The New Testament of our Lord and Saviour Jesus Christ

Mathai 1

1 Abraham suan David tapa Jesu Khrist khang ciamtehna: 2 Isaac pa Abraham, Jacob pa Isaac, Judah le a sanggam pasalte pa Jacob, 3 A zi Tamar tawh a neih a tapa Perez le Zerah pa Judah, Hezron pa Perez, Ram pa Hezron, 4 Amminadab pa Ram Nahshon pa Amminadab, Salmon pa Nahshon, 5 A zi Rahab tawh a neih a tapa Boaz pa Salmon, A zi Ruth tawh a neih a tapa Obed pa Boaz, Jesse pa Obed, 6 Kumpi David pa Jesse, Uriah zi a hi ngei tawh a neih a tapa Solomon pa David, 7 Rehoboam pa Solomon, Abijah pa Rehoboam, Asa pa Abijah, 8 Jehoshaphat pa Asa, Joram pa Jehoshaphat, Uzziah pa Joram, 9 Jotham pa Uzziah, Ahaz pa Jotham, Hezekiah pa Ahaz, 10 Manasseh pa Hezekiah, Amon pa Manasseh, Josiah pa Amon, 11 Babylon khua pi-a a saltan lai-ua a neih Jeconiaha le a sanggam pasal teng pa Josiah 12 Babylon a, a saltan khit uh ciang in: Shealtiel pa Jeconiah, Zerubbabel pa Shealtiel, 13 Abiud pa Zerubbabel, Eliakim pa Abiud, Azor pa Eliakim, 14 Zadok pa Azor, Akim pa Zadok, Eliud pa Akim, 15 Eleazar pa Eliud, Matthan pa Eleazar, Jacob pa Matthan, 16 Joseph pa Jacob hi-a, Joseph zi Mary sung panin Khrist kici Jesu a suak hi. 17 Hih bangin Abraham pan David dong khang sawm le li, David pan Babylon a saltan dong khang sawm le li hi-a, saltan khit pan Khrist dong khang sawm le li ahi hi. 18 Jesu Khrist suahzia hih bang ahi hi. A nu Mary, Joseph tawh kiteng dinga kidongsa ahi hi. Amau gel a kigawm ma-un Khasiangtho in Mary a gaiisak hi. 19 A pasal Joseph, mi lungsim dik hi-a, mi lakah daisak nuam loin maksim ding a sawm hi. 20 Ahi hangin tua banga a ngaihsut laitakin Topa vansawltak khat a mang sungah kilanga, “David tapa Joseph aw, Mary paii nau pen Khasiangtho pan ahi manin amah na tenpih ding lauthawng kei in. 21 Tapa khat a nei ding hi; tua tapa in ama mite a mawhna uh panin honkhia ding ahi manin a min Jesu na phuak in,” a ci hi. 22 Kamsangpa tungtawna Topa gensa a tangtun nadingin hihte khempeuh a piang ahi hi. 23 "Tua nungak bit gaii-in tapa khat nei dinga, ama min Immanuel kici ding hi” d a khiatna in, “Eite tawh Pasian om khawm” cihna ahi hi. 24 Joseph a khanlawh ciangin Topa vansawltak thupiak bangin manga, Mary a tenpih hi. 25 Ahi hangin tapa a suah matengin a luppih kei hi. A suah ciangin a min Jesu a phuak hi.

Mathai 2

1 Kumpi Herod uk hun laitakin Judea gam-a Bethlehem ah Jesu a suah khit ciangin nisuahna lam pan Jerusalem ah Mipiltea a tung uh hi. 2 Amaute in, “A suakkhinsab Jew-te kumpipa koi-ah om hiam? Nisuahna lamah ama aksi ka mu zo uh a, a bia dingin kong pai uh hi,” ci-in a dong uh hi. 3 Kumpi Herod in hih thu a zak ciangin a lungzing hi. Jerusalem a mi khempeuh in zong a lungzinpih uh hi. 4 Mipite’ siampi makaite khempeuh le thukham siate a kaihkhop khit ciangin, “Khristc suah nading koi lai ahi hiam?” ci-in a dong hi. 5 Amaute in, “Judea gam-a Bethlehem ah suak ding hi. Ahang in, kamsangpa in hih bangin na gelh khin hi: 6 "Judah gam-a om Bethlehem aw, ka mi Israel-te a cing dingin nang sung pan ukpa khat piang ding ahi manind Judah gam-ukte sungah nang a neupen na hi kei hi.” ci hi,” ci-in a dawng uh hi. 7 Tua ciangin Herod in Mipilte samsim a, aksi kilat hun lian amaute tung pan a theikhia hi. 8 Amaute Bethlehem ah sawlin, “Pai unla, tua naupang va limzon un. Kei zong pai-in amah ka biak theih nadingin na muh phetun hong ko pah un,” ci-in a vaikhak hi. 9 Amaute in kumpipa vaikhakna a zak khit uh ciangin a paikhia leuleu uh hi. Nisuahnae lama a muhsa uh aksi, naupang omna tung santakah a khawl mateng amau mai-ah a na paipai hi. 10 Amaute in aksi a muh uh ciangin a lungdam mahmah uh hi. 11 Tua inn a tun uh ciangin naungek le a nu Mary mu uh a, kunin a bia uh hi. A goute uh suahkhia-in letsong in kham, gimnamtui le paknamtui kha a pia uh hi. 12 Herod kiangah amaute a pai kik loh nadingun mang sunga kivauhilhsa bangin lamtuam tawnin a gamuah a ciah uh hi. 13 Amaute a ciah khit uh ciangin Joseph mang sungah Topa vansawltak khat a kilang hi. Amah in, “Tho inla naungek le a nu Egypt ah taipih in. Herod in naungek thah dingin zong ding ahi manin, kong hilh kik mateng tua lai-ah va om un,” a ci hi. 14 Tua ciangin amah tho-a azan azanin naungek le a nu paipih in Egypt ah a tai uh hi. 15 Herod sih khit dong tua gamah va om uh hi. Kamsangpa tungtawna Topa genna: “Egypt gam pan ka tapa ka samkhia hi.”f cih thu a tangtunna ahi hi. 16 Mipilte in amah a khem lam a theih ciangin Herod lungham a, Mipilte tung pana a theihsa hun tawh kituakin seh a, Bethlehem le akim apam khuate-a pasalno kum nih le a nuaisiah khempeuh thah dingin thu a pia hi. 17 Tua ciangin kamsangpa Jeremiah genkholhna: 18 "Ramah gamah nakpi-a dahna le, kahna awging kiza hi. Rachel in a tate a kahkah hangin khat beek om nawn lo a hi manin kihehnem zo lo hi,”g cih thu a tangtunna ahi hi. 19 Herod a sih khit ciangin Joseph mang sungah Topa vansawltak khat kilanga, 20 "Tho in, naupang thah sawmte si khin ta ahi manin naupang le a nu paipih inla Israel gamah pai ta un,” a ci hi. 21 Tua ciangin amah tho-a, naupang le a nu tawh Israel gamah a ciah uh hi. 22 Ahi hangin Archelaus in a pa Herod za luah in Judea gam uk hi, cih thu a zak ciangin tua gamah a pai ngam kei hi. A manga kivauhilhsa bangin Galilee gamah kihem a, 23 Nazareth kici khua-ah a va teng hi. Tua bangin: “Amah Nazareth mi kici ding hi,” ci-a kamsangpa tungtawna kigensa thu a tangtung hi.

Mathai 3

1 Tua hun lai-in Baptize-pa Johan va pai- a, 2 "Kisik un. Vantung gam hong nai ta hi,” ci-in Judea gama Gamlakah thu a hilh hi. 3 Kamsangpa Isaiah tungtawna kigen: “Gamlak a kikopa aw in, ‘Topa ading lampi na sialkhol un, ama lampite na tangsak un,’”a a cih in hih pa ahi hi. 4 Johan in kala-oh mul kigan puan silhin savun kawnggakin a kawng a gak hi. Kauphe le gamlak khuaizu anin a nei hi. 5 Jerusalem, Judea gam sung khempeuh le Jordan kual bup pana mite ama kiangah a pai uh hi. 6 Amaute in a mawhnate uh pulak uh a, amah in Jordan Gun ah a baptise hi. 7 A baptisena phual-ah Pharisee-te le Sadducee-te tampi a pai Johan in a muh ciangin, “No mualtan suante! Hong tung ding Pasian thangpaihna pana taikhia dingin kua in hong vauhilh ahi hiam? 8 Kisikna tawh kilawm gah na gah un. 9 ‘Abraham ka pa uh hi’ a ci thei dingin kingaihsun kei un. Pasian in hih suangte Abraham tate suaksak thei hi, cih kong hilh hi. 10 Sing phungah hei om khin ta hi. Gah hoih a gah lo kung peuhmah kiphukin meikhuk ah kikhul ding hi. 11 "Na kisikna hangun tui-inb kong baptize hi. Ahi hangin kei nunga hong pai ding pa, kei sangin a vanglianzaw hi; ama khedap tawi ding nangawnin ka kilawm kei hi. Amah in note Khasiangtho le mei-in hong baptize ding hi. 12 Amah in buhhah-ciangka tawi-in, ama buh phual hahsiang dinga, atak teng a sal sungah koihin, asi teng a mit ngei lo mei sungah a khul ding hi,” ci-in a hilh hi. 13 Tua hunin Johan kibaptisesak dingin Galilee pan Jordan ah Jesu va pai hi. 14 Ahi hangin Johan in, “Nang kei nong baptise ding hizaw napi, nang hong kibaptisesak dingin kei hong zuan zawsop na hi hiam?” ci-in a kho hi. 15 Jesu in, “Ahi ding bang hisak in; thumaan khempeuh i tangtunsak ding kilawm hi,” ci-in a dawng hi. Tua ciangin Johan in a mang hi. 16 Jesu a kibaptise phetin tuilak pan a paito hi. Tua hun lianin van kihong a, vakhu bangin Pasian Kha kum sukin, ama tunga khawl a mu hi. 17 Tua laitakin, “Hih in ka it ka Tapa ahi hi. Ama tungah ka lung a kim mahmah hi,” ci-in vantung pan aw khat a ging hi.

Mathai 4

1 Tua ciangin dawimangpa zia-etna thuak dingin Kha in Jesu gamlakah a pi hi. 2 Sun sawmli le zan sawmli an a tan khit ciangin a gil kial hi. 3 Tua zia-etpa a kiangah va pai-a, “Nang Pasian Tapa na hileh hih suangte anlum suaksak in,” a ci hi. 4 Jesu in, “Mite anlum bek tawh nungta hi loin Pasian kam sung pana pusuak thu khempeuh tawh a nungta hizaw hi,’a ci-in kigelhhi,” ci-in a dawng hi. 5 Tua ciangin dawimangpa in amah khuapi siangtho ah paipih-a, biakinnpi khum a sang penna ah a dingsak hi. 6 Dawimangpa in, “Nang Pasian Tapa na hileh tuaksuk dih in. Ahang in: ‘Amah in nang hangin ama vansawltakte thu pia dinga, na khepekte suang tawh a kisukkhak loh nadingin a khut uh tawh hong domto ding uh hi,’b ci-in kigelh hi,” a ci hi. 7 Jesu in, “‘Na Topa Pasian na zia-et kei in,’c ci-in zong kigelh hi,” ci-in a dawng hi. 8 Tua khit ciangin dawimangpa in amah mual sangpi dawnah paipih leuleu a, leitunga om kumpi-gam khempeuh le a thupinate a lak hi. 9 Amah in, “Kunin kei nong biak leh hihte khempeuh nang kong pia ding hi,” a ci hi. 10 Jesu in, “Satan, paikhiamang in! ‘Na Topa Pasian bia inla, ama na bek sem in,’d ci-in kigelh hi,” a cih san hi. 11 Tua ciangin dawimangpa in amah paisan a, vansawltakte hong pai-in Jesu a don uh hi. 12 Jesu in Johan thongkiatna thu a zak ciangin Galilee ah a ciah kik hi. 13 Nazareth nusia in Zebulun le Naphtali gamhuam tuilipi gei khata om Capernaum ah pai-in a teng hi. 14 Hih in kamsang pa Isaiah tungtawna kigenkholsa: 15 "Zebulun gam le Naphtali gam, Jordan gun dunga tuipi zuatna lampi, Gentile-te tenna Galilee ah, 16 khuamial sunga teng mite in, khuavak lianpi a mu zo uh hi; sihna liim gam sunga teng mite tungah khuavak tang khin ta hi.”e cih thu a tangtun nading ahi hi. 17 Tua huna kipanin Jesu in, “Vantung gam hong nai zo ahi manin kisik un,” ci-in thuhilh a kipan hi. 18 Galilee Tuipi gei-a Jesu a pai laitakin Peter kici Simon le a nau Andrew-te unau a mu hi. Amaute nga bengte ahi manun tuilipi sungah len a khuh laitak uh ahi hi. 19 Jesu in, “Hong pai unla kei hong zui un. Mihing mante kong suaksak ding hi,” a ci hi. 20 Amau zong a lente uh nusia in amah a zuipah uh hi. 21 Tua pan a paikhiat ciangin unau dang nih, Zebedee tapa, James le a sang gampa John-te a mu hi. Amaute in a pa uh Zebedee tawh len puahin gunkuang sungah a om uh hi. Jesu in amaute a sam hi. 22 Amaute in zong gunkuang le a pa uh nusia pah uh a amah a zui uh hi. 23 Galilee gam sung tengah Jesu pai kawikawi a, synagogue-te ah thu hilhin, vantung gam lungdamna thuthak hilh-a, cina luna khempeuh a damsak hi. 24 Syria gam sung tengah ama thu a kizel hi. Natna tuamtuam a veite, a na valvalte, dawilutte, sibup natna veite le pumzawte khempeuh Jesu kiangah paipih uh a, amah in a damsak hi. 25 Galilee gam, Decapolisf, Jerusalem, Judea le Jordan gungal gama mihonte in amah a zui uh hi.

Mathai 5

1 Jesu in mihonte a muh ciangin mualpangah paito-in a tu hi. Nungzuite ama kiangah va pai uh a, 2 amaute thu hilh ding kipanin: 3 "Kha-a gentheite thupha ngah ahi hi, ahang in, vangtung gam amau aa ahi hi. 4 A dahte thupha ngah ahi hi, ahang in, amaute a kihehnem ding hi. 5 Lungnemte thupha ngah ahi hi, ahang in, amaute in leitung a luah ding uh hi. 6 Thumaanna hanga gilkial dangtakte thupha ngah ahi hi, ahang in, amaute kitaiisak ding hi. 7 Mi lainat siamte thupha ngah ahi hi, ahang in, amaute lainatna kingahsak ding hi. 8 Lungsim siangthote thupha ngah ahi hi, ahang in, amaute in Pasian a mu ding uh hi. 9 Kilemna a bawlte thupha ngah ahi hi, ahang in, amaute Pasian tate kici ding hi. 10 Thumaanna hanga kibawlsiate thupha ngah ahi hi, ahang in, vantung kumpi-gam amau aa ahi hi." 11 "Keima hangin engkona, bawlsiatna le zuauthu tawh gitlohna nam khempeuh a hong kingawh ciangin thupha ngah na hi uh hi. 12 Note ma-a kamsangte zong tua mah bangin bawlsia uh ahi manin lungdamin kipak un, bang hang hiam cih leh vantung ah no ading pahtakman a lian hi. 13 "Note leitung ci na hi uh hi. Ahi hangin ci a alna mang leh bangci ki-alkiksak thei ding ahi hiam? Buakhia a mite tuatcil ding longal a hoihna om lo hi: 14 "Note leitung khuavak na hi uh hi. Mualtunga om khuapi a kiliah thei kei hi. 15 Mite in meivak a vak uh ciangin kuang a khuh kei uh hi. A khuh sangsikin inn sunga omte khempeuh in khua a muh theih nadingin meivak tunna tungah kikoih zaw hi. 16 Tua mah bangin mite in na gamtatna hoihte uh a muh ciangin vantunga om na Pa uh a phat nadingun na khuavak uh mite mai-ah na tangsak un. 17 "Thukham ahi zongin, Kamsangte thu ahi zongin a beisak dinga hong pai hi, ci-in hong ngaihsun kei un; tuate a beisak dinga hong pai hi loin, a tang tungsak dinga hong pai ka hizaw hi. 18 Thutak kong geninah, van le lei a manthan masiah Thukham khempeuh a tangtun kim khit mateng, laimal neupen ahi-a sutvom ciau khat ahi zongin a mangthang kei ding hi. 19 Hih thupiakte lak pan a neu pen palsatin, tua banga palsat ding midangte a hilh peuhpeuh vantung gamah a neu pen kici ding hi. Ahi hangin hih thupiakte zui-a, midangte a hilh peuhpeuh vantung gamah alian kici ding hi. 20 Ken kong geninah, note thumaanna in Pharisee-te le thukham siate aa a khup zawh kei leh vantung gamah na lut peuhmah kei ding uh hi. 21 "Tanglai mite kiangah, ‘Tual that kei in;a tual that peuhmah in thukhenna a thuak ding hi,’ a kici thu na zaksa uh ahi hi. 22 Ahi hangin ken kong geninah, a sanggamb tunga a hehte peuhmah in thukhenna a thuak ding hi. Tua banah a sanggamte tunga, ‘Raca,c ’ a ci peuhmah in Sanhedrin-te thusitna a thuak ding hi. Ahi hangin, ‘Nang mihai!’ a ci peuhmah in hell meipi a thuak ding lauhuai hi. 23 "Tua ahi ciangin biaknatau ah biakna na piak laitakin na sanggam pa in na tungah lungkimlohna nei hi, ci-a na phawk leh, 24 biaknatau mai-ah na piak nate nusia phot in. Pai inla na sanggampa tawh va kilem phot in; tua khit ciangin pai-in na biakna pia pan in. 25 "Thukhenna mun hong tun na lawmpa tawh kilem mengmeng in. Na paikhawm laitak un kilem zawh nading hanciam in. Tua hi kei leh thukhenpa tungah hong pia dinga, thukhenpa in bupa khut sungah hong pia-in thong sung hong kidenna kha ding hi. 26 Thutak kong geninah, na liausumd na piak khit kiuhkeuh mateng na suakta kei ding hi. 27 "‘Ang kawm kei in,’e a kici thu na zaksa uh ahi hi. 28 Ahi hangin ken kong geninah, mi khatpeuh in lunggulhluatna tawh numei khatpeuh a et leh ama lungtang sungah amah tawh angkawm khin ahi hi. 29 Na taklam mittang in hong khialhsak leh khelkhia inla paimang in. Na pumpi kimin hell sunga hong kipaih sangin na pumpi na khat a hem ding nang adingin hoihzaw hi. 30 Na taklam khut in hong khialhsak leh sattan inla paimang in. Na pumpi kimin hell sungah na lut angin na pumpi hiang khat a hem ding, nang adingin hoihzaw hi. 31 "‘Zi ma peuhmah in makna lai pia ta hen,’f a kici thu a omsa ahi hi. 32 Ahi hangin ken kong geninah, ang kikawmsanna hang longal, a zi a ma peuhmah in a zi angkawmsak a suak hi. A kimasa numei a tenpih peuhmah angkawm a suak hi. Lk 16:18 33 "Tua ciang leuleu-in tanglai mite kiangah, ‘Ciampel kei in; Topa tawh na kiciamnate tangtun in,’ a kici thu na zaksa uh ahi hi. 34 Ahi hangin ken kong geninah, tomlo peuhmah kei un: vantung, Pasian tokhom ahi manin tomlawhna-in zang kei un; 35 leitung, Pasian khengakna ahi manin tomlawhna-in zang kei un; Jerusalem, Kumpi Lianpa khuapi a hi manin tomlawhna-in zang kei un. 36 Na samzang khat nangawn vomsak, kangsak thei lo na hi manin na lutang zong tomlawhna-in zang kei un. 37 A hite, ‘Himah,’ a hilote, ‘Hikei,’ ci lel un. Tua bansiah peuhmah gilopa kiang pana hong pai ahi hi. 38 "‘Mittang tangin mittang, ha tangin ha,’g a kici thu na zaksa uh ahi hi. 39 Ahi hangin ken kong geninah, migilopa na nang kei un. Na pang taklam hong bet leh alang lam zong na dawh in. 40 Na puan-ak hong deihgawh mana thusia hong zongte, na puantualpi zong na piakbeh in. 41 Zawhthawh thu-a tai khat hong paipihte, tai nih dong na zui in. 42 Hong ngente na pia inla, hong leitawite nungngat san kei in. 43 "‘Na vengteh it inla, na galte mudah in,’ a kici thu na zaksa uh ahi hi. 44 Ahi hangin ken kong geninah, na galtei na it un; hong bawlsiate ading thu na ngetsak un. 45 Tua hileh vantunga na Pa uh tate na suak thei ding uh hi. Amah in miphate le misiate tungah ni tangsak a, thumaante le thumaan lote tungah guah a zusak hi. 46 Hong itte bek na it uh leh bang pahtakman ngah ding na hi uh hiam? Siahdongte nangawn in tua bangin hih uh hi lo ahi hiam? 47 Na sanggamte bek uh na muak uh leh midangte sangin a hoihzaw na bawl uh bang om ding ahi hiam? Lawkite nangawn in tua bangin hih uh hi lo ahi hiam? 48 Tua ahi ciangin vantunga om na Pa uh a hoihkim bangin note zong na hoihkim un.

Mathai 6

1 “Note in thumaanna nasepte na sep uh ciangin mihing muh ding utna tawh mite mai-ah sem kei un. Tua bangin na sep uh leh vantunga om na Pa uh tung pan pahtakman na ngah kei ding uh hi. 2 "Tua ahi ciangin a tasamte na piak uh ciangin kineihsiamte in mite pahtawi ding a ut manun synagogue-te sung le lamdungah pengkul mutin, a tangko uh bangin na hih kei un. Thutak kong geninah, amaute in pahtakman a cingin a ngah zo uh hi. 3 Ahi hangin note in a kitasamte na piak uh ciangin na taklam khut hihna, na veilam khut theisak kei un. 4 Tua ciangin a sima kihihte a mu na Pa un note pahtakman hong pia ding hi. 5 "Note in thu na nget uh ciangin kineihsiamte bangin na hih kei un. Amaute in mite muh theihtheih dingin synagogue-te sung le lamkabom khawngah dinsa in a ngen nuam se uh hi. Thutak kong geninah, amaute in pahtakman a cingin a ngah zo uh hi. 6 Note in thu na nget uh ciangin na inndei sunguah pai unla, kong khakin a kimu thei lo na Pa uh kiangah na ngen un. Tua ciangin a sima kihihte a mu na Pa un note pahtakman hong pia ding hi. 7 Note in thu na nget uh ciangin kammal tampi kizang leh kingah diak ding ci-a a ngaihsun lawkite bangin na guitam kei un. 8 Na Pa un na nget ma un na kisapnate uh thei ahi manin, amaute bangin na hi kei un. 9 Note in hih bangin thu na ngen un: “‘Vantunga om kote Pa aw, nangma min kisiangthosak ta hen; 10 na gam hong tung ta hen, vantungah na deihna a kihih bangin, leitung ah zong kihih ta hen. 11 Ka nisim an uh tu ni-in ko hong pia in. 12 Ko tunga hong bate ka maisak uh bangin, kote leibate hong maisak ta in. 13 Zia-etna sungah hong pi kenla, gilopa panin hong hukhia in.’a ci un. 14 Ahang in, no tunga hong mawhte na maisak uh leh vantunga om na Pa un no zong hong maisak ding hi. 15 Ahi hangin mite mawhna na maisak kei uh leh note mawhnate na Pa un hong maisak lo ding hi. 16 "Note in an na tan uh ciangin, an a tan lam uh mite a lah nop manun a maitang uh a kilamdangsak kineihsiamte bangin na mai uh mualsak kei un. Thutak kong geninah, amaute in pahtakman a cingin ngah zo uh hi. 17 Ahi hangin note in an na tan uh ciangin na sam uh sathau nilh unla na mai uh phiat un. 18 Tua hileh an na tan lam uh mi mai-ah kilang lo dinga, a kimu lo na Pa uh maitang bekah kilang ding hi. Tua ciangin a sima kihihte a mu na Pa un note pahtakman hong pia ding hi. 19 "Nget le kekseu in a siatsak theihna le gutate in luh a, a guk theihna mun hih leitungah na goute uh khol kei un. 20 Nget le kekseu in a siatsak theih lohna le gutate in luh a, a guk theih lohna mun vantungah na goute uh khol un. 21 Ahang in, na goute uh omna munah na lungsim uh zong om ding hi. 22 "Mittang in pumpi meivak ahi hi. Na mit a hoih leh na pumpi tung khempeuh a vak ding hi. 23 Ahi hangin na mit a siat leh na pumpi tung khempeuh a mial ding hi. No sunga om khuavak, khuamial ahileh bangzah in a mial tazen tam! 24 "Kuamah in tonih na semkhawm thei lo hi. Khat itin khat a mudah hiam, khat belin a khat a simmawh hiam, khat zawsang hi ding hi. Note in Pasian nasep le sum nasep na thuahkhawm thei kei ding uh hi. 25 "Hong hilh tektek ka hi, na nuntak nading, na nek na dawn ding ahi zongin na pumpi uh ading, na silh na ten ding uh bangmah lunghimawh kei un. An sangin nuntakna thupizaw hi lo ahi hiam? Puansilh sangin pumpi thupizaw hi lo ahi hiam? 26 Huih laka leng vasate en dih un; tuate in vawh lah vawh lo, at lah at lo, ansal ah zong khol lo napi vantunga om na Pa un tuate a vak hi. Vasate sangin note manphazaw tham hi lo na hi uh hiam? 27 A lunghimawh manin a nuntak hun nai khat sung bek a sotto thei note lakah kua om ahi hiam?b 28 "Bang hangin na silh na ten ding uh lunghimawh na hi uh hiam? Gamlak a unok kungte ngaihsun dih un. Na sem loin khau lah a khek kei uh hi. 29 Ahi hangin Solomon nangawn a thupina na khempeuh tawh a kizep laitakin hih unok pak khat zahin zong a kizem zo kei hi, cih kong gen hi. 30 Upna neu mite aw, tu ni-in hih lai-ah om a, zing ciangin mei-a kikhul ding gamlak lopa kung khat Pasian in tua zahin zem ahileh note, puan hong silhsak zawtham lo ding ahi hiam? 31 Tua ahi ciangin, ‘Bang i ne tam? Bang i dawn tam? Bang i silh tam?’ ci-in lunghimawh kei un. 32 Lawkite in hih nate khempeuh nakpi in a zong uh hi. Hih nate na kisap lam uh vantunga om na Pa un a thei hi. 33 Ahi hangin Pasian kumpigam le ama thumaanna zong masa un. Tua hileh hih nate khempeuh hong piathuah ding hi. 34 Tua ahi manin zingciang ading lung himawh kei un; zingciang, amah le amah kilunghimawh na ding hi. Ni khat in ama buaina khop nei ciat hi.

Mathai 7

1 “Midangte tungah thu khen kei un. Na khen uh leh no tungah zong thu hong kikhen ding hi. 2 Midangte tunga na khen bangun no tungah zong hong kikhen dinga, no zat tehna mah tawh no aa zong hong kitehsak ding hi. 3 "Nang mittanga singpek ngaihsun loin bang hanga na sanggampa mita singatvui them en na hi hiam? 4 Nang mittang ah singpek om napi na sanggampa kiangah, ‘Na mit-a ninthem hong lakkhiatsak ning,’ bangci cih thei na hi hiam? 5 Kineihsiampa aw, nang mit-a singpek lakhia masa in, tua hileh na sanggampa mit-a na lakkhiat ding ninthem na telmuh pan ding hi. 6 "A siangtho nate ui pia kei un. Vok mai-ah na kep manphate uh pai kei un. Tua banga na hih uh leh a tuatcil gawp khit uh ciangin kihei-in note hong balnen ding uh hi. 7 "Ngen un hong kipia ding hi; zong un na mu ding uh hi; kiu un kongkhak hong kihon ding hi. 8 Ahang in, a ngen khempeuh in a ngah uh hi; a zongte in a mu hi; a kiute ading kongkhak kihon ding hi. 9 Note lakah a tapa in anlum a nget ciangin suang a pia ding kua om ahi hiam? 10 Ahikeh ngasa a nget ciangin gul a pia ding kua om ahi hiam? 11 Tua ahileh note migilo hi napi, na tate uh na hoih piak ding thei na hi uh leh vantunga om na Pa un a ngente na hoih pia nuam zawtham lo ding ahi hiam! 12 Na khempeuh ah no tunga hong kibawl ding na deih bangun midangte tungah bawl un. Hih in Thukham le kamsangte thu khempeuh huam khin hi. 13 "Kong kawcik ah lut un. Ahang in, siatna a tun kongpi tanzau-in lampi zai-a mi tampi a lut hi. 14 Ahi hangin nuntakna a tun kongpi neu a, lampi kawcik in mi tawmcik bek a lut hi. 15 "Kamsang zuaute hangin na kigalging un. Amaute tuuvun silhin note kiangah hong pai uh hi; ahi hangin amaute sunglam, ngia hangsan ahi hi. 16 Amaute a gah un na khentel thei ding uh hi. Lingkung panin lenggah kilo ngei ahi hiam? Thangling kung panin theigah kilo ngei ahi hiam? 17 Tua mah bangin kung hoih in gah hoih gah a, kung hoih lo in gah hoih lo a gah hi. 18 A kung hoih in gah hoih lo gah thei lo a, tua mah bangin a kung hoih lo in gah hoih gah thei lo hi. 19 Gah hoih a gah lo singkung peuhmah kiphukin meikhukah kikhul hi. 20 Tua bangin amaute a gah panun na khentel thei ding uh hi. 21 ‘Topa, Topa’ hong ci khempeuh vantung gamah a lut kim kei ding hi. Ahi hangin vantunga om ka Pa deihna banga gamtate bek a lut ding hi. 22 Tua ni ciangin mi tampi in ka kiangah, ‘Topa, Topa, nangma minin thu hilh hi lo ka hi uh hiam; nangma minin dawite hawlkhia in, nalamdang tampi bawl hi lo ka hi uh hiam?’ hong ci ding uh hi. 23 Tua ciangin, ‘Note kong thei ngei kei hi. Gitlohna a bawlte aw, kei kiang pan taikhia un!’ teltakin ka ci ding hi. 24 "Tua hi-a hih ka thute za-a, a zuipahte peuhmah suangpi tunga inn lam mipilpa tawh kibang hi. 25 Guah zu in tui khang a, huih nungin tua inn a nawk hi. Ahi zongin suangpi tunga bulkip nei ahi manin tua inn a puk kei hi. 26 Ka thute za napi, a zuipah lote sehnel tunga inn lam mihaipa tawh kibang hi. 27 Guah zu-a tui khangin, huih nunga tua inn a nawk ciangin pukgawp hi,” a ci hi. 28 Hih thu teng a gen khit ciangin mihonte in Jesu thuhilhnate lamdang a sa uh hi. 29 Bang hang hiam cih leh amah in thukham siate bang hi loin thuneipa khat bangin a hilh hi.

Mathai 8

1 Mualpang pan Jesu a paisuk ciangin mihon tampi in amah zui uh hi. 2 Miphaka khat va pai-a a mai-ah khukdinin, “Topa aw, ut peuh lecin nong siangsak thei hi,” a ci hi. 3 Jesu in a khut zanin tuapa lawnga, “Ka ut hi. Siang ta in!” a ci hi. Thakhatin a phak natna a damb pah hi. 4 Tua ciangin Jesu in ama kiangah, “Kuama kiangah gen kei in. Ahi hangin pai-in siampipa kiangah va kilak inla amaute tunga teci panna-in Moses thupiak bangin biakna na pia in,” a ci hi. 5 Capernaum ah Jesu a lut ciangin ama kiangah zakhat-uk bupa va pai-in huhna a ngen hi. 6 "Topa aw, ka nasempa pumzawtin lumcip-a, a gim mahmah hi,” a ci hi. 7 Jesu in, “Hong pai-in ka damsak ding hi,” a ci hi. 8 Zakhat-ukpa in, “Topa aw, ka inn sungah nang kong lutsak ding kilawm lo hi. Kammal khat gen ziau lecin ka nasempa dam ding hi. 9 Kei mahmah zong thuneihna nuai-a om mi ka hi-a, keima nuai-ah galkapte a om hi. Khat kiangah, ‘Pai in,’ ka cihleh pai-a, adang khat kiangah, ‘Hong pai in,’ ka cihleh hong pai hi. Ka nasempa kiangah, ‘Hih sem in,’ ka cih ciangin a sem hi,” a ci hi. 10 Jesu in hih thu a zak ciangin lamdang sa a, amah a zuite kiangah, “Thutak kong geninah, Israel-te lakah hih zah-a lian upna a nei khat beek ka mu nai kei hi. 11 Ken kong cihinah, ni suahna le nitumna pan mi tampi hong pai-in vantung gam pawipi-ah Abraham, Isaac le Jacob-te tawh a tukhawm ding uh hi. 12 Ahi hangin kumpi-gam mite ahi uh leh kahna le hagawina a omna mun khuamial lakah kipaii ding hi,” a ci hi. 13 Tua ciangin Jesu in zakhat-ukpa kiangah, “Pai in. A piang dinga na up bangin piang ding hi,” a ci hi. Tua hun lianin a nasempa a dam hi. 14 Peter inn sungah Jesu a lut ciangin Peter sungnu nattuna lupna-a lum a mu hi. 15 Jesu in a khut lawnsaka, nattun a dam hi. Amah tho in zin a do hi. 16 Nitak lam ciangin dawilut mi tampite ama kiangah paipih uh a, kammal khat tawh dawite hawlkhia in cina khempeuh a damsak hi. 17 Hih in kamsangpa Isaiah tunga genkholhna: “I zawngkhalnate amah in la-a, i natnate a pua hi,”c cih thu a tangtunna ahi hi. 18 Jesu in a kima mihonpite a muh ciangin tuili galkhat lama pai dingin thu a pia hi. 19 Tua laitakin thukham siapa khat va pai-a, “Sia aw, na paina peuhpeuh ah kong zui ding hi,” a ci hi. 20 Jesu in, “Ngiate in kua nei a, huihlak vasate in bu nei uh hi. Ahi hangin Mihing Tapa in a lutang ngak nading mun a nei kei hi,” ci-in a dawng hi. 21 Nungzui dang khat in, “Topa aw, va ciahin ka pa va vui masa phot leng,” a ci hi. 22 Ahi hangin Jesu in, “Ka nung hong zui in, misite in amau misite na vui uh hen,” ci-in a gen hi. 23 Tua ciangin amah gunkuang sungah tuanga, a nungzuite in a zui uh hi. 24 Theih kholh lohin tui tungah huihpi nasiatakin kinuai a, tuihualte in gunkuang a zialnelh hi. Ahi hangin Jesu a ihmu lai hi. 25 Nungzuite pai-in, “Topa, hong honkhia in! Tui ka kia petmah uh hi!” ci-in a phong uh hi. 26 Amah in, “No upna neute aw, bang dinga tua zah a lau lawmlawm na hi uh hiam?” ci-in a dawng hi. Tua ciangin amah tho a huih le tuihualte a tai ciangin a daipah dikdek hi. 27 Tua mite in lamdang sa mahmah uh a, “Hih pa bangci mi hiam? Huih le tuihual nangawn in a thu a mang tazen a!” a kici uh hi. 28 A galkhat lam Gadarenesd kualah Jesu a tun ciangin hanlak, panin dawilut mi nih paikhia-in na dawntuah uh hi. Amaute ngongtat lua uh ahi manin tua lai tawn ngam kuamah a om kei hi. 29 Amaute in, “Pasian Tapa aw, ko bang cih hong sawm na hi hiam? A kisehsa hun a tun ma-in kote bawlsia dinga hih lai-a hong pai na hi hiam?” ci-in a kiko uh hi. 30 Tua pan a gamla simah vok honpi khat a gamta hi. 31 Dawite in Jesu kiangah, “Ko nong hawlkhiat leh vokte sungah hong lutsak tapeuh in,” ci-in a ngen uh hi. 32 Jesu in amaute kiangah, “Pai un!” a ci hi. Tua ciangin amaute pusuak in vokte sungah a lut uh hi. Vok honte kensang pan tuili sungah tuaksukin a si khin uh hi. 33 Vok cingte khuapi sungah tai uh a, dawilutte gel tunga thupiang le hih thu teng a ko uh hi. 34 Tua ciangin Jesu dawn dingin khuazangpi in a kuankhia uh hi. Amah a muh uh ciangin amaute in tua kual a nusiat nadingin a thum uh hi.

Mathai 9

1 Gunkuang tungah Jesu tuanga galkahin ama khua a tung hi. 2 Mi pawlkhat in pumzaw khat zawngin ama kiangah va paipih uh a, phek tungah a sial uh hi. Jesu in amau upna a muh ciangin pumzawpa kiangah, “Ka tapa aw, lungkhauh in; na mawhnate kimaisak zo hi,” a ci hi. 4:13; Jn 16:33 3 Hih thu ah, thukham siate pawlkhat in, “Hih pa in Pasian a gendai hi,” a ci uh hi. 4 Jesu in amau ngaihsutna thei ahi ciangin, “Bang hangin na lungsim uhah thusia ngaihsun na hi uh hiam? 5 ‘Na mawhnate kimaisak zo hi,’ cih ding baihzaw ahi hiam? ‘Tho inla pai in,’ cih ding baihzaw ahi hiam? 6 Ahi hangin Mihing Tapa in hih leitungah mawhnate maisak theihna thu nei hi, cih na theih nadingun....” a cih khit ciangin pumzawpa kiangah, “Tho in, na phek la inla ciah in,” a ci hi. 7 Tua ciangin cinapa thoin a innah a ciah hi. 8 Mihonpite in hih thu a muh uh ciangin lamdang a sa mahmah uh a, hih bang thuneihna mihingte tunga a pia Pasian a phat uh hi. 9 Tua lai pan Jesu pai lai-a siahdonna bukno-a tu Matthew kici mi khat a mu hi. Ama kiangah, “Kei hong zui in,” a cih ciangin Matthew dingto in a zui hi. 10 Matthew innah Jesu in nitak-an a nek laitakin siahdongte tampitak le mawhneite tampi va pai uh a, Jesu le nungzuite tawh ankuang a um khawm uh hi. 11 Pharisee-te in hih a muh ciangin, “Na siapa un bang hangin siahdongte le mawhneite tawh ankuang umkhawm ahi hiam?” ci-in a nungzuite a dong uh hi. 12 Jesu in hih thu a zak ciangin, “Siavuan kisam cidamte hi loin cinate hizaw hi. 13 Pai unla,a Kei lunggulh biakpiakna hi loin lainatna hizaw hi,’ a kici bang gennopna hiam, va sin un. Ahang in, mi thumaante sam dinga hong pai hi loin mawhneite sam dinga hong pai ka hi hi,” a ci hi. 14 Tua ciangin Johan nungzuite va pai uh a, “Ko le Pharisee-te in an ka tang uh hi, bang hangin na nungzuite in tang lo uh hiam?” ci-in a dong uh hi. 15 Jesu in, “Zineipa tawh a omkhawm kimlai bangci in mopawi simte dah thei ding uh ahi hiam? Zineipa amau kiang pan a kilakkhiat hun hong tung ding hi. Tua ciangin amaute in an a tang ding uh hi. 16 "Kuamah in puanthakin puanlui a thuap ngei kei hi. Puanthakin puanlui kithuap leh puanlui kaikekin a kek beh zaw ding hi. 17 Kuamah in savun-um lui sungah lenggahzu thak thun ngei lo hi. Tua bangin kithun leh savun-um kitamin lenggahzu bua dinga savun-um a kisia ding hi. Savun-um thak sungah lenggahzu thak a kithun ciangin a nihin sia lo a, kikembit thei hi,” ci-in a dawng hi. 18 Hih thu a gen laitakin ukpa khat va pai-a amai-ah khukdinin, “Ka tanu tu mahmah in si hi. Ahi hangin hong pai-in ama tungah na khut nga lecin hing ding hi,” a ci hi. 19 Jesu dingto-in amah a zui hi. A nungzuite in zong a zui uh hi. 20 Tua laitakin kum sawm le nih hul siluang natna a vei numei khat Jesu nunglamah pai-a, a puantualpi mongtep a lawng hi. 21 Amah in, “A puantualpi lawngkha peuh leng ka dam ding hi,” a kici hi. 22 Jesu kihei-in tuanu a mu hi. Jesu in, “Ka tanu aw, lungkhauh in. Na upna in nang hong damsak zo hi,” a ci hi. Tua hun lianin tua numei a dampah hi. 23 Ukpa innah Jesu a tun ciangin tamngai mutte le mipi gamlum a mu hi. 24 Amaute kiangah, “Na kihemkhia dih un. Numeino a si hi lo hi; a ihmu ahi hi,” a ci hi. Ahi hangin amaute in amah a nuihsan uh hi. 25 Mihonpite a kipusuahsak khit ciangin Jesu tuma numeino khut a let leh numeino a thoto hi. 26 Hih thu tua kual tengah a kizel hi. 27 Tua panin Jesu a paikhiat ciangin mittaw nih in ama nung zui a, “David Tapa aw, kote hong lainat in!” ci-in a galsap uh hi. 28 Amah inn sungah a lut khit ciangin tua mittawte gel a kiangah va pai uh hi. Amah in, “Hih bang hih thei dingin nong um uh hiam?” ci-in amaute a dong hi. Amaute in, “Kong um uh hi, Topa aw,” ci-in a dawng uh hi. 29 Tua ciangin amaute mit lawnsak a, “Na up uh bangin note tungah kihih ta hen,” a ci hi. 30 Tua ciangin khua a mu thei uh hi. Jesu in amaute kiangah, “Hih thu kuamah theisak kei un,” ci-in khauhtakin a kham hi. 31 Ahi hangin tua kual bupah amaute paikhia in hih thu a thehzak uh hi. 32 Amaute a paikhiat laitakun, dawilut-a, a pau thei lo mi khat Jesu kiangah a paipih uh hi. 33 Dawi a kihawlkhiat khit ciangin tua a pau thei lo pa a pau thei hi. Mihonpite in lamdang sa uh a, “Israel gamah hih bang thu a kimu ngei nai kei hi,” a ci uh hi. 34 Ahi hangin Pharisee-te in, “Dawite kumpitapa suangin dawite a hawlkhia hi,” a ci uh hi. 35 Khuapi le khuaneu khempeuh ah Jesu pai kawikawi a, amaute synagogue-te ah vantung gam tawh kisai lungdamna thu hilhin natna satna namkim a damsak hi. 36 Amah in mihonpite a muh ciangin a cing om lo tuute bangin cimawh le lungnuam loin om uh ahi manin amaute a khuatuah hi. 37 Tua ciangin a nungzuite kiangah, “An lak ding tampi om a, ahi hangin nasem ding mi tawm hi. 38 Tua ahi ciangin lo sungah an la ding mi tampi hong sawl nadingin an la Topa kiangah ngen un,” a ci hi.

Mathai 10

1 Amah in a nungzui sawm le nihte samin kha gilotea a hawlkhiat theih nading uh le natna satna namkim a damsak theih nadingun thuneihna a pia hi. 2 Hihte, sawltakpi sawm-le-nihte min ahi hi: Amasa penin Simon (Peter kici) le a sanggampa Andrew; Zebedee tapa James le a saggampa John; 3 Philip le Bartholomew; Thomas le siah dong Matthew; Alphaeus tapa James le Thaddaeus; 4 Zealot pawl-a Simon le Jesu lehhekpa Judas Iscariot-te ahi hi. 5 Jesu in sawm-le-nihte thu hilhin hih bangin a sawlkhia hi: “Gentile-te lakah pai kei unla Samaria-te khua ah zong lut kei un. 6 Israel tuu mangthangte lak bekah pai un. 7 Na pai kawmun, ‘Vantung gam hong nai ta hi,’ cih thupuak va hilh un. 8 Cinate damsak unla misite thosak un. Miphakteb siangsak unla, dawite hawlkhia un. Man nei lo-a na ngah bangun man nei loin na pia un. 9 Na kawnggak sung uhah kham, ngun le sumsante khat beek vom kei un. 10 Na khualzinna uhah thung-ip ahi zongin puantungsilh val ahi zongin khedap le ciangkhutte keng kei un. Ahang in, nasemte in a nekkhop ding uh ngah na ding uh hi. 11 Khuapi ahikeh khuaneu khat peuh peuhah na lut uh ciangin zintun nadinga kilawm mi zong unla, na ciah mateng uh tuapa innah om un. 12 Tua innah na lut uh ciangin hopih masa un. 13 Tua innah nopna a tung dinga kilawm ahileh na piak uh nopna om ta hen; a kilawm lo ahileh na piak uh nopna no tungah hong kileh kik ta hen. 14 Note hong sang lo, na thu uh a ngai nuam lo khua le innte na nusiat uh ciangin na khepek-ua leivuite na singkhia un. 15 Thutak kong geninah, thukhen ni ciangin tua khua thuak nading sangin Sodom le Gomorrah thuakna a zangzaw ding hi. 16 "Ngiate lakah tuute bangin note kong sawlkhia hi. Tua ahi ciangin gul bangin na pilvang unla, vakhu bangin na cinghkam un. 17 Ahi hangin mite lakah na kigalging un; amaute in tualsung vaihawmte khutah note hong puak ding uh a, amaute synagogue-te sungah note hong sat ding uh hi. 18 Keima hangin gam-ukte le kumpite mai-ah hong puak ding uh a, tuate tung le Gentile-te tungah ka teci na hi ding uh hi. 19 Ahi hangin note hong mat uh ciangin bang ka gen ding hiam, bang ka ci gen ding hiam, ci-in lunghimawh kei un. Tua hun ciangin na gen ding uh hong kihilh ding hi. 20 Ahang in, no a gen hi loin no tungtawnin na Pa uh’ Kha in a gen ding hi. 21 "Sungkhat suak unau khat le khat ahi zongin, pata ahi zongin, sih nading dongin a kilehhek ding uh hi. Nu le pa-te langah tate pang ding uh a, thatsak ding uh hi. 22 Keima hangin mi khempeuh in note hong mudah ding uh hi. Ahi hangin a tawp donga kipte kihonkhia ding hi. 23 Mun khatah bawlsiatna na thuak uh leh a mundang khatah na tai un. Thutak kong geninah, Mihing Tapa hong pai ma-in Israel gam khuapite na sikkim man kei ding uh hi. 24 "Sang naupangte a siate sangin siamzaw lo-a, nasemte a pu sangin a lianzaw kei hi. 25 Sang naupangte a siapa a bata nasemte a pu a bat nak leh phazo hi. Inn sunga pa pen Beelzebubc a kicih leh a innkuanpihte kinak cih ngel ve! 26 "Tua ahi ciangin amaute na kihta kei un. A kilakkhia lo dinga kiselcip bangmah a om kei hi; a kitheikhia lo dinga ki-imcip zong bangmah a om kei hi. 27 Khuamial sunga note kong hilhte khuavak sungah gen un. Na bil-ua hong kihuausimte innkhum pan na tangko un. 28 Pumpi a thah hangin kha a that thei lote kihta kei un. Kha le pumpi meili sunga a siasak thei pa na kihta zaw un. 29 Kawlgit nih in dangkasand khat man lel hi lo ahi hiam? Ahi zongin na Pa uh deihna ahikeh tuate khat nangawn zong lei-ah a mawk kiat kei ding hi. 30 Na lu ua samzang khempeuh zong kisim khin hi. 31 Tua ahi ciangin lau kei un; Kawlgit tampi sangin na manphazaw uh hi. 32 "Mite mai-a kei hong gumte peuh mah vantunga om ka Pa mai-ah kei zong ka gum ding hi. 33 Mite mai-a hong kitheihmawhbawlte peuhmah vantunga om ka Pa mai-ah ka kitheihmawhbawl ding hi. 34 "Leitungah kilemna puak dingin hong pai hi, ci-in na vawh kha kei un. Kilemna puak dinga hong pai ka hi kei-a namsau khah dinga hong pai ka hizaw hi. 35 " ‘A pa langah tapa pangsak ding, a nu langah tanu pangsak ding, a teknu langah monu pangsak ding – 36 mi khat gal ama innkuanpihte mah a hisak dinga’e hong pai ka hi hi. 37 "Kei sangin a nu a pa a itzawte peuhmah kei adingin a cin kei hi. Kei sangin a tanu, a tapate a itzawte peuhmah kei adingin a cin kei hi. 38 Ama singlamteh kisuana ka nung hong zui lote peuhmah kei adingin a cin kei hi. 39 Ama nuntakna a hu nuamte peuhmah in taan dinga keima hanga a nuntakna a taan peuhmah in a nuntakna a hu ding hi. 40 "No hong sangte, kei hong sang hi-a, kei hong sangte, kei hong sawlpa a sang ahi hi. 41 Kamsangpa, kamsang ahi mana a sang peuhmah in kamsangpa pahtakman a ngah ding hi. Thumaan mipa, mi thumaan ahi mana a sang peuhmah in thumaan mipa pahtakman a ngah ding hi. 42 Thutak kong geninah, hih naupangnote lakah khat peuhpeuh keima nungzui ahi mana tuisik hai khat a suah peuhmah in ama pahtakman a taan peuhmah kei ding hi,” a ci hi.

Mathai 11

1 Jesu in a nungzui sawm le nihte a thuhilh khit ciangin tua lai pan Galileea gama khuapite ah thugen ding le thuhilh dingin a paisuak lai hi. 2 Johan in thong sung pan Khrist nasepna a zak ciangin a nungzuite sawl a, 3 "Hong pai ding pa mah na hi hiam. Midang khatpeuh ka na lamen lai ding uh hiam?” ci-in a dongsak hi. 4 Jesu in, “Note ciah kik unla na zaksa uh le na muhsa uh thu teng Johan kiangah va ko un: 5 Mittawte in khua mu a, khebaite lam pai-in, miphakteb damsiang uh a, bilngongte in khua za hi; misite kithosakin, mizawngte kiangah lung damna thu kigen hi. 6 Kei hanga a pukmang lo mi thupha ngah ahi hi,” ci-in a dawng hi. 7 Johan nungzuite a dinkhiat laitakun Jesu in mihonpite kiangah Johan thu hih bangin a gen hi: “Bang en dingin gamlakah pai na hi uh hiam? Huih muta huang pumpeng en ding na hi uh hiam? 8 Ahikeh bang en dinga paikhia na hi uh hiam? Puan hoih silhte en dinga paikhia na hi uh hiam? Hi lo hi. Puan hoih silhte kumpite inn sungah om uh hi. 9 Tua ahileh bang en dingin paikhia na hi uh hiam? Kamsangpa en dingin maw? Hi mah hi, ken kong geninah, kamsangpa sangin a lianzaw hi. 10 ‘Ka thu puapa na mai-ah ka sawl dinga, amah in nangma mai-ah na lampi ding a sialkhol ding hi,’c ci-a kigelhpa hih pa ahi hi. 11 Thutak kong geninah, numei sung pana suakte lakah Baptize-pa Johan sanga lianzaw kuamah a khangkhia nai kei hi. Ahi zongin vantung gam ah a neupen nangawn amah sangin lianzaw hi. 12 Baptize-pa Johan hun-a kipan tu dong thahat thu-in vantung gam in ma kek a, mihatte in a lenkip hi. 13 Ahang in, Kamsangte khempeuh le Thukham in, Johan hun dong thu na gen khol zo hi. 14 Na san nop uh leh amah, hong pai ding pa Elijah ahi hi. 15 Bil nei peuh in za ta hen. 16 "Hih khang mite bang tawh ka genteh ding hiam? Sumzuakna munah tu a: 17 "‘Tamngai kong mutsak uh hangin na lam kei uh hi; dahla ka sak uh hangin lah, na kap kei uh hi,’ ci-a kigal to naupangte tawh kibang uh hi. 18 Ahang in, ne lo dawn loin Johan hong pai-a, ‘Dawi lawmnei pa hi,’ a ci uh hi. 19 Mihing Tapa hong pai ciangin ne-in dawna, ‘An hai zu hai pa, siahdongte le “Mawhneite” lawmpa hi,’ a ci zel uh hi. Ahi hangin pilna ahileh a sepnate in amaan ahina a lak hi. 20 Tua ciangin nalamdang a tam pen a bawlna khuapite kisik lo uh ahi manin Jesu in mawhpaih a, 21 "Korazin aw, gimna nak thuak na nicia! Bethsaida aw, gimna nak thuak na nicia! No sunga kibawl nalamdangte Tyre le Sidon khuate ah kibawl hileh amaute in sawtpi in, ippi puan silhin, vut kibuakin a kisik zo ta ding uh hi. 22 Ahi hangin ken kong geninah, thukhen ni ciangin no thuak ding sangin Tyre le Sidon-te thuakna zangzaw ding hi. 23 Nang Capernaum aw, vanlai dongin hong kilaamto ding ahi hiam? Hi peuhmah lo hi, a thuk pennad mun dongin na kiasuk ding hi. Nang sunga kibawl nalamdangte Sodom ah kibawl kha hileh tuni dong tua khuapi kip lai ding hi. 24 Ahi hangin thukhen ni cianga nang thuak ding sangin Sodom thuakna zangzaw ding hi,” a ci hi. 25 Tua hun laitakin Jesu in, “Leitung le vantung Topa, Pa aw, mipilte le misiamte tungah hih thute na im a, naupangnote tungah lakkhia na hi manin nang kong phat hi. 26 Hihi Pa aw, hih in nangma deihna ahi hi. 27 "Ka Pa in na khempeuh kei hong ap zo hi. Pa longal kuamah in Tapa a thei kei hi. Tapa le Tapa in amah a lah theih nadinga a teel mite longal in Pa a thei kei uh hi. 28 "Vangik pua a gim mite khempeuh aw, ka kiangah hong pai ta un; tawldamna kong pia ding hi. 29 Keima hakkol kisuan unla kei kiangah kisin ta un. Ahang in, keimah lungsim nem le lungsim ki niamkhiat mi ka hi hi, na hinna un tawldamna a ngah ding hi. 30 Ahang in, ka hakkol nuam in ka van zong a zang hi.

Mathai 12

1 Tua hun lai Sabbath ni khat buhlei tawnin Jesu a pai hi. A nungzuite a gil uh kial a, buhvui zutin a ne uh hi. 2 Pharisee-te in a muh uh ciangin ama kiangah, “En dih in! Na nungzuite Sabbath ni-in thukham tawh kituak loin a gamta uh hi,” a ci uh hi. 3 Jesu in, “David le a pawlte in a gilkial laitakun bang hih uh cih sim ngei lo na hi uh hiam? 4 Pasian inn sungah lutin amau ading ahi lo, siampite ading beka kisiangsaksa anlumte a ne uh hi. 5 Ahikeh siampite in biakinnpi sungah Sabbath ni a tan loh uh hangin mawhpeng hi veve uh hi, cih Thukham sungah sim kha ngei lo na hi uh hiam? 6 Biakinnpi sanga lianzaw khata hih lai-ah a om hi, cih kong gen hi. 7 ‘Kei lunggulh in biakpiakna hi loin lainatna hizaw hi.’b cih thu a khiatna thei khin hi le uh cin a mawhpengte na mawhpaih kei ding uh hi. 8 Mihing Tapa, Sabbath ni Topa ahi hi,” a ci hi. 9 Tua mun pan paikhia-a amaute synagogue sungah a lut hi. 10 Tua lai-ah a khut langkhat a tem mi khat a om hi. Amaute in Jesu mawhna a zon nop manun, “Sabbath ni-in cina damsak ding thukham tawh a kituak hiam?” ci-in a dong uh hi. 11 Jesu in amaute kiangah, “Note lakah khatpeuh in tuu khat nei in, tua tuu Sabbath ni-in kawhawm ah kia zenzen leh, lakhia lo ding na hi uh hiam? 12 Tuu sangin mihing bangzahin manphazaw ahi hiam! Tua ahi ciangin Sabbath ni-in a hoih bawl ding thukham tawh kituak hi,” a ci hi. 13 Tua khit ciangin amah in khuttempa kiangah, “Na khut zan in,” ci-in a sawl hi. Amah in a khut a zan leh a langkhat mah bangin a sa dim a, a damsiang kiuhkeuh hi. 14 Ahi hangin Pharisee-te paikhia uh a, Jesu thah theih nading zia a geelsim uh hi. 15 Jesu in hih thu thei-a tua mun pan a kihemkhia hi. Mi tampi in a mah zui uh a, cinate khempeuh damsak in, 16 amah kua hiam cih a gen loh nadingun a kham hi. 17 Hih in kamsangpa Isaiah tungtawna kigen: 18 "Ka it ka lung hong kimsak, ka teel ka nasempa hih lai-ah om hi; ama tungah ka Kha ka koih dinga, minamte tungah thutang a tangko ding hi. 19 Amah in kuamah tawng lo, kiko lo dinga, kongzing lakah kuamah in ama aw a za kei ding hi. 20 Thutang a gualzawhsak mateng, satliamsa pumpeng kuaitan lo dinga, mei kuang liakliak a sumit kei ding hi. 21 Minamte in a lametna uh ama minah a nga ding uh hi,”c cih thu a tangtun nading ahi hi. 22 Tua ciangin amaute in mittaw-a pauthei lo, dawilut mi khat ama kiangah va puak uh a, tuapa in khua mu thei a, a pau theih nading in Jesu in a na damsak hi. 23 Mite khempeuh in lamdang sa uh a, “Hih pa David Tapa ahi kha thei tam?” a ci uh hi. 24 Ahi hangin hih thu Pharisee-te in a zak uh ciangin, “Hih pa in dawite kumpitapa Beelzebubd bek suangin dawite a hawlkhia hi,” a ci uh hi. 25 Jesu in amaute ngaihsutna thei-a, amaute kiangah, “Amah le amah ki langpanga kikhenthang gam a sia ding hi;amah le amah kilangpanga ki khenthang khuapi ahi a, innkuan ahi zongin a kip kei ding hi. 26 Satan in Satan hawlkhia leh amah le amah a kilem lo ahi hi. Tua hileh ama gam bangci kip thei ding ahi hiam? 27 Ken Beelzebub suangin dawite hawlkhia ka hileh na mite un kua suangin tuate hawlkhia ahi uh hiam? Tua ahi ciangin amaute no tungah thukhente a suak ding uh hi. 28 Ahi hangin Pasian Kha suanga hawlkhia ka hileh note tungah Pasian gam hong tung zo hi. 29 "Tua tham loin mi khatpeuh in mihatpa hencip masa loin tuapa inn sungah lutin a neihsa bangci puak khiatsak thei ding ahi hiam? A hencip khit ciangin a inn luh thei pan ding hi. 30 "Kei hong koppih lote kei langa pang ahi hi. Kei hong kaihkhoppih lote a thehthang ahi hi. 31 Tua ahi ciangin ken kong geninah, mawhna le Pasian gen daina khempeuh kimaisak zo dinga, ahi hangin langpanga Kha gendaina a kimaisak zo kei ding hi. 32 Mihing Tapa a langgente peuhmah kimaisak dinga, ahi hangin Khasiangtho a langgen peuhmah tu khang ahi zongin, hong tung ding khang ahi zongin a kimaisak kei ding hi. 33 "Singkung a gah in kikhentel thei ahi manin a kung na hoihsak un, tua hileh gah hoih a gah ding hi; a kung na hoihsak kei un, tua hileh gah hoih lo a gah ding hi. 34 No mualtan suante aw, migilo note in bangci in thu hoih gen thei ding na hi uh hiam? Ahang in, lungsim a dimlet ciangin kamah pusuak pan hi. 35 Mi hoih in a sunga a kholsa na hoihte pusuah a, migilo in a sunga a kholsa na hoih lote a pusuah hi. 36 Ahi hangin mite in amau motpaunasate uh tawh kisai-in thukhen ni ciangin a telin a gen ding uh hi. 37 Ahang in, nomau kammalte tawh kizui-in note na mawhpeng ding uh a, nomau kam malte tawh kizui-in note hong kimawhpaih ding hi,” a ci hi. 38 Tua ciangin Pharisee-te le thukham siate kimkhat in ama kiangah, “Sia aw, nang khut panin lim lamdang khat ka mu nuam uh hi,” a ci uh hi. 39 Jesu in, “A tatsia le angkawm hat no tu khang mite in lah lim lamdang nong ngen tazen ua! Kamsangpa Jonah lim longal lim dang hong kilak kei ding hi. 40 Ahang in, ngapi gil sungah Jonah sun thum le zan thum a om mah bangin Mihing Tapa zong lei sungah sun thum le zan thum a om ding hi. 41 Thukhen ni ciangin hih khang mite langah Nineveh a mite ding ding uh a, a mawhpaih ding uh hi. A hang in, Jonah thuhilhna hangin amaute a kisik uh hi. Tu-in hih lai-ah Jonah sanga lianzaw mi khate a om hi. 42 Thukhen ni ciangin hih khang mite langah Leitaw-lam Kumpinu dingin a mawhpaih ding hi. Ahang in, tua Kumpinu, Solomon pilna ngai dingin leimong panin a pai hi. Tu-in Solomon sanga lianzaw hih lai-ah a om hi. 43 "Mi khat sung pan kha gilof khat pusuak-a, a khawl nading a keuna mun zongin a vak kawikawi hangin a mu kei hi. 44 Tua ciangin, ‘Ka nusiatsa innah ciah kik ning,’ ci hi. A tun kik ciangin tua inn awng a, kiphiat siangin a kipuah sinsen a mu hi. 45 Tua ciangin amah pai-a amah sanga tatsiazaw adang kha sagihte zawnin, tua lai-ah a va teng uh hi. Tua mipa omdan nunung in a masa sangin a siazaw hi. Hih a tatsia khang mite zong tua mah bang ahi ding uh hi. 46 Jesu in mihonpite kiangah thu a hilh laitakin amah hopih nuamin a nu le a sanggamte inn pua-ah ding uh hi. 47 Mi khat in, “Na nu le na sanggamte nang hong hopih nuamin inn pua-ah ding uh hi,”g ci-in a gen hi. 48 Amah in, “Ka nu kua hi-a, ka sang gamte kua ahi hiam?” a cih khit ciangin 49 a nungzuite kawka, “Ka nute ka saggamte hih lai-ate ahi hi. 50 Ahang in, vantung a om ka Pa deihna a hih peuhpeuh ka sanggam-nu, ka saggampa le ka nu ahi hi,” ci-in a dawng hi.

Mathai 13

1 Tua ni mah in tua inn pan Jesu paikhia a, tuilipi gei-ah a tu hi. 2 A kimkotah mi tam lua ahi manin amah gunkuang sungah pai-in a tu hi. Mihonte a hileh tuigei ah a ding uh hi. 3 Amah in gentehnate-in na tampi gena: “Lokhopa khat ama khaici vawh dingin a kuankhia hi. 4 Khaici a theh ciangin pawlkhat lam-dungah tu-a vasate pai-in a nemang uh hi. 5 Pawlkhatte leitak tam lohna mun suang lakah a tu hi. Leitak dai ahi manin popah sam hi. 6 Ahi hangin ni a san ciangin ankungte kangdulh a, zung kha lo ahi manin a vulpah hi. 7 Pawlkhat ling lakah tu-a a po tei hangin lingkung in a depgawp hi. 8 A dang pawlkhat pen lei hoihna ah tu-in, a kivawh zah za khat, azah sawmguk, azah sawmthum a gahkhia hi. 9 Bil nei peuh in za ta hen,” a ci hi. 10 Ama kiangah nungzuite va pai uh a, “Bang hangin gentehnate tawh mite hilh na hi hiam?” ci-in a dong uh hi. 11 Amah in, “Vantung gam thusimte theih theihna no tungah hong kipiak hangin amaute tungah a kipia kei hi. 12 A nei peuhpeuh kipiakbeh ding a, tampitak a nei ding hi. A nei lo peuhmah tung panin a neihsa nangawn kilakkhiatsak ding hi. 13 Hih thu hangin amaute kiangah gentehnate ka gen hi: “Amaute in en napi a mutel thei kei uh hi; amaute in ngai napi zatel thei loin a theitel thei kei uh hi. 14 Amaute tungah kamsangpa Isaiah in: ‘“Note in na zak ngitnget uh hangin, na theitel ngei kei ding uh hi; na muh ngitnget uh hangin na mutel ngei kei ding uh hi. 15 Hih mite lungtang kheeng lua ahi manin; a bil uh tawh za mialmial in, a mit uh si uh hi. Tua hi kei leh a mit-un mu-in a bil uh tawh za-in a lungtang uh tawh theitel in kihei ding uh a, amaute ka damsak kha ding hi,’a ci-a a genkholhna tangtung hi. 16 "Note na hi uh leh na mitun mu thei na hi manun na mit uh thupha ngah hi-a; na bilun za thei na hi manun na bil uh thupha ngah ahi hi. 17 Thutak kong geninah, kamsangte le mi thumaan tampite in na muhte uh a muh nop uh hangin mu lo uh a, na zakte uh a zak nop uh hangin a za kei uh hi. 18 "Tua ahileh khaici vawhpa tawh gentehna bang cihnopna hiam, cih na ngai un: 19 Mi khatpeuh in vantung gam thu a zak hangin a theihtel kei leh, gilopa pai-in a lungtang sunga kivawhsate a sutkhia hi. Hih khaici pen lamdunga tute ahi hi. 20 Suang laka tute ahileh thu a zak ciangin lungdamin thakhatin a sangpahte ahi hi. 21 Ahi hangin zung kha lo ahi manin tawmvei sung bek a hing zo hi. Thu hangin lungmanna ahi zongin bawlsiatna ahi zongin a tun ciangin pukmang pah hi. 22 Ling laka tute ahileh thu za napi hih leitung nuntak nading lunghimawhna le hauhna’ khemna in depgawp a gah a gah lote ahi hi. 23 Ahi hangin lei hoihna-a tute ahileh thu a zak uh ciangin a theitel pah mipa ahi hi. Tuate a kivawh zah za khat, azah sawmguk, azah sawmthum a gahpa ahi hi,” ci-in a dawng hi. 24 Jesu in gentehna dang khat gen a: “Vantung gam pen ama lo sunga khaici hoih a vawh mi khat tawh kibang hi. 25 Ahi hangin mi ihmut kalin a galpa va pai-a buh kivawhna ah tahum a vawh khit ciangin a paikhia hi. 26 Buh poto in a vuih ciangin tahumte zong a kilang hi. 27 "Lo nei pa kiangah nasemte pai uh a, ‘Pu aw, na lo sungah khaici hoih vawh hi lo na hi hiam! Hih tahumte koi pana hong piang ahi hiam?’ ci uh hi. 28 "Amah in, ‘Hih in galpa hih ahi hi,’ ci-in dawng hi. “A nasemte in, ‘Pai-in va botkhia le ung na phal hiam?’ ci-in dong uh hi. 29 "‘Tahumte bot le uh cin buh tawh botkhawm kha ding na hi manun ka phal kei hi. 30 Anlak hun mateng pokhawm tadih hen. Tua hun ciangin anlate kiangah: Tahumte khawm masa unla khultum dingin a lomlomin hen un; tua ciangin buh teng kaikhawm unla, ka sal sungah na koih un,’ ka ci ding hi,” a ci hi. 31 Jesu in amaute tungah gentehna dang khat gena: “Vantung gam in mi khatin a lo sungah a cin ankam tang tawh kibang hi. 32 Tua ankam tang, khaici khempeuh lak pan a neu pen hangin a khan ciangin huan ankungte khempeuh lakah a lian pen ahi hi; kungpi a suah ciangin vana vasate pai-in a hiangte tungah a tuang uh hi,” a ci hi. 33 Jesu in gentehna dang khat genbeh lai-a: “Vantung gam in, numei khat in a mekman buhnel lompib khat a tawkkim zo-a kisawh silngo tawh kibang hi,” a ci hi. 34 Jesu in mihonpite kiangah hih thute khempeuh gentehna tawh a hilh hi. Gentehna zang loin amaute kiangah bangmah a gen kei hi. 35 Hih in kamsangpa tungtawna kigen: “Gentehnate zangin ka kamka dinga, leitung piansak cil-a kipan a ki-imcip thute ka genkhia ding hi,”c cih thu a tangtunna ahi hi. 36 Tua ciangin mihonpite nusia in inn sungah a lut hi. Nungzuite a kiangah va pai uh a, “Lo sunga tahumte tawh gentehna hong hilhcian dih in,” a ci uh hi. 37 Jesu in, “Khaici hoih a vawhpa, Mihing Tapa ahi hi. 38 Lo sung pen leitung hi-a khaici hoih in kumpi-gam tapate cihna ahi hi. Tahum ahileh gilopa tate cihna ahi hi. 39 Tua tahum tangte a vawh galpa in dawimangpa ahi hi. An lak hun in tu khang bei hun hi-a anlate in vansawltakte ahi hi. 40 "Tahumte kibotin mei-ah a kikhul mah bangin, tu khanghun a bei ciangin zong tua mah bang ahi ding hi. 41 Mihing Tapa in ama vansawltakte sawlkhia dinga, a gam sungah mawhna a piangsak na khempeuh le gitlohna a hihte khempeuh a botkhiasak ding hi. 42 Tua vansawltakte in amaute a sa mahmah mei-am khukpi sungah a khul ding uh hi. Tua munah kahna le hagawina a om ding hi. 43 A thumaante ahileh tua hun ciangin amau Pa gam sungah ni bangin a tang ding uh hi. Bil nei peuh in za ta hen. 44 "Vantung gam in lo lai-a kisel gou tawh kibang hi. Mi khat in tua gou a muh ciangin sel-a, lungdamin ciaha, a neih khempeuh a zuak khit ciangin tua lo a lei hi. 45 "Khat leuleu ah vantung gam in kepmanpha hoih a zong sumbukpa tawh kibang hi. 46 Tam a man mahmah kep manpha khat a muh ciangin ciah kika, a neih khempeuh a zuak khit ciangin tua kepmanpha a lei hi. 47 "Khatvei leuleu, vantung gam in, tui sunga a kikhuh ciangin ngasa namkim a awk len tawh kibang hi. 48 Len dima ngasa a awk khit ciangin ngasa bengte in tui gei-ah a kaikhia uh hi. Tua ciangin amaute tu uh a, ngasa hoih teng khawmin bawm sungah koih uh a, a hoih lo teng a pai uh hi. 49 Tu khanghun a bei ciangin hih bang ahi ding hi: Vansawltakte hong pai-in mi thumaante lak pan a tatsia mite khenkhia ding uh a, 50 a sa mahmah mei-am khukpi sungah a khul ding uh hi. Tua mun ah kahna le hagawina a om ding hi” a ci hi. 51 Jesu in, “Hih thu teng na theitel uh hiam?” ci-in a dong hi. Amaute in, “Theitel mah ung,” ci-in a dawng uh hi. 52 Amah in amaute kiangah, “Tua ahi ciangin vantung gam thu tawh kisai-a lam a kilaksa thukham siate khempeuh, ama sumkholna pana a gou a lui le a thak a pusuahkhia inn neipa tawh kibang hi,” a ci hi. 53 Jesu in hih gentehna teng a gen khit ciangin tua mun panin a paikhia hi. 54 Ama khua a tun ciangin synagogue sungah mite thuhilh kipana, amaute in lamdang a sa uh hi. Amaute in, “Hih pilna le hih bang nalamdang bawl theihna vangte hih pa in koi pana a ngah ahi hiam? 55 Khutsiampa tapa hi lo ahi hiam? Anu min Mary hi-a James, Joseph, Simon le Judas-te ama sanggam hilo ahi hiam? 56 A sanggam numeite ei tawh tengkhawm hilo ahi hiam? Tua ahileh hih pa in, hihte khempeuh koi pana a ngah hiam?” ci-in a kidong uh hi. 57 Tua ciangin amaute in amah a phunsan uh hi. Ahi hangin Jesu in amaute kiangah, “Kamsangpa in ama khua sung le ama inn sung bekah pahtawina a ngah kei hi,” a ci hi. 58 Tua hi-a amaute uplahna hangin Jesu in tua lai-ah nalamdang tampi a bawl kei hi.

Mathai 14

1 Tua hun laitakin gam-ukpa Herod in Jesu thu a kigenna a za hi. 2 Tua ciangin a sawltakte kiangah, “Hih pa, Baptize-pa Johan ahi hi. A sisa hong tho kik hi ngel ding hi! Tua hanga amah in nalamdang bawl theihna vang nei hi,” a ci hi. 3 Herod in a naupa Philip zi Herodia hangin Johan mana a hen khit ciangin thong sungah a khum hi. 4 Tua pen Johan in Herod kiangah, “Tuanu na tenpih ding thukham tawh kituak peuhmah lo hi,” a cih hang ahi hi. 5 Herod in amah a thah nop hangin mipite in amah kamsangin ngaihsun uh ahi manin mipite a kihta hi. 6 Herod suah ni pawi-in amau et dingin Herodia tanu a lam hi. Herod a lungkim lua ahi manin, 7 kiciam a tuanu nget peuhpeuh piak dingin a kamciam hi. 8 A nu hilhtawm bangin, “Baptize-pa Johan lutang kuangdai khatin hong pia in,” ci-in a ngen hi. 9 Kumpipa lungdong a, ahi hangin a kiciamnasa le a lenglate hangin tuanu ngetna banga piak ding le 10 thong sunga Johan ngawng tan dingin thu a pia hi. 11 Ama lutang kuangin hong kitawi-a numeino kipia hi; amah in a nu a piasawn hi. 12 Johan nungzuite pai uh a. a luang la in a vui uh hi. Tua ciangin pai uh a Jesu a ko uh hi. 13 Jesu in tua thupiang teng a zak ciangin gunkuangin tuanga gamdaih na mun lamah a kihemkhia hi. Hih thu a zak uh ciangin khuapite panin mihonte khe-in va pai uh a, a nung a zui uh hi. 14 Jesu a kumkhiat ciangin mihonte mu a, amaute khuatuah in a cinate uh a damsak hi. 15 Nitak lam neh ta ahi ciangin a nungzuite a kiangah va pai uh a, “Hih lai lah gamtawng hi-a ni lah niam lua ta hi. Khuate ah pai-in a an ding uh lei dingin mihonte ciahsak in,” a ci uh hi. 16 Jesu in, “Amaute paikhiat kul lo hi. A nek ding uh bang khatpeuh pia un,” ci-in a dawng hi. 17 Amaute in, “Anlum nga le ngasa nih bek ka nei uh hi,” ci-in a dawng uh hi. 18 Amah in, “Tuate hiah hong la dih un,” a ci hi. 19 Tua ciangin mipite lopa tungah a tusak uh hi. Tua anlum nga le ngasate gel la-a vantung lam ento in, lungdam a koh khit ciangin anlumte a balkham hi. Tua ciangin nungzuite pia a, nungzuite in mipite lakah a hawm uh hi. 20 Amaute khempeuh in ne uh a, a kham pikpek uh hi. Nungzuite in a khamvalte uh a neng a themin a top uh leh bawmta sawm-le-nih tak a pha hi. 21 Tua an nete numei le naupang simloh pasal tulnga bang a pha hi. 22 Jesu in a nungzuite thakhatin gun kuangah tuangsak a, ama maiah galkah sakin mihonpite a ciahsak hi. 23 Mihonpite a ciahsak khit ciangin a mah kia thungen dingin mualtung ah a paito hi. Nitak ciangin amah kia tua lai ah a om hi. 24 Ahi hangin gunkuang pen tuigei panin gamlaa simna tung ta a, huih in lehmut ahi manin tuihualte in a satsat hi. 25 Zingsang vil lina sungin Jesu a mau lam zuanin tui tungah a pai hi. 26 Nungzuite in amah tui tungah a pai a muh uh ciangin a lau mahmah uh hi. Amaute in, “Hua lai-ah sikha,” ci-in lau lua in nakpi in a awng uh hi. 27 Ahi hangin amaute kiangah Jesu in, “Lau kei un! Keimah ka hi hi. Hong kihta kei un,” a cipah hi. 28 Peter in, “Topa nang na hileh, kei zong na kiang zuanin tui tungah kong pai nading thu hong pia in,” ci-in a dawng hi. 29 Jesu in, “Hong pai ou,” a ci hi. Tua ciangin gunkuang panin Peter tuakkhia a, Jesu lam zuanin tui tungah a pai hi. 30 Ahi hangin huihpi a muh ciangin lau-in tumsuk dektak a, “Topa hong hon ou,” ci-in a awng khia zal hi. 31 Jesu in a khutin manphei pah a, “Upna neupa aw, bang hangin lunghei nei se na hi hiam?” a ci hi. 32 Gunkuang sung a tun uh ciangin huih nung a dai kiuhkeuh hi. 33 Gunkuang sunga om teng in, “Pasian Tapa na hi takpi hi,” ci-in Jesu a bia uh hi. 34 Amaute galkah uh a Gennesaret a tung uh hi. 35 Tua lai-a mite in Jesu a hilam a theihtel uh ciangin a kima khua khempeuhah thu a zasak uh hi. Mite in amau cinate paipih uh a, 36 a puantualpi mong a lawnsak nadingin a thum uh hi. Amah a lawng khempeuh a damsiang hi.

Mathai 15

1 Tua ciangin Jerusalem panin Pharisee-te le thukham siate pawl khat va pai uh a Jesu kiangah, 2 "Bang hangin na nungzuite in upate tangngeina palsat uh ahi hiam? An a nek ma-un a khut uh a sil kei uh hi!” ci-in a dong uh hi. 3 Jesu in, “No zong tangngeina na zuih nop manun bang hangin Pasian thupiak palsat na hi uh hiam? 4 Ahang in, Pasian in, ‘Na nu le na pa pahtawi in,a a nu le a pa a hamsiatte kithat pelmawh ding hi,’b ci hi. 5 Ahi hangin note in, mi khatpeuh in a nu le a pa-te kiangah, ‘Kei tung pana na ngah ding uh huhna peuhmah, Pasian tungah letsong a kipia ahi hi. A cihleh 6 a pa a pahtawi kul lo hi,’c na ci uh hi. Tua bang tangngeina na kiplet manun Pasian thu na phiat mang uh hi. 7 No kineih siamte! Isaiah in note tawh kisai-a a genkholhna: 8 ‘Hih mite in a muk uh tawh kei hong pahtawi uh a, ahi hangin a lungtang uh kei panin gamla hi. 9 Amaute in a mawkna-in kei hong bia uh a, a thuhilhnate uh mihing bawltawm ngeina ahi hi,’d a cih a man mahmah hi,” ci-in a dawng hi. 10 Jesu in mihonpite a kiangah sam a, “Ngai unla theitel un. 11 Mite kam sunga a tumsukte in mi a ‘ninsak’ kei hi. Kam sung pana pusuakte in mi a ‘ninsak’ hi,” a ci hi. 12 Tua ciangin nungzuite in ama kiangah va nai uh a, “Pharisee-te in hih thu a zak uh ciangin a lungkim loh lam uh na thei hiam?” ci-in amah a dong uh hi. 13 Amah in, “Vantunga ka Pa in a suan loh kung peuhmah a zungin kibotkhia ding hi. 14 Amaute thudon dah lel un; amaute, mittaw lamhilhtee ahi uh hi. Mittaw khat in mittaw dang khat makaih leh a nih un kawhawm sungah kiakhawm ding uh hi,” ci-in a dawng hi. 15 Peter in, “Tua gentehna kote hong hilhcian dih in,” a ci hi. 16 Jesu in amaute kiangah, “Tua zahin lungmawl lai zawzen na hi uh hiam? 17 Kam sunga tumte, gilpi sungah tumsuk a, tua ciangin pumpi pualamah a pu suakkhia hi, cih thei lo na hi uh hiam? 18 Kam sung pana pusuakkhiate ahileh lungtang pana piang hi-a tuate in mi a ‘ninsak hi. 19 Lungtang pana piangte: ngaihsut khel, tualthahna, angkawmna, numei le pasal paktatna, guktakna, zuau teci panna le gensiatna-te ahi hi. 20 Hihte in mi a ‘ninsak’ hi, ahi hangin khut sil lo-a an nek in amah a ‘ninsak’ kei hi,” a ci hi. 21 Jesu in tua mun nusia in, Tyre le Sidon kual lamah a kihem to hi. 22 Tua kimnai panin Canaan numei khat va pai a, “Topa David Tapa aw, kei hong lainat in! Ka tanu sungah dawi luta, a gim lua mahmah hi,” ci-in a kiko hi. 23 Jesu in kam khat zong a dawng kei hi. Tua ciangin nungzuite a kiangah pai uh a, “Tuanu in i nungah hong zui-in hong gal sapsap ahi manin hawlkhia in,” ci-in Jesu a kun uh hi. 24 Amah in, “Kei, Israel tuu mangte kiang bekah hong kisawl ahi hi,” ci-in a dawng hi. 25 Tua numei pai-in a mai ah khukdina, “Topa aw, hong huh tapeuh in!” a ci hi. 26 Amah in, “Tate nek anlum laksakin a uite uh piak ding kilawm lo hi,” ci-in a dawng hi. 27 Tua numei in, “Himah hi, Topa aw, ahi hangin uite in zong a topa sabuai pana kia annengte a ne uh hi,” a ci hi. 28 Tua ciangin Jesu in, “Numei aw, upna lian na nei hi! Nong nget bangin kong pia hi,” ci-in a dawng hi. Tua hun lianin a tanu a dampah hi. 29 Tua mun nusia in Galilee Tuipi dungah Jesu a pai hi. Tua ciangin mualpang ah kahto in a tu hi. 30 Mihon tampi ama kiangah pai-in mittawte, khebaite, a poite, a pautheilote le cina dang tampi va paipih uh a, a khe phungah a nga uh hi. Jesu in amaute a damsiangsak hi. 31 Tua mite in, a pautheilote pau thei a, a poite dam kikin, khebaite lam pai thei a, mittawte in khua a muh theih a muh uh ciangin lamdang a sa uh hi. Tua ciangin Israel-te Pasian a phat uh hi. 32 Jesu in nungzuite a kiangah sam a, “Hih mite ka khuatuah hi. Ka kiangah a om zawh uh ni thumtak pha ta a, a nek ding uh bangmah a nei kei uh hi. Gilkial pi in ka ciahsak nuam kei hi; tua bangin ciah le uh phukhong vei in pukgawp ding uh hi,” a ci hi. 33 A nungzuite in, “Hih bang gamtawngah mihon hih zahta vak nading an koi pan kingah thei ding hiam?” ci-in a dawng uh hi. 34 Jesu in, “Anlum bangzah na nei uh hiam?” ci-in a dot ciangin, “Lum sagih le ngasa tawmkha om lai hi,” ci-in a dawng uh hi. 35 Amah in mihonpite leitual ah a tusak hi. 36 Tua ciangin tua anlum sagih le ngasate la a, lungdam a koh khit ciangin balkhamin a nungzuite a pia hi. Nungzuite in mipite a piasawn uh hi. 37 Mipite in ne uh a, a kham pikpek uh hi. Nungzuite in khamval teng athem anengin a top uh leh bawm sagihtak a pha hi. 38 Tua an nete numei naupang sim loh tulli a pha hi. 39 Jesu in mihonpite a ciahkhiatsak khit ciangin gunkuang ah tuangin Magadan kim nai lam zuanin a pai hi.

Mathai 16

1 Pharisee-te le Sadducee-te Jesu kiangah pai uh a, vantung pan lim khat ngetna tawh amah a zia-et uh hi. 2 Amah in,a “Nitakin, ‘Meiisan a suah ciangin khuapha ding hi,’ na ci uh a, 3 zingsangin, ‘Meiisan suak a khua a nim ciangin huihpi nungin guahpi zu ding hi,’ na ci uh hi. Van maitang pianzia na khiat theih uh hangin hun lahna limte na thei thei kei uh hi. 4 A tatkhel le angkawmhat hih khang mite in lim lamdang a zon uh hangin Jonah lim longal adang khat beek a kilak kei ding hi,” ci-in a dawng hi. Tua ciangin Jesu in amaute nusia in a paikhia hi. 5 Tuilipi a kantan laitakun nungzuite in an a pua mangngilh uh hi. 6 Jesu in amaute kiangah, “Pilvang unla, Pharisee-te le Sadducee-te silngo panin kikem un,” a ci hi. 7 Amaute in, “Anlum khat beek i puak loh hang hi,” ci-in a kikum uh hi. 8 Jesu in amaute kikupna a theih ciangin, “Upna neute aw, bang hangin anlum om loh thu kikum tazen na hi uh hiam! 9 Theitel nai lo lailai na hi uh hiam? Mi tul nga ading anlum nga le a val bawm bangzah na kaikhawm uh cih phawk nawn lo na hi uh hiam? 10 Ahikeh mi tulli adingin lum sagih le a val bawm bangzah na kaikhawm uh cih phawk nawn lo na hi uh hiam? 11 Bangci-a an thu gen ka hi loh lam theitel lo na hi uh hiam? Ahi hangin Pharisee-te le Sadducee-te silngo panin na kikem un,” a ci hi. 12 Tua ciangin anlum bawl cianga kizang silngo gen hi loin Pharisee-te le Sadducee-te hilhna pana kikep ding gen ahilam a theitel pan uh hi. 13 Caesarea Philipi kuala Jesu a pai ciangin a nungzuite kiangah, “Mite in Mihing Tapa kua hi, a ci uh hiam?” ci-in a dong hi. 14 Amaute in, “Mi pawlkhat in, ‘Baptize-pa Johan hi; pawlkhatte in Elijah hi; pawlkhat leuleu in, Jerimiah hiam, kamsang khatpeuh hiam, hi ding hi,’ hong ci uh hi,” ci-in a dawng uh hi. 15 "Tua ahileh no e leh? Kei kua hi nong ci uh hiam?” ci-in a dong hi. 16 Simon Peter in, “Nang, a nungta Pasian Tapa, Khristb na hi hi,” ci-in a dawng hi. 17 Jesu in, “Jonah tapa Simon aw, thupha ngah na hi hi; ahang in, hih in mihing hong laak hi loin vantung a om ka Pa hong laak ahi hi. 18 Tua hi a, nang Peterc na hi hi. Hih suangpi tungah ka pawlpi ka phut dinga Gawtmund kongpite in a zo zo kei ding uh hi.e 19 Vantung gam tawhtangte nang kong pia ding hi. Leitung a na hen peuhpeuh vantungah kihen dingaf, leitung a na phel peuhpeuh vantungah kiphel dingg hi,” a ci kik hi. 20 Tua ciangin Jesu in amah Khrist ahilam kuamah a hilh loh nadingun a nungzuite a vauhilh hi. 21 Jerusalem ah Jesu pai-in upate, siampi makaite le thukham siate khutah tampi thuak pelmawh dinga, pel loin amah kithatin, a ni thum ni ciangin kihingkiksak ding hi, cih thute tua hun pana kipan a nungzuite a hilhcian hi. 22 Peter in amah tang paikhiatpih in tai a, “Topa, hi ngei mahmah lo e! Hih thu nang tungah tung ngei peuhmah lo ding hi!” a ci hi. 23 Jesu kihei a Peter kiangah, “Satan ka nunglamah kihem in! Kei adingin kimuk-tukna na hi hi. Pasian thute ngaihsun loin mihing thute na ngaihsun hi,” a ci hi. 24 Tua ciangin Jesu in a nungzuite kiangah, “Mi khatpeuh in ka nung hong zuih ding leh amah le amah kinialin, ama singlamteh kisuanin hong zuih pelmawh kul hi. 25 Ahang in, ama nuntaknah a honkhia nuamte in taan dinga, ahi hangin kei hanga ama nuntakna a taante in, nuntakna a ngah ding hi. 26 Mi khatpeuh in leitung buppi a neih hangin a hinna tanlawh leh ama adingin bang phatuam ding ahi hiam? Ahikeh mi khatpeuh in ama kha bang tawh khek thei ding ahi hiam? 27 Ahang in, Mihing Tapa ama vansawl takte tawh a Pa minthanna kengin hong pai ding hi. Tua ciangin mi khempeuh in amau sepna tawh kizui-in pahtakman a sang ciat ding uh hi. 28 Thutak kong geninah, hih lai-a ding mi pawlkhat in, Mihing Tapa ama kumpi-gam tawh hong pai, a muh matengun sihna a ciamkha kei ding uh hi,” a ci hi.

Mathai 17

1 Niguk khit ciangin Jesu in Peter, James le James sanggampa John-te zawnin mualsang tungah a kahtohpih hi. 2 Tua lai-ah amaute mitmuhin a pum piandan a kikhel hi. Amai ni bangin tanga, a puante khuavak bangin a leng hi. 3 Tua khit phetin amaute mai-ah Moses le Elijah kilang a, Jesu tawh a kiho uh hi. 4 Peter in Jesu kiangah, “Topa, hih lai-ah i om nuam mahmah hi. Nong awi leh, buk thum—nang ading khat, Moses ading khat, Elijah ading khat, hong lamsak ning,” a ci hi. 5 Tua banga a pau laitakin meiingo khat in amaute tuama, tua meii lak panin, “Hih in, ka it ka Tapa ahi hi, ama tungah ka lung a kim mahmah hi; ama thu na ngai ta un!” ci-in aw khat a ging hi. 6 Nungzuite in hih awging a zak uh ciangin lau uh a, lei ah a khupbawh uh hi. 7 Ahi hangin Jesu pai-in amaute lawnga, “Tho un, lau kei un,” a ci hi. 8 Amaute a khuadak uh leh Jesu longal kuamah a mu kei uh hi. 9 Amaute mualtung pan a paisuk kawmkawmun Jesu in amaute kiangah, “Mihing Tapa misi pan a thawh mateng, na muhsate uh kuama kiangah gen peuhmah kei un,” a ci hi. 10 Nungzuite in, “Tua ahileh thukham siate in, ‘Elijah hong pai masa pelmawh ding hi,’ ci-in bang hangin hilh uh ahi hiam?” ci-in a dong uh hi. 11 Jesu in dawnga, “A taktakin, Elijah hong pai-a na khempeuh a bawlpha ding hi. 12 Ahi hangin ken kong geninah, Elijah hong pai khin zo napi amaute in amah a thei kei uh hi. Ama tungah amau ut bangin a bawl uh hi. Tua mah bangin Mihing Tapa in amaute khutlum a thuak ding hi,” a ci hi. 13 Tua ciangin Jesu in Baptize-pa Johan tawh kisai-in a gen ahilam nungzuite in a theitel pan uh hi. 14 Mihonpite lakah amaute a pai laitakun mi khat in Jesu va naih a, a mai ah a khukdin hi. 15 Amah in, “Topa aw, ka tapa lainat in. Amah sibupbupin, gim mahmah hi. Mei sung khawng tui sung khawngah puk zelzel hi. 16 Na nungzuite kiangah ka paipih hangin a damsak thei kei uh hi.” a ci hi. 17 Jesu in, “Thu um lo-a a lehtat khang mite aw, note tawh bang tan vei om khawmin bang tan vei hong dawhdawh zo ding ka hi hiam? Tua naupang ka kiangah hong paipih un,” a ci hi. 18 Jesu in tua dawi a tai ciangin naupang sung panin paikhia-a, tua hun lianin naupang a damsiang pah hi. 19 Tua ciangin Jesu kiangah nungzuite va paituam uh a, “Bang hanga ko hawlkhia thei lo ka hi uh hiam?” ci-in a dong uh hi. 20 Amah in, “Na upna uh a neu luat hang ahi hi. Thutak kong geninah, upna ankam tang cia-a neu khat na neih uh leh hih mualpi kiangah, ‘Hih mun pan hua lai-ah kisuankhia in,’ ci le uh cin kisuankhia ding hi. No adingin a hi thei lo bangmah a om kei ding hi. 21 Ahi hangin thungetna le antanna longal in hih bangte a hisak thei kei hi,”a a ci hi. 22 Amaute Galilee a tunkuan uh ciangin amaute kiangah, “Mite khutah Mihing Tapa kilehhek ding hi. 23 Amaute in amah that ding uh a, a ni thum ni ciangin kihingkiksak ding hi,” a ci hi. Tua ciangin nungzuite a dah lua mahmah uh hi. 24 Jesu le a nungzuite Capernaum a tun khit uh ciangin siah drachma nih dongte Peter kiangah va pai uh a, “Na siapa un biakinnpi siah pia lo hiam?”b ci-in a dong uh hi. 25 Amah in, “Pia mah hi,” a ci hi. Inn sungah Peter a lut ciangin Jesu in na hopih masa a, “Simon aw, nang bang na ci ngaihsut hiam? Leitung kumpite in mangmu le siah kua tungah dong uh ahi hiam? Amau tate tung hiam? Midangte tung ahi hiam?” ci-in a dong hi. 26 Peter in, “Midangte tungah a dong hi,” ci-in a dawng hi. Jesu in, “Tua bang ahileh tate a peng hi. 27 Ahi hangin amaute i lungkimsak nadingin tuilipi ah va pai inla, ngathang va siah in. Na mat masakpen a kam phen lecin drachma tang li man sumtang khat na mu ding hi. Hong tawi inla, kei le nang siah dingin amaute pia in,” a ci hi.

Mathai 18

1 Tua hun laitakin Jesu kiangah nungzuite va pai uh a, “Vantung gamah kua lian pen ahi hiam?” ci-in a dong uh hi. 2 Amah in naupang neu khat samin amaute lakah a dingsak hi. 3 Tua ciangin amah in, “Thutak kong geninah, note kikhela naupangno na bat kei uh leh vantung gam sungah na lut ngei kei ding uh hi. 4 Tua ahi ciangin hih naupangno banga a ki niamkhiat peuhpeuh vantung gam ah a lianpen ahi hi. 5 Tua ciangin keima min hangin hih bang naupangno khat a sangte peuhmah, kei hong sang ahi hi. 6 "Ahi hangin kei hong um hih naupangnote khat peuhpeuh mawhna a bawlsak a om leh a ngawngah angawina suang lianpi khihin tuipi thuk sungah tuakin tummang leh ama adingin a hoihzaw ding hi. 7 Mite mawhna a bawlsakte hangin hih leitung in gimna nak thuak na zen in cia! Tua bang a piang pelmawh ding ahi hi; ahi hangin mawhna bawl nadinga kizang mite in gimna nak thuak na zen in cia! 8 Na khut a hi a na khe ahi zongin mawhna hong bawlsak penpen sattan inla paimang in. Khut kim khe kimin tawntung meikhuk ah hong kikhul sangin, khutbui khebui-in nuntakna ah na lut ding hoihzaw hi. 9 Na mittang in mawhna hong bawlsak leh khelkhia inla paimang in. Mittang kimin meili sungah hong kikhul sangin mit lang khat bek tawh nuntakna ah na lut ding hoihzaw hi. 10 "Hih naupangnote khat beek na simmawh kha kei in. Ahang in, vantunga om amau vansawltakte in, vantunga ka Pa maitang a mu ngitnget uh hi.a 11 Mihing Tapa, a mangb te hon dinga hong pai ahi hi. 12 "Bang na ci ngaihsut uh hiam? Mi khat in tuu za khat nei henla, tuate lakah khat gammang leh, a om lai sawm kua le kuate mual tungah nusia-in, tua a gammang tuu pen zong lo ding ahi hiam? 13 Thutak kong geninah, tua a gammang tuu a muh kik ciangin a gammang lo tuu sawm kua le kuate sangin, tua tuu khat hangin a lungdam zaw ding hi. 14 Tua mah bangin hih naupangte khat nangawn a manthan ding vantunga om na Pa un a phal kei hi. 15 "Nangc tungah na sanggampa hong mawh leh pai-in nogel bek omkhawmin ama khialhna na lak in. Na thu hong man leh nang lamah na sanggampa na zo hi. 16 Ahi hangin na thu hong man nop kei leh ‘teci nih hiam thum hiam a om ciangin thu khempeuh thukip suak’d ahi manin midang khat hiam nih hiam zawnin na pai kik in. 17 Amaute thu a man nop kei lai leh pawlpi na ko in; pawlpite thu a man nop kei lailai leh, lawkipa ahikeh siah dongpa bang lelin na koih in. 18 "Thutak kong geninah, leitungah na hen peuhpeuh vantungah kihen dingae, lei tungah na phel peuhpeuh vantungah kiphel dingf hi. 19 "Kong genbeh lai-inah, leitungah note nih kithukima na nget peuhpeuh uh vantunga om ka Pa in hong pia ding hi. 20 Ahang in, keima minin nih le thum a kikhop leh amaute tawh tua munah ka om hi,” a ci hi. 21 Tua ciangin Jesu kiangah Peter va pai a, “Topa aw, ka sanggam khat ka tungah hong mawh leh bangzah vei ciang ka maisak ding hiam? Sagih vei ciang dong hiam?” ci-in a dong hi. 22 Jesu in, “Sagih vei ciang bek hi lo, sawm sagih mun sagihg vei ciang dong maisak in, kong ci hi. 23 "Tua hi-a vantung gam in ama na semte sum ciamtehna a sittel nuam kumpipa tawh kibang hi. 24 Tua sum ciamtehna a sittel ciangin talenth tulsawm a bapa ama kiangah a paipih uh hi. 25 A sum bat pia zo lo ahi manin a leiba loh nadingin a zi a tate le a neihsa khempeuh zuak dingin a pu in thu a pia hi. 26 "Tua nasempa a pu mai-ah khukdin in, ‘Hong thuak keikai lai in. A vekpi-in kong loh ding hi,’ ci-in a thum hi. 27 Tua ciangin a pu in amah hehpih a, a leiba khempeuh maisak in a khah hi. 28 "Ahi hangin tua nasempa a paikhiat ciangin ama tunga denariii zakhat a ba a naseppihte khat a mu hi. Amah pumbawh in a gawl meka, ‘Nong sum bat hong loh meng in,’ ci-in a siik hi. 29 "A lawmpa zong khukdin a, ‘Hong thuak keikai lai in; kong loh na ding hi,’ ci-in a thum hi. 30 "Ahi hangin a ut kei hi. A ut sangsikin paikhia-a a leiba teng a loh khit matengin tuapa thong sungah a khum hi. 31 Nasem dangte in tua thu teng a muh uh ciangin lungdong mahmah uh a, pai-in thu piang teng khempeuh a pu uh a ko uh hi. 32 "Tua ciang a pu in inn sungah tua nasempa sama, ‘Nasem tatsiapa aw, nong thum manin na leiba teng kong maisak hi. 33 Nang kong lainat bang tektekin na naseppihpa tungah na hih ding hi lo hiam?’ ci hi. 34 A pu heh lua ahi manin a bat khempeuh a loh khit matengin tua nasempa a kigawt dingin thong ukte khut sungah a pia hi. 35 "No zong na lungsim takpi uh tawh na sanggamte uh mawhna na maisak kei uh leh vantunga om ka Pa in hih bangin note tung ciatah hong hih ding hi,” a ci hi.

Mathai 19

1 Jesu in hih thu teng a gen khit ciangin Galilee gam nusia in Jordan gal khat lam Judea kualah a pai hi. 2 Mihon tampi in amah zui uh a, tua munah amaute a damsak hi. 3 Amah zia-et dingin Pharisee-te pawlkhat va pai uh a, “Thu khat peuhpeuh hangin pasal in a zi a mak ding thukham tawh a kituak hiam?” ci-in a dong uh hi. 4 Jesu in, “‘A kipatcilin Piangsakpa in numei le pasal a bawl hi,’a cih thu leh 5 ‘Hih thu hangin pasal in a nu a pa nusia in a zi tawh kigawm dinga, amau gel sa khat a suak ding uh hi,’b cih thute sim ngei lo na hi uh hiam? 6 Tua hi-a amaute nih hi loin khat ahi hi, tua ahi ciangin Pasian in a gawmsate mihing in khen kei ta hen,” a ci hi. 7 Amaute in, “Tua ahileh, ‘Mikhat in a zi a makna lai pia henla, a zi nawkiksak ta hen,’ ci-in bang hangin Moses in thu pia ahi hiam?” ci-in a dong uh hi. 8 Jesu in, “Note na lungtang uh khauh lua ahi manin, zi na mak theih nadingun Moses in phalna hong pia hi. Ahi hangin a cila kipan hih bang a hi kei hi. 9 Ken kong geninah, ang kikawmsanna hang longal a zi ma a numei dang a tenpih peuhmah, angkawm a suak hi,” ci-in a dawng hi. 10 Nungzuite in ama kiangah, “Nupa kal thu hih bang ding ahileh kuamah kitenpih loh ding hoihzaw hi,” a ci uh hi. 11 Jesu in, “Amau tunga kipiasate simloh kuamah in hih thuhilhna a sang thei kei ding uh hi. 12 Ahang in, mi pawlkhatte gehsa in a suak uh hi; pawlkhatte ahileh mite geh ahi hi; adang pawlkhatte in vantung gam hangin kuamah a tenpihc kei uh hi. Hih thu a sang thei peuh in san ding ahi hi,” a ci hi. 13 Tua ciangin amaute tungah khut ngasak ding le amau ading thu a ngensak dingin Jesu kiangah naupangnote a kipaipih hi. Ahi hangin nungzuite in tua a paipihte a tai uh hi. 14 Jesu in, “Naupangnote ka kiangah hong paisak un. Amaute dal kei un. Vantung gam i cih, hih bangte aa ahi hi,” a ci hi. 15 Amaute tungah a khutte a ngak khit ciangin tua mun pan a paikhia hi. 16 Tua laitakin Jesu kiangah mi khat va pai a, “Sia aw, nuntak tawntungna ka ngah theih nadingin a hoih bang ka sem ding hiam?” ci-in a dong hi. 17 Jesu in, “A hoih thu bang hangin kei hong dong na hi hiam? Mi hoih Khat bek a om hi. Nuntakna na ngah nop leh thupiakte zui in,” a ci hi. 18 Tua mipa in, “Koite hiam?” ci-in a dong hi. Jesu in, “‘Tual that kei in; angkawm kei in; gu kei in; zuau teci pang kei in; 19 na nu na pa pahtawi in;d nang le nang na ki-it bangin na vengte it in,’”e a ci hi. 20 Tua khangnopa in, “Hih teng ka zuih zawhsa ahi hi. Bang ka sam lai hiam?” a ci hi. 21 Jesu in, “Na hoihkim nop leh pai-in, na neihsa khempeuh zuak inla mizawngte na pia in. Tua hileh vantungah gou na nei ding hi. Tua khit ciangin hong pai inla ka nung hong zui in,” ci-in a dawng kik hi. 22 Khangnopa in hih thu a zak ciangin hau mahmah ahi manin lungsi dedu-in a paikhia hi. 23 Tua ciangin Jesu in nungzuite kiangah, “Thutak kong geninah, mihaute vantung gam a lut zawh nading a haksa mahmah hi. 24 Kong gen kik inah mihau khat Pasian gam a lut ding sangin Kala-oh khat phim bilvangah a thawl ding baihzaw ding hi,” a ci hi. 25 Nungzuite in hih thu a zak uh ciangin lamdang sa mahmah uh a, “Tua himawk leh kua kihonkhia zo peuhmah ding hiam?” a ci uh hi. 26 Jesu in amaute en a, “Hih thu mihing in hih thei lo hi. Ahi hangin Pasian in na khempeuh hih thei hi,” a ci uh hi. 27 Peter in, “Kote in na khempeuh nusia in nang kong zui uh hi! Tua ahileh ko bang ka lemlawh ding uh hiam?” ci-in a dong hi. 28 Jesu in amaute kiangah, “Thutak kong geninah, na khempeuh a kibawl thak hun, Mihing Tapa ama kumpi tokhom minthang tungah a tut ciangin keima nung hong zui note zong kumpi tokhom sawm le nih tungah tuin, Israel mi beh sawm le nihte tungah thu na khen ding uh hi. 29 Keima hangin a inn, a lo, a sanggamnu, a sanggampa, a nuf, a pa le a tate a nusia peuhmah in, a zah zakhat ngahin nuntak tawntungna zong a luah ding hi. 30 Ahi hangin a masate tampi nunung ding uh a, a nunungte tampi a masa ding uh hi.

Mathai 20

1 "Vantung gam in, ama lenggui lo a nasem ding mi cial dingin zing tunga kuankhia lo-neipa tawh kibang hi. 2 Nitha denarii khat piak dingin a thukim khit uh ciangin a lenggui lo ah a kuansak hi. 3 "Nai thumna pawl ciangin amah paikhia a, sumzuakna muna bangmah sem lo-a ding mawkmawk midangte a mu hi. 4 Amaute kiangah, ‘No zong pai unla ka lenggui lo ah na va sem un; thaman a kituak zah kong pia ding hi,’ ci hi. 5 Tua ciangin amaute a kuan uh hi. “Nai gukna pawl le nai kuana pawl ciangin paikhia leuleu a, tua mah bangina hih hi. 6 Nai sawm le khatna pawl a sat ciangin paikhia kik leuleu a, a ding mawkmawk mi pawlkhat a mu lai hi. Amaute kiangah, ‘Bang hangin bangmah sem loin sun nilohin ding mawkmawk na hi uh hiam?’ ci-in dong hi. 7 "Amaute in, ‘Kuamah in ko hong cial lo hi,’ ci-in dawng uh hi. “Amah in amaute kiangah, ‘No zong pai unla ka lenggui lo ah na va sem un,’ ci hi. 8 "Nitak lam ciangin loneipa in a sum kempa kiangah, ‘Na sem teng sam inla a kicial nunung pente pan panin a masa pente dong a thaman uh pia in,’ ci hi. 9 "Nai sawm le khat pawla kicial nasemte pai uh a, denarii khat ciat a ngah uh hi. 10 A kicial masate a pai uh ciangin a tamzaw ngah dingin a kilamen uh hi. Ahi zongin denarii khat ciat mah ngah veve uh hi. 11 Tua banga a ngah uh ciangin loneipa a phunsan uh hi. 12 ‘Hih na cial nunung pente in nai khat sung bek na sem napi, nisa thuaka na hampi teng a sem kote tawh nong kikimsak hi,’ ci-in gen uh hi. 13 "Ahi hangin loneipa in tua nasemte laka khat kiangah, ‘Lawm aw, nang tungah a kilawm lo-a ka tatna a om kei hi. Denarii khat thalawh ding na thukimsa hi lo ahi hiam? 14 Na sum la inla ciah in. Ka cial nunung penpa zong nang kong piak zah mah ka pia nuam hi. 15 Keima sum ka ut bangin zek thei hi lo ka hi hiam? Ahikeh ka citnate hong haza na hi hiam?’ ci hi. 16 "Tua ahi ciangin a nunungte masa dinga a masate a nunung ding hi,” a ci hi. 17 Jerusalem ah Jesu a pai toh laitakin nungzui sawm le nihte tuam tonpih a, amaute kiangah, 18 "Jerusalem ah i paito dinga, siampi makaite le thukham siate tungah Mihing Tapa kilehhek ding hi. Amaute in amah mawhpaihin sihna thuaksak ding uh hi. 19 Tua ciangin selpho ding, sat ding le kilhlup dingin Gentile-te khutah amah a piakhia ding uh hi. A ni thum ni ciangin kihing kiksak ding hi!” ci-in a gen hi. 20 Tua ciangin Jesu kiangah Zebedee tapate nu, a tapate tawh va pai-in khukdina, a angvan ding a ngen hi. 21 Jesu in, “Bang deih na hi hiam?” ci-in a dong hi. Amah in, “Na gam sungah hih ka tapate gel khat na taklamah khat na veilamah a tut theih nadingun thu hong pia in,” a ci hi. 22 Jesu in amaute kiangah, “Nong nget uh na thei kei uh hi. Ka dawn ding hai na dawn thei ding uh hiam?” a ci hi. Amaute in, “Ka dawn thei ding uh hi,” ci-in a dawng uh hi. 23 Jesu in amaute kiangah, “Kei hai panin na dawn takpi ding uh hi. Ahi hangin ka taklam ahi a, ka veilam ahi zongin kei piak theih ahi kei hi. Ka Pa in tua munte ah a tu dinga a sehkholhsate ading bek ahi hi,” a ci hi. 24 Nungzui sawmte in hih thu a zak uh ciangin tua unau nihte tungah a lungkim kei uh hi. 25 Jesu in a vekun sama, “Gentile-te a gam-ukte uh, a nuai-ate tungah kiliansak uh a, a uliante uh amau tungah kithuneisak uh hi. 26 Note tua bang na hi kei uh hi. Note lakah a lian nuam peuhmah na nasem uh hi ding hi. 27 Note lakah mapi ahi nuam peuhmah na sila uh hi pelmawh ding hi. 28 Mihing Tapa, midangte ama na a semsak dinga hong pai hi lo, midangte ading nasem ding le mi tampi tat nadinga ama nuntakna a pia dingin hong pai ahi hi,” a ci hi. 29 Jesu le a nungzuite in Jericho a nusiat uh ciangin mi tampi in amah a zui uh hi. 30 Lamgei-a tu mittaw nih in Jesu in tua lai tawn cih a zak uh ciangin, “Topa David Tapa aw, kote hong lainat in!” ci-in a kiko uh hi. 31 Mihonpite in amaute tai-in daitaka a om nadingun a gen uh hi. Ahi hangin amaute in, “Topa David Tapa aw, kote hong lainat in,” ci-in a kinak ko semsem uh hi. 32 Jesu khawlin amaute sama, “Bang kong hihsak ding deih na hi uh hiam?” ci-in a dong hi. 33 Amaute in, “Topa aw, khua ka mu thei nuam uh hi,” ci-in a dawng uh hi. 34 Jesu in amaute khuatuah mahmah a, a mit uh a lawnsak hi. Amaute in khua mu theipah lian uh a, a nung a zui uh hi.

Mathai 21

1 Amaute Jerusalem zuanin pai uh a, Olive Vum tunga om Bethpage a tun uh ciangin Jesu in a nungzuite nih a mapaisak hi. 2 Jesu in amaute kiangah, “Mai-a khuaah pai le uh cin laapi khat a kikhihsa-a om na mu pah ding uh hi; a no zong a gei-ah om ding hi. A nuta in sut unla hong paipih un. 3 Mi khatpeuh in bang khatpeuh hong cih leh, Topa in a deihna om hi; hong puak kikpah ding hi,’ ci-un,” ci-in a sawl hi. 4 Kamsangpa tungtawna kigen: 5 "En un, na kumpipa uh, lungsim niam tawh, laapi tung le, a kituang nai lo laano, laapi ta laano tungah, tuangin note kiangah hong pai hi,’ ci-in Zion Tanu kiangah na gen in,”a cih thu a tangtunna-in hih thu a piang ahi hi. 6 Nungzuite pai uh a, Jesu hilh bangin a hih uh hi. 7 Laapi le laano paipih uh a, a tungah a puantualpite uh phahin Jesu in tuate a tutphah hi. 8 Mihonpite in a puantualpite uh lampi ah a phah uh hi. Pawlkhatte in singhiangte khiakin lampi ah a phah uh hi. 9 A nung le a mai-a pai mihonpite in, “David Tapa tungah Hosanna!b “Topa mina hong paipa in thupha a ngah hi!”c “A sang penna munah Hosanna!”d ci-in a awng uh hi. 10 Jerusalem ah Jesu a lut ciangin khuazangpi-in linglawng henhan uh a, “Hih pa kua ahi hiam?” a ci uh hi. 11 Mihonpite in, “Galilee gam Nazareth pana kamsangpa Jesu hi,” ci-in a dawng uh hi. 12 Biakinnpi huang sungah Jesu lut a, tua lai-a sumleite le sumzuakte khempeuh a hawlkhia hi. Sumkhengte sabuaite le vakhuzuakte tutphahsaute a sawn thalsak hi. 13 Amaute kiangah, “‘Ka inn, thungetna inn kici ding hi,’e ci-in ‘kigelh’ hi. Ahi hangin note in ‘misuamte kuapi’f na suaksak uh hi,” a ci hi. 14 Biakinnpi-a ama kiangah mittawte le khelbaite va pai uh a, amaute a damsak hi. 15 Ahi hangin siampi makaite le thukham siate in, a nalamdang bawlte mu uh a biakinnpi huang sungah, “David Tapa tungah Hosanna,” ci-a naupangte otna a zak uh ciangin a lungkim kei uh hi. 16 Amaute in, “Hih naupangte gen na za hiam?” ci-in a dong uh hi. Jesu in, “Za mah ing, ‘Naupangnote le naungekte muk pan phatna a ginkhiat ding, nangma sehkholhsa ahi hi,’g cih thu sim ngei lo na hi uh hiam?” a ci hi. 17 Tua ciangin amaute nusia-in tua khuapi panin Bethany ah pai-a tua lai-ah a giak hi. 18 Zingsang tungin khuapi zuana a ciah kik leh a gil kial hi. 19 Lampi gei-ah theikung khat a muh ciangin a zuan to hi. Ahi hangin theikung tungah a teh longal bangmah a mu kei hi. Tua ciangin, “Gah nawn peuhmah kei in!” a cih leh thei kung a dinggaw pah hi. 20 Nungzuite in hih a muh uh ciangin lamdang a sa uh hi. Amaute in, “Bangci a theikung dinggaw pah mawk ahi hiam?” ci-in a dong uh hi. 21 Jesu in, “Thutak kong geninah, lunghei loin upna na neih nak uh leh theikung tunga kihih bang hih thei bek tham loin hih mualpi kiangah, ‘Pai inla tuipi sungah nang le nang kipai in,’ ci le uh cin, na cih bangun piang ding hi. 22 Na up nak uh leh thungetna-a na nget peuhpeuh uh na ngah ding uh hi,” a ci hi. 23 Biakinnpi tualah Jesu luta thu a hilh laitakin siampi makaite le mipite’ upate a kiangah va pai uh hi. Amaute in, “Bang thuneihna tawh hihte hih na hi hiam? Hih thuneihna kua hong piak hiam?” ci-in a dong uh hi. 24 Jesu in, “Kei zong khat kong dong ding hi. Nong dawn uh leh bang thuneihna tawh hihte hih ka hi hiam, cih kong gen ding hi. 25 Johan baptisena koi pana hong kipan ahi hiam? Vantung pan hiam, mihing tung pan hiam?” a ci hi. “‘Vantung pan hi,’ ci leng, ‘Tua ahileh bang hangin amah um lo na hi uh hiam?’ hong ci ding hi. 26 ‘Mihing tung pan hi,’ ci leng lah Johan pen kamsang khatin sang uh ahi manin mipite i kihta zel hi,” ci-in amaute a kikum uh hi. 27 "Tua ahi ciangin, “Ka thei kei uh hi,” ci-in a dawng uh hi. Tua ciangin Jesu in, “Ken zong bang thuneihna tawh hihte ka hih cih kong gen kei ding hi. 28 "Bang na ci ngaihsut uh hiam? Tapa nih a nei mi khat a om hi. Khat kiangah pai masa a, ‘Ka ta aw, tu ni-in lenggui lo ah va kuan inla na va sem in,’ ci-in sawl hi. 29 "A tapa in, ‘Kuan kei ning,’ ci hi. Ahi hangin a den ciangin a lungsim khela a kuan hi. 30 "Tua ciangin a tapa dang khat kiangah pai-a tua mah bangin a sawl hi. A tapa in, ‘Pa aw, va kuan ning,’ ci napi a kuan kei hi. 31 "Tua nihte kua zaw in a pa deihna bangin hih ahi hiam?” a ci hi. Amaute in, “Amasa pen in,” a ci uh hi. Jesu in amaute kiangah, “Thutak kong geninah, siahdongte le numei kizuakte in vantung gam hong lutsan ding uh hi ta hi. 32 Note kiangah thumaanna lampi lak dingin Johan hong pai hangin na um kei uh a, ahi zongin siahdongte le numei kizuakte in a um uh hi. Hih thu na muh khit ciang nangawnun kisikin na um tuan kei uh hi. 33 "Gentehna dang khat na ngai un: Lenggui a cing loneipa khat a om hi. Amah in a kimkotah dai kai-a, lengtui sukna khuk khat to-in tausang khat a dawh hi. Tua khit ciangin a lenggui lo, lokho pawlkhat a khawhlawhsak hi. Tua ciangin khual a zinsan hi. 34 A lak hun a tun ciangin lenggah khawm dingin lo-khawh-lawhte kiangah a nasemte a sawl hi. 35 "Lo-khawhlawhte in nasemte man uh a, khat sat, adang khat thatin, a thumna a deng uh hi. 36 Tua ciangin a sawl masakte sangin nasem tamzaw a paisak hi. Lo-khawhlawhte in tuate zong a masate mah bangin a bawl uh hi. 37 A tawpkhakna ah, ‘Ka tapa na zahtak buang ding uh hi,’ ci-in a tapa a paisak hi. 38 "Ahi hangin lo-khawhlawhte in tua a tapa a muh uh ciangin, ‘Hih pa a innluahpa ahi hi. Hong pai un, amah thatin a luah ding teng tang ni,’ kici uh hi. 39 Tua ciangin amah manin dai pua-ah kaikhia uh a, a that uh hi. 40 "Tua ahi ciangin loneipa a pai ciangin tua lo-khawhlawhte bang a ci bawl ding hiam?” ci-in a dong hi. 41 Amaute in, “Siatna khukah tua migentheite tun dinga, an lak ciangin loneipa tan ding zah a pia ding lo-khawhlawh dangte a khosak ding hi,” ci-in a dawng uh hi. 42 Jesu in amaute kiangah, “Laisiangtho sungah: “‘Inn lamten a nilkhiat suang, inntungkhum suang a suak hi;h hih thu Topa hih hi-a, eite mitmuh in a piandang hi,’i cih thu sim ngei lo na hi uh hiam? 43 "Tua ahi ciangin ken kong geninah, note kiang pan Pasian gam kilakhia dinga, ama gah a gahsak ding mite khutah kipia ding hi. 44 Hih suang tunga a puk peuhmah kitamzan dinga, ahi hangin hih suang in a delhkhakte peuhmah a zancim ding hi,”j a ci hi. 45 Siampi makaite le Pharisee-te in Jesu gentehnate a zak uh ciangin amau a genna ahilam a thei uh hi. 46 Amah mat theih nading lampi zong uh a, ahi hangin mipite in Jesu kamsangin sang uh ahi manin mihonpite a kihta uh hi.

Mathai 22

1 Jesu in gentehnate zangin amaute tungah gen kik a: 2 "Vantung gam in, a tapa ading mopawi bawl kumpipa tawh kibang hi. 3 A khohsate sam dingin a nasemte a sawl hangin a khohsate a hawh nuam kei uh hi. 4 "Tua ciangin nasem dangte sawlbeh a, ‘Nitak-an min khin ta hi: Ka bawngtalte le ka bawng vakthaute kigo zo a, na khempeuh kiman ta hi. Mopawi hong siim ta un,’ ci-in a khohsate kiangah a gensak hi. 5 "Ahi hangin amaute in awlmawh lo uh a, khat in lo kuansan in, adang khat in a sumbukah paisan hi. 6 Tua lo teng in a nasemte man uh a, bawlsia in a that uh hi. 7 Kumpipa a lungso hi. A galkapte sawla, tua tualthatte thatsakin a khuapi uh a haltumsak hi. 8 "Tua ciangin a nasemte kiangah, ‘Mopawi ankuang kilui ta hi. Ahi hangin ka khohsate lah hong hawh dingin a kilawm kei hi. 9 Kongzing lakah va pai unla, na muh peuhpeuh uh hong sam un,’ ci-in sawl hi. 10 Tua ciangin nasemte kongzing tengah pai kawikawi uh a, misia mipha a muh peuhpeuh uh a khawm uh hi. Tua ciangin mopawi bawlna innpi dimin a kisamte a om uh hi. 11 "Ahi hangin a kisamte en dingin kumpipa a tum ciangin mopi puan silh lo mi khat a mu hi. 12 Amah in tuapa kiangah, ‘Lawm aw, mopi puan silh lopi-in hih lai-ah bangci lut theih na hi hiam?’ ci-in dong hi. Tuapa in a gen ding a thei kei hi. 13 "Tua ciangin kumpipa in a sawltakte kiangah, ‘A khut a khe hen unla, kahna le hagawina a omna mun pualam khua mialna-ah paikhia un,’ ci-in a sawl hi. 14 "A kisamte tampi ahi hangin a kiteelte tawmkha ahi hi,” a ci hi. 15 Tua ciangin Pharisee-te paikhia uh a, ama kammalte pan a awk theih nadingin a geel uh hi. 16 Amaute in a nungzuite uh le Herod pawlte a kiangah a sawl uh hi. Tuate in, “Sia aw, mi thutak khat na hi-a, Pasian thutak tawh kituakin na hilh cih kong thei uh hi. Amaute hina en lo na hi manin kuama thu-in na gamta kei hi. 17 Tua hi-a Caesar tungah siah piak tuak hiam, piak tuak lo, cih na ngaihsutna hong gen dih in,” ci-in a dong uh hi. 18 Ahi hangin Jesu in amaute ngimna khel a theih ciangin, “No kineihsiamte aw, bang hangin kei hong thangsiah na hi uh hiam? 19 Siah-a kipia sumtang hong lak dih un,” a ci hi. Amaute in denarii tang khat a lak uh hi. 20 Tua ciangin Jesu in, “Hih kua lim hi-a hih kua min ahi hiam?” ci-in a dong hi. 21 Amaute in, “Caesar aa ahi hi,” a ci uh hi. Tua ciangin amah in amaute kiangah, “Caesar aa-te Caesar pia unla, Pasian aa-te Pasian na pia un,” a ci hi. 22 Amaute in hih thu a zak uh ciang- in lamdang a sa uh hi. Tua ciangin amah nusia in a paikhia uh hi. 23 Tua ni mah in: Thawhkikna om lo hi, a ci Sadducee-te Jesu kiangah thu dong dingin va pai uh hi. 24 Amaute in, “Sia aw, Moses in, ‘Ta nei man lo-a si pisal khatpeuh a om leh a sanggampa in a u zi luah henla, ta neihsak hen,’ ci-in gen hi. 25 Tu-in ko lakah unau pasal sagih a om hi. A u pen in zi nei-a, ta nei man loin si ahi manin a sanggampa adingin a zi a nusiat hi. 26 Tua bangin a nihna, a thumna, a banbanin a sagihna dong a kibangin hi suksuk hi. 27 A tawp khakna ah tua numei si hi. 28 Tua ahileh tua numei in, unau pasal sagihte tenpih kim ahi ciangin, thawhkik hun teh amah kua pen zi hi ding hiam?” ci-in a dong uh hi. 29 Jesu in, “Note in Laisiangtho ahi zongin, Pasian vangliatna ahi zongin thei lo na hi manun na khial uh hi. 30 Thawhkik ni ciangin mopina le mo khakna a om kei ding hi; mite, vantungah vansawltakte bang ding uh hi. 31 Ahi hangin misite thawhkikna tawh kisai-in Pasian in note kianga a gen, 32 ‘Keimah in Abraham’ Pasian, Issac’ Pasian le Jacob’ Pasian ka hi hi’a cih thu sim ngei lo na hi uh hiam? Amah in a site Pasian hi lo, a hingte Pasian ahi hi,” a ci hi. 33 Mihonpite in hih thu a zak uh ciangin a thuhilhna lamdang a sa uh hi. 34 Jesu in Sadducee-te a daihsak lam Pharisee-te in a theih uh ciangin a kikaikhawm uh hi. 35 Amaute lakah thukham a thei mahmah khat in a zia-etna in, 36 "Sia aw, Thukham lakah koi pen thupiak lianpen ahi hiam?” ci-in a dong hi. 37 Jesu in, “Na Topa Pasian na lungsim khempeuh, na hinna khempeuh le na ngaihsutna khempeuh tawh it in.’b 38 Hih thupiak a masapen le a lianpen ahi hi. 39 A nihna in, ‘Nang le nang na ki-it bangin na vengpa it in,’ cih ahi hi.c 40 Thukham le Kamsangte thu khempeuh, hih thupiak nihte tung pana mengkhia ahi hi,” ci-in a dawng hi. 41 Pharisee-te a kikhopkhawm laitak un Jesu in amaute kiangah, 42 "Khristd bangin na ngaihsun uh hiam? Amah kua tapa ahi hiam?” ci-in a dong hi. Amaute in, “David tapa ahi hi,” a ci uh hi. 43 Amah in amaute kiangah, “Tua ahileh bangci a David in Kha tawh thu genin amah ‘Topa’ ci thei ahi hiam? 44 "‘Topa in ka Topa kiangah: Na galte khempeuh na khenuai ah ka koih matengin ka taklamah na tu-in,’”e na ci hi. 45 Tua hi-a amah David in Topa ci ahileh ama tapa bangci hi thei ding ahi hiam?” a ci hi. 46 A dawng kik thei khat bek om lo uh a, tua ni-a kipan kuamah in bangmah a dong ngam nawn kei uh hi.

Mathai 23

1 Tua ciangin mihonpite le a nungzuite kiangah Jesu in, 2 "Moses tutphahah thukham siate le Pharisee-te a tu uh hi. 3 Tua ahi ciang in amau thu na mang unla, amau hong gen khempeuh na hih un. Ahi hangin amaute in a hilh bangun hih lo uh ahi manin amau hih bangin na hih kei un. 4 Amaute in vangik pipi lomhenin mite liangko ah suan uh hi. Ahi hangin tuate khin nadingin a khutme nangawn uh a tangsak nuam kei uh hi. 5 "Amaute hih peuhmah mite muh ding deihin a hih uh hi: Amaute in a phylact-tea uh liansak in, a thunget puante uh a mongtep a sausak uh hi. 6 Pawi bawlna ah a kipahtawi mun le synagogue-te sunga tutna thupipente ah tu nuam diak uh hi. 7 Vanzuakna munte ah pibawl ding le ‘Rabbi’ ci-a mite sap ding a ut se uh hi. 8 "Ahi zongin note ‘Rabbi’ a kici ding na hi kei uh hi. To khat bek nei na hi manun na vekun unau khat na hi uh hi. 9 Vantunga om Pa khat bek nei na hi manun, leitungah kuamah ‘pa’ na ci kei un. 10 Sia khat na nei uh a, amah Khristb ahi manin ‘sia’ cih ding kuamah na om kei uh hi. 11 Note lakah a lianpen note nasem hi ding hi. 12 Ahang in, amah leh amah a kitawisangte kiniamsak dinga, amah le amah a kiniamsakte kitawisang ding hi. 13 "No kineihsiam thukham siate le Pharisee-te, gimna nak thuak na nu cia! Note in mite mai ah vantung gam kongkhak na khak uh hi. No lah lut loin a lut nuamte lah na lutsak kei uh hi.c 14 No kineihsiam thukham siate le Pharisee-te gimna nak thuak na nu cia! Note in meigongte innte na netum uh a, mi theih dingin thu sau pipi na ngen uh hi. Tua ahi manin note a nasiazaw in hong kigawt ding hi. 15 "No kineihsiam thukham siate le Pharisee-te gimna nak thuak na nu cia! Note in mi khat na khel zawh nadingun leitung le tuitungah na zin kawikawi uh hi. Amah hong kikhel ciangin no zah nihvei-in hell tapa na suaksak uh hi. 16 "No mittaw lamhilhte, gimna nak thuak na nucia! Note in, ‘Mi khatpeuh biakinnpi-in a kitomlawh leh phamawh lo hi. Ahi hangin biakinnpi sunga khamte-in a kitomlawh leh ama kiciamna in amah a hen hi,’ na ci uh hi. 17 No mittaw mihaite aw! Tua khamte thupizaw ahi hiam? Ahi kei leh tua khamte a siangthosak biakinnpi thupizaw ahi hiam? 18 ‘Mi khatpeuh biakna-tau-in a kitomlawh hangin pha mawh lo hi. Ahi zongin biakna-tau tunga om nate tomlawhna-a a zang peuhmah ama kiciamna in a hen hi,’ na ci uh hi. 19 No mittawte aw! Biakna-tau tunga nate le tua nate a siangthosak biakna-tau koi thupizaw ahi hiam? 20 Tua ahi manin biakna-tau-a tomlopa tua biakna-tau le a tunga om nate khempeuhin a tomlo suak hi. 21 Biakinnpi-a tomlo mi, tua sunga tengpa tawh tomlo a suak hi. 22 Vantung tawh a tomlote Pasian tokhom le a tunga tupa-in a tomlo suak hi. 23 "No kineihsiam thukham siate le Pharisee-te, gimna nak thuak na nu cia! Note in na masalate uh, mint, dill le cummin-te, sawmah khat na pia uh hi. Ahi hangin thukham tawh kisai-a a thupizaw, thutangna, lainatna le muanhuainate na thudon kei uh hi. Amasa thudon lo tuan loin a nunungte na hih ding uh ahi hi. 24 No mittaw lamhilhte aw! Note in thovai om loh nadingin tui na khaih uh hangin kala-ohe na nawmvalh uh hi. 25 "No kineihsiam thukham siate le Pharisee-te, gimna nak thuak na nu cia! Note in hai le kuangte a pualam na silsiang uh a, ahi hangin a sungah duhgawlna le angsung khualna tawh kidim hi. 26 Pharisee mittawte aw! Hai le kuang a sunglam silsiang masa un. Tua ciangin a pualam a siang ding hi. 27 "No kineihsiam thukham siate le Pharisee-te, gimna nak thuak na nu cia! Note, a pualam etlawm napi a sungah misi guh le nin kihhuai khempeuh a dim a kanga kizut hante tawh na kibang uh hi. 28 Tua mah bangin mite muhna ah na pualam uh a thumaan a bat hangin na sung uh kineihsiamna le kheltatna tawh a dim hi. 29 "No kineihsiam thukham siate le Pharisee-te, gimna nak thuak na nu cia! Note in kamsangte han bawlsak in, a dikte aa na zem uh hi. 30 Tua ciangin, ‘I pu i pa-te khan lai-in eite om hi lehang kamsangte a sisan suah amaute lakah kihel buang kei ni,’ na ci uh hi. 31 Tuaci-in kamsangte a thatte suan le khak na hihna uh no le no in na langsak uh hi. 32 Tua ahileh na pu na pa-te uh mawhna tehna dimsak vet ve ua! 33 "No gulte! No gul gilo mualtan suante! Note meili sung tun nading mawhpaihna pan bangci suahtak thei ding na hi uh hiam? 34 Tua ahi ciangin note kiangah kamsangte, mipilte le siate kong sawl hi. Amaute pawlkhat thatin, pawlkhatte na kilhcip ding uh hi. Adangte synagogue-te sungah na sat ding uh a, khuapi khat pan khuapi khatah na delh kawi kawi ding uh hi. 35 Tua bangin mi thumaan Abel sisan-a kipan biakinnpi le biakna-tau kikala na thah uh Berakiah tapa Zechariah sisan dong, leitunga mi thumaante sisan khempeuh no tungah hong tu ding hi. 36 Thutak kong geninah, hihte khempeuh hih khang mite tungah a tung ding hi. 37 "Jerusalem aw, Jerusalem, kamsangte thata, na kianga hong kisawlte suang tawh a deng note, akpi in a note a kha nuai-ah a khop bangin na tate ka kaihkhop ding bangzah vei lunggulh ta ka hi hiam, ahi hangin na ut kei uh hi. 38 En un, na inn uh a hawmmangsa in kinusia hi. 39 Ken kong geninah, ‘Topa mina hong paipa in thupha a ngah hi’ na cih matengun kei nong mu kik nawn kei ding uh hi,d” a ci hi.

Mathai 24

1 Biakinnpi nusia-in Jesu a paikhiat laitakin tua innte ensak dingin nungzuite a kiangah a pai uh hi. 2 Jesu in, “Hihte khempeuh na mu uh hiam? Thutak kong geninah, hih taka suang khat tungah suang dang khat beek a kiciang om loin, a vekpi in a kicimmang kiuhkeuh ding hi,” a ci hi. 3 Olive Vum tungah Jesu a tut laitakin a nungzuite ama kiangah a paisim uh hi. Amaute in “Hih thu cik cianga piang dinga, nong pai kik nading le khanghun bei nading lim bang hi ding hiam, hong hilh in,” a ci uh hi. 4 Jesu in, “Note kuamah in hong khem zawh loh nadingin na kigalging un. 5 Keima minin mi tampi hong pai ding uh a, ‘Keimah, Khrista ka hi hi,’ ci-in mi tampi khem ding uh hi. 6 Galthu le galthuthangte na za ding uh hi; ahi hangin na patau nai peuhmah kei un. Tua thute a piang pelmawh ding mah ahi hi. Ahi hangin a beina hi nai lo hi. 7 Minam khat le minam khat kido dinga, gam khat le gam khat a kido ding uh hi. Mun tuamtuamah kialpi tung dinga, zin a ling ding hi. 8 Hihte khempeuh nausuahnat kipatna ahi hi. 9 "Tua ciangin note bawlsiat ding le thah dingin hong kipiakhia dinga, keima hangin minam khempeuh in note hong mudah ding uh hi. 10 Tua hun ciangin mi tampitak in upna taisan dinga, khat le khat kimudah in kilehhek ding uh hi. 11 Kamsang-zuau tampi hong kilangin mi tampi a khem ding uh hi. 12 Tatsiatna khang ding ahi manin mi tampite ki-itna a kiam ding hi. 13 Ahi hangin a bei donga kipte in hotkhiatna a ngah ding uh hi. 14 Tua ciangin mi namkim tungah teci ahi dingin leitung buppi ah kumpi-gam lungdamna-thu kihilh dinga tua khit ciangin beina a tung ding hi. 15 "Tua hi-a kamsangpa Daniel tung tawna kigensa, mun siangtho ah ‘a hawm mangsak kihhuaina’b a din na muh uh ciangin—a simte in theitel ta hen. 16 Judea gama omte mualte tungah tai uh hen. 17 A innkhum tunga omte kuamah inn sungah na khatpeuh la dingin kumsuk kei hen. 18 Lo-a omte kuamah puantualpi la dingin ciah kik kei hen. 19 Naupaiite le naungek nei numeite adingin tua nite mulkimhuai lua na’n cia! 20 Na galtai hun uh phalbi lai le Sabbath ni tawh a kituah loh nadingin thu na ngen un. 21 Ahang in, leitung piancil a kipan tu hun dong tuazah a om ngei lo le a om ngei nawn lo ding lungdonna hong tung ding hi. 22 Tua nite kitomsak lo hileh kuamah a suakta zo kei ding hi. Ahi hangin a kiteel mite cihna-in tua nite kitomsak ding hi. 23 Tua hun ciangin note kiangah mi khatpeuh in, ‘En un, hih lai-ah Khrist om hi! Ahikeh ‘Hua lai-ah om hi,’ hong cih leh um kei un. 24 Ahang in, Khrist-zuaute le kamsang-zuaute hong kilang ding uh a, ahi thei hileh telsate nangawn a khem nadingun lim le na lamdang lianpipite bawl ding uh hi. 25 Thei ta un, hih thute a hun ma-in kong hilh hi. 26 "Tua ahi ciangin note kiangah mi khatpeuh in, ‘Hua gamlakah amah om hi,’ hong cihleh paikhia kei un; ahikeh ‘Inndei sungah amah om hi,’ hong cihleh um kei un. 27 Ahang in, khuaphelep in nisuahna pan nitumna dong a tanzal bangin Mihing Tapa hong pai ciangin tua bang hi ding hi. 28 Gan siluang omna peuhpeuh ah musanete a kikhawm ding uh hi. 29 "Tua lungdonnite khit phetin, ‘ni kimialsak dinga, kha a tang nawn kei ding hi; van panin aksite kiasuk dinga, vana om nate kiling ding hi’c 30 "Tua hun ciangin vanah Mihing Tapa lim hong kilang dinga, leitung a om minam khempeuh a kap ding uh hi. Vangliatna le minthanna lianpi tawh Mihing Tapa vana meii tungah tuanga hong pai amaute in a mu ding uh hi. 31 Amah in ngaihtakin pengkul-a sapna tawh tonin a vansawltak-te a sawlkhia ding hi. Amaute in van mong khat pan mong khat dong huih lite panin a teelsa mite a kaikhawm ding uh hi. 32 "Tu-in hih thute theikung panin na sin un; a hiang menga, a teh a sel ciangin khuakhal nai ta hi, cih na thei uh hi. 33 Tua mah bangin hih nate na muh uh ciangin tua thud kongbiang dongin hong nai ta hi, cih na thei un. 34 Thutak kong geninah, hih thute khempeuh a tun khit mateng hih khange mite a bei kei ding uh hi. 35 Van le lei a mangthang ding hi; ahi hangin ka thute a mangthang ngei kei ding hi. 36 "A ni le a hun kuamah in a thei kei hi; vana om vansawltakte nangawn in a thei kei uh hi. Tapaf in zong thei lo a, ahi hangin Pa bek in a thei hi. 37 Mihing tapa hong pai ding, Noah hun lai mah bang hi ding hi. 38 Tuiciin a tun ma-in gunkuangpi sungah Noah a lut ni dongin mite in ne-in, dawnin, mopi mokha-in a om uh hi. 39 Tui khanga, amaute a lakmang hun mateng bang thu piang ding cih a thei kei uh hi. Mihing Tapa hong pai ciangin zong tua mah bang hi ding hi. 40 Lo khokhawm mi nih, khat kila-in khat kinusia ding hi. 41 An gawi khawm numei nihte khat kila-in khat kinusia ding hi. 42 "Tua ahi ciangin na Topa uh hong pai ding hun thei lo na hi manun na kigalging un. 43 Ahi hangin note in hih thu na theitel un: Inn neipa in zan lai bang hunin gutate pai ding hiam, cih theikhol hileh na kigalging dinga, a inn a kiluhsak kei ding hi. 44 Tua hi-a na lamet loh laitakun Mihing Tapa hong pai ding ahi manin kigingsa in om den un. 45 "Tua ahileh ama inn sunga nasem dangte ukin, amaute a hunhunin an a pia dinga a pu in a koih a muanhuai a pil nasempa kua ahi hiam? 46 A pu a ciah kik ciangin tua banga a sep laitak a tuah nasempa a hampha ding hi. 47 Thutak kong geninah, a pu in tuapa a neihsa khempeuh a saisak ding hi. 48 Ahi hangin tua nasempa mi tatsia khat hi henla, ‘Ka pu sawt veipi hong tam ding hi,’ ci-in 49 a naseppihte satin, zu khamkhamte tawh ne-in dawnkhawm leh a, 50 tua nasempa a pu a upmawhloh ni le a khuadon loh hun laitakin tung leh, 51 tua nasempa a pu in atnenin, kahna le hagawina a omna munah kineihsiamte tawh a koihkhawm ding hi.

Mathai 25

1 "Tua hun ciangin vantung gam in a meivakte uh kengin zineipa dawn dinga kuankhia nungak bit sawmte tawh kibang ding hi. 2 Tuate lakah nga hai-a nga a pil hi. 3 Tua a hai teng in meivak keng napi, meitui a keng kei uh hi. 4 A pilte in ahileh a meivak uh leh thawl sungah meitui a keng uh hi. 5 Zineipa tung hak lua ahi manin a vekun ihmut suakin a ihmu uh hi. 6 "Zankim laitakin, ‘Zineipa hong tung ta hi! Pai-in dawn un!’ ci-in kitangko hi. 7 "Tua ciangin nungak bitte a vekun khanglo uh a, a meivak uh a puah tek uh hi. 8 Nungak hai teng in a pilte kiangah, ‘Ka meivak uh mit hi, na meitui uh hong hawm un,’ ci-in ngen uh hi. 9 "Nungak pilte in, ‘I vek adingin kicing lo ding ahi manin kong hawm zo kei ding uh hi. Tua sangin, pai-in meitui zuakte kiangah no ading va lei un,’ ci uh hi. 10 "Tua bangin meitui lei dinga a pai kalun, zineipa a tung hi. A kigingkholsa nungakte, zineipa tawh mopawi-ah lutkhawm uh hi. Tua ciangin kong kikhak hi. 11 "Tua nung ciangin adangte zong pai uh a, ‘Pu aw! Pu aw, kote kong hong hon in!’ ci uh hi. 12 "Ahi hangin amah in, ‘Thutak kong geninah, note kong thei kei hi,’ ci-in dawng hi. 13 "Tua ahi manin a ni, a hun thei lo na hi manun na kigingkhol un. 14 "Tua ciang leuleu-in, mi khatin a nasemte sama, a neihsa teng amaute khutah a kepsak khit ciangin khual a zinkhia mipa tawh kibang ding hi. 15 Amau hihtheihna ciat tawh kizui-in, nasem khat tungah talenta nga, a dang khat tungah talent nih, adang khat tungah talent khat tua bangin a pia ciat hi. Tua khit ciangin khual a zinsan hi. 16 Talent nga a ngah pa paikhia pah a, summet bawlin a met talent nga a ngah hi. 17 Tua mah bangin talent nih a ngah pa in zong a met talent nih mah a ngah hi. 18 Ahi hangin talent khat a ngah pa paikhia-in lei to-a, a pu sum a phum hi. 19 "Hun sawtpi khit ciangin tua nasemte’ pu ciah kika, amaute sum kepna thu teng a sittel hi. 20 Talent nga a ngah pa in adang nga hong tawi thuah a, ‘Pu aw, kei muanga nong kepsak talent nga ahi hi. En in, hih lai-ah a met nga ka ngah hi,’ ci hi. 21 "A pu in, ‘A hoih a muanhuai nasempa aw, pha hi! Na tawmkha tungah na muanhuai hi; na tampi kong uksak ding hi. Hong pai inla na pu tawh lungdam khawm in!’ ci hi. 22 "Talent nih a ngah pa zong va pai a, ‘Pu aw, kei muanga nong kepsak talent nih ahi hi. En in, a met nih ka ngah hi,’ ci hi. 23 "A pu in, ‘A hoih, a muanhuai na sempa aw, pha hi! Na tawmkha tungah na muanhuai hi; na tampi kong uksak ding hi. Hong pai inla na pu tawh lungdam khawm in!’ ci hi. 24 "Tua ciangin talent khat a ngah pa va pai a, ‘Pu aw, nang mi genhak na hi hi, na vawh lohna munah na at a, khaici na theh lohna munah a kaikhawmpa na hilam ka thei hi. 25 Tua ahi ciangin kong kihta a paikhia-in na talent lei sungah ka sel hi. En in, nang aa teng mah ahi hi,’ ci hi. 26 "A pu in, ‘A tatsia, a thadah na sempa aw! Ka vawh lohna munah atin, khaici ka theh lohna munah ka kaihkhop lam thei takpi na hi hiam? 27 Tua ahileh kong ciah kik cianga a met le a sumpi ka ngah kik theih nadingin bang dinga ka sum, sumsinte na ap lo na hi hiam. 28 "Tua talent khat ama tung pan lakhia unla, talent sawm neipa na pia un. 29 Ahang in, a nei peuhmah kipiabeh dinga, tampitak a nei ding hi. A nei lo peuhmah a neihsun nangawn a kilakkhiatsak ding hi. 30 Kimanna nei lo tua nasempa, kah-na le hagawina a omna mun pualam khuamialna ah paikhia un,’ ci hi. 31 "Mihing Tapa Vansawltakte khempeuh tawh ama minthanna tawh hong pai ciangin, vantung minthanna kumpi tokhom tungah hong tu ding hi. 32 Ama mai-ah mi namkim khempeuh kikhawm dinga, tuucingpa in tuu le keel a tuam khen mah bangin mite a tuamkhen ding hi. 33 Tuute a taklamah koihin keelte a veilamah a koih ding hi. 34 "Tua hun ciangin Kumpipa in a taklama omte kiangah, ‘Ka Pa in thupha hong piaksate aw, hong pai un; leipiansak cil-a kipan no adinga kibawlsa na luah ding uh gam hong luah un. 35 Ahang in, ka gilkial laitakin ka nek ding nong pia uh a, ka dangtak laitakin ka dawn ding nong pia uh hi. Mikhual ka hi laitakin zin nong do uh hi. 36 Puan ka neih loh laitakin nong silhsak uh hi. Ka cinat laitakin nong khoi uh a, ka thong kiat laitakin nong veh uh hi,’ ci ding hi. 37 "Tua ciangin a thumaante in, ‘Topa aw, na gilkial laitak cikin hong mu-a, hong vakin, na dangtak laitak na dawn ding hong pia ka hi uh hiam? 38 Mikhual na hi laitak cikin hong mu-a, zin hong do ka hi uh hiam? Puan na neih loh laitak cikin hong mu-a, puan hong silhsak ka hi uh hiam? 39 Na cinat laitak ahi a, na thongkiat laitak ahi zongin cikin hong mu-a, hong veh ka hi uh hiam?’ ci ding uh hi. 40 "Kumpipa in, ‘Thutak kong gen-inah, hih ka sanggamte a neupen khat adinga na bawlte khempeuh uh kei adinga hong bawl na hi uh hi,’ ci-in dawng ding hi. 41 "Tua khit ciangin a veilam a omte kiangah, ‘Hamsiatna a thuakte aw, kei kiang pan taikhia un, dawimangpa le ama vansawltakte adinga kibawlsa tawntung meikuang sungah pai un. 42 Ahang in, ka gilkial laitakin ka nek ding bangmah nong pia kei uh hi. 43 Mikhual ka hi laitakin zin nong do kei uh hi. Puan ka kisap laitakin nong silhsak kei uh hi. Ka cinat laitak ahi zongin ka thongkiat laitak ahi zongin nong khoi kei uh hi,’ ci ding hi. 44 "Amaute in zong, ‘Topa aw, na gilkial laitak, na dangtak laitak, puan na neih loh laitak, mikhual na hi laitak, na cinat laitak le na thongkiat laitak cikin hong mu-a, hong don lo ka hi uh hiam?’ ci-in dawng ding uh hi. 45 "Amah in, ‘Thutak kong geninah, hihte a neu pen khat adinga na bawl loh khempeuh uh, kei adinga hong bawl lo na hi uh hi,’ ci kik ding hi. 46 "Tua ciangin amaute tawntung gawtna ah pai ding uh a, a thumaante ahi uh leh tawntung nuntakna ah a pai ding uh hi,” a ci hi.

Mathai 26

1 Jesu in hih thu teng a gen khit ciangin a nungzuite kiangah, 2 "Na theihsa bangun tu zawh ni nih khit ciangin Paisan pawi hong tung dinga - Mihing Tapa kilhcip dingin kipia ding hi,” ci-in a gen hi. 3 Tua ciangin Caiaphas kici tulpipa innpi-ah siampi makaite le mipite’ upate a kikhawm uh hi. 4 Tua ciangin amaute in Jesu mansim a thahlup ding a sawmsim uh hi. 5 Ahi hangin, “Mipite hong so kha ding ahi ciangin Pawi sungah hih kei ni,” a ci uh hi. 6 Bethany a Simon kici Miphakpa innah Jesu a om laitakin, 7 a manpha mahmah sathau namtui suangngo thawl khat tawi-in numei khat ama kiangah a pai hi. Sabuai tungah kingama a om laitakin tuanu in a lutungah a sathau namtui a buak hi. 8 Nungzuite in a muh uh ciangin a lungkim kei uh hi. Amaute in, “Pammaih lel hi lo hiam? 9 Hih sathau namtui man tampi-in zuakin a sum mizawngte piak tuak zaw hi,” a ci uh hi. 10 Jesu in a theih ciangin amaute kiangah, “Hih nu bang dinga buaisak na hi uh hiam? Amah in kei tungah a kilawm na hoih khat a hih khin hi. 11 Mizawngte tawh note na omkhawm den ding uh a, ahi hangin kei tawh na omkhawm den kei ding uh hi. 12 Ka pumpi sathau nam-tui hong buah ciangin kei kivui nading a bawlkhol ahi hi. 13 Thutak kong geninah, hih lungdamna-thu a kihilhna leitung mun khempeuh ah amah a kiphawk gige nadingin ama hihsa thu zong a kigen ding hi,” a ci hi. 14 Tua ciaingin sawm-le-nihte lakah khat - Judas Iscariot kici pa siampi makaite kiangah va pai a, 15 "Amah note khutah hong pia leng, kei bang nong pia ding uh hiam?” ci-in a dong hi. Tua ciangin amaute in sumtang sawm thum a sehkhia uh hi. 16 Tua huna kipan Judas in amaute khutah Jesu a piak theih nading hun hoih a ngak gige hi. 17 Silngo sawh loh Anlum Pawi ni masa pen ni-in Jesu kiangah nungzuite va pai uh a, “Paisan-pawi an nek nading koi lai-ah na bawlkhol le ung na deih hiam?” ci-in a dong uh hi. 18 Amah in, “Khuapi sunga mi khat kiangah, ‘Siapa in: “A kisehsa ka hun tung dek ta hi. Ka nungzuite tawh na innah Paisan-pawi kong bawl ding uh hi, ci hi,’ va ci un,” ci-in a dawng hi. 19 Tua ciangin nungzuite in Jesu cih bangin Paisan-pawi bawl nading a bawlkhol uh hi. 20 A nitak ciangin, Sawm-le-nihte le Jesu sabuai ah a kingam uh hi. 21 Amaute in an a nek laitakun Jesu in, “Thutak kong geninah, note lakah khat in kei hong lehhek ding hi,” a ci hi. 22 Amaute dah mahmah uh a, a ban banin ama kiangah, “Kei hi buang kei ning maw Topa?” a ci ciat uh hi. 23 Jesu in, “Kei tawh ankuang a sawk khawmpa in kei hong lehhek ding hi. 24 Ama thu a kigelhsa bangin Mihing Tapa a pai ding hi. Ahi hangin Mihing Tapa a lehhekpa in gimna nak thuak na zen in cia! A piang vet lo hileh ama adingin hoih zaw ding hi ven,” a ci hi. 25 Tua ciangin amah lehhek ding pa Judas in, “Kei hi buang kei ning maw Rabbi?” a ci hi. Jesu in, “Hihi, nang na hi hi,”a ci-in a dawng hi. 26 Amaute in an a nek laitakun, Jesu in anlum la a, lungdam koin balkhama, a nungzuite pia-in, “Hih ka pumpi ahi hi, la unla ne un,” a ci hi. 27 Tua khit ciangin hai la a, lungdam koin, amaute pia-a, “Hih hai-in dawn kim ciat un. 28 Mi tampi mawh mai nadinga kibuakhia, thukhunnab ka sisan ahi hi. 29 Ken kong geninah, ka Pa gam sungah note tawh a thaka ka dawn khawm mateng, tu-a kipan lenggahzu ka dawn nawn kei ding hi,” a ci hi. 30 Amaute in biakna la a sak khit uh ciangin Olive Vum ah a pai uh hi. 31 Tua ciangin Jesu in amaute kiangah: “‘Tuucingpa ka sat dinga, tuuhonte a kithehthang ding hi,’c ci-a kigelhsa bangin tu zan mahmah in kei hangin na vekun na puk ding uh hi. 32 Ahi hangin ka thawh kik khit ciangin note mai-ah Gililee gamah ka na pai ding hi,” ci-in a gen hi. 33 Peter in, “Nang hangin mi khempeuh a puk zongin kei ka puk ngei kei ding hi,” ci-in a dawng hi. 34 Jesu in, “Thutak kong geninah, tu zan mahmah ak khuan ma-in thumvei nong kitheihmawhbawl ding hi,” a ci kik hi. 35 Ahi hangin Peter in, “Nang tawh sihkhawm nading ahi zongin kong kitheihmawhbawl ngei kei ding hi,” a ci teitei hi. Tua mah bangin nungzui dangte in zong a ci ciat uh hi. 36 Tua khit ciangin Jesu a nung zuite tawh Gethsemane kici munah pai uh a, amaute kiangah, “Hua lai-ah pai-a thu ka nget kalin hih lai-ah na tu un,” a ci hi. 37 Amah in Peter le Zebedee tapate gel tonpih a, tua ciangin amah dah lua-in a lungmang hi. 38 Tua ciangin amaute kiangah, “Dah luatna in sih nading zah dongin hong zen hi. Hih lai-ah na om unla, kei tawh kigalging khawm un,” a ci hi. 39 Tawmkha pai lai-in lei-ah boka, “Pa aw, ahi theih leh hih hai tawh hong kipelhsak in. Ahi zongin kei deih bang hi loin nangma deihna bang hizaw hen,” ci-in thu a ngen hi. 40 Tua ciangin nungzuite kiangah pai kika, amaute a na ihmu khin uh hi. Jesu in Peter kiangah, “Note in nai khat sung nangawn hong kigalginpih zo lo na hi uh hiam? 41 Khem na na thuak loh nadingun thungenin kigalging un. A kha a ut hangin pumpi thanem hi,” a ci hi. 42 Amah a nihveina va pai kika, “Pa aw, hih hai kei dawn loh a kipelh thei lo ahileh, nangma deihna bang hi ta hen,” ci-in thu a ngen hi. 43 Amaute ihmut suak lua uh ahi manin amah a pai kik ciangin a ihmut laitak uh a tuak leuleu hi. 44 Tua ciangin amaute nusia-in paikhia leuleu a, a nget ngei mah a thumveina a ngen hi. 45 Tua khit ciangin nungzuite kiangah pai kik-a, “Note ihmu lailai in tawlnga lailai na hi uh hiam? En un, Mihing Tapa mawhneite khut sungah a kilehhek hun naita hi. 46 Tho un, pai ta ni! Kei hong lehhekpa hih lai-ah hong pai ta hi!” a ci hi. 47 Tua banga a paupau laitakin, Sawm le nihte lakah khat Judas a tung hi. Amah tawh, siampi makaite le mipite’ upate in a sawl, namsau le khetbuk tawi mihonpi tawh a tonkhawm hi. 48 Tua a lehhekpa in, “Ka nap penpen Jesu hi ding hi; tuapa man pah un,” ci-in amaute tawh lim a kilahkholhsa bangin 49 Jesu kiangah Judas paipah a, “Rabbi dam maw!” ci-in amah a nam hi. 50 Jesu in, “Lawm aw, hih dinga nong paina hih in,”d ci-in a dawng hi. Tua ciangin mihonte in Jesu nehphei uh a, lencipin a man uh hi. 51 Tua laitakin Jesu pawlte khat in ama namsau mana, dokin tulpipa nasempa sat-a, a bil a satkhia hi. 52 Jesu in ama kiangah; “Na namsau a paii ah siat in. Namsau zangte namsau mah in si ding hi. 53 Ka Pa ko thei lo dingin hong ngaihsun na hi uh hiam? Ko leng ka deih banga ka zat theih ding van sawltak legionb sawm le nih sanga tamzawte thakhatin hong puakpah ding hi. 54 Tua bang hileh hih bang tektekin piang ding hi, ci-a Laisiangtho gensa bangci tangtun thei ding ahi hiam?” a ci hi. 55 Tua laitakin Jesu in mihonpite kiang ah, “Kei man dinga namsau le khetbuk tawh nong kuan uh, kumpi langpangte makai ka hi hiam? Nisimin biakinnpi tualte ah thu ka hilh laitakin nong man kei uh hi. 56 Ahi hangin kamsangte gelhsate a tangtun theih nadingin hih bang teng a piang ahi hi,” a ci hi. Tua ciangin nungzuite khempeuh amah nusia-in a tai uh hi. 57 Jesu a mante in thukham siate le upate omkhawmna mun tulpi Caiaphas inn a tun uh hi. 58 Ahi hangin Peter in tulpipa inntual dong kihal simsimin Jesu a zui hi. Bang thu piang ding hiam, cih thei nuamin inntual ah lut-a a cingte tawh a va tukhawm hi. 59 Siampi makaite le Sanhedrin buppi in Jesu a thah theih nadingun a langah zuau teci a zong uh hi. 60 Zuau teci pang tampi a pai uh hangin thu-a santak ding thukho a mu zo kei uh hi. A tawpna ah nih va pai uh a, 61 "Hih pa in, ‘Pasian biakinnpi susia in nithum sungin ka lam kik thei ding hi,’ ci hi,” ci-in teci a pang uh hi. 62 Tua ciangin tulpipa dingin Jesu kiangah, “Dawng lo ding na hi hiam? Na lang khata hihte teci pannate bangci bang ahi hiam?” ci-in a dong hi. 63 Ahi hangin Jesu a dai dide hi. Tulpipa in ama kiangah, “Nang Pasian Tapa Khriste na hi hiam hong gen in, ci-in a nungta Pasian ah tomlo-in nang kong sawl hi,” a ci hi. 64 Jesu in, “Himah ing, na cih bangin ka hi hi. Ahi hangin note khempeuh kiangah kong gen hi: Mailam hunah Mihing Tapa, Thahat Pa’ taklamah tu-in meii tungah hong tuangsuk na mu ding uh hi,” ci-in a dawng hi. 65 Tua ciangin tulpipa in a puansilhte balkeka, “Pasian a gendai zo hi! Teci dang kul nawn ding ahi hiam? En un, Pasian a gendaina kam na za zo uh hi. 66 Bang na ci ngaihsut uh hiam?” a ci hi. Amaute in, “Amah sihsak taak hi,” ci-in a dawng uh hi. 67 Tua ciangin amaute in a maitang cilphih uh a, a khuttum uh tawh a tum uh hi. Adangte in a pang bengin, 68 "Khrist aw, nang kua’n hong su hiam, hong gen dih in,” a ci uh hi. 69 Inntual ah Peter a tut laitakin nasem numei khat a kiangah va pai-in, “Nang zong Galilee mi Jesu tawh na kipawl hi,” va ci hi. 70 Ahi hangin amah in, “Na thu gente ka thei kei hi,” ci-in amaute khempeuh mai ah a nial hi. 71 Tua ciangin inntualkong lam manawhin a pai leh numei dang khat in amah mu-a, mipite kiangah, “Hih pa Nazareth mi Jesu tawh kipawl hi,” a ci hi. 72 Amah in, “Tua mipa ka thei kei hi,” ci-in tomlo-in a nial kik hi, 73 Tawlkhat khit ciangin tua lai-a dingte Peter kiangah va pai uh a, “Ama pawlte lakah khat na hi taktak hi; na aw suah in zong kithei hi,” a va ci uh hi. 74 Tua ciangin amah le amah kihamsiat-in, “Tuapa ka thei peuhmah kei hi!” ci-in amaute mai-ah a kiciam hi. Tua khit phetin ak a khuang hi. 75 Tua ciangin, “Akkhuan ma-in kei thum vei nong kitheihmawhbawl ding hi,” ci-a Jesu gen Peter in a phawk hi. Tua ciangin amah a pualamah pusuak a, kah cihtakin a kap hi.

Mathai 27

1 Zingsang tungin siampi ma-kaite le mipite’ upate khempeuh in Jesu, thah dingin a khensat uh hi. 2 Amaute in amah henin paikhiatpih uh a, ukpipa Pilate khutah a pia uh hi. 3 Amah lehhekpa Judas in Jesu a kimawhpaih lam a muh ciangin mawh kisa in dah lua ahi manin siampi makaite le upate kiangah ngun tang sawmthum va pia kik-a, 4 "Ka mawh zo hi; mawhpeng sisan ka lehhek zo hi,” a ci hi. Amaute in, “Tua leh ko bang kisai ahi hiam? Tua pen nangma thu hi hen,” ci-in a dawng uh hi. 5 Tua ciangin Judas in a sumte biakinnpi sungah lawnin a paisan hi. Tua khit ciangin amah paikhia a, amah le amah a gui-awk hi. 6 Siampite in sumtangte tawm uh a, “Hih sum sisan man ahi manin sumkholna sunga koih ding thukham tawh kilehbulh hi,” a ci uh hi. 7 Tua ahi ciangin amaute in tua sum, gamdang mite kivuina mun dingin belseekpa lo leina-a zat dingin a khensat uh hi. 8 Tua hangin tua mun, tuni dong Sisan Lo, kici hi. 9 Tua hunin, kamsangpa Jeremiah gensa: “Israel mipite in ama man ding a ciangtansa bangin, amaute in sumtang sawmthum la uh a, 10 Topa in kei hong thupiak bangin bellei lakna mun lei nadingin tua sumte a zang uh hi,”a cih thu a tangtung hi. 11 Tua hun laitakin ukpipa mai-ah Jesu a ding hi. Ukpipa in ama kiangah, “Nang Jew-te kumpipa na hi hiam?” ci-in a dong hi. Jesu in, “Hi mah hi, na cih bangin ka hi hi,” ci-in a dawng hi. 12 Siampi makaite le upate in amah a mawhsak uh ciangin amah’n a dawng kik kei hi. 13 Tua ciangin Pilate in, “Amaute in nang langa a teci pannate uh za lo na hi hiam?” ci-in a dong hi. 14 Ahi hangin Jesu in dawng lo a, amau mawhmatnate khat beek nangawn a dawng kik peuhmah kei hi. Tua pen ukpipa in lamdang a sa mahmah hi. 15 Tua lai-in Pawi kibawl hunin mipite teel thongkia khat ta khahkhiat ding, ukpipa ngeina ahi hi. 16 Tua laitakin Barabbas kici a gilo-a minthang thongkia khat a om hi. 17 Tua ahi ciangin mihonpite a kikhop uh ciangin Pilate in amaute kiangah, “Barabbas le Khrist kici Jesu kua zaw khah leng na deih uh hiam?” ci-in a dong hi. 18 Ahang in, amaute in Jesu a hazat manun ama khutah pia uh ahilam a thei hi. 19 Pilate a thukhenna tokhom ah a tut laitakin a zi in, “Tua mawhpengpa bangmah na cih kha kei in; ama hangin tuni-in ka mangin tampitak ka thuak hi,” ci-in thu a khak hi. 20 Ahi hangin in, Barabbas khaha, Jesu thah dinga a nget nadingun siampi makaite le upate in mihonpite a thuzawh uh hi. 21 Ukpipa in, “Kua zaw hong khahkhia leng na deih uh hiam?” ci-in a dong hi. Amaute in, “Barabbas,” a ci uh hi. 22 Pilate in, “Tua ahileh Khrist kici Jesu bang ka cih ding hiam?” ci-in a dong hi. Amaute in a vekpi un, “Amah kilhlum in!” ci-in a dawng uh hi. 23 Pilate in, “Bang hang in? Amah’n bang tatkhialhna nei ahi hiam?” ci-in a dong hi. Ahi hangin amaute in, “Amah kilhlum in,” ci-in a ngaihzaw-in a kiko uh hi. 24 Pilate in a cih nading thei lo tham loin mipite so dinga kipan a muh ciangin tui la-in mihonpite mai-ah a khut sil-a, “Hih pa sisan tawh kisai-in ka mawhpeng hi. Nomau thuthu hi ta hen,” a ci hi. 25 Mipite khempeuh in, “Ama sisan kote tung le ka suan ka khakte uh tungah tu ta hen!” ci-in a dawng uh hi. 26 Tua ciangin amaute kiangah Barabbas a khahkhia hi. Ahi hangin Jesu a satsak khit ciangin kilhlup dingin amaute khutah a pia hi. 27 Tua ciangin ukpipa galkapte in ukpipa innpi ah Jesu paipih uh a, galkap company buppi a kimah a umcihsak uh hi. 28 Amaute in Jesu puan hawkkhiatsakin kumpi puan dupsan khat silhsak uh a, 29 ling tawh kumpi lukhu khat phanin a lutungah a khusak uh hi. A taklam khutah ciangkhut khat tawisak uh a, a mai-ah khukdinin, “Jew-te kumpipa aw, khansawt in,” ci-in a zahko uh hi. 30 Amah cilphihin, a ciangkhut la kik uh a, a lutang a satsat mai uh hi. 31 Amah a zahko khit uh ciangin a kumpi puan suahkhiat sak uh a, ama puan a silhsak kik uh hi. Tua khit ciangin kilhlup dingin amah a paikhiatpih uh hi. 32 Amaute a paikhiat laitakun Simon kici Cyrene pana mi khat tuak uh a, zawhthawh thu-in singlamteh a puasak uh hi. 33 Amaute Golgotha (Luguh mun cihna) kici mun a tung uh hi. 34 Tua lai-ah a khaa tawh kihel lenggahzu a pia uh hi. Ahi hangin a ciap ciangin a dawn nuam kei hi. 35 Singlamteh tungah Jesu a kilh khit uh ciangin amaute in ai saninb ama puan a hawm uh hi. 36 Tua ciangin amaute tu-in amah a vil uh hi. 37 Amaute in: HIH JEW-TE KUMPIPA, JESU HI, ci-in a mawhmatna uh lai, a lutung sanah a suang uh hi. 38 Misuamte nih a taklam khat, a veilam khat, singlamteh ah a kilh uh hi. 39 Tua lai a tawnte in amah engko uh a lupeisanin, 40 "Biakinnpi susia-a ni thum sunga lam kik zo ding pa aw, nang le nang kihonkhia in! Pasian Tapa na hileh singlamteh tung pan hong kumsuk in!” a ci uh hi. 41 Tua mah bangin siampi makaite, thukham siate le upate in amah a zahko uh hi. 42 Amaute in, “Amah in midangte honkhia zo napi, amah le amah kihonkhia zo lo pi! Amah Israel-te kumpipa hi ven! Tu laitakin singlamteh tung pan hong kumsuk leh amah um ni. 43 Amah’n Pasian a muang hi. ‘Pasian Tapa ka hi;’ a cih buangin Pasian in a ut leh amah tu-in hon ta hen,” a ci uh hi. 44 Tua mah bangin amah tawh kikhai khawm misuamte in zong a eng koko uh hi. 45 Tua gam bupah nai gukna-a kipan nai kuana dong khim a zing hi. 46 Nai kua hun pawlin Jesu in, “Eloi, Eloi, c lama sabachthani?” ci-in nakpi in a kiko hi. A khiatna, “Ka Pasian, ka Paisan aw, bang hangin kei hong paisan na hi hiam?”d cihna ahi hi. 47 Tua lai-a ding mi pawlkhat in hih a cih a zak uh ciangin, “Amah’n Elijah sam hi,” a ci uh hi. 48 Tua khit phetin amaute lakah khat va tai a tuihup a va la hi. Lenggahzu thuk sungah tuihup a diah khit ciangin, ciang dawnah koihin Jesu dawn dingin a pia hi. 49 Ahi hangin adangte in, “Bangmah cih dah dih in; amah honkhia dingin Elijah hong pai hiam en phot dih ni,” a ci uh hi. 50 Jesu nakpi in a kiko khit ciangin a kha a khah hi. 51 Tua hun lianin biakinnpi puanzak alu pan ataw dong kikekin phel nih a suak hi. Lei kilokin suangtumpite kitamkham hi. 52 Hante kihonga, a sisa misiangthote luang tampi hing kikin a tho hi. 53 Amaute han panin pusuakkhia uh a, Jesu thawhkik khit ciangin khuapi siangtho sungah pai-in mi tampi kiangah a kilang uh hi. 54 Jesu luang a cingte le zakhat-ukpa in, zinling le thupiang teng a muh uh ciangin lau mahmah uh a, “Pasian Tapae lah a hi takpi a!” a ci uh hi. 55 A gamla sim pana a galvil numei tampi tua lai-ah a om uh hi. Amaute, Jesu kisapnate a hihsak dingin Galilee pana amah a zuite ahi uh hi. 56 Tuate lakah Mary Magdalene, James le Joseph-te nu Mary le Zebedee tate’ nu a om uh hi. 57 Nitak lam ciangin Jesu nungzui a suak khin Joseph min nei mihau khat Arimathea panin va pai hi. 58 Amah Pilate kiangah pai-a Jesu luang a nget ciangin, amah piak dingin Pilate in thu a pia hi. 59 Joseph in siluang la a, saihadial puan siangtho-in a tun khit ciangin, 60 amah mah in suangpi a khuak han thak sungah a sial hi. Tua han kongvang suangtumpi khatin a huk khit ciangin a paikhia hi. 61 Mary Magdalene le Mary dang khat han galsan takah a tu uh hi. 62 Kiginkholh Ni khit a zingciang in Pilate kiangah siampi makaite le Pharisee-te a pai uh hi. 63 Amaute in, “Pu aw, tua mikhempa in a nuntak lai-in, ni thum khit ciangin ka tho kik ding hi,’ a cih ka phawk gige uh hi. 64 Tua ahi ciangin a ni thum ni dong tua han, bangmah a kicih loh nadingin thu pia in. Tua hi kei leh a nungzuite pai-in a luang gu ding uh a, amah misi pan tho zo hi, ci-in mite kiangah gen kha ding uh hi. Tua hileh hong khem masak sangin hong khem nunung a nasiazaw lai ding hi,” a ci uh hi. 65 Pilate in, “A cing mi khat paipih un. Pai unla na theih bangun tua han a muanhuai theithei dingin na bawl un,” a ci hi. 66 Tua ciangin amaute pai uh a, han kongvang khakna suang tungah seal in ciamteh uh a, a bit nadingin a cingsak uh hi.

Mathai 28

1 Sabbath ni khit nipikal ni masa pen ni, phalvak tungin Mary Magdalen le adang Mary-te han hawh dingin a pai uh hi. 2 Ziin nakpi-in a ling hi; Topa vansawltak khat, van panin paisuk a, tua hanah pai-in han kongvang khakna suang likkhia-in, a tungah a tu hi. 3 Ama mel khuaphelep banga, a puante vuk bangin a pak hi. 4 Han cingte in amah kihta mahmah uh ahi manin liingin a si tawh kibang uh hi. 5 Vansawltak in numeite kiangah, “Lau kei un, a kikilhlum Jesu a zong na hilam uh ka thei hi. 6 Amah hih lai-ah om lo hi; a gensa bang tektekin tho kik zo hi. Hong pai-in a kisialna mun hong en un. 7 Tua khit ciangin pai mengmeng unla a nungzuite kiangah, ‘Amah misi pan tho kik khina, note mai-ah Gililee ah a pai hi. Tua lai-ah amah na mu ding uh hi,’ ci-in va gen un. Tu-in no kong hilh khin hi,” a ci hi. 8 Tua ciangin tua numeite lau le lungdam mahmah thuahin a nungzuite kiangah tua thu gen dingin han panin manlangtakin a tai uh hi. 9 Jesu in amaute thakhatin na dawntuah a, “Dam maw,” ci-in a hopih hi. Amaute ama kiangah pai uh a, a khete kawi-in a bia uh hi. 10 Tua ciangin Jesu in amaute kiangah, “Lau kei un. Pai unla, ka sanggamte Galilee a pai dingin na sawl un; tua lai-ah kei hong mu ding uh hi,” a ci hi. 11 Numeite lampi ah a pai laitakun, han cingte pawlkhat khuapi sungah pai uh a, thu piang khempeuh siampi makaite kiangah a ko uh hi. 12 Siampi makaite le upate a kisuktuah khit uh ciangin ngaihsutna khat a geel uh hi. Galkapte sum tampi pia uh a, 13 "‘Zan laitakin a nungzuite hong pai uh a, ka ihmut kalun a luang a gumang uh hi,’ ci un. 14 Hih thukohna gam ukpipa kiang a tun leh kote in amah ka na lungkimsak ding uh a, na buai loh nadingun kong hu ding uh hi,” ci-in a sawl uh hi. 15 Tua ciangin galkapte in sumte sang uh a, a hilh bangbangun a hih uh hi. Tua hi-a tuni ciang dong Jew-te lakah hih thu a kigen kawikawi hi. 16 Tua ciangin nungzui sawm-le-khatte Galilee ah pai uh a, Jesu in amaute pai nadinga a genna mun mual tungah a pai uh hi. 17 Amaute in amah a muh uh ciangin a bia uh hi. Ahi hangin pawlkhat a lunghei nei lai uh hi. 18 Tua ciangin amaute kiangah Jesu pai a, “Vantung le leitungah thuneihna khempeuh kei hong kipia khin hi. 19 Tua ahi manin pai unla, minamte khempeuh nungzui na suaksak un; Pa, Tapa le Khasiangtho minina na baptise unla, 20 kong thupiak khempeuh a zuih nadingun na hilh un. Khanghun a bei tektek dong a tawntungin note kong ompih taktak ding hi,” a ci hi.

Marka 1

1 Pasian Tapaa Jesu Khrist tawh kisai lungdamna-thu a kipatna. 2 Kamsangpa Isaiah lai sungah: “Na lampi a sialkhol dingin, ka thupuakpa na mai-ah ka sawl ding hi,”b 3 "Gamlak-a kikopa aw in ‘Topa ading lampi sialkhol unla, ama lampi na tangsak un,’”c ci-in kigelh hi. 4 Tua bangin Johan in sehnel-gam kual sungah baptise in mawhnate maisak nading kisikna tawh kisai baptisena thu hilh in a pai hi. 5 Judea gam sung teng le Jerusalem a mite khempeuh ama kiangah a pai uh hi. A mawhnate uh pulak uh a, amah in Jordan Gun sungah a baptise hi. 6 Johan in kala-oh mul tawh kibawl puan silhin savun kawnggak a gak hi. Kauphe le gamlak khuaizu an in a nei hi. 7 Ama thupuak hih ahi hi: “Ka nungah kei sanga vanglianzaw khat hong pai ding hi. Kun in ama khedap khaute sut ding nangawnin ka kilawm kei hi. 8 Kei in note tui ind kong baptize hi. Ahi hangin amah in note Khasiangtho in hong baptize ding hi.” 9 Tua hunin Galilee gam Nazareth panin Jesu pai-a, Jordan gun sungah Johan a kibaptisesak hi. 10 Tui lakpanin Jesu a paikhiat toh laitakin van kihong a, ama tungah vakhu bangin Kha a kumsuk a mu hi. 11 Tua laitakin vantung panin aw khat ginga, “Nang, ka it ka Tapa na hi hi; nang tungah ka lungkim mahmah hi,” a ci hi. 12 Thakhatin Kha in amah sehnelgamah sawlpah a, 13 Satan zia-etna thuakin ni sawmli sung a om hi. Gamsate tawh amah omkhawm a, vansawltakte in a don uh hi. 14 Johan thong a kiat khit ciangin Pasian lungdamna thuthak tangko in Galilee gam sungah Jesu va pai hi. 15 Amah in, “A hun hong tung zo hi. Pasian gam hong nai ta hi. Kisik unla thupha um un!” a ci hi. 16 Galilee Tuipi gei-a Jesu a pai laitakin nga beng mi ahi Simon le a sanggampa Andrew-te in tui sungah len a khuh laitak uh a mu hi. 17 Jesu in, “Hong pai unla kei hong zui un. Mi a mante kong suaksak ding hi,” a ci hi. 18 Amau zong a lente uh nusia pah in amah a zui uh hi. 19 Tua pan tawmkha a pai lai leh Zebedee tapa James le a sanggampa John, a lente uh puaha gunkuang sunga om a mu hi. 20 Amah in amaute sampah a, amau zong a pa uh Zebedee le sumthalawhte gunkuang sungah nusia-in amah a zui uh hi. 21 Amaute Capernaum ah pai uh a, Sabbath ni a tun ciangin synagogue ah Jesu lutin thuhilh a kipan hi. 22 Thukham siate bang hi loin thuneipa khat bangin a hilh manin mite in a thuhilh zia lamdang a sa mahmah uh hi. 23 Tua laitakin synagogue sungah kha giloe a lut mi khat in, 24 "Nazareth mi Jesu aw, kote bang hong cih nuam na hi hiam? Kote susia dingin hong pai na hi hiam? Nang kua na hiam cih kong thei hi - Pasian Mi Siangtho na hi hi!” ci-in a kiko hi. 25 Jesu in khauhtakin, “Pau ken! Ama sung pan paikhia in!” a ci hi. 26 Kha gilo in tua mipa a pumlinsak gawp khit ciangin kiko zekzak kawmin a paikhia hi. 27 Mite in lamdang sa mahmah uh a, “Hih in bang ahi hiam? Thuneihna tawh thuhilhna thak khat hilh mawk! Kha gilote thu a piak ciang nangawnin amaute in a mang tazen uh hi,” ci-in khat le khat a kidong uh hi. 28 Galilee kual bupah ama thu a kizel khinpah hi. 29 Synagogue pan amaute a paikhiat khit phetun James le Johan tawh Simon le Andrew-te innah a hawh uh hi. 30 Simon sungnu nattun a lupna-a lum ahilam amaute in Jesu kiangah a gen uh hi. 31 Tua ciangin ama kiangah Jesu pai-a, a khut lenin a phongto hi. A nattun dam a, amaute a zindo hi. 32 Tua nitak, ni a tum khit ciangin mite in cinate le dawilutte khempeuh Jesu kiangah a puak uh hi. 33 Khuazangpi in kongkhak kiangah kikhawm uh a, 34 natna tuamtuam a vei mi tampi Jesu in a damsak hi. Amah in dawi tampi zong hawlkhia a, tua dawite in amah kua hiam cih thei uh ahi manin Jesu in amaute pau ding a phal kei hi. 35 Zingkhangpi phalvak ma-in Jesu tho a, tua inn panin gamdaihna munah pai-in tua lai-ah thu a ngen hi. 36 Simon le a pawlte amah zong dingin a pai uh hi. 37 Amah a muh uh ciangin, “Mi khempeuh in nang hong zong uh hi lo hiam!” ci-in a ko uh hi. 38 Jesu in, “Thu hilh dinga hong pai ka hi manin hih khuate khatpeuhah thuhilh dingin paikhia ni” a ci hi. 39 Tua ciangin amah Galilee gam sung tengah zin kawikawi a, synagogue-te ah thu hilhin dawite a hawlkhia hi. 40 Miphakf khat a kiangah va pai a, khukdinin, “Ut peuh lecin nong siangsak thei hi,” ci-in a thum hi. 41 Khuatuahna tawh Jesu kidimin, a khut zana, tuapa lawngin, “Ka ut hi. Siang ta in!” a ci hi. 42 Tua khit phetin a phak natna in amah nusia-a, a damsiang hi. 43 Jesu in vauhilhna khauh tawh amah sawlkhiapah a, 44 "Hih thu kuamah hilh peuhmah kei in. Ahi hangin pai inla siampipa kiangah va kilak in; amaute tungah teci pang na suah nadingin na sian nading a Moses thupiak biakpiakna na pia in,” a ci hi. 45 Tuapa in tua banga a hih sangsikin paikhia-a genthang in tua thu a kizelsak hi. Tua hangin khuapi sungah Jesu a langtangin lut thei nawn lo-a, a pualam kuama om lohna munmun ah a om kawikawi hi. Tua hi napi mun khempeuh panin mihonte ama kiangah a pai veve uh hi.

Marka 2

1 Ni tawmvei khit Capernaum ah Jesu a lut kik ciangin inn tung kik hi, cih thu mite in a za uh hi. 2 Inn pua nangawnah om nading om lo zah dongin mi tampi va kikhawm uh a, amah in amaute kiangah thu a hilh hi. 3 Mi pawlkhat va pai uh a, mi li in a zawn pumzaw khat a kiangah a paipih uh hi. 4 Mihonpite hangin Jesu kiang a tut theih loh manun Jesu tung santak innkhum phelkhia in vangsak uh a, tua ciangin a zawna phekin pumzawpa a khaisuk uh hi. 5 Jesu in amaute upna a muh ciangin pumzawpa kiangah, “Tapa aw, na mawhnate kimaisak zo hi,” a ci hi. 6 Tua lai-a tu thukham siate pawlkhat in,” 7 Bang hangin hih pa tua bangin pau ahi hiam? Amah in Pasian a gendai hi! Pasian longal kua in mawhna maisak thei ahi hiam!” ci-in a ngaihsun uh hi. 8 Amaute lungsim sunga a ngaihsutna uh Jesu in a kha-in theipah ahi manin amaute kiangah, “Hih thute bang hangin ngaihsun na hi uh hiam? 9 Pumzawpa kiangah, ‘Na mawhnate kimaisak zo hi,’ cih ding le, ‘Tho in, na phek la-in pai in,’ cih ding koi baihzaw ahi hiam? 10 Ahi hangin Mihing Tapa in hih leitungah mawh maisak theih nading thu nei hi, cih na theih nadingun...,” a cih khit ciangin pumzawpa kiangah, 11 "Tho in, na phek la inla innah ciah in, kong ci hi,” a ci hi. 12 Amah tho a, a phek la-in amaute khempeuh muhin a paikhia hi. Mi khempeuh in lamdang mahmah sa uh a, “Hih bang peuhmah mu ngei nai kei hang maw!” kici-in Pasian a phat uh hi. 13 Khatvei tuilipi gei-ah Jesu a pai leuleu hi. Mihon tampi ama kiangah va pai uh a, amah in amaute thu a hilh hi. 14 Amah a pai kawikawi laitakin Alphaeus tapa Levi, siahdonna bukno sunga tu a mu hi. Jesu in, “Kei hong zui in,” a cih ciangin Levi dingto in a zui hi. 15 Levi innah Jesu in nitak-an a nek laitakin mi tampi in a nung zui ahi manin siahdongte tampi le “mawhneite” in amah le a nungzuite tawh a nekhawm uh hi. 16 Thukham sia ahi Pharisee-te in “mawhneite” le siahdongte tawh an a nekkhawm a muh uh ciangin, “Amah in bang hangin siahdongte le “mawhneite” tawh ankuang umkhawm ahi hiam?” ci-in a nungzuite kiangah a dong uh hi. 17 Jesu in hih thu a zak ciangin amaute kiangah, “Siavuan kisam cidamte hi loin cinate hizaw hi. A thumaante sam dinga hong pai ka hi kei a, mawhneite sam dinga hong pai ka hi hi,” a ci hi. 18 Johan nungzuite le Pharisee-te in an a tang uh hi. Jesu kiangah mi pawlkhat va pai uh a, “Johan nungzuite le Pharisee-te nungzuite in an tang napi bang hangin nang nungzuite in an tang lo uh hiam?” ci-in a dong uh hi. 19 Jesu in, “Zineipa tawh a omkhawm kimlai bangci in mopawi simte in an tang thei ding uh hiam? Zineipa tawh a omkhawm lai tengun an a tang thei kei ding uh hi. 20 Ahi hangin amaute kiang pan zineipa a kilakkhiat hun hong tung ding hi. Tua ni ciangin amaute in an a tang ding uh hi. 21 "Kuamah in a ton nai lo puanbekin puanlui a thuap ngei kei hi. A thuap leh tua puanthak them in puanlui kaikekin a kek semsem ding hi. 22 Savun-um lui sungah lenggahzu thak kuamah in a thun ngei kei hi. Tua bangin thun leh lenggahzu in savun-um phukham dinga, lenggahzu le savun-um a kisia khawm ding hi. Tua bang hi lo zaw in, savun-um thak sungah lenggahzu thak thun zaw hi,” a ci hi. 23 Sabbath ni khat Jesu buhlei tawnin a pai hi. Nungzuite in a pai kawmkawmun buhvuite a zut uh hi. 24 Pharisee-te in a kiangah, “En in, bang hangin amaute Sabbath ni-in thukham tawh kituak loin gamta uh hiam?” a ci uh hi. 25 Amah in, “David le a pawlte in a gilkial laitak uh le a kisap laitakun bang hih uh cih sim ngei nai lo na hi.uh hiam? 26 Tulpi Abiathar hunlai-in Pasian inn sungah amah luta, siampite bekin a nek theih a ki-apsa anlum ne-in, a pawlte zong a pia hi,” ci-in a dawng hi. 27 Tua ciangin amah in amaute kiangah, “Mite adingin Sabbath kibawl hi-a Sabbath ni adingin mite a kibawl kei hi. 28 Tua hi-a Mihing Tapa, Sabbath ni Topa nangawn ahi hi,” a ci hi.

Marka 3

1 Khatvei synagogue ah a pai leh a khut teem mi khat a na om hi. 2 Amaute lakah pawlkhat in Jesu a mawhmat nading uh zongin, tua mipa Sabbath ni-in a damsak kha hiam, ci-in a vil gige uh hi. 3 Jesu in khutteem pa kiangah, “Mi khempeuh mai-ah ding dih in,” ci-in a sawl hi. 4 Tua ciangin Jesu in amaute kiangah, “Sabbath ni-in a sia hih ding le a pha hih ding, nuntakna hot ding le thah ding, koi pen thukham tawh kituakzaw hiam?” ci-in a dong hi. Ahi hangin amaute a dai khipkhep uh hi. 5 Amah hehin akim apam en-a, amaute lungkhauhna hangin lungdong ngeungau-a khutteempa kiangah, “Na khut zan in,” ci-in a sawl hi. Amah in a khut a zan leh, a sa dim kikin a damsiang kiuhkeuh hi. 6 Tua ciangin Pharisee-te paikhia uh a, Jesu a thah theih nadingun Herod pawlte tawh a geelsim uh hi. 7 Jesu a nungzuite tawh tuilipi lamah kihemkhia uh a Galilee panin mihon tampi in a zui uh hi. 8 Amaute in ama hihte khempeuh a zak uh ciangin Judea, Jerusalem, Idumea le Jordan gungal kual teng le Tyre le Sidon kima gamte panin mi tampi in amah a zuan uh hi. 9 Mihonpite in amah a nehcip gawp khak loh nadingin gunkuang khat kigingsa-a a koih nadingun Jesu in a nungzuite kiangah a gen hi. 10 Ahang in, amah in mi tampi damsak khin ahi manin a cina laite in amah lawng nuamin mailam a phu tentan uh hi. 11 Amah kha gilotea in a muh peuhpeuh uh ciangin a mai-ah bokin, “Pasian Tapa na hi hi,” ci-in a kiko uh hi. 12 Ahi hangin amah kua hiam, cih a gen loh nadingun amaute thukhauh a pia hi. 13 Jesu mualtung lamah kahto a, ama deihte a kiangah samin amaute in amah a zuan uh hi. 14 Amah in sawm-le-nihte sehkhia-a, sawltakpi,b ci-in a minvawh hi. Tua in amaute ama kiangah a om theih nading, thu hilh ding le 15 dawite hawlkhiat theihna thuneihna nei-a a sawlkhiat theih nading ahi hi. 16 A sehkhiat sawm le nihte hih teng ahi hi: Simon (Peter min a phuah); 17 Zebedee tapa James le a sanggampa Johan (Vanging Tapate cih nopna in amau unau Boanerges, ci-a min a phuah); 18 Andrew, Philip, Bartholomew, Matthew, Thomas, Alphaeus tapa James, Thaddaeus, Zealot pawl-a Simon 19 le amah lehhekpa Judas Iskariot-te ahi hi. 20 Tua ciangin Jesu inn khatah luta mihonpite va kikhawm leuleu uh ahi manin amah le a nungzuite in an nangawn a ne thei kei uh hi. 21 A innkuanpihte in hih thu a zak uh ciangin, “Amah a lungmawk ahi hi,” ci-in a kemcing dingin a pai uh hi. 22 Jerusalem pana paisuk thukham siate in, “Ama sungah Beelzebubc lut hi! Amah in dawite kumpitapa suangin dawite a hawlkhia hi,” a ci uh hi. 23 Tua ahi ciangin Jesu in amaute samin gentehnate zangin amaute kiangah thu gen a, “Bangci bangin Satan in Satan hawlkhia thei ding ahi hiam? 24 Amah le amah kilangpanga a kikhenthang kumpi-gam a kip kei hi. 25 Amah le amah kilangpanga kikhenthang innkuan a kip kei ding hi. 26 Tua ahi ciaingin Satan, amah le amah kilangpangin kikhenthang leh a kip kei ding hi; ama beina a tung ta hi. 27 A taktak in mi khatpeuh in mihatpa hencip masa loin tuapa inn sungah lutin a neihsa bangci puakkhiatsak thei ding ahi hiam? A hencip khit ciangin a inn a luh thei pan ding hi. 28 Thutak kong geninah, mite mawhnate khempeuh le Pasian gen dainate khempeuh kimaisak ding hi. 29 Ahi hangin Khasiangtho a gendai peuhmah a kimaisak ngei kei ding hi; amah tawntung khialhna ah a mawh hi,” a ci hi. 30 Amaute in, “Amah in kha gilo nei hi,” a cihna uh hangin amah in hih thu a gen hi. 31 Tua ciangin Jesu nu le a sanggamte a tung uh hi. Amaute innpua ah ding uh a, amah sam dingin inn sungah mi khat a sawl uh hi. 32 A kimkotah mihonpi tu uh a, amaute in ama kiangah, “Na nu le na sanggamte nang hong zongin inn pua-ah om uh hi,” ci-in a hilh uh hi. 33 Amah in, “Ka nu kua hi a, ka sanggamte kua ahi hiam?” ci-in a dong hi. 34 Tua ciangin amah in a kimkot-a tute en a, “Hih lai-ah ka nu le ka sanggamte a om uh hi! 35 Pasian deihna a hih peuhpeuh ka sanggampa, ka sanggamnu le ka nu ahi uh hi,” a ci hi.

Marka 4

1 Hun dang khatin Jesu in tuilipi gei-ah thuhilh a kipan hi. Ama kimkota kikhawm mi tam lua ahi manin tuilipi tunga gunkuang sungah kahin a tu hi. Mipite ahileh tui gei sehtak tungah a tu uh hi. 2 Amah in amaute gentehnate tawh na tampi hilh a: 3 "Ngai un! Lokhopa khat ama khaici vawh dingin a kuankhia hi. 4 Khaici a vawh ciangin pawlkhat lamdung-ah tu-a, vasate pai-in tawmin a nemang uh hi. 5 Pawlkhatte leitak tam lohna mun, suang lakah a tu hi. Leitak dai ahi manin popah sam hi. 6 Ahi hangin ni a san ciangin ankungte kangdulh a, zung kha zo lo ahi manin vulpah hi. 7 Adang pawlkhatte ling lakah tu-a, lingkungte khangin ankungte depgawp ahi manin gah a gah zo kei hi. 8 Adang pawlkhatte leuleu lei hoihna ah a tu hi. Ankung po-a, khangtoin, a kivawh zah sawmthum, sawmguk tham lo zakhat nangawn a gahkhia hi,” a ci hi. 9 Tua ciangin Jesu in, “Bil nei peuh in za ta hen,” a ci hi. 10 Amah kia a om laitakin, Sawm-le-nihte le ama kima om adangte in tua gentehna thute, amah a dong uh hi. 11 Amah in amaute kiangah, “Note tungah Pasian gam thusim hong kipia zo hi. Ahi hangin a pualama omte gentehnate tawh ka hilhna pen, 12 "‘Amaute in mu ngitnget napi, mutel ngei lo ding uh a, za ngitnget napi, a theitel ngei kei ding uh hi; tua hi kei leh amaute lunghei in, kimaisak kha ding hi!’a cih a tangtun nading ahi hi,” a ci hi. 13 Tua ciangin Jesu in amaute kiangah, “Hih gentehna theitel lo na hi uh hiam? Tua ahileh gentehna khatpeuh bangci theihtel thei ding na hi uh hiam? 14 Lokhopa in thu a vawh hi. 15 Mi pawlkhatte thu kivawhna lamdung a tu khaici tawh kibang uh hi. Tua thu a zak phetun Satan va pai-a amaute sunga kivawhsa thu a lak mangsak hi. 16 Adangte, suang laka tu khaici tawh kibangin thu ngai uh a, lungdamin a sangpah uh hi. 17 Ahi hangin zung kha lo ahi manin tawmvei sung bek a hing zo hi. Thu hangin lungmanna ahi zongin bawlsiatna ahi zongin a tun ciangin a pukmang pah uh hi. 18 Adangte leuleu, ling laka tu khaici kivawh tawh kibang uh hi; thu ngai uh a, 19 ahi hangin leitung nuntak nading lunghimawh nate, hauhna’ khemna-te le nadangte lunggulhna lutin, thu depgawp a, gah a gahsak kei hi. 20 A dangte lei hoihna-a tu khaici tawh kibang uh hi; thu ngai-in sang uh a, a kivawh zah sawmthum, sawmguk tham lo za khat nangawn a gahkhia uh hi,” a ci hi. 21 Amah in amaute kiangah, “Note in kuangkum nuai peuh lupna nuai peuh a koih dingin meivak keng na hi uh hiam? A tunna tungah tungzaw hi lo na hi uh hiam? 22 Ahang in, a ki-imcip peuhmah a kigenkhia ding cihnopna hi-a, a kiselcip peuhmah a kipholak ding cihnopna ahi hi. 23 Zak nading bil nei peuh in za ta hen,” a ci hi. 24 Amah in, “Na zakte uh limtakin ngaihsun un. Midangte aa na tehna uh tawh no aa zong hong kitehsak tham loin a tamzaw in hong kiteh kik ding hi. 25 A nei peuhmah a kipia beh ding hi; a nei lo peuhmah a neihsun nangawn a kilak khiatsak ding hi,” a ci lai hi. 26 Amah in, “Pasian gam pianzia hih bang ahi hi: Mi khat in leitungah khaici a vawh hi. 27 Amah in khaici pianzia a theih loh hangin a sun a zan, a ihmut kal ahi zongin, a hah sung ahi zongin khaici po in na khang hi. 28 Lei in ama thu-in gah a gahsak hi. A masa penin a kung, tua khit ciangin a vui, tua khit ciangin a vui sungah atak a piangsak hi. 29 Buh a min phetin an lak hun tung ta ahi manin phiaukawi tawh a at hi,” zong a ci lai hi. 30 Amah in, “Pasian gam pianzia bang tawh kibang ci ding i hi hiam? Bang gentehna zangin telgen ding i hi hiam? 31 Pasian gam in lei sunga na tuh khaici neupen ankam tang tawh kibang hi. 32 Ahi zongin a kituh ciangin khangto-a, huan ankungte khempeuh lakah a lian pen suakin vana vasate a lim belin a tuan theih-na zahin a hiangte lian hi,” ci-in a gen leuleu hi. 33 Jesu in amaute theihcian theih zahzah tua tawh a kibang gentehna tampite zangin amaute thu a hilh hi. 34 Amah in gentehna zang loin amaute bangmah a hilh kei hi. Ahi hangin a nungzuite bek tawh a omkhawm ciangin na khempeuh a hilhcian hi. 35 Tua ni nitak lam ciangin amah in a nungzuite kiangah, “Galkhat lamah pai ni,” a ci hi. 36 Mihonpite nusia-in, amaute in gunkuang sunga a om bangbangin a paipih uh hi. Gunkuang dangte tawh zong a ton uh hi. 37 Huih le guah nasiatakin kinuai-a, tuihualte in gunkuang vatin gunkuang a tuum dektak hi. 38 Gunkuang nunglamah lukham khamin Jesu a ihmu hi. Nungzuite in amah phong uh a, “Sia aw, tui kia le ung phamawh sa lo na hiam?” a ci uh hi. 39 Amah tho a huih tai-in tuihualte kiangah, “Dai un! Tang kei un!” a ci hi. Tua ciangin huih nung khawla, tui sippahin a dai dide hi. 40 Amah in a nungzuite kiangah, “Bang dinga tua ci lau lawmlawm na hi uh hiam? Upna nei nai lo lailai na hi uh hiam?” a ci hi. 41 Amaute lau lua mahmah uh a, “Hihpa kua hiam? Huih le tuihualte nangawn in a thu mang tazen hi!” a kici uh hi.

Marka 5

1 Amaute tuilipi kantanin Gerasenesa kual lamah a pai uh hi. 2 Gunkuang pan Jesu a tuahkhiat ciangin, amah a dawntuah dingin kha gilob a lut mi khat hankhuk lak pan a paikhia hi. 3 Hih mipa hankhuk laka teng hi-a, kuamah in sikkhau nangawn tawh a hen zo nawn kei hi. 4 A khut le a khete a sikkhainiang bottatin a khe-a sikkolte a sutan hi. Amah a thazawh zo dinga hat kuamah a om kei hi. 5 A sun a zanin hankhuk lak le mual tungah awng-a, amah le amah suang tawh a kikui keh hi. 6 Jesu a galmuh ciangin tai-in a mai-ah a khukdin hi. 7 Tuapa in, “A Sang Pen Pasian Tapa Jesu aw, kei bang hong cih nuam na hiam? Kei hong bawlsia lo dingin Pasian tungah kiciam in!” ci-in a aw neih zahin a awng hi. 8 Ahang in, Jesu in ama kiangah, “Kha gilo aw, hih pa sung pan paikhia in,” a ci hi. 9 Tua ciangin Jesu in ama kiangah, “Na min bang hiam?” ci-in a dong hi. “Tampi pha ka hi manun, ka min Legionb hi,” ci-in a dawng hi. 10 Tua ciangin tua kuam pana amaute a hawlkhiat loh nadingin Jesu kiangah tuapa in a ngen kikkik hi. 11 A kianga mual pangah vok hon tampi a gamta hi. 12 Dawite in Jesu kiangah, “Vokte lakah hong sawl inla tuate sungah hong lutsak in,” ci-in a thum uh hi. 13 Amah in amaute phalna pia-a, tua ciangin kha gilote paikhia-in vokte sungah a lut uh hi. Vok honte tul nih bang pha a, kensang pan tuili sungah tuaksukin tui a kia khin uh hi. 14 Vok cingte tai-in khuapi le khua neu ah hih thu a koh uh ciangin bang thu piang hiam cih en dingin mi tampi a kuankhia uh hi. 15 Amaute Jesu kiang a tun uh ciangin dawi legion khat a lutna pa, tua lai-ah tu-in puan silha, a lungsim pila om a muh uh ciangin a lau uh hi. 16 Tua thu a musate in dawi lutpa tunga piangte le vokte thu zong mite kiangah a gen uh hi. 17 Tua ciangin mipite in Jesu in amau kual a nusiat nadingin a thum uh hi. 18 Gunkuang ah Jesu a kah laitakin tua dawilut ngei pa in amah a zuih nadingin a thum hi. 19 Jesu in phal loin, “Na innah ciah inla, Topa in nang tungah bangzahtak bawla, nang bangzahtakin hong lainat cih thu na innkuanpihte kiangah gen in,” a ci hi. 20 Tua ahi ciangin tuapa paikhia a, ama adingin Jesu in bangzahtak bawl cih thu Decapolisc ah a gen hi. Mite khempeuh in lamdang a sa mahmah uh hi. 21 Gunkuang tuangin tuipi gal khatah Jesu a galkah ciangin mihon tampite a kimah va kikhawm uh hi. Tuilipi gei-ah a om laitakin 22 synagogue ukte lakah Jairus min nei khat, tua lai-ah va pai hi. Jesu a muh ciangin a khephungah bok-a, 23 "Ka tanu si dekdek hi. Nong hehpihna-in cidama a nuntak nadingin hong pai inla, ama tungah na khut hong ngaksak in,” ci-in a thum ngutngut hi. 24 Tua ciangin Jesu in amah a zui hi. Mihon tampi in ama nung zui uh a, a kimah a nehcih uh hi. 25 Tua laitakin kum sawm-le-nih sung siluang natna a thuak khat a om hi. 26 Siavuan tampi in a bawl sungin gim mahmah a, a neihsa khempeuh a bei khin hi. Ahi zongin noptuam tuan loin a nasia semsem zaw hi. 27 Amah in Jesu thu a zak ciangin mihonpite lakah Jesu nunglam panin zuana, a puantualpi a lawng hi. 28 Ahang in, tuanu in, “A puan lawngkha peuh leng ka dam ding hi,” ci-in a ngaihsun hi. 29 Tua khit phetin a siluang kangpah a, a thuakna pan a suahtak lam a pumpi panin a kiphawk hi. 30 Jesu in ama tung panin vang paikhia cih a phawk pah hi. Mihonpi lakah amah kihei kawikawi a, “Ka puansilhte hong lawnsak kua hiam?” ci-in a dong hi. 31 A nungzuite in, “Hong nehcih mihon pite mu napi in, ‘Kuan hong lawng hiam,’ ci-in bang dinga dong lai na hi hiam?” ci-in a dawng uh hi. 32 Ahi hangin Jesu in a lawng kua hiam cih thei nuamin a kimkot a enen hi. 33 Tua ciangin ama natna hanga ama tunga thupiang a thei tua numei lau-a ling kawmin va pai-a, Jesu khephungah bokin ahi bang teng a gen hi. 34 Amah in tuanu kiangah, “Ka tanu aw, na upna in nang hong damsak zo hi. Lungnuamin ciah inla, na thuakna pan suakta in,” a ci hi. 35 Jesu a paupau laitakin synagogue ukpa Jairus inn panin mi pawl khat va pai uh hi. Amaute in, “Na tanu si ta hi. Siapa buaisak kul nawn ding hiam?” a ci uh hi. 36 Jesu in a mau thugente thudon loin Jew-te synagogue ukpa kiangah, “Lau kei in; um lel in,” ci-in a gen hi. 37 Amah in Peter, James le James sanggampa John-te simloh adang kua mah a kizuisak kei hi. 38 Jew-te synagogue ukpa’ inn a tun uh ciangin mite nakpi-in kapa taamloin a buai ngeingai Jesu in a mu hi. 39 Amah inn sungah lutin amaute kiangah, “Bang hangin hih bangin taamlo-a buai ngeingai na hi uh hiam? Naupangno a si hi lo hi; a ihmu hi,” a ci hi. 40 Ahi hangin amaute in amah a nuihsan uh hi. Amah in amaute a pusuahsak khit ciangin numeino omna ah numeinof nu le a pa le a tonpih a nungzuite a lutpih hi. 41 Tua numeino a khutin len a, “Talitha koum!” (“Numeino aw, nang tungah kong ci hi tho in,!” a cihnopna) a ci hi. 42 Tua khit phetin numeino (amah kum sawm-le-nih pha ta) thotoin a vak kawikawi hi. Amaute in hih thu lamdang a sa mahmah uh hi. 43 Amah in hih thu kuamah a theihsak loh nadingun amaute thukhauh pia-a, numeino nek dingin bang khatpeuh a piak dingun a sawl hi.

Marka 6

1 Tua mun nusia in Jesu le a nungzuite ama tenna khua ah a pai uh hi. 2 Sabbath a tun ciangin synagogue sungah thuhilh kipana, ama thugen a za mi tampi in lamdang a sa uh hi. Amaute in, “Hih mipa in hih nate koi pana a ngah ahi hiam? Nalamdangte nangawn a bawl theih nadingin ama tunga kipia hih pilna bang ahi hiam? 3 Khutsiampa hi lo ahi hiam? Mary tapa hi-a, James, Josepha, Judas le Simon-te sanggampa hi lo ahi hiam? A saggam numeite ei tawh teng khawm uh hi lo ahi hiam?” a ci uh hi. Tua ciangin ama tungah amaute a lungkim kei uh hi. 4 Jesu in amaute kiangah, “Kamsangpa ama khua sung, ama tanau-te lak le ama inn sung bekah a kipahtawi kei hi,” a ci hi. 5 Tua lai-ah amah in mi cina tawmkhatte tungah a khut nga-in a damsak lohngal nalamdang khat beek a bawl thei kei hi. 6 Amah in amaute uplahna lamdang a sa hi. Tua ciangin Jesu, khua khat pan khua khatah thuhilhin a vak kawikawi hi. 7 Sawm-le-nihte ama kiangah sama, kha giloteb tungah thuneihna pia-in nihta nihta-in a sawlkhia hi. 8 Amah in amaute a lamlahna hih bang ahi hi: “Na khualzinna ua na zat dingun ciangkhut longal an ahi zongin, thung-ip ahi zongin, kawnggak sungah sum ahi zongin bangmah pua kei un. 9 Khedap bulh unla ahi hangin puantuangsilh keng thuah kei un. 10 Inn khatpeuh ah na lut uh ciangin tua khua na nusiat mateng uh tua inn ah tam suak un. 11 Note hong ngai lo, na thu uh a ngai nuam lo munte na nusiat uh ciangin amaute langa teci panna-in na khepek ua leivuite singkhia un,” a ci hi. 12 Amaute paikhia uh a, mite a kisik nadingin thu a hilh uh hi. 13 Amaute in dawi tampi hawlkhia uh a, cina tampite sathau nilhin a damsak uh hi. 14 Jesu min kithei khawk khin ta ahi manin Kumpi Herod in zong hih thu a za hi. Mi pawlkhatin,c “Baptize-pa Johan misisa tho kika, tua hangin amah in nalamdang bawl theihna vangliatna nei ahi hi,” a ci uh hi. 15 Adangte in, “Amah Elijah hi,” a ci uh hi. Pawlkhatte leuleu in, “Tang lai-a kamsangte banga kamsangpa khat ahi hi,” a ci uh hi. 16 Ahi hangin Herod in hih thu a zak ciangin, “A ngawng ka tanpa Johan misisa tho kik hi!” a ci hi. 17 Ahang in, Johan mat dingin Herod mahmah in thu pia-in hensak-a thong sungah a khumsak hi. A nau pa Philip zi a suh nu Herodia hangin hih banga a hih ahi hi. 18 Johan in Herod kiangah, “Na sanggampa zi na suh thukham tawh kituak het lo hi,” a cici khin zo hi. 19 Tua ahi ciangin Herodia in Johan hua-in a that nuam hi. Ahi hangin tuanu in amah a that thei kei hi. 20 Bang hang hiam cih leh Johan mi thumaan le misiangtho khat ahilam Herod in thei ahi manin amah kihta in a hu hi. Herod in Johan thu a zak ciangin amkham mahmahd napi ama thugen a ngai nuam hi. 21 A nunungna-ah a hun hoih khat a om hi. Herod in a suah ni-in ama uliante le galkapmangte le Galilee makaite an a vak hi. 22 Herodia’ tanu sungtumin lama, tuanu in Herod le a nitak-an nekpih lenglate a lungkimsak hi. Kumpipa in numeino kiangah, “Na deih peuhpeuh hong ngen in, kong pia ding hi,” a ci hi. 23 Amah kiciama, “Ka kumpi gam phel khat dong nong nget peuhpeuh kong pia ding hi,” ci-in a kamciam hi. 24 Tuanu paikhia-in a nu kiangah, “Bang ngen ding ka hi hiam?” a ci hi. Amah in, “Baptize-pa John’ lutang,” ci-in a dawng hi. 25 Kumpipa kiangah numeino manlangin paipah a, “Tu mahmah in kuangdai-in Baptize-pa Johan lutang nong piak ding ka deih hi,” ci-in a ngen hi. 26 Kumpipa lungdong lua mahmah a, ahi hangin ama kamciamsa le a nitak-an nekpih a lenglate hangin tuanu a nial nuam kei hi. 27 Tua ciangin amah in Johan lutang a paipih nading thupiakna tawh mithatpa khat a sawlpah hi. Tua mipa pai-in thong sunga om Johan ngawng tana, 28 ama lutang kuangdai-in a puak kik hi. Amah in numeino pia-a tuanu in a nu a pia hi. 29 Johan nungzuite in hih thu a zak uh ciangin pai uh a, a luang la-in han sung khatah a sial uh hi. 30 Jesu kimkotah sawltakpite va ki khawm uh a, amau hihsa le a hilhsate uh a ko uh hi. 31 Tua ciangin mipite a ciah le a kuan a tam luat manin an nek hun ding nangawn nei lo uh a, amaute kiangah, “Gamdaihna mun khatah no kia bek in hong zui unla, tawlnga un,” a ci hi. 32 Tua ciangin amau guak gamtawng khatah gunkuang khatin a pai uh hi. 33 Ahi hangin amaute paikhiat a mute in thei uh a, khua khempeuh panin khe-in tai uh a, amaute tun ma-in a na tung uh hi. 34 Jesu lei-ah a tun ciangin mihonpi tampi a mu hi. Amah in amaute khuatuah hi, bang hang hiam cih leh amaute a cingpa om lo tuuhon tawh kibang uh hi. Tua ciangin amaute thu tampi a hilh hi. 35 Tua hunlaitak nitak lam ahi hi. Tua ciangin a nungzuite a kiangah va pai uh a amaute in, “Hih tak gamtawng hi-a khuanung lua mahmah ta hi. 36 Hih kima khuata khuaneute ah pai-in a nek ding uh an a lei theih nadingun mipite ciahsak ta in,” a ci uh hi. 37 Ahi hangin amah in, “Note in a nek ding uh khatpeuh pia un,” a ci hi. Amaute in ama kiangah, “Tuabang hileh pasal khat, kha giat thamane tak bei ding hi! Kote pai-in tua zah tawh an va lei-in amaute nek ding, pia ding ka hi uh hiam?” a ci uh hi. 38 Amah in, “Anlum bangzah na nei uh hiam? Pai-in va en dih un,”a ci hi. Amaute in a et khit uh ciangin, “Lum nga le ngasa nih om hi,” a ci uh hi. 39 Tua ciangin Jesu in mipite lopa hing tungah a pawlpawlin a tusak hi. 40 Tua ahi ciangin amaute a zaza, a sawm nganga-in a tu ciptep uh hi. 41 Tua anlum nga le ngasate gel la-a, vantung lam ento-in lungdam a koh khit ciangin anlumte a balkham hi. Tua ciangin mipite a lui dingun a nungzuite a pia hi. Amaute khempeuh lakah ngasate gel zong a hawm hi. 42 Amaute in ne uh a, a kham pikpek uh hi. 43 Nungzuite in anlum le ngasa athem aneng bawmta sawm-le- nih a tawm uh hi. 44 Tua an nete pasal cingteng tul nga a pha hi. 45 Tua khit phetin Jesu in nungzuite gunkuang sungah tuangsaka, ama mai Bethsaida ah paisakin mihonpite a ciahsak hi. 46 Amaute paisan-a, amah thungen dingin mual tungah a pai hi. 47 Nitak ciangin tuilipi laizangah gun kuang om a, amah ahileh lei lakah a om hi. 48 Huih in gunkuang lehmut ahi manin nungzuite in gunkuang nakpi-a a hot uh a mu hi. Zan vil lina pawlin amaute lam zuanin tuilipi tungah Jesu a pai hi. Amaute kheng dektak a, 49 ahi hangin amah tuilipi tunga pai a muh uh ciangin sikha sa in a kikokhia uh hi. 50 Bang hang hiam cih leh a vekun amah mu uh a, a lau mahmah uh hi. Jesu in amaute kiangah, “Lau kei un! Keimah ka hi hi. Hong kihta kei un,” a cipah hi. 51 Tua ciangin amaute tawh gunkuang tungah kahto a, huih nung a dai kiuhkeuh hi. 52 Amaute in anlum ngate thu theitel lo uh ahi manin lamdang lua mahmah a sa uh hi, amaute lungtang kikhauhsak hi. 53 Amaute galkah uh a, Gennesaret a tun uh ciangin tua lai-ah a gunkuang uh a khih uh hi. 54 Gunkuang pan a pusuah phetun, mipite in Jesu mel a theitel uh hi. 55 Mipite tua kual khempeuhah tai kawi kawi uh a, cinate phek tawh zawngin, amah om hi ci-a a zakna peuhpeuhuah a paipih uh hi. 56 Khuapite khuaneute le gamsung khuate ahi zongin ama paina peuhpeuhah cinate paipih uh a, sum zuakna munte ah a na koih uh hi. Ama puantualpi mongtep ciang beek a lawnsak theih nadingin thum uh a, amah a lawngte khempeuh a dam uh hi.

Marka 7

1 Jerusalem panin Pharisee-te le thukham siate pawlkhat Jesu kiang ah va kikhawm uh a, 2 a nungzuite pawlkhat in ngeina banga “siang lo”—tua pen biakna ngeina a silsiang loh khut tawh an a nek laitak uh a mu uh hi. 3 (Pharisee-te le Jew-te khempeuh in upate tang ngeinate a kipletna un a ngeina bangin khut sil masa loin an a ne kei uh hi. 4 Sum zuakna mun pan a ciah uh ciangin kisil masa loin an a ne kei uh hi. Tua ciangin haite, tuivotbeelte le niangbeelte sawpsiangna-a kipan tang ngeina adang tampi a tang uh hi.a) 5 Tua ahi ciangin Pharisee-te le thukham siate in, “Bang hangin na nungzuite in khut sianglo tawh an a nek uh sangin upate tang ngeina bangin gamta zaw lo uh ahi hiam?” ci-in Jesu a dong uh hi. 6 Amah in, “No kineihsiamte tawh kisai-a Isaiah in a genkholh hih banga kigelhsa: “‘Hih mite in a muk uh tawh kei hong pahtawi uh a, ahi hangin a lungtang uh kei tawh kigamla hi. 7 A mawkna in kei hong bia uh a, a thuhilhte uh mihing bawltawm ngeina ahi hi,’b a cih man mahmah hi. 8 "Note in Pasian thupiakte na paikhia uh a, mihingte tang ngeinate na len tentan uh hi,” ci-in a dawng hi. 9 Tua ciangin amah in amaute kiangah, “Na tang ngeinate uh na tanc theih nadingun Pasian thupiakte nawlkhin dan na siam uh hi! 10 Moses in, ‘Na nu na pa pahtawi in.d A nu a pa a hamsiat mi peuhmah thah ding ahi hi,’e ci hi. 11 Ahi hangin note in, mi khatpeuh in a nu a pa-te khatpeuh kiangah, ‘Kei tung pana na ngah ding uh huhnate Corban (Pasian a ki-apsa letsong) hi ta hi,’ na ci uh a, 12 tua ciangin a nute a pate ading bangmah na hihsak nawn kei uh hi. 13 Tua bangin note na kipiaksawn uh na tang ngeinate uh zangin Pasian thu bangmah lo na suaksak uh hi. Tua banah tua bangin na tampi na hih uh hi,” a ci hi. 14 Jesu in mihonpite sam leuleu a, “Na vekpi un ngai unla hih thu theitel un. 15 A pualam pana mihing sunga tumsuk, bangmah in amah a ‘nin’ suaksak thei lo hi. Mihing sung pana pusuakte in amah a ‘nin’f suaksak zaw hi. 16 Zak nading bil nei peuh in za ta hen,”g a ci hi. 17 Mihonpite nusia in inn sungah a lut ciangin a nungzuite in hih gentehna thu ama kiangah a dong uh hi. 18 Amah in, “Tua zahin lungmawl zawzen na hi uh hiam? Pua lam panin mihing sunga tumsuk khatpeuh in amah a ‘nin’ suaksak thei lo ahilam thei lo na hi uh hiam? 19 Ahang in, a lungtang sungah tumsuk loin gilpi sungah tumsuk a, tua ciangin pumpi pualamah a pusuak khia hi,” a ci hi. (Jesu in hih banga a gen ciangin ante khempeuh ‘siang’ hi ci-a a pulakkhia ahi hi.) 20 A thugen zom lai-a: “Mihing sung pana pusuak in amah a ‘nin’ suaksak hi. 21 Ahang in, a sunglam mihing lungtang panin ngaihsutna khel, numei pasal paktatna, guktakna, tualthahna, angkawmna, 22 huaihamna, etsatna, zuau tatna, thangtatna enna, gensiatna, kiphatsakna le hainate a pusuakkhia hi. 23 Hih gitlohnate khempeuh a sung lam pana pusuakkhia hi-a, mihing a ‘nin’ suaksak hi,” a ci hi. 24 Jesu in tua mun nusia a, Tyreh kimnai-ah a pai hi. Amah inn khatah luta, ama omsim lam kuama theih ding deih lo napi a ki-im zo kei hi. 25 A taktakin, a tanu sunga kha giloi a lut nupi khat in ama thu a zak khit phetin va pai-a, a khe phungah a bok hi. 26 Tuanu, Syria gam Phoenicia a suak Greek mi ahi hi. Tuanu in a tanu sunga dawi a hawlkhiatsak nadingin Jesu kiangah a thum hi. 27 Amah in tuanu kiangah. “Tate an nek kim lai laksakin uite piak ding kilawm lo ahi manin, tate in a duh zahzah uh ne masa phot uh hen,” a ci hi. 28 Tuanu in, “Himah hi, Topa aw, ahi hangin sabuai nuai-a uite in zong naupangte annengte a ne uh hi,” a ci hi. 29 Tua ciangin amah in tuanu kiangah, “Tuaci banga nong dawn manin na ciah thei hi; dawi in na tanu a nusia zo hi,” a ci hi. 30 Tuanu ciaha, a sung pana dawi a paikhia khin, lupna tunga lum a tanuno a mu hi. 31 Tua ciangin Jesu in Tyre kimnai teng nusia-a, Sidon kantanin Galilee tuipi ah pai-a tua ciangin Decapolisj kualah a paisuk hi. 32 Tua lai-ah mi pawlkhat in bilngong-a pau-awk pasal khat va paipih uh a, tuapa tungah a khut a ngak nadingin ama kiangah a thum hi. 33 Jesu in tuapa mihonpite lak panin a tang paikhiatpih khit ciangin a khutmete tuapa bil sungah a khum suk hi. Tua ciangin a cil phih a tuapa leii a lawng hi. 34 Vantung lam ento a nakpi-in khuisa-a tuapa kiangah, “Ephatha!” (“Kihong ta hen!” cihna) a ci hi. 35 Tua laitakin tua mipa bilte kihonga, a leiigui kikolin siangtakin a pau thei sensen hi. 36 Kuama tungah a gen loh nadingun Jesu in amaute thu a pia hi. Ahi hangin tua banga thu a piak semsem ciangin amaute in tua thu a gen semsem uh hi. 37 Mipite in lamdang sa lua mahmah uh a, “Amah in na khempeuh a hoihin bawl khin zo hi. Amah in bilngongte khua zasakin, a pau thei lote nangawn a pausak hi,” a ci uh hi.

Marka 8

1 Tua hunlaitakin mihonpi dang khat va kikhawm uh hi. Amaute in nek ding bangmah nei lo uh ahi ciangin Jesu in a nungzuite sama, 2 "Hih mite ka khuatuah hi. Kei kianga hong om zawh uh ni thum tak pha khin ta-a, a nek ding uh bangmah a nei kei uh hi. 3 Gil kialpi in innah ciahsak leng pawlkhatte gamlapi pana hong pai uh ahi manin lamkalah phuk-hong vei-in puk ding uh hi,” a ci hi. 4 A nungzuite in, “Ahi ta zongin gamsung hi bangah mihon hizah ta vak nading an koi pan kingah thei ding ahi hiam?” ci-in a dawng uh hi. 5 Jesu in, “Anlum bangzah na nei uh hiam?” ci-in a dot ciangin, “Sagih,” ci-in a dawng uh hi. 6 Amah in mihonpite leitual ah a tusak hi. Tua anlum sagihte la-a, lungdam a koh khit ciangin balkhama mipite a lui dingun a nungzuite pia-a, amaute in mipite a lui uh hi. 7 Amaute in ngasa neu tawmkha zong a nei uh hi; amah in tuate hangin zong lungdam a koh khit ciangin a hawmkhia dingin nungzuite a sawl hi. 8 Mipite in ne uh a, a kham pikpek uh hi. An khamval teng nungzuite in a neng a themin a top uh leh bawm sagih dimtak a pha hi. 9 Tua lai-ah pasal tulli bang a om hi. Jesu in amaute a ciahkhiatsak khit ciangin 10 a nungzuite tawh gunkuangah tuangin Dalmanutha kual lam a zuan hi. 11 Pharisee-te va pai-in Jesu kiangah thu a dong uh hi. Amah a zia-etna un, amaute in vantung panin lim khat a ngen uh hi. 12 Amah nakpi in khuisa-a, “Bang hangin hih khang mite in lim lamdang ngen uh ahi hiam? Thutak kong geninah, amaute tungah lim bangmah a kilak kei ding hi,” a ci hi. 13 Tua ciangin Jesu in amaute nusia in gunkuangah tuang kika, a galkhat lamah a galkah hi. 14 Nungzuite in gunkuang sunga a neihsa uh anlum khat longal an puak ding a mangngilh uh hi. 15 Jesu in amaute kiangah, “Pilvang un, Pharisee-te le Herod silngo panin na kidawm un,” ci-in a vauhilh hi. 16 "An i neih loh hang hi,” ci-in amaute khat le khat a kikum uh hi. 17 Jesu in amaute kikupna a theih ciangin, “Bang hangin note, na an neih loh uh kikum tazen na hi uh hiam? Tu dongin mu nai lo, theitel nailo lailai na hi uh hiam? Na lungtang uh kikhauhsak lai ahi hiam? 18 Mit nei napi in mu lo a, bil nei napi in za lo na hi uh hiam? Hih thu phawk lo lailai na hi uh hiam? 19 Mi tulnga adingin anlum nga ka balkhap lai-in athem aneng na topte uh bawm dim bangzah pha ahi hiam, na phawk lai uh hiam?” a ci hi. “Sawm-le-nih,” ci-in a dawng uh hi. 20 "Mi tulli ading anlum sagih ka balkhap lai-in athem aneng na topte uh, bawm dim bangzah pha ahi hiam?” ci-in a dot ciangin, amaute in, “Sagih,” ci-in a dawng uh hi. 21 Jesu in amaute kiangah, “Theitel nai lo na hi uh hiam?” a ci hi. 22 Amaute Bethsaida a tun uh ciangin mi pawlkhat in mittaw khat va paipih uh a, Jesu in a lawn nadingin a thum uh hi. 23 Amah in mittawpa a khutin kai-a, khuanawl ah a paikhiatpih hi. Jesu in tuapa mitte a cil phih-a a tungah a khutte a ngak khit ciangin, “Na khatpeuh na mu thei hiam?” ci-in a dong hi. 24 Amah khuadak a, “Mite ka mu hi; amaute singkung lampai bang uh hi,” a ci hi. 25 Jesu in a khutte tuapa mitte ah a nga kik hi. Tua ciangin a mit kihongin khua mu thei-in na khempeuh siang sinsenin a mu hi. 26 Jesu in, “Khua sungah lut kei in,” a ci-in amah a ciahsak hi. 27 Jesu le a nungzuite, Caesarea le Philipi kima khuaneute a tun dong uh a pai uh hi. Lam a pai laitakun amaute kiangah, “Mite in kei kua hi, hong ci uh hiam?” ci-in a dong hi. 28 Amaute in, “Kimkhat in Baptize-pa Johan hi; adangte in Elijah hi; pawlkhatte leuleu in kamsangte lakah khat hi, hong ci uh hi,” ci-in a dawng uh hi. 29 "No e leh, kei kua hi nong ci uh hiam?” ci-in a dong kik hi. Peter in, “Nang tua Khrist na hi hi,”b ci-in a dawng hi. 30 Jesu in ama thu kuamah a hilh loh nadingun amaute a vauhilh hi. 31 Tua ciangin Mihing Tapa in tampi thuak pelmawh dinga, upate, siampi makaite le thukham siate in amah nolh ding uh a, pel loin amah kithatin ni thum khit ciangin a tho kik ding hi, cih thu amaute hilh a kipan hi. 32 Amah in hih thu teltakin gena, tua ciangin Peter in amah tang paikhiatpih in a tai hi. 33 Ahi hangin Jesu kihei-a, a nungzuite enin Peter tai a, “Satan aw, ka nungah kihem in! Pasian thute ngaihsun loin mihing thute na ngaihsun hi,” a ci hi. 34 Tua ciangin a nungzuite le mihonpite ama kiangah sama, “Mi khatpeuh in ka nung hong zuih nop leh pel loin amah le mah kinialin, ama singlamteh kisuanin hong zui ding hi. 35 Ahang in, a nuntaknac a honkhia nuam peuh in taan dinga, ahi hangin kei hang le lungdamna-thu hangin ama nuntakna a taan peuhmah in a nuntakna a honkhia ding hi. 36 Mi khatin leitung buppi a neih hangin a hinna taan leh bang phatuam ding ahi hiam? 37 Ahi kei leh mi khatin ama hinna bang tawh khek thei ding ahi hiam? 38 Hih angkawm le mawhdim khang mite hunah keimah le ka thu a zumpihte, Mihing Tapa in a Pa minthanna-in ama vansawltak siang thote tawh hong pai ciangin amaute a zumpih ding hi,” a ci hi.

Marka 9

1 Tua ciangin amah in amaute kiangah, “Thutak kong geninah, vangliatna tawh Pasian gam hong tung, hih lai-a ding mi kimkhat in a muh matengun sihna a ciam kei ding uh hi,” a ci hi. 2 Niguk khit ciangin Jesu in Peter, James le Johan tonpih in mualsang tungah kahpih to a, tua lai-ah amauteng bek a om uh hi. Tua lai-ah amauteng bek mitmuhin a mel a kikhel hi. 3 Ama puansilhte leitunga, a kipaksak thei penpen sangin pak zaw-a a leng daldal hi. 4 Tua laitakin amaute mai-ah Elijah le Moses kilanga, Jesu tawh a kiho uh hi. 5 Peter in Jesu kiangah, “Rabbi, hih lai-a i om nuam mahmah hi. Nang ading khat, Moses ading khat, Elijah ading khat, buk thum lam ni,” a ci hi. 6 (Amah in a gen ding thei lo hi, amaute a lau mahmah uh hi.) 7 Tua ciangin meii lompi khat kai-in amaute tuama, tua meii lak panin aw khat in, “Hih in, ka it ka Tapa ahi hi. Ama thu na ngai un,” a ci hi. 8 Tua khit phetin a kimkot uh a et uh leh Jesu longal kuamah dang a mu nawn kei uh hi. 9 Amaute mualtung pan a kumsuk kawmkawmun Mihing Tapa misi pan a thawh kik mateng a muhte uh kuama kiangah a gen loh nadingun Jesu in amaute thu a pia hi. 10 Amaute in hih thu amauteng theih in koih uh a “misi pan tho kik” cih bang cihnopna hiam cih a kikum uh hi. 11 Tua ciangin amaute in, “Bang hangin thukham siate in, Elijah hong pai masa pelmawh ding hi, ci-in gen uh ahi hiam?” ci-in amah a dong uh hi. 12 Jesu in, “A taktakin Elijah hong pai masa takpi mah a na khempeuh bawlpha mah hi. Tua ahileh Mihing Tapa in nak thuak mahmah dinga a kinolh ding hi, cih thu bang hangin kigelh ahi hiam? 13 Ahi hangin ken kong cihinah, Elijah hong pai khin zo a, ama thu a kigelhsa bangin amau ut bangin ama tungah bawl khin zo uh hi,” ci-in a dawng hi. 14 Nungzui dangte kiangah amaute a tun uh ciangin amaute kimah mihon tampi na oma, thukham siate tawh thu a kinialnial uh a mu uh hi. 15 Tua lai-a om mite khempeuh in Jesu a muh phetun lamdang sa lua uh a, amah dawntuah dingin a tai uh hi. 16 Amah in, “Amaute tawh bang thu kinialnial na hi uh hiam?” ci-in a dong hi. 17 Mihonpite lakah khat in, “Sia aw, ka tapa sungah kha khat lutin pausak thei lo-a na kiangah kong paipih hi. 18 A dawi in a mat peuhpeuh ciangin leilak a denna hi. A kam panin cilphuan bua-a, a ha gawi-in gawcip hi. Na nungzuite kiangah tua kha a hawlkhiat nadingun ka nget hangin a hawlkhia thei kei uh hi,” ci-in a dawng hi. 19 Jesu in, “Thu um lo khangmite aw, no tawh bang tan om khawm lai ding ka hi hiam? Bang tanvei hong thuak zo ding ka hi hiam? Tua pasalno ka kiangah hong paipih un,” a ci hi. 20 Tua ciangin amaute in amah a paipih uh hi. Tua kha in Jesu a muh phetin tua naupang a kisatgawpsak hi. Amah lei lakah pukin kipum khuka, a cilphuan a bua hi. 21 Jesu in, “A hicih zawh bang tanvei sawt khin hiam?” ci-in tua pasalno’ pa a dong hi. Amah in, “A neu tunga kipan ahi hi. 22 Tua kha in amah that nuamin mei sung khawng, tui sung khawng ah sawnpai zel hi. Ahi zongin nang na hih theih leh hong hehpih inla, hong huh in,” a ci hi. 23 Jesu in, “‘Na hih theih leh e’? A um mi adingin na khempeuh hi thei hi,” a ci hi. 24 Tua pasalno’ pa in zong, “Ka um hi; ka uplahna ka zawh nadingin hong huh in!” a cikhia pah hi. 25 Tua munah mihonpite hong tai uh Jesu in a muh ciangin tua kha giloa a tai hi. Amah in, “Nang a bilngong, a pauthei lo kha aw, ama sung pan paikhia inla, lut kik nawn peuhmah kei in, ci-in thu kong pia hi,” a ci hi. 26 Tua kha ku zelzal a, tua pasalno kisatsak vanvanin tua khit ciangin a paikhia hi. Tua pasalno misisa tawh kibang lua ahi manin mi tampi in, “Si ta ei!” a ci uh hi. 27 Ahi hangin Jesu in tuapa khut lenin a phottoh leh amah a ding to hi. 28 Inn sungah Jesu a tum khit ciangin a nungzuite in, “Bang hangin kote in hawlkhia thei lo ka hi uh hiam?” ci-in a dong sim uh hi. 29 Amah in, “Hih bangte pawl, thungetnab bek tawh paikhia thei hi,” ci-in a dawng hi. 30 Amaute in tua mun nusia in Galilee a kantan uh hi. Jesu in amau omna kuama theih ding a deih kei hi. 31 Bang hang hiam cih leh amah in, “Mihing Tapa, mite khut sungah kilehhek ding hi. Amaute in amah that ding uh a, ni thum khit ciangin amah tho ding hi,” ci-in a nungzuite a hilh hi. 32 Ahi hangin amaute in ama cihnopna theitel lo uh a, tua thu tawh kisai lah a dong ngam kei uh hi. 33 Amaute Capernaum a tung uh hi. Inn sungah a om laitakun, “Lampi-a na kisel uh bang ahi hiam?” ci-in amaute a dong hi. 34 Ahi hangin lampi-a a kisel uh kua lianpen hiam, cih thu tawh kisai ahi manin a dai uh hi. 35 Jesu tusuk in Sawm-le-nihte sam a, “Mi khatpeuh a masakpen nop leh a nunung penpen le adang teng’ nasem ahi pelmawh kul hi,” a ci hi. 36 Amah in naupangno khat kai-a amaute lakah a dingsak hi. Amah in tua naupangno tawi-in amaute kiangah, 37 "Keima min hangin hih bang naupangno khat a sang peuhmah kei hong sang ahi hi. Kei hong sang peuhmah, keimah hong sang hi loin kei hong sawlpa a sang ahi hi,” a ci hi. 38 Johan in, “Sia aw, mi khatin nang minin dawite a hawlkhiat ka mu uh a, ei mi hi lo ahi manin a hih nawn loh nadingin ka kho uh hi,” a ci hi. 39 Jesu in, “Tuapa kho kei un, kuamah in keima minin nalamdang a bawl khit phetin kei hong siatgen pah thei lo ding hi. 40 Ahang in, ei hong langpang lo peuh ei aa ahi hi. 41 Thutak kong geninah, Khrist pawl na hi manun kei min hanga tuisik hai khat hong suah peuhpeuh pahtakman ngah loin a om peuhmah kei ding hi. 42 Kei hong um hih naupang no khatpeuh mawhna a bawlsak a om leh a ngawngah angawina suang lianpi khihin tuipi sungah kipai leh ama adingin hoihzaw ding hi. 43 Na khut in mawhna hong bawlsak leh sattan in. 44 Khut kimin, amaute than a sihlohna, mei a mit lohna muna meilipi khukah hong kikhul sangin khut buisa-in nuntakna ah lut lecin nang adingin a hoihzaw hi.c 45 Na khe in mawhna hong bawlsak leh sattan in 46 Khe kimin, amaute than a sihlohna mei a mit lohna mund meilipi khukah hong kipaih sangin khe buisa-in nuntakna ah lut lecin nang ading a hoihzaw hi. 47 Na mittang hangin mawhna na bawl leh khelkhia in. Mittang kimin meilipi khukah hong kipaih sangin mit langkhat bek tawh Pasian gamah lut lecin nang adingin a hoihzaw hi. 48 Tua meilipi khukah “ ‘amaute than nangawn si lo-a, mei zong a mit ngei kei hi,’e 49 Mi khempeuh cisawh bangin mei tawh kisawh ding hi. 50 "Ci a lim hangin a alna mang leh bangci alkiksak thei ding na hi hiam? Note zong ci alin al unla, khat le khat na kilem un,” a ci hi.

Marka 10

1 Tua ciangin Jesu tua mun nusia in Jordan gal khat lam Judea kualah a pai hi. Ama kiangah mihonte va pai leuleu uh a, a hih ngei bangin amaute thu a hilh hi. 2 Pharisee-te pawlkhat va pai uh a, a zia-etna un, “Mikhat in zi a mak ding thukham tawh a kituak hiam?” ci-in a dong uh hi. 3 Amah in, “Moses in note bang thu hong pia ahi hiam?” ci-in a dawng hi. 4 Amaute in, “Mi khatin a zi a makna lai pia-a, a zi a nawkiksak theih nading Moses in a phal hi,” a ci uh hi. 5 Jesu in, “Na lungtang uh khauh lua ahi manin Moses in hih thukham note adingin a gelh ahi hi. 6 Ahi hangin Pasian in na khempeuh a piansak cilin amaute ‘numei le pasal-in a bawl hi.’a 7 ‘Hih thu hangin pasal in a nu a pa nusia-in a zi tawh kigawm dinga,b 8 amaute gel sakhat a suak ding uh hi.’c Tua ahi ciangin amaute nih hi nawn loin khat ahi hi. 9 Tua ahi manin Pasian gawmsate mihing in khen kei ta hen,” a ci hi. 10 Amaute inn sungah a om kik uh ciangin, nungzuite in hih thu Jesu a dong uh hi. 11 Amah in, “Ama zi ma-a, numei dang khat a tenpih peuhmah a zi angkawmsan ahi hi. 12 Tua ciangin numei khat in a pasal ma-a pasal dang khat a tenpih leh tua numei angkawm a suak hi,” ci-in a dawng hi. 13 Jesu lawn dingin mipite in nau pangnote ama kiangah a paipih uh leh, nungzuite in amaute a na tai uh hi. 14 Jesu in a muh ciangin a lungkim kei hi. Amah in amaute kiangah, “Naupangnote ka kiangah hong paisak un, amaute dal kei un. Ahang in, Pasian gam i cih hih bangte aa ahi hi,” a ci hi. 15 Thutak kong geninah, naupangno banga Pasian gam a sang lo peuhmah, tua sungah a lut ngei kei ding hi,” a ci hi. 16 Tua ciangin amah in naupangnote a khutin tawi-a, a tunguah a khutte nga in amaute thupha a pia hi. 17 Jesu a paikhiat laitakin ama kiangah mi khat va tai-a, a mai ah khukdinin, “A hoih siapa aw, nuntak tawntungna ka luah nadingin bang ka hih ding kul hiam?” ci-in a dong hi. 18 Jesu in, “Bang hangin kei hoih hong ci na hi hiam? Pasian bek longal mi hoih khat beek a om kei hi. 19 ‘Tual that kei in, ang kawm kei in, gu kei in, zuau teci pang kei in, khem kei in, na nu na pa pahtawi in,’d kici thupiakte na theihsa ahi hi,” ci-in a dawng hi. 20 Tuapa in, “Sia aw, tuate khempeuh ka neu tunga kipan ka zuihsa ahi hi,” a ci hi. 21 Jesu in amah enin it a, “Na khat na kisam lai hi. Pai-in, na neihsa khempeuh zuak inla mizawngte pia in. Tua hileh vantungah gou na nei ding hi. Tua khit ciangin hong pai inla kei hong zui in,” a ci hi. 22 Hih thu hangin tuapa a mai a mual hi. Amah hau mahmah ahi manin lungsi dedu in a paikhia hi. 23 Jesu in a kim teng en kawikawi a, a nungzuite kiangah, “A haute Pasian gam a lut nading haksa na zen e!” a ci hi. 24 Nungzuite in Jesu thugente lamdang a sa mahmah uh hi. Ahi hangin Jesu in, “Tate aw, Pasian gam lut nading haksa mahmah si!e 25 Mihau khat Pasian gam a lut ding sangin phim bilvang ah kala-oh thawl ding a baihzaw hi,” a ci hi. 26 Nungzuite in lamdang sa semsem uh a, “Tua hileh kua kihonkhia thei peuhmah ding hiam?” ci-in khat le khat a kikum uh hi. 27 Jesu in amaute en a, “Mihing adingin ahi thei lo mah ahi hi; ahi hangin Pasian adingin tua bang hi lo hi. Pasian adingin na khempeuh hi thei hi,” a ci hi. 28 Peter in ama kiangah, “Kote in na khempeuh nusia in nang kong zui uh hi,” a ci hi. 29 Jesu in “Thutak kong geninah, keima hang le lungdamna-thu hangin a inn, a sanggampate, a sanggamnute, a nu, a pa, a tate le a lote a nusia peuhmah in, 30 tu khanghunin a zah zakhat (innte, sanggampate, sanggamnute, nute, tate le lote—tuate tawh bawlsiatnate) le hong tung ding khanghunin nuntak tawntungna a ngah ding a kipelh kei ding hi. 31 Ahi hangin a masate tampi nunung ding uh a, a nunungte a masa ding uh hi,” ci-in a dawng hi. 32 Jesu mapi in amaute Jerusalem manawhin a pai laitakun nungzuite in lamdang vat sa uh a, amau zuite ahileh a lau uh hi. Amah in Sawm-le-nihte paipih tuamin ama tunga piang dingte a hilh hi. 33 Amah in, “Jerusalem dong i pai dinga, siampi makaite le thukham siate tungah Mihing Tapa a kilehhek ding hi. Amaute in amah thah dingin mawhpaih ding uh a, Gentile-te khut ah amah piakhia ding uh hi. 34 Amaute in amah zahko-in, cilphih in, satin, a that ding uh hi. Tua zawh ni thum ciangin amah a tho kik ding hi,” a ci hi. 35 Tua ciangin Zebedee tapate James le Johan a kiangah va pai uh hi. Amaute in, “Sia aw, kong nget peuhpeuh uh hong hihsak dingin kong deih uh hi,” a ci uh hi. 36 Amah in, “Bang hong hihsak leng na deih uh hiam?” ci-in a dong hi. 37 Amaute in, “Na minthanna na ngah ciangin kote gel na taklam khat na veilam khat hong tusak in,” ci-in a dawng hi. 38 Jesu in, “Nong nget uh na thei kei uh hi. Ka dawn ding hai dawn thei ding na hi uh hiam? Ahikeh kei kibaptise nading baptisena ah na kibaptise thei ding uh hiam?” a ci hi. 39 Amaute in, “Ka hih thei ding uh hi,” ci-in a dawng uh hi. Jesu in amaute kiangah, “Ka dawn ding hai na dawn takpi ding uh a, kei kibaptisena tua kibaptisena ah na kibaptise takpi ding uh hi. 40 Ahi hangin ka taklam ahikeh ka veilam a tu ding kei hong piak theih hi lo hi. Tua munte ah a tu dinga a kiseh kholsa mite bek tu ding uh hi,” a ci hi. 41 Nungzui sawmte in hih thu a zak uh ciangin James le Johan tungah a lungkim kei uh hi. 42 Jesu in amaute samkhawm a, “Gentile-te tungah gam-uka ki ngaih sunte, amau tungah kiliansak uh a, a uliante uh amau tungah kithuneisak uh hi, cih na thei uh hi. 43 Note tua bang na hi kei uh hi. Tua bang na hi sangsik-un note lakah a lian nuam peuhmah na nasem uh suakin, 44 a masa pen ahi nuam peuh, mi khempeuh sila ahi pelmawh kul hi. 45 Ahang in, Mihing Tapa nangawn ama na midangte a semsak ding hi loin, midangte na a sem ding le mi tampi tat nadingin ama nuntakna pia dinga hong pai ahi hi,” a ci hi. 46 Tua ciangin amaute Jericho a tung uh hi. Jesu le a nungzuite in mihon tampi tawh tua khuapi a nusiat laitakun mittaw khat Bartimaeus (tua pen, Timaeus Tapa) khut dawh-a ngenin lam gei ah a na tu hi. 47 Amah in Nazareth mi Jesu ahi lam a zak ciangin, “David Tapa Jesu aw, kei hong lainat in,” ci-in a kiko hi. 48 Mi tampi in amah tai uh a, daitaka a om nadingin a gen uh hi. Ahi hangin tuapa in, “David Tapa aw, kei hong lainat in!” ci-in a kiko semsem hi. 49 Jesu khawl a, “Amah sam un,” a ci hi. Tua ciangin amaute in mittawpa kiangah, “Lung nuam in! Ding in! Amah in nang hong sam hi,” ci-in a galsap uh hi. 50 Amah in a puantualpi paikhia pahin dingto-a Jesu kiangah a pai hi. 51 Jesu in, “Bang kong hihsak ding deih na hi hiam?” ci-in amah a dong hi. Tua mittawpa in, “Rabbi aw, khua ka mu thei nuam hi,” a ci hi. 52 Jesu in, “Pai ta in, na upna in nang hong damsak zo hi,” a ci hi. Tua khit phetin amah in khua mu thei pah lian a, lampi ah Jesu a zui hi.

Marka 11

1 Amaute Jerusalem zuana a pai laitak, Olive Vum panga om Bethphage le Bethany a tun uh ciangin Jesu in a nungzuite nih a mapaisak hi. 2 Amah in amaute kiangah “Na mai-ua khua ah pai le uh cin na lut phetun kuama tuan ngei nai lohna laano khat a kikhih na mu ding uh hi. Sut unla hong paipih un. 3 Mi khatpeuh in, ‘Bang hangin hih banga hih na hi uh hiam?’ ci-a hong dot leh, ‘Topa in a deihna om hi; hong puak kik pah ding hi,’ ci un,” ci-in a sawl hi. 4 Amaute pai uh a inntual kong pualam kongzinga kikhih laano khat a mu uh hi. Amaute in a sut laitakun 5 tua lai-a ding mi pawlkhat in, “Bang dinga tua laano sut na hi uh hiam?” ci-in a dong uh hi. 6 Amau gel in Jesu hilhsa bangin a dawn uh ciangin tua mite in amaute a paisak uh hi. 7 Tua laano Jesu kiang a tunpih uh ciangin a tungah a puantualpite uh phah uh a, amah a tungah a tu hi. 8 Mi tampi in a puantualpite uh lampi ah a phah uh hi. Pawlkhat in gamlak singhiangte khiakin lampi ah a phah uh hi. 9 A nung le a mai-a pai mihonpite in, “Hosanna!”a “Topa min-a hong pai pa in thupha a ngah hi!”b 10 "Hong tung ding i pa David kumpi gam in thupha a ngah hi!” “A sangpenna munah Hosanna!” ci-in a awng uh hi. 11 Jerusalem ah Jesu lutin biakinnpi ah a pai hi. Amah in na khempeuh en kawikawi a, ahi hangin khuanung lua ta ahi manin Sawm-le-nihte tawh Bethany ah a pai uh hi. 12 A zing ciangin Bethany nusia-a a pai laitakin Jesu a gil kial hi. 13 Theikung a teh pha khat a galmuh ciangin, a gah kha hiam cih en dingin a va pai hi. Thei gah hun hi lo ahi manin thei phung a tun ciangin a teh simloh bangmah a om kei hi. 14 Tua ciangin amah in theikung kiangah, “Kuamah in na gah ne ngei nawn kei ta hen,” a ci hi. A nungzuite in tua a cih a za uh hi. 15 Jerusalem a tun uh ciangin biakinnpi huangah Jesu lut-a, tua lai-a sum lei sum zuakte a hawlkhia hi. Sum khengte sabuaite le vakhu zuakte tutphahsaute sawnthalsak gawpin, 16 biakinntualte ah sumbuk van paipih ding kuamah a phal kei hi. 17 Amah in amaute hilh a, “ ‘Ka inn, minamte khempeuh thungetna inn kici ding hi,’c ci-in kigelh hi lo ahi hiam? Ahi hang-in note in ‘misuamte kua’d na suaksak tazen uh hi,” a ci hi. 18 Siampi makaite le thukham siate in hih thu a zak uh ciangin Jesu a thah theih nading uh lampi a zong uh hi. Ahang in, mihonpite khempeuh in ama thuhilhna lamdang sa mahmah uh ahi manin amaute in amah a kihta uh hi. 19 Nitak lam ciangin amautee khuapi pualamah a paikhia uh hi. 20 A zingsang ciangin amaute a pai laitakun tua theikung a zunga kipan a dinggaw-a om a mu uh hi. 21 Peter in phawka Jesu kiangah, “Rabbi aw, en in! Na hamsiat theikung dinggaw hi!” a ci hi. 22 Jesu in, “Pasian muangf un. 23 Thutak kong geninah, mi khatpeuh in hih mualpi kiangah, ‘Pai inla tuipi sungah kipai in,’ ci-in lunghei loin a cih bang piang ding hi, ci-a a up leh ama cih bang tektekin a piang ding hi. 24 Tua ahi manin ken kong geninah, na nget peuhpeuh uh ka ngah khin hi, ci-a na up uh leh na ngah ding uh hi. 25 Thungena na din laitakin mi khatpeuh tungah lungkimlohna na neih leh vantunga om na Pa in na mawhnateg hong maisak theih nadingin tuapa na maisak in. 26 Ahi zongin na maisak kei uh leh vantunga om na Pa un no mawhnate hong maisak lo ding hi,”h ci-in a dawng hi. 27 Amaute Jerusalem tung kik uh a, biakinnpi tualte ah Jesu a vak kawikawi laitakin siampi makaite, thukham siate le upate ama kiangah a pai uh hi. 28 Amaute in, “Bang thuneihna tawh hihte hih na hiam? Hihte hih nading thuneihna kua in hong pia hiam?” ci-in a dong uh hi. 29 Jesu in, “Kei zong khat kong dong ding hi. Hong dawng un; tua ciangin ken zong bang thu neihna tawh hihte hih ka hi hiam, cih kong gen ding hi. 30 Johan baptisena koi pana hong pai ahi hiam? Vantung pan hiam, mihing tung pan hiam? Hong gen dih un!” ci-in a dawng hi.e 31 Amaute kikum uh a, “Vantung pan hi,’ ci leng, ‘Tua ahileh bang hangin amah um lo na hi uh hiam?’ hong ci ding hi. 32 Ahi hangin ‘Mihing tung pan hi,’ ci leng lah..., (Johan pen mi khempeuh in kamsang taktakin sang uh ahi manin amaute in mipite a kihta uh hi.)” a ci uh hi.. 33 Tua ciangin amaute in, “Ka thei kei uh hi,” ci-in Jesu a dawng uh hi. Jesu in, “Kei zong bang thuneihna tawh hihte ka hih cih kong gen kei ding hi,” a ci hi.

Marka 12

1 Tua ciangin amah in amaute kiangah gentehnate zangin thu gen a: “Lenggui a ciing mi khat a om hi. A kimkotah dai kai-a, lengtui sukna khat toin, tausang khat a dawh hi. Tua khit ciangin a lenggui lo lokho pawlkhat khawhlawhsakin khual a zinsan hi. 2 A lak hun a tun ciangin lenggah khawm dingin lo-khawhlawhte kiangah a nasemte khat a sawl hi. 3 Ahi hangin amaute in tuapa na man uh a, satgawpin a guak ciahsak uh hi. 4 Tua ciangin amah in tuate kiangah nasem dang khat a sawl kik hi. Amaute in hih pa lu sat sakin a zahlaksak ngi-ingei uh hi. 5 Amah in zong nasem dang khat sawl kik leuleu a, amaute in tuapa a that uh hi. Nasem adang tampi a sawl hangin amaute in pawlkhat satin, adangte a that uh hi. 6 "Amah in a sawl theih ding a it a tapa khat a nei lai hi. A tawpkhakna ah, ‘Ka tapa zahtak buang ding uh hi,’ ci-in a tapa a paisak hi. 7 "Ahi hangin lo-khawhlawhte in, ‘Hih pa a gouluahpa ahi hi; hong pai un amah that ni, a luah ding teng ei aa suakpah ding hi,’ kici uh hi. 8 Tua ciangin amah manin that uh a, daipua lamah a paikhia uh hi. 9 "Tua bangin hileh lenggui lo neipa in bang a cih ding hiam? Amah hong pai-in lo-khawhlawhte thatin ama lo midangte a pia ding hi. 10 Hih Laisiangtho thu: “‘Inn lamte nilkhiat suang inntungkhuma suang a suak hi; 11 hih thu Topa hih hi a, eite mitmuh in piandang hi,’b cih sim ngei lo na hi uh hiam?” a ci hi. 12 Hih gentehna amaute a langgenna ahilam thei uh ahi manin amah mat nading lampi a zong uh hi. Ahi hangin amaute in mihonpite kihta uh a, tua ciangin amah nusia-in a paimang uh hi. 13 Tua nung ciangin amaute in ama thugenin amah a mat theih nadingun Pharisee-te le Herod pawlte Jesu kiangah a paisak uh hi. 14 Amaute va pai-in ama kiangah, “Sia aw, nang mi thutak khat na hi lam ka thei uh hi. Kuamah maivil nei lo na hi manin, kuama thu-in na gamta kei a, Pasian thutak tawh kizui-in na hilh hi. Tua hi-a Caesar tungah siah piak tuak hiam, piak tuak lo hiam? 15 Pia ding ka hi uh hiam, pia lo ding ka hi uh hiam?” a ci uh hi. Ahi hangin Jesu in amaute a kineih a hina thei-a, “Bang hangin kei hong thangsiah na hi uh hiam? Denarius khat hong la unla hong veelsak dih un,” a ci hi. 16 Amaute in tua sumtang a paipih uh ciangin amaute kiangah, “Hih kua lim hi-a hih kua min ahi hiam?” ci-in a dong hi. Amaute in, “Caesar aa ahi hi,” ci-in a dawng uh hi. 17 Tua ciangin Jesu in amaute kiangah, “Caesar aa te Caesar na pia unla, Pasian aa te Pasian na pia un,” a ci hi. Tua ciangin amaute in amah lamdang a sa mahmah uh hi. 18 Tua khit ciangin thawhkikna om lo hi, a ci Sadducee-te thu dong dingin Jesu kiangah a pai uh hi. 19 Amaute in, “Sia aw, Moses in, ‘Ta nei man loin a zi a sihsan pasal khatpeuh a om leh a sanggampa in tua meigongnu tenpihin a sanggampa ading tate neihsak hen,’ ci-in ko adingin na gelh hi. 20 Tu-in unau pasal sagih a om hi. A u pen in zi nei a, ta nei man loin a si hi. A nihna pa in 21 tua meigongnu tenpih a, ahi hangin amah zong ta nei man lo mah in a si hi. A thumna pa zong tua mah bang ahi hi. 22 A taktak in tua unau sagihte khat beek in ta a nei man kei uh hi. A tawpkhakna ah tua numei zong a si hi. 23 Tua ahileh tua numei in unau pasal sagih teng tenpih kim ahi ciangin thawhkikc ciangin amah kua pen zi hi ding hiam?” ci-in a dong uh hi. 24 Jesu in, “Note in Laisiangtho ahi zongin, Pasian vang ahi zongin thei lo na hi manun khial hi lo na hi uh hiam? 25 Misite a thawh kik ciangin mopina le mokhakna a om kei ding hi. Amaute vana vansawltakte a bang ding uh hi. 26 Misite thawhkikna tawh kisai-in Pasian in, Moses kiangah, ‘Abraham’ Pasian, Isaac’ Pasian le Jacob’ Pasian ka hi hi,’d ci-a sawlbawk laka a genna thu Moses laibu sungah sim ngei lo na hi uh hiam? 27 Amah a site Pasian hi loin a nungtate Pasian ahi hi. Note nakpi takin na khial uh hi!” ci-in a dawng hi. 28 Tua laitakin thukham siate lakah khat va pai-a amaute kam kinialna a za hi. Jesu in amaute hoihtakin a dawn theih lam tuapa in a theih ciangin, “Thupiakte khempeuh lakah koi a thupi pen ahi hiam?” ci-in amah a dong hi. 29 Jesu in, “A thupi penpen hih ahi hi: ‘Israel aw, ngai dih in i Topa eite Pasian in Topa khat ahi hi.e 30 Na Topa Pasian, na lungtang khempeuh, na hinna khempeuh, na lungsim khempeuh le na thahatna khempeuh tawh it in.’f 31 A nihna hih ahi hi: ‘Nang le nang na ki-it bangin na vengte it in.’g Hihte gel sanga lianzaw thupiak khat beek a om kei hi,” ci-in a dawng hi. 32 Tuapa in, “Sia aw, na gente ahi takpi ahi hi. Pasian khat bek hi-a, amah longal Pasian dang a om kei hi, na cih a man hi. 33 Na lungtang khempeuh, na theihna khempeuh le na thahatna khempeuh tawh amah it ding le nang le nang na ki-it banga na vengte na it ding pen meihal biakna buppi le biakpiaknate sangin thupizaw mah hi,” ci-in a dawng kik hi. 34 Jesu in tuapa in pilna tawh dawng cih a theih ciangin ama kiangah, “Nang Pasian gam tawh na kigamla kei hi,” a ci hi. Tua-a kipan kuamah in thu dang a dong ngam nawn kei uh hi. 35 Biakinntualte ah Jesu in thu a hilh laitakin, “Khrist h pen David Tapa hi, ci-in bangci a thukham siate in gen thei uh ahi hiam? 36 David mahmah in: “Topa in ka Topa kiangah: ‘Na galte khempeuh na khe nuai-ah ka koih matengin ka taklamah na tu in’” ci-in Khasiangtho in na pulakkhia khin hi.i 37 “Amah pen David mahmah in ‘Topa’ ci ahileh bangci in ama tapa hi thei ding hiam?” ci-in a dong hi. Mihon tampite in lungkimtakin ama thugen a ngai uh hi. 38 Tua bang a hilh kawmin Jesu in, “Thukham siate panin na kikem un. Amaute puantual deldal silhin vak kawikawi nuam uh a, vanzuakna munte ah pibawl ding a ut uh hi. 39 Synagogue-te sunga tutna thupi pente ah tu nuam diakin, pawite ah pahtawina munte ah a tu nuam uh hi. 40 Amaute in meigongte inn netum uh a, kineih khemin sauvei pipi thu a ngen uh hi. Tua bang mite a nasia penin kigawt ding hi,” a ci hi. 41 Sumpi khiatna mun mai-ah Jesu tu-in mihonpite in biakinnpi sumkholna sunga amau sumpi a khiat uh a vil hi. Sumhau tampi in sum tampipi a khia uh hi. 42 Ahi hangin azawng meigongnu khat va pai-a sumj tawmkha bek a man sumsank tangneu nih a khia hi. 43 Jesu in a nungzuite ama kiangah sama, “Thutak kong geninah, hih a zawng meigongnu in midang teng khempeuh sangin sumkholna ah tam a khia zaw hi. 44 Amaute in a hauhna lak panun a pia uh hi; tuanu in ahileh a zawnsa pipi-in ama kivak nadinga a neih khempeuh a khia hi,” a ci hi.

Marka 13

1 Biakinnpi pan Jesu a paikhiat laitakin a nungzuite khat in ama kiangah, “Siapa en dih ve! Hih suangtumte gol thei tabuang a! Hih innte thupi thei ngemngam mahmah hi!” a ci hi. 2 Jesu in, “Hih inn liante khempeuh na mu hiam? Suang khat tungah suang dang khat beek a kiciangsa-in a kinusia kei ding hi; a vekpi in a kicimmang ding hi,” ci-in a dawng hi. 3 Biakinnpi tawh a kigalsai Olive Vum tungah Jesu a tut laitakin Peter, James, Johan le Andrew-te in, 4 "Hihte cik cianga piang ding ahi hiam? Tua teng a tangtun kim nading bang lim hong hi ding hiam hong hilh in,” ci-in a dong sim uh hi. 5 Jesu in amaute kiangah, “Note kuamah in hong khem zawh loh nadingin kikem un. 6 Keima minin mi tampi hong pai ding uh a, ‘Keimah in amah ka hi hi’ ci teltalin mi tampi a khem ding uh hi. 7 Galthu le galthuthang na zak uh ciangin na patau nai kei un. Tua bangte a piang pelmawh ding mah ahi hi. Ahi hangin hun beina hi nai lo hi. 8 Mi nam khat le nam khat kido dinga, gam khat le gam khat a kido ding uh hi. Mun tuamtuam ah zin lingin kialpi a tung ding hi. Hihte khempeuh nausuahnat kipatna ahi hi. 9 Note kigingsa in om pelmawh un. Tualsung vaihawmte khutah note hong ap ding uh a, synagogue-te sungah hong sat ding uh hi. Keima hangin gam-ukte le kumpite mai-ah teci in na ding ding uh hi. 10 Minamte khempeuh tungah lungdamna-thu kihilh masa pelmawh ding hi. 11 Note hong kimanin thu hong kisit peuhpeuh ciangin, bang ka gen ding hiam, ci-in ama-in lunghimawh khol kei un. A gen ding no hi loin Khasiangtho hizaw ding ahi manin tua huna hong kipia peuhpeuh na gen lel un. 12 "Unau khat le khat ahi zongin, pa in a ta ahi zongin, sih nading dongin a kilehhek ding uh hi. A nu a pa-te langah tate pang ding uh a, a thatsak ding uh hi. 13 Keima hangin mi khempeuh in note hong mudah ding uh hi. Ahi zongin a bei dongin a kipte kihonkhia ding hi. 14 "Note in ‘a hawmmangsak kihhuaina’a ab kisai loh na munah a ding na muh uh ciangin—a simte in theitel ta hen—Judea gama omte mual tungah tai uh hen. 15 A innkhuma omte kuamah kumsuk kei hen. Ahikeh inn sunga na khatpeuh la dingin lut kei hen. 16 Lo-a om kuamah a puantual-pi la dingin ciah kei hen. 17 Nau paiite le naungek nei numeite adingin tua nite a mulkimhuai lua ding hi! 18 Hih hun phalbi sunga a tun loh nadingin thu na ngen un. 19 Ahang in, Pasian in leitung a piansak cil-a kipan tu hun dong tua zah a om ngei lo le a om ngei nawn lo ding lungdonna nite ahi ding hi. 20 Topa in tua nite tomsak lo hileh kuamah a suakta zo kei ding hi. Ahi hangin amah in a teelsa teltuamte hangin tua nite a tomsak khin zo hi. 21 Tua hun ciangin mi khatpeuh in note kiangah, ‘En un, hih lai-ah Khristc om hi!’ ahikeh, ‘Hua lai-ah om hi!’ hong cih leh um kei un. 22 Ahang in, Khrist zuaute le kamsang zuaute hong kilang ding uh a, hi thei hi leh teelsate nangawn a khem nadingun limte le nalamdangte a bawl ding uh hi. 23 Tua ahi ciangin kigingsa in om un; na khempeuh a pian ma-in kong genkhol hi. 24 "Ahi hangin tua lungdon nite khit ciangin, “ ‘ni kimialsak dinga, kha a tang nawn kei ding hi; 25 van panin aksite kiasuk dinga, van-a om nate kilingsak ding hi.’d 26 "Tua hunin mite in Mihing Tapa a vanglianpi le a minthanna tawh meii lakah a paisuk a mu ding uh hi. 27 Tua ciangin amah in ama vansawltakte sawl dinga, lei kiu lite pan, leimongte panin van mongte dongin a teelsa mite a kaikhawm ding hi. 28 "Tu-in hih thute theikung panin na sin un: A hiang menga a teh a sel phetin khuakhal hong nai ta hi, cih na thei uh hi. 29 Tua mah bangin hih nate a piang na muh ciangun kongbiang mahmah dong hong nai ta hi, cih na thei un. 30 Thutak kong genin-ah, hih thute khempeuh a tun khit mateng hih khange mite a bei kei ding uh hi. 31 Van le lei a mangthang ding hi; ahi zongin ka thu a mangthang ngei kei ding hi. 32 "A ni ahi zongin a hun ahi zongin kuamah in a thei kei hi; vantunga vansawltakte nangawn in a thei kei uh hi; Tapa in zong thei lo a, ahi zongin Pa khat bek in a thei hi. 33 Kigingsa-in om un! Kigalging un!f Tua hun cik ciangin hong tung ding cih na thei kei uh hi. 34 Tua in khual zinkhia mi khat tawh kibang hi. Amah in a nasemte khutah a inn ap a, amau sep ding ciat sehsakin, kongcingpa kiangah a vil gige ding a vaikhak hi. 35 "Tua ahi ciangin inn neipa a tun kik ding hun—nitak hi ding hiam, zankim laitak hi ding hiam, akkhuan hi ding hiam, phalvak ciang hi ding hiam, cih thei lo na hi manun na vil gige un. 36 Amah thakhatin hong tung vat leh ihmusa a na om laitak uh kituaksak kei un. 37 Note kianga kong cih bangin a kuamahpeuh kiangah: ‘Vil un!’ ka ci hi,” a ci hi.

Marka 14

1 Tu-in Paisan-pawi le Silngo-sawhloh Anlum Pawi ding ni nih bekin a sap laitakin, siampi makaite le thukham siate in, Jesu mansima thahlup theih nading lampi a zong uh hi. 2 Amaute in, “Mipite hong so kha ding ahi ciangin Pawi sungin hih kei ni,” a ci uh hi. 3 Bethany a Miphak Simon kici pa inn-a sabuai tungah Jesu kingama a om laitakin a manpha mahmah nard kia kibawl sathau namtui suangngo thawl khat tawi-in numei khat ama kiangah a pai hi. Tuanu in a thawl sukham a Jesu lutang tungah sathau namtui a buak hi. 4 Tua lai-a om mi kimkhat lungkim lo uh a, “Sathau namtui pammaih lel hi lo hiam? 5 Kizuak leh kumkhat thamana sanga tamzaw kikhawng ding hi, tua sum mizawngte piakhuai zaw hi,” a kici uh hi. Tua ciangin amaute in tuanu a taigawp uh hi. 6 Jesu in, “Hih nu bangmah cih dah un. Bang hang buaisak na hi uh hiam? Amah in kei tungah a kilawm na khat a sem khin hi. 7 Note tawh mizawngte a om khawm den ding uh a, na ut hunhunun amaute na huh thei uh hi. Ahi hangin kei note tawh ka omkhawm den kei ding hi. 8 Hih nu in ama hih theih bang a hih zo hi. Ka pumpi sathau namtui hong buah ciangin kei kivui nading bawlkhol ahi hi. 9 Thutak kong geninah, lungdamna-thu a kihilhna leitung mun khempeuhah tuanu a kiphawkna in ama hihsa thu zong a kigen ding hi,” a ci hi. 10 Tua ciangin Jesu lehek dingin Sawm-le-nihte lakah khat, Judas Iscariot, siampi makaite kiangah a va pai hi. 11 Amaute in hih thu a zak uh ciangin lungkim mahmah uh a, ama tungah sum piak dingin a kamciam pah uh hi. Tua hi-a amah in amaute khutah Jesu a piak thei nading hun hoih a ngak gige hi. 12 Silngo-sawhloh Anlum Pawi ni masa pen ni Paisan tuuno-a biakna a kipiak ngei hunin Jesu nungzuite in ama kiangah, “Paisan-pawi bawl nading koi lai-ah pai-in na bawlkhol le ung na deih hiam?” ci-in a dong uh hi. 13 Tua ahi ciangin amah in a nungzuite nih sawla, amaute kiangah, “Khuapi sungah pai le uh cin tuibel khat a pua pasal khat tawh na kituak ding uh hi. Tuapa na zui un. 14 Ama lutna inntekpa kiangah, ‘Siapa in: Ka nungzuite tawh Paisan-pawi ka bawl nading, ka zintunna inndei koi lai ahi hiam, ci-in hong dongsak hi,’ va ci un. 15 Amah in van zat ding a kima om, a kipuahsa inndei tungnung a zaipi khat note hong lak ding hi. Tua lai-ah ei adingin na kisakhol un,” ci-in a vaikhak hi. 16 Tua nungzuite gel paikhia uh a, khuapi sungah a lut uh ciangin Jesu gensa bang tektek in a mu uh hi. Tua hi-a amaute in Paisan-pawi bawl nading a na kisakhol uh hi. 17 A nitak ciangin Sawm-le-nihte tawh Jesu a tung hi. 18 Amaute sabuai ah kingamin an a nek laitakun amah in, “Thutak kong geninah, an ka nek khawmpih note lakah khat in kei hong lehhek ding hi,”a ci hi. 19 Amaute lungsi dedu uh a, ama kiangah, “Kei hi buang kei ning maw?” ci-in khat khatin a dong uh hi. 20 Amah in, “Sawm-le-nihte lakah khat ahi hi; tuapa kei tawh kuangkum-a anlum a diahkhawm pa ahi hi. 21 Ama’ thu a kigelhsa bangin Mihing Tapa a pai ding hi. Ahi hangin Mihing Tapa a lehhek pa in gimna nak thuak nazen incia! Amah a piang vet lo hileh ama adingin hoihzaw ding hi,” a ci hi. 22 Amaute in an a nek laitakun Jesu in anlum la-a, lungdam ko-in balkhama, a nungzuite pia in, “Hih, ka pumpi ahi hi, la unla ne un,” a ci hi. 23 Tua khit ciangin hai la-in lungdam ko-a amaute pia-in amaute in tua hai panin a dawn ciat uh hi. 24 Amah in amaute kiangah, “Hih in mi tampi adingb kibuakhia thukhunna ka sisana ahi hi. 25 Thutak kong geninah, Pasian gam sungah a thaka ka dawn ni mateng tu-a kipan lenggahzu ka dawn nawn kei ding hi,” a ci hi. 26 Amaute in biakna la a sak khit uh ciangin Olive Vum manawhin a paikhia uh hi. 27 Tua khit ciangin Jesu in amaute kiangah, “ ‘Tuucingpa ka sat dinga, tuuhonte kithehthang ding hi,’c ci-a kigelhsa bangin note na vekpi un na pukmang ding uh hi. 28 Ahi hangin ka thawh kik khit ciangin note mai Galilee ah ka na pai ding hi,” ci-in a gen hi. 29 Peter in, “Adang teng khempeuh a pukmang zongin kei ka puk kei ding hi,” ci-in a pulakkhia hi. 30 Jesu in, “Thutak kong geninah, tu ni, tu zan mahmah ak nihveid a khuan ma-in nang tektek in thumvei nong kitheih mawhbawl ding hi,” ci-in a dawng hi. 31 Ahi hangin Peter in, “Nang tawh sihkhawm ding ahi zongin nang kong kitheihmawhbawl ngei kei ding hi,” a ci teitei hi. Adangte khempeuh in zong tua mah a ci ciat uh hi. 32 Amaute Gethsemane kici mun ah pai uh a, Jesu in a nungzuite kiangah, “Thungen-a ka pai kalin hih lai-ah na tu un,” a ci hi. 33 Amah in Peter, James le John-te tonpih a lungdong ngeungau-in a lungkham mahmah hi. 34 Amah in amaute kiangah, “Dahluatna in sih nading zah in hong zen hi. Hih lai-ah na om unla, na kigalging un,” a ci hi. 35 Tawmkha pailai-in lei-ah bok a, ahi theih leh tua hun tawh a kipelh nadingin thu a ngen hi. 36 "Abbae, Pa aw, nang adingin na khempeuh hi thei hi. Hih hai kei kiang panin hong lakkhiatsak in. Ahi zongin kei deihna bang hi loin nangma deihna bang hizaw hen,” a ci hi. 37 Tua khit ciangin a nungzuite kiangah a pai kik leh amaute ihmu sa a om a mu hi. Amah in Peter kiangah, “Simon aw, ihmu na hi hiam? Nai khat sung beek kigalging zo lo na hi hiam? 38 Zia-etna na thuak loh nadingun kigalgingin thu na ngen un. Kha a ut hangin pumpi a thanem hi,” a ci hi. 39 Khatvei paikhia leuleu-a, a ngetsa mah bangin a ngen hi. 40 Amah a pai kik ciangin amaute ihmut suak lua uh ahi manin a ihmut laitak uh a tuak leuleu hi. Amaute in ama kiangah a gen ding uh a thei kei uh hi. 41 A thumveina va pai kika, amaute kiangah, “Note ihmu lailai-in tawlnga lailai na hi uh hiam? Pha zo ta! A hun hong tung ta hi. En un, mawhneite khut sungah Mihing Tapa a kilehhek hun hong tung petmah hi. 42 Tho un! Pai ta ni! Kei hong lehhekpa hih lai-ah hong pai ta hi!” a ci hi. 43 Tua banga a paupau laitak, Sawm-le-nihte lakah khat Judas a kilang hi. Siampi makaite, thukham siate le upate sawl namsau le khetbuk tawi mihon amah tawh a tonkhawm uh hi. 44 Tua a lehhekpa in, “Ka nappa pen amah hi ding hi; tuapa man pah unla, cingin paikhiatpih un,” ci-in amaute tawh lim a kilakkhol khin hi. 45 Jesu kiangah Juda paipah a, “Rabbi aw!” ci-in Jesu a nam hi. 46 Tua mite in Jesu lencipin a man uh hi. 47 Tua laitakin a gei-a dingte khat in a namsau dokin tulpipa nasempa a sat leh a bil langkhat a satkhia hi. 48 Jesu in, “Kei man dinga namsau le khetbuk tawh nong kuan zawzen uh, kumpi langpangte makai ka hi hiam? 49 Nisimin biakinnpi tualte ah thu ka hilh laitakin nong man kei uh hi. Ahi hangin Laisiangtho a tangtung pelmawh ding mah ahi hi,” a ci hi. 50 Tua ciangin mi khempeuh amah nusia-in a taimang uh hi. 51 Saihadial puanza khat longal puan dang a silh lo tangval khat in zong Jesu a zui hi. Amaute in amah a mat uh ciangin, 52 amah in a puanza nusia in a guaktang in a tai hi. 53 Amaute in tulpipa kiangah Jesu paipih uh a siampi makaite, upate le thukham siate khempeuh a kikhawm uh hi. 54 Peter in tulpipa inntual ciang tektek a kihal simsimin Jesu a zui hi. Tua laitakah amah a cingte tawh mei awi-in a va tukhawm hi. 55 Siampi makaite le Sanhedrin buppi in Jesu a thah theih nadingun langpangin paulap a zon uh hangin khat beek a mu kei uh hi. 56 Ama langah mi tampi dingin zuau teci a pan uh hangin a thugente uh a kituak kei hi. 57 Tua ciangin mi pawlkhat dingin ama langah hih zuau teci pang uh a, 58 "Amah in, ‘Mihing khuta kibawl hih biakinnpi ka susia dinga, mihing khuta kibawl lo adang khat nithum sungin ka lam kik zo ding hi,’ a cih ka za uh hi,” a ci uh hi. 59 Tua bang hi napi amaute teci panna a kituak kei lailai hi. 60 Tua ciangin amaute mai-ah tulpipa dingin Jesu kiangah, “Dawng lo ding na hi hiam? Na langkhata hihte tecipanna bang hiam?” ci-in a dong hi. 61 Ahi hangin Jesu in dawng loin a dai dide hi. Tua ciangin tulpipa in ama kiangah, “Nang Thupha Ngahpa’ Tapa Khristf na hi hiam?” ci-in a dong kik hi. 62 Jesu in, “Ka hi hi. Note in Thahat Pa taklama tu meiipi tunga hong paisuk Mihing Tapa na mu ding uh hi,” a ci hi. 63 Tulpipa in a puansilh balkek a, “Teci dang kul nawn ding ahi hiam? 64 Pasian a gendaina na za zo uh hi. Bang na ci ngaihsut uh hiam?” ci-in a dong hi. Amaute in amah sihsak thamin a mawhpaih uh hi. 65 Tua ciangin pawlkhat in amah cilphih uh a, a mai tuamin a khuttum uh tawh tumin, “Hong gen in!” a ci uh hi. Tua ciangin a cingte in amah tonpih in a sat uh hi. 66 A nuai innpi tualah Peter a om laitakin tulpipa nasem numeite khat a kiangah va pai hi. 67 Tuanu in Peter mei-awi a muh ciangin amah a va nai et mahmah hi. “Nang zong tua Nazareth mi Jesu tawh na kipawl hi,” a va ci hi. 68 Ahi hangin aman a nial hi. Amah in, “Na thugen ka thei kei-a, a pianzia zong ka thei beek kei hi,” ci-in kong pua ah a kihemkhia hi,g 69 Tua numei mah in tua lai-a om a muh ciangin a kima dingte kiangah, “Hih pa amaute lakah khat ahi hi,” a ci kik hi. 70 Amah in a nial leuleu hi. Tawlkhat khit ciangin a gei-a dingte in Peter kiangah, “Amau pawlte lakah khat na hi taktak hi. Galilee mi na hi ngel ve leh,” a ci uh hi. 71 Tua ciangin amah le amah kihamsiat in, “Na gen uh hih mipa ka thei peuhmah kei hi,” ci-in a tomlo hi. 72 Tua khit phetin a nih veinah ak a khuang hi. Tua ciangin Peter in Jesu in a ma tunga, “Ak nih veii a khuan ma-in thum vei nong kitheihmawhbawl ding hi,” ci-a a gensa a phawk hi. Tua ciangin amah ki-ip zo nawn loin a kapkhia hi.

Marka 15

1 Zingsang phalvak tungin siampi makaite in upate, thukham siate le Sanhedrin buppi tawh thukhensatna a bawl uh hi. Amaute in Jesu henin paikhiatpih uh a, Pilate khutah a tun uh hi. 2 Pilate in, “Nang Jew-te kumpipa na hi hiam?” ci-in a dong hi. Jesu in, “Ka hi hi, na cih bang ahi hi,” ci-in a dawng hi. 3 Siampi makaite in amah thu tampi tawh a mawhmat uh hi. 4 Tua ahi ciangin Pilate in, “Amaute in nang thu tampi tawh hong mawhmat uh na thei hi. Dawng lo ding na hi hiam?” ci-in a dong hi. 5 Ahi hangin Jesu in dawng tuan lo lailai ahi ciangin Pilate in lamdang a sa mahmah hi. 6 Tua hun lai-in pawi hun ciangin mipite nget thongkia khatpeuh a khahkhiat ding ngeina ahi hi. 7 Kumpi langdo-a, tualthatte tawh thong kiakhawm Barabbas kici mi khat a om hi. 8 Pilate kiangah mihonpite va pai uh a, a hih ngei banga a hih nadingin a ngen uh hi. 9 Pilate in, “Jew-te kumpipa no kiangah hong khah leng na deih uh hiam?” ci-in a dong hi. 10 Tua pen siampi makaite in Jesu a hazat manun ama khutah a tut uh ahilam a theih man ahi hi. 11 Ahi hangin Pilate in Barabbas a khahsak zawk nadingin siampi makaite in mihonpite a tawsawn uh hi. 12 Pilate in, “Tua ahileh Jew-te kumpipa na cih pa uh bang ka cih ding hiam?” ci-in a dong hi. 13 Amaute in, “Kilhlum in,” ci-in a kiko uh hi. 14 Pilate in, “Bang hangin maw? Amah in bang tatkhialhna nei ahi hiam?” ci-in a dong hi. Ahi hangin amaute in, “Amah kilhlum in!” ci-in a kinak ko semsem uh hi. 15 Pilate in mihonpite a lungkimsak nop manin amaute kiangah Barabbas a khah hi. Amah in Jesu a satsak khit ciangin kilhlup dingin amaute khutah a ap hi. 16 Galkapte in Jesu kumpi inn (tua pen gam-ukpa Innpi) ah paipih uh a, tua ciangin galkap company bup khat a sam uh hi. 17 Tua ciangin amaute in kumpi puan dupsan khat silhsak uh a, ling tawh kumpi lukhu khat phanin amah a khusak uh hi. 18 Tua ciangin amaute in, “Jew-te kumpipa aw, na khan sawt ta hen!” ci-in a otkhai uh hi. 19 Amaute in ciangkhutin a lu satsat uh a, cil a phihphih uh hi. Amaute khuk dinin amah a bia uh hi. 20 Amah a zahko khit uh ciangin kumpi puan dupsan suahkhiatsak uh a, ama puan a silhsak kik uh hi. Tua khit ciangin kilhlup dingin a paikhiatpih uh hi. 21 Alexander le Rufus-te pa, Cyrene pana Simon kici mi khat in gamsung panin tua lai a va tawn hi. Amaute in zawhthawh thu-in amah singlamteh a puasak uh hi. 22 Amaute in Golgotha (Luguh Mun cihna) kici munah Jesu a paipih uh hi. 23 Tua ciangin amaute in amah, paknamtui kha tawh kihel lenggahzu a pia uh hi. Ahi hangin a dawn kei hi. 24 Amaute in singlamteh tungah amah a kilh uh hi. Amaute in a puan hawm uh a, kua in koi tang ding cihna-in ai a lawn uh hi. 25 Amaute in amah a kilh laitakun nai thumna a sat hi. 26 Amah kimawhmatna-in JEW-TE KUMPIPA, ci-in theihsakna lai kigelh hi. 27 Amaute in amah tawh, misuamte nih a taklam khat, a veilam khat kilh uh a, 28 tua ciangin Laisiangtho gen: “Thukham palsatte tawh amah kisimkhawm hi” cih thu a tangtung hi.a 29 Tua lai a tawnte in amah engko in lupeisan uh a, “Petmah aw! Nang, biakinnpi susia a ni thum sunga lam kik ding pa, 30 singlamteh tung pan hong kumsuk inla, nang le nang hong kihon khia dih ve!” a ci uh hi. 31 Tua mah bangin siampi makaite le thukham siate in amaute lakah amah a zahko uh hi. Amaute in, “Amah in midangte honkhia zo a, amah le amah kihonkhia zo lo pi! 32 I mitin mu a i up theih nadingin hih Israel-te kumpipa, hih Khristb singlamteh tung pan hong kumsuk ta hen,” a ci uh hi. Tua mah bangin amah tawh a kikilh khawmte in zong a engko uh hi. 33 Tua gam bupah nai gukna-a kipan nai kuana dong khim a zing hi. 34 Nai kuana laitakin Jesu in, “Eloi, Eloi, lama sabacthani?” ci-in nakpi-in a kiko hi. A khiatna in, “Ka Pasian, ka Pasian aw, bang hangin kei hong taisan na hi hiam?”c cihna ahi hi. 35 Tua lai-a ding mi kimkhat in a zak uh ciangin, “Ngai dih un, amah’n Elijah sam hi,” a ci uh hi. 36 Mi khat va tai-a, lenggahzu thuk sungah tuihup a diah khit ciangin ciang dawnah koihin Jesu dawn dingin a pia hi. Amah in, “Bangmah cih dah dih un. Amah lakhiasuk dingin Elijah hong pai hiam, en phot dih ni,” a ci hi. 37 Jesu nakpi-in kiko-a tua ciangin a hutawpna a sang hi. 38 Biakinnpi puanzak a lu pan a taw dong kikekin phel nih a suak hi. 39 Jesu mai-a ding zakhat-ukpa in ama kikona led a sihzia a muh ciang- in, “Hih pa Pasian Tapae hi takpi ei!” a ci hi. 40 A gamla sim pan numei pawlkhat in a galvil uh hi. Amaute lakah Mary Magdalene, James nauzaw pen le Joses nu Mary, le Salome-te a om uh hi. 41 Hih numeite in Galilee ah amah zui uh a, a kisapnate a sepsak uh hi. Jerusalem dong amah tawh a ton numei dang tampi zong tua lai-ah a om uh hi. 42 Tua ni, kiginkholh Ni, Sabbath tunma ni ahi hi. Tua hi-a ni niam kuan ciangin, 43 Pasian gam a ngak gige Vaihawmte lakah mi thupi khat, Arimathea mi Joseph Pilate kiangah hangtakin pai-a Jesu luang a va ngen hi. 44 Pilate in amah si zo cih a zak ciangin lamdang a sa hi. Amah in zakhat-ukpa samin, Jesu si khin takpi hiam, cih a dong hi. 45 Si khin zo takpi, cih zakhat-ukpa kam pan a zak ciangin a luang Joseph a pia hi. 46 Tua ciangin Joseph in saihadial puan pawlkhat lei-in siluang lakhia suka, saihadial puanin a tun khit ciangin suangpi a khuak han sungah a sial hi. Tua ciangin tua han kong vang suangtum khatin a khak hi. 47 Mary Magdalene le Joses nu Mary-te in ama kisialna mun a mu uh hi.

Marka 16

1 Sabbath ni a bei khit ciangin Mary Magdalene, James nu Mary le Salome-te in Jesu luang a zut nading uh gimnamtui a keng uh hi. 2 Nipikal ni masa ni zingsang tung ni suah khit phetin amaute hanah hawh uh a, 3 "Han kongvang khakna suangtum kuan hong likkhiatsak ding hiam?” ci-in khat le khat a kikum uh hi. 4 Ahi hangin a daktoh uh ciangin a lian mahmah tua suangtumpi a tukkhia khin zo a mu uh hi. 5 Amaute han sungah a lut uh leh, puantualpi pak silh tangval khat, a taklam-a tu mu uh a, amaute a patau uh hi. 6 Amah in, “Patau kei un, a kikilhlum Nazareth mi Jesu a zong na hi uh hi. Amah tho kik zo hi! Amah hih lai-ah om lo hi. A kisialna mun en un. 7 Ahi hangin pai unla nungzuite le Peter kiangah, “Note mai Galilee ah amah na pai ding hi. Ama hong gensa bang tektekin, tua lai-ah amah na mu ding uh hi,’ ci-in va gen un,”a ci hi. 8 Tua numeite lungmang le ling kawmsa-in han pan paikhia-in a tai uh hi. Amaute lau uh ahi manin kuama kiangah bangmah a gen kei uh hi. 9 Nipikal ni masa ni, zingsang tung, Jesu a thawh kik khit ciangin a sung pana dawi sagih a hawlkhiatna nu Mary Magdalene kiangah a kilang masa pen hi. 10 Tuanu pai-in amah tawh a omkhawm ngei, adah a kap laite kiangah thu a gen hi. 11 Jesu nungta-a amah in mu khin zo cih thu amaute in a zak uh ciangin a um kei uh hi. 12 Tua khit ciangin tuate lakah nih gamsung lam zuanin a pai laitakun amaute kiangah meltuamin Jesu a kilang hi. 13 Hihte gel kileh kik uh a, adangte kiangah a va koh uh hangin amau zong a um tuan kei uh hi. 14 Tua nung ciangin nungzui Sawm le khatte in an a nek laitakun amaute kiangah a kilang hi. Amah a thawh kik khit ciangin amah a mute genna a up loh teltalna hang uh le amaute uplahna hangin amaute a tai hi. 15 Amah in amaute kiangah, “Leitung mun khempeuh ah pai unla, a piansaksa khempeuh tungah lungdamna thu na hilh un. 16 Um-a a kibaptise-te peuhmah kihonkhia dinga, ahi hangin a um lo peuhmah a kimawhpaih ding hi. 17 Tua ciangin a umte ahileh hih limte in a zui ding hi: Keima minin dawite a hawlkhia ding uh hi; amaute pauthakte in a pau ding uh hi. 18 A khutun gul a man ding uh hi; sihtheihna gu a dawn uh hangin bangmah a ci peuhmah kei ding uh hi. Amaute in cinate tungah a khut uh nga ding uh a, amaute a dam ding uh hi,” a ci hi. 19 Topa Jesu in amaute a vaikhak khit ciangin amah vantungah kilato a, Pasian taklamah a tu hi. 20 Tua ciangin nungzuite paikhia uh a mun khempeuh ah thu a hilh uh hi. Topa in amaute seppih a, amaute a zui limte in ama thugen a kipsak hi.

Luka 1

1 Eite laka a tangtungsaa nate thu mitampi in na gelh khin zo uh hi. 2 A tunga kipan mit-a a mute le thu’ nasemte in eite kianga hong hilhsawm bang tektek uh ahi hi. 3 Tua ahi manin zahtakpipen Theophilus aw, kei mahmah in zong tuate khempeuh atunga kipan limtaka ka kantel sinsen khit ciangin a thu kizom diudeu-in nang adinga kong gelh ding pha ka sa hi. 4 Tua pen nang hong kihilhte a taktak a hina na theih nading ahi hi. 5 Judea gamah Herod kumpi ahi laitakin Abijah uk siampi pawl lakah Zechariah min nei siampi khat a om hi. Ama zi Elizabeth zong Aaron suan ahi hi. 6 Amau nupa Pasian muhna-ah mi thutang hi uh a, Topa thupiakte le zuih ding ngeinate khempeuh kawkbaanna om loin a zui uh hi. 7 Ahi hangin Elizabeth tasel ahi manin ta a nei kei uh hi; a nih un zong a kum uh tam lua ta hi. 8 Khatvei Zechariah uk pawl in na a sep hun, amah in Pasian mai-ah siampi na a sep sungin, 9 siampi ngeina tawh kizui-in Topa biakinnpi sungah pai-a gimnamtui hal ding ai a san uh leh amah in a ngah hi. 10 Gimnamtui hal hun a tun ciangin Pasian bia-a kikhawmte khempeuh in a pualam ah thu a ngen uh hi. 11 Tua laitakin Topa vansawltak khat ama kiangah kilanga, gimnam-tui halna biakna-tau taklam pangah a ding hi. 12 Zechariah in amah a muh ciangin kigaih a lau-in a koncip hi. 13 Ahi hangin vansawltakin a kiangah, “Zechariah aw, lau kei in na thungetna hong kiza zo hi. Na zi Elizabeth in tapa khat nei dinga, a min Johan na phuak ding hi. 14 Amah na lungnopna, na lungkimna hi dinga, ama suahna hangin mi tampi a kipak ding hi. 15 Ahang in, Topa muhna ah amah alian ding hi. Amah in leng gahzu ahi zongin a kibilh zu nam tuamtaumte ahi zongin dawn lo dinga, a suahb a kipan Khasiangtho tawh kidim ding hi. 16 Israel mite tampitak, Topa amau Pasian kiang a tunpih kik ding hi. 17 Tua hi-a amah in pate lungtang tate lamah kiheisak dinga, thumang lote, thumaan pilna lamah kiheisak ding, Topa adingin mite a baihsa-a, a koihkhol dingin Elijah kha le vangliatna tawh Topa mai-ah a pai ding hi,” a ci hi. 18 Zechariah in tua vansawltak kiangah, “Kei lah tek ta inga, ka zi lah kum tam lua ta hi. Hih thu bangci muan ngam ding ka hi hiam?” ci-in a dong hi. 19 Tua vansawltak in, Gabriel ka hi hi. Pasian kianga ding ka hi-a hih lungdamna thu nang tunga gen ding le nang hong hopih dingin kei hong kisawl hi. 20 A hun a cin cianga a tung takpi ding ka thugente um lo na hi manin hih thu a tun mateng pau thei loin na daicip ding hi,” ci-in a dawng hi. 21 Tua kikal sungin mipite in Zechariah na ngak uh a, biakinnpi sungah tua tanvei a om lamdang a sa uh hi. 22 A paikhiat ciangin amaute a hopih thei kei hi. Amah pau thei lo a, amaute lim bek tawh a khutin a hopih ciangin biakinnpi sungah amah mangmu ahilam a theikhia pan uh hi. 23 A nasep hun sung a cin khit ciangin innah a ciah hi. 24 Hih thu teng khit ciangin a zi Elizabeth gai-a kha nga sung a tang om hi. 25 Amah in, “Topa in kei adingin hih hong hihsak ahi hi. Ka mite lakah tu hun laitaka ka maimawlna hong lakkhiat sakin kei hong angvan hi,” a ci hi. 26 A kha gukna ciangin, Pasian in Galilee gam khuapi khat ahi Nazareth ah, 27 David suan, Joseph min nei pasal khat tawh kiteng dinga a kidongsa nungak bit khat kiangah vansawltak Gabriel a sawl hi. Nungak bit min Mary ahi hi. 28 Ama kiangah vansawltak pai-in, “Nang hong ki-angvan mahmah nu aw kong hopih hi! Topa in nang hong ompih hi,” a ci hi. 29 Ama thugente hangin Mary lungmang mahmah a, bangci bang hopihna hiam, ci-in lamdang a sa hi. 30 Ahi hangin vansawltak in ama kiangah, “Mary aw, lau kei in Pasian in nang hong angvan zo hi. 31 Nau na paii dinga tapa khat na nei ding hi; a min Jesu na phuak ding hi. 32 Amah lian dinga Sang Penpa Tapa kici ding hi. Topa Pasian in a pa David tokhom pia dinga, 33 amah in Jacob suante uk denin ama gam a bei ngei kei ding hi,” a ci hi. 34 Mary in vansawltak kiangah, “Kei nungak bit ka hi hi, hih thu bangci pian theih ding ahi hiam?” ci-in a dong hi. 35 Vansawltak in, “Nang tungah Khasiangtho hong tung dinga Sang Penpa vang in nang hong sung ding hi. Tua ahi ciangin a suak ding misiangthopa, Pasian Tapa kicic ding hi. 36 Na tanaunu Elizabeth nangawn in a tek nungin ta khat nei dekta hi. Amah tasel a kici nangawn a gai kha guk pha zo hi. 37 Ahang in, Pasian in hih theih loh a nei kei hi,” ci-in a dawng hi. 38 Mary in, “Kei, Topa nasemnu ka hi hi. Na cih bangin kei tungah piang ta hen,” a ci kik hi. Tua khit ciangin vansawltak in amah a nusia hi. 39 Tua hunin Mary kithawi-a Judah gam sung mualtung khuapi khat zuanin pai mengmeng a, 40 Zechariah innah lutin Elizabeth a hopih hi. 41 Mary hopihna Elizabeth in a zak ciangin ama sunga naungeek dianga Elizabeth Khasiangtho tawh a kidim hi. 42 Amah in: “Numeite lakah thupha ngah nu na hi-a, nang sung pana suakkhia ding naungek, thupha ngah ahi hi! 43 Ahi zongin bang hanga ka Topa nu kei kianga hawh ding zah dongin kei hong ki-angvan ahi hiam? 44 Nong hopihna ka zak phetin ka sunga nau ngeek lungdamin a diang hi. 45 Topa in ama tunga a gensate a tung takpi ding hi, ci-a a um numei in thupha ngah ahi hi,” ci-in ngaihtakin a awngkhia hi. 46 Tua ciangin Mary in: “Ka hinna in Topa phat a 47 ka Honpa Pasian ah ka kha a kipak hi. 48 ahang in a nasemnu tualniamna hong thudon hi. Tu-a kipan khang sawnsawnte’n thupha ngah nu hong ci ding hi; 49 hang in, Thahat Pa in kei ading na lianpipi bawl zo a – ama min siangtho hi. 50 Amah a kihtate tungah akhang akhangin ama lainatna zaam suksuk hi. 51 Amah in a khut tawh a thahatna lak hi; a lungsim tawnga kisatheite a thehthang zo hi. 52 Gam-ukte amau tokhom panin khiasuk a, ahi hangin a tualniamte lamto khin zo hi. 53 A gilkialte na hoihin taisak a, ahi hangin a haute a hawm ciahsak zo hi. 54 Amah in ama nasem Israel huh a, 55 i pu i pate tungah a gensa bangin Abraham le a suan a khaktea hehpih denden ding, a phawk gige hi,”a ci hi. 56 Elizabeth kiangah Mary kha thum bang a tam khit ciangin innah a ciah hi. 57 Elizabeth suah hun tunga tapa khat a nei hi. 58 Topa in ama tungah lainatna lianpi a lah lam a vengte le a tanaute in za-in a lungdampih uh hi. 59 A nigiatna ni-in tua naupang vun-at dingin amaute khempeuh va pai uh a, a min, a pa Zechariah tamsak dingin a kisa uh hi. 60 Ahi hangin a nu in, “Hi kei! Johan phuah ding ahi hi,” ci-in a genkhia hi. 61 Amaute in ama kiangah, “Na tanaute lakah tua min nei om lo hi,” a ci uh hi. 62 Tua ciangin a pa in naupang min ding bang phuak nuam hiam, cih amaute in khut tawh lim lakin a dong uh hi. 63 Amah in suangpek khat ngen in, “Ama min Johan ahi hi,” ci-a a gelh ciangin tua muna omte khempeuh in lamdang a sa uh hi. 64 Tua khit phetin a kam kihonga, a leigui kolin paukhia-a Pasian a phat hi. 65 A vengte khempeuh in piandang a sa mahmah uh hi. Judea gam mualtung tenga mite in zong hih thute khempeuh a gengen uh hi. 66 Hih thu a za peuhpeuh in lamdang sa uh a, “Tua ahileh hih naupang bangci mi hong hi tam?” ci-in a kidong ciat uh hi. Ahang in, Topa khutin amah a ompih gige hi. 67 A pa Zechariah, Khasiangtho tawh kidim a thu genin: 68 “Topa, Israel-te Pasian kiphat ta hen, bang hang hiam cih leh amah hong pai-in ama mite tankhia zo hi. 69 Ama nasem David suan sung panin eite ading, hotkhiatna kid khat hong potosak a, 70 (tanglai ama kamsang siangthote tungtawna a gensa mah bangin), 71 i galte le ei hong mudahte khut sung panin hotkhiatna ahi zongin, 72 i pu i pate tunga lainatna lak ding le ama thukhun siangtho phawk gige nading ahi zongin, 73 i pa Abraham tunga a ciamsa tua kiciamna: 74 i galte khut sung panin hong kihonkhia ding, lau lo-a ama na sem thei ding, 75 i nun sung teng ama mai-ah siang thona le thumaanna tawh ama na a sem ding i hi hi. 76 Tua ciangin nang, ka ta aw, Sang Pen-pa’ kamsangpa hong kici ding hi; a lampi sial dingin Topa mai-ah na pai dinga, 77 amaute mawhna maisakna tungtawna ama mite hotkhiat theihna piak nading ahi hi; 78 bang hang hiam cih leh i Pasian’ lainatna nem ngi-ingei hangin van pan sun nisuak i tungah hong tang dinga, 79 khuamial sung le sihna liim le khuamial sunga tengte tungah tangin, i khete lemna lampi a tawnsak ding hi,” a ci hi. 80 Tua ciangin naupang khangto a, a lungsim a pumpi a hat hi; Israel mipite lakah a kilaak mateng gamlakah a teng hi.

Luka 2

1 Tua hun laitakin Rome khuapi uk bupah mi a kisim nading Caesar Augustus in thukip a pia hi. 2 (Hih in Syria gama Quirinius gam-ukpa ahi zawh kisimna a khatveina ahi hi) 3 Tua hi-a mi khempeuh amau khuapi ciat ah minkhum dingin a pai uh hi. 4 Tua ciangin Joseph zong Galilee gam Nazareth khuapi panin Judea gamah pai-a David gui le suan ahi manin David khuapi Bethlehem ah a pai hi. 5 Kiteng dingin a dotsa nausuak kuan Mary tawh min khum dingin tua khua ah a paikhawm uh hi. 6 Tua lai-ah a om laitakun nausuah hun tunga, 7 amah a tacil suakin tapa ahi hi. Amah in puanza bekin tuna, zintun innah amau ading inndei awng lo ahi manin tua naungek gan ankuang sungah a sial hi. 8 Tua nai-a lopaangte ah zan laitaka a tuute uh a vil tuucingte a om uh hi. 9 Amaute kiangah Topa vansawltak khat kilanga, amaute kimkotah Topa minthanna tangin a lau mahmah uh hi. 10 Ahi hangin vansawltak in amaute kiangah, “Lau kei un, mi khempeuh ading a lian mahmah lungdamna thu note kong puak hi. 11 Tuni-in David khuapi ah note ading Honpa khat suak khin zo hi; amah Khrista Topa ahi hi. 12 Note tungah hih lim ahi ding hi. Note in naungek khat puanzabek tawh kituna, gan ankuang sunga kisial na mu ding uh hi,” a ci hi. 13 Thakhatin tua vansawltak tawh, vantung galkap hon tampitak kilang zuah uh a, 14 "A sang penna-a Pasian minthang henla, leitunga ama angvan mite tungah lemna om ta hen.”ci-in Pasian a phat uh hi. 15 Vansawltakte in amaute nusia in vantungah a ciahsan uh ciangin tuucingte in, “Bethlehem ah pai-in Topa hong gensa hih thupiang va en dih ni,” ci-in khat le khat a kiho uh hi. 16 Tua ciangin amaute paikhia mengmeng uh a, Mary Joseph le gan ankuang sunga kisial naungek a mu uh hi. 17 Amaute in amah a muh khit uh ciangin hih naungek tawh kisai amaute kianga kigen thu a kizelsak kawikawi uh hi. 18 Tua hi-a tuucingte thugen a zate khempeuh in lamdang a sa uh hi. 19 Ahi hangin Mary in hih thute kemcing gige-in a lungtangah a ngaihsunsun hi. 20 Tuucingte ciah kik uh a, amaute tunga kigensa bang tektekin a zak uh le a muhte uh hangin Pasian phatin a minthangsak uh hi. 21 A nigiatna ni, ama vun-at hun ciangin, amah a kipaii ma-a vansawltak phuahsa bangin a min Jesu a phuak uh hi. 22 Moses thukham tawh kizui-in amaute a kisiansuah ding hun a cin ciangin Joseph le Mary in Topa tunga ap dingin amah Jerusalem ah paipih uh a, 23 (“Tapasal masa peuhmah Topa tungah ap ding ah hi”b ci-a Topa Thukham sunga kigelh bangin) 24 Topa Thukham sunga kigen tawh kizui-in “Vakhu kop khat ahikeh kawl vakhuno nih”c tawh biakpiakna a pia ding uh hi. 25 Tua hunlaitakin Jerusalem ah Simeon kici biakna hahkat mi thumaan khat a om hi. Amah, Israel-te kihehnemna ngakin a om hi-a ama tungah Khasiangtho a om hi. 26 Amah in Topa Khrist a muh matengin a si kei ding hi, cih Khasiangtho in ama tungah a laaksa ahi hi. 27 Kha sawlna tawh amah biakinnpi tualah a pai hi. Thukham ngeina in a kalh banga a bawl dingin a nu le a pa-te in naupang Jesu a paipih uh ciangin, 28 Simeon in amah la-in tawi-a Pasian phatin: 29 "Thuneipipen Topa aw, na kamciamsa bangin na nasempa tu-in lungnuamtakin khahkhiad ta in. 30 Ahang in, ka mitte inna hotkhiatna a mu zo hi, 31 tua pen mi khempeuh mitmuh ah na bawlkholhsa hi-a, 32 Gentile-te tunga kilaak nading khuavak le na mi Israel-te minthan nading ahi hi,” a ci hi. 33 Naupang nu le pa-te in amah tawh kisai-a thu kigente piandang a sa uh hi. 34 Tua ciangin Simeon in amaute thupha pia-a, a nu Mary kiangah, “Hih naungek in Israel gam sunga mi tampi a puk nading, a thawh nading le a kilanggenna lim dinga laitansa ahi hi. 35 Tua hi-a mi tampite lungtang ngaihsutna a pholak nading ahi hi. Tuateh nang hinna zong namsau in a sunlet ding hi,” a ci hi. 36 Tua lai-in Asher beh pana Phanuel tanu Anna kici kamsang numei khat a om hi. Amah tek mahmah ta hi. A pasal tawh a kiten zawh kum sagih bek nungta khawm uh a, 37 amah kum sawm giat le li a phak dong a meigong hi.e Amah in biakinnpi nusia ngei lo-a, sun le zan-in Pasian bia a, antangin thu a ngen hi. 38 Tua hun lianin amaute kiangah tuanu pai-in Pasian tungah lungdam thu puakin Jerusalem kitatkhiat ding a lam ente khempeuh tungah hih naupang thu a gen hi. 39 Joseph le Mary in Topa Thukham kalh khempeuh a bawl khit uh ciangin Galilee gam amau khua Nazareth khuapi ah a ciah kik uh hi. 40 Tua ciangin naupang khangto-a, a tha a hat hi; amah pilna tawh kidim a Pasian hehpihna a tungah a om hi. 41 Kum simin a nu a pa-te Paisan Pawi sim dingin Jerusalem ah a pai uh hi. 42 Amah kum sawm-le-nih a phak ciangin a ngeina omsa tawh kizui-in Pawi sim dingin a pai uh hi. 43 Pawi ven khit a nu a pa-te a ciah kik laitakun Jerusalem ah naupang Jesu a tam lai hi. Ahi hangin amaute in tua thu a phawk kei uh hi. 44 Amah tawh a tonkhawmin kingaihsun uh ahi manin ni khat lam a pai khin ta uh hi. Tua ciangin a tanaute le a lawmte lakah amah a zong pan uh hi. 45 Amah a muh loh uh ciangin a zong dingin Jerusalem ah a kileh kik uh hi. 46 Ni thum khit ciangin amah biakinnpi tualte-a siate lakah tu-in amaute thugen ngai-a thu dongin a om laitak a tuak uh hi. 47 Ama teltheihna le a dawnnate a za mi khempeuh in lamdang mahmah a sa ciat uh hi. 48 A nu a pa-te in amah a muh uh ciangin lamdang a sa uh hi. A nu in ama kiangah, “Ka ta aw, bang hangin hih banga hong bawl na hi hiam? Na pa tawh lunghimawh in nang kong zongzong uh hi,” a ci hi. 49 Amah in, “Bang hangin kei hong zong na hi uh hiam? Ka Pa inn-a a om ding mah ka hilam thei lo na hi uh hiam?” a ci hi. 50 Ahi hangin amaute in amau tunga a cihna thu a theitel zo kei uh hi. 51 Tua ciangin amaute tawh Nazareth ah paisuka, a thu uh a mang hi. Ahi hangin a nu in hih thute khempeuh a lungsim sungah a kemcing gige hi. 52 Jesu a pilna le a pumpi khanpha-in khanga Pasian le mite pahtakna a ngah hi.

Luka 3

1 Pontius Pilate, Judea gam ukpipa hi-a, Herod, Galilee gam ukpa hi-in, a sanggampa Philip, Iturea le Traconitis gam ukpa hi-a, Lysanias, Abilene gam ukpa ahi laitak– Tiberius Caesar in a uk zawh a kum sawm le ngana ahi hi. 2 Tua hunin Anna le Caiaphas tulpi sem hi uh a, tua hunlaitakin gamlaka om Zechariah tapa Johan tungah Pasian thu a tung hi. 3 Amah Jordan kimkot-a gamsung khua khempeuh ah pai-a, mawhnate maisak nading kisikna tawh kisai baptisena thu a hilh hi. 4 Kamsangpa Isaiah thute laibu sungah: “Gamlak-a kikopa aw in, ‘Topa ading lampi na sialkhol un, ama ading lampi na tangsak un. 5 Mualkuam khempeuh kivuk dim dinga, muallian le mualneu khempeuh kiniamsak ding hi. Lamkawi khempeuh kitangsak dinga, lamphok khempeuh kimaihtam ding hi. 6 Tua ciangin mi vannuai in Pasian hotkhiatna a mu ding uh hi.’ ci hi”a ci-a kigelh bang ahi hi. 7 Amah kibaptisesak dinga pai mihonte Johan in a muh ciangin, “No mualtan suante! Hong tung ding thangpaihna pana taikhia dingin kua in hong vauhilh ahi hiam? 8 Kisikna tawh kilawm gah na gah un. No le no in, ‘Abraham ka pa uh hi,’ kici kei un. Ahang in, Pasian in hih suangte Abraham tate a suaksak thei hi, cih kong hilh hi. 9 Sing phungte ah hei a om khin zo hi; gah hoih a gah lo kungte kiphukin mei sungah kikhul ding hi,” a ci hi. 10 Mihonpite in, “Tua ahileh bang ka hih ding uh hiam?” ci-in a dong uh hi. 11 Johan in, “Puantungsilh nih a neithuah pa in, a nei lo pa khen ding a, tua mah bangin an nei pa in zong a hih ding hi,” ci-in a dawng hi. 12 Siahdongte zong a kibaptise dingin va pai uh a, “Sia aw, bang hih ding ka hi uh hiam?” ci-in a dong uh hi. 13 Amah in amaute kiangah, “Na don ding zah val uh na dong kei un,” ci-in a gen hi. 14 Tua ciangin galkap pawlkhat va pai uh a, “Ko zong bang ka hih ding uh hiam?” ci-in amah a dong uh hi. Amah in, “Mi sum na gumsuh kei unla, zuauthu tawh mi na mawk ngawh kei un. Na khasum uh tawh lungkim lel un,” ci-in a dawng hi. 15 Mite in Johan hoh Khristb a hi kha tam ci-a a lungtang sunguah ngaihsun kakkakin, a ngak laitak uh ahi hi. 16 Johan in amaute khempeuh kiangah, “Keimah in note tui inc kong baptize hi. Ahi hangin kei sanga a vanglian zaw khat hong pai ding hi; ama khedap khaute sut ding nangawnin ka cin zo kei hi. Amah in note Khasiangtho le mei-in hong baptize ding hi. 17 Amah in a buhlak ciangka tawi-in buhphual a hahsiang ding hi. Atak teng a sal sungah koih dinga, a sii teng ahileh a mit thei lo mei sungah a khul ding hi,” ci-in a hilh hi. 18 Johan in mipite thudang tampi tawh hanthawna, amaute kiangah lungdamna thu a hilh hi. 19 Ahi hangin Johan in, gam-ukpa Herod tatsiatna khempeuh le a sanggampa zi Herodias hangin amah a tai ciangin, 20 Herod in ama tatsiatnasa teng a behlapna in thong sungah Johan a khum hi. 21 Mi khempeuh a kibaptise uh ciangin Jesu zong a kibaptise hi. Tua ci-a thu a nget laitakin van kihong a, 22 vakhu bangin Khasiangtho pumpi nei in ama tungah a kumsuk hi. Tua ciangin vantung pan aw khat in, “Nang ka it ka Tapa na hi hi; nang tungah ka lungkim mahmah hi,” a ci hi. 23 Jesu thuhilh nasep a kipatin kum sawmthum bang a pha hi. A kingaihsutna ah amah Joseph tapa hi-a, Heli tapa Joseph, 24 Matthat tapa Heli, Levi tapa Matthat, Melki tapa Levi, Jannai tapa Melki, Joseph tapa Jannai 25 Mattathias tapa Joseph, Amos tapa Mattathias, Nahum tapa Amos, Esli tapa Nahum, Naggai tapa Esli, 26 Maath tapa Nagai, Mattathias tapa Maath, Semein Tapa Matathia, Josech tapa Semein, Joda tapa Josech, 27 Joanan tapa Joda, Rhesa tapa Joanan, Zerubbabel tapa Rhesa, Shealtiel Tapa Zerubabel, Neri tapa Shealtiel, 28 Melki tapa Neri, Addi tapa Melki, Cosam tapa Adi, Elmadam tapa Cosam, Er tapa Elmadam, 29 Joshua tapa Er, Eliezer tapa Joshua, Jorim tapa Eliezer,Matthat tapa Jorim, Levi tapa Matthat, 30 Simeon tapa Levi, Judah tapa Simeon, Joseph tapa Judah, Jotham tapa Joseph, Eliakim tapa Jonam, 31 Melea tapa Eliakim, Menna tapa Melea, Mattatha tapa Menna, Nathan tapa Mattatha, David tapa Nathan, 32 Jesse tapa David, Obed tapa Jesse, Boaz tapa Obed, Salmond tapa Boaz, Nahshon tapa Salmon, 33 Amminadab tapa Nahshon, Rame tapa Aminadab, Hezron tapa Ram, Perez tapa Hezron, Judah tapa Perez, 34 Jacob tapa Judah, Isaac tapa Jacob,Abraham tapa Isaac, Terah tapa Abraham, Nahor tapa Terah, 35 Serug tapa Nahor, Reu tapa Serug, Peleg tapa Reu, Eber tapa Peleg, Shelah tapa Eber, 36 Cainan tapa Shelah, Arphaxad tapa Kainan, Shem tapa Arphaxad, Noah tapa Shem, Lamech tapa Noah, 37 Methuselah tapa Lamech, Enoch tapa Methuselah, Jared tapa Enoch, Mahalalel tapa Jared, Cainan tapa Mahalalel, 38 Enosh tapa Cainan, Seth tapa Enos, Adam tapa Seth. Pasian tapa Adam.

Luka 4

1 Jesu Khasiangtho tawh kidimin, Jordan panin ciah kika Kha in amah gamlakah a pi hi. 2 Tua lai-ah dawimangpa in ni sawmli sung a zia-et hi. Tua hun sungin amah in bangmah ne lo a, tua nite a bei khit ciangin a gil kial hi. 3 Dawimangpa in ama kiangah, “Nang Pasian Tapa na hileh hih suang, anlum suaksak in,” a ci hi. 4 Jesu in, “‘Mihingte anlum bekin nungta lo hi,’a ci-in kigelh hi.” ci-in a dawng hi. 5 Dawimangpa in munsang khatah amah paipih a, leitunga om kumpi gamte khempeuh thakhatin a lak hi. 6 Ama kiangah, “Thuneihna le a thupina teng khempeuh kei hong kipia zo hi. Ka piak nop peuh pia thei ka hi manin nang kong pia ding hi. 7 Tua ahi ciangin kei hong bia peuh lecin a vekin nang aa hi ding hi,” a ci hi. 8 Jesu in, “‘Na Topa Pasian bia inla ama na bek sem in,’b ci-in kigelh hi,” ci-in a dawng hi. 9 Dawimangpa in amah Jerusalem ah paipih a biakinnpi khum dawnah a dingsak hi. Amah in, “Nang Pasian Tapa na hileh hih lai panin tuaksuk in. 10 Bang hang hiam cih leh: “ ‘Nang tawh kisai-in limtaka nang hong cing dingin amah in a vansawltakte thu pia ding hi: 11 na khepek suang tawh na tahkhak loh nadingin, amaute in a khut uh tawh nang hong domto ding uh hi,’c ci-in kigelh hi,” a ci hi. 12 Jesu in, “‘Na Topa Pasian na zia-et kei in,’d ci hi,” ci-in a dawng hi. 13 Dawimangpa in hih zia-etna teng khempeuh a man khit ciangin hun hoih a om kik mateng amah a nusia hi. 14 Jesu, Kha vangliatna tawh Galilee ah ciah kika, ama thu gamsung khua khempeuh ah a kizel hi. 15 Amaute synagogue-te sungah thu hilh a, mikim in amah a phat uh hi. 16 Amah a khanna khua Nazareth ah pai-a, ama ngeina bangin Sabbath ni-in synagogue ah a pai hi. Amah laisim dingin a dingto hi. 17 Kamsangpa Isaiah laizial amah kipia hi. Amah in tua laizial a phel leh: 18 "Mizawngte tunga lungdamna thu hilh dingin keimah sathau hong nilh khin zo ahi manin, Topa Kha ka tungah a om hi. Amah in thongkiate suaktasak ding, mittawte khua musak ding, a kinengcipte khahkhia ding, 19 Topa angvanna kum a tangko dingin, kei hong sawl zo hi,”e ci-a kigelhna mun a mu hi. 20 A sim khit ciangin laizial zialin sawltakpa pia-in a tu hi. Jew-te synagogue sunga om mi khempeuh in amah mitkhah loin a en uh hi. 21 Tua ciangin amah in amaute kiangah, “Tuni-in hih Laisiangtho note zakin a tangtung hi,” a ci hi. 22 Mi khempeuh in amah phatgen in a kam pana kamngaihte lamdang sa mahmah uh a, “Hih pa Joseph tapa hi lo ahi hiam?” ci-in a dong uh hi. 23 Jesu in amaute kiangah, “‘Zato mangpa aw, nang le nang kidamsak in! Na khankhiatna Capernaum a na hih ka zakte uh hih lai-ah zong hong hih dih in,’ ci-in hih paunak tawh nong bulh tektek ding uh hi,” a ci hi. 24 Amah in, “Thutak kong geninah, ama khua-a kisang kamsang khat beek a om kei hi. 25 Elijah hun lai-in kum thum le kum lang sung van kikhak-a, gamsung khempeuh ah a nasia mahmah kialpi a tun laitakin Israel gamah meigong tampi om hi, cih mantakin kong gen hi. 26 Tua hi napi Sidon kual Zarephath a meigongnu kiang longal adangte kiangah Elijah a kisawl kei hi. 27 Kamsangpa Elisha hun lai-in zong Israel gamah phakf natna a vei tampi a om hi. Tua hi napi Syria mi Naaman bek longal adang khat beek a kisiangsak kei hi,” ci-in a gen a zom lai hi. 28 Synagogue sunga om mite khempeuh in hih thu a zak uh ciangin a lungham uh hi. 29 Amaute dingkhia in, khuapi pua-ah amah hawlkhia uh a, kenah khiatsuk dingin tua khuapi kiphuhna mualdawn kil ah amah a paipih uh hi. 30 Ahi hangin amah mihonpite kawmlak tawnin a gelkhia hi. 31 Tua ciangin Galilee gam khuapi khat, Capernaum ah paisukin Sabbath ni-in mite kiangah thu a hilh hi. 32 Ama thuhilhna lamdang a sa mahmah uh hi; bang hang hiam cih leh a thuhilhna in thuneihna a nei hi. 33 Synagogue sungah kha gilog lut mi khat a om hi. Tuapa in a aw neihzah in, 34 “Ehei! Nazareth mi Jesu aw, kote bang hong cih nuam na hi hiam? Kote susia dingin hong pai na hi hiam? Nang kua na hi hiam, cih kong thei hi – Pasian’ Mi Siangtho na hi hi!” ci-in a kiko hi. 35 Jesu in khauhtakin, “Pau kei in! Ama sung pan paikhia in,” ci-in a sawl hi. Tua ciangin dawi in amaute khempeuh mai-ah tuapa a puksak khit ciangin amah liamsak loin a paikhia hi. 36 Mi khempeuh in lamdang sa mahmah uh a, “Hih thuhilhna bang ahi hiam? Thuneihna le vang tawh kha gilote thu a piak ciangin paikhia mawk uh hi!” khat le khat a kici uh hi. 37 Tua ciangin tua kuam kimkot tengah ama thu a kizel hi. 38 Synagogue inn panin Jesu paikhia a, Simon innah a hawh hi. Tua laitakin Simon sungnu nattun gim mahmah a, Jesu in amah a huh nading amaute in a ngen uh hi. 39 Tua ahi ciangin tuanu tungah kun a, nattun natna a tai leh a natna in amah nusiapah hi. Amah tho in amaute a zindo hi. 40 Nitum ciangin mipite in, natna tuamtuam a neite Jesu kiangah va paipih uh a, amah in amaute tungah khut nga kimin a damsak hi. 41 Tua tham loin mi tampite sung pan dawite paikhai a, “Nang Pasian Tapa na hi hi!” ci-in a kiko uh hi. Ahi hangin amah in amaute a tai hi. Tua dawite in amah Khristh hi, cih thei uh ahi manin amaute pau ding Jesu in a phal kei hi. 42 Khuavak ciangin Jesu gamdaihna munah a pai hi. Mite in amah zong uh a, ama omna munah a tun uh ciangin amaute nusia lo dingin a kho uh hi. 43 Ahi hangin amah in, “Pasian gam lungdamna thu hilh dingin kei hong kisawl ahi manin khua dangte ah zong ka hilh pelmawh ding hi,” a ci hi. 44 Tua hi-a, amah in Judeai gam synagogue-te sungah thu a hilhhilh hi.

Luka 5

1 Ni khat Gennesareta tuilipi gei-ah Jesu a din laitakin a kimah mihonpi va kikhawmin Pasian thu a ngai uh hi. 2 Tua laitakin a lente uh a sawp ngabengte in tuili monga a nusiat uh gunkuang nih amah in a mu hi. 3 Simon’ gunkuang tungah amah kahto in sehtak pan tawm a khinphei dingun a gen hi. Tua ciangin amah tu-a, gunkuang panin thu a hilh hi. 4 A thu hilh a man khit ciangin Simon kiangah, “Tui thuk lamah hot phei inla na lente khiasukb in,” a ci hi. 5 Simon in, “Topa aw, zan thapai-in khuhkhuh napi bangmah ka man kei uh hi. Ahi zongin nang cih ahi manin ka khiasuk ding hi,” a ci hi. 6 Amaute in tua banga a hih uh ciangin ngasa tam awk lua ahi manin a lente uh a kikek dektak hi. 7 Tua ciangin gunkuang khat pen-a om a lawmte uh pai-in amau huh dingun a khutvan uh hi. Tua ciangin amaute pai uh a gunkuangte gel sungah a koih uh ciangin dim lua ahi manin a tum dektak hi. 8 Simon Peter in hih a muh ciangin Jesu mai takah bokin, “Topa aw, kei kiang pan paikhia in; mawhdim mi ka hi hi!” a ci hi. 9 Ahang in, ngasa tua zahta a mat uh amah le a pawlte khempeuh in lamdang a sa uh hi. 10 Zebedee tate James le John-te, Simon lawmte in zong lamdang a sa uh hi. Tua ciangin Jesu in Simon kiangah, “Lau kei in; tu-a kipan mihing na man ding hi,” a ci hi. 11 Tua ciangin amaute in a gunkuangte uh tuigei-ah kaito uh a, na khempeuh nusia in amah a zui uh hi. 12 Khuapite khatah Jesu a om laitakin phakc natna in a pumtuam mi khat va pai hi. Tuapa in Jesu a muh ciangin leitualah khupbawh in, “Topa aw, ut peuh lecin nong siang-sak thei hi,” ci-in a thum hi. 13 Jesu in a khut zanin tuapa lawng a, “Ka ut hi, siang ta in!” a ci hi. Tua khit phetin phak natna in amah a nusia pah hi. 14 Tua ciangin Jesu in ama kiangah, “Kuama kiangah gen kei in, ahi hangin pai-in siampipa kiangah va kilak inla, amaute tungah teci panna in Moses in na sian nadinga hong thupiak na biakpiakna va pia in,” ci-in thu a pia hi. 15 Tua hi napi ama thu kizel semsem a, ama thugen ngai ding le a natnate uh a damsak ding deihin mihonpite a va pai uh hi. 16 Ahi hangin Jesu in gamdaihna munte ah kihemkhia zelin thu a ngen hi. 17 Ni khat Jesu in thu a hilh laitakin Galilee gam khuaneu khempeuh pan, Judea le Jerusalem pana pai Pharisee-te le thukham siate tua lai-ah a tu uh hi. Cinate a damsak nading Topa vangliatna ama adingin a om hi. 18 Mi pawlkhat in pumzaw khat phek tawh zawngin va paipih uh a, inn sungah tumpih in Jesu mai-a ngak ding a hanciam uh hi. 19 Mihonpite hangin Jesu kiang a tut theih nading uh lampi a muh theih loh uh ciangin innkhumah kahto in leisekpekte phelkhia uh a, mihonpite laizang, Jesu mai santakah a phekin a khai suk uh hi. 20 Jesu in amaute upna a muh ciangin, “Lawm aw, na mawhna kimaisak zo hi,” a ci hi. 21 Pharisee-te le thukham siate in, “Pasian a gendai hih mipa kua ahi hiam? Pasian longal kua in mawhna maisak thei ahi hiam?” ci-in a ngaihsun uh hi. 22 Jesu in amaute ngaihsutna thei a, “Note in bang hangin na lungsim uhah hih thute ngaihsun na hi uh hiam? 23 ‘Na mawhnate kimaisak zo hi,’ cih ding le ‘Tho inla pai in,’ cih ding koi baihzaw hiam? 24 Ahi hangin Mihing Tapa in hih leitungah mawh maisak theih nading thu nei hi, cih na theih nadingun...,” a cih khit ciangin pumzawpa kiangah, “Tho-in, na phek la inla, innah ciah in, kong ci hi,” a ci hi. 25 Tua khit phetin amah amaute mai-ah dingto pah a, ama kizawnna a lak khit ciangin innah ciah a Pasian a phat hi. 26 Mi khempeuh in lamdang sa mahmah uh a Pasian a phat uh hi. Amaute in piandang sa lua mahmah uh a, “Tuni-in a ciamtehtak thute i mu zo hi,” a ci uh hi. 27 Tua khit ciangin Jesu a paikhiat leh siahdonna bukno-a tu Levi min nei siahdongpa khat a mu hi. Jesu in ama kiangah, “Kei hong zui in,” a cih ciangin 28 Levi dingto a na khempeuh nusia in amah a zui hi. 29 Tua ciangin Levi in a innah Jesu ading anvakna pawi khat a bawl hi. Siahdongte hon tampi le midang tampi in amaute tawh an a nekhawm uh hi. 30 Ahi hangin Pharisee-te le amau pawlmi thukham siate in a nungzuite kiangah, “Bang hangin note in siahdongte le ‘mawhneite’ tawh nekhawm dawnkhawm na hi uh hiam?” ci-in a phunsan uh hi. 31 Jesu in amaute kiangah, “Cinate siavuan kisam uh a, cidamte kisam lo uh hi. 32 Thumaante sam dinga hong pai hi loin, mawhneite kisiksak dinga hong pai ka hi hi,” a ci hi. 33 Amaute in ama kiangah, “Johan nungzuite le Pharisee-te nungzuite in an a tan zelzel uh hangin nang nungzuite in a nene a dawndawn uh hi,” a ci uh hi. 34 Jesu in, “Zineipa tawh a omkhawm kimlai a lenglate in bangci-in an tang thei ding uh ahi hiam? 35 Ahi hangin zineipa amaute kiang pan a kilakkhiat hun hong tung ding hi. Tua ni ciangin amaute in an tang ding uh hi,” ci-in a dawng hi. 36 Amah in amaute kiangah gentehna gen a: “Kuamah in puanthak eukhia in puanlui a thuap kei hi. Tua bangin kihih leh puan thak kimlai eukhia dinga tua puanthak bek le a lui a kituak kei ding hi. 37 Savun-um lui sungah lenggahzu thak kuamah in thun ngei lo hi. Tua bangin kithun leh savun-um kitamin lenggahzu bua dinga savun-um kisia ding hi. 38 Tua bang hizaw loin savun-um thak sungah lenggahzu thak kithun pelmawh zaw ding hi. 39 Tua ciangin lenggahzu kumlui a dawnsa peuhmah in ‘A kumlui mah geii zaw’ sa uh ahi manin lenggahzu thak a deih zaw kei uh hi,” a ci hi.

Luka 6

1 Sabbath ni khat Jesu buhlei tawnin a pai hi. Nungzuite in buhvui zutin a khut sunguah nuai-in a takte a ne uh hi. 2 Pharisee-te pawlkhat in, “Bang hangin Sabbath ni-in thukham tawh kituak lo hih na hi uh hiam?” ci-in a dong uh hi. 3 Jesu in amaute kiangah, “David le a pawlte a gilkial laitakun bang hih uh cih sim ngei lo na hi uh hiam? 4 Pasian inn sungah lutin siampite bek nek dinga kiphal a ki-apsa anlum ne in, a pawlte zong a pia hi,” ci-in a dawng hi. 5 Tua ciangin Jesu in amaute kiangah, “Mihing Tapa, Sabbath’ Topa ahi hi,” a ci hi. 6 Sabbath ni dang khat synagogue sungah pai-a thu a hilh laitakin a khut taklam a teem mi khat a om hi. 7 Pharisee-te le thukham siate in Jesu a mawhmat nop manun Sabbath ni-in cina a damsak kha hiam, ci-in a vil gige uh hi. 8 Ahi hangin Jesu in amaute ngaihsutna thei ahi manin khutteempa kiangah, “Tho inla mi khempeuh mai ah ding dih in,” ci-in a sawl hi. Tua ciangin amah thoin tua lai-ah a ding hi. 9 Tua ciangin Jesu in amaute kiangah, “Sabbath ni-in a sia hih ding le a pha hih ding, nuntakna hot khiat ding le nuntakna suksiat ding koi pen thukham tawh kituak zaw ahi hiam, cih kong dong hi,” a ci hi. 10 Amah in amaute khempeuh en kawikawi a, tua ciangin tuapa kiangah, “Na khut zan in,” ci-in a sawl hi. Amah in a khut a zan leh a khutsa a dim kik phitphet hi. 11 Ahi hangin amaute lungham uh a, Jesu bangci hih ding cih thu khat le khat a .kikum uh hi. 12 Tua hunlai ni khat, thungen dingin Jesu mualtungah kahto a, zan khuavakin Pasian kiangah thu a ngen hi. 13 Zingsang ciangin ama kiangah a nungzuite sama, sawm le nih telkhia-in sawltakpi, ci-in a min vawh hi. 14 Tuate in: Simon (Peter min a phuah) le a sanggampa Andrew, James, John, Philip, Bartholomew, 15 Matthew, Thomas, Alphaeus tapa James, Zealot kici Simon, 16 James tapa Judas le lehhekpa Judas Iscariot te ahi uh hi. 17 Amaute tawh amah tonkhawm sukin munzang khatah a ding hi. Ama nungzui mihon tampi le Judea gam khempeuh pan ahi zongin, Jerusalem le Tyre le Sidon le tuipi dung pan ahi zongin mi tampitak, 18 ama thu a ngai ding le a cinate uh a damsak nading deihin tua lai-ah a na om uh hi. Kha giloa in a thuaksiatsakte kidamsakin, 19 ama tung panin vang paikhia a, cinate khempeuh dam siangsak ahi manin mi khempeuh in amah lawn a sawm uh hi. 20 Amah in a nungzuite en a: “A zawng note thupha ngah na hi uh hi, ahang in, Pasian gam nomau aa ahi hi 21 Tu laitaka gilkial note thupha ngah na hi uh hi, ahang in, hong kivak kham ding hi. Tu laitaka kap note thupha ngah na hi uh hi, ahang in, na nui ding uh hi. 22 Mite in note hong mudah uh a, Mihing Tapa hangin amaute in note hong puaseh in, hong engko in na min uh siasak a, hong nolh uh ciangin thupha ngah na hi uh hi. 23 "Vantungah no ading pahtakman lian ahi manin, tua ni-in kipakin lungdamin diang un. Ahang in, tua mah bangin a pu a pa-te un kamsangte na bawl zo uh hi. 24 "Ahi hangin a hau note, gimna na thuak ding uh hi, ahang in, na nuamsa khin zo uh hi. 25 Tu laitaka an kham note, gimna na thuak ding uh hi, ahang in, na gilkial ding uh hi. Tu laitaka nui note, gimna na thuak ding uh hi, ahang in, dah in na kap ding uh hi. 26 Mi khempeuh in note hong phatgen uh ciangin gimna na thuak ding uh hi, ahang in, na pu na pa-te un kamsangzuaute tua bangin a hih uh hi. 27 "Ahi hangin ka thugen a za mite tungah kong hilh hi: Na galte na it in, hong mudahte tungah a hoih na bawl in; 28 nang hong samsiate thupha na pia inla, hong bawlsiate ading thu na ngetsak in. 29 Mi khatpeuh in na pang hong bet leh a lang lam zong na dawh in. Mi khatpeuh in na puantualpi hong laksak leh na puantungsilh a lak ding kham kei in. 30 Hong ngente khempeuh na pia inla, na neihsa hong laksak peuhpeuh kiangah bangmah na ngen kik kei in. 31 Nang tunga hong kibawl ding na deih bangin midangte tungah na bawl in. 32 "No hong itte bek na it uh leh bang lawhtak ding na hi uh hiam? ‘Mawhneite’ nangawn in amau a itte it uh hi. 33 No tunga a hoih hong bawlte tung bekah a hoih na bawl uh leh bang lawhtak ding na hi uh hiam? ‘Mawhneite’ nangawn in tua bangin hih uh hi. 34 Hong loh kik dinga na lamette bek uh na leitawisak uh leh tua in nang bang hong lawhtaksak tuan ding ahi hiam? ‘Mawhneite’ nangawn in a cinga loh kik ding a lamet uh ‘mawhneite’ leitawisak uh hi. 35 Ahi hangin note na hi uh leh na galte uh itin, amaute tungah a hoih bawl unla ngah kik ding khat beek lamen loin na leitawisak un. Tua ciangin na pahtakman uh lian dinga, Sang Penpa tate na hi ding uh hi. Ahang in, amah nuamna mel a thei lote le a tatsiate tungah a migi hi. 36 Na Pa un a lainat theih bangin no zong na lainat thei un. 37 Thu na khen kei un, no tungah zong hong kikhen kei ding hi. Na mawhpaih kei un, no zong hong kimawhpaih lo ding hi. Na maisak un, no zong hong kimaisak ding hi. 38 Pia un, no zong hong kipia ding hi. No tehna dimvum tham lo kinengcipin kitattat-a, a dimletin na anguah hong kisung ding hi. Ahang in, note zat tehna tawh no ading hong kitehsak ding hi,” a ci hi. 39 Amah in amaute kiangah hih gentehna gen a: “Mittaw khat in mittaw dang khat bangci lamhilh thei ding ahi hiam? A nih un leihawm ah kia lo ding uh ahi hiam? 40 A sin mi in a siapa sangin theizaw lo hi, ahi hangin cingtaaktaka a kisinsak peuhmah a siapa mah tawh kibang ding hi. 41 "Nang mittang-a singpek phawkkha loin na sanggampa mittang a singvui them bang dinga en na hi hiam? 42 Nang mahmah in na mittang a singpek mu thei lo napi na sanggampa kiangah, ‘Sanggam aw, na mit-a ninthem hong lakkhiatsak ning,’ bangci cih theih na hi hiam? Kineihsiampa aw, na mit-a singpek lakhia phot lecin tua ciangin na sanggampa mit-a lakkhiat ding singvui them na telmuh thei pan ding hi. 43 Singkung hoih, a gah hoih lo gah om lo a, singkung hoih lo a gah hoih gah a om kei hi. 44 Singkung khempeuh a gah in kikhentel thei ciat hi. Mite in thangling kung panin thei gah lo lo uh a, sialtalling kung panin lenggah a lo thei kei uh hi. 45 Mi hoih in a lungtanga a koihcing a hoihte panin na hoih pusuahkhia hi. Ahang in, lungtang sung a dimlet ciangin kamin kipaukhia hi. 46 "Bang hangin “Topa, Topa hong ci napi, ka gen bangin hih lo na hi uh hiam? 47 Ka kiangah hong pai-in ka thu za-a, a zuipahte bang tawh kibang hiam, cih kong lak ding hi, 48 Thukpi a tawh khit ciangin suangpi tungah bulkip a phut innlampa tawh kibang hi. Tui khanga, tua inn a nawk hangin kiptaka kilam ahi manin tua inn a lok zo kei hi. 49 Ahi hangin ka thute za napi a zui lote, bulpi a nei lo leituala inn lam pa tawh kibang hi. Tui khanga tua inn a nawk phetin puka, a kisia ngi-ingei hi,” a ci hi.

Luka 7

1 Jesu in hih thu khempeuh mipite zakin a gen khit ciangin Capernaum ah a lut hi. 2 Tua lai-ah zakhat ukpa khat in a pahtak mahmah nasempa cina-a, si dektakin a om hi. 3 Zakhat ukpa in Jesu thu za-a Jew upate pawlkhat ama kiangah sawlin, amah pai-a a nasempa a damsak nadingin thumsak hi. 4 Amaute Jesu kiang a tun uh ciangin, “Hih mipa ading na hihsak ding kilawm hi. 5 Bang hang hiam cih leh amah in i minam it a, ei Jew-te synagogue hong lamsak ahi manin hong pai hamtang in,” ci-in a kun tangtang uh hi. 6 Tua ahi ciangin Jesu in amaute a zui hi. Amah tuapa inn a tun dektak ciangin zakhat-ukpa in a lawmte sawl a, “Topa aw, kibuaisak dah in. Kei inn sungah nang kong lutsak ding kei adingin kilawm lo hi. 7 Nang kianga hong pai dinga kilawm ka kisaklohna zong tua hang mah ahi hi. Ahi hangin kammal khat gen lel lecin ka nasempa dampah ding hi. 8 Kei mahmah zong thuneihna nuai-a om ka hi-a, keima nuai-ah galkapte a om hi. Khat kiangah, ‘Pai in,’ ka cih leh pai-a, adang khat kiangah, ‘Hong pai in,’ ka cih leh hong pai hi. Ka nasempa kiangah, ‘Hih sem in,’ ka cih ciangin a sem hi,” a ci hi. 9 Jesu in hih thu a zak ciangin, tuapa lamdang sa mahmah a, amah a zui mihonpite lam nga-in, “Ken kong geninah, Israel-te lak nangawn ah hih zaha lian upna ka mu nai kei hi,” a ci hi. 10 Tua ciangin amah sama kisawlte tung uh a, tua nasempa a damsa in a mu uh hi. 11 A sawt loin Nain kici khua ah Jesu pai-a, a nungzuite le mihon tampi in amah zui uh hi. 12 Amah tua khuapi kongpi a tun kuan ciangin meigongnu khat tapa khat neihsun a sisa in a kizawngkhia hi. Tua khuapi panin mihonpi in tua meigongnu a zui uh hi. 13 Topa in tuanu a muh ciangin khasiat mahmah ahi manin, “Kap nawn kei in,” a ci hi. 14 Tua ciangin va naih a hankuang zawngte a dinkhawl uh hi. Amah in, “Tangvalpa aw, tho in kong ci hi!” a ci hi. 15 Misipa thoto in pau-a, Jesu in a nu kiangah a ap kik hi. 16 Amaute khempeuh in piandang sa in Pasian a phat uh hi. Amaute in, “Eite lakah kamsang lian khat hong kilang ta hi. Ama mite huh dingin Pasian hong pai ta hi,” a ci uh hi. 17 Hih Jesu tawh kisai thu Judeaa le a kimkot gamsung khua khempeuh ah a kizel hi. 18 Johan nungzuite in hih thupiang khempeuh Johan a hilh uh hi. Amaute lakah nih sama, 19 Topa kiangah, “Hong pai ding pa mah na hi hiam? Midang ka na lamen lai ding uh hiam?” cih a dong dingin a sawl hi. 20 Tua mite Jesu kiang a tun uh ciangin, “‘Hong pai ding pa mah na hi hiam? Midang khatpeuh ka na lamen lai ding uh hiam?’ cih a dong dingin Baptize-pa Johan in na kiangah kote hong sawl hi,” a ci uh hi. 21 Tua hun laitak tektekin Jesu in natna satna le kha gilo a veite tampi damsakin, mittaw tampi khua a musak hi. 22 Tua ciangin amah in thupuate kiangah, “Note pai kik unla, na zaksa na muhsa uh thu teng Johan kiangah va hilh un: Mittawte in khua mu uh hi, khebaite lam pai thei uh hi; miphakteb damsiang uh hi; bilngongte in khua za uh hi; misite kihingkiksak hi; mizawngte kiangah lungdamna thu kihilh hi. 23 Keima hanga a puk lo mi thupha ngah ahi hi,” a ci hi. 24 Johan thupuate a ciah khit uh ciangin Jesu in mihonpite kiangah, Johan thu hih bangin gen a: “Bang en dinga gamlak ah pai na hi uh hiam? Huih mut-a huang pumpeng en dinga paikhia na hi uh hiam? 25 Ahi kei leh bang en dinga paikhia na hi uh hiam? Puan hoih silhte en dinga pai na hi uh hiam? Hi lo hi. Puan hoih silhte le a noptatte kumpi-inn sungah a om uh hi. 26 Tua ahileh note bang en dingin paikhia na hi uh hiam? Kamsangpa en dingin maw? Hi mah hi. Ken kong geninah, kamsangpa sangin a lianzaw hi. 27 Tuapa thu hih bangin kigelh hi: “‘Ka thupuapa na mai-ah ka sawl dinga amah in na mai-ah na lampi ding a sialkhol ding hi,’c 28 Ken kong geninah, numei sung pana suakte lakah Baptisepa Johan sanga lianzaw kuamah a om kei hi; ahi zongin Pasian gamah a neupen nangawn amah sangin a lianzaw hi,” a ci hi. 29 (Mi khempeuh, siahdongte nangawn in Jesu thugen a zak uh ciangin Pasian lampi a maan hi, ci-in a sang uh hi; bang hang hiam cih leh amaute Johan in baptise khin hi. 30 Ahi hangin Pharisee-te le thukham siamte Johan in baptise kha lo ahi manin amau ading Pasian ngimsak na a nolh uh hi.) 31 "Tua ahileh hih khang mite bang tawh ka teh ding hiam? Amaute bang tawh kibang uh hiam? 32 Suamzuakna munah tu a: “ ‘Tamngai kong mutsak uh hangin na laam kei uh hi; misi-la ka sak uh hangin lah na kap kei uh hi,’ ci-in a kigal to naupangte tawh kibang uh hi. 33 Ahang in, Baptize-pa Johan anne lo lenggahzu dawn loin hong pai-a, ‘Dawi lawm neipa hi,’ na ci uh hi. 34 Mihing Tapa hong pai ciangin ne-in dawna, ‘An hai zu haipa, siahdongte le “mawhneite” lawmpa hi,’ na ci zel uh hi. 35 Ahi hangin pilna aman a hina a tate khempeuh in lakkhia hi,” a ci hi. 36 Pharisee-te khat in nitak-an nekpih dingin Jesu sama, tua Pharisee-pa innah pai-in sabuai-ah a kingam hi. 37 Jesu in tua Pharisee-pa inn-a an a nek lam mawhna a bawl ngitnget tua khua-a numei khat in a theih ciangin sathau namtui suangngo thawl khat tawi a, 38 Jesu nunglam a khe phungah kap kawmin dinga a khitui in Jesu khepekte a kawtsak hi. Tua khit ciangin a samin nul-a, namin a sathau namtui a buak hi. 39 Amah a sam Pharisee-pa in a muh ciangin, “Hih pa kamsang ahileh amah a lawng kua hi-a hih nu bangci numei hi-in, mawhnei khat ahilam a thei ding hi,” amah le amah a kici hi. 40 Jesu in ama kiangah, “Simon aw, kong gen nop khat a om hi,” ci-in a dawng hi. Amah in, “Sia aw, hong gen in,” a ci hi. 41 Jesu in, “Sum pakhak pa khat tungah mi nih in sum ba uh hi. Khat in denariid zanga ba-in adang khat in sawmnga a ba hi. 42 Amaute in a leiba uh loh zo lo tuak uh ahi manin amah in a leibate a nihin maisak tuak hi. Tua ahileh tuate gel kua pen in amah nak itzaw ding ahi hiam?” ci-in a dong hi. 43 Simon in, “Leiba a tamzaw a kimaisakpa hi-in ka um hi,” ci-in a dawng hi. Jesu in, “A mantakin na khen zo hi,” a ci hi. 44 Tua ciangin amah tuanu lamah kihei-a Simon kiangah, “Hih nu na mu hiam? Na innah kong hawh a, ka khe sil nading tui nong pia kei hi. Ahi hangin amah in ka khepekte a khitui tawh kawtsakin a samin a nul hi. 45 Nang nong nam kei a, ahi hangin hih nu in innsung kong luta kipan tawlnga loin ka khepekte a nam hi. 46 Nang, ka lu sathau nong nilh kei a, amah in ahileh ka khepekte sathau namtui a buak hi. 47 Tua ahi manin ken kong geninah, ama mawhna tampite kimaisak zo ahi manin tampi-in a it hi. Ahi hangin tawmkha a kimaisakte in a tawm it uh hi,” a ci hi. 48 Tua ciangin Jesu in tuanu kiangah, “Na mawhnate kimaisak zo hi,” a ci hi. 49 Lengla dangte in, “Mawhnate nangawn a maisak hih mipa kua ahi hiam?” ci-in a kiho uh hi. 50 Jesu in numei kiangah, “Na upna in nang hong honkhia zo hi; lungnuamin ciah in,” a ci hi.

Luka 8

1 Tua khit ciangin Jesu khuapi le khuaneute ah zin kawikawi-a, Pasian gam tawh kisai lungdamna thu a tangko hi. Tua Sawm-le-nihte ama kiangah om uh a, 2 kha gilo le a natnate uh a damsak numei pawlkhat zong a om uh hi: A sung pana dawi sagih a paikhiatna nu Mary (Magdalene kici); 3 Herod inn sunga sungtapipa Chuza zi Joanna, Susanna, le adang tampi tawh a om uh hi. Hih numeite in amau neih bangbang tawh amaute a panpih uh hi. 4 Khuapite panin Jesu kiangah mipite pai uh a, mihon tampi a kihonkhop laitakin amah in hih gentehna na gen a, 5 "Lokhopa khat ama khaici vawh dingin kuankhia hi. Khaici a theh ciangin pawlkhat lamdungah tu-a kituancilin vana vasate in nemang uh hi. 6 Pawlkhatte suang tungah tu-a a po khiat ciangin a nom om lo ahi manin ankungte a keugaw hi. 7 Adang pawlkhatte linglakah tu-a, lingkung tawh khangkhawmin lingkung in depgawp hi. 8 Adang pawlkhatte leuleu lei hoihna ah a tu hi. Tuate poto in a kivawh sangin azah zakhat-a tamzaw gah a gah hi,” a ci hi. Hih thu a gen khit ciangin, “Zak nading bil nei peuh in za ta hen,” ci-in a kiko hi. 9 A nungzuite in hih gentehna a khiatna a dong uh hi. 10 Amah in, Pasian-gam thusimte theih theihna note hong kipiak hangin, “amaute in mumu napi a muhtel theih loh, zaza napi in a theihtel theih loh,’a nadingin midangte tungah gentehnate zangin ka gen hi. 11 "Hih gentehna a khiatna: Khaici pen Pasian thu ahi hi. 12 Lam dunga tute, thu za-a, ahi hangin uma hotkhiatna a ngah loh nadingin dawimangpa va pai-in amau lungsim panin Pasian thu a lakkhiatte ahi hi. 13 Suang tunga tute, Pasian thu a zak uh ciangin lungdamin a san uh hangin zungkha lote ahi uh hi. Amaute in tomkha sung um uh a zia-etna a thuak uh ciangin a pukmangte ahi hi. 14 Ling laka tu khaicite, Pasian thu a zak uh hangin a nuntakna uhah nuntak nading lunghimawhnate, hauhnate le nopsaknate in depgawp-a, a picing lote cihna ahi hi. 15 Ahi hangin lei hoihna-a tu khaicite ahileh lungsim picing le lungsim hoih nei in Pasian thu za-in kem dena, thuak keikai-in gah a gahkhiate cihna ahi hi. 16 "Kuamah in mei a vak khit ciangin bel sung ahi zongin lupna nuai ahi zongin a sel kei hi. Tua sangsikin inn sunga om khempeuh in khua a muh theih nadingin meivak tunna tungah tungzaw hi. 17 Ahang in, a kigenkhia lo ding a ki-imcip khat beek om lo-a, a kitheikhawk lo ding le a langtanga kipholak lo ding a kiselcip khat beek a om kei hi. 18 Tua ahi manin thu bangci ngaih na hi uh hiam, limtakin ngaihsun un. A nei peuhmah kipia beh ding hi; a nei lo peuhmah ama neihsa-a a ngaihsutte nangawn kilaksak ding hi,” a ci hi. 19 Tua laitakin amah tawh kimu nuamin Jesu nu le a sanggamte a pai uh hi; ahi hangin mihonpite hangin ama kiangah a pai thei kei uh hi. 20 Mi khat in, “Na nu le na sanggamte, nang hong mu nuamin innpua ah ding uh hi,” a ci hi. 21 Amah in, “Pasian thu za a, a zuite ka nu le ka sanggamte ahi hi,” ci-in a dawng hi. 22 Ni khat Jesu in a nungzuite kiangah, “Tuilipi galkhat lamah galkah ni,” a ci hi. Tua ciangin amaute gunkuang ah tuangin a dingkhia uh hi. 23 A pai laitakun amah a ihmu hi. Tuilipi tungah huih le guah kinuai-a gunkuang tuum dektak ahi manin amaute adingin a lauhuai mahmah hi. 24 Nungzuite pai-in, “Topa, Topa, tui a kia petmah ding hi ta ung!” ci-in a phong uh hi. Amah tho-in huih le tuihual kinuai a tai ciangin huihpi daipah in a sippah dide hi. 25 Amah in a nungzuite kiangah, “Na upna uh koi-ah om hiam?” ci-in a dong hi. Amaute in lau kawm lamdang sa mahmah kawmin, “Hih pa kua hiam? Thu a piak ciangin huih le tui nangawn in ama thu mang uh hi,” a kici uh hi. 26 Amaute Galilee tuilipi galkhat lam Gerasenesb kualah gunkuangin a pai uh hi. 27 Tui gei-ah Jesu a kumkhiat ciangin khuapi panin dawilut mi khatin a na dawntuah hi. Hih mipa in sawt veipi puan silh lo, inn ah teng loin hante lakah a teng hi. 28 Amah in Jesu a muh ciangin kiko-a ama khe phungah bokin, “Sang Pen Pasian Tapa Jesu aw, kei bang hong cih nuam na hi hiam? Kei hong bawlsia kei in ci-in kong thum hi!” ci-in a aw neih zahin a kiko hi. 29 Ahang in, Jesu in tuapa sung pan tua kha giloc a paikhiat nadingin thu a pia hi. Tua kha gilo in tuapa tam veipi a man hi. A khut a khete sikkhainiang tawh khihin a cin uh hangin a sikkhainiangte peksatin tua dawi in amah gamdaih na munte ah a hawl hi. 30 Jesu in ama kiangah, “Na min bang ahi hiam?” ci-in a dong hi. Amah in a sungah dawi tampi om ahi ciangin, “Legion hi,” ci-in a dawng hi. 31 Tua ciangin amaute Kawhawmpi sungah a paisak loh nadingin ama kiangah a thumthum uh hi. 32 Mual pangah vok hon tampi a gamta hi. Dawite in tuate sungah a lutsak nadingin Jesu kiangah a nget uh ciangin amah in a phal hi. 33 Tua mipa sung pan dawite a paikhiat ciangin vokte sungah lut uh a vok honte kensang pan tuili sungah tuaksukin tui kia khin uh hi. 34 Vok cingte in tua thupiangsa a muh uh ciangin tai uh a, khuapi le khuaneute ah a koh uh ciangin, 35 bang thu piang hiam cih en dingin mipite a paikhia uh hi. Jesu kiang a tun uh ciangin dawite in a paikhiatsan pa Jesu khe phungah tu-in, puan silh-a, a lungsim pil kik-a om a muh uh ciangin a lau uh hi. 36 Tua thu a musate in dawilut pa a kidamsak zia mite kiangah a gen uh hi. 37 Tua ciangin amaute lau mahmah uh ahi manin, Gerasenes kuala mi khempeuh in amaute kiang pan Jesu a paikhiat ding a ngen uh hi. Tua ciangin amah gunkuang sungah kahin a paikhia hi. 38 Dawite a paikhiatna pa in amah a tonpih nadingin a thum hangin Jesu in, 39 "Na inn ah ciah inla Pasian in nang tungah bangzah hong bawlsak cih thu na gen in,” ci-in amah a sawlkhia hi. Tua ahi ciangin tuapa paikhia a, Jesu in ama tungah bangzah bawlsak cih khuapi sung khempeuh ah a gen hi. 40 Mi honpite khempeuh in Jesu a kileh kik ding lamen uh ahi manin, amah a ciah kik ciangin a na muak uh hi. 41 Tua laitakin Jairus min nei synagogue ukpa va pai-a, Jesu khephungah bokin ama inn ah a pai nading a ngen hi. 42 Bang hang hiam cih leh kum sawm-le-nih bang a pha pan a tanu neihsun a si dektak hi. Jesu lampi ah a pai laitakin mihon pite in a nehkham dektak uh hi. 43 Tua lai-ah kum sawm le nih sungd siluang natna a vei, kuama damsak zawh loh numei khat a om hi. 44 Tua-nu, Jesu nunglamah pai-in a puantualpi mongtep a lawn leh a siluang a kangpah hi. 45 Jesu in, “Kei hong lawng kua hiam?” ci-in a kan hi. Amaute khempeuh in a nial uh ciangin Peter in, “Topa aw, mipite in nang hong neh in hong phukhakha uh hi,” ci-in a dawng hi. 46 Ahi hangin Jesu in, “Hong lawng khat om hi; ka tung panin vang a paikhiat lam ka thei hi,” a ci hi. 47 Tua ciangin tuanu in amah kitheikhia veve ding cih a theih ciangin lingsa in va pai-a, Jesu khe phungah a bok hi. Mi khempeuh zakin, amah in bang hangin Jesu lawnga, bangci dampah lian cih thu a gen hi. 48 Tua ciangin amah in tuanu kiangah, “Ka tanu aw, na upna in nang hong damsak hi. Lungnuamin ciah in,” a ci hi. 49 Jesu a paupau laitakin synagogue ukpa Jairus inn panin mi khat hong pai hi. Tuapa in, “Na tanu si ta hi. Siapa buaisak nawn dah in,” a ci hi. 50 Jesu in hih thu a zak ciangin Jairus kiangah, “Lau kei in; um lel in, tua hileh amah dam ding hi,” a ci hi. 51 Amah Jairus inn a tun ciangin Peter, Johan le James le tua naupang nu le pa longal adang kuamah inn sungah a tumpih kei hi. 52 Tua kawmkalin mi khempeuh amah kahin a taamlo uh hi. Jesu in, “Tawp dih un, amah a si hi loin a ihmu ahi hi,” a ci hi. 53 Amaute in tua numeino a si ahilam thei uh ahi manin amah a nuihsan uh hi. 54 Ahi hangin amah in tuanu a khutin len a, “Ka ta aw, tho in!” a ci hi. 55 Tuanu a kha kileh kik a thakhatin a ding to hi. Tua ciangin Jesu in ama nek ding bang khatpeuh a piak dingun a sawl hi. 56 A nu a pate in lamdang a sa uh hi. Ahi hangin amah in hih thupiang kuama kiangah a gen loh nadingun thu a pia hi.

Luka 9

1 Jesu in Sawm-le-nihte a sapkhawm khit ciangin, dawite khempeuh a hawlkhiat nading uh le natnate a damsak nading uh vang le thuneihna a pia hi. 2 Tua ciangin amah in Pasian gam thu hilh ding le cinate damsak dingin amaute a sawl khia hi. 3 Amah in amaute kiangah, “Na khualzinna-ua na zat dingun ciangkhut, thung-ip, anlum le sum keng loin puantungsilh keng thuah kei un. 4 Inn khatpeuh ah na lut uh ciangin tua khua na nusiat mateng uh tua inn ah taam suak un. 5 Mite in note hong ngaih kei uh leh amau langa teci ahi dingin tua khua na nusiat uh ciangin na khepek-ua leivuite singkhia un,” a ci hi. 6 Tua ahi ciangin amaute kuankhia uh a, khuaneute ah pai kawikawi-in mun khempeuh ah lungdamna-thu hilhin, mite a damsak uh hi. 7 Tua laitakin gam-ukpa Herod in thupiang teng na za-a a amkham mahmah hi. Bang hang hiam cih leh mi pawlkhat in misi pan Johan thokik zo hi, ci uh a, 8 adang pawlkhat in Elijah hong kilang hi, ci-in pawlkhat leuleu in tanglai-a kamsangte khat hong hing kik hi ci uh hi. 9 Ahi hangin Herod in, “Johan ngawng ka tansa ahi hi. Tua ahileh a thu ka zak pa kua ahi hiam?” ci-in donga, amah a muh nadingin a hanciam hi. 10 Sawltakpite kileh kik uh a, a nasepsate uh Jesu a zasak uh hi. Tua ciangin amah in amaute paipih a Bethsaida kici khuapi khat lamah a kihemkhia uh hi. 11 Ahi hangin mihonpite in thei veve uh a, amah a zui uh hi. Amah in amaute na muak a, Pasian-gam thu genpihin damsak ding a kisamte a damsak hi. 12 Nitak lam ni niam ciangin Sawm-le-nihte ama kiangah va pai uh a, “Hih lai gamsungpi ahi manin hih kima khuaneu khuatate ah pai-in a nek ding uh le a zintun nading uh a zon theih nadingun mipite sawlkhia in,” a ci uh hi. 13 Amah in, “A nek ding uh bang khatpeuh pia un,” ci-in a dawng hi. Amaute in, “Hih mihonpite khempeuh ading an lei dinga pai ding ka hi kei ngal uh leh, anlum nga le ngasa nih bek ka nei uh hi,” ci-in a dawng uh hi. 14 (Tua lai-ah pasal tul nga bang a om hi.) Ahi hangin amah in a nungzuite kiangah, “Sawmnga ta khawngin a pawlpawlin khen unla tusak dih un,” a ci hi. 15 Nungzuite in tua banga a khen khit uh ciangin mi khempeuh a tu uh hi. 16 Amah in, tua anlum nga le ngasa gel la-a, vantung lam ento in, lungdam a koh khit ciangin tuate a balkham hi. Tua khit ciangin mipite a lui dingun nungzuite a pia hi. 17 Amaute khempeuh in ne uh a, a kham pikpek khit uh ciangin a khamvalte uh a nungzuite in a top uh leh bawmta sawm le nih tak a pha hi. 18 Khatvei Jesu in amah kia-a thu a nget laitakin a nungzuite zong om a, amah in amaute kiangah, “Mihonpite in kei kua hi, hong ci uh hiam?” ci-in a dong hi. 19 Amaute in, “Mi pawlkhat in Baptize-pa Johan hi; pawlkhatte in Elijah hi; pawlkhat leuleu in tanglai kamsangte khat hong hing kik hi; hong ci uh hi,” ci-in a dawng uh hi. 20 Amah in, “Tua ahileh no, kei kua hi nong ci uh hiam?” ci-in a dong hi. Peter in, “Pasian’ Khrista na hi hi,” ci-in a dawng hi. 21 Jesu in hih thu kuamah a hilh loh nadingun khauhtakin a vauhilh hi. 22 Tua ciangin amah in, “Mihing Tapa in tampi thuak pelmawh dinga, upate, siampi makaite le thukham siate in amah nolhin, pel loin amah kithat dinga a ni thumna ni-in kihingkiksak ding hi,” a ci hi. 23 Tua ciangin amah in amaute khempeuh kiangah, “Mi khatpeuh in ka nung hong zuih nop leh amah leh amah kinial pelmawh dinga nisimin ama singlamteh kisuanin hong zuih kul hi. 24 Ahang in, ama nuntakna a honkhia nuamte in taan ding uh a, ahi hangin kei hanga a nuntakna a mangsakte in a honkhia ding hi. 25 Mi khatin leitung buppi a neih hangin amahmah kimansuah ahikeh kitaan leh bang phatuam ding ahi hiam? 26 Mi khatpeuh in keimah le ka thute a zumpih leh vantung misiangthote le Pasian minthanna le ama minthanna tawh Mihing Tapa hong pai ciangin ama hangin a maizum ding hi. 27 Thutak kong geninah hih lai-a ding mi kimkhat in Pasian gam a muh ma-un sihna a ciam kei ding uh hi,” a ci hi. 28 Jesu in hih thu a gen zawh ni giat bang a phak ciangin Peter, Johan le James-te zawnin mualtung ah thungen dingin a kahto uh hi. 29 Thu a nget laitakin, a mel kikhela, a puante khuaphia bangin a tang hi. 30 Mi nih – Moses leh Elijah, 31 minthanna thupi tawh kilang uh a, Jesu tawh a kiho uh hi. Amaute in Jerusalem a, a tangtunsak ding, ama paikhiat nading thu a gen uh hi. 32 Peter le a pawlte a ihmut uh suak mahmah a, ahi hangin a tei sinsen uh ciangin ama minthanna le amah tawh a dingkhawm mi nih a mu uh hi. 33 Tua mite Jesu kiang pan a paikhiat laitakun Peter in, “Topa, hih lai-a i om nuam mahmah hi. Nang ading khat, Moses ading khat, Elijah ading khat, buk thum hong lamsak nung,” a ci hi. (Ama gen bang hiam cih a thei kei hi.) 34 Tua banga a pau laitakin meii khat kai-in amaute tuama, meii lakah a tum uh ciangin a lau uh hi. 35 Meii lak panin aw khat in, “Hih in ka teelsa ka Tapa ahi hi; ama thu na ngai un,” a ci hi. 36 Tua aw in a gen khit ciangin amaute in, Jesu amah kia-a om a mu uh hi. Nungzuite in hih thu amaute lungsimah kem gige uh a, amau muhsa thute tua hunin kuama kiangah a gen kei uh hi. 37 A zing ciang, mualtung pan a kumsuk uh ciangin mihon tampi in amah a na dawntuah uh hi. 38 Mihonpite lakah khat in, “Sia aw, ka tapa hong etsak dih in; amah bek ta-a ka neih ahi hi. 39 Amah kha khat in mana, thakhat khatin a kiko zakzak hi. Tua kha in amah kisatsak gawp a, a kam panin cilphuan a bua hi. Tua kha in amah nusiat hun nei lo phiala, a susia gawp ding hi ta hi. 40 Na nungzuite kiangah tua kha a hawlkhiat nadingun ka nget hangin a hawlkhia thei kei uh hi,” a ci hi. 41 Jesu in, “Thu um lo-a a lehtat khang mite aw, note tawh bang tan vei om khawma, bang tan vei hong dawhdawh zo ding ka hi hiam? Na tapa hong paipih in,” a ci hi. 42 Tua naupang a paipih laitak nangawnin dawi in leitualah tuksak-a a kisatsak gawp hi. Ahi hangin Jesu in tua kha gilob tai-a tua naupang a damsak khit ciangin a pa a pia kik hi. 43 Tua ciangin amaute in Pasian liatna lamdang a sa mahmah uh hi. Mi khempeuh in Jesu hihna piandang a sak laitakun amah in a nungzuite kiangah, 44 "Thu khat kong gen ding hi. Limtakin na ngai un: Mihing Tapa mite khutah a kilehhek ding hi,” a ci hi. 45 Ahi hangin amaute in bang a cih nopna hiam, cih a thei kei uh hi. Amaute theih loh dingin hih thu ki-im lai ahi manin amaute in a khiatna tel thei lo uh a, amah lah a dong ngam kei uh hi. 46 Nungzuite in amau lakah kua lianpen ding cih a kisel ngeingai uh hi. 47 Jesu in amaute ngaihsutna thei a, naupangno khat kai-in, a kiangah a dingsak hi. 48 Tua ciangin amah in amaute kiangah, “Keima min hangin hih naupnangno a sang peuhpeuh, kei hong sang ahi hi; kei hong sang peuhpeuh kei hong sawlpa a sang ahi hi. Ahang in, note khempeuh laka a neupen in a lianpen ahi hi,” a ci hi. 49 Johan in, “Sia aw, mi khatin nang minin dawite a hawlkhiat ka mu uh a, ei mi hi lo ahi manin a hih nawn loh nadingin ka kho uh hi,” a ci hi. 50 Jesu in, “No hong langpang lo peuhmah no pawl ahi hi, tuapa kho kei un,” a ci hi. 51 Jesu vantungah a kilak toh ding hun a tun kuan ciangin Jerusalem lam manawhin kuankhia ngiatngiat a, 52 ama mai-ah thupuate a sawl hi. Ama ading nate a baihsa-a koihkhol dingin Samaria khua neu khatah amaute a lut uh hi. 53 Ahi hangin amah Jerusalem manawh ahi manin tua khuate in amah a na muak kei uh hi. 54 Nungzui James le John-te in hih thu a muh uh ciangin, “Topa aw, amaute suksiat nadinginc vantung panin meikuang sam le ung nong awi hiam?” ci-in a dong uh hi. 55 Ahi hangin Jesu kihei-in amaute tai-a, 56 tua ciangin amaute khua dang khatah a pai uh hi.d 57 Amaute lampi-a a pai laitakun mi khat in ama kiangah, “Na paina peuhpeuh ah kong zui ding hi,” a ci hi. 58 Jesu in, “Ngiate in kua nei uh a, van-a vasate in bu a nei uh hi; ahi hangin Mihing Tapa in a lutang ngak nading mun a nei kei hi,” ci-in a dawng hi. 59 Amah in adang khat pa kiangah, “Kei hong zui in,” a ci hi. Ahi hangin tuapa in, “Topa aw, va ciah photin, ka pa va vui masa ning,” a ci hi. 60 Jesu in ama kiangah, “Misite in amau misite na vui uh hen. Ahi hangin nang pai inla Pasian-gam thu na tangko in,” a ci hi. 61 Adang khat leuleu in, “Topa nang hong zui ning, ahi hangin va ciah kik masa photin ka innkuanpihte mangpha va khak phot ning,” a ci hi. 62 Jesu in, “Lokaihna tu lenkawma a nunglam en peuhmah Pasian-gam sunga nasem dingin cing zo lo hi,” ci-in a dawng hi.

Luka 10

1 Tua khit ciangin Topa in adang sawmsagih le nihtea sehkhia-in ama pai nading mun le khua lian khempeuhah, ama mai-ah nihta in a sawlkhia hi. 2 Amah in amaute kiangah, “An lak ding tampi a om hangin nasem ding mi tawm hi. Tua ahi ciangin ama lo lai-a nasem dingin an nei Topa kiangah ngen ta un. 3 Pai un, keivomte lakah tuunote bangin note kong sawlkhia hi. 4 Sumbawmte, thung-ipte, khedapte keng kei un; lamkalah kuamah hopih kei un. 5 "Inn khatpeuh ah na lut uh ciangin, ‘Hih innah lemna om ta hen.’ ci masa un. 6 Tua lai-ah lemna deih mi a om leh na piak uh lemna ama tungah tung dinga, a deih kei leh no tungah hong kileh kik ding hi. 7 Nasempa in thaman ngah ding kilawm ahi manin tua innah na tam unla, nek ding dawn dinga hong piak peuhpeuh na ne un. Inn khat pan inn khatah zin na khel kawikawi kei un. 8 "Khua khatpeuh ah na lut uh a hong ngaih uh leh na mai-ua hong lui peuhpeuh ne un. 9 Tua khua-a cinate damsak unla amaute kiangah, ‘Note kiangah Pasian-gam hong nai ta hi,’ ci-in gen un. 10 Ahi hangin khua khatpeuh na lut uh a hong ngaih kei uh leh kongzingte ah pai-in, 11 ‘Ka khepek-ua bang na khua-ua leivuite nangawn no langa pang dingin ka phiatkhia uh hi. Ahi ta zongin Pasian-gam hong nai ta hi, cih na tel un,’ ci un. 12 Kong gen tektek hi, tua ni ciangin tua khua thuak ding sangin Sodom khuapi thuakna a thuak nopzaw ding hi. 13 "Korazin aw, gimna nak thuak na nicia! Bethsaida aw, gimna nak thuak na nicia! No sunga kibawl nalamdangte Tyre le Sidon khuate ah kibawl leh amaute in ippipuan silhin vut kibuakin sawt veipi-in kisik zo ding uh hi. 14 Ahi hangin thukhenna ah no thuak ding sangin Tyre le Sidon khuate thuakna a zangzaw ding hi. 15 Nang Capernaum aw, vanlai dongin hong kilamto ding ahi hiam? Hi peuhmah lo ding hi; a thuk penna munb dongin na kiasuk ding hi. 16 "No thu hong ngaite, kei thu ngai ahi hi; no hong nolhte, kei hong nolh ahi hi; ahi hangin kei hong nolhte, kei hong sawlpa nolh ahi hi,” a ci hi. 17 Sawmsagih le nihte lungnuamin ciah kik uh a, “Topa aw, nang min hangin dawite nangawn ka thuthu un om tazen hi,” a ci uh hi. 18 Amah in, “Vantung panin khuaphelep bangin Satan hong kumsuk ka mu zo hi. 19 Gulte le aikamte na tuatcil theih nading uh le galpa vang khempeuh na zawh theih nadingun thuneihna kong pia zo hi. Note bangmah in hong siasak zo lo ding hi. 20 Ahi zongin khate in na thu uh a manna hangin lungnuam kei unla vantungah na min uh a kigelhna hangin na lungnuam zaw un,” ci-in a dawng hi. 21 Tua hun laitakin Khasiangtho tungtawnin Jesu lungnuam mahmah a, “Vantung le leitung’ Topa, ka Pa aw, hih thute mipilte le theihna sangte tungah na im-a, naupangte tungah pholak na hi manin nangmah kong phat hi. Hi mah hi, Pa aw, hih in nangma deihna ahi hi. 22 "Ka Pa in na khempeuh kei hong ap zo hi. Tapa kua hiam, cih Pa longal kumah in thei lo-a, Pa kua hiam, cih Tapa le Tapa in a theihsak dinga a teelte longal kuamah in a thei kei uh hi,” a ci hi. 23 Tua ciangin a nungzuite lamah amah kihei a, “Tu-a na muhte uh a mu mitte thupha ngah ahi hi. 24 Ahang in, kamsangte le kumpi tampitakin na muhte uh a muh nop uh hangin mu kha lo uh a, na zakte uh a zak nop uh hangin a za kha kei uh hi, cih kong gen hi” ci-in a tuam genpih hi. 25 Khat vei Jesu zia-et dingin thukham siam khat dingto a, “Sia aw, nuntak tawntungna ka luah theih nadingin ka hih pelmawh ding bang ahi hiam?” ci-in a dong hi. 26 Jesu in, “Thukham ah bang kigelh ahi hiam? Nang bang na ci ngaihsut hiam?” ci-in a dong hi. 27 Tuapa in, “‘Na Topa Pasian na lungtang khempeuh, na hinna khempeuh, na thahatna khempeuh le na lungsim khempeuh tawh na it in,’c cih le ‘Nang le nang na ki-it bangin na vengte it in,’d ci-in kigelh hi,” ci-in a dawng hi. 28 Jesu in, “Mantakin nong dawng hi. Tua bangin zui lecin na nungta ding hi,” a ci hi. 29 Ahi hangin tuapa amah le amah kidiktangsak nuam ahi manin Jesu kiangah, “Tua ahileh ka vengte kua ahi hiam?” ci-in a dong hi. 30 Tua dawnna-in Jesu in, “Mikhat, Jerusalem pan Jericho lam manawha a paisuk laitakin misuamte a tuak hi. Tuate in a puan hawkkhiatsak uh a, sat gawpin a sisa phialin nusia-in a paisan uh hi. 31 Tua lampi mah tawnin siampi khat paisuk a, tuapa a muh ciangin a pamlamah pelin a paisan hi. 32 Tua mah bangin Levi-te khat va pai-a tua mun a tun ciangin tuapa mu-a, a langkhatah pelin a paisan hi. 33 Ahi hangin Samaria mi khualzin khat tua mun ah tunga tuapa a muh ciangin a hehpih hi. 34 Amah tua mipa omna-ah pai-a, a liammate sathau le lenggahzu nuhin a tuamsak hi. Tua ciangin tuapa ama laa tungah tuangsaka, zintun innah paipihin a khoi hi. 35 A zing ciangin nguntange nih lakhia a zin-inn ngakpa a pia hi. Amah in, ‘Amah na khoi in; nang aa na zatbeh a om leh kong kileh kik ciangin kong din ding hi,’ ci hi. 36 "Hih mi thumte lakah misuamte khut thuakpa adingin kua pen a vengte hi, ci-in na ngaihsun hiam?” ci-in a dong hi. 37 Thukham siampa in; “Amah a lainatpa pen ahi hi,” ci-in a dawng hi. Jesu in, “Pai inla tua mah bangin na hih in,” a ci hi. 38 Jesu le a nungzuite a pai laitakun khua khatah amah lut-a, Martha min nei numei khat in amah a inn a na hon hi. 39 Amah in Mary kici sanggam numei khat a nei hi. Tuanu a thugente ngai-in Topa khephungah a tu hi. 40 Ahi hangin Martha pen a innsung nasep teng semin a buai mahmah hi. Amah Jesu kiangah pai-a, “Topa aw, ka sanggamnu in nasep khempeuh kei guak hong khiat phamawh sa lo na hi hiam? Kei hong huh dingin sawl dih in!” a ci hi. 41 Topa in, “Martha, Martha aw, na tampi lunghimawhin na lunggim hi. 42 Ahi hangin a kisam na khat bek a om hi.f Mary in a hoihzaw pen tel khin zo a, tua pen ama tung pan a kilakhia nawn kei ding hi,” ci-in a dawng hi.

Luka 11

1 Ni khat Jesu in mun khatah thu a ngen hi. A thunget a man khit ciangin a nungzuite khat in ama kiangah, “Topa aw, Johan in ama nungzuite thungetzia ding a hilh bangin kote zong hong hilh in,” a ci hi. 2 Amah in amaute kiangah, “Thu na nget uh ciangin, “‘Paa aw, nangma min kisiangthosak ta hen, na gam hong tung ta hen.b 3 Ka nisim an uh nisialin hong pia in. 4 Ko tunga hong mawh peuhpeuh maisak ka hi manun, kote mawhnate hong maisak in,c Zia-etna sungah hong pi kei in,’d na ci un,” a ci hi. 5 Tua ciangin amah in amaute kiangah, “Note lakah khat in lawm khat nei-a, tuapa zankim laitakin a lawmpa kiangah pai-in, ‘Lawm aw, anlum thum hong leitawisak dih in. 6 Khualzin ka lawmpa khat kei kiang hong tunga amah ka lui ding bangmah ka nei kei hi,’ ci hi. 7 "Tua ciangin inn sunga om pa in, ‘Hong buaisak kei in. Kong ka kalh zo-a ka tate ka luppih zo hi. Thoin bangmah kong pia thei kei ding hi,’ ci hi. 8 Ken kong geninah amah tho-in a lawmpa ahi mana a piak loh hangin, a lawmpa kuhkalnae hangin amah tho in a kisap zahzah a pia ding hi. 9 "Tua ahi ciangin note kianga kong cihinah: Ngen un, hong kipia ding hi; zong un, na mu ding uh hi; kiu un, kong hong kihon ding hi. 10 Ahang in, a ngen peuhpeuh in a ngah uh hi; a zongte in a mu uh hi; a kiute ading kong kihon ding hi. 11 "Na tapa un ngasaf hong ngen leh tua tangin gul a pia ding note lakah pa kua om na hi uh hiam? 12 Ahikeh aktui hong ngen leh aikam a pia ding kua om na hi uh hiam? 13 Note mi gilo hi napi, tua ci-in na tate uh na hoih mawkpiak ding thei na hi uh leh, vantunga om na Pa un ama kianga Khasiangtho a ngente pia nuam zawsem lo ding ahi hiam!” a ci hi. 14 Jesu in a pau thei lo dawi khat a hawlkhia hi. Tua dawi a paikhiat ciangin a pau thei lo pa pau thei a, mihonpite in lamdang a sa mahmah uh hi. 15 Ahi hangin amaute pawlkhat in, “Amah in dawite kumpitapa Beelzebubg suangin dawite a hawlkhia hi,” ci uh hi. 16 A dangte in amah a zia-et na-un van panin lim khat a ngen uh hi. 17 Jesu in amaute ngaihsutna thei-a amaute kiangah, “Amah le amah kilangpang gam kisia dinga, amah le amah kilangpanga kikhen innkuan puk ding hi. 18 Satan, amah le amah kilangpang leh ama gam bangci kip thei ding ahi hiam? Hih kong genna pen Beelzebub suangin dawite hawlkhia nong cih man uh ahi hi. 19 Tu-in ken Beelzebub suangin dawite hawlkhia ka hileh, na nungzuite un kua suangin dawite hawlkhia uh ahi hiam? Tua ahi ciangin amaute, no tungah thukhente a suak uh hi. 20 Ahi hangin Pasian khutme tawh dawite ka hawlkhiat leh Pasian gam note tungah hong tung zo hi. 21 "Mi thahat khat in ama inn, hiam tawh a cin ciangin a neihsate a bit hi. 22 Ahi hangin amah sanga hatzaw khatin amah busima, a thazawh khit ciangin ama muan a hiamte sutin a nate a hawmthang hi. 23 "Kei hong koppih lote ka langa pang hi-a kei hong kaihkhoppih lote a thehthang ahi hi. 24 "Mi khat sung panin kha giloh khat a paikhiat khit ciangin a khawl nading zongin a keuna munte ah a vak kawikawi hangin a mu kei hi. Tua ciangin amah in, ‘Ka nusiatsa inn ah ciah kik ning,’ ci hi. 25 A tun kik ciangin tua inn kiphiat siangin kipuah sinsena om a mu hi. 26 Tua ciangin amah pai-a, amah sanga tatsiazaw kha sagih zawnin tua lai-ah lutin va teng uh hi. Tua mipa nuntakzia a nunung in, a masa sangin a siazaw hi,” a ci hi. 27 Jesu in hih thute a gen laitakin mihonpite lak pan numei khat in, “Nang ta-a hong nei hong don nu, thupha ngah ahi hi,” a gal cih hi. 28 Amah in, “Pasian thu za-a a mangte, thupha ngah hizaw hi,” ci-in a dawng hi. 29 Mihonte a tam semsem ciangin Jesu in, “Hihte, a tatsia khangmite ahi hi. Amaute in lim lamdang hong nget uh hangin Jonah lim longal lim khat beek a kilak kei ding hi. 30 Ahang in, Nineveh-te adingin Jonah, lim a suah bangin Mihing Tapa zong hih khang mite adingin lim hi ding hi. 31 Solomon pilna ngai dingin leitaw lam Kumpinu lei mong panin va pai to ahi manin amah in thukhen ni ciangin hih khang mite tawh dingin amaute a mawhpaih ding hi.Tu-in hih lai-ah Solomon sanga lianzaw khati a om hi. 32 Thukhen ni ciangin Nineveh khua mite, hih khang mite tawh ding khawmin amaute a mawhpaih ding uh hi. Ahang in, Jonah thuhilhna hangin amaute kisik uh hi. Tu-in hih lai-ah Jonah sanga lianzaw khat a om hi. 33 "Kuamah in, meivak vakin a kimuh loh nading mun ahikeh kuangkum nuai-ah a koih kei hi. Tua sangsikin inn sunga a lut khempeuh in meivak tang a muh theih nadingin meivak tunna tungah kikoihzaw hi. 34 Na pumpi adingin na mittang meivak ahi hi. Na mittang a hoih laiteng na pumpi khempeuh khuavak tawh a kidim hi. Ahi hangin na mitte a mial ciangin na pumpi zong khuamial tawh a kidim hi. 35 Tua ahi ciangin note sunga om khuavak, khuamial ahi loh nadingin limtakin ngaihsun un. 36 Tua ahi manin na pumpi khempeuh uh khuavak tawh kidima, a mialna themkha zong a om kei leh khuavak in note hong tan mah bang in na pumpi uh a tang khin kiuhkeuh ding hi,” a ci hi. 37 Jesu a thu gen a man ciangin Pharisee-te khat in amah an nekpih dingin a sam hi. Tua ciangin amah pai-in sabuai ah a kingam hi. 38 Ahi hangin an a nek ma-in Jesu a kisil loh lam tua Pharisee-pa in a theih ciangin lamdang a sa hi. 39 Tua ciangin Topa in ama kiangah, “Ahileh no Pharisee-te in hai le kuangte a pualam na silsiang uh hangin na sunglam uh huaihamna le tatsiatna tawh a kidim hi. 40 No mihai honte! A pualam a bawlpa in a sunglam zong bawl hi lo ahi hiam? 41 Ahi hangin kuangj sunglam-a omte mizawngte na pia un. Tua hileh note adingin na khempeuh a siang ding hi. 42 "No Pharisee-te aw, note in mint, rue le huan antehhing nam khempeuh sawmah khat na piak uh hangin Pasian’ itna le thutang thudon lo na hi manun gimna na thuak ding uh hi. Hihte gel a masa pen hih lo tuan loin a nunung pen na hih ding uh ahi hi. 43 "No Pharisee-te aw, synagogue-te sunga tutna thupipente ah tu nuam diakin, van zuakna munte ah pibawl ding ut diak na hi manun gimna na thuak ding uh hi. 44 "Mite in thei kha loin, atung a tot uh ciamtehna om lo hante tawh kibang na hi manun note in gimna na thuak ding uh hi” a ci hi. 45 Thukham siamte khatin, “Sia aw, hih thute na gen ciangin kote zong hong selpho na hi hi,” ci-in a dawng hi. 46 Jesu in, “No thukham siamte aw, mite tungah a puak zawh loh ding uh vante na suan uh a tua ciangin amaute na huh nading un na khutme nangawn uh khat beek tangsak lo na hi manun gimna na thuak ding uh hi. 47 "Note in na pu na pate uh thah kamsangte han bawl na hi manun gimna na thuak ding uh hi. 48 Tua ahi ciangin na pu na pa-te uh hihnate na thukimpihna uh teci a pang na suak uh hi. Amaute in kamsangte that uh a, amaute hante note in na bawl uh hi. 49 Hih thu hangin Pasian in ama pilna tawh, ‘Amaute kiangah kamsangte le sawltakpite ka paisak dinga, amaute in tuate pawlkhat thatin, pawlkhat a bawlsia ding uh hi,’ ci hi. 50 Tua ahi manin leitung piancila kipan kamsangte khempeuh sisan ahi zongin, 51 Abel sisan a kipan biakna-tau le mun-siangtho kikala kithat Zechariah sisan dong, a luangkhia khempeuh hih khang mite mawhna in kisim ding hi. Hi mah hi, ken kong geninah hihte khempeuh hih khang mite mawhna in a kisim ding hi. 52 "No thukham siamte aw, theihna tawhtang lakhia na hi manun gimna na thuak ding uh hi. No mahmah lah lut loin lut dinga kisate lah na dal uh hi,” a ci hi. 53 Tua lai panin Jesu a paikhiat ciangin Pharisee-te le thukham siate in amah nasiataka langpan ding sawmin ngak uh a, 54 ama kamin amah a mat theih nadingun thu a dong huan uh hi.

Luka 12

1 Tua hun laitak, khat le khat kisikkha zah dongin mi tul tampi a kihonkhop uh ciangin Jesu in a masa penin a nungzuite kiangah, “Kineihsiamna ahi Pharisee-te silngo lakah na kikem un. 2 A kipholak lo ding, a kiselcip bangmah om lo a; a kitheikhawk lo ding a ki-imcip bangmah a om kei hi. 3 Khuamial sunga na gente uh sun nitang sungah kiza dinga, inn sungtawnga na huausimte uh innkhum dawnah kitangko ding hi. 4 "Ken kong geninah lawmte aw, pumpi a thah khit ciangin aban bangmah a cih thei nawn lote na kihta kei un. 5 Ahi hangin na kihtak ding uh kua hiam cih kong lak ding hi: Pumpi a thah khit ciangin hell khuk sunga hong paii thei dinga vangliatna a neipa na kihta un. Hi hi, ken kong geninah amah na kihta un. 6 Kawlgit nga ciangin pennya nih in kizuak hi lo ahi hiam? Tua hi napi Pasian in kawlgit khat zong a mangngilh kei hi. 7 Na samzangte khempeuh uh kisim khin takpi hi. Lau kei un; kawlgit tampi sangin note na manphazaw uh hi. 8 "Ken kong geninah, mite mai-a kei hong sang peuhpeuh Mihing Tapa in Pasian vansawltakte mai-ah a sang ding hi. 9 Ahi hangin mite mai-ah kei hong kitheihmawhbawlte Pasian vansawltakte mai-ah ka kitheihmawh bawl ding hi. 10 Tua ahi ciangin Mihing Tapa a langgente peuhmah kimaisak dinga, ahi hangin Khasiangtho a gendai peuhpeuh a kimaisak kei ding hi. 11 "Synagogue-te mai ahi zongin gam-ukte le thuneite mai-ah ahi zongin note hong kipaipih ciangin bang kici hutin, bang gen ding cih lunghimawh kei un. 12 Tua hun ciangin na gen ding uh Khasiangtho in hong hilh na ding hi,” ci-in a gen hi. 13 Mihonpite lakah khat in, “Sia aw, ka sanggampa tawh ka gamh luah dingte ka hawm nadingun ama tungah hong gensak in,” a ci hi. 14 Jesu in, “Mihingpa, nogel kikal-a thukhen ding ahikeh lemgen dingin kua in kei za hong pia hiam?” ci-in a dawng hi. 15 Tua ciangin amah in amaute kiangah, “Kigalging un! Huaihamna nam khempeuh panin na kikem un; mihing nuntakna pen neih le lama bucinna tawh a kim kei hi,” a ci hi. 16 Tua ciangin amah in amaute kiangah gentehna gen a, “Mi hau khat lo ah an tampi a piang hi. 17 Tuapa in, ‘Bang ci ding ka hi hiam? Ka ante ka khol nading mun ka nei kei hi,’ ci-in a ngaihsun hi. 18 "Tua ciangin amah in, ‘Hih ka hih ding hi. Ka salte phelkhia-in a lianzaw ka lam dinga, tua lai-ah ka ante khempeuh le ka vante ka koih ding hi. 19 Tua ciangin, ‘Kum tampi man ding na hoih tampi ka koih khin zo hi. Nuntakna nopzatin, nene-in dawndawnin gualnuam in, ka kici ding hi,’ ci hi. 20 "Ahi hangin Pasian in ama kiangah, ‘Nang mihaipa! Tu zan mahmah in na nuntakna nang tung pan hong kilaksak ding hi. Tua hileh nang adinga na koihkholhte kua in tang ding ahi hiam?’ ci hi. 21 "Pasian lamah hau lo a, ama adinga na a kholte peuhmah tua bang hi ding hi,” a ci hi. 22 Tua caingin Jesu in a nungzuite kiangah, ‘Tua ahi ciangin ken kong geninah na nuntak nading, na nek ding ahi zongin, na silh na ten ding ahi zongin na pumpi uh ading bangmah lunghimawh kei un. 23 An sangin nuntakna thupizaw a, puan sangin pumpi thupizaw hi. 24 Va-akte na ngaihsun dih un: Tuate in vawh lah vawh lo, at lah at lo, gawdam ahi zongin sal ah ahi zongin a khol kei uh hi. Tua hi napi Pasian in tuate a vak hi. Vasate sangin note na manpha zawtham pek uh hi! 25 A lunghimawh manin a nuntak hun nai khat bek nangawn a sottob thei note lakah kua om ahi hiam? 26 Hih bang thu neucik khat nangawn na hih theih loh khit nungsangun adangte bang lunghimawhna na hi uh hiam? 27 "Unokte khanzia na ngaihsun un. Na sem loin khau lah a khek kei uh hi. Tua hi napi Solomon nangawn a thupina khempeuh tawh a kizep laitakin, hihte zahin zong a kizem zo kei hi. 28 Upna neu mite aw, tuni-in hih lai-ah om a, zing ciangin mei-a kikhul ding lopa kung khat, Pasian in tua zahin zem ahileh amah in note puan hong guan zaw tham ding hi! 29 Tua ahi ciangin na nek na dawn ding uh ngaihsut penin nei kei un; tuate na lunghimawh kei un. 30 Hih nate khempeuh leitung lawkite in zon penin a nei uh hi. Hih nate na kisap lam uh na Pa un a thei hi. 31 Ahi zongin Pasian gam na zong un, tua hileh hih nate khempeuh hong piathuah ding hi. 32 "Tuu hon tawmkhate aw, na Pa un note gam hong piak ding lungkim khin ahi manin na lau kei un. 33 Na neihsate uh zuak unla mizawngte na pia un. A patvang thei lo sumbawm no le no na kiguan unla, a bei thei lo, gutate in a naih theih loh le nget nek theih lohna mun vantungah na gou uh khol un. 34 Ahang in, na gou omna munah na lungsim zong om ding hi. 35 "Na sem dinga kisa kholsa in om unla, meivak kuangsa-in om un; 36 mopi powi sima hong ciah kik, kong a kiuh pheta a honpah thei dinga a pu uh a ngakte bangin om un. 37 A pu uh a pai ciangin tua banga a ngak laitak a tuah nasemte hampha ding uh hi. Thutak kong geninah, an vak dingin amah kithawi-a, a nasemte sabuai ah kingamsakin amaute ankuang a lui ding hi. 38 Zan, vil nihna ahi zongin, vil thumna ahi zongin a pu a pai cianga, a pu in kigingsa-a om a tuah nasemte a hampha ding uh hi. 39 Ahi hangin note in hih thu na theitel un: Inn neipa in zanlai bang hunin gutate pai ding hiam cih theikhol leh a inn kiluhsak lo ding hi. 40 Na muanmawh loh hun laitakun Mihing Tapa hong pai ding ahi manin note zong pel loin kigingsa in om un,” a ci hi. 41 Peter in, “Topa aw, hih gentehna ko tung beka gen na hi hiam, ahikeh mikim tunga gen na hi hiam?” ci-in a dong hi. 42 Topa in, “Tua ahileh ama inn sunga nasem dangte ukin, amaute a hunhuna an a pia dinga a pu in a koih, a muanhuai a pil sungtapipa kua ahi hiam? 43 A pu a ciah kik cianga tua banga a sep laitak a tuah nasempa hampha ding hi. 44 Thutak kong geninah, a pu in tuapa a neihsa khempeuh a uksak ding hi. 45 Ahi hangin tua nasempa in, ‘Ka pu sawtveipi hong tam na inteh,’ ci-in nasem-numei le nasem-pasalte satgawp henla, an ne in zu dawnin zu na kham leh, 46 a lamet loh ni le a khuadon loh hun laitakin a pu tung dinga, tua nasempa a pu in atnenin thu um lote tawh mun khatah a koihkhawm ding hi. 47 "A pu deihna thei napi-in, a pu deihna banga gamta lo-a, kigingkhol lo tua nasempa tam veipi a kisat ding hi. 48 Ahi hangin bangmah thei lo-a gawtna thuak nadinga kilawm nate a hihpa ahileh tawm vei kisat ding hi. Tampi a kipiate tung panin tampi kingen kik ding hi; tampi a ki-apte tung panin a tamzaw lai kingen kik ding hi. 49 "Leitungah mei puak dinga hong pai ka hi hi. Tua mei a kuang khin hileh ut sing! 50 Ahi hangin ka thuak ding baptisena khat oma, tua a kizawh siang mateng ka lungdong mahmah hi! 51 Leitung ah kilemna puak dingin hong pai hi, ci-in hong ngaihsun kha uh hiam? Hi lo hi, ken kong geninah kikhenna khah dinga hong pai ka hi hi. 52 Tu-a kipanin innkuan khat mi nga a phate, thum lang ah nih, nih langah thumin khat le khat kilangpang ciat ding uh hi. 53 A tapa langah a pa, a pa langah a tapa, a tanu langah a nu, a nu langah a tanu, monu langah teknu, teknu langah monu kilangpan ciatin amaute a kikhen ding uh hi,” ci-in a dawng hi. 54 Amah in mihonpite kiangah, “Nitumna-lam panin meii hong kai na muh uh ciangin, ‘Guah zu ding hi,’ na ci thei pah uh a, guah lah a zu takpi hi. 55 Leitaw-lam pana huih a nun ciangin, ‘Khua lum ding hi,’ na ci uh a, a lum takpi hi. 56 Kineihsiamte! Van le lei maitangte pianzia na khia thei uh hi. Bangci bangin tu lai hun khia thei lo na hi uh hiam? 57 "Bang hangin note in amaan le amaan lo khen thei lo na hi uh hiam? 58 Thukhenpa kiangah na langpa tawh na paikhawm laitak mah un lampi-ah na kilemkik zawh nading nakpi in hanciam in. Tua hi kei leh amah in thukhenpa kiangah nang hong kai dinga, thukhenpa in bupa tungah hong apin, tua bupa in nang thong sung hong denna ding hi. 59 Ken kong geninah, na liausum na piak khit siang matengin na suakta kei ding hi”c.

Luka 13

1 Tua laitakin tua lai-a om mi pawlkhat in, Pilate in Galilee-te sisan le a biakpiakna uh a helsakna Jesu kiangah a ko uh hi. 2 Jesu in, “Tua Galilee mite in hih banga a thuak manun a Galilee mipih dangte khempeuh sangin a mawhzaw hi dingin na ngaihsun uh hiam? 3 Ken kong geninah, a mawhzaw tuan kei uh hi! Ahi hangin note na kisik kei uh leh note zong na vekun na mangthang khin ding uh hi. 4 Ahikeh Siloam a tausang in a denlup mi sawm le giatte, Jerusalem a tengte khempeuh sangin a mawhzaw hi dingin na ngaihsun uh hiam? 5 Kong hilh tektek hi, a mawhzaw tuan kei uh hi! Ahi hangin note na kisik kei uh leh note zong na vekun na mangthang khin ding uh hi,” ci-in a dawng hi. 6 Tua ciangin amah in, hih gentehna gen a: “Mi khat in a lenggui lo sunga kisuan theikung khat a nei hi. Amah a gah en dingin a pai hangin a gah khat beek a mu kei hi. 7 Tua ciangin amah in a lenggui lo cingpa kiangah, ‘Kum thum sung tawntung thei a gah hiam, cih en dingin kong paipai hangin a gah khat beek ka mu kei hi. Phuk tan in! Lei hoih pengsak lel hi lo hiam?’ ci hi. 8 "Tuapa in, ‘Pu aw, kum khat khawi lai dih in, a kimkot toin leihoih na sung phot dih ning. 9 Ni kum ciang a gah le pha! A gah kei leh tua ciangin phuk in,’ ci-in dawng hi,” a ci hi. 10 Sabbath ni khat Jesu in synagogue-te khatah thu a hilh hi. 11 Tua lai-ah kha khat in, kum sawm-le-giat sungtak a poisak numei khat a om hi. Tuanu a nung kulin a dingtang thei peuhmah kei hi. 12 Jesu in amah a muh ciangin a mai lamah samkhia a, “Numei aw, na zawnkhalna panin hong kikhahkhia hi,” a ci hi. 13 Tua ciangin amah in tuanu tungah a khutte nga-a, tua khit phetin tuanu dingtang thei-a Pasian a phat hi. 14 Sabbath ni-in Jesu in cina damsak ahi manin synagogue ukpa lungkim lo a mipite kiangah, “Nasep hun ding ni guktak a om hi. Tua ahi ciangin a kidamsak dingin tua nite in hong pai unla, Sabbath ni-in hong pai kei zaw un,” a ci hi. 15 Topa in tuapa kiangah, “No kineihsiamte, Sabbath ni-in na bawngte na laate uh a buk pan sutin nomau ciat in tui pia dingin paipih hi lo na hi uh hiam? 16 Tua ahileh kum sawm le giat sungtak Satan in a hencip hih Abraham tanu a kihencipna pan Sabbath ni-in khahkhiat huaizaw lo ding ahi hiam?” ci-in a dawng hi. 17 Amah in hih thu a gen ciangin amah a langpangte khempeuh zahlak uh a, ahi hangin mipite ahileh ama hih nalamdangte hangin a kipak uh hi. 18 Tua ciangin Jesu in, “Pasian gam bang tawh kibang ahi hiam? Bang tawh ka teh ding hiam? 19 Mi khat in huan sunga a cin ankam tang tawh kibang hi. Tua ankam khangto a, kungpi suakin a hiangte tungah huihlak vasate a tuang uh hi,” a ci hi. 20 Amah in, “Pasian gam bang tawh ka teh ding hiam? 21 Numei khat in a ki mekman buhnel lompia khat a khangsak zo-a, a sawh silngo tawh kibang hi,” a ci lai hi. 22 Tua ciangin Jerusalem lam manawhin a pai kawmin khuapi khuaneute ah lutin thu a hilh hi. 23 Mi khat in ama kiangah, “Topa, mi tawmkha bekin hotkhiatna ngah ding uh ahi hiam?” ci-in a dong hi. Amah in amaute kiangah, 24 "Kong kawcik-a lut ding na hahkat un. Bang hang hiam cihleh, mi tampi in lut ding a hanciam ding uh a, ahi hangin a lut thei kei ding uh hi, cih kong gen hi. 25 Inn neipa khatvei thoin kong a khak khit nak leh note a pualamah dingin, ‘Topa aw, kote kong hong hon in,’ ci-in kongkhak kiu-in na ngen ding uh hi. “Ahi hangin amah in, ‘Note kong thei kei hi; koi pan hong pai cih zong kong thei kei hi,’ ci-in dawng ding hi. 26 "Tua ciangin note in, ‘Nang tawh i nekhawm i dawnkhawm a, ka kongzingte uah zong thu na hilh hi,’ na ci ding uh hi. 27 "Ahi hangin amah in, ‘Note kong thei kei hi; koi pan hong pai cih zong kong thei kei hi, no a tatkhelte aw paimang un!’ ci-in hong dawng ding hi. 28 "Abraham, Isaac, Jacob le kamsangte khempeuh, Pasian gam sungah om a, note pualamah hong kihawlkhia cih na muh uh ciangin tua lai-ah kahna le hagawina a om ding hi. 29 Nisuahna, nitumna, leilu, leitaw panin mite hong pai ding uh a, Pasian gam sunga pawipi-ah amau mun ciatah a tu ding uh hi. 30 A nunungte masa a, a masate nunung cih a om takpi hi,” ci-in a gen hi. 31 Tua hun laitakin Jesu kiangah Pharisee-te pawlkhat va pai uh a ama kiangah, “Hih lai nusia in mundang khatpeuh ah pai in. Herod in nang hong that nuam hi,” a ci uh hi. 32 Amah in, “Pai-in tua ngia kiangah, ‘Tuni le zingciang dawite hawlkhia-in mite ka damsak dinga, a ni thumna ni-in ka tupna ka tung ding hi, ci hi,’ ci-in va gen un. 33 Bangbang ahi zongin tuni, zingciang le thaiciang ka vakvak lai ding hi - ahang in, Jerusalem pualamah kamsang kuamah a si thei peuhmah kei ding hi! 34 "Jerusalem aw, Jerusalem, kamsangte that-a, nang kianga hong kisawlte suangin a deng nang, akpi in a note a kha nuai-ah a khop bangin na tate ka khop nop hangin nang na ut kei hi! 35 En in, na inn a hawmmangsa in kinusia ding hi. Ken kong geninah, ‘Topa minb hong paipa in thupha a ngah hi,’a na cih matengin nong mu kik nawn kei ding hi,” a ci hi.

Luka 14

1 Sabbath ni khat, a kipi-et mahmah Pharisee khat innah Jesu an ne dingin a pai ciangin amah limtakin a encik uh hi. 2 Tua lai-ah, ama mai-ah tuipuak natna a vei mi khat a om hi. 3 Jesu in Pharisee-te le thukham siamte kiangah, “Sabbath ni-a cina damsak ding thukham tawh kituak hiam, kituak lo hiam?” ci-in a dong hi. 4 Ahi hangin amaute a dai khipkhep uh hi. Tua ciangin amah in, tua mipa lenin damsaka, a ciahsak hi. 5 Tua khit ciangin Jesu in amaute kiangah, “Note lakah khatpeuh in a tapaa ahikeh a bawngtal khat, Sabbath ni-in tuikhuk sungah kia leh a kaikhiapah lo ding kua om ahi hiam?” ci-in a dong hi. 6 Amaute in gen ding a nei kei uh hi. 7 Lenglate in sabuai-a tutna thupite a tel uh amah in a theih ciangin amaute kiangah gentehna gena: 8 "Mi khatpeuh in mopi pawi-a hong sap ciangin no sanga lianzawte na kisam kha thei ding ahi manin, tutna thupite ah na tu kei un. 9 Tua hileh note gel hong samkhawm inntekpa hong pai-in na kiangah, ‘Na tutna tuapa na awn in,’ hong ci ding hi. Tua ciangin nang zahlakin a thupi lo penna munah na tut kul kha ding hi. 10 Ahi hangin nang hong kisap ciangin aniam penna munah na tut leh, inntekpa hong pai-in nang kiangah, ‘Lawm aw, a hoihzaw mun tutna ah na tuto in,’ hong ci ding hi. Tua ciangin na lenglapihte khempeuh lakah na angtang ding hi. 11 Ahang in, amah le amah a kitawisangte kiniamsak dinga, amah le amah a kiniamsakte kitawisang ding hi,” a ci hi. 12 Tua ciangin Jesu in a inntekpa kiangah, “Sun-an ahi zongin nitak-an ahi zongin na vak ciangin, na lawmte ahi zongin na sanggamte ahi zongin na tanaute ahi zongin sum hau na vengte ahi zongin sam kei in. Tua banga na sap leh amaute in nang hong samin hong thuk kik ding uh hi. 13 Anvakna pawi na bawl ciangin mizawngte, mipoite, khebaite le mittawte na sam zaw in, 14 tua hileh thupha na ngah ding hi. Amaute in nang hong thuk zawh loh hangin thumaante thawhkik ciangin nang hong kithukkik ding hi,” a ci hi. 15 Amah tawh sabuai-a tukhawmte khat in hih thu a zak ciangin Jesu kiangah, “Pasian gam sunga pawi-a an ne dingte, thupha ngah ahi hi,” a ci hi. 16 Jesu in, “Mi khat in pawi lianpi khat bawlin mi tampi a kho hi. 17 Tua anvak pawi hun ciangin a khohsate kiangah, ‘Hong pai ta un, na khempeuh a baihsa-in om zo hi,’ ci-a gen dingin a nasemte a sawl hi. 18 "Ahi hangin a khohsate in a kibangin paulap a nei ciat uh hi. A masa pa in, ‘Lo khat a lei khin phet ka hi a, pai-in tua lo ka et kul hi. Nong hehpihna-in hong pengsak in,’ ci hi. 19 "Adang khat in, ‘Bawng kap nga a lei khin phet ka hi-a tuate sin dingin a pai kimlai ka hi hi. Nong hehpihna-in kei hong pengsak in,’ ci hi. 20 "Adang khat leuleu in, ‘Zi nei khin phet ka hi hi, tua ahi ciangin kong pai thei kei ding hi,’ ci hi. 21 "Nasempa ciah kika, a pu kiangah hih thute a zasak hi. Tua ciangin inn neipa heha, a nasempa kiangah, ‘Khuapi kongzingte le kongzingneute ah pai mengmeng inla, mizawngte, mipoite, mittawte le khebaite hong lutsak in,’ ci-in thu pia hi. 22 "Nasempa in ‘Pu aw, nong thupiak bangin kihih khin zo hi, ahi hangin mun awng lai hi,’ ci hi. 23 "Tua ciangin a pu in nasempa kiangah, ‘Lamliante le lamneute ah va pai inla, ka inn a dim nadingin amaute hong lutsak in. 24 Ken kong geninah, a kikhosate khat beek in ka anvak a ciam kha kei ding uh hi,’ ci hi,” a ci hi. 25 Mihon tampi tawh Jesu a paikhawm laitakin amaute lam nga in, 26 "Kei kianga hong pai mi khatpeuh in a nu, a pa, a zi a tate le a sanggampate, a sang gamnute tham lo ama nuntakna nangawn a muhdah kei leh amah, kei nungzui a hi thei kei ding hi. 27 Tua hi-a ama singlamteh pua-a ka nung hong zui lo peuhmah ka nungzui a hi thei kei ding hi. 28 "Gentehna-in note lakah tausang dawh nuam khat om leh a tua tausang a dawh zawh nading sum a kicing ding a nei hiam, cih thei dingin tu-in aman ding tuat masa lo ding ahi hiam? 29 Ahang in, amah in a bulpi pan khin napi, zosiang zo kei leh a mu khempeuh in nuihsan dinga, 30 ‘Hih pa in tausang dawh kipan khin napi a zosiang kei hi,’ ci ding uh hi. 31 "Ahikeh gentehna in kumpipa khat in kumpi dang khat sim dingin kithawi leh mi tul sawmnih tawh a kuanpa, mi tul sawm tawh a nang zo ding hiam, cih tu photin, ngaihsun masa lo ding ahi hiam? 32 Amah a kingap kei leh, a galpa a gamlapi-a a om lai-in ama kiangah palai sawl dinga, kilem nadingin a thumsak ding hi. 33 Tua mah bangin note laka na khempeuh a nusia lo peuhmah ka nungzui a hi thei kei ding hi. 34 "Ci a lim hangin a alna mang leh bangci in ki-al kiksak thei ding hiam? 35 Leitak ading ahi zongin eklei dinga khol ding ahi zongin kimanna a nei kei hi; kibuakhia lel hi. “Zak nading bil nei peuh in za ta hen,” a ci hi.

Luka 15

1 Tua ciangin ama thu gen ngai dingin siahdongte le “mawhneite” ama kimah a kikhawm uh hi. 2 Ahi hangin Pharisee-te le thukham siate in, “Hih mipa in mawhneite ngai-in amaute tawh an a nekhawm hi,” ci-in a phunsan uh hi. 3 Tua ciangin Jesu in amaute kiangah gentehna gen a, 4 "Note lakah khat in tuu zakhat nei a, tuate lakah khat mansuah leh sawmkua le kua-te pawn lakah nusia in a tuu mang a muh mateng zong lo ding ahi hiam? 5 A muh ciangin lungnuamtakin a liangko tungah pua-in, 6 innah a ciah hi. Tua ciangin amah in a lawmte le a vengte samkhawm a, ‘Kei hong nuampih un; ka tuu mang ka mu zo hi,’ ci hi. 7 Tua mah bangin kisik a kul lo a thumaan mi sawm kua le kua-te sangin mawh nei khat a kisik na hangin vantung ah nuamna a lianzaw ding hi, cih kong hilh hi. 8 "Ahikeh gentehna-in numei khat in nguntanga sawm nei in khat mansuah leh tuanu in mei vaka a inn phiatin a muh mateng limtakin zong lo ding ahi hiam? 9 A muh ciangin a lawmte le a vengte samkhawm in, ‘Kei hong nuampih un; ka sum mang ka mu zo hi,’ ci hi. 10 Tua mah bangin ken kong geninah, mawhnei mi khat a kisikna hangin Pasian vansawltakte omna ah nuamna a om hi,” a ci hi. 11 Jesu in a thugen zomlai a, “Tapa nih a nei mi khat a om hi. 12 A nauzawpa in a pa kiangah, ‘Pa aw, i goute sung pan kei tanh ding hong khenkhia in,’ ci hi. Tua ciangin amah in a neihsate amau gel a hawmsak hi. 13 "Tua khit a sawt loin a nauzawpa in a neih khempeuh kaikhawmin, gamlapi ah pai-a noptatna-in a sum neih teng a zangbei hi. 14 A neih khempeuh a zat bei khit ciangin tua gambup ah kialpi tunga, amah a kitasam hi. 15 Tua ciangin amah tua gam mite khat kiangah sum thalawh dingin pai-a, tuapa in amah a lo ah vok-an pia dingin a sawl hi. 16 Amah in vokte nek begapte duhgawh mahmah a, ahi hangin kuamah in bangmah a pia kei hi. 17 "Amah le amah a kiphawkkhiat ciangin, ‘Ka pa inn a sum thalawhte tampi in an khamval nei ding uh a, kei lah hih lai-ah ka puksi dektak hi! 18 Kei dingkhia ning ka pa kiangah ciah kikin: Pa aw, vantung le nangma tungah ka mawh zo hi. 19 Nang ta cih dingin ka kilawm nawn kei hi; na sum thalawhte khat bangin hong koih in ka ci ding hi,’ ci hi. 20 Tua ahi ciangin amah tho-a, a pa kiangah a ciah hi. “Ahi hangin inn pan gamlapi-a a om laitakin a pa in na galmuh-a, amah khuatuah mahmah ahi manin, a tapa delha pumkawi-in a nam hi. 21 "A tapa in ama kiangah, ‘Pa aw vantung le nangma tungah ka mawh zo hi. Nang ta cih dingin ka kilawm nawn kei hi,’b ci hi. 22 "Ahi hangin a pa in a nasemte kiangah, ‘Manlang un! Puan a hoih pen hong la unla amah silhsak un. A khutme ah zungbuh bunsak unla khedap zong bulhsak un. 23 Bawngno vakthau pen hong paipih unla go un. Pawipi bawlin lawm ni. 24 Ahang in, hih a si khinsa ka tapa tu-in hing kik zo hi; a mangsa hi-a tu-in kimu kik hi,’ ci hi. Tua ahi ciangin amaute in a lawm uh hi. 25 "Tua hun laitakin a tapa uzaw pen lo-ah a om hi. Inn kiang a tun ciangin tumging le lamna a za hi. 26 Tua ahi ciangin amah in nasemte khat sama, ‘Bang kihih ahi hiam?’ ci-in dong hi. 27 Amah in, ‘Na sanggampa hong ciah ta a, cidam ludamtakin na pa kiang hong tung kik ahi manin na pa in amah bawngno vakthau pen gawh hi,’ ci hi. 28 "A u pa heh a inn sungah a lut nuam kei hi. Tua ahi ciangin a pa pusuakin amah va zol hi. 29 Ahi hangin amah in a pa kiangah, ‘Ngaihsun in! Kum hi tan vei nang adingin sila-na ka sema, nong thupiakte ka mang lo ngei peuhmah kei hi. Tua hi napi ka lawmte tawh ka lop nadingin keelno khat nangawn nong pia ngei kei hi. 30 Ahi hangin na neihsa teng numei kizuakte tawh a zatmang khit cianga inn hong zuan hih na tapa, bawngno vakthau pen na gawh tazen hi!’ ci hi. 31 "A pa in, ‘Ka ta aw, nang le kei i omkhawm dena, ka neih khempeuh nang aa ahi hi. 32 Ahi hangin na sanggampa a si khinsa tu-in hong hing kika, a mangsa tu-in kimu kik ahi manin nuamin i lop a kul hi,’ ci hi,” ci-in a gen hi.

Luka 16

1 Jesu in a nungzuite kiangah, “Khatvei mihau khat om a, sungtapipa in a pu neihsa teng a zat beisak hi, ci-in kingawh hi. 2 Tua ahi ciangin a pu in amah sama, ‘Nang thu ka zak bang thu ahi hiam? Ka sungtapipa hi thei nawn lo ding na hi manin na sum ciamtehna hong lak dih in,’ ci hi. 3 "Sungtapipa in a lungsim sungah, ‘Tu-in bang cih ding ka hi hiam? Ka pu in ka nasepna pan hong tawpsak ding hi. Lei to dingin lah ka hat nawn kei a, khut dawha nget ding lah ka maizum hi. 4 Hih lai-a ka nasep ka tan ciangin mite in a innuah kei hong san theih nadingun ka hih ding ka thei ta hi,’ ci hi. 5 "Tua ahi ciangin amah in a pu tunga leibate a banbanin a sam hi. Amah in a masa pen kiangah, ‘Ka pu tungah bangzah na ba hiam?’ ci-in dong hi. 6 "Amah in, ‘Olive thau gallona za giat hi,’ ci hi. “Sungtapipa in ama kiangah, ‘Na leiba lai va la inla, tu mengmeng in zali in bawl in,’ ci hi. 7 "Tua ciangin a nihna pa kiangah, ‘Nang bang zah ba na hi hiam?’ ci-in dong hi. “Amah in, ‘Mangbuh seub tul khat hi,’ci-in dawng hi. “Amah in ama kiangah, ‘Na leiba lai va la inla, zagiat-in bawl in,’ ci-in gen hi. 8 "A pu in a simtat nasempa geelsiam mahmah ahi manin a phat hi. Ahang in, khuavak sunga om mite sangin hih leitung mite in amaute kibatpihte tawh kizop zia ah a geelsiam zaw uh hi. 9 Ken kong geninah, leitung hauhnate lawm ngah nadingin na zang un; tua hileh a bei ciangin tawntung tenna ah note hong kimuak ding hi. 10 "Tawmcik tunga muanhuaite tampi tungah kimuang thei dinga, tawmcik tunga muanhuai lote tampi tungah zong a muanhuai kei ding hi. 11 Tua ahi ciangin note leitung hauhna kem dingin na muanhuai kei uh leh hauhna taktak kem dingin kua in hong muang ding ahi hiam? 12 Midang khatpeuh neihsa tungah na muanhuai kei uh leh no neihsa ding kua in hong pia ding ahi hiam? 13 "Kuamah in to nih na a sem khawm thei kei hi. Khat itin khat a mudah hiam, khat beelin a khat a simmawh hiam, khat zawsang hi ding hi. Pasian na le Sum na, na sem khawm thei kei ding uh hi,” ci-in a gen hi. 14 Sum iplah Pharisee-te in hih thu a zak uh ciangin Jesu a zahpih uh hi. 15 Amah in amaute kiangah, “Note, mite mitmuh ah dik na kitansak uh hangin Pasian in na lungtangte uh a thei hi. Mite in manpha a sak mahmah nate Pasian muhna-ah kihhuai hi. 16 "Johan hun masiah Thukham le Kamsangte a kitangko hi. Tua khita kipan, Pasian gam lungdamna thu kihilhin, tua sungah thahatthu-in mikim a lut gawp hi. 17 Thukham panin a mal themcik khat a mawk maiman sangin van le lei a mawk maiman ding a baihzaw ding hi. 18 "A zi ma a numei dang khat a tenpih peuhmah, angkawmpa suak a, a kimasa numei a tenpih peuhmah angkawmpa a suak hi. 19 "Khatvei sumhaupa khat a om hi; tuapa in puan dupsan le saihadial puan silh a, nisimin noptatin a om hi. 20 A kongpi gei-ah meima in a pumtuam Lazarus min nei khutdawh-a ngen khat kikoih hi. 21 Amah in sumhaupa sabuai pana kia an-nengte a lunggulh hi. Uite nangawn pai-in ama meimate a liahsak uh hi. 22 "Tua khutdawh-a ngenpa a sih ciangin vansawltakte in Abraham kiangah a puak uh hi. Sumhaupa zong si-a, a kivui hi. 23 Amah gentheipi-a a omna mun hellc khuk sung pan a khuadak leh agal pekpekah Abraham le a kianga om Lazarus a mu hi. 24 Tua ciangin amah sama, ‘Pa Abraham aw, kei hong hehpih in. Hih mei sungah gimna nakpi in ka thuak hi. Lazarus in a khutme dawn tui diahin ka leii hong votsak dingin hong sawl in,’ ci hi. 25 "Ahi hangin Abraham in, ‘Ka ta aw, na nuntak hun sungin na hoihte na ngah a, tua laitakin Lazarus in na hoih lote a ngah hi, cih phawk in. Ahi hangin tu-in amah hih lai-ah nuamsa a, nang na hileh gimna na thuak hi. 26 Tua banah eite kikalah guam thukpi khat om a, tua kantanin hih lai pan tua lai-a pai nuamte a pai thei kei uh hi; tua lai pan hih lai ko kianga hong pai nuamte a pai thei kei uh hi,’ ci hi. 27 "Amah in, ‘Tua ahileh pa aw, ka pa inn ah Lazarus nong sawlsak ding kong thum hi. 28 Ahang in, sanggam pasal nga ka nei hi. Tua ka sanggamte hih gentheihna mun hong tun loh nadingun amah in amaute va vauhilhsak hen,’ ci-in dawng hi. 29 "Abraham in, ‘Amaute in Moses le Kamsangte a nei uh hi; tuate thu na ngai uh hen,’ ci-in dawng kik hi. 30 "Tuapa in, ‘Hi lo hi, pa Abraham aw, a sisate kiang panin amau kiangah khatpeuh va pai leh amaute kisik ding uh hi,’ ci hi. 31 "Amah in ama kiangah, ‘Amaute in Moses le Kamsangte thu a ngaih nop kei uh leh a sisa khatpeuh a thawh kik hangin a taksang tuan kei ding uh hi,’ ci hi,” ci-in a gen hi.

Luka 17

1 Jesu in a nungzuite kiangah, “Mite mawhna a bawlsak ding thute hong tung pelmawh ding hi. Ahi hangin tua mawhnate a bawlsak mipa in nakpitakin gimna thuak ta hen. 2 Hih naupangnote mawhna a bawlsak tua mipa, a ngawgah angawina suang kikhihin tuipi sungah kipai leh ama adingin hoihzaw ding hi. 3 Tua ahi ciangin note kigalging un. “Na sanggampa in mawhna a bawl leh tai inla, a kisik leh ama mawhna maisak in. 4 Nang tungah ni khatin mawhna sagih vei hong bawla, nang kiangah sagih vei mah hong pai-in, ‘Ka kisik hi,’ hong cihleh maisak in,” ci-in a gen hi. 5 Sawltakpite in Topa kiangah, “Ka upna uh hong khangsak in,” a ci uh hi. 6 Amah in, “Note in ankam tang cia-a neu upna na neih uh leh hih nailung ankung kiangah, ‘Kizunglot inla, tuipi sungah va po in,’ ci le uh cin na thu uh hong mang ding hi. 7 "Gentehna-in, note lakah khat in lokai ahikeh tuucing nasem khat nei hi. Tua nasempa lo pan a ciah ciangin ama kiangah, ‘Tu-in hong pai inla an ne dingin tukhawm ni,’ a ci ding hiam? 8 ‘Ka nitak-an kuang hong lui inla a kigingsa-in om in; an ka nek ka dawn laitakin hong tuan-vai in; ka kham khit ciangin nang na ne na dawn thei pan ding hi,’ ci zaw ding hi lo ahi hiam? 9 Amah in a nasempa tunga sep dinga a hilh bangin sem ahi manin ama tungah a lungdam ding hiam? 10 Tua ahi ciangin note in zong no tunga hong kigen khempeuh na hih khit uh ciangin, ‘Eite, a kizen lo na semte i hi hi; i sep ding zah bek a sem i hi hi,’ na cih ding uh ahi hi,” a ci hi. 11 Jerusalem lam manawh-a a pai laitakin Jesu in Samaria le Galilee kikal gamgi dung a zui hi. 12 Amah khuaneu khatah a lut laitakin phak natnaa a vei mi sawm in amah a na dawntuah uh hi. A gamlat simna munah ding uh a, 13 "Jesu aw, Topa aw, kote hong hehpih in!” ci-in nakpi in a galsap uh hi. 14 Amah in tuate a muh ciangin, “Pai unla, siampite kiangah va kilak un,” a ci hi. Tua banga a pai kimlai mah amaute a siang uh hi. 15 Amaute lakah khat in a damsiang lam a kitheih ciangin va pai kika, aw ngaihtakin Pasian a phat hi. 16 Amah Jesu khephung kidenna-in a lungdamna a gen hi – amah Samaria mi ahi hi. 17 Jesu in, “A kisiangsak sawm pha hi lo ahi hiam? Adang kuate koi-ah om uh ahi hiam? 18 Hih mi namdang pa longal hong kileh kika Pasian phat ding khat beek om lo ahi hiam?” ci-in a dong hi. 19 Tua ciangin amah in tuapa kiangah, “Tho inla pai in; na upna in nang hong damsak zo hi,” a ci hi. 20 Khat vei Pharisee-te in Pasian gam hong tun ding hun a dot uh ciangin Jesu in, “Pasian-gam mit-a kimu thei-in hong tung lo ding hi. 21 Mite in, ‘Pasian gam hih lai-ah om hi, hua lai-ah om hi,’ zong a ci thei kei ding uh hi. Bang hang hiam cih leh Pasian gam note sungahb a om hi,” ci-in a dawng hi. 22 Tua ciangin a nungzuite kiangah, “Note in Mihing Tapa nite lakah khat na muh nop hun uh hong tung dinga, ahi hangin na mu kei ding uh hi. 23 Mite in note kiangah, ‘Amah hua lai-ah om hi!’ Ahikeh ‘Amah hih lai-ah om hi!’ hong ci ding uh hi. Amaute na nungdelh kei un. 24 Ahang in, Mihing Tapa, ama ni-inc khuaphelep in van mong khat pan mong khat dong phia in a tanzal tawh kibang ding hi. 25 Ahi hangin amah in na tampi thuak masa-in, hih khang mite in amah a nolh phot ding uh hi. 26 "Mihing Tapa hun in, Noah hun lai mah bang ding hi. 27 Noah gunkuangpi sungah a lut ni dongin mite in ne-in dawna, mo la mo kha-in a om uh hi. Tui khanga amaute khempeuh a tuum mang hi. 28 "Lot hunlai-in zong tua mah bang ahi hi. Mite in ne-in dawna, lei-in zuak-a suanin a lam uh hi. 29 Ahi hangin Lot in Sodom a nusiat ni-in vantung panin kaat le meikuang zusuk a, amaute khempeuh a kangtummang uh hi. 30 "Mihing Tapa hong kilaak ni ciangin tua bang tektek hi ding hi. 31 Tua ni-in innkhum tunga omte kuamah inn sunga vante la dingin kumsuk kei hen. Tua mah bangin lo-a omte, na khatpeuh la dingin ciah kik kei hen. 32 Lot’ zi phawk gige un! 33 A nuntakna a hu nuamte in mangsak dinga, a nuntakna a mangsakte in hu ding uh hi. 34 Ken kong geninah, tua zanin lupna khatah mi nih lumkhawm dinga; khat kila-in khat kinusia ding hi. 35 Numei nih in an gawikhawm dinga; khat kila-in khat kinusia ding hi. 36 Lo lai-ah mi nih om dinga; khat kila-in khat kinusia ding hi,”d a ci hi. 37 Amaute in, “Koi lai-ah maw, Topa?” ci-in a dong uh hi. Amah in, “Mi siluang omna peuhpeuh ah musanete a kikhawm ding uh hi,” ci-in a dawng hi.

Luka 18

1 Tua ciangin Jesu in a nungzuite, lungkia lo-a thu a nget tawntung nadingun gentehna khat a gen hi. 2 Amah in, “Khuapi khatah Pasian kihta lo, mite a awlmawh lo thukhenpa khat om hi. 3 Tua khuapi sunga meigongnu khat ama kiangah pai ngitnget a, ‘Ka langpa tungah mantakin thu hong khensak in,’ ci-in ngen hi. 4 "Amah in tawlkhat sung a nial hi. Ahi hangin a tawpkhakna ah, ‘Pasian nangawn kihta loin mite ka awlmawh loh hangin, 5 hih meigongnu in hong buaisak den ahi manin, amah hong paipai-a kei hong gimsak ngi-ingei nawn loh nadingin a thu tangtakin khensak ning!’ ci-in ngaihsun hi,” a ci hi. 6 Tua ciangin Topa in, “A thutang lo tua thukhenpa gente ngaihsun dih un. 7 Pasian in, sun le zana ama kianga kiko, a teelsate adingin thu khensak lo ding ahi hiam? Amaute ngaksaksak ding ahi hiam? 8 Ken kong geninah amaute thu manlangtakin a khensak ding hi. Ahi zongin Mihing Tapa hong pai ciangin leitungah upna a mu ding hiam?” a ci hi. 9 Amaute thumaanna kimuanga midangte khempeuh a neumuh pawlkhatte tungah Jesu in gentehna gen a, 10 "Pharisee khat le siahdong khat mi nih thungen dingin biakinnpi ah a pai uh hi. 11 Pharisee-pa dingto a, ama thua amahmah in ngena, ‘Pasian aw, keimah midangte khempeuh - misuamte, a kheltatte, angkawmte tham lo hih siahdongpa bang hi lo ka hi manin na tungah ka lungdam hi. 12 Nipikal khatin nih vei an tangin ka ngah khempeuh sawm ah khat ka pia hi,’ ci hi. 13 "Siahdongpa ahileh a gamlapi-ah a ding hi. Amah in vantung lam nangawn ento loin a awm tum-a, ‘Pasian aw, mawhneipa keimah hong lainat in,’ ci hi. 14 "A khat pa sangin hih pa, Pasian mai-ah diktangsa in innah a ciah hi, cih kong gen hi. Ahang in, amah le amah a kitawisangte kiniamsak dinga amah le amah a kiniamsakte a kitawisang ding hi,” a ci hi. 15 "Naungekte, Jesu a lawngsak dingin mipite in ama kiangah a paipih uh hi. Nungzuite in a muh uh ciangin amaute a tai uh hi. 16 Ahi hangin Jesu in naupangnote ama kiangah sama, “Naupangnote ka kiangah hong paisak un. Amaute na dal kei un, Pasian gam in hih bangte aa ahi hi. 17 Thutak kong geninah, naupangno banga Pasian gam a sang lo peuhmah tua gam sungah a lut ngei kei ding hi,” a ci hi. 18 Ukpa khat in ama kiangah, “A hoih siapa aw, nuntak tawntungna ka luah theih nadingin ka hih pelmawh ding bang ahi hiam?” ci-in a dong hi. 19 Jesu in, “Bang hangin kei hoih hong ci na hi hiam? Pasian bek longal kuamah a hoih a om kei hi. 20 Angkawm kei in, tual that kei in, gu kei in, zuau teci pang kei in, na nu na pa pahtawi in,b cih thupiakte na theihsa ahi hi,” ci-in a dawng hi. 21 Tuapa in, “Tuate khempeuh ka neu-a kipan ka zuihsa ahi hi,” a ci hi. 22 Jesu in hih thu a zak ciangin ama kiangah, “Na khat na samlai hi. Na neihsa khempeuh zuak inla, mizawngte pia in. Tua hileh vantungah gou na nei ding hi. Tua khit ciangin hong pai-in kei hong zui in,” a ci hi. 23 Tuapa in hih thu a zak ciangin hau mahmah ahi manin a lungsi dedu hi. 24 Jesu in amah en a, “A haute Pasian gam a lut nading haksa mahmah hi! 25 Mihau khat Pasian-gam sungah a lut ding sangin kala-oh khat phimbil vangah a thawl ding a baihzaw takpi ding hi,” a ci hi. 26 Hih thu a zate in, “Tua hileh hotkhiatna kua in ngah zo peuhmah ding hiam?” a ci uh hi. 27 Jesu in “Mihing hih theih lohte Pasian in hih thei hi,” ci-in a dawng hi. 28 Peter in ama kiangah, “Kote in ka neih khempeuh uh nusia in nang kong zui uh hi!” a ci hi. 29 Jesu in amaute kiangah, “Thutak kong geninah, Pasian gam hangin a inn, a zi, a sanggampate, a nu-le-pa le a tate a nusia peuhmah in, 30 hih khanghunah a zah tampi ngah in, hong tung ding khanghunah nuntak tawntungna a ngah ding hi,” a ci hi. 31 Jesu in Sawm le nihte paipih tuamin amaute kiangah, “Eite Jerusalem ah i paito dinga, Mihing Tapa thu kamsangte gelhsa khempeuh a tangtung ding hi. 32 Gentile-te khutah amah a piakhia ding uh hi. Tuate in amah zahko-in, engbawlin, cilphih-in, satin that ding uh hi. 33 A ni thumna ni-in a tho kik ding hi,” a ci hi. 34 Nungzuite in hih thute khat beek a theitel kei uh hi. Amaute tungah a khiatna ki-im lai-a, amah in bang thu gen hiam, cih a thei kei uh hi. 35 Jericho ah Jesu a tun kuan ciangin mittaw khat lamgei-ah tu-in khutdawhin a ngen hi. 36 Tuapa in mihonpi lam pai a zak ciangin, bang thu piang hiam, cih a dong hi. 37 Amaute in ama kiangah, “Nazareth mi Jesu in hong nawk laitak hi,” ci-in a gen uh hi. 38 Amah in, “David Tapa Jesu aw, kei hong lainat in!” ci-in a galsap hi. 39 A madawk mipite in amah tai uh a, daitaka a om nadingin a gen uh hi. Ahi hangin tuapa in, “David Tapa aw, kei hong lainat in,” ci-in a kinak ko semsem hi. 40 Jesu khawl-a ama kiangah tuapa a paipih nadingun thu a pia hi. Tuapa ama kiangah a tun ciangin Jesu in, 41 "Bang kong hihsak ding deih na hi hiam?” ci-in a dong hi. Amah in, “Topa aw, khua ka mu nuam hi,” ci-in a dawng hi. 42 Jesu in, “Khua mu ta in; na upna in nang hong damsak zo hi,” a ci hi. 43 Tua khit phetin khua mu pah lian a, Jesu nungzui-in Pasian a phat hi. Mi khempeuh in zong tua thu a muh uh ciangin Pasian a phat uh hi.

Luka 19

1 Jericho ah Jesu luta kantanin a pai hi. 2 Tua lai-ah Zacchaeus min nei mi khat a om hi. Amah siah dong makai ahi manin a hau mahmah hi. 3 Amah in Jesu kua hiam, cih a mu nuam hi. Ahi hangin a tun tom mi hi-a mihonpite hangin a mu thei kei hi. 4 Tua ahi ciangin amah na matai a, Jesu in a tot nading lampi gei-a po theithek kung khatah a na kah hi. 5 Tua munah Jesu a tun ciangin ento a, ama kiangah, “Zacchaeus aw, hong kum mengmeng in. Tuni-in na innah kong taam kul hi,” a ci hi. 6 Tua ahi ciangin amah kumsuk pah a lungdam mahmah in a muak hi. 7 Mipite khempeuh in hih thu a muh uh ciangin, “Amah ‘mawhneipa’ inn ah zin tung dingin pai tazen hi,” ci-in a phun uh hi. 8 Ahi hangin Zacchaeus dingto a Topa kiangah, “Topa, en in! Hih lai-ah tu mahmah in ka neihsa alang mizawngte ka pia hi. Mi khatpeuh khemin ama neihsa ka laksak leh a zah li-in ka din kik ding hi,” a ci hi. 9 Jesu in ama kiangah, “Hih mipa zong Abraham tapa ahi manin tuni-in hih innsungah hotkhiatna a tung ta hi. 10 Ahang in, Mihing Tapa, a mangsate zong ding le honkhia dinga hong pai ahi hi,” a ci hi. 11 Amah in Jerusalem naih ta a, mipite in Pasian gam a kilangpah dingin ngaihsun uh ahi manin amaute in Jesu thugen a ngaih laitakun amah in amaute kiangah gentehna khat gena, 12 "Kumpi za kipiasakin tua khit cianga hong ciah kik dingin nampi mi khat gamlapi gamah a zinkhia hi. 13 Tua ahi ciangin amah in a nasemte sawm sama, amaute minaa sawm ciat pia in, ‘Kong ciah kik mateng hih sumte tawh summet na bawl un,’ ci hi. 14 "Ahi hangin gam mite in amah mudah uh a, ama kiangah, ‘Hih mipa ka kumpi dingun ka deih kei uh hi,’ ci-a gen dingin a nungah palaite a nungdelhsak uh hi. 15 "Ahi zongin amah kumpi suak veve a, tua khit ciangin innah a ciah kik hi. Tua ciangin sum a ap a nasemte in bangzah na metsak hiam, cih thei nuamin a nasemte a samsak hi. 16 "A khatna pa va pai a, ‘Pu aw, na mina khat in sawm a met hi,’ ci hi. 17 "A pu in, ‘A hoih ka nasempa aw, na hoih na sem hi! Thu neu mahmah khat tungah muanhuai na hi manin khuapi lian sawm na uk in,’ ci hi. 18 "A nihna pa va pai a, ‘Pu aw, na mina khat in nga a met hi,’ ci hi. 19 "A pu in, ‘Nang, khuapi lian nga na uk in,’ ci-in a dawng hi. 20 "Tua ciangin a nasem dang khat va pai-a, ‘Pu aw, hih lai-ah na mina a om hi; puanthem tawh tunin mun khatah ka koihcip hi. 21 Nang mi genhak na hi manin kong kihta hi. Na koih lohpi na lakhia a, na vawh lohpi na at hi,’ ci hi. 22 "A pu in, ‘Nang a tatsia nasempa aw, na thugente tawh kizui-in na tungah thu ka khen ding hi! Kei mi genhak hi-in, ka koih lohna ah lakhia in, ka vawh lohpi at ka hilam thei takpi na hi hiam? 23 Tua ahileh bang hangin kong ciah kik cianga ka sum a met tawh ka ngah kik theih nadingin ka sum, sumsinte na ap lo na hi hiam?’ ci hi. 24 "Tua ciangin amah in a gei-a dingte kiangah, ‘Tuapa tung pan ama mina lakhia unla, mina sawm a neipa na pia un,’ ci hi. 25 "Amaute in, ‘Pu aw, amah’n mina sawm nei khin hi!’ ci uh hi. 26 "A pu in, ‘A nei khempeuh kipiak beh dinga, ahi hangin a nei lote tung pan a neihsun nangawn kilakkhiatsak ding hi. 27 Ahi hangin amau kumpi dinga hong deih lo ka galte hih lai-ah hong paipih unla, keima mai-ah that un,’ ci hi,” a ci hi. 28 Jesu in hih thute a gen khit ciangin amah mapi-in Jerusalem zuanin a pai hi. 29 Olive Vum kici mual bul-a om Bethphage le Bethany a tun kuan uh ciangin a nungzuite nih a mapaisak hi. Amah in amaute kiangah, 30 "Na mai-ua khua ah pai le uh cin tua khua na lut uh ciangin kuama tuan ngei nai lohna laano khat a kikhih na mu ding uh hi. Sut unla hih lai-ah hong paipih un. 31 Mi khatpeuh in, ‘Bang hangin tua laano sut na hi uh hiam?’ ci-a hong dot leh, ‘Topa in deih hi,’ ci-un,” ci-in a sawl hi. 32 Tua a sawlte pai uh a, ama gensa bang tektekin a mu uh hi. 33 Amaute in tua laano a sut laitakun a neipa in amaute kiangah, “Bang hangin tua laano sut na hi uh hiam?” ci-in a dong hi. 34 Amaute in, “Topa in deih hi,” ci-in a dawng uh hi. 35 Amaute in Jesu kiangah paipih uh a, tua laano tungah a puantualpite uh phahin a tungah Jesu a tuangsak uh hi. 36 Tua banga a pai laitakin mipite in a puantualpite uh lampi-ah a phah uh hi. 37 Olive Vum zuatna lampi a tunsuk dektak uh ciangin a nunga zui mihon buppi in, amau muhsa nalamdangte hangin lungnuamtakin aw ngaihtak tawh Pasian phat uh a: 38 "Topa min-a hong pai kumpipa in thupha a ngah hi!b “Vantungah lemna om henla, a sang penna munah minthanna om ta hen!”ci-in a awng uh hi. 39 Mihonpite laka Pharisee-te pawlkhat in Jesu kiangah, “Sia aw, na nungzuite tai in!” a ci uh hi. 40 Amah in, “Ken kong geninah, amaute dai le uh suangte kiko ding uh hi,” ci-in a dawng hi. Hab 2:11 41 Jerusalem a tun kuan uh tua khuapi a muh ciangin amah in kah a, 42 "Nang, bang in kilemna hong puak ding cih tuni-in thei tapeuh lecin maw—ahi hangin lah tu-in tua thu na muh loh dingin kisel ta hi. 43 Na galte in nang hong do nading kulh bawlin a kimkot panin nang umcih in hong bumek ding hun hong tung ding hi. 44 Amaute in nang le na tate na khuapi kulh sungah leilak hong denna ding uh hi. Pasian in note hong veh hun na theih loh manun amaute in suang khat tungah suang dang khat beek a kithuapsa in a hawi kei ding uh hi,” a ci hi. 45 Tua ciangin amah biakinnpi huang sungah lutin vanzuakte a hawlkhia hi. 46 Amah in amaute kiangah,” ‘Ka inn, thungetna inn kici ding hi,’c ci-in kigelh hi. Ahi hangin note in, ‘misuamte kuapi’ na suaksak tazen uh hi,”d a ci hi. 47 Amah in nisimin biakinnpi ah thu a hilh hi. Ahi hangin siampi makaite, thukham siate le mipite laka makaite in amah that dingin a hanciam uh hi. 48 Ahi zongin mipite in ama thugente pom uh ahi manin thah theih nading lampi a mu thei kei uh hi.

Luka 20

1 Ni khat biakinnpi tualah thu hilh-a lungdamna-thu a gen laitakin siampi makaite le thukham siate, upate tawh ama kiangah va pai uh hi. 2 Amaute in, “Nang, bang thuneihna tawh hihte hih na hi hiam? Hih thuneihna kua hong piak hiam, hong gen in?” a ci uh hi. 3 Jesu in, “Kei zong khat kong dong ding hi, hong gen un. 4 Johan baptise-na koi pana kipan hiam, vantung pan hiam, mihing tung pan hiam?” ci-in a dawng hi. 5 Amaute in, “‘Vantung pan hi,’ ci leeng, ‘Tua ahileh bang hangin amah um lo na hi uh hiam?’ hong ci ding hi. 6 ‘Mihing tung pan hi,’ ci leeng lah mipite khempeuh in eite suang tawh hong deng ding uh hi. Bang hang hiam cih leh amaute in Johan kamsangin a sang uh hi” ci-in a kikum uh hi. 7 Tua ahi ciangin amaute in, “Koi pan hiam, ka thei kei uh hi,” ci-in a dawng uh hi. 8 Jesu in, “Ken zong bang thuneihna tawh hihte ka hih, cih kong gen kei ding hi,” a ci hi. 9 Amah in mipite kiangah gentehna gena, “Lenggui lo a bawl mi khat a om hi; tuapa in a lenggui lo lo-khawhlawhte pawlkhat khawhlawhsak in sawt veipi a paikhiatsan hi. 10 A lak hun a tun ciangin lenggah khawm dingin lo-khawhlawhte kiangah nasem khat a sawl hi. Ahi hangin amaute in tuapa satgawp uh a, khut guakin a ciahsak uh hi. 11 Tua ciangin amah in tuate kiangah nasem dang khat sawl kik hi. Ahi hangin amaute in tuapa zong na satgawp uh a, a zahlaksak ngiingei khit uh ciangin a khut guakin a ciahsak uh hi. 12 Amah in a thumna pa sawl lai-a, amaute in tuapa liamsakin a hawlkhia uh hi. 13 "Tua ciangin lo neipa in, ‘Bang lawh ding ka hiam? Ka it ka tapa ka sawl ding hi; amah na zahtak buang ding uh hi,!’ ci hi. 14 "Ahi hangin lo-khawhlawhte in amah a muh uh ciangin, ‘Hih pa, a gouluah pa ahi hi; amah that leng a luah ding teng ei aa hi ding hi,’ ci-in thutanna a bawl uh hi. 15 Tua ahi ciangin amaute in amah daipua ah kaikhia uh a, a that uh hi. “Tua ahileh lo neipa in amaute bang a ci bawl ding hiam? 16 Amah pai-in lo-khawhlawhte that in ama lo midangte a pia ding hi,” a ci hi. Mipite in hih thu a zak uh ciangin, “Hih bang piang ngei kei ta hen!” a ci uh hi. 17 Jesu in amaute en gemgam a, “Tua ahileh: “Inn lamte nilkhiat suang, inntungkhuma suang a suak hi,’b 18 Tua suang tunga puk peuhmah kitamzan dinga, ahi hangin tua suang in a delhkhakte peuhmah a zanciim ding hi, ci-a kigelh a khiatna bang ahi hiam?” ci-in a dong hi. 19 Thukham siate le siampi makaite in hih gentehna amau a cihnopna ahilam thei uh ahi manin a matpah theih nadingun lampi a zong uh hi. Ahi hangin amaute in mipite a kihta uh hi. 20 Amaute in amah encik gige uh a, mi muanhuai a kineihkhem thusim kante ama kiangah a sawl uh hi. Thuneihna le vang a nei gam-ukpa tungah Jesu a piakkhiat theih nadingun ama kam tawh amah lehmat thei dingin a kilamen uh hi. 21 Tua ahi ciangin thusim kante in ama kiangah, “Sia aw, nang in ahi bang thu genin na hilh a, kuamah deihsak tuam nei loin thutak bangin Pasian thu na hilh lam ka thei uh hi. 22 Tua hi-a kote adingin Caesar tungah siah piak tuak hiam, piak tuak lo hiam?” ci-in a dong uh hi. 23 Amah in amaute kineihkhemna a muhtel ciangin, 24 "Denarius khat hong lak dih un. A tungah kua lim le kua min tuang ahi hiam?” a ci hi. 25 Amaute in, “Caesar aa ahi hi,” ci-in a dawng uh hi. Amah in amaute kiangah, “Tua ahileh Caesar aa te Caesar pia unla, Pasian aa te Pasian pia un,” a ci hi. 26 Amah in tua banga mipite laka a gennate tawh amah a awksak zo kei uh hi. Ama dawnnate lamdang sa uh a, tua ciangin amaute a dai uh hi. 27 Thawhkikna om lo hi, a ci Saddusee-te pawlkhat thu dong dingin Jesu kiangah a pai uh hi. 28 Amaute in, “Sia aw, Moses in, ‘Mi khat a sanggampa a sih a, ta nei man loin a zi a nusiat leh tuapa in meigongnu tenpihin a sanggampa ading tate neihsak hen,” ci-in ko adingin a gelh hi. 29 Tu-in unau pasal sagih a om hi. A upapen in zi nei-a ta nei loin a si hi. 30 A nihna pa tuateh 31 a thumna pa in tuanu tenpih uh a, tua mah bangin a sagihun ta nei man loin a si khin uh hi. 32 A tawpkhakna ah tua numei zong a si hi. 33 Tua ahileh tua numei in unau pasal sagihte tenpih kim ahi ciangin thawhkik ni ciangin amah kua pen zi hi ding hiam?” ci-in a dong uh hi. 34 Jesu in, “Hih khanghun a mite in mopi mokha in a om uh hi. 35 Ahi hangin hong tung ding khanghun le misi pana thawhkikna ngah dinga kilawmte in mo pi loin mo lah a kha kei ding uh hi. 36 Amaute vantung mite bang ding uh ahi manin a si thei nawn kei ding uh hi. Amaute thawhkikna tate ahi manun Pasian tate ahi uh hi. 37 Ahi hangin, Topa in, ‘Abraham Pasian, Isaac Pasian le Jacob Pasian,'c ci-in sam ahi manin sawlbawk lak thu ah Moses nangawn in a sisate tho kik hi, cih a lak hi. 38 Pasian ah mi khempeuh nungta ahi manin amah a site Pasian hilo, a nungtate Pasian ahi hi,” ci-in a dawng hi. 39 Thukham siate pawlkhat in, “Sia aw, dawng thei mahmah ciai!” ci-in a dawng uh hi. 40 Tua ciangin kuamah in dotna dang peuhmah amah a dong ngam nawn kei uh hi. 41 Tua ciangin Jesu in amaute kiangah, “Khrist,d David tapa hi, ci-in bangci-a amaute in gen thei uh ahi hiam? 42 Phatna late Bu sungah David mahmah in: ‘Topa in ka Topa kiangah: 43 "Na galte khempeuh na khe ngakna-a ka bawl matengin ka taklamah na tu-in,”’e ci-in pulakkhia hi. 44 David in amah ‘Topa’ ci hi. Tua ahileh bangci in amah a tapa hi thei ding ahi hiam?” a ci hi. 45 Mi khempeuh in ama thugen a ngaih laitakun Jesu in a nungzuite kiangah, 46 "Thukham siate pan na kikem un. Amaute puantual deldal silhin vak kawikawi nuam uh a, van zuakna munte ah pibawl ding utin, synagogue-te sunga tutna thupi pente ah tu nuam diak uh a, anvaknate ah uliante tutna-ah a tu nuam uh hi. 47 Amaute in meigongte inn netum uh a, kineih in sauvei pipi thu a ngen uh hi. Tua bang mite nasiatakin gawtna kithuaksak ding hi,” a ci hi.

Luka 21

1 Jesu a khuadak toh leh, sum haute in biakinnpi sumkholna sungah amau sum a khiat uh a mu hi. 2 Amah in, a zawng meigongnu khat in a neu mahmah sumsan tanga nih a khiat zong a mu hi. 3 Amah in, “Thutak kong geninah, hih a zawng meigongnu in midang khempeuh sangin tam khiazaw hi. 4 Hih mite khempeuh in a hauhna uh panin khia uh hi; ahi hangin tuanu in a zawnsa pipi-in a ma kivak nading a neih khempeuh a khia hi,” a ci hi. 5 A nungzuite pawlkhat in suang melhoihte le Pasian tunga ki-ap letsongte tawh hoihtaka kizem biakinnpi thu a gen uh hi. Ahi hangin Jesu in, 6 "Hih laitaka na muhte uh tawh kisai-in suang khat tungah suang dang khat beek kiciang lo a, a vekpi-in a kicipmang kiuhkeuh hun hong tung ding hi,” a ci hi. 7 Amaute in, “Sia aw, hih thute cik cianga piang ding ahi hiam? Hih thute a tun dektakna bang limin kithei ding hiam?” ci-in a dong uh hi. 8 Amah in, “Note kuamah in hong khem zawh loh nadingin na kigalging un. Ahang in, keima minin mi tampi hong pai ding uh a, ‘Amah ka hi hi. Hun hong nai ta hi,’ hong ci tangtang ding uh hi. Amaute na zui kei un. 9 Galatia-Te thu le kumpi lumletna thu na zak uh ciangin na linglawng kei un. Hih thute a piang masa pelmawh ding mah hi-a ahi hangin a beina a tungpah nai kei ding hi,” ci-in a dawng hi. 10 Tua ciangin amah in amaute kiangah, “Minam khat le minam khat kido dinga, gam khat le gam khat a kido ding uh hi. 11 Mun tuamtuam ah zin nakpi in ling dinga, kialpi le pul tungin vantung panin a kihtakhuai thupiangte le lim lianpite hong om ding hi. 12 "Ahi hangin hihte a pian ma-in amaute in note tungah a khut uh hong nga-in hong bawlsia ding uh hi. Keima min hangin amaute in note synagogue-te le thongte ah hong tun ding uh a, kumpite le gam-ukte mai-ah hong paipih ding uh hi. 13 Hih in amaute tunga teci pang na suah nading uh ahi hi. 14 Ahi hangin no le no na kihut zia ding uh ama in na lunghimawh loh nadingun lungsim khentatsa-in om un. 15 Ahang in, na langte un note hong nan zawh loh nadingun thute le pilna kong pia ding hi. 16 Na nu-le-pate, na sanggamte, na tanaute le na lawmte un note hong lehhek ding uh a, pawlkhat hong that ding uh hi. 17 Keima hangin mi khempeuh in note hong mudah ding uh hi. 18 Ahi hangin na samzang khat nangawn uh a mang thang kei ding hi. 19 Kiptaka dinna tawh nuntakna na ngah ding uh hi. 20 "Galkap honpi in Jerusalem a umcih na muh uh ciangin a hawmmang nading nai ta hi, cih na thei ding uh hi. 21 Tua ciangin Judea gama omte mual tungah tai uh hen; tua khuapi sunga omte taikhia uh henla, gamsunga omte tua khuapi ah lut kei uh hen. 22 Tua in, a kigelhsa khempeuh a tangtun nadingin gawtna hun ahi hi. 23 Tua nite, nau paiite le naungek nei nupite adingin mulkimhuai lua ding hi! Tua gam sung tengah lungdonna lianpi le hih mite tungah thangpaihna lianpi a tung ding hi. 24 Amaute namsau in puk ding uh a, minamte khempeuh thongkiate bangin a kai ding uh hi. Gentile-te hunte a tangtun kim khit matengin Gentile-te in Jerusalem a tuancil ngi-ingei ding uh hi. 25 "Ni, kha le aksite sungah limte hong om ding hi. Tuipi kilok le tuihual hawkte hangin leitunga minamte lunggimin a cimawh ding uh hi. 26 Van a nate khempeuh kiling dinga, leitunga piang dingte kihta kholin lau lua-in mite a sibup ding uh hi. 27 Tua laitakin vanglianpi le minthanna tawh meii laka hong paisuk Mihing Tapa amaute in a mu ding uh hi. 28 Hih nate tun a kipat ciangin note tatkhiatna nai ta ahi manin ding to unla khuadak khia un,” a ci hi. 29 Amah in amaute kiangah hih gentehna gena: “Theikung le singkung dangte khempeuh na en un. 30 A tehte a sel ciangin khuakhal hun nai ta hi, cih na thei uh hi. 31 Tua mah bangin hih nate a pian na muh uh ciangin Pasian gam hong nai ta hi, cih na thei un. 32 "Thutak kong geninah, hih thute khempeuh a tun khit mateng hih khang miteb a bei peuhmah kei ding hi. 33 Van le lei a mangthang ding hi; ahi hangin ka thute a mangthang ngei kei ding hi. 34 "Note pilvang un, tua hi keileh na lungsimte uh lalthangin zukhamna le nuntak nading lunghimawh nate in hong thazawhgawp dinga tua ciangin na upmawh loh laitak un tua ni, thang kisai bangin no tungah hong tung ding hi. 35 Leitung bupa tengte khempeuh tungah tua ni a tung ding ahi hi. 36 Note na kigalging gige un. Thupiang dingte khempeuh pana na suahtak nading uh le Mihing Tapa mai-a na din theih nadingun thu na ngen un,” a ci hi. 37 Jesu in biakinnpi ah nisimin thu hilh a, Olive Vum ah giak dingin nitak sialin a paikhia hi. 38 Ama thugen ngai dingin zingsang tungin mi khempeuh biakinnpi ah a pai uh hi.

Luka 22

1 Paisanpawi kici Silngo-sawhloh Anlum Pawi hun kuan ciangin, 2 siampi makaite le thukham siate in mipite kihta uh ahi manin Jesu a hepkhiat theih nading uh lampi a zong uh hi. 3 Tua ciangin Sawm-le-nihte lakah khat, Iscariot kici Judas sungah Satan a lut hi. 4 Tua ciangin siampi makaite le biakinnpi cing makaite kiangah Judas pai-a Jesu a lehhek theih nading zia amaute tawh a kikum hi. 5 Amaute lungkim uh a, amah sum piak dingin a thukim uh hi. 6 Amah thukima, mihonpite om loh kala amaute khutah Jesu a piak theih nading hun hoih a ngak gige hi. 7 Tua ciangin Silngo sawhloh Anlum Pawi ni tunga, tua ni Paisan Tuuno-a biakpiak ni ding ahi hi. 8 Jesu in Peter le Johan kiangah, “Pai unla Paisan-pawi i nek theih nadingin na kisakhol un,” ci-in a sawl hi. 9 Amaute in, “Koi lai-ah na bawlkhol le ung nong deih hiam?” ci-in a dong uh hi. 10 Amah in, “Khuapi sung na lut uh ciangin tuibeel khat a pua pasal khat tawh na kituak ding uh hi. Ama lutna inn dong amah zui unla, 11 a inntekpa kiangah, ‘Siapa in: Ka nungzuite tawh Paisan-pawi ka nek nading zintunna inndei koi lai ahi hiam, ci-in hong dongsak hi,’ va ci un. 12 Amah in van zat ding a kima omsa inndei tungnung a zaipi khat hong lak ding hi. Tua lai-ah na bawlkhol un,” ci-in a dawng hi. 13 Amaute a pai uh ciangin Jesu gensa bang tektekin nate a mu uh hi. Tua hi-a amaute in Paisan-pawi bawl nading a bawlkhol uh hi. 14 A hun a tun ciangin Jesu le sawltakpite sabuai ah a kingam uh hi. 15 Tua ciangin amah in amaute kiangah, “Keimah in ka thuak ma in hih Paisan-pawi note tawh i nekkhawm ding utin ka ngaklah mahmah hi. 16 Ahang in, Pasian gamah hih thu a tangtun hun matengin ka ne nawn kei ding hi, cih kong gen hi,” a ci hi. 17 Amah in hai a lak khit ciangin lungdam ko a, “Hih hai la unla note lakah hawm un. 18 Ahang in, ken kong cih inah Pasian gam hong tun mateng lenggahzu ka dawn nawn kei ding hi,” a ci hi. 19 Amah in anlum la-a, lungdam ko-in balkhama, amaute pia-in, “Hih in note adinga kipia ka pumpi ahi hi; kei nong phawk tawntung nadingun na bawl un,” a ci hi. 20 Tua mah bangin nitak-an a nek khit uh ciangin hai la-a, “Hih hai, note adinga kibuakhia ka sisan-a thukhunna thak ahi hi. 21 Ahi hangin kei hong lehhek ding pa khut, keima khut tawh sabuai ah a om hi. 22 Thukip omsa bangin Mihing Tapa a pai ding hi. Ahi hangin amah a lehhek tua mipa in, gimna a thuak ding hi,” a ci hi. 23 Amaute lakah kua pen in hih a hih tam, ci-in a kidong ciat uh hi. 24 Amaute lakah alian pena kingaihsun kua hiam, cih thu kiselna zong a piang hi. 25 Jesu in amaute kiangah, “Gentile-te ahi uh leh a kumpite uh amau tungah kiliansak uh a, amau tunga thuneihna a zangte, amau le amau Deihsakte a kici tawm uh hi. 26 Ahi hangin note tua bang na hi kei un. Tua sangsikin, note lakah a lianpen in a moipen bang hi dinga, a ukpen in nasempa bang hi ding hi. 27 Sabuai-a tupa le tuanvaipa kua lianzaw ahi hiam? Ahi hangin kei ka hileh note lakah nasempa bang ka hi hi. 28 Hong kizia-et lai-a hong dinpihte note na hi uh hi. 29 Ka Pa in kei tunga gam khat hong bilpiak bangin note tungah gam khat kong pia hi; 30 ka gam sunga sabuai ah kei tawh nekhawm dawnkhawma, kumpi tokhom tungah tu-in Israel beh sawm-le-nihte tungah thu na khen theih nading uh ahi hi. 31 "Simon, Simon aw buh haih bangin Satan in nanga haih hong sawm hi. 32 Ahi hangin Simon aw, na upna a lawhsap loh nadingin nang ading thu ka ngen zo hi. Na kihei kik ciangin na sanggamte na thahatsak in,” a ci hi. 33 Ahi hangin amah in, “Topa aw, nang tawh thong kiakhawm ding ahi zongin, sihkhawm ding ahi zongin a kigingsa ka hi hi,” ci-in a dawng hi. 34 Jesu in, “Peter aw, ken kong geninah, tuni ak a khuan ma-in kei nong theihna thumvei na nial ding hi,” ci-in a dawng hi. 35 Tua ciangin amaute kiangah, “Note sumbawm, thung-ip le khedapte hong kengsak lo a kong sawlkhiat lai-in kisapna na nei uh hiam,” ci-in a dong hi. Amaute in, “Bangmah ka kisam kei uh hi,” ci-in a dawng uh hi. 36 Amah in amaute kiangah, “Tu-in ahileh sumbawm ahi zongin, thung-ip ahi zongin na neih uh leh keng un; namsau na neih kei uh leh na puantualpite uh zuak unla lei un. 37 ‘Amah thukham palsatte tawh a kisimkhawm hi,’b ci-in kigelh hi. Tua hi a hih thu kei tungah hong tangtung pelmawh ding hi, cih kong gen hi. Himah hi. Kei thu a kigelhsate a tangtung ding hi ta hi,” a ci hi. 38 Nungzuite in, “Topa en dih in, hiah namsau nih om hi,” a ci uh hi. Amah in, “Pha zo hi,” a ci hi. 39 Jesu a pai ngei bangin Olive Vum ah pai-a, a nungzuite in amah a zui uh hi. 40 Tua mun a tun ciangin amah in amaute kiangah, “Zia-etna sungah na puk loh nadingun thu na ngen un,” a ci hi. 41 Amaute khen suanglot khat tan bangah khukdinin thu ngen a, 42 "Pa aw, na ut leh hih hai tawh hong kipelhsak in; ahi zongin kei deihna bang hi loin nangma deihna bang hizaw hen,” a ci hi. 43 Vantung panin vansawltak khat ama kiangah kilanga, amah a thakhauhsak hi. 44 Amah lunggimin thu limngetzaw-a, a khua-ul sisanmal bangin leitungah a takkhia hi.c 45 A thungetna pan dingkhia a, a nungzuite kiangah a pai kik ciangin amaute dah lua-in thazawm uh ahi manin a ihmut laitak uh a tuak hi. 46 Amah in amaute kiangah, “Note bang hangin ihmu na hi uh hiam? Tho un. Zia-etna sunga na puk loh nadingun thu ngen un,” a ci hi. 47 Tua banga a paupau laitakin mihon khat va paito uh a, Sawm-le-nihte laka khat, Judas kici pa in amaute a makaih hi. Amah in Jesu nam dingin a va naih hi. 48 Ahi hangin Jesu in ama kiangah, “Judas aw, nang Mihing Tapa khatvei napna tawh lehhek ding maw?” ci-in a dong hi. 49 Jesu a zuite in hih thu piang ding a muh uh ciangin, “Topa aw, ka namsaute uh tawh ka sat ding uh hiam?” ci-in a dong uh hi. 50 Tua ciangin amaute lakah khat in, tulpipa nasempa a sat leh a taklam bil a satkhia hi. 51 Ahi hangin Jesu in, “Tu-a zah pha zo!” ci-in a dawng hi. Tua ciangin amah in tua mipa bil lawngin a damsak hi. 52 Tua ciangin Jesu in amah man dinga a pai siampi makaite, biakinnpi cing makaite le upate kiangah, “Kei man dinga namsau le khetbuk tawh nong kuan zawzen uh kumpi langpang dinga makaih ka hi hiam? 53 Nisimin biakinnpi tualte ah note tawh ka om khawm laitakin khut khat zong nong nga kei uh hi. Ahi hangin tu laitak, note hun ahi, khuamial thuneih hun ahi hi,” a ci hi. 54 Tua ciangin amaute in amah manin paikhiatpih uh a, tulpipa innah a tun uh hi. Peter in a kigamla simsimah a zui hi. 55 Ahi hangin amaute in inntual laizangah mei cih in a tutkhawm uh ciangin amaute kiangah Peter zong a va tu hi. 56 Nasem numei khat in meitang ah tua lai-a a tut a mu hi. Tuanu in amah va tel-et a, “Hih pa amah tawh kipawl hi,” a ci hi. 57 Ahi hangin amah in nial a, “Numei aw, ken amah ka thei kei hi,” a ci hi. 58 Tawmvei khit ciangin midang khat in amah mu-a, “Nang zong amaute lakah khat na hi hi,” a ci hi. Peter in, “Mipa aw, ka hi peuhmah kei hi!” ci-in a dawng hi. 59 Nai khat bang khit ciangin adang khat in, “Hih pa amah tawh kipawl pha mahmah, Galilee mi ahi hi,” a ci hi. 60 Peter in, “Mipa aw, na thu gen ka thei peuhmah kei hi!” ci-in a dawng kik hi. Tua banga a pau laitakin ak a khuang hi. 61 Topa kihei a tangtakin Peter a en hi. Tua ciangin Peter in Jesu in ama tunga, “Tuni ak khuan ma-in thumvei nong kitheihmawhbawl ding hi,” ci-a a gen a pawk hi. 62 Tua ciangin amah a pualam ah pusuak a kah cihtakin a kap hi. 63 Jesu a cingte in zahko in a sat uh hi. 64 Amaute in a mit tunsak uh a, “Nang kuan hong su hiam? Hong gen dih in!” a ci uh hi. 65 Amaute in engkona kam tampi ama tungah a zang uh hi. 66 Khuavak tungin tangpi upa vai hawmte, siampi makaite le thukham siate kikhawm uh a, amaute mai-ah Jesu a paipih uh hi. 67 Amaute in, “Nang Khristd na hileh, hong gen in,” a ci uh hi. Jesu in, “Kong gen hangin note in nong um nuam kei uh a, 68 kong dot hangin nong dawng nuam kei uh hi. 69 Ahi hangin tu-a kipan Mihing Tapa a thahat Pasian taklamah a tu ding hi,” ci-in a dawng hi. 70 Amaute khempeuh in, “Tua ahileh nang Pasian Tapa na hi hiam?” ci-in a dong huan uh hi. Amah in, “Maan hi, nong cih bang uh ka hi hi,” ci-in a dawng hi. 71 Tua ciangin amaute in, “Teci dang kul nawn ding ahi hiam? Eite in ama kam panin i za zo hi,” a ci uh hi.

Luka 23

1 Tua ciangin tua lai-a kikhawmte khempeuh ding uh a, amah Pilate kiangah a paipih uh hi. 2 Amaute in, “Hih pa in ka minam uh a holhthawh ka thei uh hi. Caesar tunga siah piak ding dalin kumpi khat, Khrista in kigen lai hi,” ci-in amah a ngawh uh hi. 3 Tua ahi ciangin Pilate in Jesu kiangah, “Nang, Jew-te kumpipa na hi hiam?” ci-in a dong hi. Jesu in, “Ka hi hi, na cih bang ahi hi,” ci-in a dawng hi. 4 Tua ciangin Pilate in siampi makaite le mihonte kiangah, “Hih pa, mawhmat theih nading thubul ka mu kei hi,” ci-in a pulak hi. 5 Ahi hangin amaute in, “Amah in a thuhilhna tawh Judeab gam sunga mi khempeuh a tokbuai hi. Galilee pan hong panin hih ciang dong hong tun hi,” a ci teitei uh hi. 6 Pilate in hih thu a zak ciangin Galilee gam mi ahi hiam, ci-in a dong hi. 7 Jesu, Herod uk sung mi ahilam a theih ciangin amah Herod kiangah a puak hi. Tua hun laitakin Herod zong Jerusalem ah a om hi. 8 Herod in Jesu a muh ciangin, a muh nop sawt zo ta ahi manin a lungkim mahmah hi. Ama thu a na zaksa mah bangin amah in nalamdang pawlkhat a bawl ding a lamen hi. 9 Amah in thu tampi adot kawikawi hangin Jesu in a dawng kik kei hi. 10 Siampi makaite le thukham siate tua lai-ah ding uh a nakpi in a mawhsak uh hi. 11 Tua ciangin Herod le a galkapte in amah ciamnuih-bawlna in nei uh a, a zahko uh hi. Amah kumpi puan hoih mahmah khat silhsakin Pilate kiangah a puak kik uh hi. 12 Tua ni-in Herod le Pilate a kilawmta kik uh hi - tua ma-in amau gel a kigalneih uh ahi hi. 13 Pilate in siampi makaite, ukpate le mipite kaikhawma, 14 amaute kiangah, “Note in hih mipa in kumpi langpang dingin mite tawsawn hi, ci-in ka kiangah nong paipih uh hi. Nomau mai mahmah ah amah ka sittel ciangin amah na mawhmatna uh thubul ka mu kei hi. 15 Herod in zong amah kei kiangah hong puak kik ahi manin a mu tuan lo ahi hi. Na muh mah bangun sihna thuak nadinga kilawm bangmah a hih kei hi. 16 Tua ahi manin, amah ka gawt khit ciangin ka khahkhia ding hi,” c ci hi. 17 Tua hunlai-in Pawi hun ciangin amaute tungah mi khat a khahkhiat ding ama hih theih ahi hi.d 18 Amaute in, “Hih pa that in! Ko kiangah Barabbas hong khahkhia in,” ci-in aw khatin a kiko uh hi. 19 (Barabbas pen tua khuapi sunga kumpi a langdona hang le a tualthahna hangin thong sunga kikhum ahi hi.) 20 Pilate in Jesu khahkhia nuam ahi manin amaute tungah a ngen kik hi. 21 Ahi hangin amaute in, “Amah kilhlum in! Amah kilhlum in!”ci-in a kiko teitei uh hi. 22 Amah in a thumveina amaute kiang ah, “Bang hang in? Amah in bang tatkhialhna lian hih ahi hiam? Sihna a thuak nading zahin paulap ding bangmah ka mu kei hi. Tua ahi manin amah ka gawt khit ciangin ka khahkhia ding hi,” a ci hi. 23 Ahi hangin amaute nakpi in kiko uh a, amah a kilhlup nadingin a kalh teitei uh ciangin amau kikonate in a zozaw hi. 24 Tua ahi ciangin Pilate in amau kalhna banga piak dingin a khensat hi. 25 Amau ngetsa, kumpi langdona hang le tual thahna hanga thong sunga kikhumpa khahkhia-in, amau ut banga a bawl dingun amau tungah Jesu piakhia hi. 26 Amaute in amah a paikhiatpih laitakun gamsung panin tua lai hong tawn Cyrene mi Simon lencip uh a, amah singlamteh suanin Jesu nung zui-in singlamteh a puasak uh hi. 27 Mipi tampitakin amah zui uh a, tuate lakah amah kah a, a zui numeite zong a kihel uh hi. 28 Jesu kihei-in amaute kiangah, “Jerusalem tanute aw, kei adingin kap kei un, no ading le na tate uh adingin kapzaw un. 29 Ahang in, note in, ‘Tasel numeite, nau a paii ngei lo gilte le a kiteep ngei lo nawite thupha ngah ahi hi!’ na cih hun uh hong tung ding hi. 30 Tua ciangin, “amaute in mualliante kiangah, ‘Ko tungah hong cim un!’ mualneute kiangah, “Kote hong vuk un!’” ci ding uh hi.e 31 Ahang in, mite in sing ahin laitakin hihte hih uh ahileh akeu ciangin bang suak tazen ding uh hiam?” a ci hi. 32 Tatkhialhna lian a nei midang nih zong thah dingin amah tawh a paikhiatpih uh hi. 33 Luguh kici munah amaute a tun uh ciangin tua lai-ah amah le tatkhialhna lian a neite – a taklam khat, a veilam khat tawh singlamteh tungah a kilh uh hi. 34 Jesu in, “Pa aw, amaute in a hih uh thei lo uh ahi manin amaute maisak in”f a ci hi. Amaute in ai lawnin a puante a hawm uh hi. 35 Mipite dingin en uh a, ukpate in amah a zahpih beh lai uh hi. Amaute in, “Amah in midangte a honkhia zo hi; amah Teltuampa Khat, Pasian’ Khrist hi ahileh, amah le amah kihonkhia ta hen,” a ci uh hi. 36 Galkapte zong paito uh a, amah a zahko uh hi. Amaute in amah lenggahzu thuk pia-in ama kiangah, 37 "Nang Jew-te kimpipa na hileh nang le nang kihonkhia in,” a ci uh hi. 38 Ama lutung santakah :HIH PA JEW-TE KUMPIPA HI ci-in theih-sakna lai a suang uh hi. 39 Tua lai-a kikhai tatkhialhna lian a neite khat in, “Nang Khrist hilo na hi hiam? Nang le ko hong honkhia in!” ci-in a engko hi. 40 Ahi hangin a khat pa in, “Amah banga nang, gawtna thuak na hi khit nungsang Pasian kihta lo na hi hiam? 41 Ei i hileh i gamtatnasate tawh kizui-in thuak i hi manin a kituaka gawtna a thuak i hi hi. Ahi hangin hih pa in tatkhialhna khat beek a nei kei hi,” ci-in tuapa a tai hi. 42 Tua khit ciangin amah in, “Jesu aw, na gam sungah na tun ciangin kei hong phawk in,g” a ci hi. 43 Jesu in ama kiangah, “Thutak kong geninah, tuni-in kei tawh Paradