ntiotssole ontena OPVÜI than jiang n yikrachicho.
Shiloh lo Samuel
18 Hojithüng jo eboeroro Samuel jo nthosü phungthesi OPVÜI benkata vanpvü tssocho. 19 Nzyu akvü oyona orapvü phana nzyua than ji pilo woana osü ethan ombo hanicho. 20 Hojithüng Eli na Elkanah ha ombo engh oni mmhayithuka heto Elkanah ezocho, "OPVÜI na eloe shi yakchia otsoe thanpo ha ni mmhaithoki ntena khochaki pithako shi echungcho thoku ka." Tothakale ontena oki yitacho. 21 Otsotso OPVÜI na Hannah mmhayithukcho, osi ompvüna tsokhying ethüm, tsolo otsük eni to vanlancho. Osi Samuel ji OPVÜI elhi lona khyocheranküma yicho.
Eli Tona Ombo Tsoe Jiang To
22 Eli jo elümoto sonthakcho. Osi ombo tsoe jiangna Israel kyon jiang thüngi etssophyowo jiang topvü ombona zoa vancho. Ombo tsoe jiang na OPVÜI vanrhyu ranki kipüngo elhi etssoe eloe jiang thüngi mpatao yiptala to ombona yivon zocho. 23 Hoji tsükona ombona onte zocho, "Nteno ntioli heto elhitala? Ntena mmen elhi tsso jiang otsük akvüna a ezotala. 24Esantava a tsoeden! OPVÜI kyon shiang na phyota vamo shiango ekhenthao motsü! 25 Kyon na kyon thüngi mmen tssona Potsow na ombo nkocheo ha lia; tokhatola OPVÜI thüngi mmen tsso jiango ochona nkochevla?" Tokhatola ontena opo na ezo jiang nngatacho, ntiotssole OPVÜI na onte chüthoku methakthakcho. 26 Jithüng ji eboeroro Samuel ji rankata yicho osi kyon tona Potsow to na chokata kümcho.
Eli Wopan Pono Potsow zenkhying yi
27 OPVÜI thüngina yithen heto hansi Eli thüngi zenkhying tsüka rocho, "Nte motsüi Aaron tona ombo wopan to na Ejip mesao küpo ezii tssota vanathüng, ana a bobo Aaron hungthukcho. 28 Israel jipo topvü yolo na ombo wopan ethüngchei a pvüti tssothuka, thanphen lo zathuka, tssütsserhüm runga, ntho sü ekasi athüngi thyudathuka rocho. Osi ana onte ejan ha thanpheni na rungo jilona khichei onte ejan lithukcho. 29 Tona nino, kvütoli kyon na athüngi othan epiv elio ji pio jiang ji epiera zetala? Eli, nino ni tsoe jiang ji othan jianglo mmhontso jiang lo khiche onte bobo tsotsüngi vanthuksi nina athüngina jo onte ekyongo yikrachiala? 30 OPVÜI Israel Potsow A shina ovüngthüng na phyoe lia, ni osi ni wopan na yuta topvü lo a pvüti tssoa abenkata wov ka to. Tokhatola enhungo hojito tssov meka to ana phyochakala! Jithüngona jo ochoangna a yikrachia sana ana jiang yikrachivka, osi ochoangna a khaki siana ana onte tssaku ka. 31 Enga, ana ni wopan osi nipvüji yolo khyingroe jiang topvü chüthoko tsüngon livka, osi ni wopan lo eboetso ochia eson jana vam meka. 32 Nina emhoknungra nduku ka, osi ana Israel jipo thanpoe jiang mmhayithoko jiang ji omhyik rakia zev, osi ni wopan yolo ochinaha eson jana harishia vanlam meka. 33 Tokhatola ana ni tsoeoro yolo tsüka enhyokathuki pvüti tssoa a benkathoku ka. Tokhtaola omboha omhyik juki eyilo n liv siv, osi ni tsoronichen thanpoe jiangha echü ntav lona chüravka. 34 Ni tsoe onjeni, Hophni ha Phinehas woniata enga na chüa na jijo, ana phyo jiang topvü benchetala to chekaphen ji tssovka. 35 Ana alo longtsükao tüv osi ana ntio a tssothuk hunga sana jiang topvü etsso tüv pvüti tsüka ethüngchevka. Ana tsoerüi ombo piv osi ana ethüngcheo mesao ji vanhya lo benkae elhi tssothoku ka. 36 Ni tsoronichen ochoang enhyokae vana sana jiang na pvüti ji thüngi orang osi etsoyu chomka, osi pvüti ji phajae tssoe eküm süphiv chomka."
OPVÃœI na Samuel Ndukala
1 Yuta jilo eboeroro Samuel na Eli küpo elhi tssoa vanathüng jo OPVÜI yithen hanphi matarocho osi OPVÜI thüngi na hungthuk ji elümoto matarocho. 2 Zümo motsünga lo, omhyik na n hungu sithako eson Eli na ombo yipheni yipa vancho, 3 osi Samuel jo Ntho Ntsata thephen lio jilo yipa vancho. Enyathüng, n wonchithüng, milon ji n mhethüng, 4 OPVÜI na Samuel tsacho. Tole ombona, "Hao tsüphoe yo," to yicho si, 5 Eli thüngi owo, "Nina a tsacho alo, aiyo shilo vanka" to ezocho. Tole Eli na ezocho, "Ana ni n tsaka oyi yipa vana" Tole Samuel na oyi yiplancho. 67 OPVÜI na Samuel tsalancho, tolea OPVÜI na echunga tia ombo n tsahamo jina ombo tsala to n tsicho. Hoji tsükona ombona phanthi Eli thüngi owo, "Nina a tsao ji aiyo helo vanka" to ezocho. Tole Eli na janlancho, "A tsoeyo, ana ni n tsaka, oyi yipa vana." 8 OPVÜI na yenjo ethümoto Samuel tsalancho. Tole ombona phanthi Eli thüngi owo, "Hao, nina atsoa ji shilo vanka" to ezocho. Jisüi jo OPVÜI na Samuel tsala to Eli na nchümchecho, 9 hoji tsükona ombona ezolancho, "Oyi yipa vana osi ni tsalana tssona, 'OPVÜI, ni phajae na enga vanaka jana' " to ezoa. Jisüi jo Samuel na yipa yilancho. 10 Jisüi jo OPVÜI na joro hojilo mangi ovüngthüng esüa, "Samuel! Samuel! to tsalancho" Tole Samuel na, "Ni phajae na enga vanka, jana" to ezocho. 11 OPVÜI na phyocho, "Tsüngona lojo ana Israel pvüji tsükona ntiosana tssoyiv osi hoji jo ekhenthao tssov osi hoji motsü ji ezoe topvü ngangchev. 12 Hoji tsüngono jo ana Eli wopan pono ekyuv jiang benkadeni na ochüm jana rothoku ka. 13 Ana ombo wopan ji nchünkhon tsükona ezüp piv sala to ezothaka, ntiotssole ombo tsoe jiang na athüngi n mhom phyothaka. Ontena hojito tssota vamo jiang Eli na ntsia ha ombona ntia onte n tangcho. 14 Hoji tsükona ana Eli wopan thüngi khünga phyochakala, nti than naha ekhenthao mmen shi man ji khi sichev meka." 15 Samuel na enyathüng jana yipa vansi phanthi OPVÜI ki kipüng ji chonchi cho. Osi ombona OPVÜI yithen ezowo ji Eli ezov kyucho. 16 Tole Eli na "A nungori Samuel" to ombo tsacho. Tole Samuel na "Hao, tsüphoe yo" to yichocho. 17 Eli na engacho, "OPVÜI na ntio ni ezochola? Ntia ati mphokhe, nina a mphocho jo OPVÜI na ni ezüpthuku ka." 18 Tole samuel na topvü ombo ezoracho, osi ntia n valanchicho. Tole Eli na phyocho, "Ombo OPVÜI, hoji tsükona ombona ombo tsükona ntio mmhontso to zecheta sana ji ephan ombo na tssovka." 19 Sam uel ji rankata yiale OPVÜI na ombolo vanrhücho osi ombona phyo jiang topvü benchethukcho. 20 Hojito Israel meta ochümi na ochüma janae na Samuel jo OPVÜI yiphyoe ji to chekacho. 21 OPVÜI na Samuel thüngi ombobo ejüthako ji esüa Shiloh loha ombombo hungthuka vanrhyucho. Osi Samuel na oyi nsana na, Israel topvü na engayicho.
Ntsata Bakos Ji Phanchoyio Ji
1 Yuta jilo Philistine jiang na Israel thüngi ori tssov tsükona sanrhyutacho, hoji tsükona Israel jiang naha ori tssov tsükona khochicho. Israel jiang na Ebenezer lo nchen, nna Philistine jiango Aphek lo nchen to tssocho. 2 Philistine jiang na sakae elümoto rotasi ontena Israel jiang wothüng mezhü harüma ritssopheni na chüthokcho. 3 Israel enhyo jiang na nchenpheni kholani yile Israel esopvüi jiang na phyocho, "Nchüngo ntioli OPVÜI na Philistine jiang khi e khyothukcho ato? Etena Shiloh lo OPVÜI Ntsata Bakos ji khi hansi oyi ete ndüngo vasi hoji khi ete ri jiang khelona eshanchothoku ka." 4 Hojito ontena Shiloh lo yithenpvüi wothuka OPVÜI Ntsata Bakos ji, OPVÜI Thotsü ji Vantsü thungtssophen ji hana yithukcho. Osi Eli tsoe otsük eni, Hophni ha Pinehas onina phana wocho. 5 Ntsata Bakos ji hana yiale, Israel jiang na ematha lona emhokthav erontao jina liko mpato enhyokcho. 6 Hoji nshanlongta ji Philistine jiang na zoe phyotacho, "Hebre shiang nchenpheni nshanlongtao shi engatva! Hoji jo ntio etsso la?" Kvüthüng Ntsata Bakos ji Israel jiang vanpheni hansi yithaka to ontena 7 ntsicho sana ontena kyua phyotacho, "Onte nchenpheni Potsow rothaka! Ete ji e n benthaka! Ovüngthüng jo hetüv kvüthüngha ete thüngi n tssohan! 8 Ochona Thotsü Potsow jiang khe lona e shanchov la? Potsow shina lijüngi na Ejip kyon jiang lüngtharüpcho! 9 Philistine kyonden, lüm tssontava, osi eboe tssoe sakatava, to mekana etena onte ji ete ezii tssothuko ji esüa, etena Hebrew jiang ezii tssochevka. Hoji tsükona eboe esüa sakatava!" 10 Philistine jiang na etho theta rotae Isarael jiang khyocho osi Israel jiang na oki tsanta yicho. Hoji lona emhokthav chücho, Israel rasan wothüng thümro lüngthacho. 11 Osi Hebrew jiang Ntsata Bakos ji rechocho osi Eli tsoe Hophni ha Pinehas oniha lüngthacho.
Eli Chüo Ji
12 Benjamin pvüji kyon tsüka na ritssopheni na yongnrhüi hoji nchuk na oyi Shiloh jancho. Ombo nungra ji ejüv tsükona ombona osü jiang reroe sisi kvüri ochon shake hancho. 13 Eli jo OPVÜI Ntsata Bakos ji tsükona elümoto wongkhyua lantssae khukthephen jilo khukthei zechia vancho. Kyon jina yithen ji yantsü pyinga yithukcho osi otsük akvüna ekyu lona kyasochicho. 14 Eli na owon ji zoe engacho, "Shijo ntio won tssotala?" Tole kyon jina Eli thüngi zakto owo yithen ji ezocho. 15 (Jithüng jo Eli jo nzyu ekha tokusi tiza tssothakcho osi omhyik ha jukthakcho.) 16 Kyon jina phyocho, "Aiyo ritssopheni na tsan choe nchüngti yunga shilo yicho." Eli na ezocho, "Ntio tssochola a tsoe yo?" 17 Yithenpvüi jina ezocho, "Israel na Philistine jiang mhadungo tsanthaka, ekhenthao ekhyothaka! Hoji ekalo nitsoe Hophni ha Pinehas oniha lüngthacho osi Potsow Ntsata Bakos jiha rechoe khithaka!" 18 Kyon jina Ntsata Bakos ji motsü ji phyoa Eli na zoale ombona kipüng ndüngo lantssae khukthei vamo jilona sülamoe erithecho. Omboji elümoto beleta sonthako jina hoto ombo erithetathüng evüng jaki chüi sicho. Ombo Israel lo esopvüi nzyu zhüro tssothakcho.
Pinehas Emi Ji Chüo Ji
19 Pinehas eloe, Eli orüv jijo hojithüng ji ngaro hansi vancho osi ngaro ji evamu yuta janthakcho. Potsow Ntsata Bakos recho ji tona omo chüo ji osi orapvü chüo ji to jiang ompvüna zoale jitopvü ngaro evam eno benkae ngaro ji bukcho. 20 Osi ompvü chüa vamo jithüng ompvü nzanchia vamo eloe jina ezocho, "Lüm tssonkhe! Tsokhying bukthaka!" Tokhatola ompvüna hoji ntsayiv n janlancho. 21 Eloe jina tsokhying ji Tchabod" to tsayicho, ji yichak jo Potsow pfütsson na Israel sithaka" to. Hoji jo Potsow Ntsata thephen recho ji, omo chüo ji osi orapvü chüo ji tolo rakae tsacho. 22 Ompvüna phyocho, "Potsow pfütsson na Israel sithaka, ntiotssole Potsow Ntsata Bakos ji rechothaka!"
Philistine Jiang Yolo Ntsata Bakos Ji
1 Philistine jiang na Ntsata Bakos ji rechoe Ebenezer lona onte yantsü Ashdad lo hansi oyi 2 onte Potsow Dagon khümpheni hansi owo Dagon kisü ji ndüngo vatacho. 3 Ojyuato nyazüngi jo Ashdad kyon jiang na Dagon kisü ji OPVÜI Ntsata Bakos ji mhadungoe nkhümo evümthei lia hungcho. Hoji tsükona ontena hoji khyokae vaphen jilo valancho. 4 Tole hoji ojyuato enyathüng ha kisü ji OPVÜI Ntsata Bakos ji mhadungo vanthei lia hunglancho. Hojithüng jo kisü ji kvüri ji tona okhe eni ji tojo jakchoe kipüng ndüngo licho, osi otsük jitae licho. 5 Hoji tsükona nchüng jana Dagon ekhüm jiang na hoji lo n hyekana nkyaka rhowo khümtala. 6 OPVÜI na Ashdod kyon jiang elümoto khangshia ekhenrhükthukcho. Ombona Ashdod kyon jiang tona hoji nkonjano evan jiang topvü to vela na jentsüngthukcho. 7 Ontena hoji ezüp ji hungale phyotacho, "Israel Potsow jina ete tona ete potsow Dagon to e khangriala. Etena Ntsata Bakos ji shilo n vatache." 8 Hoji tsükona ontena yithenpvüi wothuka Philistine mesao otsük mongo jiang tsae engacho, "Etena Israel Potsow ji Ntsata Bakos ji kvüto lyutavla?" Tole ontena ezocho, "Gath lo hansi yitava." Hoji tsükona ontena Philistine yantsü thanpo Gath jilo hansi yitacho. 9 Tole hoji vao ji yakchia jilo evamo kyon jiangha OPVÜI na elümoto ekhenthukcho. OPVÜI na hojilo evamo kyon jiang ji ngaro eran topvü bümtsüngthukcho. 10 Toajo ontena Ntsata Bakos ji Philistine yantsü thanpo Ekron to tsao jilo hansi yitacho. Tole hoji hansi oyi yantsü ji janpvüto jilo kyon jiangna phyotacho, "Echükhanthoku ji Israel Potsow Ntsata Bakos ji hepi hantasi yithaka!" 11 Tole elani ontena Philistine mesao jiang tsae egatacho, "Israel Potsow Ntsata Bakos ji ombo tathi vanpheni yithuka, to mekana wopan tona echükham ka." Potsow na elümoto onte khangshia vamo jina yantsü mpüm ekhentsüngcho. 12 N chüo jiang jo vela osi ebüm khyingi ezüpta onte potsow thüngi nzanchile to randantacho.
Ntsata Bakos Ji Hansi Yilamo Ji
1 OPVÜI Ntsata Bakos ji Philistia lo choro tiying vasi sülo, 2 kyon jiangna pvüti jiang tona ozen ntsii jiang to tsarhyue ezocho, "OPVÜI Ntsata Bakso ji etena kvüto lyutavla? Etena ombo tathi vanpheni yithuka tssona hoji nzo ntio theyia yithokvü la?" 3 Tole ontena janlancho, "Ntena Israel Potsow Ntsata Bakos ji yithuka tssona ete mmen esiyithuko tssoa ntiosana yantso theta yithoku lia. Ntsata thephen ji yantso n jüv n yiche. To tssona nte emiyivka osi ntio tsükona ombona n tümjaku nte khangshicho sana ji engathevka." 4 Tole kyon jiangna, "Etena ntio yantso theyitavla?" to engatacho. Tole ontena ezocho, "Shona mpüm vela esüa tüv mongo tona zhütsünaro kisü shona na nsüngrücho mongo to thetava. Hojiang akvüto ji Philistine mesao tsüka thung tssoa pitava. Hojitüv ezüp jina nte otsük akvü tona mesao mongo jiang to thüngi yicho. 5 Vela tona zütsünaro to na meta shi roa vamo jina ntena hojiang kisü nsüngrüi Israel Potsow yikrachitava. To tssona Potsow na, nte tona nte potsow jiang to ezüp thuka vamo ji esanthoku mpato tssov. 6 Nteno ntioli Ejip kyonden osi onte mesao jiang esüa lümbüm khüngta vantala? Israel na Ejip meta lona n khochukthüng nandang Potsow na onte ejitheehio ji ti mhechotava. 7 Hojitsükona zotoro ethan shantava osi mangsü eni zotoro n suhan tüv methak-tava. Mangsü eni ji zotoro jilo shenkae mangsüro jiang ranki phana yia. 8 OPVÜI Ntsata Bakos ji zotoro jilo thesi hoji tssae ntena shona kisü nsüngrüo jiang thei OPVÜI thüngi nte mmen man yantso hanthuka. Zotoro ji khochithuka osi olani jo ombobo yithuka. 9 Tona zotoro jina ombobo Beth Shemesh yantsüwoe yina ji yichak jo vara shiang ji Israel Potsow na yithukcho to chethevka. Tokhatola zotoro jina jiwoe n yia tssona ji yichak jo vara shiangji Potsow na mek, ombo eyi yicho to chekae khitava." 10 Onte ezoji ephan ontena mangsü eni khi zotoro jilo shenkae onte ro jiango ranki shenkae vacho. 11 Ontena Ntsata thephen ji zotoro jilo thesi ji tssae vela tona zütsünaro to kisü jiang thecho. 12 Tole mangsü jiang na Beth Shemesh lamoe saksak khochicho. Mangsü jiangna nrunga khochitacho osi Philistine mesao otsük mongo jiang naha hoji phana Beth Shemesh erü jana wotacho. 13 Beth Shemesh kyon jiango oli rita vancho, osi ontena zakto zechitale Ntsata thephen ji hungcho. Toajo elümoto onte emathacho. 14 Zotoro jina Joshua to tsa Beth Shemesh yamo ji li longpvü motsünga ndüngo oyi esancho. Kyon jiang na otssüng zotoro ji tssiroe, mangsü jiang lüngthae OPVÜI thüngi erungthan pitacho. 15 Levi jiang na OPVÜI Ntsata Bakos ji tona shona kisü jiang to tsakae longpvü ji poni ekachicho. Jisülo jo Beth Shemesh kyon jiangna erungthan tona thanpo than to OPVÜI pitacho. 16 Philistine mesao otsük mongo jiangna shiang zeta vansi hoji nchuk na Ekron lo yitacho. 17 Philistine jiang na shona vela kisü mongo ji onte mmen than tssoa thantacho, yantsü mongo ji nkhen motsüngtsüngAshdod, Asheklon, Gath, Gaza, tona Ekron to. 18 Ontena shona zütsünaro kisü jiangha Philistine mesae otsük mongo na sawo yantsü pikhfü lio jiang osi pikhfü n lio jiang to thung pitacho. Hojito tsso ji chethephen jo Joshua li longpvü tsüphov ji enhünga lea lia. 19 Beth Shemesh kyon ochoang na Ntsata thephen ji zecho sana jiangji OPVÜI na otsük ekha tiying lüngthacho. OPVÜI na onte yolo hojito chüthoko jina kyon jiangna nugra kyatacho.
Keriath Jearim lo Ntsata Thephen ji
20 Jitsükona Beth Shemesh kyon jiang na phyotacho, "Ochona ntho Potsow mhadungo phanthikhokvü la? Etena ombo nkachotav tsükona kvülo ombo yithuk tavla?" 2i Ontena Kiriath Jearim kyon jiang thüngi heto ezolo yithenpvüi wothukcho, "Philistine jiangna OPVÜI Ntsata Bakos ji epilanthaka. Hoji tsükona joro khitava."
1 Kiriath Jearim kyon jiangna OPVÃœI Ntsata Bakos ji owo khi yondoni vamo Abinadab to tsao ji ki owo vatacho. Osi ontena ombo tsoe Eleazar ji hoji ezei tssov nthochaki vanthukcho.
Samuel na Israel lo Esapvüi Tssoala
2 OPVÜI Ntsata thephen ji Kiriath Jearim lo sunga nzyu mekyu vacho. Yuta shilo Israel topvüna OPVÜI thüngi nzan chona kyatacho. 3 Samuel na kyon jiang ezocho, "Ntena nte lümbüm totona OPVÜI lo khophi yia tssona, ntena jipopoe potsow jiang topvü tona eloe potsow Astarte kisü to jiang vachi sitava. Osi nte bobo OPVÜI lo khochaki pitava osi ombo tae khümtava tona ombona Philistine jiang khelona nte shanchovka." 4 Hoji tsükona Israel jiangna Baal tona Astarte to kisü jiang sitasi OPVÜI tae khümtacho. 5 Jisülo jo Samuel na Israel jiang Mizpah lo sanrhyutale to heto yivon picho, "Ana hojilona OPVÜI thüngi nte randanivka." 6 Hojitsükona onte topvüna Mizpah lo sanrhyutacho. ontena ojü wokae phyangchochia OPVÜI thantacho osi hoji tsüngon totona khangtacho. Ontena phyotacho, "Etena OPVÜI thüngi mmen tssothaka." (Samuel na Mizpah lona Israel jiang ekhiranta jiang mmyantayicho) 7 Kvüthüng Israel jiangna Mizpah lo sanrhyutala to Philistine jiangna zocho sana, mesao otsük mongo jiangna onte nzo tssoa kyon jiang ekhfürhyui Israel jiang hav tssocho. Tole Israel jiang na hoji zoe kyua, Samuel ezotacho, 8 "Philistine jiang khelona e shanchole to OPVÜI thüngi erandania vana." 9 Samuel na olyuro tatsüngi OPVÜI thancho. Jisülojo ombona OPVÜI thüngi Israel kyochile to randanle OPVÜI na ombo randan ji janlancho. 10 Samuel na othan pia vanathüng Philistine jiang na oro onte hayacho, tokhatola OPVÜI na potsüwoe na tharaka ejena onte phancho. Tole onteji hamae ekhenrhüka tsantacho. 11 Israel jiangna Mizpah lona khochi Philistine jiang ji Bethkar jana phani olan dunga onte lüngtharacho. 12 Samuel na olong khi Mizapah tona Shen to oni yutalo chümkachisi heto phyocho, "OPVÜI na hetopvü enzanchia rothaka," tothakale ombona olong ji "Nzanchi long" to tsacho. 13 Hojito Philistin jiang ji khyoe sicho osi Samuel evanthüng jo OPVÜI na onte khi Israel thüngi ori n tssothokvü tanglanchicho. 14 Philistin jiangna Ekron tona Gath yutalo Israel meta khithako jiang topvü pilancho osi Israel jiangna onte meta jiang topvü khilancho. Osi Israel tona Kanaan kyon to yutalo ha noying licho. 15 Samuel na eküm evanthüng nandang jo Israel sa vancho. !6 Nzyu akvüto ombona, Bethel, Gilgal, Mizpah to shiang lo khyua wocho, osi meta shianglo pangtarota jiang nlansüngia wocho. 17 Jisülo jo ombona ombo ki Ramah lo elani oyi yitssoe elhi tsso to tssocho. ombona Ramha lo OPVÜI thanphen sa roncho.
Kyon Jiangna Mesao Chontala
1 Ombo sonale Samuel na ombo tsoe jiang ji Israel lo yitssoeden kümthukcho. 2 Otsoe eramo jijo Joel to tsacho osi nungo jijo Abijah to tsacho, osi onteno Beersheba lo yitssoeden tssocho. 3 Tokhatola opo ejyu-esü jiang n khina orang eyan tae tssocho. Hoji tsükona ontena ekhüp tae tsocho. Hoji tsükona ontena ekhüp khitasi ntsa lona oyi n tssotacho. 4 Tole Israel esopvüi topvü na nduktae Ramah lo Samuel thüngi 5 owo ezotacho, "Zeta, ni sona vanthaka osi ni tsoe jiangna ni esüa mmhona n vantala. Hoji tsükona e pono esapvüi tssothoku tsükona, pvüjipoe jianglo mesao vanthokwo ji esüa enaha mesao epia." 6 Ontena mesao chontao ji Samuel na n mathav sicho osi ombona OPVÜI thüngi randanle 7 OPVÜI na heto janlancho, "kyon jiangna ntio ni ezoana engayia. Ontena ni khaksicho meka, tolea onte mesao A shi a khaksichoka. 8 Ana onteji Ejip lona sochukpvüto ontena a thüngi na kontae potsow thanpo khümtapvü; enhungo ontena ntio a thüngi tssopvü sana ji ni thüngi tssotala. 9 Hoji tsükona onte engayia, tokhatola ntangshon yilan ekhüngu onte pia, onte mesao vana na ombona kvüto onte tsütsav sana jiang ezoa." 10 OPVÜI na ombo ezo jiang topvü Samuel na kyon jiang ezocho. 11 "Nte mesao jina heto nte tsütsavka." to samuel na phyoa heto onte ezocho, "Ombona nte tsokhying jiang khi rasan kümthoku, osi onte ejoma jo ombo ritsso zotoro jiang tsütsav, ejoma jo liko rasan tssov, elani ejoma jo zotoro jiang mhadungina lansoeden tssoa yungtav, 12 onte ejoma jo rasan wothüng pono esopvüiden, ejoma jo tinyan pono esopvüi to kümthokvü. Nte tsoe jiangna ombo li rhontav, osi ritav, ombo ebensü jotav osi ombo zotoro jilo ethelan jiang nsüngrüiden to tssotav. 13 Nte otsolov jiangna ombo echi mozhürhüm mmhom nsüngrütav osi ombo tssoyanden tona hümri erüngden to kümrav. 14 Ombona nte jününgroli mmhontso jiang khiv, nte li osi Olive rhyu mmhontso jiang khi ombo küpo tsüphoden jiang chitayiv. 15 Ombona ombo tsüphoe jiang tona yitssopheni tsüphoeden jiang to tsükona nte jününgroli osi tsünghanrho jiang lona tarochia nte khiyiv. 16 Ombona nte phajae jiang, osi nte mangsü kurü jiang khi ombo elhi tssothoku. 17 Ombona nte tssiden yolona tarochia khiv osi nteha ombo phajae kümrav. 18 Hoji yutaji yiana ntena nte popo ethüngo mesao ji thüngi erinjantav khatola OPVÜI na nte engayiv mek." 19 Tole kyon jiangna Samuel yi ji n ngatana phyotacho, "Meka! Ena e mesao ethev lia, 20 Jipopoe jiangna vamo ji esüa enaha ritssolo esophia ori etssoyithokvü osi e yansae tssothokvü mesao ethev lia. 21 Samuel na ontena ephyo jiang topvü engayicho osi topvü OPVÜI thüngi ezocho. 22 Tole OPVÜI na janlancho, Ontena rüngwo ji tssoyia, mesao onte pia" Jisülo jo Samuel na Israel jiang topvü oki yitale to ezoracho.
Saul na Samuel Ndukala
1 Benjamin pvüji lo kyon tsüka Kish to tsa ejüeli osi okho pono etho eli tsüka vancho; Ombo Zeroro tsoe Abeil ji tsoe, osi Aphia khümtsüng lo Bekorath opan. 2 Ombona otsoe tsüka Saul to tsa khyingroe opyon mmhom vancho. Saul jo Israel lo kyon topvü pomoe kvüri njüpa siphoa opyon mmhoncho. 3 Tsüngonalo Kish gadho ejoma na khyumhia yi sicho, hoji tsükona ombona Saul ezocho, "A phajae tsüka sosi gadho momo jiang yana wotava." 4 Tole ontena Ephraim phunglan meta yakchia Shalishah metae chiwocho, khatola onte n yancheo jina Shaalim metae chiyitacho, tole gadho jiang ji jilo ha n vancho. Tole Benjamin erü jana yanta woaha n hungcho. 5 Osi kvüthüng Zuph metalo chiyicho sana Saul na ombo phajae ji ezocho, "Oki kholani yitavka, apona gadho jiang mekna eni tsükona nchüma wongkhyua vamvü." 6 Tole phajae jina janlancho, "Tosale! Shilo ntho kyon tsüka vana osi ombona ntio phyoa sana benchetala. Ombona gadho jiang kvülo vancho sana ezov mpato tssovka ombo thüngi wotavkalo." 7 Tole Saul na ezocho, "Enina owo ombo ndukna ntio pitavla? Etsoyu ha ji lichethaka osi ntia ombo hanio tüv nli la nüng?" 8 Tole phajae jina janlancho, "Ana janti rang teriv hanka, hoji ombo pina ombona gadho jiang kvülo vancho sana ji ezov tssovka." 9-11 Tole Saul na ezocho, "O tona elüm mmhona! Toka wotavka." Hojito phyota onina ntho kyon vamo yan jilo wotacho. Osi onina yantsü jilo chüngita vanathüng loroe ejoma ojülo jorota vancho ontena ndukcho. Tole ontena loroe jiang heto ezotacho, "Ratssen ji oyani vevan?" Yuta jilo jo zenkhying jiang ji ratssen to tsatacho osi ontena Potsow lüm erüng ntsihunga na, "O ratssen ji thüngi wotavkalo" to phyotacho. 12-13 Loroe jiang na ezocho, "Ho, ombo oyani vana," "Ntena tara ekhyinga chungotana nte mhadungo yia van küma ntena oyani khothepvüto ombo nduku ka. Ombona nchüngo oyani rocho, ntiotssole kyon jiangna phunglani na othan pitav sala. Osi ombona n chiov jo kyon jiang na tsoyuv mek, ntiotssole ombona ovüng tssoa othan ji randankav sala. Ntena enhünga ona ombona phunglani nchüngithüng ombo nduku ka." 14 Tole Saul ha phajae ji wonina yantsü jilo rhowotale Samuel na oni thüngoe ehiroa phunglani khümpheni chüngia vancho. 15 Njyuto OPVÜI na heto Samuel ezoe licho, 16 "Ojyua heto-thüng jo ana Benjamin kyon tsüka ni thüngi rothuku ka, ombo ji Israel lo mesao ji tssothoku tsükona thyujü nzüyia, tona ombona Israel jiang Philistia jiang khelona shanchovka. A kyon jiang ezüp ji ana hungthaka, osi ontena nzanchi chomo ji zothaka." 17 Samuel na Saul hungale OPVÜI na ombo ezocho, "Ana ni ezowo kyon ji shika, ombona a kyon Israel jiang savka." 18 Tole Saul na kipüng ndüngo owo Samuel ezocho, "Ratssen ji kvülo vana sana a zoa." 19 Samuel na ezocho, "Ratssen ji a ka, khümpheni woa vana. Nchüngo ninitana a thüngi tsoyutava. Ojyua enyathüng ana ni emhuk jiang ni janlankhamka osi oki ni niyithoku ka. 20 Nte gadho monsi nchuk ethüm tsothako jiang ji yanchethaka ti-wongkhyua. Osi Israel kyon na chokao ji nika, ni tona nipo wopan toka." 21 Tole Saul na janlancho, "Aiyo Benjamin pvüji kyon, Israel lo pvüji terio ji osi a wopan ha topvü lo teritsowo ji, tona ntioli nina hoto a ezoato?" 22 Tosi Samuel na Saul tona ombo phajae ji to sosi chungchak tsüphov lo yentsae thümro bena ncheni vamo ji yolo ntssontso vanphen ji ombo picho. 23 Tothakale Samuel na tssoyan ji ezocho, "Ana oso ni pia echümpo vanthuko ji hana oyi a pia." 24 Tole tssoyan jina ojo so ethüngchei vao ji hana oyi Saul ndüngo ekachicho. Tole Samuel na Saul ezocho, "Shijo ni ejan ni vayio jika, tsoa. Ana tsae vanthuko kyon shiang yolona ni tswothukvü ni vayichoka." Hoji nchuk Saul na Samuel nzo etsoyu tssocho. 25 Jisülo jo ontena khümpheni na oyani joyita vanathüng ontena mhonki Saul yiphen ronicho, 26 tole Saul na hojilo yipcho.
Samuel Na Saul Ji Esapvüi Ethüngchetala
Wonchiale Samuel na mhonki Saul vamo ji tsakachi, "Phanthia ana ni yithukvüka," to ezocho. Tole Saul na phanthi Samuel oni lantsüi wotacho. 27 Onina yantsü tssae chiyiale Samuel na Saul ezocho, "Phajae ji ovüngi yia vanto ezoa." Phajae jina khochicho osi Samuel na phyolancho, "Shilo tara tamanga ana Potsow na phyoji yithen ji ni ezovka."
1 Jisülojo Samuel na olive thyujü opvü motsünga khi Saul kvüri phyangkayicho osi ombo ntsüphia ezocho, "OPVÜI na ombo kyon Israel jiang esapvüi ni tssothoku ni nzüyiala. Nina ombo kyon jiang yansavka osi ori khelona onte nkohachevka. Osi shijo OPVÜI na ombo kyon jiang esapvüi ni tssothuko ji chekaphenka. 2 Nina nchüng athüngi na khoe yiathüng Benjamin metalo Rachel lüp ji ndüngona eboe otsük eni nduku ka. Osi ntena gadho moncho yanta vamo jiang hungthaka to onina ni ezovka osi nipona gadho jiang tsükona wongkhyu ji sisi nte tsükona wongkhyua heto phyoa nte eyiloa vamu to ni ezovka, "Atsoe ji tsükona aiyo kvüto lyuv to?" to. 3 Ntena jilona oyi Tabor ntho dung ji n janthüng jo yita vamka osi jilona ntena kyon otsük ethüm Bethel lo othan pilo yita vancho nduku ka. Onte tsükana nyanyanro ethüm süv, tsükajo hümri ethüm bem osi ethümoto jina zükhi sofü sükvü motsünga to hamka. 4 Ontena nte nduki hümri jilona eni nte pivka osi nina hoji khichovka. 5 Tosi nina Gebea lo Potsow yingsüng jilo Philistian vamo jilo chungovka. Yantsü pikhfü jilona ntena zenkhying okho motsünga na phunglani thanphen jilona jungken khüta, ophyang tümta, philulyu tona zhükhen to khüta joyita vancho nduku ka. Osi ontena sharita owon tssota joyita vamka. 6 Jithüngji jitopvü potsow mon na ni pyingi onte kholo rhowoe longtsüi shari sharita owon tssotavka osi kyonthan ni kümvüka. 7 Shi esüa tssoa na Potsow na ntio etssov ni ezoa na ji ephan tssoa. 8 Ana Gilgal lona ni nduku ka, nina ovüngna jilo owo othan osi khümshümta than pikhe. Osi ana oro ntio kvüto tssov sana ji ni n zothüng jo nchuk tiying jilona anhyaka vankhe." 9 Kvüthüng Saul na Samuel thüngina khochicho sana kyon ethan ombo kümcho. Osi Samuel na ombo ezo jiang topvü hoji nchuk bencho. 10 Saul tona ombo phajae ji tona Gibeah lo chiyile zenkhying okho motsünga na onte ndukcho. Jitopvü Potsow mon na ombo sayae ombona onte kholo rhowoe sharia okhen dentacho. 11 Tole ovüngthüng ombo ntsithako kyon jiangna hoto tssoa ombo hungi phyotacho, "Kish tsoe shijo ntio tssothakcho ato?" 12 Hojilo evan tsükana phyocho, "Tona zenkhying thanpoe shiango kvütola Onte opo jo ochoang tssov to nchümtala nteno?" Hojilo na benkae, "Saul mpatona zenkhying kümthakchoke" to yijakta ji benkacho. 13 Saul na sharia okhen denta ji thakthakale phunglani thanphen jilo chungocho. 14 Jisüi jo Saul oporo jina Saul ha phajae ji woni nduki ezocho, "Ninio kvülo wotachola?" Saul na ezocho, "gadho jiang yana wotacho ka" "osi ena hojiang n hungwo jina Samuel nduko wotalancho ka." 15 Tole Saul oporo jina engacho, "Tole ombona kvüto nte ezochola?" Tole Saul na janlancho, 16 "Ombona gadho jiang yanchethaka to e zocho" Tokhatola Samuel na mesae ombo kümthukvü ombo ezo jijo Saul na oporo n zocho.
Saul ji Mesao to Khichoala
17 Samuel na kyon jiang ji ekhüm khitav tsükona Mizpah lo tsarhyui ezocho, 18 "Israel Potsow OPVÜI na heto phyoala, 'Ana Ejip lona nte sochukcho osi Ejip kyon tona thanpoe kvütata na nte khangshicho sana jiang khelona nte shanchocho. 19 Aiyo nte Potsow ji, nte ezüp phyingrüng topvü lona nte shanchoe ji, tokhatola nchüngo ntena asisi mesao chontathaka. Hoji tsükona ntena jipo osi khümtsük ephanina OPVÜI mhadungo etssirhyutava.' " 20 Jitosi Samuel na jipo akvüto OPVÜI mhadungo sanchukchithukcho, tole OPVÜI na Benjamin pvüji khyochecho. 21 Jisülo jo Samuel na Benjamin pvüji ji mhadungi chiyithuki jilo Matri wopan ji khyochecho. Jitosi Matri opan lo eboetso sanchukchile OPVÜI na Kish tsoe Saul khyochecho. Ontena ombo yanta ha n hungwo jina phyotacho, 22 "Ocho sana n chiyihancho alo?" to OPVÜI engatacho. Tole OPVÜI na janlancho, "Saul jo, O jilo etsoyu vaphen sülamoe mphoe vanaje." 23 Tole ontena yunga owo Saul sosi yicho osi Saul ji kyon topvü poni kvüri njüpa tüv tssocho. 24 Samuel na kyon jiang ezocho, "OPVÜI na ethüngcheo kyon ji shije! Ete yolo ochia ombo esüa n van." Tole kyon jiang topvüna, "Mesao ji harishia vanthuka" to tüngtacho. 25 Jisülo jo Samuel na mesao ezocho osi yilan jiang topvü erani, ntho metae vacho. Jisülo jo Samuel na onte topvü oki yirathukcho. 26 Saul ha Gibeah lo oki yicho. Osi Potsow na tssyukae etho ejüi kyon ejoma na ombo phana yicho. 27 Tokhatola ethelan n li kyon ejoma na heto phyotacho, "Kyon tsük shina ntio mmhom etsso yivla?" Hojito phyota ontena Saul yikvüta si yantso ntia hansi oro ombo n pitacho.
Saul na Amorite Jiang Khyoala
1 Choroa sülojo Ammon mesao Nahash na Gilead metalo Jabesh yantsü ji rasan sosi owo hayacho. Tole Jabesh kyon jiang na Nahash ezocho, "Ethüngi mmhontav yana tona ena epono esapvüi ni kümthoku ka." 2 Tole Nahash na janlancho, "Ana hetowoe na nte thüngi ntsatavka; Ana Israel yikrathuku tsükona nte otsük akvü mhyik amimoe ji khi nte siyidemka." 3 Tole Jabesh lo esopvüi jiangna phyocho, "Tsüngon tiying evayia, ena ochina ha eke-kyov sana Israel topvü yivon pia wothuki zevka, osi ochia ekyochio tüv n vana tssona ni khelo rheyivka." 4 Yithenpvüi jiangrta Saul vamo Gibeah jilo chivocho, osi ontena yivon ji pile kyon topvüna ekhencho. 5 Hojithüng Saul na ombo lirhon mangsü jiang sosi oli na yia vancho osi ombona ezocho, "Ntio tssochola? Kvütoli otsük akvüna kyatala?" Tole jilo kyon jiangna Jabesh yithenpvüi jiang na phyoji ombo ezocho. 6 Saul na shi zoale Potsow mon na ombo saye elümoto ombo lüm tsukachicho. 7 Ombona mangsü eni khi lüngthae rhoni oso jiang hansi heto ezoa Israel meta topvü lo wotale to yithenpvüi jiang ezocho, "Kyon ochona Samuel ha Saul oni phana ritssolo n woasana ombo mangsü ji heto rhonroe siyivka." Tole Israel jiang na OPVÜI na ntio tssov sana ji kyua topvü mmyanta sanrhyutacho. 8 Saul na Bezek lo onte etssirhyuthoki zele Israel lona kyon owo 30,000, Juda lona owo 30,000 to chirocho. 9 Osi ontena Jabesh yithenpvüi jiang heto ezocho, "Nte kyon jiang oyi ezotava, ojyua nshi n düngu nte shanchovka to." Jabesh kyon jiang na hoji yithen ji zoale onte emathatsüngi 10 Nahash ezotacho, "Ena ojyuana ni khelo rheyivka, e poni ntio ni tssohunga na tssole." 11 Ojyuato nyazüngina Saul na ombo rasan jiang echi ethüm chiche khochi owo Ammon kyon jiang sakacho. Ontena ori jiang nshi edüngo jo khyothakcho osi ori enhyolani vamo' jiango ombobo tsancholan yana tsanroe sicho. 12 Jisülo jo Israel kyon jiangna Samuel ezocho, "Kyon ochoangna Saul ji ete mesae n tssothuk to phyochola? Onte ji rhümae sosi yia ena onte lüngthav ka!" 13 Tole Saul na ezocho, "Nchüngo kyon ochia chüthoku meka, ntiotssole tsüngon shijo OPVÜI na Israel shancho tsüngon ji." 14 Tole Samuel na onte ezocho, "Ete topvüna Gilgal elani oyi Saul ji ete mesao to yenjoa phyochaktalamka." 15 Ontena Gilgal lo oyi ntho meta jilona Saul ji onte mesao to phyochaktalancho. Ontena khümshümta than pitacho osi Saul tona kyon jiang topvüto nzo tssoe tokhutacho.
Samuel na Kyon Jiang Thüngi Pyontayi Nsanala
1 Samuel na Israel jiang ezocho, "Ntena ntio etssov a zocho sana ji a na tssothaka. Nte yansathoku tsükona mesoa nte pithaka, 2 hoji tsükona enhungo ombo khi nte sothuka. Aiyo atsükona jo enhungo asona otssan pyokthaka, osi atsoe jiang nte yolo vana. Akhyingro ekümo na nchüng jana nte esopvüi tssoa rothaka. 3 Ana shilo vamka ochona sana nlan apio tüv lina Potsow tona ombona ethüngcheo mesao ji to mhadungo na nlan apitava. Ana ocho sana mangsü osi gadho khicho licho alo? Ana ocho sana ejiphia khangshicho licho alo? Ana ocho thüngi sana ekhüp khicho licho alo? Ana hetüv elhi tssocho lina ana khio ji pilamka." 4 Tole kyon jiangna janlancho, "Meka, nina ochia e jithechicho osi khangshicho n lika; Nina ochi thüngi ha ntia e khicho n li." 5 Samuel na janlancho, "OPVÜI tona ombona ethüngcheo mesao ji to mhadungo na ntena n lan n li kyon to ehungpvüi apithaka." Tole kyon jiang na phyotacho, "Hoka, e ehungpvüi jo OPVÜI ka." 6 Samuel na phyolancho, "OPVÜI na Moses tona Aaron to ethüngchecho, osi ombona nte pyimtsümotsüi jinag Ejip lona sochukcho. 7 Hoji tsükona ntena nte vanphen lo mangi vana, ana OPVÜI na nte osi nte pyimtsümotsüi jiang shanchov tsükona emhukthav elhi tssoa nte ejüa rothako jiang nte ezoa nlan nte pivka. 8 Kvüthüng Jakob tona ombo wopan to na Ejip meta owo vancho sana Ejip kyon jiang na onte khangshicho. Tole nte motsüi jiangna kyatacho osi OPVÜI na Moses ha Aaron oni wothuka Ejip lona onte sochukthuki meta shilo onte vanthukcho. 9 Tokhatola kyon jiangna OPVÜI nte Potsow ji mhechoe sicho. Hoji tsükona Philistin jiang. Moab mesao osi Hazor yantsü lo rasan esopvüi Sisera khi nte motsüi jiang ji ori khi nte khyothukcho. 10 Tole nte motsüi jiangna kyata heto OPVÜI thüngi ekhyo chontacho, 'OPVÜI, ena nithüngi na tsani Baal kisü tona Astarte to khümta yio jina mmen tssothaka. E ri jiang khe lona e shanchoa tona ena ni khümvüka! 11 Tole OPVÜI na, Gideon, Barak, Jephtah tona wokhao tssoa to etho epia onte shanchothukcho. E otsük akvüna nte ri khe lona nte shanchoe noyinga nte vanthukcho. 12 Tokhatola Ammon mesao Nahash na nte sakav vamo ji ntena hungi nte OPVÜI Potsow na nte mesao tssoa vamo ji sisi a thüngi 'Esathokvü tsükona mesao e pia' to a ezotacho. 13 "Ntena chomo ji shikaje, osi ntena chomo ji ephan OPVÜI na nte pithaka. 14 Ntena OPVÜI nte Potsow benkata ombo jancho zoa, osi ombo yikrachia tssona, osi nte tona nte mesao to na ombo phankata tssona, olan topvülo nte sükhying mmhomka. 15 Tokhatola ntena ombo yi n ngav ombo yizüng jiang n benphiana, ombona nte pyimtsümotsüi jiang thüngi tsso ji esüa OPVÜI na nte osi nte mesao thüngri ori kümvüka. 16 Hoji tsükona nte vanphen jilo to vantava, osi OPVÜI na elhi tsüphov tssov sa evamo ji zetava. 17 Enhüngajo tsüngkying yuta la nüng? Tokhatola ana randamka, tona OPVÜI na ejenlunga tharaka eryu jothoku ka. Hojito tssoana, ntena OPVÜI thüngi mesao chontao ji worhyucho saka to nchümchevka." 18 Tosi Samuel na randanle, jitopvü potsüo tharaka ejenlunga eryu jocho. Tole kyon topvüna Samuel tona OPVÜI ji to kyutacho, 19 osi ontena Samuel ezotacho, "Tsühpoe yo, nzansi, OPVÜI ni Potsow thüngi e tichüthukle to erandania. Enhungo ena e mmen thanpo jiang ekalo mesao choni mmen tssolanthaka to ena engathethaka." 20 Tole Samuel na onte ezocho, "Tikyutava, ntena hojitüv mmen tssothaka khatola OPVÜI thüngi na jo ti-kontava, tolea nte lümbüm topvü theta ombo benkatava. 21 Osi ejüng potsow jo ti-phankatava, ontena ntiloha nte n zanchiche mekana ntiolona ha nte n shanchoche, ntiotssole onteno potsow tsotso mek. 22 OPVÜI na phyochak tsüphov vathaka, ombona nte sinkiv meka, ntiotssole ombona ombo kyonden nte kümthoku methakthaka. 23 A tsükona jo nte n radaniv esani sisi OPVÜI thüngi mmen tssov meka. Jithüngi na jo elan etssov tsükona ana nte sokav ka. 24 OPVÜI jancho zotava, osi longtsükaroa nte lümbüm topvü khi ombo benkatava. Ombona nte tsükona elhi tsüphov tsso jiang nchümchetava. 25 Tokhatola ntena mmen tae tssolana vancho jo OPVÜI na nte mesao osi nte topvü nte monthokvü ka."
Philistin Jiang Thüngi Ritsso
1 Saul na esapvüi kümathüngjo ombo nzyu zhüro tssoa vancho, osi ombona Israel pono nzyu thümrosi eni sacho. 2 Saul na kyon wothüng ethüm ethüngche wothüng eni jo ombo ndüngo Michomash tona Bethel. phunglanro jianglo to vanthukcho, osi wothüng motsünga jo ombo tsoe Jonathan khi sosi Benjamin metae Gibeah lo wothukcho osi enhyoe vamo jiang jo Saul na oki yithoki sicho. 3 Jonathan na Giba lo Philistin esopvüi ji lüngthacho, osi Philistin kyon topvü na hoji zocho. Tole Saul na Hebrew meta topvü lo yithenpvüi wothuka tatara mhüa ritssolo role to tsathukcho. 4 Saul na Philistin esopvüi ji lüngthathaka osi Philistin jiangna onte n zehungala to Israel topvü ezoracho. Hoji tsükona kyon topvü na etsao ji enga Gilgal lo Saul thüngi roracho. 5 Philistin jiangna Israel jiang thüngi ori etssov sanrhyucho. Ontena ritsso zotoro Kurü na esüo tüv wothüng thümro licho, osi kurü rasan wothüng tiruk tona jümang tssae hajang lio jitata rasan vancho. Ontena Bethavan na engchirolamoe Michmash lo owo nchentacho. 6 Hoji lona ontena Israel jiang elümoto mmyinga sakacho osi Israel jiang ji ezüp khatüng nduki sicho. Israel jiang na ochoang najo longkvüi, ochoangnajo olong yolo osi likokvüi, sokvüi, osi jükhae to mphotacho; 7 osi ejoma jo Jordan pankae Gad lo tona Gilead meta lo to chiyitacho. Tolea Saul jo Gilgal lo vanpvüto tssocho osi ombo ndüngo vamo kyon jiang na ekyu lona enetsüngracho. 8Samuel na ombo ezoji ephan ombona tsüngon tiying nhyaka vancho khatola Samuel jo Gilgal lo n rohancho osi kyon jiangna Saul sisi tsanrale, 9 ombona onte ezocho, "Erungthan tona khümshümta than to jiang hansi oyi apia." 10 Hojito ombona erungthan ji pira tona Samuel chirocho. Osi Saul na olanina chiwo ombo nduki elonchocho, 11 tokhatola Samuel na ezocho, "Nino ntio elhicho la?" Tole Saul na janlancho, "Kyon jiangna a sisi eyiv benkacho, elani nina erov phyo ji yuta ebenlo n rocho, ji ekalo Philistin jiangna Michmash lo sanrhyuta vancho; 12 hoji tsükona ana nchümcho, Thilistin jiang na Gilgal lona a sakav sala, osi ana OPVÜI emathao elhi n tssohan.' Hojitolui ana othan epiv benkacho." 13 Tole Samuel na ezocho, "Hoji jo zhüva elhi, osi OPVÜI Potsow na yizüng ni pio jiang nina n tssohan. Nina hoji engacho sawo ni osi ni tsoronichen jiang na eküm echung Israel sav, 14 tokhatola enhungo nina yansav meka. Nina ombo janchgo n zov sithako jina OPVÜI na ombo chokao kyon ji yani ombo kyon jiang esopvüi kümthukthaka." 15 Samuel na Gilgal lona khoe yicho. Saul na ritssolo khochicho osi ombo rasan enhyoe vamo jiang ha ombo phana wocho. Ontena Gilgal lona khochi Benjamin metae Gibeah lo wotacho. Saul na ombo rasan nzo tirok harüma ji rashii zecho. 16 Osi Saul tona Ombo tsoe Jonathan, rasan jiang to jo Benjamin metae Geba lo nchentacho, osi Philistin jiango Michmash lo vancho. 17 Philistin rasan jiang na okho ethüm tssoe onte nchenpheni na khochi owo rotacho. Okho motsünga na Shual metalo Ophrah lo wocho, 18 okho motsünga jo Beth Horon thüngoe wocho, osi okho motsünga jo Zeboim hayi to na lijüng to hungchio erü jilo wocho. 19 Philistin jiangna Hebrew jiang ji otsso lepok ejoe n vanthoku ekhyo tsso jina Israel lo yonjoe n vancho. 20 Israel jiangna onte lirhonphen yikaphen, opvü osi vekhfüro jiang phyako Philistin metae wotacho, 21 opvü teriv tona mangsü ejungphen ephyak mmyo tojo jantirang teriv motsünga pitacho. Osi opvü tona likhephen to ephyak mmyo jo janti rang eni pitacho. 22 Hoji tsükona ritsso tsüngono jo Saul, Jonathan to yaka rasan ochinaha yonri osi otsso n bencho. 23 Philistin jiangna Michmash eyak lan ji nhyako rasan razhü motsünga wothukcho.
Jonathna Ekhyo Ekhüng Elhi
1 Tsüngona lo Jonathan na ombo ebensü ehan khyingroe ji ezocho, "Etena phukowoe Philistin jiang nchenpheni chivotavka" Tokhatola Jonathan na hoji yi ji opo Saul, 2 Gibeah ndüngo Migron lo tsarümthiben dung kupi ncheni vamo ji ntia n zocho. 3 (Pvüti sü ebemo pvüti jijo Ahijah, Shiloh lo OPVÜI pvüti Eli orüo Phinehas tsoe Ahitub, Ichabad ojenio ji tsoe ji tssocho.' Jonathan na khochithaka to ontena n tsicho. 4 Jonathan na yakchia Philistin jiang nchenpheni wov sa vamo Michmash eyak jilo olan tsungkho longpvü tsüphov eni licho. Motsünga jo Bozez, osi motsünga jo Seneh ta tsacho. 5 Motsünga jo eyak ji jükiwoe, Mikmash chanchio tssocho, osi motsünga jo jolowoe Geba woe zechiwo to licho. 6 Jonathan na khyingroe ji ezocho, "N longtsüi Philistin jiang nchenpheni pankawoe chivotavkalo. OPVÜI na ekyov mpato tssovka; osi ombona ekyoa tssona ete wozanro tssolea ekhyo epiv ji ntinaha ombo n khanche." 7 Tole khyingroe jina ezocho, "Nina ntio tssotav to nchüma na ji ephan tssoa, aiyo ni sü erüv tsükona methaki vanka." 8 Jonathan na phyocho, "Toka etena pankae chiwo Philistin jiang khi ehungthoktavka. 9 Osi ontena 'nte yana rovka nhyaka vanle' to e zona etena vanpheno vani nhyakvüka. 10 Tokhatola ontena, role to e tsana etena yana wovka, ntiotssole hojijo OPVÜI na onte pono ekhyo epithaka to chekav ji tssov." 11 Tosi ontena Philistin jiang khi onte hungthukle Philistin jiang na phyocho, "Zetava, Hebrew ejoma na onte mhophen tssungkvü, longkvü jiang lona chiyirathaka." 12 Tothakale ontena Jonathan tona khyingroe ji to tsae ezocho, "Hepi ethüngi chungrotava! Ena ntiosana nte ezov lika!" Tole Jonathan na khyingroe ji ezocho, "A sü rüa roa, OPVÜI na onte pono ekhyo ji Israel pithaka." 13 Jitosi Jonathan na yakchilan ji khejü tona nkhok tona tsena yanga chüngile khyingroe jinaha ombo phana chungocho. Jonathan na Philistin jiang ji sakae vümchüchüna khyingroe jina lüngthata phancho. 14 Lüngtha benkaden ji metaro teriv rima echen yuta lona Jonathan ha khyingroe ji wonina nchyu mekyu harüma lüngthacho. 15 Hojina meta jilo Philistin vamo jiang ji ekhentsüngkhancho. Osi onte nchenpheni ritssoe osi rasan evamo jiang ji ekyu lona enetsüngcho, osi liko ji mpa enhyoka jo onte ji emhokthav ekhentacho.
Philistin Jiang Khyo ji
16 Benjamin metae Gibeah nhyakta vamo Saul woro jiangna Philistin jiang ji ekhenzhüvae yungphita hungchicho. 17 Jitsükona Saul na ombo woro jiang ezocho, "Rasan jiang khae zesi ocho njücho sana zetava." Tole ontena khae zetale Jonathan tona ombo ebensü ehamo khyingroe ji to n jücho. 18 Jitsükona Saul na pvüti Ahijah ezocho, "Pvüti sü ji hansi hepi yia" (Hoji nchuk jo Ahijah na pvüti sü ji kyon jiang mhadungo na hansi vancho.) 19 Saul na pvüti ji thüngi janta vanathüng Philistin jiang ji elümoto kyongkata chyumota yicho, tole Saul na pvüti ji ezocho, "OPVÜI lüm erüng zeta evamo yuta n liv sithaka!" 20 Jitosi ombona ombo woro jiang nzo Philistin jiangna ontebobo rota chyumoe vamo jiang thüngi rotav wocho. 21 Hebrew ejoma Philistin thüngoe thei onte nchenpheni vamo jiangha khophi Saul tona Jonathan to thüngoe thecho. 22 Thanpoe ochoang Ephraim phunglani mphoa vancho sana jiangna Philistin jiangna tsanala to owon zoale benkae 23 Philistin jiang phana Bethava jana rokata phancho. Hoji nchuk OPVÜI na Israel jiang ekhyo picho.
Ritsso Sülo Etsso Jiang
24 Hoji nchuk jo Israel jiang ji wonton lona etho n jüv sicho, ntiotssole Saul na heto phyoe licho, "Ochona nchüng ana ori jiang n lilanthüng etsoyu tssoa sana hojijo rhiyikathoka." Hoji tsükona hoji nchuk jo ochinaha etsoyu n tsohancho. 25 Ontena ora oyi janale tssakijü elümoto hungcho, 26 khatola Saul rhiyika ekyu lona ochinaha n tsotacho. 27 Tokhatola opona kyon jiang rhiyikata ezoji Jonathan na n zohan cho. Jitsükona ombona ombo jarung jina tssakijü lo ejungthechi jilo züpkao jiang tsocho. Jitopvü ombo tsoyokata yicho. 28 Tokhatola kyon tsükana phyocho, "E topvü ekhangtsüngthakaj khatola nipona ekhenthuka heto phyo cho lia, 'Ochona nchüng etsoyu tsoasana hoji rhyikathuka.'" 29 Jonathan na janlancho, "Apona ete kyon jiang pono ntio ekhenthav tssoyicho ato! Zeta, ana tssakijü ji tsosanati kvüta etho jükacho sana. 30 Ete woro jiang na nchüng ori khyo jithüng ontena hamo etsoyu jiang tsocho sawo kvüta mmhomto. Nchümi zetava ontena Philistin jiang kvüta kyongkata lüngthav sana!" 31 Hoji nchuk jo Israel jiangna Philistin jiang khyocho, Mikhmash lona Aijalon jana phanchicho. Hojithüng jo Israel jiango wonton lona sangtsüngkhanthakcho. 32 Hoji tsükona ontena ori khelona recho jiang yana yitacho, osi olyu mangsü jiang khi lüngthae oso jiang lo ejen khyinga tsotacho. 33 Osi Saul ji heto ezocho, "Zeta, kyon jiangna oso lo ejen khyinga tsoe OPVÜI mhadungo mmen tssotaka." Tole Saul na tüngkachia ezocho, "Nteno yentsoedenla!" "Athüngoe olong tsüphov erichia." 34 Jisülojo ombona heto ezolancho, "Owo kyon jiang ji onte olyu, mangsü jiang ji helo sosi yita to ezotava. Ontena oyi shilona lüngthae tsotakhuka, osi ontena ejen khyinga oso tsoe OPVÜI mhadungo mmen tssov meka." Tole hoji zümo onte topvüna onte tssidden jiang süsi oro lüngtharacho. 35 Osi Saul na OPVÜI thanphen tssoden ji jilo tssokachicho. 36 Saul na ombo woro jiang ezocho, "Etena zümolo owo Philistin jiang hatavkalo osi n wonchithüng nandang onte phana lüngthatav kalo." Tole ontena janlancho, "Nina kvüto tssona mmhona to nchüma na ji ephan tssoa." Tole pvüti jina phyocho, "Etena ovüng tssoa Potsow lüm rüng yantadem ka." 37 Tole Saul na Potsow engacho, "Ana Philistin jiang saka na tona nina ekhyo apiv alo?" Tokhatola hoji nchuk jo Potsow na n janlancho. 38 Tole Saul ana kyon jiang esopvüi jiang ezocho, "Shilo oyi nchüng ntio mmen tssotacho sana ji zetava. 39 Israel ekhyo epio eküm evamo Potsow myingo na ana phyochakala, ochona n lan tssocho sana chüthoku, atsoe Jonathan tssolea chüthoku. Tole ochinaha ntia n phyocho. 40 Tole Saul na phyocho, "Nte topvüna hojilo vantava, osi a tona Jonathan tojo hepiwoe vamka." Tole kyon jiangna ezotacho, "Nina ntio mmhontso tssov to nchüma na ji ephan tssoa." 41 Tole Saul na OPVÜI Israel Potsow thüngi ezocho, "OPVÜI, nino nchüngo ntioli a n janlanala? OPVÜI Israel Potsow, ntho long jilona ajanlana. Nlan ji a tsoe Jonathan eni pono tssona, Urim phyalu yakchia a ntsithuka. Tokhatola nlan ji kyon jiang pono tssona Thumim phyalyu yakchia a janlana." Tole janlan ji ephan jo Saul ha Jonathan oni nlan tssocho. Osi kyon jiango ntssüngchecho. 42 Toajo Saul na phyocho, "A tsoe Joanthan eni ocho n lan sana a ntsithuka." Tole Jonathan khyochecho. 43 Tole Saul na Jonathan ezocho, "Nino ntio elhichola?" Tole Joanthan na phyocho, "Ana tssakijü tara tsochoka, aiyo echüv methaki vamka." 44 Tole Saul na ombo ezocho, "Ni nchüthoka tssona a Potsow na achüthoku ka!" 45 Tole kyon jiangna Saul ezocho, "Israel ekhyo pio Jonathan ji chüthoku ke? Meka! ena eküm evamo OPVÜI myingona echümchakala, Jonathan kvüri tssan motsünga tia elungu meka. Ombona nchüng tsso jijo Potsow ekyo-erung lona tssocho." Hojitolui kyon jiangna Jonathan ji echü lona shanchocho. 46 Jisülo jo Saul na Philistin jiang ephamu ji esani sisi onte metae yitacho.
Saul Yansa osi Wopan
47 Saul na Israel mesao kümthakale ote ri jiang topvü thüngi rotacho. Moab kyon, Ammon osi Edom kyon, Zobah mesao jiang tona Philistin jiang to. Ombona kvüta rotacho sana ekhyo hungcho. 48 Ombona lüm tssona rotasi Amalek jiang mpato khyocho. Ombona Israel jiang ori topvü lona shanchocho. 49 Saul tsoeden jo, Jonathan, Ishvi tona Malchishua to. Ombo otolov eramo jijo Merab osi wokhao jijo Michal. 50 Ombo engh jo Ahimaaz otsolov Ahinoam; ombo rasan esoe jo ombo oporo Ner tsoe Abner, 51 Osi Saul opo Kish ha Abner opo Ner tojo Abeil tsoeden tssocho. 52 Saul eküm totona Philistin jiang thüngi rota vancho. Hoji tsükona ombona etho ejüi kvüta hunga sana rasan lo rheyithukcho.
Amalek Jiang Thüngi Ritsso
1 Samuel na Saul ezocho, "OPVÜI na ombo kyon Israel mesao ni kümthoku thyujü nzüa randankalo rothuko ji a ka. OPVÜI Thotsü jina ntio phyoa na enga. 2 Ombona Amalek jiang khangshiv sala, ntiotssole Israel na Ejip lona chiyiathüng ontena zalanchicho. 3 Hoji tsükona Owo Israel jiang sakata osi ontena ntio liana topvü rorüpi siyia. Ntia hakae ti-vana, eboetso, eloe osi nungori, kakaro, mangsü, olyu, Odh osi gadho topvü rorüpi sia." 4 Saul na ombo rasan jiang Telem lo tsarhyui khi chani zecho osi Israel lona rasan 200,000, Juda lona 10,000 to tssocho. 5 Jisüi jo ombona onte sosi owo Amalek yantsü zhükhfü jüran ekyingu tüv lona zümta vancho. 6 Ombona Kenite jipo ochoangna Israel jiang na Ejip lona chiyiathüng nzanchicho sana jiang thüngi ntangnshon yithen heto hanthukcho, "Ana Amalek jiang nzo nte n lüngthanhyao tssoa onte thüngi na tsantava." Tole Kenite jiang na tsani sicho. 7 Saul na Amalek jiang Havila lona benkae Ejip engkhüwoe Shur nandang roa wocho. 8 Ombona Amalek mesao Agag ji rhüma vasi thanpoe jiang topvü lüngtae sicho. 9 Saul tona ombo woro to jiangna Agag ji n lüngtha na vanthukcho osi ekümrümo mmhom, olyu, mangsü, osi olyuro tona mangsüro to mmhomotso osi olan topvü mmhomo jiang tojo hayae vasi ethev n lio jiang tae roe sicho.
Saul ji Mesao Lona Khi Siala
10 OPVÜI na Samuel ezocho, 11 "Ana Saul ji mesao kümthoko ji a ethojaka; ombona akhaksia ayi n ngav sithaka." Samuel na lüm tsukcho osi zümo totona OPVÜI thüngi jonjicho. 12 Ojyuato jo ombona nyazüngi na Saul yana wocho. Saul na Karmel lo owo ombo zekaphen tssokachi vasi Gilgal lo yithaka to Samuel na zocho. 13 Samuel na owo Saul ndukle ombona heto Samuel ezocho, "Samuel, OPVÜI khi ni mmhayithuka! Ana OPVÜI yizüng ji engathaka." 14 Tole Samuel na engacho, "Tona kvütoli ana olyu nyanyan erontacho zoala?" 15 Saul na janlancho, "A woro jiangna Amalek jiang thüngi na khichoka. Onte OPVÜI ni Potsow tham tsükona olyu, nyanyan mmhontso jiang khi vancho osi enhyo jiango topvü rorüpi sitacho." 16 Samuel na ezocho, "Yingto vana, OPVÜI na nsümo azoji ana ni ezovka." Tole Saul na "Azoa" to phyocho. 17 Samuel na Saul ezocho, "Nina nipopo teria nchümlea nino Israel pono esopvüi ji. OPVÜI na Israel mesao ni nzükata ni ethüngchecho 18 osi nthae Amalek jiang topvü roe sile to ni wothukcho. Nina onte n lüngthara thüng nandang ori onte tssoleto ombona ni ezocho. 19 Tole nino kvütoli ombo yi nngachola? Nino ntioli ori tsütsaelan jiang khilo yungchola osi OPVÜI n mathao elhi tssochola?" 20 Saul na ezocho, "Ana OPVÜI yi engacho. Osi ombona aezoji ephan ana khochi owo Agag mesao rhümae sosi oyi Amalek jiang jo topvü rorüpi sicho. 21 Tokhatola a woro jiangna olyu, mangsü ontena rhümao jiang yolo mmhontso jingo n lüngthana Gilgal lona OPVÜI etham tsükona hansi yiatcho." 22 Tole Samuel na ezocho, "OPVÜI na jo kvüwoe chokatalajancho ezoji alo othan jila? Olyu mmhomtsow ji ombo thamo ji thüngina jo jancho ombo zoyio ji mmhontsowo. 23 Ombo panlamo jijo etsiratsen elhi esüa mmen, osi kanchan elhi jijo kisükhüm esüa mmen. Nina OPVÜI yizüng ji khi siwo jina ombona mesao elhi lona khi ni sithaka." 24 Saul na ezocho, "Hoka, ana mmen tssothaka. Ana OPVÜI yizüng osi ni ndungntssung ji nngav sithaka. Ana aoro jiang ekyu lona onte phyocho ephan tssothaka. 25 Tokhatola enhungo a mmen nlan jiang asiyisi a phana Gilgal lo roa, Tona ana hoji lona OPVÜI khümehevüka." 26 Samuel na ezocho, "Ana ni phana rov meka, nina OPVÜI yizüng nngaoji tsükona ombona Israel mesao lona ni vachithaka." 27 Tosi Samuel na khochivkato nkanphile Saul na osü lona ombo rhumacho tole osü ji resocho. 28 Tole Samuel na ombo ezocho, "OPVÜI na nchüng Israel ekhüngyan ji ni thüngina rechoe nilo mmhonkao tüv tsüka pithaka. 29 Israel Potsow phfütsson eli jina ejüng n phyo osi lümbüm n senphi. Ombo kyon mek, osi ombona lümbüm n dongphi." 30 Saul na phyocho, "Ana mmen tssothaka. Tokhtaola Israel kyon osi esopvüi jiang mhdungo tia a yikrachia. Ana ni Potsow ekhümo tssoa a phana roa." 31 Tole Samuel na Saul phana Gilgal lo wole Saul na OPVÜI khümcho. 32 Tole Samuel na ezocho, "Mesao Agag ji helo a thüngi sosi yia." Tole Agag na heto nchüma eneta ombo thüngi yicho, "Chüv jo kvüto n mhom tssovto!" 33 Samuel na phyocho, "Ni yonri na opvü-oyo elümoto ngaro n vam kümthoko ji esüa, niyo ha ngaro n van oyo kümthokala." Tosi ombona Gilgal lo thanphen ndüngona mesao Agag ji ejoroe sicho. 34 Jisülo jo Samuel na Ramah lo yicho osi Saul ha Gibea lo oki yicho. 35 Samuel eküm evanthüng nandang ombona mesao Saul ji n hunglam sicho; tokhatola ombona Saul tsükona jo nungracho. Osi OPVÜI na ombona Saul ji mesao tssothoko ji tsükona nungracho.
David Ji Mesao Etssov Nzüyiala
1 OPVÜI na Samuel ezocho, "Nino Saul tsükona kvütenhya nungra mongula? Ana Israel pono mesao lona khi ombo sithaka. Olive thyujü khi Bethlehem lo Jesse to tsao ji ki woa, ana ombo tsoe yolo tsüka mesao etssov ethüngchethaka." 2 Samuel na ezocho, "Ana kvütoli hoji tssovla? Saul na hoji zocho jo ombona alüngthav." OPVÜI na janlancho, "Mangsüro motsünga süsi OPVÜI thano yiaka to phyoa woa. 3 Hojithan jilo Jesse ha tsanhya tona nina kvüto lyuv sana ana ni ezovka. Ana ethüngcheo kyon ji nina mesao etssov nzüyivka." 4 OPVÜI na ezoji esüa Samuel na Bethlehem lo wocho tole yantsü jilo esopvüi jiangna enetsüngra oro Samuel ezotacho, "Nina noying elhi tsükona rocho alo?" 5 Ombona ezocho, "Hoka, ana OPVÜI thüngi othan pilo rochoka. Ntebobo ntssüngchei othan pilo aphana rotava." Ombona Jesse tona ombo tsoe jiang toha onte bobo ntssüngche othan jilo rotale to ezocho. 6 Ontena rorale Samuel na Jesse tsoe Eliab ji hungi nchümcho, "OPVÜI vanrhyulo evamo kyon shi OPVÜI na ethüngo ji shi tssovka." 7 Tole OPVÜI na ombo ezocho, "Siphoa opyon mmhomo ji ephan ti zeta, ana ombo n thüngcheka. Ntiotssole aiyo kyon na zeta to n zetala. Kyon na oponi chanka ji zetala tolea aiyo lümbüm ji zetala." 8 Tole Jesse na ombo tsoe Abinadab jitsae sosi Samuel thüngi rocho. Tole Samuel na ezocho, "Meka, OPVÜI na ethüngcheo ji omboha meka." 9 Jisülojo Jesse na Shammah sosi rocho. Tole Samuel na ezocho, "Meka, omboha OPVÜI na ethüngcheo ji mek." 10 Hojito Jesse na ombo tsoe otsük tiyingata sosi oro Samuel ejücho. Tole Samuel na ombo ezocho, "Onte ochia OPVÜI na ethüngcheo ji meka." 11 Tosi ombona engacho, "Ni tsoe vanlancho alo?" Tole Jesse na ezocho, "Nungotso ji vanhana, tolea ombo olyu jiang rhükia vana." Samuel na ezocho, "Hepi yile to ombo ezoa. Ombo n yithüng jo etena othan ji pitav meka." 12 Jesse na ombo tsalo wothukcho. Ombo otsük oso mmhona opyon mmhon tsüka osi ombo mhyik jiango rakachia tüv. Tole OPVÜI na Samuel ezocho, "Kyon ji shika ombo nzüyia." 13 Samuel na olive thyujü khi ombo ojenio jiang mhadungo na David nzüyicho. Jitopvü OPVÜI mon jina David sayae khi hoji tsüngono na ombolo vancho. Jisülo jo Samuel na Ramah yani elani yicho.
Saul Yitssoki David
14 OPVÜI mon na Saul vachi sicho osi OPVÜI na omon n mhom tüv rothuki ombo khangshithukcho. 15 Ombo phajae jiang na ombo ezotacho, "Potsow na rothukcho omon n mhom na ni khangshiala to ena ntsia. 16 Hojitsükona nina yidan epia tona ena zhükhen khüthi kyon tsüka yamka. Ombo n mhom jina ni sakata na ombona zhükhen ji khüv, tona ni mmhonlamka." 17 Saul na onte ezocho, "Ochona khenzhü mmhona khüa sana ji yani athüngi sosi yia." 18 Ombo nri tsükana ezocho, "Bethlehem lo Jesse na otsoe tsüka khenden vana. Ombo lümbüm etsson, rasan osi opyon mmhona oyi nsanha mmhona tüv kyon. OPVÜI na ombo tsütsatala." 19 Tole Saul na yithenpvüi wothuka heto Jesse ezothukcho, "Ni tsoe David olyu rhüki ji athüngi rothuka." 20 Hojitsükona Jesse na ombo tsoe David ji nyanyanro motsünga, osi gadho motsünga ji hümri hanthuk, zükhi sofü sükhvü motsünga to hanthuksi wothukcho. 21 David na Saul ki owo elhi benkacho. Tole Saul na elümoto ombo chokacho osi ombo ebensü ehan ombo kümthukcho. 22 Saul na Jesse thüngi yithen hanthukcho, "Ana David a choka ka, a elhi tssoa hepi ombo vanthoku ka." 23 Hoji tsüngono na benkae kvüthüng Potsow na omon n mhom Saul thüngi rothuka na David na ombo khenzhü ji khücho. Tona omon n mhom jina tsani sicho, osi Saul ha mmhonphia yicho osi elani tathi esüa mmhonlancho.
Goliath na Israel Jiang Nochoala
1 Philistin jiangna Sokho to tsao Juda yan motsünga jilo sanrhyucho. Ontena Sokho tona Azekha to yutalo Ephes Dammim jilo sanrhyucho. 2 Osi Saul tona Israel to jiang Elah hayitsü jilo ncheni Philistin jiang thüngi rotav methaki vancho. 3 Philistin jiangna yingsüng motsüngalo ren, nna Israel jiangna yingsüng motsüng alo ren tocho osi onte yutalo hayitsü licho. 4 Gath yantsü lo Goliath to tsa tsüka jücho. Ombona Philistin jiang nchenkina chiro Israel jiang meranga nocho. Ombo ntssoni khejü tiruk pomoe, 5 osi yongmen yonjak tsükhüp seri tinyansi tiying bena ekasi yongmen yonjak kikho vencho. 6 Ombo jo jiangha yongmen yonjak na khüpzhücho osi otssoha yongmen yonjak tsso epvü lona ejümcho. 7 Ombo tsso ji sukthephen jijo tsitüm esüa chhia, osi tssowo jitaena seri tiying poni mmyinga. Osi ombo tssüng eben jiang na ombo ndüngo tssocho. 8 Goliath na phanthi Israel jiang heto ezocho, "Nteno jilo ntio lyutala? Ritsso tsükona reni vancho alo? Aiyo Philistin kyonka. Nteno Israel Saul nriden! Nte yolona tsüka ethüngche oro athüngi rotathuka. 9 Ombona a khyoe a lüngthata tssona eyio nte eziden tssovka; tokhatola ana ombo khyoe lüngthata tssona nteno eziden kümvüka. 10 Ana enhünga shilona Israel jiang nochoala. Ana nte yolo ocho sana rothuki a thüngi rotale to nte nochoala." 11 Saul tona ombo woro to jiang na hoji zoale elümoto ekhentsüngcho.
Saul Nchenpheni David Vancho
12 David jo Juda lo Bethlehem lona Epharata kyon Jesse tsoe. Jesse na otsoe jeni tiza vancho osi Saul na mesao küma jo Jesse jo sona vanthakcho. 13 Ombo tsoe eramo otsük ethüm jiangna Saul phana ritssolo wocho. Erantso jijo Eliab, ji küpo jijo Abinadab osi ethümoto jijo Shammah. 14 David jo onte yolo nungotso ji osi eramo otsük ethüm jiangna Saul thüngi vamo jina 15 ombo nsansam onte sisi Bethlehemi owo opo olyu jiang rhükilo wocho. 16 Goliath na Israel jiang ji zümo zhüro eng zhüro to enya mmyu merangcho. 17 Tsüngona lo Jesse na David ezocho, "Zakto tsüngpyak seri taro shi tona hümri taro shi to hansi owo nchenpheni nitang pia. 18 Osi ethyu kholong taro shiang ha hansi owo rasan esopvüi ji pia. Osi nitang ji kvüto vancho sana ethümi zeta osi onteji mmhona vana to chekav ntiosana oyi ajüa. 19 Mesao Saul tona nijenio jiang osi Israel topvü Elah hayitsüi Philistin jiang thüngi ori tssota vanka." 20 David na ojyuato jo nyazüngi na phanthi olyu jiang ezev ocho sana zikasi Jesse na ezo ji ephan etsoyu jiang hansi khochicho. Osi ombona chiwo jan tona Israel jiang na nzanlungta nchenkina khochuki ritssolo yita vancho. 21 Philistin tona Israel to jiang na onte zechita rotav tsükona methaki vanracho. 22 David na etsoyu jiang ji rasan esopvüi ji khelo vayisi ritssopheni otang kvüto vancho sana to zechilo yunga owo kvüto vantacho sana to ezocho. 23 Osi ombona otang thüngi janta vanathüngi ji ovüngthüng ombo tssophen ji esüa Goliath na chiro Israel jiang meranga nophicho. David na hoji zocho. 24 Israel jiang na Goliath hungale ekhenrhüka tsantacho. 25 Ontena phyotacho, "Ombo zeta! Osi Ombona e merango ji engatava! Saul mesao na ochona shi lüngthata na yantso tsüphov piv phyochaki lia; osi ochona shi lüngthata sana mesao na ombo otsolov ji soa vanthuksi opaong wopan ha tssenkhya n khiyi to methaki lia." 26 David na hojilo kyon vamo jiang heto ezocho, "Ochona Philistin kyon shi lüngthae sisi hetüv yikvü emaka lona Israel jiang vachina ntio yantso hungula? Otssotso tssoana nlongtsüi osi n mvüchung Philistin kyon shijo ochoyila eküm evamo Potsow kyon shiang heto yikvüato?" 27 Tole ontena hoji lüngthae ji yantso ji ntio tssov sana ji ombo ezotacho. 28 David ota Eliab na David na hojito oyam thüngi thyutao ji zoe David thüngi lüm tsuka phyocho, "Nino shilo ntio lyuala? Olyu jiang lijüngi ochona ni zeyia vanchola? Nina kangtsüa nchümo ji ana ntsia. Nino ritsso shi zelo rocho!" 29 David na ezocho, "Ana ntio tssochola? Ana ntia oyam nngache-choke?" 30 Hojito phyoa ombona khophi kyon thanpoe engalancho, tole ombona kvüta enga sana topvüna janlantsük ji ombo picho. 3i David na hojito phyoa kyon tsüka na zoe Saul ezoyicho. Hojitsükona Saul na David yana wothukcho. 32 Tole David na saul ezocho, "Tsüphoe yo, ochinaha Philistin kyon shi ti-kyutava. Ana ombo thüngi rotavka." 33 Tole Saul na ezocho, "Meka, Nino nongori, osi Goliath jo ombo eküm totona rasan tssoa rothaka, tona nina kvütoli ombo thüngi rotachevla!" 34 David na ezocho, "Tsüpheyo; aiyo apo olyu rhüki ka, osi hengo, sevan na chiro olyuro jiang süsi yiana 35 ana phani olyuro ji shanchoala. Osi hingho, sevan jiangna sakata na ana evüngona tssenyae tatsüngi siala. 36 Ana hingho sevan lüngthao ji esüa Philistin ochona eküm evamo Potsow yikvüa sana jiha hojito lüngthae sivka. 37 OPVÜI na hingho sevan khelona a shanchothaka, osi ombona Philistin shi khelona ha a shanchovka." Tole Saul na ezocho, "Toka woa, OPVÜI khi ni kyochithuku ka." 38 Tosi ombona ombo ritsso pipo jiang topvü hanle to David picho: Yongmen kiven, tona tsükkhüp ji to ombona David ekathukcho. 39 David na Saul yonri ji khathesi khochile ombo pashi meko jina n khochichecho. Ombona Saul ezocho, "Ana hetüv hanphen meküma shi hansi ori n tssoche." Osi ombona topvü khichoe vacho. 40 Ombona olyu rhüki pipoji tsakasi zhükhfüroe na longtsüng mongo mpümroa tüv khyoe sükvüi thecho. Tothakale ombona süporo loko ji methaki bensi Goliath nduko wocho.
David na Goliath Khyoala
41 Philistin jina ombo tsung ehan jiang ombo mhadungo tssothuksi David thüngoe wocho. Ombona enhyankata oro David ji mmhona zesi 42 David ji eboeroro khyingroe tae etsso jina emakata nchümcho. 43 Osi ombona David ezocho, "Ni jarung jijo ntio lyuphenla? Aiyo füro tsayicho alo?" Tosi ombona ombo potsow tsaphia David rhiyicho. 44 Tothakale ombona David ji, "Roa, ana niso ji woro woni osi ekümrümo to phi nisivka" to ezoa noa tsacho. 45 David na janlancho, "Nino yonri, otso osi ejungphen to benri bensi a sakalo roala, tokhatola aiyo nina yikvüo Israel rasantsü pono Thotsü Potsow ji myingona roaka. 46 Nchüng tsüngono OPVÜI na a khelo ni thechivka, osi ana ni kvüri ni onivka. Osi ana Philistin rasan jiang tsük jiang ji worowoni tona ekümrümo to phi sivka. 47 Osi shilo evan topvüna Israel na Potsow vana to chekavka osi OPVÜI na ombo kyon shanchov tsükona yonri osi otsso ethev n li to engathevka. Ombo ritssolo ekhyoe, ombona nte topvüto e khelo nte thechivka." 48 Goliath na elani David thüngoe woalancho osi David naha ombo sakalo Philistin reni vamo jiwoe yunga wocho. 49 Ombo na sükvüi yonthechia olong khichei Goliath ephyacho. Osi hojina Goliath ji otono ephayi khi kvüri ji küngsoe likolo nkhümkata evümthei sicho. 50 Hojito David na yonri n thena loko tona olong to tae na Goliath khyocho! 5 3 Ombona yunga owo Goliath müng jilo eshoni Goliath yonri ji khichei Kvüri ji wonia chüthokcho. Philistin jiangna onte ekhüng ji chüthaka to ntsiale tsanracho. 52 Toajo Juda kyon jiang na owon tssoa yungta Philistin jiang ji phana owo Gath tona Ekron to pikhfü ji jana onte phanchicho. Osi Philistin jiang ji Shaaraim lan dunga, Gath tona Ekron to jana olan tona meyani evümtherae sicho. 53 Israel jiangna onte sisi kholani yitathüng onte nchenpheni tsütsailan jiang khiyia yicho. 54 David na Goliath kvüri ji khi hansi Jerusalemi yicho, tolea ombo ebensü jiango nchenki ranki vacho.
David ji Saul Thüngi Sosi Yiala
55 David na Goliath sakalo yia Saul na hungi ombo rasan esopvüi Abner ji heto engacho, "Abner, shijo ocho tsoe la?" Tole Abner na ezocho, "Ana ntia n tsika tsüphoe yo," 56 Tole Saul na ezocho, "Tona ocho tsoe sana owo ngatüngngari zeta." 57 David na Goliath lüngthasi nchenki yile Abner na ombo sosi Saul thüngi wotacho. David na jithüng jana Goliath kvüriji hancho. 58 Tole Saul na engacho, "Khyingroe yo, nino ocho tsoela?" Tole David na "Aiyo ni nri Jesse Bethlehem yamo ji tsoeka." to janlancho.
1 Saul ha David oni thyuta esancho. Jisülo jo Saul tsoe Jonathan na David ji elümoto ombo jüpona ombobo nzana esüa nzam benkacho. 2 Hoji nchuk na benkae Saul na David ji oki n yithukna ombo ki vanthukcho. 3 Jonathan na David ji elümoto chokao jina eküm echung nzanta vamvü echümchaktacho. 4 Ombona osü ekao ji phungchei jilo yonri osi ebensü, yuko tona ryukhüng ji to David picho. 5 David ji saul na ntio elhi zikata na mmhona tssochewo jina Saul na ombo rasan tsüphoe ombo kümthukcho. Hoji na Saul woro osi tsüphoe topvü na emathacho.
Saul na David Omhyik Rakiala
6 David na Goliath lüngthasi kholani oki yia van, nna rasan jiangna ha okiwoe kholani yita to vanle Israel lo eloe topvüna mesao Saul nduko wotacho. Ontena longshi khen denta, sharita tsüngrüngu ekhota osi zhükhen rhüphita wocho. 7 Eloe jiangna longshita heto dentacho, "Saul na wothüng motsünga lüngthacho osi David na wothüng taro lüngthacho." 8 Toajo Saul na hoji zoe lüm tsuki sicho. Ombona phyocho, "Ontena David jo wothüng taro nsikasi aiyo wothüng motsünga tae a nsikatala. Ontena enhungo David ji mesao kümthoku sala!" 9 Hoji nchuk na ombona David n zekhoku hungka renka li sicho. 10 Ojyuato jo Saul ji Potsow na omon n mhom khi pyingtoki sicho osi ombo kina elümoto zhüae esüa etssophyocho. Osi David jo ombo eng akvü pashi ji esüa zhükhen rhüphia okhen dena vancho osi Saul jo otsso bensi vancho. 11 Saul na phyocho, "Ana kyimchung jilo ombo lenkavka," tosi ombona yenjo eni David chhena ha David na ngae yi sisi n rhakcho. 12 OPVÜI na David lo vansi Saul lona tsanthako jina Saul na David kyucho. 13 Hojitsükona Saul na David ji rasan wothüng motsünga lo OPVÜI tssothuka yithuki sicho. 14 Osi OPVÜI na ombolo vamo jina David na ombo woro jiang sosi ritssolo woana ekhyo tae hungcho. 15 Saul na David tssochephyoche jiang hungi kyungkata ombo kyua yicho. 16 Tokhatola Israel lo tona Juda tolo kyon jiang topvüna David chokacho ntiotssole ombo esopvüi mmhom tssocho.
David na Saul Otsolov ji Soa Vanala
17 Hoji süijo Saul na David ezocho, "Atsolo eramo Merba ji shika he. Nina lümbüm etsson osi oyi engae rasan tssoe abenkata OPVÜI lona ori tssov to tssona ana ompvüji ni soa vanthoku ka." (Saul na jo hojito tssona ombona n lüngthalea Philistin jiangna David ji lüngthachev to nchüma vancho.) 18 David na janlancho, "Aiyo ochoyila osi a wopan jo ntiola ana mesao orüo kümchevla?" 19 Tokhatola Merba ji David thüngi yanpithoku yuta ji janale, kyon thanpoe Mcholah yamo Adriei to tsao ji pi sicho. 20 To tssoaha kvütolyui sana Saul otsolov Michal to tsao jina David jüponcho, osi Saul na hoji zoale ombo emathacho. 21 Osi ombona ombobo heto phy woa vancho, "Ana Michal ji David pivka; osi ompvü yakchia a tsirhi lona ombo sathüku ka," hojitolui Philistin jiang khi ombo lüngthathuku ka. Hojito yenjo enioto Saul na David ezocho, "Nino arüo tssovka." 22 Osi ombona ombo tsüphoe jiang ezoa, kijaena David ji heto ezole to ezocho, "Mesao tona ni esüa tsüphoe jiang topvüna nipono ematha lika; enhünga jo mesao otsolov ji yanpiyanthan etssov yuta ji mmhonka, soa vana." 23 Hojito ontena David ezotacho, tole David na onte janlancho, "A esüa tsitsayantsae, osi oyam na n cheka kyon hetüv na mesao orüo ekümvü jo oyi ji tsüpho-khünga, osi hojijo yikrachi tsüphov motsünga." 24 Tole tsüphoe jiangna David na ephyo yi ji saul ezotacho, 25 osi elani Saul na David thüngi heto ezole to yidan pilancho, "Eloe man ji mesao na ni thüngi na ekhiv nchümo jijo Philistin rasan ombo ri jiang nlilana onte myungphen mmyuro otsük nzoa echhi hansi oyi pina jitae tssovka." (Shi hetoena Saul na David ji Philistin jiang khi lüngthathoku lanka yancho.) 26 Saul na ntio phyocho sana jiang ji tsüphoeden jiang na David ezotalancho, tole David na mesao orüo etssov ji emathata nchümcho. Yanpiyanthan tsüngon ji n mekathüngna 27 David na ombo woro jiang sosi owo Philistin nzo eni lüngthacho. Osi ombona mmyungphen mmyuro jiang topvü tani hansi oyi khae mesao ejücho, hoji yakchia mesao orüo etssov tsükona. Hoji tsükona Saul na Michal ji David thüngi yanpithuko tssoe sicho. 28 OPVÜI na David ndüngo vana osi ombo otsolov Michal na David ji elüm chokatala to ji Saul na mmhona engathecho. 29 Hoji tsükona ombona David ji kyongkata kyucho osi ombo eküm echung ombo ri kümi sicho. 30 Kvüthüng Philistin rasan jiang na oro onte thüngi ori tssoana Saul küpo tsüphoe thanpoe jiang thüngi najo yuta topvülo David na ekhyo hungcho. Hoji yakchia David ji elümoto thüngcheta kümcho.
Saul na David Khangshiala
1 Saul na ombo tsoe Jonathan tona ombo küpo tsüphoe jiang toji ombona David lüngthav methakala to ezocho. Tokhatola Jonathan na David ji elümoto chokacho, 2 hoji tsükona ombona David ezocho, "Apona ni lüngthav zia vanka, ojyua enyathüng jo tara ntaknshona nkeni mphoe vankhe. 3 Nina mphoa vamo jilo ana apo phana rovka osi ana nitsükona ombo thüngi thyutavka. Osi ana ntio sana zoa tssona ni ezovka." 4 Jonathan na David ji thanthünga heto opo Saul ezocho, Tsüphoe yo, ni nri David ji ntia n mhom ti-tssoyikhe. Ombona ntia n mhom ni n tssoyinrüng hanka; jithüngona jo ombona ntio tssoa sana jiang topvü ni tsükona jo nzanchi tsüphov taeka. 5 Ombona Goliath lüngthao jiloha ombo eküm na thana elhi tssocho osi OPVÜI na ombo thüngoe thei Israel ekhyo picho. Hoji nina hungi ni emathacho. Tona nina ntioli noying kyon tssatssov nchüma David ji ndam n liv lona chüthokvü sala?" 6 Jonathan yi jina Saul ji lümbüm dungphi ombona David n lüngtha to OPVÜI mhadungo phyochakcho. 7 Jonathan na David tsae hojiang topvü ezosi ombo sosi Saul thüngi wocho osi ovüngthüng esüa David na ombo nri tssoa vanlancho. 8 Philistin jiang thüngi ritsso benkalancho. David na onte sakae rotacho osi Philistin jiangna tsanracho. 9 Tsüngona lo omon n mhom na Saul rhümacho. Ombona ombo tsso ji süsi oki khuka vancho. Osi David jo ombo zhükhen ji khüa vancho. 10 Saul na David ji kyimchungo chenkav zia chenle David na, ngachoe sicho; Osi otsso ji kyimchungo chenkae sicho. Tole David na yunga tsani sicho. 11 Hoji zümo Saul na David ji chensi ojyuato enyathüng jo David ji lüngthalo kyon wothukcho. Tole David eloe Michal na heto ntangnshoyi ezocho, "Nina nchüng zümo n tsancho jo ojyua jo nino echü tssovka." 12 Tosi ompvüna kipüngro lona ombo khyanchukchia tsanthukcho. 13 Jistosi ompvüna oki kisü elio ji khi belüngi yipkachithuki kvürilo nyanyan tssan lyukacho tüv na nkhüm nsüngrüi eyuki vanthuksi tsanthukcho. 14 Saul woro jiangna David solo role Michal na ombo ra vanka to ezocho. 15 Tokhatola Saul na onte mhyik na owo zetale to ezoa wolanthukcho. Ombona heto onte ezocho, "Ombo belüng totona ejüma yitava tona ana lüngthavka."16 Ontena oki rhowotale kisü jilo nyanyan tssan eyukae nkhümsi yipthuko ji hungcho. 17 Saul na Michal engacho, "Ntioli nino hojito ajiphia a ri ji tsanthukchola?" Ompvüna ezocho, "Ana ombo nzanchia ombo n tssanthuka tssona ombona alüngthav to a ezocho." 18 David na tsanchoe Ramah lo Samuel thüngi owo Saul na ombo tsükona ntio kyakcho sana jiang topvü ezocho. Jisülo jo Samuel oni nzo tssoe owo Naioth lo vantacho. 19 David na Naioth lo vana to Saul na zoale ombona David rhümalo kyon wothukcho. 20 Tole ontena zenkhying okho ji Samuel na sosi owon tssota sharita vana hungcho. Osi OPVÜI mon jina ontelo roe onteha sharita owon tssota yicho. 21 Saul na hoji zoale kyon kyungkata wothukcho tole ontenaha benkae sharita yi sicho. Ombona yenjo ethümoto kyon wothukle jiangha hojito sharita yi sicho. 22 Jisülojo ombona ombobo Ramha lo wocho, Ombona Seku lo jükha tsüphov jilo owo jani David ha Samuel onio kvülo vancho sana to engale, Naioth lo vana to ombo ezocho. 23 Ombona hoji yia vanathüng Posto mon jina omboha rhümae omboha wontssonirota Naioth ejan sharita wocho. 24 Ombona mpensü shaki sisi Samuel mhadungona sharicho osi hoji zümo totona mpensü shaki sisi tsükshü sharithüngcho. Hoji lona heto yijakta ji benkacho, "Saul ha zenkhying kümthakcho ke?"
Jonathan na David Kyochiala
1 David na Ramah lo Naioth lona tsani Joanthan thüngi wocho. ombona ezocho, "Ana ntio n mhom tssochola? Ana ntio tssochola? Osi ana nipo thüngi ntio silyuo tssocho ombona a lüngthav a yanala?" 2 Jonathan na janlancho, "Potsow na enzanthuksi ni nchüthoku ka! A pona ntio tssoasana terilea tsüphov lea a mphov meka. Yilan shijo ejüng tssovka!" 3 David na janlancho, "Nina a nzana to nipona mmhona ntsia, küma ombo etüm ezi jiangna ni tachiv to ntsiküma ni ezov meka. Ana eküm evamo OPVÜI myingona ni ezoaka, aiyo echüv jilona ekhoa tae konta vanka!" 4 Jonathan na ezocho, "Nina ntio phyoana ana tssovka." 5 David na janlancho, "Ojyuajo choro ethan tokhu. Aiyo mesao nzo etsoyu etssov lia, tolea nina emathana ana tsani owo oli mphoa rajyu mmyu nandang vamka. 6 Nipo na a njüo ji ntsi a ethüm na ana zakto Bethleham lo oyi wopan nzo nzyua than pilo ewov lio jina ni engasi yicho to a zoyia. 7 Ombona hoji khichoa, 'tssona mmhona,' osi hoji na lüm tsuka tssona ombona a meyam lümbüm hanato nina engathevka. 8 Nzansi hojito tssoa, osi nina a nzanchiv to ntho phyochak lio ji benthuka. Tokhatola a nlan lina ntioli nipo khi a lüngthathukvüla?" Nina lüngthae a sia. 9 "Jonathan na ezocho, hojitüv jo ti nchümphia!" "Apona ni meyam ziala to ana mmhona ntsivo ana ni nzovke?" 10 Tole David na ezocho, "Nipona lümbüm tsuka ni janlana tssona hoji ochona a yenjamla?" 11 Tole "Oli wotavkalo" to Jonathan na David ezocho. Osi onina wotacho, 12 osi Jonathan na David ezolancho, "Israel Potsow OPVÜI jo ete ehungpvüi tssovka! Ana ojyua heto-thüng tona rajyu to apo ngatüngarivka. Ombona ni thüngi mmhona nchüma vanchojo ana oyi ni yemka. 13 Ombona ni meyamvü zia vanaha ana ni ezoa ni n tsanthuka tssona OPVÜI khi a chüthoku ka. OPVÜI na apo thüngoe roji esüa ni thüngoe thethuka! 14 Osi ana eküm vana tssona ni ntho phyochak ji ephan a wopan thüngi longtsükata vana, 15 A chüa tssolea hojito a wopan thüngi longtsükata vana. Osi OPVÜI na ni ri jiang topvü chükhanthu thaklea 16 jithüng jana eni phyochak ji ti yesothukna vana. Osi hoji ntsata ji yesothukcho jo OPVÜI na ni khangshivka." 17 Joanthan na David ji ombobo nzana to nzamo jina David na ombo nzanala to mmhona phyochak-lanthukcho. 18 Jonathan na ombo ezocho, "Ojyua jo chothan tokhu küma nina etsoyu lo n rocho jo elaro ni chanchev. 19 Rajyuo elani kyungkata ni chanchelam, hoji tsükona nina ovüngthüng mpho jilo owo lungrokyu ji sülami mhpoe vana. 20 Tona ana longrokyu jilo okhe ntsena esüa lotssi tsüng ethüm kokav ka. 21 Tosi ana a phajae ji ezoa owo lotsüng jiang lokthoku. Osi ana heto ombo ezona, 'Zeta lotsüng jiang ji nina vamo jilo na hepiwoe ka owo khia' to ezona nina chiyia, ekyuv n licho tssovka. To tssona ni tsükona ekyuv n li to eküm Potsow myingona ana echümala. 22 Tokhatola ana aphajae ji heto ezona, 'Lotsüng jiang ji nina vamo jilona ovüngoe ka owo khi hansi yia' tona OPVÜI na tsanle to ni ezocho tssovka tsana. 23 Enina phyochaktao shi ji benthuku tsükona OPVÜI na kümali ekyochivka. 24 David na oli mphoe vancho. Chothan tokhu jilo Saul mesao na etsoyu tssolo rocho, 25 osi kyimchung ndüngo ombo vanphen jilo khukthecho. Ombo ndüngo jo Abner na khukthecho osi Jonathan jo hoji tondüngo khukthecho. David vanphen jo ejüngcho, 26 tokhatola Saul na David ji ntiosana ntssüng-rüng yuta tssochona n rocho tssov to nchüma hoji nchuk jo n thümphicho. 27 Ojyuato ha David vanphen ji ejünglani licho, tole Saul na Jonathan engacho, "David jo ntioli nchuk enio etsoyulo n roala?" 28 Jonathan na janlancho, "Ombona Bethlehemi ombo yi-thuk to a thüngi heto choncho, 29 "Nzansi Bethelehemi a yithuka, e wopan na yantsüi na othan pitala osi ajenio na oyi thele to a ezocho. Hoji tsükona niji a shom tssona oyi a wopan a ndukthuka.' Hoji tsükona ombona ni tsoyupheni vanphen n khichechoka." 30 Saul na Jonathan thüngi lüm tsuka ezocho, "O motso, nina David thüngoe thetala to ana ntsithaka, osi nibobo nimying osi niyo mying mmeniala! 31 David meta shilo evanthüng jo nina mesao n tssoche to nina n tsichoke? Zakto owo ombo sosi yia, ombo chüthoku ka!" 32 Jonathan na ezocho, "Ntioli ombo chüthoku la? Ombona ntio tssosorachola?" 33 Hojithüng Saul na otsso khi Jonathan chencho, tole Saul na David lüngthav methak lia to Jonathan na ntsi sicho. 34 Jonathan na tsopheni na lüm tsuka phanthi sicho osi hoji nchuk chothan tokhu tsüngon enioto jilo ntia etsoyu n tssocho. Saul na David elümoto yikvüo jina Jonathan na David tsükona elüm nungracho. 35 Oni phyotao ji ephan ojyua to enya jo Jonathan na David nduko oli wocho. Osi ombona khyingroe tsüka sosi hoji ezocho, 36 "Ana kochiv vamo lotsüng ji yunga owo khia." Tole khyingroe jina yunga owo khicho osi Jonathan lotssi tsüng ji ombo yaki ovüngoe kochicho. 37 Jonathan na kochio lotsüng ji khyingroe jina owo jancho, tole Jonathan na ezocho, 38 "Lotsüng ji ovüngoeka, hojilo manga tivan na zakto woa!" Hoji jo ntio etsso sana n tsina 39 khyingroe jina lotsüng ji khyokae oyi ombo pvüi ji picho. David ha Jonathan oni tae na ntsicho. 40 Jonathan na ombo ebensü ji khyingroe ji pia oyi oki vale to ezocho. 41 Khyingroe jina yithakale David na longroyo ji sülami na phanthi khuktseni yenjo ethüm likoe nkhümthecho. Jonathan woniata na kyata ntssüphitacho; David jo Jonathan lona kyungkata nungracho. 42 Jonathan na David ezocho, "Potsow ni ndüngo tssothoku kai enina ntho ntsata vao ji eni tsoronichen jana vata ewov ji OPVÜI na benchethokvü ka." Jisülo jo David na yicho, osi Jonathan ha yantsüi yi sicho.
David Na Saul Thüngina Tsanala
1 David na Nob lo pvüti Abilemek thüngi wocho. Abimelek na enetsünga ombo nduko chiyi phyocho, "Nino kvütoli nipoti hepi rochola?" 2 David na janlancho, "Aiyo mesao elhilo shio rochoka. Ombona ntio elhilo arothukcho sana kyon ochia ti ezole to a e zocho. A woro jiang jo ana meta motsünga lona a ndukle to ezocho. 3 Nino etsoyu ntio methaki lia? Hümri mongo mekana nina ntio methaki liana apia." 4 Pvüti jina ezocho, "Ana hümri sha tüv n li, ntho hümri tae lia. Ni woro jiang na epayalo ponilan n tssocho tssona ntena hoji tsotakhuka." 5 David na janlancho, "Ontena hojitüv n tssoka. A woro shiangna ena yentsasha lo woathüng lea onte bobo etsükria vanala. Nchüngo echümporo elhilo küma ontena kyungkata etsüriv tssovka." 6 Tole pvüti jina hümri ji khi David picho, ntiotssole Potsow thani lio ji yaka ombona hümri thanpo n licho. Osi hümri ji ntho thanphenina khichesi hümri ethan na dungchelani vacho. 7 Saul tssiden rhüki esopvüi Edom kyon Deog jiha ekhüm elhilan lo rocho hojilo jücho. 8 David na Abimelek ezocho, "Nina otsso alo yonri sana lina apia, mesao yizüng ephan tsütssoa khochio jina otsso lebuk ntia n tsakachov khochi rochoka." 9 Ahilemek na ezocho, "Nina Elah hayi na lüngthao Philistine, Goliath ji yonri ji ana lia. Khümphen sülamoe osüna eyuki lia. Nina hoji ethev lina khia; shilo licho ebensü hoji tae." David na ezocho, "Hoji apia, shilo ntia ebensü hoji lona mmhonkao n lika!" 10 David na Saul thüngi na tsani Gath mesao Achish thüngi yicho. 11 Mesoa ji küpo tsüphoe jiang na Achish ezocho, "Shijo David, ombo meta mesao ji esüla? Shijo eloetsüna sharia heto denkatao ji esüla, 'Saul na wothüng lüngthathaka, osi David na wothüng taro lüngthathaka.' " 12 Onte yi jiangna David lümbüm rhakicho, osi ombona Achish elümoto kyua nchümcho. 13 Hoji tsükona onte ehungo na jo David na npenri zhüvae esüa etssophyoa ejücho, ntiotssole ontena ombo tangyav ekhyo tssocho; hojithüng jo ombona yantsü pikhfü hankhan jilo nshakphia ombo menhüm jiang zonjorae etsophyoa ejücho. 14 Tole Achish na ombo tsüphoe jiang ezocho, "Zeta kyon shijo zhüvae ka, nteno ntioli hetüv athüngi sosi yichola? 15 Ana shilo zhüvae khosha vanthaka, tona ntioli hotüv solansi oyi aki na zhüva etso-ephyo a hungthukala?"
Pvüti Jiang Lüngthao Ji
1 David na Gath yantsü lona tsani owo Adullam yantsüi ndüngo longkvüi vancho. Ombona jilo vana to ombo ojenio osi wopan jiangna zoale ontenaha wotacho. 2 Oyam na khangshio osi lümbüm m püku vamo tüv kyon nzo mezhü ombo ndüngo wocho osi ombona onte esopvüi kümcho. 3 David na jilona Moab metalo Mizpah lo owo Moab mesao ji ezocho, "Potsow na ntio a tssothukhunga na ji ana n yanchethüng nandang nina nzansi apoha ayo oni oyi ni ndüngo vanyathuka." 4 David na opo ha oyo oni ji Moab mesao ndüngo vanthukcho osi David na longkvüi evanthüng nandang jo ontena jilo vantacho. 5 Tole zenkhying Gad na oro David ezocho, "Shilo ti-vana; Juda metae zakto tsani yia." Tole David na khochi Hereth ratsüi yicho. 6 Tsüngona lo Saul na phunglani tssüngthi ethem dung kupi khukthei vancho; Ombo khelo ombo tsso ji bensi ombo küpo tsüphoe jiangna ombo hachümi vancho. Osi David tona ombo woro to jiang ji yanchethaka to ombo ezocho, 7 jitsükona ombona ombo tsüphoeden jiang ezocho, "Benjamin kyonden engatava! David na nte topvü oli tona jününgroli to nte piv osi ombo rasan yolo esopvüi nte tssothoku to nchümta alo? 8 Osi hoji tsükona ntena a monthoku to kyaktalo? Osi nte ochinaha a tsoe jina David oni shentae lia to a zocho n li, elani yuta shilo jo a kyon David jina a lüngthav tsükona lanka yana vana, osi jijo a tsoe jina lümbüm tssonkayia vana toji a ezocho n lihan!" 9 Deog na jilo Saul tsüphoe jiang nzo manga vansi phyocho, "David na Nob lo Ahitub tsoe Ahimelek thüngi yia ana hunga. 10 David na ntio tssov sana Ahimelek na Potsow engacho osi ombona etsoyu David pisi Philistin kyon Goliath ji yonri ji ombo picho." 11 Tole mesao Saul na Ahimelek tona ombo wopan pvüti jiang to sosi yile to kyon wothukcho. 12 Saul na Ahimelek engacho, "Ahimelek, engachia!" "Tole, tsüphoeyo, ni benkav methaki vana" to Ahimelek na janalancho. 13 Saul na ombo ezocho, "Ntioli David ninio a eküm ekhiv tsükona khentala? Nino ntioli etsoyu ombo pisi yonri ombo pi tosi ombo tsükona Potsow lüm erüng yaniala? Ombona ayana vana, osi alüngthav tsükona tssochobenta yana vana!" 14 Ahimelek na janlancho, "Nina tsüpoe vancho yolo David jo long tsüka eli tsüka! Ombo ni myako, ni enhyang yolo esopvüi osi mesaki elhi etssoe otsük akvüna elümoto longtsükae tsüka. 15 Ana Potsow lüm erüng ombo yanicho, khatola nchüng tae hoto tssoa mek. Tolea ni pono okyak tssocho tüv jo, tsüphoeyo, nina a osi a wopan pono ntia nlan a ti-pia, ana hetüv yilan ntia n tsika!" 16 Tole mesao jina phyocho, "Ahimelek, ni tona ni wopan to nte chüthukchev." 17 Tosi jilo enhyang manga vamo jiang ombona ezocho, "OPVÜI pvüti jiang lüngthata! Ontena David onte kyaktacho osi ombona tsanthaka to ontena ntsia ha a n zocho." Tokhatola enhyang jiangna pvüti jiang tsüko okhe ethev ekhirana okhe n khyokacho. 18 Tole jilo Doeg vamo ji Saul na ezocho, "Nina onte lüngthata!" – tole Doeg na onte topvü lüngthacho. Hoji tsüngono ombona pvüti sü ekakhong tüv pvüti otsük ekhatizasi mongo lüngthacho, 19 Saul na pvüti yantsü Nob jilo evan topvü lüngthale to ezocho; eboe, eloe, ngaro, ngakaro, tssiden, gadho, osi olyu topvü lüngtharae sicho. 20 Tokhatola Ahimelek tsoe tsüka Abiathar jo tsanchoe owo David tsankacho. 21 Saul na OPVÜI pvüti jiang lüngthao ji ombona David ezocho. 22 Tole David na ombo ezocho, "Ana hoji nchuk Doeg hungwo jithüng ombona Saul ezov to ana ntsia. Hoji tsükona nte wopan chüo jiang topvüto a poni ka. 23 A thüngi vana osi ti-kyua. Saul na enita echüthukvü yana khatola ntia tssov meka."
David na Keilah Yantsü Shanchoala
1 Philistin jiangna Keilah yantsü ji hayatala osi hoji nzyu jonchorücho topvü khiala to David na won zocho. 2 Hoji tsüko na ombona OPVÜI engacho, "Ana owo Philistin jiang hav alo, OPVÜI?" Tole OPVÜI na janlancho, "Ho, owo onte hae Keilah ji shanchoa" 3 Tokhatola David woro jiang na ombo ezocho, "Etena Juda lo lea elümoto ekyutsü lia, osi elani Keilah lo Philistin jiang hata lana tssona n mhonkao tssov!" 4 Hoji tsükona David na elani OPVÜI engalanle OPVÜI na ombo ezocho, "Owo Keilah hayata, ana Philistin jiang ekhyov etho ni pivka." 3 Hoji tsükona David tona ombo woro to jiangna Keilah lo Philistin jiang hatacho; osi ontena khosha lüngthae sisi ekümrümo jiang khiyitacho. Hojitoli David na Keilah shanchocho. 6 Ahimelek tsoe Abiathar na Keilah lona David tsankao jithüng ombo pvüti mpensü jiha hansi yicho. 7 David na keilah lo yithaka to Saul na zocho osi ombona phyocho, "Ombo ji Potsow na akhelo rheyithukthaka ntiotssole ombona pikhfü osi kipüng etheo yantsü Keilah lo rheyithaka." 8 Hojito Saul na ombo woro jiang ezosi David tona ombo woro jiang to thüngi rotav tsükona Keilah lo wotacho. 9 Saul na ombo hayalo tsata to David na zoale ombona pvüti Abiathar ezocho, "Pvüti shakasü ji shilo hana yia." 10 Tosi David na phyocho, "Israel Potsow OPVÜI, Saul na ni nri a tsükona ombo woro sosi Keilah yantsü shi roe silo tsata to owon zoa. 11 Keilah kyon shiangna Saul khelo athechiv tsükona ritssolo tsacho alo? OPVÜI, Israel Potsow, a nzansi a janlana." Tole OPVÜI na janlancho, "Saul na rovka" 12 Tole David na engalancho, "Keilah kyon shiangna a osi a woro shiang Saul khelo ethechiv alo?" Tole OPVÜI na janlancho, "Ho, ontena nte thechivka." 13 Tole David tona ombo woro to tsotsüi onte nzo tiruk harüma jina zaktole Keilah lona khochi yia vancho. Osi David na Keilah lona tsanthaka to Saul na zoale Keilah owo ehav methako ji esani sicho.
Phunglan Metae David
14 David na phunglan metae, Ziph ndüngo lijüngi mphoa vancho. Saul na yuta topvülo David yana vancho khatola OPVÜI na David ji Saul khelo n theyicho. 15 Saul na ombo lüngthav yana vana to David na ntsicho. David jo Zip lijüng ndüngo Horesh lo vancho. 16 Jonathan na hojito owo ombo lüm tssonkayia Potsow na ombo nkochevka to heto ezocho, 17 "Tikyua, apo Saul na ni tssatssov meka. Nino Israel lo mesao ji tssov osi aiyo ni küpo ji tssov to ombona mmhona ntsia." 18 Jitsosi onina onio oshomka to ji ntho ntsata vatacho. David jo jilo Horesh lo vancho osi Jonathan jo oki yilancho. 19 Ziph kyon ejoma na Gebeah lo Saul thüngi owo heto yirütacho, "David jo e metae Juda lijüngi jolowoe Hochilah phunglani Horesh lo mphoa vana. 20 Tsühpoe yo, nina kvüta ombo rhüma hunga vancho sana ji ena ntsia; küma e metae roa tona ena ni khi ombo rhümathoku ka." 21 Saul na janlancho, "Ntena a nzamo ji OPVÜI khi nte mmhayithoku ka! 22 Ombo ji meta kvülo nrünga vancho sana osi ochona ombo hungcho sana owo yenjoa oyi zetalansi oro a ezotava. Ombo elümoto okyak lia to ana zoka. 23 Ombona metaro kvülo vancho sana ji mekata owo zetasi oro a ezotava. tona ana jitopvü nte phana oro ombo yamka, osi Juda lijüng totona mpato khyua eyamo tssolea ombo yamka." 24 Hoji tsükona ontena Saul vüngina Zip lo kholani yitacho. Hojithüng jo David tona ombo woro jiang tojo Juda meta jolowoe ratsüi elio Moan enung nkeni mphoa vantacho. 25 Saul tona ombo woro to jiangna David yano khochitacho khatola David na hoji zoe Maon lijüngi longsrürheni tsani yicho. Saul na hoji zoe David phana wocho. 26 Saul tona ombo woro jiang tojo yingsüng esanawoe, David tona ombo woro jiang tojo yingsüngji esanawoe to chanchita vancho. Saul tona ombo woro to jiangna onte tssungkata onte rhümav tsao jina ontena tsanta vancho. 27 Hojithüng yithenpvüi tsüka na chiro Saul ezocho, "Philistin jiangna ete meta hala, zakto kholani yia!" 28 Hoji tsükona Saul na David phana vamo ji sisi kholani Philistin jiang thüngi rotalo yicho. Hoji tsükona hoji yingsüng jijo khosota esüng to tsala. 29 David naha hoji lona tsani oyi Engedi metae mphoa vancho.
David na Saul Nkümala
1 Saul na Philistin jiang thüngi ori tssotasi yile David ji Engedi ndüngo lijüngi vana to ombo ezocho. 2 Jitsükona saul na Israel lo rasan mmhontsov wothüng ethüm sosi David tona ombo woro jiang to yana 'OraNyanyan Longroyo' to tsao jilo wotacho. 3 Ombona lantssae olyuden ndüngo longkvüi rhowo esancho. Tole jijo David tona ombo woro to jiang na ochungi mphota vamo jilo longkvü tssocho. 4 Tole David woro jiangna ombo ezocho, "Shijo ni yuta mmhontso jika! OPVÜI na ni ri ji ni khelo ni theyiaka nina ntio ombo tssoyinhuga sana tssoyia." David na yingto epvüa owo Saul na n tsina ombo süjüm ji rhachoe khiyicho. 5 Tokhatola jisüi jo David na ombobo khetsüa nchümcho 6 osi ombo kyon jiang ezocho, "OPVÜI khi esayathuksi ombona ethüngcheo mesao apvüi ji khelo okhe a tithethuka! Ana kvütoliha ombo n tssatssothuk, ntiotssole ombo OPVÜI na ethüngcheo mesao ji!" 7 Hojito David na ombo woro jiang ji Saul n tssatssov tsükona engathethucho. Saul na longkvü jilona phanthi khochi yia vancho. 8 Tole David na ombo sü rüa chivo ombo tsacho, "Tsüphoe yo!" Osi Saul na engoe zechile, David na yikrachi ombo pia likoe nkhümthe 9 ombo ezocho, "Nino ntioli kyon na ana ni meyam yanala to phyotao ji longtsüala? 10 Enhünga longkvüina OPVÜI na a khelo ni thechio ji nina ntsithak ku. A kyon ejoma najo ni lüngthale to a ezocho, khatola ana ni tsükona nungra onte ezocho, ana kvütoli ombo tssatssovla? ombo OPVÜI na ethüngcheo a mesao ji to onte ezocho. 11 Zeta, apo, ni süjüm ana bemo shi! Ana ni lüngthacheta khatola jithüng jo ana ni süjüm shi tae tseni khicho. Shi zesi nina engathev, ana ni n panlan osi ni meyamvü ni n yan to. Ana ntia nlümo ni n tssoyiaha nino a lüngthav a yanala. 12 OPVÜI khi eni ocho nlan sana zethuka! Ombo khi nina a thüngi worio ji ni khangshithuka, ana jo ejükarolea ni meyamu meka. 13 Yijaktaphen heto lioji nina ntsia, 'kyon n mhom jiangna n mhom tssoala.' Hoji tsükona ana ni meyam meka. 14 Zeta, Israel mesao na ocho lüngthav yana vancho sana! Ombona phana vamo ji zeta! Füro echü alo, Tezhüla? 15 OPVÜI khi eni ocho ori sana ezeyithuka, osi OPVÜI khi a nkohoa ni khelona a nkochethuka." 16 David na nsanrathakale Saul na heto phyocho, "O, David, otsotso ni alo, a tsoeyo?" Jisülojo ombona ekyav benkacho. 17 Ombona David ezocho, "Nino elana osi aiyo n lan. Nina a thüngi elümoto mmhona khatola ana ni thüngi n mhom tssothaka!18 Nina a thüngi kvüto mmhona vana sana ji ana nchüng ntsithaka, ntiotssole OPVÜI na ni khelo athechia ha nina a n lüngthacho. 19 Kyon na ombori rhümae ntia n lyuyi na vanchiv jo kvüta liv to? Nina nchüng athüngi tssoji man OPVÜI khi ni mmhayithokvü ka. 20 Enhungo Israel lo mesao ji ni tssov osi ni khelona rena yiv to ana ntsia. 21 Tokhatola nina a tsoronichen jiang a nkümchev lo OPVÜI myingona phyochaka tona a osi a wopan mying ji mhecholangi siv meka." 22 Tole David na hojito tssovka to echümchakcho. Jisülojo Saul na oki kholani yicho, osi David tona ombo woro jiang tonaha ontena mphota vamo meta jilo kholani yicho.
Samuel Chüo Ji
1 Samuel chücho osi Israel topvü na sanrhyui ombo tsükona kyatacho, ontena Ramah lo ombo ki ombo shothecho.
David Tona Abigail to
Hoji sülojo David na Paran lijüngi yicho. 2-3 Hojilo Kaleb pvüji kyon Maon yamo Nabal to tsa tsüka na Karmel yantsü ndüngo liko licho. Ombo elümoto eli, ombona olyu wothüng ethüm, nyanyan wothüng motsünga to vancho. Ombo engh Abigail jo opyon mmhona kichuk ejüi tssocho, khatola ombo nkhyika osi lüm tssoshüa tüv tssocho. Nabal jo Karmel lo ombo olyu jiang otssan tssüyia vancho, 4 Osi David na lijüngina ombo yivon zoe, 5 khyingroe otsük taro wothuka Nabal ji yani salüm piyile to ezocho. 6 Osi Nabal ji owo heto ezole to ombona ezocho, "Oshom, David na ni osi ni wopan elani nina licho topvü to thüngi salüm ni hanthukcho. 7 Nina ni olyu jiang otssan tssüa vanala to ombona zothaka. Osi ni olyu rhüki jiangna ethüngi oro mungta khatola ena onte n khetsü. Ontena Karmel lo evanthüng nandang onte tsütsailan ntia onte n füyi. 8 Onte engae zeta tona ontena ni ezovka. Ena tokhu tsüngon tsükona helo rocho osi ntena e nzana e khichole to David na nte thüngi jonjiala. Ntena ni nriden osi ni shom David thüngi ntio epikhuka na epia." 9 David kyon jiangna David myingona yithen shi owo Nabal picho. Osi ontena jilona nhyakta vancho tole 10 Nabal na wokhaeti heto onte janlancho, "David ta? Ombo ochola? Ana ombo motsü n zohanla! Epayalo jo ezii tsancho tae na meta pyingi vana! 11 Ana hümri osi ojü tona ekümrümo to a elhi etssoe jiang epiv tatsüngo jiang khi meta kvülona rocho sanatia ana n tsio kyon tüv piv meka!" 12 Tole David woro jiangna oyi Nabal na ntio phyocho sana ji David ezotacho. Tole ombona onte ezocho, 13 "Nte yonri jiang ekatava" tole onte topvü na khi hantacho osi David ha ombo yonri ji hansi ombo woro nzo mezhü sosi khochicho, osi nzo eni jo etsoyu elonpvüi valanchicho. 14 Nabal nri tsükana Nabla engh Abigail thüngi ezocho, "Nino zezohan? David na lijüngi na ombo woro rotuka ete pvüi thüngi salüm oro pithukle ombona onte yikvücho. 15 Toaha ontena elümoto erüm toa enzana vancho. Ena onte yolo munga khatola e tsütsailan ntia n monhan. 16 Ena zümo eng onte ndüngo olyu nhyakathüng ontena e nkohachecho. 17 Nzansi nchümi zesi kvüto lyuv sana methaka. To n tssona ete pvüi pono osi ete topvü pono ezüp yikhuka. Ete pvüi shiji elümoto n khoka küma ombona ochi yiha n ngala!" 18 Abigail na jitopvü hümri nzo eni, zükhi sükvü eni, olyu rithakcho mongo, otsüng nghicho seri taro tiying, tssüngthi nkong ovüng nzoa, züvothi nkong nzo eni to methaki gadho oha nsüngrüicho. 19 Tosi ompvü na phajae jiang ezocho, "Ntena ota vana tona ana nte phana rovka." Tokhatola orapvü jo ompvüna ntia n zocho. 20 Ompvüna gadho lo tsankae phunglan yenjo rhüa yia vanle jitopvü David tona ombo woro jiang to tssükacho. 21 David na heto nchüma vancho, "Aiyo ntioli meta hetüv lo kyon tsük shi ejüeli nkocheyia vanchoto? Ombo woro tsütsailan motsüngatia n monihan, tole ana ombo nzanchiwo ji man jo ombona heto apilana saka! 22 Ana ojyua enya n ochiv kyon tsük shiang n chürathuka tssona Potsow khi alüngthathuka!" 23 Abigail na David ndukpvüto ompvüna tsukjoe 24 David jolo epyakthei ezocho, "Tsüphoeyo, nzansi enga, osi a engayia! N lan ji ana khivka. 25 Nabal ethelan n lii ji tsükona ti-wongkhyua! Ombo myingo tsakata zhüvae ka. Ni woro jiang na chiroathüng ana oki n vanchoka, tsüphoeyo. 26 Ni ri jiang nlilana lüngtharae esiv lona tanglanchio jijo OPVÜI na ka. Ana eküm evamo OPVÜI myingna echümchakala, ni ri osi ochoangna ni tssatssov yana sana jiang topvü Nabal esüa khangshivka. 27 Tsüphoe yo, nzansi ana yantso hamo shiang khichoe ni woro shiang pia. 28 Tsüphoeyo, ana woricho lina nlan a siyia. Nina OPVÜI ri tssoa vana, hoji tsükona ombona ni osi ni tsoronichen jiang mesapvüi ni kümthoku ka, osi nina evanthüng jo nina ntia n-mhom tssov meka. 29 Kyon ochona sana ni meyamvü ni hayata tssona OPVÜI na kyon tsükana ombo tssentsü eli nkümato ni nkümchevka. Osi ni ri jiango kyon tsükana lokolo thei shümchia to OPVÜI na shümchi sivka. 30 Osi OPVÜI na mmhom phyoe ni vayio jiang benchethuksi Israel lo mesao ni kümthukthaka na, 31 nina thama lüngthacho osi omüng nlicho khi ni etho jaka vamvü meka. Osi OPVÜI na ni mmhayithaka na nzansi a ti mhechokhe, tsüphoe yo." 32 David na ompvü ezocho, "Israel Potsow OPVÜI ochona nchüng a nduko ni rothukcho sana ji thünga! 33 Nina mmhom nchümcheo ji tsükona osi ntio kvütoli a ri jiang nlilam lona nina atanglanchicho sana ji tsükona OPVÜI thünga. 34 OPVÜI na ni n tssatssothoku a tangchoka, osi ana OPVÜI myingona echümala nina zakto oro a n dukcho savo ojyua enya wonchiana Nabal woro jiang topvü chüthakvü!" 35 Jitosi ompvüna hana ro jiang David na topvü khichoyisi ompvü ezocho, "Oki elani yia, osi nina ntio choncho sana ana benchethoku ka ti wongkhyua." 36 Abigail na Nabal thüngi oki yicho. Nabal jo mesao tokhu khia vancho. Osi ombo ji kinoe, emathata vamo jina ompvüna hoji zümo jo ntia ombo n zocho. 37 Ombo chüngtsoche sanati ompvü na olan topvü ombo ezoracho. Tole omboji echunga taena chenthuka otsük chüi sicho. 38 Osi tsüngon taro sülojo OPVÜI na Nabal tsüko okhe thei chüthoki sicho. 39 Nabal chüthaka to owon zoale David na phyocho, "OPVÜI thünga, Nabal na a yikvüo ji om bona nlilan si ombo phajae akhi n mhon n tssothukcho. OPVÜI na Nabal ji ombo nlan man ezüp picho." Jisülo jo David na Abigail soa evam tsükona yivon picho. 40 Ombo phajae jiangna Karmel lo owo heto ompvü ezotacho, "David na ombo engh ni etssov tsükona ni solo erothukcho." 41 Tole Abigail na likoe epyakthei ezocho, "Aiyo ombo phajae, ombo phajae jiang jo epyoyiv methak lia." 42 Ompvüna phanthi gadho lo tsankae, ompvü meri loroe otsük mongo sosi David phajae jiang phana owo David engh kümcho. 43 David na Jezreel kyon Ahinoan soa vanthakcho osi enhungo Abigail ha ombo engh kümthaka. 44 Tole Saul na ombo otsolov Michal David pithako ji khi Gallim yamo kyon Laish tsoe Palti ji picho.
David na Saul Eküm Nkolana la
1 Ziph yamo ejoma na Gibeah lo Saul thüngi oro David ji Judea lijüngi Hachilah phunglani tsanthei vanala to ezocho. 2 Jitopvü Saul na Israel yolo rasan mmhomtsowv wothüng ethüm sosi Ziph romhoni David yana wocho, 3 osi ombona Hachilah phunglani lantssae ncheni vancho. David jo lijüngi vanpvü tssocho osi Saul na ombo yana rothaka to ombona zoale 4 echepvüi wothukcho, tole otsotso Saul rothakcho. 5 Ombona jitopvü Saul tona Ner tsoe Abner rasan esopvüi ji to na kvülo yipa sana ji chelo wocho. Tole Saul na nchenki chungi yipcho osi ombo rasan jiang na ombo füchüma yipa vancho. 6 Tosi David na Hittite kyon Ahimelek tona Joab ojenio Abishai to (onte oyo jo Züri) engacho, "Nini ochona Saul nchenpheni aphana rovla?" Tole Abishai na "Ana rovka" to janlancho. 7 Hoji zümo David ha Abishai onina Saul nchenpheni rhowotale, Saul jo nchenphen longi ombo tsso ji ombo khümki leni vasi yipa vancho. Abner tona rasan jiang tojo ombo füchüma yipta vancho. 8 Abishai na David ezocho, "Potsow na nchüngo zümo ni riji ni khelo ni theyithaka. Ana ombo tsso ji khi echunga yonphina likolo ombo a lenkathukana yenjo eni yonphiv n lika!" 9 Tole David na ezocho, "Nina ombo meyamvü n lika! Ochona OPVÜI na ethüngcheo mesao ji meyana sana ji ombona khangshivka. 10 Hoji tsükona eküm evamo OPVÜI Potsow myingona phyoala, OPVÜI na Saul ji chüthoku ka, Omboji nochonori lona yuta janleha, ritsso yutalo lea ombo chünrünguka. 11 OPVÜI na ethüngcheo mesao ji meyamvü jo OPVÜI khi a tangthuka! Hoji tsükona ombo tsso ji tona ombo jüyuphen ji totae khi hansi yitavka." 12 Hojito David na Saul nkümo na ombo tsso ji tona jüpvü ji to ombo khümki elio ji khi hansi Abishai onina yitae sicho. Toaha onte ochinaha hojito tsso ji n tsicho, mekana ontena n yipjüngchicho, ntiotssole OPVÜI na eyip ejungu onte picho. 13 David na eyak ji pankae phunglan kvüri ji, nkachoa chiyi Saul rasan jiang tona Abner to tüngkachia ezocho, 14 "Abner! nina a won zezojan?" Tole Abner na "Ocho yila mesao nthechia jitata tünga to" to phyocho. 15 Tole David na janlancho, "Abner, nino Israel lo tsüphotso ji mekchoke? Tona nino ntioli nipvüi mesao ji n kochetala? Enhünga tsotsoti ochona sana ombo lüngthalo rhorothaka. 16 Nina ni elhi ji n tssojam sithaka Abner! Ana eküm evamo OPVÜI myingona echüma ni ezoaka, nte topvüto nte echüv etüma, ntiotssole ntena nte pvüi ocho OPVÜI na mesao ethüngchecho sana ji n kohocho. Zeta! Mesao tsso ji jo kvülo licho sana? Osi ombo ndüngo jüpvü lio jijo kvüila?" 17 Saul na David won ji chethei engacho, "David, a tsoe, jijo ni alo?" Tole David na "Hoka, tsüphoeyo" to janlancho. 18 Tosi ombona ezocho, "Tsüphoe yo, ntioli nino ni phajae, a shi enhünga jana a yanala? , Ana ntio tssochola? Osi ana ntio elhi n mhom tssochola? 19 Tsüphoe yo, ana ephyov elio shi enga.'Nina ayana vamo ji OPVÜI na ni ndungntsungcho tssona othan yakchia ombo lümbüm dungphivka; tokhatola kyon na tssona onte pono etssorandanka ji elongkathoku ka. Ntiotssole ontena OPVÜI metae na metapoe ana oyam potsow yaka n khümcheo tüv lo a phanchicho. 20 OPVÜI vanrhyu nkachoe oyam metae na a ti lüng thata. Ntio tsükona Israel mesao jina tezhü esüa a hetüv a lüngthav yana roala? Ntio tssona ombona orae woro esüa akotsüngula?' " 21 Saul na janlancho, "Ana orichoka, a tsoe David, elani yia! Nina nchüngaha a eküm ji a nkümithka, küma ana kvüthüngha ni tssatsssov meka. A zhüva vanchoka! Ana ekhenthao elhi tssothaka!" 22 Tole David na janlancho, "Ni tsso ji shika, Tsüphoe yo. Ni phajae tsüka oro khithuka. 23 Longtsüka eli osi ntsanrüng jiang jo OPVÜI na yantso piala. Ombona nchüng ni ji a khelo a theyicho, khatola ana ni n meyancho, ntiotssole OPVÜI na mesao ni tssothokcho. 24 Osi ana kvüto nchüng ni eküm ji ni nkümcheyicho sana ji esüa, OPVÜI khi a eküm ji a nkocheyia ezüp topvü lona avachithokvü ka!" 25 Saul na David ezocho, "A tsoe, Potsow khi ni mmhayithuka! Nina ntio elhiana topvü lo ekhyo hungthoku ka!" Jisüi jo David ha yicho osi Saul ha oki kholani yicho.
Philistin Jiang Yolo David
1 David na ombobo heto phyocho, "Tsüngona lojo Saul na alüngthavka. Jitsükona tsancholan mmhontso jijo ana Philistin metae tsani yio ji mmhomo. Jito tssona Saul na Israel yolo jo a n yamvü siv küma tsanchoe vamvü." 2 Jisüi jo David tona ombo woro nzo tiruk to jiang na Gath mesao Maoch tsoe Achish thüngi zaktole yitacho. 3 Osi David tona ombo woro jiang, onte wopan jiang to na jilo oyi vantacho. David na eloe eni vancho, Jezereel yamo Abinoam tona Nabal emi Abigail, Karmel yamo ji to oni. 4 David na Gath lo tsanthethaka to Saul na zoale ombo n yamvü sicho. 5 Osi David na Achish ezocho, "A ji ni shom tssona a vanphen yanro motsünga a pia. Ana ni ndüngo yanpvü jilo evam ethev n lika tsüphoe yo." 6 Tole Achish na Ziklag yantsü ji ombo picho. Hoji lona benkae Ziklag ji Juda mesae jiang echhi kümcho. 7 David na Philistin lo choro taro tiruk vancho. 8 Hoji yutalo David tona ombo woro to jiang na meta jilo sunga vanthako Geshur, Girzi tona Amalek to jiang thüngi owo rotacho. Ombona meta ji Shur lona Ejip jana 9 onte meta jiang rechoyia phancho, osi eboe eloe topvü lüngtahe sisi onte olyu, Nyanyan, gadho, Ot, osi mpensü to jiang mpato rechoe khiyicho. Jisülo jo ombona Achish thüngi elani yile 10 heto ombo engacho, "Nchüngo meta kvüi ji phano ochola nino?" Tole David na, "Juda jolowoe, mekana Jerhamel pvüji metae mekana Kenite vamo ji ocho" to ezocho. 11 Osi ochinaha ombo tona ombo woro jiang tona ntio tssota sana ji Gath lo elani oyi n phyothokvü tsükona David tona ombo woro jiang to na meta jilo eboe, eloe jiang topvü lüngtharüpi sicho. Ombona Philistin lo evamo yuta ji topvü David na hojito tssoa vancho. 12 Tokhatola Achish na David longtsüa heto phyoa vancho, "Ombo ji ombo kyon Israel jiang na elümoto tssaka küma ombo eküm echung a phajae tssoa vamka."
1 Yuta tara sülo jo, Philistin jiangna Israel thüngi ori etssov sanrhyucho. Osi Achish na David ezocho, "Ni tona ni woro jiang tojo a thüngoe thei ori tssov to ana longtsüala." 2 Tole David na, "Hoka, aiyo ni phajae küma ana ni tsükona ntio tssokhukcho sana ji nina hunguka." Tole Achish na phyocho, "Mmhonka, ana ni ji ere a enhyang ni kümthoku ka."
Saul na Ratssen Ngatüngngariala
3 Samuel ji chüi topvüna ombo tsükona kyatasi ombo yantsü Ramah lo shothecho. Osi jithüng jo Saul na methevüjae topvü Israel lona tsanle to yidan pithakcho. 4 Philistin rasan jiang na sanrhyui Shunen yantsü ndüngo ncheni vantacho, tole Saul naha Israel rasan jiang ji ekhfüreni sosi Gilboa phunglani owo ncheni vantacho. 5 Saul na kvüthüng Philistin rasan jiang hungcho sana ombo ekhenrhüki sicho, 6 hoji tsüko na ombona kvüto lyuv sana to OPVÜI engacho. Tokhatola OPVÜI na ombo n janlancho, omüngi na ha, phyalyu naha elani zenkhying jiang yakchia ha ntia ombo n janlancho. 7 Tole ombona ombo küpo tsüphoe jiang ezocho, "Ana ompvü thüngi na ndungntssung khivka, eloe ratssen tsüka a yanitava." Tole ontena, "Edor lo hojitüv tsüka vana" to ombo ezotacho. 8 Saul na mpensü dungphi hansi ombo tsüphoe otsük eni sosi zümolo eloe ratssen ji yana owo heto ezocho, "Omon ji engasi ntio kvüto tssov sana ji a ezoa." Osi ombona hetoha ompvü ezocho, "Ana ocho mon thüngi janta to ni ezoana ji tsachuka." 9 Tole eloe jina ezocho, "Nina mmhona ntsia, Saul mesao na ntio tssocho sana ji, osi ombona kvütoli methevüjae jiang topvü Israel lona phani sicho sanaji. Tona nino kvütoli a kyakthechia a chüthokvü yanala?" 10 Tole Saul na ntho echümchak heto picho, "Otsotso eküm evamo OPVÜI evanthüng jo shi ndana ezüp ni piv meka." 11 Tole eloe jina ezocho, "Tona ocho ni tsayivla?" Tole ombona "Samuel a tsayia" to ezocho. 12 Kvüthüng eloe jina Samuel hungcho sana ombo na eronkachia Saul ezocho, "Nino ntioli a kyakthechiala? Nino mesao jila!" 13 Mesao jina ompvü ezocho, "Tikyua, nina ntio hungchola?" Tole eloe jina, "Ana omboji likoe na chiyia hungala." 14 Ombona engacho, "Ombo ntio esüa tüv la?" Ompvüna janlancho, "Sonporo tsüka chiyiala, osi eyuktsüo sü hana." Hoji süijo Saul na jijo Samuel to ntsicho, hoji tsükona ombona yikrachia likoe nkhümthecho. 15 Samuel na Saul ezocho, "Nino ntioli a khetsüla? Nino ntio tsükona a phanthithuklanchola?" Tole Saul na janlancho, "Aiyo ezüp tsüphov nduki lia. Philistin jiangna ori a tssoala, tole Potsow na asithaka. Ombona omünginaha mekana zenkhying yakchia tssolea to a n janlam sithaka. Hoji tsükona na kvüto lyuv sana ji ni khi a ezothokvü tsükona ni tsachoka." 16 Samuel na ezocho, "Ntioli OPVÜI na ni sisi ombo ri ni kümthuk thakcho tssona a tsala? 17 OPVÜI na ayakchia ni ezo ji ephan tssoala; ombona ekhüngyan ji ni thüngi na khi David pithaka. 18 Nina OPVÜI yi n ngav Amalekite jiang tona onte oli jiang to ji roe n sicho. Hoji tsükona OPVÜI na shi ji ni thüngi heto ni tssoyiala. 19 Ombona ni osi Israel jiang ji Philistin jiang khelo nte thechivka. ojyua ni tsoe jiang na a thüngi yivka osi Israel rasan jiang Philistin jiang khelo rheyivka." 20 Samuel na phyoji zopvüto Saul na ekheno na likoe evümthei sicho. Osi ombona zümo eng etsoyu n tsso jina elümoto n khyov kümcho. 21 Eloe jina ombo zele ombo ji ekhentsüngi vamo jina ompvü na ombo ezocho, "Tsüphoe yo, nina phyo ji ephan ana a eküm thana elhi tssochoka. 22 Hoji esüa nzansi enhungo ana phyocho a engayia, ana e tsoyu tara ni methakiv ka. Nina etho jükae yentsao tssoa etsoyu ji tssokhe." 23 Saul na ekhirana ntia n tsoyu to phyocho. Tole ombo küpo tsüphoe jiangna etsoyu etssov lia to ntssungcho. Tole ombona wokhaeti oyi enga phanthi belüngi khukthecho. 24 Jisüijo eloe jina zaktole ompvüna phia vamo mangsüro ji tatsüngcho. Ompvüna elani hümri tara khi vümhi n thena rüngcho. 25 Ompvüna etsoyu ji Saul tona ombo küpo tsüphoe jiang to picho osi ontena tsoyutasi hoji zümo na khoe yicho.
Philistin Jiangna David ji N khichoala
1 Philistin jiang na onte rasan jiang topvü Aphek lo sanrhyuthukcho osi Israel jiang jo Jezereel hayi lo jüpukphen jilo ncheni vancho. 2 Philistin mesao mongo jiangna tsükalo rasan nzao tona wothüng motsünga to ren sosi khochicho osi David jo ombo rasan jiang nzoa Achish mesao sülamoe etsüngkae khochicho. 3 Philistin rasan esopvüi jina onte hungi ezocho, "Hebre shiango shilo ntio elhitala?" Tole Achish na janlancho, "Shijo David, Israel lo mesao Saul ji thung jika. Ombona a ndüngo yuta sunga vana vanthaka. Osi ombona a ndüngo vansi hetenhya tssoaha ana ntia n mhom ombo n zechehan." 4 Tole Philistin rasan esopvüi jina Achish thüngi lüm tsuki heto ombo ezocho," Hoji kyon tsük ji elani ombo yithuka osi nina ombo pio meta jilo oyi vanthuka, osi e nzo ritssolo ti-rothuka, ombona roana ete erokata mpa yivka. Ombona ombo mesao ji emathathoku jo ete woro echüthokvü ji yaka ntio lanka lichola? 5 Otsotso tssoa na shijo David, eloetsü na sharita, heto denkatao jila, 'Saul na wothüng lüngthacho, osi David jo wothüng taro lüngthacho.' " 6 Achish na David tsae ezocho, "Ana eküm evamo Israel Potsow myingona echümala, nina a longtsükata rothaka, osi a nzo ritssolo ni wothuk hungala. Nina a thüngi yio ji tsüngono na nchüng jana ana nilo ntia zeche n lihan. Tokhatola mesae thanpo jiangna ni n thenhyahungala. 7 Hoji tsükona noyinga oki kholani yia, osi onte n mathao ntia titssoyia." 8 David na janlancho, "Ana ntio tssosorachola Tsüphoe yo? Nina phyo ji esüa ana ni benkalo yio jithüng na benkae nina ntia n mhom a n zechecho tssona ni tsükona ana ori tssov ntio tsükona n tssochevla, a mesao osi a OPVÜI?" 9 Achish na ezocho, "Otsotsoka, ana niji Potsow lanben esüa longtsüka eli kyon to ni nchümiala. Tokhatola mesae thanpoe jiangna nina ritssolo ephana n roche to phyoe sithaka. 10 Hoji tsükona David ni osi nte kvüta na Saul sisi oro e benkata vancho sana topvüna ojyua jo nyazüngina phanthi wonchipvüto khochi yitava." 11 Hojito David tona ombo woro to jiangna ojyuato enya jo nyazüngina khochi Philistin metae yitacho osi Philistin jiango Jezereel lo wotacho.
Amalekite Jiang Thüngi Ritsso
1 Tsüngon eni sülo jo David tona ombo woro to jiangna Ziklag lo chiyilancho. Osi hojijo Amalekite jiang na Juda jolowoe meta jiang lo Ziklag ji hae khisi nchuk ethümoto tssotakcho. Ontena yantsü ji hae 2 topvü rungi sisi, eloe jiang rhümacho tolea ontena ochia jo n lüngthacho khatola ontena yiathüng topvüto onte ndüngo sonhyasi yicho. 3 David tona ombo woro to jiangna Ziklag lo chiyile onte yantsü ji rungi sisi eloe osi tsokhying tsolo jiang topvü sorasi yithakcho. 4 Hoji tsükona David tona ombo ndüngo etsso jiang tona nshüthechia kyatacho osi onte sangtsüng sanati esantacho. 5 David engden Abinoam tona Abigail to jiang mpato sosi yithakcho. 6 Osi hoji yakchia David ji elümoto khatüng ezüp nduki sicho ntiotssole ombo woro jiang tsoeni osi otsoeoro jiang topvü sosi yithako ji na ontena ombo ephyatsüngu zita yi sicho; tokhatola OpvÜT ombo Potsow na lümbüm etsson ombo picho. 7 David na Ahimelek tsoe pvüti Abiathar ji heto ezocho, "Epvülo shakasü ji hansiyi apia." Tole Abiathar na hana oyi ombo picho. 8 tole David na OPVÃœI engacho, "Ana ritssoe jiang phana wov alo? osi onte rhümav alo?" Tole OPVÃœI na ezocho, "Nina phana woa, tona onte phayav osi morantsan sosi yia evamo jiang phanchochevka." 9 Hoji tsükona David tona ombo woro nzo tiruk to jiang na khochicho osi Besor zhükhfüro jilo chivotale ejoma jo jilo vani sicho. 10 Khatola David na rasan nzo mezhü jiang sosi phana wocho, ntiotssole onte nzo enijo mmoktsüngo jina zhükhfüro ji n pankakhoku jilo esani vantacho. 11 David nzo etssoe jiangna olani na Ejip kyon eboeroro nduki ontena hoji David thüngi sotasi yicho. Onte na etsoyu tara tona ojü 12 elani züvothi nkung tona tsüngthi nkung thanpo to oyüng eni ombo pitacho. Ombona hoji tsotha kale ombo etho jükalancho; ntiotssole ombona etsoyu n tsosi nchuk ethüm tssothakcho. 13 David na ombo engacho, "Nipvüi jo ochola osi nino meta kvülo evanla?" Tole ombona, "Aiyo Ejip kyon ka, osi Amalekite tsüka eziika, tolea atsük n mhomo jina ombona avalanchisi tsüngon ethüm tssothaka. 14 Ena Juda jolowoe Cherethit, Kaleb pvüji meta ji owo hatacho osi Ziklag ji rungi sitacho." to janlancho. 15 Tole David na engacho, "Nina hojiang thüngi a sosi veovla?" Tole ombona ezocho, "Nina a n lüngtha osi a pvüiji khelo a n thechi to eküm evamo Potsow myingo na echüma tssona ana ni sosi wovka." 16 Hojito phyoa ombona David ji sosi onte yana wotacho. Tole ori jiango ontena Philistia tona Juda to owo hae tsütsailan tona kyon to elümoto sosi yio ji myingo na nzonsorae tokhuta longshita to vancho. 17 Ojyuato wonchipüngo David na onte sakae mmyu jana rotacho. Osi onte otsük nzo mezhüna Oat lo tsankae tsamo jiang yaka ochia n tssanchov onte chüthukracho. 18 Osi Amalekite jiangna recho jiang topvü, ombo engh otsük eni ji jüa David na phancholani khicho; 19 osi ntia n khachona recholani khicho. David na eboe osi tsokhying tsolo vüngi elio jiang topvü elani Amalekite jiang na phanchoe licho topvü phancholani khiyicho. 20 Ekümrümo jiangha ombona oden oden na phancholani ombo woro jiangna, "Shiang jo David echila!" to phyota onte mhadungona eküma yitacho. 21 Hoji sülojo David na ombo woro nzo eni ochoang laphyatsüngi onte phana nov Besor lo vani sicho sana jiang thüngi yitacho. Ontenaha ovüng na khochi oro David tona ombo woro jiang to olanina nduktacho osi David na lümtsakirina onte. salümcho. 22 Tokhatola David nzo ewoe onte yolo nkhyiknrüng osi ethev n lio kyon jiangna jo, "Onteno ephana n ro küma phancho jiang ji ntia onte chinhyav meka, onte eloe jiang tona ngaro jiang to khi hansi yitana taekha." to phyotacho. 23 Tokhatola David na ezocho, "Ajenioden, OPVÃœI na epia jiang khi ntena hojito n lyuchela! OPVÃœI na e ntaknshona lyu ori jiang pono ekhyo epicho. 24 Küma ntena phyo jijo ochinaha khichov meka! Ete topvüto kheti jantavka: Sülamoe vani etsoyu echenlona vamo jiangha mhadungi ritssolo wo jiangha onte kheti hunguka." 25 David na hojito shikhfü metnako ji nchüng jana benphitala. 26 David na Ziklag lo kholani oyi ombona recho jianglo ejoma khi ombo shom Juda esae jiang pia heto ezocho, "Ena OPVÃœI ri jiang khelona recho jiang yolona khichei yantso tara shi nte piala." 27 Jisülo jo"elani ombona Bethel, Juda jolowoe Ramah meta, elani Jattit yantsü kyon 28 osi Aroer, Siphmoth, Eshtemoa, 29 Rakal lo Jerahmeel, tona Kenite jiang 30 osi Hormah, Borashan, Athach, tona 31 Hebron tolo evamo kyon jiang tsükona ha hanthukcho. Elani ombo woro tona ombo na sanphio meta jiang topvü lo kyon jiang thüngiha hanthukcho.
Saul Tona Ombo Tsoe Jiang To Chüo Ji
1 Philistin jiang na Gilboa phunglani na Israel jiang thüngi ori tssotacho. Hoji lona Israel elümoto chücho osi Saul tona ombo tsoe jiangha jüa elümoto na tsancho. 2 Tokhatola Philistin jiangna onte chakyae Saul tsokhying yolo otsük ethüm, Jonathan, Abinadab tona Malchisua to lüngthacho. 3 Saul na vamo ji nkonphia elümoto rotacho osi Saul ha ori lotssina rhaki khütssona meyancho. 4 Ombona ebensü ombo hanio khyingroe ji ezocho, "Potsow n tsii jiang na a emakata a chüthuk thüngina jo nina ni yonri ji tsüngchei a lüngthae sia." Tokhatola khyingroe jiang hojito etssov ji elümoto ekhencho. Hoji tsükona Saul na ombo yonri ji khichei ombobo hojilo vankacho. 5 Khyingroe jina Saul ji chüthaka to ntsicho, hoji tsükona omboha ombo yonri ji khichei ombobo hojilo vankae Saul nzo chüi sicho. 6 Hojitolui Saul tona ombo tsoe otsük ethüm nna ombo ebensü ehamo khyingroe ji to jiang ji hoji nchuk chücho; osi Saul woro jiangha topvü hoji nchuk chücho. 7 Osi kvüthüng Jezereel esanawoe Jordan zhükhfüna engkhüwoe vamo jiangna Israel rasan jiang na tsanthaka osi Saul tona ombo tsoe jiangha to chüthaka to owon zocho sana ontena ha yantsü jiang topvü sisi tsani sicho. Hoji sülojo Philistin jiangna chiro oyan jianglo vantacho. 8 Hoji ojyuato Philistin jiang na echümüng jianglo retsolo wotale Saul tona ombo tsoe otsük ethüm jiang toji Gilboa phunglani juthei lia ontena hungcho. 9 Ontena saul kvüri ji woni si ombo ebensü jiang khiyi tosi yithenpvüi wothuka Philistin meta topvülo onte khümphen kisü jiang osi kyon jiang thüngi yithen mmhom ji pithukcho. 10 Ontena onte ebensü jiang onte potsow Astarte khümpheni vacho, osi ombo müng jijo Beth Shan yantsü pikhfülo eshenkae sitacho. 11 Philistin kyon jiangna Saul hojito tssoyiwo ji Gilead lo Jabesh kyon jiangna zoale, 12 lümbüm etssontso kyon jiangna zümo lo Beth Shan lo wotacho. Ontena pikhfü lo Saul tona ombo tsoe jiang müng to eshenkae lio jiang hungale khichoe Jabesh lo hana oyi jilona rungi sitacho. 13 Jisülo jo onte na oryu jiang khyarhyui yantsüi odung kupi shothei sitasi tsüngon tiying khangtacho.
Saul Chüo ji David na Zoala
1 Saul chüsi sülo David na Amalekite jiang khyosi oyi Ziklag lo Tsüngon eni vancho. 2 Ojyua to khyingroe tsükana Saul vanpheni na rocho. Ombo nungra ji ejüv tsükona ombona mpensü jiang reroe sia kvürilo ochon yakacho. Ombona David thüngi owo nkhüm thei khümcho. 3 David na ombo engacho, "Nino kvülona rochola?" Tole ombona ezocho, "Israel jiang nchenpheni na yichoka". 4 Tole David na ezocho, "Ntio tssocho sana a zoa" Tole khyingroe jina ezocho, "Ete rasan jiangna ori mhadungo tsanthaka osi ete woro elümoto chücho. Saul ha ombo tsoe Jonathan oni ha lüngthanhyacho." 5 David na engacho, "Saul ha Jonathan oni lüngthacho to kvütoli nina ntsichola?" 6 Tole ombona ezocho, "Ana Gilboa phunglani wocho, tole Saul na ombo tsso jilo enghokae vanathüng ori jiangna onte ritsso zotoro tona kurü rasan jiang to na ombo tssungkata woa hungcho. 7 Jithüng ombona a zechisi a tsacho. 'Ana helo a vanka kvütola tsüphoeyo!' to ezocho. 8 Tole ombona aiyo ochosana to a engacho, osi ana aiyo Amelek kyon ka to ezocho. 9 Tole ombona a ezocho, 'A ji elümoto khfütssona a meyani sika osi achüv saka oyi a lüngthae sia!' 10 Hoji tsükona ana ehungo ombo lüngthae sicho, ntiotssole ombo chüv to ana ntsia. Hoji sülo ana ombo kvüri lona ombo kiven ji khicho, evon jiang lona khekhüp jiang khicho toli hansi ni thüngi yichoka, tsüphoeyo." 11 Tole David na nungra ombo sü jiang reroe sicho osi ombo ngaro jiangna ha hojito lyucho. 12 Ontena Saul ha Jonathan oni tona Potsow kyon Israel hetata to chüo jiang tsükona mmyu nandang ekhang khia nungratacho. 13 David na yithenpvüi khyingroe ji engacho, "Nino meta kvülo kyon la?" Tole ombona ezocho, "Aiyo Amelek kyon ka, tolea aiyo ni metalo vanaka." 14 Tole David na ezocho, "Nino kvütoli OPVÜI na nthochaki vanthuko mesa ji lüngthachola?" 15 David na ombo woro tsüka tsae ezocho, "Kyon shi lüngthae sia!" 16 Tosi David na Amalek kyon ji ezocho, "Nina nibobo echüv yithen hansi yithaka. Nina OPVÜI na ethüngcheo mesao ji lüngthacho to nibobo phyothako jina nlan ji ni pono tssothaka."
Saul ha Jonathan oni Chüo ji Tsükona David na Kyala
17 Okhen shi David na Saul ha Jonathan ompotsoe denkacho osi 18 Juda kyon jiang topvü shikale to yizüng picho. (Okhen ji Jashar kako lo erani lia) 19 "Ete esopvüi jiang Israel phunglan jiang lona chürae sithaka! Ete rasan lüm etssontso jiang ha jotherathaka! 20 Hoji yithen ji Gath metalo mekana Ashkelon lantsüi jianglo tithenchoa. Philistia eloe jiang ji ti-longshuthuka; osi Potsow n tsi tsolo jiang ha ti-longshuthuka. 21 "Gilboa yondon jianglo nti eryu osi yentsso ha ti-jothuka; hoji li jiang ji nchünkhon likying vanthuka! Ntiotssole lüm etsson jiang tsung jiang ji hojilo yikra khia vantherae lia. Saul tsung jijo enhungo thyujü khi ntssalam mek. 22 Jonathan lotssi jo ekyuthav, osi Saul yonri jina jo khonzan to n tsso, etho ejüi jiang epanphen osi ori jiang chüthokphen. 23 "Saul ha Jonathan onio emhokthav, osi enzana tüv; ekümoha oni nzo, osi echü lolea oni nzo; mungshitsü lona ekhyingka, osi hingho lona etho jükata. 24 Israel eloetsü na Saul tsükona kyatava! ombona sümyon mmhom khi nte pipoyithukcho osi shona janti oyuk-osen khi nte etümthukcho. 25 "Rasan lüm etsson jiang ritssophenina chürathaka, onte ji rali na lüngthakhancho. Jonathan jo phunglanina chüi erichi lia. 26 "Ojenio Jonathan, ana ni tsükona a nungrala; Nina kvütata a nzancho ato! A tsükona ni nzan jijo kvüta emhokthav ato; eloe nzan lona lea mmhonkata. 27 "Rasan lüm etsson jiang jotherathaka, onte ebensü jiango ethev n liv ekachirae sithaka."
David ji Juda lo Mesao Kümthukala
1 Hoji sülojo David na OPVÜI engacho, "Ana owo Juda yantsü motsünga hav alo?" Tole OPVÜI na "Ho" to janlancho."Kvüwoe jila" to David na engacho. Tole OPVÜI na "Hebron ji" to janlancho. 2 Hoji tsükona David na ombo enghden otsük eni Jezreel yamo Abinoahm ji tona Nabal emi Abigail, Karmel yamo ji to oni sosi Hebron lo wocho. 3 Ombona ombo woro jiang tona onte wopan jiang toha sosi owo Hebron ndüngo oyan jianglo vanthukcho. 4 Hoji süi jo Juda kyon jiangna Hebron lo oro David ji thyujü nzüyia mesao kümthukcho. Gilead lo esüa Jabesh kyon jiang na Saul shothethaka to David na zoale, 5 ombona hojilo heto yithen hansi kyon ejoma wothukcho."Ntena nte mesao ji nzana shothe ombo siwo ji OPVÜI khi nte mmhayithuka. 6 OPVÜI khi ntelo longtsükata nte nzana vanthokvü ka. Ntena ntio tssothakcho sana ji tsükona anaha nte thüngi mmhona nte savka. 7 Etho jüa lüm tssontava, osi nte mesao Saul ji chüthaka osi Judea kyon jiangna onte mesao kümthukthaka."
Ishbosheth Ji Israel lo Mesao kümthukala
8 Saul rasan esoe Abner, Ner tsoe jina Saul tsoe Ishbosheth ji woni Jordan pankae Mahanaim lo tsana chiyitacho. 9 Hoji lona Abner na Ishbosheth ji Gilead Asher, Jezreel, Ephraim, Benjamin tona Israel to topvü pono mesae ji kümthukcho. 10 Ombo jithüng jo nzyu zhüro tssocho osi ombona nzyu eni sacho. Tokhatola Juda pvüji jo David küpo vancho, 11 osi David na Hebron lo vani Juda pono nzyu tiyingsi chiso sacho.
Israel Tona Juda To Ritsso
12 Abner tona Ishbosheth to küpo tsüphoe jiangna Mahanaim lona khochi Gibeon yantsü lo wotacho. 13 Zeruiah tsoe Joab tona David küpo tsüphoe jiang to na wozhü motsünga lona onte ndukcho, osi onte ji ejoma na wozhü jina pankae thanpoe jiangna pankaewoe to zechitao vancho. 14 Tole Abner na Joab ezocho, "Okho enita lona khyingroe ethüngche ritsso thangshi lo sonhyatavkalo." Tole Joab na "To tssotavka" to janlancho. 15 Jitsükona Ishbosheth tona Benjamin pvüji to thung tssoa otsük taro eni ethüngchei, David woro otsük taro eni thüngi rotathukcho. 16 Onte otsük akvü tona ombombo tekyim ji kvüri lona rhümae yonri na khyoyo lo ekhyipthechiyitacho, hoji yakchia onte mekyusi mezhüata onte nzo chüracho. Hoji tsükona Gibeon metalo hoji metaro jijo "Yonri Meta" to tsacho. 17 Hoji sülo jo ritsso ntav rotae David woro jiang na Abner ha Joab oni woro jiang khyothechicho. 18 Zeruiah tsokhying otsük ethüm Joab, Abishai, tona Asahel toha jilo jücho, osi Asahel jo Siano na tsana to ekhyinga yunga tüv tssocho, 19 hojina Abner ji phanrhücho, 20 hoji tsükona Abner na mmyilani, "Jijo nike, Asahel" to ezocho. Tole ombona "Hoka" to ezocho. 21 Jitsükona Abner na, "Esana, a ti phana tolea rasan tsüka phani ombo khelo ejüo ji khiyia to ezocho, tokhatola Asahel na to vekata ombo phancho. 22 Tole Abner na ezolancho, 'A ti phana, ntiolui nino a khi ni lüngthatokvü tsükona heto elhiala, ana kvütoli nijenio Joab ndokvü mekla' " 23 Tokhatola Asahel na ombo phanrücho, hoji tsükona Abner na sülamoe yonchia ombo tsso jina chencho osi Asahel ji otsso jina mmani rhaki echenina chiyicho. Toajo Asahel na jilo evümthe sicho osi kyon kvüta na hoji yakchia na ngangi zetacho. 24 Jisüi jo Joab ha Abishae onina Abner phancho osi eng rhetale ontena Gibeon lijüng lamoe Giah na engrhelamoe Ammah phunglan jilo chiyicho. 25 Osi Benjamin pvüji kyon jiangna phunglanro motsünga lona Abner hachümcho osi ontena phunglamoe tsankae zatacho. 26 Abner na Joab tsae ezocho, "Etena n tümjak na rota mongu ke? Okhae jo epüp nungra yaka ntia ndokvü mek to nino ntsicho ke? Eiyo nte esüa ete meta kyon mekchoke? Tona nina kvüthüngti ni kyon jiang ezoa e n phamvü sithukula?" 27 Joab na ezocho, "Ana eküm evamo Potsow myingona echümala" "Nina hojito n phyowo a woro jiangna ojyua enya jana nte phamvü." 28 Jisüi jo Joab na tata raji mhüsochia ritsso ji esantacho. 29 Hoji zümo na Jordan hayi yakchia oyi hoji pankae ojyua enyathüng toha olan tsanrhüi oyi Mahanaim jancho. 30 Joab na ombo woro jiang etssirhyui zetale Asahel ephalo otsük taro toku chücho yanchecho. 31 David woro jiangna Benjamin pvüji woro Abner küpo etssoe otsük 360 lüngthacho. 32 Joab tona ombo woro to jiang na Asahel müng ji khi hansi oyi Bethlehem lo onte wopan khüp ndüngo shothecho. Jitosi ontena zümo thüma sani oyi ojyua to jo Hebron jancho.
1 Saul rasan tona David rasan to rotao ji sunga khicho. David ji etho jüka jüka na yiale ombo ri jiango etho mataka mataka na yicho.
David Tsoe Jiang
2 Hebron lona bukcho David tsoe otsük tiruk jiang erani na heto rencho: Jezreel yamo eloe Ahinoam lona Amnon; 3 Karmel yamo Abigail, Nabal emi ji lona bukcho Chileab; Jershur yamo Talmai mesao otsolov Maakah ji otsolov Absalom; 4 Haggith lona Adonijah bukcho; Abital lona Shephatiah bukcho; 5 Eglah lona Ithream to onteno Hebron lona bukcho.
Abner na David Lo Khümkatala
6 Saul woro tona David woro to sunga rota yiale Saul tepfü Abner ji etho jükata yicho. 7 Tsüngona lo Ishbosheth Saul tsoe jina Abner na Aiah otsolov Rizpahj Saul yingaloroe ji thüngi yipo ji ndana makcho. 8 Tole Abner na elüm lümbüm tsukcho."Nino ana Saul ejithechiv tsayia alo? Aiyo Juda tsükona ori tssoa alo? Benkadeni na nchüng jana ana nipo Saul lo longtsükata ombo osi ombo ojenio jiang osi ombo shom to jiang mmhonthoku benkata osi David khelona nte hetopvü nte shanchothaka; tole nchüngo eloe tsükalo ndankae a n laii yanala nüng! 9-10 OPVÜI na ekhüng yan ji Saul tona ombo tsoronichen to khelona khiv osi David ji Israel tona Juda to onita pono ekhüngyan ochümi na ochüm jana mesao tssothoku to phyochakcho. Hoji n bem sia tssona Potsow na a chüthokvüka!" 11 Tole Ishbosheth na Abner ji elümoto kyuo jina oyi motsüngatia n samvü sicho. 12 Abner na Hebron lo David thüngi heto ezolo yithenpvüi Wothukcho, "Meta shi ochona sav sala? A thüngi ntsatava tona ana ni kyon Israel topvü ni thüngoe tssothoku ka." 13 David na janlancho, "Mmhon ka!" "Eni ntsatav tolea nina athüngi roathüng Saul otsolov Michal ji sosi oro apia, tona eni ntsatavka." 14 David na heto ha Ishbosheth erancho, "Michal ji apilana, aiyo Philistin myungphen mmyoro tsenchocho nzoa na ompvü shichoka." 15 Hojito Ishbosheth na Michal ji orapvü Paltiel, Lasih tsoe ji khelona khi hansi wocho. 16 Paltiel na olan dunga Bahurim jana kya chona wocho, tokhatola Abner na oki kholani yile to ezole yi sicho. 17 Abner na Israel esopvüi jiang thüngi owo ezocho, "Ntena David ji nte mesae kümthokvü tümtasi sungthaka, osi yuta shi lo jo hoji benchev mmhontso ji. 18 OPVÜI na heto phyoe lia, 'Ana a nri David khi a kyon Israel jiang ji Philistin osi onte ri topvü khelona shanchothokvü ka.' " 19 Abner na Benjaimn pvüji kyon jiang thüngiha thyutacho osi Israel pvüji tona Benjamin pvüji to na ntio ntsatacho sana owo Hebron lo David ezocho. 20 Abner na Hebron lo David thüngi otsük mekyu sosi role, David na tokhu onte picho. 21 Abner na David ezocho, "Ana enhünga khochi owo Israel topvü ni thüngoe khyoe khivka, Tsüphoe yo. Ontena ni ji onte mesao to ni khichovka, osi nina rüngwo ji bencheta meta shi topvü pono yansavka." David na Abner ji nkoche rümphithokvü phyochaka yithukcho.
Abner ji Lüngthatala
22 Sülani jo Joab tona David küpo tsüka to na ritssolo wotasi rechocho ejüeli khosha hansi yitacho. Tokhatola Abner jo David na nkoha pia yithukthako jina Hebron lo n vancho. 23 Joab tona ombo razhü to chiyiale Abner jo David thüngi oro vana vansi David na nkoha pia yithukthaka to Joab na zocho. 24 Tole Joab na mesao thüngi owo ezocho, "Nino ntioli Abner na role – n lüngtha na elani yithukchola? 25 Ombo ni ejithechiv tsükona osi nina ntio elhia osi kvüwoe eyi woa sana to chelo rocho to nina mmhona ntsia!" 26 Joab na jilona oyi kyon wothuka Abner sosi yile to Sirah jükhae othoki sosi yithukcho: tokhatola David na hoji n tsicho. 27 Abner na Hebron lo yile Joab na kija yi ombo ezov sa esüa sosi pikhfü tssae chiwocho, osi yonri na Abner mman jilo ekhyipicho. Hojito Abner na Joab ojenio Asahel ji lüngthao jina Abner ji lüngthae sicho. 28 Hoji yivon ji David na zoale heto phyocho, "A osi a woro na Abner ji n lüngtha to OPVÜI na ntsika. 29 Hoji ndana ezüp yio ji Joab osi ombo wopan pono tssothoka! Ombo wopan echungreno tsük tsük jo, echiehan lo ekhyingo nochonori ejüi, mara enoe, eloe elhi tüv tae etssoe, ori na echüi mekana yantsae jitüv jünrhüa wovka!" 30 Hojito Abner na Gibeon ritssolo oni ojenio lüngthayio jina Joab ha ombo ojenio Abishai onina Abner na Asahel lüngthao ji omüng nlilancho.
Abner Shothetala
31 Tole David na Joab tona ombo woro to jiang ji onte mpensü jiang reroe sitasi sünyikvü ekatasi Abner müng tsükona kyatale to ezocho. Osi echü shothelo otathüng David mesao na omüng ji sülani etsüngkae wocho. 32 Abner ji Hebron lo shothecho, osi mesao tona ombo woro jiang to na kyatacho. 33 David na Abner kyakata heto okhen dencho: "Kvütoli Abner ji zhüvae ejoena chüthokchola? 34 Ombo khe n chüng, ombo jo n chüng; Ombo ji münghan na lüngthacho esüa chücho!" Tole kyon jiang na kyatalancho. 35 Eng tona David ji etsoyu tssothokvü nshümta ha ombona n tsov heto phyocho, "Tsüngon shi ochüm n tssov ana ntiosana tsoyu na OPVÜI na achüthokvü ka!" 36 Ontena hoji zoe lüm pükcho. Hojito mesao na ntio tssoa na topvü kyon jiang emathao tssochecho. 37 David woro topvüna osi Israel topvüna Abner chüo jilo David khe n jü to engathecho. 38 Mesao na ombo tsüphoe jiang ezocho, "Nchüng Israel esopvüi chüo shi n chümcheta alo? 39 Aiyo Potsow na a ethüngcheo mesao ji khatola nchüngo a etho jaka nchümcheta. Zeruiah tsoe shiang ji a tsükona jo elümoto tssoshüa zecheta. Münghan jiango ontena mamo ji ephan OPVÜI na ezüp pithokvü ka!"
Ishbosheth ji Lüngthacho
1 Hebron lona Abner ji lüngthataka to Saul tsoe Isbosheth na zoale ombo osi ombo woro topvü na ekhenrhüka kyutacho. 2 Ishbosheth na ombo küpo tsüphoe otsük eni, oyam ehae okho esopvüiden Benjamin pvüji Beeroth yamo Rimmon tsoeden Baanah ha Rechab to oni vancho. (Beeroth jo Benjamin metalo khanhyala. 3 Hojilo yanchi kyon jiango Gittaim lo tsani oyi sunga vanthakcho, osi ontena jilo vani sicho.) 4 Saul tsorüi thanpoe jo Jonathan tsoe Mephibosheth, Saul ha Jonathan oni chüathüng nzyu mongo tae tssohan tüv vancho. Osi ombona Jezreel yantsü lona opoha omotsü oni chüo ji yivon zoale ombo nijüpvüi jina ombo ejümsi tsantalato nsechi elungi ojo-okhe jaki sicho. 5 Rechab ha Baanah onina khochi Ishbosheth ki wotale nshi etüng harümo chivo jancho osi omboha esana vancho. 6 Osi kipüngo vamo eloe jina otsüng nchialato enga yi yipi sicho, hoji tsükona Banaah ha Rechab onina yingto pyeta rhowotacho. 7 Onina ochüngi rhowothakale, saksak Ishbosheth yipa vamo belüng jilo owo yipa vanathüng ombo lüngthatacho. Hoji süi jo onina kvüri ji woni hantasi zümo tona tsanta Jordan hayi yakchia yitacho. 8 Onina kvüri ji hansi oyi David mesao thüngi yantsota heto ezotacho, "Niri Saul tsoe Ishbosheth, ni lüngthav ni yamo ji kvüri ji shi kalo. Nchüng OPVÜI na tssocho mmhon ni pia Saul tona ombo tsoronichen to ni khyothukcho." 9 David na oni ezocho, "Ekyutsü topvü lona a shanchothako eküm evamo OPVÜI myingona ana nchüng echümala! 10 Yithenpvüi tsükana Saul chüo ji yithen ji hansi oyi Ziklag lona a ezoji ombo najo yithen mmhom tsayia a ezocho. Tole ana ombo ji rhümae chüthokcho osi jijo ombona yithen mmhom hansi yio ji man ana ombo picho! 11 Tona kyon thanpoe ochoangna na n lan n li kyon yingto ombo ki yipa vanathüng lüngthata tssona tona kvüta rankata n mhom tssovto. Enhungo ninina ombo lüngthao ji ana omüng ji nini nlilamka, osi limha shilona nini mha ji khi nini siyivka!" 12 Hojito phyoa David na ombo kyon jiang ezoa Baanah ha Rechab oni rhümathuki ojo okhe jiang tanchoe khi Hebron ochü ndüngo tonkachi sicho. Tosi ontena Ishbosheth kvüri ji khi Hebron lo Abner khüp ji ndüngo shothei sicho.
David na Israel Tona Juda To lo Mesao kümala
1 Tole Israel pvüji topvüna Hebron lo David thüngi oro ezotacho, "Eiyo ni ejen oso lona echiyicho kyonden ka. 2 Tsüngon yithako jianglo Saul na ete mesao tssoathüng ha nina Israel jiang sosi ritssolo wocho, osi nina OPVÜI kyon jiang soa onte pono ni yansathoku to OPVÜI na phyoehakcho lia." 3 Hojito Israel lo esopvüi topvüna David thüngi Hebron lo wotacho. Osi ombona onte thüngi ntho ntsata methaktacho osi ontena thyujü ombo nzüyia onte mesao ombo kümthukcho osi hojito David ji Israel lo mesao kümcho. 4 David na ombo nzyu thümro lo mesao kümcho osi ombona nzyu zhüro yansacho. 5 Ombona Hebron lona Juda meta ji nzyu tiyingsi riso sacho osi Jerusalem lona Israel tona Juda topvü pono to nzyu thümro si ethüm to yansa sacho. 6 Osi David tona ombo woro to jiangna Jerusalem ji owo ehao yuta chiyicho. Osi Jebusite ochoangna Jerusalem lo vajüng tssothakcho sana jiangna jo David na yantsü ji n khyo to nchüma heto ombo ezocho, "Nina kvüthüngha yantsü shilo rhorochev meka; mhyikjüng osi jojak-khejang jiang na mpato phanchukchi ni sivka." 7 (Tokhatola David na Zion zenki ji khyoe khicho osi yantsü ji "David yantsü" to tsacho.) 8 Hoji tsüngono David na ombo kyon jiang ezocho, "Shilo kyon ochona Jebusite kyon jiang ji ana tssaka tata tssakala? Lüngthae lea onte sikhuka etssang tüv? Ocho sana hojitüv vancho tssona yantsüi ehungo mhyikjüng osi jojakkhejang jiang thüngi rotava." Hoji tsükona, "Mhyikjüng osi jojakkhejang na jo OPVÜI ki n rhowoche." to yijakta yicho.) 9 Yantsü ji khicho sülo David na jilo vani "David yantsü" to tsacho. Ombona yantsü ji füa, yondon na engkhüwoe ochon hantheo jilo na benkae yantsü ji tssochukchicho. 10 Osi OPVÜI Potsow na ombo ndüngo vamo jina ombo ji yuta topvülo etho jükata yicho. 11 Tyre lo vamo Hiram mesao na David thüngi shishotav ntsata yithen picho; osi ombona Cedar tssüng, kitsoe tona longjoeden to David pia yantsü ji tssothukcho. 12 OPVÜI na ombo ji Israel lo mesao kümthukthaka osi OPVÜI na ombo kyon Israel jiang tsükona ekhüngyan jilo tsükaranka osi pvülyua lithukala to David na mmhona ntsicho. 13 David na Hebron lona Jerusalemi yiale ombona engh osi yingaloroe kyungkata soa vancho osi tsokhyingtsolo elümoto vancho. 14 Jerusalem lona ombo tsoeoro buko jiango shiang: Shammua, Shobab, Nathan, Solomon, 15 Ibhar, Elishua, Nepheg, Japhia, 16 Elishama, Eliada tona Eliphelet to.
Philistin Jiang Khyo Ji
17 David ji Israel mesao kümthaka to Philistin jiangna zocho, osi ontena ombo rhümalo rasan wothukcho. David na hoji zoale, ombona rizüphen jilo tsanthecho. 18 Philistin jiangna Rephaim hayi jilo oro hoji khi vancho. 19 Tole David na OPVÜI engacho, "Ana Philistin jiang sakav alo? Osi nina onte pono ekhyo apiv alo?" Tole OPVÜI na, "Hoka, ana ekhyo nipivka, sakata osi onte hayata" to janlancho. 20 Hojitsükona David na Baal Perazim lo wocho osi ombona hojilona Philistin jiang khyothechicho. Osi ombona phyocho, "OPVÜI na a ri jiang ji jüvak esüa rosochicho." Hoji tsükona Meta ji Baal Perazim, to tsacho. 21 Kvüthüng Philistin jiang na tsancho sana ontena onte kisü potsow jiang silanchia tsancho, hojitsükona David tona ombo woro to jiang na hojiang ji khi hansi yitacho. 22 Hoji sülojo Philistin jiangna Rephaim lo kholani oyi hojilo vanlantacho. 23 Elani David na kvüto lyuvsana to OPVÜI engalancho, tole OPVÜI na, "Shilo na jo onte tihayata, tolea onte füi owo phukowoe Balsam dung ji ndüngo na onte hayata. 24 Osi kvüthüng ntena odung jiang ponina khochi won zoa sana tothüngti onte hatava, ntiotssole Philistin rasan jiang ekhyov tsükona ana nte vüngina yia vamvüka" to ezocho. 25 Hoji tsükona OPVÜI na yizüng pio ji ephan David na tssocho, osi ombona Philistin jiang ji Geba lona Gerzer jana phanthechikhukcho.
Ntsata Thephen Bakos Ji Jerusalemi Hansi Yiala
1 David na elani Israel lo rasan mmhontso jiang onte wothüng thümro ethüngchelancho, 2 osi ombona onte sosi Juda lo Baalah yan jilo Thotsü Potsow Ntsata Bakos ji khilo wotacho. Thotsü Potsow vantsü kisü ji ekümrümo echo ekhyingo tüv poni tssokacho. 3 Ontena Ntsata Bakos ji phunglani Abinadab ki jilona khichei zotoro ethan lo thecho. 4 Osi Abinadab tsoeden Uzzah ha Ahio onina nlansüngi Ahio na lanvüngsi khochitacho. 5 Osi David tona ombo woro to jiang topvüna na onte pvükhyung okhen denta sharita OPVÜI thüngtacho. Ontena pyapiro ekhota, ophyang tümta elani khükying osi khenpvü lantaro theta süyangta ekhophita dentacho. 6 Ontena Nakon litsenphen ji oyi janale tsibung jiang phephicho tole Uzzah na zaktole yonchia Ntsata Bakos ji rhümacho. 7 Tole jitopvü Uzzah na ntho ji n yikrachicho ejoena OPVÜI na lüm tsuki Uzzah ji chüthokcho. 8 Uzzah na jilo Ntsata Bakos ji ndüngona erichi chüo ji meta ji Perez Uzzah to tsacho. Osi Uzzah chüthoko ji hungi David na elümoto lüm tsükcho. 9 Jitosi David na OPVÜI kyua nchümi phyocho, "Ana enhungo kvütoli Ntsata Bakos ji hansi yivto?" 10 Hoji tsükona ombona hoji Jerusalemi hansi n yiv tsükona methakcho, Osi ombona olan dungphi Gath yantsüi kyon Obed Edom ki hansi yicho. 11 Hojilo choro ethüm vancho osi OPVÜI na Obed Edom tona ombo wopan to jiang mmhayicho. 12 Obed Edom na Ntsata Bakos ji vao ji tsükona OPVÜI na Obed Edom tona ombo wopan to mmhayithaka to David na zoale, owo Ntsata Bakos ji khi longshita tokhu tssota Jerusalemi hansi yicho. 13 Ntsata Bakos ji ejümsi ekho tiruk khochipvüto David na onte esanthoki jilona tsibung tona mangsüro belev to khi OPVÜI thancho. 14 David na sünyipvü tae eryu khüngsi ombo thokhyung sharia OPVÜI thüngcho. 15 Hojito ombo tona Israel kyon jiang topvü tona Ntsata Bakos ji ejümtasi tatara osi ethüng khen khüta Jerusalemi yitacho. 16 Ntsata Bakos ji hansi Jerusalemi rheyia vamo ji Saul otsolov Michal na kherüki na zechile David mesao na ntho shari sharia tsukphia tsao ji hungi tssaka zecho. 17 Ontena Ntsata Bakos ji hana rheyi David na hoji vaphen tssoe lio jilo vatacho. Jisülojo ombona erungthan tona khümshümta than to OPVÜI picho. 18 Ombona othan jiang pithakale Thotsü OPVÜI ji myingona kyon jiang mmhithukcho osi 19 onte topvü etsoyu picho. Ombona Israel lo eboe, eloe vancho topvü hümri motsünga, oso lümchaka tona tssüngthi nkungcho tara to piracho. Jisülojo otsük akvüna oki yitacho. 20 Jisülo David na ombo wopan jiang salüm pilo oki yile Michal na chiro ombo nduki ompvüna phyocho, "Nchüngo Israel mesao na ombo myingthüng elhi tssothaka! Ombona ombo küpo tsüphoe jiang phajapvüi loroe jiang mhadungo na zhüvae esüa tsükshü sharicho!" 21 Tole David na janlancho, "Aiyo OPVÜI Potsow ochona nipo mekna a ethüngchei Israel a sathuka sana ombo myingthüng tsükona sharicho. Osi ana elani OPVÜI yikrachia sharilana ov, 22 osi a bobojo kyungkata etssaknkung khivka. Nina jo aji ntia mekcho esüa mpa nchümkhoka tolea loroe jiangna jo a yikrachia vamvü!" 23 Saul otsolov, Michal jo echü jana otsoeoro n vancho.
David Thüngi Nathan Yithen
1 David mesao jo ombo metalo OPVÜI na noying jüngthei pia ori thüngina khetsü n liv vanthukcho. 2 Tole mesao na zenkhying Nathan ezocho, "Aiyo shilo Cedar tssüngna tssocho ki vanala khatola OPVÜI Ntsata Bakos jijo süranki lia!" 3 Nathan na janlancho, "OPVÜI na nithüngi vanaka nina ntio mmhona to zecheta na ji ephan tssoa." 4 Tole hoji zümo OPVÜI na Nathan ezocho, 5 "Ana heto phyoala to owo a phaje David ezoa," 'A vanphen ekhümki etsso ji ni meka. 6 Ana Israel jiang Ejip lona socheo jilona benkae nchüng jana ekhümki mekna vanpvü. Ana süranki ncheni yentsapvü. 7 Ana Israel kyon shiang nzo yentsata rothakcho yolo esopvüi jiang ochi thüngiha Cedar tssüngna ekhümki n tssocho ndana n khonhan.' 8 Hoji tsükona A thotsü Potsow na heto phyoala to a phajae David ezoa, "Nina opheni olyu rhükia vanathüng ana ni tsakae Israel, a kyon esopvüi ni tssothukcho. 9 Nina kvüi woana ni nzo tssopvü osi nina kvüta ritssolo woana niri jiang ni khyoyipvü. Osi ana limhalo esopvüi tsüphotso ji ni kümthukvü ka. 10H Ana a kyon Israel jiang tsükona meta yani onte ji ochinaha onte n khalanchilamo tüv lo onte vanthukthaka. Osi ontena meta jilo rheyipvüto ori haruku taena onte sakatala, tolea enhungo hojito tssov meka. Ana ori topvü lona tsanchoe khi ni vanthoku osi ni tsoronichen thicheta yithokvü phyochakala. 12 Ni chüi ni motsüi jiang yolo ni shothei sicho süloha ana ni tsoe yolo tsüka khi mesao tssothoku ka osi ombo ekhüngyan ji etho lia vanthoku ka. 13 Osi atsükona khümphen etssov ji ombona tssovka, osi ana ombo yansa ji osen lia yithoku ka. 14 Aiyo ombo opo tssovka osi ombo atsoe tssovka. Osi ombona kvüthüng woria sana opona kvüto otsoe ji ezüp pia sana ji esüa ana ezüp ombo piv. 15 Tokhatola ana Saul n kyochiv sisi ni khi echungchothoku ji esüa ombo n kyochiv siv meka. 16 Elani ni tsoronichen vanrhüa yivka, osi ana ni ekhüngyan ji linrhüa yithoku ka. Ni yansa sa jiha ochüm liv meka.' " 17 Potsow na ombo ezo jiang topvü Nathan na David ezocho.
David Montso Epi Khen
18 David na OPVÜI vanrhyu süranki jilo rhowo khukthei heto OPVÜI thüngi randancho, "Sandamo Potsow, nina a thüngi mmhom kvüta tssothakcho sana a osi a wopan na mancho na meka. 19 Tokhatola enhüngaha nina hojito rankata a nzanala, osi a tsoronichen ha lia yithokvü mhadung apithaka; Sandamo Potsow, nina kyon tsüka ji hetüv shiang hungthukala! 20 Tona ana ntio ni ezolam lichola! Nina ni nri, a shi a ntsia. 21 Nina ni lüm erüng osi etüm ezi ephanina shiang shi tssocho; osi shiang jo a püngnov tsükona tssocho. 22 Sandamo OPVÜI, Nino kvüta tsüphocho ato! Ochia ni esüa tüv n van; ena yuta topvülo ni tae Potsow to ni ntsia ropvü. 23 Limha shilo Israel esüa jipo thnpoe n van, nina Israel ji ezii ekümo na shanchoe ni kyon kümthukcho. Nina onte tsükona elhi tsüphov osi chethev etsso jiang yakchia limhatsü pono ni mying ji nzüa yithaka. Nina Ejip lona sochuki ni kyonden tssothoko jiangna khochi akvü jipopoe jiang phani siyia onte potsow jiang phani siyia yicho. 24 Nina Israel kyon jiang ji nchüngkhon tsükona ni kyon kümthukthaka, osi nina kümali tsükona onte Potsow kümthaka. 25 "Hojitsükona, OPVÜI Potsow, enhungo nina a osi a tsoronichen jiang tsükona kümali echi phyochako jiang ji benchethuka, nina ntio tssov phyocho sana tssoa. 26 Tona ni mying ji kyungkata thüngtava osi kyon na heto phyotav, 'Thotsü OPVÜI jo Israel pono OPVÜI jika.' Osi nina a ekhüngyan ji yuta topvülo linrhüa yithokvü. 27 Thotsü OPVÜI, Israel Potsow, ana shiang ni thüngi randam lümbüm etsson lio jijo, nina ni nri a thüngi shiang hetopvüto a ntsithoko jina osi a tsoronichen jiang ji mesaeden kümthoku to nina phyoji tsükona. 28 "Hojitsükona Sandamo OPVÜI, nino Potsow. Nina ni phyochak jiang benthukala osi nina athüngi emhokthao phyochak shiang vathaka. 29 Ana atsoronichen jiangna nchünkhon ni mmha lia ewo tssoa onte mmhayithukle to ni thüngi randancho. OPVÜI, Sandamo, nina shi phyochakcho, osi ni mmha ji kümali a tsoronichen pono liv wov to."
David Ori Ekhyo Jiang
1 Hoji sülo yuta tara tssosi David mesao na Philistin jiang thüngi ori tssocho osi onte khyothechi sisi meta esa ji onte khelona khi siyicho. 2 Jisülo jo ombona Moab kyon jiang khyocho. Ombona rhümao morantsan jiang ji likoe epyakthei vanthuksi onte otsük ethüm yolo otsük eniren lüngthata yicho. Hojitolui Moab kyon jiang khyoe ombo eziiden kümthukcho osi tssenkhya ombo picho. 3 Hoji sülojo ombona Syria metaro Zobah jilo Rchob tsoe Hadadezer to tsao jina Ephrates kümkiwoe meta jiang khilo yia vanathüng David na ombo khyoe sicho. 4 Hoji lona David na kurü rasanden wothüng motsünga si nzo tiying tona liko rasan wothüng mekyu to David na khyoe khicho. David na ritsso zotoro nzoa epying tae vanthuksi enhyo jiang topvü David na ojo-okhe jaki siyicho. 5 Osi kvüthüng Sayria jiang na Hadadezer mesao nzanchilo rasan rothukcho sana David na onte nduki wothüng mekyu eni lüngthacho. 6 Jitosi ombona onte metae nchenki tssoe onteji ombo eziiden kümthoka likotssen ombo pithukcho. Hojito David na kvüi woana OPVÜI na ekhyo ombo picho. 7 Hadadezer küpo tsüphoeden jiangna shona tsung joe pvütao jiang ji David na rechoe Jerusalemi hansi yicho. 8 Elani ombona Hadadezer na esao yantsü Betah tona Berothai to lona yongmen yonjak tsentsü khosha khi hansi yicho. 9 David na Hadadezer rasan topvü khyothaka to Hamath lo mesao Toi na zocho. 10 Tole Toi na yuta elümotolo sakae rota yithako Hadadezer ji David na khyothaka to yivon zoale, Toi na ombo tsoe Joram ji wothuka David thanthüng pithukcho. Joram na shona, janti osi yongmen na nsüng rücho yantso tssoa David hanisi wocho. 11 Hojiang ji OPVÜI khümathüng tsütsav tsükona David na khi ombona khyothako jipo 12 Edom, Moab, Ammon, Philistia tona Amalek to lona hansi yio tsütsailan jiang, elani ombona Hadadezer thüngi na recho tsütsailan jiang ejoma to tsotsüi khochaki vacho. 13 David na Oma hayi lona Edom kyon wothüng taro tiza lüngthalamo ji yakchia kyongkata ombo thüngtalancho. 14 Ombona Edom meta topvülo rasan vanphen nsüngrüi vanthukcho osi hojilo kyon jiangji ombo küpo evan kümcho. OPVÜI na David ji olan topvülo ekhyo picho. 15 David na Israel topvü pono yansacho osi ombona ombo kyon topvü ntsanrük tona elan to lona sacho. 16 Zeruiah tsoe Joab jo rasan esopvüi tssocho; Ahilud tsoe Jehoshapat jo eranto sekae evapvüi ji tssocho. 17 Ahitub tsoe Zaduk tona Abiathar tsoe Ahimelek to jo pvütiden; Seriah jo yitssoki eranpvüi; 18 Jehoiada tsoe Benaiah jo David tsüknhyang jiang yolo ezepvüi; osi David tsoe jiango pvütiden to tssocho.
David Tona Mephibo sheth To
1 Tsüngonalo David na phyocho, "Saul wopan kyon ochia enhyokae vevan? Ochona tia enhyokae vana tssona ana Jonathan myingo na hoji nzan ejüvka." 2 Tole Saul wopan na ekümcho tsüka Ziba to tsa vancho, osi hoji David thüngi wole to ezoa wothukcho, tole mesao jina ezocho, "Nino Ziba alo?" Tole ombona, "Aiyo ni benkav tsükona ka tsüphoe yo," to ezocho. 3 Tole David na engacho, "Saul wopan lona ochia enhyokae vevan? Ana Potsow mhadungo phyochako ji ephan nzan ejüv yanala." Ziba na ezocho, "Jonathan tsoe tsüka vanhan. Ombo jojakkhejang." 4 Tole mesao na engacho, "Ombo kvülo vanchola?" Tole Ziba na, "Ombo Lodebar lo Ammiel tsoe Machir ji ki vana" to ezocho. 5 Hojitsükona hoji owo sosi yile to mesao na kyon wothukcho. 6 Kvüthüng Saul tsorüi osi Jonathan tsoe Mephibosheth na rocho sana, ombona epyakthei David yikrachi picho. David na "Mephiboshteth" to tsaphile, "Ni benkav vanka Tsüphoe yo" to ombona janlancho. 7 David na ezocho, "Tikyua, nipo Jonathan myingona ana ni nzamka. Nimotsüi Saul liko topvü ana ni pilamka, osi a tsoyupheno yuta topvülo ni sothevka." 8 Mephibosheth na epyakthelan si phyocho, "Tsüphoe yo, aiyo füro echü lona mmhonkacho mek, ntiolui a hetüv a nzam ato?" 9 Mesao na Saul phajae Ziba ji tsae ezocho, "Ana nipvüi Saul tsorüi Mephibosheth ji, Saul osi ombo wopan ejüeli topvü pilanala. 10 Ni osi ni tsoeden, osi ni phaje topvüna nipvüi Saul likoji joni Saul wopan etsson joncho-rüchoyivka. Tokhatola Mephibosheth jo yuta topvülo a etsoyupheni lankon tsovka." (Ziba na tsokhying me kyu, phajae otsük taro mongo to vancho.) 11 Tole Ziba na janlancho, "Yikrachio tsüphoe na phyo jiang topvü ana tssovka." Hojito Mephibosheth na mesao tsoe esüa mesa tsopheni tsoyucho. 12 Mephibosheth na otsoe ngaro tsüka Mika to tsa vancho. Osi Ziba wopan lo kyon topvüna Mephibosheth phajaeden kümcho. 13 Hojito ojo enita jako Mephibosheth na Jerusalem lo vani etsoyu topvü mesao tsophenina tsocho.
David na Ammonite Tona Syrian To Jiang Khyoala
1 Nsungkhüngu Ammon mesao Nahash ji chücho, osi ombo tsoe Hanun na mesao kümcho. 2 Mesao David na phyocho, "Opo Nahash na alongtsükata vamo ji esüa ana Hamm ji longtsüka ejüv lia." Hojito David na yithenpvüi wothuka owo opo chüo ji tsükona ethojak yivon ezothukcho. Osi David yithenpvüi jiang na Ammom metalo chivole 3 Ammon 10 esopvüi jiang na mesao ji ezocho, "Nipo yikrachi lona David na yithenpvüi rothuka ombo ethojak nungra ni ezuthoka alo? Hojito meka! Ombona ete yantsü shi khoyoe ekhiv tsükona echepim rothukcho!" 4 Tole Hanun na yithenpvüi jiang ji rhümae onte khoka hüm esanawoe jiang tssüi siyisi, phukthesü jiangha eryu lona rhae khiyisi yithukcho. 5 Hoji tsükona onte na oki elani eyiv elümoto yikracho. David na hoji yivon ji zoale Jeriko lo vantasi khoka hüm jiang pvüchesanati yitale to yivon onte hanthukcho. 6 Hoji yakchia Ammon jiangna David ji onte ri kümthaka to ntsiale ontena Bethrohob tona Zobah to lona Syrian rasan owo wothüng mekyu, Tob lona wothüng taro eni, elani Maakh mesao thüngi na wothüng motsünga to engochocho. 7 David na hoji zoe Joab tona ombo rasan jiang to wothukcho. 8 Tole Ammon jiangna khochi oro onte yanpvü Rabbah pikhfü lo vanthukcho, elani syrian rasan tona Tob elani Maakah to rasan jiango yantssae na zae pyimta vancho. 9 Ori jiang na sülan mhadungo na ombo hayav to Joab na zechei, Israel lo rasan mmhontso jiang ethüngi Syrian jiang zechiwo zathukcho. 10 Jitosi rasan enhyoe vamo jiango ojenio Abishai khi sothukcho, osi onteha Ammon rasan jiang zechiwo zathukcho. 11 Joab na ombo ezocho, "Syrian jiangna a khyov to tssona nina oro a kyochia osi Ammon jiangna ni khyoa to tssona ana oro ni kyochivka. 12 Etho jüa lüm tssona zakhe! Etena ete kyon jiang tsükona osi ete Potsow yantsü shiang tsükona ryumhena ori tssotavaka. Osi OPVÜI lüm erüng ji tssothokvü ka!" 13 Joab tona ombo tona khochi owo ori jiang sakacho, tole Syrian jiangna etsan benkacho. 14 Kvüthüng Ammon kyon jiangna Syrian jiangna tsana hungcho sana ontena ha Abishai thüngi na tsani yantsüi woe eselancho. Jisülo jo Joab naha Ammon jiang thüngi rota evamo ji sisi Jerusalem yantsüi kholani yicho. 15 Hoji süi jo Syrian jiang na Israel na onte khyothaka to ntsicho, hoji tsükona ontena onte rasan jiang topvü tsarhyucho. 16 Syrina jiang na Euphrates zhükhfü na engkhüwoe vamo jiang tsalo Hadaezer mesao na wothukcho, tole ontena Helam lo oyi Zobah lo mesao Hadadezer küpo rasan esopvüi Shobah ji lanso lona yitacho. 17 David mesao na hoji zoale Israel rasan jiang ekhfürhyui Jordan zhükhfü yakchia Helam lo Syrian rasan onte zechiwo ncheni vamo jilo wocho. Hoji lona onte ji rotav benkacho, 18 osi Israel jiang na Syrian jiang phanchi sicho. Osi hoji lona David tona ombo woro to jiangna Syrian kurü zotoro esoe nzo tiying tona kurü rasan wothüng zhüro to lüngthacho osi onte ri rasan esopvüi Shobah ji meyani ritssopheni na chüthok to tssocho. 19 Hadadezer küpo mesaeden jiangna Israel jiang na onte khyoala to tssoale Israel thüngi okhümo tssoe onte küpo vani sicho. Hoji süi jo Syrian jiangna Ammon jiang ji nzanchiv kyui sicho.
David Tona Bathsheba To
1 Hoji sülo tsüngkyingo, mesae jiang na ritssolo ewo yuta jilo David na Joab tona ombo küpo tsüphoe jiang, Israel rasan jiang to wothuka owo Ammon jiang khyothukcho osi Rabbah yantsüi ji vükthechithukcho. Tokhatola David jo Jerusalemi vancho. 2 Tsüngona lo David na engo yiphisi phanthi ombo mesae ki mhonkina eyengoa wocho, tole ombona sanphia vanathüng eloe tsüka na tsükata hungchicho. Ompvü ji elümoto opyon mmhoncho. 3 Hoji tsükona ompvüo ocho sana to ethümi zelo kyon wothukcho, tole ompvü ji Elian otsolov osi Hititite kyon Uriah engh Bathsheba to tsacho to ethümchecho. 4 David na kyon wothuka owo ompvü sosi yithukcho tole ombona ompvü thüngi ponilan tssocho. Ompvüo jithüngti choro akvü nthoche elhi ji methaksi vancho. Jitosi ompvüna oki yicho. 5 Tole hoji süijo ompvü ji ngaro hanthaka to ompvüna ntsicho; osi ompvüna hoji David ezocho. 6 Tole David na Joab thüngi heto yiyencho: "Hittite kyon Uriah ji a thüngi yithuka." Tole Joab na Uriah ji David thüngi wothukcho. 7 Uriah na yile David na Joab tona rasan jiang ji kvüto vancho sana osi ritsso ji kvüto yia vancho sana ji engacho. 8 Jisüi jo Uriah ji oki oyi tara esana vanle to ezoa yithukcho. Uriah na khochicho osi David na yantso hansi Uriah ki wothukcho. 9 Tokhatola Uriah na oki n yiv mesao kipüng enhyang jiang nzo yipi sicho. 10 Uriah na oki n yihan to David na zoale ombona ezocho, "Nina yuta sunga ritssolo osi yicho, tona ntioli oki n yina esana vanala?" 11 Tole Uriah na ezocho, "Israel tona Juda to jiang na ori tssoa vana osi Ntsata Bakos jiha onte ndüngo lia, osi a tsüphoe Joab tona ombo küpo tsüphoe jiang to ha hapoe ncheni vana. Tona ana kvütoli oyi oki etsoyutssosi a eng thüngi yipvüla? Ntho topvü myingona ana phyochakala, ana hojitüv elhi n tsso!" 12 Hoji tsükona David na ezocho, "Toka nchüngo to helo esana vana, ojyuati oki ni yithokvü ka." Uriah na hoji nchuk tona ojyua to jo Jerusalemi vancho. 13 David na Uriah ji etsoyu tsolo tsacho osi kinothukcho. Tokhatola hoji nchuk ha Uriah na oki n yilam sicho; tolea ombona hoji zümoha mesaki hapoe elümsü mbensi yipi sicho. 14 Ojyuato enyathüng jo David na yiyenta kako Joab thüngi erani Uriah pia wothukcho. 15 Heto erancho, "Uriah ji rivüngi ritsso echhio jilo wothuka, osi nina eselani ombo lüngthathuka." 16 Tole Joab na yantsü ji sakatathüng kvülo ori etho elitso to zechecho sana jilo Uriah ji zathukcho. 17 Tothüng ji ori jiangna yantsüi na chiro Joab rasan jiang sakacho. Osi David küpo tsüphoe ejoma tona Uriah toji jilona chücho. 18 Hoji sülojo Joab na ritsso ji kvüto yia vancho sana ji tsükona yithenpvüi David thüngi yithukcho, 19 osi ombona yithenpvüi ji heto ezoa wothukcho, "Ritsso ji tsükona nina topvü mesao ji ezothak na, 20 ombona lüm tsuka heto ni engav mpa tssov, 'Nteno ntio tsükona yantsü ji jitata enhyana otae rotachola? Ontena pikhfü jianglo vani lotssi kochiv to ntsitachoke? 21 Gideon tsoe Abimelek ji kvütoli chücho sana ji ntena n chümchechoke? Ombo Thebes lona eloe tsükana pikhfü mhawoena hümchenlung vachochia ejüptsüi sicho. Tona nteno kvütoli yantsü pikhfü ji jitata tsenkata wotachola?' Hojito mesao jina ni engana, 'ni tsüphoe Uriah jiha chünhyacho to ezoa.' " 22 Joab na ezoji ephan yithenpvüi jina oyi David ezocho, 23 Ombona heto ezocho, "Ete ri jiang ji e lona etho jükata osi ontena yantsüi na sanchuki hapoe na esakacho, tokhatola ena onte phanlanchi yantsü pikhfü nandang yithukcho. 24 Tole ontena yantsüi na pikhfü jiang lona lotssi kochio jina ni phajae ejoma chüchoka tsüphoe yo osi ni tsüphoe Uriah ha chünhyachoka." 25 Tole David na yithenpvüi ji ezocho, "Joab ji etho ti-jakle to lüm tssonia, ntiotssole ritssolojo ochoang chüv sana etena n phyokhuk. Mhankalani sakale to ombo ezoa osi yantsü ji khyoe khitale to ombo ezoa." 26 Bathsheba na orapvü chüo ji zoale ombo tsükona nungracho. 27 Osi kvüthüng nungra ji kyimjoa yicho sana David na kyon wothuka mesaki yile to tsathukcho; osi ompvüji ombo engh kümi otsoe ombo bukicho. Tokhatola David na ntio elhicho sana ji tsükona OPVÜI na n mathacho.
Nathan Yithen Yakchia David Khophio Ji
1 OPVÜI na zenkhying Nathan ji David thüngi wothukcho. Nathan na owo heto ezocho, "Oyan motsünga lo kyon otsük eni vancho, tsüka jo elii, tsüka jo yantsae to. 2 Elii jijo mangsü, olyu, elümoto vancho, 3 tokhatola yantsae jijo olyuro motsünga ombona shicho vamo ji tae. Ombona olyuro ji elümoto nzancho osi ombo ngaro jiang nzo rankacho. Ombona ombo etsov lo khakchei olyuro ji phia, ombo pvü lona yuthukcho osi ombo philo ejümkae socho. Olyuro jijo ombo otsolov esüa vancho. 4 Tsüngonalo eli ji ki lankon rocho, tole eli-i jina ombo ekümrümo jianglo khichei lankon ji tssoyaniv ji nchukacho; hojitsükona ombona yantse ji olyuro ji khi tatsüngi ombo yenki ji tsoyuthukcho." 5 Tole David na eli-i ji thüngi elümoto lüm tsuka phyocho, "Ana eküm evamo Potsow myingona echümala, ana kyonmo ji chüthokvü lia!" 6 Ombona hojito elhi n mhom tsso ji man ombona khio jitüv mezhü lolam lia. 7 Tole Nathan na David ezocho, "Kyon mo jijo nika," Osi Israel Potsow OPVÜI jina phyoala, "Ana Saul khe lona ni shanchoe Israel lo mesao ni tssothukcho. 8 Ana ombo ekhüngyan osi ombo engh jiang ni picho; Ana Israel tona Juda to pono mesae ji ni kümthukcho. Hojito n tssocho savo, ana jitata eni ni pilanthaku. 9 To tssona, nino ntio tsükona a yizüng jiang n ngala? Osi ntioli mmen hetüv tssochola? Nina Uriah ji ritssolo na chüthukcho, Nina Ammon kyon jiang khi ombo lüngthathuksi ombo eloe ji khiyicho! 10 Hoji tsükona echungren akvüto ni tsoronichen yolo ochosana meyantsüngi chünrhüvka; ntiotssole nina a yizüng ji n ngav Uriah eloe ji khithaka. 11 Ana echüma ni ezoaka, ni wopan yolo ochona sana ezüp ni sükav ka. Hojijo ana ni engh jiang khi kyonpoe pia thüngti nina engathevka; osi kyon mo jina ni engh ji thüngi engo ponilan tssovka. 12 Nina mphoe na mmen tssocho khatola ana Israel topvüna hungra engangcheo jitüv tssothoku ka.' " 13 Tole David na phyocho, "Ana OPVÜI yakchia nlan tssothaka." Tole Nathan na janlancho, "OPVÜI na nlan ni siyithaka. Ni chüv meka. 14 Tokhatola nina hetüv mmen tssoe OPVÜI pono etssaknkung hansi yio ji tsükona nitsoe ji chüvka." 15 Jisüijo Nathan na oki yi sicho.
David tsoe ji Chüala.
Uriah engh jina David tsoe buko ji OPVÜI na elümoto nochonori thukcho. 16 Tole David na ngaro ji emiyile to Potsow thüngi randancho. Osi ombona etsoyu n tssona zümo akvüto ombo yipheni rheyi tapvüi vanthei vancho. 17 Ombo mesaki elhi etssoe jiangna rhowo ombo sükav tsükona ekhyo tssotacho, tolea David na onte nzo etsoyu n tssocho. 18 Tsüngon tiying harüma sülojo ngaro ji chücho, tolea ombo küpo tsüphoe jiang na yithen ji kvütoli David zothokvü to to emhuktacho. Ontena phyotacho, "Ngaro ji nchüthüng samo na etena janlea David na e n jan. Tona kvütoli ngaro ji chüthaka toji etena ombo ezotavla? Ombona ombobo meyani mpa sikhuka!" 19 Ontena tssürüta vamo ji David na zoe ombo ngaro ji chüthaka to David na engathecho. Jitsükona ombona onte engacho, "Ngaro ji chüthakcho ke?" Tole ontena, "Ho, ombo ji chüthaka" to janlancho. 20 Jisüi jo David na tapvüi na phanthi tsükasi, kvüri khesi, mbensü dungphicho. Hojisüi jo ombona OPVÜI kina owo OPVÜI khümcho. Ombona kholani mesaki yicho osi etsoyu choni ombo pipvüto tsoyucho. 21 Tole tsüphoe jiangna, "Shijo ntio etsso sana ena n ngathela." "Ngaro ji eküm vanathüng jo, nina kya mungsi etsoyu n tsoyucho; tole ngaroji chüpvüto phanthi etsoyu tsocho!" 22 David na janlancho, "Hoka, ngaro jina eküm vanathüng jo ana kya khangcho. Anajo OPVÜI na a khonzansi ngaro ji n chüthoku tsayicho. 23 Tole ombo chüi sithako jina ana khango ji oman n li. Ana ngaro ji kümlanthukchecho alo? Tsüngona lojo ombo vanphen jilo ana yiv, khatola enhungo ombona kvüthüngha athüngi n yilanche."
Solomon Bukala
24 David na ombo eng Bathsheba ji ejichocho. Jisüijo ombona ompvü thüngi ponilan tssocho. Osi ompvüna ngaro hani otsoe bukcho. David na ombo tsoe ji Solomon to tsacho. OPVÜI na ngaro ji nzancho 25 osi ngaro ji Jedidiah to tsale to Nathan na ezocho. Ntiotssole OPVÜI na ombo nzancho.
David na Rabbah Khyoe Khiala
26 Hojithüng jana Joab jo ritsso ji n sam Rabbah, Ammon yantsü ji thüngi ori tssoe hoji hayae khiv sa vancho. 27 Tokhatola heto oyi David ezole to yithenpvüi yithukcho: "Ana Rabbah ji hayae onte jüsolan ji khanithaka. 28 Hojitsükona enhungo rasan jiang ekhfürhyui nibobo yantsü ji khyoe khia. Ana jo hoji khyocho to omying ji a n khyihungala." 29 Tole David na ombo rasan jiang tsarhyui sosi owo Rabbah ji hayae khyoe khicho. 30 David na Ammon jiang kisü potsow Mollek ji kvüri na shona kikho mmyingi seri thümro mongo bena tüv khicho osi jilo tssentsü longha khyingcho. David na hoji khi ombo kvüri venkacho. Ombona yantsü jilona ejüeli ha elümoto rechoe khicho, 31 osi yantsü jilo kyon jiangji tssüngrhüphen, yonjak kheya, yonjakpvü to benthuksi nungkata ombo elhi tssoa yitalong nsüngüthukcho. Ombona Ammon yan thanpo jiang lo kyon jiangha hojito tssothukcho. Jisülo jo ombo tona ombo woro jiang to na Jerusalemi yitalancho.
Amnon ha Tamar Oni
1 David tsoe Absalom na oyuloe opyon mmhom n yanpihan Tamar to tsa vancho. Tole David tsoe thanpoe Amnon na hoji jüponcho. 2 Ombona jo elümoto ompvü lümcho khatola ompvüji n khiche to zecheo ji tsükona ombo nochonoria yi sicho. Osi ompvüo loroe etsso jina eboe thüngi n wothoku vanthukcho. 3 Ombona David ojenio Shammah ji tsoe Janadab to tsa okhen oyi tssothia okyak lia tüv oshom vancho. 4 Tole Janadab na Amnon thüngi ezocho, "Nino mesao tsoe kasi, eng akvü ni nungra hungala. Ntio tssocho na la?" Tole ombona, "Aiyo a nyuro Absalom ji oyilov Tamar ji elümoto a jüponala" to janlancho. 5 Tole Jonadab na ezocho, "Nira esüa lyui belüngi erikachi vana. Osi kvüthüng nipona ni zethechilo roa sana jithüng heto ezoa, "Nzansi a yulov Tamar khi oyi etsoyu apithuka. Ompvü khi ana hunga shilona etsoyu nsüngrüi ompvü khi a ekhümthuka." 6 Tole Amnon na ra esüa lyui belüngi vancho. Tothüng ji mesao David na ombo zethechilo wocho osi Amnon na ezocho, 'Nzansi aka Tamar khi shilona ana hunga oro hümri rün gi khi ompvübo a ekhümthuka.' " 7 Tole David na mesaki Tamar thüngi heto yiyencho, "Amnon ki owo etsoyu ombo nsüngrüyia." 8 Ompvüna wole omboji belüngi yipa vana hungcho. Osi ompvüna ophfü khi ombona ompvü hunga hümri nsüngrüicho. Hümri ji rüngchoe ombo tssothoku tsükona, 9 ompvüna ophilo thecho, khatola ombona n tsocho, osi heto ezocho, "Kyon topvü thanpoe yithukrava"tole onte topvü na nkachocho. 10 Jisüijo ombona ompvü ezocho, "Hümri phi ji shilo a belüngi hansi oyi nikhena a ekhüma." Ompvüna hümri ji bensi ombo thüngi wocho. 11 Ompvüna ombo ekhümvü tssoathüng ji ombona süyae ezocho, "Oyi athüngi yipa!" 12 Ompvüna ezocho, "Omying mmentao etso-ephyo jitüv etssov a ti-khüngkata! Jitüv jo etsakthao elhi! 13 Hojitüv elhi tssosi aiyo kvütoli oyam yolo omha khokachevla? Osi nina Israel yolo yikra ndung kyon tsüka tssov. Hoji tsükona nzansi, mesao ezoa, tona ombona eni vantathokvü to ana longtsüala. 14 Tokhatola ombona ompvü yi ji n ngacho; osi omboji ompvü lona etho jükao etsso jina ombona ompvü ji eyathechi retso rama tssocho. 15 Hoji süijo Amnon na elümoto ompvü tsaka nchümcho; tothakale ombona ovüngthüng ompvü jüpomo jilona kyungkata ompvü tsakcho. Osi ombona, "Hapoe chiyia!" to ompvü ezocho. 16 Tole ompvüna ezocho, "To ntssoche, heto phani asio jijo nina n mhom tssothako jilona kyongkata n lan!" Tokhatola Amnon na n ngayicho; 17 osi ombona phajae tsae khi ezocho, "Eloe shiji a ehungo na phanchukchi sia! Ompvü chiyithuksi kipüng ji khani sia!" 18 Jitsükona phajae jiangna ompvü ji süchukchi sisi kipüng ji khani sicho. Tamar na hoji echungren jilo mesao tsolo n yanpihan jiang mpensü phungrhüo okhe siphoa jitüv hancho. 19 Osi ompvüna live shae ompvü kvüri thukae hansi ompvü sü ji reroe sisi okhena omha khüpsi kya yicho. 20 Kvüthüng opyao Absalom na ompvü hungcho sana ombona engacho, "Amnon na ni yikrathukcho alo? A yuloe, nzansi, hojina jitata etho ti-jaka. Omboha nipyao ka, oyam ti-ezokhe." Hoji tsükona Tamar na Absalom ki yingsiyinglo na pyingi nungra vancho. 21 Hoji motsü ji mesao David na zoale elümoto lüm tsukcho. 22 Amnon na oyulov Tamar thüngi nlan tsso jina Absalom naha Amnon ji tssaka n jam sicho.
Absalom na Nlilanala
23 Nzyu eni sülo Absalom na ombo olyu ji Ephraim yan ndüngo Baal Hasor lona otssan tsena vancho osi ombona mesao tsoe topvü jilo tsacho. 24 Ombona David mesao thüngi owo ezocho, "Ana a olyu jiang otssan tseniala. Küma ni tona ni küpoe tsüphoe jiang to na ha oro tokhu jilo thekhukcho alo?" 25 Tole mesao na janlancho, "Meka, otsoeyo, e topvüna rocho-jo elümoto ni ezüpvüka" Tokhatola Absalom na tsa mungcho, toaha mesao jina n khichoyi Absalom ji yile to ezocho. 26 Tokhatola Absalom na ezocho, "Toka, nzansi a jenio Amnon tia rothuku alo?" Tole David na ezocho, "Ntioli ombo rothuku la?" 27 Toaha Absalom na jonjia mongo jina Amnon tona ojenio thanpoe jiang to wothukcho. Absalom na mesao tokhu esüa nsüngrüi vasi 28 ombo phajae jiang ezocho: "Cheta vantasi Amnon ji kinothaka na ana nte ezovka, ombo lüngthae sitakhe. Osi ti-kyutakhe. Oha ji ana hamka. Ntena kyua osi ti-toa ti n chümtana tssotakhe!" 29 Hoji tsükona phajae jiangna onte ezoji ephan Amnon ji lüngthae sicho. Tole David tsoeden thanpoe jiangna ombombo kurü lo tsankarümi tsani siracho. 30 Ontena okiwoe yita vanathüng na David ji heto zothukcho: "Absalom na ni tsoe jiang ji topvü lüngtharathaka, osi tsüka tia enhyokae n van!" 3i Mesao na phanthi nungra mpensü jiang reroe sisi likoe vanthei sicho. Osi phajaeden ombo ndüngo vamo jiang naha nungra lona onte mpensü jiang reroe sitacho. 32 Tokhatola David ojenio Shammah tsoe Jonadab na phyocho, "Yikrachio tsüphoeyo, nitsoe jiang topvü n lüngthaka. Amnon tae chüchoka. Amnon na oyuloe Tamar ji worio jithüng na Absalom na heto zia vana toji nina ombo mhaodonina ntsintsav tssov. 33 Hoji tsükona nitsoe jiang topvü lüngthathaka toji ti-longtsüa; Amnon tae chüchoka." 34 Tothüng jo Absalom jo tsanthakcho. Jitopvü enhyang rasan jina kyon khosha Hornaim lona sani tsata phunglan ji hungchicho. Tole ombona hungwo ji owo mesao ezocho. 35 Jonadab na David ezocho, "Ana ni ezoji esüa ni tsoe jiang tsata je." 36 Ombona hojito phyothak tona David tsoeden jiang rheyicho; osi ontena kyatav benkacho, osi David tona ombo tsüphoe den jiang tonaha nshüthechia kyatacho. 37-38 Absalom jo tsani oyi Geshur mesao Talmai, Ammihud tsoe ji tsankae vancho osi jilo nzyu ethüm vancho. David na ombo tsoe Amnon tsükona sunga kyacho, 39 tokhatola ombona Amnon chüo ji nungrathakale ombona ombo tsoe Absalom eyiloa nchümcho.
Absalom Yilanthoku Tsükona Joab na Nlansüngala
1 David mesao na Absalom ji elümoto eyiloa vana to Joab na ntsicho, 2 hoji tsükona Tekoa lo evan eloe kyakran tsüka vamo ji tsalo wothukcho. Ompvüna yiale Joab na ezocho, "Nina echüi kya esüa etsophyoa, osi nungra sü ekasi, otssan jiang ti-khena vana. Osi eloe na echü kyasi sungthakcho esüa etsophyoa. 3 Tosi ana ntio ni ezov sana ji owo mesao ezoa" Osi ompvüna ntio kvüto phyov sana ji Joab na ezocho, 4 Eloe jina mesao thüngi owo nkhümthei yikrachi pisi ezocho, "Tsüphoe yo, nzansi a nzanchia!" 5 Ombona ompvü engacho, "Ntio ethev lichola?" Tole ompvüna ezocho, 6 "Tsüphoe yo, a rapvü jo chüthaka osi ana otsoe otsük eni vancho, tole tsüngonalo oni khonta ha ochia oni epyang n van küma tsüka jina tsüka ji lüngthae sicho. 7 Enhungo a wopan topvü na athüngi n lan ayanala, osi a tsoe ji onte pile tona ontena ojenio müng ji nlilana lüngthae sivka to phyoala. Ontena hojito tssoana ayio otsoe n van a kümvü. Osi ontena a eyilo wokhao ji roe asiyia na a rapvü mying ji rümoni siv." 8 Tole mesao na ezocho, "Oki elani yia, ana a etsso tssovka." 9 Tole ompvüna janlancho, "Tsüphoeyo, nina ntio elhiana a osi wopan pono tssothuksi ni tona ni wopan to jo n lan liv meka." 10 Tole mesao na janlancho, "Ochona sana ni ekhenthuka tssona, a thüngi sosi roa, tona ombona kvüthüngha ni khetsülam meka." 11 Tole ompvüna ezocho, "Tsüphoeyo, a wopan ochona a tsoe ji lüngthae omüng nlilam zia vancho sana jina a tsoe tsükao ji lüngthalani n lan tsükalamo n tssothoku tsükona OPVÜI ni Potsow thüngi randania. David na janlancho, "Ana eküm evamo OPVÜI myingona echümchakala, nitsoe ji ejükaro lea tssatssov meka." 12 Eloe jina ezocho, "Tsüphoeyo, oyi motsünga a phyolanthukkhukcho alo?" Tole David na "Phyoa" to ezocho. 13 Ompvüna phyocho, "Nino ntioli Potsow kyon thüngi hojito n lan elhiala? Nina ni tsoe tsanthei vamo ji oki n yithukala, osi nina ntio enhünga phyothakcho sana jina nibobo nlan ni piala. 14 Ete topvü echüv, eteno likolo ojü phyangkacho, phyaklani n khicheo ji esüa tüv. Potsow na lea chüthako jijo n phanthilanthukche, tokhatola mesao jinajo tsanthei evamo jijo matachona oki yilanthuko lanka liv. 15 Hojitsükona tsüphoe yo, ana ni thüngi roji ethelan jijo kyon jiangna a ekhenthuko ji tsükona ana oro ni thüngi thyutae nina kvütowoe na a nzanchiv sana ji eyiloa rocho. 16 Ana jo nina a nzanchia ochona a tsoe ji woniata lüngthae sisi Potsow na ombo kyon jiang pio meta jilona khi esiv zia vancho sana jiang khelona a shanchov tssov to nchüma rocho. 17 Tsüphoeyo, mesao jo lanben esüa mmhom tona n mhom to ji chethetala, hoji tsükona ni phyochak jina a shanchov tssov to eyiloa rocho. Ni Potsow OPVÜI ji khi ni ndüngo vanthokvü ka!" 18 Tole mesao na ezocho, "Ana ntiosana ni engavka, nina ntsaji a ezokhamka." "Ntio a engav sana a enga, tsüphoeyo," to ompvüna ezocho. 19 Ombona ezocho, "Joab na ni rothukcho alo?" Tole ompvüna phyocho, "Ana eküm Potsow myingo na phyochakala, tsüphoe yo, nina a engao jiang ni n jalam ana n vanche osi ni m phoche. Hoka, ni küpo tsüphoe Joab na ntio kvüto elhiv osi phyov sana ji a ezoa a rothukcho ka. 20 Tokhatola yilan shiang topvü nsachov tsükona ombona heto lyucho taeka. Tsüphoeyo, nino Potsow lanben esüa, ntio tssoana topvü ntsikhanala." 21 Sülami jo mesao na Joab ezocho, "Nina ntio rüngcho sana ji etssov tsükona ana methakthaka, owo khyingroe Absalom ji sosi shilo yia." 22 Joab na David yikrachia mhadungi vanthei ezocho, "Tsüphoeyo, Potsow khi ni mmhayithuka. Nina a phyocho a engayio jina nina a thüngi ni emathatala to ana ntsithaka. 23 Jitosi ombona phanthi Geshur lo owo Absalom ji sosi Jerusalemi yicho. 24 Tokhatola mesao na Absalom ji mesaki n vanthuk to phyocho. Ombona phyocho, "Ana ombo n dukhungka" Hoji tsükona Absalom na ombo ki vansi mesao mhadungo jo n chivocho.
Absalom ji David Thüngi Senjümtayiala
25 Israel lo ochia Absalom esüa opyon mmhom n vancho, kvüri na ojo jana ombolo ephyoerüv ntia n pacho. 26 Ombo tssan jiha chhicho osi sikhünga pvüa mmyinga to tssoana nzyualo yenjoa tseni sicho. Mesao shenthi füphen ji ephan jo seri eni bena tssan tssocho. 27 Absalom na tsokhying ethüm tona tsolo Tamar to tsa elümoto opyon-ori mmhona tüv to vancho. 28 Absalom na nzyu eni Jerusalem lo mesao n duku vancho. 29 Ombona ombo thung tssoa mesao thüngi wothuku tsükona Joab tsalo wothukcho, tole Joab na n rocho. Jitsükona Absalom na Joab tsalo wothuklanaha Joab na n rocho. 30 Absalom na ombo phaje jiang ezocho, "Zeta, Joab li jo a li ndüngo osi omüm zae lia. Hojilo owo omi thenthechia." Jitsükona ontena owo Joab li jilo omi thecho. 31 Tole Joab na Absalom ki owo ezocho, "Ntioli ni phajae jiango ali jilo omi thechola?" 32 Tole Absalom na janlancho, "Ana ni tsaha nina n roji tsükona ka. Ana jo ni khi mesao thüngi a tsükona heto ni engathuk hungcho: 'Ntio tsükona ana Geshur sisi shilo yichola? Ana jilo to vancho saliwo ji mmhomo tssov kasi.'" Elani Absalom na phyolancho, "Ni khi mesao thüngi a ndukatachethoku tüv lanka ni a yanthuk hungala, osi a nlan lia tssona ombo khi a chüthuku ka." 33 Hoji tsükona Absalom na ntio phyocho sana ji Joab na owo David ezocho. Tole mesao na Absalom tsalo wothukcho osi Absalom na oro ombo mhadungo epyakthecho. Tole mesao na ombo ntsüphia khichocho.
Absalom na Panlam Okyak Yanala
1 Hoji sülo Absalom na ombo tona ombo nkhohae rasan otsük tinyan to tsükona ritsso zotoro tona kurü to methakcho. 2 Ombona nyazüngina phanthi owo yantsü kipüng ndüngo lantssae mangi vancho. Kvüthüng kyon na yitssolo mesao yana roa ombona nduka sana meta kvülo kyon sana to ombona engacho. Kyon ji meta kvülo na sana ntsithakana, 3 Absolom na heto ezocho, "Ni elan lia khatola mesao kyon ochia naha ni motsü ji ni engayio tüv n van." 4 Tosi ombona ezocho, "A ji yitssoe salivo mmhom ji, ochona a thüngi yitssolo roa na elamo tssoyia yithukvü kasi." 5 Kyon jina ombo mhadungo epyakthelo roana Absalom na ovüngna yonchia rhümae emanphicho. 6 Israel kyon kvütana mesao ji yana roana Absalom na nduki hojito tsso jina kyon topvü na ombo chokae sicho. 7 Nzyu mezhü sülo jo Absalom na David mesao ezocho, "Tsüphoeyo, ana Hebron lo owo OPVÜI thüngi phyochak benthukvüka. 8 Ana Syria lo Geshur metalo vanathüng heto phyochaki lia, OPVÜI na Jerusalemi a sosi yilan na tssona ana Hebron lona ombo khümvü to." 9 Tole mesao na ezocho, "Noyinga yia," Tole Absolom na kholani yicho. 10 Tokhatola ombona Israel pvüji topvü thüngi heto yithen yithukcho, "Ntena tatara won ji zoana heto tüngtava, 'Absalom na Hebron lo mesao kümthaka!' " 11 Absalom na tsacho otsük nzo eni Jerusalemi na khochi ombo nzo wo jiango hojitüvlo yiala to n tsiv longtsüka lona phana wocho. 12 Absalom na othan piathüng David mesao ntssong epi yolo tsüka Ahithophel ji tsalo Gilo lo wothukcho. Hojito mesao kyakthechi elhi ji opon tssoa kyon khosha na phankata yicho.
David Na Jerusalem Lona Tsanala
13 Yithenpvüi tsüka na heto David ezocho, "Israel kyon jiangna Absalom küpo tssov to methakala." 14 Tole David na ombo küpo tsüphoe Jerusalemi ombo ndüngo evan topvü ezocho, "Etena Absalom mhadungo tsanchov to zina zakto etsam lia! Zakto tsantava! To mekana ombona zakto oro ete osi yantsü kyon topvü lüngtharae esiv sala!" 15 Tole ontena janlancho, "Hoka, tsüphoeyo," "Nina ntio phyoana ena tssovka." 16 Mesao na ombo wopan topvü to na ombo küpo tsüphoeden jiang to sosi khochicho osi ombo yinga loroe otsük taro jo mesaki nhyaka vanthukcho. 17 Mesao osi ombo woro jiangna yantsü ji sisi khochiathüng oki wokhao jilo esantacho. 18 Ombo enhyang jiangna onte füa yakchiathüng mesao küpo tsüphoe topvüna ombo lo jüpkae vancho. Gath lona ombo phan rowo rasan nzo tiruk jiangna ha onte yakchia yicho, 19 osi onte esopvü Ittai thüngi mesao na ezocho, "Nino ntioli e nzo tssoala? Osü elani oyi mesao ethan ji küpo vana. Nteno tsanthan nte metae na kontae metapoe vantala. 20 Nteno meta shilo esüngaro tae vanhan, Tona ana ntioli a nzo nte yentsathukvü la? Aiyo kvüi yia sana a popo tia n tsi. Hoji tsükona ntena elani oyi nte meta kyon jiang nzo tssoa, OPVÜI khi nte mmhayithukvüka." 21 Tole Ittai na janlancho, "Tsüphoeyo, ana OPVÜI myingona phyochakala, nina kvüi woana a chülia ana ni nzo tssovka." 22 David na ezocho, "Tona mmhona!" "Khochia!" Tole Ittai na ombo nzo etssoe topvü sosi khochicho. 23 David sürüi jiangna khochiale kyon jiangna tüngkachia kyatacho. Mesao tona ombo sürüi jiang to na Kidron zhükhfü ji pankae ombo kyon jiang nzo lijüngoe yitacho. 24 Pvüti Zadok ji jilo vancho osi Levi jiangha ombo nzo Ntsata Bakos ji ejümtasi vancho. Ontena Ntsata Bakos ji vachukchisi kyon topvüna yantsü ji n yakrathüng jo khokthei vantacho. Abiathar pvüti ha jilo vancho. 25 Tole mesao na Zadok ezocho, "Ntsata Bakos ji khi yantsüi hansi yia. OPVÜI na a emathayina tsüngona lojo hoji zelo rovka osi meta kvülo vacho sana ana hunguka. 26 Tokhatola a thüngi ombo n mathacho tssona a pono ombo lüm erüng tae tssothuka." 27 Ombona Zadok ji heto ezolancho, "Zeta, ni tsoe Ahimaz ha Abiathar tsoe Jonathan to oni sosi noyinga yantsüi yitava. 28 Hojithüng jo ana lijüngi zhükhfüro eryu jilona ni yiwon nhyaka vamka." 29 Zadok ha Abiathar onina Ntsata Bakos ji khi hantasi Jerusalemi yitacho. 30 David na olive enungi na ehungo kya vancho; ombo joshü osi nungra chekaphen tssoa kvüri ha eyukcho. Ombo sürüi topvüna nungra lona omha eyukrae kyata ombo phancho. 31 Kvüthüng David na Ahithophel ha Absalom nzo panlan tssoala to zocho sana David na phyocho, "OPVÜI nzansi Ahithophel etümezi jiang ntia mekvü sithuka!" 32 David na yingsüng kvüri, khümphen meta lio ji janale ombona longtsükao shom Archite yamo Hushai ndukcho osi omboha mpensü mpato reroe, otono ochon shake hansi vana hungcho. 33 David na ombo ezocho, "Nina a phana rocho taena bentav meka, 34 nina a nzanchiv zina yantsüi oyi Absalom nduki ezoa, nina opo benkao ji esüa enhungo longtsüka lia ombo benkavka. Osi Ahithophel na ntssungyi ni pio jiang panlam ekhyo tssoa. 35 Pvütiden Zadok ha Abiathar woniata jilo vamka; nina mesaki na ntio zoa osi hunga sana topvü oni ezoa. 36 Oni ndüngo oni tsoe Ahimaz ha Jonathan oni vanka, jilo mesaki yithen kvüto sana topvü oni ezoa a thüngi rothuka." 37 Hojito David shom Hushai na yantsüi elani yicho osi Absalom ha jithüng chirocho.
David Ha Ziba Oni
1 David na yingsüng ji yaki yithakale, Mephibosheth phajae Ziba na ombo ndukcho. Ziba na gadho eni mankvüi hümri nzo eni, jününgrothi nkung nzo eni, tssüngthi eyi ochüng nzoa, tona zükhi sofü sükvü epying to hanthuksi vancho. 2 Mesao David na ombo engacho, "Shiango nino ntio lyuvsala?" Tole Ziba na janlancho, "Gadho jiango ni wopan jiang tsankathukvü tsükona ka tsüphoeyo, hümri tona tssüngthi to jiango ni kyon jiang etsov osi zükhi jijo lijüngi na nte eratsüngathüng eyuv tsükona ka." 3 Mesao na engacho, "Ni pvüi Saul orüo Mephibosheth jo kvüla?" Tole Ziba na janlancho, "Ombo Jerusalemi vanala, ntiotssole omotsü Saul ekhüngyan ji enhungo Israel jiangna ombo pilam to ombo eyilov lia." 4 Mesao na Ziba ezocho, "Mephibosheth echi topvü ni echi tssovka." Tole Ziba na ezocho, "Aiyo ni phajae ka, ana yuta topvülo ni emathao tüv tssochethukvüka tsüphoe yo!"
David Ha Shimei Oni
5 David mesao na Bahurim lo chiyile, Gera tsoe Shemei, Saul wopan tsüka jina chiro ombo ndukale rhiyikacho. 6 Shimei na David tona ombo küpo tsüphoe jiang to olong na ephya phancho, khatola enhyang jiangna David ji ekvüzhüi sicho. 7 Shemei na ombo rhiyia heto phyocho, "Tsana! Tsana! Münghan! Lüngthae! 8 Nina Saul ekhüngyan ji khicho osi nina Saul wopan elümoto lüngthao jina OPVÜI na ni khangshiala. OPVÜI na ni ekhüngyan ji Absalom pi sithaka, osi nino ni yesothaka, münghan yo!" 9 Zeruiah tsoe Abishai na heto mesao ezocho, "Tsüphoe yo, ntioli füro shi khi heto ni rhiyikathuka ato? Ana owo kvüri ji ombo vonivka lo." 10 Tole mesao na Abishai ha ojenio Joab oni ezocho, "Shijo nte elhi meka," OPVÜI na ezocho a rhiyia tssona ochina ha ombo ejamvü elan n lika. 11 David na Abishai tona ombo küpo tsüphoe jiang to topvü ezocho, "A tsoe jina samona a lüngthav yana tssona Benjamin kyon shina jo ntio lyua vamla? OPVÜI na a rhiyia to ezochoka, ombo ji to sia, osi ombo etsso tssothuka. 12 Nkhontsi OPVÜI na a ezüp ji zesi a nzana a rhiyikao jiang thung mmha mpato a piv." 13 Tosi David tona ombo kyon jiang to na khochilani yita vancho. Tole shemai na yingsüng ji dunga onte phanrhüa ochon tona olong tona onte ephya rhiyia onte phancho. 14 Ontena Jordan janale mesao tona ombo woro jiang topvü sangtsüngi jilo esantacho.
Jerusalemi Absalom
15 Absalom tona Israel topvü to na Jerusalemi rheyitacho osi onte yolo Abithophel ha jücho. 16 David shom mmhom Hushai na Absalom ndukale heto tüngkachicho, "Mesao ji harishia vanthukvüka! Mesao ji harishia vanthukvüka." 17 Absalom na ezocho, "Ni shom David thüngi longtsüka n liv sichoke? Ntioli nino ombo phana n vochola?" 18 Tole Hushai na ezocho, "Kvütoli hoto tssovla, aiyo OPVÜI na osi kyon jiangna elani Israel kyon topvü na ethüngcheo ji thüngoe tssoala. Ana ni ndüngo vamka. 19 Aiyo a pvüi ji tsoe ji n benkana ocho benkavla? Ana nipo benkao ji esüa, enhungo ni benkavka." 20 Tole Absalom na Ahithophel zechia phyocho, "Ena enhünga shilo vana, küma nina ntio e tssothuk hungala?" 21 Tole Ahithophel na janlancho, "Oyi nipo yinga loroeden mesaki nhyakta vamo jiang thüngi ponilan tssotava. Tona nino nipo ri to Israel otsük akvüna ntsiv, osi ni sürüi jiang lümbüm tssonkayivka." 22 Ontena mesaki mhoki Absalom nchenphen süki zonicho osi ombona opo loroe jiang thüngi rhowo ponilan tssocho. 23 Hoji echungren jilojo Ahithophel na ntio ntssungana otsük akvüna Potsow yi esüa khitacho; David ha Absalom onina ha ombo yi engacho.
Hushai na Absalom Ejithechiala
1 Jitosi n sungkhüngu Ahithophel na heto Absalom ezocho, "Ana kyon wothüng taro eni ethüngi nchüng zümo David phamka. 2 Omboji mmuka etho jaka vanathüng ana ombo sakavka. Tona ombo ekhemvü osi ombo woro topvü na tsani siv. 3 Ana mesao jitae lüngthasi ombo woro jiang topvü sosi ni thüngi oyi eloena orapvü thüngi kholani yia esüa yivka. Nina kyon tsüka tae ni lüngtha hungala, osi jilo enhyokao jiango topvü tsanchov." 4 Tole hojito ezoji Absalom tona Israel esopvüi topvü tona elanthata engachecho. 5 Absalom na ezocho, "Enhungo Hushai tsae ombona ntio ephyov licho sana ji ezothuka." 6 Hushai na chirole Absalom na ezocho, "Ahithophel na heto e ezocho, etena shi ephan tssov alo, toalo ninajo kvüto ezovla?" 7 Tole Hushai na ezocho, "Nchüng Ahithophel na ntssung nte pio shijo ekhio meka. 8 Nipo David tona ombo woro to jiango ritssolo etho eliden to nina ntsia, ontena Sevan opvü ji thüngina woro jiang rechoe khiyicho haruka to ntav. Nipo jo ejyueran eli-i rasan osi ombona zümolo ombo rasan nzo n yipala. 9 Enhüngalea ombona longkvüi alo kvülo sana mphoe vankhuka. David na ni woro sakacho to owon zoa na ochona zotena sana jina David na ni woro khyocho to phyov. 10 To tssoana lüm etssomo osi hingho esüa lüm etsson jina lea kyuv, ntiotssole nipoha ombo woro to jiango orilo ekhüngden to Israel topvüna ntsia. 11 Ana nte ntssüngu jo heto, Israel meta nken topvü lona kyon ekhfürhyui jürani hajang esüa ekhfürhyui nina onte sosi ritssolo khochia. 12 Ntena David kvülo na nduka na ombona n tsithüng na ombo sakata. Tona ombo osi ombo woro jiang topvü monravka. 13 Ombona yantsüi tsani yiana ete topvüna wozhü bensi oro yantsü ji sheni süsi hayitsüi joyivka. Osi yingsüng kvüri olung motsüngalea enhyokae liv meka." 14 Tole Absalom tona Israel topvü to na phyocho, "Hushai ntssungyi ji Ahithophel ntssung lona mmhonkata." Ahithephel ntssung ji n khiv ji OPVÜI na methakcho, ntiotssole Absalom ji monthoku sa vancho.
David ji Ekyuyi Picho osi Ombona Tsanala
15 Hushai na Zaduk pvüti tona Abiathar to thüngi Absalom tona Israel esopvüi jiang to thüngi ntio ntssung picho sana osi Ahithophel na jo kvüto ezocho sana jiang topvü ezocho. 16 Hushai na hetoha ezocho, "Zakto enhünga! David thüngi yithen pia, lijüngi zhükhfü eryutaphen jilo ti-yiple to, osi zakto Jordan pankae tsanle, tona ombo osi ombo woro jiang ji oyam na rhümae chüthukrav meka." 17 Abiathar tsoe Jonathan ha Zaduk tsoe Ahimaz onina Jerusalem tssae Enrogel jünhyo jilo na nhyakta vancho, ntiotssole onina oyam ehungo na yantsüi n rheyitahungcho. Osi yithen topvü eloeroro tsüka na woro woni ezocho osi onina David thüngi oyi ezo to tssoa vancho. 18 Tole tsüngonalo eboeroro tsüka na oni hungi Absalom ezocho, hojitsükona onina tsani oyi Bahurim yani kyon tsüka ki mphoe vantacho. Kyon jina oki ndüngo jükha licho osi onina jükha jilo rhowo mphotacho. 19 Tole kyon ji engh jina osü khi jükha emen ji eyukzhüi ji pono otssuk phikachi sicho, osi ochinaha bani n yancheo tüv lyui vacho. 20 Absalom küpo tsüphoe jiangna oki jilo oro eloe ji engacho, "Ahimaz ha Jonathan onio kvülo vanchola?" Tole ompvüna ezocho, "Onio zhükhfü ji pankathaka" ontena oni yantaha oni nhungu jina yantsüi kholani yicho. 21 Ontena yithakale Ahimaz ha Jonathan onina jükhae na chiyi David ezolo wotacho. Ahithopehl na ombo lo okyak theo ji yilan ji ezotacho, osi "Zakto zhükhfü pankae tsani yia" toha ezotacho. 22 Jitsükona David tona ombo woro to jiangna zakto zhükhfü ji pankae ojyuato wonchia jo ontena pankae chiyithakcho. 23 Ombo ntssungyi ji n khiyi to Ahithophel na ntsiale Kadho makvüi na ombo yantsüi kholani yi sicho. Tothakale ombo elhi jiang nsüngsochi vasi ombobo khyaktsüngi chüi sicho. Osi ombo müng jo wopan lüpi shothecho. 24 Absalom tona Israel jiang to na Jordan pankatajo David tona ombo woro to jiango Mahanaim yantsü jana yithakcho. 25 (Absalom na rasan esoe ji Joab sisi Amasa zikae sicho. Amasa ji Ishmael kyon Jether tsoe, osi ombo oyo ji Abigail, Nahash otsolov osi Joab oyo oka Zeruiah ji tsoe tssocho.) 26 Absalom tona ombo woro to jiango Gilead metae nchentacho. 27 David na Mahanaim lo chiyile kyon shiangna ombo ndukcho. Amon metalo Rabbah yamo Nahash tsoe Shobi; Lodebar yamo Ammiel tsoe Machir; Gilead metalo Rogelin yamo Barzillai. 28-29 Ontena ophi, chonphfü, sayipvü to hantasi rocho osi David tona ombo woro to tsükona etsoyu ohüm, omüm, etsoyu, otsüng nghicho, orho, küptso, tssakijü, ethyu, ponshüng tona olyu tara to hansi rocho. David tona ombo woro jiang to lijüngi wonton era mmuka vamvü to ontena ntsicho.
Absalom ji Khyothechi Lüngthacho.
1 David mesao na ombo woro topvü ekhfürhyui wothüng motsünga ren, tona nzoa ren to chiroe jianglo esopvüi ethüngi sothukcho. 2 Ombona onteji razhü ethüm nsüngrüchei khochithukcho. Osi Joab tona Joab ojenio Abisahi tona Gath lona Ittai to nkhenta razhü motsüngtsüng sothukcho. Osi mesao na ombo woro jiang ezocho, "Ana a tsükna nte phana rovka." 3 Tole Ontena ezotacho, "Nino e nzo ti-roa. E yolo ejoma na kholani tsanlea osi ete owo chiso mpato elüngthalea jijo ntia meka, tokhatola nino wothüng taro esüa tüv. Nina yantsüi vansi e kyolo rothukvo hoji mmhontso tssov." 4 Tole mesao na ezocho, "Ntena ntio mmhomo to nchüma sana ana ji ephan tssovka." Jitosi ombona pikhfü tsae vansi wothüng tona nzoa to razhü jiang wothuka vancho. 5 Ombona Joab, Abishai tona Ittai to tsae yizüng heto ezocho, "A nzansi, khyingroe Absalom ji a ti-tssatsso-yitakhe." David na hojito ombo tsüphoe jiang thüngi yizüng epio ji rasan topvü na zocho. 6 David rasan jiangna orawoe na owo Ephraim ralungina Israel jiang thüngi rotacho. 7 Osi David woro jiang na Israel jiang khyocho, elümoto n mhom khyothechicho, osi hoji nchuk taena wothüng mekyu chüthokcho. 8 Ritsso ji orawoe tssota oyi ritssolona chüo jiang lona kyungkata oraena chüi sicho. 9 Osi esüngaro taena Absalom na David woro ejoma tssükacho. Absalom jo kurü lo tsankacho osi lümrodung tsüphov kupi rheyiathüng Absalom kvüri ji khero lo oyaki yikae sicho. Kurü jina tsani sisi Absalom ji oyaki yikae sicho. 10 Tothüng ji David woro tsüka na hungi heto Joab ezocho, "Tsüphoe yo, ana Absalom ji lümrodungo yikae vana hungcho!" 11 Tole Joab na ezocho, "Nina hungna ntioli jilona n lüngthacho la? Ana janti rangpyak taro tona ryukhüngzhü to ni pivkasi." 12 Tole kyon jina ezocho, "Nina jantirang wothüng bena apilea ana mesao tsoe ji tsüko yingrolea n tssyuka. Mesao na ni tona Abisahi, Ittai to nte ezoji ana zoa, heto; 'A nzansi khyingroe Absalom ji titssatssotakhe.' 13 Ana OPVÜI yi nngav ana Absalom ji lüngthacho salivo mesao na hoji zothakvü, ntiotssole ombona yivon topvü zokhanala osi nina a nkochev mek." 14 Joab na phyocho, "Ana ni thüngi yuta tata ezia n van," Jitosi ombona otsso ethüm khi Absalom na lümrodungo yikae vanathüng ji tekilona chentsüngi sicho. 15 Jitopvü Joab rasan otsük taro na Absalom hazhüi mmhona chüthoki sicho. 16 Joab na rasan jiang ritsso ji esanle to ezov tsükona tatara mhvüle to yizüng picho osi ontena Israel jiang n pham yantsüi elani yitacho. 17 Ontena Absalom müng ji khi orae sokvüi thechi olongna hanzhüi sitacho. Osi Israel topvü na onte ki tsanrae yi sicho. 18 Absalom na ombo motsü erüv otsoe n vamo jina ombona eküm evanthüng na mesao hayi jilo chekaphen tssoe vacho. Ombona hoji Absalom chekaphen to tsacho. Nchüng tsüngon jana hoji jo Absalom chekaphen to tsala.
Absalom Chüo Ji David na Zoala
19 Zaduk tsoe Ahimaz na Joab ezocho, "Ana mesao thüngi yunga oyi OPVÜI na ombo ri jiang khelona ombo shanchothaka to ezoane?" 20 Tole Joab na ezocho, "Meka, nchüngo mesao tsoe ji chüo ji tsükona nina ntia yithen mmhom hansi mesao oyi ti-zoa, thanpothüngti tssoa. 21 Tosi ombona ombo ezzi Sudan kyon ji ezocho, "Nina ntio hungcho sana ji oyi mesao ezoa." Tole ezzi jina epyakthe yikrachi si yunga yicho. 22 Ahimaz na phyolancho, "Hetolea, hetolea nzansi yithen ji hansi a yithuka." Joab na ezocho, "Atsoe yo, ntioli hoji etssov heto ni tssohungala?" "Nina hoji man ntia yantso hungu mekla." 23 Tole Ahimaz na phyolancho, "Heto lyuchelea, heto lyuchelea, ayihungala." Jitsükona Joab na, "Toka nra yia" to ezocho. Tole Ahimaz na Jordan hayi ji yunga joyi ezzi ji mpa rhechoe yicho. 24 David jo yantsü pikhfü eni ji yutalo khuthei vancho. Osi richei jina pikhfü poni chungoe zechile kyon tsüka tae yunga tsata hungchicho. 25 Ombona mesao ji tsachochi ezole mesao na phyocho, "Omboti tsacho tssona ombona yithen mmhom hansi tsacho tssovka." Osi yithenpvüi jina enhyankata yicho. 26 Tole elani richei jina kyon tsüka yunglana tsata hungchilancho, osi ombona kipünglan enhyang ji tsachochi ezocho, "Zeta! thanpoe tsüka yunglana tsaka!" Tole mesao na phyocho, "Omboha yithen mmhom hansi tsacho tssovka." 27 Echei jina ezolancho, "Ovüngo jijo Ahimaz esüa yunga tsata." Tole mesao na phyocho, "Ombo kyon mmhom küma yithen mmhom hansi tsacho tssovka." 28 Ahimaz na yunga chiyi mesao salüm pisi ombo mhadungo vanthei ezocho, "OPVÜI, ni Potsow thünga, tsüphoeyo, ochona ni panlana vancho sana ji pono ombona ekhyo ni pithaka!" 29 Tole mesao na ezocho, "Khyingroe Absalom ji mmhona vanchoalo?" Ahimaz na janlancho, "Kvüthüng ni küpo tsüphoe Joab na a yithukcho sana jithüng jo elümoto ekhenlungta vancho, tolea ntio tsükona sana ana n phyokhuk." 30 Mesao na ezocho, "Hojilo mangi vana" tole ombona eseta oyi mangi vancho. 31 Jithüng Sudan kyon ezzi jina oyi mesao ezocho, "Tsühpoeyo, ana ni tsükona yithen mmhom hansi yicho. OPVÜI na nchüng niri topvü lona ni shanchothaka!" 32 Tole mesao na engacho, "Absalom ji mmhona vancho alo?" Ezzi jina janlancho, "Ombolo ntio tssocho sana jito ni ri jiang topvü pono tssocho savo osi ochoangna ni panlana sana jiang pono ha tssovo to ana nchümala Tsüphoe yo." 33 Jisüijo mesao ji nungra na pyingi sicho. Osi ombona chungchak omhawoe chungi jina kyacho. Ombona heto phyoa kya chüngicho, "Atsoeyo! Atsoe Absalom! Atsoe Absalom! Ni thung ji a chücho savo mmhom ji, a tsoeyo, atsoe Absalom!"
Joab na David Makala
1 David mesao na Absalom chüoji tsükona nungrala to Joab na zocho. 2 Mesao na echü kyala to owon zo ji tsükona hoji nchuk jo onte topvüna ekhyo hungwo ji emathata thung jo David rasan topvü nungratsüngkhani sicho. 3 Jitsükona onte topvüna rasana ori n khyov ritssophenina yikratsünga tsani yita vancho esüa yingto yantsüi zhüra rheyitacho. 4 Mesao jina omha eyuki owon tssoa heto kyacho, "O atsoeyo! Atsoe Absalom! Absalom a tsoeyo!" 5 Joab na mesao kina owo heto ombo ezocho, "Nina nchüng ni woro jiang yikrathuka kaje, ni eküm, ni tsokhying tsolo, ni engh jiang osi ni yingaloroe jiang shancho kyon jiang yikrathuka kaje. 6 Nino ni palana osi ni etssangnkong jiang nzansi ni nzamo jiango khalanchia saka! Ni küpo tsüphoe osi ni woro jiang thüngi ni ematha n li toji nina ntssünga e jüthaka. E topvü echükhansi Absalom eküm vancho savo ji ni emathao tssov toji ana mmhona hungthaka. 7 Nina ehungo ni kyon jiang mmhona engathethuka. Nina to n tssoa tssona ana OPVÜI myingona echüma ni ezoaka, ojyua enyana ni woro tsükalea vamvü meka. Osi to tssoana ni ekümo epüp tsotsoji hoji tssovka. 8 Tole mesao na phanthi yantsü pikhfüi khukthei vancho. Ombona jilo vana to ombo woro jiangna zoale ontena sani oro ombo hachümcho."
David na Jerusalemoe Yiala
Tothüng jo Israel jiango otsük akvü na ombobo ki tsani yikhanthakcho. 9 Osi meta topvü lona onte onte khonda phanthicho. Ontena phyotacho, "David mesao na ete ri khelona e shanchocho, Philistin jiang khelona e shanchocho, tokhatola enhungo ombona Absalom sisi metapoe tsani yithaka. 10 Ete mesao Absalom ji ethüngchecho khatola ombo ji ritsso lona chüi sithaka. Hoji tsükona ntioli ochinaha David mesao sosi n yilanala?" 11 Israel jiangna hojito phyota vamo ji David mesao na zocho. Jitsükona ombona Juda esopvüi jiang thüngi heto engalo Zadok pvüti tona Abiathar pvüti to oni wothukcho, 12 "Nteno a wopan kitsükden, osi a ejen oso; tona kvütoli mesao a tsothoku asosi yivjo ntena oyi tansanati a sosi yivla?" 13 David na hetoha Amasa thüngi ezole to oni thüngi ezocho, "Nino a wopan kyon. Nchüng na benkae Joab thung rasan esopvüi ji ni kümthuka ka. Ana heto n tssona Potsow khi a chüthoku ka!" 14 David yi jina Israel topvü emathacho. Osi ontena David ji ombo woro topvü sosi kholani yile to tsatacho. 15 David na kholani yiathüng Juda kyon jiangna Jordan pankata ombo sochilo oro Gilgal lo vamo jiang ndukcho. 16 Tothüng ji Benjamin kyon Bahurim yamo Gera tsoe Shemei na ha süsoa David mesao nduko rocho. 17 Ombona Benjamin kyon wothüng motsünga ombo ndüngo sonhyasi rocho. Saul wopan phajae Ziba naha ombo tsokhying taro mongo jiang tona phajae otsük mekyu to sosi mesao ji vüngi na oro Jordani vancho. 18 Ontena mesao na ntio ezoana ji ephan etssov tsükona mesao razhü ji sochukehilo oro vanracho.
David na Shemei Thüngi Khonzan Ejüala
Mesao na khyingkav sa vanathüng Shemei na ombo mhadungo vanthei heto ezocho, 19 "Tsüphoe yo, nina Jerusalem lona khochio ji nchuk ana ni mhadungo worio ji a nzansi nlan asiyia. Hoji nlan ji a ti-vayia, osi elani a ti-nchümehelania. 20 Tsüphoe yo, ana mmen tssocho to ntsiwo ji khümkiwoe pvüji kyon yolo ovüngtso ji ana oro nchüng ni mhadungo nlan chonala." 21 Zeruiah tsoe Abishai na heto phyocho, "Shemei jo chüthoku etüma, ntiotssole Potsow na sekae ethüngcheo mesao ji ombona rhiyikacho, " 22 Tokhatola David mesao na Abishai tona ombo ojenio Joab to heto ezocho, "Ochona ntiosana phyole to yuta ni pichola? Nina ezüp apiv sa alo? Nchüng tsüngono jo Israel lo mesao ji a, osi ana kyon tsüka lea chüthoku meka." 23 Osi ombona Shemei ezocho, "Ana ni ezoaka, ni chüthoku meka."
David na Mephibosheth Thüngi Khonzan Ejüala
24 Saul orüo Mephibosheth na mesao nduko jorocho. Mesao na Jerusalem lona khochi owo ori khyosi kholani n yithüng nandang Mephibosheth na ojo ha n pyo, mehüm ha n tssü, osü ha n tssü to tssocho. 25 Mephibosheth na Jerusalem lona khochi mesao nduko role mesao na heto ombo ezocho, "Mephibosheth, nino ntioli a nzo n ochola?" 26 Mephibosheth na ezocho, "Tsüphoe yo, nina ntsia, aiyo ojo okhe n mhom, osi ana a phajae ji thüngi kadholo a ejümkachile ni phana rovka to ezole ombona a kyakthechicho. 27 Tsüphoeyo, ombona atsükona ejüng ni ezochoka, tolea nino Potsow lanben esüa tüvka, nina mmhona to zecheo ji ephan tssoa. 28 Apo wopan topvü nzo echüthoku etüma, tsühpoeyo, tolea nina ni tsopheni na etsov elan apicho. Ana ni thüngina mmhom chonlam jo elan n li, tsüphoeyo." 29 Mesao na janlancho, "Nina ntia phyolam n lika, ni tona Ziba toha Saul ejüeli nte janhyav to ana phyothaka." 30 Tole Mephibosheth na ezocho, "Ziba tae na khikhanthuka. Nina mmhona oki kholani yio ji taena a lüm pükthaka, tsüphoeyo."
David na Barzillai Thüngi Nzan Ejüala
31 Gilead kyon Barzillai ha Rogelim lona khochi mesao ji Jordan pankathuka phana wov jorocho. 32 Barzillai jo nzyu ekha tiza tssoa sonthakacho. Ombo eli-i tsso jina mesao na Mahanaim lo vanathüng jo etsoyu ji ombona picho. 33 Mesao na ombo ezocho, "A phana Jerusalemi roa, tona ana ni nzanchia vamvüka." 34 Tokhatola Barzillai na ezocho, "Enhungo sunga a vam meküma ntioli ni phana Jerusalemi yivla? 35 Aiyo enhungo nzyu ekha tiza tssothaka, osi enhungo ntinaha a emathata n ehüm. Ana etsoyu tsso jiang thenpo-jüpo tia n tsi; khenden jiang onha n zov sithaka. Ana ni khetsücho tae tssovka, tsüphoeyo. 36 Ana yantso tsüphov ehungu ha a n tüm. Hoji tsükona ana Jordan pankae tara tae ni phana rovka. 37 Tothakana ana elani oyi a pvüpoe lüp ndüngo a juthethoku ka. A tsoe Chimham ji shika, ombona ni benkavka. Osi ni phana rovka ombo sosi yia tsüphoeyo, osi nina ntio mmhontso to nchüma naji ombo tssoyia." 38 Mesao na ezocho, "Ana ombo sosi oyi nina ntio chokata na ji tssoyivka. Osi nina ntio chona sana niha ni tssoyivka." 39 Jisülo jo David tona ombo woro topvü na Jordan pankae chiyitacho. Ombona Barzillai ji eyulo ntsüpia mmha randanakacho osi Barzillai na oki kholani yicho.
Juda tona Israel to Mesao tsükona Ekhitala
40 Juda kyon topvü tona Israel chiso to na mesao phana Jordan pankae chiwothakle ombona Gilgal jana yicho osi Chimham na ombo phana wocho. 41 Jisülo jo Israel topvü na owo mesao ji ezotacho, "Tsüphoeyo, kvütoli ejeniden Juda kyon jiangna ni osi opan tona ni woro jiang to sosi yiv osi Jordan pankae sochukchiv ji onte elhi esüa nchümchola?" 42 Tole Juda kyon jiangna janlancho, "Mesao jo eyolo kyon tsüka tsso jina ena hojito tssochoka. Tona kvütoli jina nte lüm tsukala? Ombona etsoyu man ha e n loyi, osi ntia epicho n li." 43 Israel jiangna janlancho, "Ombo nte yolo tsüka mpato tssolea ntena ombo howoji tata taro ena ombo howokhuka. Tona nteno kvütoli ezerüpala? Mesao shi sosi yilam jo ena phyochedencho!" Tokhatola Israel jiang lona ntssankata Juda kyon jiangna mesao ji onte echhi to howocho.
Sheba na Panlanala
1 Benjamin pvüji kyon Bikri tsoe Sheba to tsao etsophyo lanka n lio kyon jina kvütolisana hojithüng Gilgal lo vancho. Ombona tatara ji khüsochisi, heto tüngcho, "David jo monthokvü ka! Etena ombo phankav meka! O Israel kyonden, oki sani yitava!" 2 Tole Israel jiangna David sisi Sheba phana yitacho; tokhatola Benjamin kyon jiango David lo longtsükata Jordan lona Jerusalem jana phana wotacho. 3 David na Jerusalemi mesaki oyi janale ombona ombo loroe otsük taro mesaki nhyaka vanthokwo jiang ji tsarhyui enhyang khelo onte vanthukcho. Onte ethelan jiang topvü ombona picho, tokhatola onte thüngi ombona ponilan n tssocho. Onte eküm enhyolani elio jiang lojo emiden esüa vüngi vanthukcho. 4 Mesao na Amasa ezocho, "Juda kyon jiang tsarhyui rajyuo shilo oyi sanrhyutava." 5 Tole Amasa na onte tsarhyulo ocho khatola mesao na züngi pio yuta jilo n yicho. 6 Hoji tsükona mesao na Abishai tsae ezocho, "Absalom na ezüp epio jilona khüngkata Sheba na ezüpthoku vanka; a woro jiang tsarhyui ombo phana, to mekana ombona ete thüngi na tsani yantsü pikhfü ejoma lo mpato vanyae sivka." 7 Tole Joab woro jiang, mesao enhyang jiang tona Jerusalem rasan jiang to na khochi Sheba phana wotacho. 8 Ombona Gibeon lo longpvü ji janale Amasa na onte ndukcho. Joab na ritsso pipo hansi yonri ji okuki etssani eryulo khüngkae hancho. Ombona khochi mhadungoe wole yonri ji elungcho. 9 Joab na Amasa ezocho, "Kvütola, Oshomyo?" Tosi ombo emanphiv tsükona okhe amimoe na ombo mehümtssan jilo rhümayicho. 10 Joab na okhe esanawoe na yonri bemo ji Amasa na jo ntangshoncho. Tole Joab na mman no ombo ekhyipi cho osi erü jiang likoe shajocho. Jitopvü ombo chüo jina Joab na ombo n kacholancho. Jitosi Joab ha Abishai onina Shebae wocho. 11 Joab kyon tsüka na echümüng ji ndüngo mangi phyocho, "Kvütata na Joab ha David oni thüngoe tssoana Joab phana woa!" 12 Amasa müng ji ejen na phyangzhüi lanlongi erikachi licho. Osi otsük akvüna jilo mangi omüng ji zewo jina Joab sürüi jiangna omüng ji lantssae khothechi osüna eyuki sicho. 13 Echümümg ji lantssae sisanati otsük akvüna saksak Joab sü rüa Sheba phantacho. 14 Sheba na Israel lo pvüji jiang meta topvü yakchia yicho osi Abel Beth Maakah jilo chiyicho, osi Bikri pvüji kyon topvü na sanrhyui ombo phana yantsü jilo rhowocho. 15 Sheba ji jilo vana to Joab woro jiangna zoe ontena yantsü ji hayacho. Ontena yantsü pikhfü jilo ochon rhoni olan hankata cho osi pikhfü ji eyathoku oküpoe liko ji jiyitacho. 16 Yantsü jilo eloe nchümri eli tsüka vancho jina heto tüngkachicho, "Engatava, Joab ji hepi role to ezoa ana ntiosana ombo ezovka." 17 Joab na wole ompvüna ezocho, "Nino Joab alo?" Tole ombona 'Hoka' to janlancho. Ompvüna ezocho, "Tsüphoeyo enga," Tole Joab na, "Engaka phyoa" to ezocho. 18 Ompvüna ezocho, "Nkolojo ontena heto phyotacho, "Owo Abel yantsüi na janlan hansi yitava!" tona ontena hojito tssotacho. 19 Tokhatola nchüngo shijo yantsü tsüphov osi Israel lo longtsüka eli osi noying yantsü motsünga. Tona nino ntioli yantsü shi roe esiv yanala? OPVÜI echhi ji nina roe ni sihunga alo?" 20 Joab na ezocho, "Meka, ana kvüthüngha ni yantsü ji roe ni siyiv meka! 21 Ena hojitüv etüm ezi n lika. Ephraim phunglani Bikri tsoe Sheba jina mesao panlan elhi tssocho. Hoji kyontsük ji rhümae a pia tssona tona ana yantsü shilo na chiyi sivka." Tole ompvüna ezocho, "Ena ombo kvüri ji pikhfü ponina nte shümchukchiyivka. 22 Jitosi ompvüna yantsüi kyon jiang thüngi oyi phyotae Sheba kvüri ji woni pikhfü ponina Joab shümchukchiyicho. Tole Joab na ombo woro jiang ji elani oki yitale to ezov tatara khfücho. Jitsükona ontena oki sani yicho osi Joab ha Jerusalami mesao thüngi yicho."
David Küpo Tsüphoeden
23 Joab jo Israel rasan esopvüi ji, Jehoida tsoe Beriah jo David enhyang jiang yolo esopvüi, 24 Adoniram jo rikata kiaman elhi tssoathukathüng jiang ezepvüi. Ahilud tsoe Jehoshaphat jo erantoe ji; 25 Sheva jo yitssoki erantoe ji osi Zadok ha Abiathar onio pvütiden; 26 Jair yamo Ira ha David pvüti yolo tsüka to tssocho.
Saul Tsoronichen Jiang Chüthokala
1 David yansa yuta lo otssi vara ntav nzyu ethüm licho. Hojitsükona David na OPVÜI thüngi thyudale OPVÜI na heto ezocho, "Saul tona ombo wopan to münghan nlan lia, ontena Gibeon kyon jiang chüthokcho." 2 (Gibeon kyon jiango Israel mek, Amorite okho teriv Israel jiang na nkochev phyochaki lio ji, tokhatola Saul na Israel kyon jiang tona Juda kyon jiang to nkolona onte ji roe esiv ekhyo tssocho.) 3 Hojitsükona David na Gibeon kyon jiang ji tsarhyui ezocho, "Ana kvütowoena nte kyochivla? Kyon na nte thüngi worio jiang ana nte mmhonthoku ziala; hojitolui nte khi Potsow kyon jiang mmhayithoku tsükona." 4 Ontena ezocho, "E tona Saul wopan to yutalo khontarota jijo shona janti na mmhontacheo meka; elani ena Israel jiang lüngthav ha e n tssohungala." Tole David na, "Tona ntenajo ana ntio nte tssoyiwo to nchümala?" to engacho. 5 Tole ontena janlancho, "Saul najo e topvü echürathoku ekhyo tssocho, osi Israel yolo tsükatia enhyokae e n vanthokvü nchümcho. 6 Hojitsükona ombo tsochen tüv otsük tiying e khelo etheyia, tona ena OPVÜI na ethüngcheo mesao Saul ji yantsü Gibeah lona OPVÜI mhadungo na doni onte sivka." Tole mesao jina ezocho, "Ana onteji nte khelo theyiv ka." 7 Tokhatola David tona Jonathan to oni ntsata vao ji ephanina Jonathan tsoe Mephibosheth Saul orüo jijo David na nkoyae vanthukcho. 8 Tokhatola Aiah otsolov Rizpah lona bukcho Saul tsoe Armoni ha Mehibosheth onio ombona khicho; elani Saul otsolov Merbah na Mchola yamo kyon Barzillai tsoe Adriei ji bukio onjeni mongo jiangha khicho. 9 David na hojiang topvü Gibeon jiang picho osi ontena phunglanina OPVÜI mhadungo na doni onte sicho osi onte tiyingata nzo chücho. Onte chüthoko jithüng jo tsüngkying yakrata omüm eriv etünga vanthakacho. 10 Tole Saul yingaloroe Rizpah, Aiah otsolov jina phunglani echümüng jiang ndüngo sünyikvüna ranki tssokachi liri yutalo na benkae vamo ji nzyu eryu rheyi nandang vancho. Ompvüna engojo woro na echümüng jiang n tsothoku nhyakcho osi zümo lojo ekümrümo na n tsothoku nhyakthüng to tssocho. 11 Rizpah na heto tssoji David na zoale, 12 ombona owo Gilead lo Jabesh kyon jiang thüngi na Saul ha Jonathan oni ryu jiang choni hansi yicho (Philistin jiangna Saul ji Giboa phunglani na lüngthao ji nchuk Beth Shan lo topvüna ehungo tssoa doni ombo sioji Jabesh kyon jiangna omüng ji efüi hansi yicho.) 13 David na Saul ha Jonathan oni ryu jiang tona onjeni tiying doni siwo jiang to ryu jiang khicho. 14 Jisülo jo mesao na ezo jiang ephan ontena Saul ha Jonathan oni ryu jiang Saul opo Kish khüp ndüngo Zila lo shothe sicho. Hojisüi jo ontena meta tsükona randamo ji Potsow na onte engayicho.
Philistin Thotsü Jiang Thüngi Rotao Ji
15 Philistin jiang tona Israel jiang to ori tssotalancho osi David tona ombo woro to jiangna Philistin jiang thüngi owo rotacho. Ritsso motsünga lojo David ji mmuki sicho. 16 Kyonpvü tsüka Ishbibenob na yonjak tsso seri ethüm si riso tüv sü, yonri ethan ben, tosi ombona David lüngthachev tsayia rocho. 17 Tokhatola Zeruiah tsoe Abishai na oro David nzanchicho osi kyonpvü ji sakae lüngthae sicho. Jisülo jo David woro jiangna enhungo ritssolo onte sosi no to phyochakthuka heto ombo ezotacho, "Nino Israel na eyilokata enhikae vamo jika, küma ritsso lona ni chüi e n sithukhungala." 18 Hoji sülojo elani Gob lona Philistin jiang thüngi ori tssotalancho, osi jithüng Hushah yamo Sibbekai jina kyonpvü Saph to tsao ji lüngthacho. 19 Elani Philistin jiang thüngi Gob lona ori tssotalancho, osi jithüngha Bethlehem yamo Jair tsoe Elhanan jina Gath yamo Goliath, to tsa tssowo jo echhi tsitüm tera süo ji lüngthacho. 20 Jisüloha Gath lona ori tssotalancho osi jiloha kyonpvü tsüka ritsso chokae tüv jücho. Ombo khe tsungkhoata lo yingro tiruk, jotsungkhoata lo joyingro tiruk to mpacho. 21 Ombona Israelnyimshinyimkraktho osi David ojenio Shammah tsoe Joanthan na ombo lüngthacho. 22 Otsük mezhü shiang jo Gath lo kyonpvü jiang tsoronichenden jiang osi David tona ombo woro to na onte lüngtharacho.
David Rikhyo-Khen
1 OPVÜI na David ji Saul tona ori thanpo jiang to khelona shanchocho, tole David na heto rikhyokhen OPVÜI denkacho. 2 OPVÜI jo a nkohapvüi; ombo a tsanthephen chüngchüngu. 3 A Potsow jo a nkochephen, Ombo ndüngo jo ekyuv n 1 i. Ombona otsung esüa akhüpla; ombona ankohae tsanchoa avanthukala. Ombo a shanchpvüi; Ombona jenbukta lona a shanchoa a vanthukala. 4 Ana OPVÜI tsaphiala, osi ombona ari jiang khelona a shanchoala. OPVÜI thünga! 5 Echü won na a nkonyae vancho; osi tssorophyoro ezhü jina a ponina eria yicho. 6 Echü ekyusü jina a eyuki vancho, osi olüp jina asav okyak thei vancho. 7 A ekyutsü lo ana OPVÜI tsaphicho; Osi ana a Potsow ji akyochile to tsacho. Tole ombona ombo ekhümki na a won ji zocho; osi ana nzanchi chomo ji a engaicho. 8 Jisülo jo liko totona eneta enhyokcho: osi limha ndungkaphen jina ha enhyokcho, osi enecho, ntiotssole Potsow na lüm tsukcho. 9 Ombo khenokvüi na omi phungchukchicho, osi ombo püngina miron tona omi to shachukchicho. 10 Ombo na oyak shi resoe jorocho, osi ombo jo kupi jo eluk enyikvü rümcho. 11 Ombona echo jiang khi ekhyinga pyacho: Osi ombona mpung ji echo lona yentsacho. 12 Ombona emüng ji khi ombobo eyukcho; eluk echhiv ojü jüa tüv tona yentsso tona ombo füchümcho; 13 Ombo mhadungo tharak jina miron shachukchicho. 14 Jisülo jo OPVÜI na oyaki na tharakejencho, Osi Thotsü Potsow won ji zocho. 15 Ombona lotssi koe ombori jiang tsanrothukcho; Ombona milon tüngra onte phancho. 16 Jümang laza jiha ejüngi vancho, Osi limha ji ndungkaphen ji hungcho, OPVÜI na kvüthüng ombo ri jiang thüngi lüm tsuka eroncho sana jithüng. 17 OPVÜI na oyaki na yonchochia a rhümacho; osi ojü ejungu jilona asüchukcho. 18 Ombona ari etho ejüi khelona a shanchocho, osi a tssaka evan jiang khelona, onteno atsükona jo elümoto etho jüa. 19 Ana kvüthüng ezüpi vancho sana ontena a sakacho, tokhatola OPVÜI na ankohacho. 20 Ombona ekyu jilo a kyochicho, ombona a shanchocho, ntiotssole ombona alo ematha licho. 21 Ana elamo etsso jina OPVÜI na ayantsoala: a nlan n lio jina ombona a mmhayiala. 22 Ana OPVÜI shikhfü jiang benphithaka; Ana a Potsow thüngina tsani n yihan. 23 Ana ombo shikhfü topvü benphithaka; Ana ombo yizüng n yesohan, 24 A nlan n li to ombona a ntsia; osi ana ori elhi jiang lona konta vanala to. 25 Hoji tsükona ana elamo tsso ji man ombona a yantsoala, ntiotssole a nlan n li to ombona ntsia. 26 OPVÜI nino ni longtsükae jiang thüngi longtsükatala. Osi ephoerüv n pao jiang thüngi jo elümoto mmhona. 27 Ntssüngo jiang thüng jo nina n tssüngala, tokhatola n thae jiang thüngi jo n khyingtala. 28 Ochoangna teria sana jiang nina shanchoala, osi kangtsüi jiango nina terithukala. 29 O OPVÜI, nino a wondang; Nina emüng jiang a phaniala. 30 Nina ari jiang thüngi rotav etho apiala; Osi onte pikhfü jiang ekhyov etho apiala. 31 Potsow shi elhi jo kvüta njüma mmhoncho ato, Osi ombo yi jiango kvüta enhyikakhuko tüv ato! Ombo otsung esüa tüv; ombo nkoha eyan topvü tsükona. 32 OPVÜI jitae Potsow; Ete nkohapvüi jijo Potsow tae. 33 Potsow shijo atsankaphen etho elitso ji; ombona alan jianglo ekyutsü jiang monthukala. 34 Ombona Siano esüa mmhona ajopyanthukala; Osi phunglanilea ombona a shanchoala. 35 Ombona ritsso thangshi apiala; ji yakchia ana lotssi ekhyungtso jilea benkhukala. 36 O OPVÜI, nina ankoha osi a shanchoa; Ni nzanchi jina a tsüphothukala. 37 Oyam na arhümav lona nina a shanchothaka; osi kvüthüngha a n joyithuk-han. 38 Ana ari jiang phani khyoala; Osi ana roe onte n sithüng jo onte phanala. 39 Ana onte yonkatana n phanthikhukala; osi a mhadungo evümthei onte siala. 40 Ritsso tsükona nina etho apiala; osi ari jiang ekhyov etho apiala. 41 Nina ari jiang ji a lona tsanthukala; osi ochoangna atssaka sana ana monthukala. 42 Onte na nzanchi yancho, tolea ochinaha onte n shanchoala; Ontena OPVÜI tsaphicho, khatola ombona onte n janlancho. 43 Ana roe onte siala, osi onteji live esüa kümala; osi lanpvüi ochon esüa ana onte sümala. 44 A panlamo kyon jiang khelona nina a shanchoala; Osi jipo jiang pono a yansa ji lithukala; Ana n tsiv vamo kyon jiang enhungo aküpo tssothaka. 45 Metapoe kyon jiangna enhungo epyakthei a khümala; Osi ayi zoana, ontena engala. 46 Ontena lüm teria nchümi; ontena rizümphen jiang lona eneta chiyiala. 47 OPVÜI na eküm vana! A nkohapvüi ji thünga! A shancho etho tsüpho Potsow ji thenchoa phyola! 48 Ombona a ri jiang pono ekhyo a piala; ombona aküpo jipo jiang terithukala; 49 osi a ri jiang khelona a shanchoala. O OPVÜI nina a ri jiang pono ekhyo apia; Osi jenbukta kyon jiang lona a shanchoa. 50 Hojitsükona ana jipo jiang yolona ni mying thüngala; Ana ni myingthüng khen jiang ni denkatala. 51 Potsow na ombo mesao ji ekhyo tsüphov piala; osi ombona ethüngcheo ji n tümjakna nzanala, David osi ombo tsoronichen jiang kümali nzanala.
David Yi Okhao Jiang
1 Jesse tsoe David jo Potsow na tsüphothuko kyon ji, osi Jakob Potsow na mesao ethüngcheo ji, osi ombo Israel khen mmhom jiang eranpvüi ji. David yi wokhao jiang jo shiang: 2 OPVÜI mon jina ayakchia nsanala; ombo yithen jo a menfü jianglo khyinga. 3 Israel Potsow jina phyothaka; Israel nkohapvüi jina a ezocho, "Mesao ochona ntsanrük lona yansa sana; osi ochona Potsow jancho ezo lona yansa sana, 4 Jijo wonchibanthüng eluk n khyingna eng ona vancho tüv; osi eryu jocho sülo ero jianglo eng na rakae tsünglüpthuka vancho tüv." 5 Hojito Potsow na a tsoronichen jiang mmhayiv; ntiotssole ombona a thüngi kümali ntsata vathaka, yesoe n sicheo ntsata, osi n senphio tüv phyochak. Ana achokao jijo hoji tae; hoji jo a ekhyo ji tssov, Osi Potsow na hoji benchethuknrüngu. 6 Tokhatola Potsow n thenhyao kyon jiango okyo shümthei sicho esüa tüv; ochinaha okhe eshüna onte n vüngkache. 7 Nina yonjak mekana otsso khi hoji evüngkao tssov; Osi jiango topvü rungrüpi siv.
David Rasan Thüngche Jiang
8 David rasan thüngche jiang mying ji shiang: ovüngo jijo Tachemon yamo Josheb Basshebeth to tsao "Ethüm yolo esopvüi" ji, ombona otsso bensi owo nzo tiza thüngi rotacho osi rotaphen motsünga lona onte lüngtharacho. 9 Thüngche onthüm yolo enioto jijo Dodo tsoe Eleazar, Ahon jipo kyon ji. Tsüngonalo ombo tona David to na Philistin sanrhyui ritssolo wov vamo jiang merangtacho. Tole Israel jiangna eselani tsancho, 10 khatola ombo n senphina zacho osi ejen na ombo yonri ji ombo khelo rakae yonri ji n yonphichev n sithüng nandang jo rotacho. Hoji nchuk OPVÜI na ekhyo tsüphov hungcho. Ritsso ji thakale Israel jiangna Eleazar vamo jilo yicho osi echüi jiang pipo jiang shaki khiyitacho. 11 Thüngche ethüm jianglo ethümoto jijo Shammah, Agee tsoe Harar yamo ji. Philistin jiangna Lehi lo orho li jianglo etssirhyui vancho. 12 Tole Israel jiangna tsanracho khatola Shammah jo oli jilo to zacho osi oli ji nkocheta Philistin jiang lüngthacho. OPVÜI na hoji nchuk ekhyo tsüphov hungcho. 13 Liri benka etüngathüng "Owo Thümro" ji yolo ethüm na David na vamo Adullum longkvü jilo jowotacho, osi jithüng jo Philistin jiango Rephaim hayi ncheni vancho. 14 Hoji yuta jilo jo David jo yingsüngi eshenkachicho tüv lo vancho osi jithüngji Philistin jiang na Bethlehem ji khithakcho. 15 David na oki nchümcheta heto phyocho, "Ochona sana Bethelehem yantsüi kibüng jilo jükha jilona ojü rani oro a yuthuko kvüta mmhomto!" 16 Rasan thüngche otsük ethüm jiangna Philistin jiang vanphen ji tssürhüpa rhowo yonri tssüngche bentasi ojü woe bentasi oyi David pitacho. Tokhatola ombona n yucho; ombona yuthung jo OPVÜI than tsoa chüi sisi phyocho, 17 "OPVÜI, ana shi n yukhuk! Shi eyuv jo kyon ochoangna onte eküm pia owo khicho sana jiang ejen yua esüa tüv tssov. Hojito phyoa ombona n yucho. Thüngche rasan onthüm elhi jiango hojitüv esüa tssocho. 18 Joab ojenio Abishai (onte oyojo Zeruiah) jina "Thüngche Thümro" jiang yolo esopvüi tssocho. Ombona otsso bensi ori nzo ethüm thüngi rotacho, osi ori jiang lüngtharasi onthüm yolo thüngche kümcho. 19 Ombo "Thüngche Thümro" jiang yolo jo thüngche ji tssocho, khatola "Ethüm" ji thüngcheta tata jo ombo n thüngche. 20 Kabzeel meta kyon Jehoida tsoe Benaiah jo rasan thüngche yolo tsüka, osi ombona thüngche elhi eni tssocho, jilo motsünga jo Moab kyon thüngche nchyu eni lüngthao ji. Tsüngona lo ronren ejo yutalo ombona likokvüi rhowo hingho lüngthacho. 21 Ejip kyon tsüphosiphoa otsso bensi rocho tüv ha ombona lüngthacho. Benaiah na otsso na renyae khi Ejip kyon ji tsso ji rechoe jina lüngthae sicho. 22 Hojiang jo Thümro ji yolo tsüka Beniaha to tsao ji elhi jiang. 23 Ombo onte yolo thüngche khatola "Otsük ethüm" jiang esüa thüngche jo mek. David na ombo enhyang jiang yolo esopovüi ji ombo tssothukcho. 24-39 "Thümro" to tsao jianglo ejoma jo shiang: Joab ojenio Asahel, Bethelehem yamo Dodo tsoe Elhanan Harod yamo Shammah ha Elika oni, Pelet yamo Helez, Tekoan yamo Ikkesh tsoe Ira, Anathan lona Abiezer, Hushah lona Mebunnai, Ahoh lona Zalmon, Netophah lona Baanah tsoe Heleb, Benjamin lo Gibeah yamo Ribai tsoe Ittai Pirathon tsoe lona Benaiah, Gaash hayitsü ji ndüngo na Hiddai Abialbon lona Arabah Bahurim lona Azmaveth Shaalbon lona Eliahba Jashen tsoeden jiang Jonathan Harara lona Shammah Harar lona elani Ahiam tsoe Sharar Maacah lona Ahasbai tsoe Eliphelet Gilo lona Ahithophel tsoe Eliam Karmel lona Hezro Arab lona Paarai Zobah lona Nathan tsoe Igal Gad lona bani Ammon lona Zelek Beeroth lona Joab ebensü ehan Naharaj ji Jattir lona Ir tona Gareb to Hittite kyon Uriah to shiang. Topvü tsotsüi rasan thüngche thümro tiying tssocho.
David na Wokhata Khiala
1 OPVÜI na elani Israel thüngi lüm tsuklancho osi ombona David yakchia onte pono ezüp hansi yilanthukcho. OPVÜI na David ezocho, "Owo Israel tona Juda to kyon jiang khae zeta." 2 Tole David na ombo rasan esopvüi Joab ji heto ezocho, "Niküpo tsüphoe jiang sosi owo Israel jipo topvü meta nkeni na nken jana kyon kvüta vanacho sana khae zeta. Israel lo kyon kvüta vana na ji a ntsihungala." 3 Tole Joab na mesao ji ezocho, "Tsüpgoeyo, OPVÜI ni Potsow khi Israel woro ji enhünga vamo jitata nzao bena thichethuku ka osi niha ni harishia ni vanthuksi OPVÜI na hojito thicherüchethuko jiang hungjanthuku ka. Tokhatola Tsüphoeyo, ntioli khae ni zehungala?" 4 Tole mesao na ombo yizüng ephan tssole to Joab tona ombo tephfüi jiang to ezoa ombo thüngi na khochi wothukcho. 5 Ontena Jordan pankae Arero lo nchentacho hojijo Gath metalo hayitsü ji lungi yantsü ji. Hoji lona ontena Jazer khümkiwoe ehungo tacho, 6 jilona Gilead, jilona Hittite metae Kadesh tolo wotacho. Jilona Dan lo wotalancho osi engrhewoe Sidon lo wotacho. 7 Jilona ontena jolowoe Tyre yantsüi wocho, jilona Hivite yantsü Kanaan yantsü topvülo rhowotacho osi wokhao tssoa Juda jüjowoe Beersheba lo wotacho. 8 Ontena choro tokusi tsüngon mekyu süloti 24 Jerusalemi kholani chiyicho, osi meta topvü khyurhyusi yicho. 9 Ontena meta jilo rasan tssokhung kvüta vancho sana oyi mesao ezoji, Israel lo owo 800,000, Juda lo 500,000 to tssocho. 10 Tokhatola David na wokhata khisi sülo ombo khetsüa nchümi OPVÜI thüngi heto ezocho, "Ana heto elhio shi yakchia ekhentao mmen tssothaka, nzansi n lan a siyia. Ana zhüva elhi tssothaka." 11-12 OPVÜI na David küpo zenkhying tsüka Gad thüngi heto ezocho, "Ana David ji ethüngi ekhiv lanka ethüm ombo piala to ezoa," Ojyuato jo David na phanthipvü Gad na ocho osi OPVÜI na ombo ezoji ezoa heto engacho, 13 "Kvüwoe ji khivla? Ni metalo otssi vara nzyu ethüm ji khiv alo; ni ri mhadungo choro ethüm etsam ji khiv alo, toalo ni metalo echüvara tsüngon ethüm ji khivla? Hoji nchümi zesi ana oyi OPVÜI ntio ezov sana ji a ezoa." 14 David na ezocho, "Aiyo ekhenthao sükhyinglo vanchuchithaka! Tole kyon khelona jo ezüp ji a n khihung. Jitsükona OPVÜI khi ombo etsso tssothuka; OPVÜI jo khonzan elika." 15 Tole OPVÜI na Israel lo vara rothuki hoji enya na tsüngon kokao ji nandang licho. Israel meta ochüm phukowoe na phukowoe nandang tsotsüi otsük wothüng ekha tiying chücho. 16 OPVÜI lanben jina Jerusalem monthoku vanathüng OPVÜI na kyon jiang ezüp n piv tsükona ombo lüm dungphicho osi lüngtha lanben ji ezocho, "Esana, jitaena tssochyuthaka!" Jithüng jo lanben jijo Jebusite kyon Arunah litsenpheni vancho. 17 Lanben jina kyon jiang lüngthata vamo ji David na hungi heto OPVÜI ezocho, "Sulyuo elhio ji a ka, ana orichoka. Enzanthao kyon shiangna ntio woricho lichola? Nina a osi a wopan ezüpthokvü shikhfü lia." 18 Hoji nchuk Potsow na David thüngi ezocho, "Arunah litsenphen jilo ehungo OPVÜI thanphen tssokachia." 19 David na OPVÜI yizüng ji engacho osi Gad na ezoji ephan ombona oki yi sicho. 20 Arunah na zechochile mesao tona ombo küpo tsüphoe jiang to ombo thüngoe tsata hungchicho. 21 Ombona David mhadungo vanthei ezocho, "Tsüphoeyo, kvütoli nino hepi rochola?" David na janlancho, "Meta shilo vara ji esanthokvü tsükona ni litsenphen shi ni shiyi khi OPVÜI thanphen tssokachilo rochoka." 22 Arunah na ezocho, "Tsüphoeyo, nra khia osi ni lüm erüng OPVÜI thana. Thanphenina erungu ha tssibung shiang vanka, osi omi tssov ha otssüng ji litsenphen etakaphen osi mangsü vüngkhüng shiang lika." 23 Arunah na topvü mesao pia ezocho, "OPVÜI khi ni than jiang ni khichoyithoku ka." 24 Tole mesao na ezocho, "Meka ana liko ji oman ni pivka. Ana oman n pio tüv khi khijo OPVÜI thamvü meka." Tosi ombona litsenphen meta ji tona tssibung jiang to tsotsüi janti rang tinyan pisi khicho. 25 Hojilo ombona OPVÜI thanphen tssokachi erungthan tona khümshümta than to picho. Ombo randan jiang OPVÜI na janlancho osi meta jilo vara ji esani sicho.
David Mesao Esonlani
1 David mesao ji elümoto sonthakcho, osi ombo phajae jiangna khongkhosü na eyukaha n lümvü sicho. 2 Hoji tsükona ombo küpo tsüphoeden jiangna heto ombo ezocho, "Tsüphoeyo, ni tsükona loroe tsüka yani ni ndüngo vanthuki ni tanüngthuku ka. Ompvüna ni ndüngo yipi ni lümthuku ka." 3 Israel meta topvü lona loroe opyon mmhon tüv yantacho, tole Shunem metalo na Abishang to tsa loroe tsüka yanchei ompvüji mesao thüngi sosi yicho. 4 Ompvüo elümoto opyon mmhona osi ompvü na mesao ji phachophalünga tanüngcho. Tokhatola ombo na ompvü thüngi ponilan n tssocho.
Adonijah na Vantsü ji Hoala
5-6 Absalom chüthako jina David ha Haggith oni tsoe Adonijah ji otsoe yolo eramo ji tssoe sicho. Ombo elüm opyon mmhona tüv tssocho. David na kvüthüngha ntiolonaha ombo n khonhan osi ombona mesao tssohungcho. Ombona ombobo ritsso zotoro, kurü tona ombo lansoe otsük tinyan to methaki vancho. 7 Ombona Zeruiah otsokhyongo Joab thüngi tona pvüti Abiathar to thüngi thyutacho osi onina ombo kyochiv methakcho. 8 Tokhatola pvüti Zadok, Jehoida tsoe Benaiah, zenkhying Nathan, Shemei, Rei tona David tsüknhyang jiang tojo Adonijah thüngoe mekcho. 9 Tsüngona lo Adonijah na olyu tssibung, tona mangsüro belev to khi Enrogel jünhyo ndüngo "Nrü Longrokyu" to tsao jilona thancho. Ombona David tsoe thanpoe jiang tona David küpo tsüphoe Juda meta kyon jiang to othan tokhu jilo tsanhyacho, 10 tokhatola ombo na ombo ojeni thanpoe Solomon, Nathan zenkhying osi Benaiah tona mesao tsüknhyang to jiango ochia n tsacho.
Solomon ji Mesao Kümthukala
11 Jisülojo Nathan na Solomon oyo Bathsheba thüngi owo heto engacho, "Haggith tsoe Adonijah na ombobo mesao kümo ji nina n zhohan alo? osi David mesao naha hoji n tsihan! 12 Nina ni eküm osi Solomon eküm shanchohungna zaktole owo David mesao ji heto ezole to ni ntssungala, 13 'Tsüphoeyo, atsoe Solomon na ni echungi mesao tssov to nina phyochakcho mekchoke? Tona kvütoli Adonijah na mesao tssoala?' " 14 Nathan na ezolancho, "Nina hoto mesao thüngi thyuta vanathüng ana oro jilo theta otsotso to ni phyokyovka." 15 Jitsükona Bathesheba na mesao ji nduko ombo yipheni wocho. Omboji elümoto sonthakcho osi Shunem loroe Abishang na ombo nijüpa vancho. 16 Bathesheba na mesao mhadungo epyakthele mesao na ezocho, "Ntio ethev lichola?" 17 Ompvüna janlancho, "Tsüphoeyo, nina Potsow myingona phyochak tsüphov vao ji a tsoe Solomon na ni sülo mesao tssov to. 18 Tole Adonijah na mesao kümthaka khatola nina hoji n tsihan. 19 Ombona olyu, tssibung osi mangsüro belev to khi othan picho. Osi ombona ni tsoe jiang, pvüti Abiathar tona ni rasan esopvüi Joab to tokhu jilo tsanhyacho, tolea nitsoe Solomon jo ombona n tsacho. 20 Tsüphoeyo, Israel lo kyon topvüna ni echungo mesao jo ocho tssovsana nina phyole to ni eyilota vana. 21 Nina zaktole n phyocho jo ni chüpvüto a tsoe Solomon tona a to jo okyak n mhonden esüa etssothokvü." 22 Ompvüna nsana vanathüng Nathan na mesaki chirocho. 23 Zenkhying ji rothaka to mesao yivon picho osi Nathan na rhowo mesao mhadungo epyakthecho. 24 Osi Nathan na mesao ezocho, "Tsüphoeyo, Adonijah na mesao ni echungu to nina phyocho alo? 25 Nchüngti ombona othan epiv tsükona tssibung, olyu, osi mangsüro belev to elümoto khi thano khochithaka. Ombona nitsoe topvüto tsacho, ni rasan esopvüi Joab ha tsacho Abiathar pvüti ha tsacho, osi enhünga jo ontena nzo tsoyuta heto tüngta vana, 'Mesao Adonijah harishia vanthuka!' 26 Tokhatola tsüphoeyo, ombona a tona Zadok pvüti tojo e n tsa, elani Benaiah tona Solomon toha n tsa. 27 Tsüphoeyo, nina heto tssole to yidan pisi ni tsüphoe ochona ni echungu sana ji ntia n zocho alo?" 28 David mesao na phyocho, "Bathesheba ji hepi rheyilanle to ezoa." Tole ompvüna rheyi ombo mhadungo mangcho. 29 Tole ombo na heto ezocho, "Eküm evamo Potsow ochona a ezüp topvü lona a shanchocho sana ji myingona ana phyochakala, 30 ana OPVÜI Israel Potsow myingona ana ntio phyochak ni picho licho sana nchüng benthukvü, hojijo ni tsoe Solomon na mesao a echungchovka." 31 Bathesheba na epyakthei phyocho, "Apvüi mesao ji harishia vanthuku ka!" 32 Jisülojo David mesao na Nathan, Zadok tona Benaiah to tsalo wothukcho. 33 Ontena rheyile ombona ezocho, "A mesaki tsüphoe shiang sotasi a tsoe Solomon ji a kurü shilo khukthethuki ombo sosi Gihon jünhyoe jowotava, 34 tona jilona Nathan ha Zadok onina thyujü nzüyia mesao ombo kümthuku ka. Jitosi tatara khüsochia heto tüngtava, 'Solomon mesao harishia vanthuka!' 35 Jitosi ombona kvüthüng a vantsü shilo khukthelo roasana ombo phana rhorotava. Ombona mesao a echungu ka, ntiotssole ana Israel tona Juda to esav tsükona ombo ethüngchecho." 36 Benaiah na ombo ezocho, "Hojito tssovka. Osi OPVÜI ni Potsow khi hoji benthoku ka. 37 Tsüphoe yo, OPVÜI na ni ndüngo tssoa rothako ji esüa, Solomon ndüngo ha vani ombo yansa ji nilona mmhonkalana tssothokvü ka." 38 Hojito Zadok, Nathan, Benaiah tona mesae enhyang jiang to na Solomon ji mesa kurülo khukthethuki Gihon jünhyoe sosi wocho. 39 Zadok na OPVÜI vanrhyu ranki jilona olive thyujü pvü hamo ji khichei Solomon nzükayicho. Ontena tatara ji khücho osi topvüna "Solomon mesao harishia vanthuka" to tüngtacho. 40 Jitosi onte topvü na ombo sü rüa tüngta, Phililyu khüta liko enhyoka owon tssota kholani yicho. 41 Adonijah tona ombo yenki jiang to na tokhu ji thaka vanathüng owon ji zochicho. Joab na tatara won ji zoe phyocho, "Yantsüi na heto ontssotao shijo ntio etsso ato?" 42 Ombona hojito n phyorav pvüti Abiathar tsoe Jonathan chiyicho. Tole Adonijah na ezocho, "Rheyia, nino kyon mmhon küma yithen mmhom hansi tsacho tssovka." 43 Jonathan na ezocho, "Mmhomo tüv meka." "David na ombo tsoe Solomon ji mesao kümthukthaka. 44 Osi ombona pvüti Zadok, Nathan tona Benaiah elani mesao enhyang jiang to khi solo wothukcho. Ontena mesao kurü jilo ombo khuthethuksi, 45 Nathan ha Zadok onina Gihon jünhyoe na jowo thyujü nzükata mesao kümthukthaka. Jitosi ontena longshia tüng ta yantsüi rhowoe kyon jiangna elümoto nshanlungtala. Hoji wonji nina zochoka. 46 Enhungo mesao ji Solomon kümthaka. 47 Jito tae mek tolea mesaki evan jiangna owo mesao David ji heto ezoa salümtacho, "OPVÜI ni Potsow khi Solomon ji nilona thüngchekao kümthoku ka osi ombo khi nilona kyongkata thüng cheta yansathoku ka." Tole David mesao na ombo belüungina nkhümthei OPVÜI khümsi, 48 heto randancho, "Ete topvüna Israel Potsow thüngtavka, ombona nchüng a tsoronichen yolo tsüka khi a echungthukthaka osi hoji a mhyik na hungthaka. !" 49 Tole Adonijah yenki jiang na kyucho, osi onte topvüna phanthirae ombo ombo eyi yirae sicho. 50 Adonijah na Solomon ekyu lona OPVÜI vanrhyu ranki owo thanphen ji nkeniji rhümacho, 51 Adonijah na ombo kyua owo khümpheni thanphen ji nken ji rhümasi heto phyoala to Solomon na zocho, "Ovüng tssoa ana Solomon mesao ombona ji a n lüngtha to a echümthukhungala." 52 Tole Solomon na ezocho, "Omboji longtsüka eli-i kyon tssona ombo tssan motsüngalea vüjov meka. Tolea omboji longtsüka n li kyon tssona ombo chüvka." 53 Jitosi Solomon na thanpheni kyon othuka Adonijah ji sosi ombo thüngi yithukcho. Adonijah na mesao mhadungo oyi epyakthei le mesao na ombo ezocho, "Nra oki yia."
David na Solomon Ntssungyi Pikhao Ji
1 David na chüvsathüng ombo tsoe Solomon ji tsae ndungntssung wokhao ji heto picho. 2 Achüv yuta janthaka, lüm tssona tüngochüngkhe, 3 osi OPVÜI ni Potsow na ntio ni tssothokhunga na ji tssokhe. Moses shikhfülo erani lio jiang esüa OPVÜI yizüng jiang topvü benphikhe; to tssona nina kvüi woana osi ntio elhiana jilo mmha jüvka. 4 Nina ombo jancho zona ombona tsüngonalo a tsoronichen jiangna yansav osi ontena ombo jancho ezothüng nandang jo osi a ntangshona ashikhfü jiang benphia, lümbüm nchümri topvüna longtsükata evanthüng nandangjo yansav to phyoe lioji benthokvü ka. 5 Elani heto lilana, a rasan esopvüi Joab na athüngi ntio elhicho sana nina tsentsi? Ombona Israel lo rasan esopvüi otsük eni, Ner tsoe Abner tona Jether tsoe Amasa to oni lüngthacho. Ombona noying kyon jiang hojito chüthoko jijo apono tssoala, osi hojiman ezüp sükhying jo ana khiala. 6 Nina kvüto lyuv sana ntsi khia: omboji tathi echü lona tichüthoka. 7 Tokhatola Gilead yamo Barzillai tsoe jiang jo nzana, ntiotssole ana nita Absalom mhadungo tsanathüng ontena a nzanchicho. 8 Elani Benjamin lo Bahurim yamo Gera ji tsoe Shimei ha vana. Ana Mahanaim thüngi woathüng ombona elümoto a rhiyicho, khatola sülami jo ombona Jordan lo a thüngi rocho osi ana ombo n chüthuk to OPVÜI myingona echümcho lia. 9 Tolea nina ombo n züpthoku tisile. Nina ntio tssov sana ji ntsika, ombo chüthuka.
David Chüo Ji
10 David ji chücho osi David yantsüi ombo shothecho. 11 Ombona Israel lo nzyu zhüro mesao tssocho, nzyu tiying jo Hebron lona sacho, osi nzyu thümro si ethüm jo Jerusalem lona sacho. 12 Solomon na opo David echunga mesao kümcho osi ombo mesae etho mmhona benkae yicho.
Adonijah Chüo ji
13 Haggith otsokhyongo Adonijah na oyo Bathsheba thüngi wocho tole ompvüna na "Shijo khümoshomo ejoena rocho alo?" to engacho. Tole ombona "Hoka" to janlancho, 14 osi ombona hetoha ezocho, "Ana ntiosana ni engav lia" Tole ompvüna, "Ntiola?" to ezocho. 15 Ombona ezocho, "Ana mesao tssov etüma to nina ntsia osi Israel lo otsük akvüna hoto eyilotacho, tokhatola jito n tssov ajenio na mesao kümi sia. Hojijo OPVÜI lüm erüng ephan. 16 Osi ana jonji yi motsünga lika nzansi a ti khiranikhe." 17 Bathsheba na ezocho, "Ntiosana phyoakha." Tole ombona ezocho, "Nzansi Solomon mesao ji ezoa, ombona ni ekhiram meka; Shunem loroe Abishang ji a eloe etssov apile to ezoa." 18 Ompvüna ezocho, "Elüm mmhonakha; ana mesao thüngi ni thyutayivka." 19 tosi Bathesheba na Adonijah tsükona phyolo mesao thüngi wocho. Mesao jina oyo yikrachia phanthi epyakthecho tosi ombo vantsülo khukthecho. Tole kyon tsüka na oyo ji sosi owo mesao amimoe khuthethukcho. 20 Ompvüna ezocho, "Ana ni thüngi yilan teriv jonjiv lika nzansi a ti-khirankhe." 21 Ombona ezocho, "Ntiola ayo, ana ekhiram meka." Ompvüna ezocho, "Abishang ji nijenio Adonijah pia ombo engh tssothuka." 22 Mesao na ezocho, "Nino kvütoli Abishang ji ombo piv a ezoato? Toka vantsü jiha ombo piv a zoakhüma. Ombo ata khatola pVüti Abiathar ha Joab onio ombo thüngoe!" 23 Tosi Solomon na heto khünga phyochakcho, "Adonijah na Abisahng chomo ji man ana ombo n chüthuka tssona Potsow khi a chüthoku ka!" 24 OPVÜI na apo David vantsü lo mesao a kümthukthaka, ombona phyochako ji ephan vantsü ji a osi a tsoronichen khelo a theyithaka. Adonijah ji nchüngna chüvka to ana eküm Potsow myingona echümala. 25 Solomon mesao na Benaiah yizüng picho tole ombona owo Adonijah ji lüngthacho.
Abiathar Phani Sio ji Osi Joab Chüo Ji
26 Solomon mesao na Abiathar pvüti ji heto ezocho, "Anathoth lo ni metae yia. Ni chüthokvü etüma khatola ana enhünga ni n chüthuka ka, ntiotssole nino OPVÜI Ntsata Bakos ji enhyang tssocho, osi apo David ndüngo vani ezüp khikyocho." 27 Hojito Solomon na pvüti Abiathar ji OPVÜI pvüti elhi lona esanthukcho; osi OPVÜI na Shiloh lona Eli pvüti tona ombo tsoronichen to tsükona phyoe vaoji ji bencho. 28 Hojito tssoji Joab na zocho osi (ombo Adonijah kyochia evan tssocho, osi Absalom n kyocho.) Hojitsükona ombona OPVÜI vanrhyu ranki owo thanphen ji nken jianglo rhümacho. 29 Joab na hojito owo OPVÜI thanphen nken jiang rhümae vamo ji Solomon na zoale kyon wothuka Joab ji ntio tsükona thanpheni tsana ochosana to engathukcho. Joab na Solomon ekyu lona OPVÜI thanpheni tsana wocho to janlancho. Hoji tsükona Solomon mesao na Joab lüngthalo Benaiah wothukcho. 30 Ombona OPVÜI vanrhyu ranki jilo owo Joab ezocho, "Mesao na chiyile to yithen ni piala." Tole Joab na, "Mo, aiyo shilona chüvka" to janlancho. Benaiah na mesao thüngi elani oyi Joab na phyoji ezocho. 31 Tole Solomon na ezocho, "Joab na phyo ji ephan tssoa," "Ombo lüngthae juthei sia. To tssona Joab na n lan n li kyon lüngthae siwo ji thung ji OPVÜI na a osi David tsoronichen thanpoe jiang pono tssothokvü meka. 32 Apo David na n tsiv Joab na nlan n li kyon lüngthao ji man OPVÜI na Joab ezüp pivka. Ombo na ombolo na mmhonkao tüv noying kyon otsük eni lüngtha cho: Jiango Israel rasan esopvüi Abner ha Juda lo rasan esopvüi Amasa oni. 33 Omüng hamo ji nlilam ji Joab tona ombo tsoronichen to pono kümali khyingthuka. Tokhatola OPVÜI na David tsoronichen ombo vantsü, lo vamo jiang kümali ekhyo piv." 34 Benaiah na OPVÜI vanrhyu ranki owo Joab ji lüngthacho osi ombo metae oyi apholo shothei sicho. 35 Mesao na Benaiah ji Joab thung tssoa rasan esopvüi tssothoksi Zadok ji Abiathar thung tssoa pvüti tssothukcho.
Shimei Chüo Ji
36 Mesao na Shemei thüngi kyon wothuka heto ezocho, "Jerusalemi ni ki tssoe vata. Hojilo vansi yantsü yaki ti-woa. 37 Nina yantsü yaki Kidron jüro ji jana kvüthüng woana ni chüvka – osi ni pono tssovka." 38 Shimei na janlancho, "Hotoka, tsüphoeyo. Nina phyo ji ephan ana tssovka." Tosi ombona Jerusalem lo sunga vancho. 39 Nzyu ethüm sülojo Shimei ezii otsük eni na Maakah tsoe Achish Gath mesao ji thüngi tsani yi sicho. 40 Shimei na hoji zoale ombo gadho jilo tsankae Achish mesao thüngi Gath lo ombo ezii jiang yana wocho. Ombona owo oni sosi oki yicho. 41 Shimei na hoto lyuo ji Solomon na zoale Shimei ji owo tsae ezocho, 42 "Ana Jerusalem yaki tiole to OPVÜI myingo na ni echümthukcho. Osi nina hojito tssoana ni chüvka to ni ezoe vacho. Tole nina hoji khichoe ayi engav to n phyochak cho ke? 43 Tona nino ntioli ni echümchak yesoa a yi n gav elhichola? 44 Nina apo David nlümo elhio jiangha nipopo ntsia. Hojiang tsükona OPVÜI na ni ezüpthuku ka. 45 Tokhatola ombona a mmhayiv osi David ekhüngyan ji ombona kümali chüngchünga vanthokvü." 46 Tosi mesao na Benaiah ezoa owo Shimei ji lüngthae sithukcho. Tothakale topvü ji Solomon ekhüng saya küpo tssocho.
Solomon na Ntsinran Chona Randanala
1 Solomon na Ejip mesao oni khyingtav tsükona Ejip mesatsolo ji soa vanicho. Ombona ompvü sosi oyi ekhümki ji tona Jerusalem füa pikhfü ji to n thakthüng jo David yantsüi ompvü vanthukcho. 2 OPVÜI khümphen n tssohamo jina kyon jiangna thanphen elümoto lona OPVÜI thanta vancho. 3 Solomon na OPVÜI nzancho osi opo David ndungntssung jiang ephan elhi tssocho, tokhatola ombona ha ekümrümo lüngthae thanphen elümoto lona OPVÜI thancho. 4 Tsüngonalo ombona Gibeon lo OPVÜI thanphen thüngche lio jilo othan pilo wocho. Ovüngthüngna ombona jilo othan yenjo nzo bena pithakcho. 5 Hoji zümo jo OPVÜI na omüngi na oro heto ombo ezocho."Nina ntio ni khihungala?" 6 Solomon na janlancho, "Nina yuta topvülo apo David nzancho osi ombo mmhona, longtsüka eli osi ni thüngi ntsanrük lona shenta vancho. Osi nina ombo nzanrhüa vanala to chekav esüa otsoe ombo picho nchüngo ana ombo vantsülo vana. 7 OPVÜI Potsow, aiyo elümoto a nungohan osi kvüto yansav sana n tsihan khatola nina apo a echungthukthaka. 8 Aiyo nina ni echhi etssov ethüngcheo jiang yolo tsüka, n khacheo kyon emhokthav jiang yolo tsüka. 9 Hoji tsükona ni kyon jiang ji ntsanrük osi mmhon, n mhon ntsiv tsükona ntsinran apia. To n tssona aiyo kvütoli ni kyon hetata pono yansavla?" 10 Solomon na heto chomo ji OPVÜI na emathacho, 11 jitsükona ombona heto ezocho, "Nina harishi osi niri jiang monthokvü n chon tolea ntsinran chomo ji tsükona, 12 nina chomo ji ana ni pivka. Ana kyon ochinaha n nhunghancho osi henasüilea n hungwo tüv engathe osi ntsinran ni pivka. 13 Nina n choncho ha ana ni pivka ni eküm echung mesao ochinaha n lihancho ejüeli osi myingthüng ni pivka. 14 Osi nipo David esüa nina ayi enga a shikhfü jiang benphina harishi mmha ha ni pivka." 15 Solomon na yipjüngchi Potsow na omüngina ombo jancho to chethecho. Tosi ombona Jerusalemi owo OPVÜI Ntsata Bakos ji mhadungo erungthan osi khümshümta than OPVÜI picho. Hoji sülo ombona ombo küpo tsüphoe jiang tokhu picho.
Solomon na Oyi Ekhünguv Yitssoala
16 Tsüngona lo lonsülonphyoe eloe otsük eni na Solomon thüngi rocho. 17 Onilo tsüka na phyocho, "Yikrachio tsüphoe, eloe shi eni oki motsünga lo vantala, osi oki ompvü na vanathüng ana ngaro eboeroro bukcho. 18 Ana a ngaro ji vansi tsüngon eni sülo ompvüha eboeroro bukcho. Oki jilo enitae, ochia thanpoe n van, 19 tole zümolo ompvüna eriphiathüng ompvü ngaro ji nantsüngi sicho. 20 Osi ana yipa vanathüng ompvü ngaro echü ji a chyui avayisi a ngaro ji khi hansi yicho. 21 Ojyuato enyanthüng ana phanthi a ngaro ji züvkato zele ngaro ji echü tssocho. Osi ana mmhona zele a ngaro ji mekcho." 22 Tole eloe jina phyocho, "Meka! Ngaro eküm jijo a echi osi echü jijo ni echika!" Tole eloe ovüngo jina phyocho, "Meka! Ngaro eküm jijo a ngaro osi echü jijo ni ngaro ka!" Onina hojito mesao mhadungona ekhirantacho. 23 Tole Solomon mesao na ezocho, "Ninita na ngaro eküm jijo ompvü echhi, echü jijo thanpoe ji echi to phyotala." 24 Tosi ombona yonri khilo wothukcho, osi yonri ji hansi yile, 25 ombona ezocho, "Ngaro eküm ji epansoe oni phuko phuko nkhentayia!" 26 Tole oyo tsotso jina ompvü ngaro ji elümoto nzana mesao ezocho, "Tsüphoeyo, nzansi ngaro ji tilüngtha na ompvü pia!" Tole eloe thanpoe jina phyocho, "Eni ochia e ti-pia, epansoe sia." 27 Tole Solomon na phyocho, "Ngaro ji tilüngtha na eloe ovüngo ji pia! Ngaro ji oyo tsotso jijo ompvüka." 28 Israel kyon jiang na Solomon na hojito oyi tssoyiwo ji zoale Solomon monkhümyikrachitacho, ntiotssole Potsow na ntsinran tsüphov ombo picho lona ntsanrüka oyi tssochecho to ontena engathecho.
Solomon Küpo Tsüphoe Jiang
1 Solomon jo Israel lo mesao ji, 2 osi shiango ombo küpo tsüphoe jiang: Pvüti jo Zadok tsoe Azariah 3 yitssoe erantoeden jo: Shisha tsoe Elihoreph ha Ahijah oni: Erantoe vao jiang ezepvüi jo Ahilud tsoe Jehoshaphat 4 Rasan esopvüi jo: Jehoiada tsoe Benaiah, Pvütiden jo: Zadok ha Abiathar oni 5 Metaro esapvüi jiang pono tsüphoe jijo: Nathan tsoe Azariah jina tssocho, mesaoki ndungntssung jo Nathan tsoe Zabud 6 osi mesaki phajae jiang ezepvüi jo Ahishar elani khüngkata elhi tssothung jiang ezepvüi jo; Abda tsoe Adoniram to tssocho. 7 Solomon na Israel lo metaro esaeden otsük taro eni ethüngchecho. Onte elhi jo otsük akvüna nzyualo choroa ren etsoyu methaki mesaki evan jiang elonchiyia tsothoku ji. 8 Metaro taro eni jiang mying tona jianglo esapvüi jiang tojo: Ephraim phunglani esapvüi jo, Benhur 9 Makaz yantsü jiang – Shaalbim, Beth Shemesh, Elon. tona Beth Hanan tolo esapvüi jo Bendeker, 10 Arbbuth yantsü jiang tona Sokoh, elani Hepher meta jiang tolo esapvüi jo Benhesaed 11 Solomon otsolov Taphat soa vamo Benabinadab jo Dor yanren ji topvü esapvüi, 12 Ahilud tsoe Baana jo, Taanach, Megiddo osi Beth Shan yanren jiang topvü, Zarethan yantsü ndüngo ji osi Jezeerel yantsü jüjowoe jilona Abel Mcholah osi Jokmeam yantsü to jana sachicho. 13 Bengeber na Gilead lo Ramoth yantsü, Manasseh tsoronichen Jair jipo meta Gilead lo oyan jiang, Bashan lo Argob yanren jiang, topvü tsotsüi yantsü rokro, pikhfü osi kipüng yonjak na khalanchicho elio jiang topvü satsücho. 14 Iddo tsoe Ahinadab, na Mahanaim metaro ji lo esapvüi tssocho, 15 Ahimaz, Basemath, Solomon otsolov thanpoe jina Naphatali yanren jiang sacho, 16 Osi Hushai tsoe Baana, jo Asher tona Bealoth yanro jiang to sacho, 17 Osi Paruah tsoe Jehoshaphat jijo: Isssakhar yanren jiang sacho, 18 elani Ela tsoe Shimei jo: Benjaminerüwoe ji sacho 19 Uri tsoe Geber jo: ovüngthüng Amorite mesao Sihon tona Bashan mesao Og to na sawo Gilead to jiang sacho. Taro eni shiang ephalo meta ji totolo esapvüi tsüka vancho.
Solomon yansa lo Tsükaranka
20 Israel kyon jiang ji jürani hajang tata tssocho; ontena tsotayutasi emathata vantacho. 21 Solomon ekhüngyan jo zhükhfü Euphrates lona Philistia nandang lo meta lio jiang, osi Ejip erü nandang tssocho. Onte topvü na likotsen ombo pia ombo eküm echung onte sacho. 22 Solomon na etsoyu khio ji engalo ohüm chencho seri wothüng mongo, etsoyu seri wothüng taro; 23 Rankina ekümchecho mangsü mongo, eroyo lona rhükia ekümchecho mangsü taro, olyu nzoa, jilo Siano olan olan khosha tona hono to. 24 Solomon na Euphrates zhükhfü na engrhewoe meta topvü ji sacho; Euphrates lo Tiphsah engrhewoe Gaza yantsü jana sacho. Euphrates engrhewoe mesae topvü ombo küpo, osi ombo meta nkonphia mesae jiang topvü thüngi ombona mmhonta vancho. 25 Ombona evanthüng nandang Juda osi Israel meta topvülo kyon jiang na noyinga ombobo hümoli osi tssüngthi dung lona tsoa vancho. 26 Solomon na ombo ritsso zotoro esüi kurü tona rasan tsankaphen kurü to wothüng taro eni to jiang tsükona ranki wothüng zhüro licho. 27 Ombo küpo tsüphoe otsük taro eni, choro akvü etsoyu elon jiang na choro akvü Solomon tona ombo mesaki evan topvü to ethelan jiang to elonchocho; ontena etsoyu ethelan eli topvü yuta akvülo picho. 28Yansae otsük akvü na ombobo ejan otssuk omüm osi mavü to kvüthüng ethev liana yani mesao picho; hojiang jo ritsso zotoro esüi kurü tona likyingi sanphi ekümrümo to jiang echhi picho. 29 Potsow na Solomon ji echümporo nchümri picho osi füi n zecheo tata ntsinran picho. 30 Solomon jo engkhüwoe ntsinran osi Ejip lo ntsinran to jiang lona ntsinrankata tüv. 31 Ombo kyon topvü lo ntsinran elitso ji; Ezra kyon Ethan jilona ntsinranka, osi Mahol tsoeden, Heman, Kalkol, Darda, to lona ntsinrankata; osi ombo myingthüng na ombo ekhüngyan nkonphia elio metapoe jiang pyinga yicho. 32 Osi ombona püngnoyi wothüng ethüm osi okhen wothüng poni to eranrhyucho. 33 Ombona otssüng odung thüngoe ha Lebanon metae Cedar tssüng lona benkae tssüngo zon nandang ntsicho. Ombona ekümrümo, oro, epvüphio osi ongo to motsü rücho. 34 Limha topvü lo mesao jiangna ombo motsü zoe ombo thüngi püngno yi khilo rorathukcho.
Solomon Na Ekhümki Ji Tssov Methakala
1 Tyre lo Hiram mesao jina yuta topvülo David shom tssocho osi Solomon na opo David echungthaka to ombona zoale ombona lantssoe wothukcho. 2 Tole Solomon na yithen heto Hiram thüngi yithukcho, 3 "Nina ntsia, apo David na ombo nkonphia ombo ri jiang thüngi rota tae vansi OPVÜI na ombo ri topvü n khyothüng jo ombona ekhümki ji n tssochecho. 4 Tokhatola enhungo OPVÜI a Potsow na a meta nkonphai vamo kyon jiang thüngi mmhonta apithaka. Ana ori n van osi ochia a sakao tüv n van. 5 OPVÜI na apo David thüngi heto phyochaki lia, 'Ni tsoe ocho ana mesao kümthuka sana jina a ekhümki ji tssovka.' Hoji tsükona ana a potsow khümphen ji etssov methakcho. 6 Hojitsükona ni kyon rothuka Lebanon lo Cedar jiang atanithuka. A woro jiangna onte nzo elhi tssovka osi ni kyon jiang mmyo jo nina kvüta phyoa sana tata pivka. Nina ntsia a kyon shiang jo odung etam ni kyon jiang na tssothiato n tssothi." 7 Hiram na Solomon yithen ji zoale elümoto emathata phyocho, "OPVÜI thünga; ombona David echungu tsükona hetata nchümri eli-i tüv otsoe pia jipo tsüphov shi sathukala!" 8 Tosi Hiram na Solomon ji heto yithen picho, "Ana ni yithen ji zothaka osi nina ntio phyocho sana ji ana tssovsala. Ana Cedar osi midung jiang ni pivka. 9 A kyon jiang na Lebanon lo Cedar jiang tani orhung lo khüngkae jümangi na eha joro nina kvülo vato phyoa na jilo vachochivka. A kyon jiangna kvülo oro lanchochia sana jilona ni kyon khi oro zeyathukle. Osi nino a kyon jiang etsoyu apiyile." 10 Hojito Solomon na ethev lio Cedar osi mitssüng jiang topvü Hiram na ombo picho. 11 Tosi Solomon na Hiram kyon jiang etsoyu nzyualo ohüm efü wothüng mekyu tona olive thyujü seri wothüng nzo mezhü to picho. 12 OPVÜI na phyochako ji esüa ombona Solomon ji ntsinran picho. Hiram ha Solomon oni yutalo mmhonta licho osi onina noying ntsata vatacho. 13 Solomon mesao na Israel topvü lona nungkata elhi tssothung wothüng thümro vanthukcho, 14 osi hojiang ezepvüi ji Adoniram tssocho. Ombona hojiang ji wothüng taro ren okho ethüm chichei okho akvü na Lebanon lo choroa elhi tssosi choro eni oki oyi esan to tssocho. 15 Solomon na yingsüngi ha otsük wothüng ekha tiza olong eroe vanthukcho, osi hojiang ehan jo otsük wothüng ekha tiying vanthukcho, 16 osi ombona hojiangna elhi tssoathüng ezei wothüng ethümsi nzo ethüm ethüng che vanthukcho. 17 Solomon mesao yizüng ephan ontena longpvü jiang roe ekhümki kimüng saphen tsocho. 18 Solomon kyon jiang, Hiram kyon jiang tona Byblos kyon to tssoe ekhümki etssov otssüng tona olong to hanrhyutacho.
Solomon na Khümphen Ji Tssoala
1 Israel kyon jiangna Ejip meta lona khoe yisi nzyu nzo mezhüsi ekha tiza sülo, Solomon na Israel nzyu mezhüoto sathüng, choro enioto Ziv choro jilo Solomon na ekhümki ji benkacho. 2 Ochungi esa jo metre 27, etsüi metre 9, ntssoni metre 13.5 to 3 Rhowopheni chungchak jijo ejungi metre 4.5 nzoe metre 9, thanphen chungchak ji nzoe tera khicho. 4 Ekhümki ji echung jiang lo hanku khyingracho, osi hanku kipüng jiang opomoe jo kvüzüpsi ochungoe jo ngazokata hacho. 5 Khümphen ji kikhyowoe tona sülamoe to jo echung opomo ji tssokata oki echungta ethüm tüv rena tssocho, osi echungta akvü ntsoni metre 2.2 tera tssocho. 6 Echungta ki chungchak jiang yolo oküptso jiango nzoe metre 2. 2, chungchak olongo jijo nzoe metre 2.7, osi chungchak omhatso jijo nzoe metre 3.1, elani khümphen echungta oküptso jijo echung ji chilüma khicho, tolea echungta enio tona ethümoto jiangolo jo ela nthena echung jiang ji porokata echungkae khicho. 7 Ekhümki tssoa vamo jilona ebensü won karakchüton n zothokvü tsükona olong jiang ha ropheni na theni sisi hansi oyi thecho. 8 Oki tssokao jilo chungchak echungtao jianglo oküptso jijo khümphen ji jüjowoe osi jilona phopha thei omhao chungchak jianglo sokachicho. 9 Hojito Solomon mesao na ekhümki ji tssocho. Ombona phfüki thokachi theo jiangha nsü osi chüpkachi jiango Cedar tssüng khicho. 10 Echungta ethüm ki tssokao jilo echungta akvü ntssoni metre 2. 2 ren tssoe khicho. Osi jiang jo echung opomoe jilo tssokae Cedar tssüng ela na shentsüi khicho. 11 OPVÜI na Solomon thüngi ezocho, 12 "Nina a shikhfü yizüng topvü benphina, ana nipo David thüngi phyochak vao jiang topvü ni tssoyivka. 13 Ana a kyon jiang nzo nina tssoa vamo khümphen shilo vamka, osi ana kvüthüng ha onte sinkiv meka." 14 Hojito Solomon na khümphen ji tssothakcho.
Khümphen ji Kichungi evav Jiang
15 Echung ochungoe jo Cedar tssüng na tapvüi na koküng nandang renzhüi khicho osi tapvü jo mitssüngna sacho. 16 Chungchak ochungo Nthotso meta to tsao jijo khümphen ji sülamoe tssokacho. Hoji chungchak jijo ntsoni metre 9, osi tapvüina koküng nandang ji Cedar tssüng na chungchaki khicho. 17 Nthotso meta chungchak ji mhadungo chungchak jijo esi metre 18 tssocho. 18 Cedar tssüng reni khio jiang lojo shümo thera kisü thenkarae khicho; osi oponi olong jiang n hungwo tssoa ochungoe na Cedar tssüng na renzhüi khicho. 19 Khümphen ji sülamoe chung chak motsünga tssokae hojilo jo OPVÜI Ntsata Bakos ji vacho. 20 Hoji chungchak jijo etsüi, esi, ntssoni metre 9 ren khicho, osi jiang ji shona njüm na eyukzhüi khicho. Thanphen jijo Cedar tssüng na renzhüi khicho. 21 Khümphen ji ochungo jo shona na eyukzhüi khicho, osi chungchak ochungo jiha shona na phyonzhüi hoji kipüng jo shona zhü na süngzhüi khicho. 22 Elani khümphen ji ochungoe toto na shona na eyukzhüi khicho, osi Nthotso meta jilo thanphen jiha shona na eyukzhüi khicho. 23 Olive na ekümrümo echo eni motsünga lo ntssoni metre 4.4 ren eni khyinga nsüngrüi Ntholo nthotso meta jilo vacho. 24-26 Oniata etsüi esi topvü kheti tssocho. Echo motsünga mmyoena motsünga ji mmyowoe jo metre 2.2 tssocho. Hojitolyui oni tssotsüa na metre 4.4. tssocho. 27 Oni ji Nthotsowo meta jilo reni echo ephyamo jina tapvü longjüngina tachita, echo esanawoe eni jina kyimchung jiang tachi to tssocho. 28 Echo eni mpao ekümrüm jiang ji shona na eyukzhüi khicho. 29 Kichungchak tsüpho ji tona, chungchak ochungo ji to echung jiango echo eni khyingo ekümrüm kisü tona, palm dung kisü tona thera kisü lyukae khicho. 30 Osi tapvü ji mpato shona na phyangzhüi khicho. 31 Nthotsowo meta kipüng jilo olive tssüng na kibüng eni lyukae khicho osi kipüng ji kvüri jo füi khicho. 32 Kibüng jiango echo eni mpao ekümrüm, palm dung tona thera to kisü lyukrae khicho. Osi kibüng jiang, ekümrüm kisü, palm dung tona thera kisü to shiang ha shona na eyukzhüi khicho. 33 Kichungchak tsüpho jilo rhowolan jijo olive tssüng na nken mezhü lyui khicho. 34-35 Kibüng eni jo mitssüng na nsüngrüi echo eni ekhyingo ekümrüm kisü, palm dung kisü tona thera kisü to lyukae jiang topvü shona na mmyana eyukzhüi khicho. 36 Khümphen ji mhadungoe chungchakro motsünga ren na chungchak akvüto etsüngkae khicho. Osi olong ekata ethüm thüm sülo jo Cedar tssüng na ela thei tssoa chüngicho. 37 Khümphen ji kimüng ji Ziv choro, choro enioto jilo, Solomon na nzyu mezhüto sathüng soyingcho. 38 Choro tizaoto Bul choro jilo Solomon yansa nzyu taro ekhao to jilo, yuta kokao ji eben lo ekhümki ji thakcho. Solomon na nzyu tiying khia hoji tssocho.
Solomon Mesaki
1 Solomon na ombo vanphen ha tssocho osi hoji etssov nzyu taro ethüm khicho. 23 Lebanon ra to tsao kichungchak esi metre 44, nzoe metre 22, ntssoni metre 13.5 to khicho. Chungchak jilo Cedar durhyu taro mongo rencho, oren ethüm thecho osi hojiang poni Cedar shanka nkhokae khiracho. Phfüki ethakachi jiangha Cedar tssüng thecho osi echungkao tsütsailan vaphen ji jana ethakachi durhyu na tsenkachi khicho. 4 Echung ayi amen eni jianglo kherüki oren ethüm ren thecho 5 Kipüng osi kherüki jiango nken mezhü ekhyingo tae nsüngrüi khicho osi echung oren eni jianglo kherüki oren ethüm ren theo jiangha phukowoe kherüki theo jiang onte tondüngta khicho. 6 Durhyupvü remo chungchak jijo esi meter 22. etsüi metre 13.5. tssocho osi hojilo rafüp tssochi durhyu na tsenkachi khicho. 7 Vantsü chungchak mekana yitssophen to tsao Solomon yitssophen jijo tapvüina cedar tssüngna phani koküng nandang phankachicho. 8 Yitssoki ji sülamoe Solomon evanki jiha thanpo jiang esüa tss wocho. Ombona Ejip mesao otsolov soa vamo ji kiha hojitüv tssoyicho. 9 Oki shiang topvü osi hapho tsüpho jiha to topvü olong mmhom na tapvüi na benkae koküng nandang thekachicho. Osi olong jiang longropheni na joe ochüm jiang mmyana rhüi sisi khicho. 10 Kimüng ji totona longropheni na olong tsüphov thenchorae sacho, ejoma jo metre ethümsi riso bena tsüphoa tüv theracho. 11 Hojiang ponijo olong thanpo etsi thenchoe thecho osi cedar tssüng na ha ela nsüi khicho. 12 Mesaki hapho ji, khümphen ki hapho ochungo ji tona khümpheni rhowoden chungchak ji tojo ethenlong ethüm lo cedar tssüng nsü motsünga ren thei khicho.
Huram Elhi Ji
13 Huram to tsa tssiyanthi, Tyre yantsüi evan, yongmen yonjak ejolo tssothi ji Solomon na owo tsathukcho. 14 Opo jo Tyre kyon yongmen yonjak ejoe khatola chüthakcho, osi oyo jo Naphatali pvüji kyon tssocho. Solomon mesao na yongmen yonjak elhilo ezepvüi tssothoku "ombo tsao ji ombona khichocho.
Yongmen Yonjak Durhyu Eni Ji
15 Huram na yongmen durhyu motsünga lo ntsosni metre 8, etsüi nkoncholo metre 5.3 to tüv eni khümphen kibüngo chümcho. 16 Ombona yongmen durhyu jiang kvüri shanka ntssoni metre 2.2 tüv yongmen na jocho thecho. 17 Durhyu omha woe eji kavülo yingbenro esüa shentacho kisü thenkacho, 18 osi yongmen na tsarümthipehn kisü rena nsüngrükacho. 19 Durhyupvü kvüri shankao jiango oropangti eki esüa shani khicho osi ntssoni metre 1. 8, tssocho. 20 Osi yingbenro shentacho lyukao ji mhalo na shankae khicho. Durhyu kvürilo shanka theo jiang oren eni jilo tsarümthiphen kisü nzo eni lyukae khicho. 21 Yongmen durhyupvü eni shiang ji Huram na khümphen kibüngo ndungkachi khicho. Onilo jüjowoe jijo Jachin to tsacho osi jükiwoe jijo Boaz to tsacho. 22 Woropangti eki esüo yongmen shanka jiang ji durhyupvü kvüri lhüpkae khicho. Hojitolyui durhyu elhi jiang thaki sicho.
Yongmen Yonjak Jüjen Ji
23 Huram na yongmen yonjak na jüjen nkona joe khicho, ejungi metre 2. 2 tona etsüi metre 4. 4, osi hoji füchukchia nkhon jo metre 13. 2, to joe khicho. 24 Jüjen ji nkhon opomo rhüa yongmen na shümo kisü oren eni lyukae khicho osi onte topvü ji yonjak motsünga jina jüjen jilo jotsüi khicho. 25 Jüjen ji yongmen na jocho tssipong taro eni hapowoe zechukchio vancho kisü mankvüi jokae khicho osi tssi pong jiang topvü ethüm na reni nken mezhüata lo zechiwo tssoa lyui khicho. 26 Jüjen ji echung jo echhi milimetre 75 khicho osi nkhon jo opvü nkhon esüa lyui khicho; osi nkhon opomo ji rhüa jo oropangti wo esüa thecho; osi jüjen jilo jüpvü wothüng zhüro harüma etheo jocho.
Yongmen Zotoro Jiang
27 Huram na yongmen zotoro ha taro jocho, osi motsüngalo esi metre 1.8, etsüi metre 1.8 tona ntssoni 1.3 to khicho. 28 Zotoro jiang ji oküpi ronri ji oponi nken mezhü ekhyingo shankae khicho. 29 Osi khiron jianglo tona echung jianglo tojo hingho kisü, tssipong kisü tona echo ekhyingo ekümrüm kisü to lyukarae khicho. Tssipong osi hingho to kisü jiang pomoe tona oküpoe tojo nkoncho tüv shentae khiracho. 30 Zotoro akvülo khoro mezhü ren osi yongmen nsü thei khicho. Nken mezhü jianglo jüpvü ndungphen ronkae khicho osi hojijo yonjak nkoncho shentae ronkacho. 3i Hoji ronka ji poni nkonkae jüpvü ekachiphen khicho. Hoji jo zotoro ji mhawoe centemetre 45, ntssona osi zotoro ji küpoe centemetre 18 joyi to lyukae khicho. Hoji nkonphia kisü nsüngrükarae khicho. 32 Khoro jiango ntssoni centimetre 66 osi onteno yonjak phyankao jiang kupi lyukacho osi nsü jiango zotoro ji yonjak soana lyukae khicho. 33 Khoro jiango ritsso zotoro khoro tüv osi nsü, nkhon, etsen osi otsso jiang topvü yongmen na joe khicho. 34 Zotoro akvü nken jiang kupi etsen mezhü zotoro müng jilona sokae khicho. 35 Zotoro akvü oponi shenzhü centimetre 22 phankae khicho osi etsen tona phyanka to jiango zotoro ji soa lona jokae khicho. 36 Etsen jiang tona ephyan jiang to jo echo mpao ekümrüm kisü tona, hengho, palm dung to pothe akvü lyukae hoji füa kisü nkoncho shenta thei khicho. 37 Zotoro jiang ji hojitoli joe khicho, onte topvü etsüsi osi opholuk esüta khicho. 38 Huram na jü-vakuk ha taro jocho, zotoro motsüngalo jü-vakuk motsünga ren. Jü-vakuk motsüngalo etsüi metre 1.8, osi etükpvü 800 harüma ren thecho. 39 Ombona zotoro mongo jo khümphen ji jüjowoe vacho, osi mongo jijo jükiwoe vacho, osi jükha jijo engrhejolowoe vacho.
Ekhümki Etheo Jiang
40-45 Huran na ophfü, chonthanphen tona ophi toha jocho. Solomon mesao na OPVÜI khümpheni elhi ombo zikao jiang topvü ombona thakcho. Ombona shiang nsüngrücho: Durhyupvü eni Durhyupvü kvüri shanka ekukvü eni Durhyupvü akvülo yingpenro shentacho thenka, Durhyupvü akvülo shanka theo ji nkona yongmen na tsarümthipen kisü nzo mezhü lyukao jiang zotoro taro jiang Jü-vakuk taro jiang Jüjen ji Tssibung kisü taro eni jüjen ji tsenkachio jiang Ophfü jiang, chonthanphen jiang tona jüpvü jiang Huram na khümpheni evav nsüngrio shiang, hetopvü yongmen yonjak taena nsüngrüngcho. 46 Hojiang topvü ji mesao na Jordan hayi Sukkoth tona Zarethan to yutalo yonjak ki jilona jothukcho. 47 Shiang hetata etsso jina füi n zeche küma Solomon na n füthukcho, küma tssotsüi mmyingi kvüta sana n tsicho. 48 Solomon na khümphen ji tsükona shona tsütsaelan ha heto nsüngrücho, thanphen ji, Potsow than hümri ji vaphen mezhü jiang ji, 49 Nthotsowo meta ji mhadungi milondung taro, mongo jo jüjowoe, mongo jo jükiwoe to vao jiang, thera jiang, milondung jiang osi mmyaphen jiang, 50 opvü jiang, milon ntssaphen jiang, ophi jiang, tssütsserhüm rungphen phi jiang, miron thanthei benphiphen phikuk jiang, Nthotsowo meta ji hankhan tona khümphen opomoe hankhan jiang to lo rakphiphen theo jiang to shiang hetopvü to shona na nsüngrücho. 51 Solomon mesao na khümphen jilo elhi jiang thakrathakale ombona opo David na OPVÜI lo khochaki vao tsütsaelan shiang topvü khümpheni kikyo vaphen chonchak jilo vacho. Shona, janti osi thanpo tsütsaelan jiangha to.
Ntsata Bakos Ji Khümpheni Oyi Vatala
1 Jisülo jo Solomon mesao na OPVÜI Ntsata Bakos ji David yantsü Zion lona khi khümpheni hansi yiv tsükona Israel lo jipo osi khümtsüng akvülo esopvüi jiang ombo thüngi Jerusalem yantsüi tsarhyucho. 2 Onte topvüna Ethanim choro lo ranki tokhu yuta jilo sanrhyucho. 3 Onte topvü sanrhyuthakale pvüti jiangna Ntsata Bakos ji tsakae khümpheni ejümta yicho. 4 Levi jiang tona pvüti jiang to naha OPVÜI vanrhyu ranki ji tona jilo tsakalan jiang topvü to loki khümpheni hana yitacho. 5 Solomon tona Israel jiang topvü to Ntsata Bakos ji mhadungo sanrhyui olyu n khacheo tata lüngthae othan pitacho. 6 Jisülo jo pvüti jiangna Ntsata Bakos ji ejümkae khümpheni rhowo Nthotsowo meta jilo echo ekhyingo ekümrüm jiang kupi vanthukcho. 7 Ekümrümo jiang echo ephyamo jina Ntsata Bakos ji tona ejümphen khoro jiang to eyukzhücho. 8 Khora jiang mmyo jiang ji Nthotsowo ji mhadungo mangi evan jiangna jo hungkhuka, tokhatola thanpoena jo ochina ha n hungwo tssocho. (Khora jiangji nchüng jana lia.) 9 Ntsata Bakos ji chungi jo Israel jiangna Ejip metae na chiyiathüng OPVÜI na Sinai phunglani na Ntsata Moses khelo pio jiang eramo longpyak eni ji yaki ntia thei n vacho. 10 Pvüti jiangna khümpheni na khochiale jitopvü khümphen ji eluk na eyuki, 11 OPVÜI vanrhyu wondang na razhüi sisi ontena elani owo pvüti elhi jiang n tssolanchev sicho. 12 Jisülojo Solomon na heto randancho: "OPVÜI, nina eng ji woyaki lyukacho, tokhatola eluk osi emüng longi ni vanhungala. 13 Enhungo ana ni vanphen ekhümki ni tssoyithaka, Ni kümali vanphen ana ni tssoyithaka."
Solomon Na Kyon Jiang yolo Oyi Nsanala
14 Kyon jiangna jilo mangrae vanathüng Solomon mesao na onte zechia phanthicho. 15 Ombona onte ezocho, "Israel Potsow OPVÜI ji thünga! Ombona apo David thüngi heto phyochako ji benthukthaka, 16 'Ana Israel jiang Ejip lona sochuksi yantsü kvüwoe ha a khümphen etssov n thüngchehan, tokhatola, David, ana a kyon esav ni ethüngchecho." 17 Solomon na heto phyolancho, "Apo David na Israel Potsow OPVÜI khümphen etssov methakcho, 18 tokhatola OPVÜI Potsow na heto ombo ezocho, 'Nina a khümphen etssov methako ji elanthata, 19 tokhatola nina kvüthüng ha tssov meka, tokhatola ni tsoe jina a khümphen tssovka.' 20 "OPVÜI na hojito phyoji benthukthaka. Ana apo mesa ji echungthaka osi Israel e Potsow OPVÜI khümphen ji ana tssothaka. 21 Israel na Ejip metae na chiyiathüng OPVÜI na ete motsüi jiang thüngi Ntsata picho erankao lungpyak eni ji theo Ntsata Bakos jiha ana jilo vathaka."
Solomon Randan
22 Jisülojo kyon jiang evano na Solomon na thanphen ji mhadungo phanthi okhe khyokae heto randancho, 23 "OPVÜI Israel Potsow, potsüo oyaki osi limhae kvüloha ni esüa Potsow n van! Ni kyon jiangna lüm joa ni yi enga vanana nina onte thüngi ntsata vasi nzan onte ejüa. 24 Nina apo David thüngi phyochak vao ji benthukthaka, nchüng tsüngon shilo phyochak jiang topvü benthaka. 25 Hoji tsükona, OPVÜI Israel Potsow, ana elani randana chonala, nina heto phyochako jiha benthuka Apo David na ni jancho zo ji esüa ni kyon jiangna ha ndangshona jancho zoana nina ombo tsoronichen na yansanrhüa yiv to phyoji benthuka. 26 Hoji tsükona OPVÜI, Israel Potsow, nina ni phajae apo David thüngi phyochako jiang topvü nchüng benthuka. 27 "Tokhatola Potsow nina otsotso limhae vam alo? oyak hetara na samona ni n vanchyu, tona kvütoli ana etsso khümphen jilo ni vanchyuvla? 28 OPVÜI a Potsow, aiyo ni phajae ka, a randan a engayia. Ana nchüng ni thüngi jonjiwo shi a bencheyia. 29 Nina ni khümphen tsükona ethüngcheo khümphen shi zümo eng to na zeyata nhyaka vana. Osi ana ni khümphen shi zechia randana na a engayia. 30 A osi ni kyon jiangna kvüthüng khüphen shi zechiwo randana sana engayia. Ni ki Potsowoe na e randan zoe e nlan e siyia. 31 "Kvüthüng kyon tsükana oyam tachio elhi tssochei ntsa eshentalo ni thanphen shilo echümo sosi roa sana, 32 OPVÜI, potsüwoe na enga vansi ni nri jiang selanngotüngia. Nlan etssoe ji ombo jokheman ji ephan ezüp pia osi ntsanrüko ji epyocheta. 33 "Ni kyon Israel jiang na ni jancho n zov ori n khyoa na, osi ontena teri kümi oro ni khümphen shilona nlan chona tssona, 34 nina potsüwoe na onte zoyia. Ni kyon jiang mmen siyia osi nina onte pyimtsümotsüi pio meta shilo sosi yilana. 35 "Ni kyon jiangna mmen tssoe nina eryu n jwothukvü siathüng ontena teri kümi khümphen shi zechiwo ni thüngi nlan chona jonjia tssona, 36 nina potsüwoe na zoe nlan onte siyia. Mesao osi ni kyon Israel jiang nlan mmen siyia. Elan ji etssov lo onte sokata. Osi OPVÜI, nina onte pyimtsü motsüi thüngi kümali ejüeli tssoa pio meta shilo eryu jolanthuka. 37 "Meta shilo otssi vara osi nochonori vara liathüng, osi penroniro jiang mbungna mekana khomungna roe siathüng, mekana ni kyon jiang orina hayatathüng osi ontelo nocho-nori liathüng, 38 onte randan engayia. Ni kyon Israel yolo ochosana lüm roa nungra lona okhe jiang ni khümphemoe rüchi randana tssona, 39 onte randan engayia. Ni ki potsüwoe na onte randan engayia onte nlan siyia osi nzanchia. Ni taena kyon lümbümi jüwo jiang ntsia. Kyon otsük akvü ombo ombona etüma mamo ji ephanina tsütsata. 40 Hoto tssona ni kyon jiangna ni jancho zoa nina onte motsüi pio meta jilo harishia vamka. 41-42 "Metapoe kyon ekoni evan ochona sana nina ni kyon jiang thüngi mmhom tsso jiang myingthüng jiang zoe oro ni khümphen shilona randana tssona, 43 ombo randan engayia. Potsüwoe ni vanpheni na ombo randan engayia osi ombona jonjiwo ji engayia, hojitoli limhalo kyon topvü khi ni ntsithuka osi ni yi enga ni yana yithuka. Hojito tssona ni khümphen jo ana ni tssoyiwo shitae to ontena ntsivka. 44 "Nina ni kyon jiang owo ori tssole to ezoathüng ontena kvülo vana na jilona nina ethüngcheo yantsü shi osi ana ni tssoyiwo khümphen shi zechiwo randana na, 45 onte randan engayia. Nina potsüwoe na onte randan engayia osi ekhyo onte pia. 46 "Kyon ochia mmen n tssoe n vamo ji tsükona – ni kyon jiangna mmen tssoana – osi nina lüm tsuki onte ri khi onte khyothuka na osi metapoe sosi oyi onte vünga na, osi hoji meta ji ekoni tssona, 47 ontena randamo ji engayia. Ontena meta jilona onte mmen kvüta kyungcho sana nchümchei onte mmen phyochaka khophi randana tssona onte randan engayia, OPVÜI. 48 Ontena meta shilona otsotso osi mmyinga khophia tssona, osi nina e motsüi jiang pio meta shi thüngoe zechia randana na, nina ethüngcheo yantsü osi jilo ana ni tssoyiwo ekhümki ji zechiwo randana tssona, 49 nina onte randan engayia. Ni potsüwoe ni kina onte randan engayia onte khonzana. 50 Ontena ni mhadungo mmen tsso jiang osi ni panlamo jiang topvü nlan siyia osi onte ri jiang khi onte nzanthuka. 51 Onteno nina Ejip meta omi esüa etssov lona onte sochuko ni kyon jiang ka. 52 "Sandamo OPVÜI, ni khi yuta topvülo ni kyon Israel jiang osi onte mesao thüngi ni chokathukvüka, osi ontena ni thüngi jonjia randana na ni khi engayithukvüka. 53 Nina Ejip metaena onte sochukathüng Moses ezo ji esüa ontena limha lo kyon topvü yolona nina ni kyon onte tsswothukvü onte tsachukcho."
Randan Okhao Ji
54 Solomon na OPVÜI thüngi randanthakale, ombona thanphen ji mhadungo nkhok tseni randana vamo jilona phanthicho. 55 Ombona kyon etssi vamo jiang topvü tsükona owon chuka OPVÜI thüngi mmha choncho. Ombona heto phyocho, 56 "OPVÜI ochona ombo kyon jiang phyochak vayicho sana ji ephan noying onte pithakcho sana hoji omying thüngia. Ombona ombo nri yakchia mmhom kvüta phyochaki vacho sana jiang benthukcho. 57 Ete Potsow OPVÜI na ete motsüi jiang thüngi vamo ji esüa ete thüngiha vanthukvüka; ombona kvüthüngha e sinkia khoe e n sithukvüka; 58 ombona erüngo ji ephan etena vancheo tssoa ete khi ombo jancho ezovlo ombona e nzanchithuka osi ombona ete motsüi jiang pio shikhfü yizüng jiang e benphithukvü ka. 59 Ana heto ombo thüngi jonji randamo shiang OPVÜI khi yuta topvülo Israel kyon jiang osi onte mesao thüngi engakvü ethelan jiang benriyithukvü ka. 60 Hojitolui lim halo jipo topvüna Potsow jo OPVÜI shi tae to engathethukvü ka – thanpoe potsow ochia n van. 61 Ombo kyon nte topvüna ombolo longtsü kata vanthukvüka, osi ntena nch üng tssowo shi esüa yuta topvülo ombo jancho zoa vwothukvüka."
Khümphen Ji Nthocheo Ji
62 Jisülojo Solomon mesao tona kyon jilo vamo jiang to nzo tssoe OPVÜI thüngi othan pitacho. 63 Ombona khümshümta than tssoa mangsübung 22,000 tona olyu 1,20,000 to thancho. Hojito mesao tona kyon topvüto nzo tssoe ekhümki ji nthochetacho. 64 Hoji nchük ombona khümphen ji mhadungo hapho longjüng jiha nthochakcho, osi jilona ombona mpüm na erungo than ha picho, otssuk omüm than ha picho osi ekümrümo ethyu jiango khümshümta than picho. Ombona heto lyuo jijo yongmen yonjak thanphensa ji terio jina shiang hetopvü n kachicheo ji tsükona. 65 Khümphen jilona Solomon tona kyon jiang tona ranki tokhu ji tsüngon tiying khitacho. Hojilo kyon sanrhyuo ji jükiwoe Hamath eyak lona benkae jüjowoe Ejip erü janae na kyon rorao jina okho tsüphov sanrhyucho. 66 Tsüngon tizao to jilojo Solomon na kyon jiang oki yirathukcho. OPVÜI na ombo phajae David tona ombo kyon Israel topvüto thüngi mmha tsüphov pio jina ontena emathata oki yiracho.
Potsow na Elani Solomon Ndukala
1 Solomon na khümphen osi mesaki thanpo ombona etssov tsükona zikao jiang tssothakale, 2 OPVÜI na Gibeon lona ombo nduko ji esüa ombo nduklancho. 3 OPVÜI na ombo ezocho, "Ana ni randan ji zothaka, nina nchünkhon tsükona a khümphen a tssoyiwo ji ana nthochethaka. Ana hoji nkoha nchünkhon zeyata vanthuku ka. 4 Nipo David esüa ninaha nipopo ntsanrüka a benka na, osi nina a yizüng jiang benphia ana ni ezo jiang topvü engae benphina, 5 ana nipo David thüngi Israel ji yuta topvülo ombo tsoronichen na savka to phyoe vaoji benthuku ka. 6 Tokhatola ni osi ni tsoronichen na a n benkav siana, osi ana ni pio yizüng osi shikhfülan jiang n benphitav potsow thanpo khümta yiana, 7 tona ana Israel ji ana pio meta jilona phani siv. Tosi ana akhümphen tssov nthochakthako shiha ana sisi yiv. Meta topvülo kyon jiangna Israel jiang emakata etssaknkung tssothuku ka. 8 Khümphen shiha menroe hankachi siv osi hoji yakphi topvü na ngangtsünga ekhena heto phyotav, 'OPVÜI na ntioli kyon shiang osi meta shi heto tssoyichoto?' 9 Hojithüng kyon jiangna janlantav, 'Ontena onte Potsow ochona onte pyimtsümotsüi jiang Ejip metae na sochukcho sana ji siwo jina ka. Ontena onte longtsüka ji Potsow thanpo jiang pio jina ka. Hojitsükona OPVÜI na heto onte khangshichoka' "to phyotav.
Solomon na Hiram Thüngi Ntsatala
10 Solomon na khümphen ji tona mesaki to tssoji nzyu mekyu khicho. 11 Ombona Cedar tssüng osi mitssüng tona shona to ethelan lio jiang topvüto Tyre lo mesao Hiram na picho. Solomon na elhi thakcho sülo Hiram ji Galilee yanren jilo yantsü mekyu picho. 12 Tole Hiram na yantsü jiang owo zele n jüponcho. 13 Hojitsükona ombona Solomon heto ezocho, "O aj enio, shiango nina apio yantsü jiangke!" Hojitsükona meta shijo enhüngalea Kabul to tsala. 14 Hiram na shona seri wothüng mezhü poni Solomon pithakcho.
Solomon na Elhi Mmhom Tssolamo Jiang
15 Solomon mesao na ekhümki jiang tona mesaki to jiang tssoathüng, yantsü ji tssae engkhüwoe ochon hanthev osi yantsü pikhfü eshemo jiang to tsükona khüngkata jokhe ezae soe khi tssothukcho. Ombona Hazor, Megiddo, tona Gezer to yantsü jiang tssochoathüng ha khüngka jokhezae socho. 16 (Ejip mesao na Gezer yantsü ji ori tssoe kyon jiang lüngtharae sisi yantsü ji rungi sicho.) Osi ombo otsolov jina Solomon thüngi yanpiathüng yantso tssoa yantsü ji otsolov picho, 17 hoji Solomon na tssochoe khicho.) Solo mon na khüngka jokhezae solana Beth Horon oküpo ji, 18 Baalath, Juda liojüngi Tamar, 19 to ombona etsoyu hanthephen yantsü jiang, ombo ritsso kurü tona zotoro to vaphen yantsü jiang, tona Jerusalem, Lebanon, osi ombo ekhüngyani kvülo ntio tssochov lichosana topvü tssochocho. 20-21 Solomon na khüngkazae jokhe jo Israel na Kanaan khyoe khiathüng Kanaan kyon n lüngthana enhyoe vanthuko jiang tsoronichen jiang khicho. Hojiang yolo Amorite kyon, Hittite kyon Perizzite kyon, Hivite kyon tona Jebusite kyon to tsoronichen nchüng jana eziden tssota vamo jiang khicho. 22 Solomon na Israel kyon jiang jo ezii elhilo n socho. Osi rasan, yansae, rasan esopvüiden. zotoro esoeden tona kurü esoeden to tssothukcho. 23 Solomon kitsso elhi jianglo khünga jokhe jiang rhükipvüiden 550 vanthukcho. 24 Ombo engh, Ejip mesao otsolov jina David yantsü lona khochi Solomon na ompvü tssoyiwo yantsü jilo rheyisanati yantsü pikhfü jiang ochon hankae khicho. 25 Solomon na ombona OPVÜI thanphen tsso jilo nzyualo yenjo ethüm erungthan tona khümshümta than to picho. Ombona tssütsserhüm mmhona ha OPVÜI thana rüngcho. Hojito ombona khümphen etsso ji thakcho. 26 Solomon na orhung ha Elath ndüngo Eziongeber lo Aqabath jürani razhü motsünga hanrhyui vanthukcho. 27 Hiram mesao na ombo rhung razhü lo esae tssothimori ejoma wothuka Solomon orhung razhü jianglo zathukcho. 28 Ontena Ophir metae ehata owo shona seri wothüng taro mezhü hansi oyi Solomon picho.
Sheba lo Mesali na Solomon Thüngi Roji
1 Sheba mesali na Solomon myingthüng ji zoe ombo nduki engao ekhünguv khi ojang tssoe zelo Jerusalemi rocho. 2 Ompvü ephalo phajae khosha socho osi Odh ha khosha, mozhürhüm mmhom, tssentsülung osi shona khosha han tosi rocho. Ompvüna Solomon ndukale ompvüna nchümchecho engao topvüto Solomon engacho. 3 Tole ombona topvü janlancho osi ntia ombo tsükona ekhüngu n jücho. 4 Sheba lo mesali jina Solomon ntsinran ji chethecho osi ombona tsso mesaki jiha hungcho. 5 Ombo tsopheni etsoyu jiang, ombo phajae jiang ki jiang, ombo mesaki elhi etssoe jiang nlansüngi vanthuko jiang osi ontena mpensü kheti hamo jiang, tokhu yutalo Solomon tssitssohantssoe jiang osi khümpheni ombona othan pio jiang to shiang hetopvü ompvüna hungracho. Hojiang hungi ompvü ji echenmhuka ngangcheta emhukcho. 6 Ompvüna Solomon mesao ezocho, "Ni osi ni ntsinran tsükona ana a metae na zojiang otsotso to ana hungthaka! 7 Tokhatola ana oro apopo a mhyikna n hungthüng jo a n longtsücho. Tokhatola ana hungwo shiang chiso tia n zo. Ni ejüeli osi ntsinran shiang jo ana zo jiang lona kyongkata. 8 Ni engh shiang, ni phajae shiangna ni ndüngo vankae yuta topvü lo ni ntsinran yisanlan jiang zonrhüa vamo jijo kvüta oton eliden ato? 9 Ni Potsow OPVÜI ji mying thüngia. Ombona Israel lo mesao ni kümthukoji yakchia ombona ni thüngi ematha ji ni ejüthaka. Ombona Israel nzamoji kümali tsükona, hojitsükona ni khi Israel 10 saya osi ntsanrük lithoku mesao ni kümthukcho." 10 Ompvüna Solomon mesao hanio yantso jiang heto khichei picho; shona seri wothüng mezhü pomoe, mozhürhüm mmhom tona tssentsülung to. Ompvü na mozhürhüm hanio ji tata Solomon na echunga tia n khichohan. 11 Hiram orhung razhü jiangna Ophir lona Juniper tssüng tona otssüng mmhom elani shona khosha to hansi rocho. 12 Solomon na otssüng jiang ji ekhümki jilo tona mesa ki jilo to eraklanchi renkae khicho, osi khenden jiang tsükona zhükhenpvü nsüngrücho. Hojiango Juniper tssüng mmhontso metapoena Israel lo hansi yidemo jiang ji tssocho osi hojitüv tssüng esüa kvüloha n hunghancho. 13 Solomon mesao na Sheba lo mesali na ntio chona na pikhancho osi shikhfü ephan yantsotaphen lio jiangha topvü yantsoracho. Jisülo jo ompvü na ompvü nzo etssoe jiang onte kholani Sheba lo yitacho.
Solomon Mesao Ejüeli
14 Nzyu akvü mesao Solomon na shishoe jiang na tssenkhya theo jiang, shisho lona khakcho jiang, 15 elani Arab mesae jiang tona Israel lo metaro jiang to na tssenkhya pio jiang to ephalo shona seri wothüng mekyu bena khyarhyucho. 16 Solomon na otsung tsüphov nzo eni shüki hoji mmyingthukvü tsükona motsüngalo shona seri tiying ren thecho. 17 Ombona otsung teriv ha nzo ethüm shüki, motsüngalo shona seri eni na mmyingthokvü thecho. Otsung shiang topvü ombona Lebanon ratsü to tsao chungchak jilo varhyucho. 18 Ombona vantsü ha tsüphov shancho osi hoji phuko jo sotsüho, phuko jo shona njüm to na shani khicho. 19"20 Vantsü jilo chungophen khokav tiruk eshenkacho osi khokav jiang akvü ochümi hingho kisü lyukacho. Tsotsüi hingho kisü taro eni thecho. Vantsü ji sülamoe jo mangsüpong kvüri pyon ha nsüngrükacho, osi vantsü ji khe eni ji akvü ndüngo hingho ndungkachi vancho ha lyukacho. Osi ekhüngyan kvüloha hojitüv vantsü n lihancho. 21 Solomon na yuphen opvü jiang topvü shona na jocho, osi Lebanon ratsü chungchak jilo evao oyo-opvü topvü shona njüm taena joracho. Solomon echungi jo janti jo tata n tsütsacho, ntiotssole hoji yutalo jo janti ji oman tata n licho. 22 Ombona Hiram rhung jiang nzo jümangi ombo rhung razhü motsünga vanthukcho. Ombo rhung jiangna nzyu ethüm lo echunga shona, janti, sotssüho, kvüso tona yakso to na pying hansi yicho. 23 Solomon mesao jo mesao thanpoe jiang topvü lona ntsinrankata osi Jüolikata. 24 Osi limhatsü na Potsow na ombo pio ntinran jiang engata hungcho. 25 Kyon kvüta roana jina yantso ombo hanichoshona janti tsütsaelan, mpensü, ebensü, mozhürhüm mmhom, kurü, gadho, to hanicho. Hojito nzyua sülo nzyua to edunga yia vancho. 26 Solomon na rasantsü, ritsso zotoro nzo taro mezhü, kurü mankvüi rasan nzo taro eni to jüa soyingcho. Onte ejoma jo ombona Jerusalem lo vanthukcho osi ejoma jo ombona yantsü thanpo jianglo vanthuk to tssocho. 27 Ombo yansa yutalo jo shona, janti jo olong sha to pvülyutacho osi cedar tssünga ha tssüngsha to pvülyu tacho. 28 Mesao woro jiang na kurü metapoe yem ji Musri tona Cilicia to lona tanglanchicho, 29 osi ritsso zotoro metapoe chiyithoku jo Ejip lona tanglanchicho. Ontena Hittite tona Syrian to mesao jiang kurü osi zotoro shithukcho, zotoro motsünga lo jantirang 600, kurü motsünga lo jantirang 150 to ren shithukcho.
Solomon na Potsow Thüngina Kontala
1 Solomon na metapoe na eloe khosha nzancho. Ejip mesao otsolov ji ephalo ombo na Hittite eloeden, Moab eloeden, Ammon eloeden, Edom osi Sidon eloeden to khosha soa vancho, 2 Israel jiang ji Potsow thanpo khüma n yithuku tsükona OPVÜI na metapoe eloe thüngi lolan ti-tssotale to Israel jiang ezocho, 3 khatola Solomon na mesatsolo otsük nzo tiying soa vansi yingaloroe otsük nzo ethüm vanthukcho. ontena Solomon ji Potsow lona nkae yithokcho, 4 osi ombo sonale potsow thanpo khüma yicho. Opo David na Potsow lo ntsakata vamo ji esüa Solomon najo n tssochev sicho. 5 Ombona Sidon potsow eloe Astarte ji khümcho osi Ammon potsow etssakthav Molekh jiha khümcho. 6 Opo David na Potsow lo chüngchünga vamo jito n tssov ombona OPVÜI mhadungo mmen tssocho. 7 Jerusalem na engrhewoe phunglan jilo ombona Moab potsow etssakthav Chemosh ji khümphen tssokachicho, osi Ammon potsow Molekh ji khümphen ha tssocho. 8 Ombona ombo eloe metapoe kyon jiangna owo khüma tssütsserhüm runga othan picheo meta jiang lo ha onte potsow khümphen tssoe varayicho. 9-10 OPVÜI Israel Potsow na yenjo eni ombo nduki metapoe potsow ti-khümle to ombo ezothaka ha Solomon na OPVÜI yi n ngayiv ombo thüngi na tsani yicho. Hojitsükona OPVÜI na Solomon thüngi lüm tsuki heto ezocho, 11 "Nina tsüngtani a shikhfü jiang yesothaka, osi athüngi ntsata ji yesothako jina, ana ni ekhüngyan ji ni khelona khi niküpo tsüphoe tsüka khelo theyiv to phyochakala. 12 Tokhatola nipo David yikrachi lona ana ni eküm evanthüng mek na ni tsoe na yansathüng ti tssovka. 13 Tolea ekhüngyan totona jo ana ombo thüngina khiyiv meka, a phajae David yikrachi lona, osi ana a yantsü tsso Jerusalem ji tsükona pvüji motsünga hakae ombo vayivka."
Solomon Ri Jiang
14 Hojito OPVÜI na Edom lo mesao wopan lona Hadad ji ntssungi Solomon thüngi ori tssothukcho. 15-16 Nkolo David na Edom khyocho sülo jo ombo rasan esopvüi Joab na echü juthelo hoji wocho. Hoji sülo ombona ombo woro jiang nzo jilo choro tiruk vancho. Hojithüng ontena Edom lo eboetso kvüta vancho sana lüngthae sisi 17 Hadad tona Hadad opo phajae Edom kyon ejoma Ejip metae tsani yicho jiang to tae enhyokacho. (Hojithüng jo Hadad jo ngaro tssocho.) 18 Ontena Media lona khochi Paran lo wocho osi hojilona kyon ejoma na onte phana nzo wotacho. Ontena Ejip metae owo mesao ji nduktacho osi mesao jina meta tara Hadad picho osi etsoyu ha ombo picho. 19 Hadad ji Ejip mesao na chokata yicho, hojitsükona ombona orha mvü, Tahpanes mesali ji oka ji Hadad khi soa vanthukcho. 20 Ompvüna otsoe Genubath to tsa bukicho osi ngaro ji mesaki na mesali na süphichecho osi mesatso jiang onte nzo khyocherankümcho. 21 David chüthaka osi ombo rasan esopvüi Joab ha chüthaka to Ejip metae na Hadad na zoale ombo na heto mesao ezocho, "A metae a yithuka." 22 Tole mesao jina engacho, "Ntiotssole la, ana ni elümo n tssochecho na oki ni yihungalo?" Tole Hadad na ezocho, "To eyi tae ayithuka." Tosi ombona ombo metae yi sicho. Hadad ji Edom mesao tsso jina Israel ri n mhon tsüka tssocho. 23 Potsow na Eliada tsoe Rezon ha Solomon thüngi n khyingtav sithukcho. Rezon na ombo pvüi Zobah mesao Hadadezer thüngina tsani yia vancho, 24 osi ombo ji n thae esopvüi kümi sicho. Hoji jo David na Hadadezer ji khyoe ombo nzanchiwo Syrian jiang lüngtharae sicho sülo tssocho. Rezon tona ombo woro to na Damascus lo owo vanta vancho, osi ombo woro jiangna Syria lo mesao ombo kümthukcho. 25 Ombo Solomon echungo jo Israel ri tssocho.
Potsow na Jeroboam Phyochak Vayiala
26 Solomon küpo tsüphoe ombo panlana eyi yolo tsüka jo Ephraim lo Zeredah yamo Nebat tsoe Jerobaom ji. Jeroboam oyo jo Zeruah to tsa emi tssocho. 27 Onte nkhyingtao motsü ji heto: Solomon na engrhewoe liko jilo ochon hantheta vancho osi yantsü pikhfü ji tssochoa vancho. 28 Osi Jeroboam jo khyingroe thojürumhen tsso jina Solomon na Manasseh tona Ephraim to meta jianglo khüngka-jokhe zae jiang topvü pono esopvüi tssothukcho. 29 Tsüngona lo Jeroboam na Jerusalem lona yentsa yia vanle zenkhying Ahijah Shiloh yamo jina ora lanina omboti ndukcho. 30 Ahijah na ombo phuknrhüo sü ethan ji khichei taro eni rechei bensi heto Jeroboam ezocho, 31 "Süporo taro jo nina khia, ntiotssole Israel Potsow OPVÜI na heto phyoala.'Ana ekhüngyan ji Solomon khe lona khi pvüji taro ni pivka. 32 Solomon na pvüji motsünga tae vavka, hoji ha a phajae David yantsü etssov Israel meta topvü lona ethüngcheo ji myingona enhyokae vanthukala. 33 Ana heto lyuo shijo Solomon na athüngina tsani metapoe potsow shiang khüma yithako ji tsükona: Sidon eloe potsow Astarte; Moab potsow Chemosh; Amon potsow Molekh to shiang. Solomon na ajancho n zov sithaka; osi a yizüng jiang n benphiv opo David esüa mek na mmen tssothaka. 34 Tokhatola ana Solomon thüngina ekhüngyan totona khiv meka, osi ombo eküm evanthüng jo ana etho lo ombo vanthokvü ka. Hoji jo ana a phajae David, ana ethüngcheo jina a yizüng enga benphiwo ji myingona ana hojito tssovka. 35 Ana Solomon tsoe ji khelona ekhüngyan ji khi pvüji taro ni pivka, 36 tokhatola a phajae David na yansanrhüa yithoku tsükona osi ana a khümphen yantsü ethüngcheo Jerusalem myingona pvüji motsünga jo Solomon tsoe jiang khi sa vanthokvü ka. 37 Jeroboam ana ni ji Israel mesao ni kümthukvü ka osi nina chokao meta jiang nina savka. 38 A phajae David na tssoji esüa nina khochaki ayi enga na, osi a yizüng jiang benphia a elümo tssochena, ana yuta topvülo ni ndüngo thei vamka. Ana Israel mesao ni kümthokvü ka osi ana David thüngi tssoji esüa ni tsoronichen na meta savka. 39 Solomon mmen tsükona David tsoe jiang khangshivka, tolea nchünkhon jo khangshiv meka.' " 40 Solomon na Jeroboam lüngthav yancho khatola ombo na tsani oyi Ejip mesao Shishak tsankacho osi Solomon echü nandang jilo vancho.
Solomon chüo Ji
41 Solomon na tsso jiang topvü, ombo elhi osi ntsinran topvü Solomon motsü kako jilo erani lia, 42 Ombona Israel topvü pono Jerusalem lona yansa nzyu zhüro sacho. 43 Tosi ombo chüi David yantsü lo ombo shothecho, osi ombo tsoe Rchobaom na ombo echunga mesao kümcho.
Jükiwoe Ekhüngyan Jiangna Panlanala
1 Jükiwoe Israel ekhüngyan kyon topvü Shechem lo etsseni Rehoboam ji mesao kümthokvü sa vamo jilo Rehoboam na wocho. 2 Nebat tsoe Jeroboam, Solomon ekyu lona Ejip metae tsanthe vamo jina hoji zoale Ejip metae na kholani yicho. 3 Jükiwoe pvüji kyon jiangna Jeroboam tsalo wothukcho. Osi onte topvüna owo heto Rehoboam ezotacho, 4 "Nipo Solomon na elümoto e khangshia e sacho osi e pono oha mmyinga e ndungkayicho. Nina e ha shiang e zükhokayisi elaro eküm e vanthukvüo ena ni küpo vam." 5 Tole ombona onte ezocho, "Tsüngon ethüm sülo rolantava tona ana nte janlamka," Tole ontena yi sicho. 6 Mesao Rehoboam na opo Solomon küpo yansae mmhom tssoa ro eramoe jiang tsae heto engacho, "Ntena jo ana kyon shiang kvüto janlam etüma to zecheta?" 7 Ontena janlancho, "Nina kyon shiang mmhona yansav zikana ontena chomo jiang bencheo janlana, tona ontena yuta topvülo ni longtsükata, ni benkavka." 8 Tole ombona eramoe jiang ntssung khi thung jo ongo yinga, nungori ren ndungtssung ethüngcherae vamo jiang thüngi owo heto engacho, 9 "Ntena jo kvüto a zovla? Kyon jiangna oha zükhokayile to chonta vamo jilo ana kvüto tssoyiv etüma?" 10 Ontena janlancho, "Heto onte ezoa: 'A yingtamo shijo apo eryu lona tsükata!' 11 'Osi apona oha mmyingu nte hanthukcho tssona jilona mmyingkao ana nte hanthukvüka. Ombona wozhüna nte erhüpcho tssona; Aiyo kurü shenphenzhü khi nte erhüpvü ka!' " 12 Tsüngon ethüm sülojo phyotao ji ephan kyon topvüna Rehoboam thüngi wotacho. 13 Mesao jina eramoe jiang yi ji sisi elümoto oyi karaka onte janlancho, 14 khyingroeren jiangna ombo ezoji esüa ombona heto onte ezocho, "Apo na oha mmyingu nte hanthukcho, küma ana hojilo na mmyingkao nte hanthukvü ka. Ombona wozhü na nte erhüpcho; Ana kurü shenzhü khi nte erhüpvüka!" 15 Hoto tsso jijo OPVÜI na Shiloh lona Nebat tsoe Jeroboam thüngi Ahijah zenkhying yakchia ezoe lioji benthukvü tsükona. Hoji tsükona mesao jina kyon jiang yi ji mmyinga n khiyiv sicho. 16 Mesao na onte yi ji n ngayiala to kyon jiangna ntsiale heto tüngtacho, "David osi ombo wopan jiang moni sithuka! Ontena ntio etssoyicho lichola? Israel kyonden, oki yitava! Rehoboam khi ombobo zethuka!" Hoji tsükona Israel kyon jiangna panlana phanthicho,17osi Rehoboam jo Juda kyon jiang pono tae yansae kümcho. 18 Tole Rehoboam mesao na khüngka-jokhe zae jiang yolo Adoniram ji kyon jiang thüngi lanlyulo wothukle, ontena ephyatsüngi ombo sicho. Tole Rehoboam na zaktole ombo ritsso zotoro jilo tsanthe Jerusalemi yi sicho. 19 Hojilo na benkae ekhüngyan jükiwoe Israel kyon jiang na David mesa wopan tssaka yicho. 20 Jeroboam na Ejip metae na elani yithaka to Israel jiangna zoale, ontena kyon jiang sanrhyutsü yutalo ombo tsae Israel lo mesao ombo kümthukcho. Osi Juda pvüji taena David wopan yansa lo vancho.
Shemaiah Zenkhyingyi
21 Rehoboam na Jerusalemi chiyi Juda tona Benjamin to pvüji lona ritssoe mmhom 180,000 ethüngchecho. Ombona jo ekhüngyan jükiwoe Israel kyon jiang ori tssoe khyolani khiv tssocho. 22 Tokhatola OPVÜI na zenkhying Shemaiah tsae 23 Rehoboam tona Juda osi Benjamin kyon jiang thüngi heto ezole to ezocho: 24 "Nte jeniden Israel kyon jiang thüngi ori ti-tssotava. Nte topvü oki elani yitava. Shiang hetopvü a lüm erüng ephan tssoaka." Onte topvüna OPVÜI yi engae oki elani yi siracho.
Jeroboam Na OPVÜI Thüngina Nkae Yiala
25 Jeroboam mesao na Ephraim phunglanro jilo Shechem yantsü jilo rizümphen tssoe jilo yuta tara vancho. Jisülo jo ombona owo Penuel yantsü jilo rizümphen tssocho. 26-27 Ombona heto phyocho, "Enhünga shi ephan jo a kyon jiangna Jerusalem khümphen jilo na owo khümta na ontena longtsüka ji Rehoboam Juda mesao ji thüngi mpato yi siv osi a lüngthae siv." 28 Nchümchoe zesi, ombona shona na tssibung kisü eni nsüngrüi vasi heto kyon jiang ezocho, "Ntena Jerusalemi khümo sunga ota vanthaka. Zetava Israel kyonden, Ejip metaena nte socheo potsow jiang shiang je!" 29 Ombona shona mangsü kisü motsünga ji Bethel lo va, motsünga ji Dan lo va to tssocho. 30 Hoji tsükona kyon jiangna mmen tssota, ontena Bethel tona Dan to lona khümo wotacho. 31 Jeroboam na phunglan kvüri ha khümphen tssokachirae Levi pvüji meko tüv wopan lona pvüti ethüngcherae vanthukcho.
Bethel Lona Ekhümvü Ji N lanthukcho
32 Juda lo tokhu ji esüa Jeroboam na choro tizaoto jilo tsüngon taro mongoto jilo tokhu ha lithukcho. Bethel lo ombona tssibung kisü nsüngrüi vao ji thanphen jilo ombona thancho, osi Bethel lo ombona khümphen tsso jilo ha pvüti vanthukcho. 33 Osi ombona kokae tsüngon, choro tizaoto jilo tsüngon taro mongoto jilo ombona Israel kyon tsükona tokhu soyingi vao jilo ombona owo Bethel lo othan pia tukhu ji khitacho.
1 Jeroboam na othan piv thanphen jilo phanthi vanathüng ji OPVÜI yizüng ephan Juda zenkhying tsükana Bethel lo owo Jeroboam mhadungo mangcho. 2 OPVÜI na ezoji ephan zenkhying jina thanphen ji heto phyoa khoe sicho, "O, thanphen, thanphen, OPVÜI na heto phyoala, David wopan lona Josiah to tsa ngaro tsüka bukvü ka. Ombona nte pvütiden ochoangna n longtsüi jiang na othan nte pia vamo jiang elhi tssoyia vancho sana jina nte lüngtharavka. Osi ombona nte poni na kyon ryu rungu ka." 3 Zenkhying jiang na heto phyolancho, "Thanphen shiji elungi vanroe sivka, osi jilo live jiang nzüroe sivka. To sanati OPVÜI na a yakchia nsanchosaka to ntena engathevka." 4 Jeroboam mesao na hoji zoale zenkhying ji tssyukata phyocho, "Kyon shi rhümata!" Tole jitopvü mesao khe ji chüi sisi tssünglani n khichev sicho. 5 Osi zenkhying jina OPVÜI myingo na phyoji esüa jitopvü thanphen ji vanjoe roe sicho. 6 Tole Jerobaom mesao na zenkhying ji ezocho, "Nzansi OPVÜI ni Potsow thüngi randana osi a khe shi a emiyile to a jonjiyia." Zenkhying jina OPVÜI thüngi randan le mesao khe ji emiyicho. 7 Mesao jina zenkhying ji ezocho, "Aphana aki oro ntiosana tsoyua. Nina ntio tssocho sana ji man ana ni yantsovka." 8 Tole zenkhying jina janlancho, "Nina ni ekhüngyan chiso mpato apilea ana ni phana oyi ni etsoyu tssov meka. 9 OPVÜI na ntia ti-tsoyule osi ana rojiwoe na tiyilanle to a ezocho." 10 Hojito ombona ro lantsuk jiwoe na mekna thanpoewoe na yi sicho.
Bethel lo Zenkhying Eson Ji
11 Yuta jilo Bethel lo zenkhying eson tsüka vancho. Hoji nchuk Bethel lo OPVÜI na ombo zenkhying yakchia ntio tssocho sana osi Jeroboam mesao thüngi ntio ezocho sana ombo tsoe jiang na oyi ombo ezocho. Tole zenkhying eson jina engacho, 12 "Ombona yiathüng ntio lamoe na yichola?" Ontena olan ji ejüle 13 ombona ombo Gadho jilo khukthephen ekachi ombo tsankathuk le to ezocho. Ontena khuthephen ekachiyile ombona jilo tsankae Juda lona erowo zenkhying ji, 14 yana olan ji dunga jolowole zenkhying jina lümrodung kupi khukthe esana vancho owo phayacho. Ombona engacho, "Nino Juda zenkhying ji alo?" Tole ombona, "Hoka, hoji aka." to janlancho. 15 Tole ombona "Oro athüngi etsoyu tssoa" to tsacho. 16 Tole Juda zenkhying jina janlancho, "Ana ni phana oyi ni sochobencho n khiche. Osi ni nzo ntia etsoyu shilona ntssoche, 17 ntiotssole OPVÜI na shilona ntia ti-tsoyule osi lanpowoe na kholani yile to a ezocho." 18 Tole Bethel lo zenkhying eson jina ombo ezocho, "Ana ha ni esüa zekhying tsüka, osi OPVÜI na lanben rothuka ana oro ni sosi oyi ni sochobenchole to a ezocho." Hojito zenkhying jina ejüng phyocho. 19 Tole Juda zenkhying jina zenkhying eson ji phana oyi ombo nzo etsoyu tssocho. 20 Onina etsoyu tsopheni khuthe vanathüng OPVÜI na eson ji thüngi Potsow yi heto yicho, 21 osi ombona Juda zenkhying ji heto tüngkachia ezocho, "OPVÜI na phyoala, nina ombona ni ezo jiang n tsso osi ombo yi n ngacho to. 22 Ombona meta shilona ntia etsoyu ti-tssole to ni ezo jiang nina n nagav meta jilo elani oyi etsoyu tssothaka to. Hoji tsükona ni chüthokvü osi ni müng jo ni wopan müngsipheni siv meka." 23 Onina tsoyuta-thakale zenkhying eson jina Juda zenkhying ji tsükona gadho ji tsankav methakicho, 24 osi ombona gadho ji mangkvüi na yicho. Tole olani na hingho nduki ombo rümcho. Osi ombo müng ji lanpvüi erichi vanthuksi hingho ji tona gadho jito onio hoji ndüngo ngangta vancho. 25 Tothüng ji kyon ochoang sana jilo oyi ombo müng ji ndüngo hingho vamo ji hungcho. Jitsükona ontena Bethel lo owo ontena ehungo ji ezotacho. 26 Zenkhying eson jina hoji zoale heto phyocho, "Hojijo OPVÜI jancho nzowo zenkhying jika! OPVÜI na phyo ji esüa ombona hingho rothuki jina ombo rümthukcho ka." 27 Tosi ombona ombo tsoe jiang ji ezocho, "A gadho jilo tsankaphen atheyia." Ontena theyile, 28 Ombona olan jiwoe owo zecho tole zenkhying ji müng ji lanpvüi erichi vasi hingho jiha Gadho ji woniata jilo mangtapvü vana hungcho. Hingho jina echümüng jiha n tsohan nna gadho jiha n rüm tona vancho. 29 Jisüi jo zenkhying eson jina omüng ji khi ombo gadho jilo ejümkachi Bethel lo hansi oyi nungra yuta khisi juthe esiv tsükona khicho. 30 Hojito ombona hansi oyi ombo opan müngsipheni sicho, osi ombo tona ombo tsoeden jiang na heto phyota nungratacho, "O ojenio, O, ojenio!" 31 Omüng ji shothesi sülo zenkhying eson jina ombo tsoe jiang heto ezocho, "A chüana okhüp shilo a shothetakhe osi ombo ndüngo a shothetakhe. 32 OPVÜI na ombo yakchia Bethel lo thanphen ji osi Samaria lo khümphen topvü tsükona phyo jiang benkham ka."
Jeroboam na Echürhükao Mmen Tssoji
33 Jerobaom mesao na mmen elhi lona n samvü kyongkata tssocho, osi ombona tsso thanphen jiang lo ezae pvütiden jo wopan thama lona ethüngchecho. Ochona pvüti tssohunga na thama ombona khochaki pia pvüti kümthukcho. 34 Ombona heto mmen tsso ji yakchia ombo yansa ji monlangi sicho.
Jeroboam Tsoe Echü Ji
1 Hojithüng ji Jerobaom mesao tsoe Abijah ji racho. 2 Osi Jerobaom na ombo engh ji heto ezocho, "Ochinaha ni n chetheo jitüv pipo hansi mphoa Shiloh lo Ahijah zenkhying ochona ana Israel lo mesao tssov to phyocho sana ji vanphen jilo woa. 3 Osi hümri taro, hümri enüngu tara, tsakijü opvü motsünga to ombo hanisi woa. Osi eni tsoe shi mhadungi ji kvüto tssov sana ji ombo engae zeta tona ombona topvü ni ezovka." 4 Ompvüna Shiloh lo Ahijah ki wocho. Esonlani etsso jina Ahijah ji omhyik juki sithakcho. 5 Jeroboam eloe jina ompvü tsoe ra vamo jitsükona ombo ngatüngngarilo tsata to OPVÜI na Ahijah ezothakcho. Osi kvüto phyov sana jiha OPVÜI na ombo ezothakcho. Jerobaom engh jina chirole ompvüna kyon thanpo esüa kümi chirocho. 6 Tokhatola ompvü na oro Ahijah kipüng epyanale, Ahijah na ezocho, "Rhoroa, nino ocho sana ana ni ntsika, nino Jeroboam engh jika. Nino ntiloi oyam kümi mphoala? Ana ni tsükona yivon n mhom lia. 7 OPVÜI Israel Potsow na heto phyoala to oyi Jeroboam ezoa, 'Ana kyon yolona ethüngche a kyon Israel esapvüi ni tssothukcho. 8 Ana ekhüngyan ji David wopan khe lona khi ni picho. David jo ayi engae kyon tsüka, ombona a yizüng jiang engae jiang ephan benphicho osi ana ntio ezoa sana jiang ephan tae tssocho. 9 Ni vüngi esapvüi jiang lona n mhonka nina mmen tssothaka. Nina a sithaka osi nipopo kisü tona yonjak kisü to khümphen nsüngrüi ji yakchia alüm etssuk shichethaka. 10 Hojitsükona ana ni mesa wopan pono tssorophyoro sothechivka, jijo ni wopan lo eboetso ngaro eran chüvka. 11 Ni wopan ochoang yantsü chungina chüa sana jiango füro na tsoe sivka, osi yantssae na echüo jiango müngtsov na tsoe sivka. A, OPVÜI jina, phyothaka.'" 12 Elani Ahijah na Jeroboam engh ji thüngi heto ezoalancho, "Enhungo oki yia. Nina oyan oyi epyanpvü na ni tsoe ji chüvka. 13 Osi Israel topvüna ombo chüo ji kyatavka osi ombo shothevka. Osi ombo wopan yolo mmhona shothei esi jo ombo tae tssovka, ntiotssole OPVÜI Israel Potsow na ombolo emathacho. 14 OPVÜI na mesao ethan ethüngi Jerobaom wopan ji monthokvü sala, 15 OPVÜI na Israel khang shivsala, osi ombona Israel jiang ji zhükhfü na benbuk enhyoka to enhyokvü ka. Ombona epio meta mmhom shilona ombona Israel jiang rukchuki ezonsoarae Euphrates zhükhfü pankawoe yithuku, ntiotssole ontena Ashera potsow nsüngrüi khümta ombo lüm tsukthukcho. 16 OPVÜI na Israel ji khoe sivka, ntiotssole Jeroboam na kisü nsüngrüi Israel jiang mmen tssothukcho." 17 Jeroboam engh jina Tirzah lo elani yicho. Osi ompvü na oyi oki epyanpvü ompvü tsokhying ji chüi sicho. 18 OPVÜI na ombo zenkhying Ahijah yakchia phyo ji esüa Israel kyon jiangna ombo tsükona nungra kyata si shothei sicho.
Jeroboam Echüo Ji
19 Jeroboan na tsso jiang topvü, ritsso tssolea, yansa motsü tssolea, topvü Israel mesae jiang motsü jilo eranrae lia. 20 Jeroboamna nzyu mekyusi eni mesae tssocho. Ombo chüi shothei sicho osi ombo tsoe Hadad na ombo echungcho.
Juda lo Mesao Rehoboam,
21 Solomon tsoe Rehoboam na Juda lo mesao etssov benkatathüngjo ombo nzyu zhüro si ekhao to tssoa vancho, osi ombona Jerusalem lona nzyu taro tiying sacho, Jerusalem jo OPVÜI na meta topvü lona ethüngche ombo khümphen osi yantsü ji tssoa vacho. Rchobaom oyo jo Ammon yamo Naamah to tsacho. 22 Juda lo kyon jiangna onte vüngoe omotsüi yithako jiang topvü lona kyongkata mmen tssoe OPVÜI lüm tsukthukcho. 23 Ontena potsow ejüng tüv kisü nsüngrütacho, ontena phunglanro tona odung khümcho topvü lo durhyu osi Ashera potsow kisü chümkachi khümtacho. 24 Hojilo n mhonkao jijo, kisü khümphen jiang loji lonsülonphyoe eloe vanthukracho. Israel jiang na meta jilo rheyia thüng OPVÜI na phani siwo jipo jiang tssolanphyolan eyikrathav jiang topvü Juda kyon jiangna tssocho. 25 Rchobaom na nzyu mongo to sathüng Ejip mesao Shishak na Jerusalem thüngi ori tssocho. 26 Ombona khümpheni tona mesaki jianglo tssentssü tsütsailan jiang to khicho osi Solomon na shona chanphen pikuk tsüphov joe vao jiha khicho. 27 Hojiang nliche vav tsükona Rehoboam mesao na yongmen yonjak na chanphen phikuk nsüngrüi vacho osi kipüng enhyako jiang khelo theyia zeyata vanthukcho. 28 Mesao na kvüta khümpheni woana enhyang jiangna chanphen phi ji khi bensi osi elani oyi enhyang ki jilo vatalancho. 29 Rchobaom mesao na tsso thanpo jiang topvü Juda mesoe jiang motsü lo erani lia. 30 Yuta shiang topvü lo Rehoboam tona Jerobaom to ori tssota mungcho. 3i Rchobaom chücho osi David mesao yantsü mesakhüp lo ombo sicho, osi ombo tsoe Abijah na ombo echungcho.
Juda lo Abijah Mesao
1 Israel mesao Jeroboam yansa nzyu taro tizaoto jilo, Abijah na Juda mesao kümcho, 2 osi ombona Jerusalem lona nzyu ethüm sacho. Ombo oyo jo Absalom otsolov Mackah to tsao ji. 3 Ombona omotsü David na OPVÜI Potsow lo longtsükata roji esüa n tssona opo esüa OPVÜI lo n khochak na mmen tssocho. 4 Tokhatola OPVÜI na David yikrachi lona OPVÜI na ombo tsoe tsüka Abijah khi Jerusalem ji nkohoa vanthukvü tsükona picho. 5 OPVÜI na heto tsso jijo David na Hittite eloe Uriah thüngi worio ji yakajo yuta topvü lo ombo yizüng jiang topvü benphia roji tsükona. 6 Abijah yansa yuta tenhya ji Jeroboam ha Rehoboam oni ori tssotae sicho. 7 Osi Abijah na etssowo thanpo jiang topvü Juda mesao jiang elhi motsü kakolo eranrae lia. 8 Abijah chücho osi David yantsüi shothe sicho osi ombo tsoe Asa na ombo echungcho.
Juda lo Asa Mesao
9 Israel lo mesao Jeroboam yansa nzyu mekyuoto jilo Asa na Juda mesao kümcho, 10 osi ombona Jerusalem lo nzyu zhürosi ekha yansacho. Opyo jo Absalom otsolov Maakh to tsao ji. 11 Omotsü David na tsso ji esüa Asa na ha OPVÜI emathao tssocho. 12 Ombona meta jilo kisü khümphen jianglo eloe nthae jiang topvü phani sicho osi ombo omotsüi jiang na nsüngrüo kisü jiang topvü ombona khi sicho. 13 Opyo Maakah na ronsyu potsow Ashera kisü epholathav nsüngrüo jina ombona ompvü ji mesao oyo n tssothoku phani sicho. Asa na kisü ji roe Kidron hayi na rüngcho. l4Asa na kisü khümphen jiang topvü roe n sia khatola OPVÜI lo ombo eküm echung longtsüka vacho. 15 Ombona OPVÜI lo khochaki pio tsütsailan jiang topvü ombona khümpheni vacho. Osi ombona OPVÜI lo khochaki pio shona janti jiang ha khümpheni vacho. 16 Juda mesao Asa tona Israel mesao Baasha to onina oni esa yuta tenhya ji woni ori tssota vancho. 17 Baasha na Juda ori tssocho osi Juda lona chirorheyi etssoe topvü khaniv tsükona ombona Ramah lo rizümphen yantsü nsüngrücho. 18 Jitsükona mesao Ramah na khümpheni khochaki vae lio shona janti tsütsailan jiang tona mesaki lio jiang to topvü khi Syria lo Hezion tsoe Tabrimmon tsoe ji tsoe Benhadad mesao Damascus lo evamo ji thüngi heto ezoa ombo kyon jiang hanthuksi wothukcho: 19 "Eni omotsü jiang esüa eniha shentae vantavka. Shona janti shiang ni tsükona yantso ka. Enhungo nina Israel mesao Baasha nini shentae elio ji vachia, tona ombona a metalo ombo rasan vamo jiang khi hana yivka." 20 Asa na phyo jilo mesao Benhadad na theta ombo rasan esoeden jiang tona rasan jiang to wothuka Israel yantsü jiang thüngi ori tssocho. Ontena ijon, Dan, Abel, Beth Maakah, Galilee wozhü tsa jiang lo meta jiang tona Naphatali meta topvü to khyoe khicho. 21 Baasha mesao na hoji yivon ji zoale, Ramah yantsü jilo pikhfü theta vamo ji esani sisi Tirzah lo yi sicho. 22 Jisülojo Asa mesao na Juda meta topvülo kyon tsükalea n khachona kyota Baasha na Ramah pikhfü thev otssüng olong rüngrüi vao jiang khi hantasi yitale to ezocho. Hoji tssüng olong jiang khi Benjamin metalo Mizpah tona Geba to pikhfü thecho. 23 Asa mesao na tsso elhi than po topvü, lüm etsson elhi etsso jiang, yantsü pikhfü theo jiang, topvüto Juda mesaeden motsü eranphen kako jilo eranrae lia. Tokhatola Asa ji esonlani jo ojolo nochonori khyingi n kanphichev sicho. 24 Asa ji chücho osi David mesa yantsü jilo okhüp jianglo ombo sicho osi ombo tsoe Jehoshapat na mesao ombo echungcho.
Israel lo Nadab Mesao
25 Juda lo Asa mesao yansa nzyu enioto jilo Israel lo Jeroboam mesao tsoe Nadab na mesao kümcho osi ombona nzyu eni sacho. 26 Opo na worio mmen tssoji esüa omboha mmen tssoa Israel ji mmen tssothukcho. 27 Nadab na ombo rasan sosi Philistia lo Gibbethon yantsü ji haa vanatnüng, Issakhar pvüji lo Abijah tsoe Basha na okyak tssoe Nadab lüngthacho. 28 Juda lo mesao Asa esa nzyu ethümoto jilo heto tssocho. Osi Baasha na Nadab echungi Israel mesao kümcho. 29 Ombona jitopvü Jerobaom wopan jiang lüngthav benkacho. OPVÜI na ombo phajae, Shiloh lo Ahijah zenkhying yakchia phyoe vao ji ephan Jeroboam wopan topvü lüngtharae sisi tsükatia n hyokav sicho. 30 Hojito tsso jijo Jeroboam na ombo mmen osi Israel mmen tssothoki OPVÜI lüm etsuk shichei vao jina. 31 Nadab na tssocho thanpo topvü Israel mesao motsü eranphen kako jilo erankarae lia. 32 Juda lo mesao Asa osi Israel lo mesao Baasha onina oni yansa yuta tenhya ji woni ori tssota vancho.
Israel lo Baasha Mesao
33 Juda lo Asa mesao yansa nzyu ethümoto jilo Ahijah tsoe Baasha na mesao kümcho osi ombona Tirzah lona nzyu mekyusi mezhü sacho. 34 Ombo vüngoe Jeroboam mesao esüa ombo ha OPVÜI mhadungo mmen tssoa mmen elhilo Israel jiang sokacho.
1 OPVÜI na Baasha tsükona Hanani tsoe Jehu zenkhying ji yakchia heto phyothukcho, 2 "Nino ocho sanatia kyon na ni n tsiv vancho, tokhatola na a kyon Israel jiang esopvüi ni kümthukcho. Tole enhungo ninaha Jerobaom esüa mmen tssoa a kyon jiang mmen tssothukthaka, osi nte mmen jina a lüm tssukthukthaka, 3 hoji tsükona ana ni osi ni wopan topvü khi sivka, ana Jeroboam thüngi tsso ji esüa. 4 Ni wopan kvüta yantsüi na chüa na omüng ji füro na tsovka, osi hapoe na kvüta chüa sana jiango müngtsov na tsoe sivka." 5 Baasha na tsso elhi thanpo jiang osi ombo lüm etsson elhi jiang topvü Israel mesao motsü kako jilo erankhani lia. 6 Baasha ji chüi Tirzah lo shothei sicho osi ombo tsoe Elah na mesao ombo echungcho. 7 Baasha tona ombo wopan to thüngi yithen shi ji OPVÜI na zenkhying yakchia ezothukcho, ntiotssole Baasha na OPVÜI mhadungo mmen tssocho. Ombona OPVÜI lüm tssukthuko jijo omboha Jeroboam esüa mmen tsso ji tae mek, tolea ombona Jero boam wopan jiang ha topvü to lüngthae sicho.
Israel lo Elah Mesao
8 Juda lo Asa mesao yansa nzyu mekyusi tiruko to jilo, Baasha mesao tsoe Elah na Israel mesao kümcho osi ombo na Tirzah lona nzyu eni sacho. 9 Ombo nzanchi tsüka Zimiri ochona mesao ritsso zotoro jiang chiso pono ezepvüi sana jina ombo panlana phanthicho. Elah na tsüngona lo Tirzah lona ombo na mesaki ezepvüi Arza ki na suko yua kinoa vancho. 10 Tole Zimri na jilo rhowo ombo lüngthae sisi, mesao ji ombona kümcho. Shiang hetopvü Juda lo Asa mesao yansa nzyu mekyusi tiyingo to jilo tssocho. 11 Zimri na mesao kümale jitopvü Baasha wopan jiang topvü lüngtharae sicho. Wopan jilo eboetso topvü tona onte shom ebeotso jiangha to lüngtharae sicho. 12 Hojito OPVÜI na Jehu zenkhying yakchia Baasha wopan topvü lüngthacho. 13 Baasha ha ombo tsoe Elah onina kisü khümcho lona osi Israel jiang mmen tssothuko jina OPVÜI Israel Potsow na lüm tssukcho. 14 Elah na tssocho thanpo topvü Israel mesao motsü kako jilo eranrae lia.
Israel lo Zimri Mesao
15 Juda lo Asa mesao na nzyu mekyu to sathüng, Zimri na Tirzah lona tsüngon tiying Israel sacho. Israel rasan jiang na Philistia lo Gibbethon yantsü ji hayae vancho, 16 tole Zimri na okyak tssoe onte mesao ji lüngthao ji yilan ji zocho. Tole jitopvü ontena Omri to tsao onte esopvüi ji Israel mesao kümthukala to phyochaktacho. 17 Omri tona ombo rasan jiang to na Gibbethon yantsü ji vachi sisi oyi Tirzah yantsü ji hayacho. 18 Tole yantsü ji oyam khelo rheyithaka to owon zoa jo Zimri na mesaki chungi rizümphen jilo rheyi jilona mesaki omi thei ombobo rungtsüngi sicho. 19 Hoji jo ombona OPVÜI tachia mmen tsso jina. Ombo vüngi mesao Jeroboam esüa omboha kija mmen licho osi Israel ji mmen elhilo sokacho yakchia OPVÜI n mathathukcho. 20 Zimri na elhi thanpo tsso jiang topvü osi ombona mphoa kyarüm elhi tsso jiang topvü Israel mesao motsü kako lo erani lira.
Israel lo Omri Mesao
21 Israel kyon jiang yolo nchüm ri n myantav chiyicho: Onte yolo ejoma na jo Tibni tsoe Ginath ji mesao tssothukhungcho, tolea ejoma najo Omri ji chokacho. 22 Sülani jo Omri chokao jiang na khyocho; osi Tibni jo chüi sisi Omri na mesao kümcho. 23 Juda lo Asa mesao na nzyu thümro si ekhao to sathüng, Omri na Israel lo mesao kümcho osi ombona nzyu tarosi eni sacho. Nzyu ovüngo tiruk jijo ombona Tirzah lona sacho, 24 osi jithüng ombona Samaria phunglan ro ji Shemer to tsao ji thüngi janti rang wothüng tiruk pia shicho. Omri na phunglanro ji rizümphen thei jilo yantsü tssoe, ombo shithuko Shemer myingo tsakata Samaria to tsacho. 25 Omri na ombo vüngoe mesao jiang topvü lona kyungkata mmen tssocho. 26 Ombo vüngoe Jeroboam mesao esüa omboha ombo kija mmen tona Israel jiang mmen elhi osi kisükhüm tolo sokao jina Israel Potsow OPVÜI ji lüm tsuk thukcho. 27 Om ri na tssocho thanpo topvü osi ombo ekhyoekhung elhi topvü to Israel mesao motsü kako jilo eranrae lia. 28 Omri ji chüi Samaria lo ombo shothecho osi ombo tsoe Ahab na mesao ombo echungcho.
Israel lo Ahab Mesao
29 Juda lo Asa mesao na nzyu thümrosi tizaoto yansasathüng Omri tsoe Ahab na Israel lo mesao tssocho osi ombona Samaria lona nzyu mekyu eni sacho. 30 Ombonaha ombo vüngi mesao jiang lona kyungkata OPVÜI thüngi mmen tssocho. 31 Ombo vüngoe Jeroboam na mmen tsso jitata na jo ombo lüm npükvü, ombona Sidon mesoa Ethbaal otsolov Jezebel ji soa vancho osi Baal khümcho. 32 Ombona Samraia lo Baal khümphen tssoe jilo thanphen tssokae khümpheni vacho. 33 Ombona Ashera potsoloe ji kisü ha nsüngrüi vacho. Ombona ombo vüngoe mesoa jianglo kyungkata mmen tssoe Israel Potsow lüm tsukthukcho. 34 Ombo echungo Bethel kyon Hiel na Jeriko ji tssocholancho. Osi OPVÜI na Nun tsoe Joshua yakchia methei vathuko ji esüa ombona Jeriko nchümchephenlong ji chümkachiathüng ombo tsokhying eramo Abiramji chüi sicho, osi ombo yantsü kibüng ji tssoathüng ombo tsokhying wokhao Segub ji chüi sicho.
Elijah Tona Tsüngkying To
1 Gilead metalo Tishbet yamo Elijah zenkhying jina Ahab mesao heto ezocho, "Israel Potsow OPVÜI eküm evamo Potsow ocho ana benkata vancho sana ji myingona ana phyoala, nzyu eni mekana ethüm eryu zhüjoa lea jov meka osi ana jole to n phyothüng jo jov meka." 2 Tole OPVÜI na heto Elijah ezocho, 3 "Meta shi lona khochi owo Jordan na engkhfüwoe Cherith zhükhfüro jilo mphoa vana. 4 Zhükhfüro jilona ojü chiyi ni yuthukvü ka osi ni etsoyu jo ana Yivan khi hansi rothuku ka." 5 Elijah na OPVÜI yi enga owo zhükhfüro jilo mphoa vancho. 6 Ombona ojü jo zhükhfüro jilona yucho osi etsoyu jo enyamyu yivan na hansi oyi picho. 7 Yuta tara sülojo zhükhfüro ji eryu n jo jina nghae sicho.
Elijah Tona Zaraphat lo Emi ji To
8 OPVÜI na Elijah ezocho, 9 "Enhungo Sidon ndüngo Zarephat yantsü ji ndüngo owo vana; hojilo evan emi tsüka etsoyu ni pile to ana ezothaka." 10 Elijah na Zarephat yantsüi emi ji thüngi wocho tole ombona yantsü kibüng owo janale emi tsüka otssüng erena hungcho. Tole ombona emi ji ezocho, "A nzansi ojü oyi ayuthuka." 11 Ompvüna khochi yiathüng Elijah na ezolancho, "Nzansi hümri ha tara abenia." 12 Ompvü na ezocho, "Eküm evamo ni Potsow myingo na ana echümala, "Ana hümri n li. Ana ohüm chencho phikukro motsünga tona mvüri jilo olive thyujü zhüjoania to tae lia. Osi hoji rüngi a tsoe ji eni tsotav kato otsung ereno rocho. E tsoyu wokhao ji hoji tssov, osi jisüi jo enaha khangtsüngi chüv." 13 Tole Elijah na ompvü ezocho, "Tionkhyua," 'Tolea oyi nte etsoyu ji methaka. Tokhatola ovüngtssoa hümri teriv rüngi oro a pidena, tosanati ni tsoe ji nini echi rüngi tsotava. 14 Ntiotssole OPVÜI Israel Potsow na heto phyoala, 'OPVÜI a shina eryu n jothukthüng nandang jo phikuk jilo ohüm chencho jüwo ji kvüthüng ha lichev meka. Osi mvüri jilo thyujü jiha tso-nghav meka.' " 15 Emi jina oyi Elijah na ezoji esüa tssocho osi onte topvüna tsüngon sunga etsoyu tssona etsov licho. 16 OPVÜI na Elijah yakchia phyo ji esüa, ohüm ha phikuk ji n jünguv jünrhücho osi thyujü ha mvüri ji n nghachev jünrhücho. 17 Nsungkhünguv emi ji tsoe ji racho; osi ombo ji phatheka phathekana kümi sülami jo chüi sicho. 18 Ompvüna Elijah ezocho, "Potsow kyon nino ntioli a lo heto tssothukchola? Nina helo ero jijo a mmen jiang Potsow khi ntsüthuklani a tsoe ji chüthukvü tsükona alo?" 19 Elijah na "Eboeroro ji a pia," to ezoa ompvü khelona khi ejümsi oki ekhaka omhawoe ombo vanphen ji sosi chungi belüngi yipkachithukcho. 20 Jisüi jo ombona tüngkachia heto randancho, "OPVÜI a Potsow, nino ntioli emi shi thüngi hetata ekhenthav tssochola? Ompvüna a nzankhünga a nijüpa vanle nina ompvü tsoe ji chüthukthaka!" 21 Jisülo jo Elijaha na ngaro ji thüngoe okhe ntichie bensi yenjo ethüm heto randancho, "O, OPVÜI a Potsow ngaro shi kümlanthuka!" 22 Tole OPVÜI na Elijah randan ji engayicho osi ngaro jina ethük echenlana kümchecho. 23 Elijaha na ngaro ji sosi oki oküpoe oyo thüngi joyi oyoji heto ezocho, "Zeta ni ngaro ji kümchethaka!" 24 Tole ompvüna ezocho, "Nino Potsow nri osi ombona ni yakchia nsanalato ana ntsithaka!"
Elijah Tona Baal Zenkhying Jiang To
1 Yuta tara sülo, eng azüm tssosi nzyu ethüm sülo, OPVÜI na Elijah ezocho, "Owo Ahab mesao khi ni hungthuka, tona ana eryu jwothukvü meka." 2 Tole Elijah na khochicho. Samaria lo otssi vara ji elümoto tsükshio jina, 3 Ahab na mesaki enhyako Obadiah ji tsacho. (Obadiah jo rüpaka OPVÜI ekhüm kyon tsüka, 4 osi Jazebel na OPVÜI zenkhying jiang lüngthatathüng Obadiah na onte nzoa khi otsük tinyan tinyan na kholuk eni tssothuki lungkvüi mphoe onte vanthukcho, osi ombona ojü osi etsoyu onte elona vancho. 5 Ahab na Obadiah heto ezocho, "Etena jünhyo akvü osi jütssa hayi akvütolo ete kurü jiangna yantsoa eküm vanphen yantavka. Tona ete na ete ekümrümo shiang tatsüngi n silea vanthukchevka." 6 Ontena meta kvülo khyua wotav sana ji chitae onte metapo metapo khyuta wotacho. 7 Osi Obadiah na yia vanle zaktole Elijah ndukcho. Ombona Elijah chethei ombo mhadungo epyakthei heto engacho, "Tsüphoeyo, otsotso nike?" 8 Tole Elijah na ezocho, "Hoka, aiyo Elijah ka." "Owo nipvüi mesao ji shilo a vanka to ezoa." 9 Obadiah na janlancho, "Ana ntio tssosoracho nino Ahab mesao na alüngthav ekyulo a vanthukala? 10 Ana eküm evamo OPVÜI myingona echümala, mesao jina meta topvülo ni yanthukthaka. Meta kvülo mesao jina ombo metalo ni n van to phyoana, otsotso ombo metalona ni n yanche to Ahab na onte echümthukracho. 11 Tole nino shilo ni vanka to owo ombo ezov a ezoake? 12 Tole ana hojito ezolo khochipvüto Potsow mon na kvüisana ni sosi yi sivo kvüto tssovla? Ana shilo ni vanka to ezole ombona ni n yanchecho jo ombona a chüthokvü. Aiyo nungo ekümo na ryupaka OPVÜI ekhüm kyon to a ti-mhechoa. 13 Jezebel na OPVÜI zenkhying jiang lüngthatathüng ana otsük tinyan, tinyan na okho eni tsoe zenkhying otsük nzoa longkvüi mphoe vanthuksi etsoyu eloni süphia vamo ji nina n zohanchoke? 14 To tssona kvütoli nina owo helo ni vanka to mesao ezole to a jenchiala? Ombona a lüngthavla!" 15 Tole Elijah na janlancho, "Ana benkao Thotsü OPVÜI myingona echümaka, ana nchüng abobo mesao mhadungo chiwo manguka." 16 Hoji tsükona Obadiah na owo mesao ezocho, tole Ahab mesao na Elijah nduko khochi wocho. 17 Ahab na ombo ndukale heto ezocho, "Israel lo ezüp sothei kyon ji ni shika!" 18 Elijah na janlancho, "Aiyo ezüp sothei kyon meka." "Ni tona nipo to na ezüp sothetaka. Nina OPVÜI yi ji n ngav Baal kisü ji khüma ka. 19 Hoji tsükona Israel topvü to Karmel phunglani na a ndukle to yizüng pia. Osi Baal zenkhying 450 jiang tona Ashera potsoloe zenkhying 400 Jezebel mesali na kyoa vamo jiang to sorasi rotale to ezoa." 20 Tole Israel topvü tona Baal zenkhyingden jiang topvü to Karmel phunglani na nduktathuku tsükona Ahab na tsarhyucho. 21 Elijah na kyon jiang thüngi ehungo ezocho, "Ntena ethüngi ekhiv yuta kvütenhya khiv ato? OPVÜI ji Potsow tssona ombo khümtava, osi Baal ji potsow tssona hoji khümtava!" Tokhatola kyon jiang na yipyaka tia n phyocho. 22 Tole Elijah na ezocho, "OPVÜI zenkhying jo a tae enhyokae vana, osi baal zenkhying jo 450 vana. 23 Toka tssibung eni süsi yitava, osi motsünga jo Baal zenkhying jiang na lüngthae rhonroe otssüng hankata – osi omi jo ti-thena vanthuka. Tona tsibung motsünga jijo ana khi hojito benri vavka. 24 Jisülo jo Baal zenkhying jiang khi onte potsow thüngi randanthuka, tona anaha a potsow thüngi randamka. Hojilo potsow kvümoe jina omi jorothuki ejanlana sana potsow ji hoji tssovka." Tole kyon jiangna hojito tssole to tüngkachita khichocho. 25 Jisülo jo Elijah na Baal zenkhying jiang ezocho, "Nte khosha ka ntena tssibung khi methakdena. Nte potsow thüngi randantava khatola omi jo tithesana vanthuka." 26 Ontena tssibung oro onte pio ji ethamvü methaki nshi etüng nandnag randantacho. Ontena, "Ejanlana, O, Baal" to tüngta thanphensa ontena ronkao ji rhüa sharia randantacho. Tokhatola ntia janlan n yicho. 27 Nshi etüngale Elijah na onte emakata heto ezocho, "Ekhyokata randantava! Omboha Potsow ka! Ombo ji omüng emha yipa vancho mpato tssovka mekana esana van cho alo yentsalo yicho sana mpato tssovka! Mekna yipi sithakcho mpatao tssov, to tssocho jo ntena ombo nthechichevka!" 28 Tole zen khying jiangna ekhyokata randan ta onte shikhfü ephan lepokro na onte tsükona ejen nshüthüng jo nykathechita randantacho. 29 Ontena mmyui etsen jana hojito tüngchotüngrita nsha tacho khatola yipyakatia janlan n yicho. 30 Tole Elijah na kyon jiang ji, "Athüngoe sena rotava." to ezocho. Tole ontena sena oro ombo hachümcho. Ombona OPVÜI thanphen sa roe lio ji ntsüpnrüpa benkacho. 31 Ombo na Jakob tsoe pvüji taro eni potsow na Israel to tsao jiang nkhen olong taro eni tsakacho. 32 Olong taro eni jiang khi ombona OPVÜI thanphen sa ronkacho. Ombona hoji nkonphia dukthecho osi duktheo ekük jilo ojü etükpvü 14 bena eyemo dukthecho. 33 Jitosi ombona otssüng ji thanphen sae ekachi, tssibung ji tsanroe otssüng jiang poni ekachicho. Jitosi ombona, "jüpvü mezhülo ojü etüki otssüng ji tona oso ji to poni chükata" to ezocho, tole ontena hojito tssocho. 34 Elani ombona, "Enhüngaha hoto lyulana" – to onte ezocho, tole ontena – hoto lyulancho. 35 Tole ojü jina thanphen ji etsonchochia joyi duktheo jilo ndüngrhyui sicho. 36 Etsen yutalo othan epi yuta jilo zenkhying Elijah na thanphen jilona owo heto randancho, "O, OPVÜI, Abraham, Isaak, Jakob, Potsow, enhungo nino Israel Potsow osi aiyo ni phajae osi shiang hetopvüto ni yizüng ephan tssoa yicho to e jüa. 37 Ajanlana, OPVÜI, a janlana, osi nino OPVÜI potsow jika to osi nina onte ji ni thüngi sosi yilamka to kyon shiang khi engathethuka." 38 Tole OPVÜI na omi jorothukcho, osi othan ji rüngcho, jilo otssüng, olong jiang rungi liko ji mpa nshüthechia rungi likoe ojü ji mpa topvü tssüm nghae sicho. 39 Kvüthüng kyon jiang na hojito tssoa hungcho sana ontena likoe vantherae heto phyotacho, "Potsow ji OPVÜI, OPVÜI ji tae Potsow!" 40 Jisüijo Elijah na heto yidan picho, "Baal zenkhying jiang rhümata, ochia ti-tsanchothuka!" Tole kyon jiangna onte rhümale Elijah na onte sosi Kishon zhükhfüi na jowo onte lüngthae sitacho.
Tsüngkying Ji Esancho
41 Tosi Elijah na Ahab mesao ezocho, "Enhungo owo etsoyu tssoa, ana eryu won zoa vanthaka." 42 Ahab na etsoyu tssolo yile Elijah na Karmel phunglani ehungo cho osi ombo kvüri ji nkhuk eni ji yutalo nkhümthecho. 43 Ombona ombo phajae ji heto ezocho, "Owo jümangoe zechia." Tole phajae jina osi oyi heto phyocho, "Ana ntia n hungka." Tole Elijah na yenjo tiying owo zechile to ezocho. 44 Tole yenjo tiyingoto jilojo oyi heto phyocho, "Ana eluk kholong kyon khe tera jümangina chiyia hunga." Tole Elijah na ombo phajae ji ezocho, "Ahab mesao thüngi owo ezoa, eryu na ombo n jolanchithüng ombo ritsso zotoro jilo tsankae oki yi sile to ezoa." 45 Tole esüngaro taena eluk enyikvü suta chiyi mpung vena ryupvü chüv benkacho. Ahab na zotoro jilo tsanthei Jezebeloe yicho. 46 OPVÜI etho na Elijah pono jorocho osi ombona osü khi eryu khüngsi Ahab vüngina yunga Jezreel woe wocho.
Sinai Phunglani Elijah
1 Elijah na ntio tssocho sana topvü Ahab mesoa na kvüto Baal zenkhying jiang topvü ji kvüto evüngki thechicho sana jiang ji ombo engh ji ezocho. 2 Tole ompvü na Elijah thüngi heto yithen yithukcho, "Nina zenkhying jiang jaktona to ana ojyua heto-thüng jana ni n tssoyiana potsow jiang khi alüngthathuku ka." 3 Tole Elijah na kyua ombo eküm shanchov yana tsani ombo phajae ji sosi Bersheba lo yicho. Hojilo ombo phajae ji vanthuksi, 4 Elijah na eng tona olan tsa lijüngi wocho. Ombona odung khümcho motsünga lo khukthei esana ombo chüi sivo to nchüma vancho. Ombona heto randancho, "OPVÜI, ana sükhying shi n hankhuka ana ha chüi a sithuka!. 5 Ombona odung ji kupi yipkachi yipthei sicho. Tole jitopvü lanben na ombo tsyukata heto ezocho, "Yipjüngchi tso-yua." 6 Ombona yipjüngchi eyingole hümri tona ojü to ombo kvüri ndüngo ekachi licho hungcho. Ombona hoji tsoyusi yipkachilancho. 7 Tole OPVÜI lanben jina yenjo enioto heto oro ombo ezoa nthechilancho, "Phanthi tsoyua, nina sunga yentsapamvü küma tov meka." 8 Elijah na phanthi hoji tsoyule jisüijo Sinai phunglani tsüngon zhuro yentsav ji etho jücho. 9 Ombona phunglan jilo owo hoji zümo ji jilo yipchocho. Jitopvü OPVÜI na, "Elijah, nino jilo ntio lyuala?" to ombo ezocho. 10 Ombona janlancho, "OPVÜI Thotsü Potsow, ana yuta topvütolo ni benkata ropvü – nitae ni benkapvü. Tokhatola Israel kyon jiang na ni thüngi ntsata ji yesothaka; ni thanphen jiang roe sithaka osi ni zenkhying jiang lüngthae sithaka. Enhungo a tae enhyokae vana – osi ontena a lüngthav a yantala!" 11 OPVÜI na Elijah ezocho, "Phunglan kvüri owo a mhadungo phanthia," Jitosi OPVÜI na tsyungryu mpung ntav rothuka phunglan jiang küngsoa, longsürhen jiang küngsothukcho, tokhatola mpung jilo OPVÜI n jücho. Jisülojo mpung ji esani nri enhyokcho tokhatola jiloha OPVÜI n jücho. 12 Nri enhyoksi sülo omi rocho – khatola omi jilo ha OPVÜI n jücho. Omi ji sülojo owon enato tssürüa zocho. 13 Elijah na hoji zoale ombo sü jina omha shüngi chiwo longkvü kibüngo manga vancho. Tole heto owon zocho, "Elijah, nino helo ntio lyuala?" 14 Ombona janlancho, "OPVÜI Thotsü Potsow, ana hetenhya shi ni benkapvü, nitae benkapvü. Tokhatoa Israel kyon jiang na ni thüngi Ntsata ji yesothaka, ni thanphen jiang topvü roe sithaka osi ni zenkhying jiang ha topvü lüngthae sithaka enhungo a tae enhyokae vana, osi ontena a lüngthav a yantala." 15 OPVÜI na ezocho, "Damaskas ndüngo lijüng jilo tsani yilana, osi yantsü jilo rhowo Hazel ji thyujü nzükata Syria lo mesao ji kümthuka. 16 Nimshi tsoe Jehu ji Israel mesao kümthokvü nzüyia osi Abel Mchola yamo Shaphat tsoe Elisha ji khi ni echungthoku zenkhying kümthokvü nzüyia. 17 Ochona Hazel khelona tsanchov tssoana Jehu na lüngthavka osi ochona Jehu khelona tsanchov tssoa na Elisha na lüngthav ka. 18 Tokhatola ana Israel lo wothüng tiying enkhyokathuku ka, Hojiang jo ochoang na alo longtsükata vansi Baal mhadungo n pyakthe osi ombo kisü n khümhan sana jiang tssovka."
Elisha Tsao ji
19 Elijah na wole Elisha na mangsüpongden sosi oli rhona vancho. Ombo mhadungoe mangsü lirhon etsa taro ekha na rhonta vancho, osi ombo wokhao ji tssocho. Elijah na ombo phukthesü ji phungi Elisha phungthethukcho. 20 Tole Elisha na mangsü jiang sisi yunga owo Elijah ezocho, "Toka ana yunga oyi apo ha ayo oni pyonta salüm eyulo ntssüpisi ni phana rovka." Tole Elijah na ezocho, "Toka ana ni tangu meka, nra oyi pyonta salüm pisi yia!" 21 Jisüi jo Elishana mangsüpong ji lüngthae nankvü jina omi tssoe oso ji ekvücho. ombona oso ji kyon jiang pile onte na tsotacho, tothakale ombona Elijah nzanchi tssoa phana wocho.
Syria Thüngi Ritsso
1 Syria lo mesao Benhadad na ombo rasan topvü ekhfürhyui, jilo yansae thanpoe otsük thümro enina onte kurü tona ritsso zotoro to theta ombo nzanchia ombona rakhoe Samria ji owo vükthechi, hayacho. 2 Osi ombona Israel mesao Ahab thüngi heto yithen pilo wothukcho, "Benhadad mesao na ni ezoala, 3 ni shona janti jiang, ni eloeden jiang osi nongori yolo etho ejüo jiang to ombo mhadungo chiro khochaki pia." 4 Tole Ahab na heto janlancho, A pvüi Benhadad ji heto ezoa, a osi ana ntio liana topvü ombona khikhuka. 5 Tole Benhadad na heto Ahab ezolanthukcho, "Nina ni shona janti osi ni eloe jiang, osi nongori jiang oro apile to ni ezocho. 6 Khatola enhungo ana aküpo tsüphoe jiang khi ni mesaki ji topvü chüthokvü ka, osi ontena tsütsailan oman elio tüv ntio hunga na topvü khivka. Ojyua heto-thüng jo ontena jilo rothakvü ka." 7 Tole Ahab mesao na meta jilo esopvüi jiang topvü tsae ezocho, "Kyontsük shina ete meta emoniv yanala, ombona a eloe jiang osi shona janti jiang choncho osi ana piv to methaki lia." 8 Tole Israel lo esopvüi jiang na janlancho, "Ombo ti-khayina sia, osi ombo phyocho ti-engayia." 9 Jitsükona Ahab na Benhadad yithenpvüi jiang heto ezocho, "Apvüi mesao ji ezoa, ana ombona chondemo jijo engayiv, tokhatola enioto jo ana ombo yi n ngayikhuk." Toajo yithenpvüi jiang na yisi elani, 10 Benhadad thüngi heto yithen hansi rolancho: "Ana kyon etsson rothuka yantsü shi roe sisi jilo varohanroe siwo jiang nte hanthuksi hepi yithukvü ka." Ana heto n tssoa tssona potsow jiang khi a chüthokvü ka!" 11 Tole Ahab mesao na janlancho, "Benhadad mesao ji heto ezoa, rasan tsotso najo ritsso thaksanati kanchana kha n thakthüng kanchana mek." 12 Benhadad na ombo ekyoe jiang, yansae thanpoe jiang to nzo süranki na suko yuta vanathüng Ahab yithen ji zocho. Tole ombona yantsü ji owo sakav tsükona methak tale to ombo woro jiang ezole ontena owo pyimta vancho. 13 Jithüng ji zenkhying tsükana Ahab thüngi owo heto ezocho, "OPVÜI na phyoala, rasantsü tsüphov ji ti-kyua, ana nchüng hoji khyo tüv etho ni pivka, osi aiyo OPVÜI ji to nina chethevka." 14 Ahab na ezocho, "Tole ochona rasan jiang sosi owo havla?" Jithüng zenkhying jina phyocho, "OPVÜI na phyoala, metaro yansae jiang na khyingroe rasan jiang sosi tssovka." Tole elani mesoa jina ezocho, "Tole rasan okho echio jijo ochona sovla? ' Tole zenkhying jina, "Nina sovka" to ezocho. 15 Tole mesao na metaro yansae jiang küpo rasan esopvüi pongdenro jiang tsotsüi otsük 232 tsachukcho. Tosi ombona Israel rasan otsük wothüng tiying ji tsachukcho. 16 Benhadad na ombo ekyoe otsük thümro eni jiang nzo nshi etüngo suko yuta vanathüng ritsso ji benkacho. 17 Rasan pongdenro jang na rivüngsi sakatacho. Benhadad na ethüngche wothuko jiangna oyi Samaria lona rasan okho tsachuka hungi Benhadad ezotacho, 18 tole Benhadad na ezocho, "Ontena ritssolo tsacho tssolea, noying mmhonta lo tsacho tssolea eküm na onte rhümae sosi yia." 19 Pongdenro rasan jiang na phonkadensi jisülo Israel rasan jiang na sakalancho, 20 Osi otsük akvüna ombobo na sakao kyon ji lüngthacho. Israel jiangna lekata phamo ji mhadungo Syria jiang na tsancho, tokhatola Benhadad na kurü mankvüi na tsancho osi kurü rasan ejoma naha ombo sürüa tsancho. 21 Ahab mesao na ritssopheni woe kurü osi ritsso zotoro jiang rechoyicho osi Syrian jiang ji khyothechi sicho. 22 Tole zenkhying jina Ahab mesao thüngi owo heto ezocho, "Oyi ni rasan jiang mmhona erhümi vata ntiotssole tsüngkying etsao shilo ha Syria mesao jina ni sakalam sala."
Syria Jiangna Yenjo enioto Sakao Ji
23 Benhadad küpo tsüphoe jiangna heto ombo ezotacho, "Israel potsow jiango phunglan potsoden tsso jina Israel jiangna khyocho, khatola hayi lona rotavo etena tonrüngu. 24 Hojitsükona rasantsü jilona esaeden thümro eni ji khi sisi onte thung ritsso esopvüiden ethüngcherava. 25 Tosi ontena rasan kvüta na osi kurü tona ritsso zotoro kvütana sisi tsancho sana jitata ethüngcheta. Etena Israel jiang thüngi ori tssovka osi enhünga jo etena tovka." Tole Benhadad mesao na onte ntssung ji engae ji ephan tssocho. 26 Tsüngkying ji yiale ontena ombo rasan jiang tsarhyui onte nzo rakhoe owo Israel jiang thüngi ori tssov tsükona Aphek yantsü lo wotacho. 27 Israel jiang ji tsarhyutae ebensü tsakathukcho. Ontena rakhoe owo Syria jiang na vamo ji tsungkho chankata vani sicho. onteji phenlungi tümi vamo Syria rasan otsson jilo etsitae zena Israel jiang nyanyanden teriv eni esüa zechecho. 28 Jithüng ji zenkhying tsükana Ahab mesao thüngi owo heto ezocho, "OPVÜI na heto phyoala: 'Syria jiangna aiyo phunglani Potsow osi hayi Potsow mek; to phyoji tsükona ana onte rasantsü emhokthav tata jiang pono ekhyo ni pivka, osi ni tona ni kyon jiang to na aiyo OPVÜI ji to a chethevka.'" 29 Syria tona Israel jiang to na tsüngon tiying jo ombobo nchenpheni vani onte zechitao vancho. Osi tsüngon tiyingoto jilo jo onte sakatae rotacho osi Israel jiangna Syrian jiang elümoto lüngthacho. 30 Jilona enhyokao jiango Aphek yantsüi tsani yitacho, tole yantsü ji pikhfüji eyae onte wothüng mekyusi tiying ejüptsüngcho. Benhadad na yantsü jilo tsani oyi oki motsünga chungchak sülamoe mphoa vancho. 31 Tole ombo küpo tsüphoe tsükana heto oro ombo ezocho, "Israel mesao jiango khonzan eliden to etena zothaka. Ena zhüsü na eryu khüngsi evüngo wozhü phakae Israel mesao thüngi wovka echonchia tona ombona khonzana ni vanthoku mpato tssovka." 32 Ontena hojito zhüsü na eryu khüngtasi evüngo wozhü phakae hantasi owo Ahab mesao ji heto ezotacho, "Ni nri Benhadad na ombo eküm tsükona ni thüngi jonjiala." Tole Ahab na onte ezocho, "Ombo eküm vanpvü alo? ombo vancho tssona montssoka! ombo ajenio esüa tssovka!" 33 Benhadad na wothuko jiangna yithen mmhom eyilota vamo jina. Ahab na ajenio to ji phyopvüna. ontena tsakae phyocho , ombo nina phyo ji esüa "nijenioka!" Tole Ahab na "Omboji athüngi sosi yia" to yizüng picho. Benhadad na yithakale Ahab na tsae ombo zotoro jilo khukthethukcho. 34 Benhadad na ezocho, "Apo na nipo yantsü khiyio jiang ana ni pilamka, osi apo na Samaria lo chonchio ji esüa nina Damaskus lo shishoyan chonchicheta." Ahab na janlancho, "Tona shiang heto engathetao shilo epyankae ana ni vachivka." Ombona hojito Benhadad thüngi ntsata vasi vachi yithukcho.
Zenkhying Tsükana Ahab Nlan Piala
35 OPVÜI yizüng ephanina zenkhying okho motsünga lo tsükana zenkhying tsüka ji ekayia to yizüng picho. Tokhatola ombona ekhiramo jina tsüka jina ezocho, 36 "Nina OPVÜI yizüng nngao jina nina ayaki yipvüto hingho na ni rümvüka." Tole ombona khochi yipvüto hingho chiyi jina ombo rumi sicho. 37 Tole zenkhying tsük jina zenkhying thanpoe ji heto owo ezolancho, "A ekayia!" tole tsüka jina ombo ekayicho osi ekhyoto ombo yonkao jina ombo meyancho, 38 Hojitsükona ombona okhfüji mphoa eyukzhüi hansi owo Israel mesao na yakchiv vamo lan jilo lantssae vancho. 39 Mesao jina yakchiale zenkhying jina tüngkachia heto phyocho, "Yikrachio tsüphoe, rasan tsükana kyon tsüka rhümae sosi oyi hoji zeyata a vanthukcho osi kyon jina tsancho jo alüngthav mekana echha jantirang 3000 akhiyiv to phyocho, tole kyon ji a khelona tsani sithaka." 40 Tolea ana thanpolipo elhina a n tssochov vanathüng kyon ji tsani sichoka. Tole mesao jina ezocho, "Nina nipopo echha ji madangi phyothako ji esüa echha thechevka." 41 Zenkhying jina ombo mhashüng jiang reroe siathüng mesao jina ombo mha ji hungi shijo zenkhyig saka to chethecho. 42 Tole zenkhying jina mesao ji ezocho, "OPVÜI na heto phyoala: 'Ana lüngthae sile to phyoji kyon ji nina tsanthoko ji tsükona hoji man ji ni eküm na lovka, osi ombo rasan jiang tsanchothoko ji tsükona ni rasan jiang monthoku ka.' " 43 Tole mesao na wongkhyua lüm esuka Samaria lo yi sicho.
Naboth Jününgroli
1 Jezebel lo Ahab mesao mesaki ndüngo Naboth to tsa kyon tsüka jina jününgroli licho. 2 Tsüngon motsüngalo Ahab na Naboth ezocho, "Ni jününgroli ji aki ndüngo ka apia, tona ana oyo-ohan pahri tssovka. Ana hojilo na mmhonkao phari ni pivka mekana oman mmhona ni pivka." Tole Naboth na, 3 ezocho, "Shijo a pyimtsümotsüi phari küma ana hoji nipiv jo OPVÜI na emathav mek." 4 Tole Ahab na hoji zoe n mathav lüm tsuka yi sicho. ombona belüngo erikachi kyimchungoe zethechio etsoyu tia n tsov vancho. 5 Tole ombo engh Jezebel na ombo thüngi rheyi heto ombo engacho, "Ntio tssochona hetata ni etho jakato, etsoyu tia n tssona?" 6 Ombona janlancho, "Naboth na a ezojina a n mathatala. Ana ombo jününgroli ji shiyiv ezocho osi phari thanpo na lea dungtavka to ezocho. Tole ombona ana hojito n tssoche to phyocho!" 7 Tole Jezebel na ezocho, "Nino mesao ji tssovla nto? To alo me-mekcho?" "Phanthi longshia etsoyu tssoa. Naboth li jijo ana ni pivka!" 8 Jitosi ompvüna kako erani Ahab thung tssoa myingse thei mesao chekav ejüpkae ombo küpo tsüphoe topvü osi Jezebel lo ethelan eli kyon topvü picho. 9 Heto erancho, "Ekhang tsüngon nnüng kokata, kyon jiang tsarhyua osi Naboth ji yikrachi vanphen pia. 10 Osi Naboth na mesao tona Potsow to rhiyio ji tsükona ombo nlan pia rhiyithoku otsük eni tsa. Jitosi yantsüina ombo süchoki ephyatsüngi ombo sia." 11 Tole Jezebel yanchi kyon jiang tona tsüphoe jiang to na Jezebel yizüng ji ephan tssocho. 12 Ontena ekhang tsüngon züngchaki kyon jiang topvü tsarhyui Naboth ji yikrachi vanphen picho. 13 Osi ehungpvüi otsük eni jina kyon topvü mhadungona Naboth ji mesao osi potsow rhiyi kyon to nlan pia rhiyikacho osi yantsüi na omboji süchoki ephyatsüngi sicho. 14 Tosi "Naboth ji chüthok thaka" to Jezebel thüngi yithen picho. 15 Jezebel na hoji zopvüto Ahab ezocho, "Naboth chüthaka. Enhungo nina owo jününgroli kümoe Naboth na ni n shithuk hungcho sana ji khia." 16 Jitopvü Ahab na owo jününgroli ji khicho. 17 Tole OPVÜI na Tishbit yamo zenkhying Elijah ji heto ezocho, 18 "Samaria lo Ahab mesao thüngi woa. Ombona Naboth jününgroli vanka, osi oli ji khiyivsaka. 19 Tosi OPVÜI na heto ombo ezoala to ezoa, 'Kyon ji lüngthasi ombo ejüeli jiha nina khiv salo?' Ana heto ombo ezoala to ezolana, "Füro jiang na Naboth ejen mmyako metatsük jilona ombo ejen ha füro na mmyakivka to!' " 20 Ahab na Elijah hungale ombona phyocho, "O, ari, nina a yanchethaka nüng?" Tole Elijah na janlancho, "Hoka, Nina OPVÜI mhadungo silyuo etssovlo khochaki vanala. 2l Hojitsükona OPVÜI na ni ezoala, 'Ana nilo ezüp nungra yithokvü ka. Ana ni khaksivka, osi ni wopan lo ngaro eran eboetso topvü khi sivka. 22 Nina Israel ji mmen tssothuka a lüm etsuk shichethuko ji tsükona ni wopan ji Nabat tsoe Jerobaom wopan esüa osi Ahijah tsoe Baasha mesao wopan esüa kümthokvü ka.' 23 Osi Jezebel tsükona ha OPVÜI na phyoala, Ompvü so ji Jezebel yantsüi na füro na tsovka. 24 Ni wopan ocho yantsüi na chüa na onte soji füro na tsovka osi hapoe na chüa tssona onteno müngtsov na tsovka." 25 Ahab esüa OPVÜI mhadungo silyuo etssov lo khochaki evan tüv ochia n vancho, osi jiang topvü ombo engh ji ndung ntssung lona tssocho. 26 Ombona kisü khümo ji yakchia e yikrathao mmen tssocho, osi jijo Ammon kyon ochoang Israel jiang na meta jilo rheyiathüng OPVÜI na phani sicho sana jiang elhingo hungcho cho. 27 Elijah na nsanrathakpvüto Ahab na ombo sü jiang reroe sisi sünyikvü ekacho. Ombona etsoyu n tssov sünyikvü hansi yipcho osi omha nzhüi etho ejak chancheta sanphicho. 28 OPVÜI na Elijah zenkhying ji ezocho, 29 "Ahab na a mhadungo kvüta teriv kümthakcho sana ji nina hehung? Ombona hojito tsso ji tsükona ana ombo eküm evanthüng jo ezüp nungra ombo piv meka. Ombo tsoe echungoti ana Ahab wopan pono ezüp nungra yithokvü ka."
Maekhaya Zenkhying na Ahab Ekyu Yivon Piala
1 Jisülo nzvu eni jo Syria tona Israel to yuta lo noying licho, 2 tokhatola nzyu ethümoto jilo jo Juda lo mesao Jehoshaphat na Israele Ahab nduko wocho. 3 Ahab na ombo küpo tsüphoe jiang ezocho, "Eteno kvütoli Syria mesao khelona Gilead lo Ramoth ji khitav ntia n tssotahancho la?" 4 Jitosi Ahab na Jehoshaphat ezocho, "Ramoth hatavka nina a kekyovla?" Jehoshaphat na ezocho, "Nina poti methakna aiyo methaki vanka, osi a rasan jiang tona kurü rasan jiang toha methaki vanka. 5 Tokhatola ovüngtssoa OPVÜI engatademka." 6 Tole Ahab na zenkhying jiang nzo mezhü bena tsathei ngatüngngaria heto ezocho, "Ana owo Ramoth ji hav alo n havla?" Tole ontena ezocho, "Owo ha, OPVÜI na ekhyo ni pivka." 7 Tole Jehoshaphat na engacho, "Eteno OPVÜI lüm rüng eyam zenkhying thanpoe n vanchoke?" 8 Ahab na ezocho, Tmlah tsoe Maekhaya ji vanlanka, tokhatola omboji a tsakala, ntiotssole ombona echungatia mmhom e n zoala osi ombona yithen n mhom tae a ezoala." Jehoshapath na ezocho, "Nina hojito tiphyoa." 9 Tole Ahab na mesaki tsüphoe tsüka jenchia owo zakto Maekha sosi yile to ezocho. 10 Mesao otsük eni jina onte mesao mpensü ekatasi Samaria pikhfü kibüng tsalo litsenphen jilo oni vantsü lo khukthei vancho, osi zenkhying topvü na oni tsükona zenkhyingyi phyota vancho. 11 Onte yolo tsüka Chenaanah tsoe Zedekiah na yonjak na mangsü ejü nsüngrüi Ahab ejüa heto ezoa vancho, "OPVÜI na phyoala: 'nina shi khi Syrian jiang ori tssovka osi nina onte tothechivka.' " 12 Zenkhying thanpoe topvü na hojito phyotacho, "Ramoth jolowe rakhoe woa, tona nina ekhyo hungu ka." 13 Tole Maekha zenkhying solo ewo tsüphoe jina phyocho, "Zenkhying topvüna mesao na ekhyowo ezothaka, küma ninaha hojito phyocho mmhomo tssovka." 14 Tole Maekha na janlancho, "Ana eküm evamo OPVÜI myingona phyoala, ombona ntio phyole to a ezoasana jitae ana phyov!" 15 Ombona Ahab mesao mhadungo chiwole, mesao na ezocho, "Maekha, Jehoshaphat mesao enina owo Ramoth ji hatva alo?" tole Maekha na ezocho, "Owo hatava, nini na khyovka; OPVÜI na ekhyo ni pivka." 16 Tole Ahab na janlancho, "Nina OPVÜI myingo na aj ana na ntsa phyokhe! Ana hojito yenjo kvütao ni ezoala?" 17 Maekha na ezocho, "Israel rasan jiang olyuden enhyang n vancho esüa phunglani nzoni vana ana hunga. Osi OPVÜI na phyocho, 'Shiang shiji enhyang n vanka; noyinga oki yithuka.' " 18 Ahab na Jehoshaphat ezocho, "Ombona a tsükona yithen mmhom kvüthüngha n phyoala to ana ni zezo? Ombona yuta topvü yithen n mhom tae apiala!" 19 Maekhaya na phyolancho, "OPVÜI na phyo shi enga, ana OPVÜI ji potsüwoe lanben na hachümi ombo vantsü lo khuthe vana hungcho. 20 OPVÜI na heto lanben jiang ertgacho, 'Ochona Ahab kyakthechia Ramoth lo ritssolo wothuki chüthoku la?' Tole lanben ejoma najo heto phyo, ejoma najo heto phyo to tssocho, 21 tole omon tsüka na chiyi heto phyocho, 'Ana ombo ejithechivka!' 22 Tole OPVÜI na ezocho, 'Kvütoli ejithechivla?' Tole omon jina phyocho, "Ana owo Ahab zenkhying jiang topvü ejüng phyothuku ka." Tole OPVÜI na ezocho, "Toka owo ombo ejithechia, nina tovka." 23 Jisülojo Maekhaya na phyocho, "Heto tssocho, OPVÜI na ni zenkhying jiang khi ejüng ni ezothukcho. Tokhatola nina ezüp nungra nduku to ombo püngnaha phyoe lia!" 24 Tole zenkhying Zedekiah na Maekhaya thüngi ehungo omhalo tümsi heto engacho, "OPVÜI mon jina kvüthüng alona yisi ni janchola?" 25 Maekhaya na ezocho, "Nina oki chungchak sülamoe kvülosana mpholo woathüng ti hoji ntsivka. 26 Jisülojo Ahab mesao na ombo phajae tsüka heto ezocho, "Maekhaya rhümhae yantsü esae Ammon thüngi tona mesatso Joaash to thüngi sosi woa. 27 Osi ana noyinga kholani n yithüngjo omboji vüngpheni thechi hümri tona ojü to pia vanthuk to oni ezoa." 28 Tole Maekhaya na ezocho, "Nina noyinga elani yia tssona OPVÜI na a n jancho tssovka!" Jitosi Maekhaya na phyocho, "Ana phyoji otsük akvüna zothe khitakhe."
Ahab Chüo Ji
29 Jisülojo Israel mesao Ahab tona Juda mesao Jehoshaphta to onina Gilead lo Ramoth yantsü ji halo wotacho. 30 Ahab na Jehoshapahta ezocho, "Enina ritssolo woana ana mpensü tongphi mphoa wovka, nino mesae mpensü ji hansi rokhe." Tosi Israel mesao jo pipo dungphi hansi mphoa ritssolo wocho. 31 Syria mesao na ombo ritsso zotoro thümrosi eni ji topvü na thanpo mekna Israel mesao sakale to ezoa vancho. 32 Hojitsükona ontena Jehoshaphat hungale onte topvüna Israel mesao ji ombo tsayia sani ombo sakacho. 33 Tokhatola ombona eronkachiale topvüna ombo Israel mesao ji mek to ntsicho osi esani sitacho. 34 Tokhatola Syrian rasan tsükana lotssi nsenkhyae Ahab ji tsükkhüp evota yutalo na kochicho. Tole ombo na zotoro esüi ji ezoa tüngkachicho, "A tssatssothaka, rali na a sochuki sia." 35 Ritsso ji nnuka tssotathüng Ahab mesao ji zotoro jilo khuthei Syrian jiang zechia vani sicho. Osi ombo khfü jilona ejen zamo jina zotoro ji ndüngzhüa tsücho osi mmyui jo ombo chüi sicho. 36 Engrhebüngo Israel esopvüi jiang thüngi heto yithen yithukcho, "Otsük akvüna ombombo yan osi yantsüi yitale!" 37 Hojitolyui Ahab mesao ji chücho. Osi ombo müng ji Samaria lo hansi oyi shothecho. 38 Ombo zotoro ji Samaria wozhüi na etssüi sicho osi OPVÜI na phyoji bena ombo ejen ji füro na mmyaktacho osi lonsülonphyoe eloe jiangna hoji lona tsükatacho. 39 Ahab mesao na tsso jiang topvü, ombona mesaki ji sotsüho na merithuko jiang, osi ombona yantsü tsso jiang motsü topvü Israel mesao echungta kako lo erani lira. 40 Ombo chüale ombo tsoe Ahaziah na ombo echunga mesao kümcho.
Juda lo Mesao Jehoshaphat
41 Israel lo Ahab mesao yansa nzyu mezhüoto jilo Juda mesao ji Asa tsoe Jehoshaphat na ombo nzyu thümro mongo lo mesao kümi 42 Ombona Jerusalem lona nzyu mekyusi mongo yansacho. Ombo oyo jo Azubah, Shilhi to tsao ji otsolov ji. 43 Ombo vüngoe opo Asa esüa ombona OPVÜI mhadungo ntio elancho sana jiang tssocho; tokhatola kisü ekhüm jiang khümphen jiango roe n siwo jina kyon jiangna khümta erung than pita to tssocho. 44 Jehoshaphat na Israel mesao thüngi mmhonta vancho. 45 Jehoshaphat na tssocho thanpo topvü, ombo lüm etsson osi ritsso topvü Juda mesaeden motsü kako jilo erankhani lia. 46 Ombona opo Asa echungina lia vamo kisü khümpheni lonsülonphyoe eloe, eboe topvü n vanthoku sicho. 47 Edom meta jilo jo mesae n vam, osi meta ji Juda mesao na ethüngchecho tsüphoe tsüka na sa vancho. 48 Jehoshaphat mesao na shona khilo Ophir metae ophen orhung tsüphov elümoto shancho, tokhatola jiang topvü Eziongeber lona rokhani sisi n wochecho. 49 Tole Israel mesao Ahaziah na ombo kyon jiang nzo Jehoshaphat kyon jiang sosi ehav ezocho khatola Jehoshapath na n khichocho. 50 Jehoshapath ji chüi David mesa yantsüi mesae khüpo ombo shothecho osi ombo tsoe Jehoram na mesao ombo echungcho.
Israel Lo Ahaziah Mesao
51 Juda lo Jehoshaphat na nzyu taro tiying to sathüng Ahab tsoe Ahaziah na Israel lo mesao kümcho osi ombona Samaria lona nzyu eni sacho. 52 Ombona opo Ahab esüa, oyo Jezebel osi Jerobaom mesao ochona Israel ji mmen elhilo sokacho sana ji esüa OPVÜI mhadungo mmen tssocho. 53 Ombona Baal khüma hoji benkacho osi ombo vüngoe opo esüa omboha Israel Potsow OPVÜI ji lüm tsukthukcho.
Elijah Tona Ahaziah To Mesao
1 Israel lo Ahab mesao chüsi sülo Moab meta jina Israel sakacho. 2 Israel lo Ahaziah mesao ji Samaria lo ombo mesaki saphangina elungjoe elümoto meyancho. Hoji tsükona ombo ji kekümchev sana to Ekron yantsüi Philistin Potsow Baalzebub ji thüngi ngatüngngari lo yithenpvüi wothukcho. 3 Tole OPVÜI lanben tsükana Tishbet yamo zenkhying Elijah na owo Ahaziah yithenpvüi ji nduki heto ezole to ezocho, "Nino ntioli Ekron potsow Baalzebub ji thüngi ngatüngarilo yiala? Israel lojo Potsow n vancho tsayia nchümcho alo? 4 OPVÜI na heto phyoala to mesao ezoa, 'Ni khfü jiang pov meka; Ni chüvka!' " Elijah na OPVÜI yiji ephan tssocho, 5 tole yithenpvüi jina mesao thüngi elana yicho. Tole mesao na heto engacho, "Nino ntioli kholani yichola?" 6 Ontena janlancho, "Kyon tsükana oro endukcho osi kholani oyi heto ni ezole to e zocho, 'Nino ntioli Ekron potsow Baalzebub ji ngatüngari lo yithenpvüi wothukala? Israel lojo Potsow n vancho esüa nina nchümcho alo? Nikhfü jiang ji pov meka. Ni chüvka!' " 7 Mesao jina engacho, "Kyon ji eze kvütüvla?" 8 Tole ontena ezocho, "Ombo ekümrümo fü na phuknrhüo tüv vüi hansi sofü na eryu khüngcho." Tole mesao na phyocho, "Jijo Elijah ka." 9 Jisülo jo ombona Elijah solo tsüphoe tsüka khi kyon otsük tinyan sosi wothukcho. Tsüphoe jina wole Elijah na phunglanro lo khukthei vancho hungi ezocho, "Potsow kyon yo, mesao na ombo thüngi role to ni tsala." 10 Elijah na phyocho, "A ji Potsow kyon tssona Potsüwoe na omi joro ni osi ni razhü jiang rungtsüngthuka!" Jitopvü Potsüwoe na omi joroe tsüphoe ji tona ombo razhü topvü to rungtsüngi sicho. 11 Tole mesao na otsük tinyan solansi tsüphoe tsüka khi ehungo heto ezothukcho, "Potsow kyonyo, mesao na zakto joyile to yizüng ni piala!" 12 Tole Elijah na janlancho, "A ji Potsow kyon tssona Potsüwoe na omi joro ni tona ni razhü jiang to rungtsüngthuku ka!" Tole jitopvü potsüwoe na omi joroe tsüphoe ji tona ombo razhü jiang to topvü rungtsünglani sicho. 13 Tole mesao na elani otsük tinyan solansi tsüphoe tsüka wothukcho. Ombona phunglan jilo ehungo Elijah mhadungo epyakthesi jonjia ezocho, "Potsow kyonyo, a osi a razhü shi e khonzana eküm evanthuka! 14 Tsüphoe otsük eni ji tona oni razhü jiang tojo potsüwoe na omi joroe rungtsüngi sithukcho, tokhatola eiyo e khonzana!" 15 Tole OPVÜI lanben na Elijah ezocho, "Ombo sü rüa jowoa osi ti-kyua." Tole Elijah na tsüphoe ji phana jowo mesao ji thüngi heto ezocho, 16 "OPVÜI na heto phyoala: 'Nina Ekron Potsow Baalzebub ji thüngi ngatüngnagarilo yithenpvüi wothokcho, osi Israel lojo thyutav tsükona Potsow n vancho esüa nina tsso ji tsükona ni khfü ji pov meka osi ni chüvka!' " 17 OPVÜI na Elijah yakchia phyoji ezüa Ahaziah chücho. Ahaziah na otsoe n vamo ji tsükona Juda lo Jehoshapath mesao tsoe Jehoram na Juda sasi nzyu enioto jilo ombo ojenio Joram na ombo echungi mesao tssocho. 18 Ahaziah mesao na tssocho thanpo topvü Israel mesao jiang motsü kako lo eranrae lia.
Elijah ji Potsüwoe Tssüngkatala
1 OPVÜI na Elijah ji mbung eriv tüv longina sosi Potsüwoe chüngiv yuta jancho. Osi Elijah ha Elisha onina Gilgal lona khoe yita vanathüng 2 Elijah na heto Elisha ezocho, "Enhungo nino helo vana, OPVÜI na Bethel lo wole to a ezothaka." Tole Elisha na ezocho, "Ana eküm evamo OPVÜI lo osi nilo longtsükata vamo ji theta echümaka ana ni yaki yiv meka." Hoto ezosi oni Bethel wotacho. 3 Hojilo evan zenkhying okho motsünga na owo Elisha ji heto ezocho, "OPVÜI na ni pvüi ji nchüng sosi yivsa vamo ji nino tsentsila?" Tole Elisha na ezocho, "Ho, ana ntsia," "Tolea etena hoji motsü rütav meka." 4 Tosi Elijah na heto Elisha ezocho, "Enhungo helo vana; OPVÜI na Jeriko lo wole to a zothaka." Tokhatola Elisha na ezocho, "Ana eküm evamo OPVÜI lo osi ni lo longtsükao ji theta echümala, ana ni yaka yiv meka." Tosi oni nzo Jerikoe wotacho. 5 Tole jilo evan zenkhying okho motsünga na oro heto Elisha ezocho, "OPVÜI na nchüng ni pvüi ji ni thüngi na sosi yivsa vamo ji nina tsentsi?" Tole Elisha na ezocho, "Ho, ana ntsia, tolea etena hoji motsü rütav meka." 6 Tosi Elijah na Elisha ezocho, "Enhungo shilo vankhe, OPVÜI na Jordan zhükhfüi wole to a zothaka." Tole Elisha na janlancho, "Ana eküm evamo OPVÜI osi ni thüngi longtsükao ji theta echümaka ana ni sisi n yila." Tosi oni nzo wotacho, 7 osi zenkhying otsük tinyan na oni phana Jordani wocho. Elijah ha Elisha onina zhükfü jilo mangcho tole zenkhying otsük tinyan jiangna tara eloncheta mangta vancho. 8 Elijah na ombo phoknrhüosü opomo ji shüi jina zhükhfüi sathechile ojü ji nghasochi sicho osi hojithüng Elisha oni na likying tsa pankawoe chiyitacho. 9 Hojilona Elijah na heto Elisha ezocho, "Ni thüngi na a khikae n chüngithüng ana ntio ni tssoyihunga sana a ezoa." Tole Elisha na ezocho, "Ana ni echungchov tsükona ni etho jilona tara a pia." 10 Tole Elijah na ezocho, "Hojijo ekhüngu motsünga nina chonala," 'Tolea ana chüngiathüng nina a hunga tssona hoji etho ji hunguvka; osi ana chüngiathüng nina a n hunga tssona nina etho ji hunguv meka." 11 Onina hojito thyuta yia vanathüng zaktole omi zotoro motsünga omi kurü na süsi woro woni yutalo rheyi Elijah ji mpungina potsüwoe sosi chungi oni pyontae sicho. 12 Elisha na hoji hungwo jina tüngkachia Elijah ezocho, "Apo! Apo! Israel nkohae tsüphotsowo! Nino yithakchoke!" jitosi ombona Elijah n hunglamvü sicho. Elisha na nungra lona ombo sü jiang eni resoe sicho. 13Tosi Elijah na vachochia eyio phokthesü ji Elisha na khyoe bensi oyi Jordan jü tssae mangi vancho. 14 Ombona Elijah phokthesü jina ojüi evakthechia heto phyocho, "OPVÜI Elijah Potsow ji kvülo vancho ato?" Jitosi ombona ojüi shathechilanle zhükhfü ji kyingkae sicho. Osi ombona likying tsa pankae chiyicho. 15 Jeriko lo zenkhying otsük tinyan rowo jiang na ombo hungi phyotacho, "Elijah etho ji Elisha pithaka!" Ontena ombo nduko owo ombo mhadungo nkhümthei ezotacho, 16 "Shilo eboe etho ejüi otsük tinyan e vanka. Etena ni pvüi ji yana wotavkalo. OPVÜI na ombo ji sosi oyi phunglani alo hayi kvülo sana vanthukcho mpa tssovka." Tole Elisha na ezocho, "Meka, ntena ewov n lika." 17 Tokhatola ontena wotav phyota mungo jina Elisha na wothukcho. Ontena owo tsüngon ethüm jo phunglan hayi topvü yanta ha ombo n hungcho. 18 Ontena Elisha na onte nhyaka vamo Jeriko lona oyi ombo ndukcho. Tolea ombona onte ezocho, "Ana ti wotale to nte n zochoke?"
Elisha Chethev Elhi Jiang
19 Jeriko kyon ejoma na owo Elisha ji heto ezocho, "Tsüphoe yo, nina ntsia, meta shijo elümoto mmhona, tokhatola ojü shi n mhomo jina ngaro hamo jiang yesoe siala." 20 Elisha na ezocho, "Phikukro ethan lo oma tara thei hansi oyi a pia. Ontena hotoli hansi oro ombo pile, 21 ombona hoji bensi owo jünhyoe phyangthechia heto phyocho: 'OPVÜI na phyoala, ana ojü shi ntssüngchetala, enhungo shi yakchia ngaro hansora osi echü liv meka.'" 22 Elisha na phyo jilona benkae hoji jü ji nchüng jana ntssünga vana. 23 Elisha na Jeriko lona khoe Bethel li yicho, osi olani na nungori ejoma na yantsü motsünga lona chiyi ombo emakata heto ezotacho, "O donphyak, shilona tsana." 24 Tole Elisha na engolani onte zechia OPVÜI myingona onte rhiyikacho. Tole jitopvü orae na sevan opvü eni chiroe nungori otsük zhüro eni jiang ntsüroe sicho. 25 Elisha na Karmel phunglani yicho, osi sülami jo Samaria lo yilancho.
Israel Tona Moab to Yutalo Ritsso
1 Juda lo mesao Jehoshapath yansa nzyu taro tizao to jilo Ahab tsoe Joram na Israel lo mesao kümcho osi ombona Samaria lona nzyu taro eni sacho. 2 Ombona OPVÜI mhadungo mmen tssocho, tokhatola ombo opo ha oyo oni esüa nandang n mhomcho jo mek. Opona Baal khümphen kisü nsüngrüi vao jiang ombona roe sicho. 3 Tokhatola ombo vüngo Nebat tsoe Jeroboam ji esüa ombona Israel ji mmen tssothukcho osi n tümjak na hojito tssocho. 4 Moab lo Mesha mesao na olyu ekümcho osi nzyu akvü ombona Israel mesao thüngi tssenkhya esüa olyuro lakh motsünga tona olyu lakh motsünga lona elümtssan tssüi khi pi to tssocho. 5 Tokhatola Israel mesao Ahab ji chüale Mesha na Israel thüngi panlana phanthicho. 6 Jitopvü Joram mesao na Samaria lona khoe oyi ombo rasana topvü tsarhyucho. 7 Osi ombona Juda mesao Jehoshapath thüngi heto yithen picho: "Moab mesao na a panlana vanka, nina akekyochivla?" Jehoshapath mesao na janlancho, "Ana ni kyovka. Aiyo ni ethelan ni bencheyiv methaki vana, a rasan osi kurü jiangha hojito methaki lia. 8 Ori tssota na eyio lankvü kümoe ji zavla?" Joram na ezocho, "Ete nzo tssoe olan ekomoe na Edom lijüng metawoe na wotavka." 9 Hojito Joram mesao tona Juda lo osi Edom lo mesao jiang to nzo khochi wotacho. Tsüngon tiying yentsatathakale ojü mataroe sicho, osi kyon jiang tona ekümrümo to tsükona ojü n ham sicho. 10 Joram mesao na phyocho, "E n benthaka!" "OPVÜI na enthüm ji Moab mesao küpo e rheyithoku e tsarhyucho alo?" 11 Jehoshapath mesao na engacho, "Etena OPVÜI lüm erüng ji yani ezev tsükona shilo zenkhying vancho alo?" Tole Joram mesao küpo evan rasan tsüphoe tsükana janlancho, "Shaphat tsoe Elisha ji helo vana. Ombo Elijah jokim etssoe." 12 Jehoshapath na phyocho, "Ombo zenkhying tsotso ka." Tosi mesao onthüm na Elisha yanta wocho. 13 Elisha na Israel mesao ji ezocho, "Ntioli ana ni nzanchivla? Nipo osi niyo na engao zenkhying jiang owo enga." Tole Joram na janlancho, "Jito meka! OPVÜI na mesao e nthüm e mmyantathuki Moab mesao khelo e thechicho ka." 14 Elisha na janlancho, "Ana benkao eküm evamo OPVÜI Potsow myingona ana phyochakala, ni tepfü Juda mesao Jehoshapath jüwo ji yikrachi tsükona kha ni nzanchiv meka. 15 Owo khenkhfüi tsüka sosi yia. Osi khenkhfüi jina ombo zhükhen ji khfüale OPVÜI etho ji Elisha pono jorocho. 16 Osi Elisha na phyocho, "OPVÜI na heto phyoala: 'Zhükhfü nghachei elio shi dunga shilona okhey n rhüa. 17 Nina eryu osi mpung n hunglea ojüna okhey nrhüo ji pyingi sivka, nte osi nte ekümrümo jiang topvü na tssona eyuv ojü hungu ka.' " 18 Elisha na phyolancho, "Tokhatola shijo OPVÜI na elaro tssocheta, ombona Moab ekhyov tsükona etho ha nte pivka." 19 Onte yantsü ezehungthav tssoe elio jiangha ntena khyoe khiv, ntena onte tssüngthidung jiang topvü dani siyiv osi jünhyo jiang chungi siyisi onte lizü jiang topvü olong na hanzhüi siyivka. 20 Ojyua enyathüng tojo enyathüng than epi yuta jilo jo Edom metawoe na ojü tsüa chiyi meta ji ojüna pyingi sicho. 21 Mesao otsük ethüm jiangna onte sakalo rothaka to Moab kyon jiangna owon zoale eboetso, ngaro eran ebensü benkhung topvü tsarhyui erü ndüngo vanthukcho. 22 Osi ontena ojyuato phathile engna ojü jilo rathei ojü ji ejen. to rakia hungcho. 23 Tole hoji zetasi ontena phyotacho, "Shijo ejen! Eteri ethüm jiangna onte rotsüngtae chücho tssovka!"Etena owo onte vanphen jiang rei khitavkalo!" 24 Tokhatola ontena owo ori jiang nchenphen ji janale Israel jiangna onte sakacho osi phanlanchi onte sicho. Israel jiangna vekata onte phani onte lüngtha, 25 nna yantsü jiang roe siyi to tssocho. Ontena lizü ji yakchia na Israel kyon topvü na olong khyokae oli jilo vanthechicho osi oli ji olongna eyuki sicho. Ontena tssüngthidung jiangha tani sita, jünhyo jiangha chungi siyi to tssocho. Okhao tssoa jo Kir yanpvü jitae enhyokacho osi olong shümchia ekoe jiangna yantsü ji hachümi sicho. 26 Moab mesao na ombona n khyoala to zechetale yonri eben otsük nzo tiying ethüngi sosi ori jiang tssüsochia Syria mesao thüngi tsani yivka to ekhyo tssole n tssochecho. 27 Tole ombona ombo tsoe eramo ombo echungchov vamo ji khi yantsü pikhfü epi lona Moab Potsow thancho. Tole Israel jiangna ekhentsüngi yantsü ji lona kholani onte metae yi sicho.
Elisha na Emi Yantsae Nzanchiala
1 Zenkhying okholo tsüka eloe emia vancho jina owo Elisha ji heto ezocho, "Tsügpoeyo, arapvü ji chüthaka! Osi nina ntsia ombo Potsow ekyui tsüka, tolea ombona ochi a elov elio kyon jina oro a rapvü chhi ji man tssoa a tsokhying otsük eni jiang ombo ezii tssothokvü tsükona khilo rothaka." 2 Ombona ezocho, "Ana kvütowoena ni nzanchile to la?" "Nina oki ntio liana azoa," Tole ompvüna ezocho, "Ni nri jina ntia nli, olive thyujü opvü teriv lio ji tae." 3 Tole Elisha na ezocho, "Ni phinakiren jiang thüngi oyi muri ejüng kvüta liana nsorhyua." 4 'Tosi ni tsoe jiang nzo oki khana rheyi muri jianglo thyujü lithe tava. Osi muri jiang pyingpvü pyingpvü zakto ejümi reni vatava." 5 Emi jina oki oyi otsoe jiang nzo khalanchi thyujü tara jüwo ji otsoe jiangna muri nsoe hansi yipvü yipvü jianglo litheta vancho. 6 Onte muri jiang pyingkhanthakale elani lelilancho sana enga cho. Tole otsoe tsüka na janlancho, "Hoji wokhao küma pyingthaka." Jisülojo thyujü ji n tsüchov esani sicho. 7 Ompvüna zenkhying Elisha thüngi owo hoji ezole ombona heto ompvü ezocho, "Enhungo olive thyujü ji yeni ochhi ji lotava osi jisülolea nte tsoehyua enhyolamka."
Elisha Tona Shunem lo Eli Eloe Ji To
8 Tsüngonalo Elisha na eloe eli-i tsüka vamo Shunem meta jilo wocho tole ompvü na Elisha ji etsoyulo tsacho osi jisülo jo Elisha na Shunem lo evo akvü etsoyu ji ompvü ki tssocho. 9 Ompvüna heto orapvü ezocho, "Hepi nsannsam roa vamo kyon shijo ntho kyon tssov to ana longtsüala. 10 Etena mhonki chungchak motsünga tssokae belüng motsünga, khothephen motsünga, tssisaro motsünga tona milon motsünga to vayitavka, osi ombona oro e nchenkata na jilo nchenthuktavka." 11 Tsüngonalo Elisha na Shunem lo wolancho osi ombo nchenphen jilo ehungo esana vancho. 12 Ombona ombo phajae Gehazi ji jenchia owo eloe ji tsathukcho. Osi ompvü na rothakale, 13 Ombona Gehazi ezocho, "Ompvüna eni tsükona hetata ezüp ekhiyithako ji ana ntio pilam sana to enga. Ompvüna a khi mesao thüngi mekana rasan esopvüi ji thüngi oyi mmhom ompvü phyoyivo to mpato nchümvü ka." Tole ompvüna ezocho, "Ana a kyon shiang nzo vamo shilona a ethelan topvü benchetala." 14 Tole Elisha na Gehazi ezocho, "Tona ana ntio ompvü tssoyivla?" Tole Gehazi na ezocho, "Ompvüna otsoe n van, osi orapvü ha sonthaka." 15 Elisha na ezocho, "Owo helo role to ompvü ezoa." Ompvüna oro kipüngo mangle Elisha na 16 ompvü ezocho, Thüngküm heto-thüng jo nina otsoe ni khelo ejümsi vamka." Ompvüna phyocho, "Oh! Tsüphoeyo, nino Potsow kyonka, nzansi ejüng a ti-zoa!" 17 Tokhatola Elisha na phyoji esüa thüngkümto yuta jilo jo ompvüna otsoe bukcho. 18 Nzyu tara sülo liri yutalo, tsokhying jina enya motsüngalo opona liri nzo elhi tssoa vanathüng owo opo rikyocho. 19 Jithüng zaktole ombona tüngakchia opo ezocho, "A kvüri shina anoala! Akvüri shina a noala!" Tole opona phajae tsüka ezocho, "Ngaro shi sosi oyo thüngi woa." 20 Phajae jina ngaro ji sosi oyo thüngi wole oyona nshi etüng jana ejümsi vale ngaro ji chüi sicho. 21 Ompvü na ngaro echü ji ejümsi Elisha nchenphen jilo belüngi vasi oki ji khalanchi vanthukcho. 22 Ompvüna orapvü tsae heto ezocho, "Phajae tsüka khi gadho motsünga sosi helo rothuka, ana zenkhying Elisha ki ewov ethev lika, osi ana zakto yilamka." 23 Tole orapvüna ezocho, "Nino ntioli nchüng ombo thüngi evov lichola, nchüngo esanmungha mek, elani chothan tokhu ha mek tola?" Tole ompvüna, "Ntia n tssoka." to janlansi 24 Gadho jilo tsankae phajae ji heto yizüng picho, "Gadho ji etonandang ekhyinga yithuka osi ana ni n zothüng jo ti esanthuka." 25 Hojito ompvüna khochi Elisha vamo Karmel phunglani jilo wocho. Ompvüna owo jamu tara liathüngna Elisha na ompvü hungchi Gehazi ji ezocho, "ZechiaShunem yamo eloe ji tsaka! 26 Zakto owo nduki orapvü osi otsoe ji to jiang ji kvüto vancho sana engae zeta." Ompvüna Gehazi ezocho, "E topvü mmhona vanka." 27 Tosi ompvüna Elisha mhadungo chiwoe Elisha jo mphoe epyakthei ojolo rhümayile phajae jina ompvü khyanlanchiv tssocho, tole Elishana ezocho, "To ompvü sia! Ompvü ji elümoto wonkhyua vamo ji n hungake? Tolea OPVÜI na shi yilan ntia a n zhohan ka." 28 Eloe jina ombo ezocho, "Tsüphoe yo, ana ni thüngi otsoe choncho alo? Eyilo ntia a tipile to ana ni n zochoke?" 29 Elisha na Gehazi zechia ezocho, "Zakto a jarung ji bensi khochia, olani oyam nduklea salüma ti vana, zakto oki jilo owo ngaro ji pono a jarung ji rüchia." 30 Eloe jina Elisha ezocho, "Ana eküm evamo a Potsow myingo na osi ni mhadungo phyochakala, ana ni vachi siv meka!" Hojitsükona oni nzo yitacho. 31 Gehazi na ovüngna owo ngaro ji pono jarung ji rüchicho khatola ntia owon tssoa nkanphia to n tssocho. Ombona Elisha thüngi elani oyi ezocho, "Ngaro ji n phanthika." 32 Elisha na owo janale omboti na chungchak jilo rhowocho osi ngaro ji belüngi echü yipkachi lia hungcho. 33 Ombona kipüung ji khani OPVÜI thüngi randancho. 34 Tosi ombona ngaro ji poni nankae ombo büng, omhyik, osi okhe jiang ngaro ji büng, omhyik osi okhe jiang lo nankaecho. Tole ombona nankao jina ngaro ji tsük ji lümchukchicho. 35 Elisha na phanthi chungchak jilo sanphia osi elani oyi ngaro ji nankalancho tole ngaro jina yenjo tiying haktssisi omhyik kükacho. 36 Elisha na Gehazi tsae ngaro ji oyo ji tsale to ezocho. Ompvüna roale ombona ompvü ezocho, "Ni tsoe ji shi je!" 37 Ompvü na omha ji likowoe nkhümkata Elisha jolo vanthe yikrachisi otsoe ji sosi yi sicho.
Elani Chethev Elhi Eni
38 Tsüngonalo meta ji topvü lo otssi vara liathüng Elisha na Gilgal lo yicho. Ombona tsüngona lo zenkhying okho motsünga püngnoa vanathüng ombo phajae ji ophfü tsüphov yenkae ombona püngnoa vamo jiang tsükona etsoyu ehayile to ezocho. 39 Onte yolo tsüka na oyohan yana oli chiwocho. Tole opheni shumo zae licho hungi ombo hankuk lhochocho. Ntiosana ombona n tsi khatola hansi oyi etsoyu ehakachi lio jilo nyipthechicho. 40 Etsoyu ehao ji kyon jiang tswothukvü phyangthele ontena tsophi zetasi Elisha ezocho, "Etsoyu shijo mozhü n mhom thecho!"Tosi n tsotav sicho. 41 Elisha na etsoyu tara choni hoji khi ehao jilo nzithechisi phyocho, "Etsoyu ehao ji tara onte theyilana." Tole ontena tsophi zetale ntia n tssocho. 42 Tsüngonalo Baal Shalishah lona kyon tsüka rocho osi ombona Elisha echi omüm ethan na rüngcho hümri mekyu tona tsüngonrho rakpancho tara to bensi rocho. Tole Elisha na hoji khi zenkhying ombo na püngnoa vamo jiang tsothukle to ombo phajae ji ezocho, 43 tole phajae jina ezocho, "Shi taena otsük nzoa tsochyuv alo?" Elisha na ezocho, "Onte pia tsothuka, ntiotssole OPVÜI na phyoala, ontena tsosi enhyolam to." 44 Phajae jiangna etsoyu ji jantacho, tole OPVÜI na phyo ji esüa onte topvü na tsosi enhyolancho.
Naaman Ji Emiyiala
1 Syria rasan esopvüi Naaman jijo Syria mesao na elümoto yikrachia tüv, ntiotssole Naaman yakchia Syrian rasan jiangna ekhyo hungcho. Ombo rasan thüngche khatola otsüko ratsü eno khyingcho. 2 Syrian jiang na Israel ori tssoa thüng echungalo jo Israel eloeroro tsüka sosi oyi Syria lo Naaman eloe ji phajae tssoa vancho. 3 Tsüngona lo ompvüna ompvü pvüi ji ezocho, "Apvüi ji Samaria lo zenkhying vamo ji thüngi sosi ovo to ana nchümala! Ombona nochonori ji ombo poyiv. 4 Naaman na hoji zoale mesao thüngi owo eloeroro jina phyoji ezocho. 5 Tole mesao na ezocho, "Israel mesao thüngi owo kako shi pia." Tole Naaman na janti rang wothüng thümro shona kholung wothüng tiruk, tona osü nliphiphen mmhom taro to hanisi khochicho. 6 Ombona bemo chuti ji heto erancho; "Kako yo shina a küpo tsüphoe Naaman tsükona phyovka. Ana ni khi ombo nochonori ji ombo emiyithuk-hungala." 7 Israel mesao na kako ji khae zesi ombo lüm tsuka ombo sü jiang reroe sisi phyocho, "Kvütoli Syria mesao na kyon shi a khi emiyithukhungala? Aiyo eküm, echü etho eli Potsow tsayia ombona nchüma alo? Ombona athüngi khonda shichev ji heto elhiala!" 8 Elisha zenkhying jina hoji yivon zoale mesao thüngi heto yithen yithukcho."Nino kvütoli tata ni lüm n tssoala, kyon ji a thüngi rothuka tona Israel lo zenkhying tsüka vana to ana ombo ejüv ka!" 9 Naaman na ombo rasanden tona ritsso zotoro jiang to sosi owo Elisha kipüngo mangcho. 10 Tole Elisha na ombo phajae tsüka ezoa Naamna ji oyi Jordan zhükhfüi na yenjo tiying tsükale, tona ombo nochonori ji polangi sivka to ezocho. 11 Tokhatola Naaman na lüm tsuka phyoa yicho, "Aiyo ombona chiyi ombo OPVÜI Potsow thüngi a randania nochonori ji pono okhe evangphia totia tssoe a emiyithoku tsayile! 12 Khatola Israel lo zhükhfü jianglo mmhonkata Damaskas loha Abana tona Pharpar zhükhfü toha n lichoke? Ana hojiang lona tsükasi mmhoni vamvü saya!" 13 Ombo phajae jiangna. owo ombo ezocho, "Tsüphoeyo, zenkhying jina ntiona ekhüngu tssole to ni ezowo nina tssothakvü. Tona nino ntioli ombona ni ezoji ephan tsükasi mmhoni n siala?" 14 Tole ombona Elisha yi ji ephan Jordan zhükhfüi owo yenjo tiying jüngthele nochonori ji polangi sicho. ombo so jiang chüng chünga ngaro tsük esüa mmhoni sicho, 15 Ombona ombo nzo etssoe jiang topvü sosi Elisha zenkhying thüngi owo ezocho, "Enhungo ana Israel Potsow yaka potsow thanpo n van to engathethaka, hoji tsükona nzansi a yantso teriv shi khichoa, tsüphoe yo." 16 Elisha na ezocho, "Ana benkao eküm evamo Potsow myingo na ana phyoala, ana yantso ntia n khicho." Naaman najo khile to khüngkacho khatola Elisha na n khicho. 17 Tole Naaman na phyocho, "Nina a yantso n khichona, toka gadho eni hanchyu ochon hansi oki a yithuka, ntiotssole enhungo ana OPVÜI thüngi yaka othan osi erungthan piv meka. 18 Hojitsükona ana longtsüala, ana a mesoa phana Syrian potsow Rimmon khümpheni owo ombo khümlea OPVÜI na nlan a siyiv to longtsüala. Otsotso OPVÜI na nlan a siyiv to longtsüla!" 19 Elisha na ezocho, "Noyinga yia" Tole Naaman na yicho. Ombona tara tae yihana 20Elisha phajae Gehazi na heto nchümcho, "Apvüi jina Naamna ji ntia n khiyiv yithukthaka. Syrian jina ombo pio ji khiyiv etüma. Eküm evamo OPVÜI myingona ana yunga owo ombo thüngina ntiosanatia khivka." 21 Hojito ombona Naaman phana wocho. Naaman na ocho sana yunga tsata hungale esani ombo ritsso zotoro jilona joyi, "Ntio na tssocho alo?" to ezocho. 22 Tole Gehazi na janlancho, "Meka," "Tolea enhünga ti zenkhying kholuk eni Epharaim phunglan metae na chiyio jina a pvüi na ni thüngina janti rang wothüng ethüm tona osü nliphiphen etsa eni to khilo a rothukcho." 23 Naaman na ezocho, "Nzansi janti-rang wothüng tiruk khia," Naaman na khüngkata khile to ezoa janti rang ji otsen eni tsenchei jilo osü nliphiphen eni thei toli ombo phajae jiang benthuksi Gehazi vüngina wothukcho. 24 Ontena Elisha vanphen phunglan ji janale Gehazi na rang tsen eni ji khi hansi oki rheyicho. Tosi ombona Naaman phajae jiang yithuki sicho. 25 Ombona oki rheyile Elisha na heto ombo engacho, "Nino kvüi ochola?" Ombona janlancho, "OPVÜI kvüiha n oka." 26 Tole Elisha na ezocho, "Kyon jina ombo ritsso zotoro jilona ni nduko jithüng aiyo omon lona jilo n vancho alo? Shi yuta shijo orang, osü, olive tssüngrhyu, jününgrothi, olyu osi tssiro-mangsü meka na phajae ekhi yuta mek! 27 Hoji tsükona Naaman nochonori ji enhungo ni pono yivka, osi ni tona ni tsoronichen to eküm echung hansi vamvüka!" Gehazi na khochi tona nochonori ji ombo tsüko khyingcho, Ombo fü jiang sheryu to ehümi sicho.
Opvü Moncho Yancheo Ji
1 Tsüngona lo Elisha küpo etssoe zenkhying jiangna Elisha thüngi heto erenjantacho."Ena vamo meta shi elümoto teria! 2 Jordan lo jowo eran tanrhüpi, otssüng rüngrüi evanphen tssoe jilo evam yizüng epia." Tole Elisha na, "Twokha hojito tssotava" to ezocho. 3 Onte yulo tsükana Elisha ji onte phana role to tsacho, tole ombona ha lüm na rünga onte phana wocho. 4 Osi ontena Jordan janale elhi benkae tssotacho. 5 Tothüng ji onte yulo tsükana odung tana vanle opvü ji essuki ojüi rheyi sicho. Tole ombona ekhena Elisha ezocho, "Tsüphoeyo, aiyo opvü ji nsoe hansi rocho küma kvüto lyuvla!" 6 Tole Elisha na engacho, "Kvülo elungthechola?" Tole kyon jina shilo elungthechoka to ejüle Elisha na otssüng tani ojüi sathechia jo opvü ji oponi pfükachicho. 7 Jisüijo ombona kyon ji, "Khyokata" to ezole ombona nkhuthei khyokae khicho.
Syria Rasan Jiang Khyothechicho
8 Syria mesao na Israel thüngi ori tssoa vancho. Osi ombona ombo küpo tsüphoe jiang engasi nchenphen tsükona meta etssyukae vacho. 9 Tokhatola Elisha na Israel mesao thüngi ntangnshonyi ezoa hoji ndüngo ti-ole to ezocho, ntiotssole Syrian jiangna hoji lona onte zümta vancho. 10 Hojitsükona Israel mesao na ombo woro meta jilo evamo jiang ezoa hojilo n wothukcho, tolea tüngochünga kyimka vantacho. Hojito yenjo elümoto tssocho. 11 Syria mesao na shi zoe elümoto lüm n tssocho. Osi ombona ombo küpo tsüphoe jiang tsae ezocho, "Nte yulo ocho jo Israel mesao thüngoe la?" 12 Onte yulo tsükana janlancho, "Tsüphoeyo, ochinaha ombo thüngoe n theka. Tolea nina ntio phyoana, ni yiphenina mphoa phyo jiang mpato zenkhying Elisha na ntsi Israel mesao ezoala." 13 Mesao jina phyocho, "Ombo ji kvülo vana sana yana wotava, tona ana ombo rhümavka." Osi Elisha na Dothan lo vana to ombona zoale, 14 hojilo rasan tona kurü zotoro to khosha wothukcho. Ontena yantsü ji zümothüng jancho osi hoji hayae vancho. 15 Tothüng ji Elisha phajae tsüka na nyazüngi na phanthi hapoe chiwole Syrian rasan jiang tona onte kurü osi zotoro to jiang na yantsü ji hayae vana hungcho. Jitsükona ombona oyi heto Elisha ezocho, "E n penthaka tsüphoeyo! Eteno kvüto lyutavla?" 16 Elisha na ezocho, "Tikyua ontelo kyongkata ete thüngoe vanka." 17 Tothakale ombona heto randancho, "O, OPVÜI, ombo mhyik ji pochi hungthuka!" Tole OPVÜI na ombo randan engayicho osi Elisha phajae jina phunglanro ji topvü rasan osi kurü tona omi zotoro to na pyingi Elisha hazhüi vana hungcho. 18 Syrian jiang na ritsso sakatale Elisha na heto randancho, "OPVÜI, shiang shi omhyik juki siyia!" Tole OPVÜI na ombo randan engayia onte mhyik jiang jukicho. 19 Jithüng ji Elisha na onte thüngi owo heto ezocho, "Nteno olan nte worithaka; ntena yanta evamo yantsü ji shi meka. A phana rotava, tona ntena yanta evamo kyon ji thüngi ana nte sosi wovka." Jito ezoa ombona Samaria lo onte sosi wocho. 20 Ontena yantsüi khothepvü Elisha na randancho, "OPVÜI, enhungo onte mhyik jiang chonchi hungthuka." Tole OPVÜI na ombo randan engayia onte mhyik jiang pochicho, osi onteno Samaria meta chungi saka to chethecho. 21 Kvüthüng Israel mesao na Syria kyon jiang hungcho sana ombona heto Elisha engacho, "Tsüphoeyo, ana onte lüngthav alo? Ana onte lüngthav alo?" 22 Ombona ezocho, "Meka, nina ritsso lona rhümacho kyon tsükalea chüthoku n lika. Etsoyu ntio sana onte tsoyuthuksi onte mesao thüngi kholani yithuka." 23 Tole Israel mesoa jina onte tsükona tokhu tsüphov methakcho, osi ontena tsoyuta-thakale ombona Syria mesao thüngi kholani onte yithukcho. Hoji lona benkae Syria kyon jiangna Israel thüngi ori n tssov sicho.
Samaria ji Vükthechicho
24 Yuta tara sülo Syria mesao Benhadad na ombo rasana topvü erhümi sosi Israel sakacho osi Samaria yantsü ji hayacho. 25 Hoji ritsso ji yakchia etsoyu elümoto ntsemo jina gadho kvüri motsünga lo janti rang ekha tiza pita, nna yikhyu chü gram nzo enilo janti rang mongo to pita yicho. 26 Tothüng Israel mesao jina pikhfü ndüngona yakchia sanphia vanle eloe tsüka na heto kya ezocho, "A nzanchia, tsüphoeyo!" 27 Ombona janlancho, "OPVÜI na ni nzanchina ana ntiona ni n zanchivla? Ana etsoyu licho alo? 28 Tole ni emhuk elüm jo ntio lichola?" Ompvü na janlancho, "Shilo vamo eloe shi eni nchuka jo a ngaro ji tsotasi nchuka jo ompvü ngaro ji tsotavka to phyotacho, 29 hojitsükona a ngaro ji eküi tsotacho. Osi ojyuato jo ompvü ngaro ji tsotavkato ana ezole ompvüna ngaro ji mphoe sithaka!" 30 Hoji zoale, mesao na etho ejak lona ombo sü mpato reroe sicho. Tole hojilo vamo kyon jiangna mesao na ochungi postasü hancho hungcho. 31 Mesao na phyocho, "Nchüng eng n rhethüng Elisha kvüri n khiyia tssona OPVÜI na a chüthoka!" 32 Tosi Elisha sosi yile to ombona kyon wothukcho. Hojithüng jo Elisha jo oki vancho osi eramoe ejoma na oro ombo janthechicho jiang thüngi motsü ruta vancho. Osi mesao na rothuko kyon jina oro ombo n janthüng na ombona eramoe jiang ezocho, "Münghan jina a lüngthalo kyon rothuka vanka. Ombona shi jana na kipüng ji khani sisi ti-rhorothuk-khe. Mesao jiha ombo sülo tsavka. 33 Ombona hoto tia n phyothaku mesoa jina chiro jani heto phyocho, "OPVÜI na e pono hetüv ezüp epithaka! Tona ntio tsükona ombo khi ntiosana etssoyithokvü ana nhyaka vamvüla?"
1 Elisha na janlancho, "OPVÜI na heto phyo ji enga! Ojyua heto-thüng jo nina Samaria meta lona ohüm chencho mmhontso ji janti rang rangpyaka na seri ethüm shichovka, mekana ohüm checho seri tiruk shichovka." 2 Mesao phana ro kyon jina Elisha ezocho, "OPVÜI na mpato otsüngomüm jothuklea hoto jo tssov meka." Tole Elisha na ezocho, "Hojito tssoa nina hungu khatola nina kvüthüngha hoji tsophyav meka!"
Syria Rasan Jiang Kholani Yiala
3 Eboe ratzü enoeden otsük mezhü na Samaria pikhfü tssae na heto phyota vancho, "Etena ntioli helona echüv nhyakta vamla? 4 Yantsüi rheyiv jiha ntia oman n li, ntiotssole jilona khangtsüngi echüv; elani etena shilo vanlea jiha echüv to. Hoji tsükona etena Syria kyon jiang nchenpheni wotavka, tona ontena e lüngthakhuka, mekana e n lüngthavlea tssokhuka." 5 Hojito phyota müngale ontena Syrian jiang nchenpheni wotacho y tole hojilo ochia n vancho. 6 Hojijo, opvüi na Syria kyon jiang ji rasantsü ha kurü osi ritsso zotoro theta tsacho esüa zokathukcho, osi Syria kyon jiangna Israel mesao na Hittite kyon tona Ejip kyon to erhümi sosi ritssolo tsacho tsayicho. 7 Hoji tsükona ontena hoji mmyu na onte kurü, zotoro, süran ki topvü ntio liana sitasi onte eküm tsancho yana tsanthakcho. 8 Otsük mezhü jina nchenphen ji owo janpvüto süranki jianglo rhowo etsoyu jiang tsoyuta, shona, janti osi mpensü jiang kherhyui hanta tosi owo mphoe vatacho, elani süranki thanpo jiang loha rhowoe hojito tssota wocho. 9 Jitosi ontena phyotacho, "Etena heto lyutao mekai Etena yithen mmhom lio shi oyam ha ezotav lia. Etena ochia n zotana ojyua enya jana vanchojo etena ezüp nduk-nrüngu. Etena zakto owo mesao küpo tsüphoe jiang ezotavka!" 10 Ontena Syria nchenphen jilo osi elani Samaria lo oyi enhyang jiang heto ezotacho, "Ena Syria kyon jiang nchenpheni wotale ochia n van, onte kurü, Gadho, jiangha shenpvü lia, osi süranki jiangha sisi yioji omboji lia." 11 Tole enhyang'jiangna yithen ji phyota yicho osi mesao kiha yenjancho. 12 N vonchihana khatola mesao jina belüngina phanthi heto ombo tsüphoe jiang ezocho, "Syria kyon jiangna kyakta vamo ji ana nte ezovka, meta shilo otssi vara lia to ontena ntsia; hojitsükona ontena nchenki jiang sisi orae mpholo yirachoka. Etena etsoyu yano wov tsaya hojithüng ekümina erhümav osi yantsü shi khiv pyimta vanka." 13 Tole ombo küpo tsüphoe tsükana heto phyocho, "To mpato n tssolea yantsü shilo kyon shiango chüthako jiang esüa monthoku methak thaka, hojitsükona etena kyon ejoma tona kurü mongo valanchi elio jiang to wothuka ntio kvüto tssocho sana ji owo zethuktavka." 14 Ontena kyon ethüngcherae mesao jina zotoro eni lona wothuka owo Syria rasan jiang ji ntio kvüto tssonrüngcho sana ji zethukcho. 15 Osi ontena Syria jana otaha Syria jiangna osü, tsütsailan sia tsancho olan dunga licho hungwo ji tae tssocho. Ontena hojito oyi mesao ezotacho. 16 Tole Samaria kyon topvü na sanchuki Syria rasan nchenphen jiang shyui khitacho. Osi OPVÜI na phyoji esüa ohüm chencho mmhontso ji seri ethüm mekana omüm chencho seri tiruk to jilo janti rang motsünga taena shichoa yentacho. 17 Osi kvütoli sana Israel mesao na yantsü pikhfü enhyang ji ombo kija enhyang tsüphoe tsüka jina lanvüng tssoa vanthukcho. Tole Elisha na ezoji bena hoji tsüphoe jijo kyon santhetathüng sümtsüngi sicho. 18 Elisha na ojyuato hoji yutalo jo Samaria lo ohüm chencho mmhontso ji seri ethüm, mekana omüm chencho seri tiruko janti rangpyaka na yentav to mesao ji ezoathüng, 19 tsüphoe jina heto phyoe licho, "Hojito to n tssov tssovka, OPVÜI na otsüngomüm mpa jothuklea!" Tole jithüng ji Elisha na heto ombo ezoe licho, "Hoji bencheta nina hungu khatola nina kvüthüngha tsophyav meka!" 20 Tole hoji ombo bencho, ombona kipüngo vanathüng kyon santheo jiangna tssetssüngi ombo chücho.
Shunem Eloe Jina Kholani Yiala
1 Elisha na Shunem lo eloe ocho otsokhyongo ombona kümchelanthukcho sana hoji thüngi, OPVÜI na meta shilo nzyu tiying otssi vara lithuku saka ni wopan sosi metapoe oyi vantava to ezocho. 2 Hojitsükona Potsow kyon jina ezoji ephan ompvüna wopan sosi Philistia lo owo nzyu tiying vancho. 3 Nzyu tiying sülo jo ompvüna Israel metae elani oyi mesao thüngi owo ompvü liko osi oki jiang pilanle to choncho. 4 Hojithüng jo mesao jo Elisha phajae Gehazi thüngi thyuta Elisha na chethev elhi tsso jiang motsü ruta vancho. 5 Elisha na kyon echü lona kümchethuko ji Gehazi na mesao ezoa vanathüng eloe jina mesao thüngi jonjicho. Tole Gehazi na heto mesao ezocho, "Yikrachio mesao, eloe ji shi osi ompvü tsoe Elisha na kümchethuko jiha shije!" 6 Osi mesao jina eloe ji engae zele ompvüna Gehazi na phyothako ji hotoka, to ezolancho; tole mesao jina ombo küpo tsüphoe tsüka ezoa eloe ji son oki jiang pilanle osi nzyu tiying ompvü na metapoe vanathüng ompvü lina chiyio benro jiang man to tsotsüi ompvü pile to ezocho.
Elisha Tona Syria lo Benhadad Mesao to
7 Syria lo mesao Benhadad ji ra vanathüng Elisha na Damaskas lo wocho. Osi Elisha oro vana to mesao jina ntsiale, 8 ombona ombo küpo tsüphoe tsüka Hazael ji heto ezocho, "Yantso hansi owo zenkhying ji thüngi a nochonori shi mmhonphia yeyiv sana to OPVÜI thüngi engae zethuka." 9 Tole Hazael na odh zhüro tona Damaskas lona chiyicho tsentsü mmhontso jiang to hanthuksi Elisha yana wocho. Hazael na Elisha ndukale heto ezocho, "Ni phajae mesao Benhadad na ombo nochonori jilona ombo memeyiv sana to ni engalo a rothukcho." 10 Tole Elisha na ezocho, "Ombo chüv to OPVÜI na a hungthukthaka, tolea oyi mmhomka to ombo ezoa." 11 Jitosi Elisha na omha ji ekyua lyui khi Hazel ji yikra lona rae n sithüng nandang ji rüka zecho. Tole jitopvü Elisha mhyiki na esütsü elongcho. Tole Hazael na Elisha engacho, 12 "Nino ntioli kyala tsüphoeyo?" Tole Elisha na janlancho, "Nina Israel lo ekhentav elhi tssov sa vamo ji tsükona a etho jakala. Nina onte rizümphen jianglo omi theniv osi onte khyingroe mmhom jiang lüngthae sirav; osi ngaro jiang tatsüngi siv, elani ngaro han jiang ha thanche siyiv." 13 Tole Hazael na ezocho, "Aiyo ochoela, hojito etho ejüi a kümvüla?" Aiyo ntia mek. Tole Elisha na ezolancho, "OPVÜI na, nina Syrialo mesao tssov to a hungthukthaka." 14 Hazael na Benhadad thüngi yile heto ombo engacho, "Elisha na kvüto phyochola?" Hazael na ezocho, "Ni mmhona yinrüngu ka to a ezocho." 15 Tokhatola ojyua to jo Hazael na khongkhosü khi ojü jümi mesao ji eyuki mmhüktsüngi chüthukcho. Osi Hazael na Benhadad echungchoe mesao kümcho.
Juda lo Jehoram mesao
16 Ahab tsoe Joram na Israel lo nzyu mongo to mesao tssoathüng. Jehoshapath tsoe Jehoram na 17 ombo nzyu thümro enioto lo Juda lo mesao kümcho osi nzyu tiza Jerusalem lona sacho. 18 Ombo eloe jo Ahab otsolov tssocho osi Ahab wopan esüa ombo na Israel mesao jiang etssophyo n mhom jiang phankacho. ombona OPVÜI mhadungo mmen tssocho, 19 tokhatola OPVÜI na ombo nri David thüngi ombo tsoronichen na yansanrhüv to phyoe elio jina Juda ji moni n sithukcho. 20 Jehotam yansa yuta lo Edom na Juda panlana ombobo ekhüng evan meta kümcho. 21 Hojitsükona Jehoram na ombo ritsso zotoro jiang sosi Zair lo wotale Edom rasan jiang na onte hazhüi sicho. Tokhatola zümothüng Jehoram na ombo rasan esopvüi jiang nzo kvütoli sana chonchi tsanchocho osi rasan jiang na onte ki nzonsorae yicho. 22 Hojithüng na benkae Edom ji Juda thüngina ekhüng meta kümcho. Yuta tsük shilo Libnah yantsü jina ekhüng tssoa phanthicho. 23 Jehoram na tssocho thanpo jiang topvü Juda mesao motsü kako eranphen lo eranrae lia. 24 Jehoram chüale David yantsü lo mesae khüp lo sothecho osi ombo tsoe Ahaziah na mesao ombo echungcho.
Juda lo Ahaziah Mesao
25 Israel lo Ahab tsoe Joram yansa nzyu taro enio to jilo Jehoram tsoe Ahzaiah na ombo nzyu mekyu enilo 26 Juda mesao kümcho osi Jerusalem lona nzyua sacho. Oyo jo Ahab mesao otsolov Athaliah Israel mesao Omri orüv ji, 27 Ahaziah ha Ahab mesao thüngi yanpiyanthan yakchia opahtao jina ombo ha Ahab mesao wopan esüa OPVÜI mhadungo mmen tssocho. 28 Ahaziah mesao na Israel mesao Joram thüngi khümtsütae Syria mesao Hazael thüngi ori tssocho. Rasan okho eni ji Gilead lo Ramoth lona rotacho osi Joram ji ritsso lona meyancho. 29 Ombona okhfü ji pothoku tanüngo Jezereel yantsü lo yi sicho osi Ahaziah na owo ombo janthechicho.
Jehu Ji Nzüyia Israel mesao kümthukala
1 Hojithüng zenkying Elisha na zenkhying yolo nungoe tsüka tsae ezocho, "Methaki Gilead meta Ramoth yani woa osi olive thyujü pvü shi khi hansi, 2 nina hoji metaji jana na Nimshi tsoe Jehoshaphat ji tsoe Jehu ji yana. Osi ombo sosi oshom jiang nkachoa kichungchakpoe na oyi, 3 thyujü shina nzüyia heto ezoa, 'OPVÜI na Israel lo mesao ni kümthukala.' Tothakana zaktole meta jilona kholani yia." 4 Zenkhying honghori jina Ramoth lo wole, 5 rasan esopvüiden jiang etssi thyuta vancho. Tole ombona ezocho, "Tsüphoeyo, ana ni tsükona yithen hansi rocho." Tole Jehu na engacho, "Nino e yolo ocho ezoala?" Zenkhying jina ezocho, "Ni ezoala tsüphoe yo." 6 Jitosi onina kichungchaki rheyi thyujü ji Jehu nzüyisi zenkhying jina heto ezocho, "Israel Potsow OPVÜI jina heto phyoala: 'Ana Israel lo mesao ni ethüngchetala. 7 Nina ni pvüi Israel mesao Ahab tsoe ji lüngthae sile, tona ana Jezebel na a zenkhying jiang osi a phajae thanpoe jiang lüngthao ji man khangshi ntssonshi pivka. 8 Ahab wopan osi tsoronichen jiang topvü chüthukvüka; ana ombo wopan lo eboetso topvü ngaro eran chürathukvüka. 9 Ana Israel mesao Jeroboam osi Baasha mesao wopan jiang ezüp pio ji esüa ombo wopan jiangha ezüp pivka. 10 Jeze bel müng jo shothev meka; ompvü müng jo Jezreel metae na füro na tsoe sivka.' " Heto ezosi zenkhying nungoe jina tsani yi sicho. 11 Jehu na ombo tephfü tsüphoe jiang thüngi yile ontena heto ombo engacho, "Ntia ephyorüv jo n tssonüng? Zhüvae jijo ntio ni rüngiala?" Tole Jehu na ezocho, "Ombona rüngwo ji ntena ntsia." 12 Tole ontena ezocho, "Meka, ena n tsika e zoa!" "OPVÜI na mesoa ni ethüngchethaka to ombona a ezocho." 13 Jitopvü ombo tephfü tsüphoe jiangna onte sü jiang phungi sae Jehu ji jilo nhyekae vanthuksi tatara khfüta, "Jehu jo mesao ka!" to tüngtacho. Israel Lo Mesao Joram Lüngthao Ji 14-15 Joram na Syria mesao Hazael thüngi Ramoth lona ori tssoathüng ombo tssatssoe hoji owo Jezreel lona talünga vanathüng Jehu na ombo lo okyak theta phanthicho. Jehu na ombo tephfü tsüphoe jiang heto ezocho, "Ntena a thüngoe tssoa tssona ochina ha Ramoth lona kichuki owo Jezreel kyon jiang ti-ezotakhe." 16 Tosi ombona ritsso zotoro jilo tsanthe Jezreel lo wocho. Joram ji okhfü n pohancho, osi Juda mesao Ahaziah na oro janthechia vancho. 17 Jezreel lo richei jina Jehu tona ombo woro to tsata hungi tüngkachicho, "Ana kyon sana tsata hungala!" Tole Joram na ezocho, "Kurü mankvüi na ochosana wothuka zethuka, ete ri alo yenki sana." ' 18 Tole yithenpvüi jina tsankae yunga owo Jehu engacho, "Nino ori alo oshom sana to mesao na ntsihungala." Tole Jehu na ezocho, "Jijo ni elhi meka!" "Oyi a sülami vantheta." Tole rizüm jina zechia vansi yithenpvüi jina owo janthakasi elani n yiala to phyocho. 19 Tole yithenpvüi thanpoe wolanthuki owo engao tsük ji Jehu engale Jehu na jiha heto ezocho, "Jijo ni elhi meka! A sülani oyi vantheta." 20 Rizüm jina zeta vansi yithenpvüi jina owo janthaka osi kholani n yiala to phyolancho. Ombona hetoha phyocho, "Razhü ji esopvüi jijo zhüvae Jehu esüa tüv jina zotoro lo tsankae tsata." 21 Joram mesao na ezocho, "A zotoro ji methaka." Tole methakicho osi Ahaziah mesao oni nzo ombobo zotoro lo tsankae Jehu mesao yana wotacho. Ontena Naboth li jilona ombo ndukcho. 22 Tole Joram na engacho, "Nino noying lona tsacho alo?" Tole Jehu na janlancho. "Kvütoli noying lichevla, niyo Jezebel na vao ratssen rapvü osi kisü-ekhüm shiang enhünga lea lia" 23 Tole Joram na "Shijo meta kyakthechi elhi la!" to Ahaziah ezoa ombo zotoro ji khophi tsancho. 24 Tole Jehu na ombo lotssi ji pvükhyong khongi Joram kocho osi mankvü ji korhüpi rheyi lümbüm ji rhakcho. Tole Joram ji ombo zotoro lona elongi chüi sicho. 25 Osi Jehu na ombo tephfü Bedkar ji heto ezocho, "Ombo müng ji khi Naboth li jilo sia ni tona a tona Joram opo Ahab sülani sanphitathüng OPVÜI na heto phyoji nchümi zeta: 26 'Naboth tona ombo tsoe to jiang lüngthao ji ana njyu hungka. Hoji tsükona ana litsük shilona ni nlilam to phyochakala.' Hoji tsükona Joram müng ji khia." Tole Jehu na ombo jokyim jiang heto ezocho, "Hoji tsükona ombo müng ji khi Naboth li shilo sia OPVÜI yi ji benthuka."
Juda Lo Ahaziah Mesao Ji Lüngthatala
27 Hojito tssoji Ahaziah mesao na hungwo jina ombo zotoro lona Beth Haggan yantsüwoe tsana yile Jehu na phancho. Tole Jehu na ombo woro jiang heto ezocho, "Ombo ha lüngthata!" Tole ontena ombo ji zotoro lona Ibleam yantsü ndüngo Dur woe yia vanathüng ombo tssatssocho, tokhatola ombona to yia vansi Megiddo yantsüi na oyi chücho. 28Tole ombo küpo tsü phoe jiangna ombo müng ji zotoro lona Jerusalem lo hansi oyi David yantsü mesa khüp lo ombo shothecho. 29 Ahab tsoe Joram na Israel lo nzyu taro ekhao to mesao tssoathüng Ahaziah na Juda mesao tssocho.
Jezebel Mesali Ji Lüngthacho
30 Jehu na Jezreel lo chiyicho. Osi ntio tssocho sana Jezebel na zoale ompvüna mhyikhono enyi kvü esesi, otssan ji khyei hansi mesaki kipüngro lona lantsüi zechochia vancho. 31 Jehu na pikhfü kipüng ji yaki rhoroale ompvüna ezocho, "O Zimri! Münghanyo! Nino ntio tsükona hepi roala?" 32 Tole Jehu na zekachisi ezocho, "Ochona a thüngoe thetala?" Tole Mesaki tsüphoe otsük enithüm na zechukchile 33 Jehuna heto onte ezocho, "Ompvü rhümae shümchochia!" Tole ontena ompvü shümchochicho. Tole ompvü ejen na kyimchung tona kurü to jiang tümkachicho, 34 Jehu na ompvü müng ponina ombo zotoro jiang emunga mesaki rhowo etsoyu tssocho. Jisüloti ombona heto phyocho, "Etssakthao eloe ji khi shothei sitava phyolea ompvüha mesatsolo ka." 35 Tokhatola ompvü shothelo chivo jiangna ompvü kvüriryu, ojo-okhe ryu to tae hungcho. 36 Ontena hoji Jehu ezotale, Jehu na ezocho, "OPVÜI na ombo phajae Elijah yakchia heto phyowo ji benaka: 'Jezereel metae na Jezebel so jiang füro na tsovka. 37 Ompvü so enhyo jiang ji hojilo na ojü nzüato nzüroe sisi, ochinaha ompvü chethev meka.' "
Ahab Tsoronichen Jiang Lüngthatala
1 Ahab mesao tsoronichen otsük ekha tiying Samaria yantsü lo vana vancho. Jehu na yithen erani yantsü esae jiang, kyon opvü opvü jiang tona Ahab wopan eramoe jiang to piracho. Yithen ji heto erancho: 2 "Nteno mesao tsoronichen jiang ezepvüiden jiang osi nte tsütsav tsükona zotoro, kurü, ebensü osi pikhfü yantsü likhana. Hoji tsükona ntena yithen shi hungpvüto, 3 mesao tsoronichen jiang yolona etümo tüv tsüka ethüngche mesao kümthukuka osi ombo nkohav tsükona rota zalanchitava." 4 Tole Samaria lo yansae jiangna ekhentsünga heto phyotacho, "Kvütoli etena Jehu mesao panlana elhi tssovla? Jordan mesao osi Ahaziah mesao na samona hojito n tssokhukvülo." 5 Tosi mesaki enhyang yolo tsüphoe ji tona, kyon opvü etssoe osi mesao wopan eramoe jiangna yithen heto Jehu hanthukcho, "Eiyo ni phajaeden, osi nina ntio phyoana ena tssov tokhatola ena mesao ethüngu jo ntoka, nina kvütolyu na mmhom to zechetana ni etsso tssole." 6 Tole Jehu na heto onte eranlancho: "Ntena a thüngoe tssoa tssona osi a yizüng enga tssona Ahab mesao tsoronichen kvüri jiang hansi ojyua heto-thüng Jezreel lona oro a nduktava." Ahab mesao tsoronichen otsük ekha tiying jiango Samaria yantsü lo kyon ethelan eli-i jiangna tanünga süphi lümbüma vancho. 7 Ontena Jehu yithen kako ji hungpvü Ahab wopan ekha tiying jiang kvüri jiang onkhani tekho lo therae Jezreel lo hansi Jehu pilo wothukcho. 8 Kvüri jiang hansi yithaka to Jehu na zoale ombona kvüri jiang ji yantsü kipüngo oren eni tssoe reni ojyuato enya nandang vale to ezocho. 9 Ojyuato enya jo ombona yantsü kipüngi chiwo jilo kyon vamo jiang ezocho, "Joram mesao chüthukvü kyaktao ji osi chüthuko ji ana, nte ntamo tüv n li. Tokhatola ochona shiang lüngthachola? 10 Shiang zena OPVÜI na Ahab tsoronichen tsükona phyo jiang topvü benkhanala. OPVÜI na ombo zenkhying Elijah yakchia ntio phyocho sana jiang benthukthaka." n Tosi Jehu na Ahab opan, oshom, pvüti osi tsüphoe vanhamo jiang topvü lüngtharae sisi ochia n nhyokathukcho.
Ahaziah Wopan Jiang Lüngthatala
12 Jehu na Jezreel lona khochi Samaria lo wocho. Tole olani "Olyu enhyang nchenphen," to tsao 13 jilona ombona Ahaziah mesao wopan ejoma ndukle ombona "Nteno ochoangla?" to onte engacho. Ontena eiyo "Ahaziah opanden ka." "Ena Jezreel lo owo Jezebel mesali wopan jiang yikrachi pilo yitaka" to ezocho. 14 Tole Jehu na ombo woro jiang "Onte rhümarhyua!" to ezosi ombona hojilo sokvü motsünga ndüngo na lüngtharae onte sicho. Razhü jilo otsük zhürosi eni ji ochia n nhyokav lüngtharae sicho.
Ahab Wopan Enhyokao Jiang Topvü Lüngthatala
15 Jehu na khochilani yia vanle olani Rechab tsoe Jonadab na ombo ndukcho. Jehu na ombo salümsi ezocho, "Eni nchümri esütaka nina a thüngoe tssetssovla?" Tole Jonadab na, "Tssovka" to ezocho. Tole Jehu na, "Toka ni khe ji yonchia" to ezoa okhe echitasi Jehu na heto ezoa zotoroe sükacho, 16 "A phana oro eiyo OPVÜI elhi lo kvütata lüm thecho sana nibobo a zeta." Tosi oni nzo Samaria lo zotoroe na wotacho. 17 Onina owo janle Jehu na Ahab wopan jiang tsüka tia n hyov chüthukcho. Heto tssovto OPVÜI na Elijah ezoe licho.
Baal Ekhüm Jiang Lüngthatala
18 Jehu na Samaria kyon jiang tsarhyui heto ezocho, "Ahab mesao na Baal potsow ji tara benkacho, tokhatola ana hojilo na kyongkata ombo benkavka. 19 Baal zenkhying osi ombo ekhümden jiang osi ombo pvüti jiang tsarhyua. Osi ochia khachoa ti vanthuka; ntiotssole ana Baal othan epi ekhüm tsüphov methakala, osi ochona n roa sana chüthukvüka." (Shijo Jehu na Baal ekhüm jiang lüngtharav kyakcho.) 20 Tosi Jehu na heto yizüng picho, "Baal ekhüm tsüngon motsünga kokata!" Tole tsüngon ji kokatacho, 21 osi Jehu na Israel meta topvü lo yithen picho. Baal ekhüm topvüna tsüka tia n khachov roracho. Onte topvüna Baal khümpheni rhowo ochümi na ochümi jana pyingkachicho. 22 Tosi Jehu na pvüti jiang thüngi ntho mpensü jiang hansi oyi Baal ekhüm jiang benrithukle to ezocho. 23 Jisülo jo Jehu na Rechab tsoe Jonadab sosi khümpheni rhowo kyon jiang heto ezocho, "Shilo Baal ekhüm yaka OPVÜI Potsow ekhüm ti rhorole." 24 Jitosi omboha Jonadab onina Baal othan pilo rhowocho. Ombona khümphen haphoe otsük ekhatiza vanthuko jiang heto ezoe vacho: "Ntena shiang topvü lüngthav ka, ochona tsüka lea tsanthuka sana ombo eküm na wothüng tssovka!" 25 Jehu na othan ji pipvüto ombona enhyang jiang heto ezocho, "Rhowo onte topvü lüngthata, onte tsüka lea ti tsanchothuka!" Ontena yonri süchei rhowo onte lüngtharae omüng jiang haphoe süchukracho. Jisülo jo ontena khümphen chungchak ochungoe rhowo, 26 ntho long chümkachi lio ji khi hansi chiyi rungi sitacho. 27 Hojito ontena ntho long ji tona khümphen ji to roe sitasi khümphen jilo jo nyalungkvü kümi sithuko ji nchüng jana lia. 28 Hojitoli Jehu na Israel lona Baal ekhüm jiang monthuki sicho. 29 Tokhatola ombona Jeroboam mmen ji hungchoe tssocho, hojijo ombona Bethel tona Dan to lo shona mangsüpung kisü nsüngrüi vao ji Israel khümthuko ji. 30 OPVÜI na Jehu ezocho, "Ana Ahab wopan tsükona ntio tssoto ni ezocho sana nina engathaka hoji tsükona ana phyoala, ni tsoronichen na echungren mezhü nandang Israel lo mesao tssovka." 31 Tokhatola Jehu na OPVÜI Israel Potsow yizüng ji ombo lümbüm totona n ngacho, jithüngona jo ombona Israel mmen tsothuk Jeroboam hungchoe benphicho.
Jehu Chüo Ji
32 Hojithüng OPVÜI na Israel meta ji terikathuka benkacho. Syria mesao Hazael na Israel meta 33 Jordan na engchirolamoe jiang osi Amon zhükhfü lo Aroer yan jana khicho. Hojilo Gad, Reuben osi Manasseh engkhfüwoe jiang to jipo vanphen Gilead osi Bashan jiang khinhyacho. 34 Jehu na tssocho thanpo, osi ombo lüm etsson elhi jiang topvü Israel mesae motsü jilo erankhani lia. 35 Ombo chüi Samaria lo shothecho osi ombo tsoe Jehoahaz na mesao ombo echungcho. 36 Jehu na Israel mesao Samaria lona nzyu mekyu tiza sacho.
Juda Lo Mesali Athaliah
1 Ahaziah mesao oyo Athaliah na ompvü otsokhyungo oyam na lüngthao ji yivon zopvü na mesao wopan topvü lüngthae sile to yizüng picho. 2 Ahaziah tsoe Joash tae tsanchocho. Ombo ha thanpoe jiang nzo lüngthav vancho ono Jehosheba, Jehoram mesao otsolov osi Ahaziah oyuloe jina ombo shanchocho. Ompvüna ombo tona ombo nijüppvüi ji to sosi khümphen chungi yiphen jilo rhowo Athaliah thüngina mphoe vanthuki tsanchothukcho. 3 Jehosheba na eboeroro ji nzyu tiruk nijüpa khümpheni mphoe vanthukcho, osi jithüng jo Athaliah na mesali tssoa sa vancho. 4 Nzyu tiyingo to jilo jo pvüti Jehoiada na mesao enhyang jiang esopvüi jiang tona mesaki enhyang jiang to khümpheni role to tsachicho osi ombona lanka nlansüngi vao jilo ombo phankale to echümthukcho. Ombona Ahaziah mesao tsoe Joash ji onte ejüsi 5 heto yizüng picho: "Ntena emung tsüngono jilo roana nte echi ethümo echia jo mesaki ji nhyak; 6 echia jo Sur kipüng ji nhyak; osi echia jo enhyang thanphoe jiang nkoha onte sülamoe vanivka. 7 Emung tsüngono enhyang okho eni esanta vamo jiango khümpheni mesao nhyaka vamka. 8 Ntena Joash mesao ji yonri tssüngche bensi ombona kvüi woana phanphia nhyakvüka. Osi ochona nte ndüngo roana lüngthae sivka." 9 Tsüphoe jiangna Jehoiada yizüng jiang enga onte küpo enhyang jiang emungo elhi ejamo jiang osi esan jamo jiang topvü sosi rocho. 10 Jehoiada na David echi otsso jiang, otsung jiang khümpheni elio jiang khi onte picho, 11 osi khümphen haphowoe jiang füchüma yonri tssüngche bensi onte vanthukcho. 12 Tosi Jehoiada na Joash sosi chiyi mesa kiven ji ombo khothuksi, mesao tsükona shikhfü eramo ji kako motsünga ombo picho. Tosi Joash ji thyujü nzüyia mesao to ethüngchecho. Kyon topvüna okhe tümphia, "Mesao ji harishithuka!" to phyotacho. 13 Enhyang jiang tona kyon jiang to na nshatao ji Athaliah mesali na zoe khümpheni kyon etssüi vamo jilo wocho. 14 Tole mesao ethan ji khümphen rhowolani durhyu jilo shikhfü ephan mangi vana hungcho. Ombo ji tsüphoeden tona tatara ekhfüi to jiangna hachümi kyon jiang topvü na longshita tatara khfüta vancho. Tole Athaliah na etho jaka ompvü mpensü jiang reroe sia tüngcho, "Shijo meta yeni etsoe elhi." 15 Jehoiada na Athaliah ji khüphen hakono na n lüthahungo jina ombo tsüphoe jiang heto ezocho: "Enhyang remo jiang yutalo na ompvü süsi chiyia osi ochona ompvü shanchov ekhyo tssoana hoji chüthuka." 16 Ontena ompvü rhümae mesaki sosi oyi kurü kipüng to tsao jilona ompvü lüngthacho.
Jehoiada na Ntssacho Elhi Tssowo Jiang
17 Jehoiada pvüti na Joash mesao tona kyon jiang to OPVÜI kyon tssov to phyochak vathukcho. Ombona mesao tona kyon jiang yutalo ntsata ha vathukcho. 18 Jisülo jo kyon jiangna Baal khümphen ji owo jechüchüi sitacho. Ontena thanphen jiang; kisü jiang to roe sisi Baal pvüti Mattan ji, thanphen ndüngona lüngthae sicho. Jehoiada na khümphen ji enhyang vanthukracho, 19 osi ombo tsüphoe jiang, mesao enhyang jiang tona mesao ji to khümpheni na sosi kyon jiangna phana mesaki wotacho. Joash na enhyang kipüng jilona rheyi vantsü jilo khokthecho. 20 Kyon topvü emathana pyingcho osi yantsü jiha noyingcho, ntiotssole Athaliah ji mesaki na lüngthae sithako jina. 21 Joash na ombo nzyu tiyingo Juda mesao tssocho.
Juda Lo Joash Mesao
1 Israel lo Jehu mesao na nzyu tiyingo to sa vanathüng, Joash na Juda mesao kümcho osi Jerusalem lona nzyu zhüro sacho. Oyo jo Beersheba yantsü kyon Zibiah to tsacho, 2 Ombo eküm totona OPVÜI lüm erüngo tssocho, ntiotssole pvüti Jehoiada na hoto etssov ombo ntssungcho. 3 Tokhatola nlongtsüi khümphen jiang jo roe n sicho. Hoji tsükona kyon jiangna hojiang lona othan pita tssütse rungtacho. 4 Joash na pvüti jiang sanrhyui khümpheni othan yutalo orang theo jiang, thathi thanphen yuta jianglo theo jiang osi lüm erungthan jiang topvü nkümi vale to ezocho. 5 Pvüti otsük akvü ombo mbo elhi janathüng orang thamo jiang zei ekhümki ntsüpnrüp osi thanpo ethelan lo tsütsav vale to ezocho. 6 Tokhatola Joash na nzyu mekyusi ethümoto yansa jana pvüti jiangna khümphen ji ntsüpnrüp elhi ntia n tssocho. 7 Hoji tsükona ombona Johoiada tona pvüti thanpoe jiang to tsae heto ezocho, "Nteno ntioli khümphen ji n zechotala? Nchüngna benkae orang ji ntena ti vata, hansi roa, tona khümphen ji ntsüpmrüptavka." 8 Pvüti jiangna hoji khichocho osi ontena khümphen ji ntsüpnrüp elhi tssov to methakcho. 9 Jisülo jo Jehoiada na bakos khi, elhüp jilo okvü verhüpi thanphen ji ndüngo rhowolan amimoe vacho. Pvüti ocho elhi jana na jina ekhümo eroena orang theo jiang khi jilo theta vancho. 10 Kvüthüng bakos jilo orang khosha jüa na mesa eranpvüi ji tona ntssoni pvüti to jiangna oro janti rang jiang phyoni kholungthuki füi zetacho. 11 Ontena kvüta fücho cho sana ji merüka sekae vasi janti ji khümpheni elhi ezepvüi ji khelo theyicho. 12 Osi hojiang ji kitssoe, longjoe, longroe to jiang picho; osi olong, otssüng to shi khi ntsüpnrüp osi thanpo ethüng ezi osi ethelan eli lo tsütsacho. 13 Tokhatola orang jijo jantipvü ejov, phikuk, tatara man epiv osi milon jiang tsütsavlo tona shona janti tsütsaelan thanpo jiang to jo nti loha n tsütsacho. 14 Tolea elhi etssoe topvü jokheman tona ntsüpnrüp elhi to lona orang ji ezicho. 15 Hoji rang ezei jiango elümoto ntsanrüko jina orang ji etssüngi zetav ethev n licho. 16 Elani lothuklan than, tona mmen than to jiango pvüti echi tsso jina bakos jilo n thechicho. 17 Hoji yutalo Syria mesao Hazael na Gath yantsü ji hayae khyoe khicho; jisülo jo ombona Jerusalem hav methakcho. 18 Tole Juda lo Joash mesao na ombo vüngoe mesao jchoshaphat, Jehoram tona Ahaziah to echungo OPVÜI thamo jiang khyarhyui jilo ombo echungo othan jiang; elani khümpheni ejüeli vapheni shona janti jiang, mesaki shona janti jiang topvü tsotsüi Hazael mesao thüngi yantso picho. Jisüloti ombona rasan jiang Jerusalem lona sosi kholani yicho. 19 Joash mesao na tssocho thanpo topvüto Juda mesae jiang motsü kako lo eranrae lia. 20-21 Joash mesao küpo tsüphoe jiangna ombo kyakthechiv khyentacho, osi onte yulo otsük eni, Shimeath tsoe Jozakar tona Shomer tsoe Jehozabad to onina Jerusalem engkhfüwoe Silla jowolani ochon hanthei oki tssokao Beth Milo to tsao meta jilona ombo lüngthacho. Josah ji David yantsüi mesa khüp jilo ombo shothecho osi ombo tsoe Amaziah na ombo echungi mesao tssocho.
Israel Lo Jehoahaz
1 Ahaziah tsoe Joash na Juda lo nzyu mekyu ethümoto mesao tssoa thüng Jehu tsoe Jehoahaz na Israel lo mesao kümcho osi ombona Samraia lona nzyu taro tiying sacho. 2 Ombo vüngi Jerobaom mesao ji esüa omboha OPVÜI mhadungo mmen tssoa Israel ji mmen etssov lo sokacho, osi ombo mmenlan ji n vachicho. 3 Hojitsükona OPVÜI na Israel thüngi lümbüm tsuki Syria mesao Hazael tona ombo tsoe Benhadad to khi elan elani Israel ji khyothukcho. 4 Tole Jehoahaz na OPVÜI thüngi randancho, tole Syrian jiangna Israel jiang elümoto harukka khangshio ji OPVÜI na hungwo jina ombo randan ji engayicho. 5 OPVÜI na Israel lo esopvüi rothuka Syrian jiang khyothechi sithuk si ovüngthüng esüa noyinga vanthukcho. 6 Tokhatola oritena Jeroboam na onte sokao mmen ji n vachiv tssota vancho, osi eloe potsow Ashera ji kisü ji Samaria topvülo licho. 7 Jehoahaz ji rasan n nhyokav sicho osi kurü rasan tinyan, ritsso zotoro taro, liko rasan wothüng taro to tae enhyocho, ntiotssole Syria mesao na onte ji lüngtharae livero küma likoe tssekae sithakcho. 8 Jehoahaz na tssocho thanpo topvü osi ombo lüm etsson elhi topvü Israel mesao jiang motsü lo eranrae lia. 9 Ombo chüi Samaria 10 shothe sicho osi ombo tsoe Jehoash na mesao ombo echungcho.
Israel Lo Jehoash Mesao
10 Juda mesao Joash na nzyu thümro tiying to sathüng, Jehoahaz tsoe Jehoash na Israel mesao kümcho osi ombona Samaria lona nzyu tarosi tiruk sacho. 11 Ombona Nebat tsoe Jeroboam ejyu-esü khia Israel ji mmen elhilo sokacho. 12 Joash na tssocho thanpo topvü, elani ombona lüm tssona Juda lo Amaziah mesao thüngi ori tsso jiang topvü Israel mesao jiang motsü kako lo erani lia. 13 Joash ji chücho osi Samaria lo mesae müngsipheni ombo shothecho osi ombo tsoe Jeroboam enioto jina mesao ombo echungcho.
Elisha Chüo Ji
14 Elisha zenkhying ji chüo tüv nochonori khyingi chüa vanathüng Israel mesao Jehoash na owo janthechicho. Ombona heto phyocho, "Apo, Apo! nino Israel nkochepvüi thotsü jika!" 15 Tole Elisha na ombo ezocho, "Lotssi motsünga tona lotsüng tara to yani hansi yia." Jehoash na yani hansi yile, 16 hoji ekov methakle to Elisha na ombo khe ji mesao ji khelo rhümaecho. 17 Jitosi zenkhying jina ezo ji ephan mesao na Syria metawoe zechiwo kherüki ji chonchicho. Jitosi Elisha na ezocho, "Lotssi ji kochia!" Tole mesao na kochipvüto zenkhying jina ezocho, "Nino Syria ekhyov lo Potsow lotssi jika, nina hoji khi Syrian jiang pono ekhyo khivka. Nina Aphek lona Syrian jiang ekhyo nandang rothechi sivka." 18 Jitosi Elisha na lotsüng ejoma jiang khi likoe kothechile to mesao ezocho. Tole mesao na liko ji yenjo ethüm kosi esancho. 19 Hoji hungi Elisha na lüm tsuka mesao ji heto ezocho, "Nina yenjo mongo tiruk kothechiv ethev lila, tovo Syrian jiang khyothechi sivla, tokhatola nina yenjo ethüm tae onte khyovka." 20 Elisha chüi shothei sicho. Osi tsüngkying akvüto Moab kyon okho okhona Israel metaji phano rotacho. 21 Nchuka lojo echü talüngta vanathüng okho jiang yolo okho motsünga roa hungi ontena omüng ji Elisha khüp jilo ekachi sia tsantacho. Tole echü jina Elisha ryu jianglo evüngkatale jitopvü echüi ji kümchelani phanthicho.
Israel Tona Syria To Ritsso
22 Jehoahaz mesa echung yuta tenhya ji Syria mesao Hazael na Israel jiang elümoto ezüpthukcho, 23 tokhatola OPVÜI na onte nzana osi khonzana vancho. Ombona onte ji moni n sithukhungcho osi ombona Abraham, Isaak osi Jakob thüngi ntsata lio ji ephan onte nzanchia vancho. OPVÜI na kvüthüng ha ombo kyon jiang n mhechohancho. 24 Syria lo Hazael mesao chüsi sülo ombo tsoe Benhadad na ombo echungcho. 25 Osi Israel mesao Jehoash na Benhadad ji yenjo ethüm khyocho, toli Benhadad na Jehoash opo Jehoahaz echungo yantsü khiyio jiang phancholani khicho.
Juda Lo Amaziah Mesao
1 Jehoahaz tsoe Jehoash na Israel lo nzyu enioto mesao tssoathüng, 2 Joash tsoe Amaziah na ombo nzyu mekyu mongolo Juda mesao kümcho osi ombona Jerusalem lona nzyu mekyu tokvü sacho. Oyo jo Jerusalem kyon Jehoaddin to tsacho. 3 Ombona OPVÜI emathao elhi tssocho. Tokhatola ombo omotsüi David mesao esüa mekcho; ji thüngona jo opo Joash elhi jiang hungchoe etssophyocho. 4 Ombona n longtsüi khümphen jiang roe n siyicho osi kyon jiangna hojiang lona othan pita orhüm mmhom rungtao ji n tümjakcho. 5 Amaziah na etho tsütsata ekhüngyan ji sajünga yiale ombona tsüphoe ochoangna opo mesao ji lüngthacho sana jiang chüthuka phanthicho. 6 Tokhatola onte ngaro jiango ombona n lüngthayicho osi OPVÜI na Moses shikhfü lona heto phyoe elio jiang ephan heto tssocho: "Ngaro jiang nlan lona opvüpoe jiang ti chüthuka, osi opvüpoe jiang nlan lona ngaro jiang ha ti chüthuka. Kyon tsüka ji ombo nlan lona tae chüthukvü ka." 7 Amaziah na Oma Hayi jilona Edom rasan wothüng taro lüngthacho; ombona Silla yantsü ji khyoe khisi yantsü mying ji Joktheel to tsacho osi hoji nchüng jana tsatala. 8 Jisülo jo Amaziah na Israel mesao Jehoash thüngi yithenpvüi wothuka rotav nocho. 9 Tokhatola Jehoash mesao na heto janlana yithukcho, "Tsüngonalo Lebanon phunglani okyorhyu motsünga Cedar dung ji heto ezocho, 'Ni tsolov ji a tsokhyongo thüngi yanpithuka.' Tole orae ekümrümo sana chiyi okyo-rhyu ji tsseroe sicho. 10 Amaziah, nina Edom kyon jiang khyo jina ni kangtsüa vanala. Hoji tsükona hoji myingthüng ji khi lüm püka vana. Ntioli nyinyang shichei ni osi ni kyon jiang monthukvü yanala?" 11 Tokhatola Amaziah na n ngacho, hoji tsükona Jehoash mesao na ombo rasan sosi Juda meta Beth Shemesh lona ombo thüngi rotacho. 12 Amaziah rasan jiang ji khyothechicho. Osi onte topvüna oki tsani yiracho. 13 Jehoash na Amaziah ji rhümae vüngpheni thechisi Jerusalem moe khochilancho osi yantsü pikhfü ji Ephraim kipüng lona Nken kipüng nandang rorhüpi sicho osi jijo metre nzo eni bena rorhüpcho. 14 Ombona ombo mhadungo yanchecho to etsa, shona janti osi khümpheni tsütsaelan osi mesaki ejüeli jiang khi hansi Samaria lo yicho. Ombona kyon ha ejoma rhümae sosi yicho. 15 Jehoash na tssocho thanpo topvü osi ombona lüm etsson lona Juda mesao Amaziah thüngi rotao jiang motsü topvü Israel mesa kako lo eranrae lia. 16 Jehoash ji chüi Samaria lo mesae khüpo shothecho osi ombo tsoe Jeroboam enioto jina mesao ombo echungcho.
Juda Lo Amaziah Mesao Chüo Ji
17 Israel mesao Jehoash chüsi sülo Juda mesao Ahaziah na nz yu taro mongo vanlancho. 18 Amaziah na tssocho thanpo topvü Juda mesao motsü kako lo erakhani lia. 19 Jerusalem lona Amaziah lüngthav khyentacho, hoji tsükona ombona Lachish yantsüi tsani yicho, tokhatola ombo ri jiangna ombo phani hojilo na ombo lüngthacho. 20 Ombo echümüng ji kurü mankvüi na hansi oyi Jerusalemi mesa khüpo ombo shothecho. 21 Jitosi Juda kyon jiangna ombo tsoe nzyu taro tiruk Azariah ji mesao kümthukcho. 22 Opo echüi süiti Azariah na khyolani Elath ji tssocholani vacho.
Israel Lo Jeroboam Mesao Enioto Ji
23 Joash tsoe Amaziah na Juda mesao esa nzyu taro mongoto jilo Jehoash tsoe Jeroboam na Israel lo mesao tssocho. Osi ombona Samaria lona nzyu zhüro ekha sacho. 24 Ombona Nebat tsoe Jeroboam mesao ochona Israel ji mmen elhi lo sokacho sana ji phankata mmen tssocho. 25 Ombo na ovüngthüng Israel na hoe khio meta jiang topvü khyolani khicho, jükiwoe Hamath eyak lona jüjowoe echü jümang nandang ji. Shijo OPVÜI na ombo nri Jonah zenkhying Hepher Gath yamo Amittai tsoe ji yakchia phyoe vao ji bencho. 26 OPVÜI na Israel jiang ezüp ekhenthav ji osi ochinaha onte n zanchiv vamo ji hungcho. 27 Tokhatola' Israel ji roe monlangi sithukvü jo OPVÜI na n tümcho, hoji tsükona ombona Jeroboam mesao enio ji yakchia onte shanchocho. 28 Jeroboam enio jina tssocho thanpo topvü, ombo lüm etsson ritsso jiang osi kvütoli ombona Damaskus tona Hamath to recholani Israel pichosana jiang topvü Israel mesao motsü kako lo erankae lia. 29 Jeroboam chüi mesa khüp lo ombo shothecho osi ombo tsoe Zekhariah na ombo echungi mesao tssocho.
Juda lo Uzziah Mesao
1 Israel lo Jeroboam mesao enioto jina nzyu mekyusi tiyingo to sathüng, Amazaiah tsoe Uzziah na 2 ombo nzyu taro tiruk lo Juda lo mesao kümcho osi ombona Jerusalem lona nzyu tinyansi eni sacho. Oyo jo Jerusalem kyon Jekoliah to tsacho. 3 Uzziah na opo esüa ombonaha OPVÜI emathao elhi tssocho. 4 Tokhatola otssüng olong ekhüm khümphen jiango ombona roe n siyio jina kyon jiang na hojiang lona tssütsse rhüm rungta othan pitoa ji n tümjakcho. 5 OPVÜI na Uzziah ji ofü ekyomo nochonori khyingthoki ombo echü nandang ezüptukcho. Ombona ombo kija ki vancho osi elhi lona esani vansi ombo tsoe Jotham na meta ji sacho. 6 Uzziah na tssocho thanpo jiang topvü Juda Mesao Motsü kako lo erani lia. 7 Uzziah ji chüi David yantsü mesae khüpo shothecho; osi ombo tsoe Jotham na mesao ombo echungcho.
Israel lo Zekhariah mesao
8 Uzziah na Juda lo nzyu thümro tizao to mesao tssoathüng Jeroboam enio to ji tsoe Zekhariah na Israel lo mesao kümcho osi ombona Samaria lona choro tiruk sacho. 9 Ombona ombo vüngoe esaeden jiang esüa OPVÜI mhadungo mmen tssocho. Ombona Nebat tsoe Jerobaom mesoa hungchoe Israel jiang mmen elhilo sokacho. io Jabesh tsoe Shallum na Zekhariah mesao lüngthav okyak tssoe Ibleam lona lüngthacho osi mesao ji ombona echungchoe tssocho. 11 Zekhariah na tssocho thanpo topvü Israel Mesae jiang Motsü kako lo ernkhani lia. 12 Hojito OPVÜI na Jehu thüngi heto phyoe vaoji bencho: "Ni tsoronichen jiang na echungren mezhü jana Israel lo mesao tssovka."
Israel lo Shallum Mesao
13 Juda mesao Uzziah esa nzyu thümro tokuo to jilo Jabesh tsoe Shallum na Israel lo mesao tssocho osi ombona Samaria lona choroa sacho. 14 Gadi tsoe Manahem na Tirzah lona Samaria lo owo Shallum lüngthae sisi mesao ji ombo kümcho. 15 Shallum na tssocho thanpo topvü, ombona ochungina khyenta ojiang topvü Israel mesao jiang motsü kako lo erani likhana. 16 Menahem na Tirzah lona kholani yiathüng ombona Tappuah yantsü ji roe sisi, jilo evan kyon jiang osi hoji nkonphi meta jiang to rorhüpi sicho, ntiotssole yantsü jina ombo khelo n rheyicho. Ombona ngaro ehan jiang mpato topvü mman jiang thanrhüpi siyicho.
Israel lo Menahem mesao
17 Juda lo Uzziah mesao na nzyu thümro tokuo to mesao tssoathüng, Gadi tsoe Menahem na Israel lo mesao kümcho, osi ombona Samaria lona nzyu taro sacho. 18 Ombona Nebat tsoe Jeroboam phankata ombo echü tsüngon jana Israel jiang mmen elhilo sokata mmen tssocho. 19 Assayria mesao Tiglath Pileser na Israel ori tssocho, osi Menahem mesao na ombo yansa lo ombo kyochithoku tsükona Pileser ji janti seri wothüng thümrosi mezhü picho. 20 Menahem na janti rang jiang ji ombo metalo ejüeli-i jiang thüngina khüngkata tsükalo rangpyak tinyan ren khyae picho. Tole Tiglath Pileser na ombo metae kholani yi sicho. 21 Menahem na tssocho thanpo jiang topvü Israel mesao jiang mot sü kakolo erankhani lia. 22 Ombo chüi shothei sicho osi ombo tsoe Pekahiah na mesao ombo echungcho.
Israel lo Pekahiah Mesao
23 Juda lo Uzziah mesao na nzyu tinyan to sathüng Menahem tsoe Pekahiah na Israel lo mesao kümcho. Osi ombona Samaria lona nzyu eni sacho. 24 Omboha Nebat tsoe Jeroboam mesao phankata Israel ji mmen elhi lo sokata OPVÜI mhadungo mmen tssocho. 25 Pekahiah rasan yolo tsüphoe tsüka Pekah to tsa Remaliah tsoe jina ombo ephalo Gilead yamo otsük tinyan erhümi sosi owo mesaki rizümphen ochungo jilona Pekahiah ji lüngthae sisi ombona mesao kümcho. 26 Pekahiah na tssocho thanpo topvü Israel mesaeden motsü kako lo erankhani lia.
Israel lo Pekah Mesao
27 Juda lo Uzziah mesao na nzyu tinyan enito sathüng Remaliah tsoe Pekah na Israel lo mesao kümcho. Osi ombona Samaria lona nzyu mekyu sacho. 28 Ombona Nebat tsoe Jeroboam mesao phankata Israel ji mmen elhilo sokae OPVÜI mhadungo mmen tssocho. 29 Pekah na mesao tssoathüng Assyria mesao Tiglath Pileser na yantsü shiang khyoe khicho. ijon, Abel Beth Maakah, Janoah, Kedesh tona Hazor, elani Gilead metaroro ji, Galilee metaro ji, Nephtali to. Tothakale kyon jiang jo Assyria lo sosi yicho. 30 Uzziah tsoe Jotham na Juda lo nzyu mekyuo to sathüng, Elah tsoe Hoshea na Pekah mesao ji okyak tssoe lüngthae sisi ombona mesao kümcho. 31 Pekha na tssocho thanpo jiang topvü Israel mesao motsü kako jilo eranrae lia.
Juda lo Jotham Mesao
32 Remaliah tsoe Pekah na nzyu enioto Israel lo mesao tssoathüng Uzziah tsoe Jotham na ombo nzyu mekyu mongo lo Juda mesao kümcho. 33 Osi ombona Jerusalem lona nzyu taro tiruk sacho. Oyo jo Zadok otsolov Jerusha to tsacho. 34 Opo Uzziah etsso-ephyo mmhom jiang phankata Jotham na OPVÜI emathao elhi tssocho. 35 Tokhatola ombo na n longtsüi khümphen jiang jo roe n siwo jina kyon jiang na hojiang lona othan pita tssütsserhüm rüngtacho. Osi OPVÜI khümphen jilo 'Jükiwoe Kipüng' to tsao jijo Jotham na tssocho. 36 Jotham na tssocho thanpo topvü Juda mesaeden jiang Motsü kako lo erankhani lia. 37 Ombona mesao tssoathüng OPVÜI na Syria kyon Rezin tona Israel mesao Pekah to wothuka Juda ji sakathukcho. 38 Jotham ji chüi David yantsü mesae khüpo shothei sisi ombo tsoe Ahaz na mesao ombo echungcho.
Juda lo Ahaz Mesao
1 Remaliah tsoe Pekah na Israel lo mesao nzyu taro tiyingo to tssoathüng Jotham tsoe Ahaz na 2 Ombo nzyu mekyu lo Juda lo mesao kümcho. Osi ombona Jerusalem lona nzyu taro tiruk sacho. Ombona omotsü David etsophyo mmhom jiang n phankacho. Jithüngona jo OPVÜI n mathao elhi tssocho osi 3 Israel mesao jiang phankata etsophyocho. Ombona ombo tsoe ji mpato erungthan tssoa kisü khümi sicho, osi jijo Israel jiang na meta jilo rheyiathüng OPVÜI na phani siwo jipo jiang etsophyo etssakthao jiang hungchoe tssocho. 4 Nlongtsüi jiang khümphen jianglo osi odung khümcho akvü lona Ahaz na othan pia tssütserhüm runga wocho. 5 Syria mesao Rezin tona Israel mesao Pekah to onina Jerusalem sakacho tokhatola onina Ahaz n khyocho. 6 (Hojithüng Edom mesao na Elath yantsü ji khyolani hojilo Juda kyon vamo jiang ji phanchukchirae sicho. Edom kyon jiangna Elath lo vani sicho osi nchüng jana hojilo vantala.) 7 Ahaz na Assyria mesao Tiglath Pileser thüngi heto yithen pichicho: "Aiyo ni phajae mmhon ka, oro Syria mesao ha Israel mesao oni khelona a shanchoa, ontena a thüngi ori tssoala." 8 Ahaz na khümpheni osi mesaki lio shona janti jiang khi yantso tssoa Tiglath Pileser hanthukcho. 9 Tole Pileser na Ahaz jonji ji ephanina ombo rasan jiang sosi owo Damaskas ji khyoe Rezin ji lüngthae sisi kyon jiang Kir lo sosi oyi vüngi vanthukcho. 10 Ahaz mesao na Tiglath Pileser nduko Damaskas lo wole jilo thanphen ji hungi hoji esüa kharo teriv jiang mpato benria kisü nsüngrüi Uriah pvüti ji hanthukcho. 11 Tole Uriah na Ahaz n yithüng na hoji esüa thanphen ronkachi vacho. 12 Ahaz na Damaskas lona yile thanphen ji methaki licho, 13 Osi ombona ekümrümo than tona etsoyu than to jiang ji hoji poni na thancho; osi jilo zükhi than tona khümshümta than to jilo ejen phyangkacho. 14 Yongmen yonjak na thanphen tssoe OPVÜI echhi to khaochki vao jijo khümphen tona thanphen ethan tssoji to yutalo tssocho. 15 Ahaz na Uriah ji ezocho, "A thanphen tsüpho shijo enyathüng erungthan tona mmyui benro-niro than to piphen, mesao osi ombo kyon jiang zükhi thanphen tssothuka. Osi ekümrümo kvüta thana sana jiang ejen jiang khi hoji poni phyangkata; tokhatola yongmen yonjak na romo thanphen jijo ana methevüjaphen a vayia." 16 Tole Uriah na mesao ji yi ephan tssocho. 17 Khümpheni tsütsaphen yongmen zotoro jianglo phikukro theo jiang Ahaz mesao na khi sicho, osi yongmen yonjak mangsüpong taro eni ji sülamoe yongmen jükha jiha khi olong poni ndungkae sicho. 18 Osi Assyria mesao ji emathathoku tsükona Ahaz na khümpheni mesa vantsü ekachiphen ronkao ji khi sisi, mesao na khümpheni kijae na rhowolan jiha khani sicho. 19 Ahaz mesao na tssocho thanpo topvü Juda mesaeden motsükako jilo eranrae lia. 20 Ahaz ji chüi David yantsü lo mesae khüpo ombo shothecho osi ombo tsoe Hezekiah na mesao ombo echungcho.
Israel Lo Hoshea Mesao
1 Juda lo Ahaz mesao na nzyu taro enioto sathüng, Elah tsoe Hoshea na Israel mesao kümcho osi ombona Samaria lona nzyu toku sacho. 2 Ombona OPVÜI mhadungo mmen tssocho khatola ombo vüngoe mesao jiang esüa tata jo n tssocho. 3 Assyria mesao Shalmaneser na ori ombo tssocho osi Hoshea na Shalmaneser küpo vani sicho osi nzyu akvüto n khyo ji man Shalmaneser ji elo pia vancho. 4 Nzyua jo Hoshea na Ejip mesao thüngi yithenpvüi wothuka nzanchi chono wothuksi, Assyria mesao ji n khyo tssen ji n piv sicho. Shalmaneser na hoji zoale owo Hoshea ji rhümae vüngi sicho.
Samaria Momo Ji
5 Jisüijo Shalmanser na Israel thüngi ori tssoe Samaria ji hayae sicho. Osi hoji hayasi nzyu ethümoto lo, 6 osi Hoshea yansa nzyu tokuoto lo Assyria mesao na Samaria khyoe Israel kyon jiang Assyria lo sosi oyi ejoma jo Holah yantsü lo vanthuk, ejoma jo Goza metalo Habor zhükhfü ndüngo vanthuk, ejoma jo Media yantsüi morantsan tssoa vanthuk to tssocho. 7 Samaria joyio jijo Israel jiangna onte Potos OPVÜI ochona Ejip mesao khelona onte shanchoe Ejip metae na onte chiyithukcho sana ji mhadungo mmen tsso ji tsükona. 8 Ontena potsow thanpo khümta yicho osi ontena rheyiathüng Potsow na phani siwo kyon jiang vanlanyilan jiang hungchoa yicho, osi Israel mesao jiang na benkao tssolanphyolan jiang ben phia yicho. 9 Israel jiang na OPVÜI onte Potsow na n mathao elhi jiang tssotacho. Ontena n longtsüi khümphen jiang onte meta nken osi yanro yantsü topvülo tssokachitacho. 10 Ontena phunglanro osi odung khümcho akvü tolo onte potsow Ashera, eloe potsow ji kisü tona longzü to chümkachitacho, osi OPVÜI na phani sithako kyon jiang etsophyo khia nlongtsüi potsow jiang thanphen jiang lona tssütsserhüm rungtacho. 11 Osi onte ntha nri elhi jiang yakchia OPVÜI lümbüm tsukthukcho 12 osi kisü ti-khümle to OPVÜI na yizüng pio jiang yeso cho yakchia OPVÜI na lüm tsukcho. 13 OPVÜI na ombo yithenpvüi wothuka Israel tona Juda lo ntangnshoyi heto pithukcho: "Nte ekhümlan n mhon jiang sitava osi a yizüng kümoe ana a zenkhying osi a phajae jiang yakchia nte motsüi jiang thüngi picho sana jiang ephan tssotava." 14 Tokhatola ontena hoji n ngacho, osi onte omotsüi ochoangna onte OPVÜI Potsow lo n longtsükacho sana jiang esüa onteha lüm khünga vancho. 15 Ontena OPVÜI lanso ji nngayicho osi ombona onte motsüi jiang thüngi ntsata vao ji ontena nngav ekyu yivon pio jiangha nngayicho. Ontena ethev n lio potsow jiang khümtasi onteha ethev n lio kyonden kümracho osi OPVÜI yi nngav onte nkonjano evamo jipo jiang etssophyo hungchoe benphitacho. 16 Ontena onte pvüi Potsow shikhfü jiang topvü yesosi yonjak na tssibung nsüngrüi khümta, Ashera potsow ji kisü nsüngrüi khümta osi shantio jiang khümta Baal benkatacho. 17 Ontena onte tsokhying tsolo jiangha n longtsüi potsow jiang thüngi erungthan tssoa othan pitacho osi etsiratsen, ewoerang jiang thüngi ngatüngngarita onte eküm topvüto na OPVÜI n mathao elhi etssov lo khochaki vantacho; osi hoji yakchia OPVÜI lüm etsuk shichecho. 18 OPVÜI na hoji tsükona Israel jiang ezüp pia metapoe yithuksi Juda ekhüngyan jitae enhyokae sithukcho. 19 Tokhatola Juda kyon jiangna tia OPVÜI onte Potsow shikhfü jiang nngayicho, osi ontena Israel jiangna etssophyoa ethan benkao jiang hungchoe benphitacho. 20 OPVÜI na Israel jiang khoe sicho osi ori ntav n mhom khelo onte thechi ezüpthuka vansi wokhao tssoa ombo ehungo na onte monthuki sicho. 21 OPVÜI na Israel ji Juda lona khotathukthakale Israel jiangna Nebat tsoe Jeroboam ji onte mesao tssothokcho. Tole Jeroboam na Israel jiang ji OPVÜI mhechowo elhithuka ekyuthav mmen tssothukcho. 22 Ontena Jeroboam phankata ombona tsso mmen jiang topvü tssota phancho, 23 osi wokhao tssoa OPVÜI na zenkhying jiang yak chia yivon onte pithako ji esüa ombo ehungo na phani onte sicho. Hojitsükona Israel kyon jiang ji Assyria lo sosi yio ji nchüng jana jilo vantala.
Assyria Jiangna Israel lo Vanjüngala
24 Assyria mesao jina Babylon yantsü, Kuth, Iah, Hamath tona Sepharviam to shiang lona kyon erhüma woe samaria yantsü jianglo Israel kyon jiangna licheo jianglo rheyithukcho. Onte na meta shiang ji onte echi tssoa khi jianglo vantacho. 25 Ontena jianglo vantavanathüng jo OPVÜI n khümtacho, hoji tsükona OPVÜI na hingho khi onte ejoma rümthukcho. 26 Osi Assyria mesao ji heto ezocho, hojilo kyon ethan jiangna meta jilo potsow jiang shikhfü jiang benphiv ji n tsio jina potsow na hingo rothuki onte rümthukala to. 27 Tole mesoa jina yidan heto picho: "Etena sosi yio jianglo pvüti tsüka elani meta jilo yithuka osi ombo khi oyi onte yolo vanthuki hojilo potsow ji shikhfü jiang ji kyon jiang püngnothuka." 28 Tole Israel pvüti tsüka Samaria lona sosi yicho tüv na Israel lo elana oyi Bethel lo vani OPVÜI ekhümvü lanka jiang ji kyon jiang püngnocho. 29 Tokhatola Samaria lo vanthako kyon jiangna kisü nsüngrüi ekhüm ji n tümjak osi hojiang khi Israel na tssoe vao khümphen jianglo vata wotacho. Yantsü akvü lona onte yanthi shikhü ephan kisü echümpota nsüngrüi vatacho. 30 Babylon kyon jiangna onte Potsow Sukkoth Benoth ji kisü nsüngrü, kuth kyon jiangna Nergel kisü, elani Hamath kyon jiangna Ashima kisü, 31 Iah kyon jiangna Nibbaz tona Tartak to kisü, osi Sepharvaim kyon jiangna onte tsokhying tsolo jiang khi onte potsow Adrammech tona Anammlech to jiang thüngi othan pita to tssotacho. 32 Kyon shiangna OPVÜI ha khümtacho osi onte yolo na pvüti etssov kyonlan taro ethüngcherae n longtsüi khümphen jiang lona onte thung tssoa othan piyithukcho. 33 Hojito kyon jiangna OPVÜI Potsow ha khümcho khatola ontena meta echümpo echümpo kvülona yicho sana jiang shikhfü ephan ombobo potsow jiangha khümtacho. 34 Ontena onte shikhfü ehen jiang nchüng jana benphitala. Ontena OPVÜI ha n khüm osi Potsow ochona Israel to tsao Jakob thüngi epio yizüng jiang ha n benphi to tssocho. 35 OPVÜI na onte thüngi ntsata nsüngrüi heto onte ezocho licho: 'Potsow thanpo jiang ti-khümtava; onte mhadungo tiepyakthetava; mekana onte benkata othan tipitava. 36 Ana Ejip lona etho tsüphov khi nte socheo jina nte Potsow a khümtava osi a mhadungo epyaktheta othan apitava. 37 Ana yizüng erani nte vayio ji ntena yuta topvülo enga benphitav ka. Ntena potsow thanpo khümtav meka, 38 osi ana nte thüngi ntsata vaoji mhechov meka. 39 Ntena ajancho zoa osi ntena Potsow OPVÜI a shi a khüma tssona ana ori jiang khe lona nte shanchovka." 40 Tokhatola kyon jiangna hoji n ngacho osi onte shikhfü ehen jiang tae benphitacho. 41 Hoji to kyon jiangna OPVÜI khümcho khatola onte kisü jiangha khümtacho. Osi onte tsoronichen jiang na nchüng jana hojito tssoala.
