Boh Hiăp, Jing Ơi Adai, Jing Hĭ Mơnuih
1 Hlâo kơ Ơi Adai hrih pơjing adai lŏn, Pô arăng pơanăn Boh Hiăp hơmâo laih; Ñu dŏ hrŏm hăng Ơi Adai laih anŭn sĭt Boh Hiăp jing Ơi Adai Pô yơh. 2 Hlak blung hlâo, Ñu dŏ hrŏm hăng Ơi Adai. 3 Mơ̆ng Ñu yơh Ơi Adai hrih pơjing rai abih bang tơlơi mơnơ̆ng. Rơngiao kơ Ñu sĭt ƀu hơmâo tơlơi mơnơ̆ng hơget ôh Ơi Adai hrih pơjing rai. 4 Ñu ngă brơi kơ abih bang mơnuih mơnam hơdip laih anŭn pơrơđah kơ ƀing gơñu kơ tơlơi Ơi Adai, kar hăng tơlơi bơngač pơrơđah khul mơta tơlơi yơh. 5 Ñu jing kar hăng tơlơi bơngač pơčrang amăng tơlơi kơnăm mơmŏt, samơ̆ ƀing mơnuih, jing kar hăng ƀing dŏ amăng tơlơi kơnăm mơmŏt, ƀu thâo krăn Ñu ôh. 6 Hơmâo sa čô mơnuih Ơi Adai pơkiaŏ rai, anăn ñu jing Yôhan. 7 Ñu rai laih kiăng kơ ngă gơ̆ng jơlan, pơhiăp pơhaih kơ tơlơi Pô jing kar hăng tơlơi bơngač, tui anŭn yuakơ mơ̆ng Ñu yơh abih bang mơnuih mơnam dưi đaŏ kơnang kơ Ñu. 8 Yôhan pô ƀu djơ̆ jing Pô kar hăng tơlơi bơngač ôh. Ñu rai kơnơ̆ng pơruai kơ ƀing arăng kơ tơlơi Pô anŭn. 9 Pô anŭn, jing Pô kar hăng tơlơi bơngač sĭt hlak trŭn rai pơ lŏn tơnah anai kiăng kơ pơrơđah kơ rĭm čô mơnuih kơ tơlơi Ơi Adai yơh. 10 Tui anŭn, Pô arăng pơanăn Boh Hiăp dŏ amăng lŏn tơnah anai, laih anŭn Ơi Adai ngă brơi kơ Ñu hrih pơjing rai lŏn tơnah, samơ̆ lu mơnuih amăng lŏn tơnah ƀu thâo krăn Ñu ôh. 11 Ñu hơmâo rai laih pơ lŏn tơnah jing lŏm laih kơ Ñu pô, samơ̆ lu mơnuih amăng mơnuih Yehudah Ñu pô anŭn ƀu tŭ ju̱m Ñu ôh. 12 Samơ̆ kơ abih bang ƀing hlơi pô tŭ ju̱m laih Ñu, jing kơ ƀing đaŏ kơnang laih kơ Ñu, Ñu pha brơi tơlơi dưi kiăng kơ jing ƀing ană bă Ơi Adai yơh. 13 Ƀing ană bă anŭn ƀu djơ̆ ƀing ơi adon gơñu lŏm laih kơ Ơi Adai ôh, kŏn djơ̆ yuakơ mơnuih khưp kiăng kơ hơmâo ƀing ană bă ƀôdah rơkơi kiăng kơ ngă lơi, kơđai glaĭ, Ơi Adai yơh ngă brơi kơ ƀing gơñu jing hĭ ƀing ană bă Ñu. 14 Pô arăng pơanăn Boh Hiăp jing hĭ laih mơnuih laih anŭn hơdip laih amăng tŏng krah ƀing gơmơi. Ƀing gơmơi hơmâo ƀuh laih hiư̆m Ñu jing khăp pap, yuakơ Ñu jing khăp pap biă mă laih anŭn Ha Čô, jing Pô rai mơ̆ng Yang Ama. Ñu jing khăp pap yuakơ Ñu nanao khăp pap laih anŭn nanao pơhiăp tơlơi sĭt kơ rĭm mơnuih yơh. 15 Hơmâo sa hrơi, Yôhan ƀuh Yêsu laih anŭn pơruai hăng ƀing arăng kơ tơlơi Yêsu laih anŭn pơhiăp kraih tui anai, “Anŭn yơh jing Pô kâo hơmâo laĭ laih tui anai: Ñu yơh jing Pô rai tơdơi, jing yom prŏng hloh kơ kâo, yuakơ Ñu hơmâo hlâo kơ kâo yơh.” 16 Ñu hơmâo nanao laih jing khăp pap hlo̱m ƀo̱m kơ abih bang ƀing ta laih anŭn Ñu hơmâo bơni hiam laih kơ ƀing ta nanao. 17 Ơi Adai brơi rai Tơlơi Juăt mơ̆ng Môseh, samơ̆ Yêsu Krist khăp pap laih kơ ƀing ta laih anŭn pơruai laih kơ ƀing ta tơlơi sĭt kơ tơlơi Ơi Adai. 18 Ƀu hơmâo mơnuih pă ôh ƀuh djơ̆ Ơi Adai, samơ̆ Ơi Adai, jing Ha Čô anŭn yơh, jing Pô dŏ ƀơi gah hơnuă kơ Yang Ama, hơmâo pơrơđah laih Yang Ama kơ arăng.
Yôhan Pô Ngă Baptem Pơruai Kơ Tơlơi Ñu Pô Ƀu Djơ̆ Jing Krist Ôh
19 Tơdang ƀing khua djă̱ akŏ ƀing Yehudah amăng plei Yerusalaim pơkiaŏ rai đơđa ƀing khua ngă yang laih anŭn ƀing Lêwi kiăng kơ tơña kơ Yôhan hlơi ñu jing, anai yơh jing tơlơi Yôhan laĭ hăng ƀing gơñu. 20 Yôhan pơruai kơ ƀing gơñu hăng tơlơi sĭt laih anŭn ñu pơhaih rơđah rơđo̱ng tui anai, “Kâo ƀu djơ̆ jing Krist ôh.” 21 Ƀing gơñu tơña kơ ñu dơ̆ng tui anai, “Tui anŭn, hlơi ih jing lĕ? Ih jing Êliyah hă?” Ñu laĭ glaĭ tui anai, “Kâo ƀu djơ̆ ôh.” Ƀing gơñu tơña dơ̆ng, “Ih jing Pô Pơala hă?” Ñu laĭ glaĭ tui anai, “Kâo ƀu djơ̆ ôh.” 22 Hơnăl tuč, ƀing gơñu tơña dơ̆ng tui anai, “Tui anŭn, hlơi ih jing lĕ? Laĭ glaĭ kơ ƀing gơmơi bĕ tui anŭn ƀing gơmơi dưi laĭ glaĭ kơ ƀing hơmâo pơkiaŏ rai laih ƀing gơmơi. Ruai bĕ, bơ kơ ih pô, hlơi ih jing lĕ?” 23 Yôhan laĭ glaĭ tui hăng hơdôm boh pơhiăp pô pơala Yesayah hơmâo laĭ laih tui anai, “Kâo jing kar hăng mơnuih jing pô iâu kraih amăng tơdron ha̱r: Pơtơpă bĕ jơlan brơi kơ Khua Yang kiăng kơ rai.” 24 Hlak anŭn, hơmâo đơđa ƀing Pharisai jing ƀing mơnuih arăng pơkiaŏ rai 25 kiăng kơ tơña kơ ñu tui anai, “Tơdah ih ƀu djơ̆ Krist, ƀôdah Êliyah, kŏn djơ̆ Pô Pơala lơi, tui anŭn yua hơget ih ngă tơlơi baptem lĕ?” 26 Yôhan laĭ glaĭ tui anai, “Kâo ngă brơi baptem hăng ia, samơ̆ amăng ƀing gih hơmâo sa čô Pô ƀing gih ƀu thâo krăn ôh. 27 Ñu yơh jing Pô rai tơdơi kơ kâo đuaĭ hĭ laih. Ñu jing yom prŏng biă mă tơl kâo ƀu năng lăp ôh kiăng mă bruă kơ Ñu jing kar hăng hlŭn Ñu tơdang kâo tơleh hĭ hrĕ klĭ juă Ñu.” 28 Abih bang tơlơi anŭn hơmâo truh laih pơ plei Bêthania, jing ƀơi gah ngŏ̱ kơ krong Yurdan, jing anih Yôhan hlak ngă baptem.
Yêsu Jing Kar Hăng Ană Triu Pơsăn Drơi Ơi Adai
29 Amăng hrơi tŏ tui anŭn, tơdang Yôhan ƀuh Yêsu hlak rai pơ ñu, ñu laĭ tui anai, “Lăng adih, Pô anŭn jing kar hăng Ană Triu pơsăn drơi Ơi Adai, jing Pô ngă kơ Ơi Adai dưi pap brơi kơ mơnuih mơnam yuakơ khul tơlơi soh ñu anŭn yơh! 30 Anŭn jing kơ tơlơi Pô anŭn yơh kâo laĭ laih tui anai, ‘Pô rai tơdơi kơ kâo jing Pô yom prŏng hloh kơ kâo yuakơ Ñu hơmâo mơ̆ng đưm hlâo laih hlâo kơ kâo.’ 31 Kâo pô ƀu thâo krăn Ñu ôh, samơ̆ tơhơnal tơlơi kâo hơmâo rai ngă brơi baptem hăng ia anŭn jing kiăng kơ pơrơđah Ñu kơ ƀing Israel.” 32 Giŏng anŭn, Yôhan pơhiăp rơđah rơđo̱ng kơ ƀing mơnuih anŭn tui anai, “Kâo ƀuh Yang Bơngăt Hiam trŭn mơ̆ng adai kar hăng čim pơrơgŏm hăng găm dŏ ƀơi Ñu. 33 Hlâo kơ anŭn kâo ƀu thâo krăn Ñu ôh, samơ̆ Pô hơmâo pơkiaŏ laih kâo rai ngă baptem hăng ia pơtă kơ kâo tui anai, ‘Pô ih ƀuh Yang Bơngăt Hiam găm dŏ ƀơi Ñu, Ñu anŭn yơh jing Pô či ngă baptem hăng Yang Bơngăt Hiam.’ 34 Kâo hơmâo ƀuh laih tơlơi anŭn laih anŭn kâo ngă gơ̆ng jơlan kơ tơlơi Ñu anŭn jing Ană Ơi Adai yơh.”
Ƀing Ding Kơna Blung Hlâo Yêsu
35 Ƀơi hrơi tŏ tui anŭn, Yôhan ăt nao pơ anih anŭn mơ̆n hrŏm hăng dua čô amăng ƀing ding kơna ñu. 36 Tơdang ñu ƀuh Yêsu hlak găn nao, Yôhan laĭ tui anai, “Lăng adih, anŭn jing Pô kar hăng Ană Triu tŭ pơsăn drơi kơ Ơi Adai!” 37 Tơdang dua čô ding kơna anŭn hơmư̆ hiăp ñu laĭ tui anŭn, ƀing gơñu đuaĭ tui Yêsu yơh. 38 Yêsu wir glaĭ ƀuh dua čô mơnuih đuaĭ tui Ñu, Ñu tơña kơ ƀing gơñu tui anai, “Hơget tơlơi ƀing gih kiăng lĕ?” Ƀing gơñu laĭ glaĭ tui anai, “Ơ Rabbi ăh, kiăng laĭ Ơ Nai ăh, pơpă anih Ih dŏ lĕ?” 39 Yêsu laĭ glaĭ kơ ƀing gơñu tui anai, “Rai lăng bĕ.” Tui anŭn, dua ƀing gơñu nao hăng ƀuh anih Yêsu dŏ, laih anŭn ƀing gơñu dŏ glaĭ hrŏm hăng Yêsu amăng hrơi anŭn yuakơ hlak anŭn ƀơi mông tal pluh, jing klăm laih. 40 Andre, adơi Simôn, jing sa čô amăng dua gơñu, jing pô hơmâo hơmư̆ laih Yôhan ruai kơ tơlơi Yêsu anŭn laih anŭn hơmâo đuaĭ tui laih Yêsu. 41 Tơlơi blung hlâo Andre ngă jing nao hơduah sem ayŏng ñu Simôn laih anŭn ruai hăng gơ̆ tui anai, “Ƀing gơmơi hơmâo ƀuh laih Pô Messiah, anŭn jing Pô Krist.” 42 Tui anŭn, ñu ba Simôn nao pơ Yêsu. Yêsu lăng pơ Simôn hăng laĭ tui anai, “Ih jing Simôn ană pô pơkŏn anăn Yôhan, arăng či iâu ih Sephas, kiăng laĭ jing kar hăng Pêtrôs yơh.”
Yêsu Iâu Philip Hăng Nathanael
43 Amăng hrơi tŏ tui anŭn, Yêsu khưp kiăng nao pơ kwar Galilê. Tơdang Ñu bưp Philip, Ñu laĭ kơ gơ̆ tui anai, “Đuaĭ tui Kâo bĕ.” 44 Philip, Andre hăng Pêtrôs le̱ng kơ jing ƀing mơnuih mơ̆ng plei pơnăng Bêtsaida. 45 Philip nao hơduah Nathanael hăng ruai kơ gơ̆ tui anai, “Ƀing gơmơi bưp laih Pô Môseh hơmâo čih laih amăng Hră Tơlơi Juăt, laih anŭn ăt jing Pô hơmâo lu ƀing pô pơala čih laih kơ tơlơi Ñu. Ñu anŭn jing Yêsu plei Nazaret laih anŭn ama Ñu anăn Yôsêp.” 46 Nathanael laĭ glaĭ tui anai, “Nazaret! Ƀu hơmâo tơlơi hiam klă hơget ôh tơbiă rai mơ̆ng plei anet anŭn.” Philip jak ñu tui anai, “Rai lăng bĕ.” 47 Tơdang Yêsu ƀuh Nathanael rai pơ Ñu, Ñu laĭ kơ gơ̆ tui anai, “Anai jing mơnuih Israel sĭt. Ñu ƀu hơmâo plư pleč hlơi pô ôh.” 48 Nathanael tơña tui anai, “Hiư̆m ih thâo krăn kâo lĕ?” Yêsu laĭ glaĭ kơ ñu tui anai, “Hlâo kơ Philip iâu ih, Kâo ƀuh laih ih tơdang ih hlak dŏ gah yŭ phŭn hra.” 49 Nathanael pơhiăp pơhaih tui anai, “Ơ Nai ăh, Ih jing Ană Ơi Adai! Ih jing Pơtao ƀing Israel yơh!” 50 Yêsu pơhiăp tui anai, “Ih đaŏ kơnang kơ Kâo yuakơ Kâo ruai kơ ih kơ tơlơi Kâo ƀuh laih ih gah yŭ phŭn hra. Ih či ƀuh khul bruă prŏng hloh kơ bruă anŭn dơ̆ng yơh.” 51 Yêsu laĭ dơ̆ng tui anai, “Kâo laĭ kơ ƀing gih tơlơi sĭt biă mă, ƀing gih či ƀuh adai pŏk laih anŭn ƀing ling jang hiam Ơi Adai đĭ hăng trŭn ƀơi Kâo, jing Ană Mơnuih yơh.”
Yêsu Hăng Tơlơi Mơsêh Mơyang Pơplih Ia Jing Hĭ Tơpai Boh Kơƀâo
1 Ƀơi hrơi tal klâo tơdơi kơ anŭn, hơmâo tơlơi dŏ rơkơi bơnai pơ plei Kana amăng kwar Galilê. Amĭ Yêsu pơ anŭn mơ̆n, 2 laih anŭn arăng ăt jak iâu Yêsu wơ̆t hăng ƀing ding kơna Ñu nao pơ tơlơi pơdŏ anŭn mơ̆n. 3 Tơdang tơpai boh kơƀâo abih laih, amĭ Yêsu laĭ hăng Yêsu tui anai, “Ƀing gơñu ƀu hơmâo tơpai boh kơƀâo dơ̆ng tah.” 4 Yêsu laĭ glaĭ tui anai, “Ơ đah kơmơi hơeng hơi, ih ƀu kiăng kơ pơđar kơ Kâo hơget tơlơi kiăng kơ ngă ôh. Aka ƀu truh mông kâo ngă tơlơi anŭn ôh.” 5 Amĭ Yêsu nao laĭ kơ ƀing ding kơna sang anŭn tui anai, “Brơi kơ ƀing gih ngă bĕ tui hăng tơlơi Ñu pơđar.” 6 Jĕ pơ anŭn hơmâo năm boh čeh ia pơtâo pioh kơ ƀing ană plei rao pơrơgoh gơñu pô wơ̆t hăng gơnam mơ̆n tui hăng tơlơi phiăn ƀing Yehudah. Rĭm boh čeh dưi pioh mơ̆ng sapănpluh lid truh kơ sa-rơtuh duapluh lid ia yơh. 7 Yêsu pơđar kơ ƀing ding kơna anŭn tui anai, “Tuh pơbă bĕ ia amăng rĭm čeh anŭn.” Tui anŭn, ƀing gơñu tuh ia bă truh pơ tơƀuai čeh yơh. 8 Giŏng anŭn, Yêsu pơđar kơ ƀing gơñu dơ̆ng tui anai, “Ră anai tuăh mă bĕ ƀiă ia anŭn ba nao pơ pô wai tơlơi ƀơ̆ng huă.” Tui anŭn, ƀing gơñu ngă tui yơh. 9 Pô wai tơlơi ƀơ̆ng huă anŭn mơñum lăng ia hơmâo jing hĭ laih tơpai anŭn. Ñu ƀu thâo krăn ôh mơ̆ng pă tơpai anŭn tơbiă rai, samơ̆ ƀing ding kơna hơmâo tuăh laih ia anŭn thâo krăn. Giŏng anŭn, ñu iâu rai pô han tâo, 10 laih anŭn laĭ tui anai, “Abih bang mơnuih ba rai kiăng kơ yua tơpai hiam hloh amơĭ hlâo, giŏng anŭn tơdơi kơ ƀing anŭn mơñum lu laih, anŭn kăh ba rai ia tơpai gap ƀrô kiăng kơ mơñum. Samơ̆ ih hơmâo djă̱ pioh tơpai hiam hloh hlŏng truh pơ ră anai.” 11 Anŭn yơh jing tơlơi mơsêh mơyang blung hlâo Yêsu ngă laih amăng plei Kana amăng kwar Galilê, kiăng pơrơđah kơ tơlơi hiư̆m Yêsu jing. Tui anŭn yơh, Ñu hơmâo pơrơđah laih kơ tơlơi hiư̆m Ñu jing dưi kơtang laih anŭn ƀing ding kơna Ñu đaŏ kơ Ñu jing Pô Messiah yơh. 12 Tơdơi kơ anŭn, Yêsu hăng amĭ Ñu hrŏm hăng ƀing adơi Ñu laih anŭn ƀing ding kơna Ñu trŭn nao pơ plei Kapharnaoum yơh. Pơ anih anŭn ƀing gơñu dŏ glaĭ ƀiă hrơi.
Yêsu Puh Pơđuaĭ Hĭ Ƀing Sĭ Mơnia Mơ̆ng Wăl Tơdron Sang Yang
13 Tơdang hrơi phet Tơlơi Găn ƀing Yehudah jĕ truh laih, Yêsu đĭ nao pơ plei Yerusalaim. 14 Amăng khul wăl tơdron sang yang Ñu ƀuh ƀing mơnuih sĭ mơdrô rơmô, triu, čim kơtrâo laih anŭn wơ̆t ƀing pơplih prăk mơ̆n dŏ be̱r ƀơi kơƀa̱ng gơñu. 15 Tui anŭn, Yêsu mă hrĕ kuĭ jing mơ̆ng lu arăt hrĕ laih anŭn puh pơđuaĭ hĭ abih bang ƀing gơñu mơ̆ng anih sang yang anŭn wơ̆t hăng rơmô, triu yơh. Ñu tuh hĭ prăk kăk ƀing pơplih prăk bru bra ƀơi lŏn laih anŭn tơlư̆ hĭ kơƀa̱ng pơplih prăk gơñu. 16 Yêsu laĭ kơ ƀing sĭ čim pơrơgŏm tui anai, “Mă pơđuaĭ hĭ bĕ abih khul čim pơrơgŏm mơ̆ng anai! Ƀing gih khŏm anăm pơjing hĭ sang Ama Kâo jing hĭ anih sĭ mơnia ôh!” 17 Ƀing ding kơna Yêsu hơdơr glaĭ hiăp arăng hơmâo čih amăng Hơdrôm Hră tui anai, “Mơnuih mơnam či pơkơdơ̆ng glaĭ hăng Kâo biă mă yuakơ Kâo hur har biă mă kơ tơlơi ƀing gơñu khŏm pơpŭ pơyom kơ sang Ih, Ơi Adai.” 18 Giŏng anŭn, ƀing khua djă̱ akŏ ƀing Yehudah hơduah tơña kơ Ñu tui anai, “Hơget gru tơlơi mơsêh mơyang Ih dưi pơrơđah kơ ƀing gơmơi ƀuh kiăng kơ pơrơklă kơ tơlơi Ơi Adai jao brơi tơlơi dưi kơ Ih kiăng kơ ngă abih bang tơlơi anŭn lĕ?” 19 Yêsu laĭ glaĭ tui anai, “Pơrai rai hĭ bĕ sang yang anai laih anŭn Kâo či pơdơ̆ng glaĭ sang anŭn amăng klâo hrơi.” 20 Ƀing gơñu pơhiăp dơ̆ng tui anai, “Arăng hơmâo pơkra laih sang yang anai amăng pă̱pluh-năm thŭn, tui anŭn ih ƀu či dưi pơdơ̆ng glaĭ sang anŭn kơnơ̆ng amăng klâo hrơi đôč ôh.” 21 Samơ̆ sang yang Yêsu hơmâo pơhiăp anŭn jing kơčrâo kơ drơi jan Ñu pô. 22 Tơdơi kơ Ñu djai laih anŭn hơdip glaĭ laih mơ̆ng mơnuih djai, ƀing ding kơna hơdơr glaĭ tơlơi Yêsu hơmâo laĭ laih tui anŭn. Giŏng anŭn, ƀing gơñu đaŏ kơ Hră Ơi Adai laih anŭn boh hiăp Yêsu hơmâo pơhiăp laih pơ anŭn hlâo adih. 23 Hlak anŭn, tơdang Yêsu dŏ pơ plei Yerusalaim amăng tơlơi phet Tơlơi Găn, hơmâo lu ƀing mơnuih ƀuh laih tơlơi mơsêh mơyang Yêsu ngă laih anŭn ƀing gơñu đaŏ kơ Ñu jing Pô Messiah yơh. 24 Samơ̆ Yêsu ƀu hơmâo jao hĭ Ñu pô kơ ƀing gơñu ôh, yuakơ Yêsu thâo krăn laih abih mơnuih mơnam. 25 Ñu ƀu kiăng ôh kơ ƀing arăng pơruai kơ Ñu hơget tơlơi ƀing mơnuih pơkŏn pơmĭn, yuakơ Ñu thâo laih hơget tơlơi rĭm čô hlak pơmĭn.
Yêsu Pơtô Pơblang Kơ Nikodêmos
1 Hlak anŭn, hơmâo sa čô mơnuih amăng grup ƀing Pharisai anăn ñu Nikodêmos. Ñu jing sa čô yom pơphan amăng ƀing khua git gai ƀing Yehudah. 2 Ñu nao pơ Yêsu tơdang mlam laih anŭn laĭ tui anai, “Ơ Nai ăh, ƀing gơmơi thâo krăn Ih jing nai pơtô tơbiă rai mơ̆ng Ơi Adai, yuakơ ƀu hơmâo hlơi pô ôh dưi ngă hơdôm tơlơi mơsêh mơyang Ih hơmâo ngă laih tơdah Ơi Adai ƀu djru brơi kơ ñu.” 3 Yêsu laĭ kơ ñu tui anai, “Kâo laĭ kơ ih kơtang biă mă, tơdah Ơi Adai ƀu ngă brơi kơ sa čô mơnuih tŭ tơkeng dơ̆ng kơ phrâo, sĭt ñu anŭn ƀu dưi mưn tŭ tơlơi git gai mơ̆ng Ơi Adai ôh.” 4 Nikodêmos laĭ tui anai, “Sĭt sa čô mơnuih ƀu dưi tŭ tơkeng dơ̆ng kơ phrâo dơ̆ng tah tơdang ñu jing tha laih. Sĭt yơh, ñu ƀu dưi mŭt glaĭ pơ kian amĭ ñu tal dua kiăng kơ tŭ tơkeng rai dơ̆ng tah!” 5 Yêsu laĭ glaĭ tui anai, “Kâo laĭ kơ ih kơtang biă mă, tŭ tơkeng tui hăng yang đăr jing aka djŏp ôh. Ƀing mơnuih mơnam khŏm tŭ tơkeng gah bơngăt yua mơ̆ng Yang Bơngăt Hiam. Giŏng anŭn, ƀing gơñu dưi mưn tŭ tơlơi git gai mơ̆ng Ơi Adai yơh. 6 Sa čô mơnuih tŭ tơkeng tui hăng yang đăr kơnơ̆ng jing mơnuih mơnam đôč, samơ̆ Yang Bơngăt Hiam yơh hrih pơjing kơnuih phrâo amăng sa čô mơnuih. 7 Ih khŏm anăm dŏ kơtuă ôh kơ tơlơi Kâo laĭ anai, ‘Ƀing gih khŏm tŭ tơkeng dơ̆ng kơ phrâo mơ̆ng Yang Bơngăt Hiam.’ 8 Angĭn thut pơ anih pă ñu kiăng thut yơh. Ih hơmư̆ dơnai angĭn, samơ̆ ih ƀu thâo ruai ôh mơ̆ng pă ñu hlak rai ƀôdah pơpă ñu či nao. Ăt kar hăng anŭn mơ̆n, ih ƀu thâo ôh hiư̆m sa čô mơnuih tŭ tơkeng dơ̆ng yua mơ̆ng Yang Bơngăt Hiam.” 9 Nikodêmos tơña dơ̆ng tui anai, “Hiư̆m pă tơlơi anŭn dưi truh lĕ?” 10 Yêsu laĭ glaĭ tui anai, “Ih jing nai pơtô kơ ƀing Israel, tui anŭn ih khŏm thâo hluh kơ hơdôm tơlơi anŭn yơh. 11 Kâo laĭ kơ ih kơtang biă mă, ƀing gơmơi pơhiăp kơ tơlơi ƀing gơmơi thâo hăng ƀuh laih, samơ̆ ƀing gih ƀu đaŏ ôh kơ tơlơi ƀing gơmơi pơhiăp jing djơ̆. 12 Kâo hơmâo pơruai laih hăng ƀing gih hơdôm mơta tơlơi truh ƀơi lŏn tơnah anai laih anŭn ƀing gih ƀu đaŏ kơ Kâo ôh. Tui anŭn, sĭt ƀing gih ƀu či đaŏ kơnang kơ Kâo ôh tơdah Kâo pơhiăp khul mơta tơlơi truh amăng gah adai adih! 13 Ƀu hơmâo hlơi pô ôh đĭ nao pơ adai adih kiăng kơ thâo abih bang tơlơi hơmâo truh laih pơ anŭn, rơngiao kơ Kâo, Ană Mơnuih, jing Pô hơmâo trŭn rai laih mơ̆ng adai yơh.” 14 Kar hăng Môseh yŏng đĭ laih ala ngă hăng ko̱ng ƀơi tơmĕh kơyâo amăng tơdron ha̱r yơh, ăt tui anŭn mơ̆n arăng či yŏng đĭ Kâo, jing Ană Mơnuih, ƀơi kơyâo bơrơkal, 15 kiăng kơ hlơi đaŏ kơnang kơ Kâo dưi hơdip hlŏng lar hăng Ơi Adai amăng plei hiam. 16 “Ơi Adai khăp biă mă kơ abih bang mơnuih mơnam tơl Ñu pha brơi Ană Ñu kơnơ̆ng hơmâo ha čô, kiăng kơ hlơi pô đaŏ kơ Ană anŭn, ñu anŭn ƀu či răm rơngiă hĭ ôh samơ̆ či hơdip hlŏng lar hăng Ơi Adai amăng plei hiam yơh. 17 Ơi Adai pơkiaŏ rai Ană Ñu amăng lŏn tơnah anai ƀu djơ̆ kiăng kơ klă̱ kơđi kơ lŏn tơnah ôh, samơ̆ kiăng kơ pơklaih hĭ mơnuih mơnam yua mơ̆ng Ană anŭn yơh. 18 Hlơi pô đaŏ kơnang kơ Ană anŭn, Ơi Adai ƀu či klă̱ kơđi kơ ñu anŭn ôh, samơ̆ hlơi pô ƀu đaŏ kơnang ôh kơ Ñu, Ơi Adai hơmâo klă̱ kơđi laih kơ ñu anŭn, yuakơ ñu ƀu đaŏ kơnang ôh kơ Ană Ơi Adai kơnơ̆ng ha čô. 19 Anai yơh jing tơhơnal tơlơi yua hơget Ơi Adai klă̱ kơđi mơnuih mơnam: Pô kar hăng tơlơi bơngač hơmâo rai laih pơ lŏn tơnah anai, samơ̆ mơnuih mơnam khăp ngă tơlơi sat ƀai kar hăng khăp kơ tơlơi kơnăm mơmŏt, hloh kơ tơlơi đuaĭ tui Pô jing kar hăng tơlơi bơngač anŭn, yuakơ bruă mơnuă ƀing gơñu ngă jing sat ƀai. 20 Hlơi pô ngă sat ƀai ñu anŭn pơrơmut kơ Pô jing kar hăng tơlơi bơngač, laih anŭn ƀu či nao pơ Ñu ôh, yuakơ ñu huĭ kơ Pô anŭn pơrơđah hĭ tơlơi bruă sat ƀai ñu hơmâo ngă laih. 21 Samơ̆ hlơi pô ngă tui hăng tơlơi bruă jing sĭt, ñu anŭn nao pơ Pô jing kar hăng tơlơi bơngač yơh, kiăng kơ arăng dưi ƀuh rơđah rơđo̱ng bruă mơnuă ñu ngă, yuakơ ñu hơmâo ngă laih tui hăng tơlơi Ơi Adai kiăng.”
Yôhan Pơruai Kơ Ƀing Arăng Kơ Tơlơi Yêsu
22 Tơdơi kơ anŭn, Yêsu hăng ƀing ding kơna Ñu nao pơ kwar Yudea, jing anih Ñu hơmâo mông hăng ƀing gơ̆ laih anŭn kơčrâo brơi kơ ƀing gơ̆ ngă baptem kơ ƀing arăng. 23 Hlak anŭn, Yôhan ăt ngă brơi baptem kơ arăng mơ̆n pơ plei Ainôn jĕ plei Salim, yuakơ pơ anih anŭn hơmâo lu ia laih anŭn lu mơnuih ăt dŏ rai kiăng tŭ baptem yua mơ̆ng ñu. 24 Tơlơi anŭn truh laih hlâo kơ arăng mă krư̆ hĭ Yôhan amăng sang mơnă yơh. 25 Hơmâo tơlơi pơrơjăh tŏng krah ƀing ding kơna Yôhan hăng sa čô Yehudah pơkŏn kơ tơlơi phiăn rao pơrơgoh. 26 Ƀing gơñu nao pơ Yôhan hăng laĭ pơthâo tui anai, “Ơ Nai ăh, Pô rai bưp ih pơ gah adih ha̱ng ia Yurdan, jing Pô ih hơmâo pơruai laih hăng ƀing gơmơi, ră anai Ñu hlak dŏ ngă brơi baptem, laih anŭn lu mơnuih dơ̆ng nao pơ Ñu hloh kơ nao pơ ih.” 27 Yôhan pơhiăp tui anai, “Tơlơi anŭn huaĭ hơget gĕt ôh, yuakơ sa čô mơnuih dưi jing hĭ yom pơphan kơnơ̆ng tơdang Ơi Adai pha brơi kơ ñu đôč yơh. 28 Gih pô dưi pơkơjăp kơ tơlơi kâo laĭ tui anai, ‘Kâo pô ƀu djơ̆ Krist ôh, samơ̆ Ơi Adai pơkiaŏ rai laih kâo kiăng prap pre ƀing mơnuih kiăng kơ ju̱m Ñu.’ 29 Ƀơi tơlơi pơdŏ, neh hơđŭ anŭn lŏm kơ met han anŭn yơh. Pô gơyut jing pô dŏ dơ̆ng hăng dŏ tơguan kơ met han kiăng kơ rai hơ̆k mơak biă mă tơdang ñu hơmư̆ asăp met han pơhiăp. Ăt kar kaĭ mơ̆n, kâo mơak biă mă kơ mơta tơlơi ih hơmâo pơruai laih kơ kâo. 30 Yêsu khŏm jing yom prŏng tui; kâo khŏm jing ƀu yom tui yơh.”
Pô Rai Mơ̆ng Adai Adih
31 Yôhan laĭ dơ̆ng tui anai, “Yêsu jing Pô rai laih mơ̆ng gah adai jing yom prŏng hloh kơ abih bang mơnuih yơh. Pô tơbiă rai mơ̆ng amĭ ama ƀơi lŏn tơnah anai jing kơnơ̆ng jing mơnuih mơnam laih anŭn pơhiăp hơdôm tơlơi truh amăng lŏn tơnah anai đôč yơh. Samơ̆ yuakơ Pô anŭn tơbiă rai mơ̆ng adai adih, Ñu anŭn jing yom prŏng hloh kơ abih bang mơnuih yơh. 32 Ñu pơruai kơ hơdôm mơta tơlơi Ñu hơmâo ƀuh hăng hơmư̆ laih amăng adai adih, samơ̆ hơmâo ƀiă mơnuih biă mă hơmư̆ kơ tơlơi Ñu pơruai anŭn. 33 Hlơi pô hơmâo tŭ ju̱m laih kơ mơta tơlơi Ñu hơmâo pơruai laih, ñu anŭn pơrơklă kơ tơlơi Ơi Adai hơmâo pơhiăp laih jing sĭt yơh. 34 Ƀing ta thâo krăn anŭn jing sĭt, yuakơ Pô Ơi Adai hơmâo pơkiaŏ rai laih jing Pô pơtô tơlơi pơhiăp Ơi Adai yơh, laih anŭn ăt yuakơ Ơi Adai ngă brơi kơ Yang Bơngăt Hiam kơčrâo brơi rĭm mơta tơlơi Ñu pơhiăp hăng ngă yơh. 35 Yang Ama khăp kơ Yang Ană laih anŭn hơmâo ngă brơi laih kơ Ñu git gai abih bang tơlơi. 36 Hlơi pô đaŏ kơ Yang Ană, ñu anŭn či hơdip hăng Ơi Adai hlŏng lar, samơ̆ hlơi pô hơngah ƀu đaŏ ôh kơ Yang Ană, ñu anŭn ƀu či hơdip hăng Ơi Adai ôh, samơ̆ Ơi Adai či hil kơ ñu laih anŭn či pơkơhma̱l hĭ ñu hlŏng lar.”
Yêsu Pơhiăp Hăng Pô Đah Kơmơi Samaria
1 Ƀing Pharisai hơmư̆ hing kơ tơlơi Yêsu hơmâo lu ƀing ding kơna laih anŭn ngă brơi baptem lu hloh kơ Yôhan, 2 djơ̆ biă mă ñu, ƀu djơ̆ Yêsu pô ôh ngă brơi baptem, samơ̆ ƀing ding kơna Ñu yơh ngă. 3 Tơdang Yêsu thâo kơ tơlơi anŭn, Ñu đuaĭ hĭ mơ̆ng kwar Yudea laih anŭn wơ̆t glaĭ pơ kwar Galilê dơ̆ng. 4 Hlak anŭn, Ñu khưp ngă laih kiăng kơ khŏm găn nao amăng kwar Samaria. 5 Tui anŭn, Ñu nao truh pơ sa boh plei amăng kwar Samaria anăn Sukhar, jing jĕ pơ hơma Yakôb hơmâo jao brơi laih kơ ană ñu Yôsêp đưm hlâo adih. 6 Pơ anŭn hơmâo sa boh ia dơmun hlâo adih lŏm kơ Yakôb. Yêsu gleh rơmơ̆n mơ̆ng tơlơi rơbat laih anŭn Ñu dŏ be̱r jĕ ƀơi ia dơmun anŭn. Hlak anŭn, kơplăh wăh ƀơi yang hrơi dơ̆ng yơh. 7 Tơdang hơmâo sa čô đah kơmơi Samaria rai sŏ ia, Yêsu rơkâo kơ ñu tui anai, “Pha brơi kơ Kâo mơñum ia đa?” 8 Hlak anŭn, ƀing ding kơna Ñu mŭt nao pơ plei laih kiăng kơ blơi gơnam ƀơ̆ng. 9 Pô đah kơmơi Samaria anŭn laĭ kơ Ñu tui anai, “Ih jing sa čô Yehudah laih anŭn kâo jing sa čô đah kơmơi Samaria. Hiư̆m pă ih dưi rơkâo mơ̆ng kâo kiăng kơ mơñum ia lĕ?” Ñu laĭ tui anŭn yuakơ amăng rơnŭk anŭn, ƀing Yehudah ƀu kiăng tĕk wĕk hơget ôh hăng ƀing Samaria. 10 Yêsu laĭ glaĭ tui anai, “Tơdah ih thâo krăn tơlơi Ơi Adai kiăng pha brơi kơ ih laih anŭn thâo krăn hlơi pô hlak rơkâo kơ ih ia mơñum, sĭt ih či rơkâo kơ Kâo laih anŭn Kâo či pha brơi kơ ih ia jing ia ngă brơi kơ ih hơdip yơh.” 11 Pô đah kơmơi anŭn laĭ tui anai, “Ơ khua ăh, ih ƀu hơmâo gơnam hơget ôh kiăng kơ sŏ ia laih anŭn ia dơmun anai ăt dơlăm dơ̆ng mơ̆n, tui anŭn mơ̆ng pă ih dưi mă ia hơdip anŭn jing ia ngă brơi kơ kâo hơdip lĕ? 12 Ih jing yom prŏng hloh kơ ơi adon gơmơi Yakôb hă, jing pô brơi laih kơ ƀing gơmơi ia dơmun anai laih anŭn ñu pô ăt mơñum mơ̆ng ia anai mơ̆n, wơ̆t hăng ƀing ană đah rơkơi ñu, tơpul hlô mơnơ̆ng ñu ăt mơñum ia anai mơ̆n?” 13 Yêsu laĭ glaĭ tui anai, “Hlơi pô mơñum ia mơ̆ng ia dơmun anai, ñu anŭn ăt či dŏ mơhao dơ̆ng mơ̆n, 14 samơ̆ hlơi pô mơñum ia Kâo pha brơi kơ ñu, ñu anŭn ƀu či mơhao dơ̆ng tah. Sĭt yơh, ia Kâo brơi kơ ñu anŭn či jing hĭ amăng ñu kar hăng phŭn ia bluh jing tơlơi či ngă kơ ñu hơdip hlŏng lar yơh.” 15 Đah kơmơi anŭn laĭ tui anai, “Ơ khua, pha brơi bĕ ia anŭn kơ kâo, kiăng kơ kâo ƀu či mơhao laih anŭn ƀu rai sŏ ia pơ anai dơ̆ng tah.” 16 Yêsu pơđar kơ gơ̆ tui anai, “Nao iâu bĕ rơkơi ih laih anŭn wơ̆t glaĭ pơ anai.” 17 Đah kơmơi anŭn laĭ tui anai, “Kâo ƀu hơmâo rơkơi ôh.” Yêsu laĭ kơ gơ̆ tui anai, “Ih laĭ djơ̆ yơh tơdang ih laĭ kơ tơlơi ih ƀu hơmâo rơkơi ôh. 18 Djơ̆ biă mă ñu, ih hơmâo laih rơma čô rơkơi, bơ kơ rơkơi ih hlak dŏ ră anai ƀu djơ̆ rơkơi ih ôh. Tơlơi ih phrâo pơhiăp anŭn jing djơ̆ biă mă yơh.” 19 Pô đah kơmơi anŭn laĭ tui anai, “Ơ khua ăh, kâo thâo ih jing pô pơala. 20 Ƀing ơi adon gơmơi kơkuh pơpŭ kơ Ơi Adai ƀơi čư̆ anai, samơ̆ ƀing gih jing ƀing Yehudah yap kơ anih ƀing gơmơi khŏm kơkuh pơpŭ jing anih amăng plei phŭn Yerusalaim.” 21 Yêsu pơhiăp tui anai, “Ơ đah kơmơi ăh, đaŏ kơ Kâo bĕ tơdang Kâo laĭ kơ tơlơi hrơi mông anŭn či truh tơdang ƀing gih či kơkuh pơpŭ kơ Yang Ama ƀu djơ̆ kơnơ̆ng ƀơi čư̆ anai đôč ôh ăt kŏn djơ̆ amăng plei Yerusalaim lơi. 22 Ƀing gih, jing ƀing Samaria, kơkuh pơpŭ kơ tơlơi ƀing gih ƀu thâo ôh. Ƀing gơmơi, jing ƀing Yehudah, kơkuh pơpŭ kơ tơlơi ƀing gơmơi thâo, yuakơ mơ̆ng ƀing gơmơi, jing ƀing Yehudah yơh, Ơi Adai hơmâo pơkiaŏ rai laih Pô pơklaih mơnuih mơnam. 23 Samơ̆ hrơi mông anŭn hlak truh laih anŭn hơmâo truh laih yơh tơdang ƀing mơnuih kơkuh pơpŭ sĭt kơ Ơi Adai či kơkuh pơpŭ kơ Ñu tui hăng Yang Bơngăt Ñu kơčrâo brơi laih anŭn tui hăng mơta tơlơi jing sĭt yơh, yuakơ Yang Ama hơduah kiăng kơ ƀing mơnuih kơkuh pơpŭ kơ Ñu kar hăng anŭn yơh. 24 Hơnŭn yơh, Ơi Adai jing yang bơngăt, hlơi pô kơkuh pơpŭ kơ Ñu, ñu anŭn khŏm kơkuh pơpŭ kơ Ñu tui hăng Yang Bơngăt Ñu kơčrâo brơi laih anŭn tui hăng tơlơi sĭt yơh.” 25 Pô đah kơmơi anŭn laĭ tui anai, “Kâo thâo kơ tơlơi Pô Messiah, jing Pô Krist anŭn, hlak rai. Tơdang Ñu rai, Ñu či pơblang abih bang tơlơi bruă ƀing gơmơi kiăng kơ thâo yơh.” 26 Giŏng anŭn, Yêsu laĭ dơ̆ng tui anai, “Kâo, jing Pô hlak pơhiăp anai yơh, jing Pô Messiah.”
Ƀing Ding Kơna Yêsu Glaĭ Pơ Ñu
27 Ƀơi mông anŭn ƀing ding kơna Ñu truh laih anŭn ƀing gơñu le̱ng kơ kơtuă soh sel tơdang ƀuh Yêsu hlak pơhiăp hăng sa čô đah kơmơi. Samơ̆ ƀu hơmâo hlơi pô ôh tơña kơ pô đah kơmơi anŭn tui anai, “Hơget tơlơi Ih kiăng lĕ?” Ƀôdah tơña kơ Yêsu tui anai, “Yua hơget Ih pơhiăp hăng ñu lĕ?” 28 Giŏng anŭn, pô đah kơmơi anŭn lui hĭ čeh ia ñu laih anŭn wơ̆t glaĭ pơ plei hăng ruai kơ ƀing ană plei anŭn tui anai, 29 “Rai lăng bĕ, hơmâo sa čô mơnuih dưi pơruai glaĭ kơ kâo abih bang tơlơi kâo hơmâo ngă laih hlâo adih. Ñu anŭn ƀu djơ̆ Krist ôh hă?” 30 Tui anŭn, abih bang mơnuih amăng plei tơbiă laih anŭn nao pơ Yêsu. 31 Tơdang anŭn, ƀing ding kơna Ñu rơkâo kơ Ñu tui anai, “Ơ Nai ăh, ƀơ̆ng huă bĕ.” 32 Samơ̆ Yêsu laĭ kơ ƀing gơñu tui anai, “Kâo hơmâo gơnam ƀơ̆ng kiăng kơ ƀơ̆ng samơ̆ ƀing gih ƀu thâo djơ̆ ôh.” 33 Tơdơi kơ Ñu pơhiăp laih tui anŭn, ƀing ding kơna Ñu pơlaĭ hăng tơdruă gơñu tui anai, “Hơmâo mơnuih ba rai gơnam ƀơ̆ng kơ Ñu laih hă?” 34 Yêsu laĭ dơ̆ng tui anai, “Gơnam ƀơ̆ng Kâo jing kar hăng tơlơi ngă tui tơlơi kiăng Pô pơkiaŏ rai laih Kâo kiăng kơ Kâo ngă laih anŭn pơgiŏng hĭ bruă anŭn yơh. 35 Ƀing gih hơmâo tơlơi pơhiăp pơhreng tui anai, ‘Dŏ pă̱ blan dơ̆ng truh kơ bơyan hơpuă.’ Samơ̆ Kâo laĭ kơ ƀing gih, lăng pơñen bĕ ƀơi ƀing mơnuih jing ƀing kar hăng pơdai amăng đang hơma! Ƀing gơñu jing kar hăng pơdai tơsă tơdang bơyan hơpuă hơmâo truh laih yơh. 36 Ră anai mơnuih kar hăng pô hơpuă hlak tŭ mă tơlơi bơni laih hăng pơƀut glaĭ ƀing mơnuih kar hăng pơƀut glaĭ gơnam tăm tui anŭn ƀing gơñu dưi hơdip hlŏng lar, tui anŭn mơnuih jing pô sai hăng mơnuih pơkŏn jing pô hơpuă hơ̆k mơak hrŏm hơbĭt yơh. 37 Tui anŭn, hơmâo tơlơi pơhiăp pơhreng tui anai, ‘Pô anai sai, pô pơkŏn hơpuă’ jing djơ̆ biă mă yơh. 38 Kâo pơkiaŏ laih ƀing gih kiăng kơ mă bruă kar hăng hơpuă pơ anih ƀing gih kar hăng ƀu sai ôh. Ƀing pơkŏn hơmâo pơgiŏng laih bruă tơnap laih anŭn ƀing gih kơnơ̆ng tŭ mơyŭn, kar hăng hơpuă, mơ̆ng bruă gơñu đôč yơh.”
Lu Ƀing Samaria Đaŏ Kơnang Kơ Yêsu
39 Hơmâo lu ƀing Samaria mơ̆ng plei anŭn đaŏ kơnang kơ Yêsu yuakơ tơlơi pô đah kơmơi anŭn pơruai laih kơ ƀing gơñu tui anai, “Ñu dưi pơruai glaĭ laih kơ kâo abih bang tơlơi kâo hơmâo ngă hlâo adih.” 40 Tui anŭn, tơdang ƀing Samaria nao pơ Yêsu, ƀing gơñu rơkâo kơ Ñu dŏ glaĭ hăng ƀing gơ̆, laih anŭn Yêsu dŏ glaĭ pơ anŭn dua hrơi yơh. 41 Yua mơ̆ng hơdôm tơlơi Yêsu hơmâo pơruai laih kơ ƀing gơñu, hơmâo lu mơnuih dơ̆ng đaŏ kơnang kơ Ñu. 42 Ƀing gơñu laĭ kơ pô đah kơmơi anŭn tui anai, “Ƀing gơmơi ƀu đaŏ dơ̆ng tah kơnơ̆ng tui hăng tơlơi ih pơruai laih, samơ̆ ră anai gơmơi pô yơh hơmâo hơmư̆ laih Ñu, laih anŭn thâo sĭt Ñu yơh jing Pô dưi pơklaih hĭ abih bang mơnuih mơnam yơh.”
Yêsu Pơsuaih Ană Rơkơi Pô Khua Tơhan
43 Tơdơi kơ dua hrơi anŭn, Yêsu đuaĭ nao pơ kwar Galilê yơh. 44 Hlâo kơ anŭn Yêsu pô hơmâo laĭ laih kơ tơlơi sa čô pô pơala arăng ƀu pơpŭ pơyom ôh amăng plei ñu pô. 45 Tơdang Ñu truh pơ kwar Galilê, ƀing mơnuih kwar anŭn čơkă mơak hăng Ñu yơh. Ƀing gơñu hơmâo ƀuh laih abih bang tơlơi Ñu hơmâo ngă laih ƀơi tơlơi phet Tơlơi Găn amăng plei Yerusalaim, yuakơ ƀing gơñu ăt nao pơ tơlơi phet anŭn mơ̆n. 46 Sa wơ̆t dơ̆ng, Yêsu nao čuă ngui plei Kana amăng kwar Galilê, jing plei Ñu hơmâo pơplih hĭ laih ia ƀlăng jing hĭ tơpai boh kơƀâo. Pơ anŭn hơmâo sa čô khua tơhan, ană đah rơkơi ñu hlak dŏ ruă kơtang pơ plei Kapharnaoum. 47 Tơdang pô khua anŭn hơmư̆ kơ tơlơi Yêsu hơmâo rai laih amăng kwar Galilê mơ̆ng kwar Yudea, ñu nao bưp Yêsu laih anŭn rơkâo kơ Ñu nao pơsuaih brơi ană ñu jĕ či djai laih. 48 Tui anŭn, Yêsu laĭ kơ gơ̆ tui anai, “Kơnơ̆ng tơdah ƀing gih ƀuh Kâo ngă lu gru tơlơi mơsêh mơyang dơ̆ng đôč kiăng pơrơđah hlơi Kâo jing, anŭn kăh ƀing gih či đaŏ kơnang kơ Kâo.” 49 Pô khua anŭn laĭ tui anai, “Ơ khua ăh, rơkâo kơ Ih rai bĕ hlâo kơ ană kâo djai.” 50 Yêsu pơhiăp tui anai, “Nao bĕ, ană đah rơkơi ih či hơdip yơh.” Pô khua anŭn đaŏ kơ boh pơhiăp Yêsu laih anŭn glaĭ yơh. 51 Tơdang ñu ăt dŏ rơbat ƀơi jơlan, hơmâo ƀing ding kơna ñu đuaĭ nao čơkă ñu hăng ruai kơ tơlơi ană ñu ăt dŏ hơdip. 52 Tơdang pô khua anŭn tơña kơ ƀing gơñu hlak ƀơi mông pă ană ñu dưi suaih, ƀing gơñu laĭ glaĭ tui anai, “Ñu suaih hĭ mơ̆ng ruă tơ̆m brơi ƀơi sa mông klăm.” 53 Giŏng anŭn, pô ama anŭn thâo krăn mơtam kơ tơlơi djơ̆ ƀơi mông anŭn yơh Yêsu hơmâo pơhiăp laih hăng ñu tui anai, “Ană đah rơkơi ih či hơdip yơh.” Tui anŭn, ñu hăng abih bang sang ñu đaŏ kơnang kơ Yêsu yơh. 54 Anŭn jing tơlơi mơsêh mơyang tal dua Yêsu hơmâo ngă laih tơdang Ñu tơbiă mơ̆ng kwar Yudea hăng glaĭ pơ kwar Galilê.
Yêsu Pơsuaih Sa Čô Pô Rơwen
1 Tơdơi ƀiă kơ anŭn, Yêsu đĭ nao pơ plei Yerusalaim kiăng kơ nao pơ sa tơlơi phet ƀing Yehudah. 2 Hlak anŭn, amăng plei Yerusalaim jĕ pơ Bah amăng Triu hơmâo sa boh ia dơnao arăng pơanăn Bethesda, amăng tơlơi Aramit, laih anŭn jum dar ia dơnao anŭn hơmâo rơma boh adri̱ng wơ̆t hăng bơbŭng kơ hơdôm adri̱ng anŭn. 3 Pơ anŭn hơmâo lu mơnuih duăm ruă dŏ đih, anŭn jing đơđa mơnuih bum mơta, mơnuih rơwen rơwo, mơnuih jo tơkai tơngan, laih anŭn ƀing gơñu dŏ tơguan kơ ia dơnao pơpư̆ dar. 4 Rĭm ƀiă hrơi hơmâo sa čô ling jang Khua Yang či trŭn pơ ia anŭn hăng pơdar hĭ ia anŭn. Pô ruă pă trŭn amăng ia dơnao hlâo tơdơi kơ rĭm wơ̆t ia anŭn tŭ pơdar, ñu anŭn či suaih hĭ mơ̆ng djŏp mơta tơlơi ruă ñu hơmâo yơh. 5 Pơ anih anŭn hơmâo sa čô đah rơkơi dŏ ruă nuă amăng klâopluh-sapăn thŭn laih. 6 Tơdang Yêsu ƀuh ñu hlak dŏ đih pơ anŭn laih anŭn ăt thâo kơ tơlơi ñu hơmâo tơlơi ruă anŭn sui thŭn laih, Ñu tơña kơ gơ̆ tui anai, “Ih kiăng suaih mơ̆?” 7 Pô ruă anŭn laĭ glaĭ tui anai, “Ơ Khua ăh, kâo ƀu hơmâo hlơi pô ôh djru ba pioh kâo amăng ia tơdang ia dơnao pơpư̆. Tơdang kâo gir kiăng nao pơ ia anŭn, mơnuih pơkŏn nao pơ ia hlâo kơ kâo.” 8 Giŏng anŭn, Yêsu laĭ kơ gơ̆ tui anai, “Tơgŭ bĕ! Mă đĭ bĕ kiao ih hăng rơbat nao bĕ.” 9 Ƀơi mông anŭn mơtam pô anŭn suaih hĭ. Ñu mă glăm kiao ñu hăng rơbat nao yơh. Tơlơi truh anŭn jing amăng hrơi Saƀat. 10 Tui anŭn, ƀing khua djă̱ akŏ ƀing Yehudah laĭ kơ pô hơmâo suaih laih pơ anŭn tui anai, “Hrơi anai jing hrơi Saƀat. Tơlơi phiăn khă kơ ih ƀu dưi glăm ba kiao ih ôh.” 11 Samơ̆ gơ̆ laĭ glaĭ tui anai, “Pô hơmâo pơsuaih hĭ laih kâo pơđar kơ kâo tui anai, ‘Mă đĭ kiao ih bĕ hăng rơbat nao bĕ.’ ” 12 Tui anŭn, ƀing gơñu laĭ kơ gơ̆ dơ̆ng tui anai, “Hlơi pô anŭn jing pô hơmâo pơđar laih kơ ih kiăng kơ glăm ba kiao hăng rơbat lĕ?” 13 Samơ̆ pô suaih anŭn ƀu thâo ôh hlơi pô hơmâo ngă laih tơlơi anŭn, yuakơ Yêsu hơmâo đuaĭ mŭt laih amăng ƀing mơnuih lu pơ anŭn. 14 Tơdơi kơ anŭn, Yêsu bưp pô suaih anŭn amăng wăl tơdron sang yang laih anŭn laĭ kơ ñu tui anai, “Lăng anai, ră anai ih hơmâo suaih laih. Anăm ngă soh dơ̆ng tah, huĭ kơ tơlơi răm hloh dơ̆ng či truh kơ ih.” 15 Pô suaih anŭn đuaĭ hĭ laih anŭn ruai hăng ƀing khua djă̱ akŏ ƀing Yehudah kơ tơlơi Yêsu yơh jing Pô hơmâo pơsuaih hĭ laih ñu.
Yêsu Yap Ñu Pô Jing Ană Ơi Adai
16 Tui anŭn, yuakơ Yêsu hlak ngă khul bruă kar hăng Ñu hơmâo pơsuaih hĭ laih pô anŭn amăng hrơi Saƀat, ƀing khua djă̱ akŏ ƀing Yehudah čơdơ̆ng pơhiăp khul tơlơi sat kơ tơlơi Yêsu yơh. 17 Yêsu laĭ kơ ƀing gơñu tui anai, “Ama kâo hơmâo mă bruă Ñu hlŏng truh pơ hrơi anai, tui anŭn, Kâo ăt mă bruă kar hăng anŭn mơ̆n.” 18 Yuakơ tơhơnal tơlơi anŭn yơh, ƀing khua djă̱ akŏ ƀing Yehudah gir ngă abih bang tơlơi kơtang hloh dơ̆ng kiăng kơ pơdjai hĭ Yêsu, anŭn jing yuakơ tơlơi Yêsu ƀu djơ̆ kơnơ̆ng pơjŏh hĭ tơlơi phiăn hrơi Saƀat đôč ôh, samơ̆ ăt yap kơ Ơi Adai jing Ama Ñu pô laih anŭn pơjing Ñu pô pơdơ̆ pơđơ̱r hăng Ơi Adai mơ̆n. 19 Yêsu laĭ kơ ƀing gơñu tui anai, “Kâo laĭ kơ ƀing gih sĭt biă mă, Kâo, jing Ană, ƀu dưi ngă bruă hơjăn Kâo pô ôh. Kâo kơnơ̆ng ngă hơdôm bruă Kâo ƀuh Ama Kâo hlak ngă đôč yơh, yuakơ hơget bruă Ama Kâo ngă, Kâo, jing Ană, ăt ngă kar hăng anŭn mơ̆n. 20 Ama Kâo khăp kơ Kâo, jing Ană Ñu, laih anŭn pơrơđah brơi kơ Kâo abih bang bruă Ñu ngă. Ƀing gih či hli̱ng hla̱ng biă mă yơh tơdang Ama Kâo či pơrơđah kơ Kâo hơdôm tơlơi bruă yom prŏng hloh kơ hơdôm tơlơi bruă anai dơ̆ng. 21 Ăt hrup hăng Ama Kâo ngă kơ ƀing mơnuih djai hơdip glaĭ dơ̆ng, Kâo, jing Ană Ñu, ăt či pơhơdip glaĭ hlơi pô Kâo kiăng mơ̆n. 22 Hloh kơ anŭn dơ̆ng, Ama Kâo ƀu phat kơđi kơ hlơi pô ôh, samơ̆ Ñu hơmâo jao laih tơlơi dưi kơ Kâo kiăng kơ phat kơđi abih bang mơnuih mơnam, 23 kiăng kơ abih bang mơnuih dưi pơpŭ kơ Kâo, jing Ană Ñu, kar hăng ƀing gơñu pơpŭ kơ Ama Kâo. Hlơi pô ƀu pơpŭ ôh kơ Kâo, jing Ană Ñu, ñu anŭn ăt ƀu pơpŭ ôh kơ Ama Kâo, jing Pô pơkiaŏ rai laih Kâo, jing Ană Ñu.” 24 “Kâo laĭ sĭt biă mă kơ ƀing gih, hlơi pô hơmư̆ hiăp Kâo laih anŭn đaŏ kơnang kơ Pô pơkiaŏ rai Kâo, Ơi Adai či ngă kơ pô anŭn hơdip hlŏng lar laih anŭn Ñu ƀu či klă̱ kơđi kơ gơ̆ ôh. Ñu anŭn ƀu či djai gah bơngăt dơ̆ng tah samơ̆ hơmâo čơdơ̆ng hơdip hlŏng lar yơh. 25 Kâo laĭ sĭt biă mă kơ ƀing gih, hrơi mông hlak truh laih anŭn ră anai hơmâo truh laih tơdang ƀing mơnuih djai gah bơngăt či hơmư̆ hiăp Kâo, Ană Ơi Adai, laih anŭn hlơi pô hơmư̆ hăng đaŏ kơnang kơ tơlơi Kâo pơhiăp, ñu anŭn či hơdip hlŏng lar yơh. 26 Ama Kâo pô yơh dưi ngă kơ mơnuih kiăng kơ hơdip, tui anŭn Ñu hơmâo jao brơi laih tơlơi dưi kơ Kâo, jing Ană Ñu, kiăng kơ dưi djru mơnuih hơdip hlŏng lar mơ̆n. 27 Yuakơ Kâo jing Pô trŭn rai laih mơ̆ng adai, Ama Kâo hơmâo pha brơi laih tơlơi dưi kơ Kâo kiăng kơ phat kơđi mơnuih mơnam. 28 “Anăm dŏ hli̱ng hla̱ng ôh kơ tơlơi anai, yuakơ hrơi mông či truh tơdang abih bang ƀing hơmâo djai laih či hơmư̆ hiăp Kâo laih anŭn ƀing gơñu či jing hĭ hơdip dơ̆ng yơh. 29 Anŭn jing ƀing hlơi pô hơmâo ngă hiam klă laih či hơdip glaĭ hăng hơdip hlŏng lar, laih anŭn ƀing hlơi pô hơmâo ngă sat ƀai laih či hơdip glaĭ dơ̆ng laih anŭn Kâo či klă̱ kơđi kơ ƀing gơñu kiăng kơ tŭ tơlơi pơkơhma̱l yơh. 30 Kâo pô ƀu dưi ngă ôh tơlơi bruă kar hăng anŭn. Kâo phat kơđi kơnơ̆ng tui hăng tơlơi Kâo hơmư̆ đôč, laih anŭn Kâo phat kơđi tơpă hơnơ̆ng, yuakơ Kâo ƀu kiăng kơnơ̆ng pơmơak kơ Kâo pô đôč ôh, samơ̆ Kâo kiăng pơmơak kơ Pô pơkiaŏ rai Kâo yơh.”
Khul Tơlơi Ngă Gơ̆ng Jơlan Kơ Tơlơi Yêsu
31 Yêsu laĭ dơ̆ng tui anai, “Tơdah Kâo kơnơ̆ng ngă gơ̆ng jơlan kơ Kâo pô, ƀing mơnuih mơnam ƀu či đaŏ kơnang kơ khul boh hiăp Kâo ôh. 32 Ăt hơmâo pô pơkŏn mơ̆n, anŭn jing Ama Kâo, ngă gơ̆ng jơlan hiam klă kơ Kâo, laih anŭn Kâo thâo hơget tơlơi Ñu pơruai kơ tơlơi Kâo jing djơ̆ yơh. 33 “Ƀing gih hơmâo pơkiaŏ laih mơnuih pơala gih nao pơ Yôhan laih anŭn Yôhan hơmâo pơhiăp laih tơlơi sĭt kơ tơlơi Kâo. 34 Bơ kơ Kâo, Kâo ƀu kơnang kơ ƀing mơnuih mơnam ôh kiăng kơ ră ruai kơ ƀing arăng kơ tơlơi Kâo, samơ̆ Kâo pơruai laih kơ ƀing gih kơ tơlơi Yôhan pơhiăp laih kơ tơlơi Kâo tui anŭn Ơi Adai dưi pơklaih hĭ ƀing gih yơh. 35 Yôhan jing kar hăng apui kơđen hơmâo jă̱ laih anŭn pha brơi tơlơi bơngač, laih anŭn amăng ƀiă hrơi ƀing gih mơak laih kiăng kơ hơmư̆ hơget tơlơi ñu pơhiăp laih kar hăng tŭ mơak kơ tơlơi bơngač. 36 “Samơ̆ Kâo hơmâo đơđa mơta tơlơi yom prŏng hloh kơ tơlơi Yôhan pơruai laih kơ ƀing gih kơ tơlơi Kâo. Khul tơlơi mơsêh mơyang Ama Kâo hơmâo pơtă laih kơ Kâo kiăng kơ ngă, jing tơlơi Kâo hlak dŏ ngă anai, hơdôm bruă anŭn ngă gơ̆ng jơlan kơ tơlơi Ama hơmâo pơkiaŏ rai Kâo yơh. 37 Laih anŭn Ama Kâo pô yơh, jing Pô hơmâo pơkiaŏ rai laih Kâo, ngă gơ̆ng jơlan pơmĭn ƀlơ̆ng kơ Kâo. Ƀing gih aka ƀu hơmư̆ djơ̆ ôh hiăp Ñu laih anŭn ƀu ƀuh djơ̆ Ñu ôh, 38 laih anŭn ƀing gih ƀu đaŏ kơnang sĭt ôh kơ tơlơi Ñu hơmâo pơhiăp laih, yuakơ ƀing gih ƀu đaŏ kơnang kơ Kâo ôh, jing Pô Ơi Adai hơmâo pơkiaŏ rai laih. 39 Ƀing gih triăng hrăm Boh Hiăp Ơi Adai yuakơ ƀing gih pơmĭn kơ tơlơi yua mơ̆ng tơlơi ƀing gih hrăm anŭn yơh, ƀing gih dưi hơdip hăng Ơi Adai hlŏng lar. Anai yơh jing Boh Hiăp Ơi Adai ngă gơ̆ng jơlan kơ Kâo, 40 samơ̆ ƀing gih hơngah ƀu rai pơ Kâo ôh kiăng hơdip hlŏng lar.” 41 “Kâo ƀu hlak gir kiăng kơ ngă kơ ƀing mơnuih mơnam bơni kơ Kâo ôh, 42 samơ̆ Kâo thâo krăn ƀing gih. Kâo thâo kơ tơlơi ƀing gih ƀu khăp kơ Ơi Adai hăng tơlơi tơpă ôh. 43 Ama Kâo pha brơi tơlơi dưi kơ Kâo kiăng kơ rai laih anŭn ƀing gih ƀu tŭ ju̱m Kâo ôh, samơ̆ tơdah hlơi pha brơi tơlơi dưi kơ ñu pô kiăng kơ rai, ƀing gih či tŭ ju̱m ñu anŭn mơtam yơh. 44 Tơdah ƀing gih kơnơ̆ng khăp bơni hơơč kơ tơdruă, samơ̆ ƀing gih ƀu kiăng ngă tui tơlơi Ơi Adai či bơni kơ ƀing gih, sĭt yơh ƀing gih ƀu dưi đaŏ kơnang kơ Kâo ôh. 45 “Anăm pơmĭn ôh kơ tơlơi Kâo či phŏng kơđi kơ ƀing gih ƀơi anăp Ama Kâo. Pô či phŏng kơđi kơ ƀing gih jing Môseh, jing pô ƀing gih čang rơmang kiăng pơgang brơi kơ ƀing gih. 46 Tơdah ƀing gih đaŏ kơnang kơ Môseh, ƀing gih ăt či đaŏ kơnang kơ Kâo mơ̆n, yuakơ ñu čih laih kơ tơlơi Kâo. 47 Samơ̆ yuakơ ƀing gih ƀu đaŏ kơnang ôh kơ tơlơi Môseh čih laih kơ tơlơi Kâo, sĭt yơh ƀing gih ƀu dưi đaŏ kơnang ôh kơ tơlơi Kâo pơhiăp!”
Yêsu Čem Rơma-Rơbâo Čô Mơnuih
1 Tơdơi kơ anŭn ƀiă, Yêsu wơ̆t hăng ƀing ding kơna Ñu găn nao hăng sŏng pơ gah adih ha̱ng ia dơnao Galilê, dơnao anŭn ăt jing dơnao Tiberias mơ̆n, 2 laih anŭn hơmâo ƀing mơnuih lu kiaŏ tui Yêsu ƀơi jơlan lŏn yuakơ ƀing gơñu hơmâo ƀuh laih hơdôm gru tơlơi mơsêh mơyang Ñu hơmâo pơsuaih laih ƀing duăm ruă. 3 Giŏng anŭn, Yêsu đĭ nao pơ bŏl čư̆ laih anŭn dŏ be̱r hrŏm hăng ƀing ding kơna Ñu kiăng kơ pơtô kơ ƀing gơñu. 4 Tơlơi Phet Tơlơi Găn ƀing Yehudah jĕ či truh laih. 5 Tơdang Yêsu angak lăng đĭ ƀuh ƀing mơnuih lu rai pơ Ñu, Ñu tơña kơ ding kơna Ñu Philip tui anai, “Pơ anih pă ƀing ta dưi blơi ƀañ tơpŭng kơ ƀing mơnuih anai kiăng kơ ƀơ̆ng lĕ?” 6 Yêsu tơña tui anŭn kơnơ̆ng kiăng kơ lông lăng đôč tơdah Philip đaŏ mơ̆n thâo kơ tơlơi Yêsu či ngă đơđa tơlơi bruă, yuakơ Ñu hơmâo pơmĭn laih tơlơi Ñu či ngă. 7 Philip laĭ glaĭ kơ Ñu tui anai, “Nua apăh sapăn blan ƀu dưi blơi djŏp ôh ƀañ tơpŭng kơ rĭm čô wơ̆t tơdah kơnơ̆ng hơmâo sa čơđeh anet đôč!” 8 Pô ding kơna pơkŏn anăn Andre, adơi Simôn, laĭ tui anai, 9 “Pơ anai hơmâo sa čô čơđai rơkơi hơmâo rơma tơlŏ ƀañ tơpŭng hăng dua drơi akan anet, samơ̆ sĭt hơdôm gơnam ƀơ̆ng anŭn ƀu či pơpha djŏp ôh kơ ƀing mơnuih lu kar hăng anai!” 10 Yêsu laĭ tui anai, “Brơi kơ ƀing gơñu dŏ be̱r bĕ.” Pơ anih anŭn hơmâo rơ̆k mơda lu laih anŭn ƀing gơñu dŏ be̱r yơh. Ƀing mơnuih hơmâo pơ anŭn kơplăh wăh rơma-rơbâo čô kơnơ̆ng yap ƀing đah rơkơi đôč. 11 Giŏng anŭn, Yêsu mă hơdôm ƀañ tơpŭng anŭn, bơni hơơč kơ Ơi Adai laih anŭn jao brơi kơ ƀing ding kơna Ñu pơpha brơi gơnam ƀơ̆ng kơ ƀing mơnuih dŏ be̱r pơ anŭn ƀơ̆ng dơ̆ pă ƀing gơñu kiăng yơh. Ñu ăt ngă kar hăng anŭn mơ̆n hăng khul akan anŭn. 12 Tơdang abih bang ƀing gơñu ƀơ̆ng trơi laih, Yêsu pơđar kơ ƀing ding kơna Ñu tui anai, “Duñ mă bĕ hơdôm čơđeh rơmeh rơbeh anŭn. Anăm pơhoăč hĭ čơđeh rơmeh anŭn ôh.” 13 Tui anŭn, ƀing gơñu duñ mă hơdôm čơđeh rơmeh anŭn hơmâo bă truh kơ pluh-dua boh bai hăng čơđeh rơmeh mơ̆ng rơma tơlŏ ƀañ tơpŭng ƀing arăng ƀơ̆ng rơbeh laih. 14 Tơdơi kơ ƀing mơnuih lu anŭn ƀuh tơlơi mơsêh mơyang Yêsu hơmâo ngă laih, ƀing gơñu čơdơ̆ng laĭ tui anai, “Sĭt yơh anai jing Pô Pơala, jing Pô khŏm rai pơ lŏn tơnah anai yơh.” 15 Yuakơ Yêsu thâo krăn tơlơi pơmĭn gơñu kiăng kơ pơgŏ̱ Yêsu jing pơtao, Ñu rơiăt đuaĭ nao hĭ hơjăn pơ čư̆.
Yêsu Rơbat Ƀơi Jơlah Ia
16 Tơdang klăm truh laih, ƀing ding kơna Ñu trŭn nao pơ ha̱ng ia dơnao, 17 hăng đĭ amăng sa boh sŏng kiăng găn nao pơ gah adih dơnao anŭn, či nao pơ plei Kapharnaoum yơh. Hlak anŭn hrơi mơmŏt laih, laih anŭn Yêsu ăt aka ƀu nao truh pơ ƀing gơñu ôh. 18 Angĭn hlak thut kơtang laih anŭn jơlah ia păh pung prŏng tui yơh. 19 Tơdang ƀing gơñu hơmâo waih sŏng gơñu truh kơ klâo juă ƀôdah klâo juă sămkrah laih, ƀing gơñu ƀuh Yêsu hlak rơbat rai pơ sŏng gơñu ƀơi jơlah ia. Ƀing gơñu huĭ bra̱l biă mă yơh. 20 Samơ̆ Yêsu laĭ, “Kâo yơh anai, anăm huĭ ôh!” 21 Tui anŭn, ƀing ding kơna brơi kơ Yêsu đĭ amăng sŏng, ƀơi mông anŭn mơtam sŏng gơñu truh hĭ pơ ha̱ng jing anih ƀing gơñu kiăng kơ nao yơh. 22 Amăng hrơi tŏ tui, ƀing mơnuih lu, jing ƀing dŏ pơ ha̱ng gah adih dơnao, thâo krăn kơnơ̆ng sa boh sŏng đôč pơ anŭn laih anŭn Yêsu ƀu hơmâo đĭ amăng sŏng anŭn hrŏm hăng ƀing ding kơna Ñu ôh, samơ̆ ƀing ding kơna anŭn hơmâo đuaĭ nao hĭ laih hơjăn gơñu. 23 Đơđa hơmâo sŏng pơkŏn mơ̆ng plei Tiberias rai jĕ pơ anih ƀing mơnuih lu hơmâo ƀơ̆ng laih ƀañ tơpŭng tơdơi kơ Yêsu hơmâo bơni hơơč hăng pha brơi laih kơ ƀing arăng. 24 Tơdang ƀing mơnuih lu thâo krăn kơ tơlơi Yêsu wơ̆t hăng ƀing ding kơna Ñu ƀu dŏ pơ anŭn ôh, ƀing gơñu đĭ amăng khul sŏng anŭn hăng nao pơ plei Kapharnaoum kiăng hơduah Yêsu.
Yêsu, Jing Kar Hăng Ƀañ Tơpŭng, Ngă Kơ Mơnuih Mơnam Hơdip
25 Tơdang ƀing gơñu ƀuh Yêsu pơ ha̱ng ia gah adih, ƀing gơñu rơkâo kơ Ñu tui anai, “Ơ Nai, hơbĭn Ih hơmâo rai laih pơ anai lĕ?” 26 Yêsu laĭ glaĭ tui anai, “Kâo laĭ sĭt biă mă kơ ƀing gih, ƀing gih hơduah sem Kâo, ƀu djơ̆ kơ tơlơi ƀing gih ƀuh laih tơlơi mơsêh mơyang ôh, samơ̆ yuakơ ƀing gih hơmâo ƀơ̆ng laih ƀañ tơpŭng hăng trơi hrăp laih. 27 Anăm kơnơ̆ng mă bruă kơ gơnam ƀơ̆ng thâo răm rai đôč ôh, samơ̆ khăp kiăng bĕ kơ tơlơi kar hăng gơnam ƀơ̆ng či djru kơ ƀing gih kiăng kơ hơdip hlŏng lar, jing gơnam Kâo, jing Ană Mơnuih mơ̆ng plei hiam, či pha brơi kơ ƀing gih. Ơi Adai, Ama Kâo, hơmâo pơrơđah laih kơ tơlơi Ñu pơrơklă kơ tơlơi bruă Kâo hlak ngă.” 28 Giŏng anŭn, ƀing gơñu tơña kơ Yêsu tui anai, “Hơget tơlơi ƀing gơmơi khŏm ngă kiăng kơ pơmơak kơ Ơi Adai lĕ?” 29 Yêsu laĭ glaĭ tui anai, “Anai yơh jing bruă Ơi Adai hơduah kiăng: Đaŏ bĕ kơ Kâo, jing Pô Ơi Adai hơmâo pơkiaŏ rai laih.” 30 Tui anŭn, ƀing gơñu tơña tui anai, “Tui anŭn, hơget gru tơlơi mơsêh mơyang Ih ngă kiăng kơ ƀing gơmơi ƀuh laih anŭn đaŏ kơnang kơ Ih lĕ? 31 Ƀing ơi adon ta ƀơ̆ng laih tơpŭng mana amăng tơdron ha̱r tui hăng Hră Ơi Adai hơmâo čih laih tui anai, ‘Ơi Adai hơmâo brơi laih kơ gơñu ƀơ̆ng ƀañ mơ̆ng adai kiăng kơ ƀơ̆ng.’ ” 32 Yêsu laĭ glaĭ kơ ƀing gơñu tui anai, “Kâo laĭ sĭt biă mă kơ ƀing gih, ƀu djơ̆ Môseh ôh jing pô pha brơi kơ ƀing gih ƀañ tơpŭng mơ̆ng adai, samơ̆ Ama Kâo pô yơh jing Pô pha brơi kơ ƀing gih mơta tơlơi jing kar hăng ƀañ sĭt mơ̆ng adai adih. 33 Mơta tơlơi Ơi Adai pha brơi kar hăng ƀañ tơpŭng anŭn jing Pô trŭn rai laih mơ̆ng adai laih anŭn ngă brơi kơ ƀing mơnuih mơnam lŏn tơnah kiăng kơ hơdip yơh.” 34 Ƀing gơñu laĭ tui anai, “Ơ Khua ăh, čơdơ̆ng mơ̆ng ră anai rơkâo kơ Ih pha brơi ƀañ anŭn nanao bĕ kơ ƀing gơmơi.” 35 Yêsu pơhiăp pơhơmutu tui anai, “Kâo yơh jing ƀañ tơpŭng ngă brơi kơ mơnuih mơnam hơdip. Hlơi pô rai kơ Kâo, ñu anŭn ƀu či rơpa ôh, laih anŭn hlơi pô đaŏ kơnang kơ Kâo, ñu anŭn ƀu či mơhao dơ̆ng tah. 36 Samơ̆ tui hăng tơlơi Kâo laĭ laih kơ ƀing gih, ƀing gih hơmâo ƀuh laih Kâo samơ̆ ƀing gih ƀu đaŏ kơnang kơ Kâo ôh. 37 Abih bang ƀing mơnuih Yang Ama jao kơ Kâo, ƀing gơñu či rai pơ Kâo yơh, laih anŭn hlơi pô rai pơ Kâo, kâo ƀu či puh pơđuaĭ hĭ ñu ôh. 38 Yuakơ Kâo hơmâo rai laih mơ̆ng adai ƀu djơ̆ kiăng ngă tui hăng tơlơi Kâo pô kiăng ôh, samơ̆ ngă tui hăng tơlơi Pô pơkiaŏ rai Kâo kiăng yơh. 39 Laih anŭn anai yơh jing mơta tơlơi Pô pơkiaŏ rai Kâo kiăng: Kâo ƀu či rơngiă hĭ hlơi pô ôh amăng ƀing gơñu jing ƀing Ñu hơmâo jao brơi laih kơ Kâo, samơ̆ či ngă kơ ƀing gơñu jing hĭ hơdip dơ̆ng ƀơi hrơi hơnăl tuč yơh. 40 Anai jing mơta tơlơi Ama Kâo kiăng kơ rĭm čô: Hlơi pô lăng pơ Kâo, jing Ană Ñu, laih anŭn đaŏ kơnang kơ Kâo, ñu anŭn či hơdip hlŏng lar hăng Ơi Adai, laih anŭn Kâo či ngă brơi kơ ñu jing hĭ hơdip dơ̆ng yơh amăng hrơi hơnăl tuč tơdang Kâo či phat kơđi mơnuih mơnam.” 41 Ƀơi mông anŭn ƀing Yehudah čơdơ̆ng pơhiăp brŏk kơ Yêsu yơh yuakơ Ñu laĭ tui anai, “Kâo jing ƀañ tơbiă rai mơ̆ng adai.” 42 Ƀing gơñu pơlaĭ tui anai, “Anŭn jing kơnơ̆ng kơ Yêsu jing ană Yôsêp đôč, laih anŭn jing Pô amĭ ama Ñu abih bang ƀing ta thâo soh sel! Sĭt yơh Ñu ƀu dưi laĭ tui anai ôh, ‘Kâo trŭn rai laih mơ̆ng adai’!” 43 Yêsu pơhiăp tui anai, “Anăm pơhiăp brŏk hăng tơdruă ôh. 44 Ƀu hơmâo hlơi pô ôh dưi rai pơ Kâo tơdah Ama Kâo, jing Pô pơkiaŏ rai Kâo, ƀu dui ba ôh mơnuih anŭn rai pơ Kâo, laih anŭn Kâo či ngă kơ ñu jing hĭ hơdip dơ̆ng amăng hrơi hơnăl tuč yơh. 45 Amăng hră ƀing pô pơala hơmâo čih laih tui anai, ‘Ơi Adai yơh či pơtô brơi kơ abih bang ƀing gơñu.’ Hlơi pô hơmư̆ tui Ama Kâo hăng hrăm mơ̆ng Ñu, ñu anŭn rai pơ Kâo yơh. 46 Ƀu hơmâo hlơi pô ôh dưi ƀuh Ama Kâo rơngiao kơ Kâo, jing Pô rai mơ̆ng Ơi Adai, kơnơ̆ng Kâo đôč yơh hơmâo ƀuh laih Ama Kâo. 47 Kâo laĭ sĭt biă mă kơ ƀing gih, hlơi pô đaŏ kơnang kơ Kâo, ñu anŭn hơmâo čơdơ̆ng laih kiăng kơ hơdip hlŏng lar. 48 Kâo jing kar hăng ƀañ ngă brơi kơ mơnuih mơnam hơdip hlŏng lar yơh. 49 Ƀing ơi adon gih ƀơ̆ng laih ƀañ mana amăng tơdron ha̱r, samơ̆ ƀing gơñu ăt djai laih mơ̆n. 50 Samơ̆ Kâo hrup hăng ƀañ tơpŭng trŭn rai mơ̆ng adai, laih anŭn hlơi pô ƀơ̆ng ƀañ tơpŭng anai ñu anŭn ƀu či djai hĭ gah bơngăt ôh. 51 Kâo jing ƀañ tơlơi hơdip trŭn rai mơ̆ng adai jing ngă kơ ƀing arăng hơdip. Tơdah hlơi ƀơ̆ng ƀañ anai, ñu anŭn či hơdip hlŏng lar yơh. Ƀañ anai jing kơđeh asar Kâo pô yơh, jing tơlơi Kâo či pha brơi kiăng kơ ngă kơ ƀing mơnuih mơnam hơdip hlŏng lar.” 52 Giŏng anŭn, ƀing khua ba akŏ ƀing Yehudah čơdơ̆ng pơrơjăh kơtang tơdruă gơñu tui anai, “Pô anŭn ƀu dưi brơi kơ ƀing ta kơđeh asar Ñu kiăng ƀơ̆ng ôh!” 53 Yêsu pơhiăp pơhơmutu kơ ƀing gơñu tui anai, “Kâo laĭ sĭt biă mă kơ ƀing gih, tơdah ƀing gih ƀu ƀơ̆ng ôh kơđeh asar Kâo, jing Ană Mơnuih trŭn rai mơ̆ng adai, hăng mơñum drah Kâo, ƀing gih ƀu či hơdip hlŏng lar ôh. 54 Hlơi pô ƀơ̆ng kơđeh asar Kâo laih anŭn mơñum drah Kâo, ñu anŭn hơmâo čơdơ̆ng hơdip hlŏng lar laih, laih anŭn Kâo či ngă kơ ñu jing hĭ hơdip dơ̆ng ƀơi hrơi hơnăl tuč yơh, 55 yuakơ kơđeh asar Kâo jing gơnam ƀơ̆ng sĭt laih anŭn drah Kâo ăt jing gơnam mơñum sĭt mơ̆n. 56 Hlơi pô ƀơ̆ng asar Kâo laih anŭn mơñum drah Kâo, ñu anŭn tŏ tui tŭ pơgop sa hăng Kâo, laih anŭn Kâo tŏ tui pơgop sa hăng ñu yơh. 57 Ama Kâo, jing Pô ngă brơi kơ ƀing mơnuih mơnam kiăng kơ hơdip, pơkiaŏ rai laih Kâo laih anŭn Ñu ngă brơi laih kơ Kâo hơdip. Tui anŭn ăt kar kaĭ mơ̆n, hlơi pô ƀơ̆ng Kâo, Kâo či ngă brơi kơ ñu anŭn hơdip hlŏng lar yơh. 58 Anai jing kar hăng ƀañ tơpŭng trŭn rai mơ̆ng adai. Ƀing ơi adon gih ƀơ̆ng laih ƀañ mana laih anŭn djai laih, samơ̆ hlơi pô ƀơ̆ng ƀañ anai, ñu anŭn či hơdip hlŏng lar yơh.” 59 Yêsu pơhiăp tơlơi anŭn tơdang Ñu hlak pơtô pơblang amăng sang jơnum amăng plei Kapharnaoum.
Lu Ƀing Ding Kơna Đuaĭ Lui Hĭ Yêsu
60 Tơdang ƀing ding kơna Ñu hơmư̆ kơ tơlơi Yêsu pơtô anŭn, hơmâo đơđa ƀing gơñu laĭ tui anai, “Tơlơi pơtô anŭn jing tơnap thâo hluh đơi. Ƀu hơmâo hlơi pô ôh dưi tŭ mă tơlơi pơtô anŭn!” 61 Tơdang Yêsu thâo kơnăl kơ tơlơi ƀing ding kơna Ñu brŏk ƀuăh kơ tơlơi anŭn, Ñu laĭ kơ ƀing gơñu tui anai, “Pap mơñai yơh, tơlơi Kâo pơtô anŭn ngă brơi kơ ƀing gih kiăng kơ đuaĭ ataih hĭ! 62 Tui anŭn, hơget tơlơi ƀing gih či pơmĭn lĕ tơdah Kâo, jing Pô mơ̆ng plei hiam, đĭ glaĭ pơ adai adih lĕ? 63 Yang Bơngăt Ơi Adai ngă kơ ƀing mơnuih mơnam hơdip. Ƀing mơnuih mơnam ƀu dưi ngă brơi kơ gơñu pô hơdip ôh. Hơdôm boh hiăp Kâo hơmâo pơhiăp laih kơ ƀing gih jing mơ̆ng Yang Bơngăt laih anŭn hơdôm tơlơi anŭn ngă brơi kơ ƀing mơnuih mơnam hơdip hlŏng lar yơh. 64 Samơ̆ hơmâo đơđa mơnuih amăng ƀing gih hơngah ƀu kiăng đaŏ kơnang ôh.” Yêsu laĭ tui anŭn yuakơ Ñu thâo krăn laih čơdơ̆ng mơ̆ng Ñu čơdơ̆ng pơtô kơ ƀing mơnuih jing ƀing ƀu đaŏ kơnang kơ Ñu ôh laih anŭn hlơi jing pô či pơblư̆ lui hĭ Ñu. 65 Yêsu laĭ dơ̆ng tui anŭn, “Anŭn yơh jing tơhơnal tơlơi Kâo ruai kơ ƀing gih kơ tơlơi ƀu hơmâo hlơi pô dưi rai pơ Kâo ôh tơdah Ama Kâo ƀu ba rai laih ôh pô anŭn pơ Kâo.” 66 Čơdơ̆ng mơ̆ng anŭn, hơmâo lu ƀing ding kơna Ñu wir đuaĭ hĭ laih anŭn ƀu kiăng đuaĭ tui Yêsu dơ̆ng tah. 67 Yêsu tơña kơ ƀing pluh-dua čô ding kơna pơjao tui anai, “Hiư̆m ngă, ƀing gih ăt či lui hĭ Kâo mơ̆n hă?” 68 Simôn Pêtrôs laĭ tui anai, “Ơ Khua ăh, ƀing gơmơi ƀu hơmâo hlơi pô pơkŏn ôh kiăng kơ đuaĭ tui! Kơnơ̆ng hơjăn Ih yơh pơhiăp hơdôm boh hiăp kơ tơlơi kiăng kơ hơdip hlŏng lar. 69 Ƀing gơmơi hơmâo đaŏ kơnang laih anŭn thâo krăn yơh kơ tơlơi Ih jing Pô Rơgoh Hiam Ơi Adai.” 70 Giŏng anŭn, Yêsu pơhiăp tui anai, “Sĭt yơh, Kâo hơmâo ruah mă laih ƀing gih, jing Pluh-Dua čô ƀing ding kơna pơjao. Samơ̆ sa čô amăng ƀing gih tŭ git gai mơ̆ng yang sat.” 71 Yêsu laĭ tui anŭn kiăng kơ kơčrâo kơ Yudas, ană Simôn Iskariôt, jing pô wơ̆t tơdah sa čô amăng ƀing Pluh-Dua, či pơblư̆ hĭ Ñu tơdơi anai.
Yêsu Hăng Ƀing Adơi Đah Rơkơi Ñu
1 Tơdơi kơ anŭn, Yêsu hyu amăng kwar Galilê, tơlơi kơñăm Ñu kiăng kơ đuaĭ ataih hĭ mơ̆ng kwar Yudea yuakơ ƀing khua djă̱ akŏ ƀing Yehudah pơ anŭn dŏ krăp kiăng pơdjai hĭ Ñu. 2 Samơ̆ tơdang hrơi phet Sang Than Jăng Jăi jĕ či truh laih, 3 ƀing adơi Yêsu laĭ kơ Ñu tui anai, “Ih khŏm tơbiă bĕ mơ̆ng anih anai kiăng kơ nao pơ kwar Yudea, kiăng kơ ƀing ding kơna Ih dưi ƀuh hơdôm gru tơlơi mơsêh mơyang Ih ngă. 4 Ƀu hơmâo ôh hlơi pô kiăng kơ arăng hơmư̆ hing kơ ñu, samơ̆ ñu ngă bruă hơgŏm. Yuakơ Ih hlak ngă hơdôm tơlơi bruă anŭn, pơrơđah bĕ Ih pô kơ abih bang mơnuih.” 5 Ƀing gơñu laĭ tui anŭn yuakơ wơ̆t tơdah ƀing anŭn jing ƀing adơi Yêsu pô, samơ̆ ƀing gơñu ƀu đaŏ kơnang kơ Ñu ôh. 6 Yêsu laĭ kơ ƀing adơi Ñu tui anai, “Mông kơ kâo kiăng kơ nao pơ anih anŭn aka ƀu truh ôh, samơ̆ kơ ƀing gih kiăng kơ nao pơ anih anŭn hơmâo mông găl nanao yơh. 7 Ƀing mơnuih ƀu đaŏ kơnang kơ Kâo, ƀing gơñu ƀu pơrơmut kơ ƀing gih ôh, samơ̆ ƀing gơñu pơrơmut kơ Kâo yuakơ Kâo pơruai kơ ƀing gơñu kơ tơlơi bruă ƀing gơñu ngă jing soh sat. 8 Ƀing gih nao bĕ pơ tơlơi phet anŭn. Kâo aka či nao ôh, yuakơ mông kơ Kâo kiăng nao pơ anih anŭn aka ƀu truh ôh.” 9 Tơdơi kơ Ñu pơhiăp laih tơlơi anŭn, Ñu dŏ glaĭ pơ kwar Galilê sui ƀiă. Yêsu Nao Pơ Tơlơi Phet Sang Than Jăng Jăi 10 Samơ̆ tơdơi kơ ƀing adơi Yêsu đuaĭ nao laih pơ tơlơi Phet anŭn, Yêsu ăt nao mơ̆n samơ̆ Ñu nao hăng tơlơi hơgŏm yơh. 11 Hlak anŭn, ƀơi anih djă̱ hơdơr tơlơi Phet anŭn, ƀing khua djă̱ akŏ ƀing Yehudah hơduah sem Yêsu laih anŭn tơña kơ ƀing ană plei tui anai, “Pơpă pô anŭn lĕ?” 12 Amăng ƀing mơnuih lu, ƀing gơñu pơhiăp pơhoč hăng tơdruă kơ tơlơi Yêsu. Hơmâo đơđa laĭ, “Ñu jing mơnuih hiam.” Ƀing pơkŏn dơ̆ng laĭ tui anai, “Ơ ơh, Ñu jing pô plư pleč ană plei.” 13 Samơ̆ ƀu hơmâo hlơi pô ôh pơhiăp rơđah kơ arăng yuakơ huĭ kơ ƀing khua djă̱ akŏ ƀing Yehudah.
Yêsu Pơtô Ƀơi Tơlơi Phet
14 Tơl truh sămkrah mông tơlơi phet laih, Yêsu đĭ nao pơ wăl tơdron sang yang laih anŭn čơdơ̆ng pơtô pơblang kơ ƀing mơnuih mơnam. 15 Ƀing khua djă̱ akŏ ƀing Yehudah dŏ hli̱ng hla̱ng biă mă hăng laĭ tui anai, “Pô anŭn ƀu hơmâo hrăm hră ôh, samơ̆ Ñu thâo hluh sĭt kơ Tơlơi Ơi Adai Pơhiăp biă mă yơh!” 16 Tui anŭn, Yêsu pơhiăp tui anai, “Tơlơi Kâo pơtô ƀu djơ̆ mơ̆ng Kâo pô ôh, samơ̆ tơbiă rai mơ̆ng Pô pơkiaŏ rai Kâo yơh. 17 Tơdah hlơi pô ruah kiăng kơ ngă tui hơget tơlơi Ơi Adai kiăng, ñu anŭn či hơduah ƀuh yơh kơ mơta tơlơi Kâo pơtô pơblang tơbiă rai mơ̆ng Ơi Adai ƀôdah kơnơ̆ng mơ̆ng Kâo pô đôč yơh. 18 Hlơi pô pơhiăp tui hăng tơlơi ñu pô amoaih kiăng, ñu anŭn ngă tui anŭn kơnơ̆ng kiăng kơ hơduah sem kơ tơlơi ƀing arăng pơpŭ pơyom kơ ñu pô đôč yơh, samơ̆ hlơi pô mă bruă kiăng kơ pơpŭ pơyom kơ pô pơkiaŏ rai ñu, kar hăng Kâo ngă, ñu anŭn jing mơnuih tơpă hơnơ̆ng yơh. Sĭt kar hăng Kâo yơh, ñu anŭn ƀu či pơhiăp ƀlŏr ôh. 19 Môseh hơmâo pha brơi laih kơ ƀing gih Tơlơi Juăt. Samơ̆ ƀu hơmâo hlơi pô amăng ƀing gih ôh dưi gưt tui tơlơi juăt anŭn. Yua hơget ƀing gih gir kiăng pơdjai hĭ Kâo lĕ?” 20 Ƀing mơnuih lu laĭ glaĭ tui anai, “Ih jing pô yang sat ngă laih, ƀu hơmâo hlơi pô ôh gir kiăng kơ pơdjai hĭ Ih!” 21 Yêsu laĭ glaĭ kơ ƀing gơñu tui anai, “Kâo ngă laih sa tơlơi mơsêh mơyang laih anŭn abih bang ƀing gih le̱ng kơ hli̱ng hla̱ng soh sel. 22 Môseh hơmâo pha brơi laih kơ ƀing gih tơlơi phiăn khăt klĭ wơ̆t tơdah tơlơi anŭn ƀu djơ̆ mơ̆ng Môseh pô ôh brơi, samơ̆ mơ̆ng ƀing ama ơi adon ta đưm adih yơh. Tơdah anŭn jing tơlơi kiăng, ƀing gih khăt klĭ kơ ƀing ană đah rơkơi amăng hrơi Saƀat yơh. 23 Tơdah ƀing gih dưi khăt klĭ ƀing ană đah rơkơi amăng hrơi Saƀat kiăng kơ ƀu pơjŏh hĭ ôh Tơlơi Juăt Môseh anŭn, sĭt ƀing gih khŏm anăm hil kơ Kâo ôh yuakơ Kâo pơsuaih hĭ mơnuih amăng hrơi Saƀat! 24 Anăm phat kơđi kơ arăng tui hăng ƀing gih ƀuh gah rơngiao ôh, samơ̆ phat kơđi tơpă hơnơ̆ng bĕ.”
Hlơi Yêsu Jing Lĕ?
25 Ƀơi mông anŭn, hơmâo đơđa ƀing ană plei amăng plei Yerusalaim tơña tui anai, “Sĭt biă mă yơh, pô anŭn jing pô arăng gir kiăng kơ pơdjai hĭ! 26 Lăng adih, Ñu pơhiăp rơngai laih anŭn ƀu hơmâo hlơi pô ôh pơhiăp sa boh pơkơdơ̆ng glaĭ hăng Ñu. Hiư̆m ngă, ƀing khua djă̱ akŏ yap kơ Ñu jing Pô Krist laih hă? 27 Samơ̆ ƀing ta thâo laih mơ̆ng pă Pô anŭn tơbiă rai. Samơ̆ tơdang Pô Krist rai, sĭt ƀu hơmâo hlơi pô ôh thâo mơ̆ng pă Ñu rai.” 28 Hlak anŭn, Yêsu ăt dŏ pơtô pơblang amăng wăl tơdron sang yang, Ñu pơhiăp kraih tui anai, “Sĭt yơh, ƀing gih thâo krăn Kâo, laih anŭn ƀing gih thâo mơ̆ng pă Kâo tơbiă rai. Kâo ƀu pha brơi tơlơi dưi kơ Kâo pô kiăng kơ rai ôh, samơ̆ Pô hơmâo pơkiaŏ rai laih Kâo jing sĭt. Ƀing gih ƀu thâo krăn Ñu ôh. 29 Samơ̆ Kâo thâo krăn Ñu yuakơ Kâo rai mơ̆ng Ñu, laih anŭn Ñu jing Pô pơkiaŏ rai Kâo.” 30 Ƀơi mông anŭn, ƀing khua djă̱ akŏ ƀing Yehudah gir kiăng kơ mă Yêsu, samơ̆ ƀu hơmâo hlơi pô ôh dưi ngă tơlơi anŭn yuakơ mông Ñu djai aka ƀu truh ôh. 31 Samơ̆ amăng ƀing mơnuih lu anŭn ăt hơmâo lu mơnuih đaŏ kơnang kơ Yêsu. Ƀing gơñu laĭ tui anai, “Tơdang Pô Krist rai, sĭt Ñu ƀu či ngă tơlơi mơsêh mơyang lu hloh kơ Pô anai ôh!” 32 Ƀing Pharisai hơmư̆ ƀing mơnuih lu pơhiăp pơhoč hơdôm tơlơi anŭn kơ tơlơi Yêsu. Tui anŭn, ƀing khua ngă yang prŏng hăng ƀing Pharisai pơkiaŏ ƀing tơhan nao mă Yêsu. 33 Tui anŭn, Yêsu laĭ kơ ƀing gơñu tui anai, “Kâo dŏ hăng ƀing gih kơnơ̆ng ƀiă hrơi dơ̆ng đôč, giŏng anŭn Kâo či nao pơ Pô hơmâo pơkiaŏ rai laih Kâo yơh. 34 Ƀing gih či hơduah sem Kâo, samơ̆ ƀing gih ƀu či hơduah ƀuh Kâo ôh, yuakơ pơ anih Kâo či dŏ, ƀing gih ƀu dưi nao ôh.” 35 Ƀing khua djă̱ akŏ ƀing Yehudah pơlaĭ hăng tơdruă gơñu tui anai, “Pơpă anih Pô anai kiăng kơ nao tơl ƀing ta ƀu dưi hơduah ƀuh Ñu ôh lĕ? Djơ̆ mơ̆ Ñu či nao pơ anih hơmâo lu ƀing ană plei ta dŏ čơlah čơlap amăng lŏn čar ƀing Grek laih anŭn pơtô kơ ƀing Grek anŭn? 36 Hơget tơlơi Ñu kiăng kơ laĭ lĕ tơdang Ñu laĭ tui anai, ‘Ƀing gih či hơduah sem Kâo, samơ̆ ƀing gih ƀu či hơduah ƀuh Kâo ôh,’ laih anŭn ‘Pơpă anih Kâo či dŏ, ƀing gih ƀu dưi nao ôh’?”
Yêsu Ƀuăn Kơ Tơlơi Yang Bơngăt Hiam
37 Ƀơi hrơi đŭt ăt jing hrơi yom pơphan hloh amăng hrơi Phet anŭn, Yêsu tơgŭ laih anŭn pơhiăp pơhơmutu kraih krin tui anai, “Hlơi pô mơhao, brơi ñu rai bĕ pơ Kâo laih anŭn mơñum. 38 Tui hăng Hră Ơi Adai hơmâo čih laih tui anai: Hlơi pô đaŏ kơnang kơ Kâo, hơnŏh ia mơ̆ng phŭn ia ngă kơ mơnuih hơdip či rô tơbiă mơ̆ng gah lăm ñu yơh.” 39 Yêsu pơhiăp kơ tơlơi anŭn kiăng kơčrâo kơ Yang Bơngăt Hiam yơh, jing kơ ƀing hlơi pô đaŏ kơnang kơ Ñu či tŭ mă Yang Bơngăt Hiam. Samơ̆ hlŏng truh pơ mông anŭn, Ơi Adai aka pha brơi Yang Bơngăt Hiam ôh, yuakơ Yêsu aka hơdip glaĭ đĭ pơ adai adih ôh.
Ƀing Mơnuih Lu Pơkăh Pơpha Hĭ Yuakơ Tơlơi Yêsu
40 Tơdang ƀing mơnuih lu hơmâo hơmư̆ laih hơdôm boh hiăp Ñu anŭn, đơđa ƀing gơñu laĭ tui anai, “Sĭt yơh, mơnuih anai jing Pô Pơala.” 41 Đơđa mơnuih pơkŏn laĭ tui anai, “Ñu jing Pô Krist yơh.” Ăt hơmâo ƀing mơnuih pơkŏn dơ̆ng laĭ tui anai, “Pô Krist ƀu tơbiă rai mơ̆ng kwar Galilê ôh, 42 yuakơ Hră Ơi Adai hơmâo laĭ kơ tơlơi Pô Krist či tơbiă rai mơ̆ng ană tơčô pơtao Dawid laih anŭn mơ̆ng plei Bêtlehem yơh, jing plei pơtao Dawid hơdip đưm hlâo adih.” 43 Tui anŭn, ƀing gơñu pơčơlah pơkăh pơpha hĭ yơh yuakơ tơlơi ƀing gơñu pơmĭn hlơi Yêsu jing. 44 Hơmâo đơđa mơnuih kiăng mă Yêsu, samơ̆ ƀu hơmâo hlơi pô ôh ngă tơlơi anŭn kơ Ñu.
Tơlơi Ƀing Khua Djă̱ Akŏ Ƀing Yehudah Ƀu Đaŏ Kơnang Kơ Yêsu
45 Hơnăl tuč, ƀing tơhan gak wai sang yang wơ̆t glaĭ pơ ƀing khua ngă yang prŏng hăng ƀing Pharisai laih anŭn ƀing khua gơñu anŭn tơña kơ ƀing gơñu tui anai, “Yua hơget ƀing gih ƀu ba rai Yêsu pơ anai ôh lĕ?” 46 Ƀing tơhan anŭn laĭ glaĭ tui anai, “Ƀu hơmâo hlơi pô ôh pơhiăp kar hăng Pô anŭn!” 47 Ƀing Pharisai anŭn pơhiăp kơ ƀing gơñu tui anai, “Ƀing gih kiăng laĭ kơ tơlơi Ñu ăt plư pleč hĭ ƀing gih mơ̆n hă? 48 Hơmâo mơ̆ ƀing khua djă̱ akŏ ƀing Yehudah ƀôdah ƀing Pharisai pơkŏn đaŏ kơnang kơ Ñu? 49 Sĭt ƀu hơmâo ôh! Samơ̆ ƀing mơnuih lu anŭn hơmâo đaŏ kơnang laih kơ Ñu yuakơ ƀu thâo phe pho ôh kơ Tơlơi Juăt Môseh, tui anŭn Ơi Adai či pơrai hĭ ƀing gơñu yơh.” 50 Nikodêmos, jing sa čô amăng ƀing gơñu laih anŭn hơmâo nao bưp laih Yêsu hlâo kơ anŭn, pơhiăp tui anai, 51 “Tui Tơlơi Juăt ta, ƀing ta ƀu dưi klă̱ kơđi ôh kơ sa čô mơnuih tơdah aka ƀu tơña hơduah ôh hơdôm tơlơi ñu ngă laih.” 52 Ƀing gơñu pơhiăp hăng tơlơi hil tui anai, “Ih pơhiăp kar hăng ƀing mơnuih rai mơ̆ng kwar Galilê laih anŭn đuaĭ tui Yêsu. Brơi kơ ih kơsem lăng Hơdrôm Hră Ơi Adai bĕ, sĭt ih ƀu či hơduah ƀuh ôh kơ tơlơi pô pơala tơbiă rai mơ̆ng kwar Galilê.” 53 Giŏng anŭn, rĭm čô amăng ƀing gơñu glaĭ pơ sang ñu pô yơh.
Ƀing Arăng Ƀuh Sa Čô Đah Kơmơi Hlak Klĕ Pyu
1 Tơdang anŭn, Yêsu đĭ nao pơ čư̆ Ôliwơ. 2 Ƀơi mơguah ưm, Yêsu wơ̆t glaĭ pơ sang yang dơ̆ng, jing anih abih bang mơnuih pơƀut glaĭ jum dar Ñu. Giŏng anŭn, Yêsu dŏ be̱r čơdơ̆ng pơtô kơ ƀing gơñu yơh. 3 Tơdang anŭn, ƀing nai pơtô Tơlơi Juăt hăng ƀing Pharisai ba rai pơ Yêsu sa čô đah kơmơi arăng mă tơdang dŏ klĕ pyu. Ƀing gơñu brơi kơ gơ̆ dŏ ƀơi anăp ƀing mơnuih lu anŭn, 4 laih anŭn laĭ kơ Yêsu tui anai, “Ơ Nai ăh, đah kơmơi anai arăng hơmâo mă ñu tơdang ñu dŏ klĕ pyu. 5 Tui hăng Tơlơi Juăt Môseh pơđar kơ ƀing ta, ƀing ta khŏm glŏm boh pơtâo pơdjai hĭ đah kơmơi ngă soh kar hăng anŭn. Bơ kơ Ih, hiư̆m pă Ih laĭ lĕ?” 6 Ƀing gơñu yua tơlơi tơña anŭn kiăng pơlê̆ hĭ Yêsu, anŭn kiăng hơmâo tơhơnal tơlơi phŏng kơđi kơ Gơ̆ yơh. Samơ̆ Yêsu tơkui hăng čơdơ̆ng čih ƀơi lŏn hăng čơđe̱ng tơngan Ñu. 7 Tơdang ƀing gơñu ăt dŏ tơña kơ Ñu nanao, Yêsu angak lăng đĭ hăng laĭ kơ ƀing gơñu tui anai, “Tơdah hlơi pô amăng ƀing gih jing pô ƀu hơmâo ngă soh laih ôh, brơi bĕ ñu anŭn jing pô blung hlâo glŏm boh pơtâo ƀơi đah kơmơi anai.” 8 Giŏng anŭn, Yêsu tơkui čih ƀơi lŏn dơ̆ng. 9 Tơdang ƀing gơñu hơmư̆ kơ tơlơi anŭn, rĭm čô ƀing gơñu ƀrư̆ ƀrư̆ đuaĭ hĭ. Ƀing tha hloh đuaĭ hĭ hlâo, tơl kơnơ̆ng hơjăn Yêsu đôč dŏ glaĭ pơ anih anŭn wơ̆t hăng pô đah kơmơi hlak dŏ dơ̆ng pơ anŭn mơ̆n. 10 Yêsu lăng đĭ laih anŭn tơña kơ gơ̆ tui anai, “Ơ đah kơmơi ăh, pơpă ƀing phŏng kơđi kơ ih lĕ? Ƀu hơmâo hlơi pô klă̱ kơđi kơ ih ôh hă?” 11 Pô đah kơmơi anŭn laĭ glaĭ tui anai, “Ơ Khua ăh, ƀu hơmâo hlơi pô ôh.” Yêsu laĭ dơ̆ng tui anai, “Kâo kŏn klă̱ kơđi kơ ih lơi. Glaĭ bĕ laih anŭn lui hĭ bĕ tơlơi hơdip soh sat ih.”
Yêsu Jing Kar Hăng Tơlơi Bơngač Kơ Lŏn Tơnah
12 Tơdang Yêsu pơhiăp dơ̆ng hăng ƀing mơnuih lu, Ñu laĭ tui anai, “Kâo jing kar hăng tơlơi bơngač kơ abih bang mơnuih mơnam amăng lŏn tơnah anai. Hlơi pô đuaĭ tui Kâo, ñu anŭn ƀu či hrup hăng mơnuih rơbat amăng tơlơi kơnăm mơmŏt ôh, samơ̆ Kâo či pơčrang brơi tơlơi hơdip ñu laih anŭn ngă kơ ñu hơdip yơh.” 13 Tui anŭn, ƀing Pharisai pơgăl hăng Yêsu tui anai, “Ih pơ anai pơhiăp ngă gơ̆ng jơlan kơ Ih pô, sĭt boh hiăp Ih ƀu yom pơphan ôh.” 14 Yêsu laĭ glaĭ tui anai, “Wơ̆t tơdah Kâo ngă gơ̆ng jơlan kơ Kâo pô, boh hiăp Kâo ăt yom pơphan mơ̆n, yuakơ Kâo thâo krăn mơ̆ng pă Kâo rai laih anŭn pơ anih pă Kâo či nao. Samơ̆ ƀing gih ƀu thâo ôh mơ̆ng pă Kâo rai ƀôdah pơ anih pă Kâo či nao. 15 Ƀing gih phat kơđi tui hăng hơnơ̆ng pơkă mơnuih mơnam đôč, samơ̆ Kâo ƀu phat kơđi kơ hlơi pô ôh ră anai. 16 Samơ̆ tơdah Kâo phat kơđi, tơlơi khưp ngă Kâo jing găl djơ̆, yuakơ Kâo ƀu či ngă hơjăn ôh. Kâo či phat kơđi hăng Ama Kâo, jing Pô pơkiaŏ rai Kâo yơh. 17 Amăng Tơlơi Juăt gih pô arăng čih laih kơ tơlơi ngă gơ̆ng jơlan mơ̆ng dua čô jing yom pơphan. 18 Kâo yơh jing Pô ngă gơ̆ng jơlan kơ Kâo pô; Pô pơkŏn dơ̆ng ăt ngă gơ̆ng jơlan kơ Kâo mơ̆n, anŭn jing Ama Kâo yơh, jing Pô pơkiaŏ rai Kâo.” 19 Ƀing gơñu tơña kơ Ñu tui anai, “Pơpă Ama Ih lĕ?” Yêsu laĭ glaĭ tui anai, “Ƀing gih ƀu thâo krăn ôh kơ Kâo ƀôdah kơ Ama Kâo. Tơdah ƀing gih thâo krăn Kâo, ƀing gih ăt thâo krăn mơ̆n Ama Kâo.” 20 Yêsu pơhiăp hơdôm boh hiăp anŭn tơdang Ñu pơtô amăng anih wăl tơdron sang yang, jing anih jĕ anih ƀing arăng pơyơr gơnam. Ƀu hơmâo hlơi pô ôh mă Ñu, yuakơ mông Ñu djai aka ƀu truh ôh. 21 Sa wơ̆t dơ̆ng Yêsu laĭ kơ ƀing gơñu tui anai, “Kâo či đuaĭ hĭ laih anŭn ƀing gih či hơduah sem Kâo, ƀing gih či djai hĭ rơngiao kơ Ơi Adai pap brơi tơlơi soh gih pô yơh. Anih Kâo či nao, ƀing gih ƀu dưi nao ôh.” 22 Tơlơi Yêsu pơhiăp anŭn ngă brơi kơ ƀing khua djă̱ akŏ ƀing Yehudah pơtơña tui anai, “Ñu či pơdjai hĭ Ñu pô hă, yuakơ Ñu laĭ, ‘Pơ anih Kâo nao, ƀing gih ƀu dưi nao ôh’?” 23 Samơ̆ Yêsu laĭ dơ̆ng tui anai, “Ƀing gih rai mơ̆ng gah yŭ, samơ̆ Kâo rai mơ̆ng gah ngŏ. Ƀing gih jing ƀing lŏm kơ lŏn tơnah anai, samơ̆ kâo ƀu lŏm kơ lŏn tơnah anai ôh. 24 Kâo laĭ kơ ƀing gih kơ tơlơi ƀing gih či djai hĭ amăng khul tơlơi soh gih. Tơdah ƀing gih ƀu đaŏ ôh kơ tơlơi Kâo jing Pô Kâo laĭ Kâo jing, sĭt ƀing gih či djai hĭ rơngiao kơ Ơi Adai pap brơi khul tơlơi soh gih yơh.” 25 Tui anŭn, ƀing gơñu tơña kơ Yêsu tui anai, “Hlơi Ih jing lĕ?” Yêsu laĭ glaĭ tui anai, “Čơdơ̆ng mơ̆ng hrơi Kâo čơdơ̆ng pơtô pơblang laih, Kâo hơmâo pơruai laih nanao kơ ƀing gih truh pơ tă anai kơ tơlơi hlơi Kâo jing. 26 Kâo hơmâo lu tơlơi pơhiăp kiăng phat kơđi kơ ƀing gih. Samơ̆ Pô pơkiaŏ rai Kâo jing Pô năng đaŏ kơnang, laih anŭn hơget tơlơi Kâo hơmâo hơmư̆ laih mơ̆ng Ñu, Kâo pơhaih kơ mơnuih mơnam yơh.” 27 Ƀing gơñu ƀu thâo hluh ôh kơ tơlơi Yêsu ruai kơ ƀing gơñu kơ tơlơi Ama Ñu. 28 Tui anŭn, Yêsu laĭ tui anai, “Kâo jing Pô trŭn rai laih mơ̆ng adai, samơ̆ tơdang ƀing gih yŏng đĭ Kâo ƀơi kơyâo bơrơkal, jing Ană Mơnuih, mông anŭn ƀing gih či thâo krăn yơh kơ tơlơi Kâo jing Pô Kâo laĭ Kâo jing, laih anŭn Kâo ƀu pha brơi tơlơi dưi kơ Kâo pô kiăng kơ ngă hơget tơlơi ôh, samơ̆ Kâo pơhiăp hơdôm mơta tơlơi Ama Kâo hơmâo pơtô laih kơ Kâo yơh. 29 Pô hơmâo pơkiaŏ rai Kâo ăt dŏ hrŏm hăng Kâo. Ñu ƀu lui hĭ Kâo dŏ hơjăn ôh, yuakơ Kâo nanao ngă hơdôm tơlơi bruă pơmơak kơ Ñu.” 30 Tơdang Ñu hlak pơhiăp hơdôm tơlơi anŭn, hơmâo lu mơnuih đaŏ kơnang kơ Yêsu yơh.
Ană Tơčô Abraham Sĭt
31 Yêsu laĭ kơ ƀing Yehudah, jing ƀing hơmâo đaŏ kơnang laih kơ Ñu, tui anai, “Tơdah ƀing gih gưt tui tơlơi Kâo pơtô pơblang, sĭt ƀing gih jing ding kơna Kâo. 32 Tui anŭn, ƀing gih či thâo krăn hơget tơlơi jing sĭt kơ tơlơi Ơi Adai laih anŭn Ñu či pơrơngai hĭ ƀing gih mơ̆ng tơlơi jing kar hăng ƀing mơnă yơh.” 33 Ƀing gơñu laĭ kơ Ñu tui anai, “Ƀing gơmơi jing ƀing ană tơčô Abraham laih anŭn aka ƀu jing djơ̆ hlŭn kơ arăng ôh. Tui anŭn, hiư̆m pă Ih laĭ kơ tơlơi ƀing gơmơi arăng či pơrơngai hĭ lĕ?” 34 Yêsu laĭ glaĭ tui anai, “Kâo laĭ sĭt biă mă kơ ƀing gih, hlơi pô ngă soh ñu anŭn jing kar hăng sa čô hlŭn tui gưt kơ pô khua soh sat yơh. 35 Hlŭn ƀu hơmâo anih dŏ amăng sang anŏ nanao ôh, samơ̆ ană yơh jing pô lŏm kơ sang anŏ nanao. 36 Tui anŭn, tơdah Kâo, jing Yang Ană, pơrơngai hĭ ƀing gih, sĭt ƀing gih či rơngai yơh. 37 Kâo thâo ƀing gih jing ană tơčô Abraham, samơ̆ ƀing gih prap pre kiăng pơdjai hĭ Kâo, yuakơ ƀing gih ƀu đaŏ kơnang ôh kơ tơlơi Kâo hơmâo pơtô laih kơ ƀing gih. 38 Kâo ruai hăng ƀing gih hơdôm tơlơi Kâo hơmâo ƀuh laih ƀơi anăp Ama Kâo laih anŭn ƀing gih ngă tui hăng tơlơi ƀing gih hơmâo hơmư̆ laih mơ̆ng ama gih.” 39 Ƀing gơñu laĭ glaĭ tui anai, “Abraham yơh jing ama gơmơi.” Yêsu laĭ glaĭ tui anai, “Tơdah ƀing gih jing ană tơčô Abraham, sĭt ƀing gih či ngă tui hăng tơlơi bruă Abraham ngă yơh. 40 Bơ kơ ră anai, ƀing gih hơduah jơlan kiăng pơdjai hĭ Kâo, jing Pô hơmâo ruai laih tơlơi sĭt kơ ƀing gih kơ tơlơi Kâo hơmư̆ laih mơ̆ng Ơi Adai. Abraham ƀu hơmâo ngă ôh tơlơi kar hăng anŭn. 41 Ƀing gih hlak ngă tui hăng tơlơi bruă ama gih pô ngă yơh.” Ƀing gơñu pơhiăp pơkơdơ̆ng glaĭ tui anai, “Ƀing gơmơi ƀu djơ̆ kar hăng ană pi pum ôh. Kơnơ̆ng ha čô Ama sĭt ƀing gơmơi hơmâo, anŭn jing Ơi Adai pô yơh.”
Ană Bă Satan
42 Yêsu laĭ glaĭ kơ ƀing gơñu tui anai, “Tơdah Ơi Adai jing Ama gih, ƀing gih či khăp kơ Kâo yơh, yuakơ Kâo tơbiă rai mơ̆ng Ơi Adai laih anŭn ră anai Kâo dŏ pơ anai. Kâo ƀu rai mă hơjăn Kâo pô ôh, samơ̆ Ñu hơmâo pơkiaŏ rai laih Kâo. 43 Yua hơget boh hiăp Kâo ƀu rơđah ôh kơ ƀing gih lĕ? Anŭn jing yuakơ ƀing gih ƀu thâo hơmư̆ ôh tơlơi Kâo pơhiăp. 44 Ƀing gih lŏm kơ Satan jing kar hăng ama kơ ƀing gih, laih anŭn ƀing gih kiăng tui hăng tơlơi ama gih kiăng yơh. Ñu yơh jing pô pơdjai mơnuih čơdơ̆ng mơ̆ng phŭn kơ kơyâo pơtâo mơnơ̆ng mơnuă, ƀu gưt tui hơget tơlơi jing sĭt ôh, yuakơ ƀu hơmâo tơlơi hơget ôh jing sĭt kơ tơlơi ñu. Tơdang ñu pơhiăp ƀlŏr, ñu pơhiăp tui hăng tơlơi kơnuih ñu pô, yuakơ ñu jing pô ƀlŏr laih anŭn phŭn kơ tơlơi ƀlŏr yơh. 45 Samơ̆ yuakơ Kâo pơhiăp mơta tơlơi jing sĭt, tui anŭn ƀing gih ƀu đaŏ kơnang kơ Kâo ôh. 46 Ƀu hơmâo hlơi pô ôh amăng ƀing gih dưi pơrơklă kơ tơlơi Kâo hơmâo ngă soh laih. Yuakơ Kâo hlak pơhiăp mơta tơlơi jing sĭt, sĭt ƀing gih năng đaŏ kơnang kơ Kâo yơh. 47 Hlơi pô lŏm kơ Ơi Adai, ñu anŭn gưt tui tơlơi Ơi Adai pơhiăp yơh. Tơhơnal tơlơi ƀing gih ƀu gưt tui ôh tơlơi Ơi Adai pơhiăp anŭn yuakơ ƀing gih ƀu lŏm kơ Ơi Adai ôh.”
Tơlơi Yêsu Yap Ñu Pô Jing Yom Prŏng Hloh Kơ Abraham
48 Ƀing khua djă̱ akŏ ƀing Yehudah laĭ kơ Yêsu tui anai, “Ƀing gơmơi laĭ djơ̆ yơh kơ Ih jing mơnuih Samaria soh sat laih anŭn pô tŭ yang sat git gai.” 49 Yêsu pơhiăp tui anai, “Kâo ƀu djơ̆ mơnuih tŭ yang sat git gai ôh, samơ̆ Kâo pơpŭ kơ Ama Kâo laih anŭn ƀing gih ƀu pơpŭ kơ Kâo ôh. 50 Kâo ƀu kiăng pơpŭ kơ Kâo pô ôh, samơ̆ hơmâo sa Čô pô kiăng pơpŭ kơ Kâo, laih anŭn Ñu yơh jing Pô phat kơđi pơala brơi kơ Kâo. 51 Kâo laĭ sĭt biă mă kơ ƀing gih, tơdah hlơi pô gưt tui hơdôm boh hiăp Kâo pơtô, ñu anŭn ƀu či djai hĭ ôh.” 52 Truh ƀơi mông anŭn, ƀing khua djă̱ akŏ ƀing Yehudah pơhiăp kraih tui anai, “Ră anai ƀing gơmơi thâo yơh kơ tơlơi Ih jing pô tŭ yang sat git gai! Abraham djai laih, laih anŭn ƀing pô pơala ăt djai laih mơ̆n, samơ̆ Ih laĭ kơ tơlơi tơdah hlơi pô gưt tui hơdôm boh hiăp Ih, ñu anŭn ƀu či djai hĭ ôh! 53 Sĭt Ih ƀu jing yom prŏng hloh kơ ơi adon gơmơi Abraham ôh! Ñu djai laih, laih anŭn ƀing pô pơala ăt djai hĭ mơ̆n. Tui anŭn, hlơi Ih pơmĭn ih jing lĕ?” 54 Yêsu laĭ glaĭ tui anai, “Tơdah Kâo pơpŭ pơyom kơ Kâo pô, tơlơi anŭn či jing hĭ đôč đač yơh. Ama Kâo, jing Pô ƀing gih yap jing Ơi Adai gih, jing Pô pơpŭ pơyom kơ Kâo. 55 Wơ̆t tơdah ƀing gih ƀu thâo krăn Ñu ôh, samơ̆ Kâo thâo krăn Ñu. Tơdah Kâo laĭ Kâo ƀu thâo krăn Ñu ôh, Kâo ăt či jing Pô pơhiăp ƀlŏr kar hăng ƀing gih pơhiăp ƀlŏr mơ̆n. Samơ̆ Kâo ƀu dưi laĭ ôh tui anŭn yuakơ Kâo thâo krăn Ñu laih anŭn gưt tui boh hiăp Ñu. 56 “Ơi adon gih Abraham mơak biă mă tơdang ñu pơmĭn kơ tơlơi kiăng kơ ƀuh Kâo ƀơi lŏn tơnah anai. Ñu čang rơmang laih kơ tơlơi anŭn, laih anŭn ñu hơ̆k mơak biă mă laih.” 57 Ƀing khua djă̱ akŏ ƀing Yehudah laĭ kơ Yêsu tui anai, “Ih aka ƀu truh kơ rơmapluh thŭn ôh, tui anŭn sĭt Ih aka ƀu ƀuh Abraham ôh!” 58 Yêsu pơhiăp tui anai, “Kâo laĭ sĭt biă mă kơ ƀing gih, hlâo kơ hơmâo Abraham, hơmâo laih Kâo!” 59 Tơdang ƀing gơñu hơmư̆ tui anŭn, ƀing gơñu mă boh pơtâo kiăng glŏm kơ Yêsu yơh, samơ̆ Yêsu pơdŏp hĭ Ñu pô laih anŭn tơbiă đuaĭ hĭ mơ̆ng wăl tơdron sang yang anŭn.
Yêsu Pơsuaih Sa Čô Bum Mơta Čơdơ̆ng Mơ̆ng Hrơi Tơkeng Rai Kơ Ñu
1 Tơdang Yêsu rơbat nao, Ñu ƀuh sa čô mơnuih bum mơta čơdơ̆ng mơ̆ng hrơi amĭ ñu tơkeng kơ ñu. 2 Ƀing ding kơna Yêsu tơña kơ Ñu tui anai, “Ơ Nai ăh, hiư̆m ngă, yua mơ̆ng tơlơi soh ñu pô ƀôdah tơlơi soh amĭ ama ñu ngă kơ ñu bum mơta anai?” 3 Yêsu laĭ glaĭ tui anai, “Tơlơi ñu bum mơta anai ƀu djơ̆ yua mơ̆ng tơlơi soh ñu pô ƀôdah tơlơi soh amĭ ama ñu ôh, samơ̆ tơlơi anŭn truh kiăng kơ pơrơđah kơ mơnuih mơnam hiư̆m tơlơi dưi mơyang Ơi Adai či ngă bruă amăng ñu yơh. 4 Tơdang ăt dŏ tơ hrơi, ƀing ta khŏm ngă bruă Pô hơmâo pơkiaŏ rai laih Kâo. Tơdang mlam truh laih, hlak anŭn ƀu hơmâo hlơi pô dưi ngă bruă dơ̆ng tah. 5 Tơdang Kâo dŏ amăng lŏn tơnah, Kâo jing kar hăng tơlơi bơngač kơ mơnuih mơnam amăng lŏn tơnah yơh.” 6 Tơdang Yêsu pơhiăp kơ tơlơi anŭn giŏng laih, Ñu kơčŭh ia bah ƀơi lŏn lŭk lăk hĭ hăng hlŭ̱ laih anŭn pik ƀơi mơta pô bum anŭn. 7 Yêsu pơtă kơ gơ̆ tui anai, “Nao rao bĕ pơ dơnao Silôê.” Boh hiăp anŭn kiăng laĭ arăng pơkiaŏ nao. Tui anŭn, pô bum mơta anŭn nao rao laih anŭn ñu wơ̆t glaĭ thâo ƀuh mơtam yơh. 8 Ƀing mơnuih dŏ jum dar hăng ƀing mơnuih hlâo adih hơmâo ƀuh laih pô bum anŭn dŏ rơkâo da̱n pơlaĭ tơdruă tui anai, “Djơ̆ mơ̆ anai jing pô juăt dŏ be̱r rơkâo da̱n hlâo adih?” 9 Hơmâo đơđa mơnuih laĭ kơ tơlơi ñu yơh jing pô anŭn. Đơđa ƀing pơkŏn laĭ tui anai, “Ơ ơh, sa čô pô pơkŏn hrup hăng ñu đôč.” Samơ̆ pô bum anŭn laĭ glaĭ tui anai, “Kâo yơh jing pô anŭn.” 10 Tui anŭn, ƀing gơñu tơña pơñen kơ gơ̆ tui anai, “Tui anŭn, hiư̆m pă mơta ih dưi ƀuh lĕ?” 11 Pô bum anŭn laĭ glaĭ tui anai, “Sa čô mơnuih arăng iâu Yêsu lŭk lăk hlŭ̱ laih anŭn pik ƀơi mơta kâo. Ñu pơđar kơ kâo nao rao pơ dơnao Silôê. Tui anŭn, kâo nao rao laih anŭn kâo dưi ƀuh yơh.” 12 Ƀing gơñu tơña kơ ñu tui anai, “Pơpă pô anŭn lĕ?” Pô bum laĭ glaĭ tui anai, “Kâo ƀu thâo ôh.”
Ƀing Pharisai Tơña Kơsem Hiư̆m Pô Bum Anŭn Dưi Suaih Hĭ
13 Giŏng anŭn, ƀing gơñu ba pô bum mơta hlâo adih anŭn pơ ƀing Pharisai. 14 Ƀơi hrơi Yêsu lŭk lăk hlŭ̱ hăng pơsuaih hĭ mơta pô bum anŭn jing hrơi Saƀat. 15 Hơnŭn yơh, ƀing Pharisai tơña kơ pô bum anŭn dơ̆ng kơ tơlơi hiư̆m mơta gơ̆ thâo ƀuh. Pô bum anŭn laĭ glaĭ tui anai, “Pô arăng iâu Yêsu anŭn pik hlŭ̱ ƀơi mơta kâo, kâo nao rao laih anŭn ră anai kâo thâo ƀuh yơh.” 16 Hơmâo đơđa ƀing Pharisai laĭ tui anai, “Mơnuih anŭn ƀu tơbiă rai mơ̆ng Ơi Adai ôh, yuakơ ñu ƀu djă̱ pioh ôh tơlơi phiăn hrơi Saƀat.” Samơ̆ ƀing pơkŏn dơ̆ng laĭ tui anai, “Sa čô mơnuih soh sat ƀu dưi ngă tơlơi mơsêh mơyang kar hăng anŭn ôh.” Tui anŭn, ƀing gơñu pơčơlah tơdruă gơñu yơh. 17 Hơnăl tuč, ƀing gơñu wơ̆t glaĭ tơña kơ pô bum anŭn dơ̆ng tui anai, “Bơ kơ ih, hơget tơlơi ih pơmĭn kơ Pô anŭn lĕ, jing Pô hơmâo pơsuaih hĭ laih mơta ih?” Pô bum mơta laĭ glaĭ, “Ñu jing pô pơala yơh.” 18 Samơ̆ ƀing khua djă̱ akŏ ƀing Yehudah ăt ƀu đaŏ ôh kơ tơlơi pô bum anŭn hlâo adih jing pô bum mơta, samơ̆ ră anai hơmâo rơđah glaĭ laih mơta ñu, tui anŭn ƀing gơñu brơi arăng iâu rai amĭ ama gơ̆ yơh. 19 Ƀing gơñu tơña kơ amĭ ama gơ̆ tui anai, “Djơ̆ mơ̆ anai jing ană đah rơkơi ih? Djơ̆ mơ̆ anai jing pô ƀing gih laĭ ñu bum mơta čơdơ̆ng mơ̆ng hrơi amĭ tơkeng? Tui anŭn, hiư̆m pă ră anai ñu dưi thâo rơđah glaĭ lĕ?” 20 Amĭ ama ñu laĭ glaĭ tui anai, “Ƀing gơmơi thâo krăn ñu jing ană đah rơkơi gơmơi laih anŭn ñu hơmâo bum mơta laih čơdơ̆ng mơ̆ng hrơi ƀing gơmơi hơmâo rai ñu. 21 Samơ̆ ră anai hiư̆m pă ñu thâo ƀuh rơđah ƀôdah hlơi pô pơsuaih brơi laih mơta ñu, ƀing gơmơi ƀu thâo ôh. Tơña ñu bĕ, ñu prŏng laih, ñu pô či laĭ glaĭ kơ ƀing gih yơh.” 22 Amĭ ama ñu laĭ tui anŭn yuakơ ƀing gơñu huĭ kơ ƀing khua djă̱ akŏ ƀing Yehudah, yuakơ ƀing khua anŭn hơmâo khưp ngă laih kơ tơlơi hlơi pô tŭ ư kơ Yêsu jing Pô Messiah, ñu anŭn ƀing arăng ƀu či brơi mŭt pơ sang pơjơnum dơ̆ng tah. 23 Anŭn yơh jing tơhơnal tơlơi yua hơget ƀing amĭ ama gơ̆ laĭ tui anai, “Ñu prŏng laih, tơña ñu bĕ!” 24 Tal dua dơ̆ng ƀing gơñu iâu rai tơña kơ pô bum anŭn laih anŭn laĭ tui anai, “Ƀuăn bĕ hăng Ơi Adai ih či pơhiăp hăng tơlơi sĭt! Ƀing gơmơi thâo sĭt Pô anŭn jing sa čô mơnuih soh.” 25 Pô bum anŭn laĭ glaĭ tui anai, “Pô anŭn jing mơnuih soh sat ƀôdah ƀu jing, kâo ƀu thâo ôh. Kơnơ̆ng sa tơlơi kâo thâo. Hlâo adih kâo jing bum mơta, samơ̆ ră anai kâo thâo ƀuh laih!” 26 Giŏng anŭn ƀing gơñu tơña kơ pô bum anŭn dơ̆ng tui anai, “Hiư̆m pă ñu hơmâo ngă laih kơ ih lĕ? Hiư̆m pă ñu pơsuaih hĭ mơta ih lĕ?” 27 Pô bum anŭn laĭ glaĭ tui anai, “Kâo hơmâo ruai laih kơ ƀing gih, samơ̆ ƀing gih ƀu hơmư̆ ôh. Yua hơget ƀing gih kiăng hơmư̆ dơ̆ng lĕ? Ƀing gih ăt kiăng jing ding kơna Ñu mơ̆n hă?” 28 Giŏng anŭn, ƀing gơñu pơhiăp djik kơ gơ̆ tui anai, “Ŏng yơh jing ding kơna pô anŭn! Ƀing gơmơi jing ƀing ding kơna Môseh! 29 Ƀing gơmơi thâo kơ tơlơi Ơi Adai hơmâo pơhiăp laih hăng Môseh, samơ̆ bơ kơ pô anai, ƀing gơmơi ƀu thâo ôh mơ̆ng pă ñu tơbiă rai.” 30 Pô bum anŭn pơhiăp tui anai, “Anŭn jing sa tơlơi hli̱ng hla̱ng biă mă yơh! Ƀing gih ƀu thâo ôh mơ̆ng pă Pô anŭn tơbiă rai, samơ̆ Ñu pơsuaih brơi mơta kâo. 31 Ƀing ta thâo krăn kơ tơlơi Ơi Adai ƀu či pơđi̱ng hơmư̆ kơ ƀing mơnuih soh sat ôh, samơ̆ Ñu pơđi̱ng hơmư̆ kơ pô thâo huĭ pơpŭ kơ Ñu, jing pô ngă tui hăng tơlơi Ñu kiăng yơh. 32 Čơdơ̆ng mơ̆ng phŭn kơ kơyâo pơtâo mơnơ̆ng mơnuă hlŏng truh pơ tă anai, arăng aka ƀu hơmư̆ djơ̆ ôh kơ tơlơi sa čô mơnuih dưi pơsuaih hĭ mơnuih bum mơta čơdơ̆ng mơ̆ng hrơi amĭ ñu tơkeng kơ ñu. 33 Tơdah Pô anŭn ƀu tơbiă rai mơ̆ng Ơi Adai ôh, Ñu ƀu dưi ngă tơlơi bruă hơget kar hăng anŭn ôh.” 34 Tơdang ƀing gơñu hơmư̆ tui anŭn, ƀing gơñu pơhiăp kơ gơ̆ tui anai, “Ŏng jing mơnuih soh hlo̱m ƀo̱m čơdơ̆ng mơ̆ng hrơi arăng tơkeng rai kơ ŏng, sĭt ŏng ƀu năng lăp pơtô pơblang brơi kơ ƀing gơmơi ôh!” Laih anŭn ƀing gơñu puh pơđuaĭ hĭ gơ̆ mơ̆ng sang jơnum yơh.
Tơlơi Bum Mơta Gah Bơngăt
35 Yêsu hơmư̆ hing kơ tơlơi ƀing gơñu hơmâo puh pơđuaĭ hĭ laih pô bum anŭn mơ̆ng sang jơnum. Yêsu nao bưp gơ̆ hăng laĭ tui anai, “Ih đaŏ mơ̆ kơ Ană Mơnuih, jing Pô trŭn rai laih mơ̆ng adai adih?” 36 Gơ̆ laĭ glaĭ tui anai, “Ơ Khua ăh, hlơi Ñu jing lĕ? Rơkâo kơ Ih ruai kơ kâo bĕ, kiăng kơ kâo dưi đaŏ kơnang kơ Ñu.” 37 Yêsu laĭ glaĭ tui anai, “Ră anai ih hơmâo ƀuh laih Ñu. Sĭt yơh, anŭn jing Kâo yơh, jing Pô hlak dŏ pơhiăp hăng ih.” 38 Giŏng anŭn, pô bum anŭn laĭ tui anai, “Ơ Khua ăh, kâo đaŏ kơnang kơ Ih yơh.” Laih anŭn ñu bon kơkuh kơ Yêsu. 39 Tui anŭn, Yêsu laĭ tui anai, “Kâo rai pơ lŏn tơnah kiăng kơ phat kơđi tŏng krah mơnuih mơnam, kiăng kơ ƀing mơnuih kar hăng mơnuih bum či jing hĭ kar hăng mơnuih thâo ƀuh laih anŭn ƀing mơnuih pơkŏn dơ̆ng kar hăng ƀing thâo ƀuh či jing hĭ kar hăng mơnuih bum yơh.” 40 Hơmâo đơđa ƀing Pharisai dŏ ƀơi anŭn hăng hơmư̆ kơ tơlơi anŭn, tui anŭn ƀing gơñu pơhiăp hăng Yêsu tui anai, “Sĭt nik ƀing gơmơi ƀu jing kar hăng ƀing bum ôh.” 41 Yêsu laĭ glaĭ tui anai, “Tơdah ƀing gih jing kar hăng ƀing bum jing ƀing kiăng kơ ƀuh, Ơi Adai dưi pap brơi kơ ƀing gih kơ tơlơi ngă soh yơh, samơ̆ ră anai gih pô yap soh kơ tơlơi ƀing gih thâo hơget tơlơi jing sĭt kơ tơlơi Ơi Adai, Ñu ƀu pap brơi kơ ƀing gih ôh kơ tơlơi ngă soh anŭn.”
Tơlơi Pơhơmutu Kơ Pô Wai Triu Hăng Tơpul Triu
1 Yêsu laĭ hăng ƀing khua djă̱ akŏ ƀing Yehudah anŭn dơ̆ng tui anai, “Kâo laĭ sĭt biă mă kơ ƀing gih, mơnuih pă ƀu mŭt ôh mơ̆ng amăng ja̱ng kiăng kơ mŭt pơ war triu, samơ̆ đĭ mŭt mơ̆ng jơlan pơkŏn, ñu anŭn jing mơnuih klĕ dŏp ƀôdah mơnuih klĕ sua yơh. 2 Samơ̆ pô wai pă mŭt mơ̆ng amăng ja̱ng war anŭn, ñu anŭn jing pô wai kơ tơpul triu ñu yơh. 3 Pô gak wai bah amăng pŏk brơi amăng ja̱ng kơ pô wai laih anŭn tơpul triu hơmư̆ hiăp pô wai anŭn yơh. Pô wai anŭn iâu rĭm anăn triu ñu hăng dui ba gơñu tơbiă pơ rơngiao. 4 Tơdang pô wai ba tơbiă abih bang tơpul triu ñu, ñu nao hlâo kơ tơpul triu ñu, laih anŭn tơpul triu ñu đuaĭ tui ñu yuakơ tơpul triu ñu thâo kơnăl hiăp ñu. 5 Samơ̆ tơpul triu anŭn ƀu đuaĭ tui pô tuai ôh. Pơala kơ tơlơi anŭn, gơñu đuaĭ hĭ mơ̆ng pô tuai anŭn yơh yuakơ gơñu ƀu thâo kơnăl ôh hiăp pô tuai anŭn.” 6 Yêsu yua tơlơi pơhiăp pơhơmutu anŭn, samơ̆ ƀing gơñu ƀu thâo hluh ôh hơget tơlơi Yêsu pơhiăp hăng ƀing gơñu.
Yêsu Jing Kar Hăng Pô Wai Triu Hiam Klă
7 Hơnŭn yơh, Yêsu pơtô dơ̆ng tui anai, “Kâo laĭ sĭt biă mă kơ ƀing gih, Kâo jing kar hăng amăng ja̱ng kơ tơpul triu. 8 Abih bang ƀing khua djă̱ akŏ rai laih hlâo kơ Kâo le̱ng kơ jing kar hăng ƀing klĕ dŏp hăng ƀing klĕ sua soh sel, samơ̆ tơpul triu anŭn ƀu hơmư̆ tui ƀing gơñu ôh. 9 Kâo jing kar hăng amăng ja̱ng kơ war triu. Hlơi pô đaŏ kơnang kơ Kâo, jing kar hăng triu mŭt pơ war, ñu anŭn Ơi Adai či pơklaih hăng pha brơi kơ ñu yơh. Ñu anŭn či jing kar hăng triu mŭt pơ war hăng tơbiă mơ̆ng anŭn, laih anŭn bưp rơ̆k mơda yơh. 10 Ƀing khua ba akŏ tơlơi đaŏ gih jing kar hăng mơnuih klĕ dŏp, jing ƀing rai kơnơ̆ng kơ klĕ, pơdjai laih anŭn pơrai hĭ triu. Kâo hơmâo rai laih kiăng kơ ƀing ană plei Kâo hơdip hlŏng lar laih anŭn hơdip rơbeh rơbai yơh.” 11 “Kâo jing kar hăng pô wai triu hiam klă. Kar hăng pô wai triu hiam klă pơsăn tơlơi hơdip ñu kơ tơpul triu ñu, ăt kar kaĭ mơ̆n, Kâo či djai kiăng pơklaih hĭ ƀing ană plei Kâo. 12 Pô wai arăng apăh ƀu djơ̆ pô wai triu sĭt kơ tơpul triu ôh. Tui anŭn, tơdang ñu ƀuh asâo glai rai pơ tơpul triu, ñu lui hĭ tơpul triu hăng đuaĭ kơdŏp hĭ yơh. Giŏng anŭn, asâo glai anŭn kơsung mă tơpul triu hăng pơčơlah hĭ bru bra yơh. 13 Pô wai anŭn đuaĭ kơdŏp hĭ yuakơ ñu jing pô wai arăng apăh laih anŭn ñu ƀu pơmĭn ƀlơ̆ng brơi kơ tơpul triu ôh. 14 “Kâo jing kar hăng Pô wai triu hiam klă. Kâo thâo krăn ƀing ană plei Kâo laih anŭn ƀing gơñu thâo krăn Kâo, kar hăng pô wai thâo krăn tơpul triu ñu laih anŭn tơpul triu ñu thâo krăn ñu yơh, 15 jing kar hăng Ama Kâo thâo krăn Kâo laih anŭn Kâo thâo krăn Ama Kâo. Ăt kar kaĭ mơ̆n, Kâo či pơsăn drơi Kâo pô kơ ƀing ană plei Kâo jing kar hăng tơpul triu yơh anŭn. 16 Kâo ăt hơmâo ƀing mơnuih pơkŏn mơ̆n jing ƀing kar hăng tơpul triu pơkŏn mơ̆ng war pơkŏn. Kâo ăt khŏm ba gơñu kơ Kâo pô mơ̆n. Ƀing gơñu či hơmư̆ tui Kâo laih anŭn abih bang hlơi pô lŏm kơ Kâo či jing hĭ kar hăng sa tơpul triu hăng sa pô wai yơh. 17 Tơhơnal tơlơi Ama Kâo khăp kơ Kâo anŭn jing yuakơ Kâo či pơsăn lui hĭ Kâo pô, samơ̆ tơdơi kơ Kâo ngă tui anŭn, Kâo či jing hĭ hơdip glaĭ dơ̆ng yơh. 18 Ƀu hơmâo hlơi pô ôh dưi pơdjai hĭ Kâo, samơ̆ Kâo pô pơsăn hĭ Kâo pô yơh. Kâo hơmâo tơlơi dưi pơsăn lui hĭ Kâo pô laih anŭn Kâo ăt hơmâo tơlơi dưi kiăng kơ jing hơdip glaĭ dơ̆ng mơ̆n. Ama Kâo yơh pơđar laih kơ Kâo kiăng kơ ngă tui anŭn.” 19 Yua mơ̆ng hơdôm tơlơi pơhiăp anŭn, ƀing Yehudah pơkăh pơpha hĭ tơdruă gơñu dơ̆ng. 20 Lu mơnuih amăng ƀing gơñu laĭ tui anai, “Ñu jing pô yang sat ngă laih anŭn jing hưt laih. Anăm hơmư̆ tui Ñu ôh!” 21 Samơ̆ đơđa ƀing pơkŏn laĭ tui anai, “Tơlơi pơhiăp anŭn ƀu djơ̆ mơ̆ng pô yang sat ngă ôh. Sĭt yơh, pô yang sat ngă ƀu dưi pơsuaih hĭ mơta sa čô pô bum ôh!”
Ƀing Khua Djă̱ Akŏ Ƀing Yehudah Ƀu Đaŏ Kơnang Kơ Yêsu
22 Tơl truh hrơi Phet Iâu Laĭ Pơkô̆ Pơyơr Sang Yang amăng plei Yerusalaim. Hlak anŭn jing djơ̆ amăng bơyan puih, 23 laih anŭn Yêsu hlak dŏ rơbat amăng anih wăl tơdron sang yang ƀơi Adri̱ng Solomôn. 24 Ƀing khua djă̱ akŏ ƀing Yehudah pơƀut glaĭ jum dar Yêsu hăng tơña tui anai, “Hơbĭn sui dơ̆ng Ih či lui brơi kơ ƀing gơmơi dŏ đing đaŏ kar hăng anai lĕ? Tơdah Ih jing Pô Krist, rơkâo kơ Ih pơhiăp rơđah bĕ kơ ƀing gơmơi.” 25 Yêsu pơhiăp tui anai, “Kâo hơmâo laĭ laih kơ ƀing gih, samơ̆ ƀing gih ƀu đaŏ kơnang ôh. Hơdôm tơlơi mơsêh mơyang Kâo ngă, tui hăng Ama Kâo pha brơi tơlơi dưi, hơmâo ngă gơ̆ng jơlan laih kơ Kâo, 26 samơ̆ ƀing gih ƀu đaŏ kơnang kơ Kâo ôh, yuakơ ƀing gih ƀu djơ̆ kar hăng tơpul triu Kâo ôh. 27 Ƀing ană plei Kâo, kar hăng tơpul triu, hơmư̆ tui hiăp Kâo. Kâo thâo krăn gơñu laih anŭn gơñu đuaĭ tui Kâo. 28 Kâo či ngă kơ ƀing gơñu hơdip hăng Kâo hlŏng lar laih anŭn gơñu ƀu či răm rai hĭ ôh. Laih anŭn ƀu hơmâo hlơi pô dưi hơñăk mă hĭ gơñu mơ̆ng Kâo. 29 Ama Kâo, jing Pô jao brơi gơñu kơ Kâo, jing Pô prŏng hloh kơ abih bang laih anŭn ƀu hơmâo hlơi pô ôh dưi hơñăk mă hĭ ƀing gơñu mơ̆ng Ama Kâo. 30 Kâo hăng Ama Kâo jing sa.” 31 Ƀing khua djă̱ akŏ ƀing Yehudah mă boh pơtâo dơ̆ng kiăng glŏm hĭ Yêsu, 32 samơ̆ Yêsu laĭ kơ ƀing gơñu tui anai, “Kâo hơmâo pơrơđah laih kơ ƀing gih lu tơlơi mơsêh mơyang yom pơphan Ama Kâo pha brơi laih kiăng kơ ngă. Yuakơ amăng hơdôm tơlơi bruă hơget anŭn tơl ƀing gih kiăng pơdjai hĭ Kâo hăng tơlơi glŏm boh pơtâo kơ Kâo lĕ?” 33 Ƀing khua djă̱ akŏ ƀing Yehudah anŭn laĭ glaĭ tui anai, “Ƀu djơ̆ yuakơ hơdôm tơlơi bruă anŭn ôh ƀing gơmơi kiăng glŏm boh pơtâo kơ Ih, samơ̆ yuakơ Ih pơhiăp ƀrưh kơ Ơi Adai yơh. Ih kơnơ̆ng jing mơnuih mơnam đôč samơ̆ Ih yap Ih pô jing Ơi Adai.” 34 Yêsu laĭ glaĭ kơ ƀing gơñu tui anai, “Amăng hră Tơlơi Juăt arăng hơmâo čih laih tui anai, ‘Kâo hơmâo laĭ laih kơ ƀing gih kơ tơlơi ƀing gih jing ƀing yang’? 35 Hră Ơi Adai iâu kơ ƀing gơñu jing kar hăng ƀing yang, jing kơ ƀing hlơi pô tŭ mă tơlơi Ơi Adai pơhiăp laih anŭn hră Tơlơi Ơi Adai Pơhiăp hơmâo čih laih jing sĭt yơh. 36 Bơ kơ Kâo, Kâo jing Pô Yang Ama hơmâo pioh hơjăn laih kơ Ñu pô laih anŭn pơkiaŏ rai laih pơ lŏn tơnah anai. Tui anŭn, ƀing gih khŏm anăm phŏng kơđi kơ Kâo jing Pô ƀrưh mơhiăh ôh yuakơ Kâo hơmâo laĭ laih kơ tơlơi Kâo jing Ană Ơi Adai! 37 Ƀing gih khŏm anăm đaŏ kơnang kơ Kâo ôh tơdah Kâo ƀu ngă bruă Ama Kâo ngă. 38 Samơ̆ yuakơ Kâo ngă bruă anŭn, wơ̆t tơdah ƀing gih ƀu đaŏ kơnang kơ Kâo ôh, đaŏ kơnang bĕ kơ hơdôm tơlơi mơsêh mơyang anŭn, tui anŭn ƀing gih dưi thâo hluh kơ tơlơi Yang Ama dŏ amăng Kâo, laih anŭn Kâo dŏ amăng Yang Ama.” 39 Ƀing khua djă̱ akŏ ƀing Yehudah gir kiăng kơ mă Yêsu dơ̆ng, samơ̆ Ñu đuaĭ tơklaih hĭ mơ̆ng ƀing gơñu yơh. 40 Giŏng anŭn, Yêsu wơ̆t glaĭ pơ gah adih ha̱ng ia Yurdan, jing truh pơ anih Yôhan hơmâo ngă laih baptem hlâo adih. Laih anŭn Ñu dŏ jưh pơ anih anŭn, 41 laih anŭn hơmâo lu mơnuih rai pơ Ñu. Ƀing gơñu laĭ tui anai, “Wơ̆t tơdah Yôhan ƀu hơmâo ngă tơlơi mơsêh mơyang ôh, samơ̆ abih bang tơlơi ñu pơruai kơ Pô anai le̱ng kơ jing sĭt soh sel.” 42 Laih anŭn amăng anih anŭn hơmâo lu mơnuih đaŏ kơnang kơ Yêsu.
Tơlơi Lazaros Djai
1 Hlak anŭn, hơmâo sa čô mơnuih anăn Lazaros hlak ruă. Ñu dŏ pơ plei Bêthania, jing plei H'Mari hăng amai ñu H'Martha dŏ. 2 H'Mari jing pô tơdơi anai pik ia ƀâo hiam ƀơi tơkai Khua Yang laih anŭn sut tơkai Khua Yang hăng ƀŭk ñu. Ayŏng ñu Lazaros anŭn, jing pô hlak ruă. 3 Tui anŭn, dua adơi amai anŭn pơkiaŏ mơnuih nao laĭ pơthâo kơ Yêsu tui anai, “Ơ Khua ăh, giăng mah Ih hlak dŏ ruă.” 4 Tơdang Yêsu hơmư̆ tơlơi anŭn, Ñu laĭ tui anai, “Tơlơi kơñăm kơ tơlơi ruă duăm anŭn jing ƀu djơ̆ kơ tơlơi ñu khŏm djai ôh. Samơ̆ tơlơi ruă anŭn truh yơh kiăng kơ mơnuih mơnam či thâo krăn kơ tơlơi hiư̆m kơtang mơyang Ơi Adai jing laih anŭn kơ tơlơi Ñu kiăng kơ ƀing arăng pơpŭ pơyom kơ Kâo, jing Ană Ñu, yuakơ tơlơi truh anŭn.” 5 Yêsu khăp kơ H'Martha, kơ H'Mari adơi ñu laih anŭn kơ Lazaros mơ̆n. 6 Tơdang Ñu hơmư̆ kơ tơlơi Lazaros ruă, Ñu dŏ glaĭ pơ anih Ñu hlak dŏ anŭn dua hrơi dơ̆ng. 7 Giŏng anŭn, Ñu laĭ kơ ƀing ding kơna Ñu tui anai, “Brơi kơ ƀing ta wơ̆t glaĭ bĕ pơ kwar Yudea.” 8 Ƀing ding kơna Ñu laĭ tui anai, “Ơ Nai ăh, hlâo kơ anai ƀiă ƀing Yehudah gir hơduah glŏm boh pơtâo kơ Ih, tui anŭn ră anai Ih khŏm anăm wơ̆t glaĭ pơ anih anŭn dơ̆ng tah!” 9 Yêsu pơhiăp tui anai, “Rĭm čô thâo kơ tơlơi hơmâo pluh-dua rơwang mông amăng sa hrơi! Hlơi pô rơbat tơdang hrơi, ñu anŭn ƀu tơhneč ôh, yuakơ ñu dưi ƀuh yua mơ̆ng tơlơi bơngač yang hrơi yơh. 10 Samơ̆ tơdah ñu rơbat tơdang mlam, ñu anŭn či tơhneč hĭ yơh, yuakơ ñu ƀu hơmâo tơlơi bơngač ôh.” 11 Tơdơi kơ Ñu pơhiăp laih kơ tơlơi anŭn, Ñu laĭ kơ ƀing gơñu dơ̆ng tui anai, “Gơyut ta Lazaros hơmâo pĭt laih, samơ̆ Kâo či nao râo mơdưh ñu.” 12 Ƀing ding kơna Ñu laĭ tui anai, “Ơ Khua ăh, tơdah ñu dŏ pĭt, sĭt ñu či plai ƀiă yơh.” 13 Yêsu laĭ kơ tơlơi anŭn kiăng pơhiăp pơhơmutu kơ tơlơi djai Lazaros, samơ̆ ƀing ding kơna pơmĭn kơ tơlơi Yêsu kơnơ̆ng laĭ kơ tơlơi pĭt yang đăr đôč. 14 Tui anŭn, Yêsu pơhiăp rơđah hăng ƀing gơñu tui anai, “Lazaros djai laih, 15 samơ̆ yuakơ ƀing gih yơh Kâo mơak kơ tơlơi Kâo ƀu dŏ pơ anih anŭn, kiăng kơ ƀing gih dưi đaŏ kơnang kơ Kâo. Brơi kơ ƀing ta nao pơ ñu bĕ.” 16 Giŏng anŭn, Thômas, arăng ăt iâu Didumos, pơhiăp hăng abih bang ƀing ding kơna pơkŏn tui anai, “Brơi kơ ƀing ta ăt nao hrŏm hăng Nai bĕ, kiăng kơ ƀing ta či djai hrŏm hăng Ñu mơ̆n.”
Yêsu Pơjuh Alum Ƀing Amai Adơi Anŭn
17 Tơdang Yêsu truh laih, Ñu thâo krăn arăng hơmâo dơ̱r laih Lazaros pă̱ hrơi laih. 18 Plei Bêthania ƀu ataih ôh mơ̆ng plei Yerusalaim, anŭn jing ƀiă hloh kơ dua rơwang juă yơh. 19 Laih anŭn hơmâo lu biă mă ƀing Yehudah rai kiăng kơ pơjuh alum H'Martha hăng H'Mari yuakơ ayŏng gơñu rơngiă laih. 20 Tơdang H'Martha hơmư̆ kơ tơlơi Yêsu hlak rai, ñu tơbiă nao čơkă Ñu yơh, samơ̆ H'Mari ăt dŏ amăng sang. 21 H'Martha laĭ kơ Yêsu tui anai, “Ơ Khua ăh, tơdah Ih hơmâo dŏ laih pơ anai, sĭt ayŏng kâo ƀu či djai hĭ laih ôh. 22 Samơ̆ kâo thâo kơ tơlơi wơ̆t tơdah tă anai, Ơi Adai či ngă brơi kơ Ih hơget tơlơi Ih rơkâo kơ tơlơi ayŏng kâo yơh.” 23 Yêsu laĭ kơ ñu tui anai, “Ayŏng ih či hơdip dơ̆ng yơh.” 24 H'Martha laĭ tui anai, “Kâo thâo ñu či hơdip glaĭ dơ̆ng yơh tơdang Ơi Adai pơhơdip glaĭ ƀing mơnuih mơnam kiăng kơ phat kơđi ƀing gơñu.” 25 Yêsu laĭ kơ ñu tui anai, “Kâo yơh jing Pô pơhơdip glaĭ ƀing mơnuih mơnam laih anŭn ngă kơ ƀing gơñu hơdip hlŏng lar. Hlơi pô đaŏ kơnang kơ Kâo ñu anŭn či hơdip dơ̆ng, wơ̆t tơdah ñu djai laih. 26 Hlơi pô dŏ hơdip laih anŭn đaŏ kơnang kơ Kâo, bơngăt ñu anŭn či ƀu djai hĭ ôh. Ih đaŏ kơnang kơ tơlơi anŭn mơ̆?” 27 H'Martha laĭ glaĭ kơ Ñu tui anai, “Ơ Khua ăh, kâo đaŏ kơnang kơ tơlơi Ih jing Pô Krist, Ană Ơi Adai, jing Pô khŏm rai pơ lŏn tơnah anai.”
Yêsu Hia
28 Tơdơi kơ H'Martha laĭ laih tơlơi anŭn, ñu đuaĭ glaĭ pơ sang hăng iâu hơjăn adơi ñu H'Mari tui anai, “Nai ta dŏ pơ adih laih anŭn Ñu hlak iâu ih.” 29 Tơdang H'Mari hơmư̆ kơ tơlơi anŭn, ñu tơgŭ ječ ameč đuaĭ nao pơ Yêsu yơh. 30 Hlak anŭn, Yêsu aka mŭt amăng plei ôh, samơ̆ Ñu ăt dŏ pơ anih H'Martha hơmâo bưp laih Ñu anŭn. 31 Tơdang ƀing Yehudah, jing ƀing hlak dŏ amăng sang kiăng pơjuh alum H'Mari, ƀuh H'Mari tơgŭ tơbiă nao ječ ameč, tui anŭn ƀing gơñu đuaĭ tui ñu yơh yuakơ ƀing gơñu pơmĭn huĭdah H'Mari nao pơ anih pơsat kiăng kơ čŏk hia. 32 Tơdang H'Mari nao truh pơ anih Yêsu dŏ hăng ƀuh Ñu, H'Mari bon ƀơi tơkai Yêsu hăng laĭ tui anai, “Ơ Khua ăh, tơdah Ih ăt dŏ pơ anai mơ̆n, sĭt ayŏng kâo ƀu djai hĭ ôh.” 33 Tơdang Yêsu ƀuh gơ̆ hia wơ̆t hăng ƀing Yehudah đuaĭ tui gơ̆ ăt hia mơ̆n, Ñu glưh pran jua biă mă hăng ƀing gơ̆. 34 Ñu tơña tui anai, “Pơpă anih ƀing gih hơmâo dơ̱r laih ñu lĕ?” Ƀing gơñu laĭ glaĭ tui anai, “Ơ Khua ăh, rai lăng bĕ!” 35 Yêsu hia. 36 Giŏng anŭn, ƀing Yehudah pơlaĭ, “Lăng adih, Ñu khăp biă mă kơ Lazaros!” 37 Hơmâo đơđa mơnuih amăng ƀing gơñu laĭ tui anai, “Ñu dưi pơsuaih hĭ mơta pô bum, sĭt Ñu ăt ngă brơi kơ pô anai ƀu djai mơ̆n.”
Yêsu Ngă Kơ Lazaros Jing Hĭ Hơdip Dơ̆ng
38 Yuakơ tơlơi ƀing gơñu pơhiăp anŭn, Yêsu glưh pran jua dơ̆ng, Ñu nao pơ anih pơsat. Pơsat anŭn jing sa boh pa̱r čư̆ arăng pioh sa boh pơtâo kơđŏl hĭ ƀơi bah amăng. 39 Yêsu pơđar tui anai, “Tơglŭng đuaĭ hĭ bĕ boh pơtâo anŭn.” H'Martha, jing adơi pô djai anŭn, laĭ tui anai, “Samơ̆ Ơ Khua ăh, truh pơ tă anai atâo anŭn ƀâo brŭ laih, yuakơ atâo anŭn dŏ amăng pơsat anŭn pă̱ hrơi laih.” 40 Giŏng anŭn, Yêsu laĭ kơ ñu tui anai, “Ih hơmâo wơr bĭt hĭ laih tơlơi Kâo pơtă laih kơ ih kơ tơlơi tơdah ih đaŏ kơnang kơ Kâo, ih či ƀuh hiư̆m yom prŏng Ơi Adai jing yơh!” 41 Tui anŭn, ƀing gơñu tơglŭng đuaĭ hĭ boh pơtâo. Giŏng anŭn, Yêsu angak đĭ pơ adai laih anŭn iâu laĭ tui anai, “Ơ Ama, Kâo bơni kơ Ih yuakơ Ih hơmâo hơmư̆ laih Kâo. 42 Kâo thâo Ih hơmư̆ Kâo nanao, samơ̆ Kâo laĭ tui anŭn yuakơ tơlơi tŭ yua kơ ƀing mơnuih dŏ jum dar Kâo anai yơh, kiăng kơ ƀing gơñu đaŏ kơnang kơ tơlơi Ih hơmâo pơkiaŏ rai laih Kâo.” 43 Tơdang Yêsu pơhiăp giŏng laih tơlơi anŭn, Ñu iâu kraih tui anai, “Ơ Lazaros, tơbiă bĕ!” 44 Mơnuih djai anŭn tơbiă rai, tơkai tơngan gơ̆ dŏ pŏn hăng khăn sŏm laih anŭn khăn klŭm jum dar ƀô̆ mơta gơ̆. Yêsu pơđar kơ ƀing gơñu tui anai, “Yaih hĭ bĕ khăn pơyua ƀơi ñu laih anŭn brơi kơ ñu nao bĕ.”
Ƀing Khua Djă̱ Akŏ Ƀing Yehudah Kiăng Pơdjai Hĭ Yêsu
45 Hơnŭn yơh, lu ƀing Yehudah, jing ƀing hơmâo nao čuă ngui pơjuh pơalum H'Mari, hơmâo ƀuh laih bruă Yêsu ngă, ƀing gơñu đaŏ kơnang kơ Yêsu mơtam yơh. 46 Samơ̆ hơmâo đơđa ƀing mơnuih pơkŏn nao pơ ƀing Pharisai hăng pơruai glaĭ kơ ƀing Pharisai hơdôm tơlơi Yêsu hơmâo ngă laih. 47 Giŏng anŭn, ƀing khua ngă yang prŏng hăng ƀing Pharisai pơƀut glaĭ hrŏm hơbĭt abih bang ƀing mơnuih pơkŏn amăng tơpul Sanhedrin gơñu kiăng kơ pơčrŏng sai kơ hơdră ƀing gơñu či ngă kơ tơlơi Yêsu. Ƀing gơñu pơtơña kơ tơdruă tui anai, “Hơget tơlơi ƀing ta či ngă kơ Ñu lĕ? Yuakơ Pô anŭn hlak ngă lu tơlơi mơsêh mơyang biă mă. 48 Tơdah ƀing ta lui brơi kơ Ñu tŏ tui ngă tui anŭn, abih bang mơnuih či đaŏ kơnang kơ Ñu, laih anŭn ƀing Rôm či rai pơrai hĭ sang yang ta wơ̆t hăng lŏn čar ta mơ̆n.” 49 Giŏng anŭn, sa čô amăng ƀing gơñu anăn Kaiaphas, jing pô khua ngă yang prŏng hloh amăng rơnŭk anŭn, pơhiăp tui anai, “Ƀing gih ƀu thâo hơget gĕt ôh! 50 Ƀing gih ƀu thâo kơnăl ôh kơ tơlơi hiam hloh yơh kơ ƀing gih kơ tơlơi sa čô mơnuih djai pơala brơi kơ abih bang ană plei ta hloh kơ lŏn čar či răm rai hĭ hlo̱m ƀo̱m yua mơ̆ng ƀing Rôm.” 51 Ñu pơhiăp tơlơi anŭn ƀu djơ̆ tui hăng ñu pô ôh, samơ̆ tơdang ñu jing pô khua ngă yang prŏng hloh rơnŭk anŭn, ñu laĭ lui hlâo kơ tơlơi Yêsu či djai brơi kơ lŏn čar ƀing Yehudah yơh, 52 laih anŭn ƀu djơ̆ kơnơ̆ng kơ lŏn čar ƀing Yehudah đôč ôh, samơ̆ ăt kơ abih bang ƀing mơnuih hơdip amăng khul lŏn čar pơkŏn jing ƀing či lŏm kơ Ơi Adai, kiăng kơ ba glaĭ ƀing gơñu hrŏm hơbĭt jing hĭ sa grup. 53 Tui anŭn, čơdơ̆ng mơ̆ng hrơi anŭn, ƀing gơñu čơdơ̆ng pơkra hơdră jơlan kiăng pơdjai hĭ Yêsu yơh. 54 Hơnŭn yơh, Yêsu ƀu hơmâo pơrơđah Ñu pô dơ̆ng tah amăng ƀing Yehudah. Kơđai glaĭ, Ñu đuaĭ nao sa boh tring jĕ ƀơi tơdron ha̱r, jing pơ plei Ephraim. Pơ anih anŭn yơh Ñu dŏ hăng ƀing ding kơna Ñu. 55 Tơdang jĕ či truh biă mă yơh kơ hrơi phet Tơlơi Găn ƀing Yehudah, hơmâo lu mơnuih amăng rĭm boh plei nao pơ plei Yerusalaim kơ tơlơi phiăn pơrơgoh hĭ gơñu pô hlâo kơ hrơi phet Tơlơi Găn. 56 Ƀing gơñu hơduah sem Yêsu laih anŭn ƀing gơñu dŏ amăng anih wăl tơdron sang yang pơtơña kơ tơdruă gơñu tui anai, “Hơget ƀing gih pơmĭn lĕ? Ñu ƀu či rai pơ tơlơi Phet anai ôh hă?” 57 Samơ̆ ƀing khua ngă yang prŏng hăng ƀing Pharisai hơmâo pơtă laih kơ tơlơi tơdah hlơi pô ƀuh Yêsu dŏ pơpă, ñu anŭn khŏm pơruai glaĭ kơ ƀing gơñu kiăng kơ ƀing gơñu dưi mă hĭ Yêsu.
H'Mari Pik Ia Ƀâo Hiam Ƀơi Tơkai Yêsu Pơ Plei Bêthania
1 Năm hrơi hlâo kơ hrơi phet Tơlơi Găn, Yêsu truh pơ plei Bêthania jing plei Lazaros dŏ, jing pô Yêsu hơmâo pơhơdip glaĭ laih tơdơi kơ ñu hơmâo djai hĭ laih. 2 Pơ anŭn, H'Martha pơkra tơlơi ƀơ̆ng huă pơpŭ pơyom kơ Yêsu, tơdang anŭn Lazaros hrŏm hơbĭt hăng ƀing dŏ be̱r kiăng kơ ƀơ̆ng huă ƀơi kơƀa̱ng hrŏm hăng Yêsu. 3 Giŏng anŭn, H'Mari mă sămkrah lid ia ƀâo hiam arăng pơkra mơ̆ng phŭn nar, jing ia ƀâo hiam yom biă mă, tuh ia ƀâo anŭn ƀơi tơkai Yêsu laih anŭn mă ƀŭk ñu sut ƀơi tơkai anŭn. Amăng sang ƀâo bă hăng ia ƀâo hiam anŭn yơh. 4 Samơ̆ Yudas Iskariôt, jing sa čô ding kơna laih anŭn tơdơi anai ñu pơblư̆ Yêsu, pơhiăp pơkơdơ̆ng glaĭ hăng tơlơi bruă anŭn tui anai, 5 “Ia ƀâo hiam anŭn khŏm sĭ hĭ laih anŭn mă prăk pha brơi kơ ƀing ƀun rin! Nua yom kơ ia ƀâo hiam anŭn jing nua prăk pơtŭm kơ sa čô mơnuih amăng sa thŭn mă bruă yơh.” 6 Ñu laĭ tui anŭn ƀu djơ̆ yuakơ ñu ƀlơ̆ng brơi kơ ƀing ƀun rin ôh, samơ̆ yuakơ ñu jing mơnuih klĕ dŏp. Ñu ăt jing pô djă̱ wai kơdŭng prăk laih anŭn juăt klĕ prăk mơ̆ng anŭn kơ ñu pô. 7 Yêsu pơhiăp tui anai, “Anăm ƀuăh kơ gơ̆ ôh, gơ̆ ngă tui anŭn kiăng kơ prap pre kơ hrơi ƀing arăng či dơ̱r atâo Kâo tơdơi kơ Kâo djai yơh. 8 Ƀing gih či hơmâo nanao yơh mơnuih ƀun rin hrŏm hăng ƀing gih, samơ̆ gih ƀu hơmâo Kâo nanao ôh.” 9 Tơdang anŭn ƀing mơnuih Yehudah lu thâo krăn kơ tơlơi Yêsu dŏ pơ anŭn laih anŭn ƀing gơñu rai, ƀu djơ̆ kơnơ̆ng rai pơ Yêsu đôč ôh samơ̆ ăt kiăng ƀuh Lazaros mơ̆n, jing pô Yêsu hơmâo pơhơdip glaĭ laih tơdơi kơ ñu hơmâo djai hĭ laih. 10 Tui anŭn, ƀing khua ngă yang prŏng ăt pơkra hơdră jơlan kiăng pơdjai hĭ Lazaros mơ̆n. 11 Ƀing gơñu ngă tui anŭn yuakơ mơta tơlơi Lazaros jing hĭ hơdip glaĭ dơ̆ng yơh, hơmâo lu ƀing Yehudah đuaĭ tui Yêsu hăng đaŏ kơnang kơ Ñu.
Tơlơi Yêsu Mŭt Hing Ang Pơ Plei Yerusalaim
12 Amăng hrơi tŏ tui anŭn, ƀing mơnuih lu, jing ƀing hơmâo rai laih kơ tơlơi phet Tơlơi Găn, hơmư̆ kơ tơlơi Yêsu hlak nao pơ plei Yerusalaim. 13 Ƀing gơñu mă khul than hla đung kri nao čơkă Yêsu hăng ur hơ̆k kơdơ̆k tui anai, “Bơni hơơč kơ Ñu! “Rơkâo kơ Khua Yang Ơi Adai bơni hiam kơ Pô Ñu hơmâo pơkiaŏ rai laih!” 14 Yêsu ƀuh sa drơi ană aseh glai laih anŭn đĭ ƀơi gơ̆, kar hăng sa čô pô pơala čih laih amăng Hră Ơi Adai tui anai, 15 “Ơ ƀing ană dra Ziôn, anăm ƀing gih huĭ ôh; anai nê, Pơtao gih hlak rai, jing Pô đĭ ƀơi ană aseh glai.” 16 Hlak anŭn, ƀing ding kơna Yêsu ƀu thâo hluh ôh tơlơi hơdôm tơlơi truh anŭn. Kơnơ̆ng tơdơi kơ Yêsu đĭ glaĭ pơ tơlơi ang yang Ñu đôč, ƀing ding kơna Ñu thâo kơnăl kơ hơdôm tơlơi arăng hơmâo čih laih kơ tơlơi Ñu wơ̆t hăng kơ tơlơi ƀing arăng hơmâo ngă laih kơ Ñu tui anŭn. 17 Ƀơi mông anŭn, đơđa ƀing mơnuih lu hơmâo dŏ hăng Yêsu laih tơdang Ñu iâu Lazaros tơbiă mơ̆ng pơsat hăng ngă laih kơ gơ̆ hơdip glaĭ dơ̆ng, ƀing gơñu pơruai kơ lu mơnuih pơkŏn tơlơi anŭn. 18 Yuakơ ƀing gơñu hơmâo hơmư̆ laih kơ tơlơi Yêsu hơmâo ngă laih hơdôm tơlơi mơsêh mơyang, ƀing gơñu nao bưp Ñu yơh. 19 Tui anŭn, ƀing Pharisai pơlaĭ hăng tơdruă tui anai, “Lăng adih, tơlơi anŭn či ngă brơi kơ ƀing ta ƀu dưi ngă hơget gĕt ôh kiăng kơ pơkhư̆ hĭ Ñu. Abih bang mơnuih amăng lŏn tơnah hơmâo đuaĭ tui Ñu laih.”
Yêsu Laĭ Lui Hlâo Kơ Tơlơi Ñu Djai
20 Hlak anŭn, ăt hơmâo đơđa ƀing Grek amăng ƀing mơnuih đĭ nao kơkuh pơpŭ pơ tơlơi Phet Tơlơi Găn anŭn. 21 Ƀing gơñu rai pơ Philip, jing mơnuih mơ̆ng plei Bêtsaida amăng kwar Galilê, hăng rơkâo tui anai, “Ơ gơyut, ƀing gơmơi kiăng kơ bưp Yêsu.” 22 Philip nao laĭ kơ Andre laih anŭn Andre hăng Philip nao laĭ hăng Yêsu yơh. 23 Yêsu pơhiăp tui anai, “Hrơi mông truh laih kơ Ơi Adai pơpŭ pơyom kơ Kâo, jing Pô trŭn rai laih mơ̆ng adai. 24 Kâo laĭ sĭt biă mă kơ ƀing gih, tơdah ƀu jŭ pla ôh sa jĕh pơdai amăng lŏn kar hăng djai hĭ, sa jĕh pơdai anŭn ăt dŏ kơnơ̆ng sa jĕh đôč. Samơ̆ tơdah jĕh anŭn tŭ dơ̱r kar hăng djai hĭ laih, jĕh pơdai anŭn či pơtơbiă rai lu jĕh pơdai dơ̆ng yơh. 25 Hlơi pô kiăng biă mă kiăng kơ tŏ tui hơdip ƀơi lŏn tơnah anai, ñu či djai hĭ. Samơ̆ hlơi pô tŭ ư kiăng kơ djai yuakơ Kâo amăng lŏn tơnah anai, ñu či hơdip hlŏng lar amăng plei hiam yơh. 26 Hlơi pô mă bruă kơ Kâo, ñu anŭn khŏm đuaĭ tui Kâo yơh. Pơpă anih Kâo dŏ, ding kơna Kâo anŭn ăt dŏ pơ anŭn mơ̆n. Ama Kâo či pơpŭ pơyom kơ hlơi pô mă bruă kơ Kâo. 27 “Ră anai jua bơngăt Kâo rŭng răng biă mă laih anŭn hơget Kâo či laĭ lĕ? ‘Ơ Ama, pơklaih hĭ bĕ Kâo mơ̆ng mông gleh tơnap hăng djai anai’? Ơ ơh, samơ̆ yuakơ tơhơnal tơlơi anai yơh, Kâo rai truh pơ mông ruă nuă anai. 28 Ơ Ama ăh, pơrơđah bĕ hiư̆m yom prŏng Ih jing!” Hlak anŭn, Ơi Adai hiăp trŭn mơ̆ng adai tui anai, “Kâo hơmâo pơrơđah laih hiư̆m yom prŏng Kâo jing laih anŭn Kâo či ngă tui anŭn dơ̆ng!” 29 Ƀing mơnuih lu dŏ pơ anih anŭn hơmư̆ jua hiăp anŭn, đơđa mơnuih amăng ƀing gơñu laĭ kơ tơlơi anŭn jing jua grŏm. Ƀing pơkŏn dơ̆ng laĭ kơ tơlơi sa čô ling jang hiam hơmâo pơhiăp hrŏm hăng Ñu. 30 Yêsu laĭ tui anai, “Ơi Adai pơhiăp laih kiăng kơ tŭ yua kơ ƀing gih yơh, ƀu djơ̆ kơnơ̆ng tŭ yua kơ Kâo đôč ôh. 31 Ră anai jing mông kơ Ơi Adai kiăng kơ phat kơđi mơnuih mơnam ƀơi lŏn tơnah anai laih anŭn Ơi Adai či dưi hĭ kơ yang sat yơh jing pô git gai mơnuih mơnam ƀơi lŏn tơnah anai. 32 Samơ̆ bơ kơ Kâo, tơdang arăng yŏng đĭ Kâo mơ̆ng lŏn tơnah ƀơi kơyâo bơrơkal, Kâo či dui ba abih bang mơnuih rai pơ Kâo pô yơh.” 33 Ñu laĭ kơ tơlơi anŭn kiăng pơrơđah kơ tơlơi hiư̆m Ñu či djai yơh. 34 Đơđa mơnuih amăng ƀing mơnuih lu laĭ tui anai, “Ƀing gơmơi hơmâo hơmư̆ laih mơ̆ng hră Tơlơi Juăt laĭ kơ tơlơi Pô Krist či dŏ hơdip nanao, tui anŭn hiư̆m pă Ih dưi laĭ kơ tơlơi arăng či yŏng đĭ hĭ ƀơi kơyâo bơrơkal, jing Pô trŭn rai laih mơ̆ng adai lĕ? Hlơi jing ‘Pô trŭn rai mơ̆ng adai’ anŭn lĕ?” 35 Giŏng anŭn, Yêsu ruai kơ ƀing gơñu tui anai, “Ƀing gih či hơmâo Kâo kar hăng tơlơi bơngač kơnơ̆ng sui ƀiă dơ̆ng đôč. Rơbat bĕ tơdang ƀing gih hơmâo tơlơi bơngač, jing hlâo kơ tơlơi kơnăm mơmŏt truh pơ ƀing gih. Hlơi pô rơbat amăng tơlơi kơnăm mơmŏt, ñu anŭn ƀu thâo ôh pơpă ñu či nao. 36 Ƀing gih khŏm đaŏ kơnang kơ Kâo bĕ jing Pô kar hăng tơlơi bơngač tơdang ƀing gih ăt dŏ hơmâo Kâo anai, kiăng kơ ƀing gih dưi jing ƀing mơnuih kar hăng tơlơi bơngač kơ ƀing arăng yơh.” Tơdang Yêsu pơhiăp giŏng laih hơdôm tơlơi anŭn, Ñu đuaĭ hĭ laih anŭn pơdŏp hĭ Ñu pô mơ̆ng ƀing mơnuih lu anŭn.
Ƀing Khua Djă̱ Akŏ Ƀing Yehudah Ăt Ƀu Đaŏ Kơnang Kơ Yêsu Ôh
37 Wơ̆t tơdah Yêsu hơmâo ngă laih abih bang tơlơi mơsêh mơyang ƀơi anăp mơta ƀing khua djă̱ akŏ ƀing Yehudah, ƀing gơñu ăt ƀu đaŏ kơnang kơ Ñu ôh. 38 Tơlơi truh anŭn kiăng kơ pơkrĕp truh hĭ tui hăng hiăp pô pơala Yesayah hơmâo čih tui anai: “Ơ Khua Yang, ƀiă kơ ƀu hơmâo hlơi pô ôh đaŏ kơnang kơ boh hiăp ƀing gơmơi pơtô wơ̆t tơdah Ih pơrơđah laih kơ ƀing gơñu hiư̆m kơtang mơyang Ih jing yơh!” 39 Yuakơ tơhơnal tơlơi anŭn yơh ƀing gơñu ƀu dưi đaŏ kơnang ôh laih anŭn yuakơ tui hăng pô pơala Yesayah hơmâo laĭ tui anai dơ̆ng: 40 “Khua Yang hơmâo pơbum hĭ laih mơta gơñu, laih anŭn pơkhăng hĭ pran jua gơñu, kiăng kơ ƀing gơñu ƀu dưi ƀuh ôh hăng mơta gơñu, ƀu thâo hluh ôh hăng pran jua gơñu, kŏn thâo kơhma̱l lơi, tui anŭn Kâo, Khua Yang, či pơsuaih hĭ ƀing gơñu.” 41 Yesayah pơhiăp tui anŭn đưm hlâo adih yuakơ ñu ƀuh hlâo laih hiư̆m yom prŏng Yêsu či jing laih anŭn pơhiăp laih kơ tơlơi Ñu yơh. 42 Samơ̆ amăng mông anŭn ăt hơmâo lu mơnuih amăng ƀing khua ba akŏ đaŏ kơnang kơ Yêsu. Wơ̆t tơdah tui anŭn, ƀing gơñu ƀu khĭn ră ruai kơ ƀing arăng ôh, huĭ kơ ƀing Pharisai či puh pơđuaĭ hĭ ƀing gơñu mơ̆ng sang pơjơnum. 43 Ƀing khua ba akŏ tơlơi đaŏ anŭn ngă tui anŭn yuakơ ƀing gơñu khăp kơ tơlơi mơnuih mơnam bơni kơ ƀing gơñu hloh kơ khăp kơ tơlơi Ơi Adai bơni kơ ƀing gơñu. 44 Giŏng anŭn, Yêsu pơhiăp kraih tui anai, “Hlơi pô đaŏ kơnang kơ Kâo, ñu anŭn ƀu djơ̆ đaŏ kơnang amăng Kâo đôč ôh, samơ̆ ñu anŭn ăt đaŏ kơnang kơ Pô hơmâo pơkiaŏ rai laih kâo mơ̆n. 45 Tơdang ñu lăng ƀơi Kâo, anŭn jing kar hăng ñu ƀuh yơh Pô hơmâo pơkiaŏ rai laih Kâo. 46 Kâo hơmâo rai laih pơ lŏn tơnah anai jing kar hăng tơlơi bơngač, kiăng kơ hlơi pô đaŏ kơnang kơ Kâo, ñu anŭn ƀu či jing hĭ pô ƀu thâo phe pho kơ tơlơi Ơi Adai ôh, samơ̆ či jing hĭ kar hăng pô ƀu dŏ amăng tơlơi kơnăm mơmŏt yơh. 47 “Bơ kơ hlơi pô hơmư̆ hiăp Kâo samơ̆ ƀu gưt tui ôh, Kâo ƀu phat kơđi ñu ôh. Tơhơnal tơlơi Kâo rai ƀu djơ̆ kiăng kơ phat kơđi mơnuih mơnam lŏn tơnah anai ôh, samơ̆ kiăng kơ pơklaih hĭ ƀing gơñu yơh. 48 Hơmâo sa čô Khua Phat Kơđi kơ hlơi pô ƀu tŭ ju̱m ôh Kâo laih anŭn ƀu gưt tui ôh hơdôm boh hiăp Kâo. Anŭn jing, Ơi Adai yơh či klă̱ kơđi kơ ñu ƀơi hrơi hơnăl tuč yuakơ ñu hơngah hĭ laih rĭm boh hiăp Kâo pơhiăp laih. 49 Kâo laĭ tui anŭn yuakơ Kâo ƀu pơhiăp tui hăng Kâo pô ôh, samơ̆ Ama Kâo, jing Pô pơkiaŏ rai Kâo, hơmâo pơđar laih kơ Kâo hơget tơlơi Kâo či pơhiăp laih anŭn hiư̆m Kâo pơhiăp. 50 Kâo thâo sĭt kơ tơlơi đaŏ kơnang kơ tơlơi Ñu pơđar jing djru kơ mơnuih mơnam hơdip hlŏng lar yơh. Tui anŭn, abih bang tơlơi Kâo pơhiăp jing kơnơ̆ng tui hăng tơlơi Ama Kâo hơmâo pơtă laih kơ Kâo kiăng kơ pơhiăp đôč.”
Yêsu Rao Tơkai Ƀing Ding Kơna Ñu
1 Hlâo kơ Hrơi Phet Tơlơi Găn, Yêsu thâo krăn hrơi mông Ñu hơmâo truh laih kơ Ñu khŏm đuaĭ hĭ mơ̆ng lŏn tơnah anai kiăng glaĭ pơ Ama Ñu amăng adai adih. Ñu khăp biă mă kơ abih bang ƀing ding kơna Ñu jing ƀing ăt dŏ amăng lŏn tơnah anai, tui anŭn Ñu pơrơđah hiư̆m hlo̱m ƀo̱m Ñu khăp kơ ƀing gơ̆ yơh. 2 Yêsu hăng ƀing ding kơna dŏ ƀơ̆ng huă mlam Tơlơi Găn laih anŭn Satan hơmâo plư laih Yudas Iskariôt, ană đah rơkơi Simôn, kiăng kơ pơblư̆ hĭ Yêsu kiăng kơ jao hĭ kơ ƀing rŏh ayăt Gơ̆. 3 Yêsu thâo laih kơ tơlơi Ama Ñu hơmâo pha brơi laih tơlơi dưi kơ Ñu kiăng kơ git gai abih bang tơlơi, kơ tơlơi Ñu hơmâo rai laih mơ̆ng Ơi Adai laih anŭn Ñu či wơ̆t glaĭ pơ Ơi Adai yơh. 4 Tui anŭn, Yêsu tơgŭ mơ̆ng kơƀa̱ng ƀơ̆ng huă, tŏh hĭ ao gah rơngiao Ñu, Ñu pŏn khăn ƀơi kơiăng Ñu. 5 Giŏng anŭn, Ñu tuh ia amăng thao laih anŭn čơdơ̆ng rao tơkai ƀing ding kơna Ñu, laih anŭn sut brơi tơkai ƀing gơ̆ hăng khăn Ñu pŏn ƀơi kơiăng Ñu. 6 Ñu nao ƀơi Simôn Pêtrôs, samơ̆ Pêtrôs laĭ tui anai, “Ơ Khua ăh, sĭt Ih khŏm anăm rao tơkai kâo ôh!” 7 Yêsu pơhiăp tui anai, “Ră anai ih ƀu thâo hluh ôh bruă Kâo ngă, samơ̆ tơdơi ih či thâo hluh yơh.” 8 Pêtrôs laĭ tui anai, “Ơ ơh, Ih ƀu či rao tơkai kâo ôh!” Yêsu pơhiăp tui anai, “Samơ̆ tơdah Kâo ƀu rao tơkai ih ôh, ih ƀu jing ding kơna Kâo ôh.” 9 Simôn Pêtrôs pơhiăp tui anai, “Ơ Khua ăh, tơdah tui anŭn, anăm rao kơnơ̆ng tơkai kâo đôč ôh, samơ̆ rao bĕ wơ̆t hăng tơngan kâo, akŏ kâo mơ̆n!” 10 Yêsu pơhiăp tui anai, “Hlơi pô hơmâo mơnơi laih ñu anŭn kơnơ̆ng kiăng rao tơkai ñu đôč, tui anŭn ñu dưi jing agaih abih yơh. Ƀing gih jing agaih laih, samơ̆ ƀu djơ̆ abih bang ƀing gih ôh jing agaih.” 11 Yêsu laĭ tui anŭn yuakơ Ñu thâo laih hlơi či pơblư̆ hĭ Ñu, laih anŭn kơ tơlơi yua hơget Ñu laĭ kơ tơlơi ƀu djơ̆ abih bang ƀing gơñu ôh jing agaih laih. 12 Tơdang Ñu rao giŏng laih tơkai ƀing ding kơna Ñu, Ñu buh glaĭ ao gah rơngiao Ñu hăng wơ̆t glaĭ pơ anih Ñu dŏ pơ kơƀa̱ng hăng tơña kơ ƀing gơñu tui anai, “Ƀing gih thâo hluh mơ̆ hơget tơlơi Kâo hơmâo ngă laih kơ ƀing gih? 13 Ƀing gih iâu kơ Kâo jing ‘Nai’ jing ‘Khua,’ sĭt ƀing gih iâu djơ̆ yơh, yuakơ Kâo jing sĭt tui anŭn yơh. 14 Tui anŭn yơh, yuakơ Kâo jing Nai jing Khua gih, hơmâo rao brơi laih tơkai gih, brơi kơ ƀing gih khŏm rao bĕ tơkai kơ tơdruă gih. 15 Kâo hơmâo ngă pơhơmutu laih kơ ƀing gih, kiăng kơ ƀing gih khŏm hla tui kar hăng Kâo hơmâo ngă laih kơ ƀing gih. 16 Kâo laĭ sĭt biă mă kơ ƀing gih, ding kơna ƀu prŏng hloh kơ khua ñu ôh, pô ding kơna pơala kŏn prŏng hloh kơ pô pơkiaŏ nao ñu lơi. 17 Ră anai ƀing gih thâo kơ tơlơi sĭt anai, Ơi Adai či bơni hiam kơ ƀing gih yơh tơdah ƀing gih ngă tui tơlơi anŭn.”
Yêsu Laĭ Lui Hlâo Kơ Tơlơi Pô Či Pơblư̆ Hĭ Ñu
18 Yêsu laĭ dơ̆ng tui anai, “Ƀu djơ̆ Kâo kiăng kơčrâo kơ abih bang ƀing gih ôh. Kâo thâo krăn hơdôm ƀing Kâo hơmâo ruah laih. Samơ̆ boh hiăp anai kiăng pơkrĕp truh hĭ tui hăng Hră Ơi Adai hơmâo čih laih tui anai, ‘Pô ƀơ̆ng ƀañ hrŏm hăng kâo kar hăng gơyut hơmâo jing hĭ laih rŏh ayăt kâo.’ 19 “Kâo ruai tơlơi anai kơ ƀing gih hlâo kơ tơlơi anŭn truh, kiăng kơ tơdang tơlơi anŭn truh laih, ƀing gih či đaŏ kơnang kơ tơlơi Kâo jing Pô Messiah yơh. 20 Kâo laĭ sĭt biă mă kơ ƀing gih, hlơi pô tŭ ju̱m mơnuih Kâo pơkiaŏ nao, ñu anŭn tŭ ju̱m Kâo yơh. Hlơi pô tŭ ju̱m Kâo, ñu anŭn tŭ ju̱m Pô hơmâo pơkiaŏ rai laih Kâo.” 21 Tơdơi kơ Yêsu hơmâo pơhiăp laih kơ tơlơi anŭn, Ñu jing hĭ rŭng răng biă mă laih anŭn Ñu pơhiăp rơđah tui anai, “Kâo laĭ sĭt biă mă kơ ƀing gih, sa čô amăng ƀing gih či pơblư̆ hĭ Kâo kiăng jao hĭ kơ ƀing rŏh ayăt Kâo.” 22 Ƀing ding kơna Ñu pơlăng kơ tơdruă, ƀu thâo ôh hlơi pô amăng ƀing gơñu Yêsu kiăng laĭ anŭn. 23 Hơmâo sa čô amăng ƀing gơñu, jing ding kơna pô Yêsu khăp biă mă, dŏ ăh jĕ ƀơi Yêsu. 24 Simôn Pêtrôs ngă gru kơ pô ding kơna anŭn hăng laĭ tui anai, “Tơña bĕ Ñu kơ tơlơi Ñu kiăng laĭ kơ pô pă.” 25 Tui anŭn, pô ding kơna anŭn dŏ ăh jĕ ƀơi Yêsu hăng tơña kơ Ñu tui anai, “Ơ Khua ăh, hlơi pô anŭn lĕ?” 26 Yêsu laĭ glaĭ tui anai, “Anŭn jing pô Kâo či brơi čơđeh ƀañ tơpŭng Kâo hơmâo añrŭ laih amăng añăm anai.” Giŏng anŭn, Yêsu añrŭ sa čơđeh ƀañ tơpŭng hăng brơi kơ Yudas Iskariôt, ană rơkơi pô pơkŏn anăn Simôn. 27 Tơdang Yudas mă ƀañ anŭn laih, Satan mŭt amăng pran jua ñu mơtam yơh. Tui anŭn, Yêsu laĭ kơ ñu tui anai, “Hơget ih či ngă, brơi ih ngă tañ bĕ!” 28 Samơ̆ ƀing mơnuih dŏ hrŏm ƀơi kơƀa̱ng ƀơ̆ng huă anŭn ƀu thâo hluh ôh yua hơget Yêsu laĭ kơ ñu tui anŭn. 29 Yuakơ Yudas juăt djă̱ kơdŭng prăk, hơmâo đơđa mơnuih pơmĭn kơ tơlơi Yêsu pơđar kơ ñu nao blơi gơnam kiăng kơ tơlơi Phet, ƀôdah kiăng kơ pha brơi kơ ƀing ƀun rin. 30 Tơdơi Yudas hơmâo mă tŭ laih čơđeh ƀañ anŭn, ñu tơbiă hĭ yơh. Hlak anŭn mơmŏt laih.
Yêsu Pha Brơi Kơ Ƀing Ding Kơna Ñu Sa Tơlơi Pơđar Phrâo
31 Tơdang Yudas đuaĭ hĭ laih, Yêsu laĭ tui anai, “Ră anai Ơi Adai či pơpŭ pơyom kơ Kâo biă mă, jing Pô rai mơ̆ng adai, laih anŭn Kâo ăt či pơrơđah hiư̆m yom prŏng Ơi Adai jing mơ̆n. 32 Yuakơ mơnuih mơnam či pơpŭ pơyom Ơi Adai biă mă yua mơ̆ng tơlơi bruă Kâo, jing Pô mơ̆ng adai, ngă, Ñu pô ăt či pơpŭ pơyom biă mă yơh kơ Kâo, Ană Ñu, laih anŭn Ñu či ngă tui anŭn tañ yơh. 33 “Ƀing gih jing ƀing Kâo khăp jing kar hăng ƀing ană bă Kâo yơh, Kâo kơnơ̆ng či dŏ hrŏm hăng ƀing gih amăng ƀiă hrơi dơ̆ng đôč. Ƀing gih či hơduah sem Kâo, laih anŭn kar hăng Kâo hơmâo laĭ laih kơ ƀing khua djă̱ akŏ ƀing Yehudah, tui anŭn Kâo laĭ kơ ƀing gih ră anai tui anai: Pơ anih Kâo nao, ƀing gih aka ƀu dưi nao ôh. 34 “Ră anai Kâo pha brơi kơ ƀing gih sa tơlơi juăt phrâo anai: Khăp bĕ kơ tơdruă gih. Tui hăng Kâo hơmâo khăp laih kơ ƀing gih, tui anŭn brơi kơ ƀing gih khăp bĕ kơ tơdruă. 35 Tơdah ƀing gih khăp kơ tơdruă, yua mơ̆ng tơlơi anŭn yơh ƀing mơnuih mơnam amăng lŏn tơnah či thâo krăn kơ tơlơi ƀing gih jing ƀing ding kơna Kâo.”
Yêsu Laĭ Lui Hlâo Kơ Tơlơi Pêtrôs Či Hơngah Hĭ Ñu
36 Simôn Pêtrôs tơña kơ Yêsu tui anai, “Ơ Khua ăh, pơpă anih Ih či nao lĕ?” Yêsu laĭ glaĭ tui anai, “Anih Kâo či nao, ră anai ih ƀu dưi đuaĭ tui ôh, samơ̆ tơdơi ih či dưi đuaĭ tui yơh.” 37 Pêtrôs tơña dơ̆ng tui anai, “Ơ Khua ăh, yua hơget kâo ƀu dưi đuaĭ tui Ih ră anai ôh lĕ? Kâo prap pre kiăng kơ djai brơi kơ Ih yơh.” 38 Yêsu laĭ glaĭ tui anai, “Ih laĭ kơ tơlơi ih prap pre sĭt kiăng kơ djai yuakơ Kâo! Kâo laĭ sĭt biă mă kơ ih, hlâo kơ mơnŭ tơdjô̆, ih či pơhiăp klâo wơ̆t mơtam yơh kơ tơlơi ih ƀu thâo krăn ôh Kâo!”
Yêsu Pơjuh Alum Ƀing Ding Kơna Ñu
1 Yêsu laĭ dơ̆ng tui anai, “Anăm ƀlơ̆ng bơngơ̆t ôh. Đaŏ kơnang bĕ kơ Ơi Adai laih anŭn ăt đaŏ kơnang kơ Kâo mơ̆n. 2 Pơ anih Ama Kâo dŏ hơmâo lu anih kiăng kơ dŏ. Tơdah ƀu djơ̆ tui anŭn ôh, Kâo ƀu či ruai kơ ƀing gih ôh. Kâo či nao pơ anŭn kiăng kơ prap pre sa boh anih kơ ƀing gih. 3 Tơdơi kơ Kâo nao hăng prap pre sa boh anih kơ ƀing gih, Kâo či wơ̆t glaĭ kiăng kơ ba ƀing gih nao dŏ hrŏm hăng Kâo, kiăng kơ pơpă Kâo dŏ ƀing gih ăt či dŏ pơ anŭn mơ̆n. 4 Ƀing gih thâo jơlan nao truh pơ anih Kâo či nao anai yơh.”
Yêsu Jing Kơnơ̆ng Ha Čô Pô Dui Ba Mơnuih Mơnam Nao Pơ Ama Ñu
5 Thômas laĭ hăng Yêsu tui anai, “Ơ Khua ăh, ƀing gơmơi ƀu thâo ôh pơpă anih Ih či nao, tui anŭn ƀing gơmơi ƀu dưi thâo ôh jơlan kiăng kơ nao pơ anŭn!” 6 Yêsu laĭ glaĭ tui anai, “Kâo jing Pô kar hăng kơnơ̆ng ha sa jơlan đôč yơh, jing Pô pơrơđah hơget tơlơi jing sĭt kơ tơlơi Ơi Adai laih anŭn jing Pô ngă brơi kơ mơnuih mơnam hơdip hlŏng lar. Ƀu hơmâo hlơi pô ôh nao truh pơ Ama Kâo tơdah ñu anŭn ƀu găn mơ̆ng tơlơi dưi Kâo pha brơi kơ ñu. 7 Tơdah ƀing gih thâo krăn Kâo biă mă, ƀing gih ăt či thâo krăn Ama Kâo mơ̆n. Čơdơ̆ng mơ̆ng ră anai, ƀing gih thâo krăn Ñu laih anŭn ƀing gih hơmâo ƀuh laih Ñu.” 8 Philip laĭ tui anai, “Ơ Khua ăh, kơčrâo brơi Ama kơ ƀing gơmơi, tơlơi anŭn či djŏp kơ ƀing gơmơi yơh.” 9 Yêsu laĭ glaĭ tui anai, “Ơ Philip, ih ƀu thâo krăn Kâo ôh hă, wơ̆t tơdah tơdơi kơ Kâo hơmâo dŏ hăng ih sui laih? Hlơi pô hơmâo ƀuh laih Kâo, ñu anŭn hơmâo ƀuh laih Ama Kâo. Tui anŭn, ih khŏm anăm laĭ ôh kơ tơlơi kiăng kơčrâo brơi Ama kơ ƀing gih! 10 Sĭt yơh ih khŏm đaŏ kơ tơlơi Kâo tŭ pơgop sa hăng Ama Kâo laih anŭn Ama Kâo tŭ pơgop sa hăng Kâo! Hơdôm boh hiăp Kâo pơhiăp hăng ƀing gih, jing boh hiăp ƀu djơ̆ kơnơ̆ng mơ̆ng Kâo pô đôč ôh. Samơ̆ anŭn jing tơlơi Ama Kâo tŭ pơgop sa hăng Kâo, jing Pô hlak dŏ ngă bruă Ñu pô yơh. 11 Đaŏ kơnang kơ Kâo bĕ tơdang Kâo laĭ kơ tơlơi Kâo tŭ pơgop sa hăng Ama Kâo laih anŭn Ama Kâo tŭ pơgop sa hăng Kâo. Ƀôdah ƀiă biă mă ñu, đaŏ kơnang bĕ kơ tơlơi yuakơ hơdôm gru tơlơi mơsêh mơyang Kâo hơmâo ngă laih. 12 Kâo laĭ sĭt biă mă kơ ƀing gih, hlơi pô đaŏ kơnang kơ Kâo, ñu anŭn či ngă hơdôm tơlơi bruă Kâo hlak ngă yơh. Ñu anŭn ăt či ngă bruă prŏng hloh kơ tơlơi bruă anŭn mơ̆n, yuakơ Kâo či glaĭ pơ Yang Ama. 13 Laih anŭn Kâo či ngă brơi hơget tơlơi ƀing gih rơkâo kơnang kơ Kâo, kiăng kơ Kâo, Yang Ană, dưi pơrơđah kơ tơlơi hiư̆m yom prŏng Ama Kâo jing yơh. 14 Ƀing gih dưi rơkâo kơ Kâo kiăng kơ ngă hơdôm mơta tơlơi, kơnang kơ Kâo bĕ laih anŭn Kâo či ngă brơi yơh.”
Yêsu Ƀuăn Pơkiaŏ Rai Yang Bơngăt Hiam Kơ Ƀing Ding Kơna Ñu
15 Yêsu laĭ dơ̆ng tui anai, “Tơdah ƀing gih khăp kơ Kâo, ƀing gih či gưt tui tơlơi Kâo pơđar yơh. 16 Kâo či rơkâo kơ Ama Kâo laih anŭn Ñu či pha brơi kơ ƀing gih Pô Djru Pơmĭn pơkŏn, jing Pô či dŏ hrŏm hăng ƀing gih hlŏng lar yơh, 17 anŭn jing Yang Bơngăt jing Pô či pơrơđah hơget tơlơi jing sĭt kơ tơlơi Ơi Adai yơh. Ƀing mơnuih hlơi pô pơkơdơ̆ng glaĭ hăng tơlơi Ơi Adai kiăng ƀu či tŭ mă Ñu ôh, yuakơ ƀing gơñu ƀu ƀuh Ñu ôh kŏn thâo krăn Ñu lơi. Samơ̆ ƀing gih thâo krăn Ñu yuakơ Ñu dŏ hrŏm hăng ƀing gih laih anŭn či dŏ amăng ƀing gih yơh. 18 Kâo ƀu či lui raih hĭ ƀing gih dŏ tơhrit tơhruai ôh. Kâo či rai pơ ƀing gih yơh. 19 Dŏ ƀiă dơ̆ng, ƀing hlơi pô pơkơdơ̆ng glaĭ hăng Kâo ƀu či ƀuh Kâo dơ̆ng tah, samơ̆ ƀing gih či ƀuh Kâo, yuakơ Kâo hơdip, ƀing gih ăt či hơdip mơ̆n. 20 Amăng hrơi anŭn, ƀing gih či thâo kơnăl sĭt kơ tơlơi Kâo tŭ pơgop sa hăng Ama Kâo, laih anŭn ƀing gih tŭ pơgop sa hăng Kâo laih anŭn Kâo tŭ pơgop sa hăng ƀing gih. 21 Hlơi pô tŭ mă laih anŭn gưt tui hơdôm tơlơi Kâo pơđar kơ ñu, ñu anŭn jing pô khăp kơ Kâo yơh. Hlơi pô khăp kơ Kâo, Ama Kâo či khăp kơ ñu laih anŭn Kâo ăt khăp kơ ñu hăng pơrơđah Kâo pô kơ ñu yơh.” 22 Giŏng anŭn, Yudas, ƀu djơ̆ Yudas Iskariôt ôh, tơña tui anai, “Samơ̆ Ơ Khua ăh, yua hơget Ih kiăng pơrơđah Ih pô kơ ƀing gơmơi, samơ̆ Ih ƀu pơrơđah ôh Ih pô kơ ƀing mơnuih pơkŏn amăng lŏn tơnah lĕ?” 23 Yêsu laĭ glaĭ tui anai, “Tơdah hlơi pô khăp kơ Kâo, ñu anŭn či tui gưt tơlơi Kâo pơtô yơh. Ama Kâo či khăp kơ ñu laih anŭn Ƀing Gơmơi či nao pơ ñu hăng dŏ hrŏm hăng ñu yơh. 24 Hlơi pô ƀu khăp kơ Kâo, ñu anŭn kŏn gưt tui tơlơi Kâo pơtô lơi. Hơdôm boh hiăp ƀing gih hơmư̆ anai jing ƀu djơ̆ kơnơ̆ng mơ̆ng Kâo pô đôč ôh, hơdôm boh hiăp anŭn ăt mơ̆ng Ama Kâo mơ̆n, jing Pô hơmâo pơkiaŏ rai laih Kâo.” 25 “Kâo hơmâo pơhiăp laih abih bang tơlơi anŭn tơdang Kâo ăt dŏ hrŏm hăng ƀing gih. 26 Samơ̆ Pô Djru Pơmĭn, ăt jing Yang Bơngăt Hiam, jing Pô Kâo či brơi kơ Ama Kâo pơkiaŏ rai, či pơtô brơi kơ ƀing gih abih bang tơlơi bruă ƀing gih kiăng kơ thâo laih anŭn či pơhơdơr brơi kơ ƀing gih rĭm tơlơi Kâo hơmâo pơhiăp laih hăng ƀing gih. 27 Kâo či ngă kơ ƀing gih mưn tŭ tơlơi rơnŭk rơnua gah lăm. Tơlơi rơnŭk rơnua Kâo ngă brơi kơ ƀing gih mưn tŭ ƀu djơ̆ kar hăng tơlơi ƀing mơnuih pơkơdơ̆ng glaĭ hăng Ơi Adai pha brơi ôh. Tui anŭn, anăm ƀing gih rŭng răng hăng huĭ hyưt dơ̆ng tah. 28 “Ƀing gih hơmâo hơmư̆ laih Kâo laĭ kơ tơlơi Kâo či nao laih anŭn či wơ̆t glaĭ pơ ƀing gih. Tơdah ƀing gih khăp kơ Kâo, ƀing gih či hơ̆k mơak yơh kơ tơlơi Kâo či nao pơ Yang Ama, yuakơ Ñu jing prŏng hloh kơ Kâo. 29 Ră anai Kâo hơmâo pơruai laih kơ ƀing gih hlâo kơ tơlơi anŭn truh, kiăng kơ tơdang tơlơi anŭn truh, ƀing gih či đaŏ kơnang kơ Kâo yơh. 30 Kâo ƀu či pơhiăp hăng ƀing gih sui dơ̆ng tah, yuakơ Satan, jing pô khua kơ ƀing mơnuih pơkơdơ̆ng glaĭ hăng Ơi Adai, či rai kơsung blah Kâo. Samơ̆ ñu ƀu dưi git gai mơta tơlơi či truh kơ Kâo ôh. 31 Samơ̆ ƀing mơnuih pơkơdơ̆ng glaĭ hăng Ơi Adai khŏm thâo krăn kơ tơlơi Kâo khăp kơ Ama Kâo laih anŭn Kâo gưt tui djơ̆ tui hăng tơlơi Ama Kâo hơmâo pơđar laih kơ Kâo yơh. “Nă, brơi kơ ƀing ta đuaĭ bĕ mơ̆ng anai.”
Yêsu Jing Kar Hăng Phŭn Hrĕ Boh Kơƀâo Sĭt
1 Yêsu pơtô kơ ƀing ding kơna Ñu dơ̆ng tui anai, “Kâo jing kar hăng phŭn hrĕ boh kơƀâo sĭt laih anŭn Ama Kâo jing kar hăng pô pla hăng răk wai brơi phŭn hrĕ boh kơƀâo anŭn. 2 Ñu khăt hĭ rĭm than lir hăng Kâo ƀu pơtơbiă rai boh čroh, tơdang anŭn Ñu pơagaih hĭ rĭm than pơtơbiă rai boh čroh, tui anŭn than anŭn či pơtơbiă rai boh čroh lu hloh yơh. 3 Kar hăng khul than tŭ pơagaih yơh ƀing gih jing rơgoh laih yuakơ ƀing gih đaŏ kơnang laih kơ hơdôm boh hiăp Kâo hơmâo pơtô laih kơ ƀing gih. 4 Dŏ kle̱p pơgop sa bĕ hăng Kâo laih anŭn Kâo či dŏ kle̱p pơgop sa hăng ƀing gih. Kar kaĭ mơ̆n, ƀu hơmâo than pă ôh dưi pơtơbiă rai boh čroh ñu pô. Than anŭn khŏm dŏ kle̱p amăng phŭn hrĕ boh kơƀâo yơh. Ƀing gih ƀu dưi pơmơak kơ Ơi Adai ôh kar hăng sa ƀĕ than pơtơbiă rai boh čroh tơdah ƀing gih ƀu dŏ kle̱p pơgop sa hăng Kâo. 5 “Kâo jing kar hăng phŭn hrĕ boh kơƀâo laih anŭn ƀing gih jing kar hăng khul than. Tơdah hlơi pô dŏ kle̱p pơgop sa hăng Kâo laih anŭn Kâo dŏ kle̱p pơgop sa hăng ñu, ñu anŭn či pơmơak kơ Ơi Adai kar hăng sa ƀĕ than pơtơbiă rai boh čroh lu yơh. Rơngiao kơ tơlơi dŏ kle̱p pơgop sa hăng Kâo, ƀing gih ƀu dưi ngă mơta tơlơi hơget ôh kiăng pơmơak kơ Ơi Adai. 6 Tơdah hlơi pô ƀu dŏ kle̱p pơgop sa ôh hăng Kâo, ñu anŭn jing hrup hăng sa ƀĕ than arăng či glŏm lui hĭ ñu laih anŭn gliu hĭ. Arăng či mă khul than hrup hăng anŭn laih anŭn pơƀut glaĭ glŏm hĭ amăng apui yơh. Kar kaĭ mơ̆n, Ơi Adai či mă pơđuaĭ hĭ ƀing hlơi pô ƀu tŭ pơgop sa hăng Kâo yơh. 7 Tơdah ƀing gih dŏ kle̱p pơgop sa hăng Kâo laih anŭn ƀing gih hơdơr hăng gưt tui hơdôm boh hiăp Kâo kơ ƀing gih, rơkâo bĕ kơ Ơi Adai hơget tơlơi ƀing gih kiăng kơ Ñu ngă brơi, sĭt Ñu či ngă brơi kơ ƀing gih yơh. 8 Anai yơh jing tơlơi pơpŭ pơyom kơ Ama Kâo, kơ tơlơi ƀing gih ngă mơta tơlơi pơmơak kơ Ñu kar hăng sa ƀĕ than pơtơbiă rai boh čroh lu, tơlơi anŭn ăt pơrơđah kơ tơlơi gih pô jing ƀing ding kơna Kâo mơ̆n. 9 “Kar hăng Yang Ama hơmâo khăp kơ Kâo laih, Kâo ăt khăp kơ ƀing gih kar kaĭ mơ̆n. Ră anai tŏ tui ngă bĕ mơta tơlơi djơ̆ lăp kơ ƀing hlơi pô Kâo khăp. 10 Tơdah ƀing gih gưt tui hơdôm tơlơi Kâo pơđar, ƀing gih či ngă mơta tơlơi djơ̆ lăp kơ ƀing hlơi pô Kâo khăp yơh, jing kar hăng Kâo hơmâo gưt tui laih mơta tơlơi Ama Kâo pơđar laih kơ Kâo laih anŭn ngă tui mơta tơlơi djơ̆ lăp kơ Kâo, jing Pô Ñu khăp yơh. 11 Kâo hơmâo pơruai laih kơ ƀing gih tơlơi anŭn kiăng kơ ƀing gih dưi mơak kar hăng Kâo mơak, laih anŭn kiăng kơ ƀing gih mơak bă hlo̱m yơh. 12 Anai jing tơlơi Kâo pơđar kơ ƀing gih: Khăp bĕ kơ tơdruă gih kar hăng Kâo hơmâo khăp laih kơ ƀing gih. 13 Hơdră jơlan yom prŏng hloh kơ sa čô kiăng kơ pơrơđah kơ tơlơi ñu khăp kơ ƀing gơyut gơyâo ñu jing hơdră jơlan djai brơi kơ ƀing gơ̆ yơh. 14 Tơdah gih gưt tui tơlơi Kâo pơđar, ƀing gih jing gơyut gơyâo Kâo. 15 Kâo ƀu yap ƀing gih jing ding kơna dơ̆ng tah, yuakơ ding kơna ƀu thâo ôh tơlơi bruă khua ñu ngă. Kơđai glaĭ, Kâo yap kơ ƀing gih jing gơyut gơyâo Kâo, yuakơ abih bang tơlơi Ama Kâo hơmâo pơruai laih kơ Kâo, Kâo hơmâo pơruai laih kơ ƀing gih. 16 Ƀu djơ̆ ƀing gih ôh ruah mă Kâo, samơ̆ Kâo yơh ruah laih ƀing gih laih anŭn jao brơi kơ ƀing gih nao hăng ngă lu mơta tơlơi pơmơak kơ Ơi Adai, laih anŭn hơdôm boh tŭ yua či dŏ nanao yơh. Ama Kâo či ngă brơi kơ ƀing gih hơget tơlơi ƀing gih rơkâo kơnang kơ Kâo yơh. 17 Anai yơh jing tơlơi Kâo pơđar kơ ƀing gih: Khăp bĕ kơ tơdruă gih.”
Ƀing Mơnuih Pơkơdơ̆ng Glaĭ Hăng Ơi Adai Či Pơrơmut Kơ Ƀing Ding Kơna Yêsu
18 Yêsu pơtô dơ̆ng tui anai, “Tơdah ƀing mơnuih pơkơdơ̆ng glaĭ hăng Ơi Adai pơrơmut kơ ƀing gih, brơi kơ ƀing gih thâo bĕ kơ tơlơi ƀing gơñu hơmâo pơrơmut laih kơ Kâo hlâo laih. 19 Tơdah ƀing gih lŏm kơ ƀing mơnuih pơkơdơ̆ng glaĭ hăng Ơi Adai, ƀing gơñu či khăp kơ ƀing gih yơh jing ƀing lŏm kơ ƀing gơñu. Samơ̆ ƀing gih ƀu lŏm kơ ƀing gơñu ôh, Kâo hơmâo ruah mă laih ƀing gih kiăng kơ dŏ hơjăn mơ̆ng ƀing gơñu. Anŭn yơh jing tơhơnal tơlơi yua hơget ƀing gơñu pơrơmut kơ ƀing gih. 20 Hơdơr bĕ hơdôm boh hiăp Kâo pơhiăp laih hăng ƀing gih tui anai, ‘Ƀu hơmâo ding kơna pă ôh prŏng hloh kơ khua ñu.’ Tơdah ƀing mơnuih, jing ƀing pơkơdơ̆ng glaĭ hăng Ơi Adai, kơpĭ kơpe̱t laih Kâo, ƀing gơñu ăt či kơpĭ kơpe̱t ƀing gih mơ̆n. Tơdah ƀing mơnuih pơkŏn dơ̆ng gưt tui boh hiăp Kâo, ƀing gơñu ăt či gưt tui boh hiăp gih mơ̆n. 21 Ƀing gơñu či ngă kơ ƀing gih tui hăng hơdră anŭn yuakơ ƀing gih đuaĭ tui Kâo yơh, laih anŭn yuakơ ƀing gơñu ƀu thâo krăn ôh Pô pơkiaŏ rai Kâo. 22 Tơdah kâo ƀu hơmâo rai pơhiăp laih ôh hăng ƀing gơñu, sĭt ƀing gơñu ƀu či hơmâo ngă soh laih ôh hăng tơlơi hơngah hĭ Kâo. Bơ kơ ră anai, ƀing gơñu ƀu dưi pơgăl pơgang hăng Ơi Adai dơ̆ng tah kơ hơdôm tơlơi soh gơñu. 23 Hlơi pô pơrơmut kơ Kâo ñu anŭn ăt pơrơmut kơ Ama Kâo mơ̆n. 24 Tơdah Kâo ƀu hơmâo ngă laih ôh amăng tŏng krah ƀing gơñu tơlơi bruă ƀu hơmâo hlơi pô pơkŏn ôh dưi ngă laih, ƀing gơñu ƀu hơmâo ngă soh laih ôh hăng tơlơi hơngah hĭ Kâo. Samơ̆ ră anai ƀing gơñu hơmâo ƀuh laih hơdôm tơlơi mơsêh mơyang anŭn Kâo ngă laih, laih anŭn ƀing gơñu ăt pơrơmut kơ Kâo wơ̆t hăng Ama Kâo mơ̆n. 25 Samơ̆ tơlơi anŭn truh kiăng kơ pơkrĕp truh hĭ tui hăng arăng hơmâo čih laih amăng hră Tơlơi Juăt gơñu tui anai: Ƀing gơñu pơrơmut kơ Kâo ƀu hơmâo tơhơnal.” 26 “Tơdang Pô Djru Pơmĭn rai, jing Pô Kâo či pơkiaŏ rai kơ ƀing gih mơ̆ng Ama Kâo, Yang Bơngăt Hiam tơlơi sĭt jing Pô tơbiă mơ̆ng Yang Ama, Ñu yơh či ră ruai kơ ƀing arăng kơ tơlơi Kâo. 27 Laih anŭn ƀing gih ăt ră ruai mơ̆n kơ ƀing arăng kơ tơlơi Kâo, yuakơ ƀing gih hơmâo dŏ hrŏm laih hăng Kâo čơdơ̆ng mơ̆ng phŭn.”
1 Yêsu laĭ dơ̆ng tui anai, “Kâo hơmâo ruai laih kơ ƀing gih abih bang tơlơi anŭn kiăng kơ ƀing gih ƀu či pơdơi ôh kơ tơlơi đaŏ kơnang kơ Kâo. 2 Ƀing gơñu či puh pơđuaĭ hĭ ƀing gih mơ̆ng sang jơnum. Sĭt yơh hrơi mông či truh tơdang hlơi pô pơdjai ƀing gih, ñu pơmĭn kơ tơlơi ñu ngă anŭn jing tơlơi ñu mă bruă kơ Ơi Adai yơh. 3 Ƀing gơñu či ngă khul tơlơi kar hăng anŭn kơ ƀing gih, yuakơ ƀing gơñu ƀu thâo krăn ôh Ama Kâo laih anŭn kŏn thâo krăn Kâo lơi. 4 Kâo hơmâo ruai laih kơ ƀing gih kơ tơlơi anŭn kiăng kơ tơdang hrơi mông anŭn truh, ƀing gih či hơdơr kơ tơlơi Kâo pơkơđiăng laih kơ ƀing gih. Kâo ƀu ruai kơ ƀing gih ôh hlâo adih yuakơ Kâo dŏ hăng ƀing gih.”
Bruă Mơnuă Yang Bơngăt Hiam
5 Yêsu pơtô dơ̆ng tui anai, “Ră anai Kâo či wơ̆t glaĭ pơ Pô hơmâo pơkiaŏ rai laih Kâo, samơ̆ ƀu hơmâo ôh sa čô amăng ƀing gih tơña kơ Kâo tui anai, ‘Pơpă Ih či nao lĕ?’ 6 Yuakơ Kâo hơmâo laĭ laih hơdôm tơlơi anŭn kơ ƀing gih, ƀing gih rơngot hơning biă mă yơh. 7 Samơ̆ Kâo laĭ sĭt kơ ƀing gih tui anai: Tơlơi Kâo či đuaĭ hĭ anai jing tơlơi tŭ yua kơ ƀing gih yơh. Tơdah Kâo ƀu đuaĭ hĭ ôh, sĭt Pô Djru Pơmĭn ƀu či rai pơ ƀing gih ôh. Samơ̆ tơdơi kơ Kâo đuaĭ hĭ, Kâo či pơkiaŏ Ñu rai pơ ƀing gih yơh. 8 Tơdang Yang Djru Pơmĭn anŭn rai, Ñu či pơrơđah kơ mơnuih mơnam thâo krăn kơ tơlơi ƀing gơñu jing soh, kơ tơlơi Kâo jing tơpă hơnơ̆ng laih anŭn či phat kơđi mơnuih mơnam tui anai: 9 Ñu či pơrơđah kơ tơlơi ƀing mơnuih mơnam jing soh sat yơh yuakơ ƀing gơñu ƀu đaŏ kơnang kơ Kâo ôh; 10 Ñu či pơrơđah kơ tơlơi Kâo jing tơpă hơnơ̆ng yơh yuakơ Kâo či nao pơ Yang Ama, jing pơ anih ƀing gih ƀu dưi ƀuh Kâo dơ̆ng tah; 11 laih anŭn Ñu či pơrơđah kơ tơlơi Ơi Adai či phat kơđi rĭm mơnuih mơnam yơh yuakơ Ơi Adai hơmâo klă̱ kơđi laih Satan, jing pô git gai ƀing mơnuih pơkơdơ̆ng glaĭ hăng Ơi Adai. 12 “Kâo hơmâo lu tơlơi kiăng pơhiăp hăng ƀing gih dơ̆ng, jing lu hloh kơ tơlơi ƀing gih dưi thâo hluh ră anai yơh. 13 Samơ̆ Yang Bơngăt Hiam či pơtô ƀing gih hơget tơlơi jing sĭt. Tơdang Ñu rai, Ñu či djru brơi kơ ih thâo abih bang tơlơi sĭt yơh. Ñu ƀu či pơhiăp tui hăng Ñu pô ôh. Ñu či pơhiăp kơnơ̆ng tui hăng tơlơi Ñu hơmư̆ mơ̆ng Ama Kâo laih anŭn Ñu ăt či ruai kơ ƀing gih hơdôm mơta tơlơi či truh tơdơi mơ̆n. 14 Ñu či pơpŭ pơyom kơ Kâo, yuakơ Kâo či ră ruai kơ ƀing gih abih bang tơlơi Kâo pơtă kơ Ñu kiăng kơ pơhiăp yơh. 15 Abih bang tơlơi mơnơ̆ng Ama Kâo hơmâo ăt lŏm kơ Kâo soh sel. Anŭn yơh jing yua hơget Kâo laĭ kơ tơlơi Yang Bơngăt Hiam či hơmư̆ abih bang tơlơi Kâo pơtă kơ Ñu laih anŭn pơruai tơlơi anŭn kơ ƀing gih kiăng kơ thâo. 16 “Dŏ ƀiă dơ̆ng ƀing gih ƀu či ƀuh Kâo dơ̆ng tah, laih anŭn tơdơi kơ anŭn ƀiă ƀing gih či ƀuh glaĭ Kâo dơ̆ng.”
Ƀing Ding Kơna Rơngot Hơning Jing Hĭ Ƀing Mơak Mơai Yơh Tơdơi
17 Hơmâo đơđa amăng ƀing ding kơna Ñu pơtơña hăng tơdruă tui anai, “Hơget tơlơi Ñu kiăng laĭ tơdang Ñu laĭ kơ tơlơi dŏ ƀiă dơ̆ng ƀing ta ƀu či ƀuh Ñu dơ̆ng tah, laih anŭn tơdơi kơ anŭn ƀiă ƀing ta či ƀuh glaĭ Ñu dơ̆ng, laih anŭn kơ tơlơi yuakơ Ñu či wơ̆t glaĭ pơ Ama Ñu lĕ?” 18 Ƀing ding kơna Ñu tơña nanao tui anai, “Hơget tơlơi Ñu kiăng laĭ laih kơ tơlơi ‘dŏ ƀiă dơ̆ng’ lĕ? Ƀing ta ƀu thâo hluh ôh hơget tơlơi Ñu pơhiăp laih tui anŭn.” 19 Yêsu thâo krăn ƀing ding kơna Ñu kiăng tơña kơ Ñu kơ tơlơi anŭn, tui anŭn Ñu laĭ kơ ƀing gơñu tui anai, “Hiư̆m ngă, ƀing gih dŏ pơtơña kơ tơdruă kơ tơlơi kâo kiăng laĭ tơdang Kâo laĭ tui anai, ‘Dŏ ƀiă dơ̆ng ƀing gih ƀu či ƀuh Kâo dơ̆ng tah, laih anŭn tơdơi kơ anŭn ƀiă ƀing gih či ƀuh glaĭ Kâo dơ̆ng’ anŭn hă? 20 Kâo laĭ sĭt biă mă kơ ƀing gih, tơdơi kơ Kâo đuaĭ hĭ, ƀing gih či rơngot hơning biă mă, samơ̆ ƀing mơnuih pơkơdơ̆ng glaĭ hăng Ơi Adai či hơ̆k kơdơ̆k yơh. Ƀing gih či rơngot hơning samơ̆ tơdơi kơ anŭn ƀing gih či jing hĭ mơak mơai yơh. 21 Tơdang đah kơmơi jĕ či tơkeng kơ sa čô ană, ñu ruă nuă yơh yuakơ mông ñu ruă hơmâo truh laih. Samơ̆ tơdang ñu tơkeng kơ ană ñu laih, ñu ƀu hơdơr kơ tơlơi ruă anŭn dơ̆ng tah yuakơ ñu mơak kơ tơlơi ñu hơmâo tơkeng rai laih sa čô ană amăng lŏn tơnah anai. 22 Bơ kơ ƀing gih, ƀing gih ăt kar kaĭ mơ̆n, ră anai jing mông ƀing gih rơngot hơning, samơ̆ Kâo či ƀuh ƀing gih dơ̆ng hăng ƀing gih či hơ̆k mơak yơh laih anŭn ƀu hơmâo hlơi pô ôh dưi pơgăn hĭ ƀing gih mơ̆ng tơlơi mơak anŭn. 23 Amăng hrơi anŭn, ƀing gih či ƀu rơkâo kơ Kâo tơlơi hơget dơ̆ng tah. Kâo laĭ sĭt biă mă kơ ƀing gih, Ama Kâo či ngă brơi hơdôm mơta tơlơi kơ ƀing gih yơh hơget tơlơi ƀing gih rơkâo kơnang kơ Kâo. 24 Truh pơ tă anai, ƀing gih aka ƀu rơkâo ôh Ơi Adai kiăng kơ ngă hơget mơta tơlơi kơnang kơ Kâo. Rơkâo kơ Ñu bĕ laih anŭn Ñu či ngă brơi tơlơi anŭn, laih anŭn ƀing gih či jing hĭ mơak mơai bă hlo̱m yơh.” 25 “Wơ̆t tơdah Kâo hơmâo juăt yua laih tơlơi pơhơmutu kiăng kơ pơtô, tơl hrơi mông truh tơdang Kâo ƀu yua tơlơi pơhiăp hăng tơlơi pơhơmutu anŭn dơ̆ng ôh, samơ̆ Kâo či pơhiăp rơđah rơđo̱ng kơ tơlơi Ama Kâo kơ ƀing gih yơh. 26 Amăng hrơi anŭn, ƀing gih či rơkâo kơ Ñu kơnang kơ Kâo. Kâo ƀu laĭ ôh kơ tơlơi Kâo či rơkâo kơ Ama pơala brơi kơ ƀing gih. 27 Ƀu djơ̆ ôh, Ama pô yơh khăp kơ ƀing gih yuakơ ƀing gih hơmâo khăp laih kơ Kâo laih anŭn đaŏ kơnang laih kơ tơlơi Kâo rai mơ̆ng Ơi Adai. 28 Kâo rai laih mơ̆ng Ama Kâo hăng truh pơ lŏn tơnah anai. Ră anai Kâo či lui hĭ lŏn tơnah anai hăng glaĭ pơ Ama Kâo yơh.” 29 Giŏng anŭn, ƀing ding kơna Yêsu laĭ tui anai, “Ră anai Ih hlak pơhiăp rơđah rơđo̱ng yơh ƀu yua tơlơi pơhơmutu dơ̆ng tah. 30 Ră anai ƀing gơmơi thâo yơh kơ tơlơi Ih thâo hluh abih bang tơlơi, laih anŭn Ih ƀu kiăng kơ hlơi pô ôh tơña kơ Ih khul tơlơi tơña. Tơlơi anŭn ngă brơi kơ ƀing gơmơi đaŏ kơnang kơ tơlơi Ih tơbiă rai mơ̆ng Ơi Adai yơh.” 31 Yêsu laĭ kơ ƀing gơñu tui anai, “Hơnăl tuč, ƀing gih đaŏ kơnang laih! 32 Samơ̆ hrơi mông anŭn hlak truh laih anŭn hơmâo jĕ či truh laih, tơdang ƀing gih či čơlah đuaĭ, rĭm čô glaĭ pơ sang ñu pô. Abih bang ƀing gih či lui hĭ Kâo dŏ hơjăn. Samơ̆ Kâo ƀu dŏ hơjăn ôh yuakơ Ama Kâo dŏ hăng Kâo. 33 “Kâo hơmâo ruai laih kơ ƀing gih hơdôm tơlơi anŭn, kiăng kơ pơgop sa hăng Kâo yơh ƀing gih či rơnŭk rơnua amăng pran jua gih. Amăng lŏn tơnah anai ƀing gih či hơmâo tơlơi rŭng răng. Samơ̆ hơđơ̆ng pran jua bĕ! Kâo hơmâo dưi hĭ laih kơ ƀing mơnuih hơmâo pơkơdơ̆ng glaĭ laih hăng Kâo.”
Yêsu Iâu laĭ kơ Ñu Pô
1 Tơdơi kơ Yêsu pơhiăp giŏng laih tơlơi anŭn, Ñu angak đĭ pơ adai hăng iâu laĭ tui anai: “Ơ Ama ăh, hrơi mông hơmâo truh laih kơ Kâo, jing Ană Ih, kiăng kơ tŭ gleh tơnap laih anŭn djai. Pơpŭ pơyom kơ Kâo bĕ tơdang Kâo ngă tui anŭn, kiăng kơ Kâo dưi pơpŭ pơyom kơ Ih. 2 Ih hơmâo jao brơi laih tơlơi dưi kơ Kâo kiăng kơ git gai abih bang mơnuih mơnam tui anŭn Kâo dưi djru brơi kơ ƀing hlơi pô Ih hơmâo pha brơi laih kơ Kâo kiăng kơ hơdip hlŏng lar hăng Kâo. 3 Anai yơh jing hiư̆m mơnuih mơnam dưi hơdip hlŏng lar: Ƀing gơñu khŏm thâo krăn Ih, kơnơ̆ng hơjăn Ih đôč yơh jing Ơi Adai sĭt, laih anŭn Kâo, jing Yêsu Krist, jing Pô Ih hơmâo pơkiaŏ rai laih. 4 Kâo hơmâo pơpŭ pơyom laih Ih ƀơi lŏn tơnah anai, hăng tơlơi ngă pơgiŏng hĭ tơlơi bruă Ih hơmâo pơđar laih kơ Kâo kiăng kơ ngă. 5 Bơ kơ ră anai, Ơ Ama hơi, rơkâo kơ Ih pơpŭ pơyom bĕ Kâo ƀơi anăp Ih hăng tơlơi ngă brơi kơ Kâo jing yom prŏng tơdang Kâo dŏ laih hăng Ih hlâo kơ boh lŏn tơnah anai čơdơ̆ng hơmâo.”
Yêsu Iâu Laĭ Kơ Ƀing Ding Kơna Ñu
6 “Kâo hơmâo pơrơđah laih Ih kơ ƀing mơnuih Ih hơmâo jao brơi laih kơ Kâo mơ̆ng tŏng krah ƀing mơnuih hơdip amăng lŏn tơnah anai. Ƀing gơñu jing ƀing lŏm kơ Ih laih. Ih jao ƀing gơñu kơ Kâo laih anŭn ƀing gơñu hơmâo gưt tui laih boh hiăp Ih. 7 Ră anai ƀing gơñu thâo krăn kơ tơlơi abih bang tơlơi bruă hăng khul boh hiăp Ih hơmâo pơtă laih kơ Kâo kiăng kơ ngă jing le̱ng kơ mơ̆ng Ih soh sel yơh, 8 yuakơ Kâo hơmâo pơhiăp laih hăng ƀing gơñu hơdôm boh hiăp Ih hơmâo pơhiăp laih hăng Kâo laih anŭn ƀing gơñu đaŏ laih kơ hơdôm boh hiăp anŭn. Ƀing gơñu thâo krăn sĭt kơ tơlơi Kâo hơmâo rai laih mơ̆ng Ih, laih anŭn đaŏ kơnang kơ tơlơi Ih hơmâo pơkiaŏ rai laih Kâo. 9 Kâo iâu laĭ brơi kơ ƀing gơñu. Kâo ƀu iâu laĭ brơi kơ ƀing mơnuih pơkơdơ̆ng glaĭ hăng Ih ôh, samơ̆ Kâo iâu laĭ brơi kơ ƀing mơnuih Ih hơmâo jao brơi laih kơ Kâo, yuakơ ƀing gơñu jing ƀing lŏm kơ Ih laih. 10 Abih bang ƀing ding kơna Kâo hơmâo jing lŏm kơ Ih soh sel, laih anŭn abih bang ƀing hlơi pô lŏm kơ Ih ăt lŏm kơ Kâo mơ̆n. Laih anŭn ƀing gơñu hơmâo pơrơđah laih kơ ƀing arăng hiư̆m yom prŏng Kâo jing yơh. 11 Kâo ƀu či dŏ amăng lŏn tơnah anai sui dơ̆ng tah, samơ̆ ƀing gơñu ăt dŏ amăng lŏn tơnah anai laih anŭn Kâo či glaĭ pơ Ih. Ơ Ama rơgoh hiam hơi, Ih jing kơtang mơyang, ăt kar kaĭ mơ̆n, Ih hơmâo djru brơi laih kơ Kâo jing kơtang mơyang, kơtang mơyang biă mă yơh wai pơgang brơi kơ ƀing gơñu, kiăng kơ ƀing gơñu dưi jing pơgop sa hăng tơdruă kar hăng tơlơi Ih hăng Kâo pơgop sa laih yơh. 12 Tơdang Kâo ăt dŏ hrŏm hăng ƀing gơñu, Kâo pô wai pơgang ƀing gơñu kơtang mơyang kar hăng Ih hơmâo djru brơi laih kơ Kâo kiăng kơ ngă. Ƀu hơmâo hlơi pô ôh rơngiă hĭ kơnơ̆ng sa čô răm rơngiă hĭ kiăng kơ pơkrĕp truh tui hăng Hră Ơi Adai hơmâo čih laih. 13 “Ră anai Kâo či glaĭ pơ Ih, samơ̆ Kâo laĭ hơdôm tơlơi anŭn tơdang Kâo ăt dŏ amăng lŏn tơnah anai, kiăng kơ ƀing gơñu dưi tŭ mơak mơai kar hăng Kâo hơmâo tŭ mơak mơai yơh. 14 Kâo hơmâo pơhiăp laih boh hiăp Ih hăng ƀing gơñu laih anŭn ƀing mơnuih pơkơdơ̆ng glaĭ hăng Ih hơmâo pơrơmut hĭ laih ƀing gơñu, yuakơ ƀing gơñu ƀu lŏm kơ ƀing pơkơdơ̆ng glaĭ hăng Ih ôh kar hăng Kâo ƀu lŏm kơ ƀing pơkơdơ̆ng anŭn ôh. 15 Kâo ƀu iâu laĭ kơ Ih mă pơđuaĭ hĭ ƀing gơñu mơ̆ng lŏn tơnah ôh, samơ̆ rơkâo kơ Ih pơgang brơi ƀing gơñu mơ̆ng Satan, jing pô sat ƀai. 16 Ƀing gơñu ƀu lŏm kơ ƀing mơnuih pơkơdơ̆ng glaĭ hăng Ih ôh, kar hăng Kâo, jing Pô ƀu lŏm ôh kơ ƀing mơnuih pơkơdơ̆ng anŭn. 17 Ngă brơi bĕ kơ ƀing ding kơna Kâo mă bruă kơ Ih sĭt. Hơget tơlơi Ih pơhiăp jing sĭt yơh. 18 Kar hăng Ih hơmâo pơkiaŏ laih Kâo rai pơ lŏn tơnah anai, Kâo ăt pơkiaŏ laih ƀing gơñu nao amăng lŏn tơnah mơ̆n. 19 Yuakơ ƀing gơñu yơh Kâo jao hĭ Kâo pô, tui anŭn ƀing gơñu ăt jing hĭ jao pô hlo̱m ƀo̱m kơ Ih mơ̆n.”
Yêsu Iâu Laĭ Kơ Abih Bang Ƀing Đaŏ
20 “Kâo iâu laĭ ƀu djơ̆ kơnơ̆ng kơ ƀing gơñu đôč ôh. Kâo ăt iâu laĭ kơ ƀing hlơi pô či đaŏ kơnang kơ Kâo mơ̆ng tơlơi hơmư̆ boh hiăp ƀing gơñu pơtô pơblang mơ̆n, 21 kiăng kơ abih bang ƀing gơñu jing hĭ pơgop sa, Ơ Ama ăh, kar hăng Ih tŭ pơgop sa hăng Kâo laih anŭn Kâo tŭ pơgop sa hăng Ih yơh. Kwưh kiăng kơ ƀing gơñu ăt či pơgop sa hăng Ƀing Ta kiăng kơ mơnuih mơnam amăng lŏn tơnah dưi đaŏ kơnang kơ tơlơi Ih hơmâo pơkiaŏ rai laih Kâo. 22 Kâo hơmâo pơpŭ pơyom laih kơ ƀing ding kơna Kâo kar hăng Ih hơmâo pơpŭ pơyom laih kơ Kâo, kiăng kơ ƀing gơñu dưi jing pơgop sa kar hăng Ƀing Ta jing pơgop sa tui anai: 23 Kâo tŭ pơgop sa hăng ƀing gơñu laih anŭn Ih tŭ pơgop sa hăng Kâo. Kwưh kiăng kơ ƀing gơñu dưi jing hĭ pơgop sa hlo̱m ƀo̱m kiăng kơ mơnuih mơnam amăng lŏn tơnah thâo krăn kơ tơlơi Ih pơkiaŏ rai laih Kâo laih anŭn hơmâo khăp laih kơ ƀing gơñu kar hăng Ih hơmâo khăp laih kơ Kâo. 24 “Ơ Ama hơi, Kâo kiăng kơ ƀing hlơi pô Ih hơmâo jao laih kơ Kâo anŭn dŏ hăng Kâo pơpă anih Kâo dŏ, laih anŭn kiăng kơ thâo hiư̆m yom prŏng Kâo jing, kar hăng Ih ngă brơi laih kơ Kâo jing hĭ yom prŏng yuakơ Ih khăp laih kơ Kâo hlâo kơ tơlơi hrih pơjing rai lŏn tơnah anai. 25 “Ơ Ama tơpă hơnơ̆ng ăh, wơ̆t tơdah ƀing pơkơdơ̆ng glaĭ hăng Ih ƀu thâo krăn ôh Ih, samơ̆ Kâo thâo krăn Ih laih anŭn ƀing ding kơna Kâo thâo krăn kơ tơlơi Ih yơh jing Pô hơmâo pơkiaŏ rai laih Kâo. 26 Kâo hơmâo pơrơđah laih Ih kơ ƀing gơñu laih anŭn ăt či ngă tui anŭn dơ̆ng mơ̆n, kiăng kơ tơlơi ƀing gơñu dưi khăp kơ ƀing arăng kar hăng Ih hơmâo khăp laih kơ Kâo, laih anŭn kơ tơlơi Kâo pô dưi tŭ pơgop sa hăng ƀing gơñu.”
Arăng Mă Yêsu
1 Tơdang Yêsu hơmâo iâu laĭ giŏng laih kơ hơdôm tơlơi anŭn, Ñu nao hrŏm hăng ƀing ding kơna Ñu hăng găn dơnung Kedrôn. Pơ gah adih hơmâo đang kơyâo ôliwơ laih anŭn Ñu hăng ƀing ding kơna Ñu nao mŭt pơ đang anŭn. 2 Hlak anŭn, Yudas, jing pô pơblư̆ lui hĭ Yêsu, thâo laih anih anŭn yuakơ Yêsu juăt nao pơjơnum amăng đang anŭn hrŏm hăng ding kơna Ñu. 3 Tui anŭn yơh, Yudas nao pơ đang anŭn hăng ba rai ƀing tơhan, ƀing khua moa mơ̆ng ƀing khua ngă yang prŏng laih anŭn ƀing Pharisai. Ƀing gơñu djă̱ ba khul apui arôk, apui kơđen laih anŭn đao gưm. 4 Yêsu thâo krăn laih hơdôm tơlơi či truh kơ Ñu, tui anŭn, Ñu yak tơbiă laih anŭn tơña tui anai, “Ƀing gih hơduah sem hlơi lĕ?” 5 Ƀing gơñu laĭ glaĭ tui anai, “Yêsu Pô Nazaret.” Yêsu pơhiăp tui anai, “Kâo yơh Yêsu.” Hlak anŭn, Yudas, jing pô pơblư̆, ăt hlak dŏ dơ̆ng hrŏm hăng ƀing gơñu mơ̆n. 6 Tơdang Yêsu laĭ, “Kâo yơh Yêsu,” ƀing gơñu kơdŭn glaĭ laih anŭn rơbuh ƀơi lŏn. 7 Yêsu tơña kơ ƀing gơñu dơ̆ng tui anai, “Hlơi ƀing gih hơduah sem lĕ?” Ƀing gơñu laĭ glaĭ, “Yêsu Pô Nazaret.” 8 Yêsu laĭ kơ ƀing gơñu tui anai, “Kâo laĭ laih kơ ƀing gih, Kâo yơh Yêsu. Tơdah ƀing gih kơnơ̆ng hơduah sem Kâo đôč, brơi bĕ ƀing anŭn glaĭ.” 9 Tơlơi anŭn truh laih tui anŭn kiăng kơ hơdôm boh hiăp Ñu hơmâo pơhiăp laih či tŭ pơkrĕp truh hĭ tui anai, “Ơ Ama ăh, Kâo ƀu či rơngiă hĭ hlơi pô ôh amăng ƀing mơnuih Ih hơmâo jao brơi laih kơ Kâo.” 10 Giŏng anŭn, Simôn Pêtrôs, jing pô hơmâo sa ƀĕ đao, suă đao laih anŭn kŏh hĭ pô hlŭn khua ngă yang prŏng hloh, hăng kŏh tơĭ hĭ tơngia gah hơnuă pô hlŭn anŭn. Anăn gơ̆ Malkhos. 11 Yêsu pơđar kơ Pêtrôs tui anai, “Črŏ̱ glaĭ bĕ đao ih amăng hrum ñu! Kâo khŏm tŭ gleh tơnap kar hăng Ama kiăng kơ Kâo tŭ gleh tơnap yơh.” Arăng Ba Yêsu Pơ Anăp Annas, Jing Pô Khua Ngă Yang Prŏng Hlâo Adih 12 Giŏng anŭn, ƀing tơpul tơhan hrŏm hăng khua moa gơñu anŭn hăng ƀing khua moa Yehudah mă akă hĭ tơngan Yêsu, 13 laih anŭn ba nao Yêsu pơ sang Annas hlâo, jing tơhmua Kaiaphas, pô khua ngă yang prŏng hloh amăng rơnŭk anŭn. 14 Kaiaphas yơh jing pô djru pơmĭn kơ ƀing Yehudah kơ tơlơi sa čô mơnuih djai pơala brơi kơ ƀing ană plei jing hiam hloh yơh.
Tơlơi Pêtrôs Hơngah Hĭ Yêsu
15 Simôn Pêtrôs hăng sa čô ding kơna pơkŏn đuaĭ tui hăng Yêsu. Yuakơ pô ding kơna anŭn thâo krăn laih pô khua ngă yang prŏng hloh anŭn, tui anŭn ñu mŭt nao hăng Yêsu pơ wăl tơdron sang khua ngă yang prŏng hloh, 16 samơ̆ Pêtrôs khŏm dŏ tơguan gah rơngiao jĕ ƀơi bah amăng. Pô ding kơna pơkŏn anŭn, jing mơnuih khua ngă yang prŏng thâo krăn, wơ̆t glaĭ, pơhiăp hăng pô đah kơmơi dŏ wai bah amăng kiăng kơ brơi Pêtrôs dưi mŭt pơ gah lăm. 17 Pô đah kơmơi ƀơi bah amăng anŭn tơña kơ Pêtrôs tui anai, “Djơ̆ mơ̆ ih jing ding kơna Yêsu?” Pêtrôs laĭ glaĭ tui anai, “Ƀu djơ̆ kâo ôh.” 18 Mlam anŭn rơŏt laih anŭn ƀing hlŭn hăng ƀing tơhan dŏ dơ̆ng jum dar apui ƀing gơñu hơmâo pơtŏ laih kiăng kơ pơđao. Pêtrôs ăt dŏ dang apui hrŏm hăng ƀing gơñu mơ̆n.
Khua Ngă Yang Prŏng Hloh Tơña Kơ Yêsu
19 Tơdang anŭn, khua ngă yang prŏng hloh anŭn tơña kơ Yêsu kơ tơlơi ƀing ding kơna Ñu laih anŭn kơ tơlơi Ñu pơtô pơblang mơ̆n. 20 Yêsu laĭ glaĭ tui anai, “Kâo hơmâo pơhiăp rơđah rơđo̱ng laih kơ abih bang mơnuih. Kâo juăt pơtô pơblang nanao amăng khul sang pơjơnum ƀôdah amăng sang yang, jing anih abih bang ƀing Yehudah rai jơnum hrŏm hơbĭt. Kâo ƀu pơhiăp hơgŏm ôh. 21 Yua hơget ih tơña kơ Kâo lĕ? Ih tơña bĕ kơ ƀing mơnuih hơmâo hơmư̆ laih tơlơi Kâo pơtô. Sĭt yơh ƀing gơñu thâo yơh hơdôm tơlơi Kâo pơhiăp.” 22 Tơdang Yêsu pơhiăp tơlơi anŭn, hơmâo sa čô tơhan dŏ jĕ anŭn păh meng Yêsu laih anŭn pơhiăp tui anai, “Sĭt ih khŏm anăm laĭ glaĭ hăng khua ngă yang prŏng hloh tui hăng anŭn ôh!” 23 Yêsu laĭ kơ tơhan anŭn tui anai, “Tơdah Kâo pơhiăp soh, pơrơđah bĕ kơ Kâo thâo hơget tơlơi soh anŭn jing. Samơ̆ tơdah Kâo pơhiăp djơ̆, sĭt ih khŏm anăm taih Kâo ƀơi ƀô̆ ôh!” 24 Giŏng anŭn, Annas pơkiaŏ tơhan ba Yêsu nao pơ khua ngă yang prŏng hloh Kaiaphas. Tơngan Yêsu arăng ăt dŏ akă mơ̆n.
Pêtrôs Hơngah Hĭ Yêsu Dơ̆ng
25 Tơdang Simôn Pêtrôs ăt dŏ dang apui pơđao ñu pô pơ anŭn mơ̆n, hơmâo mơnuih tơña kơ ñu tui anai, “Ih ăt jing ding kơna Ñu mơ̆n?” Samơ̆ Pêtrôs hơngah hĭ tui anai, “Ơ ơh, ƀu djơ̆ kâo ôh.” 26 Sa čô hlŭn khua ngă yang prŏng hloh, ăt jing adơi ai hăng pô Pêtrôs hơmâo kŏh tơĭ hĭ laih tơngia gơ̆ anŭn, laĭ kơ Pêtrôs tui anai, “Kâo ƀuh laih ŏng dŏ hăng Yêsu amăng đang anŭn ôliwơ adih.” 27 Sa wơ̆t dơ̆ng Pêtrôs hơngah ƀu thâo krăn ôh Yêsu laih anŭn ƀơi mông anŭn mơtam mơnŭ čơdơ̆ng tơdjô̆ yơh.
Yêsu Gah Anăp Khua Kwar Pilat
28 Hlak anŭn, ưm mơguah biă mă, ƀing Yehudah ba nao Yêsu mơ̆ng sang Kaiaphas truh pơ sang khua kwar ƀing Rôm. Ƀing Yehudah ƀu kiăng mŭt ôh amăng sang khua anŭn, tơdah ƀing gơñu mŭt, ƀing gơñu huĭ kơ tơlơi Ơi Adai ƀu či yap mŭt ƀing gơñu tui hăng tơlơi phiăn pơrơgoh, laih anŭn yuakơ ƀing gơñu kiăng kơ dưi ƀơ̆ng huă gơnam ƀơ̆ng Tơlơi Găn yơh. 29 Tui anŭn, Pilat tơbiă mơ̆ng sang nao pơ ƀing gơñu laih anŭn tơña tui anai, “Hơget tơlơi soh ƀing gih phŏng kơđi kơ pô anai hlak ngă lĕ?” 30 Ƀing gơñu laĭ tui anai, “Tơdah ñu ƀu djơ̆ mơnuih sat ƀai ôh, sĭt ƀing gơmơi ƀu či jao hĭ ñu kơ ih ôh!” 31 Pilat pơhiăp tui anai, “Brơi kơ gih pô ba glaĭ ñu laih anŭn phat kơđi ñu bĕ tui hăng tơlơi juăt gih pô.” Ƀing Yehudah pơhiăp tui anai, “Ƀing gơmơi ƀu hơmâo tơlơi dưi klă̱ kơđi pơdjai hĭ hlơi pô ôh.” 32 Tơlơi anŭn truh tui anŭn kiăng kơ hơdôm boh hiăp Yêsu hơmâo pơhiăp laih kiăng kơčrâo kơ tơlơi djai hiư̆m pă Ñu či djai, či pơkrĕp truh hĭ yơh. 33 Giŏng anŭn, Pilat mŭt pơ gah lăm sang ñu, iâu ba Yêsu laih anŭn tơña kơ Ñu tui anai, “Ih jing pơtao kơ ƀing Yehudah hă?” 34 Yêsu tơña tui anai, “Anŭn jing tơlơi pơmĭn ih pô ƀôdah ƀing pơkŏn pơhiăp hăng ih kơ tơlơi Kâo?” 35 Pilat laĭ glaĭ tui anai, “Sĭt kâo ƀu djơ̆ jing sa čô mơnuih Yehudah ôh! Ƀing ană plei Ih laih anŭn ƀing khua ngă yang prŏng hloh Ih yơh jao hĭ laih Ih kơ kâo. Hơget tơlơi Ih hơmâo ngă laih lĕ?” 36 Yêsu laĭ glaĭ tui anai, “Dêh čar Kâo ƀu lŏm kơ lŏn tơnah anai ôh. Tơdah dêh čar Kâo lŏm kơ lŏn tơnah anai, ƀing ding kơna Kâo či pơblah kiăng kơ pơklaih hĭ Kâo mơ̆ng ƀing Yehudah yơh. Samơ̆ ră anai, dêh čar Kâo jing mơ̆ng anih pơkŏn.” 37 Pilat laĭ tui anai, “Tui anŭn, Ih jing pơtao hă?” Yêsu laĭ glaĭ, “Sĭt ih laĭ djơ̆ yơh kơ tơlơi Kâo jing pơtao. Sĭt yuakơ tơhơnal tơlơi anŭn yơh arăng tơkeng kơ Kâo laih anŭn Kâo trŭn rai pơ lŏn tơnah anai, kiăng kơ ră ruai kơ mơnuih mơnam hơget tơlơi jing sĭt yơh. Hlơi pô đaŏ kơ tơlơi sĭt, ñu anŭn hơmư̆ tui Kâo yơh.” 38 Pilat tơña kơ Yêsu tui anai, “Hơget tơlơi sĭt jing biă mă lĕ?”
Ƀing Ană Plei Klă Kơđi Kơ Yêsu Kiăng Kơ Tŭ Pŏng Ƀơi Kơyâo Bơrơkal
Tơdang ñu tơña giŏng laih tơlơi anŭn, ñu tơbiă nao pơ ƀing Yehudah dơ̆ng laih anŭn laĭ tui anai, “Kâo ƀu hơduah ƀuh tơlơi soh hơget ôh pơkơdơ̆ng glaĭ hăng pô anŭn. 39 Samơ̆ tui hăng tơlơi phiăn gih yơh, kâo či pŏk brơi kơ ƀing gih sa čô mơnă ƀơi hrơi phet Tơlơi Găn. Tui anŭn, ƀing gih kiăng kơ kâo pŏk brơi ‘pơtao ƀing Yehudah’ kơ ƀing gih mơ̆?” 40 Samơ̆ ƀing gơñu laĭ glaĭ kraih tui anai, “Ơ ơh, anăm pŏk hĭ ñu ôh! Samơ̆ pŏk brơi bĕ kơ ƀing gơmơi Barabbas!” Hlâo kơ anŭn, Barabbas jing pô hơmâo ngă laih bruă tơgŭ pơkơdơ̆ng.
1 Giŏng anŭn, Pilat pơđar kơ tơhan taih Yêsu hăng hrĕ klĭ. 2 Ƀing tơhan mơñam mŭk hăng hrĕ kơyâo hơmâo drơi laih anŭn troă ƀơi akŏ Yêsu. Ƀing gơñu buh brơi Yêsu ao phyung mla̱ng, 3 laih anŭn nao djik djak kơ Yêsu lu wơ̆t tui anai, “Kơkuh kơ ih, Ơ pơtao Yehudah ăh!” Giŏng anŭn, ƀing gơñu păh meng Yêsu dơ̆ng. 4 Sa wơ̆t dơ̆ng Pilat tơbiă nao pơhiăp hăng ƀing Yehudah tui anai, “Anai nê, kâo ba tơbiă Ñu kơ ƀing gih kiăng kơ ƀing gih thâo krăn kơ tơlơi kâo ƀu hơduah ƀuh ôh tơlơi soh hơget ôh jing pơkơdơ̆ng glaĭ hăng Ñu.” 5 Tơdang Yêsu tơbiă mơ̆ng sang ƀơi akŏ Ñu arăng troă laih mŭk drơi laih anŭn arăng buh brơi laih ao phyung mơla̱ng ƀơi Ñu, Pilat laĭ kơ ƀing Yehudah tui anai, “Lăng bĕ mơnuih anai!” 6 Tơdang ƀing khua ngă yang prŏng wơ̆t hăng ƀing khua moa gơñu ƀuh Yêsu, ƀing pơhiăp kraih tui anai, “Pŏng hĭ bĕ ñu pơ kơyâo bơrơkal! Pŏng hĭ bĕ ñu pơ kơyâo bơrơkal!” Samơ̆ Pilat pơhiăp tui anai, “Ƀing gih mă pŏng hĭ bĕ Ñu pơ kơyâo bơrơkal. Bơ kơ kâo, kâo hơduah ƀu ƀuh ôh sa tơlơi soh pơkơdơ̆ng glaĭ hăng Ñu.” 7 Ƀing Yehudah pơtrŭt tui anai, “Ƀing gơmơi hơmâo sa tơlơi juăt laih anŭn tui tơlơi juăt anŭn, pô anai khŏm djai yơh yuakơ ñu hơmâo yap laih ñu pô jing Ană Ơi Adai.” 8 Tơdang Pilat hơmư̆ tơlơi anŭn, ñu huĭ hyưt lu hloh dơ̆ng yơh, 9 laih anŭn ñu mŭt nao gah lăm sang phat kơđi laih anŭn tơña kơ Yêsu tui anai, “Mơ̆ng pă Ih rai lĕ?” Samơ̆ Yêsu ƀu laĭ glaĭ hơget kơ ñu ôh. 10 Pilat tơña kơ Ñu tui anai, “Hiư̆m ngă Ih hơngah ƀu kiăng pơhiăp hăng kâo ôh hă? Ih ƀu thâo ôh hă, kâo dưi pŏng pơdjai Ih pơ kơyâo bơrơkal ƀôdah kâo dưi pơklaih brơi kơ Ih?” 11 Yêsu laĭ glaĭ tui anai, “Ih ƀu či hơmâo tơlơi dưi hơget ôh gah ngŏ kơ Kâo tơdah Ơi Adai ƀu jao brơi kơ tơlơi dưi kơ ih ôh. Hơnŭn yơh, pô hơmâo jao laih Kâo kơ ih anŭn jing pô hơmâo ngă laih sa tơlơi soh sat hloh kơ tơlơi soh ih yơh.” 12 Čơdơ̆ng mơ̆ng anŭn, Pilat gir kiăng kơ pơrơngai hĭ Yêsu, samơ̆ ƀing khua djă̱ akŏ ƀing Yehudah ăt dŏ pơhiăp kraih hăng ñu tui anai, “Tơdah ih pơrơngai hĭ pô anai, ih ƀu jing gơyut gơyâo hăng pơtao prŏng Kaisar ôh. Hlơi pô yap kơ ñu pô jing pơtao, ñu anŭn tơgŭ pơkơdơ̆ng glaĭ hăng pơtao Kaisar yơh.” 13 Tơdang Pilat hơmư̆ hơdôm tơlơi anŭn, ñu ba tơbiă Yêsu laih anŭn dŏ be̱r ƀơi grê phat kơđi ƀơi anih arăng phat kơđi arăng pơanăn Atur Pơtâo, amăng tơlơi pơhiăp Aramit pơanăn Gabbatha. 14 Anŭn jing amăng hrơi Prap Pre kơ Hrơi Kŏm Tơlơi Găn, hlak anŭn ăt kơplăh wăh mông tal năm. Pilat laĭ kơ ƀing Yehudah tui anai, “Anai yơh jing pơtao gih!” 15 Samơ̆ ƀing gơñu pơhiăp kraih tui anai, “Mă pơđuaĭ hĭ ñu bĕ! Mă pơđuaĭ hĭ ñu bĕ! Pŏng hĭ bĕ ñu pơ kơyâo bơrơkal!” Pilat tơña glaĭ kơ ƀing gơñu tui anai, “Hiư̆m ngă, ƀing gih kiăng kơ kâo pŏng pơdjai hĭ pơtao gih pơ kơyâo bơrơkal hă?” Ƀing khua ngă yang prŏng laĭ glaĭ tui anai, “Ƀing gơmơi ƀu hơmâo pơtao pơkŏn ôh rơngiao kơ pơtao prŏng Kaisar.” 16 Hơnăl tuč, Pilat tŭ ư hăng ƀing khua djă̱ akŏ ƀing Yehudah kiăng kơ prŏng hĭ Yêsu pơ kơyâo bơrơkal yơh.
Ƀing Arăng Pŏng Hĭ Yêsu Ƀơi Kơyâo Bơrơkal
Giŏng anŭn, ƀing tơhan mă Yêsu ba nao mơtam yơh. 17 Yêsu glăm kơyâo bơrơkal Ñu pô laih anŭn tơbiă nao pơ bŏl čư̆ arăng pơanăn čư̆ Tơlang Akŏ, amăng tơlơi pơhiăp Aramit ăt pơanăn čư̆ Golgotha. 18 Pơ anih anŭn yơh, ƀing gơñu pŏng hĭ Yêsu pơ kơyâo bơrơkal laih anŭn ƀing gơñu ăt pŏng dua čô mơnuih pơkŏn mơ̆n ƀơi dua ƀĕ kơyâo bơrơkal, sa čô gah hơnuă sa čô gah ieo, laih anŭn Yêsu dŏ tŏng krah dua čô anŭn. 19 Pilat pơđar kơ arăng čih sa pŏk hơnăl hăng yol ƀơi kơyâo bơrơkal Yêsu. Hơnăl anŭn arăng čih tui anai: YÊSU PLEI NAZARET, PƠTAO ɃING YEHUDAH. 20 Hơmâo lu ƀing Yehudah đŏk hơnăl čih anŭn, yuakơ anih ƀing gơñu pŏng hĭ Yêsu anŭn jing jĕ pơ plei Yerusalaim, laih anŭn hơnăl anŭn arăng čih amăng tơlơi Hêbrơ, tơlơi Latin hăng tơlơi Grek. 21 Ƀing khua ngă yang prŏng ƀing Yehudah nao pơgăl hăng Pilat tui anai, “Anăm čih ôh, ‘Pơtao ƀing Yehudah’ samơ̆ čih bĕ, ‘Ñu hơmâo yap laih ñu pô tui anai: Kâo jing pơtao ƀing Yehudah.’ ” 22 Pilat laĭ glaĭ tui anai, “Hơget tơlơi kâo hơmâo čih laih, kâo ƀu pơplih hĭ dơ̆ng tah.” 23 Tơdang ƀing tơhan pŏng hĭ laih Yêsu pơ kơyâo bơrơkal, ƀing gơñu mă ao phyung Yêsu laih anŭn pơpha ao anŭn amăng pă̱ črăn, anŭn jing sa črăn kơ rĭm čô, kơnơ̆ng ao gah lăm đôč dŏ glaĭ. Ao anŭn arăng pơkra hăng sa blah bơnăl ƀu hơmâo tơhơnal sĭt ôh, jing bơnăl arăng mơñam jing sa blah čơdơ̆ng mơ̆ng phŭn truh pơ rơnuč. 24 Ƀing tơhan anŭn pơlaĭ hăng tơdruă gơñu tui anai, “Anăm hek hĭ ao anai ôh. Brơi kơ ƀing ta pơčram bĕ kiăng kơ hlơi pô djơ̆, ñu anŭn dưi mă yơh.” Tơlơi anŭn truh tui anŭn jing pơkrĕp truh hĭ tui hăng tơlơi arăng čih laih amăng Hră Tơlơi Ơi Adai Pơhiăp tui anai, “Ƀing gơñu pơpha hĭ laih sum ao kâo hăng tơdruă gơñu laih anŭn pơčram kiăng mă hĭ ao phyung kâo.” Anŭn yơh jing tơlơi ƀing tơhan ngă laih. 25 Amĭ Yêsu dŏ jĕ ƀơi kơyâo bơrơkal hrŏm hăng neh Ñu H'Mari, jing bơnai Klôpas, laih anŭn H'Mari mơ̆ng plei Magdalênê. 26 Tơdang Yêsu ƀuh amĭ Ñu pơ anŭn laih anŭn ding kơna pô Ñu khăp dŏ jĕ ƀơi anŭn, Yêsu laĭ kơ amĭ Ñu tui anai, “Ơ amĭ ăh, pô ding kơna anŭn jing kar hăng ană đah rơkơi ih.” 27 Laih anŭn Ñu laĭ kơ pô ding kơna anŭn tui anai, “Răk wai bĕ pô anŭn jing kar hăng amĭ ih.” Čơdơ̆ng mơ̆ng hrơi anŭn, pô ding kơna anŭn rong ba amĭ Yêsu yơh.
Tơlơi Yêsu Djai
28 Tơdơi kơ anŭn, tơdang Yêsu thâo abih tơlơi anŭn ră anai pơgiŏng hĭ laih, laih anŭn kiăng kơ pơkrĕp truh hĭ tui hăng Hră Ơi Adai, Yêsu laĭ tui anai, “Kâo mơhao ia.” 29 Pơ anih anŭn hơmâo sa boh čeh ia tơpai mơsăm. Tui anŭn, ƀing tơhan mă pông rơyăn añrŭ amăng ia tơpai mơsăm, pioh pông anŭn ƀơi sa ƀĕ gai kơyâo hơmrui laih anŭn yơr nao ƀơi tơƀuai Yêsu. 30 Tơdang Yêsu mă tŭ ia mơsăm anŭn, Ñu laĭ tui anai, “Abih bruă Kâo pơgiŏng hĭ laih.” Giŏng anŭn, Ñu akŭp akŏ Ñu laih anŭn tơĭ pran yơh.
Arăng Klâŏ Djeo Yêsu
31 Hlak anŭn, hrơi anŭn jing hrơi prap pre kơ hrơi tŏ tui yơh jing sa hrơi Saƀat yom hơjăn čơdơ̆ng kơ Tơlơi Găn. Yuakơ ƀing khua djă̱ akŏ ƀing Yehudah ƀu kiăng lui ôh atâo ƀơi khul kơyâo bơrơkal tơdang amăng hrơi Saƀat, ƀing gơñu nao rơkâo kơ Pilat brơi kơ ƀing gơñu taih pơjŏh hĭ tơlang thung klâo čô ƀơi khul kơyâo bơrơkal laih anŭn brơi mă trŭn atâo gơñu mơ̆ng khul kơyâo bơrơkal anŭn yơh. 32 Hơnŭn yơh, ƀing tơhan nao taih pơjŏh hĭ tơlang thung dua čô mơnuih klĕ dŏp, jing ƀing mơnuih arăng pŏng pơdjai hrŏm hăng Yêsu, ƀơi dua gah Yêsu. 33 Samơ̆ tơdang ƀing gơñu nao jĕ pơ Yêsu, ƀing gơñu ƀuh Yêsu tơĭ pran laih. Tui anŭn, ƀing tơhan anŭn ƀu taih pơjŏh hĭ tơlang thung Yêsu ôh. 34 Kơđai glaĭ, hơmâo sa čô tơhan klâŏ djeo Yêsu hăng sa ƀĕ tơbăk tơl blĭp blăp drah hăng ia ƀlĕ mơ̆ng nam rơka anŭn. 35 Pô hơmâo ƀuh laih tơlơi anŭn ñu hơmâo ruai laih kơ ƀing arăng kơ tơlơi anŭn, laih anŭn hơget tơlơi ñu hơmâo ruai laih kơ ƀing gơñu anŭn jing sĭt yơh. Ñu thâo kơ tơlơi ñu hơmâo pơruai laih hơget tơlơi jing sĭt laih anŭn ñu ruai laih kơ ƀing gih hơdôm tơlơi anŭn kiăng kơ ƀing gih ăt dưi đaŏ kơnang kơ Yêsu mơ̆n. 36 Hơdôm tơlơi anŭn truh laih kiăng kơ pơkrĕp truh tui hăng Hră Ơi Adai hơmâo čih laih tui anai, “Ƀu hơmâo sa ƀĕ ôh tơlang Ñu jŏh hĭ.” 37 Laih anŭn tui hăng Hră Ơi Adai dơ̆ng hơmâo čih laih tui anai, “Ƀing gơñu či lăng ƀơi pô ƀing gơñu hơmâo klâŏ laih.”
Arăng Dơ̱r Atâo Yêsu
38 Tơdơi kơ anŭn, Yôsêp mơ̆ng plei Arimathea nao rơkâo kơ Pilat kiăng brơi kơ ñu mă trŭn atâo Yêsu hăng dơ̱r hĭ atâo anŭn. Hlak anŭn, Yôsêp jing pô đuaĭ tui Yêsu mơ̆n, samơ̆ ñu đuaĭ tui hơgŏm yuakơ ñu huĭ kơ ƀing Yehudah. Hăng tơlơi Pilat brơi yơh, Yôsêp nao mă tŭ atâo Yêsu. 39 Nikodêmos, jing pô hlâo adih hơmâo nao bưp laih Yêsu tơdang mlam, ăt nao hrŏm hăng Yôsêp mơ̆n. Nikodêmos djă̱ ba jrao phĭ̱ pơlŭk hăng jrao alôê, jing kơplăh wăh klâopluh-pă̱ kilôgram yơh. 40 Dua gơñu anŭn mă trŭn atâo Yêsu laih anŭn pŏn hĭ hăng bơnăl ƀlĭ hrŏm hăng jrao ƀâo mơngưi. Hơdôm tơlơi pơyua anŭn ƀing gơñu ngă tui tơlơi phiăn ƀing Yehudah pơyua atâo yơh. 41 Ƀơi anih arăng pŏng hĭ Yêsu anŭn, hơmâo sa boh đang kơyâo laih anŭn amăng đang kơyâo anŭn hơmâo sa boh pa̱r pơsat, jing anih arăng aka ƀu dơ̱r mơnuih djai ôh. 42 Ƀing gơñu ngă tui anŭn yuakơ anŭn jing hrơi prap pre kơ hrơi Saƀat ƀing Yehudah, laih anŭn hơmâo sa boh đang jĕ pơ anŭn ăt hơmâo sa boh pa̱r pơsat mơ̆n amăng đang anŭn, tui anŭn yơh ƀing gơñu dơ̱r atâo Yêsu pơ anih pa̱r pơsat anŭn yơh.
Anih Pơsat Hŏng
1 Ƀơi mơguah ưm amăng hrơi tal sa amăng hrơi kŏm, tơdang ăt dŏ sêng brêng mơmŏt, H'Mari Magdalênê nao pơ anih pơsat laih anŭn ƀuh boh pơtâo kơđŏl pơsat arăng tơglŭng đuaĭ hĭ laih mơ̆ng bah amăng pơsat. 2 Tui anŭn, ñu đuaĭ glaĭ pơ Simôn Pêtrôs hăng sa čô ding kơna pơkŏn, jing pô Yêsu khăp biă mă, laih anŭn laĭ tui anai, “Ƀing arăng hơmâo mă pơđuaĭ hĭ laih atâo Khua Yang mơ̆ng anih pơsat anŭn laih anŭn ƀing ta ƀu thâo ôh pơ anih pă ƀing gơñu hơmâo pioh hĭ laih Ñu!” 3 Giŏng anŭn, Pêtrôs hăng pô ding kơna pơkŏn anŭn đuaĭ nao pơ anih pơsat mơtam yơh. 4 Abih dua gơñu đuaĭ nao hrŏm, samơ̆ pô ding kơna pơkŏn anŭn đuaĭ kơtang hloh kơ Pêtrôs laih anŭn ñu truh hlâo pơ anih pơsat. 5 Ñu tơkui lăng amăng pơsat laih anŭn ñu ƀuh bơnăl pŏn amăng pơsat samơ̆ ñu ƀu mŭt amăng pơsat ôh. 6 Giŏng anŭn, Simôn Pêtrôs, jing pô rai gah rŏng ñu, truh laih anŭn mŭt pơ anih pơsat. Ñu ƀuh bơnăl pŏn ƀơi anih anŭn, 7 wơ̆t hăng khăn pŏn akŏ Yêsu ăt pơ anŭn mơ̆n. Arăng lŏp khăn pŏn anŭn pioh hơjăn, jing phara mơ̆ng bơnăl pŏn anŭn. 8 Hơnăl tuč, pô ding kơna pơkŏn anŭn, jing pô truh hlâo pơ anih pơsat, ăt mŭt pơ gah lăm anih pơsat anŭn mơ̆n. Ñu ƀuh hăng đaŏ kơnang yơh kơ tơlơi Yêsu hơmâo jing hĭ hơdip dơ̆ng laih yơh. 9 Hlak anŭn, ƀing gơñu ăt aka ƀu thâo hluh ôh mơ̆ng Hră Ơi Adai kơ tơlơi Yêsu khŏm hơdip glaĭ tơdơi kơ Ñu djai laih. 10 Giŏng anŭn, ƀing ding kơna anŭn glaĭ pơ sang gơñu pô yơh.
Yêsu Pơƀuh Rai Kơ H'Mari Magdalênê
11 Tơdang anŭn, H'Mari dŏ dơ̆ng gah rơngiao kơ anih pơsat hăng hlak dŏ hia. Tơdang ñu dŏ hia, ñu tơkui lăng mŭt pơ anih pơsat 12 laih anŭn ƀuh dua čô ling jang hiam Ơi Adai buh ao kô̱̆, dŏ be̱r ƀơi anih arăng pioh atâo Yêsu, sa čô dŏ be̱r gah akŏ sa čô dŏ be̱r gah tơkai. 13 Ƀing gơñu tơña kơ H'Mari tui anai, “Ơ đah kơmơi hơi, yua hơget ih hia lĕ?” H'Mari laĭ glaĭ tui anai, “Ƀing arăng hơmâo mă pơđuaĭ hĭ laih Khua kâo laih anŭn kâo ƀu thâo ôh pơpă ƀing arăng hơmâo pioh laih Ñu.” 14 Ƀơi mông anŭn, H'Mari wir glaĭ hăng ƀuh Yêsu hlak dŏ dơ̆ng pơ anŭn, samơ̆ ñu ƀu thâo kơnăl ôh anŭn jing Yêsu. 15 Yêsu pơhiăp hăng ñu tui anai, “Ơ đah kơmơi ăh, yua hơget ih dŏ čŏk hia lĕ? Ih hlak hơduah sem hlơi lĕ?” H'Mari pơmĭn pô pơhiăp hăng ñu anŭn jing pô wai lăng đang kơyâo anŭn, tui anŭn ñu laĭ tui anai, “Ơ khua ăh, tơdah ih hơmâo mă pơđuaĭ hĭ laih atâo Khua kâo, rơkâo kơ ih laĭ brơi kơ kâo thâo bĕ pơpă ih hơmâo pioh hĭ laih atâo Ñu laih anŭn kâo či nao mă tŭ atâo anŭn hăng dơ̱r glaĭ djơ̆ hơnơ̆ng yơh.” 16 Yêsu iâu ñu tui anai, “Ơ H'Mari.” H'Mari wir glaĭ lăng pơ Ñu laih anŭn pơhiăp kraih hăng tơlơi Aramit tui anai, “Rabboni!” Kiăng laĭ Ơ Nai Pơtô ăh. 17 Yêsu laĭ kơ ñu tui anai, “Ih khŏm anăm djă̱ pơkơ̆ng hĭ Kâo ôh yuakơ Kâo aka wơ̆t glaĭ pơ Ama Kâo ôh. Kơđai glaĭ, brơi kơ ih nao bĕ pơ ƀing ding kơna Kâo hăng ră ruai kơ ƀing gơñu tơlơi anai, ‘Kâo či tañ wơ̆t glaĭ pơ Ama Kâo laih anŭn pơ Ama gih, jing pơ Ơi Adai Kâo laih anŭn pơ Ơi Adai gih yơh.’ ” 18 H'Mari Magdalênê đuaĭ nao pơ ƀing ding kơna Yêsu hăng tơlơi pơthâo anai, “Kâo hơmâo ƀuh laih Khua Yang!” Laih anŭn ñu ră ruai kơ ƀing gơñu kơ tơlơi Yêsu hơmâo pơhiăp laih hơdôm tơlơi anŭn hăng ñu.
Yêsu Pơƀuh Rai Kơ Ƀing Ding Kơna Ñu
19 Ƀơi klăm hrơi blung hlâo amăng hrơi kŏm anŭn, tơdang ƀing ding kơna dŏ hrŏm hơbĭt amăng sa boh anih laih anŭn bah amăng krư̆ kăl hĭ yuakơ ƀing gơñu huĭ kơ ƀing khua djă̱ akŏ tơlơi đaŏ ƀing Yehudah, Yêsu plŭt rai dŏ dơ̆ng amăng ƀing gơñu laih anŭn laĭ tui anai, “Rơkâo kơ Ơi Adai ngă brơi kơ pran jua gih jing rơnŭk rơnua yơh!” 20 Tơdơi kơ Yêsu pơhiăp laih tơlơi anŭn, Ñu pơrơđah brơi kơ ƀing gơñu tơngan hăng djeo Ñu. Ƀing ding kơna Ñu mơak mơai biă mă tơdang ƀing gơñu ƀuh Khua Yang. 21 Laih anŭn Yêsu laĭ dơ̆ng tui anai, “Rơkâo kơ Ơi Adai ngă brơi kơ pran jua gih jing rơnŭk rơnua yơh! Tui hăng Yang Ama hơmâo pơkiaŏ rai laih Kâo, Kâo ăt či pơkiaŏ nao ƀing gih mơ̆n.” 22 Tơdơi kơ Ñu pơhiăp giŏng laih tơlơi anŭn, Ñu bluh ayŭh ƀơi ƀing gơñu hăng laĭ tui anai, “Tŭ mă bĕ Yang Bơngăt Hiam. 23 Tơdah ƀing gih pap brơi kơ ƀing arăng kơ tơlơi ngă soh, Ơi Adai ăt či pap brơi kơ ƀing gơñu mơ̆n, samơ̆ tơdah ƀing gih ƀu pap brơi ôh ƀing arăng kơ tơlơi ngă soh, sĭt Ơi Adai ƀu či pap brơi kơ ƀing gơñu ôh.”
Yêsu Pơƀuh Rai Kơ Thômas
24 Hlak anŭn, Thômas, ăt jing Didumos mơ̆n, jing sa čô amăng Pluh-Dua čô ƀing ding kơna, ƀu dŏ hrŏm hơbĭt hăng ƀing ding kơna ôh tơdang Yêsu pơƀuh rai. 25 Giŏng anŭn, ƀing ding kơna anŭn ră ruai hăng Thômas tui anai, “Ƀing gơmơi hơmâo ƀuh laih Khua Yang!” Samơ̆ Thômas laĭ kơ ƀing gơñu tui anai, “Tơdang kâo ƀuh hơdôm nam rơka kơđĭn ƀơi dua gah tơngan Ñu laih anŭn čut čơđe̱ng tơngan kâo ƀơi hơdôm nam rơka kơđĭn anŭn, laih anŭn tĕk tơngan kâo ƀơi djeo Ñu, anŭn kăh kâo či đaŏ kơnang kơ tơlơi anŭn.” 26 Sa hrơi kŏm tơdơi, ƀing ding kơna Yêsu dŏ amăng sa boh sang dơ̆ng laih anŭn Thômas dŏ hăng ƀing gơñu mơ̆n. Wơ̆t tơdah khul bah amăng arăng krư̆ kăl hĭ, plŭt mơtam Yêsu pơƀuh rai dŏ dơ̆ng ƀơi tŏng krah ƀing gơñu laih anŭn laĭ tui anai, “Tơlơi rơnŭk rơnua dŏ hăng ƀing gih!” 27 Giŏng anŭn, Yêsu laĭ kơ Thômas tui anai, “Čut nao bĕ čơđe̱ng tơngan ih pơ anai laih anŭn lăng bĕ dua gah tơngan Kâo. Tĕk bĕ tơngan ih ƀơi nam rơka ƀơi djeo Kâo. Anăm đing đaŏ dơ̆ng tah, samơ̆ đaŏ kơnang bĕ kơ tơlơi Kâo jing hơdip dơ̆ng yơh.” 28 Thômas laĭ hăng Yêsu tui anai, “Ơ Khua kâo, Ơi Adai kâo!” 29 Giŏng anŭn, Yêsu laĭ kơ ñu tui anai, “Yuakơ ih hơmâo ƀuh laih Kâo, tui anŭn ih đaŏ kơnang kơ Kâo. Ơi Adai bơni hiam kơ ƀing hlơi pô aka ƀu ƀuh Kâo ôh samơ̆ đaŏ kơnang kơ Kâo.” 30 Yêsu ngă laih lu gru tơlơi mơsêh mơyang pơkŏn dơ̆ng ƀơi anăp ƀing ding kơna Ñu, jing hơdôm tơlơi arăng ƀu čih pioh ôh amăng sŏp hră anai. 31 Samơ̆ hơdôm tơlơi anŭn arăng hơmâo čih laih kiăng kơ ƀing gih dưi đaŏ kơnang kơ tơlơi Yêsu jing Pô Krist, Ană Ơi Adai, laih anŭn hăng tơlơi ƀing gih đaŏ kơnang yơh ƀing gih dưi hơdip hlŏng lar hăng tơlơi đaŏ kơnang kơ Ñu.
Yêsu Pơƀuh Rai Kơ Tơjuh Čô Ƀing Ding Kơna
1 Tơdơi kơ anŭn, Yêsu pơƀuh rai dơ̆ng kơ ƀing ding kơna Ñu jĕ ƀơi Dơnao Tiberias. Tơlơi anŭn hơmâo truh laih tui anai: 2 Simôn Pêtrôs, Thômas, ăt jing Didumos mơ̆n, Nathanael mơ̆ng plei Kana kwar Galilê, ƀing ană đah rơkơi Zebedai hrŏm hăng dua čô ding kơna pơkŏn hyu hrŏm hơbĭt. 3 Simôn Pêtrôs laĭ hăng ƀing gơñu tui anai, “Kâo či nao trah akan.” Laih anŭn ƀing gơñu laĭ tui anai, “Ƀing gơmơi ăt či nao hăng ih mơ̆n.” Tui anŭn, ƀing gơñu trŭn nao amăng sŏng yơh, samơ̆ amăng abih mlam anŭn ƀing gơñu ƀu hơmâo trah djơ̆ hơget gĕt ôh. 4 Ƀơi mơguah ưm, Yêsu dŏ dơ̆ng ƀơi ha̱ng ia, samơ̆ ƀing ding kơna anŭn ƀu thâo kơnăl ôh anŭn jing Yêsu. 5 Yêsu iâu nao pơ ƀing gơñu tui anai, “Ơ ƀing gơyut hơi, ƀing gih trah hơmâo akan mơ̆?” Ƀing gơñu laĭ glaĭ tui anai, “Ƀu hơmâo ôh.” 6 Yêsu pơđar kơ ƀing gơñu tui anai, “Trah trŭn bĕ hơñuăl gih ƀơi gah hơnuă kơ sŏng gih laih anŭn ƀing gih či trah hơmâo akan yơh.” Tơdang ƀing gơñu glŏm trŭn hơñuăl gơñu, ƀing gơñu ƀu anăm dui đĭ hơñuăl ôh yuakơ hơmâo lu akan biă mă. 7 Giŏng anŭn, pô ding kơna Yêsu khăp anŭn laĭ hăng Pêtrôs tui anai, “Anŭn jing Khua Yang!” Tơdang Pêtrôs hơmư̆ pô ding kơna anŭn laĭ, “Anŭn jing Khua Yang,” ñu mă ao phyung sŏm hĭ drơi ñu, yuakơ ñu hơmâo tŏh hĭ laih hlâo kơ anŭn, laih anŭn kơdâo trŭn amăng ia luai nao pơ ha̱ng yơh. 8 Ƀing ding kơna pơkŏn waih sŏng đuaĭ tui, đŏh ba hơñuăl bă hăng akan yuakơ sŏng gơñu ƀu dŏ ataih ôh mơ̆ng ha̱ng kơplăh wăh kơnơ̆ng dua-rơtuh haih đôč. 9 Tơdang ƀing gơñu truh pơ ha̱ng laih, ƀing gơñu ƀuh pơ anŭn hơmâo apui hơdăng, hơmâo sa drơi akan prŏng ƀơi hơdăng anŭn laih anŭn đơđa ƀañ tơpŭng. 10 Yêsu laĭ kơ ƀing gơñu tui anai, “Ba rai bĕ đơđa akan ƀing gih phrâo trah hơmâo laih pơ anŭn.” 11 Simôn Pêtrôs đĭ nao pơ sŏng laih anŭn dui ba hơñuăl anŭn pơ ha̱ng ia. Hơñuăl anŭn bă hăng akan laih anŭn hơmâo sa-rơtuh rơmapluh-klâo drơi akan prŏng, wơ̆t tơdah hơmâo akan lu samơ̆ hơñuăl anŭn ƀu tơĭ hĭ ôh. 12 Yêsu laĭ kơ ƀing gơñu tui anai, “Rai ƀơ̆ng mơguah bĕ.” Samơ̆ ƀu hơmâo ding kơna pă ôh khĭn tơña kơ Ñu tui anai, “Hlơi Ih jing lĕ?” Ƀing gơñu thâo sĭt anŭn jing Yêsu yơh. 13 Yêsu rai mă ƀañ tơpŭng anŭn hăng pha brơi kơ ƀing gơñu wơ̆t akan mơ̆n. 14 Anŭn jing tal klâo Yêsu pơƀuh rai kơ ƀing ding kơna Ñu tơdơi kơ Ñu hơdip glaĭ tơdơi kơ Ñu djai laih.
Yêsu Pơhiăp Kơđŏm Kơ Pêtrôs
15 Tơdang ƀing gơñu ƀơ̆ng giŏng laih, Yêsu tơña kơ Simôn Pêtrôs tui anai, “Ơ Simôn ană Yôhan hơi, ih khăp sĭt kơ Kâo hloh kơ ƀing mơnuih anai khăp kơ Kâo mơ̆?” Pêtrôs laĭ glaĭ tui anai, “Sĭt yơh, Ơ Khua Yang, Ih thâo kâo khăp kơ Ih.” Yêsu laĭ tui anai, “Răk wai bĕ ƀing đuaĭ tui Kâo jing ƀing kar hăng khul ană triu.” 16 Yêsu tơña dơ̆ng tui anai, “Ơ Simôn ană Yôhan hơi, ih khăp sĭt kơ Kâo mơ̆?” Pêtrôs laĭ glaĭ tui anai, “Sĭt yơh, Ơ Khua Yang, Ih thâo kâo khăp kơ Ih.” Yêsu pơhiăp tui anai, “Răk wai bĕ ƀing đuaĭ tui Kâo jing ƀing kar hăng tơpul triu.” 17 Tal klâo dơ̆ng Yêsu tơña kơ gơ̆ tui anai, “Ơ Simôn ană Yôhan hơi, ih khăp kơ Kâo mơ̆?” Pêtrôs ruă pran yơh yuakơ Yêsu tơña kơ ñu truh pơ klâo wơ̆t tui anai, “Ih khăp kơ Kâo mơ̆?” Ñu laĭ glaĭ, “Ơ Khua Yang ăh, Ih thâo abih bang tơlơi, Ih thâo kâo khăp kơ Ih yơh.” Yêsu laĭ tui anai, “Răk wai bĕ ƀing đuaĭ tui Kâo jing ƀing kar hăng triu. 18 Kâo laĭ sĭt biă mă kơ ih, tơdang ih dŏ hlak ai, ih buh hơô ih pô laih anŭn nao pơ anih pă ih kiăng yơh, samơ̆ tơdang ih tha laih, ih či yơr tơbiă tơngan ih, arăng či buh hơô brơi kơ ih laih anŭn dui ba ih pơ anih ih pô ƀu kiăng nao ôh.” 19 Yêsu laĭ tơlơi anŭn kiăng kơčrâo kơ tơlơi djai hiư̆m pă Pêtrôs či djai kiăng kơ pơpŭ pơyom kơ Ơi Adai. Giŏng anŭn, Ñu laĭ kơ Pêtrôs tui anai, “Đuaĭ tui kâo bĕ!” 20 Pêtrôs wir glaĭ laih anŭn ñu ƀuh pô ding kơna Yêsu khăp đuaĭ tui ƀing gơñu. Hlâo kơ anŭn, pô ding kơna anŭn jing pô hơmâo ăh ƀơi jĕ Yêsu tơdang ƀing gơñu dŏ ƀơi anih ƀơ̆ng pơgop hăng hơmâo laĭ laih tui anai, “Ơ Khua ăh, hlơi pô či pơblư̆ hĭ Ih lĕ?” 21 Tơdang Pêtrôs ƀuh pô ding kơna anŭn, ñu tơña kơ Yêsu tui anai, “Ơ Khua ăh, bơ kơ pô anai, hiư̆m pă ñu či djai lĕ?” 22 Yêsu laĭ glaĭ tui anai, “Tơdah Kâo kiăng kơ ñu dŏ hơdip truh hrơi Kâo či rai dơ̆ng, tơlơi anŭn ƀu tĕk djơ̆ kơ ih ôh. Bơ kơ ih, đuaĭ tui kâo bĕ!” 23 Yuakơ tơlơi anŭn yơh, hơmâo tơlơi pơhing hyu amăng ƀing ding kơna gơñu kơ tơlơi pô ding kơna anŭn ƀu či djai dơ̆ng tah. Samơ̆ Yêsu ƀu laĭ ôh kơ tơlơi ñu ƀu či djai dơ̆ng tah, samơ̆ Ñu kơnơ̆ng laĭ tui anai, “Tơdah Kâo kiăng kơ ñu dŏ hơdip truh hrơi Kâo rai dơ̆ng, tơlơi anŭn ƀu tĕk djơ̆ kơ ih ôh!” 24 Kâo, Yôhan, jing ding kơna anŭn, jing pô hơmâo ƀuh hăng čih pioh laih hơdôm tơlơi anŭn. Ƀing gơmơi, jing ƀing kŏng tha, thâo krăn sĭt kơ tơlơi kâo, Yôhan, hơmâo čih laih tơlơi anŭn jing sĭt. 25 Yêsu ăt hơmâo ngă laih lu mơta tơlơi pơkŏn dơ̆ng mơ̆n. Tơdah arăng čih pioh rĭm mơta tơlơi Yêsu ngă anŭn, kâo, jing Yôhan, pơmĭn wơ̆t tơdah abih bang lŏn tơnah anai ăt ƀu či hơmâo djŏp anih pioh mơ̆n kiăng kơ pioh hơdôm sŏp hră arăng dưi čih pioh kơ hơdôm tơlơi anŭn.