Juda lo Hezekiah Mesao
1 Elah tsoe Hoseha na Israel lo nzyu ethümoto mesao tssoathüng Ahaz tsoe Hezekiah na 2 ombo nzyu mekyu mongo lo Juda lo mesao kümcho osi ombona Jerusalem lona nzyu mekyu si toku sacho. Oyo jo Zakhariah otsolov Abijah to tsacho. 3 Omotsü David esüa ombona OPVÜI emathao. elhi tssocho. 4 Ombona n longtsüi khü mphen jiang roe sicho, osi olong durhyu jiang vanroe sia Ashera potsow eloe kisü ji vanroe sicho, Ombona Moses na nsüngrüo yong men yonjak na nrü kisü Nehushtan to tsao jiha roe sicho. Hoji yuta jana Israel jiangna nrü ji kisü ji yikrachia mozhürhüm mmhom rungta vancho. 5 Hezekiah na OPVÜI Potsow lo longtsükacho. Juda na vana rothakcholo ombo esüa mesao n vanhan cho. 6 Ombona OPVÜI lo longtsükacho osi ombona Potsow yi n ngacho tüv ntia n licho; osi OPVÜI na Moses thüngi pio yizüng jiang topvü benphia vancho. 7 Hoji tsükona OPVÜI na ombo ndüngo vanrhyuo jina ombo na ntio tssoa sana topvülo ekhyo hungcho, Ombona Assyria mesao panlancho osi ombo küpo n tssocho. 8 Ombona Philistian jiang khyoe onte vanphen jiang oyan teritso jilona tsüphotso ji nandang, Gaza yantsü osi hoji nkonphi oyan jiang ha jura rechoe khiyicho. 9 Hezekiah na nzyu mezhüo to sathüng osi Israel mesao Hoshea na nzyu tiying to sathüng Assyria mesao Shalmanesser na Israel thüngi ori tssocho osi Samaria ji hayae khicho. 10 Nzyu ethümoto hayae vanathüng Samaria ji khyoe sicho osi hojijo Hezekiah na nzyu tiruko to sathüng osi Hoshea na nzyu tokuo to sathüng tssocho. 11 Assyria mesoa jina Israel ejoma sosi oyi Assyria lo vüngi vanthukcho osi onte ejoma jo Halath yantsü lo vanjüng tssoe sithukcho; ejoma jo Gozan metaro jilo Habor zhükfü ndüngo vanjüng tssothukcho osi ejoma jo Media yantsü vanthuk to tssocho. 12 Israel jiang na ombo jancho n zov, ombo nri Moses yakchia yizüng onte pio shikhfü jiang yesocho; osi oyi nngacho. Hoji tsükona Samaria ji joyi sicho.
Assyria Jiangna Jerusalem Ekhenthukala
13 Hezekiah mesao na nzyu taro tiruko to sathüng, Assyria mesao Sennacherib na Juda yantsü pikhfü theo jiang sakae khyoe khicho. 14 Hezekiah na Lachish lo Sennacherib thüngi heto yithen pichicho, "Ana orithaka, nzansi e thüngi ritsso ji esana, nina ntio chona na ni pivka." Tole Sennacherib na Hezekiah thüngi janti Seri wothüng taro, shona seri wothüng motsünga to choncho. 15 Hezekiah na ekhümki rang vapheni janti lio jiang topvü pisi khümphen kibüngo theo shona jiang, elani 16 ombo kibüngo shona eyukao jiang to topvü khichoralani Sennacherib hanthukcho. 17 Assyria mesao jina Lachish lona Jerusalem lo Hezekiah thüngi ori tssothokvü tsükona rasan emhokthav wothukcho; osi ombo küpo tsüphoe ntsontso otsük ethüm jiang khi rasan jiang sothukcho. Ontena Jerusalem jani, jükha omhawoe na ojü tsüchophen jülan ji tsalo osü etüng jiang vanphen jilo nchentacho. 18 Ontena Hezekiah mesao nduko wotacho; hoji tsükona, Hilkiah tsoe Eliakim, mesaki jilo esapvüi ji; Shebna, mesaki eranpvüi ji tona Asaph tsoe Joah, erantawoe vao jiang ezepvüi ji to onthüm wothukcho. 19 Tole Assyria tsüphoe yolo tsüka na ntiona Hezekiah mesao lümbüm tssonkathuka sana hoji Assyria ekhüngsae jina ntsihungala to onte engacho. 20 Ombona heto ezocho, "Ntena oyi taena rasantsü etho osi tssothomori jiang tongchev to nchümta alo? Ntena Assyria panlam jo ochona nte kyochiv to nchümtala? 21 Ntena Ejip khi nte nzanchithokvü ekhyo tssolea benbuk khi etsi tssoa sücho to tae tssov; hoji jaki nte khelo ntssüthecho tae tsssovka; Ejip mesao lo enhikae ekyo-erung choncho jo hoji totae tssovka." 22 Tosi Assyria tsüphoe jina heto phyolancho, "To alo ntena OPVÜI Potsow lo longtsükata sana a'zoa. Hezekiah na kyon jiang ji Jerusalem lo tae na khümtale to ezosi metapoe OPVÜI thanphen osi khümphen jiang roe sicho. 23 Ana mesao myingona nocho heto nte pivka, "Ntena kyon hetata yanchei tsankathuk na ana kurü wothüng eni nte pivka! 24 Nteno Assyria tsüphoe yolo oküptso jiang tia n püngulo. Ejip kyon jiang na ritsso zotoro osi kurü rasan nte piv to tsayitalo nüng! 25 Ana nte meta ji ori tssoe khyoe khio jijo OPVÜI ekyo-erung nthena tssocho tsayita alo? OPVÜI na nte meta ji ori tssoe khile to a ezocho." 26 Tole Eliakim, Shebna tona Joah to onthümna tsüphoe ji ezocho, "Tsüphoeyo, ena Aramik yi engatheka, hojitüv yina ejana. Pikhfü echung jilo evan topvü na engata vanka Hebrew yina ejana." 27 Tole ombona ezocho, "Mesao na nte tona nte mesao to thüngi tae ephyov tsükona arothukcho tsayita alo? Meka, aiyo pikhfü lo khukta evamo kyon jiang thüngi ha ezoala, nteha, onte ha, to topvüna pyomyungi tsoyutao tüv yuta yivka." 28 Jisülo jo tsüphoe jina phanthi Hebrew yina heto tüngkachia phyocho, "Assyria mesao na nte ezo shi engatava! 29 Hezekiah khi nte tiejithechithukle to ombona nte ntssungala. Hezekiah na nte shanchochev meka! 30 Ombo khi OPVÜI lo longtsüle to nte ti-ezothuka. OPVÜI na nte shanchov meka, osi Assyria rasan na nte yantsü khyov ji OPVÜI na etangu meka. 31 Hezekiah yi ti-engatava. Yantsü shilona chiyi ombo khelo rheyitale to Assyria mesao na nte ezoala. Tona nte topvü na ombobo jüngrothi lina chiyicho yuvka, osi ombobo züwodung lona lhoe tsoa, ombobo jükha lona yua vamka. 32 Tothakala Assyria mesao na nte meta esüo tüv lo nte vanthoki, jilona nte jününgroli lona chiyi eyuo, nte li lona tsünghanro chiyi hümri nsüngrüo meta, osi olive dung elio meta, olive thyujü osi tsakijü elio meta tüv nte pivka. Ombona ntio nte ezoa sana ji ntena enga tssona nte nchüna eküm vamvüka. Osi OPVÜI na nte shanchov to ejüng ji Hezekiah khi nte ti-zothuka. 33 Assyria mesao na ori tssocho meta jiang lo onte potsow na shanchocho tüv meta licho alo? 34 Potsow jiango kvüla, Hamath tona Arpad to potsow jiango kvüangla? Sepharaim, Hena tona Iah to potsow jiango kvüangla? Shiang yolo ochona Samaria shanchocho la? 35 Meta shiang potsow kümoe na Assyria mesao khelona ombo meta shanchocho la?" 36 Tole kyon jiangna jükrüpi sicho, osi Hezekiah mesao na onte ezoji esüa onte ochinaha yipyaka tia n sancho. 37 Jisüijo, Eliakim, Shebna tona Joah tona nungra lona onte sü jiang reroe sitacho osi Assyria tsüphoe jina ntio phyocho sana ji oyi Hezekiah mesao ezotacho.
Mesao na Isaiah Ntungntssung Yanala
1 Hezekiah mesao na onte yithen ji zopvü nungra lona ombo mpensü jiang reroe sisi, postasü ekasi OPVÜI khümpheni wocho. 2 Ombona tsüphoe tsüka, mesaki ezepvüi Eliakim to tsao ji tona mesaki eranpvü Shebna tona pvüti eramoden ejoma to Isaiah zenkhying ji thüngi wothukcho. Onteha postasü ekaracho. 3 Ombona heto Isaiah ji ezole to onte ezocho, "Nchüngo ezüp tsüngon ka; ezüp epio jina enungrala. Eiyo eloe tsüka na ngaro vam sa vana khatola otsük oso na nkhyov vancho esüa tüvka. 4 Assyria mesao na ombo tsüphoe tsüka rothuka eküm evamo Potsow yikvü-yilothukcho. Ni Potsow OPVÜI khi shiang ezothuksi ochoangna hoto nsannsyua sana onte ezüpthuka, osi ete kyon kvüta enhyoe vancho sana jiang tsükona Potsow thüngi erandania." 5 Isaiah na mesao Hezekiah yithen ji zoale, 6 ombona heto janlana yithukcho, "Assyria mesao na, OPVÜI na nte n shancho to ezoji tiengatale to OPVÜI na nte ezoala; 7 OPVÜI na ejüng yibung yenchi Assyria mesao ji zothuki ombo metae kholani yithoku ka. Osi OPVÜI na hoji lona ombo lüngthavka."
Assyria Jiangna Olanina Ekhenlung Yivon Piala
8 Mesao na Lachish lona khoe oyi enhyano Libnah yantsü ji ori tssoa vana to Assyria tsüphoe jina zocho; hojitsükona ombona mesao nduko hojilo wocho. 9 Jithüng ji Ejip rasan jiang Sudan lona Tirhakah mesao na sosi Assyria ori tssolo tsata to Assyria jiangna yibung zocho. Mesao na hoji zoale, ombona Juda mesao Hezekiah thüngi heto oyi yencho, 10 "Ntena longtsüa vamo Potsow jina nte ji akhelo n rheyi to nte ezoa vamo ji khi nte tiejithechithuka. 11 Assyria mesao na meta kvümoe khyoe ekhiv methaka na kvüto tssoa sana ntena zothaka. Ntena tsanchov tsaya nchümta alo? 12 A motsüi jiangna, Gozan, Haran, tona rezeb to yantsü jiang roe sisi Betheder kyon Telessar to vamo jiang lüngthae sicho, khatola onte potsow ochina ha onte n shancho cho. 13 Elani Hamath, Arpad, Sepharvaim, Hena tona Iah yantsü to shianglo mesao jiango kvüi vanrava?" 14 Hezekiah mesao na yithenpvüi ji khelona yithen ji khichoe khae zecho. Ombona yithen eramo ji hansi owo khümpheni OPVÃœI mhadungo vasi heto randancho, 15 «o OPVÃœI, Israel Potsow, echo ekhyingo ekümrüm jiang poni khothei evamo, Potsow jo ni taeka, limhatsü esae ji nika. Nina liko oyak shi soyingcho. 16 OPVÃœI, hojitsükona, e pono ntio tssoa vancho sana ji zeta. Sennacherib na eküm evamo Potsow ni yikvü-yilo jiang topvü enga. 17 OPVÃœI, Assyria mesao na meta elümoto monthurathaka to ena ntsia, onte meta jiang lijüng kümi siyithaka, 18 osi onte potsow jiang rungi siyirathaka, tolea jiango potsow mek; otssüng olong khi kyon na nsüngrücho tae. 19 Hojitsükona, OPVÃœI, e Potsow, Assyria jiang khelona e shanchoa, tona limha topvü na Potsow jo nitae to ni chethev ka."
Mesao Thüngi Isaiah Yithen
20 Tole Isaiah na Hezekiah mesoa thüngi OPVÜI na mesao randan engayithaka, 21 osi OPVÜI na heto phyocho to yithen picho, "Jerusalem yantsü jina ni emakatala, Sennacherib, osi ni tssakala. 22 Nino ocho yikvüa emakatala to tssoala? Nino Israel ntho Potsow a n yikrachiv vanpvüla. 23 Nina ni yithenpvüi wothuka athüngi kangtsüa, ni ritsso zotoro jiang khi Lebanon phunglan jiang khyocho to phyothukala. Nina hojilo Cedar dung ntsontso jiang osi Cypres dung mmhontso jiang tancho osi ralungi jana rhowocho to kangtsüa phyocho. 24 Nina jipopoe meate jükha shani yucho osi ni rasanden na Nile zhükhfü ji ngacheta sümtacho to kangtsücho. 25 "Shiang hetopvü ji nkolona heto tssov to methakcho to nina n zohancho alo? Ana hoji benthuku shiang shi tssocho. Pikhfü tssokao jiang livero kümi sithoku ana etho ni picho. 26 Hojianglo vamo kyon jiango etho n liden, onteno ekhen lona ngangchei siracho. Onteno oli ero esüa, engkhü ezhü etssov jina mhonki ero bukthoki rankao jiang esüa tüv. 27 "Tokhatola ana ni tsükona topvü ntsikhana, nina ntio elhia na, Kümoe woa sana ana ntsikhana. Nina a thüngi lüm tsuko jiha ana ntsia. 28 Hoji lüm etsuk osi ni kanchan jiang ana zokhanthaka; enhungo ana ni kheno lo yonjak ni nkontheyisi obüngi yonjak-yii ni shitheyivka; osi jilona nina erowo lan ji dunga ni süsi yivka." 29 Jitosi Isaiah na Hezekiah mesao ji heto ezocho, "Ntio tssov sana ji chethev jo heto tssovka. Nchüküm tona thüngküm tojo n tena orae yolanhanlan tae hungi tsovka. Tokhatola raküm ti ntebobo lichen liri tsovka, otsük akvüna ombobo jününgroli joni tsovka. 30 Juda lo enhyokae vamo jiango odung na oying mmhona süngyi tssüngthi ethicho esüa tssovka. 31 Jerusalem osi Zion lo kyon ocho angna jo enhyokae vamka, ntiotssole OPVÜI na hojito tssothokvü. 32 Osi Assyria mesao ji tsükona jo OPVÜI na heto phyoala, "Ombona yantsü shilo khothechev meka; rasan ochia otsung pvüsi yantsü ji ndüngo rochev meka, osi hoji nkonjano rizümphen ha tssochev meka. 33 Ombona kvülona rocho sana hoji lantsuk ji dunga yilamka osi yantsüi rhorochev meka, ntiotssole a OPVÜI shina hojito phyothaka. 34 A myingthüng lia vanthoku tsükona osi ana a phajae David thüngi ntsata vao ji tsükona ana yantsü shi nkoha vka." 35 Hoji zümo OPVÜI lanben tsüka na Assyria jiang nchenpheni owo Assyria rasana 185,000 lüngthae sicho. Oivuato enyathüng jo onte topva hojilo chükhani licho! 36 Tole Assyria mesao Sennacherib na Neniveh lo kho lani yi sicho. 37 Osi ombona tsüngon motsünga lo ekhümki na ombo potsow Niseoch ji khüma vanathüng ombo tsokhying yolo otsük eni, Adrammalech ha Sharezer to onina onte yonri jiang na ombo lüngthae sitasi Ararat metae tsani yitacho. Jisüijo ombo tsokhying thanpoe tsüka Esarhad daon na mesao ombo echungcho cho.
Hezekiah Mesao Nochonori Osi Emiyilamo Ji
1 Yuta shianglo Hezekiah mesao ji rae tara taena nchüv vancho. Tole Amoz tsoe Isaiah zenkhying jina owo ombo janthechisi ezocho, "Ni chüv sa vamo jina OPVÜI na olan topvü tsakasükae vale to ni ezoala. Echüv methaka vana." 2 Tole Hezekiah mesao na kyimchungoe zethechia heto randancho, 3 "OPVÜI, ana yuta topvü lo n senphina nilo longtsükata ni benkata rothaka to ji a nchümcheyia; osi nina ntio a tssothukhunga sana jiang ana tssocho." Tosi ombona nshüthechia kyacho. 4 Jitosi Isaiah na mesoa thüngina khoe yia vanle, mesaki hapo longjüng jitia n yaku OPVÜI na Hezekiah mesao ochona OPVÜI kyon jiang sa vancho sana ji 5 owo heto ezole to ombo ezocho, "Ni motsü David OPVÜI A shina ni randan ji zothaka osi nina esü elongo ji ana hungthaka. Ana ni emiyivka, osi nina tsüngon ethüm yutalo ekhümki wovka. 6 Ana nzyu taro mongo ni vanlanthoku ka. Ana Assyria mesao khelona ni osi Jerusalem yantsü shi shanchovka, ntiotssole ana a phajae David thüngi phyochaki lia." 7 Jitosi Isaiah na mesao enhyang ji züwothi na züprav mozhü nsüngrüi vela jilo theyile tona mmhomka to ezocho. 8 Tole Hezekiah mesao na heto engacho, "OPVÜI na a emiyiv osi ana nchuk ethüm yutalo khümpheni ochev tojo ntio lona chekavla?" 9 Tole Isaiah na janlancho, "OPVÜI na ombo phyochak ji vav to chethev ni ejüvka. Kipüng jilo khümcho lio shi ekho taro mhadungoe ni yithuk hungalo ekho taro sülamoe ni yithuk hungala?" 10 Hezekiah na ezocho, "Khümcho shi mhadungoe ekho taro yithoku jo laroa, hoji tsükona sülamoe ekho taro yithuka." 11 Isaiah na OPVÜI thüngi randancho, tole Ahaz mesao na nsüngrüo kibüng phopha jilo khümcho lio ji sülamoe ekho taro yithukcho.
Babylon Lona Yithenpvüi
12 Hoji yuta ji harüma lo Babylon mesao Merodach Baladan, Baladan tsoe jina Hezekiah ra vana to owo zoe yithen tona yantso to hanisi wothukcho. 13 Hezekiah na yithenpvüi jiang elonchoe ombo ejüeli jiang, ombo shona janti jiang, mozhürhüm mmhom osi mozhü olan olan jiang osi ombo rasan ebensü jiang topvü ejücho. Ombona ejüeli vaphen osi ekhüngyan jilo licho topvü ejükhancho. 14 Tole Isaiah zenkhying jina Hezekiah mesao thüngi owo ezocho, "kyon shiango kvülona rochola osi ontena ntio ni ezochola?" Hezekiah na ezocho, "Onteno meta ekoni, Babylon lona rochoka." 15 "Tona ontena mesaki ntio hungchola?" Tole Hezekiah na ezolancho, "Ontena olan topvü hungkhancho osi ejüeli vapheni licho topvü ana onte ejükhancho." 16 Isaiah na mesoa ji ezocho, "OPVÜI na phyoala, 17 ni motsüi na kvüta varhyui licho sana osi ni mesaki ntio licho sana topvü Babyloni hansi eyio tüv yuta tsata. Osi ntia enhyokae vav meka. 18 Ni wopan lona mpato ochoang sanajo sosi oyi boloe kümthoki Babylon mesao phajae tssothoku ka." 19 Tole Hezekiah mesao na hoji engathecho, ombo echungo jo noying osi nkoho liv to, hoji tsükona ombona janlancho, "Nina OPVÜI thüngi na yithen hansi ero shijo mmhonka."
Hezekiah yansa Ochüm Tssoji
20 Hezekiah mesao na tssocho thanpo topvü, ombo lüm etsson elhi jiang, osi likokvü nrhüi, jükha shani yantsü jilo ojü sothechio jiang topvü Juda measeden motsü kako jilo erankhani lia. 21 Hezekiah chücho, osi ombo tsoe Manasseh na mesao ombo echungcho.
Juda lo Manasseh Mesao
1 Manasseh na ombo nzyu taro eni tssoathüng Juda mesao tssocho osi ombona Jerusalem lona nzyu tinyansi mongo sacho. Oyo jo Hephziabah to tsacho. 2 OPVÃœI na ombo kyon jiang na khochiathüng onte mhadungina limha kyon phani sia yio jiang etssophyo hungchoe benphiwo jina Manasseh na OPVÃœI mhadungo mmen tssocho. 3 Opo Hezekiah na roe sithako n longtsüi khümphen jiang ombona tssocholancho. Israel mesao Ahab na tssoji esüa. Ombona Baal khümphen tsükona thanphensa roncho osi Ashera potsow kisü nsüngrücho, osi Israel mesao Ahab na tssoji esüa ombona shantio jiangha khümcho. 4 Ombona OPVÜl khümphen jiloha n longtsüi thanphensa roncho. 5 Osi khümphen hapo eni lio jiangloha ombona shantio khümphen tsso cho. 6 Ombona ombo tsoe ji erungthan tssoa thani sicho. Ombona ewoerang osi methevüjae tsütsacho osi methei jiang nduki mhadung zeta tssocho. Ombona OPVÃœI mhadungo mmen tsüphov tssoe OPVÃœI lüm tsukthukcho. 7 Ombona khümpheni vanphen motsünga lo Ashera kisü ha vacho, osi hoji vanphen ji tsükona OPVÃœI na David ha ombo tsoe Solomon oni heto ezocho licho, "Israel pvüji taro eni jiang metatopvü yolona ana Jerusalem shi a khümphen etssov ethüngchethaka. 8 Osi Israel jiang na ayi enga a phajae Moses yakchia onte pio yizüng jiang benphia vana tssona ana onte motsüi pio meta shilona phani onte sithuku meka." 9 Tokhatola Israel jiangna OPVÃœI yi nngacho osi Manasseh khi mmen tsükao onte sokathuka mmen tssota, OPVÃœI na ombo kyon jiang mhadungina phani siwo limha kyon jiang etsophyolo na n mhonkao mmen tssotacho. 10 OPVÃœI na ombo phaje zenkhying jiang yakchia heto onte ezocho, 11 "Manasseh mesao na etssakthao mmen shiang tssothaka, Kanaan kyon jiang na tsso ji pomoe n mhonkao tssothaka, ombo kisü jiang yakchia ombona Juda kyon jiang mmen elhi lo sokathaka. 12 Hoji tsükona A, Israel OPVÃœI Potsow na ana Juda tona Jerusalem to lo ekhenthao tssorophyoro rwothukvü osi hoji yivon ezoe topvü ngangcheravka. 13 Ana Samaria osi Israel lo Ahab mesao tona ombo tsoronichen jiang to ezüp pio ji esüa Jerusalem lo rwothukvü ka. Ana Jerusalem lo kyon topvü mhelüpi sivka. 14 Hoji lona ekhyo kyon jiang ana sivka osi onte ri khelo thechi sivka, osi ori jiangna onte khyoe meta ji onte khiyivka. 15 Ana a kyon jiang thüngi heto tssov, ntiotssole ontena ana onte motsüi jiang Ejip lona sochuko ji yuta lona benkae nchüng jana a lüm etsuko tae tssoala." 16 Manasseh na noying kyon elümoto lüngthao jiang ejen na Jerusalem lantsü jiang lona tsücho; ombona Juda ji mmen lo sokae OPVÃœI lüm tsukthuko ji ekalo heto elhicho. 17 Manasseh na tssocho thanpo topvü, ombo mmen elhi jiang phata, Juda motsü kako lo eranrae lia. 18 Manasseh ji chüi mesa phari, Uzza jilo shothecho osi ombo tsoe Amon na mesao ombo echungcho.
Juda Lo Amon Mesao
19 Amon na ombo nzyu mekyu enilo Juda lo mesao tssocho osi ombona Jerusalem lona nzyu eni sacho. oyo jo Meshumelleth Jotbah yamo Haruz otsolov ji. 20 Opo Manasseh esüa omboha OPVÜI mhadungo mmen tssocho. 21 Ombona opo hungchoe etsophyocho osi ombona opona khümo kisü jiang khümcho. 22 Ombona ombo omotsüi Potsow OPVÜI ji khoe sicho osi ombo yizüng n ngacho. 23 Amon küpo tsüphoe jiangna ombo pono okyak tssotae mesaki na ombo lüngthae sicho. 24 Tole Juda kyon jiangna Amon lüngthao jiang ji lüngthae sisi ombo tsoe Josiah ji mesao tssothukcho. 25 Amon na tssocho thanpo topvü Juda mesao jiang motsü kako lo erankhani lia. 26 Amon ji Uzza phari okhüp jianglo shothe sicho, osi ombo tsoe Josiah na ombo echungi mesao tssocho.
Juda lo Josiah Mesao
1 Josiah na omrjo nzyu tiza lo Juda lo mesao tssocho osi ombona Jerusalem lona nzyu thümro ekha sacho. Oyo jo Bozkath yantsü kyon Adaiah otsolov Jedidah to tsacho. 2 Josiah na OPVÜI emathao elhi tssocho osi ombona omotsüi. David hungchoa etsso-ephyocho osi OPVÜI yizüng jiang topvü rüka benphicho.
Yizüng Kako Ji Yanchetala
3 Josiah na ombo yansa nzyu taro tizaoto jilo mesaki eranpvü Shaphan, Azaliah tsoe osi Neshullam orüo ji heto ezoa ekhümki wothukcho, 4 "Pvüti ntssomo Hil. kiah thüngi owo ekhümki rhowopheni pvüti elhi jamo jiang na khyarhyuo jiang kvüta tssotha ka na etsüngi zele to ezoa. 5 Hoji rangji khi ekhümki ntsüpnrüp elhi tssota evamo kitssoe, longjoe to jiang jokheman pithuka, 6 osi ekhümki ji ntsüpnrüp elhilo ethev otssüng osi olong jiang ha shithuka. 7 Elhi etssoe jiang topvü longtsüka eli tae küma orang jiang etsüngiv ethev n lika." 8 Shaphan na mesao yithen ji owo Hilkiah ezocho, tole Hilkiah na ombona OPVÜI yizüng kako ji khümpheni na yanchethaka to ezocho. Hilkiah na kako ji ombo pile Shaphan na khae zecho. 9 Tosi ombona oyi mesao ji heto ezocho, "Ni phyajae jiang na orang ji khi elhi etssoe jiang pithaka." 10 Tosi ombona heto ezocho, "Hilkiah na apicho kako ana bena" to ezosi ombona hoji ekhyoto khae mesao engathukcho. 11 Kako ji khao ji mesoa na zoale lüm n püku mpensü jiang reroe sicho, 12 osi pvüti Hilkiah, Shaphan tsoe Ahikam, Mikaiah tsoe Achbor, mesaki eranpvü Shaphan, tona mesao ndüngo etssoe Asiah to thüngi heto yithen pilo wothukcho. 13 "Kako shilona a osi Juda kyon topvü tsükona OPVÜI na ntio phyoa sana owo OPVÜI thüngi thyutae zeta. Kako shi lona ntio etssov phyochao sana ete motsüi jiang na n tsso jina OPVÜI na ete thüngi lüm tsukala." 14 Hilkiah, Ahika, Achbor, Shaphan tona Asiah to na Hildah to tsa eloe tsüka thüngi thyutalo wocho. Huldah jo zenkhying tsüka jerusalem ethamo jiwoe evan (Orapvü Shallum, Tikvah tsoe osi Harhas orüo jijo khümpheni phukthesü jiang ezepvüi ji) Onte na ntio tssocho sana jiang topvü ompvü ezocho, 15 Tole ompvü na OPVÜI yithen heto oyi mesao ezotale to ezocho, 16 "Kako jilo erani licho mesao na khathako ji esüa ana Jerusalem osi jilo evan kyon topvü ezüp pivsaka, 17 Ontena asithako jina osi potsow thanpo khümta onte elhi jiangna a lüm etsuk shichethaka. Jerusalem thüngi alüm tsukala osi hoji pükü mek. 18 Mesao ji tsükona jo OPVÜI a shina heto phyoala, "Kako jilo ntio erani licho sana nina khathaka." 19 Osi ana Jerusalem jilo ntio ezüp rothokvü vancho sana ji nina zoale nina kya mpensü reroe sia lümbüm khophithaka. Ana Jerusalem ji oyam na rhiyitaphen mying tssota eyio sükhying ekhentao tüv kümthukvü ka. Tokhatola ana ni randan zothaka, 20 hojitsükona ana Jerusalem lo ezüp rothokvü sa evamo ji ni echü süiti rothoku ka. Ana noying lona ni chüthokvü ka." Kyon jiang na yithen shi hansi Josiah mesao thüngi elani yitacho.
Josiah na Kisükhüm Jiang Monthukala
1 Josiah mesao na Juda osi Jerusalem esopvüi jiang topvü tsae sosi, 2 pvütiden osi zenkhying jiang tona kyon topvü, yantsae osi eliden topvü na phana khümpheni wotacho. onte topvü mhadungo na Josiah mesao na Ntsata kako khümpheni na yancheo ji khacho. 3 Ombona mesao dyurhyupvü jilo phanthi Ntsata kako jilo erani elio ji ephan OPVÜI yi engav osi ombo lümbüm nchümri topvüna Ntsata kako jilo jüwo OPVÜI yizüng jiang benphiv to ntsata methakcho. Tole kyon topvüna ntsata ji khichoe benphiv to phyochakcho. 4 Jisülo jo Josiah na pvüti tsüphoe Hilkiah tona ombo nzanchi pvüti jiang, khümphen kibüng enhyang jiang to thüngi khümphen chungi Baal tona Ashera osi shantio jiang khümathüng tsütsaphen tsütsaelan kvüta liana oponi hanchukchile to ezocho. Tsütsaelan shiang topvü mesao na yantsü tssae Kidron hayi ndüngona rungi sisi mikyu jiang shae hansi Bethel li yicho. 5 Juda mesae jiangna Juda yantsü jiang osi Jerusalem hakon lo n longtsüi khümpheni othan epipvüi ethüngchei vanthuko jiang ombona phani sicho. Baal ekhüm pvüti topvü, eng ekhüm pvüti topvü, choro shantio osi oyaki limha jiang ekhüm lo othan epi pvüti jiang topvü phani sicho. 6 Ombona khümpheni na Ashera potsow kisü ji yantsüi na khichuki Kidron hayi na rungi sisi mikyu ji ohüm küma chenroe livero ji nzontsü müngsüpheni veni sicho. 7 Ombona khümpheni lonsülonphyoe eloe vanphen chung chak jiang roe sicho. Hojitüv chungchak jiang lona eloe jiangna Ashera khümpheni tsütsa sü jiang tüktacho. 8 Ombona Juda yantsü jiang lo pvüti jiang sosi Jerusalemi yicho, osi onte than piphen jiang topvü ombona mmeni siyicho. Joshua na tsso kipüng ji ndüngo, yantsü jilo esapvüi Joshua na thanphen tssoe vao jiha roe sicho. 9 Hojiang pvüti jiang jo ekhümki elhi n tssothukcho, tokhatola onteha pvüti thanpoe jiang esüa ebung mozhü n theo hümri jijo tsothukcho. 10 Josiah mesao na nlongtsüi khümphen Topheth to tsao Hinnom hayi lio jiha mmenthuki siyicho, hojijo ochia khi hojilo tsokhying tsolo jiang owo Molekh potsow thani n sithukvü tsükona. 11 Ombona Juda mesao jiangna eng ekhüm lo khochaki vao kurü jiang ha khi sicho, osi hoji ekhüm lo tsütsao zotoro jiang ha roe sicho. (Hojiang jo khümphen hapoe vacho, osi tsüphoe tsüka Nathan Melech vanphen ki ndüngo vacho.) 12 Juda mesao jiangna Ahaz mesao ki mhonki thanphen tssoe vao jiha ombona roe sicho. Josiah mesao ha Manasseh mesao to na khümphen hapo eni jilo thanphen tssoe vao jiang ha to roe sicho, osi thanphen jiang vanroe Kidron hayi hanchochi sicho. 13 Solomon mesao na Jerusalem engkhfüwoe olive phunglan jolowoe etssakthao kisü – Sidon kyon potsow Astarte, Moab na ekhümo Chemosh onita eloe potsow tona Ammon potsow to khümphen tssae vao jiang mmeni siyicho. 14 Josiah mesao na olung durhyu ji vanroe sicho osi Ashera potsow kisü ji vanchochi sicho, osi hojiang zapheno jo kyon ryu na hanzhüi sicho. 15 Nebat tsoe Jeroboam, mmen elhi lo Israel sokao jina Bethel lo khümphen tssoe vao jiha Josiah na roe sicho. Thanphen ji Josiah na roe sisi, olong jiang vanroe sisi livero küma chenroe sicho, osi ombona Ashera kisü jiha rungi sicho. 16 Josiah na eyingoe zele phunglani okhüp nungracho, tole okhüp jianglo oryu jiang ji ombona shochei thanpheni na rungi sicho, Jeroboam mesao na hojilo mangi tokhu khiathüng zenkhying na phyoe vao jiang ombona benthukcho. Josiah mesao na eyingole heto phyoe vao zenkhying ji khüp ji hungcho, tole ombona engacho. i7"Ojijowochokhüpla?" Tole Bethel kyon jiangna janlancho, "Shijo Juda zenkhying ochona nina nchüng heto tssov shi phyoe vacho sana ji khüp ka." 18 Tole Josiah na ezocho, "To vanthuka, ombo ryu jo shochev meka." Hojito ombo ryu jiango n shoche, osi Samaria kyon jiang ryu ha n shocheyicho. 19 Israel yantsü topvü lo Israel mesae jiangna tssoe vao kisükhüm khümphem tssoe OPVÜI lüm tsuk thuko jiang Josiah na roe sicho. Ombona thanphen topvü Bethel lo roe siwo ji esüa roe siracho. 20 Om bona kisükhüm thanphen lo zao pvüti jiang topvü lüngthae sicho osi thanphen akvü lona kyon ryu rungi sicho. Jitosi ombona Jerusalemi yi sicho.
Josiah Na Yakchi Tokhu Khiala
21 Ntsata kako jilo erani lio ji esüa kyon topvü na OPVÜI yikrachia yakchi tokhu ji khile to Josiah na yidan picho. 22 Yitssoe jiangna Israel saoji yuta sülo jo Israel osi Juda mesao ochina ha hojitüv yakchi tokhu n khihamo tüv khicho. 23 Okhao tssoa Josiah yansa nzyu taro tizaoto jilo Jerusalem lona yakchi tokhu ji khicho.
Josiah Na Dungphicho Thanpo Jiang
24 Pvüti tsüphoe Hilkiah na ekhüm ki na hungwo yizüng kako jilo erani lio jiang benthukvü tsükona Josiah mesao na Jerusalem osi Juda topvü lona ratssen rapvüi jiang khi sikhancho, osi oki chungi potsow osi kisü, ji yaka kisükhüm lo tsütsao tsütsaelan topvü roe sicho. 2& Ovüngthüng jo kvüthüng ha lümbüm nchümri, etho topvü na Moses yizüng jiang benphjo mesao Josiah esüa n vanhancho; osi ombo esüo tüv mesao ha n vanhancho. 26 Tokhatola Manasseh mesao na ntio tssocho sana ji tsükona Juda pono OPVÜI na lüm tsukcho osi hoji lüm etsuk ji nchüng jana n bükhan. 27 OPVÜI na phyocho, "Ana Israel lo tssoji esüa Juda loha tssovka: Ana a ehungo na Juda kyon jiang phani sivka, osi ana ethüngcheo Jerusalem yantsü ji osi khümphen kvüwoe lona a khümvü to phyochosana jiha to khoe sivka."
Josiah Yansa Ochüm Tssoji
28 Josiah mesao na tssocho thanpo topvü Juda mesao jiang motsü kako lo eranrae lia. 29 Josiah na mesao tssoathüng Ejip mesao Neko na Assyrian mesao nzanchi lo rasan sosi Euphrates zhükhfü jilo wocho. Josiah mesao na Ejip mesao ji tanglanchiv tsükona Megiddo lona ori tssotathüng Josiah ji lüngthae sicho. 30 Osi ombo küpo tsüphoe jiangna ombo müng ji zotoro lo thei hansi Jerusalemi oyi mesa khüp lo shothe sicho. Jisülo jo Juda kyon jiangna Josiah tsoe Joahaz ji nzyüyia mesao ethüngchecho.
Juda Lo Joahaz Mesao
31 Joahaz na Juda mesao kümathüng nzyu mekyu ethüm tssocho osi ombona Jerusalem lona choro ethüm sacho. Oyo jo Hamutal, Libnah yantsü kyon Jeremiah otsolov ji. 32 Omotsüi jiang hungchoe ombona OPVÜI mhadungo mmen tssocho. 33 Ombo yansa ji Ejip mesao Neko na Hamath meta lo Riblah lona ombo rhümao jithüng ochüm tssocho, osi Juda ji janti seri 3,400, shona seri thümro mezhü to echa khiyicho. 34 Neko mesao na Josiah tsoe Eliakim khi Josiah echungi mesao tssothukcho osi ombo mying ji Jehoiakim to dungphiyicho. Joahaz jo Neko mesao na Ejip lo sosi oyi jina chücho.
Juda Lo Jehoiakim Mesao
35 Jehoiakim na Ejip mesao na chomo echa ji elov tsükona kyon jiang thüngi na onte ejüeli ekyan tssenkhya khicho. 36 Jerusalem lona nzyu taro ekha sacho. Oyo jo Zebidah, Pediah otsolov Rumah yamo kyon. 37 Omotsüi jiang hungchoe Jehoiakim na OPVÜI panlana mmen tssocho.
1 Jehoiakim na mesao tssoa vanathüng Babylon mesao Nebukadnezzar na Juda ori tssoe Jehoiakim ji nzyu ethüm ombo küpo vanthukcho, jisüloti ombo na panlana phanthicho. 2 OPVÜI na Babylon, Syria, Moab osi Ammon rasan jiang jenchia Jehoiakim sakathuka, Juda roe siv to OPVÜI na ombo zenkhying yakchia phyoe lio ji benthukcho. 3 Heto tsso shijo Manasseh mesao na tsso mmen jiang topvü, 4 opvü tssoa ombona noying kyon jiang lüngthao ji tsükona OPVÜI na Juda ji ombo ehungona phani siv tsükona. Hojiang mmen tsükona OPVÜI na Manasseh nlan n siyikhukcho. 5 Jehoiahkim na tsso thanpo jiang topvüto Juda mesao jiang motsü kako lo erankhani lia. 6 Jehoiakim ji chücho osi ombo tsoe Jehoiachin na mesao ombo echungcho. 7 Jisülo jo Ejip mesao tona ombo rasan jiang to na kvüthüng ha ritssolo n khochicho, ntio tssole enhungo Babylon mesao na Ejip metaro jiang topvü Euphrates zhükhfü lona benkae Ejip erü khümkiwoe jana sayae sicho.
Juda Lo Jehoiachin Mesao
8 Jehoiachin na nzyu taro tiza lo Juda mesao tssocho, osi ombona Jerusalem lona choro ethüm sacho. Oyo jo Jerusalem kyon Elnathan otsolov Nehushta to tsacho. 9 Opo hungchoa Jehoiachin na ha OPVÜI mhadungo mmen tssocho. 10 Ombo yansa yutalo Babylon mesao Nebukadnezzar na ombo küpo tsüphoe jiang nzo rasan sosi oro Jerusalem ji hayacho. 11 Nebukadnezzar na ombobo Jerusalemi rhowocho, 12 osi Jehoiachin na oyo, ombo tsoe jiang, ombo küpo tsüphoe jiang osi mesaki tsüphoe jiang, to sosi owo Babylon kyon jiang küpo khochaki rheyicho. Nebukednezzar na yansa nzyu tizaoto sathüng, ombona Jehoiachin ji rhümae, 13 ekhümki tssentsü tsütsaelan jiang tona mesaki ejüeli to jiang topvü Babyloni hansi yicho. Osi OPVÜI na phyoe vaoji esüa mesao Solomon na ekhümki tsütsaphen shona kongophi methaki vao jiang ji topvü Nebukadnezzar na roe sicho. 14 Hoji süijo Jerusalem lo kyon jiang, mesatso jiang elani okho esopvüiden ethelan eli kyon to jiang topvüto tssotsüi onte wothüng taro jiang ji Nebukadnezzar na morantsan ejoe na Babyloni sorasi yicho. Elani ombona elhilo tssothimoriden, yonjoe jiangha phanhya topvü sosi yisi Juda lojo yantsatso jiang tae ekachi sicho. 15 Nebukadnezzar na Jehoiachin ji rhümae ombo ephalo ombo oyo, ombo engh, ombo küpo tsüphoeden topvü elani Juda lo ethelan eli kyon to jiang topvüto ji morantsan tssoa sosi yicho. 16 Elani Nebukadnezzar na ethelan eli kyon onte wothüng tiying tona, ethelan olan olan lo tssothimori eli, yonjoe jiang ha jüa, elani otsük oso mmhomden rasan yolo rhowokhung to jiang tssotsüi onte wothüng motsünga to sosi Babyloni yicho. 17 Hojisülo jo Nebukadnezzar na Jehoiachin oporo Mattaniah ji Juda lo mesao kümthuksi, ombo mying ji mpa Zedekiah to tongphicho.
Juda Lo Zedekiah Mesao
18 Zedekiah na ombo nzyu mekyusi ekha tssoathüng Juda lo mesao kümcho, osi ombona Jerusalem lona nzyu taro ekha sacho. Ombo oyo jo Libnah yantsü kyon Jeremiah otsolov Hamutal to tsacho. 19 Mesao Zedekiah naha mesao Jehoiahkim na tssoji esüa Opv Ül mhadungo mmen tssocho. 20 Hoji tsükona OPVÃœI na Jerusa lem tona Juda to kyon jiang pono lüm büm tsukcho osi hoji yakchia ombo na ombo ehungo na phani sicho.
Jerusalem Khyothechio ji
1 Zedekiah na Babylon mesao Nebukadnezzar panlancho, hoji tsükona Nebukadnezzar na ombo, rasan sosi Zedekiah yansa nzyu tukvüsi choro taro si tsüngon taro to jilo oro Jerusalem sakacho. Ontena oro yantsü ji rhüa ncheni rizümphen tssoracho, 2 osi yantsü ji hayae Zedekiah yansa nzyu taro ekhaoto nandang vancho. 3 Hoji nzyu choro mezhüoto jilo tsüngon tukvüoto jilo, otssi vara ntav yio jina kyon jiangna ntia etsoyu n liv vanathüng, 4 oro yantsü pikhfü ji rorhüpcho. Babylon kyon jiangna yantsü ji hayae vanaha rasan topvü na zümolo tsanchecho. Ontena mesa parhi jiwoena chiyi pikhfü eni ji yutalo kipüng jilo na chiyi Jordan hayi jiwoe tsanchuktacho. 5 Tokhatola Babylon rasan jiangna Zedekiah mesao ji phani Jeriko hayi ndüngo na ombo rhümacho, osi ombo rasan topvü na ombo sisi tsancho. 6 Zedekiah ji Nebukadnezzar mesao thüngi sosi yicho, jithüng jo Nebukadnezzar jo Riblah yantsüi vancho osi ombona Zedekiah chüthukvü yitan picho. 7 Zedekiah na zeta vana ombo tsoe jiang chüthukcho, osi omboha omhyik jiang eyiki ombo siyisi sheni Babyloni sosi yicho.
Ekhümki Ji Roe Sio Ji
8 Babylon lo Nebukadnezzar mesa yansa nzyu taro tukvü si choro mongo si tsüngon tiyingoto jilo, ombo rasan esapvüi Nebuzardan na Jerusalem lo rhowocho. 9 Ombona ekhümki ji, mesaki ji tona Jerusalem lo tsüphoe jiang ki jiang to rungi siyicho, 10 osi ombo rasan jiangna yantsü pikhfü ji vanroe sicho. 11 Tosi Nebuzardan na yantsü jilo kyon enhyokao, elhi tssothi tona ochoang na Babylon jiang tsankae vancho sana jiang to Babyloni sosi yicho. 12 Osi ombona yantsae tsotso jiang osi ejüeli n lio jiango Juda lo valanchi oli osi jününgro li elhi tssothukcho. 13 Babylon kyon jiangna yongmen durhyu jiang osi zotoro to khümpheni lio jiang osi yongmen jüjen ji to Babyloni hansi yicho. 14 Ontena thanpheni tsütsao miron thanphen ji tona, mibuk thephen ji, milon ntsükphen ebensü jiang, othan ekümrümo jiang ejen donthephen phikuk jiang, tssitsserhüm rungphen phikuk jiang osi yongmen tsütsaelan ekhümki tsütsao jiang ha hansi yicho. 15 Shona osi janti na nsüngrücho tsütsaelan topvü ontena khi hansi yicho, phikuk teriv osi miron thanthephen phi ji, toha jüa hansi yicho. 16 Solomon mesao na nsüngrüo yongmen tsütsaelan, durhyupvü eni ji, zotoro jiang, jüjen tsüpho ji to jo mmyingkhüngo jina füi n zechecho. 17 Durhyupvü eni jijo esüta, onita ntssoni metre tiza ren osi mmyoe jo yongmen na kvüri jiang rhüa opyon thenkao jiango yongmen yonjak na tsarümthipen kisü lyukacho.
Juda Kyon Jiang Babyloni Sosi Yiala
18 Hoji ephalo rasantsü esopvüi Nebuzzardan na pvüti tsüphoe Seraiah, ji küpo pvüti Zephaniah tona ekhümki tsüphoe otsük ethüm to evüngki sosi yicho. 19 Ombona yantsü rasan esopvüi jiang, mesao kija ndungtssungpvüi otsük mongo yantsüi vamo jiang, rasan esopvüi ji nzanchi ochona rasan eranto jiang varhyucho sana ji, tona eboe thanpo otsük rukro to sosi yicho. 20 Onte ji Nebuzardan na sosi Babylon mesao Riblah yantsü lo vamo ji thüngi sosi yicho. Hoji lona mesao na tatsüngi onte chüthukcho. 21 Hojito Juda kyon jiang onte metae na morantsan ejoena sosi yicho.
Juda Lo Yansae Gedaliah Ji
22 Shaphan tsoe Ahikam ji tsoe Gedaliah ji Nebukadnezaar mesao na Juda lo esopvüi kümthukcho, osi Babylon metae sosi n yio jiang topvü ezepvüi ji tssothukcho. 23 Juda lo tsüphoe ochoang na Babylon khelo n rheyiv vanchosana jiangna yiwon shi zoale, onte topvü na Gedaliah kyochilo Mizpah lo sanrhyucho. Hojiang tsüphoe jiango Nethaniah tsoe Ishmael, Kareah tsoe Johanan, Tanhumeth tsoe Seraiah, Netophah yamo ji tona Maakah kyon Jeza niah to. 24 Gedaliah na heto onte ezocho, "Ana nte ezoaka, ntena Babylon kyon jiang ekyuv n lika. Meta shilo vani Babylon mesao benkata vantava, tona nte echi mmhomka." 25 Tokhatola hoji nzyu choro tiyingo to jilo Elishama tsoe Nethaniah ji tsoe Ishmael, mesao wopan kyon jina ombo ndüngo otsük taro sonhyasi Mizpah lo owo Gedaliah hayae lüngthae sicho. Hojilo Israel kyon osi Baby Ion kyon ombo nzo vamo jiang ha lüngthanhyae sicho. 26 Jisülo jo Israel kyon, yantsae osi ejüeli topvüna rasan tsüphoe jiang nzo Ejip metae yitacho, ntiotssole onte na Babylon kyon jiang kyutacho.
Jehoiachin Ji Evüngkina Vachiala
27 Evilmerodakh na Babylon mesao kümo ji nzyu ombona Juda mesao Jehoiachin nzana nchümi vüngpheni na vachicho. Hojijo Jehoiahchin ji vüngi vasi nzyu thümro tiyingsi choro taro enisi tsüngon mekyu tiyingoto jilo tssocho. 28 Evilmerodakh na ombo nzana vanthukcho osi mesae tha npo ombo ndüngo Babyloni sosi yio jianglo na mmhonkata ombo nzancho. 29 Hoji tsükona Jehoiah chin eküm enhyoe lioji nandang evüngki mpensü ji dungphisi mesao tsoyupheni tsoyuv picho. 30 Ombo eküm evanthüng nandang jo engakvü ombo ethelan jiang benria pia vanthukcho.
Adam lona Abraham Nandang
1 Adam tsoe Seth, Seth tsoe Enosh, Enosh tsoe Kenan, 2 Kenan tsoe Mahalalel, osi Mahalel tsoe Jared 3 Jared tsoe Enokh, Enokh tsoe Methuselah, ocho Lamekh tsoe sana, 4 Lamekh tsoe Noah. Noah na tsokhying Shem, Ham tona Japhet to onthüm vancho. 5 Japhet tsoeden Gomer, Magog, Madai Javai, Tubal Meshekh tona Tiras to jo kyon okho kuoe na onte mying ejana yicho sana jiang motsüiden 6 Gomer tsoroni chen jiango Ashkenas kyon, Riphath kyon tona Togarmah kyon to jiang. 7 Javan tsoronichen jiango Elishah kyon, Spain kyon, Cyprus tona Rhodes kyon to kümracho. 8 Ham tsoeden Kush, Ejip, Libya tona Kanaan to jo onte mying shiang ejana yio kyon jiang kümcho. 9 Kush tsoronichen jo Seba kyon, Havilah kyon, Sabtah kyon, Raamah kyon tona Sebteka kyon to kümcho. Raamah tsoronichen jo Sheba tona Dedan kyonden to kümracho. 10 (Kush na otsoe tsüka Nimrod to tsa vancho osi jijo limhalo ekhyOPVÜI ovüngo ji tsocho. 11 Ejip tsoronichen jiango Lydia, Anam, Lehab Napthuh, 12 Pathrus, Kasluh tona Crete (ombo Philistine jiang motsüi ji) to. 13 Kanaan tsoeden Sidon, erantso ji tona Heth toha onte mying lo tsakacho kyon okho jiang motsüiden tsscho. 14 Tokhatola Jebusite, Amorite, Girgashite, 15 Hivites, Arketes, Sinites, 16 Arvadite, Zemarites tona Hama thite to jiang omotsüi jiha Kanaan tssocho. 17 Shem tsoeden Elam, Asshur, Arpachshad, Lud, Aram, Uz, Hul, Gether tona Meshak to jo onte myinglo tsakao kyon okho jiang motsüiden kümcho. 18 Arpachshad tsoe jo Shelah, Eber, opo ji. 19 Eber na otsoe otsük eni vancho, tsüka jo Peleg to tsacho, ntiotssole ombo echungo limhatsü kyon jiang chirorae sicho, osi tsüka jo Joktan to tsacho. 20 Joktan tsoronichen jiango Almodad kyon, Sheleph kyon, Hazarmaveth kyon, Jerah kyon, 21 Hadoram kyon, Uzal kyon, Diklah kyon, 22 Ebal kyon, Abimael kyon, Sheba kyon, 23 Ophir kyon, Havillah kyon tona Johab kyon to kümracho. 24 Shem lona Abram nandang pochungta ji heto tssocho; Shem, Arpachsshad, Shellah, 25 Eber, Peleg, Reu, 26 Serug, Nahor, Terah, 27 tona Abram (Abraham to tsao ji) to.
Ishmael Tsoronichen Jiang
28 Abraham na tsokhying eni Isaak ha Ishmael oni vancho. 29 Ishmael tsokhying jiangna pvüji taro eni reni yicho: Nabaioth (jijo Ishmael tsokhying eramo ji mying lona tsacho.) Kedar, Adbeel, Mibsam, 30 Mishma, Dumah, Massa, Hadad, Taema , 31 Jetur, Naphish, osi kedemah to. 32 Abraham na lothan keturah to tsa vancho osi oripvü lona tsokhying tirok shiang bukcho; Zimran, Jokshan, Medan, Midian, Ishabak tona Shuah to. Jokshan na tsokhying eni, Sheba tona Dedan to. 33 Midian na tsokhying mongo: Ephah, Epher, Hanokh, Abida tona Eldaah to vancho.
Esau Tsoronichen Jiang
34 Abraham tsoe Isaak na tsokhying eni vanchoEsau tona Jakob to. 35 Esau tsoe jo Eliphz, Reuel, Jeush, Jalam tona Korah to. 36 Eliphaz jo okho shiang omotsüi kümcho. Teman; Omar, Zephi, Gatam, Kenaz, Timna tona Amalek. 37 Osi Ruel jo okho shiang motsüi kümcho. Nahath, Zerah, Shammah, tona Mizzah to.
Edom Metalo Yanchi Kyon Jiang
38-42 Edom metalo yanchi kyon ovüngo ji Sier tose lona shiang reni yicho. Lotan, Hori ha Homam oni motsüi ji, (Lotan na oyuloe Timna to tsa vancho.) Shobal jo, Alvan, Manahath, Ebal, Shephi tona Onam to khümtsüng jiang omotsüi ji. Zibeon, ombo tsokhying Aiah, tona Anah to vancho. Anah jo Dishon opo, osi Dishon jo Hamran, Eshban, Ithran tona Chera to khüm tsüng jiang omotsüi ji tssocho. Ezer, ombo Bilham, Zaavan tona Jaakan to khümtsüng omotsüi ji tssocho. Dishon, ombo Uz tona Aran to khümtsüng omotsüi ji tssocho.
Edom Mesao Jiang
43-50 Mesao jiang na Edom metaji chungta sacho, hojithüng jo Israel lo mesao n vanhan. Dinhabah kyon Beor tsoe Bela Bozrah kyon Zerah tsoe Johab, Teman metalo kyon Husham, Avith kyon Bedalt tsoe Hadad (ombona Moab lona Median jiang ori tssoe khyocho) Masrekah kyon Samlah Zhükhfü tsae Rchoboth yamo kyon Shaul, Achbor tsoe Baal Hanan, Pau kyon Hadad (ombo eloe jo Mehetabel, Mezahab otsolov Matred ji otsolov) 51 Edom kyon jiango pvüjilan heto reni yicho; Timna, Alvah, Jetheth, 52 Oholibamah, Elah, Pinon, 53 Kenaz, Teman, Mibzar, 54 Magdiei tona Iram to.
Juda Tsoronichen Jiang
1 Jakob na tsokhying taro eni vancho; Reuben, Simeon, Levi, Judah, Issakhar, Zebulun, 2 Dan, Joseph, Benjamin, Naphtali, Gad tona Asher to. 3 Juda na tsotsüi tsokhying mongo vancho. Ombo engh Kanaan kyon Bathshua yakchia tsokhying ethüm, Er, Onan, tona Shelah to vancho. Er jo elümoto nmhomo jina OPVÜI na chüthukcho. 4 Ombo tsokhying ji engh Tamar lona Juda na tsokhying eni Perez tona Zerah to vanlancho. 5 Perez na tsokhying eni, Hezron tona Hamui to vancho. 6 Ojenio Zerah na tsokhying mongo vancho. 7 Zerah tsoronichen tsüka Karma tsoe Akhan na OPVÜI khochaki pithako jitüv phanchovo ejüeli jiang khio ji yakchia ezüp elümoto yithukcho. 8 Ethan na otsoe tsüka Azariah vancho.
David Mesao Wopan Pochung
9 Hezron na tsokhyiong ethüm vancho: Jerahmeel, Ram, tona Kaleb to. 10 Ram lona Jesse nandang pochung ji heto: Ram, Amminadab, Nashon, (Juda pvüji kyon vanjüng etssoe) 11 Salmon, Boaz, 12 Obed, tona Jesse to. 13 Jesse na tsokhying tiying vancho. Elani na heto reni yicho: Eliab, Abinadab, Shammah, 14 Nethanel, Raddai, 15 Ozem, tona David to. 16 Ombona tsolo eni: Zeruah tona Abigail to vancho. Jesse otsolov Zeruiah na tsokhying ethüm vancho: Abishai, Joab, tona Asahel to. 17 Ombo tsolo thanpo Abigail na Ishmael tsoronichen tsüka Jether thüngi yanpicho, osi onina tsokhying tsüka Amasa to tsa vancho.
Hezron Tsoronichen Jiang
18 Hezron tsoe Kaleb na Azukbah soa vancho osi onina otsolov tsüka Jerioth to tsa vancho: osi ompvüna tsokhying ethüm, Jesher, Shobab, tona Ardon to vancho. 19 Azubah chücho sülo Kaleb na Ephrath soa vancho, osi onina tsokhying tsüka Hur to tsa vancho. 20 Hur tsoe jo Uri, osi Uri tsoe jo Bezalel to tsacho. 21 Hezron ji nzyu rokro tssoathüng ombona Machir otsolov, Gilead oyilov ji soa vancho. Onina tsokhying tsüka vani Sugub to tsacho, osi 22 Segub na tsokhying tsüka Jair vancho. Jair na Gilead metalo yantsü mekyusi ethüm sacho. 23 Tokhatola Keshur tona Aram to ekhüngyan jiang na hojilo yantsü rokro khyocho, jilo Jair tona Kenath oni tona oyan enhyano jiang to jüa. Hojilo evan kyon topvü Gilead opo Machir tsoronichenden tssocho. 24 Hezron chücho sülo ombo tsoe Kaleb na Ephrath, opo emi ochona Tekoa yantsü ji benkacho sana hoji soa vancho.
Jerahmeel Tsoronichen jiang
25 Hezron tsokhying erantso Jerahmeel na tsokhying mongo vancho; Erantso. Ram, Bunah, Oren, Ozem, tona Ahijah to. 26-27 Ram na tsokhying ethüm vancho: Maaz, Jamin, tona Eker to. Jerahmeel na engh thanpo Atarah to tsa ha vancho osi onina tsokhying Onam to tsa vancho. 28 Onam na tsokhying eni Shammai ha Jada oni vancho, osi Shammai na ha tsokhying eni Nadab tona Abishur to vancho. 29 Abishur na eloe tsüka Abihail to tsa soa vancho, osi oni tsokhying eni; Ahban tona Molid to vancho. 30 Abishur ojenio Nadab na tsokhying eni vancho, Seled tona Appaim to, tokhatola Seled jo otsoe n vam chücho. 31 Appaim jo Ishi opo osi Ish jo Shesham opo, Shesham jo Ahlai opo to tssocho. 32 Shammai ojenio Jada na tsokhying eni vancho, Jether tona Jonathan to, tokhatola Jether jo otsoe n vam chüi sicho. 33 Jonathan na tsokhying eni vancho, Peleth tona Zaza to. Shiang hetopvü Jerahmeel tsoronichen tae. 34 Sheshan na tsokhying n vanncho, osi tsolo tae vancho. Ombona Ejip kyon phajae tsüka Jarha to tsa vancho, 35 Ombona otsolov tsüka jo Jarha thüngi yanpithukcho. Onina tsokhying tsüka Attai vancho. 36 Attai lona Elishama nandang wopan echungtao ji heto: Attai, Nathan, Zabad, 37 Ephlal, Obed, 38 Jehu, Azariah, 39 Hlez, Eleasah, 40 Sismai, Shallum, 41 Jekamiah, tona Elishama to.
Kaleb Tsoronichen Thanpoe Jiang
42 Jerahmeel ojenio Kaleb otsokhyungo eramo jijo Mesha to tsacho. Mesha jo Ziph opo osi Ziph jo Mareshah opo osi Mareshah jo Hebron opo. 43 Hebron na tsokhying mezhü vancho: Korah, Tappuah, Rekem, tona Shema to. 44 Shema jo Raham opo osi Jorkeam omotsü. Shema ojenio Rakem jo Shammai opo, 45 osi Maon opo, osi Maon jo Bethzur opo. 46 Kaleb na yinga loroe Ephah to tsa vancho osi ompvü lona tsokhying ethüm vanlancho: Harah, Moza, tona Gazez to. Haran na tsokhying Gazez to tsa ha vancho. 47 (Jadai to tsa kyon tsüka na tsokhying tirok vancho: Regem, Jotham, Geshan, Pelet, Ephah tona Shaap to) 48 Kaleb na yingaloroe thanphoe ha Maakah to tsa vancho osi ompvü na tsokhying eni, Sheber tona Tirhanah to bukcho. 49 Sülami ha tsokhying eni valancho: Shaaph to tsao, Mad mannah yantsü benkao ji tona, Shevah to tsa Machbennah tona Gibea yantsü to benkao ji to. Hoji ekalo Kaleb na otsolov tsüka Akhsah to tsa vancho. 50 Kaleb tsoronichen shiang ha vancho. Hur jo Kaleb ha ombo eloe Ephrath oni tsokhying eramo ji. Hur tsoe Shobal na Kiriath Jeriam yantsü ji tssocho. 51 Ombo tsokhying enioto Salma na Bethlehem tssocho osi ombo tsokhying ethümo Hareph na Bethgader yantsü ji tssocho. 52 Kiriath Jeriam yantsü tsso Shobal jo Heroeh pvüji jiang omotsüi tsocho, osi Memuhoth lo jipo owo chiso na vancho, 53 osi pvüji shiang omotsüi tssoa Kiriath Jeearim lo vancho: Ithrite kyon, Puthites jiang, Shumathite jiang tona Mishraite jiang to omotsüi tssocho. (Zoraah tona Eshtaol to yantsü kyon jiang jo pvüji shiang kyon tssocho.) 54 Bethlehem etssowo Salma jo Netophat kyon, Atroth Beth Joab kyon tona Zorite kyon, Mathahath pvüji eni jiang kyonden tssocho. 55 (Eranto lo mmhomo pvüji shiang jo Jabez yantsü lo vancho: Tiruthite jiang, Shimeathite jiang, tona Sukathite jiang to. Onteno Kenite kyon osi Rechobite jiang thüngi lolantae vancho.)
David Mesao Ngaroden jiang
1 David na Hebron lo vanathüng buko ombo ngaro jiang nzyu erani na heto rencho: Jezebel metalo eloe Ahinoam otsokhyongo Amnon, Karmel metalo eloe Abigail otsolov Daniel, Geshur lo mesao Talmai otsolov. Maakah otsokhyongo Absalom, Heggith Shephatiah otsokhyongo Adonijah, Eglah otsokhyongo Abital Ithream to, 4 Jeni tirok shi David na Hebron lo nzyu tiyingsi chiso sathüng bukcho. Obona Jerusalem lona nzyu thümrosi ethüm mesao tssocho. 5 Osi hoji lonaha tsokhying elümoto bukcho. Ombo eloe Bathsheba Ammiel otsolov jina ha tsokhying mezhü bukcho, shiang Shimea, Shobah, Nathan, tona Solomon to. 6 Ombona tsokhying than poe tukü shiang ha vancho: Ibhar, Elishua, Elpelet,7Nogah, Nepheg, Japhia, 8 Elishama, Eliada, tona Eliphelet to. 9 Shiang ephalo David na ombo yingaloroe lona bukcho tsokhying ha vanracho. Ombo otsolov Tamar ha vancho.
Solomon Mesao Ngaroden Jiang
10 Solomon mesao pochung ji opo lona otsoe nandang heto yicho: Solomon, Rehoboam, Abijah, Asa, Jehoshapat, 11 Jehoram, Ahaziah, Joash, 12 Amaziah, Uzziah, Jotham, 13 Ahaz, Hezekiah, Manasseh, 14 Amon, tona Josiah to. 15 Josiah na tsokhying mezhü vancho, shiang: Johanan, Jehoiakim, Zedekiah, tona Joahaz. 16 Jehoiakim na tsokhying eni vancho, shiang: Jehoiachin tona Zedekiah to.
Jechoiachin Mesao Pochung Jiang
17 Babylon kyon evüngki hansi oyi vanthuko Jechoiachin pochung ji heto, ombona tsokhying tiying v ancho: Shealtiel, 18 Malchiram, Pediah, Shenazzar, Jekamiah, Hoshama, tona Nedabiah to. 19 Pediah na tsokhying eni vancho: Zerobbabel tona Shimei to. Zerobbabel jo tsokhying Meshullam tona Hananiah, tona tsolo tsüka Shelomith to opo. 20 Ombona tsokhying thanpo mungo shiang ha vancho: Hashubah, Ohel, Erechiah, Hasadeah, tona Jushab Hesed. 21 Hananiah na tsokhying eni vancho, Pelatiah tona Jeshaiah to Jeshaiah jo Rephaiah opo, Rephaiah jo Aranan opo, Arnan jo Obadiah opo, Obadiah jo Sheka miah opo, 22 Shekhaniah na tsokhying tsüka vancho: Shemaiah naha, osi orüi wo tsük mongo vancho: Hattush, Igal, Bariah, Neariah, tona Shaphat to. 23 Neariah na tsokhying ethüm vancho: Elio enai, Hizkiah, tona Azrikam to. 24 Eliwoenai na tsokhying tiying vancho: Hodaviah, Eliashib, Pelaiah, Akkub, Johanan, Delaiah, tona Anani to.
Juda Tsoronichen Jiang
1 Juda tsoronichen ejoma jo shiang: Perez, Hezron, Carmi, Hur, tona Shobal. 2 Shobal tsoe Reaiah, Reaiah tsoe Janath, tsoe Ahumai tona Lahad to, shiang jo Zorah lo evamo kyon jiang motsüiden. 3-4 Hur jo Kaleb eng Ephrath otsokhyongo, osi ombo tsoronichen jiangna Bethlehem yantsü ji tssocho. Hurna tsokhying ethüm vancho: Etam, Penuel, tona Ezer to. Etem na tsokhying onthüm vancho: Jezreel, Ishma, Idbash, tona tsolo tsüka Hazzelel poni vancho. Penuel na Gedor yantsü ji tssocho, osi Ezer na Hushah yantsü ji tssocho. 5 Tekoa yantsü tsso Ashhur na engh otsük ethüm vancho, Helah tona Naarah to. 6 Ashhur na Narrah lona tsokhying mezhü vancho: Ahuzzam, Hepher, Temeni, tona Haahashtarito. 7 Ashhur na Helah lona tsokhying ethüm vancho: Zereth, Izhar, tona Ethnan to. 8 Koz jo Anub ha Zabebah oni opo osi Harum tsoe Aharhel tsoronichen jiang omotsüi tssocho. 9 Jabez to tsa kyon tsüka vancho, osi ombo wopan jijo kyon na yikrachitsowo ji. Ombo bukathüng nira na noa buko jina oyo na Jabez to ombo tsacho. 10 Tokhatola Jabez na Israel Potsow thüngi heto randancho, Potsow, a mmhayia osi liko khosha a pia, nina a ndüngo vana osi eno era bukcheo n mhom topvü lona a nkocheta. Tole ombona randamo ji Potsow na picho.
Wopan Mying Thanpoe Jiang
11 Shuhah ojenio Kaleb tsokhying tsüka, Ehir vancho. Osi Mehir na Eshton vancho, 12 Elani Eshton na tsokhying ethüm vancho: Bethrapha, Pasiah, tona Tehinnah. Tehinnah jo Nahash yantsü tsso ji. Hojilo evan jiang tsoronichen jiang na Rekah lo vancho. 13 Kenaz na Juda tsokhying eni vancho. Othniel tona Seraiah to. Othniel na tsokhying eni Hathath tona Meonothai to vancho. 14 Meonothai tsoe jo Ophrah tssocho. Seraiah tsoe jo Joab, Ombona tsiyanmorithi hayitsü ji tssocho. Hojilo evamo kyon jiango tssiyanmorithi tae tssocho. 15 Jephunneth tsoe Kaleb na tsokhying eth vancho: Iru, Elah, tona Naam to. Osi Elah jo Kenaz opo tssocho. 16 Jehallelel na tsokhying ethüm vancho: Ziph, Ziphah, Tiria, tona Asarel. 17-18 Ezrah na tsokhying mezhü vancho: Jether, Mered, Epher, tona Jalon to. Mered na Ejip mesatsolo Bithiah ji soa vancho, osi onina tsolo tsüka Miriam tona tsokhying eni Shammai ha Ishbah to vancho. Ishbah na Eshtemoa yantsü ji tssocho. Mored na Judah pvüji eloe ha tsüka soa vani onina tsokhying ethüm vancho:Gedor yantsü tsso Jered to tsa ji, Soco yantsü tsso Heber ji, Zanoah yantsü tsso Jekuthiel to. 19 Hosiah na Naham oyulov ji soa vancho. oni tsoronichen jiang lona Garm pvüji Keilah metalo vamo jiang tona Eshtemoa lo vamo Maakath pvüji to reni yicho. 20 Shimon na tsokhying mezhü vancho: Amnon, Rinnah, Benhanan, tona Tilon to. Ishi na tsokhying eni vancho: Zoheth ha Benzoheth oni.
Shelah Tsoronichen Jiang
21 Shelah jo Juda tsokhying yolo tsüka. Ombo tsoronichen jiang yolo tsüka jo Lecah yantsü etsso Er to tsao ji, Laadah, Mereshah yantsü tsso ji, Beth Ashbea lo vamo sünyipvü etüko jiang; 22Jokim tona Gizeba lo evamo kyon jiang; Joash tona Moab eloe soa vani Bethlehem lo vanjüng tssoa yio Saraph. (Shiang motsü shiango elüm ehenthaka.) 23 Onte no mesao elhilo ophi ejoeden osi Netaim tona Gederah to yantsü lo vancho.
Simeon Tsoronichen Jiang
24 Simeon ha tsokhying mungo vancho: Nemuel, Jamin, Jarib, Zerah tona Sahul to. 25 Shaul tsokhying jo Shallum osi orüo Mibsam, Osi ombo orüo ji tsoe jo Mishma. 26 Jitosi Mishma lona pochung ji Hammuel, Zakkur tona Shimei to yakchia reni yicho. 27 Shimei na tsokhying taro tirok tona tsolo tirok to reni yicho, tokhatola ombo wopan thanpoe jiang jo thicherüche tata n licho, Osi Simeon wopan jo Juda esüa n thichev sicho. 28 Simeon tsoronichen jiang na David nandang ji yantsü shiang lo vana rocho: Beersheba, Moladah, Hazarshual, 29 Billhah, Ezem, Tolad, 30 Bethuel, Hormah, Ziklag, 31 Beth Markaboth, Hazar susim, Bethbiri, tona Shaarim. 32 Ontena meta thanpo mungo shiang loha vancho: Etem, Ain, Rimmon, Tochen, tona Ashan, 33 Osi hojiang nkonchano oyan jiang lo, engrhejolowoe Baalath yantsü jana vancho. Ontena onte wopan mying osi ontena vamo meta jiang mying to erani vao ji shiang. 34-38 Onte pvüji jiang lo jiporamo jiang mying jiang shiang: Meshobab, Jamlech, Amaziah tsoe Joshah, tona Joel. Jehu (Asiel tsoe Seriah tsoe Joshibiah tsoe ji), Eliwoenai, Jaakobah, Jeshoaiah, Asaiah, Adiel, Jesimiel, Benaiah, Ziza (Jedaiah, Shimri, tona Shemaiah, to tsoronichen Allon tsoe Shiphi). onte wopan thicheta yio jina, 39 Ontena engrhewoe nzüa vana oyi Gerar yantsü jana vani yantsü tssokachio meta hayitsü ji engkhüwoe onte olyu jiang yantsophen tssoa vantacho. 40 Ontena jilo eroyo pvülyua hungcho osi meta jiha noyinga meria tssocho. Ovüngthüng meta jilo kyon jiango Hamite kyon vancho. 41 Omhawoe erani lio wopan shiangna Hezekiah na Judah lo mesao tssoathüng Gerar lo owo jilo evan kyon jiang süki osi ranki jiang roe siyicho. Hojilo olyu yantsophen nchüngkhon lia evamo eroyo lio jina ontena jilo kyon jiang phani sisi jilo vanchüng tssocho. 42 Simeon pvüji kyon thanpoe otsük nzo mongo jo Edom meta na engrhewoe owo vancho. Onteno Ishi tsokhying shiangna socho. Pelatiah, Neariah, Rephaiah, tona Uzziel to. 43 Ontena hojilo melek kyon enhyokae vamo jiang lüngthae sisi jilo vancho nchüng jana jilo vana.
Reuben Tsoronichen Jiang
1 Jakob tsoe erantso Reuben ji tsoronichen jiang shiang. (ombona opo yingaloroe tsüka thüngi rama tsso jina tsokhying eramo ji ejan elan elio jiang ji Joseph jani sicho. 2 Tokhatola Juda pvüji ekhyo eto elio theche pvüji topvü yansae jiang ji Juda pvüji lona chiyiracho.) 3 Jakob tsokhying eramo Reuben na tsokhying mezhü vancho: Hanokh, Pallu, Hezron, tona Karmi to. 46 Joel tsoronichen jiang echungren jiang heto yicho: Shemaiah, Gog, Shimei, Mikah, Reaiah, Baal tona Beerah to. Assyrian mesao Tig lath Pileser na Beerah pvüji jilo esopvüi ji rhümae metapoe yithuki sicho. 7 Wopan motsü erani vao jilo Reuben pvüji lo jiporan jiang shiang erani lia: Jeiel, Zekhariah, 8 Tona Joel pvüji, Shema tsoe Ahaz osi omboji tsoe Bela to. Pvüji shina Aroer lo vancho osi hoji meta lona benkae jükiwoe Nebo tona Baal Menon to jana vancho. 9 Ontena Gilead metalo tssiden tsüphov vamo jina ontena hoji lona engkhfüwoe lijüng jina Euphrates zhükhfü hayitsü ji jana vantacho. 10 Saul mesao echungo Reuben pvüji jina Hagrite kyon jiang thüngi ori tssoe lüngthae onte sirasi Gilead na engkhfüwoe onte metaji khiyicho.
Gad Tsoronichen Jiang
11 Gad pvüji jina Reuben pvüji jiang vamo ji jükiwoe Bashan meta lona benkae engkhfüwoe Salekah jana vancho. 12 Joel jo pvüji tsüpotsow ji benkapvüi ji, osi jisülo pvüji tsüpotsow ji benkapvüi jijo Shapham, osi Bashan lo pvüji thanpo jiang benkapvüi jo janai tona Shaphat to. 13 Osi pvüji jilo woro thanpoe jiang wopan tiying shiang kyongden: Mikhael, Meshullam, Sheba, Jorai, Jakan, Zia, tona Eber to. 14 Ontena Huri tsoe Abihail tsoronichen osi Huri motsüi jiango shiang: Abihail, Huri Jaroah, Gilead, Mikhael, Jeshishai, Jahdo Buz to 15 Shiang pvüji 10 eramo jijo Guni tsoe Abdiel ji tsoe Ahi ji. 16 Ontena Bashan meta lo osi Gilead yantsü jianglo, osi Sharon lo eroyo meta jianglo to vantacho. 17 Motsü shiang jo Juda mesao Jotham tona Israel mesao Jeroboam to echungo erancho.
Engkhfüwoe Pvüji jiang lo Rasantsü jiang
18 Reuben, Gad tona Engrhewoe Manassaeh to pvüji lo rasan 44,760 otsung epvüi osi yonri tona lotsi ebem osi tssavlo tssothiden vancho. 19 Otena Jetur lo Hagrite pvüji Naphish pvüji tona Nodab pvüji to thüngi ritsolo wocho. 20 Ontena Potsolo longtsükae Potsow thüngi randana khochio jina Potsow na Hagriteb tona onte topvü jiang to khyocho. 21 Ontena ori khelona rechocho Ut 50,000, olyu 250,000, kadho 2,000, tona morantsan 100,000 rhümae vüngi vacho. 22 Ritsso ji Potsow na lüm na rünga kyochio jina ontena ori elümoto lüngthacho. Osi ontena oyam khelo n rheyithüng nandang jo meta jilo vanta vancho
Engkhfüwoe Manasseh Kyon Jiang
23 Engkhfüwoe Manasseh kyon jiang na Bashan metalo jükiwoe Baal Hermon, Senir osi Hermon phunglan jana vancho, osi woro elümoto thicherücheta yicho. 24 Onte jiporan jiang myingjo shiang: Epher, Ishi, Elliel, Azriel, Jeremiah, Hodaviah, tona Jahdiel to. Onte topvü rasan thüngche osi pvüji esopvüiden.
Engkhfü Jipo Jiang Phani Yithukala
25 Tokhatola kyon jiangna onte motsüi Potsow jilo longtsüka ji sisi Potsow na meta jilona phani siwo limha kyon Potsow jiang khüma yi sicho. 26 Hoji tsükona Potsow na Assyria mesao Pul (Tiglath Pileser to ha tsao ji) khi onte meta ji sathukcho. Ombona Reuben, Gad, tona engkhfü Manasseh to pvüji jiang phani sisi Halah, Habor, tona Hara meta osi Gozan zhükfü tsa jiang lo onte vanthukcho.
Pvüti Tsüpho Jiang Wopan Pochung
1 Levi na tsokhying ethüm vancho: Gershon, Kohath, Merari to. 2 Kohath na tsokhying mezhü vancho: Amram, Izhar, Hebron, tona Uzziel to. 3 Amram na tsokhying eni vancho: Aaron, Moses tona tsolo tsüka Miriam to. Aaron na tsokhying mezhü vancho: Nadab, Abihu, Eleazar, tona Ithamar to. 4 Eleazar tsoronichen heto echungta yicho: Phinehas, Abishua, 5 Bükki, Uzzi, 6 Zerahiah, Merioth, 7 Amariah, Ahitub, 8 Zadok, Ahimaaz, 9 Azariah, Johanan, 10 Azariah (Solomon na tsso Jerusalem ekhümki zao ji). 11 Ameriah, Ahitub, 12 Zadok, Shallum, 13 Hilkiah, Azariah, 14 Seriah, Jehozadak, 15 Jehozadak jo OPVÜI na Juda osi Jerusalem kyon metapoe khelo yithuko jiang nzo Nebukadnezzar na yithukcho.
Levi Tsoronichen Thanpoe Jiang
16 Levi na tsokhying ethüm vancho: Gershon, Kohath, tona Meri to. 17 Onte otsük aku na tsokhying vanracho. Gershon jo Libni tona Shimei to opo. 18 Kohath jo Amram, Ishar, Hebron, tona Uzziel to, 19 Osi Merari jo Mahli tona Mushi to opo. 20 Gershon tsoronichen jiang heto echungta yicho. Libni, Jahath, Zimnah, 21 Joah, Iddo, Zerah, Jeatherai. 22 Kohath tsoronichen jiang pochung ji heto yicho: Amminadab, vKorah, Assir, 23 Elkanah, Ebiasaph, Assir, 24 Tahath, Uzziah, Shaul to. 25 lkanah na tsokhying eni vancho: Amasai tona Ahimoth. 26 Ahimoth tsoronichen jiang pochung ji heto yicho: Elkanah , Zophai, Nahath, 27 Eliab, Jehoram tona Elkanah to. 28 Samuel na tsokhying eni vancho: Eramo ji Joel, nungo ji Abijah to. 29 Merari tsoronichen jo shiang echungta yicho: Mahli, Libni, Shimei, Uzzah, 30 Shimea, Haggiah tona Asaiah to.
Ekhümki khenden Jiang
31 David mesao na ntsata kako ji thei vaphen ji Jerusalem ekhümki hansi yisi sülo jilo khenden jiang shiang. 32 Solomon mesao na ekhümki ji n tssothüng yuta jilo OPVÜI vanrhyu ranki jilo ontena chungta khenden tssotacho. 33 Shi elhi lo chungtae jiang wopan echungta ji heto: Kohath pvüji: Khenden okho ovüngo ji esopvüi Heman jo Joel otsokhyongo, Ombo wopan motsüi jiango heto Jakob nandang yicho: Eman, Joel, Samuel, 34 lkanah, Jeroham, Zeli'el, Toah, 35 Zuph, El-kanah, Mahath, Amasai, 36 El-kanah, Joel, Azariah, Zephaniah, 37 Tahath, Assir, Ebiasaph, Korah, 38 Izhar, Kohath, Levi, tona Jakob to. 39 Khenden kho enioto esopvüi jo Asaph. Ombo wopan pochung jo Levi nandang heto yicho: Asaph, Berechiah, Shimea, 40 Mikhael, Zbaaseiah, Malchijah, 41 Ethni, Zerah, Adaiah, 42 Ethan, Zimmah, Shimei, 43 Jahath, Gershon, Levi. 44 Khenden okho ethümoto ji esopvüi jo Merari pvüji kyon Ethan na tssocho. Ombo wopan pochung ji Levi nandang heto yicho: Ethan, Kishi, Abdi, Mallukh, 45 Hashabiah, Amaziah, Hilkiah,46Amzi, Bani, Shemer, 47 Mahli, Mushi, Merari, Levi to. 48 Onte shom Levi thanpoe jiango ekhümki elhi thanpo jiang topvü zikacho.
Aaron Tsoronichen Jiang
49 Aaron tona ombo tsoronichen to jiangna ntssan tssütsse orhüm mmhom than jiang pitacho osi thanphensae na rungo than jiangha pitacho. Onteno nthotso khümphen chungchak jilo ekhüm elhi jiang osi Potsow na Israel nlan siyio than jiang epipvüi tssotacho. Ontena shiang topvü ji Potsow na ombo phajae Moses ezo ji ephanina thantacho. 50 Aaron tsoronichen pochung jo heto: Eleazar, Phinehas, Abishua, 51 Bükki, Uzzi, Zerahiah, 52 Meraioth, Amariah, Ahitub, 53 Zadok tona Ahimaaz to.
Levite Jiang Vanphen
54 Konath pvüji Aaron tsoronichen jiang metalo ji shi. Onteno Levite jiango pio meta jilo ejan ovüngo ji picho. 55 Meta ji Juda lo Hebron, Osi hoji nkonphia eroyo jiang phata picho. 56 Tokhatola yantsü ji echi oli jiang tona oyan jiang to jo Jephunneh tsoe Kaleb echi tssocho. 57-59 Yantsü shiango Aaron tsoronichen echi: Tsanthephen yantsü Hebron, Jattir tona yantsü: Libnah, Eshtemoa, Debir, Ashan, tona Beth Shemesh osi jianglo eroyo jiang to. 60 Benjamin metalo jo yantsü osi eroyo shiang onte picho: Geba, Alemeth tona Anothoth to topvü tssotsüi onte wopan evam yantsü tarosi ethüm tssocho. 61 Manesseh engrhewoe yantsü taro jo phyalyu fuki Kohath pvüji kyon jiang wopan opan na jantayicho. 62 Gershon pvüji jiango meta shianglo yantsü taro ethüm khi wopan opan na jantayicho. Assachar meta, Asher, Naphtali tona Bashan lo engrhewoe Manasseh to. 63 Hoji esüa meta shianglo yantsü tarosi eni jo Merari pvüji kyon jiang wopan opan na jantayicho. Reuben meta, Gad, Zebulum to meta. 64 Hojitoli Israel kyon jiangna Levi kyon jiang ji yantsü tona jianglo eroyo jiang to jantayia vanthukcho. 65 (Omhawoe thei lio meta Juda, Simeon tona Benjamin to metalo yantsü jiang ha phyalyu fuki jantacho.) 66 Konath pvüji wopan ejoma jo Ephraim nkonjan meta shianglo yantsü osi eroyo jiang picho. 67 Shechem, Ephraim phunglani tsanthephen yantsü ji, Geser, 68 Jokmeam, Beth Heron, 69 Aijalon, tona Gath Rimmon to. 70 Engrhelamoe Manasseh metalo jo yantsü shiang tona jianglo eroyo jiang to onte picho. Aner tona Bileam to yantsü. 71 Gershon pvüji lo wopan jiango yantsü shiang tona jianglo eroyo jiang to picho. Engrhewoe Manasseh metalo Bashan lo Golan, tona Astaroth to. 72 Issakhar metalo Kedesh, Daberath, 73 Ramoth tona Anem to. 74 Asher metalo jo Mashal, Abdon, 75 Hukok tona Rchob to. 76 Naphtali meta lo Kedesh, Hammon tona Kiriathaim to. 77 Merari pvüji lo wopan thanpo jiang jo yantsü shiang tona hojiang nkonjano eroyo jiang to picho. Zebulum metalo: Rimmono, tona Tabor to. 78 Reuben metalo Jordan zhükfü engkhüwoe Jeriko pankawoe: dungtiro jilo Bezer, Jahzal, 79 Kedemoth tona Mephaat to 80 Gad metalo: Gilead lo Ramoth, Mahanaim,81 Heshbon tona Jazer to.
Isaakhar Tsoronichen Jiang
1 Isaakhar na tsokhying mezhü vancho: Tola, Puah, Jashub tona Shimron to. 2 Tola na tsokhying tiying vancho: Uzzi, Rephaiah, Jeriel, Jahmai, Ibsam tona Samuel to. Onteno Tola jipo yolo wopan lo eramoe jiang osi rasan thüngche tae. David mesao echungojo onte ji wothüng mekyu enisi nzo tirok vancho. 3 Uzzi na tsokhying tsüka Izrahiah tona ombo tsokhying mezhü Mikhael, Obadiah, Joel, tona Isshiah to, Osi onteno tsokhying lo eramoe jiang. 4 Ontena engh osi otsoe oro elümoto vamo jina onte yolona rasan wothüng thümrosi tirok chiyicho. 5 Isaahiah wopan kyon topvü, erankae lio ji ephan jo eboe rasan tssokhong taena wothüng ekha tizasi tiying vancho.
Benjamin tona Dan to Tsoronichen Jiang
6 Benjamin na tsokhying ethüm vancho: Bela, Bechar, tona Jediael to. 7 Bela na tsokhying mungo vancho: Ezbon Uzzi, Uzziel, Jerimoth tona Iri to. Onteno pvüji jilo wopan lo eramoe jiang osi rasan thüngche tae. onte tsoronichen jiang yolo eboe rasan tssokhung wothüng mekyu enisi thümro mezhü vancho. 8 Becher na tsokhying toku vancho: Zemirah, Joash, Eliezer, Elewoenai, Omri, Jeremoth, Anathoth, tona Alemeth to. 9 Onte tsoronichen jiang apon ephani na erani lioji ephan jo rasan tssokhung eboe wothüng mekyu enisi nzo eni. i0Jediael na tsokhying eni vancho, Bilhan na tsokhying tiying vancho: Jeush, Benjamin, Ehud, Chenaanah, Zethan, Tarshish, tona Ahishahar to. 11 Onteno onte jipo lo wopan jiang yolo eramoeden osi rasan thüngche tae. Onte tsoronichen jiang yolo rasan tssokhung eboe wothüng taro tiyingsi nzo eni jüa. 12 Shuppim ha Huppim oni ha pvüji shilo kyonden. Dan na tsokhying tsüka Hushim vancho.
Naphtali Tsoronichen Jiang
13 Naphtali na tsokhying mezhü vancho: Jahziel, Guni, Jezer, tona Shallum to Onteno Bilhah tsoronichen.
Manasseh Tsoronichen Jiang
14 Manasseh na ombo yinga loroe Armea kyon ji yakchia tsokhying eni vancho, Asriel tona Machir to. Machir jo Gilead opo. 15 Machir na Huppin ha Shuppim onita engh yani vayicho, Machir oyulov Maacah to tsa vancho. Machir tsoe enioto jijo Zelophehad osi ombona tsolo tsüka tae vancho. 16 Machir eng Maakah na tsokhying eni vancho, Peresh tona Sheresh to tsayicho. Peresh na tsokhying eni Ulam tona Rakem to vancho, 17 Osi Ulam na tsokhying tsüka Bedan to tsa vancho. Shiang jo Gilead tsoronichen tae, Osi Gilead jo Machir tsoe Mamasseh tsorüi ji. 18 Gilead oyulov Hammolecheth na tsokhying ethüm vancho: Ishad, Abiezer, tona Mahlah to 19 (Shemida nar tsokhying mezhü vancho: Ahian, Shechem, Likhi tona Aniam to.)
Ephraim Tsoronichen Jiang
20 Ephraim tsoronichen jiang echungren echungren heto yicho: Shuthelah, Bered, Tehath, Eleadah, Tahath, 21 Zabad, Shuthelah to. Ephraim na Shuthelah ephalo tsokhying thanpo eni vancho. Ezer tona Elead to, Osi onio Gath kyon jiang mangsü efütav tssoathüng oyam na oni lüngthacho. 22 Oni opo Ephraim na tsüngon sunga nungracho osi ojenio jiangna oro ombo echichocho. 23 Jisülo ombona ombo engh thüngi poni tssoe otsoe tsüka vancho. Onina'otsoe ji Beriah to tsacho, ntiotssole onte wopan lo ezüp elümoto yicho. 24 Ephraim na tsolo tsüka Sheerah to tsa vancho. Ompvüna Beth Haron yantsü omhao tona okupo to ji tssocho osi Uzzen Sheerah ha tssocho. 25 Ephraim na tsokhying tsüka Rephah to tsa ha vancho osi Rephah tsoronichen jo shiang: Resheph, Telah, Tahan, 26 Ladan, Ammihud, Elishama, 27 Nun tona Joshua to. 28 Ontena meta khio jiang lo vancho yolo shiang ha jüa, Bethel tona hoji nkonphia yantsü jiang, engkhüwoe Naaran jana osi engrhelamoe Gezer tona hoji nkonphia yantsü jiang to. Elani Shechem tona Ayyah to yantsü jiang tona hoji nkonphia yantsü jiang to jüa. 29 Manasseh tsoronichen jiangna yantsü shiang sayacho: Beth Shean, Taanakh, Megiddo, tona Dor, Osi hojiang nkonphia yantsü lio jiang to. Shiang hetopvü Jakob tsoe Joseph tsoronichen jiangna vamo meta jiang.
Asher Tsoronichen Jiang
30 Asher tsoronichen jiang shiang, Ombona tsokhying mezhü vancho: Imnah, Ishvah, Ishvi, tona Beriah to, Osi tsolo tsüka Serah vancho. 31 Beriah na tsokhying eni vancho, Heber tona Malchieltp. (Malchiel na Birzaith yantsü ji tssocho.) 32 Heber na tsokhying ethüm vancho: Japhlet, Shomer, tona Hothamto; osi tsolo tsa Shua to tsa vancho. 33 Aphlet naha tsokhying ethüm vancho: Pasakh, Bimhal, tona Ashvath to. 34 Ombo ojenio Shomer na tsokhying ethüm vancho: Rogah, Jehobbah, tona Aeam to. 35 Ojenio Hotham na tsokhying mezhü vancho: Zophah, Imna, Shelesh, tona Amal to. 36 Zophah tsoronichen jo Suah, Harnepher, Shual, Beri, Imrah, 37 Bezer, Hod, Shamma, Shilshah, Ithran tona Beera to. 38 Jether tsoronichen jiango Jephunneh, Pispa, tona Ara to, 39 Osi Ulla tsoronichen jiango Arah, Hannaiei, tona Rizia to. 40 Shiang hetopvü Asher tsoronichen, onteno opano eramo jiang osi ritssolo thüngche, esopvüi mmhomden. Asher tsoronichen jiang yolo rasan tssokhung eboe wothüng mekyusi tirok jüa.
Benjamin Tsoronichen Jiang
1 Benjamin na tsokhying mungo vancho. Onte ji eranina heto etsüngcho: Bela, Ashbel, Aharah, 2 Nohah, tona Rapha to. 3 Bela tsoronichen jo Addar, Ahihud, 4 Abishua, Naaman, Ahoah, 5 Gera, Shephuphan, tona Huram to. 6-7 Ehud tsoronichen jiango Naaman, Ahijah, tona Gera to. Oteno Geba lo vamo jiang yolo wopan lo eramoe jiang khatola onte ji etsüngchukchi oyi Manahath lo vancho. Osi hoji eyiv ji Uzza opo Gera na onte socho. 8-9 Shaharim na eloe eni Hushim ha Baara oni sichicho. Sülani jo ombona Moab metae vanale ombona Hodesh soa vani tsokhying tiying vancho: Johab, Zibia, Mesha, Malkam, 10 Jeuz, Sakhia, tona Mirmah to. Ombo tsoe topvü wopan lo eramoe kümracho. 11 Ombona eloe Hushi lona tsokhying eni, Abitub ha Elpaal oni vancho. 12 Elpaal na tsokhying ethüm vancho: Eber, Misham, tona Shemed to. Shemed jo Ono tona Lod to yantsü osi hojiang nkonjano oyan jiang to tsso ji.
Gath Tona Aijalon to lo Benjamin Kyon Jiang
13 Beriah ha Shema onio Aijalon yantsü kyon jiang yolo wopan lo eramoe jiang osi Gath yantsü kyon jiang phani siwo jiang. 14 Beriah tsoronichen yolo ejoma jo Ahio, Shashak, Jeremoth, 15 Zebadiah, Arad, Eder, 16 Mikhael, Ishpah, tona Joha to.
Jerusalem lo Benjamin Kyon Jiang
17 Elpaal tsoronichen yolo ejoma jo Zebadiah, Meshullam, Hizki, Heber, 18 Ishmerai, Izliah, tona Jobab to. 19 Shimei tsoronichen yolo ejoma jo Jakim, Zichri, Zabdi, 20 Elienai, Zillethai, Eliel, 21 Adaiah, Beraiah, tona Shimrath to 22 Shashak wopan yolo ejoma jo Ishpan, Eber, Eliel, 23 Abdon, Zichri, Hanan, 24 Hananiah, Elam, Anthothijah, 25 Iphdeiah, tona Penuel to. 26 Jeroham tsoronichen yolo ejoma jo Shamsherai, Shehariah, Athaliah, 27 Jaareshiah, Elijah, tona Zichri to 28 Shiang jo Jerusalem lo vamo wopan jiang motsü osi wopan eramo jiang.
Gibeon tona Jerusalem to lo Benjamin Wopan Jiang
29 Jeiel na Gibeon yantsü ji tsoe jilo vancho. Ombo eng jo Maakah to tsacho 30 Osi otsokhyungo eramo jojo Abdon to tsacho. Ombo tsoe thanpoe jiango Zur, Kish, Baal, Ner, Nadab, 31 Gedor Ahio, Zecher, 32 Tona Shimeah opo Mikloth to. Onte tsoronichen jiangna Jerusalem lo onte wopan thanpoe jiang ndüngo vancho.
Saul Mesao Wopan
33 Ner jo Kish opo osi Kish jo Saul Mesao opo ji. Saul na tsokhying mezhü vancho: Jonathan, Malchishua, Abinadab, tona Eshbaal to. 34 Meribbaal opo jo Jonathan, Ocho jo Mikah opo sana hoji. 35 Mikah na tsokhying mezhü vancho: Pithon, Melekh, Tarea, tona Ahaz. 36 Ahaz jo Jehoaddah opo, Ombo tsokhying nchyu ethüm opo: Alemeth, Azmaveth, tona Zimri to. Zimri jo Moza opo, 37 osi Moza jo Binea opo, Raphah kyon Binea, Eleasah kyon Raphah tona Azel kyon Eleasah to opo. 38 Azil na tsokhying tirok vancho: Azrikam, Bocheru, Ishmael, Sheariah, Obadiah tona Hanan to. 39 Aziel ojenio Eshek na tsokhying ethüm vancho: Ulam, Jeush, tona Eliphelet to. 40 Ulam tsoe jiango rasan thüngche tona lotssi benthi to tssocho. Ombona tsotsüi tsorüiden nzoasi tinyan vancho. Omhawoe omying thei elio shiang topvü Benjami pvüji kyonden.
Vüngpheni na Chiyio Kyon Jiang
1 Israel kyon topvü wopan ephanina omying eranracho, osi hojijo Israel mesaoden kako jilo eranrae lia. Judah kyon jiang ji onte mmen tsükona Babylon meta sosi yicho. 2 Hojina kholani yantsüi shianglo yidemo jianglo ejoma jo Israel kyon kishiroe ejoma, pvütiden, Levi jipo ejoma, tona ekhümki elhi etssoeden to, 3 Judah, Benjamin, Ephraim tona Manasseh to kyon jiangna Jerusalem lo oyi vancho. 4-6 Juda pvüji kyon 690 na Jerusalem lo vancho. Juda tsoe Perez tsoronichen jiangna Omri tsoe Ammihud ji tsoe Uthai ji onte esopvüi tssothukcho. Ombo omotsüi ejoma jo Imri tona Bani to. Juda tsoe Shelah tsoronichen jiang esopvüi jo wopan eramoe Asaiah tssocho. Juda tsoe Zerah tsoronichen jiang esopvüi jo Jeuel tssocho. 7-8 Benjamin pvüji kyon shiang shina Jerusalem lo vancho: Hassenuah tsoe Hodaviah ji tsoe Meshullam to tsao ji tsoe Sallu, Jeroham tsoe Ibneiah, Michri tsoe ji orüo osi uzzi tsoe Elah, Ibnijah tsoe Reuel ji tsoe Shephatiah tsoe Meshullam. 9 Hojito wopan ji kyon otsük 956 na yantsü jilo vancho. Omhawoe eranthako eboe shiang topvü wopan lo eramoe tae.
Jerusalem lo Vamo Pvüti Jiang
10-12 Pvüti shiai gna Jerusalem lo vancho: Jedaiah, Jehoiarib, tona Jachin, Hilkiah tsoe Azariah, (khümpheni lhitssoe opvüo ji) Osi omotsüi jiang ejoma jo Meshullam, Zadok, Meraioth tona Ahitub to Jeroham tsoe Adaiah, Osi omotsüi ejoma jo Peshhur tona Malchijah to Adiel tsoe Adaiah, Osi omotsüi ejoma jo Jahzerah, Meshullam, Meshillemith, tona Immer to. 13 Wopan lo eramoe pvüti jiang tsotsüi 1,760 tssocho. Onteno khümpheni tssota vamo elhilan jiang topvülo tssothimoriden tae.
Jerusalem lo Vamo Levi Jiang
14-16 Levi kyon shiangna Jerusalem lo vancho: Hasshub tsoe Shemiah, Osi ombo omotsüi ejoma jo Azrikam tona Hashabiah, Merari jipo kyon Bakbakkar, Heresh, tona Galal to. Mikah tsoe Mattaniah, Osi omotsüi ejoma jo Zichri tona Asaph to. Shemaiah tsoe Obadiah, Osi ombo omotsüi ejoma jo Galal tona Jeduthun to. Netophah yantsü ji metaro lo evamo. Elkanah ji Orüo Asa ji tsoe Berechiah.
Jerusalem lo Vamo Khümphen Enhyang Jiang
17 Khümpheni enhyang shiang na Jerusalem lo vancho: Shallum, Akkub, Talmon tona Ahiman to. Onte yolo esopvüi jo Shallum. 18 Hojo echungren ji nandang onte jipo ji engkuoe na rhowophen mesao kibüng jilo zathukcho. Ovüngthüng jo onte ji Levi vanphen jilo kibüng jiang enhyang tssothukcho. 19 Ebiasaph tsoe Kore tsoe Shallum na ombo jipo Korah kyon ejoma nzo tssoe onte motsüi jiangna OPVÜI vanrhyu kibüng enhyak janathüng tssoji esüa OPVÜI vanrhyu Süranki ji enhyak elhi tssotacho. 20 Eleazar tsoe Phineas OPVÜI khi ombo lo vanthuka! to etsao jina ha echunga jo onte nsünglüng tssocho. 21 Meshelemiah tsoe Zekhariah jiha OPVÜI vanrhyu ji kibüng enhyang tssocho. 22 Onte tssotsüi eboe otsük 212 jo kibüng osi rhowolan enhyang ethüngchecho onte ji ontena vamo yan jiang ephan omying erani vayicho. Onte omotsüi jiang elhi opvü heto tssothuko jijo zenkhying Samuel ha David mesao oni na tssothukcho. 23 Onte tona onte tsoronichen jiang tona OPVÜI khümphen enhyak elhi ji tssocho. 24 Kipünglan motsünga jo jükiwoe, jüjowoe, engkhfü osi engrhewoe to nken akvü zechiwo tvü kibüng licho, Osi hoji zechi akvülo enhyang opvü etssoe vancho. 25 Enhyang shiang ji onte wopan oyani vamo jiang osi tsüngon tinying na chyuta nhyako jiangna onte nzanchicho. 26 Enhyang yolo opvui otsük mezhü jiango Levi kyon osi elhi topvü ji onte pono tssocho. Oteno khümpheni chungchak jiang osi jianglo tsütsailan vao jiangha ezeiden tssocho. 27 Onte elhi jo enyanyu khümphen chonchiv tona hoji enhyak to tsso jina ontena khümphen ji ndüngo vancho.
Levi Thanpoe Jiang
28 Levi thanpoe jiango ekhüm elhilo tsütsao jiang ezeden tssocho. Hojiang tsütsa akvü ontena zeta khichesi zei valancho. 29 Thanpoe jiango ntho tsütsaelan thanpo jiang, hümchen jiang, zükhi jiang, Olive thyujü jiang, orhüm mmhom osi rhümtssophen jiang ezeden tssocho. 30 Tokhatola rhümtssophen jiang nzitsüi evav jo pvüti elhi tssocho. 31 Levi tsüka Mattithiah to tsao, Korah jipo lo Shallum tsoe jijo etsoyu than rüngcho topvü jiang ezepvüi tssocho. 32 Kohath jijo wopan jiango nthomung akvü khümpheni ntho hümri ezeden tssocho. 33 Levi kyon echoma jo khümpheni okhen ezeden tssocho. Wopan shiang lo eramoe jiangna khümphen ki ejomalo vantacho, ntiotssole onte ji zümo eng ethev licho. 34 Omhawoe eramo eboe shiango Levi wopan jiang lo eramoden, onte motsüi wopan ephan erancho. Osi onteno Jerusalem lo vamo esopvüi jiang.
Saul Mesao Motsüi Osi Orüi Jiang
35 Jeiel na Gibeon yantsü ji tssoe jilo vancho. Ombo engh jo Maakah to tsacho. 36 Ombo tsoe eramo jijo Abdon, osi ombo tsoe ejoma jo Zur, Kish, Baal, Ner, Nadab, 37 Gedor, Ahio, Zekhariah, tona Mikloth, 38 Shimea opo ji to. Onteno tsoronichen jiangna onte jipo kyon thanpoe jiang nzo Jerusalem lo vancho. 39 Ner jo Kish opo osi Kish jo Saul opo. Saul na tsokhying mezhü vancho: Jonathan, Malchishua, Abinadab, tona Eshbaal. 40 Jonathan jo Meribbaal opo, osi Mikah opo ji. 41 Mikah na tsokhying mezhü vancho: Pithon, Melekh, Tarea, tona Ahaz. 42 Ahaz jo Jarah opo, osi ombona tsokhying ethüm: Alemeth, Azmaveth, tona Zimri, osi Zimri jo Moza opo. 43 Moza jo Binea opo, Binea jo Rephaiah opo, osi Rephaiah jo Eleasah opo osi Eleasah jo Azel opo. 44 Azil na tsokhying tirok vancho. Azrikam, Bocheru, Ishmael, Sheariah Obadiah tona Hanan to.
Saul Mesao Chüo ji
1 Philistine jiangna Gilboa phunglani na Israel jiang thüngi ori tssocho. Hoji lona Israel elümoto lüngthacho, osi Saul mesao tona ombo tsokhying jiang to jüa khosha tsanrae yicho. 2 Tokhatola Philistine jiangna onte hayae Saul tsokhying ethüm, Jonathan, Abinadab tona Malchishua to lüngthae sicho. 3 Saul haphia elüm rotacho osi Saul ha ori lotssi na rhaki elümoto meyancho. 4 Ombona ombo ebensü ehanpvüi ji heto ezocho, yonri ji khichei lüngthae a sia, tona Philistine shiangna a lüngthasi kangtsütachev meka. Tokhatola khyingroe jina ekhentsüngisi okhe n thekuko jina Saul na ombo yonri ji tssüngchei jilo ombobo khyenkae chücho. 5 Saul chüo ji hungale khyingroe jinaha ombobo ombo yonri jilo vankae chücho. 6 Hojito Saul tona ombo tsokhying ethüm ji to nzo chücho, osi ombo ekhüngyan ji ochüm tssoe sicho. 7 Jezreel hayi vamo Israel jiang na onte rasan jiang na tsamo ji osi Saul tona ombo tsokhying ethüm jiang to chüo ji owon zoale ontena onte yantsü jiang sisi tsantacho. Osi Philistine jiangna oro oyan jianglo vankae sicho. 8 Ritsso ji ojyuato Philistine jiangna echü müng jiang rei khilo wotale Gilboa phunglani Saul tona ombo tsoe jiang to chüi lio ji hungcho. 9 Tole ontena Saul kuri ji woni siyisi, ebensü jiang khiyisi Saul chüo ji yithen ji onte meta topvülo onte kisü potsow jiang osi kyon jiang ezoa thenchoa wotacho. 10 Ontena Saul ebensü jiang onte khümpheni vatasi Saul kuri jijo onte potsow Dagon khümphenki yisi vatacho. 11 Philistine jiangna hoto tssoji Gilead lo Jabesh kyon jiangna zoale, 12 Onte yolo lüm etssontsoe jiang khyimtae owo Saul tona Ombo tsoe jiang müng jiang khi hansi oyi lümro dung khumchoe shothe sitasi tsüngon tiying khangtacho. 13 Saul jo ombona OPVÜI lo longtsüka n lio jina chücho. Ombona OPVÜI yizüng jiang yesocho osi OPVÜI lanso yanthungona jo echüi mon jiang thüngi lanso yana yi sicho. 14 Hoji tsükona OPVÜI na ombo lüngthae sisi ekhüngyan ji Jesse tsoe David ji khelo theyicho.
David na Israel tona Juda to Mesao kümala
1 Israel kyon topvüna Hebronlo David thüngi owo heto ezotacho, "Eiyo ni ejen oso lona ekümchecho kyonden ka. 2 Ovüngthüng Saul na e mesao tssoathüng na nina kyon jiang ritssolo socho, osi OPVÜI ni Potsowna nina ni kyon jiang sov osi nina onte esopvüi tssov to phyoe lia. 3 Hojito Israel kyon topvüna Hebron lo David mesao thüngi rocho. Osi ombona onte thüngi ntho ntsata vacho osi ontena ombo ji onte mesaoto thyujü nzüyia methakcho, osi OPVÜI na Samuel yakchia phyoe vao ji esüa ombona Israel mesao kümcho 4 Israel jiang topvü tona David mesao to tssoe owo Jerusalem ji ori tssocho. Jithg jo Jerusalem ji Jebus to tsacho osi hojilo vanhen kyon Jebus kyon jiang hojilo vanpvü tssocho. 5 Jebusite jiang na jo David na yantsü jilo n rhowoche to ezocho, tokhatola David na Zion pikhfü khyoa rhowocho osi yantsü ji "David yantsü" to tsacho 6 David na phyocho, "E kyon ochona Jebus kyon lüngthadena sana jijo rasan esopvüi ji tssothuku ka!" Tole Zeruiah otsokhyongo Joab na sosi ori tssoe esopvüi ji ombona kümcho. 7 David na rizümphen jilo vamo ji tsükona hoji avid yantsüto tsacho. 8 Ombona yantsü ji tssochoa benkacho osi yingsüng ji engkhüwoe liko hantheo jilona benka cho. Osi Joab na yantsü phukowoe ji khyoe khicho. 9 David ji etho jüka jüka na yicho,' ntiotssole thotsü Potsow na ombo ndüngo vancho.
David Rasan Thüngche Jiang
10 David rasanden thüngche jiang shiang. ontena Israel kyon topvü nzo tssoe David ji mesao kümthukcho, OPVÜI yizüng ephan, osi ontena ekhüngyan ji etho jüa vanthukcho. 11 Ovüngo jijo Hachmon jipo Jashobeam to tsacho. Ombo onthüm yolo esopvüi ji. Ombona otsso bensi otsük nzo ethüm thüngi rotacho osi rotaphen motsünga lona onte chüthukracho. 12 Thüng che ethüm jilo enioto jijo Ahoh jipo kyon Dodo tsoe Eleazar to tsacho. 13 Ombona Pas Dammim lona Philistine jiang thüngi ritsso jilo David thüngoe thei ori tssocho. Israel jiangna sani tsanathüng om bo omüm li vancho, 14 Osi ombona ombo woro jiang sosi omüm li lungi na ori jiang zalanchicho. Osi OPVÜI na ekhyo tsüpov ombo picho. 15 Tsüngona lo thüngche rasan thümro yolo omthüm jina Adullam lungkui David vamo jilo wotacho, osi jithüngjo Philistine razhü motsünga na Rephaim hayi khyuta vancho. 16 Hojithüng jo David jo rizümpheni vancho osi Philistine razhü motsünga na Bethlehem jilo vancho. 17 David na oki nchümcheta heto phyocho, "Ochona sana Bethlehem lo kibüng ndüngo jükha jilona ojü woe oro a yuthukuo kuta mmhomto!" 18 Tole rasan thüngche ethüm jina Philistine jiang lungina tssüa rhowo Bethlehem lona ojü woe hanayi David picho. Tole ombona hoji n yuna OPVÜI than tssoa phyangchi sicho 19 osi phyocho, "Ana kvüthüng. ha shi n yukhuk! ana shi yuana ochoang na onte eküm pia owo khicho sana jiang e jen yua tvü tssov!" Hojito ombona n yuv sicho; Rasan thüngche otsük ethüm jiang lüm etsson elhi ejoma jo hojiang. 20 Joab ojenio Abishai jo rasanthüngche thümro jiang yolo esopvüi ji Ombona otsso bensi otsük nzo ethüm thüngi rotae onte lüngtharae sicho osi "thümro" jiang esopvüi kümcho. 21 Ombo thümro jiangyulo thüngchetso ji osi onte yulo esopvüi ji kümcho tokhatola ombo najo thüngche nchyu ethüm jiang n jancho. 22 Kabzeel meta kyon Jehoida tsoe Benaiah jo rasan thüngche tsüka, Ombona lüm etsson elhi elümoto tssocho osi Moab kyon ritssolo thüngche otsük eniha lüngthacho. Ombona nchuka" lojo ronren joathüng likokvüi rhowo hengho motsünga lüngthacho. 23 Ombona Ejip kyon ha etho e jüi, shanka jana ntssona tvü tssobelak tsüpov esüi tsüka ha lüngthacho. Benaiah na jarung na Ejip kyon ji erakyae ombo tssoji rechoyisi jina ejungtsüngi sicho. 24 Hojito "thümro" yolo thüngche Benaiah ji lüm etsson elhi ejoma jo jiang. 25 Ombo "thümro" jiang yolo thüngche tsüka, tokhatola otsük ethüm jiang esüa jo n thüngche. David na ombo enhyang ombo tssothukcho. 26-47 Rasan thüngche thanpoe jiang shiang: Joab ojenio Asahel Bethlehem kyon Dodo tsoe Elhanan Harod yamo kyon Sammoth Pelet yamo Helez Tekoa kyon Ikkesh tsoe Ira Anathoth kyon Abiezer Hushah kyon Sibbekai Ahoh kyon Ilai Netophah kyon Maharai Netophah kyon Baanah tsoe Heled, Benjamin lo Gibeah kyon Ribai tsoe Ithai, Pirathon lona Benaiah Gaash ndüngo hayi jilo kyon Hurai Arbah kyon Abiel bahurum lona Azmaveth Shaalbon lona Eliahba Gizon lona Hashem Harar kyon Shagee tsoe Jonathan Harar kyon Sachar tsoe Ahiam Ur tsoe Eliphal Mecherah lona Hepher Pelon lona Ahijah Karmel lona Hezro Ezbai tsoe Naarai Nathan ojenio Joel Hagri tsoe Mibhar Ammon lona Zelek Beeroth Kyon Naharai, Joab ebensü eben ji Jattir lona Ira ha Gareb oni Hittite kyon Uriah Ahlai tsoe Zabad Shiza tsoe Adina (Reuben jipo lo khanhyae OPVÜI tsüka, Ombo kupo rasan thümro vana) Maakah tsoe Hanan Mithah kyon Joshaphat Ashterah kyon Uzzia Aroer kyon Hotham tsoe Shamma ha Jeiel oni, Tiz kyon Shimri tsoe Jediael ha Joha oni, Mahavah lona Aliel Elnaam tsoe Jeribai ha Joshaviah oni Moab lona Ithmah Zobah lona Eliel, Obed tona Jaasiel to.
Benjamin Jipo lona David Sürüi Ovüngo Jiang
1 David na Saul mesao mhadungo na tsani oyi Ziklang lo vanathüng, rasan ejueran eli osi longtsüka eli khosha tona, 2 Saul jipo Benjamin kyon khosha toha ombo nzo vancho. Osi onteno hayiona lia amimo na lia thamana lotsi kocheta osi olong eyokae ephyacheta tvü tae. 3-7 Onteno Gibeah yamo Shemaah tsoeden Ahiezer ha Joash oni lanso küpo tssocho. Rasan jo shiang tssocho: Azmaveth tsoeden Jeziel tona Pelet to Anathoth kyon Berakah ha Jehu oni, Gibeon kyon Ishmaiah, thüngche rasan Osi "thümro" jiang yolo esopvüi Tsükaji Jeremiah, Jahaziel, Johannan tona Gederah kyon Jozabad Eluzai, Jerimoth, Bealiah, shemariah, tona Shephatiah to tsa Hariph yamoji Elkanah, Isshiah, Azarel, Joezer tona Jashobeam lo Korah pvüji kyon jiang Gedor yamo Jeroham tsoeden Jeolah tona Zebadiah to.
Gad Pvüji Kyon David Sürüi Jiang
8 David na lichungi rizümpheni tsanthe vanathüng ombo nzo vamo rasan thüngche jiang shiang. Onteno otsung osi otsso tsütsa tssothia osi hengho mmhor mhaodon tvü osi phunglani sianoro tharaka to tharak tsoyoeden. 9-13 Onteno tsüphoeden heto etsüngcho: Ezer, Obadiah, Eliab, Mishmannah, Jeremiah, Attai, Eliel, Johanan, Elzabad, Jeremiah, tona Machbannai. 14 Gad pvüji kyon shiang ejoma jo e jueran eli, wothüng pono esopvüiden tona nzoa yolo esopvüiden to. 15 Nzyua lo choro ovüngo jilo Jordan zhükfü ji phyonchüa tsüathüng ontena zhükfü ji khyingkatacho osi jilo hayi jianglo vamo kyon jiango zhükfü ji engkhu osi engrhewoe nzüroa yithuki sicho.
Juda osi Benjamin lona David sürüi jiang
16 Tsüngona lo Benjamin tona Juda to pvüji kyonden okho motsünga na David vamo rizümphen jilo wotacho. 17 Tole David na owo onte nduki ezocho, tena oshom ejoena a nzanchilo shilo rotacho tssona nte khichoala. Oyi ete nzo tssotava! Tokhatola ana nte nlümo n tssoyiaha ntena okyak tssoe a ri jiang khelo a thechiv yanchojo ete motsüi Potsow jina ntsi nte khangshivka, 18 Onte yolo tsüka Amasai to tsa ocho "thümro" ji esopvüi kümcho sana, hoji Potsow mon na pyingi ombona heto phyocho. "Jesse tsoe David, eyio ni thüngoe ka osi ni echi ka! Ni osi ochoangna ni thüngoe tssoa na topvü thüngi Potsow khi nte khyothukuka." Tole David na onte sothei ombo rasan yolo esopvüiden tssothukracho.
Manasseh Pvüji lona David Sürüi jiang
19 David na Philistine jiang nzo tssoe Saul Mesao sakav khochuka vanathüng, Mannaseh pvüji lona rasan ejoma na owo ombo thüngoe tssocho. Tokhatola Philistin mesao ejomana David na ombo pvüi ehemo Saul khelo onte thechiv tsayia nchümtae, jina David na Philistine jiang nkyochicho, osi ontena David ji Ziglak thüngi yithulani sicho. 20 David na kholani yiathüng Manasseh jipo lona rasan David thüngi wo jiang shiang: Adnah, Jozabad, Jediael, Mikhael, Jozabad, Elihu, tona Zillethai to. Manasseh lo jo onte topvü na wothüng motsünga esopvüiden tssocho. 21 Ontena David rasan jiang pono esopvüiden tssoa David benkatacho, ntiotssole onte topvü rasan thüngche tae. Sülani jo onte ji Israel rasan jiang yolo esopvüiden kümcho. 22 Eng akvü to tssoa rasan ethan ethan David rasan rheyicho osi ombo rasan jiang elümoto kümcho.
David Rasan Jiang Mying
23-37 David na Hebron lo vanathüng rasan thangshi khithüng elümoto na ombo thüngoe thecho osi OPVÜI na phyochaki elioji esüa David ji Saul echung mesao kümthukvü tsükona phyotacho, osi khanyae jiang jo shiang: Juda: Ebensü mmhom benri, otsso tona otsung to benria ekae,6,800; Simeon: Thangshi khithakcho eboe 7,100; Live: Eboe 4,600; Jehoaida sürüiden osi Aaron tsoronichen eboe 3,700; ritssolo thüngche Zadok ji wopan eboe ethüngche oro 22; (Saul jipo) Benjamin jipo eboe 3,000 (Benjamin jipo kyon ekyungo jo Saul thüngoe vancho); Ephraim jipo eboe 20,800. onte jipolo thüngche jiang; Menasseh Engrhewoe: kyon eboe 18,000 David mesao ethüngchelo othuko jiang Issakhar: esopvüi 200 tona ontena esowo kyon jiang (Ontena Israel na ntio etssov licho sana osi kvüthüng etssov etümcho sana ntsi); Zebulun: 50,000 longtsüka eli osi enghika khuko kyon yuta topvü lo ori tssov methaki evan osi ebensü topvü benthiden; Naphtali: esopvüi 1,000 tona eboetso 37,000 otsso tona otsung to ebenden; Dan: Eboe thangshicho 28,600: Ashir: Ritssolo methaki evan eboe 40,000 Engkhüwoe jipo lona Reuben, Manasseh engkhfüwoe to lona 120,000 eboetso ebensü lantaro benthiden. 38 Ritssolo ewov methaki vamo rasan jiang' topvü tona David ji mesao kümthukü tsükona Hebron lo wotacho. Osi Israel kyon nzontsü enhyoe evamo jiang naha hojito mmyantacho. 39 Ontena etsoyu meta kyon topvüna methaki onte hanthuko ji tsoyuta jilo tsüngon ethüm David ndüngo vantacho, 40 Jükiwoe Issakhar jipo, Zebulun, Naphtali, to kyon chiang na ha Kur, Oat, Gadho tona mangsübung to jiang khi humchen, züwothi, tssüngthi nkungcho, tsüngthijü tona Olive thyujü to hanthuksi wotacho. Ontena mang sü tona olyu toha hantasi tatsüngi tsotacho. Shiang hetopvü ji meta topvülo ematha lioji ejüphen esüa tokhutacho.
Kiriath Jearim lona Ntsata Bakos ji Hansi Yiala
1 David mesao na wothüng pono esopvüi jiang tona nzoa pono esopvüi jiang topvü thüngi na okyak oyi khicho. 2 Jitosi ombona Israel kyon topvü thüngi heto ezocho, "Nte topvüna emathatana, osi ete OPVÜI Potsow na lüm na rünga tssona, ete na ete meta kyon thanpoe jiang topvü thüngi yantsü jianglo pvütiden osi Levi kyon elani onte yantsü kyon to jiang topvü thüngi yithen pi khi meta shilo ete nzo etssirhyutale to ezotavka. 3 Tothakana owo ntsata Bakos ji khitavka, ntiotssole Saul echungojo hoji n thokav ekachi sitacho." 4 Kyon topvüna hoji emathata khichocho. 5 Hojito David na meta topvü lona, jüjowoe Ejip erü lona benkae Jükiwoe Hamath eyak nandang erhümi Kiriah Jearim lona ntsata Bakos ji hansi Jerusalem lo yicho. 6 David tona kyon jiang to nzo tssoe Balaah yantsüi, Judah meta Kiriah Jearim jilo Potsow thüngina Ntsata Bakos ji poni echo mpata ekümrümo khyinga osi OPVÜI mying erankao ji khilo wotacho. 7 Ontena Abinadab kina Ntsata Bakos khichei zotoro ethan jilo ekachitacho. Tosi Uzzah ha Ahio onina zotoro ji olan socho, 8 Osi David tona kyon topvü to nzo tssoe onte thokhyung sharita OPVÜI pvütssonthukcho. Otena okhen denta khendenpvü khütacho: zhükhen, ophyang, yongmen kung kong ekhota osi tatara theta khfütacho. 9 Ontena Chidon lo litsenphen ji janale mangsü ji nshüphicho tole Uzzah na zakto yonchia Ntsata thephen Bakos ji rhümacho. 10 Tole Uzzah na Ntsata thephen ji evüngkao jina OPVÜIna lüm tsuki ombo chütokcho. Ombona OPVÜI mhadungona chücho, n hojithüng na benkae meta ji Perez Uzzah to tsacho. Hojito OPVÜI na lüm tsoka Uzzah chüthuko jina David ji elümoto lüm tsukcho. 12 Jitosi David na Potsow kyua heto phyocho, kvütoli ana enhungo Ntsata Bakos ji khivto? 13 David na hoji Jerusalemi hansi n yicho. Ombona Gad yantsü kyon Obed Edom to tsa kyon tsüka ki vae sicho. 14 Hojilo choro ethüm vacho osi OPVÜI na Obed Edom wopan tona onte echi ntio liana topvüto mmhayithukcho.
Jerusalem lo David Elhi Jiang
1 Tyre lo Hiram mesao na David thüngi shisho khophita tsükona shentalo kyon wotokcho; ombona Cedar tssüng tona lungjoeden elani tssiyanmorithiden to methaki mesaki tssothuku tsükona wothukcho. 2 Tole David na ombona OPVÜI na Israel mesao ombo kümthukthako ji chekae ombo ekhüngyan ji kyon jiang tsükona tsükaranka lithuka mmhona sacho. 3 Jerusalem lona David na eloe kyungkata soa vani tsokhying tsolo elümoto vancho. 4 Jerusalem lona ombo tsoeoro buko jiang shiang: Shammua, Shobad, Nathan, Solomon, 5 Ibhar, Elishua, Elpelet, 6 Nogah, Nepheg, Japhia, 7 Eli shama, Beeliada, tona Eliphelet to.
Philistin Jiang Khyoji
8 David ji Israel topvü pono mesao kümthukthaka to Philistin jiangna zoale onte rasan jiangna ombo rhümalo wotacho. Tole David na onte nduko khochoki chi wocho. 9 Philistin jiangna Rephaim hayi chiro jani ritssota benkacho. 10 Tole David na OPVÜI thüngi heto randancho, Ana Philistin jiang hav alo? Osi nina ekhyo apiv alo? Tole OPVÜI na janlancho, "Ho, sakata! ana ekhyo ni pivka!" 11 David na Baal Perazim lona onte hacho. Osi ote khyocho. Osi ombona phyocho."Potsow na Jüvak esüa atsütsae ori rasan jiang a rosochithukcho." Hoji tsükona meta jijo Baal Parazim to tsacho. 12 Philistine jiang na tsanathüng onte potsow kisü jiang sia tsancho, osi David na hojiang ji rungi sile to yitan picho. 13 Elani Philistin jiangna jilo chiro retsotav benkacho. 14 David na elani Potsow thüngi thyutale heto ombo janlancho, epiwoena onte ti sakana phukowoe na owo Balsam dung jiang ndüngo na sakata. 15 Nina kvüthüng odung jiang mmyoe na rasan won zoa sana onte sakata, ntiotssole ana ni vüngi na khochi owo Philistin rasan jiang khyovka. 16 OPVÜI na ezowo ji ephan David na tssocho, hoji tsükona ombona Philistin jiang ji Gibean lona Gezer nandang Phanchicho. 17 David myingthüng ji meta topvü lona zojanta yicho, osi OPVÜI na meta topvü khi ombo kyuthukcho.
Ntsata Bakos ji Hansi Eyiv Methakala
1 David na ombo tsükona David oki tssorhyucho. Ombona Potsow Ntsata thephen ji vaphen ha tssocho osi süranki tssoe vacho. 2 Jitosi ombona phyocho, "Levi kyon jiang taena Ntsata bakos ji ejümka, ntiotssole onteno OPVÜI na kümali ombo benkav ethüngchecho." 3 David na Ntsata Bakos ji ejümi ombona vaphen tsso jilo vav tsükona kyon topvü Jerusalem lo tsarhyucho. 4 Jisülo jo ombona Aaron tsoronichen jiang osi Levi kyon jiang owo tsathukcho. 5 Levi jipo Kohath lona Uriel, ombo jipo kyon otsük 120 esopvüi ji chiyicho. 6 Merari jipo lona otsük 220 esopvüi Asiah chiyicho;7 Gershon jipo lona otsük 130 esopvüi Joel chiyicho. 8 Elizapham jipo lona otsük 220 yolo esopvüi Shemaiah chiyicho; 9 Hebron jipo lona otsük 80 esopvüi Eliel chiyiocho; 10 Okhao tssoa Uzziel jipo lona otsük 112 yolo esopvüi Amminadab chiyicho. 11 David na pvüti Zadok, Abiathan, tona Live kyon otsük tirok, Uriel, Asaiah, Joel, Shemaiah, Eliel, tona Aminadab to tsathecho. 12 Ombona Levi kyon jiang ezocho, "Nteno Levi jipo lo esopvüiden jiang. Hoji tsükona ntepopo nthochetasi Levi kyon jiangha nthochetava, tona ntena Israel Potsow OPVÜI Ntsata thephen ji ana vaphen methako jilo ejümsi yichevka. 13 Ntena ovüng tssoa hoji ejümsi n vademo jina etena shikhfü ephan OPVÜI n khümcheo jina OPVÜI ete Potsow na ezüp epithaka." 14 Tole pvüti osi Levi jiangna OPVÜI Israel Potsow Ntsata thephen ji ejümvü tsükona ontebobo nthochetacho. 15 OPVÜI na Moses ezoe vao ji ephan Levi kyon jiangna khora thei hoji ejümtacho. 16 David na Levi esopvüi jiang ji elhi olan olan, okhen eden, longshi khen ekhüv, khenzhü osi yongmen ekhophiv zikarale to yidan picho. 17"21 Khenden jipo lona ontena yongmen ekhophiden shiang ethüngcheracho. Joel tsoe Heman, ombo wopan kyon Berechia tsoe Asaph; Kushaiah tsoe Ethan, Merari jipo kyon jito. Hojiang nzanchiv jo ontena khenzhü ntssoni ekhfüi Levi kyon shiang ethüngchecho; Zekhariah, Jaaziel, Shemiramoth, Jehiel, Unni, Eliah, Maaskiah, tona Benaiah to. Khenzhü owon oküpoe ekhfüi jo ontena Levi kyon shiang ethüngchecho: Mattithiah, Eliphelehu, Mikneiah, Azaziah, tona khümphen enhyang jiang, Obed Edom tona Jeiel to. 22 Ombona okhen lo tssothio ji ephani na Chenaniah jo Levi khen den jiang yolo ezepvüi ethüngchecho. 23"24 Obed Edom nzo Berechiah ha Elkanah oni ha Ntsata thephen ji enhyang ethüng checho. Pvütiden shiang: Shebaniah, Joshaphat, Netha nel, Amasai, Zekhariah, Benaiah tona Eliezer to jo Ntsata thephen ji mhadungo tatara ekhaüi ethüngchecho.
Ntsata Bakos ji Jerusalemi Hansi Yiala
25 David mesao, Israel esopvüi jiang tona rasan esopvüi jiang to tssae Ntsata bakos ji khilo Obed Edom ki wotacho, osi ontena elümoto tukhuta longshitacho. 26 Ontena mangsübung tiying tona olyu tiying to khi Potsow khi Levite jiangna Ntsa thephen ji ejümtathüng nzanchithukvü othan pitacho. 27 David na sünyipvü mmhontso jina tükcho sü ekacho, khenden jiangha, onte esopvüi Chenanaih, tona Ntsata thephen ejümo Levi kyon jiang topvüna hotvü ekacho. David jo epvülo shakasü ha ekacho. 28 Hojito Israel topvüna Ntsata thephen ji phana wontssonirota, longshita, tatara khüta, ejü mhüta, yongmen ekhophita, khenzhü khüta Jerusalem ejan wotacho. 29 Ntsata thephen ji yantsüi hansi rheyiale Saul otsolov Michal na kherüki lona zechukchile David mesao na sharia tsukphia longshia hungcho, tole hoji hungwo jina ompvü na opo ji tsankonga nchümcho.
1 Ontena Ntsata thephen bakosji khi David na tsso süranki ji chungi thechi vatacho. Hojisülo jo ontena ekümrüm than osi khümshümta than Potsow thantacho. 2 David na othan jiang pirathakale kyon jiang mmha randankata OPVÜI myingona etsoyu jantayiracho. 3 Ombona Israel lo kyon eboe osi eloe otsük akvüto humri motsüngtsüng, oso richo lümchak motsüngtsüng tona tssüngthi nkungcho to piracho. 4 David na Levi jiang yolo ejoma ethüngchei Ntsata thephen ji mhadung na Israel Potsow khüma okhen dena ombo thüngtav lo sokathukcho. 5 Asaph jo esopvüi osi Zakhariah khi ombo nzanchithukcho. Osi Jeiel, Shemiramoth, Jehiel, Mattithiah, Eliab, Benaiah, Obed Edom, tona Jeil to jo khenzhü rhüv zikacho. Asaph jo yongmen küpta ji ekhophiv ombo zikacho. 6 Osi pvüti otsük eni, Benaiah ha Jahaziel onio engakü Ntsata thephen ji ndüngona tatara mhüv zikacho. 7 Hojithüng lona David na ombo tepfü Asaph tona Levi jiang toji khenden elhi thüngoe zikacho.
Ethüngkhen
8 OPVÜI montsso pia, ombo tsüpo ji thenchoa osi ombona tsso jiang jipo thüngi ezoa; 9 OPVÜI thüngi myingthüng khen dena; osi ombona emhokthao elhi tssothako jiang phyotava. 10 Eteno ombo kyonden tsso jina longshitava; osi ombo eküm topvüna longshithuka! 11 Nzanchi yana OPVÜI thüngi woa, osi n tümjakna ombo khümtava. 12-13 O Jakob tsoeden osi Potsow phajaeden Iarael tsoronichen Potsow na ethüngcheo kyongden, Potsow na chethev tssoe etena hungthako jiang ti-mhechotava osi ombo yitsso ejüthako jiang ti-mhechotava. 14 OPVÜI jo ete Potsow jika; Ombo yizüng jiango limhatsü tsükona ka 15 Potsow ntsa ji kvüthüng ha ti-mhechotava; ombona kümali lithuku methakchoka. 16 Ombona Abraham thüngi ntsata methako ji, osi Isaak thüngi phyochak vaoji, 17 OPVÜI na Jakob thüngi ntsata methakcho, Hojijo kümali lia vam. 18 "Ombona phyocho ana Kanaan meta ji nte pivka" "osi hoji nte echi kümka" 19 Potsow kyon jiang ji Kanaan meta lo tara tae vancho, osi yentsaeden esüa vancho. 20 Ontena meta motsünga lona motsünga lo, osi ekhüngyan motsünga lona motsünga lo to khyuphita vancho. 21 Tokhatola Potsow na jipopoe ochia khi onte n tssethechithukcho, tokhatola onte nkohav tsükona ombona mesae jiang heto ekyu yiwon picho: 22 "Ana ethüngcheo phajae shiang ti tssatssothuka, osi a zenkhying shiang ti evüngkatava." 23 Limhatsü na OPVÜI nsikata dentava, Ombona e shanchothaka to yithen mmhom ji engakvü thenchoa ezotava. 24 Ombo pvütsson ji jipo topvü ezotava, osi ombo emhukthao elhi jiang kyon topvü ezotava. 25 OPVÜI jo tsüphoa osi ombo ethüngu elümoto etüma; Potsow jiang topvü poni ombo ekyungo yikrachitava. 26 Jipopoe Potsow jiangjo topvü kisü tae, tokhatola OPVÜI na oyak shiang joyingcho. 27 Pvütsson osi myingthüng na ombo eyukcho, osi etho tona longshi tona ombo khümphen pyingcho. 28 Limhalo evan kyon topvü na OPVÜI thüngtava, ombo pvütsson osi etho ji thüngtava. 29 OPVÜI pvütsson mying ji thüngtava, othan pensi ombo khümpheni rotava. OPVÜI na ombo ntho lona roathüng ombo mhadungo nkhümthetava. 30 Ombo mhadungo enetava, limha topvüna! Limha shijo ombo vanphen lo vanchüng tssoa vanthokcho, osi hoji jo n senphicheo. 31 Longshitava, limha osi woyak! OPVÜI jo mesao jika to jipo topvü ezotava. 32 Erhyutava, jümangden, osi ntelo vamo ekümrüm topvüna; longshitava oliden osi ntelo licho topvüna. 33 Orae odung jiangna OPVÜI mhadungo longshi lona owon tssovka, kvüthüng OPVÜI na limha shi salo roasana. 34 OPVÜI montsso pia, ntiotssole ombo mmhona; ombo nzanjo kümali elio. 35 Heto ombo ezotava, "E shanchoa, O Potsow E shanchopvüi; e sanrhyutayia osi jipo thanpoe jiang khe lona e nkocheta, tona ena motsso to ni mying thunguka" 36 OPVÜI thünga, Israel Potsow! enhünga osi nchükhon ombo thünga! Tole kyon topvüna "Amen" to phyotasi OPVÜI thüngtacho.
Jerusalem Osi Gibeon lona Khümtacho
37 David mesao na OPVÜI Ntsata vaphen ji ndüngo ekhüm elhi jiang ezepvüi Asaph tona ombo tepfü Levi kyon jiang to zajüng tssov tsükona zikacho. 38 Jeduthum tsoe Obed Edon tona eboe otsük rokro tiza to khi onte nzanchithukcho. Hosah tona Obed Edom to jo kibüng jiang enhyang tssothukcho. 39 Zadok pvüti ji. tona ombo tepfü pvüti jiang to jo Gibeon lo OPVÜI ekhüm elhilo nzanchiv zikacho. 40 Onteno enyanyu erung than mpüm jiang OPVÜI na na ombo yizüng Isreal jiang pio ji ephan thanphen jilo na thantacho. 41 Hojilo. Heman tona Jeduthum to nzo thanpoe ha OPVÜI kümali nzan ji edem ethüngcheo jiang toha elhi tssocho. 42 Heman ha Jeduthum onio ethgkhen denta thüng tatara osi yongmen küptao jiang khütav ha zikacho. Jeduthum wopan jiango kibüng jiang enhyakvü zikacho. 43 Ji sülo jo otsük akvüna oki yicho, David ha yuta tara ombo opan. nzo vamvü tsükona yicho.
David Tsükona Nathan Yithen
1 David na enhungo ombo mesaki vana vancho. Tsüng onalo ombona Nathan zenkhying ji tsae heto ezocho, "Ana heto Cedar na tssocho tüv kilo vana khatola OPVÜI Ntsata thephen jijo süranki vatala!" 2 Tole Nathan na janlancho, "Potsow na ni thüngoe vanka nina ntio nchüma sana hojito tssoa." 3 Hoji zümo Potsow na Nathan ji heto ezocho, 4 "Ana a phajae David ji heto ezoala to owo ezoa, 'Avanphen tsükona khümphen etsov jo ni ejan meka. 5 Ana a kyon Israel jiang Ejip metae na shancho jilo na benkae nchüng jana ana ekhümki n vanhan; Hetenhya shi aiyo süranki vana meta esena vana ropvü. 6 Ana Israel kyon shiang nzo heto yentsata roathüng ana ethüngcheo esopvüi jiang ochia Cedar tssüng na ekhümki a n tssoyicho tsükona nlan npihan'. 7 "Hoji tsükona a Thotsü Potsow na heto phyoala to a phajae David ezoa, 'Ana olyu rhüki elhi lona ni tsae a kyon Israel jiang esapvüi ni tssothukcho. 8 Nina kvüwoe woana ana ni ndüngo tssopvü, osi nina ritssolo khochi akvü ana ni ri jiang ni khyoyicho. Ana limha lo esopvüi tsüpo jiang esüa thüngche ni kümthukuka. 9-10 Ana a kyon Israel jiang tsükona meta ethüngi pithaka, ontena hojilo ochina ha onte nkhetsü na nchükhon vamka. Ontena meta shilo. rheyipvü ori ntav tae na onte sakata khatola enhungo hojito tssov meka. Ana ni ri topvü khyoe ni siyisi tsoronichen ni pivka. 11 Kvüthüng ni chüi ni motsüi jiang ndüngo ni shothetana ana ni tsoe jiang yulo tsüka mesao kümthokvü ka osi ombo ekhüngyan ji etho lia vanthokvüka. 12 Ombo na a ekhümki ji tssovka osi ombo yansa sen ji kümali lia yithoku ana zeyavka. 13 Aiyo ombo opo osi ombo atsoe tssovka. Ana Saul ocho esanthoki sisi mesao ni kümthukcho sana hoji n kyov siato. ombo siv meka. 14 Ana akyon jiang tona a ekhüngyan to kümali ezei ombo tsswothukvü ka. Osi ombo yansa sen ji kvüthüngha ochüm tssov meka." 15 Tole Nathan na Potsow na ombo ezo jiang topvü David ezocho.
David Montsso Randan
16 Jisülo jo David na OPVÜI vanrhyu ranki jilo rhowocho osi ombona jilo khukthei heto randancho, "OPVÜI Potsow nina ntio mmhom a tssoyithakcho sana a osi a wopan e n tümka. 17 Tokhatola elani jilo kyungkao nina tssolanala. Nina echungren etsao jiang tsükona ha a tsoronichen jiang tsükona phyochaki vathaka osi a ji tsüphoe esüa avanthukala OPVÜI Potsow. 18 Tona jilo yaka ana ntio ni ezolam ato! Nina a ntsiaha ni phajae a hetüv mying tsüphothukala. 19 Nina heto tssoe a mhadung mmhona a wothuk hungwo jijo ni lüm erüng licho lona. 20 OPVÜI ni esüa ochia n van; osi Potsow jo ni tae to ena yuta topvülo ntsithaka. 21 Nina nri eküm lona sükae ni kyonden kümthuko Israel shi esüa limhalo kyon n van. Nina onte tsükona emhokthao elhi tsso ji yakchia ni myingthüng ji limha topvü pyingthukala. nina ni kyon jiang Ejip lona shanchoe sothukcho osi ontena khochiathüng onte mhadungina ori jiang nina phani siyia yicho. 22 Nina Israel ji kümali ni kyonden tssothukthaka osi nina onte Potsow ji kümthaka OPVÜI. 23 "Hoji tsükona OPVÜI, enhungo nina a osi a kyon jiang tsükona phyochako jiang benthuka osi etssov phyochako jiang tssoa 24 Ni myingthüng ji tsüphoa osi kyon na nchükhon heto phyotav, "OPVÜI thotsü Potsow jo Israel pono kümali Potsow ji. Osi nina a yansa sen ji nchükhon nkoa vam. 25 A Potsow, ana heto randam lüm etsson lia, ntiotssole nina shiang hetopvü ni phajae a thüngi a ezothaka osi nina a tsoronichen jiangji mesao kümthukvü to a zothaka. 26 OPVÜI nino Potsow osi emhukthao phyochak shi athüngi a Pithaka. 27 A tsoronichen jiangna kümali ni mmha lia wothukvü tsükona nina onte lo mmha yithuka. OPVÜI, nina onte mmhayi thukthaka osi ni mmha ji onte pono kümali lia wov."
David na Rasan Ekhyo Hungo Jiang
1 Yuta tara sülo David mesao na Philistine jiang sakalancho osi khyothechicho. Ombona onte khelona Gath yantsü tona hoji nkonjan oyan jiang to rechocho. 2 Ombona Moab kyon jiangha khyoe ombo küpo vanthukcho osi ontena ombo thüngi tssenkhya picho. 3 Jisülo jo David mesao na Syrian meta Zobah to tsao Hamath ndüngo mesao Hadadezer sakacho, ntiotssole Hadadezer na Euphrates jükiwoe meta jiang rechov ekhyo tssocho. 4 David na ombo ritsso zotoro wothüng motsünga, Kurü rasan wothüng tiying tona liko rasan wothüng mekyu to shiang khyocho. Ombona kurü jiang ritsso zotoro nzoa etsson vasi jilo enhyo jiango topvü ojo okhe khfüroe siyicho. 5 Kvüthüng Damaskas lo Syrian kyon jiang na mesao Hadadezer nzanchilo rasan wothukcho sana David na olanina onte ravani hayae onte wothüng mekyu eni lüng thacho. 6 Jisülo jo ombona onte nchenphen jianglo rasan vanphen tssoe ombo küpo onte kümthukcho, osi ontena tssenkhya ombo picho. OPVÜI na David meta topvülo ekhyoe kümthukcho. 7 Hadadezer kupo tsüphoe jiangna shona tsung pvüo jiang David na rechoe khiyisi Jerusalemi onte sosi yicho. 8 Ombona Tibhath tona Kun to Hadadezer na sawo yantsü jiang lona yongmen yonjak ha khosha khi hancho. (Henasüi to jo Solomon na hojiang khi khümpheni Jükha, durhyupvü tona yongmen yonjak oyo-opvü to jiang nsüngrücho) 9 Hamath lo Toi mesao na David na Hadadezer tona ombo rasantsü to khyothechio ji owon zocho. 10 Osi ombona ombo tsoe Joram ji wothuka David na Hadedezer khyoji montsso pilo wothukcho. Joram na David ji yantso shona, janti osi yongmen na nsüng rücho yantso hanicho. 11 David mesao na hojiang ji khi jilo ombona Edom, Moab, Amon, Philistia tona Amalek to khyoathüng hansi yio shona janti jiang nzo ekhüm elhilo tsütsaphen nthochaki vacho. 12 Zeruiah otsokhyongo Abishai na Oma hayi jilona Edom kyon jiang khyothechia wothüng taro tiza onte lüngthacho. 13 Ombona Edom meta topvü lo rasan vanphen tssorae vacho osi jilo kyon jiang na David mesao küpo kyon kümracho. OPVÜI na meta topvülo David ji ekhyo picho. 14 David na Israel topvü pono yansa sacho osi yuta topvülo ombo kyon jiang ntsa osi shenthi lona tsütsav tsükona tümkanrüngcho. 15 Abishai ojenio Joab jo rasan esopvüi tssocho; Ahilud tsoe Jehoshaphat jo erantoe vao jiang ezepvüi tssocho; 16 Ahitub tsoe Zadok tona Abiathar tsoe Abimelekh to jo pvütiden tssocho. Seriah jo yitssoki eranpvüi tssocho. 17 Jehoiada tsoe Beniah jo David tsukn hyang jiang yolo ezepvüi tssocho. Osi David mesao tsoe jiangna ha ombo küpo tsüphoe elhi tssoracho.
David na Ammorite tona Syrian to Jiang Khyoala
1 Yuta tara sülojo Ammon Mesao Nahash ji chücho. Osi ombo tsoe Hanun na mesao kümcho. 2 Tole David mesao na heto phyocho, "Ana Hanun thüngi, opo Nahash na okhümo tssota vamoji esüa okhümo ejoena vamka" David na kyon wothuka owo ombo lümi ejü jiang ezothukcho. Ontena Ammon lo chiwoe Hanun mesao nduktale, 3 Ammon kyon esopvüi jiangna heto mesao ezocho, "Ntena kyon jo David na nipo yikrachi lona lümi ejü phyolo kyon shiang rothukcho tsayia alo? meka! ombona henasüi ori e tssov tsükona meta shi chepyim lo rothukchoka!" 4 Hanun na David yithenpvüi jiang rhümae menhüm jiang tssüyisi, onte sü jiang eryu nandang tseni siyisi yithukcho. 5 Ontena khoyikra oki nyiv sicho. David na hoji yivon zoale onte menhüm jiang n pvüchethüng jo Jeriko lo vantale to ezocho. 6 Hanun mesao ha Ammon kyon jiang tona ontena David ji onte ri kümthukala to nchümchecho, hoji tsükona janti rangpyak wothüng thümro mezhü khi ritsso zoto ro tona jiang tsütsae rasan to Mesopotamia khümkiwoe meta thüng oena osi Syria metaro Maakah tona Zobah to lona shitacho. 7 Ontena engochowo ritsso zotoro wothüng thümro eni ji tona Maakah mesao rasan jiang tona oro Medeba ndüngo nchencho. Ammon kyon jiangna ha yantsüi na haphoe sanchuki ritsso tsükona methakcho. 8 Hojiang yivon David na zoe ombona Joab tona ombo rasan topvü to wothukcho. 9 Ammon kyon jiang na sanchuki onte yantsü Rabbah kibüng ndüngo na pyimta vancho, osi mesao ochoangna onte nzanchilo rochosana jiang ha rotav tsükona amungi vanphen khi vancho. 10 Ombo ri jiang na sülan mhadung na ombo sakavsala to Joab na ntsiale, ombona Israel lo rasan mmhontso jiang ekyoe Syrian jiang ryulanchia vanthukcho 11 Jilo enhyo rasan jiango ombona ombo ojenio Abishai khelo theyicho, tole ombona rasan jiang Ammon kyon jiang ryulanchia vanthukcho. 12 Joab na heto ombo ezocho, "Syrian jiang na a khyoala to tssoana ntena oro akyole, osi Ammon jiangna nte khyoala to tssoana ana oro nte kyovka. 13 Etho jüa lüm tssontava! Ete kyon jiang tsükona osi ete Potsow yantsü ji tsükona lüm tssona rotavka. Osi OPVÜI lüm erüng tssochethukuka." 14 Joab tona ombo kyon to jiang na ritssolo khochicho tole Syrian jiang na tsancho. 15 Syrian jiang na tsana hungale Ammon jiangna Abishai thüngina tsani onte ki yiracho. Tosi Joab na Jerusalemi kholani yicho. 16 Israel jiangna onte khyothaka to Syrian jiangna ntsiale ontena Eupharates zhükhfü engrhewoe onte meta jiang lona ransanden sorasi oyi Zobah 10 mesao Hadalazar ji rasan esopvü ji lanso küpo vanrathukcho. 17 David na hoji yivon zoale Israel rasan jiang ekhfürhyui sosi Jordan pankae chiwo Syrian jiang ryulanchio vanthukcho. 18 Ritsso ji benkacho. Osi Israel jiangna Syrian jiang phanlanchi sicho. David tona ombo to na Syrian ritsso esoe wothüng tiying, liko rasan wothüng zhüro to lüngthacho. Ontena Syrian rasan esoe Shobakh ha lüngthacho. 19 Israel jiang na Syrian khyoji yivon ji Hadadezer küpo mesao jiangna zoale ontena Israel thüngi mmhontae David küpo rhe yicho. Jisülojo Syrian jiangna Am mon kyon jiang n zanchiv sicho.
David na Rabbah Khyoe Khiala
1 Thüngküm to tsüngkying lo mesao na nzyu akvü ritssolo ewo yuta jilo Joab na rasan jiang sosi owo Ammon khyocho; tokhatola David mesao jo Jerusalem lo vancho. Ontena Rabbah yantsü ji hayacho, osi hoji ori. tssoe roe sicho. 2 Ammon kyon khümphen kisü Molekh ji kiven jo shona seri thümro mezhü na jocho. Hojilo tssentsü lung jüwo jijo David na khi ombo kikho lo thecho. Ombona yantsüi na recho jiang lona ha elümoto khicho. 3 Ombona yantsü jilo kyon jiang tsarhyui Tssüngrhüphen, yonjak kheya tona opvü to nkhentayia elhi tssothukracho. Ombona Ammon yantsü thanpoe kyon jiangha topvü hojito elhi tsso thukcho. Jisülo jo ombona ombo woro jiang sosi Jerusalemi yicho.
Philistin Thojüi Jiang Thüngi Rota
4 Sülani jo Gezer lo Philistin jiang thüngi ritsso chiyicho. Hojithüng Hushah kyon Sibbe – kai na Philistine thojüi Sippai to tsa ji lüngthacho osi Philistin jiang khyothechicho. 5 Elani Philistin jiang thüngi ori tssotalancho, osi Jair tsoe Elhanan na Gath yamo Goliath ji ojenio Lahmi ji lüngthacho, osi ombo tssowo jo tsitüm tera tssocho. 6 Elani Gath lona rotalancho, osi hojilo thojüi kheyingro tirokren, joyingro tirok ren to ekyingo tvü jücho. Ombo nkolo thojüi tsoronichen tssocho. 7 Ombona Israel jiang yikvücho osi David ojenio Shammah tsoe Jonathan na ombo lüngthacho. 8 David osi ombo woro na lüngthao thojüi otsük ethüm shiango thojüi Goliath tsoronichen den tssocho.
David na Wokhata Khiala
1 Tsüngrham jina Israel kyon jiang ezüpthukvü zio jina David ji ntssungi wokhata khithukcho. 2 David na Joab tona tsüphoe thanpoe jiang to heto yizüng picho, "Israel meta nken phukowoe na phuko woe jana kyon owo khatava. Kyon owo kvüta vancho sana a ntsihungala." 3 Joab na ezocho, "OPVÜI khi Israel jiang enhünga vamo shilona elüm kyungkata thichethukuka! Tsüphoeyo, onte topvü ni phajae taeka. Tona ntioli nina kyon owo khatae Israel jipo nlan rhükathukula?" 4 Tokhatola mesao jina ombo yizüng ji engale to Joab ezocho. Tole Joab na khochuki owo Israel meta nken akvü khyua osi elani Jerusalem lo yicho. 5 Ombona Israel lo rasan tssokhung kvüta vancho sana David mesao ezocho. Israel lo kyon owo 1,100,000, Juda lo 470,000 to vancho. 6 Joab na mesao yizüng ji n ngao jina Levi tona Benjamin to pvüji jo owo khae nzecho. 7 Hojito elhitao ji Potsow na n mathao jina Israel pono ezüp yicho. 8 David na Potsow thüngi heto phyocho, "Ana owo khatao ji yakchia ekhenthao mmen tssothaka! A nzansi nlan asiyia. Ana zhüva elhi tssothaka." 9 Tole OPVÜI na David küpo zenkhying Gad ji heto ezocho, 10 "owo David ezoa, ana lanka ethüm lona ethüngi khiv ombo vayiaka. Ombona kvüwoe ji khiana ana hoji tssoyivka." 11 Gad na David thüngi owo OPVÜI na phyoji tssole to ezocho osi kvüwoe ji tssovsana to ezocho, "kvüwoe ji khivla? 12 Nzyu ethüm otssi vara alo? Choro ethüm ni ri khelona tsana vam alo? Toalo tsüngon ethüm tsükona OPVÜI na yonri bensi ni sakata, ni meta jilo vara rothuka ombo lanben khi Israel topvü lo echü rwothukvüla? Shiang yulo kuoe ji ana OPVÜI janlam la?" 13 David na Gad ezocho, "A ji e nungrathao sükhyingo vanka. Tokhatola kyon khi ezüp a pithukvü jo a ntssohung küma OPVÜI na ombobo ezüp a pithuka, ntiotssole ombo khonzan eli." i4Tole OPVÜI na Israel pono vara rothukcho osi kyon owo wothüng ekha tiying chücho. 15 Ombona Jerusalem ji roe silo ombo lanben wothukcho, tokhatola ombo lümbüm dungphilani ji heto ezocho, "Tae tssoa hoji taena tssonthaka!" Jithüng jo lanben jijo Jebusite kyon Araunah litsenpheni mangi vancho. 16 Lanben jina ezhüi mangi yonri bensi Jerusalem roe silo tsata David na hungcho. Tole David tona kyon jiang esopvüi jiang to na sünyikvü ekasi vamo jiangna onte mha jiang liko jana nkhümtheracho. 17 Osi David na heto randancho, "O Potsow, sulyuo etssoe ji a ka, wokhata ji a yi lona khitachoka. E nzanthao kyon shiang n lan ntia nlika. A tona a wopan to pono tae ezüp yithuka, osi ni kyon shiang ezüp ti-pia." 18 OPVÜI lanben jina Gad ezoa owo David ji Aranuah litsenphen jilo OPVÜI thanphen tssole to ezothucho. 19 Gad na ezoji ephan David na OPVÜI yizüng enga khochicho. 20 Hojilo litsenpheni Araunah tona ombo tsoeden onjeni mezhü to oli tsenta vancho. Ontena lanben ji hungale otsoe jiangna tsani mphoe sitacho. 21 Araunah na David tsata hungchiale esani owo omha jina liko jana epyakthecho 22 Tole David na ombo ezocho, "Ni litsenphen ji a shithuka, tona ana jilo OPVÜI thanphen tssoe vara shiang esanthukvü ka. Ana liko tssen ji mana ni pivka." 23 Tole Araunah na ezocho, "Tsüphoeyo, khia osi nina ntio ni tssohungana tssoa ethamvü ha tssibung shiang vana, omi tssophen ha litsenphen shiang njükcheta, osi otssuk shiang ha thanphen tssoa. Ana shiang totona ni pivka." 24 Tole mesao jina janlancho, "Meka, ana oman bena ni pivka. Ana OPVÜI tham jo ni echi n than, ana n shicho tsütsaelan khi tham meka." 25 Tosi ombona litssenphen ji man shona rang nzo tiruk Araunah picho. 26 Ombona jilo OPVÜI thanphen ronkachi erungthan osi etsoyuthan picho. Ombona randancho, tole OPVÜI na oyakina omi jorothuki othan jiang rungthukcho. 27 OPVÜI na yonri ji sile to lanben ji ezole ombona engacho. 28 Shiang zesi David na OPVÜI na ombo randan engathaka to ntsi Araunah litsenphen jilona othan OPVÜI picho. 29 Moses na romhoni na tsso OPVÜI vanrhyu süki ji, tona othan rungphen saphang jito shiang topvü yuta shilo jo Gibeon lo khümphen jilo licho; 30 Tokhatola hojithüng jo OPVÜI lanben yonri ji kyuo jina David na hojina khümo n wocho.
1 David na phyocho, "OPVÜI Potsow khümphen jo shilo tssovka. Israel jiang na othan piphen ji shi tssovka."
Khümphen ji Etssov ji Methako
2 David mesao na jipopoe Israel metalo vanta vamo jiang topvü etssirhyule to ezocho, osi ombona onte elhi tssothukcho. Onte ejoma na khümphen jilo ethev olong thencho. 3 Ombona otssüng hankhan jiang nsüngrüathüng eshenphen kozol nsüngrüv tona ntsüpnsüngrüv to yonjak tssona picho, osi yongmen yonjak khosha pio jina ochinaha füi nzerao picho. 4 Ombona Tyre tona Sidon to kyon jiango Cedar tssüngpvülong hanrhyuthukcho. 5 David na heto nchümcho, "Atsoe Solomon na tssov vamo khümphen jijo limhatsü na thüngcheta tvü tssovka. Tokhatola ombo ji nunghori osi ejyueran n lihamo jina ana ombo methakia vamka." Hojito David na ombo nchüthüng elümoto rüngrüi vayicho. 6 Ombona ombo tsoe Solomon owo tsathuki Israel Potsow khümphen tssole to ezocho. 7 David na heto ombo ezocho, "Atsoeyo, ana a pvüi Potsow Pvütssonthukvü khümphen tssoyivka. 8 Tokhatola OPVÜI na phyoala, ana ritsso elümoto tssothaka osi kyon elümoto lüngthathaka. Hojito ana jenbukta elümoto lithukthako jina, a khi ombo khümphen n tssothuk to azocho. 9 Tokhatola ombona phyochak heto a picho lia, 'Nina tsokhying vani ombona noying lona yansavka, ntiotssaole ana ombo ri jiang topvü thüngina noyinga ombo vanthukvü. Ombo mying jo Solomon tssovka, ntiotssole ombo yansa yutalo jo ana Isreal ji noying jüngthe lo vanthukvü. 10 Ombona a khümphen a tssoyivka. Ombo a tsoe tssovka osi aiyo ombo opo tssovka. Ombo yansasen ji Israel lo kümali lia sa wovka.' 11 David na ezocho, "Atsoeyo, enhungo Potsow khi ni ndüngo vanthukvüka, osi ombona ni yakchia khümphen etssov phyochako ji benthukvüka. 12 Osi ni Potsow OPVÜI khi tssenche ziche ni pithuka, ombo kyon jiang ombo shikhfü ephan ni sathukvüka. 13 OPVÜI na Moses yakchia Israel thüngi yizüng pio jiang topvü nina enga benphina nina ekhyo hunguka. Mhankata osi lüm tssona, ntinaha ni tikyuthuka. 14 Ekhümki ji tsükona jo ana ekhyo tssoe shona ton 3,400 tona janti ton 34,000 to hanrhyui vathaka. Ji ephalo yongmen tona yonjak to jo tümjak n liv hanrhyua vana. Ana olong tona otssüng toha rüngrüi vathaka, tokhatola nina jilo rüngrüphav lia. 15 Nina elhi etssoe khosha vana. Longthenpheni elhi etssoe vanra, longjoe osi otssüng thüngoe tsiyan ha vanra, 16 Ji ephalo shona, janti, yongmen osi yonjak jothio tvü khosha vanra. Enhungo elhi benkata osi OPVÜI ni ndüngo vanthuka." 17 David na Israel esopvüi topvü thüngi Solomon kyochitale to ezocho. 18 Ombona heto ezocho, "OPVÜI nte Potsow na nte ndüngo vanrhyupvü osi olan topvü lo noying nte pithaka. Ombona etho a pia meta shilo evamo kyon jiang akhyothukthaka, enhungo nte tona OPVÜI to küpo kümthaka. 19 Enhungo ni lümbüm osi eküm topvüna OPVÜI benkata. Ekhümki ji benkae tssoa, tosi jilo OPVÜI Ntsata thephen bakos ji tona ombo ekhüm elhilo etheo ntho tsütsaelan jiang topvü to jilo vata."
1 David ji elümoto sona yiale ombona ombo tsoe Solomon ji Israel mesao tssothukcho.
Levi Jiang Elhi
2 David mesao na Israel esopvüi jiang topvü, pvüti osi Levi topvü sanrhyuthukcho. 3 Ombona Levi eboetso nzyu thümro pomoe topvü owo khae zecho. Topvü ts sotsüi wothüng thümro tiza khachecho. 4 Mesao jina wothüng mekyu mezhü jo khümpheni elhi ezeden, wothüng tiruk jo erantoe evaiden osi ekhirantathüng nlansüngpvüi ethüngche, 5 Othüng mezhü jo enhyang elhi etssoe, tona wothüng mezhü jo mesao na pio khendenphen jiang theta OPVÜI ethüngu elhi to zikacho. 6 David na Levi jiang ji onte khümtsüng ephan okho ethüm chichecho; Gershon, Kohath, tona Merari to. 7 Gershon na tsokhying eni Ladan ha Shimei oni vancho. 8 Ladan na tsokhying ethüm vancho: Jehiel, Zetham tona Joel to, 9 Hoji ang jo Ladan lona thichechojipo randen. (Shimei tsokhying ethüm: Shelomoth, Haziel tona Har an to vancho.) 10-11 Shimei na tsokhying mezhü: Johath, Zina, Jeush, tona Beriah to erani na etsüngcho. Jeush ha Beriah onio tsoronichen lümha n van hoji tsü kona onio jipo motsünga esüa khacho. 12 Kohath na tsokhying mezhü vancho, Amram, Izhar, Hebron, tona Uziel to. 13 Ombo tsokhying eramo Amram jo Aaron ha Moses oni opo. (Aaron tona ombo tsoronichen jiang to jo ntho tsütsaelan jiang ezepvüi zajüng tssoa ethüngchecho, osi OPVÜI khümathüng orhüm mmhom erungu, ombo benkav osi ombo myingona kyon jiang mmhayiv ethüngcheracho. 14 Tokha-tola Potsow kyon Moses tsoe jiang jo Levi jiang yolo khanhyacho.) 15 Moses na tsokhying eni Gershom tona Eliezer to vancho. 16 Gershom tsoe jiang yolo esopvüi jijo Shebuel. 17 Eliezer na otsoe tsüka Rehabiah tae vancho, tokhatola Rehabiah na tsoronichen elümoto vancho. 18 Kohath tsoe enioto Izhar na otsoe Shelomith vancho osi ombo jipolo eran ji tssocho. 19 Kohath tsoe ethümo to Hebron na tsokhying mezhü vancho: Jeriah, Amariah, Jehaziel, tona Jekameam to. 20 Kohath tsoe mezhüoto, Uzziel na tsokhying eni Mikah ha Isshiah oni vancho. 21 Merari na tsokhying eni vancho: Mahli tona Mushi to Mahli na tsokhying eni vancho, Eleazer tona Kish to, 22 tokhatola Eleazer jo tsolovden tae vansi tsokhying n vam chüi sicho. Ombo tsolov jiangna onte oporo tsoe Kish tsokhying jiang thüngi yanpiracho. 23 Merari tsoe enioto Mushi na tsokhying ethüm vancho: Mahli, Eder tona Jeremoth to. 24 Levi tsoronichen jiango shiang, onte topvü jipo khümtsüng ephanina etsünga erancho. Ombo tsoeoro otsük akvü nzyu mekyu lona pomoe topvü na OPVÜI khümpheni elhi hungcho. 25 David na phyocho, "Israel Potsow OPVÜI na ombo kyon jiang noying pithaka osi ombona Jerusalem lo kümali vamka. 26 Osi Levi na OPVÜI vanrhyu ranki ji osi ekhüm elhilo tsakalan jiang topvü hanphita ji ethev n liv sivka. 27 David na wokhao tssoa lanso pio ji ephanina Levi topvü nzyu mekyu jana na elhi shiang picho, 28 Aaron lona chiyio pvüti jiang nzanchia khümpheni elhi tssov, hojilo chungchak osi hapho jiang ezev, osi ntho tsütsaelan jiang top vü nthoa vanthukvü tsükona; 29 Potsow thamo hümri ji ezev tsükona, othan lo ohüm cheni theo jiang ezev, hümri porov jiang ebung mozhü nthev tsükona ezev, rüngcho thamo jiang ezev, Oliv thyujü theo ohüm chencho ji ezev, othan jiang füi osi etsi ezev, 30 Ela ni enya mmyu akvü OPVÜI thünga pfütssonthukvü; 31 osi esanmung nchuk erungthan OPVÜI pio jiang, choro ethan tokhu jiang, osi tukhu thanpo jianglo thamo jiang ezev. Ekhüm akvü lo Levi kvüta elhi zikatana ji ephan shikhfü methaki vayicho. Levi jiango yuta topvülo OPVÜI elhi tssonrhüa vam zika cho. 32 OPVÜI vanrhyu ranki ji tona khümphenki ji to zeyata evam, osi onte wopan Aaron lona chiyio pvüti jiangna ekhüm elhi tssoathüng nzanchiv to shiang topvü zikacho.
Pvüti Jiang Zikao Elhi Jiang
1 Aaron tsoronichen jiang khümtsüng ji shiang. Aaron na tsokhying mezhü vancho: Nadab, Abihu, Eleazar tona Ithamar. 2 Nadab ha Abihu onio opo nchüthüng na otsoe n vam chürae sichoj hoji tsükona oni jeni Eleazar ha Ithamar onio pvüti kümracho. 3 David mesao na Aaron tsoronichen jiang onte elhilan ephan khtsüng echümpo echümpo chirorae yicho. Hojito etssov lo Eleazar tsoe Zadok tona Ithamar tsoronichen Ahimelekh na to ombo nzanchicho. 4 Eleazar tsoronichen jiango okho taro tirok chichecho osi Ithamar tsoronichen jiango okho tiza chiyicho. Hojijo eboetsoji Eleazar wopan lo ekyongo tsso jina. 5 Eleazar tsoronichen loha Ithamar tsoronichen yoloha ekhümki elhi etssoe osi omon lo esopvüiden jürao ji tsükona elhi jiang phyalyu fuki zesi nkhentayicho. 6 Eleazer tsoronichen tona Ithamar tsoronichen to jiang na chungta phyalu ji tsae zetacho. Jitosi onte ji Nethanel tsoe eranpvüi tsüka Shemaiah to tsao jina omying eranicho. Hojithüng ehungpvüi den jo mesao ji, ombo tsüphoe jiang, Zadok pvüti Abiathar tsoe Ahimelech, pvüti opano eramoe jiang tona Levi opano eramo jiang to tssocho. 7-18 Wopan okho mekyu mezhü elhi jantao ji heto rencho: 1. Jehoiarib 2. Jedaiah 3. Harim 4. Searim 5. Malchijah 6. Mijamin 7. Hakkoz 8. Abijah 9. Jeshua 10. Shekaniah 11. Eliashib 12. Jakim 13. Huppah 14: Jeshebeab 15. Bilgah 16. Immer 17. Hezir 18. Happizzez 19. Pethahiah 20. Jehezkel 21. Jachin 22. Gamul 23. Delaiah Maaziah 19 kyon shiang jo Israel Potsow, OPVÜI ji ephanina onte motsüi Aaron na methaki vao elhi jiang owo khümpheni chungta etssov elhi chitayio jiang.
Livi Jiang Mying
20 Levi tsoronichen wopan lo eramoe ejoma jo shiang: Amram na Shebuel yakchia bukcho Jehdeiah; 21 Rehabiah tsoronichen Isshiah;. 22 Izhar na Shelomith yakchia bukcho Jahath 23 Ebron tsoeden, eranina rencho Jeriah, Amariah, Jehaziel tona Jekamean to. 24 Uzziel na Mikah yakchia bukcho Shamir 25 Uziel na Mikah opyao Isshiah lona bukcho Zekhariah; 26 Merari tsoronichenden Mahli, Mushi tona Jaaziah to. 27 Jaaziah na tsokhying ethüm vancho: Shoham, Zakkur, tona Ibri to. 2829 Mahlina tsokhying eni vanho, Eliazar tona Kish to. Eliazar jo tsokhying n vancho, tokhatola Kish na tsokhying tsüka vancho, Jerahmeel. 30 Mushi na tsokhying ethüm vancho: Mahli, Eder tona Jeremoth to. Shiang jo Levi wopan jiang. 31 Wopan akvü lo eramo ji tona ombo ojenio to jiangna onte opan Aaron lona bukcheo pvüti jiang na tssoato phyalyu zetasi elhi tsakacho. Shiang lo ehungpvüi jo David mesao, Zadok, Ahimelekh tona pvüti jiang wopan lo eramo osi Levi kyon jiang to na ehungpvüi tssocho.
Ekhümki Khenden Jiang
1 David mesao tona Levi pvüjilo esopvüiden to tssoe Levi jipo yolona okho shiang ekhümki khenden ethüngchecho: Asaph, Heman, tona Jeduthum. Ontena Potsow yithen ji khenzhü osi ekhophiphen theta thenchov tsükona zikacho. Ombobo ejan elhi jiang ephanina ekhüm sokav ethüngcheo jiang shiang: 2 Asaph tsokhying mezhü jiang jo: Zakkur, Joseph, Nathaniah, tona Asharelah to. Onteno mesao na kvüthüng yizüng piana Potsow yithen ji thenchopvüi Asaph lanso küpo tssocho. 3 Jeduthum tsokhying tirok ji shiang: Gedaliah, Zeri, Jeshaiah, Shimei, Hashabiah, tona Mattithaiah to. Opona onte ezoji ephan ontena khenzhü theta OPVÜI thünga montsso pia denta ehungpvüi tssotacho. 4 Heman tsokhying taro mezhü ji shiang Bukkiah, Mattaniah, Uzziel, Shebuel, Jerimoth, Hananiah, Hanani, Eliatha, Giddalti, Romamti, Ezer, Joshbekashah, Mallothi, Hothir, tona Mahazioth to. 5 Potsow na mesao zenkhying Heman ji Ombo phyochak ji ephan tsokhying taro mezhü shiang tona tsolo ethüm to vanthukvü Heman etho picho. 6 Ombo tsokhying topvüna opo na sokata ekhophiphen osi khenzhü theta ekhümki ekhüm jiang sokacho. Osi Asaph, Jesuthum tona Heman to jo mesao lanso ephan elhi tssocho. 7 Otsük mekyu mezhü shiang topvü tssothimori tae osi onte kyon Levi kyon jiango khenden thangshi ekhiden. Eboetso onte 288 tssocho. 8 Elhi jantav jo ontena phyalyu fuki zetasi jantacho, ngaro eran osi tsothi n tssothi ephan mekacho. 9-31 Eboe otsük 288 shiji wopan ephanina otsük taro eni ren okho mekyu mezhü chichecho osi okho akvü esopvüi tsüka jücho. Onte elhi janta ji heto etsüngcho: 1. Asaph wopan lona Joseph 2. Gedaliah 3. Zakkur 4. Zeri 5. Nethaniah 6. Bukkia 7. Asharelah 8. Jeshaiah 9. Mattaniah 10. Shimei 11. Uzziel 12. Hashabiah 13. Shebuel 14. Mattithiah 15. Jerimoth 16. Hananiah 17. Joshbekashah 18. Hanani 19. Mallothi 20. Eliatha 21. Hothir 22. Giddalti 23. Mahazioth 24. Romamtiezer
Khümphen ki Enhyang Jiang
1 Khümphen enhyang Levi kyon jiang elhi jo shiang. Korah pvüji lo Asap wopan Kore tsoe, Meshelemiah vancho. 2 Om bona tsokhying tiying eranina heto rena vancho: Zekhariah, Jediel, Zebadiah tona Jatheniel to. 3 Elam, Jehonana osi Elichoenal to. 4 Obed Edom ha Potsow na tsokhying tiza pia mmhayicho, eranina rencho shiang: Shemiah, Jehozabad, Joah, Sakhar, Natheniel,5Ammiel, Iskhaar, tona Peullathai to 6-7 Obed Edom tsoe erantso, Shemiah na tsokhying tirok vancho: Othni, Rephael, Obed, Elzabad, Elihu tona Senachiah to. Onte tssothimori jiang tsükona onteno elümoto ethelan eli-i kyonden tssocho. Opvü tssoa wokhao to onio elümoto tssothimori licho. 8 Elhi shi tsükona Obed Edom wopan lona tssothimori tsotso otsük rukro eni ethüngchecho. 9 Meshelemiah wopan lona ha tssothimori otsük taro tiza khyochecho. 10 Merari wopan lona ha Hosah to tsa jina tsokhying mezhü vancho: Shimri (Ombo erantso ji meka khatola opo na esopvüi ji ombo tssothukcho), 11 Osi Hilkiah, Tebaliah tona Zechariah to. Osi Hoah wopan lona onte tsotsüi otsük taro ethüm na khümphen enhyang tsocho. 12 Ekhümki enhyang jiang ji wopan ephanina okho okho na chirotaecho osi Levi kyon thanpoe jiang esüa onteha elhi jantarayicho. 13 Wopan akvü kipvüng enhyang elhi jo teria, tsüphoa to mek na phalyu fuki fukeheo ji ephan nkhenta nhyaktacho. 14 Shemiah na engkhfüwoe kibüng ji enhyaku tsakrhakcho, osi ombo tsoe Zekhariah jo ndungntssung mmhom oyam epipvüi jijo jükiwoe kibüng ji enhyakvü tsarhakcho. 15 Obed Edom jo jüjowoe kibüng ji nhyaku zikacho, osi ombo tsoe jiango tsütsailan vaphen chungchak ji nhyaku zikacho. 16 Shhupim tona Hosah to jo engrhewoe kibüng ji tona olan omhawoe Shallecheth kibüng ji to nhyaku zikacho. Enhyak elhi ji yuta etssüngi zikao ji ephan chungta nhyaktacho. 17 Engrhewoe jo enhyang otsük tirok na eng akvü nhyaktacho, osi jükiwoe otsük mezhü tona jüjowoe otsük mezhü tona eng akvü nhyaktacho. Eng akvü tsütsailan vaphen jilo otsük mezhü tssoe otsük eni nina reni nhyaktacho. 18 Engkhfüwoe kikhyo tssochio ji ndüngo jo otsük mezhü elani kikhyo tssochio jilo otsük eni to na nhyakcho. 19 Shiang jo Korah tona Merari to wopan lona khümphen enhyang elhi chitayio jiang ji.
Khümpheni Elhi Thanpo Jiang
20 Onte kyon Levi ejoma jiango ekhümki rangjen ji tona yantso OPVÜI thancho vao jiang to ezepvüden zikacho. 21 Gershon tsoe yulo tsüka, Ladan jijo wopan khosha omotsü tssocho, ombo tsoe Jehiel tsoe jiang omotsüi jiha ombo tsocho. 22 Ladan tsoe thanpo otsük eni, Zetham ha Joel onio khümpheni rangjen ji tona tsütsailan vaphen ji to enhyangden tssocho. 23 Amran, Izhar, Hebron tona Uzziel to tsoronichen jiang ha elhi piracho. 24 Moses tsoe Gershon jipo kyon Shebuel jo ekhümki rangjen ji eze jiang yulo esopvüi ji tssocho. 25 Gershon ojenio Eliazar yakchia Shebuel ji Shelomite thüngi opantacho. Eliazar jo Rehabiah opo, Rehabiah ji Joram opo, Joram jo Zechri opo, Zechri jo Shelomith opo to tssocho. 26 Shelomith tona ombo wopan kyon jiang tojo David mesao na OPVÜI othan epio jiang ezepvüiden, wopan jiang yulo OPVÜI jiang na othan pio jiang, pvüjilo eramo jiang han jiang tona rasan tsüphoe jiang na othan pio jiang to ezepvüiden tssocho. 27 Ontena ritsolo rechocho ejoma khi khümpheni na tsütsav tsükona nthoche vatacho. 28 Shelomith. tona ombo wopan jiang to jo khümpheni tsütsav nthochei vao jiang topvü, zenkhying Samuel na yantso thamo jiang, Saul mesao na yantso thamo jiang elani Ner tsoe Abner na thamo jiang osi zeruiah tsoe Joab na thamo jiang to ezepvüden tssocho.
Levi Thanpoe Jiang elhi Jiang
29 Izhar tsoero jiang yulo jo Chennaniah tona ombo tsoe jiang tojo yansa elhi shiang zikacho: Israel jiang tsükona eranto jiang vata osi okhen oyi chiyiathüng nsüngnlüngden to tssothukcho. 30 Hebron tsoero jiang yulo jo Hoshabiah tona ombo wopan kyon nzo taro tiying onte topvü ethelan eliden, jiang ji Jordan engrhewoe Israel jiang yulo ekhümlan thüngoe osi okho thüngoe yansaeden to tssothukcho. 31 Jeriah jo Hebron tsoronichen jiang yulo esopvüi ji tssocho. David na mesao tssosi nzyu zhüro to jilo Hebron tsoronichen jiang wopan yulo ethümoe zetale, wopan shilo kyon eboetso rasan mmhomden ejoma, Gilead metalo Jaser yani vanta vancho ethümchecho. 32 David mesao na Jeriah wopan lona wopan yulo esopvüiden wothüng enisi nzo tiying ethüngche Jordan zhükhfü na engkhfüwoe Rueben, Gad, tona Manasseh eng rhewoe to metalo vamo Isreal jiang yulo ekhümlan thüngoe tona okho yansa thüngoe yansa elhi jiang to zikaracho.
Rasan osi Okho Soying Jiang
1 Israel yolo wopan lo eramoe jiang, pvüji lo eramoe osi onte tsüphoeden kvüta na ekhüngyan elhi tssocho sana jiang shiang. Nzyua jilo choro akvü otsük wothüng mekyu mezhü na choro jilo esopvüi ji küpo na elhi tssocho 2-15 Choro akvü esopvüiden jiang shiang: Choro ovüngo jilo: Zabdiel tsoe Jashobeam (ombo Juda pvüji lo Perez jipo kyon tsüka) Choro enioto jilo: Ahohi tsoronichen kyon tsüka, Dodai (Ombo küpo esoe jo Mikloth) Choro ethümo jilo: Jehoiada pvüti ji tsoe Benaiah; Ombo hümro dento tsao jilo esopvüi ji (ombo tsoe Amizzaball na esopvüi ombo echungcho) Choro mezhüo to jilo: Asahel, Joab ojenio ji (ombo tsoe Zebadiah na ombo echungcho) Choro mongoto jilo: Izhar tsoronichen yolo tsüka, Shamhuth to tsao ji Choro tirokto jilo: Tekoa yamo Ikkesh ji tsoe Ira ji Choro tiyingoto jilo: Pelon yamo Ephraim kyon Helez ji Choro tizaoto jilo: Hushah yamo Sibbekai (ombo Judah pvüji lo Zerah jipo kyon) Choro tukvoto jilo: Benjamin pvüji meta Anathoth yamo kyon Abiezer ji Choro taroto jilo: Netophah yamo Maharai ji (ombo Zera jipo kyon tsüka) Choro taro ekhao jilo: Ephraim pvüji meta Pirathon yamo Beniah ji Choro taro enioto jilo: Netophah yamo Heldai ji (ombo Othriel tsoronichen tsüka)
Israel Pvüji Jiang Yolo Yansa Elhi
16-22 Israel pvüji jiang yansae jiang shiang: Pvüji Yansae Reuben Zichri tsoe Eleazar Simeon Makah tsoe Shephatiah Levi Kemuel tsoe Hashabiah Aaron Zadok Juda David mesao ojenio tsüka Elihu Issakhar Mikhail tsoe Omri Zebulun Obadiah tsoe Ishmaiah Naphtali Azreil tsoe Jeremoth Ophraim Azaziah tsoe Hoshea Engrhewoe Pedaih tsoe Joel Manasseh Engküwoe Zekhariah tsoe Iddo Manasseh Benjamin Abner tsoe Jaasiel Dan Jerohan tsoe Azarel 23 David mesao na nzyu mekyu küpoe jiango owo ekhalo n thenhyacho, ntiotssole 0PVÜI na Isreal jiang ji oyaki shantio tata thichethukvü phyochak licho. 24 Zeruih otsokhyongo Joab na owo khav benkacho tokhatola n kharav sicho. Hojito owo khatao ji tsükona Potsow na Isreal jiang ezüp picho, hoji tsükona owo kvüta khachecho sana David mesao eranto lo n thenhyacho.
Mesa Tsütsaelan Jiang Tsütsa osi Ezeden
25-31 Mesao tsütsaelan jiang ezepvüi jo shiang: Mesao tsütsaelan vaphen ezei: Adiel tsoe Azmaveth Yankhoro jilo tsütsaelan vanphen: Uzziah tsoe Jonathan Lijon elhi etssoe jiang ezei: Chelub tsoe Ezri Zuki vaphen: Shepham yamo Zabdi "Engrhewoe phunglan jothelo": Olive tona nitsothi dung jiang ezei: Geder yamo Baal Hanan Olive thyujü vaphen: Joash. Sharon hayi mangsü jiang: Sharon yamo Shirtai Hayitsüi mangsü jiang: Adlai tsoe Shaphat Oat jiang ezei: Ishmael kyon Obil Gadho jiang ezei: Meronoth yamo Jehdeiah Olyu nyanya: Hagrite kyon Jaziz.
David Kija Ntssung Epiden
32 David mesao oporo Jonathan jo ekhaeyan eli osi ntssung epi mmhom tssocho. Ombo tona Hachmoni tsoe Jehiel to jo mesao tsoe jiang ntsinran epiden tssocho. 33 Ahithophel jo mesao ji ndungtssung epipvüi, osi Archit kyon Hushai jo mesao ji okhümo osi ejyurünyo epipvüi 34Ahithophal chüthakle, Abiathar ha, Beniah tsoe Jehoiada onina mesao ntssung epiden kümcho. Joab jo mesa rasan jiang esoe ji tssocho.
Khümphenki ji Tsükona David Ntssungyi
1 David mesao na Israel lo tsüphoe topvü Jerusalem lo sanrhyule to yizüng picho. Hojitsükona pvüji akvü lo tsüphoe jiang, ekhüngyan yansae jiang, jipo esopvüi jiang, mesao tona ombo tsoe jiang to ejüeli osi ekümrümo ezei jiang, elani mesaoki tsüphoe jiang, rasan esoe jiang tona ethelan eli eboetso topvü to Jerusalem lo sanrhyucho. 2 David na onte mhadungo phanthi heto ezocho: "A meta kyonden engachitava. Ana Ntsata Thephen ji vajüng etssov tsükona, ete Potsow OPVÃœI jo epyankaphen oki a tssohungala. Ana ekhümki tssoe ombo pvssonthukvü methakthaka, 3 tokhatola aiyo rasan osi oyam ejen elümoto zanithako ji tsükona ombona a tanga a n tssothukala. 4 OPVÃœI Israel Potsow na a osi a tsoronichen khi kümali Israel yansae e tssothukhungala. Ombona esopvüi chiyithukvü Juda pvüji ji ethüngchecho, osi Hudah lona ombona apo wopan ethüngchecho. Osi hoji opan topvü yolona ombona a ji a ethüngchei Israel topvü pono mesao atssothukhungcho. 5 Ombo na tsokhying elümoto a picho osi jiang yolona ombona Solomon ethüngn chei OPVÃœI ekhüngyan Israel ji sathukcho. 6 "OPVÃœI na heto a ezocho, 'Ni tsoe Solomon jo ekhümki etssoe ji tssovka. Ana a tsoe ombo tssov ethüngchethaka osi aiyo ombo opo ji tssovka. 7 Ombona enünga a yi enga vamo shi esüa a yizüng osi shikhfü jiang topvü benphina ana ombo ekhüngyan ji kümali lia vanthukvüka.' 8 "Tona, a kyonden, ete Potsow mhadungo na osi Israel etssikho shi mhadungo na ana nte topvüto OPVÃœI na yizüng e pithako jiang topvü benphia vantale, to tssona ntena meta mmhom shi moni nsina lia vamka osi echungren etsao jiang khelo kümali tsükona elonkavka." 9 Ombona Solomon ha heto ezocho, "Ninaha nipona ekhümo Potsow ji chekale to, osi lümbüm nshümro na ombo benkata osi choka longshia ombo benkata to ni ntssungala. Ombona ete lümbüm chungi e ntsiyia osi ete rüngcho jiang ntsikhana. Nina ombo thüngi ona ombona ni khichovka, tokhatola nina ombo lona khotae yichojo ombona kümali ni sivka. 10 OPVÃœI na ombo khünphen etssoe ni ethüngchethaka to nina chethev lia. Hojitsükona enhünga tssoa, osi mhanka vasi elhi tssoa." 11 David na ekhümki etssov etsikon ji topvü Solomon picho, kikyo vaphen chungchak ji tona chungchak thanpo jiang topvü to, elani topvü lo nthotso meta mmen siyiphen chungchak jiha etsikon picho. 12 Hapho jiang tona hojiang haphia chungchak jiang to ombo na matanga vamoji ephan ezocho, elani ekhümki tsakalan vaphen chungchak ji tona OPVÃœI yantso khochaki vaphen ji toha etsikon picho. 13 David na Levi osi pvüti jiang kvüto nlansüngi elhi tsswothukvü sana jiha okyak picho, osi ekhümki elhi topvü etssov tona jilo oyo-opvü jiang kvüto ntangshom sana jiangha okyak picho. 14 Ombona thetsotheyupvü jiang joathüng shona janti kvüta theta jovsana ezocho, 15 milon akvü osi milondung akvü lo kvüta thevsana, 16 shona saro osi janti saro kvülo Potsow thancho hümri vacho sana jiang akvülo, kvüta thev sana ezocho. 17 Ombona ekhyuki tsophen jianglo, phikukro, mvüryu, jianglo shona njüm kvüta thevsana ezocho, osi ophi jianglo jo shona janti kvüta theta jovsana jiang ha ezocho, l§ elani orhüm mmhom than rungphen jianglo shona njüm kvüta thevsana, osi OPVÃœI Ntsata Thephen bakos ji pono echo ephyankae vaphen ekümrümo ji eshonphen, zotoro jilo kvüta thevsana ha ezocho. 19 David mesao na phyocho, "Shiang hetopvü OPVÃœI na etssov yizüng a pio jiang elhilan erani lio jianglo jürata." 20 David mesao na ombo tsoe Solomon ji heto ezocho, "Mhankae lüm tssona vana. Elhi ji benkae tssoa osi ntinaha ni ti esanthuka. Ana benkao Potsow, OPVÃœI ji khi ni ndüngo vanthukvü ka. Ombona ni siv meka, ombona khümphen jilo elhi tssov ni zikao jiang n thakthüng jo ni ndüngo vamka. 21 Pvüti tona Levi to jiangha khümpheni elhi zikathaka. Elhi lantaro etssoe jiang topvü na ni nzanchivka, osi kyon topvü osi onte esopvüiden jiang topvü ni küpo tssovka."
Khümphen ji Etssov lo Yantso Jiang
1 David mesao na yantsüi vamo jiang thüngi heto ezocho, "Atsoe Solomon ji Potsow na ethüngchethaka, tokhatola omboji nunghori osi ejyueran nlihanka. Elani elhi jiha elümoto tsükshia lia, ntiotssole shijo kyon mesaki mek, tolia OPVÜI Potsow khümphen ki tssovsala. 2 Ana khümphen ji etssov tsükona shona, janti, yongmen, yonjak, dukta tssentsü lung osi tsünglüpvü, lungparak, osi sherilong to shiang topvüto etonandang yanthethaka. 3 Heto ana yanyoe thethako shiang ephalo, ana OPVÜI ekhümki ji nzamo ji tsükona a kija eli lona shona janti khichei thethaka. 4 Ana shona njüm füka wothüng ethüm lona tajoa, tona janti njüm füka wothüng tiying tojo khümphenki echung jiang merithukvü tsükona tona kitssoe jiangna tsakalan taro nsüngrüv ji to tsükona thecho. 5 Tona enhungo ochona longphya khochaki pia OPVÜI thanhunga vanchola?" 6 Tole jipo jianglo eramoe jiang tona pvüji jianglo tsüphoe jiang, rasan esopvüiden jiang, elani mesao ejüeli ezei jiang, 7 topvüna ekhümki ethev shiang kiaman thev methakcho: shona efü 532,000, janti efü wothüng 21, yongmen efü 189,000, tona yojak efü 1,050,000 pomoe to thetacho. 8 Tssentsü oyuk-osen lio jiang ha ekhümki rangvaphen, Gershon jipo lo Levi tsüka Jehiel to tsao jina nhyakyata tsütsata evamo jilo thetacho. 9 Kyon jiang topvüna emathata OPVÜI thantacho osi ontena OPVÜI khosha thamo ji emathatacho. David mesao ha elümoto emathacho.
David na Potsow Thüngala
10 Kyon etssirhyuo jiang topvü mhadungona David mesao na OPVÜI thüngcho. Ombona heto phyocho, "OPVÜI e omotsüi Jakob Potsow, kümali ni thüngta thuka! 11 Nino tsüphoa osi etho ejüi, Pfütsson eli, ratsararia osi monkhüm lia. Limhalo osi oyak kva licho sana jiang topvü ni echi, nino mesao osi esapvüi tsüphoji. 12 Ejüeli topvü ni thüngina yiala; nina olan topvü ni etho ekhüngna sala; osi nina otsük akvü tsüphoa osi etho jüa kümthukcheta. 13 Hojitsükona e Potsow ena montsso nipia ni phfütsson mying ji thüngala. 14 "Tokhatola a osi a kyon na ni pio tvü ntia n lika, ntiotssole olan topvü ni thüngi na yantso, osi ena ni echi khi ni pilancho tae. 15 OPVÜI nina ntsia, ena lankon osi evüngki vana esüa eküm yakchiala osi e motsüi jiangha hojito vansi yicho. Etsüngon jiango khümcho yakchia yicho esüa totae yiala, osi ena echü ji n kachoche. 16 OPVÜI e Potsow, ena tsütsaelan shiang hetopvü ni khümphen tssoe ni ntho mying thüngtav hansi rothaka, tokhatola shiang hetopvü ni thüngina yicho osi ni echi tae. 11 Nina otsük akvü lümbüm chyui zeyiala to ana ntsia osi lümbüm simhemo jiang thüngi nina emathatala. Lümbüm ntssüngi ntsa lona ana shiang hetopvü ni pithaka, osi ni kyon shilo sanrhyui vamo shiangna kvütata emathata othan shiang hansi oro ni thanchosana ana hungthaka. 18 OPVÜI Potsow e motsüi Abraham, Isaak, Jakob, shiangna ni kyon jiang thüngi hetvü longtsüka lia vanthukcho osi ontena elümoto nilo longtsüka vasi vancho. 19 A tsoe Solomon ji lümbüm totona chokathuka ni khümphen etssov tsükona osi ana methaka vamo shiang ji ni yizüng jiang ephan tssothuka." 20 Jisülo jo David na kyon jiang ezocho, "OPVÜI nte Potsow thüngtava!" Jitosi etssikho ji totona OPVÜI thüngtacho, osi onte motsüi Potsow thüngta, ontena epyaktherae OPVÜI osi mesao ji yikrachitacho. 21 Ojyuato jo ontena othan tssoa ekümrümo tatsüngtacho, osi hojiangji OPVÜI lo khochaki pisi oso jiango kyon jiang pia tsothukcho. Ji ephalo ontena tssibung wothüng motsünga, olyubung wothüng motsünga to thaphensa lona rungtacho. Ontena züki ha oro thantacho. 22 Hoji nchukji ontena OPVÜI vanrhyu lona tsota yuta elümoto emathatacho. Ontena yenjo enioto Solomon ji mesao tssothukcho. Osi OPVÜI myingona ontena omboji thyujü nzüyia onte esapvüi tssothuksi pvüti jo Zadok ethüngchecho 23 Hoji tsükona Solomon na OPVÜI na soyingi evao vantsü jilona opo David echongchocho. Ombo ekhyo etoe mesae osi Israel kyon topvüna ombo yi engayicho. 24 Tsüphoe osi rasan topvüna osi David tsoe thanpoe jiangna ha Solomon ji mesao to khichocho. 25 OPVÜI na jipo totona Solomon tsükona ngangeheta emhukthukcho, osi OPVÜI na omboji Israel mesao topvü pono thüngchekao kümr thukcho.
David Yansa Yintssenina
26, Jesse tsoe David na Israel topvü pono 27 nzyu zhüro yansacho. Ombona Hebron lona nzyu tiying sacho osi Jerusalem lona nzyu thümro ethüm yansacho. 28 Omboji kyon na yikrachia esonlaniti chücho, osi ejüeli lia kyon na ombo yikrachicho, osi ombo tsoe Solomon na mesao ombo echungchocho. 29 David mesao motsü jo zenkhying otsük ethüm, Samuel, Nathan, Gad to na erani vacho. 30 Ombo kvüta etho licho osi ombolo ntio tssochosana, Israel lo ntio tssocho sana osi nkonjan ekhüngyan jianglo ntio tssocho sana jiang topvü erani lia.
Mesao Solomon na Ntsinran tsükona Randamo ji
1 David tsoe Solomon na ombo ekhüngyan yansav benkacho, osi ombo OPVÜI Potsow na ombo ndüngo vani emhukthao tsüphoa ombo kümthukcho. 2 Solomon na Israel kyon topvü thüngi ezocho, wothüng pono esopvüi osi nzoa pono esopvüi jiang thüngi, yansae jiang thüngi osi Israel topvü lona esopvüi jiang thüngi osi kitsük akvü lo eramo jiang thüngi thyutacho. 3 Solomon na ombo ephalo okho topvü erhümi sosi khümphen meta Gibeon phunglanro jilo wotacho; ntiotssole hojilo OPVÜI nri Moses na lijüngi na OPVÜI ndukphen ranki tssoji hojilo licho. 4 "Tokhatola David na Ntsata Thephen bakos ji Kiriath Jearim lona khi hanayi ombona hoji vaphen Jerusalem lo tssoe vao jilo vanthukcho." 5 Jitae mekna, Hur tsorüi Uri ji tsoe Bezalel na yongmen yonjak na thanphensa nsüngrüo jiha hojilo OPVÜI vanrhyu ranki jilo licho. Osi mesao Solomon tona okhoji to nzo tssoe OPVÜI khümtacho. 6 Süranki ji mhadungo na mesao Solomon na OPVÜI khümcho, osi yongmen thanphen sa jilona ombona erungthan ekhümrümo wothüng bena lüngthae hojiang totona runga thancho. 7 Hoji zümo Potsowna Solomon thüngi oro heto ezocho, "Ana ntio nipiv sana chona?" 8 Tole Solomon na heto Potsow ezocho, "Nina apo David thüngi nzan tsüphov vacho osi ombo thung Isreal lo mesao a tssothukthaka. 9 OPVÜI nina apo David thüngi phyochako jiang enhünga benthuka, ntiotssole nina ni kyon likoe hajang tata pono mesao a tssothukthaka, 10 Hoji tsükona enhungo ni kyon hetata shi pono esav tsükona nchümrizen a pia, ni kyon shiang emhokthao kyunga, ochona onte yansakhukvüla?" 11 Tole Potsow na Solomon ji heto janlancho, "Nina ni lümbüm na rüngoji ephan, osi nina thanpo ejüeli nchomo ji tsükona, osi myingthüng nchomo ji tsükona, mekana ni rijiang eküm nchomo ji tsükona osi harishi tia nchomo ji tsükona, tokhatola nina a kyon jiang yolo chiwo rheyi tssoa yansav tsükona nchümri osi ntsirang tae chomo ji tsükona, 12 ntsin ran osi nchümri ni piaka. Osi ana ejüeli osi myingthüng, ni vüngina sa yithako jiangna n lihancho osi ni sülo jiang na leha nliotvü ejüeli osi myingthüng ni pivka".
Mesao Solomon Etho osi Ejüeli Jiang
13 Jisüi jo Solomon na Gibeon lo khümphen meta OPVÜI vanhya süranki jilona khochoki Jerusalem lo yicho, osi ombona Israel esapvüi kümcho. 14 Solomon na kurü ritsso zotoro jiang tona rasan hojianglo esoeden to sanrhyuthukcho. Ombona kurü zotoro nzo taro mezhü tona, kurü rasan nzo taro eni to tssorhyucho, ombona ejomajo Jerusalem lo vanthukcho, osi jilo enhyo jiango yantsü thanpo jianglo vanthukracho. 15 Ombo esa yuta lojo shona osi janti jiangji longsha esüa kümcho. Osi Cedar tssüng jiang ji thüngphyothi tssüng tssüngshaesüa pvülyucho 16 Mesao thüngtssoe jiangna Musri tona Cilicia to lona metapoe kurü tssentssov ji ontena sayacho. 17 Elani Ejip lona ritsso zotoro jiang metapoe yitokvü jiha onte khe tssothukcho, ontena Hittite tona Syrian mesao to jiang thüngi kurü tona ritsso zotoro to jiangji ritsso zotoro motsüngalo janti rang nzo tirok tona kurü motsüngalo nzoasi tinyan ren to shithukcho.
Ekhümki Etssov ji Methak Süthak
1 Mesao Solomon na OPVÜI khümphen etssov tsükona tona ombo tsükona mesaki to etssov methakcho. 2 Ombona hahan otsük wothüng ekha-tiying, phunglani olung erov otsük wothüng ekhatiza tona hojiang topvü ezeiden otsük wothüng ethümsi nzo tirok to ethüngchecho. 3 Jisülojo Solomon na Tyre lo mesao Hiram thüngi heto yiyencho:" Nina apo David thüngi khyingta ombo evanki etssov Cedar tssüng hanthuko ji esüa a thüngi ha hojito tssoa. 4 Ana OPVÜI a Potsow yikrachiv tsükona khümphen ki tssoala, osi hojijo ntho meta kvülo shina a tona a kyon to jiangna tssütsse rhüm mhom runga osi ena ntho hümri than jiang ji n tümjakna ombo piphen tssov, elani enya mmyu akvüto osi ntho emung tsüngono ha to ombo thüngi erungthan pia chothan tokhu, osi ntho tsüngon thanpo jiangto e OPVÜI Potsow yikrachia khümphen tssov. Shiang heto etssov tsükona ombona Israel kyong jiang thüngi yizüng picho. 5 Ete Potsow jo Potsow thanpo jiang topvü lona tsükata, hoji tsükona ana tssovsa vamo ki jijo tsüphov tssovka. 6 Tokhatola ombo oyak shina tia nvanchyuo tera, tona ombo vanchyuo tüv ki ochona tssoyivla? Erungthan piphen yaka ana kvütoli ombo ki tssovla? 7 Hoji tsükona nina kyon, shona, janti, yongmen yonjak osi yonjak jothi, sümüngu, sümyon osi ejümsü tükthi, otsung olunglo thenkathi tüv rothuka tonat ontena apo David na a picho Juda osi Jerusalem lo tssothi vanrao shiang nzo tsovka. 8 Lebanon lona Cedar, Cypress osi Juniper tssüngpvülong ha a hanthuka, ntiotssole nina Lebanon lo otssüng rhüthi elüm vana to ana ntsia. 9 Ni phajae jiangna a phajae shiang nzo elhi tssoa oki jilo ethev otssüng rhüthi rhüthukvüka, ntiotssole ana tssov vamo ki jijo tsüphov osi emhukthav tssov. 10 Ni phajae jiang tsükona otssüng etan osi erhüi pivka, osi ohüm chencho etük wothüng mekyu, omüm checho etük wothüng mekhyu, tssüngthijü etükpvü wothüng mekhyu tona thyujü etükpvü wothüng mekhyu to pivka." 11 Tole Tyre lo mesao Hiram na heto yiyenta kako erani Solomon hanthukcho."Ntiotssole OPVÜI na ombo kyon jiang nzancho lona onte pono mesao etssov ni ethüngchechoka. 12 Hiramna heto ha ezocho, Israel Potsow ochona oyak osi liko joyingcho sana! Ochona David mesao ji otsoe kichuk ejüi pichosana, tssenche ziche osi engathe eli tsoe pichosana, ochona OPVÜI khümphen osi ombo mesaki tssovsana hotvü vanthuko ji mying mmhaithuka. 13 Ana tssothimori kyon tsüka osi engathe eli Huram to tsaoji rothukala. 14 Oyojo Dan jipolo khanyae nchyua, osi ombo opojo Tyre kyon. Ombo shona, janti, yongmen, yonjak, olung osi otssüng to jiang lona tsütsaelan chiyithukvü tssothia. Ombona sümüngu, ejümsü elani sümyom osi sünyipvü tvü ha tükthia. Elani ombo otssüng olungo thenkathi osi ntio pyonlan etssov ombo ezoa sana jiang topvü tssocheta. Osi ochona nipo mesao David tsükona elhi tssoa vanchosana jiang nzo elhi ombo tssothuka. 15 Hoji tsükona enhungo nina echümchako ji esüa ohüm, omüm, thyujü osi tssüngthijü to jiang a hanthuka. 16 Tona Lebanon phung lan jianglo nina Cedar tssüng ethev lio jiang topvü dani khüng tsütae jümangina Joppa jana ni pfüchokchi yivka. Tona hojilona nina Jerusalem mi hansi yichev".
Ekhümki Etssov ji Benkatala
17 Jitosi mesao Solomon na Israel lo metapo kyon vamo jiang topvü wokha khicho, opo David na wokha khio ji esüa wokha khicho. Tole metapoe kyon tssotsüi wothüng nzoasi tinyan ethümsi nzo tirok khachecho. 18 Hojiang lona owo wothüng ekha tiying jo ohaehanden, wothüng ekha tiza jo phunglani olung eroeden, elani wothüng ethümsi nzo tirok jo selangotünga elhi jiang mmhona tsswothukvü tsükona ethüngchecho.
1 Solomon opo mesao David na khümphen ki etssov tsükona meta etssyukae vathakcho osi hoji jo Jerusalem meta lo Moriah phunglan, kvülo shi Jebusite kyon Araunah litsenphen tssochosana hoji. 2 Mesao Solomon na mesao kümi ombo yansa ji benkasi nzyu mezhüsi choro enioto jilo kitssoji benkacho. 3 Mesao Solomon na OPVÜI kiji hetera etssov etsikoncho, esi metre mekyu tiying osi etsüi metre tukvü to. 4 Ekhümki chungi mhadungoe ekhaka ji ndüngo chungchak jijo oki ji etsüi metre tukvü elani ntssoni metre tinyan mezhü, osi hoji echung ochungo jijo shona na eyuki khicho. 5 Cedar tsüngna chungsi elani hoji poni shona mmhom na phyonkae khicho, osi hoji elani mitssüng tona shenzhü esüa opyon nsüngrüka toli khicho. 6 Osi mesaona okiji tssentsü long ezehungthav tüv thei merithukcho, osi shona jiangjo Parvain metaena hansi yicho. 7 Hojito ombona oki ji shona na renzhüi khicho, durhyu nsü jiang, mmhataphen jiang, echung jiang, kipüng jiang topvü osi echung jianglo jo lanben echo mpao kisü thenkaracho. 8 Chungchak ochungo jijo nthotso meta to tsa jiha tssokacho, hojijo ekhümki ji nzoe tera esüi metre tukvü tssocho, nthotso metaji echung jijo shona seri wothüng mekyu pomoena eyukcho. 9 Eshen kyo nsüngrüv tsükona shona seri chiso tajoa khicho, osi echung omhawoe jiha shona na eyuki khicho. 10 Nthotso meta jilo jo ombona otssüng na lanben eni nsüngrüi shona eyukae thecho. 11-13 Hojilo kipüng lanji tonchio osi oni zechitao phanthi vancho nsüngrükae khicho. Oniata na echo enini mpacho, osi echo motsüngalo esi metre enisito nsüngrükacho. Osi oni echo jiang ji ephyanche chungchak ji lungona evoktae hojina chungchak tsungkhoa ta lo kyimchung jiang eyukjana tvü nsüngrüi khicho, osi woniata ephyantsüa na metre tukvü tssocho. 14 Osi zonchaksü jijo ombona ejüm tona müngzhüv to pyon, elani sünyipvü myonshiv to poni lanben kisü tükae khicho.
Yongmen Yonjak Durhyupvü eniji
15 Oki ji mhadungoe ombona durhyupvü eni motsüngalo metre taro mungosi chiso ntssona osi durhyu kiven jiango ntssoni metre eni poni tvü nsüngrüi khicho. 16 Ombona shentazhü yuko esüa joe durhyu jiang poni yisicho, osi tsarümthiphen kisü nzo bena nsüngrüi shentazhü jianglo jokae khicho. 17 Ombona shentazhü yuko esüa joe durhyu jiang khümphen mhadungoe chümi khicho, motsünga jüjowoe, motsünga jükiwoe to: Jüjowoe durhyu jijo ombona Jachin to tsa, Jükiwoe durhyu jijo Baaz to tsacho.
Ekhümki Chungi Tsakasükalan Jiang
1 Mesao Solomon na yongmen yonjak na thanphensa roncho, osi hoji etsüi esi metre tokvü elani ntsoni metre mezhüsi chiso to tssocho. 2 Elani ombona yongmen yonjak na jüjen nkona tüv motsünga ejungi metre eni lona tajoa elani hoji nkhon motsünga lona motsünga jo metre mezhüsi chiso aria elani hoji nkhon rhüa etsia na metre taro ethüm poni to nsüngrücho. 3 Osi jüjen ji nkhon opomo ji rhüa mangsübung kisüna opyon nsüngrükae nkhon ji renchokchia enini na renkae khicho. 4 Osi jüjen jijo tsibung kisü taroeni hapohowoe zechokchio theo jiang mankvüi ekachicho. Tsibung kisü jiango ethüm thüm na kholok tssoe limha nkem mezhü jiang topvülo zechiwo nsüngrücho. 5 Jüjen ji echhi jo khezüm tera chhia khicho. Hoji nkhon jo Ophfü nkhon esüa tüv osi woropangdi thera kisochoia vancho esüa opomoe ephyanchokchi khicho. Jüjen jijo etükpvü wothüng rokro ethe tssocho. 6 Elani ontena jüvakokro taro nsüngrülancho, osi mongo jo ekhümki jina jüjoe zechochio, elani mongo jo jükiwoe tonka chiwo to vacho. Hoji ango ekümrümo erungthan epio jiang etssüphen tsükona vacho. Osi jüjen tsüphov jilo ojü jijo pvüti jiang na tsükaphen osi tsütsatsülüngphen tsükona to vacho. 7-8 Ovüngthüng na thenhyae elio ji ephan ontena milondung ha shona na taro jocho osi khümphen chungi mongo jo jüjowoe elani mongo jo jükiwoe to vacho; hojito mezü ha taro nsüngrüi milondung jiang nzo otsa tsungkho vacho. Ontena shona phikuk ha nzoa joe vacho. 9 Ontena pvüti jiang tsükona chungchak, tsüpho ji tona hojiang hankhan to nsüngrüi jiang poni yongmen yonjak eyuka toli khicho. 10 Osi jüjen jijo ontena ekhümki ji chungi jüjowoe engrhewoe nken jilo vacho. 11-16 Huram na opfü, live thanphiphen tona jüpvü to jiang ha nsüngrücho. Hojito Hu ram na ombona Solomon thüngi OPVÜI ki jilo ethelan etssov tsükona phyochako elhi shiang heto thakcho. durhyupvü eni ji jüpvü esüo durhyupvü poni kiven eniji Durhypvü kiven jianglo jüpvü jiang elhüp Shenzhü jiang lo osi durhyupvü jilo kiven jiang Osi kiven eni jilo tsarümthiben nzo mezhü khyingo jiang kiven motsüngalo tsarümthiphen nzo eni to khi durjyupvü eni jiang lo opyon nsünrükao jiang, Zotoro taro jiang Jü-vakuk taro jiang Jüjen ji ndungkao tsibung taro eni jiang durhyu, kheya, osi live thanphiphen tona tsakalan thanpo to shiang topvü Huram tsiyanmorithi jina yongmen mmhona ntssacho tüv khi mesao Solomon na phyoe elio ji ephan nsüngrüi OPVÜI khümphenki jilo vacho. 17 Shiang shi ji mesao na Sukkoth tona Zereda to yutalo Jordan hayi jilo vacho. 18 Solomon na shiang hetopvü elümoto tssona nsüngrüi thecho, hoji tsükona yongmen yonjak ji mmyingi kvüta sana nzichev sicho. 19 Hojito mesao Solomon na OPVÜI ki tsakalan topvü nsüngrücho: Shona than phen sa ji, OPVÜI vanrhyu hümri vaphen saro jiangto, 20 Sekae vao ji ephan milondung jiang tona milon jiang to shona njüm na khümphen nthotso chungchak ji mhadungo kia vanthuku tsükona; 21 Elani merithukphen thera jiang, milon jiang, mmyaphen to shona njüm na nsüngrüo jiang; 22 Miron chakphen jiang, jüpvü jiang, orhüm mmhom thephen jiang, rüngtsophi shona njüm na nsüngrüo jiang hetopvü shona njüm taena nsüngrüi vacho, osi ekhümki nthotso chungchak jilo rhovophen kibüng jilo khara ji tona ekhümki ekhaka ji kibüng hankhan jiang khara topvü shona na khüpkae khicho.
1 Hojilo Solomon na OPVÜI ki etsov elio jiang topvü thak cho. Osi opo David na nthoche evao tsütsailan jiang topvü osi shona janti tona oyo-opvü topvü OPVÜI ki ejüeli vapheni varacho.
Ntsata thephen Bakos ji Khümpheni hansi oyi vacho
2 Jisülojo Solomon na Israel lo eramoeden topvü tona pvüjilo eramoe osi Jerusalem lo Israel wopan jianglo kvüri jiang to OPVÜI ntsata thephen bakos ji Zion lona David yantsüi khümphen jilo hansi ewov tsükona tsarhyucho. 3 Tole onte topvü na ranki tokhu ji yutalo hojilo sanrhyucho 4 Osi kvüthüng esopvüi topvü hojilo sanrhyucho sana Levi jiang na ntsata thephen bakos ji ejümkacho. 5 Osi ekhümki jilo hansi wocho. Osi pvüti tona Levi to jiang na OPVÜI vanrhyu süranki ji tona jilo tsütsailan thanpo to jiang ha hansi yicho. 6 Jitosi Mesao Solomon tona jilo Israel kyon evamo jiang topvü etsirhyui ntsata thephen bakos ji mhadungo na olyu osi tssiden n khacheo tata othan pitacho. 7 Hoji sülo jo pvüti jiang na ntsata bakos ji hansi oyi ekhümki ntholo ntsontso lanben echo khyinga tüv kisü elio jilo vatacho. 8 Ntiotssole Lanben echo jiang na ntsata bakos ji tona ejümphen khora jiang to poni ephyanchi vanchthukcho. 9 Khora jiang elümoto sipho jina ochona nthocholo nthotso meta jilo mangasana jina jo tondüng hungchicho, tokhatola thanphoe najo n hung. (Khora jiang nchüng jana hojilo lia) 10 Ntsata bakos jilojo thanpo ntia n jü tolea Moses na longpyak eni kümoe Sinai phunglani na thecho sana jiang tae, hojijo Isreal jiang na Ejip metae na chiyiathüng Potsow na Moses thüngi epio ji.
OPVÜI Pfütsson ji
11-14 Pvüti jiang na ntho meta jilo chiyiale jilo vancho pvüti topvü na jiang okho ka to mek na onte topvü na onte bobo nthocheta vantacho, Levi khenden topvü Asap, Heman, Jeduthum, elani onte tsoe roden osi opanden sünyipvüsü pipotacho. Osi ekhophiphen yonjakphi, tatara tsüpho terio benria bentasi tatara emhüi pvüti jiang onte nzoasi mekyu na dentacho. Osi tatara emhüi tona khenden kho khenkhüphen olan olan eben to jiang na onte owon benrita heto ejenkachia OPVÜI montso pia dentacho: " OPVÜI thünga, ntiotssole ombo mmhona osi ombo vanrhyuo nzan jijo kümali." Tole pvüti jiang na ekhümki jilona khoe yi tona esüngaro tae na OPVÜI kiji OPVÜI vanrhyu wondang emhenchü jina rümzhücho, osi hojito ontena ekhüm elhi ji n tssochev sicho.
Solomon na Kyon Jiang Thüngi Oyi Nsamoji
1 Mesao Solomon na randancho, "OPVÜI nino elok echiv chungi osi emüngi vanala. 2 Enhungo ana oki mmhom ni tssoyithaka, ni kümali kümali evanki ni tssoyithaka." 3 Jitosi mesao na khophi Israel jiang zechiwo mangcho osi Israel topvüna phanthi vancho. 4 Ombona heto phyocho, "OPVÜI Israel Potsow mying thünga! ochona apo David thüngi heto ezoa phyochak benthukcho sana, 5 'Ana a kyon jiang Ejip meta lona sochuko ji tsüngono na benkae ana Israel meta kvülo ha a khümthukvü tsükona meta n tssyukahan, osi ana a kyon Israel jiang swothukvü tsükona kyon ochia n thüngchehan. 6 Tokhatola enhungo a khümphen meta tssothechiv tsükona Jerusalemi etssyukathaka, osi David, nina a kyon jiang pono savka.' " 7 "OPVÜI Israel Potsow ki etssov ji apo David lümbümo jücho, 8 Tokhatola OPVÜI na apo David ji heto ezocho, 'A myingona oki etssov ji ni lümbümi jüwo jijo mmho na, 9 tokatola nina a ki tssov meka, tolea nina tsokying ocho vamsana jina a myingona oki tssovka.' 10 "OPVÜI na heto phyoe vao jiang topvü bencho, ntiotssole ana apo echungchothaka osi Israel van tsü jilo khukthethaka, osi OPVÜI na phyoji esüa OPVÜI Israel Potsow khümphen tssothaka. 11 Osi ana OPVÜI na ombo Ntsata Israel thüngi methako eramoji thephen Bakos ji ekhümki vathaka."
Solomon na Nthoche Randanala
12 Jisülo jo Solomon na Israel jiang topvü mhadungo na thanphen mhadungo mangi ombo khe jiang yonkachia randancho. 13 (Solomon na yongmen yonjak na osa roncho, esi khejü mungo, etsüi khejü mungo, ntssoni khejü ethüm to nsüngrüi chungchak jilo vacho osi ombona jilo phanthicho. Jisülo jo ombona Israel topvü mhadungona nkhuktsencho osi ombo khe jiang Potsüwoe rükachi heto radancho.) 14 Ombona randancho, "OPVÜI Israel Potsow, ni esüa Potsow oyaki osi limhae kvüloha n van, ni nri ochoangna onte lümbüm totona khochaki ni eshüpo sanphia sana jiang thüngi longtsükaroa ni ntsata jiang benthukala. 15 Nina ni phajae apo David thüngi phyochako jiang benthukcho. Nina ni püngina phyo jiang ni khena nchüng benthukthaka. 16 Hoji tsükona OPVÜI, Israel Potsow, nina apo David ni phajae thüngi heto phyoe vaoji benthuka. Yuta topvü lo ni tsoronichen jiang yolo tsükanajo mesao tsoe Israel jiang savka. Ontena ni shikhfü jiang ntangshona nina a shikhfü benphiato ontena a shikhfülo vamka. 17 Hoji tsükona, OPVÜI Israel Potsow, nina ni phajae David thüngi phyoe vao jiang enhünga benthuka. 18 "Tokhatola Potsow na likoe kyon nzo vam alo? Zeta oyak topvülo ntssontso jina lia ni vanchyuv mek, tona ana tsso ki shina kvütolyui ni vanchyuv la? 19 Tolea, OPVÜI a Potsow, ni phajae na randana jonjiwoji engayia, ni nri na ni mhadungo kya radamoji engayia, 20 tona ni mhyik jina zümo eng ni ki jilo zechi nrhüa vani nina phyo ji esüa ni phajae na oki shi thüngoe zechia randana thüng engayiv. 21 Osi ni phajae jina, osi ni kyon Israel jiangna oki shi thüngoe zechia randana engayia, ho OPVÜI, Potsüwoe ni vanphenina engayia osi nina zoana nlan esiyia. 22 "Kyon ochona sana ombo phinakishüm thüngi mmen tssochei ombona echümo tssoe oro oki shilo ni thanphensa jilona echüma tssona, 23 nina ni vanphen Potsüwoe na zoe elhi tssoa, ni phajae jiang oyi tssoyia ochona nlan tssoana nlan ji ombo kvüri lo tssothuksi ocho ntsacho sana jijo ombo ntsanrük ephanina yantso pia. 24 Ni kyon Israel jiangna mmen tssoe onte rina onte khyona, osi ontena ni myingji yikrachilana ni thüngi elani rona osi ekhümki shilona ni thüngi jonjia randana tssona, 25 nina Potsowoena zoe ni kyon Israel jiang nlan siyia osi nina onte osi onte motsüi jiang pio meta jilo sosi yilana. 26 "Ontena ni mhadungo mmen tssoe, Potsowoena eryu n jov khani sina, osi ontena lümbüm khophi khümphen shi zechiwo randana tssona osi onte mmen lona kholani yia tssona, 27 nina Potsowoe na zoe ni phajae Israel kyon jiang randan ji engayia nlan siyia osi ntiojo elan sanaji etssov onte püngnoa. Tothakana, OPVÜI, ni meta kvümoe ni kyon jiang thüngi nina kümali onte echi etssov pichosana meta jilo eryü jothuka. 28 "Meta jilo otssi vara lina mekana nochonori osi vara lia tssona mekana otssüng odung erüm yina osi ezhü mpung n mhon veni yolan halan roe sia tssona mekana khomung rumi azüm yina, mekana onte rina yantsü onte hayia tssona osi kvüthüng ontelo nochonori osi ezüp liana, 29 onte radan engayia. Ni kyon Israel ochona sana ethojak nongra lona ekhümki shi thüngoe onte khe rüchia randana tssona, 30 onte randan engayia osi nins Potsüwoe ni vanphenina nlan onte siyia. Ni taena kyon nchümri osi lümbüm jiang ntsia hoji tsükona otsük akvü thüngi ombo elhi man ji ephanina janlana, 31 to tssona ontena nina e motsüi jiang pio meta jilo evanthüng nandang jo ni kyuchia niyi enga vamka. 32 "Hoji esüa, ni kyon Israel meko tüv jipopoe na ni mying tsüpho ji yana ekonina roa tssona, ni ethojü kheji osi elonchov yonchio kheji yana rona, 33 onte randan engayia. Nina Potsowoe ni vanphenina engayia osi. jipopoe jina chomoji bencheyia, hojito tssona limhalo kyon topvüna ni mying ji ntsi ni kyuchivka, ni kyon Israel jiangna ni kyuoji esüa osi ana ni tssoyiwo niki shijo ni khümphen tssocho to ontena ntsivka. 34 "Osi kvüthüng nina ni kyon jiang yizüng pia onte ri jiang thüngi rotalo wothuka sana ontena shilona tssolea, shilona tssolea, yantsü shi zechia ana ni tssoyiwo ekhümki shi thüngoe zechiwo ni thüngi randana tssona, 35 onte randan engayia. Osi nina Potsüwoe na onte randan ji zoe ekhyo onte pia. 36 "Osi kvüthüng ontena ni mhadungo mmen tssoa sana osi mmen n tssoe ochia n van osi nina onte thüngi lüm tsuki onte ri khelo thechicho tssona, osi onte ri jiangna onte rhümae morantsan tssoa meta ekoni mpa sosi onte yicho tssolea, 37 ni kyon jiang randan jiang engayia. Tokhatola ontena meta ekonina khophi ni thüngi randana tssona osi onte mmen osi n mhon jiang nchümchie phyochaka tssona onte randan jiang engayia O, OPVÜI. 38 Osi oyam metaena onte lümbüm topvü theta khophi osi nina onte pio meta shi thüngoe zechiwo randana tssona osi yantsü shi thüngoe mekana yantsü shilo ni myingona ana oki tssothako shi thüngoe zechiwo randana tssona, 39 tona nina Potsowoe ni vanphenina onte jonji randan jiang engayia onte mmen jiang siyisi onte ethelan jiang bencheyia, osi ni kyon na mmen tsso jiang siyia. 40 "Enhungo A, Potsow ni myik jiang chonchi e zekata osi oki shilona randamo jiang engayia. 41 OPVÜI Potsow, enhungo phanthi, ni osi ni etho chekav Ntsata Bakos ji nzo ekhümki shilo rheyi kümali shilo vana. Ni pvüti jiang onte elhi jiang topvülo mmhayithuka, osi ni mmhon ni kyon jiang thüngi epio ji yakchia ni kyon topvü emathathuka. 42 OPVÜI Potsow, nina ethüngcheo mesao ji khoe tisia. Osi nina ni phajae David nzamoji nchümcheta.",
Ekhümki Nthocheo ji
1 Solomon na ombo randan ji thakale, Potsüwoe na omi joroe erungthan osi othan jiang topvü rungi sicho, osi OPVÜI phfütsson wondang na khümphenki ji pying cho. 2 OPVÜI phfütsson wondang na ekhümki ji pyingo jina pvüti jiang na oki jilo n rhovochecho. 3 Isreal kyon topvü na oyaki na omi joroji osi OPVÜI phfütsson na khümphen pyingo ji hungale, ontena kitajoe onte mha jiang nkhümtherae OPVÜI khümta OPVÜI montso pia heto pyotacho." Ntiotssole OPVÜI jo mmhona osi ombo n senphio nzan jo nchüngkhon liala." 4 Jitosi mesao tona kyon jiang topvü nzo tssoe OPVÜI erungthan pitacho. 5 Solomon mesao na OPVÜI thana tssibung wothüng mekyusi eni olyu wothüng nzoasi mekyu to khümshümta than tssoa thantacho. Hojito mesao tona kyon topvüto tssoe OPVÜI kiji nthochetacho. 6 Pvüti jiang na onte elhi tssopheno zatacho, osi Levi jiang naha onte zechiwo vani David na OPVÜI thüngathüng echi nsüngrüi vao khendenphen jiang theta OPVÜI denkatacho, "OPVÜI ntümjak nzan jo nchüngkhon liala to dentacho!" Ntiotssole onte benka elhi ji khi David na othan pia na hojito ontena okhen dentacho; osi onte mhachunga vamo pvüti jiang na ha tatara khütacho, osi Israel kyon topvüna tothüng jo phanthirümcho. 7 Jitosi Solomon na OPVÜI ki ji mhadungoe kitajo tsüpho jilo chungjak longjüng ji nthochecho osi hoji lona mbüm na erungthan, otssok omum than osi khümshü mta than jiang lona ethyu jiang khi thancho. Hoji jo ombona yong men sapang nsüngrüo jilona etham n tssomo jina hapo jilona thancho. 8 Hoji yutalo Solomon tona Israel topvü, Hamath kibüng lona benkae Ejip zhükhuro erü ji nandang kyon sanrhyui okho tsüphov nzo tssoe tsüngon tiying ranki tokhu khitacho. 9 Ontena thanphensa ji nthoche elhi tona tokhu to tsüngon tiying khitasi tsüngon tizao to jijo longshita sanrhyu tsüphov khitacho. 10 Choro tiyingo to jilo tsüngon mekyu ethümo to jilo jo ombona kyon jiang oki yirathukcho, osi OPVÜI na David tona Solomon to thüngi ombo mmhon ji ejüa osi mmha onte pio ji tsükona kyon jiang ji ematha longshia osi lümbüm büka yithukcho.
Potsow na Elani Solomon Thüngi Nduktala
11 Hojito Solomon na OPVÜI kiji tona mesao kiji to, ntio tssov methakcho sana ji ephan lümbüm büka thakcho sülo, 12 OPVÜI na Solomon thüngi emüngo oro ndukcho. Ombona heto ezocho, "Ana ni randan jiang zothaka osi oki shiji a echi osi othan a piphen to khichothaka. 13 Ana Potsow khani eryu n jwothukvü siana, osi khomung jiang rothuka benro niro jiang tsorothuka tssona, mekana a kyon jiang yolo nochonori osi vara rothuka tssona, 14 osi a kyon jiang na onte elhi n mhon jiang lona khophi a thüngi randana tssona tona ana Potsüwoe na onte zoyiv, osi onte mmen jiang nlan siyisi, osi onte metaji pvülyua kümlanthukvü. 15 Enhungo ana khümphen shi nhyakyata vam osi a thüngi randamo jiang engayiv tsükona methaki vam, 16 ntiotssole ana oki shi khyochei nthochei nchüngkhon to a khümphen tsükona vathaka. Hoji tsükona ana yuta topvülo nhyakyata osi nkoha vam. 17 Osi nina nipo David na tssoji esüa longtsüka lia a benkata, a shikhfü jiang enga aha yizüng nipio jiang topvü ephan tssoa tssona, 18 tona ana nipo David thüngi ni tsoronichen na yuta topvüto lo yansae tssoa vovka to phyochaki evao ji benthukvüka. 19 Tokhatola ni osi ni kyon jiang na ana shikhfü yizüng ni pio jiang n benphia tssona osi thanpo Potsow khüma tssona, 20 tona ana ni pio meta jilona khi nisiv, osi ana nthochethako ki shilona nchünkhon to a khümvü methako jiha siraki siv. Osi meta shiji kyon na motsü rütaphen mekana tssakn konga ejyusonphen kümthukvüka. 21 "Osi enhüngajo topvü na yikrachia vana, tolea oki yakchi otsük akvüna emhuka heto phyotavka, 'OPVÜI na meta shilo osi oki shilo ntioli heto tssothukcho ato?' 22 Tona kyon jiang na heto janlam, "Ntiotssole ontena onte OPVÜI, ochona onte motsüi jiang Ejip metae na sochokcho sana ji mhechoe siwo jina, osi potsow thanpo jiang yani khümta hojiang benkatao jina. Hoji tsükona OPVÜI na onte pono n mhom shiang heto rothukcho.' "
Solomon na Elhi Tssorhüpo Jiang
1 Solomon na OPVÜI ki tona ombo mesaki toji nzyu mekyu khia tssocho. 2 Huram na ombo pio yantsü jiang tssochoe Israel kyon jiang hojiang lo vanjüng tssothukcho. 3 Solomon na Hamath tona Zobah to khyoe khicho. 4 Ombona lijüng Palmyra yantsü ji epicho. Osi ombona Hamath lo ejüeli hanthephen yantsü tsso jiang ha tssocholancho. 5 Ombona Bethoron omhawoe jiha Bethoron oküpo ji woniata tssocho, osi yantsü jiang pikhfü, khanphen osi nrhangzhü thecho, 6 osi Balath yantsü tona ejüeli vaphen yantsü thanpo ombona lio jiang topvü, osi ombo ritsso zotoro vaphen yantsü jiang topvü, elani ombo kurü rasan yantsü jiang topvü, osi Solomon na Jerusalem lo, Lebanon lo osi ombo ekhüngyan chungi yantsü jiang topvü tolo ntio tssokachi lichosana jiang topvü tssocho. 78 Hittite, Amorites, Perizzite, Hivites, tona Jebusite to kyon Kanaan lo vamo jiang tona onte echü süi tsoronichen meta jilo vamo jiang osi Israel kyon jiangna onte meta ji khiyiathüng n chüthukvü vanthuko jiang hetopvü Solomon na khüngkata elhi etssoe kümthukracho, osi hojiang tsoroni chen jiang ji nchüng tsüngon jana ezi ekümo vanta vana. 9 Israel kyon jiang jo khüngkata elhi n tssothukcho, tokhatola rasanden, tsüphoeden, zotoro esoeden, osi kvürü rasanden to tssothukcho. 10 Hojilo oki olan olan jianglo elhi khüngkata etssoe jiang ezepvüi won te nzo enisi tinyan vanthukcho. 11 Solomon na ombo engh Ejip mesao otsolov soa evamoji, David yantsü lona sosi oyi ombona ompvü ki tssoyiwo jilo sothecho. Om bona' phyocho, "Ompvüna Israel mesao David mesaki jilo vam meka, ntiotssole meta kvülo Ntsata thephen Bakos ji vata sana jijo ntho." 12 Hoji sülojo Solomon na ombona ekhümki etssovo ji hapholo thanphensa jilona othan jiang picho. 13 Osi Moses shikhfü lo lio ji ephan ombona erungthan jiangji ntho tsüngon jiang akvülo, esanmung jiang, chothan tokhu jiang, nzyu ochümi tokhu jianglo, vümhi n theo hümri tokhu, liri tokhu, osi ranki tokhu jiang topvü tolo erungthan picho. 14 Opo David shikhfü lo lio ji esüa ombona pvüti engakvü elhi jiang, osi Levi ochoana pvüti jiang elhilo nzanchia okhen denia to tssocho sana jiang nlan nsüngcho, osi kibüng akvü enhyuang jiangha engakvü onte elhi chungta jiang topvü Potsow kyon David yizüng ephanina tssothukcho. 15 David na pvüti osi Levi jiang thüngi ejüeli hanrhyu pheni osi thanpo elhilan jiang etssov ezoji ephan ontena benria tssotacho. 16 Hojito khümphen ji soying lona benkae ethak nandang Solomon elhiji yuta shilo tssoracho. Hojito lyui OPVÜI khümphen kiji ochüm echeta thakcho. 17 Hoji sülojo Solomon na Edom metalo Agaba jünken jilo orhong esanphen jilo Eziongeber tona Elath to thüngi wocho. 18 Tosi Huram na ombo phajae khi orhong tona ombo phajaeden ojüi sanphithio tüv to Solomon thüngi wothukcho. Tole ontena Solomon tsüphoeden jiang nzo Opher metae wocho osi shona seri wothüng taro mungo poni hansi oyi Solomon pitacho.
Sheba lo Mesali na Solomon Janthechilo Eroji
1 Sheba lo Mesali jina. Solomon ntsinran emhokthav ji yivon zoale ompvüna sürüi khosha sosi Ut lo tsankae mozhürhüm mmhom tona shona osi tsentsülong to hanthuksi Jerusalem lo Solomon ji, engao ekhüngu khi ojang tssoe zelo rocho. Ompvüna oro Solomon ndukale ompvü lümbümi ntio engao nchüma vancho sana topvü Solomon engacho. 2 Tole ompvü na engao jiang topvü Solomon na janlankhancho osi Solomon na n janlancheo ntia n licho. 3 Sheba mesali na Solomon ntsinran osi ozen okyak jiang zoa ombona oki tsso jiang hungale. 4 Ombo tssisalo etsoyu jiang, ombo küpo tsüpohoeden jinag khothephen jiang, ombo phajae jiang tona onte pipo jiang, ombo etsoyu elon jiang osi onte pipo jang, ombona erungthan OPVÜI pio jiang, shiang topvü hungale ompvü ji echenmhuka emhoktsüngi sicho. 5 Ompvü na mesao ji ezocho, "Aria a metae na ni ntsinran osi elhingo tsükona zoa jiang topvü, 6 a mhyikna oro nhungthüngjo a n lungtsükhuku vancho, tolea ni myingthüng chiso tia ana n zov vancho to ana ntsithaka. Nino kyon na phyotao jilona ntsinrankata. 7 Ni phajae ni ndüngo vankae ni ntsinran zonrhüa vamo jiango kvüta mmhachoato! 8 Nipvüi Potsow mying thünga, ochona nilo emathata ombo mesao ni tssothuka ombo vantsü lo ni khukthethuka sana ji mmhayithuka! Ntiotssole ni Potsow na Israel nzanala osi onte khi eküm echung yantsü soyingthuk hungala, hoji tsükona ombona ni ji mesao ji tssothuki ntsanrük osi elan ni soyingthukala." 9 Jitosi ompvü na shona rang seri wothüng mezhü, mozhürhüm khosha tona tsentsü oyok-osen lung to hamo jiang ombo picho, osi Sheba lo mesali na Solomon pio jitüv mozhürhüm kvüloha n licho. 10 (Jitae mek, tolea Hiram phajaeden tona Solomon phajaeden to ochoang na Ophir lona shona hansi rocho sana jiang na tsentsütsüng Juniper tona tsentsü oyok osen toha hansi rocho. 11 Osi mesao Solomon na otsung ji khi OPVÜI ki phopha tona ombo mesaki toji lo thecho, osi khenden jiang khendenpvü rhüphiphen jiang lo shenzhü thecho. Osi Juda lo hojitüv tsüng kvüthüngha n hunghancho.) 12 Solomon mesao na Sheba lo mesali jina ntio chokatana topvü picho, ompvü na hansi ro jiang tongche epio jiang ephalo ompvü na chomo jiang topvü ompvü picho. Jisülo jo ompvü na ompvü phajae jiang sosi kholani ompvü ki Sheba metae yicho.
Solomon Ejü eli osi Ntsinran
13 Nzyu akvü Solomon na Shona seri wothüng mekyusi ethüm hungcho, 14 Shijo shishoe jiang na tsenkhaya pio jiang ephalo tssocho, osi Arabia lo mesao topvü tona meta jilo yansapvüi jiang topvü na shona janti ombo picho. 15 Solomon na shona ji khi otsung tsüphov nzo eni jocho, osi otsung motsüngalo shona tsüng seri tiying theta jocho. 16 Elani ombona shona na otsung teriv nzo ethüm jolancho. Osi otsung motsüngalo shona tsüng seri ethüm theta jocho. Osi mesao na otsung shiang Lebanon enungi oki jilo vacho. 17 Osi mesao na vantsü ha tsüphov shancho, osi hoji poni chiso jo sotsüho na eyuk osi chisojo shona njüm na jokae khicho. 18 Osi vantsü jilo phopha ekho tirok shankacho osi shona na epyankaphen shankacho, osi hayi hamen khesa shankacho. Osi hingho kisü pondünglo shankacho. 19 Osi phopha khokav akvü hingo eni ren hayi hamen taro eni shankacho. Yantsü kvülo naha hoji esüa tüv n shankahancho. 20 Solomon mesao theyupvü topvü tona Lebanon enungki jilo thetso-theyupvü topvü shona njüm tae na jocho, osi Solomon echungo jo janti jo ntia mekcho tüv tssocho. 21 Ntiotssole mesaorhung jiang tona Huram phajae jiang to na nzyu ethüm lo yenjoa Tarshish lo owo shona, janti, sotsüho, kvüso-yakso tona Tita hanpong to hansi hansi yicho. 22 Hojito Solomon na limhalo mesao topvü poni ejüeli osi nchümri mmhom lo ochina ha ombo n jancho. 23 Osi limhalo mesao topvü na Potsow na Solomon lümbümi theyio nchümri osi ozen okyak jiang engatav yantacho. 24 Onte otsük akvü na yantso, shona osi janti tsütsailan tona mpensü, ekhovrhüm osi mozhürhüm, kurü osi gadho to shiang esüa nzyu akvü hansi oro Solomon yantsotacho. 25 Osi Solomon na kurü shenphen tona ritsso zotoro to vaphen ranki wothüng mezhü, kurü rasan wothüng taro eni to jiang vanphen tssocho. Ombona ejoma jo Jerusalemi vanthukcho osi ejoma jo yantsü jianglo vanthukcho. 26 Osi ombona Euphrates lona benkae Philistine jiang, osi Ejip to jiang lo mesao jiang topvü pono esapvüi tsüpho ji tssocho. 27 Osi mesao na Jerusalem lo janti jo olong esüa pvülyuthukcho osi Cedar tssüng jo Juda meta jothe hayi jiang lo thüngphyothi tssüng tssüngsha jiang esüa pvülyuthuk cho. 28 Osi Solomon echi kvürü jo Ejip osi meta thanpo topvü lona hansi oyi tsütsathukcho.
Solomon Yansa Etsoe na
29 Solomon elhi jiang benkadeni na ochüm jana zenkhying Nathan motsü lo, osi Shiloni yamo Ahijah zenkhying yi jianglo, elani ratsen Iddo na Nebat tsoe Jeroboam tsükona zenkhying yi phyo jiang topvü lo erani lia. 30 Solomon na Jerusalem lona Israel meta topvü pono nzyu zhüro sacho. 31 Jisülojo Solomon ji chücho osi ombo motsüi jiang ndüngo opo David yantsü jilo shothecho, osi ombo tsoe Rehoboam na ombo echungchocho.
Khümkiwoe Jipo Jiangna Panlamo ji
1 Rehoboam na Shechem lo wocho, ntiotssole Israel topvüna mesao ombo tsswothukvü shechem lo oro sanrhyui vancho. 2 Kvüthüng Nebat tsoe Jeroboam na hoji zochosana ombona Solomon mhadungo tsani Ejip lo tsanthe vamo jilona kholani chiyicho. 3 Ontena kyon wothuka owo ombo tsathukcho, osi Jeroboam tona Israel topvü to sana oro Rehoboam ji heto ezotacho, 4 "Nipona oha mmyingu e hanthuki lia, hoji tsükona nina nipo ha ji e zükhokayia, tona ena ni küpo vani ni benkata vamka." 5 Tole Rehoboam na heto onte ezocho, "Nchümi ezev tsükona tsüngon ethüm apia tosana ti a thüngi rotava." Tole kyon jiang na kholani yicho. 6 Jitosi Rehoboam mesao na opo Solomon echungo ndungtssung epipvüi eramoe jiang thüngi ndungtssung khiv tsükona heto ezocho."Kyon shiang janlam tsükona ntena kvüto ntssung apivla?" 7 Tole ontena heto ombo ezocho, "Nina kyon shiang nzana onte emathathukna ontena yuta topvülo ni yi enga ni benkavka." 8 Tokhatola ombona eramoe jiangna ombo ejyurünyo jiang sisi pongdenro ombo yingaren ombo ndüngo vamo jiang na ejyurünyo ji khicho. 9 Ombona heto onte ezocho, "Ntena kvüto ndungtssung a pivla? oha e hanthuko shi e zükhoyia to a zoa vamo kyon shiang thüngi kvüto janlamla?" 10 Tole ombo yingaren khyingroren jiangna heto ombo ezocho, "Nina heto onte janlana: 'A yingro yingtamo shijo apo eryu lona tsükata.' 11 Elani heto ezocho, 'Apona vüngkhung ha mmyingu nte hanthukcho; Hojilo ana nte ekaphayivka. Apona wozhüna nte erhüpa nte thacho, khatola aiyo kurü zhü khi nte erhüpvüka!' " 12 Tsüngon ethümo to jilo jo Jeroboam tona kyon jiang topvü to sani mesao Rehoboam thüngi wotacho, ntiotssole mesao na hoto onte ezocho licho, 13 Osi mesao na elümoto haruka onte janlancho, 14 osi Rehoboam na eramoe jiangna ombo ejyurünyo ji sisi khyingroeren jiang na ombo ejyurünyo ji ephan heto onte ezocho, "Apona vüngkhüngha mmyingu nte han thuko jilo ana nte thephayivka. Apona wozhüna nte erhüpa nte thacho, khatola aiyo kurü shenzhü theta nte thavka." 15 Hojito mesaona kyon jiang na phyoji n ngayicho, ntiotssole OPVÜI na Shiloni kyon Ahijah yakchia Nebat tsoe Jeroboam thüngi ezothuko ji benthukvü yuta tssocho. 16 Israel kyon jiangna mesao na oyi onte n ngayio ji ntsiale heto mesao shakata ezocho."David osi ombo wopan ji jeyithuka! ontena ete tsükona ntio e tssoyicho lichola? Israel kyonden, ete topvüna oki yitavka! Rehoboam khi ombobo zethuka!" Hojito Israel kyon jiang na ombo panlancho, 17 osi Juda erüi evamo jiang tae enhyokae hojiang pono yansae tssocho. 18 Osi Rehoboam mesao na elhi rhükipvüi Adoniram ji ezi elhi etssoe jiang zelo wothukcho, tole Israel kyon jiangna olungna ephyatsüngi sicho. Tole tothüng ji Rehoboam mesao na süsoa ombo zotoro jilo tsanthe Jerusalemi tsani yicho. 19 Hojito nchüng jana Israel jiangna David wopan thüngi panlana vanala.
Shemaiah na Zenkhyingo ji
1 Kvüthüng Rehoboam mesao na Jerusalem jancho sana ombona oro Benjamin tona Juda to pvüji lona rasan mmhontsov otsük wothüng nzoasi ekha tiza tsarhyucho, ombona ori tssoe Israel jükiwoe pvüji jiang khyoe sayav tssocho. 2 Tokhatola OPVÜI na Shemaiah zenkhying thüngi heto ezoa 3 mesao tona Benjamin osi Juda pvüji kyon jiang thüngi to ezothukcho: 4 "Nte Israel kyon thüngi ori ti-tssotava. Nte topvü oki yitava, shiang jo a lüm erüng ephan tssocho mek." Tole ontena OPVÜI yizüng ji engae Jeroboam thüngi ori n tssov sicho.
Rehoboam na Yantsü Jiang Pikhfü Thetala
5 Rehoboam na Jerusalem lo vani Benjamin osi Juda pvüji lo yantsü shiang pikhfü thecho: 6 Bethlehem, Etam, Tekoa, 7 Bethzur, Sokho, Adullam, 8 Gath, Mareshah, Ziph, 9 Adoraim, Lachish, Azekah, 10 Zorah, Aijalon, tona Hebron to. 11 Ombona yantsü shiang ji pikhfü chüchünga thethukcho osi yantsü akvü esopvüi ethüngchecho, osi yantsü akvü lo etsoyu, olive thyujü tona jününgrothi jü lo pithukcho, 12 osi otsung tona otsso toha pithukcho. Hojitoli ombona Juda tona Benjamin to pvüji ji sayacho.
Pvüti tona Levi to Jiangna Juda lo Roala
13 Israel meta topvü to lona pvütiden osi Levi topvü jüjowoe Juda lo jororacho. 14 Levi jiangna onte eroyo jiang tona liko thanpo jiang to sisi Judah lo tona Jerusalem lo to joyicho, ntiotssole Jeroboam mesao tona ombo echungchoe to jiangna onte ji pvüti tssoa OPVÜI benkav khancho. 15 Jeroboam na ombo pvüti echümpo ethüngchei n longtsüi khümpheni elhi tssothuka tsüng rham osi mangsü kisü ombona nsüngrüi khümtacho. 16 Tokhatola OPVÜI khümvü methako jiang Israel topvü lona sani Levi jiang phana Jerusalemi oyi onte motsüi Potsow OPVÜI thüngi othan pilo yitacho. 17 Hojina Juda ekhüngyan ji etho Jükacho. Osi onte na Solomon tsoe Rehoboam ji ben kata ontena David osi Solomon mesao kupo vanathüng esüa vantacho.
Rehoboam Wopan
18 Rehoboam na Mahalath soa vancho, osi Mahalath opo jo David tsoe Jerimoth osi oyo jo Jesse otsolov Eliab ji otsolov. 19 Onina tsokhyig otsük ethüm, Jehush, Shemariah tona Zahan to vancho. 20 Sülani jo ombona Absolom otsolov Maakah ji soa vancho, osi onina tsokhying mezhü vancho: Abijah, Attai, Ziza, tona Shelomith. 21 Topvü tssotsüi Rehoboam na engh otsük taro tiza, yinga loroe otsük rukro to vancho osi ombo tsokhying mekyu tiza, tsolo rukro to vancho. Ombona engh osi yinga loroe jiang topvü lo nzantso jijo Maakah tssocho, 22 osi ombo ngaro topvü yolo Maakah tsoe Abijah ji nzantso tsso jina ombo khi mesao echungthukcho. 23 Rehoboam na ombo tsokhying jiang yolo elhi jantayio ji zicheta jantayicho, osi Benjamin tona Juda to pvüji lo pikhfü ethe yantsü jiang topvülo jantae onte vanthu kcho. Ombona onte topvü longph ya pira cho osi onte engh ha yani piracho.
Ejip Kyon na Juda Ori Tssoala
1 Rehoboam na mesao to etho khichopvü ombo kyon jiang topvü OPVÜI shikhfü sithukcho. 2 Rehoboam na nzyu mungo to sathüng OPVÜI na kyon jiang jancho nzo ji ezüp picho. Ejip lo mesao Shishak na rasan kurü zotoro nzo taro eni, 3 Kurü rasan wothüng rukro, tona nkhacheo rasan tata, Libya tona, Sukkite, Sudan to rasan jüa sosi rocho. 4 Ombona Juda lo pikhfü thio yantsü jiang khyoe khicho osi Jerusalem jana wocho. 5 Shemaiah zenkhying jina Rehoboam mesao tona Juda esopvüiden jiang to thüngi owo ontena Shishak mhadungo tsanchov tsükona Jerusalem lo tsanthe vanathüng owo heto ezocho: "OPVÜI na nte thüngi yithen heto nte piala, ntena asio jina anaha Shishak khelo thechi nte siala." 6 Tole mesao osi esopvüiden jiangna ontena mmen tssothaka to phyoa heto phyotacho, "OPVÜI na heto tsso shijo elanthata." 7 Tole OPVÜI na hoji hungi Shemaiah thüngi heto ezolancho," Omtena onte mmen ji phyochako jina ana onte chürathukvü meka. Osi Shishak na onte sakata thüng onte tara jo tsanchov ka. Jerusalem na a lüm etsuk ji totona jo tssükav meka, 8 tolea Shishak na onte khyovka, osi ontena a ben kao ji tona limha lo mesao benkao ji to echümpota ji chekavka." 9 Shishak mesao na Jerusalem lo oro khümpheni osi mesaki na ejüeli jiang khi hansi yicho. Ombona ntio hungana, Solomon na shona tsung joe vao jiang mpato khinhya, khiracho. 10 Hoji thung tssoa vaphen jo Rehoboam na yongmen yonjak na joe mesaki kibung enhyang jiang zikata vayicho. 11 Mesao na1 kvüthüng khümpheni woana enhyang jiangna otsung jiang khi ejümtasi phana osi hanlansi oyi enhyak ranki valantacho. 12 Ombona OPVÜI lo kholani yio jiha OPVÜI na ombo monlangi n sithukcho, osi Judah metalo ha sükhying mmhona yicho.
Rehoboam Yansa Motsü Etsoena
13 Rehoboam na Jerusalem lona sacho osi ombo mesa etho rankata yicho. Ombona nzyu zhüro ekha tssoathüng mesao tssocho osi ombona Jerusalem lona nzyu taro tiying yansacho. Jerusalem yantsü jijo OPVÜI na yantsü topvü lona ethüngchei ombo khümphen yantsü khicho. Rehoboam oyo jo Ammon yamo kyon Naamah to tsacho. 14 Ombona OPVÜI lüm erüng n yamo jina mmen elhi tae tssocho. 15 Rehoboam elhi benkadeni na ochüm nandang tona ombo wopan motsü to jo zenkhying Shemaiah ji motsü lo tona zenkhying Iddo motsü to lo erani lia. Rehoboam tona Jeroboam to jo yuta topvü lo oni ori tssota vancho. 16 Rehoboam chüi David yantsü mesa khüp lo shothecho osi ombo tsoe Abijah na mesao ombo echungcho.
Abijah na Jeroboam Ori Tssoala
1 Israel mesao Jeroboam yansa nzyu taro tiza tolo Abijah na Juda mesao kümcho, 2 Osi ombona Jerusalem lona nzyu ethüm sacho. Oyo jo Uriel otsolov Mikaiah to tsacho, osi Gibeah yamo tssocho. Abijah ha Jeroboam oni yutalo ritsso chiyicho. 3 Abijah mesao na rasan wothüng nzo mezhü rümrhyucho osi Jeroboam na rasan wothüng nzo tiza sosi ori ombo tssocho. 4 Rasan eni jiang ji Ephraim phunglan metaena nduktacho. Abijah mesaona Zemaraim phung lani chungocho osi Jeroboamtona Israel jiang to tsachuka heto ezocho: "A yi shi enga!" '5 "Israel Potsow OPVÜI na David thüngi elümoto tüngochüa ntsatae vacho to osi Israel lo yansav ombo osi ombo tsoronichen jiang picho to ntsichoke? 6 Nebat tsoe Jeroboam na ombo mesao Solomon thüngi panlancho. 7 Osi sülami jo opona n thae ekhyvürhyucho. Osi ontena onte lüm erüng ji Solomon tsoe Rehoboam pono khüngkata tssothukcho, ntiotssole jithüng jo Rehoboam ji nungokhüngo jina onte n khirancho. 8 Enhungo nteno OPVÜI na David tsoronichen jiang pio mesa etho jilo panlana rotav methakala. Ntena rasan khosha vana osi Rehoboam na nsüngrüo nte Potsow shona mangsü jiangha nte ndüngo lia. 9 Ntena Aaron tsoronichen OPVÜI pvüti jiang phani sicho osi Levi kyon jiang nte na phani sicho. Onte thung ji ntena jipopoe jiang na vaoji esüa pvüti ethüngi vanthukcho. Ochona mangsübung tona olyu tiying to hansi roana ombobo pvüti to nthochaki nte Potsow jiang pvüti kümthukcho. 10 "Tokhatola eiyo nchüng jana e Potsow OPVÜI benkatala osi ombo n sihan, Aaron tsoronichen jiang na pvüti tssoala osi Levi kyon jiang nzanchiala. n Enya mmyu akvü ontena orhüm mmhom tona ekümrümo mbüm na erungthan to pia vanala. Ontena saro ntssüngchei vao jianglo humri ekachi thanala osi mmyu akvü ontena shona milondung jiang njükae vatala. Eiyo OPVÜI na yizüng epio jiang topvü tssoa yanala, tolea ntena ombo sithaka. 12 E esopvüi jo Potsow osi pvüti jiang na tatara methaki benrasi e tsae nte thüngi ori e tsswothukvü methaki vana. Israel kyonden, nte motsüi Potsow thüngi ori ti-tssotava! Ntena ombo khyov meka!" 13 Jithüngji Jeroboam na Judea rasan jiang Sülamoe na owo hav rasan wothukcho osi ejoma enhyo jiangna mhadungoe na sakav methaki licho. 14 Judea kyon jiangna eyingoe zele onte nkonphia orina hazhüi vanthakcho. Ontena OPVÜI thüngi ekhyo chona randan cho osi tatara jiang mhütacho. 15 Judea kyon jiang na elümoto ntssana owon tssotacho, osi Abijah na onte sosi ori tssocho. Tole Potsow na Israel jiang tona Jeroboam to khyocho. 16 Israel jiang na Judea kyon jiang mhadungo tsancho osi Potsow na Judea kyon jiang khi onte khyothechithukcho. 17 Abijah tona ombo rasan to jiang na Israel jiang rorüpa khyothechicho, Israel rasan mmhontso jiang yolo wothüng nzo mongo chüthukcho. 18 Hojito Juda kyon jiang na Israel pono ekhyo tsüphov hungcho, ntiotssole ontena onte motsüi OPVÜI Potsow lo enhyikacho. 19 Abijah na Jeroboam rasan jiang phana wocho osi ombo yantsü ejoma shiang hayacho: Bethel, Jeshanah, tona Ephron, tona yantsü shiang ndüngo oyan jiang to khyocho. 20 Jeroboam na Abijah echungo jo kvütoli ha etho nchiyilammü sicho. Okhao tssoa OPVÜI na ombo evüngkae ombo chüthukcho. 21 Tokhatola Abijah jo etho chükata yicho. Ombona engh otsük taro mezhü vancho osi tsokhying mekhyusi eni, tsolo taro tiruk to vancho. 22 Abijah motsü thanpo, ombona ntio phyo, osi ntio tssochosana jiang topvü Iddo zenkhying ji motsü lo erani lia.
Asa Mesao na Sudan Kyon jiang Khyoala
1 Abijah mesao chüi David yantsüi mesae khüp lo shothecho. Ombo tsoe Asa na mesao ombo echungcho, osi Asa echungo meta ji nzyu taro noying licho. 2 Asa na elan. Osi mmhon tssoe OPVÜI emathathukcho. 3 Om bona metapoe kyon thanphen jiang roe sicho osi n longtsüi khümphen jiang roe sia olung durhyu jiang roe sicho, osi Ashera potsow kisü ji thenroe sicho. 4 Ombona Juda kyon jiangji onte motsüi Potsow OPVÜI kkhümtale osi ombo püngno yizüng jiang engatale to ezocho. 5 Ombona n longtsüi khümphen jiang osi orhüm mmhom thanphen jiang Juda meta topvü lona roe siwo jina ekhüngyan ji ombo yansalo jo noying yicho. 6 Ombo na hoji yutalo Juda yantsü jiang pikhfü thecho osi nzyu sunga ritsso n licho, ntiotssole OPVÜI na noying ombo picho. 7 Ombona Juda kyon jiang ezocho, "Etena yantsü jiang pikhfü na chunga rizümphen thetavka osi kibüng jiang khansi chonchio tüv thetavka. Etena OPVÜI Potsow lüm erüng tsso jina meta shilo saya lichetala. Ombona enkohae nken akvü lona nkochei evanthukala." Hojito ontena yantsü jiang tssoe noying tsükaranka licho. 8 Asa mesao na rasan 300,000 Juda lona, otsso tona otsung epvüiden to, osi Benjamin lona rasan 280,000 lotssi tona lotsüng to eben to vancho. onte topvü lüm etssonden osi mmhona thangshi ekhiden. 9 Sudan kyon Zerah to tsao jina rasan wothüng nzo taro tona ritsso zotoro nzo ethüm to sosi Juda thüngi ori tssocho, osi ombona Mareshah jana tssoa wocho. 10 Asa na ombo rolanchilo wocho osi okho enita Mareshah ndüngo Zephathah hayitsü lona methakta vancho. 11 Asa na ombo Potsow OPVÜI thüngi heto randancho, "OPVÜI nina etho eli rasan jiang nzanchiato etho nlio rasan jiangha elaro nzanchicheta. Hoji tsükona, OPVÜI e Potsow, enhünga e nzanchia, ntiotssole ena nilo enhikatala, osi ena ni myingona rasan etho eli hetüv sakalo rocho. OPVÜI nino e Potsow, ochinaha ni ekhyov eyilo n li." 12 Asa tona Juda kyon jiang na Sudan kyon jiang sakale OPVÜI na Sudan jiang khyocho, 13 Sudan jiang na tsancho, osi Asa tona ombo rasan to jiangna Gerar jana onte phanchicho. Sudan jiang khosha lüngthae siwo jina rasan jiangna khophilani ori n tssochev sicho. Ntiotssole onte ji OPVÜI na osi ombo rasan na ekvüyae sicho, osi rasan jiang na ritsso ejüeli elümoto phanchoe khicho. 14 Ontena Gerar meta hakono yantsü jiang khyoe khichecho ntiotssole hojilo kyon jiang na OPVÜI kyuta ekhentacho. Rasan jiangna yantsü topvü khyoe ejüeli elümoto rechoe khitacho. 15 Ontena olyu rhükiden vanphen ha ejoma hayacho osi olyu tona Ut to elümoto rechocho. Jitosi ontena Jerusalemi yitacho.
Asa na Meta Ntssachoji
1 Potsow mon jina Obed tsoe Azariah lo vani Azariah na Asa mesao nduko wocho. 2 Ombona heto owo tsacho, "A yithen enga, Asa mesao osi Juda tona Benjamin to kyonden! Ntena ombo ndüngo evanthüng nandang OPVÜI na nte ndüngo vanka. Ntena ombo yana tssona ombona nte khi ombo yanchethukvüka, tokhatola ntena ombo thüngina khophi tsana tssona ombona ha nte siv. 3 Israel jiang na nzyu sunga Potsow tsotso ji n thev vancho. Osi onte püngno thukvü tsükona pvüti tona yizüng to n thev vantacho. 4 Tokhatola ezüp yiana ontena OPVÜI Israel Potsow yana wotacho, Ontena ombo yantacho osi yanchecho. 5 Hoji tsüngono jo ochinaha noyinga eyio n tssochecho, ntiotssole meta topvü lo ezüp licho. 6 Jipo motsüngana jipo motsünga khang shicho osi yantsü motsüngana yantsü motsünga khangshicho, ntiotssole Potsow na onte yolo ninyang ezüp sotheyicho. 7 Tokhatola ntena etho khyunga lüm nteriv shikhfü. Ntena etsso elhi jiang yantso "hunguka, " 8. Obed tsoe Azariah na zenkhyingo ji Asa na zoale ombo lüm tssoncho, ombona Benjamin osi Juda metalo lona kisü khio jiang tona Ephraim phunglan lona phan cho jiang topvü roe sicho. Ombona khümphen hapho jilo OPVÜI thanphen roe lio jiha nsüngrücho. 9 Ephraim, Manasseh tona Simeon to meta lona kyon khosha Asa thüngoe yicho osi onteno ombo ekhüngyani vanta vancho, ntiotssole OPVÜI na ombo ndüngo vana to ontena ntsicho. Asa na Juda osi Benjanim metalo evamo jiang topvü tsaracho. 10 Ontena Asa yansa nzyu taro mungo to choro ethümo to jilo ontena Jerusalem lo sanrhyutacho. 11 Hoji tsüngono ontena ritssolo na recho jiang khi OPVÜI thancho, mangsü nzo tiying tona olyu wothüng tiying to thantacho. 12 Ontena OPVÜI onte omotsüi jiang Potsow ji lümbüm topvü na khochaki khümtav ntsatacho. 13 Kyon topvü, nunghori lea eran lea, eboe lea eloe lea ochona ombo n khümana chüthukvü to ntsatacho. 14 ntena owon tssoa OPVÜI myingona echümchakta ntsata yi vav to tüngkachia phyotasi tatara mhütacho. 15 Juda kyon topvüna emathatacho, ntiotssole ontena onte lümbüm topvü theta OPVÜI thüngi ntsata yi methaktacho. Ontena OPVÜI ekhüm lo choka licho osi OPVÜI na onte khichocho. Osi lanka topvü lona noying onte picho. 16 Asa mesao na opyo Maakah ji mesali oyo n tsswothukvü khi sicho, ntiotssole ombona Ashera potsow pvüi ji kisü nsüngrücho. Asa na kisü ji vanroe Kidron hayina rungi sicho. 17 Asa na meta jilo n longtsüi khümphen jiang topvü roe nsia khatola, ombona ombo eküm echung OPVÜI lo longtsükata vancho. 18 Ombona opo Abijah na Potsow lo khochaki vao jiang tona ombona tssentsü shona osi janti khchaki vao jiang to topvü khümpheni vacho. 19 Ombo yansa nzyu thümro mungo nandang jo ritsso n-liv sicho.
Israel lo Ezüp
1 Juda lo Asa mesao na nzyu thümro tiruk to sathüng Israel lo Baasha mesao na Juda thüngi ori tssoe Ramah yantsü ji pikhfü theta benkacho, hoji jo Juda lona chiwo rheyi n tssotachethukvü tsükona. 2 Hoji tsükona Asa na khümpheni tona mesaki to ejüeli vaphen jiang lona janti osi shona jiang khi Syrian mesao Benhadad Damaskus lo vamo ji thüngi heto ezolo hansi wothukcho: 3 "Ete motsüi jiang na khyingtae vamo ji esüa eni ha shentae vantavka. Osi shona janti shiang jo yantso ni hanthukala. Nina Israel mesao Daasha thüngi shentao ji esani sia, tona ombona a metalo rasan vamo jiang sosi yi sivka." 4 Benhadad na Asa yi ji khichoe ombo rasan esoe jiang wothuka Israel yantsü jiang halo wothukcho. Ontena ijon; Dan, Abel Beth Maakah, tona Naphtali lo ejüeli evao yantsü jiang topvü ori tssoe khyocho. 5 Hojito tsso jiang yivon ji Baashah mesao na zoe ombona Ramah pikfü theta vamo elhi ji esani sicho. 6 Jisülo jo Asa mesao na Juda topvü lona kyon tsarhyui Baash na Ramah lo elhi tssov rüngrüi vao olung osi otssüng jiang khithuki Geba tona Mizpah to yantsü jiang pikhfü thetacho.
Hanani Zenkhying ji
7 Hojithüng Hanani zenkhying jina Asa mesao thüngi owo ezocho, "Nina OPVÜI ni Potsow lo enghika thongjo Syria mesao lo enghikao jina Israel mesao rasan jiang na ni lona tsanthaka.'8 Sudan tona Libya to rasan jiang osi onte ritsso zotoro jiang jo elümoto mekchoke? Tokhatola nina OPVÜI lo enghikao jina ombo na ekhyo ni picho. 9 OPVÜI na limhatsü topvü zetsüa zeyata vanala, osi ochoang na ombolo longtsükata vanana jiang etho ekhimphayiv tsükona. Nina zhüva etssophyo jina enhünga na benkae nino ritsso tae livka." 10 Hojina Asa ji elüm lüm tsüki Hanani zenkhying ji evüngki thechicho. Hoji yutatsük jilo Asa na kyon ochoangna jo elümoto haruka ekümcho.
Asa Yansa Ochüm Tssoji
11 Asa yansa lo tsüngon Opvü jiang topvü Juda tona Israel to mesoaoden motsü lo erani lia. 12 Asa na mesao tssosi nzyu thüm ro tukvüo to jilo ombo jo jilo nocho nori n mhom na khingcho; toaha ombona nzanchi tsükona OPVÜI lo wothüng jo tsüktssen jiang yana wocho. 13 Nzyu eni sülojo ombo chücho, 14 osi ombona David yantsüi okhüp shanthe vao jilo ombo sicho. Ontena ombo müng ji mozhürhüm mmhom na nzüi shothetasi, omi khosha tssokachi vasi ombo chüo ji nongra kyatacho.
Jehoshaphat na Mesao Kümala
1 Jehoshaphat na opo Asa echungji mesao kümcho osi Israel panlam lo ombo etho nkhüngchocho. 2 Ombona Juda yantsü pikhfü theo jianglo, Juda yanro jianglo osi opo Asa na meta khio Ephraim to jianglo rasan jiang etho nkhüngchoe vanthukcho. 3 Jehoshaphat na opo eküm ovüng thüng esüa vancho osi Ombona Baal n khümo ji tsükona OPVÜI na ombo mmhaicho. 4 Ombona ombo motsüi Potsow ji benkacho osi ombo yizüng jiang benphicho osi Israel mesao jiang na elhia to n tssocho. 5 OPVÜI na Jehoshaphat ji Juda ekhüngyan pono etho chungchunga soyingthukcho osi kyon topvü na yantso ombo pia ejüeli osi yikrachio kyon ombo kümthukcho. 6 Ombona OPVÜI benkav lo ekhüng tssosi jipopoe potsow jiang kisü jo rokhani sicho, osi Asherah potsopvüi ji kisü jiangha roe siracho. 7 Ombo yansa nzyu ethümo to ombona Juda yantsü jianglo püngnolo tsüphoe shiang wothukcho: Benhail, Obadiah, Zekhariah, Nethanel tona Mikaiah to. 8 Onte nzo Levi otsük tukvü tona pvi otsük eni to wothukcho. Levi jiango Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, tona Tobatonijah to; Osi pvüti jiango
Elishama tona Jehoram to.
9 Ontena OPVÜI yizüng kako ji hansi owo Juda yantsü jianglo kyon jiang püngnotacho.
Jehoshaphat Mying Tsüpho ji
10 OPVÜI na Jeshosaphat nkonphia ekhüngyan jiang topvü ji Jeshosaphat thüngi ori etssov kyuthukcho. 11 Philistin kyon ejoma na janti osi yantso thanpo khosha hanaro Jehoshaphat pitacho, osi Arab ejomana olyu 7,700, nyanya 7,700 to oro pitacho. 12 Hojito Jehoshaphat ji tsüka rankata tae yicho osi etho echüi kümcho. Juda meta topvü lo yantsü jiang ombona pikhfü thecho, 13 ntiotssole etsoyu osi tsütsaelan echenphen yantsü jiang hojiang tssocho. Jerusalem lo ombona tsüphoe tssothimori jiang vanthukcho, 14 osi onte pvüji ephani na vanthukcho. Juda pvüji lo rasan esoe jo Adnah, ombo küpo rasan 300,000 vanthukcho. 15 Ombo küpo enioto jo Jehohanan osi ombo küpo rasan 280,000, 16 ethümo to jijo Zichri tsoe Amasiah ji rasan 200,000 sosi vanthukcho."Amasiah na OPVÜI benkav khochaki vancho." 17 Benjamin pvüji lo rasan esoe jijo Eliada, rasan tssothimori tsüka ji küpo rasan 200,000, otsung osi lotsi benri tüv sosi vanthukcho. 18 Ombo küpo eso pvüi jijo Jehozabad, rasan 180,000 ebensü elümoto mmhona benrio rasanden jiang sosi vanthukcho. 19 Shiang hetopvü na Jerusalem lo mesao ji benkacho, osi ombona Juda yantsü pikhfü theo thanpo jiang loha rasan vanthukracho.
Mikaiah Zenkhying na Ahab Jiang Ekyu Yithen Piala
1 Jehoshaphat mesao ji ejüeli osi thüngcheta kümale ombona ombo wopan tona Israel lo Ahab mesao wopan to lolantav benkacho. 2 Nzyu sunga yisanati Jehoshaphat mesao na Ahab mesao nduko Samaria yantsüi wocho. Tole Jehoshaphat tona ombo nzo etssoe jiang to yikrachi lona Ahab na olyu osi nyanyan khosha lüngthae tokhu methakcho. Ombo na Jehoshabat ji Gilead metalo Ramoth ji ori tssotav khyimcho. 3 Ombona heto ezocho, "Nina Ramoth ori tssolo a kyov alo?" Tole Jehoshaphat na ezocho, "Nina tae methakna aiyo methaki vana, a rasan ha methaki vana. Ena ni kyochivka." 4 Tosi ombona heto ezocho, "Tolea ovüngtssoa OPVÜI lüm erüng zetatemka." 5 Ahab na zenkhying nzo mezhü harüma tsathei heto engacho, "Ana Ramoth halo wov alo n wovla?" Tole ontena ezocho, "owo ha, Potsow na ekhyo ni pivka." 6 Tokhatola Jehoshaphat na engacho, "OPVÜI lüm erüng yanphen zenkhying thanpoe n vanlanchoke?" 7 Tole Ahab na janlancho, "Tsüka vanlana, Imlah tsoe Mikaiah ji vana, tokhatola ombona kvüthüng ha a echi mmhomo n zenkhyingo jina ombo ji a tsakala. Ombona yuta topvülo n mhom tae a zenkhyingiala." Tole Jeshaphat na ezocho, "Nina hoto n phyov shikhfü!" 8 Ahab na tsüphoeden tsarhyui Mikaiah ji zakto owo sosi yile to ezocho. 9 Mesao otsük eni jina onte mesa mpensü ekatasi Samaria kibüng tssae litssenphen jilo onte vantsü lo khukthei vantacho, osi zenkhying topvü na oni mhadungona zekhying yi nsanta vancho. 10 Onte yolo tsüka, Chenaanah tsoe Zedekiah jina yonjak ejü lyukae hansi heto Ahab mesao ezocho, "OPVÜI na heto phyoala, 'shiang sosi ninina Syria thüngi ori tssovka osi onte khyothechia." n Zenkhying thanpoe jiangha topvü na yitsük ji heto phyocho, "khochi owo Ramoth ori tssoa tona ninina khyovka. OPVÜI na ekhyo nini pivka." 12 Jithüngji Mikaiah tsalo wo tsüphoe jina heto phyocho, "zenkhying thanpoe topvüna mesao na khyov to phyothako jina nina hoji ephan etssowo ji mmhomo." 13 Tokhatola Mikaiah na phyocho, "Eküm evamo OPVÜI myingona aiyo a pvüi Potsow na ntio a ezoana ji phyovka!" 14 Ombona Ahab mesao mhadungo chiwole mesao na heto Mikaiah ezocho, "Mikaiah, Jehoshaphat mesao enina owo Ramoth ori tssetsovla?" Tole Mikaiah na ezocho, "owo hatava!" "OPVÜI na ekhyo nini pivka." 15 Tole Ahab na ezocho, "Nina OPVÜI myingona ntio phyoana ntsa phyoa, ana hojito yenjo kvüta ni ezovla?" 16 Tole Mikaiah na janlancho, "Ana Israel rasan jiang phunglani olyuden enhyang n vamvü tsanroracho to hunga. Osi OPVÜI na heto phyocho.'Kyon shiang esopvüi n vanka noyinga oki yitae sithuka." 17 Tole Ahab na Jeshaphat ezocho, "Ana ni ezochoka zeta, zenkhying shina kvüthüng ha a echi mmhomo n phyoala; yuta topvülo a echi n mhom tae phyoala!" 18 Mikiaiah na heto phyolancho: "OPVÜI na heto phyoshi enga! Ana OPVÜI na potsüwoe ombo vantsülo khukthei lanbenden na hachüma phanthi vana hunga. 19 Osi OPVÜI na engacho, 'Ochona Ahab ejithechi owo Ramoth ori tssothuki jilo na ombo lüngthathukvüla? Tole lanben ejoma na heto phyo, ejoma na heto phyo to tssocho, 20 tole jithüng omon motsünga na chiro OPVÜI ji heto ezocho, 'Ana ombo ejithechivka.' Tole OPVÜI na engacho, 'kvütoli ejithe chivla?' 21 Tole omon jina janlancho, "Ana owo Ahab zenkhying jiang topvü ejüng phywothukvü ka." Tole OPVÜI na ezocho, 'owo ombo echithechia. Nina khyovka.' " 22 Mikaiah na Ahab ezocho: "Heto tsso jina ni zenkhying jiang na ejüng ni ezocho. Tokhatola OPVÜI na jo nina echü ndukvü to methaki lia!" 23 Tole zenkhying Zedekiah na ehungo Mikaiah ji omhalo tümicho osi ezocho, "OPVÜI mon jina kvüthüng a sisi nilo vani elhi tssov benkachola?" 24 Mikaiah na ezocho, "Nina chungchak sülamoe rheyi mphoa vanathüng hoji ntsivka, " 25 Tole Ahab mesao na ombo tsüphoe tsüka heto yizüng picho," Mikaiah rhümae yantsü esapvüi Amon thüngi tona mesatso Joash to thüngi sosi woa. 26 Ombo ji evüngki thechia osi ana mmhona kholani nyithüng jo ojü tona hümri to tae pia vanthuk to onte ezoa." 27 Mikaiah na tüngsochia phyocho, "Nina mmhona kholani yina OPVÜI na a yakchia nsancho mekcho tssovka," Tosi ombona heto phyocho, "Otsük akvü na ana phyo shi engatakhe!"
Ahab Chüo ji
28 Jitosi Israel mesao Ahab tona Juda mesao Jehoshaphat to onina Gilead lo Ramoth ji ori tssolo wotacho. 29 Ahab na Jehoshaphat heto ezocho, "Enina ritssolo woathüng ana mpho mpensü ekavka." Tosi Israel mesao jina mpho mpensü ekasi mesao mekcho esüthuki wocho. 30 Syria mesao jina Israel mesao yaka thanpoe ochia ti sakale to ombo ritsso zotoro esopvüi jiang ezoe vacho. 31 Tole ontena Jehoshaphat hungale Israel mesao ji tsayicho osi ombo ryulanchia ori tssocho. Tokhatola Jehoshaphat na tüngkachia ontssocho, osi OPVÜI na ombo kyoa ombo ri jiang kholani sithukcho. 32 Ritsso zotoro esoe jiangna hojijo Israel mesao mekto chethei ombo n pham kholancho. 33 Tokhatola Syria rasan tsüka na lotssi yonphimhia kochile Ahab mesao tsükkhüp yutalo na rheyi kochicho. Tole Ahab na ombo zotoro süoji thüngi tüngkachia, "A meyanthaka, küma zotoro ji khophi ritssopheni na asosi chiyia!" 34 Hojito ori nnoka tssota vanathüngji Ahab mesao na ombo ritsso zotoro jilo tsanthei Syria kyon jiang zechiwo vani sicho. Osi eng rhetale ombo chüi sicho.
Zenkhying Tsükana Jehoshaphat Makala
1 Juda mesao Jehoshaphat na ntia n tssov kholani ombo mesaki Jerusalemi yicho. 2 Hanani to tsao ji tsoe zenkhying tsüka Jehu to tsao ji tsoe jina owo mesao nduki ezocho, "Nthae jiang nzanchia osi OPVÜI tssako jiang thüngoe thev elancho alo? Nina ntio elhicho sana jina OPVÜI lüm etsuk ji ni pono yithaka. 3 Tokhatola nilo ntiosana mmhom ha jüa. Nina kyon jiang na khümo Ashera Potsow pvüi ji kisü jiang khi sirasi Potsow lüm erüng tssocho."
Jehoshaphat na Ntsacho Elhi Tsoji
4 Jehoshaphat mesao na Jerusalem lo vancho khatola ombona kyon jiang janthechia yentsathüngcho, osi jüjowoe Bersheba lona benkae jükiwoe Ephraim phunglan meta jana yentsa, kyon jiang ji onte motsüi Potsow OPVÜI lo kholani yile to ezoa yentsacho. 5 Ombona Juda yantsü pikhfü theo jiang topvülo yitssoeden vanthuka 6 heto ezocho, "Nte na yitsolo yidan piathüng ntaknshontale; nteno kyon etho lona oyi tssoa meka, tolea OPVÜI etho lona tssoala, osi ntena oyi tssoa khensanyisana thüng ombona nte ndüngo vanala. 7 OPVÜI kyua ntaknshona elhi tssotava, ntiotssole OPVÜI na ejithechi mekana phuko jenshan elhi n zehung, osi ekhüp etso n zehungala." 8 Jerusalem lojo Jehoshaphat na Levi, Pvütiden tona yanchi kyon eramoe ejoma to yitssoeden ethüngchei, yantsü jilo evan kyon jiang OPVÜI yizüng osi yansa shikhfü lo ekhiranta chiyiathüng oyi tssoyithukcho. 9 Ombona heto onte ezocho, "Ntena OPVÜI kyua elhi tssotakhe, osi ntena ntio elhi tssoa sana jiang topvülo OPVÜI longtsükata jancho ezo lona tssotakhe. 10 Kvüthüng nte yantsüina münghan yilan mekana shikhfü thanpo yesocho yilan hansi roana, kyon jiang na yitssolo kvüto etsophyov sana ji ntena mmhona onte engathethuka, tona ontena OPVÜI mmhadungo mmen tssov meka. To n tsocho jo nte osi kyon jiang na OPVÜI lüm etsuk lo nte rhakvüka. Tokhatola ntena nte elhi jiang rena mmhona tssoa tssona OPVÜI na nte thüngi lüm n tsuk osi nte nlan n liv tssov. n Ekhümlan osi longtsü yilan topvü lo Amariah pvüti ntsomo jina yitan pivka, osi limha yansa thüngoe yilan jo Ishmael tsoe Zebadiah Juda lo yansae tsüpo jina oyi tamvüka. Levi jiango yitsoki na ntio methaka sana jiang benthukvü tsükona ezepvüiden tssovka. Lümbüm tssontava osi nte elhi mmhona tssotava, osi ochoang na elana elhi tssoa sana jiang thüngoe OPVÜI khi thethukvü ka."
Edom Thüngi Ritsso
1 Yuta tara sülo Moab tona Ammon to rasan jiangna onte tepfütae Meunit jiang nzo tssoe Juda thüngi ori tssocho. 2 Yithenpvüi ejoma na oro Jehoshaphat mesao heto ezocho: "'Echü jümang ji esanawoe na rasan elümoto ori nitssolo tsata. Ontena Hazazon Tamar jiha khyoe khithaka." (Engedi ji Hazazon toha tsacho.) 3 Jehoshaphat ji ekhentsüngi OPVÜI thüngi lanso tsükona randancho. Jisülo jo ombona meta topvülo ekhang khitale to yizüng picho. 4 Juda yantsü jiang topvü lona kyon jiang na OPVÜI lanso tsükona randam Jerusalemi roracho, 5 osi onte tona Jerusalem kyon topvü to Jerusalem lo khümphen hapho ethan jilo sanrhyucho. 6 Osi Jehoshaphat mesao na onte mhadungi chiwo owon tssoa heto randancho: "E motsüi jiang Potsow, OPVÜI, nina Potsüwoe na limhalo jipo topvü satsüala. Nino etho ejüi osi emhukthao thotsü, ochinaha ni n palankhuk. 7 Nino e Potsow, Ni kyon Israel jiangna meta shilo rheyiathüng nina meta shilo kyon jiang phani sicho osi meta ji nishom Abraham tsoronichen jiang picho, osi kümali onte echi tsswothukvü picho. 8 Ontena helo vanthaka osi ontena helo ni khümphen tssothaka, 9 hojijo ntonsito onte pono ritsso nochonori osi vara, yakchia khangshi ezüp yina, ontena ni khümphen shi mhadungo oro mangu tsükona. Ontena oro ni thüngi ezüp jiang phyoa randam osi nina zoe onte shanchwothukvü tsükona. 10 "Tole Ammon kyon, Moab kyon tona Edom kyon tona ori e tssothaka. E motsüi jiangna Ejip lona chiyiathüng nina meta shilo onte n rheyithukcho, hoji tsükona e motsüi jiangna onte nkonphia yicho osi onte n monthukcho. 11 Tole ontena hetowoe na e loala, ontena oro nina e pio meta shilo na e phanala. 12 Nino e Potsow ka! Ezüp onte pia, ntiotssole rasantsü hetatana ori e tssoa vamo shiang ndüngo jo eiyo ntia mek. Kvüto lyuvsana ena ntsi tolea nina e nzanchile to ena ni mhalo zekatala." 13 Juda kyon topvüna onte eloeden osi ngaro jiang nzo khümphen ji mhadungo mangi vanracho. 14 Jithüng kholuk jilo Levi tsüka jücho ombo lo OPVÜI mon ji jorocho. Ombo Zekhariah tsoe Jahaziel; Ombo Asaph pvüji tsoronichen osi Mattaniah, Jeiel tona Benaiah to yakchia Asaph tsoronichen tssocho. 15 Jahaziel na phyocho, "Yikrachio tsüphoe osi Juda tona Jerusalem to kyonden, OPVÜI na phyoala, ntena rasantsü shiang zalanchiv tsükona lümbüm titeritale osi tikyutale to OPVÜI na phyoala. Ritsso ji Potsow pono na tssovka, nte pono tssov meka. 16 Ojyua ontena Ziz lo eyaklan jilo na chungroathüng onte sakatava. Ntena hayichüm jilona benkae ora lia eyio Jerusalem nüdngona onte ndukvüka. 17 Ritsso shi ntena tssov meka, ntena vanphen tae khi züma vantava; osi OPVÜI na ekhyo nte pioji ntena hunguka. Juda osi Jerusalem kyonden, ti-kyutava mekana titoa ti-nchümtava. khochuki ritssopheni votava tona OPVÜI ha nte ndüngo tssovka!" 18 Tole Jehoshaphat mesao na nkhümthei ombo mha jina liko jancho, osi kyon topvüna nkhümthei ombo nzo tssoe OPVÜI khümtacho. 19 Levi pvüji yulo Kohath tona Korah to khümtsüng kyon jiang na phanthirae tüngkachia OPVÜI Israel Potsow thüngtacho. 20 Ojyuato jo nyazüngina kyon jiangna Tekoa ndüngo orae wotacho. Ontena khochiathüng Jehoshaphat na heto onte ezocho: "Juda osi Jerusalem kyonden! OPVÜI nte Potsow lo longtsüka vatava, tona ntena chüngchünga phanthiv ka. Ombo zenkhying jiangna ntio nte ezoana longtsütava tona ntena ekhyo hunguka." 21 Kyon jiang ngatüng ngarisi mesao na khenden ejoma, ontena ntho elhi tssoathüng ekao mpensü jiang ekasi ritssoe jiang vüngina okhen heto dena sole to yizüng picho: "OPVÜI thünga! Ombo nzan jo kümali!" 22 Ontena okhen ji benkae denale OPVÜI na onte ri jiang ekhentsüngi sithukcho. 23 Ammon rasan tona Moab rasan to jiangna Edom rasan jiang khyothechi monthuki sicho, tosi onte bobo ji rotsüngtae sicho. 24 Judea rasan jiangna lijüngi zenki tssokachichio jiang janale ontena onte ri jiang zechitale topvü chürae erichi lia hungcho osi tsüka tia ntsanchocho. 25 Jeshosaphat tona ombo rasan jiang tona ori jiang ejüeli jiang khilo rhowocho, tole ontena tssiden khosha tona etsoyulan osi tsütsaelan osi mpensü elümoto hungcho. Ontena hojiang ji nchuk ethüm hanrhyutacho, tokhatola kyungtio jina topvü nkhikhancho. 26 Ontena tsüngon mezhüoto jilo jo Berakah hayi jilo sanrhyucho osi OPVÜI na ntio tssocho sana jiang tsükona OPVÜI thüngtacho. Hoji tsükona hayitsü jijo "Berakah" to tsacho. 27 Jehoshaphat na ombo rasan jiang Jerusalemi sosi yicho, ntiotssole OPVÜI na onte ri jiang khyoe siyicho. 28 Ontena yantsü ji janale khümpheni, zhükhen osi tatara jiang yana sani wocho. 29 Jipo kvü tana OPVÜI na Israel ri khyo yio yilan ji zochosana ekhentsüngrae sicho, 30 jitosi Jehoshaphat na noying lona yansacho osi opvüi na lanka topvülo nkoha onte picho.
Jehoshaphat Yansa Ochüm Tssoji
31 Jehoshaphat na nzyu thümro mungo tssoathüng Juda mesao kümcho osi Jerusalem lona nzyu mekyu mungo yansa sacho. Ombo oyojo Shilhi otsolov Azubah ji. 32 Opo Asah esüa omboha OPVÜI mhadungo elan etssoe tsüka; 33 tokhatola n longtsüi khümphen jiango roe n sicho. Kyon jiang naha onte motsüi Potsow ekhümvü lo tata lüm n thecho. 34 Jehoshaphat na yansa benkao jilona ochüm nandang ntio tssochosana Hanani tsoe Jehu ji motsülo eranrae lia, osi hoji motsü jijo Israel mesao jiang motsü kako jilo echi motsünga. 35 Yuta motsünga lojo Juda mesao Jehoshaphat na Israel mesao Ahaziah thüngi shentacho osi Ahaziah jo ntha elhi elümoto tssocho. 36 Ontena Eziongeber orhung esanphen jilo na jümangi sanphio rhung elümoto shantacho. 37 Tokhatola Dodavahu tsoe Eliezar to tsa Mareshah lo evamo jina heto Jehoshaphat ekyu yivon picho, "Nina Ahaziah thüngi khyingtao jina nina ntio tssokachi lichosana OPVÜI na roe sivka." osi orhung jiang roe sicho osi kvüthüng ha eha n wocho.
1 Jehoshaphat ji chüi David yantsü lo mesa khüp lo shothecho, osi ombo tsoe Jehoram na mesao ombo echungcho.
Juda lo Jehoram Mesao
2 Jehoshapat mesao tsoe Jehoram jo jeni tirok shiang vancho: Azariah, Jehiel, Zekhariah, Azariahu, Mikhael tona Shephatiah to. 3 Onte opona shona, janti osi tsentsü man thanpo lipo elümoto onte picho osi jeni tsük akvü to Juda yantsü pikhfü thecho motsüngtsüng lo OPVÜI tsothukcho. Tokhatola Jehoram eramo tsso jina Jehoshapat na ombo echung ji Jehoram tssothukcho. 4 Jehoram na ekhüngyan ji sajünga vanale ombona ombo jeni jiang lüngtharae sicho osi Israel lo tsüphoe ha elümoto lüngtharacho. 5 Jehoram na ombo nzyu thümro eni lo mesao kümcho, osi ombona Jerusalem lona nzyu tiza sacho. 6 Ombona Ahab mesao osi Israel lo nthae mesaeden ejoma hungchoa etso-ephyocho, ntiotssole ombona Ahab otsolov yulo tsüka soa vancho. Ombona OPVÜI mhadungo mmen tssocho, 7 tokhatola OPVÜI na David yansa tsoroni chen jiang roe n sihungcho, ntiotssole ombona David thüngi ombo tsoronichen na echungren sa vov to ntsata vacho licho 8 Jehoram yansasa yuta lo Edom na Juda thüngi ori tssoe ombo ekhüng vana yicho. 9 Hoji tsükona Jehoram na ritsso zotoro sosi ovo Edom thüngi pri tssocho. Hojithüng Edom rasan jiang na onte ekvüzhücho, tokhatola ontena zümolo rorhüphi tsantacho. 10 Hoji lona benkae Edom jo Juda lona echümpo ekhüng vanpvü. Hoji yuta tsük jilo Libnah yantsü na ha panlancho, ntiotssole Jehoram na ombo motsüi jiang OPVÜI Potsow ji sinkicho. 11 Ombona Jerusalem phunglanro jianglo mpato n longtsüi khümphen tssoracho osi Juda tona Jerusalem tolo evamo kyon jiang OPVÜI panlana mmen elhilo sokacho. 12 Elijah zenkhying jina Jehoram thüngi heto yithen erancho, Ni motsüi David Potsow OPVÜI jina khoe ni sithaka, ntiotssole nina nipo Jehoshaphat esüa n tsso mekana nimotsü mesao Asa na vamo ji esüa nina n tsso 13 Jithüngina jo nina Isreal mesao jiang etso-ephyo phankata Judah osi Jerusalem lo evamo kyon jiang ji OPVÜI lo n longtsükao elhi tssothukcho. Ahab tona ombo echungchoe jiang tona Israel ji n longtsü lamoe so ji esüa nina tsso cho. Nina nijenio nilo na mmho nako jiang mpato lüngtharae sicho. 14 Hoji tsükona OPVÜI na ni kyon jiang ni tsoero osi nitsoeni jiang elümoto ezüpthoku osi ni ejüeli jiang roe nisiyivüka. 15 Niha erülo emhoe engakvüto rathikata yio jitüv nochonori ni khungvüka. 16 Sudan kyon jiang na jütsa rhüa vanthako jiang ndüngo Arab kyon tona Philistin kyon ejoma toha vancho. Hojiang ji OPVÜI na ntssungi Jehoram thüngi ori tssothukcho. 17 Ontena Juda thüngi ori tssoe mesaki jilo ejüeli jiang re khiyisi mesao engden, ngaroden jiang rhümarae evüngki sosi yisi ombo tsoe wokhao Ahaziah jitae enhyokae vanthukcho. 18 Shiang hetopvü ji tssosi sülojo OPVÜI na mesao erülo emho nochonori khyinghtukcho. 19 Nzyu eni bena emho ji rathia ezüpa vansi mesao ji nungra lona chüi sicho. Ombo motsüi jiang esüa ombo kyon jiangna ombo khüpo jo omi n tssoyicho 20 Jehoram na ombo nzyu thümrosi enilo mesao kümcho osi Jer usalem lona nzyu tiza yansa sa cho. Toaha ombo chüale ochinaha ombo nnungrayicho. Ontena David yantsüi ombo shothecho, khatola mesae khüpo jo ombo n thecho.
Juda lo Mesao Ahaziah
1 Arab kyon ejoma na ori tssoe Jehoram tsoe jiang, wokhao Ahaziah ji yaka topvü lüngtharae sicho. Hoji tsükona Jerusalem kyon jiangna Ahaziah ji opo echung mesao tssothukcho. 2"3 Ahaziah na nzyu mekyu eni lo mesao kümcho, osi ombona Jerusalem lona nzyua yansa sacho. Ahazaiah naha Ahab mesao wopan jiang etsoephoyo phankacho, ntiotssole oyojo Athaliah, Israel mesao Omri tsoe Ahab mesao ji otsolov tssocho osi ompvüna ndungntssung. ombo pio jina kyon jiang mmeni sokacho. 4 Ombona OPVÜI mhadungo mmen tssocho, ntiotssole ombo chüsi sülojo Ahab wopan thanpoe jiang na ombo ndungntssungcho, osi hoji yakchia ombo joyicho. 5 Onte ndungntssung khi ombona Israel mesai Joram thüngoe thei Syria mesao Hazel thüngi ori tssocho. Osi rasan jiang ji Gilead metalo Ramaoth lona nduktae rotacho osi Joram ji jilona tsatsocho. 6 Ombona okhvü ji pothuku tanüngo Jez reel yantsüi kholani yicho osi Aha ziah na oro ombo janthechicho. 7 Ahaziah na hojito Joram janthechilo oji yakchia Potsow na Ahaziah elongjophen esüa tssothukcho. Ahaziah na jilo owo vanathüng Nimshi tsoe Jehu na owo onte sakacho, osi Jehu jo Ahab mesa wopan ji monthukvü OPVÜI na ethüngchecho. 8 Potsow na onte wopan pono phyochaki lioji Jehu na benthukvü woathüng ombona okho motsünga Judea esopvüiden tona Ahaziah orüo jiang to khümtsütae Ahaziah nzo yentsata rocho jiang ndukcho osi Jehu na onte topvü lüngthae siracho. 9 Ahaziah ji kvülo vancho sana yantale Samaria lo vancho. Tole ontena Jehu thüngi ombo sosi oyi lüngthae sitacho. Tokhatola ontena ombo omotsü Jehoshaphat mesao ochona onbo eto nandang OPVÜI benkata vansi chücho sana hoji yikrachi lona ombo müngji shothe sitacho. Jisülo jo Ahaziah wopan lo ochia mesao etsso tvü n vam sicho.
Juda lo Athaliah Mesali
10 Ahaziah mesao oyo na otsokhyungo chüoji yivon zoale jitopvü ompvü na Juda lo mesao wopan jiang lüngtharae sile to yizüng picho. 11 Ahaziah oyuloe tsüka Jehoshaba to tsa pvüti Jehoiada thüngi yanpicho. Ompvüna mphoa Ahaziah tsoe tsüka Joash ji mesatso lüngthavsa vamo jiang yolo na sosi oyi ombo tona ombo ezei tsüka to khümpheni yiphen lio jilo mphoe vanthukcho. Hojito mphoe ombo vanthuki ompvü na Athaliah khe lona ombo shanchocho. 12 Ombona jilo nzyu tiruk mphoa Athaliah mesali yansa ochüm n tssothüng nandang vancho.
Athaliah Palana Phanthio ji
1 Nzyu tiruk nhyaksi sülo pvüti Jehoiada na elhi tssov benkacho. Ombona rasan tsüphoe otsük mungo shiang thüngi ntsata heto vatacho: Jeroham tsoe Azariah, Jehohanan tsoe Ishmael, Obed tsoe Azariah, Adaiah tsoe Maaseiah tona Zichri tsoe Elishaphat to. 2 Ontena Juda yantsü topvülo yentsata owo Levi jiang osi pvüji lo eramoe jiang topvü sosi Jerusalem lo yitacho. 3 Ontena ekhümki sanrhyui mesao tsoe Joash thüngi ntsata vacho, Jehoiada na heto onte ezocho, "Chüa yithako mesao ji tsoe ji helo vana je! OPVÜI na David mesao tsoronichen na yansav to phyoe lio ji esüa ombona enhungo mesao ji tssovka. 4 Ena heto tssovka. Pvütiden osi Levi jiangna esanmung tsüngon lo elhilo roana onte kholok ji echi ethümo echia na khümphen kibüng nhyakvüka, 5 echia na mesaki nhyakvüka, osi enhyoe vamo echia jina soyingden kibüng ji nhyakvüka. Osi kyon topvüna ekhümki haphoe sanrhyuvka 6 Pvüti osi Levi elhi zikao jiang yaka thanpoe ochi naha khümphen ki rhowov meka. Onteno nthochaki vao jina rhowokuka, tolia thanpoe yo OPVÜI yizüng ephanina haphoe vamka. 7 Levi jiango onte yonri tssüngchei bensi mesao ji nhyakvü, osi mesao na kvüi woana ontena wovka. Ocho na khümpheni rhoroana lüngthae sivka." 8 Levi tona Juda kyon jiang tona Jehoiada na ezoji ephan tssotacho. Eboe ochoangna esanmung lo elhi lona esan hungcho sana jiang tona elhi jamo jiang to topvü mying ji esopvüi jiang khelo licho, ntiotssole Jehoiada na elhi lona esan pio kyon jiang n vachicho. 9 Jehoiada na David mesao tsso tona otsung to ekhümki vae lio jiang khi tsüphoe jiang picho. 10 Ombona enhyang jiang yonri tssüngchei bensi mesao nhyaka vanthukcho. 11 Jitosi Jehoiada na Joash tsachuki mesa khikho ji ombo kvürilo venkayicho, osi mesao tsükona shikhfü erani lio kako ji motsünga Joash picho. Hojito ombo ji mesao kümthukcho. Pvüti Jehoiada tona ombo tsoe jiang to tssoe Joash ji thyujü nzüyisi kyon topvü na heto tüngtacho, "Mesao harishia vanthuka!" 12 Kyon jiangna mesao mying thüngchothüngritao ji Athaliah na zoe khümpheni kyon etsseni vamo jilo ompvüna wocho. 13 Jilo ompvüna mesao ethan ji khümphen kibüngo mesao vanphen durhyupvü jilo mangi, rasan tsüphoeden tona tatara emhüi tona hachümi vana hungcho. Otsük akvüna ematha lona tatara mhütacho osi ekhümki khenden jiangna sokasi tokhuta longshita vancho. Tole ompvüna nungra lona ompvü sü jiang reroe sia phyocho, "Shijo kyakthechita! Osi Ejithechi elhi!". 14 Jehoiada na Athaliah ji khümphen hakono na lüngthav n tssohungcho, hojitsükona ombona rasan esopvüi jiang tsachuki heto ezocho, "Enhyang jiang yuta lona ompvü sosi chiyia osi ochona ompvü shanchov ekhyo tssoana lüngthae sia." 15 Ontena ompvü rhümae mesaki sosi oyi jilo Kur Kibüng to tsao jilona ompvü lüngthacho.
Jehoiada na Ntsacho Elhi Tsso jiang
16 Jehoida pvüti na Joash mesao tona kyon jiang to jo OPVÃœI thüngi ntsata vatav lo ombo pfükatale to ezocho. 17 Tosi onte topvüna Baal khümpheni owo ekhümki ji roe sitacho. Ontena jilo thanphen osi kisü jiang roe sitacho, osi Baal pvüti Mattan ji rhümae thanphen ji ndüngona lüngthae sitacho. l§ Jehoiada na pvüti jiang tona Levi jiang to khümpheni elhi zikaracho. Onteno David mesao na elhi jantae vayio ji ephan etssov picho osi Moses shikhfü ephanina erungthan jiang OPVÃœI piv elhi picho. 19 Jehoiada na khümphen kibüng enhyangden ha vanthuki ochona shikhfü ephan n tssüngchev roasana to ha zeta vanthukcho. 20 Rasan tsüphoe jiang, yanchüi eramoe jiang tsüphoe jiang osi kyon topvü na Jehoiada phana mesao ji khümpheni na mesaki sosi wotacho. Ontena kibüng shenthi jiwoena rheyitacho osi mesao na vantsü jilo khukthecho. 21 Kyon topvü ematha na pyingcho osi Athaliah ji lüngthae sithako jina kyon topvü tona emathata yantsü ji noyingi sicho.
Juda lo Joash Mesao
1 Joash na ombo nzyu tiying lo mesao kümcho osi ombona Jerusalem lona nzyu zhüro sacho. Oyo jo Beershaba yamo Zibiah to tsacho. 2 Pvüti Jehoiada eküm evanthüng nandang jo ombona OPVÜI emathao tssoa vancho. 3 Jehoiada na mesao ji engh eni ethüngi picho osi onina tsokhying tsolo bukicho. 4 Ombona mesao kümsi tara tssoale Joash na ekhümki ji ntsüp nrüpvü methakcho. 5 Ombona pvüti osi Levi jiang ji Juda yantsü jianglo wothuka ekhümki ji ntsüp nrüpvü orang tssona khyathukcho. Ombona yuta eben ebenlo elhi tssotale to Levi jiang ezocho khatola Levi jiangna sülana vamo jina, 6 Ombona onte esopvüi Jehoiada tsathe heto ezocho, "Nino ntio tsükona Juda tona Jerusalem to lo owo Moses na phyoe vao ji ephan OPVÜI vanrhyu süranki ji saya ethelan tsükona orang khyav Levi jiang n zochola?" 7 "Ntiotssole n thae Athaliah sürüi jiang na ntho tsütsaelan elümoto Baal ekhüm elhi lo thetacho." 8 Mesao na Levi jiang ezoa bakos motsünga shani kibüngo vathuka kyon jiang khi orang thethukcho. 9 Ontena Juda osi Jerusalem topvülo kyon jiang Potsow nri Moses na phyoji ephan kvüto lijüngi yentsatathüng benkae khyatacho sana hojito tssenkhya ji thetale to yivon yithukcho. 10 Hojina kyon osi esopvüi jiang emathae ontena orang theo jina khyathephen jiang pyingracho. 11 Levi jiangna engakvü orang ji khi hansi orang ezei tsüphoe ji oyi pitacho. Hojito ontena orang khosha khyachecho. 12 Mesao ha Jehoiada onina orang ji khi ekhümki ntsüpnrüpvü tsükona ezepvüi jiang pitacho, osi ontena lungjoe, tssüngjoe osi yonjoe jiang soe ntsüpnrüptacho. 13 Elhi etssoe topvüna elhi kungtsünga tssoe ekhümki ji ovüngthüng tathi esüa chüngchünga tssochukchicho. 14 Elhi ji thakratale shona janti enhyoe lio jiango mesao tona Jehoiada to pia ekhümki vaphen oyo-opvü jothukcho.
Jehoiada Nlansüng Jiang Dungphiyicho
Jehoiada evanthüng nandang jo khümpheni othan jiang yuta topvülo picho. 15 Omboji elüm sontsünga nzyu nzoasi thümro vansi chücho. 16 Ombona Israel kyon tsükona, Potsow tsükona, elani khümphen ji tsükona elhi mmhom tssoji yikrachia cheka pia omboji David yantsülo mesao khüp jilo ombo shothecho. 17 Tokhatola Jehoiada chüthakale, Juda esopvüi jiangna Joash mesao ji onte lüm erüngo phankale to ezocho. 18 Hoji tsükona es OPVÜI jiangna onte motsüi Potsow OPVÜI ji sisi Ashera potsow pvüi ji kisü jiang khümta yicho. Ontena heto mmen tsso ji nlan ji OPVÜI na Juda tona Jerusalem to pono lüm tsukcho. 19 OPVÜI na ombo lo kholani yile to ezolo ombo zenkhying wothukcho, tolea onte na n ngacho. 20 Tole OPVÜI mon jina Jehoiada pvüti tsoe Zekhariah ji sayacho. Ombona kyon chanka lo mangi heto phyocho, "Ntena ntioli OPVÜI Potsow yizüng jiang n ngav ntebobo ezüp nungra hansi yiasana to OPVÜI na phyoala. Ntena ombo siwo jina OPVÜI na nte sithaka!" 21 Joash mesao na ochungina khyentae Zekhariah chüthukvü methaktae Zekhariah ji ekhümki haphoe na ephyatsüngi sitacho. 22 Mesao na Zekhariah opo Jehoiada na kvüta OPVÜI lo longtsükata elhi mmhom tssoa rothakcho sana mhechoe sisi Zekhariah ji chüthukcho. Zekhariah na heto phyoa chücho, "Nina ntio elhia sana hoji OPVÜI na hungi ezüp ni pithukvüka!"
Joash Yansa Ochüm Tssoji
23 Hoji nzyu vami jantemo lo Syrian rasan jiang na Juda tona Jerusalem to ori tssoe, esopvüi jiang topvü lüngthae sisi ejüeli elümoto rei hansi Damaskas yitacho. 24 Syrian rasan jo tara tae khatola Juda kyon jiangna onte motsüi Potsow OPVÜI sinkithako jina Juda rasantsü ji khyothukcho. Hojito Joash mesao ji ezüp picho. 25 Ombo ji elümoto khütssona tssatssoe vancho, tole ori jiangna yithakale ombona Jehoiada pvüti ji tsoe chüthuko jina ombo küpo tsüphoe otsük enina ombo belüngina ombo lüngthae sicho. Ombo ji David yantsü shothecho khatola mesa khüpi n sicho. 26 (Ombo chüthukvü khyentae jiango Ammon kyon, eloe Shimeath to tsa ji tsoe Zabad, tona Moabite eloe tsüka Shimrith tsoe Jehozabad to oni). 27 Mesae kako ji eroro jianglo Joash tsoe jiang motsü osi ombo pono zenkhying yi jiang, osi ombona khümphen tsso jiang motsü topvü jüa. Ombo tsoe Amaziah na mesao ombo echungcho.
Juda lo Amaziah Mesao
1 Amaziah na ombo nzyu mekyu mongolo mesao kümcho osi ombona Jerusalem lona nzyu mekyusi toku yansa sacho. Oyo jo Jerusalem yamo Jehoaddin. 2 Ombona OPVÜI emathao jo ntio sana hoji tssocho, tokhatola n chokav tssocho. 3 Ombona etholo vanjüng tssothakale tsüphoe ochoang na opo lüngthacho sana jiang lüngthae sicho. 4 Tokhatola onte tsoe ro jiang ombona n lüngthacho, ntiotssole OPVÜI yizüng heto Moses shikhfü lo phyoe lioji ombona engacho: "Onte ngaro jiang na n lan tssocho ndana opvüpoe jiang chüthuku meka, osi opvüpoe nlan lona ngaro jiang ha chüthuku meka, Ochona nlan tssoana hoji man ji ombo tae chüthuka."
Edom thüngi Ritso
5 Amaziah mesao na Juda tona Benjamin to pvüji lo eboe jiang topvü ombobo khümtsüng ephan rasan soyingrae, jiang ji wothüng pono tona nzyua pono to esopvüi vantukracho. Hojilo eboetso nzyu mekyu na mhawoe kyon tüv wothüng nzo ethüm ethüngcho. Onteji rasan ritsolo ewov methaki evan osi otssüng, otso benthi tae tssocho. 6 Hoji ekalo ombona Israel thüngi na rasan wothüng nzoa, Janti seri 3,400 pia engocholancho. 7 Tokhatola zenkhying tsüka na mesao ji owo heto ezocho, "Israel rasan shiang tisole, OPVÜI na jükiwoe ekhüngyan kyon shiang thüngoe n theka. 8 Nina jo onte na ritsolo etho nte jükayiv esüa nchümvü tokhatola ritsolo ekhyo pio osi monthuko jijo Potsow ka, hoji tsükona ombo na niri khi ni khyothkuka." 9 Tole Amaziah na zenkhying ji heto engacho: "Tona ana janti onte pithako ji kvüto lyuvla?" zenkhying jina janlancho," OPVÜI na hoji lona kyongkao ni pilamka." 10 Jisüijo Amaziah na rasan jiang oki yirale to ezocho. Tole rasan jiang na Juda kyon jiang thüngi elümoto lüm tssuka sani yitacho. 11 Amaziah na ombo lümbüm tssonkae osi mhankae ombo rasan jiang sosi oma hayitsüi wocho. Hoji lona ori jiang ndukate rotacho osi Edom kyon wothüng taro lüngthacho. 12 Osi wothüng taro jo rhümhacho. Ontena rhümhao jiang sosi Sela yantsü sürhen kvüri sosi ehungo jilona khyanchochi ekhüngtsüngrathukcho. 13 Jithüngji Amaziah na yilanchisi ritsolo n sov esio Israel rasan jiang na Samaria tona Beth Horon to oni yutalo Juda yantsü ji hae kyon wothüng ethüm lüngthasi, ejüeli khosha rei khicho. 14 Amaziah na Edom kyon jiang khyosi kholani yiathüng ombona onte potsow kisü jiang hansi oyi chümkachio jiang khüma mozhürhüm mmhom rungi thancho. 15 Hoji tsükona OPVÜI lüm tssuki ombona zenkhying tsüka Amaziah thüngi wothukcho. Osi zenkhying jina ezocho, "Nino ntio tssona jipopoe potsow ochona ni khelona tia onte n shancho khukcho sana jitüv yani khümchola?" 16 Tole Amaziah na hoji shüma janlancho, "Ena kvüthüng mesao ndungntssungpvüi ni ethüngchechola? oyi ti-n sana, to mekana ni lüngthavka." Tole zenkhying jina heto phyosi esani sicho, "Nina shiang shi hetopvü tssoji tsükona, osi a ndungntssung n khicho ji tsükona OPVÜI na ni chüthukvü methakcho to ana ntsia."
Israel thüngi Ritsso
17 Juda lo Amaziah mesao tona ombo ndungntssung jiang tona Israel thüngi ori etssov methakcho, Ombona Israel mesao Jehoash, Jehu tsoe Jehoaz tsoe ji thüngi, ori etssov nochoa heto yithen hansi wothukcho. 18 Tole Jehoash na heto Amaziah janlancho, "Tsüngon motsüngalo Lebanon phonglani okyodung teriv motsünga na cedar dungpvüi ji heto ezocho, Ni tsolov ji a tsoe ji thüngi yanpithuka," tole jithüng orae ekümrümo na yakchia vansi odung teriv ji tsseroe sicho. l9 "Amaziah, nina Edom jiang khyoelato kanchanala, tokhatola ana jo oki vanle to ni ntssungala. Ntio tssona nibobo nilo osi ni kyon jiang pono ezüp hansi eyiv ninyang shikatala?" 20 Tokhatola Amaziah na nngacho. Osi ombona Edom potsow khümthako jina Potsow na ombo monthuku methakcho. 21 Hojito Isreal mesao Jehoash na Juda mesao Amaziah thüngi ori tssocho. Oniji Juda metalo Beth Shemesh lona nduktacho. 22 Osi hoji lona Juda rasan jiang ji khyothechi ombobo ki tsanrae yicho. 23 Jehoash na Amaziah rhümhae Jerusalemi sosi yicho. Hojilo ombo na yantsü pikhhfü ji Ephraim kibüng lona benkae Nken kibüng nandang roe sicho, hojijo metre nzo eni tenhyaka roe sicho. 24 Hojilo ekhümki shona janti topvü tona ekhümki tsütsailan Obed Edom tsoronichen na nhyakyata evamo jiang topvü elani mesaki ejüeli jiang to topvü khicho. Ombona kyon ha rhümhae morantsan tssoa sosi yicho, 25 Juda mesao Amaziah na Israel mesao Jehoash pomoe nzyu taro mongo vanlancho. 26 Amazia na tssocho thanpo topvü, ombo yansa benkadenina ochüm jana motsü ji Juda osi Israel mesao jiang motsü kakolo eranrae lia. 27 Ombona OPVÜI panlan elhi benkapvüto Jerusalem lona ombo panlan kyimtacho. Okhao tssoa ombona Lachish yantsüi tsana yicho, tokhatola ombo ri jiang na ombo phana owo ombo lüngthacho. 28 Ombo echü müng ji kurü mankvüi na hansi oyi David yantsü mesa khüp tüv lo ombo shothecho.
Juda lo Uzziah Mesao
1 Kyon topvü na Amaziah tsoe nzyu taro tirok Uzziah ji opo echungi mesao tssothoku methakcho. 2 Amazaih echü-süiti Uzziah na Elath yantsü ji recholani tssochoe vancho. 3 Uzziah na nzyu taro tirok lo mesao kümcho osi ombona Jerusalem lona nzyu tinyansi eni yansa sacho. Oyo jo Jerusalem kyon Jekoliah to tsacho. 4 Opo esüa ombo naha OPVÜI emathao elhi tssocho. 5 Ombo ekhümlam osi longtsü thüngoe ndungntssung pvüi Zechariah ji evanthüng nandangjo ombona OPVÜI benkacho osi Potsow na ombo mmhayicho 6 Uzziah na philistin jiang thüngi ori tssocho. Osi ombona yantsü Gath, Jamnia tona Ashdod to jiang pikhfü jiang roe sisi Ashdod ndüngo yantsü jiang lo rizümphen theta tssochocho osi Philiestin meta jiang topvü lo yantsü jiang ha tssochocho. 7 Potsow na ombo nzanchia ombona Philistine jiang, Gurbaal lo Arab vamo jiang tona Meunite jiang to khyothechicho. 8 Ammorite jiang na Uzziah thüngi tsenkhya picho osi ombo ji etho ejüi tsotso kümi Ejip meta kyon na mpa topvüna ombo ntsia kümcho 9 Uzziah na Jerusalem ji pikhfü theta Nken Kibüng to tsao jilo richephen tssokachi elani Hayi kibüng jilo tssokachi nna oyan pikhfü ekhuk jiloha tssokachi to tssocho. 10 Ombona hapo amung jiang loha richephen tssokachia jükha shana woe vacho, ntiotssole ombona engrhewoe phunglan jothe jianglo tona hayitsü to jianglo tssiden khosha vancho. Ombo na oli ejom chokao jina kyon jiang ha ntssünga phunglanro jianglo osi lizü jiang oli jontale to ntssungcho. 11 Ombona ritsso tsükona rasantsü vancho. Rasantsü jiang tsükona eranto jiango mesaki elhi etsoe tsüka Hannaniah na zeyata ombo erantoe Jeil tona Maaseiah to jiang na sekapvüiden tssoa yancho. 12 Rasantsü jijo tsüphoe otsük 2,600 na sacho. 13 Tsüphoe jiang küpo rasanden onte 307,500 vancho osi onte mesao ri jiang elaroa khyothechikhoko jitvü etho licho. 14 Uzziah na rasan jiang otssüng, otsso, kiven, tsükhüp osi lotssi osi lotsüng tona ephyaphen lung to piracho. 15 Jerusalem lo ombona okyak ethan yanchei lotssi eko thüngoe osi yantsü richephen osi yantsü pikhfü nken jiang lona longpvü erichochio kyak yancheracho. Ombo mying ji yanren echeta thüngcheta yicho, osi elümoto etho ejüi ombo kümcho, ntiotssole OPVÜI Potsow na ombo kyochicho.
Uzziah na Kangtsüo ji man Ezüp
16 Uzziah na etho jüa kümale ombo kangtsüa phanthicho osi hoji yakchia ombo joyi sicho. Ombona khümpheni thanphen jianglo tssütsserhüm runga elhi tssoe OPVÜI ombo Potsow mmenthukcho. 17 Azariah pvüti jina pvüti etho ejüi osi lüm etsson otsük 80 sosi mesao tanglanchilo phana otacho. 18 Ontena heto phyotacho, "Uzziah, nina OPVÜI than tssütserhüm erungu ntia etho n li. Aaron lona chiyio pvüji jiang taena hojito tssokhuka. Ntho meta shi lona tsana. Nina OPVÜI lüm tssükthukthaka osi ombona enhungo ni mmhayiv meka." 19 Uzziah na khümpheni tssütserhüm thanphen jilo mangi tsütse rungphen bensi vancho. Osi ombona pvüti jiang thüngi lüm tssukcho tole jitopvü ombo ton jilo zhüpho nochonori ombo khyingicho. 20 Azaria tona pvüti thanpoe to jiang na mesao ton jilo nochonori ji ekhentsünga zetacho osi khümpheni na zakto ombo yithukcho. OPVÜI na ombo khyang shia vamo jina ombona jitopvü tsani sicho. 21 Ombo nochonori ji tsükona Uzziah mesao ji eküm echung n tho kümi sicho. Khümpheni rhovov elan n liv siwo jina ombo elhi topvü lona esani sisi ombo tsoe Jotham na meta ji yansa sacho. 22 Amoz tsoe Isaiah zenkhying jina Uzziah mesao elhi thanpo jiang topvü erani vacho. 23 Uzziah jo chüi mesae müngsiphen metae sicho, tokhatola ombo nochonori ji tsükona mesao khüp lo ombo n sicho. Osi ombo tsoe Jotham na mesao ombo echungcho.
Juda lo Jotham Mesao
1 Jotham na ombo nzyu mukyu mongo tssoathüng mesao tssocho, osi ombona Jerusalem lona nzyu taro tirok sacho. Oyo jo Zadok otsolov Jrushah to tsacho. 2 Ombona opo na tssoato OPVÜI lüm erüng tssocho, tokhatola opo esüa khümpheni tssütse rungi mmen n tssocho. Tokhatola kyon jiang najo mmen tsoa vancho. 3 Khümphen jükiwoe kibüng jijo Jotham na tssocho, osi Jerusalem yantsü jilo ophel to tsa jilo yantsü pikhfü elhi elümoto tssocho. 4 Ombona Juda phunglan jianglo yantsü tssoracho, osi ora jianglo rizümphen tona richephen to tssoracho. 5 Ombona Ammon mesao osi ombo rasan jiang thüngi ori tssoe khyothechicho. Osi ombona Ammon kyon jiang nzyu ethüm tsükona nzyu akvü tsenkhya hetata ombo pile to methakcho: Janti seri 3400, ohüm metric ton 1000, omüm metric ton 100 to. 6 Jotham na ombona Potsow lo longtsükata kyuchio jina etho ejüi ombo kümcho. 7 Jotham yansa motsü thanpo, ombo ritsso osi yansa kyak jiang topvü Irael tona Juda to mesao jiang motsü kako jilo eranrae lia. 8 Jotham na ombo nzyu mekyu mongo lo mesao tssocho osi Jerusalem lona nzyu tarotirok yansa sacho. 9 Ombo chüi David yantsüi ombo shothecho osi ombo tsoe Ahaz na mesao ombo echungcho.
Juda lo Ahaz Mesao
1 Ahaz na ombo nzyu mukyu lo mesao tssocho osi ombona Jerusalem lona nzyu taro tiriok sacho. Ombona omotsü David ejuesü mmhom ji n khiv, OPVÜI na n mathao jiang tssoa, 2 Israel mesao jiang hungchoa etsopephyocho. Ombona Baal kisü jiang yonjak na joe vanthuksi; 3 Hinnon hayitsüi na tssütserhüm runga kisü jiang khümcho; osi ombona ombo tsoe jiang mpato erung than tssoa kisü jiang khümcho, osi hojitüv etso ephyo jo Israel jiang na meta jilo khotheta thüng hojilo kyon jiang ji OPVÜI na phani siwo kyon jiang etsopephyo tssocho, 4 Nlongtsüi khümphen meta jianglo, phunglanro osi odung khümcho akvülo Ahaz na othan pia erungthan picho.
Syria tona Israel to thüngi Ritsso
56 Ahaz mesao na mmen tsso jina ombo Potsow OPVÜI na Syria mesao khi ombo khyothuki Judea kyon elümoto Damaskas lo sosi oyi vüngcho. OPVÜI na Israel mesao Pekah, Remaliah tsoe jina ha Ahz thümgi ori tssothukcho, osi enga taena Judea rasan 120,000 lüngthae sithukcho. Onte motsüi Potsow OPVÜI jina heto tssothukcho ntiotssole Judea kyon jiang na Ombo sinki sicho. 7 Israel rasan tsüka Zicheri to tsa jina Ahaz tsoe Maaseiah ji tona mesaki yansae Azrikam, tona mesao küpo enioto yansae Elkanah to tsao ji to lüngthae sicho. 8 Judea kyon jiang jo onte nzo meta kyon khatola Israel rasan jiang na Judea eloe osi ngaroden 200,000 rhümae sosi Samaria oyi vüngcho osi ejüeli ha elümoto rei khiyicho.
Oded Zenkhying
9 OPVÜI zenkhying tsüka Oded to tsa Samaria yantsü lo vancho. Ombona Israel jiang na Judea kyon jiang rhümae sotasi yantsüi rheyisathüng nduki heto phyocho; "Nte motsüi Potsow na Juda kyon jiang thüngi lüm tsuki nte khi onte khyothkcho, tokhatola ntena emhokthav haruka onte lüngthao jiang ombona zothaka. 10 Enhungo ntena Jerusalem kyon eboe eloe osi ngaro eran nte phajae kümthoku sala. Ntena ha OPVÜI mhadungo mmen tssoe lia to n nchümchechoke? 11 Ana nte ezovka engatava! Evüngki evan shiang jo nte ojenio osi oyuloeden. Onte vachi yithuka, to mekana OPVÜI na lüm tsuki nte khangshivka." 12 Ekhüngyan khümkiwoe esopvüi otsük mezhü shiang, Jehonanan tsoe Azariah, Mershi; Emoth tsoe Berekhiah, Shallum tsoe Jehizkiah, tona Hadlaai tsoe Amasa ji na ha rasan jiang elhi ni panlanacho. 13 Ontena heto phyot acho, "morantsan shiang hepi sosi ti-yitava! Etena mmen tssoe OPVÜI elümoto lüm tssuthuki ombona ekhangshio lanka lika. Tole ntena ete nlan rankao elhi tssolantala." 14 Tole rasan jiang na morantsan jiang tona ejüeli rechho jiang to ji esopvüi jiang khelo picho. 15 Osi esopvüi otsük mezhü jiang zikata ejüeli rechoe hansi yio jiang lona mpensü tona jokhüp to khi morantsan jiang ekathukcho osi etsoyuha tssona onte picho. Osi onte tsatsokhü jiang lo olive thyujü onte theyitacho. Onte yulo nkhyo nrungo jiango gadho mangkuina socho. Osi morantsan topvüto Judea meta, Jeriko rümbüm dung yan to tsao jilo solansi wocho. Tosi onteno elani okiwoe Samaria lo yitacho.
Ahaz na Assayria thüngi Ekyoerung Chonala
16-17 Edom kyon jiang na benkae Juda meta ji ori tssolancho osi morantsan khosha rumi hana yicho. Hoji tsükona Ahaz mesao na Assyria mesao Tiglath Pilesae thüngi nzanchi choncho. 18 Yutatsük jilo Philestia jiang na Juda meta engrhewoe phung lan jothe jiang tona jüjowoe jiang to thüngi ori tssoa vancho. Ontena Beth Shemesh yantsü, Aijalon, tona Geteroth yantsü , Soko, Timnah, Gimzo yantsü tona jianglo oyan jiang to khyoe jianglo vanjüng tssawoe sicho. 19 Juda mesao Ahaz na kyon jiang elan ji yesoyio jina osi OPVÜI myimg mmenthuko jina OPVÜI na Juda lo ezüp rothukcho. 20 Assayria mesao jina Ahaz nzanchithung jo ombo panlana ezüp picho. 21 Hoji tsükona Ahaz na khümpheni shona jiang khi, mesaki elio jiang tona esopvüi jiang ki to elio jiang khi Assyria mesao ji picho, khatola ombo n nzanchicho.
Ahaz Mmen Jiang
22 Ombo ezüp nrankata chiyiale Ahaz na kyongkata OPVÜI mhadungo mmen tssocho. 23 Ombo na Syria potsow jiang thüngi erungthan, picho. Osi ombona phyocho, "Syria potsow jiang Syria kyon jiang na kyocho, hoji tsükona ana othan ombo pina anaha a nzannchiv." Hoji yakchia ombo tona ombo meta to jilo ezüp nungra yicho. 24 Hojilo ekata ombona ekhümki tsütsailan jiang topvü khi roe sicho. Ombona ekhümki ji mpa khani sisi Jerusalem yan nken akvülo thanphen ronkachiracho. 25 Juda metalo yantsü osi yanro topvülo ombona jipopoe potsow thüngi erungthan piphen khümphen tssoracho. Hojitolyui ombona ombo omotsüi Potsow OPVÜI lüm tssukthukcho. 26 Ombo yansa yutalo tssocho motsü thanpo jiang topvü Juda tona Israel to mesao jiang motsü kako lo eranrae lia. 27 Ahaz mesao chüi Jerusalem lo shothecho, tokhatola mesa khüpo ombo n sicho. Ombo tsoe Hezekiah na mesao ombo echungcho.
Juda lo Hezekiah Mesao
1 Hezekiah na ombo nzyu mekyu mongo tssoathüng Juda lo mesao tssocho osi Jerusalem lona nzyu mekyu tokvü yansa sacho. Oyo jo Abijah to tsa Zekhariah otsolov ji. 2 Omotsü David mesao esüa ombo ha OPVÜI emathao elhi tssocho.
Khümphen Ntssüngcheo ji
3 Hezekiah na mesao kümsi choro ovüngo jilo ombona khümphen kibüng jiang chonchithuki ntsüpnrüpi vacho. 4 Ombona khümphen ji engkhfüwoe hapo jilo pvütiden tona Leviden jiang to tsarhyui heto ezocho, 5 "Liveden, nteno nte motsüi Potsow OPVÜI khümphen ji ntssüngchevka. Ntiona khümphen ji mmen sana jiang topvü khichoki sitava. 6 Ete motsüi jiang na ete Potsow thüngi longtsüka n vacho osi ombo n mathao elhi tsotacho. Ontena ombo khaki sisi ombo vanphen ji lona nlüpi yitacho. 7 Ontena khüm phen kibüng jiang khani sitacho, milon jiang mhethuki sitacho, tssütserhüm n rungtav sicho, osi Israel Potsow mhadungo erungthan n piv sitacho. 8 Hoji tsükona OPVÜI na Juda tona Jerusalem to thüngi lüm tsukcho osi ombona ntio onte tssoyicho sana jina otsük akvü ekhentsüngthaka, hoji ntena mmhona ntsia. 9 Ete opo jiang ritsso lona chürathaka osi ete enghden osi ngaro jiang rhümhae sosi yirathaka. 10 "Enhungo ana Israel Potsow OPVÜI thüngi ntsata methak thaka, ombo khi ete thüngi lüm n tsuklanthukvü tsükona. 11A tso eden, yuta ti ezithuktava, OPVÜI na tssütserhüm erungu ethüngcheo ji osi kyon jiang sokata ombo ekhümvü ethüngcheo ji nteka." 12-14 Levi kyon shiang ji hojilo jüracho: Kohath pvüji lona Amasai tsoe Mahat tona Azariah tsoe Joel to, Merari pvüji lona Abdi tsoe kish tona Jehallelel tsoe Azariash to, Gershon pvüji lona Zimnah tsoe Joah tona Eden tsoe Joah to, Elizaphan pvüji lona Jeuel tona Shimri to, Asaph pvüji lona Zakhariah tona Mattaniah to Heman pvüji lona, Jehuel tona Shemei to, Jethudun pvüji lona, Shemaiah tona Uzziel to. 15 Kyon shiang na onte okho Levi jiang tsarhyui ontebobo nthochetacho. Osi jisülo jo Mesao na onte ezo ji esüa, ontena khümphen ji OPVÜI shikhfü ephan ntssüngchetav benkacho. 16 Pvüti jiang na khümphen ji nthochelo ochungi rhovotacho osi kichungi khümphem mmemo tvü ntio lichosana topvü hanchuki sitacho. Hoji lona Levi jiang na mmen jiang ji khi hansi yantsü pomoe chivo Kidron hayi jilo sitacho. 17 Elhi ji choro ovüngo jilo tsüngon ovüngo jilo benkacho osi tsüngon ti-zoato jilo jo elhi ji thakcho, khümphen rhovolan chungchak jiha thakcho. Jitosi ontena tsüngon tiza elhi tssolani choro jilo tsüngon taro tiroko ji nandang tssotacho. Osi hoji nchuk lona benkae ekhümvü benkav tsükona khümphen ji ha methaktav benkatcho.
Khümphen ji Nthochelanala
18 Levi jiang na Hezekiah mesao thüngi heto yivon picho: "Ena khümphen ji shikhfü ephan ntheoche elhi ji thakthaka, osi erungthan saphang jiha, ntho hümri vaphen jiha osi jianglo vaphen thanpo topvü thakthaka. 19 Elani Ahaz mesao na Potsow lo n longtsükav vanathüng khi hansi yio tsütsailan jiang ha hanlansi yirathaka osi nthochelani varathaka. Osi hojiang topvü OPVÜI thanphensa ndüngo lia." 20 Tole Hezekiah mesao na zaktole yantsü jilo eramoe jiang tsarhyucho, osi ombo nzo ekhümki wotacho. 21 Mesao wopan osi Juda kyon jiang mmen khi siyiv osi khümphen nthochev tsükona onte na tsibung tiying, olyu tiying, olyuoro tiying osi nyanyan tiying to hansi wotacho. Mesao na Aaron wopan pvütiden jiang ji thanphen jilo na ekümrüm than pitale to ezocho. 22 Pvüti jiang na ovüngo ji tsibung jiang lüngthae, jisülo jo olyu jiang, jisülojo olyuro jiang to lünghthae hojiang ejen jiang ji thanphen jilo erhikatacho. 23 Okhao tssoa ntena nyanyan jiang ji Mesao tona thanpoe khümo eroe jiang to thüngi süsi owo onte khe jiang nyimkathukcho. 24 Jisülojo pvüti jiang na nyanyan jiang lüngthae, mesao osi kyon topvü mmen khi siyithuku tsükona nyanyan ejen jiang thanpheno phyangkatacho, ntiotssole mesao na Israel kyon topvü tsükona erungthan pile to pvüti jiang yizüng picho licho. 25 Mesao na ovüngthüng Potsow na, esao küpo zenkhying Gad, tona Nathan to yakchia David mesao ezoe vathakao ji ephan yizüng picho. Ombona khümpheni Levi jiang vanthukcho osi khenzhü tona phikuk ekhophen, 26 tona David mesao na tsütsao tüv khenpvü jiang to tsütsatacho. Pvüti jiang naha tatara bentasi jilo mangi vantacho 27 Hezekiah na erungthan epiv ji yizüng picho. Osi othan ji epiv benka tona kyon jiang na okhen denta OPVÜI thüngtacho osi khenpvü ekhui jiang naha okhen khüta khendenpvü olan taro benria tsütsatacho. 28 Hojilo evan topvü na ekhüm jilo thecho osi erungthan jiang n rungrathüng nandang jo khenkhüi jiang na ntümjak na khüta vancho. 29 Osi Hezekiah mesao tona kyon jiang topvü na khoktseni OPVÜI khümcho. 30 Mesao osi esopvüiden jiang na kyon jiang ji David mesao osi Asaph zenkhying jina eramo khen jiang dentale to ezocho. Hojito otsük akvü na khoktseni OPVÜI khüma okhen denta longshitacho. 31 Hezekiah na kyon jiang heto ezocho: "Nteno enhungo shikhfü ephan nte nthochethakao ji tsükona OPVÜI thüngi montso epithan hansi rotava." Ontena hoji engatacho osi ochaoang najo OPVÜI etham tsükona lüm erüng than ekümrümo hansi roracho. 32 Ontena tsibung ekha tiying, olyu nzoa, tona olyuro nzo eni to OPVÜI etham hansi roracho. 33 Ontena kyon jiang etsov ha tsibung nzo tiruk, olyu wothüng ethüm toha hansi rocho. 34 Ekümrümo hetata shi lüngthav pvüti tssona n vamo jina Levi jiang na elhi ethak nandang onte nzanchicho. Hojito thüng pvüti kyong kata nthocherae chiyicho. Osi Levi jiang pvüti jiang lona kyong ata ntsüknrüka nthochetacho. 35 Mpümna erungo than jiang ephalo pvüti jiango kyon jiang na etsowo than jianglo ethyu jiang erungu osi erungthan nzo zükhi thamo jiang toha ezev zikacho. Hojito khümpheni na elani khümtav benkatacho. 36 Potsow na heto shiang zakto etssov nzanchiwo jina Hezekiah mesao osi kyon jiang emathacho.
Yakchi Tokhu Tsükona Methak
1 Kyon jiang na yakchi tokhü ji yuta eben lo choro ovüngo jilo khitav n tssochev vancho, ntiotssole pvüti nthochecho tssona n vancho osi Jerusalem loha kyon tssona n sanrhyucho. Hoji tsükona Hezekiah mesao osi ombo tsoe jiang osi Jerusalem kyon jiang na choro enioto jilo khitav methakcho; osi mesao na Juda osi Isreal meta topvülo yithen picho. Ombona Ephraim tona Manasseh to pvüji kyon jiang yithen piv tsükona echümpo tssoa methakcho osi onte ji Isreael OPVÜI Potsow yikrachia khümlo Jerusalemi rotale to tsacho. 4 Hojito onte methak ji hungi mesao osi kyon jiang emathacho, 5 hoji tsükona ontena Israel topvü jükiwoe Dan lona benkae jüjowoe Beersheba nandang tsarhyui Jeru salem lona shikhfü ephan yakchi tokhü khitacho osi ovüngthüng thüngina jo topvülo hojithüng ekyongo sanrhyutae tokhvütacho. 6 Mesao tona ombo tsüphoe jiang to thüngina yithen heto Juda osi Isreal topvülo yithukcho: Tsrael kyonden, ntena Asyria jiang na meta khyo jilona tssanchothaka. Enhungo ntena Abraham Potsow, Isak, Jakob Potsow thüngi yitava, tona ombo naha nte thüngi elani yivka. 7 Nte motsüi jiang osi nte Israel kyon thanpoe jiang na onte OPVÜI Potsow lo n longtsükao ji esaüa ti-tssotava, ombona onte ji ezüp elüm picho ntena hungthaka. 8 Onte esüa lüm ti-khüngtava, tokhatola OPVÜI yi engatava. Nte Potsow OPVÜI na kümali ntho kümthukthako Jerusalem yantsü jilo khümpheni rotava osi ombo khüm tava tona ombona nte thüngi lüm tsuklam meka. 9 Ntena OPVÜI lo elani yina osi ochoangna nte wopan jiang sosi tsancho sana jiang na lümbüm khophilani onte nzana vachia yithukuka. OPVÜI nte Potsow jo nzan eli osi khonzan to etssoe, osi ntena ombolo kholani yina ombona nte khichov." 10 Ephraim tona Manasseh to meta topvü lo yithenpvüi wocho osi jükiwoe Zebulun pvüji jana chungotacho, tokhatola kyon jiang na onte emakata-yikvütacho. 11 Khatola Asher pvuji lona ha kyon tara, Manasseh tona Zebulun pvüji lona tara tona chokata Jerusalemi rocho 12 Juda kyon jang yulo engathethukvü Potsow na elhi tssoe onte khi mesao osi tsüphoe jiang yizüng jiang engathukcho.
Yakchi Tokhu khitala
13 Choro enioto jilo vümhi n theo hümri tokhu ji khitav Jerusalemi kyon khosha sanrhyucho. 14 Ontena Jerusalem lo othan saphang osi thanphen lio jiang topvü khi Kidron hayi owo sitacho. 15 Osi choro ji tsüngon taro mezhüo to jilo ontena olyuro jiang lüngthae OPVÜI othan pitacho. Pvüti osi Levi ochoang na n thechev vancho sana jiango elümoto yikra OPVÜI lo nthocherae onte ha khümpheni othan pichecho. 16 On tena Potsow kyon Moses shikhfü lo lanso lio ji ephan ombobo vanphen khiracho. Levi jiang na othan ejen jiang khi pvüti jiang pia thanphen jianglo erhikathukcho 17 Kyon elümoto jo shikhfü ephan n tssüngche hamo ji tsükona ontena jo yakchi tokhu olyu jiang n lüngthachecho, hoji tsükona Levi jiang wothüng onte tssoyicho osi olyuro jiang OPVÜI lo khochaki pitacho. 18 Hoji ephalo kyon elümoto Ephraim lona eroe, Manasseh, Issakhar osi Zebulun lona eroe elümoto jo nthoche elhi n tssohancho, hoji tsükona onte na yakchi tokhu ji shikhfü n phan khita vancho. Tolea onte tsükona Hezekiah na heto randanicho: 19 "OPVÜI, emotsüi Potsow, ni mmhoncho lona kyon ochoang na n thochelea onte lümbüm topvü theta ni khüma vancho sana nlan onte siyia." 20 OPVÜI na Hezekiah randan engae nlan onte siyicho osi onte n tssatsocho. 21 Jerusalem lo sanrhyuo kyon jiang na tsüngon tiying longshita vümhi n theo tokhü ji khitacho, osi eng akvü Levi tona Pvüti to jiangna onte etho topvü na OPVÜI thüngtacho. 22 Levi jiangna OPVÜI ekhüm elhilo tssothia sokabenkao jina Hezekiah na onte thüngi thanthüngcho.
Enioto Tokhütala
Ontena OPVÜI onte motsüi Potsow ji thünga tsüngon tiying othan pia khümtasi sülo, 23 Ontena tsüngon tiying tokhutaiam methaktacho, osi hojito ontena longshita tokhutacho. 24 Hezekiah mesao na kyon jiangna lüngthae etsov tsükona tssibung wothüng motsünga, olyu wothüng taro to thecho, osi tsüphoe jiangna ha tssibung wothüng motsünga tona olyu wothüng tiying to thelancho. Osi Pvüti khosha na nthoche elhi tssoe onte bobo nthochecho. 25 Otsük akvü, Juda kyon pvütiden, Levi jiang, jükiwoe na erovo kyon jiang, jipopoe Israel tona Juda tolo oro vankae vamo jiang topvüna longshitacho. 26 David tsoe Solomon tsüngono na benkae hetenhya tsüngon kvüloha heteüv tokhu n khitachehamo jina kyon otsük akvü na elümoto longshitachowo. 27 Pvütiden osi Levi jiang na kyon jiang mmha randankayicho. Tole Potsow na Potsüwoe ombo kina randan jiang zoe khichocho.
Hezekiah na Ekhümlan Ntssachoala
1 Tokhu ji thakthakale Israel kyon topvü na Juda lo yantsü akvü lo owo longzü jiang vanroe sita, Ashera potso-pvüi ji kisü jiang roe sita, n longtsüi thanphen osi khümphen jiang roe sitacho. Ontena Juda meta topvülo osi Benjamin, Ephraim tona Manasseh to jiang lo hojito roe sita osi oki elani yitacho. 2 Hezekiah mesao na pvüti tona Levi to okho jiang soyinglancho, ntiotssole hojilo onte elhi jiang jantae liracho. Onte elhi jianglo erungthan epi, khümshümthan epi, khümpheni ekhüm elhi, tona khümphen ki nken akvü lona montsso epi to jiang tssotacho. 3 Mesao na ombo tssiden lona khichei pia enya mmyu akvü erungthan jiang, Nthomung than jiang, chothan tokhu than jiang tona thanpho than OPVÜI yizüngo lio jiang to pithukcho. 4 Hoji ephalo, mesao na Jerusalem kyon jiang ji pvüti osi Levi jiang ejan than jiang oro pitale to ezocho. To tssona pvüti osi Levi jiang na OPVÜI lo onte elhi Jüngtheta mmhona tssochethukvü tsükona. 5 Mesao na hojito yizüng pipvü to Israel kyon jiang na onte ethieben ovüngo jiang, zükhi, olive thyujü, tssakijü tona thanpo benro-niro to jiang, elani tarochia jiang to hansi roracho. 6 Juda yantsülo evan kyon topvü na onte mangsü osi olyu jiang lona tarochia tona yantso khosha to hansi oro OPVÜI onte Potsow lo khochaki pitacho. 7 Yantso jiang choro ethümo to jilona hanrhyua vancho osi choro mezhüo to ji jana eshenkachia hanrhyucho. 8 Hezekiah mesao tona ombo küpo thanpoe jiang to na yantso nshakachio ji hungi onte na Potsow thünga Israel kyon jiang thüngtacho. 9 Mesao na yantso shiang tsükona pvüti osi Levi jiang thüngi oyi nsancho, 10 osi Zadok rüi Azariah pvüti jina heto ombo ezocho, "Kyon jiangna onte yantso jiang khümpheni hanrhyuo jina etsoyu elümoto pvülyua. shiang hetopvü ji OPVÜI na ombo kyon jiang mmhayio jinaka." 11 Mesao na ezo ji ephan oson ranki tssorae 12 tarochia osi yantso lantaro jiang n yeswothukvü hanthe vatacho. Ontena hoji ezei jo Levi tsüka Konaniah to tsao ji ethüngchecho osi ombo ojenio Shimai khi ombo nzarichithukcho. 13 Oni küpo elhi etssov jo Levi otsük taro shiang ethüngchecho: Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath tona Benaiah to shiang hetopvü Hezekiah mesao tona pvüti tsüphoe Azariah to yizüng lona tssocho. 14 Khümphen ji engkhfü kibüng enhyang Kore to tsao Imnah tsoe jijo kyon jiang na OPVÜI thamo jiang khirhyui jantav ji ezepvüi tssothukcho. 15 Pvüti evamo yantsü thanpo jiang lojo elhi shilo ombo longtsükata nzanchiv tsükona Levi shiang ethüngchecho: Eden, Miniamin, Jeshua, Shemiah, Amariah, tona Shekaniah to. Ontena etsoyu jiang Levi topvü thüngi ombombo elhilan ji ephan jantayicho, 16 pvüji ephanina jo n jantacho. Ontena eboetso nzyu thümro tona ji mhawoe to jiang topvü khümpheni onte elhi jiang ephan ejan yantso piracho. 17 Pvüti jiango onte elhi jiang pvüji ephan jantayicho, osi Levi jiango nzyu mekyu nandang na mhawoe jo onte lhitssoe okhona elhi jantayicho. 18 Onte ji yuta ntinsalo elhilo etsao tssojina onte mying, eloe osi otsoe oro tona onte thüngi evan thanpoe jiang topvü theta omying erani : vayicho. 19 Aaron tsoronichen pvütiden yantsü jianglo osi yantsü jiang lo eroyu meta jianglo evamo kyon jiang yolo longtsüka eli kyon jiang na pvü ti wopan lo eboetso jiang tona Levi pvüji lo omying lio jiang topvü to etsoyu jantayiv elhi picho. 20 Juda meta topvüto lo Hezekiah mesao na OPVÜI emathao osi elamo elhi tssocho. 21 Ombo ekhyo ekhüng mesao tssocho, ntiotssole ombona khümpheni elhi osi yizüng benphi topvülo ombona longtsüka lümbüm hansi OPVÜI Potsow lo khochaki elhi tsssocho.
Assyria Jiangna Jerusalem Ekhenthukala
1 Hezekiah na longtsüka lia woami OPVÜI benkata heto. elhi tssotasi sülo Syria mesao Senacherub na Juda thüngi ori tssocho. Ombona yantsü pikhfüo jiang hayae vasi ombo rasan jiang ji epi jiang vanrhüpi rhovole to ezocho. 2 Senacherib na Jesuralem ha sakav sala to Hezekiah na ntsiale, 3-4 Ombo osi tsüphoeden jiangna Jerusalemi ojü soa yiphen jiang khani siyiv osi, Assyria kyon jiang Jerusalem ndüngo roana ojü n jüv sithoku to methaktacho. Osi tsüphoeden jiang na kyon khosha sosi chivo jünhyo topvü chungi sitacho osi ojü n pukthukvü sicho. 5 Mesao na yantsü pikhfü mmhonkathuku pikhfü rhüa rizümphen tssokachiracho osi pikhfü tsae epiha thelancho, hoji ephalo mesao na Jerusalem yanhen jiwoe engrhelamoe ochon hanthei epio jiha ntsüpnrüpcho. Ombona otsso tona otsung toha khosha methakcho. 6 Ombona yantsü ; kyon topvü rasan tsüphoe küpo tssothuki onte topvü yantsü etsirhyuphen jilo sanrhyule to ezocho. ombona onte ezocho: 7 "Mhankatava osi Assyria mesao na rasan sosi tsao ji ti-kyutava, ombona so jiang lona mmhonkata eteha vanka. 8 Ombo na kyon etho lileha eteno Potsow na ete thüngoe thetala osi ombona ritsolo ekyochiv." Mesao na hojito phyo ji zoe kyon jiang na elümoto lüm tssonkacho. 9 Yuta tara sülojo Senacherb tona ombo rasan jiang tona Lachish lo vanathüng ombona Hezekiah tona ombo ndüngo kyon Jerusalemi vamo jiang to thüngi heto yithen picho: 10 "A, Senachereb Assyria mesao na nte engala, Jerusalem ji hayataha n tssana jilo vamo jijo ntiona nte lüm tssonkayichola? 11 Hezekaih na jo nteji OPVÜI nte Potsow na e khelona nte shanchov to phyoala, tokhatola ombona nte ejithechiala, nteji wonton era lona nte chükhanthuku sala. 12 Ombona OPVÜI thanphen osi khümphen jiang roe sicho osi Jerusalem kyon jiang nte meta motsünga lona tae khümtale to nte ezocho. 13 A osi e motsüi jiang na jipo thanpoe jiang thüngi ntio tssoyithakcho sana ntena tsentsi? Jipo kuoesana onte Potsow jiang na Assyria khelona shanchojo jitvu vancho alo? 14 Meta kumoe potsow e khelona ombo kyon jiang shanchochechola? tona nte Potsow na nte shanchov to kvütoli nchümtala? 15 Hezekiah khi hojito nte ti-ejithechithuktava osi ombo ti-longtsütava, Nti jipo Potsow naha Assyria mesao khe lona ombo kyon jiang n shanchohanka. Otsotso nte Potsow jinaha nte n shanchoche." 16 Assyria tsüphoe jiang na elani jilona nmhonkao OPVÜI potsow osi ombo phajae Hezekiah echi phyoyitacho. 17 Assyria mesao na eramo yithen jina Israel Potsow mying nmenicho. Ombona heto erancho: "Jipo jiang potsow kuenaha onte kyon jiang a khelona n shanchohan. Hoji esüa Hezekiah Potsow jina ha ombo kyon jiang a khelona n shanchoche." 18 Assyria tsüphoe jiang na ha Jerusalem kyon yantsü pikhfü lo vamo jiang lüm terikayia ekhenthuku tsükona Hebrew yina hojito tüngkachia phyotacho, hojitolyui yantsü ji elaroa khyoe ekhiv tsükona. 19 Ontena potso thanpo okhena nsüngrüo jiang phyoyio ji esüa Jerusalem Potsow jiha hojito phypyitacho. 20 Tothüng jo Hezekiah mesao ha zenkhying Isaiah, Amoz tsoe ji wonina Potsow thüngi nzanchi tsükona randantacho. 21 Tole OPVÜI na Lanben wothuka Assyria mesao tona ombo rasan jiang osi tsüphoe jiang to lüngthathukcho. Toajo mesao jina yikra Assyria metae kholani yi sicho. Tsüngona lo ombona ombo potsow khüma vanathüng ombo tsoe ejoma na otsso na ombo lüngthacho. 22 Hojitolyui OPVÜI Potsow na ombo kyon jiang osi Hezekiah mesao ji Assyria mesao khelona tona onte ri thanpoe jiang to khelona shanchocho. Ombona kyon jiang ji onte phina yanshüm osi jianglo metapoe kyon topvü thüngi mmhontae noying lia vanthukcho. 23 Hoji tsükona kyon topvüna yantso hantasi Jerusalemi oro Hezekiah mesao yantsotacho, osi jipo topvü na Hezekiah yikrachitacho.
Hezekiah Nochonori osi Kangtsü
24 Yuta shiang harümlo Hezekiah mesao ji nochonori cho, osi echüv tae tssocho. Osi ombona randanle OPVÜI na nochonori jilona emiv chethev ombo picho. 25 Tokhatola OPVÜI na hojitata ombo nzanthako ji tsükona montso epiv tia ntsiv kangtsüa vancho, osi hoji tsükona Jerusalem tona Juda tona hojithüng ezüp hungcho. 26 Tokhatola Juda tona Jerusalem to kyon jiang na sülami jo khophi OPVÜI mhadungo teri kümtacho, hoji tsükona Hezekiah n chüthüng jo OPVÜI na ezüp onte n picho.
Hezekiah Ejüeli osi Myingthüng
27 Hezekiah mesao ji elümoto ejüeli kümcho osi otsük akvüna ombo kyuchicho. Ombona shona, janti, tsentsü long, mozhürhüm, otssüng osi tsentsü thanpo jiang vaphen chungchak tssokacho. 28 Ji ephalo ombona tsünghanro, zükhi osi olive thyujü vaphen oson ha tssokalancho; ombo tssiden vanphen ha ranki tssokacho osi elani olyu jiang vanphen epikalancho, 29 Jiang topvü poni Potsow na olyu osi tssiden osi ejüeli elümoto ombo picho, osi ombona yantsü elümoto tssocho. 30 Hezekiah mesao na Gihon lo jünhyo jiang khani sicho osi ojü soe jüyenphen lona Jerusalem yantsüi rheyithukcho. Hezekiah na ntio elhiana jiang topvü lo ekhyo hungcho, 31 Osi meta jilo n tssophen tssoa yio ji ethümoe zelo Babylon lona lanlyui ro jithüng mpato OPVÜI na Hezekiah ji ombo etancho vanthukcho, jijo ombo longtsü ji ojang tssoyiv tsükona.
Hezekiah yansa Ochüm ji
32 Hezekiah mesao na tssocho thanpo topvü osi ombona OPVÜI khümo jiang topvü Amoz tsoe Isaiah zenkhying ji hungche kako jilo tona Juda osi Israel to mesao jiang motsü kako to lo eranrae lia. 33 Hezekiah ji chüale mesa khüp omhawoe ombo shothecho, Juda osi Jerusalem kyon topvü na ombo echülo elümoto ombo yikrachicho. Osi ombo tsoe Manasseh na mesao ombo echungcho.
Juda lo Manasseh Mesao
1 Manasseh na ombo nzyu taro eni tssoathüng Juda lo mesao tssocho, osi ombona Jerusalem lona nzyu tinyansi mongo sacho. 2 OPVÜI kyon jiang na rasanathüng onte mhadungo na OPVÜI na phani siwo jipo jiang etsso-ephyo n-mhom jiang zechoa Manasseh na OPVÜI mhadungo nmen tssocho. 3 Opo Hezekiah na n lungtsüi khümphen roe siwo jiang ombona tssocholancho, osi ombona Baal khümphen tssocho osi Ashera potsopvüi ji kisü nsüngrücho osi shantio jiangha khümcho. 4 Ombona khümphenki kümali OPVÜI khümphen tssov to OPVÜI na phyoe vao jilo n lungtsüi thanphensa ronkachicho. 5 Khümphen ji hapo eni jilo ombona shantio jiang khümathüng tsükona thanphen ha ronkachicho. 6 Ombona ombo tsoe ji Hinnon hayitsü na lüngthae erungthan tssocho. Ombona ratsenrapvüi tsaphia osi evoerang jiang nduki ombo mhadung zeta to tssocho. Osi hojito ombona OPVÜI mhadungo nmen tsüphov tssoe OPVÜI lüm tssukayithukcho. 7 Potsow na David tona ombo tsoe to thüngi heto phyoe lio khüm phen jilo ombona kisü vacho: "Ana Israel jipo taro eni jiang topvü yulona Jerusalem Yantsü shi ji a khümphen etssov ethüngchecho. 8 Osi Israel kyon jiang na a yizüng jiang enga a phajae Moses na pio shikhfü jiang topvü benphina, ana onte motsüi jiang epio meta shi lona phani onte siv meka." 9 Manasseh na Potsow kyon jiang sosi nmen tsso jiango OPVÜI na ombo kyon jiang mhadungo na phani siwo jipo jiang na tsso mmen jilona nmhonka tssocho.
Manasseh na Khophiala.
10 OPVÜI na Manasseh tona ombo küpo kyon jiang to ekyuyi pia ha ontena hoji n ngacho. 11 Hoji tsükona OPVÜI na Assyria rasan esae jiang khi Juda thüngi ori tssothukcho. Ontena Manasseh rhümae ombo tsüko yikaphen eshenkae Babyloni sütasi yicho. 12 Ombo ezüpathüngti Manasseh na teri kümi OPVÜI thüngi nzanchi choncho. 13 Tole Potsow na Manasseh randan ji engae Jerusalemi kholani ombo yithuki yan sa salanthukcho. Hoji lona Manasseh na OPVÜI jo Potsow to engathecho. 14 Hoji süloti Manasseh na David yantsü pikhfü engkhüwoe ji ntssonkata epicho, hojijo hayitsü jiwoe Gihon jünhyu ndüngo ongo kibüng to tsao ji jükiwoe na benkae yantsü jilo Ophel to tsao yantsü ji nandang ntssonkathukcho. Ombona Juda lo yantsü pikhfü ethe topvü lo rasan esopvüi tsük-tsük küpo rasan tara tara vanthukcho. 15 Khümpheni ombona nlungtsüi osi jipopoe potsow kisü vao jiang ji topvü khi siracho. Osi khümphen ji phunglanro jilo nlungtsüi thanphensa lirao jiang tona Jerusalem yantsü kvülo kvülo na lio jiang ha to roe siracho. Ombona shiang topvü khi yantsü tsae chivo sicho. 16 Ombona OPVÜI khümphen jilo thanphensa jiang ntsüpnrüpi jilo khümshümta than tona montso epi than to picho. Ombona Juda kyon topvü thüngi Israel Potsow OPVÜI ji khümtale to yizüng picho. 17 Osi kyon jiang na meta thanpo thanpo lona othan jiang ntumja kna pitacho khatola topvü ji OPVÜI thüngi tae pitacho.
Manasseh Yansa Ochüm Tssoji
18 Manasseh na tssocho thanpo topvü, ombona ombo Potsow thüngi randamo jiang, zenkhying na OPVÜI Israel Potsow myingo na yithen ombo pio jiang, topvüto Israel mesaeden motsü jilo eranrae lia. 19 Mesao randan jiang osi Potsow na ombo randan janlamo jiang osi ombona n khophithüng nmen tsso jiang, ombona etsso mmen jiang, n longtsüi khümphen meta jiang, Ashera potsopvüi ji kisü ombona nsüngrüo jiang, ombona khümo kisü jiang, topvü zenkhying jiang motsü lo erani lira. 20 Manasseh ji chücho osi Mesaki shothe sicho, jisüi jo ombo tsoe Amon na mesao ombo echungcho.
Juda lo Amon Mesao
21 Amon na ombo nzyu mekyusi eni lo Juda lo mesoa tssocho, osi ombona nzyu eni Jerusalem lona yansa sacho. 22 Opo Manasseh esüa ombona OPVÜI mhadungo mmen tssocho, osi ombona opo na khümo kisü jiang ombona khümcho. 23 Tokhatola ombo opona teri kümi OPVÜI lo kholani yiato n tssocho. Osi ombo opo lona kyungkata mmen tssocho. 24 Amon küpo tsüphoe jiangna ombo lüngthav khyimtae ombo mesaki na ombo lüngthae sicho. 25 Tole Juda kyon jiang Amon lüngthae jiang lüngthalani sirasi ombo tsoe Josiah ji mesao tssothukcho.
Juda lo Josiah Mesao
1 Josiah na ombo nzyu tiza lo Juda lo mesao tssocho osi ombona Jerusalem lona nzyu thümrosi ekha yansa sacho. 2 Ombona ntiojo OPVÜI emathao sana ji tssocho. Ombona ombo motsüi David sü rüa Potsow yizüng jiang khünga benphicho.
Josiah na N longtsüi Ekhümlan jiang Roe Siala
3 Josiah na nzyu tizao to mesao tssoathüng elümoto nongothüng na omotsü mesao David Potsow ji ekhümvü benkacho. Nzyu me zhü sülojo ombona n lungtsüi khümphen jiang roe siv benka cho, osi Ashera potsopvüi ji kisü tona kisü thanpo jiang topvü roe siracho. 4 Ombo lanso yakchia ombo kyon jiang na Baal thanphen jiang panroe sia jilo mozhürhüm rungphen lio jiang ha roe sicho. Ontena Ashera potsopvüi ji kisü jiang tona thanpo kisü jiang topvü makvüro küma ejüproe hojiang khi kyon ochoang na hojiang khüma othan pisi chüa yithakcho sana jiang khüp jiang lo venkata wotacho. 5 Ombona n lungtsüi jiang khümpheni pvüti jiang ryu jiang khi rungi sicho. Hojitolyui ombona Juda tona Jerusalem toji nthochelancho. 6 Ombona hoji esüa Manasseh, Ephraim, Simon to meta yantsü jianglo tona meta roe siwo jiang tolo tona jükiwoe Naphatali to jana hojito tssoa wocho. 7 Jükiwoe ekhüngyan metaro jiang jana Ashera potsopvüi ji kisü jiang osi kisü thanpo jiang to vanroe makvüro küma roe sicho osi mozhürhüm rungphen jiang topvü roe sicho. Jitosi ombona Jerusalem lo elani yicho.
Shikhfü Kako ji Yanchetala
8 Ombo yansa nzyu taro tizao to jilo, ombona n lungtsüi khümphen jiang roe sia meta ji osi khümphen jiang nthochethakale, mesao Josain na OPVÜI khümphen ji ntsüpn rüpo kyon otsük ethüm wothukcho. Azaliah tsoe Shaphan, Jerusalem yansae Massiah tona Jahaz ji tsoe Joah to. 9 Levi jiang na khümpheni khyarhyui vao rang jijo pvüti tsüphoe Hilkiah khelo picho. Orang jijo Ephraim tona Manasseh to kyon, jükiwoe ekhümgyan kyon jiang tona Juda kyon, Benjamin kyon, tona Jerusalem kyon to jiang thüngi na khyarhyuo jiang. 10 Osi hoji rang ji ekhümki ntsüpnrüpo wothuko otsük ethüm jiang pia onte khi, 11 Tssüngrhüi osi longjoe jiang pithuka otssüng tona olong to shi khi Juda mesao na roe sithuko ki jiang ntsüpnrüp thukcho. 12 Hojilo elhi etssoe jiang elümoto ntsanrük eli tae. Onte ji Levi otsük mezhü shiang na zeyata tssothukcho: Merari jipo lona Jahat ha Obadiah oni, Kohat jipo lona Zekhariah ha Meshullam oni to. Levi jiang topvü khenkhüi mmhom tae tssocho. 13 Levi thanpoe jiang topvü tsütsailan hanphiden osi elhilan elümotolo ezepvüiden tssocho, osi thanpoe jiang na erantoe osi enhyangden tssotacho. 14 Orang ji vapheni na khichetathüng Hilkiah na OPVÜI shikhfü kako ji yanchecho, hojijo Potsow na Moses pio shikhfü kako ji. 15 Ombona Shaphan ezocho, "Ana kako ji khümpheni na yan chethaka" Tosi ombona kako ji khi Shaphan picho. 16 Osi Shaphan na khi owo mesao picho. Osi ombona heto mesao ezocho: "Nina a ezo jiang topvü ena tssothaka, 17 Ekhümki evao rangjen ji ena khiche elhi etssoe jiang osi ezepvüi jiang khelo pithaka." 18 Tosi hetoha ezolancho, "Hilkiah na apio kako shi ana bensi rocho," tothakale ombona kako ji ovon choka khae mesao engathukcho. 19 Kako khao ji mesao na zoale; ombona etho ejako na ombo mpensü jiang rerocho. 20 Ombona ekhena Hilkiah thüngi osi Shaphan tsoe, Ahikam. Mikaih tsoe Abden thüngi osi yitssoki eranpvüi Shaphan thüngi tona mesao phanphi Asaiah to shiang thüngi heto ezocho. 21 "Owo A tona Israel kyon Juda lo vamo shiang to tsükona OPVÜI engatava, kako shina ntio yithen ezoa sana ji OPVÜI engatava. OPVÜI na ete thüngi lüm tsukala, ntiotssole ete motsüi jiang na OPVÜI yi nngacho osi kako shina ntio tssole to phyocho sana ji ephan n tssotacho." 22 Mesao yizüng ji ephan Hilkiah ha thanpoe jiang tona owo eloe tsüka huldah to tsa zenkhying Jerusalem yanthan jiwoe vamo ji nduktacho. Ompvü orapvü jo Shallum, Harhas tsoe Tikvah jitsoe, khümpheni pipo ezei ji tssocho. Ontena ntio tssocho sana ji topvü rüa ompvü ezotacho. 23 Tole onpvüna elani oyi mesao ji heto ezotale to onte ezocho, 24 OPVÜI thüngina yithen heto hungcho: "Ana Jerusalem ezüp piv saka, osi mesao na zoa khao ji kako jilo ezüp ntio erani licho sana hojiang topvü khi kyon jiang ezüpthukuka. 25 Ntiotssole ontena a khaksithaka osi potsow than po jiang thüngi othan pitathaka, hoji yakchia a lüm etsuk shichethaka, Hoji tsükona alüm etsuk Jerusalem pono chiyithaka osi hoji zakto pükvü meka. 26 Mesao tsükona jo Israel Potsow OPVÜI A shina heto phyoala: Nino kako jilo erani lioji engacho, 27 osi nina lümbüm khophi a mhadungo teri kümcho, osi ana Jerusalem lo kyon vamo jiang ezüpthuku yivon pioji zoale nina kya ni mpensü jiang reroe sicho. Küma ana ni randan ji zothaka, 28 osi ana Jerusalem ezüp piv methako ji ni eküm evanthüng tssothuku meka, tolia nino ana noying lona ni chüthukvüka." Kyon jiang na yithen shi hansi mesao thüngi yitacho.
Joshiah na OPVÃœI yi Engav Ntsata vatala.
29 Joshiah mesao na Juda osi Jerusalem lo esopvüi jiang topvü tsarhyucho, 30 osi Levi jiang, pvüti jiang to nzo, elani kyon thanpoe ejüeli osi yantsae topvü nzo ekhümki wotacho. Osi Onte topvü mhadungo na mesao na ekhümki na kako e hungwo ji ovon chuka khae engatacho, 31 Ombona mesao vanpheni na phanthi, OPVÜI thüngi ntsata vav methakcho, osi kako jilo erani lioji ephan shikhfü pio osi yizüng jiang ombo lümbüm osi eküm topvü na osi elhi lona benphiv methakcho. 32 Osi Benjamin kyon jiang tona Jerusalem lo oro vamo kyon jiang topvü toha ntsata ji benphithuku ombona methakthukcho. Hojito Jerusalem kyon jiang na ontena onte motsüi Potsow thüngi ntsata methaki jilona phyoe elio jiang topvü benphitacho. 33 Josiah mesao na Israel meta topvülo kisü khümphen lio jiang topvü roe sitacho, osi ombo evanthüng nandang jo ombona kyon jiang ji onte motsüi Potsow OPVÜI ji benkatale to ntssungcho;
Josiah na Yakchi Tokhvü ji Khiala
1 Josiah mesao na OPVÜI yikrachia yakchi tokhvü ji Jerusalem lona khicho, osi choro ovüngo jilo tsüngon taro mezhüo to jilo ontena tokhu so jiang nontacho. 2 Ombona pvüti jiang ji ekhümki elhi jiang zikaracho osi elhi lüm theta tssotale to ntssungcho. 3 Ombona Levi jiang tona OPVÜI lo khochaki vamo Israel püngnoe jiang to thüngi heto ntssungcho, "Ntho ntsata Bakos ji David tsoe Solomon na etssov khümphen ki jilo vatava. Enhungo ntena hoji meta topvülo hanphio tüv tssov meka, tolea nteno OPVÜI Potsow tona ombo kyon Israel to benkavka. 4 Nte topvü na David osi ombo tsoe Solomon na nte zikao elhi jiang ephan jipo jipo na ekhümki vanphen khitava, 5 Osi Israel wopan ochoang na nte nzanchi ethev liana zakto owo nzanchicheo tssoa reni khukthetava. 6 Osi ntena yakchi tokhu nyanyan osi olyu jiang lüngthav ka, nte bobo shikhfü ephan nthochetava, osi nte Israel kyon jiang na OPVÜI na Moses yakchia pio yizüng ji ephan benphiwo tssoa othan jiang methakatava." 7 Kyon jiang yakchia tokhvü lo tsütsathuku mesao Josiah na ombo tssieden lona khiche olyu, olyuro osi nyanyanro to wothüng thümro tona tsibung wothüng ethüm to thecho. 8 Ombo küpo tsüphoe jiang naha kyon jiang, pvüti osi Levi jiang na tsütsav theracho. Elani khümpheni OPVÜI tssoa pvüti tsüphoe Hilkiah, Zekhariah, ha Jehiel to na pvüti jiang to tsükona olyuro tona nyanyanro to wothüng enisi nzo tiruk to pia tokhu jilo othan tssothukcho. 9 Levi esopvüi jiang Kananiah, Shemaiah, tona ombo ojenio Nathaneil, Heshabiah, Jeil tona Jozabad to jiang na olyuro tona nyanyanro to wothüng mongo, tsibung nzo mongo to theta Levi jiang khi thanthukcho. 10 Yakchi tokhu ji tsükona olan topvü methaktale pvüti osi Levi jiang na mesao na ezo ji ephan onte vanphen khiracho. 11 Olyu osi nyanyan jiang lüngthathakale Levi jiang na ekümrümo jiang ofü shakcho osi pvüti jiang na ejen jiang thanpheni erhikacho. 12 Jitosi onte na erungthan ekümrümo jiang ji wopan ejan ephanina pia onte khi Moses shikhfü ephanina thanthukcho. 13 Levi jiang na shikhfü lo lioji ephan, yakchi tokhü than jiang omi na risi, ntho than jiango hanphvüro tona phfütsü to lona vüptacho, osi zakto oso jiang khi kyon jiang jantayicho. 14 Hojiang tssosi sülo Levi jiang na onte ejan osi Aaron tsoronichen pvüti jiang ejan to oso khitacho ntiotssole pvüiti jiang zümothüng jana n tssochov mpüm na erungo than ekümrümo jiang osi jilo ethyu jiang rungta vancho. 15 Asap jipo Levi shiang ji David na ezo ji ephan khenden tssoa vancho; Asaph, Heman, tona Jaduthun, mesao zenkhying ji to. Ekhümki kibüng enhyang jiango onte zaphen jilo zae vancho ntiotssole Levi thanpoe jiang na onte thung tssoa yakchi tokhu ji methakicho. 16 Hojito Josiah mesao lanso ephanina OPVÜI ekhüm tokhu ji olan taro mmhona methakcho, yakchi tokhu ji tona erungthan thanpheni pioji to. 17 Hojilo evan Isreal topvüna yakchia tokhu ji tona ebung mozhü ntheo hümri tokhu toji tsüngon tiying khitacho. 18 Zenkhying Samuel echung sülojo yakchi tokhu ji heto echungatia n khita hancho. 19 Nchüng Josiah mesao yansa nzyu taro tizao to shilo Josiah tona pvüti jiang, Levi osi Juda kyon. Isreal kyon osi Juda kyon jiang tona yakchi tokhu khio shi esüa jo mesao ovüngo jiang ochinaha n khitahancho.
Josiah Yansa Ochüm ji
20 Josiah mesao na khümphen ji tsükona shiang hetopvü tssosi sülo Ejip mesao Neko na Euphrates zhükhfü karchemish lona rotav ombo rasan sosi rocho. Tole Josiah na ombo tanglanchiv tssocho. 21 Tole Neko na Josiah thüngi heto yithen picho, "Ana ori tssoa vamo shina ni n tachika, Juda mesao. Ana ni thüngi rotalo rocho meka, ari jiang thüngi rotavsaka, osi Potsow na zakto tssole to a ezothaka. Potsow na athüngoe thetala, hoji tsükona a ti-khalanchia, to mekana ombona ni monthukuka." 22 Tokhatola Josiah na ori tssov methakcho, Potsow na Neko mesao yakchia ombo ezoa vamo ji ombona nngacho. Osi ombona mphoa mpensü tongphi piposi Megiddo hayi wocho. 23 Ori tssota thüng Josiah ji Ejip kyon lotsi na kochicho. Tole ombona ombo phajae jiang heto ezocho: "A sosi yia elümoto a tssatsothaka!" 24 Ontena ombo ritsso zotoro jilona ejümchukchi zotoro enioto sowo jilo khuthethukcho osi Jerusalemi ombo sosi yicho, Jilona oyi ombo chücho osi mesa khüpo ombo shothecho. Jerusalem tona Juda kyon to jiang na ombo echüo ji tsükona elümoto nungratacho. 25 Jeremiah zenkhying jina Josiah mesao nsika khen nsüngrücho osi kvüthüng Isreal jiang na ombo müngyanehia sana jithüng eboe osi eloe topvüna osi khenden jiang na hoji khen ji dentanrhü cho. Hoji khen jijo nungra khen khyarhyuo jianglo jüa. 26 Josiah na tssocho topvü, Ombona OPVÜI khümo jiang, shikhfü enga benphiwo jiang, 27 osi ombo motsü benkadeni na ochüm nandang jiang topvü Israel tona Juda tolo mesaoden kako lo eranrae lia.
Juda lo Joahaz Mesao
1 Juda kyon jiang na Josiah tsoe Joahaz ji ethüngche thyujü nzüyia Jerusalem lo mesao ji tssothukcho. 2 Joahaz na ombo nzyu mekyusi ethüm lo Juda lo mesao tssocho, osi ombo na Jerusalem lona choro ethüm yansa sacho. 3 Ejip mesao Neko (Neco) na ombo rhümhae evüngki thechisi Juda ji Janti seri 3,400, Shona seri 34 to echha khiyicho. 4 Neko na Joahaz ojenio Eliakim ji Juda mesao tssothuki ombo mying ji Jehoiakim to dungphiyicho osi Joahaz jo Neko na Ejip metae sosi yicho.
Juda lo Jehoiakim Mesao
5 Jehoiakim na ombo nzyu mekyu mongo lo Juda mesao tssocho, osi ombona Jerusalem lona nzyu taro ekha yansa sacho. Ombona ombo Potos OPVÜI tachia mmen tssocho. 6 Babylon mesao Nebukadnezar (Nebuchadnezzar) Juda thüngi ori tssoe Jehoiakim ji rhümhae sheni Babyloni sosi yicho. 7 Nebukadnezar na ekhümki ejüeli ejoma khi hansi oyi Baby loni ombo mesaki vacho. 8 Jehoia kim na tssocho topvü, ombona etsakthav elhi tsso jiang osi ombo elhi n-mhom jiang topvü Israel to na Juda to mesao jiang motsü kako lo eranrae lia. Ombo tsoe Jehoiachim na mesao ombo echungcho.
Juda lo Jehoiachem Mesao
9 Jehoiachem na ombo nzyu taro tiza lo Juda mesao tsscho osi ombona Jerusalem lo choro ethümsi tsüngon taro sacho. Ombo naha OPVÜI mhadungo mmen tssocho. 10 Tsüngkying rheyiale mesao Nebukadnezar na Jehoiachim ji vüngi Babyloni sosi yicho, osi ekhüm ki ejüeli jiang ha hansi yicho. Osi Nebukadnezar na Jehoi achim oporo Zedekiah ji Juda tona Jerusalem tolo mesao ji tssothukcho.
Juda lo Zedekia Mesao
11 Zedekiah na ombo nzyu mekyu ekha tssoathüng Juda lo mesao tssocho, osi ombona Jerusalm lona nzyü taro ekha yansa sacho. 12 Ombona OPVÜI tachia mmen tssocho osi zenkhying Jeremiah na OPVÜI yithen ombo pioji ombona n ngacho.
Jerusalem Khyothechio ji
13 Zedekiah na Nebukadnezar panlancho, ntiotssole Nebukad nezar na ombo küpo longtsükata vam' to Potsow myingona ombo echümthuki licho. Ombona lüm khünga ekhiransi OPVÜI Israel Potsow lo kholani n yicho. 14 Hoji ekao Juda esopvüiden, pvütiden, osi kyon jiang topvü na onte meta nkonphia vamo jipo jiang hungchoa kisü khümtacho, osi OPVÜI na nthoche vao khümphen ji hojito mmenthukcho. 15 Onte motsüi Potsow na zenkhying wothuka ombo kyon jiang ezoyata vancho, ntiotssole ombona kyon jiang osi khümphen ji nkoe vahungcho. 16 Tokhatola ontena Potsow yithenpvüi jiang yikvücho osi Potsow yi ji n ngayiv zenkhying jiang emakatacho, osi wokhao tssoa OPVÜI lüm etsuk ji emhokthav kümi tsanchophen n liv sicho. 17 Hoji tsükona Babylon mesao ji sosi oyi onte hayathukcho, Mesao jina Juda khyingroe jiang lüngtharae siracho, osi khümpheni na mpa owo lüngtharacho. Ombona ochi thüngi ha khonzana n vancho osi ngaro eran n li, eboe eloe n li, osi nochonoria evan mekana otsük mmhona evan ka to n lina topvü lüngthae sicho. 18 Babylon mesao na ekhümki ji rechoe khicho osi jilo ejüeli jiang, mesao ji ejüeli tona ombo küpo tsüphoeden jiang ejüeli jiang topvü khirae hansi Babyloni yicho. 19 Ombona ekhümki ji, yantsü ji, yantsü jilo mesaki osi ejüeli jiang topvü rungi sicho. Osi yantsü ji pikhfü jiha vanroe sicho. 20 Hojilo enhyo jiang topvü ombona Babyloni sosi yicho. Ontena hojilona Persia ekhüngyan n phathithüng nandang jo phajae esüa Babylon benkata vantacho. 21 Hojito lyui OPVÜI na Jeremiah zenkhying yakchia heto phyoe vao ji bencho; "Meta ji nzyu ekha tiying sirhaki sivka. Hoji jo nzyu tiying akvüto liko ji hae esanthukvü ji n benphi na eroji benchethukvü tsükona."
Cyrus na Je kyon jiang Yile to Yizüng Piala.
22 Persia lo Cyrus na mesao kümo ji nzyu ovüngo jilo OPVÜI na Jeremiah yakchia phyoe lio ji benthukcho. Ombona Cyrus ji heto yizüng pia ombo ekhüngyan topvü lo khae engathukle to ezocho. 23 "Shijo Persia mesao Cyrus yizüng, Potsüwoe evamo Potsow na limhatsü esav a ethüngchethaka osi Juda lo Jerusalem yantsü jilo khümphen motsünga etssov a zikathaka. Hoji tsükona Potsow kyon nte topvü na hojilo yitava, OPVÜI nte Potsow na nte ndüngo tsswothukvü ka."
Jihudi kyon jiang Elani Eyiv Cyrus na Oyi Picho
1 Persia mesao esa nzyu ovüngo jilo OPVÜI na zenkhying Jeremiah yakchia ntio phyoe licho sana hoji bencho. Yidan shiang ji erantsüngina pi khi ombo ekhüngyan topvü lona tüngkachia khatav tsükona OPVÜI na Cyrus' thüngi nthiphicho: 2 "Shijo Persia mesao Cyrus yizüng, Potsüwoe evamo OPVÜI jina limha mpüm lo esapvüi a tssothukthaka, osi Juda meta Jerusalem lo ombo ekhümki etssov elhi ji a ndungkathaka. 3 Nte Potsow kyon topvü pono ombo vanhya ji lithukvü ka. Ntena Jerusalemi wovka osi Jerusalem lona khümta evamo Israel OPVÜI Potsow ekhümki ji tssocholantavka. 4 Osi ombo kyon Babyloni morantsan tssoa evan jiang yulo na ochona sana kholani eyiv nchüma jitüv vana tssona, ombo phinakishüm jiang na nzanchivka, Osi Jerusalem ekhümki othan epiv tsükona tona onte tsükona shona, Janti elani ekümrümo to onte pivka." 5 Tokhatola, Juda tona Benjamin to jipo yulo kvüri osi pvütiden, Levi kyon ochoang ochoang lümbümi Potsow na janthakcho sana topvü na sani Jerusalem ji tssocholo evov methakcho. 6 Onte kidangri topvü na Shona, Janti, tsiphfü hanphfü, ekümrümo, tsütsailan osi etsoyu tona othan epiv to onte nzanchia piracho. 7 Mesao Nebukadnezzar na Jerusalem ekhümki na ophfü tona Ophi to khi hansi oyi ombo potsow ekhümki evao jiang ji Cyrus na onte pilancho. 8 Shiang shi hetopvü ji mesaki rangjen ezepvüi tsüphotso Mithredath to tsa ji khelo theyicho, osi ombona Juda lo esapvüi Sheshbazzar thüngi othan tssoa picho. 9-10 Tsütsailan ji shiang:' Othan tsükona shona phi 30 othan tsükona janti phi 1,000 Ophi thanpo 29 Shona phikuk teriv 30 Janti phikuk teriv 410 Ophfü ophi thanpo 1,000 11 Sheshbazzar tona morantsan thanpoe jiang tona Babyloni na khoe Jerusalemi yiathüng shona janti ophfü ophi tona thanpolipo to tsotsüi 5,400 hansi yicho.
Babyloni Morantsan tssoa Vansi Elani Yilamo Jiang
1 Morantsan tssoa evan jiang yulo elümotona Babylon metaro ji sisi Jerusalem tona Juda tolo ombo ombo yantsü elani yiracho. Onteji mesao Nebukadnezar na Babyloni onte sosi yipvü na morantsan tssoa vantapvü tssocho. 2 Kyon shiang na esopvüi tssoa yitacho. Zerubabel, Joshua, Nehemiah, Seraiah, Reelaiah, Mordekae, Bilshan, Mispar, Bigvai, Rehum tona Banaah to. Israel pvüjilan tona owo to morantsan ekümo na kholani eyio jiango shiang: 3-20 Parosh pvüji lona 2,172 Shephatiah pvüji lona 372 Arah pvüji lona 775 (Jeshua tona Joab to oni rüiden) Pahat Moab pvüji lona 2,812 Elam lona 1,254 Zatu lona 945 Zakkae lona 760 Bani lona 642 Bebai lona 623 Azgad lona 1,222 Adonikam lona 666 Bigvai lona 2,056 Adin lona 454 Ater (Hezekiah toha tsao) ji pvüji lona 98 Bezai lona 323 Jorah lona 112 Hashum lona 223 Gibbar lona 95 21-35 Kyon ochoang motsüi na meta shiang lo vancho sana jiang lona ha shiang heto yicho: Bethlehem lona 123 Netophah lona 56 Anathoth lona 128 Azmavrth lona 42 Kiriath Jearim, Chephirah, tona Beeroth to lona 743 Ramah tona Geba to lona 621 Michmash lona 122 Bethel osi Ai lona 223 Nebo lona 52 Magbish lona 156 Elam thanpo lona 1,254 Harim lona 320 Lod, Hadid, osi Ono lona 725 Jeriko (Jericho) lona 345 Senaah lona 3,630 36-39 Shiang jo pvüti khümtsüng lona tsanthan ekümo vansi eyio jiang: Jedaiah (Jeshua tsoronichenden) 973 Immer lona 1,052 Pashhur lona 1,247 Harim lona 1,017 4042 Levi khümtsüng tsanthan ekümo na elani eyio jiang: Jeshua lona Kadmiel (Hodaviah tsoronichen) 74 Ekümki khedenkho (Asaph tsoronichen) 128 Ekhümki enhyangden (Shallum, Ater, Talmon, Akkuk, Hatita, tona Shobai to tsoronichenden) 139 43-54 Ekhümki elhi etssoeden pvüji ochoang tsanthan ekümo na kholanieyio jiango shiang: Ziha, Hasupha, Tabbaoth, Keros, Siaha, Padon, Lebanah, Hagabah, Akkub, Shamlai, Hanan, Giddel, Gahar, Reaiah, Rezin, Nekoda, Gazzam, Uzza, Paseah, Besai, Asnah, Meunim, Nephisim, Bakbuk, Hakupha, Harhur, Bazluth, Mehida, Harsha, Barkos, Sisera, Temah, Neziah, tona Hatipha to 55-57 Solomon nriden pvüji ochoang elani yicho sana jiango shiang: Sotai, Hassophereth, Peruda, Jaalah, Darkon, Giddel, Shephatiah, Hattil, Pochereth Hazzebaim, tona Ami to 58 Ekhümki elhi etssoe pvüji tona Solomon nriden to pvüji to tsoronichen jiang tssotsüi onte 392 tssocho. 59-60 Delaiah, Tobiah tona Nekoda to pvüji ochoang na yantsü Tel, Melah Tel Harsha, Cherub, Addan osi Immer to lona elani yicho sana jiang ji tssotsüi onte 652 tssocho. Tokhatola onteno Israel tsoronichen to ji merüka n phyokhocho. 61-62 Pvüji jipo shiango onte pyimtsümotsüi jo ochoang sana ji erantsüng n hungwo jina n thümchecho: Habaiah, Hakkoz, osi Barzillai to. (Barzillai pvüti jipo motsüi kyon tsüka Gilead meta lo evan Brazzillai jipo kyon eloe soa vancho, osi hojina omo jipo ji ejancho.) Osi ontena onte pyimtsümotsüi ji ochoang sana merüka n thümcheo ji tsükona onteno pvüti jipo lo n khanhyacho. 63 Hoji tsükona pvüti vani Urim tona Thummim to jiang ntsütsa chethüng nandangjo etsoyu Potsow thüngi othan epio jiang ji ontena jo n tsoche to Jihudi esapvüi jina onte ezocho. 64-67 Tsanthan mekana evüng Babylonina elani eyio ji tssotsüi onte 42,360 tssocho Onte nri osi nripvüiden tssotsüi 7,337 Eboe osi eloe khenden tssotsüi 200 Kurü 736 Gadho esüa tüv 245 Od 435 Kurü solan terio 6,720 68 Kvüthüng morantsan tssoa vansi Jerusalemi OPVÜI khümphen jilo yicho sana jipolan ejoma najo ekhümki ji kimüng ehemo jilo etssov tsükona onte lüm erungthan pitacho 69 Ontena onte etonandang pitacho osi hojiang ji tssotsüi shona seri 500, janti seri 2,800, elani pvüti pipo 100 to tssocho. 70 Pvüti osi Levi kyon elani kyon ejoma to najo Jerusalemi tona hoji nkonphi to jianglo vanjüng tssoe sicho; osi khenden, ekhümki enhyangden, elhi etssoeden to jiango hoji hakono oyan jiang lo vantacho; osi hojilo enhyo Israel kyon jiango onte pyimtsümotsüi vanphen yan jianglo vantacho.
Ekhüm ji Elani Benkatala
1 Choro tiyingo to benale Israel jiang topvü ombobo yani vanjüng tssokhancho. Tothakale onte na Jerusalemi sanrhyutacho, 2 osi jchozadak tsoe Joshua tona ombo tepfü pvütiden elani Shealtiel tsoe Zerubbabel tona ombo opanden, to jiang na Israel Potsow thanphensa ji tssochotacho, hojitolui Potsow kyon Moses shikhfü lo tssolan phyolan shikhfü erani lioji esüa ontena erungthan jiang pitachecho. 3 Babyoloni na eyio jiang na jo meta jilo vanjüng tssothako kyon jiang kyua nchümcho khatola, thanphensa jijo ovüngthüng tssophen meta jilo ronkachitalancho. Hoji sülo jo enya mmyu erung than epio ji ontena elani benkatalancho. 4 Shikhfü lo lio ji ephan ontena ranki tokhu ji khitacho, osi eng akvü othan epiv elio jiang ji ontena pitacho; 5 osi hojianglo ekaphata, mpüm na erungo than osi chothan tokhü than tona thanpothüng ontena OPVÜI ekhümvü sanrhyutathüng othan epio jiang, elani ombobo lümbüm erungthan OPVÜI epio jiang to topvü n tümjak na pitacho. 6 Kyon jiang na ekhümki ji tssocholan elhi ji n benkata han khatola, choro tiyingoto tsüngon ovüngo jilo OPVÜI thüngi erungthan epio jijo benkae pitacho.
Ekhümki ji Tssocholam Benkatala
7 Kyon jiang na longjoe osi otssüng erhüi to jiang jokheman epiv tsükona orang thetacho osi elani Lebanon metae na Cedar tssüng khi jümangi na Joppae hansi eyiv tsükona, osi hojiang man Tyre tona Sidon to yantsüi hanthoku tsükona, etsov eyuv, osi olive thyujü toha othan thetacho. Shiang hetopvü ji Persia mesao Cyrus na lanchio ji yakchia tssochecho. 8 Hoji tsükona ontena Jerusalemi khümphenki meta jilo oyi vantawo ji nzyu choro enioto rheyiale, elhi ji etssov benkatacho. Osi Zerubbabel, Joshua elani onte meta kyon jiang, pvütiden, Levi kyon jiang, tona morantsan ekümo na kvütata na Jerusalemi elani yithakcho sana jiang topvü nzo tssoe elhi kyota tssocho. Hojiang yulo Levi kyon ochoang nzyu mekyu tssothakcho sana mekana jina mhawoe tssothakcho sana jiang ekhümki ji tssocholan elhi jilo ezepviden tssotacho. 9 Levi kyon Jeshua osi ombo tsoeden elani ombo wopan kitsük, osi Kadmiel tona ombo tsoeden (Hodaviah pvüji kyon) jiang topvü na kyota ekhümki ji tssocholan elhi ji zeyata nzanchitacho. (Onte ji Henadad Levi pvüji kyon jiang na nzanchicho.) 10 Kvüthüng kyon jiang na oki nkenlong ji chümkachia oki ji etssov benkacho sana, pvütiden jiang na onte pipo jiang benria ekata, nna tatara benta tosi onte vanphen khirümcho, osi Asaph pvüji Levi jiang na ha pyapiro ekhophiphen bentasi onte nzo hojilo mangcho, osi mesao David echungi na shikhfü benphita eroji jiang ephan ontena OPVÜI thüngtacho. 11 Ontena OPVÜI myingthüng khen ji elanphen theta heto dentacho: "OPVÜI jo mmhona, osi Israel thüngi ombo nzan jo kümali". Onte otsük akvü na onte etonandang tüngkachia OPVÜI thüngtacho, ntiotssole ekhümki kimüng ji sakae tssota vanthakcho. 12 Onte yulo pvüti eramoe osi Levi jipo elani pvüjiramp khosha na ekhümki ehemo ji hunga eroji tsükona kvüthüng ekhümki kimüng ji nkenlong theta benkae tssotacho sana ontena nungra emhena kyatacho, tokhatola thanpoe hojilo evamo jiango longshi lona tüngtacho. 13 Ontena ekon enhyan meta topvü lona zora ovon ntssana tüngtao jina, ematha won tssotalo kyata sana tia n shathev owon tssotacho.
Ekhümki ji Tssocholam jilo Khatüng Elio ji.
1 Kvüthüng morantsan ekümo na kholani eyi Israel kyon jiang na, Israel OPVÜI, Potsow khümphen kiji tssocholan-tala to Benjamin tona Juda to ri jiang na zocho sana; 2 ontena Zerubbabel tona jipolo eramo to jiang thüngi owo ntoktae heto ezotacho."Enaha ekhümki tssocholam elhi jilo nte e kyochithuka. Enaha ntena khüma evamo Potsow ji khümala, osi Assyria mesao Esarhaddon na meta shilo esosi oyi evanthokpvüto enaha ombo thüngi othan jiang pia vantapvü." 3 Tole Zerubbabel, Joshua, tona jiporamo to jiang na heto onte ezocho."Ena e OPVÜI Potsow ekhümki etssov tsükona nte kyochirungchi ethev n li. Persia ekhüngesae Cyrus na kvüto yizüng epicho sana, ji ephan ena epopo tssovka." 4 Tole meta jilo vanjüngi evamo kyon jiang na kvüto lyuna ekhümki ji n tssochev sana ji lanka yana Jihodi kyon jiang ji lümbüm mmyimia osi ekhenthoka to tssocho. 5 Elani ontena Persia yansae jiang ha ekhüp pia onte khalanchile to ntssungcho, Ontena hojito ekhümki ji mesao Cyrus echungo mekana Darius echung jana n tssochethuku tsükona elhi tssocho.
Jerusalem ji Tssocholam jilo Khetsü Elio ji.
6 Ekhüngsae Xerxes yansa benkadeni, Juda tona Jerusalem tolo evamo jiang ri jiang na n lan onte pia erantsüng hansi mesao thüngi rocho. 7 Elani Persia yansae Artazerzes yansa esa yuta loha Bislam, Mithreddath Tabed, osi onte nzo etsoeden to jiang na mesao thüngi kako erancho. Kako ji Aramaik yina erancho küma hoji khana khophi ezovo tssocho. 8 Elani yansapvüi, Rehum tona meta jilo eranpvüi Shemshai to onina Jerusalem tsükona heto Artazezers thüngi erantalancho. 9 "Yansapvüi Rehum, elani meta jilo eranpvüi tsüphotso Shimshai, onte nzo elhi etssoeden, yitssoeden, osi tsüphoe thanpoe ochoang Erekh, Babylon tona elani Elam meta Susa 10 tolo evamo kyon jiang topvüna, osi kyon ochoang etho eli osi thüngche kyon ashurbanipal onte sonokina sochuki sosi oyi engchirolamoe Euphrates meta Samaria yantsü lo tona yantsü thanpoe to jianglo oyi vanthukcho sana jiang to thüngina yithen heto yithokala." 11 Yithen yidung ji heto erancho : "engrhelamoe Euphrates lo evamo ombo nriden iang thüngi na ekhüng esae Artazerzes thüngi heto eranala. l2 "Tsüphoeyo, ena ni ntsithuk hungwo jijo, ni meta thanpoe evanden Jihudi kyon ochoang na Jerusalemi oyi vanjüng tssoe vanta vancho sana jiang na, yantsü n mhom osi nmem meta Jerusalem ji tssokachilana vanthaka, osi ontena pikhfü echung jiang tssochota vanthaka, osi hojiang ji n sungu thakvü. 13 Tsüphoeyo, yantsü shiji tssochothaka na osi hoji pikhfü jiang thakthakana, kyon jiang na tsenkhya ji ni n piv siv, osi hoji yakchia ni mesa-tsen rheyilan jiha matakae siv. 14 Enhünga jo eyio ni tsüpho esa küpo vantala, hoji tsükona heto etssov jo e n choka, hoji tsükona ena heto ni thüngi ni ezohungala, 15 ni motsüi jiang na erantoe evao jiang yandüngyanri zele to yizüng pia. Hojito tssona yantsü shijo nkolona yuta topvülo oyi nngae, osi mesae jiang tona yansae jiang to topvü ezüphthuka eroji yantsü ji shi saka toji nina yanchevka. yantsü shilo kyon jiang ji yuta topvülo n thachev rocho. Hoji yakchia yantsü shiji roe sicho. 16 Hoji tsükona kvüthüng yantsü shi tssokachia osi pikhfü jiang thaka sana, Euphraetes na engrhewoe meta shiji nina n saya khokvü yiv toji ena mmhona ntsia." 17 Tole mesao jina heto janlancho : "Yansae Rehum osi meta jilo eranpvüi Shimshai, osi nte nzo elhi etssoeden, elani Euphrates na engrhewoe Samaria lo evan kyonden, monkhümka, 18 "Ntena yiyenta kako a eramo ji khae khophi a engathethukthaka. 19 Ntena phyoji esüa, erantsüng jiang topvü yani ezev tsükona yizüng picho, tole otsotso nkolo na Jerusalem yantsü shina etho küpo n vana panlana osi ezüpthuka rocho to yanchethaka, 20 etho eli mesaeden jiang na, engrhelamoe Euphrates meta shiji saa likotsen khyae khiyia rocho. 21 Hoji tsükona ana yidan n pithüng jo elhi ji khani vale to ntena yizüng pia. 22 Shi ji zakto tssotale tona a elhi osi lüm erüng jiang ji lümato roa yiv meka." 23 Hojito Artazerexes thüngi na yithen shiji Rehum, Shimshai tona onte jokyim jiang to thüngi khae ezopvüto, ontena zaktole Jerusalemi owo Jihudi kyon jiang na yantsü tssochota evamo ji esanle to nongkata ezotacho.
Ekhümki jilo Elhi ji Benkalantala
24 Persia mesao Darius na yansa sasi nzyu enioto ji n janthüng nandang jo ekhümki jilo elhi etssov ji düngtünga esani vancho.
1 Tothüng ji zenkhying nchyu eni Haggai tona Iddo tsoe Zekhariah to onina Jerusalem tona Juda tolo Jihudi kyon evamo jiang thüngi Israel Potsow myingona ejamvü benkacho. 2 Osi kvüthüng Jehozadak tsoe Joshua ha Shealtiel tsoe Zerubabbel onina zenkhying jiang yithen ji zocho sana Jerusalem ekhümki ji tssocholana phanthicho osi zekhying otsük eni jina ha onte nzanchicho. 3 Tothüng ji yansae Tattenai ochona Euphrates na engrhewoe meta ji sa vancho sana ji tona esapvüi Shethar Bozenai, elani onte küpo tsüphoeden to jiang na zaktole Jerusalemi owo "Ekhümki shi tssolani benri vale to ochona yizüng nte pichola to engacho". 4 Elani ekhümki ji etssov tsükona kyon ochoang na onte nzanchia vancho sana jiang mying ha engatacho. 5 Tokhatola Potsow na Jihudi kyon esopvüi jiang thüngoe theta evamo ji tsükona Persia kyon jiangna onte mesao Darius thüngi kako erani hoji janlan n hungthüngjo onte pono ntia okhe n thena vancho. 6 Ontena mesao Darius thüngi yivon hanthoko ji heto hanthukcho. 7 "Mesao Daruis, ni yansa lo noying lithuka, " 8 "Ena Juda meta lo wotale tsüphotso Potsow ekhümki jiotssüng tsüphov nsü tona olong mpüm tsüphov to theta elümoto chüngchünga tssota yia vana hunga osi shi ji nina ntsiv na lia. Elhi ji elümoto lümbüm theta senjüma tssota yia vana. 9 "Osi ochona ekhümki shi tssocholam tsükona yizüng nte pi khi tssotala, ezoa, to ena esopvüi jiang thüngi engacho. 10 Elani ni thüngi ha ni yenjamvü tsükona elhi jilo esopvüi jiang mying ha ena engacho. 11 Tole ontena heto ejanlancho, "Eyio limha osi oyak jiang topvü. pono Potsow ji nridenka, hoji tsükona ena ekhüm ki shi tssocholanala, ntiotssole shi ji nkolo Israel mesao etho eli jiang na tssoe benri vacho. 12 Tokhatola e pyimtsümotsüi jiang na Potsow lüm etsuko elhi tsso jina, Babylon tona Chalden tolo mesao Nebukadnezzar khi e khyothukcho. Osi ekhümki jiha jithüng roe sisi kyon jiang ha topvüto Babylon metae tsanthan ekümo esosi yicho. 13 Hoji süijo Darius na Babylon lo mesao tssoji nzyu jilona ekhümki ji tssolam tsükona yizüng epicho. 14 Elani mesao Nebukadnezar na ekhümki na khi hansi oyi Babylon ekhümki evao shona-janti ophfü ophi jiang ha topvü epilancho. Osi hojiang ji Sheshbazzar to tsa ombona Juda lo esapvüi ethüngche tssothuko ji khelo topvü theyicho. 15 Osi tsütsailan jiang topvü khi hansi oyi ekhümki ji tssocholani ovüngthüng kvülo vaphen sana jilo valanle to mesao na ombo ezocho. 16 Hoji esüa sheshbazzar na oro kinkenlong theta kimüng ji nthoche jithüng na tssotacho khatola enhünga jana n thakhan. 17 "Hoji tsükona tsüphoeyo, otsotso ekhümki ji tssocholan tsükona Cyrus na yizüng onte picho tüv mesa kakolo erani lelichosana ji mmhona yandüng yanri zesi ni etü-mezi ji kvüto sana e ntsithukle to mesao lüm erüng yana jonjiala."
Cyrus na Yizüng Epio ji Yanchecho.
1 Hojito Babylon mesa kako lo erantsüng lelicho sana to yani ezev tsükona Darius na yizüng pia yani zethukcho. 2 Tokhatola Babyloni mekna Media meta Ekbatana yantsü na elio kako jilo heto erankae picho tüv yanchecho: 3 "Mesao Cyrus esa nzyu ovüngo jilo Jerusalem ekhümki kvülo shina othan osi erungthan piv sanaji tssocholam tsükona yizüng piala, osi ekhümki ji ntssoni meter mekyu tiying nna nzoe meter mekyu tiying to tssovka. 4 Echung jiang ha olong ekata ethüm thesi sülo otssüng ekata motsünga to theta tssovka. Osi ethüng ezi topvü mesao rangjeni na lov. 5 Elani shonajanti ophfü ophi kvütata mesao Nebukadnezar na Jerusalem ekhümki na khi hansi oyi Babyloni vacho sana jiang ha topvü to Jerusalem ekhümki hansi oyi valamka."
Elhi ji N tümjakna Tssole to Darius na yizüng Picho.
6 Tole Darius na heto janlancho: "Taltenai, Euphrates lo esapvüi, Shethar Bozenai, osi nte nzo Euophrates lo elhi etssoeden, ekhümki tssota evamo ji ntena tikhetsüa, 7 osi okhe titheta, Juda lo esapvüi ji tona Jihudi kyon esopvüi den to jiang khi ovüngthüng kimüng jilo Potsow ekhümki ji tssothuka. 8 Osi ntena ha nzanchia tssotale to yizüng nte piala. Ntiotssole ethüng ezi jiang topvüto Euphrates meta lona ntio likotsen chiyia sana jilona zak zak to piv sala küma elhi ji khetsüv n li. 9 Hoji esüa Jerusalemi pvütiden jiang na ntio ethelan lia nte chonia sana jiang topvü engakvü ntena pivka Mangsüpong tssolia, olyu tssolia, Potsow thüngi erungthan etsov tsükona, elani oma, tsüngthijü, omüm mekana omüm mekana olive thyujü tssolia to topvü pivka. 10 To tssona ontena othan jiang ji Potsow na khihungo tssoa thamu osi ontena a tona a tsoeden tsükona mmha e randaniv. 11 Osi heto yidan nte piala. Ochona oyi shi n nga sana ombo kina koküng khichoe phoko ji nzeni hoji na ombo tsük ji chyunrhüa ejungu osi hoji sülo jo ombo ki jiha mmen hanthechiphen kümthuki siyivka. 12 A, Darius na yizüng shi piala, hoji tsükona otsük akvü na engav osi shi benthokvü, tolia ochona yizüng shi tongphia mekana shilo okhe theta sana jijo ochona Jerusalem meta shi ombo khümphen etssov tsükona ethüngchecho sana mesao osi hoji pvüji jiango tsanmoni sithukvü ka.
Ekhümki ji Nthochecho
13 Mesao na yizüng pio ji esüa esapvüi Tottenai, Shethar Bozenai osi onte nzo etssoe tsüphoeden jiang na hojito tssocho. 14 Persia mesaeden, Cyrus, Darius osi Artaxerxes tona yidan onte pio ji esüa, osi Potsow na israel kyon jiang thüngi ekhümki ji kvüto tssov sana yizüng onte pio jiang ephan, osi zenkhying Haggai ha Zekhariah oni selangotüng yakchia Jihudi esopvüi jiang na ekhümki ji lümbüm theta tssoe thakcho. 15 Osi Darius na yansa sasi nzyu taro tiroko tolo Adar choro tsüngon ethümo to jilo ekhümki ji thakcho, 16 Jisülo jo Pvütiden, Levi kyon osi Israel kyon kutata na Babylon metae na yicho sana jiang topvü nzo tssoe longshita ekhümki ji nthochetacho. 17 Ontena oki ji nthocheta thüng Mangsüpong nzoa, olyu nzo eni, olyu oro nzo mezhü to, othan thecho; elani nmen onte siyithuku ndana Israel jipo motsünga lo nyanyan motsünga ren taro eni thancho. 18 Tothakale Moses shikhfü kako lo erani elio ji esüa ekhümki elhi etssov tsükona, pvütiden, tona Levi kyon pvüti osi Pvüti nzanchiden to jiang ethüngchecho.
Yakchi Tokhu
19 Thüngküm to jo Israel kyon kutata Babyloni na yicho sana jiang jina choro jandemo jilo tsüngon taro mezhü tolo yakchi tokhu khitacho. 20 Jisüi jo Pvüti osi Levi topvüna onte popo ntsüngche elhi tssotacho. Osi Levi jiang na onte tsükona' tona Babylonina eyio jiang topvü to thung tssoa yakchi tokhu ekümrüm than jiang lüngthae thana okho ji nthochecho. 21 Ekümrümo tatsüngo jiang ji Israel kyon kvütata Babyloni na yicho sana jiang osi meta jilo vanta vansi onte ekhüm jilona khophi Isreal OPVÜI Potsow khüma yicho sana jiang to topvü nzo tssotacho. 22 Elani nchuk tiyingo tolojo vümhi n theo hümri tokhu ji jani longshita khitacho. Osi OPVÜI na Assyria mesao ji lümbümi jani khi ombo yakchia Israel Potsow khümphenki ji tssocholam lanka elio ji ochüm echeta tssothoko ji tsükona hetata to longshitacho.
Ezra na Jerusalem Janala.
1 Hojilo nzyu sunga vatasi kvüthüng Persia ji Artaxerxes na sacho sana jithüngti Ezra to tsa jina ombo pyimtsümotsüi motsü ji pvüti Aaron echung jana rüchecho. Osi ombo motsüi jo shiang yakchia rocho: Ezra opo Seriah, ji opo Azariah, ji opo Hilkiah, 2 ji opo Shallum, ji opo Zadok, ji opo Ahitub, 3 ji opo Amariah, ji opo Azariah, ji opo Meraioth, 4 ji opo Zerahiah, ji opo Uzzi, ji opo Bükki,5ji opo Abeshua, ji opo Pheniahas, ji opo Eleazar, ji opo Aaron to tssocho. 6-7 Ezra ji Israel OPVÜI Potsow na Moses thüngi ntio shikhu picho sana jiang topvü mmhona ntsi kyon tssocho. Elani Ezra jo OPVÜI ombo Potsow na mmhayithoko kyon etsso jina Persia mesao Artaxerxes. na ha ombona ntio chona sana jiang topvü ombo picho. Osi Artaxerxes na yansa sasi nzyu tiying to rheyiathüng Ezra na Levi kyon pvütiden, ekhümki khenden, ekhümki enhyang elani elhi etssoeden to sosi Babylon lona khoe Jerusalami yicho. 819 Choro jandemo jilo osi tsüngon ovüngo jilo ontena Babyloni na khochi oyi Potsow nzan yakchia choro mongo to lo tsüngon jandemo jilo Jerusalem jancho. 10 Ezra na OPVÜI Potsow shikhfü jiang ji ombo eküm totona jüngthe khacho osi erani lio jiang ephan benphicho, osi Israel jiang thüngi ha shikhfüniro topvü püngnocho.
Artaxerxes na Ezra Thüngi Kenchüng yi Picho
11 Artaxerxes na kenchüngyi mekana echümchakayi shiang ji Ezra, osi pvütiden elani. ochoang na Israel OPVÜI Potsow shikhfü osi yizüng onte pio jiang mmhona ntsicho sana jiang to thüngi picho. 12 "Mesao Artaxerxes na Ezra pvüti thüngi tona Potsüwoe evamo Potsow shikhfü ntsi jiang to thüngi heto ezocho. 13 "A ekhüngyano evan Israel kyonden, Pvüti tssolea, Levi tssolea, kvütata Jerusalemi yihunga sana yikhoka to yizüng piala, 14 A, osi A ekhüng yano selangotüng nchyu tiying evamo jiang topvü na lümbüm na rünga, nte meta Juda osi Jerusalem lojo Potsow na shikhfüniro nte pio ji esüa hojiang enga vantalo kvüto vanta sana ji oyi sükhying chani ezev tsükona nte ntongkata nte yithukala 15 Elani Jerusalem lona khümta evamo Potsow ji thüngi othan etssov a osi a ndüngo nlansüng nchyu tiying evamo shiang na lüm na rünga shona janti shiang khi hansi yile to nte piala. 16 Elani Babyloni evan pvüti osi Isreal kyon jiang Jerusalemi ekhümki jilo othan etssov tsükona pio jiang tona ntena Babylon meta lona kvütata hanrhyucho sana jiang topvü to ntena hansi yivka. 17 "Orang othan shiang shiji ntena elümoto nkümnshona tsütsavka, osi hojina mangsübung, olyu oro, olyu elani tsünghanro osi tsüngthijü to shi khi hojiang ji Jerusalem ekhümki thanphensa jilo thamka. 18 Osi Shona janti enhyo jiango nte Potsow na kvütowena nte tsütsathuk hungasana ji ephan ntena nte lümcho tsütsakhoka. 19 Osi oyo-opvü kvütata Jerusalem ekhümki jilo tsütsav tsükona nte picho sana jiang topvüto Potsow mhadungo hansi wovka. 20 Hojiang ephalo ekhümki ethelan tsükona ntena ntio ethev licho sana jiang topvü ntena mesa rangjeni na khikhoka. 21 "Mesao rangjen enhyang tsüphoeden kvütata Euphrates engrhe metalo vancho sana jiang thüngi, Ezra osi pvütiden elani Potsow shikhfü ntsiden jiangna ntio chona sana jiang ji zakto bencheyile to ana yizüng piala; 22 tolea heto nandang pikhoka, Janti seri 3,400, ohüm seri 10,000, tsüngthijü etükpvü 2,000, elani olive thyujü etükpvü 2,000 osi oma jo ethelan kvüta liana ji ephan to. 23 Osi Potsow na a thüngi tona anzo ochoang na yansa sa sana jiang to thüngi to lümbüm n tsuko tssoa, Potsow na ekhümki jilo ntio kvütata ethelan licho sana jiang topvü tüngochünga benria pivka. 24 Osi ekhümki pvütiden, Levi jipo, khenden, ekhümki enhyang, elhi etssoe, ji yaka ochoang kvütata ekhümki tssolan-phyolano jücho sana jiang thüngi najo tsenkhya ntia ntena khiyiv meka. 25 "Osi Ezra, Potsow na ntio hungjan rüjan nchümri mmhom ni picho sana ji tsütsata Euphrates metalo kvütata na ni Potsow shikhfü jiang benphia vancho sana jiang esav tsükona yansa esapvüi, osi yitsoeden to jiang nina ethüngchevka. Osi ochoang na Potsow shikhfü jiang n tsicho sana jiango nina püngnovka. 26 Osi ochona sana Potsow shikhfü jiang tssolea, mekana yansa shikhfü jiang tssolea nnga tssona, omboji zaktole ezüp pivka. Osi chüthoko tssolia, metapoe phani yithuko tssolia, mekana ombo ejüeli topvü khiyio tssolea mekana vüngpheni thechio tssolea zesi ezüp pivka.
Ezra na Potsow Thanthüngala
27 "Ezra na phyocho, E pyimtsümotsüi, OPVÜI Potsow mying thünga! Ombona mesao jiang lümbümi jani Jerusalem ekhümki ji onte khi heto yikrachithukcho. 28 Potsow kia nzan yakchia, mesao osi ombo ekhüngyano nlansüng elani tsüphoeden, jiang na akhyingo tüv sükhying tssocho, osi OPVÜI Potsow na lümbüm etsson apia, Israel jipo jiang yulo kvüri jiang ji aphana eyiv tsükona onteji enayachecho."
Babyloni na Elani Eyio Kyon Jiang
1 Mesao Artaxerxes echungo Israel kyon Babyloni oyi morantsan ekümo vanta vansi Ezra nzo Jerusalemi kholani yiathüng jipo, akvülo kvüri jiang ji shiang: 2-14 Phinehas jipo lona Gershon, Ithmar jipo lona Daniel, David jipo lona Shecaniah tsoe Hattush Parosh jipo lona Zekhariah tona, ombo jipo kyon 150 (onte jipo erantsüng ji lia) Pahat Moab jipo lona Zekhariah tsoe Eliahonai tona ombo ndüngo onte 200 to, Zatu jipo lona Jaheziel tsoe Zechaniah, tona ombo ndüngo onte 300 Adin jipo lona Jonathan tsoe Ebed tona, ombo ndüngo onte onte 50 to Elam jipo lona Athaliah tsoe Jeshniah, tona ombo ndüngo onte 70 to Shepathiah jipo lona Zebadiah tsoe Michael, tona ombo ndüngo kyon onte 80 to Joab jipo lona Jeheil tsoe Obadiah tona, ombo ndüngo kyon onte 218 to Bani jipo lona Josephiah tsoe Shelomith tona ombo ndüngo kyon owo onte 160 Bebai jipo Bebai tsoe Zekhariah tona ombo ndüngo kyon owo onte 28 Azgad jipo lona Hakatan tsoe Johanan tona ombo ndüngo owo onte 110 Adohikam jipo lona Eliphelet, Jeuel, tona onte ndüngo kyon owo onte 60 (Onteno sülamiti yicho ) Bigvai jipo lona Uthai, Zakur tona onte ndüngo kyon owo onte 70
Ekhümki elhi etssoe Levi jipo Ezra na Ethüngchecho.
15 Ana okho topvü ji jülan Ahava yan yakchia etsüo ji tsalo tsarhyucho, osi ena shilo nchenphen tssoe nchuk ethüm vantacho. onte yulo pvüti jo jücho tolea Levi jipo jo n jücho, 16 Hoji tsükona esopvüiden onte otsük toku, Eliezer, Ariel, Shemaiah, Elanathan, Jarib, Elnathan, Nathan, Zekhariah osi Meshullam elani püngnoe otsük eni Joarib tona Elnathan to tsalo wothukcho. 17 Onteji Iddo, Kasiphia kholoko esopvüi osi ombo nzanchiden to jiang thüngi Potsow ekhümki jilo elhi etsoe rothukle to ezolo ana wothukcho. 18 Osi Potsow nzan yakchia ontena Levi kyon Mahli jipo lona ethelan eli kyonden Sherebiah tona ombo tsoeden onte jeni taro tona onte ojeniden to jiang rothukcho. 19 Elani Merari jipo lona Hashabiah tona Jeshaiah elani onte wopan onte owo 20 toha rothukcho. 20 0nte ephalo ekhümki elhi etssov tsükona owo 220 ovüngthüng mesao David tona ombo küpo tsüphoeden tona ethüngche Levi jiang nzanchithokvü tsükona vanthokwo jiang ha rothukcho. Onte topvü omying rüka erani varayicho.
Ezra na Kyon Jiangji Khanga Randam lo Sokatala.
21 Ahava jülan jilo vantathüng Potsow khi olan esoa osi e ngaro jiang tssolea, ejüeli jiang tssolea e nkohancheta lyui mmhona yentsa-chethukvü tsükona topvü na Potsow mhadungo teri kümi khanga randam tsükona ana yizüng picho. 22 Ana mesao thüngi ochona Potsow lo longtsükata sana topvü mhayiala, tolea ochona ombo jancho n zov tsani yia sana jiango ezüp piala to ezothako ji tsükona ena yentsata thüng ori khelona e nkohav tsükona rasan epile to ezov ji ayikra nchümcho. 23 Hoji tsükona ena khanga potsow thüngi e nkohale to randantacho, tole ombona erandan jiang ejanlancho.
Ekhümki Tsükona Yantso Jiang
24 Pvüti eramo jang yulona Sheraeiah tona Hashabiah elani thanpoe otsük taro to ana ethüngchecho. 25 Jisülo jo shonajanti osi opfü ophi ekhümki tsütsav tsükona mesao tona ombo küpo tsüphoeden elani Babyloni Israel kyon vamo jiang na epio jiang to topvü füi khi pvüti jiang khelo picho. 26-27 Shiang shi heto ana onte picho: Janti seri 22,000 Janti oyo opvü seri 70 Shona seri 3,400 Shona phi teriv 20 tsotsüi seri8. 4 Dama phfü mmhom2 (Shona phi esüa mmhona tüv) 28 Ji sülojo ana onte ezocho: "Nteno nte pyimtsümotsüi OPVÜI, Potsow ji mhadungo jo ntho kyonden, hoji esüa shona janti ophfü ophi kvütata OPVÜI thüngi lümna rünga piv tsükona hansi yicho sana jiang ha ntho. 29 Hoji tsükona, ntena Jerusalem n janthüng jo elümoto tüngochüngtakhe, osi Jerusalem janthakana hojilo pvüti chungchak jilona füi khi Jerusalem ekhümki elhi etssoeden, Pvütiden elani Israel esopvüiden vamo jiang khelo oyi reyitale to ezoa onte picho. 30 Hoji esüa Pvüti osi Levi jiang na shona osi shona janti oyo opvü jiang elonchoe Jerusalem ekhümki hansi yitacho.
Jerusalemi Kholani Eyioji
31 choro jandemo jilo tsüngon taro enioto jilo ena Ahava jülan jilona khoe Jerusalemi yitacho. Ena yentsata yiathüng e potsow na ori khelona osi e ravani vamo jiang khelona enkocheta yitacho. 32 Osi ena Jerusalem janthakale nchuk ethüm esantacho. 33 Nchuk mezhüoto jilo jo shona janti opfü ophi jiang hantasi ovo füi khi Uriah tsoe Meremoth pvüti ji khelo theyitacho, osi ombo ndüngo Phinehas tsoe Eliazar tona Levi nchyu eni Jeshua tsoe Jozabad tona Binnui tsoe Noadiah to vana picho. 34 Topvü ji mmhona khatüng khari elani hoji erantsüng toli vatacho. 35 Morantsan ekümo na Babyloni na Israel kyon kvüta yicho sana jiang topvü na sani Israel Potsow thüngi erung than shiang pitacho. Israel jipo topvü tsükona mangsübung 12, olyu 96, olyu oro 77, nmeni na onte ntssüngchetokvü tsükona nyanyan 12, toha thantacho. Ekümrüm shiang topvü erung than tssoa pitacho. 36 Elani khi mesao thüngi na ntio echümchak mekana yidan hansi yicho sana jiang ha engrhewoe Euphrates meta jilo esapvüi osi tsüphoeden jiang thüngi pitacho. Osi hoji yakchia ontena ha ekhümkina ekhümvü jilo ekyo erung onte picho.
Jihudi tona Jihudi Meko to jiang Yanpiyanthan
1 Shiang hetopvü shi tssocho sülo Israel kyon yulo esopvüi ejomana heto oro a ezotacho; pvüti osi Levi jipo jiang na thanpoe jiang lona echümpotae n vanla, tolea onte nkonjano evamo kyon Amon, Moab osi Ejip mekana Kanaan metalo evan osi Hitites, Perizzete kyon, Jebusite kyon osi Amorite kyon to jiang thüngina kontae evanthungjo hojiang na ntio etsakthav elhi tssoa sana jiang esüa tssota vantala. 2 Jihudi kyon jiang na metapoe eloe jiang soa vantala, osi ji yakchia Potos kyon jiang ji nshathev nzitae sithaka, osi opvü tssoa esopvüi jiang tona tsüphoe jiang tona ekyongo ori lia. 3 Ana kvüthüng yivon shi zocho sana nungra lona a mpensü jiang reroe sia, a tssan osi khoka hüm jiang topvü ruki sia ephathe vani sicho. 4 Israel kyon Babyloni na elani eyio jiang na heto mmen etso ji tsükona Potsow na ntio phyocho sana ji zoe kyon jiang ha ekhen tsüngracho, osi myulani othan epiv yuta ji jani kyon jiang na a hachüma yiaha ayio nungra lona jilo ephathepvü tssocho. 5 Myulani othan epi yuta ji janthakale ana nungra evamo jilona phathi mpensü rero jiang hanpvü na ekhümki ovo nkhok tseni okhe rüchi OPVÜI Potsow thüngi randancho. 6 Ana heto randancho, "O Potsow, ni mhadungo a mha khonthiv ji elümoto ayikratsüngi sithaka, ntiotssole e mmen jiang a kvüri poni chüngithaka, osi Potsüo jana ntsona chüngithaka, 7 Epyimtsümotsüi echungina enhünga jana, e, ni kyon shiang shina emhokthav mmen tssothaka. Osi e mmen yakchia e mesao osi e pvüti jiang topvüto metapoe mesao khelo rheyikhancho. Osi elüngtha khancho, jitae mek na elani ejüeli jiang e khiyisi e topvüto morantsan ejoena metapoe esosi yikhancho, hoji esüa nchüng tsüngon jana eji yikra nungralo vanala. 8 Tokhatola OPVÜI Potsow, ni khonzn ji yakchia yuta esüngaro ezii ekümo na ejoma etsanchothuki ntho meta shilo evanthukala. Nina ezii eküm lona evachithaka, osi eküm ethan epithaka. 9 Eyio eziiden tssocho tolea nina jilo ekachi e n si tolea nina Persia mesao jiang thüngi jani ontena enzana nchümi ekhümki kumoe roe sithakcho sana hoji tssocholani Juda osi Jerusalem lo oyi nkoha lia evam tsükona echonchicho. 10 'Tokhatola enhungo O Potsow, shiang hetopvü shi tssocho sülojo ena ntia ephyov n liv sithaka, Nina ni nri zenkhying jiang yakchia epio yizüng jiang ena hetata to nngav sithaka. 11 Osi ena meta nkoe vamvu sa vamo jiha mmen meta to ontena ezocho, ntiotssole meta jilo evamo kyon jiang ji ochümi na ochüm jana mmen etsakthav elhi na pyingcho tssocho. 12 Osi ena meta ji nkohoe jilo vani e tsoronichen jana evanthukhunga tssona jilo evamo jiang thüngi yanpiyanthan n tsso elani onte elhilo kyochi ejüeli n kümthukvü tsükona ha ezocho. 13 Osi ethüngi ntio ezüp epithakcho sana jiang ji ena mmen tsso jiang thüngina etsitae zetana e Potsow nina ezüp elümoto mataroa episi eküm evanthukala to ena ntsia. 14 To tssona ena kvütoli ni yizüng jiang yesoa n-mhom kyon shiang thüngi yanpiyanthan tssovla? Ena hojito tssoa tssona ni lümbüm etsukona e topvü rorüpi esiv osi ochia eküm e nvanthokvü tssov. 15 Israel Potsow OPVÜI yo, nino ntsae tolea nina roe e n sina eküm evanthukthaka. Ni mhadungo erov ji ntia elo etüm elan n liv sithaka, toji ena epopo ni mhadungo phyochakala."
Yanpiyanthan Nzita Etsov ji Ochüm Tssothokvü Tsükona Lanka
1 Kvüthüng Ezra na ekhümki ji mhadungo na nkhümthe onte mmen jiang tsükona kya osi phyochaka randana vanchosana, jithüng Israel kyon eboe eloe osi ngaro eran topvüna sani ombo hachümi emhena kyatacho. 2 Elam jipo kyon Jeheil tsoe Shecheniah jina Ezra thüngi heto ezocho: "Etena jipopoe eloe soa vantawo ji yakchia Potsow lo ete longtsü ji yesothaka, tolea Israel jiang tsükona enhungalea eyilo lihana. 3 Enhungo etena mmhona otsotso lona Potsow thüngi echümchaktav osi jipopoe eloe jiang tona onte ngaro jang tojo yithokvü. Ni osi ochoang kvütata na Potsow yizüng yikrachia vanasana jiang na ntio kvüto ezoa sana ji ephan ena tsov osi Potsow yizüng na ntio kvüto phyoasana ji ephan tssotav. 4 Shi etssov jo nipono tae lia, enaha ni sülami tssoe ni kyochiv, hoji tsükona ntio etssov liana ji ephan tssoa." 5 Hoji süi jo Ezra na phanthi esopvüiden, pvütiden elani Levi jipo jiang tona thanpoe jiang toji Secheniah na phyo ji esüa ontena tssov to echümchak-thukcho. 6 Tothakale ombona ekhümki hapoe Elishiab tsoe Jehohanan vanphen jilona ovo zümo yipchoa etsoyu n khina onte morantsan ekümo na eyi jiang n-mhom osi ori jiang tsükona nungra yipcho. 7 Israel kyon kvütata na Babylonina elani oyi Jerusalem osi Juda tolo vana vancho sana jiang topvü Jerusalem lo sanrhyutav tsükona meta topvü lo yithen picho. 8 esopvüi jiang yizüng ephan ochona nchuk ethüm yutalo n chiroa sana ombo ejüeli topvü khiyiv osi Israel kyon to ephyov n khayanhya to yidan picho. 9 Nchuk ethüm yutalo na Juda osi Benjamin to metalo evamo eboe topvü na sani choro tokuoto jilo tsüngon mekyuo tolo Jerusalem ekhümki hapoe sanrhyucho. Osi eryu elümoto joe otsük akvü enetsüngra khatola thyutalan opvü etsso ji tsükona topvü na sanrhyucho. 10 Ji sülojo pvüti Ezra na phanthi ezocho, "Ntena metapoe eloe soa vamo ji yakchia nte longtsü yesothaka osi Israel pono lümbüm n pük hansi yithaka, 11 Hoji tsükona enhungo nte mmen jiang ji nte pyimtsümotsüi OPVÜI Potsow ji thüngi phyochaktava, osi ntio tssona ombo emathav sana ji tssotava, tothakana jipopoe eloe jiang ha sichi sitava, elani nte ndüngo metapoe vamo jiang lona echümpotae vantava." 12 Tole kyon jiang na tüngkachia janlancho, "Nina kvüto ezoana ji ephan ena tssovka." 13 Tokhatola ontena heto ha phyotalancho, "Kyon shiang ha khoshakhünga elani eryu ha hetata n zalanchikhoko joa vana, küma hapoe kvütoli n vanrümkhok, elani mmen shiji ete elümoto erhaki elio ji tsükona enga nia na ethako yi mek. 14 Hoji tsükona e tsüphoeden jiang na Jerusalemi vani yuta khia thyutasantav lia osi ochoang na jipopoe eloe soa vancho sana jiangji yuta züngi pia onte yantsü lo yitssoe osi esopvüi nzo rothuka, to tssona sükhying shilo Potsow lüm etsyu ji nkachochevka. 15 Tole Ashel tsoe Jonathan tona Tikvah tsoe Jahzeiah osi Levi jipo Meshullam ha Shabbethai tona yaka jo ochinaha hoji n khirancho. 16 Israel kyon Babyloni na eyi jiang na ha oyi ji khichocho, hoji tsükona Ezra na jipo yulo eramo jiang ji esopvüi ethüngchecho osi onte mying jiang erani vacho. Osi choro tarotok) tsüngon ovüngo jilona benkae ontena elhi ji tssotacho. 17 Osi choro ethüm yutalona kvütata na jipopoe eloe soa vancho sana jiang yandüngyanricho.
Metapoe Eloe Soa Evan Jiang
18 Metapoe eloe soa evan kyon jiang ji shiang tssocho: Pvütiden onte jipo ephanina erancho. Joshua jipo lona ombo osi ombo ojeniden jiang, elani Jehozadak tsoeden, Maseiah, Eliezer, Jarib, osi Gedaliah. 19 Ontena eloe jiang sichiv echümehaktacho, osi mmen than olyupung khi thantacho. 20 Immer jipo lona Hanani tona Zebadiah, 21 Harim jipo lona Maasakiah, Elijah, Shemaiah, Jeheil tona Uzziah. 22 Pashur jipo lona Eliwoenai, Massiah, Ishmael, Nathanel, Jehozabad, elani Elasah. 23 Levi jipo: Jozabad, Shimei, Kelaiah, (Kelita toha tsacho) Pethahiah, Juda, elani Eliazer. 24 Khenden kholok: Eliashib, Ekhümki enhyangden: Shallum, Telem, osi Uri, 25 Thanpoeden: Parosh jipo lona: Ramiah, Izziah, Malchijah, Mijamin, Eleazar, elani Malchijah, osi Benaiah to. 26 Elam jipo lona: Mattaniah, Zekhariah, Jeheil, Abdi, Jeremoth, osi Elijah 27 Zatu jipo lona: Elionai, Eliashib, Mattaniah, Jeremoth, Zabad, tona Aziza to 28 Bebai jipo lona: Jehohanan, Hananiah, Zabbai tona Athlai 29 Bani jipo lona: Meshullam, Mallukh, Adaiah, Jasub, Sheal tona Jeremoth 30 Pahat Moab jipo lona: Adna, Chelai, Benaiah, Maaseiah, Mattaniah, Bezalel. Binnui, tona Maaanasseh 31-32 Harim jipo lona: Eliazer, Isshijah, Malchijah, Shemiah, Shemeon, Benjamin, Mallukh, tona Shemariah 33 Hasum jipo lona: Mattenai, Mattattah, Zabad, Elephelet, Jeremai, Manasseh, tona Shimei. 34-37 Bani jipo lona: Maddai, Amram, Uel, Benaiah, Bedeiah, Cheluhi, Vaniah, Meremoth, Eliashib, Mattaniah, Mattanai, tona Jaasu to 38-42 Benui jipo lona: Shimei, Shelemiah, Nathan, Adaiah, Machnadebai, Shashai, Sharie, Azarel, Shelemiah, Shemariah, Shallum, Amariah tona Joseph to 43 Nebo jipo lona: Jeiel, Mattithiah, Zabad, Zebina, Jaddai, Joel tona Benaiah to 44 Shiang hetopvü na jipopoe eloe soa vancho. Onte na eloe jiang sichicho osi onte ngaro jiang nzo yithoki sicho.
1 Hakaliah tsoe Nehemiah na elhi etsso ji shiang tssocho.
Nehemiah na Jerusalem Tsükona Nchümo ji
1 Artaxerxes na Persia sasi nzyu mekyuo to chophük chorolo A, Nehemiah na persia yantsü Susa to tsa jilo vanathüng, 2 ajenio yulo tsüka Hanani to tsa jina oshom ejoma sosi Juda lona athüngi rotacho, hoji tsükona Jerusalem sükhying ji kvüto yia vancho sana elani Jihudi kyon morantsan ekümona Babyloni na kholani eyio jiang ji kvüto vanta vancho sana jiang tsükona ana onte engacho. 3 Tole ontena, Jihudi kyon kvütata enhyoe okiwoe kholani oyi vancho sana jiang ji elümoto ezüp ekümo vantala, osi jipopoe e ndüngo vanta evamo jiang na elümoto ezerüpala to a ezotacho. Elani Jerusalem pikhfü jiha yantsü ji rungathüng kvüto yesocho sana ji ombo topvü kha ochina ha n zecholanhan osi kipünglan jiang ha n zechohan na lia to ha a ezotacho. 4 Ana kvüthüng shiang hetopvü shi zochosana, ana nungra lona ephathe kyacho. Osi tsüngon sunga etsoyu n khina nungracho. Jisülo ana Potsow thüngi heto randancho. 5 'Potsüwoe evamo OPVÜI Potsow! Nino tsüphoa osi ena nikyua vanala. Osi ochoang na niyi enga ni yizüng jiang benphia sana jiang thüngi nina otsotso ni ntsata ji vatala. 6 A zeta, OPVÜI, osi a randan a engayia, ana zümo eng ni nri Israel jiang tsükona randanala. A osi a pyimtsümotsüi jiang osi e Israel kyon shiang na ni mhadungo mmen tssothaka to phyochakala. 7 Ena elümoto n mhom tssothaka osi nina ni nri Moses yakchia shikhfü epio jiang n benphiv sithaka. 8 Tolea Potsow, nina Moses thüngi heto ezoji nchümcheta: 'Nte Israel kyon shiang na a lo longtsüka n vata tssona, ana jipo thanpoe jiang yulo nzinzoe nte sivka. 9 Tokhatola ntena alo kholani yisi ana ntio yizüng nte picho sana jiang ephan tssoa tssona, nteji limha ochüm jana mpato nzüi vanlea, ana meta kvülo na akhümthokvü etssyukae licho sana jilo nte solansi yivka.' 10 "OPVÜI yo, shiang jo ni nriden osi ni kyonden ka. Ni etho tsüpho osi thokhyung jina onte shanchocho. 11 Hoji tsükona a randan osi ni nriden kvütata na ni monkyuchi hunga vancho sana jiang randan e engayia. Nchüng elhi ochüm echeta a tssothuka osi mesao khi khonzan to atssoyithuka." Hoji yutalo jo ayio mesao ki mesao jününgrothijü echhan osi ezepvüi tssoa vancho.
Nehemiah na Jerusalemi woala
1 Choro mezhüo tolo Mesao Artaxerxes na tsüngon motsüngalo etsoyu tssoa vanathüng ana jününgrothijü hansi owo ombo picho. Osi hoji nchuk esüa yenjoa tia hojito anungra ombona a n hunghancho, 2 hoji tsükona ombona a engacho, "Ntiotssona hetata ni nungrato ni zechechola? Ni nochonoricho jo meka tssovla, küma shi yichakcho ntiona sana ni n mathacho tssovla nüng?" Tole elümoto akyua khatola 3ana heto janlancho, "Nchüngkhonto harishia ni vanthukuka tsüphoeyo! Tolea yantsü kuloshi a pyimtsümotsüi jiang shothecho sana ji pikhfü osi kipünglan jiang omina rungi roe sina a nungra a n zechevke?" 4 Tole mesao na "Ntio ni tssohungchola? to a engacho." Hoji sülo jo ana Potsow thüngi randansi, 5 heto mesao janlancho."Nina ni emathata a jonjiyi a engayiv to tssona, Juda meta kuloshi a pyimtsümotsüi jiang shothecho sana jilo a yithuka, tona ana hojilo yantsü ji tssocholan-chevka." 6 Tole mesao na ombo engh ji ombo ndüngo khothe vana a jonjiyi ji a khichoyicho, osi ana yuta kvütenhyaka tsükona yivsana elani kvüthüng elani yilam sana ji a engao ji tsükona ana ezocho. 7 Hoji süi jo Euphrates meta engrhelamoe esapvüiden vamo jiang thüngi Juda lo yentsa a wothukle to ezoa a tsükona kako a eranile to jonjicho. 8 Elani khi mesao ehara ji enhyakpvüi Asaph thüngi ha ekhümki ji nkhophen kipüngji etssov tsükona tona a evanki to etssov elani yantsü pikhfü ji zechov to tsükona erhütsüng apile to azoyia kako eranle to jonjicho. Tole ana kvütata choncho sana jiang topvü mesao na apicho, ntiotssole OPVÜI Potsow na a ndüngo theta vancho. 9 Hoji sülojo mesao na ransan tsüphoeden tona kurü rasanden to a nzo rothukcho, hoji tsükona ana Euphrates meta engrhelamoe wocho. Osi mesao na kako eramo ji meta jilo esapvüden vamo jiang thüngi ana picho. 10 Tokhatola Beth Horn yantsüroe evan Sanballat tona Ammon yamo tsüphoe tsüka Tobiah to onina kvüthüng ochona sana Israel jiang mmhonthukvü tsükona elhi tssolo rothaka to yivon zocho sana elümoto n tssohungtacho. 11 Osi nchuk ethüm tsükona ana Jerusalemi wocho, 12 Tokhatola Potsow na Jerusalem tsükona ntio lümbümi a theyicho sana jijo ana ochi thüngi ha n zocho. Osi zümothüng ana ashom tara sosi hapoe sanphia wotacho, osi ekrümo yulo ena eso jijo Gadho ana tsankao jitae. 13 Osi n vonchithüng na ena yantsüi na khochoki, engrhelamoe hayitsü kipüng ji yakchia jolowoe mmhonrü jüzanjo elio ji yakchi, mmen siphen kipüng jilo jovotacho. Osi yantsü pikhfü omina rungi roe elio ji tona kipüngkhan roe elio jiang to zeta wocho. 14 Hoji sülojo elani jükiwoe jüzanjo kipüng lona mesao wozhü ji jana zeta wocho. Tole Gadho ana chungoe sanphia evamo jina zizo mmhakachi elio ji yakchia evov ji olan n hungu sicho. 15 Hoji tsükona Kidron hayi joyi pikhfü roe elio jiang zeta wocho, Tosanati ana erovo lanjiwoe kholani oyi hayi kipünglan ji yakchia rheyicho. 16 Ana ntiolo ocho sana osi ntio elhia vancho sana jilo tsüphoe jiang tsüka tinaha a n tsi; ntiotssole jithüng jana pvüti, tsüphoe osi esapvüi jiang tssolea elani a kyon Jihudi kyon ochoang na elhi ji a tssokyov vancho sana jiang thüngi tia ana ntia n zohancho. 17 Tokhatola ana zechokchisanati heto onte ezocho, "Zetava Jerusalem shi roe osi kipünglan shiang hetata roe elio shiang yakchia eteno kvütata ezüp nungra lo vantacho sana! Hoji tsükona etena yantsü pikhfü shi tssocholantavka, osi ete yikra ji ephoe sitavka." 18 Hoji sülojo elani Potsow na kvüto a ndüngo theta vanpvü sana osi mesao na ntio kvüto etssov tsükona a ezocho sana jiang ha onte ezocho. Tole ontena a janlancho, "Etena tssocholantavka," to phyota elhi ji etssov tsükona methakcho. 19 Osi kvüthüng Sanbalat, Tobiah elani Arab kyon Geshem to tsa jiang na ena ntio zita elhita vancho sana ji zocho sana, "Ntena ntio elhi tssotala to nchümtala? Nteno mesao panlan elhi tssotalo "to ezoa emakacho." 20 Hoji tsükona ana heto janlancho, "Potsüwoe evamo Potsow na elhi ochüm echeta etssothokvü ka, ntiotssole eyio ombo nriden, osi ena tssocholan elhi shi benkatavsala. Tokhatola Jerusalem lo nte echi osi nte motsü ntia n li."
Jerusalem Pikhfü Tssocholamoji
1 Hetoli yantsü pikhfü ji tssocholancho. Pvüti tsüphotso Eliashib tona ombo ndüngo pvütiden to jiang na olyu kipüng to tsao ji tssochoe kipüng jiang mmhona thei khi nthochetacho. Osi nzoa vanphen zenki ji tona Hananel zenki ji to pikhfü jiang jana nthochetacho. 2 Jeriko kyon jiangna hoji ehüm ji tssocho, Zakkur Imri tsoe jina hoji chümo ji tssocho. 3 Hassenaah jipo jiang na Ongo Kipüng to tsa ji tssocho. Osi otssüng nkho jiang elani khanphen kharo jiang topvü thecho 4 Hakkoz orüo, (tsochen) Uriah tsoe Meremoth na ji ehüm ji tssocho. Meshezabel orüo Meshullam, Berechiah tsoe jina ji ehüm ji tssocho. Elani Baana tsoe Zadok na ji sülo ji tssolancho. 5 Tekoa kyon jiang na tssochümi elioji tssotacho khatola oyan jilo esopvüiden jiangna jo elhi nsüngpvüi jiang yi n ngav elhi teriv jiang n tssocho. 6 Paseah tsoe Joiada ha Besodeiah tsoe Meshullam onina Jeshanah kipüng lanji tssotacho. Ontena nkho, elani khanphen, erhü, kharo to jiang ha thecho. 7 Gibeon lona Melatiah, n-na Meronoth lona Jadon elani Mizpah lona Euphrates engrhelamoe esapvüi tsüpho ji vanphen jana tssochicho. 8 Harhaiah, tsoe Uzziel shona ejoe jinaha ji tssochümi elio ji tssocho. Elani Hananiah, deli orhüm mmhom nsüngrüi jina pikhfü nzowo ji jana tssochilancho. 9 Hur tsoe Rephaiah to tsa Jerusalem yantsü chiso esapvüi jinaha ji ehüm ji tssocho. 10 Harumaph tsoe Jedaiah na ombo ki ndüngo elio ji tssocho. Osi ombo kichüm jijo Hashabneiah tsoe Hattush na tssocho. 11 Harim tsoe Malchiah tona Pahath Moab tsoe Hasshub onina ji ehüm ji miphungphen zenki ji jana tssochicho. 12 Hallohesh tsoe Shallum Jerusalem esapvüi jina otsolov jiang sosi tssochümi elio ji tssolancho. 13 Hanun tona Zanoah yantsü lo evan to jiangna hayitsü kipüng ji tssocho. Ontena khanphen, kharo, nkho jiang topvü theta tssocho osi mmen siphen kipünglan ji jana pikhfü jiang khechü wothüng poni tssocholancho. 14 Rechab tsoe Malechijah ochona Beth Haccherem metaji sa vanchosana jina mmen siphen kipüng ji khanphen, khara jiang topvü theta tssoe kipüng ji mmhona zei vacho. 15 Kolhozeh tsoe Shallum ochona Mizpah meta sa vanchosana jinaha jüzanjo kipüng ji tssocho. Kipüng ji mhona eyuki, khanphen erhü, kharo jiang topvü thecho. Elani Shellah wozhü jilona mesao phari jilo David yantsü rhovolan ji jana tssochicho. 16 Azbuk tsoe Nehemiah, ochona Bethuzur meta sa vanchosana jina tssochümi elio ji David khüp, wozhü osi rasan vanphen to jiang jana tssocho.
Leviden Pikhfü Etssolo Theo Jiang
17 Levi kyon ochoangna pikhfü chiro khosha tssocholan elhi jilo thechosana jiango shiang: Bani tsoe Rehum na tssochümi elio ji tssocho; Hashabiah, Keilah meta chiso tae sa evamo jina ombo meta myingona Bani na tssochümi elioji tssocho; 18 Osi Henadad tsoe Baai ochona Keilah meta sa vancho sana jinaha Baai tssehüm ji tssolancho; 19 Jeshua tsoe Ezer Mizpah meta esapvüi jina ritsso ebensü vaphen jilona ovo pikhfü ji ekhok nandang tssochicho; 20 Zabbai tsoe Barukh jina ekhok jilona benkae pvüti tsüphotso Eliashib rhovolan ji nandang tssochicho; 21 Hakkoz tsorüi Meremoth, Uriah tsoe jina pvüti kipünglan jilona Eliashib ki ji jana tssochicho.
Pvütiden Pikhfü Tssolo Etheo Jiang
22 Pvüti shiangna Levi jiangna tssochümo jilona benkae shiang tssocho: Pvütiden Jerusalem hakona evamo shiang shina heto tssocho; 23 Benjamin tona Hasshub tojo onte ki hapoji tssocho; Osi Ananiah tsorüi Azariah, Masseiah tsoe jinaha ombo hapolo ji tssocho; 24 Henadad tsoe Binnui jijo Azariah ki jilona ovo pikhfü nken ji nandang tssochicho. 25-26 Uzai tsoe Palai jo pikhfü nken jilona ovo yitssophen enhyangden vanphen ji ndüngo Mesao ki ntssomo ji jana tssocho; Parosh tsoe Pedaiah na engchirolamoe jü kipüng jilona ovo ekhümki nhyakphen zenki ji nandang tssocho. (Shijo yantsü jilo Ophel to tsa ekhümki 'lhitsoe vanphen ji ndüngo.)
Lhitssoe Thanpoe Jiang
27 Tekoa kyon jiangna ekhümki nhyakphen zenki ntssomo ji zechi jilona Ophel nandang ji telok eni tssochicho. 28 Pvüti kholok ejoma na hoji tssochüm ji khümkiwoe Kurü Kipüng ji jana ombo ombo hapoji tssotacho. 29 Immer tsoe Zadok jina ombo ki hapoji tssocho. Shekaniah tsoe Shemaiah, engchirolamoe kipünglan enhyang jinaha Shemaiah tsochüm ji tssocho. 30 Shelemiah tsoe Hananiah tona Hanun, Zaleph tsoe tiroko to onina kholok enioto tssolancho. Berechiah tsoe Meshullam na ombo ki hapoji tssocho. 31 Malchijah shona ejoe jina pikhfü engchirolan nkemoe chongchak ntssomo ji jana osi Mephkad kipüng ndüngo ekhümki elhi etssoe tona shishoe to vanphen ji jana tssochocho. 32 Elani shona ejoeden, tona shishoe jiang tona nken chungchak jilona olyu kipüng ji nandang tssochicho.
Elhilo Ombo Khetsüo Jiang Nehemiah na Khyoala
1 Ena pikhfü ji tssocholanala to kvüthüng Sanballat na zochosana ethüngi elümoto lümbüm tsuka ekhetsüa phanthicho. 2 Ombo nzo evan jiang tona Samaritan rasan to jiang mhadungo na, "Jihudi kyon ezüp phyingrüngo evamo shiango ntio elhitala to nchümtato? Toalo othan pia tssona enga lona thaki siv to nchümtalo? Osi rungroe sithako shiang lona kitssolung mmhom hungu to nchümtato to lümbüm tsoka phyocho." 3 Tobiah naha mbo ndüngo manga vansi, "Shiangna ntio pikhfü mhom tssochevla? Shiali na jechochi esio tüv mekna to phyocho!" 4 Ontena hojito eyikvüta vamoji enga ana randancho, "Oh Potsow! ontena eyikvüo ji enga, onte lümbüm etsok ji onte kvüri lo elongkathuka. Osi onte ejüeli topvü khiyisi oyam na metapoe sosi oyi onte vüngthukvüka. 5 Ontena ntio elhi n mhom tssoasana jiang ti-mhechoyia osi nlan ti-siyia ntiotssole ontena e-elhi shilo ephyochophyoriala." 6 Hoji sülojo ena benkalani tssotacho osi kyon jiang jina elhilo ryupako ji yakchia pikhfü ji ntssoni chiso bena tssothakcho. 7 Osi kvüthüng ena pikhfü ji elümoto ekhyinga epo jiang mpato thanga tssoa yiala to Sanballat, Tobiah osi Arabia, Ammon osi Ashdod to kyon jiang na zochosana elümoto lümbüm tsuktacho. 8 Jisüijo onte topvü nzo tssoe oro Jerusalem ji hae kyon jiang hamathuktacho, 9 tolia ena Potsow thünga randantasi zümo eng richei vanthukcho. 10 Juda kyon jiang na okhen heto dentacho: "Oha ehano na e mmyikata yiala; Olong varocho hetata eham lia. To tssona kvütoli etena pikhfü shi nchüng elhi shilo thakvüla?" 11 Eri jiang na ontena epono oro okhe thei elüngtharüpsi elhi ji khani e nsiyithüng jo ntio tssoa vanchosana ji ena n tsi osi ena onte n hunghan to nchümtacho. 12 Tokhatola Jihudi kyon, eri jiang yulo vanta evamo jiangna ontena ntio tssov zita vanchosana jiang ji nsam nsam oro ezocho. 13 Hoji tsükona ana kyon jiang ji otsso, yonri osi lotssi to benrithuksi, jipo, jipona khosotae khi pikhfü n thakhamo jiang sülamoe nlhi vanthukcho. 14 Kyon jiang ji elümoto wongkhyuta to zecheo ji tsükona ana onte esopvüiden osi tsüphoe jiang thüngi ezocho, "Ete ri jiang kyua ti-nchümtava, tokhatola Potsow jo kvütata etho eli osi ekyuthavsana ji nchümcheta, onte ngaroden osi nte tsoeni oson oki elani onte meta kyon jiang tsükona ekhyo tssoa zalanchitava." 1&Ete ri jiang na ontena ntio tümta vanchosana jiang etena ntsithaka to ji yivon zoe Potsow na onte etüm ji lona onte khyothaka to engathethaka. To ezosi sülojo ena elani elhi ji sakalancho. 16 To tssosi nandang jo ovo chiso na ebensü otsso, yonri osi otsung to benrisi nhyak, elani chiso na elhi tsso to tssotacho. Osi esopvüiden jiang naha etonandang ekyocho 17 osi tsütsaelan ehan jiang mpana okhe phokona ejümsi okhe phukowoe jo ebensü bensi hancho. 18 Elani kvütana pikhfü ji tssoa vancho sana otsük akvüna eryulo yonri khüngkasi tssocho. Osi ochona tatara mhüv sana jijo a ndüngo tssothukcho. 19 Ana okholo esopvüi osi tsüphoe jiang thüngi ezocho, "Elhi shi hetata küma eteji nzüroe n hungjantao lyui tssotala. 20 Tolea kvüthüng tatara won zoa sana zakto a ndüngo sanrhyutakhe, ete Potsow na ete tsükona tssovka to ezocho." 21 Hojito engakvü wonchipvüna benkae mmyulani shantio chiro nandang ejoma na otsso bensi nhyaka vansi ejoma na pikhfü ji tssocho. 22 Yuta shilojo nte tssolia elhilo nte nzanchita evamo shiang tssolia Jerusalemi vantakhe, to tssona emüngo jo ori zümta, engo jo elhi tssota to tssovka to okholo esopvüi jiang thüngi ezoracho. 23 Zümothüng lea atssolea anzo etssoe jiangha elani a enhyang jiangha ochinaha mpensü phongi nva tolea ebensü ha okhelo benpvü yiptacho.
Yantsae Jiang Zerüpcho
1 Yuta tara sülojo eboe elümoto na Jihudi kyon jiang yulo phyochorichota phanthicho. 2 Ejoma na phyocho, "Eiyo wopan khosha küma eküm evam tsükona etsoyu kyongkata ethev lia." 3 Elani ejomana phyocho, "Khangtsüngi e nchüthukvü tsükona e-li jiang, Jününgrothi li jiang elani oki jiang topvü engocho thechikhani etsoyu eshio tssoe sithaka." 4 Enhüngaha ejoma na phyotacho, "E-li osi jününgrothi li jiang ndana liko tssen ethev tsükona oyam thüngi orang norae lia. 5 Ete langoto Jihudi kyon kha echümpotacho n li, e nongori jiang ha onte nongori jiang esüa n mhonchoke? Tokhatola e tsoe jiang ezi kümkhanala, osi e tsolo ejoma jiango ezi etssov yekhanthaka. Osi e-li jiang ekhikhanithako ji yakchia eji ntioloha eyilokav n liv sithaka." 6 Kvüthüng ontena erontao ji zochosana elümoto alüm tsuka, 7 elhi etssov benkacho, osi esopvüi, tsüphoeden jiang maka, "Ntena nte otanyu jiang ezüp piala!" to ezocho. Osi emhok-elüm shi thyutav tsükona nzontsü tsae ezocho; 8 "Osi edo nandang Jihudi kyon kvütata metapoe khelo onte bobo ezi etssov yeni vancho sana topvü etena shilanta vana tona kvütoli nteno nte-otanyu jiang ji nte ezi tsswothukvü tsükona ntebobo shitala to ezocho!" Tole esopvüi jiang topvü na ntio tia n phyov sicho. 9 Jisüi jo ana ezocho, "Ntena elhita evamo jijo ori! Ntena Potsow kyua elamo tae tssov lia, osi ntena to tssona ete ri, pvüji poe jiang na ezüpthukvü lanka n yanchev tssov. 10 Oyam na athüngi osi a nzo etssoe, elani elhi etssoe shiang thüngi orang, otssok to, norae lia. Tolea enhun go topvü ji sitavka, khilanitav meka. 11 Ontena ochi kvüta nte epiv lichosana topvü to siyitava, osi orang tssolea, otssok tssolea, nna olive thyujü topvü siyia. Osi oli, jününgrothi li, oki jiang ha topvü zakto pilantava to ezocho!" 12 Tole esopvüi jiangna, "Nina phyoji esüa topvü pilamka osi ochi jiang ha n khiyila to phyotacho." Hoji tsükona pvüti jiang tsae, onte mhadungona esopvüi jiang ji ontena ntio echümchakcho sana ji tsütsav to echümthukcho. 13 Tothakale ana eryulo osü tssenthe ehamo ji shaki ethüngphia ezocho."Ochona echümchako ji esüa n tssoa sana Potsow na shi esüa nte ethüngphiv, osi "Potsow na nte ki jiang, ntena ntio lichosana topvü nte khiyisi ntia nte n phfükana sivka." Jilo evan topvüna, "Hojito tssothuka" to phyota OPVÜI thüngtacho. Osi esopvüi jiang na onte echümchak ji vacho.
Nehemiah na Tajon lümcho
14 Mesao Artaxerxes na yansa sasi nzyu mekyu lona benkae owo nzyu thümrosi eni to nzyu taro eni Juda metalo esapvüi tsüphotso ji atssothukcho khatola ana yansa vanathüng, ana tssolea a wopan na tssolia esapvüi ejoena ntio etsoyu lichosana jiang ena n tsoyu. 15 Avüngi kvütana esapvüi tssocho sana jiang topvü na engalo onte etsoyu tsükona taena janti rang rangpyak zhüro khiyicho, ji yakchia kyon jiang ezüpthukcho. Onte nri jiang mpana kyon jiang ezüpthukcho. Tolia aiyo Potsow akyuo ji ephanina, hoji esüa n tssocho. 16 A etho topvü theta Jerusalem pikhfü ji tssocho osi a echi jo ntia methaki n va. Hoji esüa kvütana a ndüngo vanchosana jiang naha hojito elhi jilo lümbüm theta tssocho. 17 Tsüngon akvü a tsophenina Jihudi kyon, osi onte esopvüi jiang to nzoasi tinyan tsonhyacho, osi shiango a meta nkonjano jipopoe kyon a yana eroe "jiang ephalo tsonhyacho. 18 Elani engakvüto mangsüpong motsünga, olyu mmhontsov tirok, osi hono khosha to tsothukcho, elani tsüngon taro tarolojo tsüngthijü ethan yuthukcho. Tolea kyon jiang na oha mmyinga hanta vamo ji ana ntsiwo ji tsükona esapvüi na ntio ehungu elan licho sana jiang tia choni n khi. 19 Tolea Potsow, ana kyon shiang tsükona ntio elhi tssochosana ji a nchümcheyikhe to tae randancho.
Nehemiah Pono Okhe Ethev Yamoji
1 Sanballat, Geshem, Tobiah osi eri thanpoe jiang tona, ena pikhfü ji thakthaka osi ntia epoeri n lina tssochokchithaka, kipüng jiang n thehamo ji yakajo to zocho. 2 Tole ontena okyakina atssatssov tsükona tüma, Gesham ha Sanballat onina oyan motsünga, "Ono Hayi" to tsa jilona nduktale to yivon apicho. 3 Ana heto janlan hansi yithukcho, "Aiyo elhi opvü tsotso tssoala, küma hayi ji njoroche, nte ndukvü tsükona elhi shi esani n siche, küma n ro." 4 Ontena elani yenjo mezhü yitsük shi ahanthukcho, khatola anaha yenjo mezhüata n rocheto yitsük ji tae janlancho. 5 Jisülojo Sanballat na yenjo mongo to rothuka oyi ekhüngü erani ahanthukcho, osi shijo njüpzhüo yiyenta tssocho. 6 Oyi ji heto: "Geshem na a zocho, ntena ori nte tssohunga mekana mesao pono phanthiv etüm elio ji tsükona Jerusalem pikhfü ji tssocholancho to kyon shiangna phyotala. Elani nina Mesao ni tssohunga zia vana toha phyocho. 7 Ji tsükona nina zenkhing jiang ezoa Jerusalem topvülo Juda lo Mesao na shiji zonrüngu, hoji tsükona eni nduktae kvütosana thyutae zevo to nchümala." 8 Ana heto janlancho, "Nina kvüta phyochosana jiang topvü nipopo nsüngrücho kha, jilo ntsa n jü topvü ejüng tae." 9 Elhi shi esani esithukvü tsükona ekhyo tssoa ekhenthukala, "Tokhatola Potsow, etho a jükayia!" to ana randancho. 10 Tosi sülo Mehetabel tsochen Delaiah tsoe Shemaiah oki n vochev vanchoji janthechilo ana wocho. Tole ombona azocho."Eniatana ekhümki ntho chongchak jilo owo mphoe khalanchi vantav lia, ntiotssole ontena ni lüngthalo tsata, osi zümothüng yuta thamalo ni lüngthalo rov." 11 Ana ombo ezocho, "Aiyo hojito yungphia mphoa ekyao ji tüv kyon meka. Abobo shanchov tsükona ekhümki ovo mphov to nina nchüma alo? Ana hojito n tsso." 12 Ana kvüthüng mmhona nchümi zechosana Shenaiah ji Potsow na jancho mek, tolea Tobiah ha Sanballat onina a ekhenthukvü tsükona ekhüp pi vacho to ntsicho. 13 A ekhenthuki mmen atssothuki a mying amoniv osi ezüp a piv tsükona Shemaiah ji engochoe vacho. 14 Hoji tsükona ana randancho, "Oh Potsow, Tobiah ha Sanballat onina ntio tssoa vanchosana shi nchümcheyia osi ezüp pia. Elani eloe Nodiah tona zenkhying thanpoe jiang tona a ekhenthukvü eyamo jiha nchümchekhe."
Elhi Ethakoji
15 Elhi ji sakasi tsüngon tinyansi enilo Rongorongi choro tsüngon mekyusi mongoto lojo elhi topvü thakcho. 16 E-nkonphia eri pvüji olan olan evamo jiangna kvüthüng shi zocho sana onte mha n khonthiv sicho. Ntiotssole Potsow ekyo. yakchia heto tssochecho to topvüna ntsiwo ji tsükona. 17 Hetothüng ji yuta topvülo Jihudi esopvüiden jiang na Tobiah thüngi yivon elonta to vancho. 18 Ntio tsükona la tona Jihudi kyon Arah tsoe Jehohanan naha Berechiah tsoe Meshullam otsolov soa vancho, ji tsükona Jihudi elümoto na ombo thüngoe theta vancho. 19 Osi ontena a mhadungo na mpa Tobiah na ntio elhi n mhom tssochosana jiang topvü ombo yirüta to tssocho. Hoji tsükona ombona nsam nsam a ekhemo tüv kako arancho.
1 Pikhfü ji thaki kipüng jiang topvü thei, Ntho khenden kholok elani Levi kyon, ekhümki enhyang osi rasan topvü ethüngcheracho, osi onte elhi jiang jantayicho. 2 Jisüijo Jerusalem yantsü ji esav tsükona kyon nchyu eni ajenio Hanani tona riche jiang yulo esopvüi Hananiah to ethüngchecho; Hananiah jo Potsow ekyui osi elhilo longtsüka eli osi oyam na n chhoe kyon tsüka. 3 Osi Jerusalem kipüng jiang ji enyathüng eng chirosanati chonchi, elani mmyulaniha eng n rhethüng osi kipüng enhyang jiang na mmhona khanle to onte ezocho. Elani Jerusalem lo evan ejoma enhyang elhi pi khi, ejoma jo elhi zikata pi nna ejoma jo onte ki jiang rhüphia evam tsükona tssothukle to ha ezocho.
Babyloni na Elani Yilamo Jiang Mying
4 Jerusalem jo yantsü elümoto tsüphov motsünga tolea kyon jo tata wotssona n van, elani okiha lümato n tsohan cho. 5 Osi Potsow na a ntssünga lyui esopvüiden osi tsüphoeden jiang tsarhyui onte wopan jo ochoang sana, elani kvülo vanracho sana jiang yani zele to ezocho. Osi ochoang na Babyloni oyam khelo morantsan ekümo vansi yidencho sana jiang mying eramo ji ana hungcho; osi onte tsükona heto yanchecho. 6 Osi mmhona zele, kyon elümotona Babylon sisi Jerusalem tona Juda tolo onte yantsü jiang lo yilancho hungcho. Shiang ji wopan topvü Nebukadnezar na Babyloni onte sosi yipvüto jilo vanta vansi yilancho. 7 Onte yulo esopvüiden jiang jo shiang: Zerubabel, Joshua, Nehemiah, Azariah, Raamiah; Nahamani, Mordekai, Bilshan, Mispereth, Bigvai, Nehum, elani Baanah to. 8-25 Israel jipo ochoang na Babyloni morantsan osi tsanthan tssoa vansi kholani Juda lo yicho sana jiang tona kvüta kvüta sosi yicho sana jiang to eranrhyücho: Parosh jipo 2,172 Shephathiah jipo 372 Araha jipo 652 Pahat Moab jipo (Jeshua tona Jakob to tsoronichen) 2,818 Elam jipo 1,254 Zattu jipo 845 Zaccai jipo 760 Binnui jipo 648 Bebai jipo 628 Azgad jipo 2,322 Adnikam jipo 667 Bigvai jipo 2,067 Adin jipo 655 Ater (Hezekiah toha tsacho) jipo 98. Hashum jipo 328 Bezai jipo 324 Hariph jipo 112 Gibeon jipo 95 26-38 Kyon ochoang pyimtsümotsüiden yanro jiang lo vancho sana jiang na kholani yicho: Bethelhem, osi Netophah lona 188 Anathoth lona 128 Beth Azmaveth lona 42 Kiriath Jerim, Chephirah, tona Beefoth to lona 743 Raamah osi Geba lona 621 Michmash lona 122 Bethel tona Ai to lona123 Nebo thanpo lona52 Elam thanpo jilona 1,254 Harim lona 320 Jericho lona 345 Lod, Hadid tona Ono to lona 721 Senaah lona 3,930 39-42 Pvüti jipo kyon morantsan ekümo vansi kholamo jiang: Jedaiah (Joshua lona chenkacho) 973 Immer jipo lona 1,052 Pashhur jipo lona 1,247 Hamir jipo 1,017 43-45 Levi jipo morantsan ekümona kholamo jiang: Jeshua osi Kadmiel (Hodaviah tsoronichen) 74 Ekhümki khensoeden (Asaph tsochenden) 148 Ekhümki enhyangden (Shallum, Ater, Talmon, Akkub, Hatita osi Shobai to jiang tsoronichen) 138 46-56 Ekhümki lhitssoeden jipo ochoang na kholani yicho sana jiang: Ziha, Hasupha, Tabbaoth, Keros, Sia, Padon, Lebana, Hagaba, Shalmai, Hanan, Giddel, Gahar, Reaiah, Rezin, Nekoda, Gazzam, Uzzi, Paseah, Besai, Neunim, Nephushesim, Bakbuk, Hakupha, Harhur, Bazlith, Mehida, Harsha, Barkos, Sisere, Temah, Neziah, tona Hatipha. 57-59 Solomon nri jiang jipo lona chiyio kyon ochoang na morantsan ekümo na kholancho sana jiang: Sodai, Sophereth, Perida, Jaalah, Darkon, Giddel, Shephatiah, Hattil, Pochereth Hazzebaim, tona Amon to. 60 Ekhümki elhi etssoe jiang tsoronichen tona Solomon nriden to ochoang na morantsan eküm lona kholani yichosana jiang topvü tssotsüi onte owo 392 tssocho: 61-62 Delaiah, Tobiah, tona Nekoda to jipo ochoang na Tel Melah, Tel Harsha, Cherub, Addon, tona Immer to yanro jiang lo vansi kholani eyi jiang ji onte owo 642 tssocho; tokhatola onteno Israel tsoronichen to jo onte popo n phyokhokcho. 63-64 Elani pvüti jipo shiang na jo onte pyimtsümotsüi n thünichecho: Hobaiah, Hakkoz, tona Brazellai to (Brazellai motsüi jipo kyon nchyuana Gilead metalo Brazellai jipo eloe soa vani omo jipo ejana yicho.) Ontena onte motsüi n thümcheo ji tsükona, onteji pvütiden to n khichocho. 65 Osi Jihudi esapvüi tsüpho jina, ontena Urim tona Thummin to tsa jiang n tsütsakhokthüng nandangjo etsoyu Potsow thamo jiang khi n tsokhok to onte ezocho. 66-69 Morantsan ekümo na kholani eyio jiang onte tssotsüi 42,360 Eboe osi eloe nriden 7,337 Eboe osi eloe khenden 245 Kvürü 736 Kvürü terio 245 Odh 435 Gadho 6,720 70-72 Ekhümki ji tssocholan elhi ji tsükona kyon elümoto na shiang thecho: Esapvüi tsüpho jina shona seri 8 Ekhümki tssolan phyolan lo tsütsao phfü 50 Pvüti pipo phongnrhüo 530 jiporan jiang thüngina shona seri 168 Janti 1,250 Nzontsü kyon jiang thüngina shona seri 168 Janti seri 140 Pvütisü phongnrhüo 67 to thetacho. 73 Pvütiden, Livi kyonden, khümphenki enhyangden, khenden okho, elani nzontsü kyon khosha tona, ekhümki 'lhitssoeden onte topvü Israel kyon jiangna Juda meta yantsüro osi yantsü jianglo vanjüng tssotacho.
Ezra na Potsow Shikhfü Jiang khae Engathukala
1 Babylonina yisi choro tiyingo to lojo Israel jiang topvüna vanjüng tssoa oyan jiang lo vana yicho. Osi hoji choro tsüngon ovüngo jilo jo onte topvü na Jerusalemi ojü kipüng to etsao ji nkonphia jilo sanrhyucho. Ontena Ezra pvüti ocho Potsow shikhfü ji, osi kako elüm mmhona ntsichosana ji thüngi Potsow na Moses yakchia Israel thüngi shikhfü epio ji chontacho. 2 Hoji tsükona Ezra na kako ji khi hansi kvüloshi eboe, eloe osi nongori tssolea engathekhukcho sana to jiang sanrhyui evamo jilo yicho. 3 Ontena sanrhyui evamo meta jilona nyazüngina benkae nshietüng nandang shikhfü ji khacho osi onte topvü na eno ndungi engacho. 4 Ezra jo sanrhyu ji tsükona roni evao tsüngssa jilo chongocho. Osi ombo khe amimoe jo shiang na phanthi vancho. Mattithiah, Shema, Ananiah, Uriah, Hilkiah, osi Maaseiah; elani shiang jo hayiwoe phanthicho: Pedaiah, Mishael, Malchijah, Hashum, Hashbaddanah, Zekhariah, osi Meshullam. 5 Kvüthüng Ezra na saphang jilo kyon topvü poni phanthicho sana topvü na mhyikrüka ombolo zekata vancho. Ombona kvüthüng shikhfü kako ji elhichichosana, zaktole phanthirümcho. 6 Ezra na phyocho, "OPVÜI thünga, Potsow tsüpho ji!" Ji süijo kyon topvüna okhe rükachia hojito tssothuka to phyotacho, osi nkhoktseni omhaji likoe nkhümthe khümtacho. 7 Tokhatola onte topvüna phanthi mangi vancho osi Levi kyon shiang shina shikhfü ji eroroe onte ezocho: Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, osi Pelaiah. 8 Ontena khophi kyon jiang na engathekhuko tssoa ezocho. 9 Kvüthüng shikhfü jina ntio phyochosana, osi ntio ethev lichosana, jiang zochosana, onte lümbüm rokphia yicho osi ekyav benkacho. Hoji tsükona esapvüi Nehemiah, pvüti osi shikhfü ntsi Ezra, elani Live kyon shikhfü jiang eroroe onte engathuka evamo jiang to na kyon jiang topvü thüngi to ezocho. 'Tsüngon shijo OPVÜI nte Potsow tsükona nthoka, küma ntena nnungra mekana ekyav n li. 10 Tolea enhungo oki yitava osi oyi tokhu tssotava, osi ochoangna n liv vanchosana jiangha shümnhyata. Nchüngo ete topvü tsükona ntho tsüngon küma ti nungratakhe, osi OPVÜI na ematha nte pia vamo ji yakchia nte etho jükavka." 11 Levi kyon jiangna tsüngon shi esüa ntho tsüngono jo ti-kyatakhe to ezoa kyon jiang ji lüm emiyia wotacho. 12 Jisüijo kyon topvüna oki oyi emathata tsoyutacho osi ontena ntio lichosana jiang ji oyam thüngi ha shümnhyatacho. Ntiotssole shikhfü lona ntio phyoe lichosana jiang khae engathuko ji ontena topvü engathethakcho.
Ranki Tokhu Khitao ji
13 Ojyuato jo jipo lo kvüri, Pvüti tona Levi kyon jiang topvü nzo tssoe shikhfü püngno yiji khalo Ezra thüngi wotacho. 14 Osi shikhfü kvümoe OPVÜI na Moses yakchia Israel thüngi pichosana, jina tokhu shi yutalojo esüngaro tsükona oki tssoe nchen-mpav tsükona phyoe licho, hungcho. 15 Hoji tsükona ontena shi esüa yizüng nsüngrüi Jerusalem meta yantsü osi yanro jiang topvü heto ezoa wothukcho: "Phonglani chongo, mitssüng khero, olive khero, rümbüm khero elani myrtles to tsa khero to jiang khi hansi jeyi, shikhfü lo phyoe elio ji esüa nchenphen tssotava." 16 Hoji tsükona kyon jiang na odung khero jiang khirhyui onte mhonki ephyankae jiang poni ranki tssota, nna hapoe, elani ekhümki hapoe osi ojü kipüng tona Ephraim kipüng tolo nzontsü sanrhyuphen jianglo to ranki nchenphen tssotacho. 17 Kyon kvütata na evüng tssoa vansi yichosana jiang topvüna ranki tssoe jianglo vantacho. Heto shiji Num tsoe Joshua echungina vanta oyi nchüng ovüngo tssoa etsso jina kyon topvüna tssohung tsünga emathatacho. 18 Tokhu tsüngon ovüngo jilona benkae tsüngon wokhao ji nandang ontena shikhfii jiang tara tarana eng akvü khatacho. Ontena tokhu ji nchuk tiying khicho osi tizao tolojo shikhfü lo elio ji esüa ethak tokhu tsüngon tssocho.
Kyon Jiang na Onte Mmen Jiang Phyochaktacho
1 Choro tsük jilo tsüngon mekyusi mezhüoto lojo Israel kyon jiang na sanrhyui onte mmen tsükona nungrala to ejoena khangtacho. Ontena metapoe kyon jiang thüngina kontathakcho mekana echümpotacho. Osi etho jak-nungrala to etssoena posta sü mpentasi kvüri live yakachi hantacho. Jisülo jo onte pyimtsümotsüi jiang mmen tona onte mmen to tsükona phyochaktacho. 3 Osi shanlan ethüm harüma OPVÜI onte Potsow shikhfü jiang khae engathukcho. Elani shanlan ethüm harüma, onte mmen phyochaka OPVÜI Potsow khümtacho. 4 Levi kyon jiang tsükona osa echümpo roncho. Osi hojilo Levi kyon, Jeshua, Bani, Kadmiel, Shebaniah, Bunni, Sherebiah, Bani, osi Chenani to na khokthecho. Osi onte Potsow thüngi tüngkachia randantacho. 5 Levi kyon shiang na ekhüm etsa picho: Jeshua, Kadmiel, Bani, Hashabneiah, Sherebiah, Hodiah, Shebaniah, osi Pathahiah. Ontena kyon jiang ezocho: "Phanthia osi ni pvüi Potsow thünga; nchüngkhon, nchüngkhon to ombo thünga! Kyon na ombo mying thüngo jina tssochyucho mek khatola, otsük akvüna ombo mying thüngthuka."
Phyochak Randan
6 Jisüijo Israel kyon jiang na heto randancho: "Nino OPVÜI, osi OPVÜI jo nitae; Nina Potsüo ji nsüngrücho osi Potsüwoe shantio jiangha nsüngrücho. Nina topvü thüngi eküm picho. Potsow etho jiang naha nkhümthe ni khümala. 7 Ni OPVÜI Potsow na Abraham ji ethüngche Babylon meta Ur lona tsachokcho. Nina ombo mying ji Abraham to tongphiyi cho. 8 Nina omboji longtsüka eli to zechecho, osi nina ombo thüngi echümchakcho. Nina Kanaan metaji ombo epiv echümchakcho, osi Hittites tona Amorites jiang metaha Perizzites osi Jebusites, elani Girgashites meta jiang ha to, meta kvülo shi ombo tsoronichen na vam sana jiang. Nina ni echümchak ji vacho ntiotssole nino longtsüka eli. 9 "E pyimtsümotsüi jiang na Ejip lona kvütata ezüpcho sana jiang nina hunga; osi ontena jümyon jümang lona nithüngi nzanchi chontao ji nina engayicho. 10 Nina emhokthao chethev Mesao jiang pono tssocho, osi ombo küpo elhi etssoe, ombo meta kyon jiang pono to, ntiotssole ontena kvüto ni kyon jiang ezüpthukcho sana ji nina ntsicho. Osi nina jithüng myingthüng ehungoji nchüng jana lia vana. 11 Nina ni kyon jiang tsükona jümang ji yakchia olan kümthukcho osi ni kyon jiang ji likying yakchia sochokchicho, osi ochoang na onte phana vanchosana jiango jümang ndavlo olong jüngthetato jüngthe-khani chüracho. 12 Engo jo nina eluk kholung khi onte khümchoa socho, osi zümolo jo milon theta onte socho. 13 Nina Potsüwoe na Sinae phonglani jorocho; nina kyon jiang thüngi shikhfü mmhom tona püngnoyi mmhom jiang to onte püngnocho. 14 Ni esan emung tsüngon ji nthoa benphiv tsükona onte püngnocho, osi ni phajae Moses yakchia ni shikhfü jiang onte thüngi picho. 15 fKvüthüng onte wontona sana nina potsüwoe na hümri onte picho, osi kvüthüng onte eratsüngana olung lona ojü chiyitoki onte yuthukcho. Osi nina meta kvümoe onte epiv tsükona echümchakcho sana ji oyi esav tsükona onte ezocho. 16 Tokhatola e pyimtsü motsüi jiangna kangtsüa osi lümbüm khünga nchümi, ni yizüng jiang n ngav sicho. 17 Nina ntio elhi tssochosana jiang mhechoe sicho; osi niyi n ngacho, elani nina chethev elhi tsso jiang ha mhechoe sicho. Ontena kangtsü khi ontepopo esopvüi ethüngcho, Ejip metae ezi ekümo yilantav tssocho. Tolia nino nlan siyipvüi Potsow tssocho; nino khonzan osi nzan eli, osi zakto lümbüm n tsoko Potsow. Ni nzan jo tsüphoa ji yakchia nina onte n sinkicho. 18 Ontena mangsüpong esüa kisü nsüngrücho osi Ejip metae na sosi onte eyio Potsow ji khilato phyotacho! Kvütata ontena ni yikvü yilocho ato, OPVÜI! 19 Tokhatola nina hojilo lijüngi onte n si, ntiotssole ni khonzan jo tsüphoa. Nina eluk osi omi kvümoe na zümolo osi engo onte khümchoa lansocho sana jiangha khi hansi n yi. 20 Ni mmhon ji khi ontena ntio etssov shikhfü sana jiang ezocho; nina mana tsothukcho osi ojü yuthukcho. 21 Lijüngi nzyu zhüro yentsa topvülo onte ethelan topvü, nina picho; mpensüna n phekathuk, osi lantsa ndana onte ojona tia n nothuk. 22 "Nina jipo osi ekhüngyan onte meta nkona evamo jiang ji khyocho, Sihon sa evamo meta Heshbon jiha ontena khyocho, elani Og Mesao na etsso meta Bashan jiha to kyhocho. 23 Onte thüngi oyaki shantio esüa n khacheo tsokhying tsolo nina picho, osi onte pyimtsümotsüi thüngi epiv echümchako meta ji khyoe hojilo onte vanthukcho. 24 Ontena Kanaan meta jiha khyocho; nina hojilo evamo kyon jiang khyocho. Osi ni kyon jiang thüngi onte lümbüm erüng osi Kanaan lo evamo kyon jiang tona mesao jiang pono etssov etho onte picho. 25 Hojito ni kyon jiangna pikhfü elio yantsü jiang, lizü jiang elani oki ejüelina pyingi elio jiang elani jükha to shanthakcho, olivedung, tssüngthidung, osi jününgrothili topvü phanchoe khithukcho, onte etsson elüm tsoyutasi beleta vanthukcho; osi nina epio mmhom topvü ji ontena emathata tsütsatacho. 26 "Toaha ni kyon jiang na niyi n ngav ni panlana phanthicho; ni shikhfü jiang ji sülamoe na philanchisi n ngacho, osi onte thüngi ntangnshon epio, osi ni thüngi kholani yile to ezo zenkhying jiang ji lüngthacho. Hojito nsam nsam ni yikrathukcho, 27 Hoji tsükona nina onte ri jiang khi onte khyothukcho, osi onte ezüpale ni thüngi nzanchi chontacho, osi nina Potsowoena onte janlancho. Ni nzan tsüpho jina onte thüngi esopvüi mmhom ethüngcheyicho, osi hojiang na onte ri khelona onte shanchocho. 28 Kvüthüng noying yichosana ontena mmen tssolancho, osi onte ri jiang khi onte khyolanthukcho. Tokhatola, kvüthüng ontena mmen jilona khophilani onte shanchole to ni ezochosana, nina Potsüwoe na zocho osi elan elani khi ni nzan tsüpho khi onte shancholancho. 29 Ni püngnoyi jiang engale to nina onte ntang-shona ezocho, tolea kangtsü lona ontena ni shikhfü jiang silanchicho, ni shikhfü jiang benphiv jijo onte ekümlan ji khatola onte lümbüm ekhüng osi kichuk n chonchio ji yakchia ni yi jiang n ngacho. 30 Nzyu elümoto nina erüm edo hansi onte ntangnshoncho. Osi zenkying jiang yakchia nina onte ezothukcho, tokhatola ni kyon jiang na onte eno nchonchicho, hoji tsükona nina elani jipo thanphoe khi onte khyolanthukcho. 31 To mpa tssolea, ni nzanjo tsüphoa, nina onte n si osi onte ji roe n sithuk, nino nzan eli osi khonzan to etssoe Potsow! 32 "O Potsow, osi e Potsow, nino kvüta tsüphocho ato! Kvütata ekhenthav osi, kvüta etho eli ato! Nina echümchaka ntsatao nzan ji n senphi; Assyrian mesao jiang na ezüpthuko jithüngna enhünga jana, ena kvüta ezüpa yithakchola! Osi e mesao jiang, e esopvüiden, e pvütiden osi zenkhying jiang, elani e motsüi osi e kyon topvüna kvüta ezüp khithakchosana jiang topvü e nchümche yia! 33 Nina ezüp epio jiang topvü e elhina mancho, osi ena mmen tssolea, nino longtsüka lia ntsa nrüka vancho. 34 E motsüiden, e mesaeden, e esopvüiden, osi pvütiden jiang na ni shikhfü ji ephan ntssocho. Ni yizüng osi ni ntangnshon, jiang ontena n ngacho. 35 Nina liko lizü tsüpho jilo vanathüngjo ni nkhon mmha ji khi mesao jiang na ni kyon jiang sacho; tokhatola onte mmen jilona khophi khi benkav jijo ontena n tssocho. 36 Enhungo eyio nina liko epio jilo eziden ekümthaka, osi nina liko lizü mmhom etsoyu chiyiphen epio jianglo nriden ekümthaka. 37 Liko jilona ntio mmhom chiyia sana jiang topvü mesao jiang thüngi yiala, Hojijo ena mmen tsso jina nina hojito e pono tssothukcho. E ekümrümo jiang pono tona e pono to onte lümcho tssoala, osi eiyo nungkhu nungra ekümo evanthukala!"
Kyon Jiang na Ntsata Jilo Sekacho
38 E pono kvütata ezüp yithakchosana shiang tsükona, e Israel kyon na heto echümchaka eranala, osi e esopvüiden, pvüti yingaden, osi pvütiden na shilo okhe thetala.
1 Ntsata shilo okhe thetemo jijo e esapvüi eramo Hacali: ah tsoe Nehemiah, osi Zedekiah naha sekacho. Hoji sülo shiang naha sekalancho: 2-8 Pvütiden: Seraiah, Azariah, Jeremiah, Pashhur, Amariah, Malchijah, Hattush, Shebaniah, Malluch Harim, Meremoth, Obadiah, Daniel, Ginnethin, Baruch, Meshullam, Abijah, Mijamin, Maaziah, Bilgai, osi Shemaiah, 9-13 Pvüti yingaden: (Levi kyon jiang) Azaniah tsoe Joshua, Henadad jipo lona Binnui, Kadmiel, Shebaniah, Hidiah Kelita, Pelaiah, Hanan, Mica, Rchob, Hashabiah, Zakkur, Sherebiah, Shebaniah, Hodiah, Bani, osi Beninu, 14-27 Kyon esopvüiden: Parosh, Pahath, Moab, Elam, Zattu, Bani, Bunni, Azgad, Bebai, Adonijah, Bigvai, Adin, Ater, Hezekiah, Azzur, Hodiah, Hashum, Bezai, Hariph, Anothoth, Nebai, Magpiash, Meshullam, Hezir, Meshezabel, Zadok, Jddua Pelatiah, Hanan, Anaiah, Hoshea, Hananiah, Hasshub, Hallohesh, Pilha, Shobek, Rehum, Hashabnah, Maaseiah, Ahiah, Hanan, Anan, Malluch, Harim, osi Baanah,
Ntsata
28 E-Israel kyonden, Pvütiden, Pvüti yingaden, ekhümki enhyangden, khenden okho, ekhümki elhi etssoeden osi kvütana OPVÜr Potsow yizüng enga pvüjipoe e metalo evamo jiang lona echümpotae vanchosana, etsoe-nli jiang tona nongoriden kvütatana engathe khokchosana, 29 e-esopvüiden nzo tssoe ena ntsatab shi yesoa tssona ezüp osi etsso randanka ji khiv to ntsia ena Potsow yizüng shikhfü kvümoe ombo nri Moses yakchia epichosana ji ephan vam, osi OPVÃœI na ntio etssov etüma liato yidan epiasana jiang ephan vam to phyochaka ntsatala. 30 Pvüjipoe e metalo vamo jiang thüngi yanpiyanthan n tssota. 31 Pvüjipoe ochona sana esanmung tsüngono mekana ntho tsüngono otsung mekana thanpo lipo eshithuko rolea ena onte n shiyi. osi kvüthüng nzyu tiying benasana liko jiang n jon osi ochioma topvü ntsüngcheta loe siv. 32 Nzyu akvüto Janti rang ethümlo motsüngajo ekhümki ethüng ezi tsükona thev. 33 Ekhümki ethelan shiang ha ena piv: vümhi n theo humri, engakvü khezümtsüng, engakvüto erungthan ekümrümo, ntho tsüngono othan, chothan tokhu lo ethelan, othan thanpo Israel mmen khi siyithukvü tsükona othan jiang osi ekhümki kvütana ethev lichosana topvü piv. 34 E-kyonden, pvütiden, osi pvüti yingaden na nzyu akvü phyalyu fuki zesi OPVÃœI Potsow shikhfü ephanina erungthan piathüng otssüng ji ochoang wopan na thev sana ji ethüngu. 35 Nzyu akvüto e tssüngthi dungina tssüngthi mhendemo jiang tona otssok richodemo to jiang topvü OPVÃœI thüngi hansi wov. 36 E-otsük akvüna tsokhying vandemo ji OPVÃœI shikhfü ephanina pvüti thüngi sosi ovo randankata khochakthukvü. Elani mangsü tssolea, olyu tssolea osi nyanya tssolea nrodemo jiang jo Potsow thüngi khojaki piv. 37 Elani ena richodemo jilona etsov nsüngrüo jiang, tona jününgrothijü, olive thyujü osi tsüngthilan taro pvüti thüngi hansi wov. E-lina ntio chiyichosana jiang tona othan jiang to pvüti yinga jiang thüngi hansi ov, ntiotssole ontena hojiang hanrhyuala. 38 Pvütiden ochoang jo Aaron lona rena yichosana jiang jo kvüthüng othan hanrhyuasana pvüti yinga jiang ntüngo tssov, to thakana ekhümki ethelan jo othan hanrhyui elio jianglo echi tarolo echia jo pvüti yinga jiangna ekhümki othan hanrhyupheni hansi owo vav. 39 Hoji sülojo Israel kyon tona pvüti yinga to jiang na othan olan olan hanrhyui elio jiang ekhümki kvülo pvüti, osi enhyang jiangna oyo opvü vaphen sana jianglo hansi wov elani ekhümki khenden jiang ki to hansi wov. E-na kvüthüng ha OPVÃœI Potsow kiji nsi-nki.
Jerusalem lo Evamo Kyon Jiang
1 Esopvüiden jo Jerusalem lo vancho, osi nzontsü jo phyalyu zetasi wopan taro yulo wopan motsüngtsüngna ntho Jerusalem yantsüi vanthukcho, tokhatola hojilo enhyo jiangjo oyan osi yantsü thanpo jianglo chirorae vantacho. 2 Kyon ochoangna Jerusalemi vamvü to ontebobo phyokhokcho sana jiang jo kyon na thüngcho. 3 Tolea Juda meta yantsü thanpo jianglo Israel kyon, pvütiden, pvüti yingaeden, ekhümki elhi etssoe osi Solomon nriden tsoronichen jiang to jo onte metalo onte ejüeli tsütsata vancho. osi Juda meta Jerusalem lo esopvüiden evamo jiang jo shiang: 4 Juda jipo jilo khanhyaeden: Zekhariah rüi Uzziah tsoe Athaiah, elani ombo tsochen ejoma Amariah, Shephatiah, elani Mahalalel, tona Juda tsoe lona chiyio Perez. 5 Colhozeh rui Barukh tsoe Maaseiah, osi ombo motsüiden Hazaiah, Adaiah, Joiarib, elani Zekhariah, osi Juda lona chiyio Shelah. 6 Perez tsoronichen jiang ethüngche woro onte 468 na Jerusalem lo vancho. 7 Benjamin jipo lo khanhyaeden jiang: Joed tsochen Meshullam tsoe Sallu, ombo motsüi thanpoe thenhyao jiang jo Pedaiah, Kolaiah, Maaseiah, Ithiel, osi Jeshaiah. 8 Gabbai tona Sallai tojo Sallu wopan ndüngo tssocho, onte topvü tssotsüi Benjamin jipo 928 na Jerusalem lo vancho. 9 Zichri tsoe Joel jo esopvüi ji osi Hassenuah tsoe Juda jo yantsü jilo tsüphoe enioto ji tssocho. 10 Pvütiden: Jachin tona Joiarib to oni tsoe Jedaiah. 11 Hilkiah tsoe Sereiah oso ombo rüi Meshullam. Ombo motsüi thapoe Zadok, Meraioth elani Ahitub, pvüti tsüphotso ji to. 12 Onte jipo topvü tssotsüi, 822 na ekhümki elhi tssocho. Pelaliah tsoe Jeroham ji tsoe Adaiah, ombo motsüiden Amzi, Zekhariah, Pashhur, elani Maichijah to shiang. 13 Onte jipo lona 242 na wopan lo kvüri tssocho. Ahzai rüi Amashsai, ombo Azarel tsoe. Ombo omotsüiden, Meshillemoth osi Immer. 14 Onte jipo yulo na otsük 128 na rasan thüngoe esopvüiden tssoracho. Onte yulo esopvüi jijo Zabdiel, ombo esopvüi wopan lona chiyicho. 15 Livi jipo jiang: Azrikam tsorüi Shemaiah, Hasshub tsoe ji tona ombo motsüiden Hashabeah elani Buni. 16 Shabbethai osi Jozabad onio Livi yulo khümphenki hapoe elhi jiang yulo thüngcheta etssoeden tssocho. 17 Mattaniah, Mika tsoe osi Zabdi tsorüi, ombo Asaph tsochen lona chiyicho, osi ombo ekhümki montsso epi khen ekhvüiden esopvüi ji tssocho. Bakbukiah, jo Mattaniah nzanchi tssocho. Jeduthum pvüji lona chiyio Galal, tsorüi Abda, Shammua tsoe jiha pvüti nzanchi elhi tssocho. 18 Hojito ntho yantsü Jerusalem jilo Livi kyonden onte 284 vancho. 19 Khümphenki enhyang jiang: Akkub, Talmon, osi ombo wopan kitsük tssotsüi onte 172 na ekhümki enhyang tssocho. 20 Israel kyon ejoma tona pvütiden, osi Livi kyon ejoma tojo onte liko lo Jerusalemi mekna Juda meta yantsü thanpoe jianglo vancho. 21 Ekhümki lhitssoe jiango Jerusalem yantsülo yankho motsünga Ophal to tsa jilo vani Ziha tona Gishpa to oni nlansüng küpona elhi tssocho. 22 Jerusalemi vani Livi jiang nsünglüngio jijo Hashabiah tsorüi Uzzi to tsa, Bani tsoe jina tssocho. Ombo motsüiden mekana wopan Mattaaniah tona Mika toha jüa, osi ombo ekhümki okhen thüngoe ezepvüiden Asaph, jipo lona chiyicho. 23 Ntiotssole onte jipo topvü chongta okhen jiang eng akvü ovüngna ethelan eli ephanina methaki vam tsükona mesao yizüng hojito licho. 24 Juda jipo lona chiyio, Zerah pvüji kyon Meshezabel tsoe Petahaiah, jina Persia yitsso ki jilo Israel jipo thung tssocho.
Yantsüro Osi Yantsü Thanpoe evamo Kyon Jiang
25 Kyon ekyongona jo yanroe onte li jiang lo vanracho, tolea juda jipo jiango Kiriath, Arba, Dibon elani Jekabzeel, to shianglo tona yantsü ndüngo oyan teriv jianglo vancho. 26 Elani Jeshua, Moladah, Bethepelet 27 osi Hazarshual, Beersheba tona hojiang nkonphia oyan elio jiang tolo vantacho. 28 Ziklag, Mekonah, yantsü osi onte hakono oyan jiang toloha vancho, 29 elani Enrimmon, Zorah, Jarmuth, 30 Zanoah, Adultam, elani oyan teriv yanro shiang nkonphia elio jianglo vancho. Lachish tona yanro shi ndüngo oli jianglo elani Azikah osi oyan jianglo to vancho. Heto ephyo shiang yichakjo Juda jipo kyon jiango jolowoe jo Beersheba erü ndüngo, osi khümkiwoe jo Hinnom hayi to yutalo vancho. 31 Benjamin pvüji jiango Geba, Michmash, Ai, Bethel tonaa shiang nkona oyan elio jiang tolo vantacho, 32 Elani Anathoth, Nob, Ananiah, 33 Hazor, Ramah, Gittaim, 34 Hadid, Zeboim, Neballat, 35 Lod, osi Ono, elani tsiyanmori hayi to tsao jianglo vantacho. 36 Levi okho ejoma ochoang na Juda erü ndüngo vanchosana jiango Benjamin jipo nzo vanle to zikacho.
Pvütiden Osi Pvüti Nzanchi Jiang
1 Pvütiden osi onte nzanchiden ochoangna Shealtiel tsoe Zerubabel tona pvüti tsüphotso Joshua to phana tsanthan metaena elani yichosana jiango shiang: 2-7 Pvütiden: Seraiah, Jeremiah, Ezra, Amariah, Malluchi, Hattush, Shekaniah, Rehum, Meremoth, Iddo, Ginnethoi, Abijah, Mijamin, Maadiah, Bilgah, Shemaiahm Joiarib, Jedaiah, Sallu, Amok, Hilkiah, osi Jedaiah. Shiang jo Joshua echungo pvüti jiang yulo esopvüiden jiang tssocho. 8 Livi jiang: Livi yulo Jeshua, Binnui, Kadmiel, Sherebia, Judah, elani Mattaniah to shiango ekhümki montsso epikhen eden jiang yulo esopvüiden tssocho. 9 Bakbukiah, Unno, elani onte shom pvüti nzanchiden jiang tona khenden okho ji tssocho, osi ontena janlan ji mekna benlan ji dencho. Pvüti Tsüphotso Joshua lona Chencheo Jiang 10 Joshua jo Joiakim opo, Joiakim jo Eliashib opo, Eliashib jo Joiada opo; 11 Joida jo Jonathan opo osi Jonathan jo Juddua opo to tssocho. Pvüti Jipo Yulo Kvüri Jiang 12-21 Joiakim na pvüti tsüphotso ji tssoathüng shiang shina pvüti jipo yulo kvüri ji tssocho: Pvüti Jipo Meraiah Seraiah Hananiah Jeremiah Meshullam Ezra Jehohanan Amariah Jonathan Malluchi Joseph Shebaniah Adna Haram Helkai Meraioth Zekhariah Iddo Meshullam Ginnethon Zichri Abijah Miniamin Piltai Moadiah Shammua Bilgah Jehonathan Hemaiah Mattanai Joiarib Uzzi Jedaiah Kallai Sallai Eber Amok Hashabiah Hikiah Nethanel Jedaiah
Pvüti tona Levi to Wopan Erantsüng Ephan
22 Pvüti tsüphotsoe Eliashib, Joiada, Jonathan tona Jaddua to shiang echungo, pvütiden tona Levi wopan tolo wopan kvüri tssoa ero jiang erantsüng heto vacho. Erantsüng shiji mesao Darius na persia lo mesao tssoa vanathüng thaki vacho. 23 Tokhatola Levi wopan lo kvüri jiango Eliashib tsorüi, Jonathan echungoti pvüti chungta erantsüng jilo rheyithukcho.
Ekhümki Ethelan Etssov Jiang
24 Pvüti Hashabiah, Sherebiah, Jeshua, Binnui, elani Kadmiel, to lanso küpona Levi kyon khenden jiang ji okho eni soyingi vacho, osi Potsow kyon, mesao David na lanso pi elio ji ephanina, ekhüm yutalojo, onte okho eni jina onteji janlanta Potsow montsso pia, thanthüng khen dentacho. 25 Ekhümki tsütsaelan hanrhyupheni khümphenki towoe kipüng jilo enhyang jo Mattaniah, Bakbukiah, Obadiah, Meshullam, Talmon, osi Akkub. 26 Kyon shiango Jehozadak tsorüi Joiakim, Joshua tsoe ji echungo tona Nehemiah na esapvüi tssoathüng osi Ezra pvüti ocho shikhfü lo ntsinran tssoa vancho sana jiang echungo to tssocho.
Nehemiah na Yantsü Pikhfü Nthocheoji
27 Kvüthüng Jerusalem yantsü pikhfü ji nthochecho sana, Levi jiang khi nthoche elhi jilo khenpvü olan olan, pyabiro, zhükhen to theta Potsow montsso epikhen denthukvü tsükona meta topvü lona tsarhyucho. 28 Hojito Levi khenden wopan Jerusalem nkonjano evanden, osi Netophah yanro nkonphia evan topvü Jerusalemi sanrhyucho, 29 elani Bethgilgal, Geba osi Azmaveth to jiang lona ha rocho. 30 Pvüti osi Levi jiangna onte tsükona, kyon jiang tsükona osi pikhfükhan, kipünglan osi yantsü pikhfü to jiang shikhfü ephan nthochecho. 31 Hoji sülojo ana Juda lo esopvüiden jiang pikhfü ji poni tsarhyui okho tsüphov eni jiang zeyata Potsow montsso pia Jerusalem yantsü ji füa evov tsükona zikacho. Kholok ovüngo jina pikhfü ji poni amimoe mmen siphen kipüng jiwoe wocho. 32 Hoshaiah na khenden jiang sülami tssosi Juda yulo khenden jiang ejoma na phana wocho. 33-35 Pvüti, Azariah, Ezra, Meshullam, Judah, Benjanim, Shemaiah tona Jeremiah tona khenden jiang sülamitssoe tatara khfüa phana wocho. Jisülo jo Shemaiah tsorüi osi Jonathan tsoe Zekhariah (osi ombo motsüiden Mattaniah, Mikaiah, tona Zakkur, Asaph jipo kyon to jiang na tssocho.) 36 Omba sülamoe jo ombo wopan ejoma Shemaiah, Azarel, Melalai, Gilalai, Maai, Nethanil, Juda osi Hanani Onte topvü na David mesao Potsow kyon jina tsütsao khendenphen jiang bentasi wocho. Ntsinran Ezra na shi okho ji sosi rasantacho. 37 Jisülojo ontena jüzanjo kipüng jilona David yantsü lan jiwoe na dunga ehungo, David mesao ki ji yakchia yantsü ji engchirolamoe jü kipüng to tsao jilo kholani yilantacho. 38 Osi montsso epi okho jiango hayiwoe na pikhfü ji ponina dunga wotacho, anaha onte ejoma phana wocho. E-okho jina pikhfü nzowo jowoe miphung chiphen ntssomo ji yakchia wotacho, 39 osi jilona Ephraim kipüngtsü, Jeshanah kipüng, ongo kipüng, Hananel zenki, elani owo nzoa vanphen zenki to jiang yakchia olyu kipüng jilo wotacho. Osi e rasanta ji khümphen kipüng ji ndüngona ochüm tssocho. 40 Hoji esüa Potsow montsso epi okho eniatana khümphenki jilo chiyiracho. 41 A-ephalo esopvüiden echüo jianglo ekaphata, elani a kholok jilo pvütiden tatara khuta ero jiango, Eliakim, Maaseaih, Miniamin, Mikaiah, Eliwoenai, Zakhariah, osi Hananiah to tssocho, 42 osi hoji sülojo Maaseiah, Shemaoah, Eliazar, Uzzi, Jehohanan, Malchijah, Elam osi Ezer tona tssocho. Osi khenkhfüiden Jezariah na osi owon tssoa tüngkachia khfüta chiyicho. 43 Hoji tsüngono othan elümoto pitacho osi kyon jiang ha ematha na pyingcho, ntiotssole Potsowna emhukthav ematha onte picho. Eloe, nongori topvüna hoji ematha longshi nthoche jilo thecho osi ontena ematha lona ontsso nirotao jiang meta nken topvü lona zojancho.
Ekhümki jilo Khümphen Chungchak Epio ji
44 Shi tsüngon yuta shilo khümphen chungi etsoyu osi tsüngthi lonphen, yonlan hanlan hungdemo than jiang elani khümphen ki tsükona ekhya hansi ero tsütsaelan jiang to vaphen jilo ezepvüi ethüngche vanthukcho. Kyon shiang elhi jo olina chiyidemo than jiang oyan osi yantsü jiang lona hanrhyua elani shikhfü lo lio ji esüa pvüti osi pvüti nzanchi jiang ejan kyon jiang na epio jiang topvü khyarhyua wov tsükona ethüngchecho. 45 Hoji, tsüngono pvüti jiang na Potsowna onte ezoji esüa onte bobo nthochaka elani thanpoe jiang ha nthocheta to etsso ji tsükona Juda metalo kyon topvüna pvüti jiang thüngi emathacho. Ekhümki khenden okho elani enhyang jiang topvüna mesao David tona ombo tsoe Solomon tona ntio shikhfü onte picho sana jiang ephan ombombo ejan jiang mmhona tssotacho. 46 Mesao David osi khesoe Asaph echungina benkae khenden jiangna Potsow montsso epi myingthüng khen edem lo sokabenka lia denta rocho. 47 Hojito Zerubbabel tona Nehemiah to echungojo Israel kyon topvüna ekhümki khenden okho jiang tona enhyang jiang to tsükonaha engakvü othan pitacho. Hoji esüa kyon jiang na Levi jiang thüngi ntho than picho osi Levi jiang naha Aaron tsochen pvüti jiang ejan ji rüka bena khiche pilancho.
Metapoe Jiang Thüngina Echümpotae Vanthukcho
1 Kvüthüng Moses shikhfü kako ji kyon jiang thüngi tüngkachia khae engathukcho sana Ammon kyon tona Moab kyon tojo kvüthüngha Potsow kyon nzo n tssoche to erancho khachecho. 2 Hojijo ntio tsükona la tona Israel kyon jiangna Ejip metaena khochoki yiathüng ji Moab kyon tona Ammon kyon to jiangna Israel jiang ji ojü osi etsoyu ntia n picho. Etsoyu epi thüngonajo ontena Baliam thüngi orang pia Israel jiang rhiyirandankale to ezocho, tokhatola Potsow na rhiyirandanka ji nkhon mmhana tongcheyicho. 3 Kvüthüng Israel kyon jiangna shikhfü yilan shi kha zochosana metapoe kyon jiang topvü onte yulona khosotae vanthukcho.
Nehemiah na Nkhüngcholancho
4 Pvüti Eliashib ocho ekhümki tsütsaelan hanrhyuphen jilo ezepvüi sana jina metapoe kyon Tobiah oni yuta songa khyingta vana rocho. 5 Hoji yakchia chungchak kvümoe othan olan olan elani ntssantssütse, ekhümki ebensü osi pvüti jiang tsükona othan, tsüngonrho, omüm, tssüngthijü, olive thyujü, Levi osi enhyang, ekhümki khenden to jiang epiv vaphen sana ji Tobiah Ammonite kyon ji tsütsathukcho. 6 Tokhatola heto etsso yuta shilojo aiyo Jerusalem lo n vancho, ntiotssole mesao Artaxerxes na Babylon lo mesao tssosi nzyu 32, to jilo ana esan yuta chonphalo wocho. Osi yuta tara sülojo elani ombo thüngina yidan khi 7 Jerusalemi yilancho. Hoji süloti Eliashib na Tobiah khi chongchak ji mmena vanthuka vamoji; hungi akhenrhükcho. 8 Hoji tsükona alüm etsok lona ana Tobiah tsütsaelan topvü haphoe shümchokchi siyicho. 9 Jisülojo chongchak ji nthochie ekhümki ebensü osi tsakalan elani othan orhüm mmhom to jiang valamvü tsükona ana yidan picho. 10 Elani ekhümki khenden okho osi Levi ejoma tojo kyon jiangna ekhya ji n pio ji tsükona ntio n tso küma Jerusalem sisi onte hümoli yana yikhanthaka to ntsicho. 11 Hoji tsükona ana jilo tsüphoe jiang maka Levi osi khenden okho jiang elani tsarhyui onte elhi tethi ji tssothuklancho. 12 Tokhatola Israel kyon topvüna otssuk, omüm than osi olive thyujü, jününgrothijü jiang topvü ekhümki hanrhyulana yicho. 13 Jisüi jo ana kyon shiang ji tsütsaelan chongchak ji zeyae enhyikacho: Shelemiah, pvüti, Zadok, shikhfü lo ntsinran, elani Pedaiah, Levi, jisülo onte nzanchithukvü tsükona Mattaniah tsorüi Hanan, Zakkur tsoe ji to ethüngchecho. Ntiotssole ontena tongochünga etsoyu jiang tssolea mmhona chitalontav to ana ontelo longtsüka licho. 14 Oh, A Potsow, ana ni ekhümki osi shilona ekhüm jiang tsükona ntio elhi mmhon tssochosana hoji a nehümeheyia. 15 Shi yuta shilo Juda kyon jiangna esanmung tsüngono jününgrothi zümta ana hungcho, elani ejomajo, otssuk omüm, jününgrothijü, Züvothi, to jiang ji gadho mankvüi hankachi Jerusalemi hansi yita to tssocho; Hoji tsükona esanmung nchok jo ntia tiyentale to maka ezocho. 16 Elani Tyre yantsü kyon ejoma Jerusalemi vanta evamo jiang naha ongo, osi tsütsaelan olan olan hanrasi oro yantsüi e kyon jiang thüngi esamumg tsüngono yeno rocho. 17 Hoji tsükona ana Jihudi esopvüiden jiang thüngi maka heto ezocho, "Zeta nteno ntio tsükona heto mmen elhi tssotala! Ntena esanmung ji nthoa n vanthukala. 18 Heto etsso shi tsükona Potsow na nte pyimtsümotsüi jiangha yantsü shi roe sia ezüp pichola, tole ntenaha elani Israel pono Potsow lüm etsok socholamo elhi tssotala, esanmung mmenthuko ji yakchia." 19 Hoji sülojo esanmung ejam ji myuina yantsü kipüng ji khani vasi esanmung ji n yakthüng jo tichonchile to yidan picho. Elani emung nchok eyemvü tsükona ochinaha yantsüi ntia hansi n rwothukvü tsükona kipüng jianglo enhyang vanthukrae sicho. 20 Toaha shishoe ejoma tsütsaelan taro eyen jiangna zümona Ronsyu tsüngon nchuk na pikhfü tssae yipta emung ji nhyakcho. 21 Hoji tsükona ana, "Nteno ntio etsso pikhfü tssae oro yipa emung nhyaktala. Elani heto elhi tssotachojo, enhungo okhe nte thevka to ezocho." 22 Levi jiangha onte bobo nthochesi kipüng jiang nhyakyata vani esamung ji nthoa vanthukle to ana yidan picho. Oh, Potsow, heto elhi mmhom etsso shi tsükona ha ni nzan tsüphov ji khi a nkohov nchümcheta. 23 Shi yuta shilo Jihudi eboe elümotona Ashdod, Ammon, elani Moab to Eloe soa vancho ha yanchecho. 24 Osi onte tsoero chiso najo Ashdod yitona thanpoe yi to nsantasi e yi-jo n tsio jitüv ha vanracho. 25 Hoji tsükona ana a lüm etsok lona eboe jiang tsae rhyikata otssan lona rukphia makcho osi ochoang najo okhena mpa yonkasi sülo enhungo onte tsokhying tsolo jiang ochinaha metapoe kyon thüngi yanpiyanthan n tssothuk osi ontena ha n khi to Potsow myingona echümchakthukcho. 26 Ana onte ezocho, "Solomon ha metapoe eloe soa evamo mmen tsük shi tssocho, ombo mesao thanpoe jiang lona tsüphokata, osi Potsow na ombo nzamo ji yakchia Israel pvüji topvü pono mesao tssothukcho, tolea shi mmen shi tssocho. 27 To tssona ntenaha onte zechoe, Potsow yi n ngana metapoe omo-atsi eloe soa vamke?" 28 Eliashib pvüti tsüphotso ji tsokhying Joiada ji tsokhying yolo tsükana, Beth Horn yamo Sanballat otsolov soa vancho, hoji tsükona ana omboji Jerusalemi na yithuki sicho. 29 Oh, Potsow, kyon shiang na pvüti elhi ji mmenthuko jitae mekna nina pvüti jiang thüngi ntsata evao ji kvütoli mmenthukcho sana ji ti-mhechoa. 30 Shi sülo ana kyon jiang ji ntiojo metapoe eküm sana jiang lona onte ntssüngchecho, osi Levi tona pvüti to jiang khi onte elhi ji ntsia tsswothukvü tsükona shikhfüniro topvü methakcho. 31 Erungthan hansi roathüng rongphen otssüng ethev elio jiang elani tssüngthi osi otssuk omüm ethidemo jiang yuta ebeno hansi rochethukvü tsükona topvü methakcho. Oh, Potsow, elhi mmhom shiang topvü a nchümcheyia osi thanthüng apia.
Rani Vashti na mesao Xerxes Mmenthukchp
1 Persia yantsü okying Susa lo mesao vantsü jilo khokthe mesao Xerxes na India lona Sudan meta nandang meta chiro 127 topvü sajana sacho. 3 Ombona mesao tssosi nzyu ethümoto jilo ombo küpo yansapvüi jiang tona tsüphoeden to jiang tsükona tokhu tssocho. Hoji tokhu jilo Media tona Persia tolo rasan jiang naha thecho, elani meta jilo esopvüiden, osi ntsinranden elümoto roracho. 4 Osi mesao na ombo mesa yitssopheni ejüeli, tssothimori, myingthüng osi ntio kvütata mmhon licho sana jiang ji choro tirok khia ejücho. 5 Hojisüi jo mesao na ombo yantsü Susa lo evan teri tsüphoe osi ejüeli osi yantsae topvü tsükona tokhu tssocho. Tokhu ji mesao pharina tsüngon tiying khicho. 6 Mesaki hapoji merithuku tsükona khongkho sü müngzhüv tona ehümvü to khi phari ji füchaka zoncho. Osi osü jiang topvü lo janti tsünglüpvü tona sünyipvü to ntsükae tirhyu jiang lo phankae vacho. Elani khothephen jiang ha shona janti na nsüngrücho tüv vacho osi hojiang yuta lojo marble lung ehümvü tona tssentsülung emyom osi pvürüm senthan tsünglüpkirina tüv to jiang na hapo ji sazhüi khicho. 7 Tokhu lo eroe topvü shonapvü echümpo echümpo tüv lona tsüngthijü eyuv picho, osi mesao na eyuo tsüngthijü mmhom jiang ha pvülyua yutacho. 8 Elani tokhulo eroe jiang topvü thüngi onte eto nandang onte yuhung yuthukle to mesaoki nri jiang ezoa chanthukcho. 9 Tothüngji kichungi ha rani. Vashti na eloe jiang thüngi tokhu pia vancho. 10 Tokhuji benkasi nchuk tiyingo tolojo mesao ji etsoyuna lümbüm pyingi emathatacho, osi ombo nriden poloe nchyu tiying Mehuman, Biztha, Harbona, Bigtha, Abagtha, Zethar elani Karkas to jiang tsachukcho. 11 Osi rani Vashti ji elümoto opyon mmhomo ji tsükona ombo ekhüng yano tsüphoe, tsarhyuo jiang ejüv tsükona ompvü rani mpensü jiang benria ekasi chirole to ezoa tsathukcho. 12 Tokhatola kvüthüng nriden jiang na mesao na phyo ji ezocho sana Vashti rani na ekhirancho, osi ji yakchia mesao ji lümbüm etsuk na pyingi sicho. 13 Mesao shikhfü ephani na shikhfü niro tsütsav ji shikhfü lo engathe eli osi ntsi jiang engav licho, hoji tsükona mesao na shikhfü ntsi, ombo ejü-rünyoe jiang tsae kvüto lyuv sana to onte engacho. 14 Shikhfü niro tsükona ombona engapvü vamo jiango Persia osi Media metalo shikhfü ntsiden, elani ekhüngyan jilo etho eliden nchyu tiying jiangjo, karshena, Shethar, Admatha, Tarshish, Meres, Marsena, tona Memukan to jiang tssocho. 15 Ombona onte thüngi heto ezocho, "A, mesao Xerxes na rani Vashti ji chirov tsükona yidan pia nri jiang solo wothukaha ompvüna n chiro! Hoji tsükona shikhfü lona jo ntio ompvü tssoyiv etüma to phyoala? to engacho." 16 Tole Memukan na mesao osi ombo küpo tsüphoeden jiang thüngi heto ezocho: "Rani Vashti na mesao tae yikrathukcho mek, tolea ekhüngyano kyon topvü yikrathukthaka! 17 Kvüthüng rani na ntio elhi tssocho sana ji eloe jiang na zoa sana, eloe otsük akvü na orapvü jiang zerüpa phanthiv, osi 'mesao Xerxes na ombo rani Vashti thüngi ezosamo na n ngav' to ontena phyotav. 18 Hoji esüa Persia osi Media metalo tsüphoe eloeden jiang na kvüthüng shi zoa sana englea n rhev onte orapvü jang ezov, osi meta topvülo eloe jiang na onte orapvü jiang yikrachi n piv siv, ji yakchia orapvü jiang na onte engh jiang thüngi lümbüm etsuk phanthiv. 19 Hoji tsükna mesao na emthata tssona mekana elana to zechena, enhungo rani Vashti na mesao mhadungo elani n chiroche to yidan pile, osi Persia tona Media to shikhfü lo mmhona erani vata to tssona tongphichev meka. Tothakana rani vanphen ji eloe thanpoe mmhonkao tüv pina mmhona. 20 To tssona kvüthüng yidan ji zoa sana ekhüngyan mpüm heteralo eloe topvü na ejüeli tssolea, yantsae tssolea shikhfü ephani na onte orapvüi jiang yikrachia vamvü." 21 Tole mesao osi ombo küpo elhi etssoe topvüna elana to zecheo ji tsükona Memukan na phyoji esüa tssotacho. 22 Jisüi jo ekhüngyan jilo meta chiro elio jiang topvülo, oki jilo OPVÜI ji eboe jina tssov osi lanka topvü lo ombo etho lona oyi tana methaku, to yilan shi onte jipo akvü yina erani hanthukracho.
Esther ji Rani Kümala
1 Mesao na ombo lümbüm tsukro sana ti mpa rani Vashti na ntio elhi tssocho sana osi ombona ompvü tsükona ntio yidan picho sana jiang nchüma vancho. 2 Hoji tsükona mesao thüngi lanka ejüi osi ombo ndungntssung jiang na heto ombo ezocho, "Loroe opyon mmhon osi ntsanthoe tüv ntio tssona n yanala? 3 Ni ekhüngyano tsüphoeden jiang ji onte nkonjano kvüta loroe opyon mmhon vancho sana topvü Susa yantsü lo sosi oro eloe ezepvüi Hegae khi ocho opyon mmhomo sana zethuka. 4 Osi ni elümo lo ethüngi Vashti vanphen ji khithukle to ntssungcho. Mesao na shiji mmhona to engacheo ji tsükona hoji esüa tssocho. 5 Susa yantsülo Benjamin jipo lona Jair tsoe ji tsoe Mordekai to tsa Kish tona Shimei, to lona chenchecho vancho. 6 Osi kvüthüng Nebukadnezar mesao na Juda lo mesao Jehoiachin ji Jerusalem lona Babyloni morantsan ekümo sosi yichosana Mordekai ha jilo jücho. 7 Osi opo chücho süloti Mordekai na khi ombo otsolov tssoa süphicho tüv Hebrew yina jo Hadassah to tsa; onte wopan loroe Esther opyon elümoto mhona tüv vancho; 8 Kvüthüng mesao na yizüng ethan pichosana loroe elümoto Susa yantsülo sosi roracho osi jiang yulo Esther ha nchyua tssocho. Osi ompvü ha mesao ki eloe vanphen jilo boloe Hagai ocho boloe ezepvüi sana jina na zenhya vanthukcho. 9 Hegai na Esther ji mmhona zechecho, hoji tsükona mesao ki loroe otsük tiying ethüngchethuki Esther ji etsoyu echümpo tssoa mmhom pithuka osi otsük mmhona kümthukvü tsükona otsük nnoki thuka to tssocho; osi vanphen mmhom lo vanthukcho. 10 Mordekai na Esther ji ompvüo Jihudi loroe ka to tiphyole to ezoji tsükona ompvüna ha mphoa vancho. 11 Jisüi jo Mordekai na engakvü mesao ki loroe vanphen ji rhüa sanphia Esther ji kvütüv küma sana osi kvüto tssov sana ji zeta wocho. 12 Opyon mmhonthukvü tsükona otsük tanüngo ji nzyua khichowosi deli orhüm mmhom na choro tirok nnok elani balsam deli na choro tirok nnok to tssocho. Jisüloti tsük tsük na mesao Xerxes thüngi sosi wocho. 13 Kvüthüng onte vanphenina mesao thüngi woa sana ompvü na ntio mpensü han hungana hoji hanthukcho. 14 Mmyulani osi enyathüng jo loroe vanphen thanphoe sosi oyi mesao ki boloe jiang yulo ezepvüi Shaashgaz na zeyata vanthukcho. Osi mesao na chokata omying rüki n tsavjo elani mesao thüngi n vocho. 15 Kvüthüng mesao thüngi eovji Mordekai na otsolov tssoa süphicheo Abihail otsolov Esther ji jancho sana, Hegai na ntio kvütüv mpensü to ezocho sana ji ephan hancho. Osi kvütana ompvü hungchosana topvüna epia zetacho. 16 Xerxes na metaji sasi nzyu tiying si choro taro tolo, Tebeth (Rongorungi) choro to tsa jilo Esther ji Xerxes mesao vanpheni sosi chirocho. 17 Mesao na loroe thanphoe jiang thüngina jo ompvü chokao osi nzamo zechecho. Hoji tsükona ombona rani kikho ompvü venthuksi rani Vashti vanphen ji ompvü picho. 18 Jisüijo mesao na Esther myingona tokhu nsüngrücho osi ombo küpo tsüphoeden tona yansapvüi jiang toha tokhu jilo tsacho. Osi ombona ekhüngyan mpümtolo esan tsüngon pisi mesao na yantsocho chünga tüv yantso jantacho,
Mordekai na Mesao Eküm Shanchoyiala
19 Hojithüng jo mesao na Mordekai ji esapvüi vanpheno rheyithukthakcho. 20 Toaha jithüng jana Esther najo Mordekai na tiphyole to ezoji esüa ngarothüng na kvüto Mordekai yi enga rochosana ji esüa jancho zoa, ompvüo Jihudi loroeka toji ochia n zoham mphoa vancho. 21 Kvüthüng Mordekai na Mesao yantsüi yansasae tssoa vanchosana ji topvüto mesao ki boloe nchyu eni Bigthana tona Teresh to ochoangna mesao chung chak rhowolan jilo enhyangden tssota vancho sana jiang na mesao Xerxes thüngi lümbüm mbükvü phanthicho osi ombo lüngthav tsükona okyak nsüngrütacho. 22 Mordekai na hoji ntsi rani Esther ezocho osi Esther na elani Mordekai na ntio ompvü ezochosana ji mesao Xerxes thüngi ezocho. 23 Hoji tsükona otsotso memekana to ethümi zetacho tole yivon ezoji otsotso to yanchecho, hoji tsükona woniata khyaktsüngi chüthukcho. Hoji sülojo heto etsso motsü ji ekhüngyan motsü eranpheno erani valeto mesao na yizüng pia erani vathukcho.
Haman na Jihudi Kyon Jiang Roe Esiv Lanka Yamoji
1 Yuta tara sülojo mesao Xerxes na kyon tsüka Haman to tsa ji ombo küpo esapvüi tsüphotso ji tssothukcho. Haman jo Agag tsochen lona cheyicho, Hammedath tsoe tssocho. 2 Mesao na ombo küpo elhi etssoe topvü tona Haman yikrachi pia ombo mhadungo nkhok tseni khüma tssotale to yizüng picho. Hoji tsükona Mordekai na ekhiramo ji yakajo onte topvü na hoji esüa tssotacho. 3 Tole mesao elhilo evan tsüphoe topvüna ntio tssona ombo mesao yizüng n ngala to ombo engatacho; 4 Eng akvüto ntio tsükona sana to ombo engata mungcho, tokhatola ombona onte yi n ngacho, osi heto phyocho."Aiyo Jihudi kyon," "hoji tsükona ana Haman mhadungo n khümthecho." Hojisüi jo ontena Haman thüngi ezocho, osi ombona Mordekai etssophyoji zesi erüm tetov sana to emhoka nhyaka vantacho. 5 Osi kvüthüng Haman na Mordekai na nkhok tseni osi nkhümthei ombo n khümto ntsichosana elümoto lüm tsukcho, 6 osi kvüthüng ombona Mordekai jo Jihudi kyon to ntsichosana, Mordekai tae mekna ezüp piv to methakcho. Hojito ombona Persian ekhüng yan nbüm tolo Jihudi kyon topvü lüngthae esiv lanka yancho. 7 Mesao Xerxes na yansa sasi nzyu taro enioto yiathüng choro ovüngo Nesan (Ejon) chorolo, Haman na phalyui fuktav "Purim, to tsa jiang ji" ntio choro tsüngono ombo kyak ji benkana mmhom sana to zetacho tole choro taro enio lo Adar chorolo tsüngon taro ethümoto jilo benkav to methakcho. 8 Hoji tsükona Haman na mesao thüngi ezocho, "Ni ekhüngyano jipolan motsünga kyon vana osi onte ji meta chiro jiang topvülo nzüi vankhana. Osi ontena kyon thanpo jiang na n tsso jitüv shikhfü niro benphiala. Hoji tae mek tolea, ontena ekhüngyan shikhü jiha n ngala, hoji tsükona nina hetüv etssophyo jiang ji n rümkhok to ana nchümala. 9 Osi ni mesao na emathata tssona onte ji chüthukvü tsükona yizüng pia. Nina hoji to tssona, ekhüngyan shi satarontachev tsükona mesa rang jeni ana janti rang seri 340,000 thev to ni mhadungo phyochakala." 10 Hoji süijo mesao na ombo yingrüm kvümoe yizüngo ejüpkae mesae yizüng kümthoka sana hoji khi Jehudi kyon jiang ri, Agag tsochen Hammedatha tsoe Haman thüngi picho. 11 Osi mesao na heto ombo ezocho, "Kyon jiang ha osi orang jiang ha ni echi; nina hojiang pono ni etsso tssoa." 12 Hoji tsükona choro ovüngo jilo tsüngon taro ethümo tolo jo Haman na mesao eranpvüi jiang tsarhyui mesao yizüng ji ekhüngyano yisanlan topvü yina khophi esapvüi topvü thüngi, yansapvüiden, osi tsüphoeden jiang topvü thüngi hathukleto ezoa onte eranthukcho, osi hoji yithen ji mesao yingrüm na ejüpkae mesao Xerxes myingo na hanthukracho. 13 Yizüng jiang ji yithen hanphi jiang jina khi hansi ekhüngyano meta topvülo wocho. Hoji yizüng jilo engalo taena, Adar choro tsüngon taro ethümo to jilo, Jihudi topvü ngaro eran, eloe osi nongori topvü lüngthae sile to yithen jücho. Osi onteji khonzan to n tssona lüngtharüpi sisi onte ejüeli jiang topvü khiyile toha jücho. 14 Yizüng jilo yithen jiang topvü meta jiang topvü tolo kyon nzontsü thüngi ntsithukle, to tssoa tssona hoji tsüngon ji kvüthüng yia sana kyon topvüna methaki nhyaka vamto yithen lo jücho. 15 Mesao yizüng ephanina yidan epioji Susa yanpvü kyon topvü thüngi ntsithukcho. Osi yithen hanphi jiangna meta chiro jiang topvülo yithen ji hansi wocho. Kvüthüng Susa yantsü ji hamaharina pyingi vancho sana tothüngjo mesao ha Haman onio khokthei soko yuta vancho.
Mordekai na Esther Thüngi Nzanchile to Jonjicho
1 Kvüthüng yivon ji zochosana Mordekai jo nungra lona ombo mpensü topvü reroe sicho. Osi postasü mpensi kvüri live yakae hansi yantsü lan jiang tonga owon choka nshüthechia kya wocho, 2 mesao ki rhowolan ji n janthüng jo emhena kya wocho. Tolea ochungi jo n rhowocho ntiotssole postasü mpensi jo ochia n rhowothuko ji tsükona. 3 Meta kvütata lona mesao na yizüng nsüngrüo ji zochosana jianglo Jihudi kyon jiang topvüna kyata nungratacho. Osi onte ekyongo na postasü mpentasi live yulo epfüphia khanga kyatacho 4 Kvüthüng Esther nri loroeden osi rani ki boloe vamo jiang na Mordekai na ntio elhia vanchosana ji ompvüna ezochosana elümoto ompvü nvanthev tssocho. Hoji tsükona Mordekai thüngi posta sü ji sisi thanpo hanle to mpensü hanthukcho, tolea ombona n khichocho. 5 Jisüijo Hathakh to tsa mesao ki boloe tsüka ompvü nzanchi etssov vanthukcho ji Esther na tsae ntio tssona hojito elhia vanchosana Mordekai owo zele to wothukcho. 6 Hathakh na mesao vanphen yantsüi mesao kipünglan jilo Mordekai thüngi wocho. 7 Tole Haman na Jihudi kyon jiang lüngthav tsükona ntio lanka yani pichosana osi to tssona ombona mesao rangjeni janti kvüta thev echümchaki licho sana jiang topvü Mordekai na ombo ezocho. 8 Susa yantsülo Jihudi kyon jiang roe esiv tsükona ntio shikhfü yizüng nsüngrüi lichosana ji opyak motsünga khi Esther pile to ezoa Hathakh picho. Elani ntio tssoa yia vancho sana jiha ompvü thüngi ntsithukle, osi ompvü kyon jiang ji khonzan to nchümle to mesao thüngi owo jonjile toha ezocho. 9 Hoji esüa Hathakh na tssocho, 10 osi Esther na yithen shi hansi Mordekai thüngi olanle to ezoa ombo picho. 11 "Eboe tssolea, Eloe tssolea ochona mesao na n tsav mesa ki hakona oro haphia sana hoji kyomoji chüthukvü shikhfü lia. Shi shikhfü shijo, mesao ndungntssung osi selangotüng jiang lona benkae meta shilo evan topvüna ntsia. Shi shikhfü shi yakchiv tsükona lanka motsünga tae lia; Jijo mesaona ombo shona jarung ji ocho khelo piasana ji eküm ji shanchochev, osi anaha choro benaha mesao na a n-tsahan." 12 Kvüthüng Mordekai na Esther yithen ji hungchosana, 13 ombona Esther thüngi heto ekyu janlan ezocho: "Nina rani vanpheni vamo jina Jihudi thanpoe jiang thüngina jo ni tsanchov lanka elio to ti nchüma. 14 Yuta hetüv lo nina yingto vani sia tssona, Potsow na Jihudi kyon jiang thüngi kyov osi onte shanchov. Tokhatola nino nichüv, osi nipo wopan ji ochüm tssoe mpa siv. Tssokhuka yuta hetüv lo nzanchitav tsükona Potsow na rani ni tssothukcho mpa tssov!" 15 Jisüijo Esther na Mordekai thüngi heto yithen picho: 16 "Jihudi kyon topvü Susa yantsülo sanrhyuthuka osi khanga atsükona arandania. A tona a nri loroeden shiang naha hoji esüa tssovka. Osi shikhfü n lia khatola, ji sülojo ana mesao thüngi wovka. Osi ana jilo oji ndana achüv lia tssona, to chüvka." 17 Hoji sülojo Mordekai na oyi Esther na ezoji esüa ombona owo topvüto tssocho.
Esther na Mesao ha Haman Oni Tokhu lo Tsacho
1 Khanga vansi nchuk ethümo tolojo Esther na ompvü rani mpensü ji ekasi mesao ki ochungoe vantsü jiwoe zechia owo mangcho. Mesao na vantsü jilo khokthe kipünglamoe zechokchia vancho. 2 Kvüthüng mesao na Esther ji kipüngi mangi vana hungchosana nzana nchümi shona jarung ji pichokchicho. Jisüi jo Esther na rhowo jarung mmyu ji evüngkacho. 3 "Rani Esther, ntio ephyov lichosana phyole a ekhüngyan chiso to mpa phyolia ni pivka to ezocho." 4 Esther na janlancho, "Ni lüm na rünga ni emathana ni tona Haman to tsükona ana tokhu methaka küma nchüng myulani rotana to ni tsala." 5 Mesaona Haman ji zaktole Esther na ntio tokhü lo tsa vancho sana jilo longshitalo ewov tsükona role to tsacho, osi hojito mesao ha Haman onina Esther tokhü jilo wotacho. 6 Etsoyu ji tsothakale mesao na Esther thüngi ezocho."Ntio ni jüponala mekana ntio ethev lichola phyoa, ana ni pivka osi a ekhüngyan chiso lia ni pile to mpa chonlia ni pivka." 7 Esther na janlancho, 8 "Nina a nzana a ethelan jiang abencheyiv ji ni ematha lia tssona, ana etsoyu nte methakiv küma Haman nini aki etsoyu lo rotalanle. Tona ji thüngti a ethelan ji ni ezovka."
Haman na Mordekai Lüngthav Yancho
9 Kvüthüng tsoyutasi yichosana Haman ha emathata yicho. Twokha tola kvüthüng Mordekai na mesa ki ndüngo vansi ombona yaka yiaha ntia yikrachi monkhüm ombo n pio ji tsükona Mordekai thüngi elümoto lümbüm tsukcho. 10 Tokhatola lüm etsukji nyimthechia oki yicho. Jisüi jo ombo shom jiang topvü oki tsacho osi ombo engh Zeresh ha tsanhyacho. 11 Ombona kangtsüa, ombona kvütata lichosana osi ombo tsokhying kvüta vanchosana elani mesao na kvütoli jitata elhi mmhom ombo pichosana, osi mesao küpo elhi etssoe topvü yulo lea mesao na kvüto ombo yikrachia sana jiang kha onte ezocho. 12 "Jilo ekata," heto phyocho, "Rani Esther naha thanpoe vasi mesao tona a to tokhü tssolo etsacho, elani ojyuato ha e tsalani lia. 13 Tokhatola Mordekai Jihudi kyon jina mesa kipünglano khoka vana ehungthüng nandang jo shiang hetata mmhom jiang a tsükona jo ntia mekcho esüa tüv." 14 Hojiang engatasi ombo shom jiang tona ombo engh to na ombo thüngi heto ezocho."Ntio tssona ojyua Mordekai edom tsükona donphen khejü rokro ntssona n-süngrüala? Osi mesao ezosi Mordekai jo jilona dona to ntioli mesao n zoala? tona ni lüm püka ni emathata tokhü tsolo ojyua ochev." Haman na mmhona engache donphen ji nsüngrücho.
Mesao na Mordekai Yikrachi Picho
1 Hoji zümo jilo mesao na mmhona n yipcheo ji tsükona, phanthi mesao yansa kako jiang lo ntio erani licho sana jiang hansi oyi khae engathukle to ezocho. 2 Osi hansi oyi khae ombo engathuko jilo mesa ki enhyang boloe nchyu eni Bigthana ha Jeresh onina mesao lüngthav lanka yantao ji Mordekai na yanche ombo eküm shanchoyio yilan ji erancho khachecho. 3 Mesao na tsüphoe jiang engacho, "Mordekai na helo elhi mmhom tssoji man ntio yikrachi ana yantso ombo pithaka?" Ombo nri jiang na janlancho, "Etena ntia ombo n tssoyihan osi n pihan to ezocho." 4 A küpo elhi etssoe tsüphoe ochona yitssopheni vanchola? to mesao na engacho. Tothüngji Haman ha yitssopheni oro vancho, osi ombona donphen nsüngrüi vasi Mordekai edom tsükona mesao thüngi engalo rocho. 5 Hoji tsükona nri jiang na ezocho."Haman na ni ntokvü tsükona shilo oro vana." "Tole, sosi rheyia," to mesao na ezocho. 6 Haman na mesao vanpheni rhowocho osi mesao na ezocho."A ekhüngyano kyon nchyua elümoto yikrachi monkhüm apihunga vana, küma kvüto tssona mmhomla?" Haman na ombobo nchümcho, "Mesao na yikrachi epiv ocho vamla? a tssovka." 7-8 Ombona mesao ji janlancho, "Mesa sü phoknrhüo nina echomo ji sü ji kyon shi tsükona hansi yithuka. Tothakana mesao pipo jiang hansi oyi ni kurü ji hanthuka. 9 Jisüijo ni ekhüngyano tsüphotso jiang yulo tsüka tssoe ombo pipothuksi, kurü mangkhvüi tsankathuksi, yantsü ji tonga: 'Zeta mesaona montsso epiv elio jiang jo shi esüa yantsoaka, to tsüphoe ji khi tüngthuka sanphithuka!' " 10 Jisüijo mesao na Haman ezocho, "Zakto mpensü jiang tona kurü ji to hansi oyi Mordekai Jihudi kyon ji pipothuka, osi kurü jilo chongothuka. Omboji mesao vanphen kipünglano khokthei vamka tsae oyi nina ntio phyocho sana jiang topvü tssoyia." 11 Hoji tsükona Haman na mpensü jiang tona kurü ji to sosi oyi Mordekai pipothukcho, osi Mordekai ji kurü mangkhvüi chongothuksi yantsü ji rhüphia: "Zeta mesao na yikrachiv elio jiango shi esüa yikrachiala. !" to phyoa wocho. 12 Mordekai jo mesao vanpheni kipünglan jilo elani yicho, tolea Haman jo yikra lona omha eyuki hansi oki tsani yi sicho. 13 Oki oyi mbo engh osi oshom ntsinranden jiang thüngi ntio tssocho sana jiang topvü rüa ezocho. Tole ombo shom ntsinran jiang tona ombo engh ji tona ombo ezocho, "Nina Mordekai n-sayakhukvü yia vanthaka. Ombo Jihudi kyon, tolea nina ombo n-sayakhuk küma ombona ni khyovka."
Haman Doni Sicho
14 Ontena to thuyta vanathüng mesao vanpheni na boloe jiang na yongta oro Esther na etsoyu tssolo tsao jilo Haman sosi ewov tsükona tsacho.
1 Hoji tsükona mesao ha Haman onina yenjo enioto 2 Esther ki etsoyu tssolo wotacho. Osi sokona yuchyuthakale mesao na ompvü engalancho, "Rani Esther, ntio ni jüpona? phyoa ni bencheyivka." 3 Rani Esther na janlancho, "Nina otsotso ni emathata, jonjiwo ji a ngayiv to nchüma tssona, ana ephyov jijo a kyon tona a to na eküm evanhungala. 4 A kyon jiang tona a tojo lüngthae esiv tsükona eyenthaka. Osi nri etssov tsükona yemo jilona nmhonka mekcho salivo ana yingto vani siv, mekana n phyo; tokhatola eyio roe osi monthuki esiv sala!" 5 Mesao Xerxes na Esther thüngi ezocho, "Ocho kyon kvütüv na hetüv elhi tssovsala? Ombo kvülo vanchola?" 6 Esther na janlancho, "E ri osi ekhangshiv, evamo jijo kyon nmhon Haman shi je!" Haman na ekhennona mesao ha rani ji woni mhalo zekachicho. 7 Mesao na lüm etsukona nkanloki phanthi phari rüphia chiyi sicho. Osi mesao na ezüp ombo pivsala tojo Haman na chethecho, hoji tsükona, ombo eküm shanchoyile to jonjiv tsükona rani Esther sülami vancho. 8 Esther thüngi nzan chom tsükona Esther khokthephen ndüngo vanthei vanle, tothüng mesao na phari na elani oki rheyicho. Osi hoji hungi mesao na tüngkachia phyocho, "Kyon shina a mhadungona osi a kina rani Esther thüngi n-mhom tssov sala?" Messao na hoto phyopvüto boloe jiang na zaktole Haman ji kvüri eyukicho. 9 Osi onte yulo tsüka, Harbonah to tsa jina ezocho, "Mordekai ochona ni mesao eküm ni shanchoyicho sana hoji edom tsükona Haman shina ombo ki donphen khejü rokro tirok ntssona nsüngrüi lia!" Tole "Haman ji hoji lona dona!" to mesao na yidan picho. 10 Hoji tsükona Haman ji ombona kvülona Mordekai edom methaki vacho sana hoji loha doni ombo sicho. Tosanati mesao ji lümbüm tsukrocho.
Jihudi Jiang ji Onte Eküm Nkoa Rolanchiv Onte ezocho
1 Hoji tsüngon tsük jilona, mesao Xerxes na Haman ocho kyon jiang ri sana, ji ejüeli topvü Esther rani picho. Rani Esther na Mordekai jo a wopan to mesao ezocho, osi hoji tsüngono na benkae Mordekai na mesao ki ombo mhadungo wochecho. 2 Messao na ombo ymgrüm, yidan ejüpkaphen ekhyingo kvümoe ombona Haman pisi khilanicho sana hoji Mordekai picho. Hoji tsükona Esther na Mordekai ji Haman ejüeli jiang ezepvüi ombo tssothukcho. 3 Elani Esther na mesao jolo epyakthei kya ezolancho, Agag tsorüi Haman na Jihudi kyon jiang roe esiv tsükona ntio lan ka n-mhom methaki licho sana hoji esanthukvü tsükona jonjicho. 4 Hoji tsükona mesao na shona jarung ji Esther thüngoe tonchicho. 5 Hojithüng ji Esther na phanthi ezocho, "Ni emathata tssona osi nina a nzana nchüma tssona osi elan to zechena, Agag rüi Hamanadatha tsoe Haman na ni ekhüngyano Jihudi kyon jiang topvü roe esiv yizüng pi elio ji n tsswothukvü tsükona nina nzansi yidan pina to jonjiala. 6 Hetüv ezüp shi a kyon jiang pono yia tssona, osi a wopan jiang lüngthae rae sia tssona ana ntio nchüma rüma vamla?" 7 Jisüi jo mesao Xerxes na Esther tona jihudi kyon Mordekai to oni thüngi ezocho, "Zeta, shi tsükona ana Haman ji doni sithaka osi ombo ejüeli jiang Esther pithaka. 8 Tokhatola ntio mesao myingona ejüpkaphen theta yizüng pithakcho sana jijo khilani n siche, tolea ntena ntio kvüto nte kyon Jihudi jiang thüngi nte eran hungasana jijo amyingona erani mesae ejüpkaphen thei hanthukhoka." 9 Shijo choro ethümoto, Sivan choro jilo tsüngon mekyusi ethümotolo tssocho. Hoji tsükona Mordekai na mesao küpo eranpvüi osi esaeden jiang tsarhyui ezoa Jihudi kyon India lona benkae Sudan nandang meta chiro 127 elio jiang lo evan jiang topvü thüngi yithen eranthokcho. Yithen jiang ji meta akvülo onte yisanlan jiang ephanina onte yina erancho, osi Jihudi jiang thüngi ha onte yina osi onte eranto shikhfü ephanina erancho. 10 Mordekai na yithen jiang topvü mesao Xerxes myingona erani mesa ejüpka etho khi thecho. Hoji sülojo mesao vanpheni kurü ekhyingtso jiang khi kurü rasan jiang pia yithen jiang hansi meta topvülo chita wothukcho. 11 Yithen jilona heto eroroe ntsitacho, meta topvülo Jihudi kyon jiang ji onte popo onte nkoha tsükona okho tssoe vankhoka to mesao na chonchiala. Osi meta kvülona ochoang jipona sana onte thüngi ebensü theta onte pono okhe theta tssona ontena rolanchiv, osi onte eloe, mekana ngaro jiang pono okhe theta sana ontena rolanchiv osi ontena kyon tsüka lea nhyokana topvü roe sisi onte ejüeli jiang ha khiyikhuka. 12 Shi yidan shi Persia ekhüngyan topvü lona choro taro enio tolo tsüngon taro ethümo, Jihudi kyon jiang roe esiv tsükona methako jilona benkae tsütsata yiv. 13 Yidan shijo meta topvülo kyon topvü thüngi yidan esüa ntsithukvü, to tssona, kvüthüng tsüngon ji jana sana Jihudi kyon jiang naha onte ri jiang nnlilam tsükona methaki vam. 14 Messao yizüng ephanina kurü rasan jiang na mesao kurü mmhomo jiang lo chongoe yithen jiang hansi elümoto ekhyinga meta topvülo pita wocho. Osi Susa yantsü jiloha yidan shiji kyon topvü thüngi ntsithukcho. 15 Mordekai na mesao pipo mümgzhüv osi emhüm sünyipvü mmhom na nsüngrücho tona shona kikho to jiang piposi mesao kina khochuki wocho. Tole Susa yantsüi lantsü jiang topvü lona emathata tüngtacho. 16 Jihudi kyon jiang tsükona jo ematha longshi osi ekhyo osi lümbüm emi tssocho. 17 Meta kvütata lona mesao yizüng ji khatacho sana jiang topvülo Jihudi kyon jiang na longshita tokhü tssota mongtacho, osi onte ekyu lona thanpoe elümoto na Jihudi kyon kümcho.
Esther Jihudi Kyon Jiang na nte ri Jiang Roe Siala
1 Adar choro tsüngon taro ethümo to tsüngon kvümoe mesao na yidan pitemo ji ephanina Jihudi kyon jiang roe esiv mekacho sana ji tsüngon ji jancho osi onte ri jiang na jo onte khelo rheyiv tsaya, eyilota vancho, tolea Jihudi kyon jiang na onte khyocho. 2 Jihudi kyon evan meta yantsü jiang topvü lona Jihudi jiang na onte khüngtsütae ochoang kvütata na onte pono okhe theta sana jiang ekvüyav tsükona methakcho. Tole kyon topvüna onte kyutsüngrae sicho osi ochina ha onte n ryulanchikhukvü osi onte pono okhe n thecho. 3 Meta chiro jiang lo tsüphoeden, esapvüiden osi yansa thüngoe tsüphoeden jiang topvüna Mordekai ekyu lona Jihudi jiang kyochicho. 4 Ntio tssole Mordekai ji mesao vanpheni etho elitso ji kümthaka osi hojito ombo ethoji rankata yia vana toji kyon topvüna ntsicho. 5. Hoji tsükona Jihudi kyon jiang na onte lümcho ori jiang topvü hazhüi yonri na lüngthatacho. 6 Susa yanpvü yantsü jilo taena owo nzo mongo lüngthacho. 7-10 Lüngthao jiang yulo Jihudi ri, Hammedatha tsoe Haman ji tsoeden tae na onte otsük taro lüngthacho: Omying jiang Parshandatha, Dalphon, Aspatha, Poratha, Adalia, Aridatha, Parmashtha, Arisai, Aridai tona Vaizatha to, tokhatola ejüeli lojo okhe n thecho. 11 Hoji nchukna Susa yantsülo kyon kvüta lüngthacho sana ji mesao ezocho. 12 Tole ombona rani Esther thüngi ezocho, "Susa yantsü shilo tae na owo nzo mongo lüngthathaka osi jiang yulo Haman tsae otsük taro jüa. tona meta thanpoe jiang lojo ontena kvütüv elhi tssothakvü to! Enhungo nina ntio ethev lichola? Ni bencheyivka. Thanpo ntio ethev lilancho sana azoa, ni bencheyi lamka." 13 Tole Esther na janlancho, "Ni ematha lia tssona nchüng Jihudi kyon jiang na Susa yantsü jilo ntio tssocho sana ji esüa ojyua ha hojito tssothuka. Osi Haman tsoe nchyu taro müng jiango donpheni na toni sile to yizüng pina mmhona." 14 Mesao na hoji esüa Susa yantsülo yidan pia tssothukcho, osi Haman tsoe nchyu taro mungo jiango kyontsü ehungo donkachi sicho. 15 Tsüngon taro mezhüo tolo ha Jihudi jiangna sanrhyutae onte ri, Susa yantsü lo tae na owo nzo ethüm lüngthalancho, tolea ejüeli lojo okhe n thecho. 16 Hoji esüa meta thanpo jiang loha Jihudi kyon jiang na onte nzo tssoe onte tssak-nkonga kyon jiang tssotsüi wothüng ekha tiyingsi mongo lüngthacho. Tolea ontena ha ejüeli lojo okhe n thecho. 17 Shijo Adar choro tsüngon taro ethümoto lo tssocho osi tsüngon taro mezhüo tolo jo ontena lüngtha elhi n tssota tolea longshita tsoyuta tsüngon khitacho. 18 Tokhatola Susa yantsülo evamo Jihudi jiango tsüngon taro ethümo ha, elani taro mezhü loha onte ri jiang lüngthata mongo jitsükona taro mongo loti mungtsüi longshitacho. 19 Hoji tsükona Jihudi kvütata yanro lo vancho sana jiang na Adar choro tsüngon taro mezhü shilo jo tokhü emung tsüngon khi etsoyu na yantso pita mekana tokhüta to yicho.
Purim Tokhü
20 Ntio kvüto tssocho sana shiang hetopvü Mordekai na erani Persia eküngyano evan jihudi kyon enhyano osi ekoni evan jiang topvü thüngi yithen jiang ji hanthukcho. 21 Nzyu akvüto Adar choro, tsüngon taro mezhü tona taro mongo tolo jo tokhü emung khitale to hanthukacho. 22 Tsüngon eni shijo Jihudi kyon jiang na onte ri jiang khelona ontepopo nkocheo ji tsüngon tssocho; Osi tsüngon shilo ovüngthüng jo ekhen emhok osi nungra tsüngon khatola ematha osi longshi tsüngon na tongchecho. Tsüngon shijo etsoyu theta longshita, osi pitalonta, yantsae jiang ha etsoyu shümnhyata tsüngon khitale to ezocho. 23 Jihudi kyon jiang na Mordekai na ezoji enga hojito tssotacho, osi tsüngon shiji nzyu akvü tsükona tokhu tsüngon kümi sicho. 24 Agag tsochen Hammedatha tsoe Haman ocho Jihudi ri sana jina, Jihudi kyon jiang topvü khi esiv tsükona zikae phyalyu fhuki ezeo tsüngon ji (Purim) to tsacho. 25 Tolea Haman na hojito zia yia vanathüng ji Esther na mesao thüngi owo ezoe Haman na Jihudi kyon jiang ezüpthukvü ezio ji ombo osi ombo tsoe jiang echi tssoe sicho. Osi donpheni na onte donracho. 26 Hoji tsükona emung tsüngon shijo (Purim) yichakina vachi mekana ekhyo tsüngon to tsacho. Ntiotssole Mordekai chiti ji yakchia heto tssochewo ji tsükona. 27 Jihudi kyon jiang na onte, osi onte tsoronichen elani ochoangna Jihudi kyon küma sana jiang tsükona tsüngon eni shijo nzyua akvüto yuta epenlo khia osi Mordekai na ntio ezocho sana hoji ephan tssov to shikhfü nsüngrüi sicho. 28 Tsüngon shiji Jihudi wopan topvülo echungren echungren jana meta topvülo osi yantsü topvü lona müngyanchia Purim tokhü shi khiv to methakcho. 29 Jisüi jo Abihail otsolov rani Esther naha Mordekai na ntio Purim tsükona eranthakcho sana jilo thephata ompvü rani etho theta shi tokhü shi tsükona chiti erancho. 30 Chiti ji Persia ekhüngyano Jihudi kyon jiang thüngi etsyukata erancho, osi Persia eküngyano meta chiro 127 elio jiang topvülo chiti ji yithukracho. Chiti yithen ji yakchia Jihudi jiang topvü thüngi noying osi nkoha lithukvüka to randankata erancho, 31 osi ontena kvüta ekhang randan tsüngon mmhona khicho sana ji esüa tsüngon shijo nzyu akvü yuta epenlo khita eyiv tsükona lanso onte pia erancho. Heto etssov shijo rani Esther ha Mordekai woniata na yizüng picho. 32 Purim tokhü shikhfü niro tsüko na, Esther na yizüng epio jiang ji shikhfü kako lo erankae vacho.
Xerxes Tona Mordekai to Oni Tsüpho Myingthüng
1 Mesao Xerxes na ombo ekhüngyano jümang tssae evan jiang tona nken ntssae evan jiang topvü kiaman nüngkata elhi tssothukcho. 2 Tothakale emhokthav osi ntio elhi tsüphov kvütata tssocho sana jiang tona ombona kvütoli Mordekai ji elhi tsüphov pichosana jiang motsü topvüto ji Persia tona Media to mesaeden kakolo erankae vacho. 3 Mordekai Jihudi kyon jijo mesao Xerxes küpo tsüphotso ji tssocho. Osi Jihudi kyon topvüna ombo yikrachia ombo chokacho, osi ombona ha hojito ombo kyon jiang mmhon tsükona tona onte tsoronichen jiang nkoho to tsükona elhi tssocho.
Tsüngrham Jina Job Chyui Zetala
1 Uz yantsü jilo kyon tsüka Job to tsa vancho, ombo Potsow khüma Potsow lo longtsükaroa vancho. Ombo kyon mmhom osi n mhom elhi n tssov ntangshona evan tsüka. 2 Ombona tsokhying tiying tona tsolo ethüm to vancho, 3 osi olyu wothüng tiying, Ut wothüng ethüm, mangsü othüg motsünga tona Gadho nzo mungo to vancho. Ombona phajae elümoto vancho osi engkhfüwoe ejüelitso ji ombo tssocho. 4 Job tsokhying jiang na chungta tokhu khita vancho osi onteji chungta tokhu lo tsata vancho osi onte oyuloe jiang ha tsanhyata vancho. 5 Ontena tokhu khita akvü Job na nyazüngina phanthi onte otsük akvü tsükona nthoche than piyicho. Ntiotssole onte ochona sana n tsiv Potsow n mathao mpato tssochei liv küma to nthoche elhi tssoyicho. 6 Potsüwoe evanden jiang na OPVÜI mhadungo ndukta tsüngon jilo tsüngrham ha jücho. 7 Tole OPVÜI na ombo engacho, "Nino ntio lyua vanala?" Tole tsüngrham jina janlancho, "Aiyo limha shi nkonchukchia helo helo to khyua vanaka." 8 OPVÜI na ombo ezocho, "Nina a phajae Job hehung? Limha shilo ombo esüa mmhom osi longtsüka eli n van. Ombona a khümala osi n mhom ntia n tssov tsükona ntangnshonala." 9 Tole tsüngrham jina janlancho, "Job na ombo eman n jüwo ni khümvü alo? 10 Nina yuta topvülo ombo osi ombo wopan nkohoala osi ombo ejüeli jiang nkoyiala. Ombona ntio elhi tssoa sana nina mmhayiala, osi nina ombo ji tssiden khosha mmhayia ombo tssiden na meta shi pyingthaka. 11 Tokhatola nina ombo ejüeli jiang topvü khi siyio ombona ni rhiyikav!" 12 Tole OPVÜI na tsüngrham ji ezocho, "Toka ombo ejüeli topvü ni khelo tssoa osi Job tsüko jo okhe ti thekhe." Tole tsüngrham jina khochi yicho.
Job Ngaro Jiang Tona Ejüeli to Jiang Monala
13 Tsüngona lo Job ngaro jiang na onte yolo eramoji kina tokhu khita vanathüng, 14 yithenpvüi tsükana yunga oyi heto Job ezocho, "Ena mangsü sosi oli rhonta vancho osi Gadho jiango e ndüngo eroyo jianglo yantsota vancho. 15 Tole esüngaro taena Sabeam kyon sanchukchi onte hayae khi hansi yiracho. Ontena ni phajae topvü lüngtharasi a tae a enhyokacho. Ana motsü ji ni ezov a enhyokao ji tae." 16 Ombona n phyothakvü, phajae thanpoe na oyi heto phyolancho," Olyu jiang tona olyu enhyang jiang to ji tsüngjoe onte topvü chürathaka. Osi oyi ni ezov a enhyokao ji tae." 17 Ombona n phyorov phajae thanpoe na oyi heto phyolancho, "Chaldean ri razhü ethüm na oro e hacho osi ni Ut jiang sosi yikhancho osi ni phajae topvü lüngtharasi a tae a enhyocho. Motsü ji oyi ni ezov a enhyokao ji tae." 18 Ombona n phyorav phajae thanpoe yilani heto phyolancho, "Ni ngaro jiangna ni tsokhyongo eramo ji ki tokhu khita vanle, 19 lijüngi na tsungryu ntav vena chiyi oki ji venchüchüi onte topvü meyani chürathaka. Oyi ni ezov a enhyokao ji tae." 20 Tole Job na phanthi, nungra lona mpensü jiang reroe sicho. Ombona kvüri ji tsüisisi nkhümo likoe vanthecho. 21 Ombona heto phyocho, "A bukathüng ntia hansi n ro, hoji tsükona a chüathüng ntia hansi n yi. OPVÜI na a picho küma ombona khi hansi yithaka ombo mying thüngchethuka!" 22 Shiang hetopvü tssoa yiaha Job na Potsow n lan pia mmen n tssocho.
Tsüngrham Jina Job Ojang Tssolanala
1 Potsüwoe evanden jiangna OPVÜI mhadungo ndukta tsüngon ji janlancho, tole tsüngrham jiha jilo thecho. 2 OPVÜI na ombo engacho, "Nino kvüi ochola?" Tole tsüngrham jina janlancho, "Aiyo shilo shilo to limha nkonphia sanphia vanaka." 3 Tole OPVÜI na ezocho, "Nina a phajae Job hehung? Limha shilo ombo esüa longtsüka lia kyon mmhom thanpoe n van. Ombona a khümala osi n mhom n tssov elümoto ntangnshonala. Ntia ntam n lina nina ombo sakav a thüngi choncho, tokhatola ombo nsenphiv longtsükaroa vanala." 4 Tsüngrham jina janlancho, "Kyon na eküm evam tsükona olan topvü sikhoka. 5 Tokhatola nina ombo tsüko okhe theyio ombona ni rhiyikav!" 6 Tole OPVÜI na tsüngrham ji ezocho, "Toka ombo ji ni khelo tssothuka, tolea nina ombo chüthukvü meka." 7 Tole tsüngrham jina OPVÜI vanrhyu lona yi sicho osi Job tsük topvü emho na pyingthukcho. 8 Tole Job na zizo sipheni owo khukthei ophfü varocho khi ombo tsüko emho jiang enüka vancho. 9 Tole ombo engh jina heto ombo ezocho, "Nino enhünga jana longtsükae tssoa vanake? Ntioli Potsow rhiyikasi chüi n siala?" 10 Tole Job na janlancho, "Nina zhüvae esüa ethelan n lio yi nsanala. Kvüthüng Potsow na ntiosana mmhom e piana etena khichoala. Tona ombona ezüp yithukana etena erenjamke?" Ombona olan topvüto lo hoto ezüp ndukaha Job na ntia Potsow tachio n phyocho.
Job Shom Jiang Roala
11 Job shom otsük ethüm jo Teman yamo kyon Eliphaz, Shuah meta kyon Bildad, tona Naamah meta kyon Zophar to. Job na kvüta ezüpa vanchosana ontena zoale ontena owo ombo ejichotav methakcho. 12 Ontena owo jam kona liathüngna Job hunga ha ombo n chethecho. Ontena ombo chethetale, ontena nungra lona mpensü jiang reroe sia, live shae oyaki thukachia osi onte kvüri lo nzükata kyatacho. 13 Tosi ontena ombo ndüngo likoe khukthei, tsüngon tiying, zümo tiying to oyi motsünga tia n sana vantacho, ntiotssole kvüta ombo ezüpa vancho sana ji ontena hungcho.
Job na Potsow Thüngi Erenjamo ji
1 Okhae jo Job na jükrüpi vamoji owon tssosochia ombo ebuk tsüngon ji rhiyicho. [Job na phyocho] 2-3 O Potsow a buko tsüngon ji rhiyia; A njenkao zümo ji rhiyia! 4 Hoji tsüngon ji emüng tssothuka, Potsow. Tsüngon ji kvüthüng ha ti n chümcheta; hoji tsüngon jilo kvüthüngha wondang ti rathethuka. 5 Tsüngon ji tsüngkhüm osi emüng echiv tsüngon tssothuka; eluk na eyukthuksi eng ji khichoe sia. 6 Nzyu jilona zümotsük ji khichei sia, Osi zümoji kvüthüngha ti-khanhya; 7 Zümotsük jijo tssüngthi n thio osi longshi n lio tssothuka. 8 Etsi-ratssen jiang khi zümo ji rhiyithuka, osi Leviathan sayathio jiang ezoa. 9 Enya shantio jiha ti onthuka; Hoji zümo ji n wonchiv sithuka. 10 A bukthuko zümo ji rhiyikata, ezüp osi nungra lo a chirothuko zümotsük ji rhiyikata. 11 Ayo mmani na a chücho saliwo mmhom mekana a bukpvüto a chüo mmhom. 12 Ntioli ayona nkhuk-tseni a ejümcho ato? Ntioli ompvü shyuro a yuthukcho ato? 13 Hojithüng a chücho saliwo aiyo enhünga jo noying lo vam, 14 mesao osi yansae ochoangna mesaki ehen tssoe vasi esana vancho sana hoto vam. 15 Tokkha anaha mesatso jiangna shona janti na onte ki pyingi vasi vanato jüngtheta vam, 16 mekana ngaro echü bukchoto erichi vam. 17 Nthae jiang na olüpina n mhom elhi jiang esanala, osi esangmoka lhitssoe jiangna wokhae jo esan hungala. 18 Evüngki evan jiangna mpato noying hungala, osi haruk yizüng tona tüngra-tüngria emak nde nshü jiang lona esan hungu. 19 Otsük akvü jilo jüa, thüngcheo jiha, n chekao jiha jilo jüa, osi ezii jiangha sülani jo vachiala. 20 Ntioli kyon jiang e nzanthao eküm lo tae vanthukala? Ntioli nungra vamo kyon ji wondang piala? 21 Ontena echü nhyaka vanala tolea onte n chüala; ontena ejüeli ji thüngina jo olüp jüponala. 22 Ontena chüi shothe onte n sithüngjo n mathatala; 23 Potsow na onte mhadung ji mphoe vayiala osi nken topvü shüngzhüyiala. 24 Etsoyu thung, ana nungra vanala, osi ana kvüthüngha erüv n tümjak. 25 Ana atssaka akyuo jiang topvü ndukala. 26 Ana esan noying n li, osi a ezüp ji ochüm n li.
Thyuta Ovüngo ji
[Eliphaz yi] 1 Job, ana ntiosana phyona ni lüm n tssov tssotssovla? Ana enhungo yingto n vankhukvü sithaka. 3 Nina kyon elümoto püngnothaka osi okhe n khyungo jiang khyungithaka. 4 Ochosana nshüana, mmuka osi n khyoala, ni yi jiangna lüm tssonia phanthithukcho. 5 Enhungo ezüp ji ni ejan tssothaka, osi nino hoji ezüp ji ekhiv ni ngangchetala. 6 Nina Potsow khümcho osi ni eküm jo ephyorüv n licho; hojitsükona nina lüm etssore osi eyilo liv shikhfü. 7 Enhünga nchümi zeta. Ntsanrük kyon ocho ezüp ndukcho lichola. 8 Ana kyon n mhom jiangna n mhon li rhoni n mhom mojü vena hungthaka; osi ontena n mhon osi n tha tssüngthi richoala. 9 Potsow na tsungryu vena to lüm tsuka roe onte siala. 10 Nthae jiangna hingho to erhyua epvüphiala, Tokhatola Potsow na onte ho jiang nrümia yingto vanthukala. 11 Hingho na ntio tia rumi n tsov vancho esüa, Onteha chüi siala osi onte ngaro jiang jo meta nzoni tsanroe siala. 12 Nchuka tsüngono yithen enato azoa zocho, elümoto enato tsso jina monsüroa zocho. 13 Zümolo emonato a eyip nshicho. 14 Ana eneta a hamacho osi a tsük totona ekyu lona enecho. 15 Tothüng ezhü enyiprov na a mhalo venkacho, osi a tssan nthia a kyucho. 16 Ana jithüng ntiosana mangi vana hungcho; Ana ngangi zetaha ntiosana n phyochecho. Jithüng jükrüpi vamo jilona owon tssoa zocho: 17 "Potsow mhadungo ntsanrük kyon ochosana vancho alo mekana ochosana ombo liyingpvüo mhadungo ntssüngu vancho alo? 18 Potsow na potsüwoe ombo phajae jiang tia n lungtsükatala; ombona ombo lanben jiang lo mpato nlan yanchetala. 19 Ombona ochon na liyingo jiang longtsükav tsayia nchümalo, mekana ochon na liyingcho sisanphili emeroa to roe siwo tüv jiang longtsüv alo? 20 Kyon tsüka ji enyathüng jo eküm vankhuka, tokhatola mmyu njam n tsiv chüi sikhoka. 21 Ombo, vanyaro;sayazhü ji tanchiana; ombo chüi siala, tona hojina n ngathetake?"
1 Ethümi zeta Job. Ochona sana janlankhoko tüv vancho alo. Nina owo engao tüv lanben vancho alo? 2 Nipopo rashia wonkhyu lona chüv jo zhüva elhi, nchümri n li elhi. 3 Zhüvae na jüngthecho to zecheta vamo tüv ha ana hungthaka, tokhatola ana onte wopan lo rhiyika yi n sancho. 4 Onte tsoe jiangna kvüthüngha noying n li, ochinaha yitssopheni phanthi oyilo n theyiala. 5 Wontomo jiangna zhüvae jiang joncho-rücho jiang tsoyiv, okyo yolo zao jiang mpato tsoyiv, osi eratsüngo jiangna ombo ejüeli jiang mhyiktssoyiv. 6 N mhom jijo ochon lona n bukala, osi ezüp jijo likoe na n bukala. 7 Jito mek! Kyon na ombobo ezüp sosi yiala. otsotso! mitsüng buki yio jito otsotso hoto. 8 A ji ni saliwo, aiyo Potsow thüngi kholani yiv osi a emhukelüm jiang ombo thüngi hana wov. 9 Ombona elhi tsüphov tsso jiang etena jo n ngatheyiala, osi ombo chethev elhi jiang jo ochün n li. 10 Ombona liko lo eryu jokathukala osi ombona oli jianglo ojü etspnala. 11 Otsotso, teri ekümo vamo jiang Potsow na ekhyonkachiala, osi nungrae jiang ombona ematha piala. 1213 Kyakramo kyon jiang matangmari jiang ombona dungphi siyiala, osi ntsinramo jiang ontebobo onte kyako rhethukala. Hojito onte elhi jiang ntia ochüm n chethükala; 14 Nshi-etüngo mpato ontena emüngi sanphiala. 15 Tokhatola Potsow na yantsae jiang echü lona shanchoala; osi ombona ezüpo kyon jiang oyam khangshi lona shanchoala. 16 Ombona yantsae jiang eyilo pisi nthae jiang ji jükrüpi sithukala. 17 Potsow na kyon ocho elanchoyiana hojijo ematha lia! Ombona ni khonathüng ti rashia. 18 Potsow na ombona okhfü tssoyiwo jiang yukayiala; ombo khe jina meyansi, ombo khena emiyiala. 19 Yuta yuta lojo ombona ekyu lona ni shanchov; 20 Otssi vara yiathüng ombona eküm ni vanthukvü, osi ritssolo lea ombona echü lona ni nkochev. 21 Potsow na echi-rüta lona ni shanchov; ombona ezüp yutalo ni shanchov. 22 Jenbukta osi ekhang yutalo nina emathata vam osi orae ekümorümo jiang ni kyuv mek. 23 Nina jomo li jianglo olung jüv mek; ora ekümrümo na ni sakav mek. 24 To tssona nina noyinga ni ranki vam; Nina ni olyu jiang zetathüng onte ji nkoha liv. 25 Eroyo lo lomo tata otsoeoro nina vam. 26 Liri yutalo otssuk mhencho esüa, nina eson jana harishia vam. 27 Job, ena shiangji nzyu sunga yani ejyueranthaka. Shiang ji otsotso ka nina khichoa.
[Job na phyocho] 1 A ezüp osi nungra jiang füphen lona füi zeo, 3 Jümangi hajang lona mmyingkata füchev, hoji tsükona a erinjan yi shiang khi ti mhuka. 4 Thotsü Potsow na lotssi na achyunrhüthaka, osi lotssi lo mozhü jina a tsük nzü pyingthaka. Potsow na ombo ekyuthao ezüp jiang reni a vayi lia. 5 Gadho jijo ero rüngtsoana emathatala, osi mangsü jina mavü tsoana yingto vanala. 6 Tokhatola ochona oma n the etsoyu tsovla? Honojü lo ehümo ojü jilo ntio ntanmhon jüchola? 7 Ana hojitüv etsoyu a tsohunga n ehüm, osi ana ntio tsoana jina a ryusangthukala. 8 Potsow na ntioli ana chomo ji a n piala? Ombona ntioli a randan a n janlanala? Ombona lüngthae a sio! 10 Ombona a lüngthav to ana ntsiwo ematha lona tsukphiv, elümoto mpato a nolea emathav. Potsow jo ntho to ana ntsia; osi ombo yizüng ntia ana n panlanhan. 11 Ana eküm vana wov ntio etho jüchola? Ana ntia eyilo n livlo ntioli eküm vamla? 12 Aiyo olung na a jocho alo? A tsükjo yonjak alo? 13 Ana abobo shanchov etho n jüv sithaka; Ana nzanchi yana ophen kvüloha n liv sithaka. 14 Hetüv ezüp lo jo ana longtsüka shom ethev lia Ana Potsow mhechothaklea osi n mhechohanlea. 15 Tole oshomden, eryu n joana zhükhfüro jiang khyingi siwo jiang esüa ntena a kyakthechithaka. !6 Zhükhfüro jiang ji porüp kholung osi sheryu na, 17 chungi siala, tokhatola eng ona na phyonala, osi zhükhfü ji mpato kyingchei siala. 18 Yentsae jiang ji ojü eyan lona monala, osi ontena lijüngi rümphita chürala. 19, Shepa tona Tema to lona yentsae jiangna ojü yanala, 20 tokhatola onte eyilo ji zhükhfüro nghacheo jiang lo nghanhyae siala. 21 A tsükona jo nino hojitüv zhükhfüro jiang tüv, nina a sükhying ji zesi kyua elani yi siala. 22 Ana yantso ni chonicho alo mekana a thung oyam a khüpile to choncho alo 23 mekana ori osi ekhüng khe lona a shanchov to choncho alo? 24 Toka a püngnoa, osi a ori jiang a zoa. Ana yingto vani ni ngayivka. 25 Ntsa yi jiango e longtsü hunga, tokhatola nino zhüva yi nsanala. 26 Nina jo aiyo ntia mekna mpung esüa nsana tsayiala; tona a etho ejakyi jiang nina ntioli ajanlanala? 27 Nina nrinran phajae jiang tsükona mpato phyalyu fukala osi ni shom ndüng jiang poni mpato tssentssoe eli kümala! 28 Ana ejüng phyov meka. Omhalo a zekayia. 29 Nina kontia yithaka. Ntsa elhi lona esana. Aiyo elan jilo vanaka. N lan a ti pia. 30 Nina jo aiyo ejüng phyoa tsayia nchümala osi nina jo aiyo elan, n lan jo kvüi sana n phyochev tsayiala.
1 Kyon eküm ji rasan elhi khüngkata tssothuko ji esüa tüv, osi esangmuk elhi eküm tüv, 2 mekana ezii na khümcho yana vancho tüv; osi elhi etssoe jina ombo jokheman nhyaka vancho tüv. 3 Choro eng shiang yikhana khatola ana ntio etssov eküm vam sana n tsi; osi zümo shiang topvülo nungra tae. 4 Ana yipvü erikachiana, yuta jiang eyiv sunga khiala; ana zümo thüma eng-si wonchiv nhyaktssükala 5 A tsük topvü orana pyingcho; osi emhokyip na pyingcho; osi a emho jiang lona jencho sanala. 6 A tsüngon jiang eyilov n liv yikhanala, osi sütüng tsiro lona ekhyingkata yiala. 7 Potsow, a eküm jo ethük echen motsünga tae to a ntsiyia; A ematha jiang ji ochüm tssothaka. 8 Nina enhünga a hungala, tolea kvüthüngha a hunglam mek. Nina a yanlea a chüthakvü. 9-10 Eluk pyonroe mona yiato, kyon ha chüi siala osi n yilam siala; ombo ntsiwo jiang topvüna ombo mhechoe siala. 11 Mek! Ana yingto n vanche! Aiyo a lüm tsukala osi n mhonala. Hoji tsükona ana ephyov lia. 12 Nina ntioli enhyang khelo a vanthukala? Aiyo jümangi monran to a nchümiake? 13 Ana esamü ekhyo tssoa erikachiala; osi a enoera ji kyimchotokvü yanala. 14 Tokhatola nina omüng n mhom khi a khethukala; nina müngtüng tona omüng tsükshi to rothukala. 15 Osi ana ezüp nungra eküm vanathüng jo khyaktsüngi a chühun gala. 16 Ana eküm a n vanhungu sithaka; enhungo a eküm ochüm tssoala. a eküm shi ntia oman n lika a ti khetsüna sia. 17 Kyon jo kvütoli ni tsükona tata opvü tssoala? Ntio tsükona ombo elhi jianglo nina lüm thetala? 18 Nina enya akvü ombo zeyatala osi shanlan akvü ombo füphiala. 19 Nina kona a nkachosi njü a n zhüthethukvüke? 20 O evüngki ezepvüi, a mmen na ni tssatssocho alo? Ntio tsükona ni ebensü yonyikae zephen tssoa a tsütsatala? Aiyo ni tsükona oha mmyingu tssocho alo? 21 Nina kvüthüng ha a mmen jiang a n siyichevke? Ana worio jiang nina nlan a n siyiv alo? Nsungu aiyo a lüpkvüi tssov, osi nina a yana na aiyo yithakvü.
[Bildad na phyoala] 1 Ni yi mpong esüo jiang nsanrathakcho alo? 3 Potsow na jo ntsa ji n phephiala; Ombona elamo ji etssov n khachoala, 4 Ni tsoeworo jiangna Potsow tachia mmen tssocho tssov, osi Potsow na onte elhi ephan ezüp onte picho tssov. 5 Tokhatola enhungo khophilani thotsü Potsow thüngi jonjia; 6 Nina jito ntsanrüka nthocho tssona, Potsow na oro ni nzanchivka osi ni ki wopan ji yantso tssoa ni pilamka. 7 Nina monthako ejüeli jiang Potsow na ni pilam ji ejyutana ntia mek. 8 Nkolo engatheyi mmhom ji esüngaro yani zesa; osi ete motsüi jiangna ntsiwo ji nchümi zeta. 9 Ete eküm jo hungriv tae, osi etena ntia n tsi; etena liko poni khümcho esüa esüngaro yakchia yiala. 10 Tokhatola nkolo ntsinran jiang na püngnotao jiang engathe khia; ontena heto phyotao ji enga: 11 "Ojü n jüi jo kherang n zala; onteno nhyayo lo kha thanpoe zacho nhung. 12 Ojü ji nghachetana onte ovüngo chüala, Kitssoe ethelan n tssochyuham dungniro lea chüi siala. 13 Potsow n theo kyon jiangjo kherang jiang esüa tüv; Potsow mhechoa na onte eyilo topvü moni siala. 14 Ontena oying osi payangsüng lo longtsükatala. 15 Ontena payangsünglo enghikana jina onte tangyav alo? Ontena oying rhümana hojina onte süyachev alo? 16 Kyon n mhom jiango eng etssolo ero bukchoto phanthiala, phari topvü züngzhüo ero jiang esüa tüv. 17 Onte ying jiangna olung poni nrhangkatala osi olung akvü khüngi vanala. 18 Tokhatola rukchei onte siala osi hojilo ntio lichosana tia ochinaha n tsiv siala. 19 Ho, kyon n mhom jiang longshi jo hoji to tae; thanpoe jiangna oro onte vanphen ji khi siala. 20 Tokhatola Potsow na kvüthüngha longtsüka eli jiang n sinki mekana ombona kyon n mhon jiang n kyochiala. 21 Ombona ni ji elani ni emathathuka ni tüngcholanthukvü, 22 tolea ni etsssang jiangjo ombona yikrathukvü, osi nthae jiang ki jo moni sithukvü.
[Job yi] 1 Ana hojiang topvü ovüngthüng na zothaka. Tokhatola kvütoli kyon tsükana Potsow panlana ombo elan phyoe khivla? 3 Kyon ochona ombo thüngi ekhitachevla? kvüthüngha ochina Ombon janlancheo engao wothüng bena engakhuka. 4 Potsow jo nchümri eli osi thojüi; kyon ochina ha ombo panlana n phanthikuk. 5 Ntia yiwon n piten na ombona phunglan khi siala, osi ombo lüm etsuk lona roe siala. 6 Potsow na nri enhyukthuki liko ji enhyukala; ombo na liko etsen durhyupvü jiang enhyukphiala. 7 Ombona eng ji n chirov sithukcheta, osi shantio jiangha zümolo n om sithukcheta. 8 Ochina ha oyak shi soyingo Potsow ji nzanchicho n li, mekana jümangi monran tsü ji phanthechicho n li. 9 Potsow na shantio jiang oyaki yisicho – Shantiruk, Tssirophamo, osi odung ejümo jiang osi jüjowoe jiang topvü ombona oyaki yisicho 10 Ombona emhukthao elhi tsso jiang etena n tsi, osi ombo chethev elhi jo ochüm n li. n Potsow na yakchia yiala, tolea ana ombo n hungche. 12 Ombona ntio khihunga na khiala, osi ochinaha ombo n tangche; ochina ha, "Nino ntio lyuala?" to ombo n ngakhuk. 13 Potsow lüm etsuk jo linrhüala, Ombona ombo ri jiang roe sicho, Rahab kyochio jiang roe sicho, osi jümangi montsü jina ombo panlancho. 14 Tona kvütoli ana Potsow janlam oyi livla? 15 Ana nlan n lia khatola a yitssoe Potsow thüngi ana tssochewo jijo, ombo thüngi khonzan echom ji a ejan. 16 To mpato tssolea, ombona oyi nsam apio ombona a ngayiv to ana n longtsükhuk. 17 Ombona ntam n lina tsungryu rothuki edunga atssoriala. 18 Ombona ethük a npiv siala; osi a eküm shi erenjan na pyingthaka. 19 Ana khüngkata tssov alo? Potsow nungkata tsswothukvü alo? Ana yitssolo ombo tsav alo? ochona ombo wothukvüla? 20 Aiyo nlan n li osi longtsükata evan, tolea a yi jiang n lan esüa engathetala, osi ana ntio phyoaaana a yi jiang topvü nlan a piala. 21-22 Aiyo nlan n li, tokhatola ana n wongkhyuala. Aiyo a laka vanchethaka. Ntsae osi n tsae to khota n li, Potsow na ete topvü emonthukvü. 23 Yingto evan kyon ji zaktole chüana Potsow na emathatala. 24 Potsow na limha ji nthae khelo picho. Ombona yitssoe topvü omhyik jukicho. Potsow na meküo ochona hoto tssothukchola? 25 A tsüngon jiang zakto yi siala, tsüngon tia mmhom n jü. 26 A eküm ji orhung ekhyingu esüa ekhyinga yiala, osi müngtsov na lishüso hungchochi yonjoato joyi siala. 27-28 Ana emaphia a enov ji mhechov ekhyo tssoana, a ezüp topvü sana chiyilani a rhümatala; Potsow na nlan apiala to ana ntsia. 29 A ji nlan apia van na, ana ntio wonkhyuvla? 30 Nti shapon na ha a mmen jiang n tssüchora. 31 Potsow na zizo sipheni a thechiala, osi a mpensü jiang mpato na a yikratala 32 Potsow ji kyon tüv saliwo, ana janlam, osi yitssokina owo oyi jantav. 33 Tokhatola e yutalo e zayio tüv ochia n van, ochina ha Potsow tona a to oyi etssoyi n van. 34 Potsow, enhungo tae a ezüpthuka! Ni ekyuthao khangshi jiang khi hansi yia! 35 Ana a nkyuala. Ana abobo a lüm ntsia, hoji tsükona ana phyov sala.
1 Aiyo a laka eküm vanchethaka. A nungra erenjan jiang a ngayia. 2 Potsow, nlan a ti pia. A zoa! A nlan ji ntio sana a n tsithukvüke? 3 Nina tata harukvü elancho alo? Nina liyingo ji tssaki esiv elancho alo? Osi nthae jiang elhingo lo emaphiv elancho alo? 4 Ena tssoa towoe na niha elhi tssoa alo? 5 Ni eküm joe esüa esüngaro tae alo? 6 Tona nino ntioli a mmen topvü a yaniala? Osi a worhyu topvü a shyucheyiala? 7 Aiyo nlan n li to nina ntsia, osi ochina ha ni khe lona a nshanchoche to nina ntsia. 8 Ni khena a soyingi a jocho; tole khetsük jina a monthukala. 9 Nina ochon khi a jocho to ti mhechoa, Nina elani ochon kümi a sithukvü alo? 10 Nina apo etho pia a soyingthukcho; osi nina ayo mmani na a rankathukcho. 11 Nina a tsük ji oryu osi ethozhü theta a joyingcho osi oryu jiang ji ozü tona ofü to khi eyukcho. 12 Nina eküm a picho osi n senphi nzan a pithaka, osi ni ntangnshon ji yakchia ana eküm vanpvü. 13 Tokhatola hojiang topvü lona nina mphoena a ezüpthukvü methaka rochoto ana ntsithaka. 14 Ana mmen tssona to nina a nhyaka zeta vancho, hojitoli n lan a siyiv ekhiram tsükona. 15 Ana mmen tssopvüto, aiyo ni thüngi ezüp shichethaka, tokhatola ana elamo tssolea ntia oman n hung. Aiyo e nungrathao eküm osi yikra na pyingcho. 16 Ana ntiona ekhyo hunguo, nina jitopvü hengho kochochiato a elungthukala, osi a tssatsswothukvü nina chethev elhi jiang mpato tssoala. 17 Nina yuta topvülo a nlan eyan ochoang sana yanchetala; a thüngi ni lüm etsuk ji ranka rankana yiala; osi nina yuta topvülo lanka ethan khi a sayatala. 18 Potsow, ntioli nina a bukthuchola? Ochina ha a n hungthüng na a chücho saliwo mmhom. 19 Limhalo n ro ntsana mmanina saksak okhüpi rheyicho saliwo hoji mmhomo tssov. 20 A eküm ji echethakcho mekcho alo? a ti khetsü na sia! ana a eküm enhyoe lio ji tia emathata vamka. 21 Aiyo nsungu yiv osi elani yilam mekana emüng osi n meri metae yiala, 22 emüng, chyumo chyurita osi khümcho metae yiala, hojilo jo wondang ji mpato emüng.
[Zophar yi] 1 Zhüva yilan esüo jiang ochinaha n janlam alo? Kyon ochona sana oyi kyungo jina elamo tssocheta alo? 3 Job, ena ni n janlanchev tsayia alo? osi ni yikvü-yilo yi jiang na yingto e vanthukvü alo? 4 Nina ntio phyoana topvü otsotso to nina phyoala; osi nino Potsow mhadungo elana to phyoala. 5 Potsow na ni janlano, to ana nchümala! 6 Nchümri mmhom jo lanka elümoto lona chiyiala to mbona ni zovkasi; kyon nchümri na jo n jamo ntsiran ejungu lia. 7 Potsow na ni n lan lo matarokata ni ezüpthukala. 8 Nina Potsow etho osi tsüpho ji tssenchak licho yanchev alo? 9 Oyak shina Potsow ochüm ntsso, tokhatola ombo nina ntsicho pomoe. Potsow na echüli jiha ntsia; tokhatola nina jo n tsi. Potsow jo liko shilona tsükata tsüphoa, osi jümang shilona nzokata tsüphoa. 10 Potsow na ni rhümae yitssolo ni sosi wo-wo, Ombo tangkhuko tüv ocho vanchola? 11 Kyon ochojo ethev n licho sana Potsow na ntsia; ombona onte elhi n mhon jiang topvü hungala. 12 Kichuk n jüi jiang mpato nchümri likata yiala tokhatola Gadho jiang mpato bukathüngna thacheo tüv bukala. 13 Ni lümbüm ji elamo lo vanthuka, Job. Osi Potsow ekyorung yana. 14 Ni ki jilona n mhon osi ori jiang khi sia. 15 Tosi lümbüm tssonlani chüngchünga limha ji ryukalana. 16 To tssona ni ezüp topvü ni nchümri lona chiyi sivka, jüphyon nghachecho mhechoe sicho to tssovka. 17 Tona ni eküm ji eng olungolo tüngratsüo jilona wondangka tssovka, osi eküm emüngtso yuta jianglo na wonchithakcho esüa omka. 18 Nina eyilo osi nkoha lia vamka; Potsow na ni khümchoe esan ni pivka. 19 Nina ni ri jiang ni kyuv meka; osi kyon elümoto na onte kyochile to nizovka. 20 Tokhatola nthae jiango eyilo moni sisi eyingota vamka, osi tsancholan n li to ntsivka. onte eyilo motsünga lio jijo echü eyiv jitae tssoe sivka.
[Job yi] 1 Otsotsoka nteno kyon thung tssoa phyoaka. Nte chüana ozen okyak jiang ha chünhyavka. 3 Tokhatola anaha ntena hungjana to hungjan lia; aiyo ntio lona ha ntelona terikacho mek; ntena phyothako jiang topvü kyon topvü na ntsia. 4 A shom jiangna mpato enhüngajo a emakatala; a elan lia osi ntsanrüka ha ontena a emakatala; tokhatola Potsow na a randan ajanlan yuta ha licho. 5 Nteno ezüp ntia n duka ha ntena a emakatala; ntena kyon ochosana eyavsa vamo ji ekayiala. 6 Tokhatola efüi osi Potsow n tsio jiang jo noying lo vana, tolea onte potsow jo onte etho jitae. 7 Woro woni osi ekümrümo jiang na mpato nte püngno tüv elümoto lia. 8 Limhalo ekümrümo jiang thüngi ozen okyak tsükona engae zetava. 9 Onte topvüna Potsow khena onte joyingcho to ntsia. 10 Ombo joyingcho jiang zeyae jo Potsow; otsük akvü eküm ji ombo etho lo. 11 Tokhatola ni nlli jina etsoyu mpakphi zewo ji esüa, ni eno jina oyi zoala. 12-13 Eran jiangna ozen okyak liala, tokhatola Potsow jo ozen okyak tona etho to liala. Eran jiangna tssenche ziche liala; tokhatola Potsow jo tssenche ziche tona elhi etssov to etho liala. 14 Potsow na phiroe siana ochona tssokaehi-lanchevla, Potsow na vüngi vao kyon ji ochona vachichevla? 15 Potsow na eryu n jothuka na eng a züm yiala; osi ombona ojü chonchiana jüphyon roala. 16 Potsow jo etho jüa osi yuta topvülo khyoala; oyam ejiphipvüi osi ejithechio ji wonita ombo etho küpo. 17 Ombona shikhfü jiang lo ozen okyak jüwo jiang khi sisi esapvüi jiangji zhüvae esüa etssophyothukala. 18 Ombona mesae jiang vantsü lona joyithuksi evüngki evanden onte kümthukala; 19 ombona pvüti jiang osi etho ejüi jiang teri kümthukala. 20 Longtsüka kyon jiang ombona yingto vanthukala osi eran jiang zen okyak jiang khi siyiala. 21 Ombona etho tsütsae jiang yikrathukala, osi esapvüi jiang etho jiang ochüm tssothukala. 22 Ombona echü esüa emüng jiang lo wondang sothechiala. 23 Ombona jipo jiang etho jüa tsüphothukala, tokhatola ombona onte khyothechi monthukala; 24 Ombona onte esopvüi jiang zhüvathukala osi hama zhüva khyuphia kyathukala; 25 ontena emüngi ephfüphia kinoe esüa ngaphithukala.
1 Nina ntio phyoana, ana nkolo na zokhanthakcho tae. Ana hojiang topvü engatheta; ntena ntsiwo tata anaha ntsia. Aiyo nte lona terikacho mek. 3 Ana ekhiranta vamo jijo Potsow thüngi, nte thüngi mek; Ana a yilan shiang ombo thüngi a ekhita hungala. 4 Nina ni eyimtsari ji ejüng khi eyuki siala; nino tsüktssen tsüka ochia n miyicheo ji esüa tüv. 5 Ntia ti phyona vana, tona ni ji nchümri eli tsayia oyam na nchümka! 6 Ana a yilan shi phyoathüng enga vana. 7 Nino ntioli ejüng phyoala? Ni ejüng ephyo jina Potsow manthukvü to nchüma alo? 8 Nina ombo nkochev ekhyo tssoa alo? Nina ombo yilan jiang yitssopheni na tssoyiv zia alo? 9 Potsow na mmhona ni zeya wo nilo ntiosana mmhom yanchev alo? Nina kyon ejithechia to Potsow ejithechichev tsayia alo? 10 Ni kyakrüm ji mpholeha, ombona ni kyakshiv, 11 osi ombo etho jina ni ekhentsüngthukvü. 12 Ni püngnoyi jiangjo livero esüa ethev n li; ni khiran jiang jo ochon tüv. 13 Yingto vansi a nsanthuka, osi ji lona ntio chiyiasana onte esi-sia. 14 Ana a eküm thana elhiv saka. 15 A eyilo topvü monthaka, hojitsükona Potsow na lüngthalea ntio tssovla? Ana ephyov lio jiang ombo mhadungo phyovsala. 16 Khontsicho, a lüm etsson lona mpato a shanchokhoka, ntiotssole nthae ochina ha Potsow n ryulanchikhuk. 17 Ana eroroe ni ejüv ka enga. 18 Ana a ephyov jiang ephyov methakthaka, ntiotssole aiyo elan jilo vana to ana ntsia. 19 Potsow nina nlan apilo tsacho alo? To tssona aiyo jükrüpi vansi chüi sivka. 20 Ana olan eni chomka a engayia; tona ana ni mhadungo hojiang mphov meka: 21 A ezüpthukvü esana, osi ekhenthao khi a ti monthuka. 22 Potsow nina nsandena tona, ana ni janlamka. To mekna a nsandenthukasi nina a janlana. 23 A mmen jiango ntiola? Ana ntio orichola? Aiyo ntio münghan elhi tssochona nlan a piala? 24 Nina ntio tsükona a n kala? Nina ntioli ori esüa : a tsütsatala? 25 Nina a ekhenthukvü ekhyo tssoa alo? Aiyo limoro esüa tae; nina mavü ekyingu ntsanchoe hoji thüngi ori tssoala. 26 Nina a thüngi nlan ekhov a piala, ana nungothüng n lan tsso jiang mpato khi a khangshiala. 27 Nina a jo lo shenzhü a theyiala; osi a khochi akvü nina a chetala, osi a josü jiang mpato tsseni zetala. 28 Hoji tsükona, aiyo tssüngkyon esüa athonalai orana osü tsorocho to a thonala.
1 Kyon topvü n benriv osi etho n liv bukcho. Topvüna ezüp eküm lan ji dungala. 2 Kyon jo thera esüa rankae, esüngaro mmikae siala; Eiyo khümcho yakchia yicho to esüngaro yaki yiala. 3 Potsow, nina engoe tia a zechev alo mekana yitssopheni thechi oyi a tssoyiv alo? 4 Kyon esüa mmen lona jo ntia ntssüngüv n chiyiala. 5 Ombo harishi tsüngon jo ombo n bukthüng na kokae vayicho – ombona choro kvüta vamsana kokae vayicho. Nina sekae vayio ji n dungphiche. 6 Ombo thüngoe ti zechina ombo esi sia; ombona tetov sana eküm ekhüngu ji vani ombo zethuka. 7 Odung tani sithako ji tsükona eyilov lilana; hojina kümlani owo chenlankhuka. 8 Ombo ying ji sona yilea, osi hümluk ji likoe kyonthei silea, 9 ojüna retana dungniro to chenchelam. 10 Tokhatola kyon jo chüana jilona ochüm tssoala; ombo chüthakana kvüi vanlanala? 11 Zhükhfü ojü n tsüv sithakcho esüa, osi wozhü kyingchei sithakcho esüa, kyon jo chüi siala, osi n phanthilam siala. 12 Oyak shi elithüng nandang ontena n phanthilan, osi onte eyip jilona n phathi. 13 Anaha nina echüli mphoe a vao mmhona; Ni lüm etsuk ji ' n santhüng nandang mphoe a vanthuka, tosi a nchümchev yuta kokae vata. 14 Kyon ji chüthakana eküm vanlanchecho alo? Tokhatola ana yuta mmhonkao nhyaka vamka, ezüp yuta shi n yakthüng nandang nhyaka vamka. 15 Jithüng nina a tsav osi ana ni yichov, tona ni liyingcho a shi thüngi ni emathav. 16 Ji sülojo nina a khochi akvü a zeyav, tokhatola nina a mmen jo a vayiv mek. 17 Nina nlan a süyiv osi aori jiang topvü mhei a siyiv. 18 Yuta kvülona jo phunglan jiang mpato menjoala osi menkhon jiang mpato dungphia yiala. 19 Ojü na longpvü leha etsonroe siala, osi ryupvü joe liko meni siala; Hojito nina kyon eyilo ji eküm echung monthukala. 20 Nina kyon ji rhümae kümali yithuki siala; ombo mha ji erüproe chüthukala. 21 Ombo tsoe jiang na ekhyo hungala, tokhatola ombona n tsiv siala, osi onte yikra jiangha ombo thüngi n zov siala. 22 Ombona ombo tsük lo noa vamo ji tona ombo lümbümi nungra ji totae ntsiala.
Thyuta Enio to
[Eliphaz yi] 1 Job, ni yi shiango yijüng tae! yijüng! 3 Kichuk ejüi ochina ha nina nsanato n san osi yijüng hetvü na ombobo n phyochetala. 4 Nina ni lanka ephani na tssocho jo, ochinaha Potsow kyuchiv mek; osi ochinaha Potsow thüngi n randan. 5 Ni yi jiang yakchia ni ntha ji ejüala; nina yiji-yirana nlüpchoe yiv ekhyo tssoala. 6 Ana nlan ni piv ethev n li, ntiotssole ni yi jiang na yilan akvü lona nlan ni piala. 7 Nino kyon bukdemo ji tsayia nchüma alo? Potsow na phunglan shiang joyingathüng nina vancho alo? 8 Potsow methak jiang nina zorhakcho alo? osi kyon nchümri mmhom jo nilo tae licho alo? 9 Nina ntsicho ena n tsio tüv ntia n li. 10 Eiyo e ntsinran jo tsanpyokthang thüngina ntsi khichonipo n bukthüng na buko jiang thüngina shikae khicho. 11 Potsow na lüm emi ni piala; tona ntioli enhünga jana nkhichov vanala? Ena ombo myingona noying enyip yilan ni pithaka. 12 Tokhatola nina jo lüm tsuka ngangi e zetala. 13 Nina Potsow thüngi lüm tsuka khoe ombo siala. 14 Kyon ochosana ntssüngu tsotso tüv vancho alo? Kyon ochosana Potsow mhadungo elan kyon vancho alo? 15 Potsow na ntioli ombo lanben jiang tia n longtsükatala; onteha ombo mhadungo jo n tssüng. 16 Kyon na n mhom ji ojü yuato yuala; ho, kyon jo ntha; osi kyon jo oman n lio. 17 Enhungo enga, Job, ana ntsiwo jiang enga. Kichuk ejüi na ntsaji a shikathaka. 18 Onteno onte opo thüngina shikacho, osi ontena ntia mphoe n vana aezocho. 19 Onte metae jo metapoe kyon n van; ochina ha Potsow onte mhechothuko tüv kyon n van. 20 Nthae kyon ochona oyam khangshia sana jijo Ombo eküm evanthüng nandang ezüp lo vamvü. 21 Ekhenlung yivon na ombo eno pyingu, osi ombona noyinga to nchüma vanathüng efüi na ombo hayav. 22 Ombona emüng lona tsanchov eyilo n li, ntiotssole kvülo sana yonrina ombo lüngthav ombo nhyaka vana, 23 müngtsov jiang na ombo so ji tsov nhyaka vana. osi ombo mhadung jo emüng to ombo ntsia; 24 Epüp nungra jina mesae etho eli esüa kümi, ombo sav nhyaka vana. 25 Okhe zümi Potsow mhalo eyophia mhamo kyon osi thotsü Potsow n khayio kyon ji sükhying jo hotüv lia. 26-27 Hoji kyontsük jijo kangtsüa osi oyam panlanala; osi ombona lüm khüngi otsung pvüsi Potsow thüngi khondav nophia woala. 28 Kyontsük jina yantsü jiang hayacho osi OPVÜI yithako ki jiang rechoe khicho, tokhatola ritsso na yantsü jiang osi oki jiang roe siv. 29 Ombo sunga ejülia vam mek; osi ombona licho ntiha sunga liv mek. Ombo mon khümcho ji mpato zakto moni siv, ombona emüng jilona tsanchov mek. 30 Ombo odung kvüwoe omina khero jiang rungchosana hoji esüa tssov, osi thera kvüwoe mbung na vena yichosana omboji hojito tssov. 31 Ombona zhüva n mhom ji longtsüa tssona, ombo yantso jo n mhom ji tssov. Ombo yuta n bem ombo mmikav, 32 khero esüa mmikae sisi n chenchelam siv. 33 Ombo jününgro zhü ethi khyinga mmikae sicho to tssov; osi olive dung jina eki vüi sia to tssov. 34 Potsow n tsi kyon jiang jo tsoronichen vam mek, osi ekhüp khi etsowo ki jiang jo omina rungi siv. 35 Kyontsük shiang na ezüp shicheo matangala osi n mhom ji tssoala; onte lümbüm jiango yuta topvü lo ejithechi lümbüm tae.
[Job yi] 1 Ana yitsük shiang nkolona zothaka; nina a ejicho yi shiango khangshi yi tae. 3 Nina nchüngkhon nsani siv alo? Nina yuta topvülo janlan yi wokhao ji phyov licho alo? 4 Niji a sükhying shilo vancho saliwo osi a ji nte sükhying lo vancho sao, ntena phyoa vamo shiang topvü ana phyocheta. 5 Ana elaro kvuri eyephisi echüma nshakhuka. Ana ndungtssung khi etho khyungthukvü osi ejicho yi khi n tümjakvü nte ezoa vam. 6 Tokhatola ana phyocho ntina ha a n zanchi osi jükrüpi vanlea jina ha a enov ji n kyimjo. 7 Nina a sangtsüngthuk thaka, Potsow; nina a wopan jiang a lüngthayithaka. Nina a süyathaka; nino a ri. 8 Aiyo ofü oryu tae kümthaka, osi kyon na jo hoji zesi a nlan lia to phyola. 9 Potsow na lüm tsuka ojo okhe topvü nrhakroe a siyiala; osi ombona tssaka a zetala. Kyon na a nkungala; 10 osi ontena a hachümi omhalo a tümiatala. Potsow na kyon n mhon khelo a thechithaka. 11 Aiyo noying lo vana vancho, 12 Tokhatola Potsow na ekhi lona a tsükyae a echükroe a jüprocho. Potsow na ombo thangshi tssophen esüa a yonkathaka 13 osi nken akvü lona lotssi na a kokathakalotsüng jiang na a tssatssoala; tolia ombona a nzana n chümala. Ombona elan elani a meyanala; 14 ombona rasan zhüvacho esüa a sakatala osi a tssakala. 15 Ana nungra postasü mpensi vanala, osi ana a n khyov live yulo vanthei vanala. 16 Ana a mha myona kyathaka, osi a mhyik jiang büma enyikvü na nkonzhüthaka, 17 tokhatola aiyo jenbuktalo wocho n li, osi Potsow thüngi a randan jo otsotso. 18 O liko, a lo silyuo a tssoyiwo jiang ti mphoa! 19 Ana ntsanrük yana erona vamo shi a ti tanga! Potsowoe ochosana a tsükona phanthi a thung a tssoyia evamo tüv vana. 20 A shom shiangna a yikvüala; Osi a mhyikina Potsow thüngi esü elongala 21 Ana ochosana khi Potsow thüngi a jonjiyithuk hungala, oshom na oshom phyocheta to a phyochethuk hungala. 22 A nzyu rana yia vanthaka, osi enhungo ana kholani n yio lan ji dungala.
1 A eküm ochüm ji jana vanthaka. enhungo ethük echenkav tia n khyov vanthaka. Enhungo a tsükona olüp ji yaka ntia n li. Kyon otsük akvüna nshütheta a yikvü emakao jiang ana zeta vanala. Potsow, aiyo ntia nlan n lika, a yi jiang khichoa. 3 Ana phyo ji a khichoyi kyon ochia n van. 4 Nina elan engathev lümbüm ji onte khanithaka; enhünga onte khi a ti khyothuka. 5 Yiphyo ehen püngnoyi heto lia, kyon na orang jüpon lona ombo shom kyakthechiala to, osi hoji man jo ombo ngaro jiangna ezüp khiala to. 6 Tole enhünga ji yiphyo shi kyon na athüngi tsütsatala; ontena oro omhalo a nchukayiala. 7 A nungra shina omhyik mpato ajokithaka; osi ajo okhe jo khümcho esüa ekyimthaka. 8 Ntsanrüng to ejana. vamo jiang topvü ekhenrhük thaka. osi onte topvüna a ji potsow n tsi to a tsala. 9 Kyon na yikrachio kyon jiang na ha onteno elan to kyongka kyongkana nchümala. 10 Tokhatola onte topvüna oro a mhadungo mango onte tsüka tia nchümri eli to ana onte zechev mek. 11 A tsüngon jiang yakthaka; osi a matang jiang ha ntia mekvü sithaka; osi a eyilo jiang monthaka. 12 Tokhatola a shom shiangna jo emüng ji wondang kümthaka to phyoala; osi wondang ji enhyana to phyoala, tokhatola aiyo emüngi vana to ana ntsia. 13 A eyilo jo echüli ji tae, hojilo oyi emüngi erichi eyipvü ji tae. 14 Olüp ji apo to tsav, osi a tsovsa vamo ra jiang ayo osi a yilovden to tsav. 15 A eyilo kvülo lichola? ochona sana eyilo lia zechocho alo? 16 Ana echüli rheyiana eyilo jina a nzo rheyiv mek.
[Bidad yi] 1 Yingto vanwo mmhona. O Job, ni esüo kyon jiangna jo Nina yingto vani engao ena ni ezov. 3 Eiyo mangsü to kichuk n jü to ochona ni nchümthukchola? 4 Ni lümbüm etsok jina nibobo tssatssocho tae. Nina lüm tsuko jina liko shi sirhaki siv alo? Potsow na phunglan enhyuki ni lüm pükthukvü alo? 5 Nthae ji mi jo tamhe siyilam; osi ombo mi ji kvüthüngha n kilan. Ombo ranki milon ji müngi sithukvü. 6 Ombona chüngchünga khochia vancho khatola enhungo nshüphiala; ombo matangmari jiang yakchia ombo joyithukvü. 7 Ombona ngozonphen zoni lio jiang lo ombo rhyuthe, ombo jo jiang sala. 8 Tsirhina ombo jo jiang sae ombo süyatala. 9 Likoe tsirhi toni lia; osi ombo lankalo tsirhi toni lia. 10 Ombo nkonphia ekhelung jina nhyaka vana; 11 osi ombo khochi akvü ekyutssi na phana woala. 12 Ombo ejüeli khatola enhungo wontona sanphiala; Tssoro-phyoro jina hachümi nhyaka vana. 13 Echüo nochonori na ombo tsük pyingcho osi ombo jo okhe jiang kyonala. 14 Ombo tsanthephen ranki jilona rüngroe ombo siala, osi süa chiyi echü mesao ombo ndukthukala. 15 Enhungo kyon thanpoe na ombo ranki jilo vam osi mozhü erhi nochonori ra jiang phani sisi jilo vam! 16 Ombo ying osi khero jiango mmikae chüi sithaka. 17 Ombo myingthüng ji oki osi metapoe topvü lona ochüm tssothaka; Osi ochinaha ombo n chümchev sirathaka. 18 Ombo ji eküm evan metae na phani sithaka, osi wondangina emüngi phanthechithaka. 19 Ombona tsoronichen n van, ochia enhyokae n van. 20 Engkhfüwoe na engrhewoe jana ombo sükhying hetvüv ezoe topvüna otsük therüa, eneta kyuala. 21 Hojitüv sükhying jo kyon n mhom jiang na ndukala, osi Potsow n ziphio kyon jiang na ndukala.
[Job yi] 1 Nteno ntioli oyi khi hetata a nungrathukala? 3 Yuta yutalo ntena a yikvüala osi ntena a yikvü emakao ji nte yikra n chümtala. 4 Ana silyuo tssocho sayilea, hojina nte tachi cho alo? 5 Nteno a lona mmhonkacho esüa nchümtala, osi aiyo a nlan man ezüpa tsayiala. 6 Shijo Potsow na to ntena n tsichoke? Ombona a sathukvü tsirhi a tonicho. 7 Ombona heto haruko ji, ana ekhirana khatola ochinaha n ngala; ochina ha ana ntsa yana tüngkachio shi a n zoyiala. 8 Potsow na olan khanchaki lia osi ana hoji tssürhüpi n yichetala; Ombona a lan ji emüngi mphoe a siyithaka. 9 Ombona a ejüeli topvü khi a siyithaka a. myingthüng a monithaka. 10 Ombona shanlan akvü a echükroa a tala. Ombona a eyilo ji ruki a siyithaka osi mmikae chüi esio a vachiala. 11 Potsow lüm tsukala osi a thüngi kikatala; ombona aiyo ombo ri n mhom esüa a tssothukala. 12 Ombona ori a tssolo ombo rasan rothukala; ontena okhye nrhüala osi a vanphen süki ji hatala. 13 Potsow na ajeni jiang khi a mhechothukala; Aiyo a ntsiwo kyon jiang tsükona omoatssi kümthaka; 14 A shom osi wopan kitsük jiang chürathaka. 15 A ki lankon tssoa nchemo jiang topvü na a mhechothaka; a phajae eloeroro jiang mpato na aiyo lankon osi amotssi to a nchümiala. 16 Ana a phajae ji tsaphilea, a n yichoala ana a kyochito jonjilea ompvüna a n kyochiala. 17 A eloe jina a ethük nnamo ji n rümkhukvü sithaka, osi a jenio ndüng jiangna tia a ndüngo n roala. 18 Ngaro jiang na mpato a tssakala osi ontena a hungana a makatala. 19 A shom ndüngtso jiangna ha a tssak nkonga a zetala; ana nzantso jiang na a tssakvü benkathaka. 20 A fü jiang oryu lo eyukao tae kümthaka; aiyoa eküm shi mmuknrak enhyokae lio shi tae. 21 Nteno a shomdenka! Khonzan to a tssoyitava!. Potsow khe na a " vümchochithaka 22 Kvütoli ntena ha Potsow na a ezüpthuka to a ezüpthukala? Ntena etsson a n khangshihancho ke? 23 Ochona sana tia ayi shiang a nchümcheyio to ana nchümala osi kakolo erankae vao to nchümala! 24 Mekana kvüthenphen khi olung lo a yi shiang thenkae vao osi kümali tsükona vanthukvüo to nchümala. 25 Tokhatola ana ntsia wokhao tssoa potsüwoe na ochona sana a ehungpvüi tssolo rovto. 26 A fü shi nochonori na tsoroe silea, a tsük shi moni n sithüng ana Potsow hungu to ntsia. 27 Ana a mhyikna ombo hungu, osi ombo atsükona amoatssi tssov mek A lüm etsson momo jijo ntena heto phyotao jina, 28 "Etena kvütoli ombo khangshitavla?" to phyotao jina, ntena a sakav ntiosana ntanphen yantala. 29 Tokhatola enhungo yonri ji kyutava yonri kvüwoe na mmen tssoe Potsow lüm tsukthuka sana ji kyutava, tona yitssopvüi tsüka vanka to ntena ntsiv.
[Zophar yi] 1 Job, nina a lüm tssothukthaka. Aiyo ni janlam a n vanthev sithaka. 3 Nina phyothako jiang topvü yikvü yilo tae, tokhatola kvüto ni janlam sana ana n tsia. 4 Nina mmhona ntsia nkolo na kyon vandemo jiang echungina, 5 kyon nmhon jo ochia sunga emathata vancho n li. 6 O chosana ji tsüphov kümi, oyak etssunga kümkhuka, 7 Ombo kvüri na eluk etssunga rankakhoka, tokhatola livero esüa ombo vena yi siv. Osi ombo ntsiwo kyon jiang na mpato kvüi yichosana to emhuka ombo ethümtav. 8 Omboji omüngi esüa moni siv, osi zümolo müngtüngcho esüa moni siv, osi kvüthüng ha ombo n hungu siv. 9 Ombo vanphen jiang lo ombo n hungu siv; 10 osi ombona yantsae echi efüo jiango ombo tsoe jiang na lolam. 11 Ombo tsük jo eniro osi etho ejüi tssocho, tokhatola nsungu ochon kümi siv. 12-13 N mhom ji ombo chokatsüngo ji tsükona hoji rhüm ji moni n sithukvü opüngi na tara nkyansi vanala. 14 Tokhatola ombo mmani na etsoyu jiang ekhov kümi siala, mozhü n mhom khoa to khoe siala. 15 Nthae jina ombona efüo ejüeli jiang opüngina lae siala; Potsow na ombo mmani na mpato khiche khiyiala. 16 Nthae jina nzhüo jiango mozhü n mhom esüa tüv; nrü n mhom na njüchoto etsoyu jiangna ombo chüthukala. 17 Ombona olive thyujü zhükhfü hunga harishia n vanala mekana tssakijü tsüo zhükhfüro hunga n vanala. 18 Ombona sango jiang topvü esio tssoe siala; ombona ombo ejüeli jiang emathata tsütsao tüv yuta n hungala, 19 ntiotssole ombona yantsae jiang khakisia onte khangshicho osi kyon; thanpoe na tssoe vao ki jiang ombona khicho. 20 Ombo tajo elüm ji kvüthüngha lüm ebük n liala. 21 Ombona tsoana ntia enhyoe n liala, tokhatola enhungo ombo pvüli hanlyu ji ochüm tssothaka. 22 Ombona ekhyo kyunga hungathüng, enungrathao sükhyingna ombo süjov. 23 Ombona chokao jiang topvü ombo tsothuka! Potsow na omi kiato lüm etsuk khi ombo khangshivka. 24 Ombona yonjak yonri lona tsanchov ekhyo tssona yongmen lotssi na ombo kochüchüv. 25 Lotssina ombo tsük chyunrhüv; lotssi mmyo tsünglüpo jilona ombo ejen lenjov, osi ekhen na ombo lümbüm rüngjov. 26 Ombona yanthei vacho topvü moni siv; kyon khena n tekacho mi tüv na ombo osi ombo wopan jiang rungtsüngu. 27 Potsüo shina kyontsük ji mmen jiang oponi chiyithukala, osi liko shina ehungpvüi tssoyia nlan ombo piala. 28 Potsow lüm etsuk phyonchüo jilona ombo ejüeli topvü moni sirav. 29 Kyon n mhom jiang sükhying jo shi esüa tssov, Potsow na onte thüngi epio sükhyingjo hoji tüv tssov.
[Job yi] 1 Ana phyo shi enga; tona nte thüngina ejicho ethev lioji hoji tae. : 3 A ephyov yuta apia, osi jisüloti a ezov lina a ezoa. 4 Ana khonta vamo jijo echü sekao kyon jiang thüngi mek, ana a nvantheo ji ntio tsükona sana ntam lia. 5 A zetava. A hungi nte ekhentsüngcho taena n ngathechoke? 6 A lo ntio tssochosana ana nchümi zena, A ngangchetala, osi a nhyuka a netala. 7 Potsow na kyon n mhom jiang ntioli vanthukala, osi onte rankathuka osi onte mmhonthukala? 8 Onte na otsoero osi tsoerüi vana, osi onte rankao jiang hunga harishia vanala. 9 Tolea Potsow na onte wopan lo ekhen nungra n rheyithukala; osi onte no emhuk ekhen lo n vanchukchiala. 10 Hoka, onte tssiden jiang topvü thichetala osi ntia ezüp n liv rotsso roniala. n Onte ngaro jiang na olyuroden to tsukphita yungphita; 12 Osi khenzhü tona philyulyu to khfüwo jiang ephan sharitala. 13 Ontena eküm jiang noying lona vana yiala osi ntia n ryusangna chüala. 14 Nthae jiang na to onte evan vanthukle to Potsow thüngi chonala; osi onte eküm tsükona ombo lüm erüng jo ntio sana n tsihungala. 15 Potsow benkav ethev n li to ontena nchümala osi ombo thüngi randam oman n li to nchümala. 16 Onte ethona ekhyo hungcho to ontena hoe khiala tokhatola ana jo hojitüv nchümri n khichoala. 17 Nthae milon mhethukcho licho alo? Onte yulo ochosana ezüp nungra ndukcho licho alo? Potsow na kvüthüngsana lüm tsuka nthae jiang ezüpthukcho licho alo? 18 Osi oli mavü esüa mpung na vena onte yithukcho licho alo, mekana livero esüa tsungryu na vena yithukcho lichola? 19 Ntena jo Potsow na opvüpoe mmen jiang thung ngaro jiang khangshiala to phyoala. Tokhatola hoto mek! Potsow khi mmen kyon jiang khangshithuka; osi ombona onte mmen man onte ezüpthukala to onte ntsithuka. 20 Mmen kyon jiang ji onte mmen man ji hanthuka; osi thotsü Potsow lüm etsuk ji ontena ejyuerathuka. 21 Kvüthüng kyon tsüka ji eküm ochüm tssoasana, ombona ombo ngaro jiang ematha ntsiyiv alo? 22 Kyon tsükana Potsow ochona, oyaki mpato oyi tssoasana ji püngnokhukcho alo? 2324 Kyon ochoang sana jo onte echü jana otsük mmhona vanala; onte emathata osi tssochoyichoa chüala, osi onte otsük oso ha mmhona chüla. 25 Thanpoe jiango ntia ematha n li; ontena nungra lona okhfü hansi chüala. 26 Tokhatola topvüto kheti onte chüala; osi shothei onte siala osi onte topvü orana kheti sanzhüi tsoroe siala. 27 Ntena oyam püpthukvü nchümri hamo ji ana ntsia. 28 Ntena ethümala, "Kyon tsüphoe ji kijo kvüi sithakchola, elhi n mhom etssoe ji kiji?" to. 29 Ntena yentsae jiang thüngi n thyuta hancho alo? Ontena ntio yithen hansi yilana sana ntena tsintsi? 30 Potsow na lüm tsuki ezüp yithukana nthae jijo tsanchoala. 31 Nthae ji nlan epi kyon ochia n vanala mekana ombo elhi jiang man pilamo tüv ochia n van. 32 Ombo ji chüi ejümtasi, ombo khüp mmhom enhyang vamo jilo ejümtasi woala, 33 kyon wothüng na sani phana woala, osi ochon jina mpato ombo echümüng jilo enato erikatala. 34 Tona nteno kvütola! Hetüv zhüva yi kvülo khi a ejicho taala! Nte janlan shiang topvü ejüng tae!
Thyuta Ethümo to Ji
[Eliphaz yi] 1 Kvon ochosana tia, ntsinrantso ji tia Potsow na ethev lio tüv vancho alo? 3 Nina elamo kato tsso jina Potsow nzanchiv alo? Toalo nina mmhona vancho na Potsow nzanchivla? 4 Nina ombo kyuchia vancho tsükona ombona ni khona mek osi ojang ni tssoa mek. 5 Mek, nina mmen elüm tssothako jina; osi nina ombo mhadungo n mhom elümoto tsso jina. 6 Ni jeniona orang ni noyio ji ni pithukvü tsükona, osi nina ombo mpensü jiang khiyisi ntio nkav vanthuko jina. 7 Oyam sangtsünga vanathüng nina ojü n yuthuko jina osi wontontsünga vanathüng etsuyu n pio jina. & Nina ni etho osi vanphen ntssom ji meta topvülo tsütsao jina. 9 Nina emi jiang nzanchiv ekhiramo tae mek tolea nrinran jiang retsoyia osi opvüpoe n van jiang khangshicho. 10 Hoji tsükona enhungo ni nkonphia topvü sokvüi tae kümthaka, osi esüngaro taena ni kyua chiroala. 11 Emüng ji elümoto kyungthako jina nina ntia n hungu sithaka, osi jüvak na ni tüngzhü thaka. 12 Potsow jo oyak ntssontso ji vani shantio ntsotso jiang mpato zechochia n vana alo? 13 Tokhatola nina jo, "Potsow na ntio ntsivla?" to phyoala, osi Potsow ji eluk na eyuki vana küma ombona ehungi oyi e n tssoyi to phyoala. 14 Ombona liko osi oyak oni erü lo sanphiathüng, eluk echiv jiangna ombo eyukzhüi e n hungu tsayiala. 15 Nteno kyon n mhon jiang na sanphio lan ji dungu zikathakcho alo? 16 Kyon n mhon jiango onte yuta n jam, ojü na evaki hanayi moni sithukala. 17 Hojiang jo Potsow khaki esio kyon osi ombona ntia onte n lyuyi to nchümo kyon jiang. 18 Tokhatola Potsow taena onte mmhonthukchonthae jiang nchümri jo kvütoli hetvü sana a emhuka osi ana n ngathe. 19 Nthae jiang ji ezüp pioji hungana kyon mmhom noyinga evan jiangna emathatala. 20 Nthae jiang ejüeli jo topvü monthukala, jilo enhyokao jiango omina rungi sithukala. 21 O Job, enhungo Potsow thüngi mmhontava osi oso ori esüa ombo ti zeta; tona ombona ni mmhayivka. 22 Ombo püngnoyi jiang khichoa; osi ombo yi jiang ni lümbümi vata. 23 Hoka, nina teri kümi Potsow yanlana yiv lia, osi ni kilo n mhom elhi jiang topvü esam lia. 24 Ni shona jiang topvü sia; shona mmhontso jiang. zhükhfüran ngachethako jitüv lo sia. 25 Ni shona jijo Thotsü Potsow ji tssoa, Osi ombo ni janti nshakachi vacho esüa tssothuka. 26 Tona nina yuta topvülo ombo longtsükavka, osi ombo ni ematha chiyiphen ji to ntsiv. 27 Nina randan na, ombona ni janlam, osi ni echümchako jiang nina benthukvü. 28 Ni elhi topvülo nina ekhyo hungu, osi wondang na ni lano tüngrav. 29 Potsow na kangtsüi jiang tssüngjosi, teri kümo jiang shanchoala. 30 Nina nlan n rhükana vana tssona osi nina ntio tssoana jiang topvü elamo tssona Potsow na ni shanchov.
[Job yi] 1 Ana nchüng jana Potsow panlana phyocho phyoria; a ryusang mmuk jiang n phyochukchyiv n vanche. 3 Ana kvülona ombo yanchev sanaji ntsiwo mmhom je, osi ana ombo vanpheni eolan ji ntsiwo mmhom je, 4 To tssona ana ombo mhadungo a ephyov shiang topvü ezov osi a engathewo tssoa rüa ezov. 5 Ombona ntio phyov osi kvüto a janlam sana a ntsihungala. 6 Potsow na ombo etho topvü khi a sakav alo; mek, ana nsanathüng ombona a engayiv. 7 Aiyo ntsa evan osi ana Potsow thüngi elan phyokhuka, osi ombona ntsa kyon to nchükhon tsükona ehungpvüi a tssoyikhuka. 8 Ana engkhfüwoe yanthaka, tolea Potsow ji Jüjowoe n van; ana engrhewoe ombo yamo jithüng ha ana ombo n hung. 9 Potsow na jükiwoe osi jüjowoe elhi tssoa vanpvü, tokhatola ana ombo n hunghan. 10 Tokhatola a khochi akvü ombona ntsia; ombona ojang a tssoe zewo ntsa kyon to a yanchev. 11 Ombona a ejüchio lan ji ana longtsükata dungala, osi lantssae kvüthüngha n kathetala. 12 Ana yuta topvülo Potsow yizüng ephan vanala; ana ombo lüm erüng yanala osi a etacho n tssoala. 13 Ombona kvüthüngha n dungphiala. kyon ochina ha ombo n khiranche, mekana ombona ntio tssohungana jilona ochina ha ombo n tangche. 14 Ombona a tsükona methako jiang topvü benchethukvü; hojijo ombo tümka jiang yolo motsünga. 15 Ana ombo mhadungo ekyu lona enetala. 16-17 Thotsü Potsow na, a lüm etsson ji a yesoyithaka. Emüng jina omhyik a chukia khatola, emüng ji mek Potsow a kyuala.
1 Potsow na ntioli yitsso yuta n vatala, ombo benkae jiang tsükona ntsa sekacho yanta tsüngon ntioli kokae n vatala. 2 Kyon na liko tsükata ekhiv tsükona erülong laphiala; ontena olyu efüi onte tssiden lo thechiala. 3 Ontena nrinphen jiang Gadho jiang khiyiala, osi emi ji mangsü ji vüngi vayisi ompvüna ochi jiang n lorathüng jo n piala. 4 Ontena yantsae jiang elan n piala, osi ezüpa evan jiang nungkata tsani nphothukala. 5 Hojitsükona yantsae jiang jo ora kurü esüa lijüngi ojak yana tsani yiala, osi ontena kvülo ha onte ngaro jiang etsoyu yanchei n tsothukala. 6 Ontena n joncho tüv li ria wothukala, osi nthae jiang jününgroli lo tsüngthi elho tssoe siala. 7 Zümolo ha ontena osü hungi n mpensü na yipala, osi etssük jilona nkachocheo tüv ntia n tssochetala. 8 Phunglani eryu jokao jiang na onte jümchetala, osi ontena khümcho yana longpvü jiang nlhilo woala. 9 Kyon n mhom jiang na opvüpoe n vamo nunghori jiang ezii tssoa ekümala, osi yantsae jiang ngaro jiang ochi chüngkata khiala. 10 Tokhatola yantsae jiango mpensü tia n liv haphoe chiwoala; osi onteno liri yutalo lea khangtsünga vanala. 11 Ontena olive zümi thyujü khiala, osi jününgrothi lona zükhi zümchoala, tokhatola onteno eratsünga vanala. 12 Yantsü jiang lo tssatsso jiang osi chüa vamo jiangna kyata erontala, tokhatola onte randan jiang Potsow na n ngayiala. 13 Wondang ji khoe esio kyon vanra, ontena wondang ji nchethe osi jina olan so jilo n woala. 14 Wonchiana münghan jina phanthi yantsae jiang lüngthalo woala, osi müngana ombona owo efüala. 15 Efürama etssoe jina engrhebüngo nhyaka vanala; osi ochina ha n hungwo tssoa ombona omha eyukala. 16 Efüi jiangna zümolo oki pharhüpi efüala, tokhatola engo jo ondang ji mphoa vanala. 17 Ontena engo wondang ji kyuala, tokhatola emüng jijo onte tsükona ekyüv mek. Zophar yi 18 Nthae jiango jüvak na evaknhyae hansi yiala, osi ombo likoramüng jiangha Potsow na rhiyikae siala; Ombona ombo jününgroli elhilo n wov siala. 19 Tsüngkying osi etsso jina sherhyu ji phyonthukala osi mmen kyon jiha eküm evan jiang meta lona moni siala. 20 Ombo oyona tia ombo n chümchev siala; ombo orana tsoroe odung eyacho esüa kyoni siala. 21 Hojito tsso jijo ombona emi jiang khangshio ji tsükona, osi otsoero n lio eloe jiang thüngi nzan n jüwo jina. 22 Potsow na, ombo etho khi etho ejüi jiang monthukala; Potsow na nkanphiala osi nthae jiang chüthukala. 23 Potsow na hakae mpato ombo vanthukalea, yuta topvülo ombo zekata vanala. 24 Nthae jiang mmhon jo esüngaro tae tssoala, tosi ero esüa esüngaro mmikae siala, osi tsüngonrho eyen etsechakchoto jaki siala. 25 Hojito tssoala toji ochona ekhirankhukcho la? A yi ji otsotso mek to ochona sana phyokhukcho alo?
[Bildad yi] 1 Potsow jo etho ejüi; kyon topvü na ombo kyuchia phanthiv lia; ombona potsüwoe ombo ekhüngyan ji noyinglo vanthukala. 3 Ombo benkae lanben jiang ochona sana khachecho alo? meta kvülo sana Potsow ondang na n rathejancho licho alo? 4 Potsow mhadungo kyon ochosana ntsanrüng vancho alo? 5 Ombo ehungo jo choro ji lea wondang n licho tüv, osi shantio jiang ha n tssüngcho tüv. 6 To tssona kyon jo kvütola, ora ori esüa, beno bensü esüa tüv alo? Potsow mhadungo jo kyon jo ntio manchola?
[Job yi] 1 Nino a tsükona kvüta nzanchi eli ato? aiyo n pemolan, n khyontoe sayia! 3 Nina ndungtssung mmhom hetüv apiala osi ni ntsinran ji zhüvae a esüa tüv thüngi chinhyala! 4 Ochona ni yi shiang zov to nchümala? osi ochona heto nsam ni ntssungala? [Bildad yi] 5 Echüi jiang mon jiangna lichungi ojüi na eneta vanala. 6 Echüli jiha Potsow na hungrhüa vana; ombo enhungo ntinaha n phoche. 7 Potsow na jükiwoe oyak ji ephyanchicho
Job osi liko shiji lanjümhalo
nsüngrükacho. 8 Eluk jiang ojü na pyingthuko ji Potsow na osi ejerhüpi n bukrhüpthuko ji Potsow na. 9 Ombona choro ranchethako ji eluk na khümthukala, 10 Ombona jümang poni nkonkae wondang ji emüng lona khotayicjio. 11 Oyak shiang tsenkachio durhyu jiang ekhenthukana onte kyua enhyukala. 12 Ombo etho na jümang ji khyocho, Ombo tssothimori lona thojüi Rahab monthukcho. 13 Ombo ethük na oyak shi ntssüngthukchp, osi monrantsana vamo ji ombo khena lüngthacho. 14 Tolea shiang hetopvü ombo ethoji oponro ejücho tae, osi etena tssürütacho zocho esüa tae. Potsow jo kvüta tsüphocho sana ochona ntsikhoka?
[Job yi] 1 Eküm evamo Thotsü ji myingona ana echümala, ochona a elan jiang a khania osi eküm ji ekhov kümthuka sana3 Potsow na ethük a piathüng nandangjo, 4 a menfü na kvüthüng ha n mhom n phyo, osi a nnli shina ejüng n phyo. 5 Nte razhü shiang elana to ana kvüthüngha n phyo; a echü tsüngon nandang aiyo nlan nli to ana phyov. 6 Ana aiyo a elan toji ephyov esam mek; ana a kichuk chüngtsoa phyoala. 7 A panlamo jiang osi a thüngi ori etssoe jiang topvü nthae osi n tsanrüng esüa ezüp onte piv. 8 Potsow n tsi jiang tsükona jo Potsow. na kyon eküm jiang chonana ntio eyilo lichola? 9 Ezüp yiana Potsow na onte ekya engayiv alo? 10 Ombona pio longshi ji ontena chokav shikhfü; osi ontena ntümjakna ombo thüngi randam shikhfü. 11 Potsow etho jo kvüta tsüphocho sana ana püngnovka, osi thotsü Potsow methak jiang eroroe onte ezovka. 12 Tokhatola, to mek, otsotso tssowo ntena topvü ntsikhana; tona ntioli yisha hetüv nsantala? [Zophar yi] 13 Thotsü Potsow na nthae osi jenbuktae kyon jiang hetoli ezüp piala. 14 Ontena tsokhying elüm vankhuka, tokhatola onte topvü ritsso lona chükham; osi onte ngaro jiang na kvüthüng ha etsoyu etsson liv mek. 15 Jilona enhyo jiango nochonori lona chükham osi onte emi jiang na tia onte echü kyayiv mek. 16 Nthae jiang na janti n khacheo tata likhuka, osi onte ethelan lona kyungkata mpensü likhuka; 17 tokhatola kyon mmhom ejoma na mpensü ekav, osi ntsanrüng ochoangna sana janti jiang hung khuka. 18 Nthae jiangna onte ki jiang payangna süngcho to tssotala mekana oli enhyang ezii ji ranki ji esüa tüv. 19 Ontena wokhao tssoa ejüelii esüa esanchochiv, osi ontena phanthi zetana onte ejüeli jiang monkhanthakvü. 20 Esüngaro taena chüvak esüa ekhaenthao sükhying na onte rhakvü; osi zümolo ezhü vencho taena onte vena yi siv; 21 engkhfüwoe ezhü jiang na onte ji okina venchukchirae siv; 22 ontena tsam tssoathüng mpung jina onte pono nzan n liv echükata vem. 23 Ontena yunga vanathüng mpung jina onte echükav osi monthuko tüv etho khi onte ekhenthukvü.
Ntsinran Ethüng
1 Janti rhonchephen likokvü liala; Shona rungchophen metaha lira. 2 Kyon na yonjak jo likokvüi na rhonchetala osi yongmen jo olung lona phyoni khiala. 3 Kyon na emüng echitso ji' mpato khyui zetala. Ontena liko ejungu jiha yani zetala osi emüngi olung jyui zetala. 4 Kyon na n vanjan metae mekana kyon jona n vojan mo metae lea owo likokvü jyutala. Ontena jilo owo yingsü yingloa elhi tssotala, osi likokvüi wozhü lona mpangta mungala. 5 Etsoyujo likokvüi na chiyiala, tokhatola hoji likotsük ji chungi olan topvü ejüproe lia. 6 Likoe olung jiang lo tssentsü lung jüa, osi hoji makvüro jianglo shona jüa. 7 Mungshiro jina jo shonakvü kvülo sana n tsi, osi müngtso jina ha jiwoe n pyaphiala. 8 Hengho osi ekümrümo ntao tüv kvüinaha hoji yingsü yinglo lan ji n dungala. 9 Kyon na lungpvü ekhüngtso ji jyuala, osi phunglan jiang yenjo jana jyuala. 10 Ontena lungpvü jianglo okvü vei, tssentsü lung jiang vechetala. 11 Ontena zhükhfü jiang jünhyo jiang jana jyui mphoe lio jiang oponi chiyithukala. 12 Tokhatola ntsinran jo kvülona hungala? Engatheo etho jo etena kvülona yanchetala? 13 Ntsiran jo kyon yolona yanchev mek; kyon ochina ha hoji man tsotso ji n tsi. 14 Jümang jiang chungina e zoala ntsinran jo hojiang lo n li to. 15 Ntsinran jo shona janti na n shichoala. 16 Shona janti njümtso jiang na hoji n shichoala. 17 Ntsinran jijo shona lona tssentsükata, osi shonapvü mekana shisha njüm lona tsükata. 18 Ntsinran man jo jümang, tssentsü jiang, osi eomo tssentsü lung jiang tssentsülung emyom jiang lona tsükata. 19 Yonjak etssükvü osi shona njüm jiangna lea ntsinran ji man lo n tsitakhuk. 20 To tssona, ntsinran chiyiphen jo kvülola? Etena engathewo lanka ji kvülona ntsi khivla? 21 Eküm evamo ntinaha hoji n hungche, osi pyaphia vamo woro jiang na tia n hungala. 22 Echü osi monthuko etho jiangna tia hoji yilan jo yibung yaka tüngochüa n zohan to phyoala. 23 Potsow tae na ntsiran lan ji ntsia, ntsinran liphen meta ji kvülo sana ombona ntsia, 24 Ntiotssole ombona liko ehüm, osi woyak shi küpo licho topvü hungkhanala. 25 Potsow na mpung ji etho piathüng osi jümang ji etsüiesi jiang methakathüng; 26 Osi Potsow na. eryu jothephen jiang methakathüng, osi ombona tsüngjowo ethoji lan nsüngrüyiathüng; 27 Hojithüng ombona ntsinran ji man ji chekachowosi ojang tssoe zecho, osi hoji ethoji ombona khichoyicho. 28 Potsow na kyon ezocho, "Ntsinran ni küm hungna OPVÜI yikrachiv ethev lia. Engathe eli ni küm hungna nina n mhom lona tsanchov lia."
Job na Okhao Tssoa Ombo Elan phyoala
1 Job na elani nsam benkacho. [Job yi] 2 A eküm shi kvütoli sana Potsow na zeyata vamo jithüng esüa kümlano. 3 Hojithüng jo Potsow na yuta topvü lo a ndüngo vancho osi emüng jiang yakchia a sanphilan jilo wondang apia vancho. 4 Hojithüng jo aiyo pvülyu ekümo vancho, osi Potsow khyingta jina a ki a nhyakyata vancho. 5 Jithüngjo Thotsü Potsow na a ndüngo vancho osi a ngaroden na a hazhüa vancho. 6 A mangsü osi nyanyan jiangna shirojü tssona a picho, osi a olive dung jiangna olong yolo mpato zacho. 7 Yantsü lo eramoe jiangna nduktathüng jo anaha jiang yolo theta vancho. 8 Khyingroe jiang na a hungpvüto zakto a nkachicho, eson jiang na ha phanthi yikrachi a picho. 9 Kyon esopvüiden jiangna mpato oyi nsana vamo jiang esani sicho; 10 osi kyon ethelan elitso jina mpato yingto vani sicho. 11 Kyon kvütana a hunga osi a yiwon zoana topvüna a elhi jiang mmhona to phyocho. 12 Yantsae jiangna ethev lia jonjia na ana nzanchicho; osi opvüpoe n vam kvülo n wov vamo jiang ana nzanchicho. 13 Ezüptsünga vamo jina mpato a thüngcho, osi ana emi jiang noyinga evamo tssoyicho. 14 Ana yuta topvülo ntsanrüka osi elana elhicho. 15 Aiyo mhyikjüng jiang mhyik tssocho, osi jojang jiang jo tssocho. 16 Aiyo yantsae jiang opo esüa tssocho osi ezüp lo jo lankon jiang nzanchipvüi tssocho. 17 Ana etho ejüi jiang haruk ji roe siyicho osi ontena khangrio jiang shanchocho. 18 Ana yuta topvülo harishia sunga evam eyiloa vancho osi okina noyinga chüv eyiloa vancho. 19 Aiyo odung na oying ji ojü pvülyuo tüvlo zacho to osi khero yentsso na njüa vanthuko ji esüa vancho. 20 Otsük akvüna yuta topvülo a thanthünga vancho, osi kvüthüngha a etho n mom vancho. 21 Ana ndungtssung piana kyon jiang na jükrüpi ana ntio phyoasana jiang tüngochünga a engayicho; 22 Ana phyoracho sülo ontena thephao tüv ntia n licho. A yi jina eryujü na reta to onte lümbüm recho; 23 lijon jiangha tsüngkyingo eryu eyiloa to otsük akvüna a yi jiang eyiloa vancho. 24 Ontena a lo longtsüka mona yiana ana menseta onte zecho; osi a ematha eyiechan jina onte lüm tssonkata yicho. 25 Ana OPVÜI tssoe methak jiang nsüngrücho; osi mesae na rasan soato onte socho, osi onte lüm teriathüng lüm ejichoyicho.
1 Tokhatola a lona nüngokao kyon jiangna enhungo a emakata vanthaka! Onte opo motsüi jiang jo ethelan n liden tssocho hojitsükona ana a füro jiangna olyu nhyakathüng nzanchi elhi tia onte n tssothukcho. 2 Onteno laphyatsüngcho kyon tae, osi nti elhiha a tssoyicheo tüv etho n jü. 3 Onteji elümoto yantsa osi wonton chancheta osi tsüngying nkong lea njakphiv to khangtachozümoloha, orae osi yingsü-yinglo meta jiang lo vantacho. 4 Ontena lijüngi tssüngying jiang rukchei tsotacho, chükcha dung ying n tson yuo jiang mpato rukchie tsotacho! 5 Otsük akvüna onte ji efüi phanato tüngkachia phani sicho. 6 Ontena lungkvüi vantacho, osi sürheni okvü dukthei vantacho. 7 Ralungi na ontena ekümrüm esüa eronta osi ranuk kupi etssirhyui vantacho. 8 Ethelan n lio osi omying n pio kyonden sanrhyucho! Osi onteno meta jilona phanchukchi sicho. 9 Tole enhungo ontena oro a emakatala; aiyo onte tsükona jo emakaphen kha ntia mek. 10 Ontena a tssaka a zetala; osi aiyo onte tsükona jo onte mmhontia to nchümala, osi woro omhalo mpato a nchukayiala. 11 Potsow na aji nkhyo-ntov osi ethev n lio a kümthuko jina, ontena onte n mhon jiang topvü a lo thüngala. 12 Kyon kholuk jina kvüri na a sakatala; ontena yunga a tsanthukala; osi wokhao tssoa a sakav yantala. 13 Ontena a tsanphen lan a khanisi roe a asiv yantala; osi onte etang ochia n van. 14 A pikhfülo epo jiang lona ontena rhoroala osi a poni na roe sia rhoroala; 15 aiyo ekhenlung na a pyingthaka; osi a phfütsson jo mpong esüa vena yithaka, osi a tssochyu mochyu yuta ji eluk esüa rüma yi sithaka. 16 Enhungo a chüvsala; osi a ezüp a poyio tüv n liv sithaka. 17 Zümolo jo a ryu shiang topvü na a noala; osi a nküka anoa vamo ji kvüthüng ha n mpoala. 18 Potsow na evüng lona a tssenyathaka osi a mpensü jiang eriroe sithaka. 19 Ombona chonchen yoe a shümthechiala; aiyo mmen lona n mhonka a kümthaka. 20 O Potsow, ana ni tsacho, khatola nina kvüthüng ha a n janlancho; osi ana randanathüng, nina a n ngayicho. 21 Nina ntssana a tsütsatala; osi ni etho topvü khi a khangshiala. 22 Nina mpung khi vena a yithukala; osi nina tsungrhyu ntav khi a jiphithukala. 23 Nina echülo a sosi yialato ana ntsia, otsük akvüna oyi echephen jilo a sosi yiala. 24 Nino ntioli mona vamo kyon ji sakatala, osi khonzan chom ji yakijo ntia etssov n khyocho sana hoji roe siato? 25 Ana ezüpa evan jiang nzo n kyachoke osi ezüpa evan jiang tsükona n nungracho alo? 26 Ana ematha osi oha zükhov eyilocho, tole jithungjo ezüp osi emüng a janthaka. 27 Aiyo emhukelüm osi enov na a roe sithaka; engakvü ezüp kyongkao chiyiala. 28 Aiyo engondang ntia n hungu emüngi sanphiala; osi ana kyon mmhatsülo mangi nzanchi chonala. 29 A won ji orae shali osi jüworo won esüa yingsü yingloa tüv. 30 A tsükfü ji mungi sithaka; osi aiyo erana a rungtsünga a rachethaka 31 Ana ovüngthüng okhen mmhom zo jiang lojo ekya nungra won tae zoala.
1 Ana loroe jiang jüpona n ze to phyochakthaka. 2 Thotsü Potsow na ete pono kvüto elhi tssoala? Ombona kyon elhi jiang kvüto pilanala? 3 Ombona sulyuo etssoe jiang thüngi tssoro phyoro osi ebüp nungra rothukala. 4 Ana ntio tssoa sana Potsow na topvü ntsiala; Ana khochi akvü ombona hungala. 5 Ana kvüthüngha ntha elhi n tssohan to echümala; osi ana kvüthüngha oyam ejithechiv ekhyo n tssohan. 6 Potsow khi ntsa seri lona füi a zethuka tona aiyo kvüta ntsacho sana ji ombona ntsiv. 7 Ana olan eremo jilona nkae yithakcho mekana jilona n mhom apopo a tssüng yakthakcho tssona, osi a khe jiang mmen na tümzhüthakcho tssona, 8 tona a li ji roe asiyithuka, mekana ana jonchowo etsoyu ji oyam tsothuka. 9 Ana a phinakiren ji tsoeni ji jüpona ompvü kibüng tssae na mphoe nhyaka vana tssona, 10 tona a eloe ji khi eboe thanpoe etsoyu tssoyanthuka, osi eboe thanpoe belüngi yipthuka. 11 Hojitüv ntha elhi ji man jo echü tssothuka. 12 Hojijo roe esio, n mhemi to tssov, ana ntio liana rungi esio mi tssov. 13 Kvüthüng a phajae yolo tsükana a pono phyocho phyoria roana ana yingto engayisi etüm elan ephan ombo zeyicho. 14 Ana hojito n tssowo kvütoli ana Potsow ndukvüla? Potsow na oyi a tssoyi lo roathüng ana kvüto ezovla? 15 A liyingo Potsow tsük jina a phajae jiang liyingcho. 16 Ana kvüthüng ha ezüpa evan kyon jiang nzanchiv n khiranhan; osi ana kvüthüngha emi jiang ezüpa n vanthukhan 17 mekana ana tsoyusi opvüpoe n van jiang wontona n yithukhan. 18 A eküm totona onte sheküpa vanpvü. 19 Ana ezüp kyon ochosana hungna, ezüp lona mpensü n shichov hungna, 20 Ana tssansü mpensü ombo piv osi a olyu jiang lona khichocho tssansü mpensü piv. Tona ombona ombo lümbüm totona a thüngu. 21 Ana opvüpoe n van ejithechicho lina, osi yitssoki na ana ombo khyov to ntsina hoto elhicho lina, 22 tona a khe shiang jakthuka; osi okhe jiang epvü lona rüngjoe sithuka. 23 Ana Potsow yitsso a kyuo jina, hojitüv elhi kvüthüng ha n tssocho. 24 Ana kvüthüng ha a longtsü ji ejüeli lo n vahan. 25 mekana a ejüeli khi kangtsüa n vanhan. 26 Ana kvüthüng ha eng wondang ji n khümhan, mekana choro opyon mmhom ji n khümhan. 27 Hojiang kyuchiv elhilo a n sosorahan osi onte yikrachia a khe n tssüphan. 28 Hojitüv mmen jokheman jo echü ji tssov; ntiotssole hojina thotsü Potsow n kharo tssoala. 29 A ri jiang ezüpathüng ana kvüthüng ha a n mathahan, mekana ontena ezüp ndukathüng a n mathahan; 30 Ana kvüthüng ha onte chüthukvü randani mmen n tssohan. 31A nzo elhi etssoe topvüna ntsia ana kvüthüngha yentsae n sothev n sihan. 32 Ana yentsae jiang a ki sothecho osi kvüthüng ha lantsüi onte n yipthuk. 33 Kyon thanpoe yo onte mmen jiang mphov ekhyo tssoala, tokhatola ana kvüthüng ha a mmen mphoe n vahan. 34 Kyon na ntio phyov sana ana kvüthüng ha n kyuhan; Ana kvüthüngha onte yikvü-yilo kyua kichungi Jükrüpi n vanhan. 35 Ana phyoa vamo shiang ochina ha n ngav alo? Yitsüng akvü otsotso to ana phyochakala. Thotsü Potsow khi a janlanthukvüka. Ari jiang na nlan apio jiang eranrhyui vasi a hungthukvüo, 36 Ana jiang ji emathata epvülo yikae ham osi a kvüri kikho esüa khov. 37 Ana ntio tssochosana jiang topvü Potsow ezosi, ombo mhadungo a mha engokae vam. 38 Ana jona vamo liko ji ana efüsi lipvüo ji püpthukvüo 39 oli jilona chiyio etsoyu ji ana tsosi lijon ji khangthukvüo 40 otssuk omüm thung jo, ero osi okyo zathukvü, Job yi jiang ochüm tssocho.
Elihu na nsancho
1 Job na ombobo ji n lan n li kyon to engathe vamo jina panithüm na ombo n janlam sicho. 2 Tokhatola jilo manga evan yolo tsüka Elihu to tsao jina Job na ombobo ntsacheta, Potsow n lan pia vamo ji zoe n rümkhukvü lüm tsuka phanthicho. (Elihu jo Buz tsoronichen Barakel ji tsoe osi Ram pvüji kyon.) 3 Ombona Job shom otsük ethüm ji thüngi ha lüm tsukcho. Ntiotssole ontena Job janlam tsükona ntia lanka n yancheo ji tsükona, Job na n lan pioji otsotso esüa kümthukcho. 4 Hojilo nungotso ji Elihu tsso jina ombona thanpoe jiang nsandenthukvü nhyaka vancho. 5 Panithüm na Job n janlanchev siale, ombona lüm tsuka 6 phanthi heto phyov benkacho. [Elihu yi] Aiyo nunghori, osi nte eramo, hoji tsükona ana nchümo ji phyov a kyua vancho. 7 Ana abobo ji ntena nsandem shikhfü, osi nte ntsinran jiang phyodem shikhfü to zia vancho. 8 Tokhatola Thotsü Potsow mon jina oro kyon etho pia nchümri lithukala. 9 Kyon ji sona yio jina nchümri lia küma mek, mekana, eran ekümo jina engathev lo nzanchi epia mek. 10 Hojitsükona ana nteji ana phyo shiang a engathuk hungala; ana nchümo ji nte ezovka. 11 Ntena n sanathüngjo aiyo erüm toa nte engayia vancho osi ntena yinüng yanta vanathüng jo aiyo yingto nhyaka vancho. 12 Ana yingto enga vancho osi ntena ntia n phyochev sia zechecho; jijo Job na ntio phyochosana ntena n khiranicho. 13 Kvütoli ntena ntsinran lia to phyochechola? Ntena n janlanchev siwo ji tsükona Potsow na Job janlamka. 14 Job jo nte janchokha, a jancho mek, tokhatola ana kvüthüng ha ntena janlana to janlam mek. 15 Job; ontena oyi n liv sithaka, ontena ni janlam n liv sithaka. 16 Ontena yingto vanathüng anaha nhyaka vam alo? Ontena ntia ephyov n liv jilo mangta vana. 17 Mek, ana a janlan heto ni piv osi ana nchümo ji ephan heto ni ezov. 18 Ana oyi n sam n vankhukthak. A yi jiang n sayakhukvü sithaka, 19 Ana ephyov yuta n liana, a ji zükhi eniro thephen sofü sükhfü pukrhüpa to a pukrhüpvü. 20 Ana yingto n vanche; ana nsam lia. 21 Heto ekhirantathüng ana ochia oyilo theyiv mek; ana ochia tssayiv mek. 22 Ana ochia n makathi, osi ana oyam emakavo Potsow na zaktole ezüp a piv.
1 Job, enhungo mmhona enga vana ana ntio phyov sana ji 2 A lümbümi ejüo jiang ana phyovsala. 3 A yi jiang topvü tongochünga, osi ana ntsa ji phyoala. 4 Potsow mon jina a joyingcho osi eküm a picho. 5 Nina ajanlanche na a janlana. Ni ekhiran yi jiang methaka vana. 6 Potsow mhadungo jo enita kheti, enita ochon na e joyingcho. 7 Hojitsükona nina a kyuo tüv ntia n li; ana ni khyothechiv mek. 8 Nina heto phyoa ana ni zoyicho: 9 "Aiyo ntia nlan n li; ana ntia sulyuo n tsso. Aiyo yingto evan osi mmen lona n kachoe vanala. 10 Tokhatola Potsow na a khangshiv ntanphen yanchethaka osi ori esüa a tsütsatala. 11 Ombona a jolo yonjakzhü a shenkayiala; osi a nkanphi akvü a cheyatala." 12 Tokhatola ana ni ezoala, Job, nino ori kyon, Potsow jo kyon otsük akvü lona tsüphokata. 13 Nino ntioli Potsow na kyon phyocho rücho n janlancho Potsow n lan piala? 14 Potsow na elan elani phyolea, ochina ha ombona ntio phyocho sana ji n ngayiala. 15 Zümolo kyon yiprathüng Potsow na kyon jiang omüngina müngtüng thukala. 16 Ombona ntio phyoa sana jiang ji onte engathukala, osi ombo ekyuesü yi jiang na onte ekhenala. 17 Potsow na onte mmen jiang esanthukvü onte ezoala osi kangtsüa onte n kümthukvü tsükona onte janaia. 18 Ombona onte ji monthukvü mek; ombona echü jilona onte shanchoala. 19 Potsow na nochonori khi kyon ji elanchoyiala osi otsük topvü enov na phyingthukala. 20 Nochonori jina ombo wonton ji moni siala, osi etsoyu mmhontso jilia tssaka zetala. 21 Ombo tsükji thama lona ekyimkae siala; osi oryu tae chancheta hungala; 22 Ombo echüli rheyiv tae vanthaka. 23 Nkhontsi lanben na mpato oro ombo nzanchiv tssovPotsow lanben wothüng othüng jiang yolo ochona sana oro, kyon jiang ji onte elhi ji oro ezocholam tssokhuka. 24 Lanben jina khonzana heto phyov, "Ombo vachia! Ombo echüli rheyithukvü tsükona meka. Ombo vachiv tsükona rhanlan tssen ji shika." 25 Ombo tsük ji eniro to kümlani etho jükalam; 26 Ombona randana, Potsow na ombo janlam; osi ombona emathata Potsow khümvü; Potsow na ombo tsükona olan topvü mmhonlan thukvü. 27 Ombona nzotsü ponina heto phyov, "Ana mmen tssothaka. Ana elamo n tssochehan, tokhatola Potsow na a eküm ji nkochethaka. 28 Ombona echüli eyiv lona a shanchothaka, osi aiyo enhünga jana eküm vanala." 29 Potsow na shiang hetopvü elan elani tssoala; 30 Ombona kyon eküm ji shanchoala, osi eküm lo ematha ombo piala. 31 Job, enhünga ana phyo shiang enga; yingto vani a phyothuka. 32 Tokhatola nina ntiosana phyov lina, phyoe a zothuka; tona nino elamo lo vana to ana emathata khichov. 33 To mekana yingto vani ana phyocho enga, tona kvütoli nchümri eli kümvü sana ana ni shikavka.
1 Nteno elümoto kichuk jüa, osi okyak lira; enhungo ana ntio phyoasana ji a ngayia. 3 Nina etsoyu mmhom tsoathüng kvütüv sana ntsia, tokhatola oyi mmhom jo mmhona n ngachetala. 4 Mhemhoncho sana ntsiv jo ete pono tae. 5 Job na ombo n lan nli kyon to phyoala, Osi Potsow na ntsa ji ombo n tssoyiala to phyoala. 6 Ombona phyoala, "Kvütoli ana ejüng phyoa aiyo ori kyon to phyovla? Aiyo echüo khfü hana, tolea mmen n li." 7 Ntena kvüthüng sana Job esüa kyon hungthakcho alo? Ombona kvüthüng ha Potsow n yikrachiala. 8 Ombona n mhom etssoe jokyim tssohungala osi mmen kyon jiang yolo sanphiala. 9 Ombona Potsow lüm erüngo sanphicho ntia oman n li to phyoala. 10 Ana phyo shi engatava, engathe eli kyonden! Thotsü Potsow na woria elhi tssov alo? 11 Ombona kyon jiang elhi ephan yantso piala osi ontena mamo ji ephan onte piala. 12 Thotsü Potsow na n mhom n tsso; Ombo kvüthüng ha ochi thüngi ha ntsanrükvü n tsütsa. 13 Potsow na ombo etho ji ocho thüngi na sana hungcho alo? Ochona sana limha jilo OPVÜI tssov etho ji ombo picho alo? 14 Potsow na ethük echenko etho ji khi sithaka, 15 eküm evan topvü chüi siv osi ochon kümrae siv. 16 Enhungo ana phyo shi enga, ni ji kichuk ejüi tssona. 17 Nina ntsa Potsow ji nlan pia alo? Ombona ntsanrük tssaka tsayia alo? 18 Potsow na mesae osi yantsae jiang na ntha osi ethev n li elhi tssoana n lan piala. 19 Ombona yansae jiang yilo n the mekana yantsae jiang tssaksi ejüeli jiang thüngoe thecho nli, ntiotssole ombona otsük akvü liyingcho. 20 Kyon tsüka ji yipathüng chüi sikhuka. Potsow na kyon jiang yonkatala osi onte chüala; ombona etho ejüi ji lea enato chüthukala. 21 Kyon jiang khochi akvü Potsow na cheta vanala. 22 Potsow mhadungo mmen kyon jina mphocheo jitüv emüng echiv n li. 23 Kyon jiangna kvütothüng owo Potsow khi oyi onte tssoyithukvü sana Potsow na yuta sekae epiv n li. 24 Ombona esopvüi jiang khi sisi ethan dungphiv tsükona elan n lan ethümta vamo tüv ethev nli. 25 Onte elhi jiang ombona ntsiwo ji tsükona ombona zümoa na onte mothuka khi siala. 26 Ombona mmen kyon jiang nzontsü ehungona ezüp piala, 27 ntiotssole ontena ombo sürüi n tssov siwo jina, osi ombo yizüng jiang topvü n ngav siwo jina. 28 Ontena yantsae jiang Potsow mhadungo kyathoko jina, osi ontena kyao ji Potsow na zo jina. 29 Potsow na ntia n tssoyiv silia, ochinaha phyocho phyoriv ha n li. ombona ombo mha ji mphoe sio, kyon jiango elümoto ezüp tssov. 30 Ntio jipo naha esapvüi ekhüng etssoe jiangna yantsae ezüpthuko jiang tanglanchio lanka n li. 31 Job, nina Potsow thüngi ni mmen phyochakthakcho alo osi nina mmen n tssolan to phyochakthakcho alo? 32 Ni ori jiang ni ejüle to nina Potsow ezothakcho ala, osi nina mmen jiang n tssolan to phyochakthakcho alo? 33 Potsow elhi ji nina erenjanthako jina nina ni lüm erüng ephan Potsow na ni tssoyiv to nchüma alo? Methak ji ni pono tae, a pono mek; nina ntio nchüma na enhungo e zoa. 34 Nchümri eli topvüna otsotso to phyov; kichuk ejüi ochona shi zoana jina 35 Job na ntia ntsiv nsanala to phyov osi ombona phyo shiang ntia yichak n li to phyov. 36 Job na ntio phyoasana tüngochüa nchümi zeta; tona ombona kyon n mhom esüa nsanla to ntena hungu. 37 Ombona ombo mmen jilo Potsow panlan thephatala; osi ete topvü mhadungona ombona Potsow emakatala.
1 Job, nina Potsow mhadungo nipopo ntsanrüng ejana, vamo jijo n lan, 3 mekana nina Potsow ji, "kvütoli a mmen na ni tachicho la? osi ana mmen n tsso ji man ntio khakchoala?" to engao jijo n lan. 4 Ana ni osi ni shom jiang janlanrav sala. 5 Oyaki zekachia! Eluk jiang kvüta ntssonchola! 6 Nina mmen tssona, jina Potsow ntachi. Nina elan elani silyuo tssolea, jina ombo tachia alo? 7 Nina elümoto ntsanrük le jina Potsow nzanchia alo? Potsow na ni thüngina ntia ethev n li. 8 Ni mmen jina ni nzo evan kyon jiang tssatssoala osi nina elhi mmhom tsso jina ombo nzanchiala. 9 Kyon jiang khangshina, ontena emhena eronala; ontena kyochile to ocho thüngi sana eronala. 10 Tokhatola ontena onte joyingpvüo Potsow thüngi, onte shanchole to n zoala, onte ezüp echitso jilo lea eyilo onte Potsow ji thüngi n jonjiala. 11 Ochona nchümri lia, ekümrümo mekana woro jiang lona okyak likata a liyingcho sana hoji Potsow ji thüngi ontena n voala. 12 Ontena nzanchi chonala, tokhatola Potsow na onte n janlanala, ntiotssole onteno kangtsüa osi kyon n mhomden. 13 Ontena ekyao ji ethev n li; ntiotssole Thotsü Potsow na onte n hung osi onte n zoyi. 14 Job, nina Potsow n hung to phyoala; tokhatola erüm toa nhyaka, ni yi jiang ombona zoa vana. 15 Potsow na ezüp ni piala to nina nchümala, osi ombona mmen jo tata mmyinga n khia tsayia nina nchümala. 16 Nina oyi tae nsana mungo ji ntia ethev n li ka; nina ntio phyoasana nibobo n tsi to mmhona hungala.
1 Erüm toa esüngaro engalana ana Potsow thung tssoa phyov lio shiang enga vana. 3 A ntsinran jo ngazoa; ana ntio ntsiana ji phyovsala osi a joyingpvüo Potsow jo ntsa to ejüvsala. 4 Ana ntio ni ezoa sana ejüng njü; nina ni mhadungo na ntsinran kyon na ni jana hunguka. 5 Potsow jo kvüta etho jüchola! Ombona ochia n. khaksiala; osi ombona n ngathecho ntia n li. 6 Ombona mmen kyon jiang n vanthuk hungala, osi ombona yuta topvülo ezüp kyon jiang ntsa lona sala. 7 Ochoang na ntsanrüka sana jiang ombona nkohala; ombona onte ji mesaeden esüa sathukala osi kümali onte mying lia yikrachithukkala. 8 Tokhatola kyon jiang yonjakzhü na shena tssona, osi onte elhi man ezüpthukna, 9 Potsow na onte kangtsü mmen ji onte ejüala. 10 Ombona mmen lona kholanle to onte ezoji onte engathuk hungala. 11 Ontena Potsow yi enga ombo benkana, onte eküm jiang noying emathalo vanchukchiala. 12 Tokhatola hojito mekana, onte ji ntia n tsiv jilona onte chüi siv osi echüli eyilani zhükhfü ji pankae rheyiv. 13 Potsow n tsio kyon jiang na lüm tsuka tae vanala, osi ezüp picho tia nzanchile to n randanala. 14 Onteno nunghothüng na chüi siala, ekümo yikra nungra na epyimtsüngi chüala. 15 Tokhatola Potsow na ezüp yakchia kyon püngnoala osi nungra yakchia omhyik onte pochiyiala. 16 Potsow na ezüp yakchia ni sochecho, osi noyingi tsanchoe ni vanthukkala; ni tssisa jo etsoyu taena pyingkachicho. 17 Tokhatola enhüngajo ni jokheman ephan ni ezüpthukala. 18 Ekhüp khi ni n jithechithukvü ntangshona vana, mekana ejüeli na ni ti yesothuka. 19 Nina nzanchi yana kyalea ntia mek; ni etho topvüna lea enhungo ni n zanchiche. 20 Zümo ji eyiv tiyiloa, jipo jiang emom zümoji yile to ti yiloa. 21 Mmen elhilo n rheyiv ntangshona; ni ezüp shijo hojilo na ni nkachwothukvü rothukcho. 22 Potsow etho jo kvüta tsüphochosana nchümi zeta; ombo topvü pono püngnoe tsüphotso ji. 23 Ochina ha kvüto elhiv sana Potsow n zokhuk mekana mmen elhi ntana ombo n lan n piche. 24 Ombona elhio jiang tsükona yuta topvülo ombo thünga; niha yuta topvülo ombo thünga. 25 Ombona elhio jiang otsük akvüna hungthaka; tokhatola ochina ha hojiang n tsikhan. 26 Etena ombo tsüpho ji n tsirache mekana ombo harishi nzyu ji n khayiche. 27 Potsow na likoe na ojü khichetala osi eryujü onte kümthukala. 28 Ombona eryu jiang elukina jothukala osi kyon topvülo jokathukala. 29 Eluk jiang na kvüto rümphia sana ochina n tsi, mekana Potsow vanphen oyaki na tharak won tsso jiang kvütoli tssoa sana ochinaha n tsi. 30 Ombona oyak topvü lona tsüngjo mi nlüpthukala, tokhatola jümang ejungi jo to müngpvü vanala. 31 Potsow na hojitoli kyon jiang süphiala osi etsoyu pvülyua piala. 32 Ombona ombo khena tharak ji rhümae siala osi kvülo tharakthukvü sana jilo owo rhakthukala. 33 Tharak won jina tsungryu tsata to ntsithukala, osi tssiro mangsü jiang na hoji tsata to ntsiala.
1 Tsungryu jina a lümbüm ji ekhyingkata echithukala. 2 Nte topvüna Potsow won ji engatava, ombo püngina tharak won chiyio won ji engatava. 3 Ombona tharak won ji woyak shi chyunrhüa, limha nken phukowoe na phukowoe yithukala. 4 Jitosi ombona ejenlongo won ji zoala, osi pfütssomo tharak won tssosi jitopvü tsüngjo mi ji nlüpala. 5 Potsow yizüng lona e ngangcheo elhi tssoa yiala, osi etena n ngathekhuko emhokthav elhi tssoala. 6 Ombona ronren jiang ezoa limhalo jothukala, osi eryupvü jiang na ojü tünga jothukala. 7 Ombona kyon elhi jiang esaniala; osi ombona ntio elhi tssokhukcho sana hoji onte thüngi ejüala. 8 Orae ekümrümo jiang na onte shüpi rheyiala. 9 Tsungrhyu ezhü ji jüjowoe na yiala, osi zeena mmyimo ezhü jijo jükiwoe na jeyiala. 10 Potsow ethük na ojü jiang kholungthukala, osi sherhyu lung kümthukala. 11 Tsüngjo mi ji elukina nlüpala, 12 osi Potsow lüm erüng ephan nlüpala. Ontena Potsow yizüng ephan tae nkanphiala, limha nken topvü lona hojito tssoala. 13 Potsow na liko ji etsom eryu jothukala; ombona kyon ezüp piv ha jothukala, mekana onte emathayicho to ejoe naha jothukala. 14 Job, esüngaro esani engasa, Potsow na emhukthao elhi tsso shiang nchümi zeta. 15 Potsow na kvüto yizüng piasana nina tsintsi osi tsüngjo mi elukona nlüpthuko jiang nina ntsicho alo? 16 Eluk jiang na kvütoli oyaki rümphia sana nina ntsicho alo, osi Potsow e ngangcheo elhi ji nina ntsicho alo? 17 Mek, jüjo ezhü jina limha jilo echükathüng nino etsso jina ni ezüpo ji tae tssov. 18 Nina Potsow nzanchia oyak ji ephyanthuki oyak ji yonjak ntssae vacho esüa khünga kümthukchecho alo? 19 Etena kvüto Potsow janlam sana e zoa; e lümbüm jo eyukcho, osi ena ntio phyov sana n tsi. 20 Ana jo Potsow thüngi thyutav n chon; ntioli ana a bobo a yesowo yuta ombo pivla? 21 Enhüngajo oyaki wondang ji tüngra tsüala, etena n zekhukvü erazhüa tüv; osi oyak ji mpato ezhü na echüki ntssungthukthaka. 22 Jükiwoe jo shona wondang to hungala, osi Potsow pfütsson na e pyingi e razhüa yiala. 23 Potsow etho jo elümoto tsüpho jina etena ombo ndüngo n roche; ombona kyon thüngi elhi tssoathüng ntsa osi elan lona tssoala. 24 To tsso jina otsük akvüna rangsüa ombo mhadungo phanthiala, osi ochoangna ntsinran lia to nchümasana ombona engoe n zechiala.
OPVÃœI na Job Janlanala
1 Tosi OPVÜI na tsungryu lungina Job thüngi ezocho. [OPVÜI yi] 2 Nino ocho yila a ntsinran lona methako ji ekhiranala, ni eyimtsari yijüng khi ekhiranala? 3 Enhungo kyon esüa phanthia osi ana ni engao shiang jani ana. 4 Ana limha ji liyingathüng nina vancho alo? Nina elümoto ntsicho tssona hoji yilan azoa. 5 Limha ji kvütera tssovsana ochona methakchola? Ochona hoji poni etsiphen-zhü ji tssüngi zechola? Nina janlan jiang topvü ntsiracho alo? 6 Liko shi tsenkachio durhyu jiango ntio na sayatala? Ochona limha shi nkeni lungpvü jiang chümchola? 7 Hoji tsüngon ji wonchiathüng shantio jiangna okhen dentacho, osi potsüwoe choro shantio jiangna longshia tüngkachitacho. 8 Ochona jümang ji tünglanchiv khalanchichola? Jümang jina liko bukchongina bukrhübi chiyiathüng ji? 9 Jümang ji eluk na eyukoji ana osi emüng na eyukthuko jiha ana. 10 Ana jümang ji erülanchicho osi kharo theta khanlanchi sicho. H Ana heto ezocho, "Hoji nandang tae, osi konkata tiyia! Ni jükyo etho ji shilona esana." 12 Job, nina ni ekümona kvüthüng ha wonchileto yizüng bepihan? 13 Nina tsüngon wondang ji ezoa liko ji tssüngyathukthakcho alo? osi nthae jiang onte mpho vanpheni na phanrothakcho alo? 14 Tsüngon wondang jina phunglan osi hayi jiang chancheta hungthukala, mpensü chüpchoto osi ochon lo chekav ejüpkachoto ntssünga hungthukala. 15 N thae jiang tsükona jo tsüngon wondang jijo elümoto rayatia ondanga osi onte jenbukta elhi jiang etssov khetsüala. 16 Nina jümang chungi jükvü ji hungthakcho alo? Nina jümang ji lazae sanphi zethakcho alo? 17 Ochona sana kvüthüng sana echüli müngterüpo khanlanchiphen kibüng ji ni ejüthakcho alo? 18 Limha shi kvüta tsüphocho sana nina tara tia esürhakcho alo? Nina ntsina a janlana. 19 Kvülona wondang chiyia sana nina ntsicho alo mekana emüng chiyiphen ji ntsicho alo? 20 Ontena kvütenhya yiv sana nina onte ejükhukcho alo, mekana kholani onte yithukchecho alo? 21 Ana longtsüala nina tssocheta, ntiotssole nino elümoto ni sonthaka osi niji limha liyingathüng ha vancho tssov! 22 Ana sheryu osi ronren vao meta ji, nina hungthakcho alo? 23 Ana hojiang ji ezüp yutalo echi methaki vatala, osi rota ori tssota to yutalo echi vatala. 24 Eng jina kvülona chiroa sana meta jilo nina othakcho alo, mekana engkhvü ezhü bukphen ji hungthakcho alo? 25 Ochona eryu joji sochilan nrhüchola mekana tsungryu ji ochona olan wonia yithukchola? 26 Eryu ji kyon ochia n van metae jothuko ji ochonala? 27 Ochona likying meta jilo ojü etsonala, osi ochona hoji lona ero chenchethukala? 28 Eryu jina osi yentsso jina opo vancho alo? 29 Sherhyu osi yentsso ji oyo jo ochola? 30 Ochona ojü ji olung kümthukala osi jümang pon ji ochona shüngzhüthukchola? 31 Nina shantio tsirophamo jiang khüngtsüchecho alo mekana odung ejümo to tsao shantio jiang sayao ji lanphechecho alo? 32 Nina shantio jiang oküm nzyu akvü sophichecho alo mekana shantiruk mphen terio osi tsüpho jiang sochecho alo? 33 Nina oyak shi saya shikhfü ji ntsicho alo osi nina hojiang shikhfü ji limha shilo tsütsachecho alo? 34 Nina eluk jiang thüngi tüngkachia yizüng pi onte khi eryu jothuki ni lakthukchecho alo? 35 Nina potsüo nlüpato yizüng pile, jina ni thüngi oro heto ni zov, "Ni benka elhi alo'? 36 Nile zhükhvfü ji phyonchüv ochona Ibis oro ji ezochola, mekana eryu ejov ochona hanpung ji ezochola? 37 Ochona ntsinran li eluk ji khachechola, osi onte janphyathuki eryu jwothukvüla, 38 osi makvüro jiang ekhüügu kümthuku eryu jiang jwothukvüla? 39 Ntena hengho ji etsoyu yani pichecho alo, osi hinghoro wontona vamo jiang wonton bükichecho alo? 40 Ontena longkvüi na mphoathüng osi onte vanpheni na pyima nhyakathüng? 41 Ochona kashak jiang süphiala? Onte wontona pyaphita onte ro eniro jiang na a thüngi ojak chona erontathüng?
1 Tsiyo jiang kvüthüng nroasana nina ntsicho alo? osi siano jiang nroathüng nina hungthakcho alo? 2 Ontena onte ro jiang kvütenhya hana sana nina tsintsi? osi onte nro yuta. ji nina ntsicho alo? 3 Ontena kvüthüng nkhok tseni onte ro jiang nrov sana nina ntsicho alo? 4 Orae na onte ro jiang etho jüa rankatala; ontena yi sithakana n yilanala. 5 Ochona ora Gadho jiang onte etancho etssov pichola? Ochona onte vachi sanphithukcho la? 6 Ana lijüng jiang onte ki tssoa piala, osi oma hayi jiang lo onte vanthukala. 7 Ontena yantsüi onlahtaro jiang nkachoa vanala, osi ochinaha onte ji thae elhi n tssothukche. 8 Phunglan jiango onte yantsophen tssoala, osi hojiariglo ontena lomo mmyako jiang topvü yani tsoala. 9 Ora mangsübung jina elhi ni tssoyiv alo? Ombona ni ranki eyipvü chokav alo? 10 Nina onte yolo motsünga sheni bensi oli elhi tssothukchev alo? mekana nili lirhonphen süv alo? 11 Nina ombo etho ejülo enhyikae ni elhi mmyingu jiang ni tssoyiv to eyiloa alo? 12 Ni lirilo ombona ni nzanchiv to nina eyiloa alo? osi ni litsenpheni otssuk jiang ni hantheyithukvü alo? 13 Jüoro tsüpho ji. echo jiang na kvüta ekhyinga echonphicheta! Tokhatola jüworo tsüpho najo jüworo esüa n pyachetala. 14 Jüoro tsüpho jiang na ombo ejü ji likoe vatala osi liko etsso jina shüpthukala. 15 Ojona sümrovka to ombona n tsi mekana ora ekümo na sümrov to n tsiala. 16 Ejü jiang ombo ejü mekchoto elhiala, osi ombo sangcho man ji moni esiv n wonkhyuala 17 Ana omboji zhüvae esüa liyingcho osi ntsinran ombo n picho. 18 Tokhatola ompvü na yungana ompvü na kurü jilo tsankae jianglea emakakhuka. 19 Job, kurü etho jüa liyingo ji nina alo? osi nina onte vüngtssan zoncho ji nsüngrükayicho alo? 20 Nina onte ji khomung to tsukthuka alo osi onte erhe won na kyon ekhenthuka alo? 21 Ontena hayi jianglo liko jiang emathata tsseroala; osi onte etho topvü theta ritssolo woala. 22 Ontena ekyu jo ntio sana n tsi, osi nti yonrina ha onte n tanglanchiche. 23 Onte pono tsankao jiang ebensü lo rakae nlüpa süyangtala. 24 Ekhenlung lona eneta kurü jiangna mhadungoe yungtala; tatara jiang khfüa na kurü jiangna mangi n vanche. 25 Tatara jiang emhvü akvü ontena erhetala; ontena ritssophen n janthüngna orhüm zoala, osi tsüphoe jiangna yizüng pio won jiang ovüngna zoala. 26 Mungshiro jina ombo echo ji jüjowoe ephyanchochi epyav ni thüngina shikacho alo? 27 Müngtsov jina phunglan ntssoni oshüp etssov ji ni yi nhyaka alo? 28 Ombona süren ntssontsov lo oshüp tssoala osi yonton ntssomo ji ombo tsanthephen tssoala. 29 Hojilo na ombona ntio rumi tsorhakvü ato to ekoni osi enhyano topvü cheta vanala. 30 Müngtsov jiangna echümüng hanphiana sanrhyutala, osi müngtsov woro jiangna ejep jiang yutala.
1 Job, nina Thotsü Potsow nocho alo; Enhungo nina tae tssov alo, toalo janlan pivla? [Job yi] 3-4 Ana zhüva nsanthaka, OPVÜI, aiyo kvüto janlamla? Ana thanpo ntia nsam ekhyo n tsso. 5 Ana n phyo tüv mpato phyokhanthaka. 6 Tole OPVÜI na elani tsungryu lungina Job thüngi heto janlancho. [OPVÜI yi] 7 Enhungo kyon esüa phanthi a janlana. 8 Aiyo n tsanrük to nina a zechev ekhyo tssoa alo? aiyo n lan to atssothuksi nino elan to ejüvsa alo? 9 Nino a esüa etho ejüi alo? Nina a tharakon ji a esüa ekhyoto tharakthukchecho alo? 10 To tssona, ni etho echhana phanthia; Nipopo pfütsson myingthüngna pipoa. 11 Kangtsüi jiang zeta osi ni lüm etsuk onte lo hankata teriv onte kümthuka. 12 Ho, onte zeta osi onte tssüngchoa; osi nthae jiang onte vanpheni na roe onte sia. 13 Onte topvü likoe shothe sia; osi echü limhae sheni onte sia. 14 Tona ana ni thanthüngdem ka osi nina khyocho to ni chekayivka. 15 Thojüi Behemoth ji zeta; ana ombo joyingcho osi niha ana ni joyingcho. 16 Tolea ombo tsüko ntio etho jüchola, osi ombo sozü jianglo ntio etho jüchola! 17 Ombo emhi ji cedar esüa ndungala, osi ombo jo jianglo etho jiango khyunga. 18 Ombo ryu jiangjo yongmen to khyunga, osi ombo jo jiango yonjak to khyunga. 19 Ana liyingcho yulo emhuktso jijo shi! Ombo joyingpvüo taena ombo khyokhuka. 20 Ero jiangna ombo tswothukvü phunglan jianglo ekümrüm tsukphitaphen jianglo zala. 21 Ombona okyo rhyulo yipkachiala, osi nhyayo lo tijüngyo jiang lo yipala. 22 Zhükhfü tssalo okyo rhyu osi eroyo jiang na khümcho onte piala. 23 Ombona ojü tssona etsüo zhükhfü ji n kyuala; osi Jordan zhükhfü na ombo mhalo tsükayi leha yingto vanala. 24 Ochona ombo mhyik jiang eyuki ombo rhümachevla? mekana ochona ombo menshung lona tsirhi khi sathukchechola?
1 Nina jüpvüo ji ngoldifü na ejiyakhukcho alo mekana ombo nli ji wozhü na phani vaehecho alo? 2 Nina ombo menshung jüwo wozhü fuktheyichev alo mekana kanryu jilo okhfü yitheyichev alo? 3 Ombona ni thüngina ombo tsanthukle to chom alo? mekana ombona ni thüngi khonzan chom alo? 4 Ombona nithüngi ntsatae vasi eküm echung ni benkav alo? 5 Nina woro ekümcho to sheni ombo vaehecho alo, mekana ni phajae eloeroro emathaphen ombo tssothukehecho alo? 6 Ngorüm jiang na ombo thüngi ejienichev alo? , mekana shishoe na ombo noni yenchecho alo? 7 Nina ombo fü ji ngorüm tsso na chenrhüpchev alo mekana zhü-tsso na ombo kvüri ji lenrhüpichev alo? 8 Echunga ombo evüngkae zeta, tona nina kvüthüngha ombo evüngkalan hungu meka; osi nini rota ji kvüthüngha mhechov meka! 9 Jüpvüo ehung ochinaha lümbüm n tssonkhukala osi likoe vanthe siala. 10 Ombo shichetana ekhenthao karüngala; osi ochinaha ombo n zalanchikhukala. 11 Ochona ombo sakasi ekhüm vanlanchevla? Limha shilo ochinaha n tssoche. 12 Jüpvüo jiango kvüta tsüphocho sana osi ombo etho kvüta jücho sana ana eroroe ni zovka. 13 Kyon ochinaha ombo ofü opomo ji n shaki-khuk mekana ombo tsüko tanglanchiphen ekhyingo jiang ochinaha n rorhüpche 14 Ochona ombo büng kosothukchecho la, ombo büng ekhenthao oho na renzhüo ji? 15 Ombo mankvü jo otsung na khüpzhücho, otsung jiang chüngtsüi olung to khüngthukcho. 16 Otsung jiang elümoto khünga züptae khicho, osi yuta topvülo ezhü tia n venthe. 17 Onte ji khünga züptae khio jina nti-naha Kvüthüngha onte nraksoche. 18 Ombona haktssiana omi nlüpala, osi ombo mhyik jiang eng chiroa vancho esüa tüngrala. 19 Ombo büngina omi mmyo evakphiala, osi miron shajoa haktssichokchiala. 20 Ombo kheno kvüi na miphung chiyiala, opfü lo ero hanthe runga to phungala. 21 Ombo ethük na omi mhüchetala; osi obüngina mimyo e vakchukchiala. 22 Ombo evüng jo elümoto etho jüa osi ombo nduko jiang topvü ekhentsüngala. 23 Ombo fü jilo poro tüv n jü; elümoto khünga n lenrhüpche osi yonjak tüv. 24 Ombo olung lümbüm jilo ekyu n jü, osi oyam n kachi osi hümchen-long to khünga. 25 Ombona phanthiana, etho ejütso jiang lea ekhenala; osi ekyu lona onte ekhentsüngala. 26 Ombo meyamo tüv yonri kvüloha n li; ombo meyamo otsso mekana lotssi osi otssi n li. 27 Ombo tsükona jo yonjak lia mavü to enyipa, osi yongmen yonjak jo tssüngkyon to enyipa. 28 Nti lotssi na ha ombo n tsanthukche; ombo ephyao lung jo mvükyoro esüa totae. 29 Ombo tsükona jo erhüphen jiango mavü tüv, osi kyon na otsso na ombo chhena na ematala. 30 Ombo mman lo ngolüp jiango ophfülo thera jokacho tüv; hojiang na liko ji lirhonphen na rhona to rhonsochia sanphiala. 31 Ombona jümang ji ojü elaka to nkhüphithukala osi thyujü phfü esüa tsyuthukala. 32 Ombona yakphiana jümang poni ehümvü sünga ojü evakrhüpa yiala. 33 Limha shilo ntia ombo lo ejyutao tüv n li; Ombo ekyu n jüwo ekümrümo. 34 Ombona eküngtso ekümrümo ji lea zerüpala; Osi ombo ekümrüm topvü pono ekhüng ji.
1 Tole Job na OPVÜI janlancho. [Job yi] 2 OPVÜI, nino etho ejütso ji to ana ntsia; osi nina ni tssohungo jiang topvü tssocheta to ana ntsia. 3 Ana ntia n tsina ntioli ni ntsinran jiang lo phyocho phyoria sana to nina a engala. Ana n tsio tüv motsü ana phyoa vancho, osi a tsükona ekhenthao, emhuko tüv motsü phyoa vancho. 4 Nina nsanathüng enga vansi ni janlanle to nina a zocho. 5 Tole aiyo oyam na azo jiang tae ntsia vancho, tokhatola enhungo ana a mhyik na ni hungthaka. 6 Hoji tsükona ana ntio phyothakcho sana jiang topvü tsükona a yikrala osi ana livero shakata khophiala.
Thakchi Yi
7 OPVÜI na Job thüngi nsancho sülo, ombona Eliphaz thüngi heto ezolancho, "Ana ni thüngi osi ni shom otsük eni jiang thüngi a lüm tsukala, ntiotssole nini na a tsükona ntsa n phyo, a phajae Job na ntsa phyoji esüa n phyocho. 8 Hojitsükona tssibung tiying tona olyubung tiying to hansi Job thüngi owo nte nthoche than pitava. Job na nte randanivka osi ana ombo randan engayivka, osi ntena ezüp ehungu lioji nte ezüpthukvü meka. Job na ntsa phyoji esüa ntena a tsükona ntsa n phyocho." 9 Tole Eliphaz, Bildad, tona Zophar to na OPVÜI na ezoji ephan tssocho, osi OPVÜI na Job randan ji engayicho. 10 Job na ombo shom otsük ethüm ji tsükona randanicho sülo OPVÜI na Job ji mmhayilancho osi ovüngthüng ombona lio jitata eni pilancho. 11 Job ojenio osi oyuloe topvü osi ombo yenki ehen topvü na oro ombo nduki Job kina tokhu khitacho. Ontena ombo tsükona nungrayio ji ombo ezota OPVÜI na ezüp ombo pio jiang topvü tsükona ombo ejichotacho. Onte otsük akvüna orang tara tara tona shona yingrüm to ombo piracho. 12 OPVÜI na Job eküm wokhao jiwoe jo mmhayicho, ovüngthüng ombona mmhayio jilona kyungkata mmhayicho. Job na olyu wothüng taro mezhü, Ut wothüng tiruk, mangsü wothüng eni tona gadho wothüng motsünga to ekümchelancho. 13 Ombo tsokhying tiying tona tsolo ethüm to vancho. 14 Ombona tsolo erantso ji Jemimah to tsacho, enioto ji Keziah, osi wokhaotso ji Keren Happuch to tsacho. 15 Limhatsü lo Job otsolov jiang opyon mmhona tüv ochia n vancho. Onte opona onte pyae jiang esüa tssentso onte chinhyacho. 16 Job na hoji sülo nzyu nzoasi zhüro vanlancho, osi ombo rüi osi orüi jiang tsoe jana hungjana harishia sona vancho. 17 Jisülo jo elümoto harishia sona vansi ombo chücho.
Ematha Tsotso Ji
1 Kyon n mhon jiang ndungntssung n khio jiang, mmen kyon jiang ejyu-esü n khio jiang, osi Potsow mhadungo ethev n lio jiang, mekana Potsow na n tsütsao jiang nzo n tsso osi n phanphio jiang ematha elitso. 2 Jithüngina jo kyon mmhom jiang jo OPVÜI shikhfü jiang benphiv lo longshiala; osi ontena hojiang ji zümo eng khatala. 3 Onteno zhükhfü tsalo odung zae yuta eben no tssüngthi ethia, owo n vüna vamo jiang, esüa ontena ntio tssoa sana topvülo mmhom tssochetala. 4 Khatola kyon n mhon jiango kvüthüng ha hojitüv mek; Onteno mbungna vena eyio mvükyoro jiang esüa tüv. 5 Mmen kyon jiango Potsow na khoe siv; Osi Potsow kyon jiang lona khotae vanthokvü. 6 Ntsanrük kyon jiango OPVÜI na olan soa nkohav, Tolea kyon n mhon jiang jo emon lamoe yia vana.
Potsow na Ethüngcheo Mesao
1 Jipo jiangna ntioli panlan methakala? Osi kyon jiangna ntioli ethev n lio tüv kyaktala? 2 Onte mesao jiangna panlanala; osi onte esopvüi jiangna OPVÜI ryulanchiv osi OPVÜI na ethüngcheo mesao ji panlam lo nzo tssoala. 3 "Etena onte khelo mekna etancholo vantavkalo" to ontena phyotala. osi onte etho ji khi siyivkalo to phyotala. 4 OPVÜI na Potsüwoe ombo vantsü lo vani, onte kyakrüm jianglo emakayiala. 5 Osi ombona lüm etsuk yivon onte pia ekhenthukala. 6 "Oh a ntho phunglan Zion," "a mesao ji ana vanthukchoka." to ombona phyoala; 7 "OPVÜI na ntio phyoa sana ji ana tüngchovka." to mesao jina phyoala. "Ombona heto a ezocho, 'Nino a tsoe: Nchüngna aiyo nipo kümthaka. 8 Nina chona, tona ana jipo topvü ni pivka; limha shiha ni echi tssovka. 9 Nina yonjak jarung khi onte erhüpvü; Osi nina chonphfü esüa onte vanrothokvü.' " 10 Ekyu yivon shi engatava, mesaeden; osi limhalo yansaeden, shi engathe khitava. 11 OPVÜI ji kyua benkatava; 12 Ombo mhadungo eneta epyakthetava; to mekana ombo lüm etsuk ji zakto chiyiv osi nte ji zaktole nte chürav. Ochoangna ombo nkoha yana woana jiang ematha elio tssov.
Nzanchi Tsükona Enyathüng Randan
1 A ri khosha vana, OPVÜI, A pono phanthi khosha vana. 2 Ontena a motsü ruta heto phyotala, "Potsow na ombo kyov meka." 3 Tolea OPVÜI, nino yuta topvülo ekyusü lo a tsung; nina ekhyo a pia osi a lüm a tssonkayiala. 4 Ana OPVÜI khi a kyochithukvü tsaphiala, Tona ombona ntho phunglani na a janlanala. 5 Ana erikachi yipala, osi OPVÜI na zümo tona a nhyakala. 6 A ri wothüng wothüng na nken akvü tssoe a hazhüo ji a n kyuala. 7 Roa OPVÜI! a shanchoa a Potsow! Nina a ri jiang topvü ezüp pia osi etho onte monia a n meyan thukala. 8 Ekhyo ji OPVÜI thüngina yiala – ombo khi ombo kyon jiang mmhayitoka.
Nzanchi Tsükona Mmyui Randan
1 O a nkohapvüi Potsow, ana randanaka a janlana! Ana ezüpi vanathüng, nina a kyocho, Elani a nzana osi a randan a janlancho. 2 Kyonden ntena kvütenhya a makavla? Ntena kvütenhya ethev n lio jiang jüponta, osi ejüng jiang yantavla? 3 OPVÜI na ntsanrük kyon ji ombo echi tssov ethüngchecho to ntsi khitava, osi ana ombo thüngi jonjina ombona a engayiala. 4 Ekyu lona enetava osi mmen etssov esantava; yitsük shi ntena noyinga belüngi erikachi vanathüng jonga nchümi zetava. 5 Elan elio than jiang OPVÜI thana, osi nte longtsü ombolo vatava. 6 Kyon elümotona heto randanala; "Mmha kyungkata e pia OPVÜI. Nzanka to tssoa e zekata." 7 Tokhatola nina longshi a pithako jijo ontena onte etsov-eyuv theta longshitao jilo na kyungkata. 8 Ana yipkachiana noyinga yipa yiala; OPVÜI, ni taena noying jüngthe a pikhuka.
Nkoho Tsükona Randan
1 A yi shiang a engayia, OPVÜI, osi ana emhemo shiang a zoyia. 2 Ana nzanchi tsükona erokachio ji a engayia a Potsow osi a mesao! To ana randanala, OPVÜI. 3 Nina enyathüng a randan a engayia; eng chiroa na ana randansi ni janlan ji nhyakala. 4 Nino silyuo elhi na ni emathao Potsow mek; nina ni vanhyalo jo n mhom ni n lithuk hungala. 5 Kangtsüi kyon jiang nina n zekhukala; osi nthae kyon jiang ni tssakala. 6 N tsae topvü nina monthukala osi haruka oyam kyakthechi jiang nina tssakala. 7 Tolea ni nzan tsüphov ji tsükona ana ni ki rokhukala; Ana ni ntho khümpheni rhoro ni Khümkhuka, osi ni yikrachia epyakthekuka. 8 OPVÜI, a ri elümoto vana! Ni lüm erüngo a tssothuka; ni lamoe sanphiv tsükona olan a nsakia. 9 A ri jiangna ephyo ji kvüthüngha n longtsükakhuk; Onteno monthukvü tae chokatala. Onte yi jiangjo jikarükayi osi enyipa khatola echülo ekyakthechio tae. 10 N lan onte pia ezüpthuka, Potsow; onte kyak lo onte rhethuka. Ontena mmen kyunga tssoa osi ni panlamo jiang tsükona ni vanhya lona onte phanchukchia. 11 Tokhatola ni nkoha lo evan jiango longshiv; ontena yuta topvü lo longshia okhen denkuka. Ni nzamo kyon jiango nkocheta, ni tsükona otsotso onte emathatala. 12 Ni yi engae jiang nina mmhayiala, OPVÜI; Ni nzan jina otsung esüa onte nkohoala.
Ezüp Yutalo Nzanchi Tsükona Randan
1 OPVÜI, ni lüm tsuka a ti maka! Ni lüm etsukona a ti khanshia! 2 A laphyathaka OPVÜI, khonzanka to a tssoyia! A mmoktsüngthaka, etho a pia 3 a eküm totona ryusangala, OPVÜI; Nina kvütenhyaka tssosi a nzanchiv sala? 4 Oro a shanchoa, OPVÜI; Ni khonzan khi echü lona ashanchoa. 5 Echüli najo ni nchümchev mek; hoji lona jo ochinaha ni n thüngche. 6 Aiyo nongra lona a laphyathaka; zümo akvü esüna a belüng lakala; a nkhüm jiha esüjü na rethaka. 7 A ri jiangna akyathuko jina a mhyik shiang pümkhani ntia n hungu sithaka. 8 A thüngina tsantava, kyon n mhonden! OPVÜI na a ekya ji zoala; 9 Ana a nzanchile to tüngkachio ji ombona enga vanala, osi ombona a randan a engayiv. 10 A ri jiang ji yikra khia khyothechithuko ji ontena ntsiv; esüngaro ethunglongtacho taena onte ji phanthechikhani siv.
Ntsanrük Tsükona Randan
1 OPVÜI a Potsow, ana ni tsankalo ni yana roala; a phana vamo jiang khelona a phanchoe a shanchoa, 2 to n tssona ontena hingho esüa a rhümae, ochinaha a n shanchojamo metae na oyi npvüroe a siv. 3-4 OPVÜI, a Potsow, ana ochosana tachicho lina, osi a shom ejithechicho lina mekana n lamo lona a ri jiang tssatssocho lina – osi ana shiang tssocho lina – 5 tona a ri jiang khi a phani a rhümathuka, onte khi a lüngthae likoe echü ekachi asithuka! 6 Lüm tsuka phanthia, OPVÜI! A ri jiang lüm etsyu ji ryulanchia; nina phanthi a kyoa! 7 Nina ntsanrük ji yanala, jitsükona kyon topvü ni hungjano sarhyuthuki, nina omhawoe na onte sayata. 8 Nino limhalo kyontsü yitssopvüi ji, jitsükona a thüngoe theta oyi atssoyia, OPVÜI; aiyo eyingroe kyon to nina ntsia. 9 Nina ntsanrük Potsow osi e nchümri osi choka longshi jiang füi ezeyila. Kyon n mhon ntha elhi jiang esania osi mmhomo jiango yantsoa. 10 Potsow jo a nkohapvüi; omboyi engae jiang ombona shanchoala. 11 Potsow jo ntsa yitssoe jitsükona ombona nthae jiang yuta topvü lo nlan piala. 12 Ontena lümbüm n khophia tssona, Potsow na ombo yonri ji ehev: Ombona lotssi ji khüngi kov sala; 13 ombona echüo ebensü ji tsakatala osi ombo omi lotssi ji etsia vana. 14 Nthae jiangna n mhom nchümta vamo ji zeta; ontena ezüp chiyithukvü kyaktala osi ejithechi elhi tssotala. 15 Tokhatola ontena oyam vayio tsirhi jilona onte salanala. 16 Jitsükona onte n mhon jina onte ezüpthukala osi onte jenpuknipuk elhi jiangna onte jneyanala. 17 OPVÜI ntsanrük ji tsükona ana montsso ombo piala, ana ntssontso OPVÜI myingthüng khen denala.
Potsow Phfütsson Osi Kyon Myingtsson
1 O OPVÜI, e OPVÜI, ni etho tsüpho ji limha toto lona hungala! Ni myingthüng jina potsüo etssungala; 2 nungori osi nganiro jiangna ni thünga dentala. Nino ni ri jiang topvü thüngina tsanchoa nkocheta vanala. 3 Nina joyingo oyak shi ana zekachiana, choro osi shantio nina chümkarae elio shiang ana zena – 4 Kyon jo ntiola nina ombo tsükona hetata nchümato; osi kyonshae ji tsükona nina wongkhyuato? 5 Tolea nina omboji ni lona tara süjoa tae liyingcho; nina phfütsson myingthüng khi ombo kikhothukcho. 6 Nina ombo ji ni liyingcho topvü pono esapvüi tssothukcho; osi ni liyingcho topvü poni ombo vanthukcho: 7 Olyu, mangsü osi orae ekümrümo topvü poni; 8 woro jiang osi ongo jiang, osi jümangi ekümrüm topvü pomoe ombo vanthukcho. 9 O, OPVÜI, e OPVÜI, Ni etho tsüpho ji limha topvü lona hungala.
Ombo Ntsanrük Ji Tsükona Potsow Montsso Epi
1 OPVÜI, a lümbüm totona ana ni thüngu; Nina emhokthav elhi tssothako jiang topvü ana ezov. 2 Ni tsükona ana longshia okhen demvü. Ana myingthüng khen ni denkav, Thotsü Potsow. 3 Nina kvüthüng chiroa sana a ri jiangna kholanaia; Osi ontena evümtherae chüala. 4 Nino ntsa osi elan lona oyi tssoyiala; osi nina athüngoe theta tssothaka. 5 Nina n longtsüi jiang nlan pithaka, osi nthae jiang monthukthaka; Onteno elani nchümchelam mek. 6 Eri jiango kümali tsükona monthaka; Nina onte yantsü jiang rothaka, Osi onteno mhecholangi sithaka. 7 Tokhatola OPVÜI jo kümali tsükona mesao; Ombona yitsso tsükona ombo vantsü ronthaka. 8 Ombona ntsanrük lona limha sala; osi ombona ntsanrük lona jipo jiang oyi tssoyiala. 9 OPVÜI jo oyam na khangshio jiang tsankaphen, ezüp yutalo tsanchophen ji. to OPVÜI, ni ntsiwo kyon jiangna ni longtsükav; osi ni yana eroe ochia nina n si. n Zion lona yansa rona vamo OPVÜI ji myingthüng khen dentava! Ombona ntio tssothakcho sana ji jipo akvüto ezoa! 12 Ochoangna ezüpa vancho sana jiang ji Potsow na nchümchetala; i Onte ekya won ji ombona n mhecho, onte tachio kyon jiang Potsow na ezüp piala. 13 Khonzan to a tssoyia O OPVÜI! Ari jiangna ezüp apio jiang zeta! Echü lona a shanchoa OPVÜI. 14 To tssona ana Jerusalem kyon jiang mhadungo mangkhuku, osi ana ntio tsükona ni thünga sana jiang topvü onte ezov. Osi nina a shancho ji tsükona ana longshiv. 15 N longtsüi jina sokvü jui jilo ombo vanthethaka, Onte kyako onte rhelanthaka. 16 OPVÜI na ombo ntsa yitsso ji yakchia ombobo ehungthukthaka, osi nthae jiango onte elhina ontebobo sathaka. 17 Echü jijo nthae osi Potsow n khichoe jiang topvü na ndukvü. is Nzanchi ethev elio jiang ji yuta topvülo mhechoe siv mek; Osi yantsae jiang eyilo ji moni siyiv mek. 19 OPVÜI, roa! Kyon khi ni n kha n ziv ni ti vanthuka! N longtsüi jiang ni mhadungo sosi chiyia, osi oyi onte tssoyia. 20 Onte kyuthuka, OPVÜI; osi onteno echüo kyondenka to onte ntsithuka.
Ntsanrük Tsükona Randan
1 OPVÜI, nino ntiolui tata ekoni vanchola? Ena ezüpi vanathüng ntiolui nino nibobo mphoala OPVÜI? 2 N thae jiango kangtsüiden, osi ontena yantsae jiang khangshiala, Ontena doni evao tsirhi jilona onte sathuka. 3 Nthae jijo ombo lüm erüng ji khi kangtsüa vanala; osi nkhyik-nrüng jijo rhiyia OPVÜI khaki sia vanala. 4 Nthae jina OPVÜI ji n ziphiala; osi ombo kangtsü lona Potsow jo ntia mek to nchümala. 5 N thae jina olan tarolo tsüka-rankatala. Ombona jo Potsow yitsso ji n ngathe; Ombona ombo ri jiang rhalanala. 6 Ombona phyoala, "Ana kvüthüngha ezüpi vamvü mek." 7 Ombo yi jiang topvü rhiyi-randan, ejüng, osi ekyuna pyingcho; ombo etssakthao yi osi n mhom jiang nsamvü lo thazakala. 8 Ombona oyan jianglo mhpoe vansi n lan n li kyon jiang lüngthav züma vanala; Osi ombona ombo jakdonphen kyon jiang chepyimala. 9 Ombona yantsae jiang züma vansi ombo tsirhi lona onte sathuki süsi yiala. 10 Ombo kyakthechiphen nzanchi n vamo jiang ji ombona bükroe onte siala osi kyakrüm n mhon jina onte khyothukala. 11 N thae jina ombobo phyoala. "Potsow na n wongkhyuka! ombo mhik ji jukthaka osi kvüthüngha ahungu mek!" 12 OPVÜI, n thae kyon ji khangshia! Ezüpa vamo jiang nchümcheta! 13 Kvütoli n thae kyon na Potsow tsakala osi ombobo, "Ombona a khangshiv mek, to phyokhukchola?" 14 Tolea nina hungala, ezüp osi nungra jiang nina hungala, osi yuta topvülo kyochiv tsükona methaki vanala. Nzanchiv ethev lio kyon jina nilo khochaki pia vanala, osi nina yuta topvülo ethev elio kyon jiang nzanala. 15 N thae osi n mhon kyon jiang etho ji roe siyia; Ontena ori jiang esani n sithüng nandang onte ezüpthuka. 16 OPVÜI jo kümali, kümali mesao. Ochoangna thampo. potsow khüma sana jiango ombo meta lona monrae siv; 17 OPVÜI, nina n bennzio. ji randan engayiv; Osi nina lüm etsson onte piv. 18 Opvüpoe nvan osi oyamna khangshio kyon jiangna erontao jiang nina zov; Nina onte thüngoe theta oyi tssov, to tssona echüv sekao kyon jiang na oyam ekhemo elhi tssolam mek.
OPVÜI lo Longtsüka
1 Ana tsancholan tsükona OPVÜI lo longtsükatala; Ni zhüva heto a ezoala, "oro esüa phunglan jianglo pya yi sia. 2 Ntiotssole n thae jiangna onte lotssi jiang khungrae emüngina kyon mmhom jianglo etsikarae vanthaka. 3 kvüthüng yuta n mhona sana kyon mmhom jiangna ntia n lyuchetala." 4 OPVÜI ji ombo ntho khümpheni vana; Ombona Potsüwoe ombo vantsü lia. Meta topvülo kyon jiangna ntio elhita sana ji ntsia cheta vanala. 5 Ombona mmhom jiha, n thae jiha ojang tssoe zetala; osi nthae jijo ombo lümbüm totona tssakala. 6 Ombona nthae jiang pono miron ekiv tona tsüngmünga kio misheryu to vachochiala; Osi tsungryuv ndav khi onte khangshiala. 7 OPVÜI jo ntsanrüka osi elhi mmhom jiang zehungala; Mmhom etssoe jiangna ombo hungjano vamvü.
Nzanchi tsükona randan
1 E nzanchia, OPVÜI! Kyon mmhom tsükatia n vamvü sithaka; Ntsanrük kyon n hungu sithaka. 2 Onte onte ejiphita, yikvüta osi kyakthechitala; 3 OPVÜI, oyam ejithechio nlyi jiang yingto vanthuka! Kangtsüa heto phyo jiang büng ji ntsüptayia. 4 "Ete yi tae na etena ejüpomo jiang hungala. Jitsükona etena ntio ephyohunga na ji phyotavka; Osi ochinha e n tangche." 5 Tolea OPVÜI na phyoala, "Enhungo ana rov" "Ntiotssole ezüpo jiang khangshitala, osi khangshio jina noa erhyuala. Ontena nhayktsüka evamo nkoho osi noying ji ana onte pivka." 6 OPVÜI echümchak yi jiango longtsüka khuka; Janti jiango yonjophenina yenjo tiying rithakcho esüa n jüma. 7-8 N thae jiang ji meta topvü lo vana, osi otsük akvüna ntio n mhoncho sana ji epitala. OPVÜI, yuta topvülo enkocheta. Osi hetüv kyon shiang thüngina e tsanchothuka.
Nzanchi tsükona Randan
1 OPVÜI, nina kvütenhya a mhechoa vamvüla? Kümali tssov alo? Nina a mhadungona kvütenhya mphoe vamvüla? 2 Ana kvütenhya ezüp rümpamla? Zümo eng nungra na pyingi khi kvütenhya vampamla? osi a ri jiang na kvütenhya a khyopamla? 3 OPVÜI, a Potsow, a zechia osi a janlana; a etho ji a theyilana osi a ti chüthoka. 4 A ri jiang khi, "Ena ombo khyothaka" to ti phyothuka. A sükhying joyiathüng onte ti longshithuka. 5 Ni nzan n senphio jilo ana enhikatala, osi nina a shanchov ji nchümi a emathatala. 6 OPVÜI, nina a thüngi mmhonthako ji tsükona ana ni thünga demvü.
Kyon Ntha Nri Ji
1 Zhüvae jiangna ontebobo "Potsow n van" to phyotala; Onte topvü ephyo-erüv mpae tae; ontena ekhenthao silyuo elhi tssothaka; Onte tsüka tia elan ji etssoe n jü. 2 OPVÜI na potsüwoe na kyon jiang pono, ochina nchümria lia kümi ombo khekhüma sana to zechochia vanala. 3 Khatola onte topvü orithaka; Onte topvü kheti n mhon. Onte yulo ochinaha elamo etssoe n jü. Tsükatia n van 4 OPVÜI na phyoala, "Ontena n tsichoke? N mhon etssoe jiang topvü ji ntia n tsiden ke?" Ontena akyon jiang retsoyia eküm vantala. Osi kvüthüngha athüngi n randan." 5 Tokhatola onte ekhentsüngthokvü ka, ntiotssole, Potsow jo ombo yi engae jiang thüngoe thetala. 6 N mhom etssoe jiangna noying kyon ji etüm ezi jiang yesoyiala; tokhatola Potsow jo ombo nkohapvüi. 7 Zion lona ekhyo ji Israel lo rothoku tsükona ana kvüta randanato. OPVÜI na elani tssochyu-mochyu lo onte vanthuklana na Israel jiango kvüta emathav ato!
Potsow na Ntio Ethev Lia
1 OPVÜI, ochona ni khümpheni rhorokhuka? 2 Ochona ni ntho phunglan Zion lona khümkhuka? Ochona olan topvülo OPVÜI yi enga na, Ochona yuta topvü lo elamo tssoa sana, 3 ochona oyi ntsa nsana osi tangjüngcho sana, osi ochona oyam ebüp n rüa sana ji taena. Ombona ombo shom jiang n tachiala osi ombo phinakiren jiang echi onbung yibunga n woala. 4 Potsow na khaki siwo jiang ombona tssakala, osi OPVÜI yi engae jiang ombona yikrachiala. i Ombona sükhying topvülo ! ombo phyochak yi jiang ephan tssoala. 5 Ombona eran n khiyina noala, osi nlan n lio kyon jiang pübthuko tüv silyuo ehungpvüi epi man ekhüp n khiala. Shiang esüa tsso jiango yuta topvülo ekyuv n li.
Lüm Etsson Randan
1 A nkocheta, O Potsow; Ana tsancholan tsükona ni lo longtsükatala. 2 Ana heto OPVÜI ezoala, "Nino a OPVÜI; ana mmhom licho topvü ni thüngi na yiala." 3 OPVÜI kyon longtsüka eli jiang mmhontsowo! topvülo a chokatsowo jijo onte nzo evam ji. 4 Potsow thanpo yana kyao jiangna ontebobo ezüp elümoto hansi yiala. Onte ekümrüm than jianglo ana okhe thev meka; osi onte Potsow jiang ana khümvü meka. 5 OPVÜI, a ejüeli jo ni, osi a ethelan topvü nina a piala; a mhadung jo ni khelo lia. 6 Nina yantso a pio jiango kvüta emhukthao ato; osi nino kvüta mmhoncho ato! 7 OPVÜI na olan a so jina ana ombo thüngala, osi zümothüng jo a kichuk na ntangshon yivon a piala. 8 OPVÜI na a ndüngo vanato ana yuta topvü lo ntsia; ombona enhyano vana, osi ntina ha a n kenphi. 9 Jitsükona ana montsso pia a longshiala osi a wonkhyu n liv vanala, 10 Ntiotssole nina echü ji etho lona a nkochetala. osi nina nzamo ji echüli khachoe n vanthuk. 11 Eküm lamoe eyilan ji nina a jüv; nina vamo jilo zekae longshina a pyingala. Osi emathana kümali a lüm pyingala. Osi ni khe amimoe evam ji kümali ematha lia.
N lan N lio Kyon Randan
1 Ntsanrük lithokvü tsükona ana randamo ji enga OPVÜI; A nzanchile to tüngo ji a engayia! Ana ntsa lona randamo ji a engayia. 2 Nina elan jo ntiosana ji ntsia, jitsükona nina athüngoe theta tssov. 3 Nina a lümbüm ji ntsia. Nina zümolongo athüngi rothaka; Osi nina mmhona chyui a zethaka osi alo n mhom ntia a n yancheyi. 4 Ana thanpoe na tssoji esüa n mhom n phyo, osi ana ni yi jiang engala; osi ana jenbukta loha n wohan. 5 Ana yuta topvülo ni lanka jianglo sanphicho, osi hoji lona kvüthüngha nkae n yihan. 6 Potsow, nina ajanlamo jina ana nithüngi randanala; Jitsükona athüngoe donchi ayi shiang a engayia. 7 Ni emhokthao nzanji a hungthuka osi a shanchoa; ni ndüngo tssona a ri jiang lona a nkochev. 8 Ni mhyik jiang nkoha to a nkohoa, osi ni echo kupi a mphothuka, 9 osi nthae jiang mhadungo a mphothuka. Echüthoko tüv rina a hachümi vana. 10 Onteno nzan n lina kangtsüa nsantala. 11 Ana kvümoe zechia na jiang topvülo ontena a hachümi vana; osi a rukchüchüv mhanta vana. 12 Ontena hinghoden esüa lyui mpvüroe a siv a nhyakta vana. 13 Roa, OPVÜI! osi ari shiang ryulanchi tothechi sia! Ni yonri khi n thae jiang khelona a shanchoa; 14 limha shilo onte choka topvü khia vamo shiang khelona a shanchoa. Nina onte vayio ezüp jiang topvü khi onte khangshia; onte ngaro jiang tsükona ha etsson vayia, osi onte tsoerüi jiang tsükonaha phyochüa vayia! 15 Tokhatola ana ni hungu, ntiotssole ana ntia ori elhi n tssohan; osi ayipjüngchia na ni vanhya etho jina longshi na apyingu.
David Ekhyo Khen
1 OPVÜI, ana kvüta ni nzanato! Nino a nkohapvüi, 2 OPVÜI jo a nkohapvüi, ombo a pikhfü chüngchüngo ji. A Potsow jo a pikhfü, osi ombolo a nkoha lia. Ombona otsung esüa a nkochetala; ombona nkoyae tsanchoa avanthukala. 3 Ana OPVÜI tsaphiala osi ombona a ri jiang khelona a shanchoala. OPVÜI thünga! 4 Echüv ekyuna a nkonphia vancho, osi roe esio jükyo jina a vakzhücho. 5 Echüv ekyu na a nkonphia vancho, osi olüp jina a tsükona chonchi vancho. 6 A ezüp yutalo ana OPVÜI tsaphicho, a nzanchithoku ana a Potsow tsaphicho. Ombo ekhümki na ombona azoyicho, osi ana eromo ji ombona a engayicho. 7 Tole limha jina eneta enhyokcho, phunglan jiang ndungkaphen jiang eyephia enhyokcho; ntiotssole Potsow na lüm tsukcho. 8 Ombo khenokvüi na miphung chiyia, obüngina omi eki tona miron to chiyicho. 9 Ombona potsüo shi resoe, ombo jo lo eluk enyikvü hansi jorocho. 10 Ombona echo mpao ekümrüm lona ekhyingka pyacho; osi ombona mbung jiang echo lo eshoni yentsacho. 11 Ombona emüng khi ombobo eyukcho; osi ojü ndüngo tüv eluk eehiv na ombo eyukcho. 12 Ombo mhadungo tharako jilona omi nlüpa sheryu long chiyicho osi eluk enyiko jiang chyusochicho. 13 Tole OPVÜI na oyaki na tharakcho; osi Ntssontsowo Potsow won zocho. 14 Ombona ombo lotssi ji koe ombo ri jiang tsanrothukcho; Potsow nlüpa onte phani tsanthukcho. 15 Jümang ji laza jiha; kyingkying kümi sicho, OPVÜI, hojijo nina ni ri jiang khonathüng, osi ni lüm tsuka erhyuathüng tssocho. 16 OPVÜI na oyaki na a yonjani a rhümacho; ombona ojü ejungo jilona a süchecho. 17 Ombona a ri etho jiang osi etssangkung jiang khelona a shanchocho, ntiotssole a tsükona jo onteno etho emhukthav jüa. 18 Ana ezüpi vanathüng, ontena a hazhücho, khatola OPVÜI na a nkochecho. 19 Ombona ekyuv n lio lo a sochukcho; osi ombona a thüngi ematha lio jina a shanchocho. 20 Ana ntio elan sana ji tsso jina OPVÜI na a yantsoala; ana nlan n liv vamo jina ombona a mmhayiala. 21 Ana OPVÜI shikhfü jiang benphithaka; Osi a Potsow thüngina ana tsani n sihan. 22 Ana ombo shikhfü topvü benphirathaka; osi ombo yizüng n ngayicho n li. 23 Osi silyuo elhi jiang lona nkachoe vanala to ombona ntsia. 24 Jitsükona ombona a yantsoala ntiotssole ana elan ji tae tssoala, osi aiyo n lan n lio to ombona ntsia: 25 OPVÜI, nino ochoangna ni longtsükata sana; jiang thüngi longtsükatala; osi ochoang jo benricho sana jiang thüngi jo mmhona. 26 Ochoang ntssüng-rüngcho sana jiang thüngi jo nino ntssünga, khatola n thae jiang thüngi jo omoatssi tssoala. 27 Ochona teri kümi vana sana nina shanchoala, khatola kangtsüi jiango teriv kümthukala. 28 OPVÜI, nina wondang a pia; a emüng ji phani a siyia. 29 Nina a ri jiang ekhyov etho a pia osi onte pikhfü jiang yakchiv etho a pia. 30 Potsow shi jo – ombo elhi jiango kvüta benricho ato! Ombo yi jiango kvüta longtsüka licho ato! Ombolo longtsükae topvü tsükona ombo otsung esüa tüv. 31 Potsow jo ete OPVÜI shi tae; Potsow jo ete pikhfü. 32 Ombo etho a jükayio Potsow ji, osi a sanphilano ekyuv n lithuko ji. 33 Ombona siano esüa chüngchünga zarungi a vanthukala; ombona phunglan jianglo ekyuv n lina a sanphithukala. 34 Ana lotssi ekhyungtso ji benphikhuko tssoa, ombona ritsso ji tsükona a thangshiala. 35 OPVÜI, nina a nkochei ashanchoa; Nina a ntangshomo jina a tsüphothukala, osi ni etho na shanchoe a vanthukala. 36 Oyam na a n rhümao tssoa nina a sayatala, osi kvüthüngha a n lungjo-han. 37 Ana a ri jiang phani rhümatala; osi ana onte n chüthukvü jo n vachochiala. 38 Ana onte echükthechiala, osi ontena n phanthiche; ontena a ekhyo kupi eriji vantala. 39 Ritsso ji tsükona nina etho a piala. 40 Nina a ri jiang mhadungona tsanthukala; osi a tssako jiang chüthukala. 41 Ontena nzanchi yana eronkachiala, tolea ochina ha onte n shanchocho; ontena OPVÜI tsaphia khatola ombona n yichoala. 42 Onte ji livero esüa kümthukvü ana onte chenroala osi mbung na vena yiala. Ana onteji lanpvüi chonchen esüa tsseroe onte siala. 43 Nina n zo n ngae khe lona a shanchoe jipo jiang pono esapvüi a kümthukala; ana n tsiv vamo kyon jiang ji enhungo a ekhüng küpo evanden kümrathaka. 44 Metapoe kyon jiangna a mhadungo epyakthetala; ontena a yi zoana, engatala. 45 Ontena lüm etsson moni sisi onte rizümpheni na eneta chiyirala. 46 OPVÜI vana! A nkochepvüi ji thünga! A shanchowo Potsow ji myingtsü ji thüngchoa ezoa. 47 Ombona a ri jiang ekhyov a piala; ombona jipo jiang a kupi rheyithukala. 48 Osi a ri jiang khe lona a shanchoala, OPVÜI, a ri jiang pono ekhyo a pia, osi jenbukta kyon jiang khe lona a shanchoa. 49 Jitsükona jipo jiang yolona ana ni thüngala; ana ni thünga denala. 50 Potsow na ombo mesao ji ekhyo tsüphov piala; ombona ombo ethüngche kyon ji n tümjakvü nzanala. David osi ombo tsoronichen jiang kümali nzanala.
Lyuyingo Jilo Potsow phfütsson
1 Potsüo shina Potsow phfütsson ji ntssünga ejüala! Ombona ntio elhi tssothakcho sana ' hoji lona mmhona ejüala! 2 Tsüngon jiang topvüna yilan shi ojyuato tsüngon ji tsükona ezochi vatala; zümo jiang topvüna ojyuato zümo ji tsükona ezochi vatala, 3 Ntia oyi n san, owon ha nzo; 4 Khatola ontena ehungpvüi tssoji limha chümi na mpato zoala. Potsow na eng ji tsükona potsüwoe oki tssoyicho. 5 Eng jina ematha yanpithan khyingroe esüa enyathüng chiroala; osi khvürilo ewoe ria yungtalo rhowov nhyaktsüka vancho to chiroala. 6 Ombona potsüo ehüm phukowoe na benkae phukowoe chiyiala. Ombo etsso jilona ochina ha n phoche.
OPVÜI Shikhfü Ji
7 OPVÜI shikhfü jo n jüma, hojina thothan apiala. OPVÜI yizüng jiango longtsüka khuko tüv tae; Nchümri n liv vamo jiang ji hojina likathukala. 8 OPVÜI shikhfü jiango elanthata, osi hoji benphi jiango ematha lia. OPVÜI yizüng jiango ntsanrüka osi lümbümi engathewo etho epiala. 9 OPVÜI yikrachi kyuchiv jo mmhona, osi hoji kümali lithuku na lia. OPVÜI yitsso jiango ntsanrüka; hojiango topvüto elanthata. 10 Hojiango shona lona ejüponkata, osi tsakijü njüm lona nüngkata. n Hojiangna ni nri a shi thüngi ntsinran a piala. Ana hojiang benphiwo ji man yantso apiala; % 12 Kyon ochinaha ombo ori jiang ombobo n hungala; OPVÜI, n tsiv worio jiang lona a sücheta. 13 Etana na mmen tsso jiang lona ha a shanchoa; osi ojang khi a ti khyothuka. To tssona a benriv osi mmen n mhon jilona tsanchov. 14 A yi osi nchümri jiang nina a khichoyi khuko tssothuka; A tsankaphen osi a rhanlanpvüi, OPVÜI!
Ekhyo Randan
1 Ni ezüp yutalo OPVÜI khi ni janlanthokvü ka. Jakob Potsow khi ni nkohathukvü ka! 2 Ombo khi ekhümkina nzanchi ni pithukvü ka. Osi Zion phunglan lona ni kyochithokvü ka. 3 Ombo khi ni than jiang topvüto ni khichoyi thokvü ka. Osi ni erungthan jianglo ombo khi ni emathae-thokvü ka. 4 Nina chokao jiang topvü ombo khi ni pithokvü ka osi ni etümezi topvü benchethokvü ka. 5 To tssona ena ni ekhyo jilo emathata tüngkachiv; osi nina khyo ji tsükona ena Potsow thünga sharitav. OPVÜI khi ni jonji topvü ni engathokvü ka. 6 OPVÜI na ombona ethüngcheo mesao ji etho piala to ana ntsithaka; Ombona ombo ntho potsüwoe na janlanala osi ombo etho khi ekhyo tsüphov piala. 7 Ochoang sana jo onte ritsso zotoro jianglo longtsükatala; osi ochoang nao onte kurü jianglo to; tokhatola eiyo e OPVÜI Potsow ethojilo longtsükatala. 8 Hojitüv kyon jiango nshüphi ekhüngu, tolea eteno chüngchünga zav. 9 OPVÜI, mesao ji ekhyo pia; osi ena ni tsathüng ejanlana.
Ekhyo Tsükona Myingthüng
1 OPVÜI, nina etho pio jitsükona mesao na longshiala; Nina ekhyoe ombo kümthoko jina ombo longshiala. 2 Ombo lüm na erüngo ji nina pithaka; osi ombo jonji ji nina janlanthaka. 3 Nina mmha tsüphov ombo hanisi oro, ombo kvürilo shona kikho venthukthaka. 4 Ombona eküm choncho osi nina ombo picho, hojijo harishia sunga evamo eküm. 5 Nina kyochio ji tsükona ombo phfütsson jo tsüphoa; nina myingthüng osi tsüpho ombo pithaka. 6 Ni mmha jiango kümali ombo ndüngo lia; osi ni vanrhyu jina longshina ombo pyingala. 7 Mesao jina Thotsü Potsow lo longtsükatala; osi OPVÜI n senphi nzan jina ombona topvü lona tsanchov. 8 Mesao jina ombo ri jiang topvü rhümav; osi ombo etssang topvü ombona rhümav. 9 Ombona roa na omi kia to roe onte siv; OPVÜI na ombo lüm etsuk lona onte monthukrav osi omina roe onte siv. 10 Onte tsoronichen ochia n hyoka na mesao jina onte lüngthakhamvü. 11 Ontena okyak tssota ombo zümta vana, tolea ontena ochüm echeta tsanchov mek. 12 Ombona ombo lotssi jina onte kov osi ontena. kholani tsanrav; 13 Ni etho tsüpho ji tsükona ena ni thüngala OPVÜI! Ena okhen denta ni etho ji thüngtav.
Nungra won osi Myingthüng Khen
A Potsow, A Potsow, nino ntiolui a sithakchola? A kyochile to ana e mhena kyacho, khatola enhüngha ntia mek; 2 A Potsow, ana engo ni tsalea nina a n janlan; Ana zümolo ni tsalea, jiha jüngthe n li. 3 Tolea nino nthoe ji to vantsülo ni khukthethukcho; Israel na ntho to thüngtao ji ni. 4 E motsüi jiangna nilo longtsükatacho; osi ontena nilo longtsükao ji esüa nina onte shanchocho. 5 Ontena ni tsaphia ekyu lona tsanchotacho; Ontena ni longtsükatacho osi lüm n püko tüv ntia n licho. 6 Khatola aiyo kyon nsüv a sithaka; aiyo ora-oben esüa topvüna a tssakala! 7 A ehung topvüna a yikvüta nli süchei khi kvüri eyephita yiala. 8 Ontena "Nino OPVÜI lo enhikachola" to a ezota, "Ombona ni n shanchoake? Osi OPVÜI na ni chokavo ombona ni n kyochiv ke'? to a ezotala. 9 A bukathüng ntaknshona arothuko ji ni; a ngarothüng nina a nkochecho. 10 A buko jilona benkae ana nilo enhikapvü. osi nino yuta topvülo a Potsow tssopvü. 11 Ezüp tsaka, a lona kontae ti vana! ntiotssole a nzanchiwo tüv ochia n van. 12 A ri jiangna tssibungden esüa onte topvüna a hachümi vanra. Bashan metae tssibung ndav den toli vankhana. 13 Ontena hingho erhyuato obung korae a zetala. 14 A etho ji monrathaka, likoe ojü eshukcho esüa monthaka. Aryu topvü chungta lokphithaka; osi alümbüm ha onni esüa pyonroe sithaka. 15 A ekhyi ji livero punga kyingthaka; osi a nli jiha kholo lo züpkathaka. Nina chüi sile to ochon yulo a sithaka. 16 Kyon n mhon kholok na a hachümi vanra; Füroden esüa ontena a thüngi sena rotala. Osi ontena ajowokhe jiang ji a nkükroyiala. 17 Aryu topvü njüprala osi a ri jiangna zükae a zetala. 18 Ontena phyalyu fuki zetasi a sü jiang ji chitae khitala. 19 OPVÜI, a thüngina kontae ti-vana! Zakto oro a shanchoa! 20 Yonri jilona a shanchoa, füro jiang khelona a eküm shi a shanchoyia. 21 Hingho shiang khelona a shanchoa, Tssibung ndav shiang khelona a shanchoe ochia n van. 22 Nina ntio tssothakcho sana ji ana kyon jiang ezovka; Onte etssikho lona ana heto ni thüngu, 23 "OPVÜI phajaeden, ombo thüngtava! Jakob tsochenden, ombo yikrachitava; Israel kyonden, ombo khümtava! 24 Ombona yantsae jiang khachoe n si; osi onte ezüp jiang ji n hung ntan n tssoyi. Ontena kholani nyiana onte janlanala." 25 Nina ntio tssothakcho sana ji ana onte etssikho lona ni thüngu; osi ana ntio ekümrüm than phyochaki licho sana ni ekhüm kyon jiang enhungo na ni thamvü. 26 yantsae jiang na onte eto njaktav; OPVÜI yana eroe jiangna ombo thüngtav. nchünkhonto onte pvülyuthuka! 27 Jipo topvüna OPVÜI nchümchev; Limha nken topvü lona ontena Ombo thüngi kholam, Jipolan topvüna ombo thüngu. 28 OPVÜI jo mesao, ombona jipo topvü sala. 29 Kangtsüi topvüna enhungo ombolo epyakthev; osi echüo kyon topvü na ombo mhadungo epyakthev. 30 Ochyuovüngi tsoronichen jiangna ombo benkav; Kyon jiangna echungren etsao jiang thüngi Potsow motsü rüa ezov. 31 N vanhamo jiang thüngi ha "OPVÜI na ombo kyon jiang shanchov" to ezov.
OPVÃœI jo Ete Enhyang
1 OPVÜI jo a enhyang: ana wongkhyuv n li. 2 Ombona eroyo mmyakvü lo asosi owo a esanthukala; osi zhükhfüro noyingu tssae a sosi woala. 3 Ombona a ekümo thothan atheyiala osi ombona phyochako ji esüa, ntsanrük lamoe a soala. 4 Ana emüng echitsov yakchia thüng lea, a kyuv mek, OPVÜI, ntiotssole nina a ndüngo vana. Ni rhüki jarung osi etsi jina a nkochetala. 5 A ri jiang ehungona nina tssisa a methakiala; Nina yikrachio yenki esüa thyujü a nzüyia a sothetala osi a pvü ji phyochüa ayeniala. 6 Ni mmhon osi khonzan ji a eküm echung alo linrhüa vamvü; osi a eküm evanthüng nandang jo, niki ji a vanphen tssov.
Mesao Tsüpho Ji
1 a Limha shi osi shilo licho to etsa OPVÜI echi; Liko shi osi shilo vancho to etsa ombo echi. 2 Ombona lichungi ojü jüwo ji poni liko ji lyuyingkacho, osi jümang ejungu jiang poni ndungkacho. 3 OPVÜI phunglani chungov ocho etümchola? Ombo ntho Khümpheni rhowov ocho etümchola? 4 Ochoang elhingo osi nchümri ntssungcho sana jiang etüma, ochoangna kisü n khümvü osi ejüng phyochaki n vatana jiang etüma. 5 OPVÜI na onte mmhayiv osi onte shanchov; onteno nlan n li to Potsow na ehungpvüi tssov. 6 Potsow yana eroe kyon jiango hojito tssov, Jakob Potsow vanrhyu jilo eroe jiango hojito tssov. 7 Pikhfü jiang ngaza chonchia, kibüng ehen jiang, to tssona mesao tsüpho jina rhorovka. 8 Mesao tsüphoe jijo ochola? Ombo OPVÜI ji, etho jüwo osi thotsü ji, ritssolo ekhyoe OPVÜI ji. 9 Pikhfü jiang ngaza chonchia, kibüng ehen jiang chonchia, tona mesao tsüpho jina rhorov. 10 Mesao tsüphoe jo ochola? EkhyOPVÜI OPVÜI ji – ombo mesao tsüphoe ji.
Lanso Osi Nkoha Randan
1 OPVÜI ana ni thüngi randanala; 2 a Potsow, ana ni lo longtsüala. Oyam na a khyoe yikra ndukvü lona ashanchoa; a ri jiang khi a ti raotsenthuka! 3 N khyo jijo nilo longtsükae jiang tsükona mek, jijo ochoangna zakto ni banlana sana jiang tsükona. 4 OPVÜI ni lanka jiang a püngnoa; osi a ntsithuka. 5 Ni ntsa ephanina vam a püngnoa, ntiotssole nina a shanchowo Potsow ji. Ana yuta topvülo nilo longtsükatala. 6 OPVÜI, nina nkolo khonzan osi n senphio nzan e hungthuko jiang ti mhechoa. 7 A nungo ekümo mmen osi ori jiang nlan a siyia, Ni n senphio nzan osi mmhon yakchia a nchümcheta, OPVÜI! 8 OPVÜI jo ntsanrüka mmhomo ji tsükona, mmen kyon na ntio lanka lo sanphiv sana ombona ejüala. 9 Teri jiang ombona elamo lo püngnoa ombo lüm erüng ji onte ejüala. 10 Ombo ntsa jiang benphia osi ombo yizüng jiang engae jiang topvü longtsüka osi nzan lona ombona olan soala. n OPVÜI, ni phyochakji benthuka, osi a mmen jiang a siyia, ntiotssole a mmen jiangji elümoto. 12 OPVÜI yikrachikyuchi jiango elan jilo sanphiv tsükona ombona onte ntsithokvü. 13 Onteno yuta topvülo tssochyu ekümo vamvü, osi onte ngaro jiangna meta ji hoe khiv. 14 OPVÜI jo ombo yi engae jiang shom ji, Ombona onte thüngina ntsata ji nkhüngchoala. 15 Ana akyochithoku tsükona yuta topvülo OPVÜI lo zekatala; Osi ombona ekyutsi lona a shanchoala. 16 OPVÜI, a thüngoe zechia osi khonzan to a tssoyia; ntiotssole aiyo yingsiying loe osi nkhyo-ntoe. 17 A wongkhyu jiang apoyia osi a ezüp topvü lona a shanchoa. 18 A nrimphen osi a ezüp jiang zi a zeyisi; a mmen topvü n lan a siyia. 12 19 Zeta ana ori kvüta vancho sana; zeta, ontena kvüta atssaka sana. 20 A nkocheta osi a shanchoa, osi oyam khi a tikhyothuka. 21 Ana ekhyo tsükona nithüngi roala, Ana nilo longtsükao ji tsükona, a mmhon osi ntsanrük ji khi a süyathuka. 22 Potsow, ni kyonden Israel jiang ezüp topvü lona onte shanchoa.
Kyon Mmhom Randan
1 OPVÜI, ana elamo ji tssoala, osi nilo longtsükatala; jitsükona aji elan kyonka to a phyoyia. 2 Ojang atssoa chyui a zeta, OPVÜI, a choka osi nchümri jiang chyui a zeyia. 3 Ni nzan n senphio jijo alansoeji, ni longtsüka jina yuta topvülo olan a soala. 4 Ethev n lio kyon jiang ana jokim n tsso; Ana kyakrüm jiang ete shentae n van. 5 N mhon kyon jiang nzo etssov a tssakala; osi n thae jiang nkachoala. 6 OPVÜI, aiyo nlan n li to ejüa okhe ntsükala; osi ni thanphensa ji haphia khümo khochiala. 7 Ana myingthüng khen denala osi ni emhokthao elhi jiang ehungpvüi tssoa phyoala. 8 OPVÜI, nina vamo kiji a chokatala; Ni phfütsson elio meta ji. 9 Mmen kyon jiang nzo a ti-monthuka; Münghan jiang jokheman ji a ti chinhya. 10 Onteno yuta topvülo n mhon etssoeden, osi ekhüp ekhiv methaki evanden. 11 A tsükona jo yuta topvülo elan ji tssoala; khonzan to a tssoyia osi a shanchoa! 12 Aiyo ekyutsi topvü lona tsanchoe vanala; Osi ombo kyon jiang etssikho lona ombo mying thüngala.
Myingthüng Randan
1 OPVÜI jo a wondang osi a shanchoe; ana ochia ekyuv n li. OPVÜI na ekyutssü topvü lona a nkochetala; ana kvüthüngha a nkyu. 2 Kyon n mhon jiangna alüngthav a hazhüa na, onte ji nshüphi ekhüngala. 3 Rasantsü topvü na ahazhülea ana akyuv mek; A ri na ahazhülea ana a Potsow lo longtsükav. 4 Ana ntiosana olan motsünga OPVÜI thüngi choncho; ana olan motsünga tae achokatala. Hoji jo OPVÜI ki a eküm echung evamvü ji, hojilo ombo mmhon ji emhuka ezev tsükona, osi ombo lanso ji eyam tsükona. 5 Ezüp phyingrüng yutalo ombona akhümchov, osi ombona ombo khümphen ki jilo nkoha lia a vanthokvü; osi longpvü n tssom lo tsankae nkocheta a vanthokvü. 6 Jitsükona a hachümi vamo ori jiang pono ana ekhyo hungu. Ana longshi won tssoa tüngkachia ombo ekhümki na ekümrüm than piv. Osi ana okhen dena OPVÜI thünguv. 7 OPVÜI, ana ni tsathüng azoyia! a khonzan si ajanlana! 8 Nina kvüthüng "Oro a khüma" to a tsacho sana, "Ana rovka, OPVÜI, a timphoa," to ana ni janlancho. 9 A thüngi lüm ti-tsuka! Osi ni nri ji ti-phanlanchia. Nina anzanchia ropvüka, jitsükona a tisia. Osi a ti-khachoa, O a shanchopvüi a Potsow. 10 Apo ha ayo onina a sikhoka, tolea OPVÜI na a sheküpvü. 11 OPVÜI, nina ntio a tssothuk hunga na ji a püngnoa, osi ekyu n lio lamoe a soa, ntiotssole a ri khosha vana. 12 A ri ochoangna ejüngjüng osi ekhenlung khi a khetsüa sana jiang khelo ekachi a tisia. 13 Ana a eküm shina OPVÜI mmhonji nhyakche hungu to ana ntsia. OPVÜI lo longtsükata. 14 Longtsüa, osi ti-khena, OPVÜI lo longtsükata.
Nzanchi randan
1 OPVÜI, a nkohapvüi, ana ni tsaphiala. Ana kyao shi enga! Nina a n gayia, aiyo echüli eyio jiang yulo tssov. 2 Ana akyochile to kya ni ezoathüng, osi a khe ji ni ntho khümphen towoe yonchia thüng a engayia. 3 N thae osi kyon n mhon jiang nlan epio jilo a ti-khanhya; Onteno obüng oyi nüngsi lümbümi jo etssaknkong tae. 4 Ontena ntio elhicho sana osi ntio n mhom tssocho sana jiang man onte ezüpthuka. Onte elhi topvü man onte ezüpthoka, osi ontena mamo ji onte pia! 5 OPVÜI na ntio tssothakcho sana osi ntio lyuyingcho sana jiang ji ontena n chekatala; jitsükona onteji ombona ezüpthokvü osi monthokvü. 6 OPVÜI thünga, ana nzanchi tsükona kyao ji ombona zothaka. 7 OPVÜI na a nkocheta a ntangshonala; osi ana ombo lo longtsüala. Ombona a nzanchiala osi a longshithokala; ana longshi khen khi ombo thüngala. 8 OPVÜI na ombo kyon jiang nkohoala; ombona ethüngcheo mesao ji nkohoe shanchoala. 9 OPVÜI, ni kyon jiang shanchoa, osi ni kyon jiang mmhayia. Onte enhyang tssoa, osi nchünkhonto onte ntangshona.
Tsungryu lo OPVÃœI Won
1 OPVÜI thüngtava, potsüwoe choro shantioden; ombo etho osi phfütsson ji thüngtava. 2 OPVÜI phfütsson mying ji thüngia; Nthoe jina roathüng ombo mhadungo epyakthetava. 3 OPVÜI won ji jümangi na zoala; phfütsson Potsow jina tharakala, osi ombo won ji jümang poni eshokatala. 4 OPVÜI won ji etho osi myingtsson jüa zoala. 5 OPVÜI won jina Lebanon enungi Cedar tssüng jiang mpato tssüngjoala. 6 Ombona Lebanon phunglan jiang ji mangsüro esüa tsukphithokala, osi Hermon phunglan ji tssibung esüa shanthathokala. 7 Tsüngjoathüng nlüpo jiha OPVÜI won jina. 8 Ombo won jina lijüng ji enhyukala; osi ombona Kadesh lijüng jiha enhyokthukala. 9 Osi OPVÜI won jina lümrodung jiang ekhyoki owo vüyiala, hojithüng otsük akvüna ombombo khümphenina "OPVÜI phfütssonthoka!" to tüngkachiala. i0 OPVÜI na jümang ejungo jiang sayatala; osi ombona mesao esüa kümali sala. 11 OPVÜI na ombo kyon jiang etho piala osi noying khi onte mmhayiala.
Montsso Epi Randan
1 OPVÜI, nina a tsanchothoka a shanchothako ji tsükona osi a ri jiang khi a n yikvüthoko jina ana ni thüngala. 2 Ana ni thüngi a nzanchile to choncho OPVÜI, a Potsow, osi nina a miyicho; 3 nina olüp ji a nkachothokcho. Aiyo lichungi rheyia vanthakcho, khatola nina a kümlanthokcho. 4 OPVÜI mying thünga dentava, ombolo longtsükae kyonden! Nthoe jina ntio elhi tssothakcho sana nchümchetava, osi ombo mying thüngtava. 5 Ombo lüm etsuk jo esüngaro tae vanala, osi ombo mmhon jijo kümali vanala. Zümothüng esü zanlea, wonchiana longshi yiala. 6 Ana tsanchoe vanala to nchüma abobo phyocho, "Aiyo kvüthüngha ochina ha a n khyo." 7 OPVÜI, nina a thüngi mmhoncho, osi phunglan pikhfü esüa a nkochecho. Tokhatola nina mphoe sisi aiyo a kyucho. 8 Ana ni tsaphicho, OPVÜI; ana ni nzan choncho: 9 "Achüna ni tajo ntio lichola? Ana lüpkvüi rheyina ntio na ni mamla? Echüi jiangna ni thüngchev alo? osi ontena ni mmhom ji thenchoa phyochev alo? 10 A engayia, OPVÜI, khonzan to tssoa! A nzanchia OPVÜI!" 11 Nina a nungra ji longshia shario kümthokthaka; Nina a nungra ji khi sisi longshina a pyingthokthaka. 12 Jitsükona ana yingto n van; Ana ni thünga dem. OPVÜI, nino a Potsow, Ana kümali montsso ni piv.
Potsow lo Longtsüka Randan
1 OPVÜI, ana tsancholan tsükona ni thüngi roala; Kvüthüngha oyam khi a ti khyothoka. Nino ntsanrük Potsow; ana randanala, a shanchoa! 2 A zoyia! Osi enhünga ashanchoa! A nkochev tsükona a tsankaphen tssoa; osi a shanchov tsükona a pikhfü tssoa. 3 Nino a tsankaphen osi pikhfü; Nina phyochako ji esüa olan a ejüa a soa. 4 A tsükona tsirhi lio jiang lona a shanchoa; ekyuv lona a shanchoa. 5 Ana a bobo ni ntangshon lo rheyiala. OPVÜI, nina a shanchoa; nino longtsüka elio Potsow. 6 Potsow thanpo ekhüm jiang nina tssakala, tolea aiyo nilo longtsükatala. 7 Ni n senphi nzan ji tsükona a mathata longshiv. Nina a ezüp a hungia osi a emhok-elüm ntsia. 8 Nina a ri jiang khi a n rhümathok; Ana kvüi a wohungana wov tsükona nina a etancho a tssothoka. 9 OPVÜI, khonzan to a tssoyia, aiyo ezüpi vanala; ekya lona a mhyik shiang ezüpala osi a mmuktsüngthaka. 10 Aiyo nungra taena a sangtsüngthaka, osi ekya lona a eküm hüngrikathaka. Ezüp topvü tsükona aiyo a mmukthaka; osi a ryu jiang mpato phfürothaka. 11A ri topvüna, osi echümporo tssoa a phinakiren jiangna a tssakala; a ntsiwo jiangna a kyutala; osi ontena kvüthüng lantsüina a hungana tsani sitala. 12 A chüthakcho esüa otsük a kvüna a mhechotala; Aiyo shümthe sicho tsütsaelan esüthaka. 13 A ri elümotona tssürüta ana zoala; ekyu na a hazhüthaka. Ontena a kyakthechiv yantala, osi a chüthokvü kyaktala. 14 Tolea OPVÜI, a longtsüka jo nilo; nino a Potsow. 15 Aiyo yuta topvülo ni ntangshon küpo vanala; a ri jiang khelona a shanchoa, osi a khangrio jiang khelona a shanchoa. 16 Ni nri ji nzana zeta, ni n senphi nzan lona a shanchoa. 17 Ana ni tsaphiala, OPVÜI; yikra a ti ndukthuka. Onte ji jükrüpi echüli rheyithoka. 18 N tsae jiang jükrüpthoka – kangtsüa osi mhachana ochoangna ntsanrük kyon n zehunga sana jiang topvü hojito tssothoka. 19 Ni yikrachio kyon jiang echi nina vayio jiango kvüta mmhom tae ato! Nino kvüta mmhoncho sana otsük akvüna ntsia, osi ni longtsüi jiang nina kvüta nzana ntangshona sana ntsia. 20 Nina vanrhyui onte ri jiang yikvü-yilo ji lona onte nkocheta mphochetala. 21 OPVÜI thünga! A ri jiangna a hazhüa vanathüng ombona kvüta emhuk thao nzan a jücho ato! 22 Ana ekyu lona ombona a sithakcho tsayicho. Khatola ana a nzanchile to ombo tsao ji ombona a zoyicho. 23 Ana OPVÜI nzanala, osi ombo longtsükao kyon topvü nzanala. Longtsüi jiang OPVÜI na nkochetala, tokhatola kangtsüi jiango ontena mamo ji esüa ezüpthokala. 24 OPVÜI lo eyilokata evanden, etho jüa lüm tssona vantava.
Phyochak Osi N lan Siyi
1 Ochoang jo n lan siyithakcho sana osi ochoang ori siyithakcho sana jiang ematha elio. 2 Worio jiang OPVÜI na n lan n pio kyon jiang osi ejithechi topvü lona tsanchoe evan kyon jiang mmhomo. 3 Ana a mmen jiang n phyochakvü vamo jithüng jo eng elang ekya na a sangtsüngcho. 4 OPVÜI, nina zümo eng a khangshicho, osi a etho ji nzyulo eng etsso jina yenjü kyingkathoka to kyingkae sicho. 5 Tolea ana a mmen jiang ni mhadungo phyochakcho; osi a ori ana mphoe n vacho. Hojiang ana ni thüngi phyochakvü methakcho, osi nina a mmen jiang topvü a siyicho. 6 Jitsükona ni longtsükata evan topvü na ethelan eli yutalo ni thüngi randam lia; ezüp tsüphov na jükhyo esüa jeta yilea, onte jam meka. 7 Nino a mphophen; nina a ezüp lona a shanchov. Nina a nkocheo ji tsükona ana ni shancho elhi ji khen denkachiv. 8 OPVÜI na phyoala, "Ni sanphilan ana ni ejüvka; ana ni sokata ni ndungtssunguv. 9 Kurü osi gadho esüa yima ti-vana, jiang jo obüngi yonjakzhü theyi sanati oyi engala." 10 N thae jiango ezüpvü lia, tolea OPVÜI lo longtsükae jiango ombo n senphio nzan jina nkochev. ho ntsanrük kyonden, OPVÜI na ntio tssothakcho sana ji tsükona longshitava. o OPVÜI jancho ezoeden, longshia tüngkachitava.
Myingthüng Khen
1 Nte ntsanrüng topvüna, OPVÜI na ntio tssothakcho sana ji tsükona longshia tüngkachitava; ombo jancho ezoeden, ombo thüngtava. 2 Khfükying theta OPVÜI myingthüng khen dentava, Khenzhü theta ombo denkatava. 3 Khenthan khi ombo denkatava, tssothimori theta khfükying ji khfütava. Osi longshia tüngkachitava! 4 OPVÜI yi jiango ntsa osi ombo elhi jiango longtsüka lia. 5 OPVÜI na ntio jo ntsanrüka osi ntsacho sana ji chokatala; Ombo n shenphi nzan jina limha pyingala. 6 OPVÜI na ombo nzan jina Potsüo oyak shi soyingcho; osi choro, eng, tona shantio to shiang topvü ombona phyochio ji taena lyuyingcho. 7 Ombona jümang topvü kholukalo tssüngrhyuthukala; osi jümang jungo jiango ombo sonranki khalanchi vatala. 8 OPVÜI khümtava, limhatsü na! Osi limhalo kyon vancho topvüna ombo yikrachitava. 9 Ombona oyi phyochio ji taena limha shi lyuyingcho; osi ombo yizüng taena olan topvü chiyithukcho. 10 Limhalo jipo jiang etümezi jiang OPVÜI na ntia meku sithukala. Osi ontena tümo jiang ntia n tssochev sithukala. 11 Khatola ombona tümo jiango kümali vanala. Osi ombo etüm jiang kümali liala. 12 Potsow na OPVÜI onte tssoyiwo jipo ji ematha elio; Ombo kyonden tssothokvü ethüngcheo jiang ematha elio! 13 OPVÜI na potsüwoe na zechochiala; osi limhalo kyon topvü hungkhanala. 14 Ombo yansa ki na ombona limhalo evan topvü zechochiala. 15 Onte nchümri topvü ombona theyiala; osi onte elhi topvü ombona ntsia. 16 Mesao jina ombo rasan etho lio jina khyov mek, rasan tsüka jina ombo etho na khyoa mek. 17 Ekhyov tsükona ritsso kurü ethev n li; Onte etho tsüpho jina onte n shanchokhuk. 18 Zeta, OPVÜI na ombo jancho ezoe jiang osi ombo n senphio nzan jilo longtsükao jiang zeyatala. 19 Ombona echü lona onte shanchoala; Ombona vara yutalo eküm onte vantokala. 20 Etena ete eyilo ji OPVÜI lo vatala; Ombo ete nkochepvüi osi nzanchipvüi. 21 Ombo tsükona ete e longshiala; osi etena ombo ntho mying jilo longtsükatala. 22 OPVÜI, ena e eyilo nilo vao ji esüa ni n senphio nzan ji elo litoka.
Potsow Mmhon Ji Thüngcho
1 Ana yuta topvülo OPVÜI montsso piv; ana tümjak n lina ombo thünguv. 2 Ombona ntio tssothakcho sana ji tsükona ombo thünguv; oyam na khangshia vamo kyon jiangna engatasi longshitava! 3 A nzo tssoe OPVÜI etho tsüphov ji thenchotava; etena nzo tssoe ombo ntho mying ji thüngtavka. 4 Ana OPVÜI thüngi randancho, osi ombona ajanlancho; a ekyutssi topvü lona ombona a shanchocho. 5 Oyam na khangshio jiangna ombolo zekatala; osi longshiala; ontena kvüthüngha etho jakvü mek. 6 Nzanchi ethev lio jiangna ombo tsaphiala osi ombona janlanala; onte ezüp topvü lona ombona onte shanchoala. 7 OPVÜI jancho ezoe jiango ombo lanben na nhyakala osi ekyutssi lona onte shanchoala. 8 OPVÜI jo kvütata mmhoncho sana nibobo yani zeta. Ochoangna ombolo tsankae vana sana jiang ematha elio. 9 OPVÜI kyuchitava, ombo kyonden; Ombo jancho ezoe jiango ontena ethev elio jiang benria hungala. 10 Hingho jiang mpato na, etsoyu n hungu wondonala, khatola OPVÜI jancho ezoe jiango ontena n licho ntia n li. 11 Rotava, a shom nongoriden, osi a yi engatava; tona OPVÜI kyuchivlo ana nte sokavka. 12 Ntena eküm longshi nte jüpona alo? Ntena harishi osi ematha nte jüpona alo? 13 To tssona n mhom tiphyoa osi ejüng tiphyoa. 14 N mhom lona khophi mmhom tssoa nte lümbüm totona noyinga vana. 15 OPVÜI na ntsanrüng jiang nhyakyatala; osi onte ekya won ji zoyiala; 16 khatola n mhom etssoe jiango ombona nkachoala osi onteno chüana elaro mhechoe siala. 17 Ntsanrüng jiangna OPVÜI tsaphiala, osi ombona engayiala; onte ezüp topvü lona ombona onte shanchoala. 18 Lümbüm essuka vamo jiang ndüngo vanala; eyilo monkhanthako jiang topvü ombona shanchoala. 19 Kyon mmhom jina ezüp elümoto ndukala, khatola OPVÜI na jiang topvü lona ombo shanchoala; 20 OPVÜI na shera ombo nkohoala; ombo ryu motsüngalea n jak. 21 N mhom jina n thae ji lüngthav; ntsanrüng tssako jianga ezüp piv. 22 OPVÜI na ombo kyon jiang shanchov; ombo khi nkohathokvü yamo jiang topvü nkochev.
Nzanchi Randan
1 OPVÜI, a panlamo jiang ha panlana, osi a thüngi khondao jiang thüngi nina ha khontava! 2 Ni tsung osi ebensü jiang tsakae oro a shanchoa. 3 A phana vamo jiang thüngi ni tsso lebuk jiang tsakae phana. Nina a shanchov to a ezoa. 4 Ochoangna a lüngthav yana sana onte khyothoka osi yikrathoka; a kyakthechiv yamo jiang phanlanchi hamathoka. 5 Onte ji mbung na vena yio lishüo jiang esüa OPVÜI lanben na onte phanthoka! 6 OPVÜI lanben na onte tachüchüathüng onte lan jiang ji emüng osi pherüa kümthoka. 7 Ntia ntam n liaha ontena arhümav tsükona tssirhi donia a vaiyita, sokvü jyui avayita to tssocho. 8 Tolea onteno n tsiv onte momka, osi onte tssirhi jianglo onte rheyi monrav! 9 Jithüng ji OPVÜI tsükona a longshiv, Ombona a shancho jitsükona a longshiv. 10 Ana lüm topvü theta heto OPVÜI ezov, "Ni esüa OPVÜI n van, nina etho ejüi jiang khelona etho n jüi jiang nkochetala. Osi khangshipvüi jiang khelona yantsae jiang nkochetala." 11 Kyon n mhom jiangna a tachia ehungpvüi piala, osi ana n tsio tüv n lan tsüphov a shakatala. 12 Ana mmhom etsso ji oman ontena n mhom a piala, osi aiyo eyilo n liv siala. 13 Tolea onte nochonoriathüng jo7 ana nungra pipocho; ana etsoyu khangcho; ana ashom osi ojenio randania esüa kvüri nkhümthei randancho, 14 Oyo tsükona nungrae kyon esüa ana nungra lona nkhümthei sanphicho. 15 Tolea a ezüpathüng jo ontena longshita a emakalo sanrhyucho; lankonlansi jiangna a tata a yonkacho, osi ontena esan nlina atatacho. 16 Kyon na jotüm khetüm jiang emakata esüa oho shükchei a yikvütacho. 17 OPVÜI, nina onte mhadungona a n shanchona, eze tae kvütenhya a zevla? Hingho shiang khelona a eküm a shanchoyia! 18 To tssona ni kyon etssikho lona ana montsso ni piv; osi onte topvü mhadungona ana ni thünguv. 19 Ana oyam n khyo ji khi, a ri jiang ti longshithoka. Osi n tam n liaha a tssako jiang khi a nungra yutalo omhyik rüngphita ti longshithoka. 20 Ontena nzan theta n santala; tolea noying chokae kyon jiang echi ejüngjüng tae nsantala. 21 Ontena, "Nina tssoji ena hungka!" to phyota a emakatala. 22 OPVÜI, nina hoji hungthaka, mphoe ti vana, OPVÜI; osi nkachoe ti vana. 23 OPVÜI nina phanthi a nkocheta; a Potsow, phanthi a thüngoe tssoa. 24 OPVÜI, nino ntsanrüka, jitsükona elan kyon to a phyoyia; osi a ri jiang khi ati makathoka. 25 0nte khi "Ena ombo nkachoe vanala, ena hoji e chokatala! to ti phyothoka." 26 A ezüp lo a emakae jiango khyothechi hamae sithoka; ochoangna alo na mmhonkata to nchüma sana jiango yikra nungra na pyingthoka. 27 Ochoangna a mmhonthuk hunga nchüma sana jiango longshi lona elan elani heto tüngthoka, "OPVÜI jo kvüta tsüphocho ato! Ombo nri jiangna khyoathüng ombona longshiala." 28 To tssona ana ni ntsanrük ji thenchoa phyov, osi eng to na ni thünga munguv.
Kyon N thanri
1 Mmen jina n thae ji lümbüm chungi janthechiyiala; ombona Potsow khaki siala osi ombona n yikrachiala. 2 Ombobo tsükhünga nchüma vamo jina ombona jo Potsow na ombo mmen ji yanchei n lan ombo n piv tsayiala. 3 Ombo won oyi jiango ejüng taena pyingcho; enhungo ombona ntio mmhoncho osi elancho sana jiang n tssov sithaka. 4 Ombona yipathüng mpato okyak n mhom nchümala; ombo elhi topvülo mmhom n jü, osi n mhom jo ombona n khachoala.
Potsow Mmhon ji
5 OPVÜI, ni n senphi nzan jina potsüo etssungala, osi ni longtsüka jina oyak janala. 6 Ni ntsantho jo phunglan esüa tsenkachiala, osi ni ntsanrük jo jümang esüa junga. Kyon osi ekümrümo topvü ni khelo. 7 Potsow, ni n senphi nzan jijo kvüta tsentsü ato? Ena ni echo kupi nlhichoe vanala. 8 Nina etsoyu etsson epio jiang na esüphiala; Osi ni nzan mmhom zhükhfü jilona ena yuala. 9 Nino eküm topvü chenkaphen ji, osi ni wondang ji yakchia ena wondang hungala. 10 Ni5ntsio jiang n tümjak na nzana osi ntsanthoe jiang thüngi mmhom tssonrhüa. 11 kangtsüi kyon jiang khi a ti hayathuka, osi nthae jiang mhadungo a ti tsanthuka. 12 Kyon n mhon jiang elungphen ji zeta, onteno n phanthicheo hojilo vantherae vana.
N thae tona Kyon N mhon to Mhadung
1 N thae jiang tsükona ti wongkhyua; osi sulyuo etssoe jiang ji omhyik ti rakia. 2 Ntiotssole onteno esüngaro taena lomo mmikata esüa moni siv. osi otssüng odung mmikae chüo ji esüa chürae siv. 3 OPVÜI lo longtsüa osi mmhom tssoa; meta jilo vanjüngi noyinga vana. 4 Ni ematha ji OPVÜI lo yana, tona ni lümbüm na rüngwo ji ombona ni piv. 5 Ni eküm ji OPVÜI lo khochaki pia; ombolo longtsükata; tona ombona ni nzanchivka; 6 osi ombona ni ntsanrük ji eng ranchecho esüa onthokvü. 7 Erüm toa yingto vana osi OPVÜI nhyaki tssothuka; osi oyam tssochumochyua evamo jiang tsükona ti-wongkhyua, mekana nlamo tssolea mmhom lo echeo jiang tsükona khetsüa ti nchüma. 8 Wongkhyu osi lüm etsuki ti-rheyia; hojina ezüp kyongkao ji tae. 9 OPVÜI lo longtsükae jiang na meta ji hoe khiv; khatola n thae jiango jilona phanchukchi siv. 10 N thae jiango nsungu monrae siv; nina onte yam khatola onte yanchev mek; 11 teri ekümo vamo jiangna metaji hochev; Ontena pvülyu eküm osi noying ji hungu. 12 N thae jiangna kyon mmhon ji tsükona lanka n mhon tüv kyaktala osi ombo tssaka zetala. 13 Tokhatola OPVÜI na n thae jiang ji emakatala, ntiotssole nsungu onteji monkham to ombona ntsia. 14 N thae jina yantsae osi ezüpa evan jiang chüthoku tsükona, osi elamo etssoe jiang ha chüthoku tsükona onte yonri jiang tssüngchetala; osi onte lotssi jiang khungtala; 15 tokhatola onte yonri jiangna onte lüngthav; osi onte lotssi jiangha ejüproe siv. 16 Kyon mmhon jina ejükaro lio jijo n thae ji ejüeli topvü lona mmhonkata. 17 Ntiotssole OPVÜI na n thae etho ji khi siyiv; Osi kyon mmhom jiang jo nkochev. 18 OPVÜI na ombo yi engae jiang tsükona ntangnshonala; osi meta ji nchünkhon to onte echi tssothoku. 19 Onteno yuta n mhom yiathüng ezüpvü mek; osi otssi vara yutalolea onteno etsson liv. 20 Tole n thae jijo chüv; osi OPVÜI ri jiango orae thera esüa moni siv; osi onteji miphung esüa moni siv. 21 N thae jina epvüi tsosi n loala; tokhatola kyon mmhon jina jo longphyata piala. 22 OPVÜI na mmhayio kyon jiangna metaji ji hov, tolea OPVÜI na rhiyio jiango phanchukchi sirav. 23 Kyon tsüka eküm ji heto evamvü lia to OPVÜI na olan soala, osi ombo emathathuko jiang jo ombona nkohoala. 24 Onteno elunglea vanthei n van; ntiotssole OPVÜI na onte sükav. 25 Ana nzyu sunga vanthaka osi enhungo a sonthaka, khatola kyon mmhon ji OPVÜI na sinkicho mekana ombo tsoeworo jiangna choni tsoa yicho jitüv ana kvüthüngha n hunghan. 26 Ombona yuta topvülo longphya pia oyam noruronala; osi ombo tsoeoro jiango mmha tssoala. 27 N mhom jilona khophia osi mmhom tssoa; tona ni tsoronichen jiangna yuta topvülo meta jilo vanchevka; 28 ntiotssole OPVÜI na ntiojo elancho sana ji chokatala; osi ombolo longtsükao kyon jiang ji n sinkiala. ombona nchünkhon onte nkochetala, khatola n thae ji tsoeoro jiango phanchukchi siv. 29 Ntsanrük jiangna metaji hov osi jilo nchünkhonto vamvü. 30 Kyon mmhon ji yi jianglo nchümri jüa osi ombona yuta topvülo elamo ji tssoala. 31 Ombona ombo Potsow ji shikhfü ji lümbümi vatala osi yuta topvülo hojilona nkae n yiala. 32 N thae jina kyon mmhon ji cheta vanala; osi lüngthav ekhyo tssoala; 33 khatola OPVÜI na ombo ri khelo thechi ombo n si; mekana ojang yutalo nlan n rhükathuk. 34 Ni eyilo ji OPVÜI lo vata osi ombo yizüng jiang engayia; tona ombona metaji ni pia ni phfütssonthokvü, osi n thae jiango phani sia nina hunguv. 35 Ana n thae kyon tsüka ntsia; ombo tsüngon motsünga lojo Lebanon enungi Cedar dung esüa otsük akvü füpchochia vancho; 36 khatola sülani jo ana meta ji yakchia yiaha ombo n hung; Ana ombo eyingoa ha ombo n hung. 37 Kyon mmhon ji zeta osi ntsae ji chei zeta, noying kyon jina tsoronichen liala; 38 tokhatola mmen kyon jiango rorüpi sithukala; osi onte orojü jiango phyaklüpi sithukala. 39 OPVÜI na ntsanrüng kyon jiang shanchoala; osi onteji ezüp yutalo nkochetala. 40 Ombona onte kyochiala osi phanchoala; osi nthae jiang khelona onte shanchoala; ntiotssole ontena ombolo tsankalo woala.
Ezüpi Evan Kyon Randan
1 OPVÜI, ni lüm etsuk lona a ti khangshia! 2 Nina ni lotssi na a meyanthaka; osi nina avümchüchüthaka; 3 Ni lüm etsuk lona aiyo ezüp tsüphov lo vanala; a mmen tsükona a tsük mpüm na ra vana. 4 Aiyo a mmen jüvak jilo a rhetala, osi hojiangjo ana n hankhokvü mmyinga. 5 Azhüva lona a emho jiang nnana kyonala. 6 Aiyo engümthecho osi ejüprocho; Ana eng totona nungra mungala. 7 Nochonori lona a rungtsüngala osi a chüv enhyanthaka. 8 A mmuktsüngthaka osi n khio a nnukrothaka; a lümbümi emhuk elüm lia osi ana ezüp lona erhyuala. 9 OPVÜI, ana nhyaktssüka vamo ji nina ntsia; ana erhyuo ji nina topvü zoa. 10 A lümbüm thukthukala, osi a etho n jüv sithaka. osi a mhyik ji n tsemvü sithaka. 11 A shom osi phinakiren jiangna ha a ndüngo rov mek, a emho shiang tsükona a wopan na mpato a nkachoala. 12 A chüthukhungo jiangna tsirhi toni a vayiala, osi a meyanhungo jiangna a monthukvü a ekhen thokala; ontena n tümjakna a tsükona n mhon kyaktala. 13 Aiyo nobüng tüv osi n zo, eyim esüa oyi n sanche, 14 Aiyo nobüngna oyim n janlamo ji esüa tüv. 15 Tolea ana nilo longtsükatala, O OPVÜI, osi nina a janlam O OPVÜI a Potsow. 16 A ezüp nungra shi khi a ri jiang ti mathathoka; a joyio ji khi onte ti kanchanthoka! 17 Aiyo a vanjovsala osi n tümjakna a ryusangala. 18 Ana a mmen jiang phyochakala; a mmen jiang tsükona a ungkhyutsüngala. 19 A ri jiango etho jüa osi otsük mmhona; ntam n lilea a tssako tüv elümoto vana. 20 Mmhom thung n mhom pilan kyon jiangna a panlanala ntiotssole ana elan ji etssov yanala. 21 O OPVÜI, a ti sinkia; a ti nkachoa, A Potsow! 22 OPVÜI a shanchopvüi! enhünga a kyochia!
Ezüp Kyon Ji Phyochak
1 Ana heto phyocho, "Ana ntangshona etssophyov a nli ji khi mmeni a n sothok; Kyon n mhon jiangna enhyano vanathüng ana ntia n phyo." 2 Ana yitsünga tia n phyov yingto vancho, mmhom ha ntia n phyov vancho! Toaha a ezüpji rankata tae yicho, 3 osi wonkhyu taena a pyingkachicho. Ana kvüta kyunga nchümria na tata a ezüpkacho, Ana heto n ngav n vanchecho: 4 "OPVÜI, kvütenhya a vamla? Kvüthüng a chüvla? A eküm shi kvüta tsüsoa mom sana a zoa." 5 Nina a eküm ji kvüta hüngrithokcho ato! Ni mhadungo jo a eküm tsüngon jo ntia mekcho tüv. Otsotso kyon eküm jo mbung kholung motsünga esüa tae, 6 osi khümcho motsünga esüa tae. Ombona elhi tsso jiang ntia ethev n li, ombona ejüeli hanrhyuo jiang ocho echi tssov sana ombona n tsi. 7 Tona OPVÜI, ana ntio eyilov lia? Ana ni lo eyilokacho. 8 Mmen topvü lona a shanchoa, osi zhüvae jiang khi a ti makathoka. 9 Ana jükrüpi vam, oyi motsünga lea n phyo, ntiotssole ana heto ezüpa vamo ji ni thüngina. 10 Shilona kyungkata a ti ezüpthoka! Ni khfü jiangna a chüvsala. 11 Nina kyon tsüka ji mmen man ji ni püngno khi ezüp piala, osi ombo ematha ehung lanka jiang soryunkuk na lupa to nina lüproe siyiala. Otsotso, kyon tsüka jijo mbung kholung esüa totae! 12 OPVÜI, a randan jiang enga, osi a ekya won ji enga; ana kyathüng oro a nzanchia. A motsüi thanpoe jiang esüa anaha esüngaro tsükona ni yenki kyon esüa tae. 13 Vachi a sia, tona ana mona yi n sithüng esüngaro emathata vamka.
Myingthüng Khen
1 Ana erüm toa OPVÜI ekyo nhyaka vancho; tole ombona enga vansi a ekya won ji zocho. 2 E kyuthao sokvü jilona ombona a süchecho, osi a tssüngyao chonphyalyu jilona a süchecho. Ombona longpvü poni a vanthoki tsanchoa a vanthokcho. 3 Ombona khenthan edem a sokacho, jijo ete Potsow thünga denka khen. Shi ehung kyon elümoto na tüngkachia ontena OPVÜI lo longtsükav. 4 OPVÜI longtsükao jiang ematha elio, ochoangna kisü khümvü n yam ejüng potso ekhüm jiang yolo n rhowoa sana jiang emathao. 5 Nina a tsükona elhi elümoto etssoyithaka, OPVÜI e Potsow; ni esüa ochia n van! Nina e tsükona emhukthao lanka methakra thaka. Elümoto tsso jina ana n phyorao! 6 Ekümrüm than osi othan jianglo ni ematha n li; thanphensae ekümrüm mbüm ekachio ji osi mmen epyov ekümrüm than pio jiang nina choncho mek. Jithüngona jo nina zophen eno e picho, 7 jitsükona ana janlancho, "Helo a vana to; nina a püngno yi jiango shikhfü kako lo lia. 8 A Potsow ana ni lüm erüng etssov kvüta a chokacho ato! Ni püngnoyi jiang ana lümbümi vatala." 9 OPVÜI nina e shanchoala to yithen mmhom ji ana kyonden etssikho lo ezocho. Ana hoji ephyov kvüthüngha n san to nina ntsia. 10 Ni shancho ji ana a lo vae n si; ana ni longtsüka osi nzanchi tsükona yuta topvülo phyoala. Ni kyon jiang etssikho lona ni longtsüka osi n senphi nzan ji tsükona jükrüpi n vanala. 11 OPVÜI, nina a khonzana vamo shi nina kvüthüngha n tümjak to ana ntsia. Ni nzan osi longtsüka jina yuta topvülo tsanchoa a vanthokvü.
Kyochithokvü Randan
12 Ezüp kyungtia na a hachümi lia – n khacheo ezüp! A mmen jiangna a chümzhüi, ana ntia n hunguv sithaka; a mmen jiang a kvüritssan jiang lona kyungkatha ka, osi ana lüm etsson moni sithaka. 13 A shanchoa, OPVÜI! Enhünga a kyochia! 14 A lüngthav yamo jiang khyothechirae hamathoka, a ezüp zesi a emakata vamo jiang kholani yithoka osi yikrathoka. 15 A yikvü emakae jiang lümbüm esuka khyothechithoka. 16 Ni thüngi eroe topvü emathata longshithoka. Nina shanchowo jiang montsso to nchümo jiang topvü na yuta topvü lo "OPVÜI jo kvüta tsüphocho ato!" to phyothoka. 17 OPVÜI, aiyo n khyo, osi yantsae khatola nina a n mhechohan. Nino a shanchopvüi a Potsow – Nina tsüsoa oro a kyochia.
Nochonori Kyon Jiang Randan
1 Yantsae jiang tsükona wonkhyuo jiang emathao; onte ezüp yutalo OPVÜI na onte kyochiv. 2 OPVÜI na onte nkochei onte eküm jiang süyayiv; ombona meta jilo emathata onte vanthokvü; ombona onte ri jiang khelo thechi onte n si. 3 Onte nochonoriathüng OPVÜI na onte kyochiv osi otsük onte mmhonlaniv. 4 Ana phyocho, "Ana ni panlana mmen tssothaka, OPVÜI; a khonzana osi a emiyia." 5 A ri jiangna a tsükona haruk yilan phyotala. Ontena a ji chüi mhechoe a sithokhungala. 6 Oro a zewo jiango lümbüm n tssüng, ontena a tsükona n mhom phyota meta topvü thenchoa wotala. 7 A tssako jiang topvüna a echi tssürütala, osi ontena n mhontso ji a nchümkatala. 8 Ontena phyotala, "Ombo echüv rala; ombona kvüthüngha belüngona phanthilam mek." 9 A shom mmhontsowo, ana longtsüka elitsowo, osi a thüngi tssikunga etso jina mpato a nlan yana yithaka. !0 A khonzana, OPVÜI osi a tsük mmhonlanthoka, tona ana a ri jiang nlilamka. 11 Ontena a khyov meka, osi nina a thüngi ematha lia to ana ntsiv. 12 Nina a kyochiv, ntiotssole ana ntio elan sana ji tssoala; nina ni vanrhyu jilo nchünkhon a vanthokvü. 13 OPVÜI thünga! Israel Potsow ji! Enhünga osi nchünkhon ombo thünga! Amen! Amen!
Tsanthan Ekümo Evan Kyon Randan
1 Siano na jümyim zhükhfüro nhyaktssüka to ana ni nhyaktssükala, O Potsow. 2 Ana a eratsünga ni yanala, eküm Potsow; Ana kvüthüng ni vanpheni owo ni khümchevla? 3 Ana zümo eng kyala, a etsoyu jo esüjü; A ri jiangna yuta topvülo, "Ni Potsow jo Kvüato?" to a engatala. 4 Nkolo jiang nchümi zena a lümbüm buksoala, ana kyon kholuk ji nzo Potsow ki wotacho ana onte sosi ontena a phana rotacho, okhen denta tüngkachita Potsow ekhüm kholuk. 5 Aiyo ntio heto a nungra ato? osi aiyo ntio heto a ezüpato? Ana a eyilo ji Potsow lo vav, osi elani ombo thünguv a shanchopvüi osi a Potsow. 6-7 Tsanthan eküm shilona a lümbüm buksoala, jitsükona ana ombolo nchümkatala. Ombona a mon eküm jilo nungra ekvü ekvüna yithokthaka; nungra jina jükyo esüa a thüngi eronala. Hermon osi Mizar phunglan lona osi Jordan lona jüzanjo ejenlunga joyia esüa owon tssoala. 8 Engo OPVÜI khi ombo n senphio nzan ji a ejüthoka, tona ana zümolo jo okhen dem osi a eküm tsükona Potsow thüngi randam. 9 A nkohapvüi, Potsow thüngi ana ezoala, "Nina ntiolyui a mhe choala? Ntiolyui aiyo a ri jiang khe lona ezüpa tae vamla? 10 Ontena ni Potsow jo kvüato?" to tae a ezota vamo jina onte yikvü yilo jina a pyonroala. 11 Aiyo ntio heto a nungra ato? osi aiyo ntio heto a ezüpato? ana a eyilo ji Potsow lo vav, osi elani ombo thünglam vü, A shanchopvüi osi a Potsow.
Tsanthan Ekümo Evan Kyon Randan
1 O Potsow, elan kyon to a phyoyia, osi Potsow n tsi jiang tsükona a kyoa; oyi n tsae osi kyon n mhon jiang khe lona a shanchoa! 2 Nino a nkochepvüi; Nino ntiolyui a sinkiala? Aiyo ntioli a ri jiang haruk jilo ezüpa tae vamla? 3 Ni wondang osi ni ntsa ji rothoka; hojiang khi ni ntho phunglan zion jilo osi ni khümphen nina vamo jilo a sosi yilanthoka. 4 Tona ana ni thanpheni ov, O Potsow; Nino a ematha yanphen ji. Ana a khendenzhü ji rhüphia ni myingthüng khen dem, O Potsow, a Potsow. 5 Aiyo ntioli heto a nungrato? osi heto a khetsüato? Ana a eyilo ji Potsow lo vav, osi elani ombo thünglamvü a shanchopvüi osi a Potsow.
Nkoha Tsükona Randan
1 O Potsow, e eno na zothaka, – nina nkolo e motsüi jiang thüngi elhi tsüphov tsso jiang ontena ezothaka: 2 nina n longtsüi jiang phani sisi meta jilo ni kyon jiang vanthokwo ji, osi nina jipo thanpoe jiang khangshi si ni kyon jiang soyingo ji. 3 Ni kyon jiangna onte yonri na osi onte etho na meta ji khyoe khicho mek; hojijo ni etho na osi ekhüngna, nina onte vanrhyui onte nzana vamo ji taena. 4 Nino a mesao osi a Potsow; nina ni kyon jiang ekhyo piala, 5 ni etho lona ena e ri jiang khyoala. 6 A shanchov tsükona ana a lotssi mekana a yonri jianglo n longtsükatala; 7 khatola nina e shanchothaka osi e tssako kyon jiang khyothaka. 8 Ena yuta topvülo ni thünga montsso ni piv. 9 Tolia enhungo nina esithaka osi oyam khi ekhyothokthaka; nina e rasan jiang nzo n khochiala. 10 Nina e ri jiang mhadungo etsanthokala, osi e echi jiang onte khithokala. 11 Nina olyuden esüa e lüngtharüpthokcho; nina jipopoe metae e nzonrorathokcho. 12 Nina ni kyon jiang oman laroa nchümcho esüa oman tara taena yeni sicho. 13 Nina ntio e tssoyicho sana e yanren jiangna hungcho, osi e yikvü emakacho. 14 Nina jipolan topvü tssakphen ekümthokthaka; ontena etssaka kvüri eyephitala. 15 Aiyo yuta topvülo a ri osi etssangkung jiang 16 mensekvüla jiang zesi yikra nungra na pyingi vanala. 17 Ena ni n mhechoaha osi e thüngi ni ntsata ji n yesoaha nina hoto tssocho. 18 Ena ni n longtsükav n vanhan; osi ni yizüng n yesohan. 19 Toaha nina ora ekümrümo yolo ezüpkachi esicho; osi emüng echitsowo lo ekachi e sicho. 20 Ena e Potsow n khümvü sisi jipopoe Potsow khüma yicho saliwo nina e ntsinrünguv, 21 ntiotssole nina e mpho nchümri jiang ntsia. 22 Khatola ni tsükona eiyo engakvü echüthokala, osi lüngthavsa vamo olyu jiang esüa etsütsatala. 23 Phanthia, OPVÜI! Nino ntioli yipala? Nipopo phanthia! Nchünkhon mhechoe e ti sia. 24 Nino ntioli e mphoala? E ezüp khangshi shiang ti mhechoa! 25 Ephyaroe likoe e vanthetala; eiyo oyam n khyov livero yolo vanthei vana. 26 Oro e kyochia! Ni n senphi nzan jina oro e shanchoa.
Mesao Yanpithan Khen
1 Ana mesao tsükona okhen shi eranathüng oyi mmhom na a lümbüm pyingala. Eranpvüi mmhom eranphen ji esüa a nnli shilo okhen khyinga methaki hana. 2 Nino eboe yolo opyon mmhontso ji; nino oyilo tssothimori. Potsow na yuta topvülo ni mmhayithaka. 3 Ni yonri ji etssana, thotsü mesae; nino phfütsson myingthüng lia. 4 Myingtsson lona ekhyo lo khochia woa, ntsa osi ntsanrük ji nkocheta! Ni ethona ekhyo tsüphov hansi yiv. 5 Ni lotssi jiango eroa, jiangna ni ri jiang lümbüm chyunrhüyiala; jipo jiangna ni jolo epyakthetala. 6 Potsow na ni pithako ekhüngyan jina kümali vam. Nina ntsanrük khi ni kyon jiang sala; 7 nina elan ji ni chokasi n mhon ji ni tssakala. Hojitsükona ni Potsow na ni ethüngchecho osi mesao thanpoe thüngina jo ni ekyungo ni emathathokcho. 8 Tssüngthi enünguv tona tssütsse ekhov to rhüm na ni sülo thakacho; mesaki sotsü ho na roncho jiang lona khenden jiangna ni denkatala. 9 Ni mesaki eloe jiang yolo mesa tsolo ha jürava, osi ni vantsü hamimoe mesali na tssentsü yukosen ekasi mangi vanala. 10 O mesao ji yanpithan loroe, ana phyo shi enga – ni kyon jiang osi wopan jiang mhechoe sia. 11 Ni pyon ji zesi mesao na ni chokav; ombo ni pvüi, nina ombo yi engayiv lia. !2 Tyre meta kyon jiangna yantso ni benisi rov; osi ejüeli jiangna nina onte thüngi emathayithokvü ekhyo tssotav. 13 Mesatsolo ji mesaki vana – ompvüo kvüta opyon mmhoncho ato! ompvü phuknrhüo sü jijo tssentsü yingna tükcho. 14 Phukthesü opyon ratsav ekasi khümshüm jiangna phana mesao thüngi sosi woala, osi onteha ombo thüngi sosi woala. 15 Ontena emathata longshia oro mesaki rhoroala. 16 A mesao, nina otsoe elümoto vani ni motsüi jiang mesa ji echungchov, osi nina limha topvülo esapvüi onte kümthukvü. 17 A khen shina ni myingthüng ji kümali lithokvü, osi otsük akvü na yuta topvülo ni thünga wov.
Potsow Ete Ndüngo Vana
1 Potsow jo ete khümcho osi ete etho, ezüp yutalo ekyochiv yuta topvülo methaki vanala. 2 Jitsükona limha shi enhyuklea, osi phunglan jiang jümangi vantheralea; 3 jümang jiangna erhyua ntalea, osi ekhenlung na phunglan jiang enhyuklea etena ekyuv mek. 4 Potsow yantsü jilo osi ntssontso ntho ki jilo longshi hana yithokvü zhükhfü motsünga lia. 5 Potsow jo hoji yantsü jilo vana, osi kvüthüngha hoji n monthokehe; ombona nyazüngina oro yantsü ji kyochiv. 6 Jipo jiang ekhentsüngrala, ekhüngyan jiang enhyukala; Potsow na ejenlungala, osi limha ji pyonroala. 7 Thotsü OPVÜI ji ete yolo vana; Jakob Potsow jo ete tsankaphenji. 8 OPVÜI na ntio tssothakcho sana oro zeta. Ombona limhalo ntio engangcheo tssothakcho sana zeta. 9 Ombona limha topvülo ritsso jiang esanthokala; ombona lotssi jiang khfüroala, otsso jiang roe siala, osi otsung jiang rungi siala. 10 Ombona pyoala, "Ritsso ji esantava," "Osi aiyo Potsow ji to ntsitava, jipo topvü pono ntssontsowo osi limha topvü pono ntssontsowo ji a." 11 Thotsü OPVÜI ji ete yolo vana; Jakob Potsow jijo ete tsankaphen.
Yansapvüi Ntssontso Ji
1 Longshia okhe tümphitava kyonden! owon ntssoni na OPVÜI thünga dentava! 2 OPVÜI, ntssontso ji ekyuv lia; ombo limha topvü pomoe yansae mesao tsüphoe. 3 Ombona kyon jiang pono ekhyo epicho; jipo jiang esav ombona epicho. 4 Etena vamo meta shi ombona ethüngchei e picho, shijo ombo nzamo kyon jiangna kangtsüa hoyata vamo ji. 5 Potsow na ombo vantsülo chüngiala, OPVÜI na chungoathüng longshi won tüngkachita tatara khfüsochitala. 6 Potsow thünga dentava; ete mesao thünga dentava! 7 Potsow jo limha topvü pono mesao; okhen dena ombo thüngtava! 8 Potsow na ombo ntho vantsülo khokthei vanala. ombona jipo jiang pono yansae tssoala. 9 Jipo topvülo yansaeden jiangna Abraham Potsow ji kyon jiang nzo sanrhyuala. Ombo rasantsü topvü lona etho jükata; ombona ntssontso yansa ronala.
Potsow Yantsü Zion
1 OPVÜI jo tsüphoa ete Potsow yantsü jilona osi ombo ntho phunglani na elümoto ntssona ombo thünguv lia. 2 Potsow phunglan Zion jijo elümoto ntssona osi opyon mmhona; mesao tsüpho ji yantsü jina limha topvülo longshi hansi roala. 3 Yantsü ji chungi tsanthe ki jilo ombo ndüngo tsanthephen lia to Potsow na ejüthaka. 4 Mesao jiangna sanrhyutae Zion phunglan ji hatav rotacho. 5 Khatola ontena hoji hungale onte ngangtsüngcho; osi onte kyua tsanracho. 6 Hoji lona onteji ekyu emhuk na rhümacho, osi onteji eloe tsobuku sa vancho esüa 7 osi tsungryu na orhung nkhüphia esüa emhuk ekyu na pyingcho. 8 Potsow na ntio tssocho sana etena zothaka, osi hoji etena Thotsü Potsow yantsü ji lona hungthaka; ombona yantsü ji kümali nkocheta vanthokvü. 9 O Potsow, ena ni khümphen chungina ni n senphi nzan ji nchümchetala. 10 Meta topvülo kyon topvüna ni thüngala, osi ni myingthüng ji limha topvüna ntsia. Nina ntsanrük lona yansala; 11 Zion kyon jiang longshithoka! Nina elanthata nlansüngiala; Juda yantsü jianglo longshi lirathoka! 12 Potsow kyonden, Zion nkonphia sanphitava osi yak ki jiang khae zetava; 13 pikhfü jiang zetava osi rizümki jiang zi zetava, osi ntena echungren etsao ji heto ezotava: 14 'Potsow shijo kümali ete Potsow; yuta tsüngon etsao jiang topvülo ombona esov."
Ejüeli lo Longtsükao Jijo Zhüva
1 Otsük akvüna engatava! Meta topvülo kyon topvüna engatava, 2 teri osi tsüphoe, yantsae osi ejüeli topvüna engatava, 3 A nchümri jo junga, osi kichuk jüa nchümriala. 4 Ana elaroa khendenpvü rhüphia esüa püngnoyi ejunguv jiang yichak jiang erorocheta. 5 Ekyutssü yutalo a n kyu, a ri jiangna a hazhüathüng, 6 osi kyon n mhon, onte ejüeli lo longtsükata osi jiang khi kanchana evan jiangna a hazhüathüng. 7 Kyon tsükana kvüthüngha ombobo n rhanchoche; ombona ombo eküm ji man Potsow n lokuk, 8 ntiotssole kyon eküm man jo ntssona 9 ombona kvüta lokhukcho sana jina jo echü ji nkachoe nchünkhon vanthukvü n man. 10 Nchümri eli kyon jiangha, zhüvae osi n benrio jiangha chükham to kyon topvüna ntsia. Onte topvüna onte ejüeli jiang onte, tsoronichen jiang vayiala. 11 Ontena tsüngona lojo onte liko ramüng liracho, khatola enhungo onte kümali ki jo olüp ji kümthaka. ontena kümali hojilo vanala. 12 Kyon tsüka ji tsüpho jina echü lona ombo n shanchoche, omboha ekümrümo jiang esüa chüi siv. 13 Onte bobo longtsükata evan jiang kvüto tssoa sana zetava, ejüeli na lüm büki evan jiang mhadung ji zetava – 14 onteno olyuden esüa chünrünguv, osi echü jina onte rhükiv. Ntsanrüng jiangna onte khyov, osi onte tsük jiango onte ki na kontae hmhae kyonroe siv. 15 Tolea Potsow na a shanchov; echü ji etho lona ombona a shanchov. 16 Kyon tsüka ji eli kyon kümlea, osi ombo ejüeli tsükarankata yilea jina ni etho ti jaka; 17 ombo chüana ombona hojiang hansi n yiche; ombo ejüeli jiangna ombo nzo olüpi n rheyiche. 18 Kyon ochosana limhalo eküm shilo lüm ebük lilea, osi ombo ekhyo mying thüngitalea, 19 omboha ombo motsüi jiang esüa chüv, osi hojilo jo kümali emüng. 20 Kyon tsüka ji tsüpho jina echü lona ombo n shanchoche; omboha ekümrümo jiang esüa chüi siv.
Ekhüm Tsotso
1 Thotsü Potsow, OPVÜI, jina phyoala; limha topvü engkhfüwoe na engrhewoe nandang ombona tsaphiala. 2 Zion yantsü opyon mmhomo jilona Potsov na onala. 3 Ete Potsow tsathaka, tolea yingto tsacho mek, omi ntav na lanvüngisi tsungryu ntav na nkonzhüi tsata. 4 Ombona ombo kyon jiang oyi tssoyiv ji ehungpvüi tssoyiv tsükona ombona oyak osi liko ji tsala. 5 Ombona phyoala, "A longtsükae kyonden, ochoangna ekümrüm than theta a thüngi ntsatae vachosana jiang tsanrhua." 6 Potsow jo ntsanrüka osi yitssoe ji ombo to oyak shina ehungpvüi tssoyiala. 7 "A kyonden, engatava, ana oyi nsamka; Ana ni tachia ehungpvüi pivka, Israel. Aiyo Potsow, ni Potsow ji. 8 Ntena ekümo than a pio jiang osi yuta topvülo erungthan a pio jianglo n lan nte yanicho mek. 9 Tolea ana nte parhi tssibung jiang osi tssiden jilo nyanyan jiang nte chonicho mek; 10 romhoni ekümrüm topvü a echi osi yingsüng wothüng jianglo tssiden jiang topvü a echi. 11 Ora woro jiang topvü a echi osi phenlungi ekümrümo topvü a echi. 12 "A wontona yilea, ana nte ezov n li, ntiotssole limha shi osi limha shilo licho topvü a echi. 13 Ana tssibung jiang so tsoa mekana nyanya ejen yuv alo? 14 Montsso epi ji nte than tssotava, osi ntena phyochako jiang topvü Thotsü Potsow pitava. 15 Ezüp yiathüng a tsaphitava; tona ana nte shanchov, osi ntena a mying thünguv." 16 Khatola n thae jiango Potsow na heto ezoala, "Ntena ntioli a yizüng jiang ereni engatala? osi a ntsata jiang motsü ntioli rütala? 17 Ana nte elanchoyiv ji nte n chokacho; osi a yizüng jiang n khicho. 18 Ntena efüi nduko jiang topvü thüngi oshom tssoala osi rama etssoe thüngi jokyim tssoala. 19 "Ntena n mhom phyov tsükona yuta topvülo methaki vanala; osi ejüng ephyov nte n khatüngala. 20 Ntena nte shom jiang makvü osi ntena ntanphen yaniv pyimta vanala. 21 Ntena shiang hetopvü tssoaha ana ntia nte n zo, tolea anaha nte esücho tsayia ntena nchümtacho. khatola enhungo ana nlan nte piala osi elaroa nte ntsithokala. 22 "A n khanziden shi engatava, to mekana, ana nte monrathokvü, osi nte shanchoe ochia n vam siv. 23 Montsso pio jijo a phfütssonthoko than ji, osi otsotso ana a yi engae jiang topvü shanchov."
N lan Siyi Randan
1 O Potsow, ni nsenphi nzan lona a khonzana. Ni khonzan tsüphov ji khi a mmen jiang topvü mhei a siyia! 2 A n mhon jiang topvü epyoe a siyisi a mmen lona a ntssüngcheta! 3 A ori jiang ana n khiranala; ana yuta topvü lo a mmen jiang nchümchetala. 4 Ana ni tachia mmen tssothaka – thanpoe mek – ni tachio osi nina n mhon to phyo ji ana tssothaka. Jitsükona nina oyi a tssoyiwo ji elana; osi nlan a pio ji elana. 5 Aiyo a bukpvü na n mhon osi a ebuk tsüngon lona benkae mmen tssopvü. 6 Nina chokao jijo lümbüm tanjüng tona ntsa to; ni ntsinran khi lümbüm a pyingia. 7 A mmen jiang khi a siyia, tona a ntssünguv; a epyocheta, tona sherhyu lona emhümkata a kumvü. 8 Ematha longshi won a zothoka; nina a jüprothukthaka khatola elani a emathalamvü. 9 A mmen jianglo a ti zekayina a n mhon jiang mhei a siyia. 10 A lo lümbüm ntssung rheyithoka, Potsow, osi omon ethan, longtsükao mon a theyia. 11 Ni vanrhyu jilona a ti chiyithoka; ni nthomon ji a lona khi hansi ti yia. 12 Ni shancho ji lona hungwo longshi ji a pilana, osi ni yi engav a chokathoka. 13 Tona ana ni yizüng jiang mmen kyon thüngi püngnov, osi ontena khophi ni lo yiv. 14 A nchümcheta Potsow, osi ashanchoa, tona ana longshia ni ntsanrük ji ehungpvüi tssovka. 15 A kyochia a phyothoka, OPVÜI ana ni thünguvka. 16 Nina ekümrüm than ni n choka, anaha hojitüv ni tham mek, erungthan naha ni n matha. 17 Potsow, a than jo eküm teri ji, teri eküm osi khophio lümbüm ji nina n khichov n si. 18 O Potsow, Zion nzana osi ompvü nzanchia, Jerusalem pikhfü ji tssochoa. 19 Tona etümelan lona thamo jiang osi e erungthan jiang nina e khichoyiv, osi ni thanphensa jianglo tssibung khi thantav.
Potsow Yitsso Osi Kianzan
1 Tsüphoe, nino ntioli ni n mhon jiang khi kanchanala? Potsow nzan jo kümali nzan. 2 Nina oyam chüthokvü kyakala; ni nnli jo khetssülo erov esüa. Nina yuta topvülo ejüng yani phyoala. 3 Nina mmhom ji thünginajo n mhom ji ekyungo ni chokatala. osi ntsa ji thünginajo ejüng ji ekyungo nzanala. 4 Nina ni yi khi oyam tssatssov ni chokatala, osi nino ejüng ephyoe. 5 Jitsükona Potsow na kümali ni monthokvü; Ombona ni rhümae ni kina ni süchukvü; ombona eküm limhae na ni chiyi thokvü. 6 Ntsanrüng kyon jiangna shi hungi kyuv; Jithüng ontena ni emakata phyov, 7 "Zeta kyon shina tsanchophen Potsow lo n zikana ombo ejüeli jilo longtsükata osi elhi n mhom tssoe lüm nana vanala." 8 Tolea aiyo Potsow ki olive dung zacho esüa; ana ombo n senphio nzan jilo Kümali longtsükatala. 9 Potsow nina ntio tssothakcho sana ji tsükona ana yuta topvülo montsso ni piala, ni kyon jiang yolona ana nino mmhona to ehungpvüi tssovka.
Kyon N thanri
1 Zhüvae jiangna Potsow n van to nchümala. Onteno kyon sulyuoden, ontena ekhenthao tssothaka; ochosana tia elamo etssoe n van. 2 Potsow na kyon ochosana tia nchümri eli, osi ombo ekhüm vevana na to oyaki na zechochiala. 3 Khatola onte topvüna kholani tsanthaka; osi onte n mhon ji kheti tae. ochia elan etssoe n van, tsüka tia n van. 4 Potsow na phyoala, "Ontena n tsichoke?" "N mhom etssoe shiango ebüng eyimden ke? Ontena a kyon jiang retsoyia eküm vanala, osi kvüthüngha a thüngi n randanala." 5 Khatola onte ekhemka, echunga tia hojito onte n khenhancho tüv ekhemka, Ntiotssole Potsow na ombo kyon jiang ri jiang nzonrorae siyiv. Potsow na onte sithaka, hojitsükona Israel na onte khyothechiv. 6 Zion lona ekhyo chiyio to ana randanala. Potsow na Israel kyon jiang onte etancho vanthoklana na kvüta onte emathavto!
Ori Mhadungo Tsancho Randan
1 O Potsow, ni etho lona a shanchoa; ni ekhyo ji khi etancho a vachia! 2 A randan enga, O Potsow; a yi shiang a zoyia! 3 Kangtsüi kyon jiangna a halo roala; osi haruko jiangna a lüngthav yantala – onteno Potsow n kyuiden. 4 Tolea Potsow jo a kyochipvüi. OPVÜI jo a nkochepvüi. 5 A ri jiang kyakrüp ji khi Potsow na onte ezüpthokvüka. Ombo longtsüka eli, ombona onte monthokvü. 6 O OPVÜI ana longtsüka lia ni thamvü; Nino mmhona, jitsükona ana montsso ni piala. 7 A ezüp topvü lona nina a shanchothaka, osi ana hunga a ri jiang khyothaka.
Oshom na Kyakthechio Kyon Ji Randan
1 O Potsow, a randan enga; a jonji jiang sisi ti yia! 2 A engayia osi a janlana, aiyo wonkhyu emhuk na a laphyatsüngthaka. 3 A ri jiang kyakrüp jiang zesi a ekhentsüngthaka, nthae jiang khangshikhfü na a pyonrothaka. Ontena a lo ezüp sükatala; osi ontena athüngi lüm tsuka a tssakala. 4 A ekhentsüngi echüv ekyu lona a pyonroala. 5 Ekyu osi ene na a tsükyathaka; osi ekhenthao na a venyathaka. 6 Ana yukhyu esüa echo mpacho saliwo, pya oyi esana vam. 7 Ana kona pya oyi yingsiyinglo metae aki tssov. 8 Ana tsungryu mbung ntav jiang lona zakto khümcho hunguv. 9 OPVÜI, a ri jiangna oyi nsantao jiang hamathoka! Ana yantsü jilo jenbukta osi khontarota hungala, 10 Zümo eng yantsü haphia, osi yantsü ji münghanyihan tona ezüp tona pyingthokala. 11 Meta topvülo tssorophyoro tae; lantsüi jiang topvü khangshi ntssonshi tae osi kyakthechita na pyingcho. 12 A ri na a yikvü-emakao jijo ana rümkhoka, osi a panlan jina a merango jijo ana nkachoe sikhuka. 13 Tokhatola nino, a shom ndüng, osi a jokyim etssoe. 14 Enina lüm pita thyuta osi ekhümkina nzo khümta rocho. 15 A ri jiang tsüngon n jam chürathoka; ekümina echüli onte rheyithoka! Onte son oki osi onte lümbümi n mhoiji jükhana. 16 Tokhatola ana OPVÜI Potsow khi a nzanchithukvü tsaphicho. osi ombona a shanchov. 17 Enyathüng, engo osi zümolo, yuta topvülo a jonji randan jiang ombo thüngi chüngiala, ombona a won zov. 18 Ana a ri thüngi rota vamo shilona ombona a shanchoe a yilanthukvü. 19 Potsow ochona kümali sa rothakcho sana jina onte khyovka, ntiotssole ontena n khophiala osi ombo n kyuala. 20 A shom ehen jina ombo shom jiang sakatala; osi ombo phyochak jiang yesoala. 21 Ombo yi jiango ponshüng lona enyipkata khatola, ombo lümbümi etssangkung jüa; ombo yi jiango thyujü esüa enyipa khatola, jiangna yonri erov esüa etsüratala. 22 Ni ezüp jiang OPVÜI lo vanthoka, tona ombona ni nkochevka, N lan n lio kyon jiang ombona kvüthüngha oyam khi n khyothokala. 23 O Potsow, tolea nina münghan osi oyi n tsae jiang onte eküm tsüngon tia n risov onte chürathokvü. A tsükona jo nilo longtsükatala.
Potsow lo Longtsüka Randan
1 O Potsow, a khonzana, aiyo oyam na a sakatala; a ri jiangna yuta topvülo a khangshiala. 2 A panlan jiangna eng tona a sakatala. A thüngi rotae kyon elümoto vana. 3 Thotsü Potsow, a kyuana ana nilo longtsükatala. 4 Ana Potsow lo longtsükatala, osi aiyo a n kyu; ombona ntio phyochak licho sana ji tsükona ana ombo thüngala. Kyonshae na jo ntio a lyuyivla? 5 A ri jiangna eng totona ezüp a piala; osi a tssatssothokvü kyaktala! 6 Ontena nkeni tsantherae ana ntio elhiana achetala, osi a lüngthav eyilotala. 7 O Potsow, onte n mhon ji man onte khangshia; ni lüm etsuk lona onte khyothechia. 8 Aiyo kvüta a ezüpa sana nina ntsia; ana esü zamo jiang nina sekata vanpvü. Nina hojiang ni kako lo eranrae licho alo? 9 Ana ni tsaphio ji tsüngono na a ri jiang phanlanchiv. Potsow jo athüngoe to ana ntsia – 10 ombo OPVÜI, ocho echümchak ana longtsükata sana ji. 11 Ana ombo longtsükatala, osi a kyuv mek. Kyonshae na ntio a lyuyikhukvüla? 12 O Potsow ana ntio phyochakcho sana ana ni piv; ana a montsso than ji ni piv, 13 ntiotssole nina echü lona a shanchothaka osi oyam na a ekhyov lona a shanchothaka. Jitsükona ana Potsow hungjano sanphiala, osi eküm vamo jianglo onkao ondang jilo sanphiala.
Kyochi Randan
1 O Potsow, a khonzana, khonzan to tssoa, ntiotssole ana ni lo tsankav roala. Tsungryu ntav jiang n santhüng nandang ana ni echo kupi tsanthetala. 2 Ana ntssontso Potsow ji tsaphiala, a ethelan topvü a benriyio Potsow ji. 3 Ombona potsüwoe na a janlamvü osi a shanchov; a panlan jiang ombona kyothechiv. Potsow na ombo n senphio nzan osi longtsüka ji a ejüv. 4 Aiyo kyon etsoe hingho ari jiangna a hazhücho. Onte ho jiango otsso osi lotssi esüa; onte nnli jiango yonri erov esüa. 5 O Potsow, ni tsüpho ji oyaki na ejüa, osi ni phfütsson ji limha topvü pono ejüa. 6 A ri jiangna a zonyathukvü ozhü nrhangi lia; Aiyo nungra na pyingi vanala. Ontena a lano sokvü jyucho, khatola onte rhetala. 7 O Potsow, ana chüngchünga longtsükatala; ana okhen dena ni thünguv! 8 Phanthia, a mon! Phanthia, a khendenzhü! Ana eng ji chirothokuka. 9 OPVÜI, ana jipo jiang mhadungo na montsso ni piv. Ana kyon topvü yolo na ni thünguv. 10 Ni n senphi nzan jina potsüo etssungala; ni longtsüka jina oyak etssungala. 11 Potsow ni tsüpho ji oyaki na ejüa, osi ni phfütsson ji limha topvülo ejüa.
N thae Jiang Khanshithukvü Randan
1 O yansaeden, ntena kvüthüngsanatia ntsa lona methaka alo? Ntena kyon topvü ntsa lona etsia alo? 2 Mek! ntena n mhom etssov ji tae nchümtala. osi meta jilo münghanta osi jenbukta lithukala. 3 Kyon n mhon jiangna onte eküm echung woriala; ontena buklena ejüng phyoala. 4 Onteno nrüden esüa echü mozhü na pyingcho; onteno nrütsü nobüng jina, 5 nrü erüm jiang khen ji n ngayio ji esüa, mekana ratssen okyak eli randan lea n ngayio ji esüa onte eno ji ndungkachi siala. 6 O Potsow hingho ntav shiang ho jiang nrümia. 7 Ojü tsümoni sia esüa onte monthoka; lanpvülo ero zacho esüa onte sümrothoka. 8 Züzüv jiang phyona to onte pyonthoka; ngaro echü vancho wondang n hungu siwo ji esüa onte kümthoka. 9 Ontena n tsiv vanathüngna ero esüa elhüpi onte siala; ontena eküm vanpvü na Potsow na ombo lüm etsuk lona vena yi onte sithokvü. 10 Mmen kyon jiang khangshiana ntsanrüng jiangna zesi emakav. ontena n thae jiang ejen jiang rhyusochia yiv. 11 Kyon jiangna, "Ntsanrüng jiango otsotso yantsothaka to phyov; otsotso, limha shi zeyata evamo Potsow vana."
Tsanchophen Randan
1 A Potsow, a ri jiang khe lona a shanchoa; A yana vamo jiang khe lona a nkocheta! 2 Kyon n mhon jiang khelona a shanchoa; Münghan jiang khelona a shanchoa. 3 Zeta! ontena a lüngthav a nhyakta vana; haruk kyon jiang etssirhyui a yantala, 4 ana ntia woricho n li, O Potsow, osi ntia a n lan n liaha ontena zakto vanphen khirae a nhyaktala. 5 OPVÜI Thotsü Potsow, phanthi a kyochia; nina zeta, Israel Potsow! Phanthi n longtsüi jiang ezüp pia; osi ejithechiden n mhon jiang khonzana ti vana 6 Ontena mmyulani elani oro füro esüa nnyenta yantsüi rümphitala. 7 Onte yikvü-yilo osi ekhenlung yi shiang engatava. Onte nnli jiango obüngi yonri Jücho tüv, khatola ontena jo ochina ha onte n zoyia tsayiala. 8 Tolea OPVÜI, nina onte emakatala; nina n longtsüi jiang topvü emakatala. 9 Ana ni etho lo longtsüka lia; osi nino a tsankaphen, O Potsow. 10 A Potsow na a nzanala osi a thüngi rov; ombona a ri jiang khyothechia a hunguv. 11 O Potsow, onte ti chüthoka a kyon jiangna mhechoe mpato siv. Ni etho lona onte ji nzonronrae sithoka osi onte khyothechia, O OPVÜI, e nkohapvüi. 12 Onte menfü lo mmen mpata; onte yi jiang topvü mmen tae; onte ji kangtsü lona onte rhümathaka! Ntiotssole ontena rhüyia ejüng phyoala, 13 Ni lüm etsuk lona onte monthoka; monrüngi onte sithoka. Tona kyon topvüna Potsow na Israel sala to, osi ombo na limhatsü echeta sala to chekav. 14 A ri jiangna mmyulani elani oro füro esüa nnyenta yantsüi rümphitala, 15 füroden esüa ojak yana rümphitala osi ontena ojak tssona n hungana erontala. 16 Tolea ana ni etho ji thünga dem; enya akvü ana ni n senphi nzan ji thünga dem. Nino atsankaphen tssoa yipvü osi a ezüp yutalo a khümcho. 17 Ana ni thünguv, a n kochepvüi, A tsankaphen jo Potsow, a nzana evamo Potsow ji.
Shanchothuko Randan
1 Potsow, nina a sithaka, osi a khyothechithaka; e thüngi ni lüm tsuka vancho – khatola enhungo e thüngoe zechiala. 2 Nina liko ji enhyukthokcho osi küngsothokcho; enhungo hoji khfü ji emi yia ntiotssole hoji küngroa vana. 3 Nina ni kyon jiang elüm ezüpthokthaka; ena kinoeden esüa nkanphitala. 4 Ni kyuo jiang nina n lan n pio tssoa nina ntangshon yi pithaka. 5 Ni etho lona e shanchoa; e randan e ngayia, tona ni nzamo kyon jiang shanchov. 6 Potsow na ombo ntho khümpheni na phyothaka, "Ana ekhyo lona Shechem ji chisoe Sukkoth hayi ji a kyon jiang chitayiv. 7 Gilead jo a echi, Manasseh ha a echi; Ephraim jo a kikho osi Juda jo a mesa jarung. 8 Khatola Moab jo ana khetsükmha Jüpvü esüa tsütsav osi ana a jokhüp ji Edom lo shümchiv, jijo ana hoala to chekav ji. Philistine jiangna a khyoe tüngkachitav nchümta alo?" 9 Potsow, ochona yantsü epichako jilo a sosi wovla? Ochona Edom lo a sochiv la? 10 Nina otsotso a sithakcho alo? Nina a rasan jiang nzo n khochivke? 11 Ori jiang khyov e kyochia; kyon na e nzanchiwo jijo oman n li. 12 Potsow e thüngoe tssona jina khyov; ombona e ri jiang khyov.
Nkoche Randan
1 O Potsow, a ekya a engayia; a randan a engayia! 2 Ana n benlani na osi a kina kontae ni tsaphiala! Tsancholamoe a soa, 3 ntiotssole nino a nkochepvüi, osi a ri jiang zalanchiphen ji ni. 4 A eküm totona ni ekhümki a vanthoka; ni echo kupi a tsanthethoka. 5 O Potsow, nina a phyochak jiang zothaka, osi ni kyuchio jiang ejan ji nina a pithaka. 6 Mesao ji harishi nzyu elümoto ekhyimia; ochüm n lina ombo vanthoka! 7 O Potsow, ni mhadungo nchüngkhon ombo sathoka; Ni n senphio nzan osi longtsüka ji khi ombo nkocheta. 8 To tssona ana nchünkhon ni thünga dem osi ana phyochako jiang eng akvü ni piv.
Potsow Nkoha Lo Longtsüka
1 Potsow khi a shanchothokvü ana erüm toa nhyakala; Ana ombo lo tae enhikatala. 2 Ombo taena a nkocheta ashanchoala; ombo a nkochepvüi, osi kvüthüngha a nkhyothechi. 3 Ntena yuta kvütenhya khia kyon ocho epi phiroe sicho esüa etho n jüv roe sithakcho sana ji hatavla? 4 Ombo myingthüng vanphen jilo na ntena ombo tssüngjo-hungala; ntena n tsa elhi lo emathatala. 5 Ana Potsow lo tae enhikatala; ana ombo lo eyilokatala. 6 Ombo lo taena a nkoha a shanchoala; ombo a nkochepvüi, aiyo kvüthüngha oyam na a n khyo. 7 A shancho osi myingthüng jo Potsow ponoi tae; ombo a nkohae etho ejüi ji; osi ombo a khümcho ji. 8 A kyonden, yuta topvülo Potsow lo longtsükatava. Nte ezüp topvü ombo ezotava, ombo ete tsankaphen ji. 9 Kyon topvü ji ethük kholungro esüa tüv tae; teri tsüphoe topvü ntia mek. Füpheni onte thei zelea ntia n füchoala, onteno ethük lona zükhokata. 10 Jenbukta jilo ti longtsükatava; retsoreyu elhi lona ntiona khakchov tsaya ti nchümtava; ni ejüeli ranka lea hojilo ti enhyikata. 11 Potsow na etho ji ombo echi osi nzan jo n senphi to yenjoa tae mekna phyoa ana zothaka. 12 OPVÜI, nina otsük akvüto ombombo elhi ephan yantsoala.
Potsow lo Eyiloka
1 O Potsow nino a Potsow; osi ana ni nhyaktssükala. A eküm totona likying meta ojü n jücho esüa a eratsünga ni nhyatssükala. 2 Ekhümki na ni a hungthoka; nino kvüto Thotsü osi phfütsson sana ji ahungthoka. 3 Ni n senphi nzan jijo eküm jilona mmhonkata; jitsükona ana ni thüngu. 4 Ana eküm evanthüng nandangjo montsso ni pia vam; osi ana a khe khikae ni thüngi randam. 5 Amon eküm jina tssona tsoyuv osi mmhiv; osi longshi khen ni denkav. 6 Ana belüngi erikachi vanathüng lea ni nchümchetala; ana zümo totona ni nchümala, 7 ntiotssole yuta topvülo a nzanchia evamo ji ni. Ni echo khümcho küpina ana longshi khen denala. 8 Ana nilo zonkae vanala, osi ni khe jina a shanchoala. 9 A chüthoku yana vamo jiango echüli rheyiv. 10 Onteno ritsso lona lüngtharav osi echümüng jiango ranfü na tsorav. 11 Potsow na ekhyo ombo pio ji tsükona mesao jina longshiv; Potsow myingona phyochak evae jiangna ombo thüngu, khatola ejüng ephyoe jiang büng jo chüngiv.
Nkoche Randan
1 Potsow, aiyo ezüpi vana, a randan a enagyia! A ri jiang akyuaka – a shanchoa! 2 N thae jiang kyakrüm jiang osi kyon n mhom jiang kholuk jilona a nkocheta. 3 Ontena nnli jiang yonri esüa phyaki, onte yi jiang lotssi esüa harukyi khi etsikatala. 4 Ontena eyikrathao n tsayi ji khi nzüpyingthokuvü tsütsoala' Ontena nsüpa yiroyiri lona kyon jiang yesothokala. 5 Ontena kyakrüm elhi jianglo ntungntssungtala; Ontena tsirhi jiang kvülo dontav sana to khyimtala osi "ochina onte hungu mek" to phyotala; 6 Ontena kyakrüm elhi tssotasi "Etena münghan elhi tsotso kyaktathaka" to phyotala. Kyon lümbüm nchümri ji emhokthao. 7 Tolea Potsow na ombo lotssi ji ontelo kokatala, osi zakto onte meyanala. 8 Hotüv yi jiang tsükona ombona onte monthokvü; onte ehung topvüna kvüri eyephitav. 9 Onte topvü na kyuv; Potsow na ntio tssothakcho sana ji ontena nchüma ombo elhi jiang topvü tsükona phyotav. 10 OPVÜI na ntio tssocho sana jilo ntsanrüng topvü na longshiv. Ontena ombo lona tsancholan yanchev; osi kyon mmhom topvüna ombo thünguv.
Myingthüng Osi Montssoepi
1 O Potsow, ena Zion lona ni thünguv osi ni thüngi e phyochak jiang vav etüma, 2 ntiotssole nina randan janlanala. Meta topvü lona kyon jiangna 3 onte mmen tsükona ni yana rov. E nlan jiangna ekhyoa khatola nina jiang nlan esiyiala. 4 Ochoang nina ethüngchecho sana osi khümpheni vanthokcho sana jiang ematha elio. Ni ki ntio mmhom licho sana osi ni ntho khümpheni ntio mmhom licho sana jiangna elümbüm pükvü. 5 Nina ekhyo epia ejanlanala: osi e shanchov tsükona emhokthav elhi tssoala. Limha topvülo kyon osi jümang pankae evan jiang topvüna nilo longtsükatala. 6 Ni etho tsüphov ji hungthuka phunglan jiang onte zapheno, zathoka. 7 Jümang jiang na echyuo ji osi jükyo jiang nina esanthokala; osi kyon jiangna erontao jiangha noyingthokala. 8 Jitsükona ni elhi tsüphov jiang zesi limhatsüna emhoktsünga zetala. Ni elhi jiangna müngi-onchi limha nkeni na nken jana longshi ontsoniro chiyithokala. 9 Nina eryu jothoki liko ji tanünga liko mmhom lizü kümthukala. Nina zhükhfüro jiang ojüna pyingthukala; Nina liko ji benro na pyingthukala osi nina hetolyui e benriala: 10 Liko rhonthako jilo nina eryu jokathoki liko ji ojüna rethukala; osi ryumhenjü rümkathoki ochon ji enyipthuki benro jiang rankathukala. 11 Ni mmhoncho lona kvüta tssukromümrothuka ato! Nina kvüi woana jilo jo etsson elüm lithukala. 12 Eroyo jiang tssiden na rümzhüi yantsothukala; osi yingsüng jiangha longshi na pyingala. 13 Phenlung jiangha olyuden na rümzhücho; osi lihayi jiang lojo otssuk zakhanala. Olan topvüna longshi lona okhen denala.
Myingthüng osi Montso Epi Khen
1 Kyon topvüna longshi won tssoa Potsow thüngtava! 2 Ombo mying phfütssonthuka dentava: phfütssonia ombo thantava! 3 "Potsow, ni elhi jo kvüta emhokthav ato! osi ni etho tsüphov ji tsükona niri jiangna ni kyua, ni mhadungo epyakthetala to Potsow ezotava. 4 Limhalo kyon topvüna ni khümala; Ontena ni thünga dentala, ni mying ji nsikata thüngtala to ezotava." 5 Potsow na kyon yulo ntio emhokthav elhi tssothakcho sana oro zetava. 6 Ombona jümang jiang likying kümthukala; Ete motsüi jiangna ojoena zhükhfü ji pankae chiyicho. Hojithüng etena ombo elhi ji zesi longshitacho. 7 Ombona ombo etho khi kümali sala osi jipo topvü zeyata vanala. Ombo panlan ochia tivathuka. 8 Ete Potsow thüngtava, jipo topvüna; nte myingthüng won ji zothuka. 9 Ombona eküm evanthukthaka osi e n longthoku e sayathaka. 10 Potsow, nina ojang tssoe e zeta; janti jiang omina rungi zeoji esüa ojang tssoe ezeta. 11 Nina tsirhi lona esathukthaka osi e mankvüi oha mmyinga ehanthukthaka. 12 Nina eri jiang khi e sümrothukthaka; ena omi osi jüphyonjü yakchia yicho, khatola enhungo nina tsanchophen metae e vathukthaka. 13 Ana niki erungthan hansi roala; ena ntio phyochak cho sana ni thamvü. 14 Ana ezüpi vanathüng ntio ni piv phyochakcho sana ji ni piv. 15 Ana thanphen sa jilona erungu olyu ni thamvü; Ana olyu osi tssibungden ni thamvü, osi miphung jiha potsüwoe chüngiv. 16 Potsow kyuchi topvüna oro engatava, ombona ntio etssoyicho sana ji ana nte ezov. 17 Ana ombo thüngi nzan chona kyacho; osi okhenina ombo thüngcho; 18 Ana a mmen jiang n chekavo, OPVÜI na a randan engav mek. 19 Tolea otsotso Potsow na a zoyithaka; Ombona arandan a engayithaka. 20 Ana Potsow thüngala, ntiotssole ombona a randan a n valanchiyihan, mekana ombo n senphio nzan ji a thüngina valanchi n sihan.
Montso Epi Khen
1 Potsow, e khonzana osi e mmhayia; nzan mmha hansi ezekata, 2 to tssona limhatsü na ni lüm erüng ji ntsiv; osi jipo topvüna ni shancho ji ntsiv. 3 O Potsow, kyon khi ni thüngthoka; kyon topvü khi ni thüngthoka! 4 Jipo topvüna longshia ni denkathoka, ntiotssole nina kyon jiang ntsanrük lona etsiala osi limha lo jipo topvü olan soala. 5 O Potsow, kyon jiang khi ni thüngthoka; kyon topvü khi ni thüngthoka! 6 Liko jina tssüngthi mmhom ethithaka; Potsow, e Potsow na e mmhayithaka. 7 Potsow na e mmhayithaka; Meta topvülo kyon topvüna ombo yikrachithoka.
Ekhyoe Jipo Khen
1 Potsow na phanthiala osi ombo ri jiang jiang tsanrothokala. 2 Ombo tssako kyon jiangna oyam n khyov tsanrala; omi ndüngona onni phyomo ji esüa, nthae jiangjo Potsow mhadungo na moni siv. 3 Tokhatola ntsanrüng jiango emathav osi ombo vanhya lona longshiv; ontena emathatala osi longshia tüngkachiala. 4 Potsow denkatava, ombo mying ji thünga dentava; emhenjü lona sanphio ji lan methakia. Ombo mying jo OPVÃœI – Ombo mhadungo longshitava! 5 Potsow na ombo ntho khümpheni vani opvüpoe n van jiang zeyata osi emi jiang nkohachetala. 6 Yingsüyingloe ji ombona oki pia vanthokala osi evüngki evan jiang etancho evam lo sochetala, tolea ekhüng etssoe jiango yingsüyinglo metae vam. 7 O Potsow, nina ni kyon jiang socheo jithüng jo, osi nina lijüng yakchia khochio jithüng jo, 8 liko jina enhyukcho, osi oyak jina eryu jothokcho, hojijo Sinai Potsow osi Israel Potsow rowo ji tsükona. 9 Nina eryu etsson jothoki liryu ji lizü kümthokcho; 10 ni kyon jiangna hojilo onte ki tssotacho; ni mmhon yakchia nina yantsae jiang pioloncho. 11 OPVÃœI na yizüng ji picho osi eloe elümotona yithen ji heto hanphitacho: 12 "Mesaeden osi onte rasanden jiang na tsanrala!" Jilo phanchowo jiang ji kilomung eloe jiangna jantae khicho: 13 janti na yikhyu nsüngrücho, osi echo jiango shona taena e razhüa tüv. (Ntio tsükona nte ejoma jo ritsso yutalo olyu yolo vanchola?) 14 Thotsü Potsow na Zalmon phunglan lo mesao jiang phanro jithüng sheryu jothokcho. 15 Bashan jo kvüta phunglan tsüphov ato, Yonton elümoto khyinga! 16 Ni yonton tsüpho jiang lona ntiolyui Potsow vanphen phunglan ji n khanziv zechiala? OPVÃœI na hojüo kümali vam. 17 OPVÃœI na ritsso kari etho ejüv wothüng wothüng sosi Sinai lona ntho metae roala. 18 Ombona rhümao jiang khosha sosi ntssoni chungoala; Ombona ombo panlamo kyon jiang thüngina yantso khiala. OPVÃœI Potsow na jilo vam. 19 OPVÃœI thünga, ombona engakvü ete ha jiang e haniala; ombo e shanchowo Potsow ji. 20 Ete Potsow jo e shanchowo Potsow; ombo OPVÃœI, ete PVÜI ochona echü lona e shanchoa sana ji. 21 Otsotso Potsow na ombo ri jiang osi ochoang na onte mmen lanka jianglo tae sanphia sana jiang kvüri jakiv. 22 OPVÃœI na phyothaka, "Ana ni ri jiang Bashan lona rothuklamka; Ana jümang chungina sosi chiyilamka, 23 osi ontena onte ejen jiang rhyuphia sanphitav, osi nte füro jiangna etsson mmyaktav." 24 O Potsow ni ekhyo khochi ji topvü na hunga, Potsow a mesao jina ombo ntho kiwoe khochio ji. 25 Khenden jiangna ovüngi tssoyi, khendenpvüi ekhfüi jiangna sülani tssoyi, olungo jo loroeden jiangna kyarakvü ekhophita to heto okhen dentala. 26 "Ombo kyon jiang etssikho lona Potsow thüngtava; Jakob tsoronichen topvüna Potsow thüngtava!" 27 Ovüngtso ji pvüji teritso Benjamin, jisülo Juda esopvüiden tona onte razhü ji, jisülo Zebulun tona Naphtali to esopvüiden. 28 Potsow, ni etho ji ejüa Jerusalem lo mesao jiangna onte yantso jiang ni pio jilo 29 ekhümki ji lona ni etho nina e tsükona tsütsao ji. 30 Benbuk yoe vamo ekümrümo Ejip kyon jiang maka; jipo jiang maka, tssibung osi mangsüro jiang ha to, onte topvüna epyakthei onte janti jiang ni n thanthüng nandang. Ritsso jüpomo kyon jiang tsanrorae sithoka! 31 Ejip lona lantssoeden rov; Ethiopia kyon jiangna yonkachia Potsow thüngi randandav. 32 Limhalo ekhüngyanden, Potsow denkatava, 33 ombo oyakina pyaphia sanphiala, nkolo liphen oyak ji. Ombona ekhenthao erona owon tssoji engatava. 34 Potsow etho ji thenchoa ezotava; ombo myingtsson ji Israel pono lia, osi ombo etho jo oyaki lia. 35 Potsow na ombo ekhümkina chiyiana kvüta erangsüa tüv ato – Israel Potsow ji! Ombona ombo kyon jiang etho osi ekhyo piala. Potsow thünga!
Nzanchi Randan
1 O Potsow, a shanchoa! ojüna a evüng nandang a ntüngzhüthaka; 2 chonphyalyu ejunguv lo a rhyuthetala, osi likotso n li; Aiyo ojü ejungi vana, osi jükhyo na a rhüktsünguv sala. 3 A nzanchipvüi etsalona ekhi shakroa tüngthaka, ni nzan zechi lona omhyik na a noa vanthaka. 4 Ntam n liv a tssako kyon taena a kvüri tssan lona kyungkathaka. A ri jiangna ejüng a phyoyiala; Onteno etho jüa osi a chüthokvü yantala. Ontena ana n füo tsütsaelan jiang a pilanthokala. 5 O Potsow, a mmen jiango ni thüngina mphoe n va; A n benri zhüva ji nina ntsithaka. 6 Nilo longtsükae jiang a tsükona ti yikrathoka, Sandamo Thotsü OPVÜI! A khi ni ekhüm jiang pono yikra hansi ti yithoka, O Israel Potsow! 7 Ni tsükona oyam na a yikvüala osi yikra taena a pyingthokala. 8 Aiyo a jenio jiang thüngi jo amoatssi tüv, osi a wopan jiang thüngi jo jipopoe tüv. 9 Ni khümpheni jüngthei evam a chokatala; ni yikvüo jiang ji alo elongkatala. 10 Ana teri küma khangala, tolea kyon na a yikvüala; 11 Ana nungra mpensü ekatala, tole kyon na a makatala. 12 Ontena lantsüina a motsü rütala. osi kinoe jiangna okhen tssoa a denkatala. 13 Tolea OPVÜI, a tsükona jo ni thüngi randamka; ni yuta ebenlo a janlana. Ni nzan tsüphov ji khi ajanlana, Ntiotssole nina shanchov phyochako ji ephan benthokala. 14 Chonphyalyui a rhyuthev jilona a shanchoa; a ri jiang a nkachothoka, osi ojü ejunguv jiang lona a shanchoa. 15 Jüphyon jina a ti evakzhüthoka; jümangi eyithechi a ti sithoka mekana olüpi a ti rheyithoka. 16 OPVÜI, ni nsenphi nzan mmhom ji yakchia a janlana; ni nzanti tsüphov ji yakchia a thüngoe a zechia! 17 Ni nri ji thüngina mphoa ti vana; Aiyo ezüp tsüphov lo vanka – enhünga a janlana! 18 Roa, osi a shanchoa; a ri jiang khelona a shanchoa. 19 Aiyo kvütata a yikvü-yilota, oküpi a joyithoka sana nina ntsia; osi nina a ri jiang hungkhana. 20 Yikvü-yilo jina a lümbüm rothaka, osi aiyo eyilo n liv vanala. Ana a nchümchei kyon eyiloa ha ochia n van. Alümbüm a emiyiwo tüv yana ha ochia n yanche. 21 A wontonathüng ontena echü mozhü a picho. A eratsüngathüng ontena ethem jü a picho. 22 Onte tokhuta jiang yakchia onte monthokvüka; onte ntho tokhu jiang yakchia onte elungrathoka. 23 Omhyik onte jukirathoka! Onte echen jiang belaka tae vanthoka! 24 Ni lüm etsuk ji onte lo phyangkayia; ni lüm etsuk jina onte venyathoka. 25 Onte nchenki jiang siraki sithoka osi onte süki jiang ochia eküm enhyoe ti vanthoka. 26 Nina ezüpthoko jiang ontena khangriala, osi nina tssatsso kyon jiang ezüp jiang ontena rütala. 27 Onte mmen jiang topvü sekarae vayia; osi ni shancho jilo onte ejan ti lithoka. 28 Eküm kako jilona onte mying jiang mhei siyithoka; osi ni kyon jiang yolo onte ti khanhyathoka. 29 Tolea aiyo eyilo n liv ryusanga vanala; O Potsow, a sükata osi a shanchoa! 30 Ana okhen dena Potsow thünguv; ana montsson ombo pia ombo tsüpho ji thenchoa ehungpvüi piv. 31 Hojina OPVÜI ji tssiden osi tssibung khi thancho lona kyungkata emathav. 32 Hoji kvüthüng oyam na khangri jiangna hungana onte emathav; osi Potsow ekhüm jiang lümbüm tssonkav. 33 Ethev lia chomo jiang OPVÜI na engayila, osi vüngpheni ombo kyon vamo jiang ombona n mhechoala. 34 Potsow thünga, oyak osi liko, jümang osi jilo lyuyingcho topvüna. 35 Ombona Jerusalem shanchov osi Juda yantsü jiang tssocholam. Ombo kyon jiangna jilo vam osi meta ji onte echi tssov; 36 Ombo nri jiang tsoronichen jiang na hojilo tssentso tssov, osi ombo nzamo kyon jiangna jilo vam.
Nzanchi Randan
1 Potsow, A shanchoa! OPVÜI, enhünga a nzanchia! 2 A lüngthav eyan jiango khyothechirae hamathoka. A ezüp shi tsükona emathae jiang elana yithoka osi yikrathoka. 3 A emakao jiang oyam khi khyothoki nungrathoka. 4 Ni thüngi eroe jiang topvü longshithoka. Ni shancho ji tsükona montsson ni pio jiang topvüna yuta topvülo, "Potsow jo kvüta tsüphocho ato!" to phyothoka. 5 Aiyo n khyontoe osi ekyorung n van; Potsow, zakto a thüngi roa. wo OPVÜI, nino a shanchopvüi – tsüsoa oro a kyochia.
Eson Tsüka Randan
1 OPVÜI, ana ni tsankalo yithaka; Kvüthüngha a ti khyothoka! 2 Ntiotssole nina ntsanrüka, a nzanchia osi a shanchoa. A engayia osi a shanchoa! 3 A tsankaphen khümcho tssoa osi a nkochev tsükona tsankaphen mmhom tssoa; nino a tsankaphen osi mphophen. 4 A Potsow nthae khelona a shanchoa, harung osi n mhom jiang etho lona a shanchoa. 5 Sandamo OPVÜI, ana ni lo longtsükatala; Ana a nungothüngna nilo longtsükata vanpvü. 6 Ana a eküm hetenhya shi nilo enhikae vanpvü; osi a ebuk tsüngono na nina a nkohapvü. Ana yuta topvülo ni thüngu. 7 A eküm jo oyam ejyukaphen kümthaka, ntiotssole hino a nkohoe mmhom ji. 8 Ana eng tona ni thünga ni phfütsson ji thüngchoa phyoala. 9 Enhungo a sonthako ji tsükona a ti silanchia; 10 A ri jiangna a lüngthahungala; ontena thyuta a tsükona okyak tssotala. 11 Ontena phyotala, "Potsow na ombo sinkithaka; osi ombo shanchoe ochia n van; etena owo ombo rhümatavka." 12 O Potsow, tata ekoni ti vana; a Potsow, tsüsoa oro a nzanchia! 13 A yana vamo jiango khyothechi moni sithoka. A meyam ekhyo tssota vamo jiang yikrathukvü terithoka. 14 Ana yuta topvülo nilo eyilokav; Ana kyungka kyungkana ni thünguv. 15 Ni mmhon ji eng totona ezov; osi ni shancho ji tsükona phyov, ana n ngathekhamo tüv khatola. 16 Sandamo OPVÜI, ana ni etho ji thünguv; ana ni mmhon ji tae thenchoa phyov. 17 A nungothüngna nina a püngnocho, osi enhünga jana ana ni emhokthao elhi jiang tsükona phyoala. 18 Enhungo a soni a tssan pyukthako jina a ti sinkia, O Potsow! Ana ni etho osi ekhyo ji echungren etsao jiang thüngi ezoathüng a ndüngo vana. 19 Potsow ni ntsanrük jina potsüo etssungala. Nina elhi tsüphov tssothaka; osi ochia ni esüa n van. 20 Nina a thüngi ezüp nungra rothokcho, tolea nina a etho jükalanthocho; nina olüpji nkachoa avanthokcho. 21 Nina topvülo tsükalana a kümthokvü; osi nina elani a ejicholam. 22 Ana otsotso khendenzhü rhüphia ni thünguv; O a Potsow, ana ni longtsükata thüngala. Ana a khendenzhü ji theta ni longtsüka ji tsükona ni denkav. O Israel Ntho Potsow. 23 Ana ni denkata tüngkaehiv osi nina a shanchowo ji tsükona a eküm totona okhen dem. 24 Ana ni ntsanrük ji eng tona phyov, ntiotssole a meyamvü yamo jiang topvü khyothechi yikrathokthaka.
Mesao Tsükona Randan
O Potsow, ni ntsanrük ji khi sale to mesao ji püngnoa; ni ntsa ji ombo chinhya, 2 to tssoana ombona ntsa khi ni kyon jiang sav osi oyam na khangshi kyon jiang ji ntsanrük lona sav. 3 Meta jilo pvülyuhanlyu lithoka; osi ntsanrük ji ejyueranthoka. 4 Mesao khi yantsae jiang ntsa lona sathoka; ezüpa evan jiang nzanchithoka osi onte khangshio jiang khyothechi siyithoka. 5 Eng shi ona evanthüng osi choro shi eonthüng nandang jo, ni kyon jiang khi ni khümthoka. 6 Mesao ji oli eryu jokacho osi likolo ryuvenro jokathoka esüa tssothoka. 7 Ombo eküm echung ntsanrük na pyingthoka, osi choro jina wondanga thüng nandang jo noying mmha lithoka. 8 Ombo ekhüngyan jina jümang phukowoe na phokowoe jam, Euphrates lona limha ehüm jana tssov. 9 Lijüngi kyon jiangna ombo mhadungo epyakthev; omb ri jiangna ombo mhadungo onte bobo vantherav. 10 Spain lo osi jüyi jianglo mesao jina yantso ombo piv; Sheba osi Seba lo mesao jiangna othan ombo piv. 11 Mesao topvüna ombo mhadungo epyakthev; osi jipo topvüna ombo küpo elhi tssov. 12 Ombo tsaphio yantsae ji ombona shanchoala, oso ezüp kyon osi oyam na khachoe siwo jiang ombona shanchoala. 13 Yantsae osi n khyoe jiang ombona nzanala; ezüpa yantsa vamo jiang eküm ji ombona shanchoyiala. 14 Khangshita osi jenbukta jilona ombona onte shanchoala. onte eküm jiang ombona tssentsü tssothokala. 15 Mesao ji harishithoka! Arabia meta lona shona khi ombo pithoka; yuta topvülo ombo randanithoka, Potsow khi yuta topvülo ombo mmhayithoka! 16 Meta jilo etsov pvülyuthoka; Lebanon lona pvülyuo ji esüa yingsüng jiang topvü benro na pyinghoka. Oli ero khosha zacho esüa yantsü jiang kyon khi pyingthoka. 17 Mesao ji mying ji kvüthüngha ti mhechothoka; ombo myingthüng ji eng ji esüa lia vanthoka. jipo topvü khi ombona mesao ji mmhayithoko ji esüa onte mmhayile to chonthoka. 18 Israel Potsow OPVÜI ji thünga! Ombo taena emhokthao elhi shiang tssoala. 19 Ombo pvütsson mying ji nchünkhon thünga! Ombo pvütsson na limhatsü pyingthoka. Amen! Amen! 20 Jesse tsoe randan ji shilona echetala.
Potsow Ntsanrük Ji
1 Potsow jo otsotso Israel thüngi osi lüm ntssüngo jiang thüngi mmhonala. 2 Tokhatola aiyo longtsüka ji monshuka vancho; osi a longtsü lona a phephiv tae vancho, 3 ntiotssole ana kangtsüi kyon ji omhyik rakicho, osi nthae jiang ejüeli küma hungwo jina. 4 Onteno ezüp n liv otsük mmhona vantala. 5 Kyon thanpoe ezüpato onte n züp osi thanpoe jiang esüa onte khatüng n li. 6 Jitsükona ontena kangtsü khi yoko tssoala osi jenbukta khi mpensü tssoala; 7 onte lümbümina n mhom chiyithukala osi onte nchümri jo ntha etümezi na pyingcho. 8 Ontena oyam emakata n mhom phyotala; onteno kangtsüiden osi oyam khangshiv nchümtala. 9 Ontena oyaki Potsow tachia nsantala osi limhalo kyon jiang yikvü yitan pitala, 10 Jitsükona Potsow kyon jiangna mpato ontena phyo jianglo eyilokata longtsütala. 11 Ontena phyotala, "Potsow na n tsiv meka; Ntssontso jina yanchev meka." 12 Nthae jo shiang esüa tüv. Ontena etsso lia osi kyungkata hunglanala. 13 To tssona ana ntssüng-rünga vamo ji ntia oman n licho alo? osi mmen n rhükav vamo ji oman n licho alo? 14 O Potsow, nina eng totona a ezüpthokala; nina engakvü a khangricho. 15 Ana hojito phyocho saliwo, aiyo ni kyon ejoena mekna elhicho tssov. 16 Jitsükona ana shi engathev ekhyo tssocho, 17 tokhatola ana ni ekhümki n vothüng nandang jo hoji engathev ji a tsükona elümoto ekhünguv tssocho. Hoji süloti nthae jiang ji kvüto tssov sana ji ana engathecho. 18 Otsotso nina meta pherüv lo onte zathokvü osi onte ekhüngi monthokvü! 19 Onteno tontüng monthaka osi ekhenthao lo ochüm tssothokvü. 20 Onteno omüng motsünga wonchiana mhechoe siwo ji esüa tüv; nina yipjungchiana onteno mhechoe siala, OPVÜI. 21 Ana lümbümi ekhov jüa osi oyam tssatssowo nchümathüng jo, 22 Aiyo a zhüva ni n ngathev ni mhadungo ekümrümo esüa etssophyocho. 23 Tolea aiyo yuta topvülo ni ndüngo tssocho osi nina okhe lona a erüala. 24 Nina ndungtssung khi a soala osi wokhae jo nina yikrachia a khichov. 25 Ana ni yaka Potsüwoe ocho vanchola? osi nino a chi tssothako ji tsükona limhalo ntia ana ethev n li. 26 A lümbüm osi otsük na n khyov a küm lea, tolea a etho jo Potsow; ana ethev elio ji ombo tae. 27 Ni sinkio jiango otsotso chünrünguv, osi ni n longtsükao jiango nina monthokvü. 28 Tolea a tsükona jo Potsow eshüpo vamo ji kvüta emhokthav ato, osi OPVÜI Potsow nkoha lo evam jo osi ombona tssothako jiang topvü ana thenchov jo kvüta mmhom tssov ato!
Jipo Shanchothokvü Randan
1 Potsow, nino ntiolyui heto e sinkiala? Nina ni kyon jiang thüngi nchüngkhon ni lüm tsukvü alo? 2 Nina ni kyon tssothokvü nkolo ethüngcheo jiang ti mhechoa, nina ni pvüji tssothokvü ezii ekümona sochuko kyon jiang. Nina vamo Zion phunglan ji ti mhechoa. 3 Roe elio shianglo oro rümphia woe zeta; e ri jiangna khümphen ki elio jiang topvü rorüpthaka. 4 Ni ri jiangna ni khümphen ki na ekhüng tssoa nshatala, ontena ekhyo chekav riven ji donkachithaka. 5 Onteno tssüngoe na opvü bentasi otssüng erhochochia vancho esüa zecheta. 6 Ontena vümphen tona opvü to bentasi oki ji topvü vümrotala. 7 Ontena ni ekhümki ji roe jilo omi thenala osi ni khümphen ji mmenthokala. 8 Ontena e monthokrünguv osi meta jilo ntho meta topvü rungkhani siv methakcho. 9 E ntho chekaphen ntia n liv sithaka; zenkhying ha n vam sithaka, osi heto shina kvütenhya ezüptav sana n tsi. to O Potsow e ri jiangna kvütenhya ni makavla? Ontena ni mying ji nchüngkhon yikvü vam alo? 11 Nino ntiolyui e n kyochiv sithakchola? Osi ntioli ni khe jiang sülani na ntssütae vanala? 12 O Potsow, tolea nino benkadenina e mesao ji tssopvü; nina yuta elümoto lo e shanchothaka. 13 Ni thotsü etho jina jümang ji khosothukcho Osi jüpvüo jiang kvüri tüpicho; 14 Nina Leviathan kvüri ji ejüproe siyisi, otsük jijo lijüngi ekümrümo jiang tsothoki sicho. 15 Jünhyo osi jükvü jiang nina tsüthokcho; osi zhükhfü tsüpho jiang nghathokcho. 16 Nina zümo osi eng ji lithukcho; osi choro eng jiang vanphen jiang nina picho; 17 Limha ji erü ochüm jiang nina tssümchakthokcho, osi vami nzyu ji nina methakcho. 18 Tolea OPVÜI, ni ri jiangna ni emakatala osi ontena Potsow n thena ni tssakala to ntsi khia. 19 Ni kyon jiang onte ri haruko jiang khelo thechi ti sia, ntssonshi küpo evamo ni kyon jiang ti mhechoa! 20 Nina e thüngi ntsata evao ji nchümcheta. Meta nken emüng akvülo jenbukta lia. 21 Khanshitsüngo kyon jiang ji ti yikrathoka; tolea yantsae osi ezüpo jiang khi ni thüngthoka. 22 Potsow, nipopo phanthia osi ni elan ji nkoa; Potsow n tsio kyon jiangna engakvü ni emakatala to ritsi khia. 23 Ni ri jiangna lüm tsuki tüngta n tümj akvü shelüptao jiang ti mhechoa.
Yitssoe Potsow
1 O Potsow, ena motsson ni pila, ena ni thüngala! Nino kvüta tsüphocho sana ena phyoala, osi nina emhukthao elhi tsso jiang ena thenchoa phyoala. 2 Potsow na phyoala, "Ana yitsso yuta kokathaka." "Osi ana ntsa lona oyi tssov." 3 Limha shi osi jilo evan topvü enhyukphilea ombo soyingkaphen jijo ana chüngchünga vanthukvü. 4 Kangtsüi jiang ti kangtsüta to ana ezoala; 5 osi onte kanchan jiang esantale to ezoala. 6 Yitsso ji engkhfüwoe osi engrhewoe na yia mek; khümkiwoe osi jolowoe na yia mek, 7 tolea Potsow taena oyi tssoyiala, osi ejoma joyithok, ejoma chüngithok to tssoala. 8 OPVÜI na ombo khelo lüm etsuk zükhipvü chani bena; ombona hoji lichochiala osi nthae topvüna hoji yuala, ontena kikhoro mpato nkikatala. 9 Tolea ana Jakob Potsow motsü ji n tümjakna rüv mekana myingthüng ombo denkav ji n tümjak. 10 Ombona n thae jiang etho monithokvü, tolea ntsanrüng jiango etho rankayiv.
Ekhyoe Potsow
1 Potsow jo Juda meta topvü lona ntsia osi Israel lo thüngche; 2 Ombo kijo Jerusalem lo osi ombona Zion phunglan jilo vanala. 3 Hojilona ombona ombo ri jiang lotssi khfüroecho; osi onte tsung, yonri osi ebensü topvü roe siyicho. 4 Potsow, nino kvüta Phfütsson licho ato! Nina phungalni na ni ri jiang khyosi elani yiathüng kvüta myingtsson licho ato! 5 Onte rasan lüm etsson jiang kikho jiang rechoyicho. Osi onteno enhungo echü eyip yipta vana; onte tssothimori osi etho jiango ntia mek. 6 Jakob Potsow, nina onte ekhenthuka na kurü jiang osi jianglo tsankae jiang elungchorae chüala. 7 Tolea nino kyon na kvüta ni kyuchia ato? Ni lüm tsuka thüng jo ochinaha ni eshüpo n vanche. 8 Ni yitsso ji nina potsüwoe na ntsithukala; Limha jinaha ntsii kyua jükrüpi siala, 9 nina oyi tssoyiv phanthiathüng osi limha khangshi kyon jiang ji kyochiv phanthiathüng. 10 Kyon na lüm tsuko jijo ni myingthüng kyungka tsükona. Ritsso lona enhyo jiangna tokhuta ni mying thünga vamvü. 11 Nina ni pvüi Potsow thüngi ntio phyochakcho sana ji ombo pia; Enhyano evan jipo topvü na ombo yantsotava. 12 Potsow na kyon khi ombo kyuthukala ombona mesatso kangtsüi jiangji teri kümthukala, osi mesae tsüphoe jiang ekhenthukala.
Nungra Yutalo Lüm-emi
1 Ana Potsow thüngi tüngkachiala; ana tüngkachiala, osi ombona a zoyiala. 2 Ana' ezüp yutalo OPVÜI thüngi randanala, zümo tona ana okhe yonchi bensi randanala; tolea ana ntia lüm emi n hung. 3 Ana Potsow nchüma na a ekhenrhüka yiala; osi ana ombolo nchümria na a etho jaki siala; 4 Ombona zümo to na nyipkem a vanthukala; osi wongkhyu emhok lona ana oyi tia n sanche. 5 Tsüngon yithako jiang ana nchümala; osi okümnzyu yakthako jiang ana nchümchetala. 6 Ana junga nchümria zümo ji yakthukala, osi ana junga nchüma heto abobo engala: 7 "OPVÜI na nchünkhon esiv alo? osi ombona kvüthüngha ethüngi n mathalamvü alo? 8 Ombona e n zam sithakcho alo? osi ombo phyochak jiang ejüng tssov alo? 9 Potsow na khonzan ji mechothakcho alo? osi ombo nzanti lümbüm ji lüm etsuk na pyingthakcho alo? 10 Hojithüng ana , phyochukchiala, 'A etho ejaktso jijo Potsow na etho n liv sithako ji!" 11 OPVÜI, ana ni etho tsüpho ji nchümcheta vamvüka; Ho, yithako ji nina emhokthav elhi tsso jiang ana nchümcheta vamvüka. 12 Nina ntio tssothakcho sana topvü ana nchümchevka, osi ni emhokthav elhi jiang nchümri zeta vamvüka. 13 Potsow, nina ntio tssoa sana jiango topvü ntho; Potsow, kvüwoeha ni esüa tsüphoa tüv n van. 14 Chethev elhi etssoe Potsow ji ni, nina ni etho ji jipo topvü yolo ejücho. 15 Nina ni etho jina kyon jiang shanchocho, Jakob osi Joseph tsoronichen jiang. 16 Potsow, ojü jiangna ni hungale ni kyucho, osi jümang ejungtso jiangna enecho. 17 Eluk jiangna eryu jothokcho, oyaki na tharakcho osi nken akvü lona potsüo nlüpcho, 18 Ni tharak won zocho osi potsüo nlüpi limha ji ondangthokcho, limha ji eneta enhyukcho; 19 Nina jükyo ji khyingkacho; osi jümang ejünguv ji yakchicho, toaha ni josü n hungcho. 20 Nina olyu-enhyang esüa ni kyon jiang ji Moses ha Aaron oni yakchia sochethokcho.
Potsow Tona Ombo Kyon To
1 A kyonden, a püngoyi shi engatava, osi ana ntio phyoa sana engatava. 2 Ana püngnoyi mmhom tsütsavsala osi nkolo emhuko jiang erorov sala. 3 Etena zoa ntsithako jiang osi ete motsüi na ezothako jiang. 4 Etena hojiang ji ete nungori jiang ezotavka, osi OPVÜI etho tsüphov osi emhukthao tssothako jiang etena echungren etsao jiha ezotavka. 5 Ombona Israel kyon jiang shikhfü picho, osi Jakob tsoronichen jiang yizüng picho. Ombo shikhfü khi otsoe jiang püngnotale to ete motsüi jiang ezocho. 6 Hojitolyui echungren etsao jina ha ntsi khi onte tsoe jiang püngnolanthokvü tsükona. 7 Hojito ontena ha Potsow elhi jiang n mhechov ombo lo longtsükata ombo yizüng jiang engathokvü tsükona. 8 Ontena onte motsüi jiang esüa oyam palana jancho n zoeden osi Potsow lo chüngchünga n longtsüiden tssov mek. 9 Ephraim kyon jiangna lotssi benrasi, ritsso tsüngono jo tsanrala. 10 Ontena Potsow lo ntsatao ji ephan n vancho osi ombo shikhfü jiang benphiv ekhirancho. 11 Ombo elhi ontena hunga chethev tsso jiang mhechoe sicho. 12 Onte motsüi jiangna zeta vana Potsow na Ejip meta Zoan hayi lona chethev elhi tssocho. 13 Ontena jümang ji khosoe hoji yakchia onte socho; Ombona ojü jiang kyimchung esüa mangi sithokcho. 14 Ombona eng-o jo eluk khi onte sothokcho, osi zümolo jo omi na onte sothokcho. 15 Ombona lijüngi longpvü jiang küngsothokcho osi lijüngina ojü onte picho. 16 Ombona longpvü jilo na ojü tsüa chiyithokcho, osi zhükhfüro esüa tsüthok cho. 17 Toaha ontena Potsow mhadungo n tümjakvü mmen tssocho osi lijüngina ontena ntssontso Potsow ji panlantacho. 18 Ontena etanana onte chokao etsoyu jiang chonta Potsow ojang tssotacho. 19 Ontena Potsow tachia heto phyotacho. "Potsow na lijüngina etsoyu epikhokcho alo? 20 Otsotso ombona longpvü ji ekhophi ojü tsüchuk thokcho; tolea ombona hümri e pikhokcho alo? Osi ombo kyon jiang etsoyu, oso to pikhokcho alo?" 21 Potsow na hoji zoe lüm tsukcho; osi ombo kyon jiang ji omi khi ezüp picho osi onte thüngi ombo lüm etsuk ji rankacho, 22 ntiotssole ontena ombolo longtsüka n licho osi ombona onte shanchov to n longtsücho. 23 Tokhatola ombona oyak ji yizüng pia potsüwoe kibüng jiang chon chithokcho; 24 osi ombona mana jothoki etsoyu onte picho. 25 Hojito ontena lanben etsoyu tsotacho osi onte chokao ji Potsow na onte picho. 26 Ombona engkhfülan ezhü ji venthokcho, osi jolowoe ezhü jiha venthokcho. 27 Osi ombo kyon jiang thüngi ombona woroden jürani hajang tata chiyithokcho, 28 osi hojiangna kyon jiang ranki elongjorae, 29 kyon jiangna tsotacho osi lüm bukcho. 30 Tokhatola ontena jithüngtia onte yangphi ji n bukcho, 31 osi Potsow na lüm tsuki onte yolo etho ejütsowo osi Israel lo khyingroe mmhontso jiang chüthokathüng jana onteno etsoyu tssota vancho. 32 Heto tssoaha kyon jiango mmen tssotapvü tssocho, ombo chethev elhi jiang hungrata ha kyon jiangna n longtsütacho. 33 Jitsükona ombona onte tsüngon jiang ethük esüa kümthokcho, osi onte eküm jiang ji esüngaro taena ezüp nduki chüracho. 34 Kvüthüng ombona onte ejoma chüthokcho sana ejoma jiangna ombo thüngi kholancho; osi ontena khophi jonjia ombo thüngi randantacho. 35 Potsow jo onte nkochepvüi, osi ntssontsowo Potsow na onte kyochia rocho to ontena n chümchecho. 36 Khatola onte yi jiango topvü ejüng tae tssocho; Ontena phyocholo ntia ntsa n jü. 37 Ontena ombolo longtsükata n vancho osi ontena ombo thüngi ntsata vao ji longtsüka n liv sithakcho. 38 Tolea Potsowna jo ombo kyon jiang khonzan to tssocho; ombona onte mmen siyicho osi roe onte n sicho. Ombona sunga ombo lüm etsuk tssünglana vancho osi ombo lüm etsuk ji shünglanchicho. 39 Onteno echüv sekao kyonden osi mbung vena yicho esüa esüngaro eküm tae to engathecho. 40 Ontena lijüngina yenjo kvüta ombo panlanchola; osi yenjo kvüta lüm ombo tsukthokchola! 41 Ontena elan elani Potsow ojang tssoa Israel Ntho Potsow ji nungrathokcho. 42 Ontena ombo etho tsüphov ji mhechocho osi ombona onte ri jiang yolona onte shanchowo tsüngon jiha mhechocho. 43 Ombona tsüngonalo Ejip meta Zoan lona ori khe lona onte shanchoa chethev osi elhi tsüphov tsso ji ontena mhechocho. 44 Ombona zhükhfü jiang ejen kümthoki Ejip kyon jiangna ntio n yuv sicho. 45 Ombona onte. yulo benjüm, benjükaro othoki onte khetsüthokcho, osi ovüden sanchuktoki onte meta yesothokcho. 46 Ombona onte benro jiang tsothokcho osi oli jiang yesothokvü khomung othokcho. 47 Ombona onte jününgrozhü jiang sheryu na ephyarothokcho, osi tssüngthidung jiang ronren na rentsüngthokcho. 48 Ombona onte tssiro mangsü jiang sherhyu na ephya tsüngicho osi olyuden jiang tsüngjoyicho. 49 Ombona ontelo ombo lüm etsuk etsyua ezüpthokcho, hoji echü ji yithenpvüi esüa rothokcho. 50 Ombo lüm etsuk ji n zümlanchicho, osi onte eküm jiang n valanchicho. 51 Ombona Ejip meta topvü lona tsokhfü jiang lüngthayicho. 52 Ombo kyon jiang ombona olyu-enhyang esüa socho osi lijüng yakchia onte sochukcho. 53 Ombona ntangshona onte socho, osi onte n kyuthokcho; Tokhatola onte ri jiango jümang jina shüa phancho. 54 Ombona ntho meta jilo onte sochukchicho osi ombona khyoe vao phunglan jilo onte chiyithokcho. 55 Ombo kyon jiang sani yiale, meta kyon jiango ombona phani sicho; onte meta jiang ombona Israel pvüji jiang chitayicho osi onte son-oki jiang ji ombo kyon jiang picho. 56 Toaha ontena Thotsü Potsow panlancho osi ojang ombo tssotacho. Ontena ombo yizüng jiang n ngacho, 57 osi onte motsüi jiang esüa panlanta longtsüka n liden tssocho, osi lotssitsüng kajukvü esüa longtsüka n litacho. 58 Ontena n longtsüi khümphen jiang khi ombo lüm tsukthukcho osi kisü ha nsüngrüi khi ombo lüm tsukthukcho. 59 Potsow na hoji hungi ombo lüm tsuka ombo kyon jiang khoe sicho. 60 Ombona Shiloh lo ombo süranki ji sinkicho, hojijo ombona ete evanrhyuo ki ji. 61 Ombona ombo etho osi phfütsson chekaphen Ntsata Bakos ji ete ri jiang khi phanchothokcho. 62 Ombona ombo kyon jiang thüngi lüm tsuki orina onte chüthokcho. 63 Khyingroe jiang ritsso lona chüracho osi loroe jiang kvülo n yanpiv sicho. 64 Pvüti jiang jenbukta lona chüracho osi onte emi jiangji n kyathukcho. 65 Sülaniti OPVÜI na yipchüngchicho esüa phanthicho osi kyon etho ejüi tsüka kinocho esüa phanthicho. 66 Ombona ombo ri jiang yikrathuka osi n phanthilamo khyothechia phani sicho. 67 Tolea ombona Joseph tsoronichen jiang sülanchicho osi Ephraim pvüji jiha n thüngchecho. 68 Jithungjo ombona Juda pvüji ji osi ombona nzamo Zion phunglan ji ethüngchecho. 69 Ombona hojilo ombo khümphen potsüwoe ombo ki ji esüa tssokachicho; osi hoji ombona liko ji esüa chüngchünga nchünkhon evamo tssoa tssokachicho. 70 Ombona ombo nri David ethüngchecho; 71 Ombona phenlungi na olyu rhükia vamo jilona ombo tsachukcho, osi Israel lo mesae, Potsow kyon jiang rhüki ombo kümthukcho. 72 David na tajo elüm n jüna onte rhükicho osi tssothimori khi onte socho.
Jipo Shancho Randan
1 O Potsow, n longtsüi jiangna ni metaji khyothaka; osi ontena ni ntho khümphen ji mmenthukala osi Jerusalem ji roe sithaka. 2 Ontena ni kyon jiang echümüng jiang ji müngtsov woro phicho, osi niri jiang echümüng jiang ha ora ekümrümo tsothukcho. 3 Ontena ni kyon jiang ejen jiang ji ojü esüa tsüthukala osi ejen na Jerusalem tüngzhüa tsücho osi echü tanünguv tia ochia n nhyoka. 4 E nkonjano vamo jipo jiangna eyikvüa emakatala. 5 OPVÜI nina nchünkhon ethüngi ni lüm tsukvü alo? Osi nilüm etsuk ji omi esüa kia vanthoku alo? 6 Nilüm etsuk ji ni n khümo jipo jianglo etsyua, osi nithüngi n randamo jipo jianglo etsyua. 7 ntiotssole ontena ni kyon jiang lüngthacho osi ni metaji rothukcho. 8 E motsüi jiang mmen ji man e ti-züpthuka; enhünga khonzanto e zeta; e eyilo topvü monthaka. 9 O Potsow, enzanchia, osi eshanchoa; eshanchoa osi ni myingona e mmen jiang esiyia. 10 Ntiolyui jipopoe jiang khi "Nte Potsow jo kvüla" to ezothukala? Jipo jiangna ni nriden jiang ejan zanio ji tsükona nina onte khangshia ehungthuka. 11 Evüngki evan jiangna erontao ji engayia; osi chüthoku methako jiang ni etho lona vachia. 12 Jipopoe jiangna ni yikvüo ji man hotata tiying onte nlilana. 13 To tssona ni kyonden, olyu kholuk e shina kümali montsso ni pia yuta topvülo ni thüngtav.
Jipo Tsükona Randan
1 O Israel enhyakpvüi, e randan engayia, O ni kyonden esopvüi. Echo khyingo ekümrümo jiang poni oyaki ni vantsülo khukthei 2 Ephraim, Benjamin, osi Manasseh jipo jiang thüngi ni ehungpvüi tssoa. Ni etho ji ejüa oro eshanchoa! 3 O Potsow, esosi yilana! Osi ni khonzan ji ejüa, tona eshanchovka! 4 OPVÜI thotsü Potsow, nina ni kyon jiang randan jilo kvütenha ni lüm tsuka vamla? 5 Nina nungra ji etsov tsükona epithaka, osi esüjü pvü tsüphov eyuv tsükona epithaka. 6 E nkonjano jipo shiang khi nina e meta thüngi khontathukala; eri jiangna eyikvüala. 7 Thotsü Potsow, esosi yilana; ni khonzan ji ejüa; tona eshanchovka! 8 Nina Ejip metaena jününgrothi hansi oyi jipo thanpoe jiang phani sisi onte meta jilo chümcho. 9 Hoji zaphen meta nina tsonrhüpcho, hoji ying jina junga süngcho osi meta topvü pyinga yua yicho. 10 Hoji khümcho jina yingsüng jiang eyukcho osi hoji khero jiangna Cedar dungpvü jiang eyukzhücho. 11 Hoji khero jiangna Mediteranean jümang yojanala osi Euphrates zhükhfü janala. 12 Nino ntioli hoji epi ji roe sichola? Enhungo hojilo yakphi topvüna jününgrothi efücheta. 13 Onni jiangna hoji sümroala osi ora ekümrümo jiangna hoji tsotala. 14 Thotsü Potsow, ethüngoe zechia! Potsüwoe na e zechochia joro ni kyon jiang eshanchoa! 15 Joro nina chümo jününgrothi ji shanchoa, jününgrozhü eniro nina eran kümthoko ji! 16 Eri jiangna hojilo omi rungkae tanchi sithaka; lüm tsuka onte zeta osi monthuka. 17 Nina tsachuko kyon jiang osi ni etho khyungthoko jipo ji nküma nkocheta. 18 Ena ni yaki kvüthüngha tsani n yi, osi eküm evanthuka tona ena ni thüngu ka. 19 Thotsü Potsow, e sosi yilana, ni khonzan ejüa, tona eshanchovka.
Tokhu Ematha Khen
1 Ete nkohapvüi Potsow thüngchoa longshitava; Jakob Potsow myingthüng khen dentava! 2 Okhen mmhom benkata osi tsüngrünguv ekhoa khendenzhü teri tsüpho theta dentava. 3 Choro choniathüng osi ranchetathüng tokhu tatara ji mhütava. 4 Shijo Israel jiang shikhfü, Jakob Potsow thüngina yicho shikhfü. 5 Ombona Ejip meta ji hathüng Israel kyon jiang thüngi hojito yizüng picho; osi Ana nzophen won tüv heto zocho, 6 "Ni mankvüi oha mmyingu ji ana ni khichoyicho; osi ni yitaha ji ana ni ejümchoyicho. 7 Ni ezüp yutalo nina a tsaphicho osi ana ni shanchocho. tsyungryulo a mphophen ji chungina ana ni yichocho. Ana Meribah jü jianglona ojang ni tssocho. 8 A kyonden, a ntangshon yi shi engatava; Israel kyonden, ntena ayi engavo to ana kvüta nchümato! 9 Ntena kvüthüngha ayaki pvüjipoe potsow osi thanpo kümu meka. 10 Aiyo Ejip metae na nte socheo nte pvüi Potsow ji; Nte büng kotava, tona ana nte süphivka." 11 "Tolea a kyon jiangna ayi n ngacho, Israel na ajancho n zocho. 12 Jitsükona ana onte lümbüm ekhüng lanka jilo vanthoki onte etancho tssothukcho. 13 A kyon jiangna ayi engatavo to ana kvüta nchümato! Osi ajancho zovo to ana kvüta eyiloa ato! 14 Ana n sungu onte ri jiang khyothechia a khe jiang onte ri jiang thüngoe yonchiv. 15 A tssako jiangna a kyua a mhadungo epyakthev. 16 Onte khangshi ji esam mek, khatola nteno ana otssi mmhontso ji khi nte süphiv osi ora tsakijü khi lüm büka nte tsothokvü."
Esapvüi Ndamo ji Potsow
1 Potsüwoe etsikho ji Potsow na sayatala; potsoden etsikho ji ombo lüm erüngnasa heto ezoala: 2 "Ntena N tsa lona kvütenhya satapamla, osi n thae jiang thüngi omhyik thetavla? 3 Nkhyoe osi opvü-opo n van jiang elan ji timonia osi onte elan ji nkoyia. , 4 nzanchi n van osi ezüpa evan jiang ji nthae jiang khelona shanchoa." 5 "Nteno kvüta nte yimchoa ato! osi kvüta zhüvaeden ato? Nte topvüto ntsanrük n liden. Limha shilo ntsanrük n liv sithaka. 6 Ana phyoala, 'Nteno potsoden,' 7 tokhatola nte topvü kyon esüa nte chürav, osi mesao jiang esüa nte elongjov." 8 Phanthia Potsow, limha shi nina sa: jipo topvü ni echi.
Israel Ri Jiang Khyothoku Randan
1 O Potsow, yingto ti-vana, Jükrüpi ti-vana; osi n senphiv ti-vana. 2 Zeta! ni ri jiangna phanthiala, osi ni etssang jiangna panlanala. 3 Ontena ni kyon jiang kyakthechiv mphoena kyaktala, osi nina nkohao kyon jiang ji ontena kyakritala. 4 Ontena phyotala, "Rotava" "Etena onte jipo ji mon thuktavka, osi Israel ji nchünkhon tsükona mhechoe sithoku ka." 5 Ontena kyaktao ji onte topvüna lümbüm na rünga onte jatae ni panlanala. 6 Edom tona Ishmael to kyonden, Moab osi Hagrit kyonden, 7 Gebal, Amon osi Amalik kyonden, Philistia osi Tyre kyonden. 8 Assyria naha Lot tsoronichen thüngi nzo tssoa ejoena onte khümkathaka. 9 Nina Median kyon jiang thüngi tsso ji esüa onte thüngiha tssoa; osi Kishon zhükhfü ndüngona Sisera ha Jabin oni thüngi tssoji esüa tssoyia. 10 Nina Endor lona onte khyocho osi onte echümüng jiang likoe kyonkae sicho. 11 Nina Oreb ha Zip oni tssoyiwo ji esüa onte esopvüi jiang tssoyia; nina Zebah tona Zalmuna to thüngi tssoji esüa. Onte esopvüi jiang topvü khyoa. 12 Ontena phyotacho, "Etena Potsow liko ji ete echhi tssoa khitavka." 13 Potsow, livero esüa osi mbungna mavü vena yio ji esüa onte venrothuka. 14 Omina ora runga to osi yingsüng jiang thenkachicho esüa, 15 tsyungryu soa onte phana osi ni mbung tsükshiv ji khi onte ekhenthuka. 16 Onte mha jiang yikra khi eyukia osi onte khi ni etho ji chekathuka. 17 Onte ji khyothechi nchünkhon ekhena vanthuka, osi onteji nungratsünga chüthoka. 18 OPVÜI jo nitae, osi nino meta topvülo Sandamo ji to onte khi ni ntsithuka.
Potsow ki Eyiloala
1 Thotsü Potsow, ni ekhümki ji kvüta a chokacho ato? 2 Hojilo kvüta avanhunga ato! Ana OPVÜI ekhümki eov ji nhyaktsükala. A eküm totona longshia eküm Potsow denkatala. 3 yichiro shiang na samona onte shüp liala; tsungoworo shiangna ha onte ki liala; osi ontena woro jiang ni thanphensa ndüngo vanthukala; O Thotsü OPVÜI, a mesoa osi a Potsow. 4 Ni ekhümki evan jiango kvüta ematha licho ato? yuta topvülo ontena myingthüng khen ni denkatala. 5 Nithüngina etho hungwo jiango kvüta ematha licho ato? Zion phunglani ntho yentsalo wohungo jiango kvüta ematha lichoato! 6 Ontena baka hayi yakchia yiana hoji jünhyo kümi siala, Eryu jodemo jina ojü ndüngthukala. 7 Ontena yia vanathüng etho jükata kümala. ontena Zion lona potsoden pono Potsow ji hungu. 8 OPVÜI Thotsü Potsow, a randan enga, Enga Jakob Potsow! 9 E mesao ji mmhayia Potsow; nina ethüngcheo mesao ji. 10 Ni ekhümki tsüngona mongo jijo meta thanpoe tsüngon wothüng motsünga vamo jilona mmhonkata. Ana n thae ki vanthüngo najo a Potsow ki kibüng enhyang taelea tssoa vamvü. 11 OPVÜI jo e nkohapvüi, phfütsson mesao, nzan osi myingtsson khi emhayia. Elan etssoe ochia ombona mmhom khi n piv nsiala. 12 Thotsü Potsow, nilo longtsükae jiango kvüta ematha lichoato!
Jipo Echi Mmhonthokvü Randan
1 OPVÜI, nina ni metaji khonzana vanpvü; Nina Israel ji mmhonkalantokthaka. 2 Nina ni kyon jiang mmen siyithaka osi onte wori topvü siyithaka. 3 nina onte thüngi lüm ntsukvü sithaka osi nilüm etsyu ji tanglanchithaka. 4 O eshanchopvüi Potsow, e sosi yilana osi e thüngi ni n chokao ji esani sia! 5 Nina nchünkhon ethüngi ni lüm tsuku ke? osi ni lüm etsuk ji ochüm n tssovke? 6 Elani etho jüa ekümlanthuka tona ni kyon jiangna ni thünguv. 7 OPVÜI, ni nsenphi nzan ji ejüa, osi ni shancho nzan ji epia. 8 OPVÜI Potsow na ntio phyoa sana ji ana enga vanala; ombo kyon ete shiang thüngi ombona noying epiv phyochakala. Etena zhüva lan jiwoe elani n yia tssona. 9 Otsotso ombo yikrachio jiang shanchov ombona methaki vana, osi ombona shanchoa vanrhyuo ji ete metalo liv. 10 Nzan tona longtsüka to oni nduktava; ntsanrük tona noying to oni khayatav. 11 Kyon longtsüka jina limhae na oyaki chüngiv osi Potsow ntsanrük jina oyaki na zechochiv. 12 OPVÜI na etsson elüm lia ekümthokvü osi ete metalo tssukromümro liv. 13 Ntsanrük jina OPVÜI mhadungi tssov osi hojina ombo lan oniv.
Nzanchi randan
1 A engayia OPVÜI, osi a janlana, aiyo nzanchipvüi n van osi n khyo-ntoe. 2 Ana nilo longtsükata vanala; jitsükona echü lona ashanchoa. A shanchoa aiyo ni nri osi nilo longtsükatala. 3 Nino a Potsow, jitsükona a khonzana, ana eng tona nithüngi randanala. 4 OPVÜI ni nri ji longshithuka, ntiotssole a randan ni thüngi chüngiala. 5 Nina e nlan esiyiala osi ethüngi mmhonala, osi ni thüngi randamo jiang topvü n senphi nzan ji nilo lia. 6 OPVÜI a randan enga, osi nzanchi yana kyao shi a engayia. 7 Ana ezüp yutalo ni tsaphiala, ntiotssole nina arandan jiang a engayiala. 8 OPVÜI, ni esüa potsow ochia n van, nina tssoato etssoe ochia n van. 9 Nina lyuyingo jipo jiang topvüna oro n khümthev osi ontena ni tsüpho ji thüngtav. 10 Nino Thotsü, osi emhokthao elhi tssoala; Potsow jo ni tae. 11 OPVÜI, nina ntio a tssothukhunga sana ji apüngnoa, tona ana longtsükata ni engayiv. Khochaklangi ni benkav tsükona a sokata. 12 OPVÜI, a Potsow, ana lümbüm totona ni thüngu osi ana tsüpho ji nchünkhon thenchoa phyov. 13 A thüngi nzan jijo kvüta tsüphocho ato? Nina olüpina a süchethaka. 14 O Potsow, kangtsüi jiangna ni panlana tsata. haruk kyon kholuk motsünga na a lüngthav yantala, ni ngangshio kyon jiangna. 15 OPVÜI, tolea nino khonzan eli osi enzamo Potsow ji ni. Nina yuta topvülo erüm toa, nzantharoa osi longtsüka liala. 16 Athüngoe engolani a khonzana, etho ajükayia osi a shanchoa, ntiotssole ayo na tsso ji esüa anaha ni benkatala. 17 OPVÜI, ni mmhon ji chekav a jüa, Nina nzanchi osi lüm emi apio ji a etssangnkong jiangna hungana onte yikrav.
Jerusalem Ethüngkhen
1 OPVÜI na ombo yantsü ji ntho phunglani tssocho; 2 Israel lo meta thanpo jiang lona kyongkata ombona Jerusalem yantsü ji chokatala. 3 O Potsow yantsü, Ombona ni tsükona emhoktav tvü phyo ji enga; 4 "Ana ayi engae jipo jiang eranrhyuana, Ejip osi Babylon ha thenhyav; Ana Jerusalem kyon jiang yulo Philistia, Tyre osi Sudan kyon jiangha khanhyav." 5 Jipo topvü Zion echi osi Thotsü Potsow na etho ejüi ompvü kümthoku to phyov. 6 OPVÜI na kyon jiang etsünga erani zesi topvüto Jerusalem kyonden to khanhyav. 7 Ontena sharita heto dentala: "Ete mmha topvü chiyiphen ji Zion."
Nzanchi Randan
1 OPVÜI Potsow, a shanchopvüi, ana eng tona kyala osi zümolo jo ni thüngi roala. 2 A randan a engayia, nzanchi tsükona ana kyao ji enga. 3 Ezüp kyungtia arhaki a chüv sala. 4 Chüv sa vamo thanpoe jiang esüa ana ha a chüv sala; a etho topvü monthaka. 5 Aiyo echüi jiang nzo asinhyathaka osi oyam na lüngthae olüpi vamo jiang esüa, osi jiango nina mhecholangi sithaka osi onte n zanchicheo kümthaka. 6 Nina lüpkvüi ashümthechithaka, osi sokvü emüngtso jilo a vathechithaka. 7 Ni lüm etsuk ji apono vümkae lia, osi hoji etho ji küpina a pyonroa vana. 8 Nina ashom jiang khi a sinkithukthaka, osi nina onte ji a phanlanchithukala. Aiyo a khalanchithaka osi ntsanchoche. 9 Ezüp lona a mhyik shiangha monreni sithaka. OPVÜI, ana eng akvü ni tsaphiala, osi akhe yonkachia ni thüngi randanala. 10 Nina echüi jiang tsükona chethev elhi tssoa alo? Osi ontena phanthi ni thüngta lo? 11 Echüi jiang naha ni n senphi nzan ji tsükona phyota lo? Osi emon metae na ni longtsüka ji tsükona phyota alo? 12 Mekana emüngina ni chethev etho jiang hungualo? Osi nina mhechothako kyon jiang metae na ni mmhom ji hunguvla? 13 OPVÜI, ana ni thüngi nzanchi chonala; ana enya akvü ni thüngi randanala. 14 OPVÜI, nino ntioli asiala? Ntioli a thüngina engolani yiala? 15 A nungothüngna ana ezüp elümoto khithaka osi achükyuthaka. Nina a ezüpthoku shi ha ehan lona a sangtsüngthaka. 16 Ni lüm etsyu jina a nnuk-roala; Nina ekhenthao lyui a sakoa jina a monthukala. 17 Ontena eng tona jüphyonjü esüa a sanzhüala; osi ontena nken akvü lona ahatala. 18 A shom ndüng jina mpato nina a sithukthaka; osi a ndüngo jo emüng jitae tssothukthaka.
Jipo Pono Ezüp Liathüng Khen
1 OPVÜI, ana ni n senphi nzan jitae dena vamvü; Ni longtsüka ji ana nchünkhon thenchoa phyov. 2 Ni nzan jijo yuta topvülo zajünga lia vamvü, osi ni longtsüka jo oyak shi esüa ntssona linrhüa vamvü to ana ntsia. 3 Nina phyocho, "Ana ethüngcheo kyon ji thüngi ana ntsata vatala; osi a na a nri David thüngi heto phyochak picho. 4 'Ni tsoronichen jo yuta topvülo mesao tssovka; osi ana ni wopan esasen ji ni hoyivka.' " 5 Oyak shinaha ni emhokthav elhi jiang tsükona denala; Ontena ni longtsüka ji denala OPVÜI. 6 Potsüwoe ha ochia ni esüa n van OPVÜI, osi potsüwoe tsoe ochinaha ni njyuphi. 7 Nthoe jiang etsikho jina ni yikrachiala; osi onte topvüna ni zesi ngangtsüngala. 8 OPVÜI, Thotsü Potsow, ni esüa etho tsüphoe ochia n van; Nino olan topvülo longtsüka lia OPVÜI. 9 Nina jümangtsü ji sala osi hojilo jükyo ndav jiang noyingthukala. 10 Nina monrantsü Rahab ji ejüproe sicho osi lüngthacho; osi ni thotsü ji khi nina ni ri jiang khyocho. 11 Oyak shiha ni echi, limha shiha ni echi; Nina limha shi osi jilo lio jiang topvü lyuyingcho; 12 Jolo khümki jiha nina lyuyingcho; Osi Tabor tona Hermon to phunglan jiangna longshyu khen ni denkatala. 13 Nino kvüta etho jücho ato? Ni etho jo kvüta tsüpho ato? 14 Ni ekhüngyan jo ntsanrük tona ntsa tolo tssokacho; osi ni elhi topvü lona nzan osi longtsüka ejüala. 15 Okhen dena ni ekhüm kyon jiango osi ni nzan wondangi evan kyon jiango kvüta ematha licho ato? 16 ni tsükona ontena eng tona longshitala; osi ni mmhon ji tsükona ontena ni thüngala. 17 Nina ekhyo tsüphov epiala; osi nzan lona nina ekhyoe ekümthukala. 18 OPVÜI, nina e nkohapvüi ethüngcheyicho. Israel ntho Potsow, nina e mesao epicho.
David Thüngi Potsow Phyochak
19 Nkolo nina ni longtsükao ni nri jiang heto ezocho, "Ana thüngche rasan ji nzanchicho; Ana kyon yulona ethüngcheo ji thüngi vantsü ji pithaka. 20 Ana a nri David jo nthojü na nzüyia mesao kümthukthaka. 21 A etho ji yuta topvülo ombo thüngi liv. A etho jina ombo etho khy ungthokvü. 22 Ombo ri jiangna kvüthüngha ombo n khyo; n thae jina ombo n khyo. 23 Ana ombo ri jiang enhyikroe siyiv; osi ombo etssako kyon jiang topvü chüthokvü. 24 Ana ombo nzam osi ombo longtsükav. Ana yuta topvülo ekhyoe ombo kümthokvü. 25 Ana ombo ekhüngyan ji Mediteranean jümang jilona benkae Euphrates zhükhfü nandang tssochiyiv. 26 Ombona athüngi, 'Nino apo osi a Potsow; nino ankohae osi a shanchoe' to phyov. 27 Ana atsokhfü tsokhying ji mesao yulo tsüphotso ji kümthokvü. 28 Ana ombolo phyochako ji ntsa vanthokvü osi ana ombo thüngi ntsatao ji nchünkhon vav. 29 Ombo ekhüngyan jo oyak shi esüa kümali vamvü. Yuta topvülo ombo tsoronichen yulo tsükana mesoa tssoa wov. 30 'Tokhatola ombo tsoronichen jiangna a shikhfü n benphina osi a yizüng ephan n vana tssona, osi 31 Ontena a püngnoyi shiang n kha-nziv a yizüng jiang n benphia tssona, 32 tona onte mmen ji tsükona onte ezüpthokvü osi onte wori jiang man ezüp onte piv. 33 Tolea ana David nzamo shi jo esani n si; mekana ombo thüngi phyochako jiang ejüng n tssothuk. 34 Ana ombo thüngi ntsatao ji n yesothuk osi ana ombo thüngi phyochaki vacho motsüngalea n khilan. 35 "Ana a ntho myingona nchünkhon tsükona yenjoa phyochakthaka; ana kvüthüngha David ejiphiv mek; osi ombo thüngi phyo chakcho n benphiv n si. 36 Ombona yuta topvülo tsoronichen vam, osi eng shina ona evanthüng jo ana ombo ekhüngyan ji nhyakiv. 37 Ombo ekhüngyan jijo oyaki choro jina n senphina longtsüka lia ehungpvüi tssoa vamo ji esüa kümali tssothokvü."
Mesao Ekhyoji Tsükona Nungra
38 Tolea nina ethüngcheo mesao ji thüngi ni lüm tsukala; nina kholangi ombo sithaka. 39 Nina ni nri thüngi ntsatao ji yesothaka; osi ombo kikho ji choncheni shümthechiyi-thaka, 40 Nina ombo yantsü Pikhfü jiang laroe siyithaka osi ombo rizüphen jiangha roe siyithaka. 41 Yakphi topvüna ombo tsütsailan jiang efüyiala osi ombo phinakiren jiangna ombo emakatala. 42 Nina ekhyo ji ombo ri ji thüngi pithaka, osi nina onte topvü emathathukthaka. 43 Nina ombo ebensü jiang ethelan n lio kümthokthaka; osi ritsso lona ombo mon thukala. 44 nina ombo mesa jarung ji khiyithaka osi ombo vantsü ji likoe erichochi siyithaka. 45 Nina eson n jam ombo sonthukthaka osi yikra-nungra na ombo eyukthaka.
Shanchov Tsükona Randan
46 OPVÜI, nina kümali mphoe vam alo? Nilüm etsyu ji kvütenhyaka omi esüa kia vanthokvü la? 47 A eküm jo kvüta hüngricho sana ji a nchümcheyia; osi nina e topvüto echüo kyon e nsüngrücho to ji nchümcheta! 48 Ochona n chüna eküm vanchechola? Kvütoli kyon na olüp ji nkachochevla? 49 OPVÜI, nina ni nzan ji chekav ejüa rothakcho kvülo lichola? Nina David thüngi echümchako jiang kvüangla? 50 Ni nri a shiji kvüto yikvü-yilocho sana ji ti-mhechoa. Osi ana kvüto n longtsüi jiang yikvü-yilo ji rümcho sana ji ti-mhechoa. 51 O OPVÜI, ni nri jiangna nina ethüngcheo mesao ji yikvüala; ombona kvülo woana jilona ontena ombo yikvüla. 52 Kümali to OPVÜI ji thünga! Amen! Amen!
Potsow Osi Kyon
1 OPVÜI, nino yuta topvülo a vanphen ji tssoa vanpvü; 2 Nina yingsüng shiang nsoyingthüng osi limha shi n lithukthüng vüngina nino kümali Potsow tssocho osi kümali Potsow ji tssolam. 3 Kyon ji kvütüv lona rocho sana jitüv kümlani sile to nina ezoala. Osi ochon ombo kümlanthukala. 4 Ni mhadungo jo nzyu wothüng motsünga lea yithaka na njyuti esüa osi zümoa tae esüa yi siala. 5 Eiyo jüphyonjü esüa nina evaki hansi eyithaka; osi eiyo omüng emhacho esüa totia sunga e n vanala. 6 Eiyo ero motsünga enyathüng buki rankae, engo jo kisochisi mmyulani jo mmikae chüi esio ji esüa to tae. 7 Eiyo ni lüm etsuk na emonthukthaka, osi ni lüm etsyu jina ekhenrhükthukthaka. 8 Nina e mmen jiang ni mhadungo vatala; osi e mpho mmen jiang ni mhadungo vatala. 9 E eküm tsüngon jo ni lüm etsuk na hüngrithukala, osi ethük ehachicho esüa moni siala. 10 E tsükona jo nzyu ekha tiying tae vanala; osi elüm etho jülea nzyu ekha tiza tae vanala. Tolea nzyu jianglo jüo jiango ezüp nungra tae; eküm ji zakto methaki yi siala osi e n vamvü siala. 11 Ni lüm etsuk tsotso ji ochona chanchetala? Osi ni lüm etsuk tsükshi jina ntio hansi yia sana ochona ntsicho ato? 12 E eküm jo kvüta hüngricho sana ji e ntsithuka, tona chüngtsoe ekümvüka. 13 Nilüm etsuk ji kvütenhya vampamla? OPVÜI, ni nri jiang pono khonzan to tssoa. 14 Enya akvü ni n senphi nzan jina epyingthuka, to tssona ena eküm echung okhen dena longshitavka. 15 E nungra tsüngon jianglo enungrathuko jiang thung enhungo ematha epia. 16 Ni nriden e shi khi ni etho elhi jiang ehungthuka; E tsoronichen jiang khi ni phfütsort etho ji hungthuka. 17 OPVÜI e Potsow, e pono ni mmha lithuka. Ena ntio tssoa na topvülo ekhyo epia!
Ete Nkohae Potsow
1 Ochona OPVÜI tsankav yana sana, osi ochona Thotsü ji khümcho kupi vana sana jina heto ombo ezokhuka; 2 "Nino apikhfü osi a nkohapvüi. Nino a Potsow, ana nilo longtsükatala." 3 Ombona n hungi elio ekyutssi jiang topvü lona osi echüo nochonori jiang topvü lona ni shanchoa ni vanthokvü. 4 Ombona ombo echo jiangna ni eyukvü; osi ombo ntangnshon kupi nina jüngtheta vamvü; ombo longtsüka jina ni pikhfü tssoa ni nkochev. 5 Nina zümolo lea ntia ekyuv n li, osi eng-o tssolea zakto ni phonkao tüv n li; 6 zümolo vara n mhom jiang osi eng-o chüthoko etho n mhom jiang ekyuv n li. 7 Ni mhadungo kyon wothüng na erithe chükhoka, osi ni nkonphia wothüng taro chükhoka; tolea nino ntia n tsso. 8 N thae jiango kvüta khangshia sana nina hunga zeta vamvü. 9 Nina OPVÜI ji ni pikhfü tssothukthaka, osi ntsontso ji ni nkohapvüi tssothukthaka. 10 Jitsükona nti emhuk nungra osi jenbukta naha niki hakono n phyaphi. n Nina kvüi woana ni zeyathoku tsükona Potsow na lanben khi ni sayathokvü. 12 Ontena ni jo jiang olongo n vüpkathokvü tsükona onte khena ni ekhyonka chiv. 13 Nina hingo osi nrü jiang tsseroe siv; hingo ndav osi nrü mozhü n mhom ehan jiang. 14 Potsow na phyoala, "Ochoangna a nzana sana ana jiang shanchov; osi OPVÜI to a ntsiwo jiang nkochev. 15 Ontena a tsathüng ana yichov; osi onte ezüp yutalo ana onte ndüngo vamvü; Ana onte shanchov osi onte yikrachiv. 16 Ana harishi eküm khi onte yantsov osi onte shanchov."
OPVÜI Ethüng Khen
1 OPVÜI, montso ni piv jo kvüta mmhoncho ato, Ni yikrachia okhen ni nsikav jo kvüta mmhoncho ato, Ntsontso Potsow, 2 eng akvü ni n senphi nzan ji thenchov tsükona, osi zümo akvü ni longtsüka ji ephyov tsükona; 3 khendenzhü theta osi owon enüngu elani rhüphiphen theta edem jo kvüta mmhoncho ato. Ntiotssole OPVÜI Thotsü elhi jiangna a longshi thukala. 4 Nina ntio tssothakcho sana jiang zesi ana longshia denala. 5 OPVÜI, ni elhi jo kvüta tsüphocho ato! Ni nchümri jo kvüta jungcho ato! 6 Shijo zhüvae najo n tsikhoko osi eyim najo n ngathekhok. 7 Nthae jiang ji ero esüa chenchekhoka, osi silyuo etssoe jiang mmhonkhoka, tolea onteno moni sithoknrüngu, 8 ntiotssole nino kümali OPVÜI tsüphotsowo ji. 9 Ni ri jiang chüv to ena ntsia; osi nthae topvü khyothe chiv. 10 Nina romhon tssiro esüa etho a khyungithokthaka, nina ematha khi a mmhayithaka. 11 Ari jiang momo ji ana hungthaka, osi nthae jiangna erontao ji ana zothaka. 12 Ntsanrüng jiango Pam dung esüa tsükarankav, Onteno Lebanon lo Cedar dung jiang esüa rankav. 13 Onteno OPVÜI ki odung chümcho esüa zav, osi ete Potsow ekhümki zae 14 eson jana tsüngthi ethicho to osi nchünkhon to owo mmyaka chüngchünga za vancho to tssov. 15 Hoji zena OPVÜI jo ntsanrüka, osi a nkohapvüi jijo ntia ephyoerüv n khying to zechetala.
Potsow jo Mesao
1 OPVÜI jo mesao, ombo myingtsson tona etho to khi bipocho. Limha shijo chüngchünga soyingcho osi n senphiche. 2 OPVÜI, ni vantsü ji benkadenina chüngchünga lipvü, osi tsüngon yuta shiang n soyingthüng na nina vancho. 3 Jümang ejungu jiangna ontssoala, OPVÜI; osi ontena owon tssoa echyutala; 4 osi jümang echyuo jilona tsükao osi jükhyo ji etho pomoe OPVÜI na potsüwoena sala. 5 OPVÜI, ni shikhfü jiango kümali tsükona; osi ni khümphen jijo otsotso kümali, kümali ntho.
Topvü Pono Yitssoe Potsow
1 OPVÜI, nino ezüp epipvüi, ni lüm etsuk ji oponi chiyithuka! 2 Nino kyon topvü yitssoe, phanthi kangtsüi jiang ji onte jokheman pia! 3 N thae jiang ji kvütenhyaka longshithuklamla? Kvütenhyaka lihana OPVÜI? 4 Münghan jiang ji kvütenhya kangtsüthuka onte elhi n mhom jiang khi kanchanthukula? 5 Ontena ni kyon jiang nnukroala; OPVÜI, osi nithüngoe etssoe jiang ontena khangshiala. 6 Onteria emi osi opvüpoe n vamo jiang lüngthatala, osi e metalo omoatsi vamo jiang lüngthatala. 7 Ontena phyoala; "OPVÜI na e n hungka, osi Israel Potsow jina e n tsika." 8 A kyonden nteno kvütoli jitata nte yima nte zhüvatala? Nteno kvüthüngti engathevla? 9 Ete eno shiangha Potsow na nsüngrücho, tona ombona n zovke? Ete mhyik shiangha ombona nsüngrücho, tona ombona n hunguke? 10 Ombo kyon topvü püngnOPVÜI, tona ombo ntsinran ntia n lichoke? Ombo jipo topvü ezepvüi ji; tona ombona ezüp nte n pivke? 11 Ontena nchümo ji OPVÜI na ntsia; Onte madangmari ji kvüta ethev n licho sana ji ombona ntsia. 12 OPVÜI, nina püngno kyon jijo kvüta ematha licho ato? Osi nina ni shikhfü jiang shikao kyon ji! 13 N thae ji sathokvü sokvü n jyuthüng jo nina ombo ji ezüp yuta jiang lona esanthuka. 14 OPVÜI na ombo kyon jiang n sinki; Ombo thüngoe etsoe jiang ombona khoe n si. 15 Elani yitssoki jianglo ntsanrük liv, ntsanrük kyon topvü na hoji yilo thev. 16 N thae jiang tanglanchiv tsükona ochona akyochichola? N mhom etssoe jiang zalanchiv ochona a thüngoe thechola? 17 OPVÜI, nina a n kyocho sawo aiyo tüngtüng khüa evamo metae zakto a yithakvü. is Ana "a elungala to phyocho;" tokhatola ni n senphi nzan jina a sayacho OPVÜI. 19 Ana kvüthüng a nkhenraka osi a wongkhyua vancho sana nina alüm a emiyia a emathathukcho. 20 N tsa yitssoe jiang thüngi jo nina n shentala; n lamo ji shikhfü kümthoko jiang thüngi, 21 osi noyinga evan kyon jiang chüthokvü kyakritao jiang thüngi to. 22 Tokhatola OPVÜI na ankohoala; osi ombona apikhfü tssoala. 23 Onte ntha-nri ji tsükona Potsow na onte ezüpthokvü; osi onte mmen tsükona onte monthokvü; OPVÜI ete Potsow na onte monthokvü.
1 Rotava, ete OPVÜI thüngtavka! Ete enkohao Potsow ji longshia denkatavka! 2 Montsso epi lümbüm hantasi ombo mhadungo wotavka osi ethüngkhen longshia dentavka. 3 Ntiotssole OPVÜI jo Thotsü Potsow, potsow topvü yolo ombo mesao. 4 Ombona limha topvü satsüala, longkvü ejungtso jilona yingsüng ntsontso ji nandang. 5 Ombona ombo khetsen jümang ji osi ombona lyuyingo limha ji sayatala. 6 Rotava, etena nkhümthei ombo khümtavka; etena e joyingo OPVÜI ji mhadungo khuktsentavka. 7 Ombo ete Potsow, eteno ombona ntangnshomo kyonden, osi ombona süphilümbümo kholokden. Ombona ntio phyoa sana nchüng engatava: 8 "Nte pyimtsümotsüi jiangna Meribah lona lüm khüngo ji esüa ti-tssotava, Onteno jithüng jo Masseh lijüngi vancho." 9 Hoji lona onte na afüphita ojang a tssotacho; ana onte tsükona tsso jiang hungthaka ha hojito tssotacho. 10 Ana kyontsük jiang ji nzyu zhüro a tssakcho osi ana phyocho, 'Onteno kvüta jancho n zocho ato! Osi ontena a yizüng jiang ji n gacho.' 11 Osi ana a lüm tsuki echümchakcho: 'Ana nte pi khi esana nte vanthokvü sa evamo meta jilo ntena rheyiv meka.' "
Mesao Opontso Jo Potsow
1 Khenthan khi OPVÜI denkatava! Limhatsüna OPVÜI denkatava! 2 OPVÜI denkatava osi ombo thüngtava! Ombona eshanchothaka to yithen mmhom ji eng akvüto thenchoa phyotava. 3 Ombo phfütsson ji jipo topvü thüngi thenchoa phyotava, osi ombo Thotsü elhi jiang kyon topvü thüngi ezoa. 4 OPVÜI jo tsüphoa osi emhokthav, Ombo thünguv etüma; Ombo Potsow topvü poni kyungkata yikrachiv na lia. 5 Jipo thanpoe potsow jiango topvü kisü tae; tokhatola OPVÜI na woyak shi soyingcho, 6 Phfütsson myingthüng na ombo eyukzhücho; etho osi opyon ratsav na ombo ekhümki pyingcho. 7 Limhalo kyon topvü na OPVÜI thüngtava: Ombo phfütsson osi etho ji thüngtava. 8 OPVÜI phfütsson mying ji thüngia. Othan hansi ombo khümpheni rhowotava. 9 Nthoe jina roathüng ombo mhadungo nkhümthetava; Osi limhatsüna ombo mhadungo enetava! 10 Jipo topvü thüngi ezoa, "OPVÜI jo mesao to! Limha shijo chüngchünga soyingkacho, osi n senphi; ombona elan khi kyon jiang ji ntsa lona oyi tssoyiv." 11 Longshia, limha osi woyak! Echyua, jümang, osi nilo vancho ekümrüm topvüna; 12 Longshia, oliden, osi jilo evanden! Orae otssüng odung jiang na ematha lona tüngkachiv 13 OPVÜI na kvüthüng limha shi salo roasana. Ombona ntsanrük osi elan khi limhalo kyon jiang sav.
Esapvüi Ntsontso Ji Potsow
1 OPVÜI jo mesao! Longshia limhatsü! Longshia, jümangi jüyiden naha! 2 Eluk osi emüng na ombo füchümcho; Ombona ntsanrük osi ntsa lona sala. 3 Omina ombo mhadungi tssoala osi ombo hachüma evamo ori jiang rungtsüngala. 4 Ombona nlüpo shiang na limha shi wondangchetala; osi limha jina hoji hungi enetala. 5 OPVÜI mhadungo jo yingsüng shiang na tssütse esüa phyonala; osi ombo mhadungo limha topvü na. 6 Oyak shina ombo ntsanrük ji phyoyiala osi jipo topvüna ombo phfütsson ji hungala. 7 Kisü ekhüm jiang topvü yikrathokvü, potsow topvü na OPVÜI mhadungo nkhümthetava. 8 Ni yitsso ji tsükona Zion kyon jiangna longshiala, osi Juda yantsü jiangnaha longshiala, OPVÜI. 9 OPVÜI, Thotsü, nino limha topvü esapvüi ji; nino potsow topvü tssotsücho lona elümoto etho jükata. 10 N mhom ji tssako jiango OPVÜI na nzanala; osi ombo kyon jiang eküm ombona nkochetala; Osi n thae jiang khe lona ombona onte shanchoala. n Wondang jina ntsanrüng jiang pono onkatala; osi longshina kyon mmhom jiang pyingala. 12 OPVÜI na ntio tssothakcho sana jiang tsükona longshitava; ntsanrüng kyonden! Ntho Potsow jina ntio tssothakcho sana nchümi zetava osi montso ombo pitava.
Limha Esapvüi Potsow
1 Khenthan khi OPVÜI denkatava, Ombona emhokthao elhi tssothaka! 2 OPVÜI na ombo ekyo ji thenchocho, osi ombo shancho etho ji jipo topvü thüngi ezocho. Ombo etho osi thokhyung ji yakchia ombona ekhyo hungthaka. 3 Ombona Israel jiang thüngi ombo phyochak ji vata ombo longtsüka osi ombo n senphi nzan ji onte ejücho. Meta topvülo kyon topvüna ete Potsow ekhyo ji hungthaka. 4 Longshi lona OPVÜI denkatava, limhatsüna; Okhen osi longshi on theta ombo thünga. 5 OPVÜI thünga dentava! Khendenzhü jiang theta owon mmhom tssotava. 6 Tatara osi ejü jiang mhütava, osi longshia OPVÜI mesao ji denkatava. 7 Echyua, jümang, osi nilo evamo ekümrüm topvüna; Okhen dena, limha osi nilo vancho topvüna! 8 Nte khe tümphitava, zhükhfü osi yingsüngden; OPVÜI mhadungo topvü nzo tssoe longshia dentava, 9 ntiotssole ombona limha shi salo tsata, ombona limhalo kyon jiang ntsa osi elan lona sav.
Mesao Ntsontso ji Potsow
1 OPVÜI jo mesao, kyon na ombo mhadungo enetala; Ombona echo mpao ekümrümo jiang poni ombo vantsü jilo khuthetala osi limha shi enhyokala. 2 OPVÜI jo Zion lo Thotsü ji; Ombo jipo topvü pono OPVÜI opontso ji. 3 Otsük akvüna ombo mying tsüpho osi myingtsson ji thüngu. Nthoe jo Ombo! 4 Thotsü mesao, nino ntio elan sana ji ni chokatala; Nina Israel lo ntsanrük ji soyingthaka, osi nina ntsanrük tona shenthi toji hansi yithaka. 5 OPVÜI ete Potsow thünga, Ombo vantsü mhadungo na ombo khüma! ombo Ntho. 6 Moses ha Aaron onio ombo pvütiden; osi Samuel jo ombo thüngi randana evamo kyon ji. ontena OPVÜI tsaphicho osi ombona onte janlancho. 7 Ombona eluk durhyu lona onte socho osi ombona pio shikhfü yizüng jiang ontena engatacho. 8 O OPVÜI, a Potsow, nina ni kyon jiang janlancho; nino nlan siyipvüi Potsow to nina onte ntsithukcho; tolea onte mmen tsükona nina onte ezüpthukcho. 9 OPVÜI ete Potsow thünga osi ombo ntho phunglanina ombo khüma! OPVÜI ete Potsow jo nthoa.
OPVÜI Ethüng Khen
1 Limhatsüna OPVÜI denkatava! 2 Longshia OPVÜI khüma, ombo mhadungo longshi khen dena roa; 3 OPVÜI jo Potsow ji to kvüthüngha ti mhechoa; Ombona ejoyingcho osi eteno Ombo echi; eteno ombo kyonden osi ombo olyuden. 4 Montsso epi lümbüm hansi ombo ekhümki khotheta; Ombo chongchak jianglo omying thünga rhowoa. Montso ombo pia osi ombo thünga. 5 OPVÜI jo mmhona; ombo nzan jo kümali; osi ombo longtsüka jo nchünkhonto liala.
Mesao Phyochak
1 Ana longtsüka tona ntsanrük to tsükona okhen denala; osi ana ni denkatala, OPVÜI. 2 A etsophyo lo sulyuo n jü. Nina athüngi kvüthüng rovla? Ana aki eküm mmhona vamvü osi n mhom jijo n rümkok, 3 Potsow lona tsani eyio kyon jiang elhi jiang ana a tssakala. Ana onte thüngi ntia shentae n va. 4 Ana n tsanrükvü n tsso; osi n thae jiang thüngi ntia shenta kota n va, 5 Osi kyon ochona oyam echi rüa oyam tssürüa woasana jijo ana ombo nkachov. Kangtsüa kangchamo kyon jijo ana ombo nzekhuk. 6 Potsow lo longtsükae kyon jiango ana khichov; osi a mesaki onte vanthokvü. Otsotso ntsanrüng jiang tae khi a benkathoku. 7 N thae ochia a mesaki n vanthok; osi a mhadungo jo kyakrüm ochia n vanthok. 8 Ana tsüngon akvütolo ete metalo n thae jiang monthokvü. Ana OPVÜI yantsü jilo kyon n mhomo jiang topvü phani siv.
Khyingroe emhok-elüm lo randan
1 OPVÜI, a randan a engayia; osi a nzanchithoku kyao shi enga! 2 A ezüp yutalo athüngina kholani, ti-yia; A yi a engayia, osi ana ni tsaphiana zakto a janlana! 3 A eküm jo miphung esüa mona yiala; osi a tsük jo omi esüa runga yiala. 4 Aiyo limo echü esüa sümroala, etsoyuha a nchokav sithaka. 5 Ana eronkachiala, aiyo ntia mek; oryu ofü tae akümthaka. 6 Aiyo lijüngi ora woro esüa, osi oyan pyonthako jianglo velungu vancho esüa tüv. 7 Ana n yipthev vanala, osi aiyo mhonki woro yingsiyingloa vancho esüa tüv. 8 A ri jiangna eng tona ayikvütala; osi a emakae jiang na amying ji tsakae a rhiyitala. 9 Ni lüm etsuk ji tsükona a etsoyu jo livero tssoala, osi a esüjü na apvüi tsüthetala. 10 Nina tsakae shümthei a sicho. 11 A eküm jo mmyulani khümcho esüa osi limo echü esüa tüv. 12 Tokhatola OPVÜI, nino kümali mesao; echungren topvü na ni nchümchev. 13 Nina phanthi Zion ji khonzan to nchüma ompvü nzamvü yuta janthaka; yuta mmhontso ji enhünga. 14 Ompvü roe silea ni nri jiangna jo ni nzanala; Ompvü ji roe lia khatola ontena nzana nchümala. 15 Jipo topvüna ompvü kyuchiv; limhalo mesao topvüna ombo etho ji kyuchiv. 16 OPVÜI na kvüthüng Zion ji tssocholana sana ombona ombo elhi ji ejüv. 17 Khaksithako kyon jiang randan ombona engayiv; osi onte jonji ji n moni. 18 OPVÜI na ntio tssothakcho sana jiang ji echungren etsao ji echi erani vayia. To tssona nbukhamo kyon jiang naha ombo thüngu. 19 OPVÜI na ombo ntho vanphenina zechochiala; ombona potsüwoe na limhae zechochiala. 20 Ombona evüngki evan jiang randan engayiala; osi chüthoku methako jiang ji vachicho. 21 Jitsükona ombo mying ji Zion lo thenchotav osi Jerusalem lona ombo thüngtav; 22 jithüng ji jipo topvüna sanrhyui OPVÜI khümtav. 23 A khyingrothüngna OPVÜI na etho amatakayicho; ombona a eküm hüngrikathukcho. 24 O Potsow, a n sonthürigna jo a ti chüthoka; OPVÜI, nino kümali vanala. 25 Nkolo nina limha ji soyingcho; osi ni khena potsüo shi ha soyingcho. 26 Shiang ji monkhamvü, tolea nino vanphen ji vamvü; shiang shi hetopvü mpensü esüa ekeroe sikham. Nina mpensü esüa shaki onte siv, osi monkhani onte sirav. 27 Tolea nino kümali kheti osi ni eküm jo ochüm n li. 28 E ngaro jiangna noyingroa vam; osi ni khümcho küpo na onte tsoronichen jiang na noyingroa nkoho lia vamvü.
Potsow Nzan
1 OPVÜI thünga a eküm! alo jücho topvü na ombo ntho mying ji thünga. 2 OPVÜI thünga a eküm, osi ombo kvüta nzan licho sana ti-mhechoa. 3 Ombona a mmen topvü nlan a siyiala osi a nochonori topvü a emiyiala. 4 Ombona echü lona a shanchoala osi nzan tona khonzan to khi a mmhayithukala. 5 Ombona mmhom khi eküm ji pyingthukala osi jina mungshiro esüa etho jüa nungoria a vanthukala. 6 Oyam na khangshio kyon jiang thüngoe OPVÜI na theta oyi tssoyiala osi onte elan ji piala. 7 Ombona ombo etüm ezi ji Moses ntsithuki ombo emhokthav elhi jiang Israel thüngi ntsithukcho. 8 OPVÜI jo khonzan jüa nzan lia, zakto lüm n tsuk; osi n senphi nzan na pyingcho. 9 Ombona makkhona tae n mung, osi nchünkhon lüm tsuka tae n van. 10 Etena mamo ji ephan ombona e nkhangshi, osi ete mmen ori jiang man e n pilan. n Ombo kyuchio jiang tsükona limha shi poni oyak lio shi ombo nzan tsüphov esüa lia. 12 Engkhfü ji engrhewoe na kontao ji esüa ombona ete mmen jiang ete lona e kontayiala. 13 Ombona ngaro jiang nzamo ji esüa Potsow naha ombo kyuchio kyon jiang nzanala. 14 Ntio khi ejochosana ombona ntsia, eteno ochon na ejoyingcho to ombona ntsia. 15 Ete eküm jo limo esüa tüv, Eteno romhon thera esüa buki rankatala; 16 osi mbung na oyi venkatana vüi siala osi ochinaha n hunglam moni siala. 17 Khatola OPVÜI ekyui jiang tsükona jo OPVÜI nzan ji n senphina liala, osi ombo mmhon jina echungren topvü echeta liala. 18 Ochoangna ombo nsata ji benphia longtsükata ombo yizüng enga sana jiang thüngi hojito tssoala. 19 OPVÜI na ombo vantsüji potsüwoe vanthukcho; Ombo topvü pono mesao! 20 OPVÜI thüngtava! thokhyung osi thotsü lanbenden; Ombo yizüng engaeden osi ombo phyocho engaeden. 21 OPVÜI thüngtava, potsüwoe ombo nriden osi etho tsütsae osi ombo lüm erüng etssoeden. 22 Ombona yansa sawo jiang topvülo lyuyingcho topvüna OPVÜI thüngtava. OPVÜI thünga a eküm!
Lyuyingpvüi Ethüngkhen
1 OPVÜI thünga a eküm! OPVÜI a Potsow nino kvüta tsüphocho ato! Nino myingtsson osi phfütsson khi bipocho; 2 nina wondang khi nibobo eyukzhüala. Nina oyak shi süki esüa echongcho; 3 osi oyaki ojü jianglo ni vanphen tssocho. Nina eluk ji ni tsankaphen tssoala; 4 osi mpung ji echolo tsankae sanphiala. Nina mbung ji ni yithenpvüi tssothukala, nlüpo ji ni nri tssoa tsütsatala. 5 Nina limha shi ombo chenkapheno chüngchünga zathukala, osi kvüthüngha n senphi. 6 Nina jümang ji hoji poni mpensü esüa eyukatala; osi ojüna phunglan jiang eyukala. 7 nina ojü jiang makle ontena tsancho; nina tüngkachia yizüng pioji ontena zoale tsancho. 8 Ontena phunglan jiang osi hayi jiang poni phyonkata tsüala, osi nina methakio meta jianglo tsüthetala. 9 Ontena nina methakio erü ji yaki limha ji ndüngzhüa n chiyi. 10 Nina jianglo jünhyo bukthukala; osi yingsüng jiang yutalona zhükhfü tsüthokala. n Hojiangna romhoni ekümrüm jiang ojü piala; osi hojianglona romhon kurü jiangna era khyima yuala. 12 Hojianglo odung enhyano lio jianglo woro jiangna oshüp tssoe okhen den tala. 13 Nina oyaki na yingsüng jianglo eryu jokathukala; osi limha ji ni mmha na pyingthukala. 14 Nina tssiro-mangsü jiang tsükona ero zathukala, osi ji yakchia kyon na benro thei 15 zükhi chiyithuki ematha khiala; osi olive thyujü khi ombo longshithuk, nna hümri chiyithuki tsosi etho jükae van to tssoala. 16 Lebanon lo cedar dung jiangna eryu tssona hungala; osi hojiango OPVÜI tssüngodung ombona chümcho. 17 Hojianglo woro jiangna oshüp tssoala osi jüworo jiang naha oshüp tssoala. 18 Tsiyo jiangna sürhen ntssom jianglo vantala osi sethan jiangna longsürheni mphoe vantala. 19 Nina choroa ji chekathoku choro lyuyingcho; osi eng jinaha erhev yuta ji ntsia. 20 Nina zümo ji lithukcho osi romhon ekümrüm jiangna zümolo chiroala. 21 Hingo woro jiangna Potsow na onte pio ojak jiang yantathüng erhyutala. 22 Eng ji chiroana ontena onte vanpheni oyi erikachi vantala. 23 Tothakana kyon jiangna onte elhi sakarae n myuthüng jo tssotala. 24 OPVÜI, nina shiang hetopvü lyuyingthaka; nina kvüta kichuk jüa shiang shi lyuyingchoato! Limha shijo ni ekümrümo na pyingcho. 25 Jümang ji ngazoa tsüphoa, osi hojilo n khacheo teri tsüpho ekümrümo vanala. 26 Rhungtsü jiangna hoji ponina ehala; osi nina lyuyingo jüpvüo Leviathan na jilona khüriala. 27 Onte topvüna ojak etso etüngana nilo zekatala. Osi nina onte pia tsothukala. 28 Nina onte tsothuka onte mmhithukala. 29 Nina kholani yiana onte kyuala; osi nina onte ethük ji khiyiana onte chüala; osi onte lyuyingo chon ji kümlani siala. 30 tokhatola nina ethük onte theyiana onte lyuyinglana la; nina limha ji eküm ethan piala. 31 OPVÜI phfütsson ji kümali lithuka! Ombo lyuyingcho jiang tsükona OPVÜI ji emathathuka. 32 Ombona limha ji zetala osi limha jiang na enetala; ombona phunglan jiang evüngkatala osi ontena omi phungchukchiala. 33 Ana a eküm echung OPVÜI denkav; ana eküm evanthüng jo a pvüi myingthüng khen dem. 34 A longshi ji ombona a picho; jitsükona a khen jiang khi ombo emathathuka. 35 Mmen kyon jiango limha lona moni sithukkhuka; osi n thae jiangha monkhankhuka. OPVÜI thünga, a eküm! OPVÜI thünga!
Potsow tona Ombo kyonden to
1 OPVÜI montso pia, osi ombo tsüpho ji thensochia phyoa; ombona ntio tssothakcho sana ji jipo jiang ezoa. 2 OPVÜI thünga denkatava; ombona emhokthao elhi tsso jiang ezotava. 3 Eteno ombo echi tsso ji tsükona longshitava; ombo ekhüm kyon topvüna longshitava. 4 OPVÜI nzan ji yana woa, osi n tümjak na ombo khüma. 5 Ombona emhoktav elhi tsso jiang osi oyi tssoyiwo jiang ti mhechotava. 6 O ombo nri Abraham tsoeden, Jakob tsoeden osi ombona ethüngcheo kyonden! 7 OPVÜI jo ete Potsow, ombo yizüng jiango limhatsü tsükona. 8 Ombona ombo ntsata ji nchünkhon vav osi ombo phyochak jiang echungren wothüng bena vanthokvü. 9 Ombona Abraham thüngi ntsatao ji vav osi Isaak thüngi phyochako ji lia vanthokvü. 10 OPVÜI na nchünkhonto lia evamo ntsata Jakob thüngi vacho. 11 "Ana Kanaan metaji nte piv; osi hojijo nte echi tssov." 12 Potsow kyon jiango tara tae tssocho tssocho osi Kanaan metalo jo amoatsi esüa tssocho. 13 Ontena meta motsünga lona motsünga, ekhüngyan motsünga lona motsünga to khyutacho. 14 Tokhatola Potsow na onte thüngi ochi khi ha onte n tssonshithukcho. Osi ombona onte nkochev tsükona mesao jiang heto ntaknshonyi picho: 15 "Ana ethüngcheo nri ji ti tssatssothuka; osi a zenkhying jiang ti-evüngka ta." 16 OPVÜI na onte meta jilo otssi vara rothukcho, osi onte etsoyu topvü khi siyicho. 17 Khatola ombona onte vüngina kyon tsüka, Joseph, ontena ezii tssothuka yeni sioji wothukcho. 18 Ombo jo jiang chungi vayicho; osi ombo evüngo yonjak vüngkhüng theyicho. 19 Ombona metheo jiang n benthüng jo hojitoli vanthukcho; osi OPVÜI yi jina ojang tssoe ombo zecho. 20 Tole Ejip mesao jina ombo vachicho; jipo jiang esapvüi jina ombo vachicho. 21 Ombona ombo yansa ji Joseph khelo theyicho osi meta topvü esapvüi ombo kümthukcho, 22 osi mesao küpo tsüphoe jiang tona ombo ndungnts sungpvüi jiang to pono etho picho. 23 Tole Jakob naha Ejip lo owo vanjüng tssocho. 24 Tole OPVÜI na ombo kyon jiang thüngi otsoeoro elümoto picho osi onte ri jiang lona elümoto etho jükata kümthukcho. 25 Ombona Ejip kyon jiang khi ombo kyon jiang tssakthukcho, osi ombo ri jiang kyakthechithukcho. 26 Tosi ombona ombo nri Moses ha Aaron oni ethüngche wothukcho. 27 Ontena Potsow thotsü elhi elümoto tssoa wotacho osi Ejip lo chethev elhi elümoto tssotacho. 28 Potsow na meta jilo emüng rothuka ha Ejip kyon jiangna n longtsücho. 29 Ombona onte zhükhfü jiang ejen kümrathoki ongo jiang chürathukcho. 30 Onte metaji ovü na phyolakcho osi mesaki ji mpato pyingcho. 31 Potsow na ombo yizüng ephan beno osi benjükaro taena meta ji pying thukcho. 32 Ombona onte meta jilo eryu thung sheryu tona potsüo nlüpo ji to rothukcho. 33 Ombona onte jününgrothi tona züvodung to jiang yesothukcho, osi odung topvü eyathukcho. 34 Ombo yizüng ephan khomong n khacheo tata rümthukcho; 35 osi hojiangna meta jilo otssüng odung osi benro-niro topvü tsoroe sicho. 36 Ombona Ejip wopan topvü lona otsoe tsokhfü jiang lüngthayicho. 37 Tosi Israel kyon jiango ombona sochukcho; Ontena janti osi shona hantacho, osi onte topvü otsük mmhona etho jura kümcho. 38 Ejip kyon jiangna onte kyucho osi ontena tsani yiale emathacho. 39 Potsow na ombo kyon jiang pono eluk lithukcho osi zümolo jo omi khi onte wondangthukcho. 40 Ontena chomo ji esüa ombona biluku rümchukthuki onte tsothukcho; osi onte lüm bükthoku tsükona potsü oe na etsoyu onte picho. 41 Ombona olung küngsothuki jilona ojü chiyithuki onte yuthukcho; osi hojina lijüngi zhükhfüro esüa tsüthukcho. 42 Ombona ombo nri Abraham thüngi ntho phyochak lio ji nchümchecho. 43 Jitsükona ombona ombo ethüngche kyon jiang sothukcho osi ontena longshi lona tüngta okhen dentacho. 44 Ombona oyam meta jiang onte picho, osi oli jiang onte khithukcho; 45 hojijo onte khi ombo shikhfü yizüng jiang engathoku tsükona. OPVÜI thünga!
Ombo Kyon Jiang Thüngi OPVÜI Mmhon Ji
1 OPVÜI thünga! OPVÜI montso pia, ntiotssole ombo mmhona; osi ombo nzan jo kümali. 2 Ombona elhi tsüphov tsso jiang topvü ochona phyokhukcho ato? Ochona etsson ombo thüngkhukcho ato? 3 Ochoangna ombo yizüng enga sana osi yuta topvülo elan tae tssoa sana jiang ematha elio. 4 OPVÜI, nina ni kyon jiang nzanchiathüng anaha a ti-mhechoa; nina onte shanchoathüng anaha a thenhya. 5 Ni kyon jiang sükhying mmhom ji a hungthoka osi ni jipo ji ematha ji a chinhya, osi ni kyon jiang thüngi longshi ji achinhya. 6 Ena e motsüi jiang esüa mmen tssothaka; ena n thae osi n mhon tssoa vanala. 7 Ejip metae e motsüi jiangna Potsow chethev elhi jiang n gathecho; Ombona elani ombo nzan onte ejüo ji ontena mhechocho, osi ontena jümang rakio jilona Thotsü Potsow ji panlancho. 8 Tokhatola ombo na phyochako ji esüa onte shanchocho. Jijo ombo etho tsüpho ji onte ejüv tsükona. 9 Ombona jümyon jümang ji yizüng picho tole jina nghache sicho, osi ombona hoji pankata ombo kyon jiang sochukcho. 10 Onte etssak-nkung jiang khelona ombona onte shanchocho; Osi onte ri jiang khelona ombona onte shanchocho. 11 Onte ri jiango ojü jina erhüktsüngracho osi ochia n hyokacho. 12 Tole ombo kyon jiangna ombo phyochak jiang longtsücho osi ombo thünga dentacho. 13 Khatola ombona ntio tssocho sana ji onte na zaktole mhechoe sicho osi ombo lanso n thena tsüsoa onte etancho tssocho. 14 Ontena lijüngi na tssüphi yangphita Potsow ojang tssotacho. 15 Jitsükona ontena chomo ji ombona onte picho; khatola onte yolo ekhenthao nochonori ha lithukcho. 16 Lijüngina ontena Moses ha Aaron oni, OPVÜI ntho nri jiang ji n zekhukcho, 17 tole liko jina küksoe Dathan nzhücho osi Abiram wopan menzhücho. 18 Onte sürüi jiang pono omi joroe nthae jiang rungtsüngrae sicho. 19 Ontena Sinai lona shona mangsüro nsüngrütacho osi kisü ji khümtacho. 20 Ontena lomo etsowo ekümrüm ji kisü khi Potsow phfütsson ji thung tssothukcho. 21 Potsow ochona ombo Thotsü lona Ejip metae na onte shanchocho sana ontena mhechoe sicho. 22 Ombona hoji na ntio emhokthav elhi tssochola! Osi ntio engangcheo elhi jümyon jümang jilona tssochola! 23 Kvüthüng Potsow na ombo kyon jiang monthokvü methakcho sana ombona ethüngcheo ombo nri Moses na Potsow ryulana phanthi ombo kyon jiang ti-monthukle to tanglanchicho. 24 Ontena meta mmhom ji silanchicho, ntiotssole ontena Potsow phyochak ji n longtsücho. 25 Ontena ranki vani pvünyota mungsi OPVÜI yi n ngatacho. 26 Jitsükona lijüngina onte chüvka; osi onte tsoronichen jiangji n longtsüi metae ezonsorae sithokvü, 27 osi jipopoe metaena onte chüravka to tüngochünga onte ezocho. 28 Tole Peor meta lona Potsow kyon jiangna Baal khümtav benkacho osi eküm n jüo kisü Potsow jiang thüngi thamo etsoyu jiang tsotacho. 29 Onte elhingo jina OPVÜI lüm etsuk shichecho osi ekhenthao nochonori onte yolo chiyicho. 30 Khatola Pinehas na phanthi nlan elio jiang ezüp picho, tole nochonori vara ji esancho. 31 Ombona heto elhi mmhom tssoji chekayicho osi echungren topvü lo ombo nchümcheyiv. 32 Meribah jünhyo lona kyon jiangna OPVÜI lüm tsukthukcho; osi onte tsükona Moses ezüpcho. 33 Ontena ombo lüm tsukshakthuko jina ombona tamangi zei n zena nsancho. 34 N longtsü jiang lüngthale to OPVÜI na onte ezowo ji ephan ontena n tssocho. 35 Osi ontena n gav hojiang thüngi yanpiyanthan tssota onte phankata yicho. 36 Potsow kyon jiangna kisü khümtacho, osi hoji man onte moncho. 37 Ontena onte tsoeoro jiang khi Kanaan kisü potsow jiang thantacho. 38 Ontena n lan n lio ngaro jiang ji lüngthatacho osi meta ji münghan na mmenthukcho. 39 Onte elhi jiang khi ontebobo mmentacho osi Potsow lo n longtsükav sicho. 40 Jitsükona OPVÜI na ombo kyon jiang thüngi lüm tsukcho osi onte thüngina kholani sicho. 41 Ombona n longtsüi jiang khelo ekachi onte sicho osi onte ri jiangna onte pono esapvüi tssocho. 42 Onte ri jiangna onte ntssonshicho, osi ori jiang kupi onte rheyicho. 43 OPVÜI na yuta elümoto lo ombo kyon jiang shanchocho; tolea ontena ombo panlam zikacho; osi mmeni jungkata rheyicho. 44 Khatola ontena kyata na OPVÜI na onte engayicho; osi ombona onte ezüp jiang zeyicho. 45 Onte nzancho tsükona ombona ntsata ji n mhechocho; osi khonzanka to lüm yulani sicho. 46 Ombona onte khangshio kyon jiangtopvü khi onte nzana nchümthukcho. 47 E shanchoa, OPVÜI e Potsow; jipopoe khelona e sochuka; tona ena montsoto ni ntho mying ji thüngtavka. 48 OPVÜI thünga, Israel Potsow ji; enhünga osi nchünkhon! Kyon topvü khi Amen to phyothuka! OPVÜI thünga!
Potsow Mmhon ji Thanthüngcho
1 "OPVÜI montso pia, ntiotssole ombo mmhona; ombo nzan jo kümali. 2 OPVÜI thünga, elan elani shiang phyoa, ombona shanchoe kyonden, ombona nte topvü nte ri jiang khelona nte shanchothaka. 3 Osi jipopoe metae na nte sochukthaka, engkhüwoe osi engrhewoe, elani jolo khümki na. 4 Ejomajo lijüngi rümphita olan n yanchev vancho. 5 Onte wondon eratsünga ntia eyilo n liv sithakcho. 6 Tolea onte ezüp yutala ontena OPVÜI tsaphicho osi OPVÜI na onte ezüp lona onte shanchocho. 7 Ombona olan saksak onte pia ontena vancheo yantsüi onte sochukchicho. 8 Ombo n senphio nzan ji tsükona osi ombona emhokthav elhi onte tssoyiwo ji tsükona ontena montsso ombo piv shikhfü. 9 Eratsüngo jiang ombona era khyimiala; osi wondomo jiang etsoyu mmhom khi mmhithukala. 10 Ejoma jo emüng nungrae vancho osi shenrae evüngki ezüpta vancho. 11 Hojijo ontena Thotsü Potsow panlana ontena ombo yi n ngayio jitsükona. 12 Onte ji elhi ekhüngu na sangtsüngrathakcho; osi onte vanthelea ochinaha onte n zewo kümthakcho. 13 Jithüng onte ezüp yutalo ontena OPVÜI tsaphicho; osi ombona onte ezüp nungra lona onte shanchocho. 14 Onte nungra emüng jilona onte sochecho osi shenzhü jiang tüproyicho. 15 Ontena OPVÜI n senphio nzan ji tsükona osi ombona emhokthao elhi onte tssoyiwo ji tsükona montsso pinrüngu lia. 16 Yungmen yonjak osi yonjak na erako jiang ombona khuroe siala. 17 Ejoma jo onte n mhon osi onte mmen tsükona nochonoria vancho osi zhüvaeden esüa tssocho. 18 Onteno etsoyu tia n zehungu onte chürav vanthakcho. 19 Tole onte ezüp lo ontena OPVÜI tsaphicho; osi ombona onte ezüp lona onte shanchocho. 20 Ombona ombo yizüng khi onte emiyicho osi olüpi na onte tsanchothukcho. 21 OPVÜI n senphi nzan ji tsükona osi emhoktahv elhi onte tssoyiwo ji tsükona OPVÜI thüngu lia. 22 Ontena ekümrümo than theta montsso ombo piv lia; osi ombona ntio tssothakcho sana ji tsükona longshi khen theta dentathuka. 23 Ejoma jo orhungina jümangi ehaphita onte tssikung yani tsota vancho. 24 OPVÜI na jümangi ntio etho tsütsakhukcho sana osi ntio emhkthav elhi tssocho sana ji ontena hungcho. 25 Ombona yizüng pile ezhü ntav veni jukyo phanthithukcho. 26 Tole orhung jiang ji oyaki ekhyonkachisi jüngtherae sicho. 27 Hojitüv ekyutsi lona kyon jiangna onte longtsüka ji moni sisi ontena sokona kinoe esüa eyaphitacho. Osi onte tssothimori jiang ntia mekvü kümi sicho. 28 Ontena hetüv ezüp yutalo OPVÜI tsaphicho tole ombona ezüp jiang lona onte shanchocho. 29 Tsungryu ntav ji ombona esanthukcho osi jukyo jiangha noyingi sicho. Hojina onte emathacho. 30 Osi ontena esantav zio esanphen jilo onte sochukchicho. 31 OPVÜI n senphi nzan jitsükona osi ombona emhokthav elhi onte tssoyithako ji tsükona ontena montsso ombo piv lia. 32 Ontena kyon etsiko lona ombo tsüpho ji thenchoa osi esopvüiden sanrhyu jiang lona ombo thüng tav lia. 33 OPVÜI na zhükhfüro jiang nghathuki jünhyo jiang n bukchethuku sicho. 34 Hojilo evamo jiang nthanri jitsükona ombona liko lizü jiangha oma elio lijüng kümthukcho. 35 Ombona lijüng jiang zhükhfüro kümthuka likying jiang jünhyo kümthukcho. 36 Ombona wondona vamo kyon jiang hojilo vanthukcho osi ontena evan yantsü tssotacho. 37 Ontena oli jianglo mojü thei jününgrothi chümtacho, osi etsson lhochocho. 38 Ombona ombo kyonden jiang mmhayicho osi ontena otsoeoro khosha vanracho, osi onte tssiromangsü jiang n monthokvü ombona zeyaicho. 39 Kvüthüng Potsow kyon jiang oyam na khangshia ezüpthuka khoe sisi teri kümthukcho sana, 40 onte khangshi jiang OPVÜI na n zehungu lijüngi ephophita yirathukcho. 41 Khatola ezüpa vamo jiango ombona nungra lona shanchoe onte wopan jiang tssiden esüa thichethukcho. 42 Ntsanthoe jiangna shi hungi longshiala, khatola nthae jiango jükrüpi siala. 43 Ochoangna nchümri liana shiang nchümi zethuka; onte khi OPVÜI n senphi nzan ji chekathuka.
Ori Zalanchiv Kyochi Randan
1 O Potsow, ana longtsüka tsüphov lia! Ana okhen dena ni thünguv! 2 O phanthia a eküm! Phanthia a khendenzhü osi rhüphiphen; ana eng ji onsochitokvü ka. 3 OPVÜI, ana jipo topvü yolona montso ni piv. Kyon okho yolona ni thünguv. 4 Ni n senphio nzan jina potsüo janala; osi ni longtsüka jina oyak etssungala. 5 O Potsow, ni tsüpho ji oyaki ha hungthuka osi ni phfütsson ji limha topvü lona hungthuka. 6 Ni thotsü jina e shanchoa, osi a randan ajanlana, tona nina nzamo kyon jiang shanchochev. 7 Potsow na ombo ntho vanphenina phyocho, "Ana ekhyo lona Shechem ji chiroe Sukkoth hayi jijo a kyon jiang chitayiv. 8 Gilead osi Manasseh jo a echi; Ephraim jo a kiven osi Juda jo a mesa jarung. 9 Tolea Moab jo ana khetsük-mhaphen jü-vakuk tssoa tsütsav, osi Edom jo a jokhüp ekachiphen tssov, ji yichak jo a echi to. Ana philistia jiang pono a ekhyo lona tüngkachiv." 10 O Potsow, ochona pikhfülanchio yantsü jilo a sosi wovla? Ochona Edom lo a sosi wovla? 11 Otsotso nina khoe a sithakcho alo? Nina e rasan jiang sosi khochia mekchoke? 12 Eri jiang zalanchiv ekyochia; Kyon na e nzamo jijo ntia mek. 13 Potsow ji ethüngoe tssothuki ena khyov; ombona eri jiang ekhyoyiv.
Ezüpi Evamo Kyon ji Randan
1 Potsow, ana ni thüngala; jükrüpi ti vana! 2 N thae osi n tsae na arokathaka; osi ontena ejüng aphyoyitala. 3 Osi a tsükona n mhom phyota ntia ntam n liv asakatala. 4 Ana onte nzana onte randania khatola ontena a palanala. 5 Ontena mmhom thung n mhom apilantaka, osi nzan thung etssak-nkung apilanala. 6 Yitssoe nthoe tüv ethüngi ari ji oyi tssoyithuka osi ombo ri yolo tsüka khi nlan ombo pithuka. 7 Oyi ombo tssoyikhi nlan yancheyithuka, osi ombo randan ji mpato mmen kümthuka. 8 Ombo eküm ji elaro ochüm tssoyia; osi ombo elhi ji kyon thanpoe khi khiyithuka! 9 Ombo tsoe jiang opvüpoe n vantso kümkhanthuka, osi ombo engh ji emi kümthuka! 10 Ombo ngaroden jiang oson-oki n liv chontsochonyuta yirathuka; ontena vamo yingsi-yinglo meta jiang lona phani onte sithuka. 11 Ombo pvüonowo kyon jiangna ejüeli topvü khiyi khanthoka; osi ombona sango jiang topvü omoatsi echi kümthuka. 12 Ochinaha ombo nzana to ti nchümthuka; osi ombona valanchio tsoero jiang ochinaha ti-zeyithuka. 13 Ombo tsoronichen jiang topvü chürathuka osi bochung ethani jo ombo mying ji mhecholangi sithuka. 14 Ombo motsüi jiang n mhon ji OPVÜI khi nchümcheyithuka; osi oyo mmen ji man kvüthüngha n lan ombo tisiyithuka. 15 OPVÜI na onte mmen jiang nchümcheyisi onteno mhechoe onte sithuka! 16 Hoji kyontsük jina nzan jo ntiosana n tsi; Ombona yantsae jiang, n pentae osi nzanchi ethev elio kyon jiang khangshia chüthokcho. 17 Ombona oyam rhiyirandankao ji esüa omboha rhiyirandankao tssothuka. Ombona oyam mmha n pihungo ji esüa omboha ti-mmhayithuka. 18 Ombona ombo bipo tssoa oyam rhiyirandankacho; ombo yi ekhov jiang na ojü esüa ombo tsük jiang rethuka, osi ombo ryu jana thyujü esüa rheyithuka. 19 Hojiang khi mpensü esüa ombo eyukthuka osi ryulankhüng esüa nchünkhon ombo khüngthuka. 20 OPVÜI, a ri jiang hojito khangshia, osi a echi n mhom ephyo jiang ji hojito ezüpthuka! 21 Tolea OPVÜI a potso, nina phyochako ji esüa akyochia, osi ni nzan mmhom ji khi a shanchoa. 22 Aiyo yantsae osi n bentae kyon, lümbüm ehung jana a tsatssoe vanala. 23 Aiyo mmyulani khümcho esüa a mom sala; osi oraoben esüa vena ayiv sala. 24 Etsoyu hungi n tsocho lona a jopya-khepya vana; osi oryu ofü tae a kümthaka. 25 Kyon na ahunga na a yikvütala, osi a emakata kvüri engümphitala. 26 Ni n senphio nzan ji khi a shanchoa! 27 Nino a shanchoe ji to a ri jiang khi chekathuka. 28 Ontena a rhiyikhoka, tolea nina a mmhayithokvü, A khangshi jiang monthuksi ni nri aiyo a longshithuka. 29 A ri jiango yikra-nungra na eyukthuka; osi yikra jina onte mpensü esüa tssothuka. 30 Ana tüngkachia OPVÜI, montso piv; ana kyon etsiko lona ombo thünguv, 31 ntiotssole ombona yantsae ji nkohoala osi oyam na chüthokvü vamo jiang khelona shanchoala.
OPVÜI Tona, Ombona Ethüngcheo Mesao ji to.
1 OPVÜI na apvüi mesao ji ezocho, "Ana ni nri jiang nijo kupi n thechithüng nandang jo shilo a amimoe khukthei vana!" 2 OPVÜI na Zion lona ombo mesao etho ji nzokathoku. Ombona "Ni nri jiang esapvüi tssoa" to phyoala. 3 Nina niri jiang thüngi rota tsüngono jo ni kyon jiang na wothüng tssoa ni nzanchiv. Enyathüng yentsso esüa ni khyingroeden jiangna ntho phunglani ni thüngi rov. 4 OPVÜI na khünga heto phyochakthaka; osi ombona hoji ekilamvü mek; "Ana kümali Melchezedek sen pvüti ni kümthukvü-ka." 5 OPVÜIna ni amimoe vana; ombona lüm tsükana, mesao jiang ombona khyov. 6 Ombona jipo jiang oyi tssoyiv osi echümüng taena rali pyingthokvü; Ombona meta topvülo mesao jiang khyov. 7 Meso jina lantssae zhükhfüro jilona ojü yusi etho jükav; osi ombona khyov.
OPVÜI Ethüng
1 OPVÜI thünga! Alümbüm topvü theta kyon etsiko lona a pvüi ji montsso piv. 2 OPVÜI elhi shiango kvüta emhokcho ato! Hojiang chokae topvü na jiang ntsihungala. 3 Ombo elhi jiang topvü myingtsson osi myingthüng tae; Ombo ntsanrük jo kümali tsükona. 4 OPVÜI na ombo emhokthav elhi jiang e n mhechothuk hungala; Ombo nzan osi khonzan elii. 5 Ombo kyuchio jiang ombona etsoyu piala; ombona ntsatao ji kvüthüngha n mhechoala. 6 Ombona jipopoe meta jiang ombo kyon jiang pia ombo ethoji onte ejücho. 7 Ombo elhi topvülo longtsüka lia osi ntsanrüka; : Ombo yizüng jiang topvü to enhikakhoko tüv tae. 8 Hojijo kümali liv osi ombona ntsa osi ntsanrük theta methakcho. 9 Ombona ombo kyon jiang vachicho osi ombo kyon jiang thüngi kümali ntsata vacho. Ombo ntho osi Thotsü! 10 Nchümri eli-i ekümvü tsükona jo OPVÜI yikra chio ji; Ombo yizüng benphi jiang topvü ombona tssencheziche mmhom piala. Kümali ombo ethünguv lia!
Kyon Mmhom Ematha ji
1 OPVÜI thünga! OPVÜI yikrachio kyon ji ematha elio; ombo yizüng engav lo emathae kyon ji. 2 Kyon mmhom ji tsoeoro jiang na meta jilo ematha lia vamvü; osi ombo tsoronichen jiango mmhayiv. 3 Ombo wopan ji ejüeli kümvü, osi ombo kümali etsson elüm ekümo vamvü. 4 Wondang jina kyon mmhom jiang tsükona emüngi onala; khonzan elii, nzan eli-i osi ntsae jiang tsükona. 5 Kyon ochona longphya oyam pvüonoa osi ombo shisho khophilo ntsanrüka sana ji ematha elio. 6 Kyon mmhom jijo kvüthüngha n joyi; ombo yuta topvülo ombo nchümchev. 7 Ombo yithen n mhom zov ji n kyuala; ombo longtsü chüngchünga osi ombona OPVÜI lo longtsüala. 8 Ombona n wongkhyu osi n kyu; ombo ri jiang khyothechia ombona hungnrüv. 9 Ombona n pentae jiang longphya piala, osi ombo nzan jo kvüthüng ha ochüm n tsso; Ombo etho ejüi tssov osi ombo yikrachiv. 10 N thae jiangna shi hungi lüm tsukala osi ontena eneta lüm tsuka yi siala; onte eyilo jiangha kümali moni siala.
OPVÜI Mmhom Thüngicho
1 OPVÜI thünga! O OPVÜI nriden, OPVÜI myingji thüngtava! 2 Ombo mying ji enhünga osi nchünkhonto thüngiv. 3 Engkhfü osi engrhewoe na OPVÜI mying ji thüngtava! 4 OPVÜI na jipo topvü pono sayatala; Ombo phfütsson jo oyak shi pomoe. 5 OPVÜI ete Potsow esüa ochia n van. Ombona omhawoe ntssoni vanala. 6 Tolea ombona oyak osi limha shi ezev tsükona nkhothetala. 7 Ombona yantsae jiang ochon lona phanthithukala, osi n pentao jiang ombona onte n penzi jilona phanthithukala, 8 osi mesatso jiang onte jokim tssothukala; Ombo kyonden mesatso jiang. 9 Ombona otsoeoro n van opvü-oyo ji mying lithuka otsoeoro pia ompvü emathathukala. OPVÜI thünga!
Yakchi Tokhu Khen
1 Israel kyon jiangna Ejip metae na khochiathüng, Jakob tsoronichen jiangna n longtsüi meta jilona khoathüng, 2 Juda jo OPVÜI ntho pvüji kümcho; osi Israel ji ombo echi kümcho. 3 Jümyon jina zesi tsani sicho, Jordan zhükhfü jina tamangi n tsüv sicho. 4 Phunglan jiangna nyanyanden esüa tsukphitacho; yingsüng jiangnaha olyuroden esüa shanthatacho. 5 O jümyon jümang, ntiona ni tsanthukcho ato? O Jordan, nino ntioli n tsüv tamangi sicho ato? 6 O phunglanden, nteno ntioli nyanyanden to tsukphitacho ato? O yingsüngden, nteno ntioli olyuroden esüa shanthatacho ato? 7 O liko, OPVÜI ero yutalo eneta vana. Jakob Potsow ji vanrhyulo eneta. 8 Ombona longpvü jianglea wozhü kümthukala, osi likang sürhen jiang tsüa evamo jünhyo kümthukala!
Otsotso Potsow Tsüka ji
1 OPVÜI, ni n senphi nzan osi longtsüka ji tsükona phfütsson jo ni echi tae; ni echi; e echi mek; 2 Jipopoe jiangna ntioli, "Nte Potsow jo kvüla?" to engathukala. 3 E Potsow jo potsüwoe vana; ombona ntio chokata na ji tssoala. 4 Onte potsow jiango shona janti khi kyon khe na nsüngrücho. 5 Ontena obüng khyinga; tolea n sanche, omhyik khyinga tolea n hung; 6 Ontena eno khyinga, tolea n zo; kheno khyinga, tolea orhüm nzo. 7 Onteno okhe khyinga, tolea n kanphiche, ojo khyinga, tolea ntsache; ontena owon ha n tssoche. 8 Ochoangna onte nsüngrücho sana osi onte lo longtsükata sana jiangha ontena nsüngrüo kisü jiang esüa kümrathoka. 9 O Israel kyonden, OPVÜI lo longtsütava; Ombona nte nzanchia nte nkohav. 10 OPVÜI lo longtsükatava, O Potsow pvütiden, Ombona nte kyochia nte nkohoala. n OPVÜI lo longtsükatava, ombo ekhümden. ombona nte kyochia nte nkohoala. 12 OPVÜI na e nchümcheta osi e mmhayiv; Ombona Israel kyon jiang osi Potsow pvütiden topvü mmhayiv. 13 Ombo yikrachio jiang topvü mmhayiv; tsüpho teri topvü kheti mmhayiv. 14 OPVÜI khi otsoeoro nte pithokvü ka, nte osi nte tsoronichen jiang thüngiha to! 15 Potsüo osi liko liyingo Potsow jina nte mmhayithokvü ka. 16 Potsüo oyak shijo OPVÜI echi tae; tolea liko shijo ombona kyon jiang picho. 17 OPVÜI jo echüi jiangna thüngu mek; echüli yithako jiang ochinaha thünguv mek. 18 Tolea eküm evan ete shina, enhünga osi nchünkhon montsso ombo piv. OPVÜI ji thünga! Potsow thünga
Echü Lona Shancho Kyon Jiangna
1 Ana OPVÜI nzanala, ntiotssole ombona a yi engala; ana randamo ji ombona a engayiala. 2 Ana ombo tsaphi akvüto ombona a engayiala. 3 Echü ekyutsi na a nkonzhücho; olüp ekyuthav ji alo licho; Ekyu osi wongkhyu taena apyingcho. 4 Jithüng ana OPVÜI tsacho, "OPVÜI ana jonjiala, a shanchoa." 5 OPVÜI jo khonzan eli osi mmhona, ete Potsow jo nzanti ejüo Potsow. 6 Ekyurung n lio jiang OPVÜI na nkohoala; ana ekyutsi lo vanathüng ombona a shanchocho. 7 Longtsüka lia vana a lümbüm; ntiotssole OPVÜI na a thüngi mmhona yipvü. 8 OPVÜI na echü lona a shanchocho; Ombona esü a mheyisi oyam khi a n khyothukcho. 9 Jitsükona ana eküm evan jiang limhae OPVÜI vanhyalo sanphiala. 10 Ana "Aiyo nkhio atsserothaka" to phyoa vanathüng lea ombo n vachiv ombo longtsücho. n Ana "Ochia longtsüka khoko tüv n van" to phyoathüng lea ombo longtsükacho. 12 OPVÜI mmhon jiang topvü tsükona ana ntio ombo pilamla? 13 Ombona ashancho ji montsso piv tsükona ana zükhi than ombo piv. 14 Ana ntio ombo piv phyochakcho sana ji kyon etsiko lona ombo piv. 15 Ombo kyon yolo tsüka chücho lea OPVÜI na kvüta lüm nanoa ato! 16 OPVÜI, aiyo ni nri, ayona ni benkao ji esüa ana ni benkatala. Nina echü lona a shanchothaka. 17 Ana montso than ni piv osi ni thüngi randam. 18 Ana ntio phyochaki vancho sana hoji Jerusalem ekhümki ntho vanphen jilona, 19 osi ni kyon jiang topvü etssikho lona ana ni piv. OPVÜI thünga!
1 OPVÜI thünga Jipo topvüna! Ombo thünga pvüjilan topvüna! 2 Ombona e nzamo jijo elümoto etho lia; osi ombo longtsükajo kümali. OPVÜI thünga!
Ekhyo lo Montsso Randan
1 OPVÜI montsso pia, ntiotssole ombo mmhona. Osi ombo nzan jo kümali. 2 Israel kyon jiang khi "ombo nzan jo kümali" to phyothuka. 3 Potsow pvüti jiang khi "Ombo nzan jo kümali" to phyothuka. 4 Ombo ekhüm jiang topvü khi "Ombo nzan jo kümali" to phyothuka. 5 A nungra yutalo ana OPVÜI tsaphicho, tole ombona a yichocho osi a vachicho. 6 OPVÜI na a ndüngo vana a n kyu; ochona ntio a lyuikhoku la? 7 Anzanchipvüi jo OPVÜI osi ana a ri jiang khyothechia hungu. 8 Kyon lo enhyika thungona jo OPVÜI lo longtsükao ji mmhomo. 9 Kyon esopvüiden jianglo enhyika thungona jo OPVÜI lo longtsükao ji mmhomo. 10 Ori elümoto na a hachümi vancho; khatola OPVÜI etho lona ana onte monthukcho. 11 Ontena nken akvü lona a hazhüi vancho; khatola OPVÜI etho lona ana roe onte sicho. 12 Ontena otssak esüa a ryulanchicho, khatola OPVÜI etho lona ana onte ji omi okyo thechicho esüa zakto rungi onte sicho. 13 Elümoto ori ntav tüv na aryukacho, osi akhyothechicho; tokhatola OPVÜI na a kyochicho. 14 OPVÜI na etho atheyia etho khyunga a vanthukala; ombona a shanchothaka. 15 Potsow kyon jiang ranki na ekhyo won tssotao jiang enga; "OPVÜI thotsü jina khyocho! 16 Ombo etho na ekhyo epicho – ritssolo ombo thotsü ji." 17 A chüv meka tolea ana vanlani OPVÜI na ntio tssothakcho sana ji thenchoa phyov. 18 Ombona tsükshia a ezüpthukcho khatola a n chüthok. 19 Khümphen kibüng ji a chonchiyia, ana rhowo OPVÜI montsso pivka. 20 Shijo OPVÜI kibüng ji; ntsanthoe taena rhowocheta. 21 Nina a randana engayio ji tsükona osi ekhyo apio ji tsükona, ana ni thüngala OPVÜI. 22 Kitssoe jiang na ekyochei siwo lung ji topvülo opvütsotso ji kümi sicho. 23 Shijo OPVÜI na tssocho, ntio kvüta emhokthao ato! 24 Shijo OPVÜI ekhyo tsüngon, etena emathata tokhütav kalo! 25 E shanchoa OPVÜI, e shanchoa! Ekhyo epia, OPVÜI! 26 OPVÜI myingona roji Potsow khi mmhayithuka! 27 OPVÜI jo Potsow, ombo ete tsükona mmhona; Nte khelo khero bentasi tokhü ji benkata. Osi thanphen rhüphia thüngtava. 28 Nino a Potsow, ana montsso ni piala; ana ni tsüpho ji thenchoa phyov. 29 OPVÜI montsso pia, ntiotssole ombo mmhona, osi ombo nzanjo kümali!
OPVÜI Shikhfü Ji
1 Ekümlo phyocho-rücho n lina OPVÜI shikhfü lo vamo jiango ematha lia. 2 Ochoangna ombo yizüng jiang ephanina vana sana, osi onte lümbüm totona OPVÜI yi enga sana jiango ematha lia. 3 Ontena kvüthüngha silyuo n tssoala, tolea onteno OPVÜI lamoe sanphiala. 4 OPVÜI, nina ni shikhfü jiang epithaka, osi jiang longtsükata benphia vanle to ezocho. 5 Ana longtsüka lia ni püngnoyi shiang benphicheo to ana kvüta nchümato! 6 Ni yizüng jiang tüngochüa benphiwo ana yikra ndukvü liv mek. 7 Nina ntsanrük lona methako ji ana engathewo jina a lümbüm ntssüngi ni thünguv. 8 Ana ni shikhfü jiang engavka kvüthüngha a tisia!
OPVÜI Shikhfü Ji Enga Benphi
9 Kyingroe jina ombo eküm ji kvütoli ntssünga vanthukcheta? Ni yizüng jiang engana tssocheta. 10 Ana lümbüm totona ni benkahungala; ni yizüng jiang n ngav a ti vanthoka. 11 Ana ni tachia mmen n tssov tsükona ni shikhfü ji lümbümi vatala. 12 OPVÜI ana ni thüngala, ni lamoe a sokata. 13 Nina pithako shikhfü jiang topvü ana tüngkachia khav. 14 Ana ejüeli elümoto lithüngona jo ni shikhfü ji benphiv ji a chokav. 15 Ni sokabenka jiang ana yani zetala, osi ni püngnoyi jiang ana chyui zetala. 16 Ni shikhfü jianglo a longshi liala; osi ana ni yizüng jiang n mhecho.
OPVÜI Shikhfü lo Longshi
17 Ni nri a thüngi mmhona OPVÜI, tona ana eküm vani ni püngnoyi jiang engavka. 18 Ni shikhfü jianglo emhokthao ntsa jüo jiang a hungthokvü omhyik a pochiyia. 19 Aiyo limha shilo jo esüngaro evan taeka; ni yizüng jiang a thüngina timphoa. 20 A lümbüm na noa eyiloa nhyakala; ana yuta topvülo ni matang ji a ntsihungala. 21 Kangtsüi jiang nina khonala; ni yizüng n ngao jiango rhiyikaeden. 22 Onte yikvü emaka jilona a shanchoa; ntiotssole ana ni yizüng jiang benphiala. 23 esopvüi jiang sanrhyui a kyakthechiv lanka yantala; tolea ana ni püngnoyi jiang yana vam. 24 Ni sokabenka jiangna a longshithukala; hojiango a ndungtssungpvüiden.
OPVÜI Shikhfü ji Engavlo Zenka
25 Aiyo akhyothechi livero yulo vanala; nina phyochako ji esüa a kümlanthuka. 26 Ana tssothako jiang ana phyochakracho, tole nina ajanlancho; ni lamoe a sokata. 27 Ni shikhfü jiang engathevlo a kyochia; tona ana ni emhokthav püngnoyi jianglo zitüngziria vam. 28 Aiyo nungra na a shüpchüa vanala; nina phyoji esüa etho atheyia. 29 Wori jilo a n rheyithoku a sayata; osi ni mmhon yakchia ni shikhfü jiang a püngnoa. 30 Ana jancho ezoe kümvü zikathaka; osi ni methak jiang chekathaka. 31 OPVÜI, ana ni methak jiang benphithaka; jitsükona a ti-yikrathuka. 32 Ana a chokatsünga ni yizüng jiang engav; ntiotssole nina engathewo etho a rankayiv.
Engathev Tsükona Randan
33 OPVÜI, ni shikhfü jiang yichak ji apüngnoa, tona yuta topvülo ana enga benphiv. 34 Ni shikhfü ji eroroe a jüa tona hoji benphiv; a lümbüm totona hoji engav. 35 Ni yizüng jiang enga evam etho a pia ntsiotssole ana hojiang lona longshi hungala. 36 Ejüeli yanthüngona jo ni shikhfü jianglo chokao etho apia. 37 Oman n lio jianglo jüngrav eti yanthuka, nina phyochako ji esüa a thüngi mmhona, 38 Ni nri a thüngi ni phyochak ji benthoka – ni yi engae jiang thüngi nina phyochako ji. 39 Ana a kyuo yikvü yilo jiang lona a shanchoa; ni matang jo kvüta emhukthao ato! 40 Ana ni yizüng jiang a benphihungala; eküm ethan a pia, ntiotssole nino ntsanrüka.
OPVÜI Shikhfü Ji longtsüka
41 OPVÜI, nina kvüta a nzana sana a ejüa, osi ni phyochak ji ephan a shanchoa. 42 To tssona a yikvüo jiang ana janlankhokvü, ntiotssole ana ni yi ji longtsükatala. 43 Yuta topvülo ntsa a nsanthuka, ntiotssole a eyilo jo ni matang jilo tae lia. 44 Ana yuta topvülo osi nchünkhon ni shikhfü ji benphiv. 45 Ana ni püngnoyi jiang engav ekhyo tsso jina ana etancho lo vanchetala. 46 Ana mesao jiang thüngi ni yizüng jiang ezov osi a yikrav mek. 47 Ana ni yizüng jiang engav a chokatala, ntiotssole ana jiang a jüponala. 48 Ana ni yizüng jiang yikrachia nzanala, osi ni püngnoyi jiang nchümri zeta vam.
OPVÜI Shikhfü Lo Longtsüka
49 Ni nri a thüngi ni phyochak jiang nchümcheta, hojina eyilo a pithaka. 50 Ni phyochak jina eküm a pio jina a ezüp yutalo lea a lüm emiala. 51 Kantsüi jiangna yuta topvülo a emakatala, tolea ana ni shikhfü jiang n sihan. 52 Nkolo ni nlansüng jiang ana nchümchei a lüm bükala, OPVÜI. 53 N thae jiangna ni shikhfü yesoana a lüm tsukala. 54 Limhalo süngaro evanthüng ana ni yizüng jiang tsükona okhen eranala. 55 OPVÜI, ana zümolo ni nchümchetala, osi ni yizüng jiang nchümchetala. 56 A ematha jo ni yizüng jiang benphiwo ji lona hungala.
OPVÜI Shikhfü Jilo Choka
57 O OPVÜI, ana ethelan lio jiang topvü ji ni; ana ni shikhfü jiang benphiv phyochakala. 58 Nina phyochako ji esüa a khonzanle to ana lümbüm totona ni thüngi chonala! 59 Ana a etssophyo jiang zi zethaka, osi ni yizüng jiang benphiv methakthaka. 60 Ana sülana n van na ni yizüng jiang zakto a engahungala. 61 N thae jiangna tsirhi doni a vayi lia, tolea ana ni shikhfü ji n mhecho. 62 Ana zümolongo lea phanthi ni ntsa methak jiang tsükona omying ni thüngiala. 63 Aiyo ni elhi etssoe topvü osi ni yizüng benphi jiang topvü shom. 64 OPVÜI, limha shijo ni n senphio nzan jina pyingcho; ni yizüng jiang a püngnoa.
OPVÜI Shikhfü Ji Man Ji
65 OPVÜI, nina ni phyochak ji benthoka, osi nina ni nri a thüngi mmhonala. 66 Ana ni yizüng jiang lo longtsükatala, jitsükona nchümri osi ntsinran a pia. 67 Nina ezüp a n pithüng jo ana woria tae yicho, tolea enhungo ana ni yi engala. 68 Nino kvüta mmhoncho ato – osi nzan licho ato! Ni yizüng jiang a püngnoa. 69 Kangtsüi kyon jiangna ejüng a phyoyithaka, tolea a lüm totona ni püngnoyi jiang enga benphiala. 70 Kyon shiangna engathe n li, tolea aiyo ni shikhfü jilo longshiala. 71A khangshio jijo a tsükona mmhona, ntiotssole hoji yakchia ni yizüng jiang engathecho. 72 Nina ni shikhfü pio jijo a tsükona jo limhalo orang licho topvü poni man.
OPVÜI Shikhfü ji Ntsanrük
73 Nina a joyingcho, osi nina shanchoe a vanthokala; ana ni shikhfü jiang engatheo etho a pia. 74 Ni yikrachio kyon jiangna a hungana onte emathav, Ntiotssole ana ni phyochak jilo longtsükatala. 75 Ni methak jiango ntsanrüka to ana ntsia, OPVÜI, osi nino ntsanrüko jina nina a ezüpthokcho. 76 Nina ni nri thüngi phyochako ji esüa ni n senphio nzan ji khi a lüm a emiyia. 77 A khonzana, tona ana eküm vam, ntiotssole ana ni shikhfü jilo a longshiala. 78 Kangtsüi jiangna ejüngona n lan a pio ji tsükona onte yikrathoka; aiyo ni püngo jianglo zitüng ziria vam. 79 Ni yikrachio kyon jiang a thüngi rothoka, ni shikhfü ntsiwo jiang topvü. 80 Ana ni yizüng jiang mmhona engae yikra lona a tsanchothuka.
Shanchov Randan
81 Aiyo a santsüngthaka, OPVÜI, nina a shanchothokvü enhyak lona ana ni yi jilo longtsükatala. 82 Nina phyochako ji eyilo lona omhyik na a noala, "Nina kvüthüng a nzanchivla?" to ana ni engala. 83 Aiyo sükhfü ekye esüa shümthei a sithaka; tolea ana ni yizüng jiang n mhechohan. 84 Ana kvütenhya nhyakpamla? A khangshio jiang nina kvüthüng khangshivla? 85 Kangtsüa ni n longtsükao kyon jiangna a rheyithokvü sokvü jyutathaka. 86 Ni yizüng jiango topvü longtsükakhoko tae; kyon na ejüngona a ezüpthukakaa nzanchia! 87 Ontena a lüngthathaka, tolea ana ni yizüng jiang n mhechohan. 88 Ana ni shikhfü jiang benphiwo tssoa ni n senphi nzan ji yakchia a thüngi mmhona.
OPVÜI Shikhfü Jilo Longtsü
89 OPVÜI, ni yi jijo kümali liv; potsüwoe jo hojijo kümali liala. 90 Ni longtsüka jijo echungren topvülo liv; limha shi nina ombo vanpheno vanthokcho osi hojilo lipvü. 91 Olan topvüna ni yizüng ephanina zajüngi vanala, ntiotssole onteno topvü ni nriden. 92 A longshi chiyiphen ji ni shikhfü ji mekcho saliwo aiyo ezüp lona a chüthakvü. 93 Ana ni püngnoyi jiang n mhecho, ntiotssole hojina a eküm a vanthokala. 94 Aiyo ni echika – a shanchoa! Ana ni yizüng engav ekhyo tssothaka. 95 N thae jiangna a lüngthav a nhyaktala, tolea ana ni shikhfü jianglo zitüng ziria vam. 96 Olan topvü ochüm lia, tolea ni yizüng jiango njüma to ana ntsithaka.
OPVÜI Shikhfü Ji Nzan Tsükona
97 Ni shikhfü ji ana kvüta a nzanato! Ana eng tona hoji nchümala. 98 Yuta topvülo ni yizüng jo a ndüngo lia osi a ri jiang poni a kyakranthokala. 99 Ana ni püngnoyi jianglo zitüngziria vamo jina ana a püngnoe jiang poni kyungkata engathe tala. 100 Ana ni yizüng jiang engao ji tsükona aiyo kyon topvü pono na kyakrankata. 101 Ana ni yi a enga hungwo jina n mhom etssophyo topvü nkachothaka. 102 Nino a püngnoe tsso jina ana ni püngno yi jiang n sihan. 103 Ni püngnoyi jiangjo kvüta enünguv ato – tssakijü lona lea nüngkata! 104 Ana ni shikhfü jiang lona nchümri hungwo jina etssophyo n mhom jo a tsskala.
OPVÜI Shikhfü Ji Lona Wondang
105 Ni yi jijo a lanso milon, osi a khochipheno wondang ji. 106 Ana ni püngno ntsayi ji engav tsükona methak tsüphov vav. 107 OPVÜI, a ezüp jiango ekhenthao; nina phyochako ji esüa eküm a vanthoka. 108 A montsso randan shi khichoa, OPVÜI, osi ni yizüng jiang a püngnoa. 109 Ana ni shikhfü jiang n mhechohan, ana a eküm lea piv methakala. 110 N thae jiangna tsirhi doni a vayiala, tolea ana ni yizüng jiang n ngav n vanhan. 111 Ni yizüng jiango kümali a echi; hojiango a lümbümi ematha ji. 112 Ana a echü tsüngon n janthüng nandang ni shikhfü jiang benphiv to methakthaka.
OPVÜI Shikhfü Jilo Tsankaphen
113 Nilo lümbüm phuko tae vao jiang a tssakala, tolea ana ni shikhfü ji a chokatala. 114 Nino a mphophen osi a nkohOPVÜI; ana ni phyochak jilo a eyilo ji vatala. 115 Tsantava, n mhom etssoeden. Ana a Potsow yizüng jiang benphivka. 116 Ana eküm evamo tssoa ni phyochak ji khia sayata, osi a eyilo jilo yikra a ti ndukthoka. 117 Ana noyinga vani n tümjakna ni yizüng jiang yikrachio tssoa a sayata. 118 Ni shikhfü n benphi jiang topvü nina n thenhyala; Onte kyakrüm jiango oman n lio tae. 119 N thae topvü nina zizo esüa tssothoka, jitsükona ni püngno yi jiang a chokatala. 120 Jitsükona a kyuala, OPVÜI, ni yitsso shiang zesi a kyuala.
OPVÜI Shikhfü Ji Benphiv
121 Ana elan osi mmhomo ji tssothaka, a ri jiang khelo ekachi a ti sia. 122 Nina ni nri ji nzanchiv to phyochaka; kangtsüi jiang khi a ti khangshithoka. 123 Ni shancho nzanchi ji osi nina phyochako rhancho ji enhyak lona omhyik na a noala. 124 Ni n senphio nzan ji ephanina a ziyia osi ni yizüng a püngnoa. 125 Aiyo ni nri; ana ni püngnoyi jiang engathethokvü etho a pia. 126 OPVÜI, kyon na ni shukhfü jiang n ngav vanthaka, nina elhi etssov yuta janthaka. 127 Aiyo shona njümtso jilona kyungkata ni yizüng jiang a chokatala. 128 Jitsükona ni püngno jiang tapvü ana benphiala, n lamo topvü a tssakala.
OPVÜI Shikhfü Engav Choka
129 Ni püngoyi jiango ekhenthao; ana a lümbüm totona hojiang engala. 130 Ni püngo yi eroro jilona wondang e piala osi ntia n tsio jiang thüngi nchümri piala. 131 Ni yizüng ji choka lona obüng koe a mhvüala. 132 Nina ni nzamo kyon thüngi tssoji esüa a thüngi khophi a khonzana. 133 A ti longthokna nina phyochako ji esüa a sayata; n mhom ji khi a ti khyothoka. 134 Ana ni yizüng enga vamka, a khangshi jiang khelona a shanchoa. 135 Ni vanrhyu ji khi a mmhayia osi ni shikhfü jiang a püngnoa. 136 A esüjü jiang zhükhfü to tsüala, ntiotssole kyon na ni shikhfü jiang n ngala.
OPVÜI Shikhfü Ji Ntsanrük
137 OPVÜI nino ntsanrüka, osi ni shikhfü jiango ntsa. 138 Nina pio shikhfü jiango etüma osi elana. 139 A lüm etsuk na omi esüa a rungala, ntiotssole ni ri jiangna ni yizüng jiang n khayiala. 140 Ni phyochak jo kvüta ntsacho ato! Ana kvüta a chokatala! 141 Aiyo a ethev n li osi a tssakala, tolea ana ni püngnoyi jiang n khanziv n van. 142 Ni ntsanrük jo kümali liv, osi ni shikhfü jo nchünkhon otsotso. 143 Aiyo ezüp wonkhyu na a pyingcho, tolea ni yizüng jiangna a longshithokala. 144 Ni püngno jiango yuta topvü lo elanthata; engathewo etho a pia, tona ana eküm vanchev.
Shanchothokvü Randan
145 A lümbüm totona ana ni tsaphiala, ajanlana, OPVÜI, tona ana ni yizüng jiang engav! 146 Ana ni tsaphiala; a shanchoa, tona ana ni shikhfü jiang benphiv. 147 Eng n chirothüngna ana ni nzanchiv tsükona ni tsaphiala, ana ni phyochak jianglo eyilokatala. 148 Ana zümo to na n yipvü ni püngno jianglo zitüng-ziriala. 149 OPVÜI, ni nzan jo n senphi, a randan a engayia; ni khonzan & ejüa osi a eküm a shanyayia. 150 A khangshipvüi osi ni shikhfü jiang kvüthüngha n tsi jiangna enhyano tsathaka. 151 Tolea nino a ndüngo vana, OPVÜI, osi ni yizüng topvü n senphio tae. 152 Ni püngnoyi jiang ana nkolo na engathethaka; nina nchünkhon onte lithokala.
Kyochithokvü Randan
153 Ana ni shikhfü jiang benphiala, jitsükona a ezüp shiang zesi a shanchoa. 154 A sükhyingoe theta osi a vachia; nina phyochako ji esüa a shanchoa. 155 N thae jiango n shancho, ntiotssole ontena ni shikhfü ji n benphi. 156 Tolea OPVÜI, ni nzanti jo tsüphoa; ni khonzan a ejüa a shanchoa! 157 Aiyo ori osi a khangshipvüi elümoto vana, tolea ana ni shikhfü ji benphiv n tümjakhan. 158 Oyam yentsoe jiang zetana a lüm tsukala, ntiotssole ontena ni yizüng jiang n benphi. 159 OPVÜI, ana ni püngnoyi jiang kvüta a chokakatato, Ni nzan jo n dungphiala, jitsükona a shanchoa! 160 Ni shikhfü longjüngo ntsa ji, osi nina ntsa lona methako jiango kümali tsükona.
OPVÜI Shikhfü Jilo Khochaki Epi
161 Etho ejüi jiangna ejüngona a sakatala, tolea ana ni shikhfü yikrachiala. 162 Ni phyochak jiang tsükona aiyo kvüta a mathata to – ejüeli yancheo kyon ji esüa a emathatala. 163 Ana n tsao jiang a tssaki siala, tolea ni shikhfü ji a chokatala. 164 Ni ntsa methak jiang tsükona ana enga lo yenjo tiying montsso ni piala. 165 Ni shikhfü ji chokao jiango tsanthephen mmhom lo vana, osi ntinaha onte n lungthok. 166 Ni khi a shanchothokvü ana nhyakala, osi nina ntio yizüng a piana ana tssoala. 167 Ni püngno jiang ana engala, a lümbüm totona hojiang a chokatala. 168 Ana ni yizüng jiang osi püngnoyi jiang engala; ana ntio tssoa sana nina hungala.
Kyochithokvü Randan
169 A kyochithokvü ana randamo ji khi ni janthuka, OPVÜI! Nina phyochako ji esüa engathe a pia. 170 A randan a engayia, osi ni phyochak ephanina a shanchoa! 171 Nina ni shikhfü jiang a püngno ji tsükona ana yuta topvülo ni thünguv. 172 Ni yizüng jiango ntsa, jitsükona ana ni shikhfü ji ephan denala. 173 Ana ni yizüng ephan vanala; jitsükona yuta topvülo a kyochiv methaki vana. 174 wo OPVÜI, ni shancho kyochi ji ana kvüta nhyaktssüka ato! 175 Ana ni thünguv tsükona eküm a pia; Ni püngoyi jiang khi a kyothoka. 176 Aiyo olyu moncho esüa rümphiala, jitsükona oro ni nrü ji yana, ntiotssole ana ni shikhfü jiang n sinkihan.
Nzanchi Randan
1 A ezüp yutalo ana OPVÜI tsaphicho, tole ombona a janlancho. 2 OPVÜI, n tsae osi ejithechi jiang khe lona a shanchoa. 3 O n tsaeden, Potsow na kvüto nte lyuyivla? osi ombona ezüp kvüto nte pivla? 4 Rasan lotssi erov khi alo miron na tssovla! 5 Nte yolo, vam jo Meshekh lo vana esüa mekana Kedar kyon yolo vana esüa nmhon. 6 Noying n chokae kyon ndüngo sungkhünga vanthaka! 7 Ana noying tsükona phyoala ontena ritsso phyoala.
OPVÜI Jo Ete Nkohapvüi
1 Ana phunglan jiang lo zekachiala; a nzanchiv kvüwoe na yivla? 2 A nzanchipvüi jo OPVÜI, oyak osi liko lyuyingpvüi ji thüngina yiala. 3 Ombona ni n lungthok; ni nkopvüi jina yuta topvü lo tsoyoa vanala. 4 Israel nkopvüi jina engüv osi yipvü mek. 5 OPVÜI na ni nhyakyav; ombona ni nkoyav tsükona ni thüngoe vana. 6 Eng-o eng jina ni n tssatsso, osi zümolo choro jina ni n tssatsso. 7 OPVÜI jina ekyutssi topvü lona ni nkochev; ombona tsanchoe ni vanthokvü. 8 Ombona enhünga osi nchünkhon to ni eyi-eo jiang lo ni nkohav.
Jerusalem Thünga Nsikacho
1 Ontena kvüthüng "OPVÜI ki wotavkalo" to a ezocho sana ana a emathacho. 2 E jo shiang na Jerusalem pikhfü chungi mangi vanrathaka! 3 Jerusalem jo meria samyana tssokachicho. 4 Israel pvüji jiangna OPVÜI yizüng ephan montsso OPVÜI epiv shilo roala. 5 Israel kyon jiangna onte kyon jiang oyi tssoyia shilo khokthetacho. 6 Jerusalem lo noying lithukvü heto randania: "Ni nzan kyon jiang echi mmhonthokvüka. 7 Ni pildifü chungi noying lithokvüka. Osi mesaki jianglo jüngthe lithokvüka." 8 A wopan osi oshom jiang tsükona ana Jerusalem ji "Nilo noying hthukvüka," to ezoala. 9 Ete OPVÜI Potsow ki ji tsükona ana ni echi mmhonthokvü randanala.
Khonzan Tsükona Randan
1 OPVÜI, ana ni vanphen osi yansaphen potsüwoe zekachiala. 2 Phajae jina ombo pvüi lo enhikao ji esüa, osi eloe phajae jina ompvü pvüi lo enhikao ji esüa, nina khonzan e n jüthüng jo ena nilo zekata vam, OPVÜI. 3 Khonzan to etssoyia, osi khonzan ka to etssoyia OPVÜI, eiyo etssangkong esüa e zetala. 4 Ejüelii jiangna sungkhünga emakathaka osi khangshipvüi kangtsüo jiangna e yikvüthaka.
Ombo Kyon Jiang Nkochepvüo Potsow
1 OPVÜI na ete thüngoe mekcho saliwo kvüto tssovla? Phyotava, wo Israel. 2 "Ete ri jiangna ete poni phanthiathüng OPVÜI na ete thüngoe n vancho saliwo, 3 ontena lüm etsuk tsükshi ji yakchia ekümi na e nzhüthakvü; 4 to tssowo jüphyon jiangna evaki e hansi yithakvü, osi ojü na e tsüzhüthakvü, osi 5 jükhyo ntav jianglo e rhetha kvü." 6 OPVÜI ochona ori khi e n khyothukcho sana ji thüngtavkalo. 7 Etena woro esüa tsirhi edon ji khe lona tsanchothaka; tsirhi ji jakthaka osi etancho lo evachithaka! 8 Ete nzanchi jo oyak osi limha lyuyingo OPVÜI ji thüngina yiala.
Potsow Kyon Jiang Tsükona Nkoho
1 OPVÜI lo longtsükae jiango Zion phunglan esüa tssov, kvüthüngha n nhyokphi osi n senphio. 2 Phunglan jina Jerusalem füchako ji esüa OPVÜI na ombo kyon jiang enhünga osi nchünkhon füchakala. 3 N thae jiangna ntsanrüng jiang metalo sunga vam mek, hoto n tssowo ntsanrüng jiang ha n mhom tssoa yiv. 4 OPVÜI, mmhomo jiang thüngi mmhom tssoyia, ni yizüng benphiwo jiang thüngi. 5 Tolea nina n thae jiang ezüpthokathüng ochoangna ni shikhfü n khicho sana jiang ha ezüpthoka. Israel lo noying lithoka!
Sochethukvü Randan
1 OPVÜI na jerusalem lo e sosi yilamo ji omüngi esüa tüv! 2 Etena emathatacho, osi longshia okhen dentacho! Tole jipopoe jiangna heto e phyoyitacho, "OPVÜI na elhi tsüphov onte tssoyithaka." 3 Otsotso, ombona ete tsükona elhi tsüphov tssocho, kvüta e mathacho ato! 4 OPVÜI, eryu jina jütssa ekyinguv jiang lo ojü hansi rolamo ji esüa nina pvülyu ekümo e vantho klana. 5 Ochoangna kyata mojü thecho sana longshia rithoka! 6 Ochoangna mojü ji hantasi kyata chiwocho sana jiangna longshi lona okhen denta, tssüngthi jiang lhoe hansi rheyiv.
Potsow Mmhon Thüngcho
1 Oki ji OPVÜI na tssocho yaka, kitssoe jiangna sango ji oman n li; OPVÜI na yantsü ji n hoyata tssona enhyang jiangna mangi vamo ji oman n li. 2 Eküm evamvü tsükona nyazüngina phanthisi sülana yipa sanga elhio ji man n li. Ntiotssole OPVÜI na ombo nzamo kyon jiangna yipa vanathüng lea, benria onte piala. 3 Ngaro jiango tsentso osi OPVÜI thüngina yantso; Onteno mmha tsotso jiang. 4 Kyon tsükana khyingrothüng otsoe vamo jiango rasan khelo lotssitsüng bencho tüv. 5 Kyon ochoangna hojitüv lotssitsüng elüm liana hoji ematha elio. Ombona yitssopheni na ombo ri jiang nduklea kvüthüng ha ombo n khyothechi.
OPVÃœI Jancho Ezoe Yantso
1 OPVÜI jancho ezoe osi ombo yizüng ephanina eküm evan ji ematha elio. 2 Ni elhi lona chiyio jiang na ni ethelan jiang benchev; nina ematha lia eküm mmhona vam. 3 Ni engh jijo ni ki jününgrothizhü esüa tssovka, osi ni tsoe jiango olive rüni chencho to ni tssisa renzhüa vamka. 4 OPVÜI jancho ezo kyon jijo otsotso heto mmhayiv. 5 OPVÜI na Zion lona ni mmhayithokvüka! Nina ni eküm echung Jerusalem mmhon ji hungthokvüka! 6 Nino tsoerüi hungjana harishia ni vanthokvüka! Israel lo noying lithoka!
Israel Ri Jiang Randanka
1 Israel, ni nungothüngna ntiolui ni ri jiangna ni khangricho sana ji e zoa. 2 "A nungothüngna a ri jiangna haruka a khangshicho khatola ontena a n khyohan. 3 Ontena a echeno oli rhoncho esüa junga a lüngthechiyicho. 4 Khatola ntsanrüko OPVÜI jina nri eküm lona a vachicho." 5 Zion tssako jiang topvü khyothechi phanlanchi sithokvüka. 6 Onte topvü mhonki ero bukcho n rankav mmikae sicho esüa tssothuka; 7 hojiangjo ochinaha n hanrhyuala osi chungi hansi n yiala. 8 Onte yakchia eyi ochinaha, "OPVÜI na ni mmhaithoka! Ena OPVÜI myingona ni mmhayiala" to n zoala.
Nzanchi Randan
1 OPVÜI, a eyilo n linrünguv vanathüng ana ni tsaphiala. 2 OPVÜI, a ekya won a zoyia; ana nzanchi yana kyao shi a engayia! 3 E mmen jiang nina etsüngrhyui evayicho saliwo n lan n piotüv ocho vanchola? 4 Tokhatola nina e n lan e siyio ji tsükona ena ni kyuchia vanala. 5 Ana OPVÜI nzanchi ji eyiloshaka vanala, osi ombo yi ji longtsükatala. 6 Zümo enhyang jina wonchiv nhyaktssüka to – ana OPVÜI nhyaktssükala. 7 O Israel, OPVÜI lo longtsükata, Ntiotssole ombo nzan jo n senphi osi ombona yuta topvülo shanchov chokatala. 8 Ombona ombo kyon Israel jiang onte mmen jiang lona shanchov.
Emiroa Longtsüka Randan
1 OPVÜI, ana a kangtsü ji sithaka osi kangtsü eküm jilona khophithaka. Ana a tsükona tümka tsüphov osi emhokthav khi wongkhyua n vanala. 2 Aiyo lümbüm büka noying lo vanala. Ngaro jina noyinga oyo khelo enghokae vamo ji esüa a lümbüm ji a lo noyinga vanala. 3 Israel, enhünga osi nchünkhon OPVÜI lo longtsükata!
Khümphen Ki Na Thüngcho
1 OPVÜI, David ti mhechoa, osi ombona ezüp rümo jiang topvü ti mhechoyia. 2 Ombona ntio phyochakcho sana ji nchümcheta OPVÜI, ombona Jakob Potsow Thotsü ni thüngi heto phyochako ji: 3 "Ana oki n yi, osi n yip; 4 Ana n san mekana n yip, 5 ana OPVÜI vanphen osi Jakob Potsow Thotsü ji ki n methakithüng jo." 6 Ntsatayi ji thephen Bakos ji tsükona ena Bethlehem lona zothaka, osi Jearim li jiang lona ena hungcho. 7 Ena phyotacho, "OPVÜI ki otavkalo; ombo vantsü ji mhadungo na ombo khümtavkalo." 8 OPVÜI, ni etho osi kümali vanrhyu ji nchokapen Bakos ji nzo khümpheni roa. 9 Ni pvüti jiang khi yuta topvülo elan ji tssothoka; osi ni kyon jiang khi longshia thüngka chithoka! 10 Nina ni nri David thüngi phyochaki vachoka, nina ethüngcheo mesao ji ti silachia, OPVÜI. 11 Nina David thüngi tüngochüa phyochaki lia – nina hoji phyochak ji n kilan; "Ana ni tsoe yolo tsüka mesao kümthukvü osi ombona ni sülo esapvüi kümü. 12 Ni tsoe jiangna a ntsatayi shiang benthukvü osi ana yizüng onte pio jiang benphiana onte tsoe jiangna ha yuta topvü lo ni echungchoe mesaeden tssov." 13 OPVÜI na Zion ethüngchethaka; hoji ombona ombo ki kümthuk hungala: 14 "Meta shijo kümali a vanphen ji; ana shilo vani a sahungala. 15 Zion na ntio ethev liasana ana ompvü piv; ompvü yantsae jiang ana etsoyu khi lüm bükiv. 16 Ompvü pvüti jiang elhi lo ana mmhayiv, osi ompvü kyon jiangna longshia thüngkachita okhen dentava. 17 Shilo David tsochen tsüka ana mesao tsüphov kümthukvü; shilona a ethüngcheo mesao ji yansa ji echungthukvü. 18 Ana ombo ri jiang yikra khi eyukthokvü, tokhatola ombo ekhüngyan jo mmhona zajünga liv."
Oshom Lo Nzantao Ji Thüngcho
1 Potsow kyon jiangna mmyantae nzo vantawo jijo kvüta emhukthav ato osi mmhoncho ato! 2 Hojijo Aaron kvüri osi khokahüm lona tssentsü thyujü nzüyio ji tsüa joyi ombo phukthesü lo zankata vancho tüv. 3 Hoji jo Hermon phunglani yentsso na Zion yingsüng jiang lo renkacho tüv. Hoji lo OPVÜI na ombo mmha ji phyochaki lia – kümali eküm ji.
Potsow Thünguv Ntssungcho
1 OPVÜI nriden, osi zümolo ombo ekhümki na ombo ekhümden topvü na oro ombo thüngtava. 2 Ekhümki na nte khe jiang khikae randanta OPVÜI thüngtava! 3 Oyak osi liko liyingo OPVÜI jina, Zion lona nte mmhaithuk ka!
Ethüng Khen
1 OPVÜI thünga! Ombo mying thüngtava, OPVÜI n riden ochoang 2 OPVÜI ki mangrae vancho sana, osi ete Potsow ki vanracho sana topvüna. 3 OPVÜI thünga, ntiotssole ombo mmhona; ombo nzan e lika, pmbo mying ji nsikata dentaya. 4 Ombona Jakob ji ombo edd ethüngchecho osi Israel kyon jiang ombo echi ethüngchecho. 5 Ete OPVÜI jo tsüphoa, Potsow jo topvü poni tsükata to ana ntsia. 6 Oyaki osi limhae, jümang osi lichungi ntio ombona tssohunga sana ombona tssoala. 7 Ombona limha chümi na tsungryu esowo emhenjü süa chiyiala; ombona tsungryu tsükona potsüo nlüpthokala, osi jiang ombo vanpheni na chiyithokala. 8 Ejip metalo kyon osi ekümrümo jiang tsokhfü topvü ombona chüthokcho. 9 Hojilo ombona mesao osi ombo küpo tsüphoe topvü , ezüpthokvü tsükona chethev osi emhukthao elhi tssocho. 10 Ombona jipo elümoto monthokcho osi etho eli mesao elüm monthokcho: 11 Amorite mesao Sihon ji, Bashan mesao Og ji osi Kanaan metalo mesao jiang to chüthokcho. 12 Onte meta ji ombona ombo kyon Israel jiang picho. 13 OPVÜI, nino Potsow to yuta topvü lo ni phyoyiv; osi echungren topvüna ni nchümchev. 14 OPVÜI na ombo kyon jiang nkohachev; ombo nri jiang thüngi nzantio to ombona tssov. 15 Jipopoe jiang potsow jiango shona janti na jocho; hojiang jo okhena jocho. 16 Ontena obüng khyinga khatola n sanche, osi omhik khyinga khatola n hung. 17 Ontena eno khyinga khatola n zo, ontena ethük tia n chenche. 18 Ochoang na onte joyingcho sana osi onte longtsükata sana topvü ontena joyingo kisü jiang esüa kümrathokvü ka! 19 OPVÜI thüngtava, Israel kyonden; Potsow pvütiden, ombo thüngtava! 20 Leviden ombo thüngtava, ombo ekhüm topvüna ombo thüngtava. 21 Zion osi Jerusalem, ombo ki jilo na ombo thüngtava. OPVÜI thünga!
Montsso Epi Khen
1 OPVÜI montsso pitava, ntiotssole ombo mmhona; Ombo nzan jo kümali. 2 potsow topvü yolo tsüphotso ji montsso pitava; ombo nzan jo kümali. 3 OPVÜI topvü yolo thotsü ji montsso pitava; Ombo mzan jo kümali. 4 Ombo taena chethev tsüphov jiang tssoala; ombo nzan jo kümali. 5 Ombo nchümri lona oyak shiang soyingcho; ombo nzan jo kümali; 6 ombona ojü ejungo jiang poni limha shi soyingcho; ombo nzan jo kümali. 7 Ombona eng osi limha shi lyuyingcho; ombo nzan jo kümali; 8 eng ji khi tsüngon ji sathokvü lyuyingcho; ombo nzan jo kümali; 9 choro osi Shantio jiang khi zümo ji sothokvü lyuyingcho; ombo nzan jo kümali. 10 Ombona Ejip kyon jiang tsokhying tsokhfü jiang chüthokcho; ombo nzan jo kümali; n Ombona Israel kyon jiang Ejip lona sochukcho; ombo nzan jo kümali; 12 ombo khe etho jüwo jiang osi ombo evon ekhyungo jiangna; ombo nzan jo kümali. 13 Ombona jümyon ji khosothokcho; ombo nzan jo kümali; 14 Ombona ombo kyon jiang hoji yakchia sochukcho; ombo nzan jo kümali; 15 tokhatola ombona Ejip mesao osi ombo rasan jiang hoji lona rhethukcho; ombo nzan jo kümali. 16 Ombona lijüng ji yakchia ombo kyon jiang sochukcho; ombo nzan jo kümali. 17 Ombona mesao etho ejüi jiang chüthokcho; ombo nzan jo kümali; 18 ombona mesae thüngche jiang chüthokcho; ombo nzan jo kümali. 19 Amorite mesao Sihon chüthokcho; ombo nzan jo kümali; 20 Bashan mesae Og chüthokcho; ombo nzan jo kümali. 21 Ombona onte meta jiang ombo kyon jiang picho; ombo nzan jo kümali; 22 ombona ombo nri Israel picho; Ombo nzan jo kümali. 23 Oyam na e khyoathüng ombona e n mhecho; ombo nzan jo kümali; 24 ombona ete ri khe lona e vachicho; ombo nzan jo kümali. 25 Ombona ekümrüm topvü thüngi etsoyu piala; ombo nzan jo kümali. 26 Oyak Potsow ji montsso pia; ombo nzan jo kümali.
Oyam Khelo Evamo Israel Jiang Nungra
1 Etena Babylon zhükhfü jütssae khukta vancho; Hojilo na etena Zion nchümchei kyatacho. 2 Jianglo odung khero lo ete khenden zhü jiang yisi vatacho. 3 E rhümao kyon jiang na okhen deni onte engathukle to heto e zotacho: "Zion khen deni e ngathuktava." 4 Kvütolui ena metapoe na OPVÜI khen denchevla? 5 O Jerusalem, ena ni mhechona a khe shi chüi khendenzhü n rhüphichev a sithoka. 6 Ana ni mhechona osi a longshi ntssontso ji ni lo n vata tssona a nnli shi kholo lo tükae okhen n denchev sithoka! 7 OPVÜI, Jerusalem hayao jithüng Edom kyon jiangna ntio tssocho sana, osi phyocho sana nchümcheta, "Likoe sümthechi sithoka!" 8 Babylon ni ha roe ni sivka. Ntena n mhom etssoyiwo ji nte nlilana – 9 ochona nte ngaro jiang khi olongo ekhüngkata sana hoji kyon ji ematha elio tssov.
David Montsso Epi Randan
1 OPVÜI, a lümbüm totona montsso ni piala; potsow jiang mhadungo na ana ni thünga denala. 2 Ana ni ntho khümphemoe zechiwo nkhümthei ni n senphio nzan osi longtsüka ji tsükona ni mying thüngala, ntiotssole ni mying osi ni yizüng jijo tsüphotsowo ji to nina ejüthaka. 3 Ana ni tsaphio ji tsüngono nina a janlancho; osi a eküm etho a rankayicho. 4 Limhalo mesao topvüna ni thünguv, OPVÜI, ntiotssole ontena ni büngina chiyio yi jiang zothaka. 5 Osi ontena OPVÜI na tssowo jiang osi phfütsson jiang thünga dem. 6 Nina ntssoni vanlea, nina teri jiang tsükona onkhyala, osi kangtsüi jiangna ni n phoche. 7 Ezüp na a hazhüathüng nina tsanchoe a vanthokala. A ri lüm etsuk jiang nina panlanala osi ni etho na a shanchoala. 8 Nina phyochako jiang topvü nina tssokhamvü; OPVÜI, ni nzan jo kümali, nina ntio elhi benkacho sana ji echethoka.
Potsow na Ntsikhana Zejana
1 OPVÜI, nina a yanthaka osi a ntsithaka. 2 A khukthe phanthi jiang nina ntsia; nina ekoni na a nchümri ntsikhana. 3 Ana elhi tssoathüng mekana esanathüng nina a hungala; a nkankvü topvü nina ntsia. 4 Ana n phyothüng na ana phyovsa vamo ji nina n tsia, 5 Nina nken topvü a hachümi vana; osi ni etho na a nkohoala. 6 Nina elümoto junga a ntsijana; osi ana hoji jo n ngathekhok. 7 Ana ni mhadungo kvülo tsana wovla? ni vanrhyu ji nkachoa ana kvüi wovla? 8 Ana potsüwoe chongo lea jilo ni vam; ana echüli rhowo lea jilo ha ni vam. 9 Ana engkhfü chümi tsani yilea mekana engrhewoe meta ekontso jilo vanlea; 10 nina hojilo vani olan a sov osi a nzanchiv. 11 Ana emüng ji a mphole to ezokhoka mekana wondang shi emüng kümle to ezokhoka, 12 tolea ni tsükona jo emüng ji lea emüng mek, osi zümo ji lea ni tsükona jo ond angtsü. 13 A solan topvü nina a joyingcho; osi ayo mmani na nina a soyingcho. 14 Ni ekyuv ethev lio ji tsükona ana ni thüngala; ni elhi topvü echümpo osi emhuko tae. 15 A oryu jiang soyingathüng, ayo mmani na ntangshona soyingcho, hojilona n hungina a rankatathüng nina joa n vana to a ntsia – 16 a n bukthüng na nina a hunga. A eküm tsüngon topvü, tsüngona tia n vanthüng na ni kako lo erankae lia. 17 O Potsow, ni nchümri jiango a tsükona kvüta khüngcho ato, osi nchümri lan kvüta licho ato! 18 Ana hojiang khae zewo hojiango hajang tsüng lona kyongkav. Ana yipjüngchia na aiyo ni ndüngo vanpvü tssoala. 19 O Potsow, nina n thae jiang chüthokvüo to ana nchümala! Jenbukta kyon jiangna a nkachowoto ana kvüta nchümala! 20 Ontena ni echi n mhom phyotala; osi ni mying jilo n mhom phyotala. 21 O OPVÜI, ni etssang jiang ana a tssakala! Ni panlan jiang ana a tssakala! 22 Ana etssak ntsong a tssakala; osi a ri esüa onte nchümiala. 23 O Potsow, nina ojang tssoe a zeta osi a lümbüm a ntsiyia; nina ojang a tssoe a nchümri a yancheyia. 24 A lo n mhom ntia jejüana yani zeta osi kümali lamoe a sochia.
Nkoha randan
1 Kyon n mhom khelona a shanchoa, OPVÜI; osi jenbuktae khe lona a nkocheta. 2 Ontena yuta topvülo n mhom kyaktala, osi khondav eki-eongtala. 3 Onte nnli jiango nrü nnli esüa eroa; Onte yi jiango nrü mozhü n mhom esüa tüv. 4 OPVÜI, n thae jiang etho osi jenbukta kyon ochoang na a elungthokvü kyakta sana jiang khelona a nkocheta. 5 Kangtsüi jiangna tsirhi doni a vayithaka; Ontena zonchakphen methaki lia osi olan ndüngo a sathokvü tsirhi a vayi lia. 6 Ana OPVÜI ji, "Nino a Potso" to ezoala. OPVÜI, ana a nzanchile to kyao shi enga! 7 OPVÜI Sandamo a Potsow osi a pikhfü, nina ritsso lona a nkochethaka. 8 OPVÜI, n thae jiang lüm erüng ti tssoyia; ontena kyaktao ji ti ben thoka. 9 A ri jiang thüngi ekhyo tipia, ontena a tsükona tümtao ji onte lo elungkathoka. 10 Miron onte lo elungkathoka; sokvüi n phanthicheo tssoa onte elungkathoka. n Ejüngona oyam n lan pio jiang ochüm ti echethoka; osi jenbukta kyon jiang ji khi roe onte sithoka. 12 OPVÜI, nina yantsae jiang ethelan eli ji zeyiala osi ezüpa evan jiang elan ji n moni to ana ntsia. 13 Ntsanrüng jiangna otsotso ni thünguv osi ontena ni vanrhyu lo vam.
Mmyulani Randan
1 OPVÜI, ana ni tsaphiala; enhünga a nzanchia! Ana ni tsaphiathüng a engayia. 2 A randan ji tssitsserhüm esüa a khichoyia, osi ana okhe yonkachio ji mmyui othan esüa a khichoyia. 3 OPVÜI, a büngo enhyang vanthoka, osi a menfü lo enhyang vanthoka. 4 Silyuo n tssov a tanga osi kyon n mhon jiang n tha elhi lo n phankav a tanga. Osi onte tokhu jiang lo a ti tsoyuthoka. 5 Kyon mmhom na jo nzana a khonkhuka, tolea ana kvüthüngha kyon n mhon thüngi na jo yikrachi n khi, ntiotssole ana yuta topvülo onte elhi n mhon jiang a tssaka randanala. 6 Kvüthüng onte esapvüiden jiang sürheni na vachochia sana a yi jo otsotso to ontena khichov. 7 Otssüng tssiroe raroa to onte ryu jiang olüp büngo nzüroe siv. 8 Tolea a OPVÜI Potsow, ana ni tae longtsükatala. Ana ni khümcho yanaka; a ti chüthoka! 9 Ontena tsirhi a vayio jiang lona a shanchoa, elhi n mhon etssoe jiang tsirhi jiang lona. 10 N thae jiang onte tsirhi lo elungkathoka osi aiyo ntia n tssona a yithoka.
Nzanchi Randan
1 Ana a nzanchithokvü OPVÜI tsaphiala; ana ombo thüngi jonjiala. 2 Ana ephyov lio jiang osi a ezüp jiang topvü ana ombo thüngi hansi woala. 3 A etho monrasanati lea kvüto lyuv sana ombona ntsia. 4 A sanphilani a ri jiangna tsirhi doni lia, ana a nkonjano eyingoe zena ochia a nzanchi n vanala, ochia a nkohOPVÜI n van. Ochina ha a tsükona a non khyuayiala. 5 OPVÜI, a nzanchile to ana ni thüngi chonala, nino a nkohapvüi; a ekümo ethelan eli topvü ni. 6 A nzanchile to ana kyao ji enga, ntiotssole aiyo eyilo n liv sithaka. A ri jiang khelo na a shanchoa; onteno atsükona etho jükhünga. 7 A nungra lona a vachia; to tssona ni kyon etssikho lona ana ni thünguv ni mmhon jiang topvü tsükona.
Nzanchi Randan
1 OPVÜI, a randan a engayia! Ni ntsanrük lona a jonji a engayia; ni longtsüka lona a janlana! 2 Aiyo ni nri ka ojangi a ti rheyithoka, ni mhadungo ochia n lan n liv n van. 3 A ri jina a toe a khyothechithaka. ombona vüngpheni emüngi a thechithaka. Osi aiyo nkolo na chüthako jiang tüv tssothaka. 4 Jitsükona aiyo a monkena yiala osi eyilo n liv sithaka. 5 Tsüngon yakthako jiang ana nchümchetala, nina a tsükona tssothako jiang ana nchümchetala, ni elhi jiang topvü a lümbümi jüa. 6 Ana a khe jiang khikae ni thüngi randanala; a mon jina liko ekhüngüv esüa eratsünga ni nhyakala. 7 OPVÜI, enhünga a janlana! A eyilo topvü monthaka. Nina a ti mphoa, to mekana ana ha echüli eyi jiang esüa a kümvüka. 8 Enya akvü ni n senphio nzan ji a nchümchethoka, ntiotssole ana nilo longtsükatala. A randan jiang ni thüngi chüngiala; ana kvüto vamsana olan a ejüa. 9 OPVÜI, ana ni khümcho yana ni thüngi roala; a ri jiang khe lona a shanchoa. 10 Nino a Potsow; ni lüm erüng etssov a püngnoa. A thüngi mmhona osi lanka nsako jiwoe a soa. 11 OPVÜI, nina phyochako ji esüa a shanchoa; ni mmhon jina a ezüp jiang lona a shanchoa. 12 Nina a nzamo ji tsükona, a ri jiang chüthuka osi a khangshio jiang topvü monthuka, ntiotssole aiyo ni nri.
Mesao na Ekhyo Hungi Potsow Thüngcho
1 A nkohapvüi OPVÜI mying thüngna! Ombona ritssolo eov a thangshiala osi rotav a methakiala. 2 Ombo a nkohapvü osi pikhfü, a khümchophen osi a shanchopvüi, ana longtsükao tsankaphen ji. Ombona jipo jiang a kupi joyithukala. 3 OPVÜI, kyon jo ntiola nina n mhechoa ato? ombo lojo kyon tathi ji tae kasi nina ombo tsükona nchümala. 4 Kyon jo ethük esüa tüv; ombo tsüngon jiango khümcho zakto yia esüa tüv. 5 OPVÜI, oyak ji rerhüpi joroa; phunglan jiang evüngkata, tona ontena miphung hanchukchiv. 6 Potsüo nlüpi ni ri tsanrothoka; ni lotssi jiang koe onte tsanthoka; 7 oyakina yonchochia ojü ejunguv shilo na a süchei a shanchoa; 8 jipopoe oyi n tsaeden osi ejüng echüm n tsao jiang etho lona a shanchoa. 9 O Potsow, ana khenthan ni nsikav; ana khendenzhü theta ni denkav. 10 Nina mesao jiang ekhyo pia; osi ni nri David shanchoa. 11 A ri haruko jiang khelo na a shanchoa; jipopoe oyi n tsaeden osi ejüng echüm jiang etho lona a shanchoa. 12 Ete tsoeden jiang khyingrothüng jo odung chüngchünga chüngicho esüa etho khyungthoka. Ete tsolo jiango mesaki nkeni durhyupvü chüngchünga zacho to tssothoka. 13 Ete son oki jiang otssuk omüm lan taro na pyingthukvüka. Ete li olyuden jiangna oro wothüng wothüng sochethokvüka. 14 Ete tssiro mangsü jiangna oro nroroe n sithokna osi epüp n lithokna etsson thichethokvüka. Ete lantsü jianglo ekya nungra won n zothokvüka. 15 Ochoang jipo lo heto tssoasana jiang mmha elio; jipo kvüwoe na OPVÜI ji onte Potsow tssoa sana jiang mmha elio!
Myingthüng Khen
1 A Potsow osi mesao, ana ni tsüpho ji thenchov; ana kümali montsso ni piv. 2 Tsüngon akvü ana montsso ni piv; ana kümali osi kümali ni thünguv. 3 OPVÜI jo tsüphoa osi elümoto ombo thünguv lia; ombo tsüpho jijo n chümjamo. 4 Nina ntio tssothakcho sana jijo echungren echungren thüngtav; Ontena ni thotsü elhi jiang thüngtav. 5 Ontena ni thotsü elhi jiang ehungpvüi tssov; ontena ni phfütsson osi myingtsson tsükona phyotav, osi ana ni emhukthav elhi jiang lo nchümriv. 6 Kyon na ni thotsü elhi jiang phyotav, osi ana ni tsüpho ji kyon yolo phyov. 7 Ontena ni mmhon topvü phyov osi ni nzan ji dentav. 8 OPVÜI jo nzan lia osi khonzan jüa, elaro lüm n tsuk osi nsenphio nzan na pyingcho. 9 Ombo otsük akvü thüngi mmhona osi ombo lyuyingcho topvü thüngi nzantio to tssoala. 10 OPVÜI, ni lyuyingcho topvü na osi ni kyon topvüna ni thünga montsso ni piv. 11 Ontena ni mesa etho ji phfütsson motsü rütav osi ni etho ji phyotav. 12 To tssona kyon topvü na ni thotsü elhi jiang osi ni ekhüngyan phfütsson myingthüng ji ntsiv. 13 Ni yansa jo kümali, osi nino kümali mesao. OPVÜI na ombo phyochak jiang ntsa vatala, osi ombona ntio tssoasana jiang topvülo nzan jüa tssoala. 14 Ezüpa evan jiang ombona nzanchiala, elongchoe evan jiang ombona sükatala. 15 Eküm evan topvü na eyiloa ni zekatala, osi onte ethelan liana nina etsoyu onte piala. 16 Nina etsson onte piala osi topvü to ethelan penriyiala. 17 OPVÜI jo ombo elhi topvü lo ntsanrük jüa, osi ombo elhi topvülo khonzan jüa. 18 Ombona ombo tsaphio jiang ndüngo vanala, ochoang na jüngthei ombo tsaphia sana jiang ndüngo. 19 Ombo yikrachio jiango ethelan topvü ombona penriyiala; onte ekya jiang ombona zoyiala osi onte shanchola. 20 Ombo nzan otsük akvü ombona nkohav, tolea n thae jiango ombona monthokvü. 21 Ana yuta topvülo OPVÜI thünguv; Ombona lyuyingcho topvü khi kümali ombo ntho mying ji thüngthoka.
Shanchopvüi Potsow Thüngcho
1 OPVÜI thünga! OPVÜI thünga, a eküm! 2 A eküm evanthüng jo ana ni thünguv; a eküm totona a Potsow denkata vam. 3 Kyon esopvüi jiang lo ti longtsükata; kyon esopvüi ochina ha ni n shanchokhok. 4 Onte chüana ochon kümlani siala; hoji tsüngono onte etüm ezi topvü ochüm tssoala. 5 Kyon ocho Jakob Potsow na nzanchia sana osi ochona ombo pvüi oyak osi liko, 6 jümang osi jiang lo jüwo jiang topvü lyuyingcho sana jilo enhikao ji ematha elio. Ombona yuta topvülo ombo phyochak jiang benthokala; 7 ombona oyam na khangshio jiang thüngoe theta oyi tssoala osi wonton jiang etsoyu piala. OPVÜI na evüngki evan jiang vachiala 8 osi mhikjung jiang omhik pochiyiala. Elongjoe vamo jiang ombona sükatala; ombo kyon ntsanrüng jiang ombona nzanala. 9 Ete metalo amoatssi vamo jiang ombona nkohoala; emi osi opvüpoe n van jiang ombona nzanchiala, Tokhatola n thae jiang etüm-ezi jo roe siyiala. 10 OPVÜI jo kümali to mesao. O Zion, ni Potsow na kümali sav. OPVÜI thünga!
Thotsü Potsow Thüngcho
1 OPVÜI thünga! Ete Potsow thünga dem jo mmhona; Ombo ethünguv jo mmhona osi elanthata. 2 OPVÜI na Jerusalem ji phanthilanthukvü sala; oyam khelo vamo jiang ombona sosi yilanala. 3 Lümbüm roa vamo jiang ombona emiyiala osi onte khfü jiang yukayiala. 4 Shantio kvüta lithokvü sana ombona methakthaka osi onte otsük akvü omyingina tsala. 5 Ete OPVÜI jo tsüphoa osi thotsü;ombo nchümri jo n matangjamo. 6 Ombona terio ji sükatala tolea n thae jijo likoe tssethechiala. 7 OPVÜI thünga denkata; Ete Potsow khendenpvü lona okhen dentava. 8 Ombona oyak shi poni eluk eyukatala; liko jilo eryu jokathokala osi yingsüng jianglo ero zathokala. 9 Ombona ekümrümo jiang etsoyu piala osi kyakshakro jiang na eronathüng süphiala. 10 Ombo chokao jo kurü etho ejüv jiang lo mek, ombo longshi ji rasan lüm etsson jiang ha mek; 11 Tolea ombo n senphio nzan jilo ombo longtsükao jiang thüngi ombo emathatala. 12 OPVÜI thünga, O Jerusalem! Ni Potsow thünga, O Zion! 13 Ombona ni pikhfü ji chüngchüngthokala; ombona ni kyon jiang mmhayiala. 14 Ni erüekon jiang ombona nkochetala osi etsov mmhontso ji khi nte mmhayithokala. 15 Ombona liko ji yizüng piala osi ombona ntio phyasana zakto benchetala. 16 Ombona porüp jiang osü esüa eyukatala ronren jiang livero esüa nzürothokala. 17 Ombona sheryu longran esüa jothokala; ombona etssük rothoko ji ochinaha nrümkhok. 18 Tothakana ombona yizüng pia porüp ji phyonrothokala; ombona mbung rothoki ojü tsüthokala. 19 Ombona ombo kyon jiang thüngi ombo yithen piala, Ombo püngnoyi osi shikhfü jiang Israel thüngi rothukala. 20 Ombona jipopoe jiang tsükona hojito n tssoyihan; ontena jo ombo shikhfü jiang n tsi. OPVÜI thünga!
Limhatsü na Potsow Thüngle To
1 OPVÜI thünga! oyaki na OPVÜI thüngtava, nte omhawoe evanden. 2 Ombo lanben topvüna ombo thüngtava, oyaki ombo rasantsü topvü na ombo thüngtava. 3 Ombo thüngtava, eng osi choro; ombo thüngtava, shantio tsünglüpvüden. 4 Ombo thüngtava, oyak ntssontsowoden, osi woyak shi poni ojü jiangna ha ombo thüngtava. 5 Onte topvü na OPVÜI mying thüngthoka! Ombona yizüng picho osi onte joyingcho; 6 ombo yizüngona onte vanphen jianglo kümli onte chümkaracho, osi ontena hoji n ngav n vanche. 7 Limha na ha OPVÜI thüngtava, jümangi jüpvüoden osi jümang ejunguvden. 8 Potsow nlüp osi sheryu, porüp osi elukden, osi ombo yi engae mbung ntavden. 9 Ombo thünga, phunglan osi yingsüngden, tssüngthi dung osi ralungden; 10 oki ekümoden osi ora ekümrümoden, epvüphio ekümrüm osi oroden. 11Ombo thüngtava, mesaeden osi kyon topvüna, mesatsoden osi esapvüi thanpoeden; 12 loroeden osi khyingroeden, esoneranden osi ngaroden. 13 Onte topvüna OPVÜI mying thüngthoka! Ombo mying jo thanpoe topvü lona tsükata; 14 Ombo kyon topvü khi ombo thüngthokvü tsükona ombona ombo jipo ji etho jüthokcho – hoji jo ombo nzantso Israel kyon jiang. OPVÜI thünga!
Myingthüng Khen
1 OPVÜI thünga! Khenthan khi OPVÜI denkata; ombo longtsükao kyon jiang etssikho lona ombo thünga! 2 O Israel, ni liyingpvüo ji tsükona longshia; Zion kyonden, ni mesao tsükona longshia! 3 Ombo mying thünga sharia; ombo thünga ophyang tümta osi khendenzhü rhüphitava. 4 OPVÜI na ombo kyon jiang thüngi emathatala; teri eküm jiang ombona ekhyo pia phfütssonthokala. 5 Potsow kyon jiang khi ekhyo lona longshithoka osi zümo thüma longshitathoka. 6 Ontena tüngkachia Potsow thüngtathoka 7 jipo jiang ekhyov osi kyon jiang khangshiv yonri erov bentasi; 8 onte mesao jiang yonjakzhü na chüngtav tsükona; 9 Potsow na yizüng pio ji esüa jipopoe jiang khangshiv tsükona. Shijo Potsow kyon jiang ekhyo ji. OPVÜI thünga!
OPVÜI thünga!
1 OPVÜI thünga Ombo ekhümki na Potsow thünga! oyaki na ombo etho ji thüngtava! 2 Ombona emhokthav tssotha , ko ji tsükona ombo thünga. ombo sandamo etho ji thünga. 3 Tatara theta ombo thünga. khendenphen osi rhüphiphen theta ombo thünga. 4 Ophyang theta sharita ombo thünga. Khendenzhü osi philyulyu theta ombo thünga. 5 Yonjakphi ekhota ombo thünga. Ekhophen ntssam theta ombo thünga. 6 OPVÜI thünga, liuying cho eküm evamo topvü na! OPVÜI thünga!
Püngno yi Jiang Man ji
1 Israel mesao David tsoe Solomon püngnoyi jiang. 2 Shilo püngnoyi shiang na ntsinran osi ndungtssung mmhom jo ntiosana ji chethevlo ni nzanchiv, osi yijak jiang yichak ejungo jiang engathev. 3 Ontena kvüto kichuk jüa vamvü sana, osi kvüto ntsanrüka, shenthia osi shitünga vam sana ni püngnov 4 Shiang na ejyueran n lii jiang okyak lithukvü osi pungdenro jiang nchümri lia kümthukvü. 5 Püngnoyi shiang na ntsinramo jiang lia ntsinran kyungkayiv osi ntsinran khathako jiang lea olan sokhuka, 6 hojitoli ontena püngnoyi ji yichak ejungo ji engathev osi ntsiran lio jina engao pio jiang jalanchev.
Khyingroe Jiang Thüngi Püngno
7 OPVÜI kyuchio jijo ntsinran benkaden ji. Eyimtsari jina ntsinran tona nchümri mmhon toji ntsii ekhiv tssakala. Behae jiangna ntsinran ethelan lia to nchethetala osi ntsinran eyam ekhiranala. 8 A tsoeyo, nipo osi niyo na ni ezo jiang engathe khia. 9 Kvüto khikho mmhom osi yuko mmhom na opyon mmhona ni zecheta sana ji esüa onte püngno yi jiang na ni etssophyo mmhonkavka. 10 A tsoeyo mmen kyon jiang na ni ejithechiv tssoathüng onte kyako ti-rheyia. 11 Ontena heto ni ezokhuka, "Roa; owo ochosana yani lüngthatavka! 12 Onte ji mmhona eküm vankhuka tokhatola etena owo ndukana onte chüthukvü! 13 Etena ejüeli lantaro hanrhyui retso ejüeli na ete ki pyingi vatavka. 14 Roa, etena ntio rechoana jantae khitavka oro ephankata." 15 A tsoeyo, hojitvü kyon phana ti-woa. Onte nkachoa vana. 16 Ontena n-mhom etssov lo sülana n vankhukala. Onteno yuta topvülo lüngthav methaki vanala. 17 Nina rhümav zikao woro jiangna ni zeta vanajo zonyaphen shümchiv ethev n li, 18 tokhatola hotüv kyon jiangna onte bobo tsirhi donala, onte bobo echüo tsirhi dontala. 19 Retsoreyu elhi jina yuta topvüto retsoe ji eküm khiyiala osi jenbukta elhilo evan jiang topvü pono hoto tssoala.
Ntsinran jina Tsala
20 Enga! Ntsinran jina lantsüi osi shishopheni na tünga phyoala, 21 Yantsü pikhfü jiang osi kyon mmhataphen jianglona heto tüngsochiala: 22 Zhüvae kyonden, nteno kvütenhya zhüva nte vanhungula? Ntena kvütenhya ntsinran jilo phyokasankata vantavla? Ntena kvüthüngha engathe n khiv alo? 23 Ana ni khomo shi enga; ana ndungtssung mmhom nipia ntsinran ni shümnhyavka. 24 Ana ni tsapvü, a thüngi roleto ni tsapvü, tokhatola nina n ngala. Nina a yi jiang n ngacho. 25 A ndung ntssung jiang topvü nina khi sicho osi ana ni elanchoyiv ji ni n chokacho. 26 Hoji tsükona nina ezüp ndukana ana ni ema kavka. Ekhenthao sükhying yiana ana ni emakavka. 27 Sükhying jina tsungrhyu esüa ezüp mbung ntav sosi yiana, ni ezüp nungra tssov. 28 Tothüngjo nina ntsinran ji tsa yam khatola ana ni janlam mek. Nina meta topvülo a yam khatola nina a hungu mek. 29 Nina kvüthüng ha ntsinran n tsütsahan osi OPVÜI yi ha n ngahan. 30 Nina a ndungtssung ethev n hcho esüa to tssopvü osi ana ni elanchoyiathüng engae n khihan. 31 Hoji tsükona nina ntio mancho sana hoji hunguka, osi ni elhi jina ni ryusangthukvüka. 32 Ejyueran n lio jiang jo ntsinran n khichowo jina onte chüala. Osi zhüvae jiangjo onte nchümjan zijan jiang roe onte siyiv. 33 Tokhatola a yi engae jiangjo lüm büka nkoho lia tsanchoa vam. Ombo tsanchoe vam osi ekyu lanka ntia liv mek.
Ntsinran Ji Yantso
1 A tsoeyo, ana ni püngno shiang ntsi khia, osi ana etssov ni ezo shiang etssov kvüthüng ha ti mhechoa. 2 Ntsinran jo ntio sana ntsi khia osi engathev ekhyo tssoa. 3 Ho, ntsinran ehungu chona osi engathe lithukvü jonjia 4 Nina janti mekana ejüeli mmhom mphoe licho yana to yana. 5 Nina hojito tssona OPVÜI kyuchi jo ntio sana nina engathev osi Potsow jo kvütüv sana ntsiv. 6 Ntsinran epipvüi jo OPVÜI; Ombo thüngina ntsinran osi tssenche rüche hungala. 7 Ombona ntsanrüng osi noying kyon jiang nkoha nzanchiala. 8 Ochoang na ntsa lona oyam tsütsata sana jiang ombona nkohoala, osi ombolo khochaki evan jiang nhyakyata vanala. 9 Nina a yi engana ntiojo elancho sana, etümcho sana osi ntssüng-rüng cho sana nina ntsiv. 10 Ntsinran eli ni kümvü osi ntsinran jina ematha ni piv 11 Ni tssenche osi engathe jina ni nkoyae nlamo etssov lona ni tanglanchiv. 12 Hojiangna ni ji kyon lanka n liv thama oyi nsani ninyang chiyithuko jiang lona ni nkachwothukvü 13 osi kyon ochoangna ntsanrük ji sisi mmen osi emüngi vanhunga sana jiang thüngina ni nkachwothukvü, 14 Ochoang na n mhom etssov lo ematha liasana, osi lanka n lio mmen elhi jianglo emathata, 15 osi longtsüka n lio kyong jiang to thüngi na nkachoa ni vanthukvü. 16 Eloe n thae ochona yinüng khi ni ejithechiv ekhyo tssoa sana ji nina tanglanchikhukvü. 17 Eloe ochona orapvü thüngi longtsüka n liv osi ompvüna ntho echümchak vao ji mhechoa sana jiang lona nkachokhukvü. 18 Nina ompvü ki ochojo nino echü lanji dunga vanthaka. Hoji wo jijo echü limha jiwoe yia vancho tvü. 19 Ompvü janthechi ochia kvüthüngha elani n yiala. Ombona kvüthüngha ekümlan jiwoe elani n yiala. 20 Hojitsükona nina kyon mmhom jiang ejyu-esü hungchoe ntsanrük eküm lo vam lia. 21 Ntsanrük kyon, osi kija tüngochü eli kyon jiangna ete meta shilo vam. 22 Tokhatola Potsow na nthae jiang osi mmen kyon jiangjo likoe na ero rukcheta to meta shi lona khi siv
Khyingroe Jiang Thüngi Püngnoyi
1 A tsoeyo, ana ni püngno shiang ti-mhechoa. Ana etssov ni zo shiang yuta topvülo nchümcheta. 2 A püngnoyi shina harishi osi ematha eküm sunga ni pivka. 3 Ntsata osi longtsüka vatao ji kvüthüngha ni lona ti monthuka. Hojiang ji ni evünglo phakae hana osi ni lümbüm lo erankae hana. 4 Nina hojito tssona Potsow osi ni kyon na ni thüngi emathavka. 5 Ni lümbüm topvüna OPVÜI lo longtsükata. Nina ntsia to nchümo jilo tae enghikae kvüthüngha ti-vana. 6 Nina ntio tssoana jiang topvülo OPVÜI nchümcheta, tona ombona elamo lanka ni ejüvka. 7 Nibobo ji kvüthüngha ni ekyan jilona ntsinraka cho esüa ti nchüma, yingto OPVÜI yi enga osi sülyuo etssov ekhirana. 8 Hojito tssona hojina mozhü mmhom esüa ni khfü osi enov jiang ni emiyivka. 9 Ni elhicho lona chiyio jiang topvülo mmhontso ji khichei OPVÜI thana ombo yikrachia. 10 Nina hojito tssona ni son jiang pyingrav osi zükhi taena vanphen tia n-liv ni pyingkachiv. 11 A tsoeyo, OPVÜI na ni elanchoyiana tüngochüa engae khia osi ntangshon yiwon ni piala to engae khia. 12 Opo jina ombo longtsükao tsoe ji elanchoyio ji esüa, OPVÜI na ha ombo nzamo kyon jiang elanchoyiala. 13 Kyon ocho nchümri lia küma sana jijo ematha lia osi engathe eli kyon jijo mmha lia. 14 Hojilo jo janti tssen lo rankata ekhak jüa, osi shona lona tssentsükata eman lia. 15 Nchümri jüwo jijo tsentsüman long lona tsükata, nina ni chokao jiang topvü pomoe man lona tsükata. 16 Nchümri lio jilo jo harishi, ejüeli osi yikrachi hungala. 17 Nchümri elio ji yakchia eküm emathata vancheta osi ekhyo eküm jilo lanso hungu. 18 Ochoang na'hchümri jüa küma sana jiango ematha lia; ntiotssole nchümri jina eküm onte piv. 19 OPVÜI na ombo nchümri theta limha shi joyingcho; Osi ombo ntsinran na oyak shi ronkacho 20 Ombo nchümri na zhükhfü shiang tsüthukala osi eluk shiang khi likolo eryu jokathukala. 21 A tsoeyo, ni nchümri osi ntsinran jiang sayae vanthuka, osi kvüthüngha ni lona moni tisithuka. 22 Ontena eküm ni pivka, ematha eküm mmhom ni pivka. 23 Nina ni lanlo mmhona sanphichev osi ni nshüphiv mek. 24 Nina yipathüng ni kyuv mek, osi zümo topvü jüngtheta yipchev. 25 Nina tssüka ekyutssü eyiv ni kyuv mek, nthae jiang na tsyungryu roato erov ni kyuv mek. 26 OPVÜI na nkochei ni vanthukvü. Ombona tsirhi lo ni rhethukvü mek. 27 Ni eto nandang jo nzanchi ethev eli kyon jiang thüngi mmhom tssoa. 28 Nina nchüng nzanchicheo lanka lina kvüthüngha ni shom ji ojyuati to ti ezoa. 29 Ni phinakishüm jiang tssatssowo elhi ntia timatanga; ombona ni hakono vanala, osi nilo longtsükata vanala. 30 Ni ntssatssothuko kyon ji thüngi ntia ntam n liv kvüthüngha ti ekhirantava. 31 Jenbukta kyon jiang omhyik rakia ti nchüma, osi onte esüa etssophyov ti methaka, 32 ntiotssole OPVÜI na n mhom etssoe jiang topvü tssakala, tokhatola ntsanrüng jiango ombona longtsükatala. 33 Nthae jiang wopan jo OPVÜI na rhiyikatala, tokhatola ntsanrüng jiang wopan jo mmhayiala. 34 Kangtsüi kyon jiang jo ombona n tsütsatala, tokhatola emiroe jiang thüungoe ombona thetala. 35 Nchümri eli jiangna yikrachi mying hungala, tokhatola nthae jiango ontebobo etssaknkong rankatala.
Nchümri Lio ji Man
1 A tsoeden, ni pona ntio nte püngnoa na enga. Tüngochüa enga, tona nina engathe livka. 2 Ana ni püngno shiangjo mmhona, hojitsükona topvü lümbümi vata. 3 Ana a pvüpoe jiang ngaro tsonthi tssoathüng jo 4 apona a püngnocho. Ombona heto a ezocho, "Ana phyo shiang nchümcheta osi kvüthüngha ti mhechoa. Ana ni ezo shi ephan tssoa, tona nina eküm vamka. 5 Nchümri osi etüngche lia vana! Ana phyo shiang ti-mhechoa osi ti sinkia. 6 Nchümri ti sinkia tona jina ni nkochevka; Nchümri ji nzana, tona jina noyinga ni vanthukvüka. 7 Nina etssov lio jiang yulo opvü tsotso jijo nchümri ehungu ji. Nina thanpoha lilea edüngche osi tssenche ziche jo nilo linrüngthuka. 8 Nchümri mmhom chokata, tona ombona ni tsüphwothukvü. Ompvü rhümata, tona ompvü na myingthüng ni piv. 9 Ompvüna myingthüng kikho ni piv." 10 A tsoeyo, a yi shiang enga. Ana ni ezo shiang tüngochüa engae khia, tona ni harishia vamka. 11 Ana nchümri lia osi ekümlan nsaka evam ni püngnothaka. 12 Nina nchümri lia vana tssona ntina ha ni lanka lo zav meka, os1 nina yunglea ni nshüphiv meka. 13 Nina ntsithako jiang yuta topvülo nchümcheta vana. Ni ntsinran jijo ni eküm jika, hoji nkohae vata. 14 Kyon n mhom jiang opheni ti-woa. Osi n thae jiang ejyu-esü ti zechoa. 15 Hoji esüa ti tssoa! N mhom lona tsanchoe vana! Ekhiranchoe tsani sia. 16 Nthae jiango ontena n mhom n tssothüngjo n yipthetala. Ontena ochosana tia n tssatssothüng jo n yipthev vanala. 17 Ntha elhi osi jenbukta jo onte etsoyu esüa tssoala. 18 Ntsanrüng jiangna dungo lan jijo eng chirocho esüa tüv osi tüngrakata osi wondangkata eng rancheta yio ji esüa tüv. 19 Tokhatola nthae jiang lan jo zümolo esüa münga. Onte ekhüngala, tolea ntio lona onte nshüphicho sana n hungala. 20 A tsoeyo ana ntio phyoana engathe khia. A yi jiang enga. 21 Hojiang ji ni thüngi na kvüthüngha ti monthuka. Hojiang nchümcheta lümbümo vata. 22 Ochoang na shiang engatheta na eküm osi otsük mmhon hungu. 23 Nina nchümo jina ni eküm ji soyingala; hojitsükona nina ntio nchüma sana ntangshona. 24 Ntiojo ntsa mekcho sana kvüthüngha tiphyoa. Ejüng osi engathesorao yi jiang kvüthüng ha ti thenhya. 25 Ntsa jilona lüm tssoni mhadungoe nsa zechia, osi ni kvüri ji yikra lona ti nkhümtheta. 26 Nina ntio tssoana tüngochüa madanga, tona nina ntio tssoana jiang topvü lo elamo tssochevka. 27 N mhom jo nkachosi nsa khochia woa. Ntsa jilo na ekhoa lia ti khomhia.
Efürama Ntangshon Yi
1 A tsoeyo, ana etüngche yi phyo shiang damangi enga. 2 Tona nina elamo etssophyo jiang ji chethevka, osi ni yi jiang yak chia nino ntsiran lia to chethev. 3 Eboe thanpo tsoeni ji yi jiangji tssakijü to nüngkhoka, osi ompvü na olive thyujü enyipa to enyipa ni emanphikhuka, 4 tokhatola hojiang yakchithakana ompvüna ni pono ekhov tona enov to ni vayisi yi siv. 5 Ompvüna echü limhae ni tssüngchov; ntiotssole ompvüna dungo lan jijo echü lan ji. 6 Ompvü na eküm lan jilo n vanala; tolea ntio tssoa sana nchethena lonphia tae vanala. 7 A tsoeyo, ana phyo shiang enga osi kvüthüngha ti mhechoa. 8 Hojitvü eloe nkachoe vana! Ompvü ndüngo tia ti-woa! 9 Nina hoto tssochojo ni yikrachi myingthüng lia rothako ji oyam echi tssoe siv, osi haruk hashüi khelona khyingrothüng na ni chüi siv. 10 Osi lankon jiang na ni ejüeli jiang khiv, nina elhi tssoe vao jiang oyam echi tssoe siv. 11 Nino ni echü belüngi erikachi rüa vam, osi ni so tona etho jiang topvü tsoroe siv, 12 jithüng nina phyov, "Aiyo ntioli n ngathechoto? Aiyo ntioli oyam ochia khi a nlanchoyithukcho to? 13 Ana a püngnoe yi n ngacho. Ana onte yi jiang n ngayicho. 14 Tole esüngaro taena a ji limhatsü emakaphen a kümi sia." 15 Ni engh ji thüngi longtsükaroa vana osi ni nzan ji ompvü tae pia. 16 Nina eloe thanpoe yakchia otsoe oro vamo jiangna ntia mmhom ni tssoyiv mek. 17 Ni ngaro jiang na rankae ni kyochiv ethev lia, thanpoe ngaro jiang na mek. 18 Hojitsükona ni engh thüngi emathata osi nina soa vamo loroe ji thüngi na ematha khia, 19 Ompvüo sianoro esüa ezev jüa emiroa nzantharoa. Ompvü pyon mmhon ji khi ni emathata vahthukay osi ompvü nzan khi ni hachümthuka. 20 A tsoeyo, ntio tssona ni nzanji eloe thanpoe pivla? Ntio tsükona nina kyon thanpoe «ngh jiang mmhomo zechevla? 21 Nina ntio tssoa sana topvü OPVÃœI na hungala. Nina kvüi woa sana ombona zeta vana. 22 Nthae mmen jo tsirhi esüa tüv. Ombo ombo mmen tsirhi lona ombobo sala. 23 Ombona erüm eto n lio jina ombo chüala. Ombona ntha elhi n mhom tso jiang na lüpkvüi ombo sothechiv.
Ndangshon Yi
1 A tsoeyo, nina thanpoe ochosana jina ochi epvüo ji ni pono tsswothukvü phyochaki licho alo? 2 Ni yi jiang na ni salancho alo, mekana ni echümchak tsirhi jina ni sacho alo? 3 A tsoeyo, hoto tssoana nino kyon tsük ji etho küpo vanala, tolea tsancholan ji heto lia: Zakto ombo thüngi woa osi ni vachile to jonjia. 4 Nibobo esana ti-vana mekana yiptheta ti-vana. 5 Siano mekana woro jina sophan khelona tsanchoa to tsani sia, 6 Etho n jüi jiangna tsümphiro ji eküm ji zesi engathe khia. 7 Onteno esopvüi, eramoe, osi esopvüi n van, 8 tokhatola ontena etsoyu ji nzyulo hanthe vasi vamilo tsoala. 9 Etho njüi jina kvüthenhya belüngi erikachi vamsala? Ombona kvüthüng phanthinrüngu sala? 10 Ombona phyoala, "Ana esüngaro yipsavka," A khe chüpi tara yipsavka. 11 Tokhatola ombona yipa vanathüng, yantsa jina epensü eben efüi esüa ombo sakav. 12 Ethev n lio, n thae jiangha ejüng phyoa sanphiala. 13 Ontena omhyik ekyipa osi hatakta ni ejithechiala, 14 osi onte lümbümi najo n mhom khenta meta topvülo nyinyang sothechia woala; 15 Hojitsükona ontena ntsüngtam vanathüng ekya nungra na onte rhümav osi n myikhuko tüv onte meyam. 16-19 OPVÜI na tssako osi n rüm khoko olan tiying shiang lia: Kangtsü etssophyo, ejüng ephyo, noyinga evan kyon jiang lüngtha khe, ntha elhi etssov nchümrio lümbüm jiang; n mhom thüngoe yonga eo jo jiang; ejüng tae elan elani ephyo ehungpvüi ji; tona kyon ochona oshom yulo ezüp sothechia sana ji to.
Efürama Tsükona Ntangshon
20 A tsoeyo, nipona ntio ni ezoana hoji tssoa, osi niyona ntio ni püngnoana kvüthüng ha ti mhechoa. 21 Onte yi jiang yuta topvülo ni thüngi vanthuka, osi ni lümbümi nchekae hana. 22 Onte püngno jiang na ni yentsa jiang loha ni phanphiv, 'zümolo ni nkohav, osi engo ni lansoe tssov. 23 Onte püngno jiangjo wondang esüa tüv, osi onte elancho yilan jiang na eküm evam lanka ni jüv; 24 Onte püngno yi jiangna eloe n mhom jiang thüngina nkachoe ni vanthukvü, osi eboe thanpoe eng jiang kyakthechi yi jianglona ni tsanchwothukvü. 25 Onte pyon mmhon jiangna ni ti-jithechithuka, osi onte olüp ori mhyik jiang khi ni ti-sa-thuka. 26 Eboe tsükana lonsü lonpyoe eloe elümoto laroa, tsikonga man taena hungkhuka, tokhatola efürama jina ombo eli topvü ombo moniv. 27 Nina ni tekilo omi thankae hansi nisü jiang n rungu vanchecho alo? 28 Nina nijo jiang n rungna mirom ponina süma yichecho alo? 29 Hoji esüa eboe na eloe thanpoe thüngi yipchojo ekyuv lia. Ochona hojito tssoana ezüp hungu. 30 Efüi jina ombo wontonathüng etsoyu efüo jijo kyon na ombo n tssakala; 31 tokhatola ombo rhümatana ombona efüo ji tata tiying lochev, ombona licho topvü thechichev. 32 Ombo yikrathukvü osi ekho esükvü. 33 Tokhatola efürama etssoe jo kichok n jücho tssoala. Ombona ombobo yesoala. Omboji ekhoesüka yikrathukvü, osi eküm echong omha eshoka vam. 34 Orapvü ji lüm etsuk ntssontso jijo ombona omhik rakiathüng ombona nlilan yamo jijo ochüm n li. 35 Ombona otssen khi locho tüv khiv mek, nti tssenoyon naha ombo lümbüm bükvü mek.
1 A tsoeyo, ana ntio phyoasana ji nchümcheta, osi ana ntio etssov ni ezocho sana ji kvüthüngha ti-mhechoa. 2 Ana ntio phyoa sana ji tssoa, tona nina eküm vanchevka. Nina kvüto ni mhyik ji nkohoa sana ji esüa a püngno yi jiang tüngochünga benphia. 3 A püngno yi jiang yuta topvülo nilo lithuka; Osi ni lümbümo erankae vata. 4 Nchümri ji nika esüa tssothuka, osi engathe ji nishom ndüng esüa tssothuka. 5 Hojito tssona ontena thanpoe kyon engh jiang thüngina kontae ni vanthukvü, osi eloe ochoangna enayao khenoyi nsana sana jiang thüngina to.
Nthae Eloe Ji
6 Tsüngon motsüngalo ana aki kherüki lona zechokchia vancho, 7 tole eju-eran n lihan kyingroeden hungcho, osi onte yulo tsükajo echümpo tssoa zhüvae to zechecho. 8 Ombona lantsü nken kvülo eloe vanchosana ji hakono sanphia vancho. Osi ombona ompvüki ji ndüngona yakchia yia vancho 9 hojijo müngsanati tssocho. 10 Tole tothüngji ombona ompvü ndukcho; osi ompvüo lonsülonphyoe eloe esüa mpensüsi oyam ejithechiv kyaka vancho. 11 Ompvüo lümbüm etsson osi yikra n lina yuta topvülo lantsü jianglo sanphia evan eloe 12 mekana kvüthüng sanajo lantsüi nken jiang lona nhyaka evan, kvülosana jo shishopheni van to etssoe eloe. 13 Ompvüna okhe tsungkho yonchia khyingroe ji khayacho, osi ombo ntssüpsi, ombo mhyiki tondüng zethechiyia ezocho, 14 "Nchüngo ana othan picho, osi othan jiang lona oso khichei lia. 15 Hoji tsükona ni eyengoa hapoe chirocho. Ana ni hungvo to nchüma vanle, shilona ni hungthaka! 16 Ana Ejip metaena hansi yicho tüv sünyipvü opyon mmhom jiang khi a belüngi sakae lia. 17 Ana mozhürhüm mmhom, olan olan jiang khi belüngo erhikae lia. 18 Roalo! zümo tona eni nzanta yiptavkalo. Eni khayatae yipna emathavka. 19 Arapvüha oki n van. Ombo meta ekoni zakto nyio tüv yentsalo yia. 20 Ombona orang tssona khi hansi yia küma ombo hopta eni ntssov jo oki kholani n yi." 21 Hojito phyoa ompvüna ompvü pyon mmhon tona, ompvü yinüng to jiang khi ombo ejithechicho. 22 Tole zaktole ombo mangsübung tatsüngpheni sosi yia vancho esüa, mekana tsirhi ndüngo na siano na shanthata vancho esüa 23 osi kvülo shina lotsitsüngna ombo lümbüm chyunrhüa kovsana tüv lona shanthata vancho esüa ompvü phana yia vancho. Ombo eküm jilo ekyuv elio jijo ntsinaorona zonyaphen thüngoe yia vancho esüa yia vancho. 24 Hoji tsükona enhungo, atsoeden, a yi engachitava. Ana ntio phyoa sana ji lümbüm theta engatava. 25 Hetüv eloe khi nte lümbüm titssüngyathuka; osi ompvü chakphia tisanphitava. 26 Ompvüna khyingroe elümoto eküm yesoe sithaka osi n khakhamo chüthukthaka. 27 Ntenaha ompvü ki woa tssona, nteno echü metawoe yiala. Shijo echüv tsükona echak lanji.
Ntsinran Thüngcho
1 Enga! ntsinran jina heto phyoala. Elan nchüm jina ompvübo tüngkachiala. 2 Ompvüna lanpvü ndüngo yonton jianglo osi lanrhyu jianglo zae phyoala. 3 Yantsü pikhfü ndüngo, osi kipüng jiang ndüngo zae tüngkachiala: 4 "Kyontsoeden, ana nte thüngi ntssungala; Ana limhalo evan otsük akvü tsala. 5 Nteno n ranbenhan alo? Ranbemvü ekhyo tssoa. Nteno zhüvaeden alo? chüngtsov ekhyo tssotava. 6 A yi mmhomtsow shiang engatava; Ana ntio nte ezoana topvüto elana. 7 Ana phyo jiango ntsa ji; Osi ejüng ephyoe jijo atssakala. 8 Ana phyocho topvü otsotso; Ana phyocho lo ntia ejüng osi sosorao n jü. 9 Engathe eli kyon jina jo shiangji topvü mmhona engathetala; Osi ntsinran elio ji tsükona jo, shiang topvü polaroa engathetala. 10 Janti thung a püngno shiang ethüngi khia; Shona njümtso ji thüngi najo ntsinran ji ethüngi khia. 11 "Aiyo nchümri mmhom ji, aiyo tssentsü oyuk-osen lona mmhonkata; ni chokao jiang yolo ntinaha alo n jyutakhuk. 12 Aiyo nchümri mmhom ji, osi ana nchümjanzijan lia; Ana ntsinran osi tssenche mmhom lia. 13 OPVÜI yikrachio ji yichak jo n mhom ji tssako ji; Ana kangtsü osi mhatsso mhalang jiang atssakala, lanka n mhom osi ejüng yi jiang atssakala. 14 Ana olan topvü: matang-mariteni tssochokchi khiala. Ana engathe lia, osi aiyo etho khyunga. 15 Ana mesae jiang yansalo nzanchiala osi yansae jiangna shikhfü mmhom nsüngrüv lo nzanchiala. 16 Limhalo yansae otsük akvüna a nzanchi theta yansala, yansae jiang osi ntsinran jiang topvüna. 17 A nzamo jiang topvü ana nzanala; Ochona a yana sana jina a yanchev. 18 Ana ejüeli osi myingthüng, pvülyu hanlyu osi ekhyo topvü piala. 19 Ntena a thüngina hungwo jiango shona mmhontsov ji lona mmhonkata, osi janti njüm lona mmhonkata. 20 Aiyo ntsanrük lan ji dungala; Osi elan lankawoe sanphiala, 21 osi a nzamo jiang ejüeli piala, osi onte ki jiang ejüeli na pyingthukala. 22 "OPVÜI na ovüngtso ji a joyingcho, nkolo ombo elhi ovüngtso ji a tssocho. 23 Aiyo topvülo benkadeni a joyingcho, limha shi n benkathüng, ovüngoji a joyingcho. 24 Jümang shiang n lithüngna a vancho, osi ojü n bukchethüng na a vancho. 25 Aiyo phunglan shiang vüngina a bukcho, yingsüng shiang n lithukthüng na a bukcho. 26 Potsow na liko shi osi oli jiang n joyingthüng na a vancho, osi liko shilo ochon ezüma tia n lithüng na a vancho. 27 Potsow na oyak shi nsüngrüathüng jo a vanthakcho, osi hungchüm shi jümang yakchia thetathüng a vanthakcho. 28 Ombona oyaki eluk jiang thetathüng, osi jümang jükvü jiang nsüngrüathüng a vanthakcho. 29 Osi jümang jü jiang kvünandang tae tüngkachithukvü sekacho sana jithüng jo a vanthakcho. Osi ombona liko soyingkaphen ji joyingathüng jo aiyo a vanthakcho. 30 Aiyo Potsow ndüngo tssoe kitssoe matangpvüi ji esüa matanga vancho, Aiyo ombo engakvü emathathukpvüi ji tssoa vancho, osi ombo mhadungo ematha linrhüa vancho 31 Limha shi thüngi emathata osi kyon jiang thüngi emathata vancho. 32 "Khyingroeyo, enhungo a yi shi engachia. Ana phyoshi ephan tssoa, tona nilo a ematha livka. 33 Ni püngnothako ji enga. Osi nchümri eli küma, osi nchümri mmhon ji tisinkia. 34 A yi engao kyon jijo ematha hungukyon ochona engakvü a kipüngo vanasana, osi a ki rhorophen jilona vana sana jijo ematha hungu. 35 Kyon ochona a yanchetana ; jina eküm ji yanchetala, osi OPVÜI na ombo thüngi emathav. 36 Kyon ochona a n yanchetana jina ombobo meyanala; osi kyon ochona a tssakana ombona echü ji nzanala."
Nchümri eli tona Eyimtsari to
1 Nchümri eli jina ombo kiji tssothaka osi dyurhyupvü tiying chümthaka. 2 Ompvü na tokhütav ekümrümo lüngthathaka, osi zükhi lo orhüm-ori thechi, tssisa ji methaki vathaka. 3 Ompvüna kyon jiang tsalo ompvü phaj apvüi jiang yantsü dungti jiang lona heto tünga tsalo wothukthaka: 4 "Rotava, enhya osi eyimden!" Elani zhüvae jiangha ombona heto ezothukala, 5 "Rotava, osi ana methako etsoyu shiang tsotava osi ana lilangtsüi evao zükhi shi yutava. 6 Eyim kyon jiang razhü ji sülanchisi oro eküm vana. Osi ntsinran eli-i lanka ji ephan vana." 7 Nina kanchan kyon ji elan choyicho jo ombona ni yikvü. Nina kyon n mhon ji püngnochojo ombona ni meyamo tae tssov. 8 Kanchan kyon ji kvüthüngha ti-lanchoyia; ombona hoji man ji ni tssako ji tae tssov, tokhatola nina nchümri eli elanchoyina ombona ni yikrachiv. 9 Nina nchümri eli ji thüngi ntio ezoasana jina ombo nchümri likathukala. Nina ntsanrük kyon ji ntio ezoasana jina ombo ntsinran rankav. 10 OPVÜI kyuchio jijo ntsinran benkaden ji. Ntsinran ni lihungna ovüngtssoa OPVÜI kyuchidem shikhfü. Nina NTHO OPVÜI ji ntsia tssona nino engathe lithaka. 11 Nchümri mmhom jina ni harishi ni rankayiv. 12 Nina ntsinran lina ni eman tssov, tokhatola nina hoji silanchina ni ezüp tae tssov. 13 Eyimtsari jijo eloe tsüka na ntia n tsina osi yikra n lina ntssontssia nshanlunga vamo ji esüa tüv. 14 Ompvüna ompvü kipüngo khukthei, mekana yantsü phungdung lo mangi, 15 yakphiyakri jiang osi ombombo elhina ntssochov vamo jiang heto tsala: 16 "Rhorotava, eyimden!" Osi zhüvae ji thüngi ompvüna heto ezoala, 17 "Efücho jü jo nüngkata, osi efücho hümri jo mmhonkata." 18 Ompvü kyako erhei jiangna, ompvü ki rhowoe jiango chürala to n tsi, osi ompvü ki rhowoe jiango enhünga jo echü limhae vanra toji n tsi.
Solomon Püngnoyi
1 Shiangjo Solomon püngnoyi: Nchümri elio tsoe jina opo ji longshia kangtsüthukala; tolia zhüvae jina oyo nungrathukala. 2 Nina ntsanrük lankawoe na ejüeli hungwo jina jo ni manthukvü mek, tokhatola ntsanrük jina ni eküm shanchov. 3 OPVÜI na kyon mmhom jiang ji khangthukvü mek tokhatola ombona nthae jiangjo ontena chokata yamo jiang bencheyiv mek. 4 Etho n jüwo ji yakchia yantsae ni kümvü, tokhatola kongtsüngo jina ejüeli ni kümvü. 5 Nchümri ejüo kyon jina benro niro jiang ranchetana yanyoe khiala; tokhatola lirirhüm jilo yipa vani siwo jijo yikra ndukvü. 6 Kyon mmhom jiango mmha khi onte kikhothokvü. Tolea n thae jijo n mhom tathi jina ombo büng ji chüngphüngiala. 7 Kyon mmhom jiang jo mmha esüa oyam na nchümcheta vam, tokhatola n thae jijo esüngaro mhechoe siv. 8 Nchümri eli-i jiangna ndungntssung mmhom jiang khiala. Kyon ochona zhüva nsana sana onteno mom. 9 Ntsanrüng jiango tsanchoa noyinga vamvü, tokhatola n tsanrüng jiango onte rhümav. 10 Ochona ntsa ji mphoe siana jina ezüp shikatala, Tokhatola ochona opon chuka elancho ta sana jina noying lanka nsüngrüala. 11 Kyon mmhom ji yi jiango eküm bukchephen jüzanjo to tssov, tokhatola n thae yi jina n mhom tathi ji mphoala. 12 Tssakta nkungta jina ezüp sochukchiala, tokhatola nzan jina ori jiang leha eyukzhüi siala. 13 Kichuk ejüi jiang na yichak jüa nsanala, tokhatola eyim esüa nsamo jiango ezüp piv lia. 14 Nchümri eli-i jiango ontena yamo ntsinran ji hungala, tokhatola zhüvae na nsanchiana ezüp yanchetala. 15 Ejüeli jina ejüelio kyon ji nkochetala, tokhatola yantsa jina yantsae ji monthukala. 16 Elhi mmhom tsso ji manjo eküm, tokhatola mmen elhi jina mmen kyongkathukala. 17 Kyon ochoang na onte elanchoyiathüng enga sana jiangna eküm vamka, tokhatola ochoangna onte wori n phyochaka sana jiango ekyuv lia osi oyam sosorala. 18 Kyon ochona ombo lümbümi tssakta jüwo ji mphoa sana jijo ejüng ephyoe. Ochona yibung hanphia sana jijo zhüvae. 19 Nina kvüta kyonga nsana sana jitata mmen kyongkav. Ni ji nchümri eli tssona yingto vam. 20 Kyon mmhom ji yi jiango janti njüm esüa tüv. Tolia n thae ji nchümri jo ethev n lio tüv tssoala. 21 Kyon mmhom ji yi jiangna kyon khosha manthokvü, tokhatola ni eyim tsari yi jina ni chüthukvü. 22 OPVÜI mmha jina ni jüolithukvüka. Nina kongtsüngcho taena jo ni ejüeli kyungkav meka. 23 Elhi n mhom lo longshio jijo zhüva, tokhatola kichuk ejüi jina nchümri mmhom lo longshiala. 24 Ntsanrüng jina ombona yamo jiang hungala, tokhatola n thae jiango ontena ekyutso ji yanchetala. 25 Tsyungryu ji yiana nthae jiango vena yi siala, tokhatola ntsnrüng jiango yuta topvülo tsanchoa vanala. 26 Etho njüi ji kvüthüngha ni elhi titssothuka, ombo ethem na niho kyimchoto, mekana miphungna ni phungtsüngcho to khetsükherak tssovka. 27 OPVÜI yi enga, tona ni harishia vamka. Nthae jiango onte yuta n jam chüala. 28 Kyon mmhom jiang eyilo jina ematha hansi yiala, tokhatola n thae jiang zekaphen jo ntia n li. 29 OPVÜI na ntsanrüng jiang yuta topvülo nkohala, tokhatola sulyuo etssoe jiang jo monthukala. 30 Ntsanrüng jiango yuta topvülo jüngtheta tsanchoa vamvü, tokhatola n thae jiang na meta jilo sunga vamvü mek. 31 Ntsanrüng jiang na kichuk jüa nsanala, tokhatola n mhom nsamo nnli jijo esanthukvü. 32 Ntsanrüng jiangna nzan yi nsanala, tolia n thae jiang na yuta topvülo oyam tachio nsanala.
1 OPVÜI na kyon ochoangna efü-seri n tsav tsütsatana jiang tsakala. Ombona ntsanrük efü-seri jiango emathayiala. 2 Kangtsüi jiango nsungu yikrathukvü. Emiroe jijo nchümri elio tssoala. 3 Niji mmhoncho tssona ntsanrük na ni socho tsükona tssov. Longtsüka n li kyon jiangjo onte n tsanrük jina onte yesoala. 4 Nina echü tsüngon ji ndukana ejüeli na ntia tssochev mek, Tolia ntsanrük jina eküm ni shanchoyiv. 5 Ntsanrük jina kyon tsüka ji eküm enyipthukala, tokhatola nthae jijo ombobo joyithuko tvü tssochetala. 6 Ntsanrük jina ntsanrük kyon ji shanchoala, longtsüka n lio kyon jijo ombo nkhyik tserhi ji lona ombo salanala. 7 Nthae tsüka chüana ombo eyilo jiha ombo nzo chüala. Ejüeli lo longtsükae vamo jijo ntia mekvü siala. 8 Ntsanthoe jiango ezüp lona nkochetala. Osi ezüp ji nthae jiang thüngi yiala. 9 Potsow n tsio jiang onsanyisan jiangna ni yesov, tokhatola ntsanrüng jiang nchümri na ni shanchov. 10 Ntsanrüng jiangna mmha hungana yantsü jina emathatala. Tokhatola nthae chüana kyon na emathata ntssontssitala. 11 Ntsanrüng jiangna mmha hana oyi piana yantsü ji ematha tala. Tokhatola nthae jiang won oyi jiangna yantsü ji monthukala. 12 Oyam echi n mhon phyoyio jijo zhüva elhi, niji ntsijan eli kyon tssona noyinga vam. 13 Ochona wonro yiroa sana ji thüngi mphoyi thyutav n li, tokhatola longtsüka eli kyon ji thüngijo nina longtsüka vakhuka. 14 Lansoe n vamo jipo jijo moni siala. ndungntssung khosha vamo ji man jo noying nkoha liv. 15 Nina n tsio kyon tüv ochi loyiv echümchaki vao jijo, nina epüp ntokvü. Nina hojitüv ezüp nshichevo hoji mmhomo. 16 Nzan eli eloe jijo yikrachiala, tokhatola etsso-ephyo mmhom n jüwo eloe jijo yikra tae. Etho njüo kyon jina kvüthüngha orang n liala, tokhatola kongtsüngryumhemo kyon jijo ejüeli kümala. 17 Nina nzan lina nibobo mmhom tssoala, tolea nina haroko jijo nibobo meyamo tae tssoala. 18 Nthae kyon jiang na ntia oman n hungala, tokhatola nina elan ji tssoa tssona nina yantso mmhom hungrüngüv. 19 Kyon ochona elamo etssov zenkatasana jina eküm vanchev, tokhatola ochona n mhom etssov tae rüngasana ombo chüv. 20 OPVÜI na lümbümi mmen ehamo kyon jiang tsakala, tokhatola elamo elhi etssoe jiango nzanala. 21 Kyon n mhon jiango Potsow na ezüp pirüngüv, tolia ntsanrük jiango tsanchov. 22 Eloe ocho elan nlan tssencheo etho n lina opyon mmhomo ji tae tssoasana jijo wokomenshung lo shona phakae hancho tüv. 23 Kyon mmhom jiang na chokao jiangjo mmhom lo echetala, tokhatola nthae jiangna onte lüm rüngcho tssochetana otsük akvüna lüm tsokala. 24 Kyon ejomajo onte rang jiang thama tsütsae silia ejüeli kümala. Tolea ochoangsana jo elümoto nkümshon lilea, yantsakata yiala. 25 Longphya vana, tona ni pvülu-hanlyua ni küvümka. Oyam nzanchia, tona nina nzanchi hunguka. 26 Ochona etsoyulan hanthei vasi oman tsükthuksi eyemü nhyaka vanasana kyon topvüna onte tssakala, tokhatola ochoangna hojiang yeni siasana jiango kyon na thüngala. 27 Ni etümezi ji mmhon na tssona kyon na ni yikrachiv, tokhatola nina ezüp yana tssona nina ezüp ji yanchev. 28 Ochona onte ejüeli lo zekae vanasana hojiango tsüngkying lomo vüato vüi siv, tokhatola ntsanrüng jiango nzyulo limo esüa pvülyua chüngchüga vamvü. 29 Kyon ochona ombo wopan lo ezüp hansi yiasana ochümijo ntia n hungu siv. Zhüvae jiangjo yuta topvülo ntsinran jiang phajae tssov. 30 Ntsanrük jina eküm vanthukala, khatola jenbukta jina hoji roe siala. 31 Kyon mmhom jiango limha shina yantso piv, hoji tsükona nthae osi mmen kyon jiango ezüp pivto ntsinrüngu lia.
1 Ntsinran eli kyon otsük akvüna onte woriathüng oyam na elanchoyicho tssohungala. Oyam na elanchoyicho n mathao jijo zhüvae esüa tüv. 2 OPVÜI na kyon mmhom jiang thüngi emathatala, tokhatola okyak n mhomo jiangjo ombona nlan piala. 3 Ntha elhinajo noying jüngthe hansi n yiala, tokhatola ntsanrüng jiango chüngchünga vanthukala. 4 Engh mmhom jijo orapvü myingthüng osi longshi tssoala, tokhatola engh ochona orapvü yikrathuka sana jijo ombo ryulo rano jücho tüv. 5 Ntsanrük kyon jiang na ntsalona ni etsiv, tolia nthae jiangna jo ni ejithechiv tae tssohungala. 6 Nthae jiang yijo münghan yi tssoala, tokhatola ntsanrüng jiang yi jina ekhenthuki vamo jiang mpa shanchoala. 7 Nthae jiango oküpi jeyi siala, osi onte tsoronichen n liala, tokhatola ntsanrüng jiang wopan jo vanrhüa yiala. 8 Nina kichuk jüna kyon na ni thüngu, tokhatola ni behachojo kyon na ni zerüpvü. 9 Tsüphoe esüa etssophyosi khangtsünga vamo ji thüngina jo kyon shae esülia elhingoe tsoa vamo ji mmhomo. 10 Ntsanrüng jina ombo ekümrümo jiang nzanala, tolea nthae jiang na onte ekümrümo jiang ntssonshiala. 11 Lijon kongtsüngo jina etsoyu pvülyua liala, tolea ethev n lio elhi jiang lona yuta ezio jijo zhüva elhi. 12 Nthae na chokao jijo yuta topvülo ntha elhi etssovji, tokhatola ntsanrüng jina chüngchünga vanala. 13 Nthae jijo ombo yi jina ombo sala, tokhatola ntsanrüng jijo ezüp lona ombobo tsanchoala. 14 Ni yantso jo nina ntio phyoa osi tssoasana jilona chiyiv, ntiotssole nina ntio manchosana hoji hungu. 15 Zhüvae jiango yuta topvülo onte elan to nchüma vanala, tolea kichuk ejüi jiango oyam püngno yi engala. 16 Zhüvae tsüka lüm tsükana ombona zakto oyam ntsithukala, tokhatola nchümri eli jiango oyam na yikvü yilolea nzonntan tssoe siala. 17 Nina kvüthüng ntsa nsanasana ntsanrük elhi tssoala, tolea echüng phyo jijo n tsanrük elhi tssoala. 18 Nchümri n zev nsamo jina yonri esüa tssatssoala, tokhatola nchümri jüa nsamo yi jina emithukala. 19 Ejüng jijo esüngaro tae vanala, tolia ntsa jijo nchünkhon vanala. 20 Okyak n mhomo jiango emhuk ekhen tssükatala, osi elhi mmhom etssoe jiango ematha hungu. 21 Ntsanrüng jiang ponojo n mhom n yiala, tokhatola nthae jiango ezüp tae ndukala. 22 OPVÜI na ejüng ephyoe jiang tssakala, tokhatola ochona ontena nsamoji engatheta vanasana jiang thüngi jo OPVÜI na emathatala. 23 Nchümri eli jiango ontena ntsioji yingto vanthukala, tokhatola zhüvae jiangna onte n penri ji echana woala, 24 Kongtsüng ryumhen jina etho nipiv, etho njüo jina oyam ezi ni kümü. 25 Wonkhyu jina ni ematha ji moni nisiyiv, tolea nzanyi jina ni longshithukvü. 26 Ntsanrük jijo ombo shom ji lansoe, tokhatola nthae ji etssophyo na onte sosorala. 27 Nina etho n jüv vanchojo nina yamoji kvüthüngha n hung, tokhatola nina kongtsünga elhi tssona nina nkhonmmha hungu. 28 Ntsanrük jijo eküm lanji, ntha nri jijo echü lanji.
1 Nchümri elio tsoe jina opo na elanchoyio jiang jüngra engala, tokhatola kangtsüi jina kvüthüngha ombo ori n phyochakala. 2 Kyon mmhom jiango onte yi jiang man yantso piv, tokhatola oyam kyakthechi jiango jenpokta elhi ji nhyaktsüka vanala. 3 Nina ntio nsana sana ntangnshona osi ni eküm nkohoa. Ntiotssole thama nsamo jina ombobo yesoala. 4 Etho njüi jina olan taro eyiloa vanlea ntia hungu mek. Kongtsüngo kyon jijo ombona ntio jüpona sana ji hungu. 5 Ntsanrüng jiang na ejüng nsamo jiang tsakala, tokhatola nthae jiang yi jo eyikrathao osi omying mmentao tae tssoala. 6 Ntsanrüng na noying kyon jiang nkochetala, tokhatola ntha nri yakchia mmen kyon jiang monthukala. 7 Kyon ochoang najo ejüeli esüa etsophyoala, tolea ntia n liala. Thanpoe jiango yantsae esüa etssophyosi elümoto ejüeli tssoala. 8 Ejü eli jina ombo eküm nkochev tsükona orang jiang tsütsao tssoala, tolea yantsae jijo ochina ha n khenthukala. 9 Ntsanrüng jiango omi düngra vancho tüv, kyakchung n mhon jiango milon mheta vancho esüa tüv. 10 Kangtsü jina ezüp tae shichetala. Oyam ndungntsung yamo jijo nchümri licho tssoala. 11 Ni ejüeli ji kvüta laroa hungasana jitata laroa moni siv, nina kvüta sanga mmyochoa sana jitata rankata pvüsonpvüria vamvü. 12 Kvüthüng eyilo ji monthaka na, lümbüm jiha monala, tokhatola eyilo bencheo jina ni longshithukala. 13 Nina püngnoyi mmhom jiang n khia tssona nina ezüp chonala, hoji tsükona püngno mmhom jiang benphia tona tsanchovka. 14 Nchümri eli-i jiang püngnoyi jiango eküm chenkaphen, ontena ezüp yutalo ni tsanchothuku. 15 Nchümri erovo jina yikrachi hungala, longtsüka n li jiango emonlani yiala. 16 Kichuk ejüi jiangna yuta topvülo elhi n tssothüng nchümdena la, tokhatola zhüvae jiang na onte nbenri ji thenchoa rümphiala. 17 Longtsüka n lio yithenpvüi jina ezüp hansi yiala, tokhatola longtsüka eli-i jiang na noying hansi yiala. 18 Kyon ochona püngnoyi engathei n khia sana jijo yantsav osi yikra ndokvü. Ochona oyam na elanchoyio jiang enga sana jijo yikrachiv. 19 Nina rungo ji ehungu jo kvüta mmhonchoato! Behae jiang na n mhom jilo na nkae n yihungala. 20 Nchümri eli-i jiang jokim tssoa tona niha nchümri livka. Nina nthae thüngi jokim tssochojo ni yesovka. 21 Mmen kyon jiango yuta topvülo ezüp tae ndukala, tokhatola ntsanrüng jiango mmhom khi yantsov. 22 Kyon mmhom jina ombo tsoronichen vayio tüv ejüeli liv, tokhatola mmen kyon jiang ejüeli jo ntsanrüng jiang echi tssov. 23 Oli hae esio jiang lona yantsae jiang etsov elümoto richov, tokhatola n tsanrüng jiang na oli jiang n jom hae siv. 24 Nina ni tsoe ji ezüp n pia tssona nina n zancho tssoala. Tolia nina ombo nzancho tssona ombo elanchoyia püngnov. 25 Ntsanrüng jiango etsoyuv etsson liv, tokhatola nthae jiango yuta topvülo wondona vam.
1 Wopan mmhom jijo eloe nchümri mmhom jiang na soyingala, tolea zhüva-zhütük jina jo roe siala. 2 Ntsanrüka vansi nina OPVÜI yikrachiala to oyam ejüa, tolea n tsanrük jina jo nina OPVÜI n kyuchiala toji ejüala. 3 Zhüvae ji kangtsü jina oyi kyunga ombo nshasthukala, tolea kichuk ejüi ji yi jina ombo nkochetala. 4 Lirhon mangsü n vamvü jo nison ji ejüng tssov, tokhatola lirhon mangsü vansanati nison ji pyingüv. 5 Longtsüka eli-i ehungpvüi jina yuta topvülo ntsa phyoala, tokhatola longtsüka n lio jijo ejüng tae phyoala. 6 Kanchankangri kyon jina kvüthüng ha ntsinran n kümala, tokhatola kichuk ejüi kyon jina elaro engathe khiala. 7 Zhüvae jiang thüngi na kontae vana, ontena ni püngno tüv ntia n li. 8 Okyak eli-i jijo kvütoli kichuk ejüi tssoala? Ntiotssole ntio tssov sana ombona ntsia. Eyim jina ntioli zhüvae to etssophyoala? Ntiotssole ombona ntsikhancho to nchümala. 9 Zhüvae jiango mmen tssochelea n vwongkhyuala, tolea kyon mmhom jiang na nlan siyi ji yanala. 10 Ni longshi jo ni echi tae. Ni nungra jiha ni echi tae. Ochina ha ni nhankyoche. 11 Kyon n mhom ji ki ji moni sicho sülo leha kyon mmhom ji kijo lia vamvü 12 Nina olan nsaka to zecheo jijo echü lamoe eyio mpato tssov. 13 Emao jina nungra mphoe sikhuka. Ematha ji monthakana nungra tae tssoe siv. 14 Kyon n mhom jiango onte na mamo ji hungu, osi kyon mmhom jiang onte elhi ephan yantsov. 15 Zhüvae jina olan topvü longtsükhuka, tolea kichuk jüwo kyon jina ntangnshona khochiala. 16 Nchümri elio jijo ezüp lona tsanchoa vanala, tokhatola eyim jina thama etssophyoala, osi zi n zev etssophyoala. 17 Lümbüm etsuk elaro jiang na zhüva elhi tssoala, tolea nchümri eli-i jiang na lümbüm mmyima vanala. 18 Nchümri n lio kyon jiang na onte zhüva man ji hungu, tokhatola okyak eli-i jiang jo ntsinran khi yantsov. 19 Kyon n mhom jiang na ntsanrüng jiang mhadungo epyakthe nzanchi chom. 20 Yantsae jijo ochinaha, osi ombo kiren jina tia n khyingala, tokhatola ejüeli jijo oshom elümoto vanala. 21 Nina ematha ni jüpona tssona yantsae ji nzana, ntiotssole kyon tsükatia ntsakao jijo mmen. 22 Nina elhi mmhom tssona kyon thüngina yikrachi osi longtsüka hungu, tolea nina elhi n mhom tssona ni woriala. 23 Elhi tssoa tona eküm süphilanka livka, tolea nina khokthei nsha tae vanchojo ni yantsav. 24 Kichuk ejüi jiango ejüeli mmhayiala, tolea zhüvae jiango onte zhüva jina oyam na onte chethetala. 25 Ehungpvüi jina ntsa phyoa na ombona eküm shanchoyiala, tolea ombona ejüng phyona oyam eküm ejithechiala. 26 OPVÜI yikrachio ji yakchia kyon tsüka jina ombo osi ombo wopan ji tsancho ekümo noyinga vanthukala. 27 Echü lona ni tsancho hungalo? OPVÜI kyuchio jijo eküm chenkaphen ji. 28 Mesao ji kvüta tsüphocho sana jijo ombona kyon kvüta sa sana jilona ntsiala, kyon n vam jo ombo ntia mek. 29 Nina yingto vana tssona nino nchümri eli-i tssoala, tokhatola nina lüm etsuk elaro cho tssona nibobo zhüvae to ejüala. 30 Lümbüm noyingo jina otsük mmhona vanthukala, tokhatola mhyiktsso ranki jijo rano jücho tüv. 31 Nina yantsae jiang khangshina onte liyingo Potsow ji nina yikvüala, tokhatola yantsae nzamo jijo Potsow ekhüm elhi tssoala. 32 Nthae jiang na onte popo onte elhina onte tssüngchoala, tokhatola kyon mmhom jiango onte düngochüngo na onte nkochetala. 33 Kichuk ejüi otsük akvü nchümri lo ozen jüala, tolea zhüvae jiang na jo ozen okyak jo ntio sana n tsi. 34 Ntsanrük na jipo ji tsüphothukala, tolea mmen jijo jipo yikrathuk elhi tssoala. 35 Mesao jiang na elhi tssorhüpo tsüphoe jiang thüngi emathatala, tolea n tssojamo jiang thüngi jo ezüp piala.
1 Emiroa janlamo jina lüm etsok bükala, tolia ntssana nsamo jina lüm etsuk rankayiala. 2 Nchümri eli-i na nsanana ontena ntsinran ji engav jüa phyoe oyam ezoala, tokhatola eyim jiangna jo oyam na n ngatheo nsanala. 3 Meta topvülo ntio tssoa sana OPVÜI na hungala, etena mmhona tssolea, n mhom tssolea ombona ezeta vanala. 4 Nzan yi jiangna eküm epiala, tolea haruk yi jiangna ni mon eküm roe siala. 5 Nipona ni püngno ji nkhanziv siwo jijo zhüva elhi, ntiotssole ombona ni elanchoyio jiang khichov ji oman lia. 6 Ntsanrüng jiangna onte ejüeli jiang linrhüa vanthukala, tolea nthae jiang ejüeli jo ezüp yutalo moni siala. 7 Ntsinran jo kichuk ejüi jiangna meta pyinga yithukala, zhüvae jiangna mek. 8 Kyon mmhom jiangna randana na OPVÜI na emathatala, tokhatola nthae jiangna othan pio ji ombona tssakala. 9 OPVÜI na nthae lanka jiang tssakala, tokhatola ochoang na elamo tssoa sana jiang nzanala. 10 Nina sulyuo elhichojo enov tssoa ni ezüpthukvü, osi nina oyam elancho yi n khichoa tssona ni chüv. 11 Echüli ji lea hojilo ntio lichosana OPVÜI na n tsiv n van, tona kvütoli kyon tsükana ombo nchümri jiang Potsow thüngina mphochevla? 12 Kangtsüi jiangna oyam na elanchocho n mathatala, ontena nchümri eli-i jiang thüngina elancho kvühüngha n khiala. 13 Lümbümi emathata lina menseta omha tsoyua vanala, tolea onte nungra na omha nzhüi eyukae evantokala. 14 Kichuk ejüi jiangna jo oyam thüngina ntsi khihungala, tolia eyim jiango onte eyimtsari jina lüm büki tae vanala. 15 Yantsae ji eküm jo ntümjak na esang eküm, tokhatola longshi kyon jiangna yuta topvülo emathata eküm vanala. 16 Ejüelii kümi ezüpi vamo ji thüngina jo yantsae kümi OPVÜI kyua vamo ji mmhomo. 17 Tssakta nkongta lio tüv yolo vani etsoyu mmhontso ji tsoa vanthüngo na jo nina nzamo kyon jiang yolo lomosüo tsoa vamo ji mmhomo. 18 Lümbüm elaro tsuko ji yakchia ekhiranta chiyiala, tolea erüm eto jina noying hana yiala. 19 Nina etho n jüv vanchojo meta topvülo emhuk elüm tae tssov, tokhatola nina ntsanrüka vana tssona ezüp liv mek. 20 Nchümri elio tsoe jina opo emathathukala. Zhüvae ji taena oyo khoe siala. 21 Eyim jiango onte eyimtsari jina lüm joa vanala, tokhatola nchümri elio jina elan jo ntiosana hoji tssoala. 22 Ndungtssung topvü khyarhyui khia tona nina ekhyo hungu, hojiang n thev jo ni elongjov. 23 Yuta tsüngon jilo erao yi nchümi nsamo jijo kvüta longshi licho ato! 24 Nchümri eli-i kyon jiangna eküm lamoe yio lan ji yani dungala, echülan oküpoe joyio ji dunga mek. 25 Kangtsüi jiang ki jijo OPVÜI na roe; siv, tokhatola ombona emi tsüka ji ejüeli jiang nkoyiv. 26 OPVÜI na nchümri n mhon jiang tssakala, tolea khyingtarata yilan jo ombona chokatala. 27 Nina n tsa lankawoe na ekhak yancho jo nina ni wopan ji ezüp lo thechiala. Ekhüp ti-khia, tona nina harishia vam. 28 Kyon mmhom jiangna ontena janlan n pithüng nchümchoe zetala. Nthae jiango zakto oyam janlanala, tolea ezüp yanchetala. 29 Kyon mmhom jiangna randan na OPVÜI na engayiala, tokhatola n mhon jiang jo ombona n kharo tssoe siala. 30 Mense mha jina ni emathathukala, osi yithen mmhom na ni longshia nchümthukala. 31 Oyan na ni elanchoyiathüng nina yingto engae khina nino nchümri licho tssoala. 32 Nina oyam thüngina ntsi ekhiv ekhirana tssona nipopo tssatssoala. Nina elancho yi ji khichoa tssona nino nchümri likata ni kümü. 33 OPVÜI yikrachio jijo ntsiran tsotso ji. Nina yikrachi n hungthüng nipopo teri kümdem lia.
1 Etena matangta vanlia, oyi etanpvüo jijo Potsow vana. 2 Nina ntio tssoa sana topvü elana to nina nchümkhuka, tokhatola ni lümbümi jüwo jijo OPVÜI na tsseni ni zeyiala. 3 Ni matangmari jianglo OPVÜI khi ni mmhayithukvü chona, tona hojiang benchevka. 4 OPVÜI na lyuyingcho topvü tümka lia lyuyingcho, osi nthae jiang jo roe esio jilo echev. 5 OPVÜI na kangtsüi jiang topvü tssakala, osi ombona kvüthüngha ezüpina onte n-tsanchothuk. 6 Longtsükata ntsa vana tona Potsow na ni mmen jiang ni siyiv. OPVÜI jancho zoa, tona n mhom ntina ha ni rhakvü meka. 7 Nina OPVÜI emathathukna ni ri jiang lea ni shom kümthukcheta. 8 N tsanrüko na ejüeli elümoto hanthei vaoji thüngina jo ntsanrüka tara lioji mmhomo. 9 Nina matangmari likhuka, tolea Potsow na hojiang etssov lo olan ni sov. 10 Mesao jina Potsow etho khi oyi nsanala osi ombo methak jiang jo yuta topvü lo elanala. 11 OPVÜI na efü-seri jiang ntsanrükthuk hungala, osi eyemo jiang ntsanrüka yenthuk hungala. 12 Mesao jina n mhom elhi jiango n rümkhokala, ntiotssole ntsanrük jina yansaji chüngchüngthukala. 13 Mesao jina ntsayi zohungala osi ochoangna ntsa nsana sana ombona onte khyingala. 14 Nchümri eli kyon jina mesao ji emathata vanthukvü ekhyo tssov, ntiotssole mesao ji lüm tsükana ochosana chüthukvü. 15 Mesao jina emathayio jijo tsüngkyingo elokna eryu hansi oyi jothuko ji esüa mmhona osi hojilo jo eküm jüa. 16 Shona janti lio ji thüngina jo elümna ntsinran osi nchümri mmhom lio ji mmhomo. 17 Kyon mmhomo jiango olan n mhbmo jiang nkachoa yentsala, hoji tsükona nina ntio lan dungasana tüngochüa, tona hojina ni eküm shanchokhuka. 18 Kangtsü jina emon lamoe soala, osi kanchan jina oküpoe tssüngchoala. 19 Kangtsüi jiang yolo tsüka kümi onte sükhyingo shümnhyao ji thüngina jo teri kümi yantsae tssoa vamo ji mmhomo. 20 Ntio ni püngnocho sana hoji engatheta vana, tona nina ekhyo hunguvka; OPVÜI lo longtsükata tona nina emathata vanchevka. 21 Nchümri lia lüm ranbenthako kyon jijo ombo engathe elio jiang yakchia kyon na ombo ntsiala. Ombo yi jiang kvüta nünga nsana sana jitata oyam enayachetala. 22 Nchümri eli jina jo ntsinran lo eküm jüa to engathetala, tolea nhyatsanhyari püngnov jo yuta ezio jitae tssoala. 23 Kichuk ejüi kyon jiangna zie zedensi oyi nsanala, hoji tsükona ontena ntio phyoasana oyam na engathewo tssoala. 24 Nzan yi jiango tssakijü tvü engav jüa nünga osi ni tsük tsükona mmhom tssoala. 25 Nina olan nsaka to zecheo jina echülamoe yicho lea tssokhuka. 26 Elhi etssoe jijo etsoyu chokao jina elhi kyongkata tssoala, ntiotssole ombona ombo wonton büka vanhungala. 27 Kyon n mhom jiangna oyam tssatssov lanka yanala, osi onte yi jiangna n mhom esüa runga vanala. 28 Yiro-yiri jo nthae jiangna hanphiala, osi hojiang yakchia ninyang shichetala osi oshom oden khosotayiala. 29 Jenbukta kyon jiangna onte shom jiang kyakthechiala, osi tsso rophyoroe esio lamoe onte soala. 30 Kyon ochoang na oho chancheta emaphia osi omhyik ekyipa ni ejüana tüngochüa, Ontena ni pono n mhom etssov kyaka vana. 31 Harishi jijo ntsanrüng jiang yantso, osi otssan pyoko jijo ntsanrüng jiang myingthüng kikho. 32 Etho ekhyung tssothungonajo erüm etoe tssoji mmhomo. Yantsü totona sayakhuko ji thünginajo nibobo sayakhoko ji mmhomo. 33 Kyon jiangna Potsow lüm erüng ntsivji phyalyu fuki zetala, tolea janlan jijo Potsow na methakala.
1 Wopan lo ninyaang zarak JL ekümo vansi shaphia tsoyuta vamoji thünginajo, hümri nkong taelea tsoa lümbümi noying lia vamoji mmhomo. 2 Phajae okyak elio jina kipvüo ji tsoe ethelan n lio ji sayakhuka osi wopan jilo tssentso kümkhuka. 3 Shona janti jo omi khi rii zetala, tolia kyon lümbüm jo OPVÜI na ojang tssoe zetala. 4 Kyon n mhom jiangna okyak n mhom jiang yi engala, osi ejüng ephyoe jiang na ejüng jiang engahungala. 5 Nina yantsae jiang emakao jijo onte lyuyingo Potsow ji emakatala. Nina oyam sükying jeyiathüng emakachojo ni ezüpthukvü. 6 Khyingroe jiangna onte opo tsükona kangtsüo ji esüa eson jiangna onte tsoerüi jiang zesi kangtsüala. 7 Oyam na yikrachio kyon jiangna jo ejüng n phyoala, osi zhüvae jiango ntia ethelan elio tüv ephyov tüv ntia nliala. 8 Kyon ochoang sana jo ekhüp jina ozen esüa elhi tssoalato nchümala, osi ekhüp jina olan topvü tssocheta to nchümala. 9 Kyon khi ni kyingthuk hungna onte wori jiang nlan siyia. Kyon ori jiang zeyia vanchojo khyingta rata ji roe siala. 10 Zhüvae jijo yenjo nzo bena tasanati engathetala, tolea kichuk ejüi jijo echunga makcho taena engathetala. 11 Nthae ochoangna yuta topvülo ezüp shieheta vanchosana jiang pono echü jina haruka yithen hansi roala. 12 Zhüvae jiangna onte eyimtsari elhi n tssochov tssoa vamo jiang nduko ji thüngina jo sevan oro moni yana vancho tüv opvü nduko ji mhomo. 13 Nina mmhom man ji n mhom pilanchojo kvüthüngha n mhom jina ni kilona n kachoche. 14 Ekhiranta benkao jijo jütüng cho bukrhüpvü benkata tüv ka, ovüngna hoji züpi esanthuki sia. 15 Yingto evan ji nlan pioji, elani nlan elio kyon ji yachi yithuko ji to woniata OPVÜI na tssakala. 16 Zhüvae ji ntsinran epiv tsükona orang ezio jijo ntia oman n li, ntiotssole zhüvae jinajo nzontsüna engathewo tüv engathe n liala. 17 Oshom jiang na yuta topvülo nzan ejütala, tolea jenilo ezüp n nghankyota tssona ntio oman lichola? 18 Oyam chiwoma elov phyochaki evao jijo nchümri n licho tssoala. 19 Mmen chokao jijo ezüp choka cho tssoala. Nina yuta topvülo ni mmhon jitae rüa tssona nibobo ezüp yanala. 20 Ochona n mhom nchümnria osi nsana sana jina tssorophyoro yaka ntia mmhom n hung. 21 Otsoe ochoangna zhüva elhi tae tssoasana jiang opo jijo nungkhunungra yaka thanpo ntia n li. 22 Longshia vamo jina mozhü esüa otsük mmhona ni vanthukala. Yuta topvülo eyuthei tae vamo jijo echü etssüng esio esüa tüv. 23 Yitssoe kyakrüpo jiangna mphoa ekhüp khiala osi ntsanrük n benphiala. 24 Kichuk ejüi jina elhi mmhom etssov zikatala, tokhatola zhüvae jina lanka tarolo yonthechiala. 25 Otsoe zhüvae jina opo nungrathukala osi oyo etho jaka nchümthukala. 26 Yingto evan jiang echha khiyio jijo elan n li, kyon mmhom jiang ezüp pio jina ntsa ji yesothukala. 27 Kyon ochona ombobo chüngchünga vanasana yuta topvülo jo oyi n sanala. Noyinga evamo jiangjo nchümri njüm hanala. 28 Otsotso tssoana zhüvae jiang mpato ontena emen ntsüptae yingto vanathüng jo kichük ejüi esüa zechetala.
1 Kyon ochoangna oyam thüngi n khyingta chetasana jiango onte echitae nchüma evan tssoala, ontena kyon topvüna ntsiwo ntsa jilo lea ekhiranala. 2 Zhüvae jina ombona ntia tsintsicho sana ji zie n zetala, osi ombona tssohungo jijo ombo okyak elito oyam khi ombo zechethukhungo jitae. 3 Mmen tona yikra tojo oni jokyim. Nilo yikrachi ji moni sithuka tona hoji dungchejo yikvü yilo tssovka. 4 Kyon tsüka ji yijo nchümri mmhom chiyiphen tssokhuka, jümang esüa ejungu osi zhükhvüro jü esüa ntsüngrüngo nchümri tssokhuka. 5 N lan kyon ji yilo theyisi yingto evanji ntsa n tssothuko jijo elan mek. 6 Zhüvae ejomana ekhiranta so katana ontebobo tssungkvü yantala. 7 Zhüvae jina nsanana ombona tsirhi doni vasi tsanato ombobo omboyi jilona sala. 8 Wonroyiro jijo enüngu esüo jina etena elaro nzhüi siala. 9 Etho n jüi kyon jijo tssorophyoroe kyon ji esüa n mhom kyon tssoala. 10 OPVÜI jo tsanthephen zenki chüngchüngu esüa tüv, ntsanrüng jiangna owo ombolo tsanthetala. 11 Tokhatola ejüeli jiangna jo onte ejüeli jiangna yantsü pikhfü na nkoni vacho esüa onte chonglanchi vana to nchümala. 12 Teri kümi vamo jiang yakajo ochia kyon na n yikrachiala. Kangtsüo kyon jiango emon lamoe tssoala. 13 Nina n janlanthüng vüngi engasa, to n tssoana niji eyim osi oyam yikvüi tssoala. 14 Ni nochonoriana nina eküm vam mhanka lio ji yakchia emikhuka, tokhatola nina hoji mona tssona ni eyilo wokhao ji monthaka. 15 Kichuk ejüi jiango yuta topvülo engae ntsi ekhiv methaki vanala. 16 Nina ethelan eli kyon ni nduk hunga alo? Yantso ombo benia tona elaro ombo ndukchev. 17 Yitssoki ochona nsandena sana jijo ombo panlan jina n santhüng jo elan kyon ji esüa engathetala. 18 Yitssoki etho eli kyon otsük eni ekhirantana phyalyu fuki elan yantacheta. 19 Ni jenio nzanchia tona ombona yantsü pikhfü chüngchünguv esüa ni nzanchiv, tokhatola nina ombo thüngi khondacho jo ombona kipüng ji khani siv. 20 Nina ntio nsana na ji man ji nina vanchukchiv. 21 Nina ntio phyoa sana jina eküm monthukhuka; hoji tsükona ni yi ji man ntio sükying chiyiana nina khichev. 22 Tsoeni yani vana tona ntiosana mmhom yanchecho tssoala; tona OPVÜI na ni nzancho tssoala. 23 Yantsae jina oyi nsana na ombona teri kümi jonjiala, osi ejüeli jina janlana na haruka janlanala. 24 Oshom kvülona jo sunga n vamo ha liala, tolea oshom ochoangna jo jeni ndüng lona mmhonka tssoala.
1 Ejüng phyoa zhüvao ji thüngina jo yantsalea ntsanrüka vamo ji mmhomo. 2 Ntia n tsina eki-evunga wo ji taena jo n bentala; erüm esi n lioji yakchia nina emhuk elüm ndukvü. 3 Kyon ochoangna jo onte eyimtsari lona ezüp nduksi OPVÜI ntanala. 4 Ejüeli jiango yuta topvülo oshom ethan yanchetala, tolea yantsae jiango ontena oshom tara vamo jiang tia n tssüngyakhukala. 5 Nina yitssoki ejüng phyocho jo ezüp ni piv, nina tsanchov mek. 6 Otsük akvüna kyon ethelan eli jiang khi onte emathayithuk hungala, osi otsük akvüna hotvü kyon jiang shom to hoala. 7 Yantsae jijo ombo ojenio jina tia ethev n liala; ntiotssole ombona oshom n van. Ombona elümoto ekhyo tssolea oshom tsüka tia n yanchetala. 8 Nibobo kyochia osi engathe khia; osi nina ntio engathechosana nchümcheta tona ni tsüka rankata yivka. 9 kyon ochona yitssopheni ejüng phyoasana ezüp jilona n tsanchoala; ombona ezüp hungala. 10 Zhüvae jiangna etssonelüm lo n vam shikhfü, osi ezii jiangna tsüphoe pono esae n tssov lia. 11 Nina nchümri jüo, nibobo lüm sayakhukvü. Oyam na ni thüngi woriathüng n tsichoto siyio jijo etssophyo mmhom motsünga. 12 Mesao ji lüm etsuk jo hengho erhyua tüv, khatola ombona ekhyingo jijo ero poni eryu jokata eryu joa tüv. 13 Otsoe eyim jina opo yesothukala. Tokhatola oyam nyankata mungo kikhüm jijo ojü owon tssoa sojoa vancho tüv. 14 Kyon tsükana ombo pvüpoe thüngina oson-oki osi otssi orang tssentso hungkhuka, tokhatola OPVÜI taena kichuk ejüi kikhüm ombo pikhuka. 15 Ni chokana etho n chüv vana; osi yipa vana, tokhatola khanga evamo tssov. 16 Potsow yizüng jiang benphia tona nina sunga vamka; osi nina hojiang n zotan tssocho jo ni chüvka. 17 Nina yantsae pio jijo OPVÜI thüngi eno pi vacho tvü, osi OPVÜI na ni pilam. 18 Ni ngaro jiangna püngno engakhuka nonghori tssoathüng na püngnoa. To n tssona nina ontebobo roe esiv lo nzanchicho tvü. 19 Ochona sana lüm tsükshina ji man ji ombo tssükathuka. Nina ezüp lona yenjoa ombo shanchona nina elani ombo nzanchilanchev. 20 Nina oyam ndungtssung enga osi engathe ni khihungna, tsüngona lojo nchümri eli-i ni kümvü. 21 Kyon na lanka taro matangi vankhuka, tokhatola OPVÜI na ombona lüm na rungo ji ephan tae tssov. 22 Tajo elüm jo yikra lia; Ejüng ephyo ji thüngina jo yantsao ji mmhomo. 23 OPVÜI yi enga tona. nina sunga vamka, osi lüm joa ezüp n lina vamka. 24 Kyon ochoangna jo onte büngi etsoyu thechiv tia n tssohungu etho n jüala. 25 Kangtsüi jo ezüp piv lia, tona kyon ochoangna lanka mmhonkao n tsichosana jiangna engathe khiv, Ni ji nchümri eli tssona oyam na ni elanchoyio jiang engae khiv. 26 Yikra n li osi nzan n li kyon jiang taena opoji ezüpthukala mekana okina oyo phani siala. 27 Otsoeyo, nina shikae ekhiv jilona esanana nina ntsithako jiang mpato nsungu mhechorae siv. 28 Ehungpvüi ji oyam thechiyenchio ehungpvüi methako jilo jo ntsanrük n jü. N thae kyon jiangna n mhom jiang chokatsünga tssoala. 29 Kangtsüo zhüvae jijo tsüngkhvü nduki tsonrüngu.
1 Suko tsükshia yuo1 jijo ni won chuka zhüvae ni kümo ji tae. Kino jijo enhya tsari elhi. 2 Nina hengho erhyua vancho kyuato mesao lüm tsuka vamo ji kyua; nina ombo lüm tsukthuko jijo nibobo jaktoni chücho tüv. 3 Zhüvae nti-nsa na ekhiranta benkakhuka; nina jiang yolona tsanchoki vanwo jilo yikrachi ejüo. 4 Lijon ochona etho n jüv yuta eben lo oli ji n rhona sana jina olieriv n liala. 5 Kyon tsüka ji nchümri jo jükha ejungu chungi ojü jücho tüv, tokhatola nchümjan eli jina hojiang ranchuki khicheta. 6 Otsük akvüna ombombo ntsanrük khatala, tolea hotüv kyon jo ocho tsov sana yani zeta. 7 Ngaroden ochoangna opo ntsa-nrüng osi elamo etssoe vana sana jiango oton eli-iden. 8 Mesao jina yitssov nhyaka khukthe vanala osi ombona kvüthüng n mhom ji hungasana hoji chethetala. 9 Kyon ochona sana ombo nchümri otsotso ntssünga to phyokhukcho alo, tolyui ombo mmen jilona nkachoa alo? 10 Kyon ochona n tsanrük efü-seri tsütsata sana OPVÜI na tssakala. 11 Ngaro jina mpato ombo tathi ji elhi yakchia ombobo ejüa vanala; ombo ji ntsanrüka mmhoncho tssona nina chethev. 12 OPVÜI na hungphen omhyik epithaka osi zophen eno epicho. 13 Nina yipa tae vanchojo ni yantsav. Nibobo n tssochov elhia vana tona etsov pvülyuvka. 14 Eshio jina oman tssüka to yuta topvülo erejanala, tolea oyam yolo owo ombona ekhichoe ekhio ji phyoa kanchanala. 15 Nina ntio phyoa sana nibobo chekana nina tssentsü shona licho lona oman likata. 16 Ochona zhüva lona amoatsi kyon tvüna ochi epvüo ji khi ombo ha to hanasana ombo ejüeli jiang khi elov ntankae vav shikhfü. 17 Nina n tsanrük yakchia hungwo ji etsoyu mmhom tsov esüa emathata tsokhuka, tolea nsungu nina hajang opüng pyinga ekhümthecho to tssov. 18 ndungntssung mmhom khia, tona nina khyovka; methak nlivjo wontssoniroa ritssolo ti woa. 19 Yiroyiri najo ntia mphoe n vachetala. Kyon ochoangna oyi kyunga na jiang nkachoa vana. 20 Nina nipvüopo rhiyicho jo nino emüngi omi mhecho esüa tüv ekümo vanchokchiv. 21 Nina kvüta laroa ejüeli hungasana jitata mataroa oman liv. 22 Oyam ori jiang nlilam tsükona nibobo tiyana. OPVÜI lo longtsükata, tona ombona elanchoyivka. 23 Kyon ochoang na efü-seri n tsanrükvü tsütsata sana jiango OPVÜI na tssakala. 24 OPVÜI na ete ekümlan ji e methaki lia, tona kvütoli ochona ombo eküm mhadung ntsivla? 25 Nina Potsow othan n pithüng mmhona nchümi zeta. Henasüi jo ni püpa mpa nchümkhuka; 26 kichuk ejüi mesao jina n lan etssoe ji yanchev, osi nzana n van na ezüp ombo piv. 27 OPVÜI na lümbüm osi tssenche epicho, etena etebobo n mphoche. 28 Mesao jina ombo yansa ji ntsa, elan osi nsa esathüng nandang jo etholo vam. 29 Etena pungdenro etho ji thanthüngala, osi otssan pyoka eson jiang yikrachiala. 30 Kvüthüngna jo ete lanka edungphiyiv ji elümoto ryusanga lyui dungphiala.
1 OPVÜI na mesao lümbüm ji zhükhvüro sophia to elaro sophia tsütsatala. 2 Nina ntio tssoasana jiang topvü elana to nina nchümkhuka: tolea OPVÜI taena ni lümbüm ni tssenia vanato nchümcheta. 3 Ntio jo elancho osi ntsacho sana hoji tssoa, tona nina ekümrüm than pio jilo mmhonka OPVÜI emathathukala. 4 Nthae jiango kanchan osi mhatssoniro na onte sayatala, hoji jo mmen elhi. 5 Tüngochünga selangotünga, tona nina etsson elüm hunguka, nina lalukroa nlansüngcho jo kvüthüngha tssochyua hungu meka. 6 Nina n tsanrük lona ejüeli hungwo jijo esüngaro moni siala, jitae mek, tokhatola echü jilo ni sosi odensanati ejüeli jiangha moni siala. 7 Nthae jiango onte jenbukta elhina khalanchi siala, osi ontena elamo etssov ji ekhiranala. 8 Nlamo etssoe jiangna lankhvrüp dungala, osi noying kyon jiangna elamo ji yani tssoala. 9 Oyam nyanka nrhyüo kikhüm ji nzo oki vanthüngona jo mhonki ehungo vamo ji mmhomo. 10 Nthae jiango yuta topvülo n mhom etssov nhyaka vanala, ontena ochia khonzana n chümala. 11 Kvüthüng kyon jina ezüp hungasana noyingo kyon jina ha engathei ekhio hungala. Kichuk ejüi jijo oyam na ombo püngno jilona engathei khiala. 12 Thotsü Potsow na n thae jiang kichungi tssoa yia vamo jiang ntsikhana, osi ombona n thae jiang roe esiv lo süchochiv. 13 Nina yantsae jiang ekya ji engayiv ekhirancho jo ni ekya jiha oyam na ni n ngayiv ni ekhiram. 14 Kyon ochonasana ni thüngi lüm tsukna nina yantso mphoa pio jina ombo emen mmaniv. 15 Ntsanrük elhi tssoana kyon mmhom jiang emathatala, tokhatola, nthae jiango ekya-nungra shichetala. 16 Kyon ochona etüm elan jilona nkae yiasana echü jina ombo nhyaka vana. 17 Lola ekümo vana, suko osi etsoyu mmhom tae tsoyuo jina jo kvüthüngha ejüeli ni n kümala. 18 Kyon n mhom jiangna ontena oyam echi n mhom kyako jianglo ontebobo tssükatala. 19 Oyam nyanka nrhüo kikhüm ji nzo vanthungo na jo haphoe lijüngi vamoji mmhomo. 20 Kichuk ejüi jiango onte ejüeli jiang khi pvülyu ekümo vanala, tolea kichuk n jüi jiango onte ejüeli jiang thama tsüsoa ezii siala. 21 Nzan nchümri jüa vana osi ntsanrüka vana, tona ni harishia vam, osi oyam na ni yikrachia ntsa lona ni tsütsav. 22 Rasan esopvüi kichuk ejüo jina oyam yantsü pikhfü mmhom thei vamo ji elaro khyoe yantsü jilo kyon jiang na pikhfü jilo longtsükata vamo ji eyilo moni sithukala. 23 Nina ezüp n shikav ni vanhungna nina ntio nsana sana ji zi zeta. 24 Kanchan kyon ajüa tona ana harung osi kangtsüi, mhatssoe osi nzan nli tüv kyon ni ejüvka; 25 Etho n jüi ochona elhi n tsso to phyoasana ombobo lüngthatala; 26 ombona tsso jijo ombona chokao jiang rünga vamo ji tae. Tokhatola ntsanrüng jiango oyam mpato piolona longphyala. 27 Nthae na othan ombo piana OPVÜI na tssakala, opvütssoa onte nchümri n tssüngna thamo jiang. 28 Ejüng ephyoe ehungpvüi jo ochinaha n longtsüala, tokhatola ochona mmhona nchümi zesi phyoasana jijo khichoyiala. 29 Ntsanrüng jiango ontebobo chetheta vanala, nthae jiango oponina mmhoncho esüa oyam ejüv ekhyo tssoala. 30 Kichuk erov osi etüngche jiangjo kyon ntsinran, OPVÜI na ni thüngi n mathata tssona ethev n liv siv. 31 Nina ritsso tsükona kürü me thaki vakuka, tolea ekhyo jo OPVÜI taena ni picheta.
1 Nina myingthüng tona ejüeli to onilo motsünga ethüngi ekhio salivo, myingthüng ji ethüngi ekhio ji mmhomo, ntiotssole hojijo shona janti lona mmhonkata. 2 Ejüeli ji tona yantsae ji to woniata pono kheti etsso jijo shi. Oniata OPVÜI na joyingcho. 3 Tssenche eli jiang na ezüp jiang hungchi nkachoala, tokhatola nchümi n zewo kyon jina hoji owo tssükaden-si sülamiti nungrala. 4 OPVÜI jancho zoa, osi teri küma, tona nina ejüeli hunguka, osi myingthüng lia harishia ni vamka. 5 Nina ni eküm ji nzana tssona olan dunga tssiri doni nthae jiang vayio jiang nkachoa. 6 Ngaro ji eküm lan mmhom jo ntio kvütüv sana jianglo sokata, tona ombona eküm echung hoji nchümchevka. Osi hoji lona nkae yiv meka. 7 Yantsae jiango ejüeli jiang phajae tssoala. Hoji esüa nina orang noe tsütsao jijo ni nopvüo ji phajae kümala. 8 Nina n tsanrük mojü vena tssona, tssorophyoro buku, osi nina oyam tssethechio elhi ji esani siv. 9 Longphya vana, osi ni etsoyu jiang yantsae jiang thüngi chinhya. Tona hoji man ji ni mmhayiv. 10 Kanchan kyon jiang nkachoa tona khonta rota, ekhiranta mekana omying n-mhom eyikae tsata jitüv liv meka. 11 Nina lümbüm ntssung osi onüng-yinüng ni choka na, mesao jilea ni shom kümvü. 12 OPVÜI na ejüng ephyoe jiang yi jiang khi sisi ntsa ji nkoe vatala. 13 Etho n jüi kyon jina oki tae vanhungala. Ombona hapoe chivocho jo hengho ndukvü mekana lantsüi na oyam na a lüngthav to phyoala. 14 Efürama jo tssiri tüv, hojina OPVÜI na ochoang thüngi lümbüm tsuka vancho sana jiang sala. 15 Ngaro jiangna ontena tathina ngaro elhi tssoala, osi ntaknsohn n liv tssoala, tokhatola echük sanati jina elanchoala, 16 Nina ejüeli jiang yantso pisi yantsae jiang retsoyi khi eli küma tssona, nibobo yantsae ni kümvü.
Nchümri eli Püngnoyi Thümro Jiang
17 Engachia, nchümri eli jiang na ntio phyocho sana jiang ana ni püngnovka. Onte püngnoyi jiang yandüngyanri zeta, 18 osi nina hojiang ji nchümchekhoka osi jiang eyiphia phyocheta tssona ni emathav. 19 OPVÜI lo longtsükata ni a vanthuk hungala; hoji tsükona hojiang yilan ji ana enhünga ni ezov sala. 20 Ni tsükona ana püngnoyi mekana yiphyo thümro erani vathaka. Hojianglo ntsiran mmhom tona ejürünyu mmhom to jura, 21 osi hojina ntsa jijo ntio tsotso sana ni püngnov. Hojito tssona nina hojiang yana wothoku osi ontena elamo ji hansi yiv. 22 Nina ekhyo-eto li-lato yantsae jiang ti-kyakthechia, osi yitssopheni ochonatia n zanchiv manga vamo jiang ti-kyakthechia. 23 OPVÜI na onte thung tssoa onte phyochev osi ochoangna onte eküm khiyiv ekhenthuka sana jiang ji OPVÜI na onte ekhentokvü. 24 Kyon ochoang na ejen tssoa jenbukata lümbüm hancho sana onte thüngi jokim ti-tssoa. 25 Nina n tsiv onte hungchoe n dungphichev siv. 26 Oyam ochioma jiang ni echi esüa hoe tikhia. 27 Nina n lochetana ni belüng ji mpa lae ni khiyivka. 28 Ni pyimtsümotsüi jiang na chümo erülong jiang kvüthüngha tilukphia. 29 Elhi mmhom etssoe kyon ocho vancho sana a ejüa, ana ethelan eli mesaeden jiang yulo mmhonkata tüv ni ejüv.
1 Nina tsüphoe thüngi nzo khukthe tsoyutathüng, ombo ochosana chetheta. 2 Nina etsoyu tsoyak-yuyak pashi lina, nibobo tanglanchi lia tsoyua. 3 Ombona etsoyu mmhom tae ni shayilia ntangshona tsoa; ntiotssole ombona etsoyu ji yakchia chyui ni zev mpato zia vam. 4 Ejüeli kümvü nchüma otsük oso roe sia tisanga, tolea nchümri lia vana. 5 Ni otssi-orang jo omhyik ekyip taena moni sikhuka. Ejüeli jianglo echo mpae mungshiro na pya esüa pya yi sikhuka. 6 Nkhyingnrüng tsoyupheni titsoyua, mekana ombona etsoyu mmhom ni shayio jiang tajo lüma ti tsoa. 7 Ombona, "Tara ekalani tsoa" to ni zov, khatola lümbümina jo hoto n ehüm. Ombona ombo tathi ji esüa nkhyiknrüka nchümriala. 8 Nina tsothako jiang mpato lachokehi sisi nitssayi yi jiang oman n liv siv. 9 Zhüvae ji thüngi ontsa yichüng ti-zoa, ombona hotvü engathev meka. 10 Liko erülung ehen jiang kvüthüngha ti senphia mekana nrinphen osi opvü opo n van ji liko ti rechoyia. 11 OPVÜI jo onte nkohae tsüphotsoji osi ombona onte thung ni thüngi oyi ni tssov. 12 Ni püngoe ji thüngi eno ndungi enga yia osi ni etonandang engathei khia. 13 Ngaro ji püngnov titoa ti vana. Nina zicheta erhüpo jina jo chüv meka. 14 Jithüngi najo jina ombo eküm shanchovka. 15 Otsoeyo, nina nchümri eli kümvo elümoto a mathav. 16 Nina kichuk ejü yi nsana zoana a kangtsüa nchümvüka. 17 Mmen kyon jiang omhyik tirakia, ni ekümo ni wongkhyu opvü tso jijo OPVÜI yikrachiv ji tssothuka. 18 To tssona ni mhadung mmhom ka. 19 Engae khia, otsoeyo, osi ni vanlanyilan jianglo junga nchümi zeta vana. 20 Suko tsükshia eyui jiang thüngi oshom ti tssoa, mekana jakthana thama njako jiang ti phanphia. 21 Kinokiri osi jakthana tsoyui jiango yantsae kümvü. Ni elhi jo tsosi yipa evan tae tssocho jo nsungu nina sükye mpena yiv. 22 Nipo yi enga, ombo n tssowo nina eküm vam mek; niyo sonpvüro küma na nina montsso ompvü ejüa 23 Ntsa, nchümri mmhom osi ntsinran osi tssenche ziche to shiangjo khicho mana, tokhatola yeni esiv jo ntina ha n shicho. 24 Ntsanrük kyon opo etssov jo ematha lia. Nina ni tsoe nchümri eli ji khi kangtsükhuka. 25 Nipo osi niyo khi ni tsükona kangtsüa nchümthuka; hotüv ematha ji niyo pia 26 Otsoeyo, Tüngochüa engae khia, osi a eküm jo nina ejyukae khiphen tssothvü ka. 27 Lonsülonphyoe osi eloe nthae jiang jo tsirhi esüa tvü. 28 Ontena retsoeden esüa nhyakta vansi eboe elümoto ejithechia longtsüka n li kümthukala. 29-30 Suko tsükshia eyui tsüka a jüa ochona suko ethan tae yuphi zehunga sana, tona ana ombo enungrathao kyon to ni ejüvka osi yuta topvülo erenjan osi ezüp hansi eyi kyon to ni ejüvka. Ombo mhyik jiango ejen ndüngcho tüv osi ombo tsüko okhfü jiang nkae sicheo tüv khfü mpacho nte ejüv. 31 Suko ji ezehunga raki lia, opvü jilo tsyua chiroa osi enyiproa nzhüthelia hoji khi ni ti ejithechithuka. 32 Enyathüng jo nino nrü n mhom na ni njücho to phanthiv. 33 Ni mhyik mozoa yiv osi ntia ntssüng-rünga nchümchev oyi ntssüng-rünga n sanchev siv. 34 Nibobo ji jümangi jüngthe vanchoto tssov osi orhung mhonki tsankae vanchoto ni enhyukphiv. 35 Nina nibobo phyov, "Ochona sana a tachicho alo? Ochona sana okhvü tssoa a tacho ana n tsicho alo? Ana n phanthikhukcho ke? phanthi elani suko n yuchecho ke?" to phyov.
1 Kyon n mhom jiang omhyik tirakia, osi onte thüngi oshom etssov ti nchüma. 2 Ezüp shicheo elhi ji etssov tae onte chokatala; ontena opüng kochi akvü ochosana jo tachi tssatssothukala. 3 Wopan eküm oki jijo nchümri osi engathe eli pono tssokatala. 4 Ntsijanrüjan lio jilo jo chungchak jiang tssentsü na renzhücho to tssothukala osi tsütsaelan opyon mmhom na pyingcho tüv. 5 Etho jüwo ji thüngina jo nchümri jüwo ji mmhomo, otsotso, nchümjan zijan jijo etho jilona tsükata. 6 Otsotso, nina ritssolo n wothüng matangmari ethev lia. Osi nina ndungntssung mmhom kvüta hungana tata laroa ritsso ji khyov. 7 Eyim ji tsükona jo kichuk ejü yilan jo engathev elümoto khünga. Ethelan eli opvü thyutathüng ombona ephyo tüv n liala. 8 Nina yuta topvülo n mhom zitüng ziria vancho jo nibobo ezüp shicheo kyon to omying hungu. 9 Zhüvae jina matango jiango topvü mmen. Kyon ochoangna thanpo ntia mekna oyam yikvü tae ntsia sana kyon topvüna tssakala. 10 Ezüp yutalo ni mekameshüa tssona nino otsotso mikameshüi tssocho tssoala. 11 Kyon ocho ejüng ntani chüthuka vanchosana jitüv shanchov 10 titoa ti woa. 12 Nina hotüv jo ni elhi mek to nchüma vankhuka, tolea Potsow na ni nchümri ji ntsia vana. Ombona ni zeta vana hoji tsükona ombona ntsia. Ni elhi ephan ombona ni yantsov. 13 Otsoeyo, tsakijü tsoa; elüm mmhonka, osi tssakijü jina kvüto ni nlilo nüngchosana jito, 14 nchümri mmhom jiha omon eküm ji tsükona nünga to ntsi khia. Nchümri eli tssoa tona ni mhadung mmhomka. 15 Nthae ochona noying kyon ji retsov nhyaka vana sana osi ombo ki ji re khiyia sana ji esüa ti tssoa. 16 Ntsanrüng kyon jijo yuta elümoto vanthelea elani phanthilanala, tokhatola nthae jijo nungra sükhyingo vanchukchiala. 17 Niri jina ezüp ndukathüng ti emakata, osi ombo nshüphiathüng ti longshia. 18 Nina ombo emakachojo OPVÜI na ntsiv osi OPVÜI na chokav mek osi ombo n züpthukvü mpa siv. 19 Kyon n-mhom ji tsükona ni wonkhyua ti vana, onte pono omhyik ti rakia. 20 N thanri jiang limha n lika, ontena mhadungoe eyiloa zechiwo n li. 21 Atsoeyo, OPVÜI kyuchia, osi mesao yikrachia osi onte panlamo jiang thüngi ntia ti tssoyia; 22 Hotüv kyon jo yuta esüngaro taena roe sikhuka. Onte pono Potsow na mekana mesaona ezüp yithukvü to ji nchümcheta.
Nchümri Eli Püngno
23 Nchümri eli jiangna heto ha phyoe lia: Khentsso yitssoe jiangna omhyik ethev elan n li. 24 Ombona n lan kyon ji elan eli to vachina otsük akvüna ombo tssaka ombo rhiyikav. 25 Tokhatola yitssoe ochoang na n lan etsso ji ezüp piana jijo ombo mhadung mmhom osi omying mmhom hungu. 26 Ntsanrüka janlan epio jijo oshom tsotso to chekaphen. 27 Nina oli tüngochüngi vasi süphilan yanteni n vav jo oki ti tssoa. 28 Nina mmhona n tsiv oyam ehungpvüi ti pia, mekana ombo ejithechio yilan ti nsana. 29 Heto tiphyoa, "Ombona ntio atssoyi cho sana ji esüa anaha ombo tssoyivka! Ana ha ombona mamo ji ephan pivka!" 30 Ana etho n jüi, eyim ji li osi jününgrothi li jiang yakchicho. 31 Tole oli jiang ora küma okyona yozhüa tüv tssocho. Oli ji olungna epio jiha eyathaka. 32 Ana hoji hungi, nchümi zesi jilona püngnoyi engathei khicho. 33 Nina esanchochia ni vanhungna yipphia, okhe khatae esanchochia, 34 tokhatola nina ntsüngtam yipthe vanathüng na retsoe na ni hayacho esüa yantsa jina ni vük-yav.
Solomon Püngnoyi Ejoma Lilana
1 Püngnoyi shiangha Solomon Püngnoyi, Juda mesao Hezekiah mesaki elhi etssoe jiangna eranrhyucho. 2 Etena Potsow jo ombona ntio mphoa sana jiang tsükona kyuchiala, osi mesao jiango ontena ntio eroroe e jüa sana jiang tsükona yikrachiala. 3 Mesao jina ntio nchüma sana etena kvüthüngha n tsi; Ombo nchümri jo etena n zijamo potsüo ntssona to ntssona osi jümang jüngato junga. 4 Janti jilona mmen jiang khichei sina yonjoe jina opyon ejüo tsütsaelan joe e piv. 5 Hojito ndungtssung n mhom jiang lona mesao nkachoa vanthuka, tona ombo yansa ji ntsanrük na thüngchevka. 6 Nina mesao mhadungo phanthiathüng ombo engav ekhyo ti tssoa osi niji elüm ethelan eli esüa etssophyoe tijüa. 7 Ni ji vanphen omhawoe ni chüngithuko ji mmhomo, tokhatola ni vanphen ji ni pomoe tsüphokao tüv piv jijo n mhon. 8 Nina ntio zechetana zaktole yitssoki ewov ekhyo ti-tssoa. Ehungpvüi thanpoe na ni n lan zechei lichojo nino kvüto lyuvla? 9 Ni phinakiren tona ni to yutalo oyi chiyina nini yutalo taena engathetae sia, osi mphoyi ntia opono ti chiyithuka. 10 To mekna kyontsü na nino mphoyi n vatala to ntsirav osi ni yikra ji ephochoa n vanche. 11 Nchümri mmhom ji mmhona phyocheo jijo janti longi shona shanthecho tvü. 12 Engae khihungo ji thüngi ejyueran kyon jina ntangshon yi pio jijo shona rümbüm osi oyok-osen shona njüm khi jocho lona mmhonkata. 13 Longtsükakhuko yithenpvüi jijo OPVÜI ji tsükona lüm joa eyio tüv tssoala, lirithüng eng etssolo jümyim yuthechicho to tssoala. 14 Kyon ochona eyilo tae oyam pisi n pencheyia sana jiango eluk osi ezhü mpung eryu n jüwo ji tvü. 15 Erüm toa jonjiwo jina yansapvüi lüm ekhüngo jiang mpato lüm khophiyiala. 16 Tssakijü ji kvüthüng ha nina etsov lio jilona kyungkata titsoa; kyungtia tsoana ni lav mpato tssov. 17 Ni phinakiren ji nsamsam ti zethechia, nina ombo khetsüo jina ni tssaki sikhuka. 18 Ejüng oyam nlan pio jijo yonri, erhüphenzhü osi lotssi erov esüa tüv. 19 Emhuk-elüm yutalo longtsüka n lio kyon jilo zikao jijo oho kalukvü na ntiona njakvü ekhyo tssoa vancho tüv, mekana ojo jaki sanphia vancho esüa tüv. 20 Lümbüm eyui vamo ji okhen dena ezo jijo etssüko phukthesü phungicho tüv, mekana okhfülo oma nzüyicho tüv. 21 Ni riji wonton na etsoyu pia, eratsüng na ojü eyuv pia. 22 Tona nina ombo ji yikra na rungthukvü, osi OPVÜI na yantso ni piv. 23 Jüki ezhü jina eryu sonhyao ji esüa, echi ruta jina lüm etsuk shichetala. 24 Kikhüm oyam nyanka-nrhüo tüv nzo kichüngi vamo ji thüngina jo mhonki vamo ji mmhomo. 25 Okhao tssoa meta ekonina yiwon mmhom zo jijo tsüngkyingo e ratsüngathüng jümyim yucho tüv. 26 Kyon mmhom ochona kyon n mhom ji nkachia n mhom tssothuka sana jina jünhyo mmencho osi jükha lo mozhü n mhom jücho esüa tüv ni nchümchethukala. 27 Tssakijü kyungtia tsochojo n mhomo ji esüa oyam thüngina thanthüng kyungtia eyilo jiha n mhon. 28 Nina ni lüm etsuk n tanglanchicho jo nino yantsü kvüwoe pikhfü n liv oyam na sakav larocho sana ji esüa tüv.
1 Zhüvae tsüka ji tssayiv jo ethia, nzyulo sheryu joatüv, mekana lirithüng eryu jocho tvü. 2 Ni elhi na mancho yakajo oyam na ni rhiyilea ni kav mek. Rhiyika jiang woro esüa pya yirav osi eshom mek. 3 Kvürü erhüpo ji esüa, kadho emen shikayio ji esüa, zhüvae jiha echükvü lia. 4 Zhüvayi engao tüv janlaino jijo niha engapvüo ji esüa ni zhüvacho tssov. 5 Zhüvayi engao jiangji zhüva janlan pia, tona engapvüo jina ombobo ntsirancho esüa nchümo ji ejüng to engathev. 6 Nina zhüvae ji motsü püngnothuka tssona, nibobo nijo ji tanchoe sia, nina nibobo ezüp yanala. 7 Ojo ejangna ombo jo tsütsao ji esüa zhüvae jina püngnoyi tsütsatala. 8 Eyim ji thanthüngo jijo rubber loko lo lotsüng erükacho tüv. 9 Zhüvae jina kichuk ejüi püngnoyi khi yijaka vamo jijo sukona kinoe jina ombo khelo okyo khana vancho tüv. 10 Lijon ochona zhüvae ji nduko ji akvü erhümi soa sana kyon otsük akvü tachiala. 11 Zhüvae jina zhüva elhi ji elan elani tssoa vamo jijo füro na ombona lacho yana wolamo ji esüa tüv. 12 Kichuk n jüi jina ombobo kichuk jüa to nchüma vamo jijo topvülo zhüvatso jilo n mmhonka. 13 Etho n jüi jina ntioli ombo ki yaki n chiyiala? Ombo ntio kyuala? Hingho mhorü kyua alo? 14 Hankhan ji yisii kophia vamoji esüa etho n jüi jina belüngi eriphia vanala. 15 Kyon ochoang sana jo etho njü lona onte büngi etsoyu thechiv tia etho n jüala. 16 Etho n jüi jina ombobo ji kichuk ejüi otsük tiyingna onte ephyo elan pikuko tata jiang lona mmhonkata nchüma vanala. 17 Ni nshikao ninyang jilo nibobo rhowo jijo lantsüi owo füro eno lona rüngi süphia vancho tüv. 18-19 Kyon ochona oyam sosorasi ombona ngashücho to ntana na jijo zhüvae jina e meyamo ebensü khi khfüria vancho tüv. 20 Otssüng n-jükana omi ji mhetala, hoji esüa echi n rütana khontarota esanala. 21 Mihan jina miron tssonthukala, otssüngna omi ji kikachithukala, hoji esüa khondashio jiangna pangtarota tae lia vanthukhungala. 22 Echi ruta jo enüngu tsotso! Ete topvü na hoji e nzhü-hungala! 23 Thama nsan-nsyui ni tathi nchümri ji mpho jijo chonpfü oman elav tüv lo tsünglüpvü jokacho tüv. 24 Kyakrüm jina ombo etssak nchümri ji tssayi yina mphoe hanala. 25 Oyi jiang engav mmhonlea ombo ti-longtsüa, ntiotssole ombo lümbüm ji etssangkung na pyingkachi hana. 26 Ombona ombo etssangkung ji mphoe hanlea ombo elhi n mhon jiang otsük ekvüna hungala. 27 Kyon ochoangna oyam sathukvü tsirhi dona sana ontebobo sala. Kyon ochoangna liko menthukana ontebobo menzhüala. 28 Nina ochosana ejüng ezoe tssatssothuko jijo ombo tssakcho tssoala. Thama nsansyuo jijo tssorophyoro yaka ntia hansi n yiala.
1 Ojyua tsükona kangtsüa ti nchüma. Enhünga tona jithüng to yutalo ntio tssov sana nina n tsi. 2 Kyon thanpoe khi ni thüngthuka, lankon jiang na lea ni thüngtathuka, tolea nibobo ti thünga. 3 Nchümri n lina etssophyo jina ezüp shikao jijo olung osi hajang lona mmyingkata. 4 Lüm etsuk jo haruk osi tssorophyoro etssophyo, tokhatola mhyiktssoraki jijo jilona tsükshikata. 5 Kyon tsüka jina nina ombo n wongkhyuyiala to nchümthuko ji thüngina jo opon chuka elanchoyio ji mmhomo. 6 Oshom to phyo jijo ombona ni tssatssoathüng mpato tssolea longtsükakhuka. Tokhatola ni ri jina epvülo ni rhümayia na ntangshona. 7 Ni mmhithakana tssakijü lea ntso to phyov, tokhatola ni wontona na ekhov lea nünga tsochev. 8 Kyon tsükana oki yaki woana worona oshüp yaki wocho tüv. 9 Mozhürhüm mmhom thyujü jiangna ni emathakathukala, tokhatola ezüp jiangna ni lümbümi noying ji ni khaniala. 10 Ni shom jiang ti mhechoa, osi nipo shom jiang ti mhechoa. Ni ezüp yutalo jo ni jenio yana ti vana; ni jenio ekoni vamo ji thüngina jo ni phinakiren enhyano vamo jiangna ekyungo ni nzanchiv. 11 Atsoeyo, nchümri lia vana, tona a emathav. ochona a phyochophyoriyia sana jiang janlanphen ana liv. 12 Chetünga evan jiangna ezüp tsao jiang etüngchei nkachoala, tokhatola nchümri n zichei kyon jina ezüp jilo saksak owo tssükae tosanati nungrala. 13 Ochona kichuk n jüv oyam chi-oma elov khichoa sana hoji elov tsükona ombo ejüeli jiang thechiyenchi silea etüma. 14 Nyazüngina ni shom ji owon elümoto tssoa nthechio jijo ombo rhiyikacho tüv. 15 Oyam nyankanrhüo tsoeni jijo eryu joathung ojü na owon tssoa zhüchoa vancho tüv. 16 Nina kvütoli yingto ombo vanthukchevla? Nina kvüthüng sana ezhü ji tanglanchiv mekana thyujü mmyokvü lona zümi epem ekhyo tssothakcho alo? 17 Yonjak na yonjak phyako ji esüa kyon na kyon thüngi na ntsi khiala. 18 Nina züwodung nijüpchena züwothi ethi tsov. Hojito ombo pvüi ji nkohao phajae jijo yikrachi hungu. 19 Nipopo ojüi ni mon ji hungthechio ji esüa ni lümbümi nibobo hungthechi-cheta. 20 Kyon na rüngwo jiango echüli tüv, theta munglea n pyingo tssoala. 21 Omina shona janti jiang rungi zetala, hojito kyon myingthüng jiha tsseni zekhuka. 22 Nina zhüvae ji echü terio chüa talea, ombo zhüva ji khi n siyiche. 23 Ni olyu mangsü jiang etonandang zeyata, 24 ntiotssole ejüeli jo sunga evamo mek. Jipo tsüpho jiang lea nchükhon jo etho lia n vanala. 25 Benro-niro jiang phan thilana vanathüng ovüngo jiang mavü tanroa osi litssae ero jiang elhüpa vankhuka. 26 Nina ni olyu jiang tssan khi mpensü nsüngrükhuka mekana ni nyanyan ejoma yeni orang jina liko shikhuka. 27 Enhyoe vamo nyanyan jiangna ni osi ni opan, elani ni phaj apvüi to tsükona shirojü ni piv.
1 Nthae jina ochinaha ombo n phan lea tsanala, tokhatola shenthia evan jiangjo hengho esüa lümbüm tssona vanala. 2 Jipo kvüwoe na mmen tssoasana, hoji meta jijo yansae elümoto echungta sala. Tokhatola meta kvüwoe nchümri eli esapvüi na sa sana etho khyunga vanala. 3 Etho tsütsae kyon ochona yantsae jiang khangshia sana jijo ryupvü joe benro jiang roe siwo ji esüa tüv. 4 Nina shikhfü jiang n yikrachia tssona nino n thae jiang thüngoe tssoala; tokhatola nina shikhfü jiang enga yikrachina n thae jiang thüngoe mekcho tssoala. 5 Nthae kyon jiangna jo ntsanrük jo ntiosana n tsiala, tokhatola OPVÜI ekhümo kyon jiangna jo shikhfü jiang mmhona engathetala. 6 Ejüeli kümlea ntsanrük n lio ji thüngina jo yantsae tssolea ntsanrüko ji mmhomo. 7 Khyingroe ochona shikhfü yizüng jiang benphia sana kichuk jücho tssoala. Kyon ochona ethev n lio kyon jiang thüngi oshom tssoasana ombona opo mying mmeniala. 8 Nina eran oyam khiyia kyon ezüplo tssocho mmhon khia tssona ni ejüeli jiang ji kyon ochona yantsae nzanasana ji echi kümvü. 9 Nina shikhfü ji n benphia tssona Potsow na ni randan jiang ji engav ji etssakthav esüa engachev. 10 Nina ntsanrük kyon ji ejithechia n mhom tssothukcho jo ni tsirhi lona ni sav. Ntsanrüng jiangjo onte mana yantsov. 11 Ejüeli kyon jiangna yuta topvülo kichuk jücho esüa nchümala, tolea yantsae ochona etssophyo mmhom esürhaka na hoji mmhomo ntsicho tssoala. 12 Kvüthüng kyon mmhom na etho tsütsata sana kyon topvüna longshitala, tolea kyon n mhom na yansa sana kyon topvüna mphoe siala. 13 Nina ni mmen jiang mphocho jo nina ni ekümo kvüthüngha ekhyo hungu mek. Ni mmen jiang phyochaki sisi mhechoe sia; tona Potsow na khonzan ni ejüvka. 14 Yuta topvülo OPVÜI jancho zoa, tona ni emathav. Nina lüm khünga vancho jo ni yesov. 15 Yantsae jiango n thae yansae jiang mhadungo jo nzanchi n li; ombo mmhorü erhyua vamo ji esüa, osi sevan na pyimphia vamo ji to ekyuv lia. 16 Nchümri n lio yansae jijo ekhüng etssoe tae. Kyon ochona n tsanrük tssakana jina sunga sav. 17 Münghan kyon jina ombobo ombo lüp ji tsüsoa jyuala, ombo ti tanga. 18 Ntsanrüka, tona nina tsanchov. Nina n tsanrükcho jo ni vanthe nrüngu. 19 Kungtsüngo lijon jina etsoyu etsson liala. Ochoangna yuta ezi siana jiango yuta topvülo yantsav. 20 Ntsanrüng jiang na emathata harishia sunga vam. Tokhatola nina ejüeli kümü süsoa tssochojo ni ezüpthukvü sala. 21 Oyam hungkarenkao jijo nlan. Tokhatola yitssoe ochoangsana jo ekhüp ejükaro ji mpato züpi khiv yana oryu elhi tssoala. 22 Tajo elüm jiangna ejüeli kümvü lo tae tsüsosi yantsae jina onte eshüpvüsa vamo ji n chümchetala. 23 Ochosana ji elanchoyia, tona sülani yikvü-yilo jiang lona kyungkata ombona hoji chokav. 24 Ochona opvüpoe thüngina efüv jo nlan mek to nchüma sana ombo efüi thanpo jiang onte kheti. 25 Tajo lümo jina ezüp shicheo tae tssoala. Nina OPVÜI longtsüna ni mmhomo tssoala. 26 Ni nchümri ephan tae tsso jijo zhüva elhi. Tüngochüsi okyak elio jiang yi enga. 27 Yantsae jiang nzana, tona ni ezüpvü meka. Nina yantsae jiang mhadungo omhyik juki sicho jo kyon elümoto na ni rhiyikav. 28 Kyon n mhom na etho lo rheyiana kyon jiangna mphoe siala. Tolea onte elungjoana ntsanrüng jiangna elani salam.
1 Kvüta oyam na ni elanchoyia na tata lüm khüngkata yicho jo tsüngona lo jo ni ejüprov osi nina phanthilanchev mek. 2 Ntsa yansae tsüka a jüa tona ana ematha kyonden ni ejüvka. Nthae yansae tsüka a jüa tona ana e nungrathao kyonden ni ejüvka. 3 Nina nchümri mmhom ji ni chokana nipo na ni tsükona kangtsüv. Lonsülonphyoe jianglo orang thukthechio jijo zhüva elhi. 4 Mesao jina ntsanrük jilo lüm theta tssona jipo ji etho khyungala, tokhatola omboji orang lo tae lüm thecho jo ombona ombo meta ji yesov. 5 Nina ni shom ji yikvüo jijo nibobo ni tsirhi toncho tüv. 6 Kyon n mhom jiang jo onte mmen jina onte sala, tokhatola ntsanrüng jiango ematha lia osi etancho vanala. 7 Kyon mmhom jina yantsae jiang elan ji ntsiala, tokhatola nthae kyon jiangna hojitüv n tsi. 8 Oyam n khanzio kyon jiangna yantsü jiang topvülo ninyang bukchethukala. Tokhatola kichuk jüo jiangna jo noyinga vanthukala. 9 Kvüthüng kichuk ejüi na zhüvae ji yitssoki sosi woana zhüvae jina emav osi ntssonkao emata osi kyungkalamo woria kümala. 10 Oyam meyanhungo kyon jiango ntsae kyon topvü tssaka vanala, tokhatola ntsa kyon jiangna jo ntsa kyon jiang nkochetala. 11 Eyimtsari jiang na onte lüm etsuk ji thama oponi chiyithukala, tolea kichuk ejüi jiangna jo erüm toa tangthechia vanala. 12 Yansae jina ejüng yilan jianglo lüm thecho jo ombo küpo tsüphoe jiang topvü ejüng ephyoe kümala. 13 Yantsae ji tona ombo khangshia vamo kyon ji to onita pono kheti jijo shi, OPVÜI na onita omhyik picho. 14 Mesao na yansae jiang elan ji nkoyia tssona, ombona sunga yansav. 15 Ngaro jiang tsükona elancho osi shikhfü lo sokao jijo mmhona. Ngaro jina ombo etancho vancho jo ombona oyo yikrathukvü. 16 Kyon n mhom jiangna etho tsütsata na münghan kyungkatala. Tokhatola ntsanrüng jiangna hotüv kyon jiang joyio ji hunga harishia vamvü 17 Ni tsoe ji shikhfü lo sokata, tona nina ombo tsükona kangtsüa nchümüka. Ombona kvüthüngha nina yikra nduko tüv tssoe ni vayiv meka. 18 Potsow lanso n theo osi hungjan rüjan n lio jipo jilojo kyon jiangji n sayajam monala. Ochona Potsow shikhfü tsütsata na hoji ematha elio! 19 Nina ni phajae ji oyi taena jo n lanchoyiche. Ombona ni engathekhoka, tolea nzikav osi lümbüm n thev siv. 20 Nchümi n zena nsamo kyon ji thüngi najo zhüvae ji eyilo elio. 21 Nina kyon tsüka ji ngarothüng na ombona ntio chona sana ji pia phancho jo tsüngona lo jo ni ejüeli topvü ombona hoe khiv. 22 Lümbüm etsuk elaro kyon jiangna khonta rota si ezüp elümoto shichetala. 23 Kanchan jina ni elungthukvü, tokhatola nina teri küma tssona ni yikrachiv. 24 Efüi ji nzo etssoe jijo ombo ri n mhontso ji. Ombona yitssoki ntsa phyocho jo ombo ezüpthukvü, osi ombona ejüng phyocho jo Potsow na ezüp ombo piv. 25 Kyon na ntio ni nchümiana hoji nchüma tae vamo jijo ekyuv lia, tokhatola nina OPVÜI lo longtsü na nino tsanchoa vam. 26 Otsük akvüna yansae ji ekyorung yanala, tokhatola OPVÜI lo taena nina ntsanrük ji hungu. 27 Ntsanrüng jiangna nthae jiang tssakala, osi n thae jiangna ntsanrüng jiang tssakala.
Agur Püngnoyi Jiang
1 Shiang jo Jakeh tsoe Agur yi mmhom jiang: "Potsow a ndüngo n van, Potsow a ndüngo n van, hoji tsükona aiyo ochona a n zanchi. 2 Aiyo kyon mekna ekümrümo esüa; kyon na nchümo jiang n chümchev sithaka. 3 Ana okyak-oyi ntia engathei n khihan, Osi ana Potsow tsükona ntia engathei n khihan. 4 Kyon ochona potsüwoe ntsinran jiang ntsirathakchola? Kyon ochona ombo khe lona mbung ji rhümathakchola? Mekana süporo lona ojü tseni vachechola? Mekana limha chümi erü chümkhukchola? Hojijo ochola? Nina ntsicho alo? Ombo tsokhying jo ochola? 5 "Potsow na ombo phyochak topvü benthukala. Ochoangna ombo nkoha yana na jiang tsükona ombona otsung tssoe khümchoala. 6 Ombona n phyocho tüv khi ombona phyocho to nina ntancho jo nina ejüng ephyo ji man ombona ni khomvü."
Püngnoyi Kyungkata Lia
7 Potsow, ana a n chüthüng, lanka eni ni thüngi chonala: 8 Ejüng a ti phyothuka osi yantsae ha a ti kümthuka osi eli ha a ti kümthuka. Ana etsoyu kvüta ethev liana jitae a pia. 9 Ana kyungtia liana nkhontsi, enhungo ni ethev n li to phyoa yi sikhuka. Tokhatola a yantsacho jo ana efü elhi tssoe ni yikrathukvü mpato tssov. 10 Phajae ji epüp OPVÜI ji thüngi ti phyochophyoria. Ombona ni rhiyikav osi nina hoji ezüp ji ndukvü. 11 Kyon ochoana jo onte opo jiang rhiyiala osi oyo jiang n yikrachi ala. 12 Kyon ochoangna jo etssakthav phola eküm vana khatola ontebobo ntssüngchoto nchümala. 13 Kyon ochona jo elüm mmhona to ontebobo nchümala – onteno kvüta mmhoncho ato to nchümala! 14 Kyon ochoangna jo ezüpa evan osi yantsae jiang ejan mpato re khiyiala, hojitoli onte eküm süphia vanala. 15 Eva jina otsolov eni vana, woniata mying "Apia!" to tsayicho. Olan mezhü shijo kvüthüng ha lüm epük n liala: 16 echüli ji, otsoe n van eloe ji, eryu n jokao likying ji, tona n tangchov kia vamo mi ji to. 17 Ochona opo emakatana osi oyo esonlani yikvüana müngtsov na ombo tsov osi orae woro na ombo mhyik jiang dukchukchiyiv. 18 Ana n ngathekhuko jitüv olan mezhü lia: 19 Müngtsov na oyaki na pyao ji, nrü na olung poni phyuphio ji, jümangi rhungtsü jiangna olan yancheo ji, tona eboe eloe nzantao ji to. 20 Lonsülonphyo tsoeni ji etssophyo jo heto: ompvüna oyam thüngi efürama tssosi tsükae siala, tosi "Ana ntia n mhom n tsso!" to phyoala. 21 Limha shina tia n rümkhuko olan mezhü lia: 22 Ezi jina mesao kümo ji, zhüvae jina ombo tsoyuhungo jiang topvü lio ji, 23 etssakthao eloe jina yanpichho ji, tona phajae eloeroro jina oyam orapvü rechoe tsoeni ji ompvüna kümi sioji to. 24 Limha shilo ekümrümo terisi okyak elümoto lio tüv vanra: 26 Tssümphiro: onteno terirov khatola nzyu lo etsoyu yanthei vatala. 26 Sethan, ontena etho elüm n : jüa khatola onte vanphen jo longkvüi tssoala. 27 Khomung: onte no mesao n van, khatola nsüngi reni pyatala. 28 Momonro: onteno okhena rhümacheta tüv khatola mesaki lea vanala. 29 Sanphiathüng eze mmhomo tüv ekümrümo mezhü vana: 30 Hingho, ekümrüm yolo etho elitso osi ochia n kyuo ji; 31 Nyanyan, chükrüka sanphio hanpung ji, tona mesao na ombo kyon yolo sanphio ji to. 32 Ni zhüva kangtsüa nchüm na tümjaki nchümi zeta! 33 Nina shirojü eha na ethyu tssüchetala, nina ochosana kheno lo ejungina ejen eshüala. Hojito nina lüm etsuk shichena nibobo ezüp sokatala.
Mesao ndungtssung Picho
1 Oyi shiangjo Lamuel mesao oyo na püngnoyi ombo pio jiang: 2 "A tsoeyo, nino a nzamo tsoe, a randan janlan ji ni bukcho. Ana ntio ni püngnovla? 3 Ni etho topvü rama lona ti zia, osi ni rang topvü eloe lona ti zia; ontena mesao jiang mpato yesorathaka. 4 Engae khia Lamuel, mesao na suko n yuv shikhfü osi e kino jitüv n yam shikhfü. 5 Kvüthüng ontena suko yua na shikhfü jiang ji mhechoe siala osi ezüpa vamo kyon jiang elan ji n zikayiv siala. 6 Suko jo chüa vamo jiang tsükona osi enungrathao ekümo vamo jiang tsükona. 7 Onte yuthuksi onte ezüp osi n matha jiang mhechoe sithukala. 8 "Kyon ochoangna ontebobo n phyochecho sana jiang tsükona phyoyia. Ochoang kvütana nzanchi ethev liana jiang elan ji nkohoyia. 9 Onte thung phyoyia osi ntsanrüng yitssoe küma. Ezüpa evan osi yantsae jiang elan ji nkoyia."
Tsoeni Tssothimori Eli Jiang
10 Ekhyo-eto eli tsoeni yanchev jo kvüta khüngcho ato! Ompvüo tssentsü oyuk-osen lona mmhonkata! 11 Orapvü na ompvülo longtsü-katala, osi kvüthüng ha ombo n yantsa. 12 Ombo eküm evanthüng nandang jo ompvüna mmhom tssoyiala, osi kvüthüngha n mhom n tssoyiala. 13 Ompvüna yuta topvülo tssansü tsiyana osi sünyipvü sü tüka n tssochov vanala. 14 Ompvüna shishoe rhung jiang esüa yenlan ekonina etsoyu yani hansi yiala. 15 Ompvü na nyazüngina phanthi wopan etsoyu methakala, osi phajapvüi ji ntio elhi tssov sana jiang ezoala. 16 Ompvüna liko ji zesi shiala, osi ompvü jokheman rang ji khi jününgrodung chümala. 17 Ompvüo kongtsünga elhi etssoe osi etho khyunga ryumhena etssoe. 18 Ompvüna ntio tsiyana sana jiang man ji ompvü na ntsia osi münga elhi tssosi yipala. 19 Ompvüna ompvü kongkho yeni ompvübo osü tükala. 20 Ompvüo yantsae osi ezüpa vamo jiang thüngi lungphya vanala. 21 Ronren jolea ompvüna n vonkhyuala, ntiotssole ompvü wopan jiango mpensü benria lia. 22 Ompvüna süsaphen tükala osi ejümsü enyipvü pipoala. 23 Orapvü jo thüngche kyon, yanchi kyon tüngochüi tsüka. 24 Ompvüna mpensü osi ryukhüngzhü tükala osi hojiangji shishoe thüngi yenala. 25 Ompvüo chüngchünga, oyam na yikrachia la osi mhadung tsükona kyua n vanala. 26 Ompvüna emiroa osi nchümri lia nsanala. 27 Ompvüo yuta topvülo n tssochov vanala osi ompvü wopan ji zeyatala. 28 Ompvü ngaro jiang na monts so ompvü piala osi orapvüna ha ompvü thüngala. 29 Ombona heto phyoala, "Eloe elümoto engh mmhom vanra, tokhatola nino topvülo mmhontso ji." 30 Ezev jüwo jilo jo ejithechio jüa osi opyon mmhomo jijo moni siala, tokhatola eloe ochona OPVÜI kyuchia sana hoji jo omying thüngiv lia. 31 Ompvüna mmhom tsso jiang topvü tsükona ompvü mying thüngia, ntiotssole ompvüna otsük akvü thüngina yikrachi ehungu etüma.
Eküm Shijo Ethev n lio
1 Shiang jo David tsoe, Jungzio ochona Jerusalem mesao tssocho sana ji yi jiang. 2 Jungzio jina phyocho, ethev nli, ntia ethev n li. Eküm shijo ethev n lio, topvü ntia mek. 3 Nina ni eküm ji elhi tssoa esangmmuka vanala, tole hoji man ntio khi ejüo lichola? 4 Echungren jiang yisi elani yilanala, tolea limha shijo vanphen jitae kheti vanala. 5 Eng jina nchüng jana chiroala, osi nchüng jana rhetala, santsünga benkaphen yana rheyia la osi benkalani chiroala. 6 Ezhü jina jükiwoe venala osi jüjowoe ha venalankonphia vena osi yilanala. 7 Zhükhfü jiangna jümangi tsütherala tolia jümang ji n mpyinghan. Ojü jina zhükhfü jiang bukchepheni tsüthelanala osi jilona benkalani tsüala. 8 Olan topvüna esang – mmuk tae, oyina n phyocheo esangmmuk. Ete mhyik shina kvüthüngha lüm büka n hungkhanala; osi ete eno shiang na kvüthüngha zora nliala. 9 Ovüngthüng ntio hunga yithakcho sana jiang hungiam. Ovüngthüng ntio tssoa yithakcho sana jiang tssolam. Limha shilo ntia ethan n li. 10 Ontena, "Zeta, shilo ntiona ethan lia!" to phyoala. tokhatola mek, shiang topvü ete n bukthüng na tssoa yithakcho tae. 11 Sülani ntio tssoa yithakcho sana ochina ha n chümche, osi ochinaha nchüng ntio tssochosana shi tona henasüi to yutalo kvüto tssov sana jiang nchümchev mek.
Jungzio ji Ejyueran
12 Aiyo jungzüi tsüka, osi ana Israel meta Jerusalem lo mesao tssothaka. 13 Limha shilo ntio tssoa sana jiang shyua yani tsseni zev zikathaka. Potsow na ete pono enungrathao mhadung e vayicho. 14 Limha shilo ntio tssoasana ana hungrathaka, osi ana phyoala, shiang hetopvü ethev n lio tae. Ochona sana mbung ji phana vancho esüa tüv. 15 Ntio khangkhfüthakcho sana hoji nina n satukehe; osi n lio tsütsayilan jiang nina khae n zeche. 16 Ana abobo heto phyoa vancho, "Aiyo tsüphoe a kümthaka, a vüngi Jerusalem yansao jiang topvü poni tsükao a kümthaka. Enhungo nchümri eli osi ntsinran tsotsojo ntio sana ana ntsithaka." to. 17 Ana nchümri eli tona zhüva, ntsinran tona enhya to jo ntiona echümpotacho sana yani zev zikacho. Tole anaha mbung ji phana vancho to zecheta. 18 Nina kvüta kichuk jüa ni kümana tata wonkhyu rankata yiv; osi nina kvüta ntsiana tata kyungkata ni kharasürav.
1 Ana abobo ematha lantaro khisi ematha jo ntiosana yani zev zikacho. Tokhatola hojiha ntia ethev n liv yanchecho. 2 Ema jiha zhüva etssophyo osi otsükoso emathao jina ha ntia mmhom e n tssoyi to ana yanchecho. 3 Ana ntsinran eyan choka lio jina ana suko yusi longshia osi jüngtheta evam methakcho. Kyon eküm limha shilo esüngaro evam yuta ji hotowoena yitukcho mmhomtsow tssov to ana nchümcho. 4 Ana elhi elümoto tssorhüpcho. A bobo oki tssoa jününgro phari joni vacho. 5 Ana phari epi, tssüngthilan taro chümi vacho; 6 Osi ojü etsonphen jükha shani varacho. 7 Ana ezii elüm shii vanthukcho osi a kina ha ezii bukchecho. Jerusalem lo vana yithako jiang topvü lo kyungkata ana ekümrüm ekümcho. 8 Ana yansao meta jianglo mesaki ejüeli jiang lona ana shona janti hanrhyui vacho. Eboe eloe sani okhen a nsikata a mathatukcho, osi eboena chokao eloe topvü ana vantokcho. 9 Ho, aiyo elümoto a tsüphocho, Jerusalem lo vana yithako jiang topvülo tsükao tssocho, osi a kichuk nchümri mmhonrhüa vancho. 10 Ana ntio a chokata na hungcho osi a chokacho ntia n khiv n vancho. Ana elhi tssoe ntio hungcho sana jiang topvü tsükona kanchana vancho, osi shiang hetopvü a yantso tssoa vancho. 11 Jitosi ana kvüta tssothakcho sana jiang nchümi zecho osi kvüta kung tsünga elhicho sana nchümi zecho, tole hojiang topvü ntia mek to nchümchecho. Hojiang topvü mbung ji phana vancho esüa ntia ethev n licho. 12 Ntiotssole mesao tsüka jina ombo vüngi mesao jiang na tssothako jilo kyungkata n tssoche. Hojitsükona nchümri elijo ntiosana mekana zhüva jo ntiosana amoazan mekana nchümi n zena elhijo ntiosana hoji nchümvü benkacho. 13 Ana ntsia, "Kvüto wondang jijo emüng jilona mmhonkacho sana jito nchümri lio jijo zhüva zhütük jilona mmhonkata. 14 Nchümri eli jiangna onteno kvüi yiasana ntsia, tokhatola zhüvae jiangna jo ontena yia vamo ji n tsi." Tokhatola hoji sükhyingtsük jina ete topvü enhyaka vana to jiha ana ntsia. 15 Ana a bobo nchümcho, "Ana ha zhüvae jiang mhadung esüa ndukvu esüka, tona ana nchümri eli kümi vamoji ntio oman lichola?" Tosi a bobo zichecho, "Ntia tajo n li, ntia mek, to." 16 Nchümri eli jiang tssolia, zhüvae jiang tssalea, ochinaha nchümchesiala. Tsüngona lojo ete topvü mhechoe e siv. Nchümri lilea, zhüva lia ete topvü e chüv. 17 Hojitsükona a tsükona eküm jo ntia mek, ntiotssole hojilo jüwo jiang topvü ezüp yaka ntia mek. Hojiang topvü ntia mek, ana mbung ji phani zecho esüa tae. 18 Ana sanga elhithako jiang osi ana mmyochothako jiang ntia oman n lio tae, ntiotssole shiang hetopvü a sülo a echungcho ji vayi siv to ana ntsia, 19 osi omboji zhüvae lea tssokuka, mekana kichuk ejüi lea tssokuka, ochona phyokukchola? Tokhatola ana songa elhithe vathako osi ana limha , shilona mmyocho jiang topviiombo echi tssov sala. Shiang hetopvü ntia oman n li. 20 Hojitsükona ana tata sanga elhi tssoji a püpa zichethaka. 21 Nina ni etho osi kichuk nchümri osi tssothimori topvü theta sangi vasi hojiang topvü ochona n sangchosana ji echi tssoe siv. Shiang hetüv jo ntia ethev n li, osi hoto jo elan n li! 22 Nina ni eküm totona wonkhyua, sanga elhisi ji man ntio lichola? 23 Ni eküm evanthüng jo nina ntio elhiana jina wonkhyu emhuk osi lümbüm na enowo tssochetala. Zümolo tia ni lümbüm na noyinga n yipche. Shiang hetopvü ethev n lio tae. 24 Kyon tsükana etssov mmhomo jijo ombona sanga elhio ji man tsoyusi lüm büka vam ji. Tokhatola ana zichethaka, shiang hetopvü ji Potsow thüngina yiala to. 25 To n tssowo kvütoli ntio lona nina tsoyusi emathao lanka thanpo lichola? 26 Potsow na ombo kyuchio kyon jiang thüngi ematha, ntsinran osi kichuk nchümri mmhom piala, tokhatola ombona mmen kyon jiango sanga elhi tssothuksi ontena mmyochoe nkümthe vao jiango ombo emathao elhi etssoe jiang pi siala. Shiang hetopvü ji oman n li. Kyon tsükana mbung ji phani zeta vancho esüa tüv.
Lanka Topvü Tsükona Onte Yuta Lira
1 Limha shilo ntio tssoasana topvü ji Potsow na kokae vao yuta jilo tssoa yiala. 2 Ebuk yuta osi echü yuta, echüm yuta osi rukche yuta. 3 lüngthav osi emiyiv yuta, tssokachiv osi phirov yuta. 4 Nungra yuta osi ematha yuta, nungra yuta osi shari yuta. 5 jüponta yuta osi konta yuta, osi emanphita nzanta yuta osi kontae evam yuta. 6 Yanche yuta osi emon yuta nkümrhyu yuta osi shümthe esiv yuta, yingto evan yuta osi nsamvü yuta. 7 Rerov yuta osi hoji khümtae ekhiv yuta. 8 Nzanta yuta osi tssakta yuta, ritsso yuta osi mmhonta yuta. 9 Ete elhi shiang topvü lona etena ntio khakchoala? 10 Potsow na ete pono oha mmyingu e hantuko ji ana ntsia. 11 Ombona olan topvü yuta etümtso jilo etssov kokae varacho. Ete khi mhadung ji e ntsithukvü choka etheyio ji ombona, tokhatola ombona ntio tssoa sana jiang ntsikhani lüm püka vamo etho jo e n piala. 12 Hojitsükona ana zichethaka ete eküm evanthüng nandang jo emathata ntio elhiana ji ete eto nandang mmhona etssov epicho. 13 Ete topvüna ete sangcho man jiang tsoyua emathav lia. Shijo Potsow yantso. 14 Ana ntsia Potsow na tssocho topvü ochüm echeta liv. Nina hojilo ntia ekhyimchov mekana ntia khi n siche. Osi Potsow na tümkao motsünga-jo etena ombo kyuchia evam ji. 15 Ntio tssothakcho sana osi tssopam sana jiang topvü nkolo na tssoa yithaka. Tssoa yithako jiang Potsow na elan elani tssolantukala.
Limha Shilo N tsanrük
16 Shiang ephalo ana zechecho thanpo jo limha shilo ntsanrük litukvü etüm kasi nthanri taena pyingcho. 17 Ana apopo heto phyocho, "Potsow na ntsae osi n tsae jiang topvü kheti oyi tssoyivsala, ntiotssole olan taro, elhi topvü, ombo yuta eben kokao jilo tssoa yiala." 18 Ana wokhao tssoa engathe khithako jijo Potsow na ete ji ekümrümo jiang lona mmhonkacho mek to e ngathethukvü lümbüm efüyiala. 19 Ntiotssole kyon tssolea ekümrümo tssolea sükhying motsüngalo e rheyiala. Kyon lea ekümrümo lea kheti chüala. Onteata ekümrümo tae. Kyon jiangha ekümrümo lona mmhonkacho tüv n li, ntiotssole kyon tssolea osi eküm jilo ntia yichak n jü. 20 Onteata meta motsüngalo rheyiv-ochon kümi siv. Onteata na jilona chiyio jina onteata hojilo yilam. 21 Kvütoli kyon ochona kyon mon jo oyaki chüngisi ekümrümo mon jiango liko chungi rheyialato ntsivla? 22 Hojitsükona ana wokhao tssoa zicheo jijo ete sangcho jiang tsoyua emathata vamo ji mmhomo. Hojilo yaka etena tssochewo ntia n li. Echücho sülo ntio küma e yiv sana ochina ha ntsiwo tüv lanka n li.
1 Jisülo jo ana limha shilo n tsanrük elhi tssoa yia evamo jiang topvü chani zecho. Oyam na khangshio jiangna kyata vancho, osi ochia onte nzanchiwo kyon n vam hungcho. Onte khangshipvüo jiang jo etho tsütsae jiang tsso jina ochia onte nzanchiwo n vancho. 2 Chüa yithako jiang mmhomo osi hojiang a tssohunga, ntiotssole onteno eküm evamo jiang lona mmhonkata. 3 Tokha tola chüthako osi eküm evamo jiang thüngina mmhonkao jiangjo n buk ntsao jiang osi limha shilo n tsanrük tssoa evamo jiang n hung ntsao jiang mmhomo. 4 Kyon na ekhyo hungu tsükona ntioli tata sanga elhi tssota sana jiha ana ntsithaka; jijo ontena onte phinakiren jiang mhyiktsso rakio jina. Tokhatola jijo ntia ethev nli. Hojijo mbung ji phana vancho esüa tüv. 5 Ontena phyoala kyon na okhe khatasi khangtsüngi chüo jijo zhüva elhi to. 6 Hojijo otsotso tssokuka, tokhatola yuta topvülo okhe eniata na n tssochov nbung ji phana vanthungona ji tara. tae lio jilo lüm püka vamo ji mmhomo. 7 Ethev n lio eküm jilo ntiosana ana zeche lia. 8 Kyon tsükana otsoero osi jeni n vam ombo tae vana, tole ombona ntio liana jina lüm n pükvü elhi tae tssoa vanala. Ombo ocho echi sangala, osi ombo ematha ji n khina ocho echi tsükona hetata sanga tssoala? Hojiha zhüva elhi, osi eküm ezüpo vanthukala. 9 Tsüka tae tsso ji thüngina jo otsük eni tsso jimmhomo, ntiotssole nzo tssoe elhi tsükata tssorhüpkuka. 10 Onilo tsüka ekhünga tssona tsüka jina ombo sükakuka. Tokhatola ochosana ji omboti tssole ekhüngna elümoto e n tssohung, ntiotssole ochona tia ombo n süka. 11 Otsük eni tssona etssüko lüma nzo yipcheta, tokhatola niboti tae tssona kvütoli nibobo lüma vamla? 12 Tsüka ji tae tssoathüng orina ekhyothechiv tolia otsük eni tssona zalanchicheta. Ozhü ethüm nnotsüo jijo zakto n tüpchetala. 13-14 Kyon tsüka ji yantsa vanlia nrichei ombo meta jilo mesae kümkhuka, mekana vüngpheni vamo jina vantsü jilo khuktheta yikuka, tokhatola ombo esonlani zhüva oyam püngno n khia tssona, omboji pungdenro tsükana yantsa khatola kichuk jüwo ji mmhomo tssoala. 15 Ana limha shilo evan kyon topvü echi nchümi zecho, tole ana nchümchecho, tsüngona lojo onte yolo pungdenro ochona sana jo mesao yantsü jilo khukthev to. 16 Ombona yansao kyon jiang n kha-khamo tssokuka, tokhatola ombo chüana ombo elhi jiang man ochina ha montsso ombo epi n vanala. Hetüv jo ntia oman n li. ochona sana mbung ji phana vancho tüv.
Tssüsoa Echümchaki Ti Vata
1 Khümpheni woathüng ntangshona. Zhüvae kyon ochona elan osi n lan jo ntiosana n tsina tssoji esüa othan pilo tae oji thüngina jo ntsi khilo oji mmhomo. 2 Nina ntia n phyothüngna nchümi zeta, osi Potsow thüngi ntia tsüsoa echümchaki ti vata. Ombo potsüwoe vana osi nino limhae vana. Nina ephyov lio jilo kyungkata ntia ti phyoa. 3 Nina kvüthüng wonkhyuana tata omüng tsükshiv, osi nina kvüta oyi kyungana tata oyi nsansorav. 4 Nina Potsow thüngi phyochakana, hoji zakto benthuki sia. Ombona zhüvae ethev n li. Nina etssov phyochako ji tssoa. 5 Echümchaksi n tsso ji thüngina jo n phyophi ntsao ji mmhomo. 6 Ni yi ji khi mmeni ni tisothechithuka, osi pvüti ji nina ngashüa phyocho to ti-zoa. Ntioli Potsow khi ni thüngi lüm tsukthukvüla? Ntioli ni elhicho ji ombo khi roe ni sithukvüla? 7 Nina elüm matang lea, elüm ethev n lio elhi tssolea osi elüm nsanrhyulia nina Potsow ekyu lo jo vam shikhfü.
Eküm jo Ethev N lio
8 Yansae jiangna yantsae jiang tssethechia onte elan jiang khi siyio ji zesi timhuktava. Tsüphoe otsükakvü ombo pomoe jina nkoa la osi woniata oni pomoe jiangna nkoala. 9 Mesao jina ha liri jilo enghikatala. 10 Nina orang nzanchojo kvüthüngha ni lüm pükvü mek. Nina ejüeli kümü yanlia ni jüpomo jiang topvü nina hungrav mek. Hoji jo ntia ethev n li. 11 Kvüta ejüelia ni küma sana tata kyungkata oyam süphi lümbüm liala. Nina khakchov jijo nino eli to nchümo ji tae. 12 Elhi etssoe jijo etsoyu lilea n lilea eyip tia noyinga yipchetala. Tokhatola ejüeli jijo khosha lio jina n yipthev wonkhyuala. 13 Limha shilo e n tssohungtsov ana hungwo jijo kyon na ethelan elilo echi ejüeli nkümthe vata vansi, 14 tsüngona lojo oton n lio elhingo lo thechi echunga taena ezirae sisi otsoe jiang echi tia n vayichev sioji. 15 Etena limha shilo kvüto khejüng rochosana jito ntia n hana sisi yiv. Etena elümoto sanga elhingolea ntia khi hansi n yiche. 16 Hojijo nlancho ke! Etena kvüto rochosana jito tae yiala. Etena mbung ji rhümav sanga phanala, tole etena ntio khakchoala? 17 Ete eküm jo omüngi osi nungralo, lüm etsuk osi nochonori lo vanala. 18 Ana heto chechethaka: Kyon tsükana jo Potsow na ombo pio eküm esüngaro jilo ombona elhingoe yantheo jiang tsoyusi emathata vamo ji mmhomo; hoji jo kyon lo sekao ji. 19 Potsow na kyon tsüka ji ejüeli ombo pia emathata tsoyutuka tssona ombona emathata Potsow montsso pia ombo sangcho ji tsoyuv etüma. Hoji jo Potsow thüngina yantso. 20 Potsow na ematha ombo pio jina eküm ji hungri lea tata wonkhyu n li.
1 Limha shilojo elümoto n tsanrük lia to ana chechethaka. 2 Potsow na ochosana jo ejüeli, myingthüng, tsütsaelan, osi ombo jüpomo topvü ombo pisi hojiang ombo n tsütsaphyatukala. Jithüngina jo omoatssi jiang khi tsütsata yithukala. Hojitüv jo ntia ethev n li osi shijo topvü syulyuo. 3 Kyon tsükana otsoero nzo bena vanlea osi nzyu songa vanlea, ombo ejan ematha ji n hunga tssona osi echü tia ochona ombo n tanünga tssona, ombo thüngina jo ngaro echü buko ji mmhomo to ana phyoala. 4 Hoji ngarotsük jijo buko ji oman n li; omboji emüngi rheyi sisi, ochina ha ombo n chümchetala. 5 Hoji ngaro jina jo tsüngon wondang jo kvütüv sana tia n hungala, tokhatola ombo tsükona jo esan hungthaka 6 elani kyon ochona sana nzyu wothüng eni vanlea eküm jilo ematha n khio jiha ngaro echü buko jilona n mhonkao. Ntiotssole onita meta motsünga lo yiala. 7 Kyon tsükana elhi tsso ji topvü ombo püngi ethev sangala, tolea kvüthüngha etsson n hungala. 8 Kvütoli kichuk ejüi jijo zhüvae jilona mmhonkachola? Yantsae jina kvüto eküm vamsana engathena ntio oman lichola? 9 Ntia ethev n li; hoji jo mbung phana vancho esüa tüv. Nina ntio ni jüponana jiangna ni wonkhyua tae vamo ji thüngina jo nina ntio liana jina lüm püka vamo ji mmhomo. 10 Ntio tssov sana topvü nkolona sekarae lia, hoji tsükona kyon tsükana ombo pomoe etho jüwo ji thüngi ekhiranta n vamo ji mmhomo. 11 Nina kvüta sunga ekhiranta sana tata n mhomkao tssov, osi ni eman ntia n li. 12 Kvütoli ochona esüngaro eküm yuta shilo kyon tsükana mmhontso ji ntiosana ntsichevlaeküm shijo khümcho esüa esüngaro moni esio. Kvütoli ochona echü süi ntio tssov sana ntsichechola?
Eküm Tsükona Yilan
1 Myingthüng mmhom jijo mozhürhüm tssentsü lona mmhonkata, osi ili echü tsüngon jijo ni ebuk tsüngon jilona mmhonkata. 2 Tokhuta vamo jilo wothüngona jo echü kyata vamo jilo eoji mmhomo, ntiotssole eküm evamo jiangna ha echü jina otsük akvü enhyaka vana to engathei ekhiv lia. 3 Ematao ji thüngina jo nungra ji mmhomo ntiotssole nungra jina ni mha nzhüthuklea hojina engathewo etho ni rankayiala. 4 Kyon ochona yuta topvülo ematha eyam tae nchüma vanasana ombo zhüvae. Nchümri eli jiangna jo echü tsükona nchüma vanala. 5 Zhüvae na ethüngkhen ni denkao ji thüngina jo nchümri elina ni mako ji mmhomo. 6 Zhüvae jina ematana, okyo rüngcho baraka tüv. Hojilo ntia otsa n jü. 7 Nchümri ejüina ochosana ejithechia na zhüvae esüa tssoe ejithechiala. Nina ekhüp khio jijo nibobo ni mhadung yesoala. 8 Olan taro lo benkaphen ji thüngi najo echephen ji mmhomo. Kangtsü ji thüngina jo erüm eto ji mmhomo. 9 Ni lüm etsuk ji tangthechi vata; oyam etssak hansi vamo jijo zhüva elhi. 10 Kvüthüngha lea heto ti enga, "kvütoli olan taro nkolo mmhomo tssochola?" Hojitüv jo kichuk ejüi yilan mek, 11 Eküm evan kyon topvüna nchümri lia vam lia; tona ejüeli osi tssentso mmhom licho esüa tüv osi orangna lüm püko tata ni lüm püka vam 12 Nchümri lio jina ni jüngtheta vam. Hoji tsükona ntsinran lio jijo oman lia. 13 Potsow na ntio tssothakcho sana hoji nchümi zeta. Potsow na khangkhfüa nsüngrüo ji kvütoli ochona nsachechola? 14 Ni sükhying mmhona vana na emathata, tokhatola ezüp yiana, Potsow na ematha osi ezüp onita ombo thüngina yithukala to nchümcheta; ntiotssole jisülo ntio tssov sana nina kvüthüngha n tsi. 15 A eküm jo ethelan n lio tüv, tokhatola jilona ana olan taro hungi khithaka. Kyon n mhom jina harishia vanathüng, kyon mmhom jijo chüi siwo tüv ha liv. 16 Hojitsükona mmhonyaka osi ntsinranyaka ti tssoa Nibobo lüngthata tüv mekchoke? 17 Tokhatola zhüvayaka osi nthayaka ha ti tssoa Ntioli ni tsüngon n jam chüvla? 18 Onita lo tssoyak moyak ti lituka. Tokhatola niji ekhümlano lümbüm ethei tssocho jo khyovka. 19 Kyon tsükana nchümri lio jijo yansae otsük taro na yantsü motsünga yansao jilona mmhonkata tssocheta. 20 Limha shilo jo kyon ochia yuta topvülo ori n lina elamo tae tssochewo kyon ochia n van. 21 Kyon na nsamo jiang topvü ti engakhanani phajae jina ni yikvüa mpato zokhuka, 22 elani nina oyam elümoto yikvücho ha lia to nchümchev. 23 Ana shiang topvü füi ezev a kichuk tsütsatala. Ana nchümri eli kümvü tümkacho, tolea jijo ana n tssojamo. 24 Eküm jo ntiosana kvütoli ochona yanchekükchola? Etena n chümjamo elüm junga osi engathev khünga. 25 Tokhatola aiyo ntsinran lo jüngthei vanala; Ana ntsinran yam tümkacho osi oyi-olan lio shiang janlam eyam zikacho, toli khi eyimtsari jo kvüta n tha osi zhüva sana engathev tsükona. 26 Ana echü lona n mhonkao ntiosana ntsi lia jijo-eloe. Ompvü nzan jina tsirhi osi zonyaphen esüa ni rhümav; osi ompvüna ni khayao khe jiango shenphenzhü esüa tüv. Potsow ekyui eboe jina jo nkachoe siala, tokhatola ompvüna mmen kyon jiang süyatala. 27 Ho, jungzio jina phyoala, ana engav lio jiang tara tara na yancherata yiala. 28 Thanpo janlan jo ana yana khatola n yan, chehan. Ana eboe wothüng motsüngalo yikrachi eli tsüka yanchetala, tolia eloe jo yikrachio tüv tsüka tia n yanchetala. 29 Ana engathethako ji shi: Potsow na jo elümoto polaroa osi zükhoa e joyingcho khatola etena etebobo elümoto ngontsüngu kümthukala.
1 Nchümri eli kyon jina otsotso jo ntiosana ji ntsiala. Ombona nchümri mmhom jina ombo mensethukala osi lüm etsuk ji ombo mhalo na khi siyiala.
Mesao ji Yi Engayia
2 Mesao jina ntio phyoasana ji ephan tssoa, osi Potsow thüngi tsüsoa echümchaki ti vata. 3 Mesao jina ombona chokao jiang tssocheta, hoji tsükona ombo nkachoe vana; hojitüv ekyutssi vanpheno ti vana. 4 Mesao jina etho tsütsata elhi tssoala, osi ombo elhilo ochina ha ntia nryulanchikuk. 5 Nina ombo yi engathüng nandang jo ntia ekyu nli, osi kichuk ejüi jina jo hoto etssov yüta ntsiala. 6 Elhilan taro tsükona etssov yuta etüm osi elamo lona etssov lanka ji liala, tokhatola etena jo hojiang tara tia n tsi! 7 Ntio kvütüv tssovsa sana etena n tsi osi ochina ha hoji ezoe tüv ochia n van. 8 Kyon ochina ha echü jilona n tsanchoche mekana ombo echü tsüngon ji n senchiche. Hoji yuta jijo etena n tsanchocheo yuta ntav tsotso osi etena hojilo na okyak lia nkae n yiche.
Nthae Tona ntsanrüng to
9 Limhalo tssoa yia vamo shiang ana zele shiang hetopvü zechecho, jijo limha shilo ochoang sana jo etho eliden ochoang sana jo etho eli jiang küpo ezüp khia vanto. 10 Hoka, nthae jiang ha shotheta ana hungthaka tolea sho thesi yita vanathüng ontena n mhom etssowo yantsü jianglo kyon jiangna mpato onte thanthünga zothaka. Hojitüv jo ntia ethev n lio. 11 Ntioli kyon na khetsü n liv ntha elhi tssotala? Hojijo ntha elhi ji zaktole khangshi mpio jina. 12 Mmen kyon jina ntha elhi nzo bena tssosilea eküm vanlankuka. Ho, ontena heto phyotao ji ana ntsia, "Nina Potsow jancho zona olan topvü mmhomka, 13 tokhatola nthae jiang mhadung jo mmhom meka. Onte eküm jo khümchoro esüa tae osi onteno nungothüng na onte chüv, ntiotssole ontena Potsow yi n nga." 14 Tokhatola hojijo zhüva yilan. Limhalo tssoa yia vamo shiang zeta: Kvülosana jo nthae jiang na mamo ezüp ji ntsanrüko jiang na ndukala, osi ntsanrüng jiangna mamo yantso ji nthae jiangna hungala. Ana phyoala, shiang hetopvü ethev n lio. 15 Hoji tsükona ana zecheo jijo kyon na limhalo evanthüng ematha longshi jiang khia vam lia, ntiotssole limhalo kyon ekümo ematha jo tsosi yusi ombobo emathata vamo ji tae. Hoji tsükona Potsow na limhalo evam eküm yuta ombo pio jilo ezüpa vanathüng hojito etssov etüma. 16 Ana Kvüthüng nchümri eli kümi limha shilo ntio tssoa yiasana jiang ntsiv ekhyo tssoa sana ana zicheo jijo nina zümo eng nyip thena zilea, 17 Potsow na tssoavamo shiang n ngathe. Nina elümoto ekhyo tssolea hoji ntsiv mek. Kichuk ejüi kyon jiangna ntsia to phyov khatola ontena n tsi.
1 Ana shiang hetopvü tsükona sunga nchümi zesi engathethaka, Potsow na ntsanrüng jiang osi nchümri lio jiang elhingo jiang olan soala, ontena nzantao jiang osi tssaktao jiang ombona sayayiala. Kyon ochina ha ombo mhadungi ntio tssov sana n hungjan. 2 Ntia echümpota n li. Ntiotssole sükhying topvü ntsanrüng, nthae, mmhona evan osi mmhona n van, Potsow ntsia evan osi Potsow n tsi, othan epi osi n pi topvü pono kheti. Kyon mmhom jiha mmen kyon jilo na n chümpotacho tüv; phyochaki vao kyon jiha hojito echümchaki nvao jilona mmhonkacho n li. 3 Sükhying motsünga ji kyon topvü pono kheti yiala, osi hoto tsso jijo limha shilo ntio tssoa vanchosana ji esüa n lan. Kyon jiang eküm evanthüng nandang jo onte nchümri ji n mhom osi zhüva tae, osi tssükarungka onte chüi siala. 4 Tokhatola kyon ochona eküm evamo jiang limhae vancho sana jiango eyilo tara lia; hingho echü ji thüngina jo füro eküm ji mmhomo. 5 Ho, eküm evamo jiangna jo onte echüv ji ntsia, tolea echüi jiang na jo ntia n tsi. Onte yantso ntia n lilan; osi tüngtünga mhechoe onte siyiala. 6 Onte nzanta, tssakta osi oso erüng jiang topvü onte echülo chünhyae siala. Ontena kvüthüng ha elani limha shilo ntio tssoa yia vancho sana shianglo okhe ntheche. 7 Nina lio jiang tsoyusi emathata vana; ni zükhi jiang yusi longshia vana. Potsow na ntia phyov meka. 8 Yuta topvülo ematha chancheta, eyichana vana. 9 Potsow na limha shilo ethelan n lio eküm ni pio ji elithüng nandang jo nina nzamo eloe ji nini emathata vantava. Eküm jilo ethelan n lio tsüngon jiang topvü ematha lo tsütsata vana, ntiotssole jijo ni ezüp topvü man ji hoji tae tssov. 10 Nina ntio tssoana jilo lüm theta tssoa ntiotssole nina yia vamo echü meta jilo jo elhi etssov, nchümriv, ntsinran osi nchümri mmhom ntia liv mek. 11 Ana heto ha nchümchethaka, limha shilo jo eyungo ekhyingo jiangna yuta topvü lo ovüngo ji hungu mek, osi lüm tssomo jiang na yuta topvülo ritsso lo ekhyo n hung. Nchümri jüwo jiangna yuta topvülo tssikung hungi tsoa mek, kichuk ejüi jiangna yuta topvülo ejüeli hungu mek, osi ekhyoetoe jiangna yuta topvülo vanphen omhawoe chüngiv mek. Sükhying n mhom jina otsük akvü rhakala. 12 Ni yuta ji kvüthüng yivsana ji nina kvüthüngha n tsi. Woro zaktole sacho to, ongo zakto zonyachoto, yuta n mhom jina etena n chümphiv vanathüng oyi ejanala.
Ntsinran Tona Zhüva to Thüngoe Yilan
13 Ana thanpo ha heto zechei lia, limha shilo nchümri eli jiang kvütowoena zetasana hoji. 14 Yantsü teriv motsüngalo kyon mataroa vancho. Tole mesao etho ejüi tsükana hoji ritsso sakacho. Ombona yantsü ji hazhüi pikhvü jiang rorhüpvü benkacho. 15 Hojilo yantsae tsüka yantsae khatola ombona yantsü ji lea shanchokuka okyak lia tüv vancho. Tokhatola kyon ochina ha ombo n chümphiv vancho. 16 Ana yuta topvülo etho ejüi thüngina jo ntsinran elioji mmhomo to phyoala, tokhatola kyon ochina ha yantsae jo ntsinran lia to n chümiala osi ombona ntio phyoa sana ochinaha n ngayiala. 17 Zhüvaeden yolo esopvüi jina nshanlunga vamo ji engathungona jo nchümri eli jina enato nsamo jiang yingto enga vamo ji mmhomo. 18 Ebensü jiang thüngina jo kichuk jüwo ji ekhyingo elhi tssoala, tokhatola mmen kyon tsükana mmhom elümoto n mhom kümthokala.
1 Benho echü jina mozhürhüm ntav opvü motsünga ji totona n nani situkcheta, hojito ejükaro eyimtsari jina lea ntsinran tsüphotso ji yesoe sikuka. 2 Tathi na kichuk ejüo jina elamo tssosi kichuk n jüwo jina silyuo tssoala. 3 Ombo eyimtsari ji ombona olani na tssüka omoatsi nduko jiangna lea chethetala; osi ombo zhüvae to otsük akvüna ombo ntsitokala. 4 Ni yansapvüi jina ni thüngi lüm tsuka vanathüng ni elhi esam erani ti pia; ntiotssole nina mmyimi vanwo n lan tsüphov lea ni siyikuka. 5 Ana limhalo n tsanrük ji heto hungthaka-jijo yansae jiangna n tsanrük litoko ji. 6 Enhyatsari jiango elhi tsüphov pisi ejüeli jiango khachoe siala. 7 Ezii jiangna kvürü mankvüi khukthesi tsüphoe jiangna eziiden esüa ojoena tsata vancho ana hungthaka. 8 Nina sokvü jyuchojo jilo ni rheyiv; nina kyimchung vanrhüpi rhowochojo nrü na ni njüala. 9 Nina olung vanropheni elhi tssona olungna ni meyanala. Nina otssüng tssina jina ni meyanala. 10 Ni pvü ji mbüm tssoaha nina n phyaka tssona hoji elümoto ni sangtsünga tsütsachev. Ovüngna matanga vamo jilo elan elio. 11 Nrü jina ni njüdentoka tssona nina nrü mmhanyathio ji ntia ethev n li. 12 Kichuk ejüo jina ntio phyoasana jiangna ombo myingthüng hana yiala, tokhatola zhüvae jijo ombo yi jina ombo yesoala. 13 Ombona yisha nsana benkae owo zhüva yi lo echetala. 14 Zhüvae jina tümjak n lina nsanala. Shanlan etsao jilo ntio tssov vanchosana ochina ha n tsi, osi e chücho süi kvüto tssov sana ochina ha e n zokuk. 15 Kyon ocho ombo ki eyiv tia olan n yanchev vanchosana jijo elhi na tssotsüngi sangtsüngi siala. 16 Meta kvüwoe mesao ji nunghori sana osi esopvüi jiangna zümo thüma tokhuta sana ji meta jijo ezüp lia. 17 Tokhatola meta kvüwoe mesao jina ombobo khentan yitana methak khia sana, osi esopvüi jiangna yuta eben lo tsoyua sana, osi ontebobo tanglanchisi n kinoa sana hoji meta jijo mmha lia. 18 Kyon ochona ombo mhonkhi ethav tia n tsiv etho n jüasana, oki eryu jothev, osi oki ji eyav. 19 Tokhu tssotao jina ni emathatukala osi zükhi jina ni nthiphia longshitukala, tokhatola onita orang lisanati tssochetala. 20 Mphoena tssolea mesao ji ti phyocho-phyoriyia, ejüeli jiangha ti phyocho-phyoriyia, ni yiphen chungi nipoti vanathüng lea. Nina ntio phyoasana jiang ji woro na mpato owo onte ezov.
Kichuk Ejüi Jina Ntio Tssoala
1 Ni rang ji metapoe shisho lo thechia, tona tsüngona lo nina ekhak hunguka. 2 Ni rang ji meta khoshalo thechi vatameta khoshalo thechirae vata, ntiotssole limha shilo ni mmha n liv ntio tssovsana ji nina n tsi. 3 Odung jina hetowoe yilea, hetowoe yilea ji yi ntia n li, osi odung ji kvütowoe eya yiasana jilo vanthei siala. Eluk jiang hanrhyuana eryu joala. 4 Nina mpung chiyiv osi tsünglan pochiv nhyaka vanchojo, nina ntia n yingjüyüngriche osi ntia ri n khiche. 5 Olan topvü Potsow na tssoala, osi oyo ji mmani ngaro ji kvüthüng njenkacho sana n tsio ji esüa Potsow na ntio tssoa sana nina n tsi. 6 Enyathüng mojü vena osi mmyuiha vena. Ntiotssole yingo jiang topvü pebukvü osi yingo jiang yolo kvümoe ji mmhomo tssov sana nina kvüthüngha n tsi. 7 Engo wondang ji hungwo jijo ematha lia. 8 Nina eküm vamo nzyu jiang akvüto tsükona montsso pia. Nina kvüta sunga eküm vanana hojilo sungkao echü jilo vamka to nchümcheta. Ntia mhadungoe eyiloa zechiwo tüv n li.
Pungdenro Thüngi Ndungtssung
9 Pungdenroden, nte loro khyingrothüng longshitava. lorokhyingroa vanathüng emathatava. Ntena ntio tssohungana tssotava, osi nte lümbüm rüngcho jiang benritava. Tokhatola ntsi khitava, ntena ntio elhi tssoa sana jiang khi Potsow na oyi nte tssoyivka. 10 Ntina ha ni ti wonkhyutoka mekana ni ti ezüptoka. Sunga tsükona ni lorokhyingroa vamsa meka.
1 Hojitsükona ni nungothüng jLAm na ni lyuyingpvüi nchümcheta, enungrathao tsüngon osi nzyu jiang nyithüng osi nina, "Aiyo eküm a n vanhung." to n phyothüng. 2 Hojithüng jo eng wondang jiha, choro osi shantio wondang jiang ha tüngzüpi siv, osi eryu ejüo eluk jina Kvüthüng ha yaki yiv mek. 3 Toana ni khe kvüwoe na ni shanchothakcho sana jiangna enev, osi ni jo enhünga khyunga vamo shiang pelaki siv. Ni ho jiangha etsoyu n jakchev matarokae siv, ni mhyik jiang ha monlyui ntssünga n hungu siv. 4 Ni eno jiang ha lantsüi wonlan taro jianglea n zov büngi siv. Nina tssoktssüphen ji won jilea zoshuka zov, okhen jiang ha zov mek, tolea yipana woro won na lea ni nthechi siv. 5 Meta ntssom jiang ni kyuv osi olan etsav jo ekyu lia ni kümvü. Ni tssan jiang pyukvü; osi ni tsük tia n süphov siv, osi ni tsük erüng topvü moni siv. Etena ete vankhaphen jilo yiala, osi lantsü jianglo kyatanrungta liv. 6 Janti yuko jiang tüpvü, osi shona milon jiang elungi kherhüpvü; osi jükhae wozhü shenkao ji tüpvü osi jüpvü jiang ephakroe siv. 7 Ete tsük jiangna likoe livero kümi siv, osi Potsow ethük shijo ochona e pichosana ji thüngi yilani siv. 8 Jungzii jina phyoala, ntia ethev n li, ethev n li, osi shiang topvü moni esio.
Tssorhyucho
9 Tokhatola jungzii jijo kichuk jüwo ji tsükona, ombona ntio ntsiana hoji kyon püngnoa vancho. Ombona püngno yiphyo jiang khae zesi tüngochüa tsseni zecho. 10 Jungzii jina lüm ebük yi jiang yanchev ekhyo tssocho, osi ombona eramo yi jiango ntsa. 11 Kichuk ejüi jiang na phyo jiango olyu enhyangna olyu eraklanchiphen nzeni pemo ji esüa tüv, osi püngno yi khyarhyuo jiango eshenkyo junga eshenthechicho tüv. Hojiango Potsow na e picho yi, ombo ete topvü-rhükipvüi. 12 A tsoeyo, chei zeotüv ntiosana lilana. Kako eram ochüm n li, osi kyungtia khao jina ni sangtokvü. 13 Shiang hetopvü sülojo, ephyov motsünga tae lia: Jijo Potsow yikrachi kyuchia, osi ombo yizüng jiang enga, ntiotssole hoto etssov tsükona tae kyon lyuyingcho. 14 Etena ntio tssoana topvü Potsow na etsi zevsala, mmhom lea, n mhom lea, osi mphoe na tsso jiang mpato ombona etsi zev.
1 Okhen jiang yolo mmhontsowo, Solomon nsikakhen ji.
Okhen Ovüngo Ji
[Eloe jina] 2 Ni menfü jiangna a eyuka antssüphiala; Ni nzan jo zükhi lona mmhonkata. 3 Ni lo orhüm mmhom jüa; osi ni mying jina orhüm ji zokatala. Eloe ochina ha ni n lümvü n vanche. 4 A sosi yia, osi eni tsantavka; A mesae tssoa, osi ni yipheni a sotheta. Eni nzo tssoe emathatavka, Eni nzo zükhi yutasi, nzantalo jüngthetavka. Eloetsü na ni lümo ji etümthata. 5 Jerusalem lo eloeden, aiyo a nyika khatola opyon mmhona, Kedar lo lijüngi süranki jiang esüa a nyika, khatola Solomon mesaki zonchaksü jiang esüa opyon mmhona. 6 A fü nyiko ji tsükona a ti zerüpa, Eng jina a tükae a nyikchoka. A pyao jiangna a thüngi lüm tsuki jününgroli elhi a tssothukcho. Ana apopo yayia ntangshom yuta n hungchoka. 7 A nzamo, nino ni olyu jiang kvülo yantsotukvü sana a zoa? Eng etssotso lo kvülo onte esantukvü la? Ntioli ana enhyang thanpoe jiang olyudeni ni yamla? [Eboe jina] 8 Meta ji nina n tsichoke, eloe yolo mmhontso eloeyo? Tssiden ji phana woa; osi ni nyanyaden jiang ji olyunhyang jiang ranki ndüngo yantsothuka. 9 A nzamo, nino, Kvürü lamen jina Pharaoh Kvürü rasan jiang jüpontuka to eboe na ni jüponala. 10 Ni tssan jo ni eyo zonzhüa mmhona osi tssentsü yuko to evüng zonjana, 11 Tokhatola ena shona yuko osi janti oyok-osen ni joyivka. [Eloe jina] 12 A mesao na belungo erikae vancho, osi a mozhürhüm na ezhü pyinga rhümcho. 13 A nzamo na a tekilo nankatathüng mozhürhüm mmhom ana zoala. 14 A nzamo jo Engedi metalo jününgroli jianglo ora thera zae kia vancho esüa tüv. [Eboe jina] 15 A nzamo, nino kvütata opyon mmhoncho ato; ni mhyik jiango kvütata nzan na pyinga nrüngcho ato! [Eloe jina] 16 A nzantsowo, nino kvüta ni khyingrocho ato; Nina kvütata atssohungtoka ato! Eroyo mmyako ji eni belüng tssotavka; 17 Cedar dung jiango eni ki kyimchung nkho tssotavka, osi Cypress dung jiango eni phfüki-ethang tssotavka.
1 Aiyo Sharon metalo orae thera tae, osi phunglan jothe hayilo oropangti tae. [Eboe jina] 2 Eloe jiang yolo a nzamo eloe jijo okyo yolo oropangti jücho tüv. [Eloe jina] 3 Eboe jiang yulo a nzamo eboe jijo orae odung jiang yolo malanthidung jücho tüv, ana hoji khümcho lo a esanhungala, osi hoji tsüngthi jijo a püngo ekhyingo tssüngthi. 4 Ombona ombo tokhupheni a sothetala osi nzan riven ji a kvüri chungala. 5 Tssüngthi nkongcho khi etho achükathuka, osi malanthi khi a tsoyo thuka! Aiyo nzan erüng lona a mmikatala. 6 Ombo khe hayiwoe jijo a kvüri kupi, osi amimoe jina a mmyiphiala. 7 O Jerusalem lo eloden; siano osi tsiyo ekhyingo jiang khi echümta phyotava, ntena e nzanta e n khetsü to.
Oken Enioto Ji
[Eloe jina] 8 Ana a nzamo ji won zoala. Ombona phunglan ponina yunga tsata, osi yingsüng jiang yakchia yunga a thüngi tsata. 9 A nzamo jo tsiyo tüv, osi sianoro tüv. Ombona jilo pikhfü lo mangi vana. Ombona kiporo lona zethechiala osi echung zarango jiang lona chethechiala. 10 A nzamo na a janala. [Eboe jina] Tona roa, a nzamo; a phana roa a nzamo. 11 Vami ji yakthaka; osi eryu ejo esanthaka; 12 orae thera jiang kicheta vanthaka. Yuta shijo okhen eden yuta; Oli jiang lona yukhyu won zoala. 13 Züothi jiang emhem benkatala; osi jününgro ebemo ji rhüm na ezhü pyingala. Hoji tsükona roa, a nzamo; a nzantsowo, a phana roa. 14 Nino yikhyu na longkvüi mphoa vancho tüv. Ni nzan mha ji a hungthuka, osi ni tssüngya khen ji a zotuka. 15 Shiali terio jiangna ete jününgroli ebenathüng ji roe n sithüng rhümata. [Eloe jina] 16 A nzamo jo a echi, osi aiyo ombo echi. Ombona enyathüng ezhü ji veni emüng ji yithuki n sithüng nandang. Ombona woro pangti yolona ombo tssiden jiang süphiala. 17 A, nzamo, enyathüng ezhü ji veni emüng ji yithuki n sithüng tsiyuro esüa osi Bethar phunglani na sianoro esüa kholani a thüngi yia.
1 A belüngo zümo akvü yipa, ana a nzamo ji tae emhala. Ana ombo yancho khatola ombo n yanche. 2 Ana yantsü echüki sia khyuphia wocho, osi lanro lantsü dunga a nzamo ji yana wocho. Tokhatola ombo n hungcho. 3 Zümo lo yantsü enhyang jiangna a ndukcho. Osi ana onte engacho, "a nzamo ji ntena hehung?" 4 Ana onte yaki yipvüto, ana ombo hungcho. Tosi ana ombo süyae n yitokvü sicho osi ayo ki abuko chungchak jilo ombo sosi wocho. 5 O Jerusalem lo eloeden; siano osi tsiyo ekhyingo jiang khi echümkata phyotava, ntena e nzanta ji e n khetsü to.
Okhen Ethümo To
[Eloe jina] 6 Lijüngina miphung ejukato chiyio shijo ntiola, shishoe na orhüm mmhom yemo jiang esüa orhüm mmhom yio shijo ntiola? 7 Solomon ji ombo yantsü lona ejümta tsata; Israel lo rasan mmhontso otsük rukro na nkohoa tsata. 8 Onte topvü na yonri tsütsa lo elümoto tssothia; osi ritssolo zenran ejüi tae. Onte otsük akvü yonri bensi zümolo ekyutssi ntang tssoa nhyaka tsata. 9 Solomon mesao jo tssentsü tssüng na shancho vantsü lo khukthe ejümta tsata. 10 Vantsü jo jiango janti na eyukcho; hoji poni jo shona phyonkacho sü na eyukcho. Hojito khukthephen enyipo jiango ejümsü na eyukcho, osi jiango Jerusalem lo eloeden na mmhom tükcho. 11 Zion eloeden, oro Solomon mesao zetava. Ombo yanpi yanthan tsüngono osi ombo longshi tsüngon jilo oyona kikhotoko kikho ji kvüri lo venkacho.
[Eboe jina] 1 O a nzamo, nino kvüta opyon mmhoncho ato! Ni nzan mhyik jina ni mhashüng chungi na kvüta tüngra to. Ni tssan jina Gilead phunglan lona nyanyaden tsukphita joyia vancho to tsukphia la. 2 Ni ho jiang jo olyu tssan tssüchopancho etssüi vacho to ehüma. Ni ho jiang motsünga tia n lunghan; osi onte topvü etüma rencho. 3 Ni menfü jiango süporo emyom tüv; nina oyi nsana na kvüta ezev jücho ato. Ni eyo jina mhashüng chungina tüngrala. 4 Ni evüng jo David rizümphen ntssom ji esüa tüv osi enyiproa, osi füfo wothüng na renzhücho yuko eyikcho. 5 Ni shyuro jo woro pangti yolo na tsiyo, osi siano nshüm züta vancho tüv. 6 Ana orhüm mmhom elio phunglani vamka, mozhürhüm enüngu meta jilo, enya wonchi zhüro vena osi emüng n nyakrathüng nandang nhyaka vamka. 7 Nino kvüta opyon mmhoncho ato a nzamo; nino kvüta njüm ato! 8 A kikhümyo; Lebanon phunglani na a phana roa. Aman phunglan kvüri na a phana joyia, Senir phunglan osi Hermon phunglan kvüloshi hengho osi khvüzhü mmhorü vancho sana jilona. 9 0 a nzamo kikhüm, ni mhyiki zethechisi ni yuko jiang lo zekatana a lümbüm ji tssüngyata yiala. 10 Ni nzan jina a longshitukala, O a nzantso osi a kikhüm. Ni nzan jo zükhi lona mmhonkata; osi ni rhüm mmhom jijo mozhürhüm jiang topvü lona lia mmhomkata. 11 Ni menfü lo tssakijü jüa, a nzamo; ni nnli jijo a tsükona jo shirojü osi tssakijü tüv. Ni mpensü lo Lebanon phunglan rhüm jiang benria jüa. 12 A nzamo, osi a kikhüm, jijo mpho parhi esüa tüv, epilanchio parhi osi kija jünhyo esüa tüv; 13 hojilo otssüng odung zala. Hojilo tsarümthi parhi lona tssüngthi mmhontso ji ethicho tüv, 14 tssütsserhüm mmhom jiang topvü n khachona likhana, hakhüv, tssentsü mozhürhüm osi sangsuryu jiang osi orhüm mmhom lantaro likhana. Parhi shilo mozhürhüm mmhom Myrrh osi aloes jiang ha orhüm mmhom thanpo jiang nzo zala. 15 Jüzanjo jiang na parhi ji etsonala, zhükhfüro osi jüro jiang Lebanon phunglani na bukchei tsüjoa yiala. [Eloe jina] 16 O jüki mbung, venchuka, jüjo mbung, osi a parhi vena; osi orhüm mmhom na ezhü pyingtuka. A nzamo ji ombo parhi rotoka osi tssüngthi mmhomtsow ji tsotoka. [Eboe jina]
1 A nzantsowo, ana a phari i rheyithaka, a engh yo, Ana mozhürhüm mmhom jiang hanrhyuala. Ana tssakijü osi tssakpho jiang tsoala; Ana a zükhi osi shirojü jiang yuala. [Eloe jina] O nzamoden, tsotava osi yutava, nzanta jina nte n kinothüng jo tsoyutava!
Okhen Mezhüo To Ji
[Eloe jina] 2 Ana yipathüng, a lübüm jijo n yipthev vancho. A nzamo jina a kibüng ekhophia ana müngtüngcho. [Eboe jina] A nzamo, a rhorothuka, a lümbüm joa nzamo, osi a yikhyu. A kvüri jo yentsso na yingsüthaka, osi a tssan jo emhenjü na njüthaka. [Eloe jina] 3 Ana mpensü khichei vathaka; tona ana ntioli pipolamla? Ana a jo epyothaka; tona ntioli ochon rhyulamla? 4 A nzamo jina kibüng jilo evüngkatala, osi ombona enhyana tsao ji a tsük therüa a tssohungcho. 5 Ana ombo rhorwothukvü methaki vancho. A khe jiang mozhürhüm esei hansi vancho, Osi a yingro jiang lo mozhürhüm mmhom jü esekae hancho, osi kibüng ji chonchiv yonchicho. 6 Ana a nzamo ji kibüng chonchicho, tole ombona yi sithakcho. Oh, ana kvüta ombo on a zohunga ato! Ana eyingoa ha ombo n hung sicho; ana ombo tsa-ha ombona a n yichocho. 7 Zümolo yantsü enhyang jiang na a hungcho; Osi ontena a erhüpa atssoricho; yantsü pikhfü enhyang jiangna a kikho ji reroe a siyicho. 8 Oh, Jerusalem eloeden, echümtava, osi ntena a nzamo ji hungna aiyo nzan erüng lona a mmikata yiala to ezoyitava.
Eloeden jiang na phyoala
9 Eloe yolo opyon mmhontsowo, ni nzamo jijo kyon thanpoe lona echümpotacho alo? Ombolo emhokthao tüv ntio jüchola ntio ntana ena echümchak ni piv ato? [Eloe jina] 10 A nzamo jijo opyon mmhona etho khyunga; ombo wothüng taro yolo kyon tsüka. 11 Ombo mha jo yonjak khüpkacho osi enyipa; ombo tssan jo zanzana, osi kashak to nyika. 12 Ombo mhyik jiango ezehunga osi jütssae yikhyu vancho tüv, shirojüna tsükasi jütssalo vancho yikhyu tüv. 13 Ombo eyo jiango parhi ero osi orhüm mmhomero zacho tüv. Ombo menfü jiango oropangti tüv, mozhürhüm mmhom jüna jümi hancho tüv. 14 Ombo khe jiango mmhona shungcho, osi ombona yingrüm lo tsünglüpvü dukthecho hanala. Ombo tsük jo sotsü ho enyipvü lo pvürüm dukthecho tüv. 15 Ombo phi jiango shona chüngkaphen lo tüv. Ombo Lebanon phunglan jiang lo Cedar tssüngtsü njüpa zacho to pvütsson lia. 16 Ombo büng jiang jo nünga osi emanphiv mmhona; ombolo jücho topvü na a tssüngyatala. A nzamo jijo shi esüa tüvka Jerusalem lo eloeden.
[Eloe jina] 1 Eloe topvü yolo opyon mmhonj) tsowo eloe, ni nzamo ji kvüi yichola? Ni nzamo jina yio lanka ji a zoa, tona ana ni yankyov-ka. [Eloe jina] 2 A nzamo jo ombo parhi yia, Balsam dung ezao parhi jilo yithaka. Ombona parhi ombo tssiden jiang rhükia yantsotukala osi oropangti rhonala. 3 A nzamo jo a echi, osi aiyo ombo echi; ombona oropangti jiang yolona ombo tssiden jiang phiala.
Okhen Mongo To Ji
[Eboe jina] 4 A nzamo, nino Jerusalem esüa opyon mmhona, osi Tirzah yantsü ji esüa e chokao, osi yantsü shiang esüa e mhukthao eloe. 5 Ni mhyik jiang a lona engoe yia; ntiotssole ni mhyik jiangna a süyae siala. Ni tssan jiang na nyanya den tsukphita Gilead phunglani na sanjoa to sharitala. 6 Ni ho jiango olyuden tsükayi-pancho yita vancho esüa ehüma. Oho motsünga tia n lunghan; onte topvü mmyanta rencho. 7 Ni mhashüng ji chungina ni eyo jiang tsünglüpa hungala. 8 Mesao jo mesali otsük rukro vantuka, yinga loroe otsük ekha tiza vantuksi, osi loroeden n khacheo vantuka! 9 Tokhatola aiyo tsüka tae nzamka, Ompvüo yikhyu esüa opyon mmhona. Ompvüo oyo tsolo nthi osi oyo nzantsoro, Eloe topvüna ompvü zesi thanthüngala; mesali jiang osi mesao yinga loroe jiangna ompvü thünga okhen nsikatala. 10 Ompvü mhachan ji taena wonchicho tüv sala shijo ochola? Ompvüo opyon mmhona osi e rakachia, eng osi choro ji esüa tsünglüba. 11 Ana almond dung jiang yolo jorocho jününgrozhü jianglo woniro jiang zelo, osi tsarümthi epena vamo jianglo woniro jiang zelo jorocho. 12 Aiyo a enetala; ni ritsso kvürü esoe jina ritssolo ewov tsükona etssüa to nzan jilo a etssüphitukala. Eloeden jiang na phyoala 13 O Shulam loroe, Sharia, sharia, osi nina shario ji e zetuka. [Eloe jina] Nteno kvütoli ana kyon etüngi vamo jiang yutalona sharia woathüng a zetahungala?
[Eboe Jina] 1 Nino kvüta emhokthav loroe mmhom ato? Ni jo jiang lo jokhüp shikao jiang kvütata opyon mmhoncho ato. Ni phi füyipo ji tssiyanthi na nsüngrücho to Kvütata ezev jücho ato. 2 Opvü motsünga lia, jilona morümthi rhümo zükhi ji jünrhüa vanala. Tssukchüng motsünga lia, jijo oropangti tae na zazhücho. 3 Ni shyuro jiango siano eni rencho tüv, osi tsiyo eni reni vancho esüa tüv. 4 Ni evüng jijo sotsüho na echungkacho tüv. Ni mhyik jiango Hebron yantsü lo wozhüro yantsü ji kibüngo lio jiang esüa tüv. Ni kheno jijo Lebanon phungdungro jina Damaskas yantsü füphia nhyakyata vamo ji tüv. 5 Ni kvüri jijo Karmel phunglan ji esüa ntssona ekhyonkachicho. Ni tssan pio jijo sünyipvü tssentsü esüa tsünglüpa; Hoji pyon jina mesao ji lia tssüngyakhuka. 6 Nino kvüta opyon mmhomcho ato, osi ni lorocho ato; osi ni nzan jilo kvüta mmhom Jücho ato. 7 Nino Balm dung esüa noyingroa, osi ni shyuro jiango rümbüm dung ephyancho tüv. 8 Ana Balm dung jilo chungoe tssüngthi jü lhovka. Ni shyuro jiango a tsükona jo jününgrothi kholung esüa, ni ethük jo malanthi rhüm, 9 osi ni büng jo zükhi mmhontso ji tüv. [Eloe jina] To tssona zükhi ji a nzamo thüngi tontüng tsüa joyithuka, ombo menfü osi oho jiang lo tsükayituka. 10 Aiyo a nzamo echi, osi ombona a chokatala 11 Roa, nzamo, phenlungoe sanphia wotavka osi oyan jiang lo zümo yipchotavka. 12 Tosi nyazüngina phanthitav osi jününgrozhü jiang kvüto rankata sana, osi ebena sana osi tsarümthi dung jiang kvüto ebena sana zetavka. Osi ana hoji lona a nzan ji ni pivka. 13 Nina jilona therarhüm mmhom jiang zov, osi tsüngthi jiango ete kibüng ndüngona ethiala. O nzamo, ana ni tsükona e tssohungo ematha ji ehen ethan benria ni vayichoka.
1 Niji a pyao saliwo, osi ayo shyuro na ni züchecho saliwo a mathav. To tssowo, ana lantsüi na ni ndukathüng ni ntssüplia ochinaha ntia n mmhom a nchümiv mek. 2 Twokha ana ayo ki ni sosi oyi ni khi nzan a shikatukvü. Ana morüm zükhi ni yutuka osi tsarümthi pen zükhi ni yutukvü. 3 Ni khe ayiwoe jijo a kvüri kupi, osi ni khe amimoe jina a mmyiphiala. 4 O Jerusalem lo eloeden, ena nzantao shi e n khetsü to phyochaktava.
Okhen Tiruko To Ji
[Eloeden jiang na] 5 Lijüngina ombo nzamo ewon lo rhümasi tsao shijo ochola? [Eloe jina] Ana malanthi dung küpina ni nthechicho, ni ebuk meta jilo na. 6 Ni lümbüm ji nzan topvü khani sisi a tae a nzana; ni khena a yaka ochia ti rhümata. Nzanta jijo echü ji esüa etho tsüphoa; oso rüngcho jijo echü ji esüa etho jüa. Hojina omi buksochiala osi omi ntav esüa rungala. 7 Ojüna hoji n tsonmheche; osi jüphyon jina lia n tsyumheche. Tokhatola ochona sana orangna nzan ji shiv tssowo, ombona shichowo jijo etssak nkung ji tae tssov. [Eloeji Opyao Jiangna] 8 Ena oyiloe loroe tsüka vana, osi ompvü shyuro jiango enirohan. Hoji tsükona eboe ochona sana lüma tssona eiyo kvüto lyuv ato? 9 Ompvü ji pikhfü saliwo, ena janti pikhfü na eshenkachi vav. Ompvü ji pikhfü kibüng saliwo ena ompvü ji Cedar tssüng ozen khi renchaki ompvü vav. [Eloe Jina] 10 Aiyo pikhfü ka, osi a shyuro jiango jilo zenki tssokao jiangka. Ana ombolo lüm epük osi noying lia to a nzamo jina ntsia. [Eboe jina] 11 Solomon na Baal Hamon meta jilo jününgrothi lia. Lijon ejomana ombo thüngina hoji engochoala; osi onte otsük akvüna janti rang wothüng motsünga ren ombo piala. 12 Solomon jo ombo janti rang wothüng jiang khithukala, osi lijon jiango onte ejan nzo eni janala; tolea aiyo a kija jününgroli lia! 13 A nzamo, parhi na ni won ji a zotuka; a nzo etssoe jiangna ni won ji zohungala. [Eloe jina] 14 A thüngi roa, a nzamo, tsiyo esüa, osi orhüm mmhon lomo zaphen phunglani siano jiang esüa roa.
1 Kako shilo ejüo jiang jo Uzziah, Jotham, Ahaz, to na Hezekiah tona, Hudah lo mesao tssotathüng Amoz tsokhying Isaiah thüngi Potsow na hungtoko jiang osi Juda tona Jerusalem to tsükona yithemo jiang erancho.
Potsowna Ombo Kyon jiang Khonala
2 OPVÜI na phyocho, "Limha osi oyak topvü na ana ntio phyoasana hoji engatava! Nonghori ochoang ana nzana khyocherankümtukcho sana jiangna apanlanthaka. 3 Tssiro-mangsü jiangna onte pvüi jiang ntsia, gadho jiang naha onte OPVÜI ochona kvülona onte süphilümbüma sana ntsia. Tokhatola a kyon Israel jiangna jo kyongkata n tsiala. Osi ontena n ngathe nrüngala." 4 Nteno nte montokvüka, nte mmen jipo, osi n mhon kyonden! Nte mmen jina nte süjothaka! Ntena Israel ntho Potsow, OPVÜI ji sinkithaka, osi ntena sülamoe na ombo philanchithaka. 5 Ntio tsükona hetata ombo panlantala? Ezüp kyongkata nte jüponchoke? Israel kyonden, nte lümbüm nchümri jilo nochonori rhethaka, osi nte kvüri ji okhuora na pyingthaka. 6 Kvürina benkae ojo jana nte tsük jilo mmhom n khyingu sithaka. Nteji okhu-ora, emho osi wontssa na pyingthaka. Nte wontssa osi okhu jiang n tssünghan osi n yukahan. Nti mozhü ha emho jiang lo n thehan. 7 Nte liphungtsü ji roe sithaka, osi nte yantsü jiang ha likolo nshükae sithaka. Ntena zeta vanpüna metapoe kyon jiang na nte meta ji khi topvü roe nte siyithaka. 8 Osi Jerusalem ji tae enhyokae lia, tolea jiha jününgroli enhyang liki ochinaha nkohoa n vancho esüa osi lishakthili liki ji esüa hayathaka. 9 Tokhamo OPVÜI Potsow na kyon ejoma tia enhyokae n vanthukcho saliwo, Jerusalem jo mpümna, Sodom tona Gomorrah to roe siato roe sithakvü. 10 Jerusalem, ni esapvüi osi ni kyon jiango Sodom tona Gomorrah tolo kyon jiang esüa tüv. OPVÜI na ntio ni ezoasana ji enga. Ete Potsow na ntio ni püngno-rünyua vanchosana ji tüngochünga engayia. 11 Ombona phyoala, "Ntena othan apia evamo shiang ana achokata vancho alo? Ntena olyu erungthan apio jiang osi ekümrümo belev khi athamo jiang na atssochyuthaka. Mangsüpong ejen , osi olyu ejen osi nyanyan ejen jiang na a lakthaka. 12 A khümo roathüng shiang hansi role to ochona nte ezochola? Osi ochona a ekhümkina heto wontssonirotale to nte ezochola? 13 Ntena othan hansi erov jiang ntia ethev n li. Osi ntena ntssantssütsse rungtao jina a nnantsüng thaka, nte chothan tokhu, esanmung, osi ekhümlan tsükona sanrhyu shiang ana n zekhukvü sithaka; jiang topvü nte mmen jiang na yesorae sithaka. 14 Ana nte chothan tokhu osi ntho tsüngon jiang a tssakala; jiang topvü a tsükona jo oha mmyingu esüa n hankukthaka. 15 "Ntena okhe yonkachia randantalea, ana nte zekachiv meka. Ntena küma limha mpa randanta lea, nte engayiv meka, ntiotssole nte khe jiang topvü ejen na tümzhücho. 16. Ntssünga tsükae sitava. Ana nte hunga mmen tssota evamo shiang esantava. Ho, n mhom elhi jiang esantava. 17 Osi elan osi mmhom etssov tsükona ntsi khitava. Ntsanrüka tssotava osi oyam na zerüpa evamo jiang nzanchitava, opvü opo n van jiangha onte elan ji litoka, osi emi jiangha nkohotava." 18 OPVÜI na phyoala, "Enhungo hetowoe na eteji engathetavka. Nteno mmen jina ejen esüa rakia nte nzüpyingthaka, tokhatola ana sherhyu esüa nte epyochevka. Nte mmen jiang ejen esüa rakilea, tssansü esüa nte kümtokvüka. 19 Ntena poti a yi enga osi ajancho zoa vana tssona, liko jilona ntio mmhom chiyiasana hoji ntena tsovka. 20 Tokhatola ntena panga ekhirana tssona nte montukvü. A, opvüo na hojito phyothaka."
Mmen Yantsü
21 Yantsü kvümoe longtsüka lia vana rochosana jina enhüngajo lonsülonphyoe esüa etssophyoala! Tsüngon motsünga lojo yantsü shijo ntsan ho kyon na pyingi vancho, toha enhüngajo münghan tae enhyokae vana. 22 Jerusalem, tsüngon motsünga lojo nino janti esüa tssocho, tolia enhüngajo ethelan n liv sithaka; nino tsüngthijü mekana soko mmhom esüa tssocho, tolea enhungo ojü esüa ni kümthaka. 23 Nte esopvüi jiango ekhirankheri osi efüi shomvüden kümthaka; ontena yantso osi ekhüp jiang yuta topvülo khiala. kvüthüng yitssopheni na opvüpoe n van osi emi jiangna onte elan yansana ontena kvüthüngha hojiang nkoho n piala. 24 Hojitsükona Tokhamo OPVÜI Israel Thotsü Potsow jina ntio phyoa vanchosana hoji engatava: "A riden ana nte nlilamka, osi ntena elani a ezüpthuklanchev meka. 25 Ana nte pono okhe thevka. Osi yonjak rongchoe khiato nte richevka, ntelo n mhom ejüo jiang topvü khi nte siyivka. 26 Nte yolo nkolo vamo jiang esüa ana esapvüden osi rünyupvüiden nte pivka. Tosanati Jerusalem ji ntsantho, osi longtsüka eli yantsü to tsavka." 27 OPVÜI jo ntsanrüng etssoji tsükona ombona Jerusalem osi hojilo evan kvütata na onte mmen lona khophiana topvü shanchovka. 28 Tokhatola kvütatana mmen tssoa ombo panlana sana jiango rorüpi sivka; osi kvütana ombo sinkiana jiango lüngthae sivka. 29 Ntena otsung odung khümta osi ntho parhi khilato vata ero jiang tsükona nte nungravka. 30 Nteji lümrodung mmikatato osi parhi oyo-ohan jiang ochinaha ojü n tsona chütukato nte mmikata yivka. 31 Mitsünga pokchona mavü rungato, etho eli kyon jiangha onte mmen elhi jina roe onte sivka, osi ochinaha hojito roe esiv jilona khalanchikhokvü meka.
Kümali Noying
1 Yithen shijo Juda tona Jerusalem to tsükona Potsow na Amoz tsoe Isaiah thüngi heto ezocho: 2 Tsüngon etsao jiang lojo phunglan kvülo ekhümki ji tssokachi lichosana jijo topvü yolo ntssontso ji tssov, osi hojina phunglan topvü khümchochiv. Jipo elümotona ombo yana jeta rorav, 3 osi hojilo evamo kyon jiang na "Etena OPVÜI phunglan jilo chongotav, osi Israel Potsow ekhümki jilo wotavka to phyotav. Ombona ntio etssothukhunga sana hoji ombona eshikarünyov; ombona ethüngche evayio lan jilo etena sanphiv. Ntiotssole OPVÜI püngono-rünyo yi jiang Jerusalem lona yiala; osi Zion lona ombona ombo kyon jiang thüngi jantala." 4 Jipo tsüphov jiang yutalo pangta rota elio jiang ombona nsüngsochiv. Onte yonri jiang joe lirhonphen lepok kümtokvü osi onte tsso jiangha ora nrüphen lepok kümtukham. Jipo jiang na ritssolo n volan, osi ritsso tsükona kvüthüngha n methaklan. 5 Jakob tsoronichen, etena enhungo OPVÜI na epio wondang jilo sanphilantavka.
Kanchankangri Jiangjo Roe Siv
6 O, Potsow, nina ni kyon Jakob tsoronichen jiang ji sinkithaka! Meta shi totona Philistia tona engkhfüwoe na eroe to ozen kheli kyon jiangna pyingthaka. Osi kyon jiangna metapoe jiang shikhfü khia onte panlantala. 7 Onte metajo shona osi janti na ntiolo tia n vav pyingkachicho. Osi ejüeli eyan na ochüm n li. Onte metaji kurü naha pyingcho osi kurü zotoro na ochüm n lina vazhücho. 8 Onte metaji onte khena nsüngrücho kisü jiang na pyingi hojiang khümtala. 9 Otsük akvüto ezüptokvü osi yikratokvü. Nlan onte tisiyia OPVÜI! 10 Ontena OPVÜI lüm etsuk osi ombo etho, phfütsson jiang lona tsanchoe vam khilato ejoma jo liko jiv, osi ejoma jo phunglani olong yolo longkvü jiang lo mphotav! 11 Kyon jiang kangtsükangri osi mhachan-tonchan, lümbüm etsuk to jiang roe siyia esantukvü tsükona tsüngon ji tsathaka. Hojito tssosanati OPVÜI mying ji ekhyonkachiv. 12 Hoji tsüngono jo Thotsü OPVÜI na etho eli kyon jiang, osi kvütatana kangtsüa osi ejithechi elhi tssoa vanchosana jiang topvü teri osi eyingroe kümtukvü. 13 Lebanon lo Cedar dung ntssomo jiang osi Bashan lo lümrodung ntssomo jiang topvü ombona roe siv. 14 Phunglan yingsüng ntssomo jiang topvüto ombona hayitukvü, 15 osi oki ntssomo jiang elani rizümphen zenki echung jiangha topvü hanmyani hayi kümtukvü. 16 Orhung tsüphotso osi opyon mmhontso jiang lea ombona jüngthetukvü. 17-18 Kyon kanchan osi mhathenshüthen topvü ochüm tsswothukvü. Kisü jiangha topvü monrae sithuksi OPVÜI jitae oyakoe ekhyonkachiv osi thüngchetukvü. 19 OPVÜI na kvüthüng limhashi enhyoko roasana kyon jiangna OPVÜI Potsow lüm etsuk, phfütsson osi etho myingthüng jilona tsanchov khilato longkvüi osi liko jui khi hojiang lo mphotav. 20 Kvüthüng hoji tsüngon ji yiasana kyon jiang na shona, janti na kisü nsüngrüo jiang topvü shümthe siv, osi lipvüso tona sosiro jiang yolo ekachi sia tsamvü. 21 Kvüthüng OPVÜI na limha shi enhyoko roasana kyon jiang ombo lüm etsuk osi phfütsson, etho jilona tsanchov khilato phunglani, longkvüi osi likokvüi jianglo mphotav. 22 Echüo kyon jiang pono ntia longtsüka tivatava. onteno ntio oman lichola?
1 Enhungo OPVÜI, tokhamo OPVÜI jina, Jerusalem osi Juda meta lona kyon na ochoang osi ntiolo enhikae vanta vancho sana jiang topvü khi hansi yivsala. Ombona onte etsoyu osi ojü topvü, khi hansi yivsala, 2 onte yolo ekhüng osi onte rasan, onte yitssoe osi zenkhyingden, mhadung tsükona ratssen, osi onte yolo okhen oyi nsanthi topvü khi hansi yiv, 3 onte rasan esopvüi osi nzontsü kyon esopvüi yansasae elani onte sükhying sayasi evamo ratssenrapvüi jiang ha topvü khi siyiv. 4 Osi OPVÜI na nonghori n ranbenhan tüv jiang khi onte satukvü. 5 Otsük akvüna ombobo etancho tssorav. Pongdenro jiang naha onte eramoe jiang n yirachi, osi ethelan n lio kyon jiang na lia onte mhawoe evamo jiang ochia yikrachi n pi. 6 Khümtsüng akvü lona onte yolo tsüka ethüngchei, "Nino matacho ni mpensü jo lika, ezüp yuta hetüvlo e esopvüi tssoa." to ezotav. 7 Tokhatola ombona janlamvü, "A meka! Ana nte n zanchichela. Anaha etsoyu mekana mpensü ntia n lika. Nte esopvüi a titssotuktava!" 8 Ho, Jerusalem jo montokvü zenkathaka! Osi Juda ha eyaa vanthaka! Ontena ntio nsanchia osi tssoasana jiang topvü OPVÜI ekhirancho tae; osi ontena chancheta Potsow ji yikratukcho. 9 Onte phoko jenshan elhi jina onte pono kholani yiv. Sodom kyon jiangna tssoji esüa ontena opon choka mmen tssocho. Onteno montukvü onte zekathaka, osi hojijo ontena onte popo onte pono ezüp hansi yicho. 10 Ntsanrük kyon jiango emathav, osi onte tsükonajo olan topvülo mmhom tae tssov. Ontena sanga elhi tssoji man ji ontena tsütsaphyav. 11 Tokhatola n mhon kyon jiang tsükona jo emon ji tssov; osi ontena kvüto oyam thüngi ntio n mhom tssocho sana hoji onte pono tssovka. 12 Oyam orang enoe jiangna a kyon jiang elüm zerüpa osi myimthechithaka, osi a jakiman ekhi jiangna onte ejithechithaka. A kyonden, nte esopvüi jiangna olan nte sosoratala, hoji yakchia ntena kvüwoe mmilani eyiosana ji n tsiala.
OPVÃœI na Ombo Kyon Jiang Pono Oyi Tssoyiala
13 OPVÜI na ombo lümbüm n pük jiang ephyov methakthaka; ombona ombo kyon jiang oyi tssoyiv methakthaka. 14 OPVÜI na eramoeden osi ombo kyon yolo esopvüiden jiang oyi tssoyiv sosi tsata. Osi ombona heto nlan onte piala: "Ntena jününgroli jiang rechokhanthaka, osi nte ki jiangji ntena yantsae jiang thüngi na ekhio jiangna pyingkhani lia. 15 Ntena a kyon jiang ezüp piv osi yantsae jiang pono nte lümcho etssov elan n li. Hojito A, Sandamo osi Tokhamo OPVÜI jina phyochithaka."
Jerusalem lo Eloe Jiang Thüngi Ntangshonyi Picho
16 OPVÜI na phyocho, "Zeta Jerusalem eloe shiang jo kvüta kangtsüchosana! Onte kheno jiang oyaki tonkachi hansi rümphitaka. Onteno nchokabento elhaelang tae. Ontena ojo jiang ekhaphia khochio jina ojolo tsüngrünguv theo jiang na owon tssoa sanphitala. 17 Tokhatola ana ezüp onte piv-Ana kvüri onte tssüyisi odon pae onte vantukvü." 18 Jerusalem lo eloe jiangna oyok-osen onte jo-okhe osi kvüri evüngo ekatasi kangtsüta evamo jiang topvü khi onte siyiv tsüngon ji tsathaka, 19 osi onte kheripüngo na epemo jiangha khiyiv. Ombona mhashüng jiang ha khiyiv 20 osi onte khikho jiang; lo-ha onte evono tona eryu lo to ehamo jiang; 21 elani shona yingrüm osi khenolo konkae ehamo jiang; 22 onte pipo mmhom, phongrhüosü, osi rangsükhvü topvü; 23 otsük evonrhüa ehamo npensü jiang, sünyipvü eshanjü mhephen ebemo jiang, elani evüng eyuk osi kvüri eyuk siphov kvürilo ehamo jiang topvü onte khiyiv. 24 Mozhürhüm mmhom thung ji nnan-nrana onte kümtukvü; ryukhüng mmhom ehanthung, tsizhü eke hantukvü, otssan mmhom hae ehanthung, kvüri onte payiv; mpensü mmhom thung ji posta eke onte mpentukvü; onte pyon mmhom ji yikrana onte tongcheyiv! 25 Yantsüi eboeden, etho ejütso jilea, ritssolo na lüngthav. 26 Yantsü pikhfü jina nungra kyav, osi yantsü jiha eloena mpensü n han na likoe khokthe vancho esüa ntia n liv eyinga kümtukvü.
1 Kvüthüng hojitüv yuta ji yiasana elopvüi nchyu tiying na eboe tsüka rhümatasi phyotav, "Ena epopo yani tsoyuv osi mpensüvka, tolea e rapvüi ji nika totia ephyothuka, to tssona loran eküm yikra ji ephochokhokvüka."
Jerusalem ji Mmhom Kümtuklam
2 OPVÜI na meta jilo otssüng odung topvü ji tsüphosiphoa mmhona rankatukvü yuta ji tsathaka. Osi Israel kyon kvütana eküm na nhyakchecho sana jiang topvüna meta jilona ntio mmhom chiyiasana jiang khi emathata osi kangtsüa nchümvü. 3 Jerusalemi kvütata valanchi vanchosana, osi Potsow na eküm vantukvü ethüngchecho sana, jiango ntho to tsav. 4 OPVÜI na ombo ethoji khi khi jipo jiang etssüchev osi Jerusalem lo jenpok nipokta elio jiang elani kvütata onte lümbüm na nlan pia vanchosana jiang topvü mhekhi onte siyiv. 5 Jisülojo Zion phunglani osi hoji nkonjano kvütata sanrhyui vanchosana jiang topvü pono, OPVÜI na engojo elok osi miphong osi zümo lojo miphungtsü rakachia tüv to rotukvü. Potsow phfütsson jina yantsü ji mpüm eyuki nkohov. 6 Ombo phfütsson jina yantsü ji khümchoe eng-etsso ji monisiyisi ekyusü n lina vamo meta mmhom kümtukvü, osi tsongryu mpung lolea noyinga vancheo tssov.
Jününgroli Ejon Khen
1 Ana okhen khüa nte ezoshi enga, a shom tona ombo li ji to tsükona okhen to: A shom jina phunglan lizü topvülo jününgroli licho. 2 Ombona liko ji jüi khi olong jiang nryue sicho; osi jününgrozhü mmhontsov jiang chümcho. Ombona linhyak zenki tssocho, osi jününgrothi erhyuphen liko ha jyucho. Jününgrothi jiang mhentukvü ombona nhyakcho, tokhatola topvüto ethemü tae tssocho. 3 Hoji tsükona enhungo a shom jina phyoala, "Nte Jerusalem tona Juda tolo evamo kyonden, a tona a jününgroli to yutalo ejyui e zetava. 4 Ana ntiosana ombo n tssojanicho alo? Tona ntio tsükona ombo ethemü ethiala osi ntiotssona ana eyilo ji esüa jününgrothi mmhom n thiala? 5 "Enhungo ana a jününgrothi li jilo heto tssovsala; ana epi ji phi siv, osi echung kvümoe na onte nkohoa vanchosana jiha roe sisi, ora ekümrüm khi santhei tsoe osi tsseroe situkvü. 6 Osi ora kümi situkvü. Ana jününgro jiangha n rhüche osi liko jiha n rhonro tona siv; ji thüngi najo wozhüokyu khi eyuzhüi situkvü. Jilo ekata elok-emhenjü osi eryu ha ontelo n jokathuk." 7 Israel jo Tokhamo OPVÜI ji Jününgroli; Juda kyon jiang jo ombona jününgrozhü echümo jiang. Ntiojo mmhoncho sana ji ombona onte tssotok hungcho, tokhatola mmhom etssothüngo najo müngtssomünghan elhi tssocho. Ombonajo ntiojo elansana ji onte tssotuk hungcho, tokhatola ontena khangshio jiangna ntsanrük ethüma eronkachiala.
Kyon na N mhon Etsso Jiang
8 Nteno nte montokvüka! Ntena lithako jianglo ekata ntena oki osi oli jiang shithaka. Nsungu jianglo evan ochia vamü meka, osi meta jilo evan ji nte poti tssovka. 9 Tokhamo OPVÜI jina heto phyoa ana zothaka, "Oki mmhom tsüphov, hetopvü to ejüng thonrocho kümkhamka. 10 Jününgrothili etük taro echen jonlia tssüngthijüjo shishapvü tiza harüma tae zümchovka. Osi tsünghonro tsüng etükpvü nzoasi ekhatiza mpa yinglia etükpvü taro tiza tae rakchovka." 11 Nte montuknrüngu! Ntena enyathüngna phanthi soko yutachona emüng jana nte kinoa yuta mongtala. 12 Nte tokhü jianglo ntena phililyu, tsüngrüngu osi rhüphiphen-zhü osi soko to tsütsatala. Tokhatola OPVÜI na ntio elhi tssoa vanchosana jijo ntena n ngathe. 13 Hoji tsükona nteji evüngki evan esüa khi hansi nte yivka. Nte esopvüi jiang khangtsüngi chüthokvü, osi nte nzontsü jo eratsüngi nte chüthokvü. 14 Echüli jina onte nhyaktssüka nhyaka vana, osi echülikvü jina opüng tsüphov koe khi vana. Jerusalem lo tsüphoe jiang ji nzontsü kyon jiang nzo echülikvü jina nzhükhana vana. 15 Otsük akvüto yiratukvü, osi kvütatana kangtsüa vanchosana jiangha myimchochiv osi yingto vantukvü. 16 Tokhatola Tokhamo OPVÜI Potsow jina elan elhi etssoji yakchia ombo tsüpho osi ethoji ejüala, osi ombo ntho ji ombo kyon jiang oyi tssoyiwo jilona hungtukala. 17 Yantsü roe sithako jiang lona olyu jiangna ero rüngi tsochev osi nyanyan jiang naha yantsophen mmhom liv. 18 Nte montukvü methakthaka! Ntiotssole ntena nte mmen jiang lona n tsanchok han. 19 Ntena heto phyotala, "OPVÜI na ombona ntio tssovka to phyocho sana nra tssotuka, tona etenaha hunguka. Israel Potsow ji khi nra ombona ntio tümkacho sana ji tssotoka; tona ombo lümbümi ntio jüchosana ji etena ha hunguka." 20 Nte montukvüka! Ntena n mhon jijo mmhom to tsasi, mmhom jijo n mhom tsa to tssotala. Ntena emüng ji wondang kümtukala osi wondang ji emüng kümtukala. Ntena ekhov ji enüngu kümtukala, osi ntiojo enüngu sana jijo ekhov kümtukala. 21 Nte montuknrüngu! Ntena nteno nchümri eli, osi elüm okyak eli to nchümtala. 22 Nte montukvüka! Sokopvü lo ekhüng etssoeden! Soko lilangtsüi eyüvlo ekhyu n lina lümbüm tssona evanden! 23 Tokhatola ntiosana jükaro khi nte khüpcho taena nlan eli kyon ji vachi siala, osi yantsae jijo ombo elan ji yani ekhiv ji mpa khalanchiala. 24 Hojitsükona enhungo, Kvüto mavü osi ero echüna owon tssoa omina nshüa ronga sana jito, nte ying jiang kyomvü osi nte na ntio kisochi vachosana jiang topvü kyingi siv osi metapoe veni yikham, ntiotssole Israel Tokhamo OPVÜI ntho Potsow, jina ntio e püngnocho sana hojing topvü n khichov sithaka. 25 OPVÜI jina ombo kyon jiang thüngi lüm tsukthaka osi ezüp onte e piv tsükona okhe yonehithaka. Phunglan jiang topvü enhyokkvü, osi kyon kvütata chüchosana jiang müngji lantsüi mmen mmyak esüa hankachi siv. Tokhatola hojina OPVÜI lüm etsuk ji ochüm tssov mek, tolia ezüp onte piv tsükona ombo kheji rüchipvü vamü. 26 Jipopoe ekoni evamo jiang OPVÜI na etsa cheka onte piala. Meta ochümina role to ombona philulyu theta onte tsala. Osi ontena shilo zaktole ekhyinga rothakaje! 27 Onte ochia mmok n chanche; osi ochia jonshükhenshü n tsso. Ontena n yip osi engünga tia n yi. Ryukhüng motsüngatia n mon; osi joküp ntssü motsünga tia n tüp. 28 Onte lotssitsüng jiango elümoto nzena, osi onte lotssi jiang ekhav tae methakthaka. Onte kurü jonpho jiang longtssyu esüa khünga, osi onte ritsso kurü zotoro jiango mpung na eriato khophiala. 29 Onte rasan jiango hingho na ekümrümo rumi erona süa to erhyuala osi ochinaha onte khelona rechoe hansi n yiche. 30 Kvüthüng hoji tsüngon ji yiasana, jümang na echyua tsüato Israel pono ontena erhyukav. Liphungtsü ji zechia! Emüng osi ezüp phyingrüng tae! Wondang ji emüng jina nzhüthaka.
Zenkhying Etssov Potsow na Isaiah Tsala
1 Mesao Uzziah echü nzyu, jilo OPVÜI jina ombo vantsü ekhyonkao osi ntssomo jilo khokthei ombo mpensü jina ekhümki ji pyingi vana ana hungcho. 2 Ombo füchüma milon ependen ekümrüm echo tirok mpata tüv jiang na phanthirae vancho, onte otsük akvüna echo eni khi omha ji eyukcho, enijo otsük ji eyukcho, osi eni enhyoe elio jijo pyaphen tsükona vantukcho. 3 Osi onte onte heto tsaphita vancho: "Ntho, ntho, ntho! Tokhamo OPVÜI jijo ntho! Ombo phfütsson jina limha phyingala." 4 Onte tsaphita won jina ekhümki kimüng ji enhyokphicho, osi miphong na ekhümki ji phyingi sicho. 5 Ana phyocho, "A tsükona jo eyilo n lithaka! Aiyo a montokvü a sekathaka ntiotssole a püngina ntio nsanchokchicho sana jiang topvü mmen tae, osi aiyo n tho nno menfü nnli ehan yolo vanala. Tokasi a mhyikna mesao, Tokhamo OPVÜI ji hungthaka!" 6 Tothakale, ekümrüm jiang yolo tsükana thanphenina miron mmyaphen eni khi miron mmyae bensi a thüngoe pya jorocho. 7 Osi ombona miron kia evamo ji khi a menfü lo a evüphiyisi phyocho, "Miron shina ni emen jilo evüngkathaka, osi hojina ni ori jiang osi ni mmen jiang nthochei ni siyithaka." 8 Hojisüijo OPVÜI na heto phyoa ana zocho, "Ana ocho wothukvüla? Ochona nte yithenpvüi tssovla?" Tothüng ji ana janlancho, "Ana wovka! A otuka!" 9 Hojitsükona owo kyon jiang thüngi yithen heto pile to a ezocho: "Ntena engamunglea, ntia engathev meka. Ntena küma zeta munglea, ntio tssoa yia vanchosana ji ntena ntsiv meka." 10 Tosi ombona heto a ezocho, "Kyon jiang lümbüm ji shayimthoka, onte eno jiang püngia, osi omhyik jiha jokithukia, to tssona ontena hungu mek, mekana zov mek osi n ngathe. To tssona ontena a thüngi kholamvü mpa tssov osi onte emiyikhoka." 11 Hojitsükona ana "Heto shi esüajo kvütenhya tssovla?" to OPVÜI engacho. Tole ombona "Shi esüa jiyantsü jiang roe ejüng n kümthüngjo osi oki jianglo ochinaha n vamvü n sithüng nandang, elani metaji mpa kyon na sirhaki n sithüng nandang jo heto tssov, to a janlancho. 12 Ana kyon jiang ji meta ekoni yitoki sisi metaji mpüm na ejüng ekachi siv. 13 Osi meta shilo kyon taro yolo tsüka tae mpa enhyokae vanlea, omboha montoki siv; osi omboji lümrodung tani sisi humlok jitae esüa kümi sitokvü." (Shilo hümlok to ephyo jijo Potsow kyon jiang ethan chenkalanphen jilo ejyukacho.)
Mesao Ahaz Tsükona Yithen
1 Uzziah tsorüi Jotham tsokying Ahaz na Kvüthüng Juda esapvüi tssoa vanchosana, jithüng ritsso chiyicho. Syria mesao, Rezin, tona Remaliah tsoe Pekah, Israel lo mesao ji to onina Jerusalem ji hacho khatola yantsü ji n khichecho. 2 Kvüthüng Syria rasan jiangna Israel erü jana rhorothaka to Juda lo mesao ji yenjancho sana, ombo osi ombo kyon jiangna erhüka ekhentacho, osi onteji mpungna orae odung pfüphia vancho to ekyulona enhyoklokcho. 3 OPVÜI na Isaiah thüngi heto ezocho, "Ni tsokhying Shear Jashub, ji sosi mesao Ahaz nduko wotava. Tona ntena osü nsüngrüi jiangna elhi tssota evamo lanjina, omhawoe wozhü phyoncho ji tsüchüm jilona ombo hunguvka. 4 Osi nkhennkhyua, ekhena to mekna tüngochünga, tsoyotsoria vanle to ezoa. Ntiotssole mesao Rezin osi ombo woro Syrian elani mesao Pekah to lüm etsuk jo tata ekyuv n lika, michüm eni tsentae miphung chiyia vancho lona n kyongkaka tinkyim-nsüpa. 5 Syria tona Israel lo mesao jiang khüngtae ritsso sakacho. 6 Osi ontena jo Juda ji phonkae kyon jiang ekhentuki onte thüngoe tssotuksi Tabeel tsokhying ji mesao vantsü jilo khokthetukvü khilato kyaktacho. 7 "Tokhatola A, OPVÜI na phyoala, kvüthüngha hojito tssochev meka. 8 Ntiotsükona la? Ntiotssole la tona Syria jo Damaskas yantsü jilona etho jükacho mek, osi Damaskas jo mesao Rezin lona etho jükacho mek. Elani Israel tsükona jo nzyu rokrosi mongo yutalojo jipo nchünga phanthilamo jitüv etho n li. 9 Israel jo ombo yantsü Samaria jilona etho likacho mek, osi Samaria jiha mesao Pekah lona etho jükacho ha mek. "Osi ntena longtsülo n sümhena tssona tona ntena rümchokchikhukvü meka."
Immanuel Ji Chekav Ji
10 OPVÜI na Ahaz thüngi yithen heto yilantukcho: 11 "Ni OPVÜI ni Potsow thüngi chekav nipile to chona. Hojijo echülikvü chungina lea tssokhuka mekana potsüwoe omhawoe na lea tssokhuka." 12 Tole Ahaz na janlancho, "Ana ntia chekav chomvü meka. Ana OPVÜI chyui ezev osi füphi ezev jo a n tssohungala." 13 Isaiah na hoji heto janlancho, "Toka enhungo, engatava, David tsochenden. Ntena kyon erüm etoji yesoyio jilea elüm nmhon – tona ntena Potsow erüm eto jiha yesotukvü nüng? 14 Mmhonka, toka OPVÜI na chekav ni pivka: Zeta loroe tsüka na ngaro hani jina tsokhying vamü osi ombo myingjo 'Immanuel,' to tsayivka. 15 Ombona kvütothüng ombo nchümcho khikhoka eranküm kümasana, kyon jiango shirojü yuta osi tsakijü tsota vanthakvü. 16 Osi hojitüv yutaji n yithüng vüngina mesao nchyu eni ochona ni ekhentukcho sana jiang metajo sirhakthakvü. 17 "OPVÜI na nipono, nikyon jiang pono osi mesao wopan topvü pono, Israel ekhüngyan Juda lona chichoe khisi sülo ezüp yithako jiang yolona n mhonkao ezüp tsüngon yitukvü sala – hojijo ombona nipono Assyria mesao ji sosi yivsala. 18 "Kvüthüng hoji tsüngon ji yiasana, OPVÜI na Ejip kyon ekoni Nile zhükhfü eryuo zhükhfüro jianglo evamo jiang tsae benoden esüa rotukvü, osi Assyrian jiangha onte metaena otssak ryuato rotukvü. 19 Osi ontena longrokyu hayi osi olong yolo longkvü jiang lo rümthev, osi ontena okyoyo elani yantsophen eroyu topvü eyuki siv. 20 "Kvüthüng hoji tsüngon ji yiasana OPVÜI na Eupharates zhükhfü pankae na kvüri etssüi engochoe sosi yiv – osi hojijo Assyria lo ekhüngsae ji tssov ! Osi hojina nte mehüm, kvüritssan, osi tsüktssan topvü saki nte siyiv. 21 "Kvüthüng hoji tsüngon ji yiasana, lijon tsükana mangsü motsünga tona nyanyan eni totae mpa ekümchelea, 22 ontena ombo ethelan topvü tssochyua shyurojü piv. Ho, otsotso meta jilo ochoang mataroa enhyokae vanchosana jiangna shyurojü yuv osi tssakijü tsov. 23 "Kvüthüng hoji tsüngon ji yiasana, jününgroli mmhomo, odung akvülo wothüng bena chenkae elio jiang topvüna osi jantirang wothüng bena man sana jiang topvü okyoyo osi pikhfü jiangna ranzhüi siv. 24 Kyon na hojianglo lotssi bensi shikarita sophanyiphano wotav. Ho, hojilo liphungtsü mpüm ji pikhfü osi okyo taena phyingi siv. 25 Phunglanro kvülo benro zaphensana jiang topvü wozhü-okyo na zazhüi kyon ochinaha jianglo n wov siv. Osi mangsü kvürü tona olyu to yantsophen kümvü."
Isaiah Tsokying ji Kyon Jiang Tsükona Chekav Esüa Tssov
1 OPVÜI na a thüngi heto azocho, "Eranphen tsütsaelan tsüphov khi, erantsüng tsüphov na chancheta heto erankata: 'Zakto rechoe khia, ekhyinga roe sia.' 2 Osi longtsüka eli kyon nchyu eni, pvüti Uriah tona Jeberechiah tsoe Zekhariah to oni khi ehungpvüiden tssotoka." 3 Yuta tara sülojo a engh jina ngaro hancho. Osi kvüthüng otsoe ji bukchosana, OPVÜI na "Omying ji heto pia 'Zakto rechoe khia osi ekhyinga roe sia' to a ezocho. 4 Ntiotssole ngaro jina khyochei 'Apo' osi 'Ayo' to n phyochethüng na Damaskas yantsü jilo ejüeli osi Samaria lo eli topvü Assyrian mesao na rechoe hansi yi siv."
Assyria Mesao Ji Tsathaka
5 OPVÜI na elani heto a zolancho. 6 Ombona phyocho, "Ntiotssole kyon shiang na Shiloah zhükhfü jilona jüro enyipoji khaki sisi, mesao Rezin ha mesao Pekah oni mhadungo enetala, 7 hojitsükona A, OPVÜI shina Assyria mesao tona ombo rasan to jiang sosi oyi Juda ji hayatoku Ontena Eupharates zhükhfü jina kvüto phyonchüi zhükhfü tssaji phyonzhüa tsüasana hoji esüa ekhyinga chirov. 8 Ontena epvü nkhongi hansi jüvak na evakzhüa esüa jütssalo juda meta mpüm na sanzhüa a phfüa yiv." 9 Ekyu lona nte topvü sanrhyutava, nte jipoden! Nte meta ekoni evanden naha engachita; Osi rotav tsükona methaka, tokhatola kyua! Ho, methaka, tolia kyua nchüma! 10 Lanka judon yantava! Tolia ontena kvüthüngha ochüm echev meka. Ntiotssole Potsow na ethüngoe thei vana.
OPVÃœI na Zenkhying Ji Ntangshonyi Piala
11 OPVÜI na ombo etho tsüphov theta kyon jiangna dungta evamo lanji tidungle to ntangshonyi a pithaka. Ombona a zocho, 12 "Kyon jiangna lanka judon nsüngrüta evamo jilo ti-rhowoa osi ontena kyuo jiang ti-kyua. 13 Nchümcheta A, Thotsü OPVÜI jijo, aiyo ntho; hojitsükona a tae a kyuv shikhfü. 14 A emhokthav ntsa-ntho jina aiyo olung kvümoe na kyon nshüphia sana hoji esüa tüv; osi elani aiyo tsirhipvü kvümoena Juda ekhüngyano kyon, Israel osi Jerusalem lo kyon jiang savsana ji esüa tüv. 15 Elümoto jo nshüphiv; onteji evümthev osi onte evüpromorov. onte ji tsirhipvü lona onte sav."
Echüi Jiang Thüngi Ngatüng Ngariv ji Khancho
16 Nte, a sürüi jiangna Potsow na ntio yithen nte pichosana jiang kenchüngi vasi nkohov ethev lia. 17 OPVÜI na ombo kyon jiang thüngina ombo mha ji mphoe sithaka, tolea enajo ombo longtsüala osi a eyiloji ombolo vatala. 18 OPVÜI na apio nongori jiang nzo ana shilo vanala. Tokhamo OPVÜI Potsow ocho vantsüjo Zion phunglan ji sana jina Israel kyon jiang thüngi eküm evamo yithen heto e hantukthaka. 19 A kyon jiangna jo ratssen rapvüi osi müngyitssoe jiang, elani oyam mhadung ezoe ewoerang jiang thüngina yithen yantale to nte ezov. Osi ontena, "Eküm evamo jiang tsükonajo mhadung yithen ji chüthako mon jiang thüngi ngatüngariv ethev lia, to phyotav." 20 Hojithüng ji ntena heto janlamvü lia, "OPVÜI na ntio nte Püngnorünyoa sana ji tae engathetava! Osi müngyitssoe, methevüjae jiang yi ti-engatava – Ontena nte ezo jiangna ntia mmhom nte tssoyiv meka."
Ezüp Yuta
21 Kyon jiangna wonton era osi vonkhyu emhok hansi meta ezoni ov, osi wonton era elani onte lümbüm etsok lona onte mesao osi Potsow ji rhiyirandankatav. Ontena potsüwoe zekachiv 22 mekana likoe zechochiv, osi ekyuthav emüng kvülo onte phanthechia vanchosana ji yaka thanpo ntia hungu mek.
1 Shi ezüp yuta shilona ontena tsanchov tsükona ntia lanka liv mek. Zebulun jipo meta tona Naphtali tojo tsüngon motsünga lojo yikratokcho, tolia ochyu-ovüngi meta shilo yikrachi myingthüng hansi yiv, Engkhfüwoe Mediterranean lona benkae Jordan meta phokowoe jana osi metapoe kyon jiangna evamo Galilee ji jana yikrachi litokvü.
Ochyu Ovüngi Mesao
2 Emüngi sanphita evamo kyon jiangna wondang tsüphov hungthaka. Tsüngkhüm meta jiang lo ontena vancho, tokhatola enhungo ondang na onte pono onkatala. 3 OPVÜI na longshi tsüphov onte pithaka; nina onte emathatukthaka. Nina ntio onte tssoyithakcho sana jilo longshiala, oli riathüng longshitato ontena longshitala mekana ejüeli phanchoe chitathüng longshita-to longshitala. 4 Ntiotssole ontena vüngkhüng khokra ehamoji nina roe siyithaka osi epvülo erhüpiphen etsi ji jaki siyithaka. Ni kyon jiang myimthechia ezüptuka evamo jipo ji nina khyothechithaka, nina kvüto nkolo Midian rasan khyocho sana ji esüa. 5 Rasan jokhüp jiang osi onte mpensü ejen na jümzhüo jiang topvü otssüng rungato omina rungi siyiv. 6 Ete tsükona ngaro tsüka bukthaka! Ete thüngi tsokhying epithaka! Osi ombona ete esapvüi tssov. Osi ombo myingjo, "Emhokthav rünyopvüi," "Thotsü Potsow," "Kümali opo," "Noying Roza" to tsav. 7 Ombo ekhüng esaji ochüm n lina rankata yiv; ombo ekhüngyan jo nchokabemo noying lona tssov. Mesao David echungchoe esüa ombona sav, ombo etho esajo elan osi ntsalo ndungkav, enhüngana benkae ochüm jana hojito tssov. Thotsü OPVÜI jina shi esüa heto etssovji benkathaka. OPVÜI na Israel ji Ezüptukvü 8 OPVÜI na Israel ekhüngyan, tona Jakob tsoronichen jiang to pono khendan-yidan pithaka. 9 Osi Israel kyon jiang topvüna, ochoang kvütatana Samaria yantsülo vanchosana, jiang topvüna shiji OPVÜI na tssocho to ntsiv. Enhüngajo ontena kangtsüa osi haruka heto phyota vana, 10 "yida na etsso oki jiang eyathaka, tokhatola hojiang ji ena longkina tongchev. Thüngphyotssüng na nsü etheo jiang ji roe sithaka, tokhatola hojiang ji ena Cedar tssüng mmhontso jiang khi tongchev." 11 Onte hayathukvü tsükona onte ri jiang OPVÜI na ntssüngthaka. 12 Syria na engkhvüwoe elani Philistia jiangna engrhelamoe tolyui Israel jiang nzhüv tsükona onte püng jiang kokhanthaka. Toaha OPVÜI lüm etsuk ji n kyimjohan, osi ezüp onte epiv tsükona ombo kheji yonchipvü vanhana. 13 Thotsü OPVÜI jina ezüp onte pithaka khatola Israel kyon jiangna lümbüm n khophihan, osi OPVÜI thüngi elani n yihan. 14 Eng motsünga yuta lo taena OPVÜI na Israel yolo esopvüiden osi onte kyon jiang topvü ezüp piv; osi onteji kvüri jiha, emhi jiha tanchochi siyiv. 15 Eramoeden osi yikrachi eli kyon jiango kvüri ji, osi emhi jijo zenkhying ochona ejüng püngno pichosana hojiang! 16 Kyon ochoangna esopvüi tssochosana hojiang na kyon jiang sosoracho osi mpümna hamatsüi sicho. 17 Hoji tsükona OPVÜI na khyingroe jiangha n tsanchotuk, osi emi elani opvü-opo n van jiang thüngi lia khonzan to n tsso, ntiotssole kyon topvü ji Potsow n tsi osi n mhonden, ontena ntio nsana sana jiangha n mhon tae. Osi hojito tssosanati lea OPVÜI lümbüm etsok ji ochüm n tsso, tolea ezüp onte piv tsükona OPVÜI na ombo kheji rüchipvü vamvü. 18 Kyon jiang n lan n mhon ji omina wozhü-okyo ranuk runga to rungala. Osi hojina ora rungi khi miphung kholung khulongna oyaki chüngitokato rungala. 19 Ntiotssole Thotsü OPVÜI ji lümbüm tsukthaka, osi ombona ezüp pio jina meta topvülo omina rungato kyon jiang roe siala, osi otsük akvüto ji ombobo roe siala. 20 Liphungtsü shi topvülo kyon na ntio imngana hoji rechoe tsota vana, tokhatola onte wonton ji kvüthüngha n pük. Onte ngaro jiang mpa ontena tsotala! 21 Manasseh kyon tona Ephraim kyon to rotala, tolia elani onte nzo tssolani Juda ji phonkatala. Tokhatola OPVÜI lümbüm etsuk ji n pükhan; osi ezüp onte epiv tsükona ombo kheji rüchipvü vanhana.
1 Nteno nte montokvü! Ntena JL vl n tsanrük shikhfü nsüngrüi a kyon jiang tssethechiala. 2 Ntena hojito etsso ji yakchia yantsae jiangna onte elan osi ntsa ji yani ekhiv lona khalanchiala. Hojito ntena emi-nloe osi opvü-opo n van jiang ejüeli jiang khiyiala. 3 Potsow na ezüp nte piana ntena kvüto lyuvla? Osi ombona meta ekonina ntelo ezüp-nmok hansi yitukana nteno kvüto lyuvla? Nteno ocholo nzanchi yana tsankavla? Nte ejüeli jiango ntiolo mphotavla? 4 Nteji ritssophenina nte lüngthav mekana evüngki evanden esüa nte süchokrav. Hojito tssocho süloti lia OPVÜI lümbüm etsok ji ochüm n tsso; osi ombo kheji ezüp nte epiv tsükona rüchipvü vamü. Assyria Ekhüng ji Potsowna Ebensü Esüa Tsütsacho 5 OPVÜI na phyocho, "Assyria! Ana Assyria ji lüm tsuktoko kyon jiang echükphen jarung esüa tsütsatala. 6 Ana Assyria ji a lüm tsuktoko kyon jiang pono, osi n thenhyana evamo jipo jiang halo wothukcho. Ana Assyria khi kyon jiang lantsüi mmen esüa tsserotukvü osi onte ejüeli jiang rechoe khiyia efüyitukvü tsükona wotokcho." 7 Tokhatola Assyrian ekhüng jina ombo ritssolanka okyak thanpo etssov ombo lümbümi jücho. Ombona jipo elümoto roe esiv tsükona tümkathaka. 8 Ombona kangtsüa heto phyocho, "A rasan esopvüi otsük akvüto mesao ka! 9 Ana Kalno yantsü ji khyothaka osi Karchemish, Hamath tona Arpad, toha khyothaka. Ana Samaria osi Damaskas toha khyothaka. 10 Ekhüngyan kvümoena kisü khümta, Samaria tona Jerusalem tolo elio kisü jiang lona kyongka vasi khümta vanchosana jiang thüngi ezüp epiv tsükona a khe yochicho. 11 Ana Samaria osi hojilo kisü kvüta lichosana jiang topvü roe sithaka, osi hoji esüa ana Jerusalem tona hojilo kisü kvüta khümta vanchosana jiang topvü roe siv." 12 Tokhatola OPVÜI na phyoala, "Ana kvüthüng Zion phunglan tona Jerusalem tolo ana ntio elhi tssoa vanchosana ji thakthakana, Assyria lo ekhüng ji ombo kangtsü-kangri tona mhachantonchan toji tsükona ezüp piv." 13 Assyria lo ekhüng jina kangtsüa phyocho, "Shiang hetopvü ana apopo tssocho. Aiyo etho jüa, okyak lia osi nchümjan eli. Ana jipo jipo yutalo erü-ekük jiang topvü roe sisi ontena ntio ejüeli hanthe vachosana jiang topvü hani khiyicho. Osi mangsüpong na tssephiato jilo kyon evamo jiang ana tsseromoroe sicho. 14 Limha shilo jipolan taro evamo jiango oro-shüp esüa tüv, osi ana onte ejüeli jiang woro ejü khia esüa enato kherhyui khicho. Ochinaha a ekhentukvü tsükona echo motsünga tia n lhüphi; osi a ndev tsükona tia opüng n kophi!" 15 Tokhatola OPVÜI na phyoala, "Opvü jina ombo tsütsapvüo kyon jilona tsüphokata to hokhukcho alo? To alo tsüngrhüphen jijo tsütsapvüo kyon jilona tsüphokao mekana opvü tssokachola? Jarung jina kyon ji sükata mek; tolea kyon jina jarung ji süphia mekana khyokatala." 16 Thotsü OPVÜI jina ochoang kvütatana mmhona mmhia tsoyusi vanchosana jiang thüngi nochonori otuki ezüptukvü sala. Onte tsük chungina omina rungato onte runga mungu. 17 Potsow, kvümoe Israel jiang wondang sana jina omi kümvüsala. Israel ntho Potsow jina mikholung kümvüsala, osi hojina engalo taena okyo osi khyonrhon jiang mpato osi olan topvü rungi siv. 18 Eha-ratsü, lizü osi ejonra jiang topvü nshüroe siv, kvüto nochonori n mhon tüv na kyon jiang roe siasana ji esüa. 19 Osi odung jiang ngaro nalia khacheta elümoto mataroa tae enhyokae siv.
Mataroa Taena Kholani Yiv
20 Israel ochoang enhyokae vanchosana jiangna jipo kvümoena onte ji tara taena rorüpi n sichosana jianglo n nhyikana evamvü tsüngon ji tsathaka. Ontena Israel ntho Potsow, OPVÜI jilo onte longtsüka tsotsoji vav. 21 Israel kyon jiang yulo nte tara taena thotsü Potsow thüngi kholamvü. 22 Enhünga jo Israel kyon jiang ji jürani hajang tata vana, tokhatola onte tara taena OPVÜI lo kholani yiv. Montokphen ji kyon jiang tsükona methaki vathaka, ntiotssole onte montuki esiv ji etümcho. 23 Ho, otsotso liphungtsü toto pono emon osi roe esio ji ombona rotokvüto phyoji esüa Tokhamo OPVÜI jina rotokvü.
OPVÜI na Assyria Ji Ezüp Piv
24 Zion lo evan kyon jiang thüngi Thotsü OPVÜI tsüphotso jina heto ezoala, "Ejip kyon jiang na nte tssethechio ji esüa mpa nte tssethechi lia Assyrian jiang ti-kyutava. 25 Lümato nsungu ana nte ezüptuka evamo ji esani siv, osi onteji ana roe khi siv. 26 Ana kvüto Oreb longpvü jilona Median jiang erhüpchosana ji esüa, A, Thotsü OPVÜI shina erhüphen ji khi onte erhüpvü. Ana kvüto Ejip ezüptukcho sana ji esüa Assyrian jiangha ezüptukvüka. 27 Kvüthüng hojitüv tsüngon ji yiasana ana Assyrian etho jilona nte vachiv, osi nte epvülo vüngkhüng mmyinga ehamo ji ephongi nte siyiv."
Assyrian Jiangna Israel Phonkatala
28 Ori rasan jiangna Ai yantsü ji hayathaka! Ontena Migron ji yakchia rheyithaka! Osi etsoyu jo Michmash lo valanchi lia! 29 Ontena yakchilan ji yaki rheyi Geba lo ncheni vana! Ramah yan jilo evan jiango ekhenrhük khanthaka, osi mesao Saul yan Gebeah lo evamo kyon jiango tsankhanthaka. 30 Tüngtava, Gallim kyonden! Engatava, Laishah kyonden! Janlana, Anathoth kyonden! 31 Madmenah kyonden tona Gebim kyonden tojo mmhiphen yana tsantala. 32 Nchüngo ori jiangna Nob yan jilo rheyithaka, osi ontena Zion phunglan ji tona Jerusalem yantsü ji to thüngi okhe zümi shüngphia ejüa vana. 33 Osi Thotsü OPVÜI jina onteji odung khero kvüto nrhakroe joyiasana ji esüa onte ji ejüprov sala. Onte yolo kangtsütso osi tsüphotso jiha danchüchüv osi ezüpa yikratukvü. 34 Ralongina OPVÜI na kvüto odung jiang danchüchüa sana hoji esüa OPVÜI na onte danchüchüv, Osi Lebanon lo odung mmhotso jiang eyato onte eyatokvü!
Noyingtetük Ekhüngyan
1 David lona rena eyio mesapvüi jiango odung esüa danchüchücho; tokhatola kvüto mhüm lok lona rüni khero ethan chenkatasana ji esüa, David tsoronichen lona mesao ethan phanthiv. 2 OPVÜI mon jina engathewo nchümri ombo piv, osi ombo kyon jiang sav tsükona ntsinran osi ozen-okyak ombo piv. Ombona OPVÜI lümbüm erüng ji ntsiv osi ombo yikrachi kyuchiv. 3 Osi ombo jancho ezov jijo ematha tssov. Ombona oponina zecheo jina mekana ombona ntio zoasana ji ephanina oyi n tssoyi; 4 Ombona yantsae jiang ha elan lona oyi tssoyiv osi n benzii jiang elan ji nkohayiv. Ombona yidan pioji yakchia kyon jiang ezüptukvü, Osi n mhon kyon jiango chüv. 5 Ombona ntsanrük tona khüngtsüta cheo to khi ombo kyon jiang pono sav. 6 Ranfü tona olyu to nzo noyinga vantachev, osi khvüzhü mmhor jiangna lia nyanyanro nzo yipvü. Osi nongori jiangna, onte zeyata hinghoro tona mangsüro to nzo ojak phitsütav. 7 Mangsü tona sevan to tsorhyutav, osi mangsüro tona sevanro to nzo noyinga yiptav. Mangsü na tsoji esüa hingho naha mavü tsov. 8 Osi nganiro jiangna mozhü n mhom ehan nrü tüv ndüngona khfürilea onte n tssatsso osi n jü. 9 Potsow ntho phunglan, Zion jilojo etssatssowo tüv osi n mhom ntia n li. Osi kvüto jümang ji ojüna pyingcho sana ji esüa metaji totona OPVÜI mmhom osi ntsinran jina pyingu.
Metapoe Tsanthan Evamo Jiang Kholam
10 Mesao David wopan lona mesao ethan chiyiv ji chekav jipo jiang thüngi hungtukvü tsükona tsüngon ji tsathaka. Ontena ombo mesa yantsü jilo sanrhyui monkhüm yikrachi ombo piv. 11 Kvüthüng hojitüv tsüngon ji yiasana, elani OPVÜI na ombo etho tsütsae ombo kyon ochoang kvütata Assyria osi Ejip metae valanchicho sana, elani khi jümang tssa rhüa evamo meta Pathros, Sudan, Elam, Babylonia, osi Hamath, to jiang topvü lona okiwoe sosi yirav. 12 Osi OPVÜI na jipo jiang topvü thüngi Israel osi Juda kyon kvütata metapoe tsanroe, nzüroe vanta vanchosana jiang topvü limha nken mezhü shilona okiwoe tsarhyuala to chekav ji riven ekhyonkachia ejüv. 13 Hojithüng jo Israel ekhüngyan jiang naha Juda pono omhyik n raki, elani Juda naha Israel jiang onte rika to n tsso. 14 Onte nzo tssoe engrhelamoe evamo Philistia kyon jiang ori phonkav, osi engkhvüwoe onte thüngoe evamo jiango ejüeli mpa re-khiyia phamvü. Ontena Edom tona Moab to kyon jiang khyov, osi Ammon kyon jiango onte jancho zoa vamvü. 15 OPVÜI na Suez jünken jijo nghae sitoksi ezhü etssov hansi oyi Euphrates zhükhfü jiha zhükhfüro teriv tiying jiang tae enhyokae vasi nghakyingrüngi sitokvü, hojitoli otsük akvüna zhükhfü ji kyakacheo kümtokvü. 16 Osi onte pyimtsümotsüi jiangna kvüto Ejip meta sisi sani yiathüng, lantsü dunga yichosana hoji esüa Israel Assyria lo valanchi elio jiang tsükona eyilan lantsü litokvü.
Montsso Epikhen
1 Kyon jiang na okhen dentav yutaji tsathaka, "Ana ni thüngala, OPVÜI! Nina a thüngi ni lüm tsukcho, tokhatola enhungo nina a thüngi ni lümbüm n tsukvü sithaka osi alümbüm a miyiala. 2 Potsow jo a shanchopvüi; Ana ombo longtsüv osi ombo n kyu. OPVÜI na etho osi thokhyung apiala, ombo a shanchopvüi. 3 Ojü ethan jina kvüto eratsüngo ji thüngi ematha piasana ji esüa, Potsow kyon jiangna longshiala, kvüthüng ombona onte : shanchoasana." 4 Kyon jiangna heto dentav tsüngon ji tsathaka, "OPVÜI thüngi motsso pitava! Ni nzanchitukvü tsükona ombo tsaphia! Ombona ntio tssothak chosana jiang jipo topvü thüngi ezoa! Ombo kvüta tsüphocho sana onte ezoa! 5 Ombona elhi tsüphov tssothako ji tsükona OPVÜI denkatava. Limha totona hoji yithen ji zothuka. 6 Zion lo evan otsük akvüna tüngkachia okhen denkatava! Israel ntho Potsow jo tsüphoa, osi ombona ombo kyon jiang nzo vanala."
1 Yithen shijo Babylon tsükona Amoz tsoe Isaiah zenkying jina Potsow thüngi na heto hungcho. 2 Likying phunglan kvürina ritsso riven tonkachia! Rasan jiang thüngi tüngkachia ezoa osi kangtsüo yantsü pikhfü ji hale to ni khe rükachia okhe hataka ejüa. 3 OPVÜI na ombo longtsükao osi lümbüm etsson jiang ji ombona lümbüm tsuka evamo jiang ntho ritsso phonkale to tsachokthaka. 4 Phunglani na ontssotao ji enga – kyon mmhatsücho won jiang enga, jipo osi ekhüngyan jiang sanrhyutao won jiang enga. Rasanden pvüi jina ritsso phonkav tsükona ombona rasan methaka vana. 5 Ontena limhachüm ekonina saana tsarata. OPVÜI na ombo lüm etsok lona liphungtsü ji mpüm na roe sivsala. 6 Ryusanga emhentava! OPVÜI tsüngon kvümoe, Thotsü OPVÜI jina tssorophyoroe esio tsüngon ji enhyana tsathaka. 7 Otsük akvüto okhe jiang jakrae silangi sirav, osi lüm etsson topvü moni siv. 8 Onteji topvüto ekhen-rhükhani, eloena ngaro vamüsathüng noato eno jina onte khyorav. Ontena ekyu lona omha rangoa zekatav, osi yikra lona omha tssoa yiv. 9 OPVÜI lüm etsok tssoshü osi haruk-hashü tsüngon ji tsathaka. Limhaji eyingkhfü-khfüna romhon kümi sitokvü, osi mmen kyon jiang topvü roe siv. 10 Choro shantio topvü na n vom esani siv, eng jina chiro lia müngi siv, osi choro jinaha n vom siv. 11 OPVÜI na heto phyoala, "Ana limha jilo ezüp ntssonshi hansi yiv osi kyon n mhon topvü onte mmen jiang tsükona ezüptokvü. Osi kvütatana kangtsüa, mhachantonchana osi haruka mmen tssoa vanchosana onte n mhon jiang ochüm tssoyiv osi onte joyitukvü. 12 Hoji lona enhyokae evamü jo shona ntsena to ntsemvü. 13 A, Thotsü Potsow na kvüthüng a lüm etsuk ji limha shilo ejüasana, oyak potsüo jiha shüroe siv osi limha jiha enhyokroe ombo vanpheno n vamü sitokvü. 14 "Babyloni metapoe kyon tsanthan kvüta vanchosana jiang topvüto na onte meta yana tsamü, osi siano na sophan mhadungo tsanato, mekana olyu rhüki n vancho esüa tsanrorae sirav. 15 Onte ocho tsana vancho rhümatasana jijo ejungtsüngi chütokvü. 16 Osi ontena ntiolo tia n tsankav osi n khvüyangkav eyingoa vanathüng, onte ehungona onte ngaro jiang ejüproe siv, onte ki ejüeli jiang retav, osi onte tsoeni jiang thüngi ekhüngona efürama tssov." 17 OPVÜI na phyoala, "Babylon ji hathokvü tsükona ana Medes jiang nthechiala osi etssungetssüala. Ontena shona janti ntia n jüpon osi hojiang na onte lümbüm n yeso. 18 Onte lotssi osi lotssitsüng jiang na khyingroe jiang kotsüngrav. Onte nganiro jiang lia khonzan to n tsso osi nongori jiang ha nzana n ehüm. 19 Babylon meta jijo topvülo mmhontsoji; osi meta jilo kyon jiangna hojilo zekata kangtsüa vancho. Tokhatola A, OPVÜI shina kvüto Sodom osi Gomorrah montokcho sana ji esüa Babylon jiha montukvü! 20 Kyon ochina ha hojilo elani n vanlan. Arab kyon khyuphirümphia evan jiangna lea ochina ha hojilo süranki lia n phokachi, osi olyu rhüki ochina ha ombo olyuden jiang hojilo n yantsotuk. 21 Meta shijo lijüngi ekümrümo jiang vanphen osi velongu na oshüp tssophen kümi siv. Jüworo jiangna jilo vamvü osi ora nyanyan jiangna roe elioji ponina tsokphitav. 22 Oki ntssomvü tssokachio jianglo tona mesaphen ki to jiango, meseranfü osi shiali na eroncho eshokaphen tssov. Babylon emom yuta ji yithaka! Osi ompvü tsüngon mmhom jo yakhana vanthaka."
Tsanthan Eküm Lona Elani Yilamoji
1 OPVÜI na elani ombo kyon Israel jiang pono khonzan to tssov osi ombo kyon to onte ethüngchelamvü. Ombona elani onte meta jilo onte vantoklamvü, osi metapoe kyon jiang naha jilo oyi onte nzo vantav. 2 Jipo elümoto na Israel jiang ji nzanchia OPVÜI na onte pio meta jilo yilantukvü, osi jipo olan olan jiangna onte nri ejoena onte benkata vamü. Ochoang na ovüngthüng Israel jiang hayacho sana jiang ji enhungo Israel jiangna hayav, osi kyon ochoangna onte nyimthechia rochosana jiang pono Israel jiangna sav.
Babylonia Mesao Jiha Echüli Tssov
3 OPVÜI na Israel kyon jiang ji onte ryusang mmok osi ezüp phyingrüng jiang onte kyimchoyiv, osi onte nüngkata elhi ntav onte tssotoka evamo jiang esaniv. 4 Kvüthüng shi heto onte tssoyiasana, onte na heto phyoa Babylon mesao ji nchukatav osi yikvüyilov: "Haruko mesao ji elongthaka! Ombona enhungo ochia n tssethechilan! 5 Esapvüi n mhon jiang etho ji OPVÜI na ochüm tssoyithaka 6 osi ochoang na ontena khyothako jipo kyon jiang ji esan n lina lümbüm etsok lona khangria myimthechia to tssocho sana hoji etho ji OPVÜI na monithaka. 7 Enhungo limhatsü na noying osi esan hungthaka, osi otsük akvütona longshilona okhen denala. 8 Ethüngdung osi Cedar dung Lebanon lo elio jiangna mpa mesao elongthako ji tsükona longshiala, ntiotssole enhungo ochinaha onte n tanchüchülan, ombo enhungo monthaka! 9 "Echüli jina Babylon mesao ji elonchov methaki nhyaka vanthaka. Ochoangna limha shilo etho lia vana rochosana jiang mon jiangna phanthiala. Osi mesaoden mon jiang naha onte vantsüjiang lona phanthiala. 10 Onte topvüna ombo tsae ezoala, 'Enhungo ninaha e esüa ni n penthaka! Nina e yolo tsüka ni kümthaka! 11 Nino rhüphiphen khenzhü theta ni monkhüm yikrachicho, tokhatola enhungo niha echüli shilo tssothaka. Niha kangkangu na pyingcho belüng jilo yipkachia osi osü ora-oben na pyingi elio ji mpena.' 12 "Babylon lo mesao, enyathüng tüngrao shantio, potsüwoe na ni elongchothaka! Yuta yithako jianglo jo nina jipo jiang khyothechia rocho, khatola niha enhüngajo likoe ni shümchochithaka. 13 Nina potsüwoe yanga ehungo ni vantsü ji shantio ntssontso jilo vav tümkacho. Osi nina khümkiwoe phunglan kvülo potsow jiang etssirhyua sana jilo mesao esüa khokthe vamvü nchümcho. 14 Nina phyocho, eluk jiang poni ehungo Thotsü Potsow ji esüa vamü to. 15 Tokhatola, eluk poni chungov mekna enhungo topvülo oküptso echüli ni vanchukehithaka. 16 "Echüi jiangna omhyik nrüngi opüng koe emhoka ni zev. Osi heto ni engav, 'Limha enhyokthoko osi ekhüngyan jiang ekhentoko kyon ji shi alo? 17 Yantsü jiang roe sisi limha eyingkhvükhvü na lijüng kümtuki esio kyon ji shi alo? Osi vüngpheni evan jiang ochia vachi oki nyituko kyon ji shi alo?' 18 Limha shilo mesao jiang topvüna ombobo lüp mmhom jianglo esana vankhana, 19 tokhatola nino ni lüp n li, osi ni mungji hapoe kyonkachi ni sicho. Osi ritsso lona rasan lüngthao müng jiangna vazhüi, thanpo müng jiang nzo longkvüi hanthechi sümroe ni sicho. 20 Ntiotssole nina ni metaji roe sicho osi ni kyon jiang topvü lüngthacho, hoji tsükona mesao thanpoe jiang talünga jitheo ji esüa ni n jithe. Ni wopan n mhon ochia eküm valanchiv meka. 21 Lüngthata ji benkatuka! Mesao shi tsokhying jiang ji onte pyimtsü motsüi mmen yakchia chürav. Osi ochinaha elani limha shi saphyav meka mekana yantsü tssokachilamvü meka."
Potsow na Babylon Roe Siv
22 Thotsü OPVÜI jina phyoala, "Ana Babylon ji haekhi roe siv. Ana ntia n valanchinongori jiang lea n kachi osi ochia eküm n valanchi nrüng. A, OPVÜI shina phyothaka. 23 Ana Babylon ji nhyayo kümtokvü, osi velongu vanphen tssotukvü. Ana Babylon ji kikhephen bena khev osi olan topvü evüi sirav. A, Thotsü OPVÜI Potsow na phyothaka."
Potsow na Assyria Kyon Jiang Roe Siv
24 OPVÜI Thotsü Potsow jina heto echümchakthaka: "Ana ntio kvüto nsüng-nlüngthakcho sana ji ephan tssov. Ana ntio etssov tümkathakcho sana ji ephan tssov. 25 Ana Assyrian jiang a meta Israel jilona rorüpi sivka osi a phunglan jiang lona onte sümromorov. Ana a kyon jiang ji Assyrian jiang vüngkhüng jilona onte vachiv osi ontena oha mmyingu ehamü elio jiang onte ephongiv. 26 Limha shilo etssov a etüm ezi ji shi, osi jipo jiang ezüp epiv tsükona a evon ji rüchithaka." 27 OPVÜI Thotsü Potsow jina heto etssov ji tümkathaka; ezüp epiv tsükona ombo evon ji rüchithaka, osi kyon ochinaha hoji ombo n tanglanchiche.
Philistia Kyon Jiang Potsow na Roe Siv
28 Yithen shijo mesao Ahaz echü nzyu heto thenchocho. 29 Philistia kyonden, nte erhüpo yonjak jarung jijo jakthaka, tokhatola ntena hoji khi emathao tüv ntia n li. Kvüthüng nrü motsünga chüasana hojilona n mhonkao jitüv na hoji vanphen jilo chiyiala. Nrü ejüna epyao mmhoni khechoala. 30 Ombo kyon yantsae jiang pono OPVÜI na enhyakpvüi tssov osi onteji nküpnfücheo metalo onte vantokvü. Tokhatola OPVÜI na otssivara ntav nte pono yithukvü philistia kyonden, osi nte ochia eküm nte n vanlanchi. 31 Ekyo-erung yana emhena kyatava, Nte philistia yantsüden! Nte topvü na, ekhenrhüka ekhentava! Livero-elok tüv khümkiwoe na tsata – Hojijo rasanden, ochia nsüp-nrüp onte yolo n jü. 32 Philistia lona yithenpvüi eroji etena kvüto janlantavla? OPVÜI na zion ji tssoe vathaka osi ombo kyon ezüpa evamo jiang na hojilo onte eküm n phocheta vanchev to etena ezotavka.
Potsow na Moabji Roe Siv
1 Yithen shijo Moab tsükona phyocho. Ar tona Kir to yantsü ji zümoa taena roe sisi Moab metaji noyingtetükna kümi sithaka. 2 Dibon kyon jiangna kyalo phunglani ekhümki jilo yanga chongtala. Moab kyon jiang na nongra lona Nebo tona Medeba to yantsü tsükona kyatala; osi etho ejakona kvüri osi mehüm topvü tssüi sithaka. 3 Lantsüi kyon jiang jo posta mpentasi vana; osi yantsü nkonphia elani mhonkvüri na kyon jiangna nongrata kyatala. 4 Heshbon kyon tona Elealeh to jiangna ha kyatala, osi onte ekya won ji Jahaz jana konaena zoala. Rasan jiangna mpa enetala; osi onte lümbüm etsson ji monthaka. 5 A lümbüm na Moab tsükona kyala! Kyon jiangna Zoar yani tona Eglath Shelishiyah tolo tsankhani yithaka. Onte yolo ejoma jo kyata Luhith lan jiwoe tsana chüngita, ejomajo eronkachia kyata Horonaim lo yita to tssoala. 6 Nimrim zhükhfü ji nghae sithaka, jütssae eroyo jiangha mmikathaka, osi limo mmyakvü ntia enhyokae n li. 7 Kyon jiangna ontena ntio ejüeli lichosana, jiang topvü hantasi tsanchov ekhyo tssota lijü hayi pankae yithaka. 8 Moab erü jiang topvü lona kyata-nrongta won zoala. Eglaim osi Beerelim yan jiang lona mpa zochiala. 9 Dibon yanro ji ndüngo zhükhfü jijo ejen na rakia tsüala, osi Potsow na hojilona n mhonka tüv kyon jiang tsükona methaki lia. Ho, Moab lo valanchio jiang yolo jenpok-nipokta osi lüngthata liv.
Moab Eyilo N li Sükhying
1 Lijüng yantsü Sela lona Moab kyon jiangna Jerusalem lo esapvüi jiang thüngi olyu oro yantso hantukcho. 2 Osi ontena Amon zhükhfü tssaena ntia tümka n lina woro oshüpina phanchokchicho to eyi-eo shenphita nhyakta vancho. 3 Ontena Juda kyon jiang thüngi ezotacho, "Kvüto lyuvsana e ezotava. Osi odung na eng etssolo mmyimroa khümcho pia esüa enkohoa, osi nte khümcholo esantuka. Eiyo tsanthan-denka; oyam na e n yancheo tüvlo emphotuka. 4 Nte metalo evantoka. Osi roe esihunga evamo kyon jiang thüngina e nkocheta." (Nyimthechia roe sia evamo jijo ochüm tssovka, osi ochoang na liphungtsü shi roe sia vanchosana jiangha yisiv. 5 Hoji sülojo David tsoronichen lona mesao tssov, osi ombo kyon jiang ji longtsüka osi nzan lona sav. Elan elhi etssov lojo ombona etha-zaka tssov osi topvüto ntsanrük ephanina tssov.) 6 Juda kyon jiangna phyocho, "Moab kyon jiang jo kvüta kangtsüi sana ena zothaka. Onteno mhakhyung-mharan osi ejithechiden to ana ntsia, tokhatola onte kangtsü-kangri jilo ntia n jü." 7 Moab kyon jiangna ezüp mmok lona kyavka. Osi ontena Kvüthüng Kir Heres yantsülo vanathüng etsoyu mmhom tsotao jiang nchümchetana kyavtavka. Osi onteji ezüp phyingrüng lo onte phanthechiv. 8 Heshbon lo oli mmhom osi Sibmah lo jününgroli mmhom kvülo na soko mmhom chiyithuki jipo jiang esapvüiden jiang kinotuka rochosana jiang roe sithaka. Tsüngon motsünga lojo jününgroli jiangna Jazer yantsü jana, engkhvüwoe lijüng ji jana, elani engrhelamoe jo echüjü jümang jan to meta topvü nzüjana licho. 9 Enhungo ana Jazer lo jününgroli jiang tsükona kyao ji esüa Sibmah lo jününgrothi jiang tsükona kyala. Osi Heshbon tona Elealeh to tsükona a esü zanala, ntiotssole jilo liri lithuki-khi kyon jiang emathatuko tüv n li. 10 Enhungo lizü meta jianglo ochia emathata n van. Ochinaha jününgroli jianglona okhen denkachia n van. Osi ochinaha zükhi nsüngrüv tsükona jününgrothijü n zümcho; ematha longshi won jiang topvü ochüm tssothaka. 11 Ana Moab tsükona nungra emhenala, osi Kir Heres tsükona a nungrala. 12 Moab kyon jiang ji phunglani khümphen jianglo chongota lona tona ekhümki randanwo ewo tojina sangtsüngkhanthaka, tokhatola jina ntiona mmhom onte tssoyiv tüv n li. 13 Ovüngthüng na OPVÜI na Moab tsükona yithen epioji hoji. 14 Enhungo OPVÜI na phyoala, "Nzyu ethüm yutalo Moab ejüeli topvü momvü. Osi kyon khosha khatola mataroa tae eküm valanchiv, osi onteji etho n-liv siv."
Potsow na Syria Tona Israel to Ezüptukvü
1 OPVÜI na phyoala, "Damaskas jijo enhungo yantsü tssov meka; tokhatola rota-nsuphyu na roe ekachi siv. 2 Syria yantsü jiangha nchüngkhonto tsükona sirhaki siv. Onteji olyu osi mangsü yantsophen kümi siv, osi ochinaha phani n si. 3 Israel jo ntia nkohaphen n liv tüv tssov, osi Damaskas jiha ombo ekhüng etho ji momvü. Syria kyon kvütata eküm enhyolanchia sana jiangha Israel jiang esüa yikratokvü. Hojito A, Thotsü OPVÜI jina, phyoala." 4 OPVÜI jina phyocho, "Israel tsüpho ji ochüm etssov tsüngon ji tsathaka, osi ejüeli ji tssitsayantsana tongcheyiv. 5 Osi kvüto Rephaim hayitsü ji oli rikhithakale, apho among esüa sirhaki sichosana hoji esüa Israel jiha oli ri khisi ophen tae ekachi sicho esüa kümi siv. 6 Kyon tara tae eküm valanchiv, osi Israel ji olive dungina tssüngthi topvü lhokani khisi odung mmyoe enithüm tae enhyoe vacho, mekana oküpi khero jianglo tara enhyokae sicho esüa tüv tssov. A, Israel OPVÜI Potsow jina phyothaka." 7 Kvüthüng hojitüv tsüngon ji yiasana, kyon jiangna onte liyingpvüi, Israel ntho Potsow ji thüngina nzan yana yiv. 8 Ontena onte khena thanphensa nsüngrüo jianglo n nhyika mekana onte khena Asherah potsow pvüi ji pono osi tssütse rhüm mmhom rungphensa jianglo n longtsükav siv. 9 Kvüthüng hoji tsüngon ji yiasana, mmhona epi evao yantsü jiangha kvüto Amorites tona Hivites to jiangna Israel mhadungo tsanathüng yantsü jiang ji thonroe ekachi sichosana ji esüa ekachi siv. 10 Israelden, ntena OPVÜI Potsow ochona nte shanchocho sana osi longpvü esüa nte nkohoacho sana ji mhechoe sithaka. Ombo nchümchev thünginajo metapoe Potsow jiang khümtav tsükona ntho tssotuka phari jonrae lia. 11 Tokhatola ntena chümo ji enyathüng na mpa poki rankalia jianglona tssüngthi lhov meka. Ezüp tona n pocheo eno-era to tae tssovka.
Ori Jipo Jiang Khyothechicho
12 Etho eli jipo jiangna jümang jüna echyuato, osi jükyo evokta to owon tssoa ekhenlongtala. 13 Jipo jiang na jüvak esüa vüngtsana tsata, tokhatola Potsow na onte ryulanchi onteji phunglani livero rüma esüa osi mpungna mavü venphiato kholanala. 14 Mmyui jo ekhenthav esüa chirosi, enya jana na moni siala. Ochoang kvütata na e meta jilo retso-reyu elhi tssocho sana jiang sükhying jo shi heto tssovka.
Potsow na Sudan Ezüptukvü
1 Sudan zhükhfü ji pankae lo meta jilona echo elhüphitacho won zoala. 2 Hoji meta jilona lantssoeden Nile zhükhfüi orhung kherang na nsüngrücho tüv lona jorotala. Nte kiwoe elani yitava, nte yithen ekhyinga hanphiden! Zhükhfü na khosotae elio nte meta jilo, nte kyon tsüpho siphoeden, ofü enyipa siphoe kyonden, osi limha mpüm na kyua evamo kyonden jiang thüngi yithen hansi yitava. 3 Engatava, limhalo evan otsük akvüna! Phunglan kvürina riven chekav tonkachiv evamoji zetava! Jungken emhvüo wonji engatava! 4 OPVÜI na heto a ezocho, "Ana kvüto liri yutalo ezhü lümathüng, osi zümothüng yentsso ji yingying joroa sana ji esüa, osi eng etssolo eng jina yingto vonkata sana ji esüa ana potsüwoe na zechochivka. 5 Jününgrothi jiang n Ihothüng na kvüto eben jiang vüchoe siasana, osi jününgro jiang mhenchokchiathüng thoni esio ji esüa, mekana kvüto lepok na jününgrozhü jiang elaroa etssachochia sana ji esüa ori jiangna Sudan kyon jiang ji elaro roe sivka. 6 Onte rasan echümüng jiangji orae oso woro tsophen hapoe ekachi siv. Nzyulo-jo woro na hojiang tsov, osi etssükojo ekümrüm jiangna tsov." 7 Thotsü OPVÜI jina, zhükhfü na khosotae evamo kyon etho ejüi jipo limhatsü na kyua evamo, ofü enyipa tsüpho siphoe kyon jiang thüngina othan khichov tsüngon ji tsathaka. Zion phunglan kvülo shina Thotsü osi Tokhamo OPVÜI ji khümta sana jilo ontena rov.
Potsow na Ejip ji Ezüptokvü
1 Yithen shijo Ejip tsükona ephyoji. OPVÜI na eluk ekhyinga tüvlo eshoni Ejip metae tsata. Hoji tsükona Ejiplo kisü elio jiangna ombo mhadungo enetala, osi Ejip kyon jiang lümbüm etsson ji moni sithaka. 2 OPVÜI na phyoala, "Ana Ejip kyon jiang yolo ritsso chiyitokvü nthiphiv osi onteji jeni yutalo osi kinakishüm yulo onte khontatokvü. Yantsü n khyingtav vamo jiang nochotae khontav, osi mesao n khyingtav evamo jiangna ha etho reta rotav. 3 Ana Ejip kyon jiang ritsso lanka jiangji shanlanehiv osi onteji etho nseni sitokvü. Ontena kisü jiang thüngina nzanchi yamvü, osi müngyitssoe, ratssen-rapvüi jiang thüngi ngatüngngariv osi echüi mon jiang thüngina ejü-rünyo yantav. 4 Ana Ejip kyon jiang ji mesao n mhon, haruk-hashüi jitüv khelo theyia onte satokvü. A, Tokhamo OPVÜI jina heto phyoala." 5 Nile zhükhfüi ojü ji ngha joyitokvü, osi wokhao tssoa kyingrünga nghae sitokvü. 6 Zhükhvü jilo oyi eryuo jüro jiangha nnan-phfüphfüna nghae sitokvü. Osi kherang osi ponghon jiang topvü mmikae siv, 7 osi oyo wohan Nile zhükhfü tssa rhüa benroe evao jiang topvü chürae mpungna vena yitukvü. 8 Nile zhükhfüi ongo rumi eküm süphia evamo jiang otsük akvüna emhena kyav; osi onte okhfü tona ngozonphen jiang ntia ethev n liv kümi siv. 9 Sünyipvü sü nsüngrüi jiangha etho jaktokvü; 10 Sütüngden osi tssiyan-morithi jiang topvü yantsae kümi ezüptokvü. 11 Zoan yantsü jilo esopvüiden jiango zhüvaeden! Ejip kyon nchümri elitso jiangna ethelan n lio ejü-rünyo piala! Kvütoli khi ontena mesao ji thüngi eyio nkolo ntsinran osi mesao jiang echung jika to ezovla? 12 Ejip lo mesao, nte yulo okyak eli osi ejü-rünyo epipvüi jiango kvülo vanrachola? Thotsü OPVÜI jina Ejip tsükona ombo etüm-ezi ntio lichosana jiang mpa ontena nte ezokhokvü mpa tssovla. 13 Zoan osi Memphis lo esopvüiden jiango zhüvaeden! Ontena jipo ji sosi yiv shikhfü, tole ontena sosorathaka. 14 OPVÜI na hama ejü-rünyo epio onte kümtokcho. Hoji yakchia, Ejip kyon jiangji ontena ntio tssoasana jiang topvü, sokona kinoe na sanphiato osi ontena lae jilona phephio ji esüa silyuo osi n lamo tae tssotala. 15 Ejip lo evan, elika osi yantsaeka, mekana ethelan elika, n lika to mekna ochinaha ochia n zancheo kümi sicho.
Ejip na OPVÜI ji Khümvü
16 Ejip kyon jiangna eloe esüa nsüp-nrüpa ekümvü yutaji tsathaka. Kvüthüng onte ezüp epiv tsükona OPVÜI na okhe rüchio ji hungasana ekyu lona enev. 17 Ontena kvüthünga Juda kyon jiangji OPVÜI na onte ntssonshitukvü methakio ji nchümcheta sana ji akvüto onte ekhenrhüka ekhemvü. 18 Kvüthüng hoji yuta ji yiasana, Hebrew yiji Ejip kyon yantsü mongo lona nsantav. Hojiang lo kyon jiangna Thotsü OPVÜI Potsow myingona echümtav. Osi yantsü jiang yolo motsüngajo, "Eng Yantsü" to tsav. 19 Hojitüv yutaji kvüthüng yiasana, OPVÜI tsükona thanphensa Ejip metalo liv, osi OPVÜI lo khochaki picho olong turhyu Ejip erü jianglo chümvü. 20 Hojiang jo Ejip metalo OPVÜI Potsow vanrhyu ji chekav jiang tssov. Kvüthüng hojilo kyon jiangji oyam na khangshi ntssonshia sana osi ontena OPVÜI nzanchi ethümphia sana ombona ochosana wothuka onte shanchotukvü. 21 OPVÜI na ombobo Ejip kyon jiang thüngi hungtukvü, Osi ontena ombo chekae othan osi erungthan theta ombo khümvü. Ontena echümchak mmyingu khi OPVÜI lo echümchakvü osi ontena echümchako ji esüa benphiv. 22 OPVÜI na Ejip jiang ezüptukvü, tokhatola onte emiyilamü. Ontena ombo thüngi kholamü, osi ombona onte randan jiang zoe onte emiyiv. 23 Hoji yutaji kvüthüng yiasana, Ejip tona Assyria to yutalo sanphilan lantsü liv. Liphungtsü eni shilo kyon jiangna hepi hepito yutalo eyi-otav, osi jipo eni kyon jiang na onte nzo khümtav. 24 Kvüthüng hoji yutaji yiasana, Israel ji Ejip tona Assyria to kheti kümü, osi jipo ethüm ji limhatsü tsükona mmha tssov. 25 OPVÜI Thotsü Potsow jina onte mmhayiv osi heto phyov, "Ana nte mmhayivka Ejip a kyonden, ana liyingo Assyria kyonden; osi ana ethüngcheo jipo, Israel kyonden."
Zenkhying Tsükshü ji Ejyuka
1 Assyria ekhüng esae Sargon yizüng küpo na Assyria rasantsü esopvüi jina Philistine yantsü Ashodod ji hacho. 2 Nzyu ethüm yithako ji OPVÜI na Amoz tsoe Isaiah ji ombo jokhüp jiang tona ombona postasü mpemo ji to shaki sile to ezocho. Hoji tsükona ombona oyi enga khi sisi mpensü n hana joshü sanphicho. 3 Osi kvüthüng Ashodod ji hayachosana OPVÜI na phyocho, "A, phajae Isaiah na nzyu ethümoto mpensü n kana tsükshü osi joshü sanphia vanthaka. Heto etsso shijo Ejip tona Sudan tolo ntio tssov vanchosana ji chekav jika. 4 Assyria lo ekhüng jina ombo liphungtsü eni lona rhümae evao morantsan jiang ji tsükshü sosi samüka. Khyingroe osi eson-eran topvüna joshü, osi tsükshü onte repyak jiang hunga Ejip lo yikra hansi yia sanphitavka. 5 Kvütata na Sudan lo longtsükata vanchosana osi Ejip lo zekae kangtsüa vanchosana jiang topvü nsüp-nrüp na pyingtokvü osi onte eyiloji moniv. 6 Kvüthüng hojitüv yuta yiasana, Philistia jütssa rhüa evamo kyon jiangna phyotav, 'Zeta etena e nkohoatokvü eyilokata evamo Assyria ekhüng ji ntio kümthakcho sana! Kvütoli khi etena eküm vanchevla?' "
Babylon Joyiv Hungthokoji
Yithen shijo Babylon tsüAmJL kona heto phyocho. Mpung erio jina lijüng phfüisia venato, ekhenthav meta jilona roe esioji rov. 2 Ekyuthav elhi elüp jitüv müngtüng ana hungcho, khaksilonsio chekav osi tssorophyoroe esio jitüv müngtüng. Elam rasan, phonkata! Media rasanden yantsü jiang nkonzhüi vantoka! Babylon yakchia ezüp yitokoji Potsow na ochüm tssotokvü. 3 Ana ntio hungchosana osi zochosana jina ekhen emhok osi eloena tsopokvü sathüng rusanga to a rusanga anoala. 4 A kvüri shi harita, osi ekyu lona a enetala. Ana emüng eyiv ji nhyaktssüka vanle, thanpo ntia mekna emhok ekhen hansi yithaka. 5 Omüngi ji tokhu methaki licho; tole tokhulo eroe jiang khokthephen jo sükerak sae licho. Osi ontena tsoyuta vanathüng na süngaro taena yithen heto ontssocho: "Tsüphoeden nte tsung jiang methak-tava!" 6 Hojisüi jo OPVÜI na a ezocho, "Woa osi enhyang vantoka, osi ombona ntio hungasana hoji oyi phyole to ezoa. 7 Ombona kurü mangkvüi na kyon nchyu eninina, tsankae rota hunga tssona osi gadho mekana odh lo tsankae rota hunga tssona jiang ji ombona tüngochünga chevka." 8 Enhyang jina heto phyoa chiyicho, "Tsüphoeyo, a vantuko jilo zümo eng ana phanthi nhyaka vanpvü." 9 Tole süngaro taena, onteji shilo chiyirathaka! Onteji kvürü mankvüi na otsük enini-na khokthecho to enhyang jina yirücho."Babylon ji joyithaka! Osi ontena khümtao kisü jiang topvü likoe evüprokhani lira." 10 A kyon Israel kyonden, nteji ohüm küma nte enhyikrocho, khatola enhungo ana Israel Thotsü Potsow thüngina ntio ematha yithen mmhom zochosana ji nte ezoala.
Edom Tsükona Yithen
11 Yithen shijo Edom tsükona heto. Edom lona ochonasana heto a tsaphicho, "Enhyang, zümo shijo kvüta laloka yivla? Kvüta zakto ochüm tssovsana a zoa." 12 Ana heto janlancho, "Enya ji tsathaka, tokhatola münglamvü ji elani yilamü. Küma nina ni engahunglana tssona, elani khi oro engalana."
Arabia Tsükona Yithen
13 Yithen shijo Arabia tsükona heto. Nte Dedan kyonden, Ochoangna nte zotoro jiang ji Arabia meta apho-among jilo ncheni vanchosana, 14 Eratsünga nte thüngi eroe kyon jiang ojü pitava, Tema lo evan kyonden, tsanthan jiang thüngi etsoyu pitava. 15 Onte lüngthav tsükona yonri methaki lio jiang osi lotssi onte ekovtae methaki evamo jiang, osi ritssolo kvüta ekyuv lichosana jiang mhadungona tsanchov tsükona tsantala. 16 Hojisüi jo OPVÜI na a thüngi a ezocho, "Nzyu motsünga yutalo Kedar jipo jiang tsüpho ji ochüm tssotoka. 17 Kedar lo lotssi eben jiango lümbüm etssontsoe den, tokhatola tara tae onte enhyokav. A, Israel OPVÜI Potsow jina hojito phyothaka."
Jerusalem Tsükona Yithen
1 Yithen shijo müngtüng hayitsü ji tsükona heto phyocho. Ntio tssoa vanchola? Ntiotssole yantsü shilo kyon jiangna mhonkvüri na longshita mongala? 2 Yantsü shiji nsha-nlongta, osi wontssoniro emathana pyingthaka. Nte kyon ritsso lona echüo jiangna oyam n panlana chücho. 3 Nte esopvüi jiangha topvüto ontena lotssitsüng motsünga tia n shümchithüng na tsantacho khatola rhümaracho. 4 Hojitsükona enhungo a kyon echüo jiang tsükona nshüthechia kya nungrav saka a nkachoa. Osi a ejichov ekhyo ti-tssotava. 5 Shijo ekhenlung yuta, ekhyo, osi hamahari OPVÜI Potsow na ete pono müngtüng hayitsü shilo rotukcho. Ete yantsü pikhfü jiang topvüto thonchokhanthaka, osi e nzanchile to erontao won jiangna phunglan jianglo eshokatala. 6 Elam metae rasan jiangna kurü mankvüi na lotssi tona lotsüng to benri hantasi yungta rocho. Osi Kir lo rasan jiangna otsung jiang methaki vancho. 7 Juda hayitsü lizü ji ritsso zotoro osi kurü rasan na pyingcho; osi kurü rasan jiangna Jerusalem kibüngkhan jilo mangcho. 8 Hojito Juda pikhfü topvüto eyaracho. Kvüthüng hojito tssochosana, ntena ebensü vaphen jilona ritsso ebensü jiang khichokcho. 9-10 Jerusalem pikhfü kvüanglo jo tsochov ethev lichosana ntena yanchecho. Ntena Jerusalemi oki jiang topvü rashi zesi ejomajo khyanchüchüi sisi olong ethan khi pikhfü jiang zechoe ekhio tssov. Ojü tüngi evav tsükona, n ntena yantsü ji chungi ojü ji jüjen jilo tsüa jeyio ji tünglanchia jükha shancho. Tokhatola ntena Potsow ochona shiang hetopvü ji ovüngna madangi vasi heto tssotukchosana jijo engoe n zecho. 12 topvülo Tokhamo OPVÜI jina shiang tsükona kya nungratale, osi nte kvüri jiang tssüi sisi posta mpentale to nte ezocho. 13 Tokhatola hojito tssothüngo najo, ntena emakata longshitacho. Ntena olyu, mangsü jiang tatsüngi tsota soko yutacho. Osi ntena phyotacho, "Etena tsoyutavka! Ojyua e chüvsala." 14 Tsüphotso OPVÜI Thotsü jina ombobo heto a ezocho, "Onte eküm evanthüng nandang jo mmen elhi shiji onte mhechoyiv meka. to A, OPVÜI Thotsü jina phyocho."
Sheba Thüngi Ntang-nshocho
15 Tokhamo OPVÜI jina Shebalo owo; mesao wopan yolo enhyakpvüi ji thüngi heto ezole to a ezocho, 16 "Nino ocho to nchümala? Nina longrokyu-yu phunglan jilona olüp long theni evav ntio elan lichola? 17 Niji ethelan eli kyon mpa tssokuka, tokhatola OPVÜI na khyokae shümthe ni sivka. 18 Boll esüa ni khyokae khi liphungtsü tsüphokao tüvlo ni shümthechivka. Nina kangtsüa enhikata evamo ritsso zotoro ji nzo jilona ni chüvka. Nipvüi kijilo yikra hansi eyi ji ni. 19 OPVÜI na ni elhishüp vanphen jilona khi nisiv osi ni vanphen ntssomo jilona ni süjov." 20 OPVÜI na Sheba thüngi ezocho, "kvüthüng hojito tssoasana ana Hilkiah tsoe Eliakim a phajae ji rotokuka. 21 Osi ni esapvüi mpensü osi ryukhüng ji khi ombo hantukvü osi ni etho esa ji khi ombo piv. Ombo Jerusalem tona Juda to opo esüa tssovka. 22 Osi David tsochen yulona mesao tssoa evamo ethoji mpüm na ana ombo pivka. Ombona Ihishüp topvü jabi ji bemü: Osi ombona ntio chonchia sana, hoji ochinaha n khanche, osi ombona ntio khanasana hoji ochinaha n chonchiche. 23 Ana eshentan esüa elümoto chüngchünga ombo vantukvü, osi ombo wopan topvü tsükona yikrachi monkhüm chiyiphen ji ombo tssov. 24 "Tokhatola ombo wopan jiang tona ombolo enghikae evan jiang topvü tsükona ombona tssov. Osi kvüto tssiphfü osi vakok yisipheno yikae vatasana ji esüa ontena ombo lo enhyikae mekana yikae vamvü! 25 Kvüthüng hojiang esüa tssoasana yikaphen chüngchünga eshenkae evaoji sokchoki elungjov. Osi kvütata hojilo yikae vanchosana jiang topvüto ochüm ji hoji tssov." OPVÜI na hojito phyothaka.
Phoenicia Tsükona Yithen
1 Yithen shijo Tyre tsükona heto. Nungra lona emhentava, nte orhung ehaeden jümangina hapoe chiyia! Tyre lo nte esanphen kiji roe sithaka; jilo oson oki jiang osi orhung esanphen jiang topvü roe sithaka. Nte rhungtsü jiangna kvüthüng Cyprus lona kholani yiasana yithen shi ntsiv. 2 Sidon lo shishoeden, kyatava! Ntena jümang pankawoe kyon 3 wothuka Ejip lona chiyio tsünghonro jiang shi khi jipo topvü thüngi shishov tsükona tssocho. 4 Sidon yantsü, nino ni yikra khithaka! Jümang tsüphov osi jümang ejungo jiang na ni sithaka osi ontena heto phyoala, "Ana kvüthüng ha nongori n van. Ana tsokhying tsolo khyocheranküm thakcho kvüloha n van." 5 Kvüthüng Tyre ji roe sithaka to ntsiasana Ejip kyon jiang nalia ekhen emhoka nungrav. 6 Nungra lona emhoktava, Phoenicia kyonden! Osi Spain metae tsani eyiv ekhyo tssotava! 7 Nkolona yantsü tssoa erovo Tyre shi ematha longshi jo heto tssokhuk-choke? Jümang yakchia oyan tssoa yithuko yantsü ji shi alo? 8 Yikrachio yantsü, osi shilo shishoe tsüphoe jiangjo limhatsü na yikrachio kyondenla, ochona shi pono heto etssov nsünglüngchola? 9 Thotsü OPVÜI Potsow jina hojito etssov zikacho. Yantsü shilo kyon jiang kanchan-kanri ji ocho tssotukvü khilato osi oyam na yikrachio kyon jiang yikratukvü tsükona OPVÜI na heto nlansüngcho. 10 Spain metalo evanden, ntena owo oli jontava! Nte nkohov tsükona enhungo ochia n vamü sithaka. n OPVÜI na jümang poni okhe yonchia ekhüngyan jiang khi sithaka. Osi Phoenicia kyon jiang shishotaphen longjüng ji roe sile to yidan pithaka. 12 Sidon yantsü kyonden, nte ematha ji ochüm tssothaka, osi nte kyon jiang ji tssethechiala. Osi ontena küma Cyprus lo mpa tsani yilea tsanchophen liv meka. 13 (Ora ekümrümo khi Tyre ji sümi sithuko jijo Assyrian jiangna mek, tolia Babylon kyon jiangna tssocho. Tyre yantsü ji roe esiv tsükona rizümphen tssokachi, jilona Tyre pikhfü jiang topvü roe sisi yantsü ji thonkachi esioji ha Babylon na.) 14 Emhenta nungratava, nte orhung ehaeden ha hapoe chiyitava! Ntena enhikata evamo yantsü ji roe sithaka. 15 Tyre yantsü ji nzyu ekhatiying tsükona mhechoe esiv ji yuta tsathaka, hojijo mesao echungren motsünga. Kvüthüng hoji yutaji yakthakana, Tyre yantsü jo eloe lonsülonphyoe khen heto edemo ji esüa tssoe siv: 16 Ni khenpvü ji khi bensi, yantsü tonga woa, oyam na mhechothang lonsülonphyoe eloe! Ni khenpvü ji rhüphia osi elani okhen jiang denlana, Eboe jiang tsarhyulamvü tsükona. 17 Kvüthüng nzyu ekhatiying ji benthakana, Tyre ji OPVÜI na elani ombo shishophen ehen jilo yilantokvü, osi ompvüpo limha shilo ekhüngyan jiang thüngi mmyotsoe kümvü. 18 Osi ompvüna shishokhophi yakchia orang kvüta hungasana jiang topvü OPVÜI lo khochaki piv. Ompvüna hojiang hanrhyue khi n va, tolea kvütatana OPVÜI khümasana jiang etsoyu tona mpensü to eshiv tsükona ompvü rang ji tsütsav.
OPVÜI na Limhaji Ezüp Piv
1 OPVÜI na limha shi roe khi eyingterüp na sirhaki ekachi sivsala. Ombona limha pon shi erüproe sisi kyon jiang hanroe siv. 2 Pvüti tssolea osi kyon shae tssolea mekana ezii, Opvüiden, eshiden, eyen elani oyam thüngi noe etsoe, oyam enoe, eli osi yantsae topvü na sükhying tsükshi ndukvü. 3 Limha shiji küngroe metsükana ejüng kümi situkvü. OPVÜI na hojito phyothaka küma hojito tssov. 4 Limha shi kyingkae osi likying kümala; osi limha mpüm ji etho n liv siala; liko shiha oyak jiha ehena vanthaka. 5 Kyon jiang na Potsow shikhfü jiang yeso ji yakchia limha ji mmeni sithaka osi eküm echung tsükona ntsata evaoji yeso ji tsükona hojito tssoala. 6 Hoji tsükona Potsow na limha ji rhiyikathaka. Kyon jiangna ontena ntio tssochosana ji man ji hungala. Kyon jiang mataka, matakana enhyoa vanthaka. 7 Jününgrothi dung jiang mmikata yiala, osi tssüngthijü ntsena vanthaka. Ochoang kvütata emathata vanchosana jiang topvü enhungo nungrala, 8 osi onte ematha longshi khen, khenpvü osi sungkhuhg ekhota khfütao jiang enhungo esanthaka. 9 Enhungo soko yusi longshita denta ji n liv sithaka; osi ochinaha enhungo soko rhüm ji n chokav sithaka. 10 Yantsüi olan topvü benromoroe lia, osi kyon jiangna onte tsancholan yana oki khalanchikhana rheyiala. 11 Enhungo soko n lithako ji tsükona kyon jiangna lantsüi na nsha-nlongtala. Ematha longshi ji nchüngkhon tsükona yi sithaka; osi limha shilona moni sithaka. 12 Yantsü ji roe sithaka, osi kipüngkhan jiangha topvü jerhüpkhanthaka. 13 Heto shiji limha shi topvülo osi jipo akvülo tssovka. Heto shiji lirithung olive dung topvü lona tssüngthi lhoe khithaksi osi jününgrothi wokhao ji khia vancho esüa tssovka. 14 Ochoang kvütata eküm enhyolanchia sana jiangna longshi lona okhen dentav. Osi engrhelamoe evan jiangna jo OPVÜI jo kvüta tsüphocho ato to ezotav, 15 osi engkhvüwoe evamo jiangna jo ombo mying thüngtav. jümang rhüa evamo kyon jiangna OPVÜI Israel Potsow ji mying thüngtav. 16 Limha nken ekonina kyon jiangna ntsa ntho jipo Israel jiang thünga dentacho won ena zov. Tokhatola a tsükona jo eyilov n li! A mona yiala! Yentsoyenyui jiangna akhaksiala osi onte kyakthechi elhi ji n mhonka n mhonkana yiala. 17 Otsük akvüna, a engayia! Ekyu, sokvü osi tsirhi topvü lona nte nhyaka vana. 18 Ochona ekyuthav jilona tsanchov khilato ekhyo tssoana jijo sokvüi elongthev, osi ochoangna sokvüina tsanchoka sana jiango tsirhyi jilona sav. oyakina ryupvü ntav jochochiv osi limha chenkaphen ji enhyokvü. 19 Limha ji menro-tssüngroe kosochi siv. 20 Limha shi sokona kinoe na ngaphiato hanphiv osi tsungryu na kitokaro hanphiato hanphiv. Limha shiji ombo mmen ji mmying jina ombo süjov, osi eyav; osi kvüthüngha elani n khonthilan. 21 OPVÜI na omhawoe etho jiang osi limha esapvüiden jiang ezüp epiv tsüngon ji tsathaka. 22 Morantsanden sokvüi phanrhyuato Potsow na mesao jiang telokalo phanrhyuv. Osi onte ezüp epiv yutaji n janthüng nandangjo ombona vüngpheni khalanchi onte vantukvü. 23 Choro jinaha müngi siv osi eng jinaha n vomü siv, ntiotssole Thotsü OPVÜI jina mesao tssov. Ombona Zion phunglanina Jerusalem ji sav, osi kyon yulo esopvüi jiangna ombo phfütsson ji hungu.
Myingthüng Khen
1 OPVÜI, nino a Potsow; ana ni monkhüm yikrachiv osi ni mying thüngu. Nina engangcheo elhi tssothaka; nina nkolo madangi evao ji longtsükata tssochokchithaka. 2 Yantsü jiang ji nina roe situkthaka, osi onte pikhfü jiangha roe sithaka. E ri jiangna mesao vanphen tsso jiangha nchüngkhon tsükona moni siyithaka. 3 Etho eli jipo kyon jiangna ni thünguv; Haruk hashüi jipo yantsü jiang lona lea ni kyuv. 4 Nbennzi osi yantsae jiangna ni thüngi tsani yithaka osi ezüpta yutalo onte nküpnfüthaka. tsungryu mpung tssoathüng onte nkhüm nlhithukthaka. Haruk hashüi kyon jiangna etssüko tsungryu esüa oro ehacho. 5 Osi likying metalo tsüngkying esüa rocho; tokhatola OPVÜI, nina e ri jiang noyinga jükrüpi sithukthaka; osi eng etssolo elok na mmyima khümchoato, nina haruk-hashüi nsha-nlongtaji jükrüpi situkthaka.
Potsow na Tokhu Methakala
6 Thotsü OPVÜI jina Zion phunglan shilona limhalo jipolan topvü tsükona etsoyu mmhontso osi zükhi mmhontsoji theta tokhu methakvüsala. 7 Osi shilona zaktole ombona jipo topvü pono nungra elukna eyuki elio ji shaki sivsala. 8 OPVÜI Tsüphotso jina echü ji nchüngkhon tsükona roe siv! Ombona otsük akvü mhyikina esü mhe siyiv osi limha shilo ombo kyon jiangna yikra nungra hansi evamo ji khi siyiv. Hojito OPVÜI jina ombobo phyothaka. 9 Kvüthüng shiji heto tssoana, otsük akvüna phyov, "Ombo e Potsow ena ombolo e longtsü vathaka, osi ombona eshanchothaka. Ombo OPVÜI ji! Elongtsü ena ombolo vathaka, osi eyio enhungo e emathatala osi e longshiala ntiotssole ombona eshanchocho."
Potsow na Moab ji Ezüpthukvü
10 Zion phunglan jijo OPVÜI na nkov, tokhatola Moab kyon jiango tssethechiv, kvüto lizü lo mavü tssethechia sana ji esüa. 11 Ontena ojü nghov-sathüng esüa onte khe jiang ntichirav, tolea OPVÜI na onte terithokvü, osi onte khe jiang ntiolo tia n yakav jüngthev. 12 Ombona Moab pikhfü ntssomo jiang topvü roe khi ohüm mekana livero küma sümroe siv.
Potsow na Ombo Kyon Jiang Ekhyo Piv
1 Juda meta lona kyon jiang na okhen shi demvü tsükona yuta tsathaka: E-yantsü shijo chüngchünga! Potsow na ombobo pikhfü jiang nhyakala! 2 Yantsü kipüngkhan ji chonchi longtsüka eli jipo jiang rheyithuka, jipo kvümoe kyon jiang na elanji tssoa sana jiang 3 OPVÜI yo, nina benrio noying pia ochoang na nilo longtsüka lichosana osi ochoangna onte etüm ji chüngchüngcho sana jiang thüngi. 4 Nchüngkhonto OPVÜI lo longtsükata; ombona yuta topvülo e nkohovka. 5 Kangtsüi jiang ombona nyimthechithaka; osi ontena evamo yantsü chüngchüngo jiha roe siyithaka. Echung jiangha erüproe livero kümthukthaka. 6 Ochoang oyam na tssethechia vanchosana jiangna enhungo hoji ponina sanphiala osi hojiang ji onte jona sümroala. 7 OPVÜI yo, kyon mmhom jiang tsükona nina olan ji enyipa kümtokcho; ontena yentsao lan jijo san-myana. 8 Ena ni lümbüm erüng jilo phanthiv, osi a eyilo ji nilo vantokvü; ena e chokao jijo nitae. 9 Zümolo a lümbüm na ni eyiloala; nina kvüthüng limha shilo kyon shiang oyi tssoyiasana, ntsajo ntio sana onte topvüna ntsiv. 10 Nina kyon n mhon jiang nzanlia, ontena elanji etssov tsükona kvüthüngha ntsi n khiala. Ntsantho meta shilona mpato kyon jiangna nchüng jana kyon jiangna n lamo ji tssoala, osi onte na nino kvüta tsüphocho sana hoji jo n cheka hungala. 11 Nina onte ezüp piv toji niri jiangna n tsiala. OPVÜI yo, onte yikratuka, osi onte ezüptoka; Nina methakio ezüp ji pia onte ezüptoka. osi onte ejüa nina kvütata ni kyon jiang nzanasana ji. 12 Nina ejüeli epiv, OPVÜI yo, osi ena ntio elhi mmhom tssochokchia sana jiangjo topvü nina ntio etssoyicho sana ji tsükona. 13 OPVÜI e Potsow, eiyo oyam na esa yithaka, tokhatola e OPVÜI jo ni tae. 14 Enhungo onteno chüthaka osi elani eküm n vanlan; onte mon jiang naha n phanthilan, ntiotssole nina onte ezüptukthaka osi roe onte sithaka. ochinaha onte n chümchelamvü sithaka. 15 OPVÜI yo, nina e jipo ji rankatukcho, e rü ekük jiang nken topvülo etsükayicho, osi shi yakchia nilo myingthüng hansi yicho. 16 Nina ni kyon jiang ezüp picho, OPVÜI, osi ontena nungkhfü nungra lona ni thüngi randancho. 17 OPVÜI yo, nina ekyakachitokcho, eloe na tsopokvü sathüng noa eronato. 18 E ji eryusanga enocho, khatola ji yakchia ntia n chiyicho. Ena e meta tsükona ekhyo hungcho n li; osi ena tssochecho ha ntia nli. 19 E kyon ochoang chüthakcho sana jiangna elani eküm vanlamü! Onte tsük jiang ji kümchelamvü. Ochoang kvütatana onte lüpi yipta vanchosana, jiangna phanthilani ematha lona okhen demvü. Kvüto yentsso tsünglüpo jina limha shi tsoyochethoka sana ji esüa, ochoang kvüta nkolo chüthakcho sana jiangha OPVÜI na kümlantokvü.
Yitsso Tona Shancholan To
20 A kyonden, nte ki jiang lo rheyitava osi khalanchi vantava, Potsow lüm etsuk ji n yakthüng jo yuta esüngaro tsükona ntepopo mphoa vantava. 21 OPVÜI na ombo Potsowoe vanphen jilona limha kyon jiang onte mmen jiang tsükona ezüp pilo tsathaka. Limha shilona mphoa lüngtha elhi tsso jiang topvü oponi chiyitokvü, osi kvütata lüngthacho sana jiang ji liko jina kvüthüngha n mpho.
1 Hoji tsüngono jo OPVÜI na ombo yonri etho elitso osi echü mozhü ejüo ji tsütsav, osi tsüngrhampvü, ejukphia, nrhiphia evamo nrütsü ji lüngthav osi jümangi evamo tsüngrhampvü jiha lüngthav. 2 Hoji tsüngonojo OPVÜI na ombo jününgrothili mmhomo ji tsükona heto phyov, 3 "Ana nhyakyata osi n tümjakna ojü etsonala. Oyam khi n yesotokvü tsükona zümo eng ana nhyakyatala. 4 Enhungo ana jününgroli ji thüngi a lüm n tsokvü sithaka. Okyo osi onhya phanthia tssona tothüngti totona rungi siv. 5 Tokhatola a kyon jiang ri jiangna a thüngina nkoho jüpona tssona a thüngi mmhontatoka. Ho, hojito onte khi a thüngi mmhontadentoka." 6 Tsüngon etsao jianglo jo Israel kyon, Jakob tsoronichen jiangna odung esüa oying süngüv, osi onte pvüpüm jiang kisochiv osi ethiepemü. Ontena tssüngthi ethiepemo jina limha lhüpvü. 7 Potsow na onte ri jiang ezüptuko ji esüa jo Israel jo n züptokhan, osi oyam chüo tataha onte nchütok han. 8 Metapoe tsanthan eküm lo onte vantuko ji yakchia OPVÜI na ombo kyon jiang ezüptukcho. Ombona engkhvüwoe na ezhü mpung n mhon khi hansi onte yithukcho. 9 Tokhatola kvüthüng Potsow n tsi jiang thanphensa olongna nsüngrüo olong benshung esüa nshakachia sana, osi Asherah potsow ji chekav jiang elani orhüm mmhom rungphen jiang n liv siasana tothüngti Israel jiang mmen jiang siyiv. 10 Yantsü pikhfü chungi elioji roe sithaka. Osi romhon ejüng esüa eyingkhfükhfü na ekachi lia, osi yantsü jijo ekümrümo yantsophen osi mangsü yiphen osi yantsophen kümthaka. 11 Odung khero jiangha mmikae, chüi jakroe eloena otssüng njükvü ereni khithaka. Ntiotssole kyon jiang na ntia n ngathecho, hoji tsükona Potsow, onte liyingpvüi jinaha onte nzana n ehüm mekana khonzan onte ejüv mek. 12 Hoji tsüngon jilojo Euphrates lona Ejip erü jana kyon na makvü tona otsung to khotatokvü khyoa to OPVÜI na ombo kyon jiang tsük-tsükna khyorhyuv. 13 Kvüthüng hojitüv tsüngon ji yiasana tatara khfüsochiv osi Israel kyon Assyria lo tona Ejip lo to tsanthan tssota evamo jiang tsalamvü. Ontena ombo ntho phunglan jilona oyi OPVÜI Potsow ji Jerusalem lona khümtav.
Khümkiwoe Ekhüngyan ji Thüngi Ntangshon Piala
1 Israel ekhüngyan jiha montokvü zikathaka! Thera eki jiang vüjoe siato ombo phfütsson osi myithüng ji kinozhüvae esopvüi jiang kvüri lona thera kikho ji elongato ombo Phfütsson jiha nrona yiala. Onte kangtsü kvüri jiango mozhü orhüm mmhom na esezhücho, tokhatola onteji kinolangi erichi lia. 2 OPVÜI na ochosana etho ejüi osi thotsü ehan tüv khi onte sayatokvü, osi hojina sheru esüa rov sala, tsungryu esüa elani jüvak osi jükholong vanta roe meta ji evakzhüv. 3 Osi kinozhüvae esopvüi jiang mhachan-tonchan ji likoe tssethechi siyiv. 4 Kangtsüi esopvüiden myingthüng ji züvothi ethitemo jiang mhenpan mhenpan lhoe tsoe siato mona yiv. 5 Tokhatola ombo kyon kvütata eküm valanchiv sana jiang thüngijo emüngyanthav thera kikho esüa OPVÜI Thotsü jina erov tsüngon tsathaka. 6 Osi yitssoe jiang thüngi ntsanrük jo ntiosana monsüo etho piv, osi ochoang kvütatana yantsü pikhfü ji ori khelona nkohov sana jiang thüngi lümbüm etsson piv.
Isaiah Tona Juda Tolo Kinoe Zenkhying Jiangto
7 Pvüti tona zenkhying jiang mpa kinoe ngaphitala. Ontena soko osi kinokiri yuyako ji yakchia onte hamaharia onte nshüphiala. Zenkhing jiang ji kinolango ji yakchia Potsow na ntio hungjan rüjan rothukasana jiang n ngathe, osi pvüti jiangha kinotsüngo ji yakchia onte thüngi emhuk elüm hansi ero jiang n süngcheyi. 8 Ontena khokthe evamo jilo mezü jiangha topvü lazhücho osi ntssüngu tara tia n mpa. 9 Ontena a phyokasankata, heto phyoala, "Kyon mo jijo ombo ntio püngnoala to nchümasanaje? Ochona ombo yithen ji ethev lichola? Nganiro bokbamo jiang tsükona tae mmhona! 10 Ombona jo yitsüng akvüto, yiren yiren na osi tssümjak tssümchakna e shikav ekhyo tssoala." 11 Ntena ayi n nga tssona, tona Potsowna amotsi kyon osi khensan-yisan emhoka nsamo tüv yi khi nte püngnotokvü. 12 Ombona esan osi lümbüm emi nte picho, tokhatola ntena ombo n ngayicho. 13 Hojitsükona OPVÜI na yitsüng yitsüngna yiren yiren na osi ntsi ekhio tssoa tssümchak, tssümchakna nte shikavsala. Hoji sülojo kvüta khochiana nte nshüphivka. Nte tssatsov, osi tsirhi lona nte sav osi vüngpheni nte thechiv.
Zion Tsükona Nkenlong
14 Enhungo nte haruk hashüi ochoangna Jerusalem kyon shiang pono esopvüi tssoa vanchosana jiangna, OPVÜI na ntio phyoasana ji engatava. 15 Ntena echüi thüngi mmhontae khi echüi jiang thüngi ntsata vathakilato kangtsütala. Ntenajo emhok-ekhen yiathüng nteno nkachochev to nchümtala ntiotssole nteno ejüng osi ejithechi jianglo enhikae jiang lona tsanchov to nchümala. 16 Enhungo tsüphotso OPVÜI jina heto phyoala, "Ana Zion lo kimüng elümoto chüngchünga eshenala. Osi hojilo ana nkenlong motsüngalo heto erankae vatala, 'Longtsü chüngchüngo jilojo erüm eto jüa.' 17 Ntsanrük jijo kimüng ji etsiphenzhü ji tssovka, osi shitüng jijo renthango etsiphenzhü ji tssovka." Sheryu khi khi ntena enhikae evamo ejüng ephyo ji phyoni situkvüka, osi jüvak khi nte nkoho ji evaki nte siyitukvü. 18 Ntena echü ji thüngi ntsatae evao jijo khani nte siyiv, osi ntena echüli ji thüngi ntsachaktae evao jijo roe khi mhei nte siyiv. Kvüthüng ezüp etsü ji yiasana hojina nte khyov. 19 Hojina omhalo nte tümia esüa elanlani enya akvüto nte echükvü, osi ntena zümo eng hoji hamvü. Potsow thüngina yithen ethan kvüta yiasana jina ethan tssoe nte ekhemvü! 20 Nteji püngno kako lona ephyo kyon ochona belung hungriv lo n phisachetaha yipvü ekhyo tssoa vanchosana ji esüa, osi osü terikhüngi ombo n penchyuv yipa vanchosana ji esüa tssov. 21 OPVÜI na Perizam phunglan lona osi Gibeon hayitsü lona rotao ji esüa rotav, osi ombo elhi ji e n chokao mpa tssov khatola, ombona ntio tümkachosana ji ephan tssov. Ombona emhoko elhi ji ochüm echeta tssov. 22 Ana ntangnshonyi nte pia evamo shi emataphen ti tssotava! Ntena hojito tssochojo, nte tsanchov lanka ji khüngkavka. Tokhamo OPVÜI jina liphungtsü shi totona roe esiv methako ji ana zothaka.
Potsow Nchümri
23 Ana ntio phyoasana engatava; osi ana ntio nte ezoa vanchosana ji tüngochünga engatava. 24 Lijon ochinaha mojü ethev tsükona tümjak n lina oli ji tae rhona n mungala. 25 Kvüthüng liko ji rhonpükthakana mekana ta-myanasana, tenjü mojü, osi zhüchü, rarakhüm to jiang thetala. Ombona oden, omüm jiang rena vensi, litssae jo thanpolipo tenjü mojü thetala. 26 Potsow na ombo Püngnothako ji tsükona, ombona kvüto elhiv sana ji ntsia. 27 Ombona zhüchü, rarakhüm tsüng jiang tae ekhiv tsükona tssüngpvülong khi si mek tolea tssüngpümro khi sae khiala. 28 Ombona oden-omüm jiang tseni ekhiv tsükona otsung jiang mpa myaroa tsena monga mek, tolea otsung jiang n rotokna enato sanphia woe khiala. 29 Nchümri mmhom shiang hetopvüto Thotsü OPVÜI ji thüngina yiala. Potsow na lanka nlansüngo jiango nchümjana tssoala, osi hojiango nchokabemo ochüm echetala.
Jerusalem Mhadung
1 Potsow thanphen Jerusalem ji mpa roe esiv zenkathaka! David na esamo yantsü jiha roe siv! Nzyua mekana eni tokhvü tssota vansi sülojo, 2 hojisülo jo yantsü kvümoe "Potsow thanphensa." to tsacho sana ji pono Potsow na ezüp yitokvü. Osi kyata nrungtana yantsü ji pyingi yantsü ji mpato thanphensa ejen na phyangzhücho toli siv. 3 Potsow na yantsü ji sakae hachümvü osi vükthechiv. 4 Osi Jerusalem yantsü jijo likokvüi na omon na nsanchokchiv ekhyo tssoa vancho esüa, osi owon lhümlhüma live yolona chiyia vancho esüa tüv tssov. 5 Jerusalem, metapoe kyon kvütatana oro ni hachosana jiango makvüro esüa veni hansi yivka, osi ekhenthav rasan jiang ha mavü esüa pyakhana yiv. Ntena n yilov vanthüng zaktole 6 OPVÜI Thotsü jina ejenlonga, tharaka osi nri enhyoka oro nte shanchov. Ombona tsungrhyu tona mikholong to rotokvü; 7 hoji sülojo jipolan taro rasan jiangna Potsow thanphensa yantsü vükthechia evamo jiang ji osi onte ritsso epensü jiang topvü omüng emhacho esüa mekana zümothüng ntiosana hungkacho esüa moni siv. 8 Osi jipo kvütatana Jerusalem ji halo sanrhyucho sana jiango omüngi jo etsoyu tssoa emhasi vondona yipjüngchicho sana ji esüa, mekana ochona omüngi jo eratsüngi chüa vanathüng ojü yua emhasi yipjüngchile ekhi mpa kyinga phanthicho sana ji esüa tssov.
Ntang-nshonyi Epioji N khayicho
9 Nte lümcho tssotasi zhüvae kümtava! Nte etssotssoa osi omhyik juki vantava! Soko n thelea kinoe tssotava! Osi soko zhüjoa tia n yulea ngaphia sanphitava! 10 OPVÜI na nte yiphungtukthaka, hoji tsükona jünga yipvü methaka. Nzontsü kyon jiang mhyik-kük chiphen ji zenkhying jiang tssov shikhfü, tokhatola Potsow na omhyik onte eyukithaka. 11 Zenkhying osi chekavyi jiang topvü nte thüngina mphovka; osi hojiango nte tsükona jo kakoshüi züplanchi vacho esüa tssov. Ntena ochosana kako khathio tüv thüngi mpa bensi owo khae nte engatukle to ezolea, züplanchicho küma n khache to nte ezov. 12 Osi ntena kako n khacheo tüv thüngi bensi owo, khae nte ezole to ezochojo kvüto khavsana n tsi to nte ezov. 13 OPVÜI na heto phyoala, "Kyon shiang na ontena jo a khümala to phyotala, tokhatola onteyi ji ntia yichak n li, osi onte lümbüm jiha thanpoe kvülosana lea. Onte ekhüm lan ji ntia mek tokhatola kyon na tsütsata, rülonta yichoka to lümbümi ejüo ji yaka ntia mek. 14 Hoji tsükona ontena n yilov vamo tüv khezüm khi elan elan na onte vümüka. Nchümri lilato etsso jiangha eyim kümtokvü, osi onte kyakli ji ntia ethev n liv siv.
Ochyu Ovüngi Eyilo
15 Ochoang kvüatatana onte etüm ezi jiangji OPVÜI mphoasana jiang topvü montukvü! Ontena onte etüm ezi osi okyak oyi jiangji mphoena tssosi ochinaha onte n hunga esüa mekana n tsia esüa nchümala. 16 Ontena topvü chenchyuo kümtukala. Phfüjoe ji opvüo alo chonphyalyu ji opvüola? Kyon na ombo khena nsüngrücho tüv na "Nina a n süngrüka." to Ombo ejamo tüv nsüngrüchecho alo?"Toalo, nina ntio elhia sana nina n tsi to ombo ezo tüv tssovla?" 17 Heto ephyo ji ntena ntsia, nsungu rajung rayu shiang hetopvü ejonli kümkhamvü, osi ejonli jiango ratsü kümi silamvü. 18 Kvüthüng hojitüv tsüngon jiang yiasana nopüng jiangna lia kako tüngkachia khao jiang won zov, osi mhyikjüng emüngi vana erowo jinaha, omhik ji pochi hungu. 19 Tssitsa yantsae osi oyam kupi evamo kyon jiangna lea Israel ntho Potsow OPVÜI jina epio emathaji elani hunglam. 20 Ochoangna Potsow khakisia oyam nyimthechia vanchosana jiang tsükona ochüm tssov. Mmen kyon otsük akvüto roe siv. 21 Kyon ochoangna oyam mhyiktssorakia, osi münghan jiang ezüp epiv ji khalanchia, osi ochoang na oyam ejüng ezoe kyon ntsanrüng jiangna ntsaji n khichetukvü sichosana jiang topvü Potsow na roe onte siv. 22 Hojitsükona enhungo Israel Potsow OPVÜI ochona ezüp lona Abraham shanchocho sana jina heto phyoala, "A kyonden, enhungo nte n yikratukla osi yikra lona nte mha mpa mmia to etssowoji liv meka. 23 Ntena kvüthüng ana nte pio orowojü jiang hungasana, tothüngti ntena aiyo Israel ntho Potsow OPVÜI jika to achekav. Ntena a monkhüma osi a ndüngojo nte rangsüa to tssovka. 24 yimtsayimri jiangna ha engathewo lanka liv, osi ochoangna yuta topvülo pvüchopvüria vanchosana jiangna ha oyam na onte püngnov ji emathav."
Ethelan N lio Ejip Thüngi Ntsata
1 OPVÜI na heto phyoala: "Ochoang na Juda saa vanchosana jiango montokvü, ntiotssole ontena a yaka elhi tssocho. Ana n tümka zikao jiang tssoala, Osi a panlana oyam thüngi ntsatayi vatala, ji yakchia onte mmen jiang kyongkatala. 2 A thüngina ntia lanso n khina Ejip thüngi nzanchi yana woala. Ontena Ejip khi onte nkohatuk hungwo ji tsükona, ontena Ejip mesao lo longtsüka vatala. 3 Tokhatola Ejip mesao ji onte nzanchiv tsükona etho n li, osi nsungu Ejip na nkoho pia evamo ji ochüm tssov. 4 Onte thungtssoe jiangna Ejip yantsü Zoan tona Hanes tolo chirothakcho mpa tssolea, 5 Juda kyon jiangna longtsüka n lio jipo jilo enhikata evamo ji yakchia onte etho jakvü, ntiotssole kyon jiangna nzanchi ethev liathüng ontena tssojaniv mek." 6 Potsow yithen shijo jolowoe lijüng jilo ekümrümo jiang tsükona heto: "Meta thung etssoe jiangna ekyuthav meta kvülo hingho osi mozhü n mhon ehan nrü vanphen jiang elani epya mmhorü vamo meta jiang to yakchia yentsatala. Osi onte kadho elani odh to jiang ji jipo kvümoe na ntia onte nzanchicho sana jiang tsükona yantso oman etssükvü hantala. 7 Ejip na ekyo onte pia evamo jijo ethev n lio. Hojitsükona ana Ejip ji 'Ekyuv n lio mmhor' to omying eyikayithaka.' "
Jancho N zoe Kyonden
8 Kyon jiangna Kvütata n mhoncho sana jiangji erantsaüngi vasi nchüngkhonto ntsita evamü tsükona, osi kyon jiang ji kvütüv sana ji kakolo erani vale to Potsow na a ezocho. 9 Onteno nchokapento Potsow panlanala, yuta akvüto lo ejüng phyoa osi OPVÜI püngnoyi n ngahungala. 10 Ontena zenkhying jiangji yingto vanle to ezoala. Osi ontena heto ezoala, Ntio jo elan sana ji e ti-zoa Tolea ena engahungo jiang ezoa. Ena ntio emonphio ekümo vanchosana ji e tikhetsüa, 11 Olan e tikhani na ethüngi na tsantava. Ena nte Israel ntho Potsow ji tsükona ntia e n ngahungala. 12 Tokhatola Israel ntho Potsow jina heto phyoala: "Ana ntio nte ezochosana jijo shümthei sisi khonta rota tona ejithechita to jilo tae ntena enhikatala. 13 Ntena orithaka. Osi nteno echung ntssomvü, kvürina ojo jana küknrhüthakcho esüa tüv, zaktole nte eyakhuka. 14 Nteji chonphfü esüa nte evüproe siv, osi nteji elümoto n mhon varomoroe e siojina, miron ethev mekana ojü vokaphen etssov tera tia n jüna nte tsarov." 15 Tsüphotsowo OPVÜI, Israel ntho Potsow jina kyon jiang heto ezoala, "Yingto kholani oyi alo longtsükatava. To tssona etho jüa osi nte tsanchophen livka." Tolea ntena hojito etssov nte n tssohungala! 16 Hoji thünginajo nte ri jiang khelona tsanchov khilato kurü ekhyingu lo tsankae yungtala. Ho, ntena tsanchov lanka eyamo jijo elana-hojito etssov lia! Ntena nte kurü jiango ekhyingcho tsaya nchümtala, tokhatola nte phana evamo jiango nte kurü jiang lona ekhyingka tssov! 17 Nteji ori tsüka hungana wothüng bena na tsamü osi hoji ephanjo ori rasan nchyu mongo hungchona nte topvüna etsamo tssov. Osi nte riven ji eyingkhvükhvü na phunglan kvüri tonkachio ji yaka nte rasan ochia n nhyokana tsamüka. 18 To mpa tssolea OPVÜI najo nte khonzamü tsükona nte nhyaka vana. Ombona jo khonzan meka to nte thüngi tssov tsükona methakala. Ntiotssole ombo yuta topvülo elan ji tssoala. Ochoang na onte longtsüka ji OPVÜI lo vatasana jiang ematha elio.
Potsow na Ombo Kyon Jiang Mmhayiv
19 Nte Jerusalem lo evan kyon jiangna elani kyalam meka. OPVÜI jo nzan eli, hoji tsükona kvüthüng ntena ombo nzanchi yana kyasana, ombona nte janlam. 20 OPVÜI na ezüp yuta khi nte yakchitukvü, tokhatola tothüng lea ombona nte ndüngo tssoe nte püngnorünyuv, osi ntena ombo yana wolamo tüv n li. 21 Ntena ayi-amen kyaktheta mpa rümphilia, OPVÜI na sülamoe na heto nte jamo won ji zov, "Olan ji hepika. shilona yitava." 22 Nte kisü shona tona janti to phyonkao jiang topvü khi, "A ehungona tsantava!" to tüngta mmennta esüa shümtherae siv. 23 Ntena kvüthüng tenjü mojü theta sana, OPVÜI na eryu jokatuki rankatukvü osi ntena pvülyua richovka, osi nte mangsü nyanyan jiangna ha tssona yantsophen liv. 24 Mangsüpong tona gadho wochangna oli nte rhonia sana jiangna ojak mmhontsowo jiang tsovka. 25 Kvüthüng ntena nte ri jiang rizümphen jiang hayae vükthechi kyon jiang lüngthata sana, jithüng phunglan osi yingsüng akvülona zhükhfüro tsüa joyiv. 26 Choro jinaha eng ji esüa wondangu, osi eng jina ombo tathi tüngraphen jilona yenjo tiying kyongkata wondangu, ejyukaena enga lona nchuk tiying wondangu ji wondangcho esüa tüv tssov. Kvüthüng OPVÜI na ombo kyon jiang ombona ezüp pio jiang lona emiyia osi onte emho jiang yukayia sana shi esüa tssov.
Potsow na Assyria Ezüptokvü
27 OPVÜI etho osi phfütsson ji ekonina lia hungchiala. Omi tona miphong to jina ombo lümbüm etsuk ji ejüala. Ombona nsanana, ombo yi jina omi esüa kiala. 28 Kvüto jüvak jina topvü evaka kheta yiasana ji esüa ombona ombo mhadungi mpüng ji rotukala. Osi hojina jipo jiang evakroe siala osi onte kyak n mhon jiang ochüm tssoe siyiala 29 Tokhatola nte, Potsow kyon jiango ntena kvüto ntho tokhu zümo jilo emathacho sana ji esüa nte emathata okhen dentav. Nteno ochoangna philulhyu bensi okhen khüa, Israel jiang nkohOPVÜI OPVÜI ji ekhümki woasana ji esüa nte emathavka. 30 OPVÜI na ombo thotsü won chüngchüngo ji otsük akvüto zotokvü osi ombo lüm etsuk etho jiha chanchetokvü. Hoji loshi mivak liv osi, elokina tharaka nlüp, osi misheryu elani ryupvü to liv. 31 Kvüthüng Assyrian jiangna OPVÜI won ji zoasana onte ekhenrhükvü, osi ombona ezüpthuko ji chanchetokvü. 32 Kvüthüng OPVÜI na elan elani onte tüma ezüptoka sana, jithüng ombo kyon jiangna ophyang osi zhükhen theta dentav. Potsow na ombobo Assyria kyon jiang thüngi rotav. 33 Assyria ekhüng esae ji rungphen meta ji nkowo-lona methaki lia. Hojijo junga osi nzoa, otssüng ekatacho. Hoji njükae erongu tsükona OPVÜI na miphong echenchokchiv.
Potsow na Jerusalem Nkohov
1 Ochoang na nzanchi yana Ejip thüngi woana jiango montokvü! Ontena Ejip rasan wokyongo etho jilo, onte kurü ritsso zotoro osi rasan jianglo enhikatala. Tokhatola ontena OPVÜI lojo n nhikatala. Osi Israel ntho Potsow ji thüngi jo ekyo-erung n chonala. 2 Ombona ntio tssoa vanchosana ombona ntsia! Roe esiv ombona rotukala. Ombona kyon n mhon jiang tona ochoang na kyon n mhon jiang nkoho piasana jiang to roe esiv tsükona ekhenlong yithen epioji otsa kümtokala. 3 Ejip kyon jiango potsoden mek-onteno kyonden. Onte kvürü jiangha potsow etho theyicho mek. Kvüthüng OPVÜI na okhe theta phanthiasana, jipo etho ejüo jiha eyav. Osi jipo etho mataroe ombona kyochia evamo jiha eyav. Oniata roe siv. 4 OPVÜI na heto azocho, "Olyu enhyang jiangna hetata erona osi tüngkachia nkyolea, ekümrümo ombona rumi vathako rajak jilona hingho ji phani n siche; hoji esüa Zion phunglan ji nkohov tsükona ntianaha a n tanglanchiche, a OPVÜI Thotsü Potsow shijo. 5 Kvüto woro jina ombo roniro jiang nkoa ombo shüp ji mhawoe na pyaphia vanasana ji esüa, A, Thotsü OPVÜI shinaha Jerusalem ji nkohov osi nhyakyav." 6 OPVÜI na phyocho, "Israel kyonden, ntena a yaka mmen tssocho osi ntena a panlancho. Tokhatola enhungo a thüngi kholani yitava! 7 Ntena shona, janti khi mmen kisü nsüngrütao jiang shümtherae esiv yuta ji tsathaka. 8 Assyria ji ritsso lona roe siv, tolia hojijo kyon ethona tssov mek. Assyria kyon jiangna ritssophenina tsani yirav, osi onte khyignroe jiango eziiden kümtokvü. 9 Onte ekhüng esae jiha ekyu lona tsamvü, osi ombo küpo tsüphoeden jiangha ekhenrhüki riven ji mpato sia tsamvü." OPVÜI ocho Jerusalem lona khümtacho sana osi ocho mina othan jiang rungasana jina hojito phyothaka.
Nchümjan Zijan Mesao
1 Tsüngon motsüngalo jo nchümjan Zijana osi etho lia esae tüv mesao chiyiv, osi ntsanrük khi jipo ji esao tüv esopvüiden ha chiyirav. 2 Onte otsük akvüto ji tsungryu mpung lo tsankaphen osi mphophen esüa tssov. Onteno lijüngi zhükhfü tsüa yia vancho esüa tüv tssov, osi likyingo longpvü na khümchoe vancho esüa tssov. 3 Onte eno osi omhyik jiang ji kyon jiang ethelan jiang zeyia engayiphen tssov. 4 Onteno enhungo n vankemo tüv n tsso, tokhatola onteno engathe osi nchümjan zijan lia tssov, osi ontena ntio tüma sana hoji ephan nsamvü. 5 Kyon ochinaha eyimtsari jilo yikrachi monkhüm jüa to n ehüm, osi mekana nri jijo ntsanrük eli to n phyoyi. 6 Zhüvae jina zhüva khen oyi nsanala, osi n mhom etssov nchümala. Ombona ntio elhiasana osi ntio phyoasana jiang topvü OPVÜI yikvü-yilocho tae tssov, osi ombona jo kvüthüng ha wontona evamo jiang n süphi-lümbüm osi eratsünga evamo jiang thüngi eyuv n pi. 7 Yimtsayimri jijo n mhon osi ombona ntio elhiasana jiang topvü tsüngrham elhi; osi ombona yantsae jiang ejüng khi roe esiv kyakala osi onte na elan ehungu elio jiang lona khalanchiala. 8 Tokhatola yikrachi eli tsüphoe jinajo ntsanrüka tssoala, osi ntsalo chüngchünga zarungala.
Yitsso Tona Mmhonituklan to
9 Nte elopvüiden ochoangna emhok-elüm ntia n lina, nte lümcho loyia vanchosana jiangna, ana ntio phyoasana ji engachitava. 10 Enhüngajo nte lümbüm püka vanta mpa tssov, tolea nzyu etsao ji heto-thüngjo jününgrothi elhov liv mek, küma nteji ezüp osi emhok-elüm tssovka. 11 Ntena ntia emhok-elüm n lina nte lümcho loyia vanta yipvü; tokhatola enhungo ekyu lona eneta vanta ntsa! Nte mpensü jiang phongi sitava osi sükerak khi eryu khüngtava. 12 Osi tekilo shüngthechia nungratava, ntiotssole lizü osi jününgroli topvü roe sithaka, 13 osi wozhü okyo elani onhya ranuk jiangna a kyon jiang li jiang topvü eyuki sithaka. Oki jiang topvü kyon na pyingi yantsü ji mpüm na ematha longshina vanta erovo ji nchümi zetasi kyatava. 14 Mesali jiha sisi tsamvü osi yantsü ji mpüm na siraknrüngi siv. Oson oki osi rizümphen ki kvümoena yantsü ji nhyakyata vanta rocho sana jiang topvü roe ekachi siv. Orae sepvü siano rümphiphen, osi olyu yantsophen kümi siv. 15 Tokhatola elani echungaphan Potsow na ombo mon ji ete thüngi rotokvü. Aphoamong ekachi esio meta jiangji elani lizü kümlamvü, osi meta jilona tssukro-mümro lilamvü. 16 Meta jilo nken topvülo ntsanrük osi khetisa liv. 17 Ntiotssole otsük akvüna elan ji tae tssov, osi meta jilo noying elani nchüngkhonto tsükona nküp-nfüta liv. 18 Potsow kyon jiang kilo ntia wonkhyu liv mek, tolea noying nkoho liv. 19 (Tokhatola ratsü jiang lojo sheryu joe yantsü ji ephyarov.) 20 Otsük akvü tsükona kvütata ematha longshi tssov ato osi oyo wohan jiang rankav tsükona ojü tssona jüv, elani meta topvülo ekümrüm lan taro gadho osi tssiden jiang tsükona yantsophen liv.
Nzanchi Tsükona Randan
1 E ri jiango montoknrüngu! Ontena oyam retsoyia osi ejithechicho, ochina ha onte n retsoyi osi n kyakthechia ha ontena hojito tssocho. Tokhatola onte retsoreyu osi oyam kyakthechi elhi jiang ha ochüm tssov, onteha oyam na onte retsoyia onte kyakthechiv, onte kyakrüm elhi jiang tsükona. 2 OPVÜI yo, e khonzana. Ena e longtsü nilo vathaka. Engakvüto e nkohoa osi ezüp yutalo eshanchoa. 3 Nina kvüthüng e tsükona rotasana, jipo jiangna ritssopheni na ontssota jiang sisi tsanala. 4 Osi onte tsütsaelan jiang lo yangkarümi retae khiyiala. 5 OPVÜI jo kvütata tsüphochoato! Ombona olan topvü pono esapvüi tssoala. Ombona Jerusalem ji. ntsanrük tona khüngtsüta to khi pyingtukvü 6 osi jipo ji chüngchünnga vantukvü. Ombona yuta topvülo ombo kyon jiang nkohoa nchümjan zijan tona ntsinran to piala. Osi onte ejüeli tsüphotso jijo ontena OPVÜI yikrachi-kyuchio ji. 7 Lümbüm etsson jiangna ha nzanchi yana erontala. Jipo thungtssoe ochoangna noying hansi eyiv ekhyo tssochosana jiangna ha nshüthechia kyatala. 8 Lantsü jiang topvü ekyutssüna epyingo ji tsükona ochinaha jianglo n yentsatala. Khüngta jiang roe sithaka osi ntsata jiangha yesothaka. Ochinaha ochia thüngi yikrachi n piv sithaka. 9 Meta jiha n tsütsav eyingkhfü-khfüna ekachi sithaka. Lebanon lo ratsü jiang ha mmikathaka, osi Sharon hayitsü lizü jiha lijüng kümthaka; osi Bashan tona Karmel phunglan to jianglo jo odung jiang limo vükhanala.
OPVÃœI na Ombo Ri Jiang Ntangshon yi Ezoala
10 OPVÜI na jipo jiang thüngi heto ezoala, "Enhungo ana nkanphivka. Osi aiyo kvütata etho lichosana nte ejüvka. 11 Ntena ethelan n lio jitüv matang maritala osi ntena ntio tssoasana jiang topvü ethev nlio tae. Amon jo omi esüa tüv küma hojina roe nte siv. 12 Nteji olong jun ekhiv tsükona rungroato rungroe nte siv osi okyo jiang livero küma rungtao ji esüa nte rungu. 13 Ekoni, osi enhyano evan topvüna ana ntio tssochosana hoji zojantoka osi a etho ji chekatoka." 14 Zion lo mmen kyon jiangna ekyu lona enetala. Osi ontena phyoala, "Potsow yitsso jijo n mheomi esüa rungala, ete yolo ochona sana hojitüv. mi mhatungona tsanchokhokvü alo?" 15 Ntena ntiojo elan sana hoji tssoa osi phyoa vana tssona hojitüv lona lia tsanchokhoka. Yantsae jiang ejithichiv tsükona etho ti-tsütsata osi ekhüp tikhia. Osi ochoangna müngtssomünghan elhi etssov kyakta mekana thampo-lipo n mhon elhi etssov zita evamo kyon jiang ti-phankatava. 16 Totssona ntena tsanchokukvüka osi rizümki mmhom lo tsanthei vancho esüa nte nkohochev. Ntena etsov osi eyuv tsükona hungu.
Pfütssomo Mhadung
17 Elani nte meta kvümoe na nken topvü lo ephfüjani licho sana ji lona mesao na phfütsson lia salana ntena hungu. 18 Ntena kyua erovo metapoe kyon likotssen ekhyae jiang tona yutalo lantsa-lanpen to jiango nchümchephen esüa to tae tssov. 19 Osi metapoe kyon ochoang na nte thüngi haruka ntena n ngatheo tüv yina nsana ero jiang elani jo n hunglan. 20 Zeta Zion yantsü kvümoe lona ena ekhümlan tokhu khita vanchosana. Jerusalem ji zechial Evamü tsükona kvütata noying meta tssovsana! Hojijo süki kvümoena n senphi osi ombo eshentan jiang kvüthüngha n lokche, elani wozhü jiang n tüp to tssochosana ji esüa tüv tssov. 21 OPVÜI na ombo Phfütsson ji e thüngi e ejüv. Osi ena zhükhfü tsüphov elani zhükhfüro jiang ndüngo vamvü, tokhatola ori rhung jiangna jilo eha rov mek. 22-23 Rhungshen-zhü etheo jiang ethev n li; osü jiang echonchei eha ochev mek! Ena ori rasan jiang ejüeli topvü phanchoe khiyiv osi jojang jiang lea ejamo tssoa jitata ejüeli rechov. OPVÜI jina ombobo e pono mesao tssov, osi ombona e nkohov. 24 Osi e metalo evan ochinaha nochonori n ronlan, osi mmen topvüto nlan siyiv.
Potsow na Ombo Ri Jiang Ezüp Piv
1 Rotava, jipo topvülo kyonden! Sanrhyui engatava. Limha mpüm osi limhalo evan otsük akvüna shilona oro engatava. 2 OPVÜI na jipo topvülo onte rasan jiang thüngi lümbüm tsukala. Ombona onte roe esiv tsükona nlan onte pithaka. 3 Onte echümüng jiang ji shothei lea n si, tolea haphoe kyonkachi nnanphfüphfü na ekachi sirav; osi phunglan jiangha ejen rakiv na pyingi siv. 4 Osi choro, eng, osi shantio jiang topvü livero küma tsaroe siv. oyak potsüo jiha kako shüa esüa shüroe moni siv, osi shantio jiangha züwodung mekana jününgrodung lona limo vüjoa to vüjorav. 5 OPVÜI na Potsowoe na ombo yonri ji methakthaka, osi enhungo Edom kyon ochoang ombona khaki sithakcho sana jiang pono yonkae roe siv. 6 Onte ejen osi ethyu jiangna kvüto olyu belev osi nyanyan ethamo jiang ejen na pyingasana ji esüa ombo yonri ji ejen na tümzhüv. OPVÜI na shi than shiji Bozrah yantsü lona thamvü; osi heto lüngtharüp elhi ji Edom lona tssov. 7 Kyon jiangji tsiyopong, osi mangsüpong evümtheta to evümtherav, osi limha shiji ejen tona ethyu to jina pyingi siv. 8 Shi yuta shilo OPVÜI na Zion ji shanchov osi ompvü ri jiang nlilamü. 9 Edom lo zhükhfü jiango khyimvü-jü esüa kümvü osi liko jijo ntia thei n tssochewo sheryulong kümi siv. Osi liphungtsü ji mpüm to alikatar rungato rungu. 10 Hojito zümo eng rungu osi hojilona nchüngkhon to miphong chiyia vamü. Metaji echungren echungren jana ethev n lina ekachi siv osi kyon ochinaha hoji yakchiaha n yentsalan. 11 Meta jijo velongu tona mungshiro kyashak to vanphen tssov. Osi OPVÜI na meta ji apho-among likying kümtoklamvü, osi otssüng odung n liyingthüng esüa lijüng ekachi siv. 12 Metaji esav tsükona nti mesao ha n chiyi, osi esopvüi topvüto monkhani siv. 13 Mesaki jiang elani yantsü mmhom jiang topvüto wozhü okyona yozhüi khi siv osi shaeli tona velongü to jiangna hojilo vamvü. 14 Orae ekümrümo na jiang lo sanphiv osi omon n mhon jiangna onte onte tsaphita, emüng tsüngrham jinaha jilo esanphen yana rov. 15 Velongu na jianglo oshüp tssoe oro khechoe jianglona süphichev. Müngtsov woro jiangna ha jilo motsüngtsüng na sanrhyuv. 16 OPVÜI na eküm evamo ekümrüm jiang mying eranphen kako ji yani hojilona ntio phyoasana hoji khae zeta. Tona ekümrümo olan motsüngalia n khachona onte poni jiang thenhya erankhani livka. Hojito etssov tsükona OPVÜI na yizüng pithaka, osi ombona ombobo onte hanrhyuv. 17 OPVÜI na liko ji chitae ombo ombo ejan ephanina pia vantok vü. Ontena meta jilo echungren echungren jana vamvü, osi meta jijo nchüngkhonto onte echi tssov.
Ntho Lan
1 Lijüng jiangna longshiv, osi thera jiangna romhonina kisochiv. 2 Lijüng jina okhen demvü osi ematha lona tüngkachiv; osi hojijo Lebanon phunglan jiang esüa emüngyantsüngü tüv tssov osi Karmel tona sharon to liko jiang esüa lizü tssov. Otsük akvüna OPVÜI ondang ji hungu, osi ombo tsüpho tona etho ji to hungu. 3 Okhe chüa yia evamo jiang etho piv osi laphya lona nkhok shüngta eneta evamo jiang etho ekhyi miv. 4 Lümbüm yonlani evamo jiang otsük akvü thüngi ezoa, "Lümbüm tssona osi ti-kyua! Potsow na ni shancholo tsata, ombona ni ri jiang ezüptukvü tsata." 5 Mhyikjüng jiangna hungu, osi nopüng jiang naha zov. 6 Jojang jiangna tsokphia shariv, osi oyi n sancheo eyim jiangna ha ematha lona tüngcho tüngriv. Lijüng jiang yakchia zhükhfüro tsüa yiv; 7 Hajang runga evamo jiang wozhü kümvü, osi likying jiang topvü jüpokphen tssov. Meseranfü vanphen jiang ji, wozhü ero osi lijü jiangna ranzhüv. 8 Hojilo shi lantsü liv, osi "Hojijo Ntholan to tsav." Mmen kyon ochina ha hoji lan jilo n yentsalan; Hoji lan jilo yentsae jiang ha zhüvae ochinaha onte n sosoralan. 9 Nti hengho ha hojilo n van; ekümrüm ntavna ha hoji lan jilona n yakchi. Osi ochoang kvütata OPVÜI na shanchocho sana jiangna hoji lan ji dunga okiwoe yiv. 10 Ontena ematha longshia Jerusalem jamvü, osi ematha longshi lona okhen denta tüngcho tüngritav. Ontena nchüngkhon to emathata vamvü, osi nongkhfü nungra topvü lona onte vachiv.
Assyria Jiangna Jerusalem ji Ekhentukala
1 Hezekiah na Juda lo mesao tssosi nzyu taro mezhüo to jilo, Assyria ekhüng esae Sennacherib na Juda yantsü epilanchi evao jiang owo vükthechi onte hayacho. 2 Hojisülo jo ombona ombo rasan esopvüi tsüphotso ji ezoa rasantsü sosi Lachish lona khoe Jerusalemi owo mesao Hezekiah ji ombo mhadungo okhe yonkachia khochakle to ezov tsükona yidan pia otukcho. Hoji tsükona tsüphoe jina, osü nsüngrüphen lan kvüloshi wozhü omhawoe na ojü tsüa joyiphen jülan lichosana jilo wocho. 3 Tole Juda kyon otsük ethüm na ombo nduko chirocho: hojiango mesao ki jilo ezepvüi tsüphoe Helkiah tsoe Eliakim; elani yitssopheni eranpvüi Shebna, osi ethelan eli erani vaphen jilo ezepvüi tsüphoe Joah, Assap tsoe ji to tssocho. 4 Assyria tsüphoe jina Hezekiah jo ntiolo enhikae lümbüm tssona vanasana ji ekhüng esae jina ntsihungala to onte ezocho. 5 Ombona engacho, "Oyi jina jo rasan etho osi tssothimori ji vanphen ji khiyikhoka to ntena nchümta alo? Assyria thüngi ryulanchiv tsükona ocho nzanchi ethev lia to nchümtala? 6 Ejip na nte nzanchichev to ntena eyilotala, tokhatola hojijo kherang khi jarung tssoa süphia vancho esüa to tae, nina süalato okhelo ni jakayiv. Ochona Ejip mesao jilo enhikata vanchosana ombo hoji esüa totae." 7 Assyria tsüphoe jina heto phyolancho, "To alo nteno nte OPVÜI Potsow lo enhikata vanala to ezovla? Kvüthüng mesao Hezekiah na Juda tona Jerusalem kyon jiang thüngi thanphen motsüngalo taena khümta to ezochosana, ombona thanphen osi khümphen jiangha roe sicho. 8 Ekhüng esapvüi ji myingona ana heto nte thüngi oyiolana thyutavka. Ana kurü wothüng eni nte pivka ntena hojianglo tsankarata tüv kyon hunga tssona. 9 Nteno Assyria tsüphoe yulo oküptso jiang tia mpüng, toaha Ejip jiang thüngina ritsso zotoro osi kvürü rasan ehungu eyilotala. 10 Ana nte meta ji OPVÜI kyo-erung n jüna hayae roe nte siyichoto nchümta alo? OPVÜI ombo opvüo na nteji hae roe sile to a ezocho." 11 Hojisüi jo, Eliakim, Shebna, tona Joah to onthüm na Assyria tsüphoe ji ezotacho, "Aramia yina ejana. Hojijo ena engatheta. Tolea Hebrew yina jo ti-nsana; kyon na kyimchung hetopvü pyingi engata vanka." 12 Tole ombona heto janlancho, "Esapvüi jina oyi shiang shiji nte thüngi tae nte ezole to a rotokcho tsayita alo? Meka, kyon kvütata epi shianglo khoktherae vanchosana osi ochoangna nte esüa onte pyocho osi mmyungjü tsoyuv sana jiang thüngiha ezoala." 13 Hojisülo jo tsüphoe jina phanthi khi Hebrew yina tüngkachia ezocho, "Assyria ekhüng esae jina ntioyi nte ezoa vanchosana ji engachitava. 14 Osi Hezekiah khi nte ti-ejithechitukle to ntangshon yi nte piala. Hezekiah na nte shanchochev meka. 15 Osi etena OPVÜI lo enhikatavka to yi khiha nte ti-ejithechituka. Osi OPVÜI na Assyria rasan jiang khalanchi yantsü shi hayatokvü meka toha ti-nchümtava. 16 Hezekiah yi ti-engatava! Assyria ekhüng jina nte yantsüi na chiyirae ombo mhadungo khochaktale to nte ezoala. To tssona nte topvüto na nte jününgrothi jiang lona tssüngthi hungu osi nte züwodung jiang lona züwothi lhoe nte tsotokvü osi nte jükha jiang lona ojü nte yutokvü – 17 osi ombona nte meta shi esüa meta ethani kvülo shi jününgrothi lia, osi hümri nsüngrüi etsov tsükona oden omüm livsana tüv lo nte n vantokthüng nandang jo hojilo nte vantukvü. 18 OPVÜI na nte shanchovka to yi phyoa Hazekiah khi nte ti-ejithechituka. Jipopoe thanpoe jiangha onte Potsow jiangna Assyria ekhüng ji khelona ochoangna shanchocho tüv vancho alo? 19 Hamath tona Arpad to potsow jiango enhüngajo onteno kvülo vanchola? Sepharvaim potsow jiango kvülo vanchola? Onte yulo ochonasana tia Samaria ji shanchocho alo? 20 Jipo shiang yolo potsow kvümoena ekhüng esae jiang khelona onte meta shanchocho tüv kvüthüng lichola? To tssona ntio ntana nteno OPVÜI na Jerusalem ji shanchovka to nchümtala?" 21 Kyon jiang na yingto jükrüpi sicho, osi mesao Hezekiah na onte ezovo ji esüa kyon ochina ha yipyaka tia n sancho. 22 Hoji süijo Eliakim, Shebna osi Joah tona nungra lona onte mpensü jiang reroe sia, Assyria tsüphoe jina ntio phyochosana ji owo onte mesao ji yirütacho.
Mesao na Isaiah Thüngina Ejürünyu Yanala
1 Mesao Hezekiah na yivon ji zopvüto etho ejako na ombo sü jiang reroe sisi, posta mpensi OPVÜI ekhümki wocho. 2 Osi ombona, Eliakim mesaoki jilo ezepvüi tsüphoji, Shebna yitssopheni eranpvüi ji, elani pvüti eramo jiang to topvü Amoz tsoe zenkhying Isaiah thüngi wothukcho. Osi ontenaha posta mpentasi wocho. 3 Osi yithen shiji heto Isaiah thüngi ezotale to ombona onte wothukcho: "Nchüng tsüngon shijo ezüp tsüngon; Eteji ezüpi ethechithaka osi eyikrakhithaka. Eteji eloe tsopuk yuta janthakaha, otsük osona n khyov vancho esüa tüv. 4 Assyria ekhüng esae jina eküm evamo Potsow ji yikvü yilothukvu tsükona ombo küpo tsüphotso ji rothukthaka. Nte OPVÜI Potsow khi ombo yikvü-yilo shiang zwothukvüka osi ochona hetüv khen oyi nsancho sana hoji ezüp pithukvüka. Hoji tsükona ete kyon kvütata eküm enhyokae vancho sana topvüna Potsow thüngi randantava." 5 Kvüthüng Isaiah na mesao Hezekiah thüngina yithen shi zochosana, 6 ombona yithen shi heto hanthuklancho: "Assyria mesao na nte potsow na nte shanchochev meka to nte ezoa nte ekhenthuka evamo ji khi tikhentale to OPVÜI na nte ezoala. 7 Khenpong yipong zocho taena ekheni ombo metae tsani eyi jitüv OPVÜI na ekhüng ji pono tssovsaka, osi OPVÜI na hoji lona ombo lüngthav."
Assyria na Elani Ekhenlong Yivon Thanpo Hanthuklanala
8 Ekhüng esae jina Lachish jilona senphi oyi hoji ndüngo yantsü motsünga Libnah lona rota vana to ombo küpo tsüphoe jina owon zocho; hoji tsükona ombo 37thüngi ngatüng ngarilo wocho. 9 Tothüng ji elani Ejip rasan jiangna, Sudan lo mesao Tirhakah na esopvüi tssoa onte halo tsathaka toji Assyria jiang yenjancho. Kvüthüng Assyria ekhüng jina oyi shi zocho sana, Juda lo 10 mesao Hezekiah thüngi heto yiyenta hanthukcho."Ntena longtsükata evamo Potsow jina akhelo nte n rheyithuk to nte ezocho, khatola hoji yi ji khi nte ti ejithechithuka. 11 Assyria ekhüng na meta motsünga ji roe esiv tsükona zikathakana ntio kvüto tssoa sana hoji ntena zothaka. Tona ntena tsanchov to nchümtake? 12 A motsüi jiangna Gozan, Haran tona Rezeph to jiang roe sisi Betheden kyon Telassae lo evamo jiang lüngtharüpi sicho osi onte potsow ochina ha onte n shanchokhukcho. 13 Yantsü Hamath, Arpad, Sepharvaim, Hana, tona Iah to lo evamo mesao jiango kvülo vanrachola?" 14 Mesao Hezekiah na yithen yiyenta kako ji yithen hanphi ji khelona khi khae zecho. Tosi yiyenta kako ji pensi ekhümki owo OPVÜI vanhya jilo owo ekachi vasi 15 Heto randancho, 16 'Tokhamo OPVÜI, Israel Potsow, echo mpao ekümrüm ji poni ni vantsü jilo khukthei evamo, limha shilo ekhüngyan jiang sa evamo Potsow jo ni tae. oyak shiha, limha shiha, nina liyingcho. 17 Enhungo OPVÜI yo, e ngayia elo ntio tssoa vancho sana e zechia. Senacherib na kvütata khenphyo yiphyoa eküm evamo Potsow ni yikvü yiloa vancho sana ji enga. 18 OPVÜI yo, Assyria ekhüng jina jipo elümoto roe sisi meta jiangji lijüng ekachi sicho, hoji e topvüna ntsia, 19 osi Potsow tsotso mekna otssüng tona olong to khi kyon khena potsow kisü nsüngrüo jiang topvü rongi sicho. 20 Tokhatola enhungo, OPVÜI e Potsow, Assyria jiang khelona eshanchoa tona limha shilo evamo jipo jiang topvüna Potsow jo ni tae toji ntsiv."
Mesao Thüngi Isaiah Yithen
21 Hoji sülojo Isaiah na mesao Hezekiah thüngi ombo randan ji janlana heto yithen hanthukcho, 22 OPVÜI na phyocho, "Sennacherib, Jerusalem yantsü jina ni emakatala osi ni yikvüala. 23 Nino ocho yikvü-yiloa, phyokosankatala to nchümala? Nina ntho Israel Potsow, ji a n yikrachi kyuchiv vana yithaka. 24 Nina ni nri jiang rothuka ritsso zotoro jiang khi Lebanon lo phunglan ntssontso jiang khyocho to a thüngi kangtsüa ephyov tsükona rothukcho. Osi hojilo Cedar dung ntssontso jiang osi Cyprass dung mmhontso jiangha to eyathukthaka, osi hoji yakchia nina ratsü jianglo rhovocho to kangtsücho. 25 Elani nina metapoe metae jükha shani yucho, osi ni rasan jiangna Nile zhükhfü ji likying küma sümcho to kangtsücho. 26 "Shiang hetopvü ji ana ovüngthüng na nlansüngi vacho to nina n zohanchoke? Osi hoji ephan ana tssocho. Ana etho ni pia yantsü pikhfü jiang roe ekatae ni sithukcho. 27 Hojilo kyon evamo jiango etho n liden: Onte ji ekhentsüngi, ngangkachi sicho. Onteno oli ero mekana engkhvüwoe na mpong etssov venathüng erotsüng vena oyi mhonkina poki vancho esüa tüv tssocho. 28 "Tokhatola ni tsükona jo nina ntio elhiana mekana kvülo oana topvü ana ni ntsia. Nina a pono kvüto a panlana sana ji ana ntsia. 29 Ni kangtsü kangri osi ni tssümhe rongmhe jiang a yenjanthaka, hoji tsükona enhungo ana ni kheno lo oyii ni theyisi opüngina otssüng ni nkyanthuksi nina erovo lan jilona ni süa yivka." 30 Hoji süijo Isaiah na mmesao Hezekiah ezocho, "Shi ejyuka shijo heto etssov jika. Nchüküm tona thüngküm tojo ntena ora tsüngthitsüng tae tsovka, Tokhatola ji chümi jo ntena oli joni otssok omüm thei riv, osi jününgro chümi lhoe tsochev. 31 Osi Juda metalo kvütata eküm enhyokata sana jiango odung jiangna kvüto oying ji likoe jonga süngthei rankae tsüngthi ethia sana ji esüa pvülyu hanlyua kümvüka. 32 Jerusalem lo tona Zion phunglan jianglo to kyon enhyokaravka, ntiotssole Tokhamo opvüi Potsow na hojito tsswothukvü zenkathaka. 33 "OPVÜI na shi heto Assyria ekhüng ji tsükona phyocho: 'Ombona yantsü shilo rhorochev meka osi lotssitsüng motsünga lea shi pono kothechiv meka. Nti rasanaha otsung bensi yantsü ji ndüngo rov meka, osi yantsü ji ehav tsükona hoji nkona ntia elhi tssochev meka. 34 Yantsü jilo n rhovochena ombona erovo lanji dunga elani yivka. A, OPVÜI shina phyothaka. 35 Ana yantsü shi nkohav osi zalanchiv, a mying yikrachi tsükona hojito tssov, ntiotssole ana a phajae David thüngi echümchaki evao ji tsükona.' " 36 OPVÜI lanben na Assyria nchenki jilo ovo rasan otsük 185,000 lüngthacho. Ojyuato wonchipüngo jo onte topvü echü erichirae licho! 37 Hoji süijo Assyria ekhüng Sennacherib na kholani Nineveh lo yicho. 38 Osi tsüngon motsüngalo ombona ombo potsow Nisroch ji ekhümkina khüma vanathüng ombo tsoe yulo nchyu eni Adrammelech tona Sharezer to onina onte yonri khi ombo lüngthae sisi Ararat metae tsani yitae sicho. Hoji sülojo ombo tsoe tsüka Esarhaddon to tsa jina ekhüng esa ji ombo echungchocho.
Mesao Hezekiah Nochonori si Mmhomo Ji
1 Yuta shiang harümalo mesao Hezekiah ji chüv esüa nochonoria vancho. Tole Amoz tsoe zenkhying Isaiah na ombo janthechilo rosi heto ombo ezocho."OPVÜI na heto ni ezoaka, nchüng nochonori shilona n shichov ni chüvka, echüv tsükona methakhe, osi lanka topvü ntssüng-rünga nsünglüngi vale to phyoala." 2 Tole Hezekiah na kyimchüngoe nlüpi zethechii heto randancho: 3 "OPVÜI yo, yuta topvü lo ana longtsükaroa ni benkata rocho, osi ana yuta topvülo nina ntio kvüto a tssothukhunga sana jitae etssov ekhyo tssocho toji a nchümcheyia." Hojito phyosi nshüthechia ekyav benkacho. 4 Hoji süijo elani OPVÜI na Isaiah jenchia 5 Hezekiah thüngi elani owo heto ezole to yidan picho, "A, OPVÜI nte motsüi David Potsow jina ni randan ji zothaka, osi ni esütsü ji hunghaka, hoji tsükona ana elani nzyu taro mongo ni vanlanthukuka. 6 Ana Jerusalem yantsü shiha, niha, Assyria ekhüng ji khe lona ni shanchovka, osi ana yantsü shi nkohapvü vamvüka." 7 Tole Isaiah na janlancho, "OPVÜI na ombo echümchak ji benthukuka to chekav ni piv. 8 Osi mesao Ahaz na tssokachio phopha jilo, OPVÜI na eng khümcho jina sülamoe khokachi taro eseta joyia ni hungthokvü." Osi hojito khümcho jina sülamoe khochi taro eselancho. 9 Hezekiah na nochonori jilona mmhon sanati ombona myingthüng khen shi heto erancho: 10 Ana nchümcho, a khyingro ekümo na Aiyo echüli yiasaka, eküm elani n vanlamo. 11 Elani ana nchümcho, eküm limha shilona jo ana OPVÜI elani n hunglan, mekana eküm evan ochia n hunglan. 12 A ekümji tümchaki ochüm tssoe siala, Kvüto süki ji süjoe vata sana ji esüa, Osi kvüto osü ji tükphen ji lona rhachia sana to. Ana nchümcho, Potsow na a eküm ji ochüm a tssoyithakato. 13 Ana zümo tona a ryusanga kyathüngcho, Osi hingo na a ryu jiang apükroyia esüa. Potsow na a eküm ji ehüm atssoyia saka to ana nchümcho. 14 Aon ji matakata, monsüngroa kümcho, Osi ana yukhyu esüa rücho. Potsüwoe zekachicho na a mhyik ji ezüpa to tssocho. OPVÜI yo, ezüp shiang lona a sücheta. 15 Ana ntio phyovla? OPVÜI na shiji tssocho. A lümbüm na noala, Osi ana yipa n yiche. 16 OPVÜI yo, ana ni tsükona vamvü, ni tsükona tae; A emiyia osi eküm a vanthuka. 17 A ryusang mmok ji noying kümvü. Ekyusü topvü lona eküm ji ashanchoyia; A mmen topvü nina a siyia. 18 Echüli najo ochinaha ni mying n thüngche; Echü najo kvüthüngha ni mmhon jilo longtsüka n vache. 19 Eküm evamo jiang na ni mying thüngala, Ana enhünga ni thünga vamo ji esüa. Opo jiang na nino kvütata longtsüka licho sana, to onte tsoe jiang ezoala. 20 OPVÜI yo, nina a emiyithaka. Ena rhüphiphen khen theta ni myingthüng khen demvü, Ena eküm evanthüng nandang jo ni ekhümki na ni myingthüng khen demvü. 21 Isaiah na mesao ji züvothi emeroe tssütsse züprav nsüngrüi vela jilo thele tona poe sivka to ezocho. 22 Hoji süijo Hezekiah na, "Ana ekhümki olanchev ji chekav jo ntio tssovla?" to engacho.
Babylonina Yithenpvüiden Ero Jiang
1 Yuta shiang harümalo, Babylon mesao Baladan tsoe Merodakh na mesao Hezekiah ji nochonoria vana to yivon zocho, hoji tsükona ombona yiyenta kako tona yantso to hanthukcho. 2 Hezekiah na yithen hansi ero jiang ji emathata sothei, ombo ejüeli, shona janti osi mozhürhüm mmhom jiang tona ombo ritsso ebensü to jiang topvü ejücho. Ombo ekhüngyan jilo mekana ombo tsütsailan hanrhyuphen jiang ji n khachona topvü onte ejücho. 3 Hoji sülojo zenkhying Isaiah na mesao Hezekiah thüngi owo "kyon shiangjo kvülona rotachola osi ntio ni ezochola? to engacho." Tole Hezekiah na, "Onteno meta ekonina Babylonina rotachoka" to janlancho. 4 "Ontena mesaki shilo ntio zetachola?" to engalancho, tole "Ontena topvü zecho osi ana ntia n khachona onte ejücho," to ezocho. 5 Hoji süijo Isaiah na mesao ji ezocho, "Tokhamo OPVÜI jina heto phyoala, 6 Nte pyimtsümotsüi echungina benkae enhünga jana ni mesakilo ntio kvüata hanrhyui licho sana jiang topvü ji Babyloni hansi eyiv yuta ji tsathaka. Ntia enhyokav meka. 7 Ni tsoronichen ejoma jo Babyloni osi oyi pokulokyu kümthoki Babylon mesaki tsilo-nhanlon kümthokuka." 8 Tole mesao Hezekiah na, tona ji yichak jo ombo echungo jo ntia n tssov noyinga vantav tssovka to engathecho; hoji tsükona ombona heto janlancho, "Nina OPVÜI thüngi na yithen hansi eroji mmhonka."
Eyiloka yi Jiang
1 "Jüngratava a kyonden," to ete Potsow na phyoala, "Onte jüngrathuka! 2 Jerusalem lo evamo kyon jiang lümbüm tssonkayia. Ontena sunga tssochyua ezüpthaka, hoji tsükona onte mmen jiang topvü siyithaka to onte ezoa. Onte mmen jiang tsükona tssona benria ana onte ezüpthukthaka." 3 Owon motsüngana heto tüngkachiala, "OPVÜI tsükona romhoni olan methakia! Lijüngi olanji ete Potsow tsükona ntssüngcheyia! 4 Vankuk akvüto hanpyingthuka; osi phunglan akvüto sanmyanthuka. Yingsüng jiangha hayi kümvüka, osi meta kukthe-kukyo jiang topvü sanmyana kümthukuka. 5 Hoji sülojo OPVÜI pfütson ji oponi chiyitokvü, Osi kyon vanchoto etsana hoji hungu. OPVÜI na ombobo shi etssov echümchakthaka." 6 Owon motsüngana heto tüngkachilancho, "Yithen shi thenchoa!" "Ntio yithen thenchovla?" to ana engacho."Kyon vanchoto etsa ero esüa tüvka to thenchoa; Osi ora thera jiang lona sungka ontena n vanche. 7 Ero jiang mmikatala osi thera jiang vüala, Kvüthüng OPVÜI na mpung rothuki Ontelo venkathukasana. Kyon jiangha ero jiang lona sungka n vanala. 8 Ho, ero jiang mmikatala osi thera jang vüjoe siala. Tokhatola Potsow yi jijo kümali liv." 9 Jerusalem, phunglan ntssomo ji chungoa, osi yithen mmhomji thenchoa phyoa! Tüngkachia tsachuka, Zion; Yithen mmhom ji phyosochia! Tikyuna nsanchukchia. Juda yantsü jiang ji onte potsow na tsathaka to ezoa! 10 OPVÜI tsüphotso jina etho lona esav tsükona tsathaka, osi ombona shancho kyon jiang ji ombo ndüngo sonhyasi tsata. 11 Ombona olyu enhyang esüa ombo kholuk ji sheküpvü. Ombona olyu woro jiang ji tsarhyui ombo khena ejümvü; osi opvü-oyo jiang ji ombona enyipa sov.
Israel Potsow jo N tsitacheo
12 Ochona sana jümang ji ntijan khukcho alo? mekana ombo okhena oyak shi etsii zechecho alo? limha shilo ochon ji ochona sana opvü motsüngalo thei benchecho alo? Toalo phunglani yingsüng ji füphen jiang lona füi zechechola? 13 Ochonasana OPVÜI na kvüto tssov sanaji ezokhukchoalo? Ochona püngno mekana ejü-rünyo ombo pikhok ka? 14 Ocho thüngi Potsow na ntsiv osi engathev tsükona osi kvüto tssov sana ji ntsiv tsona ngatüngngriala? 15 OPVÜI tsükona jo jipo jiang jijo ntia mek, ojü zhüjoa lona n kyungka, osi jüyi ekoni elio jiangha livero jiang esüa zükhoa tüv. 16 Lebanon ratsü jilo ekümrümo jiang topvü tssolea Ete Potsow thüngi othan epiv tsükona e n tsson, Osi odung topvü tssolea omi n tssokachichyu. 17 Ombo tsükona jo jipo jiang ji ntia mek nrüng. 18 Potsow jo ocho thüngina etsita khokchola? Ombo kvütüv sanaji nina kvütoli erorokhokvüla? 19 Ombo tssiyan morina kisü nsüngrüi vao ji esüa tüv mek, Yonjoe na yonjak ji shona na phyonzhüi janti lo ekachi evao jiang esüa ha mek. 20 Kyon ochoang na shona shona janti n shichokhoka sana, jiangna otssüng zakto n kyomo tüv ethüngi khiala, Osi ombona tssiyanthi jiang yani elungi n siwo tssoa kisün süngrüthukala. 21 Ntena ntsicho alo? Nkolona nte n zohanchoke? Limha ji kvütoli benkacho sana ji ntena n zohanchoke? 22 Ochona ombo vantsü jilo khokthie vancho sana jina nsüngrücho, limha shi mhaawoe jiha elani oyaki pomoe jiha; Kyon oküpoe evamo shiangji tsümphiro to teria zechetala. Ombona osü zonchochia esüa oyak shi ephyansochicho; osi vanphen süki esüa echoncho. 23 Ombona etho eli esapvüiden sojoala, osi onteji ntia mekvü kümthukala. 24 Onteno dungniro esüa tüv, Kvüthüng OPVÜI na mpong rothukana. Oying n süngpen han küma elaroa rokchev, osi onteji mmikae mavü esüa mpung jina vena yiv. 25 Ntho Potsow ji khi ocho thüngi etsitavla? Ochosana ombo esüa tüv vancho alo? 26 Potsowoe zekachia! Nina hunga evamo shantio shiango ochona nsüngrüchola? Ochona rasanden esüa onte sochoka sana jina, oyaki kvüta npachosana ombona ntsia osi motsüngtsüngna ombona omyingna tsala! Ombo etho jo hetata to tsüphoa – Onteji motsünga tia n monhan. 27 Hojito tssona, Israelden, nteno ntio tsükona ombona nte ezüp etsi n tsiyi to ere-njantala, mekana n tümo lona nte ezüpthukathüng nte n zetala to phyotala? 28 Ntena n tsichoke? osi n zohanchoke? OPVÜI jo kümali Potsow to ji; limha hetopvü ombona liyingcho. Ombo kvüthüngha n mok, osi n sangtsüng. Ochinaha ombo nchümri n ngatheyiala. 29 Nkhyov mmoktsünga evamo jiang ombona etho jükayiala. 30 Khyingroe jiang mpato n khyov kümala; Osi pongdenro jiang lea santsüngkhuka. 31 Tokhatola ochoangna OPVÜI na nzanchiv to ombolo longtsükata sana hojiang na thothan hunglam. Ontena mungshyuro jiang esüa echo khi pyakav; ontena yungu tolea n laphya; ontena sunga tsav tolea mmok n chanche.
Potsow na Israel Thüngi Ntsakayi Pioji
1 Potsow na phyoala, "Yingto vanta osi a engayitava, nte meta ekoni evanden! Nteyi jiang yitssopheni hanchokchiv methaka; ntena hojiang ephyov yuta hunguka. Ocho elan sana ji methaktav tsükona etena sanrhyutavka." 2 "Ochona ekhyoe ji engkhvüwoe na sosi yichola, Ochona mesao jiang pono osi jipo jiang pono ekhyo ombo pichola? Onteji livero esüa ombo yonrina onte tümchochiala. Osi ombo lotssi jina mpungna mavü venroato onte hanroala. 3 Ombona hojito phanrhüala osi ezüp n lina khochiala, likolo tia n hyekata to ekhyinga yungala! 4 Heto ji ochona tssochetukchola? Ochona motsü jiang nsüngala osi dung phiala? A, OPVÜI shina benkadenina vancho, osi ochüm jana A, OPVÜI shina vamvü. 5 "Ana ntio tssothakcho sana meta ekoni evan kyon jiangna hungthaka; Onte ji; ekhenrhük-thaka osi ekyu lona enetala. hoji tsükona onte topvü sanryutae roala. 6 Tssiyan mori jiangna onte onte nzanchita lümbüm tssonkatala. 7 Otssüng thüngoe tssiyan jina shona ejoe ji, 'mmhonka!' to ezoala. Ochona kisü ji enarotukasana jina ochona eshenkyo na eshentsüa sana ji lümbüm tssonkayiala. Ontena phyotalaj 'Züptsütae khio ji mmhonka'osi ontena kisü jiang eshenkyo na eshentsüala. 8 'Tokhatola aphajae Israelden, nteno ana ethüngcheo kyondenka, osi a khümo Abraham tsoronichenden ka. 9 Ana limha ochümina nte sosi yicho; osi ana meta nkentso jilona nte tsachoki nte ezocho, 'Nteno a nridenka.' Ana khaki nte sicho mek, tokhatola nte ethüngchecho. 10 Ntena tikyutava-Ana nte ndüngo vanka! Aiyo nte Potso-Ntinaha nte ti-ekhenrhüktoka! Ana etho khyonga nte kümtokvü osi nte nzanchiv; Ana nte nkohav osi nte shanchov. 11 "Ochoang na nte thüngi lümbüm tsuka sana jiango oyam n tov yikrakhivka. Ochoangna nte thüngi rotasana chüv. 12 Osi limha shilona moni siv. 13 Aiyo nte OPVÜI Potsow ji; Ana etho nte jükayia nte ezov, 'Tikyutava; ana nte kyochivka.' " 14 OPVÜI na phyoala, "Israelden, nte teria nte n penlia, tikyutava; Ana nte kyochivka. A, ntho Israel Potsow, ochona nte shanchoa sana hoji a ka. 15 Ana litsenphen-sa esüa nte kümtokvü, osi otssi terüa eroa tüv ethan nte mpayiv. Ntena phunglan jiang saroe khi siv; osi yingsüng jiang ji livero küma evüprotokvü. 16 Nteno ezhüi onte venkachiv; osi mpungna vena onte yiv, osi onte ji mpungna venroe onte siv. Tosanati nte emathav ntiotssole aiyo nte Potsow ji; ntena a mying thüngu, Israel ntho Potsow to. 17 "Kvüthüng a kyon jiangna ojü ethev lia yanasana, osi kvüthüng ekhyi kyinga onte eratsünga sana, tosanati A, OPVÜI shina onte randan engayiv, A, Israel Potsow shina kvüthüngha onte n sinki 18 Likying phunglan jiang lona ana zhükhfü tsütukvü, osi hayitsü jianglo ebokjü tsüa joyitokvü. Lijüng jiangjo ana ozhüyo kümtokvü osi likying jiangji ebukjü na tsüpyingtokvü. 19 Lijüng jiang lona ana odung olan olan, cedar, osi akacia, myrtle tona olive to rankatokvü. Likying jiang lona ora phanthituki mitssüngdung, Juniper tona cypruss to zatokvü. 20 Kyon na shiang hungu osi A, OPVÜI na shi tssochoto ntsiv. Israel ntho Potsow jina heto tssochetukcho to ontena engathev."
OPVÜI na Ejüng Potsow Jiang Nochocho
21 OPVÜI Israel mesao jina heto ephyov lia: "Jipo jiang Potsowden, ntena ephyov elio ji phyoa. Ntena ntio elantso to nchümana hoji hanchokchia! 22 Shilo yitava osi ntio tssovsana methetava, to tssona kvüthüng hojiang ji tssoasana ena ntsivka, ntio tssoa yithakcho sana jiang yitssoki na eroroe ejüa, osi hojiang jo ntio yichak sana ezoa. 23 Ochyu-ovüngi jo ntio tssovsana ji ezoa tona nteno Potsow sakato ena ntsiv! Ntiosana mmhom hansi yia mekana ntiosana mmhom tssoe zetava; tosi rangsü ekyuna e pyingtoka! 24 Nteha osi ntena ntio tssoasana jiangha ntia mek; osi ochoang na nte khüma sana jiangha etssakthav! 25 "Ana engkhvüwoe evan kyon tsüka ethüngchethaka; khümkiwoe na oro vükthechitokvü ombo sosi yiv. Ombona esapvüi jiang ji chonphyalyu esüa onte tsseroala, phfüjoena kvüto ochon ji kyaphiasana ji esüa. 26 Shf esüa tssov to nte yolo ochona methechola, osi to tssona nino elana to ena phyokukvüla? Nte ochinaha hoji tsükona yitsünga tia n phyo;, osi ochinaha ntia phyoa nte n zoyi! 27 Yithen shiji Zion thüngi ezov tsükona A, OPVÜI shi ovüngo tssocho; owo phyole to ana yithenpvüi Jerusalemi wothukcho, 'Nte kyon jiang tsathaka! ontena okiwoe tsata!' 28 Kvüthüng ana potsow jiang zechicho sana, onte ochinaha ntia ephyov n licho; ana engao jiang tsüka tinaha a n janlanchecho. 29 Potsow shiang hetopvü ethelan n liden; ontena ntia n tsso chenrüngkisü shiangjo n penthak osi etho n li."
OPVÃœI Nriji
1 OPVÜI na phyoala, tmm "Ana etho jükayio a nriji shijeana ethüngcheo ji, osi ana ocho thüngi a emathacho sana hoji. Ana a nthomon khi ombo pyingtukthaka, osi ombona jipo topvü pono ntsanrük hansi yiv. 2 Ombona owon ntssana n tüngchotüngri mekana lantsüi na tünga nsana n vo. 3 Ombona kherang khongcho tüv ekhüproe n si; mekana milon mozoa kia vamoji n mhetuk. Tolia ombona sunga elio ntsanrük hansi yiv. 4 Ombona eyilo n montuk osi lümbüm n yolan; tolia ombona limha shilo ntsanrük soyingu. meta ekoni evamo jiangna ombo püngnoyi nhyaktsüka nhyaktala." 5 Potsow na potsüo shi liyingi tsüphoa ephyanchetukcho; Ombona limha osi shilo evamo shiang topvü nsüngrücho; Ombona kyon topvü etho theyicho osi eküm picho. Osi enhungo OPVÜI Potsowna ombo phajae ji thüngi heto ezoala. 6 "A, OPVÜI, shina ni tsae etho ni picho osi hojijo limha shilo ntsanrük litukvü tsükona. Ni yakchia ana kyon topvü thüngi : ntsata methakvü; osi ni yakchia ana jipo topvü thüngi wondang rotukvü. 7 Nina mhyikjüng jiang omhyik pochiyiv osi evüngki müngterüp na khokthei evamo jiang etancholo vachiv. 8 "Nte OPVÜI Potsow jo a tae. Potsow thanpoe ochinaha a phfütsson ji n shümnhyache; osi a myingthüng ji kisü jiang thüngi n shümnhyatuk. 9 Ana ntio methecho sana jiang enhungo otsa kümthaka. Osi enhungo ana ntiosana ethan ntssothüng vüngina ni ezovka."
Myingthüng Khen
10 Khenthan khi OPVÜI denkatava; limha topvüna, ombo myingthüng khen dentava! Nte jümangi ehata evanden, ombo thünga; jümangi evamo ekümrüm topvüna ombo thünga! Meta ekoni evan jiang topvüna ombo denkatava! 11 Lijüng jiang osi yantsü jiang khi Potsow thüngtoka; Kedar kyon jiang khiha ombo thüngtoka! Sela yantsülo evamo jiang khi phunglan ntssontso jiang lona ematha longshia tüngkachituka! 12 Meta ekoni evamo jiang khi OPVÜI phfütssontuka omying thüngia! 13 Ritssoe esüa OPVÜI na rotalo khochokala; Ombona ritssolo eov tsükona nhyaktssüka methakala. Ombona ritsso won tssoa, osi radetala; osi ombo ri jiang thüngi ombo etho ji ejüala.
Potsow na Ombo Kyon Jiang Nzanchiv Phyochakala
14 Potsow na phyoala, "Yuta elümoto sunga ana yingto vanthaka; Ana a kyon jiang ji n janlancho. Tokhatola enhungo nkanphiv yuta janthaka; eloena tsopukvüsa thüng esüa ana erokachiala. 15 Ana phunglan yingsüng jiang roe siv osi otssüng odung tona ero to jiang mmikatokvü. Ana zhükhfü hayi jiang ji lijüng kümtokvü osi ozhü jiang ji kyingkae sitokvü. 16 "Ana a kyon mhyikjüng jiangji ontena n yentsa hamo lan tüv lona onte sov. Osi emüng ji ana ondangna onte tungcheyiv osi meta n mhom kharüpo jiang sanmyana onte mhadungona nsüngrüyiv. A echümchak jo shiang, osi shiang ji ana khachoe n sina tssov. 17 Ochoangna kisü jiang lo longtsükatana, osi kisü jiang onte Potsow to tsa-sana, jiango onte joyitukvü osi yikratokvü."
Israel Jiangna Ntsi N khioji
18 OPVÜI na phyoala, "Engatava, nte nopüngden! Mmhona mhyikrüka zeta, nte mhyikjungna ha! 19 A nri jilona mhyik-juka ochosana vancho alo, osi ana otuko yithenpvüi jilona nopüngka vancho alo? 20 Israel kyonden, ntena elümoto hunga yithaka, tokhatola hoji yichak ntelo ntio lia? Ntena ezov tsükona eno mpata, tokhatola ntena otsotso ntio zothaka?" 21 OPVÜI jo Potsow shanchov tsükona nhyaka evamo hoji tsükona ombona ombo shikhfü jiang tona püngnoyi to jiang thüngchetokcho, osi ombona ombo kyon jiang khi hojiang yikrachitok hungala, 22 Tokhatola enhüngajo ombo kyon jiangji rhümathaka, osi onte ji vüngpheni khalanchi thaka. Osi likokvüi mphoe vantukthaka. onte ji phanchoe roe khiyicho, osi ochinaha onte shancholo n rocho. 23 Nte ochona sana heto shi engav alo? enhungana benkae ntena tüngochünga engav alo? 24 Ochona Israel jiangji retsoe khelo thechichola? Hojijo OPVÜI ocho thüngi etena mmen tssochosana jina ombobo hojito tssotukcho! Ombona evantuk hungwo ji esüa etena n vancho, mekana ombo püngnoyi jiang etena n ngayicho. 25 Hoji tsükona ombona ombo lümbüm etsuk ji entsitukcho, osi ritsso khonta rota khi ezüptukcho. Ombo lümbüm etsuk ji omi esüa Israel topvü pono rungtokcho, tokhatola ntio tssoa vanchosana ji etena n tsi-nrüngcho; Etena hoji yakchia ntia engathei n khicho.
Potsow na Ombo Kyon Jiang Shanchov Phyochakala
1 Israel den, OPVÜI ochona nte liyingchosana jina heto phyoala, "Tikyutava-ana nte shanchovka. Ana omying rüki nte tsathaka, küma nteno a echika. 2 Ntena kvüthüng ojü ejungu yakchia sana, ana nte ndüngo tssov; nte ezüp jiang na nte eyukzhüv meka. Ntena kvüthüng omi yakchia sana hojina ha nte rungu meka; ntena ezüp ekhüngu mpa yakchilea jina nte tssatssov meka. 3 Ntiotssole aiyo nte OPVÜI Potsow ji, Israel ntho Potsow ochona nte shanchoasana ji. Ana Ejip ji khaki sisi etancho ekümo nte vachiv, osi hojito Sudan tona sheba toha silanchiv. 4 Nte eküm ji nte shanchoyiv tsükona ana jipo topvü valanchiv, ntiotssole nteno a tsükona jo tssentsüman ntio tsükonala tona ana nte nzanala osi ana nte yikrachiala. 5 Tikyutava-Ana nte ndüngo vanka! "Engkhvüwoe osi engrhelamoe ekontso meta jiang lona ana nte kyon jiang okiwoe sosi yiv. 6 Ana khümkiwoe evamo jiang ji onte yitokle to ezov osi jolowoe jiang ha onte ti-süyale to ezov. A kyon jiang ji ekonina osi limha topvü lona kholani yitoka. 7 Onteno a kyonden, A myingthüng phfütsson hansi yitokvü onte liyingcho."
Israel jo OPVÜI Ehungpvüi
8 Potsow na Phyoala, A kyon jiang ji yitssopheni tsa. Ontena omhyik mpata tokhatola onteno mhyikjüng; onteno eno mpata khatola onteno nopüng! 9 Yitssolo rotale to jipo jia tsarhyua. Onte Potsow Kvümo ochyu ovüng ji methekhukchola? Osi enhünga ntio tssoa vanchosana ji onte yolo ochona methechola? Potsow shiang khi onteno elana to ji onte popo ejütokvü ehungpvüi tssotoka osi onte yi jiangji ntsakato oponi chiyia e jütoka. 10 'Israel kyonden, nteno a ehungpvüiden kana; A nri etssov ana nte ethüngchecho, hojito tssona ntena a ntsiv osi a lo longtsüka liv, osi Potsow jo a taeka to ji engathev. A yaka Potsow thanpoe ochia n van; Kvüthüng ha n vanhan osi kvüthüngha n vanlan. 11 "OPVÜI jo a tae, ochona nte shanchokukcho sana jijo a tae. 12 Ntio tssovsana ji ana ovüngna methecho, osi ana nte nzanchiv rocho. Metapoe potsow ochinaha hojito n tssohan; a ehungpvüiden ji nte. 13 Aiyo Potsow ji, yuta topvülo hojito vam. A etho jilona ochinaha n tsanchoche; ana ntio tssoa sana ji ochinaha ntongphiche."
Babylon Lona Tsanchoe Yia
14 Israel ntho Potsow OPVÜI ochona nte shanchoa sana jina heto phyala, "Nte shanchov tsükona ana Babylon panlana, ana a rasan otokvüka; ana yantsü pikhfükhan ji roe siv, osi onte tüngchotüngrita ji ekya kümtokvü. 15 Aiyo OPVÜI, nte Potsow nthoji. Ana nte liyingchoka, Israelden, osi aiyo nte mesao jika." 16 Nkolo OPVÜI na jümang chyusochia olan nsüngrücho, ojü eria tsüa evamo jilo olan litukcho. 17 Osi ombona rasantsü etho eli jiang emoni sothechicho, rasanden, ritsso zotoro osi kurü rasanden jiang kvüthüngha n phanthilamo elongthetokcho, osi milon tümhecho esüa onte montokcho! 18 Tokhatola OPVÜI na phyoala, "Yithako ji etsso jiang nchüma tivantava mekana nkolo ntio tssochosana jianglo tivantava. 19 Ana ntio ethan tssov sana jiang cheta vantava. Hoji tssoa vanthaka-osi enhungo ntena hungkuka! Ana romhon yakchia olan nsüngrüv osi hojilona zhükhfü jü nte piv. 20 Ana kvüthüng a kyon ana ethüngcheo jiang thüngi ojü epiv tsükona lijüng yakchia zhükhfü tsütukasana, orae ekümrümo jiangna lia a yikrachiv; osi ranfü, jüworo to jiangna lea a mying thüngu. 21 Onteno ana a tsükona liyingo kyon jiang, osi ontena a myingthüng khen jiang demvü!"
Israel Jiang Mmen
22 OPVÜI na phyoala, "Tokhatola ntena a laki sicho, Israelden; osi ntena a n khümtacho. 23 Ntena a tsükona erungthan olyu hansi n rotacho; nte than jiang yakchiaha a n yikrachitacho. Ana othan nte chonia oha nte n süngrüyi mekana orhüm mmhom choni nte n wonkhyutok. 24 Ntena mozhürhüm mmhom a tsükona n shi mekana nte ekümrümo beleo jiang khi a lümbüm püktükcho n li. Ji thüngina jo nte mmen jiangna oha a myingkayicho; osi ntena syulyuo elhi tsso jiang yakchia a laphyatukcho. 25 To tssoa khatola, aiyo nte Potsow ochona nte mmen jiang nlan nte siyiasana ji, heto etsso jijo aiyo ochosana hoji tsükona. Ana nte mmen jiang bensi n van. 26 "Etena yitssopheni s wotavka; a pono phyoka-sankav elio jiang hansi roa! osi heto tsso jina ntena elanka to ji chekao ntena ephyov elio ji phyoa! 27 Nte motsüi ovüngtso jiang na mmen tssocho; nte esopvüi jiangna ha a yaka mmen tssocho. 28 Osi nte esapvüiden jiangna a ntho khümphen ji mmentokcho. Hoji tsükona ana Israel pono roe esioji rotokcho; osi ana a kyon jiangji oyam khi yikvü-yilotokcho."
OPVÃœI ji tae Potsow
1 OPVÜI jina phyoala, "Enhungo engatava Israelden, a nri ana ethüngcheo kyonden, osi Jakob tsoroni chenden. 2 Aiyo OPVÜI ochona nte liyingcho sana ji; nte pokpvü tona ana nte nzanchicho. Tikyutava; nteno a phajaeka, ana nzamo osi ana ethüngcheo kyonden ka. 3 "Likying meta jilo ana ojü piv osi likying jiang lona zhükhfüro tsütokvü. Ana a nthomon ji nte ngaro jiang pono phyangkayiv osi nte tsoronichen jiang pono ana mmhayitukvü. 4 Onteji ojüna etsonthakcho ero esüa rankav, osi zhükhfü tssalo sangsü lijü zachoto tssov. 5 "Kyon jiangna tsük tsükna,' 'Aiyo OPVÜI echi to phyov.' Osi ontena Israel kyon jiang thüngi oro nzo tssov. Onte otsük akvüna OPVÜI mying ji onte eono erankav osi Potsow kyon jiang yolo anaha tsükaka to ombobo tsav." 6 OPVÜI ochona Israel jiang nküpnfüa sana, osi Thotsü OPVÜI jina heto ephyov lia: "Aiyo ovüngtso osi sülantso Potsow ji a tae; a yaka Potsow thanpoe ochia n van. 7 Ana ntio tssothakcho sana ji esüa ochona sana tssochecho alo? Benkadenina ochüm jana yuta jilo ntio tssoa yivsana ji ochona phyokukchola? 8 Tikyuta-nrüngtava, a kyonden! Yuta denteni na nchüng jana yuta shilo ntio tssovsana hojiang ji topvü ana methekukcho toji ntena ntsia, osi nteno a ehungpvüiden. Potsow thanpoe ochona vancho alo? Osi ana n zohancho jitüv Potsow ochosana etho eli vancho alo?"
Kisü Ekhüm Jiang Mak-khoncho
9 Ochoang kvütatana kisü nsüngrüa sana jiango oman n lio, osi ontena tssentsü tssotuko potsow jiangjo ntia ethev n li. Ochoang kvütatana hetüv potsow shiang khüma sana jiango mhyikjüng osi ntia n tsiden, osi onteno yikra nduktokvü. 10 Yonjak na kisü joe potsow tssoa ekhümo jijo n mhon-rüng! 11 Hetüv potsow ekhüm otsük akvüto ezüptokvü. Kisü hetüv nsüngrüi jiangha kyon kha thanpoe jo mek. Yitssolo oro thetuka-onteji ekhenrhüka yikra onte ndoktukvüka. 12 Yonjak ejoe jiang na yonjak motsünga khi omina rungi joala. Ombo ewon ekhyongo ji sonphia vümphen jina ejüpi kisü kümtukala. Osi hojito tssoa vanana omboji wonton era osi sangtsüngala. 13 Otssüng thüngoe tssiyan jinaha otssüng ji etsikonala. Osi sekaphen khi heto tssovka to opyon nsüngrüala, osi hijito ombo ebensü ji khi kyon kisü esüa opyon mmhona nsüngrüala, ombo ki evav tsükona. 14 Ombona Cedar tssüng mekana Cypras tssüng dani khikhuka, mekana oraena otssüng mmhom hana oyi chümi hoji rankae ethelan etssov tsükona ojü etssona rankathu nhyaka vankuka. 15 Kyon na odung motsünga jilo ejoma jo otssüng njüko khisi ejoma jo kisü nsüngrüv tsükona to khiala. Osi phuko jo ombona efüpvü tsükona mekana tssoyamvü tsükona khi; phukojo Potsow kisü nsüngrüi khüm to tssoala. 16 Ombona ejoma otssüng etssov ekhio jilona oso rungi mekana choe tsoala osi lümbüm pükala, omi füpsi ombo lümthakana, "Kvüta elüma mmhoncho sana he! osi omi shijo kvüta mmhoncho sana." to phyoa la. 17 Njüksi enhyo jiang jo ombona kisü nsüngrüala, osi , hoji mhadungo epyakthei khümala. Osi ombona "A potsow ji nika a shanchoa to phyoala!" 18 Heto etsso kyon shiango ontena ntio tssoa sana jitia n tsiana zhüvala. Onte mhyik lümbüm ji juki ntsa jijo ntio sana n tsiala. 19 Kisü nsüngrüi jiang na jo, "Otssüng ejoma jo ana njüki sithakla to ephyov ji tia onte nchümrilo n yiala. Osi ana otssüng ji lona hümri rung nna oso ri toli tsothaka, osi otssüng chiso jijo ana kisü nsüngrücho. Osi ana hoji mhadungo epyakthei khümcho toji tia n chümchev zhüvala!" 20 Hoji yichakjo mikyu shae tsoa vancho esüa tüv. Ombo zhüva zhütük kyak lümbüm jina ntia nlyucheo ombo sosorathaka. Osi ombona ombo khelo ejümsi evamo jijo potsow mek tolia kisü toji n khichoala.
OPVÜI jo Liyingpyüi Osi Shanchopvüi
21 OPVÜI na phyoala, "Israelden, shi nchümcheta va;, nteno a nriden to ji nchümchetava. A nri etssov tsükona ana nte liyingcho, osi ana kvüthüngha nte n mhecho. 22 Eluk na shaki yia esüa nte mmen jiang ana evüi nte siyithaka. A thüngi elani yitava; Aiyo ochona nte shanchoa vanchosana hojika." 23 Nte oyak topvüna, longshi lona tüngtava! Tüngkachitava nte limha likok topvüna!" longshi lona tüngkachitava, phunglanden, osi orae otssüng odung topvüna! OPVÜI na Israel kyon jiang shancho ji yakchia Ombo tsüpho ji e ejüthaka. 24 "Aiyo OPVÜI, nte shanchopvüi ji; A shina nte liyingcho. Aiyo OPVÜI, topvüto liyingpvüi ji. A taena potsüo shi ephyansochicho; Ana limha shi nsürüathüng ochina ha a nzanchicho n li. 25 Ana methevüjae jiang zhüvae kümtokala osi oyaki choro shantio ekhae jiangna metheo jiang ji lümbüm shünglanchiyiala. Nchümri eli yi jiangji ana janlanala osi onte nchümri jiangjo zhüva-zhütük elhi to ji onte hungtukala. 26 Tokhatola kvüthüng a nri jina methetasana, osi ana yithenpvüi rotoka a etüm ezi jiang oponi chiyituka sana, aiyo a etüm ezi jiang matangala osi a methevüja jo otsotso tssoala. Kyon na elani khi jilo vanlamka toji ana Jerusalem ji ezoala, Osi Juda yantsü jiang ji tssocholam to ezoala. 27 Ana yidan picho taena jümang ji nghatuki siala. 28 Ana Cyrus thüngi ezoala, 'Nina a tsükona yansa savka, ana ntio ni tssotuk hungasana ji nina tssov; Jerusalem ji tssocholanle to nina yidan pivka osi ekhümki kimüng ji etssov olong chümvüka.' "
OPVÜI na Cyrus Ethüngchetala
1 OPVÜI na Cyrus ji mesao etssov ethüngchethaka! Ombona jipo jiang khyotokvü tsükona ombo ethüngchecho; mesao jiangji onte etho jiang khi siyiv tsükona ombo rotukala; yantsü pikhfükhan jiang ji OPVÜI na ombo chon chiyiv. OPVÜI na Cyrus thüngi heto ezoala, 2 "Ana apopo phunglan yingsüng jiang hayitoka olan ni nsüngrüyivka. Ana pyontsü yonjak kibüngkhan jiang phüngroe siv osi yonjak ronri jiangha erüproe sivka. 3 Ana emüng osi mphophen meta jiang lona ejüeli ni pivka; tosanati nina aiyo OPVÜI ji toji a ntsiv, osi Israel Potsow jina omying rüki ni tsacho toji chekav. 4 A nri Israel ana ethüngche evao kyon jiang ji nzanchiv tsükona ana ni ethüngchecho. Nina mpa a n tsiletoha, ana monkhüm yikrachi tsüphov ni pithaka. 5 "Aiyo OPVÜI ji, Potsow thanpoe ochia n van, nina ethev elio thokhyong ji ana nipiv, nina mpa a n tsia sayilea. 6 Ana heto etsso shijo limha ochümina ochüm jana otsük akvüna potso thanpoe n van tokhatola OPVÜI ji a tae to a ntsitokvü tsükona heto tssoala. 7 Wondang jiha emüng jiha ana liyingala; Mmha jiha roe esio jiha ana hansi yiala. A OPVÜI shina shiang hetopvüto ji tssoala. 8 Ana ekhyo ji potsüowoe na eryu joato rotokvüka; osi limha jina hoji khichoe ntsanrük tona etancho eküm to litokvü. A, OPVÜI shina heto shi tssotokvüka."
Liyingpyüi Osi Motsü Jilo OPVÜI ji
9 Chonphfü jina phfüjoe ji thüngi ekhirantakukcho alo, ophfü kvümoe thanphoe esüa tüv jina? Chonphyalyu jina phfüjoe ji ombona ntio nsüngrüa sanaji enga alo? mekana chonphfü jina phfüjoe jijo n tssothimori to erinjana alo? to Ochona sana opvü opo thüngi, "Ntiolyui heto a nsüngrüchola to engakukcho alo?" 11 OPVÜI, Israel ntho Potsow ochona, ochyu ovüngji soyinga sana jina phyoala: "Nina a tsokhying tsolo jiang tsükona a engatüng ngariv ntia elan n li, mekana ana kvüto elhiv sanaji nina a ezov n li! 12 Limha shi nsüngrüi khi jilo kyon vantukoji ana, a etho jina potsüo jiang ephyansochicho; choro shantio, eng to jiang topvü ana sayasi vanala. 13 A etüm ezi jiang bencheta olan taro mmhona tssochetukvü tsükona ana a bobo Cyrus ji elhi etssov tsükona nthiphicho. Ombona yentsao lan jiang topvü ana nsachotokvü. ombona a yantsü, Jerusalem ji tssocho lamka; osi vüngi evamo kyon jiang vachiv. shi heto etssov tsükona ochinaha ombo n ngocho mekana ekhüp ombo n pi." Tokhamo OPVÜI jina phyoathaka. 14 OPVÜI na Israel jiang heto ezoala, "Ejip lo tona Sudan tolo ejüeli shiang jo nte echi tssovka, osi Seba kyon thungchyu-mori jiang jo nte nriden tssovka; onte khelo wozhü the hansi nte phanphivka. Osi ontena nte thüngi oro epyakthe phyochakvü, 'Potsow na nte ndüngo vana-Potsow jo ombo tae. 15 Israel Potsow ochona ombo kyon jiang shanchoa sana, jijo ombobo mphoa evamo Potsow ji. 16 Ochoangna kisü nsüngrüa sana jiango yikratokvü; onte topvü to. Yikra khitukvü. 17 Tokhatola Israel jiango OPVÜI na shanchochoka, küma ekhyo ji ontelo kümali lia vamvü; osi OPVÜI kyon jiangjo kvüthüngha n yikratuk.' " 18 OPVÜI jina potsüo jiang liyingcho Ochojo Potsow sana hoji ombo! Ombona limha ji soyingi, chüngchünga – sunga evamo tssoa nsüngrücho. Eyingkhfükhfü na ekachi esiv tsükona mek, tolea kyon na vancheo meta ombona nsüngrücho. "Aiyo OPVÜI ji, osi hojilo Potsow thanpoe n van to ephyoji ombo. 19 Ana mphoena ntia n phyohan mekana a tümka jiang mphoe n vahan. Kyon n van meta jitüv lo Israel jiang khi a yantokvü ntia ethev nli. Aiyo OPVÜI ji, osi ana ntsa nsanala; ntiojo elan sana ji ana ntsitokala."
Limha Shilo OPVÜI ji Tona Babyloni Kisü Jiang to
20 OPVÜI jina phyoala, A nzo sanrhyutava, limhalo jipo kyonden, nte ekhüngyan ji joyiathüng nte kvütata eküm nte valanchia sana; jiangna yitssopheni nte popo phanthitava! Kyon kvütatana otssüng potso, kisü jiang reni vasi onte n shanchocheo potsow jiang thüngi randanda vancho sana – hojiang kyon jiango ntia n tsi-nrüngden! 21 Oro yitssophenina ntena ephyov elio jiang phyotava; osi ochoang na ntio tssovsana nkolona methechosana jiang jina onte popo nkochev tsükona lanka yana onte onte ngatüng ngarita tuka! OPVÜI Potsow ochona ombo kyon jiang shanchoa vancho sana hoji a mekchoke? Hojilo Potsow thanpoe ochia n van. 22 "Enhungo a thüngi kholantava osi shanchotava, limhalo kyon topvüna! Potsow jo a vamo shi taeka. 23 A echümchak jiango otsotso, osi hojiang ji ntungphi. A lo jücho Topvütheta ana heto mmhona echümchakala: Otsük akvüto na oyi a mhatungo nkhok tsemvü osi a yi engav to echümchakvü. 24 "Osi ontena a lo taena ekhyo osi etho ji hungu to phyotav; tokhatola ochoang kvütatana atssakasana jiango yikra ntukrav. 25 A, OPVÜI shina Jakpb tsoronichen jiang topvü shanchov, osi ontena a mying thüng tav.
1 "Babylon potsow ochüm ji shi! yuta motsüngalojo Bel tona Nebo tojo khümtacho, Tokhatola enhüngajo onteno gadho oha na sangtsünga evamo ekümrüm jiang mankhvüi hankachi lia. 2 Kisü jiangna jo ontepopo n shanchoche; onte ji rechokhani hansi yithaka. Babylon jiang potso ehüm jo shi! 3 "Jakob tsoronichen a kyonden, nte kvütata nte enhyolanchicho sana jiang topvüna engatava. Nte ebuk yutalona benkae khi ana nte ntangshona yithaka. 4 Aiyo nte Potsowka, ana nte sheküpvüka otssan pyoka nte eson nandang ana nte liyingcho küma nte sheküpvüka. Ana nte kyochivka osi nte shanchovka. 5 "Ntena ocho khi a thüngi etsitavla?" to OPVÜI na phyoala."Ochosana a esüa tüv vancho alo? 6 Kyon jiangna onte rangsükvü jiang chonchi shona chüchoktala; osi ontena janti jiang seri lona fütala. Ontena yonjoe engochoe potsow jotokala; osi hoji mhadungo epyakthei khümtala! 7 Osi hojiang ji ontena epvüi ejümkachi bentala; onteno kvülo vachokehia sana jilo mangkachila, tokhatola hojilona ontena senphi n yiche. Ochona sana mpa hoji thüngi randan lea ombona n janlanche mekana emhok elümona ombo n shanchoche. 8 "Mmen kyonden, shi nehümehetava; ana ntio tssothakchosana jiangnchümi zetava. 9 Nkolo ntio tssoa yithakchosana jiang nehümehetava; Potsow jo a taeka, osi jilo thanphoe a esüa jitüv ochia n vanka to chethei khitava. 10 Ntio tssov sana ji bekadenina ana methecho; osi nti kvüto tssovsana ji ana nkolona zenkhyingi vacho. A etüm ezi jiang n tssojamvü siv meka, osi ana ntio zikachosana ji topvü tssovka to ana phyocho. 11 Ana engkhfüwoena kyon tsüka roleto tsa vana; ombona kyorhü esüa pyajov osi ana ntio zikachosana ji tssochev. Ana phyothaka, küma hoji esüa tssov. 12 "A yi engatava, nte lümbüm ekhüngden osi ekhyo jijo ekoni lika to nchüma evanden. 13 Ana ekhyo tsüngon ji enhyana hansi tsathakaosi hoji kona n li-nrüng. A thüngcheta ekhyov ji sülamvü meka, ana Jerusalem ji shanchov osi Israel jiang pono yikrachi hansi yiv."
Babylon Pono Yitsso
1 OPVÜI na phyoala, "Babylon, ni vantsü jilona joyia, osi likoe livero yulo khoktheta. Tsüngon motsünga lojo nino meta omh, yantsü ochina ha n khyohancho tüv tssocho, tokhatola enhungo hojito enyiproa mmhona vanchev meka! Nino enhungo ezii ni kümthaka! 2 Enhyikphen long ji siriphia! Osi omhüm enhyika! Ni mhashüng ji khi sia! Osi ni sü mmhon jiang shaki sia! Zhükhfü jiang yakchiv tsükona ni mpensü ji phokata! 3 Kyon na ni tsükshü ji hungu; ni yikra osi ni joyia ni hungu. Ana nnlilan elhi tssov osi ochinaha a nkhalanchiche." 4 Israel ntho Potsow na etancho evachialaOmbo mying jo tokhamo OPVÜI. 5 OPVÜI na Babylon thüngi heto ezoala, 'Yingto emüngi khokthei vana; enhungo onte na jipo jiang yolo rani to ni tsav meka! 6 A kyon jiang thüngi a lümbüm tsukcho; osi nteji a echi mekvü sithakcho esüa tsütsacho: Onteji ana ni etholo theyicho, osi nina khonzan to onte n tssocho; eson eran jiang mpato nshü-mmoa ezüptukcho. 7 Yuta topvülo rani tssopvü vamü tsayia nina nchümcho, osi nina shiang tsükona ntia nchümi n ze mekana kvüto ochüm echev sana nchümi n ze. 8 "Heto shi enga, nte ematha longshi jüponden, osi eiyo emhok-elüm n liv, tsanchothaka to nchüma evanden. Ntena jo nteno Potsow esüa tsüphoato hoalahoji tsükona nte esüa jo ochia n van to. Nteno kvüthüngha emi nte n kümhan to ntena nchümcho mekana nte ngaro jiang n mon to. 9 Tokhatola, yuta motsüngalo osi engalo taena shiang hetopvü shi heto tssovka. Nina küma ozen okyak topvü mpa tsütsalea, nte tsoerapvüi osi otsoeoro jiang monkhamka. 10 "Ntenajo nte elhi n mhon jilo lümbüm püka; Ochinaha nte n hungka to nchümtacho. Nte nchümri osi ntsinran jina nte sosoracho, osi nina nibobo, 'Aiyo Potsoa esüa ochia n van to phyoala.' 11 Roe esio ji nipono rovka, osi nti ni zen okyak naha hoji khalanchichev meka. Tssoro-phyoroe esio jitüv nipono zakto rovosi nina omüngina tia n mhacho tüv tssovka! 12 Ni khyingrothüng na tsütsata erowo ozen-okyak; osi loha jiang topvüto vantoki zeta. Ntio lanka lona sanajo ontena ni kyochio tüv mpa livka; mekana jiang yakchia ni ri jiang ekhentokchev lea mpa tssokuka. 13 Nina ndungntssung hunga khatola niji etho n liv ni kümthaka. Ni mhadung tsükona choro shantio che-ezei jiang khi chiyi ni shanchothokaosi ochoang na choro shantio jiang khae, potsüo jiang etsi-ekoni zesi choro akvüto ni ekümo ntio tssov sana ji ni ezoa evamo jiang khi chiyi ni shanchotoka küma. 14 "Onteno mavü sharocho esüa tüv tssov, osi omina nshüi onte siv! Ontena jo pntepopo lea n shanchocheomi elüm na jina onte tssohunga onte fhüpkao tüv mek, tolia ontena n rümkuko mmi-myo tssov. 15 Ntena nte eküm echung choro shantio ekhae jiang thüngi ngatüng ngaria ero ji man jo, ontena nte thüngi elhi mmhom etsso jijo hojito nte ezüpthukvü ji tssovka. Ontena nte sisi onte lanka yana yi siv, osi nte shanchov tsükona ochia n valanchi."
Potsow jo Ochyuovüng Jilo OPVÜI
1 Israel kyonden, heto shi engatava, Jakob lona chenkae eyi nte topvü tona: Ntena Israel Potsow ji khümala to OPVÜI myingona echümtachor tokhatola ntena phyo jiang yitsünga tia opvü n tssotuk. 2 Tokhatola ntena kangtsüta nteno ntho yantsü jilo tssentso khilato elani nteno Israel Potsow lo enhikatala, ocho myingjo Tokhamo OPVÜI sanaji to phyotala. 3 OPVÜI na Israel thüngi heto ezoala, "Ntio kvüto tssovsanaji ana nkolona methei vathaka; osi zaktole ana hoji tssotukcho. 4 Nteji lümbüm ekhüngden tssov osi yonjak esüa khünga, mekana pyontsü yonjak esüa engünga tüv tssov toji ana ntsintsa küma. 5 Hoji tsükona nte ochyu-ovüng ji ana nkolona methe nte vayicho, osi hojiang ntia n tssothüng vüngina tüngsochi ntsacho, osi hojijo nte khi khi kisü mekana ntena nsüngrüo jiangna hojito tssotukchoka to ntekhi n phyotokvü tsükona. 6 "Ana phyoe evao jiang topvü benkathaka; Ana metheo jiang elanka to ntena khichov shikhfü. Enhungo ntiosana ethan etsao jiang tsükona ana nte ezovka, lanka tara ana nte n zohancho jitüv. 7 Enhüngati ana heto tssotokala; vana yithako jijo shi esüa echunga tia n tssohan. Hojiang tssothakvo ntena topvüji ena ntsia to phyokuka. 8 Nteji nte n longtsükakhuk to ji ana ntsia, ntiotssole nteno yuta topvülo ekhiranden to nte ntsia yipvü. Hoji tsükona ntena shiangji n zo-nrüng hancho ntiotssole shiangji yitsünga tia nte enolo n yihancho. 9 "Kyon jiang khi a mying thüngtukvü tsükona, ana a lüm etsuk ji senlana vanala; A lüm etsuk ji valanchivka osi nte montukvü meka. 10 Ana omi khi nte ezüpthuka ejyui nte zethaka, kvüto yonjokvüi na janti richoe khia sana ji esüa. Tokhatola nteji ethelan n lidento ana yanchethaka. 11 Osi ana ntio tssoa sana jijo a tsükona tssocho Ana a myingji n joyitoklan, mekana myingthüng kvümoe a ejan osi a echi tae sana hoji oyam khi n shümnhyatuk."
OPVÜI na Ethüngcheo Esopvüi Cyrus
12 OPVÜI na phyoala, "Ana tsachuki evao Israel kyonden, a engachiyitava! Aiyo Potsow kvümoe ovüngtso, wokhatso sana Potsow ji a taeka! 13 A khena limha chenkaphen jiang nsüngrücho osi potsüo jiang ephyanchicho. Ana kvüthüng limha osi oyak shi tsa sana ontena zaktole oro a ndüngo mangkachiala. 14 "Nte topvüna sanrhyua osi engatava! Potsow kvümoena ha ana ethüngche evao kyon jina Babylon ji havka to methecho n li; Ana ntio ombo tssotukhungana ji ombona tssov. 15 Ombo etsao osi ombo ejamo jijo ana; Ana ombo chiyitoki ekhyo ombo picho. 16 "Enhungo a thüngoe sena oro ana ntio phyov sana ji engatava. Benkadenina ana ntia valanchi n lina phyopvü, osi yuta topvülo a yi jiangji ntsa kümtuka mekana bentukala." (Enhungo OPVÜI Tsüphotso jina ombo etho ji apithaka osi a rothukcho)
Ombo Kyon Jiang Tsükona OPVÜI Etüm-ezi
17 Israel ntho Potsow, ochona nte shanchoa sana jina phyoala: "Aiyo OPVÜI nte Potsow ji, ochona nte mmhon tsükona nte püngno hunga vancho sana hoji osi olan eremoe nte ejüchiv tsükona evamo Potsow ji. 18 "Ntena tae a yizüng jiang engacho saliwo! Towo mmhalan taro nte thüngi tsüa yitokvü osi kvüthüngha lea n nghao zhükhfü tsüa esüa! Osi jümangjü na jütssae evakchokchio ji esüa ekhyo ji nte thüngi rotok vü. 19 Nte tsoronichen jo n khacheo tata hajang esüa kümthakvü, osi kvüthüngha lea onteji roe. khi n si toji ana zikathakvü." 20 Babylon lona chiyitava, osi etancho yitava! Yithen ji emathata tüngtava; osi meta topvülo ntsijantuka: "OPVÜI na ombo nri Israel ji shanchothaka!" 21 OPVÜI na ombo kyon jiangji likying lijüng etsso, yakchia, soathüng onte n ratsüngtukcho. Longpvü lona ojü chiyi onte yutukcho; ombona olongji küngsotoki ojü chiyitokcho. 22 "Mmen kyon jiang tsükona jo tsanchophen ntia nli," to OPVÜI na phyoala.
Israel jo Jipo Jiang Tsükona Milon
1 A engayitava, ekoni evan jipoden, osi nte kyon ochoang ekoni vanchosana jiangna! A nbukthüng vüngina OPVÜI na a ethüngchecho osi ombo nri etssov a ethüngchecho. 2 A yi jiangji ombona yonri erov esüa kümtokcho. Ombo khe jina ombona a nkohacho, ombona lotssitsüng esüa a nsüngrücho, osi a tsütsav tsükona methakcho. 3 Ombona a ezocho, "Israel nino a nri ka; osi ni yakchia, kyon na a mying thünguka." 4 Ana phyocho, "Ana tssoe zethaka, tokhatola ntia eyilov n li! Ana a ethoji tsütsae zethaka, tolea hojina ha ntia n tssorhüp." Tolia ana OPVÜI lo longtsükatala, Ombona a elhi ji a nkocheyiv to; osi ana ntio tssoasana ji tsükona a yantso. 5 A n bokthüng vüngina, OPVÜI na a ethüngchecho; ombona ombo kyon jiang solansi eyiv tsükona ombo nri a tssotukcho, osi Israel kyon nzüroe evamo jiang solansi eyiv tsükona. OPVÜI jina yikrachi apiala; osi ombo a etho chiyiphen ndüng ji. 6 OPVÜI na heto a ezocho, "A nri yo, ana ni tsükona elhi tsüphokao tüv lika. Nina Israel kyon eküm valanchi evamo jiang thüngi onte tsüpho ji pilamvü ji tae mek, tolea ana jipo jiang tsükona milon wondang ni kümtokvühojito tssona limha topvüto shanchochev." 7 Israel ntho Potsow shanchopvüi jina phyoala ocho yikratoki jüngthei vanchosana ji thüngi, osi jipo topvüna ocho tssakchosana, osi ochojo esapvüi jiang nri sana ji thüngi: "Ni vachio ji mesao jiangna hunguka osi onte topvüna yikrachi ni ejüa phanthiv; mesa tsokhying jiang naha hoji hungu, osi ontena ha ni yikrachia epyakthetav." Hetoshi tssov, ntiotssole OPVÜI na ombo nri ji ethüngchethaka; Israel ntho Potsow jina ombo phyochak jiang vatala.
Jerusalem Tssocholam ji
8 OPVÜI na ombo kyon jiang heto ezoala, "Kvüthüng nte shanchov tsükona yutaji yiasana, ana nte emathao nte tssoyiv osi ntena ekyo echomo ji nte janlamvü. Ana nte nkohoa nte nhyakyav osi nte yakchia kyon topvü thüngi ntsatav. Nte meta enhünga ejüng ekachi elio jilo ana elani nte vanthuklamvü. 9 Vüngpheni evan jiang thüngi, 'Etancholo yitava!' to ana ezov! osi ochoang kvütata emüngi vanchosana jiangha 'ondangi!' to ezov. Osi onteno phunglan jianglo olyuden yantsota vamo jiang esüa tssov; 10 Onteno kvüthüngha n wonton osi n ratsüng. Lijüngi eng etsso jinaha onte n tssatsso, ntiotssole onteno onte nzana evamo jina olan onte sov. Ombona jüpokphen mmhom lo onte sochokchiv. 11 "Ana phunglan jiang yakchia lantsü onsochiv osi a kyon jiang tsükona yentsalan nsüngrüv. 12 A kyon jiangna ekon ekonina, khümkiwoe na osi engrhelamoe na to rorav, osi jolowoe Asan to jiang lona rov." 13 Oyak topvü lona dentava! longshilona tüngkachia limha! Phunglan jiangha okhen densochituka! OPVÜI na ombo kyon jiang lümbüm emiyiv; osi ombo kyon ezüpa evamo jiang pono khonzan to tssov. 14 Tokhatola Jerusalemlo evamo kyon jiangna phyotacho, "OPVÜI na e sinkithaka! osi ombona emhechothaka." 15 Hoji tsükona OPVÜI na janlanala, "Eloe ochona sana ompvü ngaro oshyu lo vamoji mhechokukcho alo? mekana ompvüna vani evao ngaro ji n zamvü ke? Oyo jina ompvü ngaro ji mpa mhecho lia, ana jo kvüthüngha nte n mhecho. 16 Jerusalem, Ana kvüthüngha ni n mhechoche! Ana ni myingji a mmyo kvüi erankae vathaka. 17 "Ochoangna nte tssocholam sana jiangji nsungu tsathaka, osi ochoangna roe nte sichosana jiango nkachoe yiv. 18 Eyingoe zetava ntio tssoa yia vanchosana! nte kyon jiang sanrhyua vanthaka-onte ji okiwoe tsathaka! Otsotso aiyo eküm evamo Potsow tssoji esüa, osi yanpithan jina oyok-osen ji zesi kangtsüa nchümo ji esüa, nteha nte kyon jiang tsükona nte kangtsüv. 19 "Nte metaji roe ekachi sicho tokatola enhungo hoji lona n vanchyuo kyon tata hojilo vanwo tsathaka, osi ochoangna roe nte sichosana jiangjo nte lona meta ekoni yitoki siv. 20 Nte kyon metapoe tsanthan ekümona buko jiangna tsüngon motsünga lojo heto nte ezov, 'Meta shijo e tsükona jo terikhüngae evamü tsükona meta tsükata ethev lia!' 21 Hojisüi jo ntena ntepopo heto phyov, 'Ngaro hetata shiangjo ochona evanicho ato? A ngarojo moni sisi elani n vamü sichola. Aiyo metapoe phanchi tsanthan tssoa vancholaochona hetata shi khyo cheranküm tukcho ato? Aiyo apoti ekachi a sicholanongori shiangjo kvülona yiracho ato?' " 22 Sandamo OPVÜI jina ombo kyon jiang ezoala: "Ana jipo jiang thüngi chekav khi hatakvü, osi ontena nte tsokhying tsolo jiang topvü tekilo khakae ejümsi elani epvüina ejümsi okiwoe yirav. 23 Mesao jiango nte opoden esüa tssov; osi rani jiango nte opvü-oyo esüa to tssov. Ontena nte mhadungo liko jana epyakthe nte yikrachiv; ontena emiroa yikrachi nte ejüv. Hoji sülojo ntena aiyo OPVÜI ji to a ntsiv; osi wochangna a thüngina kyochi nhyakasana jiango ochia lümbüm n shiyi." 24 Nina rasan khelona erechokukcho alo? osi ekhüng jiangna vüngi evao jiang khelona e nrhachekukcho alo? 25 OPVÜI jina janlanala, "Nina phyoji esüa hojito tssovsala. rasan jiangna vüngi evao jiang khi hansi yiv osi harung jiangna rechoe evao jiang khalanchiv. Ochoangna nte rokatasana jiang thüngi ana ryulanchia rotav osi ana nte ngaro jiang rechov. 26 Nte khangria evamo jiangji ana onte onte lüngthatatukvü; onteji müngtsso-münghan na onte kinotokvü. To tssona kyon vanchona aiyo OPVÜI ji to a ntsiv, Ochona nte shanchoasana osi etancholo nte vachia sana hoji. Aiyo Israel Potsow etho eli ji to ontena a ntsiv."
1 OPVÜI jina phyoala, A kyon jiangji ana eboe tsükana ombo eloe sichia yituko ji esüa yituki sicho to ntena nchümta alo? Tona sichita kako eramo jijo kvüla? Elani kyon tsükana ombo ngaro jiang ezii tssotokvü yemo ji esüa ana evüngki yeni nte sichoto ntena nchümta alo? Hojito mek nte mmen jiang tsükona evüngki nte rheyicho; nte müngtsso-münghan elhi jiang tsükona metapoe nte yitukcho. 2 "Ntio tssona ana kvüthüng a kyon jiangji onte shancholo ochosana jithüng a n yivonchola? Osi ana onte tsathüng ntioli a njanlanchola? Aiyo onte shanchov tsükona elümoto n khyov tüv ke? Ana yizüng pichona jümang jiang nghae sicheta, osi zhükhfü jiang lijüng kümtokcheta, hojito ojü n jüwo ji yakchia jilo ongo evamo jiang chüv. 3 Potsüo shi lea ana müngi situkcheta, echüi tsükona nungrata vancho esüa."
OPVÃœI Phajae ji Jancho Ezoji
4 Sandamo OPVÜI jina ana ntio phyovsana ji a shikacho, ji yakchia wonkhyua evamo jiang ana e jükayitukchev tsüko. Enya akvüto ombon a püngnov sana ji nhyaktssüka a vantukala. 5 OPVÜI na engathewo etho apithaka, osi ana ombo n panlan mekana ombo thüngina mmyilani n yihan. 6 Ochoangna a tasana jiang thüngi ana a mankvü ji shakche toniala osi ontena a yikratukathüng lea ana onte ntanglanchi, osi ontena kvüthüng amemhüm tssan jiang a rukchoyisi, omhalo a mphyokayicho sana jithüngha ana n panlan. 7 Tokhatola onte elhi jina jo a ntssatssoche ntiotssole OPVÜI Tsüphotso jina a kyochiala. Ana apopo erüm etov tsükona khüplanchicho. a ji a n yiratokche to ejoena, 8 ntiotssole Potsow na a ndüngo vana, Osi ombona a nlan n li to a phyochev. Ochona sana a pono nlan ashakav nchüma vancho alo? Ete nzo yitssopheni otavka! Ombona nlan a piv elio jiang hansi rotoka! 9 Sandamo OPVÜI jina ombobo a zalanchiyiala to tssona, ochona a nlan lia to phyokukchola? Nlan api jiang topvü n hungu siv; Osi onteji yingrana osü tsorochoto moni siv. 10 Nte kvütatana OPVÜI ji yikrachia osi ombo phajae ji yi engasana, ntena tsata evamo lan jilo emüng mpa likhoka, tokhatola OPVÜI lo longtsükata, osi ni Potsow lo enhikata. 11 Nte kvütatana oyam roe esiv kyakasana jiang topvüto nte kyak jina nte rov. OPVÜI jina ombobo hojito tsswothukvü; osi ntena n pen n khio ezüp sükhying ntokvüka.
1 OPVÜI jina phyoala, "Ayi Engalana, nte kvütata na nte shancho hungasana, osi nzan yana a thüngi eroeden, Longpvü kümoe lona ntena yicho sana, osi olong khiphen kvülona nte shanchecho sana jiang nchümi zetava. 2 Nte pyimtsümotsüi, Abraham tona Sarah to ochoang lona nte chenkacho sana ji nchümi zetava. Ana kvühüng Abraham tsachosana ombo otsoeoro n van tssocho, tokhatola ombo mmhayitukcho osi otsoero ombo picho; osi ombo tsoronichen jo n khacheo kümtokcho. 3 "Ana Jerusalem thüngi nzan ejüv, osi kvütana roe elio jianglo vanchosana jiang thüngi to. Ompvü metaji lijüng mpa tssolea, Ana Eden lo phari nsüngrüo ji esüa, phari mmhom kümthokvü. Hojilo ematha osi longshi liv, osi a myingthüng khen tona montsso api khen to dentav. 4 "A kyonden, a yi engachitava, osi ana ntio phyoasana hoji engatava: Ana jipo jiang thüngi püngnoyi piala; a shikhfü jiangna onte thüngi wondang hansi yiv. 5 Ana zakto rov osi onte shanchov; a ekhyo yuta ji enhyanthaka. Ana apopo jipo jiang thüngi sav; meta ekoni evanden ana erov ji nhyaktava; ontena shanchov eyilov khi a nhyaka vana. 6 Potsüwoe zekachitava; likoe ha zechochitava! Potsüo ji miphong esüa moni siv; limha jiha sükerak esüa thonrov, osi jilo evamo kyon jiango beno esüa chürav. Tokhatola ana sochok elhi hansi erov jijo nchüngkhonto liv; a ekhyo jijo wokha tsoji tssov. 7 "A engayitava, nte elanjo ntiosana ji ntsiden, osi nte ochoangna a püngnoyi jiang nte lümbümi chüngthei hanchosana jiangna Kyon na nte yikvü-yiloa nte nshümoa thüng ti-kyutava; 8 onteno yingrana osü tsorocho esüa moni sivka! Tokhatola ana hansi erowo a shancho jijo nchükhonto tsükona tssovka; a ekhyo jina yuta topvülo rüma lia vamvü." 9 Phanthia, OPVür yo, osi ekyochia! Ni ethoji tsütsata osi e shanchoa; nina nkolo tsütsao ji esüa etho tsütsata. Jümangi tsüngrham-pvü, Rahab ji etakroe esio jijo ni. 10 Jümang ji kyingtoki olan nsüngrüo jiha nina tssocho osi hoji yakchia nina shanchoa evamo jiang na yakchichecho. 11 Nina ochoang kvütata shanchocho sana jiangna longshi kerina okhen denta emathata Jerusalem janrav. Onteno nchüngkhon to tsükona emathav, osi kümali nüngkhfü nungra n lina vamvü. 12 OPVÜI na phyoala, "Etho nte jükayia evamo jijo ana. Nteno ntio tsükona chüi esio kyon ochojo ero jiang tia mpüngu tüv sana ji kyutala? 13 Nteno nte liyingo OPVÜI ji mhechothakcho ke, osi ochona potsüo jiang ephyansochicho sana osi limha shi ndungkaphen ji nsüngrücho sana ji mhechothakcho ke? Nteno ntioli lümbüm etsuk hansi nte nyimthechia evamo jiang yuta topvülo kyua vantala? Tolia nte roe esiv tsükona methaka evamo jiang onte lümbüm tsükshi jina enhungo nte evüngkachev meka. 14 Ochoang vüngi vanchosana jiang ha n sungu etancholo vachiv; onteno harishia vamka osi ontena etsoyu ethev elio jiang topvü hungu, 15 "Aiyo nte OPVÜI Potsow ji; Ana jümang ji nthiphi jükyo khi evakphia echyutukcho. A myingjo tokhamo OPVÜI ji. 16 Ana potsüo jiang ephyansochicho osi limha shi ndungka phen jiang nsüngrücho; Ana Jerusalem thüngi ezoala, 'Nteno a kyonden! Ana a püngnoyi jiang nte pithaka, osi ana a khena nte nkohacho."
Jerusalem Ezüp ji Ochüm tssov
17 Jerusalem, phanthia! Nipopo phanthi manga! OPVÜI na ombo lümbüm etsuk lona yuleto nipio ezüp-pvü ji nina yuthaka; nina tsümthechicho osi jina ni ngaphitokcho. 18 Ni sosi eyi tüv ochia n van osi nte kyon yolo, okhena ni erüsi eyii jitüv ochia n van. 19 Ezüp lanka eni nipono elongkathaka: ni meta ji ritsso yakchia pheni sithaka, osi ni kyon jiangha khangtsüngkhancho. Nzan ni ejüo tüv kyon ochia n van. 20 Lantsüi nken akvü lona ni kyon jiangji n khyov erithetala oteno sophan zhülona siano nzenyacho esüa tüv; ontena Potsow lümbüm etsuk ethoji chanchethaka. 21 Nte Jerusalem kyon ezüpa evanden, osi sokona nte kinocho to ngaphita evanden, 22 OPVÜI nte Potsow na nte nkoala osi heto phyoala, "Ana a lümbüm etsukona nipio opvüji khi hansi yiala. Ntena yusi nte kinoe ngaphitao sokoji enhungo yulam meka. 23 Ochoang na nte tssethechkho sana ana hojiang thüngi pivka, Ochona lantsüi nte yipthokchosana osi ochoangna nteji mmen mmyak esüa nte thechichi sana jiang thüngi to."
Potsow na Jerusalem ji Phanchov
1 Jerusalem, ethojüa osi ni tsüphoji lilanthuka! Potsow ntho yantsü, nipopo rakachia pipoa! Potsow n tsi jiangna kvüthüng ha elani ni kipüngo khothelam meka. 2 Nipopo ethüngrüngi sia, Jerusalem! Live yu jilona phanthi ni vantsülo khoktheta! Zion kyonden, yonjakzhüna nte sheni lio jilona ephungchoktava! 3 OPVÜI Sandamo jina ombo kyon jiang thüngi ezoala, "Kvüthüng nte ji ezii nte kümcho sana nti rangha nte tsükona n pi, hoji esüa nte lanchiv tsükona ha ntia oman pitav meka. 4 Ntena kvüthüng Ejip metae oyi tsanthan tssota vanchosana ntena nte lüm erüng ephanina tssocho; tokhatola Assyria jina ekhüngona nte hansi yicho, osi nte tsükona oman ntia picho n li. 5 Osi enhungaha Babylon niha hoji esüa tssocho: nteno morantsan nte tssotukcho khatola ntia nte tsükona picho n li. Ochoang na nte pono nte sacho sana jiangna yuta topvülo kangtsüa tümjak n lina khoe a sitacho. 6 Yuta etsao jilojo ntena aiyo Potsow toji mmhona a chekavka osi ana nte janthaka to ntsivka." 7 Kvütata emhukthav ato yithenpvüi phunglan yakchia etsaoji hungchio jijo, yithen mmhom, noying yithen hansi tsata! Ombona ekhyo-on tüngsochia Zion thüngi ezoala, "Ni Potsow jijo mesao!" 8 Ochoangna yantsüji nhyakta vanchosana jiangna tüngtala, longshi lona nzo tssoe tüngtala! OPVÜI na Zion lo kholani yia evamoji nte mhyikna hungala! 9 Ematha longshi won tssoa, roe elio Jerusalem! OPVÜI na ombo yantsü ji phanchov osi ombo kyon jiang lümbüm emiyiv. !0 OPVÜI na ombo ntho etho ji tsütsav; osi ombona ombo kyon jiang shanchov, osi limha topvüna hoji hungu. 11 Nte ekhümki tsakalan jiang ependen, nte topvüna Babylon ji silanchitava! sario tsütsaelan ntia ti-vüngkatana nte popo ntsa nthochei tsani yitava. 12 Yuta shilojo ntena lok-lyua eyiv n li; osi tsanchov tsükona ekhyo n tsso. Nte OPVÜI Potsow na olan nte sov osi tiyi-ammen topvü lona nte nkohov.
Ezüpo Phajae ji
13 OPVÜI jina phyoala, "A phajae jina ombo elhi ji ochüm echevka; osi omboji elümoto monkhüm yikrachiv. 14 Kvüthüng kyon jiangna ombo hungchosana onte elümoto jo ekhenrhükcho; ntiotssole omboji kyon tia n süv khokjaklokjak kümthakcho. 15 Tokhatola enhungo jipo elümotona ombo zesi ngangtsüngrav, osi emhuk ekhen lona mesao jiangna lea oyi tia nsanchev siv. Ontena kvüthüngha n tsihamo jitüv hungu osi ontena ntiona engathei khiv."
1 Kyon jiang na janlanala, "Ena enhungo ntio yivon pia vanchosana shi ochona longtsükhokvü ato? Ochona OPVÜI khe ji shilona hungkhukcho tssov ato? 2 Ombo phajae jina liko likying lona oying süngi odung esüa rankav jijo OPVÜI lümbüm erüng ji tssocho. Etena chancheta ombo ntsio jitüv ombolo orhüm-ori n khying, elani ombolo ntia etssüngyao tüv ha n jü; osi ombo thüngoe e hana eyio jitüv ombolo ntia n jü. 3 Ena ombo yikvüa khoe ombo sicho; osi ombona ezüp etsü, nongkhfü nongra jiang rümcho. Ochinaha engoe tia ombo n zeosi ombo ji ntia mekcho esüa etena ombo n khanzicho. 4 "Tokhatola etena ehamvü thungji ombona ezüp topvü rümchokchicho, etena enov thungji ombo notukcho. Osi ombo ezüp yuta ji topvüto Potsow thüngina eziip yitokchoka to nchümicho: 5 Tokhatola ete mmen jiang yakchia ombo tssatssocho, osi etena n mhom etsso jiman ombo echükcho. Ombona ezüp ekhio ji yakchia eteji emiyicho, osi ombona khepyak toni etso ji yakchia eteji e mmhontukcho. 6 Ete otsük akvüto olyu tsan-moncho esüa tüv, osi ete otsük akvüna ombo ombo lamoe yirae sicho. Tokhatola OPVÜI na ezüp haji ombolo elongkatukcho, ezüp kvümoe ete topvü epiv etümcho sana ji. 7 "Omboji elümoto haruka kangshicho; tokhatola hoji eyingroa rümcho. Osi ombona yitsünga tia n phyocho, olyu tatsüngo sosi yia vancho esüa, mekana otssan tssüyilo sosi yia vancho esüa, ombona yitsünga tia n phyocho. 8 Omboji rhümacho osi chütokvü tsükona." khochaki picho, osi ochinaha ombo mhadung tsükona n chümicho. Ete kyon jiang mmen tsükona. omboji doni chütukcho. 9 Omboji kyon n mhon nzo olüpi ombo thechicho, osi omboji ejüeli jiang nzo shothecho, ombona münghan elhi ntia n tssoa khatola mekana ejüng ntia n phyoa khatola." 10 OPVÜI jina phyoala, "Ombona ezüp ekhiv jijo a lümbüm erüng tssocho; ombo echüo jijo nlan siyiv tsükona thungthan tssocho. Hoji tsükona ombona ombo tsoronichen jiang hunguka; osi harishia sunga ombo vamüka, osi ombo yakchia a etüm-ezi ji benchev. 11 Ezüp eküm vansi sülo ombona elani ematha longshi hungulamü; Ombona kiman ezüpcho meka to ji ombona engathev. Longtsüka eli a phajae ocho thüngi a ematha licho sana, jina kyon elümoto ezüptokvü thungji ombona hamvü osi ombo nzan yakchia ana nlan onte siyiv. 12 Hoji tsükona ana monkhüm yikrachi vanphen ombo piv, tsüphoe osi etho eli jiang yolo vanphen ombo piv. Ombona chokata ombo eküm ji picho osi n mhon kyon jiang eküm sükhying ji ombona shümkyocho. Ombona mmen kyon elümoto jiang vanphen ji khi nlan onte siyileto randancho."
Israel Jiang Tsükona OPVÜI Nzan
1 Jerusalem, nino otsoe n li eloe esüa vana rothaka, tokhatola enhungo nina longshi lona tüngkachia okhen denkhoka. Enhungo, eloe orapvüna yaki n vona vanyata evamo jiang lona kyongkata nina otsoero livka! 2 Nina vana evamo süki-ji tsükathoka; ozhü jiangha sikathuka osi etsen jiangji chüngchüngkathuka! 3 Ni erü-ekük jiangha tiyi-ammen topvü tsükathukvüka; osi enhünga jipopoe jiangna nkoyae elio metaji ni kyon jiang na hungalamvüka. Enhünga sirhaki elio yantsü jiangha kyon na pyinglamka. 4 Tikyu-khe enhungo elanijo ni yikratoklamvü meka; osi elanijo ni n joyitoklan. Nina yanpipanthüng esüa n tsanrükvü vana erowo jijo mhechoe sivka. Osi emii esüa ni eyingtsünga vana erowo ji eküm jijo mhechoe sia. 5 Ni liyingpvüo jijo ni rapvü esüa tssov OPVÜI Tokhamo jina ombo myingona. Israel ntho Potsow jina ni shanchov ombo limha topvülo esapvüi ji. 6 Israel, nino eloe yanpipancho, orapvüna sichi sisi, nchümri tsünga vancho esüa tüv. Tokhatola OPVÜI na ombo thüngoe tsalani heto nizoala: 7 'Yuta esüngaro tsükona ana ni sücho; tolea nzan ejunguv khi ana ni khilamka. 8 Yuta esüngaro tsükona tae a lümbüm tsuka mmyulani yicho, tokhatola ana a nzanji nchüngkhonto ni ejüvka." Hojito OPVÜI ochona ni shanchoa sana jina phyoala. 9 "Noah echungo ana elani ojüna limha shi n montuk lan to echümchakcho. Osi enhüngajo ana elani ni thüngi a lüm n tsuklan to echümchakala; Ana elanijo ni n khangrilan osi ezüptuklam meka. 10 Phunglan yingsüng jiang mpato menroe sikhoka, tolea ni thüngi a nzan jijo kvüthüngha ochüm ntsso; ana noying tsükona phyochako ji nchüngkhon to lia vanthukvüka." Hojito OPVÜI ochona ni nzana sana jina phyoala.
Jerusalem Ethan
11 OPVÜI jina phyoala, "Oh, n khyov ezüpa evamo Jerusalem yantsü, ochinaha lümbüm ni emiyiwo tüv n vamo, ana ni kimüng ji tssentsü long khi tssocho lamka. 12 Ana ni ri zümphen zenki jiang sheryu longna tssovka, osi ni kibüngkhan jiangjo olong omi esüa tüngra tüv na nsüngrüvka; osi ni nkona pikhfü elio jiang jo tssentsü oyok osen na nsüngrüv. 13 "Ana a popo ni kyon jiang püngnov, osi tssochyu mochyu tona noyingto piv. 14 Ntsanrük osi elanji khi ni thokhyungtokvü. Emhuk-ekhen osi ezüp etsyu jiang lona ni shanchov. 15 Ochona sana ni hayata tssona, ombona a yi n jüna tssocho tssov küma; ochona ni rokata sana jijo elongjovka. 16 "Yonjoe ochona, omi tssoe ritsso ebensü joa sana jijo ana liyingcho. Osi rasan ochona, ebensü jiang khi lüngthata sana jiangha ana liyingala. 17 Tokhatola nti epensüna ha nte tssatssochev meka; osi ochoang na nlan nte pia nsana sana jiang janlamvü lanka liv. Ana a phajae jiang nkohav osi ekhyoji onte piv." Hojito OPVÜI na phyothaka.
Potsow Khonzan Epioji
1 OPVÜI na phyoala, Roa, eratsünga evan otsük akvüna ojüji shilo jüka! Rotava nte orang n liden tsünghanro shi-khi tsotava! Rotava! Osi tssüngthijü tona shyurojü to shitavaoman ntia nte khiyiv meka! 2 Ntioli tsoyusi nte lümbüm n püko tüv lona orang ezitala? Ntioli nte jokheman jiang ethüng ezia ha nte wontonala? A yi engatava osi ana ntio phyoana hoji ephan tssotava, hojito tssona ntena etsoyu yulo mmhontso ji tsophyavka. 3 "Engatava, a kyonden, osi a thüngi rotava; a thüngi rotava tona ntena eküm hunguka! Ana kümali ntsata nte thüngi vav osi ana David thüngi echümchaki evao mmha jiang nte piv. 4 Ana jipo jiang pono esopvüi osi khentüng yidüng ombo tssotukcho, osi ombo yakchia ana a etho ji onte ejücho. 5 Enhungo jipopoe jiang ntena tsarhyuv; yuta motsüngalo jo ontena nte n tsiv vancho, tokhatola enhungo ontena yungta oro nte nzo tssovka! A, nte OPVÜI Potsow osi Israel ntho Potsow jina shiang hetopvü shi heto tssotokvüka; Ana yikrachi kyuchi tona phfütsson to nte piv." 6 Ombona yanjano vanathüng OPVÜI ji yana kholana, osi ombo thüngi randana, ombona enhünga enhyano vanathüng ombo tsaphia. 7 Nthae jiang khi onte nthalan jiang sitoka osi nchümri eli lamoe khophitoka. Onte khi ete OPVÜI Potsow thüngi kholan toka; ntiotssole ombo khonzan elii osi zaktole nlan onte siyiv. 8 OPVÜI na phyoala, "A nchümri jo nte nchümri esüa tüv meka," osi a lanka jiango nte lanka jiang lona echümpo. 9 Kvüto potsüo jiango limha jilona n phyotao ntssonkacho sana ji esüa, a lanka osi nchümri jiango nte nchümri osi lanka jiang lona ntssonkata. 10 "Ayi jo sheryu osi eryu jiang esüa tüv hojiang na oyakina jo-chhochi liko ji etsonala. Osi yolan halan jiang rankatokala, hoji yakchia etsoyu tona mojü mono eyingu tsükona to litokala. 11 Hoji esüa a yi kvümoe ana ntio nsanchokchia sana jina ana ntio etssov tümkacho sana jiang n khyae n sina tssov; ana ntio etssov tsükona otokasana ji ephan topvüto tssov. 12 "Ntena Babylon sisi yivka; nteji yantsü jilona noying khi nte sochokvüka, Phunglan yingsüng jiangna ha okhen densochiv, osi otssüng odung jiangna ha longshi lona tüngkachiv. 13 Enhünga meta kvüloshi, wozhü-okyo rankata vanchosana jiang lona Cypress dung phantiv; osi okyo thung ji lepokri mekana khümkiri dung phanthiv. Heto chekav shiangjo nchüngkhon to tsükona livka, osi a OPVÜI, shina ntio tssothakcho sana jiangjo nte nchümchelantokphen ji tssovka."
Potsow Kyon jiang Yulo Jipo Topvüto Thenhyav
1 OPVÜI na ombo kyon jiang thüngi ezoala, "Ntiojo ntsa osi elan sanaji tssotava, ntiotssole ana n sungu nte shanchov. 2 Ochoang na yuta topvülo esanmung ji n tsütsasorna na tsütsata sana jiang ana mmhayiv. Ochaong na n-mhom n tssoana jiang ana mmhayiv." 3 Metapoe kyon ochoang na OPVÜI kyon jiang thüngi nzo tssoe vanthakcho sana jiang na, "OPVÜI na ombo kyon jiang nzo jo a nkhümthukvü tssov." to n phyov shikhfü. Eboe ochona eboe tsüng ji khi sithakcho sana jiang na enhungo eyio otsoero vanchev mek küma eyio Potsow kyon lo e n khanhya to n phyoche. 4 Hetvü kyon jiang thüngi OPVÜI na heto phyoala, "Nina a yikrachia esanmung jiang benphia osi ntsatao ji longtsüka lia vana tssona, osi ntiona a emathav sana jiang tssoa tssona, 5 tona ni myingji a ekhümki na ni nchümcheyiv, nina tsokhying tsolo licho lona sungkata. Osi kvüthüng haletoha ni n mhecho." 6 Osi metapoe kyon ochoang na ombo kyon jiang nzo tssoe esanmung jiang tsütsata osi ntsatao jiang longtsüka lia tsütsata sana jiang thüngi OPVÜI na heto ezoala: 7 "Ana a ntho phunglan Zion jilo nte sosi wov osi a randan ki jilona longshi nte piv osi ntena thanphensa jilo ntio thanasana nte khyichoyiv. A ekhümki jijo jipo topvü tsükona randanki to tsav." 8 OPVÜI Sandamo, ochona Israel kyon jiang tsanthan ekümo na okiwoe sosi yia sana jina, elani kyon thanpoe jiang ha sosi oyi onte nzo tssotokvü to phyochakthaka.
Israel Esopvüi Jiang ji Nlan Picho
9 OPVÜI na metapoe jipo jiangji orae ekümrümo esüa chiro ombo kyon jiang rümitsole to ezocho. 10 Ombona phyoala, "esopvüi ochoang na a kyon jiang ntaknshon pia evamvü shikhfü sana jiang topvü mhyikjüng tae! Onteno ntia ntsi. Onteno enhyang füro vanthuko jina n rhyuna yipkachi omüng emha vancho esüa tüv tae. Onteno eyip kvütata onte chokacho sana zeta! 11 Onteno epierae füro yuta topvülo ombo mmhithüng n lina vancho sana ji esüa tüv. Esopvüi shiang ntia engatheta n li, Otsük akvüna ombo ombona ntio tssohunga sana ji ephan onte eman tae yana etssoeden. 12 Osi hetüv kyon kinozhüvae shiang na, 'soko tara khi' etena bensi vankhukthüng nandang jo yutavka! Ntiotssole ojyua jo nchüng lona mmhonka mpa tssov! to phyotala."
Israel Jiang Kisü Ekhüm ji Nlan Picho
1 Kyon mmhom jiang chüala, osi ochinaha n ngatheyi mekana nzanka to tia n tsso. Tokhatola kvüthüng onte chüasana, nti tssorophyoro naha onte n tssatsso. 2 Ochoang na eküm mmhona vana sana jiango echülo lea noying osi esan hungu. 3 Oyi nte tssoyiv tsükona shilo rotava mmen kyonden, nteno methevüjae, efüramae elani otsük yeni tsoa evan kyon jiang lona nte mmhonkacho mek. 4 Nteno ocho khvüri ngashükatala? Nte ejüng ephyoeden nteno ocho ngashükatala, osi phyokasankatala? 5 Ntena tssokromümro potsow khümtala to ekhümdung jiang küpina efürama tssotala. Osi nte ngaro jiangji khi zhükhfü ndüngo longrokyu longkvü jiang lona othan pitala. 6 Osi ntena olong mpümroa enyipro jiang khi potsow tssotuka khümtala, osi hojiang lo zükhi phyangkata otssokomüm than jiang pitala. Elhi shiangna a emathacho tsayita alo nteno? 7 Ntena phunglani othan pilo chongotasi jina efürama tssotala, 8 Osi ntena nte potsow kisü etssakthav jiang kipüng ndüngo ochungoe vatacho. Osi ntena khoe asitasi, nte mpensü jiang mpato shaki sitasi nte yingaloroe ochoang thüngi ntena oman pia lonsülonphyo elhi tssotasana jiang nzo belüng tsüpho jiang lo tsankae hojilona nte tsük erüng elhi ji nte lüm epük tssotacho. 9 Jisülo jo ntena mozhürhüm mmhom jiang esekae hantasi Molekh potsow ji khümo wotala. Nteno potsow khilato ekhümvü tsükona yithenpvüi hepi hepi to meta ekoni wotoka, osi echüli mpato wotokala. 10 Potsow thanpo ekhümvü eyan lona nte sangtsüngkhana khatola ntena esani ha n sita. nte nchümjo, nte ejüng potsow jiangna etho nte piv küma kvüthüngha lea nte n mika to nchümtala. 11 OPVÜI na phyoala, "Ntena a mhecholangi sisi a thüngi ejüng phyota, ntena nsüngrüo potsow jiang kyuta evamo shiango ochoangla? Ana sunga yingto vani siwo jina ntena a n yirachiv sicho alo? 12 Ntena ntio tssotasana jiango elan to nchümtala, tokhatola ana nte tssolan phyolan jiang oponi nte hanchokchiyivka osi nte kisü potsow jiangna kvüthüngha nte nzanchiv meka. 13 Ntena kyochirungchi ethev lia chonana, nra nte kisü jiang khi nte shanchotuktakhe! Onteno mpung echonga vanchona mhvüi hansi onte yivlo! Tokhatola ochoang na alo longtsükata vanasana jiango meta shilo vanphyav, osi ekhümki jilona a khümvü."
Potsow na Ekyo-erung Tona Emiyi to Phyochakala
14 OPVÜI na phyoala, "A kyon jiang khi a thüngi kholantuka. Onte lani khetsüv jiang topvü khi siyia! olanji wonia osi methaka! 15 "Aiyo ntssontso osi ntho Potsow ochona kümali vanasana hoji. Ana meta ntssom osi ntho metalo vanala, tokhatola elani kyon jiang khi alo longtsüka osi eyilu litukvü tsükona, ochoangna eyingroa osi lümbüm khophilani vanasana jiang ndüngo ha ana vanala. 16 Ana a kyon jiang thüngi eküm picho, osi elani nlan onte h pilan mekana elanijo kvüthüngha onte thüngi lümbüm n tsoklan. 17 Onte mmen osi nkhyiknrük ji tsükona a lümbüm tsuki ezüp onte pia kholangi onte sicho. Toaha ontena onte lümbüm ekhüng jilona n tungphina onte lanka jilo tae yicho. 18 "Ontena kvüto etssophyocho sana ji ana hungthaka, tokhatola onte emiyivka. Ana onte sovka osi onte nzanchivka. Osi ochoang na nungra nchümana jiango lümbüm emiyivka. 19 Ana kyon topvü pono noying piala, ekoni vanlea enhyano vanlea! Ana a kyon jiang emiyiv. 20 Tokhatola kyon n mhon jiango jümang jiangna esan n lina vamoji esüa tüv, jükyo kvümoe na n sana jephia mmen lan taro hansi yiasana ji esüa tüv. 21 Mmen kyon jiang tsükona jo tsanchophen n li." to OPVÜI na phyoala.
Ekhang Tsotso ji
1 OPVÜI na phyoala, "Ni edona-ndang tüngkachia! Osi a kyon Israel jiang thüngi onte mmen jiang ezoa! 2 Ontena a shikhfü lanka jiang ntsihungala to phyoa tsüngon akvü a khümtala. Osi ontena a khi khi ntsa shikhfü onte pitok-hungala, osi a ekhüm jilo onte choka lia to phyotala." 3 A kyon jiangna engatala, "OPVÜI na e n tsivjo ntio tsükona khangüvla? osi ntio tsükona etsoyu n tssona vamvüla OPVÜI na mmhona e n tsiyiv jo?" Opvüi na heto nte ezoala, "Otsotso jijo shi, ntena khangtala to nte chokao elhi jiang tssota, nte elhi etssoe jiang tssethechitala. 4 Nte etsoyu ekhang jina lümbüm n mhon sochokchi khonta rotala. Hetüv ekhang khiajo ana nte randan nte engayiv to nchümta alo? 5 Ntena kvüthüng khangasana nte popo ezüp khiala, osi ntena nte kvüri jiang liko jana limoro esüa nkhümthetala elani live yolo zhüsü sachi hojilo erichitala. Ntena hojito lyuoji ekhang to tsa alo? Osi hojina a emathav to ntena nchümta alo? 6 "Ekhang ji, hetowoe na nte akhitukhungala; oyam tssethechia osi ezüptuka evamo zhüji khi sia, n tsanrük vüngkhüng ji khi siyisi, ntena ezüptuka evamo jiang etancholo vachia. 7 Wontona evamo jiang thüngi nte etsoyu jiang shümnhya osi oso oki n liv evamo yantsae jiang sotheta. Mpe nsü ntio tia n ham evamo jiang thüngi mpensü pia osi ni wopan kitsük jiang nzanchiv lo tikhirana. 8 "To tssona a mmhon osi ematha jina nte pono enyathüg eng ji esüa nte wonkav, osi nte khvü jiangha zakto poe nte siyiv. Ana nte shanchov tsükona yuta topvülo nte ndüngo tssov; osi a vanhya jina nken topvü lona nte nkochev. 9 Ntena kvüthüng randana sana nte bencheyiv osi ntena kvüthüng a tsaphia sana nte janlam vü. "Ntena oyam zerüpa tssethechi elhi ji esana tssona oyam nlan pia khoe esio nkan-nkvü ji khi sia tssona osi okhen oyi n mhom jiang esana tssona. 10 Ntena wonton era vamo jiang etsoyu pia tssona, osi ezüpa evan jiang ethelan pencheyia tssona tona ana nte nkonphia emüng elio ji eng longjüngo wondangna nte dungcheyiv. 11 Osi ana yuta topvülo olan nte soa mmhom jiang khi lümbüm nte pükiv. Etho jüa mmhona nte vantokvü. Osi nteno phari mmhom ojü tssochyua elio meta esüa elani jünhyo mmhom kvüthüngha n nghao jitüv esüa tssov. 12 Oki kvümoe nkolona roe ekachi sithak cho sana ji nte kyon jiangna tssocholamka, osi ovüngthüng kimüng ehen jilona tssokachivka. Osi nteno kyon ochoangna echungji tssochochosana, jiang to nte ntsiv; osi ochoangna roe elio ji mmhontokcho sana jiangka to nte chethev."
Esanmung Benphio ji Yantso
13 OPVÜI na phyoala, "Ntena esanmung ji ntho ka towoe na benphia hoji tsüngono nte eman tsükona n yana tssona; osi esan tsüngon ji opvü tssotuka, hoji nchukjo n yentsana yikrachia, osi elhiha n tsso elani thama nshata mungi n sia tssona, 14 tona ntena a benkao jilo kvüta ematha longshi lichosana ji ntena hunguka. Ana limha topvüto khi nte monkhüm yikrachitokvü, osi ana nte pyimtsümotsüi Jakob thüngi epio metaji ntena emathata tsütsav, to A, OPVÜI shina phyothaka."
Zenkhying Jina Kyon Jiang Mmen ji Nlan Piala
1 OPVÜI jina nte shanchov tsükona etho n li mekana ntena nzanchi echomo ji tia nzocheo eno püngthaka to ti-nchümtava! 2 Nte mmen jiang tsükona ombona nte randan n zocho. Nte mmen jiang tsükona ntena kvüthüng ombo khümü ekhyo tssochosana ombo thüngina nte khosotayicho. 3 Ntelo ejüng ephyov, meyantssiyanta osi lüngthata nlan lia. 4 Ntena yitssopheni woala, tolea nte n tsachetala. Ntena oyi ji ekhyov tsükona ejüng phyotala. Ntena okyak oyi benphiwo jiang topvü oyam tssatsov tsükona tae. 5-6 Ntena okyak n mhom nsüngrüo jiangjo echü mozhü ehan nrü ejü esüa tüv, ejü motsünga ekhorhüpi zena, nrü chiyiala! Tokhatola nte kyakoyi jiangna ntia nte tsükona mmhom tssochev meka-osi onte ji payang na süngcho khi osü tükcho esüa ethev n lio tssov! 7 Ntena yuta topvülo n mhom etssov ji tae hapi-halümtala, osi hoji etssov yuta jitia n nhyakchekukcho esüa tssoala. Nlan n li kyon jiang lüngthav jiha kvüthüngha nte n tito. Ntena kvülo woasana tssorophyoroe osi roe ekachi siala. 8 Osi ntena kvülo woana ochinaha n tsanchoala. Ntena ntio tssoasana jiang topvü n tsanrük tae. Ntena lankhfürüp tüv yani tsatala, osi hoji lan jilo sanphi ochia n tsanchoche.
Kyon Jiangna Onte Mmen Phyochakala
9 Kyon jiangna phyotala, "Ntio tsükona Potsow na oyam na etssethechia evamo jiang khelona e n shanchocho sana ji enhungo ena ntsithaka. Ena wondangi sanphiv tsükona eyilocho, khatola topvüto emüng tae tssocho. 10 Osi ena mhyikjüng esüa tssocho. engo lea emüngo esüa enshüphicho; osi eiyo echüli emüngi vancho esüa tüv tssocho. 11 E ji ekhenrhüka osi e ezüp-phyingrüngcho. Oyam na etssethechia evamo osi n lamo jiang lona Potsow na eshanchowo to eyilotacho khatola hojito n tssocho. 12 "OPVÜI yo, ni mhadungo e ori jiangji elümoto. E mmen jiangna nlan epiala. Ena hojiang ji mmhona ntsia. 13 Ena ni panlana elhi tssothaka, ena khoe ni sicho osi ni n phankacho. Ena oyam jiang ezüpthukcho osi ni thüngina mmilani yicho. E nchüm ri jiang ejüng tae osi e yi jiang loha ntsa n jü. 14 Ntsanrük ji phani sicho, osi elan jina e ndüngo n rochecho. Nzontsü mmhataphen jilojo ntsaji nshüphiala, osi ntsanrük ji vanphen ntia n li. 15 Ntsanrük ji elümoto mataroa elio ji tsükona ochoangna n mhon etssov jilona esana sana ontepopo onte n mhon ji rajak onte kümala."
OPVÃœI na Ombo Kyon Jiang Shanchov Methakala
OPVÜI na shiang shi hungthaka, osi hojilo ntia ntsanrük n lio ji tsükona ombo n mathacho. 16 Oyam na nyimthechia ezüptoka evamo jiang nzanchi ochia n vamo ji zesi ombo emhokcho. Hoji tsükona ombona ombo etho tsütsae onte shanchov osi ekhyo ji khiv. 17 Ombona ntsanrük ji ritsso pipo esüa ekav osi ekhyoji kikho esüa hamü. Ombona ntsanrük ji lituk-nrüngu tsükona osi ezüpa evamo kyon jiang tsükona nlilam ji choka-tümka ji khi ombo mpensü tssov. 18 Ombo ri jiangna meta ekoni mpa vanlea onte nlan ji ephanina onte ezüpthukvü. 19 Engrhe khümkiwoena engrhelan jana ombo etho osi tsüpho ji otsük akvütona kyuv. Ombona zhükhfü khvürung ntav tsüa vancho esüa osi tsungryu mpong ntav esüa chirov. 20 OPVÜI na ombo kyon jiang thüngi ezoala, "Ana Jerusalemi oro nte kvütatana nte mmen jiang lona kholana sana jiang shanchov osi nkohov. 21 Osi ana nte thüngi ntsatala: Ana a etho osi a püngoyi jiang nchüngkhonto nte echi etssov tsükona nte pithaka, hoji tsükona enhungana benkae ntena a jancho zov osi nte ngaro jiang elani nte tsoronichen jiang thüngi echungren echungren jana a yi engatale to püngnotava."
Ochyuovüngi Jerusalem Phfütsson
1 Phanthia, Jerusalem, osi eng ji esüa tüngra; OPVÜI phfütsson ji nilo onkata vana! 2 Jipo thanpoe jiang jo emüngna eyukvü, Tokhatola nilo jo OPVÜI ondang jina ni tüngrakav; Ombo vanhya wondango jina nilo vamvü 3 Jipo jiang ji ni wondang jilo tssüngrhyuv, Osi mesao jiang naha ni tsüngon ethan wonchivsa vamo jilo yirav. 4 Ni nkonphia jiang eyingoe zeta osi ntio tssoa vancho sana ji zeta: Ni kyon jiang na okiwoe eyiv tsükona sanrhyutala! Ni tsokhying jiangna meta ekoni na yirav, osi ni tsoloden jiango ngaroden esüa ejümsi yirav. 5 Nina shi tssoa hungu osi longshina ni pyingu; osi ematha lona ni enenomvü. Jipo jiang ejüeli ji ni thüngi hansi yiv; jümang pankawoe na onte ejüeli jiang yirav. 6 Midian tona Ephah to lona zotoro sana yirav. Ontena Sheba lona shona tona tssütserhüm to hansi yiv. Osi OPVÜI na ntio tssothakcho sana ji yithen mmhom ji kyon jiang thüngi ezov! 7 Kedar tona Nebaioth to lo olyu jiang topvü othan etssov ni thüngi hansi rov. Osi OPVÜI emathatukvü tsükona thanphensa jilona thamvü. Osi OPVÜI na ombo ekhümki ji thanpothüng lona kyongkata phfütssonthukvü. 8 Elok emhenjü esüa etsao rhongtsü shiango ntio ato, yukhyuden esüa okiwoe kholani tsacho alo? 9 Onteno orhong khosha meta ekon ekonina etsao jiang, Ontena Potsow kyon jiang sorasi tsata. Ontena OPVÜI mying ji yikrachi epiv tsükona shona janti hantasi tsata, Ntho Israel Potsow, ochona jipo jiang topvü khi ombo kyon jiang khi yikrachi tukcho sana ji. 10 OPVÜI na Jerusalem thüngi ezoala, "Metapoe kyon jiangna ni pikhfü ji tssocholamka, Osi onte mesao jiangna ha ni benkav. A lüm etsuk lona ana ni ezüpthukcho, Tokhatola enhungo ana a khonzan osi kyochi rongchi ni ejüv. 11 Zümo eng ni kipüng ji chonchiv, To tssona jipolan taro mesao jiangna Onte ejüeli jiang ni haniv. 12 Tokhatola jipo ochoangna ni n benkata sana jiango topvü rorüpi siv. 13 "Mitssüng mmhom jiang, mevü tssüng osi Cypress tssüngto, Lebanon raena otssüng mmhontso jiang topvü hansi oyi ni tssocholamka, Jerusalem, a ekhümki ji meritokvü tsükona osi a yantsü ji phfütssonthukvü hojito tssov. 14 Nte tssethechia erowo jiang tsokhying jiangna ni mhadungo nkhümthe monkhüm yikrachi ni jüv. Osi ochoang kvütatana yuta motsüngalo ni yikvü-yilochosana jiangna ni jolo epyakthe ni khümvü. Ontena 'OPVÜI yantsü' to nitsav, 'Zion, Israel ntho Potsow yantsü' to nitsav. 15 "Enhungo ni n sinkilan osi ni n tssaklan, Yantsü eyingkhvükhvüna siraki esio. Ana thüngche osi eze mmhona ni kümtokvü, Osi nchünkhon nchünkhon to tsükona longshi meta ni nsüngrüv. 16 Mesaoden osi jipo jiangna kvüto opvü-oyona ompvü ngaro ji lümbüma sana ji esüa ni sheküpvü. Osi A, OPVÜI shina nte shanchocho toji ntena ntsiv, Osi Israel Thotsü Potsow jina etancholo nte vachiala toji ntsiv. 17 "Ana pyontsü yonjak thungji shona ni haniv, Osi yonjak tona otssüng to thungji janti tona pyontsü yonjak to ni haniv, Osi olong thung yonjak to. Nte esapvüi jiangna elani jo nte n tssethechilan; Ana ntsa tona noying to khi onte satokvü. 18 Khonta rota won ji enhungo n zov siv; Tssoro-phyoro jina nte metaji elani n montoklan. Ana pikhfü esüa nte nkohov osi nte zalanchiyiv; Ana nte shancho ji tsükona ntena a mying thüngu. 19 "Enhungo engo nte wondang jijo eng ji tssov meka Osi zümolo wondang jiha choroji tssov meka; Tokhatola, A, OPVÜI shina kümali nte wondang ji tssov osi a phfütsson wondang jina ntelo tüngrakav. 20 Ni nungkhfü nungra tsüngon ji ochüm tssotokvü. A, OPVÜI shina nte tsükona kümali wondang ji tssov, Eng tona choroto jiang lona sungkata liv. 21 Kyon topvüna ntiojo ntsasana ji tssov, Osi metaji nchüngkhon tsükona hoe khiv. A tsüpho ji oponi chiyitokvü tsükona, Ana onte chümcho, osi onte nsüngrücho. 22 Nte yulo wopan matarotso osi teritso jiang mpatona jipo esüa ethojüa kümvü. Kvüthüng yutaji yiasana shiang shi hetopvü zakto tssotukvü. Aiyo OPVÜI ji!"
Sochokvü Tsükona Yithen Mmhom
1 OPVÜI Tsüpho jina ombo mon ji khi a phyingtokthaka. Ombona yantsae jiang thüngi yithen mmhom hansi ewov tsükona a ethüngchethaka osi a rotukthaka, Lümbüm roe evamo jiang emiyiv tsükona, Tosi vüngi evamo jiang vachile to tüngsochiv tsükona Osi evüngki evamo jiang etancholo vachile to tüngsochiv tsükona. 2 OPVÜI na ombo kyon jiang shanchov Osi onte ri jiang khyothechiv yutaji Yithakato tüngsochiv tsükona ombona a rotokcho. Osi ochoang kvütata na emhena nungra vancho sana jiang lümbüm emiyiv tsükona ombona a rotokcho. 3 Zion lona nungrata evamo jiang thüngi Nungra thungji ematha osi longshi, piv Osi nungra thung myingthüng khen demvü. Ontena OPVÜI na onte popo chümcho dung esüa tssov. Ntiojo elansana ji onte topvüna tssov, Osi ombona ntio tssothakcho sana ji tsükona Potsow mying thüngiv. 4 Yantsü kvümoe yuta elümoto sunga roe ekachi lichosana ji ontena tssocholam. 5 A kyonden, metapoe kyon jiangna nte benkavka. Nte tssiden jiang ontena nte rhükiyiv. Osi nte liko jiang nte jonia, osi jününgro li jiang nte zeyayiv. 6 Nteno OPVÜI pvütiden, osi Potsow phajaeden to nte ntsiv. Ntena jipo jiang ejüeli jiang emathata tsütsav osi hojiang ji nte echi tssothako ji tsükona nte kangtsüa nchümvü. 7 Nte yikra, osi mhashuk jiang ochüm tssothaka. Ntena nte meta jilo vamü, Osi nte ejüeli jiang hojitüv eni kümvü; Nte longshi jo kümali lia vamvü. 8 OPVÜI na phyoala, "Aiyo ntsa achokatala osi zerüpta tona müngtsso-münghan tojo a tssakala. Ana longtsükaroa a kyon jiang yantsov Osi kümali tsükona ntsata onte thüngi nsüngrüv. 9 Onteno jipo jiang yolo thüngche tssov; Onte e hungu otsük akvüto na onteno ana mmhayithako kyonden to ntsiv." 10 Jerusalem, OPVÜI na ntio tssothakcho sana ji tsükona longshia. Ompvüo yanpiwoe na yanpiyanthan etssov tsükona piposi vancho tüv. Potsow na ekhyo tona shanchov to khi ombo mpensütuk-thaka. 11 Tssüngthitsüng jina poki rankao ji esüa, OPVÜI Sandamo jina ombo kyon jiang shanchov, Osi jipo jiang topvüna ombo mying thüngu.
1 Ana Jerusalem thüngi lümbüm etsson yi ezov; Ompvü n shanchothüng jo ana yingto n van, Osi ompvü ekhyo jina zümolo mitüngraphen esüa tüngrala. 2 Jerusalem, jipo jiangna ekhyoe to ni hunguka! Mesao topvüna ni phfütsson ji hungu. Nino myingthan khi ni tsav, OPVÜI na ombobo ni picho mying. 3 Nino OPVÜI kikho mmhon esüa tssov. 4 Nino enhungo "Khoe sithakcho" to ni n tsalan, mekana ni meta jiha "Ompvü tae ekachi sicho eloe" to n tsalan. Ni mying ethan jijo "Potsow na ompvü thüngi emathacho" to tsav. Ni meta jiha "Ematha tsoeni" to tsav. Ntiotssole OPVÜI na ni thüngi emathatala, osi ni meta ji tsükona orapvü esüa tssov. 5 Khyingroe na ntsenntho loroe soa vana esüa, Ochona ni liyingcho sana jina ni soa vamvü. Osi kvüto yanpithan jina, yanpiwoe ji thüngi emathata sana ji esüa, Ni Potsow na ha nilo ematha liv. 6 Jerusalem, ni pikhfü jianglo ana shenphi enhyang vantokthaka; Ontena zümo eng yingto n vamvü ethev lia. Osi ontena OPVÜI ji ombo echümchak jiang nchümchetuka vamvü lia osi kvüthüngha ombo n mhechotokvü shikhfü. 7 Ombona Jerusalem ji n tssocholanthüng nandang jo osi yantsü kvümoe limhatsüna thünga tüv n kümtokthüng nandang jo esan ombo n piv shikhfü. 8 OPVÜI na mmyinga echümthaka, Osi ombo etho jina hoji benphiv: "Nte tsüngonrho jiangji enhungo nte ri jiang jak n tssolan, Osi metapoe kyon jiangna nte tsüngthijü jiang nte n yuyilan. 9 Tokhatola ntena ntio otssok omüm thei khi rii vathakcho sana hoji mhümri ji tsosi OPVÜI thüngu. Nte ochoang na jününgrothi jiang zeyae tsüngthi lhocho sana jiangna a ekhümki hakono na tssüngthijü jiang yuvka." 10 Jerusalem kyonden, yantsü pomoe chiwoe nte kyon kholani yia evamo jiang tsükona olan ontava! Lantsü nsüngrüa; osi olong jiang khyoe sitava! Osi chekav donkachia tona jipo jiangna ntsivka. 11 OPVÜI jina limha topvülo tüngsochiala: "Jerusalem kyon jiang ji OPVÜI na nte shancholo tsata to ezoa, osi ombona shanchowo kyon jiang topvü sosi tsathaka." 12 Nteno "Potsow Ntho kyonden" to nte tsav, "Osi OPVÜI na shancho thako kyonden to." Osi Jerusalem yantsü jijo "Potsow na nzamo yantsü" to tsav, "Yantsü kvümoe Potsow na n sinkicho sana ji."
Jipo Jiang Pono OPVÃœI Ekhyo ji
1 "Edom meta Bozrah to etsao jijo ochola? Ochoyila heto emyum na rakachia piposi etho osi phfütsson lia tsacho ato?" "Hojijo OPVÜI ji, shanchov tsükona etho elio jina ombo ekhyo ji tüngsochiv tsükona tsata." 2 "Tona ntio tsükona ombo pipo jijo jitata myunchola, ombo zükhi nsüngrüv tsükona jününgrothi tsena vancho tüvla?" 3 OPVÜI na janlanala, "Ana jipo jiangji jününgrothi esüa tsserothaka, osi ochinaha oro a n zanchi. Ana a lümbüm etsukona onte tsserocho, osi onte ejen jiangna osü topvüto a erhizhüi thaka. 4 A kyon jiang shanchov tsükona yuta ji janthaka to ana methakthaka; osi enhüngajo onte ri jiang ezüp epiv yuta. 5 Ana eyingoaha a nzanchi ochia n vamo jina ana a emhukcho. Tokhatola a lüm etsuk jina a etho jükae ekhyo ji apopo hungcho. 6 A lümbüm etsukona ana jipo mpüm tsserocho osi onte eküm ji roe siyicho. Onte eküm ejen jiang ana liko thani siyicho."
Israel Thüngi OPVÜI Mmhon
7 Ana OPVÜI n senphi nzan ji tsükona phyov; ombona e tsükona ntio tssothakcho sana ji tsükona ombo thüngu. Ombo n senphi kia nzan ji yakchia ombona tssochyua Israel jiang mmhayithaka. 8 OPVÜI na phyocho, "Onteno a kyonden, ontena a ejiphiv mek." osi hoji tsükona ombona onte shanchov, 9 onte ezüp jiang topvü lona. Lanpen na mek, tokhatola OPVÜI jina ombobo. onte shanchocho. Ombona nzan tona khonzan to khi onte rhanlancho. Vana yithako jianglo ha yuta topvülo ombona onte sheküpcho, 10 tokhatola ontena ombo panlancho osi ombo nthomon ji nungra na pyingtukcho. Hojitsükona OPVÜI jina onte ri kümi onte thüngi rotacho. 11 Tokhatola ontena OPVÜI phajae Moses echungo tsüngon jiang ji nchümchecho osi ontena engacho."Ombo kyon jiang yolo esopvüi jiang jümangina shanchowo OPVÜI jijo enhüngajo kvülo vancho ato? Moses thüngi ombo mon epio OPVÜI jijo kvülo vancho ato? 12-13 Moses yakchia ombo etho tsüphov khi elhi tsüphov etssowo osi jümang ji mpato khosochei, hoji yakchia ombo kyon jiang ji jümang ejungu longina yakchi chiyitoki ombo myingthüng ji kümali litokvü tsükona hojito etssowo OPVÜI jijo kvülo vancho ato?" OPVÜI lanso ji yakchia ontena ora-kurü esüa chüngchünga nhyethecho osi kvüthüngha onte n shüphicho. 14 Mangsü tssiden jiang lizü hayilo sothechia to, OPVÜI na ombo kyon jiang esan picho. Ombona ombo kyon jiang socho osi ombo mying jilo yikrachi hansi yicho.
Khonzan Tona Nzanchi to Tsükona Randan
15 OPVÜI yo, potsüwoe na elo ezekata, nina ntho osi phfütsson lo evamo meta jilona. Nina e tsükona junga nchüma evamo jijo kvüla? Ni etho jo kvüla? Ni nzan osi khonzan jo kvüla? E tisinkia. 16 Nino e opo. E motsüi Abraham tona Jakob to najo e n cheka, tolea OPVÜI, nino e opo, ochona yuta topvülo eshanchoa osi oyam khelona e phanchoa yichosana ji ni. 17 Ntio tsükona nilan jiang lona esomoni siala? Ntio tsükona hetata lümbüm ekhüng ekümtoki ni thüngina tsani eyitukala. Ni benkao kyon jiang nzan tsükona tia kholana, osi yuta topvülo ni kyon tssoa erowo kyon jiang nzan tsükona tia e thüngi kholani yia OPVÜI. 18 Ni ntho kyon e shiji yuta tara tsükona e ri jiangna e phanchokchi sicho, osi ontena ni ntho kiji sümromoroe sicho. 19 Osi nina echunga tia e esapvüi n tssohancho esüa osi ena echunga tia ni kyon n tssohancho esüa etsütsacho.
1 Ntio tsükona Potsüo ji puksoe e thüngi n joroala? Phunglan jiang na ni hungi osi ekyu lona enhyukvü. 2 Omi poni na ojü elakato ontena enhyukphiv. Joroa osi ni etho ji ni ri jiang thüngi hungthuka osi jipo jiang ji ni vanhya lona enhyuktoka! 3 Nina joro ena n yilo jitüv elhi ekhenthao tssocho tüv yuta licho, hojithüng ji phunglan jiang na ni hungi ekyu lona enecho. 4 Kyon ochina ha ni esüa Potsow tüv n hunghan osi n zohan, ochoang na nilo longtsüa sana jiang tsükona elhi tsüphov tssoa. 5 Ochoang na elan ji etssov lo longshi licho sana jiang ji nina khichola, osi ochoangna nina kvüto vantukhungcho sana jiang nchümcheta sana jiang. Nina e thüngi ni lüm tsukcho, tokhatola ena mmen n tümjakna tssota vancho; osi ni lüm etsuk ji n khayina ena nkolona mmen tssota yitapvü. 6 E topvü mmen kyon tae, osi ena elhi mmhontsov khilato etsso jiang ha topvüto mmen etssakthav tae. E mmen jiang yakchia eyio limoro mmyikae mpung na vena eyio jiang esüa tüv ekümcho. 7 Ochina ha randana ni thüngi n kholancho; osi ochinaha ni thüngi nzanchi yana n rocho. E mmen jiang tsükona nina e lona mphoe sicho osi e sinkicho. 8 Tokhatola OPVÜI yo, nino e opo. Eyio chonphyalyu esüa tüv osi nino phfüjoe esüa tüv. Nina eliyingcho. 9 Hoji tsükona e thüngi tata tsükshia ni lüm ti-tsuka, mekana e mmen jiang nchüngkhonto rhümasi ti-vana. Eyio ni kyonden; ethüngi khonzan to tssoa. 10 Ni ntho yantsü jiang jo lijüng esüa tüv kümthaka; Jerusalem jiha roe sirhakthaka, 11 osi e ntho khümphen ki emüngyanthav kvülo shina e motsüi jiang na ni thüngtacho sana jiha omina rungi sithaka. Ena ejüpomo meta jiang topvü roe sithaka. 12 OPVÜI yo, shiang hetopvü shiang na ni n vwongkhyuake? Ntia e n tssoyina ena n tolea e ezüpthokvü sake OPVÜI?
Panlan Jiang Tsükona Potsow Thüngina Ezüp
1 OPVÜI na phyocho, "A kyon jiang randan jiang janlam tsükona methaka vancho, tokhatola ontena n randan. Onte khi a yanchetukvü tsükona ana methakcho khatola ontena a yanchev tsükona ekhyo n tsso. Jipo jina a thüngi n randan, ana jo yuta topvülo, 'Shilo a vanka; ana nte nzanchivka' to ezoa janlam tsükona methakcho. 2 Ana jo yuta topvülo a kyon ochoangna haruk lümbüm hansi onte etancho n lamo jitae tssota vanchosana jiang khichov tsükona methaka vancho. 3 Tokhatola ontena yikra n lina a lüm tsuktuka tae mungtacho. Ontena ntho phari jilona Potsow n tsi than jiang thantacho, Potsow n tsi jiang thanphensa jilona ntssantssütsse rungtacho. 4 Zümo lojo ontena longkvüi osi olüp jianglo echüi mon jiang thüngi ngatüng-ngarilo wotala. Osi ontena Potsow n tsi jiang than jiang lona okoso jiang tsota osi oso lona chiyio ojü jiang yutala. 5 Ontena heto vantasi thanpoe jiang thüngijo, 'Eiyo nthoka ntena jo e ti-vüngkatale' to ezotala. Hetüv elhijo ana n rümkhuk, osi onte pono a lüm etsuk ji kvüthüng ha mhei n siv esüa tssoala. 6 "Ntio ezüp ana nte pivsana ji methakthaka, osi nte ezüp epiv ji erankae vathaka. Ontena ntio elhi n mhom tssothakcho sana jiang ji to nanzhüi onte n siyi, tolea onte nlilam, 7 onte mmen osi onte motsüi jiang mmen tsükona. Ontena potsow n tsi khümphen phunglan jiang lona ntssantssütsse rungta, a nlan n mhon phyotacho. Hoji tsükona, ontena mmen tssoa yithako jiangna manthaküma ezüp onte piv." 8 OPVÜI jina phyoala, "Ochinaha jününgrothi mmhom jiang roe n siala, tolea hojiang khi tsüngthijü nsüngrüala. Hojito anaha a kyon jiang topvü jo roe n si, tolea ochoangna a benkata sana jiango ana shanchov. 9 Israel kyon ochoangjo Juda jipo sana jiango ana mmhayiv, osi onte tsoronichen jiangna a meta phunglan jiang khivka. Ana ethüngcheo kyon ochoang na a benkata sana jiangna hojilo vamvü. 10 Ontena a khümvü osi onte olyu osi tssiden jiang na engrhelamoe jo sharon hayi osi engchirolamoe jo ezüp hayitsü to jianglo yantsotokvü. 11 "Tokhatola nte ochoangna a sichosana, osi a ntho phunglan, Zion ji sinkicho sana, elani Gad tona Meni to potsow kvümoe oton eli osi mhadung mmhon potsow tssotoka khümtacho sana jiang tsükona jo echümpo tssov. 12 Nte mhadungjo ryusanga echüo ji tssov, ntiotssole ana nte tsathüng a n janlan osi ana nte thüngi nsanathüng a n ngayi. Ntena a jancho n zov ji ethüngi khicho osi n mhom tssocho. 13 Hoji tsükona ana nte ezoaka, ochoangna a khüma a yi engasana jiango etsoyu etsson livka, tokhatola nteno nte wonton-eratsüngu. Onteno emathav tokhatola nteno nte yikrathukvü. 14 Onteno longshi lona okhen dentav tolia nteno lümbüm pyonroa kyav. 15 Ana e thüngcheo kyon jiangna nte myingjo rhiyirandanka esüa tssotukvü. A, OPVÜI Sandamo shina nte chüthukvü. Tokhatola ochoangna a yi e engasana jiango ana myingthan piv. 16 Meta shilo kyon ochona mmha chonasana hojina longtsükao Potsow na mmhayile to chomvü. Ochona echüma sana jinaha longtsükao Potsow myingona echümvü. Yithako ezüp jiango moni mhechoe siyiv."
Soying Ethan
17 OPVÜI na phyoala, "Ana limha ethan osi potsüo ethan liyingala. Ntio tssoa yithakcho sana jiango mhecholangi siv. 18 Ana ntio liyinga sana jilo nchüngkhonto emathatava osi longshitava. Ana soyingo Jerusalem ethan jilojo emathana pyingcho tssov, osi hojilo evamo kyon jiango emathav. 19 Anaha Jerusalem ethan osi hojilo kyon jiang tsükona abobo ematha na apyingu. Hojilo jo ntia ekya n li, nzanchi eyamvü ha n li. 20 Ngaro jiangji nganirothüng najo n chü, osi a kyon topvüna onte echungo tajoa harishia vamü. Ochoangna nzyu nzoa vanthakana jiango nongori to khav. Hoji njamü echüo jiango ana ezüp picho to chekaphen tssov. 21-22 Kyon jiangna oki tssoe hojilo vamvü osi thanpoena jo hojiang n tsütsayi. Ontena jününgro chümi hojilona tssüngthijü chiyi yuv osi oyam na onte n yuyiche. Otssüng odung esüa a kyon jiang harishia vamü. Ontena ntio tssoasana jiang lona chiyio jiang topvü ontena tsoyua tsütsaphyav. 23 Ontena ntio elhi tssoasana jiang topvü benchev osi ochüm echev. Osi onte ngaro jiangna ntia ezüp etsi n tok. Ana onte mmhyiv osi onte tsoronichen jiangna onte mmhayiv. 24 Onte randan jiang n khathüngna lea ana onte randan jiang janlamü. 25 Ranfü tona olyu oro to jiang nzo tsotav; hingho jiangna ha mangsü esüa mavü tsov, osi nrü jiangha ekyuv n lio kümvü osi e n tssatso. Zion, a ntho phunglan jilo jo ntia ekyuv osi n mhom liv meka."
OPVÃœI na Jipo Jiang Oyi Tssoyiala
1 OPVÜI na phyoala, "Potsüo jijo a vantsü osi limha jijo ajo epyankaphen. Tona a tsükona nina ntio kvütüv ki a tssoyivla, osi ntio kvütüv vanphen a tssoyivla? 2 Limha mpüm shi totona ana liyingcho! Ochoangna eyingroa, osi lümbüm khophi akyuchia ayi enga sana jiang thüngi a emathatala. 3 "Kyon jiang na onte tssohung tssoala. Ontena mangsübung lüng thae othan tssolea kyon khi thanlea; onte tsükona jo kheti; ontena olyu khi thanlea, füro evüng erüpchaklea kheti, osi ontena otssok-omüm than pilea, wokoejen khi thanlea, kheti osi ontena ntssantssütsse khi thanlea mekana kisü thüngi randanlea onte tsükona jo kheti. Ontena etssakthav ekhümlanka jiang lo emathatala. 4 Hoji tsükona ana onte pono-ontena ntio ekyutso sana ji khi ezüp rwothukvü, ntiotssole ana onte tsathüng ontena a n janlan, osi ana onte janathüng a n gayi. Ontena ayi nngav ji ethüngi khicho osi n mhom etssov jito." 5 OPVÜI na ntio phyoa vancho sana hoji engatva, nte ochoang na ombo kyuchia ombo yi enga sana: "Ntiotssole nteno a lo longtsüka lia vancho, osi nte kyon ejoma na nte tssakcho osi nte thüngi ntia shentacho n li. Ontena nte yikvü-yiloa heto phyocho, 'OPVÜI khi ombo tsüpho ji nte hungthuka nte shanchotuka, tona ntena longshita ena nte hunguka.' Tokhatola hojito ephyo jiang onte yikratokvü! 6 Engatava! Yantsüi nshanlongta on, osi ekhümki owon tssoa evamo jiango OPVÜI na ombo ri jiang ezüp picho onka! 7 "A ntho yantsü jijo eloena ryusanga noa to n vana süngaro taena ngaro pukcho esüa tüv. 8 Ochona sana shi heto tssoa hungthakcho alo, mekana ana zothakcho alo? Jipo kvümoe sana enga taena jipo kümcho licho alo? Zion na lümato sunga ezüpa n vana jipo kümvüka. 9 Ana a kyon jiang kümchethuku mekana pukthuku yuta j anaha n pukchetokvü vamvü meka." to OPVÜI na phyothaka. 10 Jerusalem nzo longshitava; osi ompvü tsükona emathatava, Yantsü shi. nzana evan nte topvü na! Nte kvütata na Jerusalem tsükona nungra vancho sana, jiang topvü na enhungo ompvü nzo longshitava! 11 Ngaro na oyo shirojü pvülyua yua esüa, ntena ombo tssochyu-mochyu jiang tsophya-yuphavka. 12 OPVÜI na phyoala, "Ana sunga evamo jitüv tssochyu-mochyu nte piv; osi jipo jiang ejüeli ji nte thüngi n nghao zhükhvü esüa tsüa yiv. Nteno oyo na ngaro ji ompvü khena ejümsi, nzana zeyata, süphilümbümo ji esüa tüv tssovka. 13 Oyona kvüto ngaro ji ejichoa lümbüm emiyia sana ji esüa ana Jerusalem lona lümbüm nte emiyiv. 14 Ntena kvüthüng shiang shi tssoa hunga sana nte emathav; osi hojina nteji otsük mhona etho jüa nte kümvü. Tona ntena aiyo OPVÜI ji osi ochoang na ayi enga sana jiang nzanchiala osi ari jiang thüngi jo a lümbüm etsuk ji ejüala toji ntsiv." 15 OPVÜI na omi theta rov. Ombona tsungryu echolo khokthei khi ombona lümbüm tsuka evamo jiang ezüp piv tsükona rov. 16 Limha shilo kyon ochoang ombona nlan to yancheyia sana jiang topvü ombona omi tona yonri to khi ezüpthokvü, osi onte yulo elümotojo echüha chüthokvü. 17 OPVÜI na phyoala, "kyon ochoang na Potsow n tsi jiang ekhümlan lona epyochei elhi tssoa sana osi ochoang na ntho phari jilo etüngi owo okoso osi zhüroso tsota elani etssakthav etsoyu thanpo jiang tsotacho sana jiang tsükona jo ochüm ji tsathaka. 18 Ana onte nchümri osi onte elhi jiang ji ntsia. Ana jipolan topvü kyon jiang tsarhyuv tsükona tsathaka, osi ontena kvüthüng nzo sanrhyuta sana tothüngti a etho jina ntio tssokhukcho sana ji hunguka, 19 osi ezüp ote pia evamo jijo ana ka toji ntsiv. "Tokhatola onte yulo ejoma jo ana enhyolanchi vasi onteno jipo osi meta kvülona a etho, a myingthüng osi a tsüpho ji n zohan cho sana osi n hunghan sana jiang topvülo wothukvü. Meta shiang lo esüa, Spain, Libya, osi Lydea osi jianglo lotssi benthi jiang, elani Tubal osi Greece tolo. Jipo shiang yulo na a tsüpho ji thenchoa phyov. 20 Ontena meta shiang topvü lona nte meta kyon jiang ji a thüngi yantso esüa sosi yirav. Onte ji a ntho phunglan Jerusalem jilo kurü mankvüi na, odh mankvüi osi kurü zotoro osi elani nzontsü hanphiphen zotoro to jiang lona sosi yirav, kvüto Isreal jiang na onte otssuk-omüm than jiang shikhfü ephanina epyochecho loksa lona hansi ro jiang esüa tssov. 21 Onte yulo ejomajo ana pvüti osi Pvüti nzanchi to tssotokvü. 22 "Kvüto limha ethan osi potsüo ethan jiang ji a etho jina sayasi vana sana ji esüa nte mying tona nte tsoronichen to jiangha lia vamvü. 23 Chothan tokhu osi esanmung topvülo jipolan topvü kyon jiang na Jerusalem shilo na a khümo rov, to OPVÜI na phyoala. 24 "Osi ontena elani yiana ochoang na a panlancho sana jiang echümüng hunga yiv. Osi kangkangu na onte tsoa evamo jiang to jo kvüthüng ha n chü, osi omina onte runga evamo jiang kvüthüngha n mhe. Onte echümüng jiang jo jipo kyon topvü tsükona etssakthav tssov."
1 Kako shilo ejüo jiango Benjamin meta chungi Anathoth yanro jilo pvüti jiang yulo tsüka Hilkiah ji tsoe Jeremiah na ntio phyocho sana jiang eranrhyucho. 2 Amon tsoe Josiah na Juda lo mesao tssosi nzyu taro ethümo to jilo OPVÜI na Jeremiah thüngi heto jancho, 3 elani Josiah tsoe Jehoiakim na mesao tssoathüngha OPVÜI na Jeremiah thüngi janlancho. Hoji sülojo yuta elümoto lo Josiah tsoe Zedekiah na ekhüng sasi nzyu taro ekha n benthüng nandang jo OPVÜI na Jeremiah thüngi jantamongcho. Hoji nzyu choro mongo tolo Jerusalem kyon jiang ji morantsan ekümo sosi yicho.
Jeremiah Etsaoji
4 OPVÜI na a thüngi a ezocho, 5 "Oshangina ni n soyingthüng vüngina ana ni tsacho, osi ni n pukthüng vüngina jipo jiang thüngi zenkhying etssov ana ni ethüngchecho." 6 Ana janlancho, "Sandamo OPVÜI yo, ana kvüto nsamvü sana n tsi; osi ayio a nungokhüng hana." 7 Tokhatola OPVÜI na a ezocho, "Ni nungokhünga toji ti-phyoa, tolea ana ni wothuko kyon jiang thüngi woa, osi ana ntio kvütata ephyov yidan ni picho sana jiang topvü ezoa. 8 Onte tikyukhe, ntiotssole ni nkohav tsükona ana ni ndüngo theta vamvüka. A, OPVÜI, shina phyothaka!" 9 Hoji sülojo OPVÜI na Ombo khe ji rüchia, a menfü lo atssyukayicho, osi azocho, "Enga, nina ntio yi phyov sana jiang ana ni piaka. 10 Jipo osi ekhüngyan jiang sükav osi süjov, roe esiv, khi esiv, tssochov osi chümkachiv topvü ethoji nchüng ana ni piala."
Chekav Eni Jiang
11 OPVÜI na a engacho, "Jeremiah, nina ntio hungala?" Tole ana janlancho, "Almond-dungo na khero hungala" 12 "Nina elana phyothaka," to OPVÜI na phyocho, "osi ana ayi ji ephan etssov ji cheta vancho." 13 Tole OPVÜI na elani a janlancho, osi "Thanpojo ntio hungala?" to engalancho. Tole ana heto janlancho, "Khümkiwoe ophfü motsünga lona ojü elaka ana hungala, osi hoji olan hepiwoe phyangchochivsala." 14 Ombona a thüngi a ezocho, "Roe esiv ji khümkiwoena poksochiv osi meta shilo evamo shiang topvü roe siv, 15 ntiotssole khümkiwoe jipo jiang topvü rotale to ana tsala. Onte mesao jiangna Jerusalem kibüng osi pikhfü jiang nkona, elani Juda yantsü jiang nkona onte vanphen tssokachiv sala. 16 Ana a kyon jiang ezüp piv, ntiotssole a kyon jiang na mmen tssotacho osi ontena a sisi kisü nsüngrüi jiang khümta osi potsow thanpo jiang thüngi othan pita to tssocho. 17 Hojitsükona Jeremiah, methaka osi ana ntio yizüng ni pia sana jiang topvü owo ezoa, Enhungo onte ti-kyukhe, to mek chojo nina onte ndüngo woana ana kyongkata ni kyuthukuka. 18-19 Enga, Jeremiah! meta shilo evan otsük akvü na osi Juda lo mesao jiang, tsüphoeden, pvütiden, osi kyon jiang topvü na nlan ni pia ni panlamka. Tokhatola hojiang zalanchikoku tsükona ana nchüng etho ni piala; nino mmhona epichaki vacho yantsü esüa tüv tssovka, osi yonjak turhyu, pyontsü yonjak pikhfü esüa tssov. Ontena ni khyov meka, ntiotssole ni nkohav tsükona ana ni ndüngo vamvü. Hojito A, OPVÜI shina phyothaka."
Potsow na Israel Jiang Sheküpcho.
1 OPVÜI jina yithen shi 2 Jerusalem topvü lo thenchoa phyole to a ezocho. "Ni nongothüng jo nino kvüta longtsüka eli tssoa vancho sana ji ana nchümcheta, Enina yanpiyanthan tssopanthüng jo nina kvütata a nzancho ato. Lijüng jiang lo mpato nina aphana rocho, osi mojü n thehamo meta jianglo rocho. 3 Israel, nino a echi tae, Nino a ntho ejüeli esüa tssocho. Ochoang na ni tssatssocho sana jiang topvü pono ana ezüp osi roe esio ji rotukcho. Hojito A, OPVÜI na shiang phyothka."
Israel Motsüi Jiang Mmen
4 OPVÜI yithen heto engatva, nte Jakob tsoronichenden, osi Israel jipoden. 5 OPVÜI na heto phyoala: "Nte motsüi jiang na epono ntio nlan khi e shakachola? Ntio tsükona ontena a thüngina tsani yichola? Ethev n lio kisü jiang ontena khümtacho, osi ontepopo ethev n lio kyonden kümtacho. 6 Ontena a nzana n ehüm, ana Ejip khelona onte nrhachoe yingsiyinglo meta yakchia onte socho; Lijüng osi hajang meta likying osi ekyuthav meta ochinaha n vamo, osi ochinaha n yentsahamo lan jiang yakchia onte sochukcho. 7 Ana meta lizü tüv lo onte sothechicho, hoji lona tssukromumroa osi mmhom lantaro, jiang onte tsoyutoku tsükona. Tole ji thung jo ontena a meta ji roe sicho; osi ana onte epio meta ji mmentuki sitacho. 8 Pvüti jiang tina, 'OPVÜI jo kvülo vanchoto?' totia nnga. A pvüti jiang na a n tsiv sicho. Esapvüi jiang jina a panlancho; osi zenkhying jiang naha Baal myingona zenkhyingta, ethelan n lio potsow jiang khümtacho. Pono Ephyov Elioji
OPVÃœI na Ombo Kyon Jiang
9 "Hoji tsükona A, OPVÜI, shina a kyon jiang pono nlan epiv elio jiang phyov. Onte tsoronichen jiang pono ana onte nlan jiang hanchokchiv. 10 Engrhelamoe Cypres jüyi jilo woa, osi ochosana engkhfüwoe Kedar meta lo rotuka. Tona echungatia n tssophen jitüv tssoa nina hunguka. 11 Jipo ochinaha onte potsow jiang ntongphihan; Onteji otsotso potso meka mpa sailea. Tokhatola akyon jiang na Potsow ochona onte pono myingthüng picho sana ji potsow ethev n lio jiang khi a tongchethaka. 12 Hoji tsükona Potsüo ji ekyuthav lyui enhyokle to ana yidan piala; Onte ekhena ngangchetuku tsükona 13 Ntiotssole akyon jiang na mmen lan eni heto shiang tssocho: Ontena a thüngina nkae yi sithaka, ekümjü ethan bukphen jilona, osi ontena ' jüjen shanthaka, osi hojijo ojü n vancheo jüjen ekük.
Israel Jiang na Phephio ji Jokheman
14 "Israel jo ezii mek; Ombo ezii ekümo rheyiv tsükona pokcho mek. To tssona ntio tsükona ombo ri jiangna ombo phanala? 15 Ontena hingho esüa ombo erhyukathaka; Ontena ombo meta ji lijüng kümthukthaka; osi ombo yantsü jiang roe khi sirhaki ekachi sithaka. 16 Ho, Memphis tona Tahphanehes to kyon jiangna kvüri ji ombo küngsoyithaka. 17 Israel, ezüp shijo nipopo hansi yichoka! Nina a sinkicho, ni OPVÜI Potsow ji, Ana olan ni soa vanyalona. 18 Ntena Ejip lo kholani oyi Nile zhükhfü ji jü yulan na nte tsükona ntio oman licho to nchümtala? Ntena Assyria lo kholani owo Euphrates zhhfü jüji yulan na tssona nte tsükona ntio oman liv to nchümtala? 19 Nte nmhon jina nte ezüpthukvü ka, osi ntena a thüngina tsani eyio jina nlan nte pivka. Hoji jo nkvütata khoa nmhoncho sana, ji ntena ntsivka. Ntena OPVÜI Potsow a sinkio ji, osi alo longtsüka n lina evamo man ji; A, Sandamo OPVÜI jina phyothaka."
Isreal na OPVÜI Ekhümvü Ekhiranala
20 "OPVÜI sandamo jina phyoala, Israel, nkolo na nina a etho ji n khichocho; Nina ajancho ezov osi a khümvü ekhirancho. Phunglan ntsom jiang topvü lona osi odung mmyaku khümcho akvü lona ntena Pvüronsyu jiang khümtacho. 21 Mojü mmhontso jiang yulona ana Jününgrothi dung esüa ana ethüngche chümi ni vacho. Tokhatola zeta ntio ni kümthakcho sana? Nino ethev n lio jününgrozhü ekyon ni kümthaka. 22 Nina küma shaphon orhüm ntsantso jina mpa etssüi silea Nte nlan lümbüm jijo ana nte hungiv. 23 Ntena kvütoli ntepopo n menhan osi Baal potsow ji kvüthüngha n khümhan to phyokhukchola? Zetava, ntena hayitsü ji lona kvüto mmen tssotacho sana, osi ntena ntio mmen tssothakcho sana ji zetava. Nteno odh okyuro erüng yutalo etancho vachi, 24 lijüngoe yunga yia vancho esüa tüv. Ompvü erüng yutalo ochona ompvü sayakukchola? Onpvüna jüpona evamo obung jina ombobo sanga eyamvü n li; erüng yuta lojo ompvü na yana yiv. 25 Israel ni jo ezüpa ti-rümphia, mekana thanpo potso jiang yana, ni ekhyi kyingkata ti-yungphia. Tokhatola nina phyoala, meka ana n kholanche; Ana metapoe potsow jiang nzanthaka, hoji tsükona onte phan-nrhüvka!"
Israel ji Ezüp Epiv Etümthata
26 OPVÜI na phyoala, "Kvüto efüi ji kvüthüng rhümata sana yikrathuko ji esüa, nte Israel kyon jiang, mesao tssolea, tsüphoeden tssolea, Pvütiden tssolea, osi zenkhyingden tssolea topvü nte yikratokvü. 27 Nte kvütata na otssüng odung jiang nte opo tssota; osi longpvü jiang nte oyo tssota vancho sana jiang nte topvü nte yikratuka. Hetoji tssochevka, ntiotssole ntena a thüngi kholan thungjo athüngina nlüpi yicho. Tosi nte ezüpa na oro nte nzanchia nte shanchole to a tsaphitala. 28 "Ntena nte tsükona potsoden nsüngrütao jiango kvüang ato? Nte ezüpa na onte khi nte shanchotoka-kha ontena tssochena! Juda ni yantsü kvüta licho sana jitata nina potsow vana. 29 Ntena ephyov elio jijo ntiola? Ntio tsükona ntena a palantachola? 30 Ana ezüp nte picho, tokhatola jinaha jitüv mmhom tssocheta tüv n li; ntena ana nte elanchoyicho nte n choka; Hingho ntav esüa ntena nte zenkhying jiang lüngthacho. 31 Isreal kyonden, ana ntio phyoa sana hoji engatava. Nte tsükona jo ayio lijüng esüa tssocho alo, toalo liko emüngu osi ekyuthav tssothakchola? To tssona nteno ntio tsükona a thüngi kholani nyina nte etancho nte tssohung tssov to phyoala? 32 Loroe jina onpvü oyok-osen jiang mhechoa alo, toalo yanpiwoe jina ompvü yanpiyanthan pipo ji mhechoala? Tokhatola akyon jiang na tsüngon n khacheo tata a mhechoe sithaka. 33 Nte yinga loroe jiang phanphivjo nteha mmhona ntsia, eloe n mhontso jiang na mpa nte thüngina lanka ntsi khikuka tüv. 34 Nte mpensü jiango yantsae tona nlan n lio jiang to ejen na tümzhükhancho, osi efüfae retsoe jiang ejen najo mek."Tokhatola shiang hetüv pono mpa, 35 ntena phyoala, eyio mmen ntian li küma enhungo OPVÜI na epono lüm ntsuknrüng. Tokhatola A, OPVÜI shina ezüp ni pivka, ntiotssole nina nilo ntia nlan n li to ekhiramo ji tsükona. 36 Ntena thanpo potsow khümta yi-esio ji yakchia nte popo jipopoe jiang thüngina polakata nte kümthaka. Assyria na nte etho jakthuko ji esüa, Ejip kyon jiang naha nte etho jakthukuka. 37 Ntena yikra lona nte kvüri jiang nkhümthei hansi Ejip thüngina tsani yiv; ntena longtsükao jiang A OPVÜI na khoe sithaka, ntena onte thüngi na ntia oman hungi khiv meka."
Longtsüka N li Israel
1 OPVÜI na phyoala, "Eboe tsükana ombo engh ji sichile, hojina ombo sisi oyi thanpoe engh kümlana tssona, ombona elani ompvü n khilanche. Khilana tssona metaji mmen-nrüngi siv. Tokhatola, Israel, nina ni yingaloroe elüm eküma vana yithaka, : osi enhüngati a. thüngi ni kholanhungala! 2 Phunglan kvüri jianglo zekachia. Nina phunglan jiang yulo kvülona sanatia lonsülonphyo elhi n tssohan cho licho alo? Kvüto Arab jiang na ontena mmen tssoyiv evamo jiangji lijüngina züma vana sana ji esüa ninaha lantsaena ni yingaloroe jiang nhyakcho. Ni lonsülonphyo elhi jiang na meta shi mmenthaka. 3 Hoji tsükona eryu ejov ji mpa tssünglancho, osi tsüngkying eryu ji njov sicho:'Lonsülonphyoe esüa mpa ni zechelea ni nyikrala. 4 Osi enhungo nina "Nino apo ka, a ngarothüngna nina anzana ropvüka to phyoala. 5 Elani nina yuta topvü lojo a thüngi ni lüm tsuku meka, osi athüngi nilüm n tssov nchümvü meka to nina phyoala; Tokhatola Israel, nina mmen jiang ni etonandang tssothaka."
Israel tona Juda tona Khophinrüngu Lia
6 Josiah na kvüthüng mesao tssoa vancho sana jithüng OPVÜI na heto a thüngi a ezocho."Eloe Israel, longtsüka n li jina ntio tssothakcho sana ji ninaha hungthakcho alo? Ompvü na athüngina nlüpi yithaka osi phunglan ntssoni osi odung khümcho topvü lona ombona lonsülonphyoe esüa etsso-ephyothaka. 7 Osi shiang hetopvü tssothakcho sülojo ompvü na athüngi kholamvü tssovka to anajo nchüma vancho. Tokhatola ompvü na a thüngi n kholan osi ompvü oyenio n thae Juda naha hojiang topvü hunga. 8 Israel ji ompvüna a thüngina tsani yisi lonsülonphyo elhi tssoa ekyao jina ana sichi yithuki esio jiha Juda na hunga. Tokhatola Israel oyeni n thae Juda jinaha n kyu. Hoji tsükona ompvüha lonsülonphyoe kümcho, 9 toaha ompvü n yikra, ompvüna meta shi mmenthaka, ompvü na otssüng-olung ekhümo ji yakchia efürama elhi tssocho. 10 Shiang hetopvü ji tssocho sülo Isreal oyeni Juda na athüngi kholancho esüa etso-ephyocho khatola otsotso khophicho mek to A, OPVÜI shina phyothaka." 11 Hoji sülojo OPVÜI na a ezolancho, Israel na ombo thüngina tsani yicho khatola ompvüo Juda lona n mmhonka to ompvüpopo ejüthaka. 12 Ombona heto Isreal thüngi owo ezole to a ezocho. (N thae Isreal athüngi kholana, ayio nzan eli-i küma nipono lüm n tsuklanla; osi enhungo eküm echunglea ni thüngi a 1 üm n tsuklanla. 13 Nina ni OPVÜI Potsow thüngi panlancho, osi hoji yakchia nlan lithaka totae phyoa. Odung mmyakvü lio jiang khümcho topvü lona nina metapoe potsow jiang thüngi ni nzanchi pithaka, osi nina ayizüng jiang n ngacho toji phyochaka, to A, OPVÜI shina phyothaka. 14 "Longtsüka n li kyonden, athüngi kholantava, nteno a echika. Ana nte yantsü jiang lona tsük tsük khichei, nna nte khümtsüng akvü lona otsük enini khyoche toli ana Zion phunglani nte sosi wovka. 15 Ana oyi engae tüv esopvüi nte pivka, osi hojiang na nchümjan zijan lia osi engathe khi nte savka. 16 Osi nteji kvüthüng hoji meta jilona n khacheo tata wokyonga nte küma sana kyon na ntsata Bakos ji tsükona ntia n phyov siv. Ontena hoji tsükona ntia n ehüm mekana n chümchev siv; ntiotssole hoji ethev n liv siv osi hoji n süngrülan. 17 Kvüthüng hoji yuta ji yiasana Jerusalem jo 'OPVÜI Vantsü,' to tsavka, osi jipo topvüna hojilo sanrhyue akhümtavka. Onte mmen lümbüm osi onte lümbüm ekhüng jina ntio onte ezoa sana ji ephan n tssolan. 18 Isreal naha Juda nzo tssov osi onte nzo tssoe khümkiwoe tsanthan eküm vanta evamo jiang lona kholani khi meta kvülo shi ana nte motsüi jiang thüngi nchüngkhon to vanjünga evamvü picho sana jilo yiravka."
Potsow Kyon Jiang Kisü Ekhüm ji
19 OPVÜI na phyoala; "Israel, ana a tsoe esüa ni khichohungcho; osi meta mmhom jangzav tüv, limha shilo meta mmhontso ji ni a pihungcho. Ni khi apo to ni a tsathukhungcho; osi kvüthüngha a thüngina nlüpi n yio tssoa. 20 Tokhatola nina longtsüka n li tsoeni esüa, nina a thüngi etsoeph yothaka. Hojito A, OPVÜI shina phyothaka." 21 Phunglan kvüri jiang lona heto owon motsünga zocho: Hojijo Isreal kyon jiang na kya jonjiala, ntiotssole ontena mmen ekümo vanthaka, Osi onte OPVÜI Potsow ji mhechothaka. 22 Kholantava, nte kvütata na OPVÜI thüngi na tsani yicho sana jiang topvüna; Ombona nte emiyiv osi longtsüka eli nte kümtokvü. Ntena phyotala, "Ho, ena OPVÜI thüngi tsathaka, ntiotssole ombo e Potsow ji. 23 Ena potsow n tsi potsow jiang phunglani na khümtao jiang na ntiha e n zanchinrüng, Isreal jiang tsükona nzan osi ekyu-erung ji OPVÜI Potsow thüngi na tae yiala. 24 Tokhatola ena Baal potso, Yikra potso, jiang ekhümo ji yakchia eji n rhükiyae tssiden tsanrocho esüa mekana n thajan tsokhying tsoloden esüa ekümthaka; osi e motsüi jiang na nkolo na sanga tssota ero jiang ji moni sithaka. 25 Yikra lona ena likoe erichiv shikhfü, osi yikra ji khi e eyuktuka. E tona e motsüi jiang tona yuta topvü tolo OPVÜI Potsow yaka nlan mmen tssota rothaka; ena kvüthüng ha ombo yizüng jiang engacho n lihan."
Lümbüm Khophiv Tsükona Tsala
1 OPVÜI na phyoala, "Israel kyon den, ntena nte kholan hunga tssoan, tona a thüngi kholantava. Ana a tssako kisü jiang khi sisi ntena a lo longtsükata tssona, 2 ntena a myingona echümvü ji nte elan tssovka. Hojito tssona jipo topvüna onte mmhayile to a ezov osi ontena a mying thüngtav." 3 OPVÜI na Jerusalem tona Juda to kyon jiang thüngi ezoala, "Nte li n rhonhamvü elio jiang rhontava; nte mojü jiang okyu yulo ti-ventava. 4 Nte OPVÜI a thüngi ntsata vatava, osi a thüngi khochaktava, nte Juda osi Jerusalem kyonden. Ntena hojito n tssona ntena mmen tssothako jina alümbüm etsuk ji omi esüa kivka. Hojina rungu osi ochinaha hoji n panmheche."
Juda ji Phonkav Tsükona Ekyu Yivon Zothukala
5 Meta topvü lona jungken mhükachia! Chakcheta osi ntssünga tüngkachia! Jerusalem tona Juda tolo evamo kyon jiang ji, yantsü pikhfü chungi rheyitukle to ezoa. 6 Zion lo eyilan ji etssyuchia! Tsanchov tsükona yunga! Sülana ti-vana! OPVÜI na khümkiwoe na roe esio osi tssorophyoro hansi tsathaka. 7 Hingho na ombo mpho vanpheni na chiyia esüa roe esiv jipo jiang ji khochithaka. Ombona Juda roe esiv tsükona tsathaka. Juda yantsü jiang ji roe ekachi siv, Osi kyon ochinaha jiang lo n vanlan. 8 Hoji tsükona postasü mpentasi erhyua kyatava, ntiotssole OPVÜI lüm etsyu ji Juda lona kholani n yihan. 9 OPVÜI na phyocho, "Hoji tsüngono jo mesoa osi tsüphoeden jiang lümbüm etsson ji moni siv; Pvüti jiang ha ekhenrhükvü, osi zenkhying jiangha ngangcheta emkhotsüngu." 10 Hoji tsükona ana phyocho, "Sandamo OPVÜI, nina Jerusalem kyon jiang ejithechilangnrüngthaka! Noying livka to nina phyocho, tole enhünga jo onte evüngo yonrina etsikae lia." 11 Lijüngoe na mpung ekhov onte thüngoe vena tsaka to Jerusalem kyon jiang thüngi ezov yuta tsata. Hoji mpung jijo enyiproa veni tssukzhü jiang vena eyio tüv tssov meka, tolea 12 OPVÜI yizüng ephanina vena etsao mpung jijo elümoto ntssana jitüv! OPVÜI jina ombobo ombo kyon jiang pono yitsso phyochiala.
Juda jo Orina Hazhüthaka
13 Zeta, ori jina eluk emhenjü rüma to tsata, ombo ritso zotoro jiango mbung erio ji esüa tüv. Osi ombo kurü jiango mungshiro lona ekhyingka. Eteno emonthaka! Osi eteno echüv esekathaka! 14 O Jerusalem, ni lümbümi mmen jiang etssüi sia, to tssona ni shanchov mpa tssovka. Nina yuta kvütenhyaka mmen nchümri hansi vamvüla? 15 Dan yantsü tona Ephraim phunglan to jiang lona yithenpvüi ero jiangna yithen n mhom tüngsochiala. 16 Ontena Jerusalem thüngi tona meta ekoni elio jiang thüngito ori jiang tsathaka to ntak-nshonyi ezov tsükona rocho. Ori shiangna Juda yantsü pono ndakav, 17 osi kyon na oli nkhakyae vana esüa Jerusalem ji hazhüv, ntiotssole ompvü kyon jiang na OPVÜI panlanthaka. Hojito OPVÜI na phyothaka. 18 Juda, ni elhi osi ni vanlanyilan jiang yakchia nipopo nipono shiang shi hansi yicho. Ni mmen jiang na ezüp shi hansi yicho osi hojina ni lümbümo ni ekhyipthechiyithaka.
Ombo Kyon Jiang Tsükona Jeremiah Ethojak Nungra
19 Oh ezüp eno! Eno shi ana n rümkhokalo ! Oh alümbüm! A lümbüm shi heto thuktuka-kalo! Ana yingto n vanche; Ana tatara won jiang zoala; osi ritsowon jiangha to. 20 Ezüp motsünga sülo motsünga to yiala, Osi meta mpüm shi roe sithaka. Esüngaro taena e süki jiang ha roe sithaka, osi zonchaksü jiangha nthyuroe sithaka. 21 Ana kvütenhyaka ritssota shi hunga vamvüla osi tatara won eno eshozhüa ekhüo ji zoa vamvüla? 22 OPVÜI jina phyoala, "Akyon jiango zhüvaeden; Ontena a n tsi. Onteno nongori zhüveden tüv; Onteno engathe ntia n li. Onteno n mhom elhi etssovlo tssothio ji tae; tokhatola ntiojo mmhom sana jijo n tsothi."
Roe Esiv Etsao Ji Jeremiah na Hungchicho
23 Ana limha jilo zekalchoji jo apho among ekachi licho; Osi potsüwoeha ntia ondang n li. 24 Tokatola ana phunglan jianglo zekale, onteji enhyuka vancho, osi yingsüng jiang ha hepi hepi to jephia vancho. 25 Ana kyon ochia vana n hung; osi woro jiang mpana pyakhana yithaka. 26 Lizü jiang ha lijüng kümkhanthaka; hojilo yantsü jiang ha roe sithaka, OPVÜI lümbüm etsuk tsükshi ji yakchia. 27 (Limha shi mpüm na romhon kümi siv to OPVÜI na phyothaka; tokhatola ombona mpümna jo roe khi nsi.) 28 Limha jina etho jaka nungrav, osi oyak jiha müngi siv. OPVÜI na phyothaka osi ombo lümbüm n khophilan. Ombona ntio etssov sana ji methakthaka, osi ombona hoji n kilan. 29 Kurü rasan osi lotsi eben kyon jiang won zochona otsük akvüna tsankham. Ejoma jo ora yana tsamvü, osi ochoang sanajo olungo nrikata tsamvü; toli yantsü topvü sirhaki siv, osi ochinaha hojianglo n vanlan. 30 Jerusalem, nino nimontoku zenkathaka! Ntio tsükona nino sürakiv pipoala? Ntio tsükona nino oyok-osen ekasi ni mhyik jiang nzüzhüi hanala? Ejüngjüngo na nipopo opyon mmhontokvü nsüngrüala. Ni yinga khyingroe jinaha khoe ni sithaka; osi ni lüngthav nchümala. 31 Eloena ngaro evamvü noathüng esüa kya, ana zocho, osi otsoe ovüngoji vanathüng esüa erona zocho. Hojijo Jerusalem na ethük tia n chenjam kyacho on; Ompvü khe ji ntichi bensi "Ayio a montokvü methakthaka to phyoala! ontena alüngthalo tsathaka!"
Jerusalem Mmen
1 Jerusalem kyonden, nte lantsü jiang yakchia tsantava! Eyingoe zetava! ntepopo ha zetava! Shishophen meta jiang engophi zetava! Ntena kyon tsüka tina elan jo ntio sana ji tssoa osi Potsolo longtsükaroa tüv yanchevalo? Ntena yanchena, OPVÜI na Jerusalem ji nlan siyiv. 2 Ntena küma OPVÜI khümala to mpa phyolea, ntena ntio phyoa sana ji ephan n tsso. 3 OPVÜI najo otsotso longtsükaroe yanala. Ombona ni tümphicho, khatola nina hojitia n tssayi. Ombona ni nnuk-rocho, khatola nina ntsi ni n khihung. Nteno lümbüm ekhüngden, osi nte mmen jiang lona nte n khophihungden. 4 Hoji tsükona ana nchümcho, "shiango yantsae osi ntia n tsiden tae to. Ontena zhüvae esüa etso-ephyola; Onte Potsow na ntio ethev licho sana ji ontena n tsi, Osi OPVÜI na ntio onte tssotuk hunga sana jiha ontena n tsi. 5 Ana kyon jiang thüngi etho lona ov, osi onte thüngi thyutav. Potsow na ethev elio ji ontena ntsinrüngu, osi OPVÜI na ntio onte tssothukhunga vancho sana ji. Tokhatola onte topvü na OPVÜI etho ji khoe sithaka, osi omboyi engav ji n tssohungala. 6 Hoji tsükona orae evamo hingho jiangna onte rümvü; osi lijüngi evamo ranfü jiang na lümchak küma onte rüngrov. Osi khvüzhü mmhorü jiang na onte yantsü jiang yakchia rümphiv. Hojianglo kyon jiangna hapoe chiwoana, onte rüngrov, ntiotssole onte mmen jiang ji nkhacheo, osi nsan nsamu ontena OPVÜI thüngina n lüpi yithaka. 7 OPVÜI na phyocho, "Ntio tsükona ana kyon jiang mmen siyivla? Ontena khoe a sithaka osi potsow tsotso meko jiang ontena khümtacho. A kyon jiang ji onte n mmhithüng nandnang jo onte süphicho, tokhatola ontena efürama tssocho, osi lonsülonphoyoe thüngi na onte yuta jiang ezikhancho. 8 Onteno kurü obung philangi erüngna pyingi onte otsük akvüna onte phinakishüm engh jiang jüponia vancho esüa tüv. 9 Shiang shi tsükona ana ezüp onte n pivke? osi jipo shi esüa tüv pono n lilamke? 10 Ana ori rothuka a kyon jiang jününgroli jiang roe siyitokvü, tokhatola topvüto jo rokhani n siyi. khero jiang ekhüpi khiyile to ana onte ezov; ntiotssole khero jiango a echi mek. 11 Israel kyon jiang tona Juda kyon to jiangna a sisi tsannrüngthaka. A OPVÜI shina hojito phyothaka."
OPVÃœI na Israel Khoe Siala
12 OPVÜI kyon jiang na ombo n khichocho osi heto phyotacho; "Ombona otsotso jo ntia etssoyiv mek. Etena ezüp yuta ntia nduku mek, osi ritso mekana otsi vara jitüv ntia nduku meka." 1314 Elani ontena zenkhying jiango pvüjüngkha ontena OPVÜI thüngina ntia yithen n lika toha phyoyitacho. Hoji tsükona Thotsü OPVÜI Potsow na heto ezocho, "Jeremiah, kyon shiangna hetüv khensan yisanthaka küma ana a yiji ni büngi omi esüa kümthokuka, osi kyon jiang ji otssüng esüa kümthuki omi jina rungi sitokvüka." 15 Israel kyonden, OPVÜI na meta ekonina jipo motsünga sosi ni halo tsathaka; hoji jipo jijo jipo ehen osi etho ejüi, osi ntena oyi n tsiyio tüv jipo. 16 Onte yulo lotsi eben rasan jiango etho eli osi ntia oyam nzana n vana lüngthae esiden. 17 Nte benro-niro osi etsoyu jiang ha ontena njaki nte siyiv, osi ontena nte tsokhying tsolo jiangha lüngthav. Ontena nte ekümrümo nte tssiden jiang topvü lüngtharüpi nte siyiv osi nte jününgroli osi nte züvodung jiang topvü rorüpi nte siyiv. Ntena yantsü ji pikhfüi vasi ntia tssov meka to longtsükata evamo jiha onte rasan na roe siv. 18 OPVÜI na phyoala, "Hetüv tsüngono mpa tssolea ana akyon jiang topvü jo rokhani n si; 19 osi ontena ntio tsükona ana shiang shi heto tssoala to engana, heto ezoa Jeremiah, ontena kvüto a thüngi na nlüpi oyi metapoe potsow jiang onte meta lona khümtacho sana ji esüa, onte meta meko tüv lona oyi amoatsi jiang benkav ka to ezoa."
Potsow na Ombo Kyon Jiang Thüngi Ekyu Yivon Piala
20 OPVÜI na phyoala, "Jakob tsoronichen jiang tona Juda kyon jiang to thüngi heto ezoa, 21 nteno zhüvae osi eyimden, ana ntio nte ezoa sana ji tüngochünga enagatava, nte ochoang eno mpata khatola n zocho sana osi omhyik mpata ha n hunga sana jiangna. 22 Ayio OPVÜI ji tona ntio tsükona a nkyutala? Ntio tsükona a mhadungo na nte n netala? Ana hajang jiang ji jümangi erü etssov vacho; yakchi n yicheo nchüngkhon tsükona erü. Jümang ji evakphikhuka tolea hoji pankae n chiwoche; tsyungryu na echhyua evakphikuka tolia hoji na n jerhüpche. 23 Tokhatola nte kyon shiango haruka osi khirankhiri kyonden, ntena a sisi nlüpi yithaka. 24 Ana etssük eryu osi tsüngkying eryu jothuki nzyu ebento mmhona nte etsilirituklea a yikrachiv jo n chümta ntsa. 25 Jithüngi najo nte mmen shiang yakchia elhi mmhom shiang mpato ntepopo valanchikhani sithaka. 26 "Kyon nmhon jiang na a kyon jiang yulo vanala, osi woro erüm na kvüto ngozonphen zoni vasi nhyaka sana ji esüa erichei onte nhyakavükav 27 Woro rümo evoe jiang na kvüto woro jiang vüngpheni rümtheta sana ji esüa onte ki jiang oyam echi rechocho tsütsailan na pyingthaka. Hoji yakchia onteno etho jüa ejüeli tssocho. 28 Onteno ntio tsükona beleta philangcho to tssochola? Ontena n-mhom etssov ji ntia n kyimcho osi hoji ochüm n li. Ontena opvü-opo n van jiang ji onte elan ji n pi; osi oyam na joyithuka evamo jiang thüngi ntsa ji n jü. 29 "Tokhatola A OPVÜI shiang hetopvü tsükona ezüp onte piv; ana jipo shi pono nlilamvü. 30 Ekhenthav osi ekyuthav elhi meta shi lona tssothaka: 31 Zenkhying jiang naha ejüng yaka thanpo n san; pvüti jiang naha zenkhying ji yizüng jiang ephanina sala; osi a kyon jiang na ntia n khiran. Tokhatola kvüthüng ochüm ji yia sana ontena kvüto lyutav sanaje?"
Jerusalem ji Orina Hachümthaka
1 Benjamin kyonden, tsanchovo tssoa tsantava, Jerusalem lona tsanchotava! Tekoa lona tatara mhüsochia osi Beth Haecheren lona chekav omi tssokachia roe osi tssorophyoroe esiv tsükona khümkiwoe na jorov sala. 2 Zion yantsü ji elümoto eze mmhona khatola roe siv; 3 mesao jiangna onte ransanden sosi hojilo nchemvü. Ontena yantsü nkonphia meta jiang topvülo süki tssokachirav, osi onte otsük akvüna kvülo tssokachi hunga sana jilo tssokachiv. 4 Ontena phyotav, "Jerusalem ehav tsükona methaka! Methaktava! etena eng longjüngo hatavka!" Tokhatola ontena elani phyotalamü, "Enhungo elümoto sülanthaka, tsüngon ji yia vanthaka, osi mmyu khümcho jiang sikata yiala. 5 Etena zümothüng hatavka; osi yantsü pikhfü jilo rizümphen jiang roe sitav." 6 Thotsü OPVÜI jina mesao jiang thüngi Jerusalem ji vükthechiv tsükona odung jiang tani sisi ochon khi epi nsüngrüle to yidan pithaka. Ombona phyocho, "Ana yantsü shiji ezüp piv ntiotssole yantsü shijo zerüpta na pyingcho. 7 Jükha jina kvüto ojü ji ethana vanthuka sana ji esüa Jerusalem jina elhi n mhom ji hojito küm-ma vanthukala, yantsü shi lona ana khonta rota osi tssorophyoro won zoala; okhvü-ora tona nochonori to jiang tae ana hungala. 8 Jerusalem kyonden, ezüp shiang khi ekyu ntaknshon nte pithuka, to mek chojo ana khoe nte siv; osi ana nte yantsü shi ochina ha n vamo tüv lijüng kümthuki siv."
Panlan Israel
9 Tokhamo OPVÜI jina heto a ezocho, "Israel ji jününgroli jününgrothi emhen topvü lhoe khisi wozhü jitae ekachi siwo ji esüa phyaki siv sala. Hoji tsükona yuta liathüng na nina onte otsük akvüto shanchoa." 10 Ana janlancho, "Ana küma elümoto ekyusü ezoa mpa tssolea ochona ayi a engayivla? Onteno lümbüm ekhüngden, osi ni yithen ji ochina ha n khichoala, nina ntio phyole to a ezocho sana ji ontena emakatala. 11 Onte pono ni lümbüm etsuk jina ana ha a rungchiala. OPVÜI ana n sayakhuku sithaka." Tole hoji sülojo OPVÜI na a zocho, "Alümbüm etssuk ji lantsüi nongoriden jiang pono tona khyingroeden etssiko jiang pono to chükata. Orapvü jiang ha engh jiang ha topvü sorasi yiv osi sonpvü sonkyoe jiang lea n khachotok. 12 Onte ki jiangha oyam pi khi onte siyiv, osi onte ohüm-oli jiang tona onte engden to jiang ha oyam piyiv. Meta shilo kyon jiang ji ana ezüpthuknrünguvsala. 13 Tsüphoe, teri otsük akvü na n tsanrük yakchia orang yantala, osi zenkhying tona pvütiden to jiang mpatona kyon jiang ejiphiala. 14 Osi kyon jiang khvü-ora jiang ji ontena khyushakcho esüa nchümiala. Osi ntia mmhomcho n liaha Topvü mmhonka' to ontena phyotala. 15 Etssakthav elhi shiang tssotao ji tsükona onte yikrav alo? Mek, onte n yikra ntsa; omha mmyona tssosha jo ntio sana ontena n tsi. Hoji tsükona kvüto oyam joyicho sana ji esüa onteha joyivka, ana kvüthüng ezüp onte pia sana onte tsükona jo ochüm ji hoji tssovka. Hojito A OPVÜI shina phyothaka."
Israel na Potsow Lanka N khichoala
16 OPVÜI na ombo kyon jiang thüngi ezocho, "Lanrhyu lona phanthi eyingotava, osi olan lanhen mmhontso ji kvüila to enga. Osi hoji lona woa tona ntena noyinga eküm mmhona vamvüka." Tokhatola ontena phyotacho, "Mo, ena hoji esüa n tsso!" 17 Hoji süi jo OPVÜI na enhyang ethüngche tatara won ji enga evamvü tsükona vantukcho. Tokhatola ontena "Ena hoji nnga" to phyotacho. 18 Hoji tsükona OPVÜI na phyocho, "Engatava, nte jipoden, osi a kyon jiang pono ntio tssov sa sana ji ntsi khitava. 19 Enga, limha! onte okyak ochung nmhon ji tsükona ana ezüp onte pia roe onte siv sala; ntiotssole ontena a püngnoyi jiang n khicho osi ayi jiang ngacho. 20 Ontena Sheba lona tssütse rhüm mmhom hansi eyio jiang ji athüngi hansi ero jiang ji ana ntio lyuvla, mekana meta ekonina deli orhüm mmhom hansi eyio jiang ji ana ntio lyuvla? Ana onte thsan jiang lo n mathayi osi onte thungthan jiang ha onte n khichoyi. 21 Hoji tsükona ana kyon shiang nshüphi ekhüngthuku; opo jiangha otsoe jiang ha chüv, osi hoji esüa okhümo osi phinakishüm jiang topvü chürav."
Jükiwoe na Joro Ephamji
22 OPVÜI na phyoala, "Jükiwoe meta motsünga lona kyon tsathaka, osi meta ekoni evan elümoto etho ejüi jipo tüv na ritsso methaka varia. 23 Ontena onte lotssi osi yonri jiang tsakathaka; Onteno lümbüm jürhüngdeh osi nzan n liden. Ontena onte kurü jiang lo tsankae sana roana jümangi jükyona echyua to owon tssoala. Ontena Jerusalem pono ori etssov methakthaka." 24 "Ena yithen jiang zothaka," "E khe jiang chüi mmyichochi sikhanthaka, osi eloena tsobuküsathüng noato nungkhfü nungra na epyingthaka; to Jerusalem kyon jiang na phyoala. 25 Ena yantssawoe chiwov osi olani sanphiv tia n tssoche, ntiotssole eri jiang na epensü benri vanthaka osi e nkonphia topvü ekyusu na epyingthaka." 26 OPVÜI na ombo kyon jiang thüngi ezoala, "Zhüsü mpentasi live yulo epfüphitava. Tsokhying tsüka tae vancho ji moni sicho esüa ntssükata nungratav, ntiotssole ochona nte roe esiv tsükona tsacho sana jina zakatole nte hayav. 27 Jeremiah, nina kvüto yonjak ji kvütüv yonjak sana ezev tsükona ethüngato a kyon jiang ojang tssoe zeta, onte ji kvütü nrünga sana. 28 Onte topvüto khirankhiri osi yonjak mekana pyontsü yonjak esüa lümbüm ekhüngden tae. Onte topvü to n mhon osi ejüng khen-oyi hanphita ekyaeden. 29 Mikvü osi mijen jina elukphia kiala tolia yonjak chhü jiang n phyon osi n rungro. Hoji esüa a kyon shiang rungchoa eriv ji ntia oman n li; ntiotssole ochoang jo n mhoncho sana jiang ji khi hansi n yihan. 30 Onteno ethev n lio mmen to onte tsav, ntiotssole A OPVÜI shina khoe onte sithaka."
Jeremiah na Ekhümki na Püngnoala
1 OPVÜI na ekhümki kvülo Juda kyon jiang na rhovo khümta cho sana ji kipüng jilo a wothukcho. Osi Thotsü OPVÜI Israel Potsow jina onte thüngi ntio ezov licho sana ji tüngsochiv tsükona hojilo mangkachi vanle to a ezocho."Ntena vanta evamo ekümlan osi nte elhilan jiang lona tongphitava, tona ana shilo nte vanthukuka. 4 Ejithechi khenoyi jiang ti-longtsütava, 'Eyio tsanchothaka! shijo OPVÜI ekhümki ji, shijo OPVÜI ekhümki ji, shijo OPVÜI ekhümki!' 5 "Nte eküm jiang tongphitava, osi ntena ntio tssota vancho sana jiang lona tongphitava. Nte nteji elamo lona tsütsatava. 6 Omoatsi, Opvüopo n van, osi emi jiang pono nte tssocho mmhon tssota evamo eküm jiang lona esantava. Meta shilo nlan n li kyon jiang lüngthata jiha esantava. Potsow thanpo ekhüm ji esantava, ntiotssole hoji na nte rov sala. 7 Ntena khophia tssona ana meta kvümoe nte motsüi jinag thüng nchüngkhon tsükona picho sana shilo to nte vanthukvü. 8 "Zetava, ntena ejithechi khenoyi jianglo longtsükatala, 9 Ntena efüta, lüngthata, elani efürama benphita, echhümta ejüng phyota, Baal thüngi othan pita elani ntena n tsina vana erovo potos jiang khümta to tssotala. 10 Ntena ana a tssako elhi shiang tssotasi ekhümki a vanhyalo oro phanthi, "Eyio tsanchothaka" to phyotala. 11 Nteno ekhümki jo efüi jiang tsanthephen esüa nchümta alo? Ntena ntio elhi tssota sana jiang ana hungthaka. 12 Shilo, meta kvülo shi ana ovüngo tssoa a khümphen etssyukacho sana jilo wotava, osi a kyon Israel jiang mmen jiang tsükona ana ntio tssocho sana ji zetava. 13 Ntena mmen shiang topvü tssokhanthaka, osi ana elan elani mpa nte ezoa monglea ntena nte nnga hungala. Ana kvüthüng nte tsa sana ntena a n janlanala. 14 Hoji tsükona ana Shiloh lona ntio tssocho sana ji esüa a ekhümki ntena longtsüka evamo shiloha hojito tssovka. Ana nte motsüi jiang thüngi tona nte thüngi to nte epio shilo naha Shiloh meta lo ana tssoji esüa ana tssovka 15 Ana nte wopan Israel kyon jiang phanchokchi esio ji esüa ntena a ehungo na phanchokchi nte sivka. A, OPVÜI shina hojito phyothaka."
Kyon Jiang Jancho N zo ji
16 OPVÜI na phyocho, "Jermiah, kyon shiang tsükona ti-randana. Onte thung tssoa ti-randana mekana ti-kya; athüngi ti-jonjikhe ana ni engayiv meka. 17 Ontena Juda yantsü jiang lo osi Jerusalem lantsü jiang lona ntio tssota vancho sana nina n hunga ke? 18 Nongoriden jiangna otsung hanrhyuala osi eramo jiang na omi tssokachiala; osi eloe jiang na ohüm nhyoni potsOPVÜI Potsüwoe Rani to etsao ji echi hümri rüngtala. Osi ontena a lümbüm tssatsotuku tsükona potsow thanpo jiang poni ha zükhi phangkatala. 19 Tokhatola tssatsoa vamo tsotso jijo A alo? Mek, tolea ontena onte popo tssatsoala osi onte pono yikra hansi yiala. 20 Hoji tsükona A Sandamo OPVÜI shina a lümbüm nshüthechia lümbüm etsukji ekhümki shi pono kikavka. Osi kyon tona ekümrümo to jiang pono ha a lümbüm etsuk ji lituku, elani otssüng odung osi yulanhanlan jiang pono mpato kikav; Alümbüm etsuk ji omi esüa tssovka, osi hoji ochinaha tamhechev meka. 21 "Akyonden, othan ejoma jo thanphensa jilona mmhona rungtava, osi ejoma jo ntena etsov tsükona nte chonchiala. Tokhatola A, OPVÜI na, ntio phyoala tona ntena tOPVÜIeha tsokhuka. 22 Ana nte motsüi jiang ji Ejipi na sochuka thüng ji onte thüngi erungthan epiv tsükona mekana thanpolipo than epiv tsükona ntia yidan n pi. 23 Tokhatola ayi engav tsükona jo yidan picho, osi hojito tssona ayio nte Potsow ji tssov osi nteno akyonden tsso to etssov tsükona ntsatacho. Osi ana ntio kvüto yizüng nte picho sana ji ephan evamvü tsükona onte ezocho, hojito tssona onte echi mmhomka. 24 Tokhatola ontena ayi nngacho osi ayi jiang mmyinga n khi. Hoji thüngi najo onte haruk lümbüm jina ntio onte ezoa sana ji ephan onte lümcho tssotacho, osi mmhomvü ekümvü mekna nmhonkao onte kümcho. 25 Nte pyimtsümotsüi jiang na Ejip metae na chiyio ji tsüngon lona benkae nchüng tsüngon shi jana ana a phajae rotuka osi zenkhyingden rothukpvü. 26 Tokhatola ochinaha ayi nnga osi mmyinga n chüm. Ji thünginajo nteno nte motsüi jiang lona lümbüm khüngka osi khirankhiri mekana panlanden nte kümthaka. 27 "Hoji tsükona, Jeremiah, nina oyi shiang topvü a kyon jiang thüngi ezovka, tolea ontena ni engayiv meka; nina nte tsav tolea ontena ni n janlan. 28 Onte jipo jiang na A, nte Potsow osi OPVÜI ji yi nngathaka, osi ezüp onte pio jiang lona ntia engathe n khihan, to ezovka. Longtsüka jijo chüi sithaka; osi enhungo hoji ochina ha ephyotia n phyotav sithaka.
Hinnom Hayitsü Lona Mmen Elhi Etso Jiang
29 "Nungratava, Jerusalem kyonden; Nte tssan jiang mmyae shümthe sitava. Phunglan kvüri jiang lona echü khen dentava; Ntiotssole, A, OPVÜI shi a lüm tssukthaka; osi a kyon jiang khoe sithaka. 30 "Juda kyon jiang na elhi n-mhom tssothaka. Ana atssako kisü jiang ontena ekhümki vathaka, osi hojina ekhümki ji mmeni sithaka. 31 Ontena Hinnom hayitsü jilo thanphen Topheth, to tsa tssokachithaka; onte tsokhying tsolo jiang hoji omi lona ethamvü tsükona; shiang heto etssov ana yizüng onte picho n li, mekana hetüv a lümbümi n rheyi ntsa. 32 Hoji tsükona hoji metaji Topheth to n tsa, mekana Hinnom hayitsü to ntsa, tolea lüngthaphen meta to tsav. Ontena onte kyon jiangji hojilo shothev ntiotssole meta thanpoe onte shothephen liv meka. 33 Echümüng jiang jo oro-oni osi ekümrümo to jiang jak tssov; osi kyon ochiha hojiang ekhenthuka phani esi vamvü mek. 34 Meta ji lijüng kümvü osi Juda yantsü jiang lo tona Jerusalem lantsü jiang tolo ematha longshita ji ochüm tssoyiv, osi yanpiyanthan ematha longshi ontsoniro jiang ha monthukvü.
1 "Hoji yuta jilo Juda lo mesaeden tona tsüphoden to ryu jiang elani pvüti jiang ryu, zenkhying jiang ryu, osi kyon thanpoe Jerusalem lo evamo jiang to ryu jiang topvüto onte khüpi na khicherav. 2 Osi hojiang ji hanrhyui khi jithe si thungonajo likoe lizü kümtukvü hapoe ekachi sirav. Oryu jiang ji choro shantio osi eng kümoe kyon shiang na nzana khümcho sana osi onte emhok-elümo onte ngatüngriphen tssoa khümtacho sana shiang mhadungo sasochiv. 3 Osi jipo n mhom kyon shiango ana nzüroe onte esio meta jiang lona ochoang eküm valanchicho sana jiang ha eküm vanthüngo najo chüi sihungu ka, to Thotsü A, OPVÜI shina phyothaka."
Mmen osi Ezüp Epiv
4 OPVÜI na ombo kyon jiang thüngi heto ezole to a ezocho," Kvüthüng ocho sana ekhünga sana ombona elani n phanthilanake? Ochona sana olan ori na ombona kholani lanshenthi ji yana n yiake? 5 "Tona a kyonden, nteno ntioli a thüngi kholani n yitana a thüngi na tsani yitala? Nte kisü jiang lo züpkapvü vantasi a thüngijo nte n yilan hunguala. 6 Ana mmhona tüngochünga nte engayicho khatola ntena ntsaji n phyo. Osi nte tsükana tia nte nmhon ji tsükona etho jaka nchüm; osi nte ochi naha 'Ana ntio nlan tssochoto' totia engae n ze. Tolea nte otsük akvü na kurü na ritssolo yunga yia vanchoto, ombombo lanka benche tae vantala. 7 Jüoro jiang na samo na kholani eyiv yutajo ntsiala, elani yukhu, Tsungoro osi Josi woro to jiang nalea kvütothüng kvülo eyiv sana jijo ntsiala. Tokhatola nte a kyon shiang najo ana ntio shikhvüniro khi n te sa sana ji ntena n tsi. 8 To tssona kvütoli nteno nchümri eliden osi ntena shikhfü jiang ntsia to phyokhukchola? Zeta, shikhfü jiang ntsanrük nli eranpvüi jiang na tongphikhanthaka. 9 Nte yulo ntsinran jiang ji yikra pithaka, osi hama-hari jilo thechithaka; Ontena ayi jiang si-nkithaka; tona enhungo ontelo nchümri mmhom ntio lichola? 10 Hoji tsükona enhungo ana nte li jiang lipvüi ethan khelo theyivka, osi nte tsoeni jiangha kyon thanpoe thüngi pivka; tsüphoe teri otsük akvüna n tsa-nrük lanka lona orang yantav ekhyo tssotala. Osi zenkhying tona pvüti to jiang mpana oyam ejiphiala. 11 Osi ontena a kyon jiang khvü-ora jiango khenshakcho esüa totae tssotukala. Ntia ontelo mmhoncho n lilea, 'topvü ji mmhonka' noying lika to ontena phyotala. 12 A kyonden, ntena etssakthav elhi shiang etsso jina nte yikracho alo? Mek, nteji nte n yikra ntsa, nte yikrav mekna omha tssoshüa etssov tia n tsi-ntsa! Hoji tsükona oyam joyio ji esüa nteha nte joyivka; osi kvüthüng ana ezüp nte piasana nte tsükona jo ochüm ji hoji tssovka. A, OPVÜI shina hojito phyothaka. 13 "Ana jo, kyon na oli ri-khi hanrhyua esüa akyon jiang ji a hanrhyu hungcho; khatola onteji jününgrozhü ethi n pacho esüa, osi züvodung ethi mpav mekna ovo jiang mpato mmikae sithakcho esüa tüv. Hoji tsükona ana hapoe evan kyon jiang khi onte metaji khithukcho." 14 "Ntio tsükona eteno heto khukta mungala?" to Potsow kyon jiang na engatacho."Rotava, yantsü epichaki elio ji yungta ovo jilona chütavka, ntiotssole ete OPVÜI Potsow na echüthuku khoe esithaka, ntiotssole etena ombo yaka mmen tsso jina ombona echü mozhü eyuv epithaka. 15 Etena jo noying osi emi yuta tüv eyilotacho, tokhatola hojitüv kvülo n khi; jithüngi najo emhok ekhen yithukcho. 16 Ete ri jiang na Dan yantsü jilo oro vanthaka; osi onte kurü jiang na owon tsso jiang ena zoa. Onte kurü jiang na kvüthüng nryunga sana meta topvü enhyokphiala. Ete ri shiang na ete meta shi osi shilo ntio lichosana jiang topvü roe esiv tsükona rothaka, ete yantsü osi shilo kyon evamo shiang hetopvü." 17 "Tüngochünga zetava," to OPVÜI na phyoala, "Ana nte yulo nrü rotukala, echü mozhü n-mhom ehamo osi ntina ha n ji-enayacheo tüv osi hojina nte njüv.
Ombo Kyon Jiang Tsükona Jeremiah Nungra
18 A nungra jo n micheo; Ayio lümbüm nochonori a khyingthaka. 19 Engatava, meta topvü lona A kyon jiang na kyatao ji ana zoala; "OPVÜI na Zion lo n vamvü sithakcho alo? Zion mesao ji hojilo n vamvü sithakcho ke?" OPVÜI onte mesao jina janlanala, "Ntio tsükona nteno kisü khümi a lümbüm tssatssothukchola? Osi ntiolyui ethelan n lio metapoe potsow jiang mhadungo nkhümthetachola?" 20 Tole kyon jiang na kya phyotacho, "Nzyu ji yakthaka, liri jiha yi-sithaka, toaha eyio e n shanchohan." 21 A lümbüm ji pyonroe a siyithaka, ntiotssole a kyon jiang ji ejüproe sithaka; Ana emhenala, aiyo nungra na apyingthaka. 22 Gilead lo mozhü ntia n lichoke? Tsüktsen ochia jianglo n vanchoke? Tona, ntioli, a kyon jiango n miyiche-chola?
1 A kvüri shijo jükha salivo, osi amhyik shiango esütsü jüzanjo salivo to nchümala. To tssocho salivo a kyon lüngthao jiang tsükona ana zümo eng kyavkasi. 2 A kyon jiang thüngina tsani oyi tsanthei vanphen meta lijüng livo to nchümala. Onte topvüto longtsüka n li, meta yeni etsoe okho. 3 Ontena yuta topvülo ejüng ephyov methakala; ntsa khi meta ji sathüng jo n tsa-nrük tae. OPVÜI jina phyoala, "Akyon jiang na mmen jiang motsünga sülo, motsünga to n tümjak na tssoala; osi ayio onte Potsow toji a n cheka." 4 Otsük akvüna ombo shom ji mhadungo lia ntak-nshona vamvü lia, osi ochinaha ojenio lia n longtsükakhok; Ojenio otsük akvüto Jakob esüa ejethechi lümbüm ehan osi otsük akvü na ombo shom jilea yenchoe tüv kyonden. 5-6 Onte topvüna onte shom jiang sosorala, osi ochina ha ntsaji n phyo; ontena onte nlyi jiang ejüng ephyov lo oya tssothukthaka, osi onte mmen elhi etsso ji n vachihan. Ontena elan elani tssatssotao elhi tssoala, osi elan elani ejitjechiala. Ombo kyon jiangna ombo khoe siala to OPVÜI na phyoala. 7 Shi tsükona Tokhamo OPVÜI jina phyoala, "Ana akyon jiang ji yonjak esüa richoe ejyue onte zevka to. Akyon jiangna mmen tssothaknaana thanpo ntio onte tssocheyivla? 8 Nte nlyi jiango echüo lotssitsüng tüv; yuta topvülo ontena ejüng phyoala. Onte otsük akvüna onte phinakishüm thüngi zizamoria janala, tolia jijo tsirhi toni vayicho esüa tüv tae. 9 Shiang tsükona ana ezüp onte n pivke? osi jipo hetüv pono ana n lilamke? A, OPVÜI jina phyoathaka." 10 Ana phyocho, "Ana phunglan jiang tsükona nungrav osi eroyo yantsophen jiang tsükona kyav; ntiotssole onteji topvü mmikae sithaka osi enhungo ochinaha onte yakchia n yentsatala. Tssiden jiang won ha n zov sithaka; osi worowoni tona orae ekümrümo to jiang ha tsakhani sithaka." 11 OPVÜI jina phyoala, "Ana Jerusalem ji roe ethüngkachi sivka, osi ranfü vanphen, kümtokvü. Juda yantsü jijo kyon ochinaha n valanmo lijüng kümtokvü." 12 Ana engacho, "OPVÜI, ntio tsükona meta shi hetoli likying lijüng ochina ha yakchia n yentsacheo kümthuki sichola? Nchümri eli-i ocho shiang engathekuko tüv vanchola? Oyam thüngiha rüa ezocheo tssoa nina ocho thüngi eroroe ejüthaka?" 13 Tole OPVÜI na a janlancho, "Heto etsso shijo ana püngnoyi epio jiang ji akyon jiang na sinkio ji tsükona tssocho. Ontena a jancho n zo mekana ana onte ezoji ephan ontena n tsso. 14 Jithünginajo onte opo jiang na onte ezoji esüa Baal potsow jiang khümtacho, osi onteno haruka lümbüm ekhüngden. 15 Hoji tsükona, A, thotsü OPVÜI, Israel Potsow jina ntio tssovsa vancho sana ji enga: Ana a kyon jiang limo ekhov tssothuku osi echü mozhü onte yuthoku; 16 Osi onte naha elani onte motsüi jiang naha n zohamo tüv jipo yulo nzüsorae onte siv; osi onte ji rorüpi onte n sithüng nandang jo ana onte pono rasan rotokvü."
Jerusalem Kyon Jiangna Kyochile To Erontala
17 Tokhamo OPVÜI jina phyocho, "Ntio tssao vancho sana ji nchümi zeta! Nungrae jiang role to tsa osi eloe müngkyae khenden jiang tsa! 18 Kyon jiang na phyocho, "Zakto müngkyakhen etsukona dentale to onte ezoa, Osi emhyik jiang esütsüna n pyingthüng nandang, osi emhyikfü jiang esütsüna n phyonchüthüng nandang." 19 Zion lona kyata nrungta won jiang enga, "Eteno roe e sithaka! Eteji eyikrakhi nrüngthaka! Etena ete meta shi sisi eyiv lia; Ete ki jiang topvü rhonroe esiyithaka." 20 Ana phyocho, "OPVÜI yi engatava, nte eloeden, Osi ombo yi jiang eno ndungi engatava. Nte tsolo jiangji kvüto nungrav sana shikata, osi kvüto müngkya khen dem sana nte shom jiang shikatava. 21 Echü jina ete kherüki jiang lona rheyithaka, osi ete mesaphenki jianglo rheyithaka; Lantsüi nongoriden jiangji hojina ejorothaka, osi shishopheni khyingroeden jiangha to. 22 Echümüngna meta topvü, nzüpyingthaka; onteji oli lizü hankachi vacho esüa tüv, osi tsünghanrho erang na raki vasi ochinaha n hanrhyuna ekachi sicho esüa tüv. OPVÜI na shi heto phyole to a ezocho." 23 OPVÜI na phyocho, "Nchümri eli-i jiangna onte ntsinran jiang khi n kangtsüv shikhfü. Osi etho ejüi jiangna onte thokhyung ji, elani ejüeli jiang na onte eli jiang tsükona to n kangtsüv shikhfü. 24 Ochona sana kangtsü hungna, ombona antsioji mekana a engathewo ji khi kangtsüthuka; ntiotssole a nzanjo linrhüv. Aiyo ntiojo elan osi ntsa sana ji tae tssoala. Elhitsük shiang shina a emathatukala, to, A, OPVÜI shina phyothaka." 25-26 OPVÜI na phyoala, "Ana Ejip kyon, Juda kyon, Ammon kyon, Moab kyon, osi lijüngi evamo kyon ochoang na kvüritsan etsümkata tssüi hana sana jiang to ezüp epiv yuta ji tsathaka. Kyon shiang hetopvü tsenia mvüchung tae; tokhatola ontena hoji chekav ntsatao ji ephan n van. Kyon shiang naha osi Isreal kyon shiang naha to onte ochinaha ntsata yi ji n tsütsa." a
Kisü Tona Ntsa Ekhüm To
1 Israel kyonden, OPVÜI na nte tsükona ntio yithen nte piv licho sana ji engatava. 2 Ombona phyoala, "Jipo thanpoe jiang lan jiang lo ti-phankatava, Potsüwoe na n hungphen tüv mpa hunglea, jina ti-vwongkhyutava, Jipo thanpoe jiang mpa ekhentsüngleha. 3 Kyon shiang ekhümlan jiango oman n lio. Odung jo oraena tanchüchüala; osi otsung tsiyanmori jiangna epensü khi olan olan nsüngrüala. 4 Tothakana, Shona, Janti khi opyon nsüngrükatala. Osi hojiang ji n longchothoku tsükona eshenkyo khi eshenkatala. 5 Hetüv kisü jiango Mhelithi-li woro nrak vacho esüa tüv. Ontena oyi n sanche, onteno olan ha n tsache, küma ejümphia evo tüv tae. Hojitüv potos jiang ti-kyutava! Ontena jo nte n tssatssoche osi mmhom ha nte n tssoyiche." 6 OPVÜI, ni esüa tüv ochia n van; Nino Thotsü, nimyingjo tsüphoa, osi etho lia. 7 Ochona ni n kyuchivla; jipo topvü pono mesao. Ni monkhüm yikrachiv ni etüma, Ni esüa ochia n van, jipo jiang yulo nchümri eli jiang yulolea mekana onte mesao jiang yulo tssolea. 8 Onte topvüto eyim osi zhüvaeden, Otssüngna nsüngrüo kisü jiang lona ontena ntio ntsi khivla? 9 Onte kisü jiango Spain metaena hansi yicho tüv jantina eyukcho. Osi Upahz na hansi yicho shona na eyukcho. Hojiango, topvüto tssiyanmorithi elhi; osi onteji sütüng mmhom na tükcho tüv, Sümyon, sünyipvü osi sümüngu to khi hanthucho. 10 Tokhatola, OPVÜI nitae ntsa Potsow, Nino eküm evamo Potsow, osi kümali mesao ji. Kvüthüng nina ni lümtsuka sana, limha jina enetala; osi jipo jiangna ni lüm etsuk ji n rümkhok. 11 (Potsow ochoangna limha shi tona oyak to n süngrücho sana jiango topvüto roe sivka, toji nina onte ezonrüngu lia. Onteji limha shilo kvüloha n liv rorüpi siv.)
Potsow Thanthünga Nsika Khen
12 OPVÜI na ombo etho na limha shi liyingcho; osi ombo nchümri mmhon ji khi limha shi joyingcho osi oyak shiang ephyansochicho. 13 Ombo yizüng lona oyak shiang pomoe ojü jiangna ejenlungala; Ombona limha chümina eluk emhenjü hansi yiala; Ombona eryu yulona tüngrasochia nlüpthukala, osi ombo eli varhyuphen ki jilona mpung rotukala. 14 shiang shi zesi kyon ji nchümri n li, osi eyim esüa chanchetukala; ochoangna kisü hancho sana jiango monton-monricho, ntiotssole ontena potso nsüngrüo jiango ejüng osi eküm n jüo. 15 Onteno oman n lio, hoji tsükona onteji tssaka khoe siv shikhfü. Kvüthüng OPVÜI na onte pono oyi tssoyia sana onte topvü rorüpi sirav. 16 Jakob Potsow jijo onte esüa tüv mek; Ombona olan topvü nsüngrücho, osi Israel ji ombona ombo kyon tsotso etssov tsükona ethüngchecho. OPVÜI Thotsü to jijo ombo myingji.
Israel Tsanthan Ekümvü Yuta Etsao Ji
17 Jerusalem kyonden, nteno nte hayathaka! Nte tsütsailan jiang tsakasüka-tava. 18 OPVÜI na meta shi lona hapoe shümchokehi nte siv sala; nte tsükatia n hyokana ombona nte ejüprov sala. Hojito OPVÜI na phyothaka. 19 Jerusalem kyonden, eronkachitava, "Kvüta nmhom etssatssothakcho ato! Ekhvü shiango emiv mek. Osi heto oren ezüp jo ena rümkhokvü esüka to ena nchümcho. 20 E süki jiang roe sithaka; onte shenzhü jiangha jakthaka. Engaro jiang topvü tsanrathaka; E süki jiang tssokachilam tsükona ochia n van; osi zonchaksü jiang yikav tia ochia n van." 21 Ana janlancho, "E esopvüi jiango eyimden; ontena OPVÜI thüngina lanso ntia n yan. Heto etsso jina ontena n tssojam sicho, osi akyon jiang ji meta nzüi sicho. 22 Enga! Yithen ji yithaka! Jükiwoe jipo jiang na mmyinga hapihalümta vanthaka; Osi hoji ransan jiang na Juda yantsü jiang ji lijüng shaeli vanphen meta kümtukvü." 23 OPVÜI yo, ana ntsia kyon ochinaha ombo ochyuovüng jilo OPVÜI ntsoche to; osi ochinaha ombo ombo eküm ji nsayache. 24 Ni kyon jiang elanchoyia, OPVÜI, Tokhatola kvüthüng ni lüm tsuka sana enokhünga jo eti-tssoyia mekana tsükshia jo eti-züptuka, To tssoana eküm ochüm ji tssoe siv. 25 Ni lüm etsuk ji ni n khümo jipo jiang thüngoe nlüpi yia osi ni khaksio jiang pono tssothuka. Ontena ni kyon jiang lüngthacho; ontena rorüp-nrüngi esisi e metaji roe ekachi esiyicho.
Jeremiah Tona Ntsata ji To
1 OPVÜI na athüngi a ezocho, 2 "Ntsata shikhfü yi jiang enga. Juda tona Jerusalem to kyon jiang thüngi ezoa, 3 A, OPVÜI Israel Potsow jina ochoang kvütata na ntsatao yi jiang nnga sana jiang pono etsso-randankaji vayithaka to. 4 Hoji ntsata jijo ana nte pyimtsümotsüi jiang ji kvüthüng Ejip meta onte tsükona jo mikvü esüa etssovo meta jilona onte sosi chiyicho sana jithüng ntsatacho. A jancho zoa osi ana ntio yizüng onte piasana jiang tssole to ana onte ezocho. Osi ontena ayi enga tssona onteno a kyon tssov osi Aiyo onte Potsow tssov to onte ezocho. 5 Hojito tssona ana a echümchak onte motsüi jiang thüngi epio ji esüa ana ejüeli osi lizü meta ontena enhünga vanta evamo meta shi onte piv to ezocho." Ana janlancho, Hoka, OPVÜI YO. 6 Hoji süijo OPVÜI na a ezocho, "Juda yantsü osi Jerusalem lantsü jianglo woa. Osi ntsataoyi ji enga hoji ephan benphitale to kyon jiang thüngi thenchoa ezoa. 7 Ana kvüthüng onte motsüi jiang Ejip metaena sosi chiyicho sana ayi engatale to tüngochünga onte ezocho. Osi hojiang ji nchüng tsüngon jana ntak-nshon onte pia ezoa yipvü. 8 Tokhatola ontena nnga osi hoji ephan ntsso. Hoji thünginajo ovüngthüng ji esüa otsük akvütona lümbüm ekhüng osi haruk-hashü khi mmen tssotapvü. Ntsata ji benphile to ana yizüng onte picho, tolea ontena nngacho. Hoji tsükona phyoe elio ji esüa khangshi ntssonshi topvü ana onte pono hansi yithokcho." 9 Hoji süijo OPVÜI na a ezocho, "Juda tona Jerusalem kyon to jiang na apono okyak n-mhom benphitala. 10 Ontena onte pyimtsümotsüi jiang mmen jilo kholani yithaka, osi ntio ana onte ezocho sanaji mekna thanpo potsow khümtao ji esüa ontenaha tssotala. Juda tona Israel to woniata na ana onte motsüiden thüngi ntsatao ji yesothaka. 11 Hoji tsükona A, OPVÜI shina onte pono roe sioji rwothukvüsala to ekyuyi ezocho, osi ontena kvüthüng a thüngi nzanchi chona kya sana ana hojithüng onte nngayi. 12 Hoji süijo Juda kyon tona Jerusalem kyon to jiangna ontena othan pia evamo thanpo potsow jiang thüngi owo nzanchi chona kyatav. Tokhatola kvüthüng ezüp osi roe esio yutaji yiasana hojitüv potsow jiang najo onte n shanchoche. 13 Juda kyon shiango onte yantsü kvüta licho sana jitata potsow vana, osi Jerusalem lo evan kyon jiango etssakthav Baal potso thanphen ji yantsü jilo lantsü kvütata licho sana jitata thanphensa nsüngrüthaka. 14 Jeremiah, shiang kyontsük shiang hetüv tsükonajo ti-jonjia osi ti-ran dana. Kvüthüng ontena ezüp liana jithüng athüngi nzan chomvü tolea ana onte engayiv meka." 15 OPVÜI jina phyoala, "Ana nzana evamo kyon jiangna n-mhom tssola, tona ontena a ekhümki erov ntio elan lichola? Ontena ekümrümo thana echümehaktao jina ekyuv etsao jiang tanglanchikhoku to nchümta alo, osi hojina nte emathathuk alo? 16 Yuta motsünga lojo Olive dung vüluko osi tsüngthi mmhom etheo dung to onte tsacho, tokhatola enhungo ana potsüo ejenlunga esüa tharaka onte vo jianglo omi onte njükayiv osi onte khero jiang topvü jakroe onte siyiv. 17 "A Tokhamo OPVÜI na Juda tona Israel toji chümcho, tokhatola enhungo ana roe esioyi khi onte ekhenthukala. Ezüp shijo onte pono onte popo hansi yicho, ntiotssole mmen tssothaka; ontena Baal potsow thüngi othan pio jiang yakchia alümbüm tssukthaka."
Jeremiah Eküm Ekhiv Okyak Etsso ji
18 A ri jiangna apono okyak n mhom etssov tümta evamo ji OPVÜI na ayenjancho. 19 Osi aji olyu longtsüka eli tatsüngu tsükona süchoka vancho esüa tüv tssocho, osi ontena a pono okyak n-mhom etssov zita evamo ji anajo n tsicho. Ontena heto phyota vancho, "Etena odung ji ekümthüng na tssüngthi mpata tanchüchütavka; etena ombo lüngthatavka to tssona ochinaha ombo nchümchelamvü meka." 20 Hoji sülojo ana randancho."Tokhamo OPVÜI, nino ntsa yitsoe ji, nina kyon jiang osi nchümri jiang ejyue zeyiala. Ana a sükhying ji nikhelo ni theyithaka; hoji tsükona enhungo nina kyon shiang pono nlilan elhi etssov ji cheta avanthuka." 21 Anathoth kyon jiangna a lüngthatae asi hungcho, osi ana OPVÜI yithen ji thenchoa vana tssona ontena alüngthav to azocho. 22 Hoji tsükona tokhamo OPVÜI jina phyocho, "Ana ezüp onte pivka! Onte khyingroe jiango ritsolona chütokvü, osi onte ngaro jiango ekhang lona chütokvü. 23 Anathoth kyon jiang pono ezüp rothokvü ji ana yuta tümkathaka, osi kvüthüng hoji yutaji yiasana, onte ochia eküm enhyokav meka."
Jeremiah na OPVÜI Thüngi Ngatüngngariala
1 OPVÜIYO, ana ephyov elio ji nithüngi ekhirantavo ni elamo phyochev. Tokhatola ntsanrük yilan tsükona ana nithüngi ngatüngngariv lia. Ntio tsükona n-mhom kyon jiang ji tsükarankatala? Osi ntio tsükona n tsae kyon jiango ochüm echetala? 2 Nina onte ehumala, osi ontena oying süngala; osi onteji rankae tsüngthi ethiala. Ontena yuta topvülo ni mmhon phyotala, tokhatola ontena otsotso lona jo ni n chümphi. 3 Tokhatola, OPVÜI YO, nina antsia; Ana ntio tssoa sana ji nina hunga, osi ana kvüto ni nzana sana ji nina ntsia. Kyon nmhon shiangji olyu tatsüngo sosi yia vancho esüa süsi onte yia. 4 Kvütenhyaka a meta shi kyinga, osi oli ero jiang, mmikata vamvüla? E kyon shiang nmhon yakchia ekümrüm osi worowoni jiang mpa chükhanala, osi hoji jo kyon ochoang na, 'Ena ntio tssoa sana ji Potsow na n hung.' " to phyoa sana jiang yakchia. 5 OPVÜI na phyocho, "Jeremiah, nina kyon jiang thüngi yungtao jina mpa ni laphyata tssona, Nina kurü thüngijo kvütoli yungtavla? Osi nina liko apho-among lotia phanthi n vankhuka tssona, nino Jordan ratsü jiang lojo kvüto lyuvla? 6 Nijenio osi niopan kitsük jiang mpana khoe ni sithaka; Ni phonkav evamo jiang onte nzotssothaka, Hoji tsükona ontena okhen oyi mmhom mpa ni ezolea onte ti-longtsüa."
Ombo Kyon Jiang Tsükona OPVÜI Nungra
7 OPVÜI na phyoala, "Ana Israel ji khoe sithaka; Ana ethüngcheo kyon jiang ji ana khoe sithaka. Ana nzamo kyon jiang ji ana onte ri jiang khelo theyithaka. 8 Ana ethüngcheo kyon jiang na a panlanthaka; Orae hingho esüa Ontena a erhyukathaka, hoji tsükona ana onte a tssakala. 9 Ana ethüngcheo kyon jiang ji woroden esüa mongshitsü jiang na nken topvü lona hayatala. Orae ekümrümo jiang ha tsae oro onte rumi tsotav sa evamo jilo thetoka. 10 Metapoe kyon esapvüi elümotona a jününgroli ji roe asiyithaka; Ontena ali jiang sümrothaka; A meta ezehungthav ji ontena lijüng kümthukthaka. 11 Ontena hoji romhon kümthukthaka; osi roe sirhaki a mhadungo akachi sithaka. Meta mpüm ji lijüng kümthaka, Osi ochina ha hoji n chümphiala. 12 Lijüngtsü phungdungro jiang topvü lona kyon jiang na retso-reyulo rothaka. Metaji mpüm na roe esiv tsükona ana ritso rothukcho; ochina ha noyinga n vanche. 13 A kyon jiang na otssok-omüm chencho, tolea ontena erotsüng richocho; Ontena elümoto sanga joncho, tokhatola hoji mana ntia n hung. A lümbüm etsuk, tsükshi ji yakchia onte benro-niro jiang na ntia n thiv sicho."
Israel Phinakishüm Jiang Thüngi OPVÜI Phyochak
14 OPVÜI na phyoala, "Israel phinskishüm ochoang na, ana akyon Israel jiang thüngi epio metaji roe siyicho sana jiang pono ana ntiosana ephyov lia. Onte yulo kyon n mhon jiang ji ana odung rukcheta to onte meta jilona khi nte siv osi Juda ji onte khe lona nrhachev. 15 Tothakana ana onte khi sicho süloti elani khonzan onte ejülamvü; osi ana jipo jiang akvüto solansi oyi ombo ombo meta jilo vanthuklamvü. 16 Osi onte na onte lümbüm totona a kyon jiang ekhümlan ji khichoe, ontena ovüngthüng kvüto akyon jiang ji Baal ekhümvü tsükona echümchakthukcho sana ji esüa, ontena amyingona 'OPVÜI na eküm vamoji esüa' to phyochaka tssona, ontena a kyon jiang nzo etssoe kümvü, osi onte tsütsontsüria kümtokvü. 17 Tokhatola jipo kümoe na sana ayi nnga tssona, ana mpümna rukche rorüpi onte siv. Hojito A, OPVÜI shina phyothaka."
Sünyipvü Ryukhüng Hüngriv
1 Sünyipvü hüngriv shi khi ekale to OPVÜI na a ezocho, tolea hoji ojüi ti-jümthechile toha a zocho. 2 Hoji tsükona ana owo osü ji shii khi hancho. 3 Hoji sülojo OPVÜI na heto a jancho, 4 "Euphartes zhükhfüi owo osü ji longkvüi mphoe vata," 5 Hoji tsükona ana wocho osi Euphrates zhükhfü ndüngo mphoe vancho. 6 Hojito tssosi yuta tara sülojo elani owo Euphrates zhükhfüi osü ji khile to a zolancho. 7 Hoji tsükona ana Euphrates zhükhfü ndüngo ana osü mphoe evao jr zelo wocho, tole osü ji nkalancheo tüv roe sithakcho hungcho. 8 Hoji sülojo OPVÜI na elani a thüngi heto ejancho, 9 "Shi esüa ana Juda kangtsüji osi Jerusalem emhokthav kangtsü ji roe siyiv. 10 Ntiotssole kyon nmhon shiang na ajancho n zocho. Onteno haruka osi ovüngthüng ji esüa n mhonden osi thanpo potsow jiang khümta hojiang benkatacho. Hoji tsükona onteji osü hüngriv shi esüa ethev n lio onte kümvüka. 11 Osi kvüto osü teriv shi eryulo khünga ntsüthecho sanaji esüa Israel tona Juda to kyon jiang na rük-rüka a rhümatuk-hungcho. Ana heto etsso shi yakchia onte ji akyon kümthuki a mying thünga aphfütssonthukvü tssocho; twokha tola ontena ajancho n zocho."
Zükhfüi Mvüruji
12 OPVÜI Potsow na athüngi azocho, "Jeremiah, zükhi mvüru jiang topvü zükhi khi pyingthukle to Israel kyon jiang ezoa. Tona ontena zükhi mvüru topvüto zükhi khi pyingthuku ji ena ntsika to ni janlam. 13 Hoji süi jo heto onte ezoa, A, OPVÜI na zükhi khi meta shi pyingthukvü osi David tsochenden, mesaoden, Pvütiden, Zenkhyingden, osi Jerusalem lo kyon topvüto zükhi jina n kinothüng nandang jo chüthechiv sala to. 14 Hoji sülojo kvüto mvüru jiang na onte onte shüngatae varoa sana ji esüa ana nongori eran topvü onte ejüprovka. Nti nzan osi khonzan to etsso tüv khi onte lüngtharüpi esiv jilona a, n tanglanchiche."
Ekyuyi Ezoala
Kangtsü Tsükona Jeremiah na
15 Israel kyonden, OPVÜI na heto phyothaka! Eyingroe kümtava, osi Ombo yi engatava. 16 Nte OPVÜI Potsow ji monkhüm yikrachitava; Ombona emüng hansi n yithüngna, osi phunglan jiang lona nte n shüphithüng; osi ntena wondang eyiloa evamo ji emüng echhitsov n kümthuk-thüngna. 17 Osi ntena nnga tssona, Nte kangtsü ji tsükona ana mphoa kyav; Ana nshüthechia kyav, osi a, esütsü ji tsüa yiv ntiotssole OPVÜI kyon jiang ji morantsan etssov sosi yi siv. 18 OPVÜI na a ezocho, "Mesao tona ombo oyo toji onte mesa vantsü jiang lona joyile to ezoa, ntiotssole onte kikho emüngyanthav jiang ji onte kvüri lona elongjothaka. 19 Juda jüjowoe yanro jiang topvü hayathaka, osi ochina ha hoji rorhüpi onte thüngi n oche. Osi Juda kyon topvü metapoe morantsan tssoa sosi yithaka." 20 Jerusalem, zeta! Ni ri jiang na jükiwoe na jorao vanthaka! Ni nkohoa ni zeyatoku tsükona enhikao kyon jiango kvüato osi nina kangtsüa onte zikata evamo kyon jiango kui vancho ato? 21 Kvüthüng nina nishomka to nchüma evamo kyon jiang na ni khyoe ni pono esapvüi tssoa sana ninajo kvüto phyovla? Niji eloena tsopukathüng ryusango ji esüa ni-ryusanga ni nov. 22 Osi nina kvüthüng shiang shi ntio tsükona nipono heto tssoa sana to enga sana, osi ntio tsükona ni mpensü jiang reroe ni siyisi nipono retso-efürama tssoa sana to enga sanahojijo ni mmen jiang ji ekyuthav etsso ji tsükona ka toji hungu. 23 Enyiko Ethopian kyon jina ombo tsükpyon ji tongphichecho alo, mekana khüzhü mmhor jina ombo parak-pari ji tongphichechola? Ontena tongphicheo salivo, nte ochoang na n-mhom ji tae etssov ji ntsicho sana jiangna ha elan etssov ji ntsichev. 24 Nteji lijüng ezhü na mavü jiang venroe esio ji esüa OPVÜI na meta topvülo nzüroe nte sivka. 25 Nte sükhying ji heto tssovka to Ombona phyothaka. Heto etssov ji ombona methakthaka, ntiotssole ntena ombo mhechoe sicho osi ejüng potsow jianglo longtsükatacho. 26 OPVÜI na Ombobo nte mpensü jiang shaki nte siyisi nte yikratokvü. 27 Ombona etssako elhi jiangji ntena tssota ombona nte hungthaka. Osi ntena phunglani elani oli potsow n tsi jiang potsow jiang khümo, eboe nthae na ombo phinakishüm eng ji yana woato, osi kvürübung na okyu yamo ji esüa tssota ombona nte hungthaka. Jerusalem kyonden, nteno echüv nte zenkathaka! Kvüthüngti ntssünga nte kümlamla?
Ekyuthav Tsüngkying ji
1 Tsüngkying ji tsükona OPVÜI na athüngi heto a ezocho, 2 Juda ji nungkhunungra lo vana; ombo yantsü jiang chüa yiala, osi ombo kyon jiang na nungra lona likoe eritherala, osi Jerusalem jina ha nzanchi chona kyala. 3 Ejüeli kyon jiang na onte phajae jiang ojü olo wothukala; Ontena jüjen jianglo woala tokhatola ojü n hung; Ontena jümvüru jiang ejüng hansi kholanala. Lümbüm esoka osi hamacho; hoji tsükona onte mha jiang mphoala. 4 Ntiotssole eryu n jocho, osi likoji kyingkae sicho, lijon jiang ji lümbüm na noala; hoji tsükona onte mha jiang mphoala. 5 Oli, Siano okyu jinaha ompvüro nropamo ji sinkiala, ntiotssole yantsophen ero n li. 6 Orae kurü jiangna phunglan kvüri jianglo mangala osi ranfü esüa ethük mhüa echenala; osi onte mhyik jiangha mozoa yiala, ntiotssole onteno etsoyu hungi n tso. 7 A kyon jiang na athüngi heto erontacho, 'E mmen jiang na mpa nlan epilea, enzanchia OPVÜI, nina phyochako ji esüa. Ena yuta elümotolo ni thüngina tsani yithaka; Ena ni yaka mmen tssothaka. 8 Israel eyilo jo nilo tae; Ezüp etsü lona eshancho ji ni. Ntio tsükona nino a metalo omoatsi esüa, osi yentsae na zümoa tae nchemo ji esüa tssoala? 9 Ntio tssona nino emhuktsüngo kyon esüa tssoala, osi rasan oyam nzanchiv etho n licho esüa tssoala? Otsotso tola otsotso, OPVÜI yo, nino e ndüngo vana! Eyio ni kyonden ka; Eti sinkilanga.' " 10 Kyon shiang tsükona OPVÜI na phyoala, "Ontena ontepopo n saya na a thüngina tsani eyiv jitae chokatala. Hoji tsükona onte thü ngi a n matha. Ontena ntio ori elhi tssoa sana hoji onte nchümcheyia vamvü osi onte mmen jiang tsükona ezüp onte piv." 11 OPVÜI na a ezocho, "Kyon shiang nzanchiv jo a ti-zoa. 12 Ontena mpa khangta jonjilea, ana onte ekya won jiang nngayi, osi ontena mpa erungthan osi otssuk-omum than mpa khi athanlea ana onte n mathayi. Jithünginajo ritsolona ana onte lüngthav, osi tsokhang yukhang tona nochonori to lona onte chüthokvü." 13 Hoji süijo ana ezocho, "Sandamo OPVÜI, zenkhying jiangna ritso osi tsokhang yukhang liv mek, tolea OPVÜI na ete meta shilojo noying tae litoku to OPVÜI na phyothaka to kyon jiang thüngi ezoji nina ntsia." 14 Tokhatola OPVÜI na heto ajanlancho, "Zenkhying jiangna amyingona ejüng phyoala, ana onte n wothuk mekana oyi motsüngatia onte ezov tsükona yidan n pi. Ontena hungjancho yi phyota evamo jijo a thüngina mek, osi ontena methecho phyota evamo jiha oman nlio; ontena onte popo nchümcho tae. 15 A, OPVÜI na ni ezoaka, zenkhying ochoangna ana onte n jenchia ha a myingona ejüngji ritso osi tsokhang yukhang meta shilo nli tolea noying tae tssovto phyocho sana jiang thüngi ana ntio onte tssoyiv sana zetaAna ritso tona tsokhang yukhang to lona onte chüthokuka. 16 Kyon ochoang thüngi shiang shi ezocho sana jiang ha hojito onte kheti chüthokvü ka. Onte echümüng jiang ji Jerusalem lantsüi shümtherae siv, osi ochinaha hojiang tsakae juthei esio tüv vamvü mek. Heto shiji onte topvü thüngi tssovonte tsoeni, onte tsokhyingden, osi tsoloden topvüto. Onte nmhon ji tsükona ana onte lwothukvü." 17 A nungkhu nungra ji tsükona kyon jiang thüngi heto ezole to OPVÜI na yidan apicho: "Amhyikina esütsü zümo eng tsüa vanthokuka, osi a ekya ji kvüthüngha n santhokvü ka, ntiotssole a kyon jiang ji elümoto junga tssatssothaka osi elümoto n mhom tachithaka. 18 Ana kvüthüng oli jianglo woasana, kyon ritsso lona chüo müng jiang ana hungala; Ana kvüthüng yanro jianglo woasana, kyon jiang ji ekhang lona chüa ana hungala tolea Zenkhying tona pvüti to jiang na onte elhiji to tssota yia vanala, tokhatola ontena ntio tssota vancho sana ji ontena n tsi."
Jonjitala
Kyon Jiangna OPVÜI Thüngi
19 OPVÜI yo, Juda jo nina kholangi sithakcho alo? Nina Zion kyon jiang tssaka alo? Nino ntio tsükona e nmiyilancheo tüv jitata n mhom etssatssochola? Enajo noying eyilocho, tokhatola ntia mmhom tssocho n hung; Ena jo emithuk eyilocho, tole hoji dungche ekhenlung yithukcho. 20 Ena nipono mmen tssothaka, OPVÜI; Ena e mmen jiang phyochakala, osi e motsüi jiang mmenha phyochakala. 21 Ni echümchak ji nchümcheta, osi eti-tssaka; Jerusalem pono yikra hansi ti-yithuka, Ni phfütsson vantsü meta jika. Nina ntsata e thüngi evao ji bejaki ti-sia. 22 Jipo shiang kisü kumoe naha eryu hansi n yikhok; oyak jinajo ombobo eryu n jothukche. Ena e eyilo ji nilo vathaka, O OPVÜI E Potsow, Ntiotssole shiang hetopvü etssovo jijo nitae.
Juda Kyon Jiang Monthukvü Tsükona Yilan
1 OPVÜI jina ezocho, "Moses ha Samuel onina mpa shilo mahgkachi a thüngi jonjia vanlea, ana kyontsük shiang tsükona khonzan to n tsso. Nra yithuki sia; a ehungo na onte tsanthuka. 2 Ontena kuoe yivla to ni egana, ana heto phyochoka to ezoa: Ejoma jo nochonori lona echüv zenkathaka, küma hojilo yichevka! Ejoma jo ritso lona chüthoku zenkathakahojiango hoji sükhying jilo yichev! Ejoma jo tsikhang hankhang lona chüthokvü zenkathaka! Onteno hojilo yichevka! Ejoma jo morantsan ekümo metapoe yirathokvü; hoji tsükona onteno hojilo yichev. 3 A, OPVÜI shina, ekyuthav lanka mezhü onte pono tssothoku methakthaka. Onteji ritso lona lüngthav, osi onte echü müng jiang füro na süroe tsov, osi hojilo enhyo jiango worowoni na tsosi elani jilo enhyokao jiango orae ekümrümo na rüngrotav. 4 Ana limha shilo kyon topvüna onte zesi ekhentsüngo jitüv tssothokvü, Manasseh, Hezekiah tsoe jina ombona Juda lo mesao tssoathüng ntio elhi n mhom tssocho sana ji tsükona. 5 OPVÜI na phyoala, "Ochona nte nzana nchümvüla, Jerusalem kyonden? osi ochona nte tsükona nungravla? Ochona sunga mangi nteji kvüto vancho sana to vwongkhyua engavla? 6 Nte kyon shiang na a khaksithaka; ntena mankvü na athüngoe phichithaka, hoji tsükona ana a khe yonchi khi nte ejüprocho. Ntiotssole la tona alüm etsukji tssünglancho na a sangtsüngthako jina. 7 Meta shilo yanro jiang topvülo nteji mavü esüa mbung jilo nte shümchicho. Ana roe nte sichoka, a kyonden, Ana nte ngaro jiang lüngthacho ntiotssole ntena nte lanka nmhom jiang lona n khophi. 8 Nte metalo emi jiang ji jümang tsae hajang jiang lona kyongkata. Ana nte khyingroe jiang ji onte nungothüngna lüngthae onte sisi oyo jiang nungrathukcho. Ana zaktole emhokthav lüm etsuk osi haruk khi onte echhükcho. 9 Oyo ochona otsoe nchuyu tiying moncho sana jijo zünghae, echenmhuka erithethaka. Ompvü tsüngon ji emüng kümthaka; Ompvü yikrathukthaka, osi lüm na noala. Nte kvütata eküm vanlanchi vancho sana jiangha ana nte ri jiang khi nte lüngthathokvü ka. Hojito A; OPVÜI shina phyothaka."
Jeremiah na OPVÜI Thüngi Phyochophoriala
10 Ntio ematha n li kyon hetüv ato aiyo! Ntio tsükona ayona limha shilo a rothukchoto? Meta shilo otsük akvü thüngi ekhiranta osi khonta evo saka aiyo. Ana oyam thüngi orang nochoha n li; osi ana oyam nocho tüvha n li; tokasi otsük akvüna a rihiyitala. 11 OPVÜI yo, ana mmhona ni n benkacho tssona, osi ari jiang ezüp nmok yutalo onte thung tssoa ana ni thüngi n jonjicho tssona onte rhiyi-randanka topvü benthuka. 12 (Kyon ochinaha yonjak n khusoche, Jükiwoe yonjak echümpo tssoa dama nzio yonjak jiango.) 13 OPVÜI na a thüngi heto a ezocho, "Akyon jiang na meta topvü lona mmen tsso jina ezüp onte pia, ana onte ri jiang wothuka a kyon jang ejüeli jiang topvü hani khiyithuku. 14 Osi ontena ntia n tsio tvü metae na oyi onte ri jiang benkathukvü ka, ntiotssole a lüm etsuk ji omi esüa tüv, osi hojina nchüngkhonto kia vamvü." 15 Hoji süi jo ana phyocho, "OPVÜI yo, nina engatheta. A nchümcheta, osi a nzanchia, osi ochoangna a khangshicho sana jiang ji a nlilanthuka. Ontena alüngthav yuta jana onte pono rüma ti-vana. A yikvü-yilo shiang hetopvüto ni benka lona ka to a ti-mhechoyia. 16 Nina ajancho, osi nina ntio yi phyocho sana jiang topvü ana engacho. Aiyo ni echhi, OPVÜI Thotsü Potsow, hoji tsükona niyi jiangna alümbüm pyingi ematha longshi a piala. 17 Ana a yuta jiang ji oyam thüngi emata osi thama lona ezi khi n si. Ni yizüng jiang enga apoti vancho osi lümbüm etsuk na apyingcho. 18 Ntio tsükona heto a ezüpvü vamvüla? Ntio tsükona a tsüko okhfü jiang n micheo tssochola? Ntio tsükona onteji n miala? Nzyulo zhükfü nghae esio zhükhfü jiang esüa nina a ezüpthukvü salo?" 19 Tole hoji yiji OPVÜI na heto ajanlancho, "Nina kholana tssona ana ni khivka, osi niji a phajae ni kümlamvüka. Nina ethelan n lio jiang nsana vanthüngona jo ethev elio yithen jiang khi thenchoa vancho tssona, nino elani a zenkhying ni kümlamka. Kyon jiangna onte popo ni yana rov osi nina onte thüngi evov tüv ethev n li. 20 Niji onte tsükona jo pyontsü yonjak echung esüa ni kümthokvü. Ontena nirokav khatola ontena jo ni khyov mek. Ana ni shanchoa ni nkohav tsükona ni ndüngo tssov, osi ni pono ntia tssov mek. 21 Kyon nmhon osi lümbüm tsükshi jiang etho lona ni shanchov. A, OPVÜI shina hojito phyothaka."
Jeremiah Eküm Tsükona OPVÜI Lüm Erüngji
Elani OPVÜI na athüngi janta heto phyocho, 2 "Meta hetüv lona jo yanpiyanthan ti-tssota mekana otsoero ti-litava. 3 Ngaro ochoang shilona buka sana osi onte pvüpoe jiang thüngi ntio kvüto tssov sana ji ana ni ezovka. 4 Onteno ekyuthav nochonori lona chürav osi ochina ha onte tsükona n nungra mekana onte echümüng jiangha shothe n si. Onte echümüng jiang likoe lizü hanrhyue sicho esüa tssov. Onteno ritso lona chüv mekana tsokhang yukhang lona chürav osi onte echümüng jiang worowoni tona orae ekümrümo to jiang jak tssov. 5 "Nungrata vamo jitüv kilo nina n rhovov shikhfü. Ochi tsükona ha ti-nungra. Ana enhungo a kyon jiang noying khi mmhayiv mek, mekana nzan osi khonzan onte n jü. 6 Ejüeli osi yantsae tsüpho teri topvü meta shilona chürav tolea onte shothei esilea n van. Osi kyon ochina ha nungra lona kvüri tssüi sia mekana otsüko tsükthechia to n tsso. 7 Onte nzamo kyon jiang chüathünglea ochina ha onte thüngi n tsorhyu-yurhyu. Ochina ha nzanka to onte n tssoyi, osi ochosana opvü-opo mpa mona yilea onte nzana n ehüm. 8 "Oki kvülo longshita tsoyuta vancho sana jitüv loha ti-rhowoa. Onte ndüngo khokthei ti-tsoyutava. 9 A, Tokhamo OPVÜI, Israel Potsow, shina ntio ephyov licho sana ji enga. Ana ematha longshita won osi yanpiyanthan longshita won jiangji jükrüpi sitokvü ka. Osi kyon shilo evamo kyon shiang na eküm vani shiang shi tssoa hunguka. 10 "Nina kvüthüng shiang shi ezoa sana, ntio tsükona ana hetata tsükshia onte khangriv methakcho sana ji ni engav. Osi ontena ntio nlan tssocho lona mekana ntio mmen onte OPVÜI Potsow pono tssocho sana ji ni engav. 11 Tona OPVÜI jina heto phyocho to onte ezoa, "Nte pyimtsümostüi jiangna athüngina nlüpi yisi thanpo potsow jiang khümtacho, osi onte benkacho. Ontena akhaksicho osi a püngnoyi jiang nngacho. 12 Tokhatola nteno nte motsüi jiang lona n mhonka tssothaka. Nte topvüto lümbüm ekhüngden osi n mhonden, osi ntena ha oyi nngacho. 13 Hoji tsükona ana meta shi lona khi nte siv osi ntena ha osi nte motsüi jiangna ha ntsihamo jitüv meta lo thechi nte siv; osi hoji lona ntena zümo eng oyam potsow jiang benkata vamvüka, osi ana khonzan nte thüngi ejüv meka."
Tsanthan Ekümo na Elani Eyioji
14 OPVÜI na phyoala, "Kyon jiangna Aiyo eküm evamo Potsow ochona Ejip metae na onte sochukcho sana jika to a myingona n chümvü yuta ji tsathaka. 15 Ji thünginajo ontena, aiyo eküm evamo Potsow ochona Israel kyon jiang ji jükiwoe meta kvülo ana onte nzüroe sicho sana jiang lona tona meta thanpo jiang to lona onte sochuko jika to a myingona echümtav. Ana onte meta kümoe onte motsüi jiang picho sana jilo onte solansi yiv. A, OPVÜI jina hojito phyothaka."
Yitsso Etsao ji
16 OPVÜI jina phyoala, "Ana ngorüm elümoto rothuki khi kyon shiang rhümale to kyon wothukala. Hoji sülojo ana sophanden elümoto rothuki phunglan osi yondon jiang topvü lona osi olong yulo longkvü jiang lona onte phanchochithuku tsükona rotokvü. 17 Ontena ntio tssoa sana jiang topvü ana onte hunga vanala. A thüngina ntia mphoe n vache; onte mmen jiang a ehungona n yiche. 18 Onte mmen osi n mhon jitüv eni ana onte lwothukvü, ntiotssole ontena a meta shiji kisü kümoe echümüng esüa eküm n jücho sana jiang khi pyingthukcho, osi onte ejüng potsow jiang khi pyingthukcho."
Jeremiah na OPVÜI lo Longtsükata Randamoji
19 OPVÜI yo, nino ochona a nkohoa, etho apia vancho sana hoji, ezüp yuta lo nina anzanchiala. Jipo jiang na limha ochümi na oro heto phyotav, "E pyimtsümotsüi jiangna ntia mekna ejüng potsow jiang licho, ntia mek tolea ethev n lio kisü tae. 20 Kyon ochona sana ombopo ombo potsow nsüngrüchechoke? Mek, ombona nsüngrüchelea hojiango potsow tsotso tssov mek. 21 "Hoji tsükona OPVÜI na phyoala, "Echunga taena ana jipo jiang thüngi a etho osi thokhyung ji onte ejüv; tosanati ontena Aiyo OPVÜI ji to a ntsiv."
Juda Mmen osi Ezüp
1 OPVÜI na phyoala, "Juda kyonden, nte mmen jiango yonjak eranphen na erancho; osi hojiang ji tsentsülong nzemvü khi nte lümbümi tona nte thanphensa nken to jiang lo khyik-karacho. 2 Nte kyon shiang shina thanphensa jiang lona khümta, odung akvüto kupi, phunglan kvüri jianglo tona 3 meta ejüngi elio to jiang topvülo Ashera potsopvüi ji kisü ekachi vasi khümtala. Ntena nte meta mpüm tolona heto mmen tssotao ji tsükona ana nte ri jiang khi nte ejüeli jiang topvüto hani nte khiyithokuka. 4 Hojito nteno ana nte epio meta ji sisi ntena ntia n tsicho tüv metae oyi nte ri jiang benkata nte vantokvüka; ntiotssole a lüm etsuk ji omi esüa tüv, osi hojina nchüngkhon kia vamvü."
Yiphyo Olan Olan Jiang
5 OPVÜI na phyoala, "Ochona a lona tsani oyi, chüi esio kyon etho jianglo longtsükata sana ji kyonmo jijo ana nlan ombo piv. 6 Ombo lijüngi ranukro esüa tüv, kümoena rhomhon likyingo za sana ji esüa tüv; osi oma liko kvüloshi ntinaha n rankachecho sana ji esüa tüv. Ombo lojo ntia mmhom n tssoala. 7 "Tokhatola kyon ochona a lo longtsükata sana jijo ana mmhayiv. 8 Ombo odung mmhom zhükhfü tsalo zae oying süngchukehi ojü tssümi yua vancho sana ji esüa tüv tssov. Tsüngkying rheyileha hojina ntia ekyuv n li, ntiotssole hoji vo jiango mmyakpvü vanala; Eryu n joathüng leha ombona ntia wongkhyuv n li; Ombona tsüngthi ethipvü vanala. 9 "Ochona kyon lümbüm ji engathekhukchola? lümbüm ji esüa ejithechio thanpo ntia n li; ombo n micheo tüv nochonorithaka. 10 A, OPVÜI shina kyon nchümri jiang yanala osi lümbüm ji chyui zetala. Ana otsük akvü ombo vanlanyilan ji ephan onte tsütsata yantsoala, osi ombona ntio mancho sana ji ephan piala." 11 Kyon ochona n tsa-nrük lanka lona orang hungasana jijo woro na ombona n jücho ejü tüv shüpa vancho esüa tüv. Ombo jali ekümona ombo ejüeli jiang moni siv, osi ochümijo ombo ntia mek, tolea zhüvae tssov. 12 E ekhümki jijo phfütssomo vantsü esüa benkadenina phunglan ntsom lo mangi vanpvü. 13 OPVÜI yo, nino Israel eyilo ji; ochoang kvütata na ni sinkia sana jiango yikrathokvü. onteno live lo omying erankacho esüa monikhi siv; ntiotssole ontena ni OPVÜI, jüthan bukchephen ji ni sinkicho.
Jeremiah na OPVÜI Thüngi Nzanchi Chonala
14 OPVÜI yo, a emiyia tona elümoto mmhona akümvü ka; a phanchoa tona a nkoche-nrünguka. Ana thünga evamo jijo ni! 15 Tole kyon jiangna azotacho, "OPVÜI na e tsükona ekyuv methaki evayio jiango kvüato? Ombo khi hojiang enhünga benphitoka!" 16 Tokhatola, OPVÜI, kvüthüngha ana onte pono ezüp yithukle to ni nnüngka; ana onte pono ezüp yuta eyiv jitüv a n choka. OPVÜI, nina hoji ntsia; ana ntio phyothakcho sana ji nina ntsia. 17 A ti-ekhenthuka; Nino ezüp yiathüng a tsankaphen ji. 18 Ochoang na akhangshicho sana jiang pono yikra yithuka, tolea aiyo a nküpnfücheta, OPVÜI. Ekyuv khi onte pyingthoka, tolea aiyo ati-khenthoka. Ontelo tssorophyoro hansi yia osi onteji tsaromoroe sia.
Esanmung Benphiv Ji Tsükona
19 OPVÜI na athüngi heto azocho, Jeremiah, kyon shiang kipüngto etsao kvüloshina Juda mesao jiangna yantsü jilo chivorheyiphen tssota vancho sana jilona owo ayithen ji thenchoa phyoa; tosi Jerusalem lo kipüng jiang topvülo wolana. 20 Osi mesao jiang tona Juda kyon jiang osi Jerusalem lo evan, thüngi kipüng jiang lona rhowoe ana ntio phyoa vancho sana ji engatale to onte ezoa. 2i Ontena onte eküm jiang nzana tssona, esanmong nchuk oha ti-hanpitale to ezoa, 22 Ontena esanmong nchuk kipüngkhan ji yakchia ntia hansi n rheyiv shikhfü, mekana esanmong nchuk onte kina ntia n hanchoku shikhfü; osi ontena esanmong nchuk elhiha n tssov shikhfü; osi ana onte motsüi jiang thüngi yizüng pio ji esüa esanmongn ji ntho tssothuka benphiv shikhfü. 23 Onte motsüi jiangna ayi nnga, mekana hoji junga n khi. Jithüngina jo onteji lümbüm khüngkae sicho; Ontena ayi ha nnga, mekana a thüngina ntia ntsi n khi. 24 "Kyon shiang na ayi ji enganrüngu shikhfüka to onte ezoa. Ontena esanmong nchuk yantsü shi yakchia oha ntia n hanphiv shikhfü. Ontena tsüngon shiji ntho tssothuka benphiv shikhfü, osi ntia elhi n tssonrüngu shikhfü. 25 Hojito tssona onte mesao osi mesatsoeden jiangna Jerusalem kipüngkhan shi yakchia rheyiv osi David lo elio mesa etho ji omboloha liv. Osi ontena Juda kyon tona Jerusalem to nzo tssoe khi ritsso zotoro osi kurü mankvüina sanphitav, osi Jerusalem yantsü ji yuta topvülo kyon na pyingu. 26 Jerusalem nkonphia Juda yanro jiang tona oyan jiang to lona kyon jiangna rov, Ontena Benjamin erü jiang lona tona elani phunglan yejo osi yondon jiang lona elani, Juda meta jüjowoe to jiang topvü lona kyon jiang rorav. Osi ontena ekhümki erungthan, khochak than, otssuk-omüm than osi orhüm mmhom tona montso epithan to hansi rov. 27 Tokhatola ontena ayi engav shikhfü osi esanmong ji nthoa benphiv shikhfü. Hoji tsüng ono jo ontena Jerusalem kipüng ji yakchia oha n hanphi-nrüngu lia, ntiotssole ontena hojito tssoana ana Jerusalem kipüng jilo omi njükav. Osi omi jina Jerusalem lo mesao vanphen jiang rongu, osi ochinaha hoji n panmheche.".
Jeremiah na Phfüjoe jiki Eoji
1 OPVÜI na a ezocho, 2 "Phfüjoe ji ki jowoa, ana jilona a yithen ji ni pivka." 3 Hoji tsükona ana jovocho, tole phfüjoe jina elhi tssoa vana hungcho. 4 Kvüthüng ophfü jiang mmhona n chiyia sana ombona ochon ji khi ntiosana thanpo nsüngrücho. 5 Hoji süijo OPVÜI na azocho, 6 Phfüjoe jina ochon ji khi ntiosana tssoa evamo ji esüa ana nte Israel kyon jiang pono etssov a elan n lichoke? Phfüjoe ji khelo ochon ji esüa nteno a khelo. 7 A yuta thama lo jipo thama osi ekhüngyan thama roki sivka, mekana roe osi süjoe siv to ana phyoa vanle, 8 tole jipo jiangna onte ntha lan jiang lona khophivo, ana ntio etssov phyocho sana ji ana n tsso. 9 Tokhatola ana jipo jiang tssokachivka mekana yantsü jiang chüngithokuka to phyole, 10 tothüngji jipo jiangna ayi nngav mmen tssota yi-sivo, ana ntio tssov to phyocho sanaji n tssov siv. 11 Hoji tsükona enhungo Judalo kyon osi Jerusalem lo kyon jiang thüngi ana ezüp onte piv saka osi ana onte pono okyak tssoa methaka vanaka to kyon jiang thüngi ezoa. Mmen eküm ji lona esantava to ezoa-osi onte lanka jiang lona mekana ontena ntio tssota vancho sana jiang lona khophitale to ezoa. 12 Tona ontena heto phyotav, 'Meka, ena ntio tsükona hojito tssovla? Ena e topvü na lümbüm khüga vamo ji esüa khüngu osi ntio kvüto n mhoncho sana jilo evanhungala.' "
Kyon Jiangna OPVÃœI Khoe Sicho
13 OPVÜI na phyoala, "Shi esüa kvüthüngha heto tssetssohancho sana jipo jiang engae zetava. Israel kyon jiang na ekhenthav elhi tssothaka! 14 Lebanon longsürhen jianglo kvüthüng sana tia sheryu n rümkav vana alo? Mmyim phunglan jianglo zhükhfü jiang ji kvüthüng sana ngathakcho alo? 15 Tokasi a kyon jiangna amhechothaka; Ontena kisü jiang thüngi tsütse rungtala. Ontena wov sa evamo lan jilona onte nshüphithaka Ontena lanhen ji n dunglam sithaka; osi chekav n lio lan jilona sanphitala. 16 Ontena meta shi ekyuthav tüv kümthukthaka, nchüngkhonto tssaka evamo tüv meta. ochoang kvata na yakchia yia sana ontena ntio hunga sana jina onte ekhenrhüküka; osi ontena emhoka kvüri eyephita yiv. 17 Ana a kyon jiangji onte ri jiang mhadungona nzüroe onte siv, engkhüwoe mpung jina livero venphiojito. Ana a mankvüwoe na onte philanchiv; osi kvüthüng ezüp yia sana ana onte n kyochi."
Jeremiah Pono Okyak Etssoji
18 Hoji süijo kyon jiang na phyotacho, "Etena Jeremiah ji ntiona tssoyitavka! Ete eshika püngnov tsükonajo pvüti jiang yuta topvülo vamvü, ejürünyu epiv tsükonajo nchümri eli jiang vamvü, osi Potsow yithen jiang thenchov tsükona jo zenkhying jiang vamvü. Etena ombo pono nlan shakatavka, osi ombona ntio phyoa sana ji nngatala." 19 Hoji tsükona ana randancho, "OPVÜI, ana ntio phyoa sanaji azoyia, osi a ri jiangna a tsükona ntio phyota vancho sana ji engachia. 20 Mmhom ji jokheman jo n mhom ji alo? Tole ontena a elongthetokvü tsükona sokvü jue lia. Ana kvütoli ni thüngi oro onte thung tssoa phyocho sana hoji nchümcheta; ni lüm tsuka ontem tsütsav tsükona. 21 Tokhatola OPVÜI yo, enhungo, onte tsoero jiang tsokhang yukhang lona chüthoka; onteji ritso lona chüthoka. onte tsoeni jiangji orapvüi jiang tona ngaro jiang to monia; osi onte eboe jiang ji nochonori lona chüthoka, osi onte khyingroe jiangha ritso lona chüthoka. 22 Ontena n tsina vanathüng onte ki jiang hayae khi onte retsoyithuku tsükona kyon jiang rotoka, osi ekhen lona onte kyathuka. Ontena a elongthethukvü tsükona sokvü jyuo jilo a sathoku tsükona tsirhi ha donkae lia. 23 Tokhatola, OPVÜI, ontena a lüngthav tsükona okyak n mhom tsso jiang topvü nina ntsia; onte na mmen tsso jiang tsükona nlan tisiyia, osi onte n mhon jiang mhechoa ti-siyia. Onteji khyothechi shümchokchi sia, osi ni lümbüm etsuk ji n monthüng onte tssümphia."
Chonphfü Varo Ji Ejuka
1 OPVÜI na chonphfü shilo wole to azocho. Osi ombona kyon jiang yulo eramawoe ejoma tona pvüti eramo ejoma to jiang sonhyasi, 2 Chonpfü ero siphen kipüng ji yakchia Hinnom hayitsü jilo chivole to azocho. Osi hoji lona ombona ntio yithen apisana ji thenchoa ephyov tsükona, 3 OPVÜI jina heto phyole to azocho, "Juda metalo mesaoden osi Jerusalem kyonden, A, OPVÜI Thotsü osi Israel Potsow jina ntio ephyov licho sana ji engatava. Ana meta shilo tssorophyoro n-mhom hansi yiv sala osi ochoangna hoji zoasana onte ngangchev. 4 Ana meta shilo heto tssov sa evamo shijo kyon jiangna a sithako jina, osi ontena n tsicho potsow jiang mekana onte motsüi jiangna osi Judalo mesao jiangna tia n tsio potsow tüv jiang othan pia khümta to etsso ji tsükona ana heto onte ezüpthokuka. Ontena meta shiji n lan nlio jiang ejen na pyingthokthaka. 5 Osi ontena omina onte ngaro jiang runga ethamvü tsükona Baal potsow ji thanphen nsüngrüi lia. Heto etssov tsükona ana kvüthüngha onte ezocho n li; hojitüv alümbümi tia n rheyi ntsa. 6 Hoji tsükona meta shiji Topheth mekana Hinnom hayitsü to ji n tsav esiv tsükona yuta tsathaka. Hoji thünginajo meta shijo 'Lüngthaphen Hayitsü' to tsav. 7 Meta shilo na Juda tona Jerusalem to kyon jiang kyak oyi nlansüng jiang shünglanchivka. Ana onte ri jiang ji onte ekhyovo tüv etho pivka osi onteno ritsophenina chüthokvü. Osi onte echümüng jiang ji worowoni tona orae ekümrümo to jiang jak tssoa phi khi onte sivka. 8 Yantsü shilo hetüv ekhenthav tssorophyoro rothoku osi ochoangna yantsü shi yakchia sana ekhenrhüka osi ngangcheta to tssov. 9 Ori jiang na yantsü shi hayae khi kyon jiang lüngthav ekhyo tssov. Osi onteji ekhenthao vükthechi-nrüngi sioji yakchia onte onte tsota onte ngaro jiang mpato tsota to nandang tssov." 10 Hoji süijo chonphfü ji anzo ewo kyon jiang mhadungo na vanrole to OPVÜI na azocho. 11 Osi kyon jiang thüngi heto ezole to OPVÜI Thotsü jina azocho, "Ana kyon shiang tona yantsü shi toji chonphfü kvüto vanroe khi n züptalanchecho sana ji esüa varoe sivka. Osi kyon jiangna echü jiang ji ntiolo njithe küma Topheth lo mpato jithetav. 12 Ana echümchakala, yantsü shi osi shilo evan jiang topvüto Topheth esüa kümthokvü. 13 Jerusalem lo oki jiang osi Juda lo mesao ki jiang elani oki kvütat lona oyaki shantio jiang tsükona mhonki na tsütserhüm rungtacho sana osi kvülo shina thanpoe potsow jiang thüngi zükhi phyangchukchia to tssocho sana jiang topvüto Topheth esüa n tsüngnrüngu kümthokvü." 14 Hoji sülojo Topheth meta kvülo shina OPVÜI na ombo yithen ji thenchole to azocho sana hoji metaji sisi yicho. Ana ekhümki yitssophen jilo owo mangkachi kyon jiang ezocho, 15 Tokhamo OPVÜI Israel Potsow jina heto phyothaka, "Ana yantsü shilo osi yantsü shi nkonphia elio yan jiang topvü pono ana ntio ezüp yithokvü phyocho sana jiang yithokvü; ntiotssole nteno lümbüm ekhüngden, osi ana ntio phyoa sana ji ntena nnga."
Jeremiah Tona Pashur Pvüti ji to Oni Nrataoji
1 Kvüthüng Imer tsoe Pashur pvüti ocho ekhümki jilo tsüphotso sana jina ana shiang thenchoa phyoa zocho sana, 2 ombona asasi elani yonjakzhüna achüngi ekhümki Benjamin kipüng to etsao ji mhawoe a vanthokle to yizüng picho. 3 Osi ojyuato enyathüng, Pashur na shenzhü jilona alanchicho sülo ana ombo ezocho, "OPVÜI na Pashur to ni tsacho mek. Ombona ni pio mying jijo meta topvülo 'Ekhenlong' to ni picho. 4 OPVÜI jina ombobo phyothaka, 'Ana niji nibobo ekhenthoko osi ni shom jiang ekhenthukphen ni kümthukvü sala, osi onte ri jiang yonri na onte topvü lüngthata nina hunguka. Ana Juda kyon jiang topvüji Babylon mesao etholo theyiv sala; osi ombona ejomajo morantsan tssoa ombo metae sosi yiv, osi ejoma jo chüthokvü. 5 Ana onte ri jiang khi yantsü shilo ejüeli jiang topvü rechoe onte khiyithokvü, osi Juda lo mesao jiang ejüeli jiang mpato topvü khi Babyloni hansi yithokvü. 6 Nte tsükonajo Pashur, ni osi niopan topvü nte hayav, osi Babylon metae nte sosi yiv. Hoji lona ni chüv osi nina ejüng ezonrhüa evamo ni shom jiang nzo ni jithev.' "
Jeremiah na OPVÜI thüngi Ekhiranala.
7 OPVÜI, nina a jithechithaka, Osi aiyo a ejithechithaka, Nino a lona etho jükata, Osi nina akhyothechicho, Otsük akvüna a emakatala; Ontena engtona ayikvüta mongala. 8 Ana kvüthüng oyi nsana sana, "Meyanta! Tssorophyoro!" to kyakachio osi tüngkachio tssoala, OPVÜI yo aiyo a emakathaka, osi yuta topvülo a yikvü thaka ana ni yithen ji thencho ji yakchia. 9 Tokhatola kvüthüng, "Ana OPVÜI mhechoe sivka, osi ombo myingona ntia n phyona vamvüka," to ana phyoa sana, tothüngji ni yithen jina ochungina omi esüa a rungala. Ana eto nandang nyimthechiv ekhyo tssoala, tokhatola khalanchi. , n vache. 10 Otsük akvüna "Meta topvülo ekhenlung! to tssürüta ana zoala, Osi etena etho esae jiang thüngi ombo yirüyi tavka!" to phyotala. Osi a shom ndüng jiang mpana a joyiv yuta ji nhyakta vanala."Osi ombo ejithechichev mpa tssovka," "Osi to tssona etena ombo rhümae khi ombo nlilanchev" to ontena phyotala. 11 Tokhatola OPVÜI, nino a thüngoe, etho ejüi osi Thotsü, osi ochoangna akhangshia vancho sana jiango ochüm n che. Onteji eküm echung tsükona yikrathokvü, ntiotssole onte etüm ji n benche. Onte yikrathokvü ji kvüthüngha lea n mhechoche. 12 Tokhatola Thotsü OPVÜI, nina kyon jiang ji ntsa lona ejyui zetala; Onte lümbümi osi onte nchümrilo ntio jücho sana nina ntsia. Hoji tsükona nina ari jiang nlilana a hungthoka. Ntiotssole ana e emhok-elüm ji nikhelo ni theyi thaka. is OPVÜI denkata! OPVÜI ji thünga! Oyam na tssethechia evamo kyon jiang ji n mhon kyon jiang khelona ombona nrhachetala. 14 A ebuk tsüngon ji mphyuka-ta! Ayona abuko tsüngon ji mhechoe sia! 15 Kyon ochona apo emathatukcho sana ji rhiyikata. Kvüthüng ombona yithen ji ombo picho sana "Eboe saka! Nino tsokhying vanthaka!" to ezoa ombo emathatokcho. 16 Omboha yantsü kümoe OPVÜI na khonzan to n tssov roe sicho sana ji esüa hojito tssotoka. Osi ombo khi enya thüngna ryusanga ekya won tona englungo ritsso won to zotoka, 17 ntiotssole ombona a n vanathüngna a n lüngtha. A lüngthacho savo, ayo mman jijo alüpkvü ji tssovkasi. 18 Aiyo ntio tsükona abukcho ato? ezüp osi nungra tae ekhiv tsükona alo, osi a ekümji yikra lona ochüm echev tsükona alo?
Jeremiah Ekhyov ji Tssenchecho
1 Juda lo mesao Zedekiah na Malchiah tsoe Pashhur tona Masseiah tsoe Zephaniah pvüti to oni ji a thüngi jonjiyi heto ephyov tsükona rothukcho: 2 "Nzansi e tsükona OPVÜI thüngi ethyudayia, ntiotssole Babylon mesao Nebukadnezaar tona ombo rasan jiang tona yantsü shi vükthechiv sala. Osi nina ombo thüngi janta na OPVÜI na e tsükona chethev tssoe khi Nebukadnezaar ji ryukata shünglanchiv mpato tssokhuka." 3 Hoji süijo OPVÜI na heto ajancho, osi kyon ochoang athüngi rothukcho sana jiangji ana heto ezocho, 4 Zedekiah ji OPVÜI Israel Potsow jina heto phyothaka to ezoa, Zedekiah, ana ni rasan ochoangna Babylon mesoa. tona ombo rasan to jiang thüngi rota vancho sana jiangji khyovka. Ana ni ransan jiang osi onte ebensü jiangji yantsü longjüngo hankachi sivka; 5 osi ana a etho totona, a lüm etsuk elani a haruk osi lümbüm tsükshi to jiang theta ni thüngi rotavka. 6 Yantsü shilo evan otsük akvüto ana lüngthav; osi kyon ha ekümrümo ha ekyuthav nochonori khi chüthokvü. 7 Tokhatola ni tona ni tsüphoeden, ochoang ritso, tsikhang hankhang osi nochonori to jiang lona tsanchocho sana jiango elani ana Nebukadnezaar tona niri to ochoangna nte eküm jiang ji nte khiyihunga vancho sana jiang khi nte rhümathokvü. Osi Nebukadnezaar na nte chüthoku. Ombona nte ochia nte nkachi, osi nte pono khonzan mekana nzanka to n tsso. To A, OPVÜI shina phyothaka." 8 Hoji süijo kyon jiang thüngi heto ezole to OPVÜI na azocho, "Engatava! A, OPVÜI. shina ekümlan tona echülan to shilo ethüngi ekhiv tsükona nte piala. 9 Ochoangna yantsüi vana sana jiango ritsso lona mekana, tsokhang yukhang tona nochonori to lona chüthoku. Tokhatola Babylon kyon ochoang na nte yantsüji hayata vancho sana jiang mhadungo chivo onte khelo, khochaka sana jiango onte n lüngtha; osi ombo eküm jo mmoka tia tsanchov. 10 Ana yantsü shi n valanchiv tsükona a lümbüm methakthaka, küma roe khi siv. Yantsü ji Babylon mesao ji khelo thechiv, osi ombona likoe nshüthechia rungi siv, to OPVÜI shina phyothaka."
Juda mesao wopan pono Yitsso;
11-12 OPVÜI na yithen shiji Juda mesao wopan David tsochen jiang thüngi heto pile to azocho: "OPVÜI A, shina ntio phyoa vancho sana ji engatava. Eng akvüto ntsanrük litoka. Kyon ochoang oyam na ejithechia vancho sana jiang ji nkohoa. Ntena hojito n tssoa tssona, ntena n mhom tssoa evamo jina alüm etssuk ji omi kia esüa runga ochinaha n tamhecheo jitüv tssov. 13 Nte Jerusalem kyonden, nteno hayitsüji poni ntssoni khokthei, hayitsü kvürilo olung eshungkae vanchotoli vantala. Tokhatola ana nte thüngi rotavka. Ntenajo ochinaha nte nhayache mekana nte pikhfü jiang n rorhüpche to phyotala. 14 Tokhatola ntena ntio mmen tssocho sana ji tsükona nte ezüpthokvü. Ana nte mesaki jianglo omi nte theyiv, osi omi jina nte mesaki ji nkonphia jiang topvü rungi siv. A, OPVÜI shina hojito phyothaka."
Juda lo Mesao Wopan Thüngi Jeremiah Yithen
1 OPVÜI na Juda lo mesao David tsochen ji mesaki owo, mesao osi ombo küpo tsüphoeden osi Jerusalem lo kyonden to jiang thüngi OPVÜI na ntio phyocho sana jiang engatale to ezolo wole to azocho: 3 "A, OPVÜI shina ntiojo elan osi ntsa sana ji tssole to yidan nte piala. Oyam na ejithechia evamo kyon jiang ji ejithechipvüi jiang khelona nkocheta. Metapoe kyon jiang n-mhom ti-tsütsata osi ti-tssethechile, elani opvü opo n van, osi emi to jiang ti-züpthuktava, osi ntho meta shilona ntia n lan n li kyon jiangji ti-lüngthatava to yidan nte piala. 4 Ana ntioyi nte picho sana jiang ephan otsotso benphia tssona tona David wopan jiangna mesao ji tssonrhüa yia vamvüka, osi onte tsüphoeden tona ombo kyonden jiang to nzo tssoe ritsso zotoro tona kurü mangkuina mesaki kibüng shi yakchia chivorheyi tssoa nte vanthokuka. 5 Tokhatola ntena ayi nnga tssona, ana echüma nte ezoaka, meta shiji roe sivka. A, OPVÜI shina hojito phyothaka. 6 "A tsükonajo Juda mesaki jijo Gilead meta emüngyanthav osi Lebanon phunglanro jiang esüa tüv, tokhatola ana eying-khfüukhfüna ochinaha n vamo meta kümthoki siv. 7 Hoji roe esiv tsükona ana kyon wothukala. Ontena onte opvü-lepok topvü bensi oro hojilo cedar durhyu mmhom elio jiang tanchüchüi omi thechi siv. 8 "Okholi jo metapoe kyon elümoto na meta shi yakchia sanphitav, osi ntio tsükona ana yantsü thüngche shi pono shi esüa tssoyichoto-to, emhoka onte onte engata sanphitav. 9 Hoji sülojo ontena heto etsso shijo, ntena nte Potsow a thüngi ntsatao ji sinkisi thanpo potsow jiang benkata, khümta yio jinaka to ontebobo janlanta sanphiv."
Joahaz Tsükona Jeremiah Yithen
10 Juda kyonden, mesao Josiah tsükona jo, ti-kyatava; osi ombo chüo ji ti-nungratava. Tokhatola Johaz tona ombo tsoe ji to tsükona jo nshüthechia kyatava, ntiotssole omboji elani n yilamo sosi yiala. Elani kvüthüngha ombo ebuk meta n hunglamo yiala. 11 Josiah tsoe Johaz ochona Juda lo mesao etssov opo echungcho sana ji tsükona OPVÜI na heto phyoala, "Ombo elani n yilamo tssoa meta shi lona yithaka! 12 Ontena meta kvülo ombo sosi yicho sana jilona ombo chüvka, osi ombona elani kvüthüngha meta shi n hunglan."
Jehoiakim Tsükona Jeremiah Yithen
13 Kyon ochona ombo kiji n tsa-nrük lona tssokachicho sana, osi n lamo lona oki ji tsükathoko ji tsükona jo ayako; Osi ochona ombo kyon jiang ji ntia mekvü lona elhi tssothuksi hoji jokheman ji n pia sana ji tsükona jo ayako tssov. 14 Kyon ochona, "Ana apopo kipvü tssokachiv, osi ekhaka omhawoe chungso jiango tsüphoa khiv, to phyoa vancho sana jiha ayako tssov." Hojito ombona okiji tssoe, hojilo kherüki jiango cedar tsüng na nsüngrüi, emyom na nzukcho sana jijo monthokvü. 15 Cedar tsüngna oki tssoe van-na, osi oyam ki lona mmhonkata tssoe vanle; hojina mesao mmhonkao ni kümvü alo? Nipona eküm vanthata vancho, osi ombo yuta topvülo ntsa osi elan ji etssoe, osi ombona ntio tssoana jiang topvülo tsüka-ranka licho. 16 Ombona yantsae jiang ntsa lona oyi tssoyicho, osi olan topvü ombo tsükona jo mmhoncho, OPVÜI ntsia to ephyo ji yichak jo hoji. 17 Tokhatola nino ni kija tajo elüm jitae; Nina n lan nlio kyon jiang lüngthacho osi ni kyon jiang tsükshia tssethechicho. OPVÜI jina hojito phyothaka. 18 Hoji tsükona Josiah tsoe Jehoiakim, Juda mesao ji tsükona OPVÜI na heto phyoala, "Ochina ha ombo echüo ji nungra, mekana 'Kvüta ekhenthava to, oshomyo, kvüta ekhentavto! tolea n phyo. Elani ochina ha 'A, OPVÜI! A, mesao!' to phyoa n kya osi n nungra. 19 Gadho chücho silo ota totae esüa, ombo müngji sütasi owo Jerusalemkibüng tsae shümchokchi siv."
Jerusalem Sükhying Tsükona Jeremiah Yithen
20 Jerusalem kyonden, Lebanon lona owo tüngtava, Baashan metaena owo kyatava; Moab phunglan jiang lona tsachoktava, ntiotssole nte khümtsütao okho jiang topvüto khyothechithaka. 21 Ni bentayita vanathüng OPVÜI na ni jancho, khatola nina nngacho. Osi nina ni eküm echung hojito tssoa yipvü; Nina kvüthüngha OPVÜI yi nngahan. 22 Ni esopvüiden jiang ji mbung na vena yikhamka, Ni kyochia evamo jiang ji ritsso morantsan tssoa sorasi yiv, ni yantsü jiha yikrakhiv, osi mhashuk tssov; nina kvütata n mhom tssocho sana jiang tsükona. 23 Nina Cedar tssüng Lebanon lona hansi eyio jianglo enhikata vankhuka; Tokhatola nino kvütata enzantharo tssovto, kvüthüng eno jina ni rhaka sana eloena tsobukusathüng noji esüa jitüv eno tssov.
Jehoiachin Pono Potsow Yitsso
24 Juda lo mesao Jehoiakim tsoe mesao Jehoiachin thüngi OPVÜI na ezocho, "Otsotsola, otsotsoto, Aiyo eküm evamo Potsow tsso ji esüa, niji a khe amimoe. yingrüm ji esüa mpa tssolea, ana phongchei ni siv, 25 osi nina ni kyua evamo osi ni lüngtha hunga evamo kyon jiang khelo ni thechiv. Ana Babylon mesao Nebukadnezaar osi ombo rasan to khelo ni thechiv. 26 Ana ni tona niyo to niniata, nüngkata metapoe tsanthan nte yitoku, osi meta kvülo shina nte n bukcho sana jitüv lo nte yitoku; osi jilona nini chüv. 27 Ntena meta shi elümoto nte jüpona to tssov khatola kvüthüngha n yilanche." 28 Ana phyocho, "Mesao Jehoiachin ji chonphfü varocho esüa kümi ochina ha n jüpomvü shümthe sithakcho alo? Osi hoji tsükona ombo tona ombo tsoeden to jiangji ontena ntia n tsio metae tsanthan hansi yicho alo?" 29 Oh meta, meta, meta! OPVÜI na ntio phyocho sana ji engatava: 30 "Kyon shijo ombo tsoe jiang moni esiv khoe sithaka, Kyon ocho ntiloha ochüm n cheo tüv. Juda esae etsso tüv ombo tsochen ochia n vanthuk David echung etssov tsükona. A, OPVÜI, shina hojito phyothaka."
Ochyu-Ovüngi Eyilo
1 Esapvüi ochoangna onte kyon jiang roe meta nzüroe sicho sana jiang pono OPVÜI yitsso jijo kvüta ekhenthav tssov ato! 2 Esapvüi ochoangna onte kyon jiang sheküpa evamvü shikhfü sana jiang thüngi OPVÜI, Israel Potsow, jina heto phyoala; Ntena akyon jiang ji n sheküpvü, osi ntena onte ji nzüroe phani sithaka. Enhungo ntena ntio n-mhom tssocho sana ji tsükona ana ezüp nte piv sala. 3 Ana meta kvülo kvülo a kyon jiang nzüroe vancho sana jiang lona onte tsarhyui, onteji oki solansi yiv. Ontena otsoero elümoto lia yiv osi onte wokyonga kümvü. 4 Onte sheküpvü tsükona ana esapvüi ethüngchev. Osi akyon jiang ji elanijo n khenthuk mekana nkyuthuklan, osi ana ezüp onte n pilan. A, OPVÜI shina phyothaka." 5 OPVÜI na phyoala, "Ana David tsochen lona ntsa-nrüng mesao ethüngchev yuta ji tsathaka. Hoji mesao jina nchümri lia sav osi meta topvülo ntiojo ntsa osi elan sanaji tssov. 6 Kvüthüng ombona mesao tssoa sana Juda kyon jiang ji nkohachev, osi Jerusalem kyon jiangna noyinga vanchev. Ombo ji 'OPVÜI jo Eshanchopvüf to tsav. 7 OPVÜI na phyoala, "Yuta ji tsathaka," "Kvüthüng kyon jiangna aji eküm evamo Potsow ochona Israel kyon jiang ji Ejip metae na sosi chiyicho sana hoji to amyingo na n chümchako tüv yutayi. 8 Hoji thüngina jo kyon jiangna aiyo eküm evamo Potsow ochona ombona ombo kyon jiang nzüroe esio meta jükiwoe jiang lona osi meta thanpo jiang lona solansi eyio Potsow jito a myingona echümtav. Hoji sülojo ontena onte meta jilo vantav."
Zenkhying Jiang Tsükona Jeremiah Yithen
9 Alümbüm ji pyonrothaka, osi aiyo a enetala. OPVÜI ji tsükona osi ombo ntho yi jiang yakchia. Aiyo soko na kinoe kyon tüv, osi kyon ocho sokona yulangcho sana ji esüa. 10 Meta shijo OPVÜI lo longtsüka n li kyon tüv na pyingcho; Ontena eküm nmhom vanala osi etho jiang tsüstasorala, OPVÜI rhiyirandanka ji yakchia liko jina nungrala; osi eroyo jiangha mikae sithaka. n OPVÜI na phyoala, "Zenkhying osi pvüti jianglo Potsow n van, Ontena ekhümki na mpa elhi n-mhom tssoa ana onte rhümathaka. 12 Ontena edungo lan jijo pherüa, osi müngterüpna tüv tssovka. Osi ana onte nshüphithoki ekhüngthukvü. Roe esio ji ana onte pono hansi yiv sala; onte ezüpthokvü yuta ji tsathaka. A, OPVÜI shina phyothaka. 13 Ana samaria zenkhying jiang mmen jiang hungthaka! Ontena Baal myingona nsancho osi a kyon jiang ji sosorathaka. 14 Tokhatola elani Jerusalem lo zenkhying jiangna hoji lona n mhonkao tssoa aria hungthaka; Ontena efürama tssoa ejüng phyoala; Elhi n-mhom etssovlo ontena kyon jiang nzanchiala, osi hoji yakchia n-mhom ji tanglanchio ochia n van. A tsükonajo onteno, Sodom tona Gomorrah lo kyon jiang nmhon jiang esüa n mhonden. 15 "Hoji tsükona, A, Thotsü OPVÜI shina, Jerusalem lo zenkhying tsükona heto phyoala: Ana limo ekhov onte pia tsothokuka, osi echü mozhü onte tsothokvü. Ntiotsole ontena meta topülo Potsow n thenhya eküm jina nzüpyingthukthaka." 16 Tokhamo OPVÜI jina Jerusalem kyon jiang thüngi heto ezocho, "Zenkhying jiangna ntio phyoa sanaji ti-engatava; ontena eyilo ejüng khi nte eshoyiala. Ana ephyo jiang mekana ontena ntio hungkacho sana jiang ji nte ezoala. 17 Ana ntio phyocho sana jiang nngae kyon jiang thüngi 'ntia tssov meka' nte mmhomo tssovka' to ontena nte ezoala, osi ochoangna lümbüm khünga vancho sana jiang topvü thüngi 'nti ezüp vara naha nte rhakvü meka' to ezoala." 18 Ana phyocho, "Zenkhying shiang ochinaha OPVÜI mphoyi osi nchümri jiang n tsi. Onte ochinaha ombo yithen ji n zohan, mekana n gathehan osi ombona ntio phyocho sana jiang tüngochünga n gahayihan. 19 Ombo lümbüm etsuk ji tsungryu esüa tüv, osi tsungryu ntav na kyon nmhon jiang kvüri ekhüpio jitüv, 20 Osi ombona ntio tssovto tümcho sana jiang n tssothüngjo ochüm n tsso. Tsüngon etsao jiang lojo ombo kyon jiangna shiang shi mmhona engathevka." 21 OPVÜI na phyocho, "Ana zenkhying shiang n wothuk, tokhatola ontena wocho mpa tssolea, ana yithen onte picho n li; tolea ontena a myingona phyotala. 22 Ontena a mphopyi osi nchümri jiang ntsicho salivo ontena ayithen jiang kyon jiang thüngi thenchoa phyov, osi ontena eküm n-mhom vanta evamo jiang esanthokthakvü. 23 Aiyo meta motsüngalo tae evamo Potsow ji mek, tolea meta topvütolo vankhamo Potsow ji. 24 Ana n hungjamo mekana n hungcheo tüv meta kvülo naha, ochi naha, a n phoche. Ana limhalo osi Potsüwoe liyingcho topvülo vanala toji ntena n tsichoke? 25 Ana ntsia zenkhying shiang na ntio phyothakcho sanaji, ontena ana omüngina yithen onte pithaka to ejüng phyotala. 26 Yuta kvütenhyaka zenkhying shiangna ontena ejüng ephyov yancheo jiangji kyon jiang ezoa sosora vanthoku to? 27 Ontena jo ontena ntio müng emhacho sana jiang ezochona kyon jiangna amhechovto to nchümtala kvüto onte motsüi jiangna amhechoe sisi thanpo potsow Baal khümta yicho sana ji esüa. 28 Zenkhying ochoangna omüng emhacho sana jiang najo, omüng taeka to ephyov lia, osi ochoangna athüngi na yithen zocho sana jiang naha longtsüka lia hoji yithen ji thenchov lia, Mavü jijo otssuktsüng jilo ejyuta na ntio oman lichola? 29 A yithen jijo omi esüa tüv osi vümphen kvümoe na longpvü lea vanroe sia sana ji esüa tüv. 30 Zenkhying ochoangna onte yi jiang khi a thüngina yicho tssothuka thenchota vancho sana jiang ana nlan piala. 31 Elani khi zenkhying ochoangna onte kija-yi jiangji a yithen tssotoka phyoa vancho sana jiangha nlan piala. 32 A, OPVÜI na ntio phyoa sana ji engatva; zenkhying ochoang na onte müng ejü-rünyo jiang na pyingo jiang ji oyam ezoa sana jiangha ana nlan piala. Ontena kyon jiang onte ejüng müng jiang ezoa osi onte kanchanyi jiang ji khi akyon jiang olan siluoe soala. Ana onte n rothuk mekana wole to yizüng onte picho n li; osi ontenajo kyon jiang ntilonaha nzanchiwo n li; A, OPVÜI shina phyothaka." 33 OPVÜI na athüngi heto azocho, "Jeremiah, kvüthüng a kyon yulo tsükana mekana zenkhying osi pvütina, 'OPVÜI yithen jo ntiola?' to ni enga sana, nina heto ezoa, "Niji OPVÜI tsükona emhok-elüm, hoji tsükona ombona khi nisiv sala.' 34 A kyon yulo ochona sana, zenkhying tssolea, mekana pvüti tssolea ochona 'OPVÜI emhok-elümka' to jitüv yi tsütsata sana ombo osi ombo wopan ji ana ezüp pivka. 35 Hoji tsükona thanpo engathüngina jo, otsük akvüna ombo shom mekana ombo wopan jiang thüiigi 'OPVÜI na ntio janlan epichola?' to mekana OPVÜI na ntio phyochola? to engav shikhfü. 36 Hoji tsükona enhungo ontena 'OPVÜI ha osi emhok elüm' toji n tsütsav shikhfü, ntiotssole ochona sana hoji yiji tsütsata tssona ana a yithen ji ombo tsükona oha tsotso kümthokvü. Kyon jiangna onte Potsow, eküm evamo osi Thotsü Potsow yiji tongphithaka. 37 Jeremiah, zenkhying jiang thüngi engae zeta, "OPVÜI na ntio janlan ni pichola, osi mekana OPVÜI na ntio kvüto phyochola? to. 38 Osi ontena ayizüng jiang nngav "OPVÜI haka" to ji tsütsata tssona, heto onte ezoa: 39 Ana onteha elani yantsü kümoe onte thüngi osi onte motsüi jiang thüngi to onte picho sana ji khyokae a thüngi na ekoni shümchi siv sala to. 40 Osi hojito ana onte pono kümali yikra osi mhashuk kvüthgha mhechoe n shicheo tüv yithokvü ka."
Züvothi Loksa Eniji Ejyuka.
1 OPVÜI na Züvothi loksa eni ekhümki na hapoe ekachi licho tüv a ejücho. (Shijo Babylon mesao Nebukadnezaar na Juda lo mesao Jehoiakim tsokhying Jehoiachin ji, ombo küpo tsüphoeden, tssiyan-morithiden, to jiang nzo morantsan rumi Jerusalem lona Babylon metae sosi yicho süloti tssocho) 2 Loksa ovüngo jilojo züvothi mmhom jücho, ovüngna emhemo jiang osi loksa enioto jilojo tsüngthi etsov nmhomo tüv jücho. 3 Hoji sülojo OPVÜI na a engacho, "Jeremiah nina ntio hungala?" Ana janlancho, "Züvothika, mmhomo jiangjo elümoto mmhona osi nmhomo jiang jo elümoto n mhon, etso tüv mek." 4 Hoji tsükona OPVÜI na a ezocho, 5 A, OPVÜI Israel Potsow jina nchümala, kyon ochoang Babylon metae sosi yicho sana jiango züvothi mmhomo shi esüa tüv, hoji tsükona ana onte nzana vanthokvü, 6 Ana onte nhyakyata vansi elani meta shilo onte solansi yiv. Ana onte tssokachiv osi onte ntssüngcholan. Ana onte chümkachiv tolea anajo onte n süka. 7 Tothakana, aiyo OPVÜI jika to antsio choka ji onte piv. Hoji sülojo, onteno a kyon tssov, osi aiyo onte Potsow ji tssov, ntiotssole ontena onte lümbüm totona a thüngi kholani yiv. 8 "Tokhatola, Juda lo mesao Zedekiah tsükona jo, yansasae ombo ndüngo evamo jiang osi Jerusalem kyon meta shilo evamo shiang elani Ejip metae eseni yithako jiang tojo, A, OPVÜI shina züvothi etsov n mhomo jiang esüa onte tsütsav. 9 Limhalo jipo topvüna ekhenrhüko tüv ezüp onte pono rothoku, osi onteji kyon na onte n chokav, onte emataphen tssoa yikvüemakav, osi ana meta nzüi onte esio meta jiang topvü lona onte mying jijo rhiyirandankae esüa tsütsav. 10 Ana ritso, tsokhang yukhang osi nochonori rothuki ana onte motsüi tona onte to thüngi epio meta jilo ochia n hyokav n sithüng nandang jo onte chüthoku."
Jükiwoe Ori ji
1 Josiah tsoe Jehoiakim na Juda lo mesao tssosi nzyu mezhüoto, jilo Juda kyon jiang tsükona ana OPVÜI thüngina yithen heto hungcho. (Shijo Nebukadnezaar na Babylon lo mesao tssoji nzyu tssocho.) 2 Ana Juda tona Jerusalem to kyon jiang topvü thüngi ezocho. 3 "Amon tsoe Josiah na Juda lo mesao tssosi nzyu taro ethümoto jilona benkae hetenhyaka shi nchüng jana nzyu mekyusi ethümoto OPVÜI na ntio yithen apicho sana jiang topvü motsüngatia n khachona nte ezokhana yithaka, khatola ntena junga n ga. 4 OPVÜI na ombo phajae jiang tümjak n hna nte thüngi rothuka yipvü tokhatola ntena n gayi mekana mmyinga. n khi. 5 Nte mmen lan jiang lona khophile osi ntena ntio tssota vancho sana jiang sitale, to tssona, Potsow na nte motsüi jiang thüngi tona nte thüngi to meta kokae nchüngkhon nte echhi tssoa nte pio jilo vana ochevka to ontena nte ezocho. 6 Thanpo potsow jiang benkata osi khüma to ti-tssotale osi ntena nsüngrüo kisü jiang khümi OPVÜI lümbüm ti-tssukthuktale to ontena nte ezocho. Ntena OPVÜI yijiengacho salivo ezüp nte n piv tssov. 7 Tokhatola OPVÜI jina ombobo phyoala, ntena omboyi nngayicho to. Hoji thungona jo, nte kisü jiang yakchia ombo lüm tssukthukcho, osi ezüp jo ntena nte bobo nte pono hansi yicho. 8 "Hoji tsükona ntena omboyi n gaoji yakchia, OPVÜI Tokhamo jina heto phyoala: 9 Ana jükiwoe evamo kyon jiang topvü tona Babylon mesao Nebukadnezaar to rothuku sala. Osi ana hojiang ji sosi oyi Judalo evamo kyon jiang tona hoji nkonjano evamo jipo jiang topvüto thüngi rotathoku sala. Ana jipo shi osi shi phinakishüm jipo shiang topvü roe ekachi sivsala osi nchüngkhon ekyuthav mekana ekhenthao zekaphen kümthokvü sala. A, OPVÜI shina hojito phyothaka. 10 Ana onte ematha longshi ontsonirota, osi ematha yanpiyanthan tokhu, ematha longshi jiang tükthechi siyivka. Onte milonpvü jiang lo thyujü jüv meka, osi etsov tsükona tsünghanro liv mek. 11 Jipo shi topvü ana roe ekhenthao zekaphen kümthoki siv osi phinakishüm jipo jiang topvüna nzyu ekha tiying Babylon mesao ji benkata vamka. 12 Hoji süloti Babylon mesao tona kyon jiang toji onte mmen jiang tsükona ana ezüp onte piv. Ana hoji metaji roe nchüngkhonto eyingkhükhüna ekachi siv. 13 Ana Babylon meta ji kvütata n mhom roe esiv tsükona Jeremiah yakchia jipo jiang ekhentoka rocho sana osi kako shilo kvüta n mhom etssov erankae licho sana jiang ji topvü khi ezüp piv. 14 Ontena ntio tssothakcho sana jiang tsükona ana Babylon kyon jiang ji onte nlilamka osi jipo elümoto tona mesao tsüphoe kvütata vancho sana jiang nri onte kümthokvüka.' "
Jipo Jiang Pono Potsow Yitsso
15 OPVÜI Israel Potsow jina a ezocho, "Shilo sokopvü lümbüm etsukna pyingcho motsünga lia, ana jipo ochoang thüngi nte wothoka sana hansi woa, osi opvü jilona onte yuthoka. 16 Kvüthüng ontena hoji yua sana onteji ngaphia osi onte lümbüm nchümri mona yiv, ana ritsso onte pono rothuko ji yakchia." 17 Hoji tsükona ana opvü ji OPVÜI khelona khichoe khi OPVÜI na a wothuko jipo jiang topvü thüngi picho osi onte yuthokcho. 18 Jerusalem osi Juda metalo yanro elio jiang topvülo onte mesao osi esopvüiden jiang topvü hoji lona onte yuthokcho, osi hoji yakchia lijüng kümi ekhenthao zekaphen kümi sicho osi enhünga jana kyon na onte myingji rhiyirandankacho ejoena tsütsatala. 19-26 Thanpoe kvütata na opvü jilona yucho sana jiang etsünga eramo ji shiang:. Ejip mesao, ombo tsüphoeden osi esopvüiden, Ejip kyon topvü osi Ejip metalo metapoe kyon kvüta vancho sana jiang; Uz metalo mesao jiang topvü; Philistin yantsü, Ashekelon, Gaza, Ekron, osi Ashdod lo jakae elio meta to shianglo mesaoden topvüto. Ammon, Moab, osi Edom tolo kyon topvüto; Tyre tona Sidon tolo mesao topvü; Medeterranean meta jianglo mesao topvüto, Tedan, Tema, osi Buz tolo yantsü jiang topvü. Kyon kvütata na onte kvüri jiang ntssona tankae hancho sana jiang topvü; Arabia lo mesao jiang topvü; Lijüng jipo jiang topvülo mesao jiang topvüto; Zemri, Elam, osi Media lo mesao topvü; Jükiwoe enhyano osi ekoni to topvülo mesao jiang tsük tsükna yuthokcho. Limha shi poni jipo akvüto na opvü shilona eyuo tssocho, osi tae tojo Babylon mesao jina yuvka. 27 Hoji sülojo OPVÜI jina a ezocho, "Kyon jiang ji A, Thotsü OPVÜI shina, nte topvüna yusi nla-chithüng nandang osi ephathei n phanthichev n sithüng nandang jo yule to OPVÜI na yizüng nte piala to ezoa, ntiotssole ana ritsso onte pono wothuka evamo ji tsükona. 28 Osi ontena nikhelona khi eyuv ji ekhirana tssona, hetolea hetolea ontena hoji pvüji yuchenrünguka to Thotsü OPVÜI jina phyoala to ezoa. 29 Ana roe esio elhiji a yantsü shi lona benkavka. Ontena jo ezüp onte n piv siv sala to nchümta alo? Hojito n tssoche, onteji ezüp pinrüngu, ntiotssole ana onte pono osi limha topvü pono ritsso wothuku sala, A, Tokhamo OPVÜI jina phyothaka. 30 "Ni Jeremiah na, ana ntio phyocho sana jiang topvü thenchov shikhfü. Nina kyon jinag heto ezov shikhfü; OPVÜI na Potsüwoe na erhyuv, osi Potsüo ntssomo jiang lona ejenlongu. Ombona ombo kyon jiang pono erhyukav; osi kyon jinagna jününgrothi mmyaa-thüng esüa owon tssov; osi limha shilo kyon otsük akvüto na ombo won zov. 31 Osi owon jina limha ehüm jiang jana eshokata yiv. OPVÜI jina jipo jiang pono ephyov lia; ombona kyon topvüto oyi tssoyiv osi n mhomo jiang chüthokvü. OPVÜI na hojito phyothaka.' " 32 Thotsü OPVÜI jina phyoala, Roe esio ji jipo motsünga sülo motsünga to tsata, osi limha ehüm jiang lona tsyung-ryuv ndav dendia vana. 33 Hoji tsüngono jo OPVÜI na ochoang lüngthacho sana jiang echümüng jina limha chümina ochüm jana nzüpyingi siv. ochinaha onte tsükona nnungra osi onteji ochina ha tsakae n juthe. Osi onteji likoe lizü hanrhyucho esüa ekatapvü siv. 34 Kyatava, nte esopvüiden osi a olyu enhyangden, tüngkachia kyatava, osi nungrata live yulo ephfüphitava. Nte lüngthav ji yuta janthaka, osi nteji olyu esüa nte ejorov. 35 Hojilo nte tsükona ntia tsancholan liv mek. 36-37 Ntena etho ejako na emhena kyatava, ntiotssole OPVÜI na ombo lümbüm etsuk lona nte jipo ji roe sithaka, osi nte noying metaji eying-khfükhfüna ekachi sithaka. 38 OPVÜI jina ombo kyon jiang si-nkithaka, hingho na ombo kvü ji sicho esüa. Ritssolo ekyusü osi OPVÜI lümbüm etsuk tsükshi jina meta shi lijüng kümthoki sithaka.
Jeremiah Ji Oyi Tssoyiala
1 Josiah tsoe Jehoiakim jina Juda lo mesao tssopvüto na, 2 OPVÜI na athüngi azocho, ekhümki yitssophen jilo phanthi khi Juda yanro jiang lona hojilona khümo rotao jiang thüngi ana ntio ephyov ni ezocho sana jiang topvü thenchoa phyoa. Motsüngatia ti-khachona phyoa. 3 Kyon jiangna engasi onte lanka n mhom jiang mpato siv tssovka. Ontena hojito tssoa tssona ana onte nmhon jiang tsükona onte pono ezüp osi roe esiv rothoku tümkao ji a lümbüm tongphi khi n tssov mpa sikhoka." 4 OPVÜI na kyon jiang thüngi heto phyole to azocho, "A, OPVÜI jina ana ntio püngnoyi nte picho sana jiang benphia ayi engale to nte ezocho. 5 Osi ana a zenkhying rothuko jiangna ephyo jiang junga engae khile to nte ezocho. Tolea ontena ntio phyocho sana jiang ji ntena kvüthüngha nngacho. 6 Ntena hojito ayi nngav vanta yia tssona ana Shiloh lo ntio tssocho sana ji esüa ekhümki shi pono ha tssovka, osi limha shilo jipolan taro na yantsü shi mying ji rhiyikao mying esüa tsütsavka." 7 Pvüti jiang, zenkhying jiang osi kyon jiang topvüna ana ntio ekhümki na phyocho sana jiang azoyia ana hetoshi phyocho, 8 osi OPVÜI na ntio phyo to a zocho sana jiang topvü phyora tona ontena arhümae heto a ntetacho, "Shi tsükona ni lüngthav etüma! 9 Ntio tsükona nino ekhümki shiji shiloh esüa kümthoku osi yantsü shi roe sisi ochinaha n valamo tüv kümi sitoku to OPVÜI myingona phyoala?" Hoji süi jo kyon jiang na ahazhüi sicho. 10 Kvüthüng ntio tssocho sana jiang ji Juda esopvüi jiang na zocho sana; ontena mesao vanphenki jiang sisi zaktole ekhümki yungta oro kibüng ethan jilo oro onte vanphen khiracho. 11 Hoji sülojo pvütiden osi zenkhying jiang elani esopvüiden osi kyon jiang to thüngi ezocho, "Kyon shiji chüthokvü tsükona methakvü etüma ntiotssole ombona ete yantsü shi tsükona n-mhom phyothaka; nte eno na zoa ombona phyocho." 12 Hoji tsükona ana ezocho, "Ana ntena zoa ntio yantsü shi osi ekhümki tsükona phyocho sana jiang topvüto OPVÜI na arothuka aphyothukcho. 13 Nte vanlanyilan osi ntena ntio tssota vancho sana jiang lona ntena khophi nrüngu shikhfü; osi nte OPVÜI Potsow yi engav lia. Ntena hojito tssona ombona ezüp osi roe esio nte thüngi rothuku ephyo jiang lona ombona lümbüm tongphi n tssov mpa sikhoka. 14 Aiyo a tsükonajo, aiyo nte etholo! Ntena ntio etüm elana to nchüma na ji atssoyia. 15 Tokhatola shi engathei khitava; ntena a lüngthata tssona ntena nlan n li kyon lüngthao ji nlan ji nte pono tssovka, ntiotssole shi ntangshon ekyu shi nte pile to OPVÜI na arothukcho. 16 Hoji sülojo esopvüiden tona kyonden to jiangna pvütiden tona zenkhying jiang to thüngi ezotacho; "Kyon shina ete OPVÜI Potsow myingona ete thüngi ezocho; hoji tsükona omboji n chüthokche." 17 Hojito tssosi sülojo esopvüi ejoma na phanthi kyon sanrhyue vamo jianmg thüngi ezocho. 18 Kvüthüng Hezekiah na Juda lo mesao tssoa vancho sana jithüng Moresheth lo zenkhying Maekha (Micah) na Tokhamo OPVÜI jina heto phyocho kyon jiang ezocho: 'Zion jo oli esüa rhonrovka, Jerusalem jo roe ekachi sicho esüa kümvüka; osi ekhümki phonglan jijo ratsü kümvüka.' 19 Toaha Hezekiah osi kyon jiangna Maekha zenkhiung ji n chüthok. Hoji thünginajo Hezekiah na OPVÜI kyusi ombo thüngi na ekyo-erung yancho, osi OPVÜI na onte pono ntio ezüp hansi eyiv phyocho sana jilona ombo lümbüm tongphicho. Enhünga etena etebobo ete pono ekyusü osi roe esio ji hansi yiv sala." 20 (Kyon tsüka Keriath Jearim meta lona Uriah to tsa Shemiah tsoe jina ha Jeremiah na tssoji esüa OPVÜI yantsü pono tona jipo shiang pono to n-mhom phyokasankacho.) 21 Kvüthüng mesao Jehoiakim osi ombo küpo tsüphoeden, elani ombo rasan to jiagna Uriah na phyoji zocho sana mesao na, lüngthae ombo esiv ekhyo tssocho. Tokhatola Uriah na hoji zoale ekyu lona Ejip meta tsani yi sicho. 22 Toaha mesoa Jehoiakim na Akhobor tsoe Elnathan tona thanpoe ejoma to Uriah rhümalo Ejip metae wothukcho. 23 Ontena ombo rhümae mesao Jehoiakim mhadungona sosi oyi lüngthathukcho osi ombo echümüng ji nzontsü müngsipheni sithokcho.) 24 Tokhatola aiyo Shaphan tsoe Ahikam na akyochio ji tsükona, kyon jiang khelo a ntheyi osi a n lüngthacho.
Jeremiah na Mangsü Vüngkhüng Hanala
1 Josiah tsoe Zedekiah na Juda lo mesao kümpvütona OPVÜI na azocho. 2 Sofüna abobo vüngkhüng nsünrüi otsung nsü jiang thei a evüngi phongthe hanle to azocho. 3 Hoji sülojo Adom, Moab, Ammon, Tyre, osi Sidon tolo mesao jiang thüngi onte thungtssoe ochoang na Jerusalemi mesao Zedekiah janthechilo rocho sana jiang yakchia yithen hanthukle to a ezocho. 4 Tokhamo OPVÜI Israel Potsow jina onte thüngi OPVÜI na heto phyochoka to yizüng pile to ezocho: 5 "A etho osi kifü tsüphov khi ana a khe yonchia limha shi nsüngrücho, kyon osi ekümrümo limha lo kvüta vancho sana jiang topvü; osi ana ochoang apihungcho sana jiang picho. 6 Jipo shiang hetopvü ji aphajae küpo onte vantoko jijo, ana Babylon lo mesao Nebukadnezaar ji orae ekümrümo jiang mpa khi benkathukcho. 7 Osi ombo jipo ji joyiv yuta ji n jathüng nandangjo, jipo topvüna ombombo tsoe osi tsoerüi jiang topvü na ombo benkav. Hoji sülojo ombo jipo shinaha etho eli jipo jiang osi mesao jiang benkav. 8 'Tokhatola jipo osi ekhüngyan kümoena ombo yansa küpo n vana sana hojiang jo ana ritsso yakchia, tssokhang yukhang elani nochonori to jiang yakchia ezüpthokvü, ana Nebukadnezaar jenchia mpüm na rorüpi onte n sithüng nandangjo hojito tssov. 9 Nte zenkhying jiang tssolea, thanpoe jiang tssolea ochona nte mhadung ji tssenche nte ezocheta to phyoa sana jiang yi ti-engatava, omüng yakchia tssocho tssolea mekana echüi mon jiang tsaphi tssocho tssolea, mekana ozen oha yakchia tssocho tssolea to. Onte topvüna Babylon mesao küpo ti-vantale to nte ezoala. 10 Ontena nte ejithechiala osi hoji yakchia nte metae na ekoni nte hansi yiv. Ana phanchokchi nte siv osi roe khi nte siv. n Tokhatola jipo kümoena Babylon mesao küpo vani ombo benkata sana ana ombo metalona ohüm-oli jona onte vanthokvü. A, OPVÜI shina phyothaka." 12 Ana Juda lo mesao Zedekiah thüngi ha hojito ezocho; "Babylon mesao küpo rheyia, ombo osi ombo kyon jiang benkata, to tssona nina eküm vanchevka. 13 Ntio tsükona ni kyon osi nina ritso tona tsokhang yukhang to lona chüvla? Jipo kümoe na Babylon mesao küpo n rheyi sana jiang thüngi jo hojito tssovka. 14 Osi zenkhying ochoang na ombo khochaki ti-pile to nte ezoa vancho sana jiang yi ti-engatava. Ontena nte ejithechiaka. 15 OPVÜI jina ombobo phyoala, ombona onte n rothuk tolea ontena ejüngona ombo myingona nte ezoala. Hoji tsükona ombona phanchokchi nte siv, osi ombona nte lüngthav, nte tssolea, zenkhying ochoangna ejüng nte ezocho sana jiang tssolea to. 16 Hoji tsükona ana pvüti jiang tona kyon jiang toji OPVÜI na heto phyochoka to ezocho."Zenkhying ochoangna ekhümki ejüeli tsentsüman jiang ji nsungu Babylon metae hansi yilamka to phyoa sana jiang ti-longtsütava; ontena ejüng nte ezoaka. 17 Onte yi ti engtava! Tolea Babylon mesao khelo khochaki pitava tona ntena eküm vanchevka! Ntio tsükona yantsü shiji roe ekachi sithokula? 18 Onteji otsotso zenkhying tssona, osi ontelo ayithen jücho tssona, onte khi A, Tokhamo OPVÜI A engathoka; ekhümki tsentsü ejüeli enhyoe elio jiang ji osi mesao vanphenki elio jiangji. Bablyoni hansi tiyithokleto." 19-20 (Kvüthüng mesao Nebukadnezaar na Juda lo mesao Jehoiakim tsoe Jehoiachin, osi Juda lo tona Jerusalem tolo esopvüiden, to jiang ji Babylon metae sosi yicho sana, ombona pyontsü yonjak jüjen ji, zotoro jiang, oyii jiang, elani ekhümki tsentsü ejüeli ejoma tojo valanchicho.' 21 "A, OPVÜI Tokhamo Israel Potsow jina ekhümki ejüeli tona Jerusalem lo mesao vanpheni to valanchi elio jiang tsükona ntio phyoa sana ji engatava. 22 Onteji Babylon metae khi hansi yiravka, osi ana hojiang ji ana engoe n zethüng nandangjo hojilo vanthoku. Tosanati ana khi hansi yilani ovüngthüng onte tathi vaphen jilo valamvüka. A, OPVÜI shina phyothaka."
Jeremiah Tona Zenkhying Hananiah To
1 Zedekiah na mesao tssosi nzyu mezhüsi choro mongo tojilo, Gibeaon yamo, zenkhying Hananiah, Azzur tsoe jina ekhümki na athüngi thyutacho. Osi ombona pvüti jiang tona kyon jiang to mhadungona, 2 Tokhamo OPVÜI Israel Potsow jina."Ana Babylon mesao etho ji roe siyithaka to a ezocho. 3 Osi nzyu eni yuta lo Nebukadnezaar na ekhümki tsentsü ejüeli kvütata khi hansi Babyloni yicho sana jiang topvü ana vaphen tsük shilo hansi yilamvüka. 4 Ana mesao Jehoiachin, Jehoiakim tsoe jiha elani onte ndüngo Juda kyon kvütata Babyloni morantsan ekümo sosi yicho sana jiang topvü solansi yilamka. Ho, ana Babylon mesao etho ji roe siyiv, A, OPVÜI shina phyothaka." 5 Hoji tsükona pvüti osi kyon jiang ndüngo na ana Hananiah thüngi heto ezocho; 6 "Emhokthav! ana eyiloala, OPVÜI na shi esüa tssovto, osi ana otsotso eyilola OPVÜI na nina zenkhyingo ji esüa tssovto, osi ombona ekhümki tsentsü ejüeli osi kyon ochoangb Babyloni morantsan esüa sosi yicho sana jiang topvü solansi yivto. 7 Tokhatola ana ntio kyon jiang thüngi osi ni thüngi ezoa sana ji enga. 8 Zenkhying jiangna eni e n vanthüngna ritsso, tsokhang yukhang osi nochonori to jiang ji jipo etho eli osi ekhüngyan elümoto pono rov to methei vacho. 9 Tokhatola zenkhying ochoangna noying tsükona zenkhyingi vasi hoji oyi otsotso bena sana jiangjo otsotso OPVÜI thüngina rocho to chekatala." 10 Hoji sülojo Hananaiah na a evüngo vüngkhüng ehamo ji khi khüroe sisi 11 kyon jiang evano na heto phyocho. "OPVÜI na phyothaka, shi esüa Nebukadnezaar na jipo kvütata evüngo vüngkhüng phongthei licho sana jiang topvüto ombona khüroe siyivto; osi ombona nzyu eni yutalo shi tssov." Hoji sülojo ana yi sicho. 12 Heto tssosi yuta tara sülojo OPVÜI na heto a ezocho; 13 Hananiah thüngi owo ezoa, "OPVÜI na phyoala, nina mpa otsüngna nsüngrücho mpa eranroe sikhoklea, hoji yonjak vüngkhüngna tong cheyiv. 14 OPVÜI Tokhamo Israel Potsow na phyocho, jipo jiang topvü pono yonjak vüngkhüng phongtheyiv osi ontena Babylon mesao Nebukadnezaar ji benkavka. OPVÜI na phyothaka, ombona ekümrümo jianglea khi khi Nebukadnezaar benkathokvü." 15 Hoji süijo shi heto ana Hananiah ezoacho, osi hojilo ekata hetoha ezolancho: "Enga, Hananiah! Nino OPVÜI na ni rothukcho mekaha nina kyon shiang shi ejüngyi khi püngnoji ontena longtsüv sala. 16 Hoji tsükon A, OPVÜI na khi ni siv to ombobo phyoala. Nzyu shi n rithaku ni chüvka, ntiotssole nina kyon jiang ji OPVÜI panlanle to ezocho." 17 Osi hojito Hannaniah ji hoji nzyu tsük jilo choro tiyingo to jilo chücho.
Babyloni Jihudi Evamo Jiang Thüngi Jeremiaha Yiyenta Kako
1 Ana pvütiden, zenkhyingden, kyon jiang yulo esopvüiden, osi elani kvütata Nebukadnezaar na Jerusalemi na Babylon metae morantsan sosi yicho sana jiang topvü thüngi yiyenta erancho. 2 Ana eramo chidi shijo, mesao Jehoiachin, ombo oyo, mesaki tsüphoeden, Juda tona Jerusalem tolo esopvüiden, tssiyanmorithiden, osi elhilo tssothi ochoang kvütata tsanthan ekümo sosi yicho sana jiang süloti erancho. 3 Ana chidi ji Shaphan tsoe Elasah tona Helkiah tsoe Gemariah to oni thüngi picho osi hoji Juda lo mesao Zedekiah na Babyloni mesao Nebukadnezaar thüngi hanthokcho. Hojijo heto erancho: 4 'Tokhamo OPVÜI, Israel Potsow ochona mesao Nebukadnezaar ji lanchia Jerusalem lona kyon jiang Babylon metae morantsan esüa sosi yithukcho sana jiang topvü thüngi heto ezoala: 5 Oson oki tssoe hojilo vantava. Phari joni hoji lona ntio chiyiasana jiang tsotava. 6 Yanpiyanthan tssoe otsoero lia yitava, to tssona ontenaha otsoeoro livka. Nteha wotssona yiv ethev lia, tokhatola matakata eyiv n li. 7 Ana kvülo tsanthan etssov nte wothukcho sana hoji yantsü ji mmhonkathoku elhi tssotava. Onte myingona athüngi randantava, ntiotssole onte jüolia yia tssona nteha jüolia nte kümvü. 8 A, OPVÜI Israel Potsow na ntaknshon nte piaka, nte ndüngo zenkhying vamo jiang tssolea, thanpoe tssolea, ochoangna nte mhadung ji tssenche nte ezov to phyoa sana jiang khi n te ti-jithechithuka. Ontena omüng emhao jiang ji ntia mmyinga ti-khitava. 9 Ontena a myingona ejüng nte ezoala; ana onte n rothukka. A, OPVÜI shina phyothaka. 10 "OPVÜI na phyoala, kvüthüng Babylon esa nzyu ekha tiying ji bena sana, ana a nzanji nte ejüv osi ana okiwoe nte solansi eyiv echümchako ji benphiv. 11 Ana nte tsükona ntio etüm ezi licho sanaji a taena ntsia, roe esiv mek tolea nte tsüka-rankathukvü mekana ntena eyiloa evamo mhadung mmhom hansi eyiv etüm-ezi ji. 12 To tssona ntena a tsaphiv. Ntena athüngi randam osi ana nte janlam. 13 Ntena ayamvü osi ntena a yanchev, ntiotssole ntena nte lümbüm totona ayamvü. 14 Ho, aria phyoala, ntena ayanchev, osi ana nte meta jilo nte yithoklam. Ana meta kvülo osi liphungtsü kvülo kvülo nzüi nte sicho sana jiang lona nte hanrhyuv, osi ana meta kvülo shina tsanthan ekümo nte yithokcho sana jilo nte solansi yiv. A, OPVÜI shina phyothaka. 15 "OPVÜI na Babylon metaeha zenkhying nte picho to ntena phyoala. 16 Engatava, OPVÜI na, yantsü kümoe David na sacho sana ji sa evamo mesao ji tsükana osi yantsü ji tsükona ntio phyoa vancho sana, hojijo, nte opanden ochoang nte nzo morantsan ekümo sosi n yicho sana jiang tsükona. 17 OPVÜI Thotsü jina phyoala, "Ana ritso sosi tsata, osi onte pono tsokhang yukhang tona nochonori to lithokvü, osi ana onteji züvothi mhenroe n tssovo kümthakcho esüa onte kümthokvü. 18 Ana ritsso, tsokhang yukhang osi nochonori theta onte phamvü, osi limha shilo jipo jiang na zetasi ekhenrhüko tüv tssov. Meta topvülo nzüroe onte siv, osi onte pono ntio tssocho sana ji zesi kyon jiang ekhenrhüka ekhemvü; elani kyon na onte n chokav osi nte mying ji rhiyirandankao esüa tsütsav. 19 Heto shiji onte pono tssov, ntiotssole ana a phajae zenkhying jiang yakchia onte thüngi yithen wothuk-nrhüa evamoji ontena nngacho, osi engav ekhirancho. 20 Nte kvütata Babylon metae tsanthan ekümo nte yithokcho sana jiang topvü na, A, OPVÜI na ntio phyoa sana jiang engatava.' 21 "Tokhamo OPVÜI Israel Potsow na Kolaih tsoe Ahab tona Massieh tsoe Zedekiah to ochoangna ombo myingona ejüng nte ezoa sana jiang tsükona phyothaka. Ombona onteji Babylon mesao Nebukadnezaar khelo theyiv, osi nte osi nte ehungo na ombona onte chüthoku. 22 Kvüthüng kyon ochoang Jerusalemi na Babylon metae evüng tssoa sosi yicho sana jiangna rhiyirandanka yakchia oyam pono n mhom tssothuk hunga sana ontena heto phyov.'OPVÜI khi Ahab tona Zedekiah to ochoang Babylon mesao na ekümina omina richo sana jiang esüa nte tsütsathokuka!' 23 Onte sükhying ji shi esüa tssovka, ntiotssole ontelo emhokthav nlan mmen lia, ontena efürama tssosi OPVÜI myingona ejüng phyothaka. Heto shijo OPVÜI lümbüm erüng ji ephan mek, ombona ntsia ontena ntio tssocho sana ji; osi onte pono ehungpvüi ji ombo. OPVÜI na hojito phyothaka."
Shemaiah Chidi Ji
24-25 OPVÜI Tokhamo Israel Potsow na Nehelam lo Shemiah, Ochona chidi Jerusalem kyon topvü thüngi tona Massieh tsoe Zephaniah, elani pvüti jiang topvü thüngi to ombo myingona hantokcho sana ji tsükona heto yithen apicho. Ombo chidi jilo Shemiah na Zephaniah thüngi heto erancho: 26 "OPVÜI na Jehoida thung pvüti ni tssothukcho, osi nino enhungo ekhümki jilo tsüphotso ji ni kümthaka, zhüvae kvütata na zenkhying esüa tssoa vancho sana jiangji topvü evüngo yonjak-zhüna chungi evav jijo enhungo ni elhi. 27 Ntio tsükona Anathoth lo Jeremiah ochona zenkhying tssoe kyon jiang thüngi jana vancho sanaji thüngi jo hojito n tssoyiala? 28 Omboji esanthoku lia, ntiotssole Babyloni kyon evamo jiang ji ombona, onteji sunga evüng tssoa vanpvü küma oson oki tssoe hojilo vani phari joni hoji lona ntio chiyia sana jiang tsoyuta vanle to ezocho." 29 Zephaniah na chidi ji khae a engathukcho. 30 Osi OPVÜI na aezocho. 31-32 Shemiah tsükona yithen ji Babyloni evüng tssota evamo jiang topvü thüngi hanthukle to; "A, OPVÜI shina Shemiah tona ombo tsoronichen to jiang ji ezüp piv. Ana ombo n rothuk, toaha ombona zenkhying kümi nte jancho, osi ombona ejüngyi khi nte longtsüthukcho. Nte yulo ombo tsoronichen vamvü meka. Ombona eküm vani ana a kyon jiang tsükona ntio mmhom tssov sana jiang hungu meka, ntiotssole ombo na kyon jiang ji a panlanle to ezocho. A, OPVÜI shina phyothaka."
Ombo Kyon Jiang Thüngi OPVÜI Echümchak
1 OPVÜI, Israel Potsow, 2 na a thüngi a ezocho: "Ana ni ezo jiang topvü kako lo erankata, 3 ntiotssole ana akyon, Juda tona Israel to jiang ji mmhom kümthokvü yuta ji tsathaka. Ana onte pyimtsümotsüi jiang thüngi epio meta jilo ana onte sosi yilamvü sala, hojito ontena metaji khilam. A, OPVÜI shina phyothaka." 4 OPVÜI na Juda tona Israel kyon to thüngi heto ezoala: 5 "Ana ekhenlung ekya won zoala, ekyu ekya tolea noying ekya mek, 6 Enhungo esani nchümtava! Eboe na ngaro buk-khukcho alo? To tssoa tssona kvütoli eboe otsük akvüna onte mmanlo okhe nyimkae bencho hungala eloe na tsobuku noathüng esüa? Ntio tsükona otsük akvü mmipang-pang chola? 7 Ekhenthav tsüngon tsathaka; Nti tsüngon thanpo naha hojilo n jyutachea kyon jiang tsükona ryusang ezüp yuta tokhatola ontena tsanchovka." 8 Tokhamo OPVÜI jina phyoala, "Kvüthüng hoji tsüngon ji yiasana, ana nte evüngo vüngkhüng jiang nte jakiv, osi onte shenzhü jiang khi siyiv; osi ontena metapoe jiang ezi n tssolan. 9 Hoji thüngi najo ontena OPVÜI Potsow a benkav, osi David tsoronichen khi van tsü jilo mesao tssoa khokthetokvü. 10 "A kyonden, ti-kyutava; Israel kyonden, ti-ekhenrhüktava. Ana nte sochevka, meta ekomo jilona, ntena morantsan tssota evamo meta jilona. Ontena oki kholani oyi noyinga vamvüka; osi nteji nkoho lia vamvü osi kyon ochi naha nte khyothoku meka. 11 Ana nte thüngi oro nte shanchov. Ana ochoang jipo metalo nzüroe nte sicho sana jiang ana topvüto roe siv, tokhatola nteno ana roe nte n si. Tolea ana ezüp nte n piv jo nte n vachi; tokhatola ana kvüthüng ezüp nte piasana ana etüm elanina tssov. A, OPVÜI shina, hojito phyothaka." 12 OPVÜI na ombo kyon jiang thüngi ezoala, "Nte khü jiango n pocheoka, osi nte tsatso ontsa jiangha n micheo. 13 Nte ezüp nte zeyi ochia n van, Nte emho jiang emio tüv n li; nte tsükona ntia emio eyilo n li. 14 Nte nzamo topvüna nte mhechothaka; ontena nte tsükona ntia n chümvü sithaka. Ana ori esüa nte hayathaka; nte ezüp ji tsükshia tssothaka, ntiotssole nte mmen jiangji khosha osi nte n mhon jiang ji elümoto tsüphoa. 15 Nte khü-ora jiang tsükona ntia ti-erenjantava; nte emio tüv ntia n lika. Ana shi esüa ezüp nte picho ntiotssole nte mmen jiang ji khosha; osi nte n mhon jiang ji tsüphoa. 16 Tokhatola enhungo, ochoang kvütata na nte rhüngrocho sana jiangji rhüngrov, osi nte ri jiang topvü morantsan ejoena khi hansi yiv. Ochoangna nte tssethechicho sana jiang JI topvüji tssethechiv; osi ochoangna nte retsoyicho sana JIANG topvü retsoyiv. 17 Ana n te mmhontuklaniv ka; Ana nte khvü jiang nte emiyiv, nte ri jiang na mpa phyolia, 'Zion jijo khi sithaka to; ochinaha ompvü tsükona n vonkhyu!' A, OPVÜI shina hojito phyothaka." 18 OPVÜI na phyoala, "Ana a kyon jiang ji onte metalo yithoklamvü, Osi wopan akvüto thüngi khonzan to tssov; Jerusalem ji tssocholamvü, osi hojilo mesao kiji zecholani lilanthokvü. 19 Kyon ochoangna hojilo vana sana jiangna myingthüngkhen dentav, osi Ontena longshi lona tüngchotüngritav. A mmha ji yakchia onteji otssona kümvü; osi a mmha jina ontelo yikrachi hana yiv. 20 Ana nkolo onte jipo etho ji pilamvü osi elani chüngchünga soyinglamvü. Ochoang kvütata na nte nmyimthechia sana jiang ana ezüp piv. 2l-22 Onte esopvüi jiangji onte jipo lona chiyiv, Onte mesao jiang onte kyon yulona tssov. Ana kvüthüng ombo tsaphia sana ombona a ntokvü, ntiotssole ochona n tsav rokhukula? Onteno a kyon tssov, osi aiyo onte Potsow tssov. A, OPVÜI shina hojito phyothaka." 23-24 OPVÜI lümbüm etsuk jijo tsyungryu mbung ndav kümoena n mhon jiang kvüri küngsoyia sana ji esüa tüv, ombona kvüta tssov tümcho sana jiang topvü n tssokhamvü jo ochüm n tsso. Tsüngon etsao ji-jo ombo kyon jiangna shiji elümotn ntssüng-rünga engathev.
Israel Jiangna Oki Elani yiala
1 OPVÜI na phyoala, "Ana Israel jipo jiang topvü tsükona onte Potsow etssov, osi onteno a kyon to etssov yuta ji tsathaka. 2 Ochoang kvütata na echü lona tsanchochosana jiang thüngi ana lijüngina khonzan onte ejücho, osi kvüthüng Israel jiangna esanchochiv eyiloa vancho sana jithüng. 3 Ana ekonina onte hungthokcho. Israel kyonden, ana yuta topvülo nte nzanla, hoji tsükona ana n tümjak na a nzan ji nte ejüala. 4 Elani khi echungaphan nte tssokachilamka, osi nte mmhonithuklamka. Osi ntena elani khenpvü jiang tsakae bentasi lüngshi lona sharitavka. 5 Echunga-phan elani ntena Samaria phungdungro jiang lo jününgro chümlani echümpvüo jina ombona echümo jilona tsüngthi lhoe tsophyavka. 6 Ho, yuta ji tsathaka elani khi enhyang jina Ephraim phunglan jiang lona heto tüngkachia phyov, 'Etena, ete OPVÜI Potsow thüngi Zion ni chungotavka.' " 7 OPVÜI na phyoala, "Israel tsükona longshi lona owon choka dentava, Jipo jiang yulo tsüphotsowo ji. Nte myingthüng khen jiang dentava, OPVÜI na ombo kyon jiang shanchothaka; Ochoang kvüta valanchicho sana jiang topvü ombona shanchothaka.' 8 Ana jükiwoe na onte sosi yiv, osi limha ochümi na ochüm janae-na onte hanrhyuv. Mhyikjüng osi jojang jiangha onte nzo yiv, Eloe ngarohan osi evan edüngo jiangha yiv. Hojito-lyui jipo tsüphov kümi yiv. 9 A kyon jiangna kyata nrungta na sani yiv, osi ana onte sosi yiathüng randantav, ana zhükhüro jü jianglo onte sosi ov, onte n shüphio tssoa olan mmhom lona onte sov. Israel tsükona jo aiyo onte opo esüa tüv, osi Ephraim jo atsokhying eramoji esüa tüv." 10 OPVÜI ha phyoala, "Jipoden, a engayitava, osi ayi jiang ji jüran ekoni jana thenchoa. Ana akyon jiang ji nzüroe sicho, tolea ana onte hanrhyulamka, osi olyu enhyang na ombo olyu jiang nhyakyata esüa onte nhyak-yav. 11 Ana Israel jiang etancho vachithaka osi etho eli-i jipo tsüphov khe lona onte shanchothaka. 12 Ontena Zion phunglani na oro ematha longshi lona okhen dentav. Osi a yantso jiang khi emathatav; Tsünghanro yantso, tssüngthijü osi Olive thyujü, olyu osi mangsü to yantso. Osi onteno phari ojü na etssonyanta vancho esüa tüv tssov; osi ontena ethev elio jiang topvü hungu. 13 Loroe jiang na sharita lungshitav, osi eboe nongori eran topvüna lungshitav. Ana lümbüm onte emiyia onte nungkhu nungra jiang ji ematha na tongcheyiv, osi onte nungra ji lungshyu kümthokvü. 14 Pvüti jiangji ana etsoyu mmhom na onte hanzhüv osi a kyon jiang ethelan eli jiang onte bencheyiv. A, OPVÜI shina hojito phyothaka."
Israel Pono OPVÃœI khonzan
15 OPVÜI na phyoala, "Ramah lona yivon zoala, nshüthechia ekya von. Rachel na ompvü ngaro jiang tsükona kyala, Onteno yirathaka, osi ompvüna ejichov ekhiranala. 16 Ni ekya ji esana, osi ni esütsü jiang mhe sia. Nina ni ngaro jiang tsükona kvütata tssothakcho sana jiang tsükona ni n yantsov n si; ontena ori metaena elani yiv. 17 Nte mhadung tsükona eyilo lia; Ni ngaro jiang na okiwoe yilam. A, OPVÜI na hojito phyothaka. 18 "Israel na nungra ephyo ji ana zoala, 'OPVÜI yo, eyio ekümrümo n thachehan esüa tüv; tokhatola nina jancho ezov tsükona eshikacho. Esolansi yia; Ena nilo kholam tsükona methakthaka, E OPVÜI Potsow ji thüngi. 19 Ena ni thüngina nlüpi yicho, Tokhatola elani zakto kholani eyihungcho. Nina ezüp epicho süloti; Ena kvüri elangchochia e nungracho. Ena eyikracho osi mhashuk ndukcho; ntiotssole ena nongothüngjo mmen tssoa rocho.' 20 "Israel nino a nzantso tsoe jika, ana nzantso ngaro ji; Ana kvüthüng nimying phyophiasana ana nzan khi ni nchümchetala. Osi a lümbüm ji nilo yiala; Ana khonzan to tssovka. 21 Chekav tonkachia olan ji etssyukata; Nina eyio lanji elani yanchelana. Israel kyonden, elani yitalana, ntena sisi eyio oyan jianglo oki yilantava. 22 Ntena kvütenhyaka titoa vantavla, longtsü nh kyonden? Ana ntiosana ethan osi echümporo liyingthaka eloena choe nkohoa esüa echümporo.' "
Potsow Kyon Jiang Tsükona Mhadungi Tssochyumochyu
23 Tokhatola OPVÜI, Israel Potsow jina phyoala, "Ana kvüthüng akyon jiangji onte meta jilo yilanthoka sana, ontena Juda meta onte yan jiang lona elani heto phyolam: 'OPVÜI khi Jerusalem ntho phunglan ji mmhayitoka, nina evamo ntho meta ji.' 24 Kyon jiangna Juda osi hojilona oyan jianglo vanlam, osi hojianglo lijonden vanrav, elani olyu enhyang jiang naha olyu ekümlam. 25 Ochoang kvütata vwongkhyua vancho sana jiang ji tssoyotuklam osi ochoang kvütata tsokhang yukhang lona mmikata yia vancho sana jiang topvü etsoyu na lümbüm pükiv. 26 Hojito tssona kyon jiangna phyov, 'Ana yiple atssoyoa phanthithaka,' to. 27 "A, OPVÜI shina phyoala, ana Israel tona Juda to metaji kyon tona ekümrümo to khi pyingthuku yutaji tsathaka. 28 Osi ana kvüto onte rokchev, süjov, khi esiv, roe esiv, osi onte monthokvü ntsicho sana ji esüa, hojito onte chümlamvü, tssokachilamvü ji ntsia tssov. 29 Kvüthüng hoji yutaji yiasana, kyon jiangna heto phyotalamvü, 'Opvüopo jiangna tsüngthi ethem tssocho, tole mek, ngaro jiang ho kyimcho.' 30 Hojito tssothünginajo ochoang kvütata na ethemu tssoa sana onte ho ji kyimü, osi otsük akvüto ombobo mmen tsükona chüv." 31 OPVÜI na phyoala, "Ana Israel kyon jiang thüngi tona Juda kyon jiang to thüngi ntsata ethan nsüngrüv yutaji tsathaka. 32 Hoji jo ana Ejip metae na okhena onte erüsi chiyiathüng onte pyimtsümotsüi jiang thüngi ntsatao ehen ji esüa tüv mek. A ji onte tsoerapvüi esüa tssocho khatola, ontena ntsatao ji n vacho. 33 Ana Israel thüngi ntsata ethan vav sa evamo jijo shi esüa tssov: Ana a shikhfü ji onte yulo lithoku osi hoji onte lümbümi erankayiv. Aiyo onte Potsow tssov osi ontena a kyon tssov. 34 Onte yulo OPVÜI ntsiv tsükona ochinaha ochia n püngno, ntiotssole topvülo teritso jilona benkae tsüphotso ji nandang topvüna antsiv. Ana onte mmen jiang siyiv osi onte wori jiang ana onte n chümcheyilan. A, OPVÜI shina phyothaka." 35 Engo jo wondang tsükona OPVÜI na eng ji epiala, osi zümolo jo evom tsükona choro shantio. Ombona jümang ji ehaphi echyuthokala; Ombo myingjo Tokhamo OPVÜI. 36 Ombona heto phyochakala, limha shilo tathi ji n yesona elithüngjo, Israel jipo ji liv. 37 Kvüthüng tsüngon motsünga lo oyak shi etsikoncheta sana, osi limha shi ndungkaphen ji yancheta sana, hoji tsüngono ti ombona ombo kyon Israel shiang sinkiv, Ontena ntio kvüta tssothakcho sana ji tsükona, OPVÜI jina phyothaka. 38 "Yuta ji tsathaka," "kvüthüng Jerusalem ji a yantsü ejoena, engrhelamoe nken kibüng jilona benkae Hananel zenki ji nandang tssocholamvüji, to OPVÜI na phyoala. 39 Osi erü ji hoji lona benkae engrhelamoe Gareb phunglanro jilona fülani Goah lo yiv. 40 Meta mpüm echü osi mmen ntan siphen hayitsü totona, elani kidron jüro jilona engkhüwoe kurü kibüng ji nandang ji a tsükona ntho tssov. Yantsü ji elani kvüthüng ha n chirolan osi roe n silan."
Jeremiah na Liko Shiala
1 Mesao Zedekiah na Juda lo mesao tssosi nzyu taro ekhaoto osi Nebukadnezaar na Bbabylon metalo mesao tssosi nzyu taro tizao to jilo OPVÜI na heto a jancho. 2 Hoji yuta jilo jo Jerusalem ji Babylon mesao na hayata vancho osi aiyo mesao vanpheni yitssophen jilo khalanchi a vacho. 3 Mesao Zedekiah na vüngpheni a thechicho, osi OPVÜI na "Ana yantsü shiji Babylon mesao khi hayathoku osi mesao ji n tsancho to phyocho, 4 Osi omboji Babylon mesao khelo theyiv osi ombona omha omha ombo thüngi nduktae otsük na jani thyutav to ana tüngsochilato nlan apicho. 5 Zedekiah ji Babyloni sosi yiv osi ana ombo thüngi n jantathüngjo hojilo vanthokvü. Ombona küma Babylon kyon jiang ryulanchilea ombona ochüm n che. A, OPVÜI shina phyothaka, " 6 OPVÜI na a ezocho, 7 aporo Shallum tsoe Hanamel na ombo liko Benjamin erüi Anathoth lo elioji a shithoku jonjia a ezolo a thüngi tsata to; ntiotssole aiyo ombo wopan ndüng küma liko ji eshiv a elan licho. 8 Tothüngji, OPVÜI na a ezothakpvüto Hanamel na enhyang jiang vanphen ni oro liko ji shile to a ezocho. Ntiotssole liko ji shilam tsükona a elan licho, osi OPVÜI na otsotso a zothaka to ana ntsicho. 9 Ana liko ji Hanamel thüngi na shicho osi likotsen ji füi ombo pile jantirang taro tiying tssocho. 10 Ana liko shitao ntsatayi ji erani a mying sekacho, osi ehungpvüi theta ejüpkasi orang ji seri lona füi zetacho. 11 Hoji sülojo liko shitao yi eramo ji eranyu eniata ana khi-liko shita shikhfüniro erancho ejüo ejüpzhüo jiha elani n jüpzhüo jiha to 12 Maheseiah tsorüi Baruch, Neriah tsoe ji picho. Ana ntsata kako ji ehungpvüi jiang tona Hanamel osi ochoangna shitao jilo onte mying sekacho sana jiang topvüna hojilo khokta vana hojiang ehungona kako ji ombo picho. 13 Osi onte topvü mhadungona ana Baruach ezocho. 14 "Tokhamo OPVÜI, Israel Potsow na kako, liko shitao ji-yi erancho ejüpzhüo jiha, n jüpzhüo jiha to woniata khi chonphfü lo thechi vale tona nzyu sunga-lea kenchüngi vachevka to yidan ni piala. 15 Tokhamo OPVÜI, Israel Potsow na oson-oki, oli elani jününgroli topvü okholi jana meta shi lona shita wovka to phyocho."
Jeremiah Randan
16 Liko shitao yi eramo ji ana Barukh picho sülo ana heto randanacho, 17 "Sandamo OPVÜI, limha osi oyak shiang hetopvü nina ni etho osi thokhyung khi nsüngrücho; ni tsükona jo ntia ekhüngu n li. 18 Nina wothüng wothüng thüngi ni n tümjak nzan ji ejüthaka, tokhatola nina kyon jiang ji onte opvü-opo mmen jiang tsükona ha ezüp piala. Nino tsüphotso osi etho eli Potsow, nino Thotsü OPVÜI ji, 19 Nina nchümjan zijan lia madnagmariala osi emhokthav elhi jiang tssoala, kyon na ntio tssoa sana jiang topvü nina hungala osi onte elhi ephan nina yantso piala. 20 Nina nkolo Ejip meta lona emhokthav chethemothev elhi tssocho, osi hoji yakchia eri jiang ekhentsüngracho, osi hojiang esüa nina nchüng tsüngon jana tssoala, Israel yulo tssolea osi thanpoe jiang yulo tssolea; osi hoji yakchia meta topvü lona ni ntsiala. 2i Ni emhokthav osi chethemothev elhi kümoena eri jiang ekhentsüngthukcho sana ji esüa nina ni etho osi thokhyung jiang tsütsae ni kyon Israel jiang ji Ejip metaena sochukcho. 22 Osi ana onte motsüi jiang thüngi phyochaki evao ji esüa lizü meta shi onte thüngi picho. 23 Tokhatola onte na kvüthüng meta shilo rheyi vanjünga yicho sana ontena ni yizüng jiang nngacho osi ni püngnoyi jiang ephan n vancho. Nina onte thüngi ntio tssole to yizüng picho sana jiang ontena ntia n tsso. Hoji tsükona nina onte pono tssorophyoro shiang hansi yithokcho. 24 "Babylon kyon jiang na yantsü shi vükthechiv tsükona yantsü shi nkona epichukchithaka, osi ontena enhungo hayatala: Ritsso, tsokhang yukhang osi nochonori to yakchia yantsü shi onte khelo elungthethukusala. Nina ntio phyocho sana jiang topvü otsotso bena nina hungala. 25 Tolea tsüphotso OPVÜI, yantsü shi Babylon jiangna hayav sa khatola, liko shi eshiv jo nina ehungpvüi jüa yidan apicho." 26 Hoji süijo OPVÜI na a ezocho, 27 "Aiyo OPVÜI, kyon topvü Potsow ji. A tsükona jo ntia ngontsüngo jitüv n li. 28 Ana yantsü shiji Babylon mesao Nebukadnezaar tona ombo rasan jiang to khelo theyiv sala, ontena hoji hayav 29 osi yantsü shilo omi themvü. Osi yantsü jilo oki kvüang lona Baal potsow khümta tsütserhüm jiangji mhonkirina rungi a lümbüm tsukthukcho sana osi onte potsow jiang thüngi soko phyangkata khümtacho sana jiang nzo nshüi sivka. 30 Onte motsü benkadenina Israel kyon tona Juda kyon to shiangna onte elhilan jiang yakchia a n mathata-toku osi a lümbüm tssukthuka yithaka. 3l Yantsü shilo kyon shiang naha yantsü shi tssokachio ji tsüngon nona benkae hetenhyaka shi alüm mpa nshüroa lüm atsuk-thuka yipvü shi. Hoji tsükona ana roe esiv methakthaka, 32 ntiotssole Juda osi Jerusalem lo evan kyon shiangna onte mesao osi onte esopvüiden, pvütiden elani zenkhyingden to jiang phanhya hetopvüna mmen tssoa yithakcho. 33 Ana küma onte püngnoa monglea mankvüina aphilanchisi, ntia ntsi n khi osi ayi nnga. 34 A khümphen ekhümki tsso jianglo mpato etssakthav onte potsow kisü jiang ekachi vae jiang na ekhümki ji mmenthukcho. 35 Osi onte tsokhying tsolo jiangji Molekh potsow thüngi ethamvü tsükona Henon hayitsü jilo thanphen sa tssokachithaka. Heto etssov tsükona ana onte n zo, osi ontena hetüv mmen tssoe Juda kyon jiang mmen tsswothukvü to a lümbümi tia njü ntsa."
Eyilo Elio Phyochak
36 OPVÜI Israel, Potsow jina a ezocho, "Jeremiah, ritsso, tsokhang yukhanmg, osi nochonori yakchia yantsü shiji Babylon mesao khelo theyiv to kyon jiangna phyotala. Enhungo ana ntio phyolam licho sana ji enga. 37 Ana kyon jiangji alümbüm etsuk osi tsükshi ji khi meta kvülo kvülo nzüroe onte sicho sana meta liphungtsü jiang topvü lona meta shilo onte hanrhyulamu sala, osi meta shilo noying nkoha lia onte vantokvü sala. 38 Hojito tssosanati onteno a kyon tssov osi aiyo onte Potsow tssov. 39 Ana ekümo etüm motsünga tae onte piv: Yuta topvülo akyuchia vantoku, Onte mmhon osi onte tsoronichen jiang mmhon tsükona. 40 Ana onte thüngi nchüngkhon tsükona ntsata vav. Ana onte tsükona elhi mmhom etssov ji n tümjak na tssov, osi ana onte khi lümbüm topvüna akyutokvü, hojito tssona kvüthüngha ontena athüngina n lüpi n yilan. 41 Onte tsükona elhi mmhom etssov jijo a choka ji tssov, osi meta shilo vanjünga onte vanthokvü. 42 Ana kvüto roe esio ji kyon shiang pono rothukcho sana ji esüa ana onte tsükona kvüta mmhom etsov phyochaki licho sana jiang topvü onte piv. 43 Kyon jiangnajo meta shiji ekümrümo naha kyon naha n vancheo lijüng kümthoki siv osi meta shi Babylon kyon jiang khelo theyiv sala to phyotala. Tokhatola meta shi lona liko shitalana yivka. 44 Kyon jiang na liko shi shitayi jiang erankae ehungpvüi theta züpzhüi vatav. Heto shiji Benjamin erü jianglo osi Jerusalem nkona oyan jianglo, Juda yanro, phunglan yenjo jianglo osi Juda jolowoe to topvü lo tssov. A, OPVÜI shina hojito phyothaka."
Elani Thanpo Eyilo Phyochak
1 Ana yitssoki evüngki vanathüng elani OPVÜI thüngi na yithen heto a thüngi yilancho. 2 OPVÜI ochona limha shi liyingi, osi nsüngrüchoe ombo vanphen shilo lithukcho sana ombo myingjo OPVÜI osi hojina athüngi heto a ezocho, 3 "A tsaphia, tona ana ni janlamka; osi nina n tsicho emhokthav osi ekhenthav jitüv ana ni ezovka. 4 A, OPVÜI, Israel Potsow na phyoala, Jerusalem kiji osi Judalo mesaki jiang hayae vükthechi rotao ji yakchia topvü tssüngjoe roe sivka. 5 Osi kyon ochoang ana a lümbüm etsukona haruk hashü khi onte echükthechiv sana jianagna Babylon kyon jiang thüngi rotav osi onte echümüng jiangna yantsü shi pyingu. Ntiotssole yantsü shilo kyon jiangna mmen tsso jiang yakchia ana yantsü shilona nlüpi yithaka. 6 Tokhatola ana yantsü shi osi shilo kyon jiang ji onte emiyilamka, osi tssochyu-mochyua noying osi nkoha onte pilamka. 7 Ana Israel tona Juda toji jüolia onte kümthuklamvü, osi ovüngthüng kvütüv sana ji esüa onte tssocholamvü. 8 Ontena ayaka mmen tssothako jiang lona ana onte etssüchev, osi ana onte mmen osi panalan elhi jiang nlan onte siyivka. 9 Jerusalem jijo a tsükona ematha longshiphen osi yikrachi khiphen elani kanchana nchümphen tssov, osi kvüthüng ana Jerusalem kyon jiang tsükona tsso jiang osi Jerusalem yantsü shilo pvülyu-hanlyu hansi eyio jiang ji kyon na zoa sana limha shilo jipo akvüto na eneta kyuv." 10 OPVÜI na phyocho, "kyon na phyoala, yantsü shijo lijüng esüa kümthaka osi kyon elani ekümrümo ntinaha n vanto. Ontena phyotao ji elana, Juda yantsü jiang osi Jerusalem lantsü jiangjo ejüngi sithaka osi nti ekümrüm osi kyon hojilo n van. Tokhatola meta tsük shilona 11 ntena ematha longshi won osi nshanlungta yanpiyanthan tssotacho osi tokhü won ntena zolamka; elani kyon jiang na montso epithan a thüngi hansi roathüng okhen denta ntena zovka osi ontena heto phyotav: 'Tokhamo OPVÜI Potsow ji montsso pitava, ntiotssole ombo mmhona, osi ombo nzan jo kümali.' Meta shiji ovüngthüng esüa ana pvülyu-hanlyua kümthoklamka. A, OPVÜI shina hojito phyothaka." 12 Tokhamo OPVÜI jina phyocho, "Meta lijüng esüo osi kyon, ekümrümo na n vamo meta shilo, olyu rhüki jiangna onte olyu jiang yantsolo sosi ophen ero-yo lilanthokvü, 13 Phunglani oyan jianglo, phunglan yenjoe jianglo, Juda jolowoe Benjamin erü jianglo, Jerusalem nkonphia oyan jianglo osi Juda metalo yanro jiang lona olyu enhyang jiangna elani olyu khalamvüka. A, OPVÜI shina phyothaka." : 14 OPVÜI na phyocho, "Ana Jerusalem tona Juda to kyon jiang thüngi echümchako jiang benthokvü yutaji tsathaka. 15 Hoji yuta jilo ntsanrüng jitüv David tsochen lona ana mesao ethüngchev. Hoji mesao jina meta topvülo ntiojo elan osi ntsa sana ji tssov.'16 Juda os Jerusalem kyon jiang ji shanchoe nkoho lo vanthoku, osi yantsü shijo, "OPVÜI jo ete shanchoe" to tsav. 17 A, OPVÜI shina phyochakala, yuta topvülo Israel mesao etssov tsükona David tsoronichen vanrhüvka, 18 osi pvüti etssoe a benkav tsükona yuta topvülo Levi jipo vamvüka osi erungthan, otsuk-omüm than to thungthan apivka;" 19 "OPVÜI na athüngi a ezocho, 20 "Ana zümo osi eng ji thüngi ntsatathaka, onteji yuta ebenlo chiyia vanthoku tsükona, osi hoji ntsata jijo kvüthüngha lea n pechak osi n yeso. 21 Hoji esüa ana a phajae David thüngiha ombo lona mesao etssov tsükona tsoronichen vana yithokvü ntsata vathaka, elani Levi jipo yulona pvüti jiang thüngiha yuta topvülo ontena a benkav tsükona ana ntsata vathaka; osi ntsata jiang kvüthüngha n yeso. 22 David tsoronichen jiang ana wotssonkayiv osi levi jipo pvüti jiangha wotssonkav, tolyui khi oyaki kvüto shantio nkhachecho sana osi jümang tsae kvüto hajang nkhachecho sana jiang esüa kümthokvü." 23 OPVÜI na athüngi a ezocho, 24 "Ana ethüngcheo wopan eni, Juda tona Jerusalem toji ana khoe sithaka to kyon na phyota evamo ji nina zochoalo? Hoji yakchia akyon jiangji khoe sicho esüa ontena zetala, osi a jipo to onte n khanhyav sithaka. 25 Tokhatola, A, OPVÜI shina zümo osi eng to thüngi ntsata vathaka osi limha tona oyak to sayao ji shikhfü ji ana nsüngrüthaka. 26 Osi ana shi kvüto otsotso nsüngrücho sana ji esüa, ana Jakob tsochen thüngi osi a nri David thüngi ntio ntsata vacho sana hoji benphiv. Ana David tsochen lona tsüka ethüngche Abraham tsochen, Isaak tsochenden, osi Jakob tsochenden, to pono sathoku. Ana akyon jiang thüngi khonzan to tssov osi onteji elani tssochyu-mochyua kümlanthokvü."
Zedekiah Thüngi Yithen
1 Kvüthüng Babylon mesao Nebukadnezar osi ombo rasan ochoang ombo küpo evanden sana osi jipolan khümtsüng topvü lo rasan jiang na kyochia Jerusalem tona hoji nkonphia oyan jiang toji ontena hayata vancho sana jithüng OPVÜI na heto athüngi ajancho. 2 OPVÜI Israel Potsow jina Judalo mesao Zedekiah thüngi owo heto ezole to a ezocho, "A, OPVÜI shina ni yantsü ji Babylon mesao khelo theyiv osi elani rungi silamvü. 3 Nina n tsanchoche; nirhümae mesao khelo ni theyiv. Nina omha omha nduktae ombo thüngi thyutav, ji sülojo nina Babylon metae yiv. 4 Zedekiah, ana ni tsükona ntio phyocho sana ji enga. Nino ritsso lonajo ni n chü. 5 Nino noyinga ni chüv, osi kvüto ni vüngi ni motsüi jiang chüi juthetathüng kyon jiangna tsütserhüm rungtacho sanaji esüa ni chüathüngha rungtav. Ontena nungrata heto phyotav, 'E mesao ji chüthaka!' A, OPVÜI shina hojito phyothaka." 6 Hoji süijo ana yithen shi Jerusalem mesao thüngi picho. 7 Kvüthüng Babylon mesao rasan jiangna Jerusalem yantsü shi hayata vancho sana jithüng ransantsü jiangna Juda lo yantsü pikhfü theta epichakcho enhyoe elio Lachish tona Azekat to jiang ha hayacho.
Ezi Jiang Ejithechia Tsütsacho
8 Mesao Zedekiah tona Jerusalem kyon to jiangna onte Hebrew ezi jiangji 9 eboeha eloeha to, etancholo vachiv tsükona ntsatacho, osi hojito tssoji yakchia onte ochinaha onte kyon Israel jiangji ezi ejoena n vanthoku tsükona. 10 Onte esopvüi jiang osi kyon jiang topvüna ezi jiang vachisi elani ezi n kümlanthok toji lüm na rüngcho. Hoji esüa ontena ezi jiang ji etancholo vachicho; 11 tokhatola yuta tara sülojo onte lümbüm jiang tongphi ezi jiang khilani nungkata ezi tssolanthukcho. 12 Hoji sülojo 13 OPVÜI Israel Potsow jina kyon jiang thüngi heto ezole to a ezocho: "Ana kvüthüng nte pyimtsümotsüi jiang ji Ejip metae ezi eküm jilona onte lanchicho sana jithüng onte thüngi heto ntsata vacho. Ana heto onte ezocho. 14 "Hebre ezi ochoangna nzyu tirok nte benkata rothakcho sana jiang ji ntena nzyu tiying tiying lojo onte vachivka. Tokhatola nte motsüi jiang na hoji mmyinga n khi osi ana ntio ezocho sana jiang nnga. 15 Tsüngon tara yithako jianglo ntena nte lümbüm khophi ntena a emathao elhi tssocho. Nte topovüna Israel kyon nte ezi jiang vachiv lümbüm na rüngcho osi ntena a vanhya lona ntsatacho, ntena a khümta evamo ekhümki jilona. 16 Tokhatola ntena nte lümbüm tongphilani a yikrathuko elhi tssolantacho. Ntena vachithako jiang topvü ntena khilancho osi elani ezi ekümo nungthechilancho. 17 Hoji tsükona enhungo, A, OPVÜI shina phyoala, ntena ayi nngathaka; ntena nte kyon Israel jiang ji onte elan etancho ji n piv sithaka. Elüm mmhonka, toka ana etancho nte pivka; ritsso lona echüv etancho, nochonori osi tsokhang yukhang to lona echüv etancho nte pivka. Osi ana nte thüngi ntio nte tssoyia sana jiang zesi limhalo jipolan topvü na ekhenrhüko tüv nte tssoyivka. l8-19 Juda tona Jerusalem tolo tsüphoeden jiangna mesaoki tsüphoeden, Pvütiden, elani esowopvüiden topvüto nzo tssoe khi ontena mangsübung ji olungona eni chüsoe evao ji yuta lona sanphia athüngi ntsatacho. Tokhatola ontena ntsata ji yesothaka. Hoji tsükona ontena mangsübung ji thüngi ntio kvüto tssoyicho sana ji esüa ana kyon shiang pono tssoyivka. 20 Ana onte ri jiang khelo onte theyiv, onte lüngtha hunga evamo jiang khelo, osi onte echümüng jiang jo woro osi orae ekümrümo jiangna tsovka. 21 Osi mesao Zedekiah tona ombo küpo tsüphoeden to jiang ha onte lüngtha hunga evamo jiang. khelo ana onte theyivka. Babylon rasan khelo onte theyiv, ochoang na nte n hav sithakcho sana jiang. 22 Ana yidan onte piv osi ontena yantsü shilo elani yilam. Ontena yantsüji hav, osi hayae rungi siv. Osi ana Juda yantsü jiang ji kyon ochinaha n vamo tüv lijüng kümthokvü ka to A, OPVÜI shina phyothaka.
Jeremiah tona Rechab Kyon Jiang to
1 Kvüthüng Josiah tsoe Jehoiakim jina Juda lo mesao tssoa vancho sana jithüng OPVÜI na heto athüngi a ezocho. 2 "Rechabi jipo kyon jiang thüngi owo thyutava. Hoji sülojo ekhümki chungchak ochungoe onte sosi rheyi zükhi onte pia." 3 Hoji tsükona ana Rechabi kyon jiang topvü Jazaniah to tsa (Jeremiah thanpoe tsoe) ochojo Habazziniah tsoe sana ji osi ombo ojenio topvü tona otsoe jiang 4 to ekhümki onte sosi yicho. Ana onteji Igdaliah tsoe Hanan zenkhying ji sürüi jiang chungchak jilo onte sosi rheyicho. Hoji chungchak jijo ekhümki jilo tsüphoe yulo opvü odung etssoe Shallum tsoe Maasieh ji chungchak ji mhalo tssocho; osi hojijo tsüphoe thanpoe jiang chungchak ndüngo tssocho. 5 Hoji sülojo ana zükhi khi opvü mekana jükong jiang epying thei vasi onte ezocho, "Zükhi tara yuphitava." 6 Tokhatola ontena heto a janlancho, "Eiyo zükhi n yuka, e motsüi Rechab tona Jonadab tona, ena tssolea, etsoronichen na tssolea zükhi yuv meka to e zocho. 7 Ombona elani meta shilo osonoki ti-tsotale, osi elani oli ha tijontale toha ezocho. Yuta topvülo süki vantale to ombona yidan epicho, hojito tssona ena meta shilo omoatsi esüa vanchev. 8 Hojito Jonadab na ezo lanka jiang topvü ena benphiala. Osi ena tssolea, e tsoeni jiangna mekana etsoero jiangna tssolea kvüthüngha ena zükhi n yuala. 9-10 Hoji tsükona ena oki osi vanphen ntia n tssokachitolea süranki lo vantala, osi ena jününgroli tssolea, mekana oli osi tsünghanrholi tssolea ntia shii-khi n vatala. E motsüi Jonadab na ntio kvüto yizüng epicho sana ji ena rüka enga vanala. 11 Tokhatola kvüthüng mesao Nebukadnezaar na e meta shi oro rechoe khicho sana ena Jerusalemi eyiv tsükona osi Babylon tona Syria to rasan jiang to thüngina tsanchov methakcho. Hoji tsükona ena Jerusalemi vantala." 12-13 Hoji sülojo Tokhamo OPVÜI Israel Potsow jina Juda kyon osi Jerusalem kyon to jiang thüngi owo heto ezole to a ezocho."A, OPVÜI shina nte engala, ntio tsükona nteno ayi nte nnga hungchola osi ana lanka nte pio jiang n benphichola. 14 Jonadab tsoronichen jiango ombo yi enga zükhi n yuala, osi nchüng tsüngon jana onte ochinaha hojito ntia n yuhan. Tokhatola ana nte janyapvü khatola ntena jo ayi nnga. 15 Ana a phajae zenkhying jiang topvü rothuka, nte elhi n mhom jiang sisi ntiojo elan sana jiang tssotale to nte ezothukpvüi. Osi elani ontena thanpo potsow jiang ti-benkatale osi ti-khümtale to tssona ana nte thüngi osi nte pyimtsümotsüi jiang thüngi epio meta shilo vana ochevka to nte ntak-nshona nte ezopvü. Tokhatola ntena nnga osi ayi jiangji mmyinga n khi. 16 Jonadab tsoronichen jiango onte motsüi na ntio onte ezocho sana jiang topvü engathaka, tokhatola nte kyon shiangna jo ayi nnga. 17 Hoji tsükona enhungo, A, OPVÜI Tokhamo, Israel Potsow na Juda kyon jiang tona Jerusalem kyon to jiang pono ntio roe esiv tsükona phyochaki licho sanaji benphivka. Ana nte jamo ji nnga elani ana nte tsaphiathüng a n janlan to etsso jina ana shiji tssov." 18 Hoji sülojo ana Rechabi jipo jiang thüngi Tokhamo OPVÜI, Israel Potsow na heto phyothaka to ezocho, "Ntena nte pyimtsümostüi Jonadab na nte pio yizüng ji engathaka, osi ombo na nte ezo jiang topvü ntena tssothaka. 19 Hoji tsükona, Tokhamo OPVÜI A, Israel Potsow shina echümchaka-ka, Rechab tsoe Jonadab tsoronichen jiang na echungren topvülo a benkata evov tsükona eboe rena yivka."
Barukh na Ekhümkina kako ji Khala
1 Josiah tsoe Jehoiakim na Juda lo mesao tssosi nzyu mezhüo to jilo OPVÜI na a ezocho. 2 "Kako khi ana Israel tona Juda osi jipo thanpo to jiang topvüto tsükona ana ntio ni ezocho sana jiang topvüto erankata. Osi ana ji jandemo jilona benkae khi ana ntio kvütata ni ezothakcho sana jiang ji, Josiah na mesao etsso jilona benkae enhünga yuta shi nandang ji topvü erana. 3 Hojito tssona kvüthüng Juda kyon jiangna ana onte roe siv tsükona kvütata methaka vancho sana jiang zoa sana onte elhi n mhon jiang lona mpato khophikhoka. Hojito tssona ana onte n mhon osi mmen jiang onte siyiv." 4 Hoji tsükona ana Neriah tsoe Barukh ji tsae khi OPVÜI na ntio kvütata a ezocho sana jiang topvü ombo ezoa eranthukcho. Osi hojito Barukh na kako jilo topvütoji eran kacho. 5 Hoji sülojo ana Barukh thüngi lanka shiang ezocho: "Aiyo ekhümki rhovov a n chonchiv sithaka. 6 Tokhatola yuta etsao jilo kyon jiangna kvüthüng khangta sana tothüng jilo ni a wothuk hungala. Osi Kako shüi ebemo ji tüngkachia khavka tona OPVÜI na ntio a ezocho sana osi ana ntio ni ezoa ni eranthukcho sana jiang topvüto ontena zovka. Osi shiji otsük akvüna zojamo tüv lona khakhe; Juda kyon ochoang na onte yantsü jiang lona roracho sana jiangnaha ezovo tssoa. 7 To tssoa tssona ontena OPVÜI thüngi randana onte n mhom elhi jiang lona mpato khophi yikhuka, ntiotssole OPVÜI na emhokthav lümbüm etsuk osi haruk-hashü khi onteji ekhenthoka vana." 8 Hoji tsükona ana kvüto ezocho sana ji ephan Barukh na OPVÜI yithen ji ekhümki na khacho. 9 Jehoiakim na Juda lo mesao tssosi nzyu mongosi choro tokuoto jilo, OPVÜI khi onte nzana nchümthokvü tsükona kyon jiang na khangtacho. Kyon kvütata Jerusalemi vancho sana osi Juda yantsü jiang lona rorachosana jiang topvüna ekhang ji khicho. 10 Hoji sülo jo kyon jiangna enga vanathüng Barukh na kako shüo ji chonchi ana kvüto ezocho sana jiang khacho. Ombona shi elhi ji Shaphan tsoe Jeremiah yitssoe th üngoe eranpvüi ji chungchak ji lona tssocho. Ombo chungchak jijo yitssophen omhao jilo ekhümki rhovophen kibüng ethamo jilo tssocho.
Kako ji Tsüphoe Jiang Thüngi Khae Ezocho
11 OPVÜI na ntio phyocho sana jiang ji Barukh na ekhümki na khao ji Shaphan tsoe Gemariah ji tsoe Mikaiah naha zocho. 12 Hoji sülojo ombona mesaoM yitsso thüngoe eranpvüi ji chungchak kvülona tsüphoeden jiangna thyutasanata khita vancho sana jilo wole yitsso thüngoe eranpvüi Elishama, Shemaiah tsoe Delaiah, Ankhor tsoe Elnathan, Shaphan tsoe Gemariah, Hannaniah tsoe Zedekiah, osi tsüphoe thanpoe jiang ha to topvü jilo jücho. 13 Barukh na ntio kvütata kha kyon jiang thüngi ezoa ombona zocho sana jiang topvüto Mikaiah na tsüphoeden jiang thüngi ezocho. 14 Hoji sülojo tsüphoe jiang na Jihudi (Ochojo Kushi rüi osi Shelemiah tsorüi, Nethaniah tsoe) sana ji wothuka Barukh ji ombona kako kümoe kyon jiang thüngi khae ezocho sana ji hansi yile to ezothukcho. Tole Barukh na kako shüo ji bensi onte thüngi rocho. 15 "Tole khoktheta," osi kako shüo ji lanphe kha e zoa" to ontena ombo ezotacho. Tole hoji esüa Baruh na tssocho. 16 Ombona kha onte ezothakale ontena ekhenta onte onte omhalo zekatasi Barukh ezocho, "Shijo mesao ntsithoku lia." 17 Tothakale ontena heto ombo engatacho, "Enhünga ezoa, kvütoli nina shiang hetopvü eranchola? Jeremiah na ni ezoa ni eranthukcho alo?" 18 Barukh na janlancho, "Yitsüng akvüto Jeremiah na a ezo cho, osi ana khyimü jü khi kako shilo erankacho." 19 Hoji sülojo ontena ombo ezotacho. Jeremiah nina kako ji owo mphoe siv lia, osi ntena kvülo vata sanaji ochia ti-ntsithuka."
Kako shüo ji Mesao na Rungala
20 Kako ji tsüphoeden jiangna yitsso thüngoe eranpvüi Elishama chungchak jilo vatasi mesao yitssopheni owo topvüto rüa mesao ezotacho. 21 Hoji sülojo mesao na kako ji khilo Jehudi wothukcho. Ombona Elishama chungchak jilona khochi khi owo tsüphoeden jiang na mesao füchüma phanthi evamo jilona onte thüngi kako ji kha ezocho. 22 Osi etssüko etsso jina mesao jo ombo etssük mesaki jilo omi ndüngo khokthei vancho. 23 Jihudi na yi-tssümchak ethüm mekana mezhüo toji khapvütona, mesao na yonjak enno teriv khi kakoji tsenchoe khi omi rungthechicho. Osi hojito kako ji rungrae n sithüng nandangjo ombona kakoji teri teri na tsenchoe rungthechirae sicho. 24 Tokhatola mesao naha elani ombo tsüpho eden jiang ochinaha ontena ntio zocho sana ji tsükona kyua mekana etho jaka n chanchecho. 25 Elnathan, Delaiah, nna Gemariah tona jo mesao ji kako ji ti-rungle to tangtacho khatola ombona onte nngayi cho. 26 Hoji süijo mesao na Mesa tsokhying otsük ethüm, Jerahmeel tona Azriel tsoe Seraiah, Abdeel tsoe Shemaiah to onthüm yidan pia a eranpvüi Barukh eniata e rhümale to ezocho. Tokhatola OPVÜI na emphothuki sicho.
Jeremiah na Kako Thanpo Eranala
27 Ana Barukh ezoa eranthoko ji mesao Zedekiah na rungi sicho sülo 28 kako ethan khilani kako ovüngo jilo ntio erankacho sana jiang topvüto erankata to OPVÜI na a ezocho. 29 Elani mesao thüngi heto ezole toha OPVÜI na a ezolancho, "Nina kako ji rungi sithaka, osi nina Jerusalem ji ntio tsükona Babylon mesao na oro meta shi roe sisi hojilo evamo kyon jiang tona ekümrümo to jiang lüngthae siv to erancho sana to ngatüngngaricho. 30 Hoji tsükona A, OPVÜI shina ni ezoaka, mesao jchoiakim, ni tsoronichen ochinaha David ekhüngyan shi saphyav meka. Osi ni echümüng jijo hapoe shümchukchi engo jo eng na vonka, nna zümolo jo ronren renka toli ni sivka. 31 Ana niha, ni tsüphoeden jiangha elani ni tsoronichen jiangha to ntena ntio mmen tssocho sana ji tsükona ezüp nte pivka. Nina tssolea elani jerusalem kyon osi Juda kyon ochinaha ana ekyuv ntaknshon nte pio ji mmyinga 11 khi; hoji tsükona ana ntio ekyuv khi nte ekhenthuka rocho sana jiangji topvü nte pono tssothokuka." 32 Hoji sülojo ana kako shücho thanpo khilani eranpvüi Barukh picho, osi ana ombo ezothako jiang topvü ombona erancho. Kako ovüngo jilo ntio erancho sana jiang topvü ombona eranlancho, osi hoji yithen ji esüa ana ombo ezoa eranthukcho.
Jeremiah Thüngi Zedekiah Jonjiyi
1 Babylon mesao Nebukadnezaar na Josiah tsoe Zedekiah ji Juda lo mesao Jehoiakim tsoe jchoiachin ji tongche tssothukcho. 2 Tokhatola Zedekiah na tssolea, ombo küpo tsüphoeden jiangna tssolea elani kyon jiang naha to onte ochinaha OPVÜI yithen ji n ngacho. 3 Mesao Zedekiah na Shelemiah tsoe Jedukal tona Maaseiah tsoe Zepahniah pvüti ji to e jipo tsükona e OPVÜI Potsow thüngi randanale to oro a ezothukcho. 4 Hojithüng jo a ji vüngpheni a n thechihamvü kyon jiang yulo a etancho rümphicheta vancho. 5 Osi hojithüngji Baylon rasan jiangna Jerusalem ji hayata vancho; tokhatola kvüthüng Ejip rasan jiang na onte Ejip erü ji yaki tsathaka to owon zocho sana ontena shülani yicho. 6 Hoji sülojo OPVÜI, Israel Potsow, jina athüngi a ezocho, 7 Zedekiah thüngi heto ezole to, "Ejip rasan jiangna ni kyochilo olani tsathaka, tolea okiwoe kholani yiv. 8 Hoji sülojo Babylon rasan jiang na kholani oro yantsü shi hayav osi vükthechi rongi sicho. 9 A, OPVÜI shina nte ezo ntsaka, Babylon rasan jiangna n rolam tssovka to nchüma nte popo ti-jithechitava, ntiotssole ontena ronrüngu. 10 Ntena küma Babylon rasan jiang topvü khyothechisi, ts atsso jiang tae süki enhyokae van thuklea, jiangna lea phanthilani yantsü shiji likoe nshüthechi siv."
Jeremiah ji Rhümae Vüngpheni Thechicho
11 Ejip rasan jiang na onte tssuhgkata etsao ji tsükona Babylon rasan jiangna Jerusalem lona kholancho. 12 Hoji tsükona ana ha aopan ejüeli jilo a ejan elio ji ekhiv tsükona Benjamin erü jiwoe evov tsükona khochicho. i3 Tokhatola ana kvüthüng Benjamin erü ji jancho sana rasan enhyang jilo vamo jiang esopvüi hananiah tsorüi osi Shemeliah tsoe Irijiah to etsao jina a khalanchi a ezocho."Nino Babylon kyon jiang thüngoe yiala!" 14 Ana janlancho, "Hojito meka! Ana onte thüngoe yia meka." Tokhatola Irijiah na a n ngayi. Ombona a engayiv thungjo a rhümae tsüphoe jiang thüngi a sosi wocho. 15 Tole ontena hetata to a thüngi lüm tsukta ata-tasi yitssoki eranpvüi Jonathan ki jilo vüngi a sile to yidan picho. Tothüngjo Jonathan ki jijo vüngphen kümthoki licho. 16 Ontena ojo okhe a chüngisi liko chungchak tüv lona sunga a vüngcho. 17 Yuta sunga avüngcho süloti mesao Zedekiah na a tsalo kyon rothukcho osi ombona mesaki jilona kijaena mphoa a engacho, "OPVÜI thüngi na yithen ntiona yicho alo to?" "Yii lika," to ana janlancho, osi jilo ekata."Niji Babylon mesao khelo ni theyivka, to ezocho." 18 Hoji sülojo ana ombo engacho, vüngpheni athechio jitüv ni thüngi mekana ni tsüphoe jiang thüngi ana ntio n mhom tssochola mekana kyon jiang thüngi tssocho licho alo? 19 Osi ni zenkhying ochona Babylon na meta shi osi ni hayavka to ni ezo jijo ntio tssoe sichola? 20 Hoji tsükona, tsüphoeyo, enhungo ayi a engayia, osi ana ntio ni ezoa sana ji a tssoyia. Nzansi elani jo Jonathan ki vüngphen jilo a ti-yilanthuka. Nina ayithuka tssocho jo, jilona a chünrüngu." 21 Hoji tsükona yitssophen jilona a vüngle to mesoa Zedekiah na yizüng picho. Ana jilo vancho osi yantsü jilo humri topvü n tsokhanthüngjo humri rüngpheni na eng akvüto humri apicho.
Jeremiah Ji jükha Ekyingu Tüv lo Thechicho
1 Mattan tsoe Shephatiah, Pashur tsoe Gedaliah, Shelemiah tsoe Jehukal osi Malchiah tsoe Pashhur to jiang na OPVÜI na ntio phyocho sana jiang ji, 2 ana kyon jiang thüngi heto ezoa vamoji zocho, "Ochangna yantsü jilo vana sana jiango ritsso lona mekana tsokhang yukhang osi nochonori lona chükhamvüka. Tokhatola ochoangna Babylon kyon jiang thüngi owo onte popo khochaki pia sana jiango n lüngtha, tolea matacho na onte eküm jo shanchov." 3 OPVÜI na heto phyocho ana onte ezoa vancho, "Ana yantsü shi Babylon rasan jiang khelo pivka, Osi ontena hoji hayavka." 4 Hoji sülojo tsüphoeden jiangna mesao thüngi owo heto ezotacho."Kyon tsük shijo chüthuk nrüngüv lia. Ombona heto ephyo shi yakchia yantsüi rasan evamo jiang lümbüm mmyimiala, osi hoji esüa yantsüi kyon enhyokae evamo jiang otsük akvü thüngi ombona hojito tssoala, ombona kyon jiang nzanchiv ekhyo n tsso, tolea ombona onte tssatssohungala." 5 Mesao Zedekiah na onte janlancho, "Tona elüm mmhona, ntena ntio ombo tssoyihungana ji tssoyia, ana nte n tangche." 6 Hoji tsükona ontena rhümae wozhüna sheni mesao Malchiah jükhae yitssophen hapoe ojü nghai sisi chonchen tae elio jilo athechicho, osi hojilo asokthecho. 7 Tothüng ji Ebedmelekh to tsa Sudan kyon pokyu lokyu ochona mesao ki elhi tssoa vanchosana jina, ontena jükhae a thechithaka to owon zocho. Hoji yuta jilo jo mesao jo Benjamin kibüng jilona oyi tssoa vancho. 8 Hoji tsükona Ebedemelek na mesao ji owo ezocho. 9 "Yikrachio tsüphoe, ontena ntio elhi tssocho sana jijo worhyu. Ontena Jeremiah ji jükhae thechithaka osi omboji hoji lona tsokhang yukhang lona chünrünguv, ntiotssole yantsü shilo etsoyu n liv sithaka."10 Hoji sülojo mesao na yidan pia Ebedemelekh ji ombo ndüngo nchyu ethüm sosi ombo nzo tssoe a n chüchothüng a tssüngchele to ezocho. 11 Hoji tsükona Ebedemelek na kyon jiang sosi mesao tsütsaelan vapheni owo osü ekyonron tüv khi wozhülo ntssükae vathechiyicho. 12 Ozhü jina a nlhanrathukvü tsükona osüji zonküp tsungkholo nhyathechile to ombona a ezocho. Ana hoji esüa tssothakale, 13 ontena jükha jilona a tssüngchecho. Hoji sülojo mesao ki haphoe avanthukcho.
Zedekiah na Jeremiah Thüngina Ntssungyi Chonala
14 Yuta thanpothüng elani Zedekiah na ekhümki rhowolan ethümoto jilo asosi owo heto a ezocho."Ana ntiona ni engav sala, küma ntia tivalanchina ntsa ji azole." 15 Hoji tsükona ana janlancho, "Ana ntsa ji ni ezoana nina a chüthukvü osi ana ejü-rünyo ni pilia nina mmyinga engav mek." 16 Hoji tsükona mesao Zedekiah na mphoe na heto a ezocho."Ana eküm evamo Potsow ochona eküm epichosana ji myingona echüma ni ezoaka, ana ni n chüthuk mekana kyon ochoangna ni lüngthahunga vancho sana jiang kheloha ni nthechi." 17 Hoji sülojo ana Zedekiah ji heto ezocho, Tokhamo OPVÜI Israel Potsow jina heto phyocho, "Niha Babylon mesao küpo tsüphoe jiang khelo khochaki pia tssona, ontena ni eküm ji ni nkümcheyiv osi yantsü shiha rungi n si. Niha, ni wopan ha eküm nte valanchiv. 18 Tokhatola nina n khochaka tssona, tona yantsü shijo Babylon kyon jiang khelo theyiv osi ontena yantsü shi rungi siv osi ninaha ote khelona n tsanchoche." 19 Tokhatola mesao jina a janlancho, "Ete meta kyon ochoangna Baylon kyon jiang thüngoe tsani yithakcho sana jiang a kyuala. Onte khelo a thiyi a khangriv mpa tssov." 20 Ana ezocho, "Onte khelo ni thechiv meka, OPVÜI yithen ji engale to ana ni thüngi jonjiala, to tssoa tssona ni echi mmhomka osi ni eküm ji shanchochevka. 21 Tokhatola nina n nga tssona ntio tssov sana ji OPVÜI na a hungthukthaka. 22 OPVÜI na a hungthuko ji, Juda mesao ki eloe kvütata valanchi licho sana jiang topvü Babylon mesao tsüphoeden mhadungo sosi chiyiracho. Osi ontena yitathüng ntio phyotacho sana ji enga: 'Mesao shom mmhontso jina ombo sosorathaka, ontena ombo pono sala. Osi enhungo ombo jo jiangji chonphyalyu lo ombo rhyuthethaka, ombo shom jiangna ombo sithaka.'" 23 Elani ana hetoha ezolancho, "Ni eloeden osi ngaro jiang topvü Babylon jiang mhadungo sosi chiyirav osi nina ha onte khelona n tsanchoche. Nino Babylon mesao ji khelona oyi ni vüngsi yantsü shijo likolo nshükae siv." 24 Zedekiah na phyocho, "Ntio phyotacho sana ji ochia ti zokhe, ni eküm jiha ntia ekyuv n lika. 25 Ana ni thüngi thyutacho to tsüphoeden jiangna ntsichocho ntio thyutacho sana ji ontena ni ngav. Nina topvü ji ntsa onte ezoa tssona ni n chüthuk to echüma ni zov. 26 Küma elani vüngpheni na chülo ni tiyilanthukle to a thüngi jonjichoka to tae ezoa. 27 Hoji sülojo tsüphoeden topvüna sani oro a ngatüng ngari tacho, tolea mesao na a ezoa totae ana onte ezocho. Ena thyutao ji ochinaha n zoküma ontena ntia n lyuchecho. 28 Osi Jerusalem ji n hayathüng nandangjo mesao kiji hapoe vüngi a vanthukcho.
Jerusalem Joyio Ji
1 Zedekiah na Juda lo mesao tssosi nzyu tokvüsi choro taro to jilo Babylon mesao Nebukadnezar na rasan mpüm na sosi oro Jerusalem yantsaü ji hacho. 2 Zedekiah na mesao tssosi nzyu taro ekhao to jilo choro mezhüsi tsüngon tokvüo to jilo, yantsü pikhfü ji rorhüpcho. 3 (Kvüthüng Jerusalem ji hayacho sana Babylon tsüphoeden topvüna sani onte meta longi, kipüng jiang, Nergal Sarezer, Samgar, Nebo, Srasechim, elani thanpo Nergal to jiang topvü phanhya khicho.) 4 Kvüthüng mesao Zedekiah tona ombo rasan to jiangna ntio tssoa yia vancho jiang hungcho sana ontena yantsü ji lona emüngo tsantav ekhyo tssotacho. Ontena mesao phari lanji lona tsanchoki, pikhfü eni nduktaphen jilo kibüng ji yakchia chiyi, Jordan hayi jiwoe tsanta joyicho. 5 Tokhatola Babylon rasan jiang na onte phanrhüi owo Jeriko hayitsü ji ndüngona owo Zedekiah ji rhümacho. Hoji süi jo ontena Zedekiah ji sosi Hamath erüi Riblah yantsüi mesaao Nebukadnezaar thüngi chiyicho, osi hoji lona Nebukadnezaar na oyi ombo tssoyicho. 6 Riblah lona Zedekiah na zeta vana ombo tsoe jiang chüthukcho, osi elani ombona Juda lo tsüphoe jiang ha chüthokcho. 7 Tothakale Zedekiah jo omhyik ji khanchukchi siyisi Babyloni sosi eyiv tsükona yonjakzhü na ombo shencho. 8 Tothüng ji Babylon kyon jiangna Juda lo mesao vanphen jiha elani kyon jiang ki jiangha rungi sicho osi Jerusalem pikhfü jiha vanroe sicho. 9 Okhao tssoajo yantsü jilo kyon enhyokae evamo jiangji, ombo sisi etsamo jiang topvü nzo rasan esopvüi tsüphotso Nebuzardan na onte ji Babylon meta morantsan tssoa sosi yicho. 10 Osi Juda meta jilo yantsatso ochoangna ntia n licho sana jiango ombona oli tona jününgroli to pia valanchicho.
Jeremiah Vachio Ji
11 Tokhatola mesao Nebukadnezar na rasantsü esopvüi Nebuzardan ji heto yidan pile to ezocho: 12 "Jeremiah ji yana owo tanünga, ntia n mhom ombo titssoyia, tolea ombona ntio chokata sana ji ephan tssoyia." 13 Hoji tsükona Nebuzardan tona ombo ndüngo tsüphoeden, Nebushazban osi Nirgal Sarezer elani Babylon mesao tsüphoeden to jiang na, 14 mesao kina asosi chiyicho. Osi ontena Shaphan tsorüi Gedalliah ocho Ahikam tsoe sanaji na ezüp ntia n tssothukana oki a sothechile to enhikata ombo khelo a vanthukcho. Osi hojito ana jilo kyon jiang yulo vancho.
Ebedemelek Tsükona Eyilo
15 Ana mesaoki vüngpheni vana vanpvüna OPVÜI na heto a ezocho, 16 Ebedemelekh Sudan kyon ji thüngi Tokhamo OPVÜI, Israel Potsow jina heto phyoala to ezov tsükona; "Ana kvüto phyocho sanaji esüa ana tssov, osi yantsü shi pono jo roe esio ji hansi yiv kha, pvülyu hanlyu jo hansi n yithuk. Osi heto etssov jiang ji nina hojilo vani hungu. 17 Tokhatola, A, OPVÜI shina ni nkohavka; osi nina ni kyua evamo jiang khelo ni thechiv meka. 18 Ana ni nkohacheta ni vanthokvü, osi ni chüthokvü mek. Nino ni eküm jo tsanchovka, ntiotssle nina alo longtsüka licho. Hojito A, OPVÜI shina phyothaka."
Jeremiah na Gedaliah Ndüngo Vanala
1 Rasantsü esopvüi Nebuzardan na Ramah meta lona avachicho sülo OPVÜI na athüngi heto ajancho. Jerusalem tona Juda to metalo evan kyon kvütata Baylon metae evüng tssoa sosi yicho sana jiang nzo sheni asüsi wocho. 2 Rasantsü esopvüi jina apoti eyiche a sosi owo a ezocho, "Ni OPVÜI Potsow jina meta shi roe esiv tsükona e khenthukcho. 3 Osi ombona ntio tssov to phyocho sana ji ombona enhünga tssothaka. Shiang heto etsso shiang topvüto nte kyon jiang na OPVÜI yi n ngav ombo yaka mmen etsso ji tsükona tssocho. 4 Ana enhünga ni khelo yonjakzhü shi lanphen ni siyia etancholo ni vachiala. Nina Babyloni ni yihunga tssona yikhuka, ana ni sheküpvü. Tokhatola ni n chokata tssona n rolea jiha ntia n tsso. Nina ethüngi ekhiv tsükona liphungtsü hetra lia; küma nina kvülo ni yihungana jilo yia." 5 Ana kvüthüng n janlam vancho sana Nebuzaradan na phyocho."Shaphan tsorüi osi Ahikam tsoe, Gedalliah ocho Juda yantsü jiang lo esapvüi etssov tsükona, Bablyon mesao na ethüngchecho sana ji thüngi elani yia. Nina ombo ndüngo vani kyon jiang vanrhyulo vankhoka, mekana nina kvülo wocho mmhomo to nchüma sana jilo woa." Hoji sülojo ombona etsoyu tona yantso to hansi eyiv tsükona a picho; osi alümcholo ayithukcho. 6 Ana Mizpah lo Gedaliah ndüngo oyi vani khi meta jilo kyon valanchi evamo jiang nzo vancho.
Juda Lo Esapvüi Gedaliah
7 Juda kyon ejoma tona rasan ejoma tojo ontepopo oyam khelo khochaki n pihamvü vanracho. Osi Babylon mesao na meta jilo yantsatso kyon kvütata Babylon metae sosi n yina valanchi vancho sana jiang esapvüi etssov tsükona Gedaliah ji ethüngche vanthukthaka toji zocho. 8 Hoji tsükona Nathaniah tsoe Ishmael, Kareah tsoe Johanan, Tanhumeth tsoe Seraiah, Netophah lona Ephae tsoeden jiang osi Maach lona Jezereniah tona onte kyon jiang to nzo tssoe Mizpah lo Gedaliah thüngi wotacho. 9 Tole Gedaliah na onte ezocho, "Ana nte ezoaka ntena Bablyon kyon jiang thüngi khochaki epiv jo ntia ekyuv n lika, meta shilo vanjüngi Babylon mesao küpo vani ombo benkatava, tona nte echi mmhomka. 10 Anaha Mizpah lo vani kvüthüng kyon jiang roasana nte thung tssoa vamka. Tokhatola ntena oyan kvülo hoe khi vancho sana jiang lona thyujü nsüngrüta, tsüngthi osi olive thyujü hanrhyuta to vankhoka." 11 Hojito-thüngji Israel kyon Moab, Ammon, Edom, osi meta thanpoe evamo jiang topvüna Babylon mesao na Israel kyon ejoma Juda lo vanthukala, osi Gedaliah ji esapvüi tssothukala to owon zocho. 12 Hoji tsükona ontena nzüroe vamo meta jiang sisi Juda lo elani yitacho. Osi ontena Mizpah lo Gedaliah thüngi yitacho osi hoji lona ontena tssüngthijü tona tssüngthi to elümoto jonchocho.
Gedaliah Ji Lüngthacho
13 Heto shiang tssocho sülo Johanan tona rasan esopvüiden ochoangna khochaki n pihancho sana jiangna Mizpah lo esapvüi Gedaliah thüngi oro 14 heto ombo ezotacho."Ammon lo mesao Baalis na ni lüngthalo Ishmael rothukcho to nina n tsichoke?" Tokhatola Gedaliah na hoji n longtsücho. 15 Hoji süi jo Johanan na Gedaliah ezocho."Ishmael ji owo a lüngtha thuka, tona ochona ombo lüngthacho sana ji ochinaha ntsiv meka. Ntio tsükona ombo khi ni lüngthathukula? To tssona Jihudi kyon kvütata ni hachüma sanrhyui vancho sana shiang shiji elani nzüroe sithuklam osi hoji yakchia kyon kvütata Juda lo valanchi vancho sana shiang pono roe esio ryusang ezüp yilam." 16 Tokhatola Gedaliah na janlancho, "Hojito ti-tssoa! Nina Ishmael tsükona ntio phyoa vancho sana jijo ejüngka!"
1 Hoji nzyu choro tiyingoto jilo, Elishama tsoe Nathaniah ji tsoe Ishmael mesao wopan yulo khanhyae osi mesao küpo tsüphotso jina ombo ndüngo nchyu taro sonhyasi Gedaliah nduko Mizpah lo wocho. Osi kvüthüng onte topvü nzo tsoyuta vancho sana jithüng 2 Isahmael tona ombo ndüngo kyon nchyu taro to jiang na yonri tssüngche Gedalia ji lüngthacho. 3 Isahmael na Israel kyon Gedaliah ndüngo Mizapha lo evamo jiang tona Babylon kyon ochoang jilo vancho sana jiang toha lüngthacho. 4 Ojyuatojo Gedaliah lüngthao ji ochinaha n tsithüng vüngina 5 Shechem, Shiloh osi Samaria to lona kyon nchyu ekhatiza chirocho. Ontena mehüm tssüi sisi osü jiang reroe hantasi onte tsük jiang loha tsüthechirhyui hantacho. Osi otssuk omüm tona ntsantsütse to ekhümki etham tsükona ha hantacho. 6 Hoji tsükona Ishmael na Mizapah lona kya onte nduko chivocho. Kvüthüng ombona owo onte jancho sana, ombona ezocho, "Nzansi rheyi Gedaliah zetava." 7 Osi ontena yantsü chungi rheyi tona Ishmael tona ombo kyon to jiang na onte lüngtharae onte müng jiang ji jükhae shümthechi sitacho. 8 Tokhatola hojiang yulo nchyu taro najo e nzansi e ti-lüngthata ena oden omüm, olive thyujü osi tsakijü to oli mphoe lika to Ishmael ezotacho. Hoji tsükona ombona onte valanchicho. 9 Ishmael na ombona lüngthao kyon jiang echümüng jiang thechio jükha jijo tsüphov tsotso, hojijo mesao Asa na Israel mesao Baash na kvüthüng ombo hayacho sana jithüng shani vacho. Isahmel na hoji jükha ji omüng jiang khi pyingthuki vacho. 10 Hoji sülojo mesao tsoloden jiang tona Mizpah lo kyon kvütata rasantsü esopvüi Nebuzardan na Gedaliah khelo zeyathukvü tsükona vanthukcho sana jiang topvü morantsan onte kümthoki sosi Ammon erüwoe khochicho. 11 Johanan tona rasan esopvüiden ombo ndüngo etsso jiang topvü na Ishmael na ntio münghan elhi tssocho sana ji zocho. 12 Hoji tsükona ontena onte ndüngo kyon sosi ombo phancho osi Gibeon lo wozhütsü ji ndüngona ombo phayacho. 13 Kvüthüng Ishmael na morantsan rumi sosi yia evamo jiang na Johanan tona rasan esopvüiden ombo ndüngo etsso jiang to hungcho sana onte emathacho, osi 14 mmyilani onte thüngoe yungta yicho. 15 Tokhatola Ishmael tona ombo ndüngo nchyu tiza tojo Johanan khe lona tsanchoki Ammon metae tsani yicho. 16 Hoji sülojo Johanan tona ombo ndüngo rasanaden to jiang na kyon kvütata Ishmael na Gedaliah lüngthasi Mizpah lona morantsan rumi rasanden, elopvüiden, nongori osi pokulokyuden to sosi yia vancho sana jiang ezepvüi tssotacho. 17-18 Osi Gedaliah ocho Babylon mesao na meta jilo esapvüi etssov tsükona vanthukcho sana ji Ishmael na lüngthae sithako ji tsükona onte kyucho. Hoji tsükona ontena Babylon kyon jiang thüngi na tsani yitav khilato Ejip meta woe khochitacho. Osi Ontena olani Bethlehem ndüngo Chimham lo esantacho.
Kyon Jiang na Jeremiah Onte Randanile To Ezotacho Thüngi
1 Hoji süijo rasan esopvüiden topvüto Kariah tsoe Johanan osi Heshaiah tsoe Azariah tona kyonlan taro to nzo tssoe 2 oro a ezotacho."Nzansi ena ntio ni ezoana ji etssoyia! E OPVÜI Potsow thüngi etsukona erandania. E kvütata evalanchi licho sana jiang topvü tsükona erandania. Yuta motsüngalojo ete khosha vancho tolea enhungo tara tae enhyothaka, nina e hunga hetüv. 3 E OPVÜI Potsow khi ena ntio lan dunga sana osi kvüto lyuv sana ji lanka ejüthokvü tsükona eran dania." 4 Ana janlancho, "To tssona elümoto mmhonka. Ntena a ezoji esüa ana ete OPVÜI Potsow thüngi randamka, osi ombona ntio phyoa sana ji ana nte ezovka. Ana nte thüngina ntia mphoe vav meka." 5 Tole ontena a ezocho, "OPVÜI na e tsükona ntio ni pia sanaji ena nnga tssona, OPVÜI khi ntsa osi longtsüka lia ena ntio phyocho sana ji khi e pono nlan epia ehungpvüi tssothuka. 6 Emathao tüv tssolea, hojitüv meklea, ena ocho thüngi randan to ni ezocho sana hoji OPVÜI Potsow ji yi ena engav. Ena ombo yi enga tssona echhilan taro mmhom."
Jeremiah Randan OPVÃœI na Janlamo Ji
7 Tsüngon taro sülo OPVÜI na heto ajancho, 8 hoji tsükona ana Johanan tona ombo ndüngo rasan esopvüiden, evamo jiang topvü osi kyon jiang topvü to nzo tsarhyucho. 9 Ana onte ezocho, "Israel Potsow OPVÜI ocho thüngi ntena jonji-yi hansi a wothokcho sana jina heto phyocho. 10 "Ntena meta shilo vanjünga nte vanhunga tssona, tona ana nte chüngithokvü, osi nte n sücho; Ana nte chümkachiv osi rukche nte n si. Nte pono ezüp tsüphov rothuko jina elümoto alüm noa a nungrathaka. n Babylon mesao ekyu ji esantava. Ana nte ndüngo vanka, ombo etho jilona ana nte shanchovka. 12 Ntiotssole aiyo khonzan eli, hoji tsükona ana ombo khi nte khonzathoku, osi oki kholani nte yithokvü ka, hojito A, OPVÜI na phyothaka.' 13-15 "Tokhatola nte kvütata Juda lo valanchi licho sana jiang najo OPVÜI yi n ngav n tsov shikhfü; osi meta shilo evamvü tsükona ti-khirana. Osi ntena meka, eyio Ejip meta kvüloshi elani ritsso n duklam sana, mekana ritsso etsa onha n zo osi ekhang ha n li tocho-sana jilo oyi vamvüka to n phyov shikhfü." Ntena hojito phyoa tssona tona OPVÜI Tokhamo, Israel Potsow jina phyoala, 'Ntena Ejip metae oyi evamvü zikanrünga tssona, 16 tona ntena kyua evamo ritsso jina nte ndukuka osi ntena nchokao tsokhang yukhang jina nte phanphiv, osi nteji Ejip lona nte chüv. 17 Kyon kvütata na Ejip metae oyi evamvü zikata sana jiango ritsso lona mekana, tsokhang yukhang osi nochonori lona chükhamvü ka. Onteno tsükalea eküm n hyoka, osi ana onte pono rwothukvü evamo ezüp ji lona tsüka na lea n tsanchoche! 18 "OPVÜI, Israel Potsow jina phyoala, kvüto a lümbüm etsuk osi tsükshi ji Jerusalem kyon jiang pono chükacho sana ji esüa, a lümbüm etsuk osi haruk-hashü ji nte ponoha chükavka, ntena Ejip metae yita tssona. Oyam na nte zekasi ekhentsüngi esio tüv nte tssoyivka; osi kyon na nte tssaknkonga, nte mying phyophia na rhiyirandanka tssothuka nte tsütsav. Osi ntena elani meta shi hunglam meka." 19 Ana elani ezolancho, "OPVÜI na nte ezothaka, nte kvüta Juda lo enhyokae vancho sana jiang najo Ejip metae ti-otale to. Hoji tsükona ana enhungo hetüv ekyuyi ntaknshon nte piaka. 20 Ntena elüm n mhom worhyuala. Ntena ete OPVÜI Potsow thüngi nte tsükona randam a ezocho, osi ombona ntio yizüng nte piasana hoji engav to ntena phyochakcho. 21 Osi enhungo, OPVÜI na ntio nte ezole to yithen apicho sana jiang topvü nte ezothaka, tolea ntena nngatala. 22 Hoji tsükona shi nchümchetakhe, ntena owo nte vanhunga evamo meta jilo ritsso lona mekana tsikhang hankhhang osi nochonori lona nte chüvka."
Jeremiah Ji Ejip Metae Sosi Yicho
1 Onte OPVÜI Potsow na kyon jiang thüngi ntio ezole to a enhikacho sana topvü ana ezokhancho. 2 Hoji sülojo Hoshaiah tsoe Azariah tona Kariah tsoe Johanan ji elani kyon kvüta haruk-hashüi sana jiang topvü na a ezocho, "Nina ejüng phyoala. OPVÜI Potsow na Ejip metae owo ti-vantale to ezole to ni n zo. 3 Nehemiah tsoe Barukh na epono heto etssov ni ntssungcho. Hoji yakchia Babylon kyon jiang na epono etho hungi elüngthathokvü mekana Babylon meta esosi yithokvü tsükona tssocho." 4 Hoji tsükona Johanan tssolea rasan esopvüiden tssolea, mekana hoji esüa kyon ochinaha OPVÜI yi enga Juda meta lo vamvü meka. 5 Hoji sülojo Johanan tona rasan esopvüiden to jiang na Juda metalo kyon kvütata valanchi licho sana jiang topvü tona meta hepi hepi ezonsoe evamo jiang lona kholani eyio jiang to nzo Ejip meta esosi yicho. 6 Eboe, eloe, nongoriden osi mesao otsolov jiang to rasantsü esopvüi Nebuzaradan na kyon kvütata esopvüi Gedaliah zeya küpo vanthukcho sana jiang tona Baruch osi A, to topvü esosi yicho. 7 Ontena OPVÜI yizüng jiang n ngav Ejip metae Taphanhes ji jana owo vantacho. 8 Hojilona OPVÜI na heto ezocho. 9 "Olung tsüphov taro khi yantsüi ekhüngsae ji kipüngo rhovolam kitacho jilo longran yulo shotheta, osi nina hojito elhio ji Israel kyon ejoma jiang khi ni hunghuka. 10 Osi heto onte ezoa, A, OPVÜI tokhamo, Israel Potsow a shina a nri Babylon mesao Nebukadnezaar ji meta shilo sosi rov sala, osi ombona ombo vantsü ji ana olung shotheo ji poni ekachiv, osi mesao shikhfü ji hoji poni ephfükav. 11 Nebukadnezaar na oro Ejip ji khyov. Osi kyon ochoang nochonori na chüthokvü zenkacho sana jiango nochonori na chüv osi ochoang kvütata morantsan tssoa sosi eyiv tsükona onte zenkae licho sana jiango morantsan tssoa sosi yiv, osi ochoang kvütata jo ritsso lona chüthokvü onte dono licho sana jiango ori na chürav. 12 Ejip Potsow jiang khümphen jianglo ana omi thenthechiv, osi Babylon mesao jina onteji rungi siv mekana khi hansi yiv. Olyu enhyang na kvüto ombo mpensü jiang lona ntssünga orhük düngi siato Babylon mesao jina Ejip meta ji ntssüngche sisi ekhyoe tssoa metaji ekachi sia yiv. 13 Ombona Ejip lo Heliopollis nchümchephen ntho long jiang ha roe siv, osi Ejip potsow ekhümki jiang topvü rungi siv."
Jiang Thüngi OPVÜI Yithen
Israel Kyon Ejip Lo Evamo
1 Israel kyonden, Ejip metae yantsü, Migdol, Tahpanhes osi Memphis elani jüjowoe vanta evamo to jiang topvü tsükona OPVÜI na heto ajancho. 2 Tokhamo OPVÜI, Israel Potsow jina phyocho, "Ana Jerusalem pono tona Juda yantsü thanpo to jiang lo tssorophyoro rothuko ji ntena nte popo hungthaka. Enhünga jana onte ji roe ekachi lia, osi ochi naha jianglo n van, 3 ntiotssole onte kyon jiang na n mhom tssocho osi lümbüm a tsukthukcho. Ontena potsow thanpoe ontenaha n tsi, elani onte pyimtsümotsüi jiang naha n tsi to jiang khümta benkatacho. 4 Osi ana a phajae zenkhying jiang nte thüngi rothukpvü vancho, osi ana a etssako ekhenthav elhi n mhom hetüv shiang ti-tssotale to ombona nte ezocho. 5 Tokhatola ntena n nga, mekana ntena mmyinga n khi ntsa. Ntena elhi n mhom nte tssophen tssoa potsow thanpoe jiang thüngi othan epi ji vachi n si. 6 Hoji tsükona ana a lümbüm etsuk osi haruk ji Jerusalem lantsü jianglo tona Juda yantsü to jiang pono rothukcho, osi ana onte pono omi thecho. Hoji tsükona onteji roe sicho osi enhünga jana ekachi elioji esüa zesi ekhenthav tüv kümi sicho. 7 "Hoji tsükona A, Tokhamo OPVÜI, Israel Potsow shina enhungo nteno ntilyui nte popo heto n mhom tssotala to nte engala. Ntena nte eboe. eloe osi ngaro jiang topvü pono roe esio ji nte yithuk hungala, osi hoji yakchia nte kyon ochia enhyokae nte n vanthuk hungchona alo? 8 Nteno ntio tsükona ntena vanwo eyio Ejip meta shi lona kisü khümi osi potsow thanpoe jiang thüngi othan pi khi alümbüm tssukthukala? Ntena heto etsso shi yakchia nte popo roe nte sihungcho alo, osi hoji yakchia limha shilo jipolan topvü na nte tssak nkonga nte mying phyophia na nte rhiyikathakcho esüa nte tssohungcho alo? 9 Ntena n mhom lantaro ntena Juda yantsü jiang lona osi Jerusalem lantsü jiang lona nte motsüi jiang na etsso jiang, Juda mesao osi nte tsoeni jiangna, nte osi nte eloe jiang na etsso jiang mhechothakcho alo? 10 Tokhatola nchüng tsüngon shi jana ntena teri n kümhan. Ntena ayikrachicho osi ana nte osi nte motsüi jiang thüngi shikhfü pio jiang benphicho n lihan. 11 "Hojito etsso ji tsükona A, Tokhamo OPVÜI, Israel Potsow shina nte pono n mhom nchümi Juda mpümto roe siv. 12 Juda kyon ochoang yithakcho sana osi Ejip metae oyi evamvü tsükona tümkathakcho sana jiang tsükona jo, ana onte ji topvü roe esio jitüv tssothaka. Teri tsüphoe onte topvüto Ejip lona onte chüthokvü, ritsso lona, mekana tsokhang yukhang yakchia. Osi kyon na onte zesi ekhentacho jitüv tssov, kyon jiang na onte tssak-nkongu osi onte mying phyophiana rhyirandankacho ejoena onte tsütsav. 13 Ochoangna Ejip lo vancho sana jiang ji ana ezüp piv, ana kvüto Jerusalem ezüpthukcho sana ji esüaritsso lona, tsokhang yukhang osi nochonori lona to onte ezüpthoku. 14 Juda kyon ochoangna nte meta sisi Ejipi vanwo yicho sana jiang ochia tsanchov meka, mekana eküm vanphyav meka. Onte ochinaha ontena vanlan hungwo Juda meta jilo elani n yiche. Tsanthan ochoang sana yaka ochinaha elani n yilanche." 15 Hoji sülojo eboe ochoang kvütata na onte engh jiangna thanpo potsow thüngi othan picho to ntsicho sana osi eloe kvüta hojilo phanthi vancho sana jiangna, Israel eloe Ejip meta jüjowoe vamo jiang phanhyae razhü tsüphov tssoe heto a ezotacho, 16 "Nina OPVÜI myingona ntio ethüngi ezocho sana jiang ena nngala. 17 Ena ntio tssov to phyocho sana jiang topvü ena tssov. Ena eloe potso. Potsüwoe rani ji thüngi othan pia vamvü, osi ena zükhi than ompvü lo chükav, kvüto e motsüi jiangna elani e esopvüi jiang tona e mesao to jiang na Juda yantsü jiang lona tona Jerusalem lantsü to jiang lona tssocho sana jiang esüa. Hojito tsso ji yakchia etsoyu pvülyua hungcho, osi eji ejüo-lia ezüp n lina vancho. 18 Tokhatola kvüthüng ena potsüwoe rani ji thüngi othan epi jiang esanchosana elani zükhi than jiang ompvü n chükav sichosana jithüngna benkae e ji ntia n liv sicho osi e kyon jiang ji ritsso lona tona tssikhang hangkhang to lona chükhancho." 19 Osi eloe jiangna jilo ekata, "Ena kvüthüng hümri erüngo jiangji potsüwoe rani ji pyon ori esüa nsüngrücho sana, osi ompvü thüngi thungthan pichosana, osi ena kvüthüng zükhi jiang ompvü kisü jilo phyangkacho sana jiangji e tsoe rapvüi jiangna lümbüm na rünga khichocho." 20 Hoji sülojo eboe, eloe ochoang na heto a janlancho sana jiang thüngi ana heto ezocho, 21 "Nte osi nte motsüi jiang, nte mesao jiang, nte esopvüiden jiang osi meta shilo kyon jiangna othan Juda yantsü jiang lona osi Jerusalem lantsüi na pio jiang tsükona jo-OPVÜI na jiang ji n tsi mekana mhechoe khi sithaka to ntena nchümta alo? 22 Nchüng tsüngon shi jana nte meta ji roe ekachi lia osi ochinaha jianglo n van; zecho tia ekhenthav tüv, osi kyon na hoji rhüyi randankathakcho ejoena tsütsatala, ntiotssole OPVÜI na nte elhi n-mhom osi tsüngrham tssolanphyolan jiangji n rümkhukcho. 23 Nchüng ezüp osi roe esio nte pono yio jijo ntena potsüo thanpo jiang thüngi othan pita, elani OPVÜI yizüng jiang n ngao ji yakchia OPVÜI thüngi mmen tsso ji tsükona." 24-25 Ana kyon jiang topvü thüngi ezocho, echümporo tssoa eloe jiang thüngi, Tokhamo OPVÜI, Israel Potsow jina Juda kyon Ejiplo vanta evamo jiang tsükona ntio phyoa vanchosana jiang topvüto: "Nte osi nte tsoeni jiang topvüna potsüwoe rani ji thüngi echümchak tsüphov vathaka. Ntena ompvü thüngi othan piv osi zükhi than chükatav to echümchakcho, osi ntena hoji benphiala, hojito tssona, elüm mmhonka! Nte phyochak jiang vatava osi nte echümchak jiang benphitava! 26 Tokhatola enhungo ntena engatava, A, OPVÜI shina A, Thotsü mying ji tsakae Israel kyon Ejip metae evamo jiang topvü tsükona ntios echümchak khithakcho sana ji: Enhungo ana kvüthüngha elani khi ntena a mying eyiphia, 'Ana eküm evamo Potsow myingona echümala, to phyoa nte echümthukvü meka!' 27 Ana jüo-lia nte kümthukvü meka, tolia roe nte sivka. Nte topvüto nte chükhanthukvü, ritsso lona tssolea, nochonori lona tssolea to tsüka tia n hyokav n sithüng nandangjo nte chüthukvü. 28 Tokhatola nte yulo tararo najo echü jilona tsanchoe Ejiplona Juda metae yilam. Hoji süloti enhyokae evamo jiang na ntsivka, A yiji ntsao pencho alo, onte yiji ntsao sana. 29 A, OPVÜI shina nte ezoaka, ana kvüto meta shilo tssoro-phyoro yithukvüka to phyocho sana ji ntsaka to oponi chiyithuka meta shilona ezüp nte pivka. 30 Ejip lo mesao Hophra ji ombo ri ochona ombo lüngtha hunga vancho sana ji khelo ombo theyiv, ana kvüto Juda lo mesao Zedekiah ji Babylon mesao Nebukadnezar ochojo ombo ri sana osi ochona ombo lüngtha hungchosana ji khelo theyio ji esüa theyiv."
Barukh Thüngi Potsow Phyochak
1Josiah tsoe Jehoiakim na Judalo mesao tssosi nzyu mezhüo to jilo, ana ntio ombo ezochosana ji Barukh na erancho. Hoji sülojo ana ombo ezocho. 2 OPVÜI, Israel Potsow jina phyothaka, "Barukh, 3 nina phyoala, 'Ana to ekachi sivka! OPVÜI na a ezüp jilo nungra a ekayilanthaka to, erona rüchona a sangtsüngthaka, osi ana esan n hung!' 4 "Tokhatola, A, OPVÜI shina, ana ntio tssokachicho sana ji ana süchoala, osi ana ntio chümchosana ji ana rokchetala. Heto shiji ana limha shi mpüm tolo tssov. 5 Ntena echümporo tssoa nte nzana nte tsütsavka to ntena eyilota alo? Hojito ti tssotava. Ana kyon topvü pono tssoro-phyoro rwothukvü sala, tokhatola nteno matachona nte eküm jo tsancho vka. Ntena shilo wolea shilo wolea tsanchov to A, OPVÜI shina phyothaka."
Karchemish Lona Ejip Ekhyo Ji
1 Ejip lona benkae jipo jiang tsükona OPVÜI na heto a jancho, 2 Osi ombona Ejip lo mesao Neko, to tsaoji Babylon mesao Nebukadnezzar na Euphartes zhükhfü ndüngo meta Karchemish lona khyocho, osi hojijo Jehoiakim na Juda lo mesao tssosi nzyu mezhüo to jilo tssocho: 3 "Ejip esopvüi jiang na heto tüngcho, 'Nte tsung jiang methak-tava, osi ritssolo khochia. 4 Nte kurü jiang penria ekathuksi chongo, Oren motsünga tssoe nte kiven jiang ekatava! Nte tssolepok jiang ehetava! Nte ritsso pipo jiang ekarüma!' 5 "Tokhatola ana ntio hungala?" to OPVÜI na engala."Onteno ekyu lona kholanala. Onte rasan jiango shünglanchithaka; ekyu mon rhe khi, onte etonandang yongtala, Sülamoe tia n zechitana. 6 Ochoangna ekhyinga yungta vanchosana tsani n yiche, osi rasan jiang na n tsanchoche. Khümkiwoe jo, Euphrates zhükhfü jilona onte nshüphi evümthev. 7 Nile esüa phanthi vamo jijo ochola, zhükhfü na jüran pyinga tsüato? 8 Hojijo Ejip, Nile zhükhfü ji esüa phanthiala, zhükhfüna ombo jürani na tsüato. Ejip na phyocho, ana phanthiv osi limha shi eyukvü; ana yantsü jiang, elani hojiang lo evamo kyon jiangha to roe siv. 9 kürü jiang wole to yizüng pia osi ritsso kurü zotoro jiang eria wothuka! Rasan jiang khochithuka; Sudan tona Libya to lo kyon jiang na otsung bemrümsi, osi Lydia lona lotssi benthi jiangha to.' " 10 Shijo Tokhamo osi Tsüphotso OPVÜI ji tsüngon: Nchüngo ombona nlilam, nchüngo ombona ombo ri jiang ezüpthukvü. Ombo yonri jiangna n mhithüng jo Onte tsov, osi ombo lümbüm n pükthüng nandang jo onte ejen jiang yuv. Nchüngo Tokhamo OPVÜI jina Ombo rajak jiang thanala, jükiwoe Euphartes zhükhfü ji ndüngona. 11 Ejip kyonden, Gilead lo wotava, osi mozhü eyingoe zetava! Nte mozhü jiang topvü ethelan n lito zechethaka; ntina ha nte n miche. Jipo jiangna nte yikra shümhen ji zothaka; otsük akvüna nte ekya won ji zothaka. Rasan tsüka ji thanphoe lona nshüphiala, osi woniata likoe erithetala.
Nebukadnezzar Na Eroji
13 Kvüthüng Babylon mesao Nebukednezzar na Ejip ji oro hachosana jithüng OPVÜI na a thüngi ajancho. Ombona phyocho, 14 "Ejip yantsü jiang lona tüngchotüngria, Elani Migdol, Memphis osi Tahpanehes to jiang lona: Ntepopo zalanchiv tsükona methak-tava; Ntena ntio lichosana topvü ritsso lona roe siv! 15 Ntio tsso jina nte potsow etho eli-i Apis elongchola? OPVÜI jina ombo echükchüchücho! 16 Nte rasanden jiangji nshüphicho osi onte vanthethaka, Onte onteji heto ezotala 'Zakto tssotava, etena okiwoe ete kyon jiang thüngi yitavka, osi ori yonri khelona tsanchotavka! 17 "Ejip mesao ji myingthan pia 'Wonkyung-yikyungo ochona ombo yuta mmhom ji nkhyae sichosana ji.' 18 A, Tokhamo OPVÜI jijo aiyo mesao. Aiyo eküm evamo Potsow. Kvüto Tabor phunglan jina phunglan thanpo jiang khümchochia sana ji esüa. Osi Carmel phunglan jina jümang ji poni ntssona zakachi lichosana ji esüa, Ochona ni hayata vanchosana ji etho ha hojito tssov. 19 Morantsan ekümvü tsükona methaka, nte Ejip kyonden! Memphis meta jijo lijüng kümthukvü roe sicho, ochina ha jilo n vamo tüv. 20 Ejip jo mangsü tssilan mmhom esüa tüv, jükiwoe na pyatük na oro ombo hacho. 21 Ompvüna rasan engocho jiangha, mangsüroden esüa etho n liden. Ontena zalanchi n rota; Onte topvüna mmilani tsancho. Onte chüv tsüngon ji janthaka. Rorüpi onte esiv tsüngon ji. 22 Onte ri jiangna onte tssungkata roala, osi Ejip kyon jiangna nrüna füfüa to khvüa tsantacho. Ontena pvüsang pensi onte hacho, Kyon na odung tanchüchüa to. 23 Osi enungra ratsü roe sia esüa, Onte rasan jiang ji n khachekhamo, osi vara khomung rümo jilona kyongka. 24 Ejip kyon jiang ji yikra ntukcho; onteji jükiwoe evamo jiangna khyocho, A, OPVÜI shina hojito phyothaka." 25 Tokhamo OPVÜI Israel Potsow na phyoala, "Ana Ammon ji ezüpthukvüsala, Thapes potsow ji osi Ejip potsow tona ompvü mesao jiang to nzo ezüpthukvü. Ana Ejip mesao tona ombona kvütata longtsükata vanchosana jiangto khiv sala 26 osi ochoang na onte lüngthahunga vanchosana jiang khelo theyiv. Babylon mesao Nebukadnezzar osi ombo rasan jiang to. Tokhatola wokhaejo kyon na Ejip lo vanlamvü, ontena ovüngthüng tsso ji esüa. A, OPVÜI na hojito phyothaka.
OPVÃœI na Ombo Kyon Jiang Shanchov
27 "A kyonden, ti-kyutava, Israel kyonden, ti ekhenrhüktava. Ana meta ekomo jiang lona nte shanchovka, ntena moratsan etssowo meta jilona. Ntena oki elani yichevka osi noyinga vam; nteno nkohacheta vanchev osi ochinaha nte n khenthuk. 28 Ana nte thüngi rov osi nte shanchov. Ana meta kvülo nzüroe nte sicho sana jianglo jipo jiang topvü ana roe siv. Tokhatola nteno ana roe nte n si. Nteno ezüp nte n piv nte n vanthuk, tokhatola ana kvüthüng nte ezüpthuka sana ana etüm elan tssov. A, OPVÜI shina hojito phyothaka."
Philistia Tsükona OPVÜI Yithen
1 Ejip mesao na Gaza ji n hayathüng vüngina OPVÜI na Philistia tsükona heto ajancho. 2 Osi ombona phyocho: "Zeta! jükiwoe ojü jiang na evakachia vanka, osi ontena jüphyonlo zhükhfü esüa ekhyinga tsüv. Hojina meta ji topvüto evakzhüv osi limha poni ntio licho sana jiang topvüto; Osi yantsü jianglo kyon ochoang vancho sana jiangha to. Hoji sülojo kyon jiangna ekyo-erung yana tüngtav; osi limha shilo kyon otsük akvüna nshüthechia kyav. 3 Kurü jonkhü shüngtao jiang ontena zov, osi ritsso zotoro yungtao jiang won to; elani jakha na eria eyio jiang on. Opoden jiangna onte ngaro jianglea engoe n zechi; onte khe jiang otsük mphima mmichochi hamvü. 4 Philistia roe esiv yuta ji yithaka, osi Tyre to na Sidom to lona kvüta ekyo-erung licho sana jiang topvü to khani siv. A, OPVÜI shina Philistia kyon jiang roe siv, Crete jüran jiang lona ero jiang topvüto. 5 Gaza kyon jiang pono nungra tsüphotsov yithaka, Osi Ashkerlon kyon jiangna jükrüpi vanthaka. Philistia kyon ejoma jiang na kvütenhyaka nungravla? 6 Ntena kyakachia, 'OPVÜI Yonrio to! Ntena kvütenhyaka tssarovla? Ni sukthephen jilo rheyia, hojilo vani esani sia!' 7 Tokhatola hojina kvütoli esamla, ana kvüthüng etssov tsükona ombo pia sana? Ntiotssole ana Ashekelon ji ehav tsükona tona jüran rhüa evamo jiang to ehav tsükona yizüng pithaka."
Moab Roe Esioji
1 Moab tsükona Tokhamo OPVÜI jina ntio phyocho sana jijo heto: "Nebo kyon jiang ji nzankhüngka na Onte yan ji roe sithaka! kiriathaim jo hayathaka, ombo rizümphen pikhfü mmhom jiang roe sithaka osi kyon jiang ji yikra ndukthukthaka; 2 Moab myingthüng ji moni sithaka, Ori jiang na Hesbon ji hayathaka. Osi Moab jipo mpüm na roe esiv kyakthaka. Zhüva yan jijo jükrüpi sithokvü, rasan jiangna hoji panlana khochiv. 3 Horonaim kyon jiangna eronkachiala, 'Khontarota! Tssorophyoroe esio to.' 4 "Moab ji roe sithaka; ngaro jiangna kyatao ji engatava. 5 Ontena olan dunga ezüp phyingrüng won tssoa Luhit jana shüpshüpa kyatao ji engatava osi Horonaim jowolanina erontao jiang engatava. 6 Zakto, nte eküm tsancho tssoa tsantava! to ontena phyotala. 'Lijüngi Gadho esüa yungtava!' 7 "Moab, nina ni etho osi ejüeli jianglo longtsükachOj tokhatola enhungo ninaha ni khyovka; Ni potsow Chemosh jiha metapoe phanthechiv, Ombo ndüngo pvütiden osi mesaotso jiang nzo. 8 Oyan motsünga nalea roe esio jilona tsanchov meka; vankoktsü osi hayitsü topvüto roe siv. A, OPVÜI shina hojito phyothaka. 9 Moab tsükona okhüplung chümkachia; omboji nsungu roe siv saka, ombo yantsü jiangji roe ekachi siv sala, osi kyon ochinaha hojilo n vanlan." 10 (Ochoangna OPVÜI elhi ji lümbüm totona theta n tssoa sana jiang rhiyikata! Kyon ochona oyam n chüsoa sana osi oyam n lüngthata sana hojiang rhiyirandankata!)
Moab Yantsü Jiango Roe Sithaka
11 OPVÜI na phyocho, "Moab jo yuta topvülo nkoha lo vancho, osi kvüthüngha metapoe tsanthan ekümo n yithukhan. Moab jo zükhi n hyokphina jüngthecho esüa tüv osi kvüthüngha ophfü thanpolo n lithechihan. Ombo rhüm mmhom ji kvüthünga ha moni n sihan osi ombo tathi mmhom ji lia vanpvü. 12 "Hoji tsükona enhungo, ana kyon wothuka Moab ji zükhi esüa chüchokchi esiv yuta ji tsathaka. Onte zükhi yuphen mvüru jiang lichev osi tsaromoroe siv. 13 Hojito tssona Moab kyon jiang ji onte potsow Chemosh thüngina vachithokvü, kvüto Israel kyon jiang ji ontena longtsüo Potsow ji thüngina Bethel lona onte vachicho sana ji esüa. 14 "Moab kyonden, nteno ntio tsükona ekhyo ekhüngden to phyotala, lümbüm etsson rasan jiang ji ritsso lona ejui zethakcho alo? 15 Moab tona ombo yantsü to jiango roe sithaka; khyingroe mmhontso jiang ji lüngthakhanthaka. Aiyo, mesao tokhamo OPVÜI ji; osi ana phyothaka. 16 Moab emom tsüngon ji enhyathaka; ombo roe esiv ji ekhyinga tsathaka. 17 Hoji jipo ji tsükona nungratava, nte hoji hakono evanden, Nte topvüna ombo sükhying ji ntsia. Phyotava, 'ombo emhokthav etho esa ji roe sithaka; Ombo myingthüng tona etho toji n liv sithaka. 18 Nte Dibon lo evanden, Nte yikrachi vanphen ji lona joyitava osi likoe livero yulo khokthetava; Moab roe esio kyon jiang shilo vana osi rizümphen jiang roe ekachi sithaka. 19 Nte Aroer lo evan kyonden, Lantsae mangi nhyakta vantava, tsanta evamo kyon jiang engae zetava, osi ntio tssocho sana ji hojiang thüngi na engae zetava, Osi ntio tssocho sana jiang thüngina engae khitava. 20 Tona Moab ji elongthaka, to ontena janlam, 'Hoji tsükona kyatava, omboji yikrathukthaka. Aronon zhükhfü ji dunga Moab ji roe sithaka! to tüngtava!' 21 "Phunglano yantsü shiang pono yitsso ji rothaka; Holon, Jahzah, Mephath, 22 Dibon, Nebo, Beth, Diblathaim, 23 Kiriathaim, Bethgamul, Bethmeon, 24 Kerioth, osi Bozrah. Moab yantsü ekoni osi enhyano elio jiang topvü pono yitsso ji rothaka. 25 Moab etho ejü jo ejüprothaka, osi ombo etho eli ji roe sithaka, A, OPVÜI shina phyothaka."
Moab Ji Teri Kümthoku
26 OPVÜI jina phyoala, Moab ji kinothoka, Moab na ombona lao jilo eriphivka; osi kyon na ombo emakavka. 27 Moab nina kvüto Israel kyon jiang emakacho sana ji nchümchecho alo? Onteji retsoreyui okhona onte rhüma thakcho esüa nina onte tsütsacho. 28 "Nte Moab lo evan kyonden, nte yantsü jiang lo yitava! Owo sürheni vantava, Yukhu na kvüto tayak-ro yutalo onte shüp tssoa sana ji esüa tssotava, 29 Moab jo elümoto kangtsüa, onteji kvüta kangtsüa mhakhyung-mharana osi ombobo tsüphoa nchüma evan kyonden sana ana zothaka, Ontena onte bobo kvütata mmhona nchüma sana zeta. 30 A, OPVÜI shina nte mhakhyung-mharan ji ntsia, onte kangtsü ji ntia oman n li; osi ontena ntio tssoa sana jiang ji n chümvü n sii. 31 Hoji tsükona Moab kyon otsük akvü tsükona tona Kirheres to kyon jiang to tsükona ana kyav. 32 Ana Sinmah kyon jiang tsükona kyav, osi Jazer kyon jiang lona kyongkatalea kyav. Sibmah yantsü, nino jününgrozhü kümoena echü jümang ji yakchia owo Jazer jana yujancho sana ji esüa tüv. Tokhatola enhungo ni nzyulo tsüngthi tona jününgrothi to jiango roe sithaka. 33 Ematha tona longshi toji Moab meta lizü jilona khi hansi yithaka. Tssüngthi mmyae jiang thüngina tssüngthi jü etsüo ji ana esani siyithaka. Enhungo zükhi nsüngrüi emathata tüngcho tüngrio ji n vamu sithaka. 34 "Heshbon tona Elealeh tolo kyon jiang na kyakachiala, osi onte ekya won ji Jazer jana ena zoala; Zoar kyon jiang naha hoji zokhuka; osi hoji elani Horonaim tona Eglath jana tata konina leha zokhuka. Nimrim lo zhükhvüro ji mpato nghakyingi sithaka. 35 Ana Moab kyon jiang ji onte khümphen jianglo othan epiv ji khaniv. AjOPVÜI shina phyothaka. 36 "Hoji tsükona Moab kyon jiang tsükona tona Kir-Heres to kyon jiang tsükona a lümbüm na nungrala, ochona sana müngkyakhen phililyu na khüa esüa, ntiotssole ontena ntio licho sana jiang topvü moni sithaka. 37 Onte topvü na onte kvüri jiang tssüi sithaka, osi menhüm ha saki sithaka; onte topvü na onte khelo tsüthechia osi posta mpentathaka, 38 Moab lo mhonki topvülo osi nzontsü mmhataphen topvü lona thanpojo mekna nungrata evan tae, ntiotssole ana Moab ji tsaroe sithaka, kvüto chonphfü tsarocho ochinaha njüpomvü sicho sana ji esüa. 39 Moab ji roe sithaka! kyakachia! Moab ji yikrathukthaka, hojijo roe sithaka, osi ombo nkonphia evamo jipo jiang topvüna ombo emakata yikvüala. A, OPVÜI shina hojito phyothaka.
Moab na Tsanchophen N li
40 OPVÜI na echümchakthaka, jipo motsünga na, kvüto mungshitsüna ombo echo ji ephyani hansi yonjoa sana ji esüa Moab pono yonkavka; 41 osi yantsü tona pikhfü to jiang ji hayav. Hoji tsüngon jilojo Moab rasan jiangji eloena tsopoku ryusangathüng ekhena to ekhenrhükvü. 42 Moab ji roe siv osi kvüthüngha jipo n kümlan, ntiotssole ombona apanlancho. 43 Ekhenlung, Sokvü osi tsirhi tona Moab ji nhyaka vana. OPVÜI na hojito phyothaka. 44 Ochoangna ekhenlung jilona tsanchov ekhyo tssoa sana jiango sokvüi elungthev. Osi ochoangna sokvü jilona yunga chiyia sana jiango tsirhi jiang lona sav, ntiotssole Moab ji roe esiv tsükona OPVÜI na yuta ji mekathaka. 45 Ntiolotia nkhvüyangkav tsanthan dena Heshbon yantsü kümoe mesao Sihon na sa vancho sana jilo nkoha yana tsankav tolea hojijo mimyo tae. Omi jina ritsso chokae Moab kyon jiang echung osi phunglan ntssomo jiang rungi sithaka. 46 Moab kyon jiang nzana nchümtava! Kyon ochoangna chemosh potsow ji khümtacho sana jiang ji roe sithaka osi onte tsokhying tsolo jiang topvü morantsanden etsov rumi hansi yithaka. 47 Tokhatola tsüngon etsao jiang lojo OPVÜI na Moab ji tsütson-lanthoku; Shiang hetopvüto Moab lo ntio tssov sana ji OPVÜI na phyocho.
Amon lo OPVÃœI Yitsso ji
1 OPVÜI na Amon tsükona ntio phyocho sana jijo heto: "Israel lo eboe jiangjo kvülo vanchola? Onte metaji nkohov tsükona ochia n vanchoke? Ntio tsükona onteno Molekh ekhüm jiang khi Gad jipo meta ji rechothoki jilo vanjüng tssothukala? 2 Tokhatola ana Rabha yanpvü yantsü kyon jiang khi ritssowon zothokvü osi oyan jiang ji roe likolo nshükae sithokvü yuta ji tsathaka. Tosanati Israel kyon jiang na meta onte khiyio jiang khelona onte metaji khichelanchevka. 3 Hesbon kyonden kyakachitava! Ai ji roe sithaka! Rabha lo elopvüiden nungra yuta khitava! Posta mpentasi nungratava. Hama lona yungphitava. Nte potsow Molekh jijo ombo pvütiden tona mesatso to jiang nzo metapoe tsanthan ejoena khi hansi yiv sala. 4 Ntio tsükona nte longtsüka n li kyon shiangna mpato kanchantala? Nte etho ejü ji joyiala. Ntio tsükona nteno nte etholo enhikae khi ochinaha e n hakhuk to phyotala? 5 Ana nken topvü lona ekhenlung osi ekyu rotokuka. Nte topvü na tsani yivka. Otsük akvüna eküm shanchov yana tsamvü; osi nte rasan jiang tsarhyulamvü tsükona kyon ochia vamvü meka. 6 'Tokhatola ana wokhaejo Anion ji ejüeli lia kümlanthokvü. A, OPVÜI shina phyothaka.
Edom Pono OPVÃœI Yitsso
7 Tokhamo OPVÜI jina Edom tsükona ephyo jijo heto: Edom kyon jiango elan etssov nchümri ji moni sithakchoke? Kvüto lyuv sana onte ejü-rünyue jiang na ntia onte n zov sithakchoke? Onte nchümri mmhom topvü monsi sithakcho alo? 8 Dedan kyonden, nlüpi tsantava! Mphotava! Ana etsao tsoronichen jiangji roe siv sala. Ntiotssole ana ezüp onte epiv tsükona yuta ji janthaka. 9 Kvüthüng jününrothi lhoasana odung tara ontena enhyokae vatala, osi kvüthüng zümolo efüina roa sana onte elümo jiang tae khiala. 10 Tokhatola ana Esao tsoronichen jiango mpümna khiyithaka osi onte mphophen meta jiang yancheyithaka, hoji yakhcia enhungo ontena n phoche. Edom kyon topvü roe sithaka. Onte tsükatia n hyoka. 11 Nte yulo opvü-opo n van jiang ji athüngi vanthuktava. Ana onte sheküpa zevka. Nte emi-nloe jiangna ha alo enhikakhuka. 12 "Ochoang sana ezüp nte epiv n tümo jiang tssolea, ezüp-pvü jilona eyuv na licho. Ezüp nte n piv nte vachiv to ntena nchümta alo? Meka, ntena ezüp pvü jilona yunrüngu na lia! 13 Ana apopo echümchakthaka, Bozrah yantsü jijo ekyuthav, zekaphen osi lijüng tssov; kyon jiangna ombo yikvüv osi ombo mying jijo rhiyikao mying tssov. Hojiang ndüngo oyan jiang topvü nchünkhon tsükona roe siv. A, OPVÜI shina hojito phyothaka." 14 Ana phyocho, "Edom ana OPVÜI thüngina yithen zothaka, Ombona yithen pvüi rothuka onte jipo jiang topvüna onte rasan jiang tsarhyui nte hayav tsükona methakle to kyon jiang ezothukala. 15 OPVÜI na nteji etho n liv nte kümthokvü sala, osi ochinaha nte n yikarachi. 16 Nte kangtsü jina nte ejithechithaka, Ntena jo kyon na nte kyuaka to nchümta khatola ontena ntena nchüma tata nte n yikrachi, Ntena sürheni olung poni vantala, phunglan poni elümoto n tssona tüvlo, Tokhatola ntena küma mungshiro esüa meta ntsoni vanlea, OPVÜI jina nte süjov. OPVÜI jina hojito phyothaka." 17 OPVÜI na phyocho, "Edom pono tssorophyoro rov sa evamo jijo ekhenthav-mothav tssov, hoji tsükona kvütata na hoji yakchia sana ekhemhoka osi ekhenrhüka to tssov. 18 Sodom tona Gomaorrah tolo ntio tssocho sana ji esüa Edom pono ha tssovka, kvüthüng onte osi nte ndüngo oyan elio jiang roe sicho sana jiha to. Ochinaha hojilo elani khi n vanlan, A, OPVÜI na phyothaka. 19 Kvüto Jordan rhüa ratsü jiang lona eroyu mmyaku jiang lona hingho yungchuka sana ji esüa, ana rov osi Edom kyon jiang ji onte meta lona zaktole tsanthokvü. Hoji sülojo ana ethüngcheo esopvüi jina metaji sav. A lo ocho etsitakhokchola? Ochona anocho khuka? Ntio kvütüv esapvüi na a ekhiranala? 20 Hoji tsükona ana Edom pono ntio etssov tsükona nsüngnlünga vancho sana ji enga, osi ana Teman yantsü kyon jiang pono ntio etssov tsükona tüma vancho sana ji to. Onte ngaro jiang lea süchokkhamvü osi otsük akvü ekhenrhüku. 2i Kvüthüng Edom ji elongjoa sana limha shi mpüm tona enhyokphiv, osi kyata nrungta won jina Agaba jünken janae na zov. 22 Kvüto Mungshitsüna echo ji ephyanche hansi yonjoa sana ji esüa ori jiangna Bozrah ji hav. Hoji tsüngon jilo jo Edom rasan jiang eloena tsopoku noathüng ekhena esüa ekhenlangi siv."
Damaskas Pono OPVÃœI Yitsso
23 OPVÜI na Damaskas tsükona ephyo ji heto: iTIamat tona Arpad yantsü to jianglo evamo kyon jiang ji vwongkhyua ekhena vana ntiotssole ontena yithen n mhom zoe lia. Jümang esüa tssonvontssonrina onte pono shüphia vana, osi ontena esana n yiche. 24 Damaskas kyon jiango etho njü osi lümbüm n tsson küma onteno ekyu lona tsanthaka. Onteji elopvüi na tsopoku sathüng noa to noa ryusanga vana. 25 Thüngche yantsü kümoe ematha taena pyingcho sana jijo enhungo sirhakthaka. 26 Hoji tsüngon jilojo ompvü khyingroe jiango topvüto lantsüi na lüngtharüpvü, osi ompvü rasan topvüto roe siv. 27 Ana Damaskas pikhfü jilo omi thev osi mesao Benhadad mesaki jiang topvü rungi siv. A, OPVÜI, Tokhamo jina hojito phyothaka."
Kedar Pvüji Tona Hasor , Yantsü to Pono Yitsso
28 OPVÜI na Kedar pvüji tona meta kvümoe Hasor na sayata vancho sana osi Babylon mesao Nebukadnezaar na khyocho sana ji tsükona heto phyocho: "Kedar kyon jiangji hayata osi engchirolamoe pvüji kyon jiangji roe sia! 29 Onte süki osi ekümrüm jiang rechoe khiyia, osi süki zonlanchi tona süki jianglo ntio kvütata licho sana jiang topvüto. Onte Odh jiang khiyia osi kyon jiang "ekyusü osi ekhenlungna onte hachümthoka' to ezoa!" 30 "Hashor kyonden, A, OPVÜI shina ntak-nshonyi nte ezoaka ekoni tsani oyi mphotava. Babylon mesao Nebukadnezaar na nte zekathaka, osi ombona heto phyoala, 31 'Rotava, kyon nkoho lika osi tsanchovka to nchüma evamo kyonden jiang etena owo hatavka. Onte yantsü jijo hankhan n li osi khanshung (Japi) n pa osi totona rokchethaka.' 32 "Onte Odh jiang khiyia osi onte tssiden jiang ha topvüto khiyia. Kyon kvütata fia' küri dukata tssüi hancho sana jiang topvüto ana nzüroe onte siv; osi nken topvü lona ana onte pono ezüp yithokvü. 33 Hazor jo nchüng khonto tsükona lijüng kümthoki siv, ranfüden taena evamo tssoa. Kyon ochinaha hojilo elani n vanlan. A, OPVÜI shina phyothaka.
Elam Pono OPVÃœI Yitsso
34 Zedekiah na Juda lo mesao kümpvü na OPVÜI na Elam tsükona heto ajancho. 35 Ombona phyocho, "Ana lotssi epen ochoang na Elam ji heto etho lia kümthokcho sana jiang topvü lüngthae sivka. 36 Ana nken topvü lona tsyungryu khi Elam lo echükathokvü, osi ompvü kyon tsanthan jiang na meta topvülo n tsanthethüng nandangjo ompvü kyon topvü nzüroe onte siv. 37 Ana onte ri ochoang na onte lüngthahunga vancho sana jiang ji Elam kyon jiang khi onte khyuthokvü. A lümbüm etsuk lona ana Elam kyon jiang roe siv osi onte topvüto rorüpi n sithüng nandang jo ana rasanden wothokvü. 38 Ana onte mesao osi esopvüi jiang roe onte siyiv osi hojilo avantsü tssokachiv. 39 Tokhatola okholi jo ana Elam kyon jiang ji jüolia kümlanthokvü. A, OPVÜI shina hojito phyothaka."
Babylon Hathechio Ji
1 Babylon yantsü tona hojilo evamo kyon jiang to tsükona OPVÜI na heto yithen apicho: 2 "Jipo jiang thüngi yithen shi ezoa! Hoji thenchoa phyoa! Chekav pia osi yithen ji tüngsochia! Hoji mphoe khi ti-vata! Babylon jijo elungjothaka! Ompvü potsow marduk jo ekyu na pyingthaka! Babylon kisü jiangji yikra pithaka! Ompvü etsakthav kisü jiango ejüprothaka! 3 "Jükiwoe jipo motsüngana Babylon kyon jiang hayalo rothaka osi ontena Babylon ji lijüng kümthokvü; kyon osi ekümrümo jiang na tsani yiv osi ochinaha hojilo n van."
Israel Jiang Kholanala
4 OPVÜI na phyoala."Kvüthüng hojitüv yuta ji yiasana Israel kyon jiang naha elani Juda kyon naha to onte Potsow, a yana kyata rotav. 5 Ontena Zioni eolan ji engae hojitowoe wotav. Ontena nchüngkhon tsükona a thüngi ntsatav osi hoji kvüthüngha n yeso. 6 "A kyonden shiangjo olyuden, onte enhyang jina onte phunglan jianglo somoni sicho esüa jitüvden. Ontena olyuden esüa phunglan motsünga lona motsüngalo to rümphitathaka, osi onte kijo kümoe sana ontena mhechothaka. 7 Onteji ochoangna onte hunga sana jiang topvüna onte hayatala. Onte ri jiang na phyoala, 'Ontena OPVÜI yaka mmen tssothak küma ena ntio tssocho sana jilo ntia nlan n jü. Onte pyimtsümotsüiden jiangna OPVÜI lo longtsükacho küma ontena ha hojilo longtsükata vamvü shikhfü.' 8 "Israel kyonden, Babylon thüngina tsani yitava! Meta shi nkachotava! Vünga tsani eyiden tssotava! 9 Ana jükiwoe evamo jipo jiang ntssongchukchi Babylon ji hayathuku sala. Ontena meta ji pono oren oren lyui ori tssoe khyov. Onteno sophano tssothiden, Ontena lotssi kocho kvüthüngha lea zekae ekoji n rhakvü n si. 10 Babylon meta ji oro retsov osi retsoe jiang na onte na ntio jüpona sana jiang topvü khiv, A, OPVÜI shina phyothaka."
Babylon Elongjoji
11 OPVÜI jina phyoala, "Babylon kyonden, ntena a jipo jiang phanthaka, ntena nte emathata longshitala, osi mangsü na oli sümato emathata yungphitala, mekana kurü na nrungato yungphitala. 12 Tokhatola nte echi yantsü tsüphotso jiha terithokvü osi yikra khithokvü. Babylon jo jipo jiang yulo teritso ji kümthoku; osi hojijo ojü n jü meta lijüng kümvü. 13 A lümbüm etsuk ji yakchia kyon ochinaha Babylon lo vamvü meka, hojijo tssoroe ekachi siv osi ochoang kvütata na hoji zeta yakchia yia sana ekhenrhüka emhoka yakchiv. 14 "Lotssi ebenden, Babylon thüngi ori etssov tsükona renchaka, osi hoji hachüma; nte lotssi tsüng topvü Babylon lo kokata, ntiotssole ontena A, OPVÜI shi thüngi mmen tssothaka. 15 Yantsü ji nkona ritsso won tssoa! Enhungo Babylon na khochakthaka. Ombo pikhfü osi echung jiang rorhüpthaka, osi thonchokhanthaka. Ana Babylon kyon jiang nlilanala, osi ontena kvüto oyam tsütsacho sana ji esüa onte tsütsata. 16 Meta jilo mojü mono ti-benphithoka, mekana liri ha ti-lithoka. Metapoe kyon hojilo evamo jiang otsük akvüna hayalo eroe rasan jiang kyuv osi onte ki woe kholani yilamvü."
Israel Jiangna Kholamoji
17 OPVÜI jina phyoala, "Israel kyon jiangjo olyuden esüa Hinghoden na phanroe osi nzüroe sithaka. Ovüngo tssoa jo onteji Assyria ekhüng esae jina onte hacho, osi hoji sülojo Babylon mesao Nebukadnezaar na onte ryu jiangji nkokcho. 18 Heto etsso ji tsükona A, Tokhamo OPVÜI Israel Potsow jina Babylon mesao Nebukadnezaar osi ombo metaji ezüp piv, ana kvüto Assyria ekhüng esae ji ezüp picho sana ji esüa. 19 Ana Israel kyon jiang ji onte meta jilo yilanthoku. Ontena Karmel phunglan osi Bashan meta jiang lona ntio yu-ohan rankata sana jiang tsov; osi ontena chokao oyo-ohan kvütata Epharaim lona tona Gelead tolona ntio rankata sana jiang to tsov. 20 Kvüthüng hojitüv yuta ji yiasana Israel lo mmen liv mek, elani Juda lo ntha nri n mhom liv mek, ntiotssole ana ochoang valanchicho sana jiang kyon jiangna vamvü. A, OPVÜI shina hojito phyothaka."
Babylon Pono Potsow Yitsso
21 OPVÃœI na phyoala, "Merathaim kyon tona Pekod kyon to jiang ji hayata osi onte ji lüngthae roe sia. Ana ntio yizüng nte pia sana topvü tssoa to A, OPVÃœI shina phyothaka. 22 Meta jilona ritsso won zocho osi hojilo tssorophyoro tsüphov licho. 23 Babylon na limha ji mpüm na vümromoroe sicho, osi enhüngajo hoji vümshenphen ji shülanthaka! Liphungtsü ji pono ntio tssothakcho sana jinag zesi limhalo jipo topvü na ekhenrhükala. 24 Babylonia nina a thüngi rotacho, osi ana tssirhi doni ni vayio jilona ni sathaka, ninajo hoji n tsia-khatola. 25 Ana meta kvüloshi a ritsso ebensü hanrhyui vachosana ji enhungo chonchithaka, osi alümbüm etsuk na hojiang ji khichethaka, ntiotssole A, OPVÃœI tsüphotso jina Babylon metalo elhi etssov lia. 26 Nken topvü lona sanchuki hayata osi otssk omüm kvülo hanrhyui licho sana jiang tssarhüpi eshii sia! Liphungtsü ji roe sia! Ntia hayae ti-valan-chinrünga! 27 Onte rasan jiang topvü lüngtharüpi sia! Onte lüngtharüpa! Babylonia kyon jiango chüthoku methakthaka. Ezüp onte epiv yuta ji yithaka!" 28 (Tsanthan Babylon lona tsanchoe Jerusalemi eyio jiang na, Babylon ombo ekhümki jilo ntio tssocho sana ji tsükona ete OPVÃœI Potsow na onte pono kvüta nlilancho sana hoji ezoala.) 29 "Lotssi ebenden jiang ji Babylon metaji hale to ezoa. Kvütatana lotssi benthicho sana jiang topvü wothuka. Yantsü ji füchüma osi kyon tsükatia ti tsanchothuka, Ombona ntio tssothakcho sana ji onte nlilana, osi ombona kvüto oyam tsütsacho sana ji esüa onte tsütsata, ntiotssole ombona A, ntho Israel pono kangtsüa etsso-ephyocho. 30 Hoji tsükona ombona khyingroe jiangji yantsü lantsü jiang lona lüngtharav, osi hoji tsüngono rasan topvü lüngthav. A, OPVÜO na hojito phyothaka. 31 "Babylonia, niji kangtsüna ni pyingthaka, hoji tsükona, A, Tokhamo osi Tsüphotso OPVÃœI, ana nipono sakav! Ana ezüp ni epiv yuta ji janthaka. 32 Ni kangtsüo jipo shiji nshüphi ni ekhünguka osi ochinaha ni sükae vam meka. Ana ni yantsü jianglo omi ni theyivka, osi hojiang nkonphia ntio lichosana topvü roe siv." 33 OPVÃœI Tokhamo jina phyoala, "Israel kyon jiang tona Juda kyon to jiang ji tssethechithaka, kvütata onte rhümae lichosana jiangji rarünga zeyatala osi onte n yithukala. 34 Tokhatola ochona onte phanchovsa sana jijo etho ejüi-ombo mying jo Tokhamo OPVÃœI. Ombona ombobo onte mmhon tsükona elhi ji tsakav osi limha shilo noying hansi yiv, tokhatola Babylon lojo ezüp yithukvü. 35 OPVÃœI jina phyoala, "Babylon thüngijo echü!. Ombo kyon jiang, Hojilo esapvüiden, osi meta jilo nchümri eliden topvü chüthuka. 36 Meta jilo ejüng ephyoe zenkhying jo chüthuka, Onteno kvüta zhüvaeden ato! Rasanden jiang thüngiha echüOnte ji kvütata ekhenrhükthakcho ato! 37 Ombo kürü osi ritsso kürü zotoro jiang topvü roe sia! Ombona engocho rasan jiang thüngiha echü, Onteno kvütata etho n jücho ato! Ombo ejüeli jiang roe sia; phanchoe re-khiyia. 38 Meta jilo tsüngkying hansi yithuka osi hojilo zhükhfü jiang kyingkayia. Babylon jo ekhenthav kisüna pyingcho meta, osi hoji yakchia kyon jiang zhüvathukala. 39 Hoji tsükona Babylonia jo tsüngrham osi omon n mhon jiang ejiphia, osi n tssüngrüngo woro jiangna evamo meta tssothaka. Meta jilo elani kyon na kvüthüngha vanlam meka, osi okholi jana lia hojilo n vanlan. 40 Ana Sodom tona Gomorah osi hojiang hakono oyan jiang kvüthüng roe sichosana onte thüngi kvüto tssochosana jito Babylon meta jiha tssovka. Kyon ochinaha hojilo vanlam meka. A, OPVÃœI shina phyothaka. 41 "Jükiwoe liphungtsü jiang lona kyon jiang sana tsathaka, ekoni evamo etho ejüi jipo; mesao elümoto na ritsso tsükona methaka vanthaka. 42 Ontena onte lotssi tona yonri to jiang tsakathaka; Onteno harang osi khonzan to n tssoeden, ontena kurü jianglo tsankae sanphiana jümang na echyuato khüala, Ontena Babylon pono ori etssov methakthaka. 43 Babylon mesao jina yithen jiang zoala, osi ombo khe jiang mmichochithaka. omboji nungkhunungrana pyingthaka, osi eloena tsopoku noathüngto noala. 44 "Kvüto hingo na Jordan mphyima ratsü jiang lona eryo mmyaku yantsophen jiang lo chiroa sana ji esüa, A, OPVÃœI shina rov osi Babylon kyon jiang ji yantsü jilona zaktole tsanthokvü. Hoji sülojo ana ethüngcheo esopvüi jina metaji sav. Ochona alo etsitakhokchola? Ochona anocho khukchola? Ntio kvütüv esapvüi na a ekhiranala? 45 Hoji tsükona ana ntio kvüto Babylon yantsü osi hojilo kyon jiang pono etssov etüm licho sana jiang engatava. Onte ngaro jiangleha süchokvü osi hoji zesi otsük akvüto ekhenrhükvü. 46 Kvüthüng Babylon ji eya sana limhatsüna zoa owon tssoa enhyoku osi ekyu lona kyata nrungta won jiang jipo thanpoe topvü na zorav."
Babylonia Pono Yitsso Enito
1 OPVÜI jina phyoala, "Ana Babylonia osi ombo kyon jiang pono roe esio mpung hansi tsata. 2 Kvüto mpung na mavü jiang veni sia sanaji esüa Babylon ji roe esiv tsükona ana metapoe kyona mpung esüa rothokvü. Kvüthüng roe esiv tsüngon ji yia sana ontena nken akvü lona hav osi metaji ejüng ekachi siv. 3 Rasan jiangji lotssi yonphiv tsükona yuta ti-pia, mekana ritsso pipo hamvü tsükona yuta ti-pia. Khyingroe jiangha ti-khachoa! Rasantsü ji mpüm na roe sia! 4 Onteji tssatsorav osi onte yantsüi lantsü jiang lona chürav. 5 A, Tokhamo OPVÜI Potsow jina Israel tona Juda toji n sihan, ontena mpa A, Ntho Israel OPVÜI ji pono mmen tssolea. 6 Babylonia lona tsani yitava! Nte eküm tsanchov tsükona tsantava! Babylonia mmen ji tsükona nte ti-lüngthatoka. Enhüngajo ana onte nlilana ezüp onte piala, onte elhina mamo ji tsükona. 7 Babylonia jo akhelo shonapvü bencho esüa hoji lona limhatsü yuthokcho. Jipo jiangna ombo soko ji yusi onte lümbüm moni siracho. 8 Babylonia ji yuta esüngaro lona joyithaka osi roe sithaka, ombo tsükona nungratava! Ombo ontsa jiang tsükona mozhütyantava, ombo mmhonphiv mpa tssovka. 9 Meta jilo metapoe kyon evamo jiang na phyoala, 'Ena Babylonia nzanchiv ekhyo tssocho, tokhatola elümoto sülanthakcho. Ompvüji to ekachi sisi etena okiwoe kholani yitavka. Potsow na ombo etho topvü khi Babylonia ji ezüp pithaka, osi totona roe khi ombo sithaka.' " 10 OPVÜI na phyoala, "A kyonden, tüngtava, 'Ete elamo to OPVÜI na ejüthaka. Etena Jerusalemi wotavka osi ete OPVÜI Potsow na ntio tssothakcho sana ji kyon jiang ezotavka.' " 11 OPVÜI na Media lo mesao jiang ntssungchukchithaka, ntiotssole ombona Babylonia ji roe esiv zikathaka. Ombo ekhümki roe esio ji tsükona hetoeona nlilam. Hata evamo tsüphoeden jiangna yizüng piala, "Nte lotssitsüng jiang nzentava! Nte tsung jiang methak-tava! 12 Babylonia pikhfü jiang ehav tsükona chekav ji pia. Enhyang jiang etho jükathoka! Enhyang jiang owo vanthoka! Ravamvü tsükona kyon vanthoka!" OPVÜI na ombona Babylonia pono ntio tssov to phyocho sana ji tssothaka. 13 Hoji liphungtsü jilojo zhükfü elümoto lia osi ejüeli ha lia, tokhatola ombo yutaji benthaka, osi ombo ekümzhü ji tanchithaka. 14 OPVÜI na ombo eküm theta echümchakthaka, ombona kyon jiang ji vara khomung rümato rothoki Babylon ji hayathoku osi ontena ekhyo won tssoa tüngtav.
Potsow Myingthüng Nsika Khen
15 OPVÜI na ombo etho khi limha shi nsüngrücho; Ombo nchümri mmhom ji khi limha shi liyingcho, osi oyak jiang ephyansochicho. 16 Ombo yizüng lona oyak shi mhae ojü jiang na echhyuala; Ombona limha ehüm jiang lona eluk jiang hansi yiala. Ombona eryu yulona Potsow nlüpthukala, osi ombona hanrhyui vaphenina mpung jiang rothukala. 17 Shiang zesi, kyon jiang ji eyim osi ntia n tsi zhüvae esüa kümthokala, Ochoangna kisü nsüngrüa sana jiango hamathukala ntiotssole ontena nsüngrüo Potsow jiango ejüng osi eküm n jü. 18 Onteno oman n lio, hoji tsükona tssaka emakav lia; Kvüthüng OPVÜI na onte thüngi roa sana onteno topvüto roe siv. 19 Jakob Potsow jijo hoji esüa mek; Olan topvüto nsüngrüo jijo ombo, osi ombona Israel kyon jiang ji ombo kyon tsotso etssov tsükona ethüngchecho. Thotsü opvüi jo ombo mying ji.
OPVÜI Vümshenphen
20 OPVÜI jina phyoala, "Babylonia, nino vümshenphen, a ritsso ebensü ji. Jipo osi ekhüngyan jiang ejüprov tsükona ana ni tsütsacho. 21 Kurü osi kurü mankvüina eroe jiang shünglanchiv tsükona. Osi kurü zotoro tona hojing emongphi jiang shülanchiv tsükona, 22 Eboe osi eloe jiang lüngthav tsükona, pongdenro osi eson eran jiang lüngthav tsükona eboeroro osi eloeroro jiang lüngthav tsükona. 23 Olyu enhyang jiang osi ombo tssiden jiang lüngthav tsükona, lirhonden osi onte kurü jiang lüngthav tsükona esapvüiden jiang ; osi ntssoni tsüphoeden jiang ejüprov tsükona."
Babylonia Thüngi Ezüpthoko Ji
24 OPVÜI jina phyoala, "Babylonia thüngi ontena ntio kvüta n mhom Jerusalem thüngi tssocho sana jiang nlilana ntena a hunguka. 25 Babylonia, nino phunglan kümoena limha totona roe sia sanaji esüa tüv, tokhatola, A, OPVÜI, shijo ni ri. Ana ni rhümavka, osi likoe ni tssüngchov osi livero tae kümra ekachi ni siv. 26 Roe ni sithako jiang lona kvüthüngha olong tsakalani kitsolo n thelan. Nino nchünkhonto lijüng esüa tssov. A, OPVÜI, shina hojito phyothaka. 27 "Hayav tsükona chekav pia! Jungken ji khüa tona jipo topvü na zovka! Babylon thüngi ori etssov tsükona jipo jiang ji methaka! Ararat lo ekhüngyan jiang elani Minni tona Ashkenaz to jiang ji halo wole to ezoa. Halo evov tsükona esopvüi tsüphoe tsüka ethüngcheta. Kurü jiang ji vara khomung rümato sanchokthuka. 28 Babylon pono ori etssov tsükona jipo jiang ji methaka. Media lo mesao jiang tona onte esopvüiden osi tsüphoeden, elani ontena sayata evamo liphung jiang topvülo rasan jiang, to tsalo wothuka. 29 Limha jina enhyokala, ntiotssole: OPVÜI na Babylon ji lijüng kümthokvü nlansünga vana, ochinaha n vamo meta. 30 Babylonia rasan jiang n rolanchiv esani onte rizümphen jiang lo vani sithaka. Ontena onte lümbüm etsson ji moni sisi eloe esüa kümkhanthaka. Yantsü hankhan jiang ji jakrothaka, osi oki jianglo omi kikathaka. SlYithenpvüiden, lakrita Babylon mesao ji ombo yantsü ji nken topvü lona rorhüpthaka to ezolo yungphitala. 32 Ori jiang na zhükfü yakchilan ji khithaka osi rizümphen zenki jiang topvülo omi thenthechithaka. Babylonia rasan jiang ji ekhenrhükthaka. 33 Nsungu ori jiang na onte ejoroe pyonpheni na otssuk omüm süma to onte sümvü sala. A, Thotsü OPVÜI, Israel Potsow, na phyothaka." 34 Babylonia mesao na Jerusalem ji chyusocho osi hoji tsocho. Mvüru esüa ombona yantsü ji liche sicho. E Ekyuthav ekümrüm esüa ombona nzhücho. Ombona ntio jüponcho sana jiang khicho osi enhyo jiang shümthei sicho. 35 Zion kyon jiang khi heto phyothuka, "Ethüngi ntio khonta rota elhi tssothakcho sana jiangji Babylonia jiang haa tssothuka!" Jerusalem kyon jiang khi phyothuka; "Ena ntio ezüp khithakcho sana jitsükona jo Babylonia jiang haa tssothuka!"
OPVÃœI Jina Israel Nzanchiv
36 Osi hoji tsükona OPVÜI na Jerusalem kyon jiang thüngi ezocho, "Ana nte ezüp etsi yi ji tsakav osi nte ri jiang na ntio nte thüngi tssocho sana jiang tsükona onte lothokuka. Ana Babylon lo jünhyo jiang nghayiv osi zhükhfü jiang kyingkae sithokvü ka. 37 Hoji liphungtsü jijo roe ora ekümrüm vanphen kümthokvü. Zesi ekhenthav tüv kümthokvü; osi hojilo ochinaha vamvü mek, osi ochoang kvütata na hunga sana ekhentsüngu. 38 Babylon kyon jiang na hinghoden esüa erhyuta osi hingoden esüa phyuphitala. 39 Onteno wondon eratsüngcho alo? Ana onte tsükona tokhu etsoyu nsüngrüivka osi onte ji yuzhüvae emathathoku. Hoji sülojo onte na yipvü osi kvüthüngha elani n phanthilan. 40 Ana lüngthalo onte sosi ov, olyuroden, nyanyanden osi olyuden esüa, A, OPVÜI shina hojito phyothaka."
Babylon Ji Sükhying
41 OPVÜI na Babylon tsükona heto phyoala: "Yantsü kümoe limhatsüna thüngcho sana ji hayathaka. Jipo jiang tsükona Babylon ji kvüta ekhentsüngo meta kümthakcho ato! 42 Jümang jina Babylon pono evakachicho osi jükhyo jina echhyua ombo eyukzhücho. 43 Yantsü jiang ji zesi ekhentsüngo osi ojü n jüwo lijüng esüa kümthaka, Ochinaha n vamo mekana hojilo n yentsalamo meta. 44 Ana Babylon potsow Bel, ji ezüpthokvü, osi ombona efürhyuo tsütsailan jiang sithoku; osi jipo jina elani ombo n khümlan. "Babylon echhung jiang eyathaka. 45 Israel kyonden, hoji lona tsani yitava! A lümbüm haruk osi tsükshi ji lona nte eküm shachovo tssoa tsani yitava. 46 Ntena khenpungyipung zo jiang khi ti-kyutava osi lümbüm ti-teritava; nzyu ebento khenpung-yipungna nzükachiala, meta shilo tssatsomoritacho onpungyipung, osi mesao na mesao pono rotacho yipung. 47 Hoji tsükona ana Babylon kyon jiang kisü jiang ejamvü yuta ji tsathaka, liphungtsü mpüm yirathokvü osi hojilo kyon jiang topvü lüngtharüpthoku. 48 Limha shilo osi oyaki licho topvüna longshi lona tüngkachiv kvüthüng Babylon ji, jükiwoe kyon ochoangna ombo roe silo rocho sana jiang lo eyakata eya sana. 49 Babylonia na limha shi topvülo kyon echü lithokcho, osi enhungo Babylon ji joyithoku ntiotssole ombo yakchia Israel kyon elümoto chüthokcho, A, OPVÜI shina phyothaka."
Babyloni Israel Kyon Evamo Jiang Thüngi Potsow Yithen
50 OPVÜI na ombo kyon Babyloni evamo jiang thüngi heto ezoala: "Nteno echü lona tsanchothaka! Enhungo yitava! Nhyaka ti-vantava! Nteno nte metaena ekoni oyi vanta khatola, nte OPVÜI, a nehümehetava, osi Jerusalem jiha nehümehetakhe. 51 Ntena jo phyotala, 'Eiyo yikra ndukthukthaka osi eyikra khitaka; eji ntia nlyucheo kümi esithaka, ntiotssole metapoe kyon shiang na ekhümki ntho meta jiang e khiyithaka.' 52 Hoji tsükona ana phyoaka, ana Babylon kisü jiang thüngi jantav ji yuta tsathaka, osi tssatso jiang na liphungtsü totona erontavka. 53 Babylon na küma potsüwoe yanga ehungo hoji rizümphen zenki chüngchünga tssoe valea, ana kyon wothuka hoji roe sithokvü. A, OPVÜI na phyothaka."
Babylon ji Kyongkata Roe Esio ji
54 OPVÜI jina phyoala, "Babyloni kyata won jiang engatava, meta jilo tssorophyoro elio jiang tsükona nungratao jiang ji. 55 Ana Babylon ji roe siala osi jükrüpi vanthukala. Rasantsü jiangna jükyo na echyuato santhetala osi tüngchotüngrita hayatala. 56 Ontena Babylon ji roe esiv tsükona rocho; Ombo rasan jiang ha hayathaka, Osi onte lotssi jiang eranroe siyithaka. Aiyo n mhom ji ezüp epio Potsow ombo jokheman na mamo ji esüa ana Babylon ji tsütsavka. 57 Ana Babylon lo esapvüi jiang yuzhüvathokvünchümri eh kyonden esopvüiden, osi rasanden topvü yipa yithukvü osi kvüthüng ha onte n yipjüngchithuk. A, mesao na phyothaka Aiyo Thotsü, Tokhamo OPVÜI ji. 58 Emhukthao etho eli Babylon pikhfü jiang likoe eyathethukvü, osi kipüngkhan ntssomo jiangha rungi sithukvü. Jipo jina ezüpa elhi etssoji ntia mekvü sithaka; Ontena sango ji mimyo kümi sithaka, A, Tokhamo OPVÜI jina phyothaka."
Jeremiah Yithen Ji Babylon Metae Yithukcho
59 Mesao Zedekiah kija phajae jo Seraiah, Mahseiah tsorüi osi Neriah tsoe ji tssocho. Zedekiah na mesao tssosi nzyu mezhüoto jilo, Seraiah na ombo nzo Babyloni yia vancho, osi ana ejü-rünyo lanso tara ombo picho. 60 Babylon lo tssorophyoro yivsa evamo ji yilan tona Babylon tsükona thanpo yilan to ana kako lo erancho. 61 Ana Seariah ezocho, "Niha kvüthüng Babylon jana sana shilo ntio kvütata erani lichosana topvü tüngkachia kyon jiang thüngi kha ezonrüngkhe. 62 Tosi heto randana, 'OPVÜI nina meta shi roe siv osi ekümrümo naha n vancheo, kyon na tssolia ekümrümo na tssolia, n vancheo tüv osi nchükhonto tsükona lijüng esüa kümthukvü to phyocho. 63 Seraia, nina kvüthüng shiji kyon jiang thüngi khae ezothaka! sana olungo erükae Eupharetes zhükhfüi shümthechi sikhe. 64 Tosi heto phyoa, Babylon lo ntio tssov vancho sana ji hojito ka-ombo ji jüngthev osi kvüthüngha n phanthilan, OPVÜI na ombo pono tssorophyoro hansi rov sa evamo ji yakchia.' " Jeremiah yi jiangji shilona thakala.
Jerusalem Emomoji
1 Zedekiah na ombo nzyu mekyusi ekha tssoathüng Juda lo mesao kümcho. Osi ombona Jerusalem ji nzyu taro ekha sacho. Oyo mying jo Hamutal, Jeremiah, Librah yantsü lo evamo ji otsolov. 2 Mesao Jehoiakim na kvüto mmen tssocho sana ji esüa mesao Zedekiah naha OPVÜI thüngi mmen tssocho. 3 Hoji yakchia OPVÜI na Jerusalem tona Juda tolo kyon jiang thüngi hetata to lümbüm tsukcho, hoji tsükona ombona onteji ombo ehungona phani sicho. Zedekiah na Babylon mesao Nebukadnezaar pono rokata sakacho, 4 hoji tsükona Nebukadnezaar na ombo rasantsü sosi Zedekiah na mesao tssosi nzyu tokusi choro taro si tsüngon taro tolo Jerusalem ji oro hacho. Ontena yantsü tssae nchenki tssocho osi vükthechiv tsükona pikhfü ha yantsü ji rhüa nsüngrütacho, 5 osi Zedekiah esa nzyu taro ekha n benthüng nandang jo vükthechi vanthukcho. 6 Hoji nzyu choro mezhüoto tsüngon tokuotolo otssi vara ji tsükshio ji yakchia kyon jiang na ntiotia n tsotav vanathüng, 7 yantsü pikhfü ji rorhüpcho. Osi Babylon kyon jiang na yantsü ji ekvüzhüi vancho khatola rasan jiango topvüto zümolo tsankhani sicho. Ontena mesao phari jiwoena tsanchoki pikhfüi eniji nduktaphen jilo kipünglan jiwoena rhüa chiyicho osi Jordan hayitsü towoena tsani yitacho. 8 Tokhatola Babylon rasan jiangna mesao Zedekiah ji phanrhücho osi phana jowo Jeriko hayitsü ji ndüngona ombo rhümacho; osi ombo rasan topvüna ombo sisi tsanracho. 9 Zedekiah ji Nebukadnezaar, Hamath erüwoe Riblah yantsü jilo evamo ji thüngi sosi chyicho, osi hoji lona Nebukadnezaar na ombo pono oyi tssoyicho. 10 Riblah lona ombona Zedekiah tsokhying jiang ji Zedekiah na zeta vana chüthokracho; osi ombona Juda lo tsüphoeden jiangha chüthokcho. 11 Hoji sülojo ombona Zedekiah ji omhyik jiang erukchukchi siyisi shenzhü thei Babyloni sosi yicho. Zedekiah na ombo echü tsüngon n janthüng nandang Bayloni evüngki vancho.
Ekhümki Roe Esioji
12 Nebukadnezaar na Babylon lo mesao tssosi nzyu taro tokusi choro mongo to jilo tsüngon taro tolo, mesao ejürünyue osi rasantsü pono yidanpvüi, Nebuzardan na Jerusalem lo khothecho. 13 Ombona ekhümki jiha, mesao vanphen osi Jerusalem lo ethelan eli kyon topvü ki jiang ha to rungicho 14 Osi ombo rasan jiang na yantsü pikhfü jiang roe sicho. 15 Hoji sülojo Nebuzardan na yantsü jilo kyon valanchi evamo jiang elhilo tssothimori osi tsiyanthi valanchi elio jiang osi ochoang Babylon mesao thüngi yithukcho sana jiang topvü ji Babyloni sosi yicho. 16 Tokhatola Juda metalo yantsatso, ntia n lio kyon jiangjo ombona valanchia jününgrothili tona oli to elhi tssothukcho. 17 Pyontsü yonjak na nsüngrüo milon turhyu osi zotoro esüa ekhümki evao jiang elani pyontsü yonjak na nsüngrücho jükok jiang topvüto Babylon kyon jiangna ejüpromoroe Babylon metae hansi yicho. 18 Ontena kheya tona mibuk thanthephen, thanphensa ji ntsüngrügathüng tsütsao jiang, osi milon jilo ethelen jiang, ekümrüm than piathüng ejen donthephen vakuk jiang elani ntsantsütse rungphen vakuk osi jiang yaka pyontsü yonjak na nsüngrücho ekhümki tssolanphyolan lo tsütsao jiang topvü ontena khi hansi yicho. 19 Elani shona mekana janti na kvütata nsüngrücho sana topvü, vakuk terio jiang, miron thani benphiphen jiang, jüpvü ekümrümo thanathüng ejen donthephen jiang, live thanthephen, elani milondung jiang, vakuk ntsantsütse rungphen jiang osi zükhi thanathüng rani phyangchukchiphen jükuk jiang topvüto khi hansi yicho. 20 Mesao Solomon na pyontsü yonjak na nsüngrücho ekhümki evav tsükona olan eni jiang, turhyu eni ji, khyanphia wocheo zotoro esüo jiang, jüjen tsüpho jiang, turhyu taro eni jüjen tsenkachiphen füitia n zecheo mmyinga tüv jiang topvü khicho. 21-22 Turhyu eni jiang oni khetita tüv, woniata ntssoni ntyi tiza, elani nkoncholo ntyi mongosi chiso nsüngrücho. Ontena olungi jo okuk, osi yonjak ji echiyi jo yingro mezhü eküp tüv na nsünhrücho. Osi turhyu woniata omhae jo eshüm tssocho osi eshüm jiang ji okhyan phokolo ntiyi enisi ekoa tssocho, osi hoji nkona tsarümthipen esüa opyon pyontsü yonjak na nsüngrükacho. 23 Osi turhyu woniata motsüngalo tsarümthipen esüo opyon nzoa ren nsüngrükacho, hojiang yulo ekhatokvüsi tirok jo likoena hungkachia jitüv tssocho.
Juda Kyon Jiang Ji Babyloni Sosi Yicho
24 Hoji ekalo, rasantsü pono yidanpvüo Nebuzaradan naha pvüti tsüphotso Seraiah, pvüti enioto Zephaniah, elani ekhümki tsüphoeden nchyu ethüm to morantsanden tssoa Babylon ni sosi yicho. 25 Yantsü jilona rasan tsüphoeden, tssosi evamo jiang, elani mesao kija ntssungpvüi mekana ejürünyupvüi ochoang na jithüng jana yantsü jilo vanchosana jiang, osi rasantsü esopvüi ji küpo eranto thüngoe ezeden, elani opvü odung etssoe onte otsük rokro to sosi yicho. 26 Nebuzaradan na onteji Babylon mesao Riblah yantsü 27 Hamath erüi ncheni evamo ji thüngi sosi chiyicho. Hoji lona mesao jina onte khangria chüthukcho. Hoji esüa Juda kyon jiangji metapoe tsanthan ekümo hansi yicho. 28 Shijo Nebukednezzar na ombona Babylon lo mesao tssoathüng morantsan rumi sosi eyio jiang erantsüng liojiang ephan heto tssocho. Ombo esa nzyu tiyingo jilojo owo 3,023 sosi yicho; osi 29 ombo esa nzyu taro tizao to jilojo Jerusalem lona owo 832 sosi yicho; 30 elani ombo esa nzyu myukyusi ethümoto lojo Nebuzaradan na sosi yicho 745, to tssocho. Topvü tssotsüi onte owo 4,600 sosi yicho. 31 Evilmerodakh na Babylon lo mesao tssoathüng jo ombona Juda lo mesao Jehoiachin thüngi nzan ejüa evüngkina ombo vachicho. Heto etsso shijo Jehoiachin ji morantsan tssoa sosi yisi nzyu thümro tiyingsi choro taro enio tojilo tsüngon myukyusi mongo to jilo tssocho. 32 Babyloni morantsan thanpoe ombo nzo etssoe jiang thünginajo mesao Evilmerodakh na ombo yikrachio osi ombo nzamo tssocho. 33 Hoji tsükona Jehoiachin jo morantsan mpensü jiang ombo tongphithoksi ombo eküm echung mesao tssisa lona etso tüv ombo lanchicho. 34 Ombo eküm evanthüng nandang jo eng akvüto ombo ethelan jiang topvü ombo pia vanthukcho.
Jerusalem lo Nungra Jiang
1 Jerusalem, yuta motsüngalo kyon na pyingi elio jijo kvüta eyinga kümthakcho to! Yuta motsünga lojo limha na yikrachicho tolea enhungo emi esüa kümthaka; Yantsü topvülo mmhontso ji enhungo ezii eküm lo joyithaka. 2 Zümo tona ompvüna kyala, osi ompvü eyo lona esütsü tsüjoala. Ompvü shom ehen. jiang yulo, ochinaha ompvü ejichoa lümbüm emiyi n van. Ompvüna shentae vamo jiang jina ompvü sikhanthaka osi enhungo ompvü nlan epiden tae. 3 Juda kyon jiang jo ntiolo tia n yilokao eziden, okina phanchukchi sicho. Onteno oyam metae vantala, onte metaka to ephyo tüv n lina Osi tsanchophen n lio ori jiangna hachümi sithaka. 4 Ntho tsüngon jianglo tia enhungo ochi naha ekhümki khümo n rotala. Hojilo khenkhüi loroeden jiango ezüpa vanra, osi pvüti jinaha emhena evamo jitae. Yantsü kibüngkhan jiang ha ejüngthaka, osi Zion jo nungkhfü nungra lo vana. 5 Ompvü ri jiangna khyothaka, osi ompvü ri jiangna ompvü rhümasi vanthaka. Ompvü mmen jiang topvü tsükona OPVÜI na ompvü ezüpthukala. Ompvü ngaro jiangha hayae metapoe sosi yithaka. 6 Jerusalem mmhon osi opyon-ori jijo yi sithaka. Ompvü esopvüiden jiangha Siano khangtsüngcho-to etho n liv kümkhanthaka. Sophan jiang mhadungo etsan lona onte etho topvü moni sithaka. 7 Enhungo hojijo roe yingsi-yinglo na kümi sithaka, osi Jerusalem na nkolo ompvü pyon mmhon ji epiala. Kvüthüng ori khelo ompvü rheyicho sana, enhungo ompvü nzanchi n van. Ompvü joyio ji zetasi ompvü ekhyoe jiangna ompvü emakatala. 8 Ompvü myingthüng jo yithaka, ompvüo enhungo tsükshü osi khoe sithaka. Ompvüna yikra lona emhena ompvü mmha ji m phoala. Jerusalem na ekhenthav mmen tsso jiang ji ompvü bo pholathukcho. 9 Ompvü n tsüng-nrüng jiang ji elaroa ehungo; tokhatola ompvü sükhying ji nchümi n ze. Elümoto ompvü joyihaka; ochi naha lümbüm ompvü n miyiche. Ompvü ri jiang na khyothaka; osi ompvüo OPVÜI thüngi khonzan chona kyala. 10 Ompvü ri jiang na ompvü ejüeli jiang topvü re ompvü khiyithaka. Ekhümki jilo mpa rheyia ompvü na hunga; kümoe jipopoe jo khana sana jilo. 11 Ompvü kyon jiangna etsoyu eyengota emhena rütala. Eküm vanchethoku tsükona ontena onte ejüeli jiang khi etsoyu dungtala."A zeta OPVÜI, to phyoa yantsü jina kyala."A ezüp phyingrüng yutalo a zeta." 12 "A, zetalo!" to ochoang yakchia yia sana jiang otsük akvü ezoala. "A noa esüa ochinaha n nohan; OPVÜI na ombo lümbüm etsuk yuta lo ryusang mmok a pono rothukcho." 13 Ombona omhawoe na omi jorothukcho, ochungina arunga evamo tüv mi. Ombona tsirhyi doni a vayicho, osi likoe asüchojo. Tothakale a sisi yicho, osi tümjak n lina a noa a vanthukala. 14 Ombona a mmen jiang topvüto etsüngi khi onte topvü khüngtsücho; Hoji khi ombona evüngo yuko a tssothukcho, osi hoji mmying jina avongcho ji yakchia a nmikatala, OPVÜI na ari jiang khelo a thechicho; osi onte pono rotav tsükona etho n jüv akümthokcho. 15 "A rasanden, etho ejütso jiang ji OPVÜI na a emakayicho. osi a khyingroe jiang ji roe siv tsükona ombona rasan rothukcho. Ombona akyon jiang ji jününgrothi enhyik-phenina enhyika esüa ejüproe a siyicho. 16 "Hojito etsso jina a mhyik ji esütsü na a phyonzhüala. Ochina ha alümbüm a n myiche, ochina ha lümbüm a n tssonkayiche. Ori jina a khyothaka, a kyon jiang ezei ochia n vamvü sithaka. 17 "Ana a khe ntichiala, tokhatola ochinaha a nzanchiv mek. A pono rotav tsükona OPVÜI na ori jiang nken topvü lona tsanrhyucho; Ontena a ji mmen mmyak esüa a tsütsatala. 18 "Tokhatola OPVÜI jo ntsanrük eli, ntiotssole ana ombo yi nngacho. Kyonden meta topvü lona a engachiyitava; a eno era yuta lo a zechitava. A khyingro loroeden jiang ji morantsan den tssoa sosi yikhanthaka. 19 "Ana shentae evamo jiang ethümphicho, khatola ontena ekhiransi a nkyochicho. Pvütiden osi esopvüiden jiang ji yantsü lantsüi na chürathaka. Eküm evam tsükona etsoyu yanta lona. 20 "Zeta, O OPVÜI, a nungra ji osi Amon eküm jilo ryusang mmok ji; A mmen jiang ji yakchia a lümbüm ji pyonroe sithaka. Lantsü jianglo lüngthae vana, kichungi mpato echü müng ji lia. 21 "Ana eromo ji enga, a lümbüm a emiyiv tsükona ochia n van. Ari jiang emathatala, nina apono ezüp yithoko ji tsükona. Nina phyochaki elio tsüngon ji yithoka, osi ari jiangha ana ezüpo ji esüa ezüpthuka. 22 "Onte n thanri osi onte nmhon jiang tsükona nlan onte pia; A mmen jiang tsükona nina a ezüpthoko ji esüa onteha ezüpthuka. Aryusang mmok lona ana eronala, osi aiyo lümbüm na enoe tsüka a kümthaka."
OPVÜI na Jerusalem Ezüpthuko Ji
1 OPVÜI na ombo lüm etsuk lona Zion ji emüng na eyukthaka. Ombolo Potsow mmhon ji roe esio jina dungcheyithaka. Ombo lümbüm etsuk tsüngon jilo jo ombona ekhümki ji mpato khoe sicho 2 OPVÜI na khonzan to n tssona Juda lo oyan jiang akvüto roe sicho, Osi metaji nkohaphen, rizümphen zenki jiang khyanchüchüi sicho. Ombona ekhüngyan osi hojilo esapvüi jiang pono yikra hansi rothukcho. 3 Ombo haruk-hashü lona Israel jiang etho ji shünglanchicho; osi kvüthüng ori jiang rocho sana ombona e n zanchicho. Ombona e pono omi evakphia esüa erungcho osi topvüto roe esicho. 4 Ori esüa ombona ombo lotssi jina etsikacho; E lümbüm nchümkadung osi ezikaphen jiang topvü ombona lüngthae sicho. Jerusalem lona ena ombo lümbüm etsuk ji omi esüa erunga chancheta vana. 5 Ombori esüa, OPVÜI na Israel ji roe sithaka, ombona, ompvü mesaki osi rizümphen jiang topvü roe ekachi sithaka. Ombona Juda kyon jiang pono ochüm nlio nungra rothukcho. 6 Ena ekhümki kvülo na ombo khüma vancho sana jiha ejüpmromoroe sicho, ntho tsüngon osi esanmung jiangha ombona ochüm tssothukthaka. Mesao osi pvütiden jiangna ha ombo lümbüm etsuk etho ji chanchecho. 7 OPVÜI na ombo thanphensa ji khoe sithaka osi ntho khümphen ji sirhakthaka; Ombona ori jiang khi pikhfü jiang roe sithukthaka. Ena meta kvülo Shina longshia khümtacho sana ji lona ontena ekhyo on tssotala. 8 Zion pikhfü jiang eyathoku ji OPVÜI na zika nrüngcho; Pikhfü jiang mpümna roe esiv tsükona ombona etsikoncho. Enhungo zenki jiangha osi pikhfü jiang ha topvü roe ekachi sithaka. 9 Pikhfü khan jiha zizo yulo hanzhüi lia, osi hankhan ronri jiang topvü jakrothaka; Mesao osi tsüphoeden jiango enhungo metapoe tsanthan ekümo vanra, shikhfü niro jiang n püngnotav, sithaka, osi zenkhying jiangha OPVÜI thüngina ntia hungjan-rüjan yi n zov sithaka. 10 Jerusalemi sonporo jiang naha yingying likoe khothei mungtala. Onte kvürilo livero yakae hanta elani otsükojo posta ekata tosi mungtala. Loroeden jiang naha likoe nkhümthetala. 11 Ekya lona omhyik shi ezüpa yiala, Amon jiha nungkhu nungra lo vana. A kyon jiang roe esio ji nungra lona laphyatsüngthaka. Yantsü lantsü jiang lo nongoriden osi nganiro jiang chüra yiala. 12 Wondon eratsünga ontena oyoang thüngi kayatala; Onteji tssatssocho esüa lantsü jianglo eyathekhanala. Osi onte oyo jiang khe lona echüma na chürala. 13 O Jerusalem, nzantso Jerusalem; Aiyo ntio kvüto phyovla? Ana kvütoli lümbüm ni emiyivla? ochi naha shi esüa n züp han. Ni ezüp jijo jümang esüa ochüm n lio; hojilo ntia eyilo n li osi ni n myiche. 14 Nte zenkhying jiangna ejüng mekna, ntio nte n zo; Nte mmen jiang ji rakcheta nte n zo ji yakchia onte püngno jiangna nte ejithechithaka. Ntena ntia khophiv n li to ontena nte nchümthukcho. 15 Yantsü ji yakchia eyio kyon jiangna nte yikvüa nte zetala; Jerusalem roe elio ji zetasi ontena kvüri eyephita ematala. "Yantsü mmhom jijo shike?" "limha ji myinthüng jijo shia alo?" to phyotala. 16 Ni ri jiang topvüna ni emakata osi omhyik nrüngi ni zetala. Ontena onte menfü ji nirüpi shükae, "Ena roe sia küma! to phyotala. Osi shi esüa tsüngon hetüv ji ena nhyaka vancholo to phyotala!" 17 Ombona ntio tssov to phyoa ekhenthuka rocho sana ji OPVÜI na wokhao tssoa tssothaka. Khonzan to n tssona ombona topvü roe esithaka, ombona nkolo na ntaknshon ekyuyi ezoa ero ji esüa. Ombona eri jiang ekhyo pithaka, osi ejoyithuko ji yakchia longshi onte pithaka. 18 O Jerusalem ni pikhfü jiang khi OPVÜI thüngi ky akachithuka! Ni esütsü jiang zhükhfü esüa zümo eng tsüthoka; Ekya osi nungkhunungra lona nibobo phfüroe sia n sana kya! 19 Zümo tona elan elani phanthi khi OPVÜI thüngi kyakachia; Ni lümbümi ejü topvü OPVÜI ezoa osi ni ngaro jiang pono khonzan to tssole to jonjiaNungoriden jiang ji tsokhang yukhang lona lantsü nken akvü lona chüala! 20 Zeta, O, OPVÜI! Nina khangshia vamo jiang zechia! Elopvüi jiang na onte nzamo ngaro jiang so tsotala! Pvütiden osi zenkhying jiang ji ekhümki chungina lüngthakhanthaka! 21 Ngaro eran jiang topvü lantsü jianglo khyenthei chüi erichirae lia; Khyingro loroeden ori yonri na lüngthao jiang ji. Ni lümbüm etsuk tsüngono nina khonzan to n tssona onte lüngtha rüpcho. 22 Nina a ri jiang erhümi a nkonphia eküm-rümtso ekyu khi a ekhenthukcho; osi ni lümbüm etsuk tsüngon jilona ochi naha n tsanchochecho. Ana nzana süphi lümbümi khyoche thuko a ngaroden jiang ontena lüngthae siracho.
Ezüp Lümbüm Khophi Osi Eyilo
1 Aiyo, Potsow na ezüp epi jijo ntio sana ntsi kyon tsüka. 2 Ombona emüngi jungka jungka na a phanthechicho; 3 osi khonzan to n tssona elan elani a vümthechicho. 4 Ombona a tsüko oso ozü shiang, hetopvü sangro khenroe ekachi a siyithaka osi aryu shiang a ekhüproe-thaka. 5 Ombona nungkhu-nungra osi ezüp lo vüngpheni a khalanchicho. 6 Osi ombona tongphi n yina evamo echü emüng jilo a jethechicho. 7 Ombona yonjakzhü na achüngcho, aiyo tsani eyiv eyilo n lio evüng tsüka. 8 Ana nzanchi chona tüngkachia kyacho, khatola OPVÜI na a nngayicho. 9 Ana kenphia sanphicho; osi ana kvütowoe ngae yia sana towoe jo olungna akhanchakcho. 10 Ombona Sevan esüa anhyaka vancho osi hingho esüa ombona ayangkacho. 11 Ombona lantsae a phanchokchicho osi ombona lümchak lümchak na rüngroe ekachi a sicho. 12 Ombona ombo lotssi ji tssüngche ombo lotssitsüng kokaphen ji a kümthukcho. 13 Ombona ombo lotssi tsüng ji junga a tsüko kothechicho. 14 Eng totona kyon na a emakatala; osi aiyo onte topvü emakaphen a kümthaka. 15 Ombona anungkata ekhov jü khi aphyangthechiyi-cho, osi ekhov etsoyu taena apyingthukcho. 16 Ombona amha ji khi likoe na a shukthukcho, osi lungran jiang lona a ho jiang a ekhochochiyicho. 17 Otsük mmhon osi ematha jo kvütüv sana aiyo mhechothaka. 18 Aiyo enhungo lümato sunga a n vanlan; OPVÜI lo a eyilo ji monthaka. 19 A eno era osi oson oki n li, jiang nchümo jijo a tsükona jo echü mozhü; 20 Ana hojiang ji yuta topvü lo nchümo ji tsükona Amon ji n tsoyoala. 21 Tokhatola ana kvüthüng olan motsünga shi nchümcheta sana, eyilo yiala. 22 OPVÜI n tümjak osi kianzan jijo to linrhüa vanrhüala. 23 Hoji jo enya akvü kümzak zaka, osi eng ethan chiro ji esüa tüv. 24 Ana elio jijo OPVÜI tae, osi hoji tsükona ana ombolo eyilo ji vatala. 25 Ochoang kvütata na ombolo longtsüa sana jiang topvü thüngi OPVÜI na mmhoniala. 26 Hoji tsükona, ete tsükona topvülo mmhontso jijo erüm toa ombo enhyaku ji-osi eshanchothokvü tsükona ombo nhyakvü lia. 27 Osi shi erüm eto ji ete khyingrothüng ntsi ekhio ji mmhontso. 28 Kvüthüng ezüpa sana etena yingto erüm toa khokthei vamvü shikhfü; 29 Etena khochaki pia nchümi zedem lia, ntiotssole eyilo lilam mpa tssokhuka. 30 Eyikrathuka, osi ekhyoto e echhüka mpa tssolea, etena topvüto khicho-khokvü shikhfü. 31 OPVÜI jo kianzan eli, ombo na nchünkhon tsükona jo kholangi e n si. 32 Ombona ete thüngi nungra mpa yithuklea, tolea ete tsükona ombo nzan jijo merüka osi ntssana. 33 Ezüpthokvü mekana eno erathokvü jo ombona emathata n chümala. 34 Ete monji evüngki vanathüng kvütata roe sia sana ji OPVÜI na ntsia. 35 Ombona elan epio ji kvüthüng e n piv emonia sana hoji ombona ntsia. 36 Kvüthüng yitsso kina ntsa ji senphia sana hoji ombona ntsiala. 37 Yuta topvülo OPVÜI lümbüm erüng jitae tssochukchiala 38 mmhon tssolea, n mhom tssolea, ombo yizüng lona tssoala. 39 Hojito tssona kvüthüng ete mmen tsükona ezüp epia sana ntio tssona etena ekhiramla. 40 Ete eküm lanka jiang etsüngi zetavka, osi OPVÜI thüngi elani yitavka. 41 Potsüwoe evamo Potsow ji thüngi ete lümbüm chonchi randantavka. 42 "Ena mmen tssocho osi ni panlancho, osi O, OPVÜI nina n lan e nsiyicho. 43 "Nina ephani e lüngthacho; osi ni kianzan ji ni lümbüm etsuk jina mphoe sicho. 44 Erandan jina eluk ntav echhiv ji n chyuso-chikhukcho. 45 Nina limha shilo mmen zizo hankachicho esüa ekümthukcho. 46 "Eji eri topvü na eyikarathuka eyikvü emakacho. 47 Ezüp osi roe esio jina mmhona etssoyithaka; osi eiyo ekyusü lo vanala. 48 A kyon jiang roe esio ji tsükona amhyikina esütsü zhükhfü esüa tsüa yiala. 49 "A esütsü jo tümjak n lio zhükhfüro esüa tsüa chiyiv, 50 OPVÜI na Potsüwoe na ezecho-chisi e n hungthüng nandangjo tsüa vamvü. 51 Ana kvüthüng yantsü jilo elopvüi jiang thüngi ntio tssocho sana jiang hunga sana lümbüm na anoala. 52 "A ji a tssakvü lanka n lio a ri jiang khe lona a sacho. 53 Ontena eküm na sokvüi a thechisi, chiyiphen ji olungna khozhüi sicho. 54 Ojü na atssungkata ndünga yicho osi a echüv enhayathaka to ana nchümcho. 55 "Sokvü ji lazae na ana ni thüngi kyakachicho, OPVÜI, 56 Osi ana kvüthüng a ekya wonji a engayile to jonjicho sana, nina zocho. 57 Nina ajanlancho osi tikyule to nina a ezocho. 58 "Nina ashancholo rocho, OPVÜI osi nina a eküm ji a shanchoyicho. 59 A thüngoe theta oyi tssoa, OPVÜI, a thüngi worhyu elhi etsso ji nina ntsia. 60 Ari jiang na kvütata a tssaka sana ji nina ntsia OPVÜI, osi a pono kvüta n-mhom kyakta vancho sana jiha to. 61 "Ontena ayikvü yiloa nina zothaka, O OPVÜI, onte kyaktso-nitsso jiang topvü nina ntsia. 62 Eng totona ontena atsükona phyota mungala, osi okyak oyi nsüngrütala. 63 Enyathüngna benkae emüng jana ontena a yikvütala. 64 "O OPVÜI yo, ontena ntio tssothakcho sana ji tsükona ezüp onte pia; 65 Onte rhiyikata osi etho ejak khi onte pyingthoka 66 Onte phanrhüa osi limha shi lona mhelüpi onte sia !"
Jerusalem ji Elungcho Sülo
1 Ete shona tsünglüpo jiang ji nyiknae sithaka; ekhümki olung jiangha lantsü jianglo nzüroe sithaka. 2 Zion lo khyingroe jiango ete tsükona jo shona tsentsüman esüa tüv; tokhatola onteji enhungo chonphfü osha esüa tsütsatala. 3 Ranfü opvü jina-lea woro jiang züa süphiala, tokhatola a kyon jiang jo jüoro esüa tüv, Onte ro jiang thüngi harukala. 4 Onte ro jiang ji wondon era lona chüthokala; Nongori jiang na etsoyu chonta kyatala, tokhatola ochinaha onte n pi. 5 Kyon ochoangna tsüngon motsünga lojo etsoyu mmhontso jiang tsocho sana jiang ji tsokhang lona lantsüi na chüala; Osi ochoango pvülyu shaphi ekümo na rocho sana jiang naha zizo yulo etsoyu yanta epyanta woala. 6 A kyon jiang ji Sodom lo evamo kyon jiang lona rankata ezüpthukthaka, kümoe zaktole Potsow khe lona joyithukcho sana ji esüa. 7 E mesao tsokhying jiang jo ome ori ntia n khying sheryu esüa ntsüngkoranga, Rumhen osi etho ejüi, otsük ha kijoa mmhona tüv. 8 Khatola enhünga jo onte ji ochi naha n tsina lantsü jianglo erichikhan thaka; Omha jiang mpato müngterüp na chüthaka, onte fü jiang ha otssüng esüa kyingthaka, osi oryu jianglo rakathaka. 9 Sülamiti echüo jiang thüngina jo ochoang ovüngna ritsso lona chücho sana jiang mmhomo, onteno ntio khi onte eküm n süya küma echümana khangtsüngi echüo ji tsükona. 10 Ezüp etsü a kyon jiang pono eyio jina ekyusü hansi yicho; Ntiotssole nzan eli oyo jiang na onte ngaro jiang etsoyu tssoa vüptacho. 11 OPVÜI na ombo lümbüm etsuk tsükshi ji etho lia osi thala vachicho, Ombona Zion lo omi njükao jina likoe nshüthechi sicho. 12 Meta kvülona kyon ochi naha, osi pvüjipoe esapvüi jiang na lea, ochi naha Jerusalem pikhfükhan ji rorhüpi rhovochev to n longtsücho. 13 Tokhatola hojito tssocho, ntiotssole meta jilo zenkhying jiangna mmen tssocho osi pvüti jiang na nlan n lio kyon jiang chüthokoji nlan ontelo licho. 14 Ompvü esopvüiden jiangna omhyik ejungden esüa lantsü jianglo sanphitacho; Hoji tsükona ochi naha n vüngka-khuko ejen jiangna onte thazhücho. 15 Tsani yitava!" to kyon jiangna tüngtacho, "Nteno nte mmenthaka! A ti vüngkatava!" Hoji tsükona ontena jipo topvü to thüngi wotacho khatola ochi naha onte n lonchocho. 16 OPVÜI na onte tsükona n chümu sithakcho osi onteji ombona nzüroe sicho; Ombona e esopvüiden osi e pvütiden jiang tia n ziphicho. 17 E thüngi nzanchi n yi to ji n tsithüng nandang jo ena eyilota mungcho; Pvüji ochi thüngi naha n yio nzan ji ena eyilota nhyaktacho. 18 Ori jiang na echeta vancho; osi ena lantsü jiang lotia n sanphichecho. E tsüngon jiango yak-khanthaka; osi ochüm ji yithaka. 19 Mungshiro na oyaki na yonjoa lona ekhyingkata ontena ephanchochicho. Ontena esü-rüa phunglan jianglo ephanchochicho; osi lijügina emhuka-yia oro ephayacho. 20 Ontena e eküm enhikaphen mesao ocho OPVÜI na ethüngchecho sana, osi ocho pono ena ori khe lona lea e nkohacheta to longtsükata vancho sana ji rhümacho. 21 Nra ematava, Edom osi Uz kyonden; enhüngajo nte yutaka emathatava. Nte pono ha ezüp ji tsathaka; osi nte naha yikra lona ngaphia tsükshü tsatavka. 22 Zion na ompvü mmen manji lothaka; enhungo OPVÜI na tsanthan ekümo sunga e n vanthuklan. Tokhatola, Edom, OPVÜI na ezüp ni pivka; ni nlan ji ombona hapoe ni hanchukchiyivka.
Khonzan Tsükona Randan
1 Nchümcheta o, OPVÜI yo, elo ntio tssothakcho sana ji; E zechia osi e yikra shümhen ji ehungia 2 E ejüeli jiang jo omo-atsi jiang khelo tssoe sithaka, metapoe kyon jiangna eki jianglo vantala. 3 E opo jiangji ori na lüngthathaka; osi enhungo epvü-oyo jiango emiden. 4 Ena ojü eyuo jiang man mpato epio tüv; osi ena ethelan elio otsung jiang mpato shii njüko ekümthaka. 5 Odh osi Gadho jiang esüa ejita ephanala; E mmoktsüngthaka, toaha esan yuta e n pi. 6 Tso-yusi eküm vanchev tsükona etsoyu jiang mpato, Ena Ejip tona Syria to jiang thüngi chonta ocho 7 Emotsüi jiangna mmen tssocho, tolea jiang enhungo yikhanthaka; osi eyio onte mmen jiang tsükona ezüptala. 8 Eyio, ezii lona nmhonkao jiangna esala; osi onte etho jiang lona ochi naha e n shanchoche. 9 Lüngthae jiangna oyan jiang dunga sanphitala; Osi etsoyu eyam ethev liana ena e eküm thana woala. 10 Ekhang lona era sochukehia erungala, efü jiang mikvü tssoa to nandang. HE tsoeni jiang thüngi Zion lona ekhüng tssoa efürama tssocho; Osi Juda yan akvü lona e tsolo jiang thüngi ekhüngona efürama lo khochakthukcho. 12 E esopvüiden jiang ji sosi oyi khyaktsüngi chükhanthukcho; Eyolo eran jiangji yikrachi n pi. 13 Ekhyingroeden jiang ji eziden esüa khüngkata tsünghanrho enhyikthukcho; Eboeroro jiango tssüng-haa na khuktsüngo jina kenphia yiala. 14 Eran jiang na yantsü phikfü kibüng jianglo n khokthev sithaka, osi pongdenro jiangna khen won n tssov sithaka. 15 E eküm jiang lona ematha ji yi sithaka; E sharita jiang ji nungra jina e dongcheyithaka. 16 Ena vasi lümbüm tssona evamo jiang topvü ntia e n züpkav sithaka; Ena mmen tssocho osi eyio enhungo emonthokvü zenkathaka. 17 Elümbüm chungi nochonori rhethaka, osi esütsüna epyingi ntia n hungche, 18 ntiotssole Zion phunglan ji eying-khfükhfü na sirhakthaka, osi mese-ranfü jiangna roe elio meta jiang lona erontala. 19 Tokhatola, o, OPVÜI nino nchüngkhonto mesao, osi ochüm jana nina sav. 20 Ntio tsükona nino hetenhyaka e sinkiala? Nina elani khi e nchümchelam alo? 21 Nilo e sosi yilana, OPVÜI! E sosi yilana! 22 To alo nino nchüngkhon tsükona khoe esithakchola? Ni lümbüm etsuk jijo ochüm n lichoke?
Ezekiel na Chethev Ehungo Ovüngo Ji
Potsow Vantsü
1 Nzyu thümrosi choro mezhü-si tsüngon mongo to jana A, Buzi tsoe Ezekiel pvüti jina Babylon metae Jihudi kyon tsanthan osi morantsan tssota evamo jiang nzo Chebar zhükfü tsalo vana vancho. Tole potsüo chonchicho osi ana Potsow thüngina ntio sana chekav heto hungcho. 2 (Hojijo mesao Jehoiakim ji Babylon metae sosi yisi nzyu mongo to jilo tssocho.) 3 Babyloni Chebar zhükhfü tssa ji lona OPVÜI na aj ana ana zocho osi ana ombo etho ji alo roa monsücho. 4 Ana engokae zele jükiwoe na tsungryu vena tsacho hungchicho. Osi Potsüwoe eluk tsüntamvü tüv lona tüngrasochia nlüpcho osi hoji haphia oyakoe jiangha tüngrazhücho. Osi kvülo shina tüngrasochia nlüpa vancho sana ji lona pyontsü yonjak esüa tüngracho. 5 Tsungryu ji longjüngo kyon kisü esüa ekümrümo mezhü vana ana hungchicho, 6 Tokhatola onte otsük akvü na omha mezhü tona echho mezhü to mparacho. 7 Onte jo jiango saksak phisacho tolea mangsü esüa nkhfü mpacho. Osi onte na pyontsü yonjak ntssae vacho esüa tsünglüpa tüngracho. 8 Elani echo mezhü tona omha mezhü to jiang ephalo onte otsük akvüna kyon khe esüa mezhü echho akvü kupi motsüngtsüng mpacho. 9 Ekümrümo jiang akvü na onte echho jiang ephyanche echo mmyoro jina oni oyi evoktae nken mezhü kheti esüa tüv kümthukcho. Ontena kvüthüng nkanphia sana onte tsük jiang ji nkanphi na, onte kholuka tssoe nkahphicho. 10 Eküm evamo ekümrüm jiang akvü tona omha echümpo echümpo mpacho; mhadungoe jo kyon mmha, amimoe jo hingho mha, hayiwoe jo mangsübung mha osi sülamoe jo mungshiro mha to tssocho. 11 Ekümrümo akvüna echho eni ji ephyankachi thanpoe ombo ndüngo etssovo ekümrümo ji echho mmyoro lo ephyankae licho, osi onte echho thanpo eni jijo otsüko khüpkae hancho. 12 Ekümrümo akvü-tona nken mezhü lo zechiwo jina onte tsük jiang ji n lüplea ontena kvütowoe wohunga sana jiwoe wocheo tssocho. 13 Ekümrümo jiang yulo na milon düngra esüa tüv jina n tünijakna sanphia evamo jitüv jücho, osi ovüngo jina sukchuki nlüpa tüngrasochia to tssocho. 14 Osi ekümrümo jiang naha tüngra nlüpo ji esüa ekhyinga, sülan mhadung rümphitacho. 15 Ana ekümrümo mezhü jiang zeta vanathüng eriphen nkoncho mezhüa na ekümrümo jiang akvüto ndüngo na likoe takata hungcho, 16 Nkoncho mezhüata eze jo onte kheti; osi onte akvüna tsentsü lung esüa tsünglüpa tüngra tüv, osi elani nkon mezhüata lo nkon thanpo dungo nsüngrünhyacho; 17 hoji tsükona eriphen nkomo jiang topvüna hetowoeha hetowoe ha onte nzo yicheta tüv tssocho. 18 Eriphen nkhon jiang lo rungtsenphen theccho osi hoji rhüa omhyik nsüngrükacho. 19 Hojito kvüthüng ekümrümo jiangna nkanphia sana eriphen nkomo jiang naha hoji ephan eriphicho, osi kvüthüng ekümrümo jiang na phanthia sana eriphen jiang naha hoji ephan khonthicho. 20 Ekümrümo jiangna kutowoe onte wohunga sana jiwoe wocho osi eriphen jiang naha tükto hoji ephan tssocho; ntiotssole eriphen jiango ekümrümo jiang na sayacho. 21 Hoji tsükona ekümrümo jiang na yuta kvütata nkanphia sana mekana esana sana ezhüi mpa chungi leha eriphen nkon jiangna tükto hoji ephan tssocho. 22 Ekümrümo jiang kvüriwoe jo oki mpüma tssocho tüv esüa evonkirina tsünglüpa tüv licho. 23 Mpümroa elio ji küpo ekümrümo jiangna mangi ote echho eni jiang ephyanchi onte ndüngo evamo jianglo owo ephyankacho, osi echho enijo onte tsük jiang eyuk tosi vancho. 24 Onte echho jiangna pyaphio ji won jiang ana zocho, osi owon ji jümang tsüphov na echyua esüa osi rasantsü na sana thüng esüa elani tokhamo Potsow won ha esü to tssocho. Osi kvüthüng ontena esana sana onte echho jiang ji chüpi vancho, 25 tokhatola owon jijo onte kvüriwoe mpümroa elio ji lona chiyi a vancho. 26 Elani mpümroa elio ji pomoe jo pvürüm senthan na nsüngrücho vantsü esüa licho, osi hojilo kyon pyon-ori esüa tüv na khokthei vancho. 27 Osi hoji kisü jijo pyonta sü yonjak na milongina tüngrachukchia vancho esüa tüv tssocho. Hojina meta ji haphia topvü elümoto mmhona tüngrazhücho, 28 osi hojilo süngrüka pyon topvü jücho. Heto tsünglüpa erazhüa to etssovo shina OPVÜI vanhya ji ejücho.
Potsow na Ezekiel Ji Zenkhying Etssov Tsala
1 "Echüo kyonyo, phanthia. Ana ni thüngi athyuda hungala." 2 Owon jina hojito ajana vanathüng ji Potsow mon jina alo rheyicho osi a jolona ajümkacho osi owon jina heto a ezolana ana zoa vancho. 3 "Echüo kyon, ana Israel kyon jiang thüngi ni wothukala. Ontena onte pyimtsümotsüi jiang esüa apanlancho; osi enhünga jana ontena apanlana vana. 4 Onteno elümoto jümjaka rentsümtsüa osi ontena yikarachi a npi; hoji tsükona A, Tsüphotso OPVÜI jina ntio onte ezov licho sana ji owo onte ezole to ni wothukala. 5 Khirankhiri jiangna küma ni engayilea, ni n gayilea, matachona onteha onte yulo zenkhying vanthaka toji ntsiv, 6 "Tokhatola ni echüo kyon shina, onte n kyuv shikhfü, osi ontena ntio phyoa sana ji n kyuv na lia. Ontena ni emakata ni mmenthokvü; osi hojijo züthemu yulo vana esüa tüv tssov. Tolea panlan jiangna ntio phyoa sana ji ti-kyua, 7 Ana ntio ezole to ni ezocho sana, jiang nina ezovka; Ontena küma ni engayilea mekana ni nngayilea, onteno a panlanden ka to ji nchümcheta. 8 "Echüo kyonyo, ana ntio ni ezoa sana ji enga, Onte esüa panalan ti-tssoa; obüng kochi ana ntio ni piv vancho sana ji tsoa." 9 A thüngoe okhe yonchi licho ana hungcho osi hojina kako shücho bensi vancho. 10 Okhe jina kako shüo ji lanphechor osi kako ji pondüngatalo ekya nungra. tona ryusang mmok yi to erankacho tüv ana hungcho.
1 Potsow na phyocho. "Echüo kyon, kako shüo shi tsoa osi owo Israel kyon jiang thüngi ezoa." 2 Hoji tsükona ana obüng kocho, tole ombona kako shüo ji tsole to apicho. 3 Ombona phyocho, "Echüo kyon, kako shücho ana ni pio shi tsoa; shi khi ni mman pyingtkhuka," Ana hoji tsocho tole tsakijü nünga to nünga tsochecho. 4 Hoji sülojo Potsow na phyocho, "Echüo kyon, Israel kyon jiang thüngi woa osi ana ntio onte ezole to ni ezocho sana jiang ezoa to a ezocho. 5 Nina n tsio yi nsan tüv jipo thüngi ni wothuka mek, tolea Israel jiang thüngi ni wothukala, 6 Nina n gatheo yi nsan pvüji tsüphov jiang thüngi ni wothuka salivo, ontena ni engayiv mek, 7 Tokhatola Israel kyon ochi naha engahungu meka, ontena a lea a engayiv mek, onte topvüto rentsümtsüa onte bobo nkohoa evanden. 8 Enhungo ana onte esüa khünga osi rentsümtsüa ni kümthokvü. 9 Ana olung esüa chüngchünga osi longtsüng esüa khünga ni kümthokuka, panlan osi ekhiran jiang ti-kyukhe," 10 Potsow na heto a ezolancho, "Echüo kyon, ana ntio ni ezocho sana jiangji tüngochüngkhe, osi nchümche-khe, 11 Tothakana ni kyon ochoang metapoe tsanthan tssota vancho sana jiang thüngi woa, osi ontena küma ni engayilea, ni nngayilea, A, Tsüphotso OPVÜI shina ntio onte ezoa vancho sana ji onte ezoa." 12 Hoji sülojo Potsow mon jina ajümkacho, osi a sülamoe na heto owon ntssana erhyukachia ana zocho. "Potsüwoe OPVÜI phfütsson ji thünga!" 13 Osi elani ekümrümo echho jiang na ezhüi na elhüphicho won ana zocho, osi elani eriphiphen nkomo jiang wonji nri enhyuka esüa ntssana ana zocho. 14 Hojito OPVÜI etho ji elümoto ntssana alo rocho, osi OPVÜI mon jina a hansi yiathüng ji alümbüm tsükshia osi alümbüm tsuka to ana chanchecho. 15 Hoji tsükona ana tsanthan tssota evamo meta Chibar zhükhfü tssa ji lona owo Tel Abib ezov tsükona wocho; osi ana ntio hunga osi zocho sana jiangna a lümbüm essuka hojilo nchuk tiying vancho.
OPVÃœI na Ezekiel Ji Enhyang Tssothukala
16 Tsüngon tiying ji yicho süloti OPVÜI na athüngi a jancho, 17 "Echüo kyon, osi ombona a ezocho, Ana Israel kyon jiang tsükona enhyang ni kümthukala, ana ekyuyi ni epio jiang ji nina onte thüngi ntsithokvüka, 18 Osi ana kyon nmhon jijo chüv sala to thenchoa to ni ezoaha , nina ombo ji ezoa ombo lanka jiang lona n dungphithuka tssona, tona omboji mmen kyon tssopvü na chüv osi hoji chüo ji haji ana ni pono ni yamvü. 19 Tokhatola nina ekyusü jiang ji ezoaha ombona ombo nmhon jilona n dungphiv mmen kyon tssopvüna chüa tssona, ni eküm jo ni valanchivka. 20 "Osi ntsae kyon tsotso tüv na n-mhom etssov benkacho yakchia ana ekyuthav sükhyingo ombo thechia tssona, osi nina omboji ntaknshon n pia tssona ombo chüv, omboji ombo mmen jiang tsükona ombo chüvosi ombona elhi mmhom etsso jiang ji ana ombo n chümcheyi, osi ombo chüo ji haji ana ni hanthokvü. 21 Tokhatola nina kyon n-mhom ji mmen ti tssole to ntak nshonle ombona ni yi enga mmen n tssoa tssona ombo eküm vamvü, osi ni eküm jiha ni valanchiv, "
Ezekiel ji Oyi N sanchev Siv
22 OPVÜI vanhya ji ana chancheta, ombona heto a ezoa ana zocho, "Phanthia, osi hayitsü ji jowoa, Ana hoji lona ni thüngi thyutavka." 23 Hoji tsükona na hayitsü ji wocho osi ana kvüto Chebar zhükhfü tssa lona hungcho sana ji esüa OPVÜI phfütsson ji ana hoji lona hungcho osi aji nkhümo likoe a vanthecho. 24 Tokhatola Potsow mon jina alo rheyi ombona asükacho; osi OPVÜI jina a ezocho, "Oki yia osi nibobo khalanchi vana. 25 Niji wozhüna chungi ni vavka, echüo kyon, osi kyon nzontsü yulo ochev meka. 26 Ana ni. nlii ji. thoe ni siyiv, osi panlan kyon shiang thüngi ekyusü yi jiang ni ezothokvü mek, "27 Tothakana ana kvüthüng nsancheo etho ni pia sana, tothüngti A, Sandamo OPVÜI shina ntio onte thüngi ezoa vancho sana ji nina onte thüngi ezov. Onte ejoma na ni engayiv, tokhatola onte ejoma na jo ni n ziphi osi ni n ngayi; ntiotssole onteno a panlanden pvüji."
Jerusalem Vükthechio ji Ezekiel na Ejuesüala
1 Potsow na phyocho, "Echüo kyon, yita lung motsünga tsakae ni mhadungi vata, osi Jerusalem yantsü ji chekaphen oren oren na hoji poni nkhyikkata. 2 Hoji sülojo vükthechioji chekaphen tssoa likokvü jyua, ochon na pikhfü, elani nchenphen to jiang nsüngrükata, osi hoji füchüma pikhfü jiang roe siphen kisüha nsüngrükata. 3 Tothakana yonjak epyakvü motsünga khi yantsü jiwoe zechiwo, yantsü ji tona ni to yutalo yantsü ji zechiwo echung esüa chümkachia; hoji yichak jo yantsü ji vükthechithaka, osi nina hoji vükthechiala to. Heto shijo Israel pvüji jiang thüngi chekav ji shi tssovka." 4-5 "Hoji sülojo otsük hayiwoena nankao tssoa erichia, tona ana Israel pvüji nlan mmen ji nilo ekachivka. Osi onte nlan ji tsükona nina n kanphina tsüngon 390 hojilo yipkachi ezüpa vamvüka. Ontena nzyua ezüpvü ji ana tsüngon motsünga tae kümthokvü hoji ephan ni ezüpthukala. 6 Osi kvüthüng tsüngon ji bena sana nina khoriphi nitsük amimoena nankae, Juda jiang nlan n mhon osi mmen jiang tsükona tsüngon zhüro ezüp khiahojijo tsüngona lo nzyua ejoena ontena ezüp ekhiv ji. 7 'Tothakana Jerusalem vükthechi elio jilo ni mhyik ji mhikrüka zekata. Osi okhe zümi erhiphia Jerusalem pono n-mhom zenkhyingkata. 8 Jerusalem vükthechi elhi ji n yakthüng nandang jo niji ana wozhüna ni chungi ochyu-omi lea n khophicheo tssoa lyui ni vanthokvü. 9 "Enhungo nina atta, omüm, orho, Shemtsüng, Oden, elani Kotso to khi onteji nzützui hojina humri nsüngrüa. Osi nina tsüngon 390 nitsük hayiwoe na nankae vanathüngji hojiang tsoa vamvüka. 10 Tolea engalo gram 230 tae ni tsothokvü osi hoji na ojyuato jana vamvü. 11 Osi ojü ha opvü eni tae tssenchaki ni piala, hoji tsükona nküma yuvka, 12 osi oyam na pyocho ochhü jiang khi kyingtoki hojina otssüng tssoa omi tssoe humri jiang rüngi tsovka. Hojiang ji kyon topvüna ni hunga hojito tsovka." 13 OPVÜI na phyocho, "Heto etsso shijo ana kvüthüng Israel jiang ji metapoe nzüroe onte sia sana, ontena shikhfü na onte ekhamo etsoyu jiang etsov ji ejuka ji," 14 Tokhatola ana janlancho, "Meka, Sandamo OPVÜI! Ana kvüthüng ha abobo n men-han. A nungo ekümo na benkae enhünga jana ekümrümo tathi echü tssolea, mekana ora ekümrümo na rümcho tüv tssolea, hojitüv so n tsohan. Elani n tssüngrüng etsoyu to phyoa ana n tsonrünghan." 15 Hoji tsükona Potsow na phyocho, "Tona elüm mmhona. Toka, hümri erüngu tsükona jo kyonchü mekna mangsü chhü lea ni njükthokuka, jilona nina humri jiang rüngi tsokhuka." 16 Elani ombona hetoha a ezocho, "Echüo kyon, Jerusalem lo humri hansi eyilan jiang ana khanchaki siv sala. Osi hojilo evamo kyon jiang jina onte na etsoyu etüki tsota evamo ji elümoto vwongkhyua ezüp chancheta nchümritav. 17 Onte ji humri osi ojü n liv siv; osi onteji vwongkhyu ekümo vamvü, osi onte mmen jiang tsükona onteji ethev n lioden esüa montokvüka."
Ezekiel na Ombo Tssan Jiang Tssüala
1 OPVÜI na phyocho, "Echüo kyon yo, ketsülo erov tüv khi ni menhüm osi otsüko otssan topvü tssüi sia. Osi otssan jiang füi zesi echi ethüm chicheta. 2 Osi kvüthüng haya mekana vükthechi elhi ji thak-thakana echi ethümoto jijo yantsüi na rungi sia. Elani echi ethümo echia ji khi nina yantsü tssae sanphia woathüng ketsülo na tssüchochi sia woa. Osi hojilo enhyoe elio echia jijo ezhüi venchi sia tona ana hoji yonri bensi phamvüka. 3 Tolea otssan ejoma jo khi ni süjümo tsenkae hana. 4 Tothaka na ejoma khicholani omi shümthechi rungthuka. Hoji mi jina, Israel jipo topvü lo nzüa yithokvüka, " 5 Sandamo OPVÜI jina phyocho, "Jerusalem ji zeta, ana ompvüji liphungtsü thanpo jiangna ompvü füchüma, limha shi longjüngo tssothukcho. 6 Tokhatola, Jerusalem jina jipo thanpoe jiang lona n mhonkao etso-ephyo a jüa, a yizüng jiang panlancho, osi liphungtsü thanpoe ompvi nkona evamo jiang lona jancho n zoka tssocho. Elani Jerusalem jina a yizüng jiang shümthe sicho osi a shikhfü jiang n tsütsacho. 7 Jerusalem, enhungo A, OPVÜI Sandamo shina ntio phyoa sana ji enga. Nina a shikhfü jiang nngav osi a yizüng jiang n benphiwo ji tsükona ni füchüma evamo pvüji jiang thüngi najo nina ekyongo ezüp lithukthaka. Nina pvüjipoe jiang shikhfü-niro jiang phana wocho. 8 Hoji tsükona, A, tsüphotso OPVÜI shina ni ezoaka, enhungo aiyo ni-rika. Pvüji topvü ehungo na ana ni pono yitsso tsükona phyochivka. 9 Ntiotssole nina etsso elhi jiang topvü ana etssako elhi tae. Ana kvüthüngha n tssohancho tüv ezüp khi Jerusalem ji ezüpthukvü ka, osi ana elani hoji elhiji tssolam meka, 10 Hoji yakchia Jerusalemi evamo opvüpoe jiang na onte ngaro jiang tsov osi onte ngaro jiang naha onte pvüpoe jiang tsovka. Ana ni ezüpthokvü osi ochoang kvütata eküm enhyokae vancho sana jiang topvü ana nken topvü lo hanchi nzüi nte sivka. 11 "Hoji tsükona aiyo eküm evamo Potsow tsso ji esüa oyi shijo OPVÜI Sandamo ji thünginantiotssole ntena a ekhümki ji etsakthav elhi jiang khi mmeni sicho, hoji tsükona khonzan to n tsona ana khi nte sivka. 12 Nte yulo echi ethümo echia jo yantsüi na nochonori tona wondon era to lona nte chüvka, osi echia jo yantsü tssae na yonri na nte ejorovka, osi elani nte lo echi wokhao jijo ana ezhüi venchi onte siv osi yonri bensi onte phamvüka. 13 "A lümbüm n pükthüng nandnag jo alüm etsuk etsyu ntena chancheta ntelo elongkathokuka, osi kvüthüngti heto shi, tssoa sana tothüngti nte longtsüka n li jiang na alüm etsuk shichecho saka osi lümbüm etsuk lona A, OPVÜI na nte thüngi nte jancho saka toji ntena mmhona ntsiv. 14 Pvüji kvütata nte nkonjano vancho sana jiang topvüna ontena nte yakchia yiana nte nthan-njüa ekonina nte rhüa yiravka. 15 "Ana kvüthüng alümbüm ji tsyuru-tsuka chiyi ezüp nte pia sana nte füchüma evamo jipo jiang topvü ekhenrhükvü. Osi ontena nte tsak-nkonga nte zev osi nte emakav. 16 Nte etsoyu eyilan jiang ana khani nte siyisi nte khangthoku. Osi ntena wondon era ji lotssi tsüngna nte roe siv tsükona nte v ekhyuka esüa ntsükata chanchev. 17 Nte ngaro jiang roe sithoku tsükona wondon era tona ora ekümrümo to jiang ana rothoku, osi nochonori, khon ta rota, ritsso to jiang khi nte monthokvü tsükona rothokvü. A, OPVÜI shina phyothaka."
Kisü Ekhüm Ji OPVÜI na Nlan Piala
1 OPVÜI na heto athüngi ajancho. 2 "Echüo kyon yo," "Israel phunglan jiang thüngoe zechia, osi a yithen ji onte pia. 3 Israel phunglan jiang ji OPVÜI yi engatale to onte ezoa - A, OPVÜI sandamo jina phunglan osi yingsüng jiang thüngi, landyuro osi hayitsü jiang thüngi ntio ezoa sana jiang engatale to; elani kyon jiang na meta kvülo shina kisü khümta sana jiang ji roe esiv tsükona ana yonri wothukvü saka to ezoa. 4 Thanphen jiang topvü süchov osi tsütserhüm thanphen jiang ha varoe siv. Hojilo kyon jiang topvü to onte kisü jiang mhadungo na lüngthakhamvü. 5 Ana Israel kyon jiang echümüng jiangji nzüroe, hanroe siv; osi onte ryu jiang ji ana thanphen jiang rhüa nzüi onte siyiv. 6 Israel yulo yantsü jiang ji topvü roe siv. Hojito tssona, onte kisü osi thanphen jiang topvü ejüpromoroe siyichev; elani onte tsütserhüm rungphen saphang jiangha rov osi ontena nsüngrücho topvüto moniv. 7 Meta topvü lona kyon jiang ji lüngthav osi ochoang kvütata eküm valanchiv sana, jiangna aiyo OPVÜI ji to a chekav. 8 "Lüngtharüpi esiv jilona ana ejoma onte tsknchothokvü osi jipo jiang yulo nzüi onte sithoku, 9 osi ontena hojiang yulo tsanthe vamvü. Hoji lona ontena anchümchev osi ana onte yikrathuka onte ezüpthokcho saka toji ntsiv, ntiotssole onte longtsü n li lümbüm jina a sinkicho osi athüngi najo kisü jiang ji onte chokao tssocho. Osi onte naha onte bobo tsak-nkonga nchümvü, ntsiotssole ontena n mhom osi onte joyio elhi etsso jiang tsükona. 10 Hoji sülojo ontena aiyo OPVÜI ji osi ana ekyuyi ntaknshon onte epio jiango ejüng mek to ji ntsiv." 11 OPVÜI sandamo jina phyocho, "Ni khe jiang erhiphia! Nijo jiang ekyimphia! Osi Israel kyon jangna elhi n mhom etsakthav elhilan etsso jiang tsükona nungra lona kya phyoa. Onteji ritsso lona, otsi vara lona osi nochonori to lona chüvsala. 12 Ekoni evamo jiangha nochonori chüv, osi ochoang enhyano vancho sana jiango ritsso lona lüngtharav; osi ochoang valanchicho sana jiango khangtsüngi chüv. A, lümbüm etsuk etsyu ji ontena chanchev. 13 Echümüng jiang ji kisü jiang yulo, osi thanphen jiang füa nzüroe siv, phunglanro topvü poni osi phunglan kvüri jiang topvülo odung mmyaku topvü kupi, osi lümrodung tsüphov jiang topvü kupi, elani meta kvütata lona ontena kisü jiang thüngi thungthan pia khümcho sana jiang topvü lo to nzüi siv. 14 Ho, ana akhe ji yonchia onte liphungtsü jiang roe siv. Jüjowoe lijüng ji lona benkae jükiwoe Riblah yantsü ji jana roe metaji apho-amung kümthoki siv; osi hojito Israel evan meta jiang topvü n khachona roe sirav. Hoji süloti otsük akvüna aiyo OPVÜI ji to a ntsiv."
Israel Jiang Tsükona Ochüm ji Enhyanthaka
1 OPVÜI na heto a thüngi a jancho, 2 "Echüo kyon yo,"A, OPVÜI Sandamo jina Israel metaji thüngi ntio phyoa vancho sana ji yiji shi: Meta shi mpümto tsükona ochüm ji shika! 3 "Israel, ochüm ji yithaka. A, lümbüm etsuk ji ntena chancheta ntsivka, ntiotssole ana oyi nte tssoyiala, ntena ntio tssocho sana ji tsükona. Nte etssakthav etso-ephyo jiang topvü tsükona ana nte lolamka. 4 Ana nte n kachi osi khonzan nte njü. Ntena ntio etssakthav elhi tssothakcho sana jiang tsükona ana nte ezüpthokvü sala, to tssosanati aiyo OPVÜI ji to ntena a ntsivka." 5 OPVÜI Sandamo jina phyoa evamo yi jijo heto: "Elan elani nte pono ezüp osi vara ji tsathaka. 6 Enhungo topvü ji thakthaka, Ochüm ji shi. Nteno nte monthaka. 7 Nte ochoang meta shilo vancho sana jiang tsükona ochüm ji tsathaka. Ntena phunglan kvüri khümphen jiang lona longshita tokhutao jiang n tssochev yuta ji tsathaka, nteji hamahari taena nte pyingu. 8 "Enhungo lümato n sungkhüngu ntena a lümbüm etsuk etsyu ji chanchevka. Ntena ntio tssothakcho sana ji tsükona ana oyi nte tssoyiala, osi nte etssakthav etso-ephyo jiang tsükona ana topvü nte nlilamka. 9 Ana kvüthüng ha nte n vanchi osi khonzan nte n jü. Nte etssak-nkongthav elhi jiang tsükona ana ezüp nte piv sala, tosanati ntena Aiyo OPVÜI jika, osi nte ezüpthuka evamo ji A, ka toji a ntsiv." 10 Israel jiang tsükona vara tsüngon ji tsathaka, nlilan jina phyochüa yiala. Kanchan jina oyak etssungthaka. 11 Tssatssota jina ntha-nri ji rankathukala. Hoji tsükona onte echi to phyoa, ejüeli tssolea, phfütsson mekana myingthüng tssolea, ontelo ntia enhyokae lithokvü meka. 12 Yuta ji tsathaka. Shisho khophitao ji yichak ji n liv esio tüv tsüngon ji enhyana tsathaka, ntiotssole Potsow yitsso ezüp jina otsük akvü pono kheti elongkathoku. 13 Shishoe ochi naha ombona monthako ji richelana eküm vamvü meka, ntiotssole Potsow lümbüm etsuk ji otsük akvü pono lia. Ochoang n mhon sana jiang najo eküm vanchev meka. 14 Tatara won tssov, osi otsük akvüna methakvü. Tokhatola ochi naha ritssolo n khochi, ntiotssole Potsow lümbüm etsuk jina topvü pono kheti elongkav.
Israel Mmen Jiang Tsükona Ezüp Ji
15 Lantsü jianglo khonta rota lithaka, osi nochonori tona tsokhang yukhang to oki jianglo lithaka. Ochona yantssae hapoe chivoana jiha khontarota lona chüv, osi ochona yantsüi vana sana jiha nochonori tona wondon era tona rümvü. 16 Ejoma najo hayitsü jiang lona yukhu ekhenthukcho esüa phunglan jiang lo tsana chüngiv, osi onte topvü na onte mmen jiang tsükona emhena rüv. 17 Otsük akvüto onte khe jiang etho n liv jakchochiv, osi onte nkhuk jiang na n phanthikhoku onte enenom. 18 Ontena meta topvü lona posta mpentasi ekhena enetav. Onte kvüri jiang tssürae siv osi onte yikrathokvü. 19 Ontena onte shona janti jiangji mmen myak esüa lantsü jiang lo shümthe sirav, ntiotssole kvüthüng OPVÜI na ombo lümbüm etsuk ji onte pono chükata sana, shona na tssolea, janti na tssolea, onte n shanchoche. Onte choka longshi jiang pükthoku mekna onte mman jiang pyingthoku tsükona ontena hojiang ji n tsütsache. Shona osi Janti jiang na mmen jilo onte sothechicho. 20 Yuta motsünga lojo ontena onte oyuk-osen mmhom jiang tsükona kangtsütacho; tokhatola ontena hojiang khi etssakthav kisü jiang nsüngrütacho. Hoji tsükona OPVÜI na onte ejüeli jilea onte n jüpomvü osi n chokav esio tüv onte nsüngrüicho. 21 "Ana metapoe kyon jiang khi nte retsothokvü ka," to OPVÜI na phyaola."Osi pikhfü yesoe jiang khi onte ejüeli jiang khithokvü osi mmeni nte siyithokvü. 22 Ana nküpnfüo ekhümki ji efüi jiangna rorhüpi mmena vanathüng lea ana hojilo n rothechi osi n koho. 23 "Olan topvü ji hamatsüthaka meta shi mpüm na münghan na pyingthaka osi yantsü jiha khonta rota osi meyanta na pyingthaka. 24 Ana jipo yulo n mhontso jiang shilo sosi yiv osi nte son-oki jiang khithokvü. Ntena khümtao meta jiang ji kvüthüng mmena phanthia sana nte yulo etho ejütso kyon jiang naha lümbüm n tssonkhokvü onte lo longtsüka ji moni siv. 25 Etho ejak nungra tsathaka. Ntena noying yamvü khatola kvüthüngha hoji hungu mek. 26 Ezüp vara ekata ekata na yiv, osi yithen n mhom jiang zhükhüro tsüa esüa yia vamvü. Ntena zenkhying jiang thüngi ontena ntio hungchi licho sana nte ntsithukle to jonjitav. Pvütiden jiang na kyon jiang thüngi ntia püngnorünyuo tüv n liv siv, osi eramoe jang naha ntia lanso mekana ejü-rünyu epiv n liv siv. 27 Mesao jina nungrav, osi mesa tsokhying jina ha eyilo moni siv, osi kyon jiang na ekyu lona enenontav. Ntena ntio tssothakcho sana jiang topvü tsükona ana ezüp nte piv; osi ntena kvüto oyam oyi tssoyicho sana jito anaha oyi nte tssoyiv. Shi heto etsso ji yakchia Aiyo, OPVÜI jika to nte ejüvka."
Jerusalem Lo Kisü Ekhüm Ji
1 Babyloni esosi oyi evanthuksi nzyu tiroksi choro tiroksi tsüngon mongo to jilo Juda lona esopvüiden metapoe morantsan ekümo vantawo jiang na aki a ndüngo khokta vancho. Tole zaktole OPVÜI Tsüphotso ji etho ji alo yicho; 2 osi ana engokacho tole kyon osak-ophung esüa ekhenthav tüv hungcho, osi ombo eryu na oküpoe jo omi esüa zecheta tüv, osi eryu na mhawoe jo pyontsü yonjak ntssalangcho to tsünglüpkirina tüv tssocho. 3 Ombona okhe esüa tüv ji yonchia a tsan lona a rhümacho. Osi hoji müngdüng jilo ji Potsow mon jina ntssoni a ekhyonkae Jerusalemi a sosi yicho. Osi khümphen jilo jükiwoe rhovolan ji ochungoe kvülo Potsow na lümbüm etsuko tüv kisü ekachi licho sana jilo asosi rhowocho. 4 Tole hoji lona Israel Potsow vanhya ji chancheta rakachia ana hungcho; ana kvüto Chibar zhükhfü tssae na hungcho sana ji esüa. 5 Potsow na heto a ezocho, "Echüo kyon yo, Jükiwoe zekachia" osi ana zele, rhowolan jilo thanphensa ji ndüngo Potsow na lümbüm etsuko tüv kisü ji lia ana hungcho. 6 Potsow na a ezocho, "Echüo kyon yo, ntio tssoa vancho sana ji nina hunga nüng? Israel kyon shiangna etssaktha-nkongthao elhi ji shilona tssota evamo shiang zeta, A, ntho meta shilona konka konka na a phantala. Elani shi lona eyikrathao tüv kyongkata nina hunglamka." 7 Ombona elani chungchak opomo jilo a sosi owo kyimchung lo epo a ejücho. 8 Osi ombona a ezocho, "Echüo kyon yo, shilona kyimchung ji chenrhüpa. Hoji tsükona ana kyimchung ji chenrhüple jilo kibüng hungcho. 9 Osi ombona a ezolancho, rhowoa osi shilo mmen elhi etssakthankongthav ontena tssota evamo jiang zeta." 10 Hoji tsükona ana rhowo zecho. Tole kyimchung jiang ji nrü kisü tona n tssüngrüng ekümrümo kümoe Israel jiangna khümta vancho sana jiang to kisü na eranzhüi licho. 11 Hojilo shi Shaphan tsoe Jaazaniah jiha jüa Israel esopvüiden onte ekha tiying vancho; osi onte otsük akvüna tsü tse rungphen motsüngtsüng rhümasi vancho, osi tsütse rungo jiang lona miphung chiyia bentasi vancho. 12 Potsow na a engacho, "Echüo kyon, Israel esopvüiden jiang na ntio mphoena tssota vancho sana jiang ji nina hungcho alo? Onte topvüna kisüna pyingi elio ehung chak shilona khümtala, osi "Onte ndam jijo: OPVÜI na e n hung! Ombona meta shi sinkithaka to.'" 13 Hoji sülojo OPVÜI na aezocho, "Elani shilona enkongthao tüv ontena tssoa nina hunglam sala" 14 Hojito ombona ekhümki jilo jükiwoe kibunglan jilo a sosi owo elopvüiden na Tamuz potsow chüi kyata vancho a ejücho. 15 Ombona engacho, "Echüo kyon, nina hoji hungcho alo? Shilona e nkongthalamo tüv nina hunglamka." 16 Hojito phyoa ombona ekhümki ji chungchak ochungoe asosi rhowocho, osi hojilo khümphen ji ndüngo thanphen ji tona yakchilan ji to yutalo eboeden onte mekyusi mongo area vancho, osi ontena khümphen jijo onte mankvü na philanchisi engrhelamoe zechiwo nkhümthe eng chirov sa evamo ji khümta vancho. 17 OPVÜI na athüngi a ezocho, "Echüo kyon, nina hoji hunga nüng? Juda kyon shiag shina nina hungthako etssaktha nkonhgthav elhi etsso shiangna onte lümbüm npükala osi liphungtsü shi mpümto tata-lüngta na pyingthokala. Heto tae meka, ontena ekhümki shilona oro shiang lona kyongkata n mhom tssoe a lümbüm tssukthoki lika. Zeta ontena kvütata nandang n-mhom tssoe khi a yikvü yilota sana! 18 Alümbüm etsuk etsyu ji ontena chancheta ntsivka. Ana onte n kachi osi kvüthüng ha khonzan onte n jü. Ontena onte eto nandang tüngkachia athüngi randan khoka, tokhatola ana onte nngayi."
Jerusalem Ji Ezthukcho
1 Tothakale Potsow na heto tüngkachia ana zocho, "Shilo rotava, nte kyon ochoang na Jerusalem yantsü ji ezüpthuku sa vancho sana jiang jina. Nte ebensü jiang bentasi rotava." 2 Tole echunga taena ekhümki jükiwoe kibüng opomo jilona nchyu tirok rocho, osi onte otsük akvüna ebensü benracho. Onte yulo tsükajo sünyipvü esüa tüv piposi ntiona erankaphen ha bencho. Onte topvüna oro pyontsü yonjak thanphen ji ndüngo mangtacho. 3 Tothüng ji Israel Potsow vanhya chancheta echo mpao ekümrümo jiang kvülo vancho sana jiang lona wondang rakachicho, osi hojina ekhümki rhowolan jiwoe yicho. Osi sünyipvü pipo kyon ji OPVÜI na tsae ezocho. 4 "Jerusalem yantsüi rhowoa, osi Jerusalem lo ntio etssakthav elhi tssocho sana jiang tsükona ethojak nungra evamo kyon jiang onte otsük akvü odono chekav eseyia." 5 Elani Potsow na kyon thanpoe jiang thüngi heto ezoa ana zocho."Yantsüi ombo phana rhovotava; osi lüngthatava, ochia ti-nkachia; ochi thüngiha khonzan to ti-tssoa. 6 Eson jiangha, khyingroe loroe jiangha, opvü-oyo jiang, osi nongoriden topvü lüngthatava. Tokhatola ochoang odono chekav mpacho sana jiango ti-vüngkatava. Osi elhi ji a ekhümki shilona benkatava." Hoji tsükona ontena esopvüiden ochoang ekhümki jilo mangrae vancho sana jiang lona benkae lüngthacho. 7 Potsow na onte ezocho, "Ekhümki ji mmenthuka, kitajo chungchak jiang ji echümüng jiangna hanpyingthuka. Benkaetssoa!" hoji tsükona ontena yantsüi kyon jiang lüngthav benkacho. 8 Hojito lüngthata yia vanathüng ji aiyo hojilo apoti vancho. Osi ana nkhümo likoe vanthei heto tüngkachicho, "Sandamo OPVÜI, Jerusalem lo Israel kyon enhyokae evan topvü lüngthae esio tssoa hetata ni lümbüm tsukchoke?" 9 Potsow na a janlancho, "Israel tona Juda kyon shiang to mmen jiang ji ekhenthav lia. Ontena meta mpümtolo müngtsso münghan elhi tssothaka osi Jerusalem ji müngtsso münghan na pyingthukthka. Osi ontena, A, OPVÜI shina meta ji silanchithaka osi ana onte n hungala to phyotala. 10 Tokhatola ana onte pono nzana nchümvü meka; ontena thanpoe thüngi ntio kvüto tssocho sana ji esüa anaha onte pono tssovka." 11 Hoji sülojo sünyipvüsü hamo jina oyi OPVÜI heto yenjancho."Ni yizüng ji ana benphithaka."
OPVÜI Phfütsson Jina Ekhümki jilona Yiala.
1 Ana eküm evamo ekümrümo jiang kvüriwoena oki mpümroa tssoe elio jilo zechicho, tole hoji ponijo ntiosana vantsü tsentsülongna nsüngrücho esüa tüv licho; 2 osi sünyipvü ehamo ji thüngi Potsow na heto ezocho, "Ekümrümo jiang lo khoro eriphiphen ekhyingo jiang yulo rhowoa, osi miron runga evamo jiang khi ni khelo theta. Hoji sülojo miron jiang khi yantsü ji nrukpyingi sia." Ombona yioji ana zeta vancho, 3 osi ombona rhowo jithüngjo ekümrümo jiango khümphen jina jolowoe phanthi vanracho, osi elukna chungchak ochungi ji pyingi sicho. 4 Tothüngji OPVÜI vanhya erazhüo wondang jina ekümrümo jiang yulona rachukchi ekhümki rhowolan jiwoe sena yicho. Hoji sülojo eluk jina ekhümki ji pyingi sicho. Osi ekhümki chungchak jiang topvü wondang jina razhüi sicho, 5 Osi ekümrümo echho jiangna elhüphio wonji chungchak opomoe na mpato zocho. Osi owon ji thotsü Potsow won esüa tssocho. 6 Kvüthüng OPVÜI jina sünyipvü pipo kyon ji ekümrümo jiang küpo khoro eriphiphen jiang yuta lona miron jiang khiv ezocho sana, kyon jina owo khoro ji ndüngo mangkachicho. 7 Potsüwoe ekümrümo jiang yulo tsükana onte ndüngo omi lio jilo ombo kheji yonthechicho osi miron ejoma tsakae sünyipvü ehamo ji khelo theyicho. Tole kyon jina miron jiang khi hansi yicho. 8 Potsüwoe ekümrümo jiang onte otsük akvü tona onte echho kupi kyon khe esüa mparao ji ana hungcho. 9-10 Osi potsüwoe ekümrümo jiang onte akvüto ndüngo khoro eriphiphen nkon mezhü, mezhü onte kheti tüv lio jiang ha ana hungcho. Eriphiphen jiangna tsentsülong esüa tüngracho, osi eriphiphen jiang akvülo elani khoro motsüngtsüngna olungo na renthang onte evotao tssoa thelancho. 11 Hoji tsükona, kvüthüng ekümrümo jiangna nkhanphia sana ontena khoriphia n vana onte topvü nzo nken topvülo wocheo tssocho. 12 Onte tsük, echen, osi okhe, echho osi khoro jiango topvü ji omhyik na pyingcho. 13 Khoro mekana eriphiphen jiango ana ovüngthüng hungwo jiang onte kheti. 14 Potsüwoe ekümrümo jiang topvüna omha mezhü mparacho; osi omha ovüngo jijo mangsübung mha, enioto jijo kyon mha, ethümoto jijo hingho mha, osi mezhüo to jijo mungshitsü mha to tssocho. (Onteno ana Chibar zhükhfü ndüngo na ehungo jiang onte kheti) 15 Kvüthüng potsüwoe ekümrümo jiangna ezhüi phanthia sana, 16 osi nkanphia sana khoro eiphiphen jiang naha onte phana wocho, osi kvüthüng ontena epyav tsükona onte echo jiang ephayancheta sana khoro eriphiphen jiang naha onte nzo tssopvü tssocho. 17 Osi kvüthüng Potsüwoe ekümrümo jiangna esana sana khoro jiang naha esancho; osi kvüthüng ekümrümo jiang na pya yia sana khoro jiang naha onte nzo tssocho; ntiotssole potsüwoe ekümrümo jiangna onte sayacho. 18 Hoji sülojo OPVÜI vanhya wondang tsünglüpo jiangna ekhümki rhowolan jilona senphi ekümrümo jiang mhawoe chüngicho. 19 Ana zeta vana taena ontena oyakoe pya chüngicho, osi khoro jiang naha onte ndüngo tssocho. Ontena ekhümki kibüng engkhüwoe lio jilo tara tamangtacho osi wondang tsünglüpo jina onte poni tssocho. 20 Ana Chebar zhükhfü ndüngo na Israel Potsow ji kupi ekümrümo ehungo jiang onte kheti to onte chethecho. 21 Onte otsük akvüna omha mezhü, echo mezhü, osi echo jiang kupi kyon khe esüa tüv to mparacho. 22 Onte mha jiang ji ana Chebar zhükfü ndüngo na ehungo jiang onte shenthi tüv tssocho. Osi ekümrümo jiang otsük akvüna tondüng mhadungoe yicho.
Jerusalem Ji Nlan Picho.
1 Potsow mon jina akhyonkae ekhümki ji kibüng engkhüwoe a sosi wocho, osi hoji kibüng ji ndüngo jipo esopvüiden nchyu eni, Azzur tsokhying Jaazaniah tona Benaiah tsokhying Pelatiah toha jüa kyon onte mekyusi mungo vana ana hungcho. 2 Potsow na athüngi heto aezocho, "Chüi esio kyon, kyon shiang na okyak n-mhom yani yantsü kyon shiang n mhom püngnoala. 3 Osi ontena phyotala, 'Enaha nsungu oki jiang tssokachilamka'. Yantsü shijo tssoyanphfü esüa tüv, osi eiyo hojilo oso jiang esüa tüv, tokhatola matachona ophfü jina omi ji lonajo e nkochetala. 4 Hoji tsona enhungo khoe onte sia, echüo kyon yo." 5 OPVÜI mon jina a mmhanyacho osi yithen shi kyon jiang thüngi ezole to OPVÜI na a ezocho. "Israel kyonden, ntena ntio phyota osi ntio kyak nsüngrüta vancho sana ana ntsia. 6 Nte yantsü shilo kyon emhokthav lüngthathaka, osi hoji yakchia lantsü jiang topvü echümüng na pyingthaka. 7 "Hoji tsükona A, OPVÜI sandamo jina ntio nte thüngi ezoa vancho sana jijo heto: Yantsü shijo otsotso tssoyanphfü esüa tüv, tokhatola oso jo ntiola? Ntena lüngthao echümüng jiang ji! Ntena shilo vanchev meka, ana yantsü shilona hapoe shümchukchirae nte siv! 8 Ntena yonri jiang nte kyua vancho alo? Ana yonri eben kyon sosi oro nte hathokvü ka. 9 Ana yantsü shilona khichei metapoe kyon jiang khelo nte theyivka. Nte chüthokvü tsükona ana methaki pithaka, 10 osi nteno nte meta lona ritsso lona nte lüngthavka. Hoji süloti otsük akvüna aiyo OPVÜI ji to a chekavka. 11 Hanphfü jina ombo chungi oso jüwo jiang omi lona nkocheo ji esüa jo yantsü shina jo nte nkochev meka. Ntena Israel meta shilo vanlea shilo vanlea, ana ezüp nte pivka. 12 Ntena Aiyo OPVÜI jika toji a ntsiv osi ontena nte phinakishüm jipo jiang shikhfü jiang benphialato a shikhfü jiang yesocho, osi a yizüng nngacho to jiha ntena ntsivka." 13 Ana hojito zenkhyingyi phyoa vanathüngji Pelatiah ji evümthei chücho. Toajo, ana nkhümo vanthei heto tüngkachicho."Hojito mek OPVÜI tsüphotso, nina Israel lo kyon enhyokae evamo jiang otsük akvüto lüngthae siv sake?"
Babyloni Morantsan Jiang Thüngi Potsow Phyochak
14 Tole OPVÜI na heto ajancho, 15 "Osi ombona phyocho, "Echüo kyon,"Jerusalemi evamo kyon jiangna ni tona Israel kyon Babyloni morantsan ekümo evamo jiang to nte phyophitala. Ontena phyotala, Babyloni evan jiangna jo OPVÜI ekhümvü ji elümoto kona. Ombona meta shi e echi etssov e thüngi epithaka." 16 Enhungo ana ntio phyoa vancho sana ji nte nzo morantsan tssota evamo jiang thüngi ezoa, meta ekoni jipo thanpoe jiang ndüngo oyi nte vanthuka meta topvülo hanroe onte esio ji A ka to. To mpa tssolea yuta esüngaro tsükona jo ontena meta kvülo yicho sana jilo ana onte ndüngo vanhyavka to ezoa. 17 "Hoji tsükona A, OPVÜI Sandamo shina ntio phyoa sana ji heto ezoa; Ana meta kvüanglo nzüi mekana hanroe onte sicho sana jiang lona onte tsarhyulani Israel metaji onte pilamka. 18 Osi ontena kvüthüng jilona kholana sana mmen mmyak osi etssakthav kisü ontena ehungo jiang topvü khi sivka. 19 Ana lümbüm osi nchümri ethan onte theyiv. Ana onte lümbüm olung esüa khünga haruka evamo ji khi siyisi jancho ezo lümbüm ethan onte theyiv. 20 Hojito tssosanati ontena a shikhfü jiang benphiv osi longtsüka lia a yizüng jiang engav. Onteno a kyonden tssov osi aiyo onte Potsow tssov. 21 Tokhatola ochoangna kisü etssakthav mmen mmyak jiang ekhümvü choka ta sana jiango ana ezüp piv. Ontena ntio tssothakcho sana ji tsükona ana ezüp onte piv! Sandamo OPVÜI jina hojito phyothaka.
OPVÜI Pfütsson Jina Jerusalem ji Siala
22 Potsüwoe ekümrümo cherbium jiang na pyakacho osi khoro jiang naha onte nzo tssocho. Israel Potsow vanhya chancheo wondang tsünglüpo jina onte mhawoe tssocho. 23 Hoji sülojo, wondang tsünglüpo jina Jerusalem yantsü ji sisi engkhüwoe phunglan jiwoe yicho. 24 Osi hojito müngdüngina OPVÜI Potsow mon jina a khyonkae Babyloni morantsan tssota evamo jiang thüngi a solansi yicho; hoji sülojo a müngdüng ji moni sicho. 25 Osi OPVÜI na ntio athüngi a jücho sana jiang topvü to ana a nzo morantsan tssota evamo jiang thüngi rüa ezocho.
Zenkhying ji Tsanthan Esüa Kümala
1 OPVÜI na heto a jancho, 2 "Echüo kyon," Osi ombona phyolancho, "Nino ekhirankhiri kyon yulo vanala. Ontena omhyik jo khyinga tolea ntia n hungala, elani enoha mpata tolea ntia n zoala; ntiotssole onteno panlan osi khirankhiriden. 3 "Echüo kyon yo, enhungo, kvüto tsanthan na oha nsüngrüa sanaji esüa oha tssoa, osi nmüngthüng khochia. Osi nina meta shi silanchia meta thanpoe yia evamo ji otsük akvü khi ni hungthguka. To tssona ekhiran jiangna mpa ni chekav. 4 Nchonthüngna khochiv tsükona oha tssoa, to tssona ontena ni hunguka, osi nina meta thanpoe tsanthelo yia esüa onte na ni zeta vanathüng mmyulani khochia. 5 Ontena ni cheta osi ni zeta vanathüng ji ni kyimchung ji tssarhüpa osi oha jiang jilona hanchukchia, 6 Tothaka na niha jiang epvüi ejümkachi hansi omhyik ji eyuki hansi ntia n hungna yia onte ejüa; to tssona nina kvüi yia sanaji n hungna yiv. Nina ntio heto tssoa sana jijo Israel kyon jiang tsükona ekyu ntanknshon ji tssov." 7 OPVÜI na kvüto a ezocho sana jito ana tssocho. Hoji nchuk ji kvüto tsanthan na tssoa sana ji esüa ana oha ji nsüngrücho osi münga yiale a khena aki kyimchung ji chenrhüpi jilona chiyicho. Osi onte otsük akvüna a zeta vanthüng ji ana oha ji epvüi ejümkachi hansi yicho. 8 Ojyuato enyathüng OPVÜI na heto ajancho. 9 Ombona phyocho, "Echüo kyon yo, enhungo Israel ekhiran jiangna nina ntio tssoa sana to ni engala, 10 küma A, OPVÜI Tsüphotso jina heto phyoaka to onte ezoa; 'yithen shijo mesao ochona Jerusalem ji sa vancho sana ji tsükona tona hojilo kyon evamo jiang to tsükona ka. 11 Osi nina ntio etsso-ephyo ejücho sana jijo onte thüngi ntio kvüto tssov sanaji ejuka kaonte ji tsanthan osi evüng kümvüka to onte ezoa. 12 Mesao ochona onte pono esapvüi tssoa vancho sana jiha ombo haji epvülo ejümkachisi ombo kyon jiang na tsanphen kyimchung okvülo tssarhüpi evao jilona emüngo tsanchokuka. Ombona omhyik eyuki kümoe yia sana n tsina yivka. 13 Tokhatola ana a ngozonphen ji echonchi khi ombo eyukyavka. Hoji sülojo ana Babylon yantsüi ombo hansi yiv, tolea ombona jo yantsü ji n hungna hoji lona ombo chüv. 14 Ana ombo yitssopheni khanhyaeden jiang, ombo ejü-rünyoeden jiang tona ombo enhyang jiang topvüto meta nken topvülo hanroe onte siv osi kyon na onte lüngthav tsükona yantav. 15 "Ana kvüthüngti onteji jipolan taro thüngi osi omoatsi meta topvülo nzüi hanroe onte siasana tothüngti Aiyo OPVÜI ji to ontena a ntsivka. 16 Onte yulo ejomajo ritsso, otssi vara, osi nochonori jiang lona tsanchoe enhyokae onte vanthoku osi hojiang na jipolan taro yulo vanathüngti onte elhi jiang kvüta etssaktha-nkongthav sana jiang nchümchev osi Aiyo OPVÜI ji to a chekata a khichov."
Enenomo Zenkhying Ji Ejyuka
17 OPVÜI na heto a jancho, 18 "Echüo kyon yo," "Nina kvüthüng tsoa sana eneta osi nina kvüthüng yua sana ekyu lona enhyoka; 19 Osi jipo mpümto thüngi, 'shi yithen shijo, OPVÜI tsüphotso ji thüngina ochoangna enhünga jana Jerusalemi onte meta jilo vantapvü sana jiang tsükona ka' to ezoa. Ontena kvüthüng tsoa sana enev osi yua na ekyu lona enhyokvü. Onte liko ji liko eshü shakche onte siyiv, ntiotssole meta jilo evan topvüto shikhfü lo n vanden. 20 Yantsü kümoe enhünga jo kyon na pyingi vancho sana jiang topvüto roe siv osi meta oyan jiang topvü romhon kümthokvü. Hoji süloti ontena Aiyo OPVÜI ji to a ntsivka."
Opvü Tssothuka Tsütsao Püngnoyi Tona Opvü meko Yithen To
21 OPVÃœI na heto ajancho, 22 osi ombona phyocho, "Echüo kyon yo," "Ntio tsükona Israel kyon jiangna püngno yi shi phyonrhütala osi yuta jiango yilea, tolea onte tssencheyi jiango ntia meku siala? 23 Hoji tsükona A, OPVÃœI Tsüphotso jina ntio ephyov licho sana hojiang enhungo ezoa. Hoji püngnoyi ji ana ochüm tssoyiv. Israel jiang na hoji elani phyotalam meka; Osi ji thünginajo heto ezoa: Tssencheyi jiang ji otsotso ebemvü tsükona yuta ji yithaka! 24 "Enhungo Israel kyon jiang yulo ejüng-jüng, müngdüng osi olan sosorao zenkhying yi tüv jiang lithoku meka. 25 A, OPVÜO shina onte jamvü osi ana ntio phyoa sana hoji tssovka. Enhungo elani sülana vamvü meka, khirankhiriden, ntena eküm evanthüng ana ntio nte tssoyivka to ekyuyi nte ezocho sana jiang ana tssovka. Ana phyothaka" to OPVÃœI Sandamo jina phyoala. 26 Elani OPVÃœI na heto a ezocho. 27 "Echüo kyon yo, ni müng osi zenkhyingyi jiango okholiti etssov tsükona ka to nchümtala. 28 Hoji tsükona, A, OPVÃœI tsüphotso jina heto phyoaka to onte ezoa; Enhungo sülana vamvü meka. Tolea ana ntio phyocho sana ji ephan tssovka. A, OPVÃœI tsüphotso jina hojito phyothaka."
Ejüng Zenkhying Eboe Jiang Pono Zenkhying yi Ephyo Ji
1 OPVÜI na heto a jancho, 2 Osi ombona phyocho, "Echüo kyon," "Israel yulo zenkhying ochoang na onte etancho yi khi zenkyinga vancho sana jiang khoe sia, yikvüa, osi OPVÜI yi engale to onte ezoa." 3 OPVÜI Tsüphotso jina phyoa evamo jijo heto: "Zhüvae zenkhying shiangji monthokvü zenkathaka! Ontena onte bobo ntssungyi chyithukala osi ontebobo müngdüng yanchetala. 4 Israel kyonden, nte zenkhying shiang jo ethelan n lio shiali, kyon n van metalo vamo jiang esüa ethelan n liden. 5 Pikhfü thonroe vanroe elio jiang ji ontena n hyak, osi elani hojiang ha n tssocholan han, hoji tsükona OPVÜI tsüngon jilo ritsso yiana Israel kyon jiang ji ntiona n kohoche. 6 Onte müngdüng osi hungche jiango ejüng, osi onte tssencheyi jiangna ejüng tae. Ontena jo a yithen phyoala to hoala, tokhatola ana onte n rothuk. Toaha onte yi jiang ji benchev tsaya eyilotala! 7 Ntena ehungo müngdüng jiango ejüngka, osi ntena tssencheyi ephyo jiangha n tsaka to ana onte ezoala. Ntena jo hojiang ji ayithen to phyoala, khatola ana nte n janhan!" 8 Hoji tsükona OPVÜI tsüphotso jina heto onte ezoala, "Nte yi jiango ejüng, osi nte müngdüng jiangha n tsa, nte pono A, n matha. 9 Nte ejüng zenkhying osi oyam sosorao tssenche evoncheyi nsan jiang ji ana ezüp nte piv sala. A kyon jiang na kvüthüng sanrhyui onte mhadung tsükona methak khiv sana jilo nte jüv mek, elani Israel jiang metapvüi wokhatalo ha nte mying n thenhya; osi ntena kvüthüng ha nte meta jilo n kholanche. Hoji süloti ntena Aiyo OPVÜI ji to ji a chethevka. 10 "Ntiotssole zenkhying jiang na yuta sükhying jo mmhonka to phyoa a kyon jiang sosoracho. Hojilo nti yuta sükhying mmhoncho n linrüng. A kyon jiang na longsha khi pikhfü nsüngrüi vancho, tole zenkhying jiangna oro hoji chonhüm khi nzüzhüi vacho. 11 Zenkhying jiang thüngi onte pikhfü ji eyav saka to ezoa. Ana eryu thümchüa jothothokvü osi sheryu na hojilo jokav, elani mpung tsükshiv na hojilo echhükav. 12 Osi pikhfü mekana echung jiang ji eyav, osi otsük akvüna nina chonhüm khi nzüo jina ntio mmhom lyucheta to ni engav." 13 Enhungo OPVÜI Tsüphotso jina heto phyoala: "Ana a lüm etsuk lona tsyungryu rothuokvü, elani eryu thümchüa jothokvü osi hoji roe esiv tsükona sheryu jothokuka. 14 Pikhfü echung kümoe ontena chonhüm khi nzüi vancho sana hoji roe esiv tsükona ana zikatala, hoji vanroe esiv tsükona osi kimüng eshenlong jiang lae shakche vav tsükona to. Hoji eyavka osi nte topvü hojina nte ejüptsüngravka. Hojito tssocho süloti otsük akavüna Aiyo OPVÜI ji to a chekav. 15 "Pikhfü echung ji tona kyon ochoangna hoji chonhüm khi nzüi vacho sana jiang tona alümbüm etsuk ji chancheta ntsivka. Hoji sülojo pikhfü echung jiha elani hoji chonhüm na nzüo jiangha topvü monthaka to nte ezov 16 osi zenkhying ochoang na yuta sükhying n mhona ha Jerusalem lo evamo kyon jiang thüngi ntia n tssoka, yuta jo mmhonka to ntsaka picho sana jiangha monthaka to nte ezov!" OPVÜI tsüphotso jina hojito phyothaka.
Ejüng Zenkhying Eloe Jiang Pono Zenkhyingyi
17 OPVÜI na phyoala, "Echüo kyon yo, enhünga nte yulo elopvüyiden ochoang na ejüng evoncheyi onte popo phyocho sana jiang zeta. Khoe onte sia, 18 Osi OPVÜI nte Potsow jina nte thüngi ntio phyoa vancho sana jiang ji onte ezoa! "Nte eloe shiang jo nte monthoku! Ntena otsük akvü tsükona okyak n mhom sü vüi khi kheribüngo na hanthokcho. Osi elani khi okyak ori n mhom sü na kvüri eyuk vülani onte kvüri lo hanthukcho; hoji yakchia oyam eküm pono etho lithoku tsükona. Ntena oyam eküm pono etho hungi osi akyon jiang ji chüthoksi nte eman ntio sana tssochethoku tsükona nchümcho. 19 Ntena oden omüm nchüm motsünga osi hümri motsünga nia ekhiv tsükona a kyon jiang mhadungo na a yikrakhithukcho. Echüv n tümo kyon jiang ji ntena lüngthacho; osi kyon ochoang eküm evamu n tümcho sana jiang jo ntena valanchicho. Hoji ntena akyon jiang ejüng ezocho, osi ontena nte longtsücho." 20 Hoji tsükona enhungo OPVÜI Potsow na heto phyoala, "Ntena kyon eküm osi echü sayaphen tssoa nte khelo kheküp bentao jiang a tssakala. Ana nte evon jiang epanchoe nte siyiv osi ntena oyam eküm rhümhae elio jiang ji etancholo vachivka. 21 Nte kvüri shüngphen jiangha ana reroe nte siyisi a kyon ochoang nte etho na rhümae vancho sana jiang ji echunga taena eküm echung etancholo vachiv. Tosanati ntena Aiyo OPVÜI ji to a ntsivka. 22 Nte ejüng ephyo jiang yakchia kyon mmhom ochoang ana a n tssatssothuk hungcho sana jiang mpato lümbüm esuka dungsungthukcho. Osi kyon n mhon jiang ji onte elhi n mhon jiang sisi onte eküm jiang shanchothokvü lona ntena khalanchicho. 23 Hoji tsükona enhungo nte ejüng jüng müngdüng osi oyam sosorao ejüng tssenche jiang ji shilona ochüm tssovka. Nte etho jiang lona ana a kyon jiang ji nrhachetala, hoji yakchia Aiyo OPVÜI ji toji nte khi ntsithokvü tsükona, "
Potsow na Kisüekhüm ji Nlan piala.
1 Israel yulo esopvüiden ejoma na OPVÜI lümbüm erüng jo kvüto sana jiang a ngtaüngngari lo rotacho. 2 Tole OPVÜI na heto ajancho. 3 Ombona phyocho, "Echüo kyon yo," "Kyon shingna onte lümbüm jiang kisü jianglo pithaka osi hojiang khi mmenlani onte sothukala. Tona ana janlan onte pivka to ontena nchümta alo? 4 "Enhünga ha A, OPVÜI Potsow na ntio onte thüngi phyoa vancho sanaji heto onte ezoa: "Israel kyon ochoang kvütata na ombo lümbüm ji kisü jianglo vasi hojiang khi mmen ombo tssothuka vancho sana jiang na kvüthüng zenkhying jiang thüngi ngatüngngarilo roa sana, janlan ji athüngi na hunguka-osi hoji janlan jiang onte kisü jiang na emamo jitüv janlan tssovka! 5 Kisü jiang na Israel kyon jiang ji athüngina nlüpi yithokthaka, tokhatola ajanlan ji yakchia elani a jancho ezolo kholani yichev tssovka to eyilotala. 6 "Hoji tsükona enhungo A, OPVÜI Potsow na ntio onte thüngi phyoa vancho sana jiang onte ezoa. Nte enkongthav kisü jiang ji silanchisi kholani yitava. 7 "Kvüthüng Israel kyon jiang tssolea, mekana metapoe kyon Israel kyon yulo oyi tsankae evan tüv na tssolea, a thüngi na tsani oyi kisü khüma vansi hojitüv kyon na, zenkhying thüngi ngatüngngarilo woa sana, A, OPVÜI shina janlan ji ombo pivka! 8 Ana ombo panlamvü. Ana ombo yakchia ejukaphen ombo nsüngrüv. A kyon jiang kholona ana khi ombo siv, hojito tssona Aiyo, OPVÜI ji to ontena a ntsiv. 9 "Zenkhying ji ejithechia ejüng janlan pitoka tssona, hoji jo A, OPVÜI shina ombo ejithechicho na tssovka. Ana ombo ji Israel kyon jiang yulona khi siv. 10 Zenkhying jiha elani ochona oro ombo ngatüngngricho sana jiha, ezüp ji kheti tssovka. n Ana heto etssov shijo Israel kyon jiang ji khi a n sirhakthoku tsükona tona onte mmen jiang khi ontebobo n menthoku tsükona to. Onteno A kyon tsosv osi Aiyo onte Potsow tssov." OPVÜI Sandamo jina hojito phyothaka.
Noah, Danel osi Job
12 OPVÜI na heto ajancho, 13 osi ombona fheto phyocho, "Echüo kyon," "Liphungtsü motsünga na mmen tssosi alo longtsüka n liv vana tssona, ana akhe yonchia onte etsoyulan yiphen ji roe onte siyiv. Ana otsi vara rothuka, kyon osi ekümrümo topvü lüngthae siv. 14 Osi Noah, Daniel, John to onthüm na mpa hojilo vanlea onte mmhon jina onte eküm shancho jitae tssov." OPVÜI Potsow na phyothaka. 15 "Mekana ana orae ekümrümo jiang wothuka onte rümthoku, osi metaji ekyusü meta kümthoki hoji yakchia ochi naha n yentsacheo kümthokvü. 16 Osi otsotso kyon nchyu ethüm jiang na mpa jilo vanlea, A, OPVÜI eküm evamo Potsow shina phyoaka, ontena onte ngaro tsotso jiang lea shanchochev meka. Ontena onte eküm tsotso jitae shanchochev osi meta jijo romhom ratsü kümthoki siv. 17 "Mekana ana meta jilo ritsso yithokvü osi ritsso ebensü ntav jiang khi kyon osi ekümrümo topvü kheti mhelüpi khi siv. lg Osi kyon nchyu ethüm jiang mpa jilo vanlea, A, OPVÜI eküm evamo Potsow shina, phyoaka, ontena onte ngaro jiang leha n shanchoche; Onte eküm tae shanchochev." 19 "Osi ana meta jilo vara rothuka, a lümbüm etsukona eküm elümoto khiyi lea, osi kyon elani ekümrümo jiang lüngtharüpi silea, 20 osi Noah, Danel, tona Job to onthüm na mpa hojilo vanleha, A, OPVÜI eküm evamo Potsow na ntsia, ontena onte ngaro jiang eküm lea n shanchoche, tokhatola onte eküm tae shanchochev." 21 Heto shijo OPVÜI tsüphotso jina phyoala: "Ana Jerusalem pono ezüplan n-mhom mezhü jiang rothokvü ritsso, otsi vara, orae ekümrümo nta, osi nochonori to jiang rothuka, kyon osi ekümrümo jiang roe sithokvü. 22 Osi ochona sana eküm tsanchoe ombo ngaro jiang shanchocheta tssona, ontena nte thüngi roathüng zetava. Zetava onteji kvütata n mhom tüv tssov sana, osi ana Jerusalem lo ezüp yithoka, vamo jijo elanka to chethe khitava, 23 tona ana ntio kvütata tssocho sana jiang topvü etüm elan lonaka toji ntsivka." Tsüphotso OPVÜI jina hojito phyothaka.
Jününgrozhü lona Ejuka Epioji
1 OPVÜI na heto a ezocho, 2 Osi ombona phyocho, "Echüo kyon yo," "Kvütoli jününgrozhü jina odung thüngi etsitavla? Jününgrozhü khero khi orae odunglo etsitana jilo ntio mmhom jüa? 3 Ntio sana tia ejyuka nina tsütsacheo tüv tssov alo? 4 Hojijo omi tssokachiphen mmhomo jitae tssov. Osi kvüthüng ochüm jiang ji rungi sisi olungo ji ehüngroe sia sana, hoji khi nina ntio sanatia nsüngrüchev alo? 5 Nrungrothüng nalea hoji ntia ethev n li. Küma enhungo omi jina rungroe khi jakrawoe sithak-küma elani ntia ethelan n lilamo jitüv tssothaka." 6 Enhugo OPVÜI Potsow jina heto phyoala, "Kvüto jününgrozhü ji orae na ekhüpi ronga sana ji esüa, Jerusalemi evamo kyon jiang ji 7 ana khi onte ezüpthoku; Ontena omi motsünga tsanchothaka tolea, elani omina onte runglamka. Ana kvüthüng onte ezüpthoka sana jithüngti, ntena Aiyo OPVÜI ji to a ntsivka. 8 Ontena alo longtsüka n li ekümo vana ero ji tsükona, ana onte metaji romhon kümthokvü ka." Hojito OPVÜI tsüphotso jina phyothaka.
Longtsüka N li Jerusalem
1 OPVÜI na elani heto ajancho. 2 Ombona phyocho, "Echüo kyon yo," "Jerusalem thüngi ompvüna ntio n mhom enkongthav tssocho sana ji tssyukata ezoa, 3 osi OPVÜI Potsowna ntio ompvü thüngi phyoa vancho sana ji ezoa: "Nino Kanan meta lona ni bukcho. Nipojo Amorite kyon osi niyo jo Hettite jipo lona. 4 Kvüthüng ni bukcho sana ochi naha ni nla jitia ni n rhayi, mekana ni n tsükayi, mekana oma ni nzüyio tüv osi osü na ni eyuko tüv tia ochia n vancho. 5 Shiang heto ni tssoyiv tsükona ochi naha ni nzana nchümcho n li. Kvüthüng ni bukcho sana ochi naha ni nzan. Nino hapoe shümchukchi ni sicho. 6 "Tothüng ji ana yakchia yicho osi nino ni ejen jilo ephfüphia vana ni hungcho. Niji ejena ni pyingi vancho, tolea, ana ni n chüthokcho. 7 Odung mmhom esüa ana ni vanthukcho, Osi niji etho jüa siphoa ni rankae loroe ni kümcho. Ni shyuro jiha mmhona mpümroa shungcho, osi otssan jiangha mmhona pvüchecho, toaha, nino tsükshü vancho. 8 "Ana elani yakchia yiathüng ji oyam na nijüpon yuta janthaka to zechecho. Osi ana asü opomo ji khi ni tsükshü ji ni eyukisi ni nzamka to echümchak ni picho. Ho, eni yanpiyanthan tssotav tsükona ana ntsaka ni picho; osi nino a echi ni kümcho." Shi heto OPVÜI tsüphotso jina phyoala. 9 "Hoji sülojo ana ojü khi ni tsüko ejen jiang etssüchochi ni siyicho. Osi ana olive thyujü khi nitsük ji ni nzüyicho. 10 Tothakale thera pikacho tüv phoknrhüo sü khi ni hanthukcho osi sofü mmhontsov na nsüngrücho jokhüp ni picho; osi sünyipvü sü na nsüngrücho kvüri eyuk, elani mokasü na nsüngrücho eyukzhüo ni hanthukcho. 11 Elani oyuk osen khi rümbüm tona yuko to ni hanthukcho. 12 Ana elani kheno lona ehamo tona, eno lo thera osi kikho mmhom to toha ni hanthukcho. 13 Hoji sülojo, nina shona janti oyuk osen tona sünyipvüsü lo thera niro pikacho opyon mmhom tüv tae yuta topvü lo ekacho. Nina hümri ohüm mmhomtsow tüv na rüngcho tona tsakijü, osi olive thyujü to tsoyucho. Ni pyon mmhon jina erazhüa lyui rani ni kümcho; 14 Ni pyon ori mmhon ji yakchia jipo topvülo thüngche ni kümthukcho, ntiotssole ezehungthav opyon mmhona ni kümthoko jijo ana ni mmhonthukcho." Heto shijo OPVÜI Potsow na phyoala. 15 "Tokhatola nina, ni pyon mmhon osi ni thüngcheo jilo enhikae ocho ndukana ji akvüto thüngi yipa yi sicho. 16 Nina ni mpensü ejoma jiang khi ni ekhümki jiang merithoku vacho osi lonsülonphyoe eloe esüa otsük akvüto thüngi nibobo picho. 17 Ana ni pio shona janti oyuk osen jiang khi eboe kisü nsüngrüi jiang thüngi efürama tssocho. 18 Elani ana ni pio mpensü mmhom thera niro pikao jiang khi kisü jiang mpenthukcho, osi olive thyujü elani deli orhüm mmhom ana ni pio jiang ji onte nzükayicho. 19 Ana hümri nsüngrüv ohüm mmhontso jiang tona tsakijü osi olive thyujü to etsoyu ni pile hojiang khi nina kisü jiang thüngi onte nzan chona othan picho! Shi heto OPVÜI Potsow na phyoala. 20 "Tokhatola nina tsokhying tsolo iabukio jiang khi othan tssoa kisü jiang khümi sicho. Heto a thüngi longtsüka n li elhi tsso ji taena lea n mhom tsotso mekcho alo? 21 A tsokhying tsolo jiang khi mpa kisü jiang thüngi othan n pia sayileha. 22 Nina etssakthav lonsülonphyo ekümo vanathüngjo yenjoa tia ni loro eküm ji n chümchecho tsükshü ejen yulo ephfüphia evamo eküm ji.
Jerusalem na Lonsülonphyoe esüa Eküm Evamo ji
23 OPVÜI Potsow na phyocho, "Nino ni momka, Ni monrünguka! Nina n mhom lantaro tssothaka, tosi elani, 24 lantsa jiang topvülo kisü khümphen tssokachi vasi jiang lona lonsülonphyo elhi tssocho. 25 Osi ni pyon mmhon ji chonphyalu lona shoka sücho, osi ocho roana jiang thüngi nibobo picho, niji eng akvüto hojito n thaka n thaka na ni kümcho. 26 Elani nina Ejip kyon ni phinakishüm lonsülonphyo lümbüm ehan jiang thüngi eyipyi tssocho; osi a lümbüm tsuk-thoku tsükona nina ni lonsülonphyo elhi ji tssocho. 27 "Hoji tsükona enhungo ana ezüp ni piv tsükona tona ni thüngina a mmha jiang khi hansi eyiv to tsükona ana a khe ji khikathaka. Osi Philistia kyon ochoang na ni tssaka ni n thono elhi jiang tssaka vancho sana jiang khelo ana ni theyithaka. 28 "Ntiotssole nina thanpoe jiang thüngina ni lümbüm n pukna, nina Assyria jiang tae yanthüngcho. Nino hojiang lonsülonphyo elhi tssophen khatola jiang naha ni lümbüm n pük, 29 Elani shisho-khophi, Babylon kyon jiang lonsülonphyophen ha nina tssocho. Toaha jiang naha ni lümbüm n pük. 30 Heto OPVÜI tsüphotso jina phyoala: "Nina shiang hetopvü lo lonsülonphyoe yikra n li ji esüa tssothaka. 31 Lantsü jiang akvütolo nina kisü khümphen tona lonsülonphyophen to tsükona oki tssokachikhancho. Tokhatola nino nzontsü lonsülonphyoe jiang esüa orang yana hapo n chukcho. 32 Tolea nino orapvü nzamvü ji thüngo najo omoatsi thüngi efürama tssoa ekyao eloe ji esüa tssocho. 33 Lonsülonphyoe thanpoe jiango oyam thüngi na mmyu khicho, tolea nino ni nzamo yingakhyingroe jiang topvü thüngi yantso piracho; osi meta topvü lona ni thüngi oro yipthokvü tsükona ekhüp onte piracho. 34 Nino lonsülonphyoe echümpo tsotso. Ochi naha hojitüv ekümvü tsükona ni n khüngka. Ochi naha mmyo ni n pi, nina onte picho. Hoka, nino echümpoka."
Jerusalem Pono Potsow Yitsso
35 Hoji tsükona, O lonsülonphyoe Jerusalem! enhungo OPVÜI na ntio phyoa vancho sana ji enga. 36 OPVÜI tsüphotso jina heto phyoala: "Lonsülonphyoe eloe jiang esüa nina ni mpensü phungi sisi ni nzamo kyon jiang thüngi tona etsakthav kisü jiang to thüngi nibobo picho; osi kisü jiang thüngi othan etssov tsükona nina ni ngaro jiang ha lüngthacho. 37 Shiang hetopvü tsükona nina ovüngthüng nzamo jiang ha, nna nina etssako kyon jiang ha topvü ana onte nzo sosi yivka. Osi onte khi ni füchüma vanthoksi ana osü shaki ni siyisi ni tsükshü ji onte khi topvü zethokvü. 38 Ni lüngtha osi lonsülonpyo elhi jiang tsükona ana nlan ni pia khoe ni siv osi a lümbüm etsuk etsyu ji khi echü yakchia ezüp ni pivka. 39 Ana niji onte etholo ni thechiv osi nina kisü jiang khümphen tona lonsülonphyophen to tssoe evao jiang topvü ji tssüngchüchüi siv. Osi onte na ni oyok-osen osi pipo jiang khi hansi yisi nino nrüngana tsükshü tae ekachi ni siv. 40 "Ontena okho nthinlümi osi meryue olungna ni ephyav, osi ontena onte yonrina lümchak lümchak na ejoroe ni siv, 41 Ontena ni ki jiang ethunga rungi ni siyisi, ezüp ni pio ji eloe kholuk khi ni hungthokvü. Osi ana ni lonsülonphyo elhi jiang ni esanthoksi nina nzantao jiang thüngi yantso epi ji ni khaniv. 42 Hojito tsso sanati alümbüm etsuk ji ochüm tssov osi anaha yingto vamvü. Ana enhungo lümbüm tsuklana osi omhyik rakia to n tsso. 43 Ana ni lorothüng kvüta ni nzancho sana ni mhechoe sisi nina elhi n mhom etsso jiangna a lümbüm tssothukcho. Hoji tsükona ana elhi n mhom man jiang ji ni pithokcho. Ntio tsükona nino etsak nkongthav elhi jiang lo lonsülonphyo elhi ekalanchola?" To OPVÜI Potsow na phyothaka.
Oyo Esü, Otsolov Esü To
44 OPVÜI na phyocho, "Kyon na ni tsükona heto yijakta phyotavka, Jerusalem: 'Oyo esü, Otsolov esü to. 45 Nino otsotso niyo otsolovka. Ompvü na orapvü tona ompvü ngaro jiang to tsssaknkongcho. Elani nino ni yenio ochoangna onte orapvü jiang tona ngaro jiang to tssakcho sana jiang esüa tüv. Ni tona ni ndüngo yantsü jiang topvü na oyo jo Hittite osi opo jo Amorite kyon to tssocho. 46 "Ni yeni eramo jijo jükiwoe samaria yantsü ji tona hojilo oyan jiang to. Osi niyeni nungo jijo jüjowoe Sodom ji tona, hojilo oyan jiang to. 47 Onte josü rüa ontena ntio enkongthav elhi tssocho sana jiang phankao jina ni lümbüm pükcho alo? Hoto meka, yuta esüngaro tae na ontena tsso jiang topvü lona n mhonka nina etsso-ephyoa yicho. 48 "Aiyo eküm evamo Potsow etsso ji esüa," OPVÜI Potsow na phyoala, "Ni yenio Sodom osi ompvü n konjano oyan jiang najo nina n mhom tssoa jitata n tssoka. 49 Ompvü tona ompvü otsolov to jiango etsoyu tssona tsoyutasi noyinga yingto vancheo jina kangtsücho. Tokhatola ontena tsitsayantsae osi mpenzi oyam n jan jiang ji n ziphicho. 50 Ontena kangtsüa haruka ana etssako elhi etsso jiang tsükona roe onte sicho to nina mmhona ntsia. 51 "Samaria najo nina mmen tssoa tata chiso tia n tsso. Ompvüna etsso jiang lona etssaknkongthao elhi jiang nina tssocho. Ni tssoyak-phyoyak jiang lona etsita na ni yenio jiango nlan n licho esüa tüv. 52 Hoji tsükona enhungo nina yikra-shümhen ji hamuka. Ni mmen jiang ni yenio mmen jiang lona kyongkao ji tsükona ni ndüngo jo onteno nlan n liden esüa tüv. Enhungo omha rakia tssoa ni yikra ji hana, ntiotssole ni yakchia ni yenio jiang nlan n li esüa zechethokcho."
Sodom Tona Samaria Toji Mmhonilamka
53 OPVÜI na Jerusalem thüngi heto ezocho."Ana jüolia onte kümthuklamka Sodom osi ompvü yan jiang elani Samria osi ompvü yan jiang to. Ho, ana niha ni jüolia ni kümthoklamka. 54 Nipopo ni yikra chanchevka osi ni yikrashümhen jiang yakchia ni yenio jang kvüta mmhoncho sana ji hungthokuka. 55 Onteno elani ejüeli kümlamka, osi ni tona ni yan to jiangha nte mmhonilamka. 56 Ni kangtsü yuta jiang lojo nina Sodom tsükona emata yi phyoa n kyachoke? 57 Osi ni elhi n mhon jiang oponi n hanchukchithüng jo nina onte n makachoke? Enhungo niha ompvü esüa tüv osi ni etssako ni phinakiren Edom kyon, Philistia kyon to jiang emakaphen ni kümthaka. 58 Ni pholashüla jiang tsükona nina ezüp khiv shikhfü; osi nina etssak nkongthav elhi etsso jiang tsükona to." OPVÜI jina hojito phyothaka.
Küma lia Evamo Ntsata
59 OPVÜI Tsüphotso jina phyoala, "Nina ntio mancho sana ji ephanina ana ni tsütsavka, ntiotssole nina echümchako ji n khanzicho, osi ntsatao ji yesoe sicho. 60 Tokhatola anajo ni nongothüngna ni thüngi ntio ntsata vacho sana ji yikrachiv, osi ana elani kümali elio jitüv ntsata ni thüngi valamka. 61 Nina kvüto etso-ephyocho sana jiang nchümche ni yikravka kvüthüng ni yenio eramo jiha nungo ji woni solansi yiasana. Ana onteji ni tsolovden esüa tssothokuka, heto shijo ntsata jilo jo n jüa khatola. 62 Ana ni thüngi ntsata ji zecholamka, osi nina aiyo OPVÜI ji to a ntsivka. 63 Ana jo nina ntio worhyu elhi tssocho sana jiang topovü nlan ni siyiv, tokhatola nina hojiang ji nchümche khi yikra lona ni büng n kophichev tssov." Hojito OPVÜI tsüphotso jina phyothaka.
Jününgrothi Tona Mongshitsü Jiang Tolo Ejyukaoji
1 OPVÜI na heto ajancho, 2 osi ombona heto phyocho: "Echüo kyon yo," "Israel kyon jiang thüngi ejyukayi heto ezoa. 3 Onte khi A, OPVÜI Potsow na onte ezoaka to ntsithoku tsükona: Mungshitsü motsünga otssan jiangjo emüngyanthav tae osi echo jiha tsüphotsov echonche vancho, ombona Lebanon phunglani pya chungocho osi Cedar dung mmyo ji ejaki siyicho. 4 Osi hoji hansi shishoe metae yicho osi tsentssoe yantsü jilo vachochicho. 5 Hoji sülojo ombona Israel meta lona dungniro motsünga roki hansi oyi lizü elio meta kvülo yuta topvü tolo ojü jüa vani odung ji rankathukchecho sana jitüv lo chümcho. 6 Odung jina rankae nhyimroa meta eyukzhüa yua jitüv jününgrozhü kümcho. Osi khero jiangna jo mungshitsü ji thüngoe yua chüngicho, osi oying jina jo liko chungi junga rheyi to tssocho. Osi jününgrodung ji owo tona khero to na eyukzhüa yucho. 7 "Elani mongshitsü motsünga echo tsüntam mpata osi otssan mmhom na pyinga tüv vancho, osi hojilo jününgrozhü oying jina ombo thüngoe sünga yicho, osi khero tona owo to jiang naha ombo thüngoe konga yicho, hojito tssona phari ojü ejüo jilona kyongkata ombo piv to eyilo jina hojito tssocho. 8 Tokhatola jününgrodung ji liko lizü ojü ejülo chümthechio jina mmhona chenche, tssüngthi ethia elümoto joyang joria jitüv dung kümcho. 9 "Hoji tsükona, A, OPVÜI tsüphotso, jina engacho, jününgro shina kümi rankav alo? osi mongshitsü ovüngo jina oyingi na ombo rukche, tsüngthi jiang lhoe khisi, elani khero jiang ekhüpi siyi si mmyikachi n sivke? Hoji rukchev tsükona lümato etho ethev n li, mekana hoji rokchev tsükona etho ejüi jipo ethev ha n li. 10 Hoka, chümi khi jo lika, tolea hojina küma vani rerankavla? Engkhüwoe na ezhü na oyi echhükata na mmikae n siv alo? Rankata evamo jilona mmikae n sivke?"
Ejyukayi ji Heto Erorocho
11 OPVÜI na heto a ezocho, 12 "Ekhiran kyon shiang ji ontena ejyukayi shi ji tsentsiana engae zeta. Osi Babylon mesao na Jerusalemi elani oro mesao ji tona ombo küpo tsüphoeden to jiang ji ombo ndüngo Babyloni solansi yithaka to ezoa. 13 Osi ombona mesao wopan yulo na tsüka khyoche ombo thüngi mmhontae khi ombo küpo oyi enga vanthokvü tsükona echümchakthokcho. Osi ombona kyon ethelan eli ejoma jo rhümae khi vasi, 14 Jipo ji elani n phanthithukna mmhontav ntsatao ji ephan tssothokvü tssocho. 15 Tokhatola Juda lo mesao jina hoji panlana Ejip lo kurü tona rasantsü to khi oro ombo kyothukle to ezolo kyon wothukcho. Ombona hoji tssochev alo? Mekana ombona hoji yakchia tsanchochev alo? Ombona ezüp hungi n tsov ntsatao ji yesoa n tsanche! 16 "Aiyo eküm evamo Potsow tssoji esüa," to OPVÜI tsüphotso jina phyoala, "Mesao tsük ji Babyloni na chünrünguka, ntiotssole ombona ombo echümchak ji yesocho, osi ombona Babylon mesao ochona vantsülo ombo khothethukcho sana ji thüngi mmhontayi ntsatao ji yesocho. 17 Ejip mesao rasantsü etho eli-i jiang na leha Babylon mesao thüngi rotav tsükona ombo n kyochiche. Kvüthüng Babylon kyon jiang na kyon khosha lüngthav tsükona ocho pikhfü nsüngrüa osi likokvü tsanthephen jyua to tssoa sana. 18 Ombona ombo echümchak ji tona mmhontav ntsatao ji to yesocho. Ombo na shiang hetopvü etsso ji tsükona enhungo ombona n tsanchoche." 19 OPVÜI tsüphotso jina phyoala; "Aiyo eküm evamo Potsow etsso ji esüa, ana ezüp ombo pi-nrüngu, ombona mmhonta ntsatayi vav to a myingona echümchak-si hoji yesoe esio ji tsükona. 20 Sophano evoe sozonphen echonche hojina ombo eyukyathoku. Osi ana Babyloni ombo sosi oyi hojina ezüp ombo piv, ntiotssole ombona alo n longtsüka elhi tssocho. 21 Ombo rasan yulo mmhontso osi tssothimori tso jiang ji ritsso lona chüthokvü osi enhyokao jiang ji nken topvü lo hanroe onte siv. Hojito tssosanati A, OPVÜI na phyochoka to ji nina ntsivka."
Potsow na Eyilo Echümchak Piala
22 OPVÜI tsüphotso jina phyoa evamo jijo heto: "Ana Cedar dung ntssomo ji mmyo ji khiv osi eyen rüni ji ekhüpvü; Osi hoji ana phunglan ntssoni chümthechiv, 23 Israel phunglan ntssontso jilo. Hojina joyang joria rankae tsüngthi ethev, Osi Cedar dung khümchoehia tüv kümvü. Osi hojilo orolan taro na eshom osi hoji onte vanphen tssoa nkhümlhiv. 24 Osi meta jilo odung jiang topvüna Aiyo OPVÜI ji to a ntsiv. Odung ntssomo jiang ji ana echüngala osi odung hüngriv jiang ji ntssona rankathuku. Ana odung mmyako jiang ji mmyikathukala osi kyingrünga evamo dung jiang ji mmyaka kümtokala. A OPVÜI shina phyothaka, ana ntio tssov to phyocho sana ji ana tssovka."
Kija Ejan Elhi
1 OPVÜI na heto ajana 2 phyo cho, "kyon jiang na Israel meta shi lona phyota nrhüa evamo püngnoyi shijo ntiola? 'Opvü-opo jiang na jününgrothi ethem tsocho, tokhatola onte ngaro jiang oho kyimcho.' 3 "Aiyo otsotso eküm evamo Potsow jika" to OPVÜI tsüp hotso jina phyoala."Ntena Israel meta lona shi püngnoyi shi elani phyotalam meka. 4 Kyon otsük akvü eküm ji a echi, opvü-opo eküm ji tssolea, ngaro jiang eküm ji tssolea, kyon ochona mmen tssoa sana hoji kyon mo ji chüvka. 5 "Ejyukae na otsotso kyon mmhom tüv tsüka vancho, ntsanthoe osi ntsanrüng. 6 Ombona Israel kisü jiang ha n khüm, elani kisü khümpheni etsoyu than pio jiang ha n tsso, ombona oyam eloe mekana eboe ha n jithechi, mekana eloena onte tathi choro mmen yiathünga ha ponilan n tsso. 7 Ombona oyam ha n jithechi osi n retsoyi. Elani ombo thüngi otsi-orang norüroni tso jiang thüngi ontena ombo n pilanchena to ntang tsütsailan khiyio jiang ha tsae ntsalona pilan to tssoala, wondon erae jiang ha tsoyuthukala, osi tsükshü evamo jiang ha mpensü piala. 8 Eran eyan lona oyam ha orang nno. Ombona mmen elhiha n tsso osi pangta ekhitalo mpa tssolea ntsanrüka nsüngsochiala. 9 Kyon hetüv shiang na ayizüng enga a shikhfü jiang ntangnshona tsütsatala. Ombo ntsanthoe, hoji tsükona ombo eküm vamvü," to OPVÜI Potsow na phyoala. 10 "Tole ejyukaena kyon shina tsokhying vancho, tole ombo lüngthata retsoreyu elhi etssoe, 11 Opona kvüthüngha n tssowo elhi tüv. Ombona otsung olung ekhümo etsoyu jiang ha tsoala, elani oyam eboe osi eloe jiang ha ejithechiala. 12 Ombona yantsae jiang ha ejithechiala, osi retsoyiala, ombo thüngi noe etsoe jiang na otssen-dungche (karar) vayio jiang ha n pina ombona vae siala. Ombona Potsow n tsi jiang khümpheni owo etsakthav kisü jiang ha khümala. 13 Osi orang ha eran ekhak yana noala. Tona ombona eküm vamvü alo? Mek, ombona eküm n vanche; ombona enkongthav elhi shiang topvü tssothaka; hoji tsükona ombo chüvka. Ombo echüo jijo ombo nlan piv. 14 "Enhüngaha kyon enioto shina tsokhying vancho, osi opona kvüto mmen tssocho sana jiang topvü ombo na hunga, khatola ombona n phanka. 15 Ombona Israel kyon jiang na ekhümo kisü jiang ha n khüm, elani potsow n tsi jiang khümphen jiang lo etsoyu thamo jiangha khi n tsoyu; oyam eng ha ombona n jithechi, 16 mekana oyam ha n pupthuk osi n retsoyi. Ombo thüngi norüroni etso jiang na otssen-dungche vayio jiang ha ntsa pilan to tssoala. Wondon erae jiang ha ombona etsyu piala osi mpensü n liv tsükshü evamo jiang ha mpensü piala. 17 Ombona mmen elhi n tsso osi ekhak yana ha oyam orang nno. Ombona a ekhüm shikhfü jiang benphia a yizüng jiang engala. Hojito tssona opo mmen yakchia jo ombo n chü, tokhatola ombo otsotso eküm vamvü. 18 Opo na jo oyam ejithechia osi retsoyia rocho, osi yuta topvü lo otsük akvü thüngi to mmen elhi n-mhom tssocho. Hoji tsükona ombona ntio mmen tssocho sana jiang tsükona ombo chücho. 19 "Tokhatola ntena jo heto engatala: Ntio tsükona opo mmen jiang man otsoe ji ezüp n pichola to' Janlan jijo heto tae. Ntiotssole la tona otsoe jijo ntio jo elan osi mmhom cho sana ji tssocho. Ombona a shikhfvü jiang benphicho osi ntangnshona hojiang ephanina vancho; hoji tsükona ombo eküm vanrüngu. 20 Mmen etssowo kyonmo jina chüv. Otsoe jinaha opo mmen tsükona n züpche, elani opo jinaha otsoe ji mmen tsükona n züpche. Kyon mmhom jijo elhi mmhona etsso jina mmhom khi yantsov, osi elhi n-mhom etssoe jijo elhi n-mhom etso jiman ezüpvü. 21 "Elani kyon nmhon jina mmen elhi etsso ji esani sisi a shikhfü jiang enga benphia osi ombona ntiojo elan sana ji tssoa elhi mmhom tssona, ombo nchü, tolea ombo otsotso eküm vanchev. 22 Ombo mmen jiangha topvüto nlan siyiv, osi ombona eküm vamvü ntiotssole ombona ntiojo elan sana hoji tssocho. 23 Kyon n mhon tüv echüo ji ana a emathatala to ntena nchümta alo? to OPVÜI tsüphotso jina engala, hojito meka ana jo ombona ekümji khophi eküm vana a hunghungala. 24 "Tokhatola ntsanrüng kyon tüvna elhi mmhom etssov ji esani sisi, n-mhom jiang benkae tssoa, n mhon kyon jiang na etssakthav elhi tsso jiang esüa tssoa tssona, ombona hoji esüa tssonrhüa vanchev alo? Hojito meka ombona elhi mmhom tssoa rothako jiang ji motsüngalea nchümcheyivlam meka. Omboji chüvka, ombo n longtsüka elhi osi mmen jiang tsükona. 25 "Tokhatola, ntena jo phyotala, OPVÜI na etsso jijo elan ji meka to" Hoji tsükona Israelden a engachiyitava. Ana etsso lanka jiang jo elan mek to ntena nchümta alo? Ntena etsso, lanka jiang ji n lancho. 26 Kvüthüng ntsenthoe kyon jina elhi mmhom etsso ji sisi n mhom benkae tssoa chüa sana, ombo ombona elhi n mhom ntio tssocho sana jiang yakchia ombo chüala. 27 Tolea kvüthüng n thae nmhon kyon jina elhi n-mhom etsso ji esani sisi, ntiojo elan sana ji yana mmhom tssoa tssona, ombona ombo eküm ji shanchoala. 28 Ombona ntio tssoa vancho sana jiang ji nchümche, mmen elhi etsso ji esanala. Hoji tsükona ombo n chünrüng, tokhatola eküm vana yichev. 29 Osi nte Israel kyon najo OPVÜI na etsso jijo elan mek to phyotala; osi ntena a lanka jiango elan mek to nchümtala, to me-mek? N lamo jiang jo nte lanka jiang ji n lanchoka. 30 "Enhungo, A, OPVÜI tsüphotso jina nte ezoaka, Israel kyonden, nte otsük akvüto ombo ombona ntio elhi tssocho sana ji ephan ana oyi nte tssoyivka. Ntena ntio n mhom tssota vancho sana jiang lona khophitava; osi nte mmen jiang khi roe nte ti-sithoka. 31 Ntena tssota erovo n mhom lan taro jiang ephyae sitava, osi nte bobo lümbüm nchümri ethan hantava. Ntio tsükona nte Israel kyon shiang jo heto nte chühungtala? 32 Ana kyon ochia a n chüthok hungala, to OPVÜI Potsow na phyoala."Nte mmen jiang lona kholantava osi eküm vantava."
Nungra Khen
1 OPVÜI na nungra khen shiji Israel mesao tsokhying nchyu eni jiang khfükata to a ezocho: 2 Niyo jo ntio hengho okyu esüa hetüv ato! Ompvüna hengho pong ntav jiang yulona woro jiang ekümcho. 3 Ompvüna oro ekümi kvüto sorümo wov sana ji tona; kvütoli kyon erüm kümvü sana ji püngnocho. 4 Jipo jiang na ombo yivon ji zoe khi soküi ombo vüngthechithaka. Ombo ji oyiina fukae ezüpa liko shoka Ejip metae ombo süsi yithaka. 5 Eyilo topvü n mhonthüng nandang jo ompvüna nhyaka vancho. Hoji sülojo ompvüna oro jiang yulo na motsünga ekümchelani hojijo emhokthav hingho pong ntav kümcho. 6 Kvüthüng mmhona ombo pongchecho sana, ombona hingho thanpo jiang nzo chephia sanphicho. Osi kvüto oso rümvü sana ji shikachecho osi kyon rumi etsoe kümcho. 7 Rizümki jiang ombona nshakrocho, osi yantsü jiang ha roe sia wocho. Osi ombona kvüthüng erhyua sana meta jilo kyon jiang ekhenrhükcho. 8 Osi jipo jiang jina sanrhyutae ombo rokacho; kyon jiang jina nken topvü lona roracho. Osi onte sozonphen jiang shümchi khi onte tsirhi jilona ombo zonyathukcho. 9 Ontena vüngpheni ombo thechicho, osi Babylon mesao thüngi ombo sosi yicho. Osi Israel phunglan jiang lona ombo erhyu won n zolamo tssoa ontena rarünga ombo nhyakyae sicho. 10 Niyo jo jününgrozhü zhükhfü tsalo chümcho esüa tüv tssocho. Ntiotssole hojilo ojü elümoto jücho; osi jününgrozhü ji vüloka osi tssüngthina pyinga kümcho. 11 Ombo khero jiang ha chüngchünga, mesao jarung esüa rankacho. Jününgrodung jina woyaki eluk etssunga tata ntssona rankacho; Kvütata vüloka osi ntssona rankacho sana ji otsük akvüna hunga. 12 Tokhatola lümbüm etsuk khe jina oyingi na ombo rukche, likoe shümchochi sicho. Tole engkhfüwoe mbung jina tsüngthi jiang nkongkae siyicho. ombo khero jiang ha jakrocho; osi onteji chüi khi rungi sicho. 13 Enhungo omboji lijüngi ojü n jü meta tüv lo chümthaka. 14 Jününgrozhü dungpvü jilo omi kikae; omi jina khero tona tsüngthi jiang topvü rungthaka. Enhungo khero jiang ji kvüthüngha ntssana n kümlan, osi mesao jarung tssüng n tssoche. Shijo nungra khen motsünga, shiji elan elani dentala.
Potsow Lümbüm Erüng Tona kyon na Ryulanchio Ji To
1 Heto shijo ena Babyloni oyi vansi nzyu tiyingsi choro mongosi tsüngon taro to jilo tssocho. Israel kyon ejoma na OPVÜI lümbüm erüng ji kvüto sana to a ngatüngngarilo rotacho; osi ontena a mhadungi khotheracho. 2 Tothüng ji OPVÜI na heto ajancho, 3 osi ombona phyocho, "Echüo kyon yo" "OPVÜI Potsow na heto phyoaka to kyon jiang thüngi ezoa; Nteno a lümbüm erüng ji a ngatüngngarilo rotacho, na nüng? Aiyo otsotso eküm evamo OPVÜI Potsow etsso ji esüa, a thüngi ntia nte n gatüng-ngarithuk. Hojito A, OPVÜI sandamo jina phyothaka. 4 "Nino onte pono ezüp epiv yidan methakalo, echüo kyon yo? To tssona hoji esüa tssoa, Onte opoden jiang na kvüta etssaknkongthav elhi tssocho sana jiang onte nchümchethuka. 5 Ana ntio phyoa vancho sana ji onte ezoa. Ana kvüthüng Israel jiang ethüngchecho sana, ana onte thüngi echümchak vacho. Ana Ejip lona abobo onte hungthuka onte ezocho. Aiyo nte OPVÜI Potsow jika. 6 Hojithüng ji ana Ejip meta lona onte sochoki meta ethan, lizü osi eli meta, meta yulo mmhontso ji ethüngi onte pivka to onte thüngi echümchakcho. 7 Osi ontena nzana evamo etssaknkongthav kisü jiang ji shümthe sita khe, osi Ejip ejüng Potsow jiang khi nte ti-mmenthukhe, ntiotssole Aiyo nte OPVÜI Potsow jika to onte ezocho. 8 Tokhatola ontena aryulana ayi nngacho. Ontena etssakthav onte kisü jiang ha shümthe n si, mekana Ejip kyon jiang potsow jiangha n vachi küma alümbüm etsuk ji onte na Ejip lo vanathüng onte thüngi chancheta ntsithuka to ntsithoku methakcho. 9 Tokhatola ana hojito n tssocho, hoji yakchia amying jilo yikra hansi yiv kümaji tsükona, ntiotssole la tona ontena vanta evamo kyon jiang ndüngona ana Ejip meta lona onte sochokvü sala toji Israel kyon jiang ji opon chuka onte ezocho. 10 "Hoji tsükona ana Ejip lona onte sochoki lijüng metalo onte sothechicho. 11 Ana ayizüng onte picho osi a shikhfü jiang onte püngocho, jijo ochona hojinag enga benphia sana ombo pono eküm lithokvü tsükona. 12 Ete yutalo ntsatao ji chekav tssoa esanmung ji benphiv tsükona ana onte ezocho, osi A, OPVÜI na hojijo Ntho nsüngrücho ka to. onte khi nchümchethokvü tsükona. 13 Tokhatola lijüngina mpato ontena aryulancho. Ontena a shikhfü jiang yesocho osi a yizüng kvümoe benphicho yakchia eküm ehungo sana hoji mpato ontena khoe sicho. Ontena esanmung ji totona mmenthukcho. Hoji tsükona ana alümbüm etsuk etsyu ji onte chanchethoka lijüngi na roe onte esiv methakcho. 14 Tokhatola ana hojito n tssocho, ntiotssole hoji yakchia jipo ochoangna ana Israel kyon jiang ji Ejip lona sochuka ahungcho sana jiangna ayikrathuka amying a mmeniv. 15 Hoji tsükona ana onte epiv echümchako eli osi lizü meta, meta yulo mmhontso jilo onte sosi n rheyi to ana lijüngina echümchakcho. 16 Ana heto echümchako shijo ontena a yizüng jiang khoe sicho, osi a shikhfü jiang yesocho elani esanmung ji mmenthukcho osi ontena kisü jiang ekhümvü ji ekyongo chokacho. 17 "Tokhatola ana elani onte nzana nchümchelancho. Hoji tsükona lijüngi najo lüngtharüpi onte n si to methakcho. 18 Ji thüngi najo onte yulo pongdenro jiang ji ana heto ntangnshon yi picho: Nte pyimtsümotsüi na nsüngrüo shikhfü jiang ti-benphitava; osi onte shikhfüniro jiang ha ti-phankata, mekana onte kisü jiang khi nte bobo ti-mmenthuka. 19 Aiyo nte OPVÜI Potsow jika, A shikhfü osi a yizüng jiang enga benphitava, 20 Esanmung jijo ntho tsüngon to tssothuka. Hojito tssona hojina ete eyutalo ntsatao ji chekaphen tssoa vamka; osi hojina Aiyo OPVÜI nte Potsow jika to nte nchümchethuka vamvüka. 21 "Tokhatola hoji echungren jina apanlancho. Ontena a shikhfü ji yesocho osi yizüng kümoe enga benphina eküm onte piv sana hoji n tsütsacho. Onte na esanmung jiha mmenthukcho. Hoji tsükona a lümbüm etsuk etsyu ji onte ntsithoka lijüngina onte topvü lüngthae onte esiv ana methakcho. 22 Tokhatola ana hojito n tssocho, ntiotssole hoji yakchia jipo ochoangna ana Israel jiang ji Ejip metae na sochuka a hungcho sana jiang yulona amying jilo yikra hansi yiv küma ji tsükona. 23 Hoji tsükona ana lijingina echümchak thanpo khilancho. Limha topvü lo hanroe mekana nzüi onte sivka to ana echümchakcho. 24 Ana heto etsso shijo ontena ayizüng jiang khoe sicho osi a shikhfü jiang yesocho; esanmung ji mmenthukcho osi onte pyimtsümotsüi jiang na benkata erowo kisü jiang khümtacho. 25 Hoji sülojo ana onte thüngi shikhfü n mhon osi yizüng kümoe na eküm n pichecho sana jitüv onte thüngi picho. 26 Ana onte ji onte than jiang khi onte mmen thukcho osi ana onte tsokying van demo jiang khi thanthukcho. Heto etsso shijo ezüp onte epiv tsükona tona Aiyo OPVÜI jika toji onte ntsithoku tsükona tssocho. 27 "Toka enhungo, Echüo kyon yo, A, OPVÜI Potsow na ntio nte ezoa vancho sana ji Israel kyon jiang thüngi ezoa. Onte opo jiang naha alo n longtsüka elhi etsso ji yakchia a yikvü yilocho. 28 Ana onte epiv echümchako meta jilo onte sochukchicho. Tole ontena kvüthüng phunglan ntssom osi otssüng odung mmyakvü jiang hungcho sana jiang topvü thüngi othan pitacho. Ontena erung than apio jiang osi zükhi othan etssov hansi ero jiang yakchia a lümbüm tsukthukcho. 29 Hoji tsükona ana onte engacho. Ntena wotao meta ntssom jiang ntioyila jianglo wotala? Hoji sülojo meta ntssom to tsa yicho. 30 Enhungo 'A, OPVÜI tsüphotso shina ntio nte ezo avancho sana ji, Israel kyon jiang thüngi ezoa. Ntio tsükona nteno nte motsüi jiang na etsso mmen tsük jiang tssotala; osi onte kisü jiang phanphitala? 31 Nchüng tsüngon jana ntena yantso tsük jiang onte pita kisü jiang khi nte mmenthukala, osi nte ngaro jiang khi omi thechia othan tssotala. Toaha enhünga jana nte Israel shiang na alümbüm erüng jijo ntiosana ji oro engatala! Otsotso tola otsotso Aiyo OPVÜI tsüphotso osi eküm evamo Potsow tso ji esüa; nte khi ntia nte a engathoku meka. 32 Ntena nteji jipo thanpoe jiang esüa etssov tsükona methakthaka, osi metapoe evamo kyon jiangna otssüng odung khümtao jiang esüa. Tokhatola kvüthüngha hojito tssoche nrüngu meka.
Potsow na Ezüpthukala osi Nlan Siyiala
33 "Otsotso tola otsotso A ji eküm evamo Potsow etsso jina ana ekyu ntangnshonyi nte piaka, alümbüm etsuk lona ana nte ji khejak mmyinga a etho topvü khi nte pono savka. 34 Ana kvüthüngti metapoe nzüroe nte esio jiang lona nte tsarhyua sana tothüngti a lümbüm etsuk osi a etho ji ana nte ejüvka. 35 Ana nteji 'Lijüngi jipoden' esüa nte hanrhyuv osi hoji lona ana nte mhadungo na khoe nte sia nlan nte piv. 36 Ana kvüto nte opo jiang Sinae lijüngi na nlan picho sana ji esüa enhungo ana nlan nte piv." to OPVÜI Tsüphotso jina phyoala. 37 "Ana elümoto rükrüka nte sayav osi ana ntio ntsatacho sana jilo nte vanthoku osi nte benphithoku. 38 Osi nte yulo ochoang jo khirankhiri osi mmen elhi etssoesana jiang jo ana khi hansi yiv. Ontena enhünga vanta evamo meta jilona ana khi onte siv, tokhatola Israel meta lojo ana kholani onte n yithok, tosanati ntena Aiyo OPVÜI ji to a ntsivka." 39 OPVÜI tsüphotso jina phyocho, "Enhungo nte Israel kyon topvüna nte bobo emathatava! Nra owo nte kisü jiang benkatava! Tokhatola ana nte ezoaka, shi sülojo ntena kisü jiang thüngi othan pia khümi a ntho mying jilo yikra hansi yithokvü meka. 40 Tokhatola nte Israel kyon topvü tona, A, ntho phunglan jilona osi Israel phunglan ntssomo jiang lona to akhümtavka. Osi hojito tssosanati ana nte emathayiv. Osi nte than mmhontso jiang osi ntho yantso jiang nte eyiloyivka. 41 Meta kvülo kvülo nzüroe nte sicho sana jiang yulona nte sosi yirae nzo nte tssothoku-sanati ana nte erung than jiang nte khichoyivka; osi jipo jiang jina Aiyo ntho toji hunguka. 42 osi kvüthüng ana nte motsüi jiang thüngi epiv phyochako Israel meta jilo nte sosi yia sana tothüngti ntena Aiyo OPVÜI ji to a ntsivka. 43 To tssoanati ntena kvütata n mhom tssothakcho sana osi hojiang yakchia nte bobo nte mmencho sana jiang ji nchümchevka. Ntena elhi n mhom etsso jiang nchümi nte popo nte tsaknkonga to tssovka. 44 Osi kvüthüng ana a mying ji yikrachia nkohoa elhi tssoa sana tothüngti ntena Aiyo OPVÜI ji to antsiv, ntiotssole nte elhi n-mhom jiangna mamo ji esüa mekna ana mmhona nte tsütsav." OPVÜI Tsüphotso jina phyothaka.
Jolowoe Omi Ji
45 OPVÜI na heto a jancho, 46 Ombona phyocho: "Echüo kyon yo" "Engrhelamoe jolowoe zechochia. Jolowoe meta ji yaka phyoa osi hojilo ora jiang tsükona zenkhyingkata. 47 Jolowoe ora jiang thüngi OPVÜI potsow na ntio phyoa vancho sana ji engale to onte ezoa. Zeta! ana omi thenaka, osi hojina ni metalo odung kvüta licho sana jiang topvü runguka; mmyaka elio jiang tssolea, echü jiang tssolea topvüto. Nti naha hoji mi ji tamhechev meka, osi hojina jolowoe na benkae jükiwoe jana runga chüngivka. Osi otsük akvüna mimyo ji etsso ji chanchevka. 48 Hoji sülojo onte topvüna omi ji A, OPVÜI na njükacho osi hoji tsükona kyon ochinaha n tamhetala toji chekata hunguka." 49 Tokhatola ana ekhirancho, "Tsüphotso OPVÜI hojito a ti tssothuka Ntiotssole, yuta topvü lo ana emhok elüm yi tae nsanala to otsük akvüna phyochophyoriota vanthaka."
OPVÃœI Yonri
1 OPVÜI na heto a jancho, 2 "Echüo kyon yo" Osi om bona phyocho, "Jerusalemoe zechia osi Jerusalem khümphen jiang pono phyokasankata ezoa. Israel meta ji pono ekyusü yi phyoa, 3 Osi A, OPVÜI na heto phyoala to ezoa: Aiyo niri ka. Ana a yonri ji tssüngche, mmhom jiang ha n mhom jiang ha topvü pono kheti onte lüngthakham. 4 Jükiwoe na jüjo jana otsük akvüto pono a yonri ji tsütsav. 5 A, OPVÜI jina yonri ji tssüngchethaka, osi ana elani yonri ji n thechilan toji otsük akvü tona ntsiv. 6 "Echüo. kyonyo, nungra lona ni lümbüm ji pyonroa esüa emhena. Otsük akvüna ni hungwo tüv lona owo nungra emhena. 7 Osi kvüthüng ontena ntio tsükona emhenala to ni enga sana, yithen n-mhom etsao ji tsükona ka to onte ezoa. Kvüthüng hoji yithen ji yiasana onte lümbüm jiang ji ekyusü na pyingkham, osi onte khe jiangha ekyu lona mmichochi siv; elani onte lümbüm etsson jiha moni siv, osi onte nkhok jiangha enenona to tssov. Yuta ji yithaka, shilo yithaka." OPVÜI Tsüphotso jina phyothaka. 8 OPVÜI na a ezocho, 9 "Echüo kyon yo, zenkhyingyi phyoa, Osi A, OPVÜI na heto phyoala to kyon jiang thüngi ezoa: Yonri motsünga, yonri motsünga ji phyakthaka osi ntssa-nlümthaka. 10 Lüngthav tsükona ehe-thaka, Osi potsüo nlüpa to tsünglüpthokvü ntssathaka. Hojilo longshita ntia n liche, ntiotssole a kyon jiangna ekyusü ntaknshon osi ezüp epiv ezo jiang n tsayiv sithaka. n Yonri ji ntsanlümi vathaka, osi tsütsav tsükona methakthaka. Hoji phyakthaka osi echhothaka; lüngthapvüi ji khelo theyiv tsükona. 12 Nungra lona eronkachia, echüo kyon yo; yonri shijo a kyon jiang tsükona ka, osi Israel yulo esopvüi jiang tsükona. Onteji onte lüngthav sala, kyon thanpoe jiang topvü nzo. Etho ejak lona teki shüngthechia! 13 Ana a kyon jiang ji chyui nte zetala, osi ontena khophiv ekhirana tssona shiang hetopvü toji onte thüngi tssov. 14 "Enhungo zenkhyinga, echüo kyon. Ni khe jiang tümphia, osi yonri na elan elani nte ekhokavka to phyoa. Hoji yonri jina lüngthatala, yonri jina ekhenrhükthukala, osi lüngtharüpala to phyoa. 15 Hoji na akyon jiang lümbüm etsson ji moniala, osi nshüphithukala. Ana onte yantsü ji yonri khi ekhenthukala, yonri kümoe na potsow nlüpa esüa nlüpa sana osi lüngthav tsükona sanaji. 16 Ayiamen epana yonri erovo! Nina kvütowoe nlüpa sana epana! 17 Anaha a khe jiang tümphivka osi a lümbüm etsuk ji ochüm tssothukuka. A, OPVÜI shina hojito phyothaka."
Babylon Mesao ji Yonri
18 OPVÜI na ajancho, 19 "Echüo kyon", ombona phyocho, "Olan eni kvülona Babylon mesao na ombo yonri ji benri rothakcho sana hoji chekata. Olan eniata meta motsünga lona benkavka. Olan ji lanrhyu jilo chekav tonkachia. 20 Olan motsünga jina Amon yantsü Rabbah lanjiwoe eyilan ji mesao thüngi ejüv, osi motsünga jijo Juda woe eyilan ji, epichaki elio Jerusalem yantsü ji etssyuchi ejüv. 21 Babylon mesao jina lanshümrolo chekav elio jilo mangachiv; olan kvütowena ewov sana ji eyamvü tsükona ombona ombo lotssi ji eyephia ombo kisü jiang ngatüngariv; ekümrüm othan epio jiang nthenji tsseni zev. 22 Enhünga! Ombo khe amimoe jina Jerusalem thüngoe lotssitsüng kisü na etssyuchi elio ji rhümatala! Hoji na owo vümroe siphen nsüngrüv ombo ezoala, osi ritssowon etssov osi elani vümrophen ji yantsü pikhfü kibüng jilo ochon hankae elio ji vümroe esiv tsükona tona sokvü nrhüv to tsükona ombo ezoala. 23 Jerusalem lo evamo kyon jiangna shi longtsüv mek, ontena mmhontav ntsata khithako ji tsükona. Tokhatola shi tssenchyi shiang jo onte mmen jiang onte nchümchethoku tsükona, tona onteji orina onte vükthechivka to ekyusü ntangnshonyi onte epiv tsükona to. 24 A, OPVÜI tsüphotso jina ntio phyoa vancho sana jijo heto: Nte mmen jiang ji oponi elachukchithaka. Nteji kvütata nlancho sana ji otsük akvüna ntsia. Nte elhi akvü lona nte mmen jiang hungthokala. Nteno nlan epio jilo vanthaka. Nteji ana nte ri jiang khelo theyivka. 25 "Nthae osi ntsa ntho n li Israel esopvüi, ni tsüngon osi ezüp wokhao ji ni epiv tsüngon ji tsathaka. 26 A, OPVÜI Potsow na hojito phyothaka. Ni mesao kikho osi osü kikho ji phunga. Nti ha ovüngthüng ji esüa tssov meka. Yantsae jiang ji etholo chüngithoka, osi ni etholo evamo jiango soa! 27 Roe sia, roe sia! Ho, yantsü ji ana roe siv. Tokhatola yantsü ji roe esiv tsükona ana ocho ethüngchecho sana hoji n rothüng jo shiang shiji heto n tsso; ombona rosanati ana ombo khelo theyiv.
Yonri Tona Amon Kyon Jiang To
28 "Echüo kyon, zenkhyinga. A, OPVÜI Potsow na Amon kyon ochoangna Israel jiang mesekvüla vancho sana jiang thüngi ana ntio phyoa vancho sana ji thenchoa heto onte ezoa: Roe esiv tsükona yonri motsünga methakthaka, Lüngthav tsükona ntssathaka, Potsüo nlüpa esüa tsünglüpthokvü tsükona. 29 Ntena müngdüng hungwo jiango ejüng; osi ntena tssencheyi nsamo jiango n tsa. Nteno nte n tha osi n mhon, osi ezüp ekhov ji nte epiv tsükona nte tsüngon ji tsathaka. Yonri jina nte evüng jianglo elongkav sala. 30 "'Yonri ji khikata! Kvülona ni liyingcho sana jilona ana oyi ni tssoyivka, meta kvülona ni bukcho sana jilona. 31 Ana kvüthüng alümbüm etsuk ji omi kia esüa lanchia sana jithüng nina alüm etsuk ji chanchevka, osi ana haruk-hashüi kyon khelo ni thechivka, roe esivlo tssothitso ji khelo. 32 Niji omina roe ni sivka. Ni meta jilona ni ejen ji eshüvka, osi kyon ochi naha ni nchümchelam meka.' " OPVÜI jina hojito phyothaka.
Jerusalem Nlan Piala
1 OPVÜI na heto ajancho, osi ombona phyocho, 2 "Echüo kyon yo," yantsü kümoe münghan na pyingi licho sana ji oyi tssoyiv tsükona nina methak-thakcho alo? Ompvüna kvütata etssaknkongthav elhi tssocho sana jiang ji ntsüngrünga ompvü ntsithoka. 3 A, OPVÜI tsüphotso jina ntio phyoa vancho sana ji yantsü ji thüngi ezoa: Nina ni kyon emhokthav lüngthao ji tsükona osi kisü jiang khümi nibobo mmenthoko ji tsükona, ni yuta ji tsathaka. 4 Ntena lüngtha elhi tsso jiang osi kisü khümi nte bobo mmenthoko jiang tsükona nte nlanthokala, hoji tsükona ni tsüngon ji tsathaka, osi ni yuta ji benthaka! Hojito etsso ji tsükona ana jipo jiang khi ni yikvüthokala osi liphungtsü topvü na ni emakatala. 5 Liphungtsü enhyano osi ekoni jiang topvü na ni shikhfü lankhu n li jiang tsükona ni emakatala. 6 Israel esopvüiden topvü na onte etholo tae longtsükasi münghan elhi tssocho. 7 Yantsü shilo ochinaha opvü-opo mon n kyuchiala. Ntena metapoe kyon jiang ejithechiala osi emi tona opvü-opo n van nrinran jiang nyimthechia nte tssocho mmhon khiala. 8 Ntena ntho meta osi khümphen jiang n yikrachi elani esanmung ji n benphi. 9 Nte yulo kyon ochoang sanajo oyam chüthoku tsükona ejüng phyoala. Onte ejoma najo kisü jianglo etsoyu thamo. jiang tsotala, osi ochoang sanajo yuta topvülo tsükrüng ji tssoe lüm pükthoka vamo tüv jura. 10 Onte ochoang sanajo onte opo eng thüngi eyipyi tssoala. Osi ochoang na sanajo eloe na onte tathi choro mmen eyi yutalo lea nungkata ponilan etssoe vanra. 11 Ochoangna sanajo efürama benphiala, osi ochoang sanao onte tsoe ji enghjiang ejithechiala mekana ochoangnao onte oyuloe jiang mpato kyakthechia n-mhom tssoala. 12 Nte yulo kyon ochoang sanajo jokheman yana lüngthatala, mekana ekhüp khisi oyam lüngthatala. Elani nte yulo ochoang sanajo nte nte yulo mpato eran khitae jiang yakchia ejüeli kümala. Ontena amhechothaka." to OPVÜI tsüphotso jina phyothaka. 13 "Nte efüfata osi mezüm-metsata elhi jiang lo ana a khezüm khi nte yonkavka. 14 Osi ana kvüthüng tssongkvü nte tsothuk-thakana tosanati lea ntena lümbüm tssoni mekana etho jüa-lyui nte khe jiang khikakhokvü to ntena nchümta alo? A, OPVÜI na phyothaka, küma ana ayi ji ephan tssov. 15 Ana nte kyon shiangji liphung topvülo osi jipolan topvü lo nzüi nte sivka, osi nte elhi nmhon jiang ji ochüm tssothokuka. 16 Osi hojito jipopoe jiangna nte yikrathokvü, tokhatola ntena Aiyo OPVÜI jito a ntsivka."
Potsow Yonjophen Mikvü
17 OPVÜI na a ezocho, 18 "Echüo kyon yo," Israel jiang ji a tsükona ntia ethev n li, onteno yonjaksha esüa tüv Tama yonjak, Yonchü osi yonjophenina Janti riche khisi yonchü sicho esüa tüv kümrathaka. 19 Hoji tsükona enhungo A, OPVÜI tsüphotso jina onte ezoala; ontena yonchü kvüto ethev n licho sana ji esüa ethev n liv kümrathaka. Ana onte topvüto Jerusalemi onte hanrhyuvka, 20 kvüto yonjak eshü, tama, teying osi yonjaksha kvüto riche ekhiv tsükona yonjophen mikvüi hanthechia sana ji esüa. Omina kvüto yonjak chon jiang phyonthuka sana ji esüa a lümbüm etsuk osi lümbüm etsyu jina onte phyonthokuka. 21 Ho, ana Jerusalem lo onte hanrhyuv osi onte kupi omi tssokachi a lümbüm etsuk ji khi onte phyonthokuka. 22 Kvüto mikvüina Janti phyona sana ji esüa, Jerusalem lona onte phyothokvü, tosanati ontena OPVÜI lümbüm etsuk ji chanchetala to ntsiv."
Israel esopvüiden Jiang Mmen Jiang
23 OPVÜI na elani khi heto ajancho, 24 "Echüo kyon yo," osi ombona phyocho, "Israel jiang ji onte metajo n thoka, hoji tsükona ana alüm etsuk lona ezüp onte piala to ezoa. 25 esopvüiden jiango hingho na ekümrümo rumi vasi ji ponina erhyua vancho esüa tüv den. Ontena kyon jiang topvü lüngthae orang jiang khiyisi elani ejüeli jiang ha ontena kvüta toana khiyi tosi ontena lüngthao ji yakchia elümoto emi kümthokthakcho. 26 Pvüti jiang na a shikhfü jiang yeso elani nthojo ntio sana jiang nyikrachi, elani ontena ntho jo ntio osi n thojo ntio to sana jiangha echümpota n lithok. Ntiojo ntssung osi ntiojo n tssüng to sana ji echümpota ji kyon jiang n püngno; elani ontena esanmung ji n khayi. Hojito etsso ji yakchia Israel kyon jiang na a n yikrachiala. 27 Hoji yakchia yansalo tsüphoe jiangna ha kvüto ranfü na ontena ekümrümo rümo jiang rüngroa sana ji esüa tssoala. 28 Osi kyon na kvüto chonhüm na kyimchung jiang nzukzhüi vata sana ji esüa zenkhying shiangna mmen jiang mphoe vacho. Ontena ejüng müngdüng hungcho osi ejüng ji methecho. Ontena OPVÜI tsüphotso ji thüngina yithen yicho phyoala to phyotala, tokhatola ana onte thüngi jancho n li. 29 Eli jiang naha oyam ejithechia retsoyiala. Ontena yantsae jiang zerüpa ezüpthokala osi metapoe kyon jiang püpthoka. onte pono tssocho mmhon khiala. 30 Ana kyon ochona kyimchung tssokachi vakhokcho sana osi hojiang eyaroe, thonroe sicho tüv lona zarungi vansi a lümbüm etsuk etsyu jina hojiang roe esiv tssoa sana jithüng meta ji nkoho khoko tüv kyon eyingoa ha ana hojitüv tsükatia n yanche. 31 Hoji tsükona ana a lümbüm etsuk ji onte pono lanchivka, ontena ntio tssothakcho sana ji tsükona ana onteji omina runga esüa roe onte sivka." Hojito OPVÜI tsüphotso jina phyothaka.
Mmen Oyeniden
1 OPVÜI na athüngi a ezocho, AmtJ 2 Osi ombona phyocho, "Echüo kyon yo" "Tsüngon motsüngalo oyeni vancho. 3 Onte lorothüng Ejip metae vantathüng na loro eküm ji yesoe lonsülonphyoeden kümcho. 4 Onilo eramo ji Oholiah to tsacho (Ompvüo Samaria lo ejyukacho) osi nungo jijo Oholibah to tsacho. (Ompvüo Jerusalem lo ejyukacho). Ana woniata soa vancho osi woniata na otsoero a vanicho. 5 A tsoeni tssoa vanyalona Oholah jo lonsülonpho elhi ji n vachina tsükrüngna pyingi Assayria lo ombo yinga khyingroe vancho. 6 Onteno rasan osü rakiv pipoeden, ntsinran osi ntssoni tsüphoeden osi onte topvü to opyon mmhon ritsolo tsothimoriden. 7 Assyria tsüphoeden jiang topvü sothe eloe nthae ji ompvü osi ompvü erüng lona Assyria kisü jiang khüma ompvüpo mmenthuk cho. 8 Ejip meta kvülona ompvü loro eküm ji yesosi lonsülonphyoe kümcho sana hoji n tümjak na tssoa vancho. Ompvü loroche-panthüng na eboe na ompvü thüngi yipcho osi ontena lonsülonphyoe eloe ejoena ompvü tsütsacho. 9 Hoji tsükona ompvü na hetata to nzamo yinga khyingroe Assyria jiang khelo ana ompvü ji khochaki theyicho. 10 Ontena mpensü ompvü shakisi tsükshü ompvü kümthokcho, osi ompvü tsokhying tsolo jiangha rechoyicho; tosi yonrina ompvü lüngthacho. Meta topvü lona eloe jiangna ompvü sükhying eküm ji phyotacho. 11 "Osi ompvü oka Oholibah na heto etsso ji hunga khatola, elani ompvü na lonsülonphyoe ota Oholiah lona n mhonka etso-ephyocho. 12 Ompvü naha Assyria kyon ntsinran osi tsüphoeden jiang tae chokacho. Osi rasan mpensü ratsa ehan jiang, elani kurü rasan tsüphoeden, osi khyingroe opyon ori mmhon jiang topvüto to jüponcho. 13 Ompvüha pholashülae tsotso to ana ompvü zechecho, osi oyeni enioto jiha otaji kvüto n mhoncho sana ji esüa n mhon tüv. 14-15 "Ompvüna pholashüla eküm jilo jungka jüngkana jüngtheta rheyicho. Babylon tsüphoeden kisü kyimchungo nsüngrükae myontsanga mmyona tüv na nzoki, eryulo süryuphan theyi, nna kvüri lo osü mmhom na pakori theyi to etsso jiang zesi hojiang na ompvü tssüngyacho. 16 Hojiang ji hungpvüto tsükrüngna ompvü pyingi Babyloni onte thüngi yithen hantukcho. 17 Hoji tsükona Babylon kyon jiangna ompvü thüngi efürama tssolo sani rotacho. Osi ontena ompvüji tsükshia tsütsata ompvü mmentuko ji tsükona sülami jo etssak-nkongthav ompvü kümcho. 18 Hoji sülojo ompvüo lonsülonphyoe eloeka to ji ompvüpo kyontsü thüngi chancheta ejücho. Osi ana okaji kvüto atssakcho sana ji esüa ompvüha hojito atssakcho. 19 Ompvüji kyongka kyongkana ntha-nriv lonsülonphyoe kümi sicho, osi ompvüna lorothüng Ejip metae vanathüng kvüto lonsülonphyocho sana ji esüa etssophyocho. 20 Osi ompvü ntha-nri ji gadho osi kurü na erüng chiyicho esüa eboe nthatso jiang tae jüpon jina ompvü pyingcho. 21 Oholibah, nina Ejip metae ni lorothüng ntha-nriv vamo ji esüa ni tssolanhungala; hojithüng jo eboena ni shyuro jianglo ni khfürikayia ni loro eküm ji ni yesoyicho.
Oyeni Nongoji Thüngi Potsow Yitsso
22 "Hoji tsükona enhungo, Oholibah, A, Tsüphotso OPVÜI shina heto ni thüngi ni ezoala. Ni nzamo kyon jiang ji ni lakthaka, tokhatola ana onte ji lüm tsuk-thukvü osi onte sosi oro ni hachümtokvü. 23 Ana Babylon kyon jiang topvü osi Chaldean kyon jiang sosi yiv, Pekod lona eboeden, Shoa lona, elani Koa lona tona Assyrian jiang to sosi yiv. Ana khyingroe mmhom ntsinran osi tsüphoeden elani opvü-odung etssoe ntssoni evamo tsüphoeden osi kurü rasan yolo tsüpho jiang topvü sanrhyuthukvü. 24 Ontena jükiwoe na kurü rasan, rasantsü tona etsoyu ehan zotoro to jüa joro ni hayav. Otsung tona kiven tona otsük khüprasi oro ni hazhüv. Ana niji onte khelo ni thechiv osi ontena onte shikhfü ephanina oyi ni tssoyiv. 25 Ntiotssole ni thüngi alüm tsokthaka, hoji tsükona onte lümbüm etsuk ji khi ni janthukvüka. Ontena ni eno osi kheno jiang tssüpchochi ni siyisi ni ngaro jiangha ni lüngthayiv. Hoka, ontena ni thüngina ni tsokhying tsolo jiang khi ekümina omina rungu. 26 Ontena ni mpensü jiang reroe ni siyisi ni oyok-osen jiang rechoe ni khiyiv. 27 Ana ni tsükrüng ji ni moniv osi pholashüla elhi nina Ejip lona benkae hetenhyaka tssoa eyioji ochüm ni tssoyivka. Enhungo nina kisü jianglo elani zekalam meka, mekana Ejip eküm ji nchümchelam meka." 28 OPVÜI Tsüphotso jina heto shi phyoala: "Nina ni tssako osi ni lakthako kyon jiang khelo ana khochaki ni theyivka. 29 Onte naha yithako ji tsükona nina kvütata elhi tssoa roekhi nkümchei vachosana jiang topvü ni khiyiv osi lonsülonphyoe esüa tsükshü ekachi nisiv. Nitsük erüng osi ni lonsülonphyo, 30 elhi ji yakchia ni pono shi hansi yicho. Nino jipo jiang tsükona lonsülonphyoe osi onte kisü jiang yakchia ni mmencho. 31 Nina ni yenio josü ji rücho, hoji tsükona ana ompvü epio ezüp-pvü tsük ji khi ni yithukvüka." 32 Tsüphotso OPVÜI jina phyoala, "Ni yenio pvü jilona nina yuvka; Hojijo tsüphoa osi junga jitüv otsük akvüna ni yikvüa ni emayivka; opvü ji pyingthaka. 33 Hoji pvü jina ni ryusanga ni kinothokvü, ekyu-esü osi roe esio pvüji, ni yenio Samaria na eyuo pvü ji. 34 Nina yuchesi nkeni kyingkachi siv, osi hoji varo-moroe hojina ni tekiji ni nkhyikroyiv. A, OPVÜI Tsüphotso jina phyothaka." 35 Enhungo, OPVÜI tsüphotso jina heto phyoala: "Nina a mhechoe sisi ni mankvü jina a philanchio ji tsükona tona ni tsükrüng osi lonsülonphyo elhi jiang to tsükona nina ezüp khivka."
Onyeniata Pono Potsow Yitsso
36 OPVÜI na a ezocho, "Echüo kyon, nina Ohaliah tona oholibah to oni oyi tssoyiv tsükona methakthakcho alo? Ontena etssakthav nkongthav elhi etsso ji tsükona nlan onte pia. 37 Ontena efürama benphithaka osi lüngthathakakisü jiang thüngi efürama tssosi elani otsoe avanio jiang lüngtha to tssocho. Ontena a tsokhying jiang ji kisü jiang thüngi othan tssoe a siyicho. 38 Osi ontena etssoji hoji ang tae mek. Ontena a ekhümki ji mmenthukcho osi ana soyingi evao esanmung jiha yesoe sicho. 39 Ontena a tsokhying jiang lüngthao tsüngon tsük jilo ontena a ekhümki jiha oro mmencho! 40 "Elan elani ontena yithenpvüi wothuka ekonina eboe jiang tsalo wothukcho osi eboe jiangna ha rocho. Onyeni jina tsükatasi omhyiko ese nna oyok-osen ekata tosi vancho. 41 Osi ontena eboe jiang mhadungoe khokthephen mmhom jianglo khokthei ana onte epio tsütsaelan mmho oliv thyujü tona mozhürhüm mmhom jiang to ekachirae vacho. 42 Etancho evan kyonden kholuk osi lijüng jiang lona sosi oyi sotheo jiang won zothechia to tssocho. Osi ontena eloe jang khelo rümbüm mmhom phungtheyita nna kvürilo kiven mmhom ekathukata to tssocho. 43 Osi ana apopo ontena lonsülonphyo lona sonlangi sithako eloe jiang tsütsatala to phyocho. 44 Ontena elan elani lonsülonphyoe shiang thüngi wotamungcho. Ontena pholashülae eloe Oholah tona Oholibah to oni thüngi wota-nrhücho. 45 Ntsa nrüng kyon najo lüngtha tona efürama to khi onte nlan epio tssocho, ntiotssole ontena efürama elhilan tssocho osi onte khe jiang ejen na tümzhücho." 46 OPVÜI tsüphotso jina hetoshi phyoala, "Kholuk sosi oyi onte ekhenthuka osi onte retsoyia, 47 Kyon kholuk jiang khi olungna onte ephyathuka osi yonri khi onte yonkathuka, elani onte ngaro jiang lüngthae-si oki jiang rungi sithoka. 48 Meta topvü lona ana pholashüla elhi shiang esanthokuka, osi ontena tssoa rothako ji esüa efürama ti-tssotale to eloe jiang otsük akvü thüngi ekyuyi piv. 49 Osi niyenio nini pholashüla eküm ji tsükona tona kisü ekhümo ji to jiang tsükona ana ezüp nini pivka. Tosanati, Aiyo OPVÜI tsüphotso jika to ntena a ntsivka."
Hanphfü Sangrocholo Ejyukaoji
1 Babylon metae eyithuksi nzyu tokusi choro tarosi tsüngon taro to jilo, OPVÜI na heto ajancho. 2 "Echüo kyon yo," osi ombona phyolancho, "Nchüng tsüngon shi erankae vata ntiotssole tsüngon tsük shilo Babylon mesao na Jerusalem ji vükthechiv benkatala. 3 Ekhiranden, a kyon jiang thüngi ana epio ejyuka yi ji heto onte ezoa: Ophfü ji omi jilo yenkata osi hoji ojü khi pyinga yentheta. 4 Hojilo oso lümchak mmhontso jiang theta. Epfüso tona ojo so to jiang, oso oryu jiang ha ethüngi theta. 5 Olyu so mmhontso jiang khi tsütsata; Ophfü ji kupi otsung ekata njükthechia, Ojüji elankthoka; Osi oso jiang tona oryu jiang to jüma." 6 OPVÜI tsüphotso jina heto phyoala: "Münghanden, yantsü shijo monthoku zikathaka! Hojijo hanphfü sangrothakcho esüa, kvü thüngha n tssüng. Oso jiang ji lümchak lümchak na khiche khansi motsüngatia n nhyoka. 7 Yantsü jilo lüngthata licho, tokhatola livero jiang na jümi esio tüv lo ejen jiang n phyangka, tolea longpvü shakchecholo phyangkacho. 8 Osi ana ejen ji n phyocheo jina zesi lümbüm etsuko na omüng nlilanta hunga tüvlo ekachi vacho." 9 Sandamo OPVÜI jina heto phyoala, "Lüngthae yantsü jijo ro esiv zenkathaka! Ana hojilo njüko tssüng jiang ji apopo ekatae vavka. 10 Otssüng kyongkata hansi yia! Omiji vena tssoa! Oso ji mmhona jüma! Hanjü kyingkata ekvüa, oryu jiang mhenroa ekvüa! 11 Osi enhungo yongmen, yonjak phfü ejüng ji omi yenkae mmyona tssoa richethuka, to tssona elani ophfü ji shikhfü ephanina rungi sia ntssüngchevka; 12 Sasi topvü rungchochi mpa n sichelea. 13 Jerusalem, ni pholashüla elhi jiangna ni mmenthaka. Ana ni ntssüngchev ekhyo tssocho khatola enhünga jana ni mmenpvü vanhan. A lümbüm etsuk etsyu ji nina mmhona chancheta n tsithüng nandang jo elani ni ntssüngchelanchev meka. 14 A, OPVÜI tsüphotso jina hojito phyothaka, Ana elhi etssov yuta ji yithaka. Ana ni mmen jiang ji ntssi-ndan tssoe ni n siyi, mekana nzan ni n jü osi khonzan to n tsso. Nina ntio tssothakcho sana ji tsükona ni ezüpthokvü." Tsüphotso OPVÜI jina hojito phyothaka.
Zenkhying ji Kikhüm Echüoji
15 OPVÜI na heto a jancho, 16 "Echüo kyon yo" osi ombona phyocho, "Echunga yonphina nina nzantso kyon ji ana khi hansi yiv sala. Nina n khiranche, mekana n kyache osi nina esütsü n zanche. 17 Ni ekya won ji oyam khi ti-zo thuka. Osi ni nungrala to chekav tssoa kvüri n-shünga mekana joshü ti-woa. Ni mha ji ti-eyuka osi nungrae kyon na tsoyuo etsoyu jiang ti-tsoa." 18 Hojito enyathüng ana kyon jiang thüngi janta vancho. Osi hoji mmyui a engh ji chücho, osi ojyuato jo ntio etssov a ezocho sanaji ephan ana tssocho. 19 Tole kyon jiangna "Ntiolyui hojito etsso-epnyoala" to a engatacho. 20 Hoji tsükona ana onte ezocho, "OPVÜI na ajancho osi a ezocho, 21 nte Israel jiang thüngi yithen shi nte pile to; ntena khümphen ji etho ji khi nte kangtsüala. Ntena hojilo nte zeka hungala osi hojilo nte wohungala, tokhatola OPVÜI na hoji mmeni siv sala. Osi nte wopan yulo lümthanro ochoang Jerusalemi valanchi licho sana jiango ritsso lona chürav. 22 Tosanati ana ntio tssocho sana jito ntena ha tssov. Ntena omha n shüng osi ekya nungraena tsoyuo etsoyu jiang n tso. 23 Ntena kvüri n yuk osi joshüna n sanphi elani nungra osi kya to tssov meka. Nte mmen jiang tsükona nte eküm mona nte sangu osi nte nte emhenkata to tssov. 24 Hoji sülojo nte tsükona chekav ji A tssov osi ana etsso jiang ntena tssov. Kvüthüng shiang hetopvü shi heto tssoa sana ntena ombo Sandamo OPVÜI ji saka to ombo ntsiv to OPVÜI na phyoala." 25 OPVÜI na phyocho, "Enhungo echüo kyon yo, ontena kangstüa osi longshia nchümo ekhümki kümoe ontena zekahungcho sana osi yuta akvülo hojilo ohungcho sana ana hoji khi hansi yivka. Osi ana elani onte tsokhying tsolo jiang ha khi hansi yivka. 26 Ana heto etssso tsüngon jilo, ochoangna roe esio jilona tsanchov sana jitüv kyon na oro motsü ji rüa nte ezovka. 27 Hoji tsüngon jilona ntena oyi n sanchev evamo ji oyi nsancheta nte kümvü, osi ntena ombo thüngi. jantav. Hojito lyui nteno kyon jiang tsükona chekaphen tssov osi ontena Aiyo OPVÜI ji to antsiv."
Ammon pono Zenkhyingka yi
1 OPVÜI na heto a janlancho. 2 "Echüo kyon yo," osi ombona phyocho, Ammon kyon jiang khoe sia. 3 A, OPVÜI Tsüphotso jina onte thüngi ntio phyoa vancho sana hoji engale to onte ezoa: A ekhümki ji mmeni lio ji zesi nte emathatala, osi Isreal metaji roe sirhaki elio ji nte zehungala. Osi Juda kyon jiangji metapoe evüng tssoa evamvü ji nte zehungala. 4 Hojito nte emathao jiang tsükona ana engkhfüwoe na lijüng kyon jiang khi nte khyotokvüka. Ontena nte meta jilo nchenki tssokachi hojiang lo vanjüng tssov. Osi ontena nte tssüngthi jiang nte tsoyiv osi nte shirojü ntena yuvsa evamo jiang nte yuyiv. 5 Rabbah yantsü ji ana odh shenphen meta kümtukvü osi Ammon metaji mpüto olyu vanphen kümtokvü; hojito tssona aiyo OPVÜI ji to ntena a ntsivka. 6 "Sandamo OPVÜI jina phyoa evamo jijo heto: Ntena nte khe jiang tümphita nte longshicho. Osi ntena Isreal metaji tssakcho. 7 Ntena hojito etssoji tsükona, nteji aha jipo ochoang na nte phana nte retsoyiv sana jiang khelo nte theyivka. Osi ntena elani jipo n kümlamo mekana nte meta to phyoa n lio tüv ronrüngi nte sivka. Hoji süloti ntena aiyo OPVÜI ji to a ntsivka."
Moab Pono Zenkhyingka Yi ji
8 Sandamo OPVÜI jina phyocho, "Moab na Judah ha jipo thanpoe jiang esüa tüvka to ephyo ji tsükona, 9 yantsü kvümoe na Moab erü ji nkohoa vancho sana ji oyam khi hayatukvü, yantsü mmhotso Bethjeshimoth, Baal Meon, osi Keriathaim to jiang ha phanhya hayathukyü. 10 Ana eng khvüwoe evamo pvüji jiang khi Moab ji khywothukvü, Ammon oni nzo, hojito tssona Moab jo jipo nchünga tüv mekvü kümi siv. 11 Ana Moab ji ezüp piv, osi ontena Aiyo OPVÜI ji to a ntsiv."
Edom Pono Zenkhying Yi
12 Sandamo OPVÜI jina phyocho, "Edom kyon jiangna Juda ji haruk-hashü n mhom khi nlilancho, osi hoji n lilantsük jina sunga Edom pono nlan liv. 13 Hoji tsükona enhungo ana Edom ji ezüp epiv thenchoala osi kyon jiang tona ekümrümo topvü ana lüngtharav. Ana Teman yantsü lona benkae Dedan yantsü nan dang metaji topvü roe ekachi siv osi kyon jiang topvü ritsso lona lüngtharav. 14 Athung tssoa a kyon Israel jiangna Edom ji nlilam, osi ontena Edom ji khi a lümbüm tsükshi ji chanchethukvü. Osi Edom khi OPVÜI na e nlilanchojo kvütüv sana ji ntsithukvü." Sandamo OPVÜI jina hojito phyothaka.
Philistia Pono Zenkhying Yi
15 Sandamo OPVÜI jina phyocho, "Philistia kyon jiangna nkolo na onte ri tssoa erowo jiang thüngi elüm haruk-hashi n mhom khi nlilana, tssaka roe sicho. 16 Hoji tsükona ana Philistia meta ji hae khi mhelüpi onte sivka. Philistia hayi jilo ochoang valanchi vanta vancho sana jiang otsük akvüto roe onte siv. 17 Ana khejak mmyinga ezüp onte piv osi lhalünga onte nlilam. Ontena a lümbüm etsuk ji chanchev. Hojito tssona jithüngti ontena Aiyo OPVÜI ji to a ntsiv."
Tyre Pono Zenkhying Yi
1 Metapoe ephanchisi nzyu taro ekhao to jilo choro tsüngon ovüngo jilo OPVÜI na heto a jancho. 2 Ombona phyocho, "Echüo kyon yo," "Tyre yantsü jilo kyon jiang jina longshia tüngta evamo ji shi, ontena tüngtacho, 'Jerusalem jo tümthechi-thaka! Ompvü shisho khophi ethoji moni siyithaka! Enhungo ompvüo ete ri n tssolan!' 3 "Hoji tsükona enhungo, A, OPVÜI Tsüphotso shina heto phyoala: Tyre yantsü, aiyo ni ri ka. Ana jipolan khosha sosi oyi ni hayathukvüka, osi ontena jümangi jükyo jiang esüa chirov. 4 Ontena ni yantsü pikhfü jiang roe siv osi ni rizüm-phen zenki jiang süchochi sikham. Hoji sülojo ana yantsü jilo mmen myak livero jiang topvü evüi sisi olung jiang tae shakchei vav. 5 Osi jümangi olung elio ji kyingchei hoji lona ngorüm jiangna onte ngozonphen jiang phitav. A, OPVÜI tsüphotso jina hojito phyothaka. Jipo jiangna Tyre ji phanchov, 6 osi ontena yonri khi ochoangna Tyre yantsü longjüng jianglo vancho sana jiang lüngthav. Hojito tssosanati Tyre na aiyo OPVÜI ji to a ntsiv." 7 OPVÜI Tsüphotso jina phyoala, "Ana mesao yulo tsüphotsowo Babylon mesao Nebukadnezar khi Tyre ji hayathukvü tsükona sosi yiv sala, ombona khümkiwoe na rasantsü sosi jorov, osi kurü elani kurü zotoro tona ritssoeden to sosi jorov. 8 Ochoang kvütata meta longjüngo vancho sana jiango rota jilona lüngtharav, osi ori jiangna tsanthephen okhey nrhüv, nlhiphen ochon hankae vav, elani nte thüngoe jo echung chüngchünga otsung tssoa nsüngrüv. 9 Ontena nte kyimchung jiang ji vümphen theta oro ejüpvü osi nte ri zümphen zenki jiangji yonjak jarung khi erachochi nte siyiv. 10 Onte kurü jiangna yungathüng livero ethungkachio jiangna nte eyokzhüv osi onte kurü jiangna zotoro lona ritsso ha hansi yantsü roe elio ji yakchia yungtao jina nte kyimchung osi pikhfü jiang mpa ethenroe nte siyiv. 11 Onte kurü rasan jiangna nte lantsü jianglo tsyungryu venato santhev, osi hojito onte yonri jiang na nte kyon jiang lüngthav. Nte durhyupvü tsü-ndamvü jiang ha likoe vantherae nte siyiv. 12 Nte ri jiangna nte ejüeli osi nte shisho khophi jiang topvü phanchov, osi ontena nte pikhfü jiang tona nte oki mmhon jiang topvü roe nte siyiv. Ontena otssüng mmhom osi olung jiang ha elani ochon mmenmmyak jiang topvü jümangi hanthechi nte siyiv. 13 Ana nte khen jiang topvü esani nte siyiv osi nte zhükhen jiang ha topvü jükrüpthuki nte siyiv. 14 Ana longpvü ngorüm na ngozonphen phiphen jiang tae shakchei vav. Yantsü ji kvüthüngha n tssochelanthuk. A, OPVÜI Tsüpho jina hojito phyothaka." 15 OPVÜI Tsüphotso jina Tyre yantsü thüngi heto ephyov lia: "Kvüthüng orina ni khyoasana, oyam na lüngthao jiangna kyata nrungtao jiang yakchia kyon ochoangna jütssa rhüa vanchosana jiango owon jiang engatasi ekhenrhükvü. 16 Jümangina shishoe jiang, mesao jiang topvüna onte vantsü lona joyirav. Ontena phung-nrhüo sü tona osü mmhom thera lyukacho hamo jiang topvü phongkhani sisi likoe eneta khoktherav. Nte sükhying ji zesi ekhenrhüko jina n nerov enetav. 17 Osi ontena müngkya khen heto nte denkav: Thüngche yantsü ji rothaka! Ompvü jü-zotoro (Jahaz) jiang topvü jümang jiangna hansi yithaka. Yatsü shilo kyon jiangna jümang jiang sacho Osi jütssa rhüa evamo jiango topvü ekhenrhükcho. 18 Enhungo ompvü elungo tsüngon jilona, Jüyi jiang topvü enetsüngrav, Osi tssoro-phyoro hetüv yakchia onte kyon jiang ji ekhen-mhukthaka." 19 OPVÜI Sandamo jina phyoa la: "Ana yantsü ochinaha n vamo tssoa eyingkhvü-khvüna kümthuki ni siv, ana jümang ejungu jü jiang khi ni evakzhüthukvü. 20 Nkolo eranina evamo kyon jiang thüngi echüli ana ni joyithukvü. Osi hojito liko chungi limha kvülo kümali tsükona roe licho sana jilo echüi jiang ndüngo ni joyithukvü. Hoji yakchia elani khi jo kyon na ni meta tsük shilo n vanlan osi eküm evan metajo n kümlan. 21 Ana ekhenthao chekaphen ni kümthukvü osi ni tsükona jo ochüm ji hoji tssov. Kyon na ni yantav mpa tssokhuka, tokhatola kvüthüngha ni n yanche." OPVÜI Tsüphotso jina hojito phyothaka.
Tyre Tsükona Müngkya Khen
1 OPVÜI na heto a ezocho, 2 "Echüo kyon yo, Tyre pono müngkya khen denkata, 3 Yantsü kümoe jümang püngo zakachi licho sana osi jümang tssa rhüa evamo kyon jiang thüngi shishoa vancho sana. OPVÜI tsüphotso jina ntio phyoa vancho sana hoji ompvü ezoa. Tyre, ni pyon mmhom jina ni kangtsüa vancho. 4 Niki jijo jümang ji tssocho, Ni nsüngrüo jiang na rhyungtsü mmhom esüa ni nsüngrücho; 5 Ontena dukta jo Hermon phunglanina Fir tssüng khicho. Osi oyakoe ronriv tsükona jo Lebanon lona Cedar tssüng to khicho. 6 Osi ehaphen jo ontena Bashan lona lümro tssüng khicho. Ni nkho jiango ontena Cyprus meta lona mitssüng khicho. Osi hojiang ji ochongoe jo sotsüho na khümzhücho. 7 Ni zonchaksü jiango sünyipvü na nsüngrücho, Ejip lona sünyipvülo thera niro lyukacho, Ekonina lia elaroa chekacheo jitüv. Ni chungchak jianglo kvüriwoe jo osü mmhontsov myonshiv Cyprus jüyi lona hansi oyi thecho. 8 Ni rhung ehapvüiden jiango Sidon tona Arvad to yantsü jiang lona tssocho. Nte yulo tssothi mori jiango orhung ehaeden. 9 Orhungtsü jilo tssiyan-morithi jiango Byblos lo kyon tssiyan thüngoe mmhona thangshi khi-thangden. Orhungtsü kvütata jümang yakchia sana jianglo ehapvüiden topvüna ni tsütsaelan yenphen ki jiang lona shishocho. 10 "Persia, Lydia, osi Libya to jiang lona rasanden jiangna ni rasantsü kholo elhi tssocho. Ontena onte tsung osi onte yonjak kikho jiang ji ni rasan ki jianglo yisi vatacho. Ni tsükona phfütsson myingthüng hansi eyio ji ontena tssocho. 11 Arvad lona rasan jiangna ni pikhfü jianglo enhyang tssocho, osi Gamad lo kyon jiangna ni rizümphen zenki jiang nhyakcho. Ontena onte tsung jiangji ni pikhfü lo yikae vatacho. Eze echan mmhona ni kümthuko kyon jiangji onte. 12 "Nina Spain lona shishoe ni ejüeli jiangna janti, yonjak, yonjaksha. Osi orang yonjak to tongchei khicho. 13 Elani nina Greece, Tubal, osi Meshach tolo shishocho osi ni tsütsaelan jiang khi ezii tona pyontsü yonjak tsütsaelan ejoma to dungi khicho. 14 Nina ni ejüeli jiang khi elhi tssothukphen kurü, ritsso kurü, tona Beth Togarmal lona kurü olan terio jiang to tongtacho. 15 Rhodes kyon jiang na ni thüngi shishotacho, osi jütssa rhüa evamo kyon jiang elümoto na ni thüngi shishotae ontena sotsüho, tona khümkiri tssüng to ni picho. 16 Syria kyon jiang naha ni meta lona chiyio tsütsaelan jiang tona ni shisho tsütsaelan jiang to ni shiyicho. Ontena tssentsülong, osü müngzhüv, osülo opyon nsüngrükacho, sünyipvü mmhom, jümanglong elani marble long to jiang khi ni ejüeli jiang ni dungicho. 17 Juda tona Israel tona jo, omüm, tssakijü, oliv thyujü osi mozhürhüm mmhom jiang khi ni tsütsalan jiang dungi khicho. 18-19 Damaska? kyon jiangna ni thüngina shisho khophi tsütsaelan osi ni meta lona chiyio jiangji Helbon lona zükhi tona Sahar lona tssansü to khi ni shiyicho. Ni ejüeli jiangji ejo yonjak tona mozhü rhüm mmhom to jiang khi dungtacho. 20 Dedan kyon jiangna kurü mankvüi tsankaphen sü jiang khi ni kikyo-nikyo jiang ni tungicho. 21 Arabian kyon tona Kedar meta jilo esapvüiden to jiangna jo olyu oro osi nyanyan to jiang khi ni shiyicho. 22 Sheba tona Ramah to lo shishoe to jiangna oyok-osen, shona, osi mozhürhüm mmhontso to jiang khi ni tsütsaelan jiang dungcho. 23 Haran yantsü, Kanneh, osi Eden, elani Shiba lo shishoe, Asshur yantsü jianglo tona Chilmad yantsülo shishoeden to jiang topvüna ni thüngi shishotacho. 24 Mpensü oman etssükvü mmhom, mümgzhüv sü, thera pikacho sü, osi tapvüi saphen opyon ratsav tona wozhü mmhona nnocho osi ntssücho jiangji topvü ni shithukcho. 25 Ni shisho tsütsaelan jiangji rhungtsü jiang lona hanphicho. Nino jümangi rhungtsü esüa tüv, oha mmyingu na hanpyingcho esüa. 26 Kvüthüng ni rhung ehaeden jiangna jümang na haphowoe ni sochokchicho sana, Engkhfvü ezhü jina limhaena elüm kona ni venthechicho. 27 Ni shisho khophi ejüeli topvü, Ni kholoko orhung ehaeden topvü Ni rhung jianglo tssiyan morithi osi ni ejüeli jiang, orhung jilo rhowoe rasan akvüto, Onte topvüto osi topvüto jümangina moni sicho, Kvüthüng ni rhungtsü ji jüngthecho sana. 28 Tothüngji orhung ehae ojüi rheta evamo jiangna erontao jiangji jürani eshokacho. 29 "Orhungtsü topvü enhungo sirhakthaka, Orhung ehae otsük akvüto jürani chiyirathaka. 30 Onte topvüna ni tsükona nshüthechia nongratacho, Kvüri livero yakachia osi livero yulo ephfüphitacho. 31 Onte kvüri jiangji saki sitasi elani Posta mpentasi ni tsükona nongratacho. Onte lümbüm mpa nshüroa kyatacho. 32 Ontena müngkya khen ni khvükacho; 'Ocho khi Tyre lo etsitakhukchola, Tyre kvümoe enhungo jümangi jüngthei ying-ying kümi sithakcho sanaji? 33 Kvüthüng ni shishoe jiangna jümang pangkata ochosana, jipo jiang ethelan topvü nina bencheyicho. Mesao jiang ejüeli kümthukcho ni ejüeli osi tsütsaelan jiang khi. 34 Enhungo nino jümangi ni jüngthethaka: Jümang ejungo jianglo ni jüngthethaka. Ni tsütsaelan osi ni tsükona elhi etssoe jiang topvüto ni nzo jümangi na nte monthaka. 35 Ni sükhying ji zesi jütssa rhüa evan topvüto ekhenrhükkhanthaka. Onte mesao jiang mpato ekhentsüngthaka osi onte mha jiang ekyu lona rangoa kümthaka. 36 Nino ni monthaka, kümali tsükona ni monthaka, osi limha mpüm topvü tolo shishoe jiang topvüto ekhentsüng khanthaka, nilo tsso ji esüa onte loha tssov esüka to kyutacho."
Tyre Mesao Pono Zenkhyingkao Ji
1 OPVÜI na athüngi heto ajancho, 2 "Echüo kyon yo," Osi ombona phyocho, "A, OPVÜI tsüphotso jina ntio ombo thüngi phyoa vancho sana ji Tyre lo esapvüi ji thüngi ezoa: Kangtsü na ni pyingkachi nina nipopo Potsow to hoala, Potsow esüa vantsülo khothei, jümang na ni hachümi vanala to nina phyoala. Nina Potsow esüa etso-ephyo khuka, tokhatola jito mek, nino chüi esio, nino Potsow mek. 3 Nina jo nino Danel lona nchümri likata to nchümala, osi ntiha ni tüngina n phoche to. 4 Ni nchümri osi tssothimori yakchia shona janti tsentsüman na ni pyingkachicho. 5 Nina okyak lia shishoe khi ekhak elümoto hunga eriala. Osi ni ejüeli jiang khi kvütata ni kanchanato! 6 "Hoji tsükona enhungo, A, OPVÜI tsüphotso jina phyoa evamo ji heto: Nina, nino Potsow esüa nchümri lia to nchümo ji tsükona, 7 Ana haruk-hashüi tsotso tüv jipo ori sosi oyi ni hayathukuka. Nina ni nchümri osi tssothimori yakchia kvütata emungyanthav tsütsailan hanthei vacho sana jiang topvü ontena roe ni siyiv. 8 Ontena ni lüngthae ojüi shümthechi ni siyiv. 9 Tona ni lüngtalo eroji yuta jana nino Potsowka to phyoa vamvü alo? Nina kvüthüng ni lüngthalo eroe jiang ntoka sana nino echü kyon tssovka; osi kvüthüng ha Potsow tssov meka. 10 Potsow n tsi metapoe kyon jiang khelona füro esüa ni chüvka. A, OPVÜI tsüphotso jina hojito yidan ji pithaka."
Tyre Mesao Joyio Ji
11 OPVÜI na heto athüngi a ezolancho, 12 osi ombona phyocho, "Echüo kyon," "Ntio sükhying n mhom na Tyre lo mesao ji nhayak vancho sana ji tsükona nungra nchüma, osi A, OPVÜI sandamo jina ntio phyoa vancho sana ji ombo ezoa: Yuta motsünga lojo nino benri-benyoe thüngoe ejyukae khiphen mmhom tssocho. Nino kvüta opyon mmhona nchümri eli-i tssocho ato? 13 Nino Eden, Potsow phari jilo vancho, osi oyok-osen olan topvüto benria, tsentssülong, Pvürüm, Senthan, tsükro-laküp osi mmhom lantaro benria ekacho. Ni lyiyingo ji nchukna hojiang ji ni nsüngrüicho. 14 Ana ekyuthav. lanben khi ni nhyakyata vanthukcho. Nina a ntho phunglan jianglo vancho osi tssentsülong tsünglüpo jianglo sanphicho. 15 Nina n-mhom elhi etssov n benkathüng nandang jo ni ebuk tsüngono na benkae benri eküm jilo vana yicho. 16 Nina shiale, yenale to shisho khophi na ni n tssochov etsso ji yakchia khontarota osi mmen lo ni sothechicho. Hoji tsükona ana a ntho phunglan jilona tsani eyiv ni nungkacho osi lanben ochona ni nhyak-yata vancho sana jina tssentsülong tsünglüpa evamo jiang yulona phani ni sicho. 17 Ni pyon mmhon jina ni kangtsücho, osi ni myingthüng ji yakchia nina zhüvae esüa etsso-ephyocho. Hoji tsükona ana likoe shümchochi ni sicho osi mesao thanpoe jiang ejyusürütaphen esüa ni kümthokcho. 18 Nina shia osi yena to shishoa thüng elümoto n mhom tssoe khi khümphen jiang mpato mmeni sithukcho. Hoji tsükona ana yantsü jilo omi thei khi likolo nshüke sithukcho. Osi ochoang kvütata na nilo zekata sana jiang topvü na mekyu tae enhyoe lia ni hungala. 19 Nino ni monthaka, kümali tsükona ni monthaka, osi jipo kvütata na hoji ni ntsithakcho sana jiang topvü ekhentsüngthaka, ontena ha ni sükhying ji esüa tssona to kyuala."
Sidon Pono Zenkhyingkao Ji
20 OPVÜI na aezocho, 21 "Echüo kyon yo, Sidon yantsü ji khoe sia phyoa. 22 A, OPVÜI tsüphotso jina onte tsükona ntio phyoa sana ji yantsü jilo evamo kyon jiang tsüngi ezoa: Aiyo nirika, Sidon; Ana ntio tssoa sana ji khi kyon na a thüngu. Ana kvüthüng aiyo kvüta nthocho sana ji esüa nilo evamo kyon jiang ji ezüpthoka sana jithüngti Aiyo OPVÜI ji to ontena a ntsiv. 23 Ana nilo nochonori rotohuka osi ni lantsü jiang lona ejen tsüa yithokvüka, nken topvü lona niji ni hayav, osi ni kyon jiang lüngthav, tosanti nina Aiyo OPVÜI ji to a ntsivka."
Israel Jiang Mmhayithokvü
24 OPVÜI na phyocho, "Nkonjano evan jipo ochoang kvütata na Israel jiang thüngi n mhom tsütsacho sana jiang ji kvüthüngha Israel tssatsolamo tüv wozhü okyo esüa n tssolanche. Osi ontena Aiyo OPVÜI tsüphotso ji to a ntsiv." 25 OPVÜI Sandamo jina phyocho, "Ana Israel jiang ji ana jipo ochoang ochoang thüngi nzüroe onte sicho sana jiang thüngina solansi yiv, osi jipolan topvüna Aiyo ntho to a ntsiv. Israel kyon jiang na meta jilo vamvü, meta kümmoe ana a phajae Jakob thüngi picho sana jilo. 26 Ontena hojilo nkoho lia vamvü. Ontena oki tssotav osi jününgrozhü chümtav. Jipo ochoang kvütatana Israel jiang ji n mhom tsüstacho sana jiang topvü ana ezüpthokvü osi Israel jo nkohoche vanthokvü. Hojito tssona ontena aiyo OPVÜI Potsow jika toji a ntsiv."
Ejip Pono N mhom Zenkhyingkao Ji
1 Metapoe tsanthan ekümo eyithoksi nzyu taro to jilo choro tarosi tsüngon taro enioto jilo OPVÜI na a thüngi heto ajancho: 2 Osi ombona phyocho, "Echüo kyon yo," "Ejip mesao ji khoe sia zenkhyinga, ombo osi meta topvü ji kvütüv ezüp piv sana ji ombo ezoa. 3 Osi OPVÜI tsüphotso jina Ejip mesao ji thüngi heto ezoaka to phyoa: Aiyo nirika. Nino ekyuthav n-mhom ero, zhükhfüi eriche evamoji, ninajo Nile zhükhfü jijo ni echhi osi nina nsüngrücho to phyoala. 4 Ana ni khoka lo ngokhfü ni yikayivka osi zhükhfüi ongo jiang topvü rükrüka nilo shenkathokvü. Hoji sülojo ana Nile zhükhfü jilona ni süchokvü, ongo jiang topvü nilo shenkapvütona. 5 Ana ongo jiang topvü nzo lijüngi ni shümthechiv. Tona ni müng ji likoe evümthev osi n jyuthena hapoe ekachi ni siv. Osi ana nimüng ji woro woni osi ekümrümo jiang phi ni siv. 6 Hojito tssona Ejip lo kyon topvüna Aiyo OPVÜI toji a ntsiv." OPVÜI na phyoala, "Ejip kyonden, Israel jiangna ekyo-erung tsükona nilo enhikacho; tokhatola nino jarung pyasav tüv lona mmhonkacho mek. 7 Ontena kvüthüng nilo zonkacho sana nina onte khvürocho, osi onte zonküm lo ekhyipicho; elani onte echen jiang küplaecho. 8 Hoji tsükona enhungo, A, OPVÜI tsüphotso jina ni ezoaka, ana yonri ebenden khi ni hayathokuka osi ontena ni kyon osi ekümrümo jiang ni lüngthayivka. 9 Ejip meta jiha ntia n-liv ejüng ekachi sivka, osi tosanati nina Aiyo OPVÜI ji to a ntsivka. "Ntiotssole nina Nile zhükhfü jijo ni echhi osi nina nsüngrücho to phyocho. 10 Aiyo niri osi ni Nile zhükhfü ji rika. Ana Ejip ji totona meta ejüng nsüngrüi sivka; khümkiwoe Megdol yantsü lona benkae jüjowoe Asan nandang, Sudan erü ji rhünrhüa. 11 Ji sülojo nti kyon osi ekümrümo na hoji yakchia sanphiv meka. Nzyu zhüro jo ntina ha hojilo vamvü meka. 12 Ejip metaji limha shilo topvülo eyingkhükhutso ji kümthokuka. Nzyu zhüro jo Ejip lo yantsü jiang roe ekachi siv, yantsü thanpoe roe esio jiang lona n mhonka. Ana Ejip kyon jiang ji tsanthan kümthokvü. Ontena meta topvülo tsanroe oyi oyam kyon nzo vamvü." 13 OPVÜI tsüphotso jina phyoala, "Nzyu zhüro süloti Ejip kyon jiang ji ana jipo kvülo kvülo nzüroe onte sicho sana jiang lona nte solansi yivka, 14 osi Ejip meta jolowoe, kümoe jo onte metajüng sana jilo vanthokuka. Onteno hojilo jo etho n li ekhüng yan tssovka, 15 osi ekhüngyan jiang lo etho n litso ji tssov. Osi ontena kvüthüngha oyam ekhüngyan pono esapvüi tssolanchev mek. Ana onteji OPVÜI n tssothuk nrüngo ji yakchia ontena jipo kvüloha onte lümbüm erüngo tssünga yichev meka. 16 Israel jiang na kvüthüng ha ekyo erung tsükona ontelo n hyikalan. Ejip sükhying ji zesi hetüv jipolo enhikae evamvü jo kvütata worhyu tsüphov ato to Israel jiang nchümchelanthokvü. Hojito tssosanati Israel na Aiyo OPVÜI tsüphotso ji to a ntsiv."
Mesao Nebukadnezaar na Ejip ji Khyov
17 Metapoe tsanthan ekümo eyithoksi nzyu mekyusi mongoto choro jandemo jilo osi tsüngon ovüngo jilo OPVÜI na athüngi heto ajancho. 18 "Echüo kyon," osi ombona phyocho, "Babylon lo mesao Nebukadnezaar na Tyre ji hayav tsükona sakacho, tolea ombona ombo rasan jiang ji oha mmyingkhünga hanthukcho, hoji yakchia epvü mpa ephuka hancho, tokhatola ontena ezüptao ji man onte mesao tsükona tssolea, onte tsükona tssolea, ntia oman n licho. 19 Hoji tsükoan enhungo, A, OPVÜI tsüphotso jina heto phyoala: Ana Ejip meta ji mesao Nebukadnezaar thüngi piala. Ombona Ejip ji phanchoe ejüeli topvü rechoe ombo rasan jiang jokheman ejoena khiv. 20 Ombo elhi man ana Ejip ji ombo piala, ntiotssole ombo rasan jiang na a tsükona elhi tssoa vancho. A, OPVÜI tsüphotso jina hojito phyothaka. 21 "Kvüthüng hojito tssoa sana ana Israel kyon jiang ji etho jüa kümthokvü osi Ezekiel niha kyon topvüna ni zoyio tssoa ni nsanthokvü, hojito tsona Aiyo OPVÜI ji to ontena a ntsiv."
OPVÜI na Ejip Ezüp Piv
1 OPVÜI na elani phyolancho, 2 "Echüo kyon yo," osi ombona phyocho, "A, OPVÜI tsüphotso shina ntio phyoa vancho sana ji thenchoa zenkhyingyi phyoa, nina oyi jiang ji heto tüngsochivka: Ekhenthav tsüngon ji tsathaka! 3 Tsüngon ji enhyanthaka, kvüthüng OPVÜI na elhi tssov sana ji tsüngon ji, Jipo jiang tsükona emüng osi ezüp tsüngon ji. 4 Ejip metalo ritsso liv Osi Sudan lo ezüp phyingrüng liv. Ejip lo kyon elümoto lüngthav; Meta ji oyam na phanchov osi roe ekachi siv. 5 "Hoji ritsso jilona rasanden, Sudan, Lydia, Libya, Arabia, osi Kub to meta lona engochowo jiang lüngthav osi a meta kyon jiang ha lüngthanhyav." 6 OPVÜI na phyoala, "Khümkiwoe Megdol lona jüjowoe Asan jana Ejip nkhohae jiang topvüto ritsso lona lüngtharav. Ejip na longtsükata evamo onte rasan jiang rorüpi siv. A, OPVÜI tsüphotso jina phyothaka. 7 Meta ji limha topvü yulo yingsi-yinglo tsoji kümi sithoku, osi yantsü jiangji topvüto ejüktheta roe siv. 8 Ana kvüthüng Ejip lo omi theta sana osi ombo nkohoe jiang lüngthata sana, hojithüngti ontena Aiyo OPVÜI ji to a ntsiv. 9 Kvüthüng hoji tsüngon ji yia sana, osi Ejip ji roe sia sana, ontena n yilov mekana n hungkav evamo Sudan kyon jiang thüngi rhungtsü lona yithenpvüiden rothokvü osi onteji ekhentsüngkhamvü. Hoji tsüngon ji tsathaka! 10 Tsüphotso OPVÜI jina phyoala, "Ana Babylon mesao tsütsae Ejip ejüeli ji ochüm tssothoku. 11 Ombo tona ombo rasanden haruk-hashüi to jiang na metaji roe silo rov. Ontena Ejip ji yonri na yonkav osi meta ji echü müngna pyingu. 12 Ana Nile zhükhfü ji kyingi sithokvü osi Ejip metaji kyon n mhom jiang khelo theyiv, Metapoe kyon jiang na metaji mpüm na rolüpi siv. A, OPVÜI jina hojito phyothaka." 13 Tsüphotso OPVÜI jina phyoala, "Memphis kisü osi ejüngjüng potsow jiang ji ana roe siv. Osi Ejip ji esav tsükona ochia n vamvü siv, osi ana kyon jiang topvü ekhenrhükthoku. 14 Ejip meta jolowoe ji ana eyingkhfükhü na ekachi siv osi khümkiwoe Zoan yantsü jilo jo ana omi thev, osi ana Thebes yantsü yanpvü ji ezüp piv. 15 Ana Pelusiuim yantsü kümoe, Ejip lo rizümphen tsüphotso sana ji khi alümbüm etsuk ji chanchethokvü. Osi Thebes lo ejüeli jiang ana roe siv. 16 Ana Ejip lo omi thev osi Pelusium lo nungkhu-nungra lithoku. Thebes echung ji evümroe sithoksi yantsü ji ojüna evakchüthokvü. 17 Helipolis tona Bubastis to yantsü jian glo khyingroeden jiang ji ritsso lona chüthoku, osi kyon thanpoe jiango morantsan tssoa rumi sosi yiv. 18 Osi ana kvüthüng ontena kangtsüta evamo etho ji Ejip lona khi siyisi onte ekhüng ji ochüm tssoyia sana Tahpanhes pono emüngna elongkav. Ejip ji eluk emhenjü na eyukvü osi ompvü yantsü jiang topvü lo kyon jiang ji morantsan tssoa rumi hansi yiv. 19 Ana kvüthüng Ejip ji hetowoena ezüpthuka sana, tothüngti ontena Aiyo OPVÜI ji to a ntsiv."
Ejip Mesao Etho Tsaroe esio Ji
20 Metapoe tsanthan eyithuksi nzyu taro ekhasi choro ovüngo to jilo tsüngon tiyingo jilo, OPVÜI na heto ajancho. 21 "Echüo kyon," Osi ombona phyocho, "Ana mesao ewon ji ekhüpithaka, osi kyomoji mmhonlani etho khyonga kümi yonri tsakalamo tssoa ochinaha okhvü ji n yukayihan mekana okhe jilo osü ntssükae "ombo n yik-thuk han. 22 Hoji tsükona enhungo, A, OPVÜI tsüphotso jina heto phyoala: Aiyo Ejip mesao ji rika. Ana ombo khe ekhüpithako jiha, elani mmhomo jiha woniata ekhüpchakiv sala-osi yonri ji ombo khelona elongjov. 23 Ejip kyon jiang ji ana limha topvülo nzüi siv sala. 24 Hojito tssosi ana Babylon mesao kheji khyongkatuki a yonri ji ombo khelo theyiv. Tokhatola Ejip mesao khe jiango ana ekhüpchakiv, osi ombona ombo ri jiang mhadungona emhena erichi chüv. 25 Ho, ana etho ombo matakayiv, osi Babylon mesao jijo etho jükayiv. Ana kvüthüng a yonri ji ombo khelo theyisi ombona yonri ji Ejip thüngoe etsyuchia sana, otsük akvüna aiyo OPVÜI to a ntsiv. 26 Ejip kyon jiang ji ana limha topvülo nzonroe situkvü. Hoji süloti ontena aiyo OPVÜI to a ntsiv."
Ejip Ji Cedar Dunglo Etsitacho
1 Metapoe tsanthan tssoa eyithuksi nzyu taro ekhasi choro ethümoto tsüngon ovüngo jilo OPVÜI na a thüngi heto a jancho. 2 "Echüo kyon yo," Osi ombona phyolancho, "Ejip lo mesao tona ombo kyon jiang to thüngi heto ezoa: Nino kvütata etho licho ato! Ni thüngi ana ntio khi etsitav ato? 3 Nino Lebanon lo Cedar dung esüa tüv, Joyang joria emüngyan thav kümcho, Eluk emhenjü lia etssung jana ntssona tüv. 4 Hoji rankatukvü tsükona ojü jücho, Osi liko chungi na ojü pia evamo tüv licho. Odung jina rankata evamo metaji topvülo ojü jü nrhüa vancho Osi ora jilo odung jiang thüngi zhfükhfüro jü pia vancho. 5 Ntiotssole ojüna etsonthao ji yakchia, Odung thanpo jiang lona ntssonkata rankacho. Hoji khero jiangha khosha osi siphoa rankacho. 6 Worolan tarona hoji khero jianglo oshüp tssocho; Orae ekümrümo jiangna hoji khümchoe na rotsso ronicho; Limha shilo jipolan jiangna ha ombo khümcholo nkhüm nlhicho. 7 Odung jijo kvütata emüngyanthav ato! Elümoto ntssona osi ombo khero jiangha siphoa. Ombo ying jiangna zhükhfüro tsüa vamo ji süngjancho. 8 Potsow phari jilo nti Cedar dung naha ombo lo n tsitakuk. Nti nyitsodung na lia khero hetata n pa, Osi nti dung naha shümro hetata n khying. Potsow phari jilo nti dungha hetata emüngyanthav tüv n li. 9 Ana emüngyanthav khero jiangna ephyanzhüa tüv nsüngrücho. Potsow phari Eden jilo odung topvüna omhyik rakio tssoa ana nsüngrücho. 10 "Hoji tsükona enhungo, A, OPVÜI Tsüphotso jina odung kvümoe na elok jana rankacho sana jilo ntio kvüto tssov sanaji nte ezovka. Ombona kvütata ntssona rankacho sana jitata kangtsüa kümcho; 11 hoji tsükona ana khoe ombo sithaka osi ana metapoe esapvüi khi omho sathukvü. Ombo ntha-nri ji mana odung ji thüngi yantsov. 12 Haruk hashüi tsotso tüv metapoe kyon khi ombo danchüchüi ekachi ombo sithukvü. Ombo khero jako jiang tona shümro evümro jiang topvüji meta jilo phunglan osi hayi topvülo elongthetukvü. Jipo kvütatana ombo khümcholo nkhümnlhia vancho sana jiang topvüna ombo thüngina tsani yiv. 13 Woro jiangna khero elongcho jianglo oro eshom, osi orae ekümrümo jiangna khero jiang ponina sanphitav. 14 Hoji tsükona, enhungana benkae mhadungi jo odung motsünga na lea, elümoto jüjen tüv lo mpa zaleha, hoji siphoa tata jo siphoa rankav meka, mekana eluk jiang chyusochia osi etssunga tata ntssona rankav meka. Echüo kyon esüa onte topvü echüv zenkathaka, kvüta echü li chungi rheyitukvü zenkae vathakcho sana jiang onte nzo tssochevka." 15 Tsüphotso OPVÜI jina heto phyoala, "Tsüngon kvülo odung jina echüli rheyia sana, hoji nungra ejyuka ji ana liko chungi ojü ji khi ombo evakzhüthukvü. Osi ana zhükhfü jiang süasi vamü osi zhükhfü lümato lona ojü n tsütok. Osi odung ji chüthako ji tsükona, ana Lebanon meta jianglo phunglan jianglo emüng hansi yiv osi orae otssüng odung jiang topvü mmikae sithokvü. 16 Ana kvüthüng echüli ombo joyitoka sana ombo elongcho won jina limhalo jipolan topvü enhyokvü. Eden lo odung topvü osi ethüngcheo topvü, elani Lebanon lo otssüngodung kvütata ojüna etsonthata lyui rankatuksi echüli joyikhantukthachosana jiang topvüna ombo elongcho ji zesi emathatav. 17 Onte topvüna ombo nzo echüli ochoangna vanthakcho sana jiang nzo etssov tsükona jowo tav. Osi ochoang kvütatana ombo khümcho lo vancho sana jiang topvüto ji jipolan topvülo nzüroe siv. 18 "Odung ji ejyuka jijo Ejip lo mesao ji osi ombo kyon jiang topvü. Eden pharilo odungji tia ombo esüa siphoa osi hoji zesi lümbümo rhaka tüv mek. Tokhatola enhungo, Eden pharilo odung jiang esüa, Potsow n longtsüi ochoang ritsso lona lüngthacho sana jiang nzo etssov tsükona echüli chungi joyiv. Ana hojito phyothaka," to Tsüphotso OPVÜI jina phyoala.
Ejip lo Mesao Ji Erowo Thüngi Etsitala
1 Metapoe tsanthan ekümo eyithuksi nzyu taro enisi choro taro enioto tsüngon ovüngo jilo OPVÜI na athüngi elani ajancho. 2 "Ombona phyocho, "Echüo kyon yo" Eijp lo mesao ji thüngi ekyuyi ntanknshon heto mmyinga pia: Ninajo jipo jiang yulo Hingho esüa etso-ephyoala, tokhatola ni etso-ephyo ji ero na zhükhfüi na ojü ephakchukchia vancho esüa tüv. Nijo jiang na ojü ji chonchen kümthukala, osi zhükhfü jiang mmenthukala. 3 Kvüthüng jipo khosha jiang sanrhyua sana ana ngozonphen na ni eyukyae khi onte khi ngozonphen totona jütsae süa ni chiyithoku. 4 Ana likoe shümchukchi ni siv osi limha shilo woro woni osi ekümrümo topvü sani khi ni tsothokvü. 5 Ana ni echümüng ji kyon jiang khi phunglan hayi topvü lo nzüpyingthokuka. 6 Ni ejen jina phunglan osi zhükhfü topvü n tsü-pyingthüng nandang jo ana ni ejen ji phyangchochia erivka. 7 Ana kvüthüng roe ni sia sana ana oyak ji ha eyuku osi shantio jiang shüngzhüi siv. Eng jiha eluk jiang sülamo mphoe khi siv; elani choro jiha n vom siv. 8 Ana potsüwoe wondang topvü mhethuki siv osi ni limha ji emüngi thechiv. A, OPVÜI tsüphotso jina hojito phyothaka. 9 Ana kvüthüng roe ni esio yithen ji nina n zohamo meta jiang lo mpa nzüpyinga yithguka sana, jipo elümoto hojina khetsüv. 10 Ana ni thüngi ntio tssoa sana jina jipolan elümoto enhyokvü. Kvüthüng ana a yonri ji elhümphia sana mesao jiang ji ekyu lona eshüklamvü. Ni elungjo ji tsüngono jo onte topvü na ekyu lona onte eküm ji nchümi zesi enetav." 11 OPVÜI tsüpho jina Ejip lo mesao ji thüngi heto ezoala, "Nina Babylon mesao yonri ji tssükav ka. 12 Haruk hashüi jipolo rasanden jiang na onte yonri jiang khichei ni kyon jiang lüngthatokvü. Ni kyon topvü osi nina ntio kvütata khi ni kangtsüa vancho sana jiang topvü roe siv. 13 Ana ni tssiden jiang ji jükvü akvüto lona lüngthav. Ojü jiang ji chonchen kümtokvü tsükona kyon osi tssiden ochia enhyokae n vanthuk. 14 Ana nte jü jiangji jüngthetuki ntssünga kümthukvü osi nte zhükhfü jiangji noyingroa tsüthukvü. A, Tsüphotso OPVÜI jina hojito phyothaka. 15 Ana kvüthüng Ejip metaji eyingkhvürak na ekachi sisi hojilo evamo kyon jiang lüngthae sia sana ontena aiyo OPVÜI ji to a ntsivka. 16 Ekyu ntangshonyi shiji müngkya khen kümvüka. Limha shilo eloepvüiden jiangna Ejip osi hojilo evamo kyon jiang nungrakata okhen shi demvüka. A, Sandamo OPVÜI jina phyothaka."
Echüli Ji
17 Metapoe ephanchisi nzyu taro enisi choro ovüngo jilo osi tsüngon taro mungoto jilo OPVÜI na heto a jancho. 18 "Echüo kyon yo," osi mbona phyocho, "Ejip lo kyon hetata to evamo jiang tsükona nungra. Limha shilo jipo etho ejüi jiang onte nzo echüli joyithuka. 19 Osi onte ezoa: "Nina jo nino thanpoe jiang lona mmhonkata to nchüma alo? Echüli ni joyithukvüka osi hojilo Potsow !N tsi jiang nzo yipchi ; vamka. 20 "Ritsso lona ochoang lüngthae echüli vancho sana jianglo, Ejip kyon jiang na elongkavka. Onte topvü lüngthav tsükona yonri methaki vathaka. 21 Ritssolo thüngche ekhüng ochoangna Ejip kyon jiang thüngoe thekhi rotacho' sana jiang na echüli na onte elonchovka. Ontena heto tüngtav: 'Potsow n tsi ochoang ritsso lona lüngthacho sana jiang shilo joyirathaka, osi onte ji shilo erichirae lia!' 22 "Assyria ha jilo jüa ombo rasan khüp jiangna ombo hachümi lia. Onteno topvüto ritsso lona lüngtharacho, 23 osi onte khüp jiango echülikvü oküptso jilo lia. Ompvü rasan jiang topvüto ritsso lona eritheracho, osi onte lüp jiangna ompvü hachümi lia. Tokhatola tsüngon motsünga lojo eküm evan meta ji ekhentuka rocho. 24 "Elam ha jilo vana, ompvü rasan jiang khüp jiangna hachümi khi. Onteno topvüto ritsso lona lüngthakhancho, osi onteno tsenia n mvüchokvü echüli rheyiracho. Eküm evanthüng jo onteno ekyuesü chiyithungden tssocho, tokhatola enhungo onteno yikra khia chürae erichirae lia. 25 Elam ha ompvü rasan ochoang ritsso lona lüngthacho sana jiang yolo liehüngi okhüp jiangna ompvü hachümi erichi lia. Onteno topvüto n mvüchongden, osi. topvüto ritsso lona lüngtharacho. Eküm evanthüng jo ontena oyam ekhenlong-tokcho, khatola enhünga jo yikra khia echüi jiang yolo ritsso lo lüngthao jiang onte sükhying motsünga kümi erichirae lia. 26 "Meshekh ha Tubal oni ha jilo jüa, onte rasan jiang khüp jina onte hachümi lia. Onteno topvüto n mvüchongden osi topvüto ritsso lona lüngthacho. Tsüngon motsünga lojo ontena eküm evan jiang ekhenthuka rocho. 27 Nkolo ritssolo ekhüng jiango yikrachi pia ritsso pipo topvü hantuksi shothecho. Onte yonri jiang nkhümthukcho osi onte tsung jiangji onte müng poni ephvükayicho; tokhatola onteno hoji esüa yikrachi pia n shothe, Ekhüng shiango tsüngon motsünga lojo eküm evan topvü ekhenthuka vancho. 28 "Heto shi esüa Ejip kyon jiangji ejüpromoroe n mvüchong ochoang ritsso lona lüngthachosana jiang yolo erichiv. 29 "Edom ha ompvü mesaoden tona mesapvüiden to nzo hojilo jüa. Onteno ekhyo-ekhüng rasanden, tokhatola enhüngajo onteno tsenia n mvüchong ochoang ritsso lona lüngthacho sana jiang nzo echülikvüi erichirae lia. 30 "Khümkiwoe mesa tsokhying jiang ha topvü jilo jüa, Sidonia kyon jiangha jilo jüa. Yuta motsünga lojo onte etho jiangna oyam ekhenlongtukcho, khatola enhünga jo yikra khia ochoang ritsso lona chücho sana jiang onte nzo echüli esanta vana, tsenia n mvüchokvü. Ochoang na echüli rheyicho sana jiangna yikra ntuko ji shümnhya jilo vana. 31 "Ritsso lona echüo kyon jiang zesi Ejip mesao tona ombo i rasan jiang to lümbüm roroa to tssovka," to OPVÜI Tsüphotso jina phyoala. 32 "Ejip mesao ji ana eküm evan jiang ekhenthung ombo kümtukcho, tokhatola ombo tona ombo rasan jiang to topvüto lüngthae n mvüchong ochoang ritsso lona lüngthacho sana jiang nzo onte yipthukvü." Hojito OPVÜI Tsüphotso jina phyothaka.
Potsow na Ezekiel Ji Enhyang Tssothukala
1 OPVÜI na heto a jancho. 2 "Echüo kyon yo," osi ombona phyocho, "Ana meta motsüngalo ritsso hansi yiana ntio kvüto tssoa sana ji ni kyon jiang ezoa. Hoji meta jilo kyon jiang na onte yulo kyon ethüngche cheta vanthukala. 3 Kvüthüng ori jiang na tssükata roa ombona hunga sana, ombona ekhenlung won tssoa otsük akvü thüngi ntanknshon piala. 4 Osi otsük akvüna hoji zoaha n Ihümphina vansi ori na oro ombo lüngthata tssona, ombo echüo jijo ombo nlan piv. 5 Ombo echüo jijo ombo nlan, ntiotssole ntaknshonyi epio ji ombona zoa khatola ombona nkhokacho. Osi hoji yakchia ntssanchocho. 6 Tokhatola, echei jina ori jiangna onte tssungkata roa vanaha ekhenlung yivon ntia n pina vansi ori jiang na oro mmen kyon jiangji lüngthathuka tssona, onte echüo ji nlan ha jijo ana echei kyon ji hanthokvü. 7 "Hoji tsükona enhungo, echüo kyon yo, Israel jipo ji tsükona echei kyon ana ni kümthokvüka. Ana ntio ekyusü ntangnshonyi ni pia sana jiang kyon jiang thüngi hanjam shikhfü. 8 Ana n mhon kyon ji chüv saka to thenchoa ha nina hoji yithen ji ombo ezoa eküm dungphi ombo eküm ji n shanchothuka tssoana, tona omboji chüv, mmen kyon tssoa vanpvüna, osi ombo chüo ji haa ji ana ni hanthoku. 9 Tokhatola n-mhom kyon ji nina ekyu ntaknshonyi piaha ombona n tümjak na mmen tssoa vansi n khophina ombo chüa tssona, tona ni eküm jo ni nkümcheyivka."
Kija Eshanshan
10 OPVÜI na a ezocho. "Echüo kyon yo," Osi ombona phyocho," Israel kyon jiang na ntio phyota vancho sana ji elani onte ezolana: 'Ena ntio mmen osi siyluo tssocho sana jiangna e haji mmyingkathaka. Eiyo emona vanthaka. Ena kvütoli eküm vamvüla?' 11 Onte ezoa, otsotsola otssoto Aiyo eküm evamo Potsow, OPVÜI tsüphotso ji, osi ana mmen kyon chüa evamo ji achokacho mek, ji thungona jo mmen elhi jiang esansi eküm vanvo hoji a emathao, Israel kyonden, ntena n mhom tssota evamo jiang lona esantava. Nteno ntio tsükona nte chühungtala? 12 "Echüo kyon yo, enhungo Israel kyon jiang heto ezoa, kvüthüng kyon mmhom chüa sana ombona elhi mmhom etsso jiang na ombo n shanchoche. Osi mmen kyon jina mmen elhi etsso jilona esana tssona, ombo ezüp n pi, tolea kyon mmhom jina mmen benkae tssoa tssona ombo eküm ji n valancheyiche. 13 Ana kyon mmhom jiang thüngi eküm epiv phyochaki vakhuka, tokhatola ombona elhi mmhom tssoa rothako ji tae nalea tssochyu thaka to nchümi mmen elhi benkae tssoa tssona, ombona elhi mmhom tssoa rothako jiang ana motsüngalea ombo nchümcheyiv meka. Osi ombo n thanri n mhom ji tsükona mbo chüvka. 14 Ana kyon nthae ji ni chüv ka to ekyusü mpa ezoe likhuka, tokhatola ombona elhi n mhom etsso ji sisi, ntio jo elan sanaji benkae tssoa tssona. 15 Ejyukaena, ombona orang oyam eno ji ntana nkohotsen khio ji pilana tssona, mekana ombona ntio efücho sana jiang pilana tssona-osi elhi n mhowom etsso ji esansi eküm yancheo shikhfü jiang benphia tssona ombo n chü, tolea eküm vanthukhuka. 16 Ombona mmen tssothako jiang ana nlan ombo siyiv, osi ombona eküm vamvü ntiotssole ombona ntiojo elan osi mmhoncho sana ji tssocho. 17 "Nte kyon jiang najo ana ntio tssoa vancho sana jijo elan mek to phyotala! Hojito mek, Ontena dungta evamo lan ji nlanchokha. 18 Kvüthüng ntsa kyon jina mmhom etssov ji sisi n mhom benkae tssoa sana, hoji tsükona ombo chüvka. 19 Osi kvüthüng n mhom kyon jina mmen elhi ji esana sana osi ntiojo elan osi mmhoncho sana ji benkae tssoa sana, ombona ombo eküm ji shanchothaka. 20 Tokhatola Israel kyonden, ana ntio tssoa sana jijo n lan to ntena phyotala. Ntena ntio tssoa sana jiang khi ana oyi nte tssoyiv sala."
Jerusalem Elongchovo Ji Yithen
21 Metapoe tsanthan ekümo eyithuksi nzyu taro enisi choro tarosi tsüngon mungo to jilo Jerusalemi na tsanchoe eyi kyon tsükana yantsü ji joyi sithaka to oro a ezocho. 22 Ombona ojyua rov to mmyui, emhokthav OPVÜI vanhya etho ji ana chanchecho, osi ojyuato kvüthüng kyon jina oro ajancho sana oyi nsancheo etho ji OPVÜI na apilancho.
Kyon Jiang Mmen Jiang
23 OPVÜI na heto a jancho. 24 "Echüo kyon yo," Osi ombona phyocho, "Kyon ochoangna Israel meta roe elio yantsü jilo vanta vancho sana jiang na heto phyoala: Abraham jo kyon tsüka tae, tokhatola meta totona ombo picho. Eteno ete elümoto, küma meta shijo enhungo ete echi.' 25 A, OPVÜI Tsüphotso jina, ntio phyoa vancho sana ji onte ezoa: Ntena oso jiang ji ejen njüpa tsotala. Ntena kisüha khümtala. Ntena müngtsso münghanala, to tssona ntio kvütoli meta jijo nte echi to nchümtala? 26 Ntenajo nte yonri jianglo enhikatala. Nte elhi jiang jo etssaknkungthav. Nte otsük akvüna efürama tssotala. Tona ntio yakchia meta jijo nte echi to nchümchechola? 27 "Heto onte ezoa, A, OPVÜI Tsüphotso eküm evamo Potsow na otsotso onte ezoaka, kyon kvütata yantsü roe elio jilo vanta vancho sana jiang topvüto onte lüngtharavka. Osi ochoang kvütata na oyani vancho sana jiang orae ekümrümo na onte rümtsoravka. Osi ochoang phungalani tona longkvüi to mphota vancho sana jiango nochoncori na chürav. 28 Ana liphungtsü ji mpüm roe eyingkhükhüna ekachi siv, osi ontena kangtsüta erovo onte etho ji ochüm tssothokvü. Israel phunglan jiang ji enungtsü kümthokvü osi ochi naha hojiang yakchia n yentsachev siv. 29 Ana kvüthüng kyon jiang ji onte mmen jiang tsükona ezüp pia sana, osi onte metaji sirhaki ekachi onte siyia sana, tothüngti ontena Aiyo OPVÜI ji to antsiv."
Zenkhying Yithen ji Tsüngthi
30 OPVÜI na phyocho, "Echüo kyon yo, ni kyon jiangna ontena kvüthüng yantsü pikhfü jiang lona ndukta sana mekana ontena kipüngi nkyaki hapoe chiwoa sana ni phyophitala. Ontena heto phyotala, 'OPVÜI thüngina ntio yithen yithakcho sana ji etena owo engatavka.' 31 Hojito a kyon jiangna nina ntio phyov sana ji engalo jeta rotala, tokhatola nina ntio tssoto onte ezoa sana jijo ontena n tssotala. Onte menfü lona jo oyi mmhom tae chiyiala, tokhatola ontena onte ebiera lanji tae dungta vanala. 32 Onte tsükona jo nino onte ematha longshithokvü tsükona zhükhen theta nzanta khen ekhüi esüa totae. Ontena ni yi mmhom jiang engala tokhatola motsungatia ontena n benphiala. 33 Tokhatola kvüthüng ni yi jiang ji ntsa küma sana osi onteha ntsa jilo yia sanatothüngti onte yulo zenkhying vancho saya toji ontena ntsivka."
Israel Enhyangden Jiang
1 OPVÜI na athüngi heto ajancho. 2 "Echüo kyon yo," osi ombona phyocho, "Israel lo esapvüiden jiang khoe sia. Onte thüngi zenkhyingyi phyoa osi A, OPVÜI Tsüphotso jina onte thüngi ntio phyoa vancho sana ji onte ezoa: Nte Israel rhükiden, nteno nte monthoku methaktaka. Ntena ntebobo tae ntangshonsi nte olyu jiangjo kvüthünga n zeya. 3 Ntena onte shirojü jiang yuala, osi onte tsan jiang lona osü chiyio jiang ji ntena mpentala, osi olyu yulo mmhontso jiang ji ntena lüngthae tsotala. Tokhatola ntena kvüthüng ha olyu jiang n sükümsüri. 4 Npenzio olyu jiangji ntena n zeya, nochonorio jiang ha ntena n myiyi; osi tssatsoe evamo jiang ha okhfü jiang n yukayi; tsanmhio jiang ji solansi n yi, mekana moni evamo jiang n yan. Hojto tssothüngjo ntena haruka onte tsütsatala. 5 Olyu jiang ji enhyang n vamo jina ezonsorae sicho, osi orae ekümrümo na rumi tsocho. 6 Hojito A, olyu jiang ji phunglan ntssom osi yingsüng jiang lo rümphita yi-sicho. Onteji limha topvülo ezonsorae sicho, osi ochinaha onte n yan mekana yanchev ekhyo n tsso. 7 "Hoji tsükona enhungo nte olyu enhayangden, A, OPVÜI shina ntio nte ezoa sana ji engatva. 8 Otsotso-tola otsotso Aiyo eküm evamo Potsow, küma ntena Ayi engavo hoji mmhomo tssov. A, olyu jiang ji orae ekümrümo na hayae rumi tsocho, ntiotssole onte enhyang n vancho. A, olyu enhyang jiang na olyu jiang yanchev ekhyo n tsso. Ontena onte bobo süphitasi olyu jiang jo n lümbümcho, 9 Hoji tsükona nte olyu enhyangden, engatava. 10 A, OPVÜI tsüphotso jina nte ezoaka; Aiyo nte ri-ka. Ana olyu jiang ji nte thüngi na khi hansi yivka, osi kvüthüngha onte enhyang nte tssothukalam meka; elani kvüthüng ana nteji nte bobo tae nte süphilümbüma nte vanthokvü meka. Ana a olyu jiang ji nte khe lona nrhachoe khiv osi nte n tsothuk.
Olyu Enyang Mmhom
11 "A, OPVÜI Tsüphotso jina nte ezoaka, ana apopo A olyu jiang yamvü osi ana onte ntangshom 12 kvüto olyu enhyang mmhom jiangna tsanmhio jiang mpato tssideni solansi oyi süphi lümbüma sana ji esüa tssovka. Ezüp osi emüng tsüngono tsanroe meta nzüi esio meta jiang topvü lona ana onte solansi yivka. 13 Metapoe, liphongtsü jiang lona ana onte sochev osi onte sanrhyuthoki onte metae solansi yiv. Ana phunglan jianglo onte solansi owo Israel metalo zhükhfü mmhom jianglo onte sosi wov osi eroyu yantsophen mmhom jianglo onte yantswothukvü. 14 Ana onte ji khetsü n lio phunglan osi phenlong jianglo onte yantswothukvü osi Israel metalo hayitsü eroyu mmyakvü mmhom lio jianglo sosi owo onte yantswothukvü. 15 Ana apopo A, olyu jiang enhyakpvüi tssov, osi ana esanphen mmhom onte yaniv. A, Tsüphotso OPVÜI jina phyothaka. 16 "Moni evamo jiang ana yamü, tsanmhi evamo jiang solansi yiv, osi ochoang tssatsoe vanchosana jiang okhvülo yukayiv, osi nochonoria evamo jiang onte emiyiv; tokhatola beleta osi etho jüa evamo jiangjo ana roe onte siv, ntiotssole Aiyo elan etssovo olyu enhyang ji. 17 "Hoji tsükona enhungo, a tssiden, A, OPVÜI Tsüphotso jina nte ezoaka ana nte otsük akvüto oyi nte tssoyivka osi mmhom tona n mmhom to khotathukvüka, olyu tona nyanyan to khosotathukvüka. 18 Nte ejoma jo ero mmhontso ji tso jina nte lümbün n pük; osi ntena n tso jiang mpato sümroe siala! Ojü ntssüngo jiango ntena yusi ejoma jo chonchen nnhyoni siala! 19 A, olyu ejoma jiango ntena süroe esio ero jiang etsovo osi ntena ochon nhyonthechi emhümthuki esio jiang eyuo tssola. 20 "Hoji tsükona, enhungo, A, OPVÜI Tsüphotso jina nte ezoaka, ana etho ejüi olyu tona etho mekameshüi osi n khyoe jiang to yutalo oyi nte tssoyivka. 21 Otsük n mhon jiang echonga lojo ntena otssawoe etsüngchokchi sicho osi tssiden yolona phanchokchi sicho. 22 Tokhatola enhungo ana a olyu jiangji shanchov osi onte ji elani nte khi n khontsüngthuklan. Ana a olyu jiang otsük akvüto ejyui zesi mmhomo jiang tona n mhomo jiang to khosotayiv. 23 Ana a phajae David esüa tüv mesao khi onte enhyang tsswothukvü osi ombona onte zeyata süphilümbümvü. 24 A, OPVÜI shina onte Potsow tssov osi mesao esüa a phajae David khi onte esapvüi tsswothukvü. Ana hojito phyothaka. 25 Ana onte eküm nkohacheo yilan khi onte thüngi ntsata vav. Ana meta jilona ekyuv elio eküm rümo jiang topvü khi siv; to tssona, a olyu jiangna oli jianglo noyingroa vanchev osi orae lea ekyu n lina yipchev. 26 "Ana onte mmhayiv osi a ntho phunglan jiang nkona onte vanthukvü. Hoji lona ontena kvüthüng ethev lia sana mmha eryu jothuki onte mmhayiv. 27 tssüngthidung jiang ji tssüngthi ethithukvü, oli jiang lona tssukro-mümrwothukvü, osi otsük akvüto na ombo metalo nkoho lia eküm vanthukvü. Kvüthüng a kyon jiangji ochoangna onte sheni ezii ekümo vantoka vanchosana jilona ana etancholo onte vachiv osi jithüngti ontena aiyo OPVÜI ji to a ntsivka. 28 Potsow n longtsüi jipo jiangna elani onte n phanlan, osi orae ekümrümo jiangna ha onte rumi n tsolan, Ontena nkoho lia vam osi ochinaha onte n khenthuk. 29 Ana liko lizü jitüv jiang onte piv, osi meta jilo vonton era ji ochüm tssoyiv. Jipopoe jiangna elani onte n menlan mekana onte nkhonlan. 30 Otsük akvüto na ana Israel ji nkohoala osi onteno a kyon to ntsiv. A, OPVÜI Tsüphotso jina hojito phyothaka. 31 "Nte a olyu, ana süphio tssiden den, nteno a kyondenka, osi aiyo nte Potsowka," to Sandamo OPVÜI jina phyoala.
Edom Pono Potsow Ntsonshi
1 OPVÜI na heto a jancho. 2 "Echüo kyon yo," osi ombo na phyocho, "Edom liphungtsü ji khoe sia phyoa. 3 Osi A, OPVÜI Tsüphotso jina ntio phyoa vancho sana ji kyon jiang thüngi ezoa: Aiyo nte rika, Edom lo phunglanden! Ana eyingkhükhüna ekachi nte sivka. 4 Ana ni yantsü jiang roe ekachi sivka. Osi ni metajiha eyingterük na ekachi siv; Hoji süloti ntena Aiyo OPVÜI ji to a ntsivka. 5 "Nino yuta topvülo a ri tssoa rocho osi ompvü ezüp phyingrüng yuta lo kyon jiang lüngtharüpthukcho; ompvü mmen jiang yakchia ezüp pikhao ji hoji tssocho. 6 To tssona otsotso tola otsotso to Aiyo OPVÜI na eküm evamo Potsow jika tolea echü jijo nte ejankaosi ntena hojilona n tsanchoche. Ntelo münghan nlan lia osi müngtssomünghan na nte phanphivka. 7 Ana Edom yondoni oyan jiangji eyingterük na ekachi siv osi ochoangna hoji yakchia yentsa sana otsük akvüto lüngthav. 8 Ana phunglan jiang echümüngna pyingthukvü, osi ochoang kvütata ritssolona chüchosana jiang müngna phunglan osi hayi jiang pyingthukvü. 9 Ana nchünkhon tsükona eyingterük na ekachi ni siv. Osi nte yantsü jianglo ochinaha n vanlan. Hojito tssona nteno aiyo OPVÜI ji to a ntsivka. 10 "Jipo eni Israel tona Juda to OPVÜI Potsow jo A khatola, nina onte osi onte meta jiang thenhya ni echi, osi nina hoe onte khiv to phyocho. 11 Hojito tssoa tssona, otsotso aiyo eküm evamo OPVÜI Potsow Tsüphotso jika, osi a kyon jiang pono ni lümbüm etsuk, ni etssak-nkong, osi ni mhyiktsso raki ji man ana ni pilamka, osi nina ntio onte pono tssoyichosana ji tsükona ana nte pono ezüp nte piala toji ontena ha ntsivka. 12 Hoji süloti ntena Israel phunglan jiangji n kha n ziv, hojiang jo roe ekachi sivka osi ntena roe sivkato phyotao ji a OPVÜI shina nte zoyicho toji ntena ntsivka. 13 Ntena lümbüm tsükshia apono kanchana nsantao ji ana zothaka." 14 OPVÜI Tsüphotso jina phyoala, "Ana eyingterükna sirhaki nte siv, osi nte joyio ji limhatsüna longshivka. 15 Ntena kvüto a echi Israel ji monathüng nte emathacho sana ji esüa. Seir phunglan, osi ho, Edom lo meta topvüto eyingkhfü-khfüna lyui siv. Hojito tssona otsük akvütona aiyo OPVÜI ji to a ntsiv."
Israel Pono Potsow Mmha
1 OPVÜI na phyocho, "Echüo kyon yo, Israel lo phunglan jiang thüngi jana osi yithen kvümoe, 2 A, OPVÜI Tsüphotso shina onte thüngi ntio ephyov lichosana ji engatale to onte ezoa: Israel ri jiang na owon tssoa heto phyotathaka, 'Enhungo nkolo yingsüng ntssomo jiangjo ete echi kümthaka!' 3 "Hoji tsükona zenkhyinga, osi A, OPVÜI Tsüphotso jina ntio phyoa vanchosana ji thenchoa phyoa. Kvüthüng onte nkonphia evamo jipo jiangna Israel phunglan jiangji hayae, phanchoe khicho sana, onte topvüna Israel ji yikvü-yilocho. 4 Hoji tsükona enhungo nte phunglan, osi yingsüngden A, OPVÜI Tsüphotso jina ntio nte ezoa vanchosana ji engatava, nte zhükhfüro osi likok jiangna ha engatava, osi nte meta kvütata roe lichosana, elani nte yantsü kvütata nte nkonphia evamo jipo jiangna phanchoe, nchukata eyingkhfükhfü na ekachi sichosana jiangna ha ana ntio nte ezoa sana ji engatava. 5 "A, OPVÜI Tsüphotso shina a lümbüm etsuk etsyu yutalo, nte nkonphia eyamo jipo jiang thüngi heto phyothaka; osi echümporo tssoajo, Edom pono. Ontena etssang-nkong osi haruk khi a metaji hayae yantsophen mmhom jiang khicho. 6 "Hoji tsükona Israel meta ji thüngi zenkhying yi phyoa; osi phunglan jiang, yingsüng, zhükhfüro osi likok hayi jiang topvü thüngi A, OPVÜI Tsüphotso shina, onte nkoa osi oyilo theyia lümbüm etsuk yi ntio phyoa vanchosana ji onte ezoa, jipopoe jiangna ntio lanka kvütowoe na onte yikvü yiloa osi onte tssethechia etssophyocho sana ji tsükona onte ezoa. 7 A, OPVÜI Tsüphotso jina otsotso mmyinga heto echümchakala, nte nkonphia evamo jipo jiangji makkhomvü osi yikrathukvü. 8 Tokhatola Israel phunglan jianglo tssüngthidung jiangna elani owo chenlani tssüngthi nte ethiyivka, a kyon Israelden. Nteno nsungkhüngu okiwoe yivka. 9 Ana nte thüngoe tssothaka, osi ana liko jiangji nte rhonlanthuki mojü nte thethukvüka. 10 Ana nte ji wotssona nte kümthukvüka. Ntena yantsü jianglo vamvü osi ntio kvütata roe licho sana jiang topvü nte tssolanthukvü. 11 Ana tssiden osi kyon owo jiang rankata yithukvü. Vanta yithako jiang lona wotssonka nte kümthukvü osi nte lona otsoe oro elümoto thichev. Ntena vanta yithako ji esüa ana elani hojito nte vanthukvüka, osi ovüngthüng lona elümoto jü-olikata nte kümthukvü. Hojito tssona ntena aiyo OPVÜI ji to a ntsiv. 12 Ana, nte Israel kyon jiangji nte meta jilo evam tsükona nte solansi yivka. Hoji meta jijo. nte echi tssov, osi elani kvüthüngha nte ngaro jiang n khangthuklan. 13 "A, OPVÜI Tsüphotso jina, phyoala: Kyon na meta jijo kyon rümtsoe meta to phyoala, elani meta jina jipo jiang tsoe-oro topvü rechoe khiyiala to phyotao ji otsotso. 14 Tokhatola, enhüngana benkae meta jijo kyon rümtsoe osi nte ngaro jiang rechoe nte khiyio tüv tssov meka. A, OPVÜI Sandamo jina hojito phyothaka. 15 Jipo jiangna, yikvü emakata osi kyon jiangna ndeta evamo jiang ji meta jina elani khi n ngalan, osi meta jina jipo ji tsoeoro jiang elani n rechoyilan. A, OPVÜI tsüphotso osi Sandamo jina hojito phyoala."
Israel Jiang eküm Ethan
16 OPVÜI na heto a jancho. 17 "Echüo kyon yo," osi phyocho, "Kvüthüng Israel kyon jiangna meta shilo vancho sana onte vanlanyilan osi etsso-ephyo jina metaji mmenthukcho. Onte etsso-ephyo jiangji, eloena onte choro yutalo n tssüngrüngo ji esüa n tssüngrüng to ana khanhyacho. 18 Osi onte müngtsso münghan elhi jiang tona ontena kisü khüm kvümoe khi metaji mmenthukcho sana jiang tsükona ana a lümbüm etsuk etsyu ji onte chanchethukcho. 19 Onte vanlanyilan osi etsso-ephyo jiang tsükona nlan pia khoe onte sicho, osi liphongtsü topvülo na nzüroe onte sicho. 20 Osi ontena kvülo woa sana ontena a ntho mying ji mmenthukcho osi yikra hansi yicho, ntiotssole kyon na phyotacho, 'Shiangjo Potsow kyonden kasi onte meta ji sisi eyio lyuchecho.' 21 Hoji yakchia a ntho mying ji tsükona a nchümthukcho, ntiotssole Israel jiangna meta ji pono yikra hansi yithukcho. 22 "Hoji tsükona enhungo, A, OPVÜI Tsüphotso shina onte tsükona ntio yithen ephyov lichosana jiang ji Israel jiang thüngi ezoa: Ana ntio tssov vanchosana jijo nte tsükona meka Israel den, tokhatola a ntho mying kvümoe ntena meta kvülo woasana jiang topvü lona mmena wotacho sana ji tsona. 23 Ana kvüthüng jipo jiang thüngi a mying tsüpho ji kvüto. ntho cho sana ji ejüa sanaomying kvümoe ntena terithuka mmenthukcho sana hoji süloti ontena, Aiyo OPVÜI ji to a ntsiv. Hojito A, OPVÜI Sandamo, shina phyothaka. Ana nte tsütsata, jipo jiang thüngi Aiyo ntho toji ejüvka. 24 Ana jipo akvü lona osi liphongtsü topvü lona nte solansi nte meta jilo yivka. 25 Ana ojü ntssüngu nte erhikata nte kisü ekhüm osi olan taro kvümoe na nte mmenthakcho sana jiang lona nte ntssüngchevka. 26 Ana lümbüm ethan osi nchümri ethan nte pivka. Ana nte lümbüm olong esüa khünga evamo ji khi nte siyisi, jancho ezo lümbüm nte the yivka. 27 Ana a mon ji ntelo theyiv osi ana ntio yizüng osi shikhfüniro nte picho sana jiang nte benphithukvü. 28 Hojito tssona ana nte motsüi jiang thüngi epio meta jilo vanchev. Osi nteno a kyonden tssovka, osi Aiyo nte Potsow tssovka. 29 Nte mmemo lanka jiang topvü lona ana nte shanchov. Ana tsünghonro omüm jiang thüngi pvülyua ethi-ebem tsükona yizüng piv, hojito tssona elani nte yulo tssikang hangkhang n lilan. 30 Nte tssüngthidung jiang ji ana kyongkata ethi-ebenthukvü osi nte li jiangha kyongkata richwothukvü, hojito tssona nte yolo tssikang hangkang n lilan osi jipo jiang na nte n zerüp. 31 Nte elhi mmhon jiang osi ntena worhyu elhi etsso jiang ntena nchümchev, osi nte nlan n mhon jiang osi mmen jiang tsükona nte bobo tssak-nkonga nchümvü. 32 Israel kyonden, ana shiang heto etsso shiang ji nte tsükona mekna tssoala toji ntekhi a ntsithuk hungala. Elani nte khi yikra osi khonzan to ntsso elhi ntio ntena tssota vancho sana jiangji nte khi chanchethuk hungala. A, OPVÜI Tsüphotso, jina hojito phyoala." 33 OPVÜI Tsüphotso jina phyoala, "Kvüthüng ana nte mmen jiang topvü lona nte ntssüngcheta sana, Ana nte yantsü jianglo nte vanthuklam osi roe elio jiang nte tssolanthukvü. 34 Ochoang kvütata na nte li jiang yakchia sanphicho sana jiang topvü na nte li jiangji kvüta ora küma ranzhüi sithukcho sana jiang ji hunga, tokhatola hojiang ji ana elani nte jonlanthükvü. 35 Osi otsük akvütona heto phyov, kvütoli romhon ratsü kümi esio meta shiji Eden phari esüa kümthukcho ato, osi yantsü kvümoe eyingterük na roe, phanchoe osi retsosi ekachi esio jijo kvütoli enhüngajo kyon na vanzhüa osi pikhfüzhüi sithakchoto to phyotav. 36 Hoji sülojo nte füchüma evamo jipo ochoang eküm vancho sana jiangna otsotso liko ejüngekachi esio jiangji, A, OPVÜI na oli zathuklana osi yantsü jiangha tssochoala to ji ntsiv. A, OPVÜI na shiangji tssov to echümchakala osi; ana hojito tssov." 37 Tsüphotso OPVÜI jina phyoala, "Ana Israel kyon jiang ji a thüngi nzanchi chonthukvüka, osi ana onteji olyu tssiden esüa wotssona onte rankathukvü. 38 Osi yantsü kvümoe enhünga roe elio jiang kvüto yuta motsüngalo Jerusalem ji olyu tssiden na pyingi-tokhu yutalo othan tssotacho sana ji esüa kyon khi pyinglanthukvü. Hojito tssona, ontena Aiyo OPVÜI ji to a ntsiv."
Oryu Na Pyingo Hayitsü
1 OPVÃœI emhukthav etho vanhya ji ana chanchecho, osi ombo mon jina a sosi hayitsü kvülo oryu sangchecho na pyingi lichosana jilo jowocho. 2 Ombona hayitsü ji füphia a sosi wotacho; Osi ana oryu mpenkhio tata hungcho osi onteji topvü to kyinga tüv to ana hungcho. 3 Ombona azo cho, "Echüo kyon yo, oryu shiangna elani eküm kümlankhukcho alo?" Ana janlancho, OPVÃœI Sandamo, ni tae na hoji janlankhuka!" 4 Ombona phyocho, "Oryu jiahg thüngi zenkhyinga, oryu ekyingo shiangji A, OPVÃœI yi engata to onte ezoa. 5 Osi OPVÃœI Tsüphotso jiha heto phyoala to onte ezoa: Ana ntelo ethük mhüthechiyiv osi eküm nte kümlanthukvü sala £o, 6 Ana etho osi oso nte piv osi ofü khi nte eyukzhüv. Ana ntelo ethük nte theyiv osi elani eküm nte kümthuklamvü. Hojito tssona ntena aiyo OPVÃœI to ji a ntsiv." 7 Hojito a ezo ji ephan ana zenkhyingcho. Osi ana hojito zenkhyinga vanathüngji karakta won ana zocho, osi oryu jiang na onte bobo chüngtav benkacho. 8 Ana zeta vana taena, oryu jiang jioso osi etho ozü na pyingcho, osi ofü na hoji eyukzhülancho. Tokhatola otsük jilo etho n jücho. 9 Potsow na a ezocho, "Echüo kyon yo" mbung ji thüngi zenkhyinga. Osi mbung ji nken topvü lona yile to OPVÃœI tsüphotso jina yidan piala to ezoa; osi tsükchü shianglo ethük theyia. Osi onteji eküm kümlanthuka." 10 Hoji tsükona a ezoji esüa ana zenkhyingcho. Osi otsük jianglo ethük rheyi ontena phanthicho. Osi onteji rasan okho lea soyingkhuka tata tssocho. 11 Potsow na a ezocho, "Echüo kyon yo," Israel kyon jiango oryu shiang esüa tüvka. Ontena phyoala, onteno kyingkathaka, eyilo osi onte ochyu ovüng n lito. 12 Hoji tsükona akyon Israel jiang thüngi zenkhyingyi ezoa. A, OPVÃœI tsüphotso jina onte okhüp jiang chonchiv sala osi ana onteji khiche Israel meta jilo solansi yiv sala. 13 Ana kvüthüng akyon juthei elio okhüp jiang ji chonchi onte khichuka sana, ontena Aiyo OPVÃœI ji to antsiv. 14 Ana ethük ji ontelo theyiv osi elani onte kümlanthoku, osi onte meta jilo onte vanthuklam. Hojito tssona Aiyo OPVÃœI ji to ontena antsiv. Ana heto tsov to echümchaki lia küma ana tssov. A, OPVÃœI shina hojito phyothaka."
Juda Tona Israel Toji Ekhüngyan Motsünga Kümala
15 OPVÜI na elani heto ajanlancho. 16 Ombona phyocho, "Echüo kyon yo," "Otssüng jarung motsünga khi jilo heto erankata, 'Juda ekhüngyan.' Jisülojo elani jarung motsünga khilani heto erankata, "Israel ekhüngyan.' 17 Hoji sülojo jarung eni ji ochüm jiang ji woniata ni khena zümtsüa rhümata to tssona eni ji tssüngtsüka esüa zechevka. 18 Osi kvüthüng ni kyon jiangna ntio yichak sana to ni enga sana. 19 Heto ezoa, A, OPVÜI Tsüphotso jina, jarung kümoe Israel to erankacho sana hoji khi, Juda thung tssothoku jarung jilo chüngkav sala. Osi ana jarung eni ji tsotsüi jarung motsünga kümthoki a khena rhümav. 20 "Ni khelona jarung eniji rhümasi kyon jiang khi hungthuka. 21 Hoji sülojo A, OPVÜI tsüphotso shina a kyon jiang ji ontena oyi evamo jipo jiang topvü lona onte khichev, osi onteji nzo hahrhyuv, osi onteji elani onte metalo solansi yiv. 22 Ana onteji onte meta jilo osi Israel phunglan jianglo onte tsarhyui motsünga kümthoku. Tothakana onte esav tsükona mesao tsüka tae vamvü; osi onteji ekhüngyan eni n chichelan. 23 Ontena etssakthav kisü jiang khi ontebobo n menlan mekana mmen khi onte popo n yesolan. Onte mmemo lanka osi a khaksio lanka jiang topvü lona ana onte lanchiv. Ana onte ntssüngchev osi onteno a kyon tssov osi Aiyo onte Potsow tssov. 24 Mesao esüo a phajae David na onte esapvüi tssov. Onteji esapvüi tsüka küpona topvüto khüngtsütav osi a shikhfü jiang longtsüka lia benphiv. 25 Ana a phajae Jakob epio meta jilo ontena vamvü; meta kvülo onte motsüi na vancho sana jilo. Hojilo ontena nchünkhonto vamvü osi onte tsoronichen jiang naha hojilo vamvü. Osi aphajae David esüa tüv na nchünkhonto onte sav. 26 Nchünkhnto onte nkoho picheo jitüv ana onte thüngi ntsata vav. Osi ana onteji vanjüng tssothoki wotssona onte kümthoku osi onte metalo khümphen tssokachiv osi hojijo nchünkhonto liv. 27 Ana hojilo onte ndüngo vamvü; Aiyo onte Potsow ji tssov osi onteno a kyon tssov. 28 Ana kvüthüng onte yulo kümali ekhümki tssokachia sana, tosanati jipo jiangna Aiyo OPVÜI toji antsiv, osi Israel jiango a kyon osi ana onte ethüngchecho toji ntsiv."
Gog Ji Potsow Ebensü Esüa tsütsacho
1 OPVÜI na heto a jancho, 2 Ombona phyocho, "Echüo kyon yo," "Magog metalo Meshekh tona Tubal jipo to jiang esapvüi tsüphotso, Gog ji khoe sia. Khoe khi ombo sia, 3 Osi A, OPVÜI tsüphotso jijo ombo ri-ka to ezoa. 4 Ana ombo khoriphiv osi ombo khokalo okhfü ombo yikayiv, osi hoji lona ombo tona ombo rasan jiang toji onte süsi yiv. Ombo rasantsü jiang, osi onte kurü tona onte khetio-sü hansi kurü mankvüina eyungo jiango ekhenthav tata, osi onte otsük akvüna otsung bena osi yonri hana. 5 Persia, Sudan osi Libya to kyon jiang ombo ndüngo jüa. Osi onte topvüna otsung tona kvüri ekhüp to hanrava. 6 Khümkiwoe Gomer tona Beth Togarmah to meta lona rotalo rhowoe kyon elümoto ombo ndüngo jüa, osi hojito jipo thanpoe jiang kyon ha ombo ndüngo Jura. 7 Methakleto ombo ezoa, osi ombo rasan jiangha ombo yizüng khi methaktokle to ezoa. 8 Nzyu sungsanati, jipo motsünga meta elümoto lona sosi oyi tssorhyui vanthukcho osi ritsso ekyu ntia n lina vancho jitüv owo phanle to ana ombo ezovka. Ombona Israel phunglan jiang phanchov, meta kvümoe yuta elümoto sunga eyingkhfü-khfüna ekachi sisi, enhüngajo kyon jiangna oyi vanzhüi ekyuv n lina vanta vancho sana jitüv meta. 9 Ombo osi ombo rasanden, elani ombo ndüngo jipo kvütata na thei vanchosana jiangna, tsyungryu vena esüa onte hayav osi elok emhenchü esüa tüv na meta ji eyokzhüv." 10 Shi heto, OPVÜI tsüphotso jina Gog thüngi ezoala: "Kvüthüng yuta ji janasana nina okyak n mhom lan taro benkae nchümkhoka. 11 Pikhfü n lio meta osi n kohocheo yan kvüloshi kyon jiangna noying osi nkoholo sunga vanthakcho sana jitüv meta nina ehav tsükona methakvü, 12 yantsü kvümoe yuta motsünga lojo roe sisi tsocholani vanta vancho sana jiang kyon jiang ji nina owo phani retsoyiv. Onteno jipolan topvü lona khyarhyucho, tokhatola enhungo ontena ekümrümo vana, ejüeli lia elani limha lanrhyu lo vantala. 13 Shiba osi Dedan kyon osi Spain yantsü jiang lona shishoe jiangna ni engav, nina oyam phani retsoyiv tsükona ni rasanden jiang hanrhyucho alo to? Osi nina shona janti elani ekümrümo osi ejüeli ni jüponcho na alo, to alo yesothako kyon jiang nzo hojito khochi sani eyiv tsükona tssochola?' " 14 Hojito ombona ntio Gog thüngi phyoa vancho sana ji ezolo OPVÜI Tsüphotso jina a vothukcho: Kvüthüng a kyon Israel jiang na nkoholo vancho sana jithüng nina, 15 ni meta khümkiwoe ekonina, rasantsü, etho eli rasanden jipolan topvü lona khyarhyuo jiang, onte topvüna kurü mankvüi tsankathuki sosi khochivka. 16 Tsyungryu mbüng na metaji yakchaka vena yia esüa nina a kyon Israel jiangji havka. Kvüthüng yuta ji jana sana ana a meta kvülo a kyon vancho sana osi a ntho ji ni yakchia ochoang thüngi ejüv licho sana jiang thüngi ana ni wothokvü. 17 Ana nkolona phyophia evamo kyonmo ji nika. Ana kvüthüng a phajae Israel zenkhying ji yakchia, thenchoa phyoasana tsüngon etsao ji ana Israel ji hav tsükona ochosana sosi tsata to thenchoa sana." OPVÜI Tsüphotso jina hojito phyothaka.
Potsow na Gog Ezüpthoko Ji
18 Tsüphotso OPVÜI jina phyoala, "Gog na Israel ephamü tsüngon jilo jo alümbüm tsyua a lüm tsukvü. 19 Ana a lümbüm etsuk etsyu lona opon chuka phyoaka, hoji tsüngono Israel meta lo nri elümoto tsükshia jitüv enhyokvüka. 20 Osi limha shilo vancho to etsa, Ongo osi woro woni osi ekümrümo teriv lona tsüphotso ji nandang, osi limha shilo kyon vancho to etsana a ekyu lona enevka. Phunglan jiangha sokchov, sürhen jiang menjov, osi kyimchung topvüto eyarav. 21 Gog ji ana tsoro phyoro lan taro khi ombo ekhenrhükthukvü. A, OPVÜI Tsüphotso jina phyothaka. Ombo kyon jiangna yonri khi onte onte rokatav. 22 Ana nochonori tona jenpok nipokta to khi ombo ezüpthukvü, osi ryupvü sheryu tona omi sheryu to phanya jothuki ombo kyon osi jipolan taro kyon ombo thüngoe thei evamo jiang pono jokathukvü. 23 Hetolyui khi, jipolan taro jiang thüngi Aiyo tsüphoa osi Aiyo ntho toji onte ejüv. Hojito tssona ontena Aiyo OPVÜI ji a ntsiv."
Gog Ekhyo Ji
1 OPVÜI Tsüphotso jina phyocho, "Echüo kyon yo, Meshekh osi Tubal to jipo yolo esapvüi tsüpho, Gog ji khoe sia phyoa, osi Aiyo ombo ri a kümthaka to ezoa. 2 Ana ombo lan ji tongphiyivka osi ombona Israel phunglan jiang n janthüng nandang jo hojito ana kona khümkiwoe ombo sokachivka. 3 Hoji sülojo ana ombo khe hayiwoe jilona ombo lotssi ji etssungchochi siyiv osi ombo khe hamimoe jilona lotssi tsüng jiangha ethüngchochi siyiv. 4 Gog tona ombo rasanden, elani jipopoe ombo thüngoe ethei jiang topvü Israel phunglan jianglo eritherae chüv, osi ana onte echümüng jiangji woro woni tona orae ekümrümo to jiang jak tsswothukvü. 5 Onte ji apho among lona eritherae chüv, to A, OPVÜI Tsüphotso jina phyothaka. 6 Ana Magog metalo jütssa rhüa ochinaha n khetsüna evamo kyon jiang yolo omi thenthechiv, osi otsük akvüna Aiyo OPVÜI ji to a ntsiv. 7 Ana a kyon Israel jiang khi a ntho myingji mmhona ntsithukvü, osi elani khi jo ana onteji yikrathuklam meka. Hojito tssona jipo jina AIYO OPVÜI ji osi Israel Potsow nthoji to a ntsiv." 8 OPVÜI Tsüphotso jina phyocho, "Ana ephyo tsüngon ji yinrüngüv ka. 9 Kyon ochoang na Israel yantsü jianglo vancho sana jiangna haphoe khochoki chiwo rasan na ebensü esio jiang khi otssüng njüko tssoa erentavka, ontena otsung, lotssi, lotsüng, otssuk omüm osi lepok jiangji njüktav osi nzyu tiyingjo ontena hojiang ji otssüng tssoa njüktavka. 10 Ontena otssüng njüko yana n vo mekana otssüng etssov tsükona orae odung jiangji ndanta, ntiotssole ritsso epen-esü silanchio jiangji ontena tssona liv. Ochoangna onte phani onte retsoyicho sana jiangji ontena phana retsoyiv." OPVÜI Tsüphotso jina hojito phyothaka.
Gog Jitheo Ji
11 OPVÜI na phyocho, "Kvüthüng shiang hetopvü shi tssoasana, Israel metalo echü jümang jina engkhfüwoe, 'yentsae hayi' to etsao jilo, ombo shothephen tsükona ana Gog thüngi meta pivka, Gog tona ombo rasanden topvü hojilo shothev, osi hoji hayitsü jijo 'Gog rasanden hayitsü' to tsav. 12 Israel jiangna omüng jiang juthev osi metaji ntssüngchelamü tsükona jo choro tiying khiv. 13 Meta jilo kyon otsük akvüna omüng jiang onte jüthekyov, osi hoji tsükona a ekhyo tsüngono yikrachi onte piv. A, OPVÜI Sandamo jina hojito phyothaka. 14 Choro tiying ji bencho sülo, elani kyon ethüngchelani echümüng enhyokae elio jiang yani jyuthev tsükona yentsae wothukvü, hojito tssosanati ontena meta ji ntssüngchev. 15 Ontena meta jilo kvüta joyi chohgo tssoa yakphiathüng kyon ryu hunga sana, hoji ndüngo chekav ha toni vav, to tssona olüp ejyui kyon jiang na oro Gog Rasantsü Hayi to etsao jilo jüthev. 16 (Hoji ndüngo rasan jiang myingona yantsü lithukvü.) Hojito tssona metaji elani ntssüngchelamvü." 17 OPVÜI Tsüphotso jina heto a ezocho, "Echüo kyon yo, nken topvü lona woro woni osi ekümorümo topvü tsa, ana nte tsükona othan methaka evamo ji etsov tsükona. Hojijo Israel phunglan jiang lona tokhu tsüphov tssovka. Osi ontena hoji lona oso tsophyav osi ejen yuv. 18 Ontena rasanden jiang echümüng jiang tsov osi limha shilo esapvüiden jiang ejen yuv, ochoang kvütata olyu, nyanyan esüa, osi mangsüpong belev esüa lüngtharüpvü sana jiang. 19 Ana kvüthüng kyon shiang ji othan esüa onte lüngtharüpa sana, woro woni tona ekümrümo to jiangna onteno kvütata tsorhaka sana ethyu jiangji tsov, osi onte nkinothüng nandang jo ejen jiang yuv." 20 A mezü lona ontena kvütata tsokhoka sana, kurü osi kurü mankvüi tsankae tona rasanden rotalo rhowoe jiang topvü ji tsotav. A, OPVÜI Tsüphotso shina phyothaka.
Israel Jiang Tssocholamo Ji
21 OPVÜI na phyocho, "Ana jipo jiangji a phfütsson ji hungthukvü osi ana a ntsanrük methak jiangji kvütowoe na tssoasana a ethoji onte ejüv. 22 To tssona hoji yakchia, Israel jiangna Aiyo onte OPVÜI Potsow ji to a ntsiv. 23 Osi jipo jiangna ha, Israel jiangna a pono mmen tsso jina onteji metapoe phanchicho toji ntsiv. Osi ana onte thüngina nlüpi yi sisi onte ri jiang khi onte khyothuka osi ritsso lona onte lüngthathukcho. 24 Onte n tssüngrüng osi onte ntha nrina mamo ji ana picho, osi ana onte thüngina nlüpi yicho." 25 Tsüphotso OPVÜI jina phyocho, "Tokhatola enhungo, Jakob tsoro nichen, Israel kyon jiang thüngi ana khonzan to tssov. Osi onteji jü-olia onte kümlanthukvü. Ana a ntho myingji nkohov. 26 Kvüthüng ontena onte meta jilo nkoho lia vanchosana, osi ochinaha onte nkhenthukna vanasana ontena khoe asio ji tsükona kvüto onteji yikra pia ezüpthukcho sana jiangji mhecholan khukvü. 27 Aiyo nthoto jipolan elümoto thüngi ejüv tsükona, meta kvülo onte ri jiang nzo vanta vanchosana jiang topvü lona ana a kyon jiang elani solansi yiv. 28 Hojito tssona, a kyon jiangna Aiyo onte OPVÜI Potsow jito a ntsiv. Ontena hojito ntsiv, ntiotssole ana evüng tssoa metapoe hanchi onte sisi elani tsüka tia sülamoe n valanchina onte solansi eyio ji tsükona. 29 Ana a mon ji a kyon Israel jiang pono phyangkayiv, osi kvüthüngha onte thüngina elani n yilan. A, OPVÜI Tsüphotso jina hojito phyothaka."
Ochyu Ovüngi Ekhümki Tsükona Hungjanthuko Ji
1 Metapoe eyithuksi nzyu myukyusi mongo to jilo nzyu ethanmoe tsüngon taro to jilo osi Jerusalem ji oyam na khyoe khisi nzyu taro mezhüoto jilo heto tssocho. Hoji tsüngon jilo ana emhukthav OPVÜI vanhya ji chanchecho, osi ombona asosi yicho. 2 OPVÜI na Israel metae asosi oyi phunglan ntssom tüvlo a vanthuka ana monsücho. Osi a mhadungi oki khosha yantsü esüa zecheta jitüv ana hungcho. 3 Ombona enhyankata a sosi yicho, tole kyon tsüka pyontsü yonjak tsünglüpvü esüa tüv ana hungcho. Ombona sünyipvü na nsüngrücho etsiphen tona yonjak etsiphen to bensi kibünglan jiwoe manga vana hungcho. 4 Ombona a ezocho, "Zeta Echüo kyon yo, tüngochünga enga, osi ana ntio ni ejüa sana jiang topvü mhyikrüka zeta, ntiotssole shi tsükona ana shilo ni sosi yicho. Nina ntio kvütata hunga sana jiang topvü nina Israel kyon jiang thüngi ezovka."
Engkhfüwoe Kibüng
5 Ana ntio hungchosana, jijo ekhümkiji, osi hoji füchaka pikhfü licho. Kyon jina ombona epemo yonjak etsiphen esüi khejü ethüm ji khi epi ji etsicho. Tole ntssoni khejü tokvü elani echhi khejü tokvü to tssocho. 6 Hoji sülo engkhvüwoe zechiwo kibüng elio jiwoe ombona wocho. Ombona phopha ji khokachia chungocho, osi ntssontso ji lona ombona rheyilan ji etsi zecho, tole hojiha ejungi khejü tokvü tssocho. 7 Hoji zechilo elani yakchilan licho, osi hoji pondüng tsongkhoata nhyakphen chungchak ethümthüm liracho. chungchak jiang tsongkhoata etsüi osi esüi khejü tokvü, tokvü tssocho, osi onte yutalo kyimchung jiango echhi khejü tiruksi riso tssocho. Elani enhyang chungchak jiang yaka olo yakchilan esüi khejü tokvü aria ekhümki jiwoe zechiwo chungchak rheyilamoe licho. 8-9 Ombona chungchak ji etsiekoni zele khejü taro eni aria ngaza tüv tssocho. Hoji na ekhümkiji tssungkata kipünglan ji ehüm ji tssocho, osi echung ji ochümoe jo echhi khejü ethüm tssocho. 10 (Enhyang chungchak yakchilan pontüng elio jiang onte topvü etsüi esi kheti tssocho, osi onte yutalo kyimchung jiang topvü echhi ha kheti tssocho.) 11 Hoji sülojo kyon jina kibünglan jilo yakchilan ji nzoe ji etsicho. Osi topvü tssotsüi khejü taro tokvüsi riso tssocho, osi kipüng chonchio ji woni yutalo kitajo jijo khejü taro mongo tssocho. 12 Enhyang chungchak jiang akvülo kipünglamoe kyimchung tara nhyimroa tüv ntssoni khejüa elani echhi khejüa to licho. (Chungchak jiang ji topvü etsüi esüi khejü tokvü ren tssocho.) 13 Hoji sülo ombona oki esüi ji sülamoe kyimchung jilona echung sülamoe ji nandang ji chungchak ji yonchia etsi zecho, tole hojijo khejü thümro tiruksi riso tssocho. 14 Chungchak ochungtso jilona kitachowoe chiyio lanpvü tongnrhüo tüv licho. Ombona hoji chungchak ji etsi zele hojijo khejü thümro nzoa tüv tssocho. 15 Chungchak ochongtso jilona kipüng ji yakchia chiyi pikhfü khan ji nandang jo tssotsüi khejü ekhatiyingsi mongo tssocho. 16 Chungchak jiang akvülo kyimchung opmoe ha elani chungro jiang loha topvü lo chechukehiphen okvü hakhancho. Elani chungchak jiang akvülo kipüngoe tonchokchio kyimchung jianglo mitssüngdung khangkhfüa tüv nsüngrükacho.
Kitajo Chungchak Opomo
17 Kyon jina kipüng ji yakchia chungchak opomo jilo a sosi wocho. Hoji lojo kyimchung opomo jiang lo tssokata chungchakro thümro tssokae licho osi hojiang hapowoe jo olung na olan ji sanrhüi, 18 chiyi kitajo opomo ji füchaka chiyicho. Kitajo chungchak opomo shijo chungchak ochungo ji lona tara nhyimkata jitüv tssocho. 19 Elani tara ekhakae ji lona kitacho chungchak ochungo jilo rheyilan hacho. Kipünglan eniji yutaji kyon jina etsi zele, khejü nzoasi tinyan tssocho.
Khümkiwoe Kipüng Ji
20 Hoji sülojo kyon jina khümkiwoe yakchilan hapowoe chiyilan ji etsicho. 21 Osi hojilo enhyang chungchak ethüm yakchilan ji pondüng elio jiang ji onte yutalo echung elani rheyilan jiang etsi zele engrhelamoe chungchak jiang onte topvü kheti tssocho. Osi yakchilan lanpvü jijo. esüi khejü ekhatiyingsi mongo elani etsüi jo khejü thümro tiroksi riso to etsichecho. 22 Kipünglan, kherüki osi mitssüngdung khangkhfüa kyimchungo nsüngrükao jiang ha topvü erigrhelamoe chungchak jianglo elio jiang onte kheti tssocho. Shilojo hapowoe chiyilan. kipüng jijo ekho tiying tssocho. 23 Khümkiwoe na kitacho ji yakchaka kitajo ochungo jilo rheyilan motsünga licho, engrhelamoe lio ji esüa. Osi yakchilan eni shi yuta ji kyon jina etsi zele, khejü nzoasi tinyan tssocho.
Jolowoe Kipüng
24 Hoji sülo, elani kyon jina jolowoe asolansi jowocho, tole hoji lona ena yakchilan lanpvü hunglancho. Ombona pikhfü ochungo ji tona rhovolamoe chungchak ji to etsi zele, hojiangha thampo jiang onte kheti tssocho. 25 Yakchilan elio shiloha thampoe jianglo esüa kherüki liracho. Yakchilan ji tssotsüi esie khejü ekha tiyingsi mongo, elani nzoe jo khejü thümro tiroksi riso to tssocho. 26 Hoji lona ekho tiying ona rhorolan ji ehüm jo hümpo jiwoe dunga eyio tssocho. Osi yakchilan ji zechiwo kyimchung ochungo jilo mitssüngdung lAangkhfüa nsüngrükacho. 27 Shiloha kitajo ochungoe rheyilan licho. Kyon jina yakchilan eniato shi esi ji etsi zele khejü nzoasi tinyan tssocho.
Jolowoe Kibüng: Kitajo Ochungo
28 Kyon jina yakchilan jiwoena asosi chungchak ochungoe rhowotacho. Ombona yakchilan ji etsi zecho, tole kyimchung opomoe yakchilan ji woni kheti tssocho. 29-30 Hojilo enhyang chungchak rhovolan, osi kyimchung ochongo to jiang topvüto thampowoe yakchilan jiang etsüi esi onte topvü kheti tssocho. Osi yakchilan shiloha echung jianglo zechokehiphen mparacho; Esi jo tssotsüi khejü ekhatiying si mongo. Osi nzoe khejü thümro tiroksi riso to tssocho. 31 Hoji rhovolan chungchak jiha hapowoe kitajo ji zechiwo tssocho, osi yakchilan kyrmehung ji dunga mitssüngdung nsüngrükacho, shi kipüng ji ejamvü jo ekho tiza tssocho.
Engkhfüwoe Kipüng Kitajo Ochuungo
32 Kyon jina engkhfüwoe yakchilan jilo na asosi kitajo ochungo jilo rhovocho. Ombona yakchilan jiang etsi zecho tole thanpoe jiang esüa totae tssocho. 33 Enhyang chungchak, rhovolan, kyimchung ochungoe jiang topvü etsüi-esi thampoe jiang onte kheti tssocho. Kyimchung ji lungo kipüngro licho osi rhovolan jiang loha licho. Esi ji tssotsüi khejü ekha tiyingsi mongo, nzoe khejü thümro si riso to tssocho 34 osi rhovolan jina hümpoe kitajo ji zechiwo tssocho. Yakchilan ji dunga kyimchung jianglo mitssüngdung nsüngrükacho. Osi hoji ejamjo ekho tiza tssocho.
Khümkiwoe Kipüng: Kitajo Ochungoe
35 Kyon jina yakchilan khümkiwoe asosi wocho. Ombona etsi zele, thanpoe jiang onte etsüi, esii kheti tssocho. 36 Thanpoe jianglo esüa, enhyang chungchak, kyimchung ochungoe opyon lyukacho, osi rhovolan elani topvü rhüa kipüngro jücho. Hoji esii ji tssotsüi khejü ekhatiyingsi mongo, nzoe khejü thümro tiroksi riso to tssocho. 37 Rhovolan jina kitajo hümpo jiwoe zechiwo khicho. Mitssüngdung kyimchung jianglo nsüngrükacho yakchilan ji dunga. Osi hoji yakchilan ji ekho tiza tssocho.
Khümkiwoe Kipüng Ndüngo Oki Lio Jiang
38 Hümpo opomo jilo khümkiwoe yakchilan ochungo ji ndüngo oki tssokacho. Hümpo ji zechia kipünglan hacho osi hoji lona ontena ekümrümo erungthan etsov tsükona hansi ero jiang etssütacho. 39 Rhowolan chungchak shilo jo mezü mezhü pondüng tsongkho eninina vacho. Hoji mezü shiang lona ekümrümo mpüm na erungthan epio tssolea, mekana mmen than epiv tsükona tssolea, elani pilan than etssov tsükona tssolea mezhü shiang lona tatsüngcho. 40 Chungchak jina hapowoe ha hoji esüa mezhü mezhü vacho, khümkiwoe yakchilan ji pondüng enini na vacho. 41 Ekümrümo othan etssov tsükona lüngthaphen mezü ochongoe mezhü opomoe mezhü to tssotsüi tiza vacho. 42 Oki tssokao jilo mezü mezhü elio jilona ekümrüm mpüm na erungthan epiv jiang ntssüng-rüng phen jiango olung joe khicho. Hojiang echhi khejü eni aria osi esi tona nzoe tojo kheti khejü mongo aria to tssocho. Ekümrümo than lüngthaphen epensü topvü mezü shianglo vacho 43 Osi mezü jiang rhüa echhi yingro mongo aria nkhon lyukacho elani mezü jiang rhüa ekhyukphen vacho osi mezü ji poni jo oso kvütata thamvü vancho sana jiang ekachicho. 44 Hoji sülojo ombona kitajo ochungo jilo asosi rhovocho. Hojilo chungchak eni motsüngajo kitajo ochungo jiwoe zechiwo, elani motsüngajo khümkiwoe zekachio to tssocho. 45 Osi chungchak kvümoe jolowoe zechiwo licho sana jijo pvüti ochoang na ekhümki jilo elhi tssoasana jiang tsükona, 46 elani chungchak kvümoe khümkiwoe zekachio tssocho sana jijo pvüti ochoangna thanphen jilo elhi tssoa vancho sana jiang tsükona ka to kyon jina a ezocho. Pvüti jiango onte topvü to Zadok tsoronichenden; Levi jipo lo khanhyae jiango onte tae tssocho, ochoang kvütata OPVÜI vanhya lo benka elhi etssov elan picho sana jiang tssocho.
Kitajo Ochungoe, Ekhümki Ji
47 Kyon jina chungchak ochungo ji etsi zecho, tole etsüi esi topvü kheti khejü nzoasi tinyan tssocho. Ekhümki jijo engrhelamoe tssocho osi hoji mhadungo jo thanphehji tssocho. 48 Hoji sülojo ombona ekhümki rhovolan chungchak jilo asosi wocho. Osi ombona rhovolan ji etsi zecho: Tole ejungi khejü tiroksi riso tssocho, osi nzoe jo khejü mekyusi ekha, jilo echung tsongkho echi khejü mezhüsi riso to tssocho. 49 Rhovolan chungchak jilo evolan jo, etsüi khejü thümro osi ejungi khejü taro tiza to khokaphen eshenrhüikhicho. Osi rhovolan ji pondüng turhyupvü motsüngtsüng thecho.
1 Hoji sülojo, kyon jina chungchak olungtso jilo asosi rhovocho, Ntho meta jilo, Ombona hojilo rhovolan ji etsi zecho: tole esi khejü tokvü 2 osi nzoe khejü taro mongo, elani pondüng tsungkho kyimchung echhi jo khejü tiying aria to tssocho. Ombona chungchak jiha etsi zecho: tole esi khejü rokro elani nawoe khejü thümro to tssocho. 3 Hoji sülojo ombona chungchak ochungtso jilo rhovocho. Hojilo rhovolan ji ombona etsi zecho: tole ejungi khejü ethüm, elani nzoe khejü tokvü, osi hoji pondüng echhi khejü tarosi riso kyimchung licho. 4 Ombona elani chungchaak ji etsüi zecho, tole etsüi esi topvüto kheti khejü taro tssocho. Shi chungchak shijo chungchak olungo ji na esanawoe tssocho. Osi ombona azocho, "Shijo topvülo Nthotso jika."
Ekhümki Kyimchung Jilo Echungkata Chungchak Tssokao Jiang
5 Kyon jina ekhümki kyimehung ji echhi ji etsi zecho, tole khejü tirok tssocho osi ekhümki ji füchokchia kyimchung jilo etsüngkata chongchakro teri teri etsüi khejü tirok jitüv tssokacho. 6 Osi chungchak shiang ji echungta ethüm thüm tssocho, toli echungta motsüngalo chungchakro thümro tssoe khicho. Osi ekhümkiji kyimchung ji kvüta echungta chüngiasana jitata porokata khicho, hoji tsükona chungchak jiangji kyimchung jianglo n shungkana mmyankae tae khicho. 7 Hoji tsükona ekhümki kyimchung jijo hapowoe na zetana echhi ji likoe na shanka jana echhi kheti esüa zechecho. Elani ekhümki kyimchung jilo etssungkata oki tssokao jiang pomoe jo phopha nzo eni nsüngrükacho, osi hoji yakchia echungta oküpoe jilona olungo loha elani omhatso jiloha ezüp n lina rhovochecho. 8-11 Chungchak shi kyimchung opomo jiango echhi khijü tiying khicho; osi chungchak jiang lona kipüng eni hae mots üngajo ekhümkiji khümkiwoe elani motsüngajo jolowoe to hacho. Osi ekhümki ji füchokchia sanphiphen saro nzoe khejü tiying tssoka nrhü cho, osi hojijo ekhümki kyimchung jilo tssokao chungchak jiang tssokaphen ji mmyana likoe na khejü tokvü ntssona tüv tssocho. Sanphiphen saro ji tona ekh ümki jilo pvüti jiangna tsütsao chungchak ji woni yuta lojo khejü thümro ekhümki ji tssa rhüa hae vacho.
Engrhelamoe Oki Ji
12 Ekhümki na engrhelamoe hümpoe echung elioji chümi oki motsünga esi jo khejü nzoasi thümro mongo, nzoe khejü nzoasi taro to tüv tssoe licho, osi hoji kyimchung jo echhi khejü tiying tssocho.
Ekhümki Ji Tssotsüi Etsikon
13 Kyon jina ekhümki opomoe ji etsi zecho, tole esi khejü nzoasi tinyan tssocho. Osi ekhümki ji sülamoe na hümpo hae elio ji yakchia engrhelamoe ochüm ji jana etsi zele hojiha khejü nzoasi tinyan to tssocho. 14 Elani ekhümki ji mphio hümpo ji yakchia etsi zele, jiha khejü nzoasi tinyan to tssocho. 15 Elani ombona ekhümki ji engrhelamoe sanphiphen kitajo hümpho ji thenhya hayi-amen etsi zele jiha khejü nzoasi tinyan to tssocho.
Ekhümki Ji Maromaria Etsikoncho
Ekhümki chungi rhovolan chungchak Ntho chungchak osi topvülo Nthotso chungchak 16 jiang topvü likoe na benkae kherüki nandang otssüng na chüngtae chungcho. (Enhungo kherüki jiango chungzhüthaka). 17 Ekhümki kyimchung ochungo jiango kipüng jiang jana mitssüngdung 18 kisü tona ekümrümo echo mpao tüv taena kyimchung jiang pyinga nsüngrükacho. Mitssüngdungji sülo echo mpao ekümrüm nsüngrüka to onte parita chungchak jiang topvülo nsüngrükacho. Ekümrüm motsüngalo echo eni mpata nsüngrücho: 19 kyon mha motsünga na jo mitssüngdung jiwoe zechiwo elani hingho mha jinajo odung kisü motsüngao jiwoe zechiwo to khyanpenta thecho. Kyimchung jiang füchokchia, 20 likoe na koküng jana. kisü na nsüngrüzhücho. 21 Ntho chungchak jilo kipüngo turhyu jiango rhümyana tüv.
Thanphen Tssüngsa
Nthotso chungchak jilo rhovolan ji mhadungo jo 22 ntiosana otssüng na thanphensa nsüngrücho tüv licho. Hojijo khejü mezhü aria ntssona osi khejü ethüm nzoa tüv tssocho. Hoji nken turhyu, osi hoji ndungkaphen elani hoji ronri jiango topvü otssüng na nsüngrücho. Osi kyon jina, "Mezü shijo OPVÜI vanhya lo mangkachio jika " to a ezocho.
Kipüng Jiang
23 Ntho chungchak jiwoe evolan ji chhümi kipüng motsünga, elani Nthotso chungchak jiwoe evolan ji chümi kipüng motsünga to licho. 24 Onteno khanphen eni nsüngrütsüi olungo na chonchicheo jitüv nsüngrücho. 25 Ntho chungchak hankhan jiang loha mitssüngdung tona ekümrümo echo mpao jiang to kisü na kyimchung jianglo nsüngrükao jiang esüa nsüngrükacho. Osi rhovolan chungchak jiha opomoe na khanphen otssüngna nsüngrücho. 26 Shi chungchak kyimchung rhüa kherüki hacho osi kyimchung jiango mitssüngdung na opyon nsüngrükacho.
Ekhümki Ndüngo Oki Thanpo Eni Jiang
Hoji sülojo kyon jina asosi hümpo opomoe chiyicho osi ekhümki jina khümkiwoe oki kvümoe engrhelamoe ekhümki kikhyowoe licho sana jilona nkon-khüngna elio jilo asosi wocho. 2 Oki shijo esi khejü nzoasi tinyan osi nzo khejü ekhatiyingsi mongo to tssocho. 3 Phokowoe jo ekhümki ji rhüa liko ejüng khejü thümro aria elio jiwoe phichicho. Okiji ekhaka ethüm tssocho osi oküpo ji lona tara esetheta tssoe khicho. 4 Khümkiwoe kikhyo ji rhüa nzoe khejü taro mongo elani esi khejü nzoasi tinyan to yakchilan hanrhücho, khümkiwoe na rheyilan ha hacho. 5 Oki ekhaka omhatso jilo chungchak jiango olungo tona oküptso to jiang lona terikata tüv, ntiotssole onteno tara sülamoe esetheta tssojina. 6 Ekhaka ethümata lo chungro jiango, oki thanpoe jiang esüa mekna topvü turhyu lo n tssokana saro tssokacho jitüvlo ndungkarae khicho 7-8 Oki ekhaka oküpo jilo kyimchung opomo jijo oki ji esi chiso harüma khejü ekhatiying si mongo jo lira tüv lo chüngchünga tssokacho osi okiji chiso jiang lojo chungroe khicho. Ekhaka omhatso jilojo okiji esi mpüm na chungroe khicho. 9-10 Hojilo chungchak eniji küpo jo oki shi soyingi chüngio jilo jo hümpowoe chiyilan hacho. Jolowoe ha ekhümki ji kikhyowoe oki motsünga ekhümki jina engrhelamoe lioji lona lümato nkomvü licho. 11 Chungchak jiang mhadungi yakchilan khümkiwoe elio ji esüa licho. Thanpoe jiang esüa etsiekon kheti, opyon kheti osi rheyilan jiangha topvüto kheti hacho. 12 Chungchak jianglo ekhümki jina jolowoe kvülona kyimchung jiang benkae yicho sana jianglo kipüng hacho. 13 Kyon jina a ezocho, "Oki shi eniata Nthoka. Osi pvüti ochoang na OPVÜI vanhyalo rhovoa sana jiangna othan ntholo nthotso jiang shilona tsoala, elani othan nthotso jiangji pvüti jiangna hojilo vatala: otssok than tssolea, mekana mmen than epio jiang tssolea osi pilanthan tssolea topvü shianglo vatala. 14 Osi kvüthüng pvüti jiangna shilo rhowosi hapoe chivohunga sana ontena mbensüsi OPVÜI benkae pipo jiang phungi shilo evan shikhfü. Ontena hapoe kyon sanrhyui vamo jianglo n chivothüng thanpo ekav shikhfü."
Ekhümki Ji Nkonjan Etsikon
15 Kvüthüng kyon jina ekhümki ji chungi nkonjan jiang etsikhancho sana, ombona engrhelamoe kipüng jilona asosi chiyi hapowoe ji etsikontacho. 16 Ombona etsiphen ji khi engkhfüwoe ji etsicho, tole khejü 750 tssocho. 17-19 Tokhatola ombona khümkiwoe, jolowoe osi engrhelamoe to jiang topvü etsicho, tole kikhyo nken topvü kheti khejü 750 ren tssocho. 20 Hojilo Pikhfü nkonjan ji khejü 750 na füchakcho nken topvülo, pikhfü jina ntho tona ntho to ji chungsocho.
1 Elani kyon jina engkhfüwoe tonchio kipüng elio jilo asosi wocho, 2 Tole Israel Potsow OPVÜI vanhya wondang ji rakachia hojiwoena tsata ana hungcho. Osi Potsow won ji jümangi jükyo na echyua to owon tssocho, osi limha jilo tsünglüpa rakachio wondang ji rakacho. 3 Shi heto ehungo shijo kvüthüng Potsow na Jerusalem ji roe silo rocho sana jithüng ji esüa tüv, elani ana Chebar zhükhfü tssa lona hungwo ji esüa tssocho. Hoji tsükona ana a mhaji likoe nkümkao tssoa vanthecho. 4 Wondang tsünglüpa rachia etsso jina engkhfüwoe kipüng ji yakchi ekhümki jilo rheyicho. 5 OPVÜI mon jina oyaki a khyonkae ekhümki kitajo ochungoe asosi rheyicho, osi ekhümki ji OPVÜI Phfütsson na pyingi lia ana hungcho. 6 Kyon jina hojilo a ndüngo mangi vancho, osi ekhümki jilona OPVÜI na heto a jana ana zocho: 7 "Echüo kyon yo, a vantsü ji shilo lia. Ana shilo Israel kyon jiang ndüngo vani nchünkhon to onte sa vamvü. Osi Israel kyon jiangna tssolea, mekana onte mesao jiangna tssolea ontena thanpo Potsow jiang khümlani mekana onte mesao jiang echümüng jiangji shilo juthe khi a ntho mying ji n menthuklan osi n yikrathuk. 8 Mesao jiangna onte mesaki jianglo rheyilan lo kitajo jiang tona kipüngo turhyupvü to jiang ji a ekhümki rheyilan tona a kipüngo turhyupvü jiang to onte tondüngo tssocho osi ete yutalo kyimchung tae na khosotacho. Ontena kvütata etssakthav elhi tssocho sana jiangna a ntho-mying ji mmenthukcho, hoji tsükona ana a lümbüm etsukona roe onte sicho. 9 Hoji tsükona enhungo ontena Potsow thanpo jiang ekhüm ji esa mvü shikhfü osi onte mesao echü müng jiang ji khi siv shikhfü. On tena, hojito tssoa tssona Ana onte ndüngo nchünkhonto vamvü." 10 Elani OPVÜI na phyolancho, "Echüo kyon yo, Israel kyon jiang thüngi ekhümki ji tsükona onte ezoa, osi ekhümki ji etüm ezi osi eze echan jiang to yandüng yanri onte zethuka, osi onte mmen elhi jiang khi onte yikrathuka. 11 Osi ontena onte elhi jiang khi onte yikra tssona, ekhümki ji kvüto tssovsana onte thüngi eroroe ezoa: opyon ori, kvülona chiyivo-rheyiv sana, kvütera kvütüv tssov sana, osi ochungi nsüngnlüng topvüto, osi hojilo shikhfü niro lanka jiang. Shiang hetopvü ji onte tsükona erankae vata, to tssona, kvüta mmhona nsüngnlüngi vacho sana jiang hungchev osi shikhfü lanka jiang topvü benphichev. 12 Shijo ekhümki ji shikhfü ji: Meta kvütera na ekhümki shi füchakcho sana phunglan kvüri topvüto ntsük-nrüka osi nthoa."
Thanphensa
13 Thanphensa ji etsikon jo heto tssocho, ekhümki etsio ji etsiphen ji tsütsacho. Thanphensa ji tssokaphen ji füchokchia jülan ejungi khejü mezhü elani nzoe khejü mezhü aria to nsüngrükacho osi opomoe jo khejü eni aria ntssona tssokalancho. 14 Osi thanphensa ji omhatso jilona tssokaphen ji woni yutalo nhyintso jijo khejü ethüm tssocho. Enioto jo thanphen ji füchukchia etsüi khejü mezhü aria tara kyimtheta lyui khicho, osi hoji ntssoni jo khejü tirok tssocho. Elani hoji lona ochungoe jo khejü mezhü aria kyimthelana nsüngrüi khicho. 15 Osi sapang kvülona othan jiang rungüv sana jiha khejü tirok ntssona khicho. Osi nken mezhü lo bümka theo jiango nkhon thanpo jiang lona ntssonkata nsüngrükacho. 16 Thanphen saphang jijo etsüi esi topvü kheti, nken topvü khejü taro tiza tssocho. 17 Elani olungo jiha topvü kheti khicho, nken topvü khejü myukusi ekharen, osi hojilo nkhon ochüm khejü eni aria ntssona lyukacho. (Hojilo jülan jiha nzoe khejü mezhü aria tssocho.) Nken topvü lona thanphensa jilo khokata chungophen licho.
Thanphensa Nthocheoji
18 OPVÜI Tsüphotso jina azocho, "Echüo kyon yo, ana ntio ni ezoasana ji engachia, kvüthüng thanphen ji tssothaka sana nina hoji nthochevka, osi othan jiang ji hoji lona rungu elani ekünrümo thamo jiang ejen jiang khi hojilo erhikavka. 19 Osi Levi jipo ochoang Zadok lona chenchecho sana jiang pvüti jiang taena a vanhya jilo oro a benka elhi tssovka, A, OPVÜI Tsüphotso shina hojito yidan piala. Osi mmen than etssov tsükona nina onte thüngi mangsüpong pongchecho jitüv onte pivka. 20 Nina hojiang ejen ji khi thanphensa nken ntssomo edukao jianglo tona thanphen olungo jilo nken jianglo elani nkhon jiang nkona topvülo esekavka. Hojito lyui nina thanphen ji ntssüngcheta nthochevka. 21 Osi mangsüpong kvümoe mmenthan tssochosana hoji khi ekhümki jina hapowoe meta zekata tüv lona hoji runguka. 22 Ojyuato ha nina nyanya pong ntia ephyo erüv n pao tüv motsünga khi mmen than tssoa thamvüka. Osi nina kvüto mangsüpong than ji khi thanphensa ji ntssüngcheo ji esüa nthochevka. 23 Nina kvüthüng shiang elhi shi tssothaka na, elani mangsüpong lamen tona olyu oro motsünga ntia ephyov erüv n pao tüv khi, 24 hojiang ji a thüngi hansi yivka. Pvüti jiangna hojiang lo oma eyekae erungthan a pivka. 25 Nchuk tiying tsükona nina eng akvüto nyanyaro, mangsüpong tona olyu oro to khi mmen than tssoa apivka. Osi onte topvü toji ntia ephyo erüv nkhying na jitüv tssov shikhfü. 26 Tsüngon tiying pvüti jiangna thanphen ji nthoche tsütsav tsükona methakvü. 27 Kvüthüng tsüngon tiying ji benthaka sana pvüti jiangna kyon jiang tsükona erungthan tona khümshümta than to benkae a pivka. Hojito tssona ana nte topvü thüngi a emathavka. Hojito A, OPVÜI Tsüphotso jina phyothaka."
Engkhvüwoe Kipünglan Ji Tsütsa
1 Kyon jina kipünglan opomoe jiwoe asosi chivocho, ekhümki jina engkhfüwoe. Tole kipüng ji khani licho, 2 osi OPVÜI na a thüngi a ezocho, "Kipünglan shijo to khanpvü vavka. Osi kvüthüngha chonchiv meka. Nti kyon khi ha shi n tsütsathuk, ntiotssole, A, OPVÜI Israel Potsow na shilona shilona rheyicho. Hoji tsükona shoji heto khanpvü vavka. 3 Tokhatola pvüti yulo esapvüi jina jo hoji lona owo a vanhya lona ntho etsoyu tsokhuka. Ombona rheyilan ochungo ochüm ji lona rhovov osi kipünglan jijo to vanthukvü."
Ekhümki Jilo Rhovov Tsükona Shikhfülan Jiang
4 Hoji sülo jo kyon jina asosi khümkiwoe kipünglan jilona ekhümki ji mhadungoe wotacho. Ana zele, OPVÜI vanhya wondang tsünglüpo jina ekhümki ji pyingi lia ana hungcho. Hoji tsükona ana a mha jina likoe nkhümkata vanthecho, 5 osi OPVÜI na heto a jancho, "Echüo kyon, nina ntio hunga osi zoa vancho sana jiangji tüngochünga nchüma. Ana ekhüm ki shilo shikhfü lanka osi tssolanphylan jiang ni ezovsala. Kyon Ochoang jo ekhümki shilo chivorheyi thuk osi kyon ochoang jo hojito n tssothuk tav sana jiang mmhona chekata engathe khia. 6 "Panlan osi khiran khiri Israel kyon jiang ji heto ezoa, A, OPVÜI Tsüphotso shina, ontena ntio etsak-nkongthav elhi tssota rothakcho sana ji tüv elhi ji enhungo ana rümkhokvü meka. 7 Ethyu osi ejen erungthan to apitathüng ji ontena metapoe kyon ochoang jo a jancho nzoe osi n mvüchung sana jiang ji ekhümki sotheo ji yakchia ontena a ekhümki ji mmenthukcho. Hoji tsükona a kyon jiangna etssakthav tsütsaelan jiang khi a ntsata ji yesoe sithaka. 8 A Ekhümki jilo ntho tssolanphyolan jiangji ontena ntsaka, ji thüngi na jo ontena metapoe kyon omoatssi jiang khelo theyithaka. 9 "Hoji tsükona A, OPVÜI Sandamo shina opon choka phyoaka, metapoe n mvüchung kyon, osi ochoang na ayi n nga sana jiang ochinaha a ekhümki rhowov meka, metapoe kyon Israel yulo nzi vamo jiang nalia n rhovoche."
Levi Kyon Jiang Ji Pvüti Elhi Lona Khi Siala
10 OPVÜI na heto a ezocho, "Ana Levi kyon ochoang na Israel kyon jiang onte nzo tssoe khoe a sisi kisü khümtacho sana jiang ezüp onte piala. 11 Ontena ekhümki kipüng jiang enhyang tssoa osi ekhümki elhilan jiang tssoa a benkakhoka. Kyon jiang na erungthan mekana othan etssov ekümrümo hansi ero jiang tatsünga to elhi tssokhoka, elani ontena kyon ochoang elhi tssoa vancho sana jiang nzanchia to, kyon jiang benkakhoka. 12 Tokhatola ontena Israel jiang na kisü khümathüng shendung tssoa tssolanphyolania toli kyon jiang mmen tssothuko ji tsükona, A, OPVÜI Tsüphotso shina tüngochünga phyochakala, onteji ezüp pi-nrüngüv. 13 Ontena pvüti ejoena a n benkache, osi nti tsütsaelan ndüngo ha n voche, mekana ntholo nthotso chungchak jilo n rhovoche. Ontena etssakthav elhi etsso jiang tsükona ezüp ji hojito pivka. 14 Tolea ekhümki elhilan maromari jiang etssov tsükona ana onte enhikatala."
Pvütiden
15 OPVÜI tsüphotso jina phyocho, "Tokhatola Levi jipo yuloha Zadok tsoronichen jiang najo, Israel jiang na a thüngi na tsani yiathüng mpato longtsüka lia ekhümki na a benkata vancho. Hoji tsükona enhungo ekhümki othan etssovo jiang ethyu osi ejen jiang ji ontena tae khi a thamvüka. 16 Onte taena a ekhümki rhorochev osi thanphen jilo elhi jiang elani ekhüm elhi jiang ontena soka-benkavka. 17 Osi ontena kvüthüng kipünglan ji nkyaki ekhümki kitajo ochongoe rhoroa sana onteno sümyipvü ekavka. Ontena kvüthüng ekhümki epi chungi mekana ekhümki elhi tssoa sana ontena tsansü ekanrüngu meka. 18 Hojito tssona onte eshamvü mek, ontena sünyipvü na kvüri khüngüv osi suktheosü ekav, tolea ryukhüng ji n hanche. 19 Osi ontena kvüthüng kitajo opomoe kyon sanrhyui evamo jianglo chivoa sana ontena ekhümki chungina mpensüsi elhi etsso jiang jo topvü phungi chungchak jilo vasi chivov. Nthosü jiang khi kyon jiang n tssatsswothukvü tsükona mpensü thanpo ekasi chivov shikhfü. 20 "Pvüti jiang na jo kvüthüng ha otsan jiang tsüi n si, elani siphoa ha hae n han. Onteno etümro tae hae hamvü. 21 Ochungoe n rhovothüng kvüthüngha pvüti jiangna soko n yuv shikhfü. 22 Pvüti ochinaha oyam na sichicho tüv eloe soa n van; ombo Israel loroe ohm tüv mekana pvüti thanpoe chüche emi tüv tae soa vamvü shikhfü. 23 "Pvüti jiang na a kyon jiang ji ntiojo ntho osi ntio jo ntho mek, tosana oni echümpota ji püngnov, osi ntiojo ekhüm shikhfü ephani na ntssg osi ntiojo n tssüng to sana jiha püngnov. 24 Kvüthüng shikhfü ephanina ekhiranta chiyia sana pvüti jiangna a shikhfü ji ephanina khonta ji nsüngiv. Shikhfü niro pi elio jiang ephanina ontena ekhümlan tokhu tsüngkyim jiang ji tsütsav, osi ontena esanmung ji nthoa tsütsav. 25 "Pvüti jina ombo opvüpoe chücho mekana ombo tsoe chücho mekana ombo ojenio osi ombo oyulov n yanpihancho jitüv chücho jiang müng yakajo thanpoe echümüng evüngkae ombobo n tssüng üv kümthuki vamvü meka. 26 Hojitüv sükhyingo mpa tssolea ombo ntssüngchesanati lea ombona nchuk tiying saria vansi 27 tosanati ekhümki kitajo ochungoe rhovo ntssüngche than pivka, tosanati elani ombona ekhümki elhilan tsakae tssolamka. a, OPVÜI Tsüphotso jina phyothaka. 28 "Pvüti jiangna pvüti etssov tsükona ana Israel jiang thüngi echungren echungren tsütsata evov tsükona ntio onte picho sana jilo shi pvüti etssov etüm ji onte ejan osi osen liv shikhfü. Ji yakajo ontena Israel yulo ejüeli ntia chov n li; onte elhilan topvü to tsükona a vana. 29 Pvüti jiang etsoyu jo otssokomüm than jiang, mmenthan, osi pilanthan to jiang tssovka; osi Israel jiangna kvütata a tsükona eyiche vancho sana jiang topvü ontena khichovka. 30 Olina richotemo jiang yulo mmhontso jiang khivka, elani ntio kvütata a thüngi a thana sana jiang to khivka. Kyon jiang na kvütata humri rüngasana jiang topvü lo rüngchodemo jiangji a thana ejoena pvüti jiang pivka, osi a mmha ji onte kilo livka. 31 Pvüti najo woro tssolia mekana ekümrümo tssolea ontepopo chücho jitüv jo n tsov shikhfü, elani ekümrümo thanpo na rümcho rajak ha n tsov shikhfü."
Meta Jilo OPVÃœI Ejan Ji
1 Kvüthüng liko jiang ji chitae Israel jipo jiang akvüto onte ejan piasana, ejan motsünga jo OPVÜI tsükona khochaki vav. Osi hojijo esi kilometer taro enisi chiso, nzoe kilometer taro to tssov shikhfü. Hojijo totona ntho to khochaki vav. 2 Hoji chungi ekhümki etssov tsükona nken mezhü kheti osi etsüi esi khejü 750 aria etsichoe vav. Osi hoji mpüm na nzoe khejü ekhatiyingsi mongo hapo ntia n lina tüv na hachümcho tssov shikhfü. 3 Meta shi chiso, elani etsichoe esi kilometer chiso elani nzoe kilometer mongo to etsichoe vav; osi hojijo ekhümki Ntholo Ntho ji tssophen ji tssovka. 4 Hojijo meta jilo ntho to khakche evao ji, osi pvüti ochoang na OPVÜI ekhümki jilona ombo benka elhi tssoa sana jiang tsükona tssovka. Onte ki jiangha hojilo tssov osi echia jo ekhümki ji tssophen vav. 5 Elani ochoangjo ekhümki jenchioroe elhi etssoe sana jiang ejan tssoa khakchoe vayivka. Onte vanphen tsükona hojiang lo yantsü tssokachia. 6 Ntho metaji tssa-rhüa ochoang na vanhunga sana jiang vanthukvü tsükona esi kilometer taro enisi chiso, nzoe kilometer enisi chiso to khacholani hojilo yantsü chonchivka.
Mesao Jiang Tsükona Liko
7 Esapvüi etssoe jiang tsükona ha liko khakchoe vav ethev lia. Hoji tsükona engrhelamoe ntho tssoa khakchoe evao ji erü lona benkae Medeterranean jümang ji nandang, elani engkhfüwoe jo engkhfüwoe metaji erü nandang vov, hojito tssona liko ji etsüi esi ji Israel jipo jiang yulo jipo motsünga ejan tera tssov. 8 Meta shijo Israel yulo esapvüi ochoang na tssoa sana jiang wopan ejan tssov, hoji to tssona elani ontena kyon jiang ji n khontsünglan, tolea meta enhyolani elio jijo noyinga Israel yulo jipolan olan olan vamo jiang echi tsswothukvü.
Esapvüi Jiang Tsükona Shikhfü Jiang
9 OPVÜI Tsüphotso jina phyocho, "Israel esopvüiden, ntena sungkhünga mmen tssothaka, hoji tsükona nte tssatssota elhi osi oyan nkhontsüng elhi jiang esantava. Ntiojo elan osi ntsa sana ji tssotava. Ntena Kvüthüngha a kyon jiang onte meta lona phanlani siv meka. A, OPVÜI Tsüphotso shina, heto tüngochünga nte ezoala. 10 "Otsük akvüna efü seri ntsa nrüka benphiv shikhfü: 11 "Otse etükphen ephah motsünga tona ojü etükphen bath to ji woni kheti tssov shikhfü. Etükphen jijo homer ji tssov, osi etük ji shi esüa tssov. Homer motsünga lojo ephah 10, ji ekyan jo bath 10. 12 Elani nte efü-seri jo shi heto tssov: Gerahs 20 lo Sheekel motsünga tssovka Sheekel 60 lojo mina motsünga tssovka 13-15 "Heto shi ephanina ntena othan jiang ji pivka: Otssok jo ntena richo jilona echi rokro lo echia Oten omümjo ntena mmyipcho jilona echi rokro lo echia Olive thyujü jo echi nzoalo echia (Heto etüka - Bath 10 lo homer motsünga, hoji ekyan jo Kormotsünga to.) Olyu: Olyu jo Israel phenlungi olyuden jiang yulo 200 lo motsünga ren thamvü. "Ntena otssokomüm than hansi rovka, osi ekümrümo ha mpüm na erungu tsükona tona elani khümshünta than to hansi rovka. To tssona nte mmen jiang nte siyiv. Hojito A, OPVÜI Tsüphotso shina yidan piala. 16 "Meta jilo Israel kyon topvü na othan shiang hansi Israel yulo esapvüi jiang thüngi wov. 17 Osi ekümrümo mpüm na erungthan jiang, otssokomüm than, elani züki than to shiang hetopvü ji Israel pvüji topvü tsükona chothan tokhu, esanmung, osi tokhu thanpo to jianglo ontena nte pikhokvü lia. Elani Israel pvüji topvü tsükona ontena mmen than, otssok omüm than, mpüm na erungo than elani khümshümta than to Israel kyon jiang mmen khi siyithukvü tsükona ontena piv."
Tokhu Olan Olan Jiang
18 OPVÜI Tsüphotso jina phyocho, "Choro ovüngo jilo tsüngon jandemo ji nchok ntena mangsüpong esa-eri nkhyingo jitüv khi ekhümki ji ntssüngcheta othan pivka. 19 Pvüti jina mmen than shilona ejen ejoma khi ekhümki kipüngo turhyu jiang lo esekavka, elani thanphensa nken mezhü jianglo, elani kitajo ochungo jilo lanpvütsü turhyu jianglo to esekavka. 20 Elani chorotsük jilo nchok tiyingo toloha ochoang na sana worhyua, mekana ntsihan mmen tssoe lia tssona hoji thung tssoa mmen than pilam osi ovüngthüng ji esüa tssovka. Hetoli khi, ntena ekhümki ji nthoa vanthukvüka. 21 "Osi, choro ovüngtso jilo tsüngon taro mezhüo to jilo ntena yakchi tokhu ji müngyanchi elhi ji benkavka. Osi tsüngon tiying ji otsük akvüna vümhi n theo hümri tsovka. 22 Tokhu ji benkao ji nchok esapvüi mesao jina ombo mmen tsükona tona kyon jiang mmen to tsükona mangsüpong motsünga mmenthan tssoa thamvüka. 23 Osi tokhu tsüngon tiying ji akvüto ombona mangsüpong tiying elani olyuro tiying to ntia esa-eri n khyingo tüv khi thamvü osi hojiang ji mpüm na erungthan tssovka. Osi elani ombona mmenthan tssoa eng akvüto nyanyan-pong khi thamvüka. 24 Osi mangsüpong elani olyuro motsünga to etham lo tsünghanrho etükpvü taro tiyingsi chiso elani olive thyujü etükpvü ethüm to theta thamvüka. 25 "Ranki than kvüthüng choro tiyingo to jilo tsüngon taro mongo to jilo benkae khia sana tsüngon tiying ji akvüto esapvüi jina mmenthan tssoa pia rophen ji esüa tsünghanrho tona thyujü to jiang kvüta thephen sana ji ephan theta thamvüka osi othan jiang mpüm na runguka."
Esanmung Tona Tokhu Jiang To
1 OPVÜI Tsüphotso jina phyoala, "Nchuk tirok elhi etsso tsüngon jiang yuta lojo kitajo ochungoe rhovolan lanpvütsü jijo khani vav, osi esanmung nchuk tona choro ethan tokhu to jianglo tae chonchivka. 2 Osi kvüthüng pvüti jiangna mpüm na erungthan jiang tona khümshümta than to jiang rungasana, esapvüi jina ekhümki kitajo opomoe jiwoe na ochungoe lanpvütsü ji yakchia rhovo turhyu ji ndüngo mangkachi nhyaka vamvüka. Hoji kipünglan jilona ombona khümsi chiyilamvü shikhfü, osi n myuthg jo kipüng ji n khan na vav shikhfü. 3 Esanmung tona choro ethan tokhu to jiang topvülo kyon topvüna kipünglan jilona nkhümthe OPVÜI khümvüka. 4 "Esanmung nchok jo esapvüi jina totona erungothan, olyu oro tirok, opong motsünga to ntia esa-eri mekana ephyov n khyingo tüv OPVÜI thüngi hansi rov. 5 Osi olyupong hansi ero akvüto tsünghanrho etükpvü taro tiyingsi riso, elani olyu woro jiang akvüto nzo ombona ntio pihunga sana jiang hansi rov. Osi otssok omüm than piana ombona olive thyujü etükpvü ethüm hansi rov. 6 Osi choro ethan tokhu jilo jo ombona mangsü pongtsüro motsünga, olyu oro tirok, elani olyupong motsünga to ntia esa-eri npao tüv hansi oro thamvüka. 7 Mangsüpong tona olyupong to thanana motsüngalo otssok omüm than etükpvü taro tiyingsi riso-ren hansi rov, tolea olyu oro jiangjo esapvüi mesao jina ntio pihunga sana jiang thenhyae thamvüka. Otssok omüm than piana olive thyujü etükpvü ethümsi riso thenhyae piv. 8 Esapvüi jina lanpvütsü jiwoe na rheyiphen chungchak jilo na rhovo thamvü osi chiyiathüngha lantsuk jilona chiyilamvü. 9 "Kvüthüng tokhu yutalo kyon jiangna khümo roasana, ochoang kvütatana khümkiwoe lanpvütsü jilona rheyicho sana khümthakana, ontena rhoro jilona n chiyilan tolia lanpowoe na chiyiv shikhfü. 10 Esapvüi jiha kyon jiangna chiyiathüng rheyisi ontena chiyiana omboha chiyilamvü. 11 Tsoyuta tsüngono osi tokhu yutalo jo otssok omüm than jiang jo yuta topvülo etükpvü taro tiyingsi riso tssov, elani mangsüpong tona olyupong to nzo ontena ntio pihunga sana jiang hansi oro thamvü. Otssok omüm than epi akvüto olive thyujü etükpvü ethümsi riso jo pinrhüv. 12 "Kvüthüng mesao ochona esapvüi tssoa vancho sana jitüv na ombo lümbüm erüng than OPVÜI pihunga sana, mpüm na erungo than tssolea, mekana khümshümta than tssolea engkhfüwoe lanpvü ji tona kitajo ochungo ji to chonchi ombo vayiv. Osi ombona othan jiang ji kvüto esanmung tsüngono piasana ji esüa piv, osi ombona chiyithakana kipünglan ji khanlani siv."
Eng Akvü Than Jiang
13 OPVÜI na phyoala, "Enya akvüto olyu nzyua-tso esa-eri n khyingo tüv khi mpüm na erungo than tssoa OPVÜI thüngi piv. Othan shijo eng akvüto epiv shikhfü. 14 Elani khi ohüm seri eni tona hojilo nzitsüv tsükona olive thyujü etükpvü motsünga to enya akvüto piv shikhfü. OPVÜI thüngi eng akvü epio shikhfü shiangjo nchüngkhon tsükona tsütsata wov. 15 Olyu oro, ohüm chencho tona olive thyujü, to shiang jo eng akvüto nchünkhon tsükona OPVÜI thüngi epiothan."
Mesao Tona Liko Jiang To
16 OPVÜI Tsüphotso jina heto yizüng piala: "Esapvüi tssoa evamo mesao jina ombo echi liko lona khakche ombo tsoe tsüka thüngi yantso ejoena pia tssona, hojijo tsokhying ocho pichosana jina ombo wopan ejüeli esüa khiv. 17 Tokhatola esapvüi mesao na ombo küpo elhi etssoe ochosana thüngi ombo liko lona khichoe pia tssona, kvüthüng rilanta nzyu chiyia sana jithüng liko ji esapvüi ji echi kümlamvü. 18 Osi esapvüi ochinaha onte esalo ombo kyon ochhi nti ejüeli osi tsütsaelan ha n khiyiche. Osi ombona ombo tsoe thüngi liko pia sayilea hoji ombo ejan liko lona khichev shikhfü. Hojito tssona ombona a kyon jiang liko khiyia onte n khontsüngu tssov."
Ekhümki Tssoyanki Jiang
19 Hoji sülojo kyon jina asosi rhovolan chungchak, khümkiwoe lanpvü jiwoe zechiwo elio ji lona jolowoe kitajo ochungo jilo rhovotacho. Osi hojiang jo pvütiden jiang tsükona ntho meta jiang tssocho. Ombona engrhelamoe chungchak jiang yulo meta motsünga etssyukata 20 heto phyocho, "Chungchak shiangjo oso mmen than tona pilanthan to epio jiangji pvüti jiangna oso vüp-phen jiang osi ohüm chencho jiang ji rungphen, hoji to tssona nti ntho tsütsaelan ha kitajo opomo jilo hansi n chivo osi kyon jiang n tssatsso." 21-22 Hoji sülojo elani ombona kitajo opomo ji asosi chiyi a ejücho osi hojilo jo, nken mezhüata lo kitajo teri teri esi khejü tiying aria tona nzo khejü mongo aria to liracho. 23 Chungchak akvüto füchokchia olungna chungcho, osi mitssophen ha kyim ehung jiang shüpkata tssokacho. 24 Osi kyon jina heto azocho, "Tssoyanki shiangjo, kyon jiangna OPVÜI thüngi othan epio jiang ji ekhümki phajaeden jiangna vüphen chungchak jiang to."
Khümphenki Jilona Zhükhfü Tsüa Chiyio Ji
1 Kyon jina elani ekhümki chungchak opomo jilo asolansi yicho. Tole rheyilan chungchak ji chungi na ojü tsüa chiyi ekhümki jina zechiwo engkhüwoe tsüa yicho. Hojijo ekhümki ji jolowoe tsüa chiyi jilowoe thanphensa ji yakchia yicho tssocho. 2 Hoji sülojo kyon jina ekhümkina asolansi chiyi khümkiwoe lanpvü ji yakchia chiyi, engkhvüwoe zechiwo lanpvü kipüng elio jiwoe füa wotacho. Osi jolowoe lanpvü khan jiwoe na zhükhfü teriv tsüa chiyia tüv licho. 3 Osi kyon jina ombo khelo etsiphen ji khi zhükhfüro ji tunga khejü wothüng motsüngasi riso etsichochicho, tothakale hoji rhyua jowole to a ezocho. Osi ojü jijo jo-mhyik echüm tae tssocho, 4 Hoji sülojo elani ombona khejü thüngasi riso etsilanle hojiwoe jo ojü ji a nkhok jana ndünga chüngicho tüv tssocho. Elani ombona khejü wothüng motsüngasi riso etsichilanle, jilojo ojü ji a eryu nandang tssocho. 5 Elani ombona khejü thüngasi riso etsilancho, tole hojilo jo ojü ji elümoto jungo jina ana rhyunrhüa n vochecho. Nghoa wocho mekna ojoena evov jo elümoto jungcho. 6 Osi ombona heto a ezocho, "Echüo kyon yo, shiang hetopvü shi tüngochünga sekata." Hoji sülojo elani kyon jina zhükhfü ji jürani asolansi chiyicho, 7 osi ana kvüthüng jürani chiyicho sana jüran tsungkhoata lo odung elümoto zae licho hungcho. 8 Ombona azocho, "Zhükhfü shina engkhfüwoe meta jiang yakchia tsüa oyi Jordan hayitsüi tsüa joyiala osi hojilona echü jümang jilo tsüthetala. Kvüthüng zhükhfü shina echü jümang jilo tsütheta sana, hojilo majü jiang ji ojü ethan na tongchetala. 9 Kvüthüng zhükhfü tsüa sana ekümrümo lantaro osi ongolan taro jüala. Zhükhfü jü jina echü jü ji jüthan kümthukala, osi kvüthüng hojina tsüa sana hojina eküm hansi yiv. 10 Engedi jüpokphen jilona benkae Eneglam jüpokphen ji jana ngorüm na jüran topvü etüngpyingu, osi meta topvü pyinga ngazonphen phitav. Osi Mediterranean jümangi ngolan kvüta vanchosana topvü zhükhfü jianglo vamvü. 11 Tokhatola jüran jiang rhüa wozhü osi nhyayo jü jiango n tssüngche. Onteno oma chiyiphen tssoa ntongphina vamvü. 12 Osi zhükhfü jüran tsungkhoata lo etsoyu chiyiphen tssoa otssüng odung rankav. Onte wo jiango kvüthüngha n mika, osi tsüngthi tümjak n lina ethiv. Ontena choro akvüto tssüngthi ethan ethiv, ntiotssole onteno ekhümki jilona ojü tsüa chiyio jina yuta topvülo etsonkata vamo ji tsükona. Odung jiangna tssüngthi ethi etsoyu tssoa tswothukvü, osi onte wo jiango kyon jiang emiyiphen tssov."
Metaji Erü Jiang
13 OPVÜI Tsüphotso jina phyocho, "Liko Israel jipo taro eni jiang na jantav ji erü ekük jo shiang heto tssov, osi Joseph jipo jo ejan eni hungu. 14 Ana nte pyimtsü motsüi jiang thüngi liko shi nte pivto mmhona mmyinga echümchakcho. Hoji tsükona enhungo nte kheti jantae khitava. 15 "Khümkiwoe erü jina engkhfüwoe Mediterranean jümang jina Hethlon yantsü jana yicho osi hoji lona Hamath eyak ji yakchia Zebad yantsüwoe, 16 chiyi Berothah tona Sibraim yantsü jilo chiyicho. (Yantsü shiang jo Damaskas (Damascus) ekhüngyan erü ji tona Hamath ekhüngyan to oni yutalo tssocho), osi Tikon yantsüwoe jo (Haraun yansa meta erüwoe tssocho). 17 Hojito khümkiwoe erü jijo Mediterranean jümang na engkhfüwoe lona Enon yantsü nandang yicho, osi ekhümkiwoe jo elani Damaskus tona Hamath to oni meta jana yicho. 18 "Engkhfüwoe erü jijo jolowoe Damaskas tona Haman to oni ntsüktaphen jilona jolowoe joyicho, osi jordan zhükhfü jina engrhelamoe jo Israel meta jina erü tsso, nna engkhfüwoe jo Gilead, echü jümang jilo Tamar nandang tssocho. 19 "Jolowoe erü jijo engrhelan jolowoe Tamar lona Kadesh Meribah nhyayu ji nandang, osi engrhelan khümkiwoe ji Ejip kyon jiang erü lona benkae Mediterranean jümang ji nandang tssocho. 20 "Osi engrhelamoe erü jijo Mediterranean jümang jina erü tssoe khümkiwoe Hamath eyaklan ji benkaphen ji nandang tssocho. 21 "Meta shiji nte jipo jiang yulo jantava; 22 Shijo nchüngkhon to tsükona nte echi tssovka. Osi metapoe kyon ochoang na nte yulo vani otsoe oro lia yithakcho sana jiangha ntena liko shi chitana onte ejan pivka. Onteha Israel kyon tssentso ndüng esüa onte vanthuka osi Israel na kiko shiang chitav phyalu fuktathüng onteha ejan epiv tsükona phyalu fuknhyav. 23 Osi metapoe otsük akvüna ombona ochoang jipo lo tsankae vancho sana jiang ejan lona chinhyavka. A, OPVÜI Tsüphotso jina hojito phyothaka."
Jipo Jiang Yulo Liko Janta
1 Khümkiwoe erü jijo Mediterranean jümang ji lona benkae Hethlon yantsü jinandang erünrhüi oyi Hanath eyaklan, jilona Enon yantsü nandang, Damaskas ekhüngyan tona Hamath oni yutalo na erüi yicho. Osi jipo akvüna echi motsünga engkhvüwoe erü jilona benkae engrhelamoe Mediterranean jümang ji nandang khivka, osi Khümkiwoe na jolowoe jo shi esüa heto tssov: Dan Asher Naphtali Manasseh Ephraim Reuben Juda
Meta Ji Longjüngo Liko Erüchoji
8 Echi enio to jijo echümporo tsütsav tsükona khochaki vav. Osi hojijo khümkiwoe na jolowoe jana nzoe kilometer taro enisi riso etsichoe vavka, osi engkhfüwoe na engrhelamoe jo jipo thanpoe jiang pio ji woni kheti tssov. Osi khümphen ki jijo shi meta shilo tssov. 9 Osi meta shi longjüngo elani etsüi kilometer taro, esi kilometer taro enisi riso to etsicholani OPVÜI tsükona khochaki vav. 10 Pvüti jiang jo ntho meta shilo khiche onte ejan khiv, onte ejan ji engkhfüwoe na engrhelamoe jo kilometer taro enisi riso osi khümkiwoe na jolowoe jo kilometer mongo to khivka. Osi OPVÜI ekhümki jijo meta shi longjüngo tssovka. 11 Ntho meta shijo pvütiden ochoang Zadok tsoronichen sana hojiang echi tssov. Osi onteno Levi jipo thanpoe jiang esüa Israel jipo jianglo pfükae elhi silyuo n tsso tolea longtsüka lia a benkata yicho. 12 Hoji tsükona onteha ntho meta Levi jipo jiang na khio ji chümji khivka, osi hojijo topvülo nthotso ji tssovka. 13 Osi Levi jiangha pvüti na ekhio ji jolowoe meta echümpo jilo khivka osi hojiha engkhfüwoe na engrhelamoe jo kilometer taro enisi riso tssov osi khümkiwoe na jolowoe jo kilometer mongo tssovka. 14 OPVÜI tsükona khochaki evao jijo meta ji mpüm lo mmhontso ji hoji, hoji tsükona echi motsünga lea oyam thüngi n yen, mekana ntongta osi ochi khelo ha n rheyiche. Hojijo ntho osi OPVÜI echi. 15 Elani echümporo meta shilo enhyoe elio esi kilometer taro enisi riso nzoe kilometer enisi riso shijo ntho tsotso mek, tolea nzo ntsü na tsütsav tsükona vavka. Kyon jiang na hojilo vani liko ji tsütsata vankhuka. Osi yantsü jo liko shi longjüngo tssov, 16 osi hojijo etsüi esi nken mezhü kheti khejü 6,750 tssov. 17 Osi yantsü ji totona füchokchia liko tajo khejü 375 hae vavka. 18 Osi yantsü ji tssosi liko enhyolani elio jolowoe ntho metaji lona benkao esi kilometer mongo nzoe kilometer riso, osi engkhfüwoe jo esi kilometer mongo, nzoe engrhelamoe jo kilometer enisi riso tojo yantsü shilo evamo kyon shiangna oli jomvüka. 19 Shiang jipo kyon tssolea, shiang jipo tssolea ochona yantsü shilo vana sana jiangna liko shi joni tsokhuka. 20 Metaji longjüngo echümporo khakchoe evao jijo yantsü etssov ji thenhyae nken mezhüata kheti etsüi esi kilometer taro enisi riso tssov. 21-22 Engkhfüwoe na engrhelamoe jana meta khakchoe evao jilo ekhümki tssophen, pvüti jiang liko osi Levi kyon jiang ejan elani yantsü tssophen to jüa, osi hojilo enhyo jijo ochoang na esapvüi tssoa vanchosana jiang echi. Osi hojijo engkhfülamoe erü jilona engrhelamoe Mediterranean jümang ji nandang, osi khümkiwoe Juda jipo ejan jiha jolowoe Benjamin jipo ejan ji tona füchümcho.
Jipo Thanpoe Jiang tsükona
23-27 Echümporo meta shi jolowoe jo engkhfüwoe na benkae engrhelamoe Medetarreania jümang ji jana liko elio jiang ji jipolan akvütona onte ejan hunguka, osi khümkiwoe na jolowoe jana meta chita ji shi esüa tssocho. Benjamin Simeon Issakhar Zebulun Gad 28 Gad jipo epio jina jolowoe erü jipo engrhelan jolowoe Tamar lona benkae Kadesh nhyayujü ji nandang, elani engkhfülan khümkiwoe Ejip kyon jiang erüwoe na Mediterranean jümang ji nandang tssov. 29 OPVÜI Tsüphotso jina phyocho, "Israel na liko ekhiv evamo ji phyoa yithako shi esüa onte pvüjilan topvü ejan ephanina chitav."
Jerusalem Lo Lanpvütsü Jiang
30-34 Jerusalem yantsü jilo rheyilan taro eni licho, osi hojiang lo nken mezhüata pikhfü jiang ji khejü 6750 tssocho, osi hojiang akvüto jipo motsünga mying picho. Khümkiwoe kipünglan jiango, Reuben, Juda, tona Levi to omying picho, engkhfülamoe pikhfü jiangjoJoseph, Benjamin, tona Dan to omying picho; jolowoe pikhfü jiangji Simeon, Essachar tona Zebulum to; osi enggrhelamoe pikhfü jiangjo Gad, Asher, tona Napathali to omying eyikayicho. 35 Osi yantsü pikhfü ji nken mezhüata tssotsüi esi meter wothüng tokvü tssocho. Osi enhüngana benkae yantsü ji myingjo, "OPVÜI Jo Shilo Vana!" to tsavka.
Nebukadnezaar Yitssoki Khyingroeden Jiang
1 Jehoiakim na Juda ji sasi nzyu ethümo to jilo, Babylon mesao Nebukadnezaar na Jerusalem yantsü ji oro vükthechi hayacho. 2 Osi mesao Jehoiakim ji hayae rhümav tsükona OPVÜI na etho ombo picho, osi khümphen ki jilo tsentsüman ejüeli ejoma ha hayanhyacho. Hoji süijo ombona vüngi evan jiang yulo ejoma sosi Babyloni ombo potsow jiang ekhümki jilo yicho, osi tsentsüman ejüeli hansi eyio jiang jo ekhümki tsütsailan vapheni vacho. 3 Mesao jina ombo küpo tsüphotso Ashpenaz ji, Israel metae ombo kyon sosi oyi vamo jiang yulo ntsinran osi mesae tüv lona khyingroeden ejoma ethüngchele to yidan picho. 4 Onteji opyon-ori mmhona nchümri eroe elani mmhona shikathang elani zak zak to engathewo tüv osi otsük osolo ntia ephyo-er n tssoe tüv tssov shikhfü, hojtüv kyon tssona onteji mesao yitssoki benka elhi etssoe etümvü. Osi onteji Babylon yi eram osi ekhav tsükona Ashpenaz na shikao tssocho. 5 Elani onteji eng akvüto mesao yitssopheni khanhyae tsüphoeden na ntio tsoa sana jiang onte kheti etsoyu pile toha mesao na yidan picho. Osi nteji nzyu ethüm thangshi khicho sülojo mesao mhadungo sosi chivo tüv tssocho. 6 Ethüngcheo kyon jiangji Daniel, Hananiah, Mishael tona Azariah to tssocho, onte topvüto Juda jipo lona tssocho. 7 Tsüphoe jina omying ethan heto onte piracho. Belteshazaar, Shadrakh, Meshakh, tona Abednego to. 8 Tokhatola Daniel na mesao ki etsoyu osi soko jiang khi omboji n mmenthuk to ombo lümbümi methak licho; hoji tsükona Ashpenaz ji ombo kyochile to ezocho. 9 Osi hojito Ashpenaz ji Potsow na Daniel nzamo lümbüm ombo theyicho. 10 Tokhatola Ashpenaz na mesao ji kyua nchümcho, hoji tsükona ombona Daniel thüngi heto ezocho, "Nina ntio tsoyuv sana ji mesao na methakcho, osi niji khyingroe thanpoe jiang esüa etho jüa ni nzecheta tssona ombona a lüngthav mpa tssov." 11 Hoji sülojo Aphenaz na ombo thung tssoa enhyang ocho ombo tona ombo shom otsük ethüm to jiang nhyakthokvü vanthukcho sana ji thüngi Daniel na wocho. 12 Osi ombona "Tsüngon taro tsükona ejyui chei ezeta" to ezocho: "Elani etsoyu tsükona oyo-ohan tona eyuv tsükona ojü totae epia. 13 Osi hoji sülojo mesao ki yitssopheni etsoyu mmhom tsoa evamo jiang ete etsitae ezesi eji kvütüv ezechetana hojilo ndungkae nina ntio methaku sana methaka" 14 Hoji tsükona onteji nchuk taro tsükona ejyui ezev ephyo ji enhyang jinaha lümbüm na rüngcho. 15 Kvüthüng yuta ji bencho sana etsitae zele, mesao etsoyu mmhom tsoa evamo jiang thüngina jo onte tsük mmhomo osi etho ejüo tssocho. 16 Hoji tsükona, jisüijo enhyang jiang naha mesao na etsoyu mmhom epio jiang mekna oyo-ohan etsoyu onte tsothuka yicho. 17 Potsow na khyingroe nchyu mezhü jiang thüngi ntsinran, eran tovlo tssothimori tona nchümrilo choka mmha to onte picho. Hojilo ekaphata Daniel thüngi jo omüng jiang khophicheo etho tona hungjan rüjan toha picho. 18 Mesao na züngchaki evao nzyu ethüm ji benthakale, Ashpenaz na khyingroe jiang topvüto mesao Nebukadnezaar thüngi sosi wocho. 19 Osi mesao jina onte topvüto jani zecho, tole thanpoe jiang thüngi najo Daniel, Hananiah, Mishael, tona Azariah to yi jiang na ombo lümbümo rhakcho. Hoji tsükona onteji mesao yitssopheni khannhyaeden kümcho. 20 Mesao na hetüv engalea, hetüv engalea, mekana hetüv emhok-elüm hansi yilea, ombo ekhüngyano methevüjae mekana ozen ntsii topvü jiang thüngi na taro mmhonkata khyingroe shiangna ntsicho. 21 Osi hojito Persia ekhüng esae Cyrus na Babylon ji khyoe n khithüng nandang jo Daniel jo mesao yitssoki elhi tssoa vancho.
Nebukadnezaar na Omüng Emhao Ji
1 Nebukadnezaar na mesao tssosi nzyu enioto jilo ombona omüng heto emhacho: osi hojina elümoto ombo wongkhyua khetsüa to etsso jina mmhonatia n yipchev sicho, 2 hoji tsükona omüng ji khophi ombo ezotokvü tsükona, methevüjae, ozen okyak ntsii, r ratssen elani hungjan-rüjan topvüto yana wothukcho. Ontena kvüthüng mesao mhadungo mangcho sana, 3 ombona heto onte ezocho: Ana omüng emhacho osi hojina elümoto a wongkhyuala, osi omüng ji yichak ji a ntsihungalac" 4 Tole ontena Aramik yina mesao ji heto janlancho, "Oh, ekhüng esaeyo, kümalito harishia ni vanthokuka! Ni müng ji ezoa tona ena topvü eroroe ni ezovka." 5 Tole mesao jina onte ezocho: "Ntena amüngji tona hoji yichak ji to a ezov, osi hoji mmhona eroroe a ezochev shikhfü to ana alümbüm na rünga methakthaka. Osi ntena hoji a n zocheta tssona, ana ojo okhe nte jakiv osi nte son-oki jiang ha roe ekachi nte siyiv. 6 Tokhatola ntena ana omüng emhao jiha elani hoji yichak jiha to a ezochena ana yantso nte piv osi elümoto nte yikrachiv. Hoji tsükona enhungo ana ntio emhacho sana ji tona hoji yichak jiang to a ezotava." 7 Elani ontena mesao ji janlana heto ezotacho, "Nina poti ni müngji ezoa tssona ena hoji yichak ji eroroe ni ezov." 8 Jithüngji mesao jina lümbüm tsuka heto ntakachicho, "Ana nchümo ji esüa! Ntena yuta ji senchiv kyaktala! Ntiotssole ntena omüngji a nzocheta tssona, 9 ana nte topvüto ezüp kheti nte epiv tsükona a lümbümi na methakthaka; ntena jo yuta tara sülojo a lümbüm tongphia yiv mpa tssovka to nchümta yuta ezia ejüng a ezotala. Ana ntio emhacho sana ji a ezotava, tona ntena hoji yichak jiha a ezochev to ana ntsiv." 10 Tole ejü-rünyoe jiang na janlancho, "Mesao na ntsihunga evamo jiang ezov tsükona limha shilo ochia n van; nti mesao naha osi topvülo etho elitso mekana tsüphotso jina leha ombo ekhüngyano methevüjae, ozen okyak ntsii osi ratssen-rapvüi jiang thüngina hetüv yi n chonhan. 11 Mesao na ntsihunga evamo jijo ekhüngtsov motsünga osi potsow jiang na mekna kyon najo n phyoche, tole potsow jiang najo kyon yulo n van." 12 Hoji engasi mesao ji omi kia lümbüm tsukcho osi Babylon lo mesao ejü-rünyoe jiang topvü chüthukle to yidan picho. 13 Hoji tsükona onte topvüto, Daniel osi ombo shom jiang phanhya lüngthakhani esiv tsükona yidan picho.
Potsow na Nebukadnezaar Müng Yichak ji Daniel Ntsithukala
14 Hoji tsükona Daniel na ntio kvüto nsamvü sana ji nchümri hansi Ariokh ocho mesao enhyang jiang yulo tsüphotso sana osi ochojo mesao yidan ji benphiv tsükona zikacho sana ji thüngi wocho, 15 osi ntio tsükona mesao na hetata haruk-hashü yidan hetüv picho sana ji engacho. Hoji tsükona ntio kvüto tssocho na sanaji Ariokh na Daniel rüa ezocho. 16 Tole zakto Daniel na mesao thüngi yuta choncho, omühg ji yichak ji mesao thüngi rüa ezochev tsükona. 17 Hoji sülojo Daniel na oki yicho osi ntio kvüto tssocho sana jiang ji ombo shomden, Hananaih, Mishael, Azariah to thüngi rüa ezocho. 18 Hoji tsükona onte topvüna Potsow thüngi nzan chona elani omüng ji yichak ji onte ntsithoku tsükona jonjia randanatale to onte ezocho, ntiotssole ontena omüng ji yichak ji ezocheta tssona Babylon lo ratssen-rapvüi jiang nzo onte n chüthoku tsükona. 19 Tole chethev müng ji yichak ji hoji zümo jilo Daniel thüngi Potsow na monsüthukcho, osi ombona potsüwoe evamo Potsow thüngcho: 20 "Potsow jo nchümri eli osi etho ejüi! Nchünkhon, nchünkhonto ombo mying thünga. 21 Ombona yuta osi oküm nzyu jiang sayatala; Ombona mesao kümthukala osi joyithuyklanala; Nchümri mmhom osi engathe epipvüi jijo ombo. 22 Ombona mphoyi ejungi elio jiang ji ehungthukala; Emüngi ntio mphoe licho sana jiha ombona ntsia, osi omboha wondang na ombo füchümcho. 23 Ana ni thüngala osi ni kyuchiala, A pyimtsümotsüi Potsow. Nina engathewo nchümri osi etho apithaka; Nina arandan ajanlanthaka osi mesao thüngi ntio ezov sana jiang ejüthaka."
Daniel na Mesao Thüngi Omüng ji Ezoala Osi Eroroala
24 Hojito Daniel na Ariokh ocho thüngi mesaona ejü-rünyoe jiang chüthokvü tsükona yidan pithakcho sanaji thüngi wocho. Ombona heto ombo ezocho, "Onteji ti-chüthoka. Osi mesao thüngi asosi woa, tona ana ombo müng ji yichak ji ombo ezovka." 25 Tole zaktole Ariokh na Daniel ji mesao Nebukadnezaar thüngi sosi wocho osi ombona mesao ji ezocho, "Jihudi kyon tsüka hepi oyi evan ana yanchethaka, osi ombona ni müngji yichak ji ni ezochev, yikrachio mesao." 26 Tole mesao na Daniel thüngi ezocho, (ombo Belteshazaar toha tsacho), "Ana ntio emhacho sana osi hoji yichak ji nina a ezokhoku nüng?" 27 Daniel na janlancho, "Yikrachio mesao, ozen okyak ntsii methe-vüjae osi choro shantio ekhae, mekana ratsenrapvüi ochia ni müng ji osi hoji yichak ji ni ezokhoko tüv n van. 28 Tokhatola, potsüwoe Potsow ochona mphoyi topvü entsithukcho sana hoji vana; Osi ochyu ovüngi ntio tssov sana ji ombona ni ezocho. Hoji tsükona enhungo, ana ni müng nina yipathüng ehungo ji tona hoji yichak jito ni ezovka. 29 "Ni mesao na nina yipathüng, nina ochyu-ovüng tsükona emhacho; osi Potsow ochona mphoyi topvü oponi chyithuka sana jina mhadungi ntio tssov vancho sana ji ni ejücho. 30 Osi elani hoji mphoyi ji athüngi ha a ejüthaka, hojijo aji oyam lona nchümri likacho lona mek, tolea yikrachio mesao, ni müng ji yichak ji ni ntsithoku tsükona, osi ntio yichüngyi ni thüngi rothukcho sana ji ni engathoku tsükona hojito tssocho. 31 'Yikrachio mesao, nina omüngina ni mhadungi kisü tsündam tüv hungcho, osi kisü jijo rakachia tsünglüpa tüv tssocho, osi: ekyuthav n zekhoko jitüv tssocho. 32 Kisü ji kvüri jijo shona njüm na nsüngrücho, osi teki tona ojo to jiang jo janti na nsüngrücho; osi hoji eryu tona kangkok tojo pyontsü yonjak na nsüngrücho; 33 Ojo jiango yonjak osi jonpho jijo yonjak tona ochon to tsotsücho tüv na nsüngrücho. 34 Nina hoji zeta vanathüng ji ochinaha n vüngkata ha, longrhenina olung tsüphov eria joyi hojina kisü ji jonphoe yoiljak tona ochon to nzitae nsüngrüo jilo ejüpkacho, osi hoji ejüpfoe sicho. 35 Tole esüngaro taena, Yonjak, ochon, pyontsü yonjak osi shona jiang topvü nzyulo litssenpheni livero esüa kümkhani sicho; Osi ntia enhyokae n vana jiang topvüto vena yikhani sicho. Tokhatola olung jijo phunglan esüa tera kümi hojina meta ji mpümna vanzhüi sicho. 36 "Nina emhao omüng ji hoji. Hoji tsükona enhungo ana hoji yichak jo ntiosana rüa ni ezovka yikrachio mesao. 37 Yikrachio mesao, nino mesao jiang topvü pono tsüphotso ji. Potsüwoe evamo Potsow na ekhüng esao ni kümthukcho osi thosae, etho tona monkhüm yikrachi to ni picho. 38 Limha shilo kyon evan meta topvü sajamo esae osi ekümrümo, woro woni topvü pono esapvüi ni tssothukcho. Nino Shona küri ji. 39 Ni sülo ekhüngyan thanpo lilamvü, tolea ni ekhüngyan esüa etho liv mek, hoji sülo ethümo tojo pyontsü ekhüngyan chiyiv osi hojina limha topvü satsüv. 40 Hoji sülo elani ekhüngyan mezhüoto phanthiv, osi hojijo yonjak esüa ntssana olan topvü shünglanchia osi hojilo tsukachojo jakroe sia tüv tssov; osi hojina ekhüngyan yithako jiang topvü ejüpromoroe siv. 41 Kisü jilo joyingro jiangji ejomajo ochon, ejomajo yonjak tona nsüngrücho ha nina hungcho. Shi yichak jo ekhüngyan jijo chiro ekhüngyan tssov. Hoji ekhüngyan jina yonjak etho esüa etho liv, ntiotssole kisü jijo yonjak tona ochon to nzitacho jücho. 42 Joyingro jiang ji ejoma jo yonjak, ejoma jo ochon to nzitae nsüngrüchoji yichak jo ekhüngyan phoko jo etho liv osi ekhüngyan phuko jo etho n li to tssov. 43 Yonjak lo ochon nzio jiha nina hunga. Shi yichak jo ekhüngyan jilo esapvüi jiang jina kyon jiang ji yanpiyanthan lolanta yakchia wopan jiang tssüngrhyuv ekhyo tssov, tolea ochon tona yonjak to nzitao ji esüa totaekha jilona mmhonkata n tssoche. 44 Osi hojiang esapvüi jiang echungo Potsow na ekhüngyan kvüthüngha ochüm n tssovo tüv soyingu. Hojijo kvüthünghalea n khyo, tokhatola hojina ekhüngyan topvü ronrüngi sisi ombo nchüngkhonto lia vamvü. 45 Tosi longrhen sürhenina ochinaha n vüngkata khatola longpvü eria joyi kisü kümoe, shona njüm, janti, pyontsü yonjak osi ochon tona nsüngrücho sana jilo vankae ejüpro jiha nina hunga. Tsüphotso Potsow jina mhadungi ntio tssov vancho sana hoji ni ntsithukala yikrachio mesao. Nina kvüto emhacho sana ji chakcheta ni ezothaka, osi hojiang yichak jiang ha mmhona echükroe ni ejüthaka."
Mesao na Daniel Yantsoala
46 Tole mesao Nebukadnezzar na likoe nkhümthei, Daniel thüngi othan osi thungthan pile to yidan picho. 47 Mesao jina phyocho, "Ni Potsow jijo potsow thanpo jiang topvü lona tsükata, mesao jiang pono OPVÜI ji. Osi ochona mphoyi topvü e ntsithuka sana hoji. Nina mphoyi jiang topvüto erorocheo ji tsükona ana hojito shi ntsicho." 48 Hoji sülojo ombona Daniel ji tsüphoe kümthukcho, osi emhokthav tssentsüman yantso khi ombo picho, osi Babylon ekhüngyan echi motsüngalo esapvüi tssothuk, elani mesao ejü-rünyoe yulo kvüri ji ombo tssothuk to tssocho. 49 Osi Daniel na jonjicho yakchia ombo shom Meshakh, Shadrakh, elani Abednego to jiang ha ekhüngyan chiro jiang lo tsüphoeden tssothukcho, tokhatola Daniel jo mesao yitssoki vanpvüto tssocho.
Shona Kisü Khümle to Nebukadnezzar na Otsük Akvü Thüngi Yizüng Piala
1 Nebukadnezzar na shona kisü motsünga nsüngrücho, ntssoni meter myukyusi tiying, etsüi meter ethüm to harüma nsüngrücho, osi hoji Babylon meta echi motsünga Dura hayi lo chümkachicho. 2 Tokhatola mesao na ombo küpo tsüphoeden, topvü sanrhyule to yizüng picho, hoji meta jilo mesaeden meta jilo esapvüiden, rangvaeden, yitssoeden, yitssopvüiden, osi meta chiso jilo tsüphoe olan olan topvüto tsarhyucho. Osi hojijo Nebukadnezzar na shona kisü chümkachi elio ji nthoche jilo ethev tsükona. 3 Kvüthüng tsüphoeden shiang na kisü nthoche jilo ethev tsükona kisü ji mhadungo sanrhyucho sana, 4 yithen heto tüngkachicho, "Jipolan topvülo kyon topvü osi pvüjilan osi yisanlan topvüden! 5 Ntena tatara khvükachia, khenpvülan taro, osi khenzhülan, rhüphiphen osi pyapiro süyangta benria khvüsochia zov. Kvüthüng okhen jiang benkae khvüa sana nte topvüna nkhümthei Nebukadnezzar na chümkachi elio shona kisü ji khümvüka to tüngsochicho. 6 Osi kyon ochona zaktole nkhümthei n khüma sana jiango omi kia evamo mikvü jilo thechivka." 7 Hoji tsükona ontena khenkhvüphen olan olan jiang khvüa zopvüto jipolan, pvüjilan, osi yisanlan topvüna nkhümthei mesao Nebukadnezzar na chümkachio shona kisü ji khümtacho.
Daniel Shom Otsük Ethüm Jiang ji Jancho N zoe to Nlan Piala
8 Hojitothüng ji Babylon kyon ejoma na Jihudi kyon jiangji nlan pia khoe esiv tsükona tssocho mmhon hungcho. 9 Osi ontena mesao Nebukadnezzar thüngi heto ezotacho, "Yikrachio mesao nchüngkhonto ni vanthukvüka! 10 Ena yikrachio ni mesao na okhen jiang khvüsochiale, zaktole otsük akvüna nkhümthei shona kisü ji khümvüka to yidan picho, 11 osi ochona nkhümthei kisü ji n khüma sana jiango mikvüi thechiv to phyocho. 12 Tokhatola nina Babylon meta echi motsüngalo tsüphoe tssothuko Shadrakh, Meshakh, osi Abednego to Jihudi kyon shiang na ni mesao yi n ngala, ontena ni potsow ji n khümala mekana nina chümkachio kisü ji mhadungo n khümthetala." 13 Hoji zoe mesao ji omi kia lüm tsukcho, osi kyon nchyu ethüm jiang ombo mhadungo sosi yile to yidan picho. 14 Ontena role ombona heto onte ezocho, "Sadrakh, Meshakh, Abednego, otsotso ni nthümo ana chümkachi evao shona kisü a potsow ji n khümtachoke? 15 Hojito tssocho tssona, enhungo ntena tatara won osi khenpvü olan olan, phyulüyu osi zhükhen jiang kvüthüng khvüsoehia zoasana zaktole nkhümthei kisü ji khümtava osi ntena n khüma tssona, nteji zaktole mikvüi nte shümthechivka. Jilona nte shanchocheo tüv potsow ochosana vana to ntena nchümta alo?" 16Tole, Shadrakh, Meshakh, tona Abednego to onthüm na janlancho."Yikrachio mesao, enajo epopo jo nkochev ekhyo tssov meka. 17 Tolea ena benkata evamo Potsow jina mikvü jilona tona ni etho jilona to eshanchochev to tssona ombona eshanchovka. 18 Osi ombona mpa e n shanchoa sayilea, yikrachio mesao nina ntsi khia, enajo ni potsow jo n khüm, osi nina chümkachi evao shona kisü ji mhadungo jo ena jo n pyakthe."
Daniel Shom Nchyu Ethüm Jiang Chüthukvü Yidan Piala
19 Tole Nebukadnezzar ji Shadrakh, Meshakh, tona Abednego to omthüm thüngi lümbüm etsuk lona ombo lümbüm n sayakhukvü omha rakia lüm tsukcho. Hoji tsükona mikvü ji tathi lona yenjo tiying tssokata tssothukleto ombo kyon jiang ezocho. 20 Osi ombona ombo rasan jiang yulo etho ejütso ji thüngi panithüm ji chungi omi kia evamo mikvü jilo shümthechile to ezocho. 21 Hoji tsükona, panithüm ji onte mpensü, phokthesü, phüngnrhüo osi kikho to ekapvüna chungi mikvüi shümthechicho. 22 Osi mesao na mikvü ji tathilona yenjo tiying tssokata tssothukle to ezo jina omi evakchukchii khienhyang ochoang na pani thüm ji echümsi mikvüi thechicho sana jiang mpato omina rongchicho. 23 Hojito, Shodrakh, Meshakh, osi Abednego to onthüm ji omi kia evamo mikvü ji longjüngo ojo okhe chüngpvüna elongthecho. 24 Tothüng ji Nebukednazzar na zaktole ngangcheta emhuka tsukacho. Osi ombona ombo tsüphoe jiang engacho."Eteno kyon nchyu ethüm chungi mikvü omi evakchukchia evamo jilo n thechichoke?" Ontena janlancho, "Hoka yikrachio mesao etena hojito tssocho." 25 'Tona kvütoli milongina nchyu mezhü sanphita ana hunga ato?" to ombona engalanchO; "Onteji n chüng osi ontelo ntia tssocho n zeche osi onte yulo mezhüo to jijo lanben esüa zechetala."
Tsüphokao Tssothukala
Onthüm Jiang ji Vachi Elhi
26 Hoji sülojo Nebukadnezzar na omi kia evamo ji kibüngona owo omying na rüki, "Shadrakh! Meshakh! Abednago! Tsüphotso Potsow ji nriden! chiyitava!" to ezoa tsachukcho. Osi hojito ontena zaktole chiyiracho. 27 Tole jilo esapvüi ventan jiang, mesao tsokhyingden, osi tsüphoe thanpoe topvüna, nchyu ethüm ochoang omi jina ntia onte n lyuyichecho sana jiang ezev tsükona sanrhyucho. Onte tssan jiang tia n vang, onte mpensü jiang ha n rung osi ontelo mikhfü zhükacho tia n rhüm ntsa. 28 Tole mesao na phyocho, "Shadrakh, Meshakh, osi Abednago to Potsow ji thüngtava! Ombona ombo lanben rothuka kyon otsük ethüm ochoang na ombo benkata ombolo longtsüa vancho sana shiang shanchothukthaka. Ontena a yi enga a potsow ji mhadungo nkhümthei khüm thüngina jo onte eküm mpa khochaki pia onte Potsow ji yakajo thanpo potsow n khümcho osi a yizüng n ngacho. 29 "Hoji tsükona enhungo ochoang jipo, pvüji osi yisanlan kyon na Shadrakh, Meshakh, tona Abednago to Potsow ji n kha n ziv nsana sana hojijo ojoena okhe ejan nrhakroe sivka osi ombo ki jiha vanroe ekachi siyivka to ana yizüng piala. Shi esüa shanchocheo tüv Potsow kvüloha osi ochia n van." 30 Hoji sülojo mesao na Shadrakh, Meshakh tona Abednago to onthümata Babylon meta echi motsünga jilo esapvüiden tsüphokao kümthukcho.
Nebukadnezzar na Yenjo Enio To Omüng Emhao Ji
1 Mesao Nebukadnazzar na limha topvülo jipo topvü, pvüji topvü to osi yisanlan topvüto thüngi heto yithen yithukcho: "Topvü thüngi monkhümka." 2 OPVÜI Potsow Tsüphotso jina a thüngi ntio emhukthav osi chethe mothev elhi tssocho sana jiang motsü ji engachitava. 3 "Potsow na emhokthav elhi tssoe ete thüngi ejüo jiango kvüta tsüphocho ato! Ombona chethe-mothev etsso jiango kvüta tsüphocho ato! Potsow jo kümalito mesao; ombona yuta topvülo sa vamvü. 4 "Ana mesao vanphenina elümoto loyia osi tsüka ranka lia yia vancho. 5 Tokhatola ana yipathüng ekyuthav müng emhacho osi emhuk ekhenthav tüv a hungthukcho. 6 Osi omüng ji yichak ji a zwothukvü tsükona ana Babylon metalo ejü-rünyoe, ratssen rapvüi topvüto tsarhyule to yidan picho. 7 Hoji esüa mhadung tsseni zesi ephyoe, ozen okyak ntsi, ratssen rapvüi osi choro shantio ekhae topvüto rocho, hoji tsükona ana a müng ji rüa onte ezocho, khatola onte ochinaha hoji yichak ji a n zochecho. 8 Hojithüng ji Daniel rheyicho. (Ombo mying jo a potsow myingo tsakata Belteshazzar toha tsacho). Osi ntho Potsow jiang mon ji ombolo vancho, osi ana ntio emhacho sanaji rüa ombo ezocho. Ana heto ombo ezocho: 9 Belteshazzar mhadung tsseni eze yulo esopvüi, Potsow ntho mon jiang nilo vana to ana ntsia, osi hoji yakchia mphoyi topvü nina engatheta. Ana omüng heto shi emhachoka, hojijo ntio yichak sana ji a ezoa. 10 "Ana yipathüng müngdüngina limha shi longjüngo odung tsündamvü tüv lia ana hungcho. 11 Osi hojina tsüka tsükana rankata limha shilo kyon otsük akvüna ehungo tssoa potsüo etssungkachia rankacho. 12 Hoji wo jiango ezehungthav osi limhatsü lea tsochyua tata tsüngthi ethi licho. Ora ekümrüm na ombo khümcho lo nlhicho, osi wworo jiangna ombo khero, shümro jiang topvülo oshüp tssocho, elani limha shilo ekümrümo to etsana hoji tsocho. 13 "Ana ntio müngdüngcho sana ji nchüma vanathüng, Potsowoe na lanben tsüka therüka osi tsoyokirina tüv ana hungcho. 14 Ombona owon choka heto thenchoa phyocho, 'Odung ji tanchüchüa osi khero jiang tssani sia; owo jiangha nhrüpi sia osi tsüngthi jiang ha nzüroe sia. Ekümrümo jiang ha hoji khümcho jilona phanchochirae sia osi woro jiangha khero jiang lona chiyikhanthuka.' 15 Tokhatola hümluk jijo yonjak tona pyontsü yonjak tona khüpzhüi vata. Osi likoe eroyo jianglo ekachi sia. "Osi enhungo kyon shi pono yentsso renkathuka, osi ombo ji otssüng odung yulo ekümrümo jiang nzo vanthuka. 16 Nzyu tiying jo ombona kyon nchümri n jüna vamvüka, tokhatola ekümrümo nchümri hansi vamvü. 17 Shijo therük tsoyoa osi nhyakyata evamo lanben jiangna methakcho. Hojito tssocho tssona Potsow na kyon jiang ekhüngyan jiang pono etho lia osi ekhüngyan jiang ji kyon na n kha-nzitso jilea ombona ocho ethüngcheta sana ji thüngi pieheta to meta topvülo kyon jiang thüngi ntsithuka." 18 "Ana omüng ji heto emhachoka," to Nebukadnezzar mesao na phyocho."Belteshazzar enhungo, hojijo ntio yichak sanaji a ezoa, a mesao ekhüngyani ratssen rapvüi jiangna a n zoche tolea nina jo a ezocheta, ntiotssole ntho Potsow jiang mon ji nilo vana."
Mesao Müngji Daniel na Eroroala
19 Hoji zoe Daniel ocho Belteshazaar toha tsacho sanaji emhuktsüngi ntia n sanchev sicho. Tole mesao na ombo ezocho, "Belteshazaar omüng osi hoji yithen ji khi ntia ni ti-mhukthuka." Belteshazaar na janlancho, "Yikrachio mesao, omüng osi hoji yichak ji niri jiang tsükona tssosi ni tsükona mekcho salivo to ana nchümala. 20 Odung ji potsüo etssungjana chungio ji tsükona limha shilo otsük akvüna hungwo tssocho. 21 Osi hoji wo jiango emüngyanthav tssocho, osi hojina limha shi mpüm lea süphieheta tata tsüngthi ethicho; orae ekümrümo na hoji kupi esancho, osi woro woni jiang na ombo khero jianglo oshüp tssocho. 22 "Yikrachio mesao, odung jijo nika, ntssona osi chüngchünga etsso ji. Elümoto ni thüngcheta tsüphoa oyak etssunga ni chüngicho, osi ni etho jina limha topvüto jankhanala. 23 Osi yikrachio mesao, nina zeta vanathüng, potsüwoe lanben na joro phyocho, 'Odungji tanchüchüi rhosoe sia, tokhatola humluk jijo to likoe ekachi sia, osi yonjak tona pyontsü yonjak na hoji nkona eyuki sia, tosi hojilo to eroyulo ekachi sia. Kyon shi pono yentsso renkathuka, osi hojilo ekümrümo nzo nzyu tiying ombo vanthuka.' 24 "Tona hoji yichak jijo heto, yikrachio mesao, shiang hetopvüto nipono tssovka to topvülo tsüphotso Potsow jina oponi chiyia thenchothaka. 25 Niji kyon jiang yo lona phani ni sivka, osi nina orae ekümrümo jiang nzo vamvüka, osi nzyu tiyingjo nina mangsübung esüa ero rüngi tsovka, osi yentsona ni renkata hapoe yipvüka. Hoji süloti nina Potsow na kyon jiang ekhüngyan lea ombo saya küpo tssoala, osi ombo na ocho ethüngcheta sana ji khelo ombona theyicheta to ji phyochaka engathev. 26 Humluk ji to likoe vanthuksale to lanben jina yidan picho, shi yichak jijo, nina kvüthüng Potsow na limha shi mpüm ombo saya küpo tssothukala toji nina khichoa sana, elani khi mesao ni kümlamvü. 27 Hoji tsükona yikrachio tsüphoeyo, nina mmen elhi etsso jilona esana, osi a ejü-rünyo ephan tssoa. Mmen etsso ji esansi ntiojo elan osi ntsa sanaji tssoa. Yantsae jiang khonzan to tssoa. Hojito tssona nino nijüolia vanpvü tssovka." 28 Shiang hetopvüto ji mesao Nebukadnezaar pono tssocho. 29 Osi hojito tssosi choro taro enitae tssohana ombona Babylon lo ombo mesaki mhonki sanphia vanathüng, 30 Ombona phyocho, "Zeta, Babylon jo kvütata tsüphocho sana! A, etho osi thosa mekana myingthüng osi phfütsson ji hungthoku tsükona ana a yanpvü ji shi esüa heto tssocho." 31 Ombo püngina oyi shiang n chiyirav, potsüwoe na owon heto tssocho, "Mesao Nebukadnezar, ana ntio phyoa vancho sana ji enga! Ni mesao etho ji enhungo, nithüngina khi hansi yithaka. 32 Nino kyon kholuk lona phanchukchi ni sivka, osi nino ekümrümo esüa vani khi mangsübung esüa ero rüngi tsoa nzyu tiying vamvüka. Hoji sülojo nina Potsow tsüphotso jina limhalo kyon jiang ekhüngyan ji pono etho lia osi ombona ocho ethüngcheta sana ji khelo theyiv to phyochaka khichov." 33 Owon tsso ji esüa zaktole hojito tssocho. Osi Nebukadnezaar ji kyon yulona phanchukchi sisi mangsübung esüa ero rüngi tsocho. Yentso ombo tsüko renkacho, osi ombo tsan jiang ji mungshitsü echho tenhyaka rankacho, ombo yenkyip jiang ha woro yenkyip tenhya rankacho.
Nebukadnezaar na Potsow Thüngcho
34 "Kvüthüng nzyu tiying ji bencho sana," mesao na phyocho, "Ana potsüwoe zekachicho, tole a nchümri tathiji yilancho." Ana OPVÜI Potsow ji thüngcho osi ochona kümali vana sana hoji yikrachicho osi pfütssonthukcho." Ombona nchüngkhonto savka, osi ombo ekhüngyan jo nchüngkhonto liv. 35 Limha shilo kyon jiang jo ntia mekcho esüa ombona zetala; Potsüwoe lanbenden tssolea, limha lo kyon tssolea topvü ombo saya küpo tae. Ochinaha ombo lümbüm erüng ji n panlanche mekana ombona ntio tssoa sana ji ngatüngngariche. 36 "Kvüthüng a nchümri shenthi ji yilancho sana, alo monkhüm yikrachi, a tsüpho osi a ekhüngyan jilo phfütsson kvütata licho sana jiang topvü apilancho. A küpo tsüphoeden, osi a ethelan eli opvü-odung etssoeden jiang na kyongkalamo monkhüm yikrachi khi akhicholancho. 37 "Osi enhungo, A, Nebukadnezaar shina myingthüng, yikrachi osi pfütsson topvü Potsüwoe mesao ji thüngi piala. Ombona etssowo jiang topvü elan osi ntsa tae, osi ochona kangtsüa tssoa sana ji ombona terithukcheta."
Belshazaar Tokhu
1 Zümo motsüngalo Belshazaar mesao na tokhu nsüngrüi ombo küpo etssoe tsüphoeden topvüto hojilo tsacho, osi onte nzo soko jiang yutacho. 2 Ontena yuta vanathüngjo shona, Janti oyo-opvü, osi phikuk kümoe opo Nebukadnezaar na Jerusalem ekhümki na hansi yicho sana jiang topvü hansi reyile to Belshazaar mesao na yidan picho. Osi hojiang hansi yia tsona jiang lona, ombo engden, yingraloroeden, ombo küpo tsüphoeden topvüna soko eyuv tsükona khilo wothukcho. 3 Ombona yidan pio ji esüa topvüto zakto hansi rheyicho, tole ontena hojiang lona tsoyutacho, 4 osi Shona, Janti, pyontsü yonjak, yonjak sha, otssüng osi olung tona nsüngrüo potsow jiang mying thüngtacho. 6 Tole tothüngji süngrao yutalo taena kyon Jkhe esüa tüv jina, mesaki kyimchung mmhona nsüngrüi elio jianglo, osi milondung jilona wondang tondüng rakata evamo jilo erankav benkacho. Osi okhe jina erankata evamo ji mesao jina hungcho. 6 Tole omboji omha mpa mmia kümi sicho osi omboji ekhenrhüki, nkhuk ji mpa shüngta eneta yi-sicho. 7 Toajo ozen okyak ntsii, ratssenden, elani choro shantio ekhae jiang sosi yikhe to mesao na ochosana thüngi tüngakchia ezocho. Ontena kvüthüng rheyicho sana, mesao na onte ezocho, "Ochona kyimchungo erankao shi khancheta osi hoji yichak ji erorocheta sana hoji kyon mo ji mesao mpensü khi ekathoku, osi ombo evüngo yikrachi shona yuko phungtheyiv osi ekhüngyan shilo etho esae ethümo toji ombo tsswothukvü." 8 Mesao ejü-rünyoe jiang topvü na ekhyo tssotacho, tokhatola onte ochinaha erankao ji nkhachecho, mekana yichak ji mesao thüngi n zochecho. 9 Jisüi jo wonkhyuwongsü lona mesao Belesahazaar ji elani mmyi pangpangna kümlancho. Osi ombo tsüphoeden jiang jina ntio kvüto lyuv sana hoji n tsiv sicho. 10 Mesao tona ombo küpo tsüphoeden tona ntsson-ntsitao ji rani ji oyo na zocho, osi ompvüna tokhu tssoyutapheni rhowocho. Ompvüna ezocho, "Yikrachio mesao, ni tsüpho ji kümali lia vanthukuka! Nzansi ti-wongkhyua. Osi tata omha mmyia ti-ekhena. 11 Ni ekhüngayani kyon tsüka ntho Potsow jiang mon ejüi vana. Kvüthüng nipona mesao tssoa vancho sana, kyon shina, nehümri elana osi rena jitüv ejücho. Osi ombo ntsinran tona nchümri mmhom toji potsow jiang nchümri esüa tüv tssocho. Osi nipo, mesao Nebukadnezzar na zenkhying jiang mhadungo tsseni ezei osi ratssen; rapvüi, choro shantio ekhae jiang yulo esopvüi tsüpho ji tssothukcho tüv vana. 12 Ombolo omüng khophiv tsükona osi ngaringatük yi elani yimang erorocheo tüv etho nchümri osi hungjan rüjan echümporo tssoa eli kyon tüv vana, hoji tsükona Daniel to etsao kyon ji solo wothuka, mesao najo Belteshazaar to tsachoka, shiang yichak ji ntio yichak sana jiang topvü ombona ni ezochevka."
Kyimchungi Erankao ji Daniel na Eroroala
13 Zaktole Daniel ji mesao ndüngo sosi yicho, Tole mesao na heto ombo engacho, "Nino Jihudi tsanthan, hepi oyi evamo Daniel to etsao ocho apo mesao na Juda meta lona; sosi yichosana ji alo? 14 Nilo ntho Potsow mon evamo jina nina nchümri osi engathewo ntsinran lia elani nilo hojitüv tssothi-mori lia to ana zothaka. 15 Ejürünyoeden osi ozen okyak ntsiden jiang sosi oyi erani elio shi khae zesi ntio yichak sana a ezole to ezocho, tokhatola ontena yichak ji n yanchan. 16 Tolea enhungo nina mphoyi yichak jiang yanchekhoka osi emhoko yimang jiang leha yanchekhuka to ana zothaka. Erani elio shiji nina khae zesi ntio yichak sana ji azoa tssona, mesao pipo sümüngu khi ni pipwothukvü, osi elani yikrachi shonazhü khi evüngo ni phungtheyisi, ekhüngyan shilo thosae ethümo toji ni tsswothukvü." 17 Tole Daniel na janlancho, "Ni yantso jiang jo ni tsükona vata mekana ochosana thampoe pia. Ana ni mesao tsükona ntio erani lichosana ji khav osi ntio yichak sana ji ni ezovka. 18 'OPVÜI Tsüphotso Potsow jina nipo Nebukadnezzar ji mesao thüngche kümthukcho osi tssayi myingthüng tona monkhüm yikrachi to ombo picho. 19 Ombo ji elümoto thüngche tsso jina limha shilo jipolan, pvüjilan osi yisanlan topvüna eneta ombo kyucho. Ombona ochosana eküm khiyi hungna ombona khiyicho osi ochosana jo ombona eküm vanthuk hunga tssona, ombona vanthukcho. Ombona ombo yikrachi hungna yikrachi pi nna ombona ochosana jo yikrathuk hungna yikrathuk to tssocho. 20 Tokhatola ombo ji elümoto kangtsüa, rentsümtsüa haruka to kümo ji tsükona Potsow na mesao vantsü jilona khi ombo sicho osi yikrachi vanphen ji moni siyicho. 21 Hojito ombo ji kyon kholokona phanchukchi sicho, osi ombo nchümri ji ekümrümo nchümri kümi sicho. Omboji ora kurü esüa eküm vancho osi mangsüpong na tsoa to ero rüngi tsosi, haphoe ronren na renkata mpensü n khina yipcho. Tokhatola wokhaeti, Tsüphotso Potsow na kyon jiang ekhüngyan jiangha ombona sayatala osi ombona ocho ethüngcheta sana ji thüngi ekhüngyan jiang piala toji ombona chetheta ntsicho. 22 "Ombo tsoe, ninaha shiang hetopvü ntsia khatola nina teri n kümhan. 23 Nina potsüwoe evamo Potsow ji panlana tssothaka, osi ekhümkina hansi eyio oyo-opvü osi phikuk jiang nina khichecho. Tokhatola ni, osi ni tsüphoeden elani ni engden, ni yingaloroeden topvüna hojiang lo soko thei yutasi, ntiaha n hung, ezoha n zo, elani ntiaha n tsito etsso potsow kvümoe shona, janti osi pyontsü yonjak, elani otssüng olong na nsüngrüo potsow jiang thüngtacho. Tokhatola Potsow ochona ni vanthuk lea ni chüthuk lea tssochecho sana osi nina ntio tssoa vanchosana jiang topvüto sayata sana jijo nina n kyuchi. 24 Hoji tsükona oyi shiang eranthukvü tsükona Potsow na okhe rothukchoka. 25 "Ntio erani lichosana jijo heto: 'Khae zeta, khae zeta, füi zeta, chirora.' 26 Osi hojiang yichak jo heto: Khae zeta, Potsow na ni ekhüngyan ji tsüngon ji khatüng zitüngi zesi ochüm tssothuk thaka; 27 Füa, füpheni na füi khi ni zecho tole zükhoro khünga ni füchecho. 28 Chirora, ni ekhüngyan ji chirorathaka osi Medes tona Persia jiang to pithaka." 29 Yithen shi zopvüto, zaktole Daniel ji mesao pipo müngzhüv sü pipothukle osi ombo evüngo yikrachi shona zhü phungtheyile to Belshezzar na ombo nri jiang thüngi yidan picho. Osi ombona ombo ekhüngyano thosae ethümoto ji ombo kümthukcho. 30 Hoji zümo tsük jilo Babylon mesao, Belshazzar ji lüngthacho; 31 osi Medea kyon Darius to tsa nzyu rokrosi eni jali jina mesao etho ji rechoe khicho.
Daniel Ji Hingho Vevüngi Thechicho
1 Darius na ombo ekhüngyan ji esav tsükona meta chiro jianglo kvüriden onte nzoasi mekyu vanthukvü methakcho. 2 Hojilo ekhyimphata, tsüphoeden jiang zeyata nsüngnlüngu tsükona tona mesao lümbüm erüng ephanina elhi etssov elio jiang zenhyav to tsükona Daniel tona ombo shom nchyu eni to ethüngchecho. 3 Lümhato nsungu, Daniel na elhi zeyae thamphoe mekana kvüri tsüphoe jiang thünginajo ombona elhi mmhomo tssocheta toji ombo elhi lona ejücho. Omboji elümoto tssothi-moria osi enhika khuka to zecheo ji tsükona, mesaona ekhüngyan mpüm pono ezepvüi ji ombo tsswothukvü methakcho. 4 Tole elhi nlansüng thanpoe jiang tona tsüphoe kvüri jiang to tssoe ombo yansasa jilo ntiosana nlan yanchena to lanka yantacho, tokhatola ontena ntia n yanchecho; ntiotssole Daniel jo longtsüka eli, osi ombona syulyuo mekana n tsanrük tüv elhi ntia n tssocho. 5 Ontena onte yulo heto phyotacho, "Etena ekhümlan thüngoena mekna thanpo lona jo Daniel ji nlan epio tüv ntia lanka yanchevsa mek." 6 Hoji sülojo ontena mesao ji nduko wotacho osi heto ombo ezocho, "Mesao Darius ni tsüpho ji nchüngkhonto lia vanthukvüka! 7 E ochoang kvütatana ni ekhüngyan yansa esa ji zeyata vancho sana - nlansünga zeyaeden, kvüri etssoeden osi onte jokyimden elani tsüphoeden kvütata vanchosana topvüna, nina shikhfü yizüng motsünga methaki hoji chüngchünga tsütsavo to elümbüm na rüngthaka. Tsüngon thümro tsükona ni thüngi yakajo kyon ochi thüngiha mekana ntio potsow thüngiha nzanchi osi ekyo-erung n yancheto yizüng pia. Osi kyon ochona hoji yesoa sana jijo hengho vevüngi hingho jiang yulo thechivka to yizüng pia. 8 Hojito ni mesao na yizüng methaki nina nimyimg sekae pia, osi hoji zakto benphithuka, osi hojijo Medea tona Persian to jiang shikhfü n tongphicheo ji tssothuka." 9 Tole hojito mesao Darius na yizüng jilo myingseka picho. 10 Kvüthüng yizüng jilo mesao na sekathaka to Daniel na ntsicho sana, ombona oki yicho. Ombo ki chungchak omhao jilo kherüki Jerusalemoe zechiwo hae khyingcho, osi ovüngthüng ombona tssoa rothako ji esüa ombona kherüki jiang chonchi vasi Jerusalemi zechiwo engalo yenjo ethüm khoktseni Potsow thüngi randana vancho. 11 Kvüthüng Daniel na Potsow thüngi randana ombo ri jiang na hungcho sana, 12 onte topvüna Daniel nlan pilo mesao thüngi sani wotacho. Ontena ezotacho, "Yikrachio mesao, tsüngon thümro yutalo ni thüngi yaka kyon thanpoe thüngi tssolea, potsow thanpo jiang thüngi tssolea kyon ochona ekyo-erung yana sana kyonmoji hingho vevüngi hingho yulo thechiv to nina yizünglo nimying sekathaka." Mesao na janlancho, "Hoka, elümoto khünga, Medea tona Persian to shikhfü n tongphicheo tssoa methakchoka." 13 Tothüngji ontena mesao ezotacho, "Daniel, Juda meta lona hepi oyi tsanthan tssoa evamo jina ni mesao na yizüng methako ji n yikrachiala, osi nngala. Ombona eng-ebento yenjo ethüm randanala." 14 Kvüthüng mesao na shi zocho sana elümoto etho jakcho, hoji tsükona ombona kvüto sanatia lyui Daniel ji shanchochena to lanka mmhom yancho. Osi engrhe jana ombona ekhyo tssoa vancho. 15 Tole kyon jiangna elani mesao thüngi oro heto ombo ezotacho, "Mesao yo, nina ntsia Medes osi Persia shikhfü yizüng kümoe mesao na methakcho sana jijo elani ntongphicheto." 16 Hoji tsükona, Daniel ji rhümale to yizüng picho, osi omboji rhümhae vevüngi hingho epying evamo jilo shümthechicho. Osi ombona Daniel thüngi heto ezocho, "Ni Potsow ocho nina longtsükata benkata vancho sana, ji khi ni shanchothokuka." 17 Hoji sülojo vevüng ji olungna khanchakcho, osi hojilo mesao chekav ji tona ombo küpo tsüphoeden to chekav jiang ejüpkae Daniel ji kyon ochia khi n shanchothukcheo tssoa vevüngji khani vacho. 18 Tothakale mesao na ombo mesaki oyi yipcho khatola zümo tona n yipkemvü ombo khetsüthüngcho, osi etsoyuha n khi elani ntina ha n mathachev to tssocho. 19 Wonchiale, mesao na zaktole phanthi vevüng ji zelo yunga wocho. 20 Osi ombona kvüthüng vevüng ji jancho sana, ombona wongkhyutsünga tsaphicho, "Daniel, eküm evamo Potsow phajae! Nina longtsükata benkata evamo Potsow jina hingho jiang khelona ni shanchochecho alo?" to ezocho. 21 Tole Daniel na janlancho, "Eküm echung ni esa-ephyo ji lia vanthukuka! 22 Potsow na ombo lanben rothuka hingho püng jiang khani siyicho, osi ontena a n tssatssochecho, ombona heto etsso jijo a nlan n li osi ana ni thüngi ntia worhyu elhi n tsso to ombona ntsiwo jinaka, yikrachio mesao." 23 Tole mesao ji longshitsüngcho, osi Daniel ji hingho vevüngi na süchele to yidan picho. Hoji tsükona ontena ombo süchecho osi ombona Potsow lo longtsüo ji tsükona ombolo ntia n tssocho toji ontena hungcho. 24 Hoji sülojo kyon kvütata na Daniel nlan yanicho sana jiang ji rhümale to mesao na yizüng picho, osi onte topvü, onte eloe osi otsoero jiang nzo hingho vevüngi hingho epying evamo jilo thechicho. Ontena vevüngi ji liko n janthüng na, hingho jiang na onte yangkae oryu jiang mpato ekhüproe sicho. 25 Hoji sülojo mesao Darius na jipo topvü, yisanlan topvü osi pvüji topvüto thüngi heto erancho: "Salümka! 26 Ana yizüng heto nte piala, A, ekhüngyano kyon topvüna Daniel Potsow ji kyua yikrachivka. "Ombo eküm evamo Potsow, Osi ombona kümalito sav. Ombo ekhüngyan jo kvüthüngha lea roe n si, osi ombo etho jijo kvüthüngha ochüm n tsso. 27 Ombona shanchoala osi phanchoala; Ombona limhalo osi potsüwoe emhukthav osi chethemothev elhi tssoala. Ombona Daniel ji hingho jiang püngona shanchothaka." 28 Darius tona Cyrus to esa yuta lojo Daniel ji elümoto tssochyu-mochyua, tsükaranka lia vancho.
Daniel na Ekümrüm Mezhü Ehungo ji
Daniel na Ombo Müng Ji Eroroala
1 Belshazaar na Babylon lo mesao tssoji nzyu jilo, ana omüng emhacho, osi omüngina heto ana hungcho. Ana omüng ji erancho osi ana yipathüng ntio hungcho sana ji, 2 heto erani vacho: Nken topvü lona mpung vencho osi jüpon ji evakphicho, 3 Ekümrümo tsündamvü mezhü jümangi na chiyicho, osi onte topvü ji echümpo tssocho. 4 Ovüngo jijo hingho esüa tüv, tokhatola mungshitsü esüa echho mpacho. Osi ana zeta vanle echho jiang jakchoa hungcho. Osi ekümrümo jina sonkae khi kyon esüa mangcho. Hoji sülojo kyon nchümri ombolo theyicho. 5 Enioto jijo Sevan esüa tüv osi hojina ombo jo sülamo jina rungthei phanthicho, osi ombona oho na khyoyoryu ethüm nkükyacho, osi owon motsünga na hoji thüngi heto ezocho, "Tsoa, nina kvütata toana oso tsoa!" 6 Osi elani ana zeta vana taena, elani ekümrüm thanpo motsünga chiyilancho. Hojijo khüzhü mmhor esüa tüv khatola, mankvüwoe echho mezhü mpacho, woro echho esüa tüv, osi hojina kvüri ha mezhü mpacho. Osi ombo zena etho eli-i esüa zecheta jitüv tssocho. 7 Elani ana zeta vanpvüna, ekümrümo mezhüoto chiyilancho. Hojijo elümoto etho lia ekhenthav osi ekyuthav tüv. Osi ombolo yonjak ho mpao jiangna ombo jak jiang ji enato rüngroa njakrocho. Osi ekümrüm thanpoe jiang esüa mekna ombona ombo jak jiang süroe sia jitüv tssocho, osi ombo ejüha taro mpacho. 8 Ana hoji mhyikrüka zeta vanle ejü jiang yulo motsüngajo echümporo tssoa sukchukchicho. Hojina ejü thanpo ethüm jiang ekhüproe sicho. Osi ejü shina kyon mhyik tona opüng toha mpacho, osi omboji elümoto kangtsüa zechecho.
Ochona Kümalito Vana Vancho Sana Hoji Omüngina Hungcho
9 Ana zeta vanle vantsü jiang vata hungcho. Osi ochona kümali vana vancho sana jina vantsü motsünga lo khokthecho. Ombo mpensüjo sheryu esüa ehüma tüv, osi ombo tssan jo tssansü njüm tssocho. Ombo vantsü kümoe omi khoro lo ntsüpkacho sana jilona omi tüngrakachia vancho, 10 osi hoji lona mimyo ojü tsüa to evakphicho. Hojilo kyon wothüng wothüngna ombo benkata vancho, osi kyon kongdung na ombo mhadungo mangi vancho. Ombona oyi etssov benkacho osi kako jiang elhichicho. 11 Ana hojito zeta vanpvüna ejü teriv jina süngkachia kangtsü won tssocho. Osi ana zeta vanle, ekümrümo mezhüo toji lüngthae ombo jo okhe jiang milungi shümthechi rungi sicho. 12 Ekümrümo thanpoe jiangha etho jijo khiyicho tokhatola onteno yuta tara tsükonajo vanlanthukcho. 13 Zümothüng heto shiang omüngina hunga vanathüngji, kyon osak-ophung esüa tüv ana hungcho. Osi ombona atssungkata rocho, osi elukna mmhazhüi kümali vamo ji thüngoe ombona wocho osi ombo mhadungo chiwo mangkachicho. 14 Tole omboji jipolan, pvüjilan elani limhalo yisan topvü na ombo benkao tssoa, etho, yikrachi kyucho elani mesao thosa to ombo picho. Ombo etho esa jo kümali liv osi ombo ekhüngyan jo kvüthüngha ochüm n tsso.
Omüngina Ehungo ji Yichak Ji Eroroala
15 Ana omüngina chekav ehungo jina akhenthukcho osi hojina elümoto a khetsüa awongkhyucho. 16 Hoji tsükona, hojilo mangkachi evamo jiang yulo tsüka thüngi owo ntio yichak sana ji eroroe aezole to ezocho. Hoji tsükona ombona yichak ji heto azocho. 17 Ombona heto phyocho, "Ekümrüm tsüphov mezhü shiang yichak jo limha shilo ekhüngyan mezhü phanthivka. 18 Osi tsüphotso Potsow kyon jiang na mesa etho hungi hoji ethoji nchüngkhonto ontelo lia tsütsavka." 19 Hoji sülojo ana ekümrümo mezhüoto thanpo jiang n süo ekyuthav osi kümoe na ombona erümo ekümrüm jiang ji pyontsü yonjak yenkyip osi yonjak hojiang na rüngroe likoe na sümrolani sicho sana ji tsükona kyongkata a ntsihungcho. 20 Elani ombo kvürilo ejü taro mpao jiang osi sülamiti motsünga shungchukchilani hojina thanpoe ethüm jiang roe khi sicho sana jiang to tsükona a ntsihungcho. Hojijo omhyik tona opüng to mpacho osi kanchana nsancho. Thanpoe jiang thünginajo topvülo shi ekyutso. 21 Ana elani zeta vanle, hoji ejü jina Potsow kyon jiang pono ori tssocho, osi onte khyothechicho. 22 Tole ochona nchüngkhonto vana vancho sana jina oro, Potsow kyon jiang oyilo theyia oyi tssocho. Potsow kyon jiang na mesa etho ehungu yuta ji yithaka. 23 Yichak ji heto eroroe azocho: "Ekümrüm mezhüoto jijo ekhüngyan mezhüoto limha shilo chiyiv jika osi hojijo ekhüngyan thanpoe jiang lona echümpo tssovka. Hojina limha shi totona ejüproe siv osi sümromorov. 24 Ejü taro jiango mesao taro ochoang na hoji ekhüngyan ji sav sana jiang ka. Hoji sülojo mesao thanpoe chiyilam, osi ombo ha thanpoe jiang lona elümoto echümpo tssov osi hojina mesao nchyu ethüm khi siv. 25 Ombona Potsow tsüphotso ji pono phyokasankata Potsow kyon jiang tssethechiv. Osi ombona onte ekhümlan shikhfü jiang tokhu lanka jiang, to tongphiyiv ekhyo tssov, osi Potsow kyon jiang ji nzyu ethümsi riso jo ombo etho küpo tssov. 26 Hoji sülojo potsüwoe yitssophenina oyi tssotav, osi ethoji ombo khiyisi n phanthilamo roe ombo siv. 27 Tothakana limha shilo etho osi tssayi-myingthüng tsüphov topvüto Potsow kyon jiang thüngi piv. Onte mesoa etho ji kvüthüngha ochüm n tsso osi limha shilo esapvüi osi kyon topvü na onte benkata onte yi engav." 28 Shi yilan shijo shilona echetala. A ekhenrhüki a mha mmyia osi a pyon tongphia kümcho osi ana hapoe ntia n chyithukna alo vae sicho.
Daniel na Olyu Tona Nyanyan To Chekav Ehungo Ji
1 Belsahazaar na Babylon lo mesao tssosi nzyu ethümto jilo, ana chekav enioto ji hungcho. 2 Ana chekav ehungo jijo, zaktole aiyo Elam metalo Susa yantsü jilo vana apopoji hungcho. Aiyo Ulai zhükhfü tsae mangachi vancho, 3 osi hoji zhükhfü ji ndüngo olyu ejü eni siphoa mpata jitüv hungcho osi motsünga ji sipho osi ethamo tssoa jitüv chiyia ana hungcho. 4 Osi ana to zeta vana taena, olyu jina ombo ejü ji engrhelamoe, jükiwoe osi jolowoe to shüngchia vancho, osi hoji ekümrümo ji etho jilona ochinaha n tsanchoche mekana nti ekümrümo naha ombo n tanglanchicheo tüv tssocho. Ombona ombo lümcho shüngphicho osi lümbüm tsükshikata kümcho. 5 Ana hojijo ntio yichak sana to a emhoka vanathüngji, engrhelamoena nyanyanpung motsünga yunga chiyicho, osi elümoto ekhyingo jina ojo jiang na likolo-tia n hyekata to tssoa bunga chiyicho. Ombo mhyik yutalo ejü motsünga chancheta mpacho. 6 Osi hojina ana olyu zhükfü tsalo manga ehungo ji thüngoe wocho, ombo etho totona thei echhüki wocho. 7 Ombona olyu ji owo sakao ji ana zeta vancho. Osi ombona hetata to lümbüm tsuka lyui olyu ji shüngo jina ombo ejü eni jiha shüngchochi siyicho. Olyu jinajo ombo zalanchiv nti etho ha n licho. Omboji likoe ejüngchochi tsseroe ombo sicho khatola ombo shanchocheo tüv ochia jilo n vancho. 8 Nyanyanbung ji haruka haruka na kümcho tokhatola ombo lümbüm tsükshitso jilo ombo ejü ji jaki sicho. Tole ejü chenkaphen jilona elani ejü mezhü shunga chiyilancho, osi onteji nken mezhüata to zechiwo shungchukchicho. 9 Mezhü ji yulo motsünga lona ejü teriv motsünga shümkacho, osi hoji etho jina jolowoe, engkhfüwoe elani echümchak meta jiwoe to zechia ana hungcho. 10 Osi hojina potsüwoe rasantsü lea sakakhoka tüv etho jüa kümcho, tolyui shantio jiangha sakacho, osi ejoma jo likoe shümchochi tsseroe sicho. 11 Elani hojina potsüwoe rasantsü esopvüiji mpato khyocho, osi ombo thüngi eng akvüto erungthan pia evamo ji mpa esani siyicho; osi ombo ekhümki jijo ekhüpromoroe siyicho. 12 Tothakale engakvüto othan epiv ji thüngi najo kyon jiangna mmen tssotacho, osi ntsa ekhümlan jijo likoe shümthei sitacho. Ejü jina ombona ntio elhi tssoa sana topvü ochüm echeta tssochecho. 13 Hoji sülojo lanben tsükana lanben thanpoe thüngi heto enga ana zocho, "Heto chekav hunga evamo shiang ji kvütenhyaka tssoa vamula? osi ekhenthav mmen elhi shiangna eng akvüto othan epi ji kvütenhyaka tongcheta vamula? Potsüwoe rasanden tona ekhümki toji yuta kvütenhyaka tssethechia vamula?" 14 Tole lanben thanpoe jina heto janlana ana zocho, "heto shiji tsüngon 2,300 tssoa vamvüka, osi hoji yuta lojo enyathüng tona mmyui to othan epi jijo liv meka. Hoji süloti ekhümki ji pilamka."
Chekav Ehungoji Gabriel Lanben Jina Eroroala
15 Ana chekav ehungo ji ntio sana to engathev ekhyo tssoa vanathüngji, esüngaro taena ocho sana amhadungo mangkachi vancho. 16 Osi Ulai zhükhfüi na owon motsünga na heto phyoa ana zocho, "Gabriel, ombona ehungo jiang yichak jiang eroroe ombo ezoa." 17 Tole Gabriel na oro a ndüngo mangcho, toajo ekheno na likoe a vathecho. Ombona a ezocho, "Echüo kyon yo, yichak ji engathei khia. Nina chekav ehungo jijo limha ehüm roathüng kvüto tssov sana jika." 18 Ombona ajana vanathüng ji aiyo kyon n tsiv likoe a vanthecho. Tokhatola ombona arhümae, asükae a mangthuksi, 19 a ezocho, "Ana Potsow lümbüm etsuk tssüngthi jo kvütüv sana ji ni ejüala, osi chekav jiang jo limha shi ochüm tssoathüng tssolanphyolan jilo ejukachoka." 20 "Nina olyu ejü eni mpata jitüv ehungo jijo Medea tona Persia to ekhüngyan ji chekavka. 21 Osi Nyanyanbung jijo Greece ekhüngyan ji chekav, osi ombo mhyik yutalo ejü ntssuka shungo jijo mesao ovüngo ji chekav. 22 Osi kvüthüng ejü ovüngo ji jakcho sana jilona ejü mezhü chiyio jiang jo jipo ji echi mezhü chiroate esiv ji, osi hoji jipo jiango ovüng thüng motsünga tae tssaothüng tata etho liv meka to yichak chekav ji. 23 "Kvüthüng hojiang ekhüngyan jiang ji ochüm etsso edünga sana, onteji elümoto ntha nri kümvü osi onteji ezüp pi-nrüngchev; osi hojilo ekhüng esao, haruk hashüi, osi okyak n mhon, ejithechi mesao jitüv vamvü. 24 Omboji etho jüa kümvü, tokhatola ombo etho ejü lona tssov meka. Ombo yakchia emhokthav, ekhenthav tssorophyoro yiv osi ombona ntio tssoa sana jiang topvüto ochüm echeta tssochev. Ombona etho ejüi kyon jiang pono osi Potsow kyon jiang ponoha to tssorophyoro hansi yiv. 25 Ntiotssole ombo okyak eli etsso jina, osi ombo ejithechi-lanka jiang lonaha tssochephyochev. Omboji ombo etholo zikae kangtsüv osi kyon elümoto ekyuyi osi ntangshonyi n pina roe siv. Osi mesao yulo tsüphotso jileha ombona lümbüm tssona zalanchiv, tokhatola omboji kyon etho n thena roe ombo siv. 26 Chekav kümoe enya myu othan epiv tsükona sanaji eroroe ni ezovo jijo otsotso benrünguka. Tokhatola hojijo mphoe vasakhe, ntiotssole enhünga tssov meka tolea wokhaeti otsotso hojito tssovka." 27 Toajo aji elümoto ajoyia osi lümbüm esuka lyui tsüngon elümoto ara vani sicho. Osi hoji süloti phanthilani mesao na ntio elhi etssov a enhikacho sana jiang etssov tsükona wocho, tokhatola ana ntio chekav müngdüngina hungcho sana jina ahama-tsüngsi ntia nngathecho.
Daniel na Ombo Kyon Jiang Tsükona Randanala.
1 Media kyon Darius, Xerxes tsoe jina Babylon ekhüngyan ji sacho. 2 Ombo esa nzyu ovüngo jilo aiyo, ntho motsü jiang kha-yana osi OPVÜI na zenkhying Jeremiah thüngi ezoji ephanina henasüi nzyu ekha tiying sülojo Jerusalem ji roe siv to phyoe elio jiang nchümria vancho. 3 Osi hojito ana ekhang khia posta mpensi livero yulo ephanthei OPVÜI Potsow thüngi jonji-randancho. 4 Ana a, OPVÜI Potsow thüngi randan cho osi a kyon jiang mmen jiang phyochakcho. Ana phyocho, "OPVÜI Potsow, nino tsüphoa, osi ena ni kyuchiala. Nino ni echümchak ji ntsa benphiala osi ochoangna ni nzana ni. yizüng enga sana jiang thüngi tümjak n lina nzanala. 5 "Ena mmeni tssothaka, osi ena n mhom vana rothaka, osi ena worhyu elhi tssothaka. Nina ntiotssole to yizüng epicho sana jiangji ena khaki sithaka osi nina elamo lanka ejüo jiang lona ena nlüpi yithaka. 6 Nina nriden zenkhying ochoangna ni myingo na e mesao jiang thüngi, e sapvüiden, e motsüiden, osi e jipo mpüm thüngi janthukcho sana jiang yi ena nngav sithaka. 7 OPVÜI, ninajo yuta topvülo ntio elan sana ji tssoala, tokhatola ena yuta topvülo epopo epono yikra hansi yiala. Heto etsso shiji e kvütata Juda meta osi Jerusalem lo vana vancho sana jiang naha elani Israel kyon kvütata ni jancho n zocho yakchia nina meta ekoni osi enhyano topvülo nzüroe evanthuka vancho sana shiang hetopvüna hojito tssoala. 8 E mesaoden, e esapvüiden, osi e motsüiden jiang topvüna eyikrathao etso ephyothaka, osi ni yaka mmen tssothaka, OPVÜI. 9 Nino khonzan eli osi nlan siyihung, ena mpato ni pono panlan elhi tssoletoha. 10 Nina kvüthüng ni nri zenkhying jiang thüngi shikhfü jiang pia ethüngi epithukcho sana, hojiang ephanina vanle to nina ezocho, OPVÜI e Potsow, 11 Israel kyon topvüna ni shikhfü jiang yesocho, osi nina ntio phyocho sana jiang nnga to ekhirancho. Ena ni yaka mmen tssocho, hoji tsükona nina ni nri Moses kakolo kümoe erani licho sana jiang rhiyi-randanaka jiang ji epono rothukcho. 12 Nina kvüto e esapvüi osi epono tssov to phyocho sana ji esüa nina tssocho. Limha shilo yantsü thanpoe jiang pono tsso jiang lona tsükshikata nina Jerusalem ji ezüp picho. 13 Moses kako lo kvütata erani licho sana jiang topvü ethüngi ezüp epicho. Tokhatola enhünga jana e OPVÜI Potsow, ena e mmen lan jiang lona kholani mekana ni ntsa ji phankae ni emathathokvü ekhyo n tssohan. 14 Ni, e OPVÜI Potsow na ezüp epiv tsükona methakcho, osi nina hoji tssocho; ntsiotssole nino ntio elan sanaji yuta topvü lo tssoala, ntiotssole ena niyi ji nngacho. 15 "O OPVÜI e Potsow, Nina ni kyon jiang ji Ejip lona sochuka ni etho ji hungthukcho, osi ni etho ji enhünga jana nchümchetala. Ena mmen tssocho; osi ena worhyu elhi tssothaka. 16 Vana yithako jii-ha nina enkohacho, hoji tsükona enhungo Jerusalem pono jitata ni lüm ti-tsuka. Hojijo ni yantsü, osi ni ntho phunglan jika. E nkonjano evamo kyon shiang topvüna Jerusalem shi osi ni kyon jiang zerüpala, ntiotssole ena mmen tssocho osi e motsüi jiang naha n-mhom tssocho. 17 O, Potsow, erandan osi e jonjiyi engayia, osi ni ekhümki kümoe roe sithakcho sana hoji tssocholana; hoji tssocholana tona otsük akvüna nino Potsow toji ni ntsiv. 18 Eyi engayia, wo Potsow, e zeta, osi ni mying ekhio yantsü ji osi e ji ntio kvütüv ezüpo e rheyi vancho sana ji ehungia. Ena ni thüngi randanala, ntiotssole nino khonzan eli, ena elan tssocho lona mek. 19 OPVÜI, engayia OPVÜI, nlan e siyia. O, OPVÜI yo; e ngachiyia osi hoji ephan tssoa! Niji OPVÜI Potsow ji to ni ntsithoku tsükona ti-sülana tssoa! Yantsü shiha, kyon shiangha ni echika."
Gabriel na Zenkhyingyi ji Eroroala
20 Ana n tümjak na randana a mmen osi a kyon Israel jiang mmen jiang phyochaka vancho, osi OPVÜI a Potsow thüngi ekhümki ji tssocholanle to jonjicho. 21 Osi ana hojito n sana randana vanathüngi ji lanben Gabriel ana ovüngthüng müngdüngina hungthako jina ana evamo jilo pya jorocho. Hojijo mmyulani othan epi yutalo tssocho. 22 Ombona heto eroroa phyocho, "Daniel, ana shilo ero jijo zenkhyingyi ji ni engathethuko rochoka. 23 Nina kvüthüng Potsow thüngi jonjiv benkacho sana ombona ni jonji nijanlancho, Ombona ni nzanala, hoji tsükona ana janlan ji ni ezolo rocho. Enhungo chethev yi ji ana eroroe ni ezovka, mmhona enga vansi engathe khikhe. 24 "Ni kyon jiang jina mmen lona tsanchoe evamvü tsükona osi ntho yantsü jina mmen elhi jiang lona nkachoe evamvü tsükona Potsow na nzyu yenjo tiying tüv ekha tiying züngchak yuta nte vayiala. Mmen jiang ji nlan nte siyiv osi kümali ntsanrük soyingu, hojito tssona ntio chethev osi hungjan-rüjan osi zenkhyingyi phyoe licho sana ji otsotso bemvü osi ntho khümphenki jiha elani nthochelamvü. 25 Shi ntsi engathei khia: Jerusalem ji tssocholam tsükona yizüng epio jilona benkae Potsow na ethüngcheo esapvüi ji n yithüng nandangjo, nzyu tiying tüv tiying ji yia vamvüka. Jerusalem ji pikhfü chüngchünga osi lantsü jiang topvü zechoa tssocholamvü osi hoji nzyu tiying tüv rokrosi eni etssapvüa vamvü, tokhatola yuta shijo ezüp yuta tssov. 26 Hoji yuta ji ehüm jilo Potsow na ethüngcheo esopvüi ji n lan n liv lüngthav; osi yantsü ji tona khümphenki ji tojo ombo lona etho jükao rasanden jiangna roe siv. Osi ochüm yutaji jü-vaktsü yia esüa tssov; osi Potsow na methaki evao ritsso osi tssorophyoro ji hansi yiv. 27 Osi hoji esapvüi jina kyon elümoto thüngi nzyu tiying tsükona ntsata ekhüngvü vav osi hoji yutaji chiso benana othan epiv elani thungthan epi jiang topvü ombona ochüm tssoyiv. Osi etssakthav, ekhyuthav kisü khi khümphen ji mhonkvüri ekachi vav, osi hoji ochona vacho sana ji Potsow na ombo tsükona ntio methaki vayicho sana ji n dukthüng nandang jo kisü ji hojilo lipvü tssov."
Tigris Zhükhfü Tsalona Daniel na Müngdüng Ehungoji
1 (Cyrus na Persia metalo ekhüng esae tssosi nzyu ethümto jilo Daniel ocho Belteshazar toha tsacho sana ji thüngi yithen heto yithukcho: Yithen jijo otsotso yithen, tokhatola engathev tsükona khünga jitüv. Tole hoji omüngina eroroe ombo ejücho.) 2 Hoji yutalojo aiyo hopta ethüm tsükona nungra yutalo vancho. 3 Ana etsoyu mmhom mekana oso ntia n tso, tsüngthijü n yu, osi hopta ethüm ji n benthüng jo küri tia n khena vancho. 4 Nzyu benkadeni choro ovüngo jilo tsüngon mekyu mezhüoto jilo, ana Tigris zhükhfü khopvü ji jürani mangkachi vancho. 5 Osi ana engokale ocho sana sünyipvü piposi shona na eryu khüngsi vana jitüv hungcho. 6 Ombo tsük jina oyuk-osen mmhom esüa tüngracho. Ombo mha jiha potsüo nlüpathüng tüngrao ji esüa tüngra tüv tssocho; osi ombo mhyik jiangha omi kisochia tüv. Ombo jo, okhe jiangha pyontsü yonjak ntssachecho esüa tüngracho, osi owon jo kyon mmhatsü na nshata to owon tssocho. 7 Müngtüng chethev ji a taena hungcho. A ndüngo etsso kyon jiang najo ntia n hung, toaha onteji ekhenrhük-khani tsani owo mphotacho. 8 Osi hojilo engangcheo chethev ji zeta apoti ekachi a sicho. A ji etho njüv kümi asicho osi a mha jiha elümoto tongphi ochinaha a n chethev sicho. 9 Osi ana kvüthüng ombo won ji zocho sana, kyon n tsiv likoe avathecho osi amha jiha likoe nkhümkae jilo vancho. 10 Tole okhe motsünga na a sükae a nkhok nyima phanthicho; osi jithüng jana a enenona vancho. 11 Lanben jina aezocho, "Daniel, Potsow na ni nzanala, phanthia osi ana ntio ni ezov vancho sanaji tüngochünga enga. Ni thüngi a rothukchoka." Ombona kvüthüng hoto phyocho sana, ana a enhyoka phanthicho. 12 Tole ombona phyocho, "Daniel, ti-kyua. Nina engathe ekhiv tsükona tsüngon kvülona teri kümi randan benkacho sana jilona Potsow na ni randan jiang ni engayipvüka. Ni randan ji ni janlano ana rothaka. 13 Persia ekhüngyan enhyang lanben mesatso jina tsüngon mekyusi ekha a shanlanchicho. Tothüngji lanben jiang yulo esopvüi tsüka Michael na oro akyochicho, ntiotssole hojithüngjo aiyo apoti Persia lo vancho. 14 Tolea ana ero jijo ochyu-ovüngi ni kyon jiang pono ntio kvüto tssov sana ji ni engathethoku tsükona rocho. Shi müngdüng shijo ochyu-ovüng tsükona ka." 15 Ombona kvüthüng hojito phyocho sana, aiyo oyi n sanchev omhyik nrüngi likoe zechochia vancho. 16 Tole lanben, kyon esüa tüv jina ombo khe ji yonchia amenfülo a evüngkayicho, tosanati ana oyi nsanche heto ombo ezocho, "Tsüphoeyo, Müngdüngyi jina etho n jüv osi n khyov kümi sithaka, osi enhünga jana n sanchena a enetala. 17 Aiyo eziina ombo pvüi ji mhadungo manga vancho esüa tüv. Ana kvütoli nithüngi thyutavla? Aiyo etho n jüv osi ethük tia n chenjamvü sithaka." 18 Elani ombona arhümalancho, tole a etho jükata to tssoa a kümcho. 19 Osi ombona a ezocho, "Potsow na ni nzanala, hoji tsükona nti naha ni ti-wongkhyuthuka mekana ni ti-khenthuka." Ombona kvüthüng hetoshi phyocho sana a etho jükalana to tssoe ana heto phyocho, "Tsüphoeyo, nina ntio ephyov licho sana ji a ezoa. Nina a mmhonphithukthaka." 20-21 Ombona phyocho, "Ntio tsükona ana nithüngi rocho sana ji nina ntsicho alo? Hojijo ntsa kako jilo ntio erani licho sana ji oponi chiyia ni ntsithokvü tsükona. Enhungo ana elani oyi Persia ekhüngyan enhyako lanben ji thüngi rotav lia. Hoji-tothüng Greece enhyang lanben jinaha chirov, osi nte Israel enhyang lanben Michael yaka thanpoe ochia akyochio tüv n van."
1 A nzanchiv osi a nkohav jijo ombo ejan elhi. 2 Osi ana enhünga ntio ni ezov vancho sana jijo ntsayika. Lanben jina phyocho, "Elani mesao nchyu ethüm na Persia salamka, osi elani mezhüo to chiyilamvü, osi hojijo thanpoe jiang topvü lona ejüelika tssovka. Ombona ombo etho elitso yuta osi ombo lichukehiathüng ji ombona Greece ekhüngyan ji nochov.
Ejip Tona Syria Tolo Ekhüngyan Jiang
3 "Hoji sülo mesao ekhyoekhüng chiyilamvü osi ombona ekhüngyan elümoto tsüphov tüv sav osi ombona ntio tssohunga sana ji tssov. 4 Tokhatola ombo etho ejütso yutalo ombo ekhüngyan ji echükroe mezhü chiche siv. Osi ombo lona n chenkao tüv mesao jiang na ombo vanphen ji khi savka, tokhatola ontena jo ombona etho lia tata liv mek. 5 "Ejip mesao jijo elümoto etho eli tsov. Tokhatola ombo rasan esopvüi yulo tsüka jo ombo lona etho jükata osi ombo ekhüngyan lona tsükata jitüv sav. 6 Nzyu elümoto süloti Ejip mesao jina Syria mesao thüngi shentav, osi ombo otsoluv ji hoji thüngi yanpithoku. Tokhatola onte shentakota ji lümato sunga tssov meka, osi ompvü elani ompvü orapvü tona ompvü tsoero elani nriden kvütata na ompvü phana yicho sana jiang topvü lüngthav. 7 Osi nsungkhüngu ompvü wopan yulo tsükana mesao tssov. Ombona Syria mesao rasan jiang hav osi onte rizümpheni rhowoe onte khyo thechiv. 8 Osi onte potsow kisü jiang elani shona janti tsütsilan kvüta onte potsow jiang thüngi khochaki pitakcho sana jiang topvü ombona Ejip metae hansi yiv. Hojito tssosi nzyu elümto sunga noyinga vantasi süloti, 9 Syria mesao na Ejip mesao phonkav tolea ombo shünglanchiv. 10 "Hoji sülojo Syria mesao tsoeden jiangna ori etssov methaki rasan elümoto soyingu. Onte yulo tsükana jo jüvak tsüa esüa tssov osi ori pikhfü roa wov. 11 Osi Ejip mesao naha ombo lümbüm etsuk phanthi Syria mesao thüngi ori tssov osi ombo rasantsü jiang hayav. 12 Ombona rasan elümoto haya nna ori khyo to etsso ji tsükona ombo kangtsüa nchümvü, tolea hoji esüa ombona yuta topvülo n khyo-nrhü. 13 "Hoji sülojo Syria mesao jina kholani oyi ovüngthüng jiang lona kyongkata rasantsü soyinglamvü. Osi kvüthüng rota yuta jana sana ombona rasanatsü methaki ebensü benria lyui vanthuko jiang sosi rolamvü. 14 Hoji sülojo kyon elümoto na Ejip mesao panlana chiyiv; Daniel, nte jipo yulo lümbüm tsükshi ejoma naha, ntena ntiona chethev ehungo ji ndana mesao panlana rokav, tokhatola onteji khyothechiv. 15 Hoji tsükona yantsü pikhfü thei elio jilea Syria mesao jina vükthechiv. Osi Ejip rasan jiangna jo elani n rokalan; osi onte yulo ritssolo mmhontso jianglea etho n jüv siv. 16 Syria mesao jinaha ombo lümcho onte pono tssov, osi ochinaha ombo n tanglanchiche. Ombona echümchako meta jilo phanthiv osi mpümna ombo khelo tssov. 17 "Syria mesao jina elani ritssolo evov tsükona ombo rasan topvü theta lanka yanlamvü. Hoji sülojo ombo riji ekhüngyan ji roe esiv tsükona ombo otsolov ji mesao thünga yanpithuka, ombo thüngi miuhontav; tokhatola ombo kyak ji ochüm echeta tssochev mek. 18 Hoji sülojo jümangina jipolan elümoto thüngi sakae rotav osi onte elümoto khyothechiv. Tokhatola elani metapoe esopvüi tsükana ombo khyoe, ombo haruk-hashü ji ochüm tssoyiv; osi Syria mesao haruk-hashü ji elani ombo thüngoe yilam. 19 Mesao jina ombo pikhfü chungi ombo metalo elani yilamvü, tokhatola omboji oyam na khyothechiv osi hojilona ombo ekhüng ji ochüm tssoyiv. 20 "Mesao thanpoe na ombo echungchov, osi ombo ekhüngyano ejüeli rankathoku tsükona ombona ombo tsüphoe wothuka kyon jiang tssethechia likotssen khyav. Tolea esüngaro yuta lona hoji mesao ji ritsso lona ha mek tona oyam na n tsina lüngthae siv."
Syria Mesao N mhon
21 Lanben jina heto eroroa phyocho: "Syria mesao etso jijo mesao etssov etüm elan n liv, n mhom tüv tssov, tokhatola n yilophiv vanathüng esüngaro taena okyakyina ombona oyi etho ji rechoe rhümae siv. 22 Osi ochona ombo panlana sana, Potsow pvüti tsüphotso jilea topvüto monthoki kvülo sana vathechi siv. 23 Oyam thüngi mmhontae ombona jipo elümto ejithechiv, osi ombona mpato jipo teriv saleha omboji etho lika lika na kümvü. 24 Ombona ntia yivon n pina ejüeli meta jiang ji sakae phamvü osi ombo motsüi ochinaha n tssohancho elhi ombona tssov. Tothakana ritsso lona phancho tsütsilan jiang ji ombo phankae ombo küpo etssoe jiang jantayiv. i Ombona oyam rizümphen osi pikhfü jiang owo ehav lanka yamvü tolea ombo yuta ji tara tae tssoa ochüm tssov. 25 "Ombona lümbüm etsson hansi Ejip meta ji ehav tsükona rasantsü soyingu, tokhataola hojinaha rasantsü ombo lona etho likao soyingi ombo rolanchiv methaku. Tokhatola Ejip mesao ji ejithechiv osi ombo tümcho ochüm echeta n tssoche. 26 Ombo thüngi enhyantatsovo ejürünyu ombo epipvüi jina roe ombo siv. Ombo rasan elümoto lüngthav osi ombo rasankho ji moni ombo siyiv. 27 Hoji sülojo mesao nchyu eniji tssisa motsünga lona khokthei tsotav, tokhatola onte etüm ezi jiang jo n mhom tae tssov osi woniata na ejüngjüng phyotav. Tolea ontena ntio chokata vancho sana ji tssochev mek, ntiotssole yuta ji n janhamo ji tsükona. 28 Hoji sülojo Syria mesao jo ombona ritsso lona rechowo jiang topvü hansi Potsow kyon jiang ekhümlan ji roe esiv tümka hansi okiwoe kholani yiv. Ombona ombo lümcho ntio ombo tssohunga na ji tssosi ombo metae kholani yiv. 29 "Henasüi toti elani ombona Ejip ji sakalamvü, tokhatola yuta shilojo sükhying ji echümpo tssov. 30 Roman jiang na rhongtsüi na oro ombo rolanchiv osi omboji ekhenrhükvü. "Hoji sülojo ombona lümbüm nshüroa lüm tsuka kholani oyi Potsow kyon jiang ekhümlan ji roe siyiv ekhyo tssov. Osi ombona kyon ochoang na hoji ekhümlan ji khoe sicho sana jiang ejü-rünyo khiv. 31 Ombo rasan ejoma najo ekhümkiji mmenthuka elhi tssov, eng akvü othan epi jiha ontena esanthoku osi etssakthav osi ekyuthav jitüv kisü tonkachi siv. 32 Ejithechi osi kyakthechi lona ochoang kvütana na OPVÜI ekhümlam jilona tsani yithakcho sana jiang na ombo kyorongu lanka yanchev, tolea ochoangna Potsow phankata vancho sana jiang najo onte rolanchiv. 33 Kyon jiang esopvüi nchümri eli-i jiangnajo onte nchümri mmhom jiang ji thanpoe khosha thüngi shümnhyav tokhatola yuta tara tsükona jo onte ji ejoma jo ritsso lona chüv, mekana rungtsüngi chüthoku, osi ejomajo ejüeli jiang re khiyisi morantsan kümthoku. 34 Hojito lüngthata yia vanathüng lea Potsow kyon jiango nzanchi tarajo hungu, tolea onte thüngoe etssoe ejoma jo epi-era lümbüm hansi onte thüngoe tssov. 35 Onte yulo nchümri eli-i esopvüi ejomajo lüngthav, tokhatola, hoji yakchia kyon jiang ji ntssüngchev. Heto shiji Potsow na yuta tssenchaki elio yuta ji ochüm n tssothüng nandang jo to tssoa yia vamvü 36 "Syria mesao jina ombo lümcho ombona ntio tssohunga na ji tssov. Ombo potsow jiang lona tsükata osi topvülo tsüphotso potsow jilea ombo tsüpho to kangtsüa phyov. Osi Potsow na ezüp ombo epiv yuta ji n janthüng jo ombona shi heto tssocheta vamvü. Tolea ombona kvüto etssov zicho sana ji ephan Potsow na tssov. 37 Mesao jina ombo motsüi jiang na benkata erovo Potsow ji n khan ziv sinkiv, elani eloe jiang na nzamo potsow jiha khaksiv. Ombona otsotso Potsow topvü n khanziv tssov, ntiotssole ombo potsow jiang topvü lona tsüphokata to nchümvü. 38 Osi hojiang thüngi najo potsow kümoena pikhfü jiang nkocheta sana ji ombona yikrachiv. Osi potsow kümoe ombo motsüi jiang na kvüthüngha n khümhancho sana ji thüngi ombona, shona, janti osi oyok-osen mmhom topvü khi thamvü. 39 Ombo pikhfü jiang nkohav tsükona metapoe potsow ekhüm vanthoku. Osi ochoang kvütata na omboji esapvüito ombo khichoa sana jiango ombona yikrachi tsüphov piv, osi elhi-shüp tsüphovlo rheyithoku, elani likoha yantso onte piv. 40 "Kvüthüng Syria mesao yuta wokhao ji jan edünga sana, hojithüng Ejip mesao na ombo sakae hav, osi Syria mesao jina ha ombo etho topvü theta ritsso kurü, kurü zotoro osi rhungtsü elümoto theta ombo rolanchiv. Osi jüvak tsüa esüa ombona meta elümoto khyoe khiv. 41 Phyochako meta ji mpato ombona phanchov osi kyon wothüng wothüng lüngthav, tokhatola Edom, Moab, tona Ammon meta n khyohamvü jakae elio jiang tolo kyon jiango tsanchov. 42 Ombona kvüthüng meta jiang ji haa sana Ejip jilea n khacho. 43 Osi ombona Ejip lo ejüeli kenchüngi evo shona, janti osi thanpolipo oman elio tsütsilan topvü phanchoe khiv. Ombona Libya tona Sudan toha khyov. 44 Hojithüngji khümkiwoe tona engkhüwoe na eyio yithen jiangna ombo ekhenrhüku, osi ombona elümoto lümbüm tsükshikata kümi kyon elümoto lüngthav. 45 Osi ekhümki etsso meta phung lan tona jümang to oni yuta lo ombona mesao süki meta eyukzhüa tssokachiv. Tokhatola omboji ochinaha nzanchi n vamvü chüi siv." iso.
Ochüm Yuta Ji
1 Lanben sünyipvü pipo jina phyocho, "Hoji yuta tsük jilojo lanben tsüphowo Michael, ochona nte kyon jiang nhyakyata vancho sana jina chiyiv. Hoji sülojo, limha shilo jipo jiang lisi ezüp yicho sülo n mhontso jitüv ezüp yuta liv. Kvüthüng hoji yuta ji yiasana nte jipo kyon kvütata Potsow kako jilo omying erani lithakcho sana jiango shanchov. 2 Ochaong chüthakcho sana jiang yulo elümotona elani eküm vanlamvü; ochoang sanajo kümali ematha eküm tssov, osi ejoma jo kümali tsükona yikra tssov. 3 Nchümri eli-i esopvüiden jiango Potsow wondang jiang esüa tüngrav; osi ochoang na kyon elümoto elan ji püngnocho sana jiango shantio esüa nchüngkhonto wondanga vamvü." 4 Ombona heto a ezocho, "Daniel, enhungo, kako ji lhüpa osi limha shi ochüm n tssothüng tsükona khani ejüpkae vata. Hoji tothüngji, ntio tssoa yia vancho sana ji engathev tsükona ntia mekvü lona kyon elümoto na onte yuta elümoto ezia ekhyo tssov." 5 Hoji sülo kyon nchyu eni zhükhfü jüran pondüng tsungkholo phanthi vana ana hungcho. 6 Oni yulo tsüka lanben ocho zhükhfüro omhawoe phanthi vancho sana ji thüngi ezocho."Engangcheo chethev yuta shiang ji n tssothüng nandang yuta jijo kvütenhya tssovla?" 7 Tole lanben jina ombo khe eniata potsüwoe yonkachi bensi kümali potsow myingona heto mmyinga echümcho. Osi ombona heto phyoa ana zocho, "Potsow ky won jiang thüngi ntssonshi yuta jijo nzyu ethüm si chiso tssovka, osi shiang hetopvü ji tssonrünguka." 8 Mbona ntio phyocho sana jijo ana zoa, tokhatola ntio yichak sana jijo ana n ngathe. Hoji tsükona ana heto engacho, "Tsüphoyo, tole shiang hetopvü ji kvütowena ochüm tssovla?" 9 Ombona ajahlancho, "Enhungo nina yiv ethev lia, Daniel, ntiotssole oyi shiang jo ochüm ji n rothüng nandang mphoe kenchüngi evao tüv yi. 10 Kyon elümoto jo ntssühgchevka. Osi ochoang jo n thae sana jiang najo n ngathe tokhatola n mhom ji to tssoa yia vamvü, osi ochoang na nchümri mmhom hancho sana jiang taena engathev. 11 "Eng akvü othan epiv khani siwo jilona benkae, hojijo kvüthüng Potsow n tsi ekyuthav kisü ekhüm ki mhonkvüri evao yuta jilona ben kae, tsüngon 1,290 yakchia yiv ka. 12 Ochoang kvütata na tsüng won 1,335 ji n yakyarathüng nan dang longtsüka lia chüngchünga van cho sana jiang emathao osi mmhao! 13 "Daniel, nino, ochüm nandang longtsüka lia vankhe. Hoji sülojo ni chüv, tokhatola nino ochüm tsüngono jo ni yantso ji khilo phanthilamka."
1 Yithen shijo mesao Uzziah, Jotham, Ahaz, osi Hezekiah tona Juda lo esapvüi tssoa van, elani Jehoash tsoe Jeroboam na Israel lo mesao tssoa van to tssoathüng OPVÜI na Beeri tsoe Hosea thüngi picho.
Hosea Engh Tona Ngaroden To
2 Kvüthüng OPVÜI na Hosea yakchia Israel jipo thüngi jancho sana, ombona Hosea ji heto ezocho, "Woa osi yanpiyanthan tssoa; ni engh jina ni jancho n zov tssov, elani ngaroden jiang naha ompvü esüa tssov. Hoji esüa a kyon jiang naha a sithaka osi ayi nngav sithaka." 3 Hoji tsükona Hosea na Diblaim otsolov, Gomer to tsao ji soa vancho. Onte tsokhying ovüngo ji bukthakale, 4 OPVÜI na Hosea thüngi ezocho, "Omboji 'Jezerel' to tsa, ntiotssole nsungkhüngüv ana Israel lo mesao ji omotsü Jehu na Jezerel lona münghan elhi tsso ji man ezüp piv sala. Ana Jehu ekhüngyan esa ji ochüm tssoyiv sala. 5 Osi hojitothüng ana Jezerel hayitsü lona Israel rasan etho ji roe siyiv." 6 Gomer na elani enioto ngaro vanlancho-tokhatola shijo eloe tssocho. Osi OPVÜI na Hosea thüngi heto ezocho, "Ompvü ji 'N zancho' to tsa, ntiotssole ana elani Israel thüngi nzan njülan osi nlan n siyi. 7 Tokhatola Juda kyon jiang thüngi jo nzan ejüv. Osi A, onte OPVÜI Potsow, na onte shanchov, tolea ritsso lona mekelani yonri mekana lotssi osi lotssitsüng mekana kurü osi kurü rasan thüngina ha mek." 8 Gomer na otsolov ji khakthakale elani ngaro hanlancho, osi tsokhying bukcho. 9 Osi OPVÜI na Hosea ezocho, "Ombo ji 'Akyon mek' to tsa, ntiotssole Israel jiang a kyon meku sithaka osi Aiyo onte Potsow mek."
Israel Ji Mmhonilanthokvü
10 Israel kyon jiang ji jümangi hajang esüa n khacheo, osi n madangjamo kümvüka. Enhungo Potsow na heto onte ezoala, "Nteno akyonden meka," tokhatoa ombona "Nteno eküm evamo Potsow ji tsoeden ka!" to onte ezov tsüngon ji tsathaka. 11 Israel kyon jiang tona Juda kyon jiang toji nzo tssov. Osi ontena onte esopvüi onte popo ethüngchev, osi elani khi onteji onte metalo na tsüka-rankata osi jüolia kümlam. Ho, Jezreel tsüngon jijo tsüngon tsüphov tssov!
1 Hoji tsükona "Potsow kyon" osi "OPVÜI na nzamo" nte Israel kyonden jiang tsa.
Longtsüka N li Gomer Longtsüka Nli Israel
2 A tsoeden, enhungo ompvüo a engh mekvü sithaka, osi anaha ompvü orapvü mekvü sithaka khatola, niyo thüngi jonjitava. Ompvü efürama osi lonsülonphyo elhi jiloha esanle to jonjitava. 3 Ompvüna n khophia tssona, ompvü bukathüng kvüto tsükshü bukcho sana ji esüa ana tsükshü ompvü kümthokvü. Osi ana likying ntia n rankao meta esüa ompvü kümthoku, osi ompvü ji eratsüngi chüv. 4-5 Ana ompvü ngaro jiang thüngiha khonzan to n tso osi nzan n jü; ntiotssole onteno yikra nlio lonsülonphyoe tsoeden. Ompvüna ompvüpo phyocho, "Ana yinga-khyingroe jiang thüngi swona ontena etsoyu apiala osi ojü elani tsansü osi sünyipvü, elani olive thyujü tona zükhi to apiala." 6 Hoji tsükona ompvü Ian khania echung nsüngrüv, osi okyu chümi hoji epi ji chungi ompvü vanthokvü sala. 7 Ompvüna nzamo eboe jiang yana yungphiv tolea ompvüna onte rhümav mek. Ompvüna onte yamu tolea onte n yanche. Hoji sülojo ompvüna phyov, "Aiyo arapvü ovüngo ji thüngi elani yiala, ntiotssole enhünga thünginajo aji arapvü thüngi vamo jithüng mmhomo." 8 Ompvüna kvüthüngha-lea, ompvüna Baal potsow khüma thünga tsüstao shona janti osi olive thyujü elani zükhi osi etsoyu jiang ana ompvü picho to n chümche osi n khicho. 9 Hoji tsükona liri yutalo otsuk-omüm osi tsüngthijü yantso ompvü pio jiang ana ompvü thüngina khilaniv; osi tsansü elani sünyipvü mpensüv tsükona epio jiangha khilaniv. 10 Ompvü yfngakhyingore jiang mhadungona osü ompvü shakiv osi kyon ochinaha a etho jilona ompvü shanchokhokvü mek. 11 Ana ompvü tokhu olan olan jiang topvü ochüm tssoyivosi ompvü nzyu akvü tokhu, choro tokhu osi esanmung tokhutona ekhümlan tokhu longshita to jiang topvü esaniv. 12 Elani ompvü jününgroli osi züvodung kvümoe ompvü nzamo eboe jiangna ompvü na onte elümo tssoyiwo ji man ompvü picho to hoa vancho sana jiang ha topvü roe siyiv. Elani ompvü jününgroli osi tsüngthili jiang ji apho-among kümthoki siyiv; osi orae ekümrümo phanthechi roe siyiv. 13 Ompvüna amhechoe sisi tsütserhüm runga Baal khüma osi oyuk-osen mmhom jiang ekasi ompvü nzamo eboe jiang phanphia ewo jiang yuta jiang lona benkae ana ezüp ompvü piv. Hojito OPVÜI na phyothaka.
Ombo Kyon Jiang Tsükona OPVÜI Nzan
14 Hoji tsükona elani lijüngi ompvü sosi wov sala, osi hoji lona nzan yinüng khi ompvü khyolani khiv. 15 Ana ompvü jününgroli jiangji pilam osi Ezüp hayi ji Eyilo kipüng to kümthokvü. Hojilona ompvüna ompvü lorothüng Ejip metae na yiathüng ayi engao ji esüa tssolam. 16 Hoji sülojo elani ompvüna arapvü to atsalamu osi kvüthüngha a Baal to ompvüna a n tsalan. 17 Ana kvüthüngha Baal mying ompvü n phyophithuklan. 18 Hojito thüng ji ana orae ekümrümo osi worowoni jiang topvü thüngi ntsata vav, hojito tssona ontena elani khi a kyon jiang ji n tssantsolan. Elani ana meta jilona ritsso ebensü topvü ereni khi siv, yonri osi lotssi topvüto, osi akyon jiangji noying nkoho lo vanthokvü. 19 Israel, ana a engh ji ni kümthokvü; Osi ana ntsa longtsükata vamvü; Ana yuta topvülo nzan ni ejüv osi ni khonzam osi kümali tsükona a echi ni kümthokvü. 20 Ana a echümchak ji vav osi a echi ni kümthokvü, Osi nina aiyo OPVÜI to ji achekav. 21-22 Hoji yuta jilo ana akyon Israel jiang randan jiang janlam. Ana limhae eryu jokathoku, Osi liko jilona otsuk-omüm osi jüngürothi tona olive to chiyithokvü. 23 Ana a kyon jiang ji meta jilo vanjüng tssothokvü osi ejüeli lia onte kümthokvü. Ochaong thüngi "Nzancho" to tsacho sana osi ochoang jo "A kyon mek" to tsacho sana jiang thüngi ana nzan ejüv. Ana "nteno a kyon ka" to onte ezov osi ontenaha, "Nino e Potso" to a janlam.
Hosea Tona N thae Eloe Ji To
1 OPVÜI na athüngi a ezocho, "Elani wolana, osi eloe ochona ompvü nzamo eboe ji thüngi efürama tssoa vancho sana ji thüngi ni nzan ji ejüa. Osi ana kvüto akyon Israel jiang ji ontena mpato potsow thanpo jiang thüngi kholani yilea osi tssüngthi nkung jiang khi kisü jiang thüngi thanleha, ana enhünga jana kvüto nzana sana ji esüa ninaha ompvü nzamvü shikhfü." 2 Hoji tsükona ana janti rang taro mongo tona omüm seri 150 to khi ompvü shicho. 3 Osi yuta sunga mpato tssolea ochi thüngiha efürama mekana lonsülonphyo elhi n tssona a nhyakuka to ompvü ezocho, osi hoji yutaloji anaha ompvü nhyaka vamvüka to ezocho. 4 Hoji esüa yuta elümoto sunga Israel kyon jiang jina onte pono esopvüi n hungu vamvü, osi elani kisü jiang thüngi othan n pina mekana ntho long turhyu, osi kisü kiri jiang ji khi potsow thung n tssothukna vamvü. 5 Tokhatola, Israel kyon jiangna elani onte OPVÜI Potsow thüngi tona onte mesao David lona chenkao ji thüngi to kholamvü tsükona yuta ji yivka. Hoji sülojo ontena OPVÜI ekyu lo vamvü osi ontena ombo thüngina yantso mmhom jiang khichov.
Israel Jiang Thüngi OPVÜI na Nlan Pioji
1 Meta shilo evan jiang thüngi OPVÜI na heto phyochophyori lia. Israel kyonden ombona ntio phyov licho sana hoji engatava: "Meta shilo evan jiang yulo nzanta n li osi longtsüka ha n li, elani kyon jiangna aiyo Potsow ka toji a nchethe. 2 Ontena echümtala tokatola hojiang nphüklani siala, osi ontena ejüng phyoa, lüngthata, efüa osi efürama tssoala. Osi müngtsso-münghan ji kyongkata, motsünga sülo motsünga to lüngthata liala. 3 Hoji tsükona metaji likying kümvüka osi hojilo evamo jiang topvü chüravka. Ekümrüm topvü osi woro woni elani ongo jiang mpato chükhamvü."
OPVÜI na Pvüti Jiang Nlan Piala
4 OPVÜI na phyoala, "Ochinaha kyon jiangji nlan tipithuka mekana timaka-tolea a lüm n tsso jijo ntelo lika pvütiden. 5 Zümo eng ntena wori elhi tssocho osi zenkhying jiangha nte lona mmhonka tssocho mek. Ana nte oyo, Israel ji roe sivsala, 6 Ontena a n chetheo ji yakchia a kyon jiangji roe esio tssochethaka. Ntiotssole nte pvütiden na a n chethecho, osi a püngnoyi jiang khoe sicho, hoji tsükona anaha khoe nte siala osi nte tsoe oro jiangha pvütiden to nte n chekayi. 7 "Nte pvüti kvütata kyonga chiyiasana ji tata ntena mmen kyongkata a thüngi tssoala, hoji tsükona nte yikrachi thung ji yikrana nte dungcheyiv. 8 A kyon jiangna mmen tssoji yakchia nte jüoli-katala, Hoji tsükona ntena kyongkata mmen onte tssothuk hungala. 9 Nteha kyon jiangna ezüpo ji esüa ezüp khivka! Ntena ntio mmen tssocho sana ji manji ana nte ezüpthukvü. 10 Othan jiang lona nte ejan jiang khi tsov, tolea nte wontonpvü tssov. Ntena otsoe oro epio potsow ji khümtav, tolea ntena otsoe oro n hung, ntiotssole ntena a lona tsani thanpo potsow phana yi sicho."
OPVÜI na Potsow N tsi Ekhüm Ji Tssakala
11 OPVÜI na phyoala, "Soko, ehen ethan jiangna a kyon jiang engathe ji moni siyiala! 12 Ontena otssüng motsünga ji thüngi chethev pileto engala! Jarung jina ontena ntsihunga evamo ji ezoala! Ontena khoe a sithaka. Eloe ochona lonsülonphyoe kümcho sana ji esüa ontena a sisi potsow thanpoe jiang thüngi ontebobo khochakthaka. 13 Ntho meta phunglan kvüri jiang lona othan pitala, osi ontena yonton jianglo odung ntssona ovo vüloka elio jiang küpina tssütse rungtala, ntiotssole khümcho ji elümoto mmhomo ji tsükona! "Hoji tssüngthi jijo, nte tsolo jiango lonsülonphyoe kümrala, osi nte tsoe jiang tsoeni jiangna ha rama tssotala. 14 Tokhatola shi tsükona ana ezüp nte n pi, ntiotssole ntena khümpheni lonsülonphyoe evamo jiang thüngi jünatala osi onte nzo tssoe potsow meko jiang othan pita vana. Osi püng no kako lona phyoji esüa, 'Nchümri n li kyon jiango momvüka.' 15 "Nte Israel kyon jiangna mpa a yi n ngalea hoji khi Juda ji ti yikrathuka. Osi Gilgal mekana Bethaven lona ti khüma mekana hoji lona eküm evamo Potsow myingona ti echümthuka. 16 Israel kyon jiangjo kurü esüa haruk hashüiden. Totssona kvütoli ana phenlungi olyuden esüa onte süphivla? 17 Israel kyon jiango kisü ekhüm jina onte relangthaka. Hoji tsükona nra onte eyi yithuka. 18 Soko khosha yusi kinothakana yikrachi myingthüng ji thüngi najo lonsülonphyo lo yikra lio ji chokata tssotala. 19 Mpungna onte hansi yiravka, osi Potsow n tsi ekhümthan epi jina yikra onte pivka.
1 "Pvütiden, ntena shi engatava! Israel kyonden, eno ndungi engatava! Nte ephyo-esan opanden, ntenaha engatava! Ntena ntsa khi oyi tssov lia-hoji tsükona yitsso ji ntelo elungkavka! Nteno Mezpah lo tsirhi esüa osi Tabor phunglani ngozonphen zoncho esüa nte kümthaka, 2 Osi Akashia yantsülo sokvü ejungu methaki lia, osi ana nte topvüto thüngi ezüp nte piv. 3 Israel ji kvütüv sana ana ntsiaompvüna a thüngina n phoche. Ompvüna longtsüka n li ekümo vanthaka osi ompvü kyon jiangna a khümvü onte n tüm."
Hosea na Kisü Ekhüm Ji Dangala
4 Kyon jiangji ontena mmen tsso ji yakchia OPVÜI thüngi n kholanchetala. Kisü ekhüm jina onte rhümajüngi lia, osi ontena OPVÜI ji n chethev vana. 5 Israel kyon jiangji onte lüm etsuk osi kanchan jina onte panlana vana. Onte mmen jiang lona nshüphi onte ekhüngala, osi Juda kyon jiangha onte nzo ekhüngala. 6 Ontena olyu osi mangsü jiang khi OPVÜI thüngi thanala, tokhatola hojina ntia mmhom onte n tssocheyi. Ontena OPVÜI ji n yanche, ntiotssole ombona onte sithaka. 7 Ontena OPVÜI lo longtsüka n liv vanthaka; osi onte tsoe oro jiango ombo echi mekvü sithaka. Hoji tsükona onte osi onte liko jiango nsungu roe siv.
Israel Tona Juda To Yutalo Ritsso
8 Gibeah lo ritsso tatara jiang mhüa! Ramah lonaha ekhen won tssoa! Bethaven lona rateta! Osi Benjamin kyonden, rotalo rhowoa! 9 Ezüp epiv yuta ji tsathaka, osi Israel ji roe siv. Israel kyonden, shijo ntelo tssonrünguka! 10 OPVÜI na phyoala, "A lüm etsuk phanthithaka ntiotssole Juda kyon jiangna Israel ji khyoe khi metaji ompvü thüngina rechoe khiyithaka. Hoji tsükona jüphyontsü esüa ana onte pono ezüp phyangkayiv. 11 Israel ji oyam na tssethechia vana; osi ombo ejan liko jiangha monthaka, ntiotssole ekyo-erung onte npicheo jiang thüngina nzanchi eyiloa ombo eta ncho vancho. 12 Ana Israel pono tssoro phyoro rwothukvü osi Juda kyon jiang ponoha roe esio ji yithokvü. 13 "Kvüthüng Israel na ompvü nochonori ji ompvüpo hungchosana osi Judana ha ompvü emho jiang hungchosana, tothüngji Israel na Assyria esapvüo ji thüngi nzanchi chono wocho, tokhatola ombona ha onte n miyichecho, mekana onte okhfü-ora jiang n poyichecho. 14 Ana Israel kyon jiang tona Juda toji hingho esüa onte hav. Osi ana a popo nthyuroe ekachi onte siv. Ana kvüthüng shoka onte süphia sana ochinaha onte n shanchoche. 15 "A kyon jiangna onte mmen tsükona tssona ezüp khisi hojilona khophilani a yana a thüngi n yithüng nandangjo ana onte si-nkiv. To tssona ezüp ji yakchia ontena a yanchev mpa tssokhuka."
Kyon Jiangna Ntsa Lona N khophi
1 Kyon jiangna phyotala, "Etena OPVÜI thüngi kholantavka! Ombona etssatssothaka, tokhatola ombona emiyinrüngu; ombona emeyanthaka, tokhatola ombona ete khfü jiang e yukayiv, ombona to n tssovke? 2 Nchuk eni mekana ethüm yuta lona ombona ekümlanthoku, osi etena ombo vanhyalo vanlam. 3 Etena OPVÜI ji engathev ekhyo tssotavka. Kvüto wonchia sana ji esüa, osi kvüto tsüngkyingo eryu jina liko ji etsona sana ji esüa ete thüngi yilanrüngu." 4 Tokhatola OPVÜI na phyoala, "Israel osi Juda ana nte thüngi ntio tssovsala? Nte nzanji enyathüng yentsso kvüto zakto moni sia sana ji esüa moni siala; osi yenjü enyathüng lisi topvü monlani sioji esüa tüv. 5 Hoji tsükona ana nte thüngi yitsso osi tssorophyoro yithen hansi zenkhying jiang rothukcho. Ana nte thüngina eyilo jijo ntssüng-rünga heto: 6 Nte ekümrüm than jiang mek, tolea nte n tümjak nzanji. Ana erungthan jiang thüngina jo a kyon jiang khi a ntsithuk hungala. 7 "Tokhatola Adam metalo rheyipvüto, ana onte ntsata evao ji ontena yesoe sicho. 8 Gilead yantsü jo kyon n mhon osi müngtsso-münghan taena pyingcho yantsü. 9 Pvütiden jiangha retso-reyuiden na olanina oyam züma vansi retsoyio ji esüa tüv. Osi Shechem metalo evolan ntholan jiang lona mpato ontena lüngtha elhi tssocho. Osi ontena elhi n mhom shiang hetopvüto ntsi-ntsana tssocho. 10 Ana Israel lo ekhenthav elhi hungthaka: A kyon jiangna kisü khümi ontepopo mmen tssothaka. 11 "Juda kyonden nte tsükona jo, ntena ntio elhi tssota vanchosana jiang tsükona ezüp nte epiv ana yuta ji mekathaka."
1 "Kvüthüng ana akyon Israel jiang a emiyi-hunga osi tssochyua onte kümthuklan hunga sana onte n thanri osi n mhom etsso jiang tae hungala. Ontena onte onte ejithechitala; osi oki tssarhüpi efütala; osi lantsüi kyon jiang rekhiyiala. 2 Ana onte elhi n-mhom shiang onte nchümcheyiv toji onte kichuki n rhyi, tokhatola onte mmen jina onte hachümi elio ji ana n hungu n vanche."
Ekhüngyan lo Mpho Elhi
3 OPVÜI na phyoala, "Kyon jiang na onte okyak n-mhom jiang khi mesao tona ombo küpo elhi etssoe to jiang ejithechiala. 4 Onte topvüto kyaktssoe osi oyi nngae tae, Osi onte yulo tssakta nkungta ji hümri erüng na ohüm nhyoni vasi hoji n pungthüngjo michüm n tsüm-na hümri rungphen ji ehünga vanthukcho esüa tüv. 5 Mesao tokhu tsüngono ontena mesao tona ombo küpo yansaeden to jiang sokona kinothuki zhüvathukala. 6 Ho, onte kyakrüm elhi jiang hümri rungphen kvü ehüngato to tssocho; Osi zümo tona onte lümbüm etsuk ji mmümthüngsi enyathüngcho puksoe omi kümcho esüa tüv. 7 "Onte lümbüm tsükshi lona onte esapvüi jiang lüngthacho. Osi onte mesao jiangha tsük tsükna meyan khani sicho, toaha onte ochinaha a thüngi na ekyu-erung n yan."
Israel Osi Jipo Jiang
8 OPVÜI na phyoala, "Israel kyon jiangjo hümri rüngshukcho esüa tüv, onte nkonphia evamo jipo jianglo tae enhikatala, 9 Osi ontena metapoe kyon jianglo enhikae evamo jina onte etho ji matakayiala toji n chümjancho. Onte tsüngon jiang jo OPVÜI na hungrikaethaka, toaha jitia n tsii. 10 Israel kyon jiang onte lümbüm etsuk jina onte pono eronta vana, osi heto olan taro n mhom tssoa yia vana khatola ontena onte OPVÜI Potsow, athüngi n kholan. 11 Osi Israel kyon jiango vefü zhüvae na pyaphia esüa; ovüngo ji ontena Ejip thüngi nzanchi chonala, osi enioto Assyaria thüngina ekyu-erung yanala. 12 Tokhatola ana ngozonphen ephyani vasi woro na pyaphiathüng eyukyao ji esüa onte eyukyathokvü. Osi ontena mmen elhi etsso jiang tsükona ezüp onte piv. 13 "Onteno monthokvü zenkathaka! Ontena a sithaka osi apanlancho. Hoji tsükona onteji roe onte siv. Ana onte ashanchohungcho, tokhatola ontena akhümo ji ejüng lona akhümcho. 14 Ontena otsotso lona athüngi n randan, osi ji thüngonajo potsow n tssi jiang esüa likoe vanthei kyatala. Kvüthüng ontena etsov osi eyuv tsükona randana sana n longtsüi jiang esüa ephfüphia kyatala. Onteno kvütata Potsow panlanden ato? 15 Onte khyoche rankümthoki etho jüa onte kümthokvü ji ana onte kümthukcho khatola ontena a thüngi mmen kyaktso elhi tssotala. 16 Ontena athüngina n lüpi etho n lio potsow ji thüngi yitamungala! Onteno lotssi khungrocho esüa tüv, ntiloha zikav n liden. Ntiotssole onte esopvüi jiang naha haruk-hashüyi nsanala; hoji tsükona echü n mhom lona onte chüvka; Osi Ejip kyon jiang na onte emakav."
Israel na Kisü Khümo ji OPVÜI Na Nlan piala.
1 OPVÜI na phyoala, "Ekhenlung won tssoa! Ntiotssole ori jiangna mungshiro esüa a metalo pyaphita vanthaka! A kyon jiangna ana onte thüngi ntsatao ji yesothaka osi apüngno yi jiang nngana a thüngi a panlanthaka. 2 Ontena küma e potso, to mpa a tsalea osi onteno a kyonka to phyoa ontena a ntsia to phyotalea, 3 Ontena mmhom ji sithaka. Shi tsükona onte ri jiangna osülo erükata onte phamvüka. 4 "A kyon jiangna mesao ethüng cheracho, tolea onte etancho lona tssocho. Ontena esopvüiden ha ethüngcheracho tokhatola a lümbüm erüng n jüna tssocho. Ontena shona janti jiang khi kisü nsüngrüo jiango onte emonra ji hojito tssotacho. 5 Samaria yantsülo evan jiangna shona na nsüngrücho mangsüpung khümta vamo ji a tssakala. Ana onte thüngi a lüm nshüroa alüm tsukala. Ontena kisü ekhüm jilona khophiv jo kvüto-thüngti tssovla? 6 Israel yulo tssüngshan tssothi jiangnaha kisü nsüngrücho tolea jiango potsow ji mek nrüng! Samaria lona khümta evamo shona mangsüpong jiha tsaromoroe siyivka! 7 Ontena kvüthüng mpung mojü vena sana ontena tsyungryu rivka. Oli otssuk n mhen-hamo jiang najo kvüthüng ha otsung osi etsov n chiyi; tokhatola chiyia mpa sayileha metapoe kyon na tsoroe siv. 8 Israel jiangha jipo thanpoe jiang esüa kümthaka osi chonphfü evüprocho jo kvütüv sana ji esüa ethelan n liv sithaka. 9 Onteji gadho esüa oyi nngae kümthaka osi onte etancho lo yithka. Onteno Assyria thüngi nzan yana yithaka osi jipopoe jiang khi onte nkohathoku tsükona engocho man pithaka. 10 Tokhatola enhungo ana onte topvü ji hanrhyui ezüp piv sala. Osi nsungkhüngu kvüthüng Assyria mesao na onte tssethechia sana ontena emhena noa erontav. 11 "Israel kyon jiang na kvüta kyonga onte mmen jiang khi esiv tsükona thanphensa nsüngrüa sana jitata ji onte na mmen tssophen kyongkata liala! 12 Ana püngnoyi nkha-khamo erani onte piala, tolea jiang topvü ontena n tsicho esüa sikhanala osi n tsütsatala. 13 Ontena othan apicho tolea oso jiang topvü ontena khilani tsothaka. Tokhatola, A, OPVÜI shina onte elhi jilo osi onte thüngi a ematha n li; hojitsükona onte mmen jiang nchümcheyia ezüp onte piv; osi ana Ejip metae onte yithuklamvü! 14 "Israel kyon jiangna mesao ki mmhom tssotala, tokhatola onte liyingpvüo ji mhechoe sithaka, Juda kyon jiang naha yantsü pikhfü theta tssotala. Tokhatola onte yantsü osi mesao ki jiang rungi siyithokvü tsükona omi jorothokvü."
Israel Ezüp Epiv Tsükona Hosea na Tüngsochiala
1 Israel kyonden, Potsow n tsi jiang na tsso ji esüa tssotao tokhu jiang esantava. Ntena nte Potsow ji thüngi na nlüpi yithaka osi ntena longtsüka lia n vam sithaka. Meta topvü lona ntena eloe lonsülonphyoe esüa ntepopo Baal potsow thüngi yenthaka; osi ombona hoji dungche tsünghanro nte epio ji ntena chokata khicho. 2 Nsungkhüngu ntena olive thyujü tona tsünghanro jiang tssochyua hungu meka osi zükhiha n hungu sivka. 3 Israel kyon jiangna potsow na nte pio meta jilo vanchev meka, tokhatola Ejip metae kholani yilanchev, osi Assyria lona khamo etsoyu jiarig tsochev. 4 Hojilo amoatsi metae najo ontena OPVÜI thüngi zükhi than ji n piche, mekana onte than jiang ombo thüngi hansi n roche. Osi onte etsoyu jiangna ontena müngka etsoyu khi tsocho esüa onte otsük akvüto mmenkhamvü. Ontena tsolea onte wondon pükthoku tsükona tae tsov kha, OPVÜI thüngi othan tssoa ekhümki hansi ewo tüv etsoyu jo n tsso. 5 Tona kvüthüng OPVÜI yikrachi tsükona tokhu yuta ji jana nay onteno kvüto lyuvla? 6 Kvüthüng ezüp ji yia sana osi onteji tsanrorae sia sana Ejip kyon jiang na onte hanrhyuv osi Memphis lo shothei esiv tsükona hanrhyuv! Osi onte shona janti oyuk-osen jiangha momvü osi onte sonmungkimüng ehen jiang topvü ero na pvüzhükhani okyo taena pyingi siv. 7 Ezüp epiv yuta ji yithaka osi kyon jiangna ntio mancho sana ji ehungu yuta ji janthaka. Kvüthüng hoji tssoa sana tothüngti, Israel jiang na ntsivka! "Zenkhying shijo," "zhüvae, to ntena phyoala. Osi chüngtsoe kyon shijo npenri" to phyov. Ntena nte mmen ji tsüphokhüngo jitsükona ntena hetata to atssakala. 8 Potsow na zenkhying ejoena rothuko jijo ombo kyon Israel jiang thüngi ntasknshon epiv tsükona. Tokhatola ana kvülo woana, ntena woro esüa tsirhi lona a sathoku tssotala. Potsow meta jiang lo mpa zenkhying jiango kyon jiang ri. tssoala. 9 Ontena etsso jiang topvülo eyilo n lio n mhom jina tssoji esüa tssotala, ontena Gibeah lo tssoji esüa. Hoji tsükona Potsow na hoji onte nchümcheyiv osi hojitsükona ezüp onte piv.
Israel Jiang Mmen osi Hoji Jokheman Ji
10 OPVÜI na phyoala, "Ana kvüthüng ovüng tssoa Israel jiang yanchecho sana jithüngjo lijüngi jününgrothi yanchecho esüa tssocho. Ana kvüthüng nte pyimtsümotsüi jiang hungcho sana züvothi emhen yutalo mhendemo jiang esüa onte hungcho. Tokhtaola ontena kvüthüng Peor phunglan jilo chiyicho sana Baal potsow ji khümta yi sicho osi ontena nzamo potsow thanpo jiang esüa khümcho. 11 Hoji tsükona Israel tsüpho osi myingthüng ji woro pya yia esüa pya yi sivka; osi onte lona otsoero n liv sivka. Eloe jiangna ngaro n ham mekana n jenkav sivka. 12 Tokhtaola ontena mpa otsoero süphi-lümbüm-chelea, onte topvü eküm ochia n vanthukna onte khiyivka. Osi kvüthüng ana kyon shiang sia sana ekhenthao tüv onte thüngi tssov." 13 OPVÜI yo, onte tsoero jiang phani lüngthata ana hungala, 14 Ana kyon shiang thüngi ntio tssoyile to ni ezovla? Onte eloe jiang lopung kümthuka! Onte ngrao jiang nzücheo tssoa onte shiro jiang kyingkae sithuka.
Israel Pono OPVÃœI Yitsso
15 OPVÜI na phyoala, "Elhi n mhom topvüto ontena Gilgal lona benkacho. Osi hojilona ana onte tssakvü benkacho; küma ontena ntio mmen tssocho sanaji tsükona a liko shilona onte phanchukchichev. Ana onte n zanlan; Onte esopvüi topvü na apanlana tssothaka. 16 Israel kyon jiang ji odung oying ji kyingkathakcho esüa osi tsüngthi n thiv sithakcho esüa tüv kümthaka. Ontena otsoero n li osi ontena lia sayileha ontena nzamo jiang topvü ana monthoki siyiv."
Zenkhying Jina Israel Tsükona Phyoala
17 Ana benkao OPVÜI jina ombo kyon jiang khoe sivka, ntiotssole ontena ombo-yi nngacho. Onte ji tsanthan jipo jiang yulo tsanthan onte kümvü.
1 Israel kyon jiang jo jününgro dung esüa jününrothina pyingcho. Osi onte ji kvütata jüolia küma sana jitata ontena thanphensa tssotacho. Onte liko jina na kvütata tsukro-mümroa sana jitata ontena ekhümo longzü jiang mmhonkata nsüngrütacho. 2 Hoji tsükona lümbüm n tsae jiang topvü enhungo onte mmen jiang tsükona ezüpvü. Osi Potsow na onte ntho thanphensa jiang roe onte siyiv osi onte longzü jiangha khochü-chüi siyiv. 3 Kyon shiangna nsungu heto phyotav, "Eiyo mesao n van, ntiotssole ena OPVÜI ji n kyucho. Tokhatola mesao na e tsükona ntio e tssoyivla?" 4 Ontena hojito phyota yisha khi nsanta, ejüng echümkata osi ethelan nlio elhi tssotav. Ntsa jiha n tsa-nrük kümthaka, osi oli rhoni vancho tüvlo ero mozhu n-mhom ranato rankatala. 5 Samaria yantsü lo evamo kyon jiangna Bethel lo shona mangsüpung kisü ji emomvü kyua nungrav. Pvüti ochoangna kisü ji khüma benkata vancho sana jiang nzo kisü emomo ji tsükona kyatav. Osi kvüthüng shona pyon ji phfüi sia sana eronkachia kyatav. 6 Kisu jiha Assyria metae hansi oyi mesao ji thüngi ekhya tsen tssoa pi siyiv; osi Israel kyon jiang jo ontena oyam eji-ekyako rheo ji tsükona yikra-nungra ndokvü. 7 Osi Israel mesao jiha jüponi tssüngtsiro phfüa yia vancho esüa hansi yi-siv. 8 Aven Phunglan kuri khümphen tssoe khümta evamo jiangha topvü roe siyiv, osi onte khümphen sa jiang lona okyodung tona ero lo phanthiv. Osi tothüngti kyon jiang na phunglan jiang thüngi, "Emphothuka!" to ezotav osi yingsüng jiang thüngi "Ekhümzhüa!" to ezov:
OPVÃœI Na Israel Pono Yitssoyi Phyochiala
9 OPVÜI na phyoala, "Israel kyon jiang na ontena Gibeah lona mmen etssov benkao ji enhünga jana a pono mmen etsso ji n sanhan. Hoji tsükona Gibeah lona ritsso jina onte phayavka. 10 Ana mmen kyon shiang shi hayae ezüp onte piv. Jipo topvü khümtsütae onte yamvü osi ontena mmen tsso ji tsükona ezüp piv. 11 "Israel jo tsüngon motsünga lojo mangsüro elhi shikalangcho, osi oli etssem tsükona methaki vacho esüa jitüv tssocho. Tokhatola ana elhi khüngkata ompvü tssothoku tsükona evüng mmhomo jilo vüngkhüng ompvü theyisi elhilo phanchicho. Osi Juda jo lirhonphen ji benthuksi Israel jo hoji tssüngthukcho. 12 Ana onte ezocho, 'Nte popo liko ethan rhontava, osi ntsanrük yingtava, osi ntena alo jüngra lia a khümo jilona ntio mmha hunga sana ji ritava. Enhungo nte OPVÜI, athüngi kholamvü nte etümthaka, osi ana oro nte pono mmha nte phyangkayiv.' 13 Tokhatola hojito tssothüng jo ntena n mhom ji yingcho osi hoji ri khicho. Ntena na ejüng phyotao ji tssüngthi ji ntena tsothaka. "Ntiotssole ntena nte ritsso kurü osi nte rasan otssomo jilo longtsükacho; 14 Hoji tsükona ritsso ji nte kyon jiang pono yivka, osi nte rizüphen jiang topvü roe sivka. Osi mesao Shalaman tsüngono ombona ritsso lona Betharbel yantsü ji roe sisi, opvü-oyo osi ngaroden jiang topvü rorüpi esio ji esüa tüv tsswothukvü ka. 15 Hojito nte ponoha tssov, Bethel kyonden, ntena ekhenthav mmen elhi etsso ji tsükona. Osi ritsso ji benkapvüto Israel mesao ji chüvka."
Ombo Panlamo Jiang Thüngi Potsow Nzan
1 OPVÜI na phyoala, "Kvüthüng Israel ji ngaro tssoa vancho sana ana ombo nzancho, Osi atsokhying esüa Ejip lona ombo tsachukcho. 2 Tokhatola ana kvütata ombo tsa-sana, jitata ombona athüngina nlüpi yicho. A kyon jiang na Baal thüngi othan pitacho, osi kisü jiang thüngi tsütserhüm rungtachu. 3 Toaha Israel jiang thüngi olan tsachev tsükona shikao jijo A. Ana a kyon jiang ji a evono ejümkae socho; tolea onte najo ana onte sheküpcho toji a n cheka. 4 Ana nzanti khi onteji athüngi sosi yicho, Osi ana onteji ejümkae a eyulo enghokathukcho. Ana nkhuthei onte süphi-lümbümcho. 5 "Ontena athüngi kholani eyiv ji nmatha küma, onteji Ejip metae yilanchev, osi Asyria na onte savka. 6 Ritsso na onte yantsü ji eyukzhüv osi onte yantsü kipüngkhan jiang topvü roe siyiv. Hoji yakchia a kyon jiang topvü roe siv, ntiotssole ontena ntiojo mmhona to nchümcho sana ji ephan tssocho. 7 A thüngina tsani eyiv ji tae ontena nchümta-mongcho. Osi onte evüngo vüngkhüng theyio ji onte phungile to kyatav khatola hoji ochinaha khi onte n siyi. 8 "Ana kvütoli nte vachi sivla, Ephraim? Osi kvütoli ana nte sinkivla, Israel? Ana Admah thüngi tsso ji esüa roe nte siv alo? Toalo ana Zeboiim thüngi tsso ji ejoe na nte tsoyivla? A lümbüm na hojito a n tssothuk! Ntiotssole nte thüngi a nzan ji thama mek. 9 A lüm etsuk lona ana ezüp nte n pi, Ana Israel ji roe khi n silan. Ntiotssole aiyo kyon mek, tolea Potsow. A ntho Potsow jina, nte ndüngo vana. Ana alüm etsuk hansi nte thüngi n ro. 10 "Ana kvüthüng hingho esüa onte ri jiang erhyukata sana jithüng a kyon jiangna a phana rov. Ontena engrhelamoe na a thüngi yungta yiv. 11 Woro na pya to ontena Ejip lona yiv osi Assyria lona yukhyu pya to yirav. Ana onte ki elani onte solansi yiv. A, OPVÜI na phyothaka."
Israel Tona Juda To Nlan Piala
12 OPVÜI na phyoala, "Israel kyon jiang na onte ejüng ephyo tona ejithechi elhi to jina a hachümthaka, osi Juda kyon jiang naha enhünga jana a thüngi n mhom vana; longtsüka eli ntho Potsow a thüngi.
1 Israel kyon jiangna enyathüngna emüng jana elhilantao jiang topvü ethev n lio osi roe esio elhi tae. Khontarota tona ejüng ephyo toji ontelo rankata yiala. Ontena Assyria thüngi mmhonta ntsata vatala, osi Ejip thüngi shishotala." 2 OPVÜI na Juda kyon jing pono nlan epiv lanka lithaka, elani Israel jiha ompvü kyon jiang tssolanphyolan n mhon jiang tsükona ezüp piv sala; Ontena ntio n mhom tssocho sana ji man onte pilam sala. 3 Onte motsüi Jakob na ojenio nshümtso Esau thüngi onina oyo mmani vanathüng na rota rocho; osi Jakob ji erankümale Potsow panlana phanthicho. 4 Ombona lanben thüngiha rotacho osi khyocho. Ombona kya mmha chomo ji tsükona Bethel lona Potsow emotsüi Jakob thüngi oro jancho. 5 Shijo Tokhamo Potsow ji, Osi OPVÜI ji to ombo tsaphia ombo khümvü na lia. 6 Hoji tsükona Jakob tsoronichenden, ntena Potsow lo longtsükata osi ombo thüngi kholantava. Oyi engatava osi ntsae tssotava, tosi erüm etoe Potsow na ntio tssov sanaji nhyaka vantava.
Yitsso yi Kyongkata Ephyo ji
7 OPVÜI na phyoala, "Israel kyon shiang ha Kanaan kyon shiang esüa ntsa nrük n li; onte thüngi shisholo eroe jiang thüngi efü-seri ntsanrüka n benphi osi oyam ejithev jilo onte ematha lia. 8 Osi ontena phyoala, 'Eiyo ejüeli,' 'Ena khosha hanthei vathaka.' Osi ochinaha ena n tsanrüko na ejüeli hungcho to n lan e n piche. 9 Tokhato A, nte OPVÜI Potsow ochona Ejip lona nte sochukcho sana jina, ana lijüngi nte thüngi roathüng ntena sükilo vanta evamo ji esüa, elani sükilo nte vanthuklamka. 10 "Ana zenkhying jiang thüngi jancho osi hungjan-rüjan elümoto onte picho, osi zenkhying yakchia akyon jiang thüngi ntaknshonyi picho. 11 Tokhatola ntena Gilead lona kisü jiang. khümtacho, esi kisü ekhüm jiang jo chüvka. Gilgal lona mangsüpong jiang khi othan pitacho, hoji tsükona thanphen sa jiang ji haphoe olung ekatacho esüa tae kümthokuka." 12 Hojito e motsüi Jakob na Mesopotomia lo tsani eyio tssocho, osi engh ehungu tsükona ombona oyam olyu ezei elhi tssocho. 13 Osi Israel jiang ji OPVÜI na Ejipi nri eküm jilona shanchoe khi onte ntaknshona vanthoku tsükona zenkhying rothukcho. 14 Israel kyon jiangna Potsow ji elüm tsükshia lümbüm tsukthukcho; hoji tsükona onteno onte mmen ji man echüv etüma. Ontena ombo pono yikra hansi eyio ji tsükona OPVÜI na ezüp onte pivka.
Israel Pono Yitsso Okhao Ji
1 Vana rothakcho lojo, kvüthüng Ephraim jipona oyi nsana sana, Israel jipo thanpoe jiangna eneta engatacho osi Ephraim lo zekata rocho. Tokhatola kyon jiang na Baal Potsow ji khümta mmen tssoatacho; shi tsükona onte chüvka. 2 Nchüng tsüngon jana ontena kisü khüma mmen tssotala, osi kyon nchümtani na chiyicho kisü yonjaksha na nsüngrücho, Janti na nsüngrücho, to jiang khümtala. Osi ontena phyotala, "Othan onte pia!" kvütoli kyon na kisü mangsüpong esüa nsüngrücho shiang ntsüpta khümala! 3 Hoji tsükona kyon shiang jo enyathüng yentsso rümroa to moni onte sithokuka, osi enyanthüng yenjü mona to onte monthokuka! onteji pyonpheni na tssukzhü vena yia to tssothoka, osi miphungpheni na miphung chiyiato onte kümthokvü. 4 OPVÜI na phyoala, "Aiyo nte OPVÜI Potsow ochona Ejip metaena nte sosi yicho sana jika. Ntena ayaka Potsow thanpo n van. Nte shanchopvüi jo a tae. 5 Ana likying, lijüng jiang lona mpa nte sheküpcho, 6 tokhatola kvüthüng ntena meta mmhomlo rheyicho sana nte lümbüm püktsüngi nte kangtsükangri lona a mhechoe sicho. 7 Hoji tsükona ana hingho esüa nte havka osi khüzhü mmhor esüa nte zümvüka. 8 Elani Sevan na oro monchotoli nte yamvüka osi nte nrhakrovka, osi hingho esüa rümphen lona nte tsov osi ekümrüm rümchoto nte mpvürovka. 9 "Ana roe nte sivka, Israel kyonden! Tona ochona nte nzanchivla? 10 Ntena mesao osi esopvüiden jiang ethümtala osi onte thüngina ekyo-erung yantala, tokhatola ontena kvütoli jipo shanchochevla? 11 A lümbüm etsuk lona ana mesao nte picho khatola elani a lüm etsuko na ana onteji khi hansi yilan thaka. 12 "Israel mmen jiang mmhona setsünga erani lira, osi hojiang ji elümoto mhona kenchüngi lia. 13 Israel na eküm mmhona vancheo tüv yutaha yicho khatola ontena hoji n khithicho, onteji ngaro oyo mmani evamo ji evan yuta janthaka ha n rona rashia vancho esüa tüv tssocho 14 Hoji tsükona ana kyon hetüv jo echü limha jilona ha onte n shanchocho, elani echü ji etho jilona ha onte n phanchoche. Echü, ni vara ji rothuka! Echü limha, ni tssorophyoro ji hansi roa. Ana kyon shiang ji enhungo khonzan to n tssov sithaka. 15 Israel na küma kherang lijü ranato mpa phanthilea ana engchirolamoe lijüng jiang lona ezhü etssov hansi yiv, osi hojina onte jükha osi jünhyo jiang nghakyingi onte siyiv. Hoji yakchia ethelan eli topvü moni siyiv. 16 Samaria ha a panlamo ji tsükona ezüp pinrüngu, ompvü kyon jiang ritsso lona chüthokvü, osi ngaro jiangha likoe tssethechi siv, elani ngarohan jiangha mman jiang poksoe onte siyiv".
Hosea na Israel Thüngi Jonjicho
1 Israel kyonden, OPVÜI nte Potsow thüngi kholantava, nte mmen jilona nshüphi nte ekhüngchoka. 2 OPVÜI thüngi elani yitava osi ombo thüngi nte randan ji shi esüa tssothuka, "E mmen jiang topvü esiyia osi e randan ekhichoyia, to tssona ena ni thüngi echümchako ji esüa ni mying thünguka. 3 Assyria na kvüthüngha e n shanchoche, osi ritsso kurü jiangna ha e n kohache, osi ena kvüthüngha ena nsüngrüo kisü jiang thüngi elani nteno e potsow to n tsa. OPVÜI, ochi thüngiha tsankaphen n lio shiangji nina khonzan to tssoa."
OPVÜI na Israel Thüngi Eküm Ethan Epiv Echümchakala
4 OPVÜI na phyoala, "Ana a kyon jiang elani a thüngi sosi yilamvü. A lümbüm totona nte nzamvü; enhungo onte thüngi alüm n tsukvü sithaka. 5 Ana Israel kyon jiang thüngi likingo eryu esüa tssov. Onteji oropangti thera esüa kisochilam; osi Lebanon lo odung jiang esüa chüngchünga phanthiv. 6 Onteji thanti tssoe küehelam osi rankav, onteno oliv dung esüa opyon mmhona kümvü. Osi Lebanon lo Cedar dung jiang esüa orhüm mmhona kümvü. 7 Elani ontena a nkoha küpo vanlam. Osi phari mmhom esüa kümvü elani jününgrodung esüa ethi-ebem. Onteji Lebanon lo thüngche tsüngthijü ji esüa onte thüngchev. 8 Israel kyon jiangna enhungo kisü jiang ethev n li; Ana onte radan jiang engayiv osi onte sheküplamvü; Onteji küm-nrhü küma evamo mitssüngdung esüa ana onte nküpnfü; Aiyo olan topvü onte mmhayithukpvüi ji."
Thakchi Yilan
9 Kvütana nchümri lichosana jiang topvüna shilo ntio erani lichosana shiang engathethuka, osi onte lümbümi thei hanthuka. OPVÜI lan jiangjo nsaka elana, osi ntsanrük kyon jiangna hoji ephan vanala, tokhatola mmen kyon jiangjo OPVÜI lan ji sinkio ji tsükona nshüphi onte ekhüngala.
1 OPVÜI thüngina Pethuel tsoe Joel thüngi yithen heto rothukcho.
Kyon Jiangna Ohüm-oli Roe Esio ji Tsükona Nungratala
2 Nte eramoeden, tüngochünga engatava; Osi Juda lo evan topvüna eno tonchia engatava. Nte pvüopo echungi mekana nte echungo shi esüa kvüthüng sana tssothakchoalo? 3 Nte tsoeoro jiang thüngi hoji ezotava; Tona ontena onte tsoe-oro jiang thüngi ezovka, Osi hojito echungren etsao jiang thüngiha motsü shi ruta yivka. 4 Vara khomong dentsü motsünga sülo motsünga to rüma chiyi ohümoli osi benro niro topvü tsoe sithaka; Osi oden motsünga na tsonhyoe evao ji oden motsüngana tümi tsolanthaka. 5 Phanthitava, osi kyatava, kinozhüvaeden; Erhyua kyatava, nte sokolo ora etssoeden, Tssüngthijü ethan nsüngrüphen jününgrothi topvü roe sithaka. 6 Vara khomong dentsü na ete metalo rheyithaka; Oteji ekhenthav etho jüa osi n khacheo tata rüma yicho. Onte oho jiangha hingho ho eroato eroa. 7 Ontena ete jününgro dung topvü rokhani esiyithaka. Ete züwodung jiangha njak-khani sithaka. Osi tssüngfü jiang mpato nkoki sisi khero jiangha topvü ehüma nkukche khanthaka. 8 Emhena kyatava kyonden, loroena yanpipüngo khyingroe ji chüi sisi posta mpensi nungra kya to kyatava. 9 Otssuk-omüm osi tsüngthijü ekhümki etheo tüv tia n liv sithaka; Osi pvütiden jiang naha OPVÃœI thüngi ntio n pi küma nungrata vana. 10 Oli jiango lijüng Juimthaka; Liko jiangnaha nungrala ntiotssole benro-niro topvü roe sithaka, jününgrothi jiang ha kyingkae sithaka, osi olive dung jiangha mmikae sirathaka. 11 Lijonden, nungratava; Osi jününgroli ejonden, kyatava, ntiotssole nte tssukomüm osi benro-niro topvü roe sithaka. 12 Züwodung osi jününgrothi topvü mmikae sithaka; Osi tsüngthi dung topvü chürathaka, kyon jiang ematha longshiha topvü monthaka. 13 Posta mpensi kyatava, Nte pvütiden ochoangna thanphensa ji zeyata vancho sana! Ekhümki rhowo zümo tona emhena kyatava! Ntiotssole ntena Potsow thüngi othan epiv tsükona tsüngthijü osi otsuk-omüm ntia nliv sithaka. 14 Khangtale to yizüng pia, osi eramoeden jiang tsarhyua, Juda kyon jiang topvü nte OPVÃœI Potsow ki tsarhyua, Osi OPVÃœI tsaphia kyatale to ezoa. 15 OPVÃœI tsüngon ji enhyathaka; osi Tokhamo Potsowna roe esiv tsükona tsüngonji tsathaka, Ntio kvütüv ekhenthav tsüngon tssov ato! 16 Ete benro jiang etena hunga roe sia khatoala etena ntio nlyu. OVÜI ki jiloha ematha longshi n liv sithaka. 17 Mojü jiangha tsüngkying jina chükhanthaka. Etena ntio tssuk-omüm hanthei n va; hoji tsükona oson ejüng jiang ji thonrokhan-thaka. 18 Mangsü kurü jiangnaha ryusanga erontala; ntiotssole onte yantsophen n liv sithaka; Osi olyuden jiangha ezüptsüng khanala. 19 OPVÃœI yo, ana ni thüngi kyakachiala, ntiotssole yantsophen eroyo osi otssüng-odung jiang n liv chürathaka. Osi omina rungchotoli sikhanthaka. 20 Orae ekümrümo jiangna mpato ni thüngi erontala, ntiotssole onte yuphen zhükhfü jiang mpato ngha khani sithaka!
Khomong Vara Jijo OPVÜI Tsüngon Ji Ejyuka Ntaknshonyi
1 Zion, Potsow ntho phunglan jiang lona khfüa; Osi ekhenlungon tssoa. Juda kyonden; eneta kyutava! OPVÜI tsüngon ji enhyana tsathaka. 2 Tsüngon jijo emüng osi nungra tssov eluk emhenjüna eyukcho esüa tüv tsüngon, Osi vara khomong dentsü jina phunglan jiang khümzhüa tsathaka. Echungren kvüloha shi esüa n tssohan, Kvüthüngha shi esüa jo n tssolan. 3 Omi esüa ontena otsung odung topvü tsokhanala, Onte mhadungi ora-liko jiango Eden parhi ji esüa tüv. Tokhatola ontena tsoa yithakana likying lijüng kümala, Nti naha onte mhadungo n tsanchoche. 4 Onteno kurü esüa tüv; Osi ontena ritsso Kurü na yungato yungtala. 5 Ontena kvüthüng phunglan kvüri jianglo rümkata sana, Onteno ritsso zotoro esüa zecheta tüv. Osi omina ora nryukato owon tsoala. Elani rasantsüna ritssopheni reni ori etssov tsükona kyimkata vancho tüv. 6 Ontena sani yiana, otsük akvüto ekhenrhükala, osi otsük akvüna omha rangoa ekhentala. 7 Ontena ritssoe esüa hazhüala; Osi ontena rasanden esüa kyimchungo yangkatala. Onte topvüna mhadungoe tondüng yiala; osi nsate-tükna rüma yiala, 8 mekana ochinaha ochi lanha n khan na rümala. Pikhfü jiang mpato chyunrhüa rümala, osi ntinaha onte ntanglanchikhuk. 9 Ontena yantsü jiang thüngoe rumi yiala; Osi ontena pikhfü jianglo pyakatala; Ontena oki jiang loha yangra ehungo, efüi esüa kherükina oki rhowoala. 10 Ontena kvüthüng rümehuka sana meta mpa enhyokala; Potsüo jiha therüala; Choro eng jiangha müngi siala, osi shantio jiang naha n tüngrav siala. 11 OPVÜI na ombo rasan jiang thüngi potsüo tharaka to ezoala, Ombo yizüng engae jiango n khacheo tata, osi thotsü jüa. OPVÜI tsüngon jijo kvütata ekhentahv tssov ato! Ochona hojilona tsanchoe eküm vamula?
Lümbüm Khophile to Tsala
12 OPVÜI na phyoala, "tokhatola enhüngatilea ntena otsotso khophia osi ekhang nungra theta kya athüngi kholantava. 13 Ntena nungratao ji taena n tssochyu; tolea nte lümbümina otsotso nte lümbüm puksoa nte nungrala toji a hungthoka." Nte OPVÜI Potsow thüngi kholantava; Ombo nzan eli osi khonzan taena pyingcho, Ombo erüm etoe osi ombona echümchak jiang vatala. Ombona nchokabento ezüp n pina nlan siyiv ji methaka vanala. 14 Nte OPVÜI Potsow na ombo lümbüm dungphiv mpa tssokhuka. Osi nben-nkhio benro-niro, etsoyu khi nte mmhayiv. Hojito tssona ntena otsuk-omüm osi zükhi khi ombo thanchev. 15 Zion phunglan kuri na jungken khütava; Osi kyon jiang ji tsarhyui, ntho ekhang khitale to yidan pia! 16 Kyon jiang nzo sanrhyuthuka, osi ntho sanrhyu ekhhrtsükona methaka. Eson-eran jiangha sosi roa, Nganiro oshyulo jiangha nongori jiangha to sosi roa, Yanpiyanthan tssopamo poni jiangna leha onte boni chungchak ji sisi rothuka. 17 Pvütiden, ochoangna ekhümki rhowolan tona thanphensa to yutalo benka elhi tssoa vancho sana, jiang naha heto kya randam shikhfü."OPVÜI yo, ni kyon shiang pono khonzan to tssoa, Osi jipopoe jiang khi "Nte Potsow jo kvülo vanchola? to phyoa eti-yikvüthuka; Osi nimying ji timon thuka."
Potsow na Meta Jilo Tssukromümro Lithuklanala
18 Hoji sülojo OPVÜI na ombo meta ji nzana nchümlancho; Osi ombona kyon jiang khonzan to tssocho. 19 Ombona onte janlancho: "Enhungo ana otssuk-omüm, Olive thyujü elani tsüngthijü topvü tssona nte pilamka, Osi nte lümbüm pükthoku, osi jipopoe jiang khi nte n makathuklan. 20 Vara khomong dentsü khümkiwoena jof owo ji ana phani nte siyiv. Osi ejoma jo lijüngi phanthechi sivka. Onte yulo ovüng eli jiango echü jümang jilo phanthechiv, sülamo jiango Medeterranean jümmangi ekümthechiv; jilona nnanpfüpfüna onte kyonrwothukvü. Hojito onteji topvüto ana monthoki siv, ontena nte pono ntio n mhom tssocho sana ji tsükona. 21 "Ohüm-oliden, ntena kyua etho jaka tivantava, tokhatola OPVÜI na nte thüngi ntio mmhom nte tssoyithakcho sana ji tsükona emathata longshitava. 22 "Ekümrümoden, ntenaha wongkhyua ti-nchümtava, nte tsükona ero mmyakvü yantsophen lithaka; Tssüngthidung jiangnaha tssüngthi ethiala, elani züvothi osi jününg rothi tssona lithaka. 23 "Zion kyonden, emathatava, OPVÜI na ntio mmhon nte tssoyithakcho sana jilo longshitava. Ombona vami eryu ethev elio ji bena nte joyithaka; osi etssük eryu jiha tssona nte joyithukthaka, Osi tsüngkying eryu jiha ovüngthüng esüa nte pithaka." 24 Pyonphen jiang topvü otssuk osi tsünghanrho na pyingthoku; Tssüngthijü osi thyujü mmyaphen jiangha tssüngthijü tona olive thyujü tona phyochüa yithokvü. 25 Vana rothako nzyu jilo vara khomong jiangna, ohümoli osi benro ntio roe nte siyicho sana jiang nte pilamvü. Khomong dentsü rothuko jiha ana rothukcho. 26 Enhungo etsoyu tsükona nte lümbüm püka tssona hunguka, osi OPVÜI Potsow ochona emhokthav elhi nte tsükona tssothakcho sana ji thüngi ntena thanthüng myingthüng pivka; Osi a kyon jiang ji elani kvüthüngha yikrathulam meka. 27 To tssona, Israel kyonden, ana nte ndüngo vanala toji ntena ntsiv, elani aiyo nte OPVÜI Potsow ji, ayaka thanpo Potsow n van tojiha ntena antsiv. Kvüthüngha lea akyon jiang ji n züpthuk osi n yikrathuklan.
OPVÜI Tsüngon Ji
28 Hoji sülojo a mon ntsemo ji kyon otsük akvü pono rothokvü; Nte tsokhying tsolo jiangna a yithen ji thenchoa phyov, osi nte eranden na omüng emhav, osi nte pongdenro jiang naha hungjan-rüjan liv. 29 Hoji yuta jilojo ana Amon ji a nriden, jiang eboe osi eloe topvü pono lea rothokvü. 30 "Ekhenthav tsüngon ji chekav esüa, ana potsüwoe osi limha lona jenbukta lia omi osi miphung emhenjü chiyitoka nte ejüv. 31 Eng jiha müngi siv, osi ekhenthav OPVÜI tsüngon ji eropüngo jo Choro jiha ejen esüa rakia kümvü. 32 Tokhatola ochaong kvütata na OPVÜI yana sana jiango shanchov. OPVÜI na phyoji esüa Jerusalami evan ochoang sana jo tsanchov; Osi ana ethüngcheo jiang taena eküm vamvü."
Potsow na Jipo Jiang Oyi Tssoyiv
1 OPVÜI na phyoala, "Hoji tsüngon yuta jilojo ana Juda tona Jerusalem to thüngi pvülyu-hanlyupilamka. 2 Osi jipo topvü tsarhyui yitssophen hayitsü jilo sosi chiyiv. Osi hojilona ontena a kyon jiang thüngi ntio n mhom tssothakcho sana jiang tsükona oyi tssoyiv. Ntiotssole ontena Israel jiang ji phanroroae metapoe yithukcho; osi a meta Israel jiha chiroe sicho." 3 Ontena vüngpheni evan jiang ochona khiv sana to phyalyu füktacho. Elani eboeroro osi eloeroro jiang ontena efürama etssoman epiv tsükna tona soko shi eyuv tsükona to ezii kümthokvü yentacho. 4 "Nteno ntio kvüto etsso heto athüngi n mhom tssotala, Tyre, Sidon osi Philistia yanren jianglo evanden? Nteno ntiosana alolantav ekhyo tssota alo? To tssoa tssona ana zakto nte pilamka! 5 Ntena a shona, janti osi a ejüeli jiang khi hansi nte khümpheni varae lia. 6 Ntena Juda kyon jiang tona Jerusalem to kyon jiang khi hansi meta ekoni evan Greek kyon jiang thüngi yentacho. 7 Enhungo ntena yeni esio meta jiang lona ana onte sosi yirav sala. Osi ntena ntio onte thüngi tssocho sana hoji ana nte thüngi tssolam. 8 Ana nte tsokhying tsolo jiang ji Juda kyon thüngi nte yenthokuka; osi ntena ekoni evamo Sabean jiang thüngi yenchenlamvüka. Hojito A, OPVÜI shina phyothaka. 9 "Jipo jiang thüngi yithen shi heto ntsithuka; 'Ori etssov tsükona methaka, Nte ritsso kyon jiang tsarhyua; Nte rasan jiang tsarhyui khochia! 10 Nte lirhonphen jiang khi yonri jotava, Nte tsalümphen lepok jiang khi otsso jotava. Osi mpentso jinalea rotalo rhovoa. 11 Zakto rotava, Nte jipolan topvü, osi hayitsü jilo sanrhyu thuka.'" OPVÜI yo, ni rasan jiang khi hathokvü tsükona jorothuka. 12 "Enhungo jipo jiangna methaki, yitssophen hayitsü jilo jorov shikhfü. Hoji lona A, OPVÜI shina khokthei yanren nkona evamo jipo jiang topvü oyi tssoyiv. 13 Onteji elümoto n mhon; hoji tsükona liri yutalo otssuk-omüm richaki khia esüa tanchochi onte siv. Osi jününgrothi zümpheni na jününgrothi zümato onte enyonroa, Onteji pyonroe tsüa n yithüng nandang jo." 14 Yitssophen hayitsü jilo wothüng wothüng sanrhyuthaka. Hojilo OPVÜI tsüngon ji rov alo? 15 Eng osi choro jiang ha münga vanthaka, osi shantio jiangnaha n tüngrav sithaka.
Potsow na Ombo Kyon Jiang Mmhayiv
16 OPVÜI na Zion phunglanina erhyuala, osi ombo won ji Jerusalemina potsow ejenato khfüo jina oyak osi liko ji therüala. Tokhatola ombona ombo kyon jiang nkohov. 17 To tssona, Israelden, ntena aiyo nte OPVÜI Potsow ji toji antsivka. Ana Zion, ntho phunglan jilo vanala. Jerusalem jijo ntho yantsü tssovka; osi amoatsi kyon jiangna elani onte khyolam meka. OPVÜI ki jilona zhükhfüro tsüa joyiv, osi hojina Alacia hayitsü jilo etsonkav. 18 "Hojitothüng jo phunglan jiangha jününgrothi lina pyingu, Osi tssiden jiangha phunglan akvü lona hungu; Judalo zhükhfüro kvüta lichosana jianglo ojü tssona jürav. 19 Ejip metaji lijüng kümvü, osi Edom ji apho-among kümi siv; Ntiotssole ontena Juda metaji hayae, nlan n lio kyon jiang lüngtharüpi sicho. 20-21 "Lüngthao kyon jiang thung ana omüng nliv; Osi sulyuo etssoe jiang ochia n kachi. Tokhatola Juda tona Jerusalem tolojo nchünkhonto vanpyinga vanthokvü. Osi A, OPVÜI shina Zion phunglan jilo vamvü."
1 Oyi shiangjo olyu enhyang Amos Tekoa yan lo vamo ji thüngina meta jilo nri enhyokvü nzyu eni liathüng vüngi, Uzziah na Juda lo mesao tssoa van nna Jehoash tsoe Jeroboam na Israel pono mesao tssoto vanathüng Potsowna Israel tsükona Amos thüngi ntio hungthukcho sana jiang erancho. 2 Amos na phyocho, "OPVÜI jina Zion phunglani na erhyusochiala; ombo won ji Jerusalem lona potso tharaka to tssoala. Yantsophen eroyu topvü chükhanthaka, Osi Karmel phunglan jilo ero jiang topvü mmyikae sithaka."
Israel Phinakishüm Jiang Thüngi Potsow Yitsso
Syria Thüngi
3 OPVÜI na phyoala; "Damaskas kyon jiang na elan elani mmen tssothaka, hoji tsükona ana ezüp onte pi-nrünguka. Ontena Gilead kyon jiang thüngi haruk hashüa kyakshia ezüpthukcho. 4 Hoji tsükona mesao Hazel na etsso mesao vanphen ji pono ana omi jorothuku; osi mesao Benhadad rizümphen pikhfü jiangha rungi siyiv. 5 Damaskas pikhfü khan jiha ejümproe siyivka, osi Aven hayitsülo evan jiang ha elani Betheden lo esapvüiden jiang topvü onte vanphen jiang lona phanchukchiv. Hoji sülojo Syria kyon jiang topvü morantsan ejoena Kir metae vüngpheni sosi yikhamvü. To OPVÜI na phyoala."
Philistia Thüngi
6 OPVÜI na elani heto phyoala, "Gaza kyon jiang na elan elani a thüngi mmen tssothaka, hoji tsükona ana ezüp onte n piv n siche. Ontena jipo ji mpüm na sosi oyi Edom metae nri etssov yencho. 7 Hoji tsükona Gaza yantsü pikhfü ji pono ana omi jorothokvü osi rizümphen jiang topvü nshüi siyiv. 8 Ana Ashdod osi Ashkelon yantsü jiang lo esapvüi jiang ha khi siv, elani Ekron yantsü jiha ezüp piv osi Phlistia kyon kvüta enhyokae vancho sana topvü chüthokvü."
Tyre Thüngi
9 OPVÜI na phyoala, "Tyre lo evamo kyon jiang na elan elani mmen tsothaka hoji tsükona ana hoji jokheman ji ezüp onte pinrüngu. Ontena jipo mpüm na Edomo lo sosi oyi tsanthan tssoa vanthukcho; osi ovüngthüngna mmhonta evamvü ntsatao ji ephan n tssocho. 10 Hoji tsükona ana Tyre yantsü ji pono omi jorothokvü osi rizümphen zenki osi pikhfü jiang topvü rungi siv."
Edom Tsükona
11 OPVÜI na phyoala, "Edom kyon jiangna elan elani ayakchia mmen tssothako ji tsükona ana n kilan tolea ezüp onte pinrüngu. Ontena onte otaonyu Israel jiang thüngi khonzan to n tssona ekümrüm esüa lüngtharüpi sicho. Onte lüm etsuk ji kvüthüngha ochüm n lina lümbüm tsuktacho. 12 Hoji tsükona Teman yantsü ji pono omi jorothokvü osi Bozrah rizümphen zenki jiang topvü nshüi sithokvü."
Ammon Tsükona
13 OPVÜI na phyoala, "Ammon kyon jiangna elan elani mmen etsso ji tsükona ana ezüp onte pinrüngu. Ontena ekhüngyan tsükathoku ori tssotathüng Gilead lo ngaro ehan eloe jiang mpato mman thani siyia elhi n mhom tssocho. 14 Hoji tsükona ana Rabha yantsü ji pono omi jorothoku osi pikhfü jiang topvü rungi siyiv. To tssona ritsso tsüngn jilo elümoto nshanlungta liv osi khonta rota ji tsyungryu ntav venato tssotav. 15 Osi onte mesao elani tsüphoeden topvüto metapoe tsanthan yithokkhamvü."
Moab Tsükona
1 OPVÜI na phyoala, "Moab kyon jiang na elan elani mmen tsso ji tsükona ana ezüp onte pi-nrüngu. Ontena Edom mesao ji ryu ji tia n yikrachina livero küma rungi sicho. 2 Hoji tsükona Moab metalo ana omi jorothoki Keriath lo rizümphen jiang topvü rungi siyiv; osi Moab kyon jang ji rasan jiangna jungken khüa ontsso nirota ori tssoathüng kyatanrungtana chürav. 3 Ana Moab lo esapvüi jiha elani meta jilo esopvüiden jiang ha to topvü lüngthav."
Juda Tsükona
4 OPVÜI na phyoala, "Juda kyon jiang na elan elani mmen tsso jina ana ezüp onte pi-nrüngu. Ontena apüngno-rünyu jiang ji yikvü-yilocho osi a yizüng jiang n tsütsacho. Onte pyimtsümotsüi jiangna benkao ejüng potsow jiang na onte sosoracho. 5 Hoji tsükona ana Juda lo omi jorothoku osi Jerusalem pikhfü jiang topvü nshüi sikhaniv."
Israel Pono Potsow Yitsso
6 OPVÜI na phyoala, "Israel kyon jiangna elan elani mmen etsso ji tsükona ana ezüp onte pinrüngu. Ontena ntsanrük kyon ochoangna ochhi n lochev vancho sana jiang tona yantsae ochoangna jokhüp motsünga man tia n pikhokvü vancho sana jiangha to ji ezi kümthokvü yentacho. 7 N khyo nrung osi mpenzi jiang topvü ontena tssethechia, elani tsitsa yantsae jiang okholo ha phanchukchia to tssotacho. Jilo ekata opo tona otsoe to nzo tssoe ezi loroe jiang thüngi efürama tssotao ji yakchia a ntho mying ji mmenthukcho. 8 Osi khümphen meta akvülo ontena yantsae jiang na ochhi onte n lochena to osü khi vayio jiang mpentasi yiptacho. Elani onte potsow ekhümki jiang lona onte na soko ochhi khiyio jiang ji. yutacho. 9 Tokhatola a kyonden, nte tsükona ana Amorite kyon ochoang Cedar dung esüa siphoa osi lümro-dung esüa chüngchünga tüv sana jiang topvü mpümna roe sithaka 10 Ana Ejip metae na nte sochukcho, osi nzyu zhüro yingsiyinglo meta yakchia nte sosi oyi Amorite meta ji nte echhi etssov nte picho. 11 Nte tsokhying ejoma jo ana zenkhying etssov ethüngchecho, osi nte khyingroe ejoma jo Nazarite etssov to ethüngchecho. Heto etsso ji otsotso mekcho ke Israel kyonden? A, OPVÜI shina phyothaka. 12 Tokhatola ntena Nazarite jiang ji suko yuthukcho osi zenkhying jiangha yithen jiang n phyothukcho. 13 Hoji tsükona ana enhungo likoe nte tssetheehivka, osi nteji mangsü kari jiangha otssuk-omüm ha mmyingu hanthukcho ryusanga owon tssoa yiato ntena emhenlamka. 14 Eyungo ekhyingo jiang naha tsanchov meka, elani etho ejüo kyon jiang naha. onte etho ejü jiang moni siv, osi rasan jiangnalea onte eküm shanchochev meka. 15 Lotssi ebemo jiang naha onte mangpheno mangkhokvü meka, osi eyung ekhyingo jiang naha tsanchov mek, kurü mankvüi rasan jiangna-lea n tsancho. 16 Hoji tsüngono jo rasan lümbüm etssontso jinalea ebensü sisi khejüng tsamvü." To OPVÜI na phyothaka.
1 Israel kyonden, yithen kvümoe nte OPVÜI na nte tsükona phyocho sana ji engatava, nte jipo totona ombona Ejip metaena nte sosi chiyicho. 2 "Limha shilo jipolan hetata vancho yulo ana nte ntsiwo osi nte sheküpcho. Heto etssovo ji tsükona nte mmen ji elümoto myingcho osi hoji tsükona ana ezüp nte epio tssocho."
Zenkhying Ji Elhi
3 Ovünngna phyotae n vav kyon otsük enina yentsalo khochichecho alo? 4 Osi hengho jina etsov n hungu jo oraena thama na eronkachiv alo? To alo hingho oro jina ntia n rhümalea thama na eronkachiala? 5 Elani tsirhyi toni n valia thama na woro ji tsirhyi lona savalo? Mekana trirhyi jina khaphen thei n vav thama wozhü ji echüi ekhavla? 6 Ritsso tatara jiang yantsüi kyon na n kyuv khvüchecho alo? Osi OPVÜI na n rwothukvüjo yantsü jilo tssorophyoro yikhukcho alo? 7 OPVÜI Sandamo jina ombo etüm ezi jiang ombo küpo elhi etssoe zenkhying jiang ntia n zovjo kvüthüngha lea ombo etancho n tssoala. 8 Hingho na eronathüng n kyuna evam jo ocho tssovla? Kvüthüng Sandamo OPVÜI jina nsanathüng ombo yithen ji n thenchov ochona nkachochechola?
Samaria Tsükona Ekyuthav Tsüngon
9 Ejip mesao ki evan jiang tona Ashdodo tolo evan jiang thüngi heto ntsithuka, "Samaria nkonphia elio phunglan jianglo sanrhyutava, osi hoji meta jilo ntio müngtsso münghanta osi tssorophyoro yia vanchosana jiang zetava." 10 OPVÜI na phyoala, "Kyon shiang na müngtsso münghan yakchia osi khonta rota lona ntio tsütsaelan hungcho sana jiangna onte ki jiang pyingrae lia. Ntsanrük jo ntiosana ontena n tsi. 11 Hoji tsükona onte ri jiangna onte hazhüvka osi onte pikhfü jiang topvü roe sirav, elani onte kipvü-kitsü jiang topvü yesokhani siyivka." 12 OPVÜI na phyoala, "Kvüto olyu enhyang jina hingho na olyu rumi tsosi rajak jilo ojo eni tona eno motsünga to tae lichosana ji yancheta sana ji esüa, enhünga Samaria lo ochoangna lolata onte mhatso mhalangna pyingi belüng mmhom tüv lo vanta vancho sana jiang yulo ejoma taena eküm vanchevka. 13 Enhüngaha engatava, osi Jakob tsoronichen jiang thüngi ntangshon pia to Tokhamo OPVÜI jina phyoala." 14 "Ana kvüthüng Israel kyon jiang ji onte mmen tsükona ezüp piasana, ana Bethel lo thanphensa jiha roe siyiv, Thanphensa ji nken akvü lona vanroe likoe vanchoe siyiv. 15 Ejüeli jiangna etssüko vanphen, osi elümo vanphen to echüpo tssoe elio ki jiang topvü ana roe siyiv, sotsüho khi oki merithuki evao jiang topvü likoena evüproe sikhamvü; osi oki tsüphov kvüta licho sana topvü roe siv to OPVÜI na phyoala."
1 Samaria lo evan eloeden, ochoang Bashan lo mangsüpvüden beletato beleta vanchosana jiangna engatava, osi ochoangna yantsae osi n khyoe jiang n zamvü likoe tssethechia onte orapvü jiangna suko khi onte echenlona soko choni yuta ngangota vaancho sana jiangna engatava. 2 Ntssontso osi Tsüphotso jo ntho etsso ji esüa ombona echümchakthaka."Ontena yikaphen lo yikae ni esüo jitüv tsüngon yivka; osi nte otsük okvüto ngosaphen lona kvüto ongo saa sana ji esüa nte sathukvüka. 3 Nteji phikhfü kvülo yesoa vanchosana jilo nte süsi ovo kherükina shümchokchi nte sikhamvüka."
Israel na N ngatheo Ji
4 OPVÜI Tsüphotso jina phyoalar 'Tsrael kyonden, mmen nte tssohungna ntho Bethel lona ovo tssotava, mekana Gilgal lona ovo nte eto mmen tssotava. Nra oyi ekümrümo jiang hansi oro enyaakvüto thantava, elani nchuk ethüm, ethüm lojo othan jiangha hansi oro thantava. 5 Osi oyi nte hümri jiang khi Potsow montsso pia thantava, ntena othan ekaro hansi ro jiang tsükona kangtsütava! Nte tssohungo ji hojika." 6 "Ana nte yantsü jianglo otssi vara rothukcho khatola jinaha ntena a thüngi kholani n yi. 7 Ntena nte benro niro jiangna eryu ethev elitso yuta jilo ana eryu ji sülani vancho, osi ana yantsü motsünga lojo jothuksi motsünga lojo n jothuk, oli ejoma lojo eryu ji jothuksi ejomajo likying vanthukcho. 8 Eraa lona kitsüngra, kyon jiangna yantsü elümoto lona ojü hungu tssovkato eyilota yantsü motsüngalo wotacho, tolea eyuv tia n hung. Toaha ntena a thüngi kholani n yi. 9 "Ana ezhü ekhov venthuki nte benro jiang kyingkae nte siyithukcho. Elani vara khomung jiangna nte phari osi jününgroli jiang topvü tsoe nte siyithukcho. Nte züvodung osi olive dung jiangha tsoe nte siyithukcho, toaha ntena a thüngi kholani nyi. 10 "Ana Ejip lo vara wothuko ji esüa nte thüngiha rothukcho. Ana nte khyingroe jiangji ritssolona roe nte siyisi kurü jiangha khi hansi yicho. Osi müngkyon na nte kheno mpa phünga nte nnanthukcho. Toaha ntena athüngi n kholan. 11 "Ana Sodom tona Gomorrah to roe sioji esüa nte ejomajo roe nte sicho. Osi ochoang enhyokacho sana jiangha michümro rungchüm cho tolyui nte sikhancho. Toaha ntena a thüngi kholani n yi." To OPVÜI na phyoala. 12;"Hoji tsükona Israel kyonden, ana ezüp nte piv saka, küma a yitsso jilo phanthiv tsükona methak-tava!" 13 Potsow jo phunglan jiang nsüngrüo ji Osi ombona mpung jiha nsüngrücho. Ombona ombo lümbüm ji kyon jiang ntsithukala; ombona engji zümo kümthukala. Ombona meta ntssomo jianglo sanphiala. Ombo myingjo: OPVÜI Tokhamo Potsow ji!
Lümbüm Khophiv Tsala
1 Israel kyonden, engatava, ana nungra yivon osi ekyakhen nte pono dena evamoji engatava: 2 Nthoe Israel ji ekhüngthaka, kvüthüngha elani n phathilamo tssoa! Likoe vanthei ompvü sithaka, Tolea ochinaha ompvü n sükatala. 3 Sandamo OPVÜI jina heto phyoala, "Israel yantsü jiang lona rasan wothüng bena khochukthukala, tolea nzoa harümo ti kholani yiala. Yantsü thanphoena nzoa khochukthukala, khatola taro taena kholani yiala." 4 OPVÜI na Israel kyon jiang thüngi heto ezoala, "Athüngi rotava, osi ayana tona ntena eküm vamüka. 5 Beersheba lona khümo tivotava, osi Bethel lona ayanchev ekhyo ti-tssotava Bethel lona ntia hungu mek, Gilgal ha yana ti votava Gilgal jiha tsanthan kümthukvü sala." 6 OPVÜI yantava, tona ntena eküm vanchevka. Ntena ombo thüngi n woa tssona ombona Israel kyon jiang ji omi esüa joro roe nte sivsala. Osi omi jina Bethel jiha rungi siv osi kyon ochinaha hoji miji n tamheche. 7 Ntena ntsa ji khaki sicho osi kyon jiang elan jilo mpa ntena ejithechicho, hoji tsükona nteno nte n benthaka! Potsow yitsso ji ndukvüka. 8 Sandamo OPVÜI na shantio jiang nsüngrücho, Tirok mphen osi eng eso jiang. Ombona emüng ji eng ondang kümthukala, osi tsüngon ji zümo kümthokala. Ombona jümangi ojü jiang tsachuki limha jilo etssonkathukala. Ombo mying jo OPVÜI ji. 9 Ombona onte thokhung ji pono osi onte pikhfü chüngchüngo jiang pono tssorophyoro hansi yiala. 10 Nte kyon shiang shina ochoangna ntsanrük tsükona phyoa sana osi yitssopheni ntsa lithoku phyoa sana jiang ji tssakala. 11 Ntena yantsae jiang nyimthechia osi otssuk omüm jiang mpato rechoe khiyithaka. Hoji tsükona ntena emüngyanthav longki tssorae elio jiang lo ntena vanphyav meka, osi nte li mmhom jiang lona jününgrothi jü zümcho jiang ha ntena yuphyav meka. 12 Nte mmen jiang kvütata ekhenthav sana osi nte n lan n mhom kvüta licho sana jiang ana ntsia. Ntena kyon mmhom jiang ezüpthukcho, ekhüp khicho, osi yantsae jiang ji yitssopheni na onte elan osi onte ntsachev elio jiang lona ntena khalanchicho. 13 Hoji tsükona engathei osi okyak eli kyon jiang najo yuta n mhom hetüv shiang lojo yingto vamvü. 14 N mhom ji ti-tssoa khatola ntsa osi elan jo ntio sana hoji etssov tsükona nte etüm ji hoji tssothuka, tona ntena eküm vanchevka. To tssosanati ntena Potsow na e ndüngo vanala to hoa evamo ji esüa, Tokhamo OPVÜI Potsow jina otsotso nte ndüngo vamuka. 15 Mmen ji tssaka, ntiojo ntsa sana ji nzana, osi nte yitssophen jiangji ntsanrükna phyingthuka, to tssona nte jipo kyon kvütata enhyokae enhünga jana eküm vancho sana jiang thüngi nte OPVÜI Potsow na khonzamvü mpa tssov. 16 Hoji tsükona Tokhamo OPVÜI Potsow jina phyoala, "Yantsü jianglo kyata-nrungta osi nungra won zonka, osi müngkyae mmyo pio jiang tae mekna lijon jiang mpana echüi jiang tsükona müngkaye jiang nzo kyatavka. 17 Jününgrotholi jiang lonaha kyata-nrungtana tssovka, shiang hetopvü shi tssovka, ntiotssole ana ezüp nte pilo tsata." OPVÜI na hojito phyothaka. 18 Nte kvütata na OPVÜI tsüngon ji eyilota vancho sana jiang tsükona kvütata ekhenthav tssovla. Nte tsükona OPVÜI tsüngon ji ntio mmhom tssovla? Tsüngon shijo nte tsükona jo wondang tssov meka, tolea emüng tsüngon tssov. 19 Hoji tsüngon jijo kyon tsükana hingho mhadungo tsana oyi Sevan tsanchecho to tssovka. Mekana kyon tsükana oki yana oyi kyimchung jilo nyimkale nrülo nyimkae njücho esüa tüv tssovka. 20 OPVÜI tsüngon jilo nti wondang ha n li, tolea emüng hansi yiv, osi hoji tsüngon jijo tüngrav mekna müngterüp na tssov. 21 OPVÜI na phyoala, "Nte ekhümlan lo tokhu osi tsoyuta ji ana a tssakala, ana hojiang nrümkhok! 22 Ntena kvüthüng otssuk-omüm than osi erungthan hansi roasana ana nte n khichoyi; osi ntena ekümrüm belev mmontsso epithan apiv khilato hansi ero jiang ana a n jüpon. 23 Nte wontssoniro osi nshanlung von khen jiang esantava. Ntena khenzhü rhüphiphen theta khütao jiangha a nngahung. 24 Hojiang thüngina jo ntsanrük ji zhükhfüro tsüa to lithuka, osi ntsantho ji zhükhfü kvüthüngha n nghao ji esüa lithuka. 25 "Israel kyonden, ana lijüng, likying yakchia nzyu zhüro nte soathüng ana othan osi thungthan ntia nte n chonila. 26 Tokhatola ntena nte mesao potsow Sakkuth ji kisü ji khümtacho, elani nte shantio potsow Kai van ji khümtacho, hojito kisü jiang ji hanphitacho; 27 Kvüthüng ana Damaskas pankawoe meta ekoni nte sosi oyi tsanthan tssoa nte vanthuka sana hojithüng jana hamvüka," to OPVÜI ocho myingjo Thotsü Potsow sana jina phyoala.
Israel Roe Esio Ji
1 Ochoang kvütata na Zion lo loyia eküm vancho sana osi Samaria phunglan jilo tsankav to longtsükata vancho sana, osi nte Israel jipo tsüphov shilo esapvüi tsüphoeden, ochoang thüngina kyon na ntelo eyilo longtsükata vancho sana jiang tsükona kvütata ekhenthav osi ayako tssov ato? 2 Owo Kalneh yantsü ji zeta, elani emhukthav yantsü Hamath osi Philistia yantsü Gath to jiang zeta. Onteji ntio lankalona sana tia Juda yantsü osi Israel yantsü jiang lona mmhonkacho alo? Toalo onte metajo nte meta lona tsüphokachola? 3 Ntenajo tsüngon n mhom ji tsatato ntena n khichoala. Tolea ntena hojito nzhükav evamo jijo tsüngon n mhom ji enhyankata hana yicho tae. 4 Nte kvütatana nte sotsüho pelüng oman etssükvü osi mmhom jianglo nnlakachi olyuso enyipvü osi mangsü roso jiang tsophita vanchosana jiang tsükona kvüta ayako tssov ato? 5 Osi David esüa okhen ethan ethan nsüngrüi rhüphiphen theta denta vanchosana, 6 osi nte ochoangna soko jiang pvütuk totona ejümsi yuta, mozhü orhüm mmhom jiang thei hantasi Israel meta roe esio jiang tsükona jo n nungrav vanchosana, 7 jiang jina vünga tsanthan eküm jilo metapoe nte yivka. Osi ntena sharita tsoyuta evamoji ochüm tssovka. 8 Tokhamo OPVÜI Ntssontso Potsow jina shi ekyuv ntangshon yi shi pithaka: "Ana Israel kyon shiang kangtsü shi a tsakala; osi onte ngangotaphen oki mmhom jiang a n zehung. Onte yanpvü osi hojilo ntio kvüta lichosana topvü ori khelo theyivka." 9 Oki motsüngalo nchyü taro mpa enhyokae vanlea onte chürav. 10 Osi echüo jiang wopan ocho müngben vanchosana jina echümüng jiang hapoe hana chivov, osi echü tanüng jina, "Ochona enhyokae vancho alo?" to engathechi lea "Ochia n van!" to owoni taena ombo janlamvü. Tothüngji wopan jina ezov, "yingto vana! Hetothüngjo OPVÜI myinglea n phyophina ntangshona vamvü lia." 11 Kvüthüng OPVÜI na yizüng piasana jithüng oki teri tsüpho topvü ejüproe sikham. 12 Kurü na olong ponina yunga alo? mekana kyon na mangsü sosi jümangi oli rhona alo? Tolea ntena ntsaji echü mozhü kümthukcho osi elan ji n lan kümthukacho. 13 Ntena Lodebar ji hae ekhio jina kangtsüala, osi "Ena Karnaim jiha e etho ejü lona khithaka to ntena kangtsütala." 14 OPVÜI Tokhamo Potsow jina phyoala, "Israel kyonden nte pono ana metapoena ekyimphi rasantsü rwothukvü sala, nte meta ji nte khiyiv tsükona. Osi hojiangna khümkiwoe Hamath yakchilan jilona benkae joliwoe Arabah hayitsü ji nandang vani nte khangria ezüpthukvü."
Vara Khomong Eyiv Hungthukcho
1 Sandamo OPVÜI jina heto athüngi a hungthukcho. Mesao ejan oli ji ri khisi moying jiang chenchukchipvüto, OPVÜI na vara khomong rasantsü nsüngrüi chiyithukcho. 2 Osi khomong jiang jina mvüdong kvüta licho sana jiang topvü tsokhana ana hungcho, hoji süijo ana phyocho, "Ntsontso OPVÜI, ni kyon jiang nlan siyia! Ontena kvütoli eküm vanchela? Onteno m penzi osi n khyoeden!" 3 Hoji süijo OPVÜI na ombo lümbüm khophi phyocho, "Nina ntio hungcho sana ji esüa n tssothukla."
Omi Erov Hungthukcho
4 OPVÜI na elani heto ahungthuklancho. OPVÜI na omi khi ombo kyon jiang ezüp epiv methaka vancho. Limha shilo jümang topvü omi jina rungi sisi liko jiang ha kae runga yicho. 5 Hoji tsükona ana ezocho, "OPVÜI Potsow, omi ji esanthuka ! Ni kyon jiangna kvütoli eküm vanchevla? Onteno etho n li osi ntia mek!" 6 Hoji süijo OPVÜI na lümbüm khophi phyocho, "Tona shiha n tssothukla."
Etsiphen A hungthukcho
7 OPVÜI na elani heto ahungthuklancho. Hojijo OPVÜI na etsiphen süngchochi bensi pikhfü kümoe etsiphen theta tssocho sana hoji ndüngo phanthi vancho. 8 Osi ombona a engacho, "Amos, nina ntio hungala?" Tole, "Etsiphen hungala," to ana janlancho. Hoji süijo ombona phyocho, "Ana etsiphen bemo shijo a kyon jiangna pikhfü shi n remo ji esüa, n rena vanala to ejüphen ji. Ana onte ezüp epiv jilona a lümbüm n khophilan. 9 Meta kvülo shina Isaak tsoronichen jiangna khümcho sana jiang roe siv. Israel n tho meta jiang ha rokhani sisi eyingkhfü-khfüna kümthokvü. Osi mesao Jeroboam ekhüng esa ji ochüm tssothuku."
Amos Tona Amaziah To
10 Amaziah, Bethel lo pvüti tssoa evamo jina Israel mesao Jeroboam thüngi yivon heto hanthukcho: "Amos na kyon jiang yulo ni n lan elümoto ni rüyiala. Osi ombo khen-oyi jiang yakchia meta rov sala. 11 Osi ombona heto phyoala: 'Jeroboam jo ritsso lona chüvka, osi Israel kyon jiango metapoe morantsan tssoa sosi yiravka.'" 12 Tothakale Amaziah na heto Amos ezocho, "Totae tssolea mmhomka zenkhyingyo! Ni metae Judae oyi hojina püngnoa vana, osi onte khi jokheman ni pithuka. 13 Osi enhungo Bethel shilo najo zenkhyingyi ti-phyoa. Shilojo mesao yantsü lo evan jiang khümphenka, osi jipotsü tsükona khümphenka." 14 Amos na janlancho, "Aiyo jokheman khia zenkhyingo jiang tüv meka. Aiyo olyu enhyang, osi ana thüngphyothi jiang khekafükata vancho. 15 Tole OPVÜI na a elhi jilona a tsae khi olyu enhyang esüa atssothukala osi ombo kyon Israel jiang thüngi owo zenkhyingyi phyole to a enhikacho. 16 Hoji tsükona enhungo OPVÜI na ntio phyoasana ji enga. Nina zenkhyingyi ti-phyole to a tangala osi Israel jiang pono ti-püngnole to a ezoala. 17 Hoji tsükona OPVÜI na heto ni ezoala, Amaziah, 'Ni engh jijo lantsüi lonsülonphyoe eloe kümvüka osi ni ngaro jiango ritsso lona chükhamka. Ni meta jiha chiroe oyam pikhani sivka osi niha Potsow n tsi metae na oyi ni chüvka. Osi Israel kyon jiangha metapoe morantsan sosi yi nrünguka.' "
Tssüngthi Loksa Lona Ejyuka Hungthokoji
1 OPVÜI Potsow thüngina elani ana heto hungiancho. Hojijo loksa lo nzyu tsüngthi thei lia hungcho. 2 OPVÜI na a engacho, "Amos, nina ntio hungala?" "Nzyu tsüngthi loksa motsünga hungala," to ana janlancho. Osi OPVÜI na azocho, "A kyon Israel jiang tsükona, ochüm ji rothaka! Ana lümbüm tongphi ezüp onte epiv elio jiang n piv n siche. 3 Hoji tsüngno jo mesao vanpheni okhen jijo ekya nungra von tssovka. Osi echümüng na meta pyinguka, osi onteji oyam na n tsina hapoe shümchukchi khani sivka."
Israel Emomvü Zenkaoji
4 Shi heto engatava, nte ochoangna ezüpa evan jiang tssethechia osi nte metalo yantsae jiang roe esiv yancho sana jiangna. 5 "Ntena heto phyotacho, kvüthüngti ntho emung tsüngon jiang yakvüto, n hyakchekhuk-ka, otssuk omüm shiang yeno wovkasi. Osi kvüthüngti emungji yaksi elani tsütsailan jiyeno ochev to. Tovo ena n tsa seri jiang hansi owo tüphia ruki oyam jiang echha phata tacho khiyiv kasi. 6 Oden-omüm ethev n lio wozhü jianglea oman khosha na yemvü kasi. Elani yantsae ochoangsana jokhüp motsünga man tia n lokhokvü vamo jiang hungu küma ezii shi hansi yiv." 7 OPVÜI Israel Potsow jina echümthaka, "Kvüthüngha lea ana onte n lan mmen elhi ji n lan n siyi." 8 Hoji tsükona limha ji enhyokthokuka, osi meta jilo kyon otsük akvü tsontsünga ezüpthokuka. Liphungtsü totona enhyokthokvü osi Nile zhükhfü jina evakphia esüa limha ji hanphithoku. 9 Yuta kümoe ana eng ji nchonthüngna rhethokvü sana osi limha ji engo na müngthoku sana ji yutaji tsathaka. Hojito A, OPVÜI Potsow na phyothaka. 10 Nte tokhu osi longshita jiang ji ana nungra na nte tongcheyiv, osi ematha khen jiang nungkhunungra khen na nte tongcheyiv. Kvüri mpüm na nte sakisi posta nte mpenthokvü. Osi nteji otsoe tsüka tae vancho ji chüi opvü-opona kya to nte kümthokvü. Hoji jo zakto yaki yi nsio ekhov tsüngon tssovka. 11 "Ana meta jilo otssi vara rothokvü yutaji tsathaka. Kyon jiang vontomvü tolea hümri tsükona mek, onteji eratsüngu tolea ojü era mekna erav. Tokhatola onteji Potsow yi tsükona wondon-erav. A, OPVÜI Potsow na phyothaka. 12 Kyon jiangna limha nkenina nken jana, khümkiwoena jolowoe, engchirolamoena engrhelamoe to khyua rümphitav. Osi ontena kvülona OPVÜI thüngina yithen zovto to yantav, tokhatola ontena OPVÜI yithen zov mek. 13 Hoji tsüngon jilojo otsük oso mmhon eboe osi eloe jiang tssolea eratsüngona vanthekhamvü. 14 Osi ochoangna Samarialo kisü potsow jiang myingona echüma osi ochoang na 'Dan potsow myingona,' 'Beersheba potsow myingona,' to echümta potsow tsaphita vancho sana jiang topvü ekhüngrav osi onteji kvüthünghalea elani n phanthi lan."
Israel Pono OPVÃœI Yitsso
1 OPVÜI na thanphen ji ndüngo phanthi vana ana hungcho. Osi ombona heto yizüng picho: "Ekhümki ji mhonkvürina hetata to vümthechia, tona oki totona enhyokuka. Osi oki ji mpüm na evüproe kyon jiang kvürilo elongkathokuka. Hojilona enhyokae evamo jiang jo ana ritssolona onte lüngtharav. Onte ochinaha tsani n yiche osi tsükalea tsanchov meka. 2 Ontena echüli jana yungta rheyitalea ana onte rhümav. Osi ontena küma potsüwoe yanga mpa chüngilea ana onte süchov. 3 Ontena küma Carmel phunglani tsana chüngileha ana yantha yani onte rhümav. Ontena jümang lazae mpa joyi a mphotalea ana jümang nrütsü ji yidan pia onte njüthokvü. 4 Osi onteji orina morantsan rumi hansi onte yilea, doni onte sile to ana yidan piv. Ana onte nzanchiv mekna roe onte esiv zikanrüngthaka." 5 Tokhamo OPVÜI Potsow na limha jilo okhe thetala; osi hojina limha ji enhyokthukala; Hojilo evan topvüna etho jak nungrala. Osi limha ji mpümna Ejip lo Nile zhükhfüji phyangphiato elokphia enhyokala. 6 OPVÜI na ombo kiji Potsüwoe tssoala, osi limhae potsow lüm etsuk ji elongkathukala. Ombona jümangi ojü jiang tsachuki limha jilo etsonkathukala. Ombo mying jo OPVÜI ji! 7 OPVÜI na phyoala, "Israel kyonden, ana kvüto nte tsükona nchümcho sana ji esüa ana Sudan kyon jiang tsükona nchümala. Ana kvüto Ejip lona nte sosi chiyicho sana ji esüa ana Philistia kyon jiang ji Crete lona sosi yicho osi elani Syria kyon jiang ji Kir lona to sosi yicho. 8 A, OPVÜI Potsow na Israel mmen ekhüngyan shi zeta vana osi ana onteji limha shilona roe monthoki siv, tolea Jakob tsoronichen topvü jo rorüpi n si. 9 "Ana Israel kyon jiangji tsünghanro dung enhyokato enhyokle to yidan piv. Ana jipo topvü lona enhyoki Israel kyon ethelan n lio jiang jo ethüngchukchi siv. 10A kyon jiang yulo mmen kyon jiang jo ritsso lona chüthoku - 'Potsow na ethüngijo ntia tssatssorükvü n rothuk' to phyoa evamo jiang thüngi."
Ochyuo-vüngi Israel Ji Shancholam Ji
11 OPVÜI na phyoala, "David ekhüngyan kümoe, oki thonroe sithakcho esüa roe licho sana hoji tssocholani mmhonthuklam tsükona tsüngon ji tsathaka. Ana pikhfü jiang ntsüp-nrüpi mmhonlanthoku. Osi ana tssocholani ovüngthüng ji esüa kümthoku. 12 Hoji tsükona Israel kyon jiangna Edom meta kümoe enhyokae licho sana hoji khyolani khiv, elani jipo kvütata ji achhi tssoa rocho sana jiangha to." Hojito ocho na shiang hetopvüto benchethokvü sana hoji OPVÜI jina phyoala. 13 "OPVÜI jina heto phyoala," "Tsünghanro omüm jiang jina ri-tia n khichov rankav tsüngon ji tsathaka. Osi jününgrothi jiang naha n lhochov rana eriv, osi phunglan jiang lonaha tsüngthijü enüngu tae sochov. Osi yingsüng jiang lonaha tsüngthijü tsüjov. 14 Ana a kyon jiang ji onte meta jilo sosi yilamvü; Osi yantsü roe sithako jiang ji ontena tssocholani hojianglo vamvü. Ontena jününgroli joni khi tsüngthijü jiang yua vamvü. Ontena phari jonrae khi jilona ntio chiyia sana jiang tsov. 15 Ana onte epio meta jilona a kyon jiang phanthithokvü, osi onteji elani n rukchelan." To nte OPVÜI Tokhamo Potsow na phyothaka.
1 OPVÜI Potsow na Edom pvüji tsükona ntio phyocho sana hoji Obadiah na heto zenkhyingcho OPVÜI na ombo yithenpvüi jipo jiang thüngi wothukthaka, osi ena ombo yithen ji heto zocho: "Methaktava! Edom thüngi ori etssov tsükona!"
OPVÜI na Edom Ji Ezüp Piv
2 OPVÜI na Edom thüngi heto ezoala, "Ana niji etho n liv ni kümthokvü; Osi jipo akvüna ni yikvü-yilov. 3 Ni kangtsükangri jina ni ejithechithaka. Ni yantsü jijo longpvüna epicho; osi ni kijo phunglan ntssom tüvlo tssokachicho, hoji tsükona nina 'Ochona a süjo khokula?' to kangtsüa phyoala. 4 Tokhatola nina küma nikiji mungshiro tssopheni mpa jana ehungo tssolea, mekana choro shantio jana mpa ehungo tssolea ana ni süjov. 5 "Kvüthüng efüina emüngo efülo roana, onte jüpomo jitae khiala. Kvüthüng kyon na jününgrothi lhoa sana ontena ejomajo valanchia lhoala. Tokhatola niri jiang na mpüm na khi ni sithaka. 6 Esau tsoronichenden, nte ejüeli topvü nkanlüpi nte khiyithaka. 7 Ni khümo shomo jiangna ni ejithechithaka; Ontena ni meta lona ni phanchukehithaka. Osi enhünga jo ochoang nte mmhonta rocho sana jiang na ni khyothaka. Nte nzo tsoyuta ero nishom jiangna tsirhi doni ni vayicho; osi 'ombo kyak eli jijo kvütoli sicho ato to phyoa ni emakatala?' 8 "Ana Edom ji ezüp epiv tsüngon jilo, okyak eli jiangha ana topvü roe siv. Osi onte nchümri mmhom jiang topvü khi siyiv. 9 Teman lo thungtalo rhowoe topvü ekhenrhükthoku, osi Edom lo rasan otsük akvüto lüngthav.
Edom Ezüp Epiv Elio Ndam Jiang
10 "Ntiotssole nina ni jenio Jakob tsoronichen jiang ji lüngthata retsoyicho. Hoji tsükona ni monthokvü osi eküm echung ni yikrathokvü. 11 Ori jiang na kvüthüng kipüng jiang rorhüpcho sana tothüng jo nteno thanpoena zechia ngangta vancho. Hoji tsükona nino omoatsi ochoangna Jerusalem ji roe khi ejüeli topvü nkanlüpi onte chitara yicho sana jiang esüa nteha n mhonden. 12 Judalo ni jenio jiangna emhuk-elüm epüp ndukathüng ni lüm Püka zeta n vamvü shikhfü. Roe onte siathüng ntena emathata n vamvü slüMmi, osi onte ezüp mmok jilo ntena n makav shikhfü. 13 Onte ezüp tsüngono ezüp jilo ekata ntena yantsü jilo rhovo ejüeli jiang rechoe n khiyiv shikhfü. 14 Ntena lanrhyulona ravani vansi tsanchoa evamo jiang n rhümav shikhfü; osi onte mpenzi tsüngon jilo onteji rhümae ori khelo n theyiv shikhfü.
Potsow na Jipo Jiang Oyi Tssoyiv
15 "A, OPVÜI na pvüji topvü oyi tssoyiv tsükona tsüngon ji enhyanthaka. Nina ntio tssoyicho sana ji esüa ni tssoyivka Edom. Nina epio ji ni pilamka. 16 A kyon jiang na a ntho phunglani na ezüp jüpvü ekhov yuthaka. Tokhatola onte nkonphia evamo jipo topvü na jükhov ji yuvka; Osi a kyon jiang na yuo jilona khoka ezüp jüpvü ji yukhansi onte monravka."
Israel na Ekhyo Hungu
17 "Tokhatola ochoangnao tsanchoe Zion phunglani yiv; osi hojijo ntho meta tssov. Osi Jakob jipo jijo onte elan elio metaji hunglam. 18 Jakob tona Joseph to jipo kyon jiangjo omi esüa kümvü. Ontena Esau kyon jiang ji omina mavü runga to roe sivka. Esau tsoronichen ochia enhyokae vav meka to A, OPVÜI na phyothaka. 19 Juda kyon jolowoe evamo kyon jiangna Edom ji hoe khivka; osi engrhelamoe phunglan yenjolo evamo kyon jiang jo Philistia ji khiv. Israel kyon jiango Ephraim tona Samaria to metaji khivka; Benjamin jipo jo Gilead ji khivka. 20 Israel kyonden khümkiwoe ochoang jo morantsan tssoa vancho sana jiang na elani oyi Zarephet khümkiwoe jana Phoenicia metaji khyovka. Osi Jerusalem lona oyi Sardis lo morantsan tssota evamo kyon jiang na Juda jolowoe yantsü jiang rechoe khivka. 2l Jerusalem lo ekhyo ekhüngden jiang na Edom ji hae khi recholani sav. Osi A, OPVÜI shina hojilo mesao tssov."
Jonah na OPVÃœI Jancho N zoala
1 Amittai tsoe Jonah thüngi OPVÜI na tsüngon motsüngalo heto ezocho. 2 Ombona ezocho, "Yantsü jilo kyon jiang kvütata n mhoncho sana ji ana ntisa vana; hoji tsükona yantsü ji pono owo phyokasankata yithen pia. 3 Tokhatola Jonah na OPVÜI thüngina tsani yiv ekhyo tssoa ombo wothuko jiwoe mekna lanthanpoewoe yi sicho. Ombona Joppae wole rhungtsü motsüngana Spain (Tarshish) metae yiv sa vancho tüv hungcho. Hoji tsükona ombona Spaini ona OPVÜI thüngina tsanchov to nchüma orhungi tsantheman thesi orhung ehae jiang nzo tsanthecho. 4 Tokhatola OPVÜI na jümang jilo tsungryu ntav rothuki orhung ji tara taena phüngroe n siv venthukcho. 5 Hoji tsükona orhung ehae osi jilo tsanthei topvü ekhentsüngkhani, ombobo Potsow thüngi onte nzanchile to tüngkachia randam benkacho. Hojisüijo orhung ji zükhoka thoku tsükona oha jiangha hapoe shümchukchi sitacho. Tothüngji Jonah jo orhungji ekhaka oküpoe jowo noyingkirina yipa vancho. 6 Tole orhung jilo esopvüi jina jowo hungi ezocho, "Nino ntio lyua la to nchüma yipa vanala? Phanthi ni Potsow thüngi nzanchi chona randana. Tona ombona enzana nchümi eshanchov mpa tssovka." 7 Hoji süijo yentsae topvü na, "ekyusü hetüv lo ochona esüthechicho sanaji yanchev tsükona phyalyu fuktavka," to phyota phyalyu fuktale, Jonah fukacho. 8 Hoji tsükona ontena ombo ezotacho, "Shijo ni nlan alo kvütola osi nino shilo ntio lyuala? Nino ntio jipo meta kvülona rocho ntio elhi tssoala?" to ngatüngngaritacho. 9 Tole ombona "Aiyo Hebrew kyon ka," to janlancho. "Ana OPVÜI, Potsüwoe evamo Potsow, ochona limha osi jümang topvü ji nsüngrücho sana ji khümala." toha ezocho. 10 Elani ombona OPVÜI ji thüngina tsani yiaka toha ezolancho. Tole yentsae jiang na ekhentsüngra; "hojito etssov jo ekyuthav elhi!" to ombo ezotacho. 11 Tsungryu ji tsükshikata eyio ji tsükona yentsae jiangna, "tsungryu shi esanthoku tsükona ena ntio ni pono tssovla," to Jonah thüngi engatacho. 12 Hojisüijo Jonah na, "Ojüi shümthechi a sia tona tsungryu ji esamka, ntiotssole heto nte ezüpthuko shijo a nlanka" to ombona janlancho. 13 Tothakale orhung ehae jiangna onte etonandang ekhyo tssoa orhung ji jütsawoe hansi chiyiv ekho tssocho. Tole tsungryu ji tsükshikata yichwokha n samvü onteji kvüloha n yichev sicho. 14 Hoji tsükona ontena OPVÜI thüngi kyata "OPVÜI yo, ena kyon shi eküm khiyio ji ndana etichüthoka! Ntiotssole, oh, OPVÜI shiang hetopvü ni elhi osi nina tssocho," to phyoa randantacho. 15 Tosi ontena Jonah ji ejümi ojüi shümthechicho, tole ji topvüto tsungryu ji esani sicho. 16 Shi heto etsso ji yakchia orhung ehae jiang na kyutsüngkhani OPVÜI benkav to echümchakta othan pitacho. 17 Jonah ji OPVÜI yizüng ephanina ongo tsüphov khi ombo nzhüthokcho osi ombona eng ethüm, zümo ethüm to ongo mmani vancho.
Jonah Randan
1 Ongo mmanina Jonah na ombo OPVÜI Potsow thüngi randancho; 2 OPVÜI yo, a ezüp yutalo ana ni tsaphile, nina ajanlancho. Echülikvü chungina a nzanchile to randamo ji nina ezoyicho. 3 Nina jümang ejungtso ji a shümthechicho, osi jümang ji lazae a joyicho; aji jülongi jükyo yulo tssocho osi ni etho emhoktav jina aponina evakphia yicho. 4 Ni vanhya lona shümthei asithaka, osi elani ni ntho khümphen ji n hunglan to ana nchümcho. 5 Ojüna a tsük topvü rejani a erhükcho; osi jümangjü jina a eyukzhünrüngcho, osi akvüri jiha jümang ero jiang na a phanyacho. 6 A ji phunglan chenkaphen ejungtso ji a rheyicho; osi meta kvüloshi eküm echung khalanchi esio sana jilo a rheyicho. Tokhatola OPVÜI a Potsow, nina lichungi na eküm a süchuklancho. 7 Kvüthüng a chüa yia saka to ana chanchecho sana, tothüngji ana ni thüngi randancho OPVÜI; tole nina ni ntho ekhümki na a randan azoyicho. 8 Ochoangna ethev n lio kisü khümta vancho sana jiangna ni sinkikhanthaka. 9 Tokhatola anajo myingthüng khen ni denkav, osi ana ntio kvüto echümchakcho sana ji ephan tssoa thungthan ni piv. Ntiotssole shanchov jo OPVÜI thüngina yiala!" 10 Hojisüijo Jonah ji jürani nphyukchukchile to OPVÜI na ongo ji thüngi yizüng picho, tole ongo jina hojito tssocho.
Jonah na OPVÃœI Yi Engala
1 Elani OPVÜI na Jonah thüngi heto ezolancho, 2 "Nineveh yantsü tsüphotso jilo woa, osi ana ni ezothako yithen ji thenchoa kyon jiang thüngi ezoa." 3 Hoji tsükona yantsü kümoe nchuk ethüm lantsa tera tsüphocho sana jilo OPVÜI jancho zoa Jonah na wocho. 4 Jonah na yantsü ji chungina enga tsacho süloti ombona heto thenchoa phyocho, Tsüngon zhüro yutalo Nineveh shi monthokusala!" 5 Tole Nineveh kyon jiang na Potsow yithen ji longtsücho. Hoji tsükona yantsü jilo tsüphotso jilona benkae teritsso ji nandang, ontena lümbüm khophitala to chekav tssoa otsük akvüna posta mpentasi khanga randam methaktacho. 6 Kvüthüng Nineveh lo mesao jina hoji yithen ji zocho sana, ombo mesa vantsü lona phanthi mesae mpensü ji phungi sisi posta mpensi live yulo ephathecho. 7 Osi ombona Nineveh yantsü lo evan jiang thüngi heto yithen picho, "Nineveh lo mesao osi ombo küpo tsüphoe jiang thüngina yidan heto nte piala, mangsü, Nyanyan, Olyu osi kyon ochinaha ntia tsoyuv meka, 8 kyon tssolea, ekümrümo tssolea topvüna posta mpemka. Osi onte etsso-ephyo n mhom lantaro osi elhi n mhom jiang sisi OPVÜI thüngi tüngochüa randamka. 9 To tssona Potsow na ombo lümbüm khophiv mpa tssov osi ombo lümbüm etsuk ji esani sisi e n chüthokvü mpa tssov!" 10 Ontena ntio tssoa vancho sana ji Potsow na hungcho; osi ontena etsso-ephyo n mhom eküm jiang sithaka to zechecho. Hoji tsükona ombo lümbüm khophi ombona onte ezüpthokvü ephyoji n tssov sicho.
Jonah Lümbüm Etsuk Tona Potsow Khonzan To
1 Hoji tsükona Jonah na n mathav lümbüm tsukcho, 2 Osi ombona heto randancho, "OPVÜI ana a metaena khochi n yithüngna nina heto tssovka to n phyochoke? Heto tssov to ana ntsiwo ji tsükona Spain metae tsani eyiv ekhyo tssocho! Nino nzan osi khonzan eli Potsow to ana ntsia osi yuta topvülo sümhena rümala. Yuta topvülo nzan ejüala osi ezüp epiv thungona jo ni lümbüm etsuk jilona tongphiv methakala. 3 Hoji tsükona OPVÜI enhungo a chüthoka, eküm evamo ji thungona jo achüo ji mmhomo." 4 Tole OPVÜI na janlancho, "Nina ni lüm etsukvü ntio elan lichoala?" 5 Hoji süijo, Jonah na yantsü jina engkhfüwoe oyi khokthecho. Osi ombona nchenphen khümcho nsüngrüi hoji kupi nchencho, osi OPVÜI na Nineveh pono ntio tssov sanato cheta nhyaka vancho. 6 Tothüngji ombo khümchoa vanthoku tsükona Potsow na odung motsünga rankathuki ombo khümchoa vanthukcho. Tole odung khümcho ji tsükona Jonah na elümoto emathata vancho. 7 Tokhatola ojyuato wonchipüngojo jo Potsow na ora poktoki odungji tsochaki chüi sithukcho. 8 Tosi eng chiroale Potsow na engkhfüwoena ezhü etssov venthukcho, osi eng etsso jina kvürilo vonkayio ji yakchia Jonah ji chüa yia engjina phithukcho. Hoji tsükona ombo chüi sicho savo to nchümcho."Eküm evamo ji thungona jo achüi sivo ji mmhomo," to ombona phyocho. 9 Tokhatola Potsow na ombo ezocho, "Nina odung teriv ji tsükona ni lüm etsukvü ntio elan lichola?" Tole Jonah na, "Ana alüm etsukvü a elan lia – osi achüa yialeha a lüm tsuk-khoka!" to janlancho. 10 Tole Potsow na ezolancho, "Odung shijo zümoa yuta lona rankae ojyuato jo chüi sicho; nina hoji tsükona ntia tssocho n li, osi nina rankathukchoha mek – tolea nina ni lüm tsukala! 11 To tssona Nineveh yantsü jilo nlan n li apvü-aniden taena 120,000 hetata vana, elani hojilo ekümrümo n khacheo vamo jiang to tsükona ana yantsü shi pono nzanna n chümvüke!
1 Jotham, Ahaz, tona Hezekiah to shiang na Juda lo mesao tssoathng, OPVÜI na Maikha ocho Moresheth yanro jilona cheyichosana ji thüngi heto yithen picho. Samaria tona Jerusalem to yantsü tsükona OPVÜI na shiang hetopvü Maikha thüngi hungthukcho.
Samaria Tona Jerusalem to Tsükona Nungra Yivon
2 Shi engatava, Nte jipo topvüna; Shi heto engachitava, Nte limhalo evan topvüna! OPVÜI Ntssontso jina nte pono phyokasankatala. Engatava! Ombona Potsowoe ombo ekhümki jilona phyoala. 3 OPVÜI jina ombo ntho meta jilona tsata; ombona jorov osi phunglan kvüri jianglo sanphiv. 4 Tothüngji omina onni phyona to phunglan jiang ombo jo küpina phyonrov; osi phunglanina ojü zanjoa to hayi jianglo phyangchov. 5 Shiang heto etssov jijo Israel kyon jiang na Potsow panlana Potsow yaka mmen etsso ji tsükona. Israel na Potsow panlamo mmen shi tsükonajo ocho nlan pivla? Samaria yantsü ji npivke! Osi Juda lo otssüng olung ekhümo ji tsükona jo ocho nlan tssovla? Jerusalem ji nlan tssov osi ompvüna hamvü. 6 Hoji tsükona OPVÜI na phyoala, "Ana Samaria ji roe khi apho-among ekachi siv, osi jününgro chümphen tsswothukvü. Yantsüi na mmen tsüa eyio jiang hayi jilo tsürhyuthukvü, osi yantsü ji tssokaphen jiango liko ejüng ekachi siv. 7 Tssentsülong na nsüngrücho kisü jiang topvü ejüpro-moroe siv, osi kvütata ekhümki lonsülonphyoe eloe jiang thüngi picho lichosana jiang topvü omina rungi siv, onte kisü jiang topvü eyingkhfükhfü na hanrhyui ekachi sithukvü. Ezüp shiang heto Samaria na nduko jijo ompvüna oro-ojü rankathukvü lanka eyamo ji man. Enhungo ompvü ri jiangna metapoe hansi oyi onte meta thama lona khümthukvü." 8 Hojisüi jo Maikha na phyocho, "Heto etsso shiang tsükona ana etho jaka nungrav. Osi a nungra ji ejüv, elani shaili na eronato eromvü osi jüworona khfüato khfüa joshü osi tsükshü rümphiv. 9 Samaria wontssakhfü jijo n miyiche, osi Juda ha hojito ezüpvü sala, elani ezüp jina a kyon jiangna evamo Jerusalem kipüng ji janthaka.
Orina Jerusalem Janala
10 Gath metalo evamo eteri jiang thüngi orina ekhyothaka to ti ezoa; osi kyata ha nte ti-hungthuka. Beth Leaphrah kyonden, nte ethojak nungrala to ejüv tsükona ochon yulo ephfüphia kyatava! 11 Saphir kyonden, yikra lona tsükshü tsani metapoe yitava. Osi ochoangna Zaanan yantsü lo vanchosana jiangna jo hapholo lea ti-chirotava. Ntena kvüthüng Bethezel lo kyon jiang nungra vonji zoana, hojilo tsanthephen n 11 to ntsiv. 12 Maroth lo evamo kyon jiangna kiaman etsoyu eyilotala, ntiotssole OPVÜI na Jerusalem hakono meta jilo tssorophyoro rwothukvü. 13 Nte Lachish lo evanden, ntena kürü jiangji ritsso kari jianglo shenkata. Ntena Israel mmen jiang hungchoa mmen tssotacho, osi hoji yakchia Jerusalem ji mmen tssothukcho. 14 Osi enhungo Juda kyonden, Moresheth Gath yantsü ji thüngi pyonta salüm ezoa. Israel mesao jiangna Achzib yantsü jiang lona ntia nzanchi hungu meka. 15 Mareshah kyonden, OPVÜI na nteji nte ri ochoangna nte yantsü jiang hayav sana jiang khelo nte theyivsala. Osi Israel yulo esopvüi thüngche jiango Adullam longkvüi ovo nphov sala. 16 Juda kyonden, nungra lona nte kvüri jiang tssüi sitava. Osi hokon oton ephyang esüa, kümtava, ntiotssole nte nzamo ngaro jiang nte thüngina rechoe khi tsanthan metae hansi yivsala.
Yantsae Tssethechio Jiang Sükhying
1 Ochoangna n yipna n mhom etssov zithüngsi wonchiale kvü thüng yuta mmhona sana ontena ntio nchümcho sana ji etssovo kyon jiang tsükona kvütata ekhenthav tssov ato! 2 Ontena oli jüpon na, rechoe khicho; osi ontena oki jüpona, jiha khicho. Nti wopan osi tsütsaelan ha n küpnfüchecho. 3 Hoji tsükona OPVÜI na phyoala, "Ana n mhom hansi erov tüma vana, osi nte ochinaha n tsanchoche. Nteji ezüpi nte rheyiv osi ntena ovüngthüng esüa kanchana rümphichev meka. 4 Kvüthüng hoji yutaji yiasana, kyon na nte ezüp motsü ji ejyukaphen esüa motsü rütav osi nte ezüp nungra ejyu-eran khen jiang heto dentav: Eiyo ronrüngi esithaka! Osi OPVÜI na e liko ji khi Ochoangna morantsan erümcho sana jiang pi esiyithaka." 5 Hoji tsükona, kvüthüng liko ji OPVÜI kyon jiang thüngi pilamü yuta janasana, nte ochina nte ejan liv meka. 6 Kyon jiangna a püngnoa a zotacho, "Eti püngnoa hojitüv yi khi. Potsow na kvüthüngha lea e yikrathukvüsa meka. 7 Israel kyon jiango etssorandankathaka to nina nchüma alo? Osi OPVÜI na ombo erüm etoji moni sisi, otsotso hetüv ezüp yithukvü nüng? Ochoangna elan tssoasana jiang thüngijo ombona nzan enyipa n jamke?" 8 OPVÜI na janlanala, "Ntena a kyon jiang ori ejoena hayacho. Osi eboena oki yina tsanchovka to ritssophenina oki yile, hojiloha onte sü eyok opomo ji onte mankvüna phongi khiyiv nina nhyaka vancho. 9 Osi ontena vanhungo ki jiang lona ntena a kyon jiang elopvüiden jiang phanchukchi sicho, elani ngaro jiang tsükona a mmha nchünkhon tsükona elioji ntena rechoe khiyicho. 10 Hoji tsükona phanthi tsantava; shilojo enhungo ntia mphophen n lika. Nte mmen jiang yakchia meta shi ji roe siv tsükona zenkathaka. 11 "Kyon shiangna zenkhying ochona ejüng phyoa ejitheyi khi zenkhyinga woasana osi ejüngona ochoangna 'Nte metalo zükhi mmhom osi tsüngthijü tsüa yia vanthokvü ka,' to phoya woasana jiang chokatala. 12 "Tokhatola ana nte Israel kyon kvüta enhyokae vancho sana jiang topvü telukalo nte tsarhyulamvosi olyu tsanmomo jiang elani odeni sosi yiato nte tsarhyulamu. Nte metaji olyu yantsophen mmhom esüa elani a kyon jiang na pyinglamvüka." 13 Potsow na olan onte chonchia tsanthan metaena onte solansi yiv. Osi ontena yantsü pikhfü jiang roe sia etancho eküm jilo yilamvü. Onte mesao onte pvüi jina lanvüngsi onte sochokvü.
Maikha na Israel esopvüi Jiang Khoe Siala
1 Nte Israel esopvüiden engatava! Nteno ntsanrük lithoku tsükona nchümvü shikhfü, 2 tole nteno mmhom ji tssaksi n mhom ji nzanala. Ntena akyon jiang ji eküm na ofü shakicho osi ozü jiang ji oryu jana nkhyikicho. 3 Ntena a kyon jiang rumi tsokhanthaka. Ntena ofü onte shakicho, oryu jiangha jakicho osi hanphfüi ethev rhonato onte tanrocho. 4 Ntena OPVÜI thüngi kyalea nte n janlan, osi nte randan jiang ha nte nngayi to tüv yuta tsata; ntena n mhom etsso ji tsükona. 5 Ejüng zenkhying ochoangna a kyon jiang ejitechia, orang onte pina noying onte pivka, tokhatola ochoangna onte n piana jiang thüngijo ritsso yithoku to ezoa evo zenkhying jiang thüngi OPVÜI na heto ezoala. 6 "Zenkhyingden, nte tsüngon ji yikhana vanthaka osi eng jina ntelo jorov sala, ntiotssole ntena a kyon jiang sosorathaka; hoji tsükona ntena zenkhyingyi n hung osi ntena ntia methechev meka." 7 Ochoangna ochyu-ovüng tsükona metheta vancho sana jiang ha n tssojam yikra ndukthoku. Onteji topvüto yikrathoku, Potsow na onte n janlamo ji yakchia. 8 Tokhatola a thüngi jo OPVÜI na ombo mon osi etho khi apyingthukala osi ntsa jo ntio sana hoji a monsüthukala; hoji yakchia ana lümbüm etsson khi Israel jiang thüngi mmen jo ntio sana ji a ezothukala. 9 Israel esopvüiden, a yi engachitava, ntena ntsaji nte tssaksi elan ji nlan kümthukala. 10 Ntena Potsow yantsü, Jerusalem ji müngtssomünghan osi n tsanrük kimüng lo tssokachitala, 11 osi yantsü jilo esapvüi jiangna ekhüp eyan esapvüi tssotala osi pvüti jiangna shikhfü jiang jokheman eyan khophiala, elani zenkhying jiang naha orang eyan zenkhyingtasi – OPVÜI na ontelo vana to phyotala."Eiyo etssatssov meka," ntiotssole OPVÜI na e ndüngo vana," to ontena phyotala. 12 Hoji tsükona nte n mhon yakchia Zion ji oli rhonato rhonrov osi Jerusalem ha rotansyuphina ekachi siv, elani khümphen phongdung jiha ora kümi siv.
OPVÜI na Limhatsüji Noying Khi Sav
1 Tsüngon etsao jilo jo phunglan kvülo ekhümki ji tssokachicho sana jijo phunglan topvülo ntssontso ji tssov, osi hojina phunglan thanpo jiang khüm chochiv. Osi jipo elümotona hoji yana santa rov. 2 Osi onte kyon jiangna phyotav, "Etena OPVÜI phunglan, Israel Potsow ekhümki jilo chungotavka. Ntiotssole ombona hojilona ombona ntio etssothuk hunga sana ji epüngnov osi ombona ethüngche evayio lan jilo etena sanphiv. Ntiotssole OPVÜI püngnoyi ji Jerusalem lona yiala; osi ombona Zion lona kyon jiang thüngi janala." 3 Ombona jipo jipo yulo khontarota osi etho tsüpho, ekoni osi enhyano evan jiang yutalo. Khiran khirita jiang nsüngsochiala. Ontena yonri jiang khi lirhonphen lo chümthev osi otsso lepok jiang nhyabüng lo thei likhephen tssoe siv. Osi jipo ochinaha ritsso tsükona n methak, elani jipo kvüinaha ritssolo n volan. 4 Otsük akvüna jüngtheta noyinga ombobo jününgroli osi züvothili vamvü; osi ochinaha ombo n khenthuk. Tokhamo OPVÜI jina shi heto echümchakthaka. 5 Jipo akvüna ombombo Potsow yi enga khümtav. Tokhatola eyio nchüngkhon nchünkhonto e Potsow yi enga ombo khümvü.
Israel Jiangna Morantsan Eküm Jilona Khophiv
6 "OPVÜI na phyoala, "Ana ezüp pia metapoe evüng tssothuka evamo, a kyon jiang ji ana telükalo onte tsarhyuv yuta ji tsathaka. 7 Onteji nkhyo-nrungu okina ekoni vanra, tokhatola ochoang valanchi lichosana jiang lona ana ethan benkav osi onteji jipo tsüphov kümthokvü. Osi ana hoji yuta jilona benkae Zion phunglan jilona nchünkhonto tsükona onte sav." 8 Osi ni Jerusalem, kümoe Potsow na olyu enhyang na ombo kyon jiang nhyakyata vamoji esüa vancho sana jijo elani ni ekhüngyan jilo yanpvü ji kümlamvüka. 9 Ntio tsükona nteno hetata eronkachia kyatala? Ntio tsükona nteno eloe na ngaro bukvüsathüng esüa hetata nte ezüpala? Nte mesao n vamo, jina alo, toalo nte ejü-rünyoe jiang chüthakchola? 10 Jerusalem kyonden, otsük erüphia eloena ngaro vanathüng esüa erontava, ntiotssole nteno enhungo Jerusalem sisi meta ejüng tüvlo nte vanthoku sala. Ntena Babylon lo yiv tolea OPVÜI na nte ri jiang khelona nte shanchovka. 11 Nte hayav tsükona jipo elümoto sanrhyuthaka. Osi ontena phyotala, "Jerusalem shi roe siv shikhfü! Osi ronrüngi lia etena hungu na lia!" 12 Tolea jipo shiangna OPVÜI lümbümi ntio jücho sana ji ontena n tsi. Osi tsünghanro kvüto enhyikvü tsükona hanrhyua sana ji esüa ezüp onte epiv tsükona onte sanrhyuthukchoka to ji ontena n chümjan. 13 "Israel kyonden, owo nte ri jiang ezüpthuka! to OPVÜI na phyoala. Ana nteji mangsüpung ejüjo yonjak esüa osi nkhfü jo yongmen na nsüngrücho esüa etho ejüi nte kümthukthaka. Ntena jipo elümoto roe siv osi onteji jenpuknipukta lona ejüeli kvütata lichosana jiangji A, OPVÜI ocho limha mpüm tolo OPVÜI saana ji thüngi hansi oyi a yantsovka."
1 Jerusalem kyonden, nte rasan jiang tsarhyutava! Eteno evükthechithaka! Osi ontena Israel esopvüi ji hayatala!
Bethlehem Lona esopvüi Chiyithoku Potsow na Echümchakala
2 OPVÜI na phyoala, "Bethlehem Ephrathah, nino Juda metalo oyan jianglo teritsov motsünga, tokhatola nilona ana Israel esopvüi chiyithokvü, osi hojijo nkolona evamo jiang wopan lona tssovka." 3 Hoji tsükona OPVÜI na ombo kyon jiang sinkiv osi eloe ochona ompvü tsoe ebukvü licho sana ji n bukthüng nandang jo ori khelo onte thechi vanthokvü. To tssona onte meta kyon ochoang metaepoe morantsan tssota vancho sana jiang onte nzo tssothuk chev. 4 Ombona kvüthüng roa sana OPVÜI na epio etho ji khi ombo kyon jiang pono Potsow lo OPVÜI mharhüm-donrhüm ejüo ji khi sav. Osi ombo kyon jiangna noying nkoho eküm jilo vanchev; ntiotssole limha topvü lona ombo tsüpho ji chekav osi 5 ombona noying hana yiv.
Sochokvü Osi Ezüp Epiv
6 Kvüthüng Assyria jiang na ori etssolo ete metajilo rakhoe ete pikhfü jiang roa phanthia sana jithüng etena ete rasan etho ejütso jiang ji rotalo wothokvü. Osi ontena ebensü theta rotao ji yakchia ontena Assyria jiang ji Nimrod metalona khyov, osi kvüthüng Assyria jiangna ete metalo khothe ta sana ontena hojiang khelona eshanchov. 7 Israel kyon kvüta enhyokacho sana jiango jipo topvü tsükona OPVÜI na yentsso jorothukpanchoto tsoyokirina tssov, osi benro-niro rankata vamo jianglo yenjü elongkatato tssov. Ontena kyon lo mekna, Potsow lo enhyikav. 8 Jipo jiang yulo kvütata valanchiv sana jiango hingho na erae ojak yana sanphia to tssov, ombona olyu yulo rhovoe, rumi lümchak, lümchakna rüngroe siv, osi tsanchov ntia eyilov n li. 9 Hojito Israel jiang na onte ri jiang topvü khyoe roe siv. 10 OPVÜI na phyoala, "Hoji yuta jilo ana nte kurü jiang khi hansi yiv osi nte ritsso zotoro jiangha roe sikhamvü. 11 Ana nte metalo yantsü jiang topvü roe siv osi nte ritssolo zalanchiphen pikhfü jiangha süchokhani sirav. 12 Ana nte zen-okyak n mmhom jiang topvü moni nte siyiv osi nte yulo ochia ratssen-rapvüi n vanthuk. 13 Nte kisü osi ntena ntho longzü esüa tsütsao jiangha topvü roe nte siyisi ntena nsüngrücho kisü jiang elani nte n khümthuklan. 14 Nte metalo potsow Asherah kisü jiangha ana khyanchüchüi siv osi nte yantsü jiangha roe sirav. 15 Osi a lümbüm etsuk lona jipo kvütatana a yi n ngav vana rocho sana jiang topvü nte nlilam.
Israel Pono OPVÃœI na Ephyov Elio Ji
1 OPVÜI na Israel pono n mathav ephyov elio ji engatava. Phanthia, O OPVÜI, osi nina ephyov elio ji phyoa; Nina ntio phyoasana jiang phunglan osi dungtiro jiang khi zothuka. 2 Phunglanden, kümali limha shi ndungkaphen, OPVÜI na n mathav phyoa vamoji engatava! OPVÜI na ombo kyon jiang pono ntiosana ephyov lia. Ombona Israel pono nlan shakav sala. 3 OPVÜI na phyoala, "A kyonden, ana ntio nte tssoyichola? Osi ana ntio khi nte wonkhyuthukchola? A janlantava. 4 Ana Ejip lona nte sochokcho, ezii eküm lona nte shanchocho; osi ana nte swothukvü tsükona Moses, Aaron, Miriam to rothukcho. 5 Nehümehetava a kyonden, Moab lo mesao Balak na ntio nte tssoyiv kyakchosana osi Beor tsokhying Balaam na kvüto janlancho sana. Ntena olani yitathüng nte nchenphen Acacia tona Gilgal to yutalo na ntio tssocho sana jiangha nehümehetava. Ana nte shanchov tsükona ntio ntio tssocho sana jiang mmhona nchümi zetava tona ntena nehümehevka."
OPVÜI na Jüpomo Jiang
6 Ana kvüthüng OPVÜI Potsow ji khümo woa sana ana ntio ombo thüngi hansi vovla? Erungthan etssov tsükona mangsüro mmhontso ji ombo haniv alo? 7 Ana olyu wothüng bena süsi ona mekana olive thyujü zhükhfüro tsüato hansi Wona jina OPVÜI ji emathav alo? To alo a tsokhying tsokhfü ji a mmenthan tssoa sosi wovla? 8 To mek, OPVÜI na ntiojo mmhoncho sana ji ezothaka, osi ombona ejüponio jijo shi; ntiojo ntsa sana ji etssov tsükona, osi tümjak n lina ombo nzana vam ji, elani eyingro khi ete Potsow thüngi khümshümta evamvü ji. 9 OPVÜI ekyuv jijo nchümri eli elhi to OPVÜI na yantsü jiang ezoala, "Yantsüi sanrhyui evanden engatava! 10 Kyon n mhon jiang kijo n tsa n rük lona ehungo ejüeli jiang hanthei lira. Ontena efü-seri n pem tsütsacho osi ana hoji a tsakala. 11 Ochoang na efü-seri n pem tsütsacho sana jiang kvütoli ana nlan siyivla? 12 Nte ejüeli jiangna yantsae jiang ejan mpa rechoe khirathaka osi nte topvü ejüng ephyoeden. 13 Hoji tsükona nte mmen jiang tsükona roe nte esiv ji ana benkathaka. 14 Ntena tsoyu lea nte mmhiv meka osi lümbüm ebük n li, tolea nte wonton erapvü vamka. Ntena ejüeli hanrhyuta khatola ntia nkümchev meka osi ntena ntiosana mpa nkümcheta sayilea hojiang topvü ana ritsso lona roe nte siyiv. 15 Ntena otssok omüm mojü thev tolea hojiang ri n tsophya. Ntena olive thyujü zümjoe vav, tolea ntena hoji n tsütsache. Ntena zükhi nsüngrüv, tokhatola hoji ntena n yuphya. 16 Shiang heto nte thüngi etssov shijo ntena mesao Omri tona ombo tsokhying mesao Ahab to tssolan phyolan n mhom jiang phankao ji tsükona hojito tssov. Ntena onte kyak oyi jiang tsütsatapvü, hoji tsükona ana roe nte sivka. Osi otsük akvüna nte yikvü yilovka. Meta topvü lona kyon jiangna khoe nte sia nte tssak-nkongu ka.
Israel Tssomhisanmhi Jiang
1 Shijo ntia eyilov n li! Aiyo wondon erae kyon na tssüngthi yanaha odungi nti tssüngthiha enhokae nkhying, osi jününgrothi ha n hung totssoji esüa a kümthaka. Jününgrothi osi züvothi mmhom topvü lhokhanthaka. 2 Meta shilo ochia ntsae kyon enhyokae n vam sithaka, osi Potsow lo mmhona evan n jü. Otsük akvüna ombo meta kyon lüngthav tsükona yuta mmhom nhyaka vanra. Otsük akvüna ombo meta kyon jiang oso phanato phani eküm khiyiv yanala. 3 Onte topvü n mhon etssovlo jüngrae osi tssothimori tae. Tsüphoe osi yitssoe jiangna ekhüp yantala. Osi oyam enayakhoko kyon jiangna ombo tssohungo jiang ezoala, osi onte nzo tssoe okyak tssotala. 4 Onte yulo mmhontso osi ntsatso khilato etsso jiangha ethelan n lio ero esüa tüv. Potsow na zenkhying onte enhyang jiang yakchia ntangshon onte pithako ji esüa Potsow na ezüp onte epiv tsüngon ji yithaka. Onteji ngari-ngatüko vanra. 5 Nte phinakishüm lea ti-longtsüa mekana oshom lo lea tilongtsükata. Ni eloe ji thüngi lea ntaknshona khensan-yisana. 6 Yuta hetüv shianglo jo otsoe jiangna ha opoji zhüvae tssothukala, tsolo jiangna ha opvü-oyo thüngi panlanala, osi yanpipamo eloe jiangnaha ono thüngi khontala; osi eboe ri jo ombo wopan jianglo vana. 7 Tokhatola ana jo OPVÜI lo zekata cheta vamvü; osi a Potsow ochona a shanchov sana jilo longtsükata nhyaka vamvü. a Potsow na a zoyiv.
OPVÃœI na Shanchov Rothukala
8 Ete ri jiangna ete pono kangtsüa ezev ntia lanka n li. Eteji ejoyicho khatola etena elani phanthiv. Enhüngajo eteno emüngi vana khatola, OPVÜI na wondang epiv. 9 Etena OPVÜI yaka mmen tssothaka, hoji tsükona enhünga jo etena ombo lümbüm etsuk ji tarajo rümvü ethev lia. Tokhatola ochümi jo ombona e nkochev osi etena syulyio tssothako jiangji elan na edungcheyiv. Ombona wondangi esochokchiv; osi ombona eshanchovo ji etena hunga eküm vamvü. 10 Hoji süijo ete ri ochoangna eyikvü yiloa, "Nte OPVÜI Potsow jo kvülo vancho ato?" to ezochosana jiang etena hunga yikra khiv osi onteji khyothechi lantsüi chonphyalyu esüa tsseroe onte esio ji etena hungu. 11 Jerusalem kyonden, yantsü pikhfü ji tssochov yuta ji tsathaka. Tothüngjo nte meta erü-ekük jiha tsüphokav. 12 Osi nte kyon jiangna engkhfüwoe Assyria, jolowoe Ejip, elani Eupharates, nkona evamo jiang, osi phunglan, jümang ekoni evamo jiang meta topvü lona nte thüngi sani yiv. 13 Tokhatola limha shijo, limhalo evamo kyon shiang n mhon yakchia lijüng kümi sivka.
Israel Pono OPVÃœI Nzan
14 Nina ethüngcheo, ni kyon jiang enhyang tssoa OPVÜI. Ontena ralungi ezonroe vanlea onte phanphia mekana nkonphia elio meta jiango lizü. Hoji tsükona ontena nkolo tssoji esüa Baashan tona Gilgal tolo lizü lishao jianglo oyi vani onte yantsothuka. 15 Nina Ejip metaena esochuka-thüng tsso jiang esüa chethemothev etssoyia OPVÜI. 16 To tssona jipo topvüna hojiang hungu osi onte etho jiang nsenlani siv. Osi emhok ekhen lona opüng ntsüptav osi eno chüngu. 17 Ontena nrü esüa live yulona ephfüphitav, onte rizümphen jiang lona ekyu lona enetsüngra Potsow thünngi chiyiv. To tssona ontena ete OPVÜI Potsow kyua kholani yiv. 18 Ni esüa Potsow thanpoe n van, O, OPVÜI yo; Ni kyon, eküm enhyolanchi evamo jiang onte mmen jiang siyiala, osi nina ni lüm tssukpvü n vanala, tokhatola nina n tümjak na e nzana evamo jilo ni ematha lia. 19 Nina elani e khonzanlamvü. Osi nina e mmen jiang nijo küpina sümroe ki jümang lazae thechi siv! 20 Nina epyimtsümotsüi jiang thüngi nkolo echümchaki evao ji esüa Abraham osi Jakob tsoronichen, ni kyon shiang thüngi ni longtsüka osi ntümjak nzan ji ejüv tssov.
1 Elkosh yamo Nahum na ntio Potsow thüngina Nineveh tsükona yithen hungcho sana hoji heto erancho.
Nineveh Pono OPVÜI Lümbüm Etsuk
2 OPVÜI Potsow na ombo ri jiang tsükona rüma n vanala; Ochoangna ombo panlana sana jiang ezüp piala. Ombo lüm etsuk lona onte nlilanala. 3 OPVÜI na zakto lümbüm n tsukala, tokhatola ombo etho eli, osi worhyuo jiangjo ombona ezüp n pivjo n vachiala. OPVÜI na kvülo woasana, jilo tsungryu phanthiala; osi ombo jo-nhye lona livero chiyio jiangna emhenjü rümkachia sanphiala! 4 Ombona jümang ji yidan piala, osi hoji kyingi siala! Ombona zhükhfü jiang ha likying kümthukala. Bashan lo oli jiang mmikathukala, Karmel phunglan jiha mvüryuthaka; Osi Lebanon lo thera jiangha vüjoe sithaka. 5 OPVÜI vanhya lojo phunglan jiang na enhyokala; Phungdungro jiangna ombo mhadungona phyonala. OPVÜI na chiyiroana limha shi mpa enhyoka therüala. 6 Ombona lüm tsuka na, ochona tsanchovla? Ombo ekhenthav lüm etsuk jilona ochona tsanchovla? Ombona omi kisochia lümbüm tsukala, Ombo mhadungojo olung jiangha livero kümala. 7 OPVÜI jo mmhona; Ombona ombo kyon jiang ezüp lona onte nkochetala; osi ochoangna ombo thüngi kholana sana jiangjo ombona sheküpala. 8 Emhokthav jüvak ntav esüa ombona ombo ri jiang ronrüngi siala; Ochoangna ombo panlana sana jiang thüngijo ombona echü wothukala. 9 Ntena ntio khi OPVÜI rolanchivla? Ombona rorüpi nte siv. Ochinaha echunga yaka ombo n panlanche. 10 Okyodung eritsücho osi mavü echü esüa, nte kinokiriden jiango rungi nte siv! 11 Nineveh, nilona, kyon okyak ochung n mhon, ochoangna OPVÜI panlana sana jitüv chiyiala. 12 Hoji tsükona ombona ombo kyon Israel jiang thüngi heto ezoala: "Assyria jiang ji etho ejüi osi wokyonga mpa tssolea, onteji rorüpi monthoki siv. A kyonden, ana nte ezüpthukcho, khatola enhungo ana hojito tssolam meka, 13 Ana enhungo Assyria jiang ethoji monthoku osi nte shenzhü ji nte lanpheyivka." 14 OPVÜI na Assyria jiang tsükona shikhfü heto methakcho: "Onte motsü rüthoku tsükona tsoronicehn lithoku meka. Onte potsow ekhümki jianglo kisü jiang ana roe sivka. Onteji eküm evamvü n tüm, hoji tsükona ana Assyria jiang tsükona lüpkvü methakala!" 15 Zeta, phunglani na yithen mmhom hansi yithenpvüi tsaka! Ombona rikhyowon tssoa tüngsochiv tsükona olani tsathaka! Juda kyonden, nte tokhu jiang tssota longshitava, osi ntena OPVÜI Potsow thüngi ntio echümchaki vancho sana jiang pitava. Kyaktssoe jiangna kvüthüngha elani nte meta ji khilo rolam meka. Onteji totona rorüpi sithaka.
Nineveh Joyio Ji
1 Nineveh, nino ni hayathaka! Etho kvümoena ni shünglanchiv sana ji chirothaka. Ni pikhfü jianglo kyon vanthoka! Olan jiang ravani vanthuka! Osi ori etssov tsükona methaka! 2 (Ompvü ri jiang na onte khyoe nkhithüng esüa, Israel thüngi OPVÜI na pfütsson ji pilam sala.) 3 Onte ri rasan jiang na otsung emyom hana, Pipoha emyom hana. Ontena ritsso phonkav tsükona methakala! Onte kurü zotoro jiang na omi kiato tsata! Osi onte kurü jiang na tsukphitala! 4 Ritsso kurü jiangna lantsü jiang pyinga yungphitala, osi yantsü ji haphia hepi hepi to yungphitala. Milon na tüngra kia esüa osi mitsüngna tüngrasochia esüa yungphitala. 5 Tsügpoeden jiangha tsarhyutathaka;. tolea ontena mhadungi khochiana onte nshüphiala. Hayalo ewoe jiang na pikhfü jilo yungta owo, pikhfü ji vümshenphen na roe siv etsso ji zalanchiv tsükona otsung nsüngrüala. 6 Zhükhfü ndüngo kipüng ji poksochi, Mesaphenkiji ekhenlungna pyingcho. 7 Rani jiha rhümathaka; osi ompvü nri jiangna nungra lona teki shüngphia yukhyu na khüa to emhentala. 8 Jütüngtsü poksochicho to kyon jiangna Nineveh lona sanchukala! Osi "Esantale! Esantale!" to tünga khatola, ochinaha engolani n zechi. 9 Janti jiang rechoe khia! Shona jiangha rechoe khia! Yantsü shijo tsentsü ejüeli na pyingi lia! 10 Nineveh jo rothaka, sirhakthaka, osi eyingkhükhüa! Ekyu lona lümbüm jiang pyonroala; Nkhok shüngta enetala, osi etho n-liv sithaka; Osi kyon jiang omha rangoa kümthaka. 11 Yantsü hingho vanphen esüa elio jijo enhüngajo kvülo lichola? Osi hinghoro tsothukphen meta jijo kvüla, Hingho osi hinghopvü jiango enhungo kvülo wovla? Osi onte ro jiang nküpnfüphen jo kvüato? 12 Hingho jina ekümrüm rumi lümchak lümchak na rüngroe ombo nzo evamo jiang tona ombo ro jiang to picho; osi ombona onte vanphen ji solümchak na pyingi vancho. 13 "Aiyo nte ri!" to Thotsü OPVÜI jina phyoala. Nte ritsso zotoro jiang topvü nshüi nte siyiv, osi nte rasan jiangha ritsso lona lüngtharüpvü. Osi ntena kvütata oyam thüngina khithakcho sana jiang topvü ana khi hansi yiv. Limha shilona nte etho yivon ntia n zotav sivka."
1 Yantsü kümoe, jenpokta yantsü, osi rechoe ekhio ejüeli na pyingi licho sana jijo monthokvü! 2 Engatava! Echhüktacho on, Zotoro jakha erion, Kurü yungtacho on, Osi ritsso zotoro rümphio jiang on! 3 Ritsso kurü jiangna phonkatala, Yonri nlüphia osi otsso nrhiphitala! Echümüng ekatarae lia, osi echümüng n khacheo tata elio, jiang lona kyon jiang nshüphiala. 4 Nineveh lonsülonphyoe jijo ezüp pithaka. Lonsülonphyo jina ejüngona opyon mmhona lyui khi jipolan taro ejiteehia mmen nri tssothoka evamo yantsüji. 5 Tokhamo OPVÜI jina phyoala, "Ana ezüp nipinrüngu, Nineveh! Ana mpensü ni shakisi tsükshü ni kümthokvü Osi jipolan topvü khi ni hungthoka, ni yikrakhithokvü. 6 Ana ni yikvü yiloa, mmen nnam khi ni eyukav. Osi kyon khi ekhena ni zekathokvü. 7 Kyon kvütatana ni hunga sana eselani, heto phyotav, 'Nineveh jo roe sithaka! Ochona hetüv khonzan to tssovla? Ochona ompvü lümbüm emiyivla?' " 8 Nineveh, ntio lanka lona niji Ejip yantsü Thebes jilona mmhonakcho lichola? Ompvü ha, ompvü nkohav tsükona Nile zhükhfü jina füchümcho. 9 Ompvüna Sudan lona Ejip jana sachicho, osi ompvü ethoji matacho mek, Libya ha ompvülo pfükae evan. 10 Tokhatola Thebes kyon jiang topvü metapoe tsanthan hankhansi yicho. Lantsü nken akvü lona onte ngaro jiang tatsüngkhancho. Onte esopvüiden jiang jo ojo okhe chungi hansi yicho osi onte rhümae jiangna chitaracho. 11 Nineveh, ninaha kinoe yulo ni rheyivka! Elani nina ni ri jiang lona tsanchov ekhyo tssov. 12 Osi ni pikhfü jiang jo züvodung jiang lona tssüngthi mheni licho odung ji enhyokphile tssüngthi jina ni püng tondüngo ni elongtheyicho to tssov. 13 Ni rasan jiango elopvüiden to tssov, osi ni meta jijo niri jiang khelona nkohapvüi n vancho esüa tüv tssov. Ni kipüng hankhan erak jiango omina rungi sikhamvü. 14 Orina nte hayav sala küma ojü wothetava, osi nte rizüm phen pikhfü jiang zechotava! Yita erungu tsükona ha ochon chentava; osi yita nsüngrüphen chonphalyu jiang methak-tava. 15 Ntena küma heto lyulea heto lyulea, nte rungtsüngkhamvüu mekana ritsso lona nte lüngtharav. Nteji khomongna yulanhanlan n zamvü tsokhani siato khi-nrüngi nte siv. Vara khomong to kyongkata nte kümcho! 16 Oyaki choro shantio jiang lona kyongkata nina shishoe chiyithukcho. Tokhatola enhüngajo jiang topvü monthaka; khomong na echho jiang echoni pya yiato yikhanthaka. 17 Nte tsüphoeden jiang naha etsuko vara khomong na pikhfü lo rümkae vansi, eng lümchetana kvülo yicho sanatia n tsina pyara yikhancho esüa tüv tssothaka. 18 Assyria ekhüngyan esapvüi, niküpo esapvüiden jiang nchüngkhon n phanthilamo yipkhanthaka. Ni kyon jiang topvü phunglani tsanroe sithaka osi okiwoe sosi yilamo tüv ochia n van. 19 Ni tssatssothako ji emilamvü lanka n li, osi ni wontssakhü jiang ha n pola. Ni roekhi ni sithako yithen ji ezoe topvüna ematha lona okhe tümphitala. Ni ochüm n li haruk-hashü jilona ochona sana tsachocho alo?
1 Yithen shijo OPVÜI na zenkhying Habakkuk thüngi heto hungthukcho.
Ntsanrük N lio Ji Habakkuk na Erenjanala
2 OPVÜI yo, nina a n ngayina kvütenhyaka ana nzanchi chona vamvüla osi kvüthüngti khontarota shiang lona eshanchovla? 3 Ntio tsükona nina jenpoknipota osi ezüp shiang ahungthukala? Osi nina kvütoli sulyuo elhi shiang rüma zeta vanala? Tssorophyoro osi jenpok-nipokta na füchümi lia, osi meta topvüto khontarotana pyingi lia. 4 Shikhfü tsütsa ji elümoto lhasa osi n mhon; kvüthüngha ntsaji n tssoala. Mmhom kyon jiang thüngina jo n-mhom kyon jiang mmhomo vanchetala; hoji tsükona ntsaji sulyuo tsütsatala.
OPVÃœI na Janlamo ji
5 Tole OPVÜI na ombo kyon jiang thüngi heto janlancho, "Nte nkonphia evamo jipo jiang cheta vantava, ntena ntio hungasana jina nte ngangchevka. Ntena zolea n longtsü khoko tüv onte tssoyiv saka. 6 Ana Babylon kyon, n vanken osi lüm tsükshi kyon jiang ji etholo vanthukvü saka. Osi ontena limha yakchaka khyoe ekhiv tsükona khochokvü. 7 Ontena ekyu osi ekhenlong nzüa yithukvü, osi onte kangtsü kangri khi onte bobo shikhfü ji kümvü. 8 "Onte kurü jiang khüzhü mmhor lona ekhyingkata, osi ranfü wontoncho lona ntakata kurü rasan jiang na metapoena sana rorav; onte Kurü jiangna okhena liko saphia rov. Osi mongshiro na ekümrüm rümvü tsükona yonjoa to ekhyinga rov. 9 "Onte ri jiangna ryutsuka khyoa rov osi ontena roana hojina otsük akvüto ekhenrhükvü. Ontena morantsan rhümao jiango n khacheo hajang tata tssov. 10 Onte mesao lia ombo tsüphoeden jiangna yikvü emakatala. Nti pikhfüna ha onte n zalanchiche – ntiotssole ontena yikvü-yiloa ochon shae nrokata oro hayae khiv. 11 Tokhatola kyon ochoangna onte Potsow jo onte etho ejüji tssothuka sana jiangna mpungna echüka to vena rosi yi siv."
Habakkuk na Elani OPVÜI Thüngi Erinjanala
12 OPVÜI yo, benkadenina nino Potsow. Osi nino a Potsow, ntho osi kümali. OPVÜI a Potsow osi a nkochepvüi, nina Babylon kyon jiang ethüngche ekhangrithukvü tsükona etho ejüi kümtukcho. 13 Tokhatola kvütoli nina kyon n mhon, shiang heto rüma zeta vankhukchola? Ni mhyik jo mmenlo zekav tsükonajo nthokhünga, osi n lamo etssoe jiangjo nina n zekakhuk. To tssona kvütoli kyon shiang na ontelona ntsanthoka osi ntsanrüka jiang mpato rorüpi siakasi nina yingying zeta vanala? 14 Kvütoli nina kyon jiang ji ongo esüa mekana ora-oriden esopvüi olan esoe n vamo jiang ejoena tsütsatala? 15 Babylon kyon jiangna kyon jiang ji ongo ejoena ngokhfü khi yikatala. Osi ontena kyon jiang ji ngozonphen na zonyathuki khiche ontena rhümacho ejoena longshitala! 16 Ontena onte ngozonphen jiang thüngi mpato randanta othan pitala, ntiotssole onte ngozonphen jiang yakchia ontena ntio mmhom jüpona na hungala. 17 Ontena onte yonri jiang to tsütsa nrhüi jipo jiang pono khonzan to ntssona roesia vanthukvü ke?
OPVÃœI na Habakkuk Janlamoji
1 Ana richephen zenki chongoe khi OPVÜI na ana erinjamo ji kvüto ajanlam sana osi kvüto phyole to a ezov sana nhyaka vamvüka. 2 OPVÜI na heto a janlancho: "Ana ntio ni hungthuka sana jiang topvü echonga zekana khacheo tssoa longpyak lo ntsüngrünga erankata. 3 Elhi shiji tssopam küma ji tsükona erantsüngi vakhe. Tolea ana ntio ni hungthukvü sana jijo otsotso tssovka, osi hoji yutaji enhyana tsathaka, tara sülana to mpa tssolea nhyaka vankhe; n pem jo siv meka, lümhato sülanthokvü meka. 4 Osi yithen ji heto: 'Ochoangjo n mhoncho sana jiangnajo eküm vamvü meka, tokhatola ochoangjo nthosana jiango eküm vamvü ntiotssole ontena Potsow lo longtsüka licho.' "
Ntsa Nrük N lio Jiang Pono Yitsso
5 Ejüeli jijo ejithechio. Nkhyingnrüng kyon jiango kangtsüala osi vanken n li osi echüi esüa kvüthüngha lea lüm epük n liala. Hoji tsükona ontena tajo elüm lona jipo motsünga sülo jipo motsünga to khyoe khiala. 6 Oyam na khyoe evao kyon jiangna onte ekhyOPVÜI jiang thüngi onte n matha ji, ejüala osi onteji nophia vanrhyüala. Ontena heto phyoala, "Ntena nte echi meko jiang hanthecho, tokhatola nte tsükona ayako ji tsata! Nteha kvüthenhyaka ochi nte epiv elio jiang thüngina ekhüng tssoa khirhyue khi eli-i küma vamvüla?" 7 Tolea ntena n tsiv vanathüngna nte kvütatana oyam khyoe vanchosana jiangha ochi oma eküma nte kümthukvüka, osi eran theta nungkata nte lwothukvüka. Ori jiangna oro nte ekhenthukvü, osi ontena nte retsoyiv! 8 Ntena jipolan elümoto retsoyia rothaka, tolea enhungo kvütata enhyokae vanchosana jiangna, ntena lüngtha elhi tsso jiang, osi limha shilo kyon osi yantsü jiang pono ntio jenpokta elhi tssochosana jiangna nte retsoyivka. 9 Ntelo yitsso tsata, ntiotssole ntena retso-reyu osi jenpokta ekhüngona nte wopan ji eli kümthuki nte kiji ekyutsü lona nkoche vanta rocho! 10 Tokhatola nte kyak-ori jiang yakchia nte wopan lo yikra hansi yithaka; ntena jipolan elümoto roe esio jijo ntebobo nte wopan ji roe sicho tae. 11 Kyimchung jianglo olong jiangna mpa nte pono kya-nungrala osi hoji khyuron koküng jianglo eshokatala. 12 Nte tsükona ochüm ji tsathaka! Ntiotssole ntena nte yantsü ji lüngthata osi jenpok-nipok lona tssokachicho. 13 Ntena ekhyo jipo jiangna kvütata sanga tssochosana jiang moni siyicho, osi ontena ryusang mmoka tssokachio jiang topvü miphung kümi siyicho. Tokhamo OPVÜI na shiji tssocho. 14 Tokhatola kvüto jümang ji ojüna pyingi vanchosana ji esüa limha shiha OPVÜI nchümri myingthüng jina pyinga vamvü. 15 Nteno nte momvü! Ntiotssole nte lüm tsükshi lona nte phinakiren jiang yikrathuka ezüpthukcho; osi sokona kinoe ehaphia kümthukcho. 16 Hoji tsükona nteno yikrachi nte pithungjo yikra khi nte eyukthuka. OPVÜI na ezüp pvü khi nte yuthuksi kinoe esüa nte ngaphithukvü, osi nte mmhon jo yikra na nte tongcheyivka. 17 Ntena Lebanon lo otssüngodung jiang tanrhüpi sicho, hoji tsükona nteha nte tanrüpvüka. Ntena ekümrümo jiang lüngthacho tokhatola enhungo ekümrümo jiangna nte ekhenthukvü. Shiang heto nte pono etssov jijo ntena limha shilo kyon osi yantsü jiang pono lüngtha osi jenpok-nipok elhi etsso ji tsükona tssovka. 18 Kisü jijo ntio ethev lichola? Hojijo kyon na okhena nsüngrücho tae, osi hojina ejüng ji yaka thanpo ntia ni n zoche. Hojilo longtsükao tüv ombona nsüngrüpvüo ji tsükona ntio mmhom tssoyiala oyi n sancheo potso! 19 Nte tsükona ayako! Ntena tssüng sha motsünga ji "phanthia!" to ezole, mekana longpyak motsünga ji "Mangkachia!" to ezole, ontena ntiosana nte ezochecho alo? Onteji shona jantina eyuki mpa vakhu ka, khatola jianglo eküm n jü! 20 OPVÜI na ombo ekhümki vana; hoji tsükona limhalo kyon topvüna ombo vanhyalo jükrüpi vanthuka.
Habakkuk Randan
1 Habakkuk zenkhying jina heto randancho: 2 Oh, OPVÜI yo, Nina ntio tssothakcho sana ji ana zothaka, osi emhok ekyu na a pyingthaka. Nina elhi tsüphov tssoa eroji esüa nchüng e echungreno ha tssoa. Ni lüm tsukathüng lea, khonzan to tssoa. 3 Potsow na Edom lona tsalanthaka; ntho Potsow ji Paran phunglan jiang lona tsata. Ombo phfütsson wondangna Potsow mpüm tüngrazhüala; osi limha jiha ombo myingthüngna pyingala. 4 Ombona Potsow nlüpato tüngrasochia roala; ombo khelona wondang chiyiala, osi hojiloshi ombo etho ji mphoe lia. 5 Ombona ovüngna nochonori wothukala osi echüna sükhanle to yizüng piala. 6 Ombona kvüthüng esana sana, limhaji enhyokala; ombona zechichona jipo jiangna enetala. Kümali phunglan jiangha küngroala; osi nchüngkhon elio phunglanro jiang ji sukthetala, phunglanro kvümoe ombona nkolo sanphicho sana jianglo. 7 Ana, Kushan kyon jiangna kyua osi Median kyon jiangna eneta hungcho. 8 Zhükhfü jiangna ni lüm tsukthukcho alo, OPVÜI? Toalo jümang jiangna ni harukthukchola? Nina emhenjü lona rocho; osi tsungryu mpung jijo ni ritsso zotoro, hojito nina kyon jiang thüngi ekhyo hansi rocho. 9 Nina ni lotssi ji tsütsav methakcho, osi nina lotssitsüngji shümchiv methakcho. Potsow nlüpa esüa ni ekhying jina limha ji küngsocho. 10 Kvüthüng phunglan jiangna ni hungcho sana, onte enecho; osi Potsow na ojü phy angchochicho. Liko chungi ojü ejüo jiangna ovon tssocho, osi jükyo ntssona evakachicho. 11 Ni lotssitsüng mitsüung esüa ekhyingoji hungi osi nitsso tsünglüpa nrhiphioji zesi, eng osi chworo jiangna mangi sicho. 12 Ni lüm etsuk lona limha ji yakchicho; osi haruk hashü khi jipo jiang tssero-morocho. 13 Ni kyon jiang shanchov tsükona tona nina ethüngcheo mesaoji shanchov tsükona to nina khochukcho. Kyon n mhon jiang esopvüi ji nina vümchüchücho osi ombo phankae jiang mpüm na rorüpi sicho. 14 Kvüthüng ombona hanrorae esiv tsükona mpung esüa rochosana, osi ochoangna mphoena yantsae jiang ezüp pisi lüm-püka vanchosana, Jithüngji ni lotssitsüng jina ombo rasan yulo esopvüi ji rhakcho. 15 Jümang ji ni kurü jiangna santhei rhyucho, osi ekyuthav jümangjü jina mphenchuk-chicho. 16 Ana shiang hetopvü zocho, osi a enecho; osi ekyu lona a menfü rerocho. Atsük jiha etho n jüv sicho, osi a jo jiangha pyalyua kümi a enhyokcho. Osi e hao kyon jiang kvüthüngti Potsow na ezüp pivto to yingto nhyaka vamvü. 17 Züvodung jiang na n thiala osi jününgrozhü jianglo tsüngthi n palea, osi Olive dung jiagna n thi ebenlea mekana ohüm-olina ntia n chiyilea osi olyuden jiang chükhan lea elani mangsü ranki jiang ejungi mpa silea; 18 Ana a longshia emathapvü tssov, ntiotssole OPVÜI Potsow jo a shanchopvüi. 19 Ntssontso OPVÜI na etho a piala. Ombona siano esüa ojo ekhyung a kümthukala, osi phunglan jianglo a nkoha a vanthukala.
1 Amos tsoe Josiah na Juda lo mesao tssoa vanathüng OPVÜI yithen heto Zefania zenkhying thüngi rothukcho. (Zefania jo mesao Hezekiah tsoronichen ocho Amariah, Gedaliah osi Kushi wopan lona yicho sana jilona chiyicho.)
OPVÜI Yitsso Tsüngon Ji
2 OPVÜI na phyoala, "Limha shilo elio jiang topvü ana roe sivsala, 3 kyon topvü, ekümrümo topvü, worowoni osi ongo topvüto. nmhon kyon jiang pono ana onte joyithuko elhi tssov. Ana kyon topvü rorüpi siv, osi ochia eküm enhyokae n vanthuk. A, OPVÜI jina phyothaka." 4 "Ana Jerusalem kyon jiang osi Juda topvülo ezüp piv. Hojilo ntio Baal potsow ekhüm lichosana jiang ha monthuki siv, osi ochinaha pvüti elhi tssoa Baal benkata erojiang n chümchelamo tssoa roe siv. 5 Osi ochoang kvütatana mhonki tsankae, eng osi choro shantio khümta vanchosana jiangha roe sirav. Ochoangna a thüngi ntsata vasi a khüma vana khatola Molekom potsow myingona echümchaka vanchosana jiangha roe siv. 6 Ochoang kvütatana a thüngi na mmilani yithakcho sana osi a n phankav sithakcho sana, osi elani ochoangna a thüngina lanso n yanasana jiang topvü roe siv." 7 OPVÜI tsüngon kvümoe Potsow na elhi tssov sana hoji tsüngon ji enhyanthaka; hoji tsükona ombo vanhyalo jükrüpi vantava. Othan etssov esüa OPVÜI na ombo kyon jiang lüngtharav ji methaka vanthaka. 8 "OPVÜI na phyoala, hoji lüngtha tsüngon" jilojo "Ana tsüphoeden, osi mesao tsokhyingden ochoangna metapoe shikhfü tssolan-phyolan tssota vanchosana jiang topvü ana ezüp piv. 9 Ochoangna potsow n tsi esüa khümta vancho sana jiang elani ochoangna efü tsütsaelan khi onte OPVÜI ki hanpyingu tsükona efüta müngtssomüngpenta vancho sana jiang topvü ezüp onte piv. 10 OPVÜI na phyoala, "Hoji tsüngono," "Ntena Jerusalemi ongo kipüng jilona kyata-nrungta won zovka. Yanthan jiang lona erocho osi phunglan jiang lonaha meta mencho won tssoa zov. 11 Nte yantsü yankho oküpoe evan shiangna kvüthüng kyata-eronta won zoasana, shishoe topvü chüthakcho tssovka! 12 "Hojitothüng ji ana milon bensi Jerusalem ji shyua yamvü. Osi kyon ochoangna ontepopo ji lüm püktsüngra, 'OPVÜI na jo mmhomha n mhomha mekana heto heto to ntia etssoyiv meka.' to phyota vanchosana jiangji ezüp piv. 13 Onte ejüeli jiang hani khiyisi oki jiango roe siyiv. Osi ontena oson oki tssota evamo jianglo kvüthüngha n vanphya elani ontena jününgrothi chümta evamo jiang lonaha tsüngthijü yuphyav meka." 14 OPVÜI tsüngon tsüphov ji enhyanthaka elümoto enhyana osi ekhyinga tsata! Hoji tsüngon jijo ekhov tssov, osi ekyimphideh lüm etssontso jiang nalea ryusanga eronkachiv! 15 Hoji tsüngon jijo lüm etsuk tsüngon, nyinyang osi ezüp phyingrüng tsüngon, elani roe osi tssoromoroe esio tsüngon, emüng osi ekya nungra tsüngon elani eluk emüng n mhon tsüngon tssovka. 16 Ritsso tatara won na meta pyinga, rasan jiangna ritsso won tssoa, hehe hatsata yantsü pikhfü osi rizümphen zenki jiang roe esio tsüngon tssovka. 17 OPVÜI na phyoala, "Ana tsüngon n mhon hetüv kyon jiang pono rwothukvü osi otsük akvü tona mhyikjüng esüa emophitavka. Ntiotssole ontena a yaka mmen tssocho, hoji tsükona enhungo onte lona ejen ji ojü esüa tsüthukvü, osi onte echümüng jiangji mangsüchü esüa likoe kyonkachi sithukvüka." 18 Tsüngon kvüloshi OPVÜI na ombo lümbüm etsuk ji ejüa sana, onte shona janti jiangna onte shanchochev meka. Ntiotssole OPVÜI na ombo lümbüm etsuk mi jina limha shi mpüm na rungi siv. Osi esüngaro taena ochüm ji tsswothukvü – osi eküm topvü monthuki siv.
Khophiv Tsükona Jonji
1 Yikra n li jipo, nte nchümri elamolo yitava 2 thera esüa mmikae chüi nte n sithüng, osi OPVÜI lümbüm etsuk ji nte pono n yithüng, elani ombona ombo haruk-hashü nte ejüv tsüngon ji n janthüng. 3 OPVÜI thüngi kholantava, ombo yizüng jiang enga nte meta shilo eyingroa evanden. Ntiojo elansana ji tssotava, osi OPVÜI mhadungo teri kümtava. To tssona OPVÜI na ombo lüm etsuk ji rothukathüng ezüp jilona mpa tsanchokhoka.
Israel Nkonphia Evamo Jipo JiangThüngi Potsow Yitsso
4 Gaza yantsü jilo ochia enhyokae vanthukvü meka. Ashkelon jo sirhaki siv, Ashdod lo evamo kyon jiango engriso lona phanchokchi siv, osi Ekron lo evamo kyon jiangha onte yantsü jilona phanchokchiv. 5 Nte philistian kyon jümangtssa rhüa jütssae evamo kyon jiangha, nte monthukvü. Rorüpi nte esiv tsükona OPVÜI na yidan methakthaka. tsükatia nte enhyokav meka. 6 Jümang tssae nte li elio jiang topvü phenlung lijüng kümi olyu rhüki ranki tona yantsophen to kümi sithukvü. 7 Juda kyon enhyokae evamo jiangna nte meta ji khiv. Onte ekümrüm jiang jilo yantswothukvü osi Ashkelon ki jianglo yipthukvü. Onte OPVÜI Potsow jina onte ndüngo tssoe khi onte jüolia kümlanthukvü. 8 Tokhamo OPVÜI jina phyoala, "Moab tona Ammon to kyon jiangna a kyon jiang yikvü-yiloa ezüpthuka, osi onte metaji rechoyiv tsükona kangtsüta phyotao ji ana zothaka. 9 Otsotso aiyo eküm evamo Israel Potsoji etssoji tsükona, ana phyochakala Ammon tona Moab tojo Sodom tona Gommorah to kvüto roe sichosana ji esüa ro-nrüngi sivka. Osi onteno makvü kümthukvü osi kümalito eyingkhfü-khfüna ekachi ratsü kümi sithukvü, osi a kyon kvüta enhyokae vancho sana jiangna onte retsoyia onte meta jiangha khiyiv." 10 Moab tona Ammon to kyon jiangji ontena Tokhamo OPVÜI Potsow kyon jiang yikvü yiloa osi emhan ekhüng to etsso jina ezüp ji heto onte piv. 11 OPVÜI na onte ekhenrhükthukvü. Osi limha shilo kisü potsow jiangjo ntia mekvü kümi sirathukvü osi jipo akvütona ombo ombo meta lona OPVÜI Potsow tae khümthukvü. 12 OPVÜI na Sudan kyon jiangha chüthukvü. 13 OPVÜI na ombo etho tsütsata Assyria ji roe siv. Nineveh yantsü jiha eyingkhfü-khfüna roe likying lijüng ekachi siv. 14 Meta shijo ekümrümo lantaro yantssophen osi yiphen tssov. Oki roe elio jianglo velongu na vani kherüki na khfüa vamvü osi kashak na kipünglan jianglo eshoni tsokphia khfüv. Oki jianglo Cedar tssüng mmhom jiang khi hansi yirae siv. 15 Yantsü kvümoena kangtsüa ntia tssov meka to nchüma ombo etholo zekae khünga vanchosana ji hetüv kümi sithukvü. Yantsü shilo evan jiangna onte yantsü shijo limha shilo yantsü tsüphotso jika to nchümta vancho. Tokhatola hetoli sirhaki yingsi yinglona orae ekümrümo yiphen kümvü! Osi kyon kvütana yakchia sana ekyu lona sülamoe eselana tüv meta kümi sithukvü.
Jerusalem Mmen Osi Rhancholamo Ji
1 Jerusalem jo monthukvü, yantsü kvümoe na ombo kyon jiang nyimthechia osi Potsow mhadungo khirankhiria evan sana hoji. 2 Ntiotssole yantsü jina Potsow yi n ngacho osi elanchoyio ji n khichocho. Yantsü shina OPVÜI lo longtsüka n licho osi ombo thüngina nzanchi n yancho. 3 Yantsü shilo tsüphoeden jiango hingho erhyua vancho tüv tae; osi yitssoe jiango ranfüden na wonton lona oryu motsünga tia enyathüng jana n vana nkhyiknrüka tsoa vancho tüv. 4 Zenkhying jiangna ha onte elhi n chethe osi kyakrümden; pvüti jiang naha ntio ntho sana jiang mmena osi Potsow shikhfü jiang mpato tongphi onte eman tsükona tsütsata evanden. 5 Tokhatola OPVÜI na yantsü jilo vanpvü, osi ombona elamo ji yaka n lamo ji n tsso. Enya akvüto n khachona, ombona ombo kyon jiang pono ntsaji wondang esüa benphiala. Tokhatola n tsa-nrük kyon jilo evamo jiangna yikra n lina n lamo. ji tae tssota vanala. 6 OPVÜI jina phyoala, "Ana jipo mpüm khi sithaka; ana onte yantsü osi yantsü pikhfü elani rizümphen zenki jiang topvü roe siyithaka. Yantsü jiang kyon na sirhakthaka elani lantsüi jiangha ejüngthaka osi tsüka tia enhyoe n van. 7 Ana heto onte thüngi engathewo tssoa thangshina a kyon jiangna a yikrachiv tssovka, osi ana ntio onte tssoyicho sana hoji kvüthüngha mhechov meka to nchümcho. Tokhatola nsungkhüngu ovüngthüng ji esüa n mhom tssotalana yithaka. 8 OPVÜI na phyoala."Zeta vantava," "Ana jipo jiang pono nlan pia phanthiv ji tsüngon ji nhyaka vantava. Alümbüm etsukji onte khi chancheta ntsithukvü tsükona, jipo osi ekhüngyan jiang hanrhyuv ji a lümbümi na zikathaka. Limha mpüm totona a lümbüm etsuk mi jina roe sivka. 9 "Tosanati ana jipolan topvülo kyon jiang khophithukvü osi ontena a thüngi yaka potsow thanpo thüngi randanthukvü meka. Hoji süijo onte topvüna a yi engavka. 10 Osi Sudan janae na a kyon tsanroe evamo jiangna othan hansi a thüngi rov. 11 Hojithüngjo nte a kyon jiangna tsüngon motsüngalojo apanlanchoka toji nchümi nte n yikrav siv. Osi ochoang kvütatana emhan ekhüng tssoa kangtsüa sana jiang topvü khi siv, osi ntena elani khi a ntho phunglan jilona a n panlamvü tssov. 12 Ana hojilo eyingroe osi teri kümi a thüngi ekhyo yana eroe tüv kyon vanthukvü. 13 Israel kyon ochoang eküm valanchicho sana jiangna ochithüngiha n mhon n tsso, osi ejüngha n phyo osi oyamha n jithechi. Ochia ekyuv n lina, pvülyu hanlyua onte kümvü."
Longshi Khen
14 Israel kyonden, ematha lona tüngkachia dena! Ni lümbüm totona longshia, Jerusalem! 15 OPVÜI na ni khangshioji esanthaka; ombona ni ri jiang topvü khi sithaka. OPVÜI, Israel mesao ji, ni mhadungo vana; Enhungo ntia ekyuv lanka nli. 16 Ontena Jerusalem thüngi heto ezov yuta ji tsathaka, "Tikyua, Zion yantsü! Ni khe ji ti n michochia! 17 Ni OPVÜI Potsow ji ni thüngi vana; ombo etho jina ekhyo ni piv. OPVÜI na ni pono emathav, osi ombo nzan khi eküm ethan nipiv. Ombona longshia okhen ni denkav, 18 tokhu yutalo longshita to tssov." to OPVÜI na phyoala, "Nte monthukvü khen oyiji ochüm tssothukthaka osi yikrachi ji khi nte siyithaka. 19 Nte khangshio jiang ana ezüp epiv yuta tsathaka! Ana jojangha shanchov, osi a kyon tsanthan tssota evamo jiangha oki sosi yilam. Yikra ji ana mying thüngna onte tongcheyiv, osi limhatsüna onte thünguv. 20 Ana a kyon tsanroe evamo jiang solansi eyiv; yutaji tsathaka! Limha topvülo thüngche nte kümthukvü osi elani ejüeli nte kümthukvü." Hojito OPVÜI na phyothaka.
Ekhümki Ji Tssocholam Tsükona OPVÜI Thüngina Yizüng
1 Darius na Persia lo mesao tssosi nzyu enioto rheyiathüng choro tiroko tojilo tsüngon jandemo jilo, OPVÜI na zenkhying Haggai yakchia heto phyocho. Yithen jijo Juda lo esapvüi Shealtiel tsoe Zerubbabel tona pvüti ntssontso Jehozadak tsoe Joshua to oni thüngi rothukcho. 2 Tokhamo OPVÜI jina Haggai thüngi heto ezocho, "Kyon shiangna enhünga jo ekhümki ji tssocholan yuta mek." 3 Hoji tsükona OPVÜI na Haggai yakchia kyon jiang thüngi yithen heto picho. 4 "a Kyonden, a ekhümki ji roe ekachi vasi nteno ntioli oki mmhom lo vantala? 5 Nte thüngi ntio tssoa vanchosana ji ntena n hungchoke? Elanchoe khitava. 6 Ntena mojü elüm thecho khatola tara tae richocho. Nte tsopan jo lia, khatola nte mmhia tsochyua jo n li. Ntena zükhi eyuv lia, khatola nte yuchyu n li! Ntena mpensü nte ekapan jo lia, khatola nte lüma mpemo tüv jo tssona n li. Elani jokheman mmyutsoe jiang naha onte tsochyua n myocho. 7 Shiango ntio tsükona heto tssochosana ntena n hungchoke? 8 Enhungo ntena phunglani sankae, otssüng rhütava, toli hoji hani ekhümki ji tssolantava; tona ntio kvüto a phfütssonthuka a khümphen sana ji esüa a khümchev osi a emathav. 9 "Ntena khosha richov eyilocho khatola elümoto mataroa richocho. Osi ntena kvüthüng hojiang oki hansi yichosana, ana mhüi shümthe nte siyicho. Osi ana hojito nte tssoyiwoji jo, a ekhümki jo roe ekachi vatasi nte otsük akvüna nte ki tae n tssochov elhita evamo ji tsükona 10 Hoji tsükona eryu n jothukcho osi ntia n rankathukcho. 11 Hoji tsükona ana nte likolo osi phunglan jianglo tssuk-omüm, jününgroli, olive phari osi likoena ntio chiyiphen sana jiang topvüto pono tona nte pono, osi nte ekümrümo pono elani ntena ntio rankathukvü ekhyo tssoa sana jiang topvü pono tsüngkying rheyithukcho."
Kyon Jiangna OPVÜI Yizüng Ji Engacho
12 Hoji süijo Zerubbabel, osi Joshua elani kvütatana Babyloni tsanthan ekümo vansi elani yicho sana jiang topvüna OPVÜI na kvüto tssoleto onte ezocho sana ji ephan oyi enga tssotacho. Osi ontena zenkhying Haggai OPVÜI yithenpvüi ji kyua oyi engayitacho: 13 Hoji süijo Haggai na OPVÜI yithen ji kyon jiang thüngi heto picho: "Ana nte ndüngo tssovka hojijo a echümchak." 14 Otsük akvüna ekhümki elhi etssov tsükona OPVÜI na lümbüm nthiphiyicho: Zerubbabel, Juda lo esapvüo ji, elani pvüti ntssontso Joshua osi kyon kvütatana Babyloni tsanthan eküm lona kholani yichosana jiang topvüto nthiphicho. Osi hojito onte topvüna OPVÜI Tokhamo Potsow ekhümki ji tssolamvü benkacho, 15 Hojijo Darius na mesao tssosi nzyuasi choro tiroko tojilo tsüngon mekyusi mezhüo to jilo tssocho.
Ekhümki Ethan Ji Phfütssonji
1 Nzyuasi choro tiruksi tsüngon mekyusi ekhao-tolo, OPVÜI na Haggai yakchia heto phyolancho. 2 Osi Ombona Juda lo esapvüi Zerubbabel tona pvüti ntssontso Joshua, osi Israel kyon jiang thüngi heto ezoleto zenkhying Haggai thüngi ezocho. 3 "Nte yulo ochona sana ekhümki ovüngo jijo kvüta monkhüm lia emüngyanthav tüv sana ji nchümchecho alo? Enhüngajo nteno kvütüv zechetala? Ntia mek-nrüngcho esüa tüv kümthaka. 4 Tokhatola nte ochinaha lümbüm ti-teritakhe, elhi ji tae tssotava, ana nte ndüngo vanka. 5 Ntena kvüthüng Ejip lona khochoki chiyicho sana jithüng ana nte ndüngo tssovka to echümchakcho, osi enhünga jana ana nte ndüngo vana, hoji tsükona ntena ntia ti-kyutava. 6 "Nsungkhünguv ana Potsüo, liko, limha osi jümang shi enhyokthukvü sala. 7 Jipo topvü ana khi siv, osi onte ejüeli topvü shilo hansi oyi ekhümki shiji ejüeli na pyingi vav. 8 Limha shilo shona osi janti jiang topvü a echi. 9 Ekhümki ethan jijo ehen jilona monkhüm lika tssov, osi ana a kyon jiang tssochyu-mochyu osi noying piv." Tokhamo OPVÜI jina phyothaka.
Zenkhying Jina Pvüti Ji Ngatüng-ngariala
10 Nzyuasi choro tizasi tsüngon mekyusi mezhüoto Darius na esapvüi tsüphoji tssoa vanathüng, Tokhamo Thotsü OPVÜI jina zenkhying Haggai thüngi ezolancho. 11 Ombona heto ezocho, "Pvüti jina jo shi yi hetüv lojo kvüto phyovsana engae zeta. 12 Ejyukaena ochona sana othan lona nthochethakcho tüvlo oso khi ombo süna eyuknhyae hancho. Tosi ombo sü-khyimcho ji khi hümrilo mekana etsoyu, zükhi, olive thyujü mekana etsoyu thamalo evüngkacho, tona etsoyu jiang jitaena lea nthochecho etsoyu küma alo?" Kvüthüng shi heto engachosana pvüti jina, "Hojito mek." to janlancho. 13 Jisüi jo Haggai na engalancho, "Toka ejyukaena kyon tsükana echümüng evüngkana ombo mmenala. Tole ombona etsoyu shianglo evüngkana etsoyu jiangha mmeni siv alo?" "Hojijo hoto tssov." to pvüti jina janlancho. 14 Hoji süijo Haggai na ezocho, "OPVÜI na phyoala, hoji esüa jipo kyon shiang thüngiha hojito tssovka, onte khe lona ntio chenana osi ntio chiyithukana osi ontena ntio thanpheni hansi woa sana jiang topvü mmen tssovka."
OPVÃœI na Mmhayiv Phyochakala
15 OPVÜI na ezoala, "Ntena ekhümki ji tssolamvü n benkathüng, nte thüngi ntio tssocho sana ji n hungcho alo? 16 Ntena tsünghanro seri nzo eni jo hungu kato eyiloa wole seri taro tae hungcho. Ntena jününgrothi zümpheni etükpvü nzoajo hungu tssovka to eyiloa wole etükpvü zhüro tae hungcho, 17 Osi ana mpung n mhom tona sheri to vena jothuki ntena ntio kvütata benrochosana jiang topvü roe nte siyicho khatola ntena n khophi. 18 Nchüngo choro tokusii tsüngon mekyusi mezhüoto, ekhümki kimüng ji eshenthako ji tsüngon. Zetava, nchüngna benkae ntio kvüto tssovsana. 19 Benro n liv mpa sithaklia, jününgrodung, züvodung, tsarümthipen, osi olive dung ntia mpa n phanthihan mpa tssolea, tolea enhüngana benkae ana nte mmhayivka."
OPVÜI na Zerubbabel Thüngi Echümchak Piala
20 Tsüngon mekyusi mezhüoto tsüngon tsük jilo, OPVÜI na Haggai thüngi yenjo enioto yithen heto picho: 21 Zerubbabel, Juda lo esapvüi ji thüngi ezoa, "Ana limha osi potsüo shi enhyokphivsala 22 osi ekhüngyan jiang etho jiang topvü monthukvü, osi ritsso zotoro kurü jiang nkhümi siv; osi kurü jiang chükhamvü, elani jilo tsankae jiangna onte onte lüngthatay. 23 Osi a nri Zerubbabel, hoji tsüngono ana a myingona esapvüi etssov ni rheyithukvü, ntiotssole ana ni ethüngchethaka." To Thotsü OPVÜI jina phyothaka.
OPVÜI na Ombo Kyon Jiang Ombo Thüngi Kholanle to Tsala
1 Darius na Persia lo ekhüng sasi nzyu enisi choro tizaoto rheyiathüng Iddo tsorüi Zekhariah zenkhying Berechiah tsoe ji thüngi OPVÜI na yithen heto rothukcho. 2 Thotsü OPVÜI jina kyon jiang thüngi heto ezole to Zekhariah ezocho, "A, OPVÜI shina nte pyimtsümotsüi jiang thüngi elümoto alüm n tsso, 3 tokhatola enhungo ana nte ezoaka, a thüngi kholantava, tona anaha nte thüngi rovka. 4 Nte pyimtsümotsüi jiang esüa ti-tssotakhe. Nkolona zenkhying jiang yakchia mmen ti-tssotale, osi eküm n mhom ti-vantale, to nte ezocho. Tokhatola ontena ayi n nga osi jancho nzo. 5 Nte motsüi jiangha osi zenhkying jiangha enhungo ochia eküm n vamvü sithaka. 6 Osi a nri zenkhying jiang yakchia ndangshon osi yidan onte piaha, ontena hojiang ji n kha n zi ntsa, küma ji man onte ezüpcho. Ana zikao ji esüa ontena ezüp ehungu etüm elioji ezüp hungsanati A, Tokhamo OPVÜI jina onte ezüpthukala to chethei lümbüm khophicho."
Zenkhying Jina Kurü Lona Chethev Ehungoji
7 Darius na Persialo ekhüng sasi nzyuasi choro taro ekhaoto Shebat choro tsüngon mekyusi mezhüo to jilo zümothüng müngdüngina yithen heto apicho. 8 Osi OPVÜI na lanben kurü rakiv lo tsankae roa ana hungcho. Osi ombona lihayitsü jilo myrtle dung yulo esancho, osi ombo sülamiha kurü rakivtona parakvü elani ehümvü to khosha vanracho. 9 Tole ana, "Tsüphoeyo, kurü shiang yichak jo ntiola?" to ombo engacho. Lanben jina shiangjo, "Ntio ytehaksana ana ni ejüvka to ombona a janlancho. 10 Osi OPVÜI na limha shi rhüi ezev tsükona rothukchoka to a ezocho." 11 Osi ombona lanben ji thüngi: "Limha shi mpüm ena khyue zethaka tole ombobo n phanthikhokvü khyothechi lia," to janlantacho. 12 Tole lanben jina phyocho, "Tokhamo OPVÜI, nina Jerusalem pono osi Juda lo yantsü jiang pono ni lüm tsuksi nzyu ekhatiying tssothaka. Tona elani nzyu kvüta jana khonzan to onte n tssov vampamvüla?" 13 OPVÜI na lanben ji lümbüm emiyi khi janlancho, 14 hoji tsükona OPVÜI na: "Ana Jerusalem kvümoe ntho yantsü sana ji elümoto a nzanala osi ana ompvü mmhon tsükona nchümala, to phyoji, thenchole to lanben jina a ezocho. 15 Elani OPVÜI na phyolancho, jipo kvümoena yingying khetsü n lina noyinga vanchosana jiang thüngi a lüm tsukala. Ntiotssole ana a kyon jiang pono a lüm etsuk ji tssünglana vanathüngna jipo n mhon jiangna kyungkata a kyon jiang ezüpthükala. 16 Hoji tsükona ana Jerusalem yantsü ji nzamvü tsükona elani rocho. Osi a ekhümki ji tssocholani, yantsü pikhfü jiangha tssolamka." 17 Lanben jina shiangha thenchole to a ezocho: "OPVÜI na ombo yantsü ji, elani tssochyu mochyu yantsü kümlamvü osi ombona Jerusalem ji nzanchilamvü, elani ombona yantsü ji ombo echi to hov, to thotsü OPVÜI na phyoala."
Mangsüpong Ejü jilo Chekav
18 Elani ana omüngina mangsüpong ejü mezhü hungcho, 19 osi lanben ochona a thüngi janta vanchosana ji ana engalancho, "Ejü shiang yichakjo ntiola?" Tole ombona, "Shi yichakjo limha etho kvümoe na Juda kyon, Osi Israel elani Jerusalem kyon to jiang limha nzüpyingi hanrorae sithukcho sana jika," to a janlancho. 20 Hoji süijo OPVÜI na elhi etssoe nchyu mezhü vümphen ben si vana a hungthuklancho. 21 Hoji tsükona "kyon shiang jo ntio elhi tssolo rochola?" to ana engacho. Tole ombona heto e janlancho, "Onteno ochoangna Juda metaji roe khi kyon jiang phanroe sichosana jiang ekhenrhükthuka khi esiv tsükona rochoka to a ezocho."
Etsiphenzhü Hungthoko Ji
1 Enhüngaha elani kyon tsükana etsiphenzhü bensi vana ana hungcho. 2 "Nino kvüi yiala?" to ana engacho, Tole "Jerusalem ji etsüi osi esi ji kvüta sana ji etsii zelo yiaka" to ombona a janlancho. 3 Jisüijo lanben ochona a thüngi janta vancho sana jina mhadungoe chiyicho osi tothüngji lanben tsükana ombo nduko roa ana hungcho. 4 Lanben ovüngo jina rokhao ji thüngi heto ezocho, "Khyingroe etsiphenzhü bensi evamo ji thüngi yunga woa, osi Jerusalem yantsü shilo kyon tona ekümrümo to elümoto ranakata yiv sala, küma nti epinaha tssom meka to ezoa. 5 Elani OPVÜI na ombona ombobo omi pikhfü kümi yantsü ji nkona nhyaka vamvü to echümchakthaka; osi ombona hojito tssona nchünkhonto ombo phfütsson ji hojilo lia vanthoku tsükona."
Babyloni Tsanthan Tssota Evamo Jiangji Okiwoe Tsalancho.
6-7 OPVÜI na ombo kyon jiang ezocho, "Ana meta nken topvülo nzüi nte sicho. Tokhatola enhungo nte kvüta Babylon metae tsanthan tssota vancho sana hojilona tsanchuki Jerusalemi yilantava. 8 Ntiotssole ochoangna nte ezüpthuka vancho sana jiangna atsükona tsentsüman esüa etsso jiang ji ezüpthokthaka." Hoji tsükona Thotsü OPVÜI jina jipo ochoangna ombo kyon jiang phanroe ezüp pia vancho sana jiang thüngi yithen shi hansi a rothukcho. 9 "OPVÜI jina ombobo nte thüngi rotav, osi yuta motsüngalo kyon ochoangna nte nri tssota vancho sana jiang na nte khyolamvüka." Osi kvüthüng elhi shi benasana Tokhamo OPVÜI na a rothukcho to ji otsük akvüna ntsiv. 10 OPVÜI na phyoala: "Longshi lona okhen dentava, Jerusalem kyonden! Ntiotssole ana nte nzo evamvü tsükona tsata!" 11 Hoji yuta lojo jipo elümoto na OPVÜI thüngi rov osi ombo kyon kümrav. Ombona onte nzo vamvü osi ontenaha ombona nte thüngi arothukcho toji ntsiv. 12 Elani Juda jijo ombo ntho meta jilo OPVÜI echi mmhontso ji kümvü, osi Jerusalem jo ombona nzantso yantsü ji tssov. 13 Otsük akvüna OPVÜI vanhyalo jükrüpi vantava, ntiotssole ombona ombo ntho vanpheni na tsata.
Zenkhying Ji Thüngi Pvüti Ntsontso Ji Hungthokcho
1 Elani müngdüng motsünga yakchia Joshua pvüti ntsontso jina lanben ji mhadungo manga vana a hungthukcho. Osi Joshua ndüngo tsüngrham ha ombo nlan pia ehungpvüi etssov tsükona mangkachi vancho. 2 Hojilo OPVÜI lanben jina tsüngrham ji thüngi ezocho."OPVÜI khi nlan ni pithokvü ka, tsüngrham! OPVÜI ochona Jerusalem ji nzana vancho sana ji khi nlan ni pithoka! Kyon shijo nchü kvüina michüm efüi khicho esüa tüv." 3 Joshua jo hojilo mpensü mmen ekasi mangkachi vancho. 4 Osi lanben jina potsüwoe ombo jenchi engae jiang thüngi heto ezocho, "Kyon shina osü mmen ekao jiang khi siyia." Tosi lanben jina Joshua thüngi ezocho."Ana ni mmen jiang khi ni siyithaka, küma enhungo osü ethan ni ekathokvüka." 5 Hoji süijo ombona Joshua ji osü ethan khi kvüri khüngile to phajae jiang ezocho. Tole ontena hoji esüa tssocho. Osi lanben jina jilo mangi zeta vana Joshua ji süthan khi ekathokcho. 6 Tothakale lanben jina Joshua ezocho, 7 OPVÜI Thotsü jina phyothaka: "Nina ayi enga, ana elhi ni zikao jiang tssoa vana tssona, a ekhümki jilo, elani yitssophen jianglo to esapvüi ji tssoa ni vanthokvü, osi ana kvüto lanben ochona a vanhyalo vancho sana shi randan enagyicho sana ji esüa ni randan ni engayivka. 8 Hojitsükona enga Joshua, nino pvüti tsüphotso jika, osi nteno ombo jokim etssoeden, ntenaha enga tssona nteno mhadungi ntio mmhom licho sana ji chekav jiangka. Ana aphajae Khero to etsao ji nte hungthokvü! 9 Osi ana olung omha tiying mpata tüv Joshua mhadungo ekachiala. Ana hojilo ntiona erankae vav, osi hoji enga yutalo taena ana meta shilo mmen jiang khi siv. 10 Kvüthüng hoji tsüngon ji yia sana nteji jününgrothili tona züvodung tona nte hachümi, nte otsük akvüna nte phinakishüm jiang tsae noying osi lümbüm enan nkoho ji shümnhyavka."
Milondung Hungthuko Ji
1 Lanben ochona a thüngi janta yichosana jina a thüngi rolancho osi a ji yipa vancho esüa a nthechicho. 2 "Nina ntio hungala?" to ombona a engacho. "Milondung shona na nsüngrücho tüv hungala," to ana janlancho."Milondung ji kvüri jo mijü thephen vakuk ekachicho. Osi milondung jilo milon tiying mpacho, elani onte akvütolo omi njükaphen yingzhü tiying mparacho. 3 Milondung ji pondüng olivedung enini licho." 4 Hoji tsükona "Shiang yichakjo ntiola?" Tsüphoeyo, to ana lanben ji engacho. 5 "Nino shiang n tsichoke?" to ombona ezolancho, hoji tsükona, "Ana ntsika tsüphoe yo," to janlancho.
Potsow na Zerubbabel Thüngi Echümchak Pioji
6 Lanben jina OPVÜI yithen shi heto Zerubbabel thüngi pileto a ezocho."Nina rasan etho mekana ni ethona mek, tolea a nthomon etho ji yakchia khyovka. 7 Ni mhadungi phunglan esüa khetsü elio jiang moni siv, osi nina ekhümki ji tssocholamka; osi nina olong wokhaoji ekachiathüng kyon jiangna, 'Emüngyanthav, Emüngyanthav!' " to tüngtav. 8 Elani OPVÜI thüngina yithen heto yilancho, 9 osi ombona phyocho, Zerubbabel na ekhümki ji soyingthaka osi ombona hoji thaka tssov. Kvüthüng hoji thakana tothüngti OPVÜI na onte thüngi a rothukcho toji ntena ntsiv. 10 Ovüngthüng jo elhiji n tssorhüpo jina tara lümbüm teria to tssov, tokhatola Zerubbabel na esan n lina tssoe, tssochokchiana onte emathav." Tole "Milondung tiying jiang yichakjo OPVÜI mhyik tiying, kvümoena limha topvü hungkhana vanchosana jika" to lanben jina a janlancho. 11 Jisülojo ana ombo engalancho, "Tona olivedung enini midung ji pondüng lio jiang yichakjo ntiola, 12 elani shona na nsüngrücho mijü yenphen eni ji tssalo olive khero eni elio jiang yichakjo ntiola? to ana engacho. 13 Tole ombona "Nina n tsichoke?" to a ezocho, hoji tsükona 'Ana n tsika tsüphoeyo,' to janlancho. 14 Hoji sülojo ombona a ezocho, "Eni shi yichakjo limha shi mpümto lo OPVÜI Potsow jina thyujü nzüyia ethüngchei vanthuko kyon nchyu eniji yichak ka." to azocho.
Kako Shücho Tüv Pya Yia Hungthoko ji
1 Ana a mhyik kükae zechile yuta shilojo kako shücho tüv jina ezhüina pya yia hungcho. ji n jakthena yithukvü tsükona shilo 2 Tothüngji lanben jina ana ntio hunga sana to a engalancho. Hoji tsükona, "Kako shücho tüv ji pya yia hungala" to ana janlancho; osi hojijo esi meter 9, etsüi meter mezhüsi chiso to tssocho. (Mekana onchüm tokvü, onchüm mezhüsi chiso) 3 Jisüijo ombona heto a ezocho, "kako jilojo etsso randanka kümoe meta shi totolo nzüa yithokvü sana ji erankacho. Kako ji phokowoe jo efüi otsük akvüto meta shilona khi siv to erankacho; osi phokowoe jo ochoang kvütatana ejüng echüma sana jiangha khi hansi yiv to erankacho. 4 Thotsü OPVÜI jina phyoala, Shi etsso randanka ji meta topvülo yithoku osi efüi elani ejüng echüm jiang ki topvüto lo rhowothokvü. Osi hojina oki jilo vani okiji roe sithokvü."
Dekho lo Eloe Rhowoe Vancho Hungthoko ji
5 Lanben jina elani chirolani heto a ezocho, "Zeta! ntiona thanpo tsalanka!" 6 Jijo ntiola to ana e ngacho, Tole ombona a ezocho, "Dekho motsünga osi shi yichak jo meta shi topvü mmen ji." 7 Dekho ji elhüp jijo yonkjaksha na nsüngrücho. Osi ana zeta vanle elhüp ji chonchicho osi hojilo eloe khokthei vana hungcho! 8 Lanben jina phyocho, "Eloe shi ejyukajo kyon jiang nlan n mhon jika." Hojito phyoa eloe ji Dekho jilo khyanthechisi elhüp ji khani sicho. 9 Tosi ana engokae zele eloe otsük eni jüworo echo esüa tüv mpata elümoto etho lia jitüv jiangna a thüngoe pyata rocho. Osi ontena dekho ji khikae hansi pyata yicho. 10 Ana lanben ji "Onteno kvülo hansi yitala?" to engacho. 11 Tole ombona "Babylon metae, osi ontena hojilo ekhümki tssoe ekhümki ji kvüthüng thaka sana Dekho ji jilo vae khi hoji khümtav sala" to a janlancho.
Kurü Zotoro Mezhü Hungthoko Ji
1 Elani müngdüngina thanpo heto a hungthoklancho. Hojijo yongmem yonjak phunglan eni ji yuta lona ritsso kurü zotoro mezhü chiyia hungcho. 2 Osi zotoro ovüngo jijo kurü myonshiv tüv na sücho, enioto jijo enyikvüna, 3 ethümoto jijo ehümvü na; osi wokhao mezhüoto jijo parakvü na to sücho. 4 Jisüijo ana lanben ji engacho, "Tsüphoeyo, ritsso kurü shiango ntio ejyuka ato?" 5 Tole ombona ajanlancho, "Shiango mpung nken mezhü lona chiyio jiang yichak, osi onteno OPVÜI vanhya jilona limha shi topvü lona rothukcho." 6 Zotoro kümoe kurü enyikvü na sücho sana jijo Babylon meta khümkiwoe chüngia vancho, osi kurü ehümvü jiango engrhelamoe yicho. Elani kurü parakvü jiango jolowe meta jianglo joyicho. 7 Kvüthüng kurü parako jiang chiyicho sana onteno limha ji zeta ewov tsükona elümoto n vankemvü to tssocho. Hoji tsükona lanben jiha ezocho, "Nra owo limha ji rhüi zetava!" – tole ontena hojito tssocho. 8 Hoji süijo lanben jina tüngkachia azocho, "Kurü kümoe na Babylon meta khümkiwoe chüngicho sana jiangna OPVÜI lümbüm etsuk ji kyimjoyithaka."
Joshua Kikhothoku Yizüng Epio Ji
9 OPVÜI na yithen shi heto apicho, 10 osi ombona a ezocho, "yantso kümoe morantsan Hildae, Tobijah osi Jedaiah tona hansi yicho sana ji khi hansi zakto Zephaniah tsoe Josiah ki woa. Shiang on-mezhüata na Babylon lona kholani yikhanthaka. 11 Osi ontena epio Shona Janti jiang khi kikho joe pvüti tsüphotso Jehoazadak tsoe Joshua ji kikhothuka. 12 Tosi ombo ezoa, Thotsü OPVÜI jina phyoala, 'Kyon ocho rankata eyio khero' to tsacho sana ji shilo vana osi hojina OPVÜI ekhümki ji tssocholamka. 13 Ekhümki tssov sa evamo kyon ji ombo, hoji tsükona mesao esüa ombona yikrachi hungu, osi ombona kyon jiang pono esapvüi tssov. Pvüti na ombo vantsü lona phanthiv osi ontena noying tona mmhonta to khi onte nzo elhi tssokyiptav. 14 Osi myingthüng kikho jijo OPVÜI ki jilo Hildai, Tobijah, Jedaiah osi Josiah to jiang nchümchephen ji tssov." 15 Meta ekoni evan kyon jiang na sana oro OPVÜI kiji kyota tssocholamvü. Osi kvüthüng OPVÜI kiji tssocholana sana tothüngti OPVÜI na nte thüngi a rothukcho toji ntena antsivka. Ntena OPVÜI Potsow yiji bena enga benphia tssona shiang hetopvü ji tssochevka.
Oponina Khango Jijo OPVÃœI na N khichoala
1 Darius na ekhüng sasi nzyu ethümsi choro tokuoto tsüngon mezhüo tolo (kislev chorolo) OPVÜI na yithen heto apicho. 2 Bethel kyon jiang na Sharezer tona Regemmelekh to oni onte kyon jiang nzo Tokhamo OPVÜI ekhümki na mmha chona randam tsükona tona 3 pvüti osi zenkhying jiang to thüngi, "Ekhümki roe elio ji tsükona etena nzyu elümoto yithako ji choro mongo to jilo khangta rotako ji esüa khangtalana nungratavalo?" to engav tsükona rotacho. 4 OPVÜI yithen ji heto athüngi yicho. 5 Osi heto a ezocho."Meta kyon osi pvüti jiang thüngi heto ezoa, Ontena nzyu ekhatiying yuta shilo choro mongo tolo khangta nungrata eroji a yikrachi lona mek. 6 Elani ontena kvüthüng tsoyutacho sana jiangha onte lümbüm pükthokvü osi wonton era monthokvü tsükona tae tssocho." 7 Kvüthüng Jerusalem ji tssochyu-mochyu lo osi kyon na pyingi yantsü ji nkona oyan jianglo tae vancho mekna jolowoe elani engrhelan phunglan jpthe jiang mpa vanpyinga vancho sana jithüng OPVÜI na zenkhying ovüngo jiang yakchia shiang shi phyocho.
Jancho Nzo ji Yakchia Morantsan Ekümo Rheyicho.
8 OPVÜI na Zekharia thüngi yithen heto picho: 9 "Nkolona akyon jiang thüngiha heto yidan osi yizüng picho: Ntelo ntsa elhi ji lithokvü ka, osi nte nte yulo nzanta osi khonzan ejüta vantavka. 10 Elani nte yulo emi, Opvüopoe n van, metapoe kyon evamo jiang ti zerüptava osi ti-ezüpthuktava; mekana ochoangna nzanchi ethev licho sana jiang ji ti-sinkitava: Osi nte nte tssatssotao jitüv ha ntia ti-kyaktssotava. 11 "Tokhatola kyon jiangna onte lümbüm ekhüng lona a yi n ngacho. 12 Osi onte lümbüm jiang olung esüa khüngsi jina onte nchümri jiang khani sicho. Ntiotssole ana nkolona zenkhying ovüngo jiang yakchia püngnoyi nte picho khatola ontena a n ngayicho, hoji tsükona elümoto alümbüm tsukcho. 13 Osi ana onte janathüng ayi n ngatao ji tsükona ana ontena randanathüng onte n janlancho. 14 Ana mpung esüa lyui onteji metapoe evamo tssoa venthechi onte sicho. Hoji yakchia onte meta shiji kyon ochinaha n vanmvü eyingkhfü-khfüna sirhaki sithokcho."
Jerusalem ji Hocholamu Tsükona OPVÜI na Echümchakala.
1 Tokhamo OPVÜI Potsow na yithen heto Zekhariah thüngi pilancho. 2 Ana Jerusalem kyon jiang a nzankhüngo ji tsükona Jerusalem ji kyochiv nchümpvü osi hoji nzanji yakchia onte ri jiang thüngi a lüm tsukcho. 3 Ana ntho yantsü, Jerusalem jilo elani oyi vamvü. Osi hojijo longtsükao, yantsü, to tsav, osi Thotsü OPVÜI phunglan jijo ntho phunglan to tsav. 4 Elani khi eson eran, eboe, eloe eson lona jarung süsi sanphita vanthako jiangnaha yantsüi lantsü jianglo khothelamvüka. 5 Osi lantsü jiangji elani loro khyingroe na pyinglani khvüringashita to tssov. 6 "Jipo ochoang na Jerusalem sisi yithakchosana jiang tsükona jo shijo n tssochewo yi esüa tüv, tokhatola a tsükonajo shijo n tssochewo tüv mek. 7 kyon jiangji meta kvülona onte khi hansi yichosana jiang lona ana onte phancholamvü, 8 osi engchirolan, erhelan topvü lona onte sosi oyi Jerusalemi vanthuklamvü. Onteno a kyon tssov osi aiyo onte Potsow ochona ntsa osi elan lona onte sav sana ji tssov." 9 "Lümbüm tssontava! Ntiotssole ntena Jerusalem ji tssocholamvü tsükona kimüngji eshenchokchiathüng zenkhying jiangna nte ezovo yi jiangji enhünga ntena zolanala. 10 Hoji vüngijo ekyulona ochinaha kyon tssolea, ekümrümo tssolea, mmyolo n sotachecho, osi ochinaha ori khelona n tsanchocheo tssocho. Hojijo ombona kyon jiangji onte onte khontathukcho. 11 Tokhatola enhungo jipo shilo kvütata enhyokae vancho sana jiang thüngijo ana echümpo tsütsatala. 12 Ontena noyinga tenjü-mojü thechev osi jününgroli jiangna ethi epemvü, elani meta shilona tssokro-mümro liv; osi eryuha tssona jwothukvü. A jipo kyon enhyokae evamo shiang thüngi nkhon-mmha shiang hetopvüto onte piv. 13 Juda osi Israel kyonden! Vana rothako jianglo ha metapoe kyon jiangna onte onte heto rhiyi-randankatacho, 'Juda tona Israel to pono ntio ekhenthav n mhom tssoa yichosana hoji esüa nte ponoha tsswothukvüka!' Tokhatola enhungo ana nte shanchov, osi metapoe kyon jiangna ntelo ejyukata heto phyotav. "Israel tona Juda to pono ntio mmha yichosana hoji mmhaji nte ponoha lithukvüka." Hoji tsükona lümbüm tssontava osi ti-kyutava. 14 OPVÜI Potsow na phyoala, kvüthüng nte pyimtsümotsüi jiangna a lüm tsukthukcho sana ana ezüp onte epiv tsükona kyakcho osi a lümbüm n tongphina ana ntio etssov zikachosana jiang tssocho. 15 Tokhatola enhungo ana Jerusalem tona Juda tolo evamo kyon shiang mmhayiv tsükona tüma vana. Hoji tsükona ti-kyutava. 16 Ntena etssov elio jijo shiang etssov lia: Nte yulo ntsa nsantava, yitssopheni tssolea, ntsa-tsso – kvümoena noying mmhonta hansi yivsana ji benphitava. 17 Nte tssatssotao tüv ntia lanka ti-nsüngrütava osi ejüng echüma ehungpvüi ti-tssotava. Ejüng ephyo, n tsanrük osi jenpokta to jiang a tssakala." 18 Tokhamo OPVÜI Potsow na Zekhariah thüngi yithen heto pilancho: 19 "Choro mezhüo, mongo, tiyingo osi tarotolo ekhang khita nungrata ero jiango enhungo Juda kyon jiang tsükona ematha longshi tokhu kümvüka. Hoji tsükona ntena ntsa osi noying ji chokata benphiv lia." 20 OPVÜI Thotsü jina phyoala, "Yantsü elümoto lona Jerusalemi kyon erov ji yuta tsathaka. 21 Yantsü motsünga lona eroe jiangna yantsü thanpoena eroe jiang heto ezotav, 'Ena OPVÜI Thotsü Potsow ji thüngi mmha chona khümtavsala. E nzo rotava!' 22 Etho eli jipo kyon elümotona Jerusalemi na OPVÜI Thotsü Potsow ji khümo rorav osi ombo thüngi mmha chona randantav. 23 Hojithüng jo Jihudi kyon tsükalo metapoe kyon nchyu tarona heto oro ezov, 'Enaha nte ochyu-ovüng jilo ethenhyavo to nchümala, ntiotssole Potsowna nte ndüngo vanala to ena zothaka.' "
Israel Phinakishüm Jipo Jiang Thüngi Yitsso
1 OPVÜI yithen ji heto yicho: Hadrakh meta tona Damaskas yantsü toji ezüp epiv tsükona ombona yidan pithaka. Israel jipo jiang tae mek tolea, Syria yanpvü jiha OPVÜI echi. 2 Hamtah Hadrakh owo erüo jiha ombo echi, elani Tyre osi Sidon yantsü jiang osi onte tssothimori jiang topvü OPVÜI echi. 3 Tyre meta jijo epichaki vasi shona janti taena mmen mmyak esüa hanrhyui vathaka. 4 Tokhatola hojilo ntio kvüta lichosana jiang topvü OPVÜI na khi hansi yiv. Ompvü ejüeli topvü jümangi hanthechi siyisi yantsü jiha likolo nshüthechia rungi siyiv. 5 Ashkelon yantsü jinaha hoji hungi kyuv. Elani Gaza yantsü jinaha hoji hungi nungkhunungrav. Ekron naha hoji hungi ompvü eyilo ji senphia yiv osi Gaza jo ompvü mesao ji mpato moni siv elani Ashkelon jo kyon nvamvü sirhaki siv, 6 Jipolan topvü nzitae Ashdod lo vantav. OPVÜI na heto phyoala; 'Philistine kyon kangtsü kangri shiang ana joyithokvü. 7 Enhungo ontena oso jiang lo ejen jüa n tsso mekana OPVÜI na onte ekhamo etsoyu jiangha n tsolan. Kvütata enhyolanchi vancho sana jiang topvüna akyon esüa vamvü osi Juda pvüji lo khanhyae ejoena vamvü; Jebusite kyon jiang na kümo ji esüa Ekron kyon jiang naha akyon esüa kümvü. 8 Ana a metaji nkohoa vamvü osi oyam khi n yakchithoku tsükona rasan na nhyakyathokvu. Osi enhungo elani metapoe kyon khi onte n züpthuklan. Ntiotssole ana a kyon jiang ezüp ji mmhona hungthaka."
Ochyu Ovüngi Mesao
9 Longshitavaa, longshitava, Zion kyonden! Ematha lona tüngkachitava, nte Jerusalem kyonden! Zeta, nte mesao jina nte thüngi tsathaka! Ombona, tsoyokirina ekhyo hansi tsata, tokhatola eyingrotetükna Gadho mankvüi tsankae, Gadhoro esüa lümbüm enyip chancheta tsata. 10 OPVÜI jina phyoala, "Ana Israel thüngina ritsso kurü zotoro jiang khi siyiv. Osi Jerusalem lona kurü jiang khiv; ritssolo tsütsao lotssi jiang ha roe siv. Nte mesao jina jipo jiang yulo noying nsüngrüv. ombona jümang motsünga lona jümang motsünga jana sav, osi Euphrates zhükhfü lona benkae limha ochüm jana ombona sav.
Potsow Kyon Jiang Vachiv
11 OPVÜI na phyoala, "Ana thungthan epio ejen ji theta nte thüngi ntsata thako ji tsükona, ana nte kyon jiang etancho lo nte vachiv. Likying sokvü lona nte vünga evamo jilona nte vachi nte yilanthoku. 12 Nte morantsanden, kholantava, enhungo nteno eyilo lithaka; emhuk-elüm n li meta jilo yitava. Ana enhünga nte ezoala, ntena ntio ezüpa yithakcho sana jitüv man eni nte pilamka. 13 Juda jo rasan khelo lotsi esüa tsütsav osi Israel ji lotssitsüng jiang esüa tsütsav. Ana Greece kyon jiang thüngi rotav tsükona Zion kyon jiangji yonri esüa tsütsav." 14 OPVÜI jina ombo kyon jiang pono chirov; Osi ombona lotsi ji potsüo nlüpato shümchiv. Sandamo OPVÜI jina tatara won tssov, osi ombona tsungryu soa engrhelan jolowoena khochiv. 15 Thotsü OPVÜI Potsow jina ombo kyon jiang nkohov, osi ontena onte ri jiang roe siv. Ontena ritssophenina soko na kinoe na khfüato owon tssov, osi onte ri jiang ejen zaniv; osi hojiangna thung thanpheni phikok lona ejen phyangchukchiato tsüv. 16 Kvüthüng hoji tsüngon ji yiasana OPVÜI na ombo kyon jiang shanchov; Olyu rhüki na olyu ekyuv lona shancho ji esüa onte shanchov. Osi shona kikho na tsünglüpa vancho to onte metalona onte wondangu. 17 Hojito tssona meta jijo kvütata emüngyanthav jitüv tssov ato! Loro khyingroe jiangna onte tssi-osi tssüngthijü tsoyusi mmhona rankav.
Sochokyü Tsükona OPVÜI na Phyochakala
1 Tsüngkying yutalo OPVÜI thüngina eryu jole to chontava, ntiotssole eryu jothuka eluk emhenjü rümthoki, oli benro-niro jiang mmyaka rankathoko jijo OPVÜI thüngina yiala. 2 Kyon na kisü jiang thüngi tona ratsenrapvüi to jiang thüngi ngatüngngariala, tokhatola ontena ejüng tona ethev n lio yi to tae hungala. Ochoangna sanajo omüng khopi rüa nte ezoala, tolea ontena nte ezowo jijo ethev n lio khi lümbüm nte emiyia nte sosoracho tae. Kyon jiangna olyu khyumonchoto rümphitala. Onte yulo esopvüi n vamo jina hojito ezüptala. 3 OPVÜI na phyoala, "Ana metapoe kyon ochoangna akyon jiang pono sa vancho sana jiang thüngi a lüm tsukala, hoji tsükona ana ezüp onte pivsala. Juda kyon jiangjo a kyon, hoji tsükona A, OPVÜI Potsow na onte nküpnfüvka. Osi onteno a ritsso kurü etho ejüi esüa tssovka. 4 Onte yulona esapvüiden, esopvüiden osi zeyahoyaeden chiyirae a kyon jiang pono sav. 5 Juda kyon jiang jo ochoangna onte ri jiang ochon yulo tssethechicho sana ji esüa ekhyoeden tssovka. OPVÜI na onte ndüngo vamo ji tsükona rotalo rhovov osi onte ri kurü mankvüi rasan jiang lea khyothechiv. 6 "Ana Juda kyon jiang ji etho khyunga kümthokvü, osi Israel kyon jiango oyam khelona shanchov. Ana onte nzana nchümi onte topvü okiwoe solansi yiv. Osi ana echungatia onte n sinkihancho esüa tssov. Aiyo onte Potsow ji, hoji tsükona onte randan jiang engayiv. 7 Israel kyon jiango rasan esüa etho jüa kümvü osi zükhi yua evan esüa onte emathav. Onte tsoronichen jiang na shi ekhyo shi nchümchev, osi OPVÜI na ntio onte tssoyicho sana ji tsükona emathav. 8 "Ana a kyon jiang tsarhyuv osi onte kholuk motsünga tssothokvü. Ana onte phanchoe khi ovüngthüng kvüto wokyongcho sana ji esüa wokyonga kümthoku. 9 Ana jipolan topvülo nzüionte sicho. To mpa tssolea meta ekonina lea ontena a nchümchev. Onte osi onte ngaro jiangna eküm vansi tsüngona lojo onte nzo okiwoe kholani yiv. 10 Ejip osi Assyria metae na ana oki onte sosi yilamvü, osi onte metalo vanjünga vanthokvü. Ana Gilead tona Lebanon toloha onte vanjüng' thokvü, osi meta ji mpüm kyon na pyingu. 11 Kvüthüng ontena ezüp jümang jiang yakchia sana, A, OPVÜI shina jükyo jiang tanglanchi siv osi Nile zhükhfü jilea nghae sithokvü. Kangtsüi Assyria jiango yikrathokvü osi thotsü eli Ejip kyon jiango onte ethoji mpniy. 12 A kyon jiango ana etho jüa onte kümtokvü, osi ontenaha a yi enga a khümvü." To OPVÜI jina phyothaka.
Kangtsüi Jiang Elongthokvü Ji
1 Lebanon, ni kipüng jiang chonchia, to tssona omi jina ni metalo cedar dung jiang rungchev. 2 Erhyua kyatava, Cypress dungden, ntiotssole cedar dung jiang eyakhanthaka, osi thüngchedung jiang roe sikhanthaka! Bashan lo lümrodung jiang naha erhyua kyatava, ntiotssole ralungtsü ji tanrüpi sithaka. 3 Esapvüi jiangna nungra lona kyatala; ntiotssole onte myingthüng ji monthaka! Hingho jiangna erhyutao ji engatava, Jordan tssa rhüa onte vanphen ratsü jiang roe sithaka!
Olyu Enhyang Eni Jiang
4 A OPVÜI a Potsow jina heto a ezocho, "Olyu enhyang na olyuden sosi tatsüngo yia vancho esüa tssoa. 5 Onte pvüi jina onte lüngthacho osi ezüp jo n pi. Ontena oso ji yentasi heto phyotacho, 'OPVÜI thünga! Eiyo eli ekümthaka!' Onte enhyang jiang natia onte nzana n ehüm." 6 (OPVÜI na phyocho, "Enhungo limha shilo ana ochia a nzana nchümvü meka. Ana etana na abobo a kyon jiang ji onte esapvüi jiang khelo theyiv. Osi esapvüi jiangna limha shi roe khi siv, tolea hojiang etho jilona ana onte n shancho.") 7 Ochoang na olyu shii khi yentalancho sana jiangna a engatacho, osi olyu lüngthalo sosi yia evamo jiang enhyang a kümcho. Osi ana jarung eni khi motsüngajo "Ekyo-erung" osi motsüngajo "Khüngtsüta" to tsayicho osi hojito olyuden ji sheküpcho 8 Olyu enhyang nchyu ethüm ochoang na a tssakcho sana jiang thüngi n rümkhuk küma ana choroa yutalona phani onte sicho. 9 Hoji süijo ana oden ji "Enhungo nte enhyang tssov meka" to ezocho. Ochoang kvütata nte chüv licho sana to nra nte chüthoka, osi kvütata nte roe esiv licho sana to roe nte sithoka. Osi ochoang enhyokav sana jiangnaha ontepopo rorüptae sivka." 10 Hoji süijo ana jarung kümoe "Ekyo, mekana nzanchiwo" to tsacho sana ji khi OPVÜI na ntsatao ji ekilanala to ejoena khfüroe sicho. n Hojito ntsatao ji nchyukna ekilani sicho. Osi kvütata na olyu shii khi yenchenlana vancho sana jiang topvüna ana ntio elhi tssoa vancho sana jiang yakchia OPVÜI na ajanala to ntsia chetheta vantacho. 12 Osi ana onte thüngi ezocho, "Ntena a pihungna jokhemanji apia, osi a n pihungna jiha to ntena vata." Tole ontena jokheman ji jantirang thümro apicho. 13 OPVÜI na ezocho, "Orang jiangji ekhümki rangjeni thechia" Hoji tsükona ontenajo orang ji khosha apicho ka to nchüma apio jantirang thümro ji khi ana ekhümki rangjeni thechicho. 14 Jisüijo ana jarung kümoe "Khüngtsüta" to tsacho sana ji khi khüroe sicho osi hojito Juda tona Israel to khüngta ji moni sicho. 15 Hoji süijo OPVÜI na ezocho, "Elani olyu enhyang ethelan n lio jitüv ejyu-esü tssoa. 16 Ana a olyu jiang enhyang vanthukle, moni esio tssoa ekhenlung yilea n zeya, monlea jiha n yan, osi tssatssolea n tanüng mekana eküm evamo jiangha n süphi. Jithüngona jo beleo jiang tatsüngi oso ji tsosi khüpang jiang nrhakroe siala. 17 Hoji olyu enhyang ethev n lio jijo chüthaka! Ombona oden ji sithaka. Hoji tsükona ritsso yakchia ombo ethoji monlangi sithoku. Ombo khe jiangha mmikae siyiv osi omhyik amimoe jiha jukiv."
Ochyu-Ovüngi Jerusalem Shancholamvü Ji
1 OPVÜI ochona limha, potsüo shi nsüngrüi lithukcho sana osi kyon jiang thüngi eküm picho sana hoji OPVÜI ji thüngina Israel tsükona yithen heto yicho. Ombona phyocho, 2 "Ana Jerusalem ji zükhipvü esüa nsüngrüv osi ompvü nkonphia evamo jipo jiang na hoji yusi kinoeden esüa ngaphitav; osi kvüthüng yantsü ji hayata sana, Juda yantsü jiangha hayav. 3 Tokhataola kvüthüng yutaji jana sana ana Jerusalem ji olong mmyingu esüa kümthokvü osi jipo ochona hoji tssümphia sana jijo ombo tssatssov. 4 Hoji yuta jilojo ana onte kurü jiang topvü ekhenrhükthokvü osi hojianglo tsankae jiang topvü zhüvathokvü. Ana Juda kyon jiang jo nhyakyata vamvü tolea onte ri jiang kurü jiango omhyik jiang jukthokiv. 5 Hojito tssona Juda pvüji kyon jiangna ontebobo phyotav, 'Tokhamo OPVÜI Potsow na ombo kyon Jerusalemi evamo jiang thokhyung piala.' 6 "Hoji yuta jilo ana Juda pvüji ji orae omi esüa kümthokvü, mekana oli mhena vancho tüv lo omi rheyicho esüa tssothokvü – osi hojina onte nkonphia evamo jipo jiang roe sithokvü. Tokhatola Jerusalem yantsüi evamo kyon jiang jo nkocheta vamvü. 7 "A, OPVÜI shina ekhyo ji Juda thüngi vünga pidemvü, hojito tssona myingthüng osi yikrachi kümoe David tsoronichen jiang tona Jerusalem kyon to jiangna hunga sana jijo Juda thanpoe jiangna hungwo jilona tsüphokao tssov mek. 8 Hojithüng jo ochoangna Jerusalemi vancho sana jiangjo OPVÜI na nkohav, osi onte yulo mpentso jilea David kvüto etho jücho sana ji esüa etho ejüi kümvü; osi David tsoronichen jiangna OPVÜI lanben tona Potsow tona onte soa esüa onte sov. 9 Hoji yuta lojo ochoang kvütata na Jerusalem pono okhe theta phonkata sana jiang topvü ana roe siv. 10 "Elani ana David osi thanpoe kyon Jerusalemi evamo jiangji khonzan mon tona randan mon to theyiv. Osi ontena ejungtsüngi chüthpko jiang tsükona lea, kyon na tsonthi chücho nungra to ontena nungrayiv. Osi kyon na tsokhying eramo ji chüi nshüthechia kya to ontena nshüthechia nungrav. 11 Hojitothüng jo Jerusalemi nungkhfü nungra ji Megiddo hayi lona Hodadrimmon tsükona nungratao ji esüa nungra tsüphov tssov. 12-14 Meta jilo wopan topvü na nungrav, David tsoronichen Nathan lona chencheo jiang, Levi wopan lona chiyio jiang, Shemei wopan lona chiyio jiang, osi wopan thanpoe jiang topvü na wopan opan na nungratav. Elani wopan topvü lona eboe jiang na eloe jiang thüngi na echümporo nsichei khi owo nungra yuta khiv.
1 OPVÜI Thotsü Potsow na phyoala, "Kvüthüng hoji yuta ji yia sana jüzanjo chonchi David tsoronichen jiang tona Jerusalem kyon jiang to mmen osi kisü ekhüm elhi jilona epyochev. 2 Hojithüng ji kisü potsow mying jiang topvü ana meta shilona khi siv, osi ochinaha elani hojiang nchümchelamvü mek. ochoang na aiyo zenkhyingka to onte popo phyoa sana jiang topvü khi siv osi onte lo kisü ekhüm choka jiha moni siyiv. 3 Tolea ochoangna ejüngona zenkhying yi jiang phyolamvü ekhyo tssoa sana jiang topvü ombo ompvü opo jiang na onteji chüthokle to ezov. Ntiotssole ombona ejüng phyoa khatola OPVÜI yi phyoala to ephyoji tsükona. Hojito ombona ejüng zenkhyinga vanathüng ji opoha oyo onina yonkae chüthoku. 4 Kvüthüng hojito tssoa yia sana zenkhying ochinaha onte hungjan rüjan jiang khi kangtsüv mek, mekana zenkhying mpensü hansi kyon ejiphia wov mek; osi ejüngona zenkhying esüa n tssophyo. 5 Jithüngina jo, 'aiyo zenkhying meka. Aiyo lijonka, – a eküm echung oli jona vanpvüka' to ombona phyoa phanthiv. 6 Osi ochona sana 'Tona ni tekilo mhorhük mekana okhfü mpao jiango ntio tssochola?' to engana, 'Ashom ki woathüng a tssatssochoka' " to ombona janlamvü.
Potsow Olyu Enhyang Ji Chüthokvü Yizüng Epio Ji
7 OPVÜI Thotsü jina phyoala, "O yonri, Phanthia, osi a olyu enhyang ochona atsükona elhi tssoa sana ji phonkata! Omboji lüngthata tona olyu jiang tsanroe sivka. Ana meta topvü lo 8 a kyon jiang pono okhe thev, osi onteji echi ethümo echi enijo chüv. 9 Osi enhyokae evamo ethümo to jiang ji omina kvüto janti rungi khia sana ji esüa a kyon jiang ji riche ntssüngchev. Elani kvüto Shona richoe khia sana ji esüa ana a kyon jiang ejyui zev. Hojito tssosanati ontena a thüngi jonjia randam osi anaha onte janlamvü. To tssosanati onteno a kyon ka to ana onte ezov; osi ontena aiyo onte Potsow ka toji a phyochakvü."
Jerusalem Tona Jipo Jiang To
1 OPVÜI na yitssophen khokthephen jilo khokthev tsüng won ji enhyana tsathaka. Hojithüngjo Jerusalem ejüeli jiha mpüm na nte khiyiv, osi hojiang ji nte mhadungona oyam na chitae khiv. 2 OPVÜI na jipo topvüji motsünga tssothuki Jerusalem pono ritsso phonkav. Yantsü jiha rechoe khiyiv, osi oki elani ejüeli jiang topvü hani khiyisi eloe jiang thüngiha onte etancho efürama tssov, Kyon owo chiso jo metapoe tsanthan ekümo sosi yiv osi chisojo yantsü jilo valanchiv. 3 Hoji süloti OPVÜI na chiyi ovüngthüng tssoa rothako ji esüa jipo jiang thüngi rotav. 4 Hoji yuta jilojo Jerusalem na engkhfüwoe, Olive phunglan jilo ombona phanthiv. Hoji sülojo Olive phunglan ji hayitsü na yakchaka engchirolan tona engrhelan to eni chisoe siv; osi phunglan chiso jo khümkiwoe senphi chüngiv elani chiso jijo jolowoe senphi joyi to tssov. 5 Tothakana phunglan chisophen hayi jilona ntena tsanchuki yiv. Nte pyimtsümotsüi jiang na Juda lo mesao Uzziah echungo nri enhyokathüng tsana to tsamvü. Osi OPVÜI a Potsow jina, ombona lanben jiang topvü sosi rov. 6 Kvüthüng hoji tsüngon ji yiasana, etssük osi ronren elani 7 emüng to jiang liv mek. Zümolo lea eng wondang ji linrhüa vamvü. Tokhatola heto etssov tsüngon jijo kvüthüng tsov sana OPVÜI ji taena ntsia. 8 Kvüthüng hojitüv tsüngon ji yiasana Jerusalem lona jüthan tsüv osi chisojo echü jümang jilo rheyiv osi chisojo Medeterrenian jümangi tsüthev. Hoji jü jijo tsüngkying-ka nzyu-ka to mekna tsü-nrhü tsüa vamvü. 9 Hoji sülojo OPVÜI na limha mpüm tolo mesao ji tssov, osi otsük akvüna Potsow mying ji ntsiv osi ombo khümtav. 10 Tothakana khümkiwoe Geba lona benkae jolowoe Rimmon jana metaji totona hayi kümthoku. Jerusalem ji omhawoe ekhyonkachi ombo nkonphia elio meta jiang khümchochia vamvü; Yantsü ji Benjamin kipüng jilona nken kipüng ovüngthüng kipüng ehen ji jana tsüphoa tüv tssov, elani Hananel zenki ntssomo jilona mesaeden tsüngthijü mmyaphen ji nandang tssov. 11 Hoji yantsü jilo enhungo ntia roe esiv ekyusü n lina, kyon topvüna noyinga vamvü. 12 Osi jipolan ochoang na khümtsütae Jerusalem pono rits so phonka cho sana jiang thüngi OPVÜI na emhokthav nochonori n mhom jitüv rothoku. Eküm vanpvüna onte fü jiang konchora tüv tssov, osi onte mhyik tona nlyi to jiangha suktherae kyomvü. 13 Hojitoji kvüthüng tssoa sana kyon jiang hamatsüi ekyu lona onte phinakishüm jiang ji rhümae onte onte satav. 14 Juda kyon jiang na Jerusalem ji nkohav ekhyo tssoa rotav, osi Jerusalem nkonjano jipopoe jiang shona janti osi mpensü topvü hani khiyiv. 15 Nochonori n mhom tsotso tüv na onte mangsü kurü osi odh to jiang tona onte ri jiang vanpheni ekümrümo vamo jiang to topvü pono khyingu. 16 Hoji sülojo jipo ochoang na Jerusalem pono ori tssocho sana jiang yulo enhyokae evamo jiang na nzyu ebento onte nkohao ji müngyanchia OPVÜI Potsow khümo Jerusalemi wov. 17 Jipo kümoe na sana OPVÜI jo mesao tsüphotso ji to ejoena khümo n woa sana onte metalo jo eryu n jothuk. 18 Osi Ejip kyon jiang naha OPVÜI khümo n woa tssona osi nkoho ranki tokhu ji nkhia tssona, jipopoe OPVÜI n khümo jiang pono kvüto nochonori n mhom osi echü vara rothukcho sana ji esüa onte ponoha tssov. 19 Elani jipopoe ochoangna nkoho ranki tokhu ji n khicho sana jiang thüngi tsso ji esüa ezüp ji Ejip kyon jiang ponoha tssov. 20 Hoji yuta lojo kurü khyingtsü jiang lolea, "OPVÜI thüngi khochaki pithaka" to ejüpkae hanthoku. Ekhümki tssiphfühanphfü jiangha thanpheni phikuk tsütsao jiang kvüto ntho sana ji esüa nthoa tsütsav. 21 Jerusalem osi Juda meta topvülo tssiphfühanphfü jiang topvülo Potsow khümathüng tsütsav tsükona echümporo khochaki vav. Osi kyon ochoang na thungthan pia sana ji khi oso jiang ekvüphen tssov. Hoji yutaji kvüthüng yiasana OPVÜI Thotsü ji khümpheni shishoe ochia n vamvü siv.
1 Israel kyon jiang thüngi ezole to zenkhying Malakhi thüngi OPVÜI yithen heto rothukcho.
Israel Tsükona OPVÜI Nzan
2 OPVÜI na ombo kyon jiang thüngi heto phyoala, "Ana yuta topvülo nte nzana vanpvü." Tokhatola ontena janlantacho, "Nina kvütowoe na e nzanala to ejüchola?" Tole OPVÜI na janlancho, "Esau ha Jakob onio onjeni, tokhatola Jakob osi ombo tsoronichen jiang ana nzancho, 3 osi Esau tona ombo tsoronichen tojo ana tssakcho. Ana Esau meta phunglan jiang topvü roe siyisi meta topvüto shaeli vanphen kümthoki sicho." 4 Osi Esau tona ombo tsoronichen Edom kyon to jiangna "Ete yan jiang roe sithaka tolea etena elani tssocholantavka" to phyoa tssona, OPVÜI na heto onte janlam, "Nra tssocholantathuka, elani ana tssüngcholani onte siyivka. Osi kyon na, 'Mmen metaka' osi 'OPVÜI Potsow na onte pono nchünkhonto lümbüm etsuko jipo ji ka' to onte tsav." 5 Israel kyon shiang na shiji onte mhyik na hungu sala, osi ontena "OPVÜI jo Israel meta na pomoe lea Thotsü jika to phyotav!"
Pvüti Jiangji OPVÜI na Rarünga Makala
6 Thotsü OPVÜI jina pvüti jiang thüngi ezoala, "Otsoe jina opo-yi enga yikrachiala, nri jiangnaha onte pvüi jiang yikrachiala. Tona Aiyo nte Opo jila - ntio tsükona a n yikrachiala? Aiyo nte OPVÜI jila ntio tsükona a n kyuchiala? Ntena ayikrathuksi, "Ena kvütoli ni yikrathukchola?' to a engatala. 7 Osi shijo ntena thanpheni oman n lio etsoyu jiang thamo jiang yakchia ayikrathukcho. Tothakale 'Ena kvütowena ni yikrathukchola?' to phyotala. Tolea ntena a thanphen jiang n khicho ji yakchia ntena a n kyuchicho to ana nte ezoala. 8 Ntena kvüthüng othan piv tsükona ekümrümo mhyikjüng, jojang, osi nochonoria vancho jitüv hansi a thüngi rota na jijo woricho mekcho alo? Ntena hojitüv ekümrümo khi nte esapvüi jiang pi zetava! Tona ombona emathata khisi nte jonjiyi jiang nte engayiv alo? to alo ntiosana mmhom nte elümo tüv nte tssoyivla?" 9 Pvütiden, enhungo ntena ntiosana mmhom etssoyile to Potsow thüngi engae zetava. Ombona nte randan jiang nte nngayi, osi hojijo nte wori tsükona tssov. 10 OPVÜI Thotsü jina phyoala, "A thanpheni na ethev n lio omi etssov jilona nte tanglanchiv tsükona nte yulo ochona sana ekhümki kipüng ji khani sivo to ana nchümala. Ana nte thüngi a n matha-nrüng; küma ntena hansi erovo othan jiang nte khichoyiv meka. 11 Kyon jiangna limha ochümina ochüm jana a yikrachiala. Ontena meta topvü lona tssütsserhüm runga ana khichoyio than jitüv a thanala. Onte topvüna a yikrachiala! 12 Tokhatola ntena a thanphen ji ethev n li to phyota, etsoyu ntena mpa nte tsaka nte n jüpomo jiang hansi rotao jiang yakchia ntena a yikrathukala. 13 Osi ntena 'Ntio hetata esangtsünga elakchoto elhi tsük shijo!' to phyota nte kheno jiang shükae a zechitala. Osi ntena othan khilatojo, efücho ekümrüm mekana jojang mekana nochonori jitüv hansi rotala. Jitüv jiang ji ana nte thüngina khichov to ntena nchümta alo? 14 Ochoangna ombo ekümrümo denina mmhom khiche. a thamvü to echümchaksi mmhom vanaha, ethelan nlio jitüv khi a jiphia a thana sana jiang jo ana rhiyirandankavka! Ntiotssole aiyo mesao tsüphotso ji, osi meta topvülo jipo topvüna a kyuchiala."
1 OPVÜI Thotsü jina heto pvüti jiang thüngi ezoala, "Yizüng shijo nte tsükona ka: 2 Ntena ntio tssoa sana jiang yakchia ntena ayikarchi nrüngu shikhfü. Osi ana phyo shi ntena nnga tssona, tona ana nte pono etssorandanka yithokvüka. Ntena tsoyusi eküm evamvü tsükona ntio hunga vancho sana jiang pono nte randankayivka. Osi otsotso, ana onte pono randankathaka, ntena a yizüng jiang ji mmyinga n khio ji tsükona. 3 Ana nte ngaro jiangha ezüp piv osi ntena thamo ekümrümo jiang chhü khi omha nte nzüyisi ochhü phunglan jilo nte sosi chongov. 4 Tosanati yithen shiji ana nte picho to ntena ntsivka; osi to tssona ana pvüti tona Levi tsoronichen to jiang thüngi ntsatao ji n yeso na vamvü. 5 "Ana ntsata evao ji yakchia eküm osi tssochyu-mochyu onte epiv tsükona onte thüngi echümchakcho, osi ana onte epio ji hoji, hojijo onte khi a yikrachi-thokvü tsükona. Tsüngon yithako jiang lojo ontena otsotso a yikrachia a kyuchicho. 6 Ontena ntio jo elan sana ji püngno-tacho, nlamo jijo n püngnota. Ontena a thüngi mmhonta vancho. Osi ntiojo elan sana ji onte tsükona tae tssocho mek, tolea oyam jiangha n mhom etssov jiang lona esani esiv tsükona nzanchi-tacho. 7 Pvüti jiang elhijo Potsow ntsayi ji khi püngnov ji. kyon jiang na a lümbüm erüng ji ntsi ekhiv tsükona onte thüngi erov ethev lia, ntiotssole onteno Thotsü OPVÜI ji yithenpvüiden. 8 "Tokhatola, enhüngajo nte pvüti shiangna ntsa jilona nlüpi yithaka. Nte püngno yi jiang yakchia kyon elümoto n mhom etssov jilo sochikhanthaka. Ana nte thüngi ntsata evao ji ntena roe sithaka. 9 Hoji tsükona ntena n mhom tssoji tongche ana Israel kyon jiang khi nte yikvü-yilothokvü ka, ntiotssole ntena a lümbüm erüng ji n tssocho osi ntena kyon jiang thüngi püngoathüngha, otsük akvüto ji kheti n tsütsa, tolea phoko-jenshan tsütsacho."
Kyon Jiangna Potsow lo Longtsüka lia N vamoji
10 Eteno opo motsünga tso mekchoke? Osi ete topvüto Potsow motsünga na eliyingcho mekchoke? To tssona kvütoli eteno ete yutalo echümchaktao jiang roe sitavla, osi Potsow na ete pyimtsümotsüi jiang thüngi ntsata evao jiang etena kvütoli yikvü-yilovla? 11 Juda kyon jiang jina Potsow thüngi onte echümchak jiang roe sithaka, osi Jerusalem lo tona meta jiang to topvülo ekhenthav n mhom tssothaka. OPVÜI na nzamo ekhümki ji ontena mmenthukthaka. Eboe jiang na metapoe potsow ekhüm eloe jiang soa vantathaka. 12 Ochoangna elhi n mhom hetüv tssocho sana jiang ji OPVÜI na Israel kyon jiang yulona khi sithokvüka; osi ete jipona Thotsü OPVÜI thüngi othan hansi roathüng onteno hojilo n thenhyathoku ka. 13 Ntena elani hetoha tssolanala. Ntena OPVÜI thanphensa ji esütsüna phyonzhüa erhyua kyatala, ntiotssole ntena hansi ero jiang ji ombona nte n khichoyiv sithaka. 14 Ntio tsükona hojiangji nte n khichoyia sana ombo engae zetava. Hojijo ntio tsükona la tona, ntena nte khyingrothüng soa evamo nte engh jiang thüngi nte echümchak ji roe sithako ji ombona ntsia. Ompvüo ni jokim, Potsow thüngi jo nina ni engh ji thüngi longtsüka lia evamvü phyochakcho, khatola nina ompvü thüngi ni phyochak ji roe sithaka. 15 Potsow na nimpoe ji omon osi osolona motsünga to nte n kümthukchoke? Hojito etsso jilo ombo etüm jijo ntiola? Hojijo nte yakchia Potsow kyon tsotso tsoronichen rena yithokvü tsükona. Hoji tsükona nte ochinaha nte engh jiang thüngi echümchak evao ji moni ti-sithuka. 16 "Sichita jo, a tssakala," to OPVÜI Israel Potsow jina phyoala."Nte ochona nte engh jiang thüngi heto nzan n li elhi tssoa sana ana atssakala. Nte ochinaha nte engh thüngi longtsüka lia vamvüka to echümchako ji moni ti-sithuka."
Yitsso Tsüngon Ji Enhyanthaka.
17 Nte khensan-yisan jiang yakchia ntena OPVÜI ji mmok-thukthaka. Tokhatola elani ntena "Ena kvütoli ombo mmok-thukchola?" to engatala. Hojijo, "Tokhamo OPVÜI jina n mhom elhi etssoe jiang ji mmhona to nchümiala. Osi otsotso ombona hoji chokatala," to ntena. phyotacho. Mekana "Ntsa Potsow khilato etsso jijo kvülo vanchola?" to ntena engata n mhom tssotacho.
1 Tokhamo OPVÜI jina heto janlanala, "Ana alan methakthokvü tsükona ayithenpvüi rothokvü ka, hoji sülojo ntena yana evamo OPVÜI jina zakto ekhümki shilo rov osi yithenpvüi ntena nhyaktssüka evamo jina oro a ntsata yi ji thenchoa phyov." 2 Tokhatola ombona erov tsüngon jilo ochona rümkhokvüla? Ombona kvüthüng chiroa sana ochoangna eküm vanchevla? Ntiotssole omboji shaphon ntssamvü esüa osi yonjak rungchophen esüa tssov. 3 Ombona janti yonjak riphen esüa osi rungchophen esüa yitssolo rov. Yonjak ejoe jiangna kvüto shona janti jiang rungi khia sanaji esüa OPVÜI yithenpvüi jina pvüti jiang ntssüngchev. Hojito tssona ontena OPVÜI thüngi othan jiang elamo osi mmhom jiang hansi oro thanchev. 4 Hojto tssona ovüngthüng tssoa rothako ji esüa Juda tona Jerusalem to kyon jiang na OPVÜI thüngi othan hansi ero jina ombo emathathukchev. 5 Tokhamo OPVÜI jina phyoala, "Ana nte yulo yitssolo rov osi ana ropvüto ochoang kvütata na ozen khelia, efürama tssoa elani jokheman mmyotsoe jiang ejithechia, emi jiang, opvü-opoe n van jiang, metapoe tsanthan jiang pono onte tssocho mmhon tssoa osi kvütata na a n yikrachi-kyuchiv vancho sana jiang topvü pono ana onte nlan n mhon jiang ehungpvüi tssoyiv.
Othan Epiv Lanka Jiang
6 "Aiyo OPVÜI ji osi aiyo kvüthüngha n tongphio" Hoji tsükona nte Jakob tsoronichenden, nteno monlangi jo nte n sihan. 7 Tolea nte pyimtsümotsüi jiang esüa ntena a shikhfü jiang n tsütsav hojilona nkae yithaka. Hojitsükona a thüngi kholantava, tona anaha nte thüngi yilamka. Tokhatola ntena engatala, "Ena ntio tsükona ni thüngi kholamla? 8 Hoji tsükona ana nte engala, otsotso Kyon na Potsow ejiphiv elan licho alo? Hojito etssov nlinrüng, tokhatola ntena a ejiphitala. Ntena 'Kvütoli la?' to engatala. Tolea ntena othan osi tarochia jiang yakchia a ejiphitala. 9 Nte topvüto nte rhiyirandanka-thaka, ntiotssole nte jipo totona a ejiphiala. 10 Nte than osi tarochia jiang topvü bena OPVÜI ekhümki hansi rotava. To tssona OPVÜI ki jilo etsoyu tssona livka. Tosi ejyui a zetava, toa ana potsüwoe kipünglan chonchi nte tsükona mmha osi mmhomlan taro tssochyua kvülo tia n vav nte phyangchochiyia ntena hunguka. 11 Ana ora-oben jiang khi nte benro jiang roe nte n siyithuk, tokhatola nte jününgro dung jiang lona tsüngthi kongi yia nte ethiyithoku. 12 To tssona jipolan tarona emathae kyonden to nte tsav, ntiotssole nte meta jijo vanphen mmhom tssov.
Potsow na Khonzamvü Echümchako Ji
13 "Ntena elümoto n mhom aphyoyithaka" to OPVÜI na phyoala, Tosi "Ena ntio n-mhom ni phyoyichola" to engatala. 14 Ntena heto phyotacho, "Potsow benkav ethev n li, osi ombona phyo ji ephan etssov mekana ombo Tokhamo OPVÜI jika to chekata ete ori jiang tsükona nlan chona etssov ji ntio oman lichola? 15 Elani ana enhünga hunga evamo shi esüa, kangtsüi jiang ematha elio. Osi n-mhom etssoe kyon jiang ji tsükarankata yicho tae mekna onte elhi n mhom jiang khi Potsow erüm eto jiha chyui zetaha ntia n tsso, jiang mmhomo." 16 Hoji süijo kyon ochoang na OPVÜI kyua vancho sana jiangna onte onte phyotacho, osi ontena ntio phyotacho sana jiangji OPVÜI na onte zoyicho. Osi ombo vanhya lona kvütata na OPVÜI yikrachikyuchilo vancho sana jiang topvü mying ji kakolo erankacho. 17 "Onteno a kyonden tssovka," to OPVÜI Tokhamo jina phyoala, "Ana a elhi etssov ji tsüngono jo, onteno a echi tsotso tssov. Osi opona ombo benkao otsoe ji nzanato ana onte khonzamvü. 18 Elani khi ntsanrük kyon tona n mhon kyon to, osi OPVÜI benkata evan kyon jiang tona ombo n benkao jiang to yutalo kvütata echümpota licho sana ji a kyon jiang na hunglamka."
OPVÜI Tsüngon Ji Tsathaka
1 Tokhamo OPVÜI jina phyoala, "Kangtsüi osi n mhom kyon jiang ji mavü rungato rungi esiv tsüngon ji tsathaka. Hoji tsüngon jilojo onte ochia n hyokana rungi onte sirav. 2 Tokhatola nte kvütata na ayi enga vancho sana jiang thüngijo a shanchov etho jina eng esüa ntelo rakav osi engjo süngato nte pono emiyi ji rothokvü. Osi nteji mangsüro shenphenina vachichoto emathalo osi etancholo nte vachiv. 3 A ero tsüngono jo n mhom kyon jiang topvü ntena khyov osi onteji nte jo kupi livero esüa vamvü. 4 "A nri Moses püngnoyi jiang nehümchetava, shikhfü yizüng kümoe Israel kyon topvü na enga tsütsata wothoku tsükona ana Sinai phunglani na picho sana hoji. 5 "Tokhatola ekhenthav OPVÜI tsüngon ji n rothüng ana zenkhying Elijah nte thüngi rothokvü. 6 Ombona opoden jiang tona otsoero jiang topvü ji onte lümbüm motsünga tssothuklamvü; to n tssoana ana oro nte metaji roe esio tssov."
The New Testament of our Lord and Saviour Jesus Christ
Jisu Khrista Pochung
1 Abraham tsochen David osi David tsochen Jisu Khrista, pochung etsüngta kako ji: 2-6 Abraham lona David mesao nandang ji pochung heto etsüngta yicho: Abraham tsoe Isaak, Isaak tsoe Jakob, Jakob tsoe Juda tona ombo ojeniden to; Juda tsoe Perez tona Zerah to Tamar na bukcho: Perez tsoe Hezron, Hezron tsoe Ram, Ram tsoe Amminadab; Amminadab tsoe Nahshon; Nahshon tsoe Salmon, Salmon tsoe Boaz jijo Rahab na bukcho. Boaz tsoe Obed, Ruth na bukcho, Obed tsoe Jesse, Jesse tsoe David mesao. 6-11 Uriah engh lona David tsoe Solomon bukcho, osi Solomon tsoe Rehoboam, Rchobaom tsoe Abijah; Abijah tsoe Asa; Asa tsoe Jehoshaphat, Jehoshapat tsoe Jehoram; Jehoram tsoe Uziah; Uziah tsoe Jotham; Jotham tsoe Ahza; Ahaz tsoe Hezekiah, Hezekiah tsoe Manasseh; Manasseh tsoe Amon; Amon tsoe Josiah; Josiah tsoe Jehoiachin; Jehoiachin tona ombo jeniden to tssoathüng Babylon khelo onte rheyicho. 12-16 Babyloni yisi sülo Jisu Khrista ebuk nandang pochung ji heto: Jehoiachin lona Shialtiel, Shialtiel tsoe Zerubabbel; Zerubabbel tsoe Abiud; Abiud tsoe Eliakim. Eliakim tsoe Azor, Azor tsoe Zadok, Zadok tsoe Achim, Achim tsoe Eliud, Eliud tsoe Eliazar, Eliazar tsoe Matthan; Matthan tsoe Jakob; Jakob tsoe Joseph jo Mary ochona Jisu Khrista, Messiah-Shanchopvüi to tsa bukcho sana ji orapvü. 17 Hojito Abraham lona David nandang ji pochung taro mezhü; David lona Babyloni yio ji nandang ji pochung taro mezhü; Babyloni yio jilona Jisu Khrista nandang ji pochung taro mezhü to tssocho.
Jisu Buko ji
18 Khrista ji hetoli bukcho: Oyo Mary ji Joseph na soa evam oyi ntsatae vale ompvü soa n-vanthüngna Nthomon lona nagro hani sicho; !9 tole Joseph jo ntsa ntho kyon tsso jina Mary ji n-yikrathukna mphoa sichiv methakcho. 20 Khatola ombona hoto zia vanathüng ji OPVÜI lanben jina omüngina heto ombo ezocho; "O David tsoe Joseph, Mary khi ni engh etssov ji ti-kyua; ompvüna ngaro hamo jijo Nthomon lona ka; 21 ompvüna otsoe buku osi nina Jisu to ombo tsav, ntiotssole ombona ombo kyon jiang mmeni na onte shanchov." 22 Shiang hetopvü OPVÜI na zenkhying yakchia heto phyoe vao jiang benthoku tsükonatssocho. 23 "Ntho loroe tsüka na ngaro hani buku osi ombo mying jo Emmanuel to tsav; (Ji yichak jo Potsow ete ndüngo vana to.)" 24 Joseph na yipjüngchi OPVÜI lanben na ezo ji esüa Mary ji ombo engh etssov khicho. 25 Khatola ombo engh jina ngaro hamo ji buki ombona Jisu to n-tsathüng jo ombona ompvü n-jünacho.
Engkhfüwoe na Ntsinranden Ro Jiang
1 Jisu Khrista ji Herod mesao echungo Bethlehem yan lona bukale, engkhfüwoe na choro shantio cheta evan ntsinranden Jerusalem lo oro phyotacho; 2 "Jihudi roza buko ji kvülo vanchola? Ena ombo shantio ji engkhfüwoena hungthaka, osi ena ombo khümo rotacho." 3 Herod mesao na shi zoale ombo tona Jerusalem kyon topvü to n-vanthev sicho. 4 Pvüti eramoe jiang tona eranpvüi jiang to tsarhyui "Kvülona shanchopvüi ji bukvü licho la?" to onte engacho. 5 "Juda meta Bethlehem lona," ntiotssole zenkhyingna heto erani lia: 6 'O Juda meta lo Bethlehem, nino kvüthüngha Juda lo esaeden jiang yolo teritso ji mek, ntiotssole a kyonden Israel jiang esopvüi ni lona chiyiv.' " 7 Tole Herod na mphoa ntsinran jiang tsae shantio ji ntio yuta lo hungcho sana to engacho; 8 osi heto onte ezoa Bethlehem mi wothukcho: "Owo ngaro ji tüngochüa yani zetava, osi ntena hungna yithen a pitava, tona anaha owo ombo khümvüka." 9 Mesao jina onte ezothakale ontena wotacho osi ontena engkhfüwoe shantio hungwo jina olan onte soa owo ngaro ji tondüngo mangi sicho. 10 Ontena shantio ji hungale elümoto onte longshyucho, 11 osi oki jilo rhowole ngaro ji oyo Mary ndüngo hungcho osi ontena epyakthei ombo khümtacho. Osi ontena sükhü jiang lanphei shona, tssütsserhüm mmhom tona tssütsserhüm ekhov to ombo yantsotacho. 12 Jitosi omüngina Potsow na onte ezo ji ephan ontena Herod nkachoa lanpoe na onte metae yitacho.
Ejip Metae Yio Ji
13 Ontena khoe yitale OPVÜI lanben na Joseph ji omüngi na heto ezocho, "Phanthi ngaro ji tona oyo to sosi Ejip metae tsani yia osi ana ni n-zothüng jo jilo vana; ntiotssole Herod na ngaro ji lüngthav yamsala." 14 Ombona phanthi ngaro jiha oyo ji woni sosi zümothüng tsani oyi Herod n-chüthüng jo Ejip metae vancho. 15 Shijo OPVÜI zenkhying yakchia heto phyoe lio ji benthukvü tsükona, "Ejip lona ana a tsoe tsachukthaka."
Ngaro Jiang Lüngthao Ji
16 Ntsinran jiangna ombo ejithechio ji ntsiale Herod na ekhenthao lüm tsukcho, osi ombona ntsinran jiang thüngina shantio ehungo yuta madango ji ephani na Bethlehem meta osi hoji nkonjano eboetso nzyu eni küpoe kvüta vancho sana lüngthale to yizüng pia wothukcho. 17 Hoji tolyui Jeremiah zenkhying jina heto phyoe elio ji bentokcho: 18 "Ramah lona ekya nungra won zocho, Rachel na ompvü ngaro jiang tsükona kya vancho osi onte monkhamoji tsükona ompvü ejichov n mathacho.
Ejipi na Kholani Eyioji
19 Herod chüthakale Ejipr metae Joseph thüngi lanben na omüngi na heto ezocho, 20 "Phanthi ngaro jiha oyo oni sosi Israel metae yia, ngaro ji eküm eyan jiang chürathaka." 21 Jitsükona ombona phanthi ngaro jiha oyo oni sosi Israel metae yicho. 22 Khatola Herod tsoe Archelaus na Juda sala to ombona yiwon zoale meta jilo rheyiv ombo kyucho osi omüngina ezowo ji esüa Galilee lo vancho. 23 Zenkhying na "Ombo ji Nazareth kyon to tsav" to phyo ji benthokvü tsükona Nazareth yantsü jilo vancho.
John Baptio Püngno Ji
1 Hoji yutalo John Baptio na Juda lijüngi na heto püngnoa chiyicho. 2 "Nte mmen jiang lona khophitava," "Ntiotssole Potsow ekhüngyan ji enhyanthaka!" 3 Kyon shi tsükona zenkhying Isaiah na heto phyoe lia, "Kyon tsüka na lijüngi na tüngo won ji shi, 'OPVÜI lan ji methakia; ombo lan nsaka wonia!' " 4 John jo Ut tssan mbencho; osi sofü na eryu khüngcho; osi ombo etsoyu jo khomong tona tssakijü to tssocho. 5 Jerusalem tona Juda meta osi Jordan nkonjan topvü lona ombo thüngi oro, 6 onte mmen phyochakta Jordan lona baptitacho. 7 Pharasee tona Saducee to jiangna ombo thüngi baptilo role ombona ezocho, "O nrü tsoeden – ekyu tsao jilona tsantale to ochona nte ezochola? 8 Lümbüm khophio ji tssüngthi ethitava; ntebobo ji 9 'Eiyo e motsüi Abraham vanka' to phyoa ti vantava. Ntiotssole ana phyoala, Potsow jo olung shiang lona lea Abraham tsoronichen kümtokcheta. 10 Enhünga lea opvü ji odung ndüngi njükae lia; ji tsükona odung kvüwoe na tssüngthi n-thia sana jijo dani omi thechi siala. 11 "Lümbüm khophio ji tsükona ana ojüi na nte baptiyiala, tolea a sülo tsao jijo a lona tsüphokata, aiyo ombo jokhüp lanphev tia a n-tüm; ombona Nthomon osi omi lona nte baptiyivka. 12 Nkhyapheh ji ombo khelo bena osi pyonphen ji khei sisi otssuk jiang osoni hanthev, tolea wozhü jiango n-mheo mi jilo thechi rungi siv. zetnukvu, onte khena ni
Jisu na Baptio Ji
13 Jithüng Jisu na Galilee lona Jordan lo John thüngi na baptilo rocho. 14 John na jo heto phyosi nbaptiyiv tssocho, "Nina a baptiyiv ethev lila, a thüngina baptilo rochoke!" 15 Tole Jisu na ombo janlancho, "Enhünga jo heto tssosa. Heto tssosanati ntsantho topvü benriv." Tole John na hoto tssoyicho. 16 Jisu na baptithakale zakto ojüi na chiyicho, tole potsüo chonchi Potsow Mon ji yukhyu esüa joro ombo lo eshona hungcho. 17 Osi potsüwoe na heto phyoa zocho, "Shijo a nzamo tsoe ocho lo a lüm ejo licho sana ji."
Jisu Ojang Tsso Ji
1 Jisu ji tsüngrham mon ji khi ojang ombo tssotokvü tsükona tsüngrham jina lijüngi ombo sosi yicho. 2 Ombona zümo zhüro, eng zhüro to khangsi sülo ombo wondoncho. 3 Tole tsüngrham jina oro ombo ezocho, "Potsow tsoe ji ni tssona olong shiangna hümri kümthoka." 4 Tole ombona janlancho, "Motsü lo heto erani lia, 'kyon na hümri taena eküm n-vanche, tolea "Potsow püngina chiyio yitsüng akvü ethev lia.'" 5 Jisüi jo Tsüngrham jina Jerusalem Ntho Yantsü khümphen kvüri ombo sosi ehungo ezocho, 6 "Potsow tsoe ji ni tssona helo na tsukjoa, motsü lo heto erani lia, 'Ombona lanben jiang zikata ni ekhyonyav osi olung lo ni jo jianglea n-shükatok.' " 7 Jisu na ezocho, "Elani motsülo heto erani lia, 'Nina OPVÜI ni Potsow ti ejiphia.' " 8 Tsüngrham jina elani phunglan ntssom lo ombo sosi ehungo limhalo ekhüngyan osi myingthüng topvü ombo ejücho osi ezocho. 9 "Nina epyakthei a khüma tssona ana shiang hetopvü ni piv," 10 Tole Jisu na ezocho, "Tsana, Satan! Motsü lo heto erani lia, Nina OPVÜI ni Potsow khümka osi ombo tae benkavka!" 11 Hoji süijo Tsüngrham jina ombo sisi yicho, osi lanbenden na joro ombo sükcho.
Jisu na Galilee Lona Elhi Benkao Ji
12 John ji rhümae lia to Jisu na owon zoale Galilee yi sicho. 13 Osi Nazareth sisi Zebulun tona Nephtali to metae jümang tssae Kapernaum yani oyi vancho. 14 Hoji jo Isaiah zenkhying na heto phyoe lio ji benthokvü tssocho, 15 "Zebulun meta osi Nephtali meta jümangoe osi Jordan bankae, pvüjipoe yan Galilee! 16 Emüngi evamo kyon jiangna wondang tsüphov hungthaka, osi ochoang echü khümcho metae vantacho sana jiang tsükona wondang rothaka." 17 Jilo na benkae Jisu na heto püngnov benkacho: "Nte mmen jiang lona khophitava, ntiotssole Potsow ekhüngyan ji enhyanthaka!"
Jisu na Ngorüm Otsük Mezhü Tsao Ji
18 Ombona Galilee jümang rhüa yia vanathüng (Peter) to tsao Simon tona ojenio Andrew, to jümangi ongo vanta vancho, ntiotssole onteno ngovanden tssocho. 19 Tole ombona onte ezocho, "A phana rotava, tona ana kyon erümden nte kümthukvüka." 20 Jitopvü onina ngovanphen ji sisi ombo phana wocho. 21 Jilona khoe owo James ha John onjeni na opo Zebedee nzo orhungi ngovanphen ethata hungi ombona tsacho. 22 Jitopvü onina ha opo tona orhung ji to silanchia ombo phana wocho.
Jisu na Püngnoa, Shika, Emiyiala
23 Jisu na Galilee meta topvülo owo Synagogue jiang lona onte shika osi Potsow ekhüngyan tsükona Yithenmhom ji püngnoa kyon jiang yolo nochonori lantaro osi lyuso-lyuri jiang topvü emiyicho. 24 Hoji tsükona ombo mying ji Syria meta topvü zojanta yicho osi nochonori lantaro ehan, mmen mon na rhümae, etukra ejüi, jochü-khechüi sosi ro jiang topvü emiyicho. 25 Osi Galilee, Dekapolis, Jerusalem, Judea, Jordan osi Jordan bankae evanden yantsü tarolo kyon kholuk tsüphov na ombo phanphicho.
Phunglani na Püngno Ji
1 Kyon kholuk ji hungale ombona phunglani chungi khokthecho, osi ombo sürüi jiangna ombo thüngi rocho. 2 Jithüng ji ombona obüng kochia heto onte shikacho;
Ematha Tsotsoji
3 "Omon thüngoe yantsae ka to vamo jiang emathao; ntiotssole, Potsow ekhüngyan jo onte echi! 4 "Nungrae jiang emathao; ntiotssole Potsow na lümbüm onte emiyiv! 5 "Emiroe jiang emathao; ntiotssole, limha ji onte echi tssov! 6 "Ntsantho tsükona wondon era khio jiang emathao; ntiotssole onteno lümbüm bükiv! 7 "Khonzan elio jiang emathao; ntiotssole onteno Potsow na khonzamvü! 8 "Lümbüm ntssung jiang emathao; ntiotssole onteno Potsow hunguv! 9 "Noying lanlyui jiang emathao; ntiotssole onteno Potsow tsoeden to tsav! 10 "Ntsantho tsükona khangshi-ntssonshi hungwo jiang emathao; ntiotssole Potsow ekhüngyan jo onte echi! 11 "A tsükona kyon na ejüngona nte yikvüa, osi khangshia ejüngona nmhon lantaro nte tssothokna emathatava, ntiotssole nteno a phankaeden. 12 Emathata longshyua vantava, Potsüwoe nte yantso tsüphov lika. Ntiotssole nte vüngi zenkhying jiang ha kyon na hojito khangshicho.
Limha Ma Osi Wondang
13 "Nteno limha ji ma. Tokhatola oma jina ombo enüng ji monthaka na kvütolyui nünglantokvüla? Hoji jo ntiolo ha ethev n-lio tssoe siv osi haphoe shümchukchi kyon na tsseroe siwo ji mmhomo. 14 "Nteno limha ji wondang. Phungdungro lo yantsü lio ji n-phochetala. 15 Kyon na milon tekae luksa kupi venzhüi ha n vatala, tolea ekachipheno vasi oki topvü tüngratsü thukala. 16 Hoji esüa nte wondang ji tüngrathuki kyon khi nte elhi mmhom jiang hungi Potsüwoe evamo opo pvütssonithuka.
Shikhfü Tsükona Püngno Ji
17 "Ana zenkhying yi jiang tona shikhfü ji to khi silo rocho to ti nchümtava. Ana jiang monthuko rocho mek tolea benthuko rocho. 18 Ana otsotso nte ezoaka, potsüo osi limha n monthüngjo yizüng jilo tssyuka motsünga tia n bem jo mom meka. 19 Jitsükona yizüng shianglo teritso ji tia ochona n benphina oyam ha hojito etssov ezoa sana, ombo Potsow ekhüngyano teritso ji ombo tssov. Tokhatola ochona jiang benphia kyon shika sana omboha hojito Potsow ekhüngyan lo tsüphoe to tsav. 20 Ana nte ezoaka, nte ntsantho jina Pharasee tona shikhfü püngnoe jiang to pomoe n-tssov jo ntena kvüthüngha Potsow ekhüngyani n-rheyiche.
Lüm Etsuk Tsükona
21 "Nkolo kyon jiang thüngi ezoji ntena zothaka, 'Nina lüngthav meka; ochona lüngthata sana oyi tssoyivka.' 22 Tolea ana jo heto nte ezov: ochona ojenio thüngi lüm tsuka sana jiha oyi tssoyiv, ochona ojeni yikvüa sana yitssoe mhadungo chiwochev, osi ochona ojenio ji 'O zhüvae!' to tsa sana n-mheo mi jilo rheyiv to ekyuv lithaka. 23 Jitsükona nina thanpheni ntiosana thana tssona osi jithüng ni jenio na ntiosana ni zechecho lia nchümchena, 24 ni than ji thanphen madungo vasi oyi ovüngtssoa ni jenio thüngi senjümtadensi oro thana. 25 "N-lan ni epio jina ni sosi yitssoki ota vanathüng zakto olani na mmhontae sia, to n tssona ombona yitssoe ji khelo ni thechiv osi vüngpheni ni thechiv. 26 Ana otsotso ni ezoaka, nina poisa tsünga ji tia nkanchoe n-therathüng jo nina jilo na n chiyiche.
Efürama Tsükona
27 "Heto phyo ji ntena zothaka, 'Nina efürama benphiv meka.' 28 Tolea ana jo heto nte ezov: Ochona oso rüngcho lona eloe zetasana, ombo na lümbümi na ompvü thüngi efürama benphithaka. 29 Hoji tsükona ni mhyik amimoe jina mmen ni tssothoka tssona khanchei shümthei sia; ni tsük toto na nmhemi rheyio ji thüngina jo solan motsünga ji tae moni siwo ji mmhomo; 30 Ni khe amimoe jina mmen ni tssothokna tanchoe sia, ni tsük toto na nmhemi rheyio ji thünginajo solan motsünga moni siwo ji mmhomo.
Eloe Sichi Yilan
31 Hetoha phyocho, "Ochona om bo engh sichiana sichi kako ompvü pithoka." 32 Tolea ana jo heto nte ezov: ochona lonsülonphyo yi lona yaka engh sichiana ombona engh ji efürama benphi kümthokala; osi ochona oyam na sichicho eloe ji soa vana sana ombona efürama benphiala.
Echüm Tsükona
33 Elani, nkolo kyon jiang thüngi heto ezoji ntena zothaka, "Ntena ejüng echümvü meka, tolea OPVÜI thüngi ntio phyochakana benthokvüka." 34 Tolea ana jo heto nte ezov: ti ehüm nrünga, oyak shi myingona lea. Ntiotssole shijo Potsow vantsü ji; 35 elani liko shi myingona lea tichüma, ntiotssole shijo ombo jo epyankaphen ji, elani Jerusalem myingona lea, ntiotssole shijo Roza tsüpho ji yantsü. 36 Ni kvüritssan ha theta ti-chüma, ntiotssole nina tssantsünga tia enyikvü lea ehümvü lea n süngrüche. 37 Ntena ntio phyoasana 'Hoka' tona 'meka' – to tae tssothoka. Shi lona kyungkata na n-mhom lona chiyicho tssov.
Nlilan Tsükona
38 Heto phyo ji ntena zothaka, "Omhyik thung omhyik, osi oho thung oho." 39 Tolea ana jo heto nte ezov: nmhon ji kvüthüngha ti panlana. Ochona sana eyo hamimoe ni tümina phukowoe jiha donia. 40 Ochona sana oyi tssoe ni phukthesü ji ni khiyina mbemo jiha pia. 41 Ochona sana ombo ha hansi mel motsünga wov ni rikana, mel eni ombo phana woa. 42 Ochona ntio ni chonia sana pia osi ni thüngi ntiosana nsohungna ombo nsoa.
Ori Jiang Nzam
43 "Heto phyo ji ntena zothaka, 'Ntena nte phinakishüm nzamka osi nte ri jiang tssakvüka.' 44 Tolea ana jo heto nte ezovka: nte ri jiang nzantava osi nte khangshio jiang randania. 45 Hojito tssona nteno Potsowoe evamo opo tsoeden tssovka; ntiotssole ombona mmhom osi n-mhom topvü pono eng onkathokala, osi ntsae ntsae topvü pono eryu jokathokala. 48 Ochoangna nte nzana sana jiang tae ntena nzana tssona nte yantso ntio lichola? Tssenkhyae jiangna mpato hojito jo tssoala! 47 Elani nte shom jiang tae tsae salüma tssona oyam lona tajoa ntena ntio tssoala? Pvüjipoe jiangna lea hojito n-tssoake! 48 Hoji tsükona nte opo Potsow na benrio ji esüa nteha benri kümtava.
Nzan Benphiv Tsükona
1 "Ntena longtsüi elhi tssoathüng kyon ejüv to kanchana n tssov ntangshontava; ntiotssole hojito tssoana nte opo Potsow thüngina ntia yantso n li. 2 "Jitsükona ntena kiaman piathüng kyakrüm jiangna oyam khi hungthoki onte thüngthokvü tsükona lantsüi na osi Synagogue ki na tsso ji esüa tatara ti khfüthoka. Ana otsotso nte ezoaka, onteno yantso ji hoji lona khithaka. 3 Kvüthüng ntena kiaman oyam nzana sana nte khe amimoe na tsso ji ayiwoe ji tia ti ntsithoka. 4 Jito tssona nte yantso ji mphoe na tssov osi nte opo Potsow ochona mpho elhi hunga vancho sana hojina nte yantsov.
Randan Tsükona
5 Ntena randanathüng, kyakrüm jiang esüa ti tssotava! Ntiotssole ontena kyon khi hungthokvü Synagogue ki na osi lantsü nkeni mangkachi randam chokatala. Ana otsotso nte ezoaka ontena yantso ji khithaka. 6 Tolea ntena kvüthüng randana sana kichungi khanlanchi n hungi evamo opo thüngi randana, tona nte opo Potsow ochona kijaena mphoena tssolea hunga vanchosana jina chancheta nte yantsov. 7 "Ntena randanathüng Pvüjipoe etsso tssoa yisha hanrhyui elüm ti randana, ontena jo oyi kyungo ji zoyiv tsayia nchümala. 8 Onte esüa ti tssotava, ntena n phyothüng na nte opo Potsow na nte ethelan jiang topvü ntsikhana. 9 Hoji tsükona shi esüa randantava: 'Potsüwoe evamo e opo, Ni mying nthoa vanthoka. 10 Ni ekhüngyan rothoka, Potsüwoe esüa limhalo ha ni lüm erüng tssothoka. 11 Nchüng tsükona etsoyu jiang e pia; 12 Osi e thüngi nlan epvükae jiang ena siyio ji esüa e nlan e siyia; 13 Ejiphiv lo e ti rheyithoka, tolea n mhon lona e socheta.' Ntiotssole ekhüngyan jiha, etho jiha, osi phfütsson jiha, kümali ni echi, Amen. 14 "Ntena kyon nlan siyina nte opo Potsow na ha nlan nte siyiv. 15 Tolea ntena kyon nlan nsiyina, nte opo Potsow na ha nlan nte n siyi.
Ekhang Tsükona
16 "Ntena khangathüng kyakrüm jiang esüa omha nzhüa tijüa. Ontena khango ji kyon khi hungthokvü tsükona omha eyingi oyam ejüala. Ana Otsotso nte ezoaka onteno yantso ji mpüm na khithaka. 17 Ntena khanga tssona khetsükmha tssosi kvüri mozhü thei kheyi hana, 18 tona kyon na nte ekhang ji n hungna nte opo Potsow na mphoena hungi nte yantsov.
Potsüwoe Eli
19 "Limha shilo nte eli hanthei tivatava, hojilo jo ora osi sasi na tsoroa osi efüi na rorhüpi efüala. 20 Tolea nte eli jo Potsüwoe hanthetava. Hoji jo ora osi sasi na n-tso, osi efüi na ha rorhüpi n fü. 21 Ntiotssole nte eli kvülo liasana hojilo nte lümbüm ji vatala.
Otsük Wondang Ji
22 "Omhyik jo otsük ji wondang ji, jitsükona ni mhyik ji mmhona tssona otsük totona wondangala; 23 tolea ni mhyik ji nmhon na ni tsük totona emüng tssov. Jitsükona ni lo elio wondang ji emüng tssona hoji jo kvüta emüng tsüphovla!
Epying Eli Tona Potsow To
24 "Ochina ha OPVÜI eni n benkakhuk; ombona tsüka ji tssaksi tsüka ji nzam; mekana tsüka lo lüm thesi tsüka jo tssakvü. Ntena Potsow tona ejüeli to n-benrhümkhuk. 25 "Jitsükona ana nte ezoaka, nte eküm tsükona ti wongkhyutava, ntena ntio tsov osi yuv sana, osi nte tsük tsükona ntio mpensüv sana ti wongkhyutava. Nte eküm jo etsoyu lona tsüphoka mekchoke? Osi otsük jo etsoyu lona tsüphoka mekchoke? 26 Oyaki woro jiang zetava: ontena oli n ehen, n ri osi osoni ha n hanthe; toaha nte opo Potsow na onte süphiala! Nteno woro jiang lona tssentsüka mekchoke? 27 Nte yolo ochona nkhenrak lona eküm yuta jilo khejüa tia sikathokeheta? 28 "Osi nteno ntiolyui mpensü tsükona wongkhyutala? Phenlungi thera jiang kvüto rankata sana zetava: ontena n lhi osi onte tsükona mpensü n süngrü. 29 Toaha ana nte ezoaka, Solomon tata thüngcheta lia ha thera shiang yolo motsünga esüa tia n dung. 30 Potsow na oli ero nchüng lisi ojyuo rungi esiv jiang mpato hojito benriyia tssona, jilona kyungkata ombona nte n-benriyivke! O longtsü teriden! 31 Hoji tsükona "Ena ntio tsov to? mekana etena ntio yutav to?" to wongkhyua ti phyotava. 32 Ntiotssole n longtsüi jiangna shiang shi yanala. Ntena shiang ethev lia to nte opo Potsow na ntsia. 33 Ji thüngina jo, Potsow ekhüngyan tona ombo ntsantho to yandentava, tona shiang hetopvü nte echi tssov. 34 Ojyua tsükona wongkhyua ti vana; ji nchukti tsüngon tsük ji tsükona wongkhyuo ji tae lea tssochyua. Ntiotssole ntena engakvü tsükona wongkhyuv liala, küma jilo ti ekalantava.
Oyam N lan N yaniv Yilan
1 "Ntena oyam nlan tiyania, tona nte nlan ha n yani. 2 Ntiotssole nina ntiona oyam etsia sana jina ni etsiv, osi nina etüki pio jilona ni etükilam. 3 Kvütolyui ni jenio mhyiki kiha ji hungisi ni mhyiki tssüngpvülong ejüo ji nchümi n zetala? 4 Mekana ni mhyiki tssüngpvülong jüthoksi kvütoli ni jenio thüngi 'Ni mhyiki kihav ji khi ni siyialo' to ezoato? 5 O kyakrüm! Ovüngtssoa ni mhyiki tssüngpvülong ji khi sidena, tona ni jenio mhyiki kihav ji khi siyiv ntssünga hunguv. 6 "Ntio ntho sana füro jiang ti pia; osi ni tssentsü senthan jiang wokoyolo ti vachia, ontena sümroe sisi ni mpato ni sakav lea tssov."
Chona, Yana, Ekhophia
7 "Chona tona nte pivka; yana tona ntena hunguka; ekhophia tona nte chonchivka. 8 Ntiotssole ochona chona na ji piala osi ochona yana na hungala, ochona ekhophia na chonchiala. 9 Nte yolo ochona sana otsoe na hümri chonle olong epi vancho alo?" 10 Mekana ongo chonle nrü piv alo? 11 Nte nmhon na mpato ngaro jiang thüngi mmhom epiv ntsia tssona nte opo Potsow na jo kvüta kyungkata echon jiang thüngi mmhom pivla? 12 Oyam na ntio nte tssoyiwo to ntena rünga sana onte thüngi ha hojito tssoyia; shilona yizüng osi zenkhying yi jiang benthukala.
Olan Kvüzüpo Ji
13 "Olan kvüzüpo ji lona rheyia; emoni eyio lan jijo ngaza enyipa, osi khosha na hoji lan jina rheyiala. 14 Eküm lamoe eyilan jijo kvüzüpa osi khünga osi hoji ehung kyon jo mataroa.
Odung Osi Tssüngthi
15 "Ejüng zenkhying püngnoe jiang nkachotava, ochoangna ochungi jo ranfü ntav tssolea oponi jo olyu fü na eyuki hansi roa sana. 16 Ntena onte tssüngthi lona onte chethev. Okyo dung lona jününgrothi mekana züwothi lhoake? 17 Odung mmhom topvü na tssüngthi mmhom ethiala. 18 Odung mmhom na tssüngthi n-mhom n thiala, ji esüa odung n-mhom na ha tssüngthi mmhom n thiala. 19 Odung kvüwoe na tssüngthi mmhom n thia sana jijo tani omi thechi siala. 20 Jitsükona ntena tssüngthi lona onte chethevka.
Ana Kvüthüngha Nte Ntsi
21 "OPVÜI, OPVÜI, to a tsao jiang topvüna Potsow ekhüngyani n rheyiche, tolea apo Potsow lüm erüng ji tsso jiang taena rheyichev. 22 Yitsso tsüngono jo elümotona a zov, 'OPVÜI, OPVÜI! ena ni myingona n-püngnochoke, osi ni myingona tsüngrham n phanchoke, ni myingona chethev elhi n tssochoke!' 23 Hojithüng ana onte ezov, 'Ana kvüthüngha nte n tsika. A thüngina tsantava, n mhom etssoeden!'
Kitssoe Nchyu Eni
24 "Jitsükona a yi shiang engae benphi jiang topvü kitssoe nchümri eli ochona ombo ki ji longpvü poni tssokacho sana ji esüa tssov. 25 Osi eryu joe ojüna ndüngzhücho, elani tsungryu veni oki ji echükata ha oki ji longpvülo tssokao jina n yacho. 26 Tokhatola ochona a yi shiang engasi n benphia sana jiang topvü kitssoe zhüvae ochona ombo ki ji hajang poni tssocho sana ji esüa tssov. 27 Osi eryu joe ojü na ndüngzhücho, elani tsungryu echüki oki jilo echükae okiji eyacho, hoji eyao jijo ekhenthao!" 28 Jisu na shiang püngnothakale kyon kholuk jiangna ombo püngno yi jiang engasi emhuktacho. 29 Ntiotssole ombona eranpvüi jiang esüa mekana etho eli tsüka esüa onte shikacho.
Ranoe Emiyio Ji
1 Jisu na phunglani na joyile kyon kholuk tsüphov na ombo phana wocho. 2 Tole ratsü enoe tsüka na oro nkhok tseni ombo ezocho, "OPVÜI, ni lüm na rünga tssona nina a ntssüngchekuka." 3 Tole ombona okhe yonchi ombo evüngkata phyocho, "A lüm na rüngka, ntssüngcheta." Tole zakto ombo rano ji ntssüngchecho. 4 Jisu na ombo ezocho, "Nina thanpoe ochia tizokhe, tolea owo pvüti ejüa ni hungtoka, osi Moses na yizüng pio ji esüa othan pia kyon jiang khi mmhonthakcho saka to ni hungthoka."
Nzoa esopvüi Ji Phajae Emiyio Ji
5 Ombona Kapernuam lo rhowole, Roman rasan nzoapvüi tsüka na ombo yana oro jonjicho, 6 "OPVÜI, a phajae ji tsükchü khyingi oki elüm ezüpa nochonoria vana." 7 Tole ombona ezocho, "Ana oro ombo emiyivka." 8 Tole nzoa esopvüi jina ezocho, "OPVÜI, a hetüv na oki ni sothev a n-tüm, tolea nina oyi tae phyochina a phajae ji emiyiv. 9 Ntiotssole aiyo etho küpo evan osi a küpo rasan vanala osi ana tsüka thüngi 'Woa!' to ezona ombona woala, thanpoe jiang thüngi 'Roa!' to ezona ombona roala, osi a phajae ji thüngi, 'Shi tssoa!' to ezoana ombona tssoala." 10 Jisu na hoji zoe emhuktsüngcho osi ombo sürüi jiang ezocho, "Ana otsotso nte ezoaka, Israel yolo tia longtsüi hetüv n-hunghan. 11 Ana nte ezoaka, elümoto na eng-chirolan osi erhelani na oro Abraham, Issak osi Jakob nzo Potsow ekhüngyani na a nzo tsoyutavka. 12 Tolea ekhüngyani evam etümthao jiang ji hapoe emüngi phanchukchi siv; hojilo na ontena oho shüngta kyatav." 13 Tosi Jisu na nzoa esopvüi ji ezocho, "Oki yia, nina longtsüo ji ephan benthokvüka." Tole yutatsük jilo phajae ji emiyicho.
Jisu na Kyon Khosha Emiyicho
14 Jisu na Peter ki rhowole, Peter engh ji oyo ra belüngi vancho. 15 Jisu na ompvü khelo evüngkayile era ji boe sicho, osi ompvü na phanthi ombo etsoyu nsüngrüyicho. 16 Hoji mmyu ontena mmenmon evan kyon elümoto sosi ombo thüngi rotacho, tole ombona mmen-mon jiang oyi motsünga taena phanisi nochonori lantaro emiyicho. 17 Shijo Isaiah zenkhying na heto phyoji benthokvü tsükona, "Ombona ete n khyonrung jiang e khiyisi ete nochonori jiang e hanicho."
Jisu Phana ewoe Jiang
18 Kyon kholuk jiangna ombo hachüma hungale, Jisu na ombo sürüi jiang ji jüran esanawoe chiwotale to yizüng picho. 19 Tole jithüngji shikhfü eranpvüi tsükana oro ombo ezocho, "Püngnoe yo, nina kvüi woana ana ni phanphiv." 20 Tole Jisu na ombo ezocho, "Shiali jiangna ha okvü lira, osi oyaki woro jiangna oshüp lira, tolea kyon tsoe jijo kvüri enghokaphen tia n-li." 21 Tole ombo sürüi yolo tsüka na ezocho, "OPVÜI, ovüngtssoa oyi apo a shothethoka." 22 Tole Jisu na ezocho, "A phana roa osi echüi shothev jo echüi jiang vayia."
Tsungryu Esanthoko Ji
23 Ombona orhungi rehyile ombo sürüi jiangnaha rheyicho, 24 Tole esüngaro taena jümangi tsungryu ndav chiyicho osi orhung ji jüngthev esüa jükyo na jephicho; toaha ombo yipa vancho. 25 Tole ontena owo ombo nthechi ezocho, "Eshanchoa OPVÜI, emomsala." Tole ombona onte ezocho. 26 "Nteno ntio tssona jitata ekhentala, longtsü teriden?" Tothakale ombona phanthi tsungryu ji tona jümang jito ndecho, tole jükrüpi sicho. 27 Kyon jiangna emhuktsünga phyotacho, "Shijo ntio kyon hetüvla? Tsungryu osi jümang na mpato oyi engayiala!"
Mmen-mon Evan Nchyu Eni Emiyio ji
28 Ombona jümang phukowoe Gadara metae chiyile mmen mon na rhümae nchyu eni olüp jiang lona chiyi ombo ndukcho, osi oniji elüm haruko jina ochinaha hoji lamoe n-wokhokcho. 29 Tole onina heto tüngkachicho, "O Potsow tsoe, nina ntio etssoyivla? Nina yuta ji n janthüngna ekhangshiv rocho alo?" 30 Meta jiang hakono wokoden yantsota vancho. 31 Tole mmenmon jiangna ombo thüngi heto jonjicho, "Nina ephanchukchina wokoden jilo erheyithuka," 32 Tole ombona onte ezocho, "Tsantava." Onina chiyi woko jiang lo rheyicho tole oden totona jümangi santhei ojüi rhekhancho. 33 Tole wokorhüki jiangna tsanta oyi mmen mon evan kyon jiangji kvüto tssocho sana ji yantsüi ezotacho. 34 Tole yantsü jilo kyon topvü na Jisu nduko rotacho, osi ontena ombo hungale onte metae na tsanle to ombo ezotacho.
Tsükchüi Emiyicho
1 Ombona orhungina wozhü ji bankalani ombo meta echiyicho. 2 Tole ontena tsükchüi tsüka belüngi yipthuki ejümta ombo thüngi rotacho; Jisu na onte longtsü ji hungi tsükchüi ji ezocho, "Longshyua, otsoe, ni mmen jiang ni siyithaka." 3 Tole eranpvüi ejoma na phyotacho; "Kyon shina yikvü-yiloala." 4 Tole Jisu na onte lümbüm ji ntsi ezocho, "Nteno ntio tssona lümbümi na n mhom nchümtala? 5 Kvüto ephyov elao la? Ni mmen jiang ni siyithaka to alo phanthi sanphia to elaola?" 6 Tokhatola shijo kyon tsoe jina limhalo etho lia to nte engathethokvü tsükona. Tosi ombona tsükchüi ji ezocho, "Phanthi ni belüngi ji ejümkae hansi oki yia." 7 Tole ombona phanthi oki yicho. 8 Kyon kholuk jina hoji hungale kyutacho, osi kyon pono etho hetüv pio Potsow ji ontena phfütssonthukcho.
Mathew Tsao ji
9 Jisu na jilona yile Mathew to tsa tssenkhyae ombo lhishüpi khuka vancho hungi ezocho, "A phana roa." Tole ombona phanthi wocho. 10 Osi ombona Mathew ki etsoyu tssov tsükona oki vanathüng tssenkhyae tona mmen kyon to elümoto oro Jisu tona ombo sürüi jiang to yolo khukthecho, 11 Tole Pharasee jiangna hoji hungi ombo sürüi jiang ezotacho, "Ntiolyui nte püngnoe shijo tssenkhyae tona mmen kyon to nzo etsoyu tssoala?" 12 Tole ombona zoe heto onte ezocho, "Mmhona evan jiangna jo tsüktssen ethev n-li, tolea erae jiang taena ethev liala. 13 Yitava osi shijo ntio yichak sana engathei khitava: 'Ana khonzan ji ethev licho kha othan ji mek.' Ntiotssole ana ntsantho kyon jiang tsalo rocho mek tolea mmen kyon jiang."
Ekhang Tsükona Engacho
14 Hojithüng John Baptio sürüi jiangna oro ombo engacho, "Ntiolyui e tona Pharasee to jiango nsansam khangsi ni sürüi jiango n-khangala?" 15 Tole Jisu na heto ezocho, "Yanpithan jina onte ndüngo evan thüng nandang yanpithano eroe jiangna nungrav alo? Jito mek! Tsüngon motsüngalo yanpithan ji onte thüngi na sosi yiv küma jithüngti ontena khanguv. 16 Kyon ochina ha süporo ekhünguv khi sükye lo n khümkatala, ntiotssole khümkao jina tssüngroe tsükata resolam. 17 Elani sükhfü ekye lo tssüngthijü eniro yeni n-vatala; hojito yeni vao sükhfü ji bukrhüpi tssüngthijü ji ethangu, osi sükhfü ji roe siv; tssüngthijü eniro jo sükhfü ethan lo yenala, tona woniata nkümchev.
Eloe Ejen Eshüi Tona Esapvüi Ji Otsolov To Emiyiala
18 Ombona hojito phyoa vanathüng, Jihudi esapvüi tsüka na rhoro khuktseni ombo ezocho, "A tsolov ji enüngati chüthaka; khatola nina oro ni khena ompvü evüngkata, tona ompvü phanthivka." 19 Jitsükona Jisu na phanthi ombo sürüi jiang nzo ombo phana wocho. 20 Tole eloe tsüka nzyu taro-eni ejen eshüa evan jina oro ombo sülani na süjüm lo evüngkayicho. 21 Ntiotssole ompvü na heto nchümcho, "Ana ombo sü lo tia evüngka na a emiyiv." 22 Jisu na engoe zechisi ompvü hungi ezocho, "Longshyua, otsolov! ni longtsü lona ni emiyithaka. Tole jitopvü eloe ji emicho. 23 Jitosi Jisu na esapvüi ji ki jani khenden jiang hungale ombona ezocho, 24 "Nkachia! eloeroro ji n chüka – ompvü ji yipa vancho taeka!" Tole ontena ombo emakatacho. 25 Khatola kholuk ji haphoe chiyithoksi ombona rhowo ompvü khe lona ompvü sükacho osi eloeroro ji phanthicho. 26 Tole yiwon shina nkonjan meta topvü pyinga yicho.
Mhyikjüng Otsük Eni Bochiyicho
27 Jisu na hojilona yiale mhyikjüng otsük eni na heto eronta ombo phancho, "Nzantio to e nchümia, O David tsoe!" 28 Ombona oki rhowole, mhyikjüng onina ha rhowocho, tole Jisu na oni ezocho, "Ana nte emiyichev to ntena longtsüa alo?" Ontena ombo ezocho, "Hoka, OPVÜI!" 29 Tole ombona onte mhyik jiang evüngkata phyocho, "Nte longtsü ephan hoto tssothuka." – 30 Tole onte mhyik jiang pochicho, osi Jisu na tüngochüa onte ezocho, "Shi ochia ti ntsithuktakhe!" 31 Khatola ontena oyi yithen jina nkonjan meta topvü pyingthukcho.
Eyim Tsüka Nsanthukcho
32 Ontena yita vanathüng mmen-mon evan eyim tsüka Jisu thüngi sosi rocho. 33 Osi mmen mon ji phani siyiale eyim jina oyi nsancho; tole kholuk jina emhuktsünga phyotacho, "Israel lo kvüthüng ha shi esüa n hunghan!" 34 Tole Pharasee jiangna phyotacho, "Ombona mmen mon etho khi mmen mon phanala."
Jisuna Kyon Jiang Nzana Nchümcho
35 Jitosi Jisu na yanro yantsü jiang topvülo synagogue jianglo ekhüngyan yithen mmhom ji püngnoa, nochonori lantaro osi n-khyonrüng topvü emiyia wocho. 36 Ombona kyon kholuk ji hunglae khonzan to nchümcho, ntiotssole onteno enhyang n-vamo olyuden esüa hamae vancho. 37 Ombona ombo sürüi jiang ezocho, "Oli eriv elümoto lia, tokhatola liri mataroa. 38 Jitsükona liriden rothokvü lipvüi ji thüngi randantava."
Taro Eni Ethüngcheo Ji
1 Ombona otsük taro eni ombo sürüv ethüngchecho osi mmen mon phani siyia nochonori lantaro osi n khyonrüng topvü lona emiyiv tsükona etho onte picho. 2 Wothung otsük taro eni jiang mying jiang: (Peter) to tsao Simon tona ojenio Andrew; Zebedee tsoeden James tona ojenio John; 3 Philip tona Bartholomew; Thomas tona tssenkhyae Mathew; Alphaeus tsoe James tona Thaddaeus; 4 Simon tona OPVÜI yemo Judas Iskariot to.
Taro Eni jina Elhi Tssoa Woji
5 Jisu na taro eni ji heto ezoa wothukcho, "Kvüloha pvüjipoe yolo ti wotava, Samaritan jiang yantsüi ha ti rhowotava. 6 Tokhatola Israel wopan lona olyutsamomo jiang yana wotava. 7 Ntena owo püngnotava, 'Potsow ekhüngyan ji enhyanthaka!' 8 Nochonori jiang emiyia, echüi jiang phanthithoka, ranoe jiang boyia. Ntena kiaman hungchoka, Kiaman pitava. 9 Shona janti osi orang ntia ti hantava. Nte yentsa tsükona 10 Sükhfü, mpensü, Jokhüp osi jarung jiang ti hantava. Ntiotssole elhi etssoe jiangna onte etsoyu ehunguv etüma." 11 "Yantsüi lea mekana yanro lea ntena rhowoana oyan jilo ocho etüma sana yaki n yithüng jo jilo nchena. 12 Ntena oki jilo rhowoana oki jilo noying lithokvü salüma. 13 Osi oki jilo kyon jiang na nte khichoa tssona noying ji jilo lithoka. Tolea nte n khichoa tssona noying ji nte thüngi yithoklana. 14 Ochona sana nte n khichov nte yi n ngana, ntena oki mekana yantsü jilona khoe yiathüng nte joe khor jiang ekhophi sitava. 15 Ana otsotso nte ezoaka yitsso tsüngono jo hoji yantsü jijo Sodom Gomora lona ekhenkao n mhom tüv tssovka!
Khangshi Ntssonshi Eyiv
16 "Engatava! Ana ranfü yolo olyuden esüa nte wothukala. Jitsükona nrü esüa okyak litava osi yukhyu esüa noyingtava. 17 Kyon ntangshontava, ntiotssole ontena yitssolo nte sophiv; osi synagogue kina nte erhüpa nte sophia a tsükona esapvüi, 18 mesao osi pvüjipoe mhadungo ehungpvüi epiv nte süphia wov. 19 Nte phanthithokana ntio phyov sana wongkhyua ti vantava; ntena ephyov jo hoji shanlantsük jilo nte piv. 20 Ntiotssole ntena ntio nsam sana jiangjo nte yi nsam mek; tolea nte opo mon jina nte yakchia nsam. 21 "Ojenio na ojenio chüthokvü thechiv, opo na ombo ngaro jiang thechiv, ngaro jiangna opvüpoe panlana osi chüthokvü thechi to tssov. 22 Osi nteno a tsükona topvüna nte tssakvü. Tokhatola ochona ochüm jana rüma na ji tae shanchov. 23 Ontena oyan motsünga lona nte khangshia na thanpoe tsana yitava; ana otsotso nte ezoaka, Kyontsoe ji n rothüng ntena Israel lo yantsü jianglo rhowokhan ham meka. 24 "Sürüi jijo püngnoe jilona tsükacho mek; osi phajae jijo ombo OPVÜI jilona tsükacho mek. 25 Sürüi ji tsükona jo püngnoe ji esüa tssona jina lea tssochyua, osi phajae jiha ombo pvüi ji esüa tssona jina tssochyua. Ontena kipvüi ji Balzebul to tsa tssona oki jilo kyon jiang jo kvüta kyungkata omying n-mhom khi onte tsavla!
Ocho Kyuvla
26 "Hoji tsükona onte ti kyuvtava; ntiotssole oponi n chiyio tüv ntia eyuki nli, osi n-tsio tüv mphoe nli. 27 Ana emüngina ntio nte ezoana hoji nteno wondangi na phyotala; osi ntio nte tssürüa sana jiangji mhonki na tüngtava. 28 Ochoangna otsük ji lüngthakhuk si omon ji n lüngthakhuka sana jiang ti kyutava; jithüngina jo ochona otsük ha omon woniata n mhemi na monthukcheta na hoji Potsow ji kyutava. 29 Yichiro eni lo poisa motsünga na yenala, tole jiang yolo motsünga lea nte opona lüm na n rünguv jo elunguv meka. 30 Nte tsükona jo nte kvüritssan mpato kharae lia. 31 Hoji tsükona ntena ti kyutava, nteno yichiro khosha lona tssentsükata!
Khrista Phyochakvü Osi N khicho
32 "Ochona kyon mhadungona a phyochaka sana ana ha Potsüwoe evamo opo mhadungo ombo tsükona phyov; 33 Tolea ochona kyon mhadungona khoe a sia sana, ana ha opo Potsow mhadungo na khoe ombo siv.
Noying Mek Tolea Yonri
34 "Ana limhalo noying hansi rocho to ti nchümtava. Ana noying hansi rocho mek tolea yonri hansi rocho. 35 Ntiotssole ana ro jina kyon tsüka ji opo oni khotayiv, otsolov ji oyo thüngina khotayiv; ono ha otsorüv oni khotayiv to tssov tsükona rocho; 36 osi kyon ji ri jo ombo kilo kyon tssov. 37 Osi ochona a lona kyungkata otsokhyungo osi otsolov nzana sana ombo a sürüi etssov n-tüm. 38 Ochona ombo donphen tsakasi a phana n roa sana ombo a sürüi etssov n-tüm. 39 Ochona ombo eküm hunga sana ombona hoji momka, osi ochona a tsükona ombo eküm mona sana hoji hunguvka.
Yantso
40 "Ochona nte khichoa sana a khichoala, osi ochona a khichoa sana a rothoko ji khichoala. 41 Ochona Potsow zenkhying khichoa sana ombo zenkhying yantso hunguv, osi ochona ntsanthoe khichoa na ombo ntsanthoe yantso hunguv. 42 Ochona shiang yolo ter itso ji thüngi lea jümyim pvüa tia a sürüi tsso ji myingona pia sana, ana otsotso nte ezoaka, ombo yantso ji kvüthüngha mom meka."
John Baptio Thüngina yithen Wothuko Ji
1 Jisu na ombo sürüi taro eni jiang sokathakale ombona hoji lona khoe owo onte yantsü jianglo owo shika püngnov benkacho. 2 John na vüngpheni na Jisu elhingo jiang zoale ombo sürüi otsük eni wothoka heto Jisu engathokcho. 3 "Erov evamo kyon ji ni alo, to alo ena thanpo nhyakvüla?" 4 Tole Jisu na onte janlancho, "Yitava osi ntena ntio hunga zoa sana oyi John ezotava: 5 mhyikjung jiangna hungala; jojang jiangna tsachetala; ratsü enoe jiang poyiala osi nobüng jiangna zoala, echüi jiang kümlanthokala osi yantsae jiangna yithenmhom ji zoala. 6 Osi a longtsüv tsükona khatüng n lio jiang mmhao!" 7 Ontena yithakale Jisu na John tsükona kholuk jiang thüngi ezocho. "Nteno lijüngi jo ntio zelo wotachola? Mbung na benbuk venphio jiang alo? 8 To alo ntiolo wotachola? Kyon tsüka mpensü enyipa hamo ji alo? Mpensü enyipa ehan jiango mesaki evanden! 9 Tona nteno ntiolo wotachola? Zenkhying zelo alo? Ho, ana nte ezoala, zenkhying lona tsüphokata ntena hungthaka. 10 John tsükona heto erani lia: 'Ana yithenpvüi ni mhadungo rwothukvüka, ombona ni vüngina olan ni methakivka.' 11 Ana otsotso nte ezoaka, eloe na bukcho yolo John Baptio lona tsükao ochia n-van; tokhatola Potsow ekhüngyani jo teritso ji lea John lona tsüphokata. 12 John Baptio tsüngon no na benkae enhünga tsüngon jana Potsow ekhüngyan jina jenbuknibukta yakchia yithaka, osi jenbukta kyon jiangna ekhüng tssoa hoji rechov tssocho. 13 Ntiotssole John tsüngon n janthüng jo yizüng tona zenkhying to shiang na hoji tsükona phyoe vacho; 14 Osi ntena longtsüa salivo ombo Elijah erov tsükona phyoe evao ji. 15 Ochona engav eno poa sana engathoka! 16 "Tokhatola echungren shijo ana ntio lo ejyukavla? Shijo ngaroden na shishopheni khukthe vansi onte shom tsa heto ezoa tüv, 17 'Ena philyulyu khfüaha ntena n-sharicho; ena nungra khen dentaha ontena n-kyatacho!' 18 John na n-tsoyu na khanga role, ntena 'Ombolo mmen mon vana' to phyotacho. 19 Kyon tsoe jina tsoyua rocho tole ontena 'Zetava! Jakthan osi tsoha-yuhae, mmen kyon tona tssenkhyae to shom ji' to phyotala. Tokhatola Potsow ntsinran jijo otsotso ji elhi lona ejüala."
N khophio Yantsü Jiang Tsükona
20 Jitosi ombona yantsü kvülo elhi tsüphov tssocho sana jianglo kyon jiangna onte mmen lona nkhophio ji tsükona heto makvü benkacho. 21 "Khorazin! Ni tsükona enungrathav, Bethsaidal Ni tsükona ha ekhenthav, nte thüngi emhukthav elhi tssoato Tyre tona Sidon to lo tssovo, onteno nkolo na posta mpensi onte tsüko live yakata onte mmen lona khophithakvü. 22 Tolea ana nte ezoaka yitsso tsüngon jilo jo nte thüngina jo Tyre tona Sidon to mmhonphio tssovka! 23 O Kapernaum! Nino potsüwoe ni ekhyonkachi hunga alo? Nino echüli ni tssüngchov. Ntiotssole ni lo emhukthao tssoato Sidom lo tssocho saliwo hoji yantsü jo nchüng lea liv! 24 Ana nte ezoaka yitsso tsüngono jo ni thüngina jo Sodom mmhonphio tssovka!"
A thüngi Oro Esantava
25 Yuta jilo Jisu na phyosochicho: Ana ni mying thüngala opo, oyak osi limha pvüi, ntiotssole nina shiang shi ntsinran osi kichuk eroe thüngina mphoe vasi ngaro shiang thüngi ntsithoko ji tsükona. 26 Hoka, apo ntiotssole ni lüm erüng jo hojito. 27 "Olan topvüto apona a thüngi apithaka osi opo na yaki ochinaha otsoe ji n-tsi; osi otsoe ji tona otsoe jina ntsithokvü zikao jiang to na yaki jo ochinaha opo ji n tsi. 28 "A thüngi rotava, nte ryusang mmuka oha mmyingu hansi evanden; tona ana esan nte pivka. 29 Avüngkhung ji phungthetava osi a thüngi na engathe khitava; ntiotssole aiyo emiroe osi lümbüm enyipa; osi ntena nte mon ekümo esanphen hungu. 30 Ntiotssoe a vüngha jo laroa osi a ha jo zükhoa."
Esanmung Tsükona
1 Hoji yutalo Jisu na esanmung tsüngono oli yakchia wocho; osi ombo sürüi jiang na wondomo jina tssukben ntsani tsotacho. 2 Tole Pharasee jiang na hungi ombo ezotacho, "Zeta, nisürüi jiang na esanmung shikhfü yesaoala!" 3 Ombona heto onte ezocho, "David na ombo tona ombo nzo etssoe jiang to wondonathüng, kvüto lyucho sana ntena nkhachehan choke? 4 Ombona Potsow ki rhowo khochaki evao hümri kümoe pvüti na yaka n tsokhoko jiang khi ombo osi ombo nzo etssoe jiang na n tsotachoke? 5 Elani ekhümki pvüti jiangna emung tsüngono emung shikhfü yesoa ha nlan n lio ji ntena yizüng lona n khachehan-choke? 6 Ana nte ezoala; ekhümki jilona tsükao shilo vana. 7 Osi ntena "Ana khonzan ji ethev lichwokha othan ji mek" to phyo ji yichak ji ntsivo ntena elan ji nlan n-tsothuk. 8 Ntiotssole kyon tsoe jijo, esanmung ji pomoe OPVÜI ji.
Khechüi Kyon ji
9 Hoji lona khoe ombona onte Synagogue ki rhowocho. Tole hojilo kyon tsüka khechüi vancho. 10 Osi ontena ombo engacho; "Emung tsüngono emiyiv tsükona shikhfü lona elan lichoa alo?" Ontena nlan ombo piv tsükona hojito ombo engatacho. 11 Tole ombona heto onte janlancho; "Nte yolo ochona sana olyu motsünga vanle, hoji emung tsüngono sokvüi vanthei vanvo, hoji n sükae ocho vamvüla?" 12 Osi kyon jo olyu lona kvüta tsüphoka-chola? Hoji tsükona emungo lea elhi mmhom etssov jo elana." 13 Jisüi jo ombona khechüi ji ezocho, "Ni khe ji phisa," kyon jina ombo khe ji phisale esanawoe ji esüa mmhoni sicho. 14 Tole Pharasee jiang na hapoe sanchuki kvütoli ombo chüthokvü sana to khyimtacho.
Potsow na Ethüngcheo Phajae
15 Jisu na hoji esürhaki hoji lona nkachoe yicho; tole khosha na ombo sü rüa wocho, osi ombona onte emiyiracho. 16 Hoji oyam ti-ntsithukle to ombona onte ezocho. 17 Shijo Isaiah na heto phyoe vao ji benthokvü tsükona, is "Ana a phajae ethüngcheo ji zeta, a nzantsowo osi ocholo a eküm jüngra licho sana ji; ana a mon ombolo rothokvü; osi ombona pvüji topvü yolo a yitsso ji thenchoa phyov. 19 Ombona 11 khiran mekana n ron; mekana lantsüi na tüngkachia n phyo. 20 Osi ombona ntsanrük ji khi n khyothüng nandang jo, tija khfüyipi elio jilea eranroe n si; mekana oying milon lona rungchüma vamo jilea mhethoki n si. 21 Osi ombo myingo na pvüjipoe jiangna eyilo n hungthüng nandang jo ombona tssov."
Jisu Tona Belzebul To
22 Tole mhyikjüng eyim tsüka mmen mon evan oyi n sanche tüv sosi rocho osi ombona emiyicho, tole eyim jina oyi nsancheta, hunga to tssocho. 23 Tole kyon topvü na emhuka phyotacho, "Shijo David tsoe ji ke?" 24 Pharasee jiang na hoji zoe phyotacho, £iKyon shina mmen mon esapvüi Belzebul ji myingo na tae mmen mon phanala." 25 Ombona onte nchümri ji ntsii heto onte ezocho, "Ekhüngyan kvümoe ombobo chiroe onte onte rota sana jijo monala; osi yantsü mekana wopan kümoe na chiroe onte rota sana jijo n phanthichev joyi siala. 26 Ji esüa satan na satan phanvo omboha khosotala, tona kvütoli ombo ekhüngyan livla? 27 Ana Belzebul etho khi mmen mon phana tssona, nte sü rüi jiango ntio khi phanala? Jitsükona ontena oyi nte tssoyivka. 28 Tolea ana Potsow mon khi mmen mon phanala; osi hoji yichakjo Potsow ekhüngyan ji nte thüngi rothaka to ehungpvüi ji. 29 Elani kyon ochona sana etho ejüi tsüka ki efü hunga tssona ombona ovüng tssoa etho ejüi ji chüngdeni n vav kvütoli rhowovla? Kipvüi ji chüngdeni vasanati efüchey. 30 Ochona a nzo n tssoa sana jina apanlanala; osi ochona a nzo n hanrhyua sana ombona benroala. 3i Jitsükona ana nte ezoaka; kyon na mmen lan taro tssoa phyo jiang topvü nlan siyiv; tolea ntho mon ji yikvüo jijo nlan n siyi. 32 Otsoe ji tachia oyi motsünga phyo jijo siyiv, khatola ntho mon ji tachia nsamo jijo echungren shilo lea, etsao ji lea n siyi.
Odung Tona Tssüngthi ji To
33 Odung ji mmhona tssona tssüngthi jiha mmhom ethiv; osi odung ji n mhona tssona tssüngthi jiha mmhona n thiche; ntiotssole odung jijo tssüngthi ji lona chethetala. 34 0 nrü tsoeden nteji n mhom jo kvütoli ntena mmhom nsanchevla? Ntiotssole lümbümi jüwo ji opvüngi na nsanala. 35 Kyon mmhom jina ombona mmhom hantheo ji lona mmhom chiyithukala; osi kyon n mhom jina ombona n mhom hantheo ji lona n mhom chiyithukala. 36 Ana nte ezoaka, kyon na oyi motsünga ntaknshon n liv nsanchoiea yitsso tsüngono etsüngi ombo zeyiv; 37 ntiotssole ni yi yakchia ni ntsachev; osi ni yi ji yakchia ni chüv.
Chethev Yamo ji
38 Pharasee tona eranpvüi ejoma to na heto ombo ezocho; "Püng noe, ena ni thüngina chethev ezehungala." 39 Tole ombona heto onte ezocho, "Lonsülonphyo osi n mhom echungren jina chethev yanala, tolea Jonah chethev ji yaka chethev thanpo nte ejüv meka. 40 Ntiotssole Jonah ji kvüto ongo bukchungi eng ethüm zümo ethüm to vancho sana hoji esüa, kyon tsoe jiha eng ethüm, zümo ethüm to lichungi vamvü. 4i Yitsso tsüngono Neneveh yantsü kyon jiangna echungren shilo kyon jiang nzo phanthi echungren shi nlan piv; ntiotssole Jonah na püngnoale ontena khophicho, osi Jonah lona tsükao shilo vana. 42 Jüjowoe Sheba lo rani jina yitsso tsüngon no echungren shi nzo phanthi echungren shi nlan piv; ntiotssole ompvüna limha nkeni na oro Solomon püngno yi mmhon ji engacho; osi Solomon lona tsüphokao shilo vana.
Mmen mon Elani Yicho
43 "Mmen mon na kyon lona chiyia na likying yakchia esanphen yana sanphiala, tolea n hungana 44 ombona phyoala, "Ana sisi eyio kihen jilo yilamka;" Ombona kholani yiana oki ji ejungi khechei tsaka sükae lia hungala. 45 Jisüi jo ombona owo ombo lona ntakao tüv omon tiying tsaphalani oyi oki jilo vantala; toana kyon ji eküm ji ovüngthüng lona n mhonkao kümala. Nchüng echungren shiha hojito tssovka.
Jisu Oyo Osi onyuroden
46 Ombona kyon jiang püngnoa vanathüng oyo tona ojenio jiang to ombo thüngi thyutahunga oro hapoe vantacho. 47 Tole kyon tsüka na heto ombo ezocho, "Niyo tona nijenio jiang to ni thüngi thyuta hunga oro hapoe vana." 48 Tole ombona "Ayo jo ochola? osi a jeniden jo ochoangla? to phyocho; 49 osi ombo sü rüi jiang thüngoe okhe rüchia phyocho, "Zeta, ayo tona ajeniden to jo shiang: 50 Ochona Potsüwoe opo lüm erüng tssoa sana jiango a jeniden, ayulovden, osi ayo!"
Mojü Even lo Ejyukacho
1 Hoji nchuk Jisu na khoe owo püngnov tsükona jümang tssae khokthecho. 2 Kyon kholok tsüphov na ombo hazhüo jina ombona orhungi rheyi khokthecho osi kholok jijo jürani mangrae vancho. 3 Jithüng ombona ejyuka yina elüm püngnocho: Lijon tsüka na mojü veno wocho. 4 Ombona mojü ji venle mojü ejoma jo lantssae elungthecho; osi woro na oro tsoe sicho. 5 Mojü ejoma jo olung poni elungthecho osi jiang lojo ochon matarojina elaro buki phanthicho, 6 tolea eng chiroale mmikae, oying junga n süngo jina chüi sicho. 7 Mojü ejoma jo okyo yolo elungthecho; osi okyo jiang nzo rankae okyo jiangna khüptsüngi sicho. 8 Tolea mojü ejoma jo liko mmhom lo elungthei tssüngthi ethicho; ejoma jo nzo bena, ejoma jo rukro, elani ejoma jo thümro to. 9 Jitsükona Jisu na, eno mpana enga to phyocho.
Ejyuka ji Yichak
10 Ombo sürüi jiangna heto ombo engatacho, "Nino ntiolyui ejyuka yina onte püngnoala?" 11 Tole ombona janlancho, "Nteno Potsow ekhüngyan tsükona yichüng ji nte ntsithukthaka, tolea onteno n zohan. 12 Ntiotssole ocho na lia na kyongkao pilani tssona lilanthokvü; khatola ochona n liana ombona tara lio ji mpato ombo khilaniv. 13 Jitsükona ana ejyukae na onte ezocho, ntiotssole ontena zelea n hungala osi zolea n gathetala. 14 Isaiah zenkhying na heto phyo ji onte lona benala; Ntena zov khatola engathev meka, ntena hungu khatola chethev meka, 15 ntiotssole kyon jiang lümbüm ji zümathaka, osi onte eno jiang püngthaka; osi onte mhyik jiangha jukthaka. To mekcho salivo ontena hungu osi onte eno jiangna zov; osi onte lümbüm jiangna engathev osi ontena a thüngi kholani yiv küma ana nlan onte siyisi onte emiyiv, to Potsow na phyoala. 16 "Tokhatola nte mhyik jianglo jo mmha jüa; ntiotssole ntena hungala osi nte eno jiangna ha zoala. 17 Ana otsotso nte ezoala, zenkhying osi ntsanthoe elümoto na nte na hungwo jiang eyilota ha ontena n hung, osi ntena zo ji zov eyilota ha onte na n zocho.
Mojü Even Ejyuka yi Ji Erorocho
18 Mojü even ejyuka ji enga osi ntsi khia; 19 Kyon ochona potsow ekhüngyan motsü ji zosi n gatheta sana, ombo lümbümi yingthako ji n mhom jina oro rechoe hansi yiala; hojijo lantssae elungtheo ji. 20 Olong poni elungtheo jijo kyon ochona oyi ji zoe zakto emathata khicho si, 21 ombolo oying nsungu esüngaro tae vanthoksi kvüthüng oyi ji ndana khangshi ezüp yia na zakto elani sia sana hoji. 22 Okyo yolo elungtheo jijo, ochona oyi ji zolea limha tona ejüeli to jüpon lona oyi ji moni sithuksi tssüngthi n thia sana hoji. 23 Liko mmhom lo elungtheo jijo ochona oyi ji zoe engatheta sana hojina tssüngthi ethi oman lithukala; kvüina jo nzoa, kvüina jo rukro, osi kvüina jo thümro to ethiala.
Muthan Longi Ero Jiang
24 Jisu na ejyuka yi thanpo heto ezolancho, "Potsow ekhüngyan jo heto esüa tüv, kyon tsükana ombo li mojü mmhom vencho; 25 tole kyon jiangna yipta vanathüngna ombo ri jina oro erotsüng veni si tsancho. 26 Jitsükona müthan jiang buki ethi-ebenale ero jiangha phanthicho. 27 Tole kipvüi ji phajae jiangna heto oyi ombo ezocho, "Tsüphoe yo, nino oli jo mojü mmhom n venchoke? Tona kvütoli ero bukchola?" 28 Tole ombona "Jijo ori jiang elhi" to phyocho. Phajae jiangna "Tona nino owo ero jiang erukthokvü alo?" to engacho. 29 Tole ombona "Meka ntena ero jiang rukalato müthan mpato ruknhyav. 30 Jitsükona liri n janthüng jo onte nzo rankathuka; tona liri tsüngono ti ana liri jiang ezoa ero jiang rukdeni erungu chungi vaden-toksi otssuk jiang ri osoni hanthethokvü ka."
Hanyentsüng lo Ejyukao Ji
31 Ombona ejyuka thanpo heto onte ezolancho, "Potsow ekhüngyan jo kyon tsüka na hanyentsüng khi oli yingcho esüa tüv; 32 Shijo otsung yolo teritso ji khatola buki rankata na ero yolo tsüphotso ji kümala, osi oyaki woro jiang na oro hoji khero jianglo oshüp tssoala."
Ebung Mozhü lo Ejyukacho
33 Ombona ejyuka thanpo heto onte ezolancho, "Potsow ekhüngyan jo eloe tsükana ebung mozhü khi ohüm chencho lo nzii hoji pungthokvü mphoe vacho esüa tüv." 34 Shiang hetopvü Jisu na kholok ji thüngi ejyuka yina ezocho; osi ombona ejyuka n thev jo ntia n phyocho. 35 Hoji jo zenkhying na heto phyoe vao ji benthokvü tsükona. "Ana kvüthüng onte thüngi nsana sana ejyuka theta nsam; osi limha shi benkadeni na mpho yi jiang ji ana phyosochi onte ezov."
Jisu na Müthan Tona Ero to Ejyuka ji Eroroala
36 Jisüi jo ombona kholok ji sisi oki rheyicho. Tole ombo sürüi jiangna oro ombo ezocho, "Oli erolo ejyukao ji eroroe ezoa." Tole ombona ezocho, 37 "Mojü mmhom vemo jijo kyontsoe ji; 38 Oli jijo limhaji; osi mojü mmhom jiangjo ekhüngyan tsoeden, ero jiango n mhom ji tsoeden, 39 osi ori ochona erotsüng vencho sana jijo tsünrham ji; liri jijo limha ehüm ji, liriden jiango lanbenden. 40 Ero jiang hanrhyui omi na rungo ji esüa ochüm tsüngono ha hojito tssov. 41 Kyontsoe jina ombo lanben rothuki ekhüngyano mmen bukthokphen, 42 osi n mhom etssoe jiang topvü hanrhyui milongi onte vathechiv; hojilo kyon na oho shüngta kyatav. 43 Osi ntsanthoe kyon jiango eng esüa opo ekhüngyani wona vamvü. Eno bona engae khitava!
Potsow Ekhüngyan no Ejyuka Jiang
44 Potsow ekhüngyan jo shi esüa tüv. kyon tsüka na oli motsüngalo ejüeli juthei licho yanchecho. Tole ombona hoji eyuki vasi ematha tsünga oyi ombo eli jiang yenkhani owo oli ji shicho tüv. 45 Elani Potsow ekhüngyan jo shichoe tsükana tsentsülong yana owo, 46 tsentsü man yanchei oyi ombo eli topvü yenkhani owo hoji shicho esüa tüv. 47 Elani Potsow ekhüngyan jo ngovanphen jümangi vanthechi ngolan taro eyukyacho esüa tüv; 48 ngovanphen ji pyingale ombona hoji süchei ongo mmhomo jiang ekyoe khisi ongo n mhomo jiango sicho esüa tüv. 49 Ochüm tsüngono ha hoji esüa tssov; lanben jiangna jo ntsanthoe jiang yolo na n mhom jiang ekyochev; 50 osi milongi onte thechiv; hojithüng kyon na oho shüngta kyatav.
Ntsa Ethan osi Ehen
51 "Ntena shiang hetopvü engathecho alo?" Tole ontena "Hoka" to janlancho. 52 Tole ombona onte ezocho, "Jitsükona Potsow ekhüngyano eranpvüi ekümo jiango onte otsük akvü kipvüi tsükana ombo kikyo-nikyo vapheni na ejüeli ehen ethan hanchukchi cho esüa tüv."
Nazareth Lona Jisu N khicho ji
53 Jisu na ejyuka yi shiang phyora-thakale jilona khoe oyi ombo metae yicho osi Synagogue ki rhowo heto onte shikacho; 54 tole ontena emhuktsüngra heto phyotacho, "Kyon shina hetüv nchümri osi emhukthao elhi shiang kvülona khichola? 55 Shijo kitssoe ji nagro ji mekchoke? Oyo jo Mary to tsao ji mekchoke? Osi ojenio jiango James, Joseph tona Simon, Juda to jiang mekchoke? 56 Ombo oyuloe jiang topvü ete ndüngo vankhana. Tona kyon shina hetüv kvülo khichola?" 57 Ontena hojito phyota ombo thüngi lüm tsukta ombo n khichocho, Tole Jisu na onte ezocho, "Zenkhying jo ombo ki tona ombo metae na to yaka jo yikrachiala. 58 Ontena n longtsüo jina ombona jilo jo chethev elhi lümato n tssocho.
John Baptio Chüo Ji
1 Hojithüng ji Jisu motsü ruta Galilee lo mesao Herod na zoe heto onte ezocho. 2 "Shijo otsotso John baptio echü lona kümlanthaka, jitsükona ombo na heto etho lia chethev tssoala." 3 Herod na ojenio Philip engh Herodias tsükona John ji rhümae vüngi vacho. 4 Jijo John na heto ombo ezo jina, "Nina ompvü khiv shikhfü nli." 5 Herod na jo ombo chüthok hunga ha Jihudi kyon jiang kyucho ntiotssole onte na John ji zenkhying to phyotacho. 6 Tokhatola Herod ebuk tsüngon jani ombo otsolov jina kyon jiang mhadungo sharia rheyi kyon jiang emathathukcho, 7 jitsükona ompvüna ntio chona na piv to Herod na phyochakcho. 8 Herodias na otsolov ji heto chonle to ezocho, "John baptio kvüri ji ophi shilo thei apia." 9 Tole mesao jina nungraha ombona nzontsü mhadungo phyochakthako jina pile to yizüng picho. 10 Ombona ezoa owo John ji vüngpheni na kvüri wonithokcho, 11 osi kvüri ji ophilo thei oyi eloerowo ji pile ompvüna oyo thüngi hansi yicho. 12 Tole ombo sürüi jiang na omüng ji khi shothei sitasi oyi Jisu ezotacho.
Jisu na Othüng Mongo Tsothukcho
13 Jisu na hoji zoale orhungi tsanthei yingsü yinglo metae yicho. Kyon jiangna hoji zoale yantsüi na ojoena kholuk tssoe ombo phana wotacho. 14 Ombona jütssae ehachukchile kyon kholuktssü hungcho; osi ombona khonzan to onte tssoyia nochonori jiang onte emiyicho. 15 Mmyuale sürüi jiang na oro heto ombo ezocho, "Shijo yingsüng yinglo meta osi enhungo mmyuala. Jitsükona kyon jiang ji oyi onte yani onte etsoyu shitathuka." 16 Tole Jisu na ezocho, "Ontena eyiv ethev n-li, ntena ntiosana onte tsothuktava!" 17 Tole ontena ombo ezocho, "Ena hümri mungo, ongo eni totae lia." 18 Tole hojiang hansi ombo thüngi yitale to ombona ezocho. 19 Jisüi jo ombona kholuk ji ero boni khukthethoksi, hümri mungo ongo eni to ji bensi oyaki zekachia randanthakale mpvüroe ombo sürüi jiang pia kyon jiang jantaithukcho. 20 Tole onte topvüna tsotasi lüm pükcho. Jisülo enhyocho luksa tarosi eni khyocholancho. 21 Hoji lo etsoe eloe tona ngaro to n-khana wothüng mungo harüma tssocho.
Jümang Poni na Sanphicho
22 Jisüi jo ombona sürüi jiang ombo vüngina orhungi tsanthe yia vanthokcho, osi ombona kyon kholuk ji pyoni yithokcho. 23 Kholuk ji yithakale ombona phunglani randanwo chungocho. Mmyuale hojilo omboti vancho; 24 khatola orhung jijo hoji meta jilona kona jümangi eha yithakcho osi ezhü na onte ryulanchia jükhyo na onte jephicho. 25 Zümolo shanlan mezhüo to jilo ombona jüponi na tsa onte thüngi wocho. 26 Ombona jüponi na tsa sürüi jiangna ombo hungale kyutsüngra "Shijo omon!" to phyotacho, osi ekhen lona eronkachitacho. 27 Khatola ombona zakto onte ezocho, "Longshyutava!" "A ka ti kyutava!" 28 Tole Peter na heto ombo ezocho, "OPVÜI, hoji ni tssona jüponi na ni thüngi a rothuka." 29 Tole ombona "Roa" to ezocho. Jithüng ji Peter na orhungi na chiyi jüponi na tsa Jisü thüngi wocho. 30 Khatola mpung ndav ji hungi ombo kyuajo ombo jüngthe OPVÜI, a shanchoa" to tüngkachicho. 31 Jithüng Jisü na zakto okhe yonchia ombo rhümata ezocho, "O longtsü teri! Nino ntiolyui woewolanala?" 32 Tosi onina orhungi rheyiale mpung ji esancho. 33 Jithüng orhungi jüwo jiangna Jisu khümtacho."Otsotso nino Potsow tsoe ji!" to phyotacho.
Gennesaret Lo Nochonori Emiyicho
34 Ontena wozhü ji khyingkae Gennesaret metae chiyicho. 35 Tole meta jilo kyon jiang na ombo chethetale, ontena meta akvü lo wothoka nochonori jiang tsarhyutacho. 36 Osi ontena ombo süjüm lo tae evüngkav chontacho; osi hoji evüngkae topvü emiracho.
Pharasee Jiang Rülonta
1 Pharasee tona eranpvüi jiang to na Jerusalemi oro heto Jisu ezotacho, 2 "Ntiotssona ni sürüi jiangna eramoe jiangna eshikao rülonta ji yesoala? Ontena okhe n-tsükvü tsotala!" 3 Jisu na heto onte ezocho, "Tole nteno ntiolyui eran shikhfü ji tsükona Potsow yizüng yesothukala? 4 Potsow na phyocho, 'Nipo osi niyo yikrachia' osi ochona opo osi oyo rhiyikata sana chüthukvüka." 5 Tole ntena jo heto phyotala, "Ochona opo osi oyo ji heto ezoana 'Ana ni nzanchithung ji Potsow pithaka' 6 ombona opo osi oyo nzanchilam n-li to. Jitsükona ntena eran rülonta ji yakchia Potsow yi ji oman n lithukala. 7 O kyakrümden! Nte tsükona Isaiah na elanthata heto zenkhyingchi lia! 8 'Kyon shiang na onte menfü na a yikrachiala, tokhatola onte lümbüm jo otsotso a thüngina konta. 9 Ontena ejüngona a khümtala, osi kyon yijak jiang ji Potsow yichüng esüa shikatala!"
Ntiona Kyon Mmenala
10 Jisu na kyon jiang tsae heto onte ezocho, "Engatava osi engathe khitava! 11 Kyon püngi rheyio jiang na kyon ji n-menala, khatola opüngi na chiyio jiang na kyon ji mmenala." 12 Tole sürüi jiang na oro ombo ezocho, "Pharasee jiang na hoji zoe onte lüm tsuko ji nina tsentsi?" 13 Tole ombona heto onte ezocho, "Odung kvüwoe Potsüwoe evamo opo na n-chümcho sana ruki siv. 14 To onte evan vanthoka, onteno lansoe mhyikjungden ka. Mhyikjüng na mhyikjüng olan sona onita sokvüi elungthev." 15 Tole Peter na 'Yichak ji eroroe onte ejüle to choncho." 16 Jisu na ezocho, "Ntena ha enhünga ejan n-ngathehanchoke? 17 Opüngi na rheyio jijo mmani rheyi chiyilani siala to ntena n ngathehan-choke? 18 Khatola opüngina chiyio jijo lümbümi na chiyiala osi hojina kyon mmenala. 19 Ntiotssole lümbümina n-mhom chiyiala, lüngthata, efürama, lonsülonphyo, efü, ejüng ehungpvüi, echi ruta 20 shiang na kyon mmenala, khatola ontena okhe n tsükvü tso jina jo kyon n menala.
Kanaan Eloe Tsüka Longtsü
21 Jisülo Jisu na jilona khochuki Tyre tona Sidon to district lo yicho. 22 Jithüng Kanaan eloe tsükana heto erona chiyicho, "A nzankhünga, David tsoe OPVÜI; a tsolov ji mmen mon na pyingi lia osi ekhenthav sükhying lo vana." 23 Tole Jisu na yia tia ompvü n janlancho. Jithüng ombo sürüi jiangna chiyi ombo thüngi jonjicho, "Ompvü na kya ephana ka zeyia yithoki sia." 24 Tole ombona phyocho, "Aiyo Israel wopan moni vamo jiang thüngi tae arothukcho." 25 Tokhatola Ompvüna sena oro nkhok tseni phyocho, "OPVÜI, a nzanchia." 26 Tole ombona ezocho, "Ngaro jiang tsikung khi füro phiv jo nlan." 27 Ompvüna ezocho, "Hoka, OPVÜI, tokhatola füro jiangna ha omotsü tssikungina tssibüm elongo jiango khyoe tsoala." 28 Tole Jisu na janlancho, "Eloe, nino longtsü tsüphoe eloe! Nina rüngwo ji benchethokvü ka." Tole ompvü otsolov ji yuta tsük jilo zakto emi sicho.
Jisu na Kyon Elümoto Emiyiala
29 Jisu na hoji lona khoe Galilee jümang dunga yicho. Osi ombona phunglani ehungo khukthecho. 30 Hojilo kholok tsüphov rocho, osi ontena jojang, jotüm khetüm, mhyikjüng, eyim osi thanpoe elüm sosi oro ombo jo ndüngo vanthokcho, tole ombona emiyicho. 31 Osi jojang na olan tsa, mhyikjüng na hunga elani jotüm khetüm jiang benria, osi eyim na oyi nsana kyon jiangna hungale emhuktacho. Osi Israel Potsow phfütssonthukcho.
Othüng Mezhü Tsothukcho
32 Jisu na ombo sürüi jiang tsarhyui ezocho, "Ana kyon kholok shi a nzana, ntiotssole ontena a ndüngo tsüngon ethüm vanthaka osi etsov n li; olani na onte mmukvü küma ntia n tsothokvü jo onte n yithuk hungala." 33 Tole sürüi jiangna ombo ezocho, "Etena lijüngi kyon hetata etssov hümri kvülo khitavla?" 34 Tole Jisu na ezocho, "Hümri kvüta hana?" Ontena ezocho, "Tiying, tona ongo tara to." 35 Jisüi jo kholok ji likoe khokthetale to ezosi, 36 ombona hümri tiying ji tona ongo tara ji to khi bensi Potsow montsson pisi sürüi jiang pia kyon jiang jantayithukcho. 37 Ontena lüm ebük tsotasi enhyocho luksa tiying khyocho cho. 38 Hojilo etsoe eloe tona ngaro to n khana wothüng mezhü tssocho. 39 Jisüi jo ombona kyon jiang yithuksi orhungi thei Magadan metae yicho.
Chethev Chomo Ji
1 Pharasee tona Saducee to jiangna ombo kyak füi zev tsükona osi ombo ji Potsow na rothukcho to chekav tssoa chethevmothev tssoe onte ejüle to ombo ezotacho. 2 Khatola Jisu na onte ezocho, "Mmyua eng rheta yiana ntena eyingosi, 'Nchüngo oy ak myona küma tsünglan mmhom,' 3 Osi enyathüng jo ntena, 'Nchüngo oyak shi myonshia, münga to tsso küma tsyungryu rov' to phyotala. Ntena Potsüo oyak shilo chekav jiang esürhak si yuta ji chekav jiang n tsi! 4 N mhom osi lonsülongphyo echungren na chekav yanala, tolea Jonah chekav ji yaka hungu meka." Jisüi jo ombona onte thüngina yi sicho.
Pharasee tona Saducee to Jiang Ebung Mozhü Ji
5 Sürüi jiang na jümang phukowoe chiyitale mhechoa hümri n hantacho. 6 Jisu na onte ezocho, "Pharasee tona Sadusee to jiang mozhü n-mhom ji ntangshontava." 7 Tole ontena phyotacho, "Etena hümri hantasi n-ro." 8 Jisu na hoji ntsi onte ezocho, "O longtsü teri kyonden! ntiolyui nteno hümri n-hancho phyotala? 9 Enhüngaha ntena n chethehancho ke? Hümri mongo khi Othüng mungo tssothuksi ntena luksa kvüta khyochocho sana ji mhechothakchoke? 10 Mekana wothüng mezhüji hümri tiyingkhi tsothuksi ntena luksa kvüta khyochocho sana mhechothakchoke? 11 Ana hümri tsükona n-wongkhyuo ji kvütoli ntena n-chethetala? Ana phyo jijo Pharasee tona Saducee to jiang ebung mozhü n mhom ji ntangshontale to phyocho!" 12 Tole ombona hümri mozhü ji mekna Pharasee tona Saducee to jiang püngno ji phyocho sayia to ontena engathecho.
Peter na Jisu Oponi Chiyia Phyochako ji
13 Jisu na Ceasarea Philippi lo chiyi ombo sürüi jiang heto engacho, "Kyontsoe jijo ocho to kyon na phyotala?" 14 Tole ontena "Ejoma na jo John Baptio," "Ejoma na jo Elijah osi ejoma najo Jeremiah alo zenkhying yolo tsüka sana to phyotala," to ezocho. 15 Tole ombona onte engacho, "Tole ntena jo aiyo ocho to phyotala?" 16 Simon Peter na phyocho, "Nino Khrista ji, Eküm evamo Potsow tsoeji." 17 Tole Jisu na ombo janlancho, "Ni mmha elitsowo, John tsoe Simon! Ntiotssole shijo ejen oso na ni ntssungcho mek, tolea opo Potsow na. 18 Ana ni ezoala, nino Peter (olung) ana olung shi poni a ekhümkho ji tssokav, osi echü ji etho na shi pono phanthiv meka. 19 Ana Potsow ekhüngyan jabi ji ni pivka; osi nina limha lo ntio khana sana potsüwoe ha khamka, osi nina limha lo ntio chonchia na potsüwoe ha chonchivka." 20 Hojisüi jo Jisu na sürüi jiang ochina ha Khrista ji omboka to ti phyotale to ombona tangcho.
Jisu na Ombo Echüv Ovüngna Phyojo
21 Hojithüng na benkae Jisu na ombo sürüi jiangji heto elaena ntsithoka benkacho, "Ana Jerusalemi rhowoe eramoe jiang, Pvütiden jiang, tona shikhfü püngnoeden to jiang khelona ezüpvü lia. A chüthokvü, : tokhatola nchuk ethümo tolojo a kümchelam." 22 Tole Peter na ombo tsae heto maka phanthicho, "Potsow na e nzankhüngsi hojito n-tssothukla. OPVÜI!" 23 Tole ombona kholani Peter ezocho, "A sülami yia, Satan! Nina a khetsüaka. ntiotssole nino Potsow nchümri jiwoe mek, shijo kyon nchümri." 24 Tole Jisu na ombo sürüi jiang ezocho, "Ochona sana a phana rohungna ombobo mhechoe sisi ombo donphen tsakae bensi a phana rothoka, 25 Ntiotssole ochona ombo eküm shanchohunga na moni siv, osi ochona a tsükona ombo eküm mona sana hoji hunglam. 26 Ntiotssole kyon tsüka na limha totona khikhanlea ombo eküm ji moni sia tssona ntio khakchovla? 27 Ntiotssole kyon tsoe jina ombo lanben nzo opo pfütsson na pyingi rov-sala, osi hojithüng ombona kyon otsük akvü ombo ombo elhi ji ephah yantsov. 28 Ana nte ezoaka nte helo phanthi evan yolo ejoma jo kyontsoe jina ombo ekhüngyan theta roa n hungthüng jo chüv meka.
Phfütsson Dungphio Ji
1 Tsüngon tiruk sülo Jisu na Peter, James tona ojenio John to sosi phunglan ntssom tüv lo chungotacho. 2 Jithüng ontena hunga ombo pvütsson dungphicho. Ombo mha ji eng esüa tüngracho osi ombo mpensü jiang ehüma wondangcho. 3 Hoji lo Moses ha Elijah oni oro Jisu thüngi thyuta ontena hungcho. 4 Jithüng Peter na Jisu thüngi ezocho, "OPVÜI, etena helo rotacheo ji emhukthav mmhona! Ni lüm na rüng na, ana süranki ni echi motsünga, Moses echi motsünga, Elijah echi motsünga to tssov." 5 Ombona nsana vanathüng eluk tsünglüpvü na onte eyukzhücho, osi eluki na owon heto zocho, "Shijo a nzantso ji – ombo lo a ematha lia, ombo yi engatava!" 6 Ombo sürüi jiangna hoji zoale onte rangsüa ekhentsüngrae likoe vantherae vancho. 7 Khatola Jisu na oro onte evüngkata ezocho, "Phanthitava, osi ti kyutava!" 8 Ontena engokae zetale Jisu tae hungcho. 9 Ontena phunglani na joyita vanathüng, Jisu na heto onte ezocho, "Kyontsoe ji echü lona n-phanthithuk thüng jo etena hungwo shi ochia ti zotava." 10 Tole sürüi jiangna heto ombo engacho, "Tona eranpvüi jiangna ntioli Elijah na vünga rotem to phyotala?" 11 Tole ombona ezocho, "Otsotso Elijah na vünga rov osi olan topvü mmhonkathokvü" to Jisu na janlancho. 12 Tokhatola ana nte ezoaka, Elijah rothaka khatola ontena n-tsiala. Ji esüa kyon tsoe jiha onte khelo na hojito ezüpvüka." 13 Tole sürüi jiangna ombona John Baptio motsü phyoala to engathecho.
Nungori Tsüka Mmen mon Eyan Emiyicho
14 Ontena kyon kholuko chiyitale kyon tsüka na oro nkhuktseni ombo ezocho, 15 "OPVÜI, a tsoe ji a khonzania! Ombo ji etukra na n khio ezüpala; nsamsam omi osi ojüi ombo vanthetala. 16 Ana ni sürüi jiang thüngi sosi roaha ontena n miyikukcho." 17 Tole Jisu na janlancho, "O longtsü n-li osi ethi siluo echungren! Aiyo nte ndüngo kvütenhya vamla? Ana kvütenhya nte ezüpivto? Nongori, ji shilo sosi yia!" 18 Jisu na makle mmen mon jina chiyicho osi jitopvü kyon ji emicho. 19 Tole sürüi jiangna kijaroe na oro Jisu engacho, "Kvütoli hoji ena n-phanikukcho ato?" 20 Ombona ezocho, "Nte longtsü terio jinaka," "Nte longtsü hanitsüng tera tia lio ntena phunglan shi, 'Helona senphi yia!' to ezolea jina nkanphiv. Osi ntena n-tssochewo ntia liv mek!" 2i Tolea shijo ekhang tona randan to yakchia tae na tssocheta.
Jisu na Ombo Echüv Phyolamo Ji
22 Kvüthüng sürüi jiangna Galilee lo sanrhyutacho sana Jisu na heto onte ezocho, "Kyontsoe ji kyon khelo theyivka, 23 osi ontena ombo lüngthavka; tolea tsüngon ethümoto lo jo ombo kümchelanthukvü." Tole onte topvü nungratsüngcho.
Ekhümki Enhyak Tssen Khyao Ji
24 Ontena Kapernaum mi chiyitale rangkhyae jiangna oro Peter ji heto ezocho, "Nte pvüi jijo ekhya shi n thetake?" 25 "Ho, thetala," to Peter na janlancho. Tosi ombona oki yile Jisu na ombo engatencho, "Simon, nino kvüto nchümala? Limha shilo mesao jiangna ochoang thüngina ekh ya khiala? Onte tsoe jiang thüngi na alo thanpoe jiang thüngina la" 26 Ombona "Thanpoe thüngina" to ezole, Jisu na ombo ezocho, "Tona otsoe jiango etheo tüv n-li. 27 Tolea onte lüm n tsukthukvü tsükona owo jümangi ongo ejithechia osi ongo sademo ji büngi rangpyaka jüvka. Hoji khi eni ejan theta."
Ocho Tsüphotsola?
1 Jithüng sürüi jiangna oro Jisu engacho, "Potsow ekhüngyani jo ocho tsüphotsola?" 2 Tole ombona ngaro tsüka tsae onte lungo vanthuksi onte ezocho, 3 "Ana otsotso nte ezoaka, ntena khophilani ngaroden esüa n kümvü jo ntena kvüthüngha Potsow ekhüngyani n-rheyiche. 4 Ochona ngaro shi esüa ombobo teri küma sana ombo Potsow ekhüngyani tsüphotso ji. 5 Ochona a myingona hetüv ngaro jiang khichoa sana a khichoala.
Mmen Etssov lo Ejiphiv Jiang
6 Tokhatola ochona a longtsüi teri hetüv tsüka tia mmen tssothuka sana kyon mo jijo evüngo longpyak khüngkasi jümangi rheyi sioji mmhomo. 7 Mmen tsswothukvü ejiphio limha jijo n-benthaka! Ntiotssole ejiphiv eyiv ji ethelan lia – khatola kyon ocho yakchia ejiphiv ji yia sana kyon mo jijo n benthaka! 8 "Ni khe mekana ojo na ni mmenthoka tssona; ni lona ekhachoe sia! Ojo eni, okhe eni to khyinga kümali n mhemi yithüngo na jo, ojo okhe – nbenrilea ekümlani yio ji mmhomo. 9 Ni mhyik na ni mmenthokna, eyikchei sia! Omhyik eni hansi n mhemi yithüngo na jo omhyik motsünga hansi eküm lamoe yio ji mmhomo.
Olyu Moncho lo Ejyukacho
10 Ntena ngaro shiang yolo tsüka tia ti khachotava, potsüwoe onte lanben na n tümjakvü opo mhalo zekachia vanala. 11 Ntiotssole Potsow tsoe jina shanchov tsükona rocho. 12 Nteno kvüto nchümala, kyon tsükana olyu nzoa vanle motsünga mona tssona ombona ekhatokvüsi tokvü ji phunglani yantsoa vanthoksi motsünga momo ji yano n-woake? 13 Osi ombona hoji yancheta na, ana phyoala ombona ekha tukvüsi tükvü ji pomoe emathakatala. 14 Jitsükona terio shiang yolo motsünga tia moni esiv jo apo lüm erüng n li.
Ojenio N lan Ji
15 Ni jenio na ni thüngi mmen tssona owo ombo n lan ji nini boti rütava. Ombona ni engayina nina ni jenio elanchoyithaka. 16 Ombona n ngana, nini ephalo otsük enithüm tsaphae oni onthüm na ehungpvüi tssoa oyi jiang ntssachotava. 17 Ombona onte ha n ngayina ekhümkho ezoyia, osi ombona ekhümkho yi ha n ngana ombo ji ni tsükona jo pvüjipoe mekana tssenkhyae ejoe tssothuka.
Ekham Osi Chonchiv
18 "Ana otsotso nte ezoala: ntena limhalo ntio khana sana potsüwoe ha kham, osi limhalo ntio chonchia sana potsüwoe ha chonchiv. 19 "Elani ana nte ezoala: limhalo nte otsük enina ntio mmyantae chona sana, apo Potsow na hoji nte bencheyiv. 20 Ntiotssole kvülo eni ethüm tae tssolea a myingona sanrhyua sana ana onte ndüngo theta vam."
Nlan Siyiv Tsükona
21 Tole Peter na chiyi ombo ezocho, "OPVÜI, ajenio na a thüngi mmen tssona ana yenjo kvüta n lan siyivla? Yenjo tiying bena siyiv alo? 22 Jisu na ezocho, "Ana yenjo tiying to ni n zo, tolea yenjo ekha tiying tüv tiying."
Nlan N siyihungo Chipvüi Ji
23 Potsow ekhüngyan jo mesao tsüka na ombo phajae jiang thüngi ochi etsüngtacho esüa lo ejyukakuka. 24 Ombona etsüngtav benkatale tsüka jo ochi wothüng taro licho sosi chiyicho. 25 Tole ombona n lokhoko jina ombo pvüi jina ombo engh, ngaro jiang osi eli topvü yeni ochi ji lole to ezocho. 26 Tole phajae jina nkhuktseni heto jonjicho, "OPVÜI, erüm toa a nhyaka, ana topvü ni lovka!" 27 Tole OPVÜI jina khonzana nchümi ochi ji n khiyiv sicho. 28 'Phajae tsük jina jilo na haphoe chiyipvü phajae thanpoe tsüka na orang nzoa ombo epiv lio ji ndukle evüngona tssenyae ezocho, 'Nina epvüo ji a pia!' 29 Tole ombo shom phajae jina epyakthei jonjicho, "Ana ni lokhamka." 30 Toaha ombona ekhirana ombo rhümae ombo n lorathüng jo vüngpheni thechi sicho. 31 Phajae thanpoe jiangna hoji hungi nungratacho, osi ontena owo onte pvüi ji ezotacho. 32 Jisüi jo ombo pvüi jina ombo tsae ezocho, 'O n thae phajae!' 'nina jonjiwo ji tsükona ana topvü ni siyicho. 33 Tona ana ni nzamo ji esüa nina ni shom n zamke?' 34 Ombo pvüi jina lüm etsuk lona ochi ji n lokhanthüng jo vüngpheni thechi ombo sicho. 35 Ji esüa ntena nte lümbümi na nte shom jiang n lan n siyia tssona, apo Potsow na ha nte thüngi hoji esüa tssov.
Eloe Sichiv Tsükona Yilan
1 Jisu na hojito phyosi Galilee lona khoe Jordan bankae Judea metae rheyicho. 2 Tole kholuk tsüphov na ombo phana wocho osi ombona hoji lona onte emiyicho. 3 Tole Pharasee jiangna ombo thüngi oro okyak füyia heto ombo engacho, "Ntiosana ntani eloe sichiv sikhfü lo licho alo?" 4 Ombona janlancho, "Liyingpvüo na benkadeni na eboe tona eloe to liyingcho osi heto phyocho to ntena ntho motsü lona n khachechoke? 5 Hoji tsükona eboe na ombo pvüpoe sisi ombo engh nzo tssoe oni ji motsünga kümvüka. 6 Onio enhungo eni mek, tolea motsünga. Jitsükona Potsow na ntio mmyantayicho sana ji kyon ochina ha ti khosotayia." 7 Ontena ombo ezocho, "Tona ntiolyui Moses na sichi kako pia sichiv yizüng pichola?" 8 Tole ombona onte ezocho, "Nte lüm khüngo jina Moses na nte sichitathokcho. Tokhatola benkadeni na hojito mek. 9 Ana nte ezoala, ochona efürama yi lona yaka ombo engh sichiana osi thanpoe soa vana sana ombona efürama benphithaka." 10 Sürüi jiangna ombo ezocho, "Poni yuta lo hojitüv shikhfü licho tssona yanpiyanthan etssov ntia oman n li." 11 Tole ombona onte ezocho, "Kyon topvüna ntssung yi shi khichokukcho mek, khatola ochoang sekacho sana jiang taena. 12 Ntiotssole kyon na yanpiyanthan n tsso ji lanka olan olan lia: zeta, ochoang na jo bukathüng na bokyu bukcho vana, elani ochoang na jo kyon na bokyu kümthokcho vana, ochoang na jo Potsow ekhüngyan tsükona bokyu kümcho vana. Ochona shi khichokuka sana ombo khi khichothoka."
Jisu na Ngaro Jiang Mmhayicho
13 Kyon jiangna ngaro jiang ombo khi nyimkae randanitukvü tsükona sosi rotacho. Tole sürüi jiangna kyon jiang makcho. 14 Jisu na phyocho, "Ngaro jiang a thüngi rothuka, onte ti tanga, ntiotssole Potsow ekhüngyan jo shiang esüa jiang echi." 15 Tosi ombona onte pono okhe nyimkaesi jilona yi sicho.
Eli Khyingroe Ji
16 Kyon tsükana heto oro ombo ezocho, "Püngnoe, Kümali eküm ji hunguv tsükona ana ntio elhi mmhom etssov lia?" 17 Tole Jisu na ezocho, "Ntiolyui nina mmhom tsükona a engala? Mmhom jo tsüka tae vana. Eküm jilo ni rheyihungna yizüng jiang benphia." 18 Tole ombona "Kvüto-jila?" to engacho, tole Jisu na ezocho, "Nina lüngthav meka; nina efürama benphiv meka; nina efü meka; ejüngona oyam n lan ti yania; 19 Nipo osi niyo kyuchia osi ni phinakishüm jiang nibobo nzana esüa nzana." Tole khyingroe jina ezocho, 20 "Shiang hetopvü ana benphikhanthaka, tona ntio khachoe lihana?" 21 Jisu na ezocho, "Benritsoe ni küm-hunga tssona oyi nina ntio liana topvü yeni yantsae pia, tona ni eli jo potsüwoe tssovka, tosi a phana roa." 22 Khyingroe jina shi zoale nungratsünga yi sicho, ntiotssole ombo elüm ejüeli tssocho. 23 Tole Jisu na ombo sürüi jiang ezocho, "Ana otsotso nte ezoaka, eli na Potsow ekhüngyani rheyiv jo khünga. 24 Ana elani phyoala: elina Potsow ekhüngyani rheyiv jo Oat na pyimkvüi na chiyiv ji elao. 25 Sürüi jiangna shi zoale nungratsüngra phyotacho, "Tona ochoang shanchovto?" 26 Tole Jisu na onte zesi ezocho, "Kyon na jo shijo n tssoche, khatola Potsow najo topvü tssocheta." 27 Tole Peter na janlancho, "Zeta, ena topvü silanchia ni phankathaka, tona eiyo ntio hunguvla?" 28 Jisu na ezocho, "Ana otsotso nte ezoaka, kyon tsoe jina limha ethani ombo pfhütsson vantsü jilo khuktheta na, nte a sürüi shiang ha vantsü taro eni lo khukthei Israel jipo taro eni jiang savka. 29 Osi ochona a sü rüv tsükona oson oki, tsolo yulo, opvüpo, ngaroden osi liko ramüng silanchia sana hotüv nzoa tata man pilamka osi kümali eküm hunguvka. 30 Tolea ovüng eh elümoto sülani tssov osi sülan eli elümoto ovüngi tssov.
Jününgrothili Elhi Etssoe Jiang
1 Potsow ekhüngyan jo kipvüi tsüka na nyazüngi na jününgrothi li elhi etssoe jokhe soa wocho tüv. 2 Ombona enga lo rangpyaka ren piv ezoa razhü motsünga khochuk-thukcho. 3 Jitosi shanlan ethümoto harümo ombona lantsüi wole kyon ejoma etho n jüv zhüphita vana hungi ombona onte ezocho, 4 "Nteha jüngrothili wotava, tona ntio etümcho sana ji ephan ana nte pivka." 5 Elani shanlan tiruko tona tokuo to jianglo ha hojito wothukcho. 6 Jitosi shanlan taro ekhao to jianglo ombona rümphia wole ejoma na ngangta vancho hungi ezocho, "Nteno ntiolyui eng tona heto etho njüv ngangta mungtala?" 7 Tole ontena ombo ezocho, "Eiyo ochina ha e nso." Ombona ezocho, "Toka nteha jününgroli owo elhi tssotava." 8 Mmyuale lipvüi jina ombo phajae jiang tsae heto ezocho, "Yingae jiang tsae ovüngo jilona sülamo ji nandang jokheman pia." 9 Tole shanlan taro ekhao tolo ero jiangha rangpyaka picho. 10 Ovüngo jiang janale ontena kyungkata hungu tsayia eyilotacho; tolea onteha pyakaren tae hungcho. 11 Tole ontena kipvüo ji thüngi heto erinjantacho, 12 "Okhae ti ro shiango shanlana tae elhicho osi eiyo eng totona ryusanga eng etssolo zatale nina ete ejoa ekümthukthaka." Tole ombona tsüka thüngi janlancho, 13 "Oshom, ana ni thüngi nlamo tssocho meka; etena tsükalo rangpyaka ren n jantachoke? 14 Ni ejan ntiosana ji khi hansi yia; nipio tata wokhao shiha epiv tsükona jo a lümcho tae. 15 A echi khi alümcho etssov a elan n lichoke? To alo nina a longphya ji n zekhukala? 16 Jitsükona sülamo jiang ovüngo tssovka; osi ovüngo jiang sülamo tssovka."
Jisu na Ombo Echüv Echung Ethümoto Ephyoji
17 Jitosi Jisu na Jerusalemi chüngiathüng, ombona sürüi jiang tsachuki ezocho, 18 "Eteno Jerusalemi chüngitala osi kyontsoe ji rhümae pvüti osi eranpvüi jiang khelo theyiv; osi ontena n lan pia ombo chüthokvü, 19 osi pvüjipoe jiang khi yikvüthoka erhüpa dom; tolea tsüngon ethümoto jilo Kümchelam.
James ha John Oni Jonjiyi
20 Zebedee engh jina otsoe jiang sosi Jisu thüngi oro ntiosana choncho. 21 Ombona "Nina ntio ethev lichola?" to ezole, ompvüna ezocho, "Ni ekhüngyani a tsoe woniata tsüka ni amimoe, tsüka jo ni hayiwoe to khokthethkvü phyochaka." 22 Tole Jisu na janlancho, "Nina ntio chona sana nina n tsi; tosi Jisu na otsoe jiang ezocho, ana eyuv lio pvü ji ntena yukhokvü alo? Ontena ombo ezocho, "Ena toa" Jisu na onte ezolancho, 23 "Ntena apvü ji yuv khatola a khe amimoe osi hayiwoe khokthev jo a etho mek; jijo apo na methakio jiang echi." 24 Thanpoe otsük taro jiang na hoji zoale onjeni thüngi lüm tsuktacho. 25 Khatola Jisu na onte tsae ezocho, "Pvüjipoe esae jiang na onte kyon jiang pono OPVÜI tssoala osi tsüphoe thanpoe jiang na onte kyon jiang pono etho tsütsatala to ntena ntsia. 26 Nte yolo jo hojitüv tssov meka; 27 tokhatola nte yolo tsüphoe tssohungo jiangna nte phajae kümvüka; 28 kyontsoe jina mpato benkathokvü tsükona mekna benkav tsükona osi kyon elümoto shanchov tsükona ombo eküm pia wothüng tssov tsükona rocho."
Mhyikjüng Otsük Eni Emiyio Ji
29 Ontena Jeriko yaki chiyile kyon kholok tsüphov na onte phana wocho. 30 Tole mhyikjüng otsük eni lantssae khuthei vantasi Jisu na yakchia yio ji zoale tüngkachia heto phyotacho, "O David tsoe, epono khonzan lithoka." SlTole kyon kholok jiangna oni maka yingto vanle to ezocho. Khatola onina kyungkata tüngtacho, "David tsoe OPVÜI, epono khonzan to tssoa!" 32 Tole Jisu na esani onte tsae ezocho, "Ntena a khi ntio nte tssoyithuk hungala?" 33 Ontena ombo ezocho, OPVÜI, e mhyik jiang epochiyia." 34 Jisu na onte nzana nchümi onte mhyiko evüngkayicho, tole jitopvü onte mhyik jiang pochicho, osi ontena ombo sü rüa wotacho.
Jerusalem yantsü Jilo Rhowo Ji
1 Ontena Jerusalem jan etünga thüng Olive phunglan ndüngo Bethphage ji janale Jisü na sürüi otsük eni wothuka ezocho, 2 "Nte mhadungoe oyan jilo wotava, tona jitopvü gadho sheni oro ji nzo lia ntena hungu ka; hojiang lanphe sütasi a thüngi yitava; 3 osi ochona sana ntio na nte ezona, heto ezoa, "OPVÜI na shiang ethev lia. Tona ombona zakto nte pivka." 4 Shijo zenkhying na heto phyoe lio ji benthokvü tsükona: 5 "Zion yantsü ji ezoa, 'Zeta, ni mesao ji teri kümi Gadho lo tsankae tsata!" 6 Jitsükona sürüi jiangna Jisu na onte ezoji esüa owo tssocho; 7 ontena gadho ji oro ji woni nzo hansi oyi onte mpensü jiang epfükatacho, osi ombona hojilo khukthecho. 8 Onte khosha na onte mpensü jiang olani sayitacho; osi ejoma najo odungina khero nrhakchoe olani sayiatcho. 9 Osi kyon kholok ombo mhadungi tona sülani to etssoe jiangna heto tüngtacho, "David tsoe ji thünga!" OPVÜI myingo na ro ji Potsow khi mmhayithuka! Potsow thünga!" 10 Osi ombona Jerusalemi rhowole elani yantsü ji ethungchoa heto tüngtacho, "Shijo ochola? to engale, kholok jiangna janlancho, li "Shijo Nazareth yamo zenkhying, Jisu ji."
Ekhümki Nthocheo Ji
12 Jisu na ekhümki rhowocho osi ekhümki na shishota evamo jiang topvü phanchukchi sicho; osi ombona orang edung jiang tona vefü eyen jiang to vanphen, mezü jiang ha topvü khochüchüi siyicho. 13 Ombona heto onte ezocho, "Apo ki jo randan ki to tsav to erani lia; khatola ntena retsoreyui shüp kümthokala." 14 Jithüng mhyikjüng tona jojang to ekhümki ombo thüngi roracho, tole ombona onte emiyicho. 15 Tole pvütiden tona eranpvüiden to jiangna ombo emhukthav elhi jiang hungale, osi ekhümki ngaro jiangna, "David tsoe ji thünga" to tüngtao jiang zoale onte lüm tsukcho. 16 Osi ontena Jisu ezocho, "Shiangna ntio phyota sana nina zezo?" Tole Jisu na onte janlancho, "Ho, ana zoa, ntena heto n khachecho ke?"Ngaro oshyulo jiang büngi na nina myingthüng njüm chiyithokthaka." 17 Jisuüi jo ombona onte sisi chiyi Bethany lo nchencho.
Züwodung Randankao Ji
18 Enyathüng ombona yantsüi rheyia vanathüng ombo wondoncho, 19 Jithüng lantssae züwodung hungi ombona jilo wole owo yaka jo tssüngthi ntia n hungcho. Jitsükona ombona heto odung ji ezocho, "Ni lona elani tsssüngthi n thithokvüka!" Tole jitopvü züwodung ji chüi sicho. 20 Sürüi jiangna hoji hungale emhukta phyotacho, "Kvütolui züwodung ji echunga taena chüi sichoto!" 21 Tole Jisu na onte janlancho, "Ana otsotso nte ezoaka, ntena khatüng n lina longtsüa tssona züwodung jilo tsso ji tae mekna ntena ha tssochev; ntena phunglan shi thüngi, "Nkhümi jümangi rheyia" to ezolea tssochev. 22 Ntena longtsü lina ntena ntio randana chona sana ji hungu."
Jisu Etho Pio Ji Engacho
23 Ombona khümpheni rhowole pvütiden tona eramoeden to jiangna chiro ombona püngnoa vanathüng engacho, "Nino ntio etho lona shiang tssoala? Osi ochona hetüv etho ni pichola?" 24 Jisu na ezocho, "Ana ha heto nte engasi ntena ajanlanchena ana ntio etho lona shiang tssoa sana ji nte ezovka: 25 John na baptiyio etho jijo kvüi na la? Potsüwoe na alo kyon thüngina la?" Tole ontena heto phyota yicho, "Etena Potsüwoe na to ezola, 'tona ntioli ombo n longtsüchola' to ezov; 26 elani kyon thüngina to jila kyon shiang khokyu n phyo; ntiotssole John jo zenkhying to kyon topvüna phyotala." 27 Jitsükona ontena, "Ena n tssi" to janlancho. Tole Jisu na, tona anaha ntio etho lona shiang shi tssoa sana ji nte n zo" to ezocho.
Otsoe Otsük Eni lo Ejyukao Ji
28 "Nteno kvüto nchümtala? Kyon tsükana otsoe eni vancho, osi ombona owo otsoe eramo ji heto ezocho, "Otsoe, nchüngo owo jününgroli elhi tssoa." 29 Tole ombona "Aiyo n wo" to janlancho; khatola sülani jo ombona khophi wocho. 30 Ombona tsüka ji thüngiha owo yitsük ji ezocho, tole ombona "Ana wovka, Tsüphoe" to phyocho, khatola n wov sicho. 3lOniIo kümoe na opo lüm erüng ji tssochola? Tole ontena "ovüngo jina" to janlancho. Jisu na onte ezocho, "Ana otsotso nte ezoaka" Tssenkhyae jiang tona eloe n thae jiang to na nte vüngina Potsow ekhüngyani rheyiv. 32 Ntiotssole John na ntsantho lamoe na nte thüngi role ntena ombo n longtsücho, osi tssenkhyae tona eloe n thae to jiangna ombo longtsücho; osi ntena hoji hunga ha khophi ombo n longtsücho.
Jününgrothi li Tona Hoji Ejon Jiang to
33 "Ejyuka thanpo engae khitava: "Kipvüi tsüka na jününgrothih joricho osi hoji rhüa ekvülanchi vancho, osi zenki tssoe jününgrothi mmyaphen ha zei vayi tosi lijon jiang zikae vasi ombona metapoe wocho. 34 Tssüngthi elhov yuta janale ombona lijon jiang thüngi tssüngthi elhoe wothukcho. 35 Tole lijon jiangna onte rhümhae tsüka jo sacho, tsüka jo lüngthacho, tsüka jo olongna ephyatsüngcho. 36 Elani ombona ovüngo jilona kyungkata wothukalncho; tole ontena jiang thüngi ha hojito tssocho. 37 ombona wokhao tssoa heto phyoa ombo tsoe ji wothukcho. 38 'Ontena a tsoe jijo yikrachiv tssov,' khatola otsoe ji hungale ontena phyotacho, 'Shijo lipvüi ji tsoeji, etena shi lüngthasi ombo tssentso ji khitav kalo!' 39 Ontena ombo rhümae litssae süchukchi ombo lüngthacho. 40 "Jitsükona jününgrothi lipvüo jina roana ombona lijon jiang kvüto lyuyivla?" 41 "Ombona n thae jiang enungrathao echüi thechiv, osi lijon thanpoe ochoangna yuta ebenlo tssüngthi ombo piv sana oli ji hojiang khelo theyiv." 42 Jisu na onte ezocho," Ntena ntho motsü lona heto n khache nrüngchoke? 'Kitssoe jiang na eth elan n lio esüa ekyolanchi esio lungtsük ji oki nkenlong opvü tsoji kümcho, shijo OPVÜI elhi; osi etena jo zesi e ngangcheta!' 43 "Hoji tsükona ana nte ezoaka, Potsow ekhüngyan ji nte thüngi na khi jipo thanpoe ochoang na hoji tssüngthi ethithukvü sana jiang thüngi pivka." 44 Kyon ocho hoji longtsük jilo elongkata sana ombo tsarov, osi hojina ocholo elongkata sana ombo ejüprov. 45 Pvütiden tona Pharasee to jiangna ejyukayi shi zoale ombona onte echi phyocho to engathecho. 46 Ontena ombo rhümav tssoa ha kyon khosha na omboji zenkhying to phyota vamo ji tsükona ontena kyucho.
Yanpithan Tokhu lo Ejyukao ji
1 Jisu na onte thüngi heto ejyukata püngnolancho, 2 "Potsow ekhüngyan jo, mesao tsüka na ombo tsoe yanpiyanthan tokhu khicholo ejyuka khoka; 3 osi yanpiyanthan jilo thenhyae jiang tsalo ombo phajae wothuka ha n rotav sicho esüa tüv. 4 Ji sülo ombona phajae thanpoe heto ezoa wolanthukcho: 'Ana tsao jiang topvü ezorava, ana a etsoyu jiang methakthaka, a mangsübung osi mangsüro jiang tatsüngthaka, osi topvü methakthaka tsolo rotale to ezoa!' 5 Khatola tsao jiang ochina ha n zikav, tsüka na ombo li, tsüka na shishopheni to yitae sicho; 6 osi ejoma na ombo phajae jiang rhümae yikrathuka lüngthacho. 7 Tole mesao jina lüm tsuki ombo rasan wothuka münghan jiang lüngthae sisi yantsü ji rungi siyicho. 8 Jisüi jo ombo phajae jiang heto ezocho, 'Yanpiyanthan tokhu ji methaki lia, tokhatola ana tsao jiang lo erov etümo tüv n jü. 9 Jitsükona lanro lantsü jiang topvülo owo kvüta nduka sana oro yanpithan etsoyu ji tsotale to tsatava." 10 Phajae jiangna lantsüi owo kvüta hunga na tsarhyucho. 11 "Tokhatola mesao jina yanpithan lo eroe jiang zelo rheyile, kyon tsüka jo yanpithan sü n hancho; tole mesao jina ombo ezocho. 12 'Oshom, nino kvütoli yanpithan sü n ham shilo rhorocho la?' Tole ombona ntia n phyochev sicho. 13 Jisüi jo mesao jina phajae jiang ezocho, 'Ojo okhe chungi oponi emüng jilo vachukchi sia' jilo jo kyon na oho shüngta kyatav.' " 14 "Ntiotssole khosha tsacho khatola tara tae ethüngchecho" to Jisu na phyocho.
Tssenkhya Epiv Yilan
15 Tole Pharasee jiang na kvütoli ombona nsana-thüng nlan rhümayiv sana to lanka yantacho. 16 Ontena onte sürüi jiang tona Herod wopan jiang to ezoa owo heto engathukcho, "Püngnoe yo," "Nino ntsa, osi Potsow lan ji ntsa püngnoala; osi kyon vanlanyilan ephan n ze to ena ntsia. 17 Jitsükona nina jo kvüto nchüma sana e ezoa, Ceasar ji ekhya epiv jo shikhfü lo lili?" 18 Tokhatola Jisu na onte kyakrüm ji ntsi ezocho, "O kyakrümden! ntiolyui okyak a füitala? 19 Ekhya rang ji a ejütava!" Tole ontena rangpyaka hana oyi ombo ejücho, 20 osi Jisu na onte ezocho, "Shijo ocho kisü osi omying thenkachola?" 21 Ontena Ceasar, to ezole ombona onte ezocho, "Tona ntio Ceasar ejan sana Ceasar pia, osi ntio jo Potsow ejan sana Potsow pia." 22 Ontena hoji zoale ngangtsüngracho; osi ontena ombo sisi yirae sicho.
Elani Phanthilam ji Engatacho
23 Hoji tsüngono Saducee ochoangna echü lona phanthilan n li to longtsüa vancho sana jiang na oro heto ombo engacho. 24 "Püngnoe yo," "Moses na phyocho, kyon tsüka na otsoe n vam chüna ojenio jiang na emi ji soa vani ombo tsükona otsoe vanthokvü. 25 Tona e yolo jeni tiying rencho vana, osi eramo jina eloe soa vani otsoe n liv chücho, jitsükona emi ji ojenio thüngi ivanthoki lia. 26 Tole enioto jinaha, ethümo to jina ha, to tiyingo ji nandang hojito echungtacho. 27 Okhao tssoa eloe jiha chüi sicho; 28 tona phanthilana na eloe jijo ocho engh tssovla? Ntiotssole onte topvüna ompvü vanthokcho." 29 Tole Jisu na ezocho, "Ntena worhyuala, ntena ntho motsü jiang osi Potsow etho ji n tsio ji tsükona. 30 Ntiotssole phanthilancho süi jo yanpiyanthan n li, tokhatola lanbenden esüa vamvü. 31 Osi echüi jiang tsükona phanthilan jijo Potsow na nte ezoji n khatahanke? 32 'Aiyo Abraham Potsow, Isaak Potsow osi Jakob Potsow.' Ombo echüi jiang Potsow mek, khatola eküm evan jiang Potsow." 33 Kholuk jina hoji zoale ombo püngno jiangna onte emhuktsüngracho.
Yizüng Tsüphov Ji
34 Ombona Saducee jiang jükrüpthoki lia to Pharasee jiang na zoe onte sanrhyutacho. 35 Osi onte yolo yizüng ntssi tsükana okyak ombo füyia heto engacho, 36 'Püngnoe" "Yizüng yolo tsüphotsowo jijo kvüla?" 37 Tole Jisu na ezocho, " 'Nina OPVÜI ni Potsow ji ni lümbüm, eküm osi nchümri topvü na nzamka.' 38 Shijo yizüng ovüngo osi tsüphotso ji. 39 Osi enioto jijo heto: 'Nina ni phinakishüm jiang nibobo nzana esüa nzamka.' 40 Moses shikhfü osi zenkhying yi jiang topvü yizüng eni shilo enhikacho."
Shanchopvüi Erov Tsükona
41 Pharasee jiang sanrhyule Jisu na heto ezocho, 42 "Khrista ji tsükona nteno kvüto nchümala, ombo ocho tsoela?" Ontena ezocho, "David tsoe ji." 43 Tole ombona ezocho, "Tona kvütoli David ji omon na ntssungi 'OPVÜI' to ombo tsathukchola? 44 David na apvüi ji ezocho, 'Ana ni ri jiang ni jo kupi n thechithüng jo a khe amimoe khuktheta' 45 David na OPVÜI to ombo tsana kvütoli ombo tsochen tssovla?" 46 Tole ochina ha ombo n janlankhokcho. Hoji tsükona hoji tsüngono na benkae ochinaha ntia ombo n ngav sicho.
Pharasee Jiang Tona Eranpvüi Jiang to
1 Jisu na ombo sürüiden tona kyon kholok jiang to thüngi ezocho. 2 'Pharasee tona eranpvüi to jiango Moses yizüng ji erorov etho picho.' 3 Jitsükona ontena ntio nte ezoa na enga benphitava, khatola ontena ntio tssoa sana ji tizechotava, ntiotssole ontena püngno ji ephan n tssoala. 4 Ontena oha mmyinguv chungi kyon epvülo ekachiyiala; tokhatola onte popo jo yingro na tia nkanphi oyam n jümkatala. 5 Ontena elhi topvü kyon khi hungthokvü tae tssoala, osi okhelo motsü yiren khüngkae hanta, otono chancheta erankae hanta to tssoala! Osi zeta onte sü jiang zonjoa lyui hanta to tssoji! 6 Osi ontena tokhu lo vanphen mmhomo ji yantala, elani syangogue ki vanphen mmhontso ji jüponala; 7 lantsüi na oyam na onte monkhüm-yikrachiv ji osi kyon na 'Püngnoe' to onte tsao ji yantala. 8 Tokhatola nteno 'püngnoe' to nte n tsa, ntiotssole nte 'Püngnoe' tsüka vana osi nteno topvü jeniden. 9 Limha lo ochia nte 'Opo' to ti tsatava, ntiotssole nte Opo tsüka Potsüwoe vana. 10 'Opvüi' toha nte ti tsathuka, ntiotssole nte OPVÜI tsüka Khrista vana. 11 "Nte yolo tsüphotso jina nte phajae kümvüka. 12 Ochona ombobo chüngithoka na ombo terithokvü, osi ochona ombobo teria küma sana ombo tsüphothokvü.
Kyakrüm Ji Jisu na Nlanthokala
yanala, osi khophiana ntena n mheo-mi nte rheyiv etümo jitata eni onte rheyiv etüma tüv n mhom kümthokala!" 16 "Nte n benthaka! Lansoe mhyikjungden, ntiotssole ntena phyotala, ochona ekhümki ji myingo na echüma na ntia mek; ochona ekhümki shona ji myingo na echüm na jijo shitünga. 17 Zhüvae mhyikjungden, kvümoe tsüphola? Shona ji alo, shona ji ntho kümthoko ekhümki jila? 18 Elani ntena heto püngnoala, "Ochona thanphen sa ji myingona echüma na ntia mek, tolea ochona othan ji myingona echüma na shitünga." 19 Mhyikjüng kyonden! Kümoe tsüphola, othan ji alo othan ji ntho kümthoko jila? 20 Jitsükona ochona thanphen ji myingona echüma na hoji poni lio jiang topvü myingona echümala; 21 osi ochona ekhümki ji myingo na echüma sana hoji tona hojilo lio jiang topvü myingo na osi Potsow myingo na ha to echümala; 22 Ochona Potsow yan myingo na echüma sana jina hojilo Potsow vantsü tona hoji poni khuktheo ji to myingona echümala. 23 "Nte n benthaka, eranpvüi osi Pharasee kyakrümden! Ntena zhüchü osi rarakhüm jiang tarochia mpa thanala, tolea hojiang lona opvü tssokao yizüng jiang khachoala, ntsanrük, khonzan tona longtsü to jiango thanpo jiangha n khachothuk na shiang etssov lia. 24 O lansoe mhyikjungden, beno jo nlae sitasi odh nzhünhyaeden! 25 "Nte n benthaka, eranpvüi osi pharasee kyakrümden! Ntiotssole ntena ophfü ophi jiang oponi jo sütasi ochungi jo retsoreyu osi tajo elüm na nte pyingcho. 26 Pharase mhyikjungden! Ovüng tssoa ophfü ophi jiang ochungi südentava tona oponiha ntssüngu ka. 27 "Nte n benthaka, eranpvüi osi Pharasee kyakrümden! Ntiotssole nteno lüpran lo jun esecho, oponi opyon jüsi ochungi jo echü ryu tona etssakthao ekyonron to jüwo ji esüa. 28 Ji esüa nteha oponi jo ntsanthoe esüa kyon ejüsi ochungi jo kykarüm osi n thanri na pyingcho.
Jisu na Onte Ezüpthokvü Ji Hungchiala
29 "Nte n benthaka, eranpvüi osi Pharasee kyakrümden! Ntiotssole ntena zenkhying jiang lüp nsüngrüta osi ntsanthoe mmhona evan jiang müngyanchiphen jiang ntsanlümta heto phyotala; 30 "Etena pyimtsümotsüi jiang echungreni vancho salivo zenkhying jiang lüngthav lo okhe thetav mek." 3i Hoji lona nteno zenkhying lüngthae jiang tsoronichen to ehungpvüi piala! 32 Tona nte motsüi jiang n tha nri elhi jiang echungchotala! 33 O nrüden osi nrü tsoeden, n mhemi rheyiv ji lona kvüto lyui tsanchotavla? 34 Ana nte thüngi zenkhying osi ntsinran osi eranpvüiden rothokvü ka, onte yolo ejoma jo ntena lüngthav osi dom, osi ejoma jo ntena synagogue ki na nte erhüpa yantsü akvü lona khangria süphitav. 35 Jitsükona nte lona ntsantho ejen topvü limha lona zamvü, n lan n lio Abel ejen jilona benkae Barachia tsoe Zekharia ocho ntena ntho saphang tona thanphen to yuta lona lüngthacho sana ji nandang. 36 Ana otsotso nte ezoaka, münghan shiang hetopvü man ji echungren shi pono ezüp rovka!
Jisu na Jerusalem Tsükona Kyao ji
37 "O Jerusalem, Jerusalem! Zenkhying jiang lüngthae osi nte thüngi rothuko jiang ephyatsüngio! Hono hanpvü na ompvü ro jiang echho kupi tsarhyua to ana echung kvüta ni tsoeden jiang tsarhyua lea n zotavla! 38 Jitsükona ni kiji mhechothaka osi sirhakthaka. 39 Enhünga ana ni ezoaka, "Nina OPVÜI myingo na roji mmhaithoka" to n phyothüng jo a hunglam meka."
Ekhümki Roe Esiv Phyo ji
1 Jisu na ekhümki jilona yia vanle ombo sürüi jiang na oro ekhümki ji etssyukata ombo ejücho. Tole ombona ezocho, "Ntena shiang hungala nüng? 2 Ana otsotso nte ezoaka, shianglo olong eni ekatacho tia hunga ronhyov meka."
Ochüm Ji Chekav
3 Ombona Olive phunglani khukthei vanle sürüi jiang na ombo thüngi oro kijaroe na heto ombo engacho, "Hojito ji kvüthüng tssov sana osi ni erov ji tona ochüm tsüngon ji to jo kvüthüng tssov sana ji ezoa." 4 Tole Jisu na heto onte janlancho, "Ochinaha nte n sosorao tssoa ntangnshontava. 5 Elümoto na a mying ndani, "Aiyo Khrista ji" to phyoa rov, osi ontena kyon elümoto sosorav. 6 Ntena ritsso tona ritsso yibung to ekoni osi enhyano na elümoto zov; ntiotssole hojito tssov khatola ochüm ji hoji tssov mek. 7 Jipo motsünga na motsünga pono, phanthiv; ekhüngyan motsünga na ekhüngyan motsünga pono phanthiv, osi meta elümoto lo otssi vara tona nri enhyok toha lirav. 8 Tolea shiang hetopvü ji ezüp nungra jiang benkaden tae. 9 Hojithüng ontena ezüp nungra lo nte thechiv, osi nte chüthokvü; osi amying ndana jipolan topvü na nte tssakvü. 10 Osi elümoto na longtsü mona yiv, tsüka na tsüka yenchov, osi tsüka na tsüka tssakvü. 11 Ejüngjüng zenkhying khosha chiyi kyon elümoto sosorav. 12 Osi n thanri kyungkao jina elümoto na nzan woshaka yiv. 13 Tokhatola ochona ochüm jana rüma na jijo shanchov. 14 Osi ekhüngyan yithen mmhom shi jipo topvü thüngi ehungpvüi esüa limha topvü lo püngno sanati ochüm ji rov.
Khangshi Ezüp Tsüphov
15 Jitsükona zenkhying Daniel na heto phyoji esüa "Ntho mmenthuk yuta ji ntho meta lona phanthia ntena hungu." (Ekhapvüo jina engathe khia) 16 Tona Jithüng Judalo evan jiang ji phunglani tsani yithuka; 17 mmhonki vamo ji tsütsailan khilo joyiv yuta tikhithuka; 18 Oli vamo jiha ombo sü khilo elani ti yithuka. 19 Hojithüng ngaro ehan osi ngarozüi jiang tsükona jo enungrathav tssov! 20 Ntena etsam ji etssük yutalo mekana emong tsüngono n tssothokvü tsükona randantava. 21 Ntiotssole hojithüng nungra tsüphov, limha benkasi nchüng jana n lihan osi henasüi leha n lio tüv rov. Hoji tsüngon ji Potsow na n hüngrikayivo kyon ochia n nhyoka; 22 khatola ethüng cheo jiang tsükona jo tsüngon jiang hüngrikayiv. 23 Ochona "Khrista ji shika" mekana "Ojilo vanka" to ni ezoa sana ji ti longtsüa. 24 Ntiotssole ejüng zenkhying osi ejüng Khrista chiyirae chethev elhi tssota elümoto sosorav osi ethüngcheo kyon jiang lea sosorav ekhyo tssov. 25 Ana ovüng na nte ezothaka. 26 Jitsükona ontena "Zeta ombo romhoni vana" to mpa nte ezolea ti wotava, osi ombo 'Oki chungi vanka ' to phyolea jiha ti longtsüa. 27 Kvüto eng chirolamoe na Potsüo nlüpa na eng rhelamoe ha tüngra sana ji esüa kyontsoe ji rov. 28 Osi kvülo echümüng lia na jilo müngtsov sanrhyuv.
Kyontsoe Elani Erov ji
29 Hoji nungra tsüngon jiang yakpvüto eng ji müngi siv, choro jiha wondang n liv siv; shantio jiang oyaki na elongu, osi potsüwoe etho jiang enhyokvü; 30 osi kyontsoe ji chekav ji potsüwoe na hungu, osi kyontsoe ji potsüwoe eluki na etho osi pfütsson lona roa hunga na limha lo kyon topvüna nungrav osi ombona 31 tatara won ntssam khi ombo lanben wothuka ombona ethüngcheo kyon jiang limha nken mezhü lona osi potsüo chümi na ochüm nandang tsarhyuv.
Züwodung Lona Chekav
32 Züwodung lona chekae khitava: ombo khero ji enyipa kümi ovo jiang chena na nzyu rheyiv etüngala to ntena ntsiala. 33 Ji esüa shiang hetopvü ntena hunga na ombo na erov ji enhyanthaka osi woro kipüng epyanthaka to ntsi' tava. 34 Ana otsotso nte ezoaka, shiang hetopvü ji n tsothühg jo echungren shi mom meka. 35 Potsüo tona limha to mom, khatola ayi shiang jo mom meka.
Yuta ji Kyon Ochinha N tsi
36 Hoji tsüngon osi yuta ji ochi naha n tsi; potsüwoe lanben jiang na tia n tsi; osi otsoe jinaha n tsi; Opo tae na ntsia. 37 Kyontsoe erov jiloha Noah tsüngono esüa tssov. 38 Ojü limha n rothüng jo tsoyuta, yanpiyanthan tssota, Noah na orhungi rheyio ji tsüngon nandang vansi, 39 ojü jina oro onte topvü evaki hansi yiaha n tsio ji esüa kyontsoe erov jiloha hojito tssovka. 40 Hojithüng oli otsük eni zata vanlea, tsüka ji khisi tsüka jo valanchiv, 41 Eloe otsük eni tssuktssüpheni otssuk tssüta vanlea tsüka khisi tsükajo valanchiv. 42 Hoji tsükona cheta vantava; ntiotssole nte pvüi erov ji ntena n tsi. Shi engathe khia: 43 Kipvüi jina zümothüng ntio yutalo efüi ji rov sana ji ntsivo ombona cheyata vansi ombo ki ji n pharhüpthuk. 44 Jitsükona ntena yuta topvü lo methakvü shikhfü; ntiotssole kyontsoe jina ntena n yilov vanathüng rov.
Longtsüka Elio Osi n Lio Phajae
45 OPVÜI jina yuta ebenlo etsoyu onte epiv tsükona nhyaka vanthokwo phajae longtsüka elio osi nchümri elio jijo kvütüvla? 46 OPVÜI ji yiathüng hojito elhi tssoa evan phajae ji mmhontssowo osi emathao tssov. 47 Ana otsotso nte ezoaka, ombona eli topvü pono ezepvüi ombo kümthokvü. 48 Tokhatola n thao phajae jina, "Apvüi ji sunga n yiala" 49 to phyoa phajae ombo shom jiang tsasi oyi kinozhüvae jiang onte nzo tsoyutasi kinoe vanvo, 50 osi tsüngon motsüngalo phajae jina ombona n yilov vanathüng kipvüi jina yiv. 51 Osi kipvüi jina ombo ji ejoroe kyakrüm jiang sükhyingo ombo thechiv. Osi hojilo jo kyon na oho shüngta kyav.
Loroe Otsük taro lo Ejyukao Ji
1 Potsow ekhüngyan jo loroe otsük taro na milon bentasi yanphithan ndoko wotacho tüv motsü lo ejyuka khoka. 2 Onte otsük mongo jo nchümri n li, osi onte otsük mongo jo nchümri eli to tssocho; 3 nchümri n lio jiango milon jo bena ha mrjü ri bentacho; 4 khatola nchümri elio jiango milon bentasi mijüha rapvülo tajo yenthei bentacho. 5 Tole yanpithan jina sülana n roajo onte topvü na yipta vancho. 6 Tole zümolongoti heto tüngkachia zocho, "Yanpithan ji yithaka, chiro ombo nduktava." 7 Jithüng ji loroe jiang topvüna phanthi onte milon jiang ntssatae njükatacho. 8 Osi nchümri n lio jiangna nchümri eli jiang ezotacho, "Mijü tara epitava, e milon jiang mhetala." Tole nchümri lio jiangna janlancho. 9 "Ete topvü tsükona jo n tssom tssovka, jithüngo najo eyenpvüo ji thüngi owo shitava." 10 Ontena shilo woathüng na yanpithan jina yakchi yi sicho; osi methaki vamo jiang na phana oyi oki khalanchi tokhu ji khitacho. 11 Sülamiti loroe thanpoe jiang naha oyi ezotacho, "OPVÜI, OPVÜI, echonchia," Tole ombona 12 "Ana otsotso nte ezoaka, ana nte n tsika." 13 Jitsükona cheyata vantava; ntiotssole ntena yuta osi tsüngon ji n tsi.
Phajae Otsük Ethümo Ejyukao ji
14 Jithüng Potsow ekhüngyan jo shi esüa tssov: Kyon tsüka na tsüngon motsünga lo yentsalo wovsathüng ombo phajae jiang tsarhyui ombo ejüeli jiang jantayia zikarae zeyata evam picho. 15 Onte edo ephani na ombona tsüka ji rangtsen mongo, tsüka ji rangtsen eni, tsüka jo rangtseen motsünga to pirasi ombona khoe wocho. 16 Tole rangtsen mongo hungwo jina zakto owo shishoe elani rangtsen mongo khakcholani vacho. 17 Rangtsen eni hungwo jina ha owo shishoe rangtsen eni khakcholani vacho. 18 Khatola rangtsen motsünga hungwo jijo owo ombo pvüi ji rang ji juthei vacho. 19 Yuta sungsana ti onte pvüi jina oyi etssüngi onte zeyicho. 20 Tole rangtsen mongo hungwo jina mongo khakcholani hansi oro phyocho, "OPVÜI, nina rangtsen mongo apio ji ana mongo kyongkathukcho." 21 Tole ombo pvüi jina ezocho, "Elhi mmhona, longtsüka eli phajae mmhom yo, nina ejükarolo longtsüka lio jina khosha lo ni vanthokvü, oyi nipvüi longshyu jilo rheyia." 22 "Tole rangtsen eni hungwo jina ha heto phyoa rocho, 'Opvüi, nina rangtsen eni apio ji ana rangjen eni kyongkathukcho.' Tole ombo pvüi jina ezocho, 23 'Elüm mmohna, longtsüka eli phajae mmhom! Nina ejükarolo longtsüka lio jina khosha lo ni vanthokvüka. Ni pvüi longshyu lo rheyia!' 24 Okhao tssoa rangtsen motsünga hungwo jina heto phyoa chirocho, 'Tsüphoe yo, nino nkhyika to ana ntsia, nina n chencho lo riala osi nina n vencho lona hanrhyuala. 25 Jitsükona akyuo jina ni rang ji owo lichungi juthei mphoe vachoka, Ni echi ji shika khialo.' 26 Tole ombo pvüi jina janlancho, "N thae, etho njüi phajae, ana n chencholo riala osi n vencholo hanrhyuala to nina n tsia nüng? 27 To tsona nina a rang ji rangvae khelo vasi ana yiana hojilo eran thephae a khithokvü shikhfü la. 28 Jitsükona ombo thüngina orang ji khi rangtsen taro elio ji ekata. 29 Ntiotssole ochona lia sana kyungkata pia pvülyuthokvü; tokhatola ochona n liasana ombona lio ji mpato khi siyiv. 30 Osi ethev n lio phajae ji e müng opomoe vachukchi siv; hojilo kyon na oho shüngta kyatav."
Yitsso Okhao ji
31 Hoji tsükona kyontsoe jina lanben topvü sosi ombo phfütsson lona roa na, ombona ombo pfütsson vantsü jilo khokthev, 32 osi ombo mhadungo jipo topvü sanrhyuv, osi olyu enhyang na nyanyan jiang yolo na olyu jiang khosotayia to khosotayiv. 33 Osi onibona olyu jiang ombo amimoe vanthokvü, khatola nyanyan jiango ayi woe vanthokvü. 34 Jisüijo mesao jina ombo amimoe jiang ezov, 'Rotava, nteno apo na mmhayio kyonden! Limha liyingdeni na methaki nte vayio ji oro khitava. 35 Ntiotssole a wondona vancho ntena atsothukcho, osi a eratsünga vancho ntena ayuthokcho; ana yentsae tssoa vanathüng ntena a sothecho, 36 ana mpensü hungi n kav vanle ntena a iripensüthokcho, a nochonoria vanle nte na ajanthechicho, ana vüngpheni vanle ntena athüngi rocho.' 37 "Hojithüng ntsanthoe jiangna janlam, 'OPVÜI yo, ena kvüthüng ni wondona hungi ni tsoyuthokchola? Mekana ni ratsünga vanathüng eyuv ni pichola? 38 Osi kvüthüng yentsa ni hungi ni sothechola? Mekana kvüthüng mpensü n liv ni hungi ni mpensüthokchola? 39 Osi ena kvüthüng ni nochonoria hungi osi nina evüngki vana ni hungi ni janthechi chola?" 40 Hojithüng mesao jina janlam, 'Ana otsotso nte ezoaka, ntena a otaonyu jiang yolo teritso ji thüngi tssoji ha athüngi tssocho!' 41 "Hojisüi jo ombona ombo ayiwoe jiaüg thüngi ezov, 'rhiyikao kyonden, athüngina tsantava, ana nte n tsika! Osi tsüngrham ji tona ombo lanben jiang to echi kümali n mheo mi methakio jilo rheyitava! 42 Ntiotssole a wondona vanaha nteha e tsoyu a n picho, osi a eratsünga vanaha ntena eyuv a n picho; 43 ana yentsae tssoa vanaha ntena a n sothecho, mpensü n Haha ntena a n picho; A nochonoria osi vüngpheni vanaha ntena a n janthechicho.' 44 "Jithüng ontena ha janalam, 'OPVÜI, ena kvüthüng ni wondoncho, yentsacho osi mpensü n liv, nochonoria osi vüngpheni ni hunga ha ni n zechola?' 45 Jithüng ombona janlam, 'Ana otsotso nte ezoaka, ntena a otaonyu yolo teritso ji thüngi tia n tssowo jijo a thüngi n tssocho.' 46 Jitsükona onteno kümali khangshi ezüp jilo rheyiv, tokhatola ntsanthoe jiang kümali eküm jilo rheyiv."
Jisu Pono Okhe Ethev Benkacho
1 Jisu na shiang phyosi sülo ombo sürüi jiang ezocho, 2 "Tsüngon eni sülo Yakchi tokhu ji yiv to ntena ntsia, osi kyontsoe ji edom tsükona rhümav." 3 Tole eramoe tona pvüti tsüphoe jiang tona Kaiafas to tsao ji ki sanrhyue, 4 mphoe na Jisu rhümae chüthokvü phyotacho. 5 "Tokhatola ontena kyon jiang na nkanlungtav küma ji tsükona tokhu yutalo mekna tssotav to phyotacho."
Bethany Lona Jisu Nzüyio ji
6 Jisu na Bethany lo ratsü enoe Simon ji ki vancho. 7 Osi ombona etsoyu etssov vanathüng eloe tsükana thyujü tsentsü man muri motsünga hansi oro kvüri lo nzüyicho. 8 Tole ombo sürüi jiangna, hoji hungale lüm n tssov phyotacho, "Ntiolui heto ezii siala?" 9 "Thyujü shiji oman elüm na yeni yantsae pikhok la!" 10 Jisu na hoji ntsi onte ezocho, "Nteno ntiolui eloe ji khetsüala? Ompvüna a thüngi elhi mmhontso ji tssothaka. 11 Ntiotssole yantsae jiango nchokabemo nte ndüngo vamvü, tolea aiyo nchukaben nte ndüngo vamvü meka. 12 Ompvüna a tsüko hoji a phyangkayio ji yakchia a juthev tsükona benrithaka. 13 Ana otsotso nte ezoaka, "Limha kvülo yithen mmhom shi püngnoa sana ompvüna heto elhio shi ezoa ompvü nchümchevka."
Judas na Jisu Yem Methakcho
14 Taro eni ji yolo Judas to tsao jina pvüti tsüphotso ji thüngi owo ezocho, 15 "Ana ombo ji nte khelo theyina ntio apivla?" Tole ontena rangpyak thümro ombo picho. 16 Hoji yuta jilona benkae ombona Jisu ji eyem tsükona tssocho mmhom yana yicho.
Jisu na ombo Sürüi Jiang Nzo Yakchi Tokhu Tsotao ji
17 Ebung mozhü n theo hümri etso tokhu tsüngon ovüngo jilo sürüi jiangna Jisu thüngi oro ezotacho, "Nina yakchi tokhu etsov tsükona kvülo e methakthokvü la?" Ombona ezocho, 18 'Yantsü jilo owo kyon tsüka thüngi heto ezoa, "Püngnoe jina phyoala, 'A yuta janthaka; A tona a sürüi jiang tona tokhu ji nikina khitav.' " 19 Jisu na ezoji esüa sürüi jiang na tssocho osi yakchi tokhu ji methakcho. 20 Mmyuale ombona sürüi taro eni jiang nzo tsotav tsükona khokthecho; 21 osi ontena tsotav sathüng ombona ezocho, "Ana otsotso nte ezoaka, nte yolo tsüka na ayemka." 22 Tole onte nungratsüngcho osi tsüka na ombo ezocho, "OPVÜI, hoji a alo?" 23 Ombona janlancho, "Ochona a tsikungi okhe yonthechicho sana jina a yemka." 24 Kyontsoe jijo erani lio ji ephan tae yiv, khatola ochona kyontsoe ji yena sana jijo n penthak! Kyontsük jijo n buk ntsao ji mmhomo." 25 Tole ombo yemo Judas jina ezocho, "Püngnoe, hoji a alo?" Jisu na ezocho, "Nina phyothaka to."
OPVÃœI Tokhu Benkao ji
26 Ontena tsota vanathüng Jisu na hümri khikae mmhayithoksi mpvüroe ombo sürüi jiang pia ezocho, "Khi tsotava, shijo a tsük ji." 27 Elani ombona opvü motsünga tsakae Potsow montso pisi heto ezoa pilancho, "Nte topvüna shi yutava, 28 ntiotssole shijo a ntsata ejen, kyon elümoto nlan siyiv tsükona ezamo ji. 29 Ana otsotso nte ezoaka, tsüngon jilo apo ekhüngyani na nte nzo ethan tssoa n yuta thüng jo ana jününgro jü shi yulam meka." 30 Hoji süijo ontena okhen dentasi olive enungi chüngitacho.
Peter na N Phyochakvü Ovüngna Ezoji
31 Tole Jisu na onte ezocho, "Nchüng zümo ntena a thüngina elankhamka; ntiotssole heto erani lia: 'Rhükipvüo ji ana lüngthav osi olyu jiang na tsanrorav.' 32 Tokhatola ana phanthilanthaka na, ana nte vüngi na Galilee wov." 33 Jithüng Peter na phanthi ombo ezocho, "Onte topvüna mpa elankhanlea aiyo kvüthüngha elam meka." 34 Jisu na ombo ezocho, "Ana otsotso ni ezoaka, nchüng zümo hono n khüthüng nina a n tsi to yenjo ethüm phyov." 35 Peter na ezocho, "Ni nzo mpato a echüthoklea ana ni n si." Sürüi jiang topvüna hojito phyoracho.
Gathsemane Phari na Randamo ji
36 Jitosi Jisu na onte nzo Gethsemane wotacho, osi ombona sürüi jiang ezocho, "Ana ojiwoe na owo randamka, shilo khukta vantakhe." 37 Osi ombona Peter ha Zebedee tsoe otsük eni jiang to sosi wocho, emhuk nungrav benkacho, 38 osi ombona onte ezocho, "A chüv esüa a nungrala, jitsükona shilo vani a nzo nhyaktava." 39 Tosi ombona tara konkata owo nkhümthei randancho, "Apo tssochena ezüp pvü shi a thüngina khi asiyia! Tokhatola alüm erüng mek, ni lüm erüng tae." 40 Ombona sürüi otsük ethüm ji oyi zele yiprae vancho, jitsükona ombona Peter ezocho, "Nteno shanlan motsünga tia a nzo n hyak-khokchoke? 41 Ejiphiv lo nte nrheyio tssoa randana nhyaktava; omon najo chokata khatola oso na n toala." 42 Ombona echung enioto owo randancho, "Apo, opvü shi ana n yuv jo n yakchicheo tüv tssona ni lüm erüng tssothoka." 43 Ombona elani oyi zele ontena yiptalana vancho; ntiotssole onte mhyik jiang nküka-khokvü vancho. 44 Jitsükona ombona onte sisi echung ethümoto randanwo wocho, osi yitsük ji randancho. 45 Osi ombona sürüi jiang oyi ezocho, "Nteno enhünga jana esanta yiptapvüke? Yuta ji janthaka, osi kyontsoe ji mmen kyon khelo. khochaki theyithaka. 46 Phanthita, etena yita vamvüka, zetava, a yemo ji tsathaka."
Jisu Yemo ji Tona Rhümao ji To
47 Ombona nsana vanathüng sürüi taro eni ji yolo tsüka, Judas na kholuk tsüphov sosi yonri tona rübüm to benrasi pvüti osi eramoe jiang thüngina roracho. 48 Tole ombo yemo jina chekav heto picho, "Ana ocho eyulo ntssüpia na hojika rhümale." 49 Tosi ombona tondüng Jisu thüngi oro ezocho, "Salümka, Püngnoe!" Osi ombona ombo ntssüpcho. 50 Tole Jisu na ombo ezocho, "Oshom, ntiolo rochola? zakto tssoa." Tole ontena Jisu tsüko okhe theta rhümacho. 51 Jithüng Jisu nzo etssoe yolo tsüka na yonri süchei pvüti tsüpho ji nri tsüka ji eno elhümchochiyicho. Tole Jisu na ombo ezocho, 52 "Ni yonri ji ombo thepheni thei hana; ntiotssole yonri benphi jiang topvü yonri na chüthokvü. 53 Ana apo thüngi jonjiwo ombona zakto lanben wothüng taro eni n rothokvü tsayia alo? 54 Khatola hojito tssoana kvütoli motsü ji bemla?" 55 Ji shanlan jilo Jisu na kholuk ji ezocho, "Nteno efüi rümo rotacho alo? Tsüngon akvü ana nte khümpheni na shika vanaha ntena a n rhüma. 56 Khatola shiang hetopvü shi zenkhying yi ji benthokvü tssoala." Jisüi jo sürüi topvüna ombo sisi tsantacho.
Jisu ji Yitssopheni Sosi wocho
57 Jisu rhümao kyon jiangna Kaiafas ki ombo sosi wocho, osi hojilo eranpvüi tona eramoe jiang to sanrhyui vancho. 58 Peter na pvüti hapo ji jana phana wocho, osi ochungi rhowo kvüto tssov sana to zev tsükona ombona enhyang jiang nzo khukthecho. 59 Tole pvüti eramo jiang osi kholuk totona Jisu lüngthav tsükona ejüngjüng ehungpvüi pitacho. 60 Khatola ejüngjüng ehungpvüi elümoto chiyiaha ontena ntia n lan n yanchecho. Okhao tssoa otsük enina chiyi heto phyocho, 61 'Kyon shina heto phyocho, "Ana ekhümki shi roe sisi nchuk ethümo tssolancheta!" 62 Tole pvüti eramo jina phanthi phyocho, "Nina ntia janlam n lichoke? Shiangna ni phyoyia vamo shiangji kvütola?" 63 Tokhatola Jisu na yingto vancho, osi pvüti eramo jina ombo ezocho, "Ana eküm evamo Potsow myingo na ni thüngi jonjiala, nino otsotso Potsow tsoe Khrista ji memekcho sana ji ezoa." 64 Jisu na ombo ezocho, "Nina phyoji jito. Tokhatola shi süi jo kyontsoe ji na Thotsü ji amimoe khuthe roa ntena hungu ka." 65 Tole pvüti eramo jina ombo phukthesü ji reroe sia phyocho, "Ombona yikvü yiloa phyothaka! Etena ntiolui ehungpvüi yantalamla? Ntena ombo yikvü yilo yi ji zothaka. 66 Nteno kvüto nchümtala?" Ontena janlancho, "Ombo ji echüv etüma" 67 Jitosi ontena ombo mhalo mphyokayia ombo tatacho; ejoma na ombo tümsi ezocho, 68 "O Khrista, ochona ni tacho sana phyoe zei!"
Peter na Jisu N phyochako ji
69 Jithüng jana Peter jo hapoe khuka vancho. Tole pvüti tsüphotso ji phajapvüi tsüka na oro ombo ezocho, "Niha Galilee yamo Jisu ji thüngi evanla nüng?" 70 Khatola ombona topvü mhadungo na ekhirancho, "Nina ntio phyoa sana ana n tsi" 71 Elani kitajoe chiwole eloe thanpoe na ombo hungi ompvü ndüngo evan jiang ezocho, "Kyon shijo Nazareth Jisu thüngoe etssoe." 72 Tole ombona elani echüma ekhirancho, "Ana kyon ji tia n tsi." 73 N sungu jilo evamo jiangna Peter thüngi oro ezocho, "Niha ombo woro nrünga, ntiotssole ni yisan jina ni yenala." 74 Tole ombona ombobo echümkata phyocho, "Ana kyon ji n tsi." Tole zaktole hono khücho. 75 Tole jithüngti Jisu na heto phyoji Peter na nchümchecho, "Nina hono n khüthüng a n tsi to echung ethüm phyov." Jisüi jo ombona hapoe chiwo nshüthechia kyacho.
Pilate Thüngi Sosi Wocho
1 Wonchiale eramoe kholuk tona pvütiden to jiangna Jisu ji chüthoku thyutacho; 2 Ontena ombo ji sheni süsi owo esapvüi Pilate khelo theyicho.
Judas Chüo Ji
3 Nlan ombo pio ji ombo eyemo Judas jina hungale heto phyoa rangpyak thümro ji hansi oro pvüti tona eramoe to jiang pilancho. 4 "Nlan n lio ejen ji ana yenthaka, jitsükona ana n lan tssothaka." Tole ontena "Eria hoji ntio lyuvla, nina rii etso tssoa." to phyotacho. 5 Jisüi jo ombona orang jiang ekhümki nrukthechi sisi tsani owo ombobo khyaktsüngi chücho. 6 Tole pvüti jiangna orang ji bensi phyotacho, "Shi jo ejen man, jitsükona rangjeni thechiv elan n li." 7 Ontena thyutasi orang ji khi yentsae juthephen tsükona phfüjoe ji liko ji shitacho. 8 Jitsükona liko jijo nchüng jana 'Ejen liko' to tsala. 9 Hojitolui Jeremiah zenkhying na phyoe elio ji benthukcho, "Israel kyon ejoma na ocho pono oman methakcho sana, 10 hoji man rangpyak thümro ji ontena khi, OPVÜI na a ezo ji esüa phfüjoe ji liko man ji lotacho." 11 Jisu na esapvüi ji mhadungo mangcho, osi esapvüi jina ombo engacho, "Nino Jihudi mesao ji alo?" Jisu na ombo ezocho, "Nina phyoji jitoka." 12 Jisüi jo pvüti osi eramoe jiangna ombo maka ha ombona n janlancho. 13 Tole Pilate na ombo ezocho, "Ontena ni nlan hetata hansi ro shi nina n zoake?" 14 Nlan pio jiang ombo na motsünga tia n janlamo jina esapvüi ji elümoto emhukcho.
Jisu Chüthokvü Khochaki Pio ji
15 Yakchi tokhu yutalo kyon jiang lüm erüng ephani na evüng ki evan tsüka vachiv esapvüi ji etho, osi shikhfü licho. 16 Jithüng n thanri tsüka Barabbas to tsa evüngki vancho. 17 Hoji tsükona kyon jiang sanrhyuale Pilate na onte engacho, "Nteno ocho a vachithukhungala? Barabbas alo Khrista to tsao Jisu jila?" isOntena mhyiktsso raki lona Jisu ji rhümae ombo khelo theyicho toji ombona mmhona ntsicho. 19 Osi Pilate na yitssoe khukthephen jilo khukthei vanathüng ombo eloe jina heto oyi yencho, "Ntsanthoe ji tsüko okhe ti-theta, ntiotssole nchüng omüngi na elümoto a ezüpthukthaka." 20 Pvütiden osi eramoe jiang na Barabbas vachisi Jisuji chüthokle to ntssünga phyothukcho. 21 Esapvüi jina elani onte engacho, "Ntena onilo ocho a vachithuk hungala?" Ontena ezocho, "Barabbas". Tole Pilate na ezocho, 22 "Tona Khrista to etsao Jisu jijo ana kvüto lyuvla?" Tole onte topvü na "Doni ombo sia" to phyotacho. 23 Jitsükona Pilate na ezocho, "Ntio tsükona la, ombona ntio n mhom tssochola?" Tokhatola ontena "Doni ombo sia" to nrankata phyotacho. 24 Jisüi jo Piltae na ombo ephyov n liv zechecho, osi ninyang phanthiala to zechetale ombona ojü khi okhe ntsüki sia phyocho, "Ana kyon shi eküm khiyivlo okhe n thetaka, ntebobo zetava." 25 Tole onte topvü na phyotacho, "Kyon shi ejen ji e tona e tsoronichen to pono tssothuka!" 26 Jisüi jo ombona Barabbas onte vachiyisi Jisu ji erhüpa donle to khochaki onte khelo theyicho.
Rasan Jiangna Jisu Emayio Ji
27 Pilate rasan jiang na Jisu ji sosi esapvüi ji ki yicho, tole kyon kholuk jina ombo hachüma sanrhyucho. 28 Osi ontena ombo sü ji shakisi sümyon ombo mpenthukcho, 29 okyo kikho nsüngrüi kvüri lo venkayi tosi okhe amimoe na jarung süthokcho. Osi ontena ombo mhadungi khuktseni ombo emakata ezotacho, "Salümka, Jihudi mesao!" 30 Tosi ontena ombo nphyukata jarung ji rechoe kvüri lo ombo erhüpicho. 3i ontena ombo emakathakale, sümyon ji shaki siyisi ombo sü ji mpenthuksi doni silo ombo sosi wocho.
Jisu Domo ji
32 Ontena yita vanathüng Cyrene kyon tsüka Simon to tsa ndukcho; osi ontena Jisu donphen ji eham tsükona ombo khüngkacho. 33 Ontena Golgotha to tsao meta ji janale (Kvüriryu meta) 34 Ethem lo ekhov süki yule to ombo pitacho. Tokhatola ombona nkyani zesi n yucho. 35 Ontena ombo donthakale ombo sü ji phyalyu fuki zetasi jantae khicho; 36 tosi ontena khuktherae ombo cheta vantacho. 37 Ontena ndanphen heto erani ombo khümkiwoe eshenkae vayicho, "Shijo Jihudi Roza Jisu ji" 38 Efüi otsük eniha ombo hayi hamen donhyacho. 39 Hoji yakchi topvüna ombo emayia kvüri engumphita phyotacho: 40 "Ekhümki ji roe sisi nchuk ethümo tssolanpvüi, nipopo shanchoa! Potsow tsoe ji ni tssona donpheni na joyia!" 41 Hoji esüa pvüti tsüphoe, eranpvüiden osi eramoe jiangna ha ombo emakata ezocho: 42 "Ombona oyam jo shanchocho, khatola ombobo jo n-shanchoche! ombo Israel mesao jika donpheni na ombo joyithoka, tona ena ombo longtsüvka! 43 Ombona Potsow lo longtsükatala; osi ombo Potsow tsoe to hoala. Hoji tsükona Potsow na enhünga oro ombo sheshanchov sana etena zetavka!" 44 Osi ombo nzo domo efüi jiangna mpato hojito ombo emayicho.
Jisu Chüo Ji
45 Shanlan tiruko to lona benkae tukvüo to ji nandang limha topvü müngi sicho. 46 Osi shanlan tukvüoto harüma lo Jisu na heto eronkachicho, "Eli, Eli, lema Sabakthani?" Yichaki na, "A Potsow, a Potsow, nino ntio tsükona a sichola?" 47 Tole jilo manga evan ejoma na hoji zoe phyotacho, "Kyon shina Elijah tsala." 48 Tole tsüka na yunga owo sena khi ethem jümi tsontsüng lo erükae yule to ombo picho. 49 Tole thanpoe jiangna phyotacho, "Nhyaki zetae, Elijah na oro ombo sheshanchov sana zetavka!" 50 Jithüng Jisu na eronkachia ombo mon ji yithokcho. 51 Jithüng ekhümki zonlanchi ji khümki na jolo jana eni resoe sicho; osi limha ji enhyuka olung jiang küngsocho, 52 Osi ntho kyon chüthako jiang elümoto phanthilanthukcho. 53 Ombo phanthilancho sülo ontena müngsiphen ji sisi yantsüi rhowo kyon elümoto hungthokcho. 54 Limha enhyuko shiang hetopvü tssoji nzoapvüi ji tona thanpoe nhyakta evan to jiangna hungale onte rangsüa phyotacho, "Otsotso shijo Potsow tsoe ji!" 55 Hojithüng eloe elümoto na ekoni na zechita vancho, onteno Galilee na Jisu phanphita ombo benkata eroe jiang. 56 Osi jiang yolo Mary Magdalene, James ha Joseph oni oyo Mary tona Zebedee engh ji to jücho.
Olüpi Shotheo Ji
57 Mmyuale eli tsüka Arimathea yamo Joseph to tsao ji rocho. Osi omboha Jisu sürüi jiang yolo tsüka tssocho. 58 Ombona Pilate thüngi owo Jisu müngji choncho. Tole Pilate na pile to yizüng picho. 59 Joseph na echü müng ji khi osü enyipvü na eyuki, 60 ombona olung lo ombo lüp tukthe vao jilo thechi, lungpyak tsüphov khi olüp ji lhüpi vasi yicho. 61 Mary Magdalene tona Mary thanpoe ji to olüp ji mhadungoe khokta vancho.
Jisu Lüp ji Nhyathukcho
62 Ojyuato esanmung tsüngon jilo Pharasee jiang tona pvüti tsüphoe to jiangna Pilate mhadungo sanrhyui ezotacho, 63 "Tsüphoeyo, oyam ejiphi jina eküm vanathüng heto phyo ji ena nchümcheta, 'Ana nchuk ethüm sülo phanthilam.' " 64 Jitsükona tsüngon ethüm n-tssothüng jo olüp ji nhyakvü yizüng pia, to n-tssona ombo sürüi jiangna owo ombo efüi hansi yisi ombo echü lona phanthithaka to oyam ezov. Toana ovüngthüng lona n-mhonkao oyam ejiphiv." 65 Pilate na onte ezocho, "Ntena enhyang rasan vanthoka, osi owo etonandang ntangshoni vatava." 66 Tole ontena owo okhüp jilo chekav ejüpkae vanthoksi enhyang vanthokcho.
Echü Lona Phanthilamo Ji
1 Emung ji sülo tsüngon jandemo ji wonchibüngo, Mary Magdalen tona Mary thanpoe ji to olüp ji zelo wotacho. 2 Tole nri elümoto enhyukcho; osi Potsüwoe na OPVÜI lanben joro olung ji khoe sisi hoji poni khokthe vancho. 3 Ombo pyon jo potsüo nlüpa tüv osi ombo mpensü jo sheryu esüa emhüma tüv. 4 Osi ombo ekyu lona enhyang jiang ji echü esüa kümkhancho. 5 Tole lanben jina eloe jiang ezocho, "Tikyutava, Ntena Jisu doni siwo ji yantala to ana ntsia. 6 Ombo helo n-van, ntiotssole ombona phyo ji esüa ombo kümchelan thaka. 7 Ontena kvülo ombo vacho sana oro zetava. Osi zakto oyi ombo sürüi jiang thüngi ombo phanthithaka to ezotava, osi ombona nte vüngina Galilee yia vamka; ntena hojina ombo hunguvka! Zeta ana nte ezoala. 8 Hoji tsükona ontena kyua khatola longshyu na pyingi zakto olüpi na oyi ombo sürüi jiang ezolo yitacho. 9 Tole Jisu na onte nduki ezocho, "Salümka," Tole ontena owo ombo jolo rhümae khümtacho. 10 Osi Jisu na onte ezocho, "Tikyutava, owo a otanyu jiang Galilee ota to ezoa, ontena hoji na a hunguvka."
Olüp Enhyang Jiangna Yithen Pio Ji
11 Ontena yita vanathüng enhyang ejoma na yantsüi owo pvüti tsüphoe jiang thüngi ntio tssocho sana ji ezoracho. 12 Tole ontena sanrhyui thyutasi enhyang jiang orang pia ezotacho, 13 "Kyon jiang heto ezotava, ena yipa vanathüng ombo sürüi jiangna oro ombo efüi hansi yicho. 14 Esapvüi jina shi zoana, etena ombo lüm pükichev osi nteha ntia ezüp liv meka." 15 Ontena orang ji khisi ezo ji ephan tssocho; osi shi motsü shi nchüng jana Jihudi jiang yolo rütala.
Jisu na Taro Ekha Wothuko Ji
16 Jitosi sürüi taro ekha jina Galilee lo Jisu na onte ezo phunglan ji wotacho. 17 Ontena ombo hungi ombo khümtacho, khatola ejoma na jo woewolancho. 18 Tole Jisu na oro onte ezocho, "Potsüo osi limha topvülo etho ji a pithaka. 19 Hoji tsükona ntena wotava osi jipo topvü lona a sürüi kümthoka: Opo, otsoe osi Nthomon ji myingona baptiyia, 20 Osi ana yizüng nte pithako jiang topvü benphiv tsükona onte shikarünyoa. Osi limha ehüm jana ana nte ndüngo theta vamvüka."
John Baptio na Püngno ji
1 Shijo Potsow tsoe Jisu Khrista yithenmhom ji. 2 Isaiah zenkhyingna heto phyoe lio ji esüa benkacho: Potsow na phyocho, "Ana ni vüngi na yithenpvüi yithokala; ombona ni lan ni methakiv. 3 Ochosana romohoni na heto owon tsoa zoala, 'OPVÜI ji lan methakia, ombo sanphilan ji nsayia.' " 4 Hoji esüa John na romhoni na chiro kyon jiang Potsow khi mmen onte siyithokvü mmen phyochaka baptile to onte püngnocho. 5 Judea meta osi Jerusalem yantsü kyon elümoto na onte mmen phyochaka ombo thüngi oro Jordan zhükhfüi na onte baptiyithukcho. 6 John jo Odh tsansü mpensi sofü ryukhüng hancho. Ombo na khomong tona orae tssakijü to tsocho. 7 Ombona heto tünga püngnocho, "A lona elüm tsüphokata tüv a sülo tsata; osi ana jo nkhfüthei ombo jokhüpzhü lanphev tia a n tüm. 8 Ana jo ojü khi nte baptiyia la, tolea ombona jo ntho mon khi nte baptiyivka."
Jisu Baptiyio ji Osi Ojang Ji
9 N sungkhüngü Jisu ji Galilee meta Nazareth lona rocho osi John na Jordan zhükhfüi na ombo baptiyicho. 10 Jisu na ojüi na chiyipvüto potsüo ji chonchia toli omon ji yikhyu esüa joro ombolo eshona hungcho, osi 11 owon ha heto zocho, "Nino a nzamo tsoe ji. Nilo a lüm ejo lia." 12 Omon jina zaktole lijüngi ombo sochicho, 13 hojilo satan na ojang ombo tssoa tsüngon zhüro vancho. Hojilo orae ekümrüm ha vana, tokhatola Potsow lanben na oro ombo sükümcho.
Jisu na Ngorüm omezhü Tsala
14 John rhümae vüngthakale Jisu na Potsow yithenmhom ji heto püngnoa Galilee rocho. 15 "Yuta tümkao ji benthaka, osi Potsow ekhüngyan ji tsenkathaka! Nte mmen jiang lona khophi Potsow yithen-mmhom ji longtsütava!" 16 Jisu na Galilee jümang rhüa yia vanathüng ngorüm otsük eni, Simon ha onyuro Andrew oni ongo vanta hungcho. 17 Jisu na oni ezocho, "A phana rotava, ana kyon erüm nte kumthokvüka." 18 Hoji topvü onina ngovanphen jiang sisi ombo sürüiden kümcho. 19 Jilona tara tae woa, Zebedee tsoeden, James ha John onjeni na orhungi rhowo ngovanphen metha kta vancho, osi ombona onte hungpvüto onte tsacho. 20 Tole onina opo tona yingae jiang to orhungi silanchi si ombo sürüiden kümtacho.
Omon N-mhom Evan kyon Tsüka
21 Ontena Kapernaum lo wocho osi ojyuato emung jilo Jisu na synagogue ki rhowo püngnocho. 22 Ombona püngno jina kyon jiang ngangchecho, ntiotssole ombona shikhfü püngnoe jiang esüa mekna etho lia püngnocho. 23 Synagogue jilo kyon jiang yolo omon n mhom evan kyon tsüka jücho jina heto tüngkachicho, 24 "Ntiolyui a khetsüato Nazareth Jisu, e monthokvü rocho alo? Nino ochosana ana ni ntsia – nino ntho Potsow yithenpvüi ji!" 25 Jisu na karanga ezocho, "Jükrüpi vana, osi kyon jilona chiyia!" 26 Omon n mhom jina kyon jilona elümoto enhyukluka erona chiyicho. 27 Tole kyon jiang ngang tsüngrae phyota yicho, "Shijo ntio hetüvla, püngnoyi ethan la, yizüng pina omon n mhom jiangna mpato engayia sala!" 28 Jitopvü Jisu yivon ji zota Galilee nkonjan topvü lo pyinga yicho.
Jisu na Kyon Elümoto Emiyiala
29 Jisüi jo ontena synagogue ki na chiyi James ha Andrew oni ki wotacho. 30 Simon eloe ji oyo ji raa belüngi vamo jina onina Jisu ezotacho. 31 Tole Jisu na rhowo okhe lona ompvü sükacho, tole jitopvü era ji poe sisi ompvü na onte jenchi engaecho. 32 Mmyu jani eng rhethakale kyon jiangna nochonori osi omon n-mhom evan topvü Jisu thüngi sotasi rocho. 33 Oyan jilo kyon topvü oki jilo etssicho. 34 Tole Jisu na nochonori lantaro ehan osi omon n-mhom evan topvü emiyicho. Omon n-mhom jiangna ombo chetheo jina ombona ntia onte n-phyothukcho.
Jisu na Galilee na Püngnoala
35 Ojyuato jo nyazüngina ombona phanthi chiwo yingsiyinglo metae na owo randancho. 36 Tole Simon na ombo shom jiang nzotssoe ombo yana wotasi, 37 ombo hungi ezotacho, "Kyon topvüna ni yanta vana." 38 Khatola Jisu na ezocho, "Etena nkonjano oyan shianglo wotavka, osi ana jianglo ha püngnovka; ana ro jijo hoji tsükona rocho." 39 Ombona Galilee meta topvü khyurhyua püngnoa, omon n mhom jiang phania wocho.
Jisu na Ranoe Tsüka Poyiala
40 Ranoe tsüka na Jisu thüngi nkhoktseni ombo poyivo to jonjia heto ezocho, "Nina lüm na rüngwo a emiyikhuka." 41 Jisu ji khonzan na pyingi okhe rüchia evüngkata phyocho, "Ana a lüm na rüngka, ntssüngcheta." 42 Tole rano jina ombo sia yicho osi poe sicho. 43 Jisu na tüngochünga heto ombo ezoa yitho kcho, "Ochia ti zorüngkhe, 44 tolea oyi pvüti ji khi ni hungthoksi pothaka to chethev than ji Moses na phyoji ephan thana." 45 Tole kyon jina oyi elan elani phyoa meta pyinga yia jo, Jisu na oyan kvülo ha chancheta n-rhowov sicho. Jitsükona ombona yingsiyinglo metae vankae sicho. Osi nken akvü lona ontena ombo yana rotacho.
Jisu na Tsükchüi Emiyiala
1 Tsüngon tara sülo Jisu na Kapernaum lo yilancho osi ombona oki vana to yiwon zota yicho. 2 Kyon khosha na ombo thüngi roe haphoe tia vanphen n-liv sicho. 3 Jisu na onte püngnoa vanathüng kyon otsük mezhü na tsükchüi tsüka ejümtasi Jisu thüngi rocho. 4 Kyon khoshao jina ontena kvütoli tia sosi n rhowocho. Jitsükona ontena Jisu vamo ji tontüngo mhonki na shyurhüpcho. Ontena shyurhüpi kyon ji ejümphen totona ejümthechitacho. 5 Ontena longtsü lio ji hungi Jisu na tsükchüi ji ezocho, "A tsoeyo, ni mmen jiang ni siyithaka." 6 Hojilo khukta evan shikhfü püngnoe ejoma na nchümtacho, 7 "Ombo ntiolyui heto phyoato, jijo yikvü yiloala, mmen siyikhung jo Potsow tae!" 8 Ontena nchümta vamo ji Jisu na zaktole ntsi onte ezocho, "Ntiolyui ntena hoto nchümtala, tsükchüi ji 9 "Ni mmen jiang ni siyithaka" to ezov ji elao alo "Phanthia, ni belüng ji tsakae bensi sanphia' to ji elaola?" 10 Khatola kyon tsoe jina limhalo mmen siyiv etho lia to ana nte ejüvka. 11 Tosi ombona tsükchüi ji ezocho, "Ana ni ezoaka, phanthia, ni belüng ji tsakae bensi oki yia!" 12 Onte topvüna zeta vana kyon jina belüng ji tsakae bensi zakto yi sicho. Tole onte topvü ngangcherae Potsow thünga heto phyotacho, "Etena kvüthüngha hetüv n-hunghan!"
Jisu na Levi Tsala
13 Jisu na elani Galilee wozhü tssae yicho. Tole kyon kholuk na ombo sanzhücho osi ombona püngnov benkacho. 14 Ombona rümphiathüng Alpheus tsoe Levi tssenkhyae jina, lhitssoki vana hungcho. Jisu na "A phana rao" to ombo ezole Levi na phanthi ombo phana wocho. 15 Jisu na Levi ki etsoyu tsoa vancho to le. Tssenkhyae tona jipo teri to kholuk tsüpov tssoe ombo phanphita vancho osi ontena ha Jisu tona ombo sürüi jiang to nzo tsota vancho. 16 Tole shikhfü püngnoe Pharasee ejoma na Jisu ji tssenkhyae osi jipo teri nzo tsoyuta hungi ombo sürüi jiang engatacho, "Ombo ntiolui hetvü kyon nzo tsoyutala?" 17 Jisu na hoji zoe onte janlancho, "Otsük mmhona vamo kyon jiangna tsüktssen ethev licho mek, tolea nochonoria vamo jiangna ethev liala. Ana ntsanrüka evan jiang tsalo rocho mek, tolea mmen kyon jiang khophitokvü tsükona rocho.
Ekhang Tsükona
18 Tsüngona lo John baptio sürüi jiang tona Pharasee to jiang na khangta vancho. Tole kyon ejoma na oro heto Jisu engacho, "Ntiolui John baptio sürüi jiang tona Pharasee to jiangna khangsi ni sürüi shiango n khangala?" 19 Jisu na ezocho, "Yanpithan tokhu lo eroe jiangna etsoyu n tssona yio to ntena nchümtake? jito mek, yanpithan ji onte yolo evanthüng jo ontena n khang. 20 Tolea tsüngonalo jo yanpithan jina onte thüngina khoe yivküma ontena khangu." 21 "Ochina ha sükye lo süporo ethan n khümkatala, ntiotssole süporo ethan jina enyeni sükye ji tssüngroe tsüphokata poe siv. 22 Elani, ochinaha sofü-kuk ekye lo jününgro jü züniro thei n vatala, ntiotssole züniro jina sofü ji buksoe siv. To tssoa na jününgro jü jiha sükvü jiha poksoe siv. Khatola züniro jo yenphen ethan lo yeni vatala."
Emung Tsükona
23 Jisu na emung tsüngono oli ejoma yakchia sanphiathüng ombo sürüi jiangna ombo phana wotasi tssukthi jiang mmyipi tsotacho. 24 Tole Pharasee jiangna Jisu ezotacho, "Zeta, ni sürüi jiangna emung tsüngono heto elhio shijo shikhfü yesoala!" 25 Jisu na onte ezocho, "David na ethev lia osi wontonathüng kvüto lyucho sana ntena n khachehanke? 26 Ombo osi nzo etssoe jiang wontonale ombona Potsow ki rhowo Potsow thamo hümri ji khi tsotacho. Abiathar na pvüti tsüpoe tssoathüng hotüv hümri ji David na tsosi thanpoe jiangha picho." 27 Okhae jo Jisu na phyocho, "Emung jijo kyon jiang mmhonthukvü tsükona lithukcho; emung ji tsükona kyon liyingcho mek. 28 Jitsükona kyontsoe jijo emung ji pono lea OPVÜI.
Khechüi Tsüka
1 Jisu na elani synagogue ki wole jilo khechüi tsüka vancho. 2 Jisu n lan yaniv tsükona ha kyon ochoang sana oro vanracho, osi Jisu na emung tsüngono khechüi memiyiv sana to ontena cheta vantacho. 3 Jisu na kyon ji ezocho, "Hepi mhadungi chiroa." 4 Jisüi jo ombona kyon jiang engacho, "Ete shikhfü lona jo emungo ntio tssole to phyoala? Nzanchile to alo monthukle to la? Kyon eküm shanchoyile to alo chüthukle to la?" Ontena yipyaka tia n phyocho. 5 Jisu na onte zesi lüm tsukcho, khatola onte tsükona nungra ha nungracho, ntiotssole ontena sulyuo lona lüm khünga vamo jina. Jisüi jo ombona kyon ji ezocho, "Ni khe ji rüchia." Ombona rüchile emi sicho: 6 Tole Pharasee jiangna synagogue ki na khochi oyi zakto Herod thüngoe etssoe kyon ejoma onte thyutae Jisu chüthukvü kyaktacho.
Wozhü Tssae Kyon Kholuk
7 Jisu tona ombo sürüiden to Galilee wozhü tssae yitale kyon kholuk tsüpov na ombo phana wocho. Kyon jiango Galilee, Judea, 8 Jerusalem, Idumea, Jordan banka, osi Tyre tona Sidon yantsü to nkonjan meta jiang lona roracho. Kyon jiang topvüna Jisu elhi jiang yiwon zoe ombo yana rotacho. 9 Kyon jiang khoshao jina Jisu na ombo n tssetsüngo tssoa orhung ombo methakile to sürüi jiang ezocho. 10 Ombona kyon elü moto emiyithako jina kyon topvüna ombo lo tia evüngkav tsükona tssüa rotacho. 11 "Osi omon n mhom jüwo kyon jiangna ombo hungana ombo mhadungo vanthei heto erontacho, "Nino Potsow tsoe ji!" 12 Ombo ocho sana oyam ti ntsithukle to Jisu na omon n mhom jiang tüngochüa ezocho.
Jisu na sürüi otsük Taro eni Ethüngala
13 Jisu na phunglanro motsünga lo chungoe ombona ethev lio kyon jiang tsarhyucho. 14 Ontena rorale ombona hojiang yolo na otsük taro eni tsae wothungden to tsacho. Ombona ezocho, "A ndüngo nte tsswothukvü ana nte ethüngchethaka. Ana nte shiang shi haphoe püngnoa nte wothukvü, 15 osi ntena tsüngrham ephamo tüv etho hunguka." 16 Ombona taro eni ethüngcheo ji shiang: Simon (Jisu na Peter to ombo tsacho;) 17 Zebedee tsoeden James ha ojenio John oni: (Jisu na tharakon tsoeden to tsayicho;) 18 Andrew; Philip; Bartholomew; Matthew; Thomas; Alpheus tsoe James; Thadeus; meta nzan kyon Simon; 19 tona Jisu yemo Judas Iskariot to.
Jisu tona Belzebul to
20 Jisüi jo Jisu na oki yicho. Elani kyon kholuk kyungtia sanrhyuo jina Jisu tona ombo sürüi jiang to etsoyu yuta tia n-licho. 21 Ombo wopan jiangna hoji zoale ombo rashia wotacho, ntiotssole kyon jiangna ombo zhüvathaka to phyoyitacho. 22 Shikhfü püngnoe ejoma Jeru salemi na ro jiangna heto phyotacho, "ombo lo tsüngrham Belzebul etho lia. Tsüngrhampvü jina etho ombo pia tsüngrham ombo phanthukala." 23 Jisu na onte tsae ejuka yi na ezocho, "Kvütoli tsüngrham na tsüngrham phani sivla? 24 Meta motsünga ji ombobo chisoe okho okho na rota vani siwo hoji meta jijo khoso-rüsoe siv. 25 Wopan motsünga ji khosotae onte onte rota yio hoji wopan jijo khosorüsotae siv. 26 Ji esüa tsüngrham ekhüngyan jiha chiroe sicho sawo sunga vam mek tolea ochüm tssoe siv. 27 "Ochina ha kipvüi etho ejüi ji rhümae chüngdeni n vav oki ji pharhüpi n füche; ombona ovüng tssoa chüngdeni vasi efüala. 28 "Ana nte ezoala, kyon na mmen tssocho osi n mhom phyocho topvü siyikuka, 29 khatola ochona Nthomon tachia n mhom phyoana n lan n siyiche, ntiotssole ombona kümali mmen tssothaka. 30 Jisu na heto phyo jijo kyon ejoma na ombo lo omon n mhom jüa to phyotao ji tsükona.
Jisu oyo osi Ojenioden
31 Jisu oyo osi ojenio jiang roracho. Ontena haphoe vansi Jisu ji chirole to oyi yenthechicho. 32 Jisu hazhüa kyon kholuk vamo jiangna Jisu ezotacho, "Zeta, niyo tona ni jenio osi ni yulov jiang to haphoe vanra, ontena ni yantala." 33 Jisu na ezocho, "Ayo jo ochola? A jenioden jo ochoangla?" 34 Ombo hachüma khukta vamo jiang eyingosi ombona phyocho, "Zetava, ayo osi a jeniden jo shiang. 35 Ochona Potsow lüm erüng ji tssoa sana jijo a jenio, a yulov osi ayo ji."
Mojü Evenlo Ejukao ji
1 Jisu na elani Galilee wozhü tssae na püngnov benkacho. Tole kyon kyungkhünga na ombo hazhüo jina ombona orhungi rheyi khuk-thecho, osi kyon jiango topvü jütssae etssicho. 2 Ombona ejyuka yi na elüm püngnosi heto ezocho: 3 "Engatava! Kyon tsüka na mojü vena wocho. 4 Tole mojü ejoma jo olani elungthecho osi woro na khyoe tsoe sicho. 5 Mojü ejoma jo olung poni ochon matarov lo elungthecho. Ochon polao jina elaro bukchukchicho, 6 khatola eng wonale mmikae sicho osi oying n süngo jina chüi sicho. 7 Mojü ejoma jo okyo yolo elungthei okyo jiangna khüptsüngi tssüngthi n thicho. 8 Mojü ejoma jo lizü lo elungthei bukcho osi rankae ethi ebeni kvüina jo thümro, kvüna jo rukro tona nzoa to ren ethiracho. 9 Jisu na phyocho, "Ntena eno pona engae khitava."
Ejuka yi ji Ethelan
10 Jisu na omboti vanathüng ombo phanphi ejoma na taro eni ji nzo tssoe ejukayi ji yichak ji ombo engatacho."Tole ombona heto onte ezocho. 11 "Potsow ekhüngyan mphoyi ji nte thüngi jo nte ntsithukthaka, tolea a sürüi meko jiang thüngi jo topvü ejyuka yi taena ezoala, 12 ntiotssole, 'Ontena hunglea n chethe, osi zolea n gathe; Ntiotssole ontena chethei engathe ta na ontena khophiv, osi ombona nlan onte siyiv.' "
Jisu na Mojü Even ji Ejyuka yi ji Eroroala
13 Jisu na onte engacho, "Ntena ejyukayi shi n tsichoke? Tona kvütoli ejyukayi thanpo ha ntsivla? 14 Mojü even jina Potsow yi ji venala; 15 Kyon ejoma jo lantssae mojü elongtheo ji esüa tüv, ontena motsü ji zov, osi ontena zopvüto satan na oro oyi ji khi hansi yi siv. 16 Osi ejoma jo olungponi elongkao ji esüa tüv, onteno oyi ji zoe emathata elaro khicho ji; 17 onteno oying n süng küma esüngaro tae vanala, osi oyi ji ntana ezüp ndukana lüm nshii elani siala. 18 Okyo yolo mojü elungtheo jo oyi ji zoaha echungren shilo onte eküm tsükona nkhenrak, 19 ejüeli jüpon osi thanpo epiera sothei oyi ji etsüngchukchi sioji osi tssüngthi n thio ji. 20 Tokhatola lizü lo mojü elungtheo jijo oyi ji zoe, khichoe tssüngthi thümro, rukro mekana nzoa to ren ethioji.
Milon Venzhüi Vaoji
21 Jisu na phyocho, "Ochona sana milon hanayi luksa kupi mekana jenküpi vatalo? Milon ndungphen lo ekachi vav hanayicho mekchoke? 22 Ntiotssole topvü ji wondangi chiyithuko kha mphoe evao ntia n li, elhichiv tsükona yaka ntia lhüpi n vatala. 23 Ntena eno pona engatava!" 24 Ombona hetoha onte ezocho, "Ntena ntio zoana rarüngtava. Ntena etüki oyam piwo jilona etüki nte piv, tajo mpato thephae nte piv. 25 Ntiotssole ochona sana ntiona lina kyungkata piv, osi ochona n-licho sana jijo ombona tara lioji mpato khilaniv."
Rankata Eyio Mojü Jilo Ejyuka
26 Jisu na phyocho, "Potsow ekhüngyan jo shi esüa tvü. Kyon tsüka na ombo li mojü thei vacho. 27 Ombona yipsi phanthia to zümo eng jiang yia vanathüng mojü jiang buki rankacho, osi kvütolyui rankata sana ombona n-tsi 28 Liko jina ombobo odung jiang rankathuki tssüngthi ethithokala. Ovüng tssoa woniro chiroe, ji sülo eyen ji osi wokhao tssoa ethi. 29 Kvüthüng ethi ji mhena sana liri janthako jina kyon jina vekhfüro khi riala.
Hanyentsüng lo Ejyukao ji
30 Ombona phyocho, "Potsow ekhüngyan jo ntio lo ejyukae phyotavla? Etena ntio ejuka yi khi hoji erorotavla? 31 Hojijo hanyentsüng motsünga tvü; Likoe yingathüng jo limha lo otsung yolo teritso ji. 32 Tolea yingthaka na hojina buki rankae ero topvü poni tsüpotsov kümala, osi khero tsüpov elüm chenkae oyaki woro jiangna oro hoji khümchoe oshüp tssoala. 33 Hojito ejukayi shiang esüa elümoto theta ontena engathekuko towoena Jisu na onte püngnocho. 34 Ombona kvüthüng nsana na ejukayi taena nsancho khatola jiang topvü ombo süri jiang thüngi jo kijae na eroroe ezoracho.
Jisu na Jükyo Esantokala
35 Hoji nchuk mmyuale ombona onte ezocho, "Phukoe bankae chiyitavkalo." 36 Tole ontena kyon kholuk jiang silanchia Jisu na orhungi khuka vamo jilo rheyitacho, osi orhung thanpoe jiang onte nzo wotacho. 37 Jithüng tsungryu ntav chiyi jükhyo na orhungji jephia ojü evakthecho. 38 Jithüng jo ombo sülamoe enghokae yipa vancho. Osi ontena ombo nthechi ezotacho, "Püngnoe, e jüngthetala, ni n kyuake?" 39 Ombona phanthi mbung ji nteta osi ojü ji ezocho, "Jükrüpa! osi noyinga!" Jitopvü mbung ji esancho osi noyingtsüi sicho. 40 Ombona onte ezocho, "Nteno ntio jito nte kyutato? Enhüngaha nteno longtsü n lihanchoke?" 41 Tole elümoto onte ekhentsüngracho, osi ontena phyotacho, "Kyon shijo ochoto nüng? Mbung osi jükyo na mpato ombo yi engayiala!"
Jisu na Omon N mhom Evan Kyon Emiyiala
1 Jisu tona ombo sürüiden to jiangna Galilee jümang ji bankae Gerase district lo chiwocho. 2 Ombona orhungi na chiyi tona kyon tsüka omon n-mhom evan olüpi na chiyi ombo ndukcho. 3 Kyon ji müngsipheni evan tssocho. Kyon ochi naha wozhü na tia chungi ombo n vaehecho. 4 Ombo ji yuta elümoto lo nankvü theta wozhüna sheni vataha wozhü ji. tüpi jonankvü jiang raksoe siracho. Osi ochinaha ombo nsüyakhokcho. 5 Ombo olüpi osi phunglan jiang lo zümo eng erona olong na ombobo phothechia rümphia vancho. 6 Ombona ekonina Jisu hungchiale yunga owo ombo mhadungo epyak thei tüngkachicho, 7 "Nino ntiolui a khetsüala, Ntsontso Potsow tsoe Jisu? Ana Potsow myingo na ni thüngi jonjiala, a ti-khangshia." 8 Jisu na heto ombo ezocho, "Omon n mhon, kyon jilona chiyia." 9 Tosi Jisu na, "Ni mying jo ochola?" to engacho. Tole ombona janlancho, "Amying ji Legion, ntiotssole eyio ete khosha" 10 ombona hoji metaro ji yaki ombo ti wothukle to choncho. 11 Hojianglo phunglan yenjoe wokoden khosha yantsota vancho. 12 Osi omon jiang na wokoden jianglo onte rheyithokle to Jisu thüngi chontacho. 13 Jitsükona ombona rheyitale to yizüng picho, Osi omon jiang na kyon jiang lona chiyirae chiyi woko jianglo rheyicho osi woko othüng eni harüma den ji sürhenina yongjoe wozhüi rhekhancho. 14 Woko rhükiden jiangna tsanrorae oyi yanro yantsü topvü lo yithen jina pyingthokcho. Osi kyon jiangna ntio tssocho sana to zelo roracho. 15 Osi ontena Jisu thüngi role omon na rhümao kyon jiha hojilo mpensü hansi ntssüng-rünga khukthei vana hungcho, tole onte ekhentsüngracho. 16 Omon na rhümao kyon ji tona wokoden to jiang lo ntio tssocho sana omhyik na enhungo jiangna ntio tssocho sana ji kyon jiang ezocho. 17 Jitsükona ontena Jisu ji onte metae na yi sile to ezotacho. 18 Jisu na orhungi rheyile omon na rhümao kyon jina ha, "Ana ni phana a rothuka " to ezocho. 19 Khatola Jisu na ombo tanglanchia heto ombo ezocho, "Ni wopan jiang thüngi oki yia, osi OPVÜI na ni tsükona ntio kvüta ni tssoyithakcho sana jiang tona ombona kvüta ni nzancho sana ji to onte ezoa." 20 Jitsükona kyon jina oyi Jisu na ntio ombo tssoyicho sana ji Dekapolis meta topvü lo thenchoa wocho osi otsük akvüna emhuktacho. Jisu na tanglanchia heto ezocho, "Oki ni kyon jiang thüngi yia, osi OPVÜI na ntio ni tssoyithakcho sana osi ombona kvüto ni khonzan cho sana onte ezoa."
Jarius Otsolov Ji Tona Jisu süjümo Evüngkao Eloe ji to
21 Jisu na elani jümang ji pankae yicho. Tole kyon kholuk khosha na wozhü tssae na oro ombo hachümcho. 22 Hojiang yolo Jarius to tsa synagogue motsünga lo vansapvüi jina Jisu hungale ojolo epyakthe jonjia ezocho, 23 "A tsolov ji chünrüngvü sala. Ompvü ji emiyi eküm vanlamo tssoa nina oro ni khe ji ompvülo nyimkata." 24 Jisu na ompvü phana yia vanathüng emhokthav kyon na jephita ombo phana wocho. 25 Jithüng eloe tsüka ejen eshüa nzyu taro eni ezüpa vancho; 26 osi jina ompvü na tsükzei elüm thüngi na tanünga ompvü eli topvü ezithakaha epov mek na tsükshikata vancho tüv jiha rocho. 27 Ompvüna Jisu roji yivon zoe kyon kholuk jiang sülami na oro Jisu süjüm lo evüngkayicho. 28 Ompvüna phyocho, "Ana ombo mpensülotia evüngakvo a emiv." 29 Tole ejen eshüa vamo ji esancho osi ompvü ezüp ephungio ji ompvü tsükina ntsicho. 30 Tole Jisu na ombo etho chiyio ji ntsii khi engolani kholuk ji engacho, 'Ochona a mpensülo evüngkacho La?' 31 Ombo sürüi jiangna ezocho, "Kyon na hetata ni jephia vancholo ochona ni evüngkacho phyoato?" 32 Tole ombona ochona ombo evüngakcho sana to ji eyengocho. 33 Jisüi jo eloe jina ompvülo ntio tssocho sana ji ntsa ji ekhentsünga Jisu mhadungo khoktseni ezocho, 34 Tole Jisu na ompvü ezocho, "Otsolov, "ni longtsü lona ni emithaka. Noyinga yia osi ni ezüp ji ni mmhohithaka." 35 Jisu na hoto phyoa vanathüng Jarius kina ocho sana heto phyoa rocho, "Nitsolov ji chüthaka. Ntiolui püngnoe ji khetsüpvü ato?" 36 Ontena phyo ji Jisu na n khayiv ombo ezocho, "Nina ti-kyua osi longtsüa." 37 Ombona Peter, James ha John ojeni totae ombo nzo sonhyacho. 38 Ontena Synagogue vansae ji ki janale kyon na ethunglungta kyata nrungtao ji zocho. 39 Ombona rhowo onte ezocho, "Nteno ntiolui ekhenlungta kyata to, Ngaro ji n chühan, ompvüo yipthe vana!" 40 Tole onte topvüna ombo yikvücho; tolea ombona hapoe onte chiyirathuksi ombo nzo etssoe jiang tona ngaro ji opo ha oyo oni to sonhyasi ngaro ji yipheni rhowotacho. 41 Osi ombona ngaro ji khe ji rhümae si phyocho, "Talitha Koum." ji yichak jo, "Eloeroro, ana ni ezoaka phanthia." Tole eloeroro jina phanthi sanphicho. 42 Ompvüo nzyu taro eni tso tssocho. Jitopvü onte ngangtsüngrae sicho. 43 Tole Jisu na kyon ochina ha hoji oyam ti ntsithuk to tankata onte ezocho, osi eloeroro ji etsoyu pile to ezocho.
Nazareth lona Jisu N khichocho
1 Jisu na meta jilona khoe ombo sürüi jiang nzo ombo ebuk yani yitacho. 2 Ombona emung tsüngono synagogue ki püngnov benkacho. Ombo püngno ji engae kyon elümoto na ngantsüngra engatacho, "Shiango ombo kvülo khicho ato? Ombona kvütoli chethev elhi tssoato? 3 Ombo Mary tsoe, James, Joseph, Judas tona Simon to ojenio otssüng na tssiyanmori ji mekchoke? Osi oyuloe jiang ete ndüngo vamo shiang mekchoke?" Hojito phyota ontena ombo n khichocho. 4 Jisu na onte ezocho, "Zenkhying jo meta topvü lona khichosi ombo ebuk yani tona ombo wopan na to jo n khichoala" 5 Meta jilo ombona nochonori tara okhe nyimkae emiyiwo ji yaka chethev elhi ntia n-tssochecho. 6 Ontena longtsü n lio ji zesi elümoto ombo emhukcho.
Jisu na Sürüi Taro Eni Jiang Wothukala
Jisu na yanren jianglo kyon jiang püngnoa sokata wocho. 7Ombona taro eni jiang tsae otsük enini na wothukcho. Ombona omon n mhom jiang pono etho onte picho osi ezocho, 8 Ntena yentsatathüng jarung süo ji yaka ntia ti hantava: hümri lea, chonthepen sükhu lea, orang tssolea ti hantava. 9 Jokhüp hantava tolea phukthesü tajo ti hantava." Hetoha onte ezolancho, 10 Ntena yantsü motsünga lo rhowoana ochoangna nte elonchoana meta jilona eseni n yithüng nandang jiang ki nchentava." 11 Tolea meta kvülo kyon na nte n khichov osi püngno nte n ngayiana, nte jo lo khor jiang ekhochochia meta jilo na yitava. Hoji jo onte tsükona ekyu chekav tssov!" 12 Jitsükona ontena khochouki owo kyon na mmeni na kholam lia to püngnotacho. 13 Ontena omon n-mhom elüm phani siracho osi nochonori elüm thyujü eseyia emiyiracho.
John Baptio Chüo ji
14 Jisu ji meta topvü lona thüngcheo jina Herod mesao na ha zocho. Kyon ejoma na jo John baptio kümchelani ombo etho ji Jisu lo jüi hoto elhi tssoala toha phyotacho. 15 Ejoma na jo ombo ji Elijah to phyotacho. Elani ejoma na jo ombo ha nkolo zenkhying jiang esüa tsüka to phyotacho. 16 Tole Herod na jo ombona lüngthao John ji phanthilancho to phyocho. 17 Herod na ombo onyuro Philip engh Herodia tsükona John ji owo rhümathuki chungi evüngki thechicho, ntiotssole ombona Herodias khio jina John na heto ezocho, 18 "Ni jenio eloe nina soa evam elan n li." 19 Herodias na John n zehungu lüngtha-hunga khatola n tssochecho, 20 ntiotssole Herod na John jo ntsanrük osi ntho kyon to chekae kyua nkohacho. Ombona John püngno ji nsansam zocho osi ombo emhuka khetsülea emathata engacho. 21 Herod na ombo ebuk tokhu lo Galilee lo ombo küpo tsüpoe kyon ethelan eli osi rasan tsüpoe jiang tsoyuthuk tsüngon jilo Herodias na yuta mmhom hungcho. 22 Herodias oni otsolov jina sharia rheyi ombo osi tokhu lo eroe jiang topvü emathathukcho. Tole mesao jina otsolov ji ezocho, "Ntio ni jüpona na ni pivka a ezoa." 23 Ombona echümchaka ezocho, "A ekhüngyan chiso nandang jo ni pivka ntio ni khihunga na a ezoa." 24 Ompvüna chiwo oyo thüngi, "Ana ntio chomla?" to engacho, tole oyona "John baptio kuri ji" to ezocho. 25 Ompvü na zaktole mesao ji thüngi rheyi ezocho, "Nina enunga John baptio kuri ji ophi lo thei helo oyi a pio to chonala." 26 Tole mesao ji elüm nungracho, tolea ombona echümchako jina osi tokhu lo eroe jilo vamo jiang tsükona n-piv n sichecho. 27 Jisüi jo mesao jina enhyang yolo rasan tsüka thüngi John kuri ji hansi yile to yizüng picho. 28 Ombona vüngpheni owo John kuri ji woni ophilo thei hanayi eloeroro ji picho, tole eloeroro jina oyo picho. 29 Kvüthüng mbo sürüi jiangna shi zocho sana ontena owo omüng ji khi olüpi thei sicho.
Jisu na Othüng Mongo Tsothukala
30 Jisu na wothuko jiangna kholani oyi ontena ntio tssoa püngnocho sana topvü ombo ezoracho. 31 Kyon khosha na chiwo rheyi shenphitao jina Jisu tona ombo sürüi jiang to na otssi tsov tia yuta n licho. Jitsükona Jisu na onte ezocho, "Meta noyingo tvü lona tara chiyi esantava." 32 Tole ontena orhungina noying metae wotacho. 33 Ontena yita kyon elüm na onte hungi onte chethecho. Osi ojoe na nken akvü lona sani owo onte vüngina vanracho. 34 Ombona chiwo janale kholuk tsüpov hungcho osi onte tsükona ombo nungracho, ntiotssole onteno rhüki n vamo olyuden esücho; osi ombona elüm sokabenkata onte püngnocho. 35 Onte ji mmyutanale sürüi jiangna Jisu ezotacho, "Shijo yingsü yinglo meta osi emmyutanala, 36 Jitsükona kyon shiang yithuka oli osi oyan nkonjano ontepopo etsoyu yanthoka." ombona ezocho, 37 "Ntena ntiona onte pia tsothuka." Tole ontena janlancho, "Ena owo hümri rangpyak nzo eni man shi hanayi kyon shiang tsothukuke?" 38 Ombona engacho, "Ntena hümri kvüta hana, owo ze." Ontena yani zesi ezocho, "Hümri mungo, ongo eni to." 39 Tole kyon jiang kholuk tssoa ero poni khukthethuk to ombona sürüi jiang ezocho. 40 Osi ontena nzoa tona tinyan to ren khuktheracho. 41 Ombona hümri mongo tona ongo eni toji khi bensi oyaki zekachia mmha randancho; osi ombona hümri jiang mpvüroe sürüi jiang pia kyon jiang mhadungo vayirathukcho. Ongo eni jiha ombona ontechitayicho. 42 Onte topvüna mmhia tsotasi, 43 tsonhyocho luksa taro eni tona ongo tara to khyochocho. 44 Hojilo hümri etsoe jiang ji bokhying wothüng mungo tssocho.
Jisu na Jüponi sanphiala
45 Jisu na zakto kyon kholuk jiang pyoni yithuksi ombo sürüi jiang ji orhungina jütssa phukoe Bethsaeda lo chiyithukcho. 46 Ombona sürüi jiang pyontayi ezosi randanwo phunglani chungocho. 47 Mmyuale orhung ji jümang lungi tssocho osi ombo omboti ojoe na yia vancho. 48 Ontena ezhü ryua ezüpa ehata vamo ji ombona hungcho. Jitsükona enyathüng ethüm tona tiruk to ekho yutalo ojü poni na onte thüngi rhowo onte yakchia yivsa vancho. 49 Tole ombona jüponi na tsao ji, 50 ontena hungale ompn tsayia ekhentsünga tüngkachitacho. Ntiotssole ontena ombo hungajo ekhentsüngracho. Jisu na onte ezocho, "Lüm tssontava, a ka, ti kyutava." 51 Ombona onte thüngi orhungi rheyile mpung ji esancho. Tole onte emhuka ngangcheracho, 52 ntiotssole hümri khi kyon wothüng mongo tsotoko ji chekav ji ontena n ngathehancho; osi onte lümbüm na n chekahancho.
Genasereth lona Era Poyicho
53 Ontena jümang ji bankae Genaseret jani orhung ji shentacho. 54 Ontena orhungi na chiyiale kyon na Jisu chekacho. 55 Jitsükona ontena yanren topvü pungphita belüngi nochonoria vamo jiang sosi ombona kvülo woana jilo wotacho. 56 Jisu na yanro yantsüi, osi oli, külo woana kyon jiangna nochonori jiang sorasi sishopheni oro ombo süjümo tia evüngkathukle to jonjitacho; osi ombolo evüngkae topvü emiyiracho.
Pyimtsü motsüi Jiang Shikhfü
1 Pharasee jiang tona yizüng ji püngnoe ejoma to na Jerusalem lona oro Jisu nduktacho. 2 Jisu sürüi ejoma na etsoyu tsoathüng okhe jiang shikhfü ephanina n tsükvü tsota ontena hungcho. Jijo Pharasee jiang shikhfü ephan mekcho. 3 Pharasee osi Jihudi topvüna onte pyimtsü motsüi na püngno shikhfü jiang benphicho: 4 Ontena shikhfü phana okhe ntsüksanati tsocho osi yanlungina ntiona hansi yilea etsükria epyoe tsocho. Hoji esüa ontena rülonta yio shikhfü jiang elümoto tsütsacho, opfü, ophi, opvü osi belüng kvütoli süv sana tssolan liracho. 5 Jitsükona Pharasee yizüng püngnoe jiangna Jisu engacho, "Ntiolui ni sürüi shiango pyimtsümotsüi jiangna e püngno shikhfü jiang n pham okhe n tsükvü tsotala?" 6 Jisu na ezocho, Tsaiah na nte tsükona elanthata phyoe lia, Ombona eramo ji esüa nteno kyak rümden: "Potsow na phyoala, kyon mo shiangna onte yi taena a kyuchiala, tolea onte lümbüm jo otsotso a thüngina ekoni lia. 7Onte tsükona jo a ekhümvü nli, ntiotssole ontena kyon shikhfü jiang Potsow shikhfü esüa püngnoala!" 8 Jisu na phyocho, "Ntena Potsow yizüng jo valanchisi kyon püngnoyi engatala." 9 Ombona elani phyocho, "Nteno Potsow yizüng ji valanchi si nte rülonta püngnyi ji pvüthuku lo tssothia! 10 Moses na heto püngnocho, 'Nipo osi niyo mon kyuchia, osi ochona oyo ha opo oni epüp rüyia rhiyiana chüthuka.' 11 'Tole ntena jo ochona sana opo osi oyo nzanchiwo mmha lilea hoji 'Korban' to tsala (Ji yichak jo: 12 Shijo Potsow echi to) opo ha oyo onio n kyuchilea sicheta to püngnoala. 13 Hojito ntena nte rülonta püngno jiang khi Potsow yiji ephozhüi siala; osi ntena shi esüa elümoto tssoala.
Ntiona Kyon Mmenala
14 Elani Jisu na kholuk ji tsae ezocho, "Nte topvü na ana phyo shi engae ntsi khitava. 15 Oponi na kyon tsüki rheyicho na kyon mmemo ntia n li. Tolea kyon ji chungina chiyio jiang na ombo mmenala. 16 Hoji tsükona ntena eno mpana engae khitava. 17 Ombona kholuk jilo na oyi oki rheyile ombo sürüi jiang na ejyukayi yichak ji ombo engatacho. Jisu na onte ezocho, 18 'Tona nteha thanpoe jianglo mmhonkata n ngathechoke? Nteno n tsichoke, oponi na ntio kyon lo rheyia sana jiang na jo ombo mmena mek, 19 ntiotssole hojina lümbümi n rheyi, tolea mmani rheyisi otsüki na chiyi siala." (Ombona hojito phyoa etsoyu lan topvü tsokhoka to ntssüngthukcho.) 20 Ombona phyocho, "Kyon tsükchungi na ntio chiyia na jina kyon mmenala. 21 Ntiotssole ochungi kyon ji lümbümi na nchümri n mhom, 22 lonsülonphyo, efü, münghan, rama; tajo elüm, n thanri, ejithechi, wozhü n khi, mhiktssoraki, echirüta, kangtsü tona zhüva, 23 to shiang topvü chiyiala osi jina ombo mmenala.
Eloe Tsüka Longtsü
24 Jisülo jo Jisu na jilona khoe Tyre yantsü ndüngo meta ji yi sicho. Ombona oki motsa lo rhowocho osi ochia n tsithukhungcho, toaha n phochecho. 25 Jitopvü eloeroro omon n mhon evan oyo tsüka na oro ombo jolo epyakthecho. 26 Eloe jijo Greek syro-phonecia pvüji, osi otsolov lo omon n mhom vamo ji phani siyio to ompvüna Jisu thüngi choncho. 27 Jisu na ompvü ezocho, "Ngaro jiang süphidem ka, ntiossole ngaro jiang etsoyu ji khi füro jiang shümchiyiv jo n lan." Eloe jina phyocho, 28 'Tsüphoe yo, füro jiangna samo na ngaro jiangna mezü kupi longjo longtüko jiang khyoe tsoala!" Jisu na ompvü ezocho, 29 "Nina jito janlamo ji tsükona oki yia; nitsolov lo omon n mhom vamo ji tsanthaka!" 30 Ompvüna oki yile ngaro ji belüngo erikachi vancho osi omon n mhom ji ompvü lona tsanthakcho.
Jisu na Ebüng Eyim Tsüka Emiyicho
31 Jisülo Jisu na Tyre meta jilo na khoe Sidon lamoe na Dekapolis meta yakchia Galilee jümangoe yicho. 32 Tole nobüng tsüka oyi tara tae nsanchukchia tvü sotasi oro okhe nyimkayio to Jisu ezotacho. 33 Tole Jisu na kyon ji nsicheta sosi owo enokvüi yingro rüthechiyisi okhelo njü mponi nli jilo evüngkayicho, 34 osi Jisu na oyaki zekachia emhena kyon ji ezocho, "Ephphatha" ji yichak jo 'pochithuka' to. 35 Jitopvü kyon ji eno pochicho osi nli khophichei nsana yicho. 36 Jisu na jo ochia tizota to onte tangcho khatola kvüta tangana tata kyungkata ntsita yicho. 37 Onte topvü ngangcherae phyotacho, "Ombona topvü mmho na tssocheta, eno ebüng zothuka, eyim nsanthukala."
Jisu na Othüng Mezhü Tsothukala
1 N sungkhüngu kholuk tsüpov oro etssilancho. Ontena ntia etsoyu n hamvü sithakcho jitsükona Jisu na ombo sürüi jiang tsae ezocho, 2 "Kyon shiang tsükona a etho jaka, ntiotssole ontena tsüngon ethümoto a ndüngo tssopvü osi etsoyu n lithak. 3 Onte ejoma jo ekoni na roracho küma etsoyu n-tssov yithukcho jo olani na khangtsüngi chüv." 4 "Ombo sürüi jiang na ombo engatacho, "Lijüng hetvü lo kyon hetata tsochua etsoyu kvülo na hungla?" Jisu na ezocho, 5 Ntena hümri kvüta hana?" Ontena janlancho, "Mpüm tiying hana." 6 Tole ombona kholuk ji khukthera to ezocho, osi ombona hümri tiying ji khi Potsow mying thüngsi npvüroe kyon jiang jantayile to ombo sürüi jiang picho osi jiangna chitacho. 7 Ontena ongo teriv ha tara hancho. Hojiang ha Jisu na Potsow thüngsi chitayile to ezoa picho. 8 Otsük akvü na etsson tsocho osi hojilo kyon tssotsüi wothüng mezhü aria tssocho. 9 Tsonhyo jiang sürüi jiangna luksa tiying khyochocho. 10 Jisüi jo Jisu na kholuk ji pyoni yithuksi ombo sürüi jiang nzo Dalmanutha district lo yi sicho.
Pharasee Jiangna Chethev Elhi Chontacho
11 Pharasee ejoma na ombo thüngi oro ekhirantacho. Osi ontena ombo ji Potsow lona to longtsüo tssoa chethev tssoe ejüle to chontacho. 12 Tole Jisu na emhenthechisi phyocho, "Nchüng echungrenlo evan kyon shiangna ntiolui chethev elhi yantato? To n tssoche! Kyontsük shiang chethev n pi!" 13 Ombona onte silanchia orhungi rheyi jümangji bankae jüran phukoe chiyicho.
Pharasee Jiang tona Herod to Ebung Mozhü ji
14 Jisu sürüi jiangna hümri tajoe ehamvü mhechocho, jitsükona orhungi onte yolo hümri motsünga tae hancho. 15 Jisu na onte ezocho, "Hei, ntena Pharasee jiang tona Herod to ebung mozhü jiang ntangshontava." 16 Tole ontena phyotacho, "Etena humri n han küma jina ombona heto e zoala." 17 Ontena phyotao ji Jisu na ntsii heto onte ezocho, "Nteno ntiolui hümri n hamo ji phyotala? Ntena enünga jana n ngathehan ke? Nte lümbüm jiango tata yimchoke? 18 Ntena omhyik khyinga, ntena n hungalo? Ntena eno khyinga, ntena n zoalo? 19 Ana kyon wothüng mungo tsükona hümri mungo ji mpvüro ji ntena n chümchechoke? Ntena hojilo tsonhyocho luksa kvüta tsakachola?" Ontena "taro eni" to janlancho. Tole ombona engalancho, 20 "Elani, ana wothüng mezhü tsükona hümri tiying mpvüro ji tsentsi? Hojilo tsonhyocho luksa kvüta ntena tsakacholo?" Ontena "tiyingo to janlancho. 21 Tole ombo na "Toaha ntena n ngathehanchoke?" to engacho.
Jisu na Bethsaeda lo Mhyikjüng Emiyiala
22 Ontena Bethseda lo chiyile mhikjung tsüka sotasi ombo thüngi oro ombo khi evüngkathukvü jonjitacho. 23 Jisu na mhikjung ji erüsi yantssae chiyicho. Jisu na kyon ji mhyiko njü epfükayisi okhena ombo nyimkae engacho, "Nina ntia hehungala?" 24 Kyon jina zekachia ezocho, "Oh, ana kyon shiang hunga, khatola odung to onte zechetala." 25 Jisu na ombo khe jiang kyon ji mhyiko nyimkailancho. Jithüng kyon jina ekhyo tssoe kükale omhyik jiang pochi olan taro ntssünga hungcho. 26 Jisüi jo Jisu na "Oyani elani ti chiyia." To ezoa oki ombo yithukcho.
Peter na Jisu ji Opon Chuka Phyoyioji
27 Jisüi jo Jisu na ombo sürui jiang nzo Caesare Philipi yanren ji yitacho. Jithüng Jisu na olani na onte engacho, "Kyon na jo aiyo ocho to a phyoyiala?" 28 Ontena ezocho, "Ejoma na jo nino John baptio ji to, ejoma na jo Elijah, to, elani thanpoe najo niha zenkhying jiang yolo tsüka to phyoala." Ombona onte engacho, 29 "Tole ntena jo aiyo ocho to phyotala?" Peter na ezocho, "Nino OPVÜI na sekao shanchopvüi ji." 30 Tole Jisu na onte ezocho, "Ochia a ti zoyitakhe."
Jisu na Ombo Ezüp Osi Echüv Tsükona Phyoala
31 Jisüi jo Jisu na ombo sürui jiang shika püngnov benkacho: "Kyontsoe jina ezüp nungra tüngto khichev, osi eramoe, pvüti tsüpo eden tona yizüng püngnoeden to jiangna khaki siv. Omboji chüthukvü osi tsüngon ethüm sülo kümchelam." 32 Ombona yilan shi chakcheta püngnocho. Tole Peter na oinbo tsachuki makvü benkacho. 33 Tole Jisu na mmyilani ombo sürüi jiang zechia Peter makcho, "A thüngina tsana, satan, ni nchümri jiango kyon nchümri, Potsow na mek!" 34 Jisüi jo Jisu na kholuk jiang tona ombo sürüi jiang to ombo thüngi tsacho. Ombona ezocho, "Kyon ochona sana a sü rüa rohungna ombobo mhechoe sithuka, osi ombo donphen ji hansi a phana rothuka. 35 Ntiotossole ochona ombo eküm shanchohunga na, hoji moni siv; khatola ochona a tsükona osi yithenmhom ji tsükona ombo eküm monana hojina eküm vamka. 36 Kyon tsüka na limhatsü shi khi vasi ombo eküm ji moni siwo oman licho olo? Jito n tsso! 37 Kyon na ombo eküm ji tongchephen ntia n li. 38 Jisükona Potsow n theo n tha echungren shilo kyon ochona a osi yithenmhom ji tsükona yikra sana, kyon tsoe jina ha opona phfütsson lona ntho lanben nzo roathüng kyon ji tsükona yikrayiv."
1 Jisu na onte ezocho, "Ana nte ezoala, helo vamo shianglo ochoangna jo Potsow ekhüngyan ji etho lona roa ontena n hungthüngjo chüv meka."
Phfütsson Tungphio ji
2 Tsüngon tiruk sülo Jisu na Peter, James tona John to sonhyasi phunglan ntssoni onte tae chungotacho. Ontena zeta vana ombo lo dungphi yicho, 3 osi ombo sü jiang ehümtsütsüna, kyon ochina ha tata ehüma n tssücheo kümi sicho. 4 Jithüng Moses ha Elijah oni Jisu thüngi thyuta sürüi otsük ethüm jina hungcho. 5 Tole Peter na Jisu engacho, "Püngnoe, etena helo rotao ji kvüta mmhonchoato! Etena ranki ethüm, Moses echi motsünga, Elijah nini echi motsünga ren to nte tssoyitavka." 6 Peter osi oshom jiang topvü emhuk lona ntio tia n phyov ngancherae sicho. 7 Osi eluk chiyi onte khümi eluk ji lungina owon heto zocho, "Shijo a nzamo tsoe jika – ombo yi engatava! 8 Ontena tssüsoa eyingota ha ochia n hungu Jisu tae hungcho. 9 Ontena ntio hungcho sana kyontsoe jina echü lona n phanthilan thüng jo ochia ti zotale to phunglan jilona elani joyitathüng ombo na onte ezocho. 10 Ontena oyi enga ochia n zoaha onte yolo emhukta heto phyotacho, "Echü lona phanthiv ji yichak jo ntioto?" 11 Osi ontena Jisu engatacho, "Ntiolyui yizüng püngnoe jiangna Elijah rodem to phyoato?" 12 Ombona ezocho, "Lanka topvüto methaki evam tsükona Elijah na rotenala. Tolea ntiolyui motsü lona kyontsoe ji ezüp nungrav osi khaki siv to phyoala? 13 Ana nte ezoaka, Elijah ji rothaka, osi motsü lona phyoji esüa kyon na ombo pono onte tssohung tssothaka."
Eboeroro Omon n-mhom Evan Jisu na Emiyiala
14 Ontena kvüthüng sürüi than poe jiang thüngi chiyicho sana jilo kyon kholuk tsüphov etssi vancho. Yizüng püngnoe ejoma na sürüi jiang thüngi ekhiranta vancho. 15 Kyon jiangna Jisu hungpvüto emhuktsünga yunga owo ombo salümtacho. 16 Jisu na ombo sürüi jiang engacho, "Ntena onte thüngi ntio yilan ekhitato?" 17 Kholuk jilo tsüka na janlancho, "Püngnoe, ena a tsoe shi ni thüngi sosi rocho, ntiotssole ombo lo omon n-mhom vani oyi n-sanchetala. 18 Kvüthüng omon ji chiroa sana likoe evümthei opüngina njü tsyua, oho njaka phisae siala. Phani siyi to ni sürüi jiang ezole ontena n-tocho." 19 Ombona onte ezocho, "Kvütoli ntena heto n-longtsüato, ana nte ndüngo kvütenhya vamla osi ana kvüta nte rümia vamla? A thüngi sosi roa! 20 Ontena ombo sosi Jisu thüngi rocho. Omon n-mhom jina Jisu ji hungpvü ethunglungthoka njü tsyua evümthecho. 21 Hojito n benri si kvüta sungthaka to Jisu na opo engacho. "Tole nongothüng na hoto tssocho to opona janlancho. 22 Osi ojü omi. vanthei chüthokvü omon jina khangshiala to ezocho. Osi tssochewo ombo nzanchiwo mmhona to Jisu ezocho! 23 Jisu na ezocho, "Tssochewo to nüng? Longtsüi tsükona topvü tssocheta." 24 Tole opona tüngkachicho, "Ana longtsüala, a longtsü shi matarohan. Longtsü tsüphokata elio tssoa a nzanchia!" 25 Kyon kholuk jiangna onte hazhüala to Jisu na ntsicho, ji tsükona Jisu na tüngkachia omon n mhom ji ezocho, "O eno büngthoko osi yimthoko mon, ana ni ezoala, ombo lona tsanchuka osi tikhetsülana." 26 Tole omon jina erokachisi eboeroro ji ethunglungthoka nkan lunga tsanehukcho. Ombo ji echü esüa zecheo jina, "Ombo chüthaka! to topvüna phyotacho. 27 Tole Jisu na okhe lona sükale ombona phanthicho. 28 Jisüijo Jisu na oki yile sürüi jiangna kijaroe na ombo engacho, "Ena jo kvütoli omon ji n-phankucho ato?" 29 Jisu na ezocho, montsük shiangjo randan taena phanchev, thanpo na mek."
Jisu na Ombo Echü Ji Phyolanala
30 Ontena metaji sisi Galilee yakchia yitacho. Jisu ria ombo vanphen ji kyon ntsithokvü n chokacho, ntiotssole ombona sürüi jiang heto püngnoa vancho, "Kyontsoe ji rhümae kyon khelo theyiv, 31 osi ontena ombo lüngthav, tolea lüngthasi tsüngon ethüm sülo ombona phanthiv." 32 Hoto ezowo ji ontena engathev khüngcho osi ombo engae zeyha kyutacho.
Ocho Tsüphola
33 Ontena Kapernaum lo chiyicho, osi kichungi rheyi Jisu na sürüi, jiang engacho, "Nteno olani jo ntio ekhitacho ato?" 34 Toa ha ontena ethük tia n tssitacho, ntiotssole ontena ocho tsüpo tssov sana to ekhitacho. 35 Jisu na khukthei sürüi taro eni jiang tsarhyui ezocho, "Ochona ovüngtso ji kümhungana topvülo sülani vani oyam phajae tssov shikhfü." 36 Ombona ngaro tsüka. tsae onte mhadungo mangi vanthuk si ombo khe jiangna ngaro ji wonyasi onte ezocho, 37 "Ochona a myingona ngaro shianglo tsüka tia khichoa na a khichoala; osi ochona a khichoana a tae mekna a rothuko jiha khichoala."
Ochoangna E n panlana Sana Jijo Ete Thüngoe
38 John na ombo ezocho, "Püngnoe, kyon tsüka na ni myingona omon n mhom phani sia hungcho, tolea omboji ete razhü meko jina ena tangcho." 39 Jisu na onte ezocho, "Ombo ti tanga, ntiotssole a myingo na chethev elhi tssochewo kyontsük jina zakto jo a epüp rüv mek. 40 E n panlamo kyon jijo ete thüngoe tssoala. Shi engathei khitava, 41 ntena Khrista echi tssoji ntana ochona ojü nkyana tia nte yuthuka na otsotso ombo yantso livka."
Mmem Tsükona Ejiphi
42 "Ochona sanatia teritso shianglo a longtsüo ji monithuka tssona kyon mo jijo ombobo hümchenphenlong fuki eyiksi jümangi tsukthei siwo ji mmhomo. 43 Hoji tsükona ni khena ni nshüthoka tssona, ekhachoe sia! Okhe woniata mpata n mheo mi rheyi ji thüngi na jo okhe n khyingna eküm lani rheyio ji ni emamo, n mheo mi jilo jo kümali runga vanala. 44 Hojilo ora jiango kvüthüngha n chü, osi omi jiha n mhetala. 45 Ni jo jina ni nshüthoka tssona ekhae sia! Ojo eni khyinga n mheo mi rheyithüngo najo ojo m penri na eküm lamoe yio ji mmhomo. 46 Ora na onte etso ji ochüm n tsso osi omina runga evamo jiha n mhetala. 47 Ni mhyik na ni longtsü ni monia tssona, eyikchuki sia! Ntiotssole omhyik eni mpata n mheo mi rheyio ji thüngi najo omhyik motsünga hansi Potsow ekhüngyani rheyio ji mmhomo. 48 N mheo mi jilo jo kümali ora na yuroa kümali omi ji n mhev runga vanala. 49 Erungthan jiang oma na nzüo ji esüa omina evangi rungchev, 50 "Oma jo mmhona; tolea oma jilo enüng ji moni sithaka na kvütoli nünglanthokvü la? Nte yolo oma enüng jüthoka osi otsük akvü thüngi mmhonta noying lithuka."
Sichita Yilan lo Jisu Püngno
1 Jisüi jo Jisu na hojilo na khoe Judea meta lona Jordan pankae yicho. Tole kyon kholuk na oro ombo hazhülani ombona thanpothüng esüa onte püngnocho. 2 Jithüng Pharasee ejoma na ombo thüngi oro ombo kyak füphia engacho, "Ete shikhfü lo eloe sichiv nlan licho alo?" to engacho. 3 Jisu na ezocho, "Moses na kvüto yizüng nte pichola?" 4 Ontena ezocho, "Moses na jo cheka kako eranchaksi sichile to phyocho." 5 Tole Jisu na onte ezocho, "Nte lümbüm khüngo jina Moses na hoto nte ezocho. 6 Tolea lyuying benkadeni na Potsow na eboe tona eloe to tssoe kyon lyuyingcho. 7 Jitsükona eboe tsüka na opo ha oyo oni sisi ombo eloe thüngi motsünga tssoe vamka, 8 osi oni ji motsünga kümvüka. Onteno enhungo eni mek tolea motsünga tae. 9 Jitsükona Potsow na mmyantayio ji kyon na n pyontayiche." 10 Ontena oki rheyitale sürüi jiangna yilan tsük ji Jisu engatacho. 11 Jisu na onte ezocho, "Kyon ochona ombo engh sichisi thanpoe soa vana sana ombo engh ji sisi efürama tssola; 12 ji esüa orapvüi sichisi thanpoe yanpilea eloe jiha efürama tssoala."
Jisu na Ngaro Jiang Mmhayithukala
13 Kyon ejoma na ngaroden sosi Jisu khi evüngkathukvü tsükona rotale sürüi jiangna kyon jiang makcho. 14 Jisu na hoji hungi lüm n tssov ombo sürüi jiang ezocho, "Ngaro jiang a thüngi rothuka, onte ti tanglanchia, Potsow ekhüngyan jo shiang esüa jiang echika. 15 Heto engathei khitava, "Ochona Potsow ekhüngyan ji ngaro esüa n khichoana ombona jilo n rheyiche. 16 Tosi ombona ngaro jiang ejümkae otsük akvü evüngkata mmhayitokcho.
Eli kyon ji
17 Jisu na khoe yia vanle kyon tsüka na yunga oro nkhuktseni ezocho, "Püngnoe mmhom, ana kümali eküm hungu tsükona ntio tssov lia?" 18 Jisu na ombo ezocho, "Ntiolyui mmhom to a tsala, Potsow yaka ochia mmhom n van. 19 Nina yizüng jiang ntsia: Omüng ti-hana, efürama ti-tssoa, tifüa, ejüng tiphyoa; Tole kyon jina ezocho, 20 "Püngnoe, shiang hetopvü ana a nungothüng na benphikhanthaka." 21 Tole Jisu na omhalo ombo zekachiyisi nzana nchümcho. Jisu na ombo ezocho, "Motsünga na ni n penrihan, oyi ni ejüeli jiang yeni orang ji yantsae jiang pia tona potsüwoe ni eli livka, tosanati a phana roa." 22 Hoji zoe kyon jina etho jaka omha ji nzhüi nungra yicho, ntiotssole ombo elümoto ejüeli tssocho. 23 Jisu na ombo sürüi jiang mhalo zekachiyisi onte ezocho, "Ejüeli na Potsow ekhüngyani rheyiv jo kvüta ngontsüngcho ato!" 24 Hoji zoe ombo sürüi jiangna ngang tsüngracho, tolea Jisu na onte ezocho! 25 "Nunghoriden, Potsow ekhüngyani rheyiv jo kvüta khüngcho ato? Ejüeli na Potsow ekhüngyani rheyiv jo Odh na opyim kvüi na pyechuki chiyiv ji elarowo." 26 Onte topvüna ngangtsüngrae phyotacho, "Tona jo ocho shanchovto?" 27 Jisu na onte zechisi ezocho, "Kyon na jo hoji n tssoche, tolea Potsow na n tssochecho mek, ntiotssole Potsow na jo n tssochewo ntia n li." 28 Peter na phyocho, "Eiyo kvütola? Ena topvü silanchia ni phanphiala." 29 Jisu na janlancho, "Ana otsotso nte ezoaka, ochona a tsükona osi yithenmhom ji tsükona oson oki, jeniden osi oyuloeden, oyo, opo, otsoe oro mekana liko ramüng shiang silanchiana jitata nzo bena, 30 nchüng limha shilo hunglam, oson oki, jeniden, oyoden, ngaroden, liko ramüng, jilo khangshi ntssonshi ha jüv, tosi limha etsao ji ha kümali eküm hunguv. 31 Tolea enhünga wo vüngi yithakcho elümoto sülani kümvü, osi enünga sülani vamo jiang ovüng eli kumvü.'
Jisu na Ombo Echüv Yenjo Ethümoto Phyoala
32 Ontena Jerusalemi chüngita vancho. Jisu na sürüi jiang vüngina yia vancho osi onte emhuktsüngcho. Onte sülo phana wo jiangha kyutsüngracho. Jisu na elani sürüi jiang tsae. ombo lo ntio tssov vancho sana ji yilan ezocho. 33 Ombona ezocho, "Engatava," "Eteno Jerusalemi chüngitala, osi hojina kyontsoe ji rhümae pvüti tsüpoe jiang tona yizüng püngnoe jiang to khelo theyiv. 34 Ontena ombo emayia, njü nchukata, erhüpa ombo lüngthav. Tosi tsüngon ethüm sülo ombona kümchelam."
James ha John Oni Jonji yi
35 Jisü lo Zebedee tsoeden James ha John oni Jisu thüngi rocho. Ontena ezocho, "Püngnoe, ni khi ntiosana e tssoyithuk hungala." 36 Ombona onte ezocho, "Ana ntio nte tssoyiwo to ntena nchümala?" Ontena ombo ezocho, 37 "Ni phfütsson lo eni tsüka ni khe amimoe, tsüka ni khe ayiwoe to ekhukthethoka." 38 Jisu na onte ezocho, "Ntena ntio chona sana tia ntepopo n tsi, ana yuo pvü jilona ntena ye-yukukvüla, mekana ana baptio jilona ntena baptikhukvü alo?" 39 Ontena ezocho, "Ena tssokuka." Jisu na oni ezocho, "Ntena otsotso ana yuo jilona yukhukvü osi ana baptio jilo na baptikhukvü, 40 tolea a khe amimoe mekana ayie khukthev jo ana n pikhuk. Hojijo Potsow na ochoang tsükona methaki vancho sana jiang tsükona. 41 Sürüi thanpoe otsük taro jina hoji zoale ontena James ha John oni thüngi lüm n tssotacho. 42 Jisu na onte tsae ezocho, "Ntena ntsia, ochoangna ontebobo limha lo esapvüiden to nchüma sana ontena hojilo OPVÜI tssoa sala, osi onte tsüphoe jiangna etho tsütsatala. 43 Tolea nte yolo jo jito tssov mek, 44 nte yolo ochona ovüngo ji tssohungana, ombo thanpoe jiang nri tssoa. 45 Ntiotssole kyontsoe jina tia oyam khi ombo benkathukvü tsükona rocho mek, tolea ombona oyam benkav rocho, osi ombo eküm ji pia khosha rhanchov tsükona rocho."
Barthimaeus Mhyikjüng ji Jisu na Emiyiala
46 Ontena Jeriko lo chiyicho. Ombona sürüi jiang tona kyon kholuk to nzo Jeriko lona khoe yiathüng, Timaeus tsoe mhyikjüng Bartimaeus to tsa lantssae khukthe chontsoa vancho. 47 Nazareth Jisu tsata to ombona zoale heto tüngkachicho, "David tsoe Jisu, a khonzana!" 48 Kyon elüm na yingto vanle to ombo pyanga ha ombona ekhyokata tüngcho, "O David tsoe, a khonzana!" 49 Jisu na tamangi phyocho, "Ombo tsa" Tole ontena mhyikjüng ji ezotacho, "Longshyua, phanthia; ombona ni tsala." 50 Ombona mpensü jiang mpato sia phanthi Jisu thüngi wocho. 51 Jisu na ombo ezocho, "Ana ntio ni tssoyiwo to nina nchümala?" Mhyikjüng jina ombo janlancho, "OPVÜI, a hunglanthuka." 52 Jisu na ombo ezocho, "Yia, ni longtsü na ni emithaka." Tole ombo mhyik ji pochi olani Jisu phana wocho.
Jisu na Jerusalemi Rhowo Ji
1 Ontena Jerusalem jamsathüng Olive phunglan jilo oyan Bethphage tona Bethany to janale Jisu na ombo süri otsük eni heto ezoa wothukcho: 2 "Nte mhadungo oyan jilo wotava, osi ntena khothepvü gadho oro ochinaha n tsankahamo tüv sheni licho hungu ka, hoji lanphe süsi yitava. 3 Osi ochona sana ntiolui hoji khiala to nte ezona, "Ombo pvüi jina ethev lia, enhünga zakto hansi yilamka" to ezotava. 4 Ontena wotale gadho oro ji oki motsünga kibüngo sheni lia hungcho. 5 Ontena lanpheta vanle hoji evan ejoma na engacho, "Nteno ntiolui hoji lanphentala?" 6 Jitsükona ontena, Jisu na onte ezoa to ezotale onte lanphethukcho. 7 Ontena Gadho ji hana oyi onte mpensü jiang phungi hojilo sakae Jisu khukthethukcho. 8 Kyon elümoto na onte mpensü jiang olani sayitacho, osi ejoma na jo olina, limo tsoni hanayi sayitacho. 9 Ombo mhadung sülan kyon kholuk jiang na tüngkachitacho, "Potsow thünga! OPVÜI myingona ro kyon ji Potsow khi mmhayithuka! 10 Ete opo David ekhüng yan etsao ji Potsow na mmhayithuka, Potsow mying thüngchethuka!" 11 Jisu na Jerusalemi khümpheni wocho. Tokhatola mmyua vanthako jina eyingoe zesi Bethany yi sicho.
Jisu na Züwodung Randankatala
12 Ojyuato ontena Bethany lona kholani yiathüng Jisu ji wontoncho. 13 Ombona ekoni züwodung vülukvü tüv hungchi ethi pempatana zelo wocho. Owo jani zele ethi yuta meko jina tssüngthi n khyingcho. 14 Tole Jisu na züwodung ji ezocho, "Kyon ochina ha ni lona tssüngthi tsolam meka!" Ombo sürüi jiangna hoji zocho. 15 Ontena Jerusalemi chiyilani Jisu na ekhümki wocho, osi ekhümki na shishota vamo jiang phanchukchirae sicho. Ombona rangdung mezü jiang, vefü eyen ekachiphen jiang to khochüchüi siyiracho, 16 Osi kyon ochia ntia hansi khümphen hapho jiang n yakchithukcho. 17 Jitosi ombona kyon jiang rünyocho, "Potsow yi lona heto phyoala, "A ki jo jipo topvü tsükona randan ki to tsavka. Tolea ntena retsoreyui shüp kümthukala." 18 Pvüti tsüpoe jiang tona yizüng püngnoe jiang tona hoji zoe ntio lankawoe na ombo chüthukvü sana to yantav benkacho. Khatola onte kyucho, ntiotssole kholuk jina ombo püngno yi jiang zoe emhuktsüngra vancho. 19 Mmyulani jo Jisu tona sürüi jiang to na yantsüi na khoe yicho.
Züwodung Jilona Engathev
20 Ontena nyazüngi na olani yita vanle züwodung ji oying jana mmikae lia hungcho. 21 Hojicho ntio tssocho sana Peter na nchümchei phyocho, "Zeta püngnoe, nina randankao züwodung ji chüthaka!" 22 Jisu na onte ezocho, "Otsotso shi engathe khitava, 23 ntena longtsü lina phunglan shi 'Nkhümi jümangi vanthechia' to ezolea ntena phyoji bencheyiv, ntena khatüng n lina longtsü na tssocheta. 24 Jitsükona ana nte ezoala: Ntena kvüthüng randana ntiosana chonasana ntena hoji hungthaka to longtsüa, tona ntio chonana nte pivka. 25 Osi ntena kvüthüng randam phanthia na ntena oyam thüngi n mhom nchüma vancho tüv nchümchena nlan siyitena, tona potsüe evamo nte opo na nte mmen siyiv. 26 Tokhatola ntena oyam nlan n siyia tssona, potsüwoe evamo nte opo naha nte wori jiang nlan nte n siyi.
Ochona Jisu Etho Pichola
27 Ontena Jerusalemi chiyilancho. Osi Jisu na ekhümki sanphia vanle pvüti tsüpoeden, yizüng püngnoeden, tona eramoeden tona oro ombo engatacho. 28 "Nino ocho yi lona shiang tssoala? Osi ochona shiang etssov etho ni pichola?" 29 Jisu na ezocho, "Ana oyi motsünga nte engavka a janlantava, tona ana ocho myingona shiang tssoa sana nte ezovka. 30 John na baptiyio jijo potsüe na alo kyon thüngina la, a ezotava?" 31 Ontena heto phyoa onte ekhitacho, "Etena potsüe na to phyolea ombona 'tona ntiolui John n longtsütachola' to e zov, 32 elani kyon thüngina to ephyo ha mek." Kyon topvü na John jo zenkhying to phyotao jina onte kyucho. 33 Jitsükona ontena Jisu janlancho, "Ena n phyokuk." Tole Jisu na onte ezocho, "Ana ha, ana ntio etho lona shiang tssoa sana nte ezov meka."
Jününgrothi li Engochoe lo Ejukaoji
1 Jisu na ejukayi na heto onte ezocho, "Kyon tsüka na jününgrothi li chümi epi thei vacho. Hojilo tssüngthi jü mmyaphen jui vacho osi nhyakphen ha zenki tssoe vacho. Osi oli ji oyam engochothuksi yentsalo woe sicho. 2 Jününgrothi elhov yuta janale opvüo jina ombo phajae wothuka engochoe jiang thüngina engocho man tssüngthi khilo wothukcho. 3 Tole engochoe jiangna phajae ji rhümae tasi khejüng yithukcho. 4 Lipvüi jina phajae thanpo wothuklancho; tole engochoe jiangna hoji ha kuri lo tayisi yikrathuka khangshicho. 5 Lipvüi jina phajae thanpo wothuklanle hojijo lüngthae siyicho. Hoji esüa ontena thanpoe ha ochoangna jo ta, ochoangna jo lüngtha, to phajae khosha thüngi tssocho. 6 Jisüi jo lipvüo ji tsoe tsüka vancho jitae enhyocho. Okhao tssoa ombo tsoe tsüka tae vamo ji wothuka heto phyocho, "Onte ha a tsoe shijo yikrachiv tssovka." 7 Tole engochoe jiangna heto phyotacho, "Shijo lipvüo ji tsoe jika etena lüngthae sitasi ejüeli shiang khitavkalo!" 8 Ontena otsoe ji lüngthae ombo echü müngji litssae shümchukchi sitacho. 9 Jisu na engacho, tona jününgrothi lipvüo jina kvüto lyuvla? "Ombona oro lijon jiang roe sisi oli ji thanpoe thüngi vachiv. 10 Ntena motsü lo heto eramo ji khathakvü tssov: "Kitssoe jiangna olung kümoe khochukchi sicho sana lungtsük ji nkenlung kümi sicho. 11 Shijo OPVÜI na tssocho osi ete tsükona kvüta emhukthav ato!" 12 Jihudi esopvüi jiangna onte lo rakae heto püngnocho to ntsi Jisu rhümav yanta ha ontena kholuk ji kyuo jina ombo silanchia yitacho.
Ekhyatssen Ethev Engacho
13 Pharasee ejoma tona Herod razhü ejoma to na engao hansi Jisu n lan yani rhümav wothukcho. 14 Ontena oro ombo ezocho "Püngnoe, nina kyon zümlanchia n van, tolea ntsaji phyoala, osi kyon vanlan yilan n zena Potsow yi lona kyon tsükona phyoji ntsa ezoala to ena ntsia. Jitsükona e zoa, ete yizüng lona jo Rom mesao ji ekhyatssen epiv elan e pepiala? Ena piv alo n pivla?" 15 Ombona onte kyakrüm ji ntsikhi ezocho, "Ntiolui okyak a füyitala, rangtso motsünga hanayia." 16 Ontena hanayile ombona ezocho, "Shilo jo ocho kisü ejüpkachola?" Ontena esapvüi Caesar to ezocho. 17 Tole Jisu na ezocho, "Caesar echi ntiosana Caesar pia, Potsow echi ntio sana Potsow pia." Tole onte topvü ngangcherae sicho.
Echü lona Phanthiv Engatacho
18 Saducee jiangna echü lona kümchelam n longtsücho. Ontena Jisu thüngi oro engatacho, 19 "Püngnoe, Moses na züngchak heto erani e vayicho: 'Eboe tsükana otsoe n liv eloe ji valanchia chüa tssona, ojenio jina emi ji soa vani echüo ji tsoronichen lithukvü.' 20 Tsüngon motsüngalo Jeni tiying vancho eramo jina eloe soa vani otsoe n liv chücho. 2i Enioto jina eloe ji soa vanlanle jiha otsoe n liv chücho, ji esüa ethümoto jina ha tssocho. 22 Jeni tiying jina eloetsük ji vanthuka ha otsoe n liv chüracho. Okhao tssoa eloe jiha chüi sicho. 23 Phanthilan tsüngono onte topvü phanthia na eloe ji ocho engh tssovla?" 24 Jisu na onte janlancho, "Heto tsso shina nte woriala, ntena motsü lo eramo jiha n tsi Potsow etho jiha ntsi. 25 Echüi jiang eküm phanthilana na lanben esüa. tssov osi eboe eloe yanpithan n tssota. 26 Osi echüi phanthilam ji yilan jo ntena Moses kako lona Rannuk rhyu lona omi kioji n khachechoke? Hoji lo Potsow na Moses heto ezocho erani lia, 27 "Aiyo Abraham Potsow, Isaak Potsow osi Jakob Potsow ji. Ji yichak jo ombo eküm vamo Potsow kha echü jiang Potsow mek. Nte wori nrüngthaka!"
Yizüng Tsüphotso ji
28 Hojilo yizüng püngnoe tsükana engachia vancho. Jisu na Saducee jiang mmhona janlancho to engachei omboha heto 29 Jisu engacho, "Yizüng yolo opvütso jo kvüwoe jila?" Jisu na shi opvüo to ezocho, "Enga Israel OPVÜI ete Potsow ji tae OPVÜI. 30 Nina ni lümbüm totona, osi ni etho topvü na osi ni nchümri topvü na ni pvüi nzam shikhfü. 3i Yizüng opvütso enioto ji shi, "Nina ni phinakishüm jiang nipopo nzana to nzana. Yizüng küe ha eni shilo tsükao n li." 32 Yizüng püngnoe jina Jisu ezocho, "Mhona phyothaka püngnoe, nina phyoato Potsow jo OPVÜI ji tae, ombo yaka ochia n van. 33 Osi kyon na Potsow ji ombo lümbüm totona, ombo nchümri totona, ombo etho totona nzam shikhfü, osi ombobo nzanato kyon jiang nzam shikhfü. Yizüng eni shi benphiwo jijo ekümrümo osi thanpo khi Potsow thamo jilona tsükata." Engathe lia janlancho to 34 Jisu na zechei ombo ezocho, "Nino Potsow ekhüngyan ji lona n konta." Jisüi jo ochina ntia ombo n ngav sicho. 35 Jisu na khümpheni püngnoathüng heto onte engacho, "Kvütoli yizüng püngnoe jiangna shanchopvüi ji David tsochen tssov to phyotala? 36 Nthomon jina David ntssünga heto phyothukcho, "OPVÜI na a pvüi thüngi ezocho: Ana ni ri jiang ni jo kupi n tssothukthüng jo a amimoe khukthe vana." 37 David na OPVÜI to tsacho. Tona shanchopvüi ji kutoli David tsochen tssovla?"
Yizüng Püngnoe Jiang Ntangshom Jisu na Ezocho
38 Ombona püngnoathüng phyo cho, "Yizüng püngnoe jiang tsükona chepyimtava, ontena shishopheni sanphiathüng phuknrhüo hantasi oyam khi onte salümthuka yikrachithuk hungala; 39 ontena tssopheni, synagogue ki osi tokhulo khukthephen mmhom hoe vahungala. 40 Ontena n kharo tssoa emi-nloe jiang ji retsoyiala, tothakna echana sunga randanala. Onte nmhontso onte tssoriv!"
Emi ji Than
41 Jisu na khümpheni vanathüng kyon jiangna rangjeni orang thantao ji zeta vancho. Ejüeli elüm na orang khosha thetacho; 42 jithüng emi yantsae tsüka na oro poisa eni thecho. 43 Tole Jisu na ombo sürüi jiang tsarhyui ezocho, "Ana otsotso nte ezola, emi shina topvü poni kyungkata thethaka, 44 Ntiotssole thanpoe jiango onte eli lona enhyocho thecho, tolea ompvüo yantsae emi küma lioji topvü theracho - ompvü eküm süphiphen topvü thecho."
Ekhümki Roe Esiv Ji Jisu na Phyoala
1 Jisu na ekhümki na chiyiathüng ombo sürüi tsükana ezocho, "Zeta, püngnoe, emhukthav long tona oki toka!" 2 Jisu na ezocho, "Nina oki tsüphov shi hunga nüng? Shilo licho olong motsünga lea vanpheno liv meka; onte topvü lachüchüi sirav."
Ezüp Osi Khangshi
3 Jisu na olive phunglani khokthei khümphen jiwoe zechia vanle; Peter, James, John tona Andrew to na kijae na heto ombo engatacho, 4 "Heto ji kvüthüng tssov sana ezoa, osi heto tssoa chiyiv jo kvüthüng ntiona chekavla?" 5 Jisu na onte ezocho, "Ochinaha nte n sosorao tssoa ntangnshontava. 6 Khosha na amying ejana, "Aiyo omboka" to phyoa oro kyon elümoto sosoravka. 7 Ntena ritsso tona wonbung-yibung to zolea ti-khentava. Hojito tssolea ochüm ji n janhan. 8 Ntiotssole jipo motsünga na jipo motsünga yana phanthiv; ekhüngyan motsünga na ekhüngyan motsünga pono phanthiv, meta elümotolo nri enhyukvü otsi vara ha liv. Shiang hetopvü ezüp-nungra benkaden tae. 9 Tolea nte bobo ntangnshontava. Nte rhümae yitssoki nte süa wovka. Synagogue kina nte tav; a tsükona ntena esapvüi osi mesao jiang mhadungo phanthiv, yithen-mmhom ji onte ezov tsükona. 10 Khatola ovüng tssoa yithen-mmhom ji kyon topvü thüngi püngnodem." 11 Kvüthüng onteha nte rhümae yitssoki nte sosi woa na, ntio phyov sana ovüng na wongkhyua ti nchüma; yuta eben lo ntio nte ezoana jithüngti phyoa. Ntiotssole ntena ntio nsamvü sana ji nte yi mek; tolea Nthomon thüngina yiv. 12 Kyon na onte jeni jiang chüthokvü khochaki piv; opo jiang naha otsoe jiang hojito khochaki piv; ngaro jiang naha hojito onte pvüpoe jiang chütokvü khochaki piv, 13 A tsükona kyon na onte tssakvü. Tolea ochona ochüm jana rüma na jiango shanchov.
Ekhenthao Tüv Ji
14 Ekhenthao jina ombo vanphen meko tüv lo phanthi vana ntena hunguka, (shi yichak ji ekhao jina engathe khia). Jithüng Judea lo vamo jiang na phunglan jianglo tsani yichev. 15 Mhonki vamo jina yuta ezia oki tsütsaelan khilo ti joyia. 16 Osi oli vamo jina ombo mpensü khilo oki elani tiyia. 17 Hoji tsüngono eloe ngarohan osi nganiro esoe oyo jiang tsükona kvüta enungrathav tssov ato! 18 Shiang shi etssük yutalo n tssothokvü Potsow thüngi randantava! 19 Hojithüng ezüp jo Potsow na limha lyuyingsi nchüng nandang limha lona ejyuchecho yolo n mhontso ji osi limha lihamo jilea hotüv n lio ezüp tssov. 20 Tolea OPVÜI na hojiang ezüp tsüngon jiang hüngrikaethaka; hojito n tssowo ochinaha n tsanchoche. Ombona ethüngcheo kyon jiang tsükona ombona tsüngon jiang matakathukthaka. 21 Jitsükona ochona sana "Shan chopvüi ji shika zeta' mekana "zeta ojilo ombo vanka' to mpa nte ezolea ombo ti-longtsütava. 22 Ejüng shanchopvüi tona ejüng zenkhying to elümoto chiyivka. Ontena toa tssona Potsow kyon jianglea sosorav ekhyo tssoa, chethemothev elhi ha tssov. 23 Jitsükona ntebopo chüngchüngtava, ana ovüng na topvü nte ezothaka.
Kyontsoe ji Erov Ji
24 Ezüp tsüngon shiang yaksi sülo eng ji khümi siv, choro jinaha n wom siv; 25 shantio jiangha elongjorae siv, osi oyaki etho jiang ha onte vanphen jiang lona phanchukchirav. 26 Jithüng kyontsoe jina etho osi phfütsson lona eluki na rov. 27 Ombona limha nken mezhü jilo ombo lanbenden wothuka Potsow na ethüngcheo kyon jiang limha ochümi na ochüm jana tsarhyuv.
Züwodung Lona Engathev
28 Züwodung lona engathe khi tava. Kvüthüng ombo khero jiang enyipa owo chena sana nzyu rheyia vanthaka to ntena ntsia. 29 Hoji esüa, kvüthüng shiang bena yia sana kyontsoe ji enhyana tsathaka to engathe khitava. 30 Ana otsotso nte ezoala, shiang bena n yiv jo echungren shi mom meka. 31 Potsüo osi limha shi tojo mom, tolea ayi jo kvüthüngha mom meka.
Tsüngon osi Yuta ji Ochinaha N tsi
32 Tole ochinaha hoji tsüngon osi yuta ji ntsi. oyaki lanben osi otsoe jina tia n tsi. Opo tae na ntsia. 33 Hoji tsükona tüngochüa tsoyua vantava, ntiotssole ntena yuta ji kvüthüng tssov sana ji n tsi. 34 Kyon tsüka na sunga yentsalo wosi ombo phajae jiang oki nhyaka vanthukcho esüa tüv; otsük akvü elhi jantaesi kibüng enhyako ji tüngochüngle to ezocho esüa tüv. 35 Jitsükona tüngochüngtava. Kipvüi ji kvüthüng yiv sana ntena n tsi. Mmyulani alo, zümolo alo; hono khü yutalo alo; enyathüng sana n tsi. 36 Jitsükona tüngochüngtava, ombona zakto yilea ntena yipthe vana nte n hungwo tssoa. 37 Ana nte thüngi ezowo shijo topvü thüngi ezoala; tüngo-chüngtava!
Jisu ChütokvüKhentala
1 Yakchi tokhu tona ebung mozhü n theo tokhu ji to ejam tsüngon eni licho. Osi pvüti tsüphoe jiang tona yizüng püngnoeden to jiang na okyaki na mphoa Jisu ji rhümae chüthokvü kyaktacho. 2 Ontena phyotacho, "Kyon jiang yolo ninyang sothev küma etena tokhu yuta lojo ombo rhümtav meka."
Bethany Lona Jisu ji Thyujü Nzüyicho
3 Jisu na Bethany lo Simon ratsü enoe ji ki vancho, osi ombona etsoyu tssoa vanathüng eloe tsükana thyujü orhüm mmhom oman etssükvü opvü motsünga hansi rhorocho. Ompvü na opvü ji elhichi Jisu kvürilo phyangkayicho. 4 Tole kyon ejoma na lüm tsuka phyotacho, "Ntiolui tsentsü thyujü hetüv heto ezi siato!" 5 Hoji denari nzo ethüm poni na yeni orang ji yantsae jiang pivo kvüta mmhomla?" 6 Jisu na ezocho, "Ompvü etsso tssothuka, ntiolui ompvü khetsüala, ompvüna a tsükona elhi mmhom tssothaka; 7 yantsae jiango nchukabemo nte ndüngo vam küma ntena elhi mmhom nte tssohunga na tssocheta; tolea aiyo yuta topvüulo nte ndüngo n van. Ompvüna ntio tssov sana ji tssothaka. 8 A nchüthüng na ompvüna omüng ji juthev a tsükayithaka. 9 Ana otsotso nte ezoaka, "Limha kvülo yithen mmhom ji püngnoa na ompvüna etsso shi phyota ompvü nchümchev."
Judas na Jisu Yentsov Khichoala
10 Sürüi taro eni jiang yolo tsüka Judas Iskariot na ombo yeni tsov tsükona pvüti tsüphoe jiang thüngi wocho. 11 Ontena kvüthüng hoji zocho sana emathatsünga orang piv ezocho, osi ombona Jisu rhümav tsükona tssocho mmhom eyam benkacho.
Jisu na Sürüi Jiang Nzo Yakchi Tokhu Tsoala
12 Ebung mozhü n theo tokhu tsüngon ovüngo jilo yakchi tokhu tsükona olyuro enon tsüngono Jisu sürüi jiang na ombo engacho, "Nina yakchi tokhu etsov tsükona kvülo e methathokvüla?" 13 Ombona sürüi otsük eni ezoa wothukcho, "Yantsü jilo wotava, osi kyon tsüka chonphfü lona ojü hansi yia vamka, 14 ombo phana owo ombona rheyio ji kipvüi ji heto ezotava, "Püngnoe jina phyoala, 'oki chungchak kvülona asürüi jiang nzo yakchi tokhu tsov to?' " 15 Tona ombona ekhaka omhawoe methaki vacho nte ejüvka, hojilo methak-tava." 16 Sürüi jiang na owo yantsüi rhowotale Jisu na onte ezo jiang topvü benchekhani hojilo tokhu methaktacho. 17 Mmyuthakale Jisu na oyi taro eni jiang nzo khukthei etsoyu tssotathüng onte ezocho, 18 "Ana otsotso nte ezoaka, nte yolo tsüka a nzo tsoa evan na a yemka." 19 Tole ontena nungratsünga tsük tsük na ombo ezotacho, "Otsotso hoji a memek?" 20 Tole Jisu na ezocho, "Taro eni ji yolo ochona a nzo a tssikungi yonthechia vancho sana ji. 21 Kyontsoe jijo motsülo ombo tsükona erani lio ji esüa tssoa yiala, tolea kyon ochona kyontsoe ji thechia sana jijo n benthaka! Kyontsük jijo n bukntsao ji mmhomo."
OPVÃœI Tokhu Ji
22 Ontena tsota vanathüng Jisu na hümri ji khikae montso pia randan si mpvüroe ombo sürüi jiang pia ezocho, "Shi khitava, shijo a tsük." 23 Elani ombona opvü motsünga khikae Potsow montso pisi onte picho tole onte topvü na hoji lona yutacho. 24 Ombona onte ezocho, "Shijo ntsataphen a ejen kyon khosha tsükona zamo ji. 25 Ana otsotso nte ezoaka, tsüngon jilo Potsow ekhüngyani na ethan tssoa n yuthüng jo ana elani jününgrojü yulam meka; 26 Jisuülo jo ontena okhen dentasi Olive phunglani chüngitacho.
Peter na Jisu N tsi to Phyov ji Jisu na Ezoala
27 Jisu na ombo sürüi jiang ezocho, "Nte topvü na a silanchia tsantav, ntiotssole motsü lona phyoala, "Ana olyu enhyang ji tatsüngu osi olyu jiang tsanrorav." 28 Tolea a phathilanthokcho sülo jo ana nte vüngi na Galilee wov. 29 Peter na ombo ezocho, "Otsük akvüna ni silea aiyo kvüthüngha ni siv meka." 30 Jisu na ezocho, "Ana otsotso ni ezoaka, nchüng zümo hono yenjo eni n khüthüng ana ombo n tsi to nina yenjo ethüm phyovka." 31 Tole Peter na eshena phyocho, "Ni nzo mpato a echülea ana ni nsi." Ji esüa onte otsük akvüna phyotacho.
Jisu na Gethsemane na Randanala
32 Ontena Gethsemane to tsa meta motsüngalo chiyicho, tole Jisu na sürüi jiang ezocho, "Ana randamka shilo khukta vana." 33 Tosi ombona Peter tona John ha James oni to tsae ombo nungratsünga ezocho, 34 "A chüv esüa a nungraka shilona nhyakta vantava." 35 Tosi tara sena woe ombona likoe vanthei randancho, osi tssocheta tssona ezüp yuta ji ombolo ti-yithukle to heto phyoa randancho, 36 "Abba, O. apo, nina topvü tssochekhana, opvü shi a thüngina khi sia, tolea a choka ephan mek, ni lüm erüng tssoa." 37 Ombona kholani oyi zele onte topvü na yipta vana hungi ombona Peter ezocho, "Simon, nino yipake, nina khonda motsünga tia a nhyaka n vankhokcho ke? 38 Nhyakzeta randana vantava, ojang lo nte n rheyitokvü tsükona. Omon jina jo chokata ha otsük oso najo n to." 39 Ombona elani owo ovüngthüng yitsük ji randanlancho, 40 Ombona elani oyi zelanle onte topvü yiprae licho, onte yipchüchüo jina; osi ntio ombo janlam sana n tsiv sicho. 41 Ombona yenjo ethümo to kholani oyi onte ezocho, "Nteno to esana yipta vampvüke' tssochyuthaka, yuta ji janthaka. Kyontsoe ji mmen kyon khelo theyithaka. 42 Phanthitava, etena khochitavka. Zeta, a khaki siwo kyon ji tsathaka!"
Jisu Rhümao Ji
43 Jisu na oyi nsana vanathüng taro eni ji yolo tsüka Judas ji rocho. Ombo nzo razhü motsünga, pvüti tsüphoeden tona yizüng püngnoeden osi eramoeden to jiang na rothuko jiangna yonri tona jarung to benrisi rocho. 44 Yentsoe Judas na ovüng na heto onte ezoe vacho, "Ana kyon ocho eyolo ntssüpia sana hoji ntena yana vamo jika rhümae sosi yitava." 45 Judas na sasak oro Jisu ji, "Püngnoeyo" to ezoa salümsi eyulo ntssüpicho. 46 Tole ontena ombo rhümae sicho. 47 Jithüng hojilo evan tsüka na yonri tssüngche pvüti tsüphoe ji phajae ji eno etsechochicho. 48 Tole Jisu na onte ezocho, "Aiyo efüi esüa ntena a rhümav jo yonri tona jarung to theta rota ke? 49 Ana müngi wonchi nte ndüngo khümpheni püngnoa vancho khatola ntena a n rhüma. Tolea motsülo erani elio ji benthukchev." 50 Tole sürüi jiang topvüna ombo silanchia tsancho. 51 khyingroe tsüka jo sünyipvü ekasi Jisu phanphia vancho. 52 Ontena omboha rhümav tssoa ha sünyipvü ji silanchi sia tsük-mphfü tsancho.
Esaekho Mhadungo Jisu
53 Ontena pvüti eramoeden, eranden tona yizüng püngnoeden to etssiryhuphen jilo sosi wocho. 54 Peter ha tara konae na zechia phancho osi pvüti ji hapo jianglo wocho. Ombona enhyang jiang nzo hojilo khukthe omi lümkata vancho 55 Pvüti eramo jiang osi esaekho topvüna Jisu n lan pia chüthokvü yantacho, toaha ontena ntia n yanchecho. 56 Kyon elüm na ejüng ehungpvüi pira ha onte ji oyi n sütacho. 57 Ejoma na phanthi Jisu nlan pia heto ejüng phyoyicho: 58 "Ombona heto phyoa ena zoa, okhe na tssowo ekhümki shi ana roe sisi tsüngon ethüm yutalo kyon khena n tssocho tüv tssokachiv." 59 Tokhatola jiloha onte ehungpvüi ji n myantacho. Pvüti tsüphoe jiang ha onte ehungpvüi ji n myantacho. 60 Pvüti tsüphoe jiangna onte mhadungo phanthi Jisu engatacho, "Shiang na ehungpvüi pia vamo shi janlam n lichoke?" 61 Toaha Jisu na n janlam ying to vancho. Tole pvüti tsüphoe jina ombo engalancho, "Nino mmhayio Potsow tsoe ji alo?" 62 Jisu na janlancho, "Hoji a ka, kyontsoe jina Tokhamo Potsow khe amimoe khukthev osi oyaki eluki na roa nina hunguka!" 63 Pvüti tsüphoe jina ombo sü ji reroe sia phyocho, 64 "Etena shilo ntio ehungpvüi nhyaktalam la? Ombona yikvüo ji ntena zothaka, nte methak jo kvütola? Tole onte topvüna ombo ji nlan pia chüthokvü etüma to phyotacho. 65 Onte ejoma na Jisu nchukata omhyik eyukisi ekhokatav benkacho. Ontena ezocho, "Ochona ni ekhokacho sanaji phyoe ze?" Enhyang jiang naha süi khi ombo tümtacho.
Peter na Jisu Khaksiala
66 Peter na hapoe vanathüng pvüti tsüphoe ji phajae eloeroro tsüka chiwocho. Peter na omi lümkata vamo ji 67 ompvüna hungi omhalo zekayia ezocho, "Niha Nazareth Jisu phanphichola?" 68 Tole Peter na ekhirana ezocho, "Ana n tsi, nina ntio phyoa sana tia ana n tsi." Ombona hapo pomoe chiwoe sile jithüng hono khüsochicho. 69 Tole phajae eloeroro jina ombo hunglani hojilo evan jiang ezocho, "Kyon mo shiha onte yolo tsüka ka." 70 Khatola Peter na ekhiranlancho. Tara tae tssoa jilo evan jiangna Peter ezolancho, "Niha Galilee yamoka, onte yolo tsüka nrünga ka." 71 Tole ombona echümchaka phyocho, "Ana ejüng phyoa tsona Potsow khi a khangshithuka, kyontsük ji ana n tsika." 72 Jithüng hono yenjo enioto khüsochicho; tole Jisu na heto ombo ezo ji Peter na nchümchecho, "Hono yenjo eni n khüv nina echung ethüm a khaksivka." Jithüng Peter na kyasochicho.
Pilate Mhadungo Jisu
1 Nyazüngina pvüti tsüphoeden jiang na yizüng püngnoe jiang tona eramoden to jiang onte nduktae methak khitacho. Osi ontena Jisu ji sheni sosi owo Pilate khelo theyicho. 2 Tole Pilate na ombo engacho, "Nino Jihudi mesao ji alo?" Jisu na janlancho, "Nina phyoato ka." 3 Pvüti tsüphoe jiangna Jisu nlan elümoto phyoyiale, 4 Pilate na engalancho, "Nino n janlam sake? Zeta ontena ni nlan kvüta yancheta sana." 5 Toaha Jisu na ntia n phyo jina Pilate na emhukcho.
Jisu Chüthokcho
6 Yakchi tokhu akvüto Pilate na kyon jiang engasi onte lüm na erungo evüngki evan tsük-tsük vachicho. 7 Jithüng Barabbas to tsa oyam lüngthae jitüv evüngki vancho. 8 Kyon jiangna sanrhyutae thanpothüng esüa kyon tsüka vachiv tsükona ontena Pilate thüngi jonjitacho. 9 Tole Pilate na onte engacho, "Ntena Jihudi roza ji a vachithuk hungalo?" 10 Pvüti jiangna omhyik raki lona Jisu ji ombo khelo theyicho to Pilate na mmhona ntsicho. 11 Tokhatola pvüti eramoe jiangna Barabbas vachile to kyon jiang ntssünga phyothukcho. 12 Jitsükona Pilate na engalancho, "Tona ntena Jihudi roza to etsao ji thüngi jo kvüto a tssothuk hungala?" 13 Tole ontena tüngkachicho, "Doni ombo sia!" 14 Pilate na onte engalancho, "Tole ombo nlan ntio licho na la?" Elani ontena "Doni ombo sia!" to ekhyokata tüngkachilancho. 15 Pilate na kyon jiang emathathuk hungwo jina Barabbas vachisi Jisu jo erhüpsi doni sile to khochaki onte picho.
Rasan Jiang na Jisu Yikvüla
16 Rasan jiang na Jisu ji Piltae hapo ji chungi tsatheisi rasan thanpoe jiangha tsarhyucho. 17 Jisüi jo ontena Jisu ji osü myonshiv ryuphanthuksi okyo na kikho nsüngrüi kikhothukcho. 18 Tosi ontena salüm ombo pia ezotacho "Jihudi roza ji harishia vanthuka!" 19 Elani ontena otssüng khi kvürilo ombo esükia, nchukata nkhoktseni khümtacho. 20 Osi ontena hojito ombo emakathakale sümyonsü ji khichoyisi ombo sü ji mpenthukcho. Tosi donpheni na doni esiv tsükona sosi wotacho.
Jisu Doncho
21 Jithüng ontena kyon tsüka Simon to tsa oyani na yantsüi roa vancho nduki Jisu donphen ji khüngkata hanthukcho. (Ombo Cyrene yamo Alexander ha Rafus oni opo.) 22 Ontena Jisu ji sosi Golgotha, yichaki na "Kvüriryu meta" to tsao jilo wotacho. 23 Hoji lona ontena mozhü ntssam lo ekhov litsüi Jisu piaha ombona n yucho. 24 Jisüijo ontena donpheno eshenkae ombo sisi ombo sü ji phalyu fuki zetasi jantacho. 25 Ontena enyathüng toku ekholo ombo donkachicho. 26 Osi nlan ombo pio ji chekav heto eranicho, "Jihudi Roza ji." 27 Ontena Jisu nzo efüi ha otsük eni donhyacho, tsüka ombo amimoe osi tsüka ombo ayiwoe to. 28 Hojitolui motsü ji benthukcho, osi ombona münghan jiang sükhying jilo shümnhyacho. 29 Osi hoji yakchi topvüna kvüri engümphita ombo yikvüa heto phyotacho, "Hokaje, nina khümphen ji roe sisi tsüngon ethümlo tssolan sakaje! 30 Nipopo shanchoe joyia!" 31 Ji esüa pvüti tsüphoe jiang naha yizüng püngnoe jiang nzo tssoe ombo yikvüta phyotacho, "Ombona oyam jo shanchocho tolea ombobo jo n shanchoche! 32 shanchopvüi Israel roza ji donpheni na joyithuka, tona enaha hungi ombo longtsüvka!" Ombo nzo otsük eni donhyao jiang naha ombo emakacho.
Jisu Chüo Ji
33 Eng-longo meta topvüto khonda ethüm müngi sicho. 34 Ethüm ekholo Jisu na tüngkachicho, "Eloi, Eloi, Lama Sabachthani?" ji yichakjo "Apo Potsow, Apo Potsow, nino ntiolui khaki a sicho ato?" 35 Tole jilo manga evan jiangna zoe phyotacho, "Engata, ombona Elijah tsala!" 36 Onte yolo tsüka na yunga owo sena khi ethemjü jümkae hanphans tsi lo khüngkae Jisu yuthokvü pikachia phyocho, "Elijah na oro ombo khekhicho sana zetav ka!" 37 Jithüngji Jisu na eronkachia chücho. 38 Jithüng ekhümki zonchak sü ji khümkina jolo jana eni resoe sicho. 39 Hojilo rasan tsüphoe nzoa yolo esopvüi jina heto tssoa Jisu chüo ji hungi phyocho, "Otsotso kyon mo shijo Potsow tsoe!" 40 Hojilo eloeden ha tara konae na zechita vancho. Jiang yolo Mary Magdalane, ndüngo James ha Joseph oni oyo Mary, Salome to 41 ochoang na ombona Galilee vanathüng ombo phanphia kyochia vancho sana jiang; tona eloe thanpoe khosha ombo nzo Jerusalemi chungoeden to vanracho.
Jisu ji Olüpi Thechioji
42 Mmyuale ojyuato emung ji tsükona methak tsüngon tsso jina Joseph Arimathea yamo ephyo-esan tsüphoe, 43 ochona Potsow ekhüngyan erov ji eyiloa vancho sana ji rocho. Ombona lümbüm tssoni owo Pilate thüngi Jisu müng ji choncho. 44 Tole Jisu ji chüthakcho memek to Pilate na nzoa esopvüi ji ezoa owo chüsi sesunghan sana to zethukcho. 45 Nzoa yolo esopvüi jina owo zesi chüsi sungthaka to ezole Pilate na omüng ji Joseph picho. 46 Ombona Jisu müng ji khichoe sünyipvü shii eyukcho. Osi olongo olüp shanthei vacho tüv lo omüng ji thechi lungpyak tsüphov na lhüpi vacho. 47 Jithüng Mary Magdalene ha Jisu oyo Mary onina Jisu ji kvülo sicho sana ji hungcho.
Phanthilamo Ji
1 Esanmung tsüngon ji ojyuato Mary Magdalane, James oyo Mary tona Salome to shiangna Jisu müng ji nzüyitav tsükona mozhürhüm mmhom shitacho. 2 Ontena nthomong tsüngono jo nyazüngi na eng chiroathüng olüpi wotacho. 3 Ontena phyotacho, "Olüp lhüpo long ji ochona khoe esiyiv to?" (Ntiotssole olong ji elüm tsüphoa tüv tssocho) 4 Tosi ontena enyingotale olong ji khoe sithaka hungcho. 5 Jitsükona ontena olüp jilo rhowo tale khyingroe tsüka sühüm ekasi olüp ji amimoe khukthe vana hungi elümoto onte ekhencho. 6 Ombona onte ezocho, "Ti kyutava, nteno doni sithako Nazareth yamo Jisu ji yantala to ana ntsia!" Ombo shilo n van – ombo phanthithaka! Zetava, ontena shilo ombo thechichoka. 7 Enhungo ntena oyi ombo sürüi jiang tona Peter to heto ezotava, "Ombona nte vüngi na Galilee yiaka. Ombona nte ezoji esüa ntena hoji na ombo hungu ka." 8 Ontena olüp jilo na chiyi ekhenrhüka nungrata tsantacho. Osi kyuo jina ontena ochia ntia n zotacho.
Jisu na Mary Magdalane Thüngi Hungthukala
9 Jisu na echü lona kümchelansi hopta tsüngon ovüngo jilo ovüng tssoa ombona omon n mhom phani siyio eloe Mary Magdalane ji ndukdencho. 10 Tole Mary na oyi Jisu sürüiden kyata vamo jiang ezoracho. 11 Ombo ji eküm vana to ompvüna onte ezocho, osi hojito ezoji zoaha ontena n longtsücho.
Jisu na sürüi Otsük Eni Ndukala
12 Jisülo Jisu na dongphi ombo sürüi otsük eni oyani yita vamo jiang olani na ndukcho. 13 Tole ontena oyi thanpoe jiang ezotacho, khatola ontena n longtsücho.
Jisu na Taro Ekha Jiang Thüngi Hungthukala
14 Okhao tssoa Jisu na ombo sürüi taro ekha jiang na etsoyu tssota vanathüng owo hungthukcho. Osi onte na longtsü n liv lüm khüngo ji tsükona onte makcho. Ntiotssole ombo kümlamo ji hungwo jiangna onte ezoaha ontena n longtsücho. 15 Ombona onte ezocho, "Limha topvülo wotava osi yithenmhom ji meta topvülo kyon topvü thüngi thenchotava. 16 Ochona longtsüa osi baptia sana shanchov; tokhatola ochona n longtsüa sana jijo nlan piv. 17 Osi kyon jiang na kvüthüng longtsüa sana chethev shiang etssov etho onte piv; ontena a myingona omon n mhom phani siv, n tsi yina nsam, 18 Osi ontena nrü mozhü n mhon ehan tüv khyokalea mekana echü mozhü yulea jiangna onte ntsatso; osi ontena nochonori jiang okhe nyimkayiv osi emiyiv.
Jisu ji Potsüwoe Tssüngkacho
19 Onte thüngi hojito jantasi Jisu ji Potsüwoe tssüngkacho osi Potsow khe amimoe khukthecho. 20 Osi ombo sürüi jiang na meta topvülo owo püngnocho; osi ontena püngo ji otsotso to chekayia OPVÜI na onte ndüngo thei chethev elhi elümoto tssocho.
1 O nzamo Theophilus: Ete yolo ntio tssoa yithakcho sana hoji motsü ji eram tsükona kyon elümoto na ekhyo tssothaka. 2 Ontena eramo jijo ochoangna benkadeni na hungjana osi zojancho sana jiangna ete yolo ehungpvüi pio jiang erancho. 3 Hoji tsükona yikrachio tsüphoe yo, ana shiang shi benkadeni na khatüng zitüngi zethako jina, ana shiangshi mmhona etsünga erani ni vayiv to nchümcho. 4 Hojito tssona ni püngnothako ntsa jiang topvüto nina mmhona ntsilam küma ji tsükona.
John Baptio Bukvü Ezoji
5 Herod na Judea esapvüi tssoathüng Abijah khümtsüng kyon Zekhariah to tsa pvüti vancho. Ombo engh Elizabeth jo Aaron wopan lona chiyicho. 6 Omboeata kyon mmhomden osi OPVÜI yizüng jiang merüka benphia evanden tssocho. 7 Osi Elizabeth ji lobung tsso jina otsoe n-licho osi woniata sona vanthakcho. 8 Tsüngona lo Zekhariah na ombo engakvü pvüti elhi jiang Potsow mhadungo tssoa vanathüng, 9 ekhümki tachungi rhowo erungthan piv elhi ombo jancho. Hoji tsükona ombona ekhümki rhowocho. 10 Osi ombona erungthan ji piathüng kyon jiangna oponi na randanda vancho. 11 Jithüng ji OPVÜI lanben joroe erungthan ji amimoe mangcho. 12 Tole Zekhariah na hoji hungi ekhencho. 13 Tokhatola lanben jina ombo ezocho, "Tikyua, Zekhariah! Ni randan ji Potsow na zothaka. Ni engh Elizabeth na otsoe ni bukiv osi nina John ombo to tsav. 14 Ombo bukana elümoto ni ematha longshiv osi kyon thanpoe ha elümoto na longshitav! 15 Ombo ji OPVÜI mhadungo tsüphoe tssov, ombona kinokiri n-tsoyu osi ombo bukpvüto na Nthomon jina ombo pyingu. 16 Ombona Isreal kyon elümoto onte OPVÜI Potsow thüngi solansi yiv. 17 Ombona zenkhying Elijah mon osi etho khi OPVÜI ji mhadungi na khochiv. Osi ombona opo jiang tona otsoe jiang to nzo tssotoklam; osi jancho n zoe jiang ntsanrük lamoe sochiv, elani ombona OPVÜI tsükona kyon jiang methakvü." 18 Zekhariah na lanben ji ezocho, "Ana kvütoli shi ntsivla? Aiyo somporo osi a engh jiha sonthaka." 19 Lanben jina ezocho, "Aiyo Potsow vanrhyulo phanthi evamo Gabriel ji ka," "Yithen mmhom ji ni ezov tsükona ombona a rothukcho. 20 Tokhatola zeta, shiang n benthüng thüng jo nino oyi nsanchena vamvüv, ntiotssole yuta eben lo bencheo yi ana ntio ni ezocho sana ji nina nlongtsücho." 21 Jithüng jo kyon jiango Zekhariah na ntiolyui khümpheni hetenhyaka vanato to nhyakta vancho. 22 Ombona chiyiaha onte n jancheo jina ontena ombo ji khümpheni na chethev hungcho tssov to nchümtacho. Osi ombona oyi n sancheo jina okhena hataki tae onte ejücho. 23 Khümpheni ombo elhi thakthakale Zekhariah na ombo ki yicho. 24 Jitosi n sunguv ombo engh Elizabeth na ngaro hancho osi choro mungo oki vancho. 25 Ompvüna phyocho, "Okhaeti OPVÜI na hetowoe na a nzanchithaka. Kyontsüna a zerüpa vamo ji ombona khi a siyithaka."
Jisu Ebukvü Ezoji
26 Elizabeth na otsük n jüngsi choro tiruko to lo Potsow lanben Gabreil ji Galilee metae Nazereth yan jilo wothukcho. 27 Oyan jilo Mary to tsa David tsochen Joseph na engae lio loroe ji thüngi yithen hansi wothukcho. Loroe ji mying jo Mary to tsacho. 28 Lanben jina rhowo ompvü ezocho, "Salümka, mmha elitsowo eloe! OPVÜI ni ndüngo vana." 29 Mary na hoji zoe elümoto ompvü emhuka, ntio hetüv salüm yithen sana to nchümria vancho. 30 Lanben jina ompvü ezocho, "Tikyua, Mary; Potsow na elümoto ni khonzanthaka. 31 Nina otsoe tsüka hani bukvüka, osi Jisu to ombo tsavka. 32 Ombo tsüphoe tssov osi Ntssontsowo Potsow tsoe to ombo tsav. Osi OPVÜI Potsow na opo David vantsü ji ombo piv. 33 Ombona Jakob tsoronichen jiang kümali sav, ombo yansa jo ochüm n-tsso." 34 Mary na lanben ji ezocho, "Kvütoli hoto tssovla? Aiyo n-yanpihan." 35 Lanben jina ompvü janlancho, "Nthomon jina nilo rovka osi Ntssontso Potsow etho jina ni khümchovka. Jitsükona ngaro ji nthoe osi Potsow tsoe to tsav. 36 Ni wopan tsüka Elizabeth eküm ji nchümi zeta, ompvüha esonlani ngaro hanthaka; ompvüo lobung to phyotacho khatola ngaro hansi choro tiruk tssothaka. 37 Ntiotssole Potsow na n tssochewo ntia nli." 38 Mary na phyocho, "Aiyo OPVÜI phajae jika; nina phyoato a lona benthuka." Jisüi jo lanben jina ompvü sisi yi sicho.
Mary na Elizabeth Janthechio Ji
39 Jisülo Mary na tsüsoa methaki Judea lo yingsüng motsünga poni oyan lio jilo wocho. 40 Ompvüna Zekhariah ki owo Elizabeth salümcho. 41 Elizabeth na Mary salüm yi ji zoale ompvü mmani ngaro jina nkanphicho. 42 Jithüng ji Elizabeth ji Nthomon na pyingi tüngkachia phyocho, "Nino eloe yolo mmhatso ji, osi ni mmani ngaro jijo mmhayio ngaro! 43 Ntio emhukthao tssocho lona a pvüi oyo na oro a janthechia ato? 44 Ntiotssole ni salüm yi ji zopvü a mmani ngaro jina longshia tsukphicho. 45 OPVÜI na ni thüngi phyochako ji otsotso benchev to longtsüo jijo kvüta mmha tssov ato!
Mary Myingthüng Khen
46 Mary na phyocho, "A eküm totona OPVÜI thünga phfütssontoka; 47 A shanchopvüi a Pvüi Potsow, a mon a eküm na longshiala, 48 ntiotssole ombona ombo phajapvüi a hetüv, sükhying teritso ji mpa a nchümchecho! Ntiotssole enhüngana benkae echungren topvü lona mmha eli to a tsav. 49 Ntiotssole tokhamo OPVÜI jina a tsükona elhi tsüphov tssothaka. Ombo mying jo Ntho. 50 Echungren echungren jana ombo yikrachio jiang thüngi ombona ombo khonzan ji ejüala. 51 Ombona ombo Thotsü khe ji yonchia kangtsüi jiang osi onte kyak-ori jiang nzüsorae siyithaka. 52 Mesao jiang ji ombona onte vantsü lona süjorathaka, osi ekyim eyang jiango sükachithaka. 53 Wondona evan jiang ji ombona mmhom khi mmhitokthaka, osi ejüeli jiango khejüng yitokthaka. 54 Ombona e pyimtsü motsüi jiang thüngi phyochako ji bentokthaka, osi ombo phajae Israel ji kyochilo rothaka. 55 Ombona Abraham thüngi osi ombo tsoronichen topvü thüngi kümali khonzan ejüv nchümchethaka!" 56 Mary na Elizabeth thüngi choro ethüm harüma vansi oki elani yicho.
John Baptio Buko Ji
57 Elizabeth na ompvü yuta jani otsoe bukcho. 58 OPVÜI na ompvü thüngi kvüta mmhom tssoyithakcho sana ji ompvü phinakiren osi wopan kitsük jiangna zocho, osi onte topvüna ompvü longshikyocho. 59 Ngaro ji hopta benthakale tsenia mvüchukvü sotasi wocho, osi ontena opo mying esüa Zekhariah to ombo tsatav tssocho. 60 Tole oyona "Meka, ombo mying jo John to tsavka" to phyocho. 61 Ontena "Nte wopan ochia hoto etsae n-vanla!" to ezocho. 62 Opona jo kvüto tsahunga sana to ontena hataka ejücho, 63 tole Zekhariah na erankaphen choni "Ombo mying jo John" to erancho. Tole onte topvü emhuktsüngracho! 64 Jitopvü Zekhariah na oyi nsanchecho, osi Potsow thünguv benkacho. 65 Phinakiren jiang topvüna kyutsüngracho osi yithen shina Juda phunglan meta topvü pyingcho. 66 Hoji ezoe topvüna nchümi zesi phyotacho, "Ngaro shijo ntio kvütüv kyon tssov ato?" Ntiotssole ombo lo OPVÜI etho lia to opon tssoa chekacho.
Zekhariah Zenkhying Yi
67 John opo Zekhariah ji Nthomon na pyingi heto Potsow yithen phyocho: 68 "Etena OPVÜI Israel Potsow mying thüngtavkalo! Ombona ombo kyon jiang nzanchilo rothaka osi onte vachithaka. 69 Ombona ombo nri David tsochen yakchia shanchopvüi etho ejüi epithaka. 70 Hojijo ombona zenkhying yakchia nkolo na phyoe vaoji bentokcho. 71 Ombona ete ri jiang osi etssangkong jiang khelona eshanchov phyochakcho. 72 Ombona ete pyimtsü motsüi jiang khonzan ejüa osi ombo ntho ntsata ji nchümchev to phyocho. 73-74 Ombona ete motsüi Abraham thüngi ete ri jiang khelona eshanchoe ekyuv n-lina ombo benkatokvü mmhona phyochakcho. 75 Hojito tssona etena ete eküm echung ntsantho osi ntsanrük lona ombo benkatokvü tsükona. 76 "A tsoe yo, nino Nthotsowo Potsowzenkhying to ni tsavka. Nina OPVÜI vüngina owo ombo lan methakivka, 77 osi ombo kyon jiang nlan siyisi shanchov to onte ezovka. 78 Ete Potsow jo khonzan eli osi enyingroe. Ombona shancho wondang ji etelo wonkatokvü 79 osi Potsowoe na wonchithuki echü emüngi evan jiang pono rakatokvü, osi ete jo jiang noying lamoe sochiv." 80 Ngaro ji kyoche rankümi otsük oso osi omon lo rankata yicho. Osi ombona nzontsü yolo elhi etsso yuta ji njanthüng jo lijüng metae vancho.
Jisu Buko Ji
1 Yuta jilo esapvüi Augustus na Roman ekhüngyano kyon topvü na wokhalo omying erantale to yizüng picho. 2 Kvüthüng owo ekha ovüngo shi khicho sana jithüng jo Qurinius na Syria sa vancho. 3 Jitsükona otsük akvü na ombombo yantsüi owo omying erantacho. 4 Joseph na Galilee metae Nazareth lona Judea lo David ebuk yan Bethlehem ji lo wocho. Ntiotssole ombo David tsochen lona ombo chiyio ji tsükona. 5 Ombona omying erano woathüng ombona engae vao Mary ha sonhyacho, osi Mary jo otsük n-jünguv ngaro ji ebuk yuta tsenkata vancho. 6 Ontena Bethlehem lo vanathüng ngaro ji ebukvü yuta jancho. 7 Ompvüna otsoe ovüngo tssoa buki süporo na ombo eyuki mangsü vekhfü lo yipkachi vacho – Ntiotssole nchenki jilo onte vanphen n-licho.
Olyu-enhyang Tona Lanbenden To
8 Meta jilo olyuenhyang ejoma na zümolo olyu rhükita opheni vanracho. 9 Tothüng ji OPVÜI lanben tsüka roe OPVÜI phfütsson na onte razhücho, tole onte ekhentsüngracho. 10 Jithüng lanben jina onte ezocho, "Tikyutava! Ana nte tsükona yithen mmhom tsüphov hansi rochoka, osi hoji na kyontsü pono longshi tsüphov lithukvü. 11 David yantsü lona nte shanchopvüi nchüng bukthaka - OPVÜI Khrista ji! 12 Hoji chekav jijo shi: Süporona ngaro eyuki vekhfü lo yipkachi licho ntena hunguv." 13 Jitopvü lanben ji ephalo lanben rasantsü tssoe Potsow thünga dentacho: 14 "Ntssontsowo Potsow phfütssontoka, osi limhalo ombona emathayio kyon jiang thüngi noying litoka!" 15 Lanben jiangna onte sisi potsüwoe elani chungi thakale, olyu-enhyang jiangna phyotacho, "Etena Bethlenemi owo OPVÜI na e zowoji bebemsanato zetavkalo." 16 Jitosi ontena tssüsoa Bethlehemi wotale Joseph ha Mary oni ndukcho osi ngaro ji vekhfü lo yipkachi lia hungcho. 17 Olyu-enhyang jiangna ombo hungale OPVÜI lanben na ngaro ji tsükona onte ezowo ji ombo ezotacho. 18 Olyu-enhyang jiangna phyo ji ezoe topvüna emhuktacho. 19 Mary na shiang hetopvü nchümchei junga zia vancho. 20 Olyu-enhyang jiangna ontena zoa hungthako jiang tsükona Potsow thüngta okhen denta yitacho; ntiotssole lanben jina onte ezo ji esüa bencho.
Jisu Omying Tsayicho
21 Hopta motsünga sülo ngaro ji tseniv yuta jani Jisu to tsacho; omying shijo ombo n-hanthüngna lanben na picho.
Khümpheni Jisu Sosi Woji
22 Joseph ha Mary onina Moses shikhfü ephanina nthoche yuta jancho. Hojitsükona onina ngaro ji OPVÜI mhadungo sosi wov tsükona Jerusalemi wotacho. 23 OPVÜI, shikhfü heto erani lio ji ephan: "Eboetso tsokhfü to etsa OPVÜI mhadungo khochaki pia sosi wovka." 24 OPVÜI shikhfü lo lio ji esüa ontena yukhyu eni tona vefü eni to thano wotacho. 25 Jithüng Jerusalem lo Simeon to tsa tsüka vancho. Ombo Potsow ekyui kyon mmhom Israel shancho yuta ji rov nhyaka vancho. Nthomon ji ombo lo vancho 26 osi ombona OPVÜI na phyochako shanchopvüi ji n hunguv jo nchü to Nthomon jina ombo ezoe licho. 27 Nthomon jina olan ombo soa Simeon na khümpheni wocho. Kvüthüng opvüpoe jiangna ngaro Jisu ji sosi shikhfü ji benriyi lo ochosana, 28 Simoeon na ngaro ji ejümkae Potsow thünga phyocho: 29 "Nina ni phyochak ji benthukthaka OPVÜI, Enhungo ni phajae ji longshyua chütoka. 30 A mhyik shina ni shancho elhi ji hungthaka, 31 Shancho kvüwoe nina kyontsü yolo methakcho sana ji: 32 Pvüjipoe jiang pono ni lanji ejüv tsükona wondang osi ni kyon Israel pono phfütsson hansi yiv tsükona." 33 Simeon na ngaro ji tsükona phyoji zoe ngaro ji opo ha oyo oni emhukcho. 34 Simeon na onte randankata, oyo Mary ezocho, "Ngaro shijo Potsow na Israel lo kyon elümoto monthukphen osi shanchophen ethüngchecho. 35 Ombo Potsow thüngina chethev esüa tssov, osi kyon na ombo panlana nsani onte mpho nchümri jiang oponi chiyitokvü. Osi yonri erov tüv khfü esüa nungra na ni lümbüm ni royiv." 36-37 Jithüng Asher pvüji lo Phanuel otsolov Anna to tsa sonpvüro zenkhying vancho. Ompvüo yanpi nzyu tiying orapvü nzo vansi nzyu ekha tizasi mezhü emia vancho. Ompvü na khümphen n yakna zümo-eng khanga randana vancho. 38 Yutatsük jilo ompvüna ha oro Potsow thünga Jerusalem rhanchov nhyaka evan jiang thüngi ngaro ji motsü ezocho.
Nazareth lo Kholani Eyio Ji
39 Mary ha Joseph onina OPVÜI shikhfü ephanina topvü benria nthochesi Galilee onte yantsü Nazareth lo yicho. 40 Osi ngaro ji khyocheta, etho jüa; nchümri lia osi Potsow na chokata kümcho.
Ekhümki Jisu
41 Jisu pvüpoe jiangna yakchi tokhu lo nzyu akvü Jerusalemi wotacho. 42 Jisu na nzyu taro eni tssoathüng onte shikhfü ji esüa tokhu lo wotacho. 43 Tokhu ji thaki ontena oki yitale Jisu jo Jerusalemi vancho. Tokhatola ombo pvüpoe jiangna jo n tsicho; 44 osi ontena jo ombo ha razhülo jücho tsayia eng tona yentsatasi onte shom osi wopan yolo yantacho. 45 Toaha ombo n-yanchetale Jerusalemi yana wotacho. 46 Tsüngon ethümoto lo ti ombo ji ekhümki Jihudi püngnoe jiang yolo thei enga, osi ombona ha onte ngatüngngaria to vancho. 47 Ombona nchümri lia janlamo ji ezoe topvü na emhuktacho. 48 Opvüpoe jiangna ombo hungi emhuktacho, osi oyo na ombo ezocho, "Otsoe, nino ntiolyui heto elhiala? Nipo enio ni eyan lona emhukthav e wonkhyuthaka." 49 Tole ombona onte janlancho, "Nteno ntiolyui a yantala? Aiyo apo ki vam lia to ntena n tsichoke?" 50 Toaha ombona ntio onte ezocho sana ji ontena n-ngathecho. 51 Jisüi jo Jisu na onte phana oyi Nazareth lo onte jancho zoa vancho. Osi oyo na shiang topvü ompvü lümbümi kenchüngi hancho. 52 Osi Jisu ji otsük, nchümri ranbena, kyon osi Potsow na ombo chokata kümcho.
John Baptio na Püngo Ji
1 Tiberius na nzyu taro mungoto mesao tssoathüng Pontius Pilate jo Judea lo esapvüi tssoa vancho. Herod jo Galilee sa vancho osi ombo ojenio Philip jo Iturea tona Trakhonitis to sa vancho. Lysania jo Abilene sa van, 2 osi Annas ha Kaiaphas onio pvüti tsüphoeden to tssocho. Yuta shilo Potsow yi ji Zekhariah tsoe John thüngi lijüng metae na ezocho. 3 Jitsükona John na Jordan zhükhfü nkonjano meta topvü lo owo püngnocho, "Nte mmen jiang lona khophi baptitava, tona Potsow na nte mmen jiang nte siyivka." 4 Zenkhying Isaiah kako lo heto erani licho: "Ochona sana lijüngina heto tüngcho tüngriala: 'OPVÜI lan methakia; olan nsaka oni ombo sanphithuka! 5 Meta eyakthe topvü pyingthukvü, yingsüng jiang. sanmyanthukvü. Olan khukphio jiang ha nsathukvü, osi olan kharüpo jiang enyiptokvü. 6 Osi kyontsü topvüna Potsow shancho ji hunguv. 7 Kyon kholuk elüm na baptiyile to John thüngi rotacho. John na ezocho, "O Nrüden!" Potsow lüm etsuk tsao jilona tsanchov tsü kona ochona nte ezochola? 8 Ntena mmen lona khophiala to chekav ji tssoa. Osi Abraham jo ete pyimtsü motsüi to ntebobo phyota tae tivantava. Ana nte ezoaka Potsow na olung ochon shiang khi Abraham tsoronichen kümtokcheta! 9 Odung jiang ndüngi opvü ji njükae lia; tssüngthi mmhom n thio dung topvü tani omi thechi siv." 10 Tole kyon jiangna ombo engatacho, "Püngnoe, tona eiyo kvüto lyuvla?" 11 Ombona ezocho, "Ochona phokthesü eni liana n lio kyon ji motsünga piv lia, ochona etsoyu liana janta tsothuka." 12 Tssenkhyae ejomana ha bapti lo rotasi ombo engatacho, "Püngnoe, eiyo kvüto lyuvla?" 13 "Shikhfü lo yaka ti khyatava," to ombona ezocho. 14 Rasan ejoma na ombo engacho, "Eiyo tona kvüto lyuvla?" Ombona ezocho, "Ochi thüngina ha retsotsoa orang ti khitava, osi ochia ejüngona n lan ti pitava. Nte jokheman jina lüm büktava." 15 Kyon jiangna onte eyilo ji kyungkae shanchopvüi ji John memekana to nchümta yicho. 16 Jitsükona John na onte topvü ezocho, "Ana ojü taena nte baptiyiala. Tokhatola a lona elümoto tsüphokao ji tsata. Ana jo ombo jokhüpzhü lanphev tia a n tüm. Ombona Nthomon tona omi to lona nte baptiyivka. 17 Ombo khelo mvüro ji bena, ombona hoji khi otssuk ntsa jiang venchei osoni vasi tssukzhü jiango topvüto n mheo mi jilo thechi siv." 18 John na yithen mmhom ji püngnoathüng lanka elümoto lona kyon jiang thüngi onte eküm lanka jiang lona tongphitale to ntssungcho. 19 Osi ombona Herod n lan pia phyocho, ombona ojenio eloe Herodias ji rechoyicho osi thanpo mmen ha elümoto tssocho. 20 Tole Herod na John ji vüngpheni thechia elhi n mhonkao tssocho.
Jisu Baptiyio Ji
21 Kyon topvü baptiyisi Jisu ha baptiyicho. Jisu na randana vanathüng potsüo chonchi Nthomon jina yukhyu esüa ehungo kümi ombo lo rocho. 22 Osi potsüwoe na owon heto tssocho, "Nino a nzamo tsokhying. Ni lo a lüm ejo lia."
Jisu Pochung Ji
23 Jisu na ombo nzyu thümro harüma tssoale, elhi benkae tssocho. Kyon na heto ombo nchümicho, ombo Joseph tsoe ji, Joseph opo Heli, 24 Heli opo Mathat, Matthat opo Levi, Levi opo Melchi. Melchi opo Jannai, Jannai opo Joseph, Joseph opo Mattathatias, 25 Mattathatias opo Amos, Amos opo Nahum, Nahum opo Esii, Esii opo, 26 Naggai, Naggai opo Maath, Maath opo Mattathias, Mattathias opo Semein, Semein opo Joseph, Joseph opo Joda, 27 Joda opo Joanan, Joanan opo Rhesa, Rhesa opo Zerubbabel, Zerubbabel opo Shealtiel, Shealtiel opo Neri, 28 Neri opo Melchi, Melchi opo Addi, Addi opo Kosam, Kosam opo Elmadam, Elmadam opo Er, 29 Er opo Joshua, Joshua opo Eliezer, Eliezer opo Jorim, Jorim opo Matthat, Matthat opo Levi, 30 Levi opo Simeon, Simeon opo Juda, Juda opo Joseph, Joseph opo Jonam, Jonam opo Elakim, 31 Eliakim opo Melea, Melea opo Menna, Menna opo Mattatha, Mattatha opo Nathan, Nathan opo David, David opo Jesse, 32 Jesse opo Obed, Obed opo Boaz, Boaz opo Salmon, Salmon opo Nahshon, 33 Nahshon opo Amminadab, Amminadab opo Admin, Arni opo Hezron, Hezron opo Perez, Perez opo Judah, Judah opo Jakob, 34 Jakob opo Isaak, Isaak opo Abraham, Abraham opo Terah, Terah opo Nahor, 35 Nahor opo Serug, Serug opo Reu, Reu opo Peleg, Peleg opo Eber, Eber opo Shelah, 36 Shelah opo Kainan, Kainan opo Arphaxad, Arphaxad opo Shem, Shem opo Noah, Noah opo Lamekh, 37 Lamekh opo Methu selah, Methuselah opo Enokh, Enokh opo Jared, Jared opo Mahalaleel, Mahalaleel opo Kenan, 38 Kenan opo Enosh, Enosh opo Seth, Seth opo Adam, Adam opo Potsow.
Jisu Ejiphio Ji
1 Jisu ji Nthomon na pyingi Jordan lona elani yicho, 2 tole omon jina lijüngi ombo sosi oyi Ejiphiv jina tsüngon zhüro ejiphicho. Yuta tenhyaka etsoyu n tssov vansi ejiphiv yuta ji yakrathale elümoto ombo wontoncho. 3 Jithüng ejiphiv jina ombo ezocho, "Nino Potsow tsoe tssona olung shiang hümri kümthukle to ezoa." 4 Tole Jisu na ezocho, "Motsü lona phyoala, kyon na hümri taena eküm n vanche." 5 Tole ejiphiv jina ombo sosi ehungo omhyik ekyip taena limha lo ekhüngyan topvü ombo ejücho, osi ezocho, 6 "Ana shiang hetopvü osi onte phfütsson myingthüng topvü ni echi tssotokvü ni piv; 7 shiang topvü a echi tssoji tsükona ana a pihungo pikhuka; jitsükona nina a khüma tssona shiang hetopvü ni echi tssov." 8 Jisu na janlancho, "Motsü lona phyoala, 'Nina ni Pvüi Potsow tae khüma ombo tae benkav shikhfü!' " 9 Tole ejiphiv jina Jerusalemi ombo sosi owo khümphen mhokvüri chungotoki ezocho, "Nino Potsow tsoe tssona nibobo shilona tsukchoa. 10 Ntiotssole motsü lona heto phyoala, 'Ni tsükona ombona ombo lanben ezoa ni ntangshonthukvü.' 11 'Osi ni jo na olungo n shükao tssoa ontena ni ekhyonkav.'" 12 Tokhatola Jisu na ezocho, "Motsü lona phyoala, "Nina ni OPVÜI Potsow ji ojang n tssov shikhfü." 13 Ejiphiv jina Jisu ji olan olan ejiphisi vachi sicho, osi yuta mmhom nhyaklana vancho.
Jisu na Galilee lo Ombo Elhi Benkao Ji
14 Hojisülo jo Jisu na Galilee elani yicho osi Nthomon etho ombo lo licho. Ombo yithen jina meta ji pyinga yicho. 15 Ombona synagogue ki na püngnocho osi kyon topvü na ombo thüngtacho.
Nazareth Lona Jisu N khichocho
16 Jitosi Jisu na ombo ebuk yan osi nungothüng vamo yan Nazareth jilo elani yicho osi jithüngha synagogue ki wocho. 17 Ombona motsü khav phanthile Isaiah zenkhying kako ji ombo picho. Tole ombona kako ji elhichi heto erani lio ji khacho, 18 "OPVÜI mon ji a lo vana, ntiotssole ombona yithen mmhom ji yantsae jiang thüngi püngnov a ethüngchethaka. 19 Sheni vamo jiang lanphev ombona a rothokcho Mhyikjüng jiang pochiyiv osi oyam na khangshio jiang vachiv tsükona osi OPVÜI na ombo kyon jiang shanchov nzyu ji janthaka to tüngsochilo a rotokcho." 20 Jisu na kako ji shüi ebenpvüo ji pisi khokthecho. Synagogue ki kyon topvüna rüki ombo zeta vancho. 21 Ombona heto onte ezocho, "Ntena zoa khathako ji esüa motsü shi nchüng benthaka." 22 Ombona yinüng hetüv nsamo jina onte topvü lümbümo rhaki phyotacho, "Shijo Joseph tsoe ji mekchoke?" 23 Ombona onte ezocho, "Ntena yijak heto lioji a ezov to ana nchümala, Tsüktssen, nipopo emia.' Elani heto lea a ezov tssov, Kapernaum lo ntio tssocho ena zothakcho sanaji esüa ni ebuk yan shilo ha tssoa." 24 Jisu na phyocho, "Zenkhying ochia ombo yamo kyon na n sothetala. 25 "Engatava; Elijah echungo Israel meta lo nzyu ethümsi riso eryu n jov otssi vara tsüphov lio jithüng emi elümoto vancho. 26 Toaha Elijah ji onte tsüka thüngitia rothukcho mek, tokhatola Sidon meta Zerepath jilo vamo emi tsüka ji thüngi tae rotokcho. 27 Elani Elisha zenkhying ji echungo Isreal lo ratsü enoe khosha vanaha Syria kyon tsüka Naaman ji tae emiyicho." 28 Shi zoale synagogue ki vamo kyon jiang topvüna lüm tsukcho. 29 Ontena Jisu süchuki onte yan tssokao yingsüng ji kvüri na eyichochiv tsükona süsi chungocho, 30 toaha Jisu na kyon lungina tssüa yi sicho.
Omon N mhom Evan Kyon Tsüka
31 Jisu na Galilee lo yantsü motsünga Kapernaum jilo owo Jihudi emung tsüngono kyon jiang püngnocho. 32 Ombona püngno yi jianglo yitan jüa püngno jina onte emhuktsüngracho. 33 Synagogue jilo evan tsüka omon n mhom evan jücho osi jina heto tüngkachicho, 34 "O Nazareth yamo Jisu, nina ntio e tssoyivla? Nino roe esiv tsükona rochoalo? Nino ochosana ena ni n tsia. Nino Potsow Ntho yithen hanphi!" 35 Jisu na omon ji ezocho, "Ying to vana, kyon ji lona chiyiaP'Omon n mhom jina onte mhadungo na kyon ji khochüchüsi ntia n tssatssotokvü tsani sicho. 36 Onte topvü emhuktsüngrae phyotacho, "Shiango ntio püngno yi hetüvto? Kyon shina etho osi yitan theta omon n mhom shiang khüngkata chiyitokala!" 37 Jisu yithen ji meta jilo kyon topvüna zota yicho.
Jisu na Kyon Khosha Emiyiala
38 Jisu na synagogue ki na chiyi Simon ki rhowocho. Simon ono ji nochonoria vancho osi ontena Jisu ezotacho. 39 Ombona nochonori ji belüngo owo mangi nochonori phanile topvü poe sicho, osi ompvü na phanthi onte jenji engayicho. 40 Eng rhethakale kyon jiangna onte shom nochonoria vamo jiang Jisu thüngi sosi rocho; tole ombona onte otsük akvü pono okhe nyimkayia emiyiracho. 41 Omon n mhom khosha na "Nino Potsow tsoe ji!" to phyota kyon lona chiyiracho. Ombo shanchopvüi ji to ontena ombo chethio jina ti-phyotale to Jisu na onte ezocho.
Jisu na Synagogue Ki na Püngnoala
42 Wonchiale Jisu na oyani na khochi yingsi yinglo metae wocho. Kyon jiangna ombo yantasi ombo yanchetale onte ndüngo ombo vantok-hungcho. 43 Tole ombona onte ezocho, "Ana Potsow ekhüngyan yithen mmhom ji oyan thanpoe ha püngnov lia, ntiotssole hoji tssolo Potsow na a rothukcho." 44 Hojito phyoa, ombona meta jilo synagogue topvü to lo püngnocho.
Jisuna Sürüiden Tsademo Jiang
1 Tsüngona lo Jisu na Gennesaret wozhü tssalo manga vanathüng kyon jiangna Potsow yi ji engalo jeta rotacho. 2 Ngovan jiangna orhung eni jürani süchukchi vatasi ngovanphen jiang etssüta vancho ombona hungcho. 3 Jisu na Simon rhung ji ojüi tara jethechi le to ezosi ombona hojilo khokthei kyon jiang püngnocho. 4 Ombona püngnosi Simon ji heto ezocho, "Orhung ji tara jungkata jethechilana osi ni tephfü jiang nzo ngovanphen jiang vanthechia." 5 Simon na ezocho, "OPVÜI" "ena zümo na vanta ha ntia n vanya, tolea nina ezona ana vanthechivka." 6 Ontena vanthechile ngovanphen jiang rerhüpvü to tssoa khosha vanyacho. 7 Jitsükona ontena jüran phukowoe vamo jiang hataka oro onte kyothukcho. Ontena oro orhung enita ongo na pyingthuka jo onte jüngthev tssocho. 8 Simon Peter ha hoji hungale, Jisu mhadungo nkhoktseni phyocho, "A nkachoa, OPVÜI! Aiyo mmen kyon ka!" 9 Ongo khosha rhümao ji zesi ombo tona oshom jiang to emhukcho. 10 Zebedee tsoeden Simon shom James ha John oni na ha emhukcho. Jisu na Simon ezocho, "Tikyutava, enhünga na benkae ntena kyon rhümaeden tssovka." 11 Ontena orhung jiang jürani süchukchi sitasi topvü valanchi sia Jisu sürüi kümtacho.
Jisu na Ratsü Enoe Emiyiala
12 Jisu na oyan motsüngalo vanathüng ratsü enoe tsüka ha jilo vancho. Ombona Jisu hungale vanthe phyocho, "Tsüphoe, ni lüm na rüngna nina a emiyikhuka!" 13 Jisu na ombo thüngoe okhe yonchia ezocho, "Ana lüm na rüngka, ntssüngcheta." Jitpvü kyon ji ratsü eno ji pocho. 14 Jisu na ombo ezocho, "Shi ochia ti ezoa, osi sasak pvüti ji khi owo ni zetoksi Moses shikhfü lo lioji esüa othan pia ni ntssüngchethaka to kyon topvü khi ntsitoka." 15 Toaha Jisu yithen jina nzüpyinga yicho osi kyon elüm na oro ombo püngno engata nochonori onte emiyithukcho. 16 Osi ombona yingsü yinglo metae na owo randancho.
Jisu na Tsükchüi Emiyiala
17 Tsüngona lo Jisu na püngnoa vancho. Tole hojilo Galilee tona Judea to meta oyan akvü lona tona Jerusalem lona to Pharaseeden tona shikhfü püngoeden toha oro vanracho. Emiyiv tsükona OPVÜI etho ji Jisu lo licho. 18 Jithüng kyon ejoma na tsükchüi tsüka ejümtasi Jisu thüngi rotacho. 19 Tole kyon khoshao jina kvütoli ejümsi n rhowochecho. Jitsükona ontena belüng totona mhonki ejümkachi mhonki 21. larhüpi Jisu mhadungo kyon jiang longjüngo ejümthechicho. 20 Ontena longtsü tsüphov lioji Jisu na hungi kyon ji ezocho, "Oshomyo, ni mmen jiang ni siyithaka." 21 Tole Pharasee tona shikhfü püngnoe to jiangna ekhita phyotacho, "Shijo ochola, jito yikvü yiloa nsanato? Potsow na yaka ochona mmen siyikukchola!" 22 Ontena nchüma vamo ji Jisu na ntsi ezocho, "Ntiolyui hoto nchümtala? 23 'Phanthi sanphia,' to ezo ji thüngina jo, 'Ni mmen ji ni siyithaka' to ezoji elao mekchoke! 24 Tolea kyontsoe na mmen siyiv etho lia toha ana nte ejüvka." Tosi ombona tsükchüi ji ezocho, "Ana ni ezoaka, phanthi ni belüng ji tsakae hansi oki yia!" 25 Jitopvü kyon jina ombo yiphen ji tsakae hansi Potsow thünga oki yicho. 26 Onte topvü emhuktsüngracho! osi kyucho, Ontena Potsow thünga phyotacho, "Etena nchüngo ekhenthao tüv hungthaka!"
Jisu na Levi Tsala
27 Jisülo Jisu na haphoe chiwole Levi to tsa rangkhyae tsüka ombo lhishüpi khuka vana hungi Jisu na tsacho, "A Phana roa." 28 Tole Levi na topvü valanchi sia ombo phana wocho. 29 Levi na ombo ki Jisu tsükona tokhu tsüphov methakcho. Hojilo tssenkhyae kholuk tona kyon than poe toha onte ndüngo tsoyupheni vanracho. 30 Hojiang yolo Pharasee ejoma tona shikhfü püngnoeden to tssoe Jisu sürüi jiang thüngi rüpvü-rünyoa phyotacho, "Nteno ntiolyui tssenkhyae tona pvüji teri kyon jiang to nzo tsoyutala?" 31 Jisuna janlancho, "Mmhona vamo kyon jiangna mekna nochonoria vamo kyon jiangna tsükzei ethev liala. 32 Ana ntsanrüng jiang khophitoko rocho mek, tolea mmen kyon jiang tsükona rocho."
Ekhang Tsükona
33 Kyon ejoma na Jisu ezocho, "John sürui jiang jina nsansam khangta randanala osi Pharasee sürüi jiang naha hoto benphiala; tolea ni sürui jiango tsoyuala." 34 Jisu na onte ezocho, "Yanpithanpvüi jina tokhu lo eroe jiang yolo evanthüng nandang jo yanpithan tokhu lo eroe jiang khangtokvüke? Jito n tssoche! 35 Kvüthüng yanpithanpvüi jina onte sisi eyiv yuta janasana jithüngti ontena khanguv." 36 Jisu na ejyukayi hetoha onte ezocho, "Kyon ochina ha phokthesü ethan lo rechoe ekye lo n khümkatala. To tssowo ombona phokthesü ethan ji rerochev osi ethan jina ekye lo rav mek. 37 Ochina ha jüpvü ehen lo züniro yeni n vatala. To tssowo züniro jina jüpvü ji tüngrhüpi, zükhi ji ethangi siv osi jüpvü ji roe siv. 38 Jito mek! Züniro jo jüpvü ethan lo yeni vav shikhfü! 39 Kyon ochina ha züran yusi sülo züniro n chokatala. Ombona 'Ehen ji mmhomo' to phyoala."
Esanmung Ji Tsükona
1 Jisuna esanmung tsüngono tsüngonrho li yakchiathüng ombo sürüi jiangna tsüngonrho ethi rakchoe mmyokvüi na mmyae tsotacho. 2 Tole pharasee ejoma na phyotacho, "Nteno ntiolyui esanmung shikhfü yesotala?" 3 Jisu na onte janlancho, "David tona ombo shom to jiangna wontonale kvüto lyucho sana ntena khae n zetachoke? 4 Ombona Potsow ki rhowo vanrhyu hümri, pvüti taena tsokuko ji khi tsosi ombo shom jiangha picho." 5 Jisuna onte ezocho, "Kyontsoe jijo esanmung ji pono ha OPVÜI."
Khechüi Tsüka
6 Esanmung tsüngona loha Jisu na synagogue ki owo püngnocho, osi jilo khechüi tsüka vancho. 7 Pharasee ejoma tona shikhfü püngnoe jiang to tssoe Jisu n lan piv tsükona n lan yanita vancho; jitsükona Jisu na esanmung tsüngono memiyiv sana to ontena cheta vancho. 8 Tole Jisu na onte nchümri ji ntsi khechüi ji ezocho, "Phanthi mhadungi roa." Kyon jina phanthi jilo mangcho. 9 Tole Jisu na onte ezocho, "Ana nte engala, ete shikhfü lona jo esanmung lo ntio tssole to phyoala? Nzanchile to alo, tssatssole to la, Kyon eküm shanchoyi le to alo chüthuk le to la?" 10 Ombona engophi onte zesi kyon ji ezocho, "Ni khe ji yonchia." Tole ombona yonchicho osi ombo ewon ji mmhoncho." 11 Tokhatola onte lüm tsukrae Jisu kvüto lyuyivtav sana to thyuta yicho.
Jisu na Wothung Taro Eni Ethüngala
12 Hojito tssosi sülo Jisu na phunglani ehungo zümo to na randana vancho. 13 Wonchiale ombona sürui jiang tsarhyui onte yolo na otsük taro eni wothung tsswothukvü ethüngchecho: 14 Simon, ombona Peter to tsayio ji tona ombo ojenio Andrew; James tona John; Philip tona Bartholomew, 15 Mathew tona Thomas; Alpheus tsoe James, Simon ombona n vantheo to tsao ji. 16 James tsoe Judas tona yentose Judas Iskariot ji to.
Jisu na Püngnoa Emiyiala
17 Jisu na phunglani na onte nzo. joyi ombo sürüi khosha nzo meta hayiro lo mangcho. Hoji lo kyon khosha, Judea tona Jerusalem meta topvüto lona osi jümang tssae oyan Tyre tona Sidon to lonaha oro vanracho. 18 Ontena ombo püngno engalo tona nochonori jiang onte emiyithuk lo to roracho. 19 Ombo lona etho chiyi onte topvü emiyiajo onte topvü na ombo evüngkav ekhyo tssotacho.
Ematha Osi Nungra
20 Jisu na ombo sürüi jiang zesi phyocho, "Yantsaeden, nte mmhomo; Potsow ekhüngyan jo nte echi! 21 "Enhünga nte wondomo jiang mmhomo; Nte mmhyitokvü!"Nte enhünga ekyae mmhomo; Ntena emav! 22 "Kyontsoe ji myingona oyam na nte tssaka, nte khaksia, yikvüa, n mhom to nte tsathüng mmhomo! 23 Hotothüng jo emathata sharitava, Potsüwoe nte yantso tsüphov vae lia. Onte pyimtsümotsüi jiang na ha zenkhying jiang hoto tssoyicho. 24 "Nte enhünga ejüeli yo kvüta eyuthav ato; Nte eküm mmhomo ji yakthaka! 25 "Nte enhünga mman pyinga evan jiango ekyukthav; nteno nte ontom! "Nte enhünga emaphia evanyo; ekyuthav; ntena emhena kyav! 26 "Kyontsü na ni thanthünga na kvüta ekyuthav ato; ntiotssole onte pyimtsü motsüi jiangna ha ejüng zenkhying jiang hojito thanthüngtacho."
Ori Jiang Nzam
27 "A püngno engaeden, ana nte ezoala, nte ri jiang nzantava, nte etssangkung jiang mmhom tssoyitava, 28 Nte rhiyi randankae jiang mmhayitava osi nte khangshio jiang randanitava. 29 Ochona sana eyo esanawoe ni tümi na phuko jiha tonchia; ochona sana nina khyimcho süji jüpon na tssona phukthesü jiha pia. 30 Ntiosana ni chonio kyon otsük akvü pia osi ochona sana ntiona ni khiyina ti chonlana. 31 Nina oyam khi ntio ni tssoyitok hungana hojito oyam tssoyia. 32 "Ochoangna nte nzana sana ntena jiang tae nzana tssona nte yantso ntio lichola? Mmen kyon na samo na onte nzamo kyon jiang nzanlanala! 33 Ntena mmhom nte tssoyiwo jiang thüngi tae mmhom tssoyia tssona ntio yantso lichola? Mmen kyon na lea hoto jo tssoala! 34 Elani nte pilankhuko kyon jiang tae norürona tssona ntio yantso hunguvla? Mmen kyon na samo na mmen kyon jiang thüngina onte tssenli hunglam jo noala! 35 Jito mek! Nte ri jiang nzantava osi onte thüngi mmhom tssotava; ntia ti-yilona norürontava. To tssona Potsoüwoe nte yantso tsüphov livka, osi nteno Ntssontso Potsow tsoeden tssovka. Ombona n thae jiang osi montsso n pihungo jiang thüngi mmhonala. 36 Nte opona khonzan liato nteha khonzan litava.
Oyam N lan N yani
37 "Oyam n nlan ti yania, tona Potsow na n lan ni n yani; oyam khoe ti sia, tona Potsow naha khoe ni, n si, oyam n lan siyia, tona Potsow na n lan ni siyiv. 38 Oyam pia, tona Potsow na ni piv. Nina phyochüa hunguv osi enhyukphia ni etükiv. Nina oyam etükio ji lona etüki ni pilam. 39 Jisu na ejyuka yi heto onte ezocho: "Mhyikjüng tsüka na mhikjung thanpoe ji olan n soche. ombona sowo woniata sokvüi vanthev. 40 Sürüphan ochia ombo püngnoe lona tsüphokao n van; tolea ombona benria thangshi khithaka na ombo püngnoe ji esüa tssoala. 41 "Nina kvütoli ni shom ji mhyiki kihav ji hungisi ni mhyiki tssüngpvülong ji n wungkhyuala? 42 Kvütoli nina ni mhyiki tssüngpvülong ji tia n hungna ni shom ji "Ni mhyiki kihav ji khi ni siyivkalo' to ezoala? O kyakrüm, ovüngthüng ni mhyiki tssüngpvülong ji khichei sitena, tona ni shom ji mhyiki kihav ji evüi siyiv ntssünga hunguvka.
Odung Tona Ombo Tssüngthi To
43 "Odung mmhom na tssüngthi n mhom n thiala, ji esüa odung n mhom na tssüngthi mmhom n thiala. 44 Odung akvü ombo tssüngthi ji lona chethetala; ntena okyo rhyu lona züwothi n lhoala, mekana okyodung lona jününgrothi n lhoala. 45 Kyon mmhom na ombo lümbüm chungi mmhom jüwo ji lona mmhom chiyitokala. Kyon n mhom na ombo na n mhom hanrhyui lio jilo na n mhom chiyitokala. Ntiotssole lümbümi ejüo ji opüngina chiyiala.
Kitssoe Otsük Eni Ji
46 "Ntena OPVÜI, OPVÜI to atsatasi ntiolyui a lüm rüngcho ji n tssotala? 47 Ochona a thüngi oro a yi enga benphiana – hojijo kvüto tssoa sana ana nte ejüvka. 48 Kyon tsük jijo kitssoe tsüka na olong poni junga tukthei oki tssocho esüa tssov. Jükhyo chiyiale zhükhfü ji tüngrhüpi oki jilo jekacho khatola chüngchünga tsso jina n yacho. 49 Khatola ochona engasi n penphiana jijo tssokaphen njüv bukpa lo tssokacho esüa tssov. Zhükhfü ji tüngrhüpi oki jilo jekae eyae sicho, osi hoji eyao ji epüp tsüpov tssocho.
Jisü na Rom Kyon Tsüphoe Phajae Emiyiala
1 Jisu na shiang hetopvü kyon jiang ezosi Kapernaum lo yicho. 2 Hojilo Rom kyon tsüphoe tsüka phajae ji nochonori lona chüv tae vacho. 3 Tsüphoe jina Jisu yiwon zoe Jihudi eramoe ejoma wothuka oro phajae ji emiyiwo to Jisu tsathukcho. 4 Ontena Jisu thüngi owo heto jonjia ezotacho, "Kyon shina otsotso ni nzan ekhiv etüma lia. 5 Ombona e kyon nzanala osi synagogue ha e tssoyicho." 6 Jisuna onte phana wocho osi oki jamsathüng tsüphoe jina oshom wothuka nduklanchia owo ezothukcho, "Tsüphoeyo, ezüpa ti roa, a ki lo ni sothev a n tümka. 7 Jitsükona apopo oro ni ndukvü ha a n tümvü zechechoka; oyi taena phyochia osi a phajae ji emithuka. 8 Ntiotssole anaha shikhfü tsütsae osi a küpo rasanden vana. Ana tsüka ji woa to ezona ombona woala! tsüka thüngi roa to ezona ombona roala, osi nri ji thüngi 'Shi tssoa!' to ezona tssaola." 9 Jisu na hoji zoe emhukt süngcho. Ombona sülani kyon kholuk jiang thüngoe mmilani ezocho, "Ana nte ezoaka, Israel lo tia longtsü hetata tsüphoe n hunghan!" 10 Ombona jenjia wothuko kyon jiangna elani oki yile phajae ji otsük mmhoni vancho.
Jisu na Emi Tsoe Phanthilanthuka la
11 Jitopvü Jisu na ombo sürüi jiang tona kyon kholuk to onte nzo oyan motsünga Nain to tsao jilo wocho. 12 Ombona yantsü ji pikhfü jan tona echü talüng kholuk chirota vancho ndukcho. Echüo jijo emi tsüka nzantsoro tsonthi tssocho, osi oyan jilo evan kyon khosha na emi ji phana yita vancho. 13 Kvüthüng OPVÜI na hoji hungcho sana ombona elümoto ombo nzana nchümcho, osi OPVÜI na ompvü ezocho, "Tikya." 14 Tosi ombona owo omüng jilo evüngkale ejümo jiangna esancho. Jisu na phyocho, "Khyingroe, ana phyoaka, phanthia." 15 Tole chüthako jina phanthi oyi nsana kümcho, osi Jisu na oyo thüngi ombo yithukcho. 16 Onte topvü na ekhentsüngra Potsow thüngtacho osi phyotacho, "Ete yolo zenkhying tsüphov rothaka! Potsow na ombo kyon shancholo rothaka! 17 Heto etssowo Jisu yithen jina metaji osi hoji nkonjan topvü pyinga yicho.
John Baptio Thüngina Yithenpvüi
18 John sürüi jiangna yithen shi John ezole ombona ombo sürüi otsük eni tsae 19 OPVÜI thüngi heto engalo wothukcho, "Ochosana rov to John na phyo ji ni alo?" 20 Hoji esüa ontena owo Jisu nduki ezotacho, "John baptio na ni ji ombona ochosana tsata to phyoji alo ena thanpoe eyilotav sana to ni engalo e rothukcho." 21 Hoji yutatsük jilo Jisu na kyon elümoto enoera poyia omon n mhom phania, mhyikjüng jiang pochiyicho. 22 Osi ombona John sürüi jiang ezocho, "John thüngi yitava, osi ntena ntio hunga osi zothakcho sana ombo ezotava: mhyikjüng na hungala, jojangna tsachetala; ratsü enoe jiang emiyiala; nobüng jiangna zoala; echüi jiang phanthithukala, osi yithen mmhom ji ezüpa evan kyon jiang thüngi püngnoala. 23 Woewolan n lina a longtsüo jiango kvüta ematha licho ato!" 24 John yithenpvüi jiang yithakale Jisu na kyon jiang thüngi John tsükona ezocho: 25 "Ntena lijüngi John thüngi wotao jijo ntio zelo wotachola? 26 Zenkhying alo? Ho, ana nte ezoala, zankhying lona tsükata. 27 Kyon shi tsükona motsü lona heto phyoala, "Zeta, ana a vüngina a yithenpvüi rwothukvü ka; ombona ni mhadungi na olan ni methakiv." 28 Jisu na ezocho, ana nte ezoala, John jo limhalo kyon vanthakcho yolo tsüphotso ji. Tolea Potsow ekhüngyani jo teritso ji lea John lona tsüphokata. 29 Onte topvü na shi zocho osi tssenkhyae jiang nzo tssoe Potsow lanka jiango elana to khichocho, ntiotssole onte topvü na John bapti ji baptitacho. 30 Tokhatola Pharasee tona shikhfü püngnoe jiang to ochoangna Potsow elhi n khichocho sana jiango n bapticho. 31 Jisu na phyocho, "Aiyo nchüng echungren shilo kyon shiango ntio esüa to ejyukavto? 32 Onteno ngaroden shishopheni motsünga na motsünga thüngi heto khfüta vancho tüv. Kholuk ji ezoala, 'Ena yanpithan khen nte denkata ha ntena n shariala! Ena echü nungra khen denlea ntena n kyatala!' 33 John baptio na etsoyu khanga soko n yuv rocho, tole 'Ombo lo tsüngrham vana' to ntena phyoyicho. 34 Kyontsoe jina etsoyu tssoa rocho tole ntena phyoyicho, "Kyon shi zeta, jakthan osi soko eyui, tssenkhyae tona etssakthao jiang to yenki!" 35 Tolea Potsow nchümri jijo khichoe jiangna jo elanthata to ehungpvüi piala.
Pharasee Kyon Simon Ki Jisu
36 Pharasee tsüka na etsoyu tssolo Jisu tsacho osi Jisu na owo ombo ki tsoyuv khokthecho. 37 Oyan jilo eküm n mhom evan eloe tsüka vancho. Jisu na Pharasee tsüka ki tsoyua vana to ompvüna zoe mozhürhüm mmhom alabaster pvü motsünga bensi oro Jisu jo ndüngo sülamoe na phanthi kya, 38 esüjü na Jisu jo ji mpa lakcheta mangcho. Osi ompvüna ompvü tssan ji khi Jisu jo jiang shukisi ojo jiang ntssüpisi mozhürhüm ji phyangkayicho. 39 Pharasee jina hoji hungi phyocho, "Kyon shijo otssotso zenkhying sawo eloe shijo ochosana osi eküm kvütüv vana sana ombona ntsiv!" 40 Jisu na ombo ezocho, "Simon, ana ntiosana ni ezov lia," Tole ombona janlancho, "Ho, a ezoa OPVÜI." 41 Jisu na ezocho, "Kyon otsük eni na rangnoe thüngi ochi licho. Tsüka na nzo mungo, tsüka na tinyan to. 42 Khatola ontena n locheo jina rangnoe jina n khiyiv sicho. Towo onilo ochona ekyungo rangnoe ji nzamla?" 43 Simon na ezocho, "Oni lo ochi ekyungo jina ekyungo nzam to zecheta." Jisu na phyocho, "Nina elana phyothaka." 44 Tothakale ombona eloe ji thüngoe zechia simon ezocho, "Nina eloe shi hehung? Ana ni ki rhorocho khatola nina a jo epyojü a n pi; tolea ompvüna esüjü na a ephyoyisi, ompvü tssan na a mheyithaka. 45 Nina a n tssüp, tolea ana rhoropvü ompvüna n tümjakna a jo ji ntssüpvü. 46 Nina thyujü orhüm mmhom khi a kvüri a n züyi toa ha ompvüna a jo jiang mozhü na a nzüyithaka. 47 Jitsükona ana ni ezoala, ompvü mmen elüm licho khatola n lan siyithaka, osi ompvüna elüm a nzamo jijo hoji tsükona. N lan siyi ji ochona ejükaro to engatheta sana tara tae nzanala." 48 Tosi ombona ompvü ezocho, "Ni n lan jiang ni siyithaka." 49 Tole ombo nzo tsoyuta vamo jiangna phyocho, "Oyam n lan siyikhuko kyon shijo ocho ato?" 50 Ombona eloe ji ezocho, "Ni longtsü na ni shanchothaka, noyinga yia."
Jisu sü Rüa Eo Eloe Jiang
1 Yuta tara sülo Jisu na yanro osi yantsü jiang yakchia Potsow ekhüngyan ji yithen mmhom ji püngnoa wocho. Ombo sürüi taro eni jiang ha wocho, 2 osi eloe ochoang omon n mhom phania nochonori pochiyicho sana jianglo omon n mhom tiying phanio Mary (Magdalene to tsaoji). 3 Herod küpo tsüphoe Chuza ji eloe Joanna, osi Susanna tona eloe thanpoe khosha ochoangna Jisu tona ombo sürüi jiang to onte ejüeli theta kyochia vancho sana jiang to wotacho.
Mojü Even Lo Ejyukao Ji
4 Oyan akvü lona kyon jiangna Jisu thüngi rorae khosha etssyurhyuale, Jisu na ejyuka yi shi ezocho: 5 "Kyon tsükana owo mojü vena thüng ejoma jo, lanlungi elongthei kyon na sümroe sicho osi oyaki worona khyoe tsoe sicho. 6 Ejoma jo olong poni zhaporo lo elungthei buka ha ochon jilo ojü n jüwo jina mmikae sicho. 7 Ejoma jo okyorhyu lo elungthei okyo nzo phanthi khüptsüngi sicho. 8 Ejoma jo lizü lo elungthei buki rankae mojü tsüng motsünga lo tssüngthi nzoa ren ethiracho." "Hoji tsükona ntena eno bona engae khia! to Jisu na ezocho."
Ejyuka Ji Ethelan
9 Ejyuka ji ntio tsükona ezocho sana to sürüi jiangna Jisu engacho, 10 tole Jisu na ezocho, "Nteno Potsow ekhüngyan ji mphoyi ji ntsiv nte pithaka, tokhatola thampoe jiang thüngi jo ejyukayi na ezoala, onte khi zesi n hungtokvü osi zosi n ngathetokvü tsükona.
Ejyuka yi Ji Yichak
11 "Ejyuka yi ji yichak ji shi: mojü jijo Potsow yiji. 12 Olanlongi elungtheo jijo kyon jiangna motsü ji zoaha onte n longtsükokvü osi n shanchotokvü tsükona tsüngrham jina oro khi siyio ji. 13 Olong poni elungtheo jijo kyon jiangna motsü ji zoe emathata khichosi lümbümi n rheyina oponi tae na longtsüsi ojang yiana ekhüngo ji. 14 Okyorhyui elungtheo jijo motsü ji zoaha ekümo nkhenrak tona ejüeli, ematha eyan to jiangna khüptsüngi tssüngthi jiang n mhentoko ji. 15 Lizülo elungtheo jijo motsü ji zoe lümbümi kenchüngi hansi tssüngthi ethiv nhyaka vamo ji
Luksa Kupi Milon
16 "Ochina ha milon tekae luksa na veni n vatala, mekana jenküpi n vatala, tolea milon ndungpheno ekachi vasi oki rhoroe topvüna wondang ji hungtukala. 17 "Ntio mphoe liana oponi chiyitoka, osi ntio eyuki liana hungtokvü wondangi chiyitokvü. 18 "Jitsükona ntena ntio zoana tongochütava: ntiotssole ochona sana ntiona liana kyongkao piv, osi ochoangna ntia n liana ombona tara lia to nchüma vamo ji mpato khiyiv."
Jisu Oyo Tona Ojenioden
19 Jisu oyo tona ojenioden to jiangna ombo thüngi roaha kyon kholuk jiang tsükona nzo n tssochecho. 20 Ochona sana ombo ezocho, "Niyo tona ni jenioden to jiangna ni nduk hunga hapoe vana." 21 Tole ombona ezocho, "Ayo tona a jenioden to jo kyon ochoang na Potsow yithen ji zoe benphiana jiang."
Jisu na Tsungryu Esantokala
22 Tsüngona lo Jisu na ombo sürüi jiang nzo orhungi khothei onte ezocho, "Etena wozhü shi bankae wotavkalo. Hoji tsükona ontena khochitacho. 23 Ontena eha yiathüng Jisu na yipi sicho. Jitopvü tsungryu roe wozhü ji jephicho osi orhung ji ojüna pyingi ekyuv lia kümi sicho. 24 Tole sürüi jiangna owo Jisu nthechi ezocho, "Püngnoe, Püngnoe! emon kham sala!" Ombona phanthi mbung ji tona ojü ndao ji to nteta makle noyingtsüi sicho. 25 Jitosi ombona sürüi jiang ezocho, "Nte longtsü kvüla?" Onte topvü na emhuka ekhenta phyotacho, "Shijo ochola? mbung osi jükyo ji yizüng pina ontena mpa engayiala!"
Jisu na Omon N mhom Evan Kyon Emiyiala
26 Jisu na ombo sürüiden jiang nzo Galilee na phokowoe na phokowoe Gerasa meta ji chiwotacho. 27 Jisu na orhungi na joyipvü oyan jilo kyon omon n mhom evan tsüka na ombo ndukcho. kyon jina mpensü n kav osi oki n vanhunguv müngsipheni sunga vanthakcho. 28 Ombona Jisu hungale erona evümthei tüngkachicho, "Nino ntiolyui ekhetsüala Jisu, Ntssontsowo Potsow Tsoe? Ana ni thüngi jonjiala, a ti khangria!" 29 Ntiotssole Jisu na omon n mhom ji kyon jilo na chiyile to ezocho. Omon n mhom jina kyon ji yenjo elümoto rhümae khangrio jina ombo ji shenyae nankvü thei nhyakyata vancho. Toaha jiang mpato tüpi omon n mhom jina ombo phana romhoni yitokcho. 30 Jisu na "Ni mying jo ochola?" to engale ombona phyocho. "Legion ka." Ombo lo omon n mhom khosha jüwo jina. 31 Ontena lijüngi onte ti phanthechile to Jisu thüngi jonjitacho. 32 Meta jilo wokoden tsüphov vancho osi woko jianglo onte rheyitokwo to ontena Jisu thüngi chontacho. Tole Jisu na hojito yizüng picho. 33 Omon n mhom jiang na kyon jilona chiyi woko jiang lo rheyile wokoden jiangna phunglani na yanjowoe yongjorae wozhüi santhei rhekhani sicho. 34 Woko rhüki jiangna hoji hungi yungta oyi yithen jina oyan osi meta topvü pyingthukcho. 35 Osi kyon jiangna ntio tssocho sana to sanchuki zetacho. Ontena Jisu thüngi wotale omon n mhom phanithako kyon jina mpensü hansi ntssüng-rünga Jisu jolo khokthei vana hungi ontena ekhentacho. 36 Kyon ji kvütoli emiyicho sana omhyikna ehung jiangna onte ezotacho. 37 Gerasene lo evan topvüna ekhentsüngrae meta jilo na tsanle to Jisu ezotacho. Jitsükona ombona orhungi rhowoe yicho. 38 Omon n mhom phani sithako kyon jina Jisu phana wov choncho, tole ombona heto ezoa yitokcho, 39 "Ni ki oyi OPVÜI na ntio ni tssoyicho sana ji ezoa." Ombona oyi Jisu na ntio ombo tssoyicho sana oyan totona ezoracho.
Jairus Otsolov Tona Jisu Süchüm Evüngkao Eloe ji to
40 Jisu na wozhütssa esanawoe chiyile kyon jiangna ombo nhyakta vamo jina ombo elonchocho. 41 Hojilo Jairus to tsa synagogue esapvüi tsüka rocho. Ombona oro Jisu jo lo vanthei 42 ombo otsolov tsüka nzyu taro eni harüma ji chüvsaka oki role to Jisu thüngi ezocho. Jisu na khochile nken akvü lona kyon na mmhata ombo phancho. 43 Hojiang yolo eloe tsüka nzyu taro eni ejen eshüa evan jücho. Ompvüna eli topvü ezi khana tanünga ha ochina ha ompvü n miyicho. 44 Ompvü na Jisu sülani kholuk jilo rhowoe Jisu süchüm lo evüngkale zakto emi sicho. 45 Tole Jisu na "Ochona a evüngkachola?" to phyocho. Otsük akvü na ekhitale Peter na ezocho, "Püngnoe, kyon na ni hachümi mmhatala." 46 Jisu na phyocho, "Ochona sana a evüngkae etho chiyia ana ntsia." 47 Ompvü ntsithako jina, eloe jina oro Jisu jolo vanthecho. Osi jilo na ompvüna ntio tsükona evüngkacho sana osi kvütolui zakto poe sicho sana topvü mhadungona phyocho. 48 Jisu na ompvü ezocho, "Otsolov, ni longtsü lona emithaka, noyinga yia." 49 Jisu na hojito phyoa vanathüng tsüphoe ji ki na yithenpvüi tsükana oro Jairus ezocho, "Ni tsolov ji chüthaka, Püngnoe ji ti khetsüna sia." 50 Jisu na hoji zoe Jairus ezocho, "Tikyuna longtsüa, ompvü emiyivka." 51 Ombona oki rhowole, Peter, John, James tona ngaro ji opoha oyo oni to tae rhorotokcho. 52 Otsük akvüna ngaro ji tsükona kyata nungratacho. Tole Jisu na ezocho, "Tikyutava, ngaro ji n chüka, ompvüo yipa vancho taeka!" 53 Toaha chüthaka to ontena ntsiwo jina ombo emayitacho. 54 Tole Jisu na okhe lona ngaro ji erükae ezocho, "Phanthia, a tsolov!" 55 Jitopvü ompvü kümchelancho, osi ntio sana ompvü tsoyutokle to Jisu na onte ezocho. 56 Hojina opvüpoe jiang elümoto emhukcho. Tole Jisu na ochia ti ezotale to tangcho.
Jisu na Sürüi Taro Eni Jiang Wothukala
1 Jisu na sürüi taro eni jiang tsarhyui omon n mhom epham tona nochonori emiyiv to etho picho. 2 Osi ombona onte khi Potsow ekhüngyan ji püngnoa osi nochonori emiyithukvü wotokcho. 3 Ombona onte ezocho, "Ntena yen tsatathüng jarung tssolea, chonthephen sükhfü tssolea, etsoyu lea, orang lea elani phukthesü tajo motsünga lea ntia ti hantava. 4 Oki kvülo nte sotheta sana oyan jilo na n yithüng jo nchenkatava; 5 kvülo kyon na nte n khichoa na oyan ji sisi yitava, osi ekyuv cheka esüa nte jompho lo khorü jiang ekhoe sia yitava." 6 Jitsükona sürüiden jiangna khochi oyan jiang yakchia yithen mmhom ji püngnoa eno-era emiyia wotacho.
Herod Hamao Ji
7 Galilee esae Herod na shiang zoe emhukcho; ntiotssole kyon na phyotacho, "John Baptio ji kümchelanthaka." Ejoma na jo Elijah rolancho to phyotacho, 8 osi ejoma na jo nkolo zenkhying jiang yolo tsüka kümchelancho to phyotacho. 9 Herod na phyocho, "John kvüri jo ana khiyichola, phyota vamo shiang jo ocho tsükona phyotato?" Osi ombona Jisu nduki zev yana wocho.
Jisu na Othüng Mongo Ji Tsotokala
10 Wothung jiangna kholani oyi ontena ntio tssocho sana topvü Jisu ezotacho. Jisülo jo ombona onte sosi onte poti Bethsaida yan jilo wotacho. 11 Kyon kholuk jina hoji zoale, ontena ombo sürüa wotacho. Ombona onte sonhyae Potsow ekhüngyan tsükona onte püngnoa osi ethev elio jiang emiyiracho. 12 Eng rhetale sürüi taro eni jina oyi ombo ezocho, "Helo jo yingsü yinglo meta ka kyon jiang yitoki oyan osi oli jianglo etsoyu tona nchenphen to yana yitoka." 13 Tole Jisu na ezocho, "Ntena yani onte tsotoka." Tole ontena janlancho, "Ena hancho jo hümri mongo tona ongo eni to taeka, razhü topvü etsoyu shi lo nina ewothukvü alo?" 14 (Hojilo kyon wothüng mongo aria vancho.) Jisuna sürüi jiang ezocho, "Kyon jiang tinyan na reni khukthetoka." 15 Sürüi jiangna khukthetok thale, 16 Jisu na hümri mongo ji tona ongo eni ji to bensi oyaki zekachia montsso pisi mpvüroe sürüi jiang pia kyon jiang jantayitokcho. 17 Onte topvüna etsson tsotasi sülo sürüi jiangna loksa taro eni khyocholancho.
Jisu Tsükona Peter phyochak
18 Jisu na randana omboti vana thüng sürüi jiangna ombo thüngi rocho. Tole Jisu na onte engacho, "Kyon shiangna jo aiyo ocho to phyotala?" 19 Ontena janlancho, "Ejoma na jo nino John Baptio to phyotala" osi "Ejoma na jo Elijah to phyotala, elani ejomana jo niha nkolo zenkhying jiang yolo tsüka kümchelancho to phyotala." 20 Tole ombona ezocho, "Ntena jo aiyo ocho to phyotala," Peter na janlancho, "Nino Potsow na ethüngcheo shanchopvüi ji."
Jisu na Ombo Ezüp Osi Echü Tsükona Phyoala
21 Shiang shi ochia ti zotale to Jisu na tüngochüa onte ezocho. 22 Ombona heto ha onte ezocho, "Kyon tsoe jina ezüp elüm khiv osi eramoeden, pvüti tsüphoeden osi yizüng püngnoeden jiangna ombo n khichov khoe siv. Ombo chüthukvü tokhatola tsüngon ethüm süle kümchelam." 23 Ombona otsük akvü thüngi ezocho, "Ochona sana a sü rüa rohungna ombona ombobo mhechoe sisi engakvü ombo donphen ji tsakae hansi a sürüa rochev. 24 Ntiotssole ochona ombo eküm ji shancho hunga sana moni siv, tolea ochona a tsükona ombo eküm ji mona sana hoji shanchoala. 25 Kyon ochona sana limha topvü khi vasi ombo eküm ji moni mekana khyothechi siana ntio oman lichola? Ntia oman n li! 26 Kyon ochona sana a tsükona osi a püngnoyi tsükona yikra na Kyon Tsoe jina ha opo tona ntho lanben jiang tona phfütsson lona roathüng ombo tsükona yikrayiv. 27 Ana otsotso nte ezoaka, "Helo evan ejoma, jo n chüthüng na Potsow ekhüngyan ji hunguv ka.
Pvütsson Tungphio Ji
28 Ombona shiang phyosi hopta harümo Jisu na Peter, John tona James to sosi phunglani randanwo chungocho. 29 Ombona randana vanathüng ombo mha ji eze dungphicho. Osi ombo sü jiang tsünglüpa emhümi sicho, 30 Jithüng kyon otsük eni ombo thüngi thyuta vancho. Onio Moses tona Elijah to, 31 potsüwoe phfütsson lona oro Jisu na Jerusalemi na ntio lankawoe na chüi Potsow phfütsson tokvü sana ji ezota vancho. 32 Peter tona ombo shom jiang to jo yipthe vancho, osi ontena yipjungchile Jisu phfütsson ji tona otsük eni ombo nzo mangta vamo jiang to hungcho. 33 Otsük eni jina Jisu thüngi na yiale Peter na Jisu ezocho. "Püngnoe, etena helo vamo ji kvüta mmhoncho ato! Etena süranki ethüm, ni tsükona motsünga, Elijah tsükona motsünga to tssokachitavka." (Ombobo tia ntio phyocho sana n tsicho.) 34 Ombona oyi nsana vanpvüna eluk chiroe onte khümchoe sicho, osi eluk jina onte mhawoe tssoale sürüi jiang ekhentsüngcho. 35 Eluk jilona owon heto tssocho, "shijo a tsoe ana ethüngcheo jika – ombo yi engatava!" 36 Owon ji tümjakale Jisu tae enhyoe sicho. sürüi jiangna yingto tümkae vancho osi yuta jilo ontena ntio hungcho sana jiang ochia n zotacho.
Jisu na Omon N mhom Evan Eboeroro Emiyiala
37 Ojyuato jo Jisu tona sürüi onthüm ji to phunglani na joyitacho, tole kyon kholok tsüphov na Jisu ndukcho. 38 Jilo kyon tsüka na tüngkachia heto Jisu ezocho, "Püngnoe! nina a tsoe tsonthi shi a zechiwo to ana jonjiala! 39 Esüngaro na eronkachia omon na ombo rhümae ombo khangriala osi obüngi na etsyu chiyiala. Heto ombo tssatssoa mungsi n vachiala. 40 Ana ni sürüi jiang ezothaka ha ontena phani n siyichecho." 41 Jisu na janlancho, "Nteno kvütoli heto n longtsütato? Ana nte ndüngo kvütenhya vanchevla?" Jitosi ombona kyon ji ezocho, "Ni tsoe ji helo sosi yia." 42 Ombona yia vanathüng omon n mhom jina ombo evümthetoki ombo eyephicho. Tole Jisu na omon n mhom ji ndesi nungori ji emiyi opo picho. 43 Tole Potsow etho tsüphov ji hungi onte topvü ngangtsüngracho.
Jisu na Ombo Echüv Ji Phyolanala
Jisu na ombo elhi ji kyon na hungi emhoka vanathüng ombo sürüi jiang thüngi ezocho, 44 "Ana nte ezovsa vamo shi ti mhechotava! Kyontsoe ji kyon etho lo khochaki theyiv sala." 45 Tokhatola sürüi jiangna jo ntio etsso phyoasana n tsicho. Otena n ngatheo tssoa onte mphoa vancho, toaha ontena kyuo jina ombo engae n zev vancho.
Ocho Tsüphotso la?
46 Sürüi jiangna onte yolo ocho tsüphotso sana to ekhita chiyicho. 47 Ontena nchümta vamo ji Jisu na ntsi, ngaro tsüka khi ombo ndüngo manga vantoksi onte ezocho, 48 "Ochona ngaro shi a myingona khichoa na a khichoala; osi ochona a khichoa sana a rothuko ji ha khichoala. Ntiotssole nte yolo teritso ji tsüphotsowo."
Ni N palamo Jiangjo Ni Thüngoe
49 John na phyocho, "OPVÜI, kyon tsüka na ni myingona omon n mhom phani sia vancho ena ombo tangcho. Ntiotssole ombo ete razhülo meko jina. 50 Jisu na ombo tona sürüi thanpoe jiang to ezocho, "Ombo tanglanchiv ti wongkhyutava, ntiotssole ochona nte n ryulanchia sana jiango nte echi."
Samaritan Yamo na Jisü N lonchoala
51 Jisu ji Potsowoe khikav yuta janathüng, ombona Jerusalem jiwoe khochiv zenkacho. 52 Ombona yithenpvüi tsüka ovüngna wothuko jina olan taro methaki ombo vayilo Samaritan yan motsünga lo wocho. 53 Tokhatola oyan jilo kyon jiangna Jisu na Jerusalemoe yia vamo jina n khichocho. 54 James ha John onina hoji ntsiale phyotacho, "OPVÜI, ena oyaki na omi tsachoe rungi onte sithukvü alo?" 55 Jisu na kholani onte makcho. 56 Tosi ombona sürüi jiang nzo yanpoe yitae sicho.
Jisu Sürüi Tssohunga Nchümo Jiang
57 Ontena yita vanathüng kyon tsüka na Jisu ezocho, "Nina kvüwoe woana ana ni phanrhüvka." 58 Jisu na ezocho, "Shiali jiangna okvü lira, osi wworo jiangna ha oshüp lia, tokhatola kyontsoe jijo kvüri enghokae esanphen tia nli. 59 Ombona thanpoe tsüka thüngi ezocho, "A sü rüa roa." Tole kyon jina Jisu ezocho, "Tsüphoeyo, oyi apo a juthethuksa." 60 Tole Jisu na ezocho, "Echüi jiang khi echüi juthethuka, nteno owo Potsow ekhüngyan ji püngnotava." 61 Thanpoe tsüka na phyocho, "Tsüphoeyo, ana ni sü rüa rov khatola oyi a wopan thüngi pyontayi a ezothuksa." 62 Jisu na ezocho, "Ochona oli rhomvü sakasanati sülamoe mmilani zechia munga sana ombo Potsow ekhüngyani ethev n li."
Jisu na Ekha Tiyingsieni Ji Wothokala
1 Hoji sülo OPVÜI na thanpoe otsük ekha tiyingsi-eni ethüngchei ombona rhov sa vamo yan jianglo otsük enini na ombo vüngina wothokcho. 2 Ombona onte ezocho, "Oli eriv elümoto liaha hojiang ri hanthei jo elüm mataroa. Elhi etssoe kyungkata rothokvü tsükona lipvüi ji thüngi randantava. 3 Wotava! Ana olyuden esüa ranfü yolo nte wothokala. 4 Rangsükhfü lea, chonthephen sükhfü lea, jokhüp tssolea ti hantava, osi olani na ochia esani ti salümtava. 5 Ntena oki kvülo rhowoa sana ovüng tssoa 'Oki shilo noying litokvüka' to ezotava. 6 Oki jilo noying chokae kyon vana tssona nte noying ji ombo lo lithuka; to mekana nte noying salüm ji khilani hansi yitava. 7 Ontena ntio nte piana tsoyua oki jilo nchentava, ntiotssole elhi etssoe jiangna jokheman ehungüv etüma. Oki motsüngae na motsünga to khyua ti wotava. 8 Ntena oyan kvülo rhowoe nte khichoa sana ontena ntio nte piana tsotava. 9 Oyan jilo enoerae jiang emiyitava osi hojilo kyon jiang thüngi 'Potsow ekhüngyan jina nte tsenkathaka' to ezotava. 10 Ntena oyan kvülo rhowosi nte n khichoa na lantsüi na chiwo heto phyotava, 11 'Nte yan shilo na khorü e jolo rümkao jiang mpato ena ekhoe sia n lan nte piaka. Tokhatola Potsow ekhüngyan ji nte tsenkathaka to engathetava!' 12 Ana otsotso phyoaka yitsso tsüngono jo hoji yantsük jijo Sodom sükhying lona n mhonka tssovka."
N longtsüo Yan Jiang
13 "Ni tsükona kvüta ekhenthao tssov ato Khorazin! Ni tsükona ha kvüta ekhenthao tssov ato Bethsaida! Nte yolo chethev tssoato Tyre tona Sidon to lo tssocho saliwo kyon jiangna nkolo na khoktherae süborak mpentasi, live khi onte bobo thukatasi mmeni na khophiv! 14 Yitsso tsüngono Potsow na nte thüngina jo Tyre tona Sidon to ekyungo khonzam. 15 Elani, Kapernaum! Nino nipopo potsüwoe ni ekhyonka hunga alo? Nino n mhemi ni shümthechivka!" 16 Jisu na ombo sürüi jiang ezocho, "Ochona nte püngno engana a engayiala; ochona khoe nte siana a siala; osi ochona khoe a siana a rothoko ji khoe siala."
Ekha tiying Ji Elani Yiala
17 Ekha tiying jiangna longshita elani oyi phyotacho, "OPVÜI, ena ni myingona yizüng piana omon n mhom jiangna mpato e yi engayiala!" 18 Jisu na ezocho, "Ana oyaki na satan ji potsüo nlüpa to elunga hungcho. 19 Engatava, ntena nrü tona züthem to poni na olan tsalea nte n tssatsso, tolea ori etho ji khyovka. 20 Tolea omon n mhom jiangna nte yi engao jina ti long shitava, tolea nte mying jiang potsüwoe erani lio jina emathatava."
Jisu na Longshyuala
21 Hojithüng Nthomon jina Jisu pyingi longshia phyocho, "Potsow tona limha to OPVÜI! Apo, ana montsson ni piala, ntiotssole nina ntsinran jiang thüngina mphoe vao jiang ntia n tsio jiang ejüthako ji tsükona. Ho, apo ni chokao ji shi tssocho. 22 "Apo na olan topvü a pithaka. Otsoe ji kvütüv sana opo jina yaka n tsi. Osi opo ji kvütüv sana otsoe jina ochoang thüngi ntsithok hungana jiangna yaka ochina ha n tsi." 23 Tosi Jisu na ombo sürüi jiang thüngoe zechia mphoa ezocho, "Nteno kvüta oton lia shiang hunga vancho ato! 24 Ana nte ezoaka, zenkhying osi mesao elümoto na ntena hunga vamo shiang zehunga ha n hungcho osi ntena zoa vamo shiang zohunga ha n zocho."
Samaria Kyon Mmhom Jilo Ejyukao ji
25 Shikhfü püngnoe tsüka na oro Jisu rayav tsükona engacho, "Püngnoe, ana kümali eküm hunguv tsükona ntio etssov lia?" 26 Jisu na ombo ezocho, "Motsü lona kvüto phyoala? Osi nina kvüto khophi khiala?" 27 Kyon jina janlancho, "Ni Pvüi Potsow ji ni lümbüm totona, ni eküm totona, ni etho topvüna osi ni nchümri topvüna nzana; tosi ni phinakishüm ji nibobo nzana to nzana." 28 Jisu na ezocho, "Nina phyo ji elana, hoji esüa tssoa, tona nina eküm vamka." 29 Tole shikhfü püngnoe jina ombobo ntsachev nchüma Jisu engacho, "A phinakishüm jo ochola?" 30 Jisu na heto ejyukata ezoa janlancho, "Kyon tsüka na Jerusalemi na Jerikoe yia vanle retsoreyoe na ombo hayae ombona hancho topvü rei khiyisi talangi echüpünrolo ekachi sisi yitacho. 31 Jithüng pvüti tsükana lantsuk jiwoe jowocho. Khatola ombo na kyon ji hungale phokowoe na rhüi yicho. 32 Jisülo Levi tsüka naha lantsuk jiwoe jowosi kyon ji hungale lanpoe na rhüi yicho. 33 Tokhatola Samaria kyon tsüka na lantsuk jiwoe yentsa oyi kyon ji hungle lümbümi na nzantio to nchümcho. 34 Ombona owo okhfü jianglo mozhü thei yukae hanthoksi, ombo gadho jilo kyon ji tsankathoki nchenki motsünga lo sosi oyi ombo tanüngcho. 35 Ojyuato jo ombona rangpyak eni khichei kinhyang ji pia ezocho, "Ombo tanüngkhe, nina ombo tsükona shilona kyungkata ezina ana lantsuk shi yakchilanathüng ni pilamka." 36 Okhao tssoa Jisu na ezocho, "Ni nchüm jo onthüm yolo ocho jo meyamo ji phinakishüm to nchümala?" 37 Shikhfü püngnoe jina janlancho, "Kyon ochona ombo nzancho sanaji." Tole Jisu na ombo ezocho, to tssona nina ha oyi hojito benphia."
Jisu na Martha ha Mary Oni Janthechiala
38 Jisu tona sürüi jiang to yita vanathüng, ombona oyan motsünga lo chiwole eloe tsüka Martha to tsao jina oki ombo sothecho. 39 Ompvüna oyenio Mary to tsa vancho osi ompvüo OPVÜI jo ndüngo khokthei ombo püngno ji enga vancho. 40 Tole oki elhi kyungtia valanchio jina Martha na n chokav oro phyocho, "OPVÜI, a yenio na elhi topvü a boti tssokachi a sithako jina ni n wongkhyua ke? Oyi a kyochile to ompvü a ezoyia!" 41 OPVÜI na ompvü janlancho, "Martha, Martha! Nino thanpo jo elüm ni wongkhyua vana, 42 khatola lanka motsünga ethelan lihana. Mary jo olan otsotso ji ethüngchei khithaka, osi ompvü thüngina hoji khi hansi n yiche."
Randan Tsükona Jisu Püngnoyi
1 Tsüngona lo Jisu na meta motsünga lona randana vancho osi ombona randanthak tona ombo sürüi tsüka na ombo ezocho, "OPVÜI, John na ombo sürüi jiang randan shika to ena ha randan e shika." 2 Jisu na ezocho, "ntena randanathüng heto phyoa randana: 'Apo: Ni ntho mying ji yikrachi-kyuchithoka; Ni ekhüngyan rothoka. Engakvü e etsoyu ji e pia. 3 Osi e mmen jiang e siyia, Ena hae thüngi worio jiang topvü siyiala. 4 Ojang ekhünguv e ti ndukthoka.' " 5 Tosi Jisuna hetoha onte ezocho, "Nte yolo tsüka na oshom vanle zümolongo owo heto ezowo, 'Oshom, hümri ethüm a noa. 6 A yenki tsüka enhüngati yentsalani na oro a ki vankasi, ana ombo tsotokvü tsükona etsoyu ntia n li!' 7 Tole ombona tachungina janchukchicho, "A ti khetsüa! Oki khanthaka, a ngaro shiangha ana ha yipa vanthaka. Ana phanthi ntia ni n piche.' 8 Ana nte ezoala, Ombo shom tsso jina phanthi piv meklea, kyon jina n yikra na vankae chomo ji tsükona phanthi ombo ethelan ephan piv." 9 "Ana nte ezoala, chona tona nte pivka; yana tona ntena hunguvka; ekhophia, tona kipüng ji nte chonchiyivka; 10 Echon otsük akvü na khiphyatala. Ochona yana sana hungala, ochona ekhophia na kipüng ji chonchiyiala. 11 Nte yolo opo kvütüv na ombo tsoe na ongo chonle nrü pivla? 12 Toalo ombona honojü chonle züthem pivla? 13 Hojito nte n mhom na leha nte ngaro jiang yantso mmhom piv ntsia tssona, Potsowoe evamo nte opo na jo echon jiang thüngi Nthomon ji kvüta kyongkata pihunguvla!"
Jisu Tona Beelzebul to
14 Jisu na eyim kyon tsüka lo omon nmhon vancho ji phani siyia vancho; osi omon jina tsanthakale kyon jina oyi nsancho. Osi kyon jiang topvü ngangtsüngracho, 15 Khatola ejoma na phyotacho, "Shiang phani sicheo ji omon n mhom yolo OPVÜI Beelzebul jina etho ombo piala." 16 Ejomana jo Jisu rachev nchüma, Potsow na etho ombo picho to ntsiv tsükona chethev tssoe ejüle to ezotacho. 17 Tole ontena nchüma vamo ji Jisu na ntsijani ezocho, "Ekhüngyan kvüwoe na chiroe onte onte rota sana sunga n vanala; khosotao wopan jiha pyonrorae siala. 18 Hoji esüa tsüngrham ekhüngyan ji chiroe onte onte rotao kvütoli livla? Ana Beelzebul etho khi omon n mhom phanala to ntena phyoala. 19 Ana hojitoli phana tssona nte sürüi jiangna jo kvütoli phanala? Nte sürüi jiang zena nte ji n lan to zechetala! 20 Aiyo Potsow etho lona omon n mhom phanala, osi Potsow ekhüngyan ji nte lo rothaka to ji shilona ntsiala. 21 "Etho ejüi kyon tsükana ombo ebensü jiang benrisi ombo ki ji nhyaka evanthüng nandang jo ombo ejüeli topvü nkochetala. 22 Tokhatola ombo lona etho jükao kyon na ombo hae khyothechiana ombona enhyikata vamo epensü jiang khiyiala, osi ombona rechowo eli jiang jantarae khiyiala. 23 "Ocho jo a tsükona mekcho sana hojina jo a banlanala; ochona a n hanrhyu-kyoa sana otsotso ombona nzüroe siala.
Omon N mhom Jiangna Elana Yio ji
24 Kvüthüng omon n mhom na kyon lona chiyia sana ombona likying meta yakchia esana vanphen yana yentsala. Osi vanphen n yancheta na ombona phyoala, 'Ana a vanphen jilo yilam.' 25 Ombona elani yiala osi vanphen ji ntssüng-rüngi lia hungala. 26 Jisüi jo ombona chiwo ombo lona ntakao thanpo omon tiying yanphae sosi oyi nzo vantala. Hojito tssoana kyon ji sükhying ji ovüngthüng lona n mhonkao tssoala."
Ematha Tsotso Ji
27 Jisu na hojito phyothakale, kholok jilo eloe tsüka na heto ombo ezocho, Eloe ochona ni buki ni nijüpcho sana jijo kvüta ematha lichoato!" 28 Tole Jisu na janlancho, "Jithüngina jo ochoangna Potsow yi ji zoe benphiana jiango kvüta ematha lichoato!"
Chethev Chomo Ji
29 Kyon jiangna Jisu hazhüale, ombona phyocho, "Nchüngtsüngo no kyon jo hetata n mhonchoke! Ontena chethev yanala, tolea Jonah chethev ji yaka ntia hunguv meka. 30 Zenkhying Jonah ji Nineveh kyon jiang tsükona chekav tsso ji esüa kyontsoe jiha nchüng tsüngono kyon jiang tsükona chekav tssovka. 31 Yitsso tsüngono jo Sheba lo mesali jina phanthi nchüng tsüngono kyon shiang n lan piv, ntiotssole ompvüna ompvü metaena yentsa oro Solomon mesao püngno ji engacho; osi ana nte ezoala, Solomon lona tsükao tüv helo vana. 32 Yitsso tsüngono jo Nineveh kyon jiangna phanthi n lan nte piv; ntiotssole ontena Jonah püngno ji enga onte mmen jiang lona khophicho; osi ana nte ezoala, shilo Jonah lona tsüphokao ji vana!
Otsük Ji Milon
33 "Ochina ha milon tekae mphoe mekana luksa kupi n vatala; ombona oki rhoroe jiang topvü na hungwo tssoa milondung lo ekachi vatala. 34 Nte mhyik jiango nte tsük jiang milon tüv. Nte mhyik jiang mmhona tssona nte tsük mpüm wondangala, khatola nte mhyik jiang n mhon na tssona nte tsük jiang emüngi tssov. 35 Jitsükona nte lo wondang ji emüngi liliana tüngochüngtava, 36 Nte tsük jiang mpüm wondangsi solan motsünga tia emüngi n lia tssona topvü wondang tae tssov, osi milon ji wondang jina nte lo tüngrakatathüng esüa tssov."
Jisu na Pharasee Jiang Tona Shikhfü Püngoe Jiang to Makcho
37 Jisu na oyi nsanrathakale, Pharasee tsüka na etsoyu etsov oki ombo tsao jina ombona rhowo etsov khukthecho. 38 Jisu na okhe n-tsükvü tsov vamo ji Phasasee jina hungi emhukcho. 39 Jitsükona OPVÜI na ombo ezocho, "Nte Pharasee na okong-ophi jiang oponi sütala, tolea nte lümbümi jo jenbukta tona n mhom tona pyingcho. 40 Zhüvaeden, Potsow ochona opon ji nsüngrücho sana jina ochungiha nsüngrüchoke? 41 Tokhatola nte opvü osi ophi lo ntio jüana yantsae jiang pia tona shikhfü ephan nte ntssüngchecho tssovka. 42 Pharaseeden, nte tsükona kvüta ekhenthao ato! Ntena zhüchü rarakhüm osi thanpo yolan halan orhüm mmhom jiang lona tarochia Potsow piala, khatola ntsanrük osi Potsow nzan jijo khachoe siala. Shiang benphisi thanpoe jiangha ntena n khachona benphiv shikhfü. 43 "Pharaseeden, nte tsükona kvüta ekhenthao ato! Ntena synagogue ki vanphen mmhontso ji hoe nte vahungala. Osi lantsüi tona shishopheni na to oyam na yikrachia nte salümvü nte chokatala. 44 Nte tsükona kvüta ekhenthao ato! Nteno olüp chekav n thev licho kyon na n tsina oponi na sanphitacho esüa tüv. 45 Shikhfü püngnoe tsükana ombo ezocho, "Püngnoe, nina heto phyo jina enaha e yikvüala." 46 Jisu na ezocho, "Nte shikhfü püngnoeden tsükona ha kvüta ekhenthao ato! Ntena kyon jiang mankvüi oha mmyinguv n hankhoko ekayiala osi ntena jo yingro motsünga tia yonchi onte n hankyoala. 47 Nte tsükona kvüta ekhenthao ato! Nte motsüi jiangna lüngthao zenkhying jiang olüp mmhom nsüngrüyiala. 48 Jitsükona nte motsüi jiangna ntio tssochosana jilo ntenaha emathayiala to ntena ejüala; ontena zenkhying jiang lüngthale ntena olüp jiang nsüngrüyiala. 49 Jitsükona Potsow nchümri jina phyocho, 'Ana onte thüngi zenkhying tona yithenpvüi to wothokvü osi ontena ejoma jo lüngthasi ejoma jo ntssonshiv.' 50 Jitsükona limha joyingo jilona benkae enhünga nandang jilo zenkhying kvüta lüngthacho sana jitsükona echungren shilo kyon shiang ezüp piv, 51 Abel lüngthao jilona benkae Zakhariah thanphen jiha ntho vanphen ji yuta lona lüngthao ji to nandang. Ho, ana nte ezola, onte tsükona echungren shilo kyon jiang topvü ezüp piv! 52 "Shikhfü püngnoeden, nte tsükona ekhenthao! Ntena ntsinran kipüng chonchiphen ji nte khelo bena, osi ntenaha n rhowo, elani oyam rhowohungo jiangha tanglanchi to tssoala!" 53 Jisu na meta jilona khoe yithakale shikhfü püngnoeden tona Pharasee to jiangna elüm n mhom ombo phyocho phyoriyia, 54 nlamo phyochena rayav tsükona elümto ombo tükoshükvü benkacho.
Kyakrüm Tsükona Ntangshon
1 Kyon othüng othüngna onte sümchita etssirhyuale Jisu na ovüngtssoa ombo sürüi jiang ezocho, "Pharasee jiang ebung mozhü esüa – onte kyakrüm ji ntangshontava. 2 Ntio eyuki liana chonchiv osi mphoe lio jiang topvü oponi chiyiv. 3 Jitsükona, ntena emüngina ntio phyota sana jiang wondangi na zotav, osi ntena kijae na oki khalanchi ntio tssürüta sana jiang ji mhoki ponina tüngta yiv.
Ocho Kyuvla
4 Ana nte ezoaka, a shomden, ochona otsük ji lüngthache si jipomoe ntia n tssochecho sana hoji ti kyutava; 5 Tokhatola ntena ochojo kyuv liana hoji ana nte ejüvka: Potsow kyutava, ombo chü thokcho sülo lea n mheomi thechilamvü etho lia. A longtsütava, ntena ekyuv elio jijo ombo! 6 "Poisa eni na yichiro mongo n shichoa ke? Tolea yichiro motsünga tia Potsow najo n mhecho. 7 Nte kvüritssan jiang mpato zikhani lia. Jitsükona ti kyutava, nteno yichiro khosha lona kyungkata tssentsüman!
Khrista Phyochakvü Osi Khoe Esiv
8 "Ana otsotso nte ezoala, ochona a khichoa nzontsü mhadungona phyochakana kyon tsoena ha ombo tsükona Potsow lanbenden mhadungo phyochakiv. 9 Khatola ochona opon tssoa khoe a siana, kyontsoe jina ha Potsow lanben mhadungona khoe ombo siv. 10 "Ochona sana kyontsoe ji tachia oyi nsanlea jijo nlan siyikhoka; tolea ochona Nthomon ji tachia n mhom phyoana jijo n siyi. 11 "Ontena synagogue ki na osi esapvüi jiang mhadungo na oyi onte tssoyiv nte sosi woathüng, nibobo ntio phyoe tsanchov sana ti wonkhyua. 12 Nthomon jina yuta jiloti ntio phyov sana ni püngnovka.
Ejüelii Zhüvae Ji
13 Kholuk jilo tsükana Jisu ezocho, "Püngnoe, apona ejüeli a vayio ji jantale to a jenio ji ezoa." 14 Jisu na janlancho, "Oshom, oyi nini tsoyiv osi ejüeli nte jantayiv ochona etho a pichola!" 15 Ombona onte topvü thüngi ezocho, "Tajo elüm lan taro lona nte bobo tsanchoe vantava; ntiotssole kyon tsükana emhukthav eli lilea ombo eküm tsotso ji ombo eli jina nsüngrüa mek. 16 Jisu na ejyuka shi onte ezocho: "Eli tsüka na limüng mmhom licho. 17 Tsüngona lo ombona nchümcho, 'Ana joncho rücho shiang hetopvü vachyua oson n lika kvüto lyuv ato? 18 Ombona nchümcho, O ana heto lyuv; 'Ana oson ehen jiang pani tsükata tssoe ana joncho rücho jiang tona thanpo lipo topvüto vav. 19 Tosi abobo ezov, oton eli-i yo! Nina nzyu sunga etsov yanchethaka. Esana tsoa yua longshyua vana.' 20 Tole Potsow na ombo ezocho, "Zhüvae, nchüng zümo ni eküm ji ni khiyiv. Tona nina methaki elio shiang shi ocho echi tssovla?" 21 "Ji esüa ochona ejüeli hanthei vasi Potsow lo ombo ejüeli ntia n lia sana hojijo ji esüa tssov to Jisu na phyocho."
Potsow lo Longtsüa
22 Jisülo Jisu na sürüi jiang ezocho, "Jitsükona ana nte ezoaka, ntena eküm etsoyu ethelan lio ji, osi nte tsük tsükona mpensüv lio jina ti wongkhyutava. 23 Eküm jijo etsoyu jilona elüm opvü tssokata, osi otsük jijo mpensü jilona elüm opvü tssokata. 24 Kyashak jiang zetava: ontena lichen mekana liri n li; osi oson raki ha n li; tolea Potsow na onte süphiala. Tona nteno woro jiang lona kvüta tssentsükachola? 25 Nte ochona sana wongkhyu lona harishi tara rankathokchecho alo? 26 Ntena hoji tia n tssoche na ntiolyui thanpo jiang tsükona wongkhyutala? 27 Zeta, woro pangti thera jiang kvütolyui rankatala: ontena elhi n tsso osi mpensü n süngrü. Toaha ana phyoala, Solomon mesao na tata liaha thera shiang yolo motsünga tia esüo tüv mpensü n li. 28 Orae lomo jiang mpensüthoko ji Potsow na, osi lomo jiango nchüng lisi ojyua jo omi thechi siala. Ombona jianglo na elümoto kyungkata nte n pipoyivke? Nte longtsü jo kvüta matarocho ato! 29 "Jitsükona ntena yuta topvülo nte etsoyu tsükona ti wongkhyutava. 30 Shiang jo 'n longtsüi jiangna opvü tssoa nchümala,' tolea nte tsükona jo shiang ethev lia to nte opo na ntsia. 31 Jithüngona jo ombo ekhüngyan ji tsükona nchümtava, tona ombona shiang hetopvü nte benriyivka.
Potsowoe Ejüeli
32 Ti kyutava okho teriv, nte opona ekhüngyan ji nte piv ematha lia. 33 Nte ejüeli jiang topvü yenkhani orang ji yantsae jiang pitava. Ntena roe n siwo rangsükhfü vatava, osi nte eli jo Potsowoe yanthetava, hojilo jo eli jiang matakav mek, ntiotssole efüi na n rhowoche, ora na ha n yesothokehe. 34 Ntiotssole nte lümbüm ji yuta topvü lo nte eli. jiwoe vatala.
Nhyakyata Evamo Phajaeden
35 Ntio yiana zalanchiv methak-tava, nkanphiv tsükona pipotasi nte milon jiang tekae bentasi, 36 phajae jiangna onte pvüi ji yanpithan tokhu lo wosi tsacho nhyaka esüa vantava. Ombona kipüng ekhophiana ontena tsüsoa kipüng ji chonchiv. 37 Phajae ochoangna onte pvüi yiathüng tsoyoa nhyakcheta sana jiango kvüta ematha ato! Ana nte ezoala, ombona eryu khüngsi tssitsopheni onte khoktheratoki onte tssichi hanchiv. 38 Ombona zümolungo mekana sülankata mpa yilea ontena methaki vancho onte hungwo onteno kvüta ematha ato! 39 Ntena mmhona ntsia kipvüi jina efüi erov yuta ji ntsiwo efüi jina ombo ki ji n rakrhüpche. 40 Ntena methaki vam lia, ntiotssole kyontsoe jina ntena n yilo yuta jilo rov."
Longtsükao Tona N longtsükao To Phajae
41 Peter na ezocho, "OPVÜI, ejyuka yi shijo e tsükona alo? topvü tsükona la?" 42 OPVÜI na janlancho, "Tona ocho jo longtsükao okyak elio phajae la? Hoji jo kipvüi jina oki totona ombo khelo theyia, phajae thanpoe jiang etsoyu zei yuta ebeno pia etssov enhyikatala. 43 Ombo pvüi jina oki yiathüng phajae jina hojito tssoa vanwo phajae jijo kvüta ematha livla! 44 Ana otsotso nte ezoaka, OPVÜI jina oki tsütsaelan topvü phajae ji khelo theyiv. 45 Tokhatola phajae jina OPVÜI ji sunga yentsa si zakto n yiala to nchüma phajae thanpoe jiang, eboe eloe topvü tasi tsohayuha vancho saliwo, 46 OPVÜI jina tsüngona lo ombona na n yilov vanathüng osi yuta ji n tsiathüng yiv, osi OPVÜI jina etakroe ombo sia oyi n ngae phajae jiang nzo ezüp ombo piv. 47 Phajae ochona OPVÜI jina ombo tssothok hungwo ji ntsia ha etssov methaki n vana sana jijo khejak mmyinga tav. 48 Tokhatola phajae ochona OPVÜI jina ombo tssothok hungwo ji n tsiv tara wori ana jijo zükhoroa tav, khosha ehungo kyon ji thüngi na khosha eyiloyiv; osi jilo na kyungka ehungo ji thüngina jo kyungkata eyiloyilam.
Jisu Tsükona Khosota
49 Ana limha ji omi theno rocho, osi hoji kia vanthokcho sawo kvüta a mathavto! 50 Ana Bapti ji ethev lia, osi hoji n yakchithüng jo a etho jakala! 51 Ana limha lo noying hansi yiv tsayia nchüma alo? Mek noying mek, khosota hansi rocho. 52 Enhünga na benkae wopan lo otsük mongo vana tssona, otsük ethüm na otsük eni palamo tssoa osi otsük ethüm na otsük ethüm palamo tssoa khosotayiv. 53 Opo jiangna onte tsoe jiang panlan, otsoe jiangna opo jiang panlan; oyo jiangna onte tsolov jiang panlan; osi orüv jiangna ono jiang panlan to tssov.
Yuta ji Ntsiv Tsükona
54 Jisu na kyon jiang heto ha ezocho, "Ntena engrhe lamoe emhenjü khyingcho hungana eryu jov sala to zakto ntsiala osi joala. 55 Jolowoe ezhü ji vena na ntena elüm rheyiv sala to zakto ntsiala – osi elümala. 56 Kyakrümden! Ntena liko tona oyak to zesi tsünglan ji methechena; tona enhünga yutashi yichak ji kvütoli n chechetala?
Nte Ri Jiang Thüngi Mmyanta
57 "Ntena elamo ji etssov ntiolyui ntebobo etsüngi n zetala? 58 Ochona sana oyi nte shakai yitssopheni nte sosi ona, yitssopheni n chiwotathüng ombo thüngi mmyantae siv etonandang ekhyo tssoa. Nina hoto n tssona ombona yitssoe ji mhadungo ni süsi chiwov, osi yitssoe jina police khelo ni thechiv, osi vüngpheni ni thechiv. 59 Nina ni poisa teritso ji mpato nrhüchoe n lothüng jo hojilo vanchev.
Mmeni na Nkhophina Echü Tssov
1 Jithüng kyon ejoma na Galilee kyon jiangna Potsow khümta vanathüng Pilate na ochoang lüngtharae onte ejen ji othan jianglo nzüi sicho sana ji yilan ombo ezotacho. 2 Tole ombona janlancho, "Galilee kyon ochoangna hojitüv sükying ndukcho sana jiango Galilee kyon thanpoe jiang lona. mmen kyungkata eliden tsayia ntena nchümta alo? 3 Mek, ana onte ezoaka, ntena n khophia tssona, nteha hojiang esüa nte monkhamvü. 4 Toalo nteno Siloam lo mhonki jakjoe otsük taro tiza ejüptsüngo jjiango Jerusalem lo evan thanpoe jianglo na kyungkata n mhom etssoden tsayitala? 5 Mek, ana nte ezoala; nteha n khophia tssona nte topvü jiang esüa nte monkham."
Tssüngthi Nthio Züwodung Ji Ejyuka
6 Ombona ejyuka shi onte ezocho, "Kyon tsüka na ombo phari züwodung motsünga chümi vasi hojilo züwothi yana wole ethi n licho. 7 Tole ombona parhi ejon ji ezocho, "Ana nzyu ethümoto shilo züwothi yano roaha ethicho n hunghan. Odung ji tani sia. Hoji khi liko tsoa ti vantoka." 8 Tole ombona janlancho, 'Tsüphoeyo nchüküm ha to vantoksa, ana hoji nkona rhonkae lizü hankae zevka. 9 Jisüi thüngküm tia ethina mmhona, to n tssona tani sia.'"
Jisu na Esanmung Nchuk Eloe Nbenri Tsüka Emiayiala
10 Esanmung tsüngono Jisu na synagogue ki püngnoa vancho. 11 Hoji lo eloe tsüka omon n mhon na nzyu taro tiza ezüpthoka evan tüv jücho; ompvü ji echen khuki sisi nsa n phanthichecho. 12 Jisu na ompvü tsae ezocho, "Eloe, ni eno era ji mmhonthaka!" 13 Ombona okhe ompvü lo myimkale topvü echen ji nsale Potsow thünga yicho. 14 Jisu na esanmung tsüngono emiyiwo ji hungi synagogue lo OPVÜI jina lüm tsuka kyon jiang ezocho, "Etena elhi etssov tsüngon tiruk liala, jitsükona hojithüng oro nte emiyitoka, khatola esanmung tsüngono mek!" 15 OPVÜI na ombo janlancho, "Kyakrümden, nte otsük akvüna esanmung lo lea nte mangsü mekana kurü ji ranki na lanphei ojü n yuthokake? 16 Tona shilo Abraham tsochen tsüka sadan na nzyu taro tiza chungi lina esanmung lo ombo n vachiv ke?" 17 Ombona hojito ezowo jina ombo ri jiang yikratsüngcho, osi elhi tsüphov etsso jiang hungi kyon topvüna longshyutacho.
Hanyen Tsüng lo Ejyukao Ji
18 Jisu na phyocho, "Potsow ekhüngyan jo ntio esüchola? Ana hoji ntiolo ejyukav ato? 19 Shilo heto ejyukakuka. Kyon tsükana hanyentsüng motsünga oli yingala. Tona hanyendung ji rankae odung kümala osi wworo jiangna hoji khero jianglo oshüp tssoala." 20 Jisu na phyolancho, "Ana Potsow ekhüngyan ji ntiolo ejyutav ato? 21 Shilo etsitakhuka. Eloe tsükana ebung mozhü tara khi omhü chencho loksa ethüm lo nhyontsüi totona bungtsütokcho esüa tüv.
Kipüng Kvüzüpo Ji
22 Jisu na yanro yantsü jiang yakchia püngoa Jerusalem jiwoe yia vancho. 23 Jithüng ochona sana ombo engacho, "Tsüphoeyo, kyon tara tae shancho alo?" Jisu na onte janlancho, 24 "Ntena kipüng kvüzüpo ji yakchiv ekhyo tssotava, kyon khosha na jilona rheyihunga khatola n rheyiche. 25 Kipvüi jina phanthi kipüng ji khanthaka na ntena haphoe mangi ekhophia, "Tsüphoeyo, e chonchia" to ezov tolea ombona phyov, "Ana nte n tsika, nteno kvüwoe na yitachola?" 26 Jithüng ntena ezov, "Nina e hunga ete nzo tsoyutacho, osi nina eyantsü jiang lona püngocho." 27 Tolea ombona nte ezov, "Ana nte n tsika, nteno kvüwoe na yitachola? A ti khetsütava, n thae elhi etssoeden." 28 Jithüng ntena Abraham, Issak, Jakob, tona zenkhying topvüto Potsow ekhüngyani hungsi nteno haphoe tssov osi ntena oho shüngta kyatavka. 29 Kyon jiangna engchirolamoe osi engrhelamoe na, jolowoe na osi khümkiwoe na oro Potsow ekhüngyani tokhu jilo thev. 30 Enhünga sülani evamo jiang ovüngo tssovka osi enhünga ochoang na ovüngi vanchosana jiang sülamo tssovka.
Jisu na Jerusalem Nzamo Ji
31 Jithüng Pharasee ejoma na oro ombo ezocho, "Herod na ni lüngthav ekhyo tssoaka nina helona tsani kvüisana yi sia." 32 Jisu na ezocho, "Shiali ji owo ezoa: 'Ana nchüng tona ojyu tojo omon n mhom phana, emiyia wov osi tsüngon ethümoto lojo a elhi thakvü.'33 Tolea ana nchüng, ojyu tona rajyu tolo a lamoe khochiv; ntiotssole zenkhying jiang Jerusalemi na yaka thanpoe na n lüngthacho. 34 Jerusalem, Jerusalem! Nina zenkhying jiang lüngthacho; nina Potsow yithen hanphi jiang ephyatsüngcho! Ana yenjo kvüta a khena ni kyon jiang khayae, hanpvü na woro jiang echo kupi kheryuato kheryua ha ntena a khanala! 35 Jitsükona ni khümphen kiji sirhaki siv. Ana ni ezoaka, nina 'OPVÜI myingona erowo kyon ji Potsow khi mmhayitoka to ephyov tsüngon ji n janthüng jo nina a hunguv meka.' "
Jisu na Nochonori Tsüka Emiyiala
1 Esanmung tsüngon motsüngalo Jisu na Pharasee esopvüi tsüka ki tsoyulo wocho; tole kyon jiangna ombo cheyata vancho. 2 Kyon tsüka ojo osi okhe jiang bümcho Jisu thüngi rocho. 3 Tole Jisu na Pharasee jiang tona shikhfü püngnoe jiang to engacho, "Esanmung tsüngono emiyiv ete shikhfü ephanina jo lelan?" 4 Ontena jükrüpi sicho. Jithüng Jisu na kyon ji emiyisi yithukcho. 5 Ombona onte engacho, "Esanmung tsüngono mangsü mekana kurü jükhae rhe vanle n sücheo tüv nte yolo jücho alo?" 6 Tokhatola Ontena hoji n janlanchecho.
Teri Eküm Osi Nzan
7 Tsoyulo eroe ejoma na vanphen mmhom yantao ji hungi Jisu na ejyuka shi heto onte ezocho: 8 "Oyam na yanpithan tokhu lo nte tsana vanphen mmhontso jianglo ti vantatena. Nte pomoe tsükao tüv mpato tsae likhuka, 9 toana nte yinganio pvüi jina oro ni ezov, "Vanphen shilo ombo khokthetoka." Tona nino ni yikra vanphen oküpoe khokthechev. 10 Jithüngona jo nte tsana owo oküpoe khoktheta, tona opvüo jina oro ni zokuka, "Oshomyo, vanphen mmhonkao jilo chüngia." Hoji lona kyon jiang mhadungona nina myingthüng hunguv. 11 Ochona ombobo tsüphoa küma sana teritukvü, osi ochona ombobo teri küma sana ombo tsüphothokvü." 12 Jitosi Jisu na OPVÜI ji ezocho, "Nina etsoyu lo osi tokhu lo oyam tsa na, nishom, ni jeni osi opan, mekana phinakiren ejüeli jiang ti tsa – ontena ni tsae ni tsotuklam küma ni elhi man ji hunglani siv. 13 Nina tokhu nsüngrüa tssona, yantsae, n penzi, jojang tona mhyikjüng to jiang tsa, 14 tona ontena ni n pilancheo jina ni mmhayiv, osi kyon mmhom jiang echü lona phanthi tsüngon jilo ti Potsow na ni pilam.
Tokhu Tsüphov Ji Ejyuka
15 Tsota vamo jiang yolo tsüka na shi zoe Jisu engacho, "Potsow ekhüngyani tokhu jilo khotheo jiango kvüta ematha tssovto!" 16 Jisu na ombo ezocho, "Nkolo kyon tsükana tokhu nsüngrüi kyon khosha tsacho. 17 Tsoyuta yuta ji janale ombona phajae jenjia owo tsathokcho, 'Topvü methakthaka rotava.' 18 Tokhatola onte topvüna ndam likhancho. Ovüngo jina phajae ji ezocho, 'Aiyo oli shi liküma hoji owo zev lika nlan a siyia.' 19 Tsüka jina ha phyocho, 'Ana lirhon mangsü etsa mongo shi liküma, hojiang owo rhonphitoki zevsaka n lan a siyia.' 20 Tsüka na ha phyocho, 'Aiyo enhüngati yanpithan tssopancho küma jina n rochetala.' 21 "Phajae jina shiang hetopvü oyi OPVÜI ji ezocho, tole kipvüi jina lüm tsuki phajae ji ezocho, 'Zakto yantsüi owo lanro lantsüi na yantsae, n penzi, mhyikjüng, jojang to jiang ekhfüi sosi yia. 22 Nsungkhünguv phajae jina ezocho, 'Tsüphoeyo, ni yizüng ji benthokthaka osi vanphen lihana.' 23 Tole OPVÜI jina phajae ji ezocho, 'Oyan lani owo lanpvüi osi lanporo jiang lona kyon ekhfüi sosi oyi a ki ji pyingthoka. 24 Ana phyoala, ana tsao kyon jiang tsüka na lea a etsoyu tsophyav meka!' "
Potsow Yamo Ji Man
25 Tsüngona lo kyon khasha na Jisu sü rüa yitathüng ombona engolani onte ezocho, 26 "Ochona a thüngi roana ombona opo, oyo, engh osi ngaroden, ombo jeniden elani oyuloeden osi ombobo lona kyungkata a nzan sanakha a sürüi n tssoche. 27 Ochona ombo donphen hansi a sü rüa n roana a sürüi n tssoche. 28 Nte yolo ochona sana oki tsüphov tssohungo ombona ovüngthüng khokthei oki ji toa orang lelia na etsüngi zetem. 29 To n tssoana ombona kimüng eshencho süi oki ji tssoshuki siv; osi hoji ehung topvüna ombo emakata phyotav, 30 'kyon shina oki tssocho khatola n thakvü sicho!' 31 "Rasan wothüng taro evamo mesao jina ombo ri mesao thanpo rasan wothüng mekyu evan thüngi rotahunga tssona ombona ovüngtssoa khokthei ori ji tetov sana zi zetem. 32 Ombona n tov saka to tssona kona liathüngna yithenpvüi wotoka khyingtae siv. Jisu na oyi ekhachia phyocho, 33 "Hoji esüa nte ochina ha ombona kvüta liana jiang n silanchicho jo a sürüi n tssoche."
Ethev N lio Ma Ji
34 Oma jo mmhona tolea ombo enüng ji monthakana, kvütoli ha n nünglantokche. 35 Jitüv ma jo ochon osi lizü lo tsütsav tia ethev n liala; jitsükona shümthei siala. Ntena eno pona engatava!"
Olyu Momo Ji
1 Tsüngona lo tssenkhyaeden tona oyam na khaki esi jiang to elümoto na ombo püngno engalo rotacho. 2 Tole Pharasee tona shikhfü püngnoeden to jiang na phyotacho, "Kyon shina mmen kyon jiang khichoe nzo tsoyutala!" 3 Jitsükona ombona ejyuka shi onte ezocho: 4 "Nte yolo tsüka na olyu nzoa vanle, motsünga moncho saliwo – ombona ekha tukvüsi tukvü ji romhoni valanchisi motsünga momoji n hungthüng jo yana n wovke? 5 Ombona hoji yanchetana emathata epvüi ejümkachi hansi oki yiv. 6 Osi ombona oshom osi phinakiren jiang tsarhyui ezov, 'A longshikyotava, ana a olyu momo ji hungthaka.' 7 Ana nte ezoala, Hoji esüa khophiv ethev n lio ntsanthoe ekha tukvüsi tukvü jiang vasasi mmen kyon tsüka khophio jilo potsüwoe na kyongkata hojito longshyutav.
Orang Momo Ji
8 "Elani eloe tsüka na jantirang taro lile motsünga monwo, ompvüna milon tekae oki kheei sia orang ji n hungthüng jo n yamke? 9 Ompvüna hoji yanchetana oshom osi phinakeren jiang tsarhyui ezov, 'A longshyukyotava, ana a rang momo ji yanchethaka!' 10 Ana nte ezoala, hoji esüa mmen kyon tsüka khophio jilo Potsow lanben na longshyutala."
Otsoe Emomo Ji
11 Ombona ezocho, "Kyon tsüka na otsoe otsük eni vancho. 12 Tole onilo nungo jina opo ezocho, 'Apo ni eli jiang lona a ejan ji khichei a pia.' Tole ombona eli ji onjeni chitayicho. 13 Nsunguv otsoe nungo jina ombo ejan ji yeni orang ji hansi meta ekoni wocho; osi jilona thama eküm yakchia ethüng ezikhani sicho. 14 Ombona topvü ezikhan tona meta jilo otssi vara rheyi ombo ezüpkachi sicho. 15 Jitsükona ombona metapvüi tsüka thüngi elhi yana wole, woko rhüki ombo tssotokcho. 16 Tole wonton lona woko jak jiang mpato tsohunga ha ochina ha ombo n picho. 17 Jithüngti ombo chüngtsoe phyocho, 'Apo phajae jiango nzonsia tsoyuta vanathüng aiyo hepina khangtsüngi achüla! 18 Ana phanthi apo thüngi elani oyi ezov, apo ana ni mhadungo osi Potsow mhadungo mmen tssothaka. 19 Osi aiyo ni tsoe to etsav tia a n tümvü sithaka. Ni phajae tsüka esüa a vanthoka.' 20 Hojito ombona phanthi opo thüngi yicho. Tole ombona ekoni tsatathüng na opona ombo hungchi nzantio to tssocho; osi yunga oro ombo khayae eyolo ntssüpicho. 21 Otsoe jina ombo ezocho, 'Apo ana ni mhadungo osi Potsow mhadungo mmen tssothaka. Osi aiyo ni tsoe etssov a n tümvü sithaka.' 22 Tole opo jina ombo phajae jiang ezocho.'Zakto!' 'Mpensü mmhontso jiang hanayi ombo hantoka. Yingrüm ombo hantoka osi jokhüp ombo hantoka. 23 Mangsü beleo ji tatsünga etena tsota longshitavka! 24 Ntiotssole a tsoe shi chüthakcho kümlanthaka, ombo monthakcho yanchelanthaka.' Hojito ontena longshitav benkacho. 25 "Jithüng ombo tsoe eramo jina oli wosi yile, oki okhen denta sharita zochicho. 26 Ombona phajae tsüka tsae ntio etsso sana to engale, phajae jina ezocho, 27 'Ni nyuro ji chiyithaka, osi ombona mmhona chiyi nduktao jina nipo na mangsü beleo ji tatsüngcho.' 28 Tole ombo lüm tsuka oki n khothecho. Hoji tsükona opona chiwo ombo enia tsacho. 29 Tole ombona opo janlancho, 'Nzyu hetenhya ana ni phajae esüa vana rothaka osi ni yizüng motsünga tia n ngav n sihan; toaha nina nyanyanro tia a pia a shom nzo a longshyutokcho n li! 30 Osi ni tsoe shina ni ejüeli jiang lonsülonphyo lona thokthechi sisi yile nina ombo myingona mangsü beleo ji tatsüngcho!' 31 Opona ombo ezocho, 'Otsoe,' 'Nino yuta topvülo a ndüngo vanala osi a eli topvü ni echi. 32 Tolea ni nyuro shijo chüthakcho kümlamo jina, osi monthakcho yanchelamo jina etena longshitav licho.' "
Kyakrüpo Linhyang
1 Jisu na ombo sürüi jiang ezocho, "Tsüngon motsüngalo eli kyon tsüka na ombo eli enhyang tsüka vancho. Tole linhyang jina ejüeli n tsütsathiala to eli jina yiwon zocho, 2 jitsükona ombona linhyang ji tsathei ezocho, 'Ana ni yiwon zoa vamo shiang ntio etssola? Nina a eli jiang ntio kvüto tsütsata sana etsüngi a ejüa, enhungo a linhyang ni tssotokvü meka.' 3 Tole phajae jina nchümcho, 'A pvüi shina elhi a n tssotokna aiyo kvüto lyuvto? Ana liko la n rhonkhok elani chontsov ha yikra lia. 4 Jitsükona ana heto lyuv! Tona a elhi ji monlea ana a zethechiphen oshom vam.' 5 Ombona ombo pvüi ji thüngi ochi epiv lio kyon jiang tsarhyucho. Ombona ovüngo ji engacho, nina a pvüi ji kvüta piv lia? 6 Tole 'Olive thyujü ojen nzoa' to ezocho. Tole ombona, 'Khokthei tinyan tae erani vata' to ezocho. 7 Thanpoe tsüka ha engacho, 'Nino - kvüta epiv lia?' Ombona 'Omhüm chencho ojen wothüng motsünga' to ezocho. Tole linhyang jina 'Nzo tiza tae erana' to ezocho. 8 "Jitsükona kyakrüpo linhyang shi pvüi jina elhi n mhom shi tsükona kyakrüp linhyang ji omying thüngicho; ntiotssole limha sükhying tsütsav tsükona jo wondang kyon jiang thünginajo limha kyon jiang kyakrüpo tssoala." 9 Jisu na phyolancho, "Jitsükona ana nte ezoala: limha eli jiang khi oshom yanthetava, tona ntena jiang sisi yilea kümali ki jilo nte sothev. 10 Ochona teriv lo longtsüka liana tsüphov loha longtsüka liv; osi ochona teriv lo longtsüka n liana tsüphov lo ha longtsüka liv mek. 11 Hojito ntena limha eli tsütsav lo longtsüka n lina kvütoli eli tsotso tsütsav nte zikavla? 12 Osi nte ji oyam tsütsaelan tsütsav lo nte n longtsükakuk na ochona nte echi nte pivla? 13 "Phajae ochina ha OPVÜI otsük eni nri n tssoche; ombona tsüka tssaksi tsüka nzam; ombona tsüka jancho zosi tsüka jo sinkiv. Ntena ejüeli tona Potsow to n benkatsüche."
Jisu Püngnoyi Ejoma
14 Pharasee jiango orang jüponden tsso jina shi zoale ontena Jisu thüngi erenjantacho. 15 Jisu na onte ezocho, "Nteno oyam khi elamo nte zechethungden, tolea Potsow na nte lümbüm ntsia. Ntiotssole kyon na tssentsü tssotoko jiango Potsow mhadungo jo ntia mek. 16 Moses shikhfü osi zenkhying kako jiang ji John Baptio tsüngon nandang etho lia vancho; jilona benkae Potsow ekhüngyan yithen mmhom ji püngnothaka osi otsük akvü na hojilo rheyiala. 17 Tolea shikhfü jilo yitsüga tia ejüng kümtokvü jo linha osi oyak shi mom ji elao. 18 Kyon ochona ombo eloe sichisi eloe thanpoe soa vana sana jina efürama benphiala; elani ochona oyam na sichio eloe ji soa vana sana jina efürama benphiala.
Eli Kyon ji Tona Lazarus to
19 "Tsüngonalo eli tsüka mpensü etssükvü tae hansi engakvü etsson eküm lo vana vancho. 20-21 Osi yantsae Lazarus to tsa tsüka emho taena otsük pyingcho jiha engakvü eli ji tsoyupheni na etsoyu lungjo lungtük eyiloa kipüngo woa vancho. Osi füro jiangna oro ombo emho jiang mmyakitacho. 22 Yantsae jiehüale lanben na sosi potsowoe tokhu jilo Abraham ndüngo khokthetokcho. Eli kyon ji chüale juthei sicho, 23 0si ezüp nungra vanphen echüli oyi ekya nungralo vancho osi ombona ekoni zekachile Lazarus na Abraham ndüngo vana hungcho. 24 Tole ombona tüngkachicho, 'Apo Abraham a nzankhüngsi Lazarus khi yingro lo ojü tssyukae oro a nnli lo a tssyukayitoka, omi shina a rungroala!' 25 "Tole Abraham na ezocho, 'A tsoeyo, nchümi zeta, ni eküm evanthüng jo mmhom topvü ni picho, osi Lazarus jo n mhom jiang khicho. Jitsükona ombo enhünga jo emathata vanala, tolea nino enhünga jo ezüpi vanala. 26 Totae mek, e tona nina evamo ji to yutalo sokvü ejunguv lio jina ena pankae ni thüngi n roche, osi ntena vamo ji na ha ochina ha ethüngi n roche.' 27 Eli jina phyocho, 'Apo Abraham, toka ana jonjiala, Lazarus ji apo ki a jeniden otsük mongo vamo jilo wothoka. 28 Ontena tia nungra vanphen shilo n yitokvü tsükona owo ombo püngotoka. 29 "Abraham na ezocho, 'Ni jeniden jiang ndangshontokvü tsükona Moses tona zenkhying jiangha to vana. Ontena ntio phyoana ni jeniden jiangna engav shikkfü.' 39 Eli jina janlancho, 'Hojina jo n penda apo Abraham, ochona sana echü lona kümlani owo püngno na ontena mmeni na khophiv.' 31 Abraham na ezocho, 'Ontena Moses tona zenkhying to jiang yi n'ngayia tssona echü lona ochona sana phanthi wolea engayiv mek.'"
Mmen
1 Jisu na ombo sürüi jiang ezocho, "Mmeni kyon süthechio sükhying lira, tolea ochoang yakchia hotüv sükhyingo rheyiana jiang tsükona jo ekhenthao! 2 Ochona teri shiang yolo tsüka tia mmen rhükatuka sana ombo evüngo longpyak khüngkayisi jümangi shümthechi ombo siwo ji mmhomo. 3 Ji tsükona ntangshona! "Ni jenio na mmen tssona püngnoa osi ombona khophina n lan siyia. 4 Ombona eng-a lo yenjo tiying n lan tssona, osi hoji akvü ni thüngi oro, 'Ana khophiala' to ni ezona, nina n lan siyiv shikhfü."
Longtsü
5 Wothung jiangna OPVÜI ji ezocho, "Longtsü e rankayia." 6 OPVÜI na janlancho, "Ntena longtsü hanyentsüng tera tia lio tssüngthidung shi 'Nipopo oyingina rukchei rheyi jümangi ehüma!' to ezolea ni engayiv.
Phajae Ji Elhi
7 Nte yolo tsüka na phajae tsüka vani hojina oli rhona mekana olyu rhükia vansi, ombona oli na yiana zakto oyi etsoyu tssole to ezov alo? 8 Mek! jithüngina jo ntena ezoala, 'A etsoyu a methakia, osi osü ryuphansi a nhyaka a tsoyutoka; tosanati nina tsoyua.' 9 Phajae jina yizüng engao ji motsson epiv n tüm, na nüng? 10 Nteha ji esüa tüv, ntio etsso nte zikacho sana jiang tssorathakna, ntena 'Eiyo phajaesha tae, ena ejan elhi tssocho tae.' to phyotala.
Jisu na Otsük Taro Emiyiala
11 Jisu na Samaria tona Galilee to erü yakchia Jerusalemi yia vancho. 12 Ombona oyan motsüngalo rheyia vanle ratsü enoe otsük taro na ombo ndukcho. Ontena tara kona liathüng na 13 esani phyotacho, "OPVÜI Jisu! Khonzan to etssoyia!" 14 Ombona onte hungale ezocho, "Pvüti jiangna nte hungtuka owo ejütava." Ontena yita vanathüng onte topvü emikhani sicho. 15 Onte yolo tsüka na ombo emithako ji ntsiale elani owo tüngkachia Potsow pkhfütssontukcho. 16 Osi Jisu jolo ephyakthei montsson picho. Osi ombo Samaritan kyon tssocho. 17 Jisu na phyocho, "Otsük taro emiyicho mekchoke? Otsük tukvü jo kvüla? 18 Pvüjipoe shi taena oro Potsow mying thüngala? 19 Jisu na ezocho, "Phanthi yia; ni longtsü na ni emiyithaka."
Ekhüngyan Ji
20 Phajae ejoma na Potsow ekhüngyan ji kvüthüng rov sana to Jisu engacho. Ombona ezocho, "Potsow ekhüngyan ji ehungo tssoa rov meka. 21 Ochina ha heloka zeta, ojilo je to n phyota!; ntiotssole Potsow ekhüngyan jo ntelo jüa." 22 Ombona sürüi jiang ezocho, "Ntena kyontsoe ji tsüngon jianglo tsüngona tia nte vanhunga nchümvü khatola ntena n hungo yuta yiv. 23 Ochoangna sana nte ezov, 'Ojilo ka zeta! Shiloka zeta!' to nte ezov khatola owo ti zetava. 24 Ombo tsüngono jo kyontsoe ji Potsüwo nlüpathüng oyak shi tüngratsüa, nken esanawoe na esanawoe rakachia to tssov. 25 Tolea ovüngthüng ombona ezüp elümoto khia ombo echungreno kyon jiangna khoe ombo sitem. 26 Kyontsoe ji tsüngono ha Noah tsüngono esüa tssovka. 27 Noah na orhung jilo rheyi yuta jana kyon jiangna tsota, yanpithan tssota vansi ojü jina onte monthukcho. 28 Jithüngha Lot tsüngon esüa tssovka. Otsük akvüna tsoyuta, shishota, benro-nirota, sontssokitssotacho. 29 Lot na Sodom yantsü lona khochuko tsüngon jilo na benkae oyakina omi tona sheryu to joe onte chüracho. 30 Kyontsoe ji oponi chiyia hungthuk tsüngon jilo ha hojito tssovka. 31 "Hoji tsüngono ochona mhonki vana na ombo kikyo khilo oki joyiv n li; Hoji esüa ochona oli owo vana sana jina ha oki yiv n li. 32 Lot engh ji nchümi zeta! 33 Ochona ombo eküm ji shanchov nchüma sana hoji moni siv; ochona ombo eküm ji mona na hoji hungu. 34 Ana nte ezoala, zümo jilo belüng motsünga lo otsük eni yipta vanlea tsüka hansi yisi tsüka jo valanchiv. 35 Eloe otsük eni otssuk tssüta vanlea: tsüka hansi yisi tsüka jo valanchiv." 36 Kyon nchyu eni oli elhi tssota vamvü tona tsüka ji sosi yisi tsüka jo valanchiv. 37 Sürüi jiangna engacho, "Kvüila OPVÜI?" Jisu na janlancho, "Kvülo echümüng liasana jilo müngtsovden sanrhyuala."
Emi Ji Tona Yitssoe Ji to Ejyuka
1 Kyon jiangna etho ejak n lina yuta topvülo randam lia to püngnov tsükona Jisu na ejyukayi shi ezocho. 2 "Oyan motsünga lo yitssoe tsüka Potsow ha n kyu, kyon ha n kyuto tüv vancho. 3 Oyan jilo emi tsüka vancho jina nchukaben oro ombo ezocho, 'A n lümrao jiang thüngi a elan a yania!' 4 Tole ombona tara ekhirana vansi sülani jo nchümcho, 'Ana Potsow n kyuv osi kyon n yikralea, 5 Emmi shina a khetsüo ji ntang tia lanka yanivka. To n tssoana ompvü na oro a khetsütsüngi siv!' " 6 OPVÜI na ezocho, "Ntsanrük n lio yitssoe jina phyo shi enga. 7 Potsow na ombona ethüngcheo kyon jiangna zümo eng kyao ji hungi elan n tsoyivke? Ombona onte nzanchiv zünyoa vam alo? 8 Ana nte ezoala, ombona zakto elan onte yaniv. Tolea kyontsoe jina roathüng ombona limha shilo longtsüi hunguv alo?
Pharasee Tsüka Tona Tssenkhyae Tsüka Tolo Ejyukao ji
9 Kyon ochoangna ontebobo ntsanthoa nchümsi oyam jo tssaka sana jiang thüngi Jisu na ejyuka shi ezocho. 10 'Tsüngona lo Pharasee tsüka tona tssenkhyae tsüka to khümpheni randanwo chungotacho. 11 "Pharasee jina zakachi heto randancho, Potsow, ana montsso ni piala, ntiotssole nina oyam tajo elüm osi münghan, efüramae mekana shilo tssenkhyae vamo shi esüa mekvü a lyuyingcho. 12 Ana hopta lo yenjo eni khangala osi ana ntio hungana jilona tarochia thanala.' 13 Tole tssenkhyae jijo eloncheta mangi omha tia n khokana teki shüngphia phyocho, Potsow, mmen kyon a hetüv nzantio to tssoa!' i4Jisu na phyocho, "Ana nte ezoaka, Pharasee ji mek tolea tssenkhyae jina Potsow emathathoka ntsachei oki yicho. Ochona ombobo tsüphov küma na teritokvü osi ochona ombobo teri küma na tsüphotokvü."
Jisu na Ngaro Jiang Mmhayiala
15 Kyon jiangna onte nganiro jiang mpato Jisu khi mmhayitokvü sosi rotacho; tole Jisu sürüi jiangna hungi onte maktacho. 16 Tolea Jisuna ngaro jiang ombo thüngi sosi rothukle to ezosi phyocho, "Ngaro jiang a thüngi rotuka. Onte ti khalanchia, ntiotssole Potsow ekhüngyan jo shiang esüa jiang echi. 17 Ana otsotso nte ezoaka shi nehümehetava, ochona Potsow ekhüngyan ji ngaro esüa tssoe n khichoa na hojilo n rheyiche."
Ejüeli Ji
18 Jihudi esopvüi tsüka na Jisu engacho, "Püngnoe mmhomyo, ana kümali eküm ehunguv tsükona jo ntio etssov lia?" 19 Jisu na ezocho, "Nino ntioli mmhom to a tsala?" "Potsow yaka ochia mmhom n van. 20 Yizüng jiang nina ntsia, "Rama ti tssoa, omüng ti hana, ti füa, ejüng ehungpvüi ti tssoa, nipo tona niyo to yikrachi kyuchia." 21 Kyon jina janlancho, "Shiang hetopvü a nungo ekümona benphithaka." 22 Jisu na hoji zoe ombo ezocho, "Nina motsünga n tssojan han, nina ntio liana topvü yeni orang ji yantsae jiang jantayia tona nina Potsowoe ejüeli livka; tosi a sürüa roa." 23 Ombo eli-i tsso jina ombona shi zoale nungratsüngcho. 24 Ombo nungrao ji Jisu na hungi phyocho, "Ejüeli jiangna Potsow ekhüngyani rheyiv jo heto khüngchoke! 25 Elii tsüka na Potsow ekhüngyani rheyiv jo odh na opyim kvüi na beta chiyiv ji elao." 26 Hoji ezoe jiangna phyocho, "Tona ochoang shanchovto?" 27 Ombona ezocho, "Kyon na n tssocheo jiang Potsow na jo tssocheta." 28 Peter na phyocho, "Zeta! ena oson oki silanchia ni sü rüa ka eiyo kvütola?" 29 Jisu na onte ezocho, "Ho, ana otsotso phyoaka, ochona Potsow ekhüngyan ji tsükona oson oki, tsoeni, potso-jeni, opvüpoe osi ngaroden silanchia sana, 30 ontena echungren shilona elan elani oman hunguv, echungren etsao jilo ha kümali eküm hunguv."
Jisu na Ombo Echüv ji Yenjo Ethümoto Phyoala
31 Jisu na sürüi taro jiang eloncheta sosi owo ezocho, "Engatava! Eteno Jerusalemi yitala, osi kyontsoe ji tsükona zenkhying jiangna phyoe lio jiang topvüto jilo na benkham. 32 Pvüjipoe jiang khelo ombo theyiv osi jiangna ombo emakav, yikvüa osi nphukav. 33 Ontena ombo erhüpa ombo chütokvü khatola tsüngon ethüm sülo jo kümchelam." 34 Tokhatola ombona ntio phyocho sana sürüi jiangna n tsicho; oyi jiang yichak ji onte thüngina mphoe lio jina Jisu na ntio phyocho sana ji ontena n tsicho.
Jisu na Chontsoe Mhyikjüng Emiyiala
35 Jisu na Jeriko ndüngo chiyile, mhyikjüng tsüka chontsoa evan tüv ndukcho. 36 Ombona kyon jiang nshata ji zoe, "Shijo ntiola?" to engacho. 37 Ontena ombo ezocho, "Nazareth yamo Jisu na yakchiala." 38 Tole ombona tüngkachicho, "David tsoe Jisu! Nzantio to a tssoyia!" 39 Mhadungi kyon jiangna yingto vanle to ombo makcho. Tole ombona ekhyokata tünglancho, "O David tsoe! Nzantio to a tssoyia!" 40 Ji tsükona Jisu na esancho, osi mhyikjüng ji ombo thüngi sosi role to ezocho. Ombona enhyana roale Jisu na ezocho; 41 "Ana ntio ni tssoyiv wo to nina nchümala?" Ombona janlancho, "Tsüphoeyo, ana hunglano to tssoala." 42 Jisu na ombo ezocho, "Tona zeta! Ni longtsü jina ni emithaka." 43 Jitopvü ombona hungcho, osi ombona Potsow montsson pisi Jisu phanphicho. Kyon kholuk jiangna hoji hungale Potsow thüngtacho.
Jisu Tona Zakheus to
1 Ombona Jeriko lo rhowoe yakchia yia vancho. 2 Hojilo zakheus to tsa tssenkhyae tsüphoe ejüeli tsüka vancho. 3 Ombona Jisu zehunga ha kyon kyungtio jina osi ombo ekaro jina n hunguv vancho. 4 Jitsükona ombona Jisu eyilamoe owo tssüngthidungo tsankae vancho. 5 Jisu na hoji oyi janale zekachisi ezocho, "Zakheus, zakto jeyia, nchüngo ana ni ki nchemka." 6 Zakheus na zakto jeyi ematha tsünga ombo sothecho. 7 Hoji ehung kyon topvü na, "Ombona mmen kyon ki ncheno yithaka." to phyocho phyoritacho. 8 Zakheus na jilo phanthi OPVÜI thüngi ezocho, "Enga, Tsüphoeyo! Ana a ejüeli jiang chisoe yantsae piv, osi ana ochosana tajo khiyicho lina tata mezhü ombo pilam. 9 Jisu na ombo ezocho, "Shanchov ji oki shilo nchüng rothaka, ntiotssole kyon shiha Abraham tsoronichen. 10 Kyon tsoe jina momo yiang yani shancholo rocho."
Shona Rang Jianglo Ejyuka
11 Kyon jiangna engata vanathüng Jisu na oyi ejyuka motsünga heto ezocho, ntiotssole ombona Jerusalem jana vanthakcho osi kyon jiangna Potsow ekhüngyan ji echunga taena rov tsayita vancho. 12 Ombona ezocho, "Tsüphoe tsükana mesao etssov etho khilo meta ekoni yentsalo wosi elani yio tüv licho. 13 Ombona khochi n vothüng phajae otsük taro jiang tsarhyui shona rang motsüngtsüng ekhentayisi ezocho, 'Ana n yithüng nandang jo kvüta khakchov sana shishota vantakhe." 14 Tolea ombo meta kyon jiangna ombo n jübomo jina ombo sürüa yithenpvüi wotoka ezocho, 'Kyon shina e mesao etssov ena ematha n li. 15 Ombona mesao etho hungi hansi elani oki yiale, ombona orang pio phajae jiangna kvüta khakchorae licho sana to zeyiv tsükona tsarhyucho. 16 Tole ovüngo jina oro phyocho, 'Tsüphoeyo, ana ni rang jina shishoe taro kyungkatoki lia.' 17 Ombona ezocho; 'Mmhom elhichethaka phajae mmhom! Nina ejükaro lo longtsüka lio ji tsükona yantsü taro pono etho ni piala.' 18 Enioto jina oro phyocho, 'Tsüphoeyo, ana ni rang jina shishoe mongo kyung katoki lia.' 19 Hoji ha ombona ezocho, 'Niha yantsü mongo pono OPVÜI tssoa.' 20 Thanpoe jinaha oro phyocho, 'Tsüphoeyo, ni rang ji ana osüna yui ekachi vancho shije.' 21 Nino tanrük hanrüko kyon tsso jina nina n thecho lona khichetala, osi nina n chencho lona rio jina a kyucho.' 22 Tsüphoe jina ombo ezocho, 'Phajae n mhom, ana ni püngina chiyio yi jina ni etsivka! Nina phyocho aiyo ana n theo jiang lona khichetala osi ana n chemo jiang lona riala nüng. 23 Tona ntiolyui a rang ji rangvapheni vae, ana yiathüng eran phata a n khitukchola? ' 24 "Ombona jilo vamo jiang ezocho.'Orang ji ombo khiyia osi taro elio kyon ji pi sia. 25 Ontena ezocho, 'Tsüphoeyo, ombo rangpyak taro lia!' 26 Jisu na ezocho, "Ana nte ezoala, ochona ntio lia na kyungkata ombo piv; osi ochona ntia n liana ombona lio ji mpata khiyiv. 27 Osi a ri ochoangna onte pono mesao a n tssotokcho sana jiango helo sosi oyi enhünga a mhadungona onte lüngthakana!' "
Jerusalemi Ekhyo Khia Rhowo Ji
28 Jisu na hoto phyosi onte vüngina Jerusalemi khochicho. 29 Ombona Olive phunglan jilo Bethphage tona Bethany to janale, sürüi otsük eni ovüng na wothuka ezocho, 30 "Nte mhadungi oyan jilo wotava, tona ntena gadho ro ochinaha n tsanka han tüv sheni lia hunguvka; hoji lanphe hansi yitava. 31 Ochona sana ntioli lanphetala to phyona, OPVÜI na ethev lichoka to ezotava." 32 Ontena wotale Jisu na onte ezo ji esüa hungcho. 33 Ontena gadho ro ji lanpheta vanle, gadho pvüi jina, "Nteno ntioli hoji lanpheta la?" to engacho. 34 Ontena "OPVÜI jina ethev licho" to janlansi gadho ji Jisu thüngi hansi yitacho. 35 Osi onte mpensü jiang gadho ji poni ephfükae Jisu khokthethukcho. 36 Ombona tsankae yia vanathüng kyon jiangna onte mpensü jiang olani sayitacho. 37 Ombona Jerusalem ndüngo Olive Phunglani na joyio lan ji janale, ombo sürüi kholuk tsüphov jina Potsow elhi tsüphov ntio hung thakcho sana hoji tsükona tüngkachia heto Potsow thüngtacho: 38 "OPVÜI myingona erowo mesao ji Potsow khi mmhayithuka! Potsowoe noying lithuka osi Potsow phfütssonthuka!" 39 Kholuk jilo Pharasee ejoma na ombo ezocho, 'Püngnoe, ni sürüi jiang maka!" 40 Tole Jisu na janlancho, "Ana nte ezoala, ontena yingto vanlea olung shiangna tüngkachiv benkav."
Jisu na Jerusalem Kyakatala
41 Ombona yantsü ji jan-edüngale, hoji zechisi heto phyoa kyacho, 42 "Nina noying ji tsükona ntio ethev licho sana ji nchüng ntsio! Tolea enhungo nina hoji n hung! 43 Tsüngona lojo ni ri jiangna ni hachümi nken akvüna ni ntsükyae ni ekvüzhüv. 44 Ontena ni osi ni pikhfü chungi kyon jiang monkhanthokvü, osi ontena olung motsünga tia ombo lipheno litokvü mek. Ntiotssole Potsow na shi shanchov rotoko ji nina n chethecho!"
Jisu na Khümpheni Wocho
45 Jisüi jo Jisu na khümpheni owo shishoe jiang phani sia phyocho, 46 "Potsow na heto phyocho to Motsü lo erani lia, 'A khümphen jo randanki to tsav.' Tokhatola ntena efüi tsanthephen kümtokala!" 47 Jisu na engakvü khümpheni na püngnocho. Tole pvüti tsüphoeden, shikhfü püngnoeden osi kyon jiang esopvüiden to jiangna ombo lüngthahungcho, 48 Khatola kyon topvüna ombo yi jiang yitsünga tia nkhyae n sihunguv engata vamo jina ontena lanka n hungcho.
Jisu Etho Tsükona Engao Ji
1 Tsüngonalo Jisu na khümpheni na kyon jiang püngnoa yithen mmhom ji püngnoa vanathüng pvüti tsüphoeden, shikhfü püngnoeden tona eramoeden to na chungro ombo ezocho, 2 "Nina ntio etho lona shiang tssoa sana e zoa. Ochona etho shi ni pichola?" 3 Ombona janlancho, "Ana ha ntiona mte engavka a janlantava, 4 John na baptiyio jijo kyon thüngina alo Potsow thüngi na la?" 5 Tole ontena emhukta phyotacho, 'Etena Potsowoe,' na to phyoana ombona, 'Tona nteno ntiolyui John n longtsüchola?' to phyov. 6 Elani etena 'Kyon thüngina,' to phyoana kyon topvüna e phyatsünguv, ntiotssole John ji zenkhying to ontena zekacho." 7 Jitsükona ontena kvümoe na sana ena ntsi to janlancho. 8 Tole Jisu na onte ezocho, "Tona ana ha ntio etho lona shiang tssoa sana nte n zola."
Jününgrothi Li Ejon lo Ejyukacho
9 Ombona ejyuka shi kyon jiang ezocho, "Kyon tsüka na jününgro li joni lijonden khelo vayisi yentsalo meta ekoni yuta sunga woe sicho. 10 Tssüngthi elhov yutalo ombona ombo ejan ji khilo phajae tsüka lijon jiang thüngi wothokcho, tole lijon jiang na ombo tasi khejüng yikra yithokcho. 11 Elani ombona phajae tsüka wothuklanle; hojiha tasi khejüng yikra yithokcho. 12 Elani otsük ethümoto wothukle ontena okhfü mpayia phani sicho, 13 Jisüi jo lipvüi jina phyocho, 'Aiyo kvüto lyuvla? Ana nzantsoro tsüka ji wothokvüka, tona ontena ombo yikrachiv tssov!' 14 Tokhatola kyon jiangna ombo hungale pangta phyotacho, 'Shijo ombo tssentso jika, etena ombo lüngthae sina tssentso ji ete ejan tssovka!' 15 Hojito ontena ombo phanchukchi lüngthae sicho. "Tona jününgro lipvüi jina ntio onte lyuyivla?" 16 "Ombona oro lijon jiang monthuki sisi oli ji oyam pi siv" Ontena shi zoe phyotacho, "Hoto ntsso!" 17 Tole ombona onte zechisi ezocho, "Tona motsü lona heto phyo jijo ntio yichakla? 'Kitssoe na ethev n lio esüa khochukchi siwo longtsük ji oki soyingkaphen ji kümthaka.' 18 Kyon ocho hoji longtsük jilo elungkata na tsaroe ombo siv; osi hojina ocho lo elungkata na ombo livero küma ejüprov."
Likotssen Epiv Tsükona Engaoji
19 Shikhfü püngnoeden tona pvüti tsüphoeden to jiang na jilona ombolo okhe theta ombo rhümav yantacho khatola ontena kyon jiang kyucho. Ntiotssole ombona ejyuka shi onte tsükona phyotacho to ontena ntsicho. 20 Jitsükona ontena yuta mmhom yantav benkacho. Ontena echepyim ekhüp pia yingto evanden tolyui ntiosana ombo engathukvü jenchia wothukcho, osi ombo n lan yani yitssoe osi Roman esapvüiden jiang thüngi ombo sosi wov tsükona chakphita vancho. 2l Osi chepyim jiangna Jisu engatacho, "Püngnoe nina elamo ji phyoa püngnoala osi nina omha eze n benphiv Potsow lan ji ntsa lona püngnoala to ena ntsia. 22 Ena Caesar thüngi likotssen epiv shikhfü lo leliana ezoa?" 23 Ombona onte kyak ji esürhaki onte ezocho, 24 "Nteno ntio tsükona okyak a füyitala? Rangtsüng ji a jüa, hojilo ocho kisü mpata?" Ontena ezocho, "Caesar." 25 Tole Jisu na onte ezocho, "Tona Caesar ejan jo Caesar pia, osi Potsow ejan jo Potsow pia." 26 Ontena kyon mhadungona jo ombo yi ji lona jo ombo n rhümachecho, osi ombo janlan jina onte emhuktsüngrae jükrüpi siracho.
Echü Lona Kümchelan Yilan Engacho
27 Saducee ejoma echü lona phanthilan n li to longtsüi jiangna oro ombo engatacho, 28 "Püngnoe, Moses na e tsükona heto erani lia: 'Jeni jilo tsüka na otsoe n liv chüna ojenio jina emi ji soa vanlani ombo wopan thicheyithokvü lia.' 29 Tona jeni tiying vanle erantso jina yanpithan tssoaha otsoe n liv chücho. 30 Tole enioto jina emi ji soa vancho, 31 elani ethümoto jina soa vanlancho. Ji esüa jeni tiying ji thüngi vanaha otsoe n liv chüracho, 32 osi eloe jiha chüi sicho. 33 Onjeni tiyingata na ompvü sawo vamo jina echüi jiang kümchelan tsüngon jilo jo ompvüo ocho engh tssovla?" 34 Jisu na onte janlancho, "Echungren shilo eboe tona eloe to yanpiyanthan tssotala, 35 tolea eboe osi eloe ochoang echü lona kümlani echungren ethani evam etümcho sana jiangna jo yanpiyanthan n tssota. 36 Onteno lanbenden esüa tssov osi onteno nchü. Osi onteno echü lona kümchelanthako ji tsükona Potsow tsoeden tssov. 37 Echüi jiang phanthilana la toji ranuk rungo ji yilan lona Moses na chakcheta ezoala. Hoji lona ombona OPVÜI jo Abraham Potsow, Isaak Potsow osi Jakob Potsow to phyoala. 38 Ombo echüi jiang Potsow mek tolea eküm evamo jiang Potsow, ntiotssole ombo tsükona jo kyon topvü eküm vana." 39 Ontena ntia ombo n galankhokvü siale shikhfü püngnoe ejoma na phyocho, 40 'Püngnoe, nina mmhona janlanthaka!"
Shanchopvüi Erov ji Yilan
41 Jisu na onte engacho, "Shanchopvüi ji kvütoli David tsochen lona rov to phyokhukchola? 42 David na ethüngkhen jiang lona ombobo phyocho, "OPVÜI jina a pvüi thüngi ezocho, 43 "Ni etssak-nkung jiang ji ni jo kupi epyankaphen nkümthüng nandang jo, a amimoe khukthei vana." 44 David na OPVÜI to ombo tsacho, tona kvütoli shanchopvüi ji David tsochen tssovla?"
Shikhfü Püngnoe Jiang ntangnshom Jisu na Ezoala
45 Kyon topvü na ombo püngno engata vanathüng Jisu na ombo sürüi jiang ezocho, 46 "Ntena shikhfü püngnoe jiang cheyata vantava, ontena osü phuknrhüo hantasi shishopheni sanphita, oyam khi onte yikrachia onte salümthuk hungala; Ontena tokhu jianglo osi Synagogue ki vanphen mmhom hoe vatahungala; 47 elani emi jiang nkhanziv osi ontena onte ki retsoyita to tssothakana omha tssoa sunga randantala! Onte n mhontso onte ntssonshiv.
Emi Jina Thamo Ji
1 Jisu na eyingole eli jiangna khümpheni rangjen jianglo othan theta hungcho, 2 osi emi tsüka ha poisa eni theta hungcho. 3 Ombona phyocho, "Ana nte ezoaka, emi yantsae shina thanpoe lona kyungkata thanthaka. 4 Ntiotssole thanpoe jiango ejüeli enhyocho thecho, tolea ompvüo yantsae tsso jina ompvü etsov ji mpato theracho."
Khümphen ji Roe Siv to Jisu na Phyoala
5 Sürüi ejoma na khümphen olongna opyon jüa tssoe lioji osi kyon na hojilo othan thetao jiang müngyana phyotacho. 6 Jisu na ezocho, "Ntena hungwo jiango – shiang hetopvü olong motsünga lea ombo vanpheno n liv lachochikhani esiv yuta chiyivka."
Khangshi Ezüp
7 Ontena engatacho, "Püngnoe, kvüthüng hojito tssovla? Osi hojito tssovsala tojo ntiona chekavla?" 8 Jisu na ezocho, "Tüngochütava, nte ti kyakthechithuka. A tsükona püngnoa la to ephyoe kyon elüm na, 'Hoji a ka!' mekana yuta ji janthaka!" to phyotav khatola onte ti phankatava. 9 Ntena ritsso tona oren khophita to yiwon zov khatola tikyutav, hojiang tssodem khatola ochum ji enhyancho na meka." 10 Meta motsünga na motsünga thüngi rotav; ekhüngyan jiang rotav. 11 Ekhenthao nri enhyuk, otssi vara, echü vara to meta topvülo liv; oyaki na emhuka ekhemo tüv chiyiv, 12 tolea shiang hetopvü n tssothüng nte rhümae nte ntssonshiv, synagogue ki na oyi nte tssoyia nte vünguv ; a tsükona mesao osi esapvüi jiang thüngi nte sosi wov. 13 Hoji jo yithen mmhom ji ephyov tsükona nte yuta mmhom tssov. 14 Nte tsancholan ntio phyov sana to emhuk n liv tsükona ovüngna methak-tava, 15 Ntiotssole nte ri ochina ha ntena phyoji n khirancheo tssoa ana oyi nte piv. 16 Nte pvüpoe, jeniden, wopan kitsük osi oshom jiangna esapvüi khelo nte thechiv, osi nte ochoang sana jo nte chüthukvü. 17 A tsükona otsük akvüna nte tssakvü. 18 Tolea nte kvüritssan motsünga lea vüjov meka. 19 Chüngchünga phanthia, tona nibobo shanchovka.
Jerusalem Emom ji Jisu na Phyoala
20 "Kvüthüng Jerusalem ji rasan na füchaki vana hungana, ompvü ji n sunguv roe siv sala to ntena ntsiv. 21 Jithüng Judea lo evan jiangna phunglani tsana chüngiv; yantsüi vamo jiangna tsanchev, ochongna aphoe vancho sana jiangna yantsü jilo rheyiv n li. 22 Ntiotssole motsü lo lio jiang benthokvü, 'Khangshi tsüngon' ji hojiang. 23 Hojithüng ngarohan eloe tona ngaro esoe oloe to tsükona jo kvüta ekhenthao tssov ato! Ekhenthao ekya-nungra na meta shilo oro kyon jiang pono Potsow khangshi ji rov. 24 Ochoang sana jo yonri na lüngthav osi ochoang sanajo meta topvü lo sosi evüngki yiv; osi onte yuta ji n yakthüng jo n longtsüi jiangna Jerusalem tssekachi sia vam.
Kyontsoe Erov Ji
25 "Eng, choro osi shantio jiang tolo emhuko tüv tssoa hunguv. Jümang jiang won osi jükhyo ntav jiang tsükona limha lo meta topvü lo ekhenlung liv. 26 Potsüwoe etho shiang topvü enhyokvü osi limhatsü pono ntio tssoa tsacho sana hoji hungi kyon jiangna ekyu lona echenmhuka nhyakvü. 27 Jisüiti kyontsoe jina etho osi phfütsson hansi emhenjü lona roa hunguv. 28 Kvüthüng shiang shi tssoa sana, phanthi nte kvüri engokatava, ntiotssole nte shanchov ji enhyanthaka."
Züwodung Jilo na Püngno Yi
29 Jisu na ejyuka shi ezocho: "Züwodung osi odung thanpoe jiang topvü zetava. 30 Ontena woniro chena hungana nzyu rheyiv enhyanthaka to ntsiala. 31 Hoji esüa shiang hetopvü shi tssoa hungana Potsow ekhüngyan ji tsathaka to ntena ntsiv. 32 Shiang hetopvü ji enhünga vamo kyon shiang n chürathüng tssov to ntena ntsi khitava. 33 Oyak osi limha mona yiv, tolea a yi jiang jo kvüthüngha mom meka.
Cheyata Vam Lia
34 Ntena cheyata vantava! tokhuta, tsoyuta osi eküm wongkhyu emhuk taena yuta ti yithuka. 35 To tssoana tsüngon jina tsirhi esüa nte ntsükyav. Ntiotssole tsüngon ji limha lo meta topvü lo kyon topvü thüngi rov. 36 Ntio tssoa chirov sana jiang zalanchio etho hungi kyontsoe ji mhadungo phanthichev tsükona yuta topvü lo tsoyoa randana vantava." 37 Jisu na eng-o jo khümpheni püngno, zümothüng jo Olive enungi oyi yip to tsüngon akvü tssocho. 38 Kyon topvü na enya akvü ombo püngno engalo ekhümki wotacho.
Jisu Lo Okyak Thetao Ji
1 Ebung mozhü n theo hümri tokhu 'Yakchi' to tsao ji enhyana vancho. 2 Pvüti tsüphoeden osi shikhfü püngnoe jiangna kyon jiang kyuo jina mphoe na Jisu chüthokvü lanka yantacho.
Judas na Jisu Yem Methakala
3 Sürüi taro eni jilo tsüka Iskariot to tsao Judas ji satan na pyingcho. 4 Jitsükona Judas na owo pvüti tsüphoe tona ekhümki enhyang tsüphoe jiang to thüngi kvütoli ombona Jisu ji onte khelo theyiv sana to ezocho. 5 Ontena emathata orang ombo piv ezocho. 6 Judas na hoji lüm na rüngi kvütoli kyon na n tsina Jisu ji onte khelo theyiv sana to chakphia vancho.
Jisu na Yakchi Tokhu Tsov Methakala
7 Ebung mozhü n theo hümri tokhu yutalo yakchi tokhu olyuro sonon tsüngon ji jancho. 8 Jisu na Peter ha John oni heto ezoa wothukcho, "Ete etsov yakchi tokhu ji owo methaki vatava." 9 Ontena ezocho, "Nina kvülo e methaktok hungala?" 10 Ombona ezocho, "Ntena yantsü jilo khokthetathüng kyon tsüka na jümvüru hansi oyi nte ndukvüka. Ombo phana owo ombona rheyio ki jilo rhowoa, 11 osi kipvüi ji heto ezoa: 'Püngnoe jina ombo tona ombo sürüi jiang to yakchi tokhu tsophen kvülo methaki liana to ni engala.' 12 Ombona oki ekhaka omhawoe chungchak tsüphov olan topvü benricho nte ejüvka." 13 Ontena wotale Jisu na ntio onte ezocho sana hojilo benri licho hungi yakchi tokhu ji methaktacho.
OPVÃœI Tokhu Ji
14 Yuta ji janale ombona wothung jiang nzo khokthecho. 15 Osi ombona onte ezocho, "Ana ezüp n khithüng tokhu shi nte nzo tsoyutav elüm nhyaktssüka vancho! 16 Ntiotssole ana nte ezoala, shi tümka ji Potsow Ekhüngyani na n penthüng jo ana shi n tsolan." 17 Tosi ombona opvü motsünga tsakae bensi Potsow montsso pisi phyocho, "Shi khi nte janta yutava. 18 Ana nte ezoala, enhünga na benkae Potsow ekhüngyan ji n rothüng nandang jo ana jününgrojü shi yulam meka." 19 Jitosi ombona hümri tsakae montsso pisi mpvüroe onte pia ezocho, "Shijo a tsük nte tsükona pio ji. Ntena a nchümchev tsükona shi tssotava." 20 Ontena tsoyutasi sülo elani opvü motsünga tsakae bensi phyocho, "Opvü shijo ntsata ethan a ejen na methako ji; shijo nte tsükona tsüchuko ji 21 "Tokhatola zetava, ochona a yenchov sana ji khe ji a khe nzo tsopheni yonthechiala! 22 Kyon tsoe jijo methaki elio ji ephan yiala, tolea kyon ocho yakchia ombo thechi-yenchia sana jijo n benthak! 23 Ontena onte yolo ochona hojito tssov sana ji engatav benkacho.
Tsüphov Ekümvü Tsükona Ekhitaoji
24 Sürüi jiang yolo ocho tsüpho tssov sana to ekhiratav benkacho. 25 Jisu na onte ezocho, "N longtsüi mesae jiang na onte kyon jiang pono etho liala osi esapvüi jiango 'Kyon shomden' to tsala. 26 Tolea nte yolo jo hojito tssov mek; jithüngo na jo nte yolo tsüphotso jina nungotso ji esüa tssov lia, osi esopvüi jina phajae esüa tssov lia. 27 Tsoyuv tsükona khukthe nhyaka vamo ji tsüpho alo tssitsso-hantssoa vamo ji tsüpho la? Khukthei vamo ji tsüpho. Tolea aiyo phajae esüa nte benkata vana. 28 "Ntena a ekümo ojang jiang topvü yutalo a ndüngo vanthaka; 29 osi ekhüng sav apona elan apioji esüa anaha elan nte piala. 30 a ekhüngyani tsoyuphen jiang lona ntena tsoyutavka, osi ntena Israel pvüji taro eni jiang sav tsüokona vantsülo khukthev ka."
Peter na ombo n phyochakvü ji Jisu na Methetala
31 Simon, Simon! Enga! Lijon tsükana otssuk ntsa wozhü khotathoka to n mhom jiang yolona mmhom jiang nte khotayiv tsükona satan jina etho hungthaka. 32 Tolea Simon, ni longtsü n senphithokvü tsükona ana ni randanithaka. Nina kvüthüng a thüngi kholani yiana ni shom jiang ji nina etho jükayithokvü ka." 33 Peter na janlancho, "OPVÜI, ana ni nzo vüngpheni rheyiv osi chüv methakthaka!" 34 Jisu na ezocho, "Ana ni ezoaka, Peter," "Nina a ntsi to echung ethüm n phyothüng jo hono khfüv meka."
Rangsükhvü, Sükvü, Yonri to
35 Jisu na ombo sürüi jiang engacho, "Ana rangsükhvü, sükhvü, tona yonri to n ham nte wothoko jithüng jo ntia ethev lia che-nchümche?" Ontena ezocho, "Ntia ethev n li." 36 Jisu na onte ezocho, "Tokhatola enhungo ochona rangsükvü liana hantoka, sükvü ha hantoka osi yonri n lina ombo sü jilea yeni shitoka. 37 Ana nte ezoaka, motsü lona 'Ombo ji shikhfü yesoe yolo khanhyacho' to phyoji a lona bemka, ntiotssole a tsükona erani lio jiang benkhana tsata." 38 Sürüi jiang na ombo ezocho, "Zeta OPVÜI, yonri eni shi liaje!" Ombona 'Jitae na tssochyua' to ezocho.
Jisu na Olive Phunglani na Randanala
39 Jisu na thanpothüng esüa yantsüi na sürüi jiang sosi chiyi Olive phunglani chungocho. 40 Meta ji janale ombona onte ezocho, "Ejiphiv lo nte n rehyitokvü tsükona randantava." 41 Jitosi ombona olong shümjan arialo eloncheta owo nkhok tseni randancho, 42 Ombona phyocho, "Apo" "Ni lüm erüng lina ezüp nungra pvü shi khi a siyia. Tolea a lüm erüng mek, ni lüm erüng tssothoka." 43 Potsüwoe na lanben joro ombo etho jükayicho. 44 Nungkhfü nungra lona ombona kyungkata randancho. Osi ombo eshanjü jo ejen lenjoa esüa zanjocho. 45 Ombona randansi phanthi oyi ombo sürüi jiang zele nungra lona santsüngrae yipkhani vancho. 46 Tole ombona onte ezocho, "Nteno ntiolui yiptala? Ejiphiv lo nte n rheyithokvü tsükona phanthi randnatava."
Jisu Rhümao Ji
47 Jisu na nsana vanathüng sürüi taro eni ji yolo tsüka Judas na kyon razhüa sosi chirocho. Ombona Jisu ntssüpvü rocho. 48 Tole Jisu na ombo ezocho, "Judas, nina kyontsoe ji ntssüpa ejüa yemke?" 49 Jisüi jo ntio tssov sa vancho sana ji sürüi jiangna hungjani phyotacho, "OPVÜI, ena yonri shiang tsütsav alo?" 50 Tosi onte yolo tsükana pvüti tsüphoe tsüka phajae ji eno amimoe ji elhümchochi siyicho. 51 Jisu na ezocho, "Totae tssoa, mmhomka!" Tosi ombona kyon ji eno ji evüngkayia emiyicho. 52 Jisu na pvüti tsüphoe jiang, khümphen enhyang tsüphoe jiang tona eramoeden to ombo rhümalo ero jiang ezocho, 53 "Aiyo efüi ejoena ntena yonri tona rübüm to bentasi rochoke' Ana eng akvüto nte nzo khümpheni vanaha ntena a n rhümacho. Tolea shijo ntena elhi etsso yuta, emüng jina esav yuta ji."
Peter na Ekhiranala
54 Ontena Jisu ji rhümae pvüti tsüpho ji ki sosi wocho, osi Peter na sülami na chechia tara phana wocho. 55 Hapo ji longo omi tssokachi licho, osi Peter ha hojilo omi lümkata vancho. 56 Ombona omi lümkata vamo ji eloeroro phajapvüi tsüka na ombo hungi ezocho, "Kyon shiha Jisu sürüi!" 57 Peter na ekhirana phyocho, "Eloeyo, ana ntsitia ombo n tsi!" 58 Nsungkhüngu kyon tsükana Peter ji chethei phyolancho, "Niha onte yolo tsüka la!" Tole Peter na ekhia phyocho, "Aiyo meka!" 59 Khonda motsünga sülo kyon tsükana tanjünga phyolancho, "Kyon shiha Galilee yamo yi nsana la küma omboha Jisu sürüi nrünga ka." 60 Tole Peter na ekhirana phyocho, "Nina ntio yi phyoa sana aiyo ntsila!" Ombona nsana vanathüng hono khfüsochicho. 61 OPVÜI na engoe mhyikrüka Peter zechile OPVÜI na heto ombo ezoe lio ji Peter na nchümchecho, "Nchüng zümo hono n khüfüthüng nina a n tsi to yejo ethüm ekhiramka." 62 Jisüi jo Peter na hapoe chiyi emhena kyacho.
Jisu ji Emakta Tacho
63 Jisu nhyaka vamo jiangna ombo emakata ombo tacho. 64 Ontena omhyik ombo khüngisi ezotacho, "Ochona ni tacho sana phyoe ze!" 65 Ji esüa ontena elümoto ombo yikvütacho.
Jihudi Hoho Mhadungo Jisu
66 Wonchiale eramoeden pvüti tsüphoeden tona shikhfü püngnoeden to jiangna etssirhyui Jisu ji Hoho ji mhadungo sosi wocho. Ontena ombo ezocho, 67 "Nino shanchopvüi ji alo mekcho sana ezoa, " Tole ombona ezocho, 68 "Ana nte ezolea ntena alongtsüv mek; osi ana yilana nte engalea ntena ajalam mek. 69 Tolea enhünga na benkae kyontsoe ji Tokhamo Potsow khe amimoe khukthethokvü." 70 Ontena, ezocho, "Tona nino Potsow tsoe ji alo?" Ombona ezolancho, "Aiyo hoji to ntena phyothaka." 71 Ontena phyotacho, "Etena ehungpvüi ntia ethev n li! ombona phyoji etena zothaka."
Pilate Mhadungo Jisu
1 Kholok totona phanthi Jisu ji Pilate mhadungo sosi wocho, 2 osi ontena heto nlan ombo pitacho: "kyon shina ete kyon jiang sosora shanchopvüi mesao ji ombo to phyoa mesao ji ekhyatssen ti pile to ezoa vancho ena rhümacho. 3 Pilate na ombo engacho, "Nino Jihudi mesao ji alo?" Jisu na janlancho, "Nina phyothaka to." 4 Tole Pilate na pvüti tsüphoeden tona kholuk to thüngi ezocho, "Ana kyon shi nlan epio tüv ntam n yanche." 5 Toaha ontena nrankata phyotacho, "ombo püngnoyi jina Judea meta topvü pyinga ninyang sothetala. Ombona Galilee lona benkacho hepi jana yithaka."
Jisu ji Herod Thüngi Sosi Woala
6 Pilate na shi zoala, "kyon shijo Galilee kyon alo?" to engacho. 7 Ombona kvüthüng Jisu ji Herod yansaron meta lona to ethümchecho sana Herod thüngi wothukcho, osi hojithüng jo Herod ha Jerusalemi oro vancho. 8 Herod na Jisu hungi emathacho, ntiotssole ombona Jisu yivon zothako jina kvüthüngti ndukvü sana to sunga eyilothakcho. Jisu na chethev elhi tsso jiang ombo zehunga vancho. 9 Herod na Jisu ji elümoto tükoshüka ha Jisu na n janlancho. 10 Pvüti tsüphoeden tona shikhfü püngnoeden to jiangna mhadungi chiwo Jisu nlan elümoto khayitacho. 11 Herod tona ombo rasan jiang to na Jisu ji emakata khangshitacho; osi ontena osü mmhom ombo phukthetoksi Pilate thüngi yilantokcho. 12 Hoji tsüngon jilo Herod ha pilate oni oshom kümcho; ovüngthüng jo oni tssakta vancho.
Jisu Chüthukcho
13 Pilate na pvüti tsüphoeden jiang tona esopvüi osi kyon jiang to tsae ezocho, 14 "kyon shina oyam sosorala to ntena phyoa sosi rocho. Ana nte mhadungo na ombo tükoshüki zethaka ha ntena nlan ombo pio jiang motsünga tia otsotso to n yanche. 15 Herod naha ntia nlan n yancheyio jina hepi yithokcho. Ombo chütokvü etümo tüv elhi ombona tssocho n li. 16 Jitsükona ana ombo erhüpsi vachi sivka."17 Tokhu jilo evüngki evan tsüka vachiv ombo etho licho. 18 Jitsükona kyon jiang jina tüngkachitacho, "Lüngthae ombo sia osi Barabas evachiyia!" 19 Barabas jo yantsü jilo ninyang sotheta omüng hancho lona vüngi licho. 20 Pilate najo Jisu ji vachihunga elani kyon jiang ezolancho. 21 Tole ontena "Doni ombo sia, Dona!" to tüngtacho. 22 Ombona yenjo ethümoto onte ezocho, "Ntio tsükona la, ombona ntio nlan tssocho na la? Ana ombo chütoko tüv ntam ntia n yanche. Jitsükona ana ombo erhüpsi vachi sivka." 23 Tokhatola ontena onte eto tüngkachia Jisu ji doni sile to chontacho. Osi hoji esüa benchecho. 24 Jisüi jo Pilate na onte na chona vamo ji esüa chütokle to erankayicho. 25 Ontena rungo kyon ocho yantsüi ninyang sotheta omüng hancho vüngi licho sana hoji vachisi Jisu jo onte etsso tssole to khochaki picho.
Jisu Doncho
26 Rasan jiangna Jisu sosi yita vanathüng, kyon tsüka Cyrene meta lona Simon to tsa oyani na yantsüi roa vancho ndukcho. Ontena ombo süyae donphen ji ombo hanthuksi Jisu sü rüa phana wotokcho. 27 Kyon kholuk tsüphov na osü rüa ombo phancho osi jiang yolo eloe ejoma na ha ombo tsükona emhena kyata phancho. 28 Jisu na engoe onte zechia ezocho, "Jerusalem eloeden! A tsükona ti kyatana nte osi nte ngaro jiang tsükona kyatava. 29 Ntiotssole kyon na heto ephyov yuta ji tsathaka, 'Eloe ochoangna ngaro n vancho sana osi n hantsacho sana, osi n nijüp ntsacho sana jiang ematha elio!' 30 Hoji yuta jilo jo kyon jiangna phunglan jiang 'E menzhüa!' to osi yingsüng jiang thüngi 'E mphothoka! to ezov. 31 Ntiotssole enungi limo jiang chentsüathüng mpato kyon jiangna hoto tssona limo jiang chüathüng jo kvüto tssovla?" 32 Jisu nzo chüthukvü tsükona münghan otsük eni ha sonhyacho. 33 Ontena meta motsünga "Kvüriryu" to tsao ji janale Jisu ji hoji lona doncho, osi münghan otsük eni jiha Jisu hayi hamen doncho. 34 Jisu na phyocho, "Nlan onte siyia, apo! Ontena n tsijam tssoala." Ontena ombo sü jiang phyalyu zetasi jantacho. 35 Kyon jiangna etssirhyui zeta vana Jihudi esopvüi jiangna heto ombo emakatacho: "Ombona oyam shanchocho; ombo Potsow na ethüngcheo shanchopvüi ji tssona ombobo shanchothuka!" 36 Rasan jiangna ha ombo emakata: ombo ndüngo sena owo ethemjü ombo pia ezotacho, 37 "Ni ji Jihudi mesao ji tssona nibobo shanchoa!" 38 Ombo khümki heto erani vayicho, "Shijo Jihudi mesao ji." 39 Münghan donhyao jiang onilo tsüka na emakata heto ombo ezpcho, "Nino shanchopvüi ji mekchoke? Nibobo shanchosi enaha e shanchoa!" 40 Tole tsükao jina ombo maka ezocho, "Potsow ni n kyuake? Niha ombo esüa ni chüthukala. 41 Tolea enio e chütukü etüma, ntiotssole enio eni elhi man hungala; tolea ombo ntia n lan n li." 42 Tosi ombona heto Jisu ezocho, "O Jisu, nina mesao kümi roana a nchümchekhe!" 43 Jisu na ombo ezocho, "Ana Otsotso ni zoala, nina nchüng na potsüwoe a nzo vamka."
Jisu Chüo Ji
44 Taro eni ekho harümo na eng ji n wom emümgna limha topvü eyuki ethüm ekho nandang vancho; 45 osi ekhümki zonchaksü ji eni nthyusoe sicho. 46 Jisu na, "Apo! Ana a mon eküm ji ni khelo ni theyiala." to tüngkachisi chücho. 47 Heto tsso jiang rasan tsüphoe jina hungi Potsow thünga phyocho, "Otsotso ombo ntsanrük eli kyon." 48 Hojilo etssirhyui vamo jiang topvü na hojito tsso jiang hungi tekilo shüngthechita nungrata oki yiracho. 49 Toaha ombo chetheo jiang topvü na bankae na zechita vancho, Galilee lona ombo phana erowo eloe jiangna ha konae na shiang zechita vancho.
Jisu Jutheo Ji
50 Judea lo oyan motsünga Arimathea jilo kyon tsüka Joseph to tsa vancho. Ombo kyon mmhom oyam na kyochio kyon tsüka Potsow ekhüngyan ji erov nhyaka vancho. 51 Omboha Jihudi esaekho jilo khanhyae tsüka khatola heto methaki tssota yio jiang ombo lüm erüng n licho. 52 Ombona, Pilate thüngi owo Jisu müngji choncho. 53 Osi ombona omüng ji lanchoe sünyipvü na eyuki olüp olung lo tukthecho ochia n thehan tüv lo thei sicho. 54 Hoji nchuk jo hokorbar osi Jihudi esanmung ji benkav eng erhe etünga vancho. 55 Galilee lona eloeden Joseph phana ewo jiangna olüp ji tona Jisu Kvütoli shothecho sana to ji hungcho. 56 Osi ontena oki oyi ombo müngji nzüphen mozhürhüm benria nsüngrütacho. Osi Potsow yizüng ji ephan Jihudi esanmung jilo jo ontena esantacho.
Kümchelamo Ji
1 Nthomon tsüngon jilo jo nyazüngina eloe jiangna ontena methaki vao mozhürhüm jiang bentasi olüpi wotacho. 2 Olüp lhüpo lung ji lae sithaka hungwo jina ontena lüpkvüi rhowotacho, 3 tolea Jisu müng ji n hungcho. 4 Onte emhuka ngangta vanle, kyon otsük eni rakachia bipotasi mangkachi vancho hungcho. 5 Eloe jiangna kyutsünga nkhümtherae vanle otsük eni jina heto onte ezocho, "Nteno ntiolyui eküm vamo ji echü yolo yantala? 6 Ombo helo n van, ombo kümchelanthaka." Ombona Galilee vanathüng heto nte ezo ji nchümi zetava, 7 "Kyontsoe ji mmen kyon khelo theyia donpheno eshenkae chüthuksi tsüngon ethümoto jilo kümchelantokvü.' " 8 Tole eloe jiangna ombona hoto phyo jiang nchümcheta, 9 olüpi na kholani oyi shiang hetopvü sürüi taro ekha jiang osi thanpoe jiang thüngi ezotacho. 10 Eloe jiango, Mary Magdalene, Joana, James oyo Mary to; shiang tona eloe thanpoe jiang to tssoe motsü shi sürüi jiang ezotacho. 11 Tole sürüi jiangna jo eloe jiangna ejüng phyota tsayia n longtsütacho. 12 Tolea Peter na yunga owo olüpi nkae zethechile osü jiang yaka ntia n hungcho. Hoto tsso ji hungi ombo e mhuktsünga oki yicho.
Emmaus Lani na Nduko ji
13 Hoji tsüngono otsük eni Jerusalem lona mile taro ekha lo Emmaus yan jilo yita vancho. 14 Jithüng-banthüng ntio tssoa yithakcho sana jiang motsü ji ruta yita vancho. 15 Onina thyuta emhukta yita vanathüng, 16 Jisu na oni phayae onte nzo yitaha onina ombo n chethecho. 17 Jisu na, "Ninio ntio thyuta yitato?" to oni engacho. Tole onina etho jaka mangi sicho. 18 Onilo Cleopas to tsao jina ombo engacho, "Epayalo ntio tssoa yicho sana hoji n tsiv Jerusalemo evan jo ni tae alo?" 19 Ombona engacho, "Ntio tssoa yichola?" Ontena ezocho, "Nazareth Jisu ji kvüto tssocho sana ji. Ombo zenkhying osi Potsow naha kyon naha oyilo osi elhilo etho eli-i to zechecho. 20 Ete pvütiden osi esaeden jiang na ombo chüthokvü rhümae thechicho osi ontena donpheno ombo eshenkacho. 21 Osi enaha Israel shanchopvüi jijo ombo tssov to zecheta vancho! Osi shiang hetopvüto tsoa yisi tsüngnon ethümoto. 22 E yolo eloe ejoma na wonchipvü olup ji owo zetasi ombo n van to phyotao jina e mhukala. 23 Ontena lanbenden hungcho osi jiangna ombo kümchelanthaka to onte ezocho. 24 E yolo ejoma naha olup ji owo zetale eloe jiangna phyotaoji esüa tssocho osi ombo n hungcho." 25 Jisu na onte ezocho, "Hetata nte yimchoke. Zenkhying jiangna phyo jiang longtsüv heto khüngchoke? 26 shanchopvüi jina phfütsson lo rheyiv jo ezüp shiang khidem to ntsitachoke? 27 Tosi Jisu na ombo tsükona Moses kako osi zenkhying kako jianglo phyoe lio jiang eroroe oni ejücho. 28 Ontena yita vamo yan ji janale Jisu na onte yaki woe ejüle 29 ontena ombo tssünglani ezocho, "Ethüngi nchena, eng ji mongchothaksi münga vanthaka." Tole ombona onte thüngi ncheno rhowocho. 30 Ombona onte nzo tsoyupheni khukthei hümri khi montsso pia randancho osi hümri ji mpvüroe onte picho. 31 Jisüiti onte lümbüm ji chüngtsoe ombo chethecho, tolea ombona onte thüngina pyontae yi sicho. 32 Ontena phyotacho, "Ombona olanina motsü eroroe ejüa ejanle ekhenrhüka erunga to tssola nüng? 33 Ontena tssütsoa phanthi Jerusalemi yitacho, tole sürüi taro ekha jiang tona thanpoe ejoma to etssyurhyui heto phyota vancho. 34 "OPVÜI ji otsotso kümchelanthaka! Ombona Simon hungthukthaka!" 35 Jisüi jo otsük eni jina ontena olani na kvüto tssocho sana osi kvütoli OPVÜI na hümri mpvüroa thüngti ontena ombo chethecho sana ji rüa ezocho.
Jisu na ombo Sürüi jiang Hungthokala
36 Onina hoji rüa ezoa vanathüng OPVÜI na onte yolo mangkachi onte ezocho, "Nte yolo noying lithokvü ka." 37 Emhuk ekhen na pyingi ontena omon hungcho tsayicho. 38 Tolea ombona onte ezocho, "Ntiolui emhuk-elümtala? osi lümbümi khatüng lia vantala? 39 A khe, ajo, shiang zetasi a chethetava. Epyanphi a zetava, ntena ntsivka. Omon najo ntena hunga evamo ana khyinga to oso oryu khyinga ke?" 40 Ombona hojito phyoa ombo khe tona ojo to jiang onte ejücho. 41 Onteji ematha longshina pyingi jithüng jana n longtsükhovü vancho. Jitsükona ombona onte engacho, "Ntena shianglo ntia etsov leli?" 42 Ontena ongo ekvücho ombo pile, 43 ombona onte ehungo na tsocho. 44 Tosi ombona onte ezocho, "Shiang hetopvüto ana nte ndüngo vanathüng nte ezocho: A tsükona Moses osi zenkhying kako, Ethüngkhen to jianglo erani elio jiang ebemvü licho." 45 Ombona onte lümbüm chüng tsoyia motsü ji engathethukcho, 46 osi ezocho, "Heto erani lia – 'Shanchopvüi jina echü nungra ndokvü osi tsüngon ethümoto jilo kümchelamvü. 47 Osi Jerusalem lona benkae ombo myingona jipo topvü thüngi lümbüm khophiv tona nlan siyi to püngnov.' 48 Nteno shiang hetopvü tsükona ehungpvüiden." 49 Apo na ntio phyochakcho sana ji ana nte thüngi rothokvü ka, tokhatola nteji etho nte n pithüng jo ntena yantsü jilona nhyakata vantava."
Jisu Ji Potsüoyani Tssüngkatala
50 Jisüi jo ombona Bethany ndüngo onte sochuki ombo khe khikae onte mmhaithuka randankacho. 51 Ombona onte randankata vanathüng, ombona onte sisi potsüwoe ombo tssüngkae sicho. 52 Ontena ombo khümtasi emhokthav longshita, 53 Jerusalemi oyi onte yuta topvü khümpheni na Potsow thüngta yithokcho.
Eküm Yi Ji
1 Limha n liyingthüng na oyi jijo vanthakcho; osi oyi jijo Potsow ndüngo vancho osi Potsow oni kheti tssocho. 2 Bukden shungdeni na oyi jina Potsow nzo vancho. 3 Limha lo licho topvü ombo lona chenkacho. Ombo n thev liyingcho ntia n li 4 Oyi jijo eküm chenkaphen ji tssocho, osi eküm jina kyon wondangchecho. 5 Wondang jina emüngi onala osi emüng jina kvüthüngha hoji nkhyohan. 6 Potsow na ombo yithenpvüi tsüka John to tsa rothokcho, 7 wondang ji motsü zoe kyon jiang khi longtsütokvü tsükona ombona ezolo rocho. 8 Ombo wondang ji mek, ombona wondang ji tsükona ehungpvüi tssolo rocho. 9 Shijo wondang tsotso ji, limha lo oro kyon topvü pono wonkao wondang ji. 10 Oyi ji limha lo licho osi ombo lona limha ji soyingcho, tokhatola limha jina ombo n chethecho. 11 Ombona ombo limhae roaha ombo kyon jiangna ombo n chethecho. 12 Khatola ochoang sana jo ombo khichoe ombo lo longtsücho; jitsükona ombona Potsow tsoeden ekümvü elan onte picho. 13 Onteno kyon tathi lona bukcho mek, oso rüngcho osi kyon lüm erungo lona mek; Potsow lona bukcho osi Potsow jo onte opo tssocho. 14 Oyi jina kyon kümcho osi ntsa tona kianzan to na pyingi ete ndüngo vancho. Etena ombo pvütsson ji hungcho, opo na nzamo tsonthi jina ehungo pvütsson ji. 15 John na ombo ehungpvüi tssoyia heto tüngcho; "Ovüngthüng na kyon shi tsükona heto phyothaka, 'A sülani tsao jijo a lona tsüphokata, ntiotssole a n bukthüngna ombo vancho.' " 16 Ombo lo kianzan benria lio jina ete topvü e mmhayia motsünga sülo motsünga to edunga e mmhayithaka. 17 Potsow na Moses yakchia shikhfü ji picho, khatola Jisu Khrista yakchia kianzan tona ntsa to picho. 18 Kyon ochina ha Potsow n hunghan, tolea otsoe ocho jo Potsow oni kheti sana osi Potsow thüngi vancho sana jina ombobo e hungthukthaka.
John Baptio Yithen
19 Jerusalem lo Jihudi esaeden jiang na pvüti ejoma, Levi ejoma to na "Nino ochola?" to John engalo wotokcho. 20 Tole John na n khiran na chakcheta osi opon chuka heto onte ezocho; "Aiyo shanchopvüi ji meka." 21 Toajo ontena "Tona nino ochola? Elijah memek." to engacho. John na "Aiyo hoji meka" to janlancho. Tole ontena "Nino zenkhying ji alo?" to engalancho. Ombona elani "Meka," to janlancho. 22 Tole ontena "Tona nino ocho sana ezoa, ena e rothokpvüi ji oyi ezolam lia, nibobo jo ocho to phyoala?" to ezocho. 23 John na Isaiah zenkhying yi khi heto onte janlancho: "Aiyo ocho sana romhoni na tüngcho-tüngrio won ji: OPVÜI sanphilan ji nsaka wonia!" 24 Jisüi jo Pharasee jiang na rotoko yithen-pvüi jina John engacho, 25 "Niji shanchopvüi jila mek, Elijah ha mek, elani Zenkhying ha mek, tona ntioloui nina baptiyiala?" 26 John na ezocho, "Ana ojü na baptiyiala, tokhatola ntena n chethev nte yulo tsüka vana. 27 Ombona a sülani ti rov. Aiyo ombo jokhüp lanphev tia a ntüm." 28 Shiang hetopvü Bethany lo Jordan zhükhfü na engkhfüwoe na John na baptiyia vamo jilona tssocho.
Potsow Olyu Oro ji
29 Ojyua to John na Jisu ji ombo thüngi tsata hungi phyocho: "Zeta, limha mmen khi siyio Potsow olyuro ji shika!" 30 Ana heto phyoji ombo tsükona phyocho, 'A sülo kyon tsüka tsata khatola ombo a lona tsüphokata, ntiotssole a nbukthüng na ombo vancho.' 31 Ombo ji kvütüv sana ana n tsi, tolea ana baptiyia ro jijo Israel kyon jiang khi ombo chekathokvü tsükona." 32 Osi John na heto ehungpvüi picho: "Ana hunga Potsow mon jina yukhyu esüa joro ombolo vancho. 33 Toaha kyon tsük ji shi to ana n chethev vancho. Tolea ojü khi baptiyiv a rotoko Potsow jina heto a ezothaka, 'Nina Potsow mon ji joro kyon tsükalo vana hunguka; hoji kyon jina ntho mon lona baptiyivka.' 34 John na phyocho, "Ana hungthaka" "Jitsükona ombo Potsow tsoe ji to ana nte ezoala."
Jisu Sürüi Ovüngo Jiang
35 Ojyua to John na hojilo ombo sürüi otsük eni nzo mangta vanathüng, 36 Jisu na yakchia hungi phyocho: "Potsow olyuro ji hojilo vanka zechia!" 37 Sürüi otsük eni jina hoji zoale Jisu phana wotacho. 38 Tole Jisu na engoe zechisi oni ezocho, "Nteno ocho yantala?" Ontena ezocho, "Nino kvülo vanala Rabbi?" (Rabbi ji yichak jo "Püngnoe" to.) 39 Ombona ezocho, "Oro zetava," (Jithüngjo etsen engüma mezhü ekho harümo tssocho.) Ontena ombo phana wole ombo vanphen ji hungcho, osi hoji tsüngon nojo ombo ndüngo mungtacho. 40 Onte yulo tsüka jo Simon Peter ojenio Andrew. 41 Ombona tsütssoa ojenio Simon yani ezocho, "Etena shanchopvüi ji yanchethaka." (Ji yichak jo Khrista.) 42 Tosi ombona Simon sosi Jisu thüngi wocho. Jisu na ombo zesi ezocho, "Nino John tsoe Simon ji khatola ni mying jo Cephas tssovka." (Hoji yichak jo Peter, ji yichak jo "Longpvü.")
Jisu na Philip ha Nathanael Oni Tsala
43 Ojyuato Jisu na Galilee wov methakcho. Ombona Philip nduki ezocho, "A phana roa!" 44 (Philip jo Andrew ha Peter onina vamo Bethsaida yamo tsocho.) 45 Philip na Nathanael nduki ezocho, "Kyon ocho tsükona Moses shikhfü lo osi zenkhying kako lo erani licho sana hoji ena ndukthaka. Ombo Nazareth kyon Joseph tsoe Jisu ji." 46 Tole Nathanael na ezocho, "Nazareth lona ha ntio sana mmhom chiyia ke?" Philip na ezocho, "Oro zeta." 47 Nathanael na ombo thüngi roa hungi Jisu na phyocho, "Shijo Israel kyon tsotso, ombolo ntia ntsanrük n jü!" 48 Nathanael na "Nino kvütoli a ntsichola?" to engacho. Tole Jisu na ezocho, "Philip na ni n tsathüng na nina züwodung kupi vana ana ni hungcho." 49 Nathanael na janlancho, "Püngnoe, nino Potsow tsoe ji. Nino Israel mesao ji!" 50 Jisu na ezocho, "Nina züwodung kupi vana ana ni hungcho to ni ezovo jina nina longtsüalo? Hoji lona tsüphokao tüv tssoa nina hungu ka!" 51 Tosi ombona onte ezocho, "Ana otsotso nte ezoaka: Potsüwo chonchi Potsow lanben na Kyon Tsoe ji thüngi joro chungi tssota hunguv ka."
Kana lo Yanpiyanthan
1 Tsüngon eni sülo Galilee lo Kana yan jilo yanpiyanthan licho. Jisu oyo ha hojilo thecho, 2 osi Jisu ha ombo sürüi jiang nzo yanpiyanthan jilo thecho. 3 Ontena tssüngthijü ji yurathakale, Jisu oyo na ombo ezocho, "Jününgrothijü na onte n tssom sithaka." 4 Jisu na ezocho, "Kvüto lyuv sana ji nina ntia a ezov n li, a yuta n janhan." 5 Tole Jisu oyo na phajae jiang ezocho, "Ombona ntio nte ezoana ji tssotakhe." 6 Jihudi jiang na shikhfü ephan ntsük-nlükphen jüjen motsünga lo litre nzoa ethe tüv tiruk ndungi licho. 7 Jüjen jiang lo ojü yenle to Jisu na ombo phajae jiang ezocho. Tole ontena nkhon nandang yenracho. 8 Jisüi jo ombo na ezocho, "Enhungo ojü tara ranchei tokhupvüi ji owo pia." Ontena ojü tssüngthijü kümthako ji rani hansi owo ombo pitacho, 9 osi ombona yuphi zele tssüngthijü kümthakcho. Osi jününgrojü kvülona chiyicho sana ji ombona n tsicho, (tolea phajaeden ochoang na ojü ji wochecho sana jiang najo ntsicho.) Jitsükona ombona yanphithan eboe ji tsae ezocho, 10 "Kyon thanpoeyo topvü na jününgrojü mmhomo ji jandadensi yingae jiang yuchyuthakana woshako ji jantala. Tokhatola nino mmhontso ji sülamo valanchi lia!" 11 Jisu na chethev elhi ovüngo shi Galilee meta Kana lona tssocho; osi hoji lona ombo pvütsson ji ejücho; osi sürüi jiang na ombo longtsücho. 12 Hoji sülo jo Jisu na oyo tona ojenio jiang, ombo sürüi jiang to nzo oyi Kapernaum lo tsüngon tara vantacho.
Jisu na Khümpheni Woala
13 Yakchi tokhu ji jana vanathüng Jisu na Jerusalemi wocho. 14 Kyon jiangna khümpheni na mangsü, Olyu, vefü yenta osi orang edung jiang na mezü lo khuthe vana Jisu na hungcho. 15 Hoji tsükona ombona wozhü na echükphen nsüngrüi kyon jiang tona ekümrümo jiang to erhüpa phanchukchirae sicho, osi ombona orang edung jiang mezü jiangha lae siyisi orang jiang ha nruki siyicho. 16 Ombona Vefü eyen jiang ezocho, "Shilona khi hansi tsantava! Apo ki shiji shishotaphen ti kümthuktava!" 17 Tole motsü lona, "O Potsow ni kiji nzan lona a rungala" to phyo ji ombo sürüi jiang na nchümchecho. 18 Jihudi esopvüi jiangna ombo engacho, "Nina tssoa vamo shiang etüma to e ejuv tsükona chethev elhi ntio tssoe e zethokvüla?" 19 Jisu na janlancho, "Khümphen shi phiroe sia tona ana tsüngon ethümo tssokachilamka." 20 Ontena ombo engacho, "Nina tsüngon ethümo tssokachilamke? Khümphen shi nzyu zhürosi tiruk khia tssocho!" 21 Tolea Jisu na phyoa vamo khümphen jijo ombo tsük ji – 22 Osi kvüthüng echü lona ombo kümlanthokcho sana ombo sürüi jiang na shi nchümchei motsülo lio jiang osi Jisu na phyowo jiang longtsütacho.
Kyon Tathi Jisu na Ntsio ji
23 Yakchi tokhu yuta jilo Jisu na Jerusalemi vanathüng kyon elüm na ombona chethev elhi tsso jiang hungi ombo longtsütacho. 24 Tokhatola ombona kyon topvü lümbüm ntsijamo ji tsükona ombona onte n longtsücho. 25 Onte ehungpvüi thanpoe na tssoyiv n licho, ntiotssole ombona onte lümbümi ejü topvü ntsikhancho.
Jisu Tona Nekodemas to
1 Pharasee khümtsünglo Jihudi esopvüi tsüka Nekodemas to tsa vancho. 2 Zümo motsünga lo ombona Jisu thüngi owo ezocho, "Püngnoe, nino Potsow na rotoko püngoe jito ena ntsia. Potsow na etho n piv kyon ochinaha nina tssowo chethev shiang n tssoche." 3 "Jisu na ezocho, "Ana otsotso ni ezoala, kyon ochinaha n buklam jo Potsow ekhüngyan n hungche." 4 Nekodemas na ezocho, "Eranküm najo kvütoli buklam la?" "Ombona oyo bukchungi rheyilani echung enioto buklam jo n tssochenrüng!" 5 Jisu na janlancho, "Ana otsotso ni ezoaka: Ojü tona omon to lona n buklam ochinha Potsow ekhüngyani n rheyiche. 6 Kyon tsüka ji oso lona jo opvüpoe yakchia bukala, tolea omon thüngoe jo omon jilona bukala. 7 Nte topvü na omon lona buklanchev to ana ni ezowo jina ti-mhuka. 8 Mbung jina ombo yihungoe yiala, osi hoji won ji ntena zoala, tokhatola kvülona benkae kvüwoe vena yia sana ntena n tsi. Omon lona buko jiang topvü hoji esüa tssov." 9 Nekodemas na janlancho, "Kvütoli heto tssovla?" 10 Jisu na janlancho, "Nino Israel püngoe tssona shiang n tsichoke?" 11 Ana otsotso ni ezoala: Eiyo ena ntsiwo jiang nsanala osi ena hungwo jiang ehungpvüi piala; tolea nte ochinaha ena ehungpvüi pio ji n longtsüala. 12 Ana limhalo motsü ni ezoaha nina jitia n longtsüna potsüwoe motsü ni ezowo nina kvütoli longtsüvla? 13 Potsüwoe na jorowo kyontsoe ji yaka ochina ha potsüwoe n chüngihan." 14 Moses na lijüngina yonjak n rü donkachio ji esüa kyon tsoe jiha donkachiv, 15 osi ombolo longtsüi topvü kümali eküm piv. 16 Ntiotssole Potsow na limha ji nzankhüngcho lona ombona ombo tsoe tsonthi ji khi picho; hoji tsükona ochoang kvütata na ombolo longtsüa sana jiango n chü, tolea kümali eküm hunguv. 17 Ntiotssole Potsow na limha ji oyi tssoyiv tsükona ombo tsoe ji rotokcho mek, tolea ombo yakchia limha ji shanchotokvü tsükona. 18 Hoji tsükona ombo tsoe ji longtsüa tssona nlan n pi, tolea ochona n longtsüa sana jijo nlan pithaka, ntiotssole ombona Potsow tsoe tsonthi ji nlongtsücho. 19 Yitsso ji hetoli yiala: Wondang jina limhalo rothaka, khatola kyon na wondang ji thüngi najo emüng ji chokatala, ntiotssole onte elhi jiang n mhom tae tsso jina. 20 Silyuo etssoe otsük akvüna wondang ji tssakala, osi ombo elhi ji rachev kyua wondangi n chiroala; 21 tokhatola ntsa benphi jijo wondangi chiroe ombo elhi jiango Potsow jancho ezo lona tssocho toji ejüala.
Jisu Tona John To
22 Jisülo jo Jisu tona ombo sürüi jiang to na Judea metalo chiyitacho osi ombona onte nzo jilo vani baptiyicho. 23 John naha Salem ndüngo Aenon lo ojü khosha jüwo jilona baptiyia vancho; osi kyon jiangna oro ombo thüngina baptiracho. 24 jithüng jo John ji n vünghancho. 25 John sürüi ejoma na Jihudi tsüka thüngi shikhfü phana ntsük-nlükvü yilan ekhita vancho. 26 Ontena owo John ezotacho, "Püngnoe, zeta, Jordan bankawoe ni thüngi vamo kyon, nina ocho tsükona e hungpvüi picho sana jina baptiyia vana osi topvüna ombo thüngi yitala!" 27 John na onte ezocho, "Potsüwoe na picho yaka kyon ochina ha ntia n khichoche. 28 Ana 'Aiyo shanchopvüi ji meka, tolea ombo vüngi na a rothukchoka' to ana phyo ji ehungpvüi nte vana. 29 Yanpiwoe eloe ji pvüi jijo yanpithan eboe ji tssoala; tolea yanpithan eboe ji shom ochona ombo ndüngo enga vana sana jina yanpithan eboe ji won zoana emathatala. Hoji esüa lona a ematha ji benriala. 30 Ombo ethev ekyungo lia yiv, osi a ethev jo matakata yiv.
Ocho Potsow Yani na Rochosana Ji
31 Potsüwoe na ocho rocho sana jijo topvü pono tsüpho ji. Ocho jo limha lona sana jijo limha echi, osi limha tsükona nsanala, tokhatola potsüwoe na ro jijo topvü pono OPVÜI. 32 Ombona ntio hunga zothakcho sana ji phyoala tolea ochinaha ombo püngno n khichoyiala. 33 Tolea ochona ombo püngno ji khichoasana jina Potsow ji ntsa to ejüala. 34 Potsow na rothuko jina Potsow yi phyoala, ntiotssole Potsow na ombo mon ji benria ombo piala. 35 Opona otsoe ji nzana olan-taro ombo khelo theyithaka. 36 Kyon ochona otsoe ji longtsüa sana jina kümali eküm hungala; otsoe ji n longtsüo kyon jina kümali eküm ji n hungche, tokhatola Potsow lüm etsuk ji ombo lo lia vam.
Jisu Tona Samaritan Eloe Ji to
1 Jisu na John lona kyungkata baptiyia sürüi rankata yiala to Pharasee jiangna zocho. 2 (Jisu najo ochia n baptiyi, tolea ombo sürüi jiangna baptiyicho.) 3 Hoji tsükona ntio phyota vancho sana ji Jisu na zoale ombona Judea meta sisi Galilee yilani sicho; 4 osi ombona yiathüng Samaria yakchia eyio tssocho. 5 Ombona Samaria lo oyan motsünga Sykhar, to tsa Jakob na ombo tsoe Joseph pio liko ji ndüngo licho jilo chiwocho. 6 Hoji lo Jakob jükha licho, osi yentsa na ombo laphyao jina Jisu na hojilo khukthe esana vancho. Hojithüng jo eng lungjüngo tssocho. 7 Samaritan eloe tsüka na ojü wolo rocho, tole Jisu na, "Ojü a yuthuka" to ompvü ezocho. 8 (Hojithüng jo ombo sürüi jiango oyani etsoyu shilo yiracho.) 9 Samaritan eloe jina ombo ezocho, "Nino Jihudi la kvütoli Samaritan eloe a thüngi ojü chonala?" (Jihudi najo Samaritan na tsütsathako yo-opvü jiang jo n tsütsacho.) 10 Jisu na ezocho, "Nina Potsow mmha chethecho saliwo, osi ochona ojü eyuv ni chonia vancho sana ji chetheo nina ombo thüngi chom osi ombona eküm jü ji ni piv." 11 Eloe jina ombo ezocho, "Tsüphoeyo," "nina ranphen n pen, osi jükha jiha junga, tona nina kvülona ekümjü hunguvla? 12 E opo Jakob na jükha shi e picho, osi ombo tsoeden tona ombo ekümrümo, osi ombo to na yucho. Nino ombo lona tsükacho alo?" 13 Jisu na janlancho, "Ochona ojü shi yuana ombo eralam, 14 tolea ochona ana pio jü ji yuana kvüthüngha ombo eralam meka. Ana ombo pio jü jina ombo lo jünhyo kümi ekümjü ombo piv osi kümali eküm ombo piv." 15 Eloe jina ezocho, "Tsüphoeyo, Hoji jü ji a pia! Tona kvüthüngha a eralam meka, osi ana helo ojü yana rolam meka." 16 Ombona ompvü ezocho, "Oyi nirapvü tsasi roa." 17 Tole eloe jina ezocho, "Aiyo orapvüi n van." Jisu na ezocho, "Nina orapvü n van to phyoji elana. 18 Ntiotssole nina orapvüi mungo thüngi vanthaka osi nina enhünga vana vamo eboe jijo nirapvü tsotso ji mek. Nina hoji ntsa phyothaka. 19 Eloe jina ezocho, "Tsüphoe yo, nino zenkhying to ana ntsithaka. 20 E omotsüi Samaritan jiangna phunglan shilona khümtacho, tole nte Jihudi na Jerusalemi na khümvü shikhfü to phyoala." 21 Jisu na ompvü ezocho, "Ana phyo shi longtsüa eloe, ntena opo Potsow ji phunglan shilona ha mek, Jerusalemi naha mek to na ekhümvü yuta ji tsata. 22 Nte Samaritan kyon yo ntena khümo ji n tsina khümtala, tolea eyio Jihudi kyon yo ena khümo ji ntsia khümala, ntiotssole shancho ji Jihudi thüngina yiala. 23 Tolea otsotso ekhüm jiangna opo ji ntsa osi omon lona ekhümvü yuta ji tsata, osi yutaji enhünga shi; ntiotssole opo na hojito ekhüm jiang ji yanala. 24 Potsow jo omon, hoji tsükona ochoangna ombo khüma sana omon osi ntsa lona ombo khümvü shikhfü." 25 Eloe jina ombo ezocho, "Shan chopvüi ji tsata to ana ntsia, ombona roana olan topvü ezokham." 26 Jisu na ompvü ezocho, "Hoji a ka, ni thüngi thyuta vamo ji a shi ka." 27 Jithüng Jisu sürüi jiangna jilo yiracho osi Jisu na eloe thüngi thyuta vamo ji hungi emhoktacho; tolea ochina ha "Ntio ethev lichola" to ompvü n gacho mekana "Ntiolyui ompvü thüngi thyutala?" toha ombo n ngacho. 28 Tole eloe jina jümvüru ji vasi oyi oyani kyon jiang ezocho, 29 "Oro zetava, kyon tsükana a eküm vana rothako jiang topvü a ezothaka, shanchopvüi ji ombo memek?" 30 Jitsükona ontena oyani na khoe ombo thüngi wotacho. 31 Jithüng sürüi jiangna, "Püngnoe, nina etsoyu tssoa!" to ombo ezotacho. 32 Tole ombona onte ezocho, "A etsoyu jo ntena n tsio etsoyu lia." 33 Sürüi jinagna onte phyotacho, "Ochona sana etsoyu oro ombo picho alo?" 34 Jisu na onte ezocho, "A etsoyu jo a rothoko ji lüm erüng etssov ji, osi ombo elhi jiang methakiv ji. 35 Ntena 'Liri jamu choro mezhü lia' to n phyoake?" Ana nte ezoala, engokae oli jiang zechitava! Eriv tae mentsüthaka. 36 Liri ji tona lichen ji to nzo longshitao tssoa liri jina jokhe man hunga vanthaka, osi kümali eküm tsükona otssuk hantheta vanthaka. 37 Tsükana chensi thanpoe na riala to phyo ji otsotso. 38 Ntena n sangcho tüv li rilo ana nte wothukcho; osi thanpoe na sangcho man nte chinhyathaka." 39 Eloe jina phyocho, "Ana tssothako jiang ombona a ezothaka" to ana ehungpvüi pio jina oyan jilo Samaritan elümoto na ombo longtsücho. 40 Samaritan jiang na ombo thüngi rotasi onte thüngi nchen le to ombo ezotacho, osi ombona onte thüngi nchuk eni vancho. 41 Onte elümoto na ombo yithen ji yakchia longtsülancho; 42 osi ontena ompvü ezotacho, "Ehungo ena longtsüo ji ni yi jina tae mek, ena ebobo zothaka, osi shijo limha shanchopvüi ji to ena ntsithaka."
Jisu na Tsüphoe Tsoe Emiyiala
43 Hojilo tsüngon eni vanthakale Jisu na Galilee yicho. 44 Ntiotssole ombona ombobo phyocho, "Zenkhying jo ombo meta lona jo n yikrachiala." 45 Ombona Galilee yile kyon jiangna ombo khichocho, ntiotssole ontena yakchi tokhu jilo Jerusalemi woathüng ombona ntio tssocho sana ji ontena nungracho. 46 Jisüi jo Jisu na Kanan lo ombona ojü khi jününgro jü kümthuko jilo chiwocho. Hoji lo esapvüi tsüphoe tsüka tsoe nochonoria Kapernaumi vancho. 47 Jisu na Judea metaena Galilee rocho to ombona zoale, ombo tsoe Kapernaumi chüvsa vamo ji emiyile to owo ezocho. 48 Jisu na ombo ezocho, "Chethev n hunguv jo ontena n longtsüala." 49 Tsüphoe jina ezocho, "Tsüphoeyo," "A tsoe ji n chüthüng a phana roa." 50 Jisu na ezocho, "Yia ni tsoe ji kümchevka!" Kyon jina Jisu yi ji longtsüa yicho. 51 Ombona oki n jam phajae jiangna oro ombo ezocho, "Ni tsoe ji kümchethaka." 52 Ombona yuta kvüthüng otsoe ji emiyicho sana to engacho. Tole ontena "Njyu eng-o motsünga ekho harümo era ji esancho" to ombo ezocho. 53 Tole hoji yutatsük jijo Jisu na "Ni tsoe ji kümchevka' to ezo yuta jilo tssocho to opo jina nchümchecho. Ombo osi wopan topvüna longtsücho. 54 Hoji jo Jisu na Galilee yicho sülo chethev enio to ji.
Wozhü Lona Emiyio Ji
1 Hoji sülo Jisu na Jihudi tokhu lo Jerusalemi chungocho. 2 Tole Jerusalemi olyu kibüng ndüngo wozhü motsünga Jihudi na Bethsada to tsa rafüp mungo khyinga licho. 3 Nochonori elümoto rafüp jianglo erichirae vancho. Mhyikjüng, jojang, tsükchüi to jiangna ojü ji evakphiv nhyakta vancho. 4 (Ntiotssole yuta kvülona jo lanben na joro ojü ji evakphithukcho. Ojü ji evakphiathüng ochona ojü ji evüngkata sana ombo nochonori ji boe sicho.) 5 Hojilo nzyu thümro tiza nochonori tsüka jücho. 6 Jisu na kyon ji hojilo erithe vana hungcho osi sunga ezüpthaka to ombona ntsi ezocho, "Ni emi hungchoalo?" 7 Nochonori jina ezocho, "Tsüphoeyo, ojü shi evakphiathüng a süthechi ochia n van; ana rhowov tssoathüngna oyam na vüngi siala." 8 Jisu na ombo ezocho, "Phanthia, ni belüng ji tsakae sanphia." 9 Jitopvü kyon ji emi ombo belüng ji tsakae sanphicho. Hoji nchuk jo esanmung tssocho. 10 Jitsükona Jihudi esapvüi jiangna kyon ji ezocho, "Nchüngo esanmung küma nina belüng hanphiv shikhfü n li." 11 Ombona janlancho, "A emiyiwo kyon jina a belüng shi tsakae sanphile to a ezocho." 12 Ontena hoto ombo ezowoji ocho sana to engacho. 13 Khatola kyon jina Jisu ji ocho sana n chethecho, ntiotssole kyon kholuk khoshao jina Jisu na pyeta yithakcho. 14 Jisülo Jisuna kyontsük ji khümpheni na nduki ezocho, "Engae khia, ni emiyithaka, enhungo mmen ti tssokhe; to mekana jilona tsükshikao yanchelamka." 15 Tole kyon jina oyi Jihudi esopvüi jiang thüngi ombo emiyiwo ji Jisu na to ezocho. 16 Jitsükona ontena Jisu khangshiv benkacho, ntiotssole ombona esanmung tsüngono emiyiwo jina. 17 Jisu na janlancho, "Apona yuta topvülo elhi tssoala, jitsükona anaha tssoala." 18 Hoji zoale Jihudi esapvüi jiangna tsükshikata ombo n zehunguv ombo lüngthav yantacho; ntiotssole ombona emung shikhfü yeso tae mekna Potsow ji opo tsa Potsow oni kheti esüa nsancho.
Otsoe Ji Etho
19 Jisu na onte janlancho, "Ana otsotso nte ezoala, otsoe jina ntia ombo etancho lona n tssoche; opo na ntio tssoa hungana ji ombona tssoala. Opo na ntio tssoa na otsoe jina ha tssoala. 20 Ntiotssole opona otsoe ji nzanala, osi ombona ntio tssoa sana ejüala. Ombona shilona tsükao lea ombo ejüv osi nte topvü nte emhukvü. 21 Opona echü jiang phanthitoki eküm pio ji esüa, otsoe jina ha ombona chokao jiang eküm piala. 22 Opo jina ochia oyi n tssoyiala. Opo na otsoe ji etho pia oyi tssoyithukala. 23 Hojito topvüna opo kyuchio ji esüa otsoe ji kyuchithukvü tsükona. Ochona otsoe ji n kyuchiana ombo rothuko opo ji n kyuchiala. 24 "Ana otsotso ji nte ezoala: ochona a yi shiang zoe a rothuko ji longtsüa sana ombo kümali eküm lithaka. Ombo oyi n tssoyi, tolea echü jilona ekümi yithaka. 25 Ana otsotso nte ezoala: echüi jiangna Potsow tsoe ji won zov tsükona osi ochoangna zoana ekümi chiyilam tsükona yuta ji tsathaka, osi chiyithaka. 26 Opo ji eküm chenkaphen tsso ji esüa, ombona otsoe jiha eküm chenkaphen tssothukthaka. 27 Ombona otsoe ji oyi etssov elan pithaka, ntiotssole ombo kyontsoe ji. 28 Shi zoe ti-mhuktava, echüi jiangna ombo won zoe onte lüp jianglo na chiyirae, 29 elhi mmhom etssoe jiango elan pi, elhi n mhon etssoe jiango nlan pi to etssov yuta ji tsata.
Jisu Ehungpvüiden
30 "Ana a etancho ntia n tssoche; opona ntio a ezoana ji ana tssoala, jitsükona a yitsso jo elana, ntiotssole aiyo a lüm rüngcho etssoe mek, tolea a rothuko ji lüm erüng tssoala. 31 Ana a bobo ehungpvüi pia saliwo ana ntio phyoa na jijo ehungpvüi tsotso mekvü tssov. 32 Tokhatola a tsükona ehungpvüi epi ochosana vana, osi ombona ntio phyoana ntsa to ana ntsia. 33 Ntena yithenpvüi wothuko ji John thüngi, osi ombona ntsa ji tsükona phyocho. 34 Ana kyon ehungpvüi ethev licho mek; tolea nte shanchwothukvü tsükona tae ana shi phyoala. 35 John jo milon motsünga tüngra wondanga vancho tüv, osi ntena ombo wondangi esüngaro evam nte chokacho. 36 Tolea ana John ehungpvüi jilona tsükao a ehungpvüi lia: Opona ntio elhi etssov a picho sana shiang ana tsso jina apo na arothukcho to ehungpvüi piala. 37 Osi arothuko apo na ha a ehungpvüi piala. Ntena kvüthüngha ombo won n zohan osi ombo mha n hunghan, 38 osi ombo püngno jiha nte lümbümi n vahan, ntiotssole a rothuko ji ntena n longtsüala. 39 Ntena ntho motsü jiang khatala, ntiotssole hoji lona kümali eküm hunguv to ntena nchümtala. Osi ntho motsü tsük shina a tsükona phyoala! 40 Tolea ntena eküm hunguv tsükona a thüngi n roala. 41 "Ana kyon myingthüng yana mek. 42 Tokhatola nteno ntio kvütüv kyonden sana ana ntsia, osi nte lümbümi Potsow nzam n jü to ana ntsia. 43 Ana opo etho lona rocho, khatola ntena a n khichohan; khatola thanpoena ombobo ombo etho lona rowo ntena khichov. 44 Ntena nte nte omying thüngtao ji chokatala, khatola Potsow thüngina myingthüng n yantala; tona kvütoli ntena a longtsüvla? 45 Tolea apo mhadungo n lan nte pivji ana ka to ti nchümtava. Ntena eyilokao Moses na n lan nte pivka. 46 Ntena otsotso Moses longtsücho saliwo ntena a longtsüv, ntiotssole ombona a tsükona erancho. 47 Khatola ntena ombona eramo ji n longtsüv kvütoli ana phyo jiang longtsüvla?"
Jisu na Kyon Othüng Mongo Tsotokala
1 Yuta tara tssosi sülo, Jisu na Galilee wozhü bankae wocho (Tiberias wozhü toha tsacho). 2 Ombona nochonori jiang emiyiwo chethev jiang hungi kholuk khosha na ombo sü rüa wocho. 3 Jisu na phunglani ehungo ombo sürüi jiang nzo khokthecho. 4 Jithüng jo yakchi tokhu enhyana vancho. 5 Jisu na eyingoe zele kholuk tsüphov tsata hungi ombona Philip ezocho, "Kyon hetata shi tsochyu jo ntena etsoyu kvülo shitavsala?" 6 (Ombona Philip lüm füyiv tsükona ezocho, twokha kvüto lyuv sana jo ombona ntsia.) 7 Philip na ezocho, "Otsük akvüna ejükaro tia tsophyav jo janti rangpyak nzo eni poni na hümri tssona shisanati mmhom." 8 Ombo sürüi thanpoe Simon Peter ojenio Andrew to tsao jina phyocho, 9 "Helo nungori tsüka na hümri mungo, ongo eni to hana, tolea shina jo kyon shiang topvü tsochyuv mek." 10 Jisu na onte ezocho, "Kyon jiang khokthethuka." (Hojilo eroyo licho.) Kyon topvüna khoktheracho osi hojilo kyon wothüng mungo harüma vancho. 11 Jisu na hümri ji khi Potsow montsso pisi hojilo khokta vamo kyon jiang jantayicho. Ombona ongo jiha khi hojito jantacho osi ontena tsokhuk tsotacho. 12 Onte tsochyuthakale ombona sürüi jiang ezocho, "Tsonhyo jiang khyorhyutava; ntia ti sitava." 13 Ontena khyotale hümri mungo ji kyon jiangna tsotasi loksa taro eni khyocholancho. 14 Heto chethev elhi tsso ji hungwo kyon jiangna phyotacho, "Otsotso shijo zenkhying limha lo rov evamo ji!" 15 Ontena oro ombo rhümae khüngkata mesao ombo tssotokvü tümtala to ombona ntsiale omboti phunglani chüngilani sicho.
Jisu na Jüponi na Sanphiala
16 Mmyua yiale Jisu sürüi jiangna wozhüi jowo 17 orhungi rhowoe wozhü ji pankae Kapernaumwoe yitacho. Münga vanthaka ha Jisu na onte thüngi n yihancho. 18 Hojithüng ji ezhü ntav veni ojü ji evakphicho. 19 Osi Sürüi jiangna kilometer tiruk harümo eha yi tona Jisu na jüponi na tsa orhung ji jana yia hungi onte ekhentsüngracho. 20 Jisu na onte ezocho, "Tikhentava, a ka!" 2l Ontena emathata orhungi Jisu sothele ontena yita vamo meta ji elaroa jancho.
Kyon Jiangna Jisu Yantala
22 Ojyua to jo wozhü pankawoe vamo jiang na hojilo orhung motsünga tae licho to nchümchecho, osi Jisu na orhung jilo n rhowo na ombo sürüi jiang tae na yicho toji nchümchecho. 23 OPVÜI na montsson pisi kyon jiangna hümri tsotao meta jilo orhung thanpo Tiberias metae na oro jürani esancho. 24 Kyon jiangna orhung jianglo Jisu to na ombo sürüi jiang to n jü to ntsiale ontena orhung jianglo rhowoe Jisu yana Kapernaumwoe wotacho.
Jisu jo Eküm Hümri ji
25 Kyon jiangna wozhü pankawoe na Jisu hungi ezotacho, "Püngnoe, nino kvüthüng hepi rochola?" 26 Jisu na ezocho, "Ana otsotso nte ezoala; ntena ana chethev elhi tsso jiang engathecho na a yanta mek, tolea hümri nte etsson tsothako jina." 27 Kyoni esio etsoyu tsükona ti sangtava, kümali evamo etsoyu tsükona kongtsüngtava. Hoji etsoyu ji kyontsoe jina nte piv, ntiotssole opo Potsow lüm erüng elio ji ombolo bentokvü ombo sekathaka." 28 Tole ontena ombo engacho, "Potsow lüm erüng etssov jo ena kvüto lyuvla!" 29 Jisu na janlancho, "Potsow na nte tssothuk hungwo jijo, ombona rothuko ji nte khi longtsüthuk-hungala." 30 Ontena janlancho, "Ena hungi longtsüo tssoa nina ntio chethev tssoe ejüvla? 3i E pyimtsümotsüi jiangna lijüngi na Mana tsotacho, ntho motsü lona heto phyo ji ephan, 'Ombona Potsüwoe na hümri onte pia tsothukcho.' " 32 Jisu na janlancho, "Ana otsotso nte ezoala, Moses na nte pio jijo Potsüwoe na hümri mek, tolea opo na Potsüwoe hümri tssotso ji nte piala. 33 Ntiotssole Potsow na pio hümri tsotso jijo, ocho na potsüwoe na joroe limha ji thüngi eküm picho sana ji." 34 Ontena ezocho, "Tsüphoe yo, hoji hümri ji yuta akvü epia." 35 Jisu na ezocho, "Aiyo eküm hümri ji, ochona a thüngi roana kvüthüng ha ombo n wonton osi ochona a longtsüa na kvüthüng ha ombo n ratsüng. 36 Ntena ahungthaka khatola a n longtsü to nte ezothaka. 37 Apo na apio kyon otsük akvü na athüngi roala, osi ochona athüngi roa sana ochia ana n phanlanchi; 38 ntiotssole ana Potsüwoe na joro jijo, a lüm erüng tssolo mek, tolea a rothoko ji lüm erüng etssov tsükona. 39 Osi a rothoko ji lüm erüng jo ombona apio jiang ana tsüka tia moni n sithukna ochüm tsüngon jilo eküm onte phanthithokvü ji. 40 Ntiotssole apo lüm erüng jo kyon kvüta na otsoe ji hungi longtsüa sana topvüna kümali eküm hungu tsükona. Osi ochüm tsüngono ana eküm onte phanthitokvü." 41 Ombona "Aiyo Potsüwoe na jorowo hümri ji" to phyo jina kyon jiangna pvünyotav benkacho. 42 Ontena phyotacho, "Kyon shijo Joseph tsoe Jisu ji mekchoke? Ena ombo opo ha oyo ha ntsia. Tona kvütoli ombo Potsüwoe na joro cho to phyoa to?" 43 Jisu na ezocho, "Ntena tipvünyotava, 44 a rotoko opo na a thüngi rothukcho yaka ochina ha a thüngi n roche; osi ana ochüm tsüngono eküm ombo phanthitokvü. 45 Zenkhying jiang na heto erancho: "Otsük akvü Potsow na püngnov." Ochona opo yi zoe ombo thüngi na ntsi khiana jina athüngi roala. 46 Tolea ochona sana opo Potsow hungthakcho mek; Potsow thüngina roji tae na opo hungthaka. 47 Ana otsotso nte ezoala, ochona longtsüa sana jina kümali eküm hungala. 48 Aiyo eküm hümri ji; 49 nte pyimtsümotsüi jiangna lijüngi na mana tsotacho khatola onte chüracho. 50 Tokhatola ochona Potsüwoe na joro hümri ji tsoana ombo n chü. 51 Aiyo eküm evamo hümri Potsüwoe na joro ji, ochona hümri shi tsoana ombona kümali eküm vam. Ana pio hümri jijo aso ji, limha ji eküm vanthokvü ana piala." 52 Hoji zoe onte yolo pangta phyotacho, "Kvütoli kyon shina ombo so epia etsothokvüto?" 53 Jisu na onte ezocho, "Ana otsotso nte ezoala, ntena kyontsoe ji so tsoa ombo ejen n yuna ntelo eküm n jü. 54 Ochona a so tsoa osi a ejen yuana jina kümali eküm hunguv, osi ochüm tsüngono ana eküm ombo phanthithukvü. 55 Ntiotssole a so jo etsoyu tsostso osi a ejen jo eyuo tsotso ji. 56 Ochona a so tsoa a ejen yuana a lo vanala osi ana ombo lo vanala. 57 Eküm evamo opona a rothuko ji esüa ana ombo lona eküm vanala. Hoji esüa ochona a tsoa na a lona eküm vam. 58 Tona shijo potsüwoe na jorowo hümri ji, shijo nte motsüi jiangna tsosi sülani onte chüoji esüa mek. Ochona hümri shi tsoana kümali eküm vam." 59 Jisu na Kapernaum lo synagogue ki püngnoathüng shiang phyocho.
Kümali Evamo Yi Ji
60 Ombo sürüiden elüm na shiang zoe phyotacho, "Püngno yi shijo elüm khünga. Ochona engakhukvüla?" 61 Ochina ha ombo n zoaha heto pvünyotao ji Jisu na ntsi onte ezocho, "Jitsükona vachi nte sihunga alo? 62 Tona kyontsoe jina ovüngthüng ombo vanpheni elani chüngia nte ejüv-wo kvüto nehümtavla? 63 Eküm epio jijo Potsow mon; kyon etho jo ntia ethev n li. Ana nte püngnothako yi jiangna Potsow eküm epio mon ji nte piala. 64 Khatola nte ochoangna jo n longtsüala." (Ochona n longtsüv sana osi ochona ombo yemvü sana topvü benkadeni na Jisu na ntsicho.) 65 Ombona ezocho, "Jitsükona ana nte ezocho, opona rothukcho yaka ochina ha a thüngi n roche." 66 Hoji ntana sürüi elümoto na kholani yiracho, osi ombo thüngi n wolancho. 67 Tole ombona sürüi taro eni ji engacho, "Tona nte - hante kholan hungalo?" 68 Simon Peter na ezocho, "OPVÜI, ena ocho thüngi kholani yivla? Kümali evamo yi ji ni lo lia. 69 Enhungo ena longtsüthaka osi nino Ntho, potsüwoe na rocho to ena ntsia." 70 Jisu na janlancho, "Ana nte taro eni nte ethüngcho, mekchoke? Tolea nte yolo tsüka jo tsüngrham!" 71 Ombona Simon Iskariot tsoe Judas tsükona phyoa vancho. Ntiotssole Judas jo sürüi taro eni ji yolo tsüka khatola ombona Jisu yemsa vancho.
Jisu Tona Ombo Jeniden To
1 Hoji sülo Jisu na Galilee yentsa wocho; ombona Judea lojo n yentsahungcho ntiotssole hojilo Jihudi esapvüi jiangna ombo lüngthav yana vancho. 2 Tabernakel tokhu jana vanthako jina, 3 Jisu ojenio jiangna ombo ezocho, "Meta shi sisi Judea lo yia, tona nina tssoa vamo shiang ni sürüi jiangna hunguvka. 4 Oyam khi ombo ntsithukhunga tssona ochina ha ombo elhi jiang mphoe n vatala. Nina heto tssoa vamo ji tsükona limhatsü khi ni ntsithuka!" 5 (Ombo jeniden jiangna tia ombo n longtsücho.) 6 Jisu na onte ezocho, "A tsükona yuta eben ji n chiyihan. Nte tsükonajo yuta topvü etü-ma. 7 Limha jina nte n tssakche, tolea a tssakala, ntiotssole limha ji etssophyo ji n mhom to ana ezonrhüala. 8 Tokhu jilo wotava, aiyo a yuta n janhan küma tokhu jilo n woaka." 9 Ombona hoto phyoa Galilee vancho.
Tabernakel Tokhu Jilo Jisu
10 Ojenio jiangna yithakale Jisu na ha wocho, khatola ombona opon chuka mekna mphoa wocho. 11 Jihudi esapvüi jiangna "Ombo kvülo vana?" to phyota tokhu jilo ombo yanta vancho. 12 Kholuk jilo ejoma na jo "Ombo kyon mmhom," to phyoyicho. Thanpoe najo, "Ombona kyon sosorala," to phyocho. 13 Khatola ochina ha ombo tsükona opon tssoa ntia n phyocho, ntiotssole ontena Jihudi esapvüi jiang kyucho. 14 Tokhu ji risoa yiale Jisu na khümpheni owo püngnocho. 15 Jihudi esapvüi jiang ji emhuktsüngrae phyotacho, "Kyon shina ntia n kha n yan kasi kvütoli hetata ntsichoto?" 16 Jisu na janlancho, "Ana püngno shiango a yi mek, tolea a rothuko Potsow thüngina yiala. 17 Ochona Potsow lüm erüng tssohunga sana jina a püngno yi shi Potsow thüngina alo a etancho sana ntsiv. 18 Kyon ochona ombo etho lona nsana sana ombo tsükona myingthüng yanala. Tolea ochona ombo rothuko ji myingthüng yana sana ombo ntsanrüka osi ombo lo ejüng ntia n jü. 19 Moses na shikhfü ji nte pichola nüng? Khatola nte ochina ha hoji n benphi. Nteno ntiolyui a lüngthav tssotala?" 20 Kholuk jina ezocho, "Tsüngrham na ni sophia tssovka, ochona ni lüngthav yanchola?" 21 Jisu na janlancho, "Ana chethev motsünga tssole nte topvüna nte emhuktsüngcho. 22 Moses na nte tsoe jiang tseniv nte ezocho (tolea Moses na phyocho mek nte motsüi jiangna benkacho, ) jitsükona ntena eboeroro jiang esanmung tsüngono tseniala. 23 Moses shikhfü ji n yesotoko tssoa ntena tsokhying jiang esanmung tsüngono tsenia tssona kvütoli ana esanmungo kyon tsüka mmhonio jina nte lüm tsukala? 24 Oponina zesi oyi tssota ji sitasi, ntsanrük lona oyi tssotava.
Ombo shanchopvüi Ji Alo
25 Jerusalem kyon ejoma na phyotacho, "Esapvüiden na lüngthav yanta vamo kyon ji shi mekchoke? 26 Zeta! Ombona kyontsü yolo nsana vana ha ochina ha n lan n pi! Toalo ombo shanchopvüi ji to ontena ntsichola? 27 shanchopvüi ji roana ombona kvülona rocho sana ochina ha ntsiv mek. Khatola kyon shijo kvülona sana ete topvüna ntsia. 28 Jisu na khümpheni püngnoathüng tüngkachia phyocho, "Otsotso ntena a ntsia nüng? Osi aiyo kvülona rocho sana ntsia nüng? Ana a etancho rocho mek. Ochona a rothukcho sana jijo ntsanrüka. Ntena ombo n tsi, 29 tolea ana ombo ntsia, ntiotssole aiyo ombo thüngina rocho osi ombona a rothukcho. 30 Tole ontena ombo rhümatav tssocho, tolea ochina ha ombo tsüko okhe n thecho, ntiotssole ombo yuta ji n janhancho. 31 Khatola kholuk jilo kyon elümoto na ombo longtsüa phyotacho, "shanchopvüi ji roana ombona kyon shina tsso shiang lona kyungkata chethev tssov alo?"
Jisu Rhümalo Enhyang Jiang Wothukcho
32 Kholuk jina Jisu tsükona tssürüta Pharasee jiangna zoe ontena pvüti tsüphoe jiang nzo tssoe Jisu rhümalo enhyang ejoma wothukcho. 33 Tole Jisu na phyocho, "Ana nte ndüngo tara vanlansi a rothuko ji thüngi yi siv. 34 Ntena a yantav khatola a yanchev mek, ntiotssole ana kvüi vamu sana jilo ntena n woche. 35 Jihudi esapvüi jiangna onte yolo phyotacho, "Etena ombo n hungwo tüv kvüi wovla? Ombona Greek yantsüi ete kyon vamo jiang lo owo Greek jiang püngnov alo? 36 Ombona phyoala, etena ombo yanlea hunguv mek, osi ombona kvülo woana jü etena n oche, jijo ntio etssola?"
Eküm Epio Jünhyo
37 Tokhu tsüngon wokhao osi tsüngon opvüo jilo Jisu na phanthi tüngkachia heto phyocho, "Ochona eratsünga na a thüngi na oro yuv lia." 38 Nthomotsü lona phyoala, "Ochona a lo longtsüana eküm jü jünhyo ombo lümbümi na tsüv." 39 Jisu na heto phyo shijo Nthomon kvüwoe ombo lo longtsüi jiangna hunguv sana hoji tsükona phyocho. Hojithüng jo Nthomon ji n pihancho, ntiotssole Jisu ji pvütsson lo n phanthithuk hancho.
Kyon Jiang N myatacho
40 Kholuk jilo ejoma na ombona heto ephyoji zoe phyotacho, "Otsotso kyon shijo zenkhying ji!" 41 Ejoma na phyotacho, "Shanchopvüi ji ombo." Tole ejoma na phyotacho, "Shanchopvüi ji Galilee lona chiyiv meka! 42 Nthomotsü lona heto phyoala, shanchopvüi ji David mesao tsochen lona chiyiv, osi David na vamo yan Bethlehem lona bukvü." 43 Hojito Jisu tsükona kholuk ji n myantav nchümtacho. 44 Ejoma na jo ombo rhüma hungcho khatola ochina ha ombo lo okhe n thecho.
Jihudi Esapvüi Jiangna N longtsücho
45 Enhyang jiangna elani yile pvüti tsüphoeden tona Pharasee to jiangna ezocho, "Nteno ntiolui ombo sosi n yichola?" 46 Enhyang jiangna ezocho, "Kyon ochina ha kvüthüngha kyon shi esüa oyi n sanhan!" 47 Pharasee jiangna onte engacho, "Ombona nteha nte kyakthechicho alo? 48 Esapvüi osi Pharasee tsüka na tia ombo longtsüa ntena ntsicho alo? 49 Kholuk shina Moses shikhfü ji n tsiküma onteno Potsow etsso-randanka jilo tssovka!" 50 Pharasee jiang yolo tsüka jo Nikodemus, ovüngthüng Jisu nduko oji. Ombona thanpoe jiang ezocho, 51 "Ete shikhfü ephan jo etena kyon ochia ombo yi n zov osi elhi jiang n zeyiv n lan n piche." 52 Ontena janlancho, "Niha Galilee na rocho alo? Nthomotsü jiang khae zeta tona Galilee lona kvüthüng ha zenkhying n chiyi to nina khachevka."
Eloe Tsüka Efürama lo Racheo Ji
1 Otsük akvüna oki yitaracho, tolea Jisu jo Olive Phunglani chungocho. 2 Ojyuato nyazüngina ombona khümpheni elani wocho. Kyon topvüna ombo hazhüo jina ombona khukthe onte püngnocho. 3 Shikhfü püngnoe jiang tona Pharasee to na eloe tsüka efürama lona rhümacho sosi rhorocho, osi ontena topvü mhadungo ompvü mangthukcho. 4 Ontena Jisu ezocho, "Püngnoe," Eloe jina efürama tssoa vanathüng rhümacho. 5 Moses na phyo ji esüa e shikhfü ephanina jo hetüv jo ephyatsüngi chüthukvü. Nina jo kvüto phyovla?" 6 Ontena jo Jisu rayae nlan ombo piv tsükona hoto engacho. Khatola Jisu na nkhümthei ombo yingrona likoe erankacho. 7 Ontena jilo phanthi ombo ngatüngaria vanathüng ombona nsaka phanthi onte ezocho, "Nte yolo ocho mmen n tssohancho sana jina olong shümchidena ompvü ephya." 8 Tosi ombona nkhümthelani likoe eranlancho. 9 Ontena hoji zoale onte yolo erantso jina vüngsi tsük-tsük na sani yi sicho. Eloe ji mangkachi vana Jisu tae enhyoe sicho. 10 Ombona nsaka phanthi ompvü engacho, "Onteno kvüi yirachola? Nlan ni piv ochia n vanchoke?" 11 Ompvü na janlancho, "Ochia n van, Tsüphoeyo," Jisu na ezocho, "Tona ana ha n lan ni n piala, yia osi mmen ti tssolana."
Limha Wondang Jisu
12 Jisu na Pharasee jiang elani ezocho, "Aiyo limha wondang ji. Ochona a phana roana ombona eküm wondang hunguv osi emüngi kvüthüngha n sanphi." 13 Pharasee jiangna ombo ezocho, "Nina nibobo ehungpvüi pia küma nina ntio ehungpvüi tssoa sana jiango ejüng tae." 14 Jisu na janlancho, "Meka," "Ana abobo ehungpvüi pilea ana ntio phyoa sana jiango otsotso, ntiotssole aiyo kvüina rocho osi kvüi yiasana ana ntsia. Ntena jo aiyo kvüina rocho osi kvüi yiasana n tsi. 15 Ntena kyon nchümri ephanina oyam etsiala tolea ana jo ochia thüngi hojito n tssoala. 16 Ana oyam chyui zewo otsotso lona tssoyiv, ntiotssole aiyo apoti mek, a rothuko apo na a thüngi vana. 17 Nte shikhfü lo, ehungpvüi otsük enina tssona otsotso tssoala to erani lia. 18 Aiyo abobo ehungpvüi piala osi a rothuko opo na ha ehungpvüi a tssoyiala." 19 Ontena engacho."Nipo jo kvüila?" Jisu na janlancho, "Ntena a ha apo ha n tsi. Ntena a ntsiwo apo ha ntsiv." 20 Shiang hetopvü Jisu na khümpheni othan thephen Bakos vao chungchak jilo na püngnoathüng phyocho. Osi ombo yuta n janhamo jina ochina ha ombo n rhümacho.
Ana kvüi Yiasana Ntena Nroche
21 Jisu na onte janlancho, "Ana yivka, osi ntena a yantav khatola nte mmen hansi nte chükham. Ana kvüi yiana jilo ntena n roche." 22 Tole Jihudi esapvüi jiangna phyotacho, "Ombona kvüi yia sana etena n oche to phyoala. Ji yichak jo ombobo jaktoni chüvsa alo?" 23 Jisu na janlancho, "Nteno limha shilo kyonden, tolea aiyo potsüwoe na rocho. Nteno limha shi lona, osi aiyo limha shi lona mek. 24 Jitsükona nte mmen ra lona nte chükham to ana nte ezocho. Osi ntena 'Aiyo ochosana hoji A ka' to a n longtsüna nte mmen lona nte chükham. 25 Ontena, "Nino ochola?" to ombo engacho, tole Jisu na janlancho, "Ana benkadenina nte ezothaka. 26 Ana nte tsükona ephyov osi nlan nte piv elümoto lia. Tolea a rothuko jijo ntsa osi ombona ntio a ezoana ji tae ana limha ji ezoala." 27 Jisu na opo tsükona onte ezoa vana to ontena n tsicho. 28 Jitsükona ombona onte ezocho, "Ntena kyon tsoe ji kvüthüng donkachiana aiyo 'Ocho sana hoji ka' to ntena ntsiv. Ana a etancho ntia n tssoala. Apo na a püngno ji esüa ana shiang phyoala. 29 A rothuko ji a ndüngo vana osi ombona a boti a n si, ntiotssole ana ombo na chokao ji tae tssoala." 30 Jisu na heto phyo shi ezoe elümotona ombo longtsücho.
Etancho Kyon Tona Ezii To
31 Jisu na ombolo longtsüi Jihudi jiang ezocho, "Ntena a püngnoyi engae benphina nteno a sürüi tsotsoden; 32 ntena ntsa ji ntsiv osi ntsa jina nte vachiv." 33 Tole ontena ezocho, "Eiyo Abraham tsoronichen den, osi kvü thüngha oyam ezii e n kümhan. Tona kvütoli nina 'Nte vachiv' to phyoala?" 34 Jisu na onte ezocho, "Ana otsotso nte ezoala, ochona mmen tssoana jijo mmen ji nrü. 35 Nrü jo wopan lo sunga n vanala, tolea otsoe jijo wopan jilo nchünkhon vanala. 36 Otsoe jina nte vachia tssona nteno etancho tsotso jilo vam. 37 Nteno Abraham tsoronichen to ana ntsia. Toaha ntena a lüngthav yantala, ntiotssole ntena a püngno yi n khichoala. 38 Aiyo apo na ntio a ejücho sana hoji phyoala osi nteno nte opo jiangna nte ezowo ji phyotala." 39 Ontena janlancho, "E opo jo Abraham." Jisu na ezocho, '"Nte ji otsotso Abraham tsoeden saliwo ombona ntio tssocho sana ntena hoji tssov. 40 Ana nte yolo kvüta elhi tssothakcho sana topvü ana Potsow thüngina ntio ntsa zocho sana hoji nte ezov tsükona, toaha ntena a lüngthav yantala. Abraham na kvüthüngha hotüv ri tsso. 41 Ntena nte opo jiangna ntio tssocho sana jiang tssotala." Ontena janlancho, "Ena e opo jo Potsow vamo tae, osi eiyo ombo tsoeden." 42 Jisu na onte ezocho, "Otsotso nte opo jo Potsow saliwo ntena a nzam, ntiotssole ana Potsow thüngina rocho osi ana helo vana. Ana a etancho rocho mek, ombona a rothukcho. 43 Ntena ntioli ana phyo jiang n ngatala? Ntena a püngno yi ji n ngakhuko jina. 44 Nteno nte opo tsüngrham ji tso eden osi ntena nte opo lüm erüng ephan nte tssohungala. Benkadeni na ombo münghan, osi kvüthüngha ntsa jiwoe n tssohan, ntiotssole ombolo ntsa n jü. Ombona ejüng phyoana ombo tathi ji hoji, ntiotssole ombo ejüng ephyoe osi ejüng topvü opo ji ombo. 45 Tolea aiyo otsotso ji phyoala, jitsükona ntena a n longtsüala. 46 Nte yolo ochona a mmen yanchekhuka? Ana ntsaji nte ezoa tssona tona ntena ntioli a n longtsütala? 47 Potsow thüngina ero jina Potsow yi engala. Nteno Potsow thüngina meko jina ntena n ngala."
Jisu Tona Abraham To
48 Ontena Jisu engacho, "Ena nino Samaritan osi nilo tsüngrham vana to ni zo ji nlanchoke?" 49 Jisu na janlancho, "A lo tsüngrham n van. Ana apo kyuchiala, tolea ntena a nkyuchi. 50 Ana abobo myingthüng yana mek. Khatola hoji eyan thanpoe tsüka vana osi ombona a thüngoe thetala. 51 Ana otsotso nte ezoala, "Ochona a püngoyi engae benphiana ombo kvüthüngha n chü." 52 Ontena ombo ezocho, "Nilo tsüngrham vana to ena mmhona ntsithaka! Abraham ha chücho, zenkhying jiang ha chücho. Khatola nina ni püngnoyi engae topvü n chü to phyoala. 53 E opo Abraham chücho, osi nino Abraham lona tsükata to nina phyoa alo? Zenkhying jiangha chücho. Nino ocho to nibobo nchümala." 54 Jisu na ezocho, "Ana abobo a myingthüng yano hoji myingthüng jo ntia mek. A kyuchipvüi jo apo - ntena nte Potsow to phyoa vamo ji. 55 Ntena kvüthüngha ombo n tsihan, tolea ana ombo ntsithaka. Ana ombo n tsi to phyo wo ana ha nte esüa ejüng ephyoe tssov. Tolea ana ombo ntsia osi ombo yi jiang engayiala. 56 Nte opo Abraham na a ero tsüngon ji nhyakchev to eyiloa longshyucho." Osi hoji hungcho. 57 Jihudi jiangna ombo ezocho, "Nino nzyu tinyan tia n tssoham nina Abraham hungchoke?" 58 Jisu na janlancho, "Ana otsotso nte ezoala, Abraham n bukthüng na a vancho." 59 Tole ontena olong tsakae ombo ephyatsünguv tssocho. Tole Jisu na mphoa khümpheni na chiyi sicho.
Jisu na Kyon Tsüka Buklena Mhyikjüng Emiyiala
1 Jisu na yia vanathüng kyon tsüka buklena omhyik jukcho tüv ndukcho. 2 Ombo sürüi jiangna ombo engacho, "Püngnoe, kyon shi mmen lona alo ombo pvüpoe jiangna mmen tssocho mhyikjüng bukchola?" 3 Jisu na ezocho, "Shi jo ombo osi ombo pvüpoe jiang mmen tsükona mek; ombo lona Potsow elhi hungthukvü tsükona mhyikjüng bukcho. 4 Wondang tsüngon ji n yakthüng etena a rothuko ji elhi ji tssotav. Ochina ha elhi n tssochewo emüng ji tsata. 5 Ana limha lo evanthüng jo aiyo limha wondang ji." 6 Ombona hoto phyosi likoe njü nchukae chonbelak ji kyon ji mhyiko tümkayicho, 7 tosi ombo ezocho, "Owo Siloam wozhüi na epyoa sia." (Siloam yichak jo "Wothukcho." ) Jitsükona ombona owo epyoe sisi yile hungcho. 8 Ovüngthüng chontsoa ombo hungwo ombo yankho kyon jiangna phyotacho, "Kyon shijo khokthe chontsoa vamo ji mekcho ke?" 9 Tole ejoma na jo "Hoji ka" to phyotacho, khatola ejoma na jo "Hoji esücho kha hoji mek" to phyotacho. Kyon jina ombobo phyocho, "Hoji a ka." 10 Ontena ombo ezocho, "Tona ni mhyik jiango kvütoli bochichola?" 11 Ombona janlancho, "Jisu to tsao kyon jina ochon lo njü nchukae chonbelak ji atümkayi si a ezocho, Siloam wozhüi na owo omha ji mmyoe sia. Hoji esüa ana owo mmyoe sile hunga yicho." 12 Ontena "Ombo kvüi vana?" to engale ombona "Ana n tsi" to ezocho.
Emiyio Ji Pharasee Jiangna Yani Zetala
13 Ontena mhyikjüng ji Pharasee jiang thüngi sosi wocho. 14 Jisu na chonbelak nsüngrüi mhyikjüng pochiyioji emung tsüngno tssocho. 15 Pharasee jiang na kvütoli omhyik ji ombo pochiyicho sana to ombo engalancho. Ombona onte ezocho, "Ombona chonbelak atümkayisi ana hoji epyoe sile hungala." 16 Pharasee ejoma na phyotacho, "Ochona hojito elhicho sana jijo Potsow thüngi na mek; ntiotssole ombona esanmung ji n khayicho." Thanpoe na jo heto phyocho, "Mmen kyon najo kvütoli chethev hetüv tssochevla?" Hojito onteji n myantav nchümtacho. 17 Ontena elani mhyikjüng ji ezolancho, "Ombona omhyik ni pochiyicho to nina phyoaka ninajo ombo tsükona kvüto phyovla?" Om bona phyocho, "Ombo zenkhying." 18 Jihudi jiangna jo kyon ji omhyik juki vancho toji ombo pvüpoe jiang tsae heto engae n zev jo n longtsücho, 19 "Shijo nitsoe omhyik juka buko ji alo? tona kvütoli enhünga jo hungala?" 20 Opvüpoe jiangna janlancho, "Shijo etsoe ji osi omhyik juka bukcho to ena ntsia; 21 tolea kvütoli hungcho sana osi ochona pochiyicho sana jijo ena n tsi. Omboha eranküm ka ombo enga. ombobo phyovka." 22 Ombo pvüpoe jiangna hojito phyo jijo Jihudi jiang kyuo jina, ntiotssole Jihudi jiangna ochona Jisu ji shanchopvüi to longtsüa na Synagogue kina phani siv to methak licho. 23 Hoji tsükona kyon ji pvüpoe jiangna, "Omboha eranküm ka ombo enga" to phyocho. 24 Yenjo enioto ontena mhyikjüng ji tsae egacho, "Nina Potsow mhadungo otsotso phyochaka! Kyon tsük ji mmen kyon to ena ntsia." 25 Ombona janlancho, "Omboji mmen kyon mekmeka na ana n tsi, ana ntsiwo jijo aiyo mhyik jung vancho khatola ehungo hungala." 26 Ontena ombo ezocho, "Ombona ntio ni tssoyichola? osi kvütoli omhyik ji ni pochiyichola?" 27 Ombona onte ezocho, "Ana nte ezothaka ha ntena nngala; nterio ntiolui a engatala? Nteha ombo sürüi nte kümhunga alo?" 28 Ontena ombo rhiyia ezocho, "Nino ombo sürüi osi eiyo Moses sürüiden. 29 Potsow na Moses thüngi jantacho, osi kyon shijo kvüi na yicho sana n tsi." 30 Kyon jina onte ezocho, "Emhuktav lio ji shi, ntena jo ombo ji kvüina rocho sana n tsi; tolea ombona a pochiyicho! 31 Potsow na mmen kyon yi nngayiala, tolea ochona ombo lüm erüng tssoyia sanaji, Potsow na ombo yi engayiala. 32 Kyon ochinaha mhyikjüng bukcho pochiyiala to phyota n zohan. 33 Kyon shi Potsow thüngina mekcho salivo ombona ntia n tssoche." 34 Ontena ombo ezocho, "Ni bukpvü mmeni na ni khyochecho, nino ochola e püngnoala?" Ontena hoto phyoa synagogue na phani ombo sicho.
Omon lo Mhyikjüng
35 Ontena ombo phani sicho to Jisu na zocho, osi ombona kyon ji nduki ezocho, "Nina kyontsoe ji longtsüa alo?" 36 Ombona janlancho, "Tsüphoeyo, ombo ochola ana longtsüv lichola?" 37 Jisu na ezocho, "Nina ombo hungthaka, osi enhünga nithüngi janta vana." 38 Ombona ezocho, "Tsüphoeyo, ana longtsüala." Hojito phyoa ombona nkhümthe khümcho. 39 Jisu na phyocho, "Mhyikjüng jiang hungthokvü tsükona osi ochoang na hunga sana jiango mhyikjüng kümthokvü tsükona ana yitssolo limha shilo rocho." 40 Ombo ndüngo Pharasee vamo jiangna hoji zoe phyotacho, "Tona ji yichak jo enaha mhyikjungden alo?" 41 Jisu na onte ezocho, "Nteji mhyikjungden salivo nte nlan n li; tolea enhünga ntena ena hungala to phyoala; jitsükona nte nlan liala."
Olyu Enhyang lo Ejyukao Ji
1 Jisu na ezocho, "Ana otsotso nte ezoala: kyon ochona kibüngina mekvü thanpoe na yangkae olyuden jilo rhowoa sana ombo efüi osi retsoe. 2 Kyon ochona kibüng ji yakchia rhowoa sana jijo olyu jiang enhyang ji; 3 Kibüng enhyang jiangna ombo chonchiala. Ombona olyu jiang omying na tsana olyu jiangna ombo won ji zoala, osi ombona onte sochukala. 4 Ombona onte sochukthaka na ombona ovüngi woe olyu jiang khi ombo sü rütokala, ntiotssole olyu jiangna ombo won ji ntsia. 5 Ontena thanpoe n phanphi, ontena kyon thanpoe thüngina jo yunga tsantav, ntiotssole ontena ombo won n chethe." 6 Jisu na ejyuka shi onte ezoaha ontena ntio etsso sana ji n tsicho.
Jisu Jo Olyu Enhyang Mmhon
7 Jisu na onte ezocho, "Ana otsotso nte ezoala; aiyo olyu jiang kibüng ji 8 Avüngoe rothako jiang topvü efüi osi retsoeden, osi olyu jiangna onte yi n ngayicho. 9 Aiyo kibüng ji, ochona a yakchia rheyia sana jijo shanchov; Ombona chiwo rheyi tssov osi yantsophen eroyo yanchev. 10 Efüi jina efülo, lüngthalo osi roe silo tae rhoroala. Ana roji jo ntelo eküm litokvü tsükona – osi benri eküm nte hungthokvü tsükona. 11 "Aiyo olyu enhyang mmhom, ochona ombo olyu jiang tsükona chühunga sana hoji. 12 Olyu enhyang meko osi olyu jiang pvüi meko jokheman mmyotsoe jina ranfü tsata hungana olyu jiang sisi tsanala; jitsükona ranfü jiangna olyu jiang rüma phanroe siala. 13 Mmyotsoe jina tsamo jijo ombo jokheman eyan tae, osi olyu jiang tsükona n wongkhyuo jina. 14-15 Aiyo olyu enhyang mmhom ji. Apona a ntsiwo ji esüa anaha ombo ntsia, hojito ana a olyu jiang ntsia osi ontena ha a ntsia. Osi ana onte tsükona a eküm piala. 16 A olyu thanpoe oden shilo n jücho vanlana, ana onteha eküma yichev osi ontena a yi engav, osi onte ji oden motsünga tssoe enhyang motsünga tssov. 17 Opona a nzanala, ntiotssole ana a eküm ji hunglamo tssoa piv sala. 18 Ochinaha a eküm ji a lona khi hansi n yiala. Ana a lüm na rünga piala. Ana a eküm ji pisi khilam tsükona a elan lia. Osi shijo apona heto etssov a ezocho." 19 Oyi shiang tsükona elani Jihudi jiang yolo n myanta tsüphov sothecho. 20 Onte khoshana "Ombolo tsüngrham vana osi ombo zhüvala, ntiolyui ombo yi jiang engatala?" to phyotacho. 21 Thanpoe na jo "Shiang ji tsüngrham evan najo heto n phyo, tsüngrham najo mhyikjüng pochiyiake?" to phyotacho.
Jisu N khichocho
22 Vamithüng ekhümki ji nthoche elhi Jerusalemi na khita vancho. 23 Jisu na jo khümpheni Solomon rafüp jilo sanphia vancho. 24 Tole kyon jiangna etssirhyui ombo ezotacho, "Hetenhya emhuka e ti vantokna otsotso ji e zoa: Nino shanchopvüi ji memek?" 25 Jisu na janlancho, "Ana nte ezothaka ha ntena n longtsüala. Ana apo etho khi elhi tsso shiang na a tsükona phyoala;26 tolea ntena n longtsüala, ntiotssole nteno a olyuden mek. 27 A olyu jiangna a yi engala, ana onte ntsia osi ontena a sü rüala. 28 Ana kümali eküm onte piala, osi kvüthüng ha onte n chü. Ochinaha a khelona onte n rechoche. 29 Apona ntio a pithakcho sana jijo topvü pomoe lona tsüphokata, osi ochinaha opo ntanknshon jilona rechoe onte n khiche. 30 Opo tona a tojo motsünga." 31 Tole kyon jiangna elani olong khyokae ombo ephyatav tssocho. 32 Jisu na onte ezocho, "Apona etssov a picho ana nte mha dungo elhi mmhom elüm tssotha ka; jiang yolo kvüwoe tsükona ntena a ephyatsünguv la? 33 Ontena janlancho, "Ni elhi mmhom tsükona ena ni ephyatsünguv sa mek, ni yikvü-yilo ji tsükona! Ntiotssole nino kyon kha tola nina nibobo Potsow to hoala!" 34 Jisu na janlancho, "Potsow na 'Nteno Potsowden' to phyocho to nte shikhfü lo erani lia. 35 Nthomotsü lona ntio phyoa sana jijo kümali ntsa to etena ntsia, osi Potsow na kyon ochoang thüngi ombo yithen picho sana jiang Potsowden to tsala. 36 Aiyo opo na a ethüngchei limha lo a rothukcho. Tona kvütoli ana aiyo Potsow tsoe to phyoji yikvü yi to phyotala? 37 Apo na a tssothuko elhi jiang ana n tssona a ti longtsütava. 38 Tokhatola ana hojiang tssoa tssona ntena a n longtsülea a elhi jiang tia longtsüi opona alo vanala osi ana opo lo vanala to echunga taena ntsi khitava." 39 Ontena Jisu rhümav ekhyo tssotalancho, khatola ombona onte khe lona tsanchoe sicho. 40 Osi Jisu na Jordan bankae John baptiphen jilo chiyi vancho. 41 Kyon elüm na ombo thüngi oro phyotacho, "John na chethev ntia n tssoa khatola ombona kyon shi tsükona phyo jiang topvü otsotso." 42 Osi hojilo kyon elümoto na ombo longtsücho.
Lazarus Chüo Ji
1 Bethany lo evan Lazarus to tsa nochonoria vancho. Bethany jo Mary ha oyenio Martha oni yan ji. 2 (Mary shijo OPVÜI jo lo mozhürhüm phyangkayisi ompvü tssan na mhe siyio ji. Ompvü pyae Lazarus ji ra vancho.) 3 Onyeni na Jisu thüngi heto oyi yencho: "OPVÜI, ni nzamo shom ji ra vana." 4 Jisu na hoji zoe phyocho, "Era shina Lazarus chüv meka; Potsow pvütsson hungthukvü tsükona heto tssoaka, osi shi yakchia Potsow tsoe jina pvütsson hunguvka." 5 Jisu na Martha onyeni tona oni opyao Lazarus to nzancho. 6 Tokhatola Lazarus rao ji yiwon zoaha ombona vamo meta jilo tsüngon eni vanlancho. 7 Tosi ombo sürüi jiang ezocho, "Etena Judea metae yitavka." 8 Sürüi jiangna janlancho, "Püngnoe, epayalo ti hojilo kyon jiangna ni ephyatsünguv tssocho, tona nino jiwoe yilam ziake?" 9 Jisu na ezocho, "Enga lo khonda taro eni tssoala. Jitsükona ochona eng-o sanphia sana ombo nshüphiv meka, ntiotssole ombona limha wondang ji hungala. 10 Tokhatola ochona emüngo sanphia sana ombo nshüala, ntiotssole ombolo wondang ji n li." 11 Jisu na hoto phyosi heto ha phyocho, "Ete shom Lazarus ji yipa vanka, ana owo ombo nthechivka." 12 Sürüi jiangna janlancho, "OPVÜI, ombo ji yipa vancho tssona mmhomka." 13 Jisu na jo Lazarus ji chüthaka to phyocho khatola ontena jo yipa vancho tsotso tsayicho. 14 Tole Jisu na bolaroe na onte ezocho, "Lazarus jo chüthaka, 15 Khatola ana hoji n vamo ji nte tsükona a mathata ntiotssole ntena longtsüv. Etena wotavka." 16 (Nshüm tso) Thomas na ombo nzo etssoe sürüi jiang ezocho, "Ete topvü na püngnoe shi nzo wotasi ombo nzo chütavka!"
Jisu jo Kümlamo ji Osi Eküm ji
17 Jisu na chiwole, Lazarus juthesi tsüngon mezhü tssothakcho. 18 Bethany jo Jerusalem lona kilometer ethüm harüma, 19 osi Judea kyon elümoto na Martha ha Mary oni opyao chüo ji tsükona oni ejicholo rotacho. 20 Jisu tsata to Martha na zoale nduko chiwocho, khatola Mary jo oki na vancho. 2i Martha na Jisu ezocho, "OPVÜI, nina helo vancho saliwo a pyao shi n chüv tssov! 22 Tolea ana ntsia, enhünga lia nina ntio chonana Potsow na ni engayiv." 23 Jisu na ompvü ezocho, "Ni pyao ji kümchelamka." 24 Ompvüna ezocho, "Ana ntsia," "Ombona ochüm tsüngono kümchelam to." 25 Jisu na ompvü ezocho, "Aiyo kümchelamo ji osi eküm ji. Ochona a longtsüa sana ombo chülea eküm vam; 26 osi ochona eküm vani a lo longtsüa sana kvüthüng ha n chü. Nina shi longtsüa alo?" 27 Ompvü na janlancho, "Hoka, OPVÜI!" "Nino shanchopvüi Potsow tsoe, limha lo rovsa vamo ji to ana longtsüala."
Jisu na Kyala
28 Martha na heto phyosi sülo elani oyi oyenio Mary mphoa tsae ezocho, "Püngnoe ji helo vana" "Osi ombona ni tsala." 29 Mary na hoji zoale, phanthi ombo nduko chiwocho. 30 (Jisu jo oyan ji n janham Martha na nduko jilo vancho.) 31 Mary ejichota vamo jiangha Mary na phanthi chiwoale ompvü phana wotacho. Ompvüna olüpi kyalo yia tsayia ontena nchümcho. 32 Mary na Jisu na vamo ji jancho osi ompvü na ombo hungpvü ombo jolo epyakthecho. Ompvüna phyocho, "OPVÜI," "Nina shilo vancho saliwo a pyao ji n chüv tssov!" 33 Ompvüna kya Jisu na hungcho, osi ompvü ndüngo kyon jiang naha kyata hungcho. Tole ombo lümbümo rhaka elümoto ombo nungracho. 34 Ombona onte ezocho, "Nteno kvülo ombo juthechola?" Ontena ezocho, "Oro zeta OPVÜI." 35 Jisu na kyacho. 36 Tole kyon jiangna phyotacho, "Zeta ombona hetata ombo nzanka!" 37 Onte yolo ejoma na phyotacho, "Ombona mhyikjüng omhyik pochiyichola nüng? Ombona Lazarus n chüthuko tüv jo n tssochecho ke?"
Lazarus ji Kümlanthukcho
38 Jisu na lüm rungro jina olüpi wolancho. Olüp ji lungkvü tüv lungpyak na lhüpcho tssocho. 39 Jisu na ezocho, "Olong ji khoe sia!" Echüo ji oyiluv Martha na ombo ezocho, "OPVÜI, ombo chüsi tsüngon mezhü tssothak-küma orhüm tssothakvü." 40 Jisu na ompvü ezocho, "Nina longtsüna Potsow pvütsson hunguv to ana ni zezo?" 41 Ontena olong ji khoe sicho, osi Jisu na oyaki zekachia phyocho, "Nina a phyocho a engayio ji tsükona montsso ni piala apo. 42 Nina yuta topvülo a engayia khatola shilo kyon vamo shiangna nina arotokcho to longtsüthokvü tsükona ana shi phyoala." 43 Ombona hoto phyosi owon tssoa, "Chiyia, Lazarus!" to tsachukcho. 44 Tole ombo jo okhe jiang echümüng eyuksü na eyuki, ombo mha jiha eyuki chiyicho. Jisu na onte ezocho, "Lanphe ombo yithuka."
Jisu Pono Okyak Thetaoji
45 Mary janthechilo eroe kyon elümoto na Jisü na ntio tssocho sana ji hungi ombo longtsücho. 46 Tokhatola onte ejoma najo oyi Jisu na ntio tssocho sana ji Pharasee jiang ezotacho. 47 Tole Pharasee tona pvüti tsüphoeden to jiangna etssirhyui heto phyotacho, "kvüto lyutavla? Kyon shina chethev tssoa vamo shiang zetava. 48 Etena heto ombo sicho jo kyon topvü na ombo longtsüv küma Rom esapvüi jiangna ete khümphen shi tona ete jipo to roe siv!" 49 Onte yolo tsüka Caiphas to tsa hoji nzyu pvüti tsüphoe ji tssoa vamo jina phyocho, "Nte zhüvake! 50 Ete jipo topvü montokvü ji thüngina jo kyon tsüka chütoko ji mmhomo to ntena n tsichoke?" 51 Shijo ombo etancho phyocho mek, tolea hoji nzyu pvüti tsüphoe ji ombo tsso jina, Jisu na Jihudi kyon tsükona chüv sala toji ombona metheta vancho. 52 Onte tsükona tae mek tolea Potsow kyon nzonroe vamo jiang topvü motsünga kümtokvü tsükona. 53 Hoji nchyuk na Jihudi esapvüi jiangna Jisu lüngthav yancho. 54 Jitsükona ombona Judea lojo opon tssoa n yentsav lijüng ji ndüngo Ephraim to tsa oyan jilo owo ombo sürüi jiang nzo vancho. 55 Yakchi tokhu ji jana vamo jina kyon elüm na oyanina ehungo Jerusalemi tokhu ji n janthüng shikhfü ephan ntssüngche elhi tssoa vantacho. 56 Ontena Jisu yanta vansi sanrhyui onte onte engatacho, "Kvüto nchümtala, ombona tokhu jilo n rov tssovla nüng?" 57 Pvüti tsüphoeden tona Pharasee to jiangna Ochona Jisu hunga sana onte ezole ontena rhümavka to yivon pi vacho.
Bethany Lona Jisu Ji Thyujü Nzüyicho
1 Yakchi tokhu ejam tsüngon tiruk liathüng Jisu na, Lazarus, ombona kümchelantoko ji ki owo vancho. 2 Hojilo ontena mmyui etsoyu ombo methakicho, osi Martha na tssichi-hanchicho; Jisu nzo etsov tsükona khukthe evamo jiang yolo Lazarus ha tsüka tssocho. 3 Tole Mary na mozhürhüm mmhom motsünga hansi oro Jisu jolo phyangkayisi ompvü tssan jina mhe siyicho. Mozhürhüm mmhom jina oki ji pyinga rhümcho. 4 Jisu sürüi yolo tsüka Ombo yemvü sa evamo Juda Iskariot jina phyocho, 5 "Ntiouli mozhü shi rangpyak nzo ethüm na yeni orang ji yantsae jiang n pichoto?" 6 Ombona otsotso yantsae jiang nzancho lona hojito phyocho mek, khatola ombo efüi tsso jina. Ombona rangsükvü ji hansi ombobo tsütsacho. 7 Tole Jisu na phyocho, "Ompvü etsso tssothuka! Ompvü eli ji khi a shotheta thüng nzüphen tssothuka. 8 Nteno yantsae jiang ndüngo nchukaben vamvü, tolea yuta akvü jo a nzo vantav mek."
Lazarus Tsükona Kyaktacho
9 Jisu ji Bethany lo vana to kyon elümoto na zoe hoji wotacho; Jisu tsükona tae mek, khatola Jisu na kümlantoko Lazarus ji zetav tsükona. 10 jitsükona pvüti tsüphoe jiangna Lazarus ha lüngthav tssocho, 11 ntiotssole ombo tsükona kyon jiangna onte sisi Jisu longtsüa yicho.
Ekhyo Khia Jerusalmi Rhowo Ji
12 Ojyuato kholok tsüphov yakchi tokhu lo eroe jiangna Jisu ji Jerusalemi tsata to owon zocho. 13 Jitsükona ontena Pam khero ekhüpi bentasi ombo nduko heto tüngta chiwocho, "Potsow thünga! Ocho OPVÜI myingona rocho sana ji Potsow khi mmhayitoka!" Potsow khi Israel mesao ji mmhayitoka!" 14 Nthomotsü lona heto phyoe lioji esüa, "Jisu na Gadho motsünga khi tsankacho. 15 "Tikyua, Zion yantsü! Ni mesao ji Gadho ro lo tsankae tsata!" 16 Hojithüng jo ombo sürüi jiangna hoji n gathecho, khatola Jisu na pvütsson lona phanthi sanati Nthomotsü jina ombo tsükona phyocho. Osi ontena ombo tsükona hoto tssocho to sürüi jiangna nchümchecho. 17 Jisu na Lazarus ji echü lona kümlanthoko jithüng kyon jiangna hoji motsü ji oyam ezotacho. 18 Jitsükona kholuk jina ombo chethev elhi motsü ji zoe ombo yantacho. 19 Pharasee jiangna onte yolo phyotacho, "Zeta, etena ntia nlyuche, limha toto na ombo phankatala!"
Greek Kyon Ejoma na Jisu Yantacho
20 Tokhu yutalo Jerusalemi khümo eroe jiang yolo Greek kyon ejoma jücho. 21 Ontena Philip, Galilee lo Bathsaida yamo ji nduki ezotacho, "Tsüphoeyo, ena Jisu e ndukhungala." 22 Philip na owo Andrew ezocho osi oni nzo owo Jisu ezotacho. 23 Jisu na onte ezocho, "Kyontsoe jina pvütsson tsüphov ehungu yuta ji janthaka. 24 Ana otsotso nte ezoala: "Tssuktsüng motsünga jina likoe elungthe n chüa na otsung motsünga tae vanala. Hojina chüana otsung elüm kümala. 25 Ochona ombo eküm ji nzana sana hoji moni siv. Ochona limha shilo ombo eküm ji tssaka sana jina kümali eküm hungu. 26 Ochona a benkae elhi tssohunga sana jina a sü rüa rochev, osi ana kvülo vana sana jilo vanchev. Osi ochona a benkata sana ji apona yikrachiv.
Jisu na Ombo Echüv Ji tsükona Phyoala
27 Enhungo alümbüm ezüpa a nungrala, ana ntio phyovla? Ana "Apo yuta shi apono ti rothuka" to phyov alo? Tolea ana ezüp yuta ji yakchichev, ntiotssole ana shi tsükona rocho. 28 Apo, ni mying ji pvütssonthuka!" Tole tothüng ji potsüwoe na heto owon tssocho, "Ana hoji pvütsson lithukthaka, osi elani lithuklam." 29 Hojilo kyon kholuk vamo jiangna hoji zoe, potsüo ejencho tsayitacho, osi ejoma najo "Lanben na ombo janala!" to phyotacho. 30 Jisu na janlancho, "Owon zoji a tsükona mek, tolea nte tsükona. 31 Limha shi oyi tssoyiv yuta ji janthaka; enhungo limha shi esapvüi ji khi siv. 32 Kvüthüng limha shi lona akhikata sana ana otsük akvü a thüngi khikav. 33 Ombona heto phyo jijo ombo echüv ji motsü phyocho. 34 Kholuk jina janlancho, "E shikhfü lo lio ji ephan jo shanchopvüi jina kümali vam, tona kvütoli kyontsoe ji khikav to nina phyoato? Kyontsoe jijo ochola?" 35 Jisu na janlancho, "Wondang ji nte yolo esüngaro vansav. Wondang ji nte yolo liathüng sanphitava; tona emüng jina nte yolo n yi. Ntiotssole emüngi sanphi kyon jina ombo kvüi yia vancho sana ji n tsi. 36 Tona ntena wondang ji liathüng hojilo longtsütava, tona nteno wondang ji kyonden tssovka."
Kyon Jiang N longtsü Ji
Jisu na heto phyosi chiyi kyon jiang mphoa vancho. 37 Ombona onte ehungona chethev hetata tssothaka ha ontena ombo n longtsücho; 38 hojitolui Isaiah zenkhying na phyoji bencho: "OPVÜI , ochona epüngno yi ji engachola? OPVÜI na ombo etho ji ocho thüngi ejüchola?" 39 Jitsükona ontena n longtsücho, ntiotssole Isaiah na hetoha phyocho, 40 "Potsow na onte mhyik jiang jukithaka; osi onte lümbüm jiang eyukki thaka, Onte mhyik na n hungthokvü osi onte lümbüm na n ngathetokvü tsükona osi onte emiyile to a thüngi n rotokvü tsükona to Potsow na phyoala." 41 Isaiah na heto phyo jijo ombona Jisu pvütsson ji hungi ombo tsükona phyochicho. 42 Toaha Jihudi esapvüi elümoto na Jisu longtsücho. khatola Pharasee jiang ekyulona onte na opon tssoa hoji longtsü ji n phyotacho, onteji Synagogue kina n phantokvü tsükona. 43 Ontena Potsow na chokao ji thüngina jo kyon na chokao ji yantacho.
Jisu Yi Yakchia Yitsso
44 Jisu na owon tssoa phyocho, "Ochona a longtsüa sana alo tae mekna arotoko jiha longtsüala. 45 Ochona ahunga sana a rotoko jiha hungala. 46 A lo longtsüi ochinaha emüngi n vamo tssoa ana limha ji wondang esüa rothaka. 47 Ochona sana a püngnoyi zosi n benphilia ana oyi n tssoyi. Ana limhae oyi tssoyiv rocho mek, tolea limha ji shanchov tsükona rocho. 48 Ochona a n khichov osi a püngnoyi ji n khichoa na oyi ombo tssoyipvüi vana. Ochüm tsüngono jo ayi shiangna oyi ombo tssoyiv! 49 Shijo otsotso, ntiotssole ana a etancho püngnocho mek, tokhatola a rotoko a opo jina ana ntio phyov osi püngnov sana ji a ezocho. 50 Osi ombo yi jina kümali eküm epiala, to ana ntsia. Jitsükona ana ntio phyoa sana jijo apo na ntio phyothakcho sana hoji."
Jisu na Ombo Sürüi Jiang Jo Epyoyiala
1 Yakchi tokhu yuta ji ejam enga tae liathüng Jisu na heto tssocho. Jisu na ombona limha ji sisi opo thüngi chüngiv yuta janthaka to ntsicho. Limhalo ombo ndüngo vamo kyon jiang ombona yuta topvülo nzancho; osi ombona ochüm jana onte nzancho. 2 Jisu tona ombo sürüi jiang to tsoyuta vanathüng, Simon Iskariot tsoe Judas lümbümi Jisu eyemvü nchümri ji rheyithakcho. 3 Opo na etho topvü ombo pithaka to Jisu na ntsicho. ; osi ombona opo thüngi na rosi opo thüngi elani yiala toji ntsicho. 4 Jitsükona ombona tsopheni na phanthi osü opomo ji phungchei vasi eryulo osü teriv khi tssenthecho. 5 Hoji süi jo ombona jü-vakuk lo ojü yenthei bensi ombo sürüi jiang jo epyoyisi süporo jina shuki siyia wocho. 6 Ombona Simon Peter oyi janale Peter na ezocho, "OPVÜI, nino a jo a epyoyiv sake?" 7 Jisu na janlancho, "Ana ntio tssoa sana ji nina enhünga jo enga thev meka; tolea henasüiti engathevka." 8 Peter na ekhirana ezocho, "Nina kvüthüngha a jo a npyoyiche!" Tole Jisu na janlancho, "Ana ojo ni n pyoyiana nino enhungo a sürüi mek." 9 Simon Peter na ezocho, "Tona OPVÜI, ojo tae a ti epyoyia! Tolea okhe tona kvüri toha, a epyoyia!" 10 Jisu na phyocho, "Ochona tsükathaka sana ombo ntssünga, jitsükona ojo yaka epyov n li. Nte yolo tsüka yaka nte topvü ntssünga." 11 (Ochona ombo yem sana ji Jisu na ntsia, jitsükona ombona "Tsüka yaka nte topvü ntssünga" to phyocho.) 12 Jisu na onte jo jiang epyoyisi ombo sü opomo ji phukthesi ombo vanpheni oyi khukthelancho. Ombona engacho, "Enhünga ana ntio nte tssoyoicho sana ji ntena tsentsi? 13 Ntena püngnoe osi OPVÜI to a tsala, osi hoji etümthata, ntiotssole aiyo hojitüv. 14 Nte Pvüi osi püngnoe ana ojo nte epyoyithaka. Tona ntena chungta nte nte ojo epyotav shikhfü. 15 Ana ntio nte tssoyicho sana nte khi benphitokvü tsükona zechoe khiphen ana tssoe nte ejüthaka. 16 Ana otsotso nte ezoala: phajae ochia ombo pvüi ji pomoe n van, osi yithenpvüi ochia yithen ombo hansi wothoko ji pomoe tüv n van. 17 Ntena ntsa yi shi ntsithako jina ntena benphina nteno kvüta mmha eliden tssov to!" 18 "Ana nte topvü tsükona phyoa mek, ana ochoang tsachukcho sana onte ntsia. Tolea ntho motsü lona 'Kyon ochona a tsorhyucho sana jina a ri kümcho' to phyoji benthokvü tsükona. 19 Shiang n tssothüng na ana nte ezoala, kvüthüng tssoa sana nte khi 'Aiyo ocho sana hojika' to longtsütokvü tsükona. 20 Ana otsotso nte ezoala: Ochona ana wothoko jiang khichoa sana anaha a khichoala; osi ochona akhichoa sana a rotoko jiha khichoala."
Ombo Eyem ji Jisu na Methetala
21 Jisu na hoto phyothakale elüm ombo nungracho osi phyocho, "Ana otsotso nte ezoaka: Nte yolo tsükana a yemvü sala!" 22 Sürüi jiang ji ekhenyimkhani onte ocho tssov sanato omhae zekachitacho. 23 Sürüi jiang yolo tsüka Jisu na nzamo jijo Jisu ndüngo khukthei vancho. 24 Simon Peter na ombo hataka ezocho, "Ocho tssov sana ombo engae ze." 25 Jitsükona sürüi jina Jisu tsokata owo engacho, "Hojijo ochola OPVÜI?" 26 Jisu na ezocho, "Ana hümri jümi ocho piasana kyontsük ji tssovka." Tosi ombona hümri jümi Simon Iskariot tsoe Judas ji picho. 27 Judas na hümri ji khi-pvüto tsüngrham na ombolo rheyicho. Jisu na ombo ezocho, "Nina ntio tssov sana zakto tssoa!" 28 Sürüi thanpoe etsoyu tssota vamo jiang ochinaha Jisu na hoto ombo ezowo ji yichak ji n tsicho. 29 Judas jo rangsükvü ji ezepvüi tsso jina, sürüi ejoma na jo Jisu na tokhu jilo ethelan owo eshiv ezocho alo, yantsae jiang ntiosana piv ezocho sana to nchümtacho.
Yizung Ethan Ji
30 Judas na hümri ji khi bensi zaktole hapoe chiyicho. Jithüng jo zümolo tssocho. 31 Judas na chiyithakale Jisu na phyocho, "Kyontsoe ji pvütsson ji enhünga hungtokvü sala; Potsow pvütsson ji ombo yakchia oponi chiyithukthaka. 32 Osi ombo yakchia Potsow pvütsson hungthukcho tssona Potsow na kyontsoe ji pvütsson ji ombo lona hungthokvü, osi ombona hoji zakto tssov. 33 A nongoriden, ana nte ndüngo lümato sunga vanlam meka; ntena ayantav, khatola ana Jihudi esapvüi jiang ezoji enhünga nte ezoala, "Aüa kvüi yiasana jii ntena n roche." 34 Osi ana enhünga yizüng ethan nte piala; Nte nte nzantava. Ana nte nzamo ji esüa ntenaha nte nte nzantav shikhfü. 35 Ntena nte yolo nzanta lina nteno a sürüiden to topvüna nte ntsiv."
Peter na Ekhiram Ji Jisu na Phyoala
36 Simon Peter na, "Nino kvüi yiala, OPVÜI?" to engacho. Jisu na janlancho, "Enhünga jo ana yia vamo jii nina rochev meka. Henasüiti ntena a sü rüa yivka." 37 Peter na engacho, "OPVÜI, ana kvütoli ni sü rüa n rochevla? Ana ni tsükona chüv methakthaka." 38 Jisu na janlancho, "Otsotso nina a tsükona chüv methakthakcho ke? Ana otsotso ni ezoaka, hono n khfüv nina a n tsi to yenjo ethüm ekhiram ka."
Jisu jo Opo Thüngi Eyilan ji
1 Jisu na onte ezocho, "Nte lümbüm roa ti-wongkhyu tava, Potsow lo longtsütava, osi aloha longtsütava. 2 Apo ki jo vanphen elümoto lia, osi ana nte vanphen methakilo yiala. To mekwo ana nte n zo, 3 osi ana oyi vanphen nte methaki thakana, ana elani oro nte sosi a nzo yitav osi ana kvülo vana sana nteha jilo vamvü. 4 Ana yia vamo jiwoe eyilan ji ntena ntsia. 5 Thomas na ombo ezocho, "OPVÜI, nina kvüi yia sana ena n tsi; tona kvütoli nina yia evamo jilo eyilan ji ena ntsivla?" 6 Jisu na ombo ezocho, "Aiyo olan ji, ntsa ji, osi eküm ji; ochinaha a n yakchiv apo thüngi n yiche. 7 Ombona onte ezocho, "Ntena a ntsithako jina apoha ntsivka; osi enhünga nandang na ntena ombo ntsia osi ombo hungthaka." 8 Philip na ombo ezocho, "OPVÜI, opo ji ehungthuka, jitaena e tssochyuvka." 9 Ana yuta sunga nte topvü ndüngo vanpvü, toaha nina a n tsichoke, Philip? Ochona a hungthaka na jina opo hungthaka, tona nina kvütoli 'Opo e thüngi ejüa to phyovla'? 10 Ana apo lo vanala, osi apo naha alo vanala to ji nina n longtsüa ke Philip?" Jisu na ombo sürüi jiang ezocho, "Ana ntio yi nte ezothakcho sana jiango a lona chiyicho yi mek. A lo vamo opo na ombo elhi a lona tssoala. 11 Aiyo apo lo vanala osi apo na alo vanala to ana phyo ji longtsütava. To mekana a elhi shiang zesi longtsütava. 12 Ana otsotso ji nte ezoala: "Ochona a longtsüa sana ana ntio tssoa sana ombona tssovombona tsüphokatalea tssov, ntiotssole ana opo thüngi yiala. 13 Ntena a myingona ntio chona na ana nte bencheyiv, to tssona opo pvütsson ji otsoe jilona hungthokvü. 14 Ntena a myingona ntio chona na ana nte bencheyiv.
Nthomon Erov Phyochak
15 "Ntena a nzana tssona, ntena ayizüng ji engav. 16 Ana opo ezov osi ombona Nzanchipvüi thanpoe nte ndüngo nchünkhon evamo tüv nte piv. 17 Ombo Potsow tsükona ntsa ji oponi chiyitoko mon ji. Limha jina ombo n khicho-khuk, ntiotssole limha jina ombo n hungkhuk osi ntsikhuk. Tokhatola ntena ombo ntsia, ntiotssole ombona ntelo vanala osi omboji ntelo vana. 18 "Ana yilea ana nte poti nte n si; ana nte thüngi rolam. 19 Yuta süngaro tsükona limha jina ahungu mek; tolea ntena jo ahungu, osi ana eküm vamo ji tsükona nteha eküm vamvü. 20 Hoji tsüngon ji jana na aiyo apo lo vanala osi ana ntelo vamo ji esüa nteno alo yanala to ntena ntsiv. 21 Ochona a yizüng jiang engae benphiana jina a nzanala, Ochona a nzana sana apo na ombo nzam, ana ha ombo nzam osi ana abobo ombo ejüv. 22 Judas (Iskariot ji mek) na ezocho, "OPVÜI, kvütoli nina limha ji thüngi jo mekna nibobo ethüngi ejüala?" 23 Jisu na ombo ezocho, "Ochona a nzana sana jina a püngnoyi jiang benphiv. Apo na ombo nzam osi apo tona a to na ombo ndüngo oro vamvü." 24 Ochona a n zana sana jina jo a püngnoyi jiang n benphi. Osi ntena apüngno yi zothako jijo a lona mek, a rotoko opo thüngi na. 25 "Ana nte ndüngo vanathüng shiang shi nte ezothaka. 26 Nthomon osi Nzanchipvüi opo na a myingona rotoko jina olan topvü nte püngnovka, osi ana ntio nte ezocho sana jiang topvü nte nehümehetokvü ka. 27 "Ana nte thüngi nte vayio jijo noying ji; a noying ji nte piala. Limha jina pio ji esüa nte n pi. Wongkhyua ti ekhentava osi ti kyutava. 28 "Ana yia khatola nte thüngi rolamka" to nte ezoa ntena zothaka. Ntena a nzano ana opo thüngi yia evamo jina nte emathav; ntiotssole ombo a lona tsüphokata. 29 Ana shiang hetopvü ji n tssothüng na nte ezowo jijo, tssoathüng ji nte longtsüthokvü tsükona. 30 Limha shi esae ji tsathako ji tsükona ana nte ndüngo sunga thyuta n vanche. 31 Ombona a pono ntia etho n li, khatola ana apo nzanala to limha ji khi ntsithokvü tsükona ombona ntio a ezoa sana ji ana tssoala. "Rotava, meta shilona yi sitavka."
Jisu jo Jününgrozhü Tsotso Ji
1 Aiyo jününgrozhü tsotso ji osi apo jo pharipvüi ji; 2 a lona khero kvümoe na tssüngthi n thia sana jiango ombona ekhüpi siala, osi tssüngthi ethio khero jiango ombona nrüchetala, hojijo tssüngthi kyungkata ethitokvü tsükona. 3 Aha nte püngnothako jina nte ntssüngchethaka. 4 A thüngi mmyantae vantava, tona ana ha nte thüngi mmyantae vamka. Khero najo ombobo jo tssüngthi n thiche, ombona dungpvü jilo chenkae vansanati ethichev. Hoji" esüa ntena a lo n vana tssona tssüngthi n thiehe. 5 "Aiyo dungpvü ji osi nteno kheroden, ochona alo vana sana osi ana ombolo vana sana jina tssüngthi khosha ethiv; ntiotssole ntena a n thev ntia n tssoche. 6 Ochona alo n vana sana khero esüa khi siala, osi mmyikae siala, hojitüv khero jiango omi hanthechi rungi siala. 7 Ntena alo vansi ayi jiang na ntelo vana tssona, ntena ntio ethev liana ji chom, osi ana nte piv. 8 Apo pvütsson jo ntena tssüngthi khosha ethio jilona hungthukala, osi hojitolui nteno a sürüiden toji ejüala. 9 Opo na a nzamo ji esüa anaha nte nzanthaka. A nzanlo vantava. 10 Ntena a yizüng jiang benphina ntena a nzanlo vanala, ana kvüto apo yizüng jiang benphisi ombo nzaülo vana sana ji esüa. 11 "Ana shi nte ezowo jjo a longshyu ji ntelo lithokvü tsükona, osi nte longshyu ji benrithokvü tsükona. 12 A yizüng jo heto: Nte nte nzantava, ana nte nzamo ji esüa. 13 Kyon tsüka na ombo shom tsükona ombo eküm pio jilona tsüphokao nzan n li. 14 Ana ntio nte ezoa sanaji tssona nteno a shomden. 15 Ana enhungo phanjaeden to nte n tsa; ntiotssole OPVÜI jina ntio tssoa sana ji phajae jina jo n tsi. Jithungona jo ana oshomden to nte tsala; ntiotsole apo thüngina ana ntio zothakcho sana jiang topvü ana nte ntsithukthaka. 16 Ntena a ethüngi khicho mek, tolea ana nte ethüngchecho, jijo nte khi sunga evamo tssüngthi ethithokvü tsükona. Jito tssona ntena a myingona ntio chona na apo na nte piv. 17 Ana shi nte ezoala: Nte nte nzantava.
Limha ji Thüngina Etssak
18 "Limha jina nte tssaka tssona, nte n tssakthüngna a tssakdencho to ntsitava. 19 Nte ji limha ji echi saliwo limha jina ombo echi to nte nzam; khatola ana limha lona nte tssachukthaka osi nteno limha ji echhi mek, jitsükona limha jina nte tssakala. 20 Phajae ochia ombo OPVÜI jilona n tsüphoka ka to ana nte ezoji ti mhechotava. Ontena akhangshia tssona nteha nte khangshivka; ontena a püngnoyi enga tssona nteha nte engayiv. 21 Khatola nteji a echi tsso jina ontena heto nte tssoyiv; ntiotssole a rotokpvüi ji ontena n tsi. 22 Ana oro nte n püngnocho saliwo onte ji mmen n chanchev tssov, khatola enhungo ontena mmen tsso jilona tsancholan n li. 23 Ochona a tssaka sana jina apo ha tssakala. 24 Ochina ha n tssohamo tüv elhi jiang ana tssoe nte n jüwo onte mmen jiang n chanchev tssov, tolea ana tsso jiang ontena hungthako jina ontena apo eniata e tssakala. 25 Tole shikhfülo heto erani lia: "Ontena ntia ntam n liv atssakcho." Shi ji benthokvü tsükona hojito tssocho. 26 Opo thüngina erowo mon ochona Potsow ntsa ji oponi chiyitokvü sana hoji nzanchipvüi rotokvüka. Opo thüngina ana nte thüngi rotokvü osi ombona a tsükona phyov. 27 Osi nteha benkadeni na a nzo tssopvü tsso jina ntenaha a tsükona phyovka.
1 "Nte longtsü n senphina vantokvü tsükona ana shiang nte ezothaka. 2 Synangogue kina nte phanchukchiv, osi ochona nte lüngthata sana ombobo Potsow elhi tssoala to nchümvü yuta ji tsathaka. 3 Kyon jiangna opo eni ochia e n tsio jina hojito elhitavka. 4 Yuta shiang kvüthüng yiasana ana nte ezocho to nte nchümchetokvü tsükona nte ezoala.
Nthomon Ji Elhi Ji
"Ovüngthüng jo ana nte nzo vamo jina shiang nte n zocho. 5 Enhungo ana a rotoko ji thüngi yiala, tolea nte ochinaha kvüi yiala to a n nga. 6 Osi enhungo ana nte ezothako jina nte lümbüm jiang nungra na pyingthaka, 7 Khatola ana otsotso nte ezoala: ana nte sisi yio ji nte tsükona jo hoji mmhona, ntiotssole ana n yiana Nzanchipvüi ji nte thüngi rov mek. Tolea ana yiana ana ombo ji nte thüngi rotokvü. 8 Osi kvüthüng ombona roa sana limhalo kyon jiang ombona mmen jo ntiosana ji ntsithokvü; ntiojo elancho sana osi Potsow yitsso jo ntio sana ntsithokvü. 9 A n longtsüo jijo mmen to ombona nte ntsithokvü. 10 Elani ontena ntsa jilo worhyuthaka osi ntena a n hungwo tssoa ana opo thüngi yiala; 11 osi limha shi esopvüi jijo oyi tssoyithaka ntsiotssole ontena yitsso jilo worhyuthaka to nte ntsithokvü. 12 "Ana kyungkata nte ezov lia, khatola enhünga jo ntena n ngatherakhok. 13 Tolea Potsow ntsa ejüpvüi mon jina roana, ombona ntsa jiang topvülo nte sovka. Ombona etancho nsam mek tolea ombona ntio zoana jitae nsamvü, osi mhadungi ntio tssov sanaji nte ezov. 14 Ana ntio phyoa na ombona hoji khi nte ezov, osi hoji yakchia ombona a pvütssonthokvü. 15 Apo na lio jiang topvü a echi, jitsükona ana omon jina ntio nte ezoana a thüngina khicho tssov to nte ezocho.
Nungra Tona Longshyu to
16 "N sungkhüngu ntena a n hüngu sivka, osi yuta tara sülojo ntena a hunglamka. 17 Ombo sürüi ejoma na phyotacho, "N sungkhüngu ombo n hungu sisi elani n sungkhüngu ombo hunglam to ezo jijo ntio yichak to?" Ombona hetoha phyoala, "Ana apo thüngi yia vamo ji tsükona." 18 Elani ombona 'Nsungkhüngu' to phyo ji yichak jo, ntio etsso phyoa sana etena n tsi!" 19 Ontena ntiosana ombo engav sala to Jisu na ntsi onte ezocho, "Ana, ntena nsungkhüngu a n hungu sisi elani yuta tara sülojo ahunglam" to phyo jina nte emhuka nte yolo engatalo? 20 Ana otsotso nte ezoala: ntena erona kyatav; osi limha jina emathasi nteno nte nungrav. tokhatola nte nungra ji ematha kümvü. 21 Eloe tsüka na ngaro vamvü sana ompvü ezüp yuta janthako jina nungrala; tolea ngaro ji vanthaka na ompvü ezüpthako ji mhechoe siala, ntiotssole ngaro tsüka limha lo rothako jina ompvü emathatala. 22 Nteha hoji esüa tssovka: Enhünga jo nte nungrala, tolea ana nte hunglamka, osi nte lümbüm jiang longshyu na pyinguv ka, osi hoji longshyu tsük jijo ochinaha nte n khiyiche. 23 Hoji tsüngono jo ntena ntia a engao tüv liv meka. Ana otsotso nte ezoala: Ntena amyingona ntio chona na apo na nte piv. 24 Enhünga jana ntena a myingona ntia n chonhan; chontava tona ntena hunguka, osi nte longshyu ji benrivka.
Limha ji Pono Ekhyo
25 Ana ejyuka theta shiang nte ezothaka, khatola tsüngona lojo ana opo tsükona ejyuka n thena bolae na nte ezov. 26 Hoji tsüngono jo ntena a myingono na ombo thüngi chomvü, tolea ana nte myingona ombo thüngi chomvü to n phyoala, 27 ntiotssole opona ombobo nte nzanala. Ntena a nzamo jina osi Potsow na a rotokcho to longtsüo jina opo na nte nzanala. 28 Ana opo thüngina rocho, osi ana limha lo rocho, enhungo ana limha ji sisi opo thüngi yiala." 29 Ombo sürüi jiangna ombo ezocho, "Enhungo nina ejyuka n thena bolae na n sanala, 30 nina topvü ntsia toji enhungo ena ntsithaka; ochinaha ntia ni engao n li. Shi yakchia nino Potsow thüngina rocho to ena longtsüala." 31 Jisu na onte janlancho, "Enhungo ntena longtsüa lo? 32 Nte topvüna tsanroe ombobo ki yingsiyingloa vamvü ji yuta tsata, osi yuta ji tsenkathaka; osi apoti ekachi a siv. Tolea aiyo apoti mek, apona a ndüngo vana. 33 Ntena alo küpkae noying lia nte vantokvü tsükona ana shiang nte ezoala. Limha jina nte ezüpthokvü ka, tolea lüm tssontakhe! Ana limha ji khyothaka!"
Jisu na ombo sürüi Jiang Tsükona Randanala
1 Jisu na hoto phyosi Potsüwoe zekachia phyocho, "Opo, yuta ji janthaka, ni tsoe ji pvütsson pia, tona otsoe jina ni pvütssonthukvü. 2 Ntiotssole nina ombo pio kyon topvü kümali eküm pile to kyon topvü pono etho ombo picho. 3 Kümali eküm ji yichak jo ntsa Potsow jo nitae to ntsiwo ji, osi nina wothuko Jisu Khrista ji ntsiwo ji. 4 Ana limha lo ni pvütsson ji ejüthaka, osi nina etssov a pio elhi ji thakthaka. 5 Opo, enhungo ni ndüngo pvütsson a pia; limha n liyingthüng na ni ndüngo lio pvütsson ji. 6 "Nina limha lona tsachuki apio jiang thüngi ana ni chethetokthaka. Onteno ni echi osi nina onte ji apicho. 7 Ontena ni yi engathaka osi nina ntio a picho sana jiang topvü ni thüngina yicho to ontena ntsithaka. 8 Nina a pio yithen ji ana onte pithaka osi ontena khichothaka. Ana ni thüngina rocho to ontena ntsithaka, osi nina a rothukcho to ontena longtsüthaka. 9 "Ana onte tsükona randanala. Ana limha ji tsükona mekna nina a pio jiang tsükona randanala, ntiotssole onteno ni echi. 10 Ana ntio licho sana jiang topvü ni echi, osi nina ntio liana a echi; osi a pvütsson ji onte lona hungala. 11 Enhungo aiyo ni thüngi tsata, osi aiyo limha shilo mek, tokhatola onteno limha jilo. Ntho opo, ni mying nina a pio ji etho khi onte ntssüngchei vanthuka, to tssona ni tona a to motsünga tsso ji esüa onteha motsünga tssovka. 12 Nina a pio ni mying ji etho khi ana onte ndüngo vanathüng onte shanchoa vanthukcho. Ana onte nkoyacho osi kyon tsüka ocho jo mom sekae ntho motsü ji benthukcho sana ji yaka tsüka tia n mon. 13 Enhungo aiyo ni thüngi tsata osi ana limha lona shiang phyoala, onte khi a longshi ji benria lithukvü tsükona. 14 Ana ni yithen ji onte picho, osi limha jina onte tssakcho, ntiotssole aiyo limha ji echi meko ji esüa onteha limha ji echi mek. 15 Onte ji limha lona khichukle to ana ni thüngi n chon, khatola nina n mhom ji lona onte shanchole to chonala. 16 Ana limha ji echi meko ji esüa onteha limha ji echi mek. 17 Ntsa ji yakchia onte ji nilo khochaki vanthuka, ni yi jo ntsa. 18 Nina limhalo a rothuka to ana limha lo onte wothukala. 19 Ontena ha otsotso nilo khochaki vanthukvü tsükona ana onte tsükona ni lo khochakala. 20 "Ana onte tsükona tae n randan, khatola onte püngno ji yakchia alo longtsüo jiang tsükona ha randanala. 21 Onte topvü motsünga tsswothukvü ana randanala. Opo! Ana nilo vamo ji osi nina a lo vamoji esüa onteha etelo vanthuka. Nina a rothukchoto limha jina longtsüo tssoa onte ji motsünga kümthuka. 22 Ni tona a to motsünga tsso ji esüa onteha motsünga tsswothukvü tsükona nina a pio pvütsson ji ana onte picho. 23 Ana onte lo van, nina a lo van to tssoe onte ji motsünga tsotso tae kümthukvü tsükona osi hoji yakchia limha jina nina a rothukcho osi nina a nzamo ji esüa onteha nzanala to ntsithukvü tsükona. 24 "Opo! Nina onte a picho osi ana kvülo vana sana hojilo onte a vanthuk hungala tona nina a pio pvütsson ji ontena hunguv, ntiotssole limha ji n liyingthüngna nina a nzancho. 25 Ntsanrük opo! Limha jina ni n tsihan khatola ana ni ntsithaka, osi nina a rothukcho to shiangna a ntsithaka. 26 Ana ni mying ji onte ntsithukthaka, osi ntsithukvü hojitoli nina ntio nzan khi a nzancho sana ji ontelo lia vanthukvü tsükona osi ana ontelo vam tsükona."
Jisu Rhümao Ji
1 Jisu na heto randansi ombo sürüi jiang nzo khoe, Kidron lo zhükhfü pankae chiyicho. Meta jilo phari licho osi Jisu tona ombo sürüi jiang to na jilo rhowocho. 2 Jisu na sürüi jiang nzo hojilo na nduktaphen tsso jina yentsoe Judas na meta ji ntsicho. 3 Jitsükona Judas na Rom rasan razhüa tona khümphen enhyangden Pharasee tona pvüti tsüphoe jiangna rothuko jiang to na epensü tona milon to bentasi phari jilo rhowocho. 4 Jisu na ombolo ntio tssov sa vancho sana topvü ntsiwo jina mhadungi chiwo onte ezocho, "Nteno ocho yantala?" 5 Ontena janlancho, "Nazereth yamo Jisu ji," Ombona, "Hoji a ka" to ezocho. Yentsoe Judas ha hojilo onte nzo manga vancho. 6 Jisu na "Hoji a ka" to ezole, ontena eselani likoe vantheracho. 7 Jisu na engalancho, "Nteno ocho yantala," Ontena "Nazereth Jisu," to ezocho. 8 Tole Jisu na ezocho, "Hoji a ka to ana nte ezothaka. Jitsükona ntena a yanta tssona thanpoe shiango yithuka." 9 (Ombona hoto phyo jijo, ombona "Opo, nina a pio shiang yolo tsüka tia ana n monthukhan," to phyo ji benthukvü tsükona.) 10 Simon Peter na yonri hancho ji tssüngchei pvüti tsüphoe ji phajae ji eno etsechochiyicho. Pha jae ji mying jo Malchus. 11 Jisu na Peter ezocho, "Ni yonri ji ombo thepheni vanthuka! Apo na ezüp pvü a methakio ji ana n yuv tsayia nina nchüma alo?"
Annas Mhadungo Jisu
12 Rom rasan jiang tona onte esopvüi jiang to nzo tssoe Jisu ji rhümae chüngcho, 13 osi ovüngo tssoa Annas thüngi ombo sosi wocho, ntiotssole ombo Caiaphas omo tssocho, osi hoji nzyu pvüti tsüphoe ji ombo. 14 Kyon khosha thung tsüka chüo ji mmhomo to Jihudi esopvüi jiang ezowo ji Caiaphas tssocho.
Peter na Jisu ji N tsi to Phyoala
15 Simon Peter tona sürüi thanpoe ji to na Jisu phana wotacho. Sürüi thanpoe jijo pvüti tsüphoe jina ntsiwo jina ombona Jisu nzo pvüti tsüphoe ji hapoe wocho, 16 osi Peter jo kibüng ji pomoe vancho. Tole sürüi thanpoe jina elana chiwo kibüngi eloeroro ji ezosi Peter sosi rhowocho. 17 Kibüngi eloeroro jina Peter ezocho, "Niha kyon shi sürüi yolo tsüka la nüng?" Tole Peter na ezocho, "Meka, aiyo meka." 18 Etssüko tsso jina phajae jiang tona enhyang jiang to mitssopheh lona omi lümkata mangi vantacho. Peter ha hojilo owo onte nzo mangi omi lümkata vancho.
Pvüti Tsüphoe Jina Jisu Ngatüng-ngariala
19 Pvüti tsüphoe jina Jisu sürüi jiang tona ombo püngnoyi to jiang tsükona ombo ngatüng ngaricho. 20 Jisu na janlancho, "Ana yuta topvülo opon chuka topvü thüngi püngnocho, osi ekhümki kyon sanrhyupheni na püngnocho. Ana kvüthüngha ntia mphoa n phyohan. 21 Tona nina ntiolyui a engala, kyon ochoang na zocho sana jiang enga. Ana ntio phyocho sana ontena ntsika onte enga." 22 Jisu na hoto phyole enhyang jiang yolo tsüka na ombo tümi vachisi ezocho, "Pvüti tsüphoe thüngi jo nino hoto nsanake!" 23 Jisu na janlancho, "Ana siluo nsancho tssona ana ntio phyocho sana helo evan shiang enga. Osi ana ntio phyocho sana hoji elancho tssona nina ntiolyui a tala?" 24 Tole Annas na Jisu ji chüngpvüna pvüti tsüphoe Caiaphas thüngi yithukcho.
Peter na Jisu N tsi to Phyolana la
25 Peter jo hojilo mangi omi lüm kata vanpvü tssocho. Jitsükona thanpoe jiangna ombo ezocho, "Niha kyon shi sürüi yolo tsüka la?" Tole Peter na ekhia phyocho, "Meka, aiyo meka." 26 Pvüti tsüphoe ji phajae tsüka eno etsechoyio ji wopan tsüka na phyocho. "Nina ombo nzo parhi vana ana ni hungchola?" 27 Peter na elani "Meka" to phyotona hono khfücho.
Pilate Mhadungo Jisu
28 Nyazüngina Jisu ji Caiaphas ki na esapvüi (Governor) ji ki sosi wocho. Jihudi esapvüiden jiango onte bobo shikhfü ephan ntssüngche saria, yakchi tokhu ji tssohungo jina yansapvüi ji kichungi n rhowo na vancho. 29 Jitsükona Pilate na haphoe chiwo onte ezocho, "Ntena ntio nlan ombo piala?" 30 Ontena ezocho, "Ombona nlan tsüphov n tssowo ena ni thüngi sosi rov mek." 31 Pilate na onte ezocho, "Tona ntena ombo ji sosi oyi nte shikhfü ephan oyi tssoyia." Ontena janlancho, "Eiyo kyon chüthukvü etho n li." 32 (Shijo Jisu na ntio lona ombo chüvsana phyoe lioji benthukvü tssocho.) 33 Pilate na oki rheyi Jisu tsae engacho, "Nino Jihudi mesao ji alo?" 34 Jisu na janlancho, "Nina heto a engao shijo nina nchümchecho alo, oyam na a motsü ni ezothakchola?" 35 Pilata na janlancho, "Aiyo Jihudi tsayia nina nchüma alo, nte kyon tona pvüti tsüphoe to jiangna a thüngi ni sosi rocho. Nina ntio tssoe lichola?" 36 Jisu na ezocho, "A ekhüngyan jo limhalo esüa mek, a ekhüng yan ji. limhalo esüa tssowo a sürüi shiangna rotae ankochev osi Jihudi esopvüi jiang khelo a n rheyithuk. A ekhüngyan jo shilo meka." 37 Tole Pilate na engacho, "Tona nino mesao alo?" Jisu na janlancho, "Aiyo mesao to nina phyothaka. Aiyo hoji tsükona osi ntsa ji ehungpvüi piv tsükona a buki limha lo rocho. Ntsa jiwoe etssoe topvüna a yi engala." 38 Tole Pilate na engacho, "Ntsa jo ntiola?"
Jisu Chüthukvü Methaktala
Tole Pilate na hapoe chiwo kyon jiang ezocho, "Ana nlan ombo epio ntia ntam n yanche. 39 Tokhatola nte shikhfü ephanina yakchi tokhu akvü ana kyon tsüka vüngpheni na vachiala. Ntena Jihudi mesao ji a vachithuk hunga alo?" 40 Ontena tüngkachia ombo ezocho, "Ombo mek, Barabbas ji vachiv ena echokatala!" (Barabbas jo retsoreyue.)
1 Tole Pilate na Jisu ji süsi oyi erhüpcho. 2 Osi rasan jiangna okyo kikho nsüngrüi ombo kvüri lo venkayicho. 3 Osi ontena heto ezotacho, "Jihudi mesao ji harishia vanthuka!" Osi ontena ehungo ombo tümtacho. 4 Pilate na kyon jiang thüngi chiwo ezolancho, "Zetava, ana ombo nlan epiv ntia ntanphen n yanche to etsso jina nte thüngi ombo sosi chiroala." 5 Jisu na okyo kikho ji han, ejümsü ji eyuka tosi chirocho. Tole Pilate na onte ezocho, "Zetava! Kyon ji shije!" 6 Pvüti tsüphoe jiang tona khümphen enhyang to jiangna ombo hungale tüngkachitacho, "Ombo dona! Doni sia!" Pilate na onte ezocho, "Toka ntena khi doni ombo sitava. Ana jo ombo nlan epiv n yancheka." 7 Kholuk jina janlancho, "Ombona Potsow tsoe to ejamo jina e shikhfü lona ombo chüthukvü etüma lia." 8 Pilate na hoji zoale kyungkata kyucho. 9 Ombona oki rheyi Jisu engacho, "Nino kvülo kyon la?" Tole Jisu na n janlancho 10 Pilate na ombo ezocho, "Nina a thüngi ntia n phyoake? Ni vachiv osi doni nisiv jo a etho lia." 11 Jisu na janlancho, "Nina a pono etho lio jijo Potsow na ni pio jina. Jitsükona kyon ochona ni khelo a thechicho sana jina nlan kyungkata tssothaka." 12 Pilate na hoji zoale, Jisu vachiv lanka yancho. Tokhatola kholuk jina tüngkachicho, "Nina ombo vachiana nino Caeser okhümo mek! Ocho na ombobo mesao to ejana sana ombo mesao Caeser ri tssoala!" 13 Pilate na oyi shiang zoale ombona Jisu sosi chiwo yitssoe khokthephen "Olongna roncho" to tsao jilo khokthecho. (Jihudi yina jo hojijo "Gabbatha" to tsacho.) 14 Jithüng jo yakchi tokhu ji ojyua tssov to ji eng longjüngo tssoa vanthakcho. Pilate na kyon jiang ezocho, "Nte mesao ji shije!" 15 Ontena, "Ombo chüthuka! Ombo chüthuka! Doni ombo sia!" to tüngtacho. Pilate na onte engacho, "Nte Mesao ji a donthuk hungake?" Pvüti tsüphoe jiangna janlancho, "E mesao jo Caeser tae!" 16 Tole Pilate na Jisu edom onte khelo theyicho.
Jisu Doncho
Jitsükona Jisu ji ontena khicho. 17 Osi ombona ombo donphen ji ombobo hansi owo meta motsünga, "Kvüriryu" to tsa (Jihudi yina jo "Golgotha") to tsao ji jancho. 18 Hoji lona ontena doni ombo sicho; ontena thanpoe otsük eniha Jisu hayi-amen donhyae Jisu jo olongo tssothukcho. 19 Pilate na heto erani donphen lo eshenkathukcho, "Nazareth Jisu, Jihudi mesao ji." 20 Jisu domo meta ji yantsü jilona enhyano tso jina kyon khosha na hoji hungi khatacho. Hoji jo Hebrew, Latin, tona Greek to yina erancho. 21 Pvü ti tsüphoe jiangna Pilate ezotacho, "Jihudi mesao ji, to ti erania, kyon shina aiyo Jihudi mesao ji to phyocho to erania." 22 Pilate na ezocho, "Ana ntio eranthakcho sana ji to vanthokvüka." 23 Rasan jiangna Jisu ji donthakale ombo sü ji khi mezhü chiche rasan tsükalo mezhüchia jantacho. Phuknrhüo sü jijo ochüm n khyingna sükvüa na tüktsücho tüv tssocho. 24 Rasan jiangna phyotacho, "Etena shijo n resotana phyalu fuktasi ocho fukata na jina khivka." Shijo Nthomotsü lo heto erani lio ji benthokvü tsükona tssocho: "Ontena a sü ji onte jantacho, Osi a phukthesü ji tsükona phyalu zetacho." Hoji esüa rasan jiangna tssotacho. 25 Jisu donphen ji ndüngo manga evan jiang yolo, Jisu oyo, oyuro, Clopas engh Mary to tsao ji, elani Mary Magdalene to jücho. 26 Jisu na oyo tona ombo nzamo sürüi ji to hojilo vana hungi ombona oyo ezocho, "Ayo, ni tsoe ji zeta." 27 Ombo sürüi ji thüngi ezocho, "Ni yo ji zeta." Ji yuta jilo sürüi jina ombo ki ompvü sosi yicho.
Jisu Chüo ji
28 Jisu na enhungo olan topvü methaka vanthaka to ntsicho. Osi ntho motsü ji benthukvü tsükona ombona phyocho, "A eratsüngala." 29 Hojilo ethem jü ojen motsünga licho. Ontena sünyipvü khi ethem jü ji jümkae hanphantsi lo khüngkae ombo büngo hansi wocho. 30 Ombona ethem jü ji yusi, "Topvü methakthaka!" to phyocho. Tosi kvüri ji engümthei ombo mon ji yithukcho.
Jisu Khyoyo lo Ejungicho
31 Doni lio kyon jiang ojo jiang ekhaphiv tsükona osi donpheni na omüng jiang khichov tsükona Jihudi esopvüi jiangna Pilate thüngi ezocho. Emung etsao ji echümpo tssoa ntho tsso jina osi hoji nchuk jo hokorpar tsso jina ontena hojito jonjitacho. 32 Jitsükona rasan jiangna Jisu hayiamen domo kyon otsük eni jiang jo ekhüpitacho. 33 Ontena Jisu ji mmhona chüthaka to ntsi ombo jo jiango n khüpitacho. 34 Khatola rasan tsükana ombo tsso ji Jisu khyoyo lo ejungthechile jitopvü tsükjü tona ejen to chiyicho. 35 (Shiang hungwo kyontsük jina nte longtsüthukvü shiang phyoala. Ombona ntio phyocho sana jiango ntsa, osi ombona ntsa nsanala to ombobo ntsia.) 36 Shijo nthomotsü lona heto phyoji benthukvü tsükona, "Ombo ryu motsünga lia n jaki." 37 Elani motsü thanpoe na heto phyoala, "Kyon jiangna ontena ejungo ji ombo zetav."
Jisu Jutheo Ji
38 Hoji sülo Arimathea kyon Joseph to tsao jina Jisu müng ji donpheni na khikhichotokvü sana to Pilate engacho. (Joseph jo Jisu phanphi khatola ombona Jihudi esopvüi jiang kyuo jina mphoa phanphicho.) Pilate na khikhuka to ombo ezole ombona owo khicho. 39 Nikodemus, ovüngthüng zümolo Jisu thüngi wo jina mozhü rhüm seri tinyan harüma mozhülan eni nzitacho tüv hansi Joseph phana wocho. 40 Onina Jisu müngji khichoe sünyipvüna eyuki mozhürhüm mmhom ji theta Jihudi echü-müng talüng shikhfü ephani na methakcho. 41 Jisu chüthuko meta jilo phari motsünga lo olüp ethan ochia n thechihan tüv licho. 42 Hoji nchuk jo esanmung ji ojyuaka to tsso jina osi meta ji enhyano tsso jina onina Jisu müng ji hojilo sitacho.
Olüp Ejungi Lio Ji
1 Ntho emungnchuk nyazüngina Mary Magdalene na olüpi wole olung ji lüpkvüi na khoe sithaka hungcho. 2 Ompvüna Simon Peter tona thanpoe Jisu na nzamo sürüi ji to thüngi yunga oyi onte ezocho, "Ontena OPVÜI ji olüpi na khichethaka osi kvülo ombo sitacho sana etena n tsi!" 3 Peter na sürüi thanpoe ji woni olüpi wotacho. 4 Onita na yungta wotacho khatola sürüi thanpoe jina Peter rhechoe olüp ji jantencho. 5 Ombona nkhfüthe zethechile sünyipvü ji hungthechicho khatola ombona n rhowocho. 6 Om bo süloti Peter rocho, osi ombona saksak olüpi rhowocho. Ombona sünyipvü jiang tona, 7 Jisu kvüri phankayio-sü ji to hungcho. Kvüri-sü jijo sünyipvü ji nzo mekvü echümpo shüi licho. 8 Tole sürüi thanpoe olüpi rodemo jina ha rhowocho, osi ombona hungi longtsücho. 9 (Echü lona ombo phanthithukvü to nthomotsü lona phyo ji ontena jithüng jana n ngathehancho.) 10 Osi sürüi jiangna oki yitae sicho.
Jisu na Mary Magdalene Ndukala
11 Mary na olüp ji hapoe mangi kya vancho. Ompvüna kya vanpvüna nkhfüthei olüpi zethechile, 12 lanben otsük eni sühüm ekatasi Jisu mung vao ji jolo-khümki oni ekhentae khokta vana hungcho. 13 Ontena ompvü ezocho."Eloe yo, nino ntiolyui kyala?" Ompvüna janlancho, "Ontena a Pvüi ji khi hansi yithaka, osi kvülo vachosana ana n tsi." 14 Tosi ompvü na engophile Jisu hojilo manga vancho hungcho; toaha Jisu ka to ompvüna n tsicho. 15 Jisu na ompvü engacho, "Eloeyo, nino ntioli kyala?" "Nino Ocho yanala?" Ompvüna parhi ejon ji tsayia ezocho, "Tsüphoeyo, nina ombo khicho tssona nina kvülo vacho sana azoa, ana owo ombo khivka." 16 Jisu na, "Mary!" to ompvü tsacho. Ompvüna kholani ezocho, "Rabboni!" (Ji yichakjo "Püngnoe" to.) 17 Jisu na ompvü ezocho, "A ti-rhümata" ntiotssole ana apo thüngi n chüngihan. Tokhatola oyi a otaonyu jiang ezoa, ana apo osi nte opo a Potsow osi nte Potsow thüngi chüngiala to." 18 Mary Magdalene na oyi ombo sürüi jiang thüngi, "Ana OPVÜI ji hungthaka" to ezocho. Osi ombona onte ezole to ompvü ezocho to onte ezocho.
Jisu na Ombo sürüi Jiang Ndukala
19 Hoji nthomung mmyulani sü rüi jiangna etssirhyui oki khalanchi thyuta vancho, ntiotssole ontena Jihudi esapvüi jiang kyucho. Jisu na oro onte yolo mangcho osi onte ezocho, "Ntelo noying lithukvüka." 20 Tosi ombona ombo khe jiang tona khyoyo jiang to onte ejücho. Sürüi jiangna OPVÜI ji hungale longshyu na onte pyingracho. 21 Jisu na onte ezolancho, "Nte lo noying lithuka, opo na a rothuko ji esüa ana ha nte wothukala." 22 Tosi ombona ethük na onte ehakata onte ezocho, "Nthomon ji khichotava. 23 Ntena kyon nlan siyina onteno nlan siyithaka, ntena nlan onte n siyina onteno n siyi."
Jisu Tona Thomas to
24 Sürüi taro eni jilo tsüka Thomas, (Nshümtso) jo Jisu na roathüng jilo n vancho. 25 Jitsükona sürüi thanpoe jiangna, "Ena OPVÜI ji hungthaka!" to ombo ezocho. Thomas na onte ezocho, "Ana ombo khelo kozal mhorak jiang hungi a yingro ntsyukav osi khyoyo jiang lo a khe n lhüpkav jo ana n longtsü." 26 Hopta motsünga sülo sürüi jiangna elani etssirhyui oki khalanchi vantacho, osi Thomas ha vancho. Kibüng jiang khancho khatola Jisu na rhoro onte yolo phanthi ezocho, "Nte lo noying lithuka." 27 Osi ombona Thomas ezocho, "Ni yingro ji shilo tsyukata osi a khe shiang zeta; osi ni khe jiang yonchia a khyoyo lo lhüpkata. Ni dongsunga vamo ji sisi longtsüa!" 28 Thomas na ombo ezocho, "A OPVÜI osi a Potsow!" 29 Jisu na ombo ezocho, "Nina a hungwo jina longtsüala nüng? A n hunglea longtsüo jiango kvüta ematha tssovto!"
Kako Shi Tümka
30 Jisu na ombo sürüi jiang ehungo na tssocho chethev elhi elümoto kako shilo n rankham lia. 31 Shiang eramo jijo nte khi Jisu jo shanchopvüi ji osi Potsow tsoe ji to longtsüthuki ntena ombo longtsüo ji yakchia eküm hungthukvü tsükona.
Jisu na sürüi Otsük Tiying Ndukala
1 Shi sülo elani Jisu na ombo sürüi jiang Teberias wozhü tsa lona nduklani heto tssocho: 2 Simon Peter, Thomas (Nshümtso) Nathanael Galilee lo Kana yamo, Zebedee tsoe jiang tona ombo sürüi thanpoe otsük eni, to vancho. 3 Simon Peter na thanpoe jiang "Aiyo ngovano Yiala," to ezocho. Tole ontena, "Enaha ni phana rovka" to ezocho. Ontena orhung motsünga lona wotacho, tokhatola hoji zümo jilo ntia n vanyacho. 4 Eng chiroale Jisu na jütssae mangi vancho, khatola sürüi jiangna jo Jisu to n tsicho. 5 Ombona onte engacho, "Khyingroeden, ntena ntia n vanyachoke?" Ontena, "Ntia meka" to ezocho. 6 Tole ombona ezocho, "Nte ngovanphen ji orhung ji hamimoe vanthechitava, tona ntena tara vanyavka." Ontena ngovanphen ji vanthechile ongo elümoto vanyae n süchekhokvü sicho. 7 Jisu na nzamo sürüi jina Peter ezocho, "Shijo OPVÜI ji!" Peter na OPVÜI ji to zoale ombona osü opomo shaki vao ji khi eyikasi ojüi vanthecho. 8 Sürüi thanpoe jiangna ngovanphen ji ongo na pyinga sütasi orhungi na jürani chiyicho. Onteno likyingi na nkoncho, khejü nzo eni harüma tae tssocho. 9 Ontena likyingi chiyile omi tssoe ongo tona hümri to miponi ekachi lia hungcho. 10 Jisu na onte ezocho, "Ntena enhüngati rhümao ngo jiang lona ejoma hansi yia." 11 Simon Peter na orhungi chungoe ongo tsüphov na pyinga süchecho, tsotsüi nzoasi tinyan ethüm, osi ongo khosha ha ngovanphen ji n resocho. 12 Jisu na onte ezocho, "Oyi tsotava." Tole sürüi jiangna ochina ha, "Nino ochola" to n ngakhukcho. Ntiotssole ombo OPVÜI ji to ontena n tsicho. 13 Tole Jisu na owo hümri ji khi onte picho; osi ongo jiha khi onte picho. 14 Shijo Jisu echü lona kümlanthukcho sülo echung ethümoto ombo sürüi jiang thüngi hungthuko ji.
Jisu Tona Peter To
15 Ontena tsotasi sülo Jisu na Simon Peter ezocho, "John tsoe Simon, thanpoe shiang na a nzamo jilona kyungkata nina a nzanalo?" Ombona ezocho, "Hoka, OPVÜI, ana ni nzanala to nina ntsia." Jisu na ombo ezocho, "A olyu jiang süphilümbüma." 16 Echung enioto Jisu na ombo ezocho, "John tsoe Simon, nina a nzanalo?" Ombona janlancho, "Hoka, OPVÜI, ana ni nzanala to nina ntsia." Jisu na ombo ezocho, "A Olyu jiang sheküpa." 17 Jisu na echung ethümoto ombo ezocho, "John tsoe Simon, nina a nzanalo?" Jisu na echung ethümoto, "Nina a nzanalo" to eng ao ji tsükona ombona tara lüm n tssov ezocho, "OPVÜI, nina topvü ntsia, ana ni nzanala to nina ntsia!" Jisu na ombo ezocho, "A Olyu jiang sheküpa." 18 Ana otsotso ni ezoala, "Ni nongothüng jo nina benrisi kvüi ni wohunga sana jilo wocho; tolea ni sona na nina okhe ntii vansi kyonpoe na eryu ni khüngisi ni n wohungo jiwoe ni wothukvü." 19 (Jisu na heto phyo jijo Peter ji kvütowoe na chüi Potsow pvütssonthokvü sana ji phyocho.) Jisüi jo Jisu na "A sü rüa roa." to ombo ezocho.
Jisu Tona Sürüi Thanpoe ji to
20 Jisu na khophi zechile sürüi thanpoe ombona nzamo ji osi ochona tsoyuta thüng ombo jüpkata vani "OPVÜI, ochona ni yem sala?" to engacho sana ji hungcho. 21 Peter na ombo hungale ombona Jisu engacho, "OPVÜI, kyon shi tsükona jo kvütola?" 22 Jisu na ezocho, "Ana a erov ji jana ombo vanthuk hungana jina ntio ni tssoyiv? A sü rüa roa!" 23 Tole sürüi tsük jijo n chü to ombo sürüi yolo phyota yicho. Tolea Jisu na jo ombo n chü to n phyo; ombona "Ana a erov ji jana ombo vanthuk hungna jina ntio ni tssoyivla?" to phyocho. 24 Ombo shiang shi ephyo sürüi ji, osi ochona shiang erancho sana ji, osi ombona ntio phyocho sana ntsa to etena ntsia.
Thakchi Yi
25 Jisu na tssocho elhi elüm lihana. Hojiang topvü motsüngtsüngna erancho saliwo, hoji kako ji limhatsülo lea n vachyuv tssov, to ana nchümala.
Wothung Jiangna Tsso ji
1 Nzamo Theophilus: Jisu na elhi benkao jilo na potsüwoe ombo khikao ji yuta jilo 2 kvüta elhi tssoa osi püngnocho sana jiang tsükona ana a kako ovüngo jilo eranthaka. Ombo n khikathüng ombona wothung jiang ji Nthomon etho yakchia ndungntssung picho. 3 Ombo chüsi tsüngon zhüro onte khi ombo hungthuka ontena dungsung n lina longtsüo tssoa ombo eküm vanhana to ejücho. Ontena ombo hungcho osi ombo na onte thüngi Potsow ekhüngyan tsükona ezocho. 4 Osi ontena etssirhyule ombona yizüng shi onte picho: "Jerusalem ti yakta na apona phyochako yantso ana nte ezothako ji nhyakta vantava. 5 John na ojü na baptiyicho, khatola tsüngon tara sülo jo Nthomon ji khi nte baptiyivka."
Jisu Potsüwoe Tssüngkacho
6 Wothung jiangna etssirhyui Jisu engatacho, "OPVÜI, enhünga nina Israel jiang ekhüngyan ji pilam alo?" 7 Jisu na onte ezocho, "Yuta osi oküm-nzyu jiang apo na methakala, jitsükona hojiang kvüthüng tssov sana ntena ntsiv ethev n li. 8 Tolea kvüthüng Nthomon ji ntelo joroa sana etho na nte pyinguv, osi ntena a tsükona Jerusalem lo, Judea topvü lo osi Samaria lo, osi limha ochüm jana a ehungpvüiden tssov." 9 Hoto phyothakale, ontena zeta vana potsüwoe ombo tssüngkacho, osi eluk na ombo eyukzhüi n hunguv sicho. 10 Ombona chüngio ji ontena zeta vanle esüngaro taena sühüm mpensi otsük eni onte ndüngo mangkachi 11 phyocho, "Galilee kyonden, nteno ntiolyui jilo mangrae potsüwoe zekachita vanchola? Jisu, nte yolo na khikao shiji ntena kvüto hunga potsüwoe yicho sana ji esüa lyui rolamka."
Judas Echung
12 Wothung jiangna Olive phunglani na Jerusalemi na kilometer motsünga jilo yitacho. 13 Ontena yantsü jilo rheyi onte vanphen oki jilo chungchak omhawoe chüngitacho. Onteno, Peter, John, James, tona Andrew, Philip tona Thomas, Bartholomew tona Mathew, Alphaeus tsoe James, Eramo Simon osi James tsoe Judas to. 14 Ontena nsansam okho tssoe randantav tsükona eloe jiang tona Jisu oyo Mary, ombo ejenio jiang to etssirhyutacho. 15 Tsüngon tara sülo longtsüi jiang sanrhyuta licho, osi onte tssotsüi nzoasi mekyu harüma tssocho. Hojilo Peter na oyi nsam phanthicho. 16 Ombona phyocho, "A otanyuden," "Jisu rhümae jiang esopvüi Judas ji tsükona Nthomon jina David yakchia phyoe lio ji bentokvü licho. 17 Judas jo ete yolo tsüka, ntiotssole ombo ha ete elhi lo chinhyav tsükona ethüngchecho." 18 (Ombo elhi n mhom ji man orang hungwo jina liko shi-i licho, osi hoji lona chenchyuo langsi mman ekhyuchuka ombo chücho. 19 Jerusalem lo evan topvüna hoji zocho osi hoji meta ji ontena Hakeldama, ji yichak "Ejen Liko" to tsayicho.) 20 "Ntiotssole ethüngkhen kakolo heto erani lia, 'Ombo ki ji lichetuka; Kyon ochia hojilo ti vanthuka.' Heto ha erani lia, 'Ombo ejan elhi ji kyonpoe na khithuka.' 21-22 "Jitsükona OPVÜI Jisu na kümchelamo ji ehungpvüi etssokyoe etena ocho sana ethev lia. 23 Hoji kyon ji Jisu na ete ndüngo kvütenhyaka vancho sana osi John na baptiyio tsüngon jilo na benkae Jisu ete thüngina tssüngkao yuta ji nandang ete nzo etssoe jitüv khichev." 24 Tole ontena kyon otsük eni omying pitacho: Barsabbas to tsao Joseph, (Justus to ha tsao ji), tona Matthias to. 25 Osi ontena randantacho, "OPVÜI, nina kyon topvü nchümri ntsikhana, hoji tsükona Judas ochona tsani ombo evan yani yicho sana ji thung wothung elhi tssov tsükona otsük eni shilo nina ocho ethüngchecho sana ejüa." 26 Osi ontena oni lo tsüka ethüngchev tsükona phyalyu zetale Matthias ethüngchei wothung otsük taro ekha jilo ekhyimphacho.
Nthomon Roji
1 Kvüthüng Pentekost tsüngon ji janchosana longtsüi topvü meta motsünga lo etssirhyucho. 2 Tole jitopvü potsüwoe na mbung ntav vena to owon tssocho osi hojina ontena khukta vamo ki ji totona pyingcho. 3 Osi nli esüa mimyo teriv evakphita esüa ontena hunga jina onte otsük akvü evüngkacho. 4 Onte topvüto Nthomon na pyingi yisanpo nsantav benkacho. 5 Potsow khüma evan Jihudi jiang ji limha topvü lona oro Jerusalem lo vanracho. 6 Ontena owon shi zoale kholuk tsüphov etssirhyucho. Onte otsük akvü yi na longtsüi jiangna nsanta zoe onte emhukcho. 7 Ontena emhuka ngangcherae phyotacho, "Heto nsanta vamo shiango topvü Galilee kyon tae! 8 Tona kvütolyui onte topvüna ete meta yi na nsanta zoato? 9 Etena Parthia, Media, osi Elam metae na; osi Mesopotamia, Judea, osi Kappadocia lona; Pontus tona Asia, 10 Phrygia tona Pamphylia, Ejip osi Cyrenea ndüngo Libya nkonjano na to roracho. Ete ochoangna jo Rom lona, U Jihudi tona pvüjipoe to Jihudi ekhümlano khophicho, ete ejoma jo Kret tona Arabia to lona, toaha ete topvü Potsow na ntio elhi tsüphov tssocho sana ji motsü ji ete ombombo yi na nsanta zoala!" 12 Emhuk osi hama lona ontena, "Shijo ntio etsso ato?" to onte yolo engata vancho. 13 Khatola thanpoe na jo longtsüi jiang emayia: "Kyon shiango kinokhancho!" to phyotacho.
Peter Püngno
14 Peter na wothung thanpo taro ekha jiang nzo phanthi tüngkachia kholuk ji thüngi ezocho, "Okhümo-shomo Jihudi kyonden, osi nte Jerusalem lo evanden, shijo ntio etsso sana ana nte ezovka a engachitava. 15 Ntena nchümo ji esüa kyon shiango kinocho meka; enhünga jo enyathüng tokvü ekho taehan. 16 Zenkhying Joel na heto phyocho: 17 'Potsow na phyoala: Tsüngon wokhao jianglo jo, ana a mon ji kyon topvü pono rwothukvü. Nte tsokhying tsolo jiangna a yithen püngnov; nte khyingroeden jiangna eonchev, osi sonbworo jiangna omüng emhav. 18 Hoji tsüngono jo a phajae jianglo mpato, eboe loha osi eloe loha a mon ji rotokvü osi ontena a yithen ji püngnov. 19 Ana potsüwoe na chethev elhi tssov osi limhalo oküpi emhukthao elhi tssov. Ejen osi omi tona eluk echiv to hunguv; 20 eng ji müngi sithukvü, osi choro ji ejen esüa myona kümvü, OPVÜI pvütsson tsüngon ji erov mhadungro lo jo heto tssov. 21 Osi ochoangna OPVÜI mying tsaphia sana jiang topvü shanchov.' 22 "Israel kyonden, engachitava! Nazareth Jisu jo kyon tsüka Potsow na nte thüngi rotoko ji, osi ombolo Potsow etho lio ji Potsow na ombo yakchia chethev elhi tsso jiang lona ntsiala. Hojiang ji nte yolo tsso jina ntena ntebobo ntsia. 23 Potsow na ombo methak ephani na Jisu ji nte khelo theyiv licho, osi ntena mmen kyon khi ombo doni chüthokcho. 24 Khatola Potsow na echü lona echü etho ji khyothechia ombo kümlanthukcho, ntiotssole echü jina vüngi ombo n vaehecho. 25 Ombo tsükona David na heto phyocho, 'Ana OPVÜI ji yuta topvülo a mhadungo hungala, osi a ndüngo vana hungala, ombo a ndüngo osi a nkenphi. 26 Jitsükona aiyo longshi na a pyingcho, osi a yi jiangha longshi na pyingcho. Aiyo echüv a sekacho khatola enhungo eyilo lia vamvü, 27 ntiotssole nina a mon ji echüli n si; osi nina nilona ntsantho jiang ji echüli na n kyonthuk. 28 Eküm lamoe eyilan ji nina a ejüthaka, osi ni vanhya jina longshi na apyingthokvü.' 29 "Ota-onyuden, ete motsüi mesao David tsükona ana bolaroe na nte ezov. Ombo chüi shothecho osi ombo khüp ji enhünga jana ete ndüngo lia. 30 Ombo zenkhying osi Potsow na ntio ombo thüngi phyochakcho sana ombona ntsicho. Potsow na David tsochen tsüka David esüa mesao kümthokvü to phyochak licho. 31 Potsow na mhadungi ntio tssov sa vancho sana ji David na hungjancho, jitsükona ombona shanchopvüi ji kümehelamvü to heto phyoe vacho: 'Echüi jiang vanpheni ombo n sicho; ombo tsük ji olüpi na n kyoncho.' 32 Jisu tsük shi Potsow na echü lona kümlanthokcho, osi e topvü hoji ehungpvüi etssoeden. 33 Ombo opo Potsow khe amimoe ombo phanthithuk-thaka, osi Potsow na phyochako ji esüa Nthomon ji ombo thüngina khichothaka. Ntena enhünga ntio zoa osi hunga vancho sana shiang jo ombo yantso e thüngi e pio ji. 34 David na Potsüwoe chüngicho mek, tolea ombo na phyocho: 'OPVÜI na a pvüi thüngi ezocho: a amimoe khuktheta, 35 ana ni ri jiang nijo kupi ni epyankaphen n kümthuk-thüng nandang.' 36 "Jitsükona Israel kyon topvüna Jisu ocho ntena doni sicho sana jijo Potsow na OPVÜI osi Shanchopvüi ji kümthukthako ji to mmhona ntsi khiv lia!" 37 Kyon jiangna kvüthüng shi zocho sana onte lümbüm rhaki ontena Peter tona wothung thanpoe jiang to ezotacho, "Oshomden, eiyo kvüto lyuvla?" 38 Peter na ezocho, "Nte otsük akvü na ombobo mmen jiang lona khophi Jisu myingo na baptitava, tona nte mmen jiang nte siyiv; osi ntena Potsow yantso Nthomon ji hunguka. 39 Ntiotssole Potsow phyochak jo nte tsükona, nte ngaro jiang tsükona osi ochoang ekoni vancho sana jiang tsükona osi OPVÜI ete Potsow na kvüta ombo thüngi tsarhyua sana jiang topvü tsükona." 40 Peter na nocho yi onte picho osi thanpo yilan elümoto khi onte ntssungcho, "Nthae kyon shiang pono ezüp tsao ji lona nte bobo tsanchotava!" 41 Kyon elümoto na ombo püngno ji engae bapticho osi hoji nchuk wothüng ethüm harüma okholo rheyicho. 42 Onte na wothung jiang thüngina shikae khita khüm shümta lo rhowota osi khümshümta etsoyu jiang chinhyata, randanta onte yuta yitokcho.
Longtsüi Jiang Yolo Eküm
43 Wothung jiang yakchia chethev elhi osi emhukthao elhi elüm tssocho. Osi otsük akvü rangsüemhuk na pyingcho. 44 Longtsüi topvü na khümshümtalo senjümtae onte ejüeli jiang otsük akvü jantacho, 45 Ontena tsütsaelan osi ejüeli jiang yenkhani orang ji otsük akvü ethelan ji ephan jantacho. 46 Eng akvü onte na okho tssoe khümpheni na Potsow thüngta sanrhyutacho, 47 osi ontena okina tsoyuta na Potsow thüngta, enyip longshyu na pyingi kyon topvü na onte chokacho. Osi OPVÜI na shanchowo kyon jiang eng akvü okho jilo ekhyimphacho.
Jojang Tsüka Emiyicho
1 Tsüngon na lo Peter ha John onina mmyulani ethüm ekho harüma lo randan yuta jilo khümpheni wotacho. 2 Ezehungo Kibüng to tsao jilo kyon tsüka buklena jojang tüv vancho. Khümpheni eroe kyon jiang thüngi orang chontokvü tsükona ombo ji eng akvü hojilo sosi oro vanthukcho. 3 Ombona Peter ha John oni rheyia hungi ombona ntio sana oni chonicho. 4 Ontena rüka ombo zetasi Peter na, "E zechia!" to ezocho. 5 Tole ombona ntio sana, eyiloa oni zechicho. 6 Peter na ombo ezocho, "Ana nti shona janti ha n li; tolea ana ntio lia na ji ni piala: Nazareth yamo Jisu myingo na phanthi sanphia!" 7 Tosi ombona okhe amimoe na ombo sükacho. jitopvü kyon ji jo jiang osi nkhuk jiang etho jükacho; 8 Ombona phanthi mangcho osi sanphia yicho. Osi ombona onte nzo sanphia tsukphia Potsow thünga khümpheni rhowocho. 9 Hojilo kyon jiangna ombona sanphia Potsow thüngo ji hungcho osi 10 ombo ji Ezehungo kibüng jilo chontsoa vamo ji to ontena chethetale ombolo ntio tssothakcho sana ji tsüko na onte ngangtsünga emhuktacho.
Khümpheni Peter Püngno
11 Kyon jina Peter ha John oni tsokata Solomon rafüp to tsao jilo vanle kyon jiangna emhuktsünga yungta rotacho. 12 Peter na kyon jiang heto ezocho, "Israel kyonden, ntiolui shina nte emhuktala, osi rüki zetala? E etho osi e ntsa ntho lona kyon shi sanphiche-thukcho tsayitalo? 13 Abraham, Isaak, osi Jakob Potsow, ete pyimtsümotsüi jiang Potsow jina ombo nri Jisu ji Potsow pvütsson pithaka. Tokhatola ntena esapvüi jiang khelo theyicho osi Pilate na ombo vachiv phyocho sülo mpato Pilate mhadungo na khoe ombo sicho. 14 Ombo nthoe osi mmhom khatola ntena khoe ombo sicho, osi nte chokao münghan ji nte vachiyile to Pilate ezotacho. 15 Ekümlan jilo esopvüi ji ntena lüngthae sicho, tolea Potsow na echü lona ombo kümlanthukcho... Osi eiyo hoji ehungpvüi etssoe den. 16 Ntena ntsiwo osi hungwo jojang kyon shi etho pio jijo, Jisu mying jina osi ombo mying ji longtsüo jina. Osi Jisu yakchia hungwo longtsü jina kyon shi emiyicho to ntena hungthaka. 17 "Hoji tsükona, oshomden enhungo, nte esopvüi tona nte to na ntio Jisu thüngi tssocho sana jiango n tsijam tssocho to ana ntsia. 18 Hojito tsso ji yakchia Shanchopvüi jina ezüpvü lia to nkolona Potsow na zenkhying topvü yakchia heto phyoe elioji benthukcho. 19 Hojitsükona khophitava osi Potsow thüngoe yitava, tona ombona nte mmen jiang nte siyiv. Ntena hojito tssona omonlo etho ji OPVÜI thüngina rov 20 osi ombona nte tsükona ethüngche vathako Shanchopvüi Jisu ji nte tsükona rothokvü. 2l Potsow na nkolo ombo zenkhying jiang yakchia phyoe vao ji esüa topvü ethan kümthokvü yuta ji n janthüng jo ombona potsüwoe vamvü. 22 Moses na phyocho, "OPVÜI nte Potsow na rothuko ji esüa zenkhying tsüka rwothukvü, osi ombo nte kyon yolo tsüka tssov. Ombona ntio tssole to nte ezoana ntena hoji tssochev. 23 Ochona zenkhying ji yi nngana ombo Potsow kyon jiang yolona khichuki monthoki siv." 24 Osi yithen ehan zenkhying topvü na, Samuel osi ombo sülo jiang topvüna nchüng ntio tssoa vancho sana shiang topvü phyoe vacho. 25 Potsow na ombo zenkhying jiang yakchia phyochaki vao jiango nte echi, osi Potsow na nte pyimtsümotsüi thüngi ntsata methaki lio jilo nte jüa. Ombona Abraham heto ezoji esüa, 'Ni tsoronichen yakchia ana limhalo kyon topvü mmhayivka.' 26 Ji esüa Potsow na ombo nri ethüngchei ovüngtssoa nte thüngi rotokcho, jijo nte otsük akvü nte mmhayia nte na ntha eküm jilona nte khophitoki nte mmhayiv tsükona."
Esaekho Mhadungo Peter ha John oni
1 Peter ha John onina kyon jiang thüngi oyi nsana vanathüng pvüti ejoma, khümphen enhyang esapvüiden tona Saducee ejoma to rocho. 2 Wothung otsük eni jiang jina Jisu ji echü lona kümlanthaka osi hoji yakchia echüi jiang kümchelancheta to ehungpvüi pio jina onte lüm tsukcho. 3 Jitsükona ontena oni rhümae mmyulani vüngpheni thechi ojyuato jana vanthukcho. 4 Khatola yithen ji ezoe elümoto na longtsücho osi kyon wothüng mongo harüma owo rankacho. 5 Ojyuato jo Jihudi esapvüiden, eramoeden tona shikhfü püngnoeden, to Jerusalemi sanrhyucho. 6 Ontena pvüti tsüphoe Annas, Caiphas, John, Alexander tona pvüti tsüphoe wopan thanpoe jiang to ndukcho. 7 Ontena wothung jiang ji onte mhadungo mangthuki engacho, "Nteno ntio etho lona osi ocho mying khi heto lyutala?" 8 Tole Peter ji Nthomon na pyingi heto onte ezocho, "Kyon esopvüiden osi eramoeden: 9 ena jojang ji thüngi elhi mmhom tssoyiwo ji tsükona osi ombo emiyiwo jina nchüng heto etüko-shüka tssona,10 ntena osi Israel kyon topvü na ntsi khitava: Nazareth Jisu Khrista ocho ntena doncho sana osi Potsow na echü lona ombo kümlanthucho sana ji myingo na kyon shi emiyi khi nte ndüngo vana. 11 Jisu jo ocho tsükona motsü lona heto phyocho sanaji: 'Nte kitssoeden na olong kümoe khoe sicho sana hojina oki nkeni longpvü kümcho.' 12 Thanpoe ochi myingo ha shanchowo n jü; ntiotssole limhatsü yolo shi yaka eshanchowo omying thanpo Potsow na kyon picho n li." 13 Esaekho jilo khanhyae jiangna Peter ha John oni lüm etsson ji zesi, osi onteno n khya-nyan kyonshaeden to ntsi onte emhuktsüngcho, osi oni ji Jisu nzo etssoeden to ontena chethecho. 14 Khatola ontena ntia ephyov n licho, ntiotssole emiyiwo kyon ji Peter ha John oni ndüngo mangi vana ontena hungcho. 15 Jitsükona ontena etssirhyuphen ki jilona yi sitale to oni ezosi onte thyuta khicho. Ontena phyotacho, 16 "Etena kyon shiang tsükona kvüto lyutavla? Jerusaelm lo evan otsük akvüna onina chethev elhi shi tssocho to ntsia, osi etena hoji n khiranche. 17 Khatola yithen shi kyon yolo nzüa n yitokvü tanglanchiv tsükona, Jisu myingona ochi thüngi ha oyi ti-nsantale to onte tangtavka." 18 Ontena oni tsalani onina kvüthüngha Jisu myingo na püngnoa ti-nsantale to tangcho. 19 Tole Peter ha John onina onte jalancho, "Ntebobo nchümi zetava, Potsow mhadungo jo nte yi engao ji elamo alo Potsow yi engao ji elamola? 20 Ntiotsole ena ntio hunga osi zothakcho sana hoji nphyov jo n vanche." 21 Jitsükona esaekho jina oyi khüngkata onte tangsi onte vachi sicho. Ntio tssothakcho sanaji kyon jiangna hungi Potsow thüngta vamo jina ezüp oni piv ji n tssoche to ontena ntsicho. 22 Kyon ocholo chethev shi tssocho sana jijo nzyu zhüro poni kyon tssocho.
Longtsüi Jiangna Lüm Etsson Tsükona Randantala
23 Peter ha John onina oni vachipvü na onte razhü jiang thüngi oyi pvüti tsüphoeden tona eramoeden to jiangna ntio phyocho sana ji onte ezotacho. 24 Longtsüi jiangna hoji zoale onte topvü na nzo heto randantacho: "Oyak liko, jümang jianglo ntio licho sana topvü pono OPVÜI osi liyingpvüi! 25 Nina Nthomon ji khi emotsüi David ni nri ji yakchia heto phyoe vacho: 'Ntio tsükona pvüjipoe jiangna tssoshütachola; ntiolui kyon jiangna ethev n lio okyak n mhom tssotachola? 26 Limhalo mesaeden jiang na ontebobo methaki osi limhalo esaeden sanrhyutae OPVÜI osi ombo Shanchopvüi ji panlancho.' 27 Ntiotssole otsotso, Herod ha Pontius Pilate oni na pvüjipoe jiang tona Israel kyonden to nzo tssoe ni ntho nri Jisu, nina ethüngcheo ji panlana yantsü shilo sanrhyutacho. 28 Nina ntio tssothokvü methak ntsae licho sana hoji etssov tsükona ontena sanrhyutacho. 29 Jitsükona OPVÜI, ontena ekyutsü methako jiang zeta osi ni nriden na lüm tssoni niyi ephyov tsükona etho epia. 30 Ni khe yonchi emiyithuka, osi ni Ntho nri Jisu myingona chethev elhi tssothuka." 31 Ontena randanroale ontena evamo meta ji enhyokcho. Onte topvü Nthomon na pyingi lüm tssoni Potsow yithen ji püngnota yicho.
Longtsüi Jiangna Onte Ejüeli Jantala
32 Longtsüi kholuk ji nchümri osi lümbüm motsünga tssocho. ochinaha ombo echi to n phyov ontena ntio liana jiang jantacho. 33 Etho tsüphov theta wothung jiangna OPVÜI Jisu kümlamo ji ehungpvüi tssotacho, osi Potsow na onte topvü pono mmha tsüphov piracho. 34 Okho jilo ochinaha ezüpa n chümcho. 35 Ochoangna oli osi liko lichosana jiangna yenkhani orang ji wothung jiang khelo oro theracho osi orang ji otsük akvü ethelan ephan jantacho. 36 Jitsükona Levi tsüka Joseph to tsa Cyprus lona bukcho wothung jiangna jo Barnabas to tsa (Ji yichak jo oyam lümbüm tssonkayi to.) 37 Jina ombo oli licho hoji yeni orang ji oro wothung jiang khelo theyicho.
Ananias ha Sapphira Oni
1 Kyon tsüka Ananias to tsao ji tona ombo engh Sapphira onina onte tsütsaelan tara yentacho. 2 Omboe engathetae orang tara zümlanchi vatasi enhyo ji oro wothung jiang khelo theyitacho. 3 Peter na ombo ezocho, "Ananias, ntiolui nino tsüngrham na ni pyingthoki Nthomon mahdungo ejüng ni phyothuka tsütsaelan yemo ji rang ji riso zümlanchi va-chola? 4 Nina tsütsaelan ji n yenthüng jo ni echi tssocho, elani yensanatilea orang ji ni echhi. Tona nino ntiolui hojito elhichola? Nina kyon mhadungo n tsacho mek, tolea Potsow mhadungo n tsacho!" 5 Kvüthüng Ananias na hoji zochosana jitopvü likoe evümthei chüi sicho, osi hoji motsü ji ezoe topvü ekhentsüngracho. 6 Khyingroe jiangna rhoro ombo müng ji eyuki hansi hapoe chiwo juthei ombo sicho. 7 Khonda ethüm harüma sülo ombo eloe jina ntio tssochosana ji n tsiv rhorocho. 8 Peter na ompvü engacho, "Nirapvü ninina tsütsaelan ji man hungwo ji shi tae alo kvüto sana a ezoa?" Tole ompvüna janlancho, "Ho, totona shi." 9 Tole Peter na ompvü ezocho, "Nirapvü ninio ntiolui OPVÜI mon füi zeyiv mmyantachola? Nirapvü juthelo ewoe kyon jiang kibüng jana yilanthaka, osi niha onte na ni ejümatsi chiwovka!" 10 Jitopvü ompvü ji ombo jolo evümthei chüi sicho osi khyingroeden jiangna rheyile ompvü chüi lia hungi ejümata chiwo orapvü ndüngo ompvü juthecho. 11 Ekhümkho topvü osi hoji ezoe topvü ekhentsüngracho.
Chethev Elhi Osi Emhuko
12 Wothung jiang na kyon jiang yolo chethev elhi osi emhuko elhi elümoto tssotacho. Longtsüi topvü na Solomon rafüp jilo etssirhyutacho. 13 Kyon topvüna elümoto onte thüngta phyota ha okho jilo n jüwo jiangna jo ochina ha onte yolo n rhowokhokcho. 14 Khatola eboe osi eloe ochoang na OPVÜI lo longtsüthakcho sana jiang ji kyungka kyungka na okho jilo ekhyimcho. 15 Wothung jiang na emitoko elhi tsso jiang yakchia ontena nochonori jiang sotasi oro lantsüi tona belüngo, osi ophüko to erichirae Peter na yakchiathüng ombo khümcho jina rhaka yitokvü nhyakta vancho. 16 Hoji nkonjano oyan jianglo kyon jiangna Jerusalemi santhecho osi nochonori jiang, omon n mhon ejüi to jiang sotasi ro jiang topvü emiyiracho.
Wothung Jiang Khangshiala
17 Tole pvüti tsüphoe ji to na ombo razhü to jiangna, meta jilo Saduccee kholuk lo khanhyae jiang to nzo tssoe wothung jiang elümoto n zekhokvü ontena ntiona tssotav methakcho. 18 Ontena wothung jiang rhümae nzontsü vüngpheni thechicho. 19 Tole hoji zümo jilo OPVÜI lanben tsüka na evüngki khanphen jiang chonchi wothung jiang chiyitoka ezocho, 20 "Ntena owo khümpheni mangi eküm ethan motsü shi kyon jiang ezotava." 21 Hoji esüa wonchiale wothung jiang na khümpheni owo püngnotav benkacho. Tole pvüti tsüphoe ji tona ombo razhü jiang osi Jihudi eramoeden to jiang topvü tsarhyui esaekho thyutasanta khisi, wothung jiang onte thüngi sosi role to vüngpheni evan jiang yithen picho. 22 Khatola tsüphoe jiangna owo zele wothung jiang vüngpheni n vamo jina ontena oyi esaeden jiang ezocho, 23 "Ena evüngki wotale elümoto khünga khani licho osi enhyang jiang topvü kibüngi vanracho, khatola ena rhowo zetale ochungi jo ochia n van!" 24 Pvüti tsüphoeden tona khümphen enhyang tsüphoe ji to na hoji zoale wothung jiang kvüto tssocho sana to onte emhukcho. 25 Tole kyon tsükana rheyi onte ezocho, "Engatava! Ntena vüngo kyon jiango khümpheni oro kyon jiang püngnota vana!" 26 Hoji tsükona tsüphoe jina ombo kyon jiang sosi owo wothung jiang sosi yilancho. Khatola ontena ekhüng tssoa osi haruka jo ntssocho, ntiotssole kyon jiangna onte ephyatsüngu kyutacho. 27 Ontena wothung jiang sosi rheyi esaekho ji mhadungo onte mangthukcho osi pvüti tsüphoe jina onte engacho, 28 Ombona ezocho, "kyon shi myingona ti püngnotale to ena khünga nte khancho" tole "Zeta ntena ntio elhitacho sana! Ntena nte püngnoyi jina Jerusalem pyingthuk-thaka, osi ombo chüo ji ntena epono tssothuk hungala!" 29 Peter to na wothung thanpoe jiang tona janlancho, "Ena kyon yi mekna Potsow yi engav lia. 30 Ntena Jisu ji donpheno eshenkae chütokcho khatola ete pyimtsümotsüi Potsow jina echü lona ombo kümlanthukcho, 31 Potsow na Israel kyon jiang khophithoki onte mmen jiang siyiv yuta piv tsükona ombo ji esopvüi osi shanchopvüi tssothokvü ombo khe amimoe phanthitokcho. 32 E tona ombo yi engae jiang to thüngi Potsow na yantso epio Nthomon ji to na shiang shi ehungpvüi tssoala." 33 Esaekho jina shiang shi zoale lüm tsukachi wothung jiang chütok hungcho. 34 Tokhatola onte yolo Pharasee tsüka Gamalel to tsa shikhfü ji püngnoe osi oyam na yikrachi eli-i jina okho jilo phanthicho. Ombona ezoa wothung jiang hapoe tsachukthuksi, 35 esaekho ji ezocho, "Israel kyonden, ntena kyon shiang thüngi thama ti tssotava. 36 N sungalo ha Theodus na tsüphoe ejana role otsük nzo mezhü aria na ombo phanphicho. Tole omboji lüngthae sisi ombo sürüi jiang tsanroe sithukcho, osi ombo elhi ji ochüm tssoe sicho. 37 Jisülo Galilee kyon Judas na wokhata yuta jilo chiyi kyon ekhfürhyui ninyang benkacho. Toaha omboha lüngthae sisi ombo sürüi jiang ezonsorae sithukcho. 38 Jitsükona shilo jo ntena kyon shiang pono ntia ti tssotale to nte ntsithukala. To onte esi sia, ontena ntio tümka yia vancho sana osi tssothakcho sana ji kyon lona chiyicho tssona moni siv; 39 tolea shi ji Potsow thüngina tssocho jo ntena onte ntov tssov. Osi nteno Potsow thüngi khonda vancho saka to ntsiv!" Tole esaekho jina Gamalel na phyo ji engacho. 40 Ontena wothung jiang tsathei erhüpsi Jisu myingona kvüthüngha ti püngnotale to ezoa vachicho. 41 Wothung jiangna esaekho ji yaki yiale onteha Jisu tsükona yikra ezüp ekhiv etümchoke to zichei longshita yicho. 42 Osi tsüngon akvü khümpheni osi oki na ontena shanchopvüi Jisu yithenmhom ji n tümjakna püngnotacho.
Nzanchipvüi Otsük Tiying Jiang
1 Sürüi kyungkata yia tsüngon tara tssoale Greek yi nsan Jihudi jiang tona Jihudi tssotso jiang to khonta chiyicho. Greek yi nsamo Jihudi jiangna onte yolo emi-nloe jiang ji eng akvü etsoyu jantao ji lona khachoyiala to phyotacho. 2 Jitsükona wothung taro eni jiangna longtsüi topvü tsarhyui ezocho, "Ena Potsow motsü püngnov ji sisi ejüeli jantae etssov tsükona etüm elan n li. 3 Jitsükona oshomden, nte yolo na Nthomon na pyingcho to chekao tüv osi nchümri eli-i tüv otsük tiying ethüngcheta, tona ena hojiang khi elhi shi tsswothukvü ka. 4 Tosi eiyo yuta topvülo randan tona püngno to lona e yuta yithokvü ka." 5 Kyon topvü na wothung jiang na phyo ji emathacho, osi ontena Stephen, longtsü eli-i osi Nthomon na epying ji, Philip, Prokhorus, Nikanor, Tiomon, Parmenas tona Nikalaus, pvüjipoe Antiokh kyon Jihudi ekhümlano rheyithako ji to ethüngchecho. 6 Kholuk jina onte ji wothung jiang ejüa onte khi okhe nyimkae randanka-thukcho. 7 Hojito Potsow yi ji tümjak n lina nzüa yicho. Jerusalem lo sürüi jiang kyungkata yicho osi pvütiden khosha na longtsü ji khichocho.
Stephen Rhümao ji
8 Stephen jo Potsow na mmha epi osi etho eli kyon tssocho, osi ombona kyon jiang yolo chethev osi emhuko tüv elüm tssocho. 9 Tokhatola ombo ji Alexandria tona Cyrene to lo Jihudi vamo jiang 'Etancholo Vachithang Synagogue' to tsao jilo khanhyae ejoma na ombo panlancho. Hoji tsükona Cilicia meta lo vamo jiang tona Asia tolo vamo Jihudi jiang onte nzo tssoe stephen thüngi ekhiranta phanthicho. 10 Khatola omon jina Stephen ji nchümri pio jina ombona nsamo ji ontena nlanchoyichecho. 11 Jitsükona ontena kyon ejoma ekhüp pia, "Ombona Moses tona Potsow to yikvüa nsana ena zocho!" to phyothukcho. 12 Hojitolui ontena kyon jiang, eramoe jiang, osi shikhfü püngnoe jiang to nthiphicho. Ontena Stephen ji süyae esaekho mhadungo sosi wocho. 13 Ontena kyon ejoma süsi rhowo, "Kyon shina nchukaben ete ntho khümphen ji tona Moses yizüng to yikvüa nsanala to ejüng phyothuk cho. 14 Ombona heto phyoa ena zocho, Nazareth Jisu na khümphen ji roe sisi, Moses echungi na ntio shikhfü tsütsata oyi e jancho sana jiang topvü dungphikhamvü." 15 Jilo sanrhyui evan topvü na rüki Stephen zetacho tole ombo mha ji lanben mha esüa zechecho.
Stephen Püngno
1 Pvüti tsüphoe jina "Otsotso memek?" to Stephen engacho. 2 Stephen na janlacho, "Oshomden osi opoden, engatava! Ete pyimtsümotsüi Abraham na Haran lo oyi n vanthüngna pvütssomo Potsow jina Mesopotamea lona ombo ezocho, 3 'Ni wopan tona meta shi to sisi ena meta ni ejüvka jilo yia.' 4 Jitsükona ombona meta ji sisi oyi Haran lo vancho. Abraham opo chüthakale, Potsow na ombo ji ntena enhünga vamo shilo oyi vanthukcho. 5 Hojithüng jo Potsow na Abraham ji meta jilo khejüa tia ombo echi to npi, tolea Potsow na ombo piv phyochakcho, osi hojijo ombo tona ombo tsoronichen to echi tssov tsükona. Potsow na shi phyochakthüng jo Abraham na otsoe n vanhancho. 6 Potsow na heto ombo ezocho, 'Ni tsoronichen jiang na oyam metae vam osi hojilo ontena oyam nriden tssoa nzyu nzo mezhü onte ezüptokvü. 7 Tokhatola ontena benkao kyon jiang ana oyi tssoyisi sülami jo ontena meta jilona chiyi meta shilo na ontena a khümvüka.' 8 Hoji ntsataphen ji chekaphen tsükona Potsow na Abraham thüngi tseni esio shikhfü ji picho. Jitsükona Isaak buksi hopta motsünga sülo Abraham na ombo tsenicho; Isaak na ombo tsoe Jakob tsenicho; osi Jakob na ombo tsoe otsük taro eni jiang tsenicho; jiango ete jipo motsüi thüngche taro eni jiang. 9 "Jakob tsoeden jiangna onte ojenio Joseph ji n zekhokvü yeni Ejip metae oyam nri küma yicho. 10 Khatola Potsow na ombo ndüngo vani, ezüp topvü yakchia ombo sochukcho. Joseph na Ejip mesao mhadungo chiwoathüng etsso-ephyo mmhom ombo mmhayia mesao ji khi Joseph ji meta jilo osi mesao khümtsüng jilo esapvüi (governor) tssothukcho. 11 Tole Ejip meta topvü tona Kanaan meta tolo otssi vara rheyicho, osi ezüp elüm li sicho. Ete motsüi jiangna etsoyu ntia n hungcho, 12 osi Jakob na Ejip metae etsoyu lia to owon zoe, ombo tsoeden ete pyimtsümotsüi jiang ovüngo tssoa wothukcho. 13 Yenjo enioto wotale Joseph na ombo ojenio jiang thüngi ombobo chethethukcho, osi Ejip mesao jina Joseph wopan ji ntsicho. 14 Joseph na opo thüngi oyi yena ombo tona onte wopan ekha tiying si mungo to jiang Ejip metae rotale to ezocho. 15 Tole Jakob na Ejip metae wocho osi ombo to na, otsoe jiang toha jilona chücho. 16 Osi onte müng jiang hansi oyi Shechem lo Abraham na Hamor tsoe jiang thüngi shio liko jilo olüp jianglo thei onte sicho. 17 Potsow na Abraham thüngi phyochako ji ebem yuta janale Ejip lo ete jipo kyon jiang ji wotssonkacho. 18 Osi Ejip lo mesao ethan Joseph n tsio tüv chiyicho. 19 Ombona ete jipo ji khangria ete opo jiang nshümoa onte nganiro jiang chütokvü hapoe ekachi sicho. 20 Hoji yutalo Moses bukcho, osi ombo ngaro opyon mmhom tüv tssocho. 21 Ombo ji opo kina choro ethüm nijüpcho, osi oponi ombo chiyithukale Pharao otsolov na ompvü tsoe tssoa khi ombo vanthukcho. 22 Moses ji Ejip ntsinran lantaro lo ejyueran picho, osi ombo ji elhilo tona oyi lo to etho eli-i kümcho. 23 "Ombona nzyu zhüro tssungkatale ombo ojeniden Israel kyon jiang owo zethechiv nchümchecho. 24 Ombo ojenio tsüka Ejip kyon na taa hungi ombona Ejip kyon ji tatsüngi sia ombo shanchocho. 25 (Ombona jo ombo kyon jiangna Potsow shancho ji ombo yakchia rothaka to engathev tsayicho; khatola ontena n tsicho. 26 Ojyuato jo onte otsük eni khonda ombona hungi mmhontayiv tsükona ezocho, "nteno jenidenla ntiolui nte nte khangshitala?" 27 Khatola kyon ochona ombo shom khangshia vancho sana jina Moses ji süchi sia ezocho, "Ochona e pono esapvüi osi yitssoe ni tssothukchola? 28 Nina njyu Ejip kyon lüngthata to anaha a lüngthav tssoalo?" 29 Ombona hoji zoale, ekyu lona Ejip meta sisi tsani oyi Median meta lo vancho. Hoji lona ombo tsoe otsük eni vancho. 30 "Hojilo nzyu zhüro vancho sülo lanben tsüka na Sinai phunglan romhoni ranuk motsünga lona omi kia ombo ejücho. 31 Hoji hungi Moses na emhuka enhyankata owo zele ombona OPVÜIi won heto zocho, 32 'Aiyo Abraham, Isaak, osi Jakob Potsow, ni motsüi jiang Potsow jika.' Tole Moses ji enetsüngi n zechikhukcho. 33 OPVÜI na ombo ezocho, 'Ni jokhüp jiang phungcheta, nina mangi vamo meta shijo ntho meta ka. 34 Ana a kyon Ejip metae vamo jiang ntssonshi ji hungthaka, ana onte eronta ji zothaka, osi onte shancholo jorothaka.' Enhungo roa, ana Ejip metae ni yilantokvü ka. 35 Moses ji Israel kyon jiang na n khicho jo. Osi ontena "Ochona e pono esapvüi osi yitsso eni tssothukchola?' to ezotacho. Moses shi jo Potsow na lanben ji yakchia ranuk jilo na ezoa esopvüi osi vachipvüi tssoa wothukcho. 36 Ochona Ejip meta jilo jümang rakio jilo osi romhoni nzyu zhüro emhuk thao elhi osi chethev tssoa onte sochukcho sana ji ombo. 37 Ombona Israel jiang ezocho, 'Potsow na a chiyithoko ji esüa nte yolo zenkhying chiyithokvü ka.' 38 Israel jiang topvü romhoni etsseni vanathüng hojilo vamoji ombo, osi ombona ete motsüi jiang ndüngo vanathüng lanben na Sinai phunglani lanben thüngina ete e zothokvü tsükona eküm yithen khichowo ji ombo. 39 Khatola ete pyimtsümotsüi jiangna ombo yi n ngacho, ontena sülanchi ombo. sisi Ejip metae kholani onte yihungcho. 40 Ontena Aaron ezotacho, "Potsow nsüngrüi olan esothuka, Ejip metae na esocheo Moses shijo kvüto tssocho sana ena ntsiv sithaka." 41 Hojithüng ontena mangsüro kisü nsüngrüi othan pia khümtacho, osi onte khe na nsüngrüo ji tsükona tokhuta khümtacho osi onte khena nsüngrüo potsow jilo onte jüngra licho. 42 Jitsükona Potsow na onte thüngi na yi sisi potsüwoe shantio jiang onte khümtokcho; jijo zenkhying kako lo heto erani elio ji ephan: 'O Israel kyonden! Ntena romhonina nzyu zhüro ekümrüm lüngthae thantao ji a thüngi mek. 43 Ntena Molekh potsow süki ji hanphitacho, osi nte Rephan shantio ji; osi ntena epyakthe khümphen kisü nte khena nsüngrüo jiang tsükona ana Babylon bankae nte phanchivka.' 44 "Ete motsüi jiangna ehungpvüi süranki ji romhoni hanphitacho. Hojilo Potsow ntio kvütüv nsüngrüv sana ji ephan Moses ezoa nsüngrüthokcho. 45 Hoji jo ete motsüi jiangna elonta oyi Joshua khe lona Potsow na ete motsüi jiang mhadungona jipopoe jiang phani sisi epio meta jilo hansi rheyicho. Osi David echung n janthüng nandang jo hoji licho. 46 Ombona Potsow emathao tssochei Jakob Potsow vanphen oki etssov tsükona choncho. 47 Tokhatola Potsow kijo Solomon na tssocho. 48 Tolea ntsontso Potsow jina jo kyon na tssocho kilo jo n vanala, zenkhying na heto phyoe elio ji esüa: 49 OPVÜIna phyoala, "Oyak shijo a vantsü ji, osi limha shijo a jo epyankaphen ji. Tona nina ntio kvütüv ki a tssoyivla? A vanphen jo kvülo lichola? 50 Ana shiang hetopvü n liyingchoke? 51 Stephen na ezocho, "Nteno kvüta lümbüm ekhüngden ato!" osi "Nte lümbüm jo Potsow n tsi lümbüm, osi nte eno jiango Potsow yi nzowo tssoa püngthaka! Nte opo jiangna tanglanchio ji esüa ntenaha Nthomon ji tanglanchiala! 52 Zenkhying jiang yolo nte opoden jiangna n khangshicho ocho jüchola? Ntsanthoe erov elio ji ovüngna motsü lona ephyo kyon jiang ntena lüngthacho; osi enhungo nteno ombo eyen osi chüthong den tssotala. 53 Ntena shikhfü ji lanben yakchia khichotasi hoji n benphiwoji nte shi!"
Stephen Ephyatsüngo ji
54 Ontena shi engatasi oho njakta lüm tsuktacho, 55 khatola ombo ji Nthomon na pyingi oyaki rüka zekachile Potsow pvütsson osi Jisu na Potsow amimoe vana hungkachicho. 56 Ombona phyocho, Zeta, potsüo chonchi kyontsoe ji Potsow khe amimoe khukthe vana ana hungala.' 57 Tole ontena tüngkachita onte eno jiang chungi sitacho, 58 osi onte topvü na ombo sakae yantsüi na phanchukchi ephayatsüngi ombo sitacho. Hojilo zeta evan jiang na onte phukthesü jiang Saul to tsao khyingroe tsüka ji ndüngo vatacho. 59 Ombo ephyatsüngale Stephen na OPVÜI tsaphia phyocho, "OPVÜI Jisu, a mon a khichoyia!" 60 Ombona khuktseni tüngkachia phyocho, "OPVÜI, nlan shi onte ti nchümcheyia!" Hojito phyoa ombo chücho.
1 Stephen chüthuko ji Saul na lüm na rüngcho.
Saul na Ekhümkho Jiang Khangshiala
Jerusalem lo ekhümkho jina hoji tsüngono na benkae khangshi ezüp elümoto ndukcho. Wothung jiang yaka longtsüi topvü Judea tona Samaria to metae tsanrorae sicho. 2 Longtsüi ejoma na Stephen tsükona tüngkachia kyata juthei ombo sicho. 3 Tokhatola Saul na ekhümkho ji moni sithukvü yancho. Ombona oki akvü owo eboe osi eloe topvü süchuki evüngki thechicho.
Yithenmhom ji Samaria lo Püngnoala
4 Tsanroe yio kyon jiangna meta ezoni püngnota yicho. 5 Philip na samaria yantsü jilo owo shanchopvüi ji tsükona kyon jiang püngnocho. 6 Philip na chethev elhi tsso jiang ontena hungcho osi ombo püngno jiang tüngochüa engatacho. 7 Kyon elümoto lona omon n mhom jiangna eronta tsanchokcho, osi tsükchüi, jojang jiangha emiyicho. 8 Jitsükona yan tsü jilo longshi tsüphov rheyicho. 9 Simon to tsa kyon tsüka vancho osi ombona ozen-okyak elhi tssoe Samaritan kyon jiang emhukthuka yuta tara vanthakcho. Ombo etho tsüphoe to ombobo nchümcho, 10 osi kyon teri tsüphoe topvüna ombo phyocho longtsücho. Ontena phyotacho, "Ombo etho tsüpho ji" to tsao etho ji ka. 11 Ombona emhuko elhi tssoe sunga onte longtsüthuka vanthako jina ontena ombo yi engayia vancho. 12 Tokhatola Philip na Potsow ekhüngyan yithenmhom püngno ji longtsüi eboe eloe topvüna baptitacho. 13 Simon na ha longtsücho, osi bapticho sülo mbona Philip ndüngo tae vana vancho. Osi Philip na chethev elhi tsso jiang hungi ombo emhoktsüngcho. 14 Samaria kyon jiangna ha yithenmhom ji khichothaka to Jerusalemi vamo wothung jiangna zoe ontena Peter ha John oni ha hojilo wothukcho. 15 Ontena owo janale hojilo longtsüi jiang Nthomon khichwothukvü tsükona ontena randanicho. 16 Ntiotssole ontena Jisu myingona baptio ji taekha, Nthomon jo ochia eküm lo n rohancho. 17 Jitsükona Peter ha John onina okhe nyimkae onte randanile Nthomon ji ontena hungcho. 18 Wothung jiangna okhe nyimkayina Nthomon ji onte lo joroa Simon na hungcho. Ombona Peter ha John oni orang pia ezocho, 19 "Ana ocho lo okhe nyimkata na jina Nthomon ji ehungo etho shi anaha a pia." 20 Peter na ombo ezocho, "Nina Potsow yantso ji orang na shia tsayia nchümo jina ni rang ji nzo n mhemi ni yithukvüka! 21 Nina Potsow mhadungo lümbüm n tssüngo jina e elhi lo ni ejan n li. 22 Jitsükona khophia, osi ni kyak ochung heto n mhomo ji Potsow khi nlan ni siyithukvü tsükona randana. 23 Ntiotssole nilo mhiktsso raki n mhom jüa osi n thanri osi mmen na ni rhümae lia to ana ni ntsithaka." 24 Simon na Peter ha John oni ezocho, "Ntena ntio phyochosana jiang ji a lona n benthukvü tsükona a nzansi a randanitava." 25 Peter ha John oni na oni ehungpvüi pia OPVÜI yithen ji püngnothakale Jerusalemi yitacho. Ontena eyilani Samaria yan elümoto lo yithen mmhom ji püngnotacho.
Philip tona Ethopea Tsüphoe ji to
26 OPVÜI lanben tsüka na Philip ezocho, "Methaki Jerusalemi na Gaza woe joyio lan ji jolowoe jowoa." (olan shijo lanjüm.) 27 Philip na methaki wocho. Tole Ethopia lo mesali ji linhyang tsüka poloe oki yia vancho ndukcho. 28 Ombona Jerusalemi Potsow khümo rosi ombo kurü kari jilona Isaiah kako ji kha oki yia vancho. 29 Nthomon jina Philip ezocho, "Nina yunga owo kari jilo manga." 30 Philip na yunga wole ombona Isaiah zenkhying kako ji kha zocho. Tole ombona engacho, "Nina ntio kha sana ngengathe?" 31 Ombona "Ochina ha eroroe a n jüv kvütoli engathev la?" to ezosi Philip tsae ombo nzo kari jilo khukthethukcho. 32 Ombona kha vamo ntho motsü jijo shi: "Olyu lüngthalo sosi yia vancho esüa, osi olyu motsünga otssan reyilea owon n tssoji esüa, ombona yitsünga tia n phyocho. 33 Teri ombo kümthukcho, osi elan ombo n picho. Ochina ha ombo tsoronichen jiang tsükona n phyokuk, ntiotssole limhalo ombo eküm ji ochüm tssothaka." 34 Tsüphoe jina Philip engacho, "Zenkhying jina ocho tsükona heto phyocho sana a zoa? Ombo tsükona alo oyam la?" 35 Tole Philip na nthomotsü shilo na benkae Jisu Khrista yithenmhom ji ombo ezocho. 36 Ontena olan dunga joyitathüng ojü ejü meta oyi janle tsüphoe jina phyocho, "Helo ojü tara jüa, ntiona baptiv a khalanchivla?" 37 Tole Philip na ombo ezocho, "Nina ni lümbüm totona longtsüa tssona ni baptikhuka." Ombona phyocho, "Ana longtsüala;" "Ana Jisu Khrista jo Potsow tsoe to longtsüala." 38 Tsüphoe jina kari ji esanthuki Philip woniatana ojü jilo jowo Philip na ombo baptiyicho. 39 Onina ojüi na chiyiale OPVÜI mon jina Philip sosi yi sicho, "Tsüphoe jina ombo n hunglam sicho, khatola longshitsünga yentsa yicho. 40 Philip na Azotus lo chiyicho; osi ombona Caesarea lo yiathüng olani oyan jiang topvü lo yithenmhom ji püngnoa yicho.
Saul Khophio ji
1 Tothüng ji Saul na OPVÜI sürüi jiang chüthukvü tsükona methaka pvüti tsüphoe ji thüngi wocho. 2 Ombona Damakas lo synagogue ki esopvüi jiang thüngi ehungpvüi kako erani hansi wov tsükona, osi OPVÜI lan ji phankae hungna eboe lea eloe lea rhümae Jerusalemi sosi yiv tsükona kako choncho. 3 Saul na Damaskas yantsü ndüngo chiwo tona esüngaro taena potsüwoe na wondang ombo rakacho. 4 Tole likoe ombo vanjocho osi heto ombo ezocho, "Saul! Saul! Nino ntiolyui a khangshiala?" 5 Ombona engacho, "OPVÜI, nino ochola?" Owon jina phyocho, "Aiyo nina khangshia vamo Jisu ji. 6 Tolea phanthi yantsü jilo rhowoa, tona nina kvüto lyuv sana jilo na ni ezovka." 7 Saul nzo yentsata vamo jiangna ntia n phyotana mangi sicho, osi ontena owon ji zoaha ochia n hungcho. 8 Saul na likoe na phanthi omhyik kükae zele ntia n hungcho. jitsükona ontena okhe lona ombo erütasi Damakas lo rhowotacho. 9 Tsüngon ethüm jo ombona ntia n hungcho osi hoji yuta jilo jo ntia n tsoyucho. 10 Damaskas lo khristian tsüka Ananias to tsa vancho. OPVÜI na heto ombo ezoa ombona müngtüngcho, "Ananias!" Ombona janlancho, "Helo a vana OPVÜI." 11 OPVÜI na ombo ezocho, "Nina methaki olan nsako to tsao jilo woa osi Judas ki Tarsus kyon Saul ji ethüma. Ombona randana vanka, 12 osi ombona müngtüngina kyon tsüka Ananias to tsa tüv na ombo mhyik pochithukvü tsükona oro ombo nyimkae randana hunga vana." 13 Ananias na janlancho, "OPVÜI, kyon elümotona ombo motsü a ezothaka, ombona Jerusalemi ni kyon jiang thüngi ekhenthao elhi tsso jiang. 14 Osi ni ekhüm jiang topvü rhümav tsükona ombona pvüti jiang thüngina kako khi hansi Damaskas lo rothaka." 15 OPVÜI na ombo ezocho, "Nina woa, ana ombo ji pvüjipoe jiang thüngi, mesao jiang osi Israel kyon jiang thüngi a mying ji ntsithokvü tsükona ethüngchethaka. 16 Osi ombona a tsükona kvüta ezüpvü licho sana ana ombo ejüvka." 17 Jitsükona Ananias na Saul na ncheni vamo jilo rhowo okhe ombo nyimkae ezocho, "Ojenio Saul," "OPVÜI na a rothukcho – Jisu ochona, nina hepi roa vanathüng olani na ni ndukcho sana jina. Ni hunglantukvü tsükona osi Nthomon jina ni pyingthukvü tsükona ombona a rothukcho." 18 Jitopvü Saul mhyiki na ngolüp esüa elungsi omhyik ji pochicho. Ombona phanthi bapticho; 19 osi ombona etsoyu tsothakale ombo etho jükalancho.
Saul na Damaskas lo Püngnoala
Saul na Damaskas lo longtsüi jiang thüngi tsüngon tara vancho. 20 Ombona saksak synagogue ki owo Jisu jo Potsow tsoe ji to püngnocho. 21 Ombo püngno ezoe topvüna ngangtsüngrae phyotacho, "Kyon shijo Jerusalem lo Jisu ekhüm jiang lüngthata vamo ji mekchoke? Osi ombona hepi roji kyon jiang rhümae pvüti tsüphoe jiang thüngi hanlansi yiv tsükona mekchoke?" 22 Tokhatola Saul püngno ji etho jükacho osi ombona Jisu ji shanchopvüi to ehungpvüi pio ji elümoto ntssüng-rünga püngno jina Damaskas lo Jihudi jiangna ombo n janlankukcho. 23 Tsüngon sunga sülo ti Jihudi jiangna sanrhyui Saul chüthuktav okyak yantacho, 24 Khatola onte kyak ji ombona ntsicho. Ontena ombo chüthukvü tsükona yantsü ji zümo eng nhyaktacho. 25 Khatola zümoa lo Saul nzo etssoe jiangna ombo sosi chiwo dekho lo ombo thei echung kvüpo lona ombo vachochicho.
Jerusalem lo Saul
26 Saul na Jerusalemi yicho osi sürüi jiang nzo tssohungcho. Khatola ontena ombo ji sürüi kümthaka toji n longtsü khokcho osi onte topvü na ombo kyutacho. 27 Tole Barnabas na kyochia oro ombo sosi wothung jiang thüngi wotacho. Saul na olani na OPVÜI nduko ji osi OPVÜI na ombo jamo ji ombona onte ezocho. Osi ombona Saul na kvütoli Damaskas lo Jisu myingo na lüm tssona püngnocho sana jiha ezocho. 28 Osi Saul na Jerusalem meta topvülo onte nzo vani OPVÜI myingona lüm tssona püngnoa wocho. 29 Ombona Greek yi nsanden Jihudi jiang thüngi ha ekhiranta thyutacho, tole ontena ombo chüthokvü yantacho. 30 Longtsüi jiangna hoji ntsiale ontena Saul ji Caesarea lo sosi oyi Tarsus lo yithuki sicho. 31 Tothakale Judea lo, Galilee lo osi Samaria lo to ekhümkho jina noying yuta hungcho, osi ontena OPVÜI yikrachia vamo jina Nthomon ji nzan yakchia ekhümkho ji etho jükacho osi owo rankata yicho.
Lydda Tona Joppa Tolo Peter
32 Peter na meta topvülo yentsacho osi ombona tsüngona lojo Potsow kyon Lydda lo longtsüi vamo jiang owo janthechicho. 33 Hojilo kyon tsüka Aeneas to tsa otsük chüi nzyu tiza belüngona nrakjov vancho tüv ombona ndukcho. 34 Peter na ombo ezocho, "Aeneas, Jisu Khrista na ni emiyiala. Phanthi ni belüng ji tsakata. Tole jitopvü Aeneas na phanthichecho. 35 Tole Lydda lo tona Sharon tolo evan topvüna ombo hungcho osi OPVÜI lo khophicho. 36 Joppa lo eloe sürüi tsüka Tabitha, Greek yina jo Dorkas, ji yichak jo 'Siano' to tsa vancho. Ompvü na yuta topvü lo elhi mmhom tssoa ezüp etsüi jiang nzanchia yithakcho. 37 Hoji yutalo ompvü ji rae chücho. Ompvü echümüng ji tsükayi si oki ekhaka omhawoe vae licho. 38 Joppa jo Lydda lona enhyano tsso jina Joppa lo longtsüi jiangna Peter ji Lydda lo vana to owon zoale, kyon otsük eni heto ezoa wothukcho, "Nzansi zakto e thüngi roa." 39 Jitsükona Peter na methaki onte nzo wocho. Ombona chiwo janale, oki ekhaka omhawoe ombo sosi chungocho, osi emiden topvü sanrhyui kyata, Dorkas na eküm vanathüng tssiyani vao phukthesü osi Eyuksü (Coat) to jiang ombo ejütacho. 40 Peter na onte topvü hapoe chiyithuksi nkhuk tseni randancho, tosi ompvü echümüng jiwoe zechiwo phyocho, "Tabitha, phanthia!" Ompvüna omhyik kükacho osi Peter hungale ompvü na phanthi khukthecho. 41 Tole Peter na yonchia ompvü sükacho, osi ombona longtsüi jiang tona emiden to jiang thüngi, ompvü ji eküm onte ejücho. 42 Shi yithen jina Joppa pyingcho osi kyon elümoto na OPVÜI lo longtsücho. 43 Peter na Joppa lo sofü nkii evüi tsüka Simon ji ki sunga vancho.
Peter Tona Kornelius to
1 Caesarea lo kyon tsüka Kornelius to tsa Rom rasantsü 'Italian rasantsü' to tsao jilo nzoaesopvüi vancho. 2 Ombo ekhümlano lüm ethei osi ombona ombo wopan nzo tssoe Potsow khümta vancho. Ombona Jihudi kyon yantsae jiang ha elümoto nzanchia osi n tümjakna randana vancho. 3 Mmyu motsüngalo ethüm ekho harümalo Potsow lanben tsü ka na oro heto ombo ezoa ntsüngrünga ombona hungcho. "Kornelius!" 4 Ombona kyua ngangi zesi lanben ji ezocho, "Ntio kvütola tsüphoe?" Tole lanben jina ombo ezocho, "Potsow na ni randan jiang osi ni nzan elhi jianglo emathatala osi ni janlamsala. 5 Joppa lo Simon Peter ji thüngi nina kyon ochoang sana wothuka. 6 Ombona sofü nki tsüka Simon to tsa jümang tssae vamo ji thüngi ncheni vana." 7 Lanben jina yithakale Kornelius na ombo phajae otsük eni tona rasan tsüka ekhümlano lüm ethei osi ombo kija nri ji to tsacho 8 Ntio tssothakcho sana ji ombona onte ezocho, osi Joppae onte wothukcho. 9 Ojyuato ontena yentsata owo Joppa jan etüngale, Peter na eng longjüngo randanwo mhonki chungocho. 10 Jithüng ombo wondona chiyi ntiona tsohungcho osi etsoyu methaka vanathüng ombona heto hungchicho: 11 Potsüo chonchi jilona dekho esüa tüv nken mezhü jilo na sheni likoe vachochia ombona hungcho. 12 Hojilo ekümrüm lantaro, epvüphio osi romhon woro to jüracho osi owon tssoa heto ombo ezocho, 13 "Peter, phanthia, tatsüngi tsoa!" 14 Peter na ezocho, "OPVÜI, to n tssoche! Ana kvüthüngha n tsüngrüngo osi mmenthakcho tsütsaelan ntsohan." 15 Owon enioto ombona zolancho, "Potsow na ntio nthochethakcho sana ji nina n thono ti tssothuka." 16 Hoji esüa yenjo ethüm tssosi potsüwoe tssüngkae sicho. 17 Hoji ntio etsso sana to Peter na emhuka vanle, Kornelius na rothuko kyon jiangna ombo nchenki ji ntsii oro kibüngo vanthakcho. 18 Ontena tsachuki engacho, "Shilo Simon Peter to tsa ncheni vancho alo?" 19 Peter na jithüng jana ombona hungwo ji yichak ji ntio sana to nchüma vanle omon jina ombo ezocho, "Enga!" kyon otsük ethüm na ni yantala. 20 Jitsükona methaka, osi jowoa, ana rothukchoka onte phana ewov ti-ryujaka." 21 Peter na jowo kyon jiang ezocho, "Ntena yanta vamo kyon ji a ka, ntio kvüto rotachola?" 22 Ontena janlancho, "Esopvüi Kornelius na e rothukcho. Ombo kyon mmhon osi Potsow ekhüm, Jihudi topvü na elümoto ombo yikrachia tüv. Nina ntio phyov sana ombo khi zothokvü tsükona ni tsale to Potsow lanben na ombo ezocho." 23 Peter na kyon jiang tsathei hojilo yipchotale to ezocho. Ojyuato jo ombona phanthi methaki onte phana wocho, osi Joppa lo longtsüi ejoma naha ombo phana wocho. 24 Ombona ojyuato Caesarea lo chiwole, Kornelius na ombo wopan tona oshomden to tsarhyui ombo nhyakta vancho. 25 Peter na rhowosa vanle Kornelius na chiro ombo nduki ombo mhadungo nkhümthecho. 26 Khatola Peter na phanthithuki ezocho, "Phanthia, anaha kyon ka." 27 Peter na Kornelius thüngi thyuta oki jilo rhowole khosha etssi vana hungcho. 28 Ombona onte ezocho, "Jihudi tsüka na pvüjipoe thüngi yenkita janthechiv shikhfü n li to ntena mmhona ntsia. Khatola Potsow na kyon ochia n thono ti tssothukle to a ejüthaka. 29 Jitsükona ntena a tsalo rothuko ji ntia ekhirana n vana rocho. Jitsükona ntena ntio ethev lia a tsacho sana to nte engala." 30 Kornelius na ezocho, "Nchuk ethüm yithaka, ana mmyui ethüm ekho harüma lo a kina randana vancho. tole esüngaro taena kyon tsüka na sühüm ekasi a mhadungo mangi a ezocho,3i 'Kornelius! Potsow na ni randan osi ni nzan elhi jiang chekathaka. 32 Ochona sana Joppa lo Simon Peter yana wothuka, ombona sofü nki Simon, jümang tssae vamo ji ki ncheni vanka.'33 Jitsükona ana ni tsalo rothukcho, osi nina rothako jina elüm mmhona. E hetopvü na Potsow mhadungo etssi OPVÜI na ntio ni phyothuka na engav tsükona vana."
Peter Püngno
34 Peter na heto onte ezocho, "Potsow na otsotso kyon topvü kheti zetala to ana ntsithaka. 35 Jipo topvü lona kyon ochoang na ombo khüma elamo tssoa sana ombona khichoala. 36 Hojijo ombona Jisu Khrista, topvü pono OPVÜI ji yakchia noying yithen mmhom Israel kyon jiang thüngi rothuko ji. 37 John na ombo bapti yithen ji püngnocho sülo Galilee lona benkae Israel meta topvü lo ntio chekav tssoa sana ntena ntsia. 38 Ntena Nazareth yamo Jisu ji ntsiwo osi Jisu Khrista jo ocho sana osi Potsow na kvüto Nthomon ji osi etho ombolo rothukcho sana ntena ntsia. Ombona meta topvü lo sanphia elhi mmhom tssoa osi tsüngrham ji etho lo evan jiang emiyia wocho to ntena ntsia, ntiotssole Potsow na ombolo vancho. 39 Eiyo, ombona Israel meta lo osi Jerusalem lo ntio tssocho sana jiang ehungpvüiden. Osi ontena donpheno eshenkae ombo chüthokcho. 40 Tokhatola Potsow na echü lona tsüngon ethüm sülo ombo kümlanthuki onte hungthukcho. 41 Kyon topvü thüngi mekana, Potsow na ovüngna ehungpvüi ethüngche evao, osi ombona echü lona kümlan sanati ombo nzo tsoyutao e shiang thüngi ehungthukcho. 42 Osi kyon jiang topvü thüngi Potsow na echüi osi eküm topvü pono yitssoe ethüngcheo ji to ehungpvüi pia püngnov ombona ezikacho. 43 Zenkhying topvü na ombo tsükona heto phyocho: "Ochona ombo longtsüa na ombo etho osi omying ji yakchia mmen topvü siyiv."
Pvüjipoe Jiangha Nthomon Ji Piala
44 Peter na nsana vanathüng kvüta na enga vancho sana topvü pono Nthomon ji jorocho. 45 Jihudi longtsüiden Joppa lona Peter phana ro jiangna Potsow na pvüjipoe jiangha Nthomon ji pio ji hungi emhuktacho. 46 Ntiotssole ontena yisanpo nsanta Potsow etho tsüpho ji thüngta zocho. 47 Peter na phyocho, "Kyon shiang naha ete esüa Nthomon ji khichothaka, 48 jitsükona ojüi na onte baptiyiv tsükona ochona sana khankhokcho alo?" Tosi ombona Jisu Khrista myingona onte baptiyile to ezocho. Tole ontena onte ndüngo yuta tara vanle to ezotacho.
Peter na Yivon Yenjanala Jerusalem Ekhümkho Jilo
1 Pvüjipoe jiangna ha Potsow yi ji khichothaka to Judea meta topvülo evamo wothung jiang osi longtsüi thanpoe jiangna zocho. 2 Peter na Jerusalemi wole kyon ochoangna pvüjipoe jianga tseniv etüma to nchümcho sana jiangna Peter ekhirana phyotacho, 3 "Ntena pvüjipoe n tsen jiang ki ncheni jiang nte nzo tsoyuta ocho!" 4 Jitsükona kvüto tssocho sana ji Peter na motsü ji benkadeni na rüa onte ezocho. 5 "Ana Joppa yantsüi randana vanathüng heto hungcho. Dekho esüa ntiosana epyakvü ji sheni potsüwoe na vachochia hungcho, osi jina a ndüngo esancho. 6 Ana hojilo zethechile oki ekümrümo osi ora ekümrümo, epvüphio osi romhon woro topvü jüa hungcho. 7 Osi heto a ezoa zocho, "Peter, phanthia, tatsüngi tsoa!" 8 Tole ana ezocho, "OPVÜI, kvüthüngha hojito n tssoche! N thono etsoyu jo ana kvüthüngha a emeno hansi n wohan." 9 Tole elani potsüwoe na phyocho, "Potsow na ntio ntho kümthukcho sana n tho to ti nchüma." 10 Hojito yenjo ethüm tssosi sülo elani potsüwoe hansi chüngilani sicho. 11 Hoji yuta tsük jilo Caesarea na ayana rothuko otsük ethüm jiangna a nchenki jilo chirocho. 12 Osi onte phana ewov ti-kyimsümle to omon jina a ezocho. Joppa lona longtsüi otsük tiruk shiangna a nzo tssoe Kornelius ki wotacho. 13 Tole ombona lanben tsüka na müngdüngi na heto ombo ezoa zocho to phyocho; "Joppa lo kyon tsüka Simon Peter to tsao ji tsalo ocho sana wothuka. 14 Ombona ntio yi ni ezov sana jina ni tona ni wopan to shanchovka." 15 Osi ana onte thüngi püngnole Nthomon jina ovüngthüng etelo roa esüa ontelo ha rocho. 16 Jithüng OPVÜI na phyoji ana nchümchecho, "John na ojüna baptiyicho, khatola Nthomon ji khi nte baptiyivka." 17 Jitsükona etena OPVÜI Jisu Khrista longtsüo jithüng yantso e pio ji esüa onte ha picho to ntssünga hungala. Tona aiyo ochola, ana Potsow khalanchivla?" 18 Ontena shi zoale n khirantav sicho osi Potsow thünga phyotacho, "Tona Potsow na pvüjipoe jiangha khophi ekümi rheyiv tssocho mmhon pithaka."
Antiokh lo Ekhümkho Ji
19 Stephen chüthoko jithüng tsanrorao longtsüi ejoma jiangna Phoenesia, Cyprus, osi Antiokh to jana Jihudi jiang tae yithen ji ezoa yitacho. 20 Khatola longtsüi thanpoe Cyprus tona Cyrene tolo evan jiangna OPVÜI Jisu yithen mmhom ji pvüjipoe jiang thüngiha püngnoa Antiokh lo wotacho. 21 OPVÜI etho ji ontelo licho osi kyon elümoto na longtsüi OPVÜI thüngi yicho. 22 Jerusalem lo ekhümkho jina yivon shi zoe Barnabas ji Antiokh lo wothukcho. 23 Ombona owo jani Potsow na kvüta kyon jiang mmha yithakcho sana ji hungi ombo longshyucho, osi onte lümbüm toto na longtsükata OPVÜI lo ntsa vantale to ntssungcho. 24 Barnabas jo Nthomon na epying osi longtsü eli kyon osi ombona kyon elümoto OPVÜI thüngi sosi yicho. 25 Barnabas na Paul yana Tarsus lo wocho. 26 Ombona Paul yanche sosi Antiokh lo oyi nzyu toto na oni tssoe ekhümkho kyon jiang nduka kyon khosha püngnotacho. Longtsüi jiang Khristian to tsademo ji Antiokh lona. 27 Yuta jianglo Jerusalem lona zenkhying ejoma na Antiokh lo wocho. 28 Onte yolo tsüka Agabus to tsao jina omon na pyingi phanthi limha topvülo otssi vara rov to methecho, (Hoji Gladius na mesao tssoa thüng bencho.) 29 Sürüi jiangna onte otsük akvüna ombombo eto khyae Judea lo longtsüi jiang hantokvü methakcho. 30 Ontena khyatae orang ji Barnabas ha Saul oni yakchia ekhümkho eramoe thüngi hantokcho.
Ezüp Kyungkatala
1 Yuta shiang harümo Herod mesao na ekhümkho lo khanhyae ejoma khangshiv benkacho. 2 Ombona John. ojenio James ji yonri na lüngthacho. 3 Kvüthüng hojina Jihudi jiang emathata to ombona ntsicho sana, Peter ha rhümacho. (Hoji jo ebung mozhü n theo tokhu yutalo tssocho) 4 Peter ji rhümathakale, enhyang okho mezhü, okho motsüngalo enhyang otsük mezhü ren jiang khelo theyicho. Herod na jo yakchi tokhu ji süloti kyontsü mhadungona oyi tssoyiv to nchüma vancho. 5 Hoji tsükona Peter ji evüngki thechi vanthukcho, khatola ekhümkho jina jüngra lia Potsow thüngi ombo randania vancho.
Vüngpheni na Peter Vachiala
6 Herod na Peter ji kyon mhadungo ojyua süchokvü to zümothüng Peter na enhyang otsük eni yutalo yipa vancho. Yonjakzhü eni na ombo sheni evüngki kibüng jilo enhyang vanthukcho. 7 Esüngaro taena OPVÜI lanben tsüka jilo mangkachi vüngphen ji wondang na razhücho. Lanben jina Peter epvü lona enhyokphia nthechia ezocho, "Zakto phanthia!" Jitopvü Peter khelo yonjakzhü jiang pyonjoracho. 8 Lanben jina phyocho, "Eryu khünga osi jokhüp jiang hana." Peter na hoto benrithakale lanben jina ezocho, "Nisü ji khi mpensi a phana roa." 9 Peter na, otsoe alo omüngi sana n chethev evüng kina ombo phana chiyicho; ombona jo müngtünga tsayicho. 10 Ontena enhyang ovüngo jiha enioto jiha yakchicho, osi taeto yantsüi chiphen kibüng yonjak khanphen jilo chiyicho. Khanphen jina ombobo onte chonchicho osi ontena yantsüi chiyicho. Ontena lantsü dunga joyita vanathüng lanben jina Peter sisi yicho. 11 Tole Peter na kvüto tssocho sana ji nchümchei phyocho, "Shijo otsoe to ana ntsithaka!" OPVÜI na Herod etho jilo osi Jihudi jiangna a nchümita vamo jilona a shanchov tsükona ombona lanben rothukcho. 12 Ombo sükhying ji ntsi ombona John Mark oyo Mary ki rheyile, kyon khosha etssi randanta vancho. 13 Peter na kibüng ji ekhophile elororo phajae tsüka Rhoda to tsa jina chonchilo chiwocho. 14 Ompvüna Peter won ji chethei n chonchi sana emathata yunga rheyi Peter na kibüngi manga vana to ezocho. 15 Tole ontena, "Ni zhüa tssovka!" to ezocho. Toaha ompvüna otsotsoka to phyoa mongale ontena 'Ombo lanben ka,' to ezocho. 16 Peter na ekhophia vancho, tosi ontena sülani ti chonchile Peter hungi ngangtsüngracho. 17 Ombona yingto vantale to onte hataksi OPVÜI lanben na kvütoli evüngki na ombo sochukcho sana ji onte ezocho. Tosi 'James tona longtsüi thanpoe jiang to thüngiha shi ezotakhe' to onte ezosi kvüi sana yi sicho. 18 Wonchiale enhyang jiang hamatsüi 'Peter jo kvüto lyuchola?' to phyotacho. Herod na ombo eyam yizüng picho, khatola n yanchecho. Jitsükona ombona enhyang ji tükoshüksi onte chüthokvü yizüng picho. 19 Hoji sülo jo Herod na Judea lona owo Caesarea lo yuta tara vancho.
Herod Chüo ji
20 Herod na Tyre to na Sidon to kyon jiang thüngi. elümoto lüm tsukcho, jitsükona kyon jiang na mmyantae ombo nduko rotacho. Ontena ovüng tssoa mesaki OPVÜI Blastus ji enayae onte kyochile to ezotacho. Osi ontena Herod thüngi owo mmhontav ezocho, ntiotssole onte meta jilo etsoyu jiang mesao ji meta lona hunga vancho. 21 Herod na tsüngon kokae vasi ji tsüngono ombo mesa bipo ji hansi vantsü lo khukthei kyon jiang thüngi oyi nsancho. 22 Tole ontena tünga phyotacho, "Shijo kyon na nsana mek, tolea Potsow!" 23 Jitopvü OPVÜI lanben tsüka na Herod ji vümchü-chü-cho; ntiotssole ombona Potsow n pvütssonthukcho. Osi ora na tsoroe ombo chücho. 24 Osi Potsow yi ji ntümjaka na nzüa yicho. 25 Barnabas ha Saul onina elhi thaksi John Mark sonhya tasi Jerusalemi elani yitacho.
Barnabas ha Saul Oni Ethüngchei Wothukala
1 Antiokh lo ekhümkho jilo zenkhying tona püngnoe to ejoma vancho: Barnabas, Simon enyiko to tsao ji, Cyrene yamo Lucius, esapvüi Herod shom Manaen (esapvüi Herod kina khyocherankümo ji) tona Saul to. 2 Ontena OPVÜI benkata khangta vanathüng Nthomon jina onte ezocho, "Barnabas ha Saul oni ji ana nte zikao elhi ji tssothokvü tsükona khochaki vantoka." 3 Ontena khanga randantasi onte khe jiang nyimkae oni randankata khochukthukcho.
Cyprus lo
4 Nthomon jina wothuko ji esüa Barnabas ha Saul onina Selucia lo woe jilona Cyprus jüyi jilo wotacho. 5 Ontena Salamis lo chiwo Potsow yi ji synagogue ki püngnotacho. Oni nzanchi jo John Mark sonhyatacho. 6 Ontena jüyi ji topvü yakchia Paphos lo wotale Jihudi tsüka Bar-Jesus to tsa ozen nsüngrüthia, ombobo zenkhying to ejana vancho. 7 Ombo jüyi jilo esapvüi Serguis Paulus nchümri eli-i ji shom. Meta jilo esapvüi jina Potsow yi engahunga Paul ha Barnabas oni tsacho. 8 Tole ozen ntsiwo Elymas (Greek mying) jina esapvüi ji longtsü yesoyihunga oni tangcho. 9 Tole Saul, Paul toha tsao jina Nthomon na pyingi ozen ntsiwo ji rüki zeta ezocho, 10 "O tsüngrham tsoe! Nino mmhom topvü thüngi ori, Okyak n mhom tüv na ni pyingcho; osi nina yuta topvü lo OPVÜI ntsa ji ejüng kümthokvü yanala! 11 Enhünga OPVÜI khe jina nilo yonchochivka, osi ni mhyik ji juki esüngaro tsükona wondang hungu meka." Jitopvü Elymas ji ombo mhyiko enyikvü rümkata to tssocho, osi ocho sana khi ombo erüthokvü yancho. 12 Esapvüi jina hoji hungale longtsücho; ntiotssole OPVÜI tsükona püngno ji zesi ombo ngangtsüngcho.
Pisidia Meta Antiokh lo
13 Paul tona ombo nzo etssoe jiang to na Paphos lona ehakae Pamphylia lo yantsü motsünga Perga to tsao John Mark na oni sisi Jerusaelmi yio jilo chiwocho. 14 Ontena perga lona khochi Pisidea metae Antiokh synagogue ki owo khukthecho; 15 osi hojilo OPVÜI jina Moses shikhfü kako tona zenkhying kako to lona khasi "Oshomden, ntena kyon jiang tsükona ntssungyi hansi rocho tssona yuta nte piala" to ezocho. 16 Tole Paul na phanthi hatsi hakona püngnov benkacho, "Israel kyonden osi pvüjipoe Potsow ekyuiden, engatava! 17 Ete pyimtsümotsüi jiangna Ejip metae yentsae esüa vanathüng Israel kyon jiang Potsow jina onte ethüngchei jipo tsüphov kümthukcho. Potsow na ombo etho tsüphov jina Ejip lona onte sochukcho, 18 osi nzyu zhüro romhoni na ombona onte rhükümcho. 19 Omr bona Kanaan meta jilo jipo tiying monthuki sisi ombo kyon jiang ji metapvü kümthukcho. 20 Shiang hetopvü nzyu nzo mezhüsi tinyan harüam khia tssocho. Hoji lona benkae zenkhying Samuel nandang ji Ekhüngden ethüngchei sathukcho osi 21ontena mesao chontale Potsow na Benjamin pvüji lo Kish tsoe Saul ji ethüngchei nzyu zhüro sathukcho. 22 Osi ombo ji khi sithakale Potsow na David ji onte mesao tssothukcho. Ombo tsükona Potsow na heto phyocho: 'Jesse tsoe David jo ana achokao kyon, osi ana ntio ombo a tssothuk-hunga na etssovo kyon to ana ntsithaka.' 23 Osi David tsochen yolo tsüka Jisu ji Potsow na phyochako ji esüa Israel kyon jiang shanchopvüi kümthukcho. 24 Jisu na ombo elhi n benkathüng John na kyon jiang ji onte mmen lona khophi baptitale to püngnocho. 25 Osi John na ombo ejan ji thak etünga thüng phyocho; 'Aiyo ocho to ntena a nchümitala? Aiyo ntena nhyakta vamo ji mek. Tolea engatava! Ombo a sülami tsata osi ana jo ombo jokhüpzhü ti lanphev a n tüm.' 26 Abraham tsochen Israel kyoden, osi Potsow ekyui pvüjipoeden, shanchov yithen shi ete thüngi rothukcho! 27 Ntiotssole, Jerusalem kyon osi onte esopvüi jiangna shanchopvüi ji ombo to n tsicho; osi emung akvü zenkhing yi jiang khatao jiha n tsicho. Toaha ontena Jisu khoe siwo jilona zenkhying yi jiang bencho. 28 Osi ontena ombo chütokvü ntia n yancheta ha ombo chütokle to Pilate ezotacho. 29 Osi Nthomotsü lona phyoe elio jiang topvü ontena tssothakale, ontena donphen lona ombo khichoe olüpi thechicho. 30 Khatola Potsow na echü jilona ombo kümlanthukcho, 31 osi ombo nzo Galilee lona Jerusalemi yentsatao kyon jiang thüngi tsüngon sunga ombo hungthuka vancho. Onteno enhungo Israel kyon jiang thüngi ehungpvüiden. 32 Osi nte thüngi yithenmhom ji püngnov tsükona shilo evana. Potsow na ete motsüi jiang thüngi ntio tssov phyochak cho sana ji Jisu echü lona kümlanthoko ji yakchia onte tsocheden ete thüngi benthukthaka. 33 Hoji Ethüngkhen yilan eni jilo heto erani lia: 'Nino a tsokhying; ana nchüng nipo kümthaka.' 34 Osi Potsow na olüpi na kyoni ombo n sithukna ombo kümlanthokvü to heto phyoe lia: 'Ana David thüngi phyochako ntho mmha tsotso ji ni pivka.' 35 Elani ombona Ethüngkhen thanpoe na heto phyoe lio ji esüa: 'Nina ni ntho phajae ji olüpi na n kyonthuk.' 36 Ntiotssole David naha ombo yutalo Potsow etüm ji benthuka elhi tssocho, osi chüale ombo motsüi jiang nzo juthecho osi olüpi na kyoni ombo sicho. 37 Tokhatola Potsow na echü lona kümlanthoko jijo hoto n tssocho. 38 Jitsükona oshomden, ombo yakchia mmen siyio ji nte thüngi püngnoala to ntena engathei khitava. 39 Osi om bolo longtsüi topvü Moses shikhfü jina khi nte n siyicheo mmen jiang khi siyicheta. 40 Jitsükona zenkhying jiangna heto phyo ji nte n benthokvü ntaknshontava. 41 'Zetava, nte Potsow phyocho yikvüiden! Emhuktasi chüi sitava! Ntiotssole ana nchüng elhia vamo shiango, ntena n longtsüo tüv, ochona sana mpato eroroe nte ezolea!' " 42 Paul ha Barnabas onina Synagogue kina chiyita vanle, kyon jiangna emung etsao jiloha yitsük ji oro onte püngnotale to chontacho. 43 Kyon jiangna sanrhyu ji pyoni yithakale Jihudiden tona pvüjipoeden to khosha Jihudi ekhümlano rheyi vamo jiangna Paul ha Barnabas oni phana wocho. Wothung jiangna onte püngno Potsow kianzan jilo vantale to onte ezocho. 44 Emung janlanale yantsü jilo kyon topvü na OPVÜI yi engalo rocho. 45 Kyon kholuk tsüphov ji hungi Jihudi jiangna omhyik rakita Paul na nsamo yi jiang phyochophyorita ombo yikvütacho. 46 Khatola Paul ha Barnabas onina kyungkata lüm tssona phyotacho, "Potsow yi ji nte ezodem ethev licho. Khatola ntena hoji n khichov kümali eküm ji nte echi tssov etüm nli to nchümtao ji tsükona, ena nte sisi pvüjipoe jiang thüngi wovka. 47 Ntiotssole OPVÜI na epio yizüng ji shi: 'Limhatsü shanchotokvü tsükona ana pvüjipoe jiang tsükona wondang nte kümthukthaka.'" 48 Kvüthüng pvüjipoe jiangna shi zocho sana, onte longshita OPVÜI yithen ji omying thüngitacho; osi kümali eküm tsükona ochoang ethüngchecho sana jiangna longtsüi kümracho. 49 OPVÜI yi ji meta jiang nkonjan topvülo nzüa yicho. 50 Khatola Jihudi jiangna yantsü jilo opvü etsso kyon jiang tona pvüjipoe eloeden ntssoni evan osi Potsow ekhüm jiang to ethenchotacho. Ontena Paul ha Barnabas won khangshitav benpvütae meta jilona phanchukchi onte sicho. 51 Tole wothung jiangna onte ntankaphen ji onte jolo live jiang ekhochoe sita Ikonium lo yitacho. 52 Osi Antiokh lo longtsüi jiang topvü longshi tona Nthomon to na pyingcho.
Ikonium lo
1 Paul tona Barnabas to onina Ikonium loha synagogue ki owo etho lia püngnocho, tole Jihudi osi Greek okho tsüphov na longtsüi kümcho. 2 Khatola n longtsüi Jihudi jiangna pvüjipoe jiang meryua ekyanchoe khi longtsüi jiang khetsüthukcho. 3 Ontena hojilo yuta sunga vani OPVÜI na ombo kianzan yithen ji chüngchüngthokvü tsükona, chethev osi emhukthav elhi etssov etho onte picho. 4 Yantsü jilo kyon jiang ji ejoma jo wothung jiang thüngoe, ejoma jo Jihudi jiang thüngoe to chirotae sicho. 5 Osi Jihudi jiang tona pvüjipoe jiang to na onte esopvüi nzo tssoe hatae onte ephyatsüngu pyimta vamo ji ntsi, 6 Ontena Lykonia lo oyan Lystra tona Derbe to jianglo osi hojiang nkonjano to tsani yitacho. 7 Meta jiang loha ontena yithenmmhom ji püngnotacho.
Lystra Tona Derbe To lo
8 Lystra lo kyon tsüka büklen na ojo jaka tüv n sanphichev vancho. 9 Ombona khukthei Paul püngno ji enga vancho, osi Paul na rüki ombo zesi ombo lo emiyiwo longtsü lia to zechei owon tssoa ezocho, 10 "Nijo jiangna phanthi manga." Tole kyon jina tsükae sanphicho. 11 Paul na elhi tsso ji kholuk jina hungi, onte Lykonia yina nshanlungta tüngtacho, "Potsow jiangna kyon pyon khi ete thüngi jorothaka." 12 Ontena Barnabas jo Zeus tssothuk, Paul jo Hermes tssothuk tacho, ntiotssole ombona OPVÜI tssoa nsamo jina. 13 Oyan ji rhowopheni Zeus khümphen lio jilo OPVÜI jina mangsübung tona therapha to hansi kibüngi oro kyon jiang nzo tssoe onte khümtav tssocho. 14 Wothung Paul ha Barnabas onina shi zoale, nungra lona onte mpensü jiang reroe sia heto tüngkachia kyon kholuk jilo tssua rheyitacho, 15 "Kyonden, nteno ntiolui heto elhitala? Enaha nte esüa kyondenla, osi ntena tajo sangta vamo shiang lona khophi eküm evamo Potsow ochona oyak osi liko, jümang tona jiang lo ntio licho sana jiang topvü liyingcho sana hoji thüngi nte yithokvü yithenmmhom shi nte püngnoala." 16 Echungren yakthako jianglo jo ombona kyon topvü onte etancho vanthukcho. Khatola kyon jiang khi ombo n chekathokvü jo n vanhan. 17 Ombona nte thüngi ombo nzan nte ejüa oyaki na eryu jothuki yuta ebenlo bentsoniro kümnzyu lithukala; osi ombona etsoyu na lüm nte bükia, ematha na lüm nte bükio jijo ombo vana to nte chekathukphen ji." 18 Hoto ezoaha ontena kyon jiang n tanglanchi-khokvü onte khümtav tssocho. 19 Khatola Ikonium tona Pesedia meta Antiokh to lona Jihudiden rocho osi ontena oyan jilo kyon jiang meryui Paul ji olongna ephyatacho osi chüthakcho tsayia yantssae süchukchi ombo sicho. 20 Khatola sürüi jiangna ombo hazhüale, ombona phanthi oyan jilo rheyicho. Osi ojyuato jo Barnabas oni Derbe lo yitacho.
Syria Meta Antiokh lo Elani Yitacho
21 Paul ha Barnabas onina yithenmmhom ji Derbe lo püngnoe khosha longtsüi kümthukcho. Jisülojo ontena Lystra, Ikonium, tona Pesedia meta Antiokh tolo yicho. 22 Ontena sürüi jiang thüngi mmhanka ethan pitasi longtsü jilo chüngchünga vantale to heto ezocho, "Ete na khangshi ezüp elüm khia Potsow ekhüngyan jilo rheyivka." 23 Onte na ekhümkho akvülo eramoe ethüngche vayicho, osi khanga randantasi ontena longtsüthako OPVÜI ji khelo khochaki vayitacho. 24 Ontena Pisdia yakchia oyi Phamplia lo chiyicho, 25 Osi ontena yithenmhom ji Perga lo püngnotasi Attalia lo yitacho. 26 Hoji lona ontena kholani Antiokh kvülo elhi tssoa yithakcho sana jiang tsükona Potsow kianzan jilo khochaki theta onte randankacho sana jilo yitacho. 27 Ontena chiyi janale ekhümkho ji tsarhyui kvüta Potsow na onte tsütsata elhi tssoa wothukcho sana osi ombona kvütoli pvüjipoe jiangna longtsüv chonchicho sana ji rüa ezotacho. 28 Osi ontena sürüi jiang nzo sunga jilo vantacho.
Jerusalemi Sanrhyu ji
1 Judea lo kyon ejoma na Antiokh lo owo longtsüi jiang ji Moses shikhfü ephanina tseni n sina n shancho to püngnocho. 2 Paul ha Barnabas oni na onte thüngi elümoto junga ekhirantacho, jitsükona ontena yilan tiük ji tsükona Jerusalami wothung jiang tona sürüi jiang to thüngi Paul ha Barnabas oni chungothukcho. 3 Ekhümkho jina olani oni sochicho osi onina olani na Phoenicia tona Samaria to yakchia yiathüng jianglo longtsüi jiang thüngi pvüjipoe jiangna Potsow lo khophio jiang motsü rüi ezota elümoto longshyuthukcho. 4 Onina Jerusalem janale ekhümkho jilo wothung jiang, eramoden to jiangna oni khichocho, onina Potsow na kvüta oni tsütsathakcho sana ji rüa onte ezocho. 5 Tole Pharasee razhülo longtsüi ejomna phanthi pvüjipoe jiangha tsenia Moses shikhfü ji benphithokvü lia to phyotacho. 6 Jitsükona wothung jiang tona eramoeden to jaingna nduktae yilan shi jantacho. 7 Sunga ekhirantasi sülo Peter na phanthi ezocho, "Oshomden, ovüngthüngna Potsow na nte yolo na a ethüngche, pvüjipoe jiang a yakchia yithenmmhom ji zothoki longtsüthokvü methakcho to ntena ntsia. 8 Osi kyon lümbüm nchümri ntsiwo Potsow jina onte khicho ji chekav esüa Nthomon ji epio ji esüa onteha picho. 9 Ombona ete tona onte to ntia n chümpotathuk, ntiotssole longtsü yakchia onte lümbüm ntssüngcheyia nlan siyicho. 10 Tona nteno ntiolui Potsow chyui zeta oha kvümoe ete naha ete motsüi jiang naha n hankhokcho sana ji longtsüi jiang evüngo khatheyitala? 11 Jito mek, OPVÜI Jisu kianzan jina ete ha onte ha kheti e shanchoala to etena longtsüala." 12 Tole kholuk totona jükrüpi Paul ha Barnabas onina pvüjipoe jiang yolo Potsow na oni yakchia chethev osi emhukthav elhi tsso jiang rütao ji engatacho. 13 Onina nsanrothakale James na phyocho, "O shomden engatava, 14 Potsow na kvüto pvüjipoe jiang yolona ombo kyon chiyithokvü benkadeni na tümka licho sana ji Simon na rüthaka. 15 Zenkhying jiangna phyoji benala. Nthomotsü lona heto phyoala: 16 'Hoji sülo ana elani rov, osi ana David ekhüngyan ji phanthilantokvü. Hoji roe elio ji ana tssocholani chüngchünga phanthilantokvü. 17 Hojitolui pvüjipoe jiang naha OPVÜI yanthokvü osi pvüjipoe kvütata a echi to tsathakcho sana jiangna a yana yiv. 18 Nkolona shi heto ji ntsithokpvüi OPVÜI jina phyoala.' 19 Jitsükona "A zeche jo," "Pvüjipoe Potsow thüngi yia vamo jiang etena olan khaniv n li, 20 tolea kisükhüm elhilo thecho etsoyu, lonsülonphyo elhi, khyaktsüngcho so etsov, ejen tsov to shiang tsükona kako onte erantava. 21 Ntiotssole nkolo na Moses shikhfü ji emung akvü synagogue ki na khatapvü, osi ombo yi jiang oyan akvülo püngnothaka."
Pvüjipoe Longtsüi Jiang Thüngi Erancho
22 Jisüi jo Wothung jiang tona eramoeden to jiangna ekhümkho topvü to nzo tssoe kyon ejoma ethüngchei Paul ha Barnabas oni nzo Antiokh lo wothokvü methakcho. Ontena Barsabas to tsao Judas tona Silas to longtsüi topvü na yikrachio oni ji ethüngchecho. 23 Osi kako heto erani oni hanthukcho, "Nte shomden, wothung e tona eramoeden to thüngi na Antiokh, Syria tona Cilicia tolo nte pvüjipoe longtsüi jiang thüngi monkhüm yikrachi nte piala. 24 E yolo ejoma na oro onte won oyi na nte lümbüm tssatssoyia nte khetsücho owon zothaka, tolea ena ntia etho onte picho n li. 25 Jitsükona ena sanrhyui thyutasi e topvüna lüm na rünga kyon ethüngchei yithenpvüi rotokvü to methakthaka. Ontena Paul ha Barnabas oni, 26 ochoang na OPVÜI Jisu Khrista elhi jilo oni eküm khochaki pia tssoa vancho sana jiang nzo nte thüngi rothukala. 27 Jitsükona ena Judas ha Silas oni rotokla, küma ontena obüngna yitsük jiang nte ezovka. 28 Ena osi Nthomon ji lüm erungo na ethelan eli shiang lo rankae oha thanpo nte n hanthuk to methakatacho: 29 jiango, Kisükhüm lo etsoyu theo jiang titsotale, ejen ti tsotava, khyaktsüngcho so titsotale, osi lonsülonphyo ti lithuktava. Ntena shiang lona tsanchoa vanta tssona mmhona vanchevka. Enaha nte randania vamka." 30 Hojito onte wothuka Antiokh lo chiwocho. Osi ontena longtsüi jiang topvü tsarhyui khi chuti ji picho. 31 Tole onte na hoji khae lüm etsson yi ji engatsi onte longshyu-tsüngracho. 32 Judas ha Silas oniha püngnoe mmhonden tsso jina sunga longtsüi jiang püngnota etho jükayia jilo vantacho. 33 Hojilo yuta tara vantasi sülojo, longtsüi jiangna yithen rothukpvüi jiang thüngi elani oyi monkhüm pitale to ezoa onte yilanthukcho. 34 Khatola Silas jo jilo tara vanlancho. (Kvülonao shijo n jüala.) 35 Paul ha Barnabas onio Antiokh lo vani thanpoe ejoma nzo tssoe OPVÜI yi ji püngnotacho.
Paul ha Barnabas Oni Pyonta
36 Tsüngon tara sülo Paul na Barnabas ezocho, "Etena OPVÜI yi püngnothako yan jianglo longtsüi jiang kvüto vanta sana zethechia elani yitavkalo." 37 Barnabas na Mark to tsao John ji sonhyatavka to phyocho, 38 Tole Paul najo kyon ochona Pamphaylia lona onte sisi elhilo n rov sicho sana ji sonhyav jo elana n zechecho. 39 Hoji lona oni elümoto pangtae pyontae sicho, osi Barnabas na Mark sosi Cyprus lo eha yitacho. 40 Paul na Silas socho osi longtsüi jiangna OPVÜI kianzan jilo oni randankacho. 41 Ombona Syria tona Cilicia to yakchia owo ekhümkho jiang etho jükayicho.
Timothy na Paul ha Silas oni Nzo Yiala
1 Paul na Derbe yakchia Lystra lo chiyile jilo sürüi tsüka Timothy to tsa vancho, ombo Jihudi eloe longtsüi tsüka tsoe, osi opo jo Greek kyon. 2 Lystra tona Ikonium tolo longtsüi jiang na ombo chokae kyon tssocho. 3 Paul na Timothy sonhyahungcho, jitsükona ombo sosi oyi tsenicho; ntiotssole hojilo jihudi jiangna ombo opo jo Greek to ntsiwo ji tsükona. 4 Ontena yakchia wo yan jiang topvülo Jerusalem lo wothung jiang tona eramoden to na methako yi jiang ezoa wotacho osi topvü na benphitale to ezoracho. 5 Osi ekhümkho jiang na longtsü lo etho jükata engakvü longtsüi kyungkata yicho.
Troas lo Paul Müngdüng
6 Ontena Phrygia tona Galatia to nkonjan jiang yakchia wotacho. Asia lo oyi nsam tsükona Nthomon jina onte tangcho. 7 Ontena Mysia erü janale Bithynia lo rhowo hungcho, khatola Jisu mon jina onte tangcho. 8 Jitsükona Mysia yakchia Troas lo joyicho. 9 Hoji zümo Paul na müngdüngi na Macedonia lo kyon tsüka na phanthi heto ombo ezoa hungcho: "Macedonia metae oro e nzanchia!" 10 Ombona hoji müngdüng-thakale, ena Macedonia lo owo yithenmmhom ji püngnotav Potsow na etsala to zechei wotav methaktacho.
Philipi lo Lydia Khophio ji
11 Ena Troas lona orhungi na saksak ehata owo Samothrace jancho, osi ojyuato jo Neapolis lo wotacho. 12 Hoji lona ena Macedonia lo kyingro (District) ovüngtso Philipi, Homan vanphen jilo wotacho. Ena yantsü shilo sunga vantacho. 13 Emung tsüngono. jo ena pikhfü pomoe zhükhfü tsa jilo Jihudi jiang randanphen licho tsayia chiwotacho, osi eloe etssirhyui vamo jiang lo ena khukthei püngnotacho. 14 Jilo eloe tsüka Potsow ekhüm Lydia to tsa Thyatira lo ejümsü shishoe tüv jücho. OPVÜI na ompvü lümbüm chonchiyia Paul püngno ji engathukcho. 15 Ompvü tona ompvü wopan jiang tona baptithakale ompvü na ezocho, "Ana ha OPVÜI phanphi tsotso to ntena nchüma tssona, aki oro nchentava." Jitopvü ompvü ki esosi yicho.
Philipi lo Vüngpheni
16 Tsüngona lo ena randanpheni yita vanle eloeroro phajae tsüka omon n mhom ompvülo vani jina mhadung ompvü methethuka vancho tüv ndukcho. Ompvüna metheo jilona ompvü pvüi ji orang elümoto hungthukcho. 17 Ompvüna Paul tona e to ji heto tüngkachia e phancho, "Shiango Ntssontso Potsow nriden! Kvütoli nte shanchov sana ji ontena nte ezoala!" 18 Ompvüna tsüngon sunga hojito tssocho. Hojina Paul khetsüi ombona engolani omon ji ezocho, "Ana Jisu Khrista myingona ompvü lona chiyile to ni ezoala." Tole jitopvü omon jina chiyi sicho. 19 Onte shisholan yesoyio jina ompvü pvüi jiangna Paul ha Silas oni rhümae shishopheni esopvüi den jiang thüngi sosi wotacho. 20 Ontena Roman yitssopvüi jiang mhadungo onte sosi owo phyotacho, "Kyon shiango Jihudi den, osi ontena ete yantsü shilo ninyang esothechiyiala. 21 Eteno Rome kyonden osi ontena ete shikhfülo nlio tüv püngnotala, osi etena onte shikhfü jüli jiang khichoe n benphiche." 22 Tole kholuk jina ha onte yilo thei Paul ha Silas oni nlan pitacho. Hoji sülo jo tsüphoe jiangna lüm etsuko na Paul ha Silas oni sü jiang reroe siyisi erhüple to yizüng picho. 23 Jisüi jo elümto onte tasi sülo vüngpheni thechi sicho, osi tüngochüa zele to evüngpvüo ji ezotacho. 24 Jitsükona ombona vüngphen ochungo ji onte thechi ojolo nankvü theyicho. 25 Zümolong harümo Paul ha Silas onina randanta okhen denta Potsow thüngta vancho osi evüngki evan jiangna engata vancho. 26 Tole esüngaro taena nri enhyuki evüngki kimüng ji enhyukphicho, osi zaktole kibüng jiang chonchiracho, osi vüngi vamo jiang topvü yonjakzhü jiang pyonchiracho. 27 Evüngpvüi jina yipjüngchile kibüng jiang chonchitsüi lia hungi evüng jiang tsanrathakcho tsayia ombobo lüngthae siv tsükona yonri ji süngkacho. 28 Khatola Paul na tüngkachia ombo ezocho, "Nibobo ti jaktona! E topvüto shilo vanraka!" 29 Tole evüngpvüi jina milon yani bensi enetsünga tssüa rheyi Paul ha Silas oni jolo epyakthecho. 30 Jisüi jo ombona hapoe oni sosi chiyi ezocho, "Tsüphoeden, a shanchotokvü tsükona ana ntio tssov lia?" 31 Ontena ombo ezocho, "OPVÜI, Jisu lo longtsüa, tona ni osi wopan topvü shanchovka." 32 Jisülo jo onina ombo tona ombo wopan topvü to thüngi OPVÜI yithen ji ezotacho. 33 Hoji zümo na ombona onte sosi oyi okhfü jiang epyoyicho, osi jitopvü ombo tona ombo opan tona baptiyicho. 34 Ombona Paul ha Silas oni ji ombo ki sosi oyi etsoyu methaki picho; osi wopan totona Potsow longtsüi kümthako jina elümoto onte longshyucho. 35 Ojyuato jo yitssopvüi jiangna onte rasan tsühpoe jiang wothuka ezocho, "Kyon jiang vachia." 36 Evüngpvüi jina Paul ezocho, "Yitssoe jiangna Silas nini nte vachile to yithen yithukthaka. Jitsükona noyinga yitava." 37 Tole Paul na tsüphoe jiang ezocho, "E nlan ntia n liaha ontena nzontsü mhadungona e rhüpcho, osi eiyo Rom metapvüiden! Ontena evüngki ethechisi enhungo mphoa evachivke? To n tssoche, onte khi oro e vachithuka." 38 Rasan tsüphoe jiangna hoji yitssoe jiang ezocho, tole onteno Rom metapvüi to zoale onte kyucho. 39 Ontena onte thüngi oro nlan chontacho, osi onte sosi chiyi yantsü jilona yitae sile to jonjia chontacho. 40 Jitsükona ontena vüngpheni na chiyi Lydia ki yitacho; osi hoji lona longtsüi jiang ndungntssunga püngnotasi yitacho.
Thessalonika lo
1 Paul ha Silas onina Amphipolis tona Apollonia to yakchia Thessalonika lo wocho, osi jilo jihudi synagogue licho. 2 Paul na thanpothüng woato hojilo ha wocho. 3 Ombona emung ethüm owo motsü lona onte thüngi ekhiranta, shanchopvüi jina ezüp khiv osi echü lona kümchelam lia to eroroe onte ejücho. Ombona phyocho, "Jisu ocho tsükona ana nte ezoa sana jijo shanchopvüi ji." 4 Onte ejoma na jo engathei Paul ha Silas oni nzo tssocho. Potsow ekhüm Greek jiang ha khosha tona eloe opvü etssoeden khosha toha khophiracho. 5 Khatola Jihudi jiangna omhyik rakitacho. Ontena shishopheni na kyonshae khosha ekhfürhüi razhü tssotoki yantsüi nyinyang sothethukcho. Ontena Jason ki yungta owo Paul ha Silas oni ji yani kyon yolo sosi chiwotav tssocho. 6 Khatola onte n yanchetale Jason tona longtsüi ejoma to rhümae, yantsü esapvüi jiang mhadungo na heto tüngtacho. "Kyon shiangna meta topvülo nyinyang sothechiala! Osi enhungo ete metae rheyithaka, 7 osi Jason na onte nchenthukcho. Ontena Ceasar yizüng n pham elhitala osi mesao thanpoe Jisu to tsa vana to phyotala." 8 Ontena hojitolyui kholuk ji tona yantsü esaeden jiang to ethen-chocho. 9 Yitssoeden jiangna Jason tona thanpoe to jiang ntio khiyiv licho sana thethuksi vachi sicho.
Berea lo
10 Longtsüi jiangna sürüi Paul ha Silas oni ji zümothüng Berea lo yithuki sicho. Ontena chiwo janale Jihudi synagogue ki wotacho. 11 Hoji lo kyon jiango Thessalonika lo kyon jiang esüa tata n kyakrüpo jina ontena motsü ji elaro khichoe engakvü nthomotsü lona phyoji tona Paul ha Silas oni na phyo jiang to etsitae zeta vancho. 12 Onte khosha na longtsüi kümcho osi Greek eloe opvü etssoeden khosha tona eboeden to ha khophiracho. 13 Paul na Potsow motsü ji Berea lo ha püngnothaka to Thessalonika lo jihudi jiangna zoale ontena jilo ha oro kyon jiang ekyanchotacho. 14 Tole longtsüi jiangna tsüsoa Paul ji jümang tssae yithuki sicho, osi Timothy ha Silas onio hojilo vancho. 15 Paul sosi wo jiangna Athens lo sosi chiyitacho osi Silas ha Timothy oni zakto ombo thüngi rothukle to Paul na onte ezoa yithukcho.
Athen lo
16 Paul na Athen lona Silas, ha Timothy oni nhyaka vanathüng yantsü ji kisükhüm na nyinyangkachio ji zesi ombo etho jakcho. 17 Jitsükona ombona synagogue kina Jihudi jiang osi khümo eroe jiang topvü, osi engakvü shishopheni eroe jiang thüngi to ekhirantacho. 18 Epikurean tona Stoik to ntsinran ejoma na ombo thüngi thyutacho. Onte ejoma na phyocho, "Ntia n tsi oyi ekyung kyon shina ntio phyovsa to?" Thanpoe jiangna jo phyotacho, "Ombo jipoboe potsow püngnoe esüka." Ombona Jisu yithenmhom ji. tona ombo kümchelamo ji to püngnoa vamo jina hojito phyotacho. 19 Ontena ombo sosi Areopagus jilo wotacho. Ontena phyo tacho, "Nina ntiosana ethan püng noa vamo shi ena ha e ntsithukvü wo mmhona. 20 Nina e mhuko tüv e zothukala. Hojiang yichak jiang e ntsihungala." 21 (Athen kyon jiang osi jilo thanpoe vamo jiang topvüna oyam wonthan yithan engav na n tssochotav yuta jiang yithukta vancho.) 22 Paul na Areopagus esaekho mhadungo phanthi phyocho, "Athen kyonden, nteno ekhümlano lüm etheiden to ana olan topvü lona zecheta. 23 Ntiotssole ana nte khümphen jiang zeta yia vanle, onte yolo thanphen motsünga lo heto ha erani lia ana hungcho, 'N tsio Potsow thüngi'. Ntena ntio n tsina khümta vancho sana ji ana enhünga nte ezoa vamo shi. 24 Limha shi osi shilo ntio liana topvü nsüngrüo Potsow jina jo kyon khe na tssocho khümpheni n vanala. 25 Ombo oyak tona limha to Potsow. Eküm evan topvüna ntio ethev liana ombona pia vamo jina kyon na ntia ombo epio ha n li. 26 Ombona motsüi motsünga lona pvüjilan topvü lyuyingi limha topvü lo vanthukcho. Jipo jiang kvütothüng phanthisi kvütothüng joyiv sana, osi ontena kvülo vam sana ombona methakcho. 27 Hojito ontena ombo thüngi shentae vam tsükona ontena ombo yam lia; osi Potsow jo ete ochia thüngina ekoni vancho mek. 28 Ochona sana heto phyo ji esüa, Eteha ombo lona eküm vanala, nkankvüala, osi eküm vanchetala, Nte yolo eranpvüi ejoma na heto eramo ji esüa; 'Eteha ombo ngaroden.' 29 'Ntiotssole ete ha ombo tsochenden tsso jina Potsow ji shona janti osi olong na jocho mekana kyon nchümri lona chiyicho esüa nchümvü n li. 30 N tsi nchüng yuta jijo Potsow na mmyipzhüi esiyithaka, khatola enhungo ombona meta topvülo kyon topvü khophile to ezoala,3i ntiotssole ombona ombo ethüngche kyon ji yakchia limha ji oyi tssoyiv tsüngon ji kokathaka. Hoji otsotso to ejüv tsükona ombona echü lona ombo kümlanthukth aka." 32 Ontena, "Echü lona kümlan" to ji zoale ejoma na ombo emakatacho, osi thanpoe na jo, "Yilan shi ena ezohunga" to phyotacho. 33 Jitsükona Paul na esaekho ji sisi yi sicho. 34 Kyon ejoma na ombo n vachiv ombo phanphia longtsüi kümracho, hojiang yolo Dionysius Ariopagus kyon esaeden jilo khanhyae ji tona eloe tsüka Damaris ji ha elani thanpoe ejoma to jücho.
Korinth lo
1 Jisülo Paul na Athens lona Korinth lo chiyicho. 2 Ombona hojilo na Jihudi tsüka Aquila to tsa Pontus yamo tona ombo engh Priscilla to, nsungalo ti Claudius na Jihudi jiang Rom lona yithukathüng Italy metae na yicho tüv ndukcho. 3 Paul na owo onte nduki nzo vani elhi tssotacho, ntiotssole onte ha Paul esüa kitssosü shishoeden tssocho. 4 Emung akvü ombona synagogue ki na thyutasanta lithuki Jihudi jiangha Greek jiangha to engathetokvü ekhyo tssocho. 5 Silas ha Timothy onina Macedonia na yiale Paul jo püngnov jilo khochaki Jisu jo shanchopvüi ji to Jihudi jiang thüngi püngnocho. 6 Ontena ombo khalanchia n mhon ombo phyoyiale ombona npensü jiang ethüngi sia onte ezocho, "Nte monkhan lea nte nlan lona tssovka! A ntam ntia n li. Enhünga nandang na aiyo pvüjipoe jiang thüngi yiaka." 7 Jisülo jo ombona jowo Titus Justus to tsa Potsow ekhüm tsüka synagogue ki hapho lo oki tssoe vamo ji ki vanwo rhowocho. 8 Synagogue jilo esopvüi tsüka Kripus to tsao jina ombo wopan totona OPVÜI lo longtsüi kümcho, osi Korinth kyon elümoto na yithen ji zoe longtsüi kümi bapticho. 9 Zümoalo jo OPVÜI na omüngina ezocho, "Tikyua tolea phyoa woa, yingto ti vana. 10 Ana ni ndüngo vanka, ochina ha ni meyam meka, ntiotssole yantsü shilo a kyon khosha vana."11 Jitsü kona ombona hojilo nzyuasi choro tirok vani Potsow yithen ji onte püngnocho. 12 Galio na Akhaia lo Rom esapvüi kümale Jihudi kyon topvü na mmyantae Paul ji rhümae yitssopheni sosi owo ezotacho, 13 "Kyon shina shikhfü ji n pham Potsow khümtale to kyon püngnoala." 14 Paul na oyi nsam tssoathüng Galio na Jihudi jiang ezocho, "Jihudiden, elhi n mhom osi münghan yi saliwo ana nte engayia zev. 15 Khatola shijo omying osi nte tsakvütsalan tsükona saküma nte popo tssotav lia. Ana jo hetüv yilan lo okhe n the!"16 Osi ombona yitssopheni na phani onte sicho. 17 Tole onte topvüna Sosthenes, synagogue ki tsüphoe tsüka ji süyae yitssophen jilo na tatacho, khatola Galio na engoe tia n zechicho.
Antiokh lo Elani Yicho
18 Paul na tsüngon sunga Korinth lo vanlansi ombona longtsüi jiang pyonta yi ezoa Priscilla ha Aquila oni nzo Syria lo ehata yicho. Ombona phyochaki elio ji ephan Cenchreae lona kvüri tssüi sicho. 19 Ontena Efisia janale, ombona Priscilla ha Aquila oni ji hojilo vanthuksi synagogue owo Jihudi jiang thüngi thyutasantacho. 20 Ontena sungkata van to ombo ezoaha ombona moa, 21 phyonta yi onte ezoa heto phyocho, "Potsow lüm erüng lina ana nte thüngi rolam ka. Tosi ombona Efisia lona ehakae yicho. 22 Ombona Caesarea lo chiyithakale, ombona Jerusalemi owo longtsüi jiang monkhüm pisi Antiokh lo wolancho. 23 Jilo yuta tara vansi jilona Galatia kyingro (district) tona Phrygia to lo meta motsünga lona motsünga to sanphia sürüi jiang etho jükayia wocho.
Korinth Tona Efisia to lo Apollos
24 Alexandria kyon Jihudi tsüka Apollos to tsa Efisia lo oro vancho. Ombo oyi nsanthia nthomotsü ji chüphia ntsicho. 25 Ombo ji OPVÜI lan jilo sokacho kyon osi ombona John baptio tae ntsia ha choka longshyu lia OPVÜI Jisu tsükona motsü ephan elan ji püngnocho. 26 Ombona lümbüm tssoni synagogue ki na püngnov benkacho tole Priscilla ha Aquila onina ombo püngo ji zoale oki ombo tsae Potsow lan ji tsükona ntssüng-rüngkata ombo ezocho. 27 Appolos na Akhaia lo chiwo hungcho tole longtsüi jiangna ombo khichwothukvü ehungpvüi kako ombo eranitacho. Ombona chiwo janale Potsow kianzan ji yakchia longtsüi kümthako jiangna ombo thüngina nzanchi tsüphov hungcho. 28 Ntiotssole ombona nthomotsü ephanina shanchopvüi ji Jisu to Jihudi jiang thüngi nzontsü mhadungona ekhitao ji ombona khyothechia eroroe ejücho.
Efisia lo Paul
1 Apollos na Korinth lo vanathüng Paul na meta ji longjüngo rhowo Efisia lo chiwocho. 2 Ombona hojilo sürüi ejoma nduki onte engacho, "Ntena longtsüi kümo jithüng Nthomon ji nte bepi?" Ontena ombo ezotacho, "Eiyo Nthomon vana totia n zohan." 3 Ombona onte ezocho, "Tona nteno ntio bapti khichola?" Ontena ezocho, "John na baptiyio ji." 4 Paul na ezocho, "John na baptio jijo mmen lona khophithaka to chekaphen ji tae, ombo püngno jijo kyon jiang khi ombo sülani etsao Jisu lo longtsüthokvü tsükona." 5 Ontena shi zoale OPVÜI Jisu myingona baptitacho; 6 osi Paul na okhe onte nyimkayile Nthomon jina ontelo rocho, osi ontena yisanpo nsanta, zenkhyingta Potsow yi nsantacho. 7 Onte ji eboe otsük taro eni harüma tssocho. 8 Paul na synagogue ki wocho osi choro ethüm onte thüngi ekhiranta osi onte engathethuka lüm tssoni Potsow ekhüngyan tsükona onte ezocho. 9 Khatola onte ejoma najo lüm khünga n longtsücho, osi ontena kholuk ji mhadungo na OPVÜI lan ji tsükona n mhom phyotacho. Jitsükona Paul na onte sisi longtsüi jiang sosi oyi Tyurannus etssiphenki jilo na thyuta onte püngnocho. 10 Asia metalo Jihudi osi pvüjipoe jiang topvü OPVÜI yi ji zothokvü tsükona hojito nzyu eni püngnocho.
Skeva Tsoeden Jiang
11 Potsow na Paul yakchia chethev elüm tssocho. 12 Ombona tsütsao süporo tona süryuphan to jiang mpato nochonori jiang thüngi hansi ona onte nochonori jiang poyicho; osi omon n mhon jiang na onte sisi tsanracho. 13 Jihudi ejoma yentsata omon phana ewoe jiangna OPVÜI Jisu mying ji khi omon phantahungcho. Ontena omon jiang ezotacho, "Paul na püngnoa vamo Jisu ji myingona ana ni ezoala, "14 Jihudi pvüti tsüphoe Skeva to tsao ji tsokhying jeni tiying jiangna hojito tssotacho. 15 Khatola omon n mhon jiangna onte ezocho, "Ana Jisu ntsia, osi Paul tsükona ha ntsia, tolea nteno ochoangala?" 16 Kyon jilo jüwo omon n mhom jina nta tssoche onte yani onte topvü khyothechicho. Tole onte meyana mpensü jiang mpa reroe sia ombo kina tsani sitacho. 17 Efisia lo evan Jihudi osi pvüjipoe jiangna shi zoe kyutsüngracho osi OPVÜI Jisu mying ji tsükalancho. 18 Longtsüi elümoto na ontena ntio n mhom tssothakcho sana jiang oro opon chuka phyochaktacho. 19 Mphoe na ozen khi oyam jaktomo jiang naha onte kako jiang hantasi oro nzontsü mhadungo na rungtacho. Ontena kako jiang man etsüngi zetale janti rang wothüng tinyan man tssocho. 20 OPVÜI yi ji shi esüa etho lia nzüa yicho.
Efisia lo Ninyang
21 Hoji sülo Paul na Macedonia tona Akhaia to yakchia Jerusalemi yihungcho. Ombona phyocho, "Ana hoji yisi sülo Rom ha owo a zehunga." 22 Hoji tsükona ombona ombo nzanchi yolo otsük eni, Timothy ha Erastus oni Macedonia lo wothuksi ombo Asia lo yuta sungkata vancho. 23 Hoji yutalo Efisia lo OPVÜI lan ji tsükona ninyang tsüphov chiyicho. 24 Demetrius to tsa janti ejoe tsüka Arthemis ekhümki jilo vaphen janti kisü ejoe vancho osi ombo elhi ji yakchia elhi etssoe jiang elümoto oman lithukcho. 25 Ombona hojitüv elhi etssoe jiang tsarhyui osi onte esüa elhi etssoe thanpoe jiangha tsapha toli heto phyotacho, "Kyonden, ete eli ji elhi shilona chiyiala to ntena ntsia. 26 Tole Paul kyontsük shina ntio elhi tssoa osi elhia sana ntena hunga zothaka. Ombona, kyon khena nsüngrücho potsow jiango potsow mek to phyoala. Efisia lo osi Asia meta topvü lona kyon elümoto na ombo thüngoe tssothaka. 27 Jitsükona ete elhi shilo omying e mmenio tüv ekyuv lithaka. Jita mek tolea, Artemis, potsow loroe tsüpho ekhümki jiha ntia mekvü yesoe sikhoka. Asia lo evan otsük akvüna osi limhalo evan topvü na ekhümo potsow loroe jü" 28 Kholuk jina hoji zoe lüm tsukta tüngtacho, "Efisia lo Artimes jo tsüphoa!" 29 Wontssoniro jina yantsü ji pyingcho. Osi kyon kholuk jina Paul nzo yentsata evan Macedonia kyon otsük eni Gaius tona Aristarchus to süyae etssiphen ki jilo suta rhowocho. 30 Osi Paul na kholuk ji mhadungo chiwov tssoaha longtsüi jiangna tangcho. 31 Meta jilo tsüphoe ombo shom ejoma na ha ombo ji etssiphen ki jilo opon chuka ti-wole to pyangcho. 32 Jithüng ji kholuk ji totona ekhenlungta yicho, Ejoma na ntio sana tüngkachi, thanpoe ejoma na ntiosana thanpo tüngkachi to tssocho; ntiotssole onte ekyungo na jo ntio tssocho na jilo oro sanrhyutacho sana tia n tsicho. 33 Alexander ji Jihudi jiangna ovüngi chiwothuko jina kyon ejoma najo ombo tsükona tsayitacho. Jitsükona Alexandera na kyon jiang okhena hataka esanthuksi ombo elan phyov tssocho. 34 Tokhatola omboha Jihudi to ontena ntsiale topvüna nzo tssoe khonda eni tüngtacho, "Efisia lo Artimes jo tsüphoa!" 35 Sülani jo oyan jilo erantoe jina tangthechicho. Ombona phyocho, "Efisia kyonden, Efisia yantsü shina Artemis tsüpho ji ekhümki ji tona ntho lung oyaki na elungjo ji to ekümala to topvü na ntsia. 36 Ochinaha hoji ejüng to n phyoche, jitsükona ntena ochinaha tssümhe rungmhe elhi ti-tssotana noyinga vantava. 37 Kyon shiang na ete khümpheni n fü, osi ete potsow loroe ji epüp n rüaha ntena sosi helo rothaka. 38 Demetrius tona ombo nzo etssoe to jiangna ocho sana n lan zechevo etena esapvüiden, osi eng akvü yitssoe vana, küma jilona etena oyi tssoyiv. 39 Khatola ntena ntiosana hoji pomoe ethelan lia to tssona, metapvüi yitssopheni na jantav. 40 Ntiotssole nchüng ntio tssocho sana shi sülo ete ji ninyang sothecho ephanina n lan epio tüv ekyuv lia. Hetata ninyangtao shi tsükona etena n tsancho osi ete ephyov ntia n li." 41 Ombona hojito phyoa sanrhyu ji pyonthuki sicho.
Macedonia tona Akhaia tolo
1 On Ninyang ji esanthakale Paul na longtsüi jiang tsarhyui lüm etssonyi osi pyonta yi onte ezocho. Tosi ombona khoe Macedonia lo yicho. 2 Ombona hoji meta jiang yakchia püngnoyi na kyon jiang lüm tssonkayia wocho. Jisülo jo ombona 3 Akhaia lo oyi choro ethüm vancho. Ombona Syria lo wov methaka vanathüng Jihudi jiangna ombo chephita vana to ombona ntsicho. Jitsükona ombona Macedonia yakchia yilam methakcho. 4 Berea lo Pyrrhus tsoe Sopater ji tona Thessolonika lo Aristurchus ha Sekunder oni; Derbe lona Gaius, Asia lona Tykhikas tona Trophimus tona Timothy to shiang na ombo phana wocho. 5 Ontena ovüngna oyi Troas lona e nhyakta vancho. 6 Ena ebung mozhü n the hümri tokhu ji sülo Philipi lona khoe tsüngon mungo sülo Troas lo oyi onte nzo hopta motsünga vantacho.
Paul na Troas lo Wokhao Ji
7 Honipari mmyulani ena khüm shümta etsoyu tsükona sanrhyutacho. Paul na ojyuato yi sa vamo jina zümolongo kyon jiang thüngi oyi nsancho. 8 Ena sanrhyuta vamo ji ki ekhaka omhawoe milon elümoto tüngra vancho. 9 Kyingroe tsüka Eutikhus to tsa kherüki lo khukthei Paul yiji enga vancho. Jithüngji ombo yipa yi yipthecho osi ekhaka ethümoto jilona elungi likoe ombo vanthecho. Ontena owo ombo khyokale chüthakcho. 10 Tole Paul na yunga jowo ombo khayae phyocho, "Tiwongkhyutava, ombo nchühanka!" 11 Jisüijo ombona ekhaka omhawoe chungi hümri mpvüroe tsocho. Onte thüngi yuta sunga eng chiro jana thyuta vansi Paul na khochi sicho. 12 Ontena khyingroe ji ntia n tssov oki sosi yicho osi onte lüm emicho.
Troas lona Miletus lo
13 Ena ovüngna orhung jilo rhowo Paul khochithokvü sa vamo Assos jilo wotacho. Ombo ojoe na yisi hojilo owo vantale to ombona e zocho. 14 Ombona Assos lo na e ndukale ena ombo sosi Mitylene lo yitacho. 15 Ena hojilona ehakae ojyuato chiwos jancho. Tsüngona sülo Samos jancho osi ojyuato Miletus jancho. 16 Paul na Asia lona yuta n zilamvü tsükona Efisia yakchia ehatav methakcho. Ombona etonandang jo Pentecost tsüngon jilo Jerusalem jam ekhyo tssocho.
Efisia lo Eramoeden Jiang Thüngi Paul Pyonta yi
17 Paul na Efesia lo ekhümkho lo eramoeden jiang ji ombo ndukle to Miletus lona oyi yeni vacho. 18 Ombona chiyi janale onte ezocho, "Ana Asia metalo chirowo ji tsüngono na benkae ana nte thüngi ntio tssoa yuta yithakcho sana ntena ntsia. 19 Jihudi jiang na a lo okyak thei yuta n mhom tssükao jithüng ana teri kümi osi esü theta OPVÜI phajae elhi tsso ji. 20 Ana kyon yolona osi nte ki jiang lona püngnoathüng nte tsükona ethev elio jiang topvü ji ntia jaklanchi n vana nte ezocho to ntena ntsia. 21 Jihudi osi pvüjipoe jiang thüngi ana onte mmen jiang lona khophi Potsow thüngi oyi OPVÜI Jisülo longtsüv lia to onte ntssungracho. 22 Osi enhungo Nthomon ji lüm erungo na ana Jerusalemi yiala, osi hoji lona alo ntio tssov sana n tsiv yiala. 23 Yantsü akvü lona vüngphen tona ezüp to jina a nhyaka vana to Nthomon jina a ezowo ji tae ana ntsia. 24 Tolea ana a eküm shi man ji zia n van, khatola OPVÜI Jisu na Potsow kianzan ji yithenmmhom ji püngnov a zikao elhi ji thakvü ji tae a chokatala. 25 Ana nte topvü yolo Potsow ekhüngyan ji püngnoa othaka. Osi enhungo nte ochinaha kvüthüngha a n hunglan to ana ntsia. 26 Jitsükona ana nchüng tsüngon shilo tüngochünga nte ntsithukala; jijo, nte yolo ocho sana nte monlea a nlan n li. 27 Ntiotssole Potsow etüm ntio kvüta ephyov licho sanaji ntia valanchi khi n li. 281 Jitsükona nte tsükona osi oten jilo kvüta zeyav tsükona Nthomon jina nte enhikae licho sana jiang ji zeyata vantava. Potsow na ombo tsoe chüo ji yakchia soyingi vao ekhümkho ji enhyangden tssotava. 29 Ana yicho sülo ranfü ntav nte yolo sanchukchiv, osi ontena olyuden ji nküma n van to ana ntsia. 30 Nte yolo kyon ejoma na ejüng phyoa longtsüi jiang ji onte thüngi sosi yio tüv yuta chiyiv. 31 Jitsükona tüngochüngtava, osi zümo eng esütsü theta nzyu ethüm nte otsük akvü nte püngnocho to ji ti mhechotava. 32 Enhungo ana Potsow ntangnshon jilo, osi ombo kianzan kvümoe na nte phanthitoki Potsow na kyon topvü tsükona mmha vae lio ji nte pithokvü sana jilo ekachi nte vatala. 33 Ana ochia orang osi shona mekana mpensü ha jüponicho nli. 34 Ana a osi a nzo etssoe jiang ethelan tsükoan e khe shiang na elhi tssocho to ntebobo ntsia. 35 Heto kungtsünga elhio ji yakchia n khyoe jiang nzanchichetala to olan topvü lona nte ejüthaka. OPVÜI Jisu na phyoji nchümcheta: "Khicho ji thüngi na jo Pio jilo ematha mmha elio." 36 Paul na nsanrothakale, ombona onte nzo khuktseni randantacho. 37 Onte topvüna ombo khayae eyulo ntssüpita pyontayi ezoa kyatacho. 38 Ontena kvüthüngha ombo n hunglan to ombona phyo jina tajo tssoa onte nungracho. Osi ontena ombo phana orhungi wotacho.
Paul na Jerusalemi Yiala
1 Ena pyontayi onte ezotasi sülo tsoyutasi khochicho. Ena nsaka ehata oyi kos lo chiyicho; ojyua tojo ena Rhodes lo chiyi jilo na Pataralo yitacho. 2 Hoji lona orhung motsünga Phoenecia lo yia vancho ena hungi tsankae yitacho. 3 Ena Cyprus hungjana tüv metalo chiyitacho, osi hoji jolowe na ehata Syria lo chiyicho. orhung jina Tyre lo oha khichov esamo jilo ena jürani chiyitacho. 4 Ena hojilo longtsüi tara nduki onte nzo hopta motsünga vantacho. Omon ji etho lona ontena Paul ji Jerusalemi ti yile to ezocho. 5 Khatola yuta ji benale ena khochi yicho, osi onte topvü na onte engh osi ngaro jiang sotasi yantsü yaki e phana chiro jütssa jani ena khuktseni randantacho, 6 osi ena pyontayi ezotasi orhungi tsanthei, ontena oki elani yita to tssocho. 7 Ena ehata Tyre lona Ptolemais lo chiyi longtsüi jiang monkhüm pita onte ndüngo eng motsünga vantacho. 8 Ojyuato jo ena khochi Caesarea lo chiyicho. Hojilo ena motsü zae Philip, Jerusalemi na otsük tiying ethüngcheo jiang yolo tsüka ji ki nchentacho. 9 Ombona otsolov n yanpihan otsük mezhü motsü püngnoeden vancho. 10 Ena hojilo tsüngon sunga vantacho, osi Judea lona zenkhying Agabus to tsa chirocho. 11 Ombona e thüngi oro Paul ryukhüng ji khi ombo jo okhe jiang chungi hansi phyocho, "Nthomon jina heto phyoala, ryukhüng shi OPVÜI ji Jerusalmi Jihudi jiang na heto chungi, pvüjipoe jiang khelo theyiv." 12 Ena hoji zoale jilo evan topvü nzo tssoe Paul ji Jerusalmi ti wole to ntssungtacho. 13 Tole ombona phyocho, "Nteno ntiolui heto kyata a lüm rothuktala? Aiyo Jerusalemi na achüngu tae mekna OPVÜI Jisu tsükona jilona echü lea chüv to methakthaka." 14 Ena ombo ntangcheo jina heto tae phyotacho, "OPVÜI lüm erüng tae tssothuka." 15 Hojilo tara vantasi ena tsütsailan jiang methaki Jerusalemi khochicho. 16 Caesarea lona longtsüi ejoma na e phana rocho, osi ontena Mnason to tsa Cyprus kyon benkadeni na longtsüi tsüka ji ki nchentav vamo jilo esosi yitacho.
Paul na James Janthechiala
17 Ena Jerusalemi chiyile longtsüi jiangna lümtsakirina e lonchocho. 18 Ojyuato jo Paul na e nzo James ki wotacho, osi ekhümkho eramoeden topvü jilo vancho. 19 Paul na monkhüm onte pisi Potsow na ombo yakchia pvüjipoe jiang yolo kvüta elhi tssothakcho sanaji etsüngi onte ezocho. 20 Hoji zoe onte topvüna Potsow thüngtacho. Ontena Paul ezocho, "Onyuro Paul, zeta Jihudi wothüng kvüta na longtsüi kümthakcho sana, osi onte topvü na shikhfü ji kvüta ntsanrüka benphia sana. 21 Nina pvüjipoe metae Jihudi vamo jiang Moses shikhfü ji sile, ngaro jiang ti tsenile, osi Jihudi etsophyo jiang sile to püngnoala to ontena zothaka. 22 Nina chiyithaka to ontena zonrüngu. Tona kvüto lyutavla? 23 Ena jo heto ni tssothuk hungala; Shilo echümchakthakcho otsük mezhü vanka, 24 Onte nzo owo onte nthoche elhi jilo thesi hoji man ji loyia; tona ontena onte kvüri jiang tssüchev. hoji yakchia otsük akvüna ni tsükona ntio zothakcho sana jiang ji ejüng to ntsivka. Osi ninaha shikhfü ji benphiala to longtsüvka. 25 Osi pvüjipoe longtsüi jiang tsükona jo ena kako onte erana ezothaka, kisükhüm lo thecho etsoyu ti tsotale, ejen ti-tsotale, khyaktsüngcho so ti-tsotale, osi lonsülonphyo lona tsanchoa vantale to." 26 Jitsükona Paul na ojyuato jo kyon jiang sosi onte nzo nthoche elhi jiang tssotacho. Jisülo ombona khümpheni rhowo tsüngon kvüta sülo nthoche yuta ji thaki onte otsük akvü tsükona ekümrüm tham sana ji ntsithukcho.
Paul ji Khümpheni na Rhümatala
27 Tsüngon tiying ji bem sa vanathüng Asia metalo Jihudi ejoma na Paul ji khümpheni na hungcho. Ontena kholuk ji ekyanchoe Paul rhümatacho. Ontena heto tüngtacho, 28 "Israel kyonden, kyotava! Kyontsük shina meta topvülo püngnoa Israel kyon jiang, Moses shikhfü osi khümphen shi tachia nsana woala. Osi enhungo ombona pvüjipoe mpa sosi ntho meta shi mmenthukala!" 29 (Ontena Efesia kyon Trophimus to tsa Paul oni yantsüi na nduko jina hoji ha Paul na khümpheni ombo sosi rocho tsayia heto phyotacho.) 30 Yantsüi kyon topvü hamatsüi bungphita Paul ji rhümae khümphenina süchuk-tacho. Osi khümphen kibüng jiang topvü khani sitacho, 31 Kholuk jina Paul ji lüngthav vanathüng Jerusalem ji ethenchoa ninyangtala to Roman rasan tsüphoe yenjancho. 32. Jitopvü tsüphoe tona rasanden to sosi om ombo hungale Paul sata vamo ji esancho. 33 Tsüphoe jina owo Paul ji süyae yonjakzhü eni na shenle to oyi picho. Tosi ombona engacho, "Shijo ochola? ombona ntio tssochola?" 34 Kholuk jina ejoma na ntio sana phyota, ejoma najo yipo phyota to tssocho. kyon jiang ji hamatsüo jina tsüphoe jina kvüto lyuv sana tia n tsiv Paul ji rizümpheni sosi chüngile to oyi picho. 35 Ontena ombo nzo phopha jiang nandang yitasi kyon jiangna elümoto lüm tsuktao jina rasan jiangna ombo ejümtacho. 36 Onte topvü na. ombo sü rüa "ombo ji lüngthale" to tüngta wocho.
Paul na Ombobo Ehungpvüi Piala
37 Rasan jiangna Paul ji rizüpheni sosi rheyitav vanathüng Paul na esopvüi ji ezocho, "Ana ntiosana ni ezokhukcho alo?" Tole tsüphoe jina engacho, "Nino Greek yi nsanala, nanüng? 38 Tona nino nsungalo Ejip kyon tsüka na ninyang benkasi rasan wothüng mezhü sosi romhoni yio ji memek?" 39 Tole Paul na ezocho, "Aiyo Jihudi kyon, Cilicia meta Tarsus lona abukcho, yantsü thüngche jilo metapvüi tsüka. A nzansi kyon jiang thüngi a nsanthuka." 40 Esopvüi jina Paul yuta picho. Hoji tsükona Paul na phanthi hataka kyon jiang noyithukcho. Ontena jükrüpi vanle Paul na Hebrew yina onte thüngi nsancho.
1 "Oshom Israel kyonden, ana nte mhadungo a elan phyovka engatava!" 2 Ombona Hebrew yina nsana ontena zoale jükrüplani sicho, osi Paul na benkae nsancho. 3 "Aiyo Jihudi kyon, Cilicia lo Tarsus lona a bukcho, khatola Jerusalem lo Gamaliel küpo; na ekha eyan khia eranküm a kümcho. Ana ha ete motsü jiang shikhfü ji elümoto khünga püngnocho osi nchüng helo evan nte otsük akvü esüa Potsow lo khochaki picho. 4 Osi olan ethan shi phankae jiang ana khangshia chüthukcho, ana eboe ha eloe ha rhümae vüngpheni thechicho. 5 Ana otsotso phyoala to pvüti tsüphoe ji tona esae okho to jiangna ntsia. Ana onte thüngina kako erani Damaskus lo Jihudi jiang thüngi hansi, kyon jiang rhümae chüngrae Jerusalemi sosi oyi ezüp epiv tsükona ana wocho.
Paul na Ombo Khophio ji Motsü Rüala
6 "Ana Damaskus jana yia vanathüng eng longjüngo esüngaro taena wondang tsüphov na a razhücho. 7 Osi likoe avanjoe owon heto azoa zocho, 'Saul, Saul! Nino ntiolyui a khangshiala?' 8 Ana 'Nino ochola OPVÜI?' to engacho. Tole ombona phyocho, 'Aiyo Nazareth Jisu nina khangshia vamo ji.' 9 A nzo etssoe jiangna wondang ji hunga ha a jana vamo won jijo n zocho. 10 Ana 'OPVÜI aiyo kvüto lyuivla?' to engale OPVÜI na, 'Phanthi Damaskus lo woa tona Potsow na ntio ni methakia vancho sana hoji lona ni zovka' to a zocho. 11 Wondang tsüpho jina a mhyik juki siwo jina a nzo etssoe jiangna okena a rütasi Damaskus lo wotacho. 12 "Yantsü jilo kyon tsüka Ananias to tsa ekhüm lano lüm ethei osi ete shikhfü benphia evan Jihudi topvü na yikrachia tüv vancho. 13 Ombona a thüngi oro a ndüngo phanthi azocho, 'Onyuro Saul omhyik ji bochilana!' Jitopvü ana hungi ombo zecho. 14 Ombona phyocho, 'Ete motsüi Potsow jina ombo lüm erüng ji ni ntsithukvü, ombo ntho phajae ni hungthukvü osi ombona nsana ni zwothukvü ni ethüngchethaka. 15 Ntiotssole nina ntio hunga zothakcho sana jiang otsük akvü thüngi nina ezoa ombo ehungpvüi tssov. 16 Jitsükona nhyaka ti van na phanthi baptisi ombo thüngi randana ni mmen jiang epyoe ni siyithuka.'
Pvüjipoe Jiang Püngnwothukvü Paul Tsacho
17 "Ana Jerusalemi elani oyi khümpheni na randana vanle, 18 mungtüngi na OPVÜI hungi ombona heto a ezocho, 'Zakto Jerusalem lona yia, ntiotssole shilo kyon shiangna nina a ehungpvüi pio ji khichov meka.' 19 Ana janlancho, 'OPVÜI, ana synagogue owo ni longtsüi jiang rhümae tacho to ontena mmhona ntsia. 20 Osi ni ehungpvüi Stephen chüthukathüng anaha lüm na rünga jilo vancho osi ombo lüngthae jiang mpensü jiang zeyayia vancho.' 21 Tole OPVÜI na a ezocho, 'Khochia ana ekoni pvüjipoe jiang thüngi ni wothukaka.' 22 Paul na heto n phyothüng jo kyon jiangna engata vancho, khatola jitopvü tüngkachia phyotacho, 'Khi ombo sia! Ombo lüngthata! Ombo vanthukvü n tüm!' 23 Ontena eronta, osü ethungphita, oyaki live shakachitacho. 24 Rom rasan esopvüi jina Paul erhüpsi ntio tsükona Jihudi jiangna hoto ombo yanasana to engale to ombo rasan jiang ezocho. 25 Ontena ombo erhüpvü tsükona chünga vanle Paul na hojilo tsüphoe vamo ji ezocho, 'Ntena Rom metapvüi tsüka ji nlan tssoe oyi tia n tssoyiv etav shikhfü lichoke?' 26 Tsüphoe jina hoji zoale owo esopvüi ji ezocho, "Shijo Rom metapvüi la! Nino ntiolyui heto lyuala" 27 Tole esopvüi jina Paul engacho, "Nino Rom metapvüi memek?" Paul na ezocho, "Hoka." 28 Tole esopvüi jina ezocho, "Aiyo orang khosha thesanati Rom metapvüi a kümcho." Paul na ezocho, "Tolea aiyo buklena metapvüi." 29 Kyon ochoangna Pual tükoshüko yia vancho sana jiangna zakto elani sitacho, osi rasan esopvüi jiha ekhentsüngi sicho; ntiotssole ombona Rom metapvüi shenthaka to nchümchecho.
Esaeden Mhadungo Paul
30 Ntiolyui kyon jiang na Paul nlan pia sana to esopvüi jina yani zehungcho. Jitsükona ojyuato ombona pvüti tsüphoe jiang tona esae okho to nduktale to ezosi Paul ji lanphecho. Ombona Paul sosi owo onte mhadungo phanthi thukcho.
1 Paul na esae okho ji rüki zechia ezocho, "Israel kyon a shomden, ana nchüng tsüngon jana Potsow mhadungo kvüto vanpvü sana ana chetünga ntsia." 2 Pvüti tsüphoe Ananias na Paul ndüngo manga vamo kyon jiang Paul ji emeno tümile to ezocho. 3 Paul na ombo ezocho, "Potsow na oyi ni tssoyi nrünguvka - O, kyimchung ehümvü! Nina jilo khukthei shikhfü ephan oyi a tssoyiala, tolea a tav yizüng pio jijo shikhfü ji nibobo yesoala!" 4 Paul ndüngo vamo kyon jiangna Paul ezocho, "Nina Potsow pvüti tsüphoe n kha-nyikra alo!" 5 Paul na janlancho, "A shom Israel kyonden, Ombo ji pvüti tsüphoe to ana n tsicho. Nthomotsü lona phyoala, "Ni kyon jiang esapvüi ji epüp ti rüyia.' " 6 Paul na kholok jilo Saducee ejoma, Pharacee to jüa hungale esaekho ji ezocho, "Israel kyonden, aiyo Pharasee, Pharasee tsoe. Oyi a tssoyia vamo shijo ana echü lona kümlan lia to eyilo lio ji tsükona." 7 Ombona heto phyoale, Pharasee jiang tona Saducee to jiang ekhirantae sanrhyu ji eni chichecho. 8 Ntiotssole Saducee jiangna echü lona kümlan n li, lanben osi omon n van to longtsücho. Tolea Pharasee jiango hojiang topvü otsotso to longtsücho. 9 Ntssonkata pangtacho osi Pharasee jiang yolo shikhfü püngnoe ejoma na phanthi ekhirancho, "Ena kyon shi nlan ntia n yanche! Otsotso omon na alo lanben na sana ombo jancho tssov!" 10 Kyungkhünga pangta yio jina Paul ji mpvüroe mpa sitavka to rasan esopvüi jina kyua nchümcho. Jitsükona ombona ombo rasan jiang thüngi jowo Paul sosi chungi rizümpheni vanthukle to oyi picho. 11 Hoji zümo OPVÜI lanpen tsüka na Paul ndüngo mangi ezocho, "Tikyua, nina Jerusalem lo a ehungpvüi tssothaka, osi hoji esüa Rom lo ha tssovka."
Paul Chüthukvü Kyaktao ji
12 Ojyuato enyathüng jo Jihudi ejoma na nduktae heto methaktacho, ontena Paul n chüthukthüng jo etsoyu ntia n tssota to echümtacho. 13 Onte zhüro pomoe sanrhyutae hoji methakcho. 14 Osi ontena pvüti tsüphoeden tona eramoe jiang to thüngi owo ezotacho, "Ena Paul n chüthukvü etsoyu ntia n tssota to echümthaka. 15 Jitsükona ntena Paul ji ntiona engavsa esüa lyui Rom rasanpvüi thüngi na tsachoa. Tona ombona shilo n chirov ena lüngthav pyima vamka." 16 Tole Paul oyuloe ji tsoe jina hoji zoe rizümpheni owo Paul ezocho. 17 Tole Paul na tsüphoe tsüka tsae ezocho, "Khyingroe shina rasanpvüi ji ntiona ezov lika sosi woa." 18 Tsüphoe jina ombo sosi rasanpvüi ji thüngi owo ezocho, "Khyingroe shina ntiona ni ezov lio jina evüngki evan Paul na ni thüngi sosi arothukcho." 19 Rasanpvüi jina eloncheta sosi owo ombo engacho, "Nina ntio a ezov lichola?" 20 Ombona ezocho, "Jihudi esapvüi jiangna ojyua ni thüngina Paul chontav, osi ntiosana ombo engav ntana chontav to methakthaka. 21 Tolea onte tipile, ntiotssole onte zhüro pomoe na ombo lüngthav nhyakta vana. Ontena Paul n lüngthav ntia n tsoyuta to echümthaka. Ontena hoji benthukvü tsükona ni yi nhyakta vana." 22 Rasanpvüi jina "Nina heto a ezocho to ochia ti ezokhe" to ezoa khyingroe ji yitoki sicho.
Esapvüi Felix Thüngi Paul Yithukala
23 Rasanpvüi jina ombo tsüphoe otsük eni tsae ezocho, "Rasan nzo eni Caesarae lo ewov methaka, Kurü rasan ekha tiying tona otsso eben nzo eni to nchüng zümo tokvü ekho lo khochiv methaka. 24 Paul tsankathuki esapvüi Felix thüngi wothukvü kurü methakia." 25 Tosi rasanpvüi jina heto kako erani hanthukcho. 26 "Claudius Lysias na ombona yikrachio esapvüi (Governor) Felix thüngi eranala: Monkhümka. 27 Jihudi shiangna kyon shi süyae lüngthav tae vancho. Ombo ji Rom metapvüi to zowo jina ana rasan sosi owo ombo shanchocho. 28 Ontena ntio nlan ombo pia sana engav tsükona onte esaekho ethüma ana ombo sosi wocho. 29 Tole ombo ji ntia echüo mekana evüngu etüma tssosoracho nli to ana yanchecho; osi ontena onbo olan pio ji onte shikhfü tsükona. 30 Osi ontena ombo lüngthav methakala to ana ntsia ni thüngi ombo rothukala. Nlan ombo epi jiang thüngi ha ni thüngi phyotale to ana ezothaka." 31 Rasan jiangna Paul sosi hoji zümo Antipatris jana wotacho. 32 Ojyuato kurü rasan jiang phana wothuksi liko rasan jiango rizümpheni elana yitacho. 33 Ontena Caeserea jani kako ji esapvüi ji pitasi Paul ha ombo khelo theyitacho. 34 Esapvüi jina kako ji khasi Paul ji ntio meta kyon sana engacho. 35 Osi ombo ji Cilicia kyon to ntsiale ombona ezocho, "Nlan ni pio kyon jiang rothuksi jantavka." Jisülo ti ombona Paul ji esapvüi ji kyingi vanthuki enhyang khi zethukle to oyi picho.
Jihudi Jiangna Paul Nlan piala
1 Tsüngon mungo sülo pvüti tsüphoe Ananias na eramoe ejoma tona shikhfü tsütsae tsüka Tertullus to sosi Caesarea lo wocho. Ontena Felix mhadungo chiwo Paul nlan pitacho. 2 Tole Paul ji tsathei Tertullus na heto nlan ombo pia benkae phyocho: 'Yikrachio Tsüphoe! Ni yansa mmhoncho lona ete meta shi sunga noyingthaka, osi ete meta mmhonka tsükona elümoto nsachota lithaka. 3 Hotüv elhi jiang ena yuta topvülo khichoala osi montsso ni piala. 4 Ana yuta sunga ni eziyiv meka, jitsükona nzansi erüm toa a enagyina to jonjiala. 5 Kyon tsük shiji ena ninyang n mhon sokapvüi to ntsithaka. Ombona limhalo Jihudi kvüta vancho sana jiang yolo ninyang sothechiala, osi ombo Nazareth kholuk kyon esopvüi. 6 Ombona khümphen ji mmenthokvü tssoathüng ha ena ombo rhümacho; 7 osi ena e shikhfü ephanina oyi tssoyiv vanathüng rasanpvüi Lysias na oro e khe lona nrhachoe ombo sosi yicho. Osi nlan epipvüi jiangna nithüngi role to yizüng ombo picho. 8 Nina ombo tükoshüki zena, ena ntio nlan ombo pia vancho sana ji nina nibobo ombo thüngina zovka." 9 Tole jihudi jiangna topvüna ombo yilo theta jiangji otsotsoka to phyotacho.
Felix Mhadungo Paul yi
10 Esapvüi (Governor) jina Paul ji oyi nsanle to hatakcho osi Paul na benkae nsancho. "Meta shilo nina yitssoe tssosi sunga to ana ntsiwo jina ni mhadungo a elan ji ephyov tsükona a emathata 11 Nina zov tssov, ana tsüngon taro eni harüma yithako ji Jerusalemi khümo wocho. 12 Jihudi jiangna khümpheni na ana ochi thüngiha pangta a nhung, osi synagogue ki tssolea, yantsüi tssolea ntia ninyang sothecho n li. 13 Elani ontena enhünga ntio nlan apia vancho sana jiangha otsotso to ontena ehungpvüi pikhokvü mek. 14 Otsotsoka, ana e pyimtsümotsüi Potsow ji ontena ejüng to tsao lanka jilona khümala. Elani ana e motsüi potsow ji, Moses shikhfü lo osi zenkhying kakolo lio ji ephan khümala. 15 Ana Potsow longtsüo ji tsükona kyon mmhom tssolea n mhon tssolea echüm lona kümchelamvü to longtsüla, osi ontena ha hoji longtsüala. 16 Jitsükona ana Potsow osi kyon thüngi chetünga vanala. 17 Ana avansi nzyu tara sülo a meta kyon tsükona orang tara hansi piv tsükona osi khümpheni othan thev tsükonato Jerusalemi wocho. 18 Ana hojiang tssoa, nthoche elhi jiang methaka khümpheni vanathüng ontena a hungcho, Hojilo kyon kholuk osi nshanlungtacho ha n li. 19 Khatola Asia meta lona Jihudi ejoma oro vancho osi ontena a tsükona ntiosana ephyov lina, ni mhadungo helo rov shikhfü. 20 To mekana enhünga ni ndüngo vamo shiang khi ana onte esaekho mahdungo mangathüng, 21 'Nchüng ntena oyi a tssoyia vamo shijo echü lona kümlan ji yilan tsükona' to yaka ntio nlan tssocho licho sana engae zeta." 22 Tole Felix na ekhümlan ethan ji tsükona mmhona zothakoji tsükona heto onte ezocho, "Rasanpvüi Lysias ji rosanati oyi shi nte tssoyivka." Tosi ombona sanrhyu ji pyonthukcho. 23 Ombona rasanpvüi ji thüngi Paul ji enhyang khelo thei tara etancho pia vanthukle, osi ombo shom jiangna ombo nzanchihungna ti tangle to oyi picho.
Felix Tona Drusilla to Oni Mhadungo Paul
24 Tsüngon tara sülo ombo engh Drusilla, Jihudi eloe ji woni nzo rocho, ombona Paul tsae Jisu Khrista lo longtsü tsükona phyothuki engacho. 25 Ombona ntsentho, erüm eto osi yitsso tsao ji tsükona, nsamo ji Felix na zoale ekhentsünga phyocho, "Enhünga jo nina yikhoka, ana yuta janathüngti ni tsalamka." 26 Paul na orang ombo piv tsayia ombona nchüma vancho, jitsükona ombona nsansam Paul tsae thyutacho. 27 Nzyu eni sülo jo Felix ji Porcius Festus na echungcho. Jihudi jiang khi ombo khyingtokvü tsükona Felix na Paul ji evüngki thechi sicho.
Paul na Esapvüi Mhadungo Jonjyi Phyoala
1 Festus na meta jilo chiyicho osi tsüngon ethüm sülo ombona Caserea lona Jerusalemi wocho. 2 Pvüti tsühphoeden tona kyon opvü etssoeden to jiangna ovüngna Paul nlan elümoto rüi ombo ezotasi, 3 Paul ji Jerusalemi sosi yitale to jonjitacho, ntiotssole ontena olani na ombo lüngthav zita vancho. 4 Festus na onte janlancho, "Paul ji enhyang khelo Caesarea lo vana osi ana nsungu hoji elani yiv sala. 5 Nte yolo eramoeden ejoma na a phana rotava osi ombo nlan licho tssona phyotava." 6 Ombona onte ndüngo tsüngon tiza to taro aria vansi Caesarea lo wocho, osi ojyuato jo ombona yitssoe vanphen jilo khukthei Paul sosi role to ezocho. 7 Osi Paul na chiropvü, Jerusalemi na ro Jihudi jiangna ombo hazhüi Paul nlan elümoto yanitacho khatola ontena ombo nlan tsotso shi lika to tüv n pikhukcho. 8 Paul na ombobo epyochoa phyocho, "Ana ntia Jihudi shikhfü yakchia osi khümphen ji mekana Roman esapvüi ji yaka nlan tssocho n li." 9 Khatola Festus na Jihudi jiang emathatatokvü tsükona Paul engacho, "Oyi shiang ni tssoyiv tsükona Jerusalemi a mhadungo ni wewohung?" 10 Paul na ezocho, "Aiyo Caesar yitssopheni phanti vana, küma hoji lona oyi a tssoyiv shikhfü. Nina mmhona ntsia, ana Jihudi jiang thüngi ntia nlan tssocho nli. 11 Ana shikhfü yesoa osi echü mana ntiosana nlan tsoe lina ana a tsancholan n yan, tokhatola shiang na nlan apio shiang ejüng tssona ochinaha onte khelo a n thechiche to, ana Caesar thüngi jonjiala." 12 Tole Festus na ombo nzanchi jiang thüngi thyutae zesi heto janlancho, "Nina Caesar ethümo ji tsükona hoji ni wothukvü ka."
Agrippa Tona Bernice to Mhadungo Paul
13 Tsüngon tara sülo mesao Agrippa ha Bernice onina Caesarea lo oro Festus elonchoa janthechilo rotacho. 14 Ontena hojilo sunga vanathüng Festus na Paul ji mesao khelo theyia ezocho, "Shilo kyon tsüka Felix na evüngki thechicho vana. 15 Ana Jerusalemi wole Jihudi pvüti tsüphoeden tona eramoeden to jiangna ombo nlan jiang rüa a zotasi oyi ombo tssoyile to a zotacho. 16 Ana onte ezocho, Rom shikhfü ephanina nlan epipvüi jiang tona nlan epio kyon ji to omha omha ndukate elan phyothuki nzev jo ochia n lan n piala. 17 jitsükona ontena helo etssirhyucho osi ana zakto ojyuato na yitssopheni khukthei kyon ji sosi role to tsacho. 18 Khatola kvüthüng nlan epipvüi jiangna sanrhyucho sana ana nchüma evamo nlan jitüv ontena ntia n phyota. 19 Ontena ekhümlan thüngoe tona kyon tsüka chüthako Jisu to tsao ji, Paul na eküm vana to phyo ji yilan tae zocho. 20 Shiang hetüv yi jo kvüto tssoyiv sana ji ana n methakcheo jina ombona Jerusalemi owo nlan ombo pio jiang yilan jiang phephyov sana to engacho. 21 Khatola Paul na evüngki ombo vanthuksasi Caesar na oyi ombo tssoyithukle to chomo ji tsükona ombo ji Caesar thüngi ombo n wothukthüng jo enhyang küpo vanle to ana ezocho." 22 Tole Agrippa na Festus ezocho, "Ana ombo nsanthuki a engahungala." Tole Festus na, "Nina ojyua ombona oyi nsana zovka." to ezocho. 23 Ojyuato jo Agrippa ha Bernice onina elümoto ratsa methaki rasan esopvüiden tona oyan jilo opvü-odung etssoeden to nzontsü etssiphen chungchak jilo rhorocho, osi Paul sosi role to Festus na yizüng picho. Tole Paul ji sosi rocho. 24 Festus na phyocho, "Mesao Agrippa! osi shilo ete nzo evanden, kyontsük shi Jerusalemi osi shilo Jihudi jiangna ombo ji eküm vanthokvü elan nli, to a yirütacho. 25 Khatola anajo ombo ji chütokvü etüma tüv n yanche, tolea ombona Caesar ethümphio ji tsükona hoji ombo sosi evov ana methakcho. 26 Ana mesao ji thüngi kvüto eraniv sana jiha mmhona n merük. Jitsükona ana nte topvü thüngi, osi echümporo tssoa mesao Agrippa thüngi, ombo nlan ji yani zesi oyi tssoyithokvü tsükona osi hoji ephan eram tsükona sosi rocho. 27 Ntiotssole ana jo ntia ntanphen n liv jo evüngki evan wothoko ji ntia ethev n li to zecheta."
Agrippa Madungo Paul na Ombo Elan Phyoala
1 Agrippa na Paul ezocho, "Ni tsükona nibobo nsam yuta ni piala." Tole Paul na ombo khe ntichi heto nsam benkacho: 2 "Mesao Agrippa! Jihudi jiangna a nlan kvüta phyota vancho sana jiang tsükona a bobo ni mhadungo ephyov ji a emathata. 3 Echümpo tssoajo nina Jihudi tssolanphyolan jiang topvü mmhona ntsiwo ji tsükona. Jitsükona nina erüm toa a engayivo to jonjiala. 4 "Jihudi topvü na a eküm benkadenina ana kvüto Jerusalmi a kyon jiang yolo vancho sana ji ntsia. 5 Ontena sunga antsithako jina ontena tssohung na, ana a ekhümlan lo okho ekhüngtso Pharasee ekümo vancho, to ehungpvüi onte pikhuka. 6 Osi enhünga yitssopheni mangi vamo shijo e pyimtsümotsüi thüngi Potsow na phyochaki lio jiang eyiloji tsükona, 7 eyilo kvümoe e pvüji taro eni jina zümo eng khümta nhyakcho sana ji. Hoji eyilo ji ntana nlan apicho, tsüphoe yo, osi ochoangna nlan apicho sana jiango Jihudi den. 8 Helo evan Jihudi shiang na kvütoli Potsow na echü lona kümlanthukala to ji n longtsü khukchola? 9 "Ana Nazareth Jisu n khichowo elhi elümoto etssov nchümcho. 10 Osi hoji ana Jerusalemi tssocho. Pvüti tsüpho ji thüngi na etho khi ana Potsow kyon jiang elümoto vüngcho. Osi onte chüthoka thüng a lüm na rüngcho. 11 Ana elan elani Synagogue lona elümoto onte khangshia, onte longtsü ji moniv ekhyo tssocho. Ana tsükshia onte n zehungo jina jipopoe metae na mpa onte khangshilo wocho.
Paul na Ombo Khophi Motsü ji Ezoala
12 Hoji tümkae ana pvüti tsüphoe ji thüngi na etho kako khi hansi Damaskas lo yia vancho. 13 Tole tsüphoeyo, eng longjüngo, olanina wondang tsüphov, eng jilona tsünglüpkata tüv na Potsüwoe na a tona a nzo etssoe jiang to e razhücho. 14 E topvü likoe evanjocho, osi Hebrew yina heto phyoa ana zocho, 'Saul, Saul! Nino ntiolui a khangriala? Okyo lo nshükav jo ni tsatso tae tssov, mangsübung na ombo pvüi ji jarungo nshukata esüa tssov.' 15 Ana ezocho, "Nino ochola OPVÜI?" Tole OPVÜI jina phyocho, "Aiyo nina khangshia vamo Jisu jika. 16 Tolea phanthia, ana a phajae ni tssothokvü ni ndukchoka. Nina ntio hungthakcho sana osi ana ntio ni ejülamvü sana jiang nina ehungpvüi tssovka. 17 Ana kyon ochoang osi pvüjipoe ochoang thüngi ni wothuka sana jiang khoelona ni shanchovka. 18 Onte khi emüngi na wondangi chiyitokvü osi tsüngrham etho jilona Potsow lo yitokvü osi ontena a lo longtsüi onte mmen jiang siyithokvüka. Osi Potsow kyon kümthako jiang yolo vanphen onte piv tsükona nina omhyik onte pochiyivka."
Paul na Ombo Elhi Jiang Phyoala
19 "Jitsükona, mesao Agrippa, ana potsüwoe na müngtüng hungwo ji n ngao n tssocho, 20 ovügtssoa Damaskas lo, osi Jerusalem lo osi Judea meta topvülo tona pvüjipoe jiang thüngi ontena khophi Potsow yana yitale osi khophithakcho eküm esüa vantale to püngnoa wocho. 21 Shi yilan tsük shi tsükona Jihudi jiang na ekhümki na a rhümae a chütokvü tssocho. 22 Tokhatola Potsow na akyochia nchüng jana phanthi teri tsüphoe mhadungo heto ehungpvüi pia, thanpo ntia n phyona, 23 shanchopvüi jina ezüpvü lioji osi echü lona kümlamo ji ombo tssav, osi ombona Jihudi osi pvüjipoe jiang thüngi wondang ji to tsükona ezov to Moses osi zenkhying jiang na phyoe licho sana ji tae ezoala." 24 Paul na heto ombo elan phyoale, Festus na tüngkachia phyocho, "Ni zhüva ka Paul! Ni ekha-eyan khoshao jina ni zhüvathukala!" 25 Paul na janlancho, "A zhüava meka, tsüphoe yo! Aiyo otsotso ji chetünga phyoala. 26 Mesao Agrippa! Ana ni thüngi lüm tssoni phyokhuko jijo, nina shiang topvü ntsiwo ji tsükona; Ntiotssole nina n tsiv motsüngatia tssocho nli, shiang ji nkenina mphoa tssocho mek. 27 Mesao Agrippa, nina zenkhying jiang longtsüa lo? Nina longtsüala to ana ntsia!" 28 Agrippa na Paul ezocho, "Nina esüngaro yuta lona khristian a kümtokvü to nchüma alo?" 29 Paul na janlancho, "Esüngaro yuta lona tssolea, mekana yuta sunga süloti tssolea, Potsow thüngi a randan jo, ni osi ochoangna nchüng shilona a engayita vancho sana jiang topvü na, a khelo shenzhü shi yakajoa esüa nte kümtokvü tsükona!" 30 Jisüi jo Mesao ji, esapvüi ji, Bernice tona onte nzo khukthe vamo jiang topvü na phanthicho,3i Osi ontena yitathüng onte onte heto phyotacho, "Kyon shina echü mana osi evüngu etüma tüv ntia tssocho nli." 32 Tosi Agrippa na Festus ezocho, "Kyon shina Caesar thüngi jonjikümo jina kha vachi sikhoka."
Paul na Rom lo Yiala
1 Italy lo esosi evov e methakithakale Paul tona evüngki evan ejoma to jiang ji rasan esopvüi tsüka, 'Roman Rasantsü' to tsao jilo esopvüi Julius to tsao ji khelo theyicho. 2 Ena Adramyttuim lona orhung motsünga jütssa rhüa yiv sa vamo jilo tsanthei khochitacho. Osi Macedonia meta, Thesolonika kyon, Aristuschus jiha e nzo rocho. 3 Ojyua to jo ena Sidon lo esantacho, osi Julius na Paul ji nzana ombo shom jiang thüngi wothuki ombo ethelan jiang zeyitokcho. 4 Ezhü jina eryulanchio jina ena hoji lona Cyprus yenjo rhüa ehatacho. 5 Jisüi jo ena Cilicia tona Pamphyalia to jümang tangtango ji yakchia oyi Licia lo yantsü Myra ji jancho. 6 Rasan esopvüi jina hojilo orhung motsünga Italy metawoe yia vancho hungi jilo etsanthethukcho. 7 Tsüngon sunga ena echüma na ehata oyi mmuk-nrak Cnidus hakono chiyicho. Hojithüngha ezhü ntao jina ena Crete yenjo rhüa Salome yakchia ehatacho. 8 Ena ezüpta jütssa rhüa ehata oyi meta motsünga 'Orhungna Nlhia-esanphen' to tsao jilo chiyicho, hoji ndüngo Lasea yantsü ji licho. 9 Ena tsüngon sunga jilo esantacho, osi orhung ehav ha ekyuv lia vanthakcho, ntiotssole jithüng jo 'Ekhang yuta mekana thungthan tsüngon' yuta ji mpato yakthakcho. Jitsükona Paul na onte ntssünga ezocho, 10 "Oshomden, ete ji ekyuv lia, tsütsaelan osi orhung shilo elümoto epüp lio tüv tssov; osi ete eküm ha monkhuka." 11 Khatola Paul na phyo ji mekna orhung esoe ji tona orhung pvüi ji wonina ezowo ji engacho. 12 Orhung esanphen ji etssüko nchenphen n mhomo jina kyon ekyungo na hojilo n santa na yitahungcho, osi Phoenix oyi jani hoji lona vamitahungcho. Hoji jo Crete lo orhung esanphen engrhelan jolowe tona engrhelan khümkiwoe to zechiwo tssocho.
Jümangi Tsungryuv
13 Jolo ezhü ji enyiproa venale, ontena nhyakta vamo ji janthakcho tsayia rhung-shen-phen-zhü jiang khikae Crete meta yenjo tsokata ehatacho. 14 Khatola tara tae tssoa engchirolan khümkiwoe ezhü jina jüyiwoe na elüm nta vena joyicho. 15 Orhung jina hoji nryukhoko jina enato e vena yicho, 16 osi jüyi teriv Kauda to tsao ji yenjo rhüa yungta oyi elüm ezüpta orhung jilo orhung teriv jüwo jiang ena süyakhukcho. 17 Rhungsoe jiangna hoji tssüngyatasi orhung jilo sayaphen wozhü thecho. Osi Libya hajang yolo yungkav kyua ontena wozhü ji tssüngjoe ehata yicho. 18 Ojyua toha tsungryuv ji n sam tsükshia ejephio jina, 19 ontena oha jiang ejoma khi ojüi shümthechitacho, osi rajyuto ha ontena orhung ji tssüngphen ji lukjoe sitacho. 20 Tsüngon sunga eng osi shantio n hungu tsunryu ji tsükshikata yicho, osi sülani jo ena tsanchov to ntia eyilo n liv sicho. 21 Ontena hojito sunga etsoyu ntsov vanathüngji Paul na phanthi onte ezocho, "Oshomden, ntena ayi enga Crete lona nyitavo mmhom. To tssowo ntena hetata yesokhiso osi epüp n liv tssov. 22 Khatola ana nte ntssungala, lüm tssontava! Nte ochia eküm mom meka, orhung shi tae momka. 23 Nsümo ana khüma evamo Potsow ji lanben jina a ndüngo mangi phyocho, 24 "Tikyua, Paul! Nina Caesar mhadungo mangvüka, osi Potsow kianzan jina ni nzo yentsae jiangha shanchovka. 25 Jitsükona lüm jorotava, oshomden, ntiotssole ana Potsow longtsüala osi ombona ntio a ezocho sana ji benchev to ana longtsüala. 26 Khatola etena jüyi kvülo sana ehata chiyiv lia." 27 Zümo taro mezhüo to jilo ena Adria (Mediterranean) jümangi tsungryu jina ejephia ehaphita vanathüng zümo longo orhung ehae jiangna likotso ejan etüngthaka to esürhakcho. 28 Ontena etsi zetasi ejungi meter zhüro harüma tssocho, tara yisi etsi zetale meter thümro tssocho. 29 Orhung jina olongo chenkav onte kyucho, jitsükona ontena orhung shenyaphen yonjak jiang ji mezhü vachochicho osi zakto wonchiwo to randantacho. 30 Jisüi jo rhungsoe jiangna orhung ji sisi tsantav tsükona rhungshephen jiang mhadungoe vachochita esüa lyui mphoa orhung terio jiang vachochita vancho. 31 Tole Paul na rasan esopvüi ji tona rasan jiang to ezocho, "Kyon shiangna orhungi n vanana ntena tsanchov eyilo n li." 32 Jisüi jo rasan jiang na orhung terio wozhü jiang tanchi phfüa yitokcho. 33 Wonchipüngo jo Paul na onte topvü na etsoyu tsotale to ezocho. "Ntena tsüngon taro mezhü etsoyu ntsov ntan-mhon ekümo vanthaka. 34 Jitsükona tsoyutale to ana nte ntssungala, ntiotssole eküm vanchev tsükonajo tsoyuv lia. Nte ochia otssan motsünga lea mom meka." 35 Hojito phyosi ombona hümri khi mpvüroe Potsow montsso pisi benkae tsocho. 36 Hojina onte topvü lüm tssonkae etsoyu tssotacho. 37 E topvü tsotsüi orhung jilo otsük nzo enisi ekha tiyingsi tiruk tssocho. 38 Ontena mmhia tsotasi oha zükhokathokvü tsükona hümchen posta jiango ojüi thechi sitacho.
Orhung Ji Jüngtheo ji
39 Wonchiale ontena meta ji n chethecho, tolea jümang ji nken motsüngalo jüran lia tüv hungchi tssochena orhung ji jilo esantav tssocho. 40 Jitsükona ontena rhungsaphen jiang vachochi ojüi rheyitoki sitacho, elani orhung ji khukphiphen jilo wozhü jiangha lanphetacho. Jisüi jo ontena orhung ji emen ji tara mhadungoe khyokatacho, toli mpung jina mha dungoe ejeta yitacho. 41 Khatola tara tae tssoa orhung jina hajang mmhakachicho tüv lo shüngkae mhadungoe ji likoe ekhyimthe n yichev sicho; osi sülamoe jijo jükyo ntav jina phüngroe sicho: 42 Rasan jiangna evüngki evan jiang ji ojüi na hoa n tsantokvü tsükona topvü lüngthae sihungcho. 43 Khatola rasan esopvüi jina Paul nkoa hoto onte n tssothukcho. Ombona ochoangna ojü tssothia na jiang na vünga hoa chiyitale tona enhyo jiango tssüng pyako mekana orhung jakro jiang khi tsankae eha chiyiv ka to ezocho. 44 Hojitolui e topvü na tsanchoa jütssae chiyitacho.
Malta lo
1 Ena tsanchoe chiyile jüyi jijo Malta to tsacho to ntsicho. 2 Jilo kyon jiangna echümpo tssoa e nzancho. Eryu benkae joa jo etssükcho jitsükona ontena omi tssoe ekhichocho. 3 Paul na otssüng ereni omi thechicho, tole omi lümkao jina nrü chiyi okhelo ombo phakaeyicho. 4 Meta kyon jiangna ombo khelo nrü langsi lio ji hungi phyotacho, "Kyon shijo münghan tssov. Ombo ji jümangi na tsanchoa khatola ntsa jina ombo n vanthukhungala." 5 Khatola ombona erhichochi sicho osi ntia n tssocho. 6 Ontena jo ombo ji esüngaro na bümtsüngalo evümthei chüa sana tssov to nchüma zeta vancho. Toaha ntia n tssoale, onte nchümri dungphilani "Ombo ji Potso" to phyotacho. 7 Hojiang nkonjano oli jiang ji jüyi jilo opvüi Publius ji echi tssocho. Ombona e lonchoe tsüngon ethüm etsoyuthukcho. 8 Tothüng ji Publius opo ji era tona ejen epyo tona chüv tae vancho, tole Paul na rhowo okhe nyimkae randania mmhonicho. 9 Hoji sülo jo jüyi jilo nochonori topvü na roracho osi emiyiracho. 10 Ontena yantso elüm epiracho osi ena eha yitale etsoyu elümoto oro orhungi etheyiracho.
Malta Lona Rom Lo
11 Choro ethüm sülo jo ena orhung motsünga 'Potsow Eshüm' to erankata tüv Alexanderia lona rocho jüyi jilo vami ji vasi yia vancho jilo thei khochitacho. 12 Ena Syracus yantsüi chiyi tsüngon ethüm esantacho. 13 Hoji lona ena khochi nkonphia ehata oyi Rhegium lo chiyicho. Tsüngona sülo jo jolowoe ezhü jina benkae vencho osi ena tsüngon eni sülo Puteoli lo chiyicho. 14 Hojilo ena longtsüi ejoma nduki tsüngon tiying onte thüngi e nchenthukcho. Jisülojo ena Rom lo chiwocho. 15 Hojilo longtsüi jiangna e yivon zoe Appius shishophen tona nchenki ethüm to jiang jana lanyilo rotacho. Paul na onte hungale Potsow montsson pisi lüm tssonkacho.
Rom Lo
16 Ena Rom lo rhowoale Paul jo rasan ombo enhyang ji woni nzo etancho vanthukcho. 17 Tsüngon ethüm sülo ombona meta jilo vamo Jihudi jiang tsarhyucho. Osi ontena sanrhyuale ombona ezocho, "Israel kyon, oshomden, aiyo Jerusalem kyon hepi evüng ki vanaka. Ana ntia ete Jihudi osi ete motsüi tachi elhi ntssoaha a rhümae Rom esae khelo a thechicho. 18 Ontena a tükoshüksi a chütokvü etüma n lio jina a vachicho, 19 tole Jihudi jiangna hoji n chokao jina ana Caesar thüngi jonjiwo tssocho. Osi jijo ana a jipo n lan yani tsükona mek. 20 Jitsükona ana nte nduki nte thüngi thyutav tsükona choncho, ntiotssole a chungi lio shijo Israel jiangna ocholo eyilo licho sana ji tsükona." 21 Ontena ombo ezocho, "Ena ni tsükona Judea lona ntia yivon nzohan, osi oshom ochinaha ni echi n mhom ntia oro e nzo. 22 Ena ni thüngina motsü ji e ngahungala, ntiotssole meta topvülo kholukro ethan shi tsükona phyocho phyorita zoala." 23 Ontena tsüngon kokae vatasi ombo yingaeden esüa sani rotacho. Ombona Potsow ekhüngyan tsükona mmhona eroroe onte ezocho, osi enyathüngna benkae mmyu jana Jisu tsükona Moses shikhfü lona osi zenkhying kako jiang lona eroroe onte engathetokvü ekhyo tssocho. 24 Ombona phyo jina ochoang sanajo longtsücho, khatola ejoma najo n longtsücho. 25 Jitsükona Paul na yilan motsünga heto phyole, "Nthomon jina zenkhying jiang yakchia nte motsüi jiang thüngi heto elanthata ezocho lia!" Jitsükona ontena n myantav sani yi sicho. 26 Ntiotssole ombona heto phyocho: 'Kyon jiang thüngi owo heto ezoa, Ntena enga, enga mungu khatola ntena engathev meka; ntena yanta yanta mungu khatola n hungu; 27 ntiotssole kyon shiang lümbüm ji shayimthaka, osi onte eno jiang büngkhanthaka, osi omhyik jiang jukthaka. To n tssocho sawo onte na hungu, osi zov, osi onte nchümri jina engathev. Osi ontena lümbüm khophi a thüngi yiv, osi ana onte emiyiv, to Potsow na phyoala.' " 28 Paul na thakchia phyolancho, "Jitsükona shancho etho shi pvüjipoe jiang thüngi yitokthaka, to ntsi khitava. Ontena engavka!" 29 Paul na heto phyothakale Jihudi jiangna onte onte ekhiranta rota yi sicho. 30 Paul na hojilo nzyu eni oki engochoe vancho, osi ombo thüngi eroe topvü ombona elonchocho. 31 Ombona Potsow ekhüngyan ji püngnocho, osi OPVÜI Jisu Khrista tsükona ntia lankhan n lina noyinga lüm tssoni püngnocho.
1 Chiti shijo Paul ocho Khrista Jisu phajae, Potsow na wothung etssov tsae Potsow yithenmhom püngnov wothukcho sana ji thüngi na. 2 Potsow na nkolo na ombo zenkhying yakchia yithen shi Ntho motsü lona phyoe vacho. 3 Osi yithenmhm jijo ombo tsoe Jisu Khrista ocho oso lona jo tondüng David tsochen; 4 Khatola ombo ntsentho thüngoe najo Potsow etho tsüphov ejüa ombona echü lona kümlamo ji yakchia Potsow tsoe to khatüng n lina tsacho sana ji tsükona. 5 Osi ombo ete pvüi Jisu Khrista ocho yakchia ana ha wothung etssov a thenhyacho sana ji; osi elhi lo ombo tsükona jipo topvülo kyon topvü longtsü lona ombo lo sosi eyiv tsükona. 6 Jisu Khrista na nte tsathako jina nteha hojiang yolo nte jüa. 7 Jitsükona Rom lo Potsow na nzana, ntho kyon etssov tsae vanthuko jiang thüngi ana eranala: Ete opo Potsow osi OPVÜI Jisu Khrista thüngina kianzan osi noying yioji nte echi tsswothukvüka.
Montsso Epi Randan
8 Ana ovüngtssoa, nte tsükona Jisu Khrista yakchia a Potsow mying thüngala, ntiotssole ntena ombolo longtsükaroa vamo ji limhatsü na phyota yithaka. 9 Ana benkao Potsow ocho tsoe ji yithenmhom ji püngnov tsükona a lümbüm nchümri topvü na phajae mmhom tssoyia vancho sana ji ana ntsia. 10 Potsow lüm erüng lina, kvütoli sana sülani ti lia ana nte thügi rochewo to yuta akvülo radana vanala. 11 Ntiotssole ana nte nduki omon mmha nte chinhyae etho nte jükayiv nhyatssüka vanala. 12 Ji yichak jo, ete nduktana ete langjang na nzanchi hunguv, hojijo nte longtsü na a lüm tssonka, a longtsü na nte lüm tssonka to nzanchitachev. 13 A, ota-onyuden, pvüjipoe jiang limha thanpoe a elhi na kvüto tssüngthi ethithakcho sana ji esüa nte yolo ha tssotokvü tsükona ana nte thüngi rov elüm zikathaka ha enhünga jana ntiona sana a khana vana to nte a ntsithuk hungala. 14 Ntiotssole ana Greek kyon jiang thüngi ha, thanpoe jiang thüngi ha, nchümri eli osi n li jiang thüngi ha elhi tssov lia. 15 Jitsükona Rom lo evan nte thüngi ha yithen mmhom ji püngnov tsükona a n vankenala.
Yithen Mmhom ji Etho ji
16 Yithenmhom ji tsükona a n yikrala: shijo ochoang kvütana longtsüa sana jiang topvü shanchov tsükona Potsow shancho etho ji; ovüngtssoa Jihudi jiang tsükona osi Greek jiang tsükona ha to. 17 Ntiotssole, Potsow lo longtsüo ji yakchia kvütoli benkadeni na ochüm jana kyon ji ombo mhadungo elan kyon kümtokasana ji yithenmhom jina ejüala. Yithenmhom lona heto phyo ji esüa, "Potsow mhadungo kyon ocho longtsü yakchia ntsachethakcho sana hojina longtsü lona eküm vam."
Kyontsü N lan ji
18 Mmen osi n mhon etssoe kyon jiang etsso-ephyo yakchia kvütoli Potsow ntsa ji khalanchia vancho sana jiang tsükona Potsow lüm etsuk ji e hungthukthaka. 19 Potsow na onte ezüpthokala, ntiotssole ontena Potsow ntsicheo lanka jiang elarowoena onte ejüala, ntiotssole Potsow na hotowoe na onte ntsithukcho. 20 Limha shi liyingathüng na Potsow na ombo kümali etho ehungo osi n hungwo khetssen jiang topvü lona chekathukvü litoka vanpvü. Jitsükona kyon jiangna onte ntankaphen n liv sithaka! 21 Ontena Potsow ntsia, toaha, ontena myingthüng osi montsso ombo epiv etümo ji n pi. Jithüngina jo ontena oman n lio zitüngziri sakae hojina onte nchümri ji müngi sithakcho. 22 On teno nchümri eliden to ontena phyoala, khatola onteno zhüvaeden. 23 Ontena kümali Potsow ji khüm thungonajo, kyon jiang na kisü jiang, ekümrüm osi epvüphio jiang khi n chüo Potsow thung khümtacho. 24 Hoji tsükona Potsow na onte etsso tssothuka onte onte n yikratav oso rüngcho tssotatoka ekachi onte sicho. 25 Onte na Potsow ntsa ji ejüng na dungchecho; osi liyingpvüi Potsow ji thung ji ombona liyingo jiang yikrachia khümtacho, tolea liyingpvüi jijo kümali thünguv licho! Amen. 26 Jitsükona Potsow na eyikrar thao oso rüngcho jiang lo onte vanthuki sicho. Osi elopvüi jiang na onte eboe thüngi tathi tssophen ji mekna onte eloe eloe thüngi tssotacho. 27 Hoji esüa eboe jiang naha eloe jiang thüngi tathi tssotaphen ji sisi onte onte jüponta yicho. Eboe jiangna eboe thüngi eyikrathao elhi tssotae onte silyuo elhi ji man n lan ji onte lo lithukcho. 28 Ontena Potsow n ziphio jina Potsow na onte sinkicho. Onte nchümri jiang n mhon kümcho osi onte etsso-ephyo jiang silyuo kümthukcho. Onteno n thanri, lantaro n mhon, tajo elüm osi tssakta na pyingcho. 29 Onteno nthalan-taro osi mhyiktssota, münghan, khontarota, kyakthechi, osi kangtsü na pyingcho. Osi elani, 30 oyam echi erüiden, Potsow khaksiden, Potsow etssangden kümthaka. Onteno kangtsüiden, ekhüng erüiden, n mhon etssov lanka eyanden; opvüpoe yi n ngaeden; 3l chüngtüng n liden; nlüphiden, wopan nzanta n li osi oyam pono khonzan n liden. 32 Shiang benphi jiango chünrünguv to Potsow na phyochaki lia to ontena ntsia, toaha ontena hoji tssoji tae mekna thanpoe jiangha ntssünga tssothukala.
Potsow Yitsso
1 Oshomyo, nina oyam oyi tssoyialo? Ni ji hetüv kyon tssolea hetüv kyon tssolea n tsancho. Ntiotssole nina oyam oyi tssoyialato nibobo nlan pithaka, ntiotssole nina nlan pio elhitsük ji nina tssolanala. 2 Ntena ntsia, "Ochoang na hetüv tssoasana Potsow yitsso ji elanthata jiang pono yiala." 3 Oshomyo, heto etsso jiang pono nina oyi tssoyisi nina hoji tssolanala. Tona nina Potsow yitsso ji lona tsanchochev to nchüma alo? 4 Toalo nina ombo nzan tsüpho ji, osi ombo erüm eto ji n khanziala? Potsow khonzan jijo khophithukvü tsükona licho to nina mmhona ntsia. 5 Tolea ni lümbüm ekhüng osi n khophi lümbüm jitsükona Potsow lüm etsuk tsüngon kvülo Potsow na ombo yitsso ejüv yuta licho sana jilo nibobo ni ezüp varhyuala. 6 Ntiotssole hoji tsüngon jilo ombona otsük akvü ombombo elhi man ephan yantsov. 7 Kyon ochoang na elhi mmhom tssoa, pvütsson, yikrachi osi kümali yana sana hojiang Potsow na kümali eküm piala. 8 Osi ochoang na onte echi tae yana, elan ji n ngana nlan ji enga sana, jiang pono jo lüm etsuk tssori ji rov. 9 Kyon ochoangna n mhom tssoa sana jiang pono jo ezüp osi esang mmok ji tssov. Hojiang ji Jihudi jiangna hungdem, khatola Greek jiang naha hunguv. 10 Tolea kyon ochona mmhom tssoana jina ombo yantso jo myingthüng, yikrachi osi tssochyu mmhom hunguv, shiha Jihudi jiangna hungdem, khatola Greek jiang naha hunguv. 11 Potsow lo jo teri tsüpho nli, topvüto kheti. 12 Pvüjipoe jiangna Moses shikhfü ji n tsi, tolea onte mmen lona shikhfü ephan onte mom, osi Jihudi jiango shikhfü ji onte khelo lia, tolea onte mmen yakchia shikhfü jilona oyi onte tssoyiala. 13 Ntiotssole kyon tsüka ji ombona shikhfü ji zothako jina Potsow mhadungo elan kyon ombo kümtoka mek, tolea shikhfü jina ntio phyoa sana hoji benphiwo jina ntsachetala. 14 Pvüjipoe jiangna onte lo shikhfü ji n Haha, n tsina shikhfü ji ephan benphina, onte lo shikhfü ji n lilea onte shikhfü ji hojiang tssoala. 15 Onte etsso-ephyo jina shikhfü jina chomo ji onte lümbümi erankacho ejüala, shikhfü ji rüngcho ji onte nchümri chüngtüng jina ha . .. otsotso to hungtokala. Ntiotssole onte nchümri jinaha kvülosana jo nlan onte pi, kvülo sana jo onte nkohoche to tssoala. 16 Hoji tsükona ana püngno-o yithen mmhom jina, kvüthüng Potsow na Jisu Khrista yakchia kyon jiang mpho nchümri jiang pono oyi tssoyi tsüngon ji rotoka sana jilo jo hojito tssov.
Jihudi Jiang Tona Shikhfü ji to
17 Nino tona kvütola? Nino shikhfü jilo epyankae, Potsow tsükona kanchanala, osi Jihudi to phyoala; 18 Nino shikhfü ji ni khathuko jina Potsow na ntio kvüto ni tssothuk hunga sana osi ntio jo mmhontsov sana ji ntsia, 19 osi nino mhyikjüng ji lansoe osi emüngi evan jiang wondang to nibobo longtsüa, 20 osi zhüvae jiang lansokae osi ngaro jiang püngnoe to loangtsüala. Shikhfü jilo ntsinran osi ntsa tsotso ji eyuknhyao ji nina ntsiv. 2i Tona, nina oyam püngnosi, nibobo jo n püngnoake?n "Nina tifüa" to püngnoala, nino fefüala? Efürama tibenphi to nina püngnoala. 22 Nina efürama bebenphiala? Kisü jiang sari-emvü to nina püngnoala, nina khümphen ji mementokala? 23 Nibobo shikhfü ji tsona kangtsala, nina shikhfü ji yeso jina Potsow mying yeyesoyiala? 24 Nthomotsü lona heto phyala, "Pvüjipoe jiang yolo na Potsow mying ji mmentokala, osi hoji jo nte yakchia tssocho." 25 Nina shikhfü ji vata tssona tsemo jilo oman lia, tolea nina shikhfü ji yesoana nina tsemo ji n tsenchotüv kümvü. 26 N tsen pvüjipoe jina n tsena khatola, shikhfü erüng ji tssochena ombo ji tsencho esüa n khanhyavke? 27 Hoji to n tsen pvüjipoe kyon jina shikhfü ji merüka benphina, nina shikhfü eramo ji lilea osi tsenlea shikhfü ji yesoana ombona oyi ni tssoyia nlan ni piv. 28 Ntiotssole oponi zewo ji taena Jihudi to khanhyav mek, osi tsemo oponi elhi jina Jihudi tsotso ni küma mek. 29 Tolea, ochungi ntsaji taena Jihudi tsotso to khanhyala; ombo etsen jijo chungi elhi. Hoji jo omon ji thüngoe, erancho shikhfü mek. Hotüv kyon jo kyon na mekna Potsow na chekata omying thüngiala.
1 Tona Jihudi jiang na pvüjipoe jiang lona mmhonkacho ntio lichola? Mekana tsemo ji man ntio lichola? 2 Olan khosha lona lia! Ovüngtssoa, Jihudi jiango Potsow yithen ji zikacho. 3 Khatola Jihudi ejoma na n benphile jina ntio tssovla? Hojina Potsow ha nshenthiv siv alo? 4 Jito n tsso! Kyon topvü n tsae mpa tssolea Potsow jo ntsa to ejüv shikhfü. Nthomotsü lona heto phyoji esüa, "Nina kvüthüng nsana sana elanthata to ni tsssoyiv shikhfü, osi oyi ni tssoyiana nina khyov shikhfü." 5 Tokhatola ete n tha elhi jina Potsow ntsanrük ji oponi chiyia ejüa tssona, etena ntio phyotavla? Potsow na ombo lüm etsuk ji limha lo rothukna etena Potsow jo n tsanrük to phyotav alo? (Ete tathi jo hoto engao tssoala.) 6 Jito mek! Potsow ji n tsae salivo ombona kvütoli limha ji yitssoOPVÜI tssovla? 7 Ana n tsao ji yakchia Potsow longtsükaro ji mmhona oponi chiyithukna osi pvütsson ombo kyongkayi na, kvütoli aiyo mmen kyon to oyi a tssoyilamla? 8 Tona ntiolyui etena, "Elhi n mhon tssoe mmhom chiyitoktav kalo" to n phyotala? Etena hojito phyotala to kyon ejoma na a yikvütala. Onteno elanthata nlan onte pivka.
Ochia Ntsanthoe N van
9 Tona ete Jihudi jo ntiona sana pvüjipoe jiang lona mmhonkacho alo? To n tsso! "Ntiotssole ete Jihudi jiang ha Greek jiang ha mmen ji etho küpo kheti vana to ana nte ejüthaka. 10 Nthomotsü na phyoala: "Ntsanrük kyon n van, tsüka tia n van, 11 Ombo eyan mekana engathe eli-i tsüka tia n van. 12 Potsow ekhüm ochia n van; topvüna kheti worhyua yithaka; mmhom etssoe tsüka tia n van, tsüka tia n vanrüng. 13 Onte ekhi jiango lüpkvü epo esüa mmena, Onte nnli na ejithechimongala; nrü esüa onte menfü kupi mozhü n mhon jüa; 14 Onte püng jiango rhiyirandan tona ekhov to tae. 15 Onte jo jiango jenbuknibukta lo ekhyinga; 16 Ontena kvülo woasana jilo yesokhiso tona enungrathao elhi to na pyingthukala. 17 Ontena noying lan ji n tsihancho, 18 mekana onte lo Potsow ekyu kvüthüng ha njühan." 19 Enhungo etena ntsia, shikhfü jilo ntio kvüta licho sana jiango shikhfü ji küpo evan jiang tsükona osi hoji jo kyon jiang na ntanphen tssoa etsam jilona khalanchi limha totolo Potsow yitsso ji hansi eyiv tsükona. 20 Hoji jo ntiotssole la tona kyontsoe ochinaha shikhfü ji benphicho yakchia Potsow mhadungo elan kyon n kümche. Shikhfü ji elhi jo kyon ji khi ombo mmen ji chanchethuko ji.
Kvütoli Potsow na Ombo Mhadungo Elan Kyon Kümthukala
21 Tokhatola enhungo Potsow na ombo mhadungo elan kyon kümtoko lanka ji shikhfü ji n thena chonchi vathaka. Shikhfü ji tona zenkhying jiang to na hoji ehungpvüi piala. 22 Tokhatola Potsow na kyon jiang ji Jisu Khrista lo longtsüo ji lona ombo mhadungo elan kyon kümthukala osi hoji jo ombolo longtsüi topvü tsükona ochia echümpota n li. 23 Ntiotssole topvü na mmen tssoe Potsow na tümkao Potsow vanhya pvütsson ji owo n jam sithaka. 24 Tokhatola Potsow kianzan kiaman yantso osi Jisu Khrista rhancho elhi ji yakchia topvüto ombo lo elan kyon kümthukthaka osi etancholo onte vachithaka. 25 Ombo na thungthan tsso ji yakchia ombo lo longtsüi jiang mmen siyicheo kyon ji ombo ethüngchecho. Potsow na elhi shi etsso jijo Jisu jo ntsae to ejüv tsükona osi echungren yithako jilojo ombona erüm eto yakchia kyon jiang mmen jiang n khayiv siyicho. 26 Tokhatola enhünga yuta shijo Ombona onte mmen jiang khayiala, hojijo ombo ntsanrük ji ejüv tsona. Hojitolyui Potsow na ombo ntsanrük jilona Jisu lo longtsüi topvü ombona elan piala to ji ehungthokala. 27 Tona etena ntio tsükona kangtsüv ethev lichola? Ntiolona ha mek! Hoji jo ntio tsükona la? Etena shikhfü ji enga benphiwo jina alo? Mek, tolea longtsü ji yakchia tae. 28 Ntiotssole shikhfü yizüng benphiwo jina mek, tolea longtsü ji yakchia tae kyon ji Potsow mhadungo elan kyon kümthokala toji ena chekathaka. 29 Potsow jo Jihudi jiang Potsow tae alo? Ombo pvüjipoe jiang Potsow ha mekchoke? Onte tsükonaha. 30 Ntiotssole Potsow jo motsünga osi Jihudi jiang ha hoji longtsü tsük jilo na ombolo elan kyon kümtokala, osi pvüjipoe jiangha longtsü lona ombolo elan kyon kümtokala, osi Potsow na woniata ombo mhadungo elan kümtokvü. 31 Tona etena longtsü jilo jükthesi shikhfü jijo yesoe sithukvü alo? Jito mek! Etena shikhfü ji sajüngtokala.
Abraham lo Ejyuka
1 Tona etena oso lo ete motsüi Abraham tsükona jo kvüto phyotavla? Ombona ntio ejyuchechola? 2 Abraham na ombona sanga elhicho yakchia Potsow mhadungo elan kyon kümcho salivo ombona kangtsüv liv. Tolea Potsow mhadungo jo hoto mek. 3 Nthomotsü lona phyoala, "Abraham na Potsow longtsücho osi Potsow na ombo mhadungo elan kyon to ombo khanhyacho." 4 Kyon tsükana elhi tssona ombo jokheman jiango yantso n tsala, tolea ombo elhi na mancho. 5 Kyon na ombo sangcho lo ehyika thungjo Potsow ochona nlan kyon ji elana kümthuka sana hoji longtsüo, ombona longtsüo jilo zekae Potsow na ombo khichoala. 6 Potsow na kyon ochoji ombo sangcho lona mekna, khichoa sana jina ematha elio ji David na heto phyoala. 7 "Ochoang elhi n mhom ji Potsow na nlan siyithakcho sana, osi ocho mmen jiag nlan siyithakcho sana hoji kyon ji ematha elio! 8 Kyon ocho mmen OPVÜI na etsüngi n zeyia sana ji ematha elio!" 9 Tole David na ephyo ematha shijo tsemo jiang echi tae alo n tsemo jiang echi ha la? Ntiotssole motsü lona phyoala, "Potsow na Abraham ji ombo longtsü lona khichocho." 10 Hojithüng jo ombo ntio sükhyingo vanchola? Ombo tsenthakcho alo ntsenhanchola? Ombo hojithüng jo ntsenhan. 11 Tolea ombo ji ntsena ha Potsow na longtsü lona ntsanrüng to ombo khicho ji chekav esüa sülani ti tsencho. 12 Hojitolyui ombo kyon ochoang na n tsenlea longtsüa tssona Potsow na khichov sana jiang opo kümcho, osi tsemo jiangha tsemo tae mekna motsüi Abraham na n tsenthüng longtsü lioji esüa longtsü elio jiang opo kümcho.
Potsow Phyochak ji Longtsü Yakchia Hungala
13 Potsow na Abraham osi ombo tsochen jiang thüngi limha ji ombo echi tssov to phyochaki pio ji esüa onte echi tssotoko jijo Abraham na shikhfü ji benphicho tsükona mek, khatola ombona longtsüi Potsow na elan kyon to ombo khichowo jina. 14 Shikhfü jilo evan jiang tae Potsow na phyochako ji pia saliwo kyon longtsü jo otüp tssov osi Potsow phyochak ji etho n licho tssov. 15 Ntiotssole shikhfü jina Potsow lüm etsuk ji hansi yiala, tokhatola shikhfü ji n liana hoji yesov ha n liala. 16 Jitsükona phyochak jijo longtsülo ndungkacho, jitsükona olantaro Potsow kia nzan yantso jilo enhyikacho, hojijo Potsow phyochak ji Abraham tsochen otsük akvü echi to ejüv tsükona shikhfü jilo evan jiang taena mekna Abraham longtsü ji esüa longtsüo jiang tsükona ha. Ntiotssole Abraham jo ombo kyontsü opo. 17 Ntiotssole ntho motsü lona phyoji esüa Ombo longtsü lo ete topvü opo, "Ana jipo khosha opo ni kümtokthaka." Jitsükona Potsow ocho Abraham na longtsücho sana osi Potsow ochona echüi jiang eküm vanthuka sana, osi limhalo n rohamo jiang thüngi limhalo oro vanthakcho esüa tsa sana ji mhadungo ete opo tssocho. 18 Ombo lo eyilov hotüv lio jina ombona eyilo n lio sükhying lo mpato Abraham na Potsow phyochak jilo longtsücho. Jitsükona "Jipo khosha opo" ombo kümcho. Motsü lona heto phyoji esüa, "Ni tsochen jo oyaki shantio jiang esüa tssovka." 19 Jitsükona ombo hojithüng jo nzyu nzoa bena vanthaka ha, osi ombo otsük jiha echü esüthaka, elani Sara mman jiha echü esüa kümthaka ha, 20 ombo longtsü kvüthüng ha n terika, osi ombona kvüthüng ha Potsow phyochak ji n longtsükav titoa to n tssocho. Tolea ombo longtsü etho na pyingi ombona Potsow thüngcho. 21 Potsow na ntio phyochakcho sana ji benthukvü to ombona longtsücho osi hoji longtsü jina ombolo tathi etho ji jülancho. 22 Jitsükona longtsü yakchia Potsow na Abraham ji ntsanrüng to khichocho. 23 "Potsow na ombo khichocho" to phyo shi ombo tsükona tae erancho mek, tolea ete tsükona ha; 24 ete ochoangna OPVÜI Jisu echü lona kümlanthuko ji longtsüa vancho sana jiang tsükona ha. 25 Jisu jo ocho ete mmen tsükona chüthukcho sana osi Potsow mhadungo elan kyon e kümthukvü tsükona echü lona kümlanthukcho sana hoji.
Potsow Thüngi Mmyanta
1 Enhungo eteno longtsü yakchia Potsow thüngi e mmyantayithako ji tsükona OPVÜI Jisu Khrista yakchia Potsow thüngi noying mmhonta lithaka. 2 Ombona longtsü yakchia Potsow kianzan ejyueran etena enhünga vamo shilo e sochukchicho, osi etena Potsow pvütsson jilo eshümnhyav eyilo lio ji khi e longshyua nchümala! 3 Ho, ezüp yutalo lea elongshyuala, ntiotssole etena ntsia, ezüp lia, ezüp yakchia erüm eto chiyiala; 4 erüm eto yakchia ojang zalanchikuko etsso-ephyo chiyiala, osi hojitüv etsso-ephyo yakchia eyilo chiyiala. 5 Hojitüv eyilo na kvüthüng ha e n joyithukala, ntiotssole Potsow na ombo nzan ji Nthomon yakchia epio ji tsükona ete lümbümi nzan etheyithaka. 6 Etena nzanchipvüi ethev liathüng yuta eben jilo Khrista na Potsow n tsi jiang tsükona chücho. 7 Ntsanrük kyon tsüka tsükona chüv lea khünga, ochona sana mpa kyon mmhom tsüka tsükona chükhuk lea. 8 Tolea etena mmen ekümo vanathüng na Khrista na ete tsükona chüo jilo na Potsow na kvüta e nzancho sana ji chethetala. 9 Tona, Khrista ejen ji yakchia ete ji Potsow thüngi e n tssachecho tssona, tona kvüta rankata ombo yakchia Potsow lüm etsuk jilona eshanchovla? 10 Ntiotssole etena Potsow ri tssoathüng ombo tsoe chüo ji yakchia Potsow okhümo ekümthakcho tssona, ete ji mmhonta thako ji tsükona eküm evamo Khrista jina e shanchov to ji ntssüngkata hungala. 11 Khatola ji tae mek, etena ete OPVÜI Jisu Khrista yakchia Potsow lo ematha longshi ha lithaka; ntiotssole Potsow na Jisu Khrista yakchia ombo okhümo ekümthukcho.
Adam Tona Khrista to
12 Kyon tsüka yakchia mmen ji limhalo licho, osi ombo mmen jina echü ji lithukcho. hojitolui echü ji kyontsü pono li sicho, ntiotssole otsük akvü na mmen tssocho. 13 Limhalo ntia n lithüng na mmen ji licho. Tolea shikhfü ji nlithüng mmen jo etssüngi n vacho. 14 Tokhatola Adam echungi na Moses echung nandang, Adam na yizüng yesoa mmen tssoji esüa, shikhfü yeso mmen n tssowo kyon jiang pono mpa echü jina sacho. Adam na ombo sülami etsao ji kisü ji ejücho. 15 Tolea Potsow na kianzan benphiwo ji tona Adam na mmen tsso ji tojo oni n jyutakhok. Kyon tsüka mmen yakchia topvü pono echü ji rheyicho tssona Potsow nzan osi ombo kianzan yantso Jisu Khrista yakchia topvü thüngi epio kianzan yantso mmha yitoko jijo elümoto tsüphoa. 16 Potsow yantso ji tona kyon tsüka mmen jina yesothoko ji tojo ejyutav n li, oni ji echümpo. Ntiotssole mmen motsünga ji tsükona Potsow na n lan picho; khatola mmen elümoto tsükona Potsow kianzan yantso "n lan n pi" toji yakchia entsachecho. 17 Ntiotssole kyon tsüka mmen jina osi hoji kyon ji yakchia echü ji lithukcho to phyo jijo otsotso. Tokhatola kyon tsüka Jisu Khrista to tsao jina etssowo elhi jijo kvüta tsüphokacho ato! osi ochona Potsow kianzan tssochyua elio ji khichoa sana jiang topvü thüngi elan kyon kümthuka sana jiang topvü Khrista yakchia onte eküm sayayiv. 18 Tona kyon tsüka na tssosorao ji yakchia kyon topvü nlan pioji esüa, kyon tsüka elan elhi ji yakchia kyon topvü pono eküm pia etancho onte vanthukala. 19 Osi kyon tsüka jancho n zo lona topvü mmen kyon kümthuko ji esüa, kyon tsüka jancho ezo yakchia topvü Potsow mhadungo elan kyon kümthukcho. 20 Shikhfü ji lithuko jijo mmen kyongkata lithokvü tsükona, khatola mmen kyongkale kianzan jiha jilona elümoto kyongkacho. 21 Ntiotssole mmen na sawo jina kyon lo echü yithuko ji esüa, kianzan na sawo ji khi Potsow mhadungo shentakota mmhonthuki ete OPVÜI Jisu Khrista yakchia kümali eküm epithukcho.
Khrista Khi Eküm Vanala
1 Tona etena kvüto phyotavla, kianzan rankatokhvü tsükona etena mmeni tae vantav alo? 2 Kvüthüngha jito n tssoche! kvütoli etena mmen jilona echüthak na hojilo vantalamla? 3 Ete kvütana bapti yakchia Khrista lo senjümtacho sana hojina ombo echü jiloha eshümnhyathaka to yichak ji ntena n tsichoke? 4 Ete bapti ji yakchia ombo echü jilo eshümnhayo ji yichak jo, eteno ombo nzo eshothecho, elani opo Potsow pvütsson etho jina echü lona ombo kümlanthukcho, hoji yakchia eküm ethan epiv tsükona. 5 Ntiotssole ete ji ombo na echüo ji esüa echüi khi ombo thüngi ekhetitathukcho tssona eteha ombo kümlan ji esüa ekümlanthokvü. 6 Etena ntsia ete mmen eküm ehemo ji roe sithokvü tsükona Khrista nzo edonhyae sithaka, jijo etena mmen ji nri n tssolam tsükona. 7 Ntiotssole kvüthüng kyon ji echüa sana mmen etho jilona ombo vachiala. 8 Enhungo etena longtsüala, ete ji Khrista nzo echücho tssona eteha ombo nzo ekümlamvü, 9 Ntiotssole Khrista ji kümlanthoko jina ombo kvüthüngha n chülan to etena ntsia, osi echü jina ombo pono esae n tssoche. Jitsükona enhungo, echü jina ombo pono OPVÜI n tssoche. 10 Ntiotssole ombo echü jijo topvü tsükona echunga tae na mmen jilo chünhyae sicho, osi ombona enhünga eküm evamo jijo Potsow khümshüm jilo vanala. 11 Nteha hojilo ntebobo echü esüa nchümtav lia, eteno mmen jilo chüthaka khatola, Khrista Jisu yakchia Potsow khümshümlo eküm vanala. 12 Jitsükona enhungo mmen jina nte echü tsük jianglo ombo etho ji n tsütsache, hoji jo ntena ombo chokao ji ntssoyiv tsükona. 13 Ntena nte tsüko solan kvüwoe ha mmen ji ntssyukathokvü shikhfü, mekana jithüngo na jo echü lona kümlancho to Potsow lo khochaki pitava, osi nte tsük totona mmhom lo tsütsav tsükona khochaki pitava. 14 Enhungo mmen jina nte pvüi n tssov shikhfü, ntiotssole nteno shikhfü ji küpo mek, tolea Potsow kianzan ji küpo vanala.
Ntsanrük ji Nriden
15 Tona enhungo etena shikhfü jilo mekna kianzan jilo vamo jina mmen tssotav alo? Jito mek nrüng! 16 Ntena mmhona ntsia, ntena ocho sana küpo n ri elhi etssov khochaka tssona nteno kyontsük ji küpo nriden. Mekana nte mmen jina nte sayata tssona ji man jo echü tssov; osi Potsow jancho ezo ji tssona ji man jo ombona ombo mhadungo elan kyon nte kümthokvü. 17 Tokhatola, potsow mying thünga! Ntiotssole ntena mmen ji nri tssoa vanathüng jo hoji püngnorünyo jilo nte lümbüm totona pia vancho, 18 khatola mmen jilona nte vachiale, nteno ntsa ji nri nte kümcho. 19 (Kyon tathi nchümri jo mataro jina ana ntena engathewo towoena phyoala) Ntena ovüngthüng jo nte eküm jiang osolo nthanri thüngoe osi jancho nzo elhi tümkae nthanri ekümo vantacho. Hoji esüa enhungo nte eküm jiang mmhom jilo khochaki pia ntho lamoe sokatava. 20 Ntena mmen ji nri-i tssoa vanathüng jo ntsanrük jilona jo kontae vancho. 21 Ntena enhünga nte yikra nchümo elhi jiang tssotathüng jo ntio khakchochola? Hojiango echü eküm jilo vanchukchiala. 22 Tolea nteno mmen jilona nte vachi Potsow nriiden nte kümthaka. Osi nte eman jijo nteno ntho ekümlo khochaki epio ji, osi hoji jo kümali eküm lo echhev. 23 Ntiotssole mmen tsso ji jokheman jo echü; khatola Potsow kiaman yantso jijo etena OPVÜI Jisu Khrista lo vamo ji yakchia kümali eküm ji.
Yanpiyanthan lo Ejyukacho
1 Oshomden, ana ntio phyovsa vancho sana ji ntena engathenrünguv, ntiotssole nte topvüna shikhfü ji ntsia. 2 Ejyukaena, yanpithako eloe jina kyon ji eküm evan nandang shikhfü ephanina orapvü thüngi ompvü shenta lia khatola orapvü ji chüana yanpithan shikhfü ji lona ompvü lanchiv. 3 Jitsükona orapvü eküm evanthüng eboe thanpoe thüngi shenta liana efüramae to ompvü tsav; khatola orapvü chüthakana shikhfü ephanina ompvü lanchiala. Hoji tsükona eboe thanpoe thüngi yanpilanlea hojijo efürama to n kha. 4 Ntena hoji esüa tssov, otanyuden. Ntena Khrista tsük jilo solan motsünga esüa kümvü tsükona shikhfü jilo chüthaka osi hoji na nte ji Khrista echi kümthaka, hoji to echü lona kümlamo ji echi e kümthuki Potsow mhadungo ethelan eliden e kümthukvü tsükona. 5 Etena limha lo tathi ji ndungtssungo vanathüng jo, shikhfü jina chiyithuko oso rüngcho jina e sayapvü vancho, osi hoji man jo echü ji tssocho. Khatola enhungo etena ovüngthüng e sayao etho jilo chüi sithaka. 6 Tokhatola eteno shikhfü jina erhüma si echüa evamo jilona jo e vachithaka; jitsükona erani elio shikhfü ehen e sayasi evamo ji küpo mek, tolea enhungo omon eküm ethan jilona benkae elhi tssoala.
Shikhfü Tona Mmen to
7 Tona etena kvüto phyovla? Shikhfü jijo mmen to phyotav alo? Jito mek! Ntiotssole shikhfü jina mmen jo ntiosana ji e ntsithukcho. Shikhfü jina "Oyam echi ti jüpona" to n phyocho saliwo epiera jo ntiosana ana n tsiv tssov. 8 Tokhatola hoji yizüngtsük jina mmen ji lanka topvü chonchiyicho osi a lo epiera lantaro rheyicho. Shikhfü ji n lio mmen jijo echü tae tssov. 9 A ekümo shikhfü jo ntiosana n tsiv vana rocho, khatola ana yizüng ji ntsiwo ji nandang na a ekümo mmem ji rheyi a chücho. 10 Yizüng kvümoe yakchia eküm epitokvü tümkacho sana ji yizüngtsük jina a chütokcho. Ntiotssole yizüng jina lanka mmhom chonchi vayio ji mmen jina tsütsacho. 11 Osi mmen jina a ejithechi yizüng ji yakchia a chüthukcho. 12 Hojito tssocho tssona shikhfü jijo nthoa, yizüng jiha nthoa, ntsa osi mmhona. 13 Khatola mmhomo jina achüthukcho to alo? To meknrüng! Mmen jina tssocho osi mmen jina mmhom ji khi a chüthukcho. Mmen jina a chüthukuko jijo ombo tathi jo ntiosana ji oponi chiyithokvü tsükona.
Kyon lo Rapota Ejüo ji
14 Shikhfü jijo nthoa to etena ntsia, khatola aiyo echüo kyon mmen ji nri-i esüa a yencho. 15 Ana elhio shiang abobo n ngathe, ntiotssole a tssohungo jiang ana n tssoala, tolea jithüng jo a tssako jiang ana elhiala. 16 A n tssohungo jiang ana tssoji yakchia ana shikhfü ji yikrachiala osi hoji mmhona to phyoyiala. 17 Khatola otsotso tssoana ana tsso jiang ana mek; tolea a lo evamo mmen jina. 18 Ntiotssole mmhom jina a tsük oso tathi ji lo nvan to ana ntsia. Ntiotssole mmhom ji etssov a choka lea ana hoji etssov etho jo n liala. 19 Mmhom a tssohungo ji ana n tssoala tona jithüng jo ana n tssohungo n mhon ji tssochoe siala. 20 A n tssohungo ji tsso ji yichak jo, enhungo etssOPVÜI ji a mek, tolea a lo vamo mmen ji. 21 Hoji tsükona shikhfü jina a lo elhi tssoa saka to ji ana yanchethaka: Ntiotssole ana kvüthüng mmhom a tssohunga sana n mhom ji etssov ji ethüngi khi siala. 22 A chungi lümbümi najo potsow shikhfü ji chokatala. 23 Tokhatola, shikhfü echümpo eni a lo tssoa vancho ana hungala – osi shikhfü jina a lümbüm na chokao ji woni rotala. Hoji yakchia a tsük oso lona mmen elhi tssoa vamo jina a ji mmen ji ezii a kümtokala. 24 Aiyo kvüta ematha nli kyon Ato! otsük kvümoe na echü jilo a sosi yia vancho sana jilona ochona a shanchovla? 25 Potsow montssonthuka, ochona ete OPVÜI Jisu Khrista yakchia shi tssochosana! Tona, a sükhying jijo heto: Kvüthüng apoti a siasana ana Potsow shikhfü ji lümbümi taena benkathukala, tolea a kyon tathi jina jo mmen ji shikhfü ji benkathukala.
Omon lo Eküm
1 Jitsükona Khrista Jisu lo vamo jiang tsükona jo nlan epiv n liv sithaka. 2 Ntiotssole Khrista Jisu lo omon eküm tssolanphyolan jina mmen osi echü tssolanphyolan shikhfü ji lona a vachithaka. 3 Kyon tathi nkhyonrung ji yakchia shikhfü jina ntio n tssochecho sana ji Potsow na tssocho osi ombona ombo tsoe ji ete mmen tsük shi esüa kümthuki mmen ji khi silo rothukcho. Osi hoji tsük ji yakchia men ji nlan picho. 4 Ete ochoang eküm enhungo limha tathi jina mekna omon jina sa vancho sana jiang pono ntsa shikhfü jina rüngio ji bencheyiv tsükona ombona hojito methakcho. 5 Ntiotssole ochoang kvütata na kyon tathi lona vana vancho sana jiango limha lo nchümri jina onte sayata vanala, tolea ochoang omon tathi lona vana sana jiang najo omon thüngoe nchümri hansi vanala. 6 Limha nchümri hamo jijo echü tolea potsüwoe nchümri hamo jijo eküm osi noying. 7 Ntiotssole limha lo nchümri ji Potsow lo n ra; hojina Potsow shikhfü ji nngala osi engao etho n li. 8 Ochoangna onte limhalo eküm ji etho küpo vana sana ontena Potsow n mathathukche. 9 Khatola Potsow mon jina otsotso ntelo vana tssona nteno limha ji etho lo mekna omon thüngoe etho küpo vanala. Kyon ocholo Khrista mon ji njüa sana ombo Khrista echhi mek. 10 Khatola Khrista ji ntelo vana tssona mmen tsük ji chülea Potsow mhadungo elan kümthako jina ni mon ji eküm vam. 11 Potsow mon kümoe na Jisu Khrista echü lona kümlanthukcho sana ji mon jina ntelo vamo ji yakchia echüo tsük ji n chüo eküm na nte dongcheyiv. 12 Jitsükona ota-onyuden etena etssov ete ejan lithaka. Tolea ete tathi oso rüngcho osi hoji shikhfü ji lona vam tsükona mek. 13 Ntena oso rüngcho ekumlo vancho jo nte chüv, khatola omon ji etho yakchia ntena mmen oya jiang chüthoka tssona ntena eküm vam. 14 Potsow mon jina sowo jiango Potsow tsoeden. 15 Ntiotssole nsüp ekyu jilo nte yilanthokvü nrü etssowo mon ntena hungcho mek. Tolea Potsow mon jina esoeden ekümthukala, jitsükona etena "Opo! apo" to randanala. 16 Potsow mon jina ete mon ji nzo tssoe ete ji Potsow tsoeden to chethethukala. 17 Osi eteno otsoeden ekümthako jina Potsow na ombo kyon jiang mmha epiv phyochaki elio jiang hungu, elani ombona Khrista tsükona methaki elio ji eteha eshümnhyav, ntiotssole etena Khrista ezüp jilo shümnhyao jina ombo pvütsson jiha e shümnhyav.
Mhadungi Pvütsson Ji
18 Etena enhünga ezüp nungra hunga vamo shiang tona mhadungi pvütsson ehungu elio ji to oni jo kvüthüngha n tsitakhuk to ana nchümala. 19 Limha lo liyingcho topvü na Potsow tsoe jiang oponi chiyithukvü tsüngon ji nhyaktsüka nhyaka vana. 20 Ntiotssole limha jina ombo tümcho m bem esiv sekao ji limha jina etancho tssocho mek, tolea potsow lüm erüngona tssocho, 21 khatola liyingo limhaji kyonroe esiv sekao jilona tsanchoe Potsow tsoe jiang pvütsson osi etancho ji thenhyatokvü eyilo lia. 22 Ntiotssole enhünga yuta shi nandang jo liyingcho topvü na tsobuk yutalo eno ji esüa ryusanga eronta vana. 23 Tokhatola liyingcho jiang taena eronta vancho mek, tolea ete ochoang Potsow yantso nthomon ji khichoe vancho sana jiang naha tsüngon kvülo Potsow na ombo tsoeden ekümthoki eteji evachiv sana ji tsüngon ji nhyaktsüka ezüp chancheta ochungina eronta nhyakta vana. 24 Shi eyilo shi khi ete e shanchocho; khatola ete eyilo ji etena hunga evamo tsütsaelan esüa tüv sawo, hojijo eyilo tsotso tssov mek, Hunga vancho tsütsailan tüv jo ochona eyilov la? 25 Tokhatola etena n hungwo tsütsaelan tüv eyilo na etena erüm toa nhyakala. 26 Hoji esüa omon jina ha ete nkhyo-nrunglo ekyochiala; ntiotssole treteno ntio kvüto randam sana ji tia n tsi; tolea ntho mon jina ete thung tssoa Potsow thüngi oyi najo n phyokhuko emhena ejonjiyia vana. 27 Potsow ochona ete lümbüm chungi hungthechia vancho sana jina nthomon ji lümbüm erüng jiha ntsia, ntiotssole omon jina ombo kyon jiang thung tssoa Potsow thüngi ombo lüm erüng ephan jonjia chonala. 28 Potsow na ochoang kvütata ombo tümka ephanina tsacho sana osi ochoang na ombo nzana sana jiang thüngi jo olan topvü lo onte tsükona tssoala to etena mmhom ntsia. 29 Osi ochoang kvütata ombona ethüngche vathakcho sana jiang ji ombo tsoe ji esüa kümthokvü tsükona echümporo khochaki vacho sana jiango otsoe ji jeni jiang yolo erantso ji esüa tssothokvü tsükona. 30 Ombona hojito chekarae vao jiang ombona tsacho; osi ombona tsao jiang ombo mhadungo elan kyon kümthukracho. Ombona ombo mhadungo elan kyon kümthoko jiang ombo pvütsson jilo hansi yicho.
Khrista Jisu lo Potsow Nzan
31 Tona shiang hetopvü tsükona kvüto phyotavla? Potsow ji ete thüngoe tssona ochona e panlankhukchola? 32 Potsow na ombona ombo tsoe tsotso ji tia nkümi n vav ete topvü tsükona khochaki picho! Osi ombona hoto tssothakna ombona kvütoli olan taro kiaman e n pivla? 33 Potsow na ethüngcheo jiang pono ochona nlan pichevla? Potsow na n pi, ntiotssole Potsow na ete ji e ntsachethaka! 34 Tona ochona nlan onte pikhoka? Khrista Jisu ocho chücho sana mekana ocho echü lona kümlani opo Potsow khe amimoe vani ete tsükona jonjia vancho sana jina jo mek! 35 Jito tssona Khrista nzan jilona ochona e khotayi-kokchola? Ethojak nungra na alo, nungkhfü nungra na alo, khangshi ntssunshi na alo, mpensü n lio jina alo, yantsa na alo, wondon era jina alo, lüm etsuk na alo, ekyu osi echü jina la? 36 Ntho motsü jina heto phyo ji nchümcheta, "Ni tsükona yuta akvülo eyio echüv ekyuv lithaka; Eiyo olyu lüngthav sa vamo jiang esüa etssothukala." 37 Mek, shiang hetopvü lo e nzanchipvüi ji yakchia etena ekhyo tsüphov lithaka! 38 Ntiotssole ombo nzan jilona ntina ha e nkhotayiche to ana mmhona ntsia; Echüna lea, e küm na lea, lanben na lea, Potsüwoe esae thanpoe na lea, etho jiangna lea, enhünga yuta shina lea, n janhancho na lea, 39 omhawoe limha jina lea, oküpoe limha jina lea – liyingcho yolo ntiana ha Khrista yakchia Potsow nzan etelo lio jilona kvüthüngha e n khotayikhuk.
Potsow Tona Ombo Kyon to
1 Ana Khrista lona otsotso phyoala; Aiyo Khrista echi osi ana ejüng n phyo. Nthomon jina a nchümri lo vani ana otsotso nsanala to e hungpvüi tssoala. 2 Ana kvüthüng a nungra jo kvüta tsüphocho ato, to phyoa sana a kyon 3 a ejen oso motsünga kyon jiang tsükona! Onte nzan tsükona osi mmhonthukvü tsükona saliwo aiyo Potsow rhiyi-randanka ji kupi osi Khrista lona lea kontae a sithukle to randankhuka. 4 Onteno Israel kyonden. Potsow na ombo tsoeden onte kümthukvü onte tsachukcho, osi ombo pvütsson ji ejüthaka, ntsata vathaka, shikhfü ji pithaka, ntsa ekhüm ji osi phyochak jiang to onte pithaka. 5 Onteno motsüi thüngche jiang tsochenden osi oso lona phyotana shanchopvüi ji onte lona rocho. Topvü pono sayapvüi Potsow ji kümali mying thüngithuka! Amen. 6 Potsow phyochak jiang n penchehancho esüa ana phyoa mek; ntiotssole Israel lona chiyio jiang topvü otsotso tssoa na Potsow kyonden mek. 7 Abraham tsochen jiang topvü ombo ngaroden to ha mek, Potsow na Abraham ezocho, "Isaak yakchia erowo tsochen jianga ana a myingona echümchako tsochenden to tsav." 8 Ji yichak jo Potsow ngaroden to etsav jijo oso lona tathi buka to buko jiang tsa mek; 9 tolea ombo tsochen tsotso jiang jo ombo phyochak heto lio ji ephani na buko jiang: "Yuta epen jilo ana rovka osi Sarah na otsoe vamka." 10 Jitae mek. Ntiotssole Rebeka na opo tsüka, e motsüi Issak lona otsoe eni bukcho. 11-12 Tokhatola otsoe tsüka tae ethüngcheo jijo Potsow lüm erüng jika to ejüv tsükona. Potsow na heto ompvü ezocho, "Eramo jina nungo ji benkavka. Osi heto shi ji onte n vanthüng osi mmhom n mhom ntia n tssothüng na tssocho. Shijo Potsow na kvütoli ombona etsao jiang ethüngcheta sana ji ejüv tsükona; tolea kyon na ntio tssoasana ji n zetala. 13 Nthomotsü lona ha heto phyoala, "Ana Jakob jo nzansi Esau jo a tssakcho." 14 Tona eteno kvüto phyotavla, Potsow jo n tsanrük to alo? Jito mek. 15 Ntiotssole ombona Moses ezocho, "Ana ocho a nzanhunga sana ji ana nzam; osi ana ocho khonzam sana ji methakvüka." 16 Jitsükona olan taro kyon lüm erüng osi kyon tssothicho lona mek, tolea Potsow khonzan lona tssoala. 17 Ombona nthomotsü long Ejip mesao Pharaoh heto ezowo ji esüa, "Ana mesao ni kümthuko jijo thanpo tsükona mek, tolea a etho ji limhatsü lo nzüa yithukvü tsükona." 18 Jitsükona ombona kyon tsüka nzantio to tssohung na hojito tssoala, osi ombona lümbüm khüngthuk hungana khüngthukiala.
Potsow Lum Etsuk Tona Khonzan to
19 Jitsükona Ntena heto a ezokhuka, "Tona Potsow na ntioli kyon nlan yancheyiala? Ochona kvüthüng Potsow lüm erüng ji panlanchevla." 20 Khatola nino ochola, kyon shae tae, nina Potsow janlankhukcho ke ojenio? Liyingo chonphfü tsütsaelan jina liyingpvüi ji, "Nino ntiolyui heto a joyingcho la?" to ezokhukcho alo? 2l Phfüjoe jina ochon ji khi ombo lümcho ophfü jov, osi chonphfü ji khi motsünga jo oman tssüka jo-o, thanpo jo nzontsü echi to ejov jo ombo pono mekcho ke. 22 Potsow na hoji esüa otsotso tssocho to ombona ombo lüm etsuk ji khi ombo etho ji oponi chiyia ejü hungcho. Tokhatola ochoang jo ombo lüm etsuk jina monthuki esiv etüma licho sana jiang tsükona ombona elümoto sunga rümcho. 23 Osi ombona ombo pvütssona kvümoe ombo nzamo kyon ete ochoang pono epiv tssochyua methaki vacho sana hoji oponi chiyia hungthukcho. 24 Ntiotssole eteno ombona etsachuko kyonden. Ombona Jihudi kyon jiang yolona tae mekna pvüjipoe jiang yolona ha etsachukcho sana jiang. 25 Ombona Hosea kako lona heto phyo ji esüa: "A echi meko kyon jiang ana 'A kyonden' to tsavka. Jipo kvümoe ana n zancho sana ji 'Ana nzantso' to tsavka. 26 Meta kvülona onte ji, 'Nteno a kyonden mek.' to ezocho sana jilona onte ji eküm evamo Potsow tsoeden to tsav." 27 Osi Isaiah na Israel tsükona thenchoa phyoala: "Israel jiang ji jümang rani hajang tata mpa tssolea, wozanro tara tae shanchov; 28 ntiotssole OPVÜI na tsüsoa limhalo ntio tssov phyochak cho sana hoji tssov." 29 Isaiah na heto phyocho ha lia, "Thotsü OPVÜI jina ete tsoronichen tara tia enhyokae n vancho saliwo, ete ji Sodom esüa e kümthukvü osi eteno Gomorrah esüa tssothokvü."
Israel Tsükona Paul Randan
30 Tona etena shilona ntio zechetala? Pvüjipoe ochoang na Potsow thüngi elan lona shentakotav zia n vancho sana jiang na shenta lithaka, hoji shenta jijo longtsü lona tssochecho. 31 Tosi Potsow kyon Israel jo hoji to onte shentayio tüv shikhfü yanta vanathüng na hojitüv shikhfü n hungcho. 32 Ntio tsükona la? Ntiotssole ontena shentakota ji longtsü lona mekna onte elhi thüngoena yantacho. Hojitsükona onteno "Nshüphiphen lung" jilona onte nshüphicho. 33 Nthomotsü lona phyoala: "Zeta, Zion lo ana kyon jiang nshüphiphen olung chümala, onte ekhüngthuko longpvü. Tolea ochona ombo lo (Olung jilo) longtsüana ji kvüthüngha n yikrathuk."
piyikuka; khatola ontena engathe n lina chokatala. 3 Ontena Potsow na ntio lankawoe na ombo mhadungo elan kyon kümthuka sana ji n tsi, osi hoji lanka jilo ontena n rhowohan, tolea onte lankapo yanta vana. 4 Ntiotssole Khrista lona shikhfü jijo ochüm tssothaka, jitsükona ombolo longtsüi otsük akvü elan pithaka.
Shancho Jijo Topvü Echi
5 Shikhfü ji benphi Potsow mhadungo elan kyon etssov tsükona jo Moses na heto erancho: "Kyon ochona shikhfü ji benphikhuka sana jina eküm vam." 6 Tokhatola longtsü yakchia elan kyon ekümvü ji tsükona jo motsü lona heto phyoala: "Nibobo ochona Potsüwoe chungovla to ti enga." (Jijo Khrista sosi joyiv tsükona.) 7 Mekana, "Ochona lichungi rhowovla?" 'Jijo Khrista ji echü lona sosi yilam tsükona' to ti phyoa. 8 Ombona phyo jijo: "Oyi ji enhyana ni büngo osi ni lümbümo jüa." Hoji jo ena püngnoa vamo ji longtsü ji. 9 Hojijo nina Jisu ji OPVÜI to opon tssoa phyochaka osi Potsow na echü lona ombo kümlanthukcho to longtsüa tssona ni shanchov. 10 Ntiotssole kyon tsüka ji Potsow mhadungo elan kyon ekümvü jo longtsü yakchia tae tssocheta; osi hoji longtsü ji oponi chiyia phyochako jina e shanchoala. 11 Nthomotsü lona phyoala, "Ombo lo longtsüi ochina ha etho ejak liv mek." 12 Shijo kyon topvü tsükona phyocho, ntiotssole Jihudi jiang tona Greek jiang to ntia echümpota nli, ntiotssole topvü pono OPVÜI tsüka ji tae vana osi ombo nzan yana ombo tsaphio jiang topvü tssochyua mmhayiv tsükona methaki lia. 13 Ntiotssole, "OPVÜI mying ji tsaphii to etsa shanchov." 14 Khatola ontena ombo lo n longtsühan na kvütoli ombo mying tsaphivla? Ontena ombo tsükona yithen ji n zohan na kvütoli ombo longtsüvla. Püngnoe n van na ontena kvütoli ombo motsü zovla? 15 Osi onte yithenpvüi n vwothukvü jo kvütoli kyon püngnovla? Nthomotsü lona heto phyo ji esüa, "Yithen mmhom hanphi jiango kvüta mmhoncho ato!"1 6 Khatola topvüna yithen mmhom ji khichothakcho mek. Isaiah na phyoala, "OPVÜI, ochona e püngno yi engachola?" 17 Jitsükona longtsü jo yithenmhom ji ezoo jilona yiala osi ntio engae khicho sana jijo Khrista tsükona püngnoyi ji. 18 Tolea ana phyoala: Otsotso ontena püngoyi ji n zocho alo? ontena zothaka – ntiotssole nthomotsü lona phyoala: "Püngnoe jiang won jina limhatsü pyinga yithaka; osi onte yi jiangna limhachüm janthaka." 19 Elani ana phyoala: Ntonsito Israel na n ngathehancho alo? Moses na phyo shi engasa: "Ana nte khi jipo meko jiang pono nte mhyik-tssothukvüka; ana zhüva jipo jiang thüngi a kyon jiang lüm tsukthukvüka." 20 Isaiah na heto ephyov lüm etsson licho, A kyon ochoang na a n yancho sana jiangna a yanchecho; A ethümta n vamo kyon jiang thüngi ana chiocho." 21 Khatola Israel tsükona jo ombona phyoala, "Kyon ochoangna a yi n ngav, a ryulanchia sana jiang thüngi ana okhe yonchia onte khichov tsükona eng totona onte nhyakala."
Israel Pono Potsow Khonzan
1 Tona ana phyoala: Potsow na ombo kyon jiang khaki sicho alo? Mek! Anaha Israel kyon, Abraham tsochen osi Benjamin pvüji kyon. 2 Potsow na ombo kyon khaki sicho mek, nkolo na ombo kyonden to onte khichocho. Nthomotsü lo Elijah na Israel jiang nlan pia Potsow thüngi heto ezoji ntena n tsichoke: 3 "OPVÜI, ontena ni zenkhying jiang lüngthathaka osi ni thanphen jiang phiroe sithaka; A tae a enhyothaka osi ontena ana ha a lüngthav yantala." 4 Tole Potsow na ntio ombo janlanchola? "Ana a tsükona kyon wothüng tiying Baal ejüng potsow küpo n pyakthehan tüv valanchi lia." 5 Hoji esüa enhünga leha Potsow khonzan jina wozanro ethüngchei lia; 6 Osi ombo khonzan na tssocho tssona ntena elhi cho lo ndungkacho mek. Elhilo ndungkacho saliwo jijo kianzan mekcho tssov. 7 Tona ntiola? Israel na yana vamo ji ompvüna n hunghan; tolea ethüngcheo jiangna hoji hungthaka; osi enhyoe elio jiango Potsow etsa ji ngatheo kümthukthaka. 8 Nthomotsü na phyoala, "Potsow na onte yimthukthaka, etanana onte mhyik jiangna n hungwo osi eno jiang na n zowo kümthukthaka, nchüng tsüngono." 9 David na phyoala, "Onte tokhu tsoyuta jiangna onte süyathuki jilo ndankae onte khangshithokvü ka; onte ezüptoka osi onte ekhüngtokvüka! 10 Onte mhyik jiang jukthoki n hungwo kümi sithokvüka; osi Onte ji oha ehan na esan n liv ezüpa nkhfüa kümtokvüka." 11 Jisülo jo ana engacho: Tona Jihudi jiang jo otsotso n phanthilancheo ekhüngthakcho alo? Jito jo meknrüng! Ontena mmen tsso jina onte khi mhyik-tssotho kvü tsükona shanchov ji pvüjipoe jiang thüngi picho. 12 Jihudi mmen jina limha jilo mmha yithokcho osi omon lo onte joyio jina pvüjipoe jiang thüngi mmha tssochyua rothokcho. To tssona ontena onte topvü thenhyao kvüta mmha hansi yivla!
Pvüjipoe Jiang Shancho ji
13 Enhünga ana pvüjipoe jiang nte ezoala, osi ana pvüjipoe jiang thüngi wothung etssothüng jo ana etonandang elhi tssothaka. 14 Osi hoji hungi a jipo kyon Jihudi jiang ji mhyiktsso yakchia onte ejoma tia shanchwothukvü tsükona. 15 Ntiotssole onte khoe siwo ji yakchia limha lo Potsow ri jiang ji ombo okhümo kümcho. To tssona, onte ji khicholanvo kvüto tssovto! Hojijo echü lona ekümi yicho to tssov. 16 Hümri ovüngo jilo mpvüchoe Potsow pia tssona hümri totona Potsow echi, osi odung jilo oying ji Potsow pia tssona khero jiang ha ombo echi. 17 Oli elio olive dung ji khero ejoma nrhakchoe sithaka osi orae lio olive khero ejoma khi (onte pvüjipoeden) shüpkacho. Osi nte pvüjipoe jiango orae khero jiang esüa tüv, tolea enhungo nteha Jihudi jiang mmhom ji nte shümnhyala. 18 Khatola nteno hojiang khero jiang lona mmhonkata to kanchana onte ti zerüptava. Ntena ntio tsükona kangtsüv lichola? Nteno khero tae; ntena oying ji sayata mek - tolea oying jina nte sayatala. 19 Ntena phyokhuka, "A shüpkav tsükona khero jiang nrhaki sicho." 20 Hojijo otsotso. Ontena longtsü n lio jina odung jilo khero kümthaka, tolea nteno longtsüo jina ti kangtsütava; osi ntangshontava. 21 Potsow na tathi khero Jihudi jiang tia zümlanchi n vacho; tona ntioli hae nte vavla? 22 Zeta Potsow jo nzan ha lia osi okhe ha tsükshia, elungthako jiang tsükona okhe tsükshicho, osi nte thüngi jo nzan licho, ntena ombo nzan ji khichoa evanthüng nandang. Ntena hojito n tssoana, nteha nrhaki nte siv. 23 Otsotso tssoana Jihudi jiango ontena n longtsüv tae vansana kha elani shüpkalani khiv. Hoji Potsow na tssocheta. 24 Ntiotssle nte pvüijipoe jiango orae elio olive nte thathi chenkaphen ji lona khichoe oli elio olive nte tathi meko jilo nte shüpkacho, tolea Jihudi jiango khekafükao olive dung jiang esüa tüv. Jitsükona Jihudi jiango onte tathi olive dung jianglo shüpkalam jo kvütata larochola.
Topvü Pono Potsow Khonzan
25 Oshomden, mphoyi ntsa heto lia osi ana hoji nte ntsithuk hungala; hojina nte kangtsü lona nte shanchokhoka. Okhao tssoa pvüjipoe jiang topvü n rheyikhanthüng jo Israel jiangna kvütoli sana nochi-noyima vam. 26 Hoji süiti Israel topvü shanchov. Nthomotsü na phyoala, "Shanchopvüi ji Zion lona rov. Ombona Jakob thüngina ntho. Elhi jiang topvü khi siv. 27 Ana mmen topvü khi onte siyicho sülo heto ntsa vav." 28 Yithen mmhom püngno ji ontena n khicho ji yakchia Jihudi jiango Potsow riden kümcho, osi hoji yakchia nte eman tssochecho. Khatola Potsow na onte ethüngchecho osi onte motsüi jiang tsükona onte no ombo echi to vanala. 29 Ntiotssole ombona ocho tsae ombo yantso khi mmhayia sana jiang tsükona Potsow lümbüm n senphiv vanala. 30 Tolea nte pvüjipoe tsükonajo Potsow jancho n zov vancho, Jihudi jiuangna Potsow jancho n zo ji yakchia ntena Potsow khonzan ji hungthaka. 31 Hoji esüa ntena khonzan hungthako ji yakchia Jihudi jiangna enhungo Potsow jancho nzoala, hojitolyui onte ha Potsow khonzan ji hungi ekhiv tsükona. 32 Ntiotssole Potsow na ombo khonzan ji kyon topvü ejüv tsükona jancho n zo jilo rheyirathukcho.
Potsow Thüngi Thanthüng
33 Potsow ejüeli jo kvüta tsüphocho to! Ombo kichuk ntsinran jo kvüta jungchoto! Ombo methak jiang ochona erorokukchoto? Osi ochona ombo lanka jiang ntsikhokcho ato! 34 Nthomotsü lona phyoala, Kyon ochona OPVÜI nchümri ji ntsichola? Ochona ndungtssung ombo pikukchola? 35 Ochona kvüthüng ntio ombo pithakchola? Osi hojito ombona pilamo epvükae lichola?" 36 Ntiotssole topvü ombona joyingcho, osi topvü ji ombo yakchia licho osi ombo tsükona licho. Nchündkhon Potsow pvütsson tssothuka! Amen.
Potsow Benka Eküm
1 Jitsükona Ota-onyuden, Potso na e khonzana vamo ji tsükona nte tsük totona ekümthan, esüa ombo elhilo khochaki ntho osi ombona nte khichoyio tssoa pitale to nte ntssungala. Ntiotssole ntsa osi omon lona ombo ekhüm jo hoto. 2 Limha shi tssolan phyolan jianglo tiphfükatava; tolea nte nchümri jiang ntssachoe eküm totona dungphitava. Tona Potsow na ntio jo mmhom osi ntio jo khichokuko osi ntio jo benria to ombo lüm erüng lichosana ji ntena ntsiv. 3 Potsow na a pio khonzan ji tsükona ana nte otsük akvü thüngi ombobo mmhon ji khi tsüphoa nchüma ti kanchan yaktale to nte ezoala; jithüngo najo ntena emiroa nchümta, Potsow na otsük akvü longtsü kvüta kvüta nte pirae licho sana hoji etsüngchoe zeta vantava. 4 Kyontsük motsünga lo elhilan echümpo echümpo tsükona solan khosha khyinga. 5 Hoji esüa ete khosha khatola Khrista lona tssorhyui otsük motsüga tae, osi kijaena zitana ete otsük akvü solan motsüngtsüng elhi etssov ezikacho. 6 Otsük akvü kianzan kvüta e jancho sana ji ephan ete lo Potsow yantso echümpo echümpo likhana. Jitsükona etena ete yantso ephan ombo benkav lia. Yantso ji Potsow yi ephyov lo tssona ete longtsü kvüta sana ji ephan tsütsatava; 7 benka elhi tssona hojilo zajüngtava, püngnoe jina püngno thüngoe yantso ji tsütsav lia, 8 ochona oyam lüm etsson epiv yantso licho sana tsütsata; ochona oyam chinhyacheo yantso liana lungphya chinhyathuka. Ochona etho tsütsata sana jina kongtsünguv shikhfü, ochona oyam thüngi nzan ejüa sana jina longshia etssov lia. 9 Nzan jo shenthi tssov shikhfü. N mhon ji tssaksi mmhom ji rhümata. 10 Otsük akvü thüngi Khrista lona wopan esüa ota-onyu nzan ejütava; otsük akvü yikrachita lona thanpoe ji ovüngo tssothuka. U Nte chokalongshi ji ti monthuka, omon lo kümzakzak na vantava osi kongtsünga elhi tssotava. 12 Eyilo lio jilo longshitava, khangshi yutalo rümtava, yuta topvulo randan lo zajüngtava. 13 Potsow kyon jiang ethelan eli jilo piolontava; osi eyi-lankon jiang nkhümlhithukvü yuta akvülo methaka. 14 Nte khangshio jiang mmhayia, osi onte mmhayithukvü randania osi ti rhiyia. 15 Longshyuo jiang longshikyoa, ekyao jiang kya kyoa. 16 Nte nte lümbüm esütathuka; kanchana tinchüm na teri kümtava. Nteno kvüta nchümri licho to to yuta akvülo nchüma tivantava. 17 N mhon thung n mhon tipilana, kyon topvüna mmhona to zecheo elhichev tsükona zenkatava. 18 Kyon topvü thüngi mmhontae vam tsükona ni eto nandang ekhyo tssoa. 19 Ota-onyuden, nlilam ti yana tolea Potsow lüm etsuk jilo vanthuka. Nthomotsü lona phyoala, "Nlilam jijo a pono; OPVÜI na ana pilamka to phyoala." 20 Ni etssangkung ji wondon na tsothuka; ombo eratsüng na eyuo ntiosana pia; nina hojito tssona omboji runga yikrav. 21 N mhon ji khi ni ti khyothuka, jithüngona jo mmhom ji khi n mhon ji khyothuka.
Yansaron Jiang Thüngoe Elhi
1 Otsük akvü na ombo pomoe thosae jiang küpo vam lia, ntiotssole etho topvü Potsow thüngina yiala osi enhünga thosae shiango Potsow na sathukala. 2 Jitsükona ochona thosae jiang khalanchia sana Potsow na zikao ji khalanchiala, osi hoto etssoe jiang na ontebobo yitsso hansi yiala. 3 Etssophyo mmhom jiangna jo shikhfü tsütsae jiang n kyula, tolea münghan jiangna kyuala. Ntena etho esae kyon jiang ekyu lona tsanchoe nte vanhungalo? Elhi mmhom tssotava tona ombona nte mying thünguvka, 4 ntiotssole ombona ni mmhonthukvü Potsow elhi tssoala. Tolea nina n mhom tssocho jo ekyuv lithaka, ntiotssole ombona ezüp epi etho elio jijo thama mek. Ombo Potsow nri-i, n mhom etssoe ji pono nlipvüi. 5 Jitsükona Potsow lüm etsuk elio ji tsükona tae mekna, ni tssenche ji ephani na ha ombo yi enga thosae küpo vam lia. 6 Hoji tsükona ntena likotssen piala; ntiotssole thosae jiangna elhi tssoana Potsow tsükona tssoala. 7 Ntena epiv lio jiang topvü pitava, likotssen osi shishotssen, ekyu osi yikrachiv ocho etümcho sana ji pitava.
Otsük Akvü Thüngi Elhi
8 Nte yolo nzanta ji yaka ochi thüngiha ntia epvükae tivatava, ntiotssole hojito etsso kyon jina shikhfü ji benthukthaka. 9 Ntiotssole yizüng, "Nina efürama tibenphia, nina omüng ti-hana, nina tifüa, nina oyam echi ti-jüpona," shiang tona yizüng thanpo topvü tssotsüi heto lia: "Nina ni phinakishüm ji nibobo nzana esüa nzana." 10 Nina ni phinakishüm ji nzana tssona nina silyuo ombo n tssoyi, jitsükona oyam nzamo jijo shikhfü ji topvü benphiratala. 11 Ntena heto benphiwo jilona khota yuta ji janthaka to ntsitava, ntena eyip jilona phanthiv yuta; ntiotssole enhungo shancho ji etena longtsü benkao jithüng lona enhyankata tsathaka. 12 Emüng ji kvüta mekvü yirathaksi wondang ji janala. Etena emüng elhi jiang sitasi wondang ebensü jiang tsakatav lia. 13 Ete etsso-ephyo jiha wondangi evan jiang esüa tssov lia, ntena tsoha-yuhata kinota ti-vantava, lonsülonphyo osi pholashüla ti-lithuktava, khontarota osi myiktsso raki ti-lithuktava; 14 OPVÜI Jisu Khrista ji nte epensü tssotava, osi nte n benrio tathi ji rüngcho etssov ji esantava.
Ni Shom Oyi Titssoyia
1 Longtsülo etho terio kyon ji kyochia, khatola ombo thüngi ekhirantav tsükona mek. 2 Kyon tsükana ombo longtsü ephan olan topvü tsoa vankhoka; thanpoe jijo longtsü terio ji ephan lomosüdon tae tsoa vankhoka. 3 Ochona nti-nsa tsoa sana jina n tsowo kyon ji tizerüpa; osi n tsowo kyon jinaha etsowo kyon ji oyi ti tssoyia, ntiotssole omboha Potsow na ombo khichothaka. 4 Nino ochola kyon thanpoe phajae oyi tssoyivla? Ombo phanthialo ekhünga sanaji ezepvüi jo ombo OPVÜI ji vana. Osi ombona phanthiv, ntiotssole OPVÜI na hojito ombo tssothuk-khoka. 5 Kyon tsüka na tsüngon motsünga ji thanpo tsüngon jiang lona tsüphokata nchümala, thanpoe jina jo tsüngon topvü ji kheti tssothukala. Otsük akvü na ombo lümbümi na methakvü shikhfü. 6 Ochona echümpo tsüngon ji yikrachia sana ombo lümbümi OPVÜI vasi tssoala. Osi ochona tsoa sana jinaha lümbümi OPVÜI vasi tsoala, ntiotssole ombona Potsow montsso piala. Osi etsoyu saria tso jinaha lümbümi OPVÜI vasi hojito tssoala, ntiotssole ombona ha Potsow montso pia yikrachiala. 7 Ete ochinaha ombo tae tsükona ekum n vanala, osi ochinaha ombo tae tsükona n chüala. 8 Etena eküm vana tssona OPVÜI tsükona vanala osi etena chüa tssona jiha OPVÜI tsükona chüala. Tona eteno vanlea chülea OPVÜI echhi. 9 Shi tsükona Khrista na chüsi kümlancho, osi echüi jiang tona eküm jiang to pono OPVÜI ji kümcho. 10 Tona nino ntiolui ni shom ji oyi tssoyiala, osi nino ntiolui ni shom ji yikvüala? Ntiotssole ete topvü na Potsow yitsso vantsü ji mhadungo mangvü. 11 Nthomotsü lona phyoala, "OPVÜI na phyoala, ana eküm vamo ji tsükona, kyon otsük akvü na a mhadungo khoktsem ka. Osi otsük akvü na aiyo Potsow to a phyochakvü ka." 12 Jitsükona ete otsük akvü na Potsow thüngi ete ombobo elhi ji etssüngi ejüvka.
Ni Jenio ji Ti Ekhüngtoka
13 To tssona ete ete oyi tssotav ji esantava, jithüngo najo ntina ha ni shom ji ekhüngthuki mmen n tssothokvü tsükona ntangnshona. 14 Ana OPVÜI Jisu lo vamo ji yakchia a tsükona jo etsoyu kümoe ha n thocho n li to ana longtsüala; tokhatola ochona sana etsoyu ji n tssüng to nchüma tssona etsoyu jijo ombo tsükona jo n tssüng kümala. 15 Nina ntiosana tso jina ni jenio ji lümbümi khetsütoka tssona, tona nina ombo thüngi nzan lona mekna etssophyoala. Khrista na ocho tsükona chücho sana ji ni etsoyu na ti yesothuka! 16 Nina mmhona to zecheo jina thanpoe yolo n mhom phyota n yithokvü ntangnshona. 17 Potsow ekhüngyan jo etsov eyuv lo mek, tokhatola ntsa-ntho, noying osi nthomon ji thüngi na yio longshi ji. 18 Ochona hojito Potsow benkata sana jina Potsow emathao tssoala osi kyon naha chokao tssochetala. 19 To tssoana etena noying chiyitko osi nzontsü eküm mmhonkacheo elhi jiang yantavka. 20 Etsoyu yilan yakchia Potsow na ntio mmhom tssoe vacho sana ji ti yesothuka. Etsoyu topvü tsokhoka, tolea etsoyu kümoe yakchia oyam mmeni rheyitoka sana jitüv etsoyu jo n tsov na lia. 21 Nina oso, soko, mekana thanpo ntio tsoyua sana jina ni shom ji nshüphia tsona nina hojiang jo n tsoyuo ji mmhomo. 22 Ni kija engathei ji nilo vanthuka, ni tona Potsow to yutalo. Kyon ochona ombona elana to longtsükata tssoathüng ombobo lümbümi na nlan n pia sana ji mmhontsowo. 23 Khatola kyon ochona khatünga nchümsi ombona tsoa sana ombobo nlan piala, ntiotssole ombo elhi jijo longtsülo ndungakcho mek. Osi ocho elhi longtsü lo n dungkacho sana jijo mmen.
Nibobo Mekna oyam Emathatoka
1 Ete longtsü chüngchüng jiangna longtsü terio jiang kyochiv shikhfü, osi ete tsükona tae nchüma evam n li, 2 Ete otsük akvüna ombobo phinakishüm ema thatoko lanka yania nzontsü echhi mmhontokvü shikhfü. 3 Khrista na ha ombo emathao n yancho. Nthomotsü lona phyoala, "Nte yikvüo kyon jiang yikvü ji athüngi yicho." 4 Nkolo Nthomotsü lo ntio erancho sana jiango ete epüng nov tsükona osi ete khi motsü jilo epyankae hoji lona etho hungi eyilo epithokvü tsükona. 5 Etho epipvüi osi e chüngchüngtoko Potsow na Khrista Jisu lüm erüng ephanina lümbüm esütao etho nte pithoki, 6 ntena nchümri motsünga osi owon motsünga tssoe ete OPVÜI Jisu Khrista opo Potsow mying thüngtoka.
Pvüjipoe Jiang Tsükona Yithenmmhom
7 Khrista na nte khichothako ji esüa nte nte khichotae Potsow pvütssonthuka. 8 Ana phyoala, Potsow ntsa ji ejüv tsükona Khrista na Jihudi jiang nri-i küm cho, ovüngtssoa pyimtsümotsüi jiang Potsow phyochak jiang benthoki, 9 elani pvüjipoe jiang na Potsow khonzan tsükona Potsow thüngtokvü. Nthomotsü na heto phyoala, "Jitsükona ana pvüjipoe jiang yolona ni mying thünguka; Ana ni myingthüng khen ji dem." 10 Elani hetoha phyolancho: "pvüjipoeden, Potsow kyon jiang nzo longshitava!" 11 Elani phyoala, Pvüjipoeden, OPVÜI mying thüngtava; Kyon topvü na ombo thüngtoka. 12 Elani, Isaiah na phyoala, Jesse tsochen jina chiyiv, ombona pvüjipoe jiang salo rov, osi ontena onte eyilo ji ombolo vav." 13 Eyilo epipvüi, Potsow ntena longtsüo ji yakchia longshi osi eyilo nte pitoka; nthomon ji etho lona eyilo khi nte phyochüthoka. 14 A ota-onyuden, nteno nte mmhontsücho, osi ntsinran lan taro na nte pyingi nte ndungntssungta-thokvü ka to ana tito n lina longtsüala. 15 Khatola chiti jo ana nte nchümchelantokvü tsükona lüm tssoni nte eranthaka. Osi Potsow na kianzan apio kianzan kümoe na 16 pvüjipoe jiang thüngi Khrista Jisu nrü a tssothukcho sana ji khi ana nte eranala. Pvüjipoe jiang ji nthomon ji khi nthochetoki Potsow mhadungo khichothoko than tssothokvü tsükona Potsow yithenmmhom püngnov shijo a pvüti elhi. 17 Jitsükona Khrista Jisu echhi kümi ana Potsow elhi tssochewo ji tsükona a kanchanala. 18 Ana ephyov nchümwo pvüjipoe jiang jancho ezo jilo rheyitokvü tsükona Khrista na a yakchia ntio tssocho sanaji phyov. Ochona omon ji 19 etho lona ntio chethev osi emhukthav elhi theta elhi lona osi oyi lona tssocho sana hoji phyov. Osi hojijo ana Khrista yithen mmhom ji püngnoa Jerusalem lona benkae Illyricum jana benria thenchothaka. 20 Meta kvülo Khrista mying ji n zohancho sana jiang lo yithenmmhom ji püngnov tsükona a tümka lia. Kyon thanpoe ocho elhi loha n dungkav tsükona. 21 Nthomotsü lona phyocho, "Ombo tsükona ochina ha onte n zohamo jiang na hunguka, osi ochoangna n zohancho sana jiang na engathevka."
Paul na Rom lo Evov Ziala
22 Shi tsükona ana nte thüngi erov ji a khalanchicho. 23 Tolea enhungo meta shilo a elhi jo thakthaka, osi ana nte thüngi erov sunga zithako jina, 24 ana Spain metae ochena jithüng nte janthechivka. Ana ovüngtssoa nte janthechisi nte khi a nzanthoka a wohungala. 25 Enhünga jo ana Jerualemi potsow kyon jiang nzanchilo yiala. 26 Ntiotssole Macedonia tona Akhaia to ekhümkho jiang na Jerusalemi Potsow kyon jiang nzanchiv tsükona khyatav methakthaka. 27 Ontena onte bobo nchümchei methakcho, ntiotssole hoji jo onte elhi! Ntiotssole pvüjipoe jiang na Jihudi jianglo Potsow mmha jüwo ji chinhyae khia tssona onteha ejüeli thüngoe na Jihudi jiang ethelan ji bencheyiv lia. 28 Jitsükona orang khyacheo shi ana owo pisi elhi thakchithaka na ana Spain metae woathüng nte janthechivka. 29 Ana nte thüngi roana ana Khrista mmha ji benria hansi rov to ntsia. 30 Ota-onyuden, ete OPVÜI Jisu Khrista myingo na osi omon ji yantso nzan ji khi a ezüp lo akyochitava osi Potsow thüngi arandanitale to nte ntssungala. 31 Elani Judea lo n longtsüi jiang khe lona tsanchotokvü tsükona osi Jerusalemi echümporo tssoa yia vamo shi Potsow kyon jiangna a khichotokvü tsükona randantava. 32 To tssona osi Potsow lüm erüng lina ana ematha lümbüm hansi oro nte khümshüm ji khi a tsoyokathokvü tsükona rov. 33 Noying epipvüi Potsow ji nte topvü ndüngo vanthokvü ka. Amen.
Kija Monkhüm Yithen
1 Ana nte oyuloe Phoebe, Cenchrea ekhümkho lo elhi etssoe ji nte thüngi ehungpvüi tssoyiala. 2 Potsow kyonden etsso ejak esüa ompvü ji Khrista lona motsünga to khichotava, osi ompvü na nzan ntio ethev liana nzanchitava. Ompvü na kyon elümoto osi anaha to nzanchithaka. 3 Khrista Jisu lo khümshümta a nzo elhi etssoe Priscila ha Aquila oni thüngi a monkhüm ezotale; 4 Ontena onte eküm pia a shanchocho, ana montso onte piala, osi a tsükona tae mekna pvüjipoe ekhümkho jiang tsükona ha tssocho. 5 Okina sanrhyuta vamo ekhümkho ji thüngiha a monkhüm ezotava. A nzamo shom Epaenetus, Asia lo Khristan tssodemo jiha a monkhüm ezotava. 6 Mary ochona nte tsükona kongtsünga elhi tssocho sana jiha monkhüm pitava. 7 A jihudi shom Andronikas ha Junias oni a nzo evüngki vantawo jiang ha monkhüm apiyitava. Onteno wothung jiang yolo thüngche osi a vüngi na Khristan tssoracho. 8 OPVÜI khümshüm jilona anzamo shom Ampliatus ji monkhüm a piyitava. 9 E nzo Khrista elhi etssoe Urbanus jiha monkhüm apiyitava; elani a nzamo shom Stachys ha to. 10 Ojang tssothako osi Khristan jancho ezoe Apelles ji monkhüm pitava! Osi Aristobulus wopan jilo kyon topvü monkhümtava. 11 A Jihudi shom, Herodion jiha monkhümtava. Nakrisus wopan Khristan tssothako jiang ha salümtava. 12 OPVÜI elhilo lüm ethei Tryphaena ha Perses oni monkhümtava. 13 A nzamo shom Rafus, OPVÜI elhilo lüm ethei jiha monkhümtava, osi ombo oyo ocho a tsükona ha na oyo tssocho sana jiha monkhümtava. 14 Asyncritus. Phlegon, Hermus, Patrobas, Hermas tona onte ndüngo Khristan ota-onyu jiang to monkhümtava. 15 Philologus tona Julea, Nerues tona ombo oyilov ji, Olympus tona onte nzo evan Potsow kyon topvü monkhüm pitava. 16 Ntho lona eyulo ntsüpta onte monkhümtava. Khrista ekhümkho topvü na monkhüm nte hantokala.
Thakchi Püngnoyi
17 Ota-onyuden, ana nte ezoala, ochoangna ntena zothako püngnoyi n süo tüv püngnoe khotarüta chiyitoka kyon ekhenthuka sana jiang cheyata vantava, osi onte nkachotava. 18 Ntiotssole hojitüv kyon jiang na ete OPVÜI Jisu Khrista benkata mek, tolea onte wondon era jiang benkatala. Osi onte nchümri mmhon tona tssayimyingthüng yi to jiang khi oyam ejithechiala. 19 Ntena yithenmhom ji engathe vamo ji topvü na zothaka, Hoji tsükona elümoto a emathata, khatola ntena nte nchümri jiang mmhom lo tsütsatasi n mhom jilo jo n phankatao to nte tssoyiala. 20 Tona noying epipvüi Potsow na satan ji zakto nte jo kupi tssethechiv. Ete OPVÜI Jisu nzan ji nte thüngi lithokvü ka. 21 A nzo elhi etssoe Timothy, Lucius, Jason tona Sosipater a meta kyon ji tona monkhüm nte hantokala. 22 A Tertus, chiti shi eranpvüo jinaha Khrista lona monkhüm nte hantokala. 23 A tona ekhümkho totona osi sothepvüi Gaius naha to nte monkhümala. Yantsü jilo rangvae, Erastus naha nte monkhümala; Ojenio Quartus naha monkhüm nte hantokala. 24 Ete OPVÜI Jisu kianzan ji nte thüngi litokvü ka. Amen.
Thakchi Myingthüng Randan
25 Etena Potsow pvütssontoktavka! Jisu Khrista yakchia pvütsson ji nchümri elio Potsow ocjiona ana püngnowo yithenmmhom ji ephani na osi Jisu Khrista ehungpvüi pio ji ephani na chüngchünga nte phanthitokvü etho licho sana ji thüngi kümali pvütsson ji pitav ka. 26 Yithenmhom shijo echungren sunga ntio mphoe yingto vancho sana hoji wondangi chiyitoko ji. Kümali Potsow yi lona shi ji jipo topvü ntsithuk thaka, onte khi longtsüa osi engathethokvü tsükona. Zenkhying jiang na nthomotsü lona hojito phyocho. 27 Pvütsson ji Jisu Khrista yakchia kümali ntsikhamo Potsow echhi tssothuka! Amen.
1 Chiti shijo, Paul, Jisu Khrista na wothung tssothokvü potsow lüm erungo na tsao ji tona ojenio Sosthenes to thüngi na Korinthia lo Potsow ekhümkho ji thüngi eranala. 2 Korinthia lo ekhümkho Potsow ntho kyonden to etsao jiang topvü thüngi osi ochoang na Khrista Jisu lo khümtsüi ombo echhi kümthakcho sana jiang tona meta topvü lo kyon kvütata na ete pvüi osi nte pvüi Jisu Khrista khümta vancho sana jiang topvü to thüngi eranala. 3 Ete opo Potsow osi OPVÜI Jisu Khrista thüngi na yio noying osi kianzan ji lithokvü ka.
Khrista lo Mmha Jiang
4 Ana yuta topvü lo nte tsükona Potsow montso piala. Ombo kianzan Khrista Jisu yakchia nte pio ji tsükona ana montso ombo piala, 5 Ntiotssole ntena Khrista Jisu lo vamo ji yakchia nteno lanka topvu lona ombolo eliden nte kümthaka; khensan yisan osi ntsinran topvü phanhya. 6 Jisu Khrista yithenmhom ji ntelo vanjüngthako jina 7 ete topvü Jisu Khrista na oponi chiyia entsitokvü nhyakta evamo mmha jiang motsünga tia n khachona nte pithaka. 8 Ombona nteji ochüm jana chüngchünga nte vanthoki ete OPVÜI Jisu Khrista tsüngono jo nlan n lina chiyio tssoa nte kümtokvü. 9 Ombo tsoe Jisu Khrista ete pvüi ji khümshüm lo nte tsao longtsüka eli Potsow jilo longtsükav na lia.
Ekhümkho lo khosota
10 Ota-onyuden ete OPVÜI Jisu Khrista myingo na ana nte thüngi jonjiala; nte topvü na kheti motsünga ji phyotava, osi nte yolo chirota ti lithuka, topvüna nchümri osi tümka motsünga tssotava. 11 Ntiotssole ota-onyuden, ana Khloe wopan thüngi na nte khonta rota yivon ji zothaka. 12 Ntena heto phyotao jiang: Nte tsükana, "Aiyo Paul thüngoe" thanpoe jina, "Aiyo Apollo thüngoe" elani thanpoe jinaha "Aiyo Peter thüngoe" elani thanpoe jina, "Aiyo Khrista thüngoe" to phyotala. 13 Khrista ji chisothakcho alo? Nte tsükona Paul doncho alo? Ntena ombo phankae ekümo tssoa Paul myingo na bapticho alo? 14 Anajo krispus ha Gaius oni yaka ochia nte n baptiyio ji tsükona Potsow montsso piala. 15 Nte ochinaha a myingona bapticho to n phyoche. 16 Otsotso ka, ana Stephanas wopan ha baptiyicho, ji yaka jo ocho baptiyicho sana ana n tsi. 17 Khrista na baptiyilo a n rothuk, khatola Khrista donphen ji yichak ji n montokvü tsükona polaroe na püngnolo a rotokcho.
Khrista jo Potsow Etho osi Nchümri Ji
18 Shanchov jilo n jüv mona vamo jiang tsükona jo donphen ji motsü püngnov ji jo zhüva elhi, khatola shanchov jilo jüthako jiang tsükona jo potsow etho. 19 Ntho motsü lona heto phyoala, "Ana kichuk ejüi jiang nchümri ji moniv, osi nchümri eroe jiang nchümri ji ntia mekvü sitokvü'" 20 Nchümri eli ji kvüato? Shikhfü püngnoe ji kvüa to? Nchüng echungren shilo ntsintsoe jijo kvülo vancho ato? Potsow na limha ji nchümri ji zhüva yi kümthokthaka. 21 Potsow kyak lo na limha ji nchümri yakchia Potsow n tsicheo kümthokthaka. Tolea ena püngno zhüva yi to tsatao shi yakchia longtsüi jiang shanchov Potsow na methak licho. 22 Jihudi jiangna chethev chontala. Osi Greek jiangna ntsinran yantala, 23 khatola ena Khrista domo ji motsü püngnoala, hoji jo Jihudi jiang tsükona jo nshüphiphen long esüa tüv, osi pvüjipoe jiang tsükona jo zhüva yi. 24 Tolea Jihudi tssolea, Greek tssolea Potsow na etsae jiang tsükona jo ombo Khrista ocho Potsow etho osi nchümri sana ji. 25 Ntiotssole Potsow zhüva jo kyon ntsinran lona benrikata, osi Potsow nkhyo-nrung jo kyon etho lona tsükata. 26 Potsow na nte tsathüng jo nteno ntio sükhyingo vancho sana ji nchümi zetava, kyon nchümri epaninajo nte yolo ejomajo ntsinran osi ejoma na jo tsüphoe ntssoni evanden, khatola 27 Potsow na ntsinran jiang yikratokvü tsükona limha jina zhüva elhi esüa zecheo tüv ethüngchecho, osi etho ejüi tssoa vamo ji yikratokvü tsükona Potsow na etho n jüi ethüngchecho. 28 Limha jina zerüpa, yiratoka, ntia nchümri n li esüa vamo ji ethüngchecho, jijo limha jina opvü tssothuka vamo ji roe esiv tsükona. 29 Ji yichak jo kyon ochinaha Potsow mhadungo n kangtsüche to. 30 Tokhatola Potsow na Khrista lo nte hanrhyucho, osi Khrista ji Potsow na nte nchümri bukphen ji kümtokcho. Ombo lona ete ji ntho kyon e kümtokcho, e ntsachecho osi e rhanchocho elani etan cho ekümo evantoko jiha Potsow na. 31 Jitsükona nthomotsü lona phyo ji esüa, "Ochona sana kangtsü hungna, OPVÜI na ntio tssothakcho sana ji tsükona kangtsüthoka."
Doni Sio Khrista Ji Tsükona Püngno
1 Hoji tsükona ota-onyuden, Potsow mphoyi ntsaji thencholo ana nte thüngi roathüng aiyo owon oyilo osi ntsinran lo oyam lona mmhonkata to kanchana n ro. 2 Ana nte ndüngo vanathüng jo Jisu Khrista osi echümporo tssoa donpheno na ombo echüo ji to yaka thanpo jo n phyo to ana methakcho. 3 Jitsükoana ana nte thüngi roathüng ji yuta topvülo a etho mataroa a eneta akyua vancho, 4 osi ana püngnoathüng tssolea oyi nsanathüng lea oyam enayao yi osi ntsinran yi n tsütsa, khatola nte longtsü ji kyon ntsinranlo mekna Potos etholo ndungkathokvü tsükona Potsow mon ji etho ji oponi chiyia nte ejücho. 5 Tona nte longtsü jijo kyon nchümrilo ndungkacho mek, tolea Potsow etho jilo ndungkacho.
Potsow Ntsinran
6 Tolea omon lo ranbenthako jiang thüngi jo ana ntsinran yiha tsütsatala, khatola hojijo echungren shi ntsinran mek, mekana enhünga echungren shi sata evamo kvümoe sekae licho sana jiang nchümri mek. 7 Ana thenchowo ntsinran jijo Potsow mpho ntsinran kümoe epvütssonthokvü Potsow na benkadeni na mphoe vacho sana ji. 8 Echungren shi esaeden ochina ha hoji n gathe, ontena engathecho saliwo ontena pvütssomo OPVÜI ji dom mek, 9 tolea nthomotsü lona phyoala, "Nti mhyikna n hunghamo osi eno naha n zohamo, osi kyon ochina ha ntio tssov sana ji n chümjan hamo, kümoe ombo nzamo kyon jiang tsükona Potsow na methaki vayicho sana ji." 10 Tokhatola ete thüngi jo Potsow na omon ji yakchia omon mphoyi jiang e ntsithukcho. Ntio-tssole omon jina Potsow tümka ejungi mhpoe elio jiang mpato shyuchukala. 11 Kyon ji mon jina kyon ji echi topvü ntsikhanala, hoji esüa Potsow mon ji taena Potsow tsükona ntsiala. 12 Eteno limha ji mon ji khichocho mek, tolea Potsow na ntio khonzan epithakcho sana ji ntsiwo tssoa Potsow mon ji khichocho. 13 Hoji tsükona ena kyon ntsinran na püngnotao jiang n phyoala, tolea omon jina püngno ntsa yi ji phyoala; kvüto ena omon ntsayi jiang ji ochoangna omon ji ontelo lithakcho sana jiang thüngi eroroe ezoji esüa. 14 Osi ochoang omon ji n jücho sana jiang najo Potsow mon na epio yantso ji n khichoala, ombo tsükona jo hojiango zhüva yi esüa tüv osi ombona n gathetala, ntiotssole hojiang ji omon lona chyui zepam lio jina hojito tssoala. 15 Omon lo evan kyon jina topvü ojang tssoe zetala, tolea ombo ochinaha ojang ombo tssoe n zetala. 16 Motsü lona heto phyo ji esüa, "OPVÜI lümbüm ocho na ntsichola? Ochona ombo ndungntssungkhokchola?" Tolea eteno, Khrista lümbüm ji etelo lia.
Potsow Nriden
1 Jitsükona ota-onyuden, nteji omon lo ranbenthakcho esüa ana nte thüngi n janchecho, tolea limhalo kyonden osi Khrista longtsü lo ngaroden esüa nte jancho. 2 Ntena n tsoyukhok hamo jina ana etsoyu karakvü mekna shirojü na nte süphicho. Osi enhünga jana ntena hoji n khichokhok han; 3 ntiotssole nteno enhünga jana limha kyon ejoena vantapvü. Nte yolo mhyiktssota osi khontarota lioji yichak jo nteno kyonshae ejoe na vantapvü mekchoke? 4 Tsükana, "Aiyo Paul woro" to phyo, tsükana jo "Aiyo Apolo woro" to phyo, to tssona nteno limha kyon esüa etsso-ephyota mekchoke? 5 Apollos jo ochola? osi Paul jo ochola? Eiyo Potsow nriden tssoe longtsülo nte sokacho tae. Eniata na Potsow na e nkhentayio elhi ji tssotala, 6 Ana mojü ji yingcho, osi Apollos na hojilo ojü etssoncho, tolea Potsow na odung ji rankathukcho. 7 Jitsükona eyingpvüo jiha mek, ojü etssomo jiha mek, tolea Potsow ochona rankathokcho sana ji opvüo. 8 Eyingpvüo jiha ojü etssonpvüo ji woni kheti, khatola woniata na ombobo kongtsüngcho ephan Potsow na yantsov. 9 Ntiotssole eiyo Potsow elhilo jokim etssoeden tae, osi nteno Potsow pharili osi Potsow ki. 10 Potsow na epio kianzan ji yakchia ana kitssoe tssothimori esüa ana kimüng ji soyingcho; hojilo kyon thanpoe na tssokatala. Hojilo tssokae otsük akvü na ombobo ntangnshom lia;11 ntiotssole Potsow na soyingthako Jisu Khrista ji yaka kimüng thanpo ochinaha n soyingche. 12 Tolea ochona sana hoji poni shona, janti, tssentsülong tsütsakhoka osi ochona sana jo mavü osi lishü na tssokata tssona, 13 ombobo elhi ji chancheta vam, ntiotssole omi tsüngon chiroe kyon otsük akvü elhi jiang oponi chiyia ejüv. Osi otsük akvü elhi ji omi jina rungi zev. 14 Osi kyon tsüka kiji sunga vana tssona ombo yantsov 15 tolea oki ji rungi sia tssona ombo yantso n liv siv, khatola ombo omi yakchia chiyithakcho ejoena ombo shanchov. 16 Nteno Potsow khümphen ki osi Potsow mon ji ntelo vanala toji ntena tsentsita-chola? 17 Ochona Potsow khümphen kiji yesoa sana Potsow na ombo monthokvü, ntiotssole Potsow khümphen ki jo ntho osi nteno hoji khümphen ki jiang. 18 Ochia ombobo ti ejithechithuka. Nte yolo ochona echungren shi ephanina ntsinran to nchüma sana ombo ntsinrankata kümtokvü tsükona zhüvae kümtoka; 19 ntiotssle Potsow mhadungo jo limhaji ntsinran jo zhüva zhütük. Nthomotsü lona phyoala, "Ntsinran jiang ji onte kyak eli jina onte rhümav"; 20 elani phyoala, "OPVÜI na ntsinran jiang lümbüm ji ntsiyia osi hojiango otüp to ntsia." 21 Jitsükona kyon ochinaha ombona ntio tssochecho sana ji khi ti kanchanthuka; ntiotssole olan topvü nte echi. 22 Paul tssolea, Apollos tssolea, osi Cephas tssolea, Peter, mekana limha ji, osi echü tona eküm, yuta shi osi henasüi topvü nte echhi. 23 Tolea nteno Khrista echhi osi Khrista jo Potsow echhi.
Khrista na Wothungden
1 Eiyo Khrista phajaeden, Potsow mphoyi jiang hanphiv tsükona e nhyikacho to ntena e nchümiv lia. 2 longtsükao jiang jo enhikadung etssov e yiloyiala. 3 A tsükona jo ntena lea nzontsü yitssopheni na lea ojang tssoe a zelea a n wongkhyu. Ana a bobo tia ojang tssoe nze. 4 A lümbüm na n lan apicho ntia n li, khatola jina a ntsachev tüv ha n li. Ojang tssoe a zepvüijo OPVÜI vana. 5 Jitsükona yuta kokae lio ji jani OPVÜI na n rothuüng jo oyi ti tssotava. Emüngi mphoe lio jiang ha ombona wondangi chiyitokvü osi kyon nchümri jiangha, tümka jiangha oponi chiyitokvü. Hoji sülojo kyon otsük akvüna ombobo na mamo ji ephan Potsow na omying thüngiv. 6 Ota-onyuden, ana shiang hetopvüto Apollos eni lo ejyukae nte püngnothaka. Nte khi elo ejyukae, "Motsü shikhfü jiang ti vachina vana" to phyo ji nte engathe-thukhungala. Nte ochina ha tsüka thüngoe theta epyochesi tsüka jo zerüpa to n tssov shikhfü. 7 Ochona nte ocho jo thanpoe ji lona echümporo tssoa nte kümthukcho lichola? Ntena Potsow thüngina n hungcho ntio lichola? Ntena ethev elio jiang topvü hungthaka. To tssona ntena hungthako ji ntiolui yantso mekcho esüa kangtsüv lichola? 8 Ntena topvü lithaka osi nteno eli nte kümthaka! Ntena e n thev mesao kümrathakcho alo? Nte ji mesao nte kümi enaha nte nzo mesaoden kümcheo to ena kvüta n chümato. 9 A nchüm jo wothungden e shiang Potsow na wokhao tssoa limhalo kyontsü osi lanben na zeta vana nlan kyonden to chütokvü khochaki sicho esüa e kümthaka. 10 Khrista tsükona eyio zhüvaeden ekümthuka khatola nteno Khrista lona nchümri eli-iden! Eiyo n khyo-ntoeden khatola nteno etho ejüiden! Eiyo etssakn-kungden khatola nteno yikrachioden! 11 Enhünga shanlan shi jana eiyo wondon-eraeden osi mpensü tssona n liden, oyam ekhoesükphen osi eiyo khyuphirüphia evanden, 12 ebobo sangtsühga elhi etssoeden osi e rhiyirandankata na ena mmha randaniala; e khangshiana rümala, 13 osi e yikvüa na ena oyi enüngü khi janlanala. Eiyo limha shi zizo tüv; osi enhünga jana eiyo kyon zizo hankaphen! 14 Ana shi nte eramo shi jo nte yikrathokvü tsükona mek, tolea a nzamo ngaroden esüa nte ndungntsungu tsükona. 15 Ntiotssole Khrista lo nte nhyakyapvüi wothüng taro vanlea nte opo jo tsüka tae! Ntiotssole Khrista Jisu lona ana motsü mmhom ji nte püngnoe nte opo kümthaka. 16 Jitsükona ana nte thüngi jonjiala, a hungchotava. 17 Hoji tsükona ana nte thüngi Timothy rothukala. Ombo OPVÜI lona a nzamo osi longtsükao ngaro. Khrista lona a eküm lan jiang ana meta topvülo ekhümkho jiang lo püngno jiang ombona onte ezolamka. 18 Nte ochoang najo ana nte thüngi n rov tsayia kanchana etsso-ephyotala. 19 Tolea OPVÜI lüm na rüngna ana tsüsoa nte thüngi rovka; osi kanchamo jiangna ntio phyoa sana ji mekna ana onte etho jo kvütüv sana ji abobo yanchei zeyivka. 20 Potsow ekhüngyan jo oyi thüngoe mek, tolea etho thüngoe. 21 Ntio ji nte tssohungo tssov la? Ana nte thüngi rüpüm bensi rov alo; to alo nzan osi emiro etsso-ephyo lona rovla?
Ekhümkho lo Lonsülonphyo
1 Nte yolo lonsülonphyo lia to otsotso a yenjanthaka, n longtsüi osi pvüjipoe jiang yolo tia n lio etssakthav lonsülonphyo siluo. Ocho sana jo opo eloe (lothan) ji nzo vanala to zothaka! 2 Tona ntena kanchana vanchecho alo? Jithungo najo nungra na pyingi vantava, osi hojito elhi kyon jijo nte khümshüm ji lona phani sia. 3 Ana otsük na nte yolo n vanlea nte ndüngo vancho esüa omon lona jo nte yolo vana; osi kyon ochona ekhenthav elhi hetüv tssocho sana ji ana OPVÜI Jisü myingo na oyi tssoyithaka. 4 Ntena ndukta thüng osi ana omon lona nte yolo theta vanathüng OPVÜI etho ete lo lio ji khi, 5 ntena kyon mo ji tsük ji roe sitokvü tsükona tsüngrham ji khelo theyitav lia; tona OPVÜI tsüngon jilo ombo mon ji shanchov. 6 Ntena kanchamo jijo n mhon. Vümhi teriv jina kholung totona hungthukala to ntena n tsichoke? 7 Mmen vümhi ehen ji ethüngi sia tona nte ji totona kholung ethan tssovka. Otsotso zita na nte lo vümhi n jü. Ntiotssowole ete yakchi tokhu Khrista ji thanthaka. 8 Jitsükona ete tokhu hümri jianglo vümhi ehen jiang mekna, vümhi n theo hümri ntssüng-rünga ntsao ji thetavka. 9 A chiti jilona ana lonsülonphyoe kyon jiang nzo ti jokyimtale to nte erancho. 10 Ana limha shilo n longtsüi lonsülonphyoe jiang tsükona phyoa mek, epierae, efüi osi kisükhüm jiang n phyo, ntiotssole onte nkachov jo ntena limha shi lona tsanchokvü na lia, 11 Ana nte eramo jijo, ochona ojenio khilato ejansi lonsülonhpyoe, tajo elüm, kisükhüm, oyam echi erüi, kinoe mekana efüi tssoa sana ntena ombo thüngi ti khümshümtale to. Hojitüv kyon thüngi jo nzo lea khukthei ti tsoyutava. 12-13 Aphoe evan kyon jiang oyi tssoyiv a elhi ntio lichola? Potsow na oyi onte tssoyiv. Tolea nte khümshümlo vanthako jiang ntena oyi n tssoyivke? Motsü lona phyoji esüa, "Kyon n mhon jijo nte yolo na phani sia."
Longtsüi Jiang Yolo Khentsoyitssota
1 Nte nte yolo oyi yanchetathüng potsow kyon jiang khi nsüngtokvü mekna n longtsüi jiang yitsopheni na oyi tssohung nte yolo ocho sana vancho alo? 2 Potsow kyon jiangna limha ji oyi tssoyiv to ntena ntsicho ke? Ntena limhaji oyi tssoyiv tssona oyi teriv jiang tia n süngtachechoke? 3 Etena lanben jiang oyi tssoyiv to ntena ntsicho alo? 4 Tona ete eng akvü eküm tsükona ekhümkho na hapoe vamo jiang khi oyi tssotuktake? 5 Nte ji elümoto yikra lia! Nte ota-onyu Khristan yolo pangta chiyiathüng nsüngkhoka tüv nchümri eli nte khümshümlo ocho sana jo vanrüngu tssov. 6 Tole jito mekna longtsüi yolo nchyu eni pangtale sütasi n longtsüi yitssopheni na owo n longtsüi jiang khi nte nsüngitokala! 7 Ntena nte yolo khentsso-yitssota lio jina nte n tssojan phyojan ji ejüala. Jithüngo najo ntiolui nlan hansi lea n vantala? mekana oyam retsophen osi kyakthechiphen lea ntioli n kümtala? 8 Jithüng jo ntena nte nte retsoreyuta n tsanrük elhi tssotala! 9 Nthanri jiangna jo Potsow ekhüngyan nhungche to ji ntena mmhona ntsia. Ntebobo ti-ejithechitana chetüngtava, lonsülon-phyoeden osi kisükhümden, rama elhi etssoeden, osi ethi silyuo lonsülonphyo lo rhowoeden, 10 efüiden, kinozhüvaeden mekana oyam echi erüiden osi oyam ejithechiden to - shiang ochinaha ha Potsow ekhüngyan hungu meka. 11 Nte ochoang sana jo hetüv ekümo vancho khatola nte mmen jiang lona nte epyochecho osi nthonochecho, osi Potsow lo nte khochakthukcho; elani OPVÜI Jisu mying osi ete Potsow mon ji yakchia Potsow mhadungo elan kyon nte kümthukcho.
Nte tsük Jiango Potsow Pvütssonthokvü Tsütsatava
12 Ochona sana, "A tsükona jo olan topvü a etancho" to phyokhoka, khatola topvü ji ni tsükona oman elio tae mek. Olan topvü a etancho tssokhoka to ana phyokhoka, khatola ana nti nriha kümi a n vanhungala. 13 Ochona sana heto phyov, "Etsoyu jijo mman tsükona, osi mman jijo etsoyu ji tsükona." Hoka-khatola woniata Potsow na montokvü. otsük jijo lonsülonphyo tsükona mek khatola OPVÜI benkav tsükona, osi OPVÜI na otsük ji tsükona piala. 14 Potsow na ete OPVÜI ji echü lona kümlanthokcho osi eteha ombo etho lona ekümlanthokvü. 15 Nte tsük jiango Khrista tsük jilo solan motsüngtsüng to ntena ntsichoke? Tona ana Khrista tsüko solan ji khi lonsülonphyoe thüngi jünatavke? Jito n tssoche. 16 Mekana hojito tssoana oniji otsük motsünga kümi siala to ntena n tsichoke? Nthomotsü lona polaroa heto phyoala, "Eni ji motsünga kümvü." 17 Khatola ochona OPVÜI lo shenta vana sana onio omon lona motsünga tssoala. 18 Lonsülonphyo mmen saritava, mmen thanpo kyon na tsso jiangna jo ombo tsük ji n rhakala, khatola ochona lonsülonphyo mmen tssoa sana ombo tsük ji panlana mmen tssoala. 19 Nte tsük jijo Potsow na nte pio Nthomon ji vanphen, khümphen ki to ntena ntsitachoke? Nteno nte echi mek tolea Potsow echi. 20 Nteno oman khi nte shithaka, jitsükona nte tsük ji khi Potsow pvütssonthuktava.
Yanpiyanthan Tsükona
1 Enhungo ntena a erantao mpho yi ji yilan tsükona jo heto: Eboe na eloe soa n van na vanwo ji mmhomo. 2 Khatola lonsülonphyo n mhom lirao ji ntang tsükona eboe otsük akvü na ombo eloe vanthokvü lia. Ji esüa eloe otsük akvü na ompvü orapvü vanthoka. 3 Orapvü jina engh ji ethelan jiang bencheyia, osi engh jinaha ompvü orapvü thüngi hojito tssov lia. 4 Engh jina ompvü tsük ji pono etho n li, tolea orapvü ji etho lia. Ji esüa orapvü jiha ombo tsük ji pono etho n li, tolea engh ji etho lia. 5 Ntena randan yuta tsükona esüngaro nkachotasi nduktalamo engatheta licho yakajo ponilan n pitav ti sitava. Hojito tssona ntebobo tanglanchiv n tssochewo satan ejiphiv jilona tsanchochev. 6 Ana heto nte ezowo jijo yizüng esüa mek, tolea zümlanchi lia nte ezoala. 7 Kyon topvü na a esüa tssowo to ana nte nchümiala, khatola otsük akvü na kija Potsow yantso likhana; tsüka hetowoe, thanpoe jijo lankapowoe to. 8 Yanpiyanthan n tssohamo jiang tona emiden to jiangna a esüa onte poti lea vantawo ji mmhomo to ana ezoala. 9 Tolea ontepopo n sayakhoka tssona yanpithan tssotakhoka; ochungi na eyilokhünga runga vanthungo na jo yanpithan tsso ji mmhomo. 10 Yanpithan tssothako jiang tsükona ana OPVÜI yizüng heto onte piala: Engh tsüka na orapvü thüngi na n khotav shikhfü osi orapvü jina ha engh ji sichiv n li; 11 tolea engh ochona sana orapvü sichia tssona ti yanpilanthuka to mekana orapvü thüngi senjümtalanthuka; osi orapvü naha ombo engh ji n shichev shikhfü. 12 Thanpoe jiang thüngi jo OPVÜI yi meka khatola ana heto ezoala, khristian eboe ochona sana n longtsüi eloe soa vana tssona osi ompvü na ombo thüngi vanhunga tssona ombona ompvü ti sichia. 13 Elani eloe ochona sana n longtsüi orapvü thüngi vana tssona osi ombona ompvü thüngi vanhunga tssona ompvüna orapvü ti sichia. 14 Nlongtsüi orapvü jiha engh ji yakchia OPVÜI echi, osi n longtsüi engh jiha orapvü ji yakchia OPVÜI echi, to n tssowo nte ngaro jiango n longtsüiden tssov. Khatola onteno Potsow echi. 15 Tolea n longtsüi jina longtsüi ji thüngina yihung na yithuka. Hotüv yi lo jo eboe ji lea eloe ji lea onte etancho. Khatola Potsow na nte longtsüiden jo noying lona evam nte tsachokthaka. 16 Ni ji longtsü elio engh mekana orapvüi tssona nina ni tepfü ji n shanchoche to kvütoli phyokukchola?
Potsow na Ni Tsao Jito Vana
17 Tolea otsük akvüna OPVÜI thüngina yantso hungwo ji osi Potsow na ombo tsao ji ephan eküm vanthuka. Ana püngnotsük shi ekhümkho akvü lo piala. 18 Tsena muchung kyon jina OPVÜI etsa jilo yicho alo? Ombo tsenio chekav ji ti mphothuka; tsena mvüchung mekna tüv tsacho alo? Ombo ti tsenthuka. 19 Tsenlea n tsen lea hoji na ntia mek, tolea Potsow yizüng jiang evav ji ethev lia. 20 Otsük akvü kvütüv sükhying lona ombo tsacho sana hoji to vanthuka. 21 Ni tsathüng jo nino nri tssoa vancho alo? Ti wonkhyua; nina etancho evan mpato tssocholea ni nri eküm ji tsütsata. 22 Kyon ocho nri eküm vanathüng tsacho sana ombo OPVÜI na vachio kyon; ji esüa ocho etancho ekümo vanathüng tsacho sana ombo Khrista nri. 23 Nteno oman theta nte shithaka. Kyon nri ti kümtava. 24 Ota-onyuden, otsük akvü na ntio eküm lona ombo tsacho sana hoji to Potsow thüngi khümshümta vanthuka.
Yanpithan N tssohan osi Emi Jiang Tsükona
25 Yanpithan n tssohamo jiang tsükona ntena a eramo ji yilan jo: OPVÜI thüngi na yizüng yicho ana n li, tolea OPVÜI kianzan jilona longtsükae esüa ana a zeche ji pyoala. 26 Enhünga ezüp shiang nchümi zena, kyon na to vanphen ji vanlea mmhona. 27 Nina engh vancho alo? Tona khotae vam ti yana. Yanpithan n tssohancho alo? Tona eloe soa evam tiyana. Nina yanpithan tssona mmen tssocho mek, n yanpihan loroe jina yanpi na mmen tssocho mek. 28 Tolea ochoang na yanpithan tssoana limha lo ezüp phyingrüng lio jina yanpithan tssoe ezüpa n vanwo to ana nte nchümiala. 29 Ota-onyuden, ana nte ezov nchümo jijo: yuta n lithaka; enhünga na benkae engh evan jiangna n vancho esüa; 30 ekyae jiang na ontena n nungracho esüa tssotava, longshiden jiangna n mathacho esüa tssotava, tsütsailan eshio jiangna ontena ntia n licho esüa tssotava; 31 limha shilo shishoe jiang ha hojito n tssocho esüa tssotava, ntiotssole enhünga limha shi tona hoji lo licho topvü nsunguv yakchia yikham. 32 Ntena wonkhyu n lina vantawo to ana nte tssoyiala. Yanpithan n tssoe ji jo OPVÜI elhi tsükona wonkhyuala, ntiotssole ombona OPVÜI emathatok hungala. 33 Tolea yanpithan etssoe jijo limha ji tsükona wonkhyuala, osi ombo engh ji emathatok hungala; 34 Osi ombo lümbüm eshüm. Yanpithan n tssohan loroe jiang jo OPVÜI tsükona wonkhyuala. Ntiotssole Ompvü na otsük na ha omon lona ha OPVÜI echi tssohungala. Khatola yanpithako eloe jijo limha tsükona wonkhyuala, ntiotssole ompvüna orapvüi emathatok hungala. 35 Ana shiang shi nte ezo jijo nte tsükona oman elio tüv phyoala, rikata nte khalanchiv tsükona mek, tolea OPVÜI lo elan osi lümbüm senjümi valanchi n lina khochaki OPVÜI nte benkatokvü tsükona. 36 Ochona sana yanpiyanthan etssov lojilongatae vasi yanpiyanthan n tssosa to phyota vanathüng loroe ji thüngi n mhona etssophyala to nchüm na osi rüma n vankhok to tssona, ombo lüm erüng lio ji esüa yanpiyanthan tssotatoka. Hojilo ntia mmen nli. 37 Tolea kyon tsükana lümbüm sayakuka, ombo lo n jüngthe tüv n lina ombo tsük rüng sayakuk na, ombona loroe ombo lendung ji thüngi yanpithan n tssona vamo ji mmhomo. 38 Jitsükona kyon ochona yanpithan tssoana jiha mmhona khatola ochona yanpithan n tssona vana sana hoji mmhomo. 39 Orapvü ji evanthüng jo engh ji orapvü na sayatala; küma etancholo mek tolea orapvü ji chüana ompvü etancho ompvü chokao thüngi yanpithuka, khatola Khristian thüngi tae yanpithuka. 40 Khatola ompvüna n yanpina to vanwo hoji ompvü emathao tssov. Hoji jo a zeche ephan phyoala osi Potsow mon na a pyingcho to ana longtsüala.
Kisükhüm lo Etsoyu Theo Jiang
1 Kisü ekhüm lo theo etsoyu jiang tsükona jo ntena phyo ji esüa, "Ete topvü na ntsijana." Tolea hotüv ntsinran jijo oyam lümbüm bungkachithuko ntsinran; tolea nzan jina rontachetala. 2 Ocho na ntiona ntsia to nchüma sana ombo na ntsiv lio jiang tia n ntsihan tssoala. 3 Khatola ochona Potsow nzana sana jijo Potsow na ombo ntsiala. 4 Jitsükona, kisükhüm lo theo etsoyu etsov ji tsükona jo, limha lo jo kisü jijo ntia mek to etena ntsia; Elani Potsow motsünga yaka thanpo n van to ntsia. 5 Opvüiden osi potsoden tüngto vamo ji esüa limha lo osi potsüwoe "Potsow" to tsacho elümoto mpa vanlea, 6 ete tsükona jo Potsow motsünga tae vana, opo ocho lona olan topvü chiyicho sana osi ocho tsükona etena eküm vanasana ji; osi OPVÜI tsüka, Jisu Khrista ocho yakchia olan topvü chiyicho sana osi ocho yakchia ete topvü na eküm vana sana ji. 7 Khatola kyon topvüna hoji ntsa ntsinran ji n li. Ntiotssole kyon ejoma jo kisü tsütsaphen tsso jina, enhünga lea ontena etsoyu tssotao jiang ji kisükhüm lo thecho esüa nchümkatala osi onte nchümri ji enirowo jina etsoyu jina onte tachiala to nchümala. 8 Etsoyu jina Potsow lo mmhonkata eshenkatoka mek; etena n tsole e püpcho mek, osi tsole jina ha emancho ha mek. 9 Heto nte elan lio shina longtsü eniro jiang khatüngi mmeni n rheyio tssoa ntangshontava. 10 Nte nchümri eliden na kisü ekhümki rhowo tsoyua vancho nchümri eniroe tüv na nte hungwo, ombo nchümri ji enirowo jina lüm tssona nchümi kisükhüm etsoyu jiang tsoyuhunga nyivke? 11 Toana nte elan ji yakchia kyon tsüka n ranpenhamo ocho tsükona Khri sta na chücho sana ji ni ntsinran jina montokala. 12 Ntena kvüthüng shi esüa nte oshom nchümri eniro jiang tssatssoyia mmen tssotokana Khrista thüngi mmen tssoala. 13 Jitsükona etsoyu lona a shom ji mmen tssotoka tssona a otaonyu ji mmeni n rheyio tssoa ana etsoyu n tsso-nrüngu lia.
Wothung Tsüka ji Elhi osi Elan Jiang
1 Aiyo etancho eli kyon mekchoke? Aiyo wothung mekchoke? Ana ete OPVÜI Jisu n hunghanchoke? Ana OPVÜI elhi tsso ji lona nte chiyicho mekchoke? 2 A ji thanpoe jiang na mpa wothung esüa a n khanhyalea nte tsükona jo aiyo wothung tsüka; ana OPVÜI wothung tsso ji ntena OPVÜI lo shenta vamo jina ejüala. 3 Ochoang na ojang tssoe a zehunga na jiang thüngi a ephyov jo shi: 4 ena elhi man tsoyu elan n lichoke? 5 Ena ha wothung thanpoe jiang tona OPVÜI ojenio jiha Peter oni esüa e tsoeni jiang sosi yentsav elan n lichoke? 6 Barnabas eni tae na mman tsükona elhi tssov ke? 7 Ochona sana ombo kijae na ethüng ezia rasan elhi tssoa alo? Ochona sana jününgrothi n tsov sia alo? Ochona sana tssiden rhüki si shirojü khi n yualo? 8 Ana shiang shi kyon etho lona phyoa mek, ntiotssole Moses shikhfü ji lona ha heto phyoala. 9 Moses shikhfü lo heto erani lia, "Litsen mangsü jina elhi tssoathüng emen ti mmania." Potsow na mangsü tsükona wonkhyucho alo? 10 Ombo otsotso e tsükona phyoa mekchoke? Hoji jo otsotso nte tsükona erancho, ntiotssole lirhon jinaha osi liri jinaha ombo elhiman ehunguv eyilo lia elhi etssov lia. 11 Ena ntelo omon thüngoe mojü yingcho. Jisülo nte thüngina limhalo e ethelan khiv jijo ntio sana tsüphov alo? 12 Thanpoe jiangna nte eyiloyia tssona enaha jilona kyongkata elan n lichoke? Toaha ena hoji elan ji rünga n van. Ena Khrista yithen mmhom ji n khanlanchio tssoa olan topvü rüma yithaka. 13 Khümpheni pvüti elhi etssoe jiangna khümpheni na etsoyu hungala osi thanpheni elhi tssoe jiangna othan jiang lo onte ejan ji khiala to ntena n tsichoke? 14 Ji esüa ochoang na yithenmhom ji thenchoa woa sana jiang ha yithenmhom jilona onte eküm süphio tüv OPVÜI na yizüng picho. 15 Khatola aiyo shiang elan ji rüngi n khi, osi hojiang rüngi khiv tsükona shi nte erana mek, hoto tssothüng jo chüi lea siv! Ana lümtsa nchümo shi ochina ha ejüng kümi n sitokche! 16 Ana yithenmhom ji püngno na hoji khi ana kancham n li. Hoji jo aiyo a enhyikacho. Ana yithenmhom ji n püngnocho sawo aiyo kvüta enungrathav tssov ato! 17 Ana a lüm erüngona hoji elhi ji tssoa saliwo jokheman eyilov khatola OPVÜI thüngina a enhyikacho osi a elhi a jancho to ana tssoala. 18 Tona a chorotssen a yantso jo ntiola? Jijo yithenmhom ji kiaman püngnocheo ji, osi a elan jokheman rünga n vana püngnocheo ji. 19 Aiyo ochi nri ha meka, khatola Khrista woro etonandang rankathukvü tsükona abobo kyon topvü nri kümala. 20 Jihudi jiang khophiv tsükona Jihudi thüngi jo anaha Jihudi esüa tssoala, ontena Jihudi shikhfü ji küpo vamo ji tsükona Jihudi küpo evan meklea shikhfü ji küpo evan tssoala. 21 Hoji esüa, pvüjipoe jiang thüngi elhi tssoana shikhfü ji pomoe evan pvüjipoe jiang khophithokvü tsükona ana shikhfü ji pomoe evan ha kümala. Heto tsso ji yakchia ana Potsow jancho nzoala to mek. Tolea aiyo Khrista shikhfü ji küpo. 22 Longtsülo n khyo-ntoe jiang khophitokvü tsükona onte yolo jo ana n khyo-ntoe kümala, jijo kvütoli sana onte ejoma tia shanchov tsükona olan tarolo onte esüa ana kümala. 23 Yithenmhom jilo mmha ejüo ji a janhyatokvü tsükona ana elhi tsso jiang topvü yithenmhom ji tsükona tssoala. 24 Yungtalo rhowoe topvü na yungtalea tsüka taena yantso hungwo ji ntena n tsichoke? Jitsükona ntena yantso ji ehungo tssoa yungtava. 25 Merangta khfürilo rhowoe topvüna olan taro lo ontebobo sayakhok liala. Tolea onte yantso jo mmikae esio therapha tae; ete yantso jo kümali eküm ji. 26 Jitsükona ana tümka lia yungala. Kyon tsüka na ezhüi eyophia esüa ana ejüng chenphia mek. 27 Ana a tsük ji khangria tsütsae sayata khyungtoka vanala. Ana oyam püngno si a bobo yantso ji n khyae esiv jo n mhomo ji tsükona.
Kisü Jiang Tsükona Ntangshon
1 Ota-onyuden, ete motsüi ochoang na Moses sürücho sana jiang thüngi kvüto tssocho sana ana nte nchümchetok hungala. Onte topvü eluk jina socho osi onte topvü na tsanchoa jümang emyom ji pankae chiyicho. 2 Osi eluk tona jümang to yakchia onte topvü na baptia Moses sürüi kümracho. 3 Onte topvü na tathi n tsoyuphen omon etsoyu ji tsotacho, 4 osi onte topvü tathi n yuphen yutacho. Ntiotssole ontena tathi meko longpvü onte phanphia vamo ji thüngina hungi yutacho. Hoji longpvü jijo Khrista. 5 Tolea onte topvüna Potsow n lümo tssocheyicho, jitsükona Potsow na onte thüngi n mathao ji yakchia onte echü müng taena lijüng ji pyingcho. 6 Shiang hetopvü ete tsükona chekaphen, onte esüa n mhom ti tssotale to e ntangshonthukvü tsükona, osi onte ejoma na kisü khümo ji esüa kisükhüm ti tssotava. Nthomotsü lona, "Kyon jiangna tsoyutav tsükona khokthetacho osi sharitav phanthitacho" to phyo ji esüa, 7 osi onte ejoma na kisü khümo ji esüa kisükhüm ti tssotava. Nthomotsü lona, "Kyon jiang na tsoyutav tsükona khokthetacho, tole lonsülonphyoeden osi tsoyuzhüvaeden kümcho" to phyo ji esüa. 8 Osi onte ejomae na lonsülonphyo n lamo tssotasi eng-a taena wothüng mekyu ethüm chüo ji esüa etena tssotav shikhfü nli. 9 Onte ejomae na OPVÜI ojang tssotasi nrü n mhon na njüi chüthokrao ji esüa etena tssotav meka. 10 Onte ejoma na phyochophyoritasi chüthuk-pvüi Lanben jina onte monthuko ji esüa ti tssotava. 11 Shiang hetopvü oyam na zechoe ekhio ontelo tssocho, osi hojiang ji khi ete e ntangshontokvü tsükona erani evayicho. Ntiotssole echungren shina tsüngon wokhao jiang vanjana vanthako ji tsükona. 12 Jitsükona ochona zajüngi vana to nchüma sana ombo n khüngtokvü tsükona ntangshontoka. 13 Ntena ejyuerana evamo ojang shiang topvü nzontsü pono eyio jiang tüv tae. Tokhatola Potsow na ombo echümchak ji vav osi ntena chüngchünga n vankhoko osi nto tüv jang jo nte npi; tolea ojang yiathüng lea rümchokchio etho piv osi tsancholari nte vayiv. 14 Ji tsükona a nzamo oshomden, kisü tikhümtanrünga. 15 Tssenche ziche eli kyonden thüngi esüa ana nte ezoala; ana ntio phyoa na ntena chei zetava. 16 Etena randankata OPVÜI tokhü lo tsütsao opvü ji tsükona Potsow montsso piathüng osi etena hoji lona yuathüng Khrista ejen jilo shümnhyata mekchoke? Osi etena hümri mpvüroe hoji tsotathüng Khrista tsük ji shümta mekchoke? 17 Hümri pyak ji motsünga tsso ji esüa ete khosha lea otsük motsünga; ntiotssole ete topvü na hümri motsünga ji shümtala. 18 Jihudi jiang longtsü ji zetava; ontena thamo ji nzo tssoe tsotao ji yakchia Potsow ocho ontena thancho sana ji thüngi khümshümta mekchoke? 19 (Tona aiyo ntio phyoala? Kisükhüm lo theo etsoyu osi ejen jijo etsoyusha jilona echümpokacho alo? Osi kisü jijo kisü taekha ntio lona sana tsükacho alo? ) 20 Mek, ana phyoa vamo shijo kisükhüm jiangna thamo jijo tsüngrham thüngi thanala, tolea Potsow thüngi mek. Hoji tsükona tsüngrham jiang thüngi nte a n khümshümtathuk-hungala. 21 Ntena OPVÜI pvü tona tsüngrham pvü to onita n yuche, osi ntena OPVÜI etsoyu tona tsüngrham etsoyu to woniata n shümtache. 22 Etena OPVÜI ji omhyik rakithuk hungalo? Eteno ombo lona etho jükacho alo? 23 "Eteno lanka topvü e chonchicho" to phyoala. Otsotso, khatola olan topvü ete tsükona mmhoncho mek. Ntena, "Lanka topvü e chonchicho" to phyoala, khatola, topvü na e nzanchia mek. 24 Kyon ochina ha ombo kija mmhom tae ti yana, tolea thanpoe echi mmhomo yania. 25 Ntena yenpheni ntio yenta sana ji woewolan ti lina tsotava. 26 Ntho motsü lona phyo ji esüa, "Liko osi jilo ntio liana topvü OPVÜI echi." 27 N longtsüi tsüka na tsoyulo ni sothele, ni rhowohungna ntio ni piana woewolan ti lina tsoa. 28 Tolea ochona sana, "Shijo khümpheni thancho to ni ezona, hoji ti tsoa, ochona hoto ni ezocho sana ji tsükona osi lüm n püko ji tsükona – 29 ni mekna ombo lüm n püko ji ana phyoala. Ntena phyoala, "Etancho a epio ji ntioli oyam nchümri na a tanglanchiv la? 30 Ana a etsoyu ji tsükona Potsow montsso pia etsoyu ji shümta na ana montsso epio etsoyu ji khi a phyophivke?" Hoji lo a janlan jo: 31 Ntena tsolea, yulea, thanpo elhi tssolea, topvü ji Potsow pvütsson tsükona tssotava." 32 Ana a kija eman n yan tolea onte topvü shanchotukvü tsükona topvü echi yana kyon topvü emathatoko ji esüa nteha, 33 Jihudi jiang, Greek jiang osi Potsow ekhümkho ji nshüphiphen ti tssotava.
Khümathüng Kvüri Eyukvü Yilan
1 Ana Khrista zechoe khiato ntenaha a zechotava. 2 Ntena a n mhechowo jina osi püngno yi jiang ana nte ezowo ji esüa benphitao ji tsükona ana nte mying thüngala. 3 Tolea ana heto nte ntsithuk hungala, eboe otsük akvü kvüri ji Khrista, eloe ji kvüri ji eboe, osi Khrista kvüri jijo Potsow. 4 Eboe ochona randana osi Potsow yi phyoathüng kvüri eyuka na ombo kvüri Khrista ji n yikrachiala. 5 Eloe ochona randana osi Potsow yi phyoathüng ompvü kvüri n yukasana ompvü kvüri orapvü ji n yikrachiala; osi hoji yakchia nthae eloe kvüri tssüi ehamo ji woni echümpota n liala. 6 Eloena ompvü kvüri n yuka tssona ompvü tssan ji tssüi sithuka, osi otssan tssüi siv ompvü yikrana eyuki hanthuka. 7 Eboe na kvüri eyukvü n li, ntiotssole ombona Potsow kisü osi pvütsson ji hungthukala; khatola eloe yo eboe pvütsson ejüala 8 Ntiotssole eboe jo eloe lona chiyicho mek, tolea eloe jo eboe lona chiyicho. 9 Elani eboe ji eloe tsükona joyingcho mek, tolea eboe tsükona eloe ji joyingcho. 10 Jitsükona lanben jiangna ha mmhona zecheo tssoa, eloe jina kvüri eyuki hansi ompvü pono etho elio jijo orapvü etho to ejüa. 11 Khatola OPVÜI lona jo eloe na eboe ji n thena etancho evamo mek, ji esüa eboe jinaha eloe ji n thena etancho evamo mek. 12 Ntio tssole eloe ji eboe lona khicheo ji esüa, eboe ji eloe lona roala; khatola topvü ji Potsow thüngi na. 13 Ntebobo zi zetava, eloe na nzontsü ekhüm yuta lo kvüri n yukvü Potsow thüngi randam elan lihana. 14 Eboe na otssan siphoa hae hancho jo ombobo n yikrachiala to tathi shikhfü lona ha n lichoke? 15 Tolea eloena otssan siphoa hae hanna tssona, hoji jo ompvü pyon mmhom ji hoji. Ompvü tssan sipho jina ompvü eyukthukvü tsükona ompvü picho. 16 Ochona sana shi tsükona ekhiranhunga tssona ana phyoala, ena tssolea, osi Potsow ekhümkho jina tssolea ekhüm yuta lo tsükona shikhfü thanpo n li.
Opvü Tokhu ji
17 Ana heto lanso nte piathüng nte n thanthüng tolea nte elanchoyiala, ntiotssole ntena khümo sanrhyutathung mmhom thung jo n mhom ji ekyongo tssochetala. 18 Ovüngtssoa jo, ntena sanrhyuathüng nte yolo khirankhiri jüa ana zoala, osi hoji hoto tssov to ana ha longtsüala. 19 (Nte yolo khosorüsota lio ji otsotso tssokhuka, ntiotssole etena elan lo evamo kyon jiang chekatav tsükona echümpota lichev.) 20 Khatola ntena sanrhyutana OPVÜI tokhu ji tsota mek. 21 Tolea nte topvü na ombobo etsoyu tssotasi ejoma jo khangtsüng, osi ejoma jo kinotsüng to tssoatala. 22 Nteno okina n tsoyutachecho ke? Nteno Potsow ekhümkho ji nyimchochia yantsae jiang yikrathokake? Aiyo ntio nte ezovla? Ana nte thanthünguv alo? Shi yilano jo nte n thanthüngche! 23 Ana nte pio püngnoyi jijo OPVÜI thüngina yicho: OPVÜI Jisu na ombo rhümao zümo jilo hümri khi 24 Potsow montsso pisi mpvüroe bensi phyocho, "Shijo a tsük nte tsükona pio ji. Ntena a nchümchev tsükona shi tssotava." 25 Ji esüa tsotasi sülo opvü jiha tsakae bensi phyocho, "Opvü shi jo ntsata ethani a ejen na methako ji, Ntena shilona eyu akvü a nchümcheta shi benphitava." 26 Ntiotssole ntena hümri shi tsoa opvü shilo na eyu akvüto OPVÜI erov ji n janthüng jo ombo chüo ji ehungpvüi tssoe ejüala. 27 Jitsükona ochoangna n tümvü hümri ji tsoa OPVÜI pvü jilona yua sana OPVÜI tsük osi ejen ji tachia mmen tsso jina n lan. 28 Hoji tsükona otsük akvüna hümri ombo ejan n tsothüng osi opvü jilo na n yuthüng ombobo lümbüm ji jani zethuka. 29 Ntiotssole tsoa osi yuo kyon jina OPVÜI tsük ji yichak ji nchetheta tssona, ombo na tsoa, yuo ji yakchia ombobo n lanthukala. 30 Shi tsükona nte yolo n khyo-ntoe osi ejak-erae elüm vanra, osi khosha chürathaka. 31 Etena etebobo elamo lona ojang tssoe zeta vana tssona Potsow yitsso jilo e n rheyi. 32 Tolea eteno OPVÜI na ojang e tssoe elanchithako jina eteno limha ji nzo n lan e n pilan; 33 jitsükona a ota-onyuden, ntena OPVÜI tokhu ji tsoyutav sanrhyuta na nte ji nhyaktava. 34 Ochona sana wontona tssona ombo kina tsosi rotoka, to tssona ntena sanrhyutathüng Potsow na nlan nte epio tüv n tssoche. Thanpo yilan jiang tsükona jo ana roathüng ti nte ezovka.
Nthomon ji Thüngina Yantso
1 Ota-onyuden, omon thüngoe yantso tsükona jo, ana ntsa ji nte a ntsithuk hungala. 2 N longtsüi tssoa vanathüng jo nte ji lanka motsünga lona meklea motsünga lona jo kisü echü jiang thüngoe nte süsi yicho to ntena ntsia. 3 Jitsükona ana heto nte engathethukala, Potsow mon jina sophi kyon ochina ha, "Jisu rheiyia!" to n phyoche, elani Nthomon jina ntssungcho yaka ochina na, "Jisu jo OPVÜI" to n phyochakche. 4 Omon yantso olan olan lia, khatola epipvüo mon jijo motsünga. 5 Benka elhi olan elüm lia khatola jiang topvü na OPVÜI motsünga ji benka elhi etssov tsükona. 6 Tssothimori echümpo echümpo lira, khatola Potsow tsüka jina elhilan echümpo etssov piala, 7 Omon etho hungwo jiang topvü nzontsü mmhonkathukvü piala. 8 Kyon tsüka thüngi jo Potsow na omon ji yakchia nchümri lia oyi nsam picho osi thanpoe ji thüngi jo ntsinranyi nsam picho. 9 Omontsük jina thanpoe thüngi jo longtsü picho, Omontsük jina thanpoe ji thüngi jo emiyiwo etho picho. 10 Thanpoe thüngi jo chethemothev elhi etssov, thanpoe ji thüngi jo Potsow yi püngnov, ejomae thüngi jo omon jiang ntan-mhon ntsiv to picho, ejomae thüngi jo n tsiyi nsancheo etho picho, thanpoe ji thüngi jo n tsiyi jiang khophicheo etho picho; 11 Shiang hetopvü omon tsükana ochona otsük akvü thüngi olan olan khi ombo lüm erüng ephanina jantayia sana ji elhi.
Otsük Motsünga lo Solan Khosha
12 Kyon tsük ji solan elüm tssotsüi motsünga kümthoko ji esüa, osi solan khoshao topvü tssoe otsük motsünga tae kümthoko ji esüa Khrista loha hojito motsünga. 13 Ntiotssole ete ji Jihudi lea Greekden lea osi phajaeden lea, etancho evanden lea, etena omon motsünga lona baptio jilona ete topvü otsük motsünga kümcho osi omon motsünga e yuthukcho. 14 Kyontsük jo solan motsünga tae mek, khosha, solan khosha jüala. 15 Ojo jina, "Aiyo okhe mek küma otsük jilo a n jü" to phyole otsük jilo ombo n thenhya tüv n li. 16 Eno jina, "Aiyo omhyik ji mek küma to phyole otsük jilo ombo n thenhya tüv n li. 17 Otsük totona omhyik saliwo, ntiona zovla? Elani totona eno saliwo, orhüm zophen jo kvüi tssovla? 18 Jitsükona Potsow na solan jiang ombona elan zecheo ji ephan heto benricho. 19 Onte topvü ji solan motsünga tae saliwo otsük jo kvü tssovla? 20 Heto solan khosha tssolea otsük jo motsünga tae. 21 Omhyik jina okhe ji, "Ana ni ethev n li" to n zoche, elani kvüri jina ojo jiang thüngi, "Ana nte ethev n li" to n zoche. 22 Mek, otsotso tssoana ethelan n lio solan to zecheo jiang ethev elio; 23 osi etena otsüko solan opvü mek to nchümo jiang ekyongo nküma vanthukala; etena meria n hungkao solan jiang ntangshomo tssoala, 24 osi etena meria hungkao jiango tata n wonkhyutala. Tolea Potsow na otsük ji soyingtsücho osi solan kvüwoe yikrachi n picho sana jilo jo yikrachi tsüphokao theyicho. 25 Hoji jo solan jiang lo khosorüsota n lithukna onte ntangshontathukvü tsükona. 26 Solan motsünga ephyov tssoana solan topvü na hoji nzo ezüpala; solan motsünga omying thüngina solan topvüna hoji nzo longshyutala. 27 Hoji esüa nte topvü Khrista tsük jilo, osi otsük akvü hoji lo solanden. 28 Osi Potsow na ekhümkho jilo ovüngo ji wothungden, enio ji zenkhyingden, ethümo ji thangshi epiden, jisülo jo chethev elhi etssoe jiang, jisülo jo emiyivlo omon yantso jiang, nzanchi elhi etssoe jiang, yansa eron lo etho pio jiang, osi yisanlan thanpo nsanthio jiang. 29 Onte topvü wothungden alo? , onte topvü zenkhyingden alo? Onte topvü thangshi epiden alo? Topvü na chethev elhi tssoa alo? 30 Topvü na emiyiv omon etho licho alo? Topvü na yisanpo nsana alo? Topvü na oyi khophia alo? 31 Hoji tsükona yantso opvütso jianglo lümbüm thetava. Hojiang pomoe lanka mmhonkao ji ana nte ejüvka.
Nzan
1 Ana küma kyon yisanlan topvü nsanchelea osi lanben yi mpato nsanlea, alo nzan n lia tssona kongkonguv won eshokao ji esüa, mekana yonjak pyapiro süyangtao won ji esüa tae. 2 Ana Potsow yi eloni ephyov mmha lilea, osi mpho yi osi ntsinran topvü engathe lea, ana phonglan jiang senphikhuko tssoa longtsü lilea, alo nzan n lina aiyo ntia mek. 3 Ana ntio liana topvü yantsae jiang tsotoka ezirae silea, osi a tsük oso ji rungi esiv thanlea, alo nzan n lina a tajo ntia n li. 4 Nzan jo erum toa, osi nzanchiala; nzan lo mhyiktsso raki n jü, nzan na n kangtsüala; 5 nzan na tajo n lümala osi kanchana n tssophyoala, n tümo elhi n tsso, ombo lanka benche n yan, khetsüa n chümala, n mhomo jiang zi n vatala; 6 ntha elhi jiang n tssayiala, khatola ntsa jilo longshiala. 7 Nzan na longtsü ji mhechoe n siala; olan topvü lo samyanala, topvü lo longtsükatala, topvülo eyilokatala, topvülo rümchukchiala. 8 Nzan jo kümali, Potsow yithenmhom lira khatola jiang topvü ochüm tssov; yisanpo nsanthio yantso lia, khatola jiang ha ochüm tssotokvü; ntsinran lira, tolea jiangha yakchia yi siv. 9 Ntiotssole ete ntsinran yantso osi yithen jiangjo chiso tae. 10 Khatola benritsowo ji janthakana ete n tssochyu jiang monkhani siv. 11 A nungothüng jo a wonsan yisan, nchümri osi matangmari jiang nünghori ejoena tssoa rocho; enhungo eranküm a kümthako jina nünghori etssophyo jiang ana sithaka. 12 Enhüngajo etena mhachanpheni esüa monrena hungala; khatola jithüng jo omha omha tsentav. Enhünga a ntsinran jo n benri; khatola jithüng jo ana benria ntsiv – Potsow na ntsirao ji esüa ntsiv. 13 Jitsükona olan ethüm shijo vanjünga liv: longtsü, eyilo, nzan; khatola onte yolo tsüphotso jijo nzan.
Omon Yantso Tsükona Elani Tara
1 Nte tümka jo OPVÜI nzan ji tssotoktava; osi omon yantso ji yantava, echümporo tssoa Potsow yithen ephyov lo mmha ji. 2 Ochona yisanpoe na nsana na ombona kyon thüngi mek na Potsow thüngi nsanala, ntiotssole ochina ha ombo n ngathe. Ombona omon etho yakchia mpho yi nsanala. 3 Khatola ochona Potsow yi phyoa sana jina nzanchi yi, lüm tssonkayio osi lüm emiyiwo yi kyon thüngi nsanala. 4 Ochona yisanpo nsana na ombobo nzanchiala, ochona Potsow yi nsana sana ekhümkho ji nzanchiala. 5 Ana nte topvü yinsapo nte nsanthuk hunga, khatola opvü tssoa jo Potsow yi nte a nsanthuk hungala; khophipvüi vani ekhümkho ji nzanchia engathethuki mmhonkathukcho yaka jo yisanpo nsanchelea Potsow yithen ephyoe ji tsüphowo. 6 Jitsükona oshomden, ana nte thüngi oro yisanpoe na nte püngnowo, ana ntena n ngathekhoko yina mekana rünyo yi phyoe nte nzanchicho yaka kvütoli nte nzanchivla? 7 Eküm n jüwo tsütsaelan philyulyu osi khfükying jiang ha hoji esüa tüv. Hojiang khfüathüng owon n merük ka tssona kvütoli onte won ji chethevla? 8 Osi tatara jina owon n merükvü khfüwo ochona chethei ritssolo ewov methakvüla? 9 Ji esüa ntena yisanpoe na nsamo ji n merükna ochona engathev la? Nino ezhüi nsanchia esüa tssov. 10 Ana nchümala, limha lo wonlan n khacheo lia, tolea motsünga tia yichak n licho n jü. 11 Jitsükona, ana owon ji yichak ji n tsia tssona, nsanpvüo jijo ana jo yiponsan esüa ombo tsayiv, osi nsanpvüi jina ha hoto a tssoyiv. 12 Jitsükona nteha omon yantso nte jüpona tssona ntiona ekhümkho ji mmhonkata sana jiang ekhyo tssov shikhfü. 13 Jitsükona ochona yinsanpoe na nsana na hoji khophicheo etho tsükona ha randanthuka. 14 Ntiotssole ana yinsanpoe na randana na a mon jina randanala, khatola a lümbüm na jo n tsi. 15 Tona kvüto tssovla? Ana omon lona randam shikhfü, khatola a lümbüm na ha randam shikhfü, ana omon lona ethüngkhen dem shikhfü, khatola a lümbüm na ha ethüngkhen dem shikhfü. 16 Ntiotssole nina omon lona Potsow montsso pia randanwo okho jilo kyonshae jüwo jina nina ntio phyoa sana ji n tsiv jo kvütoli ni montsso epi jilo 'Amen' to phyovla? 17 Potsow lo ni montsso epi randan ji elümoto mmhonkhuka, tolea kyon thanpoe jijo n zanchiche. 18 Ana nte topvü lo kyongkata yinsapo nsamo ji tsükona Potsow montsso piala. 19 Khatola ekhümki na jo yisanpoe na oyam na ntsina oyi wothüng nsamo ji thüngi najo oyam na engathewo tssoa yitsüng mungo nsamvü ji a chokao. 20 Ota-onyuden, nte nchümri ji ngaroden esüa ti tssotava. Tolea n-mhom ji thüngoe jo ngaroden esüa tssotava, khatola nte nchümri lo ranbenthakcho esüa tssotava. 21 Ntho motsü lona phyoala, "Ana yisanpoe kyon khi a kyon shiang thüngi janthukvüka to OPVÜI na phyoala. Osi metapoe kyon menfü-nli khi janthukvüka, tolea ontena a engayiv mek." 22 Jitsükona yisanpoe na nsamo jijo longtsüi jiang tsükona mek, n longtsüi jiang tsükona chekaphen, khatola motsü püngno jijo n longtsüi jiang tsükona mek, longtsüi jiang tsükona. 23 Ekhümkho kyon topvü etssirhyui otsük akvü na yisanpo nsanta vanle, jithüng n longtsüi tona kyonshae tona rhorowo ontena, "Nteno zhüvatala" to n phyovke? 24 Khatola otsük akvüna Potsow yithen phyowo, kyon shae mekana n longtsüi jina rhorosi ombo na zo yi jiangna ombo mmen jiang ntsi nochoe junga nchüma yiv, 25 osi ombo lümbüm chungi jüwo jiang wondangi chiyirathukvü. Tona ombona nkhok tseni Potsow khüma, "Otsotso nte yolo Potsow vana!" to phyov.
Ekhümki Selangotüng
26 Tona kvüto tssovla, ota-onyuden, Ntena sanrhyuta na tsüka na ethüngkhen, yichüng ephyov, tsükana jo püngo yi osi Potsow thüngina hungtok, yisanpo osi hojiang khophiv tsükona to methaki lithuka; khatola shiang topvü okho ji mmhonkao tsükona tae tssov shikhfü. 27 Yisanpoe nsan yana otsük eni mekana kyungchona otsük ethüm nsanthuka, osi chungta nsanthuksi kyon tsüka na khophithuka. 28 Osi khophipvüi n vana tssona yisanpoe nsan jina okho jilo jo jükrüpi vansi ombobo Potsow thüngi nsanthuka. 29 Ochoang na Potsow thüngi na yithen hancho sana, otsük eni mekana ethüm nsanthuksi thanpoe jiang khi onte yi jiang füi zeyithuka; 30 Tsüka jina nsana vanathüng thanpoe khukta evan thüngi hungthuk yia tssona ovüngo jina jükrüpi sia. 31 Topvü na engathei topvü lümbüm tssonkayiv tsükona ntena tsük tsük na Potsow yi ephyov yuta hunguv. 32 Ochoangna zenkhyingyi nsam yantso licho sana jiang jo Potsow yi Püngnoe jiang saya küpo tssov shikhfü, 33 ntiotssole Potsow jo hama hari Potsow mek, tolea longtsüi jiang topvü tsükona mmyanta osi. noying Potsow. 34 Potsow ekhümkho jiang topvülo tssoji esüa ekhümkho jilo eloe jiango jükrüpi vanthuka, ntiotssole onteno Jihudi shikhfü ephani na oyi n santhukala. Potsow kyonden okho topvü lo hoto benphitava. Shikhfü lona ha phyo ji esüa ontena sülani vam shikhfü. 35 Ontena ntio sana ntsihunga tssona oki na onte rapvüi jiang engathuka, ntiotssole eloe jiangna khümpheni na oyi nsam jo yikra lia. 36 Ntena Potsow yithen ji nte lona benkae yicho tsayita alo? Mekana nte thüngi tae yicho to nchümta alo? 37 Kyon ochona sana ombobo ji Potsow yithen ehan osi ombolo omon yantso lia to ombobo nchüma sana, ana nte eramo shi jo OPVÜI thüngi na yizüng yicho to ntsi khithuka. 38 Ochona shi n ziphia sana ombo ha ti ziphia. 39 Jitsükona a shomden, Potsow yithen ephyov chokatava, yisanpo nsam jiha ti khana. 40 Khatola olan topvü ntssüng-rünga osi nsünga tssotava.
Khrista Kümchelamo ji
1 Oshomden, ana ntio yithen mmhom nte püngnocho sana osi ntena hoji khichoe nte longtsü chüngchünga vancho sana ji yichak jo ntio sana ji ana nte nchümchethuk hungala. Kvümoe ana püngno chosana ji. 2 Hoji yithen yakchia nte shanchothaka, ji yichak jo, ana nte püngno ji ephan tssona osi ntena hoji chekata longtsücho tssona to. 3 Ana ntio kvüto khichocho sana osi kvüta opvü tssothukcho sana ji esüa ana nte ezocho: jijo Nthomotsü lo erani lio ji esüa Khrista na ete mmen tsükona chücho; 4 Ombo shothecho, osi Nthomotsü lo lio ji esüa tsüngon ethüm sülo ombo kümchelanthukcho; 5 ombona Peter hungthukcho osi wothung taro eni jiangha hungthukcho. 6 Jisülo ombona echunga tae na ombo phankae nzo mungo pomoe jiangha ejücho osi jiang yolo ejoma chülea ekyongo jo eküm vana. 7 Jisülo ombona James hungthukcho osi jisülo jo wothung topvu hungthukcho. 8 Okhao tssoa choroa n bentso esüa a hetüv mpato ombona a hungthukcho. 9 Ntiotssole aiyo wothung topvü yolo teritsowo ji osi aiyo wothung to etsav tia a n tüm, ntiotssole ana Potsow ekhümkho ji khangshicho. 10 Tokhatola aiyo ntio a kümthakcho sana jijo Potsow kianzan jina osi ombona a pithako kianzan jijo oman n lio mek. Otsotso tssoa na wothung topvü yolo a ekyongo elhi tssothaka, khatola a popo mek, Potsow kianzan jina a lona tssocho. n Jitsükona ana püngno lea, onte thüngina yicho tssolea, hoji jo e püngno yi ji osi ntena ntio longtsücho sana ji.
Ete kümchelan ji
12 Enhungo ena Khrista ji echü lona kümchelanthukcho to püngnothakle kvütoli nte yolo ejoma na echüi jiang kümchelan n li to püngnota wotala? 13 Echüi jiang kümchelamvü ji n liowo Khrista ji echü lona n kümchelanthukcho tssov; 14 osi Khrista ji n kümchelantoko ena püngno ji ntia oman n li, osi nte longtsü jiha ntia oman n-liv tssov. 15 Elani, Potsow na Khrista kümchelantokcho to ena püngnowo ji ejüng to ephyoitala; khatola echüi jiang nkümlanthuka tssona ombona Khrista ji n kümchelanthokcho tssov. 16 Ntiotsole echüi jiang n kümchelanthokcho tssoa na, Khrista ha n kümchelantokcho tssov. 17 Osi Khrista ji nkümchelanthokcho tssoa tssona nte longtsü ji otüp tssov osi nteno enhünga jana mmeni vantapvü tssov. 18 Jito tssona Khrista lona chüthako jiang ha kümali monthakcho tssov. 19 Khrista lo ete eyilo ji ete eküm shi elithüng tsükona tae saliwo eteno limha shilo e n bentso ji tssov. 20" Tolea ntsa jijo, Khrista ji echü lona kümchelanthokthaka. Hoji yakchia echüi jiang ha kümchelanthokvü toji ntsaka lithaka. 21 Kyon tsüka lona echü ji limhalo rheyio ji esüa kyon tsüka lona echüi jiang kümchelantoko ji rheyicho. 22 Adam lona kyon topvü chüo ji esüa Khrista lona topvü kümchelantokvü, ntena Khrista lo vamo ji yakchia. 23 Kümchelan ji ombobo yuta ebenlo tsov, osi chekav esüa Khrista na vüngu, osi Khrista na roa na ombo woro jiang, 24 jisülo jo ochüm ji roe ombona yansaron topvü osi etho topvü monthukthakana ombona Ekhüngyan ji opo Potsow khelo theyiv. 25 Ntiotssole Potsow na Khrista ri jiang topvü ombo jo kupi n thechithüng jo Khrista na sav, 26 osi wokhao tssoa monthoko ri jijo echü ji tssov. 27 Ntho motsü ephan jo "Potsow na olan topvü ombo jo kupi tssothukcho." Olan topvü to phyo jilo Potsow jo n jü. 28 Ntiotssole hojiang ji Potsow jo kupi thechiyipvüi ji jo Potsow, khatola olan topvü otsoe ji küpo tsso ji esüa otsoe jiha Potsow küpo, Potsow ochona olan topvü Khrista küpo vanthokcho sana jina topvü pono sav. 29 Echü kümchelan ji n licho sawo echü edüngo jiang baptiyio kyon jiang ji ntio oman lichola? ochoang na sana phyo ji esüa, echüi jiang n kümchelannrüngtoka saliwo ntioli nteno echüi tsükona onte baptiyiv lichola? 30 Ntio lyui eteno shanlan akvü ekyutsi na ehazhüchola? 31 Khrista lona ana nte thüngi khümshüm motsünga tsso jina lüm tsüphoa ana otsotso nte ezo jina aiyo enga akvü chüala. 32 Ana echü sekao kyonshae tsüka ejoena tae Ephesus lo "Ekümrüm" jiang thüngi rota vanwo ntio na a manchola? Echüi jiang kümchelan nlicho tssona, "Ntena tsoyutava, ojyuo echüv ka" to phyo ji esüa tssota. 33 Osi hoji yakchia nte ti sosorathuka, "Jokim n mhoncho yakchia etsso-ephyo yesoala". 34 Nte kichuk shenthi jilo vantava osi mmen ti tssotava. Nte yolo ejoma jo Potsow n tsi, ana nte yikrathokvü hoto phyoala.
Kümchelamo Tsük Ji
35 Khatola ochona sana "Kvütoli echüi jiang kümchelanthokvü to" to phyov, osi onteno kvütüv tsük tssovla? 36 Nte ji n benricho emhok! Vanlam tsükona jo ntena ntio yinga sana ji chüdem na lia. 37 Ntena yingo jijo otsung echü, omüm mekana thanpo tsüng tsokhoka, hojijo sülani ti rankao odung ji mek. 38 Ethelan echümpo ji ephan Potsow na mojü jiang echümpota nsüngrüala, 39 Eküm evamo oso topvü kheti, sotsük ji tssoa mek, kyon so echümpo, ekümrümo so echümpo, woro woni so echümpo, osi ongo echümpo to tssoala. 40 Oyak potsüwoe elio ha lira, limha lo elio ha lira; khatola potsüwoe lio jiang pvütsson echümpo, limhae lio jiang pvütsson echümpo to lia. 41 Eng jiha pvütssonpo, choro jiha pvütssonpo, shantio jiang ha pvütssonpo, osi jiloha shantio motsünga na shantio thanpo jilo na pyonpoto lia. 42 Echüi jiang kümchelantokvü jilo ha shi esüa tssov. Otsük ji moni sitokvü tsükona juthei siala, tolea kümchelana na n chüo kümchelanthokvü. 43 Jutheta thüng jo nkho-ntov, e n zehungu tsocho, tolea kümchelana na pvütsson lia, ekhyo eto lia kümchelanthokvü. 44 Otsük oso thüngoe na juthesi omon thüngoe kümchelanthokcho. Otsük oso, opho oluk shi lio ji esüa omon thüngoe otsük ha lia. 45 Jitsükona Ntho motsü na phyoala, "Kyon ovüngo, Adam na eküm evamo kümcho, osi Adam wokhao jina eküm epio mon kümcho. 46 "Zeta, omon thüngoe eküm jina vüngcho mek, tolea otsük oso jina vüngsi ji süloti omon ji. 47 Kyon (Adam) ovüngo jijo limha lona rocho, ochhon na joyingcho, enio to jijo potsüwoe na rocho. 48 Ochon na joyingo kyon jijo limha lo kyon esüa osi potsüwoe na ro kyon jijo potsüwoe kyon esüa. 49 Etena ochhon kyon ji pyon khio ji esüa, etena potsüwoe kyon ji pyon ji esüa tssov. 50 Ana phyoa vamo ji shi, ota-onyuden, ejen oso na nsüngrüo jina jo Potsow ekhüngyan n khichoche, osi yesoe esio jina ha n yesowo n khichoche. 51-52 Ana ntsa mphoyi nte ezovka engatava: ete topvü echü rav meka, khatola tatara won wokhao jilo etongphiv, yuta tsük jilo osi omhyik ekyip tae na. Ntiotssole tatara ji khüv, osi echüi jiang echü lona kümali vachiv; osi etongphiv. 53 Ntiojo echüv sekacho sana echü ji lona kümali vachiv, osi echüo ji n chüo kümthokvü. 54 Kvüthüng echüv sekao jiang echü lona kümali vachi, echüo ji nchüo kümthoka sana Nthomotsü lona heto lioji bemvü: "Echü ji roe sithaka; ekhyo ji benrithaka!" 55 "Echü, ni ekhyo kvülo licho ato? Echü ni etho jo kvü ato?" 56 Echü ji etho jo mmen, mmen ji etho jo shikhfü ji; 57 khatola ete OPVÜI Jisu Khrista yakchia ekhyo epio Potsow ji montssonthuka. 58 Hoji tsükona a nzamo ota-onyuden, chüngchüngtava, n senphio tssoa OPVÜI elhi lo kongtsüngtava, osi OPVÜI lona nte elhi jiang kiaman n tsso to ntsitava.
Longtsüi Oshom Jiang tsükona Othan
1 Judea lo Potsow kyon jiang kyochiv tsükona orang ekhyao ji tsükona jo ana Galatia ekhümkho jiang ezothako ji esüa tssotava. 2 Ana roathüngti khyata n vam tsükona nte otsük akvü na emung akvüto ombobo jokheman ephan khakchei hopta lo tsüngon jandemo jilo varhutava. 3 Nte yolo ejoma ethüngchei vatava tona ana roana nte than jiang nzo kako erani hanthuksi Jerusalemi ote wothukvüka. 4 Anaha ewov etüma lia tssona a nzo wotavka.
Paul Etüm Ezi
5 Ana Mecedonia yakchia wov zia van küma hoji wosi nte thüngi yivka; 6 osi ana nte thüngi ncheni, hojilo na nte nzo vamia vansi ana kvüi woana nte khi a nzanchitokvüka. 7 Ntiotssole ana enhünga esüngaro taena yakchia a n yihungala. OPVÜI lüm erüng lia tssona ana nte thüngi yuta tara a van hungala. 8 Ana Pentekost n janthüng jo Ephesus lo vam. 9 Ana elhi tssorhüpo tüv kibünglan tsüphov chonchi lia osi olan a khaniden khosha vanra. 10 Timothy na nte thüngi rona, ombona nte thüngi evanthüng jo ntia lümbüm n kyutana ntena ombo zeyatava, ntiotssole omboha a esüa OPVÜI elhi tssoaka. 11 Jitsükona ochina ha ombo n khannziv ti tssotoka. Ombona a thüngi elani eyio tssoa olani noyinga ombo sochitava. Oshomden tona a to tssoe ombo nhyaka vanka. 12 Ojenio Apollos, tsükona jo oshom jiang sosi nte thüngi role to ana ombo ntssungala. Enhünga jo ombo n rohunguv vana, khatola yuta mmhom hungana ombona rovka.
Ekhachi Yi
13 Cheyata vantava, longtsülo chüngchünga phanthitava, eboe esüa tssotava, osi etho khyongtava. 14 Ntena ntio tssoa na nzan lona tssotava. 15 Ota-onyuden, Stephanas wopan jo ntena ntsia onteno Akhaiah lo khophidemo jiang, onteno Potsow kyon jiang benka elhi etssov khochaki vanthaka. 16 Hojitüv kyonden jiang yi engatale osi ochoangna nte esüa ryumhena elhia sana jiang yi engayitale to ana nte ntssungala. 17 Stephanas, Fortunatus tona Akhaikus, 18 to hepi rowo shi tsükona a longshia, ntiotssole nte n vamo ji ontena nnlichethaka. Ontena erowo jina a lümbüm osi nte lümbüm jüngrathaka. Hetüv kyon jo kvüta oman licho sana ntena chekav lia. 19 Asia lo ekhümkho jiangna nte salümala. Aquila tona Prescilla, tona onte ki ekhümkho ji to tssoe OPVÜI lona emathata salüm nte hanthukala. 20 Oshom topvüna nte salümala, Nte nte eyolo ntssüphita salümtava. 21A Paul na abobo erani salüm nte hanthukala. 22 Ochona sana OPVÜI n zana tssona ombo rhiyikathaka! Maranatha – roa e OPVÜI! 23 OPVÜI Jisu kianzan ji nte lo lithuka. 24 Khrista lona nte topvü thüngi a nzan nte hanthukala.
1 Chiti shijo Potsow lüm erüng lona Khristian wothung Paul tona ojenio Timothy to thüngina: Korinthia lo Potsow ekhümkho ji thüngi osi Akhaia meta topvülo Potsow kyon jiang thüngi eranala. 2 Ete opo Potsow osi OPVÜI Jisu Khrista thüngina epio kianzan osi noying ji nte echi tssothuka.
Paul na Potsow Montsso Piala
3 Potsow osi ete OPVÜI Jisu Khrista opo montsso pia ombo mying thüngtava, khonzan eli Potsow osi lümbüm ejicho linrhüo Potsow ji. 4 Ete nungra lo ombona e jichoala, osi etena Potsow thüngina hungwo ejicho ji khi nungra evan jiang ha ejichotokvü tsükona. 5 Ntiotssole Khrista ezüpo jina e chinhyao ji esüa Khrista yakchia lümbüm emi hungwo jina echinhyathaka. 6 Ena ezüp nduka tssona, jijo nte lümbüm emiyia nte shanchov tsükona osi lümbüm emiyia tssona, ntena e esüa ezüp khiathüng Potsow na nte ejichotokvü tsükona. 7 Ntelo e eyilo lio ji n senphiala, ntiotssole ntena e ezüp ji chitao ji esüa lümbüm emi jiha chitala. 8 Ota-onyuden, Asia lona ena ntio ezüp ndukchosana jiang nte ntsithuk hungala. Ena n hankhoko ezüp lona e eküm tia eyilov n liv sicho. 9 E topvü echüv esekathakcho esüa ena chanchecho. Khatola jijo, ena epopo e lo enhyikav tsükona mekna Potsow ochona echüi jiang kümchelanthuka sana jilo enhyikatokvü tsükona hojito tssocho. 10 Ombona hotüv ekyutssi echüpüngo na e sochecho osi ombona elani esochelam. Ombona elani ha e sochelanthukvü tsükona ena ombo lo longtsükathaka, 11 Ntena randani na e nzanchia vana tssona e randan jiangha Potsow na ejanlam osi emhayiv, hoji yakchia kyon elümoto na ete thung tssoa tüngkachia Potsow montsso piv.
Paul Etüm Ezi Dungphicho
12 Ena ntiosana tia kangtsüv licho sawo e nchümri na ejamo ji ephan ena limha shilo eküm vancheo ji osi nte thüngi shentae vancheo ji tsükona kangtsüv lia; hojijo limha nchümri ji yakchia mekna Potsow na epio kianzan ji yakchia nte thüngi donrung ntsanrüka phyotacheo ji tsükona to. 13 Ena nte eramo jijo thanpo mek, tolea ntena khacheo osi enga thekhoko yilan ji tae; tolea ntena enhünga jo chiso tae egathehan. 14 Ana longtsüala, OPVÜI Jisu tsüngon jilo jo ntena benria engathei khiv, osi ena nte tsükona kangtsüo ji tata ntena e tsükona kangtsüv to. 15 Ana heto shianglo longtsükao jina ena ovüng tssoa nte janthechiv methakcho. 16 Ana yenjo eni nte nzanchiv methakcho, ovüngtssoa ana Macedonia lo woathüng nte janthechi, elani yiathüng nte janthechi tosi nte khi a nzanchitoka Judea lo yilam tsükona. 17 Ana shiang hetopvü lo zikadung nli-i esüa tssocho alo? Ana methako ji kyon lüm erüng ephan "Hoka", "Meka" to phyolancho alo? 18 Potsow jo longtsüka lio ji tsükona nte thüngi e yi jiang ha "Hoka", "Meka" to mek. 19 Potsow tsoe Jisu Khrista ocho ena nte mhadungo thenchothakcho sana, a osi Silas tona Timothy to na püngnocho sana jiangha ombo "Hoka", "Meka" to mek; 20 khatola Potsow lüm erüng "Hoka ji ombolo lia, ombo methak jiang topvü lo Potsow na "Hoka" to ombo phyoyiala. 21 Jitsükona etena ombo yakchia Amen to phyoa Potsow pvütssonthukala. Khrista lona osi nte topvü etho jükathung jijo Potsow; 22 etssachuki e vantoko jiha Potsow na eteno ombo echi to e nkohao chekav etheyicho osi mhadungi ntio lichosana jilo tara khichei e pi vacho esüa ete lümbümi Ntho Mon ji e theyicho. 23 Ana a ehungpvüi Potsow tssoa phyoala, ana Korinthia lo n rolamo jijo nte zümlanchiv tsükona. 24 Ntena ntio longtsüv sana ena nte khüngkata mek, tolea ntena ntio longtsüa sana jina tssochyua. Eiyo nte ematha longshi tsükona tae nte nzo tssoe elhi tssotala.
1 Jitsükona ana nte thüngi roe etho nte njakthuklan to methakthaka. 2 Ana nte nungrath uka tssona ochona a mathatokvüla? Ana nungrathuko jina alo? 3 Jitsükona ana hojito nte eramo jijo, ana nte thüngi roathüng a emathatok etümo jiang khi a n nungratokvü tsükona, ntiotssole ana mmhona nte ntsia, a emathata tssona nte ha nte emathatala. 4 Ana nte nungrathukvü tsükona mek, khatola ana kvüta nte nzana sana ji nte ntsithukvü tsükona lümbümi nungra hansi esü elunga nte erancho.
Silyuo Etssoe Nlan siyi
5 Ana oyi punga phyoa mek, tolea ochona a nungrathukana lanka kvütowoe na sana jo nte nungrathukcho esüa tüv. 6 Ana heto phyo jijo ombo ntachitokvü tsükona. Jitsükona nte ekyungo na nlan ombo pio ji taena lea mmhonthaka. 7 Hoji tsükona Enhungo nte elhi jo ombo ji tata n nungrathukvü tsükona lüm tssonlanitav lia. 8 Jitsükona ntena ombo nzanala toji ombo chethelantokle to ana nte ntssungala. 9 Ana hoji nte eramo jijo, nteno kvüta mmhona ntebobo ojang tssoe zethakchosana osi a yi engav methaka vevana sana to nte zeyiv tsükona. 10 Ntena ocho nlan siyina ana ha nlan ombo siyiala. Ntiotssole ana nlan kvüthüng siyia sana, ana siyicho tssona, Khrista na ntsia nte tsükona ana nlan siyiala. 11 Tsüngrham kyak ji etena mmhona ntsia; jitsükona ombo khi e n khywothukvü lia.
Troas Lo Paul Ezüp
12 Ana Khrista yithen mmhom ji püngnolo Troas lo roathüng jo OPVÜI na ombo benkav kipüng ngaza a chonchiyicho. 13 Khatola a jenio Titus ji n hungwo jina a lümbüm n jorov vancho, jitsükona ana kyon jiang pyonta yilan onte ezosi Macedonia lo yi sicho.
Khrista Lona Ekhyo
14 Khatola Potsow myingthüng tssothuka, ntiotssole etena Khrista lo evamo ji yakchia ombona yuta topvülo ekhyo lamoe esoala osi ombona Khristian jiang ekhyo epia meta topvülo Khrista ntsithukvü püngnov tsükona mozhürhüm mmhon esüa e tsütsatala. 15 Ntiotssole eteno mozhü orhüm mmhom esüa Khrista na Potsow lo khochaki picho, jijo ete yakchia motsü ji shanchothako jiang thüngi tona moni evamo jiang thüngi to nzüa yitokvü tsükona. 16 Ntiotssole monthako jiang tsükona jo eküm yi jo echü mozhü esüa tüv, khatola shanchothako jiang tsükona jo mozhü rhüm mmhom esüa tüv, tona ochoango elhi shi tsakav etümchola? 17 To tssolea eiyo kyonpoe jiangna Potsow yithen ji tssentsso yonkiphen tsütsaelan esüa tsütsaeden jiang esüa jo mek; khatola ena chüngtünga püngnoe kyon esüa, Potsow lona osi Potsow mhadungo püngnoe osi Khrista lo evan kyonden esüa püngnoala.
Ntsata Ethan Ji Nriden
1 Ena heto phyona epopo kangtsüv benkata esüa engachetav alo? Thanpoe jiangna tssoato ena ha ehungpvüi chiti nte eram osi ena nte thüngina ekhiv ethev licho alo? 2 E chiti jo nte shiang, kyon topvüna khacheo tssoa e lümbümo erankacho. 3 Nteno Khrista thüngina chiti ntssüng-rünga erancho ena nte thüngi na ehungpvüi epio ji, khyimvü jü na mek tolea eküm evamo mon jina eramo osi olonglo mekna kyon lümbümo erankao chiti ji. 4 Ena heto phyokhuko jijo Khrista yakchia ena Potsow lo eyiloka lio ji tsükona. 5 Elo ntia benricho n li osi ntia a lona chiyicho n li. 6 E mmhoncho jo Potsow 10 tae, ochona ntsata ethan ji nriden ekümtokathüng e ethelan topvü ebenriyicho sana hoji; ntsata ethan jijo erancho shikhfü mek, tolea omon lona, ntiotssole erancho shikhfü jina echü jilo vanchukchiala; khatola omon jina jo eküm piala. 7 Echü lo echeo shikhfü kvümoe olong lo erankacho sana hoji piathüng mpato Potsow pvütsson rakachia picho. Osi Moses mha lo pvütsson ji mataka sanati tia Israel kyon jiangna ombo mhalo n zekakhukcho. Echü hansi eyio shikhfü ji piathüng samona heto pvütsson licho tssona; 8 tona omon ji thüngina eyio pvütsson jijo kvüta pvütsson likavla? 9 Elani nlan rhükao shikhfü ji piathüng mpato jito rakachia pitacho tssona, Potsow thüngi elan kyon ekümtoko mon ji yiathüng jo kvüta kyongkata rakachivla? 10 Tolea hojito rakachia erowo ji enhünga jo moni sithaka. Hoji na ombolo na pvütssonkao ji tüv ji nkachithaka. 11 Ntiotssole yuta süngaro tsükona pvütsson lia evamo jina mpata ombo pvütsson rakachicho tssona kümali vamo pvütsson jo kvüta pvütssonkav la? 12 E eyilo ji shi tsso jina ena lüm tssona nsanala. 13 Eiyo Moses esüa mek, ombo mha lona pvütsson mona yia evamo ji tia Israel kyon jiangna n zekachikhuko jina ombona omha shüngo ji esüa eiyo hojito n tssoala. 14 Onte lümbüm jiango shayimcho; ntiotssole nchüng tsüngon jana ontena motsü yi ehen ji khata na mhashüngtsük jina onte eyukpvü liala. Hoji Khrista lo tae na shaki siala. 15 Ho, nchüng tsüngon jana kvüthüng ontena Moses kako jiang khata sana enga evan jiang lümbümi eyuk khyingcho esüa tüv, 16 khatola ntho motsü lona Moses tsükona heto phyo ji esüa, "Kvüthüng ombona OPVÜI thüngoe zechicho sana mhashüng ji shaki sicho." 17 "OPVÜI" OPVÜI jijo omon ji, osi OPVÜI mon ji kvülo vana sana etancho jo hojilo liala. 18 Osi ete topvü, omha n shüngna mhachanphen esüa OPVÜI pvütsson ji ete lona rakae yithuka vamo jina hoji pvütsson ji esüa ekümi n tümjak na pvütsson ji rakata yiala. Shijo OPVÜI ochojo omon sana ji elhi.
Omon Thüngoe Tssentsü Chonphfü lo Thecho
1 Potsow na ombo khonzan lona elhi shi e ndungkathaka, jitsükona e lümbüm n teriala. 2 Ena mpho elhi osi yikra elhi jiang topvü sikhanthaka; ena ejithechi n jüna vanala. Mekana Potsow yiji ejüng n kümtokna vanala. Ena Potsow yi ji n yesothukna Potsow lo ntsa wondangi chiyithuki kyon topvü khi zi zetokvü tsükona epopo ejüala. 3 Ntiotssole ena püngnowo yithen mhom ji mphoe sia tssona jijo emonlani yia vamo jiang taena mphoe siala. 4 Ontena n longtsüo jijo echungren shilo tsüngrham potsow jina onte lümbüm jiang eyukicho, onte lo wondangkata evamo jilona onte nkachotokala osi onte khi Khrista ocho Potsow esücho sana ji wondang ji n hungtokvü tsükona. 5 Ena e popo e motsü thenchoa mek, tolea Khrista Jisu jo OPVÜI to osi eiyo Jisu tsükona nte nriden to thenchoala. 6 Ntiotssole Potsow ochona "Emüng jilona wondang tüngrachukchiv!" to phyocho sana jina Khrista yakchia Potsow pvütsson ji ntsi oponi chiyitokvü tsükona ete lümbümi wondang-tokala. 7 Toaha eiyo, chonphfü lo tssentsü thei vacho esüa ochon taena ejoyingcho, osi hojina e bobo ntia etho n li; etho ji OPVÜI Potsow echhi. 8 Eiyo nsansam ezüpthuka khatola chenroe jo e n si, kvüthüng sana jo e dungsungala khatola kvüthüngha eyilo n liv jo n si; 9 Ori elüm vana khatola oshom n vancho mek; etssatssoala, tolea moni e n sitok. 10 Kvülona jo Jisu eküm ji e tsük shiang lona hungthuko tssoa, a tsük shiang lona Jisu chüo ji hanphitala. 11 Jisu eküm ji e tsük echüo sekao shiang lona ejüv tsükona. Eküm vana khatola Jisu tsükona echütokvü yuta topvü lo ekyutssü lo esüchukchiala. 12 Ji yichak jo echü jina e lo elhi tssoa vana khatola eküm jina ntelo elhi tssoa vana. 13 Tolea ena longtsü lia. Nthomotsü lona phyoala, "Ana longtsü licho; jitsükona oyi nsancho." Ena ha longtsü mon ji lia, jitsükona enaha nsanala. 14 Ntiotssole ena ntsia, Potsow ochona OPVÜI Jisu kümlanthukcho sana jina enaha Jisu nzo e kümlanthukvü osi nte nzo ombo mhadungo chiyitav. 15 Shiang hetopvü nte tsükona osi Potsow nzan jina kvüta kyon rankata jana sana jitata ontena Potsow montsso epi randan ji kyungkata Potsow piv.
Longtsü Lona Evan
16 Shi tsükona eiyo lüm n teriala. E tsük shiang kyona vanthaklea ochungina jo engakvü ethan ekümala. 17 E emhoknungra jo zükhoa osi esüngaro tae evamo, khatola hojina e tsükona kümali pvütsson ji erankayiala; hoji jo lanka topvü poni na tsüphokata. 18 Ntiotssole eiyo omhyikna ehungo lo zekata mek, tolea n hungwo lo lüm thetha zekatala. Ntio hunga sana jijo esüngaro tsükona tae tolea ntio n hunghancho sana jijo kümali evamo.
1 Ntiotssole ena ntsia, limha shilo e ki süranki esüo ete tsük shi - ekhathe sia mpa tssolea, Potsow na oki chüngchünguv e vayi lia, ombona ombo khena tssocho, kümali evamo ki potsüwoe. 2 Otsotso, etena süranki shilo evanthüng Potsüwoe tssoe elio ete vanphen ji khümcho kupi evam tsükona eronta nhyaktsüka yantala. 3 Hoji khümcho ji hansi otsük jiha n thenhyav n situkvü tsükona. 4 Etena limha süranki shilo vanathüng ryusang mmuk chancheta erontala. Ete tsük ehen shi e n sihunga khatola, ethan ji khümcho ji hungtokvü tsükona osi echü sekao tsük shi kümali eküm khi dungchetokvü tsükona. 5 Potsow na shi dungphi tsükona e methakcho, osi ntio n janhancho sana hoji ehunguv enhünga ntsaka chekaphen esüa ombona omon ji epithaka. 6 Jitsükona ena yuta topvülo lüm tssonala. Ntiotssole ena ntsia, ena otsük jilo evanthüng jo OPVÜI ki jilona kontae vanala. 7 Eiyo hungwo jilo na mek, tolea longtsü lona vanala. 8 Ana phyoala, ena otsük shilona kontae oyi OPVÜI thüngi evamvü lüm etsson lia. 9 Jitsükona ena shilo vanlea, hoji vanlea thanpo mekna ombo emathatokvü ji e chokatala. 10 Ntiotssole ete topvüna Khrista yitssophen vantsü jilo ete tathi shina mangu. Osi otsük akvüna limhalo eküm evanthüng ombo ombo elhi mmhon osi n mhon ji ephan oman hunguv.
Khrista Yakchia Potsow Thüngi Khyingta
11 Jitsükona ena kyon engathetokvü ekhyo tssoala, ntiotssole OPVÜI kyuv to phyo ji yichak jo ntio sana ena ntsia. Eiyo kvütüv tsotso sana Potsow na mmhona e ntsia. 12 Ena epopo kangtsüa nte ezolancho mek; tolea nte khi e tsükona tara kangtsüa nte nchümtokvü tsükona ena yuta nte piala. To tssona ochoang na kyon ji etsso-ephyo tsotso jilo mekna oponi eze echan jianglo epyankae kangtsüa sana jiang ntena janlanchev. 13 Eiyo e zhüvacho alo? To tssona jiha Potsow tsükona. Osi echüngtsocho tssona jijo nte tsükona. 14 Ntiotssole Khrista nzan jina etangyatala, osi ena heto engathethaka. Jisu na topvü thung chücho; jitsükona topvüna chüthaka. Ji yichak jo ombo echü jilo topvü na shümnhyatala. 15 Ombona topvü tsükona chücho, hoji tsükona ochoang na eküm vana na enhungo onte tsükona mekna ochona onte tsükona chüsi phanthicho sana ji tsükona evam tsükona. 16 Jitsükona enhungo ena ochia limha thüngoe na ejyui n zetala. Yuta yithako jianglo ena Khrista ji limha shikhfü lona ejyui zecho mpa lilea enhungo hojito n tsso. 17 Hoji tsükona kyon tsükana Khrista lo vana tssona, ethan soyinglanthaka; ehen jijo yakthaka, ethan ji janthaka. 18 Hojiang topvü Potsow ochona Khrista yakchia ombo thüngi e khyingtalan-tokcho sana osi oyam - elhi epicho sana jina tssocho. 19 Jitsükona e yithen jijo, Potsow na Khrista yakchia kvütoli limha ji ombo lo khyingtalan-tokvü vancho sana ji hungtokvü tsükona. Ombona kyon jiang nlan ji etsüngi n vayiala, khatola khyingtalan-toko elhi ji e zikacho. 20 Jitsükona eteno Khrista lantssoeden. Potsow na e yakchia tsa vana, Khrista thung tssoa ena nte ntssungala, Potsow thüngi khyingtalantava. 21 Khrista jo mmen n rhüka, khatola Potsow na ete tsükona mmen ombo kümthukcho, hoji yakchia etena Potsow mmhon ji hunguv tsükona.
1 Potsow ndüngo nzo elhi etssoeden ejoena ena heto nte ntssungala, ntena Potsow kianzan ji khichothakoji, kiaman ti tssotoka. 2 Osi Potsow na heto phyoala: "Ana nte nzanchiv yutalo nte engayithaka; Shanchov tsüngon jilo ana nte nzanchithaka." Engatava! Echümporo nzan khichov yuta ji enhünga; osi shanchov tsüngon ji enhünga! 3 Ochina ha e elhi lo nlan e n yanio tssoa, ena ochi lanka loha nshüphiphen n vayiala. 4 Jithungona jo, eiyo Potsow nriden to ejüv tsükona lanka sükhying topvü lo ezüp mmuk, khangshi ezüp osi yuta ekhünguv jianglo erüm eto khi yakchitokala. 5 Osi ekho esük khia, evüngki vana, tssikhang hankhanga osi eyipvü tia yuta n liv elhina esantsünga tssoa rothaka. 6 Tolea e lo ntssüng-rüng, ntsinran, nchümri, erüm eto, nzan osi nthomon ji khi tanjüngi nzan, 7 ntsa ji püngno, osi Potsow etho shiang to yuta topvü lo eiyo Potsow nriden to ebobo oponi chiyia ejüthaka. Osi okhe hayi-amen ntsanrük ji khi rotav tsükona tssolea, epopo nkohav tssolea, piposi vanthaka. 8 Ena yikrachi monkhüm ha hungcho osi yikra ha ndukcho, elani e teritoka osi a thanthüngcho. Elani eiyo ejüng ephyoe esüa e tssotokcho; 9 eiyo ntsanrüka, khatola e n hung ntan tssoa khachoe esitala, khatola eiyo echekata; echü esüa etssoyi lea, ntena ehunga ena eküm vanala; ezüp epicho khatola e n chütok. 10 Ena ezüp nungra ndukala, khatola ena yuta topvülo longshyuala; eiyo yantsaeden khatola ena oyam elümoto eli-i kümtokala, eiyo ntia n lia khatola topvü likhana. 11 Nzamo Korinthia oshomden, ena valanchi n lina nte ezoala, e lümbüm jo ngaza chonchicho; 12 ena lümbümina nte zümlanchicho mek, tolea ntena lümbüm ekyuyia e zümlanchiala. 13 Jitsükona enhungo nte lümbüm ngaza chonchitava, ana ngaro ezoa esüa nte ezoala.
N longtsüi Ndungntssung N khichov Tsükona
14 N longtsüi jiang jokyim ti tssotava, jito jo n tssoche. Elan tona nlan to ntio lona esütachola? Wondang jina emüng ji thüngi ntio shenta lichola? 15 Khrista ha tsüngrham ji woni ntiolona mmyanta lichola? Longtsüi jina n longtsüi ji thüngi ntio lona khetitachola? 16 Potsow khümphen tona kisü to ntio lona esütachola? Ntiotssole etena eküm evamo Potsow ji ekhümki to Potsow na phyoala! "Ana onte lo vamvü osi onte yolo sanphiv; aiyo onte Potsow tssov, osi onteno a kyonden tssov." 17 "Jitsükona onte yolona chiyitava, osi onte nkachotava to OPVÜI na phyoala. Ntio n tho sana ti vüngkatava, tona ana nte khichovka. 18 Osi aiyo nte opo tssovka, osi nteno a tsokhying tsoloden tssovka, to OPVÜI tokhamo jina phyoala."
1 Echümchak shiang shi ete thüngi epicho, oshomden. Jitsükona etena kvümoena otsük osi omon ji mmentoka sana jiang topvü lona etepopo nthochetav lia, osi Potsow ekyu lona ntho njümtso jilo eküm vantavka.
Paul Longshi
2 Nte lümbümi e vanphen e vayitava. Ena ochia n mhom n tssoyihan, ena ochia n yesotokhan, osi ena ochi loha epyankae e echi eyam ekhyo n tssohan. 3 Ena n lan pia khoe nte esiv tsükona shi phyoa mek, ana phyothako ji esüa ena elümoto nte nzamo jina echü yilea, eküm yilea, ena nte chinhya hungala. 4 Ana nte thüngi thyutav jo lüm etsson lia; ana nte tsükona kangtsüv elüm lia! Lüm etsson na a pyingthaka; ezüp yuta lo lia longshyu na a pyingala. 5 Otsotso ena Macedonia lo rocho sülo tia ntia esan nlihan. Lanka topvü lona ezüp ndukcho: oponi khonta rota liracho, osi ochungi ekyu jücho. 6 Khatola lümbüm na noa vamo ji ejichopvüi Potsow jina Titus rothuki e jichocho. 7 Ombona ro jitae na e longshyucho mek tolea ntena kvüta lümbüm ombo tssonicho sana jinae longshyucho. Ntena kvüta a nhyaktssüka vanchosana, kvüta nte nungra vancho sana, osi kvüta lümtsa lümria ntena a khichocho sanaji ombona a ezocho. Hojina a ematha rankacho. 8 A chiti na nte nungrathuk lea aiyo jina jo a n nungra, chiti jina nte nungratoka to ana nte zecheta. Yuta tara tae tssolea nte nungrao jina, a nungracho, 9 to tssolea enhünga jo a longshiala, nte nungratoko jina mek, tolea nte nungra jina nte lümbüm khophi sotheo ji tsükona. Potsow na methako ji esüa ntena nungracho. 10 Hojijo ntena e yakchia ntia ezüp n hungu tsükona Potsow na methako ji esüa nungrao jiango shancho jilo rheyiala osi nungra n jü! Khatola limha nungra jijo echü lo echetala. 11 Zeta, Potsow methak ji ephan nungrao ji tsükona ntelo ntio kvüta oman lithakcho sana; choka longshyu kvüta, nte popo elan ephyov, kvüta lüm etsuk, eyilo, ryupak, ntsanrük elhi ezehung to shiang yakchia, olan topvü lona nteno n lan n lio to ntepopo ejüthaka. 12 Jitsükona ana nte erancho khatola n tsa elhi etsoe jiang tsükona erancho mek, osi n tsa lona ocho tsütsacho sana ji tsükona erana mek. Tolea ntena e tsükona Potsow mhadungo kvüta choka longshi lichosana ji ejüv tsükona. 13 Shi tsükona e lüm tssonkacho, jitae mek khatola e lüm tssonkao ji ekalo Titus longshio ji tsükona e longshiala. Nte topvüna ombolo etho rankayicho. 14 Ana nte tsükona ombo thüngi kangtsücho licho, tolea ntena a n joyitok-han. Ena ntsa ji yaka nte thüngi ntia nsancho n li, osi Titus thüngi e kangtsü ji etümthata. 15 Ntena kvüto ombo yi engacho sana, osi ntena kvüta kyua eneta khichocho sana ji nchümchetana ombo nzan lümbüm ji nte thüngi rankata liala. 16 Ana nte lo enhyika-jüngthako ji tsükona kvüta a longshia ato!
Khristian Than Epi
1 Ota-onyuden, Potsow na Macedonia lo ekhümkho jiang thüngi ombo kianzan ji yakchia ntio tssothakcho sana ji nte ntsitok hungala. 2 Onteno ezüp etsyu na elüm tsükshia ojang onte tssocho khatola jiang topvü pono onte longshina phyochücho, onteji elüm yantsa khatola, onte than epi jilo elüm lungphyacho. 3 Ana nte ezoala, onteno onte ejüeli ji ephan osi jilona kyongkata thancho. 4 Onte lüm erüng lona Judea lo Potsow kyon jiang benka elhi lo onte thenhyale to elümoto tüngochüa e thüngi chontacho. 5 Shiang hetopvü ena eyiloyio jilona kyungkata tssocho! Ntiotssole ontena ovüngtssoa OPVÜI lo onte popo khochaki pidencho, osi e thüngi ha Potsow lüm erüng ephani na epicho. 6 Jitsükona nte nzan than jiang nlansüngi methaktokvü tsükona ena Titus zikacho, ombo benkadeni na elhi shi ezei ji. 7 Nteno olan topvü lo nte jüolia; longtsü lo, onsanyisan lo osi ntsinran lo, oyam nzanchiv lo choka longshi tona e nzamvü lo to topvü lo tssochyua mmhona. Hoji tsükona nzan benka elhi shilo ha longphya nte tssotok hungala. 8 Ena hoji shikhfü esüa nte khüngacho mek. Tolea nte nzan ji otsotso memekana to zev tsükona oyam jiango nzanchi elhi lo kvüta choka licho sana ji tae nte ntsitokala. 9 Ete OPVÜI Jisu Khrista kianzan ji ntena ntsia. Ombo kvüta eli-i ato! Khatola nte tsükona ombona yantsae kümcho. Ombo yantsa ji yakchia eli nte kümtokvü tsükona. 10 Jitsükona jilo a nchüm ji nte ezovka. Nzyu yithako jilo jo nteno nzanchiv lo choka eli osi hoto etssoe yolo ovüngo ji tssocho. 11 Jitsükona ntena ntio lia na ji khi hoji ochüm echeta nte a tssothuk hungala! Ntena ntio benkacho sana hoji bentokvü shikkfü. 12 Hojithüng jo nzanchiv lo elüm nte chokacho, jitsükona nte eli ephan tssotava, kyon na chokata pia tssona Potsow na jo ntio liana hoji ephan ekhichoyiala, khatola ntio n liana ji mek. 13 Oyam ha-a zükhokayisi nte mmyingkayiv ana nte ezoa mek. Ntsanrük lona tssotavka. 14 Enhüngajo nteno tajo nijo elüm lia, jitsükona hoji khi onte n benta jilo nzanchitava. Tsüngon kvülona jo onte tajo-nijo khi nte n benta lo nte nzanchiv, hojito topvü thüngi kheti tssotava. 15 Nthomotsü lona phyo ji esüa, "Khosha hanrhyuo jina kyongkhünga lia mek, osi mataroa hanrhyuo jina ha matatia n li."
Titus Tona Ombo Shom Jiang to
16 Ena nte nzanchiv chokao jitata Titus naha chokao ji tsükona ena Potsow thüngala! 17 Ena jonjiwo ji etssoyiwo ji tae mek, tolea nzanchilo ombona elümoto chokao lio jina ombona nte thüngi rov methakcho. 18 Ena ombo nzo, ojenio thanpoe tsüka, yithen mmhom ji thenchoe elhilo ekhümkho topvüna yikrachio kyon ji rothukala. 19 Jitae mek, OPVÜI pvütssontokvü osi chokao longshi ji ejüv tsükona elhi tssota vamo yantso shi hansi e nzo yentsatav tsükona ekhümkho jiangna ombo zikacho. 20 Nzan lona thamo yantso shiang jantathüng oyam na e n phyophitokvü tsükona ena ekhyo tssoala. 21 E tümka jo elhi mmhom ji Potsow mhadungo tae mekna kyon mhadungo ha tssov tsükona. 22 Jitsükona ena ombo nzo ojenio thanpoe ochona yuta topvülo e nzanchiv lo choka licho sana osi sükhying topvü lo ojang tssoe zeyithakcho sanaji rotoka, osi ombona nte lo longtsükao ji tsükona lümbüm tssona vancho sana jiha rotokala. 23 Titus tsükona jo a jokyim tssoa nte nzanchiala; osi e ojenio ombo nzo eroe shiang tsükona jo ekhümkho jiang ethüngche woroden osi Khrista myithüng tsükona. 24 Jitsükona nte nzan ji chekav onte ejütava, tona ekhümkho topvü na ntsiv osi ena nte tsükona kangtsüa vamo ji engathev.
Khristian Thanpoe Jiang Nzanchi
1 Judea lo Potsow kyon jiang nzanchi elhi etssov ji tsükona jo ana nte n ranlea mmhom. 2 Ntena kvüta nzanchihunga vanchosana ji ana ntsia, osi hoji khi ana Macedonia kyon jiang thüngi mpato kanchana ezothaka, osi Akhaia kyon jiango "Lüngkümo na olan topvü methakthaka to ezothaka." Nte chokalongshi ji zesi onte ji elümoto nthiphithaka. 3 Khatola yilan shianglo ena ntio kvüta phyothakcho sana otsotso to chekatokvü tsükona ena ojenio shiang rothukkala. Osi ntena methakthaka to ana nte phyoyia vamo ji esüa methaki nte a vantok hungala. 4 Ntiotssole Macedonia kyon ochoang na sana e nzo role ntena n methakvü vanchojo nte yikra jitae mek, tolea eiyo kvüta yikra tssovla! 5 Jitsükona ntena ntio yantso piv phyochakcho sana ovüng na nte methaktokvü tsükona ojenio shiang rotokvü ethev lia to ana zechecho. Osi ana roathüng methaki vathakcho tssona nte rikao jina mekna emathata picho to chethevka. 6 Shi engathei khitava, Mataroa yingo kyon jina mataroa richov; khosha yingo jina pvülia richov. 7 Otsük akvüna ombona kvüta piv sana matangi zesi püpa nchüm na longphya piv shikhfü, ntiotssole longshia epi-i ji Potsow na nzanala. 8 Ntena olan taro etsson lioji yakchia elhi mmhom topvü lo nte nzanchitokvü tsükona Potsow na jo nte ethelan topvü osi jilo na kyungka nte pikhuka. 9 Nthomotsü lona phyoala, "Ombona yantsae jiang thüngi longphya piala; ombo nzan jijo kümali vanala." 10 Osi Potsow ochona mojü eying ji mojü pia, osi hümri pia tsothuka sana jina mojü nte pia nte benrotokvü; ombona nte longphya ji man mmhona nte richotokvü. 11 Olan topvü lo nte longphyatokvü tsükona ombona phyochüa nte lithukvü, osi ntena longphya epio ji yakchia kyon elümoto na Potsow montsso piv. 12 Ntiotssole ntena elhi shi tsso jina Potsow kyon jiang ethelan bencheyio ji tae mek, tolea hoji naha kyon elümoto khi phyochüa Potsow thüngtokvü. 13 Elhi shina nte longtsü ji ejüala, osi ontena shi tsükona Potsow thüngla, ntiotssole ntena Khrista yithenmhom jilo ntsatao tae mek, tolea onte thüngi osi thanpoe hoto longphya pio ji yakchia ntena enga benphiala to ntsiala. 14 Hojito tssona, Potsow na nte thüngi emhokthao kianzan pithako ji hungi ontena nte nzana nte randaniv. 15 Oyina n phyocheo Potsow kiaman yantso jiang tsükona etena Potsow thüngtavka.
Paul na Ombo Elhi Tsükona Phyoala
1 Shijo A, Paul ocho nte ndüngo vanathüng ji ntena enyipa zechesi nte lona kontae vanana ntssana to zechecho sana jina – Khrista eyingro osi emiro ji khi heto nte thüngi jonjiala, 2 jijo, ena limha thüngoe etüm ezi hansi elhi tssoala to e nchümio kyon jiang thüngi lümbüm tssoni ryulanchiathüng haruka etssov a ti tangtava, kvütolyuv sana ji ana mmhona ntsia. 3 Otsotso etena limha shilo vana khatola limha shilo ori tssoa mek. 4 Etena tsütsao epensü jiango thama mek; osolo ebensü mek, tolea Potsow ebensü ntssam kümoe na ori pikhfü jiang roe sikhukho sana jitüv. Ejüngona ekhiranta jiang ena monthukala; 5 osi Potsow ntsiv lo lankhan elio pikhfü ntssomo jiang tssüngjoe siala; nchümri khanphen jiang ena khi siyisi, Khrista jancho zothukala. 6 Osi ntena topvü jancho ezolo khochaki pithakana, jancho n zo elhi etssoe topvü ezüp epiv ena methakala. 7 Ntena haphoe opyon ji tae zetala. Kyon ochona sana ombo Khrista echi to longtsüalo? Mmhona, khatola heto ha zi ombo zetoka, ntiotssole ena ha ombo esüa Khrista echi. 8 N khontsi, Potsow na nte n yesothukna, nte sükümchev etho a pio ji khi ana tara kanchakyaka lea tssov. Tolea ana hoji khi a yikra n ehüm. 9 Ana chiti jiang taena nte ekhentokvü ziala to ti nchümtava. 10 Ochona sana heto phyokhuka, "Paul chiti shiango etho lia mmyinga, khatola ombona otsük na ete ndüngo thei vana na ombolo mharhümdonrhüm n jü, osi oyi nsanthi ha mek!" 11 Hojito nchümo kyon na ena nte ndüngo n vanathüng chiti na nte eramo jiang tona ena nte ndüngo vani ntio tssov sana jiang to oni ntinaha n chümpota to ha engathenrünguv shikhfü. 12 Enhünga ochoangna onte popo ekhyonkachia vancho sana jiang thüngi ena onte ejoa etssov osi etsitae zev tsükona mek, hojitüv kyon jo kvüta zhüvae tssovto! Kyon ochoangna onte ntsi ji khi ontepopo füi zeta oyam ejyusona sana jiango n benri. 13 Khatola ena jo e ekyan ji pomoe kangtsüv meka, Potsow na ntio e ejan elhi etssov methaki evayicho sana jitae ena tssov, osi hojijo nte yolo elhi etssov jiangha jüa. 14 Osi nteha hojilo nte jüwo ji tsükona ena kvüthüng Khrista yithenmhom ji nte thüngi hansi rocho sana jijo tssoyakcho mek. 15 Oyam na sangcholo zekae Potsow na evayio ji pomoe ena n kangtsüala; jithungo na jo ena longtsükata eyiloala, ntena longtsü rankav osi Potsow na tsenchaki evayio ji chungina nte yolo tsüphokao elhi tssov. 16 Tona ena yithenmhom ji nte metae na pankae meta jianglo ha püngnochev, osi oyam jiangna onte nkonjano elhi tsso jiang khi ena ejüngona kangtsüv mek. 17 Nthomotsü lona phyoala, "Kyon ochona sana kangtsü hungna OPVÜI na ntio tssocho sana ji tsükona kangtsüthuka." 18 OPVÜI na ntio mmhona to ephyoyia na jitae elhi to khichoala; etebobo myingthüng jo ntilo ha n the.
Paul tona Ejüngona Wothung Etssoe Jiang to
1 Ana tara beha nte ejüathüng lea erüm totawo mmhona, nte erüm eto ji ana ntsia. 2 Ana Potsow mhyitsoraki ji khi nte tsükona mhyiktssorakiala; nteno ana yanpiyanthan etssov echümchaki evao ntsantho loroe ji esüa tsüka thüngi tae yanpio tssoa ana Khrista tsükona hokae nte vacho. 3 Khatola nrü jina okyak lia Eve ejithechiato nte ha lümbüm yesoe sisi tüngochünga osi ntsanthoa Khrista n phanphiv mpato siv esüka to a kyuala. 4 Ena thenchothako Jisu ji mekna ochona sana oro thanpo Jisu tsükona nte püngnoale, osi hojitoli ntena omon khichodemo ji mekna thanpo khichoa tssona, osi yithenmhom zothako ji mekna thanpo motsü jiang elanroa khichoa tssona nte ji emhokthav erüm n toe tssov. 5 Ana ha wothung ntena echüm poro tssotoka evamo jiang lona terikacho mek to ana nchümala. 6 Oyi nsam lo a tssothimori n licholea tssokuka, tolea ana ha oyam thanpoe jiang esüa ntsia, osi ena lanka topvü lona hoji nte ejüthaka. 7 Ana Potsow yithenmhom ji nte püngnocho osi ntia nte n khiyi, Ana nte pvütoksi abobo teri kümala. Hoji jo mmen elhi alo? 8 Ana a ethüngezi jiang ekhümkho thanpoe na pisi nte tsükona elhi tssocho. Zitana hojijo nte tsükona onte jancho esüa tüv. 9 Osi ana nte yolo vanathüng a ethelan eli jiang lo nte ochia oha nte n hantok, ntiotssole oshom jiangna Macedonia lona roale a ethelan eli jianglo kyungkata a eziyicho. Ana kvüthüng ha ochia oha nte n hanthukvü ntangshoncho, osi henasüi lea hojito tssov! 10 Khrista ntsa ji alo elithüng jo Akhaia meta topvü lo shi ephyov ntinaha a n tanglanchiche to ana phyoala. 11 Ntio tsükona la? Ana nte n zancho tsükona alo? Potsow na ntsia ana nte nzanala! 12 Tolea ana enhünga ntio tssoa vanchosana hoji n tümjakna tssoa wov jijo hoto tssohungo jiang yuta n piv tsükona, ena tssoa vamo elhi shi onte ha etssov etho lia to ontepopo phyotao ji esüa n tssotokvü tsükona. 13 Hojiang kyon jiango ejüng wothung etssoeden, ejithechi elhi etssoeden, Khrista na wothungden esüa ontebobo etssophyoeden. 14 Tolea jiloha emhoktav n jü, tsüngrham jina mpato wondang lanben esüa piposi ejiphiala. 15 Jitsükona ombo phajae jiangna ntsanrük phajaeden esüa pipolea emhoktao n jü, ntiotssole ochümi jo onteno onte elhi jina emamo ji hunguv.
Paul na Wothung Tssoji Man Ezüp
16 Ana phyolana la, ochinaha beha-zhüvae to a ti-tssoyitava. Khatola ntena jito a tssoyia tssona hojitüv ejoena a khichotava osi a kangtsüthuka. 17 Enhünga ana hojitüv kanchan lümbüm hansi phyoa vamo jijo Khristian yisan mek, hojijo a beha-zhüva tae; 18 to lea kyon elümoto na kyon thüngoe onte elhi jiang zesi kangtsüala, tona aiyo ntioli hojito n tssovla? 19 Nteno behae thüngi erüm etov kvüta longshi osi nchümri lichoato! 20 Nteno ochona sana ezii nte kümtok lea, ochona sana nte retsoyi lea, ochona sana nte kyakthechi lea, ochona sana nte zerüp lea osi ochona sana omhalo nte tümi lea ntena erüm toala. 21 Enajo ontena tsso jiang esüa etssov ji lüm etsson nlio jina a yikra phyoala! Khatola ochona sana ntiona ntani kangtsüna, ana ha kangtsükuka (ana behae esüa phyoala) 22 Ontena Hebrew tssona anaha Hebrew, ontena Israel kyon tssona anaha Israel, osi onteji Abraham tsochen tssona anaha hojitüv. 23 Onteno Khrista nriiden alo? Ana woyaka phyoa mpa tssov tolea anaha onte lona kyongkata mmhonkao nrü. Ana esang mmok khithaka, evüngki vanthaka, tssungkhvü onte lona kyongkata hana osi eküm thana ontena n tsio sükhying topvü ndukthaka. 24 Jihudi jiang na rüpüm thümro toku echükta ji yenjo mongo phan a echükthaka; 25 osi yenjo ethüm Roman yonjak na a erhüpcho; osi olong naha yenjoa a phyacho. Yenjo ethüm orhung yeso ndukcho, osi yenjoa lojo jümang longi zümoa, enga to jüponi vancho. 26 Ana ntümjakvü yentsathüng jüvak osi zhükhfü ekyutsi ndukcho, retsoe ekyu, meta kyon ekyu, pvüjipoe ekyu, osi yantsüi ekyutsi, oyani ekyutsi, jümangi ekyutsi, ejüng oshomden etssoe jiang ekyu to ndukcho. 27 Ana ekyutssi tona nrinphen to ndukthaka. N yip zümo nsan-nsam licho, tssikhanghankhang, etsoyu n hung, etssük osi mpensü n hung to tssocho. 28 Thanpo ntia n duklanlea eng akvü alo oha lia, osi ekhümkho topvü tsükona wongkhyuv lia. 29 Ochona sana n khyontov vana tssona hoji kyochiv nchümala. Ocho sana ekhünga tssona a nungrala. 30 Ana kangtsüv liwo a n benzi ji tsükona kangtsüv. 31 Ana ejüng phyoa mek to ete OPVÜI Jisu opo Potsow ocho kümali omying thüngiv etümcho sana jina ntsia. 32 Damaskas yantsü jilo Aretas mesao küpo esapvüi jina a rhümav tsükona yantsü ji nhyakthukcho. 33 Khatola aiyo dekholo a thei kyimchung lo hankvü lio jilona a vachukchi a tsanthukcho.
Paul Müngtüng Osi Hungthuk
1 Kangtsüv mmhoncho meklea ana kangtsüv tolea enhungo OPVÜI thüngi na müngtüng osi a hungthuko jiang nte ezov. 2 Nzyu taro mezhü yithaka, kyon tsüka potsüwoe echungta ethümoto jilo tssüngkacho, ana ntsicho. Müngtüngcho alo otsotso hojito tssocho sana ana ntsi, Potsow tae na ntsia. 3-4 Ana elani phyoala, kyontsük ji Paradise tssüngkacho to ana ntsia, (tolea jiha otsotso alo ana müngtüngcho sana ana n tsi, Potsow tae na ntsia.) Osi ombona mphoyi kyon ochina ha opüngna n phyokhoko tüv a ezocho. 5 Ana hojitüv kyon tsükona kangtsüv, tolea a tsükona jo ana n kangtsü; a nbenzi ji tsükona tae kangtsüv. 6 Ana kangtsüo hojijo a zhüvacho tsükona mek, ntiotssole ana ntsa phyocho tssov; tolea ana n kangtsü, ntiotssole ochona sana jo ntssonkhünga a nchümiv mpato tssov. Ombona ahungcho osi a zoyicho lona mekna, nchümri lona hojito nchümvü. 7 Potsow na ntio e ngangcheo pvütsson a hungthukcho sana ji khi apopo tata n khyonkachitokvü tsükona, tsüngrham etho esüa otsük osolo khetsüv enov a theyicho osi hoji yakchia ana kangtsüv jilona a tanglanchicho. 8 Hoji khi a siyile to ana OPVÜI thüngi echung ethüm randancho. 9 Khatola ombona a ezocho, "A kianzan jina ni tssochyua, ntiotssole a etho jo ni n khyo nto yutalo ekyongo elhi tssoala." Jitsükona ana a nkhyo nto ji tsükona kangtsüv a longshiala, to tssona Khrista nkoho etho jina alo chancheta lithokvü tsükona. 10 Jitsükona ana Khrista tsükona etssak-nkung, khungsang-longsang, khangshi ntssonshi, osi emhok-elüm jiang emathata khiala. Ntiotssole a n khyo nto yuta lojo Khrista etho ji khi a etho jükacho.
Korinthia Kyon Jiang Tsükona Paul Wongkhyu
11 Ana beha-zhüvae esüa etsso-ephyo jijo, ntena atssothukcho. Ntena a thanthüng thung jo hojito a tssothuka vamo ji tsükona. Ntiotssole, anaha ntia meklea ntena a lona tsüphokao tssothuka evamo wothung jiang lona terikacho mek. 12 Anaha wothung ka to nte chekathokvü tsükona Potsow na a yakchia nte yolo chekav, emhoko osi etho elhi erüm toa tssoe nte hungthukcho. 13 Ana otssi-orangna a nzanchiwo tüv oha nte n hantoko ji yakajo ntilona ekhümkho thanpoe jiang lona n mhonkao nte tsütsacho lichola? Heto worhyua nte tsütsao ji tsükona a nzansi nlan a siyitava. 14 Ana nte thüngi yenjo ethümo to rov tsükona enhünga methaka vana, ana ohaa nte hantokvü meka, ntiotssole ana nte ejüeli jiang mekna nte ethev lia. Ntiotssole ngaro jiang na opvü-poe jiang yanthei vayia süphia mek, tolea opvüpoe jiang na ngaro jiang tsükona tajoe vayiala. 15 A tsükona jo ana emathata ethüng-eziv, osi apo po lea nte nzanchiv tsükona khochaki piv. Ana hetata nte nzamo ji man jo tara tae a nzamke? 16 Tona ana ohaa nte n hanthuk to ntena ntsia, khatola ochoang sana jo ana okyaki na ejüng phyoa nte ejithechiala to phyoala! 17 Ana nte thüngi rothuko kyon jiang yolo tsüka ji yakchia a echhi mmhomo yanchoke? 18 Ana Titus wothukcho osi ojenio jiang phana wole to ezocho. Tole Titus na nte pupthukcho licho alo? Ena omon motsünga lona osi jokyim motsünga n tssocho alo? 19 Ana ebobo oyilo theta tssoala to ntena nchümtapvü tolea jito mek! Nte woriala! Ena Khrista na Potsow vanhyalo kvüto e nsanthuk hunga sana ji esüa nsanala, osi nzamo oshomden, ena tsso jiang topvü nte nzanchiv tsükona tae tssoala. 20 Ntiotssole a zeche jo ana nte thüngi roana nte ji ana nchüma rünga to mekna kümi vam esüa osi anaha ntena a eyiloyia to mek na echümpo tssov esüa ekyua nchümala. Nte yolo khontarota, mhyiktssota, lümbüm ra n sayakhok, tajo lüma nkhenkhyu, owon oyi ekhov, tssürü-rünyota, kanchan elhi, osi nte yolo kolata liv mpa tssov. 21 Nkho-ntsi, ana nte thüngi rolana na a Potsow na nte ehungo na a yikrthuka, nte yolo ejoma na ovüngthüng oso rüngcho osi lonsü-lonphyo mmen lona n khophi hamo jiang tsükona akya-thokvü mpa tssokhoka.
Ntangnshon yi osi Salümyi Okhao Ji
1 Ana nte thüngi yenjo ethümoto tsata. Nthomotsü lona phyo ji esüa, "Ehungpvü otsük eni mekana ethüm tssoe oyi topvü methakvü." 2 Ana yenjo enioto nte thüngi vamo jithüng nkolo mmen etssoe jiang osi kyon topvü, ntangnshon yilan ezocho. Enhünga jo ana nte lona kontae vanala osi elani hojito nte ezolanala; ana rolana na ezüp nte n piv nte vachiv meka. 3 Khrista na a yakchia nsanala to chekav nte zehungo ji shi. Ombo na nte thüngi elhi etssov n tocho mek; ombo etho jina nte yolo elhi tssoala. 4 Donphen lona ombo domo jithüng teri kümlea, Potsow etho jina eküm ombo vanthokala, Enaha ombo n khyo nto ji khiala, tokhatola, nte thüngi oro elhi tssov tsükona Potsow etho jina ombo eküm jilo eshümnhyav. 5 Nteno longtsü lo vevana sana ntebobo ojang tssoe zeta, ntebobo chyui zeta vantava. Nteji ntia meknrüngu sithakcho sanakha – Jisu Khrista na ntelo vana la to ntena n tsitachoke? 6 Ana longtsüala, e elhi jiang ntia mekvü jo n sihan to ntena e ntsia. 7 Silyuo nte n tssochetokvü tsükona ena Potsow thüngi randanala, e elhi n mhon nte ejüv tsükona mek, khatola, e elhi ntia mekcho esüa zechelia nte khi mmhom tssochetokvü tsükona. 8 Ntiotssole ena ntsa ji panlana ntia n tssokhok, tolea ntsa ji tsükona tae tssoala. 9 Kvüthüng e joyisi nte chüngia sana e emathatala. Ena randamo jijo nte ji benribenyoa nte kümtokvü tsükona. 10 Ana nte ndüngo n vanathüng shi heto nte eramo jijo, ana nte thüngi roathüng ji OPVÜI na etho apio ji khi, tssoyak-khünga nte n tsütsav tsükona, ntiotssole nte monthokvü tsükona etho epicho mek, tolea nte rankathokvü lo nte nzanchiv tsükona apicho. 11 Enhungo, pyonta salümka, oshomden, a ndungntssung engatava, osi benrika benrika na kümtava, lümbüm motsünga tssotava osi noyinga vantava; tona nzan osi noying Potsow jina ntelo vamvüka. 12 Nte nte nzan lona eyulo ntssüphita salümtava. 13 Potsow kyon topvüna nte salümala. 14 Ete OPVÜI Jisu Khrista kianzan, Potsow nzan, osi Nthomon ji khümshüm ji nte topvü thüngi litoka.
1 Chiti shijo Paul, ocho wothung elhilo kyon thüngina mekna, Jisu Khrista tona opo Potsow ochona echü lona Jisu kümlanthukcho sana ji to ontena etho picho sanaji thüngina. 2 A ndüngo evan ojenioden topvü na yihata tssoe Galatia ekhümkho ji salümala: 3 Ete opo Potsow tona OPVÜI Jisu Khrista to khi kianzan osi noying nte pithokvüka. 4 Echungren n mhom shilo na etsanchotokvü tsükona ete mmen tsükona Khrista na ete opo Potsow yi enga ombobo khochaki bicho. 5 Kümali ombo pvütssonthuka! Amen.
Yithenmhom Motsünga ji
6 Potsow ochona yithenmhom motsünga ji kvümoe Khrista kianzan ji yakchia nte tsacho sana ji ntena tata tsüsoa khachoe sisi, 7 thanpo "Yithenmhom" engata yithako ji tsükona a emhokala. Thanpo yithenmhom kvüi oha n li. Tolea ena phyoa vamo jijo Khrista yithenmhom shi yesotok-hung kyon ejoma na nte ekhentoka vana. 8 Khatola ena tssolea, Potsüwoe na lanben na tssolea, yithenmhom ena nte püngnothako ji yaka thanpo nte püngnoa tssona Potsow khi ombo etssorandankathukvü ka. 9 Ena ovüngthüng ha nte ezothaka khatola ana phyolanala, ntena khichothako jilo yaka ochona thanpo yithenmhom püngnoa na Potsow khi nlan ombo pithokvü ka! 10 Ana heto phyole ana kyon khi a khichotokvü esüa engatheta alo? Mek! Ana Potsow khi a khichothuk hungala. Ana kyon emathatukvü ekhyo tssoa vana alo? Ana enhünga jana kyon emathatukvü yanpvü tssona aiyo Khrista nri mek.
Kvütoli Paul na Wothung Kümchola?
11 Ota-onyuden, ana nte ezoala, ana yithenmhom nte püngno jijo kyon lona chiyicho mek. 12 Ana ochi thünginaha n khi osi kyon ochinaha hoji a n püngno. Jisu Khrista na ombobo a ntsithukcho. 13 Ana Jihudi ekhümlan jilo vanathüng a etssophyo ji ntena zothaka. Ana kvüto Potsow ekhümkho ji ntia zümlanchi n liv roe sicho sana ji ntena ntsia. 14 Jihudi ekhümlan ji benphivlo osi pyimtsümotsüi shikhfü benphiv lo jo Jihudi kyon a yingaren jiang topvü lona tajoa choka longshi licho. 15 Khatola a bukathüng na Potsow na ombo kianzan ji khi a ethüngchethakcho. Osi ombo benkav a tsacho, 16 Jitsükona yithenmhom ji pvüjipoe jiang thüngi ha püngnotokvü tsükona, ombo tsoe ji a hungthukvü ombona methakala, osi ana kvüto lyuvsana to kyon ochia enga n van. 17 A vüngina wothung etssoe jiang thüngi Jerusalem lo tia ana n wo ovüngtssoa Arabia lo wocho. Jisülo ana Damaskas lo elani yicho. 18 Nzyu ethüm süloti ana Peter nduki ngatüng-nariv wocho, osi hopta eni ombo thüngi vana ha, 19 OPVÜI ojenio James yaka wothung thanpoe n hung. 20 Ana erana vamo yitsüng shiang topvü otsotso. Ana ejüng nphyo to Potsow na a ntsia! 21 Jisülo ana Syria tona Cilicia to metae wocho, 22 khatola Judea lo Khristian ekhümkho jiang najo jithüng jana mmhona a n tsihan. Ontena oyam na heto phyotao ji tae zohancho. 23 "Ekhangshio kyon jina enhungo ombona monthukvü yamo longtsü ji püngnoala." 24 Jitsükona a lo ntio tssothakcho sana ji khi ontena Potsow thüngtacho.
Paul Tona Wothung Thanpoe Jiang to
1 Nzyu taro mezhü sülo jo ana Barnabas ha Titus oni sosi Jerusalemi yilancho. 2 Potsow na a ezowo jina ana wocho. esopvüi to etssoe jiang thüngi ana kijaena nduktasi ena yithenmhom pvüjipoe jiang thüngi püngnowo ji yichak ji onte ezocho. Ana a elhi tssoa yithako jiang lea enhünnga tssoa vamo shiang lea kiaman tssoe n sithuk-hungcho. 3 Osi onte ejoma najo a ndüngo a nzo evamo Greek kyon Titus ji ha tsenia muchuk wo to tssocho khatola, 4 ana hojito tssole to ombo khüngkata n zo. Osi ontena. longtsüi to ejani khi okholo oro ena Khrista lona etancho vamo shi yichak jo kvüto sana ji ntsi ekhiv tsükona rocho. Ontena shikhfü ji nriden eküm thok-hungcho, 5 khatola ena ntsa yithenmhom ji ntelo lia evanthuk hungcho, jitsükona ena yuta esüngaro tia onte n ngayicho. 6 Osi ochoang jo ethelan eli esopvüiden esüa vancho sana, otsotso tssolea, ejüng tssolea jina a n wongkhyu, ntiotssole Potsow na oponi ji tae onte n zeyi, osi ana heto phyo jijo ontena ntia ntssungyi ethan a npi. 7 Jithüngo najo kvüto Jihudi jiang püngnov Peter zikacho sana ji esüa ana ha pvüjipoe jiang thüngi Yithenmhom ji püngnov a zikacho to ontena engathecho. 8 Ntiotssole Potsow ochona Peter ji Jihudi jiang tsükona wothung tssothukcho sana jina anaha pvüjipoe jiang tsükona wothung a tssothukcho. Jitsükona ekhümkho ji durhyupvüden to tsa. 9 James, Peter osi John to shiang na Potsow na tssocho mmhom a pio ji a chekayicho, osi Barnabas eni thüngi okhe echita nzo etssoden to e khanhyacho. Eiyo pvüjipoe jiang thüngi, osi onteno Jihudi jiang thüngi to e wothukvü licho. 10 Ontena olan motsünga ti mhechole to ezowo jijo onte yolo ezüpa evan osi yantsae jiang nchümchetale to, hoji jo ana a tssohunga vamo elhi ji
Paul na Antiok lona Peter Makala
11 Kvüthüng Peter na Antiok lo rocho sana ana nzontsü yolona ombo makcho, ntiotssole ombo ji chancheta woria vancho. 12 Ovüng thüng jo ombona pvüjipoe jiang nzo tsoyuta vancho khatola James thüngina kyon ochoang sana rothakale ombona hojito n tssov nkachoa yi sicho, osi ntsoyutav sicho, ntiotssole pvüjipoe muchukhungo kyon jiang ombo kyucho. 13 Hojilo vamo Jihudi thanpoe jiangna ha Peter nzo tssoe ntsalo n zarung khokvü vancho, jitsükona Barnabas mpato hotüv elhi jilo sünhyacho. 14 Khatola oni etssophyo ji Yithenmhom jilo n rata to ana zechetale onte topvü mhadungo na ana heto Peter ezocho, "Nino Jihudi kyon, khatola nina pvüjipoe esüa vanlanyilanala. Tona ntiolyui nina pvüjipoe jiang Jihudi esüa vanle to khüngkatala.
Jihudi ha Thanpoe ha Longtsü na Shanchoala
15 Eiyo Jihudi e bukcho, osi "Pvüjipoe mmen kyonden mek," 16 Khatola etena ntsia, kyon tsüka ji Potsow mhadungo elan kyon tsswothukvü jo shikhfü ji yakchia mek, tolea Jisu Khrista lo longtsü yakchia; ena ha shikhfü jina mekna Khrista longtsüo jina Potsow mhadungo elan kyon e kümtokvü tsükona Jisu Khrista lo longtsüthaka. Ntiotssole kyon ochina ha shikhfü benphicho na Potsow mhadungo elan kyon e nkümtokche. 17 Khatola etena Khrista lona Potsow mhadungo elan kyon kümtav yantathüng ete ji pvüjipoe jiang esüa mmen kyonden to e yanchena, ji yichak jo Khrista na mmen ji tsükona elhi tssoyia alo? Jito mek. 18 Ntiotssole roe sithako shikhfü ji ana tsakalam sawo aiyo mmen kyon to a khanhya nrünguv. 19 Aiyo a eküm jo shikhfü jiwoe na zitana chüthaka – shikhfü jina lüngthae sithaka, Potsow tsükona a vanthukvü tsükona Khrista ji doni sicho, osi ana ha ombo nzo a doncho. 20 Jitsükona ana eküm vana, tokhatola Khrista na a lo vanala. Ana oso lo eküm vana vamo shi jo Potsow tsoe ochona a nzana a tsükona ombo eküm picho sana hoji longtsüa vanala. 2i Ana Potsow kianzan ji khelanchi n si. Kyon na shikhfü benphichona Potsow mhadungo elan kyon küma sawo Khrista chüo ji oman nli.
Shikhfü alo Longtsü la
1 Galatia kyon zhüvaeden! Ochona nte behatokchola? Jisu Khrista domo ji motsü ji nte mhyikna hungcho esüa merüka nte ezocho! 2 Shi a janlantava: Ntena shikhfü benphiwo jina Nthomon ji hungcho alo? Toalo motsümhom ji zoe longtsüo jina la? 3 Otsotso jitata nte behacho nüng? Potsow mon ji yakchia ntena eküm ethan benkacho. Tole hoji benria kümthukvü jo ni etho na tssochecho ke? 4 Nte ejyueran tsüphov jiang ntia oman n lichoke? Otsotso hojito jo mek. 5 Potsow na ombo mon ji longphya nte pia nte lo chethev elhi tssoalo? A ezoa, hoji jo ntena shikhfü ji benphiwo jina alo? Toalo Yithenmhom ji zoe longtsüo jina la? 6 Nthomotsü na phyoala, "Abraham na Potsow lo longtsücho; jitsükona Potsow na ombo mhadungo ntsanrük kyon to ombo khanhyacho." 7 Tona ntepopo zetava, Abraham tsoe tsotso jiango longtsü lio jiang, 8 osi nthomotsü lona tsüngon motsünga lojo Potsow na pvüjipoe jiang ha longtsü yakchia elan kyon kümtokvü to hungjani vacho. Jitsükona hoji yithenmhom ji heto Abraham ezocho: "Ni yakchia Potsow na kyon topvü mmhayiv." 9 Abraham na longtsücho osi ombo mmhayicho; hoji esüa longtsüi topvü mmhayithaka. 10 Shikhfü ji benphikhoka to zikata evan topvü etsso-randanka jilo rheyithaka, ntiotssole nthomotsü na phyoala. "Kyon ochona shikhfü kako jilo licho yitsünga tia n benphirata sana ombo etssorandanka jilo rheyiala!" 11 Kyon ochia shikhfü ji benphichona Potsow mhadungo elan kyon n kümala, ntiotssole nthomotsü na phyoala, "Kyon ochona longtsü lona Potsow mhadungo elan kyon kümasana ji taena eküm vam." 12 Khatola shikhfü tona longtsü to ntia shenta n li, ntiotssole shikhfü jina jo, "Eküm jo shikhfü lona phyo jiang topvü benphia tssona jina eküm vam." to phyoala. 13 Khatola Khrista na etelo rhiyi-randanka ji ombona khi hansi shikhfü jilo etssorandanka jüwo jiloha erhanchocho." Ntiotssole Nthomotsü na phyoala, "Odung lo khüngkae kyon topvü randankae sicho kyon tssoala." 14 Abraham pono Potsow mmhayi ji Khrista Jisu yakchia pvüjipoe jiang thüngi yithukvü tsükona, osi longtsü yakchia etena Nthomon yantso phyochaki lio ji hungthukvü tsükona Khrista na ezüp shiang khicho.
Shikhfü ji Tona Echümchak jito
15 A ota-onyuden, ete engakvü ejyueranphen lo rakae ana nte ezovka. Kyon otsük eni ntsata na kvüto tssoala. Kyon yuta lo ntsata jiang mpato echunga ntsatao ji ochinaha khachoe n siala osi n thephatala. 16 Nthomotsü ephan jo echümchak ji Abraham tona ombo tsochen jiang yolo tsüka to thüngi picho. "Tsoronichen" ji yichak jo tsüka tae mek, khosha, khatola "Tsochen" ji yichak ji tsüka tae, hoji yichak jo Khrista. 17 Potsow na Abraham thüngi ntsatacho osi hoji ntsata ji vav to phyochakcho. Ana phyoa vamo ji heto. Hoji süi nzyu nzo mezhü si thümro sülo pio shikhfü jilo jo Potsow na methako ntsata ji ntongphicho osi echümchak ji ejüng tssoe n sithukcho. 18 Etena Potsow yantso ji shikhfü benphichona hunga saliwo hoji jo echümchak bencho to n phyo, khatola Potsow na Abraham kiaman yantso wo jijo echümchak bencho. 19 Tona kvütoli shikhfü ji ethev lilamla? Shikhfü ji lithuko jijo ori otsa jo ntio sana ji chethethukvü tsükona, khatola hoji jo echümchako tsochen ji ocho sana ji n rothüng nandang tae lithukcho, shikhfü jijo lanben na hansi rocho osi Potsow tona kyon to yutalo hoji yithenpvüi yakchia picho. 20 Khatola enhungo kyon tsükana na elhi tssoa vamo jina ntia yuta lo ezae ethev n li. Potsow jo motsünga.
Shikhfü ji Ethelan
21 Tona shikhfü jijo Potsow echümchak ji oni n ratacho alo? Mek! Kyon eküm vanthukeheo shikhfü picho tssona, otsotso shikhfü ji benphiwo jina kyon ji Potsow mhadungo elan kyon küm tokvüka. 22 Khatola nthomotsü lona phyoala, limha hetopvü mmen ji etho küpo vani siwo jina ochoang na longtsüa sana, Jisu Khrista lo longtsü jilo epyankae echümchak ji picho. 23 Longtsü ji n rothüng jo eteno shikhfü ji kupi vüngi longtsü etsao ji n rothüng nandang e vanthukcho. 24 Jitsükona shikhfü jijo Khrista nandang e sochicho lansoe esüa tüv, ete ji longtsü lona Potsow mhadungo elan kyon e kümthukvü tsükona. 25 Khatola enhungo longtsü ji rothako jina eteno shikhfü ji küpo mek. 26 Ntiotssole enhungo longtsü yakchia nteno Khrista Jisu lona Potsow tsoeden. 27 Ntena Khrista lo motsünga ekvümvü tsükona baptithaka, osi ntena Khrista ji mpensü esüa ekathaka. 28 Jitsükona Jihudi osi Greek, nri osi etancho evan eboe osi eloe to khota nli. Nteno topvüto Khrista lona motsünga. 29 Osi nteno Khrista kyonden tssona, nteno Abraham tsoronichen den, osi echümchak ji yakchia Potsow yantso ji nte na hunguv.
1 Ana phyoa vamo ji shi – kyon tsüka ji tsoe jina opo ejüeli topvü tssentso kümlea ombo nungothüng jo phajae jiang onte kheti esüa tssotokala. 2 Opo na yuta vayio ji n janthüng jo omboha olan topvü lo sokae jiang küpo. 3 Eteha hoji esüa tüv, kvüthüng ete nzyu na n benhancho sana jithüngjo ete ha limhapvüi omon jiang küpo vancho. 4 Khatola kvüthüng yuta ji benchosana Potsow na shikhfü ji küpo evan jiang rhan chov tsükona, 5 osi ete ji Otsoe tsotso e kümthukvü tsükona Jihudi shikhfü ji küpo evan eloe tsüka lona ombo tsoe ji rothukcho. 6 Nte ji ombo tsoeden to ntsithokvü tsükona Potsow na ombo tsoe ji Mon ji ete lümbümi rothuki, Omon jina, "Opo, A opo to phyothukala." 7 Jitsükona nteno enhungo nriden mek, tolea otsoe, osi nteji ombo tsoe kümthako jina Potsow na ombo tsoe epiv elio jiang topvü nte piv.
Galatia Kyon Tsükona Paul Wongkhyu
8 Tsüngon yithako jianglo jo ntena Potsow n tsiv vancho, jitsükona nteno Potsow meko tüv nriden tssota vancho. 9 Tolea enhungo ntena Potsow ntsithako jina osi Potsow na nte ntsithako jina kvütoli ntena hojitüv yantsae n senjüngo mon jiang thüngi nte yilan hungala? Limha shilo omon jiang nriden nte kümlanhungalo? 10 Ntena tsüngon, choro oküm osi nzyu jiang echümporo cheka khiala. 11 Nte tsükona elüm a ongkyuala! A elhi jiang ji ntena ntia mekvü kümi sithokvü ke? 12 A esüa kümtale to ana nte ntssungala, ojenioden. Ntiotssole aiyo nte esüa kümthaka. Ntena ntia nlümo a n tssoyi. 13 Ntio tsükona ana nte thüngi yithenmhom ji nte püngnodencho sana ji ntena nchümchev tssov, jijo a tsüko nochonori elio ji yakchia. 14 Khatola ntena a tsük oso zesi a tssaka osi a n sothev n si, osi ntena a ji lanben esüa osi Khrista Jisu esüa a khichocho. 15 Nteno elümoto nte emathacho! Tona enhünga jo nte ematha jo kvüla? Ana phyoala, ntena nte mhyik jiang mpato tssochewo khichei a piv esüa a nzancho. 16 Tona ana ntsa ji nte ezo jina aiyo nte ri kümthakchoke? 17 A n zehung kyon jiang na elümoto nte jüpona vana khatola mmhom tsükona mek. Nte khi a lona kontae onte thüngoe tsswothukvü tsükona ontena a thüngina nte kontatok-hungala. 18 Mmhom etüm-ezi hansi saliwo oyam na nte chokao ji mmhona – hoji jo ana nte thüngi vanathüng tae mek, yuta topvülo mmhona. 19 A nungoriden! Nte lo Khrista n vanthüng nandang jo aiyo nte boklam tsükona oyo tsükana tsobukra noa esüa nte tsükona a ryusanga nchümcho. 20 Ana heto mekna nte zecheo tssoa enhünga nte yolo vancho saliwo to nchümala, ntiotssole nte tsükona kvüto lyuna mmhom sana n tsiv elümoto a wongkhyuala.
Hagar tona Sarah to Ejyuka
21 Shikhfü ji kupi vanhungden: a ezotava, ntena shikhfü jina ntio phyoa sana enga n vanta alo? 22 Nthomotsü lona phyoala, Abraham na otsoe otsük eni vancho, tsüka jo ombo nri-i lona, tsüka jo etancho buko ombo eloe ji lona to. 23 Khatola ombo nri-i lona buko jijo tathi tsobuk lan lona, tolea etancho eloe lona buko jijo Potsow echümchak benthukvü bukcho. 24 Shiang hetopvü lona heto engathei khikuka: eloe otsük eni jijo ntsata olan eni ji ejyuka. Oni lo tsüka jo Sinai phunglanina chiyicho, osi ombo lona chiyio tsoe jiang jo nriden tssov sekacho; jijo Hagar. 25 Hagar jo Arabia lo Sinai phunglan ji ejyuka, ompvüo enhünga Jerusalem ji ejyuka, ntiotssole Jerusalem ji ompvü ngaro jiang nzo ezi-i ekümo vana. 26 Khatola etancho eloe jijo Potsüwoe Jerusalem ji ejyuka, ompvüo ete oyo ji. 27 Nthomotsü lona phyoala. "O otsoe n lio eloe, nina otsoe n vanlea longshia; tsobuk na ni ryusang n lilea tüngsochia longshia! Ntiotssole orapvü evamo eloe ji thüngina jo yingsiyingloe eloe ji ngaro ekyongo vanthaka." 28 Khatola oshomden, nteno Isaak esüa Potsow echümchak tsoeden. 29 Elani, hoji tsüngono tathi tsobuk lona buko tsoe jina omon etho lona buko tsoe ji kangshio ji esüa enhünga ha hoto tssoala. 30 Khatola Nthomotsü na jo kvüto phyoala? "Nri-i tona ompvü tsoe ji to phani sia; ntiotssole nri-i tsoe jina etancho eloe ji tsoe thüngi tssetso motsünga n tssoche." 31 Jitsükona oshomden, eteno nri-i eloe ji tsoeden meka, etancho eloe ji tsoeden ka.
Ni Etancho ji Nkohoa
1 Etena etancho ji evamo lithaka – osi etancho kyon esüa Khrista Jisu na evachicho! Jitsükona zajüngi vana, nri-i vüngkhüng ji ti phungthelana. 2 A Paul na nte ezoaka, engata! Ana ntio phyoana chekatava, Ntena tsena muchoka tssona Khrista jo nte tsükona mek. 3 Ochona ombobo tsena muchoka na ombona shikhfü ji rüktheta benphichev to ana ezolanala. 4 Nte ochoangna shikhfü ji lona Potsow mhadungo elan kyon kümvü ekhyo tssoa vancho sana topvü Khrista lona ntebobo kontathaka, osi Potsow kianzan ji tssae nte elongthethaka. 5 E tsükona jo, eiyo Potsow na ombo mhadungo elan kyon ekümtokvü to eyilo lia; osi Nthomon jina e longtsü jilo elhi tssoa vamo ji yakchia hoji eyilo jilo esochukchiv ji ena nhyakala. 6 Ntiotssole ena Khrista lo vana tssona tsena muchok lea n muchok lea ji ethev ntia n li, ethev lio jijo nzan lona elhi etsso longtsü ji. 7 Nteno mmhona yia vanchola! Ochona ntsa ji engav lo nte khetsüchola? Ombona kvütoli nte enayachola? 8 Hojito nte tsao Potsow jina tssocho mek. 9 "Ebung mozhü tara jina hümri totona bungtokala," to phyotao ji esüa. 10 Ete topvü OPVÜI tsüka ji echi tsso jina ana nte lo longtsüka lia, nte khi ha hoto a nchümilan thukvü tsükona. Osi ochona nte püngnosora sana kyontsük ji shilea shilea Potsow na ezüp pinrüngu. 11 A tsükonajo, oshomden, ana enhünga jana muchuk ethev lia to püngnoa vancho saliwo kvütolyui ezüp ndukvüla? 12 Ana muchuk tsükona püngnopvü saliwo, ana donphen motsü püngno jina ochia lüm n tsuk. Nte püngnosorao kyon jiangjo ontepopo tssoni sisi boloe kümtena saliwo ji a mathao. 13 Oshomden, nteno etancho evam nte tsachoka. Tolea etancho shi ti tsütsasoratava osi hojilo zikae limha lo nte tathi ji benche elhi ti-tssotava. Khatola nte nte nzanta benkatava. 14 Ntiotssole, "Ni shom jiang nibobo esüa nzana" to phyo ji benphiwo jina shikhfü ji topvü benthukala. 15 Ntena eküm rüm jiang esüa nte nte nkükta rumi tsota tssona, ntepopo rümkyingtae siv, jitsükona ntangnshontava.
Omon ji Tona Kyon Tathi to
16 Ana phyo jijo heto, Omon lanso lona vana tona limhalo nte tathi ji lüm erüng jiang bencheyiv meka. 17 Ntiotssole limhalo tathi lüm erüng jijo omon jilo n rata, osi omon jijo limha tathi ji woni n rata, ntiotssole oni ji ori, ji yichak jo ntena nte chokao jiang n tssov tsükona. 18 Omon jina nte soa tssona, nteno shikhfü ji kupi mek. 19 Limhalo tathi ji elhi jo opon tssoa hungala; lonsülonphyo, n ntssüng-rüng, shikhfü ntümo elhi; 20 kisü ekhüm, methevüja; oyi tssota, khonta; 21 mhyiktsso, lümbüm etsuk ntangkuk, tajo elüm, nkhe-nkhyu, khotarüta, khümtsüng zeta, epi-era, kinoe nshanlong, to shiang. Ana ovüngthüng ntangnshon yi nte ezoji esüa nte ezoala. Ochoang na heto etssophyoa na jiangna Potsow ekhüngyani tsentso n tssoche. 22 Khatola omon ji tssüngthi jijo, nzan, longshi, noying. erümeto, khonzan, mmhom nchüm, longtsüka, 23 eyingro, sayakhok to shiang tachio tüv shikhfü ntia n li. 24 Khrista lo vana vamo jiango onte limhalo tathi ji onte choka osi lüm erüng jiang nzo donhyae sithaka. 25 Omon jina ete eküm ethan epithakcho tssona, omon ji lanso küpo evantokvü. 26 Etena kangtsüa osi nophita ete bobo mhyiktssotae lümbüm yesota vantav meka.
Nte Oha Nlichotava
1 Ojenioden, nte yolo ochosana na silyuo tssoathüng mpato rhümalea, nte omon lo evan na enyipi na ombo nsachoyia, otsük akvüna ntepopo tüngochüngtava, to n tssona nteha worikhuka. 2 Nte nte oha hankyiptava, tona hoji lona Khrista shikhfü ji bentokala. 3 Ochona ntia meka ha ombobo ntiona esüa nchüma na ombobo ejithechiala. 4 Otsük akvü ombo ombo elhi ji chani zethuka osi mmhona tssona thanpoe elhi jilo ti etsitana ombobo montsson toka. 5 Ntiotssole otsük akvüna ombo kija haa ji ombobo na ham. 6 Ochona püngnoyi zoe khiana ombona ntio liana püngnoe ji chinhya. 7 Ntebobo ti kyakthechia; Potsow jo n jiphiche. Kyon tsüka na ntio yingana hoji tsotso ombona riv. 8 Ochona limha shi tathi erüng jilo yinga na ombona chüi esio tüv richov, osi ochona omon ji chon lo yingasana ombona kümali eküm richov. 9 Elhi mmhom etssov lo ti ryujaktava, etena etho n jakna tssota van na yuta epen lo ritav. 10 Jitsükona etena kvü' thüng elhi mmhom etssov yuta hungana topvü thüngi mmhom tssotavka, echümporo tssoa longtsüi jiang kholok lo.
Salüm osi Ntangnshoyi Okhao ji
11 Enhünga ana erantsüng tsüphov khi chancheta nte eramo shiango a khena erancho. 12 Kyon ochoang na oponi tssolan phyolan jiang tssoa nte ejü si, nte khi onte longtsüthuka sana jiangna Khrista donphen ji ntani ezüp onte n pitokvü tsükona tsena mvüchokle to nte khüngkatala. 13 Ochoang na tsena muchokvü nte ezoa sana ontena jo shikhfü ji tia n benphi, tolea nte tsüko mhorük ji zesi kangtsütav tsükona tae nte khüng katala. 14 A tsükona jo Khrista donphen kvüwoe yakchia limha ji a lo chüathukcho sana osi a ji limha jilo chüi sithukcho sana hoji tsükona yaka ntinaha n kangtsü. 15 Kyon tsüka ji muchoka, n muchok to ji ethev n li, ethev elio jijo ombo ji eküm ethan joyinglancheoji. 16 Ochoang kvüta na shikhfü shi ephan benphiana jiang topvü pono noying osi khonzan lithuka – ji jo Potsow kyon jiang pono! 17 Enhungo ochina ha a ti khetsüa, ntiotssole a tsüko mhorük jiango aiyo OPVÜI Jisu nri to chekav ji. 18 Ete OPVÜI Jisu Khrista kianzan ji nte lo vanthokuka, ojenioden. Amen.
1 Chiti shi jo Paul, ocho Potsow lüm erungo na Khrista Jisu wothung tssoa sana jina Potsow longtsüka kyonden osi Khrista Jisu echi Efisia lo vamo jiang thüngi eranala. 2 Ete opo Potsow osi OPVÜI Jisu Khrista thüngi na yio kianzan osi noying ji nte echi tssothokvü ka.
Khrista lona Omon Mmha
3 Etena ete OPVÜI Jisu Khrista opo Potsow ji montsso pitavka! Ntiotssole, etena Khrista lo motsünga tssoe vamo ji yakchia, potsüwoe omon mmha kvüta licho sana jiang khi epia e mmhayiala. 4 Limha shi n liyingthüng na Jisu Khrista yakchia ete ji ombo echi etssov tsükona ethüngchethakcho, hojitolui ete ji ombo mhadungo ntia ephyo-erüv n lina ntsanthoa ekümtokvü tsükona. 5 Ntiotssole ombona e nzancho tsükona eteji Jisu Khrista yakchia otsoe ekümthokvü tsükna ombo echi khochaki e vacho. Ombo ematha osi etüm ezi ji hoji tssocho. 6 Etena ombo emhokthav kianzan ji tsükona osi ombo nzamo tsoe ji kiaman epithako ji tsükona to Potsow thüngtavka! 7 Khrista na chüo ji yakchia ete mmen jiang e siyicho osi etancho evachicho. 8 Potsow kianzan ombona pvülyua epio jijo kvüta tsüphocho ato! 9 Ombona ntio nzan elhi Khrista yakchia etssov tümka licho sana ji osi ombo lüm erüng etssov mphoe licho sana ji ombo kichuk nchümri topvü lona e ntsithukthaka. 10 Ombona tümkao elhi jijo limha shi topvü, potsüwoe osi limha lo ntio licho sana topvü ji Khrista lona khüngtsütav ji, osi Khrista jo jilo kvüri ji. 11 Shiang hetopvü to Potsow na ombo etüm ezi osi methak ephan tssocho; osi Potsow na ombo etüm ezi khi, Khrista Jisu yakchia ombo kyonden ekümthokvü tsükona shi ang tssocho, hojijo ombona benkadeni na methaki evao jilo ndungkacho. 12 Jitsükona ete ochoang na ovüngna Khrista Jisu lo eyilokata vancho sana jiangna Potsow pvütsson ji thüngtavka. 13 Osi nte pvüjipoe ha ntsa yithen ji zoale, osi yithenmhom shancho nte pio ji zoale, Potsow kyonden kümcho, osi nteha Khrista longtsüiden kümcho. Osi nteno ombo echi to chetheo tssoa Nthomon yantso phyochaki lio ji ntelo ejüpkacho. 14 Potsow na ombo kyon jiang thüngi epiv phyochaki elio ji etena khichov to ji Nthomon jiina ntsaka epiala, osi shi yakchia Potsow na ombo kyon jiang ji etancho eküm epiv toji ntsaka epaiala. Jitsükona etena ombo pvütsson ji thüngtavka!
Paul Randan
15 Jitsükona ana kvüthüng Jisu lo ntena longtsüo ji tona ntena 16 Potsow kyon jiang topvü nzamo ji to jiang zocho sana ana nte tsükona montsson epiv n tümjakhan. A randan lo ana nte nchümchetala, 17 osi ntena ombo ntsithako ji esüa kichuk nchümri osi matangche elio omon yantso ji nte pithokvü tsükona ete OPVÜI Jisu Khrista Potsow pvütssomo opo thüngi nte randaniala, to tssona ntena mmhona ombo ntsichev. 18 Eyilo kümoe tsükona ombona nte tsacho sana hoji nte chekathokvü osi ombo wondang ji nte hungthokvü ana nte randaniala; pvütsson ejüeli kümoe ombo kyon jiang topvü nzo oro khitale to nte tsa vancho sana, 19 osi etena kvüthüng longtsüa na ombo etho ochüm n lio jina etelo elhi tssoa vamo ji nte chethetokvü tsükona. 20 Etelo elhi tssoa vamo shijo ombona echü lona Khrista kümlanthoki potsüwoe opo khe amimoe khokthethukcheo etho tsüphov ji; 21 Khrista na potsüwoe vani esae topvü poni vani etho topvü poni, etho osi OPVÜI topvü poni, echungren shilo tae mekna echungren etsao jiloha kvüta ntan kaphen omying licho sana jiang topvü pono tssoe sala. 22 Potsow na olan topvü Khrista kupi thechithaka, osi ekhümkho jilo OPVÜI kvüri ji ombo tssothukthaka. 23 Ekhümkho jijo Khrista tsük ji, osi kvüthüng otsük jina kvüri ji lo chümkata sana jithüng ji limhalo olan topvü benripvüi jina ombobo benriyiv.
Echü Lona Ekümi
1 Tsüngon yithako ji jo nte pvüjipoe yo, nte jancho nzo osi mmen ji tsükona omonlo echü tssocho. 2 Hoji yuta lojo, nteno limha mmen ji phankata, enhünga Potsow jancho n zoe jiang yolo elhi tssoa evmo, oyaki ezhüi tsüngrham mon ji etho küpo vantacho. 3 Ete topvü na tsüngona lojo otsotso ete tsük oso osi lümbüm erüng jiang lo ete etancho tssota vancho. Hoji yakchia, thanpoe jiang esüa eteha lüm etsuk jilo erheyicho. 4 Tokhatola ete tsükona Potsow khonzan jijo tssochyua osi tsüphoa elio jina 5 Etena jancho nzo yakchia omon lo echü jilo vanathüng mpa Khrista lona ekümi esochukchicho. Osi Potsow kianzan jina nte shanchocho. 6 Osi eteha Khrista lo vamo ji yakchia ombona Khrista nzo ekümlantoki Potsüwoe ombo pvütsson vanphen jilo echinhyacho. 7 Ombona Khrista Jisu nzamo jilo na ombo khonzan n jyuphitao etsson elüm ji echungren etsao jiang hungthukvü tsükona ombona hojito tssocho. Nte elhina mek, tolea longtsü yakchia kianzan jina nte shanchothaka. 8-9 Hojijo nte longtsü yakchia Potsow kianzan jina nte shanchocho tae. Ntena ntepopo hungcho mek, tolea hojijo Potsow yantso. Jitsükona hoji khi kangtsüv n li. 10 Etena enhünga vamo shilo Potsow na e kümthukcho osi Ombona Khrista Jisu yakchia ovüngna elhi mmhom tssoa vamo e kümthukthaka. Potsow na ete tsükona methako ekümlan ji shi.
Khrista lona Motsünga
11 Nte pvüjipoe yo n mvüchoko jina tsüngona lo jo Jihudi jiangna n mvüchung to nte tsacho, Oponi tssolan phyolan benrio kyon "Mvüchung" Jihudi jiangna "N mvüchung" to nte tsacho. Ntena vana yithako ji nehümehetava. 12 Hoji yuta jilo jo nteno shanchopvüi Khrista nthena vancho. Nteno lankon-lansiden osi Potsow kyon yolo nte n khanhya, osi echümchak jüwo ntsata jilo nte n khanhyacho. Nteno eyilo n-liv Potsow n thev limha shilo vancho. 13 Tolea enhungo Khrista echüo ji yakchia osi ntena Khrista lo khüm kae vamo ji yakchia nte ekoni evan jiang enhyano nte yithukthaka. 14 Khrista jo nte mmhontaphen ji, ntiotssole ombona Jihudi tona pvüjipoe jiang to motsünga ekümthokthaka. Ombona ombo tsük jina thani ete yutalo chungso ji khi sithaka. 15 Osi ombona Jihudi shikhfü ji osi jilo yizüng jüwo jiang topvü monthukthaka. Ombona Jihudi tona pvüjipoe to tssotsüi khümtsüng motsünga kyon ethan soyinguv tsükona osi ombolo khümkae noying lona e vanthukvü tsükona shiang shi tssocho. 16 Om bona ete tssakta nkongta ji moni sithuksi kyon ethan to Potsow lo sosi wov tsükona donphen lona chücho. 17 Hoji tsükona ombona oro yithenmhom ji Jihudi osi pvüjipoe topvü thüngi Potsow lona ekoni evan nte osi Jihudi enhyano evan jiang thüngi püngnocho. 18 Ete pvüji eniata na Khrista yakchia omon motsünga lona opo thüngi saksak wocheta. 19 Hojitsükona enhungo nte pvüjipoe ha amo-atsiden mek, nteno Potsow kyon jiang nzo Potsow kyon tssothaka osi ombo wopan lo rheyi thaka. 20 Nteno wothungden osi zenkhying den jiang lo ndungkae tssokachio ki kvümoe Jisu Khrista jo nkenlong sana jilo echi motsüngtsüng kümthaka. 21 Hoji dyurhyupvü jijo Khrista Jisu. Ombo lo khümtsüi, osi totona benrichukchi OPVÜI khümphen to nthochako ki kümcho. 22 Osi ntena ombo lo khümkao ji yakchia nteha thanpoe jiang nzo omon lona Potsow vanphen jilo motsünga nte kümthukthaka.
Pvüjipoe Jiang Tsükona Paul Elhi
1 Jitsükona, A, Paul ochona nte pvüjipoe jiang tsükona Khrista elhi tssoji yakchia evüngki vancho sana jina Potsow thüngi randanala. 2 Potsow na ombo kianzan lona nte thüngi elhi shi etssov a zikao ji ntena zonrüngthakvü. 3 Potsow na ombo mpho etüm ezi jiang ji a hungtokcho. (Ana hoji tsükona hüngriha nteria hoji khae zeta tssona to nte eranthaka, 4 osi hoji yakchia Khrista lo mphoyi ntio ana engathecho sana ji ritena ntsiv.) 5 Echungren yithako ji jo enhünga omon jina wothung jiang tona zenkhying jiang to thüngi ntsithukthako ji esüa jo kyon thüngi hoji n tsithuk. 6 Hoji mphoyi jijo pvüjipoe jiangna lea yithenmhom ji yakchia Jihudi jiang mmha jilo chinhyathaka; Potsow Jisu Khrista yakchia ombo echümchak benthuko jilo onte ejan ha lithaka. 7 A lo Potsow kianzan yantso jina, osi ombo etho na elhi a tssoyia vamo ji yakchia Potsow na hoji yithenmhom ji nri-i a kümthukcho. 8 Khrista ejüeli ochüm n lio yithen mmhom pvüjipoe jiang thüngi püngnov tsükona Potsow na e nzantharo a hetüv ombo kyon yolo teritso ji mpato tssochobenta a picho. 9 Potsow mpho etüm ezi ji tssochukchithukvü tsükona otsük akvü nthiphiv a zikacho. 10 Enhünga, ekhümkho ji yakchia Potsüwoe esaeden osi etho tsütsae jiang thüngi ombo mpho tümka lantaro jiang ntsithukvü tsükona limha topvü lyuyingpvüo jina shijo kümali ombo thüngi tae mphoe vacho. 11 Shiang hetopvü Potsow na kümali tsükona tümkao ji ete OPVÜI Khrista Jisu lona benthukvü tsükona tssocho. Ntiotssole shiang hetopvüto nte eman tsükona. 12 Etena longtsü yakchia Khrista lo vamo jina khatüng n lina Potsow eshüpo evov lüm etsson lithaka. 13 Jitsükona ana nte tsükona ezüpo jiang khi nte lümbüm tisuktale to jonjiala.
Khrista Nzan ji
14 Jitsükona ana shi phyoathüng ha opo thüngi khoktseni randanala. 15 Ocho lona limha lo osi Potsüwoe wopan topvü na onte mying osi onte tathi ji chekacho sana ji. 16 Osi ombo mon nte lümbüm chungi vamo ji yakchia ombona ombo pvütsson ejüeli jilo etho khichei nte pithukvü etho lia nte vantokvü ana randanala, 17 Hojitolyui longtsü lona Khrista ji nte lümbümi vanthukvü tsükona ana randanala. Nteji nzan lona oying süngi nzan lo chenkathukvü randanala. 18 Jito tssona ntena Potsow kyon topvü nzo tssoe Khrista nzan ji kvüta ngazoa, siphoa, ntssona osi jungcho sana ji engathev lo etho liv. 19 topvülo mmhona engathev jo n tssoche, tolea ntsinran topvü pomoe lio nzan ji nte ntsitoki Potsow khi benria engathe khi nte pyingthukvü tsükona ana randanala. 20 Enhungo ocho etho na nte lo elhi tssoa vamo ji yakchia etena chona osi nchümo jilo na rankata tssotukcho sana hoji thüngi: 21 osi Khrista lo khümkae vamo ji yakchia, echungren echungren ekhümkho ji yakchia ombo pvütssonthuka! Amen.
Otsük ji Yihata Tssoala
1 Jitsükona, OPVÜI elhi tsükona vüngpheni evan a shina, nte ntssungala, nte ekümlan jina OPVÜI na ntio etüm khi nte tsacho sana jilo etümtharoa vantava. 2 Yuta topvü lo emiroa, enyipa, osi erüm totava. Ntena nte erüm totawo ji khi nte nzan ejütava. 3 Omon jina noying elhi motsünga nte kümthukthako ji lia vanthuki hoji mmyanta ji eto nandang ntelo lithuka. 4 Potsow na nzontsü eyilo motsünga lo nte tsao ji esüa otsük osi omon motsünga etssov nte tsacho. 5 OPVÜI motsünga, longtsü motsünga, Bapti motsünga, khi Potsow na nte tsacho. 6 Potsow osi opo motsünga, topvü poni OPVÜI topvü yakchia elhi etssowo osi topvü lo vankhamo Potsow motsünga tae. 7 Khrista na ombo pvüli ephan ete topvü ombo ombo ekyan ephanina e yantsothaka. 8 Nthomotsü lona phyoala, "Ombona kvüthüng Potsüwoe chüngicho sana, ombo ndüngo evüng khosha sonhyacho; osi ombona kyon jiang yantso picho." 9 Ombona "oyaki chüngicho" to phyoji yichak jo ntiola? Ji yichak jo ombona lichungi rhowodencho. 10 Osi lichungi rhoeo jina oyaki ha Potsow echungta jiang topvü lo konkata chüngicho, ombo vanrhyu jina limhatsü pyingthukvü tsükona. 11 Ombona kyon jiang pono yantso picho osi hoji jo ombona ochoang sana jo wothung tssothukcho, ochoang sana jo zenkhying, ochoang na jo pastor osi püngnoeden to etssov picho. 12 Ombona heto etsso jijo, Potsow kyon jiang topvü Khrista benka elhi lo benritoki, Khrista tsük ji tssokachiv tsükona hoto tssocho. 13 Hojitolyui, ete topvüna longtsü lo, osi Potsow tsoe ji ntsia engathevlo motsünga tssotav; osi eteji longtsülo ranbenthang kümi, Khrista benrio ji esüa benria ekümtokvü tsükona. 14 Hojito tssona eteno ngaroden esüa, ejüng püngnoe ezhü kvüta vena yiasana jiangna e kenphio n tssota, osi kyon okyak eli jiang na oyam sosorav yamo jiang kyak-ko n rhetala. 15 Jithüngo najo ntsaji nzan yi na phyota, lanka topvü lo Khrista ocho ekhümkho kvüri sana jilo rankatav. 16 Ombo saya küpona chungtalukta jiang yakchia otsük totona ombo lo shentsücho. Ombona solan akvü to ombobo elhi ji tssothukala, hojitolui, kvüthüng solan akvüna onte ejan ji tssoa sana ombo nzanlo phanthiala.
Khrista lo Eküm Ethan ji
17 Jitsükona ana OPVÜI myingona heto ntangshon yi nte piala, Potsow n tsi jiangna ethev n lio nchümri hansi vantawo jiang esüa ti tssotale to nte ntssungala. 18 Onte engathe jijo emüng, onteno Potsow na pio eküm ji lona kontae vana. Ntio tsükonala? Onteno ntia chetüng n li osi eyimden. 19 Onteno yikra n lio jina ontena elhi n mhon jiang ntia khatüng n lina tssotala. 20 Khatola nteno Khrista ji hotowoe na engathecho mek! 21 Ntena ombo yi zonrüngthaka, osi nteno Khristian tsso jina Jisu lo ntsa lio ji nte püngnocho. 22 Ntena eküm ehen ji ochüm tssoe sitava, hojilo ombobo roe esio ejithechio n lamo tssohung sen jüwo ji sitava. 23 Nte lümbüm nchümri totona ethan kümtokvü shikhfü, 24 osi eküm ethan Potsow esüa lyuyingo ji, ntsa ji long chiyio ntsantho lona hunga vamo eküm ji ekatava. 25 Jitsükona ejüng ephyo ji esantava, osi Nthomotsü lona phyoji esüa, otsük akvüa ombo phinakishüm thüngi ntsa vana, ntiotssole ete otsük akvüto Khrista tsük motsünga jilo solan motsüng tsüng. 26 Nina lüm tsuka tssona, lüm etsuk ji khi mmen etssowo lüm ti-tsuka. 27 Eng n rhethüng enyipi sia, osi n mhon ji yuta ti-pia. 28 Efüi jina efü esam lia, osi ombo khe jiang ntsa elhi lo kongtsüngtoki eküm vantoka osi ombo kongtsüng ryumhen ji yakchia yantsae jiangha nzanchicheo tssotoka. 29 Nte ochia püngina ha oyi n mhon tichiyitoka, tolea yitsüng ji rakchei ethelan lia osi rontacheo nsana, tona ni yi ezoe jiangna mmha hunguv. 30 Potsow Nthomon ji ti nungrathuka, ntiotssole omon jijo ombona vachi tsüngon jilo ombo echi to nte hoa e chekaphen ji. 31 Jitsükona ekhov lümbüm etsyu, osi lümbüm etsuk topvü sitava, wonyang osi yikvü, lümbüm kümchita ntia ti lithuka. 32 Jithüngona jo nte nte nzantio to tssota nzantava, osi Potsow na Khrista yakchia nte thüngi nlan siyithako ji esüa nte nte nlan siyita vantava.
Wondangi Vantava
1 Nteno Potsow ngaroden osi ombona nte nzanala, jitsükona ombo esüa kümtav shikhfü. 2 Khrista na ombo eküm khochaki orhüm mmhom than Potsow na emathao tssoa pithako ji esüa nte eküm jiha nzan jina nte sayatokvü lia. 3 Potsow kyon jiang yolo jo lonsülonphyo n mhon, n thono lantaro osi oso lo ebiera ntia n lithukvü shikhfü. Nte yolo jo hojitüv phyotav n tüm. 4 Elani pholashüla, saritao yi osi wonshü yishü n phyotav shikhfü. Jithüngona jo ntena Potsow montsso epi na pyingi vantav lia. 5 Shi mmhona engathe khitava; kyon ochona lonsülonphyo n mhon benphia sana osi n thono elhi tssoa sana, kisükhüm yakchia ebiera sana Khrista osi Potsow ekhüngyan jilo ombo ejan nli. 6 Yilan shiang tsükona zükhoroa phyoa kyao jiang khi nte tijithechitoka. Etssophyo hetüv shiang na Potsow lüm etsuk ji ombo yi n ngae jiang pono jorotokala. 7 Hojitüv kyon thüngi ti shentava. 8 Nteno emüng ji nte n khotav vancho; khatola enhungo ntena OPVÜI echi kümthaka. Jitsükona wondangi evanden esüa vantava. 9 Ntiotssole wondang jina mmhom topvü chiyithukala, ntsanrük osi ntsa elhi jiang topvü chiyithukala. 10 Osi ntio na OPVÜI emathata sana hoji yanala. 11 Emüngi evan ethev n lio kyonden jiang thüngi ti shentava. Jithüngona jo wondangi onte sosi yiv shikhfü. 12 (Ontena mphoa etssophyotao jiang phyotav tia e yikra.) 13 Kvüthüng wondangi hansi yiasana, onte tathi ji oponi chiyia hungtokala; 14 osi hojito oponi chiyitoko jiang topvü wondang kümthukala. Hoji tsükona heto phyocho lia, "Phanthia, yipa evan, echü lona phanthia, tona Khrista na nilo wonkav." 15 Jitsükona ntena kvüto vamsana elümoto ntangshontava. Zhü vae esüa ti tssotava, tolea nchümri eli esüa etssophyotava. 16 Yuta shiang n mhonka, nte yuta jiang mmhona tsütsae oman lithuktava. 17 Jitsükona eyim esüa tivantava, tolea OPVÜI lüm erüng ji ntsitava. 18 Kinoe ti vantava jijo nte tsük yesoe esio jitae; jithüngo najo omon ji khi nte pyingthuka. 19 Nte ji ethüngkhen osi longtsü khen khi denkata; nte lümbümi na OPVÜI lo okhen mmhom dentava. 20 Yuta topvülo olan topvü tsükona ete OPVÜI Jisu Khrista myingona opo Potsow montsso pitava.
Tsoeniden tona Orapvüiden to
21 Khrista yikrachi lona nte nte kyuchitava, 22 Tsoeniden, ntena OPVÜI thüngi esüa nte tsoe-rapvüi jiang küpo vantava. 23 Osi kvüto Khrista na ekhümkho ji pono etho licho sana ji esüa orapvüi jinaha ombo engh ji pono etho lia, ntiotssole Khrista jo ombo ekhümkho ji kvüri osi shanchopvüi. 24 Khatola ekhümkho jina Khrista küpo vanala, hoji esüa engh jiang na ha olan taro lo onte tsoerapvüi jiang küpo vam lia. 25 Orapvüiden, Khrista na ekhümkho ji nzana ombo eküm pio ji esüa nte tsoeni jiang nzantava. 26 Ombona ojü tona oyi ji to khi ompvü epyocheta Potsow lo nthochev tsükona hojito tssocho. 27 Osi hojitolyui ephyo erüv n khyingna nthoa ompvü pyon shenthi tssothuki ombona khiv tsükona. 28 Orapvüi jiang na tsoeni jiang heto nzantav lia; ontena onte tsük nzana esüa tsoeni jiang nzam lia, ntiotssole tsoeni nzamo kyon jina ombobo nzanala. 29 (Kyon ochina ha ombo tsük ji n tssakala. Jithüngona jo Khrista na ekhümkho ji tanünga to tanünga süphiala; 30 ntiotssole eteno ombo tsük jilo solan jiang.) 31 Nthomotsü lona phyoala, "Hoji tsükona eboe tsükana opo ha oyo oni sisi ombo tsoeni nzo vam, osi oni motsünga kümvü." 32 Motsü lona heto ephyo jilo ntsa tsüphov mphoe jüa, a nchüm jo shijo Khrista tona ombo ekhümkho jito tsükona phyocho. 33 Khatola nte otsük akvü tsükona hoji otsotso: orapvüi otsük akvüna ombobo nzana esüa tsoeni nzamvü shikhfü, osi tsoeni jina ha orapvü yikrachia vam shikhfü.
Opvüpoe tona Ngaroden to
1 Nongoriden, Khrista lona nte pvü-opo jancho zoa vantava, ntiotssole hoji jo Khristian elhi osi elan ji hoji. 2 "Nte pvüpoe yikrachia jancho zotava" to phyo jijo yizüng ovüngo ji osi jilo echümchak heto jüa: 3 "Ntena hojito tssona nte tsükona sükhying topvü mmhomka, osi nte metalo harishia nte vamka." 4 Opvüpoeden, nte ngaro jiang lümbüm tssatssoyiwo tüv ti tssoyitava, jithüngona jo Khristian etssophyo osi püngnolan jiang lo sokatava.
Ezi-iden osi Opvüiden
5 Ezi-iden, ntena Khrista benkata vancho esüa limhalo nte pvüi jiang kyua eneta yikrachiatava, osi ntsa-nrüka onte yi engatava. 6 Ontena nte elhilo ni emathayitok hungwo jina ontena ni cheyata vanathüng tssoji tae mekna, Khrista eziiden esüa Potsow lüm erüng yana nte nchümri totona lüm thei onte benkatava. 7 Osi kyon thüngi tssoa esüa mekna OPVÜI benkata esüa emathata tssotava. 8 OPVÜI na etancho evan osi ezii to n lina otsük akvü ombobo elhi mmhom jiang ephan yantso piv to nehümehetava. 9 Nte Opvüiden naha olantaro lo hoji esüa tssotav lia. Osi nte ezii jiang ekhentoka ti ekümtava, tolea nte langoto tsükona OPVÜI tsüka potsüwoe vana to nehümehetava, ntiotssole ombo na jo kyon topvü kheti oyi tssoyiv.
Potsow Pipo ji
10 Okhao tssoa, OPVÜI Thotsü etho ji khi OPVÜI lona nte etho nkhüngchotava. 11 Tsüngrham ji kyakrüp ji zalanchikhoko tssoa Potsow pipo jiang topvü pipotava. 12 Ntiotssole eteno kyon ri tssota mek, tolea eteno potsüwoe limha jilo n mhon ji etho mon ji thüngi, osi emüng echungren shilo esaeden osi etho tsütsae jiang thüngi rotala. 13 Jitsükona yuta n mhon ji yiathüng zalanchikukvü tsükona, Potsow pipo tsakata! Tona nina ochüm jana khyovka. 14 Phanthi vana osi ntsa ji khi eryu khünga, osi ntsanrük ji khi teki khüpa, 15 noying yithenmhom ji püngnov lo ni chokao ji ni jokhüp thung tssothuka. 16 Yuta topvülo longtsü ji ni tsung tssothuki n mhon ji lotssi mi ji tangi sia. 17 Shancho yantso ji ni kiven tssothuka, osi ni yonri ji omon jina ni pio Potsow yi ji tssothuka. 18 Yuta topvülo randana osi Potsow khi ni kyochitokvü chona, elhirhüm topvü lo omon lona randana. Tümjak n lina n thiphia vana osi Potsow kyon jiang tsükona randanpvü vana. 19 Ana kvüthüng nsam methaka sana lümbüm tssoni Yithenmhom jilo mphoyi ejüo ji oponi chiyia phyochev tsükona Potsow khi yithen apitokvü tsükona ha a randanitava. 20 Osi ana evüngki vanlea, yithenmhom kümoe tsükona lantssoe tssoa vancho sana ji phyoathüng lüm tssona püngnochev tsükona a randanitava.
Thakchi Salüm
21 Ana kvüto vana sana ji nte emhokvü tssov, jitsükona, Tekikas na topvü nte ezovka. Ombo ete nzamo ojenio osi OPVÜI elhilo longtsüka lia enzanchia evan jika, küma ombona nte ezona ntena e tsükona topvü mmhona ntsivka. 22 E yivon topvü nte zothoki lüm nte tssonkayitokvü tsükona ana omboji nte thüngi rothukala. 23 Opo Potsow osi OPVÜI Jisu Khrista khi khristian oshom topvü thüngi noying, nzan, osi longtsü nte pithokvü ka. 24 Tümjak n lio nzanji khi ete OPVÜI Jisu Khrista nzamo kyon jiang topvü thüngi kianzan lithokvüka.
1 Chiti shijo Khrista Jisu nriden Paul ha Timothy oni thüngina Philipi lo Potsow kyonden osi ochoang na Khrista lo nzo tssoe vancho sana jiang topvü osi ek hümkho esopvüiden tona Deacon jiang to thüngi eranala. 2 Ete opo Potsow osi otsoe Jisu Khrista kianzan osi noying ji nte echi tsswothukvüka.
Ombo yi Ekhae Jiang Tsükona Paul Randan
3 Kvüthüng ana nte nchümcheta sana ana a Potsow thüngala; 4 osi ana a randan akvüto nte topvü tsükona randanala 5 osi tsüngon ovüngo jilona benkae nchüng jana ntena yithenmhom ji püngno elhilo a nzanchiwo ji tsükona longshi taena a pyinga randanala. 6 Ana mmhona longtsüala, ochona nte yolo elhi mmhom benkathakcho sana jina n tümjakna tssoa vani Khrista Jisu tsüngon ji roana methakvü to. 7 Yuta topvü lo a lümbümi nte jüa! Nteno a nzandemo tsso jina ana heto nte nchümiv ji elana. Potsow na tssocho mmhon a pia evüngki a vanthuka osi yithenmhom ji soyinguv osi nkohov a zikao jilo nte otsük akvüna elhi a tssokyo ji tsükona. 8 Potsow na ntsia, ana otsotso Jisu Khrista thüngina yio nzan ji hansi a lümbümi na nte eyiloa vanala. 9 A randan ji shi, nte nzan ji jungka jungka na kümthuka; nte nzanji ntsinran osi tssenche-ziche na pyingthuka, 10 To tssona ntena ntiojo elancho sana ji tae ethüngi khichev. To tssona Khrista tsüngon ji roana nteno njüm osi ephyov n lio tssov. 11 Osi Potsow thüngu tsükona tona pvütssonthokvü tsükona to ntsanrük tssüngthi mmhom kümoe Jisu Khrista taena picheo sana jina nte eküm jiang pyingu.
Eküm Vamjo Khrista
12 A ota-onyuden, ana shi nte ntsi akhithukhungala, ana ntio sükhying nduki vancho sana shina yithenmhom ji nzanchicho kha olan khanicho mek. 13 Ntiotssole ana Khrista sürüi tsso ji tsükona evüngki a thechicho to mesaki a enhyang jiang osi kyon topvü na mmhona ntsia. 14 Ana evüngki vamo ji yakchia a otaonyu khristian elümoto na lümbüm tssonkae Potsow yithen ephyov lo etho jükatala. 15 Otsotso, ochoang sana jo mhyiktsso raki osi nkhyingtarata lümbüm hansi Khrista tsükona püngnoala; khatola ochoang sana jo ntsa lona püngnoala. 16 Ochoang sana jo a nzamo ji tsükona osi ana yithenmhom ji nkoho lona hetoli ezüpa vamo shi tsükona püngnoala. 17 Khatola ochoang sana jo n mhom zia onte etüm ezi benchethokvü tajo lüma püngnoala. Osi ana evüngki vanathüng kyongkata a ezüptokvü tsükona nchümtala. 18 Jitsükona jo a nkhetsü! Mmhom tümka lea n mhom tümka lea Khrista tae ehungpvüi tssona a longshiv. 19 Ntiotssole ntena randamo jina osi Khrista na ombo mon ji apio jina tsüngona lojo a vachiv to longtsüala. 20 Ana eyiloa nchüma vamo jijo, ana kvüthüng ha a elhi ntssojancho ji yakchia yikra n duk, ji yakchia yuta topvülo osi echümporo tssoa enhünga sükhying shianglo tssolea lümbüm etsson na a pyingu osi hoji yakchia ana eküm vanlea, a chülea a eküm totona Khrista myingthüng hansi yichev. 21A eküm jo ntiola? A tsükona jo eküm vam jo Khrista, osi a chüa tssona a eman. 22 khatola ana otsük shina eküm vana sao, ana ntio sana oman elio tssochev. Jitsükona onilo kümoe ji khiv sana n tsiv yutalo vana. 23 A ji olan eni ji yutalo a nhyae lia. Ana jo Khrista thüngi oyi a vanhungala, hoji mmhontso tssov; 24 khatola ana eküm vanlam ji nte tsükona oman lia. 25 Ana hoji mmhona ntsia osi ana nte yolo vanlani nte nzanchina nte longshiv osi nte longtsü ha nte rankayiv to ntsia. 26 Jitsükona ana nte yolo oyi vanlana na aiyo Khrista lona nte ojenio to nchüma nte kangtsüvka. 27 Hoji tsükona enhungo, ntena Khrista yithenmhom ji ephan eküm evam ji opvü tsotso lia; osi hojito tssona ana oro nte hunglea, n hunglea, ntena omon lona tümka motsünga tssoe chüngchünga phanthi vanala, osi yithenmhom ji tsükona nzontsü thung tssoa rota vanala toji ana zov. 28 Nte ri jiang ti-kyutava, osi yuta topvülo lüm tssontava, to tssona ntena khyov osi onteno onte mom toji ontena engathevka, ntiotssole ekhyo nte epipvüi jijo Potsow. 29 Ntiotssole ntena Khrista benkav tsükona tssocho mmhon nte epio jijo ombolo longtsüv jitae mek, tolea ombo tsükona ezüp ekhiv ha lia. 30 Enhungo nteha a nzo ritsso jilo rhowocheta. Ntena zothako ji esüa ana rota yithako ji esüa enhünga leha rota tsük ji rota vanala.
Khrista Teri Eküm Osi Tsüpho
1 Ntena Khrista lo eküm vamo jina nte etho jüala, osi ombo nzan jina nte lüm emiyiala. Ntena omon lona khümshümta lia osi nte nte lo nzanta liala. 2 Jitsükona ana nte ntssungala, ntena a ematha benrithokvü tsükona nchümri motsünga tssotava, nzan motsünga tssotava, osi omon lona motsünga tssoe nchümri esüta vantava. 3 Ntena nti lanka lonaha tajo lüma, oman n lio khi ti-kangtsütava, tolea nte yolo eyingro enyip khi etsso-ephyota, ntena hi thünginajo thanpoe ji mmhomo to nchümta teri kümtava. 4 Ntena nte choka longshi tae mekna oyam choka longshi jiangha nchümi zeyitava. 5 Nte lümbüm chungi nchümri jo Jisu Khrista nchümri esüa tssov shikhfü. 6 Ombona yuta topvü lo Potsow tathi khicho, khatola ombona ombo ekhüngo na Potsow oni kheti ekümvü ekhyo n tsso. 7 Jithüngona jo ombona ombo lüm erungo na ombo elan elio jiang topvü sikhan cho osi nri eküm ethüngi khicho. Ombona kyon esüa kümcho, osi kyon esüa lyui rocho. 8 Ombona eyingro khi donphen lona echü nandang jancho ezo lan ji dungcho. 9 Jitsükona Potsow na vanphen ntsontso jilo ombo phanthithukcho; osi thanpoe topvü pono tsüphokao omying ombo picho. 10 Jitsükona Jisu mying yikrachi lona potsüwoe, limhalo osi lichungi evan topvü na khoktseni khümvü, 11 osi kyon topvü na Potsow pvütssonthuka Jisu Khrista jo OPVÜI to opon tssoa phyochakvü.
Limha lo Wondang Esüa Wom
12 Jitsükona nzamo oshomden, ana nte ndüngo vanathüng ntena yuta topvü lo a jancho zotao ji esüa, enhungo ana nte ndüngo n vanathüng lea kyongkata jancho ezolo evam ji opvü tsotso. Ana ntio phyoa sanaji engatava, osi nte shanchov ji benrithokvü tsükona eneta kyua elhi tssotava, ntiotssole 13 Potsow na ntelo elhi tssoa vana. ombo emathao elhi jiang nte chokathokvü osi hojiang nte nchümchethoka vanala. 14 Ntena ntio elhia sana jilo ti-phyochophyori-tana tssotava; 15 to tssona ntena mmen limha osi siluo elhi etssoe yolo vanlea, ephyo erüv n khyingna benrio Potsow tsoeden tssovka. Osi ntena eküm motsü ji onte ezoathüng nteno shantio na potsüwo tüngratsüo ji esüa, 16 n mhom jiang yolo tüngravka. Hojito tssona Khrista ero tsüngono ana nte tsükona kangtsüo tüv liv; ntiotssole hoji yakchia a elhi jiang kiaman tssoe n sicho saka toji hungu. 17 Nkhontsi, hoji yakchia a ejen ji nte longtsü Potsow thüngi othan tssoa epio jilo phyangkacho esüa mpa tssokhoka. Hojito tssocho sawo a emathata, osi a longshi ji nte topvü thüngi chinhyav. 18 Hoji esüa ntenaha emathav shikhfü, osi nte longtsü ji a chinhyav
Timothy ha Epaphroditus Oni
19 OPVÜI Jisu na lüm na rüngna ana n sungu nte thüngi Timothy rothokvü to nchümala, osi nte yivon zoe emathata lüm tssona a vanhungala. 20 Ombo esüa a lümbüm ntsi ochia n van, osi ombona nte tsükona elümoto wongkhyuala, 21 Thanpoe jo topvü na ombobo echi tae yantasi Jisu Khrsita tsükona jo n wongkhyuala, 22 Timothy jo kvüta ethev licho sana osi yithenmhom ji tsükona ombona otsoe tona opo to esüa a nzo tssoe OPVÜI benka elhi tssocho sana ji ntena ntsia. 23 Jitsükona ana a sükhying shi kvüto tssov sana ji esürhaka na jitopvü nte thüngi Timothy rothokvü to ana eyiloa vana. 24 Osi anaha n sungu nte thüngi rochev tssov to OPVÜI lo longtsüka lia. 25 Ana ojenio Epaphroditus nte yithenpvüi jiha nte thüngi rothokvü ethev lia zechethaka. A ethelan elilo a kyochithokvü ntena ombo rothokoji esüa, ombona a nzo tssoe kongtsünga elhia osi a thüngoe thei rotalo a kyochithaka. 26 Ombona nte topvü nte eyiloa vanpvü osi ombo ra vana to ntena zo jina ombo wongkhyua vana. 27 Ombo otsotso chüjua racho, khatola Potsow na ombo khonzanthaka, osi ombo tae mekna anaha a khonzancho osi ombona anungra ephfü ephfü elio jiang lona a shanchocho. 28 Jitsükona ntena ombo hunglani nte emathathokvü tsükona osi a nungra ji emithokvü tsükona ana ombo ji nte thüngi yilanthuk-hungala. 29 Jitsükona Potsow lona omboji emathata khristian jiang na oyam sothe bashi elio ji esüa ombo sothetava. Ntena hotüv kyon jiang topvü yikrachitava. 30 Ntiotssole ombona Khrista tsükona tssoathüng ejükaro taena ombo eküm n yiv tssocho osi a nzanchiv tsükona nte n vanathüng ombona nte thung tssoa ombo eküm pia a nzanchicho.
Ntsanrük Tsotso Ji
1 Okhao tssoa ota-onyuden, ntena Khrista lo vamo ji tsükona longshitava. Ana ovüngthüng nte eranthako jiang nte eranlam tsükona ntia akhetsüa n ehüm, ntiotssole hoji yakchia nte tsanchophen liv. 2 Füroden esüa, siluo elhi etssoe ochoangna otsüko tseni siv nte ezoa vancho sana jiang nkachotava. 3 Otsotso tseni esi jo onte mek, tolea e shiang, ntiotssole ena Potsow nthomon lona Potsow khümala, osi ena Khrista Jisu lona eküm vamo jina e longshiala. Eiyo oponina eze mmhomo jianglo n longtsükatala. 4 Oponi elhi ji mpa zetalea a nkyim ntia n li; oponi na zetao jilo zikatawo alona benrikao ocho vanchola? 5 Aiyo tsüngon tizao to jilo a tsenicho, osi aiyo ejeni na Israel ejen, Benjamin pvüji, Hebrew pvüpoe lona bukcho Hebrew tsoe. Shikhfü ji benphiv lo aiyo Pharasee. 6 Osi ana shikhfülo lüm theta ekhümkho ji khangshicho, osi shikhfü lona phyo jiang bena benphiv lo jo ochina ha alo phyochophori n li. 7 Khatola myingthüng hetüv shiang topvü ana Khrista tsükona ntia mekvü kümthoki sithaka. 8 Totae mek, tolea topvülo oman elitso a pvüi Khrista ntsiwo ji taena thanpo topvü moni sithokthaka, osi ombo tsükona ana olan topvü silanchia yithaka. Ana Khrista khakchoe ekhiv tsükona thanpo jiango topvü mmen zizo esüa nchümala, 9 osi ombolo motsünga kümvü, enhungo ana shikhfü ji benphiwo jina a kija ntsantho ntia n li, a ntsantho jo Khrista longtsüo jilona chiyio ntsantho ji; Potsow thüngi na eyio osi longtsülo ndung kao ntsantho ji. 10 Ana a jüpomo jijo Khrista ntsiv ji, osi ombo kümchelanthoko jilona chiyio etho jitae a ejyu-eranhungala; osi ana ombo ezüp ji a hankyo-hungala, osi echü jilona ombo esüa akümhungala. 11 Anaha echü lona a kümchelantokvü to eyilov tsükona.
Tümka Ji Yana Yungala
12 Shiang hetopvü ji a echi tssothakcho osi a benrithakcho na phyoa mek; khatola ana hoji ehungu tsükona tssüa mhadungi yunga yiala, ntiotssole shi tsükona Khrista Jisu na a rhümacho. 13 Ota-onyuden, ana hoji n rhüma han to ntsia. A tümka jo motsünga tae: ana sülamoe yithako jiang mhechoe sisi mhadungoe lioji yana ekhyo tssoa yiala. 14 Ana yantso ji yana tssüa yiala. Potsüwoe eküm yantso jilo Potsow na Khrista Jisu yakchia atsa vamo ji yana yiala. 15 Khrista lo eranküm kümthako ete topvüna hoto nchümvü shikhfü. Khatola nte ochoangna sana echümpowoe na mpa nchümlea Potsow na hoji nte engathethokvü. 16 Etena kvülo vana sana jilona benkav shikhvü, khatola ete na ntio shikhfü lona vana vancho sana jilona khoe mhadungoe wotavka. 17 Ota-onyuden, nte topvüna a hungchoe a esüa kümtava, zechoe nte khitokyü tsükona ena nte ejüala, e esüa etsso-ephyoe jiang zechoe khitava. 18 Ntiotssole ana elümoto nte ezothaka osi enhünga jo ana esü elonga nte ezolanala; kyon jiang eküm elümoto jo Khrista na donphen lona chüo ji ri esüa vanrava. 19 Onteno moni esiv sekathaka, ntiotssole ontena onte etsoyu jiang onte potsow tssothukala! Ontena yikrav thung jo kangtsüala; osi onte lümbüm jiango limha tsütsailan na pyingcho. 20 Khatola eteno Potsüwoe tsentsoden, osi eteno OPVÜI Jisu Khrista na potsüwoe na oro eshan chov ji nhyaktala. 21 Ombona olan topvü ombolo tssüng-tsücheo etho emhokthav ji khi ete echüo tsük nkhyo shiang ji ombo pvütssomo tsük ji esüa kümthokvü.
Lansorünyo yi
1 Hojitsükona ota-onyuden, ana nte nzanla osi nte ndoku nte eyiloa vanala. Ntena alongshithukala osi ana elhi mmhom tssochewo ji chekav jo nte shi vana. Jitsükona a kangtsüala, Khrista na nte tsükona kvüta nte tssoyithakcho sana khristian esüa chüngchünga vantava, oshomden. 2 Ana Euodia ha Syntheke nini thüngi echümporo tssoa jonjila, hojijo ninina OPVÜI shikhfü lona oyeni tssoe mmyantae evam lia. 3 Osi nte longtsüka eli-i jokimden thüngiha ana nte ezoala; eloe shiang nzanchitavo to nte tssoyiala, yithenmhom ji tsükona onina elümoto a kyochicho. Klement osi thanpoe nzo etssoe jiang na a nzanchiwo ji esüa onte mying jo eküm kako jilo lia. 4 Ntena Khristalo vamo ji yakchia yuta topvülo longshia vantava. Ana elani phyoala, longshitava. 5 Nte emiro lümbüm ji kyon topvü thüngi ejüa. OPVÜI ji zakto tsathaka. 6 Nti tsükona ha ti-wongkhyutava, tolea sükhying topvü lo nte ethelan jiang Potsow ntsithuktava, osi OPVÜI thüngi montso epi lümbüm hansi jonji randantava. 7 To tssona Potsow noying kümoe kyon na engathekhoko pomoe licho sana jina nte lümbüm nchümri jiang nhyakiv; ntena Khrista Jisu lo vamo ji yakchia. 8 Okhao tssoa ota-onyuden, nte lümbüm nchümri jiang topvü ji ntio jo mmhom sana osi ntio jo myingthüngiv etümcho sana, jiang tona ntio jo ntsa, elan, ntssungü, ejüpomo osi yikrachicheo tüv sana jiang khi pyingtoki vantava. 9 Ntena a thüngina ntio zoa, ntio elhi hungthakcho sana jiang benphitava, püngno zothako jiang, osi motsü athüngina zothako jiang, to tssona noying epipvüi potsow na ntelo vamka.
Yantso Tsükona Montsso
10 Yuta tara sunga yithakcho sülo elani ntena a tsükona wongkhyutao ji tsükona ana OPVÜI kyon ejoena a longshiala. Ntena n tümjakvü a nchümchepvü khatola yuta mmhomvu hungi n tssochecho to ana ntsia. 11 Ana heto phyo ji ntena a sinkia vancho tsükona phyoa mek, ntiotssole a sükhying topvülo oyam n zikana lümbüm püka evamo tüv ana yanchethaka. 12 Kvütoli ezüpa osi pvülyua vamvü sana ana ntsia. Hoji kyak ji a pithaka. Sükhying topvülo kvütoli tssochyu lo tssolea, n liv ekhang yutalo tssolea lümbüm püka vamvü sana ji ana ntsithaka. 13 Etho apio Khrista ji yakchia ana olan topvü etssov toa. 14 Khatola, a ezüp lo a nzanchiwo jijo elüm mmhona. 15 Nte Philipi kyon na mmhona ntsia, ana yithen mhomji püngnoa Macedonia lona khochidemo jithüng ethüng-ezi lamo emhuk elüm a zeyio ji osi epüp eman a shümnhyae jo nte ekhümkho tae. 16 Ana Thesolonika lo vanathüng mpato a ethelan tsükona ntena orang echunga tae mekna a hanthukcho. 17 Yantso ji ana a khicho hungcho mek, tolea aiyo Potsow na nte tajo lithukthako jilo zekatala. 18 Tolea ntena a picho olan topvü ana erani vao ji shika. Ana Epaphroditus khelona yantso ji hungthaka, ji tsükona kyongtia osi a tsonthaka, Jiang jo orhüm mmhom Potsow na khichokhoko osi emathao jiang esüa tüv. 19 Osi a Potsow na ombo etsson elüm jilona khichei Jisu Khrista yakchia nte ethelan topvü lo nte benriyivka. 20 Ete Potsow osi opo Potsow pvütson ji kümali lithuka! Amen.
Salüm Okhao
21 Jisu sürüi mmhom otsük akvü thüngi salümka. A ndüngo vamo ojenio shiang naha nte salümala. 22 Potsow kyon topvü na echümpo tssoa, Caesar wopan na nte salümala. 23 OPVÜI Jisu Khrista kianzan ji nte topvü pono lithukvü ka.
1 Chiti shijo Potsow lüm erüng lona Jisu Khrista wothung etssoe Paul tona ete ojenio Timothy to thüngi na - 2 Kolossia lo Potsow kyonden, Khrista lo khümkae vamo ji yakchia e ojenioden longtsüka eli jiang thüngi: ete opo Potsow khi kianzan osi noying nte pithokvü ka to eranala.
Montsso Epi Randan
3 Ena kvüthüng nte tsükona randana sana Potsow ocho ete OPVÜI Jisu Khrista opo sana ji montsso piala. 4 Ntiotssole ntena Khrista Jisu lo longtsüo ji osi Potsow kyonden jiang nzamo ji ena zothaka. 5 Longtsü tona nzan to woniata chiyiphen jijo eyilo kümoe ntena yithenmhom tsotso ji yithen jilona zocho sana osi eyilo kümoe potsüwoe na nte bencheyiv sana ji. 6 Hoji yithenmhom jina tssüngthi ethia limhatsü nzüa mmha hansi yiala; ntena tsüngon kvülo Potsow kianzan ji zodencho sana osi jilo ntsa ji chekae khicho sana jithüngna nte yolo lio ji esüa, 7 ntena Potsow kianzan ji Epapharas ocho jo ete thung tssoa Khrista tsükona longtsüka lia elhi etssoe osi e jokim etssoe sana ji thüngi na ntsi khithaka. 8 Omon jina nte lümbümi nzan lithokthako ji ombona e ezocho. 9 Jitsükona ena hoji zopvü nte tsükona randan n tümjak han; jijo nte khi Potsow lüm erüng ji chekathokvü osi hoji engathev tsükona osi omon jina epio ntsinran lithokvü tsükona randantala. 10 Hojito tssona ntena OPVÜI na lüm erungo eküm vanchev osi ntena yuta topvülo ombona emathao elhi tssochev. Nte eküm jiang lona mmhom lan taro chiyiv osi ntena Potsow tsükona ntsiv lo kyongka rankata yiv. 11-12 Osi Potsow pvütsson lona emhokthav etho chiyio ji khi ntelo lithoki, etho nte jükathokvü ka, osi hojito tssona ntena sükhying topvü lo erüm toa chüngchünga nte vanthokvü. Osi hojitoli Potsow ochona ombo kyon jiang tsükona ombo wondang ekhüngyani ntio nkümi vacho sana ji shümnhyav tsükona nte etümthokcho sana ji tsükona ematha longshi khi opo Potsow montsso nte pithokvü ka. 13 Ombona emüng metae na e shanchoe ombo tsoe ji ekhüngyani e vanthokcho. 14 Osi otsoe jina ete mmen jiang esiyisi etancholo evachicho.
Khrista osi Ombo Elhi
15 Khrista na ombo eküm jilona Potsow jo ntio esücho sana ji ejüala. Liyingcho topvü vüngina vandemo tsokhying ji ombo. 16 Ntiotssole Potsow na ombo khi potsüwoe osi limhalo ntio licho sana ehungo osi n hungwo topvü liyingcho. Etho elio mon osi OPVÜI jiang, esaeden osi etho jiang, olan topvü Potsow na ombo yakchia osi ombo echi liyingcho. 17 Thanpo topvü vüngina Khrista vancho osi limhatsü shi ombo lona vanala. 18 Ekhümkho jijo ombo tsük ji, hoji kvüri ji ombo, ombo tsük ji eküm chenkaphen jo ombo osi Potsow tsonthi ocho echü lona kümchelani oyi limhalo vanphen ntsontso ji khi khi vancho sana ji ombo. 19 Ntiotssole Potsow tathi jii totona Khrista lo vantokvü tsükona Potsow na methakcho. 20 Donphen lona ombo tsoe ji ejen zamo ji yakchia noying lithoki ombo yakchia limhatsü ji ombolo khyingtalanthokvü methakcho. Osi ombo tsoe jina donphen lona thungthan tssoa echüo ji yakchia noying lithokcho; osi potsüwoe, limhalo, liyingcho topvü ombolo khyingtalanthokcho. 21 Tsüngona lojo nteno Potsow lona kontae vancho, ntiotssole nte nchümri topvü ombolo n rao osi nte elhi jiang ntha elhi tae tssocho. 22 Khatola enhungo Potsow na ombo tsoe ochona nte ji Potsow mhadungo nthoa osi ephyo erüv n lina nte kümthokvü tsükona eküm vansi chüthakcho sana hoji yakchia ombo thüngi nte khyingtalan-thukthaka. 23 Khatola ntena nte longtsü chüngchünga soyingthako jilo vanjüngu shikhfü. Ntena yithenmhom ji zoe eyilo nte pithako jilona senphi ti yitava. Hoji yithenmhom ji limhatsü nzüa otsük akvü thüngi püngnothaka, osi a Paul shijo hoji nri a tssothukcho.
Ekhümkho Nri Paul Elhi
24 Jitsükona enhungo ana nte tsükona ezüp ekhiv amathatala. Ana ombo tsük, ekhümkho ji tsükona kvüta otsüko ezüp khia sana, Khrista na hoji tsükona ezüpthako jilo ekhyimphatala. 25 Potsow na ekhümkho ji nri akümthukcho, osi ombona elhi shi apio jijo nte mmhon tsükona tona yithen ji nte thüngi tssochyua nte püngnov tsükona to; 26 ntiotssole ombona kyon jiang thüngina echungren echungren mphoe evao yithen ji enhungo ombo kyon jiang thüngi ntsithukthaka. 27 Potsow etüm ezi jijo ombo mphoyi ji ombo kyon jiang thüngi ntsithokvü tsükona, hoji yithen jijo tssochyua osi pvütssona tüv ombona ombo kyon jiang topvü tsükona vayicho. Hoji mphoyi jijo Khrista na ntelo vana to, osi ji yichakjo Potsow pvütsson ji nte shümnhyav to. 28 Hoji tsükona ena Khrista yithen ji otsük akvü thüngi püngnoala; osi e ntssungyi jijo topvü tsükona, osi Potsow na epio ntsinran jiang khi kyon topvü Khrista lona eranküm kümthoki Potsow mhadungo hansi eyiv tsükona tümkata püngnoala. 29 Shi tssochetokvü tsükona Khrista etho na a lo elhi tssoa vamo jilo enhyikae kongtsünga osi ezüpa tssoa vamo jijo hojilo zekae tssoala.
1 Ana nte tsükona osi Laodicea lo evan jiang tsükona osi thanpoe kvütata na athüngi echunga tia omha n hungtahancho sana jiang to nzanchiv tsükona kungtsünga elhi tssoa vancho sana hoji nte a ntsithuk-hungala. 2 Ana lümbüm onte tssonkayi hungala. Onte khi mmhom engathethoki tssochyu ekümo onte vanthokvü tsükona osi onteji nzan lona senjümtathokvü ji a chokatala. Hojito tssona Potsow mphoyi oponi chiyithako ji ontena ntsiv, hojijo Khrista ji. 3 Potsow ntsinran osi nchümri mphoe elio ji chonchipvüi ji ombo. 4 Ana shi nte ezowo shijo, oyam rünyo yi mmhom jiang ji elüm mmhoncho esülea ejüng ekhiranta lona hojiang khi nte n kyakthechitokvü tsükona. 5 Ntiotssole ana a tsükna nte yolo n vanlea, omon lona jo nte thüngi vanala osi nte etsso-ephyo kvüta mmhoncho sana ji tsükona osi Khrista lo nte longtsüka kvüta chüngchüngcho sana ji tsükona elümoto a mathata vanala.
Khrista Lona Benri Eküm
6 Khrista Jisu jo OPVÜI to ntena khichocho, hoji tsükona ntena ombolo eküm vantava, 7 osi ombolo oying süngyi evan kyon kümtava, osi ombolo tssokae phanthitava; nte püngnothako ji esüa longtsülo etho jükata kümtava osi montsso epina nte pyingchüthoka. 8 Limhalo kyon tssothimori yi ejüng jiang tona rülonta motsü to jiang khi ochina ha nte n jithechitokvü tsükona rarüngtava, osi Khrista lona mekna limhalo omon-lüngkvümvü yi jiang khi nte ti sosorathuka. 9 Ntiotssole kyon Khrista tsük jilo Potsow tathi ji benria jüa, 10 osi omon thüngoe esapvüi osi etho topvü pono kvüri ji ombo, ntena ombolo khümkae vamo ji yakchia eküm tsotso ji nte pithaka. 11 Ntena Khrista lo vamo ji yakchia kyon tathi tsenia mvüchoko ji mekna Khrista lona nte mvüchokthaka, osi hoji yakchia nteno mmen etho jilona nte vachithaka. 12 Ntena baptio jithüng ombo nzo nte juthecho, osi ombo lo khümkae vamo ji yakchia ombo nzo nte phanthilanthukcho, ntiotssole ombo phanthithuko Potsow etho jilo ntena longtsücho. 13 Nteno tsüngona lojo nte mmen tsükona osi pvüjipoe n mvüchung tsso jina omon lojo echü tssocho, khatola Potsow na nte mpato Khrista yakchia eküm jilo nte sosi yithaka. Potsow na ete mmen topvü esiyiala. 14 Ombona ete mmen ehen topvü nlan esiyicho, osi shikhfü jilona ntio nlan epia vancho sana ji ombona donpheno eshenkanhyae sithaka. 15 Osi donphen lona Khrista na tsüngrham esapvüi jiang na ombolo etho tsütsata vamo jiang khi siyisi ombona onte khyothechio ji oponi chiyia ejücho. 16 Jitsükona nte etsoyu, tokhu müngyanchi, chothan tokhu osi esanmong jianglo ndungkae ochina ha oyi nte ti tssoyithuka. 17 Shiang hetopvü ji sülani erov elio jilo khümcho esüa rakacho tae, tolea otsa jijo Khrista. 18 Kyon ochoang najo onte tsük khangria osi lanben khüma, müngtüng jiang opvü tssothuka osi etüm elan nlilea limha thüngoe kangtsüna opon tssoa vanala. Hotüv kyon jiang khi nte yantso jiaag nte ti rechoyithuka, jiang topvü onte kyon nchümri lona chiyicho tae. 19 Onteno kvüri Khrista jilo n shenkav sithaka; Potsow methak ephanina kvüri Khristalo otsüko solan topvü ji shenkae süphia Potsow lüm erüng jilo rankathukala.
Khrista Nzo Chüv osi Vam
20 Nteno Khrista nzo chücho osi limha shilo tsüngrham mon esa jilona nte vachithaka. To tssona nteno ntioli limha shilo shentapvü esüa vantala, 21 'ti süngkata, ti tsophia, ti vüngkata' to nte ezowo tüv lilanala? 22 Shiang hetopvüto moni esio tsütsaelan motsü tae, osi hojiang topvü kyon yizüng osi püngno tae. 23 Onte bobo nsüngrücho shikhfü yizüng jiang, lanben ekhümvü lo oyam rikata ontena teri kümi oyam ejüo jiang osi onte tsük khangri jiang eze jo hojilo nchümri jücho esüa tüv zechetala. Khatola shikhfü jianglo jo ntia tsükrüng tanglanchicheo tüv n jü.
1 Nteno Khrista nzo nte kümchelanthukathaka, jitsükona Khrista na Potsow khe amimoe khukthe vamo potsüwoe ji tsükona nchümtava. 2 Nte nchümri jiang limha thüngoe mekna omhawoe jianglo zekatava; 3 ntiotssole nteha chücho khatola nte eküm ji Khrista nzo Potsow lo mphothaka. 4 Nte eküm tsotso jijo Khrista, osi ombona elani roana nteha ombo nzo oro pvütsson lo nte thenhyav.
Eküm Ehen Ji Tona Ethan Ji To
5 Jitsükona ntena osolo ematha eyan tathi ji tona hojilo kvüta shenkae licho sana jiang, lonsülonphyo silyuo, n tsüngrüng, tsükrüng, n mhom etssov etüm, tajo elüm to shiangha kisü ekhüm esüa tsso jina shiang hetopvü to chütoki siv lia. 6 Shiang tsükona Potsow lüm etsuk ji jancho n zoe jiang pono roala. 7 Tsüngona lojo nte eküm ji shiang tssocho, osi oyam esüa nteha hetüv shiangna nte eküm ji sayae vancho. 8 Enhungo nteno khristian tsso jina, lüm etsuk, lümra n mhom, yikvü-yilo, echi ruta, osi menfü n tho yi jiang topvü sikhamu lia. 9 Nte yolo ejüng ti-phyotava, eküm ehen jijo ombo tathi n mhom ji nzo shümthe sithaka. 10 Osi eküm ethan ji ekathaka, shijo kyon ethan, liyingpvüi Potsow ochona nte khi mmhona ombo ntsithokvü tsükona tümjak n lina ombo kisü ji zecholana vancho sana ji. U Hoji tsükona, eküm ethan shijo Jihudi tona Greek to mekana tsena mvüchung tona n mvüchung, n thachehan, eyim, ezii osi etancho evan to echümpoto n li. Khrista jo topvü ji ombo osi topvülo jüa. 12 Jitsükona Potsow kyonden osi ombo nzamoden nte tssothukthako ji esüa, nteha khonzan eliden, nzantharoa teri kümi emiroa erüm etoe kyon ethan kümtava. 13 Ochona sana ocho sana thüngi zechemori lina, erüm eto lia nlan siyithuka. OPVÜI na nlan nte siyithako ji esüa ntenaha oyam nlan siyiv lia. 14 Jisülojo topvülo nzan jina opon tssothuktava, ntiotssole nzan jina olan topvü ji mmhona khüngtsüchetala. Otsük motsünga solan esüa nte topvü Khrista noying jilo nte tsacho. 15 Jitsükona Khrista na epio noying ji khi nte ekümo methak süthak jiang sayathuka, ntiotssole hoji noying ji khi Potsow na otsük motsünga etssov nte tsacho. Osi montsso pitava. 16 Khrista yithen etsson elüm jina nte lümbüm pyingthuka. Ntsinran topvü khi nte nte püngnota ndungntssungtava. Nte lümbümi na montsson pia ethüngkhen, longtsü khen jiang khi Potsow denkatava. 17 Ntena ntio tssoa osi nsansyua sana olan topvü OPVÜI Jisu myingona tssotava, osi ombo yakchia opo Potsow montso pitava.
Eküm Ethani Shentakota
18 Enghden, nte rapvüi jiang küpo vantava, ntiotssole nteno khristian tsso jina hoto etssov lia. 19 Orapvüden, nte engh jiang nzantava osi onte thüngi ti haruktava. 20 Ngaroden, yuta topvü lo nte pvü-opo jiang jancho zotava, ntiotssole hojina Potsow emathathukala osi hojiang jo nte khristian elhi. 21 Opvü-opoeden, nte ngaro jiang 11 lümo ti tssoyitava, to mekana onte lümbüm yesov. 22 Eziden, limhalo nte pvüi jiang yi engayitava, osi ntena elhi tssoji kyon jiang khi nte elhilo nte emathayitokvü tsükona tae mekna ntena OPVÜI kyuo jina ntia valanchi n lina onte yi engayitava. 23 Ntena ntio tssoa sana kyon tsükona mekna OPVÜI tsükona tssoa esüa, lümbüm theta tssotava. 24 Osi OPVÜI na ombo kyon jiang tsükona phyochaki evao yantso ji ntena hungu to nehümehetava. Ntiotssole ntena benkao jijo Khrista. 25 Silyuo etssoe jiango hoji ephan ezüp piv, Potsow na kyon topvü to kheti oyi tssoyiv.
1 Opvüiden, ntena nte nri jiang ji elan osi ntsanrük lona tsütsatava, osi onteha potsüwoe onte Pvüi vana to nehümehetava.
Ejürünyo
2 Randan ti vachitava osi ntena randanathüng tsoyoa vantava, osi Potsow montsso pitava. 3 Tosi enaha Potsow na etho epio ombo yithen Khrista mphoyi ji e püngnothokvü tsükona e randamtava. Ana hoji tsükona evüng ki vanala. 4 Elarowoena kyon engathetokvü shikhfü lio ji esüa ana tssochethokvü a randanitava. 5 Nlongtsüi kyon jiang thüngi nchümri lia e tssophyoa, osi onte yuta mmhom jiang tsüisathia tsütsatava. 6 Nte khensan-yisan jiang topvü tolo engav jüa echokao jüthoka, osi nte ngatüngngrio jiang topvüto kvüto janlam sana ji ntena ntsiv shikhfü.
Salüm Okhao
7 A yithen topvü Tikikas na nte ezovka. Ombo e nzamo ojenio osi longtsüka elio nzanchitae osi OPVÜI elhilo nzo etssoe. 8 Ana nte thüngi ombo rothuko jijo, ombo khi e tsükona nte ezothoka lüm nte tssonkayithokvü tsükona. 9 Nte shom Onesimus, ena longtsükao osi nzamo ojenio jiha ombo nzo rothukala. Ontena hepi yivon topvü nte ezov. 12 Nte kholok kyon Epapharas Khrista nri jinaha nte salümala, osi nteji Potsow lüm erüng jilo jancho ezoe nte kümthokvü tsükona n tümjak na nte randania vanala. 13 Ombona nte tsükona osi Laodicea tona Hirapoli to kyon jiang tsükona kvüta kongtsünga elhi tssoa sana ana otsotso nte ezokhoka. 14 E nzamo Doctor Luke ha Demas oni thüngina nte salümla. 15 Laodicea lo e shom jiang osi Nympha tona ompvü kina khümta evamo ekhümkho ji to thüngi salüm ezoyitava. 16 Chiti shi khae nte engathukthaka na Laodicea ekhümkho loha khae engathokvü tsükona nlansüngtava. Nte tsükona Laodicea lona chiti nte hantoko jiangha khae engatav methak-tava. 17 Archibus thüngi heto ezotava, ("Ntio elhi ni zikacho sana Khrista elhika to thaka etssov rarünga." 18 Ana a khe na shi eranala: A Paul thüngina salümka. Aiyo evüngki vana to a ti mhechotava! Potsow nzan ji ntelo lithokvü ka.
1 Paul, Silas tona Timothy to thüngina Thessalonika lo ekhümkho kyon opo Potsow tona OPVÜI Jisu Khrista to echi jiang thüngi eranala. Ntelo kianzan osi noying lithokvü ka.
Thessalonia kyon Jiang Eküm Osi Longtsü
2 Ena nte tsükona yuta topvülo Potsow montsso pia osi e randanlo nte thenhya vantala. 3 Ntena kvüto nte longtsü ji elhi lona ejücho sana osi nte nzanji kongtsüng ryupak lona ejücho sana osi nte eyilo ji erüm eto lona ejücho sana ena ete Potsow osi opo mhadungo n tümjakna nchümcheta vanala. 4 E ota-onyuden, Potsow na nte nzanala osi ombo echi nte ethüngchethaka to ena ntsia. 5 Ntiotssole kvüthüng ena yithenmhom ji nte püngnocho sana, oyi jiang tae mek; Nthomon ji etho ji jücho osi ena püngno ji otsotso to enaha ntsia. Ena nte ndüngo vanathüng jo kvüto vancho sana ji ntena ntsia, hojijo nte mmhon tsükona tae. 6 Ntena ha nte eküm jiangna e lo osi OPVÜI lo rakae dungphicho, ntiotssole yithen jina nte khetsücho khatola nthomon lona eyio yithen jina nte longshicho; 7 osi nteno Macedonia lo tona Akhaia lo to longtsüi topvü chekaphen kümcho. 8 Ntiotssole nte yakchia OPVÜI yithen ji kona osi nzoa zota yio ji tae mek tolea Potsow lo nte longtsü ji tsükona Macedonia tona Akhaia to lo tae mek na meta topvülo zota yithaka. Ji tsükona ena ntia ephyov n li. 9 Kyon jiangna onte bobo ena nte thüngi rowo jiang osi ntio tssocho sana jiang phyota vana; kvütoli ntena kisü jiang sisi eküm evamo Potsow ji yana yicho sana, 10 osi ntena kvüto ombo tsoe ji Potsüwoe na rov nhyakta vancho sana osi ombona echü lona kümlanthuko Jisu ji osi lüm etsuk ronrüngu vamo jilona e shanchov sana ji.
Thessalonia lo Paul Elhi
1 Otaonyuden, ena nte thüngi rowo ji kiaman tssoe n si to ntena ntsia. 2 Ntena ntsia ena Thessalonia lo nte thüngi n rothüng vüngina eji kvüto Philip lona khangshi ezüp epicho sanaji. Osi kyon khosha na e tanglanchicho khatola Potsow thüngina eyio yithenmhom ji nte zothokvü tsükona ete Potsow na lümbüm etssonicho. 3 Ena nte jena ezoa vamo shijo ntiosana woria osi n mhom lona mek, thama lona tssayi-myingthüng khi oyam ejithechia ha mek, 4 Potsow na yithen mmhom ji elhi etssov elong tsükata enhikacho, osi ombona etssothukhungo ji ephan ena phyoala. Enajo kyon mek na Potsow emathathokvü yanala, ntiotssole ombona e nchümri jiang ojang tssoe ezeyithaka. 5 Ntena mmhona ntsia, ena nte thüngi roathüng kyakthechiyi osi tajo elüm yi nsanta n ro, ehungpvüi potsow vana. 6 Eiyo Khrista wothungden khatola ena nte thüngina tssolea thanpoe thüngina tssolea myingthüng eyilocho mek, 7 tolea oyo tsüka jina ompvü ngaro jiang ntangshona to nte thüngi enyiproa vantacho. 8 Ena nte nzam tsükona rocho osi nte nzankhüngo jina Potsow yithenmhom ji tae meklea e eküm jiang mpa nte chinhyacho. 9 Ota-onyuden, ena kvüta kongtsünga elhi tssocho sanaji ntena mmhona nchümche-nrünga vam tssov! Ena Potsow yithenmhom ji nte püngnoa thüng ezüp nte n piv tsükona ena zümo eng elhi tssocho. 10 Nte longtsüiden thüngi e etssophyo kvüta ntssünga, ntsanrüka osi ephyov n licho sana Potsow na ntsiwo ji esüa ntenaha ehungpvüi pikhuka. 11 Opona ombo ngaro jiang nzana to enaha nte otsük akvüto nte nzamo ji ntena ntsia. 12 Potsow ochona ombo ekhüngyan osi pvütsson nte chinhyav nte tsa sana hoji emathao eküm vantale to ena nte ntssünga, lüm nte tssonkayia nte ejichocho. 13 Ena n tümjakna Potsow thüngo ji ndam thanpo ha lia. Jijo ena kvüthüng Potsow yithen ji nte ezocho sana ntena kyon yithen ka to mekna Potsow yithen ka to khichocho; osi hojijo otsotso hotüv. Ntiotssole Potsow na nte longtsüi yolo elhi tssoa vana. 14 Ota-onyuden, ntelo ntio kvüto tssocho sana ji esüa Judea lo Khrista echi osi Potsow ekhümkho kyon jiang yoloha tssocho. Ntena nte meta kyon jiang khelona ezüp hungwo ji esüa ontenaha onte kyon Jihudi jiang thüngina ezüp hungcho, 15 osi hojiang na OPVÜI Jisu ha chüthokcho, osi zenkhying jiangha, enaha to e khangshi ntssonshicho. Onteno kvüta Potsow n mathao elhi etssoeden ato! Onteno kyon topvü ri! 16 Ntiotssole ena pvüjipoe jiang shanchotokvü tsükona ezowo ji mpato ekhanala. Hojitolui ontena mmen tssoa evamo ji topvü wokhao tssoa benrithukala. Tokhatola enhünga jo wokhao tssoa Potsow lüm etsuk jina ontelo jorothaka.
Paul na Onte Janthechilam Ziala
17 Ota-onyuden, ena nte sisi yithakale, n hungtalea kvüthüng ha nte n mhecho. Ena yisi tara tae tssohan khatola omha omha nduktalam nhyaktsüka vantala. 18 Jitsükona tae ena nte thüngi e rohungcho. Otsotso A Paul na elan elani a rohungcho. Tolea tsüngrham jina a khalanchicho. 19 Ntiotssole ete OPVÜI Jisu na elani roana e eyilo ji ndungkaphen osi ombo mhadungo longshi osi ena elhi tssocho to ehungpvüi jo nte shi tssov kha thanpoe mek. 20 Otsotso, nteno e pvütsson osi e longshi.
1 Jitsükona ena n rümkhokale eboti Athens lo vantasi, 2 e ojenio Timothy ochona Khrista tsü kona Yithenmhom püngnoa Potsow elhi etssokyoa vancho sana ji rotoka longtsü lo nte chüngchüngkatokvü nte ntssünga, 3 osi ezüp shiang yakchia nte ochiha n senphitokvü tsükona ombo rothokvü methakcho. Ezüp jijo Potsow na ombo lüm erungo na esekacho to ntena ntsia. 4 Ena nte ndüngo vanathüngna nte ezocho, ena khangshi ezüp ji nduknrüngu to, osi hoji otsotso benthaka to ntena ntsia. 5 Jitsükona ana nte thüngi Timothy rothukcho. Ana emhoka rüma n vankhoko jina nte longtsü kvüto yia vancho sana osi a elhi ji oman leliana to zelo rothukcho. Ntiotssole tsüngrham jinajo a elhilo oman n-liv esio tssoa nte n jithechi-checho tssov. 6 Enhungo Timothy na elani yithaka osi nte longtsü tona nzan to yithen mmhom hansi yithaka. Ntena yuta topvülo e nchümchetala to osi ena nte nduk-hunga vamo ji esüa ntenaha e nduk-hunga vana to ezothaka. 7 Jitsükona ota-onyuden, emhok nungra na epyingcho khatola nte longtsü ji yivon zoale e longshia yiala. 8 Ntiotssole ntena OPVÜI lo chüngchünga vanta tssona, enaha eküm vancho tssoala. 9 Enhungo ena nte tsükona ete Potsow montsso pikhoka. Ena ombo mhadungo nte tsükona longshi lio ji tsükona montsso ombo piala. 10 Ena omha omha nte nduki nte longtsülo ntio n benrihancho sana ji rankathokvü tsükona zümo eng randanta vantala. 11 Ete Potsow opo osi OPVÜI Jisu khi nte thüngi erov olan e sothokvü ka. 12 Ena nte nzamo ji esüa nte nte tssochyua nzanta nte nzantatokvü OPVÜI khi nte nzanchithokvü ka. 13 Hojitolui ete OPVÜI Jisu na ombo echi jiang topvü nzo elani roathüng ete Potsow osi opo mhadungo ephyo erüv n pana nte vanthokvü tsükona OPVÜI khi etho nte pithokvü ka.
Potsow Emathao Eküm
1 Okhao tssoa ota-onyuden, Potsow emathao eküm jo kvüto vam sana ji ntena e thüngi na ntsi khithaka, osi ntena otsotso hojito vana yithaka. Hojitsükona elani hojito khyongkata tssotale to ete OPVÜI Jisu Khrista myingona nte ntssungala. 2 Ena OPVÜI Jisu yizüng khi ntio nte picho sana ji ntena ntsia. 3 Potsow na nte eyiloyio jijo ntsentho, osi ntena lonsülonphyo nlamo jiang lona tsanchoe evam ji. 4 Nte eboe otsük akvüna nte engh jiang thüngi kvüto ntsanthoa yikrachita vam sana ji ntsiv shikhfü. 5 Ntena pvüjipoe Potsow n tsi jiang na oso rüngcho tssotao ji esüa ti tssotava. 6 Kyon ochinaha hetüv thüngoe tajo elüm lona ombo shom ji ti tachithuka, ntiotssole ena tüngochüa nte ezothako ji esüa, OPVÜI na shiang hetopvü tsükona ezüp piv. 7 Ntiotssole Potsow na n thono eküm tsükona etsacho mek, tolea ntho eküm tsükona etsacho. 8 Ochona püngnoyi shi n khayiana ombona kyon n khayicho mekna Potsow ochona nthomon nte picho sana ji n khayiala. 9 Khristian jiang okholo nzanta evam yilan jo ntia nte eram ethev n li, ntiotssole ntena kvüto vam sana ji Potsow na nte püngnothaka. 10 Ntena Macedonia topvü yakehia khristian kholok jiang lo hojito benphita yithaka. Tolea ota-onyuden ntena hojilo kyongkata tssotalanle to nte ntssungala. 11 Noying ekümlo vantav tümkatava, nte elhi chekatava osi ena nte ezothako ji esüa, ntebobo nte khena elhi tssotava. 12 To tssona n longtsüi jiangna nte yikrachiv osi nte ethelan jiang ochi thüngi ha enhikata evam n li.
OPVÃœI Erov Ji
13 Ota-onyuden, chüthako jiang tsükona jo ntsaji nte ntsithukhungala, to tssona eyilo n lio khristian meko jiangna nungrato ji esüa ntena tssov mek. 14 Heto: Jisu na chücho osi kümlancho to etena longtsüala, jitsükona ochoangna Jisu longtsüa chüa sana jiangha ombo nzo kümlanthokvü. 15 Enhungo ena OPVÜI na ntio püngnoyi epicho sanaji nte ezoala; Jijo kvüthüng OPVÜIna elani roasana ete eküm evamo shiangna kvüthüngha chüthako jiang vüngina n tssoche. 16 Ntiotssole lanben na owon tssoa oyi piv, osi Potsow tatara khfüsochiv, osi OPVÜI na Potsüwoe na ombobo jorov. Osi khristian tssoe longtsüa chüo jiangna phanthidem, 17 Jisüi jo ete eküm evanden shiangha onte nzo eluki etssüngkae ezhüina OPVÜI nduktav. Hojitolui OPVÜI na nchüngkhon ombo nzo e vanthokvü. IS Jitsükona yilan shiang khi nte nte lüm emita vantava.
OPVÜI Erov Ji Tsükona Methaka
1 Ota-onyuden, yuta osi okümnzyu kvütothüng tssov sana jijo nte eram ethev n li. 2 OPVÜI tsüngon ji kyon na n chümphiv vanathüng zümothüng efüina roato rov to ntena ntsia. 3 Kyon na 'Olan taro jüngtheta, noyinga mmhona' to phyota vanathüng ezüp yuta ji yiv. Osi eloe ngarohan pono esüngaro taena tsobuk ryusang-eno yiato tssov, osi kyon na n tsancho. 4 Tolea ota-onyuden, nteno emüngi evan mek, osi wondang jina efüi esüa nte ejithechiv mek, 5 Nte topvü wondang ji echi, osi tsüngon-engo evanden. 6 Eteno zümolo osi emüngi evanden mek, jitsükona oyam na yiplea eteno tsoyoa vam lia. Etena nhyakta osi chüngtsoa vam lia. 7 Kyon jiangna zümothüng yipala osi kinoe jiangna ha zümlo kinoala, 8 khatola ete wondangi evan jiango chüngtsoa, tsoyoa vantava, 9 Long tsü tona nzan to khi teki khüptava, osi shanchov tona eyilo to khi kiven tssotava. Ntiotssole Potsow na ombo lüm etsuk erhakthokvü tsükona ethüngchecho mek, tolea ete OPVÜI Jisu Khrista yakchia shanchov ehungtokvü tsükona. 10 Ombona chüo ji yakchia etena eküm vanlea, e chüthaklea, ombo nzo evanthokvü tsükona. 11 Jitsükona ntena enhünga tssoato nte nte lüm tssonita etho jükayita vantava.
Khachi püngno osi Monkhüm yi
12 Ota-onyuden, ena nte thüngi jonjiala, ochoangna nte yolo kongtsünga elhi tssocho sana yikrachitava, osi khristian khümshümta jilo nte soka-benkae osi ndungntssung jiang yikrachia vantava. 13 Onte elhi jiang tsükona topvülo ntsontso yikrachi ji pitava. Nte yoloha noying lia vantava. 14 Ena nte thüngi jonjiala, ota-onyuden, etho njüi jiang ndungntssungtava, lüm terio jiang tssonkayitava, nkhyo-ntoe jiang nzanchitava osi nte nte erüm tota vantava. 15 Ochinaha n mhom thung n mhom tipilantava, tolea yuta topvülo mmhom tssoyitav ji nte etüm ji tssothoka. 16 Yuta topvülo longshia, 17 n tümjak na randana, 18 sükhying topvülo montso pia. Ntiotssole khristian jiango Khrista lo shenkae vansi hoto etssov Potsow na nte eyiloyiala. 19 Nthomon ji ti tanglanchia; 20 omon etho lona oyi nsamo jiang nkhanziv ti tssoa. 21 Olan taro ojang tssoe zesi ntio jo mmhoncho sana ji khia, 22 osi n mhon topvü nkachoa. 23 Noying epipvüi Potsow khi olan topvülo ntho nte kümthokvüka, nte tsük, omon, eküm osi opho-oluk topvü nthoa nte vanthoki ete OPVÜI Jisu roathüng ephyov erüv n pao tssothokvü tsükona. 24 Ochona nte tsacho sana jina tssov ka, ntiotssole ombo longtsüka eli. 25 Ota-onyuden, etsukona ha e randanitana mmhona. 26 Ntsantho lona eyulo ntsüpta oshom topvü thüngi monkhüm pitava. 27 Chiti shi longtsüi topvü thüngi khae engatale to ana OPVÜI etho lona nte ntssünga zikatala. 28 Ete OPVÜI Jisu Khrista kianzan ji ntelo lithokvü ka.
1 Paul, Silas tona Timothy to thüngina, Thessalonia lo ekümkho kyon opo Potsow tona OPVÜI Jisu Khrista to echi jiang thüngi eranala. 2 Ete opo Potsow osi OPVÜI Jisu Khrista thüngina yio kianzan osi noying ji nte echi tssothuka.
Khrista Roathüng Yitsso ji
3 Ota-onyuden, ena nte tsükona n tümjak na Potsow montso piala. Nte longtsü ji ekhyinga rankao jina osi nte otsük akvüna nzan ji rankao jina hoto etssov ji etümthacho. 4 Jitsükona ena nte tsükona kangtsüa Potsow ekhümkho thanpoe jiang thüngiha ezohungala. Ena nte tsükona kangtsüo jijo ntena khangshi ezüp osi ntssonshi yuta yakchia vamo shianglo mpato erüm toa longtsülo jüngtheta vamo ji tsükona. 5 Osi hoji yakchia Potsow yitsso jijo ntsa, osi ntena enhünga ezüp khia vamo ji tssüngthi jo nteno Potsow ekhüngyan ehungu etüma to merüka chekathukala. 6 Potsow na elan ji tssov osi nte ezüpthoko jiang Potsow na ezüp khi yantsov, 7 osi nte ezüp jiha e ezüp jiangha kyimjoa yithokvü. Hoji jo OPVÜI Jisu ji potsüwoe na lanben nzo hungthukathüng tssov. 8 Hojithüngjo omi evakphita Potsow n tsi jiang pono ezüp yithokvü, osi ete OPVÜI Jisu yithenmhom ji nngao jiang pono ha hoto tssov. 9 Onteno kümali ezüpvü osi OPVÜI vanrhyu jilona osi ombo pvütsson etho jilona phani siv. 10 Tsüngon jijo ombo woro jiang osi longtsüi jiang thüngina ombona yikrachi monkhüm khilo roathüng tssov. Ntena ena ehungpvüi pio ji khichoe longtsüo jina nteha jilo jüv. 11 Jitsükona ena yuta topvülo nte tsükona randanala. Osi nte tsathako eküm jilo etümtharoa nte vanthokvü tsükona ena Potsow thüngi jonjiala. Osi ombo etho mmhom ntena chokao jiang topvü nte benriyithoka osi longtsü lona nte elhi chiyio jiang nte benriyithokvü ka. 12 Ete OPVÜI Jisu mying ji ntena yikrachithokvü osi nteno ombo echi tsso jina nte pvütssonthokvü ena nte randaniala. Ete Potsow osi OPVÜI Jisu Khrista na nte nzankhünga shiang benchethokvü ka.
N thae Ji
1 Ota-onyuden, ena OPVÜI Jisu Khrista erov ji osi etena ombo nduku sanrhyutav ji yilan ji tsükona ana heto nte thüngi jonjia ezoala. 2 Ntena OPVÜI tsüngon ji rothaka to lui zakto ethukluka, nchümta osi ekhenlungta to ti-tssotava. Zenkhying yilo rakae osi e püngno tona e chiti to jianglo to lona OPVÜI tsüngon ji rothaka to phyoala to ntena engathesorakhoka. 3 Nti lanka lona ha kyon ochinaha nte ti ejithechitoka. Ntiotssole N thae ocho jo n mheo mi thechiv sekacho sana jina chiroe, panlan tsüphov ji n rothüng jo hoji tsüngon ji rov meka. 4 Ombona potsow to ejana kyon na ekhümo jiang topvü poni ombo tsüphovo to phyoa rov. Osi ombona ombo Potsow to phyoa ekhümki mpa owo khokthev. 5 Ana nte thüngi vanathüng shiang yilan ji nte ezocho to ntena n tsitachoke? 6 Osi yuta kokayio ji n janthüng jo heto etssov ji ntiona sana tanglanchia vana, osi ntena hoji ntsia. 7 Ntiotssole N thae jijo enhünga mpa mphoena elhi tssoa vana, khatola ombo tanglanchio ji n vana na ombona oponi chiyiv. 8 N thae ji zaktole chiyitokvü, khatola OPVÜI Jisu na roana ombo na ethük na ehakae ombo lüngthav osi ombo pvütsson vanhya jina roe ombo siv. 9 N thae jina tsüngrham etho hansi oro ejüngjüngona chethev mothev osi emhoko elüm tssov; 10 ochoang jo moni siv vancho sana jiang ji olan taro yakchia ejithechiv. Ntiotssole ontena onte shanchov ntsa osi nzan ji n khichocho. 11 Jitsükona Potsow na onte lo worithoko etho ji rothoki ejüng yi ji onte khi longtsüthoko elhi tssov. 12 Jitsükona ntsa ji n longtsüna n tha elhilo chokae topvü yitsso jilo rhaki nlan piv.
Shanchov Nte Ethüngchecho
13 Ota-onyuden, OPVÜI na nte nzamo ji tsükona ena nte tsükona yuta topvülo Potsow montsso piv lia. Ntiotssole Potsow na omon ji khi nte nthoche ntsa ji nte longtsüthoko ji yakchia topvülo shanchodemo jianglo nte ethüngchecho. 14 Ena yithenmhom nte püngno ji yakchia Potsow na nte tsacho osi ombona nte etsao jijo nte khi ete OPVÜI Jisu Khrista pvütsson jilo nte ejan ji fehichotokvü tsükona. 15 Hojitsükona, ota-onyuden, ena ntio ntsa yi nte püngnocho sana osi nte erancho sana jiang lo chüngchünga vantava. 16 Ete OPVÜI Jisu Khrista khi, osi ete opo Potsow ochona e nzancho sana osi ombo kianzan epia moni nsio lüm etsson osi eyilo epicho sana jiang khi 17 lüm nte tssonkayithuka osi yuta topvülo oyi mmhom khi phyota osi elhi tssota evam lo etho nte jükayithokvüka.
E tsükona Randantava
1 Enhungo okhao tssoa ota-onyuden, OPVÜI yithen ji nte yolo esüa tsüsoa nzüa yithokvü osi yikrachia khichothokvü tsükona randantava, 2 osi enaha kyon n mhom osi silyue etsso jiang khelona tsanchotokvü tsükona to erandanitava, ntiotssole kyon topvü na yithen ji longtsüa mek. 3 Tokhatola OPVÜI jo longtsüka eli, ombona etho nte jükayia n mhom lona nte nkochev. 4 Osi enaha ntelo longtsüka elio tüv etho OPVÜI na epiala, osi ntena ha ena ntio nte ezocho sana ji tssoa vam osi tssoa wov to longtsüka lia. 5 OPVÜI khi Potsow nzan ji jungkata engathetokvü tsükona osi Khrista na epio erüm to ji ntelo lithokvü tsükona olan nte sotokvüka.
Elhi Etssov Ndungkao ji
6 Oshomden, ena OPVÜI myingona nte ezoala, ntena etho n jüi osi ena nte ezothako yilan jiang nkhichowo shom jiango to sitava. 7 Ntena kvüto e zechoe khiv licho sana ntena ntsia. Ena nte ndüngo vanathüng etho n jüv n van. Etsoyu epio jiang topvü ena oman picho. 8 Nte ochia nte n püptokvü tsükona ena e khena zümo eng sanga elhi tssotacho. 9 Hoji jo oyam khi e süphitokvü etüm n licho na mek, tolea ena vanlanyilan ejyuka nte piv tsükona. 10 Ena nte thüngi vanathüng heto nte ezocho, 'Kyon ochona elhi ntssoa sana ombona n tsov shikhfü.' 11 Nte ejoma na etho n jüna oyam elhilo tae khetsüa vantala to ena zoala. 12 Ena OPVÜI Jisu Khrista myingona hojitüv kyon jiang ji tüngochünga ntangnshon pia eküm evam tsükona elhi kongtsünga tssoe tsotale to ezoala. 13 Ota-onyuden, nte tsükona jo, elhi mmhom etsso jina nte n lakvü na lia. 14 Chiti shilo eramo püngno yi shiang ochona sana nnga tssona, ombo chekatava osi ombo esi sitava, tona omboha yikravka. 15 Tokhatola ori esüa ombo ti nchümitava, tolea ojenio esüa püngnotava. 16 Sükhying topvü to yakchia noying epipvüi OPVÜI ji khi yuta tsüngon topvülo noying nte pitokvü ka. OPVÜI ji nte otsük akvü tolo vanthokvü ka. 17 A khena shi heto eranala: Paul thüngina monkhümka. Ana a pashi tssoa chiti topvü lo heto amying sekatala, osi heto ana eranala. 18 Ete OPVÜI Jisu Khrista kianzan ji nte topvü pono lithokvü ka.
1 Chiti shijo Paul, Jisu Khrista nri, ocho ete shanchopvüi Potsow tona ete eyilo Khrista Jisu to na ethüngchecho sana ji thüngi na 2 Timothy, longtsü lo a tsoe tsotso ji thüngi eranala. Opo Potsow tona ete OPVÜI Jisu Khrista to thüngi na kianzan, khonzan osi noying yio jiangji nte echi tssothokvü ka.
Ejüng Püngnoe ntangnshon
3 Ana Macedonia lo yiathüng ni ezowo ji esüa ana Ephesus lo ni vanthuk-hungala. Hojilo kyon ejoma na ejüng yichüng püngnota vana, küma hojitüv yichüng jiang esantale to ezonrüngu lia. 4 Motsüsha tona pochung motsü ochüm n lio jiang püngnotae khirankhirita chiyia evamo jiang esantale to ezoa, ntiotssole hojiang najo Potsow etüm ezi ntia n tssoche, tolea longtsü lona jo tssocheta. 5 Hojito tangthechiv jijo lümbüm ntssüngu lona chiyio nzan tona chüngtso osi tanjünga longtsü to chiyithokvü tsükona. 6 Kyon ejoma najo shiang lona nkae yithaka, osi oman n lio thyutasanta jianglo rheyithaka. 7 Ontena Potsow shikhfü püngnoeden kümhungala; khatola ontena onte yi jiang osi ontena ntio yidung tsükona lüm tssona nsana vancho sana ji tia n tsi. 8 Shikhfü jijo benria elamo lona benphiwo mmhona to etena ntsia. 9 Shikhfü ji kyon mmhom jiang tsükona mek, khatola jancho nzoe osi n thae, ntsanrük n li, osi mmen kyon longtsü n li, limha kyon, opvü-opo lüngthae, münghan, 10 lonsülonphyoe, rama silyuo etssoe, retso-reyui, ejüng ephyoe, ejüng ehungpvüiden, osi ntiojo yichüng elamo sana jianglo n rae jiang tsükona ka to nehümehetava. 11 Osi aiyo yichüng kümoe yithenmhom lona hunga sana ji püngnov tsükona tona pvütssomo osi mmhayio Potsow thüngina eyio yithenmhom ji ephyov tsükona to a zikacho.
Potsow Khonzan Tsükona Montsso
12 Elhi shi tsükona etho apio ji tsükona ana ete OPVÜI Jisu Khrista montsso piala; ntiotssole ovüngthüng jo aiyo 13 ombo yikvü-yiloe, oyam khangshi osi jenbuktae kyon khatola ombona alo longtsüka lia elhi shi a zikacho. Ombona khonzan to a tssoyicho, ntiotssole aiyo n longtsüi tsso jina ana n tsiv elhicho; 14 osi ete OPVÜI Jisu kianzan ji tssochyua apicho osi etena Khrista Jisu lo vamo jilona longtsü osi nzan hungwo ji nzo tsotsüi apicho. 15 Khrista Jisu na limha shilo ro jijo mmen kyon jiang shanchov tsükona to ephyo yilan ji nina khatüng n lina khichoe longtsü khoka. Osi aiyo onte yolo n mhontso mmen kyon ji. 16 Khatola Potsow na khonzan a ejüo jijo ombo erüm eto mmhom ji ovüng tssoa alona ejüv tsükona. Ombona sülani kyon ochoangna ombolo longtsüi kümali eküm khiv sana jiang ejyukaphen a lona benkae vayicho. 17 Kümali osi kümali mesao, n chüo, n hungwo ocho tae Potsow sana ji myingthüng, pvütsson kümali lithuka, Amen. 18 A tsoe Timothy, ni tsükona nkolona zenkhyingna phyoe lio yi jiang tsükona elhi shi ni ndungkav a ntssungala. Hoji yi jiang jo rotav lo ebensü mmhom esüa tsütsata, 19 osi longtsü khi chüngtüng kichuk hansi rota mmhom rota. Kyon ejoma jo chetüng ji monthuki sisi onte longtsü ji roe sithukala. 20 Hojiang yolo Hymenaseus ha Alexander onio ezüp pitokvü ana tsüngrham ji khelo theyithaka. Sükhying shiang yakchia ontena yikvü-yiloa vamo ji esanthokvü.
Longtsüi Jiang Ekhüm
1 Jitsükona ana ovüng tssoa heto nte ntssungala, kyon topvü tsükona Potsow thüngi jonjia randania, lantssoyia osi montsso piyia; 2 mesao jiang tsükona osi etho tsütsae topvü tsükona randania, to tssona etena Potsow yikrachi kyuchi lona noying mmhonta lia osi omying lia mmhon chancheta eküm vantachev. 3 Hojina ete shanchopvüi Potsow ochona kyon topvü shanchoe, 4 ntsaji ntsithuk-hunga sana ji emathatala. 5 Ntiotssole Potsow motsünga vaa, osi Potsow tona kyon to yutalo lantssoe ha tsüka vana, hoji jo kyon Khrista Jisu ji. 6 Kyon topvü rhanchov tsükona ombona thungthan tssoa eküm picho. Hojijo Potsow na kyon topvüto yuta ebenlo shancho hungala to ji ejüv tsükona. 7 Hoji yilan ji thenchov tsükona, osi longtsü tona ntsaji to pvüjipoe jiang thüngi püngonv tsü kona a ethüngchecho. Ana ejüng n phyo, ana otsotso phyoala. 8 Jitsükona ntena kvüthüng sanrhyutae khümta sana Potsow lo khochakthako eboe jiangna okhe khikae randam ji a chokatala, tolea lüm etsuk osi ekhiranta tsükona mekna tssov shikhfü. 9 Ana eloe jiangha etssophyo mmhomden esüa etümroa mpensütavo to nchümiala. Ontena otssan jiang ji pyonlan taro eham osi shona janti tssentsü oyuk-osen osi mpensü etssükvü tüv ekav n li. 10 Tolea elhi mmhom jiang khi onte pipo tssothuka, hoji jo Potsow chetheo eloe jiang na tssov etüma. 11 Eloe jiang jo teri ekümo vani yingto ntsi ekhiv lia. 12 Eloe jiangna püngnoe tssoa eboe pono OPVÜI tssov ana elan n piala, onteno yingto vam shikhfü. 13 Ntiotssole Adam liyingdencho, jisüiti Eve liyingcho; 14 osi ejiphiv lo rheyio jiha Adam mek, eloe ji ejithechicho osi ompvü na Potsow yizüng ji yesocho. 15 Tolea ompvü na longtsü, nzan osi ntsantho ekümo vana osi eloe etssophyo mmhom jiang benphia vana tssona ompvü na otsoe oro vamo ji tsükona ompvü shanchov.
Ekhümkho lo Esopvüiden
1 Ekhümkholo esopvüi etssov tümka elio kyon jina ombo lümbüm ji elhi mmhom etssov lo zikae lia. Hoji jo otsotso yi. 2 Ntiotssole ekhümkholo esopvüi jo ephyo-erüv n lio tüv na tssov shikhfü. Ombo engh tsüka tae evan, junga zi ezei, ombobo sayakhoka osi eküm erücheta mmhona evan tüv tssov shikhfü, elani eyilankon sothehunga püngno rünyoe mmhom etssov shikhfü. 3 Ombo ji soko na kinoe n tsov shikhfü, osi lümra ejüi mekna emiroa evan osi noying jüpona evan kyon tüv tssov shikhfü; ombo ji orang jüpon tüv ha mekvü shikhfü. 4 Tolea ombona ombo ki wopan ji sayakhoka osi ombo nongori jiang pono OPVÜI tssoa ontena ombo yikrachia evamo kyon tssov shikhfü. 5 Ntiotssole kyon tsüka na ombo ki wopan ji tia n sayakhwokha tssona kvütoli ombona Potsow ekhümkho ji sayakhokvü la? 6 Omboji lümbüm khophipancho mekna longtsülo ranbenthang tssov shikhfü. Hojito tssona ombo ji tsüngrham ji esüa kangtsüa kvümvü mek. 7 Ombo ji n longtsüi jiangnaha longtsükao kyon tssov shikhfü, ntiotssole ombo phyophirüphio jiang yakchia tsüngrham kyako ombo n rheyithokvü shikhfü.
Ekhümkholo Nzanchiden
8 Deacon jiangha hojito tüngochüng kyonden tssov shikhfü. Ontena ntio phyoa sana ji ntsia phyov shikhfü osi soko lo ora etssoe osi orang jüpon n tssov shikhfü. 9 Tolea kichuk chüngtüng hansi longtsülo ntsa ji sayasi vam lia. 10 Onteji ojang tssoe zedensi ntia ephyov erüv n lia tssona elhi tssothokvü lia. 11 Onte tsoeni jiangha tüngochüng eloe tssov shikhfü osi onte ji yiroyiri ekyae n tssov shikhfü; khatola junga zitüng-ziriden osi longtsüka eli eloeden etssov shikhfü. 12 Deacon na engh tsüka tae vanthokvü osi ombo ngaro jiang tona wopan ji to sayakhokvü shikhfü. 13 Elhi mmhona tssothako jiangna myingthüng mmhom manthaka, osi hoji yakchia ontena Khrista Jisu lo longtsü yilan phyoathüng lüm etsson lia phyochev.
Mphoyi Tsüphov Ji
14 Ana nte erana khatola nsungkhüngu oro nduktav tssov to eyiloala, 15 tolea ntosito ana sülana roa tssona to tsükona eküm evamo Potsow wopan lo evan jiang na kvüto etssophyoa vam licho sana ji yilan nte eranala; ntiotssole hojijo eküm Potsow ekhümkho, durhyupvü osi ntsa ji vanphen tsotso ji. 16 Ete ekhümlan shi mpho yi tsotso jijo ntia phyotav n lio tsüphoa. Ombona kyon tsük kümi rocho, osi omon jina ombo ntsachethukcho, osi lanben jiangnaha hungcho. Jipo jiang yolo ombo ji thensochicho, osi limhatsüna ombo longtsücho; osi Potsüwoe ombo tssüngkacho.
Ejüng Püngnoeden
1 Nthomon jina tüngochüa phyoala, sülani jo kyon ochoangna jo longtsü ji sinkiv osi tsüngrham thüngi na yio ejüng püngno jiang yakchia ntsa jilona pyontae siv. 2 Püngno yi hetüv jo, ejüng phyoa, ejithechia, ewoe ochoang nchümri ji yonjak rimyorichona rongthakcho esüa chüi sithakcho sana jiang na nzüa yitokala. 3 Hetüv kyon jiangna ejüng püngnoa yanpiyanthan etsso jijo nlan, to püngnoala, osi etsoyu ejomajo n tsov sariv lia to püngnoala. Tokhatola ochoango longtsüi sana osi ntsa ji ntsicho sana jiangna etsoyu jiang topvü montsso pisi etsov tsükona Potsow na nsüngrücho. 4 Potsow na liyingcho topvü mmhona. Ntia khi silanchiv n li, tolea topvü ji montsso pia khichov lia, 5 ntiotssole hojijo Potsow yi jina osi randan jina nthochethaka.
Jisu Khrista Nri Mmhom
6 Püngnoyi jiang nina ota-onyu jiang ntsithuka tssona nino Khrista Jisu nri-i mmhom tssovka, long-tsü yi osi yichüng ntsa püngnoyi kvümoe nina benphia vancho sana jiang khi n tümjakna süphi-lümbüma vana. 7 Khatola limha yisha motsü kvüwoe sompvüro jiang tsükona tae etümcho sana jiang ti engatava. Tolea ntsa ekhümlam jilo nibobo thangshi khia vana, 8 Otsük thangshi jilo oman lia, khatola ntsa ekhümlan thangshi jilo jo lanka topvülo oman lia, ntiotssole hojina enhünga eküm shi osi limha ethani eküm ji tsükona phyochak e picho lia. 9 Heto ephyo yi jijo khichoe longtsüv etüma. 10 Ntiotssole etena ete eyilo ji limha topvü osi echümpo tssoa longtsüi jiang shanchopvüi eküm Potsow ji thüngi vathaka. Ji tsükona ena esang mmok khia elhi tssotala. 11 Shi lanso osi püngno yi shiang onte pia. 12 Ni nungorio ji ntana ochia khi ni tizerüpthuka, tolea ni khensan yisan osi etssophyo, ni nzan longtsüka osi ntsantssüng yakchia longtsüi jiangna ejyukae khipheri esüa tssotoka. 13 Ana n rothüng nandang jo yuta jiang topvü nzontsü yolo nthomotsü ekhav, püngnov osi rünyov lo pia vana. 14 Omon lo yantso ni echi kvüwoe zenkhying jiangna püngnoathüng osi eramoe okhona okhe ni nyimkao jithüng ni picho sana ji ti sinkia. 15 Shiang benphia osi nibobo khochaki pia shiang tssoa osi nilo kvüta tsüka ranka lia sanaji oyam hungthuka. 16 Ni osi ni püngno ji tüngochüa. Erüm sia shiang elhia tona hojina ni osi ni püngno engae jiang shanchov.
Longtsü Thüngoe Elhi
1 Eson ji ti maka, tolea ombo ji nipo esüa jonji yi jana. Ni küpoe epoe jiang ni nyuroden esüa nchümia, 2 osi ni mhawoe eloe jiang ji ni pvüoyo esüa zeta osi ni kupi eloe jiang ni yuloeden esüa lümbüm ntssüngi zeta, hojito lümbüm ntssüngi tssoa. 3 Nina emi tsotso jiang yikrachiv shikhfü. 4 Khatola emi tsükana tsoerüi vana tssona ontena onte wopan thüngi longtsü elhi tssoyiv lio jiang osi onte nijüpcheo jiang nzanlam ji ntsiv shikhfü. Hojijo Potsow emathao elhi. 5 Emi tsotso jijo ompvü tae nrünga vamo ji osi ompvü na yuta topvü Potsow pia ompvü eyilo ji Potsow lo vasi zümo eng nzanchithukvü randana vamo ji. 6 Khatola lonsülonphyoe emi jijo eküm evanthüng na echü tssoala. 7 Emi jiang ji ephyo erüv n lina vanthuko tssoa püngno yi shiang zojanta yithuka. 8 Khatola kyon ochona ombo opan, osi echümpo tssoa ombo ki ji n süphikokana ombona longtsü ji yesothukala, osi ombo n longtsüi lona n mhonka. 9 Nzyu rukro n bem jo emi jiang ekhalo ti khanhya. Elani yenjoa tae yanpio jiang tae emi to khanhyav lia. 10 Osi ompvü ji elhi mmhom lona kyon na ntsicho tssov shikhfü. Ompvü na otsoero vani mmhona sokabenkata osi eyi-lankon sothehung tssocho tssov shikhfü, osi Potsow kyon jiang jo epyoyia, ezüpo jiang nzanchia, elhi mmhom topvü lo khochaki evan tssov shikhfü. 11 Nte emi nungo jiang emi jianglo omying tiranhyatava. Ntiotssole ontena yanpi hunga na onte tathi tsükrüng jina Khrista panlana nkae yiala, 12 to tssoana ontena ovüngthüng echümchako ji yeso jina n lan onte piala. 13 Ji tae mek, ontena oki akvü zethechio jina etho n jü sotheta osi wonro yiroa onte elhi meko jiang khi n tssochov nshata ontena n tsso tüv jiang tssota yiala. 14 Emi nungo jiango yanpilani otsoe oro vana osi oson oki sayata vansi ete ri jiang khi e n phyophitok wo to onte nchümiala. 15 Ejoma jo tsüngrham sü rüa yirathaka. 16 Khatola longtsüi eloe ochona sana wopan lo emi vana tssona ompvü khi nzanchitoka, ekhümkho haa ti tssothuka, ekhümkho jijo noyinga emi tsotso jiang nzanchithuka. 17 Eramoe ochoang na tajo tssoa rümhena püngnoe tssoa sana jiango jokheman mana piv etüma. 18 Nthomotsü na phyoala, "Mangsü jina oli tsenathüng emen ti mmania." Osi, "Elhi etssoe jina jokheman ehunguv etüma." 19 Eramoe ji n lan phyotao jiang ehungpvüi otsük eni ethüm n thev ti longtsüa. 20 Mmen etssoe jiang ji nzontsü na ntsia mak-khonii khi thanpoe jiang khi ha kyuthuka. 21 Ana Potsow osi Khrista Jisu osi ntho lanbenden mhadungo na tüngochünga nte ntssongala, püngno yi shiang benphitava. Kvüthüng ha ovüngna oyi titssoyia osi phuko jenshan ti-tssoa. 22 Ocho sana ji zaktole okhe nyimkata Potsow elhilo khochaki epiv tsükona ti tssüsoa, osi hoji yakchia oyam mmen ha ji ti hankyua, tolea nino njümcheta vana. 23 Ni mman n mhom nsan-sam ni nkyip-nrüpo ji tsükona ojü tae ti-yua, tolea mman mmhontokyü tsükona jününgrojü tara jo yua. 24 Ochoang sana jo chancheta mmen tsso jina khatüng n lina oyi tssoyiala; khatola ochoang sana mmen jo sülamiti ntsiala. 25 Ji esüa elhi n mhom jiangha chancheta hungala, osi to mpa n tssolea n phoche.
1 Ochoang na nri-iden tssoa oyam kupi vana sana jiangna onte pvüi jiang yikrachiv lia to ntsitava. Hojito n tssoana Potsow mying ji tona ete püngno yi jiang tojii to omying mmeniv mek. 2 Nri-i jiang pvüi jiang ji longtsüiden tssona longtsüi tsso ji tsükona n yikrachiv to ti tssoa, ntiotssole onteha Khrista lona ota-onyuden. Ontena mmhonkata hojiang benkav lia, ntiotssole onte elhi jiang lona oman hungwo jiang ha onte nzamo longtsüiden. Ni püngno jilo shi chakcheta ezov lia.
Ejüng Püngno Tona Ejü eli Tsotso to
3 Ochona yichüng thanpo püngnoa ete OPVÜI Jisu Khrista rünyo yi jiang osi ekhümlan ntsao ji püngno yi ji n nga sana, 4 jijo kanchan na pyingcho kyon osi ntia n tsi, ombo nochonori kyon. Ombona mhyiktsso, khonta-rota, ebüp ruta, hungka renka osi, 5 n tümjakvü ninyangtao shiang topvü chiyio owon oyi shiang chokatala. Shiang hetopvü kyon ochoang kichuk yesoe ntsa ji chetüng n liv sithakcho sana jiangna etssophyoala. Ontena ekhümlan jijo eli yanphen tsayia nchümala. 6 Kyon tsüka jina ombona ntio lia sana jina lüm büki vana tssona ekhümlan jina jo kyon tsüka ji elümoto jüo-lia jo e n kümthukche, jitsükona ete na ntio lia sana jina lüm büki vanthio hoji elamo. 7 Etena limha lo ntia hansi n ro, hoji esüa etena ntia hansi n yilanche. 8 Etena etsoyu, mpensü lina jina lüm bükvü shikhfü. 9 Ochoangna ejüeli kümhunga sana ejiphiv lan tarolo rheyiala osi kyon yesothuko osi monthuko lüm erüng n mhon zhüva elhi na pyingi siala. 10 Orang jüpon-yako jijo n mhon lantaro chiyiphen oying ji, hoji jüpon ejoma jo longtsü jilona n kae yi sisi lümbümo n tssükata nungrata vana.
Kija Ndungntssung
11 Tolea nino Potsow kyon küma shiang nkachov lia. Ni lümbüm ji ntsantho, Potsow pyon, longtsüka, nzan, erüm esi osi eyingro to jiang lo vav lia. 12 Longtsü yungta jilo rhowoe kyon ji esüa etho topvü theta kümali eküm ji yana. Ntiotssole nina kvüthüng ehungpvüi elümoto mhadungo na ni longtsü ji tüngochüa phyoachakcho sana Potsow na kümali eküm shilo ni tsacho. 13 Olan topvü eküm epipvüo Potsow mhadungo osi Pontius Pilate mhadungo ombo longtsü phyochako Khrista Jisu mhadungo na ana zikata ni ezoala; 14 ete OPVÜI Jisu Khrista erov tsüngon ji n janthüng jo ni pio shikhfü jiang benphia osi longtsükata vana. 15 Ntiotssole Ombo erov ji Potsow na yuta eben lo rothuku, mmhayio osi Esapvüi jo ombo tae, Mesaoden pono Mesao osi OPVÜI jiang pono OPVÜI ji. 16 Nchüo jo Ombo tae; ombona ochinaha kvüthüngha ndüngo n vocheo wondangi vanala. Ochina ha kvüthüngha ombo n hunghan osi kvüthüngha ombo hungu mek. Ombo yikrachithuka osi kümali ekhüngyan ji hothuka! Amen. 17 Limha shilo ejüeli thüngoe eli-i jiang n kanchantokvü ntangshon yi ezoa. Onte eyilo ji nkhontsio moni esio ejüeli jianglo ti vanthuka, tokhatola Potsow ochona olan topvü e pia emathathuka sana jilo tae tssotoka. 18 Elhi mmhom tssole to onte ezoa, elhi mmhom lo eli-i kümthuka osi oyam thüngi khümshümta lona longphya kyokyipta vanthuka. 19 Hoto tssona onte ejüeli jiang khi ontena mhadung mmhom soyinguv osi eküm tsotso ji hungchev. 20 Timothy, ntio ni zikacho sana ji zeyata. Limha kyon jiang etho njü nshata jiang osi ejüng lea ntsinran to tsatao jiang ti longtsüa. 21 Kyon ejoma na hoji ntsinran ji lia to phyoala osi hojina onte longtsülan ji ori sithaka. Kianzan ji nte topvü echi tssothuka.
1 Chiti shijo Paul, ocho Potsow lüm erüng lona Khrista Jisu wothung etssov osi Khrista lo khümkae evamo jilo eküm piv phyoe elio ji püngnov tsacho sana ji thüngi na a nzamo tsoe 2 Timothy thüngi eranala. Opo Potsow osi ete OPVÜI Jisu Khrista kianzan, khonzan osi noying ji ni echi tssothokvü ka.
Montsso Epi Osi lümetsson yi
3 Potsow ocho a pyimtsümotsüi jiangna benkacho sana ji ana lümbüm chüngtüng hansi benkata montsso ombo piala. Ana zümo eng a randanlo ni nchümcheo ji esüa montsso ombo piala. 4 Nina kvüto esü elongcho sana ji ana nchümcheta, osi ni hunglam tsükona eyiloa vanala; ntiotssole hojina a longshi benriv. 5 Ni longtsü chüngchüngo ji ana nchümcheta, hoji jo ni opo oyo Lois na litencho, jisülo niyo Eunice na, osi ana longtsüala ninaha hoji longtsütsük ji lia. 6 Jitsükona ana okhe nyimkayia omon yantso ni pithuko ji kia vantukle to ana ni ntssongala. 7 Ntiotssole Potsow na nsüprüp mon epicho mek, tolea ombona etho, nzan, osi erüm eto mon e picho. 8 Jitsükona ete pvüi tsükona ephyov osi ombo tsükona evüngki evam ti yikra, osi a tsükona ha ti yikra, jithungo najo Potsow etho lo enhikata. Osi yithenmhom ji tsükona ni ejan ezüpvü elioji khia tssoa. 9 Potsow na eshanchoe ombo kyon e kümthuko jijo etena ntiosana tssocho lona mek tolea nzan lona ombo tümka licho tsükona tae. Yuta n lithokthüngna kianzan ji etena Khrista Jisu lo khümtsütao ji yakchia e pithakcho. 10 Khatola enhungo ete shanchopvüi Khrista Jisu rowo ji yakchia kianzan ji oponi chiyia e hungthokthaka. 11 Ombona echü ji ethoji ochüm tssoe siyisi eküm osi n chüo etho ji yithenmhom ji yakchia wondangi chiyitoklanthaka. Osi aiyo yithenmhom ji püngnoe etssov tsükona wothung a ethüngchecho, 12 ji tsükona ana heto ezüp khiala. Khatola a n yikra, ntiotssole ana ocho longtsüthakcho sana hoji ntsia osi tsüngon ji n rothüng nandang ana ombo longtsükao ji sayav to ana ntsia. 13 Ana püngno chüngchünguv benphile to ni pithako ji chekaphen tssoa vata osi etena Khrista Jisu lo khümkae vamo ji lona longtsü osi nzan evayio jilo vana. 14 Ete lo vamo Nthomon ji etho lona mmhona vana osi hojijo elhi mmhom ni ndungkae lio ji tssoa. 15 Nina ntsia, Phygelus ha Hermongenes oni phata Asia lo kyon topvü na a sithaka. 16 OPVÜI khi Onesphorus wopan nzanthukvüka. Ombona elanlani lüm a tssonicho osi ana evüngki vamo jina kvüthüng ha ombo n yikra. 17 Tokhatola ombona Rome lo ropvüto a ethümi a yanchecho. 18 Ombona Ephesus lo a tsükona elhi elümoto etssoji nina mmhona ntsia. Hoji tsüngon jilo OPVÜI na ombo kianzan ji ombo pithokvüka.
Khrista Jisu Rasan Mmhom
1 A tsoe, ni tsükona jo Jisu Khrista lona kianzan jilo etho ejüi küma. 2 Ana ehungpvi khosha yolona ntio püngno cho sana ji nina zothaka. Hoji püngnoyi ji longtsüka eli-i osi oyam püngnothi kyon jiang thüngi zikata. 3 Khrista Jisu rasan mmhom esüa ni ejan ezüpvü elio ji ezüp khia tssoa, 4 Rasan elhilo mmhona evan osi ombo tsüphoe emathao eyan kyon jina nzontsü elhi thanpo jo tssoa n woala. 5 Hoji esüa khüringashü tssothi ochinaha shikhfü ephan n khfüriv jo yantso n hunagla. 6 Lijon ochona rumhena elhi tssoa sana jiha oli jilona chiyio jilo echi ovüngo ji ombo piv lia. 7 Ana ni ezowo jiang nchüma, ntiotssole topvü ji engathev tsükona OPVÜI na etho ni piv. 8 Ana püngnothako yithenmhom ji ephani na David kitsük lona chiyio osi echü lona kümchelamo Jisu Khrista ji nchümcheta. 9 Ana püngno yithenmhom jina ephyo ji, yithenmhom ji püngnov ji tsükona a ezüpala, osi münghan esüa a shenala. Tolea Potsow yithenmhom jijo shencho mek. 10 Jitsükona Potsow ethüngche kyon jiang tsükona osi ontena ha Khrista Jisu lo kümali pvütssomo osi shanchov elio ji hungthokvü tsükona ana olan topvü rümala. 11 Heto phyoe lio shijo longtsüka khoko yi: "Ete ji ombo nzo echüthakcho tssona; eteha ombo nzo eküm vamvü. 12 Etena erüm toa vana tssona, eteha ombo nzo yansav. Etena ombo sinkia tssona, ombona ha e sinkiv. 13 Etena longtsü n lilea, ombo najo longtsüka lia vanala; ntiotssole ombona ombobo n longtsükav n siche."
Etüma Elhi Etssoe
14 Yilan shiang ni kyon jiang khi engathetoka vanthuka osi ontena oyi jilona n kontav tsükona Potsow mhadungo na tüngochüa onte tanga. Hojilo mmhom ntia n jü, osi hoji egae jiango onte yeso ji tae. 15 Ombo elhi lona yikra n chiyio kyon ji esüa osi Potsow ntsa ji yithen ji elamo püngnoe esüa Potsow na ni khichoyio tssochev tsükona ni eto ekhyo tssoa. 16 Limha kyon jiang onsha yisha jiang, osi ji yakchia n yikrachita chiyio osi Potsow thüngina kontae eyio jiang nkachoa. 17 Onte püngno yi jiango oso tsorhüpo emho jiang esüa tüv. Hymenaeus ha Philetus oniha hotüv püngnoeden. 18 Ontena ntsa ji sisi, ete kümchelan yuta jijo yaki yithaka to püngnoe longtsüi ejoma longtsü royiala. 19 Khatola longtsü kimüng kümoe Potsow na esenthakcho sana jijo n lukphiche, osi hojilo heto erankacho, "Ochoang kvütata na OPVÜI echi to phyoa vancho sana jiang OPVÜI na ntsia, topvüna n mhom jilona nkachoe vam lia." 20 Oki tsüphov lojo oyo-opvü jiang shona, osi janti tae lia mek, otssüng tona ochon to na nsüngrücho ha liala. Onte ejoma jo echümporo yutalo tsütsav tsükona khochaki vatala; osi ejoma jo yuta topvülo tsütsaphen tssoala. 21 Ana phyothako n mhom jiang lona ochona tsanchoe vana sana ombo tsentsüman oyo-opvü Potsow lo khochaki vacho osi ombo pvüi ji elhi bencheo elhi mmhom lo tsütsav. 22 Ni nungo eküm rüngcho jiang silanchisi ochoangna ekyo-erung tsükona lümbüm ntssüngi OPVÜI tsaphia sana jiang nzo tssoe, ntsanrük, longtsüka, nzan osi noying jiang yana. 23 Zhüva nlamo ekhiranta jianglo ti rhowoa, hojiangna khonta shichetala. 24 OPVÜI nri najo khontalo n rhowo, ombo topvü thüngi nzan lia erüm toa püngnoe mmhom, 25 osi ombo ryulamo jiang elancho-yiathüng erüm etoe tssov shikhfü. Ntiotssole hotüv kyon jiang ji Potsow na khophitoki ntsa jilo yitokvü tsükona yuta mmhom pia mpa tssov. 26 Khatola onte chüngtsoe tsüngrham ji kyak lona nkachoe yithokvü tsükona osi onte khi ntsa ji chekae khophitokvü Potsow na onte nzanchiv.
Tsüngon Okhao Jiang
1 Tsüngon wokhao jianglo jo ezüp yuta tssov to ntsi khia. 2 Kyon jiangna tajo lüma, epi-era, kanchana, ekhüng rütav; ontena yikvü-yilov, opvüpoe jancho n zo, montso to n tsso, ekhümlan n tsi; 3 onteno nzan n liv, khonzan to n tssov, echi ruta, jenbukta, haruka osi mmhom jijo tssakvü. 4 Osi onteno retsoeden, tssümherungmheta osi kangtsü na opon tssoa Potsow thüngina jo onte chokao jiang yantav. 5 Ontena ete ekhümlan shi oponi tssolanphyolan shiang benphisi ombo etho tsotso jijo khichov mek. Hojitüv kyon jiang nkachotava. 6 Osi ochoang sanajo oyam ki owo eloe n benri, onte mmen na osi oso rüngcho na pyingi vamo jiang ejithechiala. 7 Hetüv eloe jiangna jo yuta akvülo ntsi khihunglea kvüthüngha ntsa ji n yanchekhokala. 8 Jannes ha Jambres onina Moses ryulamo ji esüa kyon shiangna ntsa ji ryulanalakyon shiang nchümri jo n benri osi longtsü lo n tssojan. 9 Khatola ontena kona ochev meka, ntiotssole otsük akvüna onte n tha elhi ji hungu. Jannes ha Jambres oni loha hojito tssocho.
Püngno Okhao Jiang
10 Tolea nino a püngno yi jiang engathaka, a etsso-ephyo, a eküm tümka jiang ntsithaka; a longtsü, erüm eto, nzan, osi rümchokchi, 11 khangshi osi ezüp jiang ntsithaka. Hojiang topvü Antiok, Ikonium, osi Lystra to lona ekhenthao khangshi ezüp ana khithako ji nina ntsia; khatola OPVÜI na jiang topvü lona a shanchocho. 12 Khrista lo khümkae eküm mmhona vanhung topvü khangshiv; 13 osi kyon nmhon, kangtsüi jiang topvü n mhonka n mhonka na kümvü. Ontena oyam kyakthechiv khatola onte bobo kyakthechicho tssov. 14 Tolea nina ni püngno yi jiang ntsia, osi ntio ntsa nina zothakcho sana osi khichothakcho sana jilo longtsüka vata. 15 Ni nungo ekum lona Ntho motsü jiang nina ntsia, osi nina Khrista Jisu lo longtsüa tssona hojiang na ntsinran ni pia shanchov ji ni chekathokvü. 16 Ntho motsü topvü Potsow na ehakacho, osi jiang topvü ji ntsaji püngnotaphen, karangtaphen, ori nsachotaphen, osi eküm nsaka evam lo lanso-rünyophen mmhom. 17 Hojito lui Potsow elhi etssoe kyon jiang benriyi khi elhi mmhona topvü tssochetokvü tsükona.
1 Potsow osi Khrista Jisu ochona eküm osi echüi topvü oyi tssoyiv vancho sana oni mhadungo na, osi Khrista na elani rov, osi ombona mesao kümi yansalo rov to ntsia ana shi tüngochünga ni ezoala: 2 Yithen shi thenchoa osi yuta topvülo (etümathüng tssolea osi n tümathüng lea), nte püngnoyi enga vamo jiang ji rünyoa osi elanchoyia; erüm eto khi onte lümbüm tssonkayia, osi tümjak n lina onte püngnoa. 3 Ntiotssole kyon na yichüng mmhom jiang engav ekhiramo tüv yuta yiv. Tokhatola ontena engahungo osi chokao püngnoe jiang tae eno nthüka yantav, osi ontena chokao püngnoe jiang tae tsarhyuv. 4 Hojito ontena ntsa jilojo eno chungi sisi haton motsü jiang tae chokav. 5 Khatola nino sükhying topvü lo chüngchünga vana. Ezüp ekhiv lea methaki vana. Motsüza elhi ji tssoa osi Potsow nri ejoe na elhi jiang benria tssoa. 6 A tsükona jo othan tssoe siv yuta ji janthaka osi a pyonta yuta janthaka. 7 Ana rota mmhom rotathaka, ana eyung jilo a eto yungthaka, erüchako ji jana yungthaka, osi ana longtsü ji vathaka. 8 Enhungo a tsükona jo Potsow lona ntsanrük kikho ji ntsa yitssoe OPVÜI na hoji tsüngon jilo a piv tae nhyakala, a tsükona tae mek tolea ombona rolam jilo nzan lona zikata evan jiang naha hoji hunguv.
Kija Yi
9 Zakto a thüngi rov tsükona ekhyo tssoa. 10 Ntiotssole Demas jo a sisi yithaka, ombona limha ji jüpon lona Thessalonika lo yithaka. Krescens na Galatia lo, Titus na Damatia lo to yithaka,11A ndüngo jo Luke tae vana. nina Mark tsanhyae sosi roa; elhi lo a kyochitokvü tsükona ana ombo ethev lia. 12 Ana Tykhikus ji Ephesus lo yithukthaka. 13 Nina roana ana Troas lo Karpus thüngi vao osü ji khi hana, kako jiangha, opvü tssoa erankaphen jiang. 14 Tama yonjoe Alexander na elümoto sulyuo a tssoyithaka. Ombona ntio tssocho sanaji OPVÜI na ombo zeyivka. 15 Ombo ntangshona vanle, ombona e püngnoyi jiang elümoto panlanthaka. 16 Ana püngnodemo jithüng jo ochinaha a n kyocho osi otsük akvüna a sicho. N lan onte siyithokvüka. 17 Khatola OPVÜI na a ndüngo vani etho a picho. Osi ana pvüjipoe jiang topvü na yithen ji zojamo tssoa püngno-checho; hojitolyui hengho püngina a shanchocho. 18 OPVÜI na n mhon topvü lona a shanchov osi a nzana ombo ekhüngyani a sochokchiv. Kümali ombo pvütssonthuka! Amen.
Salüm Okhao Ji
19 Priscilla ha Aquila oni tona Onesiphorus wopan to a salümia. 20 Erastus jo Korinth lo tamangi vana, ana Trophimus ji otsük n mhon Miletus lo vanthukcho. 21 Vami n janthüng rov ekhyo tssoa. Eubulus, Pudens, Linus, Klaudia osi longtsüi topvüna ni salümala. 22 Ni mon eküm lo OPVÜI vanthukvüka. Ni lo kianzan ji lithukvüka.
1 Chiti shijo Potsow nri osi Jisu Khrista wothung Paul thüngina. Aiyo Potsow ethüngche kyon jiang longtsü ji soyinguv tsükona, 2 osi kümali eküm jilo eyilokao ete longtsü shi ntsa ji püngno lo a wothukcho. Shijo limha n soyingthüng vüngina Potsow na phyochakcho osi ombona ejüng n phyoala. 3 Potsow ete shanchopvüi jina ombo yuta ebenlo ombo yithen ji oponi chiyia e hungtokcho osi OPVÜI yizüng ephani na hoji thenchoe jo a tssov to methakcho. 4 Ana ete langoto longtsü jilo na a tsoe tsotso Titus thüngi eranala. Opo Potsow osi ete shanchopvüi Khrista Jisu thüngina yio kianzan osi noying ji ni echi tsswothukvüka.
Krete lo Titus Elhi
5 Ana Krete lo ni valanchio jijo ntio elhi tssocholam licho sana ji methaki vav tsükona tona ni ezowo ji ephanina yanro yantsü topvü lo ekhümkho lo eramoeden khyochei vanthukvü tsükona to: 6 Osi ana ni ezo jiang nchümcheta, eramoeden jiang jo phyophirüphi n liden, engh tsüka tae evanden, onte ngaro jiang ha longtsüiden, ntsantho ekümo mmhona evanden osi etssophyo mmhomden tssov shikhfü. 7 Potsow nri jijo Potsow lisae etsso jo tsükona ombona ha etssophyo lo phyophi rüphi n li-i, ombo nchümcho lo tae n zikae, lümbüm n haruk-hashüi, suko na n kinoe, osi orang lo tajo n lüm tüv tssov shikhfü. 8 Ombo oyam sothehung osi ntio jo mmhom sana ji jüpon kyon tssov lia. Ombo erüm etoe, ntsanrük eli-i, khochaki epi osi etssophyo mmhom tssov shikhfü. 9 Oyi kvüwoe jo longtsükhoko osi ete yichüng lo racho sana ji mbona sayav shikhfü. Jito tssona ombona püngno chüngchünguv khi oyam lümbüm tssonia osi ekhieran jiang elanchoyichev. 10 Shikhfü n tsina panga wotao tüv elümoto vana, opvü tssoa Jihudi Khristian jiang yolo, osi ontena silyuo tssosorala. 11 Onte ji pyangthechiv lia ntiotssole ontena wopan topvü khetsüala osi orang jüpon lona yikra n liv püngnotala. 12-13 Onte yolo tsüka zenkying to tsatao krete kyon jina heto ntsa phyocho, "Krete kyon jiango oyi n tsaeden, n tha ekümrümden, jakthana etho n jüiden." Hojijo otsotso. Jitsükona ntena rakyata onte makvü lia, to tssona longtsü lo chüngchünga vam. 14 To tssona ontena enhungo Jihudi jiang haton motsü osi ntsa ji lona tsanthako kyon jiang püngno jiang engayiv mek. 15 Ntsanrüko kyon jiang tsükona jo olan topvü ntsav; khatola mmenthako osi n longtsüo jiang tsükona jo ntia n tsa; onte lümbüm ha kichuk ha mmenthaka. 16 Ontena Potsow ntsia to yijakala, khatola onte elhi na jo ombo 11 khichoala. Onteno etssakthao oyi n ngaeden osi elhi mmhom to etsa lo n raeden
Yichüng Ntsaji
1 Nina ha yichüng ntsa jilo erao püngnov shikhfü, 2 Eramoe jiang ji chetünga, junga zia, erüm toa, longtsülo chüngchünga, nzan lia osi erüm esi lia vanthokvü tsükona nina ezov lia. 3 Eloe eramoe jiangna ha Potsow kyuchilo vam lia, osi ontena mentssyu menzena elani sokolo ora n tssov shikhfü 4 Ontena mmhom ji püngnov shikhfü osi tsoeni nungo jiang onte tsoerapvüi osi otsoe ro jiang kvüto nzam sana osi 5 erüm toa evam, ntsanthoe tsoeni mmhonden etssov tsükona osi nzan lia onte tsoerapvüi yi engayitavlo sokabenkatav shikhfü. To tsona Potsow yithen ji kyon ochinaha omying mmeniv mek. 6 Eboe khyingroe jiang ha erüm eto lile to ezoa. 7 Osi nina ntio tssoa sana jiang lona ejyuka mmhom pia. 8 Ni püngno jiang ji shenthia osi tanjünga püngnov shikhfü. Nina ntio püngnoa sana ji otsotso osi phyochov n lio tssona oyam panlan jiang yikrathokchev; osi e tsükona ha ntia ephyoyiv liv mek. 9 Nriden jiangna olan topvülo onte pvüi jiang küpo vantav shikhfü. Ontena onte pvüi jiang lümbüm epüko elhiv shikhfü. Osi onte rhalana, efüa, osi phyochophyoria to n tssov shikhfü, 10 Tolea ontena olan topvü longtsüka lia onteno nri to ejüv shikhfü, hojitoli ete shanchopvüi Potsow yithen ji olan topvü lona omying tsükayiv shiklüu. 11 Ntiotssole Potsow kianzan ji oponi chiyia ejüi kyon topvü thüngi shancho ji pithaka. 12 Hoji kianzan jina heto e püngnoala, Potsow lo 11 rao jiang, limha rüngcho jiang, osi etebobo sayata ntsanrüka, elana, limha shilo etsso-ephyo mmhona eküm vam tsükona, 13 elani ntsanrük osi Potsow lo erao eküm vani etena eyilota evamo ji ebem osi ete Potsow tsüpho ji osi shanchopvüi Jisu Khrista erov ji nhyakta vam tsükona. 14 Ete e vachiv tsükona ombobo khochaki picho osi ntha-nri topvü lona e ntssüngchecho; osi ombo kyonden ekümthoki elhi mmhom etssov e ntssungcho. 15 Nlyi enga vamo jiang nina ndungntssunga osi elanchoyia thüng ni etho ji tsütsta shiang topvü onte ezov lia. Osi onte ochiha khi ni ti zerüptoka.
Khristian Etssoephyo
1 Esaeden osi etho tsütsae jiang küpo vantale to ni kyon jiang ntssünga, ontena hojiang yi engata elhi mmhom topvü tssotav shikhfü. 2 Ontena oyam echi rüa osi khonta lüma to n tssov shikhfü, khatola olan topvülo kyon topvü thüngi woewolana osi zizamoriv shikhfü. 3 Tsüngona lojo enaha e zhüvacho esüa oyi nngav vancho. Ena olan woria e rüngcho osi e choka longshi olan taro jiang tae yanta jiang nri tssoa vancho. Ena eküm jiang kyaktssonitsso osi omhyik-raki, osi ete ete yolo tssakta-nkongta taena pyingi yithukcho. 4 Khatola kvüthüng ete shanchopvüi na ombo nzan ji osi kyon nzamo ji oponi chiyithokcho sana, 5 ombona e shochocho. hoji jo e ntsanrük elhina mek, khatola ombo kianzan jina. Buklan jü ji yakchia e buklancho, nthomon jina pio kümlan ji. 6 Ntiotssole ete shanchopvüi Jisu Khrista yakchia Potsow na omon ji etelo tssochyua rothukcho. 7 Jitsükona ombo kianzan jina om bona Potsow mhadungo elan kyon ekümthukcho osi kümali eküm ji ete echi to eyilo ji zenka epicho. 8 Shiang hetopvü otsotso osi ana ni ji shiang hetopvülo lümbüm ni thethuk-hungala. To tssona ochoangna Potsow lo longtsükacho sana jiang topvüna elhi mmhom tae etssov lo methaki vam. Shijo kyon otsük akvüna ethev elio ntssungyi mmhom. 9 Khatola ethev n lio ekhiranta jiang jo sitava, pochung motsü jiang, shikhfü ji tsükona pangta jiang, sitava, jiang topvü ethev n lio tae. 10 Ninyang sothei kyon jiang ji nina echung eni tae tanga, jisülo jo onte esi sia. 11 Hojitüv kyon jo lümbüm silyuo hana to nina ntsi khia. Osi ombona silyuo tsso jina hojijo nlan to ombobo ehungpvüi tssoala.
Ntssungyi Okhao ji
12 Ana Artemas mekna Tikikas rotoka na nina zakto oro Nikopolis lona a nduku ekhyo tssole, ana vami ji hojilo vam methakthaka. 13 Yitssoe Zenas ha Appollos oni yiathüng olani nzanchia osi onte ethelan jiang topvüto ni eto onte piolona nzanchia. 14 Osi ete kyon jiang na onte elhi mmhom jiang ji oyam ethev eli yutalo benphiv ntsiv lia, yuta thama na eziv n li. Onte na onte sangcho jiang tajo tssoe n siv shikhfü. 15 A ndüngo evan topvü na ni salümala; longtsü lona ete shom jiang a salüm ezoa. Nte topvü thüngi Potsow kianzan ji lithokvüka.
1 Jisu Khrista tsükona evüngki evan Paul tona ete ojenio Timothy to thüngina, e shom osi nzo elhi etssoe Philemon thüngi, 2 osi ni kina ndukta vamo ekhümkho ji thüngi, e oyuloe Apphia osi nzo rasan etssoe Archippus thüngi to, 3 ete opo Potsow osi OPVÜI Jisu Khrista kianzan osi noying ji lithokvü ka.
Philemon Nzan Osi Longtsü
4 A jenio Philemon, ana a randan topvü lo ni nchümchetala, osi n tümjakna a Potsow montso piala. 5 Ntiotssole nina Potsow kyon topvü nzamo ji osi ni longtsü Jisu Khristalo elio ji ana zothaka. 6 A randan jo ena longtsüi ejoena ni thüngi khümshümtao ji yakchia ete eküm na Khrista lo khümkae vamo jilona mmha hansi eyio ji jungkata engathetokvü tsov to. 7 Ojenio, ni nzan osi ntangnshon jina ematha epithaka osi Potsow kyon jiang lümbüm tssonkata osi emiroa yiala.
Onesimus Tsükona Jonjiyi
8 Khrista lona ete khümshümta jilo etancho evayio ji ephanina kvüto tssov sana ji ana rikata ni ezokhoka, 9 khatola ji thüngina jo nzan ji lona ana ni thüngi jonjiala. 10 Ho, thanpoe na mek, a Paul enhünga Khrista Jisu lantssoe ochona enhünga evüngki vancho sana jina Onesimus ochona evüngki rheyicho sülo a tsoe kümcho sana ji tsükona ni thüngi jonjiala. 11 Onesimus jo tsüngona lojo ni tsükona oman n liv vancho khatola enhungo omboji eniata tsükona oman lithaka. 12 A lümbüm ji ombolo vata omboji ni thüngi elani yithokala. 13 Ana yithenmhom ji tsükona evüngki vanathüng ombo ji nithung tssoa a nzanchia a vanthukhunga khatola, 14 ni yivon n khiv jo ntia a etancho a n tssohungala. Nzan lile to ni n khüngkache, ni lümcho tae. 15 Nkhontsi, ombo ji kümali ni echi phajae esüa mekna ojenio esüa tssov tsükona esüngaro ni thüngina kontae vancho tssokhoka. 16 Ombo a thüngi jo ezii esüa mek, tolea Khrista lona nzamo ojenio. A tsükona jo ombo kvüta oman licho ato! To tssona, ni thüngi jo OPVÜI lona longtsü shom ejoena osi nri ejoena kvüta kongkata shenta livto! 17 Tona nina a ji longtsü lona jokim to a n chümia tssona a khichoa esüa ombo khichoa. 18 Ombona ni thüngi ntio sana tssosoracho lina osi ochhi ni piv lina hoji a thüngoe tssothoka. 19 Ana shilona abobo eranchaka heto methakala: A Paul shina ni pilam. (Otsotso tssoana ni eküm totona lea a echi to ni ezolam ethev n li.) 20 Hoji tsükona ojenio, nzansi kyon tsüka shi tsükona OPVÜI lona a nchümia, osi a emathathuka! 21 Ana shi eramo shi ephan osi shilona lea kyongkata nina tssov to ana longtsüala. 22 Osi a tsükona ha nchenki a methakia, ntiotssole Potsow na nte topvü randan nte janana ana oro nte ndokvü to eyioala.
Salüm Okhao ji
23 Jisu Khrista tsükona nzo evüngki evan, Epapharas na ni salümala, 24 elani hoji esüa Mark, Aristarchus, Demas tona Luke to a nzo elhi etssoe jiang thüngina salümka. 25 Nte topvü thüngi ete OPVÜI Jisu Khrista nzan ji lithokvü ka.
1 Yuta yithako jii jo Potsow na lanka echümpo echümpoe na zenkhying jiang khi ete motsüi jiang elümoto püngnocho. 2 Tokhatola echungren wokhao shilo jo ombona ombo tsoe ji khi e janthaka. Otsoe ji yakchia Potsow na limha shi liyingcho, osi ombona limhatsü shi hoe ekhiv Potsow na ombo zikacho. 3 Ombona Potsow pvütsson wondang ji rakae yithokala, osi Potsow tathi ji kvütüv sana ombona merüka ejüala, osi ombo etho jina limha shi sayatala. Kyon jiang ji onte mmen lona epyoche nlan siyiv lanka yani vayithakale ombona Potsüwoe Thotsü Opo khe amimoe khukthecho; 4 hojitolui otsoe jina omying terio lanben jiang pomoe elümoto tsüphokao omying hungcho.
Potsow Tsoe ji Tsüpho ji
5 Ntiotssole Potsow na kvüthüngha lanben ochia, "Nino a tsoe, nchüng ana nipo kümthaka' " to nzohan; mekana "Ana ombo opo tssovka osi ombo a tsoe tssovka" to nzohan. 6 Khatola Potsow na ombo tsoe ji limhalo rothoku-sathüng ombona ezocho, "Potsow lanben topvü na ombo khümvü shikhfü." 7 Khatola lanben tsükona jo Potsow na phyoala, Ombona ombo lanben jiang mpung kümthukala, osi ombo phajae jiang mimyu kümthukala." 8 Khatola otsoe ji tsükona jo Potsow na phyocho, O Potsow ni ekhüngyan jo kümali, kümali lia vamvü! Nina ni kyon jiang pono ntsa lona sala. 9 nina ntiojo ntsa sana ji ni chokatala osi ntio ejüng sana ji ni tsakala. Jitsükona ni Potsow jina ni ethüngchecho. Osi ni shom jiang thüngina tsüphokao yikrachi ni picho. 10 Ombona hetoha phyocho, "Ni, OPVÜI jina benkadeni limha shi liyingcho; osi ni khena oyak potsüo shi nsüngrücho. 11 Onteno topvü moni siv, tolea nino lia vamvü; jiang topvü osü esüa ekeye siv. 12 Nina onte ji osü chüpa to chüpi siv, osi osü dungphiato dungphiv. Khatola nino kümali kheti vam, osi ni eküm jo ochüm ntssoala." 13 Potsow na ombo lanben ochia, "Shilo a amimoe khuktheta, ana ni ri jiang ni jo kupi a epyankaphen nkümthuk-thüng jo, to ezocho nlihan." 14 To tssona lanben jiango ntiola? Onteno OPVÜI Potsow elhi etssoe omonden; kyon ochoang shanchov sana jiang nzanchiv wothukcho.
Shanchov Tsüpho ji
1 Jitsükona etena ntio zothakcho sana ji rarüngkata sayatav lia, hojito tssona ete lanka ji n ori. 2 Ete pyimtsümotsüi jiang thüngi shikhfü ji yilan lanben jiang yakchia phyo jiango ntsa etsso ji tsükona ochona hoji nngav yesoa sana jiango ezüp picho. 3 Jito tssocho tsona shanchov tsüphov hetüv etena nngacho jo kvütoli etena tsanchochevla? Shanchov yi shiji ovüngtssoa OPVÜIna ombobo thensochicho, osi ochoangna ombo zoyicho sana jiang na ete thüngi otsotso to ejüthaka. 4 Osi Potsow na chethev, emhuko elhi osi etho tsüphov elhi olan olan ehungthuka ombo lüm erüng ephanina Nthomon ji yantso e jantayia ehungpvüi tssothaka.
Shanchov Jilo Esochipvüi ji
5 Etena limha ethan etsao ji motsü ruta evamo ji esav tsükona Potsow na lanben picho mek. 6 Nthomotsü kvülona sana heto phyoji esüa, "Kyon jo ntiola nina ombo tsükona nchümala Potsow? Ombo kyonshaela ntioli nina ombo tsükona wongkhyuv lichola? 7 Yuta esüngaro tsükona nina ombo ji lanben lona tara süjoa liyingcho; osi nina ombo ji pvütsson tona myingthüng to khi kikhothukcho. 8 Osi liyingcho topvü pono esapvüi ombo tssothukcho." Topvü ombo küpo tssothukcho to phyo ji yichak jo ombo küpo meko tüv ntia n li. Khatola enhüngajo kyon na topvü pono OPVÜI tssoa sacho n hungala. 9 Tokhatola etena hungwo jijo, Jisu ocho yuta esüngaro tsükona lanben jiang lona tara süjoa kümthukcho sana osi hojitolui Potsow kianzan lona ombo kyon topvü tsükona chücho sana jijo ombona ezüp khia eküm pio ji tsükona enhünga jo pvütsson osi yikrachi khi ombo kikhothukcho etena hungala. 10 Hojijo Potsow ochona liyingcho sana osi ochona nkümi vanthaka sana jina Jisu ji ezüp yakchia benria kümthoki otsoe elümoto khi ombo pvütsson ji shüm-nhyathukcho sana jina hoto etssov ji elan licho. Ntiotssole shanchov jilo olan onte esopvüi ji Jisu. 11 Ntiotssole ombona kyon jiang mmeni na onte epyochetala, osi ombona epyocheo jiha ochoang epyochecho sana jiangha topvü ji Potsow motsünga lona tae. Jitsükona ombona onyuroden to onte etsav ji n yikrala. 12 Ombona potsow heto ezoala, "Nina ntio tssothakcho sana ji ana a jenio jiang thüngi thenchov, osi onte sanrhyu jilona ana ni mying thünga dem." 13 Elani ombona phyoala, "Ana a longtsü ji Potsow lo vav." Elani ombona phyoala, "Potsow na apio jiang nzo ana helo vam." 14 Ombona ngaroden to etsao jiang ha ejen oso etsso ji esüa, Jisu ha onte tathi ji khicho, osi ombona hojito kyon tathi ekhio jijo, tsüngrham ochona echü ji pono etho licho sana ji monthoki sisi, 15 kyon kvütata echüv ekyu lona nri esüa vancho sana jiang vachiv tsükona tssocho. 16 Ombona lanben jiang kyochiv rocho mek, to ntssüng-rünga hungala, khatola Nthomotsü lona phyo ji esüa, Ombona Abraham tsoronichen jiang nzanchiala. 17 Jitsükona ombo ji olan topvü lona ojenio jiang esüa kümthokvü licho; hojitolui ombona khonzan osi longtsüka eli pvüti tsüphoe kümi, Potsow benkav tsükona osi kyon jiang mmen jiang khi siyichev tsükona. 18 Omboha ombo ejiphi khi ezüp khio ji esüa ochoang ejiphiv yakchia ezüp nungra vancho sana jiang ombona nzanchikhoka.
Jisu jo Moses Lona Tsüphokata
1 Jitsükona a ota-onyu nthoe Potsow na tsathako kyonden! Jisu tsükona nchümtava, ocho ete longtsü lona ombo pvüti tsüphotso Potsow na rothukcho to ehungpvüi tssoa sana ji. 2 Moses na Potsow ki phajae longtsüka eli elhi tssoji esüa, omboha ombo ethüngcheo Potsow jilo longtsüka licho. 3 Khatola oki ji thüngina jo ki-tssopvüo ji ekyongo yikrachio ji esüa, Moses thüngina jo Jisu ekyongo monkhüm yikrachiv etümcho. 4 Oki akvüto ochona sana soyingala, khatola Potsow jo topvü soyingpvüi ji. 5 Moses na Potsow ki phajae ejoena longtsüka lia vancho, osi mhadungi Potsow na ntio phyov licho sana jiang ombona ovüngna ehungpvüi tssoe vacho. 6 Khatola Khrista jo Potsow ki longtsüka eli otsoe esüa vancho. Osi eteha ete eyilo jilo longtsüka lia vana tssona eteno potsow ki.
Potsow Kyon Jiang Esan
7 Nthomon jina heto phyo ji esüa, Nchüng ntena Potsow yi ji zoa tssona, 8 Nte pyimtsümotsüi jiangna lijüngi ojang yutalo vanathüng Potsow panlamo ji esüa jo lümbüm ti-khüngtava. 9 Ontena rhomonina ana nzyu zhüro ntio elhi tssocho sana jiang hungcho khatola ontena ojang a tsso tsüngon esüa jo ti-tssotava; to Potsow na phyoala. 10 Hoji tsükona ana onte thüngi alüm tsuki heto phyocho; 'Onteno yuta topvülo nzon ngae, osi a yizüng engav ekhiranala.' 11 Ana a lüm tsuki heto phyochaklancho; 'Ana onte pia esantokvü etssowo meta jilo ontena kvüthüngha rheyichev meka!'" 12 A khümo longtsüiden, nte ochi naha n zo n ga yakchia eküm potsow thüngina tsani n yio tssoa ntangnshontava. 13 Jithüngona jo nte ochia mmen na ejithechi lümbüm khünga n kümthokvü tsona Nthomotsü lona "Nchüng" to ephyo ji etelo elithüng jo eng akvüto nte nte kyochita vantava. 14 Ntiotssole etena benkadeni longtsüka elio ji esüa ochüm jana chüngchünga rhümasi vana tssona eteno Khrista nzo elhi etssoeden. 15 Motsü lona heto phyoala, "Ntena nchüng Potsow yi zoa tssona; nte pyimtsotsüi jiang na a panlanta thüng esüa lümbüm khünga ti vantava." 16 Ochoangna Potsow yi zoaha ombo panlanchola? Moses na Ejip meta lona sochuko kyon jiang topvü na. 17 Ochoang thüngi Potsow na nzyu zhüro lüm tssukchola? Ochoang na mmen tssoe lijüngina chüracho sana jiang thüngi. 18 Kvüthüng Potsow na ombo echümchak heto khicho sana "Ana onte pia esantokvü etssowo meta jilo ontena kvüthüng ha rheyiv meka." Shijo ochoang tsükona phyochola? Ochoangna ombo panlancho sana jiang tsükona. 19 Ontena n longtsüo ji tsükona onteno phyochako meta jilo n rheyitokcho etena hungala.
1 Potsow na esan tsükona ntio phyocho sana ji nchüng ete tsükona ha phyochaki lia. Jitsükona nte ochinaha hoji esan jilona n khachov tsükona ntangnshona vantava. 2 Ntiotssole ontena zo ji esüa eteha yithenmhom ji zothaka. Ontena yithen ji zocho khatola hojina ntia mmhom onte n tssoyi, ntiotssole ontena longtsü lona n khichocho. 3 Jitsükona ete longtsüi yo Potsow na phyochako esan ji hungu. Nthomotsü lona heto phyoji esüa, "A lüm tsuki ana heto echümchakcho; 'Ana esan onte methakio meta jilo ontena kvüthüng ha rheyiv meka!'" Ombona limha ji liyingathüng na ombo elhi jo methakcho khatola ombona hojito phyocho. 4 Nthomotsü kvülona sana tsüngon tiying ji tsükona heto phyoe lia, "Tsüngon tiyingo to jilo jo Potsow na ombo elhi topvü esancho." 5 Yilan shi tsükona heto phyolancho: "Ana esan onte methakio meta jilo ontena kvüthüngha rheyiv meka." 6 Ochoangna yithenmhom ji zodencho sana jiang na hoji esan ji n hungcho, ntiotssole ontena n longtsücho. Tolea ochoang sana jo hoji picho. 7 Hoji jo Potsow na tsüngon thanpo kokae 'Nchüng' to vayilamo jilona ntisala. Nzyu elümoto süloti ombona yitsük ji David yakchia Nthomotsü lona phyothukcho: "Ntena Potsow yi ji nchüng zoa tssona lümbüm ti-khüngtava." 8 Potsow na phyochako esan ji Joshua na kyon jiang pithakcho sawo Potsow na elani tsüngon kokalam mek. 9 Khatola Potsow na tsüngon tiyingo tolo esamo ji esüa Potsow kyon jiang tsükona esan vai lia. 10 Ntiotssole ochona hoji esan ji hunga na Potsow na elhi lona esamo ji esüa, ombo elhi lona esam lia. 11 Jitsükona etena onte esüa longtsü n liv esan ji n hungu n siwo tssoa mekna esan ji ehungo tsowoa ekhyo tssotavka. 12 Potsow yi jijo kümzakzak na etho lia osi yonri yonkhong yontsson pondüng phyakcho lona erokata. Hoji na eküm tona omon to khosotayia, osi chungta lukta tona chükcho to khotayia ejungthechiala. Hojina kyon lümbüm erüng tona nchümri to ji fütae zeyiala. 13 Potsow mhadungo ntia mphocheo n li; liyingcho topvü ombo mhyiko echankachi lia. Osi ete topvü na ete eküm ehungpvüi ombo mhadungo piv.
Pvüti Tsüphoe Jisu
14 Jitsükona etena tsakathako longtsü ji sajüngtavka. Ntiotssole etena pvüti tsüphoe Jisu, Potsow tsoe ji vana, Ombona Potsow eshüpo chiwothaka. 15 Ete pvüti shijo ete n khyonto osi n benzi jiang e n tsiyio pvüti mek. Ete pvüti tsüphoe shijo olan topvü lo ete esüa ojang ndukcho; khatola mmen n rhükacho. 16 To tssona etena lüm tssontavka, osi kianzan lio vantsü jilo wotavka. Hoji lona etena ethelan elio kianzan ji hungu.
1 Pvüti tsüphoe jiang otsük akvü kyon jiangna onte yolona ethüngche onte tsükona Potsow benkathokvü osi ekümrüm than osi mmen than pithokala, 2 omboha n benri lio ji tsükona kyon jiang n benri osi wori jiang nzo tssoe eyingroa elhi tssoala. 3 Omboha n benrio ji tsükona kyon jiang mmen thungthan tae mekna ombo mmen tsükona ha thanala. 4 Pvüti ochinaha omying eyan tsükona ombobo hoe pvüti n tssola; Aaron esüa Potsow na tsacho tsükona tae pvüti tssoala. 5 Hoji esüa Khrista na myingthüng tsükona ombobo pvüti tsüphoe tssocho mek; tolea Potsow na heto ombo ezocho, "Nino a tsoe, ana nchüng nipo kümthaka." 6 Ombona thanpoe naha heto phyolancho: "Nino kümali pvüti tssovka, Melkhizedek sen ji khi tssovka." 7 Khrista na oso kümi limhalo vanathüng jo, ochona echü lona ombo shanchokhocho sana ji thüngi tüngkachia esü theta jonjia randancho, osi ombo teri enyipro eküm ji yakchia Potsow na ombo engayicho. 8 Khatola omboha Potsow tsoe tssoaha ombo ezüp etsü yakchia jancho ezo ji ntsi khicho. 9 Omboji njümchethakale ochoangna ombo yi enga sana jiang kümali shanchowo etho ji ombona kümi sicho. 10 Osi ombo ji Mekhizedek echung pvüti to Potsow na phyoyicho.
Longtsü N sinkiv Ezocho
11 Yilan shi tsükona etena elümoto phyotav lia khatola, nte engathe ji elümoto sikio ji tsükona hoji eroroe nte ezov ji elümoto khünga. 12 Nte ji yuta sunga püngnoeden kümthako ji tsükona Potsow yithen jilo polaro jiang mpato ochona sana nte püngnowo tüv lihanala. Etsoyu ekhüngu etso thung jo ntena shirojü yutapam lia, 13 osi shirojü eyuv lihamo jijo, ngaro ntan mmhom ntsihancho tssoala. 14 Khatola etsoyu ekhüngu jo eranküm ochoangna elhi lona ejyu-eranchei, mmhom n mhom chekathakcho sana jiang echi.
1 Jitsükona enhungo etena Khrista motsü jilo püngnoyi benkaden jiango valanchia mhadungi yitavka. Benkaden yi esüa Potsow lo longtsütale osi ethev n lio elhilan jiang jo sitale to nte ezolam ji ethev n li; 2 elani bapti tsükona püngnoyi, okhe nyimkayia randaniv, echüi jiang kümchelan yilan osi kümali yitsso to shiang tsükonaha nte ezolam ethev n li. 3 Jitsükona enhungo etena mhadungi khochitavka, Potsow lüm erüng lina etena otsotso hojito tssotavka. 4 Ntiotssole ochoangna onte longtsü ji sinkithakcho sana jiang solansi eyiv jo kvüta khüngchola? Onteno Potsow wondang jilo vancho osi Potsow yantso ji ntsithaka, elani nthomon yantso jilo onte chinhyathaka. 5 Potsow yi jilo mmhom jüwo ji ontena elhi lona ejyuchethaka. 6 Tosi ontena onte longtsü ji sinkilancho! Jitsükona onte sosi yilam jo n tssochewo, ntiotssole ontena Potsow tsoe ji elani doni sia oyam khi emakathukala. 7 Ochon kümoe na eryujü nsansam jowo ji re sisi lijon jiangna ethev elio oyo-ohan chiyithuka sana ji Potsow na mmhayiala. 8 Khatola hoji chon jilona ero osi okyo bukthuka tssona hojijo ethev n lio. Hoji jo Potsow na randankao osi omina rungi siv. 9 Nzamo oshomden, ena heto nte ezolea nte tsükona e khathünga n chümala; Ntiojo mmhoncho sana osi shanchov jilo esochia sana ji ntena ntsia. 10 Potsow jo ntsanrüka osi ntena ombo tsükona rothakcho lo tssolea osi enhünga ombo kyon jiang yolo nzan ejüo jiang osi ntena tssoa vamo jiang nte n mhechoyika. 11 Nte otsük akvüna ntio choka longshi lia vancho sana ji nte eyilo jiang n benthüng jo lia vanthokwo osi etho jüa vanta wo to nte eyiloyiala. 12 Ochoangna erüm-esi osi longtsü yakchia enhünga jo Potsow mmhom phyochaki vayio jianglo vancho sana jiang esüa etho n jüv nte e ntssothuk hungala.
Potsow Phyochak Ji
13 Potsow na Abraham thüngi phyochako jithüng jo ombona echümchaka phyoe vacho, ombolo tsüphokao ochia n vamo jina ombona shi phyochako jithüng jo ombo mying tsakae phyochakcho. 14 Ombona phyocho, "Ana phyochaki ni vayiala, ana ni mmhayiv osi tsoronichen khosha ni piv." 15 Abraham jo erüm etoe tssocho osi Potsow na ntio phyochakcho sana ji ombona hungcho. 16 Kyon tsüka na kvüthüng echümchaka sana ombo pomoe tsüphokao mying eyikatala; osi echümo jina ekhiranta topvü bükiala. 17 Ochoangna ombo phyochak ji hungu sana jiang thüngi Potsow na ombo phyochak ji n dungphi to n tsithuk-hungcho; jitsükona ombona phyochako jilo echümchak ekacho. 18 Jitsükona n dungphio olan eni lia, Potsow na shiang ji ejüng n tssothuk; jitsükona ete kvüta na ombo lo nkoha hungthak-cho sana jiangna mhadungi eyilo ji n vachiv tsükona lüm etssonkayithaka. 19 Etena eyilo shiji ete eküm shenyaphen esüa kümthaka. Shijo otsotso osi shina potsüwoe kümpheni zonchak ji yakchia thanphen ochungoe rhowoala. 20 Ete tsükona Jisu na ete mhadungina hoji rhowothaka osi kümali tsükona pvüti tsüphoe kümthaka, Melkhizedek sen ejüo pvüti.
Melkhizedek Pvüti
1 Melkhizedek jo Salem lo mesao osi Ntsontso Potsow pvüti. Abraham na ritsso lona mesao mezhü jiang khyosi yia vanathüng Melkhizedek na ombo nduki mmhayicho. 2 Jitsükona Abraham na phanchoe elio ejüeli jiang topvü lona tarochia khichei ombo picho. (Ovüngtssoa Melkhizedek ji yichak jo "Ntsanrük Mesao" osi ombona Salem lo mesao tsso ji yichakjo "Noying Mesao.")3 Ombo opo oyo osi pyimtsümotsüi vancho tüv erani n li, ombo ebuk osi echü motsü ha n li. Ombo Potsow tsoe ji esüa ombona kümali pvüti tssoa vanala; 4 Tona ete omotsüi Abraham na ombona phanchowo ejüeli jiang lona tarochia pio kyon shijo kvüta tsüphov sana ji zeta. 5 Levi tsochen ochoangna pvüti elhi tssocho sana jiango shikhfü lo lio ji ephan Israel kyon topvü thüngina tarochia ekhyav etho picho. Onte ji Abraham tsochen mpato tssolea tsenkha khiyicho. 6 Melkhizedek jo Levi tssochen mek, tolea Abraham thüngina tarochia khicho, osi Potsow echümchak ehungo ji mmhayicho. 7 Eramo jina nungo ji mmhayiala to jijo ntsintsa yi. 8 Pvütiden jiango tarochia khyalea chüi esioden; khatola Melkhizedek shijo eküm evamo osi tarochia khyacho, hojito Nthomotsü na phyoala. 9 Otsotso rütavo Levi ochona tarochia khyacho sana jinaha Abraham yakchia tarochia picho. 10 Ntiotssole Abraham na Melkhizedek nduki tarochia ombo pio jithüng jo Levi n bukhan, khatola ombo ji Abraham ejen lo jüthako jina. 11 Israel kyon jiang thüngi shikhfü ji pio jijo, Levi pvüti elhilo ejonkae picho. Jitsükona Levi jiang pvüti elhi jilo ephyoerüv n licho sawo thanpo Aaron sen meko tüv Melkhizedek esüo tüv rothokvü ji ethev n liv tssov. 12 Ntiotssole kvüthüng pvüti elhi ji dungphicho sana shikhfü jiha dungphiv licho. 13 Ete OPVÜI ocho tsükona shiang phyocho sana jijo, pvüji thanpo lona chiyicho, hoji pvüji kyon ochinaha OPVÜI thanphen lo pvüti elhi ntssohan pvüji. 14 Ntiotssole ete OPVÜI ji Juda pvüji lona chiyicho to ntssüng-rünga hungala. Moses na pvüti motsü phyoathüng pvüji shilo pvüti vancho tüv phyocho n li.
Melkhizedek Esüa Pvüti Thanpo
15 Melkhizedek esüo tüv pvüti thanpo chilanwo hoji lona etena yilan shi ntssüngkata engathev; 16 Limhalo shikhfü jiang ephan etssoe pvüti mek, khatola ntinaha roe n sicheo eküm tüv lo epyankao pvüti. 17 Nthomotsü na phyoala, "Nino kümali tsükona Melkhizedek sen esüo pvüti tssovka." 18 Yizüng ovüngo jijo oman n lio osi etho n lio jina valanchi sithaka. 19 Ntiotssole Moses shikhfü jina jo ntia oman lia n tssochecho, tolea etena Potsow ndüngo wocheo tüv eyilo mmhonkao epithaka. 20 Osi shilojo Potsow echümchak theta elhi epicho. Pvüti thanpo jiang echümchak n thev elhi tssocho. 21 Ombona pvüti tssoji heto ombo ezoa vamo OPVÜI ji yakchia echümchak tssocho, "OPVÜI na mmyinga echümchakthaka, osi ombona hoji n kilan: 'Nino kümali tsükona pvüti tssovka' " 22 Jitsükona echümpota jijo, Jisu jo Ntsata mmhonkao tüv ntsatapvüi ji kümthaka. 23 Elani echümpota heto lihana; Pvüti thanpoe jiango echü nduko jina onte khosha chungta tssocho, 24 khatola Jisu jo kümali pvüti tsso jina oyam na echungchowo tüv mek. 25 Jitsükona ombo etho jo kyon kvüta na ombo yakchia Potsow thüngi roa sana jiang kümali shanchoa vancheta; ntiotssole ombo onte thung Potsow thüngi evov tsükona kümali vanrhüala. 26 Jitsükona Jisu jo pvüti tsüphoe osi ete ethelan eli ebencheyikhoka, ntiotssole ombo nthoa, osi nlan n li; mmen n li, mmen kyon lona khotathukcho; osi potsüwoe ekhyonkachicho. 27 Pvüti thanpoe jiang esüa ombona jo eng akvü ombo tsükona osi kyon jiang tsükona thungthan epiv n li; shi hetopvü ombona ombobo thamo jithüng yenjoa tae na topvü tsükona tssoe sicho. 28 Moses shikhfü jina jo pvüti tsüphoe jiang ji onte n benri elio tüv ethüngchetala, khatola sülamiti ro echümchak yi jina jo ephyo-erüv n lio otsoe kümali tsükona ethüngchecho.
Jisu jo Ete Pvüti Tsüphoe
1 Shi phyotao shilo oyi opvü tsotso jijo, eteha hojitüv pvüti tsüphoe vana osi ombona Potsow pvütsson vantsü ji amimoe khukthethaka. 2 Hijlo ombona kyon khena mekna OPVÜI na etssowo Nthotso khümphen süki jilo pvüti elhi tssoa vanala. 3 Pvüti tsüphoe otsük akvü othan osi thungthan Potsow epiv zikacho; jitsükona ete pvüti tsüphoe jinaha ntio sana jo tham licho. 4 Ombo ji limhalo vanwo pvüti ethüngchev mek; ntiotssole limha lojo Jihudi shikhfü ephan othan epio pvüti vanra. 5 Onteno limha lojo potsüwoe ji ejyu esü ejak eyen esüa tae elhi tssotala. Moses na süki tssokachiv sathüng Potsow na heto ezowo ji esüa: "Phunglani na ntio ni ejücho sana ji ephan tae tssoa" 6 Khatola enhungo Jisu jo pvüti elhi pithaka, osi hojijo onte elhi jiang lona tsüphokata, kvüto ombona ombo tona kyon to yutalo ntsata soyingo ji mmhona tssocho sana ji esüa, ntiotssole hoji ntsata jijo echümchak mmhonkav lo soyingkacho. 7 Ntiotssole ntsata ovüngo ji bencho saliwo, Potsow na ntsata enioto ethev liv mek. 8 Potsow na ombo kyon jiang nlan zecheta heto phyoala, "Ana Israel kyon jiang tona Juda kyon jiang to thüngi ntsata ethan methakvü yuta ji tsata to OPVÜI na phyoala. 9 Hoji ntsata jijo, ana onte pyimtsümotsüi jiang okhe lona erüi Ejip lona onte sochuko jithüng onte thüngi ntsatao ji esüa mek. Ntiotssole ontena ntsatao ji n tsütsav sicho, jitsükona ana onte n tangnshom sicho. 10 Enhungo ana Israel wopan thüngi ntsata methakvü jijo shi: OPVÜI na phyoala, Hoji tsüngon jianglo jo ana shikhfü jiang ji onte nchümri lo theyiv; osi onte lümbümo erankayiv. Aiyo onte Potsow tssov osi onteno a kyonden tsovka. 11 Onte ochinaha ombo phinakishüm ji osi oshom ji 'OPVÜI ntsia vana' to püngno tüv liv meka. Ntiotssole terio ji lona benkae tsüpho ji nandang na a ntsiv. 12 Ana onte mmen jiang nlan siyiv, osi onte wori jiang ji onte n chümcheyilan." 13 Ombona 'Ntsata ethan' to phyo ji yakchia ntsata ovüngo ji ehen kümthukthaka; osi ntio ehen osi ekye kümthakcho sana jijo n sungu moni siv.
Limhalo Tona Potsüwoe To
1 Ntsata ovüngo jijo ekhüm tssolan-phyolan tona kyon na tssocho khümphen to tsükona nsüngrüi lia. 2 Ntiotssole süki tssocho osi chungchak opomo ji Ntho meta to tsacho; hojilo milondung tona Opvü vanrhyu hümri ekachio saro ji to vacho. 3 Zonchak enioto ji sülo jo Ntho lo Nthotso to tsao ji tssocho. 4 Hoji lojo orhüm mmhom rungphen shona saphang ji tona ntsata bakos ji to vacho, osi jiango shona na eyukzhücho. Bakos jilo jo shonapvü jilo Manna thei vacho, Aaron jarung lona limo chenkao ji, ntsata erankao longpyak eni ji to vacho. 5 Hoji mhawoe jo Potsow vanhya chiyithokpvüi Cherubem vancho, osi onte echo jiangna mmen ji nlan siyiphen meta ji khümchochi vancho. Enhungo shiang ji jükrokhfüroa phyotao tüv n li. 6 Heto züngchaktae vao ji ephan pvüti jiangna onte elhi tssoathüng jo tsüngon akvüto pvüti chungchak opomo jilo rhowocho, 7 tokhatola chungchak enito jilo jo pvüti tsüphotso ji taena nzyualo yenjoa tae rhowocho. Yuta topvülo ombona ombo tsükona osi kyon jiangna n tsina mmen tsso jiang nlan tsükona ejen bensi rhowo thancho. 8 Shi yakchia Nthomon jina heto mmhona entsithukala: chungchak opomo ji elithüng nandang jo Nthotso meta thanphen ji n hungthukcho to. 9 Hoji ejyukajo enhünga yuta shi etssyuchicho. Ji ejyukajo yantso osi thungthan pio jina kyon jiang lümbüm ji benria n kümthukche to ji. 10 Ntiotssole onteno oponi etsoyu osi oponi longtsü tssolan olan olan jiang lo tae zekae tssotacho. Hojiang jo topvü oponi tssolan Potsow na shikhfü ethan ji n soyingthüng lithukcho tae. 11 Khatola enhünga ntio mmhom licho sana shianglo pvüti tsüphotso ji etssov Khrista na rothaka. Ombo süranki tsüphotsowo osi benrikao tüv, osi okhe na n tssocho osi liyingcho limha shilo meko tüvlo pvüti ji. 12 Khrista na ntho pono ntho thanphen jilo topvü tsükona yenjoa tae rhowocho, osi ombona nyanyan osi mangsüro ejen theta n thancho; khatola ombona ombo ejen khi ete tsükona kümali shanchov eküm e vayithaka. 13 Nyanyan tona Mangsü to ejen tona mangsü rüngcho khorü nzükao jiang tojo oponi tssolan jianglo tssosorao jiang tsüko thukayicho, osi hojina onte n tssüngrüng ji khi siyicho. 14 Hojito tsso ji otsotso tssona, Khrista ejen jina jo kvüta tsüphoa tssorhüpvüla? Kümali Nthomon ji yakchia Khrista na ombobo ephoerüv n lio Potsow thüngi thanthaka. Ombo ejen jina ete nchümri e ntssüngia, ethev n lio tssolan jiang lona epyochekhoka, osi hoji yakchia etena eküm evamo Potsow ji benkachev. 15 Jitsükona Potsow na etsao kyon jiangna kümali mmha Potsow phyochak yantso ji hungthokvü tsükona Khrista na ntsata ethan methakthaka. Shijo kyon jiangna ntsata ovüngo jilo vanathüng onte wori yakchia echü rhükao jiang shanchov tsükona Khrista na chüthako ji tsükona. 16 Kvüthüng lüm erüngna thungthan etssov tüv yi chiyiana otsotso kyon jina chücho to zetav lia. 17 Ntiotssole lümerüng thungthan ji eküm evanthüng jo nlochehan, khatola ombo chüsanati ochi ji lochetala. 18 Hoji tsükona ntsata ovüngo ji mpa ejen etheo chonchicho. 19 Moses na shikhfü jilo yizüng kvüta licho sana kyon jiang ovüng tssoa ezothakale ombona mangsüro tona Nyanyan to ejen khi, ojü tona süporo emyom esephen to khi shikhfü kako ji tona kyon jianglo to erhikacho osi phyocho. 20 "Shijo Potsow na nte epio Ntsata ejen jika." 21 Hoji esüa ombona ejen ji khi süranki ji tona khümathüng tsütsaelan jiang topvü tolo erhikacho. 22 Shikhfü ji ephan ji olan topvü ejen taena ntssüngchecho osi ejen nthev jo mmen khi n sicho to phyokhoka.
Khrista Thungthan jina Mmen Khi Siyiala
23 Potsüwoe etssophyo jiang limha lona ejyu-esüphen ji hetolui nthochev licho; khatola potsüwoe lio jiango hoji lona mmhonkao tüv khi nthochev licho. 24 Ntiotssole Khrista na okhena. tssocho ntho khümphen osi ntsa esüthoku ejyuka tssocho tüv thanpheni rhowocho mek, khatola potsüwoe enhünga ombona Potsow ndüngo ete tsükona vamo jilo rhowocho. 25 Jihudi pvüti tsüphoe jiang na Nthotso khümphen jilo nzyu akvü rhowo jijo ekümrümo ejen hansi rhovocho; khatola Khrista na jo pvüti jiang na elan elani rhowoa to rhowocho mek. 26 Hojito tssocho sawo ombona limha ji liyingpvü elan elani ezüp nrhüa vancho tsov. Khatola ombona thamo ji yakchia mmen khi siyiv tsükona echungren jiang ochümiti yenjoa tae osi topvü tsükona ombo chiyithukcho. 27 Kyon jo echunga tae chüv sekacho, osi jisülojo yitsso ji; 28 Ji esüa Khrista ha khosha mmen eham tsükona yenjoa thancho; osi ombona yenjo enioto rolam, jithüng jo mmen khi siyilo mek; tolea ombo nhyaka evan jiang thüngi shanchov ji hansi rov.
1 Jihudi shikhfü jina jo tathi otsa ntio licho sana ji mmhona rakae n jüche; tolea hojijo otsa mmhom ntio rov licho sana ji kisü esüa tara tae. Nzyu akvüto edunga thantsük ji pia vanala. Hojito tssona kvütoli shikhfü lona phyo ji esüa thungthan pio jina Potsow thüngi ero kyon jiang ji benria kümthokvüla? 2 Potsow ekhüm kyon jiangji onte mmen lona ntssüngchethakcho tssona, kyon jiangna onte mmen jina nlan onte pilamo liv mek, osi thungthan epi ji esani siv. 3 Khatola nzyu akvü thungthan epio jilojo nzyu akvüto kyon jiangna onte mmen jiang nehümehe khetsüthuko ji tae. 4 Ntiotssole mangsüro ejen tona Nyanyan ejen tona jo kvüthüngha kyon mmen khi n siyiche. 5 Hoji tsükona Khrista na limha shilo eropüngo ombona heto Potsow ezocho: "Nina thungthan osi othan jiang ethev n li; khatola nina otsük oso a kümthukthaka. 6 Thanphen saphang lona ekümrümo mpüm na rungi ni thamo jina ni emathacho mek, mekana mmen than pio jina ni n matha. 7 Jitsükona ana phyocho, 'Shilo a vana, ni lüm erüng ji etssov tsükona, O Potsow. Nthomotsü shikhfü kako jilona a tsükona ntio erani licho sana ji ephan tssovka.' " 8 Ovüngtssoa ombona phyocho, "Nino thungthan osi othan jianglo, osi mbum thungthan tona mmen than to jianglo ni ematha n li." Shiang jo shikhfülo lio ji ephan thancho khatola hojito phyocho. 9 Jisülo jo ombona "Ni lüm erüng etssov shilo a vanka Potso" to phyocho. Jitsükona Jisu Khrista na ovüngo ekümrüm than ji khi siala, osi enioto Khrista na khochaki thamo ji lithukala. 10 Ombona Potsow chokao ji tssoyiwo jina osi topvü echi tsükona ombona yenjoa taena ombo tsük na thamo jina eteno e nthoche ombo tsükona evathaka. 11 Jihudi pvüti otsük akvüna eng akvü elhi tssolea elani othan pilana mungala, osi jina jo kvüthüngha mmen khi n siche. 12 Khatola Khrista, pvüti shina kümali tsükona mmen than pithaka, osi Nthomotsü lona phyo ji esüa Potsow khe amimoe khukthethaka. 13 Hoji lona ombo ri jiang topvü ombo jo epyankaphen n kümthukthüng nandang jo nhyaka vana. 14 Ntiotssole ombona ochoang ntssüngcheyia sana jiango yenjoa thamo ji taena benrithuki ombo echi to khochaki vathaka. 15 Nthomon jinaha ntsaka yi epiala, ovüngtssoa ombona phyoala, 16 "OPVÜI na phyoala, shijo tsüngon jiang sülo ana onte thüngi ntsatav ji: 'Ana a shikhfü jiang onte lümbümi erankayiv, osi onte nchümrilo theyiv.' 17 Jitosi ombona phyoala, "Ana onte mmen osi nthanri elhi jiang nchümcheyiv meka." 18 Shiang shi nlan siyithaka na elani mmen khi siyio thungthan ethev n li.
Etena Potsow Eshüpo Wotavkalo
19 Tona oshomden, etena enhungo Jisu Khrista na echüo ji yakchia thanpheni ete etancho rhowocheta. Jisu na ete tsükona chüthaka, 20 osi ombo tsük ji yakchia ombona olan ethan osi eküm evamo lan, zonchak ji yakchia tondüng evowo chonchithaka. 21 Ete Potsow wopan topvü pono pvüti tsüphoe vanthaka. 22 Jitsükona ete nlan zecheo jiang epyoe sitasi, ete tsük jiang ojü ntssüngu na tsükae sitasi, n senphina ombolo longtsükata Potsow ndüngo wotavkalo. 23 Etena eyilo ntsakathako ji rhümatasi hoji lona kholantav meka. Ntiotssole Potsow na ombo phyochak ji vathaka osi ombona hoji nkilan. 24 Etena kvütoli ete ete ndungntssungta, nzan mmhon benphitav sana ji nchümtavka. 25 Ochoang sana esüa etena ete sanrhyu jiang esani sitav mek; tolea ete ete lüm tssonkatavka, ntiotssole OPVÜI erov yuta ji enhyathaka to ntena ntsia. 26 Etena ntsa ji khicho sanati elan elani mmen tssoa tssona ete tsükona mmen khi esiyio thungthan n lilan. 27 Etena eneta kyua Potsow yitso ji osi panlan jiang thüngi ombo lüm etsuk etsyu ji nhyaka vam tae liv. 28 Jihudi ochona Moses shikhfü ji n khichoa na ombo ehungpvüi otsük eni osi ethüm tia vana tssona chüthoki sicho. 29 To tssona, zi zetava, kyon ochona Potsow tsoe ji khaki siana osi ntsata ejen ji n khichoa na, ejen kümoe na ombo nthochecho sana ji osi Potsow nzantharo mon ji yikvü-yiloa sana jijo kvüta kyungkata ezüp pivla? 30 Ochona heto phyocho sana ji etena ntsia, "Nlilam jo a vana, ana nlilam." osi ombona hetoha phyolancho, "OPVÜI na ombo kyon jiang oyi tssoyiv." 31 Eküm Potsow khelo elongthev jo ekhenthav! 32 Ntena Potsow wondang ji khichopanthüng jo kvüto tssocho sanaji nchümi zetava. Ntena ezüp mmuk yuta ekhüngu elümto hung cho khatola jina nte n khoyothechi. 33 Tsüngon motsünga lojo kyontsü yolona nte khangshi ntssonshicho, osi yuta motsünga lojo hojito oyam ezüpthuka evamo jiang yolo ezüp khia nte rhowo hungcho. 34 Evüngki ezüpta vamo jiang nzo ezüp nte khi-hungcho, osi nte ejüeli jiang nte khiyia thüng ntena ezüp erüm toa khochaki pi sihungcho, ntiotssole ntena ntiosana oman likao osi sunga evamo tüv hungthaka to longtsücho. 35 Ntena lüm ti teritava, ntiotssole nte yantso tsüphov lia. 36 Ntena Potsow lüm erüng tssoe ombo phyochak ji ehungu tsükona erüm toy ethev lia. 37 Ntiotssole Nthomotsü lona heto phyoji esüa, "Yuta tara sülo jo ocho erov licho sana jina rov; ombona sülana n van. 38 A lona ntsanrük kyon jiango longtsüv, osi eküm vamvü; khatola ochona sana kholana tssona, ombo thüngi jo ana a n matha." 39 Eteno sülani eselani moni siwo jiang mek. Tolea eteno longtsü lia osi Potsow na eshanchothaka.
Longtsü
1 Longtsü lia to ephyo jijo eyilo ji otsotso to merüka ntsiwo ji; osi n hungcheo ntio sana lia to ntsiwo ji. 2 Ete pyimtsümotsüi jiang ha onte longtsü yakchia Potsow na khichocho. 3 Limha shijo Potsow yi na liyingcho to etena ntsiwo jiha longtsü lona, hojijo etena hunga vamo shi ji n hungwo lona chiyithukcho. 4 Abel na Kain lona mmhonkata Potsow thamo jiha longtsü lona, osi ombo longtsü ji yakchia Potsow na ombo than ji khichoyicho to ejücho; osi ombo ji ntsanrük kyon to khayicho. Ombo chüthaka, khatola Abel na longtsü yakchia enhünga jana phyoa vana. 5 Longtsü yakchia Enok ji ekümina Potsüwoe hansi yicho, osi ochinaha ombo n hungu sicho; ntiotssole Potsow na ombo hansi chüngicho. Enok ji n khikathüng ombona Potsow emathathukcho to Nthomotsü lona phyoala. 6 Longtsü n thev ochinaha Potsow n mathathukche, ntiotssole Potsow thüngi eroe topvü na ombo vana to longtsüv shikhfü osi ombona ombo eyan jiang yantsoala. 7 Noah na longtsü lona mhadungi etsao n hungu yuta ji ntangnshom tsükona Potsow yi engacho. Potsow na ntio phyocho sana ji ombona tüngochünga engae ombo wopan shanchov tsükona orhung ji shancho. Hoji yakchia limha ji oyi tssoyithaka. Hojitolui longtsü yakchia ehungu ntsanrük ji Noah na hungcho. 8 Potsow na kvüthüng ombo tsacho sana Abraham na longtsü lona Potsow yi engae mhadungi ombo meta etssov vayio jilo wocho. Ombona kvüi yia sana n tsiv okina khochicho. 9 Potsow na phyochaki vayio meta jilo ombona yentsae esüa longtsü lona vancho. Potsow na Isaak ha Jakob oni thüngi ha hoji phyochak ji vayio ji tsükona oni esüa Abraham na süranki vancho. 10 Ntiotssole Abraham jo Potsow khe na soyingo yantsü, yanmüng mmhom lo tssokao ji nhyaka vancho. 11 Sarah jo ngaro n hancheo sontsüngthakcho khatola longtsü lona etho hungi hancho, osi Abraham ji opo kümcho, ntiotssole Potsow na phyochako ji ombona longtsücho. 12 Hojito chüthakcho esüa sonthako kyon tsüka jilona tsoronichen shantio tata osi jürani hajang tata n khacheo tsoronichen bukchecho. 13 Shiang hetopvü na longtsü hansi chüracho. Potsow na phyochako ji onten n hung khatola, ovüngna ekoni hungchi khichotacho. Onteno limhalo jo yentsaeden osi tsanthanden to opon tsso khichotacho. 14 Hoji esüa kyon na phyotathüng ontena onte meta yantala to ntssüng-rünga ejücho. 15 Ontena sisi yithako meta ji ontena nchümlanchia vancho sawo kholani eyio tüv yuta licho, 16 khatola onteno oki mmhonkao potsüwoe lio ji yanta vancho. Jitsükona Potsow ji onte Potsow to etsao ji Potsow na n yikracho, ntiotssole ombona yantsü methaki onte vayithaka. 17 Potsow na Abraham lümbüm füi zeyio jithüng Abraham na longtsü lona Isaak ji etham methakcho, Abraham yakchia ombo tsoronichen jiang chiyiv to phyochaki licho, khatola ombo tsoe tsüklang ji thani siv methakcho. 18 Potsow na heto ombo ezocho licho: "Isaak yakchia echümchako tsoronichen jiang chiyivka." 19 Potsow jo echü lea kümlanthokvü to ombona longtsücho, osi hoji esüa Abraham na ombo tsoe ji chüthakcho esüa tüv lona hunglancho. 20 Longtsü lona Isaak na Jakob ha Esau oni randankacho, ntiotssole mmha jijo mhadungi echi; 21 Longtsü lona Jakob na ombo n chüthüng Joseph tsoe jiang otsük akvü randankacho. Ombona jarung jilo enghokae Potsow khümcho. 22 Longtsü lona Joseph na ombo echü etüngathüng Israel jiang na Ejip lona khochuki eyiv ji hungjani ombo ryu ji kvüto lyuv sana ji ezocho. 23 Longtsü lona Moses Opvüpoe jiang na ombo buksi choro ethüm nandang mphoa nijüptacho. Ombo ji elümoto ngaro mmhom to ontena zecheo jina Ejip mesao ji yizüng tia n ngayicho. 24 Longtsü lona Moses na ombo khyochetale Pharoah otsolov tsoe to n janhungcho. 25 Ombona mmen rhükao esüngaro longshi ji thüngi najo Potsow kyon jiang nzo ezüp ekhiv ji chokacho. 26 Ntiotssole ombona Ejipi ejüeli ji thüngina jo Potsow ethüngche kyon ji tsükona yikra nungra khio ji tsüphowo to chekacho. Ombo mhyik ji mhadungi Potsow yantso lio jilo zekacho. 27 Ombona longtsü lona mesao yizüng tia n kyuv Ejip lona khochicho. Ombona n hungwo Potsow ji hungcho esüa ombo tümka ji n vachicho osi n kholancho. 28 Ombona longtsü lona yakchi tokhu ji khicho osi echü lanben jina Israel tsokhfü jiang n lüngthathokvü tsükona ejen ji kipüng durhyupvü jianglo erhikae vatale to ezocho. 29 Ontena longtsü lona Jümyon jümang ji likying esüa pankacho. Ejip kyon jiang jo pankav tssotale ojüi rhekhani chüracho. 30 Longtsü lona Israel kyon jiangna Jeriko yantsü ji yenjo tiying füchokchile pikhfü ji eyarae sicho. 31 Longtsü lona Rahab lonsülonphyoe ji n longtsüi jiang nzo n chüthokcho, ntiotssole ompvü na Israel che-opyim jiang emathata elonchocho. 32 Ana ntio phyolam lichola? Enhungo Gideon, Samson, Barak, Jepthah, David, Samuel tona zenkhying jiang to motsü rütav yuta n li. 33 Ontena longtsü lona ekhüngyan jiang khyothechicho, ntsanrük soyingcho, osi Potsow na phyochako ji hungcho. Longtsü lona ontena hingho püng jiang khanicho, 34 Omi eki ntav jiang mhethukcho, osi yonri mhadungo echü lona tsanchocho. Ontena etho n lia khatola longtsü lona etho ejüi onte kümcho. Onte ji etho ejüi ritssoe onte kümkhani oso-ori jiang phankhani sicho. 35 Eloe jiangna longtsü lona onte wopan chüo jiang kümchelancho hungcho. Thanpoe jiango khangshitsüngi chüthokcho khatola, eküm ethan phanthilan tsükona ontena ezüp jilona vachiv n tssungcho. 36 Ochoang najo yikvü yilocho, ekho esükcho, shencho osi evüngki thechicho. 37 Olong na onte ephyatsüngcho, eni rhüsoe sicho, yonri na epyantsüngcho. Ontena olyu osi nyanyan fü mpensütasi khangshi esüp khia sanphitacho. 38 Onte tsükona jo limha ji mmhoncho mekcho! Ontena tsanthan esüa lijüng meta osi phunglan yingsüngi rümphita longkvüi vanta rümphitaa vantacho. 39 Shiang hetopvü onte longtsü yakchia Potsow na onte khichocho! Khatola Potsow na phyochaki vao jijo ontena n hungcho, 40 ntiotssole Potsowna ete tsükona jo lanka mmhonkao chonchi lia. Ombo etüm jijo ete yakchia tae onte ji benrithokvü tsükona.
Ete Opo Potsow
1 Jitsükona eteno kvütola? Longtsü tsükona ehungpvüi hetata eluk emhenjü esüa eyukzhüi lioji tsükona etena ntiona olan ekhania sana jiang topvü osi esüyao mmen jiang sitasi enhungo ntio evayi licho sana hojilo zekae yungtavka. 2 Etena Jisu lo mhyikrüka zekatava, ntiotssole benkadenina ochüm jana ete longtsü ji ombolo ndungkae lia. Ombona donphen lo ezüp ji yakchicho khatola longtsü ji moni n sitokcho! Ji thüngo najo ombo mhadungi ntio longshi na ombo nhyaka vancho sana ji tsükona donphen lona yikra nungra khia echüv ji nchüma n vancho osi enhungo ombo opo Potsow vantsü ji amimoe khukthe vanthaka. 3 Jitsükona nchümi zeta osi ombona kvüto mmen kyon jiang thüngina etssaknkong khicho sanaji zeta! Tona nteha nte ryusang mmuka, osi lüm esuka nchümü meka. 4 Nteno mmen thüngi ori tssoa khatola echü jo n dukhan. 5 Nthomotsü lona Potsow na otsoeden esüa lüm nte tssonia phyoji mhecho-thakcho alo? "A tsoe, OPVÜI na ni elanchoyiathüng mmyinga khia, osi ombona ni makathüng lüm ti-yesao. 6 Ntiotssole OPVÜI na ombo nzamo jiang topvü elanchoyia püngnoala, ombona otsoe to khao jiang topvü echükala." 7 Ezüp jiang opo thüngina püngno esüa hantava. Potsow jo nteji otseoden ejoena nte tsütsatala. Opo na n püngnowo tsoe ochia n van. 8 Otsoe topvü püngnorünyo jilo nte njüa tssona nteno otsoe tsotso mekcho tssov; osi motso tssocho. 9 Etena limhalo opo jiangna epüngno jiang khithaka, osi onte yikrachi thaka. Tona omon thüngoe opo ji etena kyungkata yikrachia eküm n khitavke? 10 Limha lo ete opo jiang na mmhona zecheo ji ephan esüngaro e püngnocho; tolea Potsow na ete echi mmhon tsükona osi ombo ntsantho ji echinhyav tsükona e püngnorünyoala. 11 Püngnorünyotao shijo hojithüng jo mmhona n zechetale, osi etho jaka nchümala. Tokhatola hojina ochoang thangshia sana jiango noying osi mmhon eküm lo vanchukchiala.
Ndungntssung Osi Ntangnshon yi
12 Jitsükona nte khe jakrao ji khikatava, osi nte nkhok eneo ji chüngchüngtava; 13 nte khochilan ji nsathuka. Tona nte jo nmhomo ji esungu meka; osi emii sivka. 14 Otsük akvü thüngi mmhontav ekhyo tssotava. Ntho ekümo vantava, hoji nthev ochinaha Potsow n yanche. 15 Potsow kianzan jilona elani n yiv ntangnshonatava. 16 Mozhü n mhom ekhov dung zae jina echü mozhü chiyitoko ji esüa ochina ha ti tssotava. Tsoka motsünga khi ombo eran yensi esio Esau ji esüa osi lonsülonphyoe osi limha kyon ti kümtava. 17 Ombona sülami jo esü elonga opo thüngina mmha yanlancho khatola engoe ombo n zewo ji ntena ntsia; ntiotssole ombona ntio tssothakcho sana ji ekilam lanka ntia n licho. 18 Nteno nkolo Israel kyon jiangna ro ji esüa rocho mek. Nteno Sinai phunglano phanthi vana mek; phunglan jilona omi elümkata kio ji; emüng ji, khümzünga tsyungryu ro ji; 19 tatara won tssoa oyi nsamo ji esüa mek. Hoji zo jiangna elani n zolanwo to nchümtacho. 20 Ntiotssole ekümrüm tssolea phunglan jilo evüngkao jiango olongna ephyatsüngi chütokle to yizüng ji ontena n rümkhokcho. 21 Ekyuthav zecheo jina Moses na 'Ekyu lona a enetala' to phyocho. 22 Nteno Zion phunglan, eküm Potsow yantsü, Jerusalem ethan kvülo lanben wothüng wothüng vancho sana jilo oyi vanthaka. 23 Nteno Potsow tsoeden ovüngo ekhümkho; longshi kholuk, potsüwoe omying eranthako jiang yolo vanthaka. Nteno kyon tovü pono yitssoe Potsow ndüngo osi kyon mmhom jiang mon ntsachethako jiang ndüngo vanthaka. 24 Nteno Jisu ocho yakchia ntsata ethan ji methakcho sana, osi ocho ejen zancho Abel ejen lona mmhonkao phyochak e picho sana ji ndüngo rothaka, 25 Ombona nte janathüng n zov n vantav tsükona ntangnshontava. Limhalo Moses yakchia Potsow na nsamo jithüng n ngao jiang na samo na n tsanchocho. Tona Potsüwoe na nsanathüng n nga tssona ete tsanchophen kvülo lichola? 26 Hojithüng jo Potsow yi jina limha ji enhyokcho, khatola enhungo ombona phyochakthaka. "Ana yenjoa tae, osi elani liko ji tae mekna potsüo jiha enhyokthokvü ka." 27 Elani yenjoa tae to phyo ji yichak jo liyingcho topvü enhyokcho, moni sithuksi enhyo jiang tae valanchiv. 28 Jitsükona etena montsso pitavka, ntiotssole etena khichowo ekhüngyan jijo n hyokphicheo. Etena ombo emathao tssoa yikrachi-kyuchi theta ombo khümtavka. 29 Ntiotssole ete Potsow jo topvü rungi esio mi.
Kvütoli Potsow Emathao tssovla?
1 Khrista lona jeniden esüa nte nte nzanta vantava. 2 Nte ki lankon sothev ti mhechotava, hojito lankon sothei ejomae na n tsiv lanben sotherhak-thaka. 3 Evüngki evan jiang ji nteha nte vüngcho esüa nehümehetava; ochoang ezüp mmuka vancho sana nteha hojiang sükhying lo vancho esüa nehümehetava. 4 Yanpiyanthan ji topvüna yikrachitava osi orapvüi, enghden jiangna echümchak jiang longtsüka lia vatav shikhfü. Ochoangna lonsülonphyoa efürama benphiana Potsow na oyi tssoyiv. 5 Nte eküm ji orang jüpon khi ti sayathuka, tolea ntena ntio liana jina lüm büka vantava; ntiotssole Potsow naha phyocho, "Ana kvüthüngha nte khaksi-lonsiv meka, osi nte sinkiv meka." 6 Jitsükona etena lüm tssoni heto phyokhoka, "OPVÜI jo a kyochipvüi, ana ntia a nkyu; ochona ntio a tssoyikhokvüla?" 7 Potsow yi nte ezowo nte esopvüi ovüngo jiang ti mhechotava. Ontena kvüto ezüp ekümo vansi chücho sana ji nehümehetava, osi onte longtsü jiang hungchotava. 8 Jisu Khrista jo njyu, nchüng osi kümali kheti ji tae. 9 Püngnoyi echümpo echümpo jiang khi nte ti sosorathuka. Ete eküm jiang etho jükathokvü jo Potsow kianzan ji taena tssocheta, etsoyu thüngoe shikhfü jiangna mek; hojiang benphiwo jiang ochinaha eman n hung. 10 Jihudi khümpheni Pvüti jiang ochinaha n tsocheo tüv piphen saphang etena lia. 11 Pvüti tsüphoe jiangna ekümrüm jiang ejen jiang mmen than tssov hansi Nthotso jilo rhowocho, khatola oso jiango pikhfü tssae na rungi sicho. 12 Jitsükona Jisu na ombo ejen ji khi kyon jiang nthocheo tssoa pikhfü pomoe na chücho. 13 Jitsükona etena pikhfü pomoe chiwo ombo nzo yikra khitavkalo. 14 Ntio tssole etena shilo vanjüng etssowo tüv yantsü n li; tolea yantsü ethan n janhamo ji yantala. 15 Jitsükona etena ombo myingthüng-than ete menfü lona Jisu jo OPVÜI to phyochak khi tümjak n lina Jisu yakchia Potsow thantavkalo, hoji myingthüng jina ombo mying ji khichoyiala. 16 Nte yolo nzan benphiv osi oyam chinhyav ti mhechotava, ntiotssole shiang jo Potsow emathao than jiang. 17 Nte esopvüi jiang yi engatava osi ontena phyo ji ephan tssotava. Ontena zümo eng nte mon eküm jiang ntangnshona vanala, ntiotssole ontena Potsow mhadungo onte elhi ehungpvüi piv sala. Hoji khi onte longshia elhi tssothuka; tolea ntena nngayia tssona ontena nungra hansi elhi tssov; osi hojina jo ntia mmhom nte n tsoyiche. 18 E tsükona randanpvü vantava. Ena nchümri tüngochünga to ebobo ntsia, ntiotssole sükhying topvü lo ena elan ji tssov tsükona yanala. 19 Potsow na nte thüngi zakto a rochethokvü tsükona a randanitale to nte thüngi jonjiala.
Thakchi Randan
20-21 Potsow na ete OPVÜI Jisu ji echü lona kümlanthukcho. Osi ombona thungthan tsoa ombo eküm pio ji yakchia kümali ntsata ji lithukthaka osi olyu enhyang tsüpho ji ombo kümthukcho. Ombo lüm erüng ji nte tssothokvü tsükona potsow noying ji khi ntena ethelan elio mmhom lantaro nte pithokvüka. Osi hojitolui pvütsson ji kümali ombo echhi tssothokvüka. Amen.
Oyi Okhao jiang
22 Oshomden, ntena ntssungyi shi erüm toa engae khichotavo to jonjiala; shijo ana chiti tara nte erancho tae. 23 Ete ojenio Timothy ha evüngki na chiyithaka, to nte a ntsithuk-hungala. Ombona yuta eben lo yia tssona ana nte thüngi roathüng sonhyasi rovka. 24 Nte esopvüi topvü thüngi osi Potsow kyon topvü thüngi a salüm pitava. Ete shom Italy kyon jiang naha nte salümala. 25 Nte topvü thüngi Potsow kianzan ji lithokvüka.
1 Chiti shijo Potsow osi OPVÜI Jisu Khrista nri James thüngi na OPVÜI Potsow kyon limha topvülo nzüi vamo jiang thüngi salümala.
Longtsü Tona Ntsinran to
2 A ota-onyuden, ntelo ojang olan olan jiang yiathüng nteno odon eliden to nchümtava, 3 ntiotssole nte longtsü jiang ojang tssoji ntena toa tssona erüm eto etho ha liala. 4 Khatola nte ji benribenyuoa osi njüma nte kümthoki ntioloha n tssojan n litokvü tsükona ochüm jana rümtav lia. 5 Nte yolo ocho sana ntsinran mataroa to tssona Potsow thüngi chonthuka, tona ombo pivka; ntiotssole Potsow na topvü thüngi longphya osi nzanthata piala. 6 Khatola ombona longtsü lona ntia khatüng n lina chom shikhfü, ntiotssole khatünga nchümo kyon jijo jümangi jükyo tsungryu na jephio ji esüa jephiala. 7 Hojitüv kyon najo OPVÜI thüngina ntia eyilo n li. 8 Ombo lümbüm eshüm ehan osi ombo olan topvülo n chüngchüng.
Yantsa tona Ejüeli to
9 Potsow na khristian yantsae tsüka ji yantsa lona sükata tssona kyonmo jina hoji khi emathav shikhfü. 10 Osi eli khristian ji Potsow na ombo joyithukathüng tssolea emathav lia, ntiotssole eli jiha orae thera esüa vüjoe siv. 11 Eng jina tükata tssoa wona chiroala osi ero jiang mmikathukala, thera jiang vüthukala, osi onte pyon jiang moni sithukala. Hoji esüa ejüeli kyon jiha ombona ntssochov shishoa vanathüng mona yiv.
Ojang Osi Ejiphi
12 Kyon ochona ejiphi zalanchikhoka sana ji ematha elio, ntiotssole ombona zalanchithaka na Potsow na ombo nzamo kyon jiang tsükona eküm yantso vae elio ji ombo piv. 13 Ojang nduklea ochinaha "Potsow na ojang a tssoala" to ephov n li; Potsow jo n mhon jina ojang n tssokhok, osi ombona ha ochia ojang n tssoala. 14 Khatola kyon otsük akvü ombo n mhom jüpon jina ojang ombo tssoala, hojina ombo tssüngi hansi yiala, 15 jisüi jo ombo rüngcho jina mmen njenkae bukthukala, osi mmen jina opon tssoa rancheta na echü chiyithukala. 16 A nzamo ota-onyuden, nte ti kyakthechithuka, 17 yantso mmhom osi njüm topvü opo Potsow ochona potsüwoe wondang jiang soyingcho sana ji thüngina yiala. Ombona kvüthüng ha n dungphiala osi ete thüngina nlüpi yisi emüngi e nsiala. 18 Ombona ntsa ji oponi chiyithuka ejoyingcho, ombo lüm erüng yakchia. Ombona ete ji joyingcho sülo ovüngo ji e tssothokvü tsükona hojito tssocho. 1.
Zoji Tona Tssoji to
19 Shiang hetopvüto ntena ntsia nzamo ota-onyuden Khatola otsük akvüna zakto engae khisi nsam jo sümhemvü shikhfü; osi zakto lüm n tsuku shikhfü. 20 Ntio tssole kyon lüm etsuk najo Potsow ntsanrük ji n benchetala. 21 Jitsükona etsso-ephyo pholav osi ntha etsso-ephyo topvü nkachotava; tolea Potsow na nte lümbümi oyi nte yingithako ji eyingroa khichotava; ntiotssole hojina nte mon eküm shanchokhoka. 22 Oyi ji oponi na engatasi ochungina n benphiv nte bobo ti kyakthechitava. 23 Ochona oyi ji engasi n benphia sana jijo kyon tsüka na mhachanpheni na ombobo hungwo ji esüa tüv tae. 24 Ombona ombobo zesi yiala, osi jitopvü ombo pyon ji kvütüv sana mhechoe siala. 25 Khatola kyon ochona kyon vachicheo shikhfü benrio jilo zesi ombobo ntio zocho sana ji kvüthüngha n mhechona benphiyata vana sana kyontsük jijo ombona ntio tssoa na topvülo Potsow na mmhayiv. 26 Kyon tsüka na ombo longtsü lia to nchüma vanlea ombo nnli ji n sayata tssona ombobo ejithechiala osi ombo longtsü ji oman n lio. 27 Opo Potsow na njüma zecheo longtsü jijo, opvüpoe n van ngaro jiang, emi-nloe jiang to nzanchiwo ji; osi limha ji n mhon jiang lona tsanchoe vamo ji.
Khodarüta Tsükona ntangnshon
1 A ota-onyuden, pvütssonpvüi ete OPVÜI Jisu Khrista longtsüiden tsso jina ntena kvüthüngha kyon jiang omha zesi echümpota n tsütav shikhfü. 2 Ejyukae na kyon otsük eni, tsüka jo ejüeli tsso jina shona osi mpensü mmhom ekasi ro, tsükajo yantsae tsso jina sükerak eka tosi nte sanrhyulo rocho. 3 Tole ntena mmhona pipo ji zesi 'Nzansi vanphen mmhomo shilo khuktheta' to ezosi yantsae jijo, 'Nino shilo mangi vana, mekana tapvüi shilo khuktheta' 4 to ezona ntena nte yolo omha zeta benphiala osi nte nchümri ji silyuo to n tsichoke? 5 Engatava a nzamo ota-onyuden, limha lo yantsae tssothuko jiango longtsü lo eli tssotokvü osi ombona ombo nzamo jiang vayio ekhüngyan ji piv ethüngchecho. 6 Khatola ntena yantsae jiang joyi thukala! Ochoangna nte ntssonshia osi yitssopheni nte süsi woala? Elii jiangna! 7 Omying mmhom nte pithako ji ontena nte mmeniala. 8 Nthomotsü lo shikhfü mmhom, "Nina ni phinakiren ji nibobo nzana esüa nzana" to phyo ji benphia tssona ntena elamo ji tssoala; 9 khatola ntena omha zeta benphia tssona ntena mmen tssoala, osi shikhfü yesoeden to shikhfü jina nlan nte piala. 10 Ntiotssole kyon tsükana shikhfü ji totona benphileajilo motsünga tiayesaoa na ombona totona yesothaka. 11 Ntiotssole ochona "Efürama ti tssoa" to phyocho sana jina "omüng ti hana" toha phyocho. Nina efürama n tssov mpato vankhokha, khatola nina omüng hana tssona nina shikhfü totona yesothaka. 12 Jitsükona shikhfü kümoe na kyon vachia sana jina oyi tssoyiwo kyonden esüa khensanyisanta elhi tssotava. 13 Khonzan n benphiwo kyon ji thüngi jo yitssoe jina khonzan benphiv mek, khatola ochona ombolo khonzan lia na jina yitssoe ji ekyuv n li.
Longtsü Tona Elhi To
14 Ota-onyuden, ochona sana longtsü lia to phyosi ombo elhi jina hoji n phana tssona ntio ethev lichola? Hoji longtsü jina ombo shancho-khokcho alo? 15 Ojenio mekana oyulov tsüka na mpensü n liv, tsoka motsünga tia hungi n tsov vanathüng nte ochona sana, 16 "Potsow khi ni mmhayitokvü ka! Otsük lüma tsoyua vankhe" to ezosi ethelan eli elhi ntia n tssoyiwo hoji ethev ntio lichola? 17 Longtsü jo ji esüa tüv. Hoji ejüphen ntia n liana oyi tae tssov; osi jijo echü. 18 Ochona sana phyokhoka, "Tsüka jijo longtsü lia, osi tsüka jijo elhi tssoala." Kvütoli elhi nthev longtsü ejükhokchola? Ana elhi lona a longtsü nte ejüvka. 19 Potsow tsüka tae vana to ntena longtsüa alo? Mmhona! Tsüngrham jinaha hojito longtsüala osi eneta kyuala. 20 O behae kyon! Elhi ntheo longtsü jo echü to otsotso ni ntsihunga alo? 21 Ete pyimtsümotsüi Abraham ji kvütoli ntsanrük kyon tssothukchola? Hojijo ombo longtsü ji elhi lona ejüo jina - ombo tsoe Isaak ji othan epiv thanpheni ekachicho. 22 Ntena hoji n hungchoke? Ombo longtsü tona elhi to nzo tssocho; ombo longtsü ji elhilona benrithokcho. 23 Hojito Nthomotsü lona heto phyoji benthukcho, "Abraham na Potsow longtsücho osi ombona longtsüoji tsükona Potsow na ntsanrük kyon to ombo khichocho." Jitsükona Potsow na oshom to ombo tsacho. 24 Zeta, kyon tsüka ji longtsü lona tae mekna elhi lonaha khichoala. 25 Lonsülonphyoe Rahab ji zeta, kvütoli ompvü khichochola? Ompvü ha ompvü elhina longtsü ejücho. Ompvü na Israel cheopyim jiang emathata sothecho osi lanpoena yithuki sicho. 26 Ethük n jüana otsük ji chüala, ji esüa elhi njüana longtsü ji echü tssoala.
Nnli Ji Tsütsa
1 Ota-onyuden, nte khosha na püngnoe ti tssotava, ntiotssole eyio püngnoe tsso jina oyam lona khüngkata oyi etssoyiv to ntena ntsiv lia. 2 Ete topvü na nsannsam elümoto woriala, khatola kyon ochona ombo khen oyilo wori n jüa sana jijo otsotso njüma, osi ombona ombo eküm totona sayakhoka. 3 Etena kurü büngi yonjak theyia oyi engayithukala, osi etena tümo jiwoe wothukala, 4 Jahaz shiang ha hetata tsüpholea osi tsungryu na jeta yilea ehapvüi jina kümoe yithuk-hunga na jiwoe otsung teriv taena sochiala. 5 Nnli jiha hoji esüa tüv. Shijo otsüko solan teriv khatola ombona tsüphoa kangtsükhoka. Ralungtsü lea mitsünga bukthecho taena rungtsüi sioji nchümi zeta! 6 Osi nnli jiha omi esüa tüv; ntha-nri kholung motsünga. Otsüko solan thanpo jiang nzo vani totona kata yithukala. Ombo mi jijo mhemi na kichecho mi; osi ete eküm ji totona omi kümthukala. 7 Kyon na nthahamo osi nthacheo ekümrüm, worowoni, Jalyu-nrü, mekana epvüphio osi ongo n van. 8 Khatola kyon ochinaha nnli shi nthachehan; shijo solan n mhom echü mozhüna pyingcho. 9 Etena hoji tsütsata ete pvüi osi Potsow thüngala, elani hoji tsütsata kyon ochoang Potsow kisü theta joyingcho sana ji rhiyirandankatala. 10 Obüngtsük jilona rhiyita tona thanthüng to chiyiala. A ota-onyuden, hojito n tssov shikhfü. 11 Jünhyo motsünga na ojü ekhov tona enüngu to buktsüalo? 12 Ota-onyuden, züwodungo na Olive n thiche, osi jününgrozhü lona züwothi n thiche. Jito n tssoala. Oma wozhü naha ojü ntssüngu n bukala.
Potsüwoe na Ntsinran
13 Nte kholoko ntsinran osi engathe eli ocho sana vancho alo? To tssona ombona emiroa osi eküm mmhona vani elhi mmhom etsso jiang yakchia ntsinran osi engathe lia toji ejüv lia. 14 Khatola nte lümbümi omhyik raki, haruk, osi tajo elüm jüna ejüngona ntsinran lia to phyoa ntsa ji yesoe mmen ti tssoa. 15 Hojitüv ntsinran jo Potsüwoe na jorocho ntsinran mek; khatola limha lo echi, omon n jüwo osi tsüngrham elhi. 16 Ntiotssole kvülo mhyiktssota osi epi-era liana jilo khosorüsota osi n mhom lantaro liala, 17 Khatola Potsüwoe na pio ntsinran jijo, ovüng tssoa ntssüngnrüng; jisülo noying, emiro, osi mmhonta, zizamori, hoji jo khonzan taena pyingcho osi mmhom tae ethiala; hojilo omha eze n jü, tolea tüngochüng jüa. 18 Noying lona yingo mojü jina eyingpvüi ocho noying eyan sana ji echi ntsanrük ethiala.
Limha Ji Thüngi Khyingta
1 Ntelo khontarota jo kvülona chiyiala? Nte lümbümi oso erüng, jüwo jina nte lüm bükthokvü eyan lona khontarota chiyiala. 2 Ntena ntiosana nte jüpona osi hoji nkhicheo jina omüng hanala. Ntena n hungkhoko tüv ntiosana nte jüpomo jilona khontarotala. 3 Ntena nte jüpomo ji n hungala, jijo ntena Potsow thüngi n chomo ji tsükona, osi ntena chonlea silyuo nchümri lona chomo jina n hungala. Ntena nte tajo elüm jilo tsütsav tae chonala. 4 Nteno longtsüka n lio kyonden. Ntena limha ji jüpona tssona nteno Potsow ri den to n tsichoke? Kyon ochona limhaji nzana chokata sana ombobo Potsow ri kümala. 5 Nthomotsü na heto phyoji ejüng tsayitake? "Potsow na etelo vanthokvü liyingo mon ji n mhom na pyingi lia." 6 Khatola ombona epithako kianzan jijo jilona tsüphokata. Ntiotssole Nthomotsü lona phyoala, "Potsow na kangtsüi jiang tanglanchiala tolea eyingroe jiang jo khonzan piala. 7 Jitsükona Potsow lo eküm khochaki pitava, osi tsüngrham ji zalanchia, tona ombona ni thüngi na tsam. 8 Potsow lo sena roa tona ombona ha nilo enhyankata rovka. Mmen kyonden, nte khe jiang ntsüktava, lümbüm eshüm ehanden, nte lümbüm jiang ntssüngchetava. 9 Enhünga jo nungra ekya yuta, ni ematha ji ekya kümthoka osi nte longshi ji omha nzhü kümthoktava. 10 OPVÜI mhadungo emiroe küma tona ombona ni sükav ka.
Khristian Thanpoe Oyi Ti tssoyia
11 Ota-onyuden, nte nte epüp echi ti-rütava, kyon ochona ombo shom epüp rüa sana mekana oyi tssoyia sana hojina shikhfü ji echi rüyiala osi shikhfü ji oyi tssoyiala. Ntena shikhfü ji oyi tssoyia tssona nteno shikhfü ji benphiden mek, tolea hoji oyi tssoyiala. 12 Shikhfü ji epipvüi osi oyi etssoe tsüka tae vana, hoji jo Potsow osi ombona shanchov, monthokvü to etho lia. Nteno ochoangla nte phinakiren oyi tssoyitala?
Kanchan Tsükona
13 Engatava, nte ochoang sana jo heto yijaktala; "Nchüng mekana, ojyua jo etena oyan jilo wotasi hojilo nzyua vantavka, osi etena shishoe orang khakchotavka." 14 Tole zeta, ojyua jo kvütüv sükhying tssov sana osi nte eküm ji kvüto tssov sana ji ntena n tsi. Nteno miphung esüngaro phungchukchisi moni esio ji esüa to tae. 15 Ntena heto tae phyov etüma, "OPVÜI lüm erüng lina etena eküm vamka osi hoto hoto tssotavka." 16 Khatola nte zena nteno ntebobo longtsükayaka vantala osi kanchantala, Hojitüv kanchan jiang topvü n mhon. 17 Hoji tsükona kyon ochona elhi mmhom etssov ntsiaha n tssoana ombona mmen tssoala.
Ejüeli Jiang tsükona
1 Ejüeliden, a yi shiang engae khitava. Nte mhadungi ekya nungra tsao jiang tsükona kyata vantava. 2 Nte ejüeli jiang kyonthaka, osi nte mpensü jiang ora na tsorothaka, 3 osi nte shona janti jiang sasi na tsozhüthaka. Hoji sasi jina nte ehugpvüi tssovka osi nte so jiang omina runga to tsoroe sivka. Limha shi ochüm tssov vanathüng ntena ejüeli hankachi lia. 4 Khatola nte li elhi etssoe jiang ntena jokheman n pihan. Ontena eronta vamo ji engatava! Ni liri jiang won jina Thotsü OPVÜI Potsow janthaka, 5 Limha shilo nte eküm jo elha-elang tona ematha longshi eyan to lona vanthaka. Ntena tatsüngi esiv mangsüden phiato nte philangkhanthaka; jitsükona sonon tsüngon ji janthaka. 6 Ntena ntsanrük kyon jiang nlan pia chüthokala, osi ontena nte ntanglachi-chetala.
Erüm Eto Osi Randan
7 Jitsükona OPVÜI n rothüng nandang jo erüm totava, ota-onyuden. Zeta lijon jina ombo liko jilona tssüngthi chiyiv ji kvüta erüm toa nhyaka sana. Ombona nzyu eryu tona vami eryu toji erüm toa nhyakala. 8 Nteha erüm toa lüm tssona eyiloa vam lia, ntiotssole OPVÜI erov ji enhyanthaka, 9 Ota-onyuden, nte nte nlan ti pitava, tona potsow naha nlan nte piv meka. Yitssoe ji helo kibüngi vanthaka. 10 Ntena nrinphen osi ezüp ejyukaphen jo zenkhying ochoang na OPVÜI myingona püngnocho sana jiang nchümi zetava. 11 Etena ematha lia to zecheo kyon jiango ochoangna ochüm jana rümcho sana jiang. Ntena Job erüm eto motsü ji zothaka, osi wokhae jo OPVÜI na olan topvü ombo pilamo ji ntena ntsia. Ntiotssole OPVÜI jo khonzan na pyingcho. 12 Okhao tssoa ota-onyuden, ntena ti echümtava, Ntena Potsüo liko osi ntia eyikata ti janlana. Ntena otsotso tssona, Ho, to ezoa osi ejüng tssona Mek to tae phyoa. Osi hojang ji otsotso tssov shikhfü. To tsona ntena Potsow yitsso jilo rheyiv meka. 13 Nte yolo ochona sana emhuk elüm licho alo? Ombona randam lia. Ocho sana longshia vancho alo? Ombona myingthüng khen dem lia. 14 Ocho sana nochonoria vancho alo? Ombona ekhümkholo eramoe tsae randanthuka OPVÜI myingo na thyujü ombo nzüyithuka. 15 Tona ochoangna randani cho sana jiangna longtsü lina jina nochonori ji emiv osi OPVÜI na belüngi na ombo sükav; osi ombona mmen tssoe licho tssona nlan ombo siyiv. 16 Nte nte yolo mmen phyochakta nte nte randanitava, nte emithokvü tsükona kyon mmhon ji randan jilo etho elümoto lia. 17 Elijah ha ete esüa kyonshae. Ombona eryu n jothokvü tüngochünga randancho, tole nzyu ethümsi choro tiruk jo limha lo eryu n jocho. 18 Elani ombona randanlancho; tole potsüo chonchi eryu joe liko jina ethi-ebencho. 19 A ota-onyuden, nte yolo ocho sana ntsa jilona wochyui yina osi ochona sana ombo ji sosi yilana tssona heto ntsi khia: 20 Ochona mmen kyon tsüka ji ombo eküm n mhom jilona solansi yicho sana jina ombo eküm ji echü lona shanchov osi mmen elümoto nlan siyio tssocheyiv.
1 Chiti shijo Khrista na wothung Peter thüngi na Potsow ethüngche kyonden ezonsorae tsanthan kümi Pontus, Galatia, Kapadacia, Asia tona Bithynia to lo vamo jiang thüngi eranala. 2 Nteno opo Potsow na tümkao ji ephan nte ethüngchecho osi Jisu Khrista yi engaeden kümthokvü osi ombo ejen na epyochev tsükona Nthomon jina nte epyochecho. Kianzan osi noying ji ntelo etsson lithokvü ka.
Eküm Evamo Eyilo
3 Ete OPVÜI Jisu Khrista opo ji mying thüngitavka! Jisu Khrista ji echü lona kümchelantoki, ombo khonzan tsüphov lona ombona eküm ethan epicho osi n chüo eyilo evayicho; kümali elio etsson mmha jilo rheyiv eyilo ji. 4 Hoji ombona yesoe n siwo osi mmyikae n siwo potsüwoe nte vayiala. 5 Ntena longtsüo ji tsükona Potsow etho na nte nkochetala, osi tsüngon wokhao jilo ombo etüm ezi jiang oponi chithuk yuta jilo ombona nte shanchovka. 6 Hoji tsükona longshitava, ntena yuta esüngaro tsükona ezüp lantaro khilea, hojiang tsükona lanka lia. 7 Hojiang yakchia, nte longtsü jo njüma to ejüala. Shona jiango rongchophen mi lona rongcholea monia siala. Tolea nte longtsü ji shona lona tsentsüka khatola ojang tssoe zev lia, hojito tssona erüm eto liv. To sanati OPVÜI Jisu Khrista oponi chiyitokvü tsüngon jilo jo ntena myingthüng, pvütsson osi yikrachi hungu. 8 Ntena ombo n hunghan khatola ombo nzanala, osi ntena ombo n hunglea enhungo ombo longtsüala. 9 Osi oyina n phyocheo longshi na nte pyingthaka, ntiotssole ntena nte mon eküm shanchov ji hungala. Hojijo ntena ombo lo longtsüo ji tsükona. 10 Potsow na yantso nte epiv elio shanchov ji tsükona püngnoe zenkhying jiang na shanchov yidung ji rüka yancho osi ngatüngngaricho. 11 Ontelo Khrista mon kümoe na Khrista ezüp etsü osi pvütsson n janhamo jiang tsükona ontena ocho tssov to engatacho. 12 Ontena ntio tümka tsükona elhi tssota vancho sana jijo onte eman tsükona mek, khatola nte tsükona to nte engathetokcho. Hoji tümka ji ochoang na Potsüwoe Nthomon yakchia Yithenmhom ji hansi rocho sana jiang na nte yolo thenchothaka. Shiang jo lanben jiang na mpato zehunga vamo elhi jiang.
Ntho Eküm Evam Tsacho
13 Jitsükona nte nchümri ji elhilo thechiv methak-tava, osi therük-tsoyoa nte eyilo ji totona Khrista na n rothüng kianzan nte piv jilo vantava. 14 Potsow jancho ezoe kümtava osi kvüthüng ha nte etsso-ephyo ji nte eküm eheni ntsiv evamo choka erüng jiang na ti sayathuka. 15 Nte esapvüi jijo nthoa, jitsükona nteha ekümlan topvülo nthoa vantav lia. 16 Nthomotsü na heto phyo ji ti-mhechotava, "Aiyo ntho, jitsükona nteha nthoa vantava." 17 Ntena randanathüng ombo ji omha eze n lina kyon topvü ombobo elhi ephan oyi tssoyipvü potsow to tsa tssona, limha lo nte eküm tsüngon topvü ombo yikrachia eküm vantav lia. 18 Ntiotssole ntena ntsia, nte motsüi jiang na eküm lanka silyo nte vayio ji lona nte vachio jijo yesoe esio tsütsailan janti osi shona mek. 19 Nteno Khrista thungthan olyuoro, ephyoerüv osi mmen n lio ji ejen jina nte vachicho. 20 Ombo limha shi n soyingthüng vüngina hoji tümka lona ethüngchecho, osi nchüng yuta wokhao shiang lojo nte tsükona ombo ji oponi chiyithukcho. 21 Ntiotssole ntena ombo yakchia Potsow ocho na echü lona ombo kümchelanthuki myingthüng tsüphov ombo picho sana hoji longtsüala. ombo yakchia ntena Potsow lo longtsü osi eyilo licho. 22 Enhungo ntena ntsa ji khichoe ntebobo ntssüngchethaka osi nte nte otsotso nzantala; nte yolo nzanta ji otsotso lümbümi na nzantao tssothuka. 23 Nteno Potsow yi linrhüo ji yakchia buklanthaka osi nchüo potsow tsoeden to ejanthaka, 24 Nthomotsü na heto phyoji esüa: Kyon tsoe topvü to orae ero esüa tae; osi onte pvütsson topvü thera vüa esüa to tae. Ero jang mmikatala osi thera jiang vüala. 25 Tokhatola potsow yi jijo kümali liala; Oyi jijo nte thüngi thenchothako yithenmhom ji.
Eküm Evamo Longpvü Osi Ntho Jipo
1 Jitükona ntena mmen topvü lona nkachoe vantava; ejüng ephyo, kyakrüm, mhyiktssota osi n kha-n longtsü won oyi tsütstalam n li. 2 Ngaro vanbancho esüa yuta topvü lo omon thüngoe shirojü yantava, ntena hoji yusi nte rankae nte shanchowo tssoa. 3 Nthomotsü na phyo ji esüa, "OPVÜI jo kvüta nzan licho sana ntena nte bobo yanchethaka." 4 OPVÜI eküm evamo longpvü kümoe kyon na ethev n licho esüa sile Potsow tssentsü tssothuka ethüngchecho sana ji thüngi rotava. 5 Eküm evamo lungden esüa rotava osi omon thüngoe ekhümki ji etssov lo nte thethuka, ntena hojilo ntho pvütiden tssoe Potsow na khicho hungwo osi omon thüngoe than khi Jisu Khrista yakchia Potsow thantava. 6 Ntiotssole Nthomotsü na phyoala, "Ana tssentsülong ethüngcheo ji zion lo nkeni longpvü tssothuka vatala; osi kyon ochona ombo longtsüa sana kvüthüngha ombo lümbüm esukvü mek." 7 Nte longtsüi tsükona jo olong shi jo elümoto tssentsü tsotso; khatola n longtsüi jiang tsükona jo; "Olong kümoe kitssoe jiangna e thev n li; to sicho sana hoji topvü lo ethev elitso ji kümi sicho." 8 Elani Nthomotsü thanpo lona ha heto phyoala; "Olong shijo kyon jiang nshüphiphen, onte ekhüngthukphen long ji." Ontena oyi jilo n lontsüo jina onte nshüphiala; onte tsükona Potsow lüm erüng ji hoto. 9 Khatola nteno ethüngcheo jipo, mesao ji pvütiden; ntho jipo, osi Potsow kyonden, Potsow elhi emhokthav jiang thenchotokvü nte ethüngchecho. Ombona emüngi na nte tsachoki ombo emhoktav wondang jilo nte chiyithukthaka. 10 Tsüngona lojo nteno potsow kyonden mek, khatola nteno enhungo Potsow kyonden; tsüngon motsünga lojo nteno potsow khonzan ji n tsiv vancho, khatola enhungo ntena ombo nzan ji hungthaka.
Potsow Nriden
11 Nzamo a shomden, eteno limha shilo yentsae osi tsanthan ejoena ana nte ntssungala! Yuta topvülo eküm ji ori tssoa evamo oso erüng ji elümo ti tssotava. 12 N longtsüi jiang thüngi nte etssopehyo mmhom ejütava, tona n mhom etssoeden to ontena nte tsalea ombo erov tsüngono jo ontena nte elhi mmhom ji chekae potsow mying thüngu. 13 OPVÜI tsükona ntena limhalo esapvüi otsük akvü yi engayitava; Etho tsüphotsowo mesao jiha, 14 elani ombona ethüngheo yansapvüi ochoang na n mhom etssoe jiang ezüp pisi mmhom etssoe jiang omying thüngia sana jiang ha oyi engayitava. 15 Ntiotssole potsow na'nte tathi mmhom jiang khi zhüvae jiang nshanlungta ethev n lio ji esanthokhungala. 16 Etancho evanden tssotava, khatola nte etancho elan ji khi nte n mhon jiang eyuki ti sitava, tolea Potsow nriden esüa vantava. 17 Otsük akvü yikrachia, nte nzo evan longtsüi jiang nzantava; Potsow kyutava osi mesao ji yikrachitava.
Khrista Ezüpo Jilo Ejyuka
18 Phajaeden, nte pono OPVÜI ji woewolan lia mhoncho tssolea, mekana haruk-hashüa n mhoncho tssolea ntena yikrachia onte küpo vantava. 19 Kyon ochona Potsow nchümcheta ejungo na ezüp ombo pio jiang rüma sana Potsow na hoji tsükona onte mmhayiv. 20 Ntiotssole nina mancho tüv tsongkhfü rümo jijo ntia yantso n li; khatola elhi mmhom tssocho man ezüp hungcho tssona hojijo Potsow na emathatala osi nte mmhayiv. 21 Hoji esüa etssov nte tsacho, ntiotssole Khrista naha nte tsükona ezüp si nte vachicho. nteha hoji esüa nte tssothokvü tsükona. 22 Nthomotsü na phyoala; "Ombona ntia mmen n tssocho osi ejüng ntia n phyocho." 23 Ombo mako jiang ombona n maklan, ombona ezüp hana ha oyam n khenthuk, khatola ntsa lona oyi etssoe Potsow jilo longtsükae sicho. 24 Etena mmen jilo jo chüi sisi ntsanrük lona eküm vamvü tsükona Khrista na ombo tsükna donpheni na ete mmen jang hancho; ombo khfü jiangna nte emiyicho. 25 Nteno olyuden esüa tsanroe sicho, khatola enhungo ntena olyu enhyang osi nte mon eküm enhyakpvüi ji yana yilanthaka.
Tsoeniden osi Tsoerapvüiden
1 Hoji esüa tsoeniden, nteha nte orapvü jiang küpo vantava. Osi orapvü jiang yolo Potsow n khichohan jüa tssona, nte eküm vanlan yilan yakchia khophitokvü shikhfü. 2 Ntena ntsanthoa, yikrachi lia vamo ji onte hungthuka, tona ntena oyi motsünga tia ephyov n li; 3 nte pyon mmhomo ji oponi pipo osi otssan eze olan olan nsüngrüi hamo ji, osi oyuk-osen, elani mpensü thüngoe na ti zetava. 4 Jithüngo najo nte pyon-ori mmhom ji tathi ochungina chiyio kümali noying emiro ji zetava. Hoji pyon jijo ntinaha n yesoche, osi Potsow mhadungo jo hoji jo tsentssü. 5 Nkolo ntsanthoe Potsow ekyui eloe jiang naha onte eyilo ji Potsow lo vasi onte pyon mmhon ji onte tsoerapvüi jiang yikrachia, onte küpo vamo ji tssocho. 6 Sarah naha hoji esüa orapvü Abraham yikrachia, "A pvüi, to tsacho. Nteha nte emiro jiang n yesothuk na elhi mmhom tssona nteha Sarah tsoloden. 7 Hojito orapvü jiangnaha poni ekümo engatheta lia vantava osi nte tsoeni jiango etho mataroe to chekata yikrachiv lia; ntiotssole Potsow na kiaman eküm nte pio ji onteha jüa, to tsona nte randan jianglo khatüng liv mek.
Elamo Elhi Tsükona Ezüp Khiv
8 Okhao tssoa nte topvü na oshomden ejoe na lümbüm esütae, ezüp ntsita nte nte nzanta vantava. 9 N mhom thung n mhom ti pilana, mekana ni rhiyio jiang ti rhiyilantava, jithüngo na jo nzan mmha khi pilantava, ntiotssole Potsow na nte tsao jithüng mmha nte epiv tsükona phyochakcho. 10 Nthomotsü lona heto phyo ji esüa; "Kyon tsükana eküm ji nzana osi ematha longshia mmhona vanhungna, ombona n mhon n phyov na lia, osi ejüng ephyo ji esam shikhfü. 11 Ombona n mhom jilona kholani mmhom tssov shikhfü; Ombona lümbüm totona noying ji n tümjak na yamvü shikhfü. 12 Ntiotssole, OPVÜI na yuta topvülo ntsanrük jiang thüngoe theta vanala, osi onte randan engayia vanala, khatola ombona n mhom etssoe jiang thüngi na kholani yiala." 13 Ntena mmhom etssov ji nte chokata yana tssona, ochona nte tssatssovla? 14 Mmhom etssov tsükona jo ezüp khia saya jilo jo ematha. lia; kyon jiang ti kyutava, onte khi nte ti wongkhyuthuka. 15 Tolea Khrista jo OPVÜI to nte lümbümi na yikrachitava. Nte ngatüngngaria-thüng ntena nzontsü na eyilo hungthako ji nkohoa nsam yuta akvülo methaka vantava. 16 Khatola enyip osi yikarachi lona hoto tssotava. Ochoang na nte tachia osi yikvüa nsana sana jiangna nte khristian eküm mmhomo ji zesi yikrao tssoa yuta topvü lo nte nchümrilo chüngtüng tssoa vantava. 17 N mhom tssothungo najo potsow na lüm erüng lina mmhom tsso ji man ezüp khio ji mmhomo. 18 Ntiotssole Khrista na nte mmen jiang tsükona yenjoa tae na chücho. Ombo oso lona jo chüthakcho khatola omon lona kümthuklancho. 19 Omon thüngoe na evüngki evamo omon jiang ombona owo püngnocho. 20 Hojiang mon jiango nkolo Noah tsüngono orung ji shanchoathüng Potsow yi n ngav Potsow na erüm toa nhayako jiang mon jiang. Orhung jilo kyon tara (otsük tiza) tae ojüi na shanchocho. 21 Shilo ojü ji ejyuka jo baptio ji thungji. Baptio jijo otsüko mmen epyoe sia mek, tolea lümbüm chüngtüngi Potsow lo echümchako ji. Hojina enhünga nte shanchoala, Jisu Khrista kümchelamo ji yakchia. 22 Lanbenden, etho eliden, osi esaeden topvü ombo kupi. Ombona potsüwoe chüngicho osi enhüngajo Potsow khe amimoe vana.
Tongphithakcho Eküm
1 Khrista na otsük na ezüp khithako jina ntena ha hoji ezüp ji khiv methak vansi vam lia; ntiotssole kyona otsüko ezüp khithaka na mmen elhi jo thakala. 2 Enhünga na benkae nte eküm enhyoe elio jijo oso rüngcho ji n yan na Potsow lüm erüg jina nte sayao ekümo evam lia. 3 Nkolo jo n longtsüi elhi jiang ntena tssona tssota rothaka. Nte eküm jiango Potsow n tsi elhi tsota, osi silyuo elhi, tsoyuva-zhüvata, etssakthav tsükrüng elhi tssota, kisü khümta to vanta rocho. 4 Tolea ntena ehungo onte nzo tssoe hojiang elhi jiang n tssotao jina emhuka nte echi rütala. 5 Khatola Potsow ochona echüi osi eküm topvü oyi tssoyiv methaka vancho sana ji thüngi ontena janlan ji piv. 6 Hoji tsükona, thanpoe echüi jiangha limhalo evanthüng oyi onte tssoyicho. Enhungo onteno omon lona Potsow na eküm vamo ji esüa evamo tssoa yithenmhom ji onte püngnocho.
Potsow Yantso Ji Yithenpvüi Mmhomden
7 Olan topvü ochüm tssov yuta ji enyathaka. Ntena randankhoko tssoa ntebobo sayakhoka chetünga vantava. 8 Jiang topvü poni ntena lümbüm totona nzantav shi khfü, ntiotssole nzan jina n khacheo mmen jiang eyukzhüi shichetala. 9 Phyochorücho ti lithukna nte nte oki eloncho-sotheta vantava. 10 Potsow na nte otsük akvü thüngi linhyang mmhom esüa yantso nte pirae lia. Hoji tsükona potsow yantso jiang ji nzontsü mmhom tsükona tsütsatav lia. 11 Ochona sana püngno hungna Potsow yi lona püngnov lia. Ochona sana benka elhi tssohungna Potsow na epia vamo etho jilo ombo enhyikathuka. Olan topvü lo Jisu Khrista yakchia Potsow pvütssonthuka. Pvütsson osi etho ji kümali ombo echi, Amen.
Khristian Tsüka Ji Ezüp
12 Nzamo oshomden, omina runga esüa ojang tssoe nte zewo ji ntelo ntiona ntssophen tssocho esüa ti emhuktava. 13 Tolea ombona elani roathüng ematha longshi na lüm pyingu ji esüa, ntena na Khrista ezüp ji hankyoa tssona ntena emathav shikhfü, 14 Ntena Khrista phankae etsso ji tsükona nte yikvüa tssona nteno mmha lia to ntsitava; ntiotssole pvütsson mon, Potsow mon jina ntelo vancho tssoala; 15 Nte ochinaha münghan, efü osi nlantsü etssoe osi silyuo tssocho man ezüp ti khitava. 16 Khatola ochona sana Khristian tssocho man ezüp khia tssona jijo yikra n li; jithüngo na jo khristian to ombo ejanthuko ji taena potsow thungthuka. 17 Yitsso yuta ji janthaka, osi Potsow kyon jiang yolona benkae oyi tssoyiv; osi ete lona hoji benkata tssona Potsow yithenmhom ji ngao jiang tsükona jo kvüto tssovla? 18 Nthomotsü lona phyo ji esüa; "Kyon mmhom jiang shanchov khünga tssona, n longtsüi mmen kyon jiango kvüto tssov la?" 19 Jitsükona ochoang na Potsow lüm erüng ephan ezüp khia sana jiangna elhi mmhom etssov ji n tümjakvü shildifü osi onte liyingpvi' longtsüka elio ji khelo vamvü shikhfü.
Potsow Olyuden
1 Anaha eramoe etsso jina nte yolo ekhümkholo eramoe jiang thüngi heto nte ntssungala. Khrista na ezüp ekhio ji ana hunga osi pvütsson a hungthokvü elio jilo a ejan eyilov lia; osi heto nte ntssungala: 2 Potsow na nte epio olyu jiang enhyang emathata tssotava; ni khüngkacho etsso mekna Potsow na nte tssothuk hungwo ji esüa tssotava. 3 Ni zeyathoko jiang pono ni ekhüng etssov mek, tolea onte pono ejyu esü mmhom ejüa, 4 Olyu enhyang tsüphotso ji roana kvüthüngha n yesowo ekhyo kikho ji ni piv. 5 Hoji esüa nte nungokao jiang naha nte pomoe eramoe jiang yi engayiv shikhfü. Nte nte benka elhi tsotathüng nte otsük akvüna teritso ji kümi khümchishanchitava; Nthomotsüna phyoala, "Potsow na kangtsüi jiang khalanchiala, khatola eyingroe jiang yilo theyiala." 6 Jitsükona Thotsü Potsow küpo nibobo teri küma, tona ombona yuta eben lo ni sükav. 7 Ni wongkhyu topvü ombolo vanthuka, ntiotssole ombona ni wongkhyuyiala. 8 Tsoyoa nhyakyata vantava! Nte ri tsüngrham jina ocho sana rümhunga hingo esüa erhyua sanphiala. 9 Nte longtsülo chüngchüngi ombo zalanchia, ntiotssole limha topvü lo longtsüi jiangna hojito ezüp lo vana rocho. 10 Tolea yuta tara ezüp cho sülo kianzan elio Potsow ochona Khrista yakchia ocho ombona kümali pvütsson jilo nte tsacho sana jina nte rhanchoe kimüng chüngchünguv tüv lo nte soyingkav. 11 Etho ji kümali ombo echhi tssothuka; Amen.
Thakchi Salüm
12 Ana longtsüka-khoko ojenio Silas nzanchi khi chiti teriv shi nte eranthaka; shijo nte lüm tssonkayiv tsükona; osi shiang hetopvü Potsow kianzan tsotso ji to ehungpvüi tssov tsükona. Hojilo zajüngtava. 13 Nte esüa Potsow na ethüngcheo Babylon lo lio jinaha nte salümala. A tsoe Mark naha nte salümala. 14 Khristian nzanta khi nte nte eyulo ntsüpita salümtava. Khrista echi nte topvü pono noying lithokvüka.
1 Jisu Khrista nri osi wothung Simon Peter thüngi na kyon kvütata ete Potsow osi shanchopvüi Jisu Khrista ntsanrük lona e esüa tssentsü longtsü hungthakcho sana jiang thüngi: 2 Ntena Potsow osi ete OPVÜI Jisu Khrista ntsiwo ji yakchia kianzan osi noying ji nte yolo benria lithukvü ka.
Potsow Etsa osi Ethüngche
3 Potsow ochona etena ombo ntsioji yakchia ombo kija pvütsson osi ombo mmhom toji echinhyav etsacho sana hoji chekao ji yakchia eküm mmhom lo evam tsükona OPVÜI na ombo etho epia etsacho. 4 Hojito ombona ntssontsov osi tssentsü yantso phyochak tsüphov onte vayia Potsow tathi ji onte chinhyathoki oso rüngcho lona limha shi yesothoko jilona nte tsanchothokvü tsükona hojito tssocho. 5 Hoji tsükona ntena nte longtsü jilo mmhomlantaro khi ekhyimphatava, osi nte mmhon jilo ntsinran na ekhyimphatava. 6 Ntsinran jilo ete bobo sayakhok ji ekata, bobo sayakhok jilo erüm esi ekatava osi erüm esi jilo ntsantho ekatava. 7 Nte ntsantho jilo khyingtarata ekatava osi khyingtarata jilo nzanta to ekatava. 8 Etsso-ephyolan shiang ji ntelo rankata yithuk na jiangna etho nte rankayia tssüngthi ethithoki ete OPVÜI Jisu Khrista mmhona nte chethethokvü. 9 Shiang n benrio kyon jijo kenzüp kyon tssoala, osi kona n hungchiala. Hojina ovüngthüng ombo mmen lio jiang ombo siyithaka toji ombo na mhechothaka. 10 Jitsükona oshomden, nte tsae nte ethüngchecho to ejüv tsükona kyongkata ekhyo tssotalana. Ntena hojito vana tssona ntena kvüthüngha nte longtsü ji n sinki. 11 Hojitolyui ntena ete OPVÜI Jisu osi shanchopvüi Jisu Khrista ekhüngyan jilo rheyiv elan ji nte piv. 12 Ntsa zothako jilo ntena mmhona oying süngthaka, osi shiang topvü ntsithaka khatola ana shiang topvü nte nehümehethokvü ekhyo tssola. 13 Ana eküm evanthüng jo shiang ji n tümjak na nte nehümehethuka vamvü ji elanthata to ana zecheta; 14 ntiotssole ana limha shilo oso eküm ji ochüm tsso etünga to ntsia, ete OPVÜI Jisu Khrista na hoji a ezothaka. 15 Ho ji tsükona a echü süilea ntena shiang shi ji mmhona nchümcheta osi merüka nte vanthokvü tsükona ana a eto-nandang ekhyo tssovka.
Khrista Pvütsson Ji Omhyik na Ehungpvüi
16 Ete OPVÜI Jisu Khrista pvütsson lona erov ji tsükona ana kvüthüng nte ezocho sana ena motsü shaa tüv khi nte ezocho mek. E mhyikna ombo pvütsson jiang topvü hungcho. 17 Kvüthüng pvütsson lona, "Shijo a nzantharo tsoe, ana ombolo a lüm ejo lio ji" to owon tssocho sana opo potsow na ombo yikrachia osi pvütssonio jithüng ena jilo vancho. 18 Enaha hoji ntho phunglan jilo vancho osi Potsüwoe na owon hojito tssoa e eno na zocho. 19 Hoji tsükona ena zenkhying jiang yithen jiang kyongkata longtsülanala. Nteha hoji yi ji ega tssona nte mmhom. Zenkhying yi jijo nte lümbümi enya wondang ji n wonchithüng emüngi milon licho esüa osi enya shantio jina nte lümbümi wondanga vancho esüa tüv. 20 Khatola ovüngtssoa ntena ntsiv lia; ochinaha ombobo jo Nthomotsü ji n gathekhok; 21 ntiotssole nti zenkhying yiha kyon na nsancho tae na n phyo. Tolea Nthomon jina onte ntssungo ji ephan kyon jiangna Potsow yithen phyocho.
Ejüng Püngnoeden
1 Tolea nte yolo ejüng püngnoeden rov sa vamo ji esüa hoji tsüngono ha ejüng zenkhyingden vanracho, osi Potsow kyon jiang yolo rov osi ontena roe esio püngnoyi ji hansi rov. 2 Kyon elümoto na onte eküm n mhomo ji phankav osi ontena ntio tssoa sana ji yakchia thanpoe jiang naha ntsa lan ji ejüng kümthokvü. 3 Onte tajo elüm lona ontena ejüng motsü nte püngnosi nte thüngi na ekhak khiv. Onte yitsso ji nkolona onte tssoyithaka. hoji na onte nhyakala. Onte monthokpvüi ji phanthi vana. 4 Potsow na mmen etssoe lanben jiang tia n zümlanchina n mhemi thechi emüngi shenkhani yitsso ji nhyathuka vana. 5 Elani ombona limha ovüngo jina kyon jiangna mmen tssoale n zümlanchiv ojüna monthukcho. Khatola ombo ntsanrük yithen ji püngnOPVÜI Noah jo thanpoe otsük tiying nzo shanchocho. 6 Potsow na Sodom tona Gomorah to yantsü jiang mikyu kümi sithukcho osi hoji jo n longtsüi jiang kvüto tssov sana ji ejyuka. 7 Khatola ombona Lot shanchocho, ntiotssole ombo kyon mmhon osi n thoe kyon jiang etsophyo ji zesi ombo nungra evan tssocho. 8 Kyon mmhom shina onte nzo eng akvü vani ontena ntio tssoa vancho sana ombona topvü zecho osi onte etssophyo n mhon ji zesi ombo ntsantho mon jina nungracho. 9 Jitsükona OPVÜI na kvütoli kyon mmhon jiang ji yitsso tsüngon jilo shancho si kvütoli kyon n mhon jang jo yitsso tsüngon jilo ezüp piv sana ji ntsia; 10 opvü tssoa ochoangna limhalo onte oso erüng ji ephan vansi Potsow etho topvü n khichov sia sana jiang. Ejüng püngnoe shiango lümbüm tssona kangtsüa osi omhawoe vamo pvütsson eküm jiang n yikrachiala. Jithüngona jo ontena hoji yikvü-yiloala. 11 Ejüng püngnoe jiang lona elümoto etho jükae lanben jiang na tia onte ji OPVÜI mhadungo na n yikvüala. 12 Khatola kyon shiang jo orae ekümrümo onte tathi lanso jilo vamo osi moni esio liyingo jiang esüa tüv. Ontena n tsicho topvü n mhom tsayiala, jitsükona onteno orae ekümrümo esüa moni sithokvü. 13 Ontena ezüpthoko ji man onte ezüpthokvü. Ontena engo tsükrüg n mhom etssov ji chokatala. Ontena okholo oro nte tsorhyuo jijo yikra lia. Ontena nte tssikong jiang tsoathüng mpato nte ejithechiv chokatala! 14 Onte mhyik jiango eloe n thao jianglo tae zekatala, osi lüm ebük n-liv mmen tae tssoala. Onte lümbüm jiangha tajo elüm lo oya tssocho. Ontena n khyo-ntoe jiang tsirhi doni vayiala. Onteno Potsow randanka ji rhakvü. 15 Ontena olan nsako ji sisi Beor tsoe Balaam ochona ntha elhi man orang jüponcho sana ji phankata yicho. 16 Ombo ji shikhfü yesocho tsükona nlan picho. Osi ombo Gadho motsünga na kyon yi nsani zenkhying ji zhüva elhi ji esanicho. 17 Kyon shiang jo jünhyo nghachethakcho esüa, osi mpungna vena eyio eluk jiang esüa. Potsow na onte tsükona emüng ejungtso jilo vanphen methakithaka. IS Ontena n tha osi kangtsü yi nsana kyon ochoang na n mhon yolo na nkachohunga vancho sana jiang ejithechiala. 19 Onte bobo tia tssorophyoro ji nri tssota vanpvü na ontena etancho eküm evam oyam ezotala ntiotssole kyon tsüka ji ntio na rhümata sana hoji nri kümala. 20 Kyon na ete OPVÜI osi shanchopvüi Jisu Khrista ntsiwo jilona tsancho si elani hoji etho jiang na onte rhümalana tssona kyontsük jiango ovüngthüng thüngi najo sülami n mhontso kümala. 21 Kyon na ntsanrük lanji ntsi sanati osi hojilona ntho yizüng onte pio jilona kholani yio ji thungona jo kvüthünga ha hoji nzo n tsowo ji mmhomo. 22 Onte sükhying ji zena püngno yi lona phyo ji otsotso: "Füro jina ombona lao ji yana wolanala" Ji esüa "woko ji tsükayi na chonchen yana ephfülo wolanala."
OPVÃœI Erov Phyochako ji
1 A nzamo oshomden, shijo a chiti enioto ji, chiti woniata lo ana nte khi nsaka nchümrithokvü tsükona, 2 osi Wothung jiangna ntio OPVÜI osi shanchopvüi ji yizüng osi zenkhying jiang yi nte ezothakcho sana jiang elani nte nchümchethokala. 3 Ovüngtssoa, ntena ntsiv lia, tsüngon wokhao jilo jo tajo elüm kyon, onte lüm erüng ephan evan jiang na oro nte emakav. 4 Osi ontena phyov, "Ombo na rolam to phyo ji kvütoli sithakchola? Ombo kvülo vanchola? Ete motsüi jiango chukhanthaka khatola limha shi liyingpvü ombo tathi ji tae vanpvü!" 5 Potsow oyak shi benkadeni na lipvü toji ontena etanana n longtsüv ekhiranala. Osi Potsow na oyi phyoe ojüi na khichei ojü na limha shi liyingcho. Nkolo Potsow na yizüng pia limha osi potsüo shi liyingcho to ontena ntsiaha etanana hoji n longtsücho esüa phyotacho, 6 Osi limha ehen jiha ojüna osi jükhyo na monthukcho toji n longtsüala. 7 Osi enhünga lio oyak osi limha shi jo Potsow yizüngtsük ji khi omi na monthokvü tsükona vatala. Shijo Potsow n tsi kyon jiang oyi tssoyia monthokvü yuta jithüngti tssov vatala. 8 Oshomden, ntena shi ti mhechotava! OPVÜI lojo tsüngona tona nzyu wothüng motsünga ji to oni ntia echümpota n li. 9 Kyon na nchümo ji esüa OPVÜI na ombo phyochak jiang benthukvü sülana mek. Ombo nte thüngi erüm etoe osi tsüka tia moni n sithuk-hung. Ombona otsük akvü mmeni na khophitok hungala. 10 Khatola OPVÜI tsüngon ji efüi sanphia esüa rov. Ombo roana potsüo shiang owon tssoa moni siv osi shantio shiang etsso na phyoni siv. To tssona limha shi osi shilo lio shiang topvü moni siv. 11 Limhatsü shi hojitoli phyonthokvü tssona nino kyon kvütüv etssov etüma? 12 Nina Potsow tsüngon ji erov eyiloa vanathüng ntho osi Potsow ekyu ekümo vam lia. Tsüngon jina oyak shiang omi khi phyonthukvü osi shantio jiang etsso na phyonthukvü. 13 Khatola Potsow na ntsanrük elio limha, osi oyak ethan epiv phyochaki lia. Etena hoji nhyaktala. 14 Jitsükona nzamo okhümoden, ntena hoji tsüngon ji nhyakta vanathüng, nte ji ntsa nrüka osi ephyorüv n lithokvü ekhyo tssotava osi ombo thüngi mmhontae vantava. 15 Ete OPVÜI na erüm eto lio jijo nte shanchwothukvü yuta piala to ntsi khitava. Yitsük shi nzamo ojenio Paul na ha Potsow ntsinran khi nte eranthaka. 16 Ombona shiang phyoa chiti nte eramo jiang topvü lo shiang jüa. Hojiang lo yilan kvüwoe sana jo zakto engathev khünga osi hojiang ji kyon nngathei osi chüngtünga n vamo jiangna motsü thanpo püngnosorao ji esüa siluo püngnoe onte bobo yesoala. 17 Khatola oshomden, nteno ovüngna nte ntangnshothaka. Jitsükona ntena ochoang sana shikhfü n phan kyon jiang khelo rhei nte oying süngjüngi vamo ji roe n sithokvü tsükona ntangshotava. 18 Osi ombo kianzan jilo rankatava osi ete OPVÜI osi shanchopvüi Jisu Khrista ntsiv jilo rankatava. Enhünga osi kümali ombo pvütsson tssothuka! Amen.
Eküm yi ji
1 Eküm yi kümoe benkadeni na lipvü sana ji tsükona ena nte eranala. Hoji ena zothaka osi e mhyikna hungthaka; ho, ena zothaka osi e khena evüngakathaka. 2 Kvüthüng hoji eküm ji ehungo kümcho sana ena hungcho. 3 Hoji tsükona ena hoji nte ezoala, osi kümali eküm opo thüngi elio ji e ntsithukthako ji ena nte ezoala. Ntena e thüngu khümshümta lithokvü tsükona ena ntio hungthakcho sana osi zothakcho sana jiang nte ezoala. Ena khümshümta lio shijo opo osi ombo tsoe Jisu Khrista thüngi 4 osi ena shiang nte eramo shijo e longshi ji benrithokvü tsükona.
Potsow jo Wondang
5 Ena ombo thüngina zoe nte ezowo yithen ji shi; Potsow jo wondang osi ombolo emüng n linrüng. 6Etena ombolo khümshümtala to phyosi emüngi vana tssona eteno oyi n tsae; osi ntsa ji n benphiala. 7 Ombona wondangi vamo shi esüa wondangi sanphina ete ete yolo khümshümta lia, osi ombo tsoe Jisu ejen jina mmen topvü lona e ntssüngchetala. 8 Etena mmen n li to phyoa tssoan ete bobo ejithechiala, osi etelo ntsa ji n li. 9 Khatola etena ete mmen jiang Potsow lo phyochakna ombona ete mmen jiang esiyiv osi n tsantho jiang topvü lona e ntssüngchev, ntiotssole ombo longtsüka eli osi ntsanrüka. 10 Etena mmen n tssohan to phyoa tssona etena potsow ji n tsae kümthukala osi ombo yi ji etelo n li.
Ete Kyochipvüi Khrista
1 A ngaroden, mmen nte n tssothukvü tsükona ana shi nte eranala. Tolea ochona sana mmen tssona etena ntsanrük kyon tsüka ete thung tssoa opo thüngi ejonjiyipvüi vana. Hoji jo ntsae Jisu Khrista. 2 Ombo ete mmen khi siyiphen lanka ji, ete men tae mek limhatsü mmen. 3 Etena ombo yizüng jiang vata tssona etena ombo ntsia to mmhona phyokhoka. 4 Ochona sana, ana ombo ntsia to phyosi ombo yizüng ji n vata tssona ombo ejüng ephyoe osi ntsa ji ombolo n li; 5 Potsow nzamo jijo kyon ochona Potsow yi ji benphia sana jina otsotso nzanala. Etena Potsow lo vanala to ntsiv jijo hojiang lona ntsiala. 6 Kyon ochona Potsow lo vanala to phyoa sana jina Jisu Khrista na tsso ji esüa vam shikhfü.
Yizüng Ethan Ji
7 Nzamo sohomden, ana yizüng ethan nte erana mek, khatola yihen nte eranala, shijo benkadeni na ntena ntsithakcho yi. Yizüng ehen jijo ntena zothako yithen ji. 8Tolea enhünga ana nte erana vamo shi jo, yizüng ethan, ntiotssole hoji ntsa jijo Jisu Khrista lona ha osi nte lona ha to hungthaka. Ntiotssole emüng jo yaka yia vanthaka osi wondang tsotso ji ona vanthaka. 9 Ochona ombo wondangi vanala to phyosi ojenio tssaka sana jijo emüngi vanpvü. 10 Ochona ombo ojenio nzana sana ombo wondangi vanala; osi oyam worhyutokvü ombolo njü. n Ochona ombo ojenio tssaka sana ombo emüngi vanala, ombona emüngi sanphia khatola ombo kvüi yia sana n tsi, ntiotssole emüng jina omhyik ji ombo eyukicho. 12 Ngaroden, nte men jiang Khrista myingona nte siyithako jina ana nte eranala. 13 Opoden, benkadenina ocho vancho sana ji etena ntsithako jina ana nte eranala. Khyingroeden, ntena n mhom ji khyothako jina ana nte eranala. 14 A ngaroden, ntena opo ntsiwo jina ana nte eranala. Opoden, benkadeni na ocho vancho sana ji ntena ntsiwo ji tsükona ana nte eranala. Khyingroeden, nteno etho jüa, osi Potsow yi ji ntelo lio jina osi ntena n mhom ji khyothako jina ana nte eranala. 15 Limha shi osi limhalo lio jiang ti jüpontava; Ochona limha ji nzana sana opo nzan ji ombolo n jü; 16 ntiotssole limhalo ntio liana, hoji jüpon, tajo elüm, ejüeli lo kanchan to shiango opo thüngina mek, khatola limha jilona chiyiala. 17 Limha ji tona limha jina kyon wondon bükiv yamo ji tojo mona yiala, khatola ochona Potsow lüm erüng tssoa sana jina kümali eküm vam.
Khrista Ri ji
18 A ngaroden, ochüm ji enhyanthaka! Khrista ri ji rov to nte ezoe lia, enhungo Khrista ri elümoto chiyithaka, jitsükona ochüm ji enhyanthaka to etena ntsiala. 19 Kyon shiang jo otsotso ete khümtsüng lo mek, jitsükona ontena e sisi yicho; onte ji ete khümtsüng kyon sawo ete nzo vam. Tolea onte ochia ete echi mek to chekathokvü ontena ete lona khotae yicho. 20 Khatola nteno Khrista na ntho mon ji ntelo phyangkayithaka, jitsükona nte topvü na ntsa ji ntsia. 21 Ntena ntsa ji n tsiv vanchona nte erana mek, tolea ntena ntsa ji ntsiwo jina osi ntsa jilona kvüthüngha ejüng n chiyiala to ntsiwo ji tsükona. 22 Jisu jo Khrista ji, to n longtsüo ji yaka ejüng ephyoe ocho vanchola? Ochona opo osi otsoe ji n longtsüa sana jijo Khrista panlan ji. 23 Ntiotssole ochona opo n longtsüana otsoe jiha n khichoala; ochona otsoe ji khichoa sana opo jiha khichoala. Nte tsükona jo ntena benkadeni na ntio zocho sana ji lona ti-senphithuka. 24 Ntena benkadeni zothako yithen ji n vachina nte lümbümi vanthuka. To tssona ntena yuta topvü lo opo tona otsoe ji to khüngtsütalo vanala. 25 Shijo Khrista na kümali eküm tsükona ete thüngi phyochaki evayio ji. 26 Nte sosoroa tüv evamo ji tsükona ana shiang nte eranala. 27 Tokhatola nte tsükonajo Khrista na ombo mon ji ntelo vanthukthaka, osi ombo mon jina ntelo evanthüng jo, nte püngnoe ochia ethev n li. Ntiotssole ombo mon jina olan topvü nte püngnoala, osi ombo püngno jijo otsotso, jilo ejüng n jü. To tssona omon ji püngnoyi ji engatava, osi Khristalo shentapvü vantava. 28 Hoka, a ngaroden, Khrista lo vantava, tona ombona roathüng ete lüm etsson liv; osi ombo ero tsüngono ombo thüngi e yikra toka phani e n si. 29 Khrista jo ntsanrüka to ntena ntsia, jitsükona ochoang kvütata na ntio jo elan sana ji tssoa sana jiango Potsow ngaroden.
Potsow Tsoeden
1 Opona kvüta e nzacho sana ji zetava! Ombo nzan emhoktav ji yakchia ete ji Potsow tsoeden to etsacho; osi eteno otsotso ombo ngaroden ka. Limha shina e n chetheo jijo ontena Potsow n chetheo ji tsükona. 2 Nzamo oshomden, eteno Potsow tsoeden ekümthukthaka khatola ete ji kvütüv ekümthokvü sana jijo ntssünga ntsihan. Khatola kvüthüng Khrista na roa sana eteha ombo esüa ekümvü to etena ntsia; ntiotssole ombo ji kvütüv sana ji etena shenti na ombo hungu. 3 Ochoang kvütata na shianag eyilo ji liana jiang topvüna ntsanthoa vanala, Khrista na ntho ji esüa. 4 Kyon ochona mmen benphia sana Potsow shikhfü yesocho nlan ombolo liala, ntiotssole mmen tsso jijo shikhfü yeso ji. 5 Ntena ntsia, Khrista ji ehungthoko jijo mmen ji monthokvü tsükona, osi ombolo mmen n li. 6 Ombolo evan ochinaha mmen n tssoala, ochona mmen tssoa sana jina jo ombo n hunghan cho tssoala, osi ombo n tsihan. 7 A ngaroden, ochinaha nte ti ejithechithuka! Ochona ntsanrük elhi tssoa sana Khrsita ntsa ji ombolo ha jücho tssoala. 8 Tsüngrham jina benkadeni na mmen tssopvü, jitsükona ochona mmen tssoa vana sana jijo tsüngrham ji echi. Shi tsükona mmen elhi jiang monthokvü to Potsow tsoe ji oponi chiyithukcho. 9 Ocho jo Potsow tsoe sana jina jo mmen tssonrhüa n vanala, ntiotssole Potsow sen ji ombolo jüa; osi Potsow jo ombo opo tsso jina mmen eküm lo n vanala. 10 Potsow tsoeden tona tsüngrham tsoeden to echümpota ji shi: Ochona elan ji n tssoa sana osi ombo ojenio n zana sana jijo Potsow tsoe mek.
Nte nte Nzanta vantava
11 Ntena benkadeni na yithen shi zopvü: Etena ete ete nzanta vamvü shikhfü. 12 Eteha Kain esüa tsüngrham thüngoe tssoe ojenio Abel ji lüngthao ji esüa n tssotala. Ntio tsükona Kain na hojito elhichola? Ntiotssole ombo elhi jiango mmen elhi etsso jina osi ojenio elhi jiang elan to etsso jina. 13 Jitsükona oshomden, limha jina nte tssaklea ti emhoktava. 14 Etena ete ojenio jiang nzamo ji yichak jo eteno echü ji yakchia eküm lamoe chiyithaka. Jitsükona ochona ombo shom jiang n zana sana jijo echü jlo vanpvü tssoala. 15 Ochona ojenio ji tssaka sana jijo münghan, osi münghan jilojo kümali eküm n jü to ntena ntsia. 16 Nzan ji yichak ji etena hetoli engathetala: Khrista na ete tsükona eküm picho. Jitsükona eteha ete ojenio jang tsükona eküm epiv etüma. 17 Kyon tsüka na limhalo ejüeli lisi ojenio ji ezüp ji hunga ha ombo lümbüm ji chonchi ojenio nzamvüu ji n tsia tssona kvütoli ombona Potsow nzanala to phyokhokchola? 18 A ngaroden, etena nzan ji oyi tae n tssothokvü shikhfü, tolea nzan tsotso jo elhilona ejütacheo nzan tssov shikhfü.
Potsow Mhadungo Lüm Etsson
19 Hoji yakchia etena ntsa lo vanala to ejüala; osi hoji yakchia Potsow mhadungo ete lüm etssov liv. 20 Ntiotssole ete lümbüm na nlan epia tssona ete pomoe ntsikhamo Potsow ji vana to etena ntsia. 21 Nzamo oshomden, ete lümbüm na nlan e n pia tssona ete lüm etsson hansi Potsow mhadungo chiwokhoka. 22 Etena ntio ombo thüngi na chona sana ji etena khichaola, ntiotssole etena ombo yizüng jiang engala osi ombo emathao tssoala. 23 Ombona ezoa vamo jijo etena ombo tsoe Jisu Khrista ji longtsüv ji osi ombona ezowo ji esüa ete ete nzantav ji. 24 Kyon ochona Potsow yizüng benphia na ombona Potsow lo vanala; osi Potsow na ombolo vanala. Osi Potsow na epio mon ji yakchia ombona etelo vanala to etena ntsiala.
Potsow Mon ji Tona Ejüng Mon to
1 Nzamo oshomden, omon topvü ti-longtsütava, tolea onteno Potsow mon memekana chyui zetava. Ntiotssole limha shilo ejüng zenkhying elümoto chiyithaka. 2Onte yithen jiang ji Potsow thüngina memekana to ojang tssoe ezev jo, onte yithen jina Potsow tsoe Jisü Khrista na otsük oso lona kyon kümcho to jilo me-myanta cho sana ji chyui zeta. Jilo mmyanta tssona yithen ji Potsow thüngina tssov. 3 Hojilo mmyanta n püngnoa tssona onte yithen ji Potsow thüngina mek, tolea Khrista ri ocho erov etüngcho sana hoji thüngina tssov. Osi Khrista panlan ji limha shilo chancheta chiyia vanthaka. 4 Khatola a toseden, nteno Potsow echi osi ejüng püngnoe jiang ntena khyothaka. Ntiotssole ntelo omon evamo jijo limha kyon jianglo evamo mon jiang thüngina elümoto etho likata. 5 Ejüng püngnoe jiangna limha motsü püngnoala, osi limha kyon jiangna onte engayiala, ntiotssole onteno limha ji echi. 6 Tolea eteno Potsow echi, Ochoang Potsow kyon sana jiangna ena püngno ji engala; osi Potsow kyon meko jiangna jo e ngayiala. Hojito ena ntsa mon ji tona wori mon ji to echümpota ji nte ejüala.
Potsow Jo Nzan
7 Nzamo oshomden etena nzanta vantavka, ntiotssole nzan jo Potsow thüngina yiala. Ochona nzan benphia sana jijo Potsow tsoe osi ombona Potsow ntsia. 8 Nzan n lio kyon jina Potsow n tsi, ntiotssole Potsow jo nzan. 9 Potsow na ombo tsoe ji yakchia eküm epiv tsükona ombo tsoe tsüklang ji limha lo rothoko ji yakchia Potsow na kvüta e nzana sana ji e jüala. 10 Nzan jo heto: Etena Potsow zancho lona mek, khatola Potsow na enzandencho osi ombona ombo tsoe ji rothuka ete mmen jiang esiyio lanka chonchicho. 11 Nzamo oshomden, Potsow na hojito enzancho tssona, etena nzanta vam shikhfü. 12 Kyon ochinaha Potsow n hunghan, tolea etena ete nzanta vana tssona Potsow na evanrhyuala osi ete lona ombo nzan ji benrithukala. 13 Potsow na ombo mon ji epithako ji tsükona entungo eteno ombo vanrhyulo vanala osi ombona evanrhyuala to etena chekathaka. 14 Osi opona ombo tsoe ji limhalo shanchopvüi tssothokvü rothukcho to ena chekathaka osi hoji ena oyam ezoala. 15 Ochona sana Jisu Khrista jo Potsow tsoe to thenchoa tssona ombona Potsow vanrhuala osi Potsow na ombo vanrhyuala. 16 Osi Potsow na ete tsükona nzan lio ji ete bobo ha ntsia osi longtsüala. Potsow jo nzan, osi ochona nzan lo vana sana jina Potsow lo vanala; osi Potsow na ombolo vanala. 17 Etena yitsso tsüngono lüm etsson lithokvü tsükona nzan ji etelo benrithaka osi osi etena hoji nzan ji liv, ntiotssole limha shilo vanathüng na eteno Khrista eküm ji esüa. 18 Nzan lo ekyuv n jü; nzan tsotso jina ekyu topvü phani siala. Jitsükona ochona ekyu nsüpo vana sana ji thüngi jo nzan ji njüma n lihan, ntiotssole ekyu jijo ezüp epiv jilo shenkacho. 19 Potsow na e nzandemo jina etena Potsow nzanala. 20 Ochona sana, ana Potsow nzanala to phyosi ombo ojenioden jiang tssaka tssona ombo ejüng ephyoe. Ntiotssole ombona ehungo ombo ojenio jiang tia n zana tssona ombona n hungwo Potsow jijo n zanche. 21 Khrista thüngina eyio yizüng jo heto: Ochona Potsow nzana sana jina ombo ojenio jiangha nzam shikhfü.
Limha ji Ekhyov Ji
1 Jisu jo shanchopvüi to ochona longtsüa sana ombo Potsow tsoe; osi ochona opo ji nzana sana jina otsoe jiha nzanala. 2 Etena Potsow ngaroden jiang nzanala to chekav jijo; etena Potsow nzana ombo yizüng jiang benphiwo ji. 3 Ntiotssole etena Potsow nzamo jijo, ombo yizüng jiang benphiwo ji. Ombo yizüng jiango ete tsükona elümoto ekhüngu mek; 4 ntiotssole Potsow tsoe otsük akvüna limha ji ekhyowo etho lia. Osi etena longtsü yakchia limha jilo ekhyo hungala. 5 Ochona limha ji khyokhoka? Jisu jo Potsow tsoe ji to longtsüo ji taena khyov.
Jisu Khrista Ehungpvüi
6 Jisu Khrista jo ojü lona baptiv tona ejen yakchia eküm epiv to tsükona rocho. Ombona ojü lona baptiv tae rocho mek, tolea ojü tona ejen to thenhyae rocho. Osi hoji omon jina otsotso to ehungpvüi tssoyiala, ntiotssole omon jijo ntsaa. 7 Jilo ehungpvüi ethüm jüa: 8 Omon ji, ojü ji, osi ejen ji to. Osi onthümata na kheti ehungpvüi piala. 9 Etena kyon ehungpvüi jiang longtsüala osi Potsow ehung pvüi jo jilona tsüphokata, osi ombo tsoe ji tsükona ombona ho, to ehungpvüi tssothaka. 10 Jitsükona ochona. Potsow tsoe ji longtsüa sana ombo lümümbi ehungpvüi shi jüa; khatola ochona Potsow n longtsüa sana jina Potsow ji ejüng ephyoe tssothukthaka, ntiotssole Potsow na ombo tsoe ji tsükona ntio phyocho sana ji ombona n longtsücho. 11 Ehungpvüi ji heto: Potsow na kümali eküm epithaka, osi eküm shi chiyithokphen jijo ombo tsoe ji. 12 Ocholo otsoe ji lithaka sana ombolo eküm ji lithaka; osi ocholo otsoe ji n lhancho sana jijo ombolo eküm ji nli.
Kümali Eküm
13 Ana shi nte eramo shijo ntena kümali eküm lia to nte ntsithokvü tsükona Potsow tsoe ji longtsüi nte topvü thüng. 14 Etena Potsow mhadungo lüm etsson lithaka, ntiotssole etena ombo lüm erüng ephan ntio chona sana ombona engayiala to etena ntsia. 15 Etena ombo thüngi jonjia na ombona engayiala; osi hoji otsotso to etena ntsia, ji esüa etena ombo thüngi ntio chona sana ji ombona epiala to ha etena ntsia. 16 Ochona sana ojenio na echü n mamo tüv mmen tssoa hungna ombona Potsow thüngi randania, tona Potsow na eküm ombo piv. Hojijo echü n rhükao mmen tssoathüng tsükona. Khatola echü rhükao mmen ha lia, jitsükona jo randam jo ana nte n zoala. 17 Silyuo elhi topvü mmen, tokhatola echü n mamo mmen ha lia. 18 Potsow tsoe ochinaha mmen tssonrhüa n vanala to etena ntsia; ntiotssole Potsow tsoe jina ombo nkochetala, osi tsüngrham jina ombo n yesokhok. 19 Limhatsü ji tsüngrham khelo mpa vanlea eteno Potsow khelo vana to etena ntsia; 20 Potsow tsoe jina oro engatheo etho epithaka to etena ntsia. Etena Potsow tsotso ji osi otsoe Jisu Khrista khelo vanala, shijo Potsow tsotso ji osi kümali eküm ji shi. 21 A ngaroden, ejüng Potsow jiang lona ntebobo nkachoa vantava.
1 Chiti shijo eramoe thüngi na ana otsotso nzana evamo eloe Potsow na ethüngcheo ji tona ompvü ngaroden jiang to thüngi eranala. A tae na mek, tolea ntsa ji chekathang topvü na ompvü nzanala; 2 shijo ntsa ji etelo lithaka osi kümali to ete lo vam. 3 Opo Potsow osi Potsow tsoe Jisu Khrista khi kianzan, khonzan osi noying ji epithuka, hojiang topvü nzan osi ntsa lona ete echi tssothokvü ka.
Ntsa Osi Nzan
4 Ete opo na yizüng epio ji esüa ni ngaro ejoma ana ntsa jilo vamo jina kvüta alongshithukato. 5 Hoji tsükona nzamo eloe, etena nzanta vantav kalo to ni ezoala. Yizüng nte erana evamo shijo yithen ethan mek, tolea yizüng kümoe etena benkadenina zothakcho sana ji. 6 Jitsükona ana nzan to phyoa evamo ji yichak jo, etena ombo yizüng ji enga vam ji, osi yizüng ntena benkadeni na zothako jijo: etena nzanta vam shikhfü toji. 7 Ntiotssole oyam ejiphia ejüng püngnoe elümoto limha shilo chiyithaka; ontena Jisu Khrista na otsük kümi limhae rocho to n longtsüala. Hoji jo ejithechipvüi ji osi Khrista ri ji. 8 Jitsükona ena ntio sanga elhithakcho sana ji moni nsina yantso ntio nte vayi licho sana ji benria ehungo tssoa zachünga tssotava. 9 Kyon ochona Khrista püngno yi jianglo n vam woyaka sana ombolo Potsow n van. Tolea ochona püngno yi jilo vana sana jina opoha otsoe jiha to woniata ombo echi tssoala. 10 Ochona heto nte püngnov nte thüngi n roa sana nte ki ti sothetava; osi salüm ombo ti pia. 11 Ochona ombo salüma sana ombo elhi n mhom ji chinhyae khiala.
Thakchi yi
12 Ana tüngto nte ezopam lia khatola topvü to ji khyimvüjü osi kako to theta nte erana n van, jithüngo najo ana otsük na oro nduktae thyutavka; hojito tssona ete ematha ji benriv. 13 Ni nzamo niyenio ngaro jiang na onte salüm ni hanthukala.
1 Chiti shijo erame thüngina ana otsotso nzana evamo Gaius thüngi eranala. 2 Nzamo oshom, niji olan tarolo mmhona ni vanthokvü osi omon lo chüngchüngo ji esüa otsük ha mmhona ni vanthokvü ana ni randaniala. 3 Otanyu ejoma na a thüngi rosi nina ntsa jilo jüngthei vanpvü etsso ji a zothoko jina elümoto a mathata. Otsotso nino ntsa jilo vanka. 4 A nungori jiang na ntsa jilo vanala to yivon a zothoko jilo na a longshikao ntia nli.
Gaius ji Thanthüngcho
5 Nzamo oshom, nina khristian thanpoe jiang amoatsi mpa tssolea topvü thüngi ntsanrüka longtsüka lia tssoala. 6 Ni nzan ji ontena ekhümkho mhadungo phyothaka. Nzansi nina benkao Potsow ji emathao etssophyo mmhom yakchia onte ji olani nznchia yithuka; 7 onteha Khrista tsükona ezüpa yentsatala osi ontena n longtsüi jiang thüngina ntia n khiala. 8 Jitsükona ete Khristian na kyon hetüv nzanchv na lia, to tssona etena limha jilo ntsa ji tsükona tssoa vamo jilo shümnhyachev. 9 Ana ekhümkho jiang thüngi chiti teriv erancho khatola, onte yolo OPVÜI tssohungo Diotrephens na a püngno yi ji n khichocho. 10 Jitsükona ana roana ombona ntio e tsükona ejüngjüng phyoa vancho sana nte ntsithokvü ka. Hojina ombo lüm n pükvü elani khristian thanpoe jiang n sothetala. Osi thanpoe na sothehunglea ombona pyanga ekhümkho lona phani siala. 11 Nzamo oshom, ejyu-esü n mhom jo ti hungchona mmhom tae hungchoe khia. Ochona mmhom tssoa sana jijo Potsow echika, tolea ochona n mhom tssoa sana jijo potsow n hunghancho tssoala. 12 Demitrius jo kyon topvü na mmhona to phyoyiala; ntsa jinaha ombo tsükona ehungpvüi mmhom tssoyiala, osi ena ehungpvüi pio jijo ntsa to ntena ntsia.
Oyi Okhao ji
13 Ana ni eramu elümoto lia khatola eranphen ntsütsatala. 14 Ana n sungu ni nduki omha omha thyutav to eyilo lia. 15 Nilo noying lithukvü ka. Ni shom topvü na ni salümala. Ete shom jiang topvü omying tsakae e salüm ezole.
1 Jisu Khrista nri osi James ojenio Jude thüngi na opo Potsow na tsae ombo osi Jisu Khrista nkoha lo vanthuko jang thüngi eranala. 2 Khonzan, noying osi nzan ji nte yolo tssochyua lithokvü ka.
Ejüng Püngnoeden
3 Nzamo oshomden, ete topvü na elio shanchov yilan ji ana nte eram zia vanathüng heto ha nte erani lüm nte tssonkayiv nchümchecho. Jijo Potsow na ntio ombo kyon jiang thüngi longtsü yenjoa taena kümali echi pithakcho sana ji nkhoa vantale to. 4 Ntiotssole Potsow n tsi kyon ejoma mphoa ete yolo vanra, kyon shiang na onte n tha nri elhi jiang epyochov osi ete OPVÜI Jisu Khrista n khichov tsükona ete Potsow kianzan yithen ji yesothoku püngnoala. Onteno nkolona nlan onte epiv ji motsü lona zenkhyingchi lia. 5 Ntena ntsia khatola ana shi nte ezolana la; OPVÜI na ombo kyon jiang Ejip metae na sochecho khatola sülani jo ombo n longtsüo jiango monthuki sicho. 6 Lanben ochoang na onte ekyan etho jilo n vam onte vanphen sisi yicho sana jiang zeta; onteno kümali yonjakzhü na sheni emüng lichungi vasi Potsow yitsso tsüngon jilo nlan pia khochaki onte siv ji nhyakthuka vana. 7 Sodom tona Gomorah to yantsü osi enhyano oyan thanpo jiang nchümi zetava; yantsü shilo kyon jiangna lanben jiang esüa lonsülonphyo osi siyluo elhi tsotacho. Jitsükona kümali n mheomina onte ezüpthukala, hojijo kyon topvü ntangnshontokvü ejyuka picho. 8 Hoji esüa kyontsük shiang naha onte tsük jiang mmenthoko tüv müngtüng hungala, onte na Potsow etho ji n khanziala osi omhawoe pvütssonlo vamo jiangha yikvü-yiloala. 9 Lanben esopvüi Maikhal na tia hoto n tsso. Ombona tsüngram ji thüngi Moses echümüng ji ochona khiv sana to ekhyiran-tathüng tia oyi n mhom khi n zo; tolea heto tae ezocho: "OPVÜI khi ni khontokvü ka." 10 Khatola kyontsük shiang jo ontena n tsio yilan topvü nimshi-nyimraka ekhirantala, osi ekümrümo na onte bobo tathi lo jüwo ji esüa, onte loha jüwo jina onte yesothukala. 11 Onte tsükona jo kvüta ekyuthav tssov ato! Ontena Kain josü rüala. Ontena orang eyan lona Balaam na worio ji esüa woriala. Osi Korah na panlamo ji esüa ontenaha panlanala osi ombo esüa onteha echü jilo rheyiala. 12 Onte tsoha-yuha osi tajo elüm jiangna onte tokhu etsoyu yuta jiang mmenala. Ontena onte echi tae nchümala osi onteno eluk esüa mpungna onte hanphiala tolea eryu njothuko eluk. Onteno yuta ebenlo tia tssüngthi n thio dung esüa osi oyingi na rukchei chülangi sithakcho tüv. 13 Onteno jümangi jükyo ntav esüa onte elhi eyikrathao jiang ojü etsyu esüa oponi chiyia vanala. Onteno shantio bungphio jiang esüa, osi Potsow na emüng ejüngtso jilo vanphen onte vayithaka. 14 Adam tsochen tirokoto Enokh na nkolo na onte tsükona heto phyoe lia: "OPVÜI na kyon topvü oyi tssoyiv, ombo ntho lanbenden sosi rov, 15 osi ontena Potsow n longtsüo elhi kvüta tssocho sana nlan onte piv tsükona osi Potsow n longtsüo mmen kyon jiang na ekyuthao yi nsanta ombo tachio ji tsükona nlan onte piv!" 16 Kyon shiangna yuta topvülo phyocho-phyoria oyam n lan piala; osi onte choka n mhom jiang ephan vanala. Ontena ontebobo jo kanchansi oyam jo yikvü emakata onte lanka benche tae yanala.
Ntangnshonyi
17 Tolea a shomden, ete OPVÜI Jisu Khrista wothung jiangna ovüngthüng ntio nte ezothakcho sana jiang nchümcheta vantakhe. 18 Ontena nte ezocho, "Tsüngon okhao jiang yiana kyon ejoma na nte yikvü emakata onte oso rüngcho elhi tae chokao tüv chiyivka." 19 Kyon tsük shiangna okho chiroe sia onte oso rüngcho eyan tae vanala, osi ontelo jo Omon ji n jü. 20 Khatola a shomden, nteno ntho longtsü jilo nte bobo chüngchüngkata vantava. Nthomon etho lona randana vantava. 21 Osi ntena OPVÜI Jisu khi khonzan to kümali eküm nte pithokvü ombo tsüngon ji nhyakta vanathüng lea ntebobo Potsow nzan jilo vantava. 22 Lümbümi woewolana vamo jiang thüngi khonzan ejütava; 23 Omi jilona sücheta oyam shanchotava; osi thanpoe jiang thüngi ha khonzan to na ekyu-nsüp tona pyingi ejütava; tolea onte mpensü mmen na jümkao jiango tssaktava.
Myingthüng Randan
24 Nte n longthokvü ochona nte sayakhokcho sana, osi ombo pvütsson vanrhyu jilo ochona ephyov n pav nte sosi chiwov vancho sana hoji pvütssothuka; pvütsson, etho osi ekhyo ekhüng jiang 25 nkolona benkae enhünga ejan osi kümali ete OPVÜI Jisu Khrista yakchia shanchopvüi Potsow tsuka ji pvütsson, tsüpho, etho osi thotsü kümali echi tssothokvüka! Amen.
1 Kako shijo mhadungi ntio sükhying tsacho sanaji Potsow na Jisu Khrista yakchia ombo nri jiang hungthokvü sa evamo ji erancho. Osi Khrista na lanben wothuka ombo nri John thüngi shiang shi ntsithukcho. 2 Osi John na ntio hungcho sana jiang ji ombona phyocho. Osi shijo Jisu Khrista yakchia ntio Potsow yithen ntsa hungthukcho sana ji shi to ombona ehungpvüi piala. 3 Ochona kako shi kha sana ji emathao, osi ochoangna zenkhying yi shiang enga, kako shilo ntio erani licho sana jiang benphia sana jiang ematha elio! Ntiotssole shiang hetopvü ebemvü tsükona yuta ji enhyathaka.
Ekhümkho Tiying Jiang Thüngi Salüm yi
4 Asia lo ekhümkho tiying jiang thüngi John na eranala: Enhünga evamo Potsow, nkolona evamo, osi elani rov sa evamo Potsow ji thüngi na osi ombo vantsü mhadungo evamo omon tiying jiang elani, 5 Jisu Khrista ocho longtsükao ehungpvüi ocho jo tsokhfü sana osi echü yolona kümchethukdemo osi limhalo mesao jiang pono esapvüi to sana ji thüngi na eyio kianzan osi noying ji ntelo lithukvü ka. Ombona e nzanala osi ombona eküm pio ji yakchia ete mmen jiang lona evachiala; 6 osi pvüti ekhüngyan esoyingia ombo opo Potsow ji e benkathukala. Pvütsson osi etho ji kümali tsükona Jisu Khrista echi tssothuka! Amen. 7 Zeta ombona emhenjü longina tsata! Otsük akvüna ombo hungu, Khyoyo lo ombo ejungio jiang naha ombo hunguv; osi ombo roathüng limhalo jipo topvü na kyatav. Hojito tssothuka! 8 Thotsü OPVÜI jina phyoala, "Aiyo benkaphen osi echephen ji," nkolona vamo ji enhünga vana evamo osi elani etsao ji, to Thotsü OPVÜI Potsow jina phyoala.
Khrista Ehungo ji
9 Aiyo John, nte ojenio, osi Khrista phankae etsso ji yakchia nte shom, osi ochoang jo ombo ekhüngyan ji echi sana jiang na ezüp rüma vancho sana jiang nte hankyoa evan. Ana Potsow yithen ji thenchoa osi Khrista na ntio ntsa a hungthukcho sana ji ehungpvüi tsso jina aiyo Patmos jüyi jilo a thechicho. 10 Tole OPVÜI tsüngon jilo nthomon jina a pyingi asülamoe na tatara won esüa jina heto a ezocho: 11 "Nina ntio hungana erankae yantsü tiying shilo ekhümkho jiang thüngi hanthuka: Ephesus, Smyrna, Pergamum, Thyatira, Sardis, Philadelphia, osi Laodicea." 12 Jitsükona ochona a jana vancho sana ji zev tsükona ana mmilani zechile, shona na jocho milondung tiying hungcho, 13 osi jiang yolo kyon esüa tsüka jijo osü na ojo eyuka hansi vana hungcho, osi shona zhü na teki khüpcho. 14 Ombo tssan jo tssansü ehümvü osi porüp esüa emhüma osi ombo mhyik jo omi esüa tüngra tüv tssocho. 15 Ombo jo jiang ha yongmen ntssae vacho esüa tsünglüpa osi ombo won jo jüzanjo echyua to tssocho. 16 Ombo khe amimoe na shantio tiying bencho, osi ombo püngina yonri tsungkho phyakcho tüv chiyicho. Ombo mha jo englongo tsüngri shena esüa tsünglüpa tüv tssocho. 17 Ana ombo hungale echü esüa ombo jolo a vanthecho. Tole ombona amimoe na a nyimkae a ezocho, "Tikyua!" "Aiyo benkaden osi echephen ji" 18 Aiyo eküm evamo ji! Aiyo a chüthakcho khatola enhungo kümali kümali eküm vanala. Ana echüi jiang osi echü limha jilo etho ji lithaka. 19 Jitsükona enhünga osi mhadungi ntio tssov sana jiang ehungo jiang ji erana. 20 Nina a khe amimoe milondung tiying tona shantio tiying to hungwo ji ejyukajo shi: Shantio tiying jiango ekhümkho tiying jiang lanben jiang osi milondung tiying jiango ekhümkho tiying jiang ejyuka.
Efesia thüngi yithen Eramo ji
1 Efesia ekhümkho lanben ji thüngi heto erana: Okhe amimoe na shantio tiying bensi shona milondung tiying yolo sanphio ji thüngina yithen shi yicho. 2 Nina ntio tssocho sana ji ana ntsia osi nina kvüta etho jüa erüm toa elhia sana jiha ana ntsia. Kyon n mhom jiang na ejünglea wothung ejani sanphio jiang ji nina ejüng to tssenchethaka to ana ntsia. 3 Nina erüm toa osi a tsükona ezüp khithaka, osi vachi n sihan. 4 Khatola ana nilo zeche elio ji shi: nina ovüngthüng a nzamo ji esüa a n zam sithaka. 5 Kvüta oküpi ni elongjothakcho sana ji nchümi zeta! Ni mmen jilona khophia osi ovüngthüng esüa a nzana. Nina ni mmen lona n khophi tssona ana rov osi milondung ji ombo vanphen jilona khi hansi yiv. 6 Tolea ntena mmhom olan motsünga tsso jijo, Ntena Nikholetan kyon jiangna tsso jiang nte tssakala, anaha hoji a tssakala. 7 "Ntena eno pona omon jina ekhümkho jiang thüngi ntio ezoa sana ji engae khia! "Ochoangna ekhyo ji hungu sana hojiango Potsow phari eküm dung ji tssüngthi ji etsov elan onte piv.
Smyrna Thüngi Yithen
8 Smyrna ekhümkho lanben ji thüngi heto erana: "Ovüngtso osi sülantsso ocho chüsi eküm vanlana sana ji thüngina yithen shi yicho. 9 Ana ni ezüp jiang ntsia; ni yantsa toha ana ntsia, khatola nino eli tsotso! Ochoangna Jihudi kyonden to phyosi ejüng tssocho sana jiangna n mhom ni phyoyio ji ana ntsia; Onteno Tsüngrham ji thüngoe! 10 Ntena ezüp khiv yamo jiang tsükona ntia ti kyua. Engata! Satan jina ojang nte tssov osi nte ochoang sana jo evüngki nte thechiv, osi tsüngon taro nandang nte ezüpthokvü. Nte eküm theta lea a lo longtsükae vantava, tona nte ekhyo ji chekav esüa eküm nte piv. 11 "Ntena eno poa tssona omon ji na ntio ekhümkho jiang thüngi ezoa vancho sana jiang engae khitava! "Ochoangna ekhyo ji hunga sana jiango echü enioto jina rhakvü mek.
Pergamum Thüngi Yithen
12 Pergamum ekhümkho lanben ji thüngi heto erana: "Yonri pondüng phyakcho bencho sana ji thüngina yithen heto yicho. 13 Ni vanphen ji ana ntsia, tsüngrham ji vantsü ji ndüngo. A longtsükao phajae Antipas ji satan vanpheni na lüngthata ha nina alo longtsü n senphi to ana ntsia. 14 Tokhatola ana nilo zecheo tara lia: Nte ejoma na Balaam püngno yi ji engatala, Balaam ochona Balak ezoa Israel kyon jiang kisü ekhüm lo thecho tsoyua, osi lonsülonphyo lona mmen tssothukcho sana ji. 15 Ji esüa nte yoloha Nikoletan kyon jiang püngno yi engae vanra. 16 Nte mmen jiang lona kholantava! Ntena n khophia tssona ana zakto nte thüngi rov osi hetüv kyon jiang thüngi yonri a püngina chiyioji khi rotav. 17 "Ntena eno pona omon jina ekhümkho jiang ezo shi enga! "Ochoang na ekhyo ji hunga sana jiang thüngi ana mpho mana tara onte piv. Osi ana onte thüngi olong ehümvü lo erankacho ochoang na khichoa sana jiang taena khacheo tüv myingthan erankacho piv.
Thyatira Thüngi Yithen
18 Thyatira ekhümkho lanben ji thüngi heto erana: "Potsow tsoe ocho mhyikna omi esüa tüngra sana osi ocho ojo jo yongmen ntssacho esüa tsünglüpcho sana ji thüngina yithen heto yicho. 19 Nina ntio tssoa sana ji ana ntsia. Ana ni nzan, longtsüka, elhi mmhom jiang osi ni erüm eto jiang topvü ntsia. Osi nina ovüngthüng lona mmhonka tssoa yia vana to ana ntsia. 20 Tolea ana ni zechecho lio jijo shi: – Jezebel to tsao eloe ochona ompvüpo Potsow yithenpvüi to ejana vancho sana ji püngno yi ji ntena n tangkhokala. Ompvü püngno jina a phajae jiang yesothuka, lonsülonphyota osi kisü ekhüm lo1 thecho etsoyu tsothukala. 21 Ompvü mmen jiang lona khophiv tsükona ana yuta ompvü pia vana, khatola ompvü lonsülonphyo jilona n khophiala. 22 Jitsükona ompvü tona ochoangna ompvü thüngi efürama tssocho sana jiang to ekhyuthav ezüpthokvü tsükona meta motsünga lo onte thechiv sala. Ompvü thüngi ntio ntha elhi tssocho sana jiang lona ontena n khophia tssona ana shi elhi ji tssov. 23 Ompvü sürüi jiangha ana lüngthayiv, jito tssona ekhümkho topvü na aiyo kyon nchümri tona etüm ezi to ntsiyio ji to a chekav. Ombobona ntio mancho sana ji ephanina ana nte pilamka. 24 "Tole Thyatira lo nte ejoma jo püngno silyuo shi n phankav osi oyam na 'Satan mpho yi' to tsatao ji n khichohan. Jitsükona ana nte ezoala; ana oha thanpo nte n hanthuk. 25 Tolea ana n rothüng nandang jo ntena ntio zothakcho sanaji chüngchünga rhümasi vam lia. 26-28 Ochoang na ekhyo ji hungi ochüm jana erüm toa a lüm erüng ji tssoa sana opo na ntio etho a picho sana ji esüa ana onte piv: jijo limhalo jipo jiang pono yonjak jarung theta ekhüng esav ji; osi onte ji chonphfü varoa esüa varoe onte esiv etho ji. Enyathüng eng eso shantio ji ana onte piv. 29 "Ntena eno poa tssona omon jina ekhümkho jiang thüngi ntio ezoa vancho sana jiang engae khitava!
Sardis Thüngi Yithen
1 Sardis ekhümkho lanben ji thüngi heto erana: "Potsow mon tiying elio osi shantio tiying elio ji thüngina yithen heto yicho. Nina ntio tssoa vancho sana ana ntsia. Nino echü khatola eküm vanala to ni thüngtao ji ana ntsia. 2 Jitsükona phanthia osi nina ntio licho sana jiang n monrathüng etho jükathuka. Ntiotssole nina ntio tssothakcho sana jijo Potsow mhadungo jo n benrikhan han. 3 Jitsükona ntio ni püngnoa owoi nina ntio zothakcho sana ji nchümcheta; hoji enga osi ni mmen jiang lona khophia. Nina n phanthia tssona, ana ni thüngi efüi na sanphia esüa rov osi ana kvüthüng rov sana nina n tsi. 4 Tolea Sardis lo nte ejoma na mpensü ntsünga tsütsatala. Ntena osü ehümvü ekatasi a nzo sanphitavka, ntiotssole hoto etssov nte etüma. 5 Ochoang na ekhyo ji hunga sana hoji esüa sühüm ekathokvü osi ana eküm kako jilona onte mying jiang khi n siyi. Apo osi ombo lanbenden mhadungo na onte ji a echi to oponi chiyia ntsithokvü. 6 "Ntena eno poa tssona tona omon jina ntio ekhümkho jiang thüngi ezoa vancho sana jiang engatava!
Philadelphia Thüngi Yithen
7 Philadelphia ekhümkho lanben ji thüngi heto erana: "Ntho osi ntsa ji thüngina yithen shi yicho. Ombona David echi Jabi ji ombo khelo lia. Kvüthüng ombona chonchia na ochinaha n khanche osi ombona khancho ochinaha n chonchiche. 8 Nina ntio tssoa vancho sana ji ana ntsia, etho tara tae lia khatola a yizüng jiang n sina benphiala to ana ntsia. Ana kyon ochinaha n khancheo kipüng ni mhadungo chonchi vathaka. 9 Enga! Ochoangna heto Jihudi ejansi ejüng tssocho sana jiango ejüng ephyoeden, osi onteno satan thüngoe. Ana onte ji oro nte jolo nkhümthethokvü. Ana nte nzanala to ji onte topvü na ntsiv. 10 Ntiotssole ntena a yizüng ji erüm toa benphicho, jitsükona anaha limhalo kyon jiang ojang tssoa ezüp epiv etsao jilona nte shanchov. 11 Ana nsungu rovka. Ntena ntio lithakcho sana ji kenchüngi vatava, tona ochina ha ekhyo yantso ji rechoe nte khiyichev meka. 12 Ocho jo ekhyoe sana ji ana apo ekhümki jilo durhyupvü tssothokvü, osi ombona hoji yaki yiv mek. Ana a Potsow mying ji osi apo yantsü mying ji, osi Jerusalem ethan kvümoe apo thüngi na jorov sana ji ana ombolo erankav. Osi a myingthan jiha ombolo erankav. 13 "Ntena eno poa tssona tona omon jina ntio ekhümkho jiang thüngi ezoa vancho sana jiang engae khitava!
Laodicea Thüngi Yithen
14 Laodicea ekhümkho lanben ji thüngi heto erana: "Potsow na liyingcho topvü chenkaphen ji osi longtsüka eli, otsotso ehungpvüi osi Amen ji thüngina yithen heto yicho: 15 Nina ntio tssothakcho sana ji ana ntsia; nino mmyim ha mek, etsso ha mek to ana ntsia. Ni ji onilo motsünga tae sawo to ana kvüta nchümato! 16 Khatola nino mmyim ha mek, etsso ha mek to na lümphukcho etsso jina ana a püngina nphyukchukchi ni siv sala!17 Nina phyoala; 'Aiyo ejüeli, osi a tssochyua; osi ni ethelan topvü benria likhana to phyoala. Tokhatola nino kvüta npentharo eküm lo vancho sana ji nina n tsi! Nino yantsae, mpensü nli, osi mhyikjung. 18 Jitsükona ana ni ntssungala; a thüngina shona shia, shona njüm ji shii eli küma. Ni tsükshü eyikrathao ji eyukvü tsükona osü ehümvü ha shia. Ni mhyik jianglo ethev tsükona mozhü ha shia, tona nina hunguka. 19 Ana nzamo kyon jiang topvü ana mak-khona ezüp piala. Jitsükona zika-nrünga osi ni mmen jiang lona khophia. 20 Enga! Ana kipüngo phanthi ekhophia vana. Ochona a won zoe kipüng ji chonchia na ana ombo ki rhovov, osi ombo nzo tsoyutav osi ombona a nzo tsoyuv. 21 Ana kvüto ekhyo hungi apo vantsü ndüngo khoktheta sana ji esüa ochona ekhyo hunga sana jina a ndüngo khokthev. 22 Nina eno poa tssona, tona omon jina ntio ekhümkho jiang thüngi ezoa vancho sana ji engae khia!
Potsüwoe Ekhüm
1 Hoji sülo ana, Potsüwoe kipüng motsünga chonchi licho hunglancho. Tatara won esüa ovüngthüng a ezowo jina heto a ezocho. "Hepi chüngia, ana shi sülo ntio tssov sana jiang ni hungthukvüka" 2 Osi Potsüwoe vantsü motsünga vae jilo ocho sana khukthethukcho. 3 Ombo mha jo tssentsü lung Jaspir osi Karnelian esüa tsünglüpa, osi vantsü ji nkona süngrüka mmyakvü na füi licho. 4 Vantsü ji hachüma vantsü thanpo mekyusi mezhü lo eramoeden otsük mekyusi mezhü na sühüm hantasi, shona kikho venrasi khuktherae vancho. 5 Vantsü jilona Potsüo nlüpa tharaka chiyicho. Vantsü ji mhadungi milonpvü tiying tüngra Potsow mon tiying ji ejücho. 6 Vantsü ji mhadungo mhachanphen wozhü tsüphov evontsüa licho. Vantsü ji tssae nk en mezhülo eküm evamo mezhü, sülan mhadung omhyik taena pyingcho tüv vancho. 7 Ekürümo ovüngo jijo hengho esücho osi enioto jo tssibung esüa tüv tssocho; ethümo jijo kyon mha esücho; osi mezhüo jijo mungshitsü pya vancho esücho. 8 Ekümrüm mezhüata na echo tirok ren khyingcho osi echo jiang opon ochung omhyik tae na renzhücho. Ontena esan n lina zümo eng heto denta vancho: "Thotsü Potsow OPVÜI jo ntho, ntho, ntho, nkolona ombona vancho, enhüngaha vana osi henasüi rov jiha ombo." 9 Ekümrüm mezhü jina vantsü jilo khukthe vamo kümali evamo ji pvütsson, myingthüng osi montsson denkata vancho. Ontena hoto denkata na, 10 eranmoe otsük mekyu mezhü jina vantherae, van tsü lo khukthe vamo kümali evamo ji khümta vancho. Ontena kikho jiang phongcherae vantsü ji mhadungo vachochia heto phyotacho. 11 "E OPVÜI, osi e Potsow na pvütsson, myingthüng osi etho hungoji etüma. Ntiotssole nina topvü liyingcho, osi ni lüm erüng lona ontena zajünga eküm vanala."
Kakoyu ji Tona Olyuoro ji to
1 Vantsü lo khoktheo ji khe amimoe na kako eranyu motsünga bencho hojilo pontüng khophia erankae phyonzhüphen tiying na züpcho. 2 Osi lanben thotsü tsükana, heto tünga ana hungcho, "Ochona phyonzhü jiang shaki sisi kako ji lanphev etüma?" 3 Khatola Potsüwoe, limha osi lichungi evan yolo ochinaha kako ji chonchi hoji chungi n zethechikukcho, 4 Kako ji chonchi hoji chungi zethechikung ochia n vamo jina ana elümoto erhüngkata kyacho. 5 Tole eramoe jiang yolo tsüka na heto a ezocho, "Tikyana zeta! David tsochen, Juda pvüji lo hingho jina ekhyo hungthaka osi ombona phyonzhü tiying jiang shakrhüpi kako ji chonchikuka." 6 Tole ekümrüm mezhü tona eramoeden tona hachümo vantsü ji lungi olyuoro jina mangi vana ana hungcho. Osi olyuoro jijo lüngthae othan tssocho esüa zechecho. Olyuoro jina ejü tiying, omhyik tiying to khyinga, osi jiango Potsow mon tiying limhatsü lo rothukthako ji. 7 Vantsü lo khukthei vamoji khe amimoe jilona olyuoro jina owo kako ji khichocho. 8 Jithüng ekümrüm mezhü ji tona eramoeden otsük mekyu mezhü to jiangna vantherae olyuoro ji khüm tacho onte otsük akvüna khendenpvü benracho osi Potsow kyon jiang randan jiang chekav ji shona phfü lo tssütsse rhüm therae bentacho. 9 Ontena khenthan heto dentacho: "Kakoyu ji khichoe phyonzhüo jiang shakrhüpi chonchiv ni etüma. Ntiotssole ni lüngthacho, osi nina thungthan chüo ji yakchia meta topvü lona pvüji, jipo, yisanlan topvü Potsow kyonden tssothokvü oman khi shicho. 10 Potsow benkathokvü tsükona nina onte ji pvüti khümtsüng onte kümthokthaka, osi ontena limha ji sav." 11 Ana zelanle lanben wothüng osi kongdung tata won zocho! Onte ekümrüm mezhü tona eramoe jiang, onte lungi vantsü ji to hazhüa phanthirae owon tssoa, 12 heto dentacho: "Olyuoro ocho lüngthacho sana hojina etho, ejüeli, nchümri, osi etho, osi myingthüng, pvütsson tona thanthüng to ehunguv etüma!" 13 Osi Potsüwoe, limha lo, lichungi osi jümangi evamo ekümrümo topvü osi limhatsü shilo vancho topvü na heto denta ana zocho: "Osi Potsüwoe, limha lo, lichungi osi jümangi evamo ekümrümo topvü osi limhatsü shilo vancho topvüna heto denta ana zocho: Vantsü lo khoktheo ji, osi olyuro ji, thanthüng, myingthüng, pvütsson, etho topvü kümali ombo pia to phyoa ana zocho!" 14 Tole ekümrüm mezhü jiang na Amen! to janlancho Osi eramoeden jiangna vantherae khümtacho.
Phyonzhüo Jiang
1 Jisülo olyuoro jina phyonzhü tiying jilo motsünga shakrhüpa ana hungcho osi ekümrüm mezhü ji yolo motsünga na tharakon esüa "Roa!" to phyoa ana zocho. 2 Ana zechile kurü ehümvü motsünga hungcho. Kurü jilo tsankao jina loko bencho osi ekhyo kikho ombo picho osi ombona khyolam tsükona yicho. 3 Jisülo olyuoro jina phyonzhü enioto ji shakrhüpcho tole ekümrümo enioto jina "Roa!" to phyoa ana zocho. 4 Jithüng kurü thanpo emyom chiyicho. Kurü jilo tsankao ji etho jijo limhalo kyon lüngthatathukvü tsükona ritsso chiyithukvü picho, osi ombo ji yonri tsüphov picho. 5 Jisülo olyuoro jina phyonzhü ethümoto ji shakrhüpcho. Tole ekümrümo ethümoto jina "Roa!" to phyoa ana zocho. Ana zechile kurü enyikvü hungcho, hoji lo tsankao kyon jina seri eni bencho. 6 Jithüng ekümrümo mezhü jiang thüngina chiyicho esüa heto owon ana zocho, "Eng-a jokheman lo otsung ejükaro, osi jokheta man omüm ejükaro, tolea olive dung jiang tona jününgrozhü jiang to ji ti yesothuka!" 7 Jisülo olyuoro jina phyonzhü mezhüoto ji shakrhüpcho; tole ekümrümo mezhüoto jina "Roa!" to phyoa ana zocho. 8 Ana zechile kurü mmipangpang na tüv hungcho. Hojilo tsankae ji mying jo 'Echü' to tsacho osi Echüli jina osülo tsokata phancho osi etho onte pio jijo limha shi mezhüchia jilo, ritsso. Otssi vara, nochonori, osi ekümrüm ntav to khi monthukvü picho. 9 Jisülo olyuoro jina phyonzhü mongoto ji shakrhüpcho – tole thanphen saphang ji kupi jo ochoang Potsow yi püngnoa osi longtsüka lia enhungpvüi tssocho ontena lüngthacho sana jiang mon eküm jiang santhei vancho ana hungcho. 10 Ontena tüngkachia heto phyotacho, "Thotsü OPVÜI, nina limha ji oyi tssoyia, osi e lüngthao jiang ezüp pia" 11 Tothüng OPVÜI na sühüm onte mpenthuka ezocho," Esüngaro vantasa, nte lüngthao ji esüa nte nzo etssoe ejoma lüngthaphae owo ji ekha benthuksanati tssovka. 12 Jisülo olyuro jina phyonzhü tirukoto ji shakrhüpcho. Tole ekhenthao nri enhyukcho osi eng jiha sünyikvü ekerak esüa nyiki sicho, osi choro ji ejen esüa rakiv kümcho. 13 Shantio jiang ha tsungryu na züwothi eniro echükchochia to elongrae sicho. 14 Potsüo oyak jiha ophük shüa to yi sicho, phunglan osi jüyi jiangha topvü senphirae yiracho. 15 Tole limhalo mesaeden, yansaronden, rasan tsüpoeden, ejüeli osi etho eli, ezii, osi etancho evan to kyon topvü na lungkvüi tona lungpvü kupi osi phunglani to mphorae vancho. 16 Osi ontena lungpvü osi phunglan jiang thüngi heto ezotacho, "E menzhütava, vantsülo khuktheo ji osi olyuoro ji t mhyik jiang lona e mphochotava! 17 Ntiotssole ombo lüm etsuk tsüngon ekhenthao ji janthaka osi ochona hoji zalanchikhukvüla?"
Israel Kyon 144,000 Jiang
1 Jisülo jo lanben otsük mezhü na limha nken mezhü jilo phanthirae mbung lan mezhü ji tanglanchi bentasi limhalo, jümangi osi odung jiang pono mpung n venkathukna vana ana hungcho. 2 Tole lanben thanpo tsükana engkhfüwoe na eküm Potsow chekav ejüpkaphen ji bensi tsata ana hungcho. Tole ombona lanben thanpoe otsük mezhü ochoang Potsow na limha osi jümang ji monthukvü etho pichosana jiang ji tüngkachia tsae ezocho, 3 "Etena chekav ejüpkaphen khi Potsow nriden jiang otono n-jükayithüng jo limha, jümang osi odung jiang ti monthukrasa." 4 Osi Potsow cheka ejüpkaphen na otono ejüpkayio jiang topvü tssotsüi wothüng nzoasi zhürosi mezhü to ana zocho. Onteno Israel pvüji tarosi eni jiang yolona; 5-8 Juda, Reuben, Gad, Ashar, Naphtali, Manasseh, Simeon, Levi, Issakhar, Zebulum, Joseph osi Benjamin to pvüji akvü lona wothüng tarosi eni ren tssocho.
Kholuktsü Tsüphov
9 Jisüi ana eyingole n khacheo kyon kholoktsü pvüji, jipo osi yisanlan topvü lona khichecho onteno sühüm mpentasi okhena Palm wo ekhüpi bentasi vantsü ji tona olyuoro ji to mhadungo vanracho. 10 Ontena tüngkachia heto phyotacho, "Shancho ji ete Potsow ocho vantsülo khukthei vancho sana ji thüngi osi olyuoro ji thüngina yiala!" n Lanben topvüna vantsü ji hachümi eramoeden jiang osi ekümrümo mezhü jiang topvü na vantsü ji hachümi vancho. Osi ontena omha jiang vantsü ji mhadungo nkhümtherae Potsow khümta 12 phyotacho, "Amen! MyMgthüng, pvütsson, nchümri montsson, yikrachi, etho, osi ekhyo to shiang kümali tsükona ete Potsow echi tssothuka! Amen!" 13 Eramoe jiang yolo tsükana heto a engacho, "Sühüm mpensüo shiango ochoangla osi kvüi na rotachola?" 14 Ana ezocho, "Tsüphoeyo, ana jo n tsi, nina ntsia." Ombona a ezocho, "Kyon shiango khangshi ntssonshi ekyuthav jiang yakchia tsanchothuko jiang osi onteno olyuoro ji ejen na onte sü jiang etssüi ehümthukthaka. 15 Jitsükona ontena Potsow mhadungo chiroe ombo khümpheni ha zümo eng ombo benkatala. Vantsü lo khuktheo jina ombo vanrhyu ji khi onte nkochev. 16 Enhungo onte ji kvüthüngha woton-erav mek, eng etsso osi etsso thanpo naha onte ezüpo n li, 17 Ntiotssole vantsü lo osi ombona onte ji eküm ejüo jü bukpheno onte sochiv. Osi Potsow ha onte mhyiko na esü topvü mhe siyiv.
Phyonzhü Tiyingo ji
1 Olyuoro jina phyonzhü tiyingoto ji shakrhüple khonta chiso bena Potsüwoe jükrüpa noyingtsüi sicho. 2 Jithüng ana Potsow mhadungo evan lanben otsük tiying hungcho osi ontena tatara tiying benracho. 3 Lanben thanpo tsüka na tssütsse rungphen shona na jocho tüv bensi thanphen jilo mangi vana hungcho. Potsow kyonden jiang randan jilo ekhyimiv tsükona tssütsse orhüm elümoto ombo pia vantsü ji mhadungo shona thanphen sa jilo tham ombo picho. 4 Potsow mhadungo mangi vamo lanben ji khe lona tssütsse rhüm ji miphung chiyi Potsow kyonden jiang randan jiang nzo potsüwoe chüngicho. 5 Jitosi lanben jina tssütsse rungphen shonapvü ji khi thanpheni na omi khi pyingthuki likoe shümchochicho. Jithüng potsüo tharaka ejencho, osi potsüo nlüpa nri enhyokcho.
Tatara Jiang
6 Jitosi tatara tiying bemo lanben tiying jiang na tatara jiang khfütav methakcho. 7 Lanben ovüngo jina ombo tatara ji khfükachile sheryu tona omi to lo ejen nzia limhae hanchochicho. Tole limha shi ethümchia, odung jiang yolo ethümchia, (echi ethümo echia) tona lomo mmyakvü kvüta liana topvü to rungi sicho. 8 Jitosi lanben enioto jina ombo tatara ji khfükachile ntiosana, phunglan tsüphov lo omi kikacho esüa tüv ji jümangi eyithechicho. Tole jümang ji ethümchia jo ejen kümi sicho, 9 Osi jümang ekümrüm jiang yolo, ethümchia chücho, osi jahaz jiang yolo ethümchia roe sicho. 10 Jitosi lanben ethümoto jina ombo tatara ji khfükachile shantio tsüphov motsünga omi esüa kia jina zhükhfü ethümchia jianglo tona jünhyo to jiang lo elungthecho. 11 Shantio ji mying jo 'Ekhov' to tsacho. Hojina ojü topvülo ethümchia jo ekhov kümthukcho osi ojü ji kho ji tsükona hoji eyui elümoto chücho. 12 Jitosi lanben mezhüoto jina ombo tataraji khfükachiale eng ji ethümchia, choro ji ethümchia, shantio jiang ethümchia to rhakcho tole onte wondang jiang lo ethümchia moni sicho, osi tsüngon ji wondang n liv ethümchia moni sicho osi zümo jiha ethümchia moni sicho. 13 Jitosi ana zele mungshutsü tsüphov oyakina erona pyaphia ana zocho osi heto tüngkachia phyocho, "Oh! Ekhenthav! Ekhenthav! Lanben otsük ethüm jiang na onte tatara jiang khfüa limha lo evamo kyon jiang sükhying jo kvüta ekhenthav tssov sato!" to phyotacho.
1 Jitosi lanben mongoto jina ombo tatara ji khfükachile shantio motsünga na echüli jabi ji bensi limhae elongjocho ana hungcho. 2 Shantio jina echü likvü ji chonchile hoji lona omi tsüphov lona phunga to miphung chiyicho; osi lichungi na chiyio miphung jina eng wondang ji tona ezhü ji to müngthuki sicho. 3 Miphung ji lona khomung limhae sanchukcho osi onte topvü na züthem etho hanracho. 4 Onte ji lomo losü odung osi oyo-ohan thanpo jiang ti-yesothuk na kyon ochoang na otono Potsow chekav n hanchosana jiang tae ezüpthukle to onte ezocho. 5 Kyon jiang ti chüthukna choro mongo khangrile to khomung jiang ezocho. Khomung jiangna khangrio jilo enov jijo züthem na nkükcho noato tssocho. 6 Choro mongo yuta jilo ontena echüv yam khatola chüchev mek. Onte chühunguv khatola echü jina onte lona tsani siv. 7 Khomung jiango ritsso kurüden esüa osi onte kvüri-i shona kikho hansi omha jo kyon mha esüa zechecho. 8 Onte tssan jiang eloe tssan esüa osi onte ho jiango hengho ho esüa tüv tae. 9 Onte teki jiango yonjak khüpkacho esüa, osi onte echo jiang na ethonphitao ji ritsso kürü na süo kari khosha na owon tssoato zocho. 10 Ontena züthem esüa emhi tona eno to khyingcho, osi ontena choro mungo tsükona kyon ezüpthukvü etho ji onte ene jianglo jücho. 11 Onte esopvüi mesao vancho osi hoji jo echüli ji enhyang ji. Osi Hebrew yina ombo mying jo Abaddon; Greek yi na jo Apollyon (hoji yichak jo "Roe-sipvüi".) 12 Ekhenthav rodemo ji hoji osi elani ekhenthao eni lihana. 13 Jitosi lanben tirukoto jina ombo tatara ji khfükachile Potsow mhadungi shona thanphensa ji nken mezhü jilona heto owon tssoa, 14 lanben tirukoto ji ezoa ana zocho, "Zhükhfü tsüphov Euphrates jilo lanben otsük mezhü chungi lio jiang lanpheta!"' 15 Nzyu osi choro tsük shilo, tsüngon-tsük shilo, shalantsük shi tsükona onte ji limha lo kyon ethümchia lüngthathukvü tsükona onte vanthukcho. 16 Onte razhü ji rasan kontung nzo eni to phyota ana zocho. 17 Osi ana kurü jiang tona hojiang lo tsankae jiang to müngtüng hungcho: onte teki ekhüp jiango omi esüa myona ejüm esüa osi hakhfü kurü jiang kvüri jiango hingho kvüri esüa osi onte püng jiang lona omi tona miphung, to na hakhfü pyon to chiyicho. 18 Osi kurü jiang püngina chiyio omi, miphung tona hakhfü tsütsailan to jiang na limha lo kyontsü ethümchia lüngthacho. 19 Ntiotssole kurü jiang etho jo onte püngi tona emhi jianglo to theyicho. Onte emhi jiango nrü esüa kvüri khyingcho osi hojiangna kyon jiang meyancho. 20 Vara jiangna chüthuksi kyon kvüta enhyocho sana jiango ontena nsüngrüo jiang sisi kholani n yihancho. Ontena tsüngrham ji ekhüm tona ontena shona, janti yongmen, olung, otssüng na nsüngrüo kisü kvüwoe na n hungche, n zo osi n sanphichecho sana jiang tae khümta vancho. 21 Ontena onte münghanyihan, ratssenrapvü, lonsülonphyo osi efü jiang lona ha n khophicho.
Lanben ji Tona Kakoyu Terio ji to
1 Jitosi ana lanben thokh-yung tsüka potsüwoe na jorolana hungcho, ombo emhenjü na eyukcho osi ombo kvüri nkona süngrüka khyingcho; ombo mha jo eng ji esüa osi ombo jo jiango omi durhyu esücho. 2 Ombo khelo kakoyu teriv lansochi bencho. Ombo jo amimoe jo jümangi nhyeka, ayio jo likoe nhyeka to tssocho, 3 osi hengho erhyua to tüngsoehicho. Ombona tüngsochithakale tharak tiying jina erhyua janlancho. Ontena owon tssopvü ana erom benkacho. 4 Tole potsüwoe na heto owon tssoa ana zocho, "Tharakwon tiying jiang na ntio phyocho sana ti erana, mphoa vanthuka!" 5 Tole ana hungwo lanben likoe osi jümangi eshoni vamo jina ombo khe amimo ji potsüwoe yonkachia Potsow kümali evamo woyak, 6 liko osi jümang tona hojiang lo evamo jiang topvü joyingo ji myingona heto echümchakcho, "Enhungo sülana vam meka! 7 Kvüthüng lanben tiyingoto jina ombo tatara ji khfükachiana Potsow na ombo mpho tümka ntio ombo nri zenkhying jiang thüngi ezochosana ji benthukvü." 8 Jitosi ana potsüwoe na nsana zowo won jina heto a zolana zocho, "Lanben tsüka liko osi jümangi mangi vamo ji khelo eranyu (kakoyu) chonchicho bemo ji owo khia. 9 Ana lanben ji thüngi owo eran yu ji a pile to chonle heto a zocho, "Shi khi tsoa, shiji ni mmani na ekhov kümka, khatola ni püngi jo tssakijü esüa nünguvka. 10 Ana kakoyu teriv ji khi tsole a püngi jo tssakijü to nüngcho. Khatola ana nzhüle a mmanina ethem kümi sicho. 11 Osi heto a ezocho, "Nina elani jipo, khümtsüng osi yisanlan osi Mesaoden elümoto thüngi Potsow yithen ji ezolam lia.
Ehungpvüi Eni jiang
1 Jitosi etsikonphen esüa jarung motsünga a pia a ezocho, "Owo Potsow ekhümki ji tona thanphensa ji to etsia osi khümpheni kyon kvüta vanchosana jiang ha khae zeta. 2 Tolea chungchak opomo jijo ti etsia, hojijo n longtsüi ochoang na choro zhürosi eni tsükona Ntho yantsü ji sümroe siv sana jiang khelo pithaka. 3 Ana a ehungpvüi jiang sünyikvü hanthuksi wothukvü osi ontena tsüngon wothüng motsüngasi nzo enisi rukro yuta jilo Potsow yi püngnov. 4 Ehungpvüi otsük eni jiango Olive dung eni, milondung eni to limha shi pvüi ji mhadungo zae lio jiang ochona oni yeswothukvü roasana oni püngi na omi chiyi onte ri jiang monthukala. 5 Ochona oni yeswothukvü yana na hoji jo chüthukvü. 6 Ontena motsü püngnoathüng jo eryu n jwothukvü oyak shi thangkachiv etho lia. Onina ojü jiang ejen kümkhanthukcheta osi oni lüm erungo lo limha shi vara na pyingthukcheta. 7 Onina motsü püngnorathakana lichungi na chiyio ekümrümo jina oni thüngi rotav. Ekümrümo jina oni khyov osi oni lüngthae, 8 omüng jiang OPVÜI doni siwo yantsü tsüpho jilo ekachi siv. Hoji yantsü ji mying chekav jijo Sodom mekana Ejip. 9 Jipo khümtsüng, yisanlan osi pvüji topvü lo kyon santsüi omüng jiang tsüngon ethümsi riso zeta munguv osi n shothethuk, oni chüo ji tsükona. 10 Limha lo kyon jiang emathav zenkhying oni shina limha lo kyon thüngi ezüp elümoto yithuko ji tsükona ontena longshita yantso dungta emathatav. U Tsüngon ethümsi chiso sülojo Potsow thüngina eküm ejüo ethük oni ehakae oni kümchelantokcho osi kyon jiang ekhentsüngracho. 12 Tole oyaki na tüngkachia heto oni ezoa onina zocho, "Hepi chüngitava!" Oni ri jiangna oni zeta vana onina eluk yolona potsüwoe chüngicho. 13 Hoji shanlan jilo nri elüm tsükshia enhyukcho osi yantsü ji tarochia monthukcho osi kyon wothüng tiying monthokcho. Osi kyon enhyoe vamo jiang ekhentsüngracho osi oyak Potsow mying thüngtacho. 14 Ekhenthao enioto ji benthaka, tolea ethümoto ji n songuv rov!
Tatara Tiyingoto ji
15 Jitosi lanben tiyingoto jina ombo tatara ji khfükachile potsüwoe na heto tüngkachicho, "Enhungo limha ji esav etho ji ete OPVÜI osi ombona ethüngcheo ji to ejan tssothaka, ombona kümali, kümali sav!" 16 Tole Potsow mhadungi eramoe otsük mekyu mezhü na onte vantsü lo khoktherae vamo jiang na n khümtherae Potsow khüma 17 phyotacho: "OPVÜI, Thotsü Potsow, enhünga osi nkolo evamo! Nina etho tsüphov khi benkathako jina ena montsso ni piala! 18 Ni lüm etsuk yuta ji janthako jina, osi echüi jiang yitsso ji janthako jina n longtsüi jiang lümbüm tsyua vanthaka. Limha shi yesothuko kyon jiang yeswothukvü yuta ji janthaka." 19 Potsüwoe Potsow ekhümki ji chonchicho osi Ntsata vaphen bakos ji chonchi lia hungcho. Jithüng potsüo nlüpa, erhyua, tharaka osi nri enhyoka sheryu jocho.
Eloe ji tona Ekyuthao Ekümrüm ji to
1 Jisülo jo chekav emhokthav tüv potsüo oyaki hungkachicho. Hojijo eloe tsüka na eng ji khi piposi, choro ji ompvü joküpi vasi shantio taro eni khyinga tüv kikho motsünga vencho. 2 Ompvü na ngaro bukvüsa vancho osi tsobuk ezüp jina kyasochia ryusanga vancho. 3 Elani oyaki emhokthao chekav thanpo hunglancho. Ekyuthao ekümrüm tsüphov osi emyom motsünga na kvüri tiying khyinga osi ejü taro mpata osi kvüri akvüto khikho vencho hungcho. 4 Ombo emhi jina oyaki shantio jiang ethümchia erhüpchochi likoe elungrathukcho. Eloe jina ngaro vanpvü ngaro ji tsoe siyiv tsükona ombona eloe ji mhadungi manga vancho. 5 Tole eloe jina otsoe tsüka bukcho, osi ombo jipo topvü pono okhe tsükshia yansapvüi etssov bukcho, khatola otsoe ji tona ombo vantsü ji to rechoe Potsow thüngi sosi yi sicho. 6 Eloe jiha lijüng motsüngalo Potsow na tsüngon 1,260 tsükona ompvü tsanthetoki sicho. 7 Jisülo ji potsüwoe ritsso chiyicho. Michael tona ombo lanben to tssoe ekümrüm ji thüngi ori tssocho. Tole ekümrüm jina ha ombo lanben sosi ryulanchicho. 8 Khatola ekümrüm ji khyothechicho osi ombo tona ombo lanben jiang to jo potsüwoe n vanthukvü sicho. 9 Osi nkolona vana evamo nrü kvüwoe tsüngrham to tsacho sana osi limhatsü ejithechicho sana hoji phani sicho. Ombo nzo ombo lanbenden topvü to limhae phanchochicho. 10 Jitosi potsüwoe na heto phyoa ana zocho, "Enhungo Potsow shancho ji rothaka! Potsow na ombo mesao to etho lona ejüthaka! Ntiotssole ochona Potsow mhadungo vani ete shom jiang zümo eng nlan pia vancho sana ji potsüwoe na khi sithaka. 11 Ete shom jiangna olyuoro ji ejen ji osi ontena ehungpvüi etsso ntsaji khi ombo khyothaka; osi ontena onte eküm pia chühungcho. 12 Jitsükona potsüwoe osi kvüta hojilo vancho sana topvüna emathatava! Khatola limha osi jümang ji sükhying jo kvüta ekhenthav tssovto! Ntiotssole tsüngrham jina nte yana joyithaka osi ombo tsüngon tara tae lio ji ntsi lüm tsükshia vana. 13 Kvüthüng ekümrümo jina limhae ombo phanchochithaka to ntsichosana otsoe buki vamo eloe ji yana phanthicho. 14 Khatola lijüngi Potsow na nzyu ethümsi riso ompvü nkohav methako vanphen jilo tsanthe ekümrüm ji mhadungo tsanchotokvü tsükona mungshitsü echo eni ompvü hanthukcho. 15 Tole ekümrüm jina ombo büngina jükhyo esüa ojü ephfüi khi eloe ji phfü yithukvü tssocho. 16 Khatola liko jina eloe ji kyochicho osi liko ji küngsoe ekümrümo püngina chiyio jü ji reta rheyithuki sicho. 17 Tole ekümrümo ji lüm tsuki eloe ji tsoronichen jiang thüngi osi kvüta na Potsow yi enga osi Jisu na püngnowo yi ji enga ntsa ji longtsüana jiang topvü thüngi ori tssov tsükona wocho. 18 Osi ekümrümo jina jümang tssae mangi vancho.
Ekümrümo Eni ji
1 Jisülo ekümrümo motsünga jümangina chiyia ana hungcho. Ombo ha kvüri tiying khyingcho osi ejü akvülo kikho vencho osi kvüri jilo jo Potsow yikvü yilo erankacho. 2 Ekümrümo ji mmhor terio esücho, ojo jiango sevan jo esü, opüng jo hengho püng esü to tssocho. 3 Ombo kvüri motsünga jo tssatssosi pocho esüa tüv tssocho. Limhatsü na emhoka ekümrümo ji phanphicho. 4 Kyon topvü na ekümrümo ji khümtacho, ntiotssole ombona ombo etho ji ekümrüm ji khelo pithakcho. Ontena, "Ekümrümo shi esüi ocho vanchoto, ochona ombo sakakhukcho to," to phyota ekümrümo jiha khümtacho. 5 Ekümrümo ji kangtsü yi phyoa Potsow yikvü etho picho osi choro zhürosi eni etho tsütsav chonchicho. 6 Ombona Potsow rhiyia, Potsow mying ombo vanphen osi potsüwoe evan topvü rhiyia phanthicho. 7 Ombona Potsow kyon jiang thüngi ori tssoe ekhyov etho hungcho, osi pvüji topvü, yisanlan osi khümtsüng topvü pono etho ombo picho. 8 Olyuoro kvüwoe lüngthacho sana ji echi eküm kako jilo benkadeni na omying erani lio jiang yaka jo topvü na ekümrüm ji khümcho. 9 "Eno khyingna engae khitava! 10 Ochoang rhümav sekacho sana rhümav, ochoang yonri na lüngthav sekacho sana yonri jina lüngthav. Hoji tsükona Potsow kyon jiangna longtsü osi erüm eto ethev lia. 11 Jisülo ekümrüm thanpo motsünga limhae na chiyia ana hungcho. Ombona Olyuoro ejü esüa ejü eni khyingcho osi ekümrüm esüa nsancho. 12 Ombona ekümrümo ovüngo ji etho tsüpho ji hoji mhadungo na tsütsacho. Ombona limha ji lona limha lo evan topvü na hoji ekümrümo meyani pothako ji khümtale to khüngkacho. 13 Ekümrümo enioto shina chethev elhi elüm tssocho, ombona topvü ehungona potsüwoe na omi tsachocho osi ekürümo ovüngo ji ehungo na ntio chethev etssov ombo pichosana ji chethev elhi jina 14 limhalo kyon topvü ejithechicho. Ombona kyon jiang topvü ekümrümo ovüngo kvüwoe yonri na meyansi elani eküm vancho sana ji myingo na kisü chümkachitale to ezocho. 15 Osi ekümrümo ovüngo ji kisü jilo eküm ethük ehathechiyile to ekümrümo enio ji etho picho. Hojitolui kisü jina ombo khüm jiang lüngthacheo etho picho. 16 Ekümrümo jina kyon topvü, tsüpho teri, ejüeli, yantsae, nri osi etancho evan, topvü na onte khe amimoe mekana otono chekav therale to khüngkacho. 17 Ekümrümo ji chekav' mekana ombo mying ji chekav ji nhamvü ochina ha n shishochecho. 18 Shilo kichuk nchümri ethev lia, ochona nchümri liana jina ekümrümo ji chekav ji yichak ji zichekuka, ntiotssole chekav jijo kyon mying thüng osi chekav jijo 666.
Olyuoro ji Tona Ombo Kyon Jiang to
1 Jisülo ana zechile Olyuoro ji Zion phunglani mangkachi vancho; osi ombo nzo kyon 144,000 ombo mying tona opo mying to otono ejüpkarae hantasi vanracho. 2 Tole potsüwoe na jüzanjo won osi tharakon esüa ana zocho. Khenden okhona onte khendenpvü khfüta esüa owon tssocho. 3 Osi kyon 144,000 jina vantsü ji osi ekümrümo mezhü osi eramoeden jiang mhadungo phanthiracho; ontena khenthan denta vancho osi okhen jijo onte taena ntsicho. Kyon topvü yolona onte tae rhanchocho. 4 Onteno eboe ochoang na eloe thüngi nlan n liv nthoa vancho sana jiang osi nteno nthoeden. Olyuoro jina kvüi woana ontena phanphiala. Onteno limhalo kyontsü topvü yolona ethüngchei rhanchothako jiang osi olyuoro ji tona Potsow to thüngi othan ovüngo jiang. 5 Ontena ejüng phyoa kvüthüngha n tsi, osi onte n lan ntia n li.
Lanben Otsük Ethüm ji
6 Jisülo lanben thanpo tsüka na kümali tsükona yithenmhom hansi limhalo kyon khümtsüng, pvüji, yisanlan osi jipo topvü ezov tsükona oyaki pyaphia, "Potsowoe vana hungcho. 7 Ombona tüngkachia heto phyocho, "Potsow kyutava osi ombo etho tsüpho ji thüngthava! Ntiotssole ombona limhalo kyon oyi tssoyiv ji janthaka. Ochona woyak, liko, jümang osi jünhyo jiang liyingcho sana ji khümtava!" 8 Ovüngo ji sülo lanben enioto jina heto phyoa phancho. "Babylon tsüpho ji elongthaka! Ompvü na kyon topvü ompvü suko ji yuthukcho – oso rüngcho lonsülonphyo suko ji!" 9 Lanben ethümoto jina heto tüngkachia chirocho, "Ochona ekümrümo ji khüma osi ombo chekav ji otono mekana okhe lo ejüpkae hanana jina 10 Potsow lüm etsuk suko ombo lüm etsuk pvü jilo ekhyoto litheo ji yuthukhuka, ochoang na hojito tssoa sana onte topvü Olyuoro ji tona ntho lanben jiang to mhadungo na omi osi miron lona onte khangriv. 11 Onte khangrio ji miphung jina kümali phunga vam. Ochona ekümrümo ji khüma sana osi ombo mying ji chekav ji hana sana ji tsükona jo zümo eng ntia esan enyip nli." 12 Shi tsükona Potsow kyon osi Potsow yizüng benphi osi Jisu longtsüi jiangna erüm etov ethev lia. 13 Jisülo potsüwoe na heto phyoa ana zocho, "Heto erana! "Enhungo ochoang na OPVÜI elhi tsükona chüa sana jiang ematha elio!" Omon jina heto phyoala, "Ho, otsotso, onte na esang mmok lona esan hungka, ntiotssole ontena elhi tsso ji tssüngthi ji onte na hungu."
Limha Jilo Liri
14 Jisülo ana zechile eluk ehümvü lo kyon esüa khokthei vancho osi ombo kvüri shona kikho vensi okhena vekhfüro erov bencho. 15 Tole khümphenina lanben thanpo chiyi eluk lo khoktheo lanben ji ezocho, "Ni vekfüro ji tsütsata osi oli ji ria, ntiotssole yuta ji janthaka; Osi limha shi eriv etünga mhenthaka!" 16 Tole eluk lo khoktheo jina ombo vekhfüro ji eyokphia limha ji richo. 17 Jisülo lanben thanpo potsüwoe na khümphen jilo joro jinaha vekhfüro erov bencho. 18 Tole lanben thanpo omi ezepvüi jina thanphensa jilona chirocho. Osi vekhfüro erov bemo lanben ji thüngi ombona heto tüngkachia ezocho, "Ni vekhfüro ji tsütsata osi limha parhi jiang lo jününgrothi jiang hanrhyua, ntiotssle jününgrothi jiang mhenthaka!" 19 Tole lanben jina ombo vekhfüro ji limhae evakphia jününgro jiang ri Potsow lüm etsok pyonphen jilo hanthechicho. 20 Osi jününgrothi jiang zümpheni yantsü tssae lio jilo thechile jilona ejen tsüchukcho, hoji esi kilometer nzo ethüm, ejungi khejü mezhü harümo to tsücho.
Vara Okhao Ehamo Lanben ji
1 Jisülo ana oyaki emhokthao cheka tsüphov hungkachilancho. Lanben tiying na vara wokhao tiying Potsow lüm etsuk ejüpkao jiang bentasi vancho. 2 Osi jilo mhachanphen tona omi to nzitacho jümang esüa hungcho. Osi ochoangna ekümrümo ji tona ombo kisü ji tona omying chekaphen lioji to khyothakcho sana jiang ana hungcho. Ontena mhachanphen jümang esüa ji mhadungo mangrae Potsow na onte pio khendenphen jiang bentasi 3 Potsow nri Moses tona olyuoro ji to okhen heto denkata vancho: "Thotsü Potsow OPVÜI, ni elhi jiango kvüta emhokthao ato! Jipo topvü pono Mesao, ni etssophyo ji kvüta elanthacho ato! 4 Ni n kyui ocho vamto, OPVÜI? Ni etho tsüphov ji n phyona ocho vamto? Nthoe jo ni tae. Jipo topvü na oro ni khümtav, ntiotssole ni elhi ntsanrüko ji topvü na hungala." 5 Jisülo potsüwoe khümphen ji chonchi jilo Potsow vanrhyu sü ji lia ana hungcho. 6 Vara tiying ebemo lanben otsük tiying jiangna sünyipvü ntssünguv ehümvü hantasi tekilo shona zhü na khüngtasi ekhümki jilo na chirotacho. 7 Tole ekümrümo mezhü jilo motsünga na kümali kümali evamo Potsow ji lüm etsuk thephen shona phi tiying jiang lanben otsük tiying jiang picho. 8 Potsow pvütsson osi etho lona chiyio miphung jina khümphen ji pyingcho, osi lanben tiying jiangna hansi erowo vara tiying ji n yakchithüng jo ochina ha khümpheni n rhowokukcho.
Potsow Lüm Etsuk Phikuk Jiang
1 Ekhümki na owon tssoa heto lanben tiying jiang ezoa ana zocho: "Potsow lüm etsuk phikuk tiying ji limhae owo phyangchochia!" 2 Lanben ovüngo jina owo ombo phikuk ji limhae phyangchochicho. Tole ochoang na ekümrümo ji chekav hana osi hoji kisü ji khümcho sana jiang tsüko ekyuthao emho chiyiracho. 3 Lanben enioto jina ombo phikukji jümangi phyangthechicho. Tole ojü ji kyon ejen esüa kümi sicho osi ojüi ekümrüm topvü chüi siracho. 4 Lanben ethümoto jina ombo phikuk ji zhükhfü osi jünhyo jianglo phyangthechicho, tole ojü jiang ejen kümi sicho. 5 Tole ojü ezepvüi lanben jina heto phyocho, "O Nthoe, enhünga evamo osi nkolo na evamo, ni yitsso shijo etüma! 6 Ontena Potsow kyon jiang osi zenkhying jiang ejen zanio jina nina ejen onte yuthukala. Ontena mamo ji onte piala!" 7 Tole thanphensa jilona heto phyoa zocho, "Thotsü Potsow OPVÜI na yitsso shiang jo ntsanrüka osi otsotso etüma!" 8 Lanben mezhüoto jina ombo phikuk ji eng jilo phyangkacho, osi ombo etsso ekhenthao jina kyon rungtssünguv etho picho. 9 Eng ji etsso ekyuthao jina onte rüngcho osi ontena vara rothuko Potsow ji mying ji rhiyitacho, khatola onte mmen jiang lona jo khophi ombo etho tsüpho ji n thüngtacho. 10 Lanben mongoto jina ombo phikuk ji ekümrümo ji vantsü jilo phyangkacho. Tole ekümrümo ji ekhüngyan jilo emüng ntav rocho, osi kyon jiangna ryusang eno lona onte nli jiang njaktacho, 11 osi onte noa vamo emho ji tsükona Potsow rhiyitacho. Khatola onte mmen elhi jiang lona n khophitacho. 12 Lanben tirukoto jina ombo phikuk ji Euphrates zhükhfüi phyangthechicho. Tole engkhfüwoe na tsao Mesao jiang pankathukvü tsükona zhükhfü jina nghachei sicho. 13 Osi omon n mhom ethüm ovü esüa ana hungcho. Hojiang ji ekümrümo ntav ji püngina, osi ejüng zenkhying ji püngina chiyicho. 14 Onteno omon n mhon, chethev elhi etssoe jiang. Omon ethüm shiango Thotsü Potsow tsüngon jilo ritsso ji tsükona limhalo Mesao jiang khüngtsütathuka ewoe jiang. 15 "Enga! Ana efüi sanphia esüa tsata, ochoang na mpensü zeyata vana sana jiang eman tssov, ontena kyontsü ehungo yikra tsükshü sanphiv mek!" 16 Tole omon jina Mesao jiang tsarhyui meta motsünga Hebrew yina Armageddon to tsao jilo etssencho. 17 Tole lanben tiyingoto jina ombo phi ji ezhüi phyangchicho, tole potsüwoe vantsü jilona heto tüngkachicho, "Elhi ji tssothaka!" 18 Tole Potsow nlüpa, tharaka, hümhüma yicho, osi nri tsükshia enhyokcho. Kyon liyingsi hojitüv n ri nhyukhan; hoji jo topvü lo n mhontso ji enhyokcho! 19 Yantsü ji ethüm elache sicho osi limhalo yantsü jiang topvü roe sicho. Yantsü tsüphov Babylon ji Potsow na nchümchei ombo pvüji yuthukcho, ombo lüm etsuk ekhenthav jü ji yuthukcho. 20 jUyi topvü n liv siracho osi phunglan jiangha topvü moni siracho. 21 Osi ekhenthav sheryu joathüng ochoang na Potsow rhiyicho sana jiang pono sheryu motsüngalo seri tinyan bena tüv jokathukcho. (Ntiotssole vara ji emhokthav tsükshicho.)
Thüngche Losülonphyoe ji
1 Jisüi jo ophi tiying ebemo lanben tiying jiang yolo tsüka na oro heto a ezocho, "Roa, ana lonsülonphyoe thüngche, ndüngo yantsü tssoe lio ji zhükhfü tsüphov jiang lungi yantsü ji kvülo ezüpthukvü sana ji ni ejüvka. 2 Limha lo Mesao jiangna ompvü thüngi n lan benphicho, osi limha lo kyon jiang ji lonsülonphyo jü ji yuthukrae kinothukcho." 3 Omon jina a sayacho osi lanben jina lijüng motsünga lo a sosi yicho. Tole hojilo ekümrümo emyom motsünga otsük totona Potsow emaka yi eranzhücho ji poni eloe tsüka khukthei vana hungcho; ekümrümo jina kvüri tiying osi ejü taro to khyingcho. 4 Eloe jijo ejüm tona emyom to pipocho osi oyuk-osen tona tssentsü lung, pvürüm senthan to na eyuksi vancho. Ompvü khelo shonapvü, motsünga lo ompvü lonsülonphyo pholaphoshü osi owon oyi emvü na pyingi bensi vancho. 5 Ompvü tüv lo omying motsünga, mphoyi heto jüa tüv erankae hancho: "Babylon yantsü, limhatsü lonsülonphyo osi ethisulyuo thüngoe oyo ji." 6 Osi eloe jijo Potsow kyon jiang ejen tona Jisu longtsüi lüngthao jiang to ejen jiang na kinoe vancho. Ana ompvü hungale elümoto a emhukcho. 7 Lanben jina a ezocho, "Ntiolyui ni emhukala?" "Ana eloe ji tona ompvü na tsankao kvüri tiying ejü taro to khyingo ji to yichak ji ni ezovka. 8 Hoji ekümrümo ji eküm vancho khatola enüngo eküm mek; Ombona lichungi na chiyi ombo roe sithuko yiala. Eküm kako jilo limha n joyingthüng na omying n ranio kyon jiang topvü na ekürümo ji zetasi emhuktav. Tsüngonalo ombo eküm vancho, enhungo eküm n van, khatola elani ombo chiyilam. 9 Shijo kichuk nchünri ethev lia, ombo ejü tiying jiango eloe jina khoktheo phunglan tiying ji. Elani Mesao tiying ha ejyukacho: 10 Onte yolo otsük mongona meta sathaka, osi tsüka na sa vana, osi tsüka jo ekümrümo kvüwoe ha n sahan. Ombona sa na esüngaro tae sav. 11 Osi ekümrümo kvüwoe ovüngthüng eküm vansi enhünga eküm n vancho sana hojijo Mesao tizao to ji osi ombo tiying jiang yolo tsüka ocho moni sithukvü vancho sana ji. 12 Nina ejü taro hungwo jiango limha sav yuta n janhamo Mesao taro jiang. Onte ji ekümrümo ji nzo khonda motsünga sathukvü. 13 Onte taroa tana etüm ezi motsünga tae osi ontena onte etho ji ekümrümo ji piala. 14 Ontena Olyuoro ji thüngi ori tssov khatola Olyuoro ji tona ombo etsa kyon jiang, ombona ethüngcheo osi ombo longtsükao sürüiden to jiang na onte khyov, ntiotssole Olyuoro jijo Opvüiden pono OPVÜI osi mesaoden pono Mesao ji." 15 Lanben jina heto ha a ezocho, "Ojü kvüwoe pono lonsülonphyoe jina khukthe vana nina hungcho sana jijo jopo jiang, Kyonden, khümtsüng osi yisanlan jiang. 16 Nina hungwo ejü taro osi ekümrümo to jiang na lonsülonphyoe ji tssakvü, ompvü na licho topvü ontena khiyi siv. 17 Ntiotssole Potsow na etho jiang ekümrümo ji pia, Potsow yi jiang n penthüng nandang ontena sathukvü tsükona Potsow lüm erüng ji tssohungo lümbüm Potsow na onte theyicho. 18 Nina hungwo eloe jijo yantsü tsüphov kvüwoe na limha lo Mesao jiang pono sa sana ji.
Babylon Elongo ji
1 Hoji sülo potsüwoe na lanben joroa ana hungcho. Ombo etho tsüphov licho osi ombo pvütsson na limha topvü wondangtsücho. 2 Osi ombona heto tüngkachicho, "Ompvü elongthaka, Babylon tsüpho ji elongthaka enhungo tsüngrham osi omon n mhom na ompvü pyingthaka", osi etssakthao mmen mmyak woro taena ompvü pyingthaka. 3 Ntiotssole jipo topvü na ompvü lonsülonphyo ji benphithaka. Osi ompvü oso rüngcho ochüm n lio jina limha lo shishoe epoe jiang likachithaka." 4 Jisülo potsüwoe na heto owon tssolana ana zocho, "Chiyitava, a kyonden! Ompvü lona chiyitava! Ntena jo ompvü mmen jiang ti rhükatava; ompvü ezüp tsao jina ha nte ti rhakthuka! 5 Ntiotssole ompvü mmen jiangna Potsow etssunga eshenkachi lia, osi Potsow na ompvü n tha elhi jiang etsügiala. 6 Ompvüna kvüto nte tsütsacho sana, hoji esüa na ntio tssothakcho sana tata eni ompvü pilana. Ompvü na zükhi methaki nte yuthuko ji tata eni etho likata ompvü methakitava. 7 Ompvüpo kvüta elhaelanga pvütssonthukcho sana tata eni ompvü ezüpthukala. Ntiotssole ompvü na heto ezoa tae vanala: 'Ana mesali kümi helo vanala! Aiyo emi-nloe mek, Ana kvüthüngha nungra ndukvü mek!' 8 Hoji tsükona tsüngona lojo vara n mmhom na ompvü rhakthukvü – nochonori, nungra osi otssi vara. Osi omina ompvü rungi siv, ntiotssole oyi ompvü tssoyiwo OPVÜI jijo thotsü." 9 Yantsü ji rungo ji miphung ji limha lo mesao ochoang na ompvü thüngi lonsülon-phyotacho sana jiang na hunga na kyatav. 10 Ontena ompvü ezüp ji chinhyav kyuo jina ekonina zechita vam. Ontena phyov, "Ekhenthao osi ekyuthao! Thotsü Babylon yantsü tsüphov shijo! Khonta motsünga taena ni ezüp jiang chiyithukcho!" 11 Limha lo shisho khophi jiang na ha nungra ompvü tsükona kyayiala; 12 ntiotssole ochinaha oro tsütsaelan n shitav sithaka, shona, janti tssentsü lung, pvürüm senthan, sünyipvü tsütsaelan, osü porov, pungi sümyom, otssüng ntsem lantaro, sotsü ho tsütsaelan lantaro, osi tssentsü tssüng tsütsaelan, tona yonjak tsütsaelan marble tsütsaelan; 13 sangsiryu, orhüm-ori, rüngchorhüm, ohümtsüng, ekhov tssentsüman, tssitsserhüm, suko osi thujü, moeta, ohümtsüng, mangsü, olyu, kurü süphen ezii, osi kyon eküm mpato. 14 Shishoe jiang na heto ompvü ezoala, "Nina tsütsaelan mmhom jüpona vamo jiang topvü monkhanthaka, osi ni ejüeli osi pvütsson topvü monkhanthaka osi nina hojiang hunglam mek!" 15 Shishoe ochoangna yantsü jilo shishoe ejüeli hungchosana jiang topvü na ekonina zechita vam, ntiotssole ompvü ezüp ji onte nkhihungcho. Ontena kyata, nungrata phyotav, 16 Yantsü tsüphov ji tsükona kvüta ekhenthao osi ekyuthao ato! Ompvü na sünyipvü, osü-porov, osi sümyon mpensi, oyuk-osen jo shona, tssentsülung osi senthan to ekacho! 17 Osi khonda motsünga taena ompvü ejüeli topvü monthaka!" Orhungi tsüphoe jiang topvü, yentsae osi orhung ehae jiang osi thanpoe topvü jümangi mmyoe tso ta vamo jiang topvü na ekonina zechita vancho, 18 osi yantsü rango miphung ji ontena hungchiale heto kyatacho, "Yantsü tsüpho shi esüa kvüthüngha yantsü n lihan!" 19 Ontena live shae onte kvüri lo shakachita heto kyatacho, "Yantsü tsüphov ji tsükona kvüta ekhenthao osi ekyuthao ato! Jümangi orhung tsütsata evan topvü na ompvü ejüeli lona ejüeli kümracho. Tole khonda motsünga lo taena topvü monthaka!" 20 Ompvü monthuko ji longshia! woyak; longshitava Potsow kyonden osi zenkhyingden! Ntiotssole ompvüna ntio nte tssoyicho sana ji man Potsow na n lan ompvü pithaka! 21 Tole lanben etho ejüi tsüka na olung motsünga hümchenlong tera tsakae jümangi vanthechia heto phyocho, "Babylon yantsü tsüphov ji etho evakphia ephyachochi siv osi kvüthüng ha hunglam mek." 22 Khendenpvü jiang won osi kyon khen, philili ekhfüi on, tatara on, jiang ni lona zolam meka! Elhilan taro lo ezae ochia nilo , hunglam mek! 23 Ni lona milon tüngrachio hunglam meka, yanpiyanthan etssoe jiang won ni lona zolam meka. Ntiotssole ni thüngi shisho khophi jiango limhalo etho elitso jiang osi ni ozen elhi ejüng jiang khi nina limhatsü ejithechicho!" 24 Babylon ji ezüp picho, ntiotssole zenkhying osi Potsow kyonden jiang ejen ji yantsüi na hungcho, ho, limhalo na lüngthao jiang ejen ji. ;
1 Hoji sülo potsüwoe kyontsü won esüa heto tüngkachita ana zocho, "Potsow thünga! Shancho, Pvütsson osi etho ji ete Potsow echi! 2 Ombo yitsso jiango otsotso osi ntsa! Lonsülonphyoe ochona ompvü n tha elhina limha ji yesothuka vancho sana ji ombona n lan pithaka. Ompvü ha Potsow nri jiang lüngthao jina Potsow na ompvü ezüpthukthaka." 3 Ontena elani tüngkachicho, "Potsow thünga, yantsü rungo ji miphung jina kümali, kümali phungala!" 4 Vantsülo khokthei vamo Potsow ji eramoe otsük mekyu mezhü ji tona ekümrümo mezhü ji to na epyakthe khümtacho. Osi ontena phyotacho, Amen! Potsow thünga!"
Olyuoro ji Yanpithan Tokhu
5 Jisüi jo vantsü jilona heto owon tssocho, "Ete Potsow thünga, ombo nri topvü ombo yikrachi osi ombo kyonden, ombo ekhüm teri tsüphoeden!" 6 Jisülo jo kyon kholuk tsüphov won esüa osi jüzanjo won esüa osi Potsow tharaka esüa zocho. Owon jiangna heto phyoa ana zocho, "Potsow thünga! Ntiotssole OPVÜI ete Thotsü Potsow jo Mesao! 7 Etena longshyua emathatava; ombo tsüpho ji etena thüngtavka, osi ombo loroe jina methaki vanthaka. 8 Sünyipvü tsünglüpvü motsünga ntssünguv ekav ompvü pithaka." (Sünyipvü mmhom jijo Potsow kyon jiang elhi mmhom jiang. 9 Jisüi jo lanben jina a ezocho, "Heto erana: Olyuoro ji yanpithan tokhu jilo etsae jiang ematha elio." Osi lanben jina phyocho, "Shiango Potsow yi tsotso jiang." 10 Ana ombo khümvü tsükona ombo jolo ephyakthele ombona a ezocho, "To tilyua! Aiyo ni nzo elhi etssoe osi ni otanyui kvüta na Jisu na ntio ntsa oponi chiyithukcho sana jiang benphia vancho sana jiang tephfüi taeka Potsow khüma!" Ntiotssole Jisu na ntsa oponi chiyithuko jijo zenkhying jiang lümbümi nthiphiyio ji.
Kurü Emhüm lo Tsankao ji
11 Jisülo ji Potsüo chonchi lia ana hungcho osi kurü ehümvü motsünga hungcho. Hojilo tsankao jijo Longtsükao osi Otsotso to tsacho; ombona ntsanrük lona oyi tssoa osi ori tssoala. 12 Ombo mhyik jiango omi kia esüa, osi ombo kvüri lo kikho elümoto vencho, ombo lo omying erankae hancho, khatola ombona yaka ochinaha ntio yichak sana n tsi. 13 Ombo phokthesü ji ejen taena jümkachicho. Ombo mying jo "Potsow yi" to tsacho. 14 Potsüwoe rasanden jiangna sünyipvü ntssünguv emhümvü pipotasi ombo sü ruta vancho. 15 Ombo püngina yonri erov motsünga chiyicho, ombona hoji khi jipo topvü khyov. Ombona yonjak jarung bensi yansa rom osi ombona Thotsü Potsow lüm etsyu suko ji zümchokchiv. 16 Ombo phokthesü lo osi ombo phi lo heto erankae hancho, "Mesaoden pono Mesao, osi Opvüiden pono OPVÜI." 17 Jisülo eng jilo lanben tsüka phanthi vana ana hungcho. Ombona lanjümalo ezhüi woro kvüta pyaphita vanchosana jiang heto ezocho, "Rotava, Potsow tokhu tsüphov ji tsükona sanrhyutava! 18 Oro mesao jiang, Rasanpvüi jiang, rasanden, kurü jiang osi ontelo tsankao jiang kyon topvü so jiang, ezi-i, etancho evan, osi teri tsüphoe topvü so jiang tsotava!" 19 Tole ekümrümo ji tona limha lo mesao jiang osi onte rasanden jiangna etssirhyui kurü lo tsankao ji tona ombo rasan jiang to thüngi rotav methaka ana hungcho. 20 Osi ekümrümo ji tona ombo mhadungo chethev etssoe ejüng zenkhying jiang to jo vüngi sicho. (Hojiang chethev elhi jiang na ekümrümo ji chekav ehan kyon jiang osi ekümrümo ji kisü ji ekhüm jiang ejithechicho.) Ekümrümo ji tona ejüng zenkhying jiang to ji omi wozhü ejüm esüa kia vamo jilo thechicho. 21 Osi onte rasan jiango kurü lo tsankao ji püngi na chiyio yonri jina lüngthacho, osi onte so jiango woro topvü na tsokhok tsotacho.
Nzyu Othüng Motsünga ji
1 Jisüi jo potsüwoe na lanben tsüka na lichung Jabi ji tona yonjakzhü mmyinguv motsünga to bensi joroa ana hungcho. 2 Ombona ekümrümo, nrü ehen, tsüngrham ji rhümae nzyu wothüng motsünga tsükona sheni sicho. 3 Osi lanben jina lichungi ombo ejithechi japi thei züplanchi nzyu wothüng motsünga ji n yakthüng jo jipo jiang ombo khi n jithechithukvü tsükona vanthukcho. Hoji sülo jo ombo ji yuta tara tsükona vachiv. 4 Jisüi jo ana vantsü nungracho osi jiang lo khuktheo jiang ji oyi etssov etho picho. Osi kyon ochoang na Jisu na ephyowo ntsa Potsow yi ji ehungpvüi tssocho ntana lüngthae chüthukcho sana jiang mon eküm jiang ha ana hungcho. Ontena ekümrümo ji osi ombo kisü ji n khümcho, osi ekümrümo ji chekav ji onte tono osi okhe lo n hancho. Onte ji kümchelani mesao esüa Khrista nzo nzyu wothüng motsünga satacho. 5 Echüi thanpoe jiango nzyu wothüng motsünga ji n yakthüng jo n phanthicho. Shi jo echüi jiang phanthi ovüngo ji. 6 Echü phanthilan ovüngo shilo ochoang jüa sana jiango ematha tsüphov lia. Echü enioto Potsow osi Khrista pvütiden tssov osi ontena ombo nzo tssoe nzyu wothüng motsünga sav.
Satan ji Khyov ji
7 Nzyu wothüng motsünga ji benthakana Satan ji vüngphenina vachiv, 8 osi jipo jiangna limha nken mezhü vamo Gog tona Magog to ji echithechiv yam. Satan jina ori tssotav tsükona onte topvü, Jürani hajang tata etssirhyuthukvü. 9 Ontena limha topvü nzüi Potsow kyon jiang vanphen osi ombona nzamo yantsü jilo vantacho. Khatola potsüwoe na omi joroe onte monthukcho. 10 Jisüi jo onte ejithechio tsüngrham ji omi wozhü ejüm esüa kia vamo jilo, ekümrümo ji tona ejüng zenkhyingden to thechithako jilo thechi siv; osi onte ji zümo eng ezüpthuka kümali vanthukvü.
Yitsso Okhao ji
11 Jisülo vantsü ehüm tsüphov motsünga lo ochosana khukthei vana ana hungcho. Oyak osi liko shina ombo hungjan lo n vam tsani sicho osi onte n hunglam sicho. 12 Jisüi jo echüi jiang teri tsüphoe topvü vantsü ji mhadungo phanthi vanra ana hungcho. Kako jiang chonchicho osi kako thanpo motsünga chonchicho, hoji jo eküm kako ji. Echüi jiang ji Onte elhi ephan ntio kako jianglo erani liracho sanaji ephan oyi tssoyicho. 13 Tole jümang jinaha ombo lo echü jüwo jiang topvü vachicho. Echü jina osi echü li jina ha onte lo echü lio jiang topvü vachicho. Osi topvü ombombo elhi ephan oyi tssoyicho. 14 Tosi echüi ji tona echüli ji toha omi wozhü jilo vathechi sicho. (Omi wozhü shijo echü enioto ji.) 15 Osi kyon ochoang mying eküm kako jilo n lichosana jiang topvü omi wozhü jilo vathechi sicho.
Limha Osi Oyak Ethan
1 Jitosi ana potsüo ethan osi limha ethan hungcho. Potsüo osi limha ovüngo osi jümang jiha moni sithukcho. 2 Osi Ntho yantsü Jerusalem ethan ji potsüwoe na methaki loroe na yanpithan lo penrisi orapvü thüngi yia esüa joroa ana hungcho. 3 Osi vantsü jilona heto tüngkachia ana zocho: "Enhungo Potsow ki ji kyon ndüngo tssothaka! Ombona onte nzo vam osi onteno ombo kyonden tssov. Potsow na onte nzo vam osi ombo onte Potsow tssov. 4 Ombona onte mhyiko na esütsü topvü mhe siyiv. Elani jilo echü n lilan, nungra, ekya osi ryusang nmok n lilan. Olan taro ehen topvü monthaka." 5 Tole vantsülo khukthei vamo jina phyocho, "Enhungo ana olan topvü ethan kümthukala!" Osi ombona hetoha a ezocho, "Shiang erana, ntiotssole shiango otsotso, osi longtsüka-khuka." 6 Elani ombona phyocho, "Thakthaka! Aiyo ovüngo ji osi wokhao ji, aiyo benkaden osi chümdan ji. Kyon ochona era sana eküm jünhyo jilona kiaman eyuv tsükona ana elan ombo piv. 7 Ochona ekhyo ji hunga sana jina a thüngina shi khichov. Aiyo ombo Potsow tssov osi ombo a tsoe tssov. 8 Khatola nsüp-nrüp, n longtsüi, yentsoyenyui, ethi silyuo ramae, münghan, lonsülonphyoe, methevüjae, kisükhüm, osi oyi n tsae topvü – onte vanphen jo omi wozhü ejüm esüa kia vamo ji tssov osi jijo echü enioto ji tssov.
Jerusalem Ethan ji
9 Vara wokhao tiying ejüo ophi tiying ji ebemo lanben tiying jiang yolo tsüka na oro heto a ezocho, "Roa, ana olyuoro ji yanpithan engh ji ni ejüvka." 10 Omon jina a sayacho osi lanben jina phunglan elümoto ntsom jitüv kuri a sosi chungocho. Ombona Jerusalem ntho yantsü, Potsow thüngina potsüwoe na jora vamo ji a hungthukcho, 11 osi Potsow pvütsson na tüngra vamo ji a ejücho. 12 Yantsü jina tsentsülong osi Jasper esüa osi shisha to ntssünga tüngracho. Hojilo pikhfü ntssom tsüphov osi kipüng taro eni tona kipüng jiang enhyang lanben otsük taro eni to jiang a ejücho. Osi kipüng jianglo Israel pvüji taro eni jiang mying erankae licho. 13 Nken motsüngalo kipüng ethüm ren; engkhfüwoe ethüm, jolowoe ethüm, khümkiwoe ethüm. eng-rhelamoe ethüm to. 14 Yantsü ji pikhfü jo kishenlong longpvü taro eni olyuoro ji wothung taro eni jiang mying erankacho tüv lo tssokacho. 15 Lanben ochona ajancho sana jina shona etsiphen bensi yantsü ji pikhfü ji tona kipüng jiang etsiv sa vancho. 16 Yantsü ji nken mezhüata etsüi, esii ji kheti tssocho. Lanben jina ombo etsiphen jina yantsü ji etsicho, tole esi kilo meter 2,400 tssocho osi nzoe tona ntssoni toha hoji kheti tssocho. 17 Lanben jina pikhfü jiha etsicho, tole ombo etsiphen ji ephanina metre rukro tssocho. 18 Pikhfü jijo jasper long na tssocho osi yantsü jijo shona njüm shisha esüa ntssünga tüv na tssocho. 19 Yantsü ji pikhfü durhyupvü jiango tsentsülong lan taro na tssocho. Kishenlung ovüngo jijo Jasper na tssocho osi enioto jijo tssentsülong ejüm esüa tüv na tssocho, osi ethümoto jijo tssentsülong ntssam khicho osi mezhüoto jijo tssentssülong mmyakvü, 20 osi mongoto jijo pyonlantaro küptacho long, tiroko jijo tssentsülong myonshiv, tiyingoto jijo tssentsülong hakfü, tizaoto jijo tssentsülong mmyaku, tokvüoto jijo tsentsülong hakhfü topas, taroto jijo tsentssülong hümphokvü, taro ekhao to jijo tssentsülong ejüm esüo tüv, elani taro enioto jijo tssentsülong müngzhüv to tssocho. 21 Kipüng taro eni jijo tssentsülong taro eni khi kipüng motsünga lo tssentsülong motsünga na tssocho. Osi yantsü ji lantsü jiango shona njüm shisha to ewonrhüa tüv na roncho. 22 Ana yantsü jilo ekhümki jo n hungcho, ntiotssole ekhümki jijo thotsü potsow OPVÜI ji tona olyu oro ji to tssocho. 23 Yantsü jilo wondanguv tsükona eng osi choro ethev n licho, ntiotssole Potsow pvütsson jina hojilo wonkacho, osi olyu oro jijo hoji milon ji tssocho. 24 Limhalo kyon jiangna ombo wondang lona sanphiv, osi limhalo mesao jiangna onte ejüeli jiang jilo hansi rov. 25 Yantsü ji kipüng ji eng totona chonchi vav, hojilo jo emüng n lio jina kipüng ji kvüthüngha n khan, 26 Limhalo jipo topvü myingthüng osi ejüeli jiang yantsü jilo hansi rov. 27 Khatola n nthono jo ntia yantsü jilo n hantheche; elani kyon ochoang na eyikrathao elhi tssoa osi ejüng phyoa na jilo n rheyiche. Olyu oro ji eküm kako jilo ochoang mying erankathakcho sana jiang taena yantsü jilo rheyiv.
1 Lanben jina eküm jü zhükhfü jiha a ejücho, osi zhükhfü jijo ewona rakachia tüv tssocho, osi Potsow tona olyu oro ji to vantsü jilona tsüchuki 2 yantsü ji lantsü ji lanpvü longjüngi na tsüa yicho. Zhükhfü ji tssa tsungkho jilojo eküm dung ji zacho osi hojina nzyualo yenjo taro eni, choro akvü tssüngthi ethiala, osi hoji limo jijo jipo jiang emiyiphen ji tssocho. 3 Potsow na rhiyikacho tüv ntia yantsü jilo n li. Potsow tona olyuoro ji vantsü toji yantsü jilo liv, osi ombo phajae jiangna ombo benkata khümtav. 4 Ontena ombo mha hungu osi ombo mying ji onte tono erankae hantav. 5 Hojilo jo emüng liv mek osi ontena eng wondang mekana milon ethev liv mek, ntiotssole OPVÜI Potsow jo onte wondang tssov osi ontena mesaoden esüa kümali kümali sav.
Jisu Erov Ji
6 Tothakale lanben jina a ezocho, "oyi shiango otsotso osi longtsüka khoka. Osi OPVÜI Potsow ochona ombo mon ji zenkhying jiang thüngi pia sana jina ombo lanben jiang rothuka nsungu ntio tssov sa vancho sana ji ombo phajae jiang thüngi ejücho." 7 Jisu na phyoala, "Engatava! Ana zakto tsata! Ochoang na kako shilo zenkhying yi jiang enga sana jiang ematha elio." 8 A John shina shiang hetopvü hungthaka. Osi ana kvüthüng shiang hunga zocho sana ana lanben ochona shiang ejücho sana ji mhadungo khuktseni ombo khümvü tae vancho. 9 Tokhatola ombona a ezocho, "To tilua! Aiyo ni osi ni shomden zenkhying jiang osi ochoang na kako shilo oyi jiang longtsüa sana jiang topvü jokim etssoe taeka. Potsow Khüma!" 10 Osi ombona a ezocho, "Zenkhying kako shi mphoe tivata, ntio-tssole shiang hetopvü etssov ji yuta ji janthaka. 11 Ocho jo n mhoncho sana jiha to nmhon ji tssonrhüa vanthuka, osi ocho jo pholacho sana to pholata vanthuka; tolea ocho jo mmhoncho sana jijo mmhom ji tssoa vam shikhfü, osi ocho jo nthocho sana jina nthonrhüa vam shikhfü." 12 Jisu na phyoala, "Engatava! Ana zakto tsata! Otsük akvüto ombo ombo elhi ephan yantsov tsükona ana yantso hansi rov. 13 Aiyo ovüngo ji osi wokhao ji, benkaden osi chümdan ji." (Alpha osi Omega.) 14 Ochoangna onte mpensü jiang ntssünga etssüi, ekümdung jiang lona tssüngthi jiang etsov elan hungi yantsü lantsü jilona rheyia sana jiang emathao. 15 Kha tola yantsü tssae jiango silyuo etssoe kyonden, ozen n-mhom benphiden, lonsülonphyoeden, münghanden, osi kisü ekhümden, elani oyi loha, elhi lona ejüng ephyoeden jiang tssov. 16 "Ekhümkho jianglo nte thenchotokvü tsükona A Jisu shina ana lanben rothukthaka. Aiyo David wopan lona chiyicho: aiyo engo eso shantio wondangtsüo ji." 17 Omon jiha yanphithan ji onina phyoala, "Rotava!" Shi ezoe topvüna "Rotava!" to phyov lia. Ochona eratsünga sana jina roa, eküm jü ji ochona ethev liana jina kiaman khia.
Thakchi yi
18 A John shina kako shilo zenkhying yi jiang ezoe topvü heto tüngochünga ezoala: Ochona shilo ntio sana ekhyipata sana, kako shilo vara phyoe elio shiang Potsow na ombo ekayia ezüpthokvü. 19 Osi ochona sana zenkhying kako shilo ntio sana tia khi siana, Potsow na kako shilo ekümdung tssüngthi osi Ntho yantsü phyoe lio jiang lona Potsow na ombo ejan jiang khi siyiv. 20 Shiang hetopvü ehungpvüi tssoa vamo jina phyoala, "Otsotsoka, ana zakto tsata!" Amen. Jitsükona, Hoto tssoa, Roa, OPVÜI Jisu! 21 OPVÜI Jisu kianzan ji otsük akvü pono lithukvü ka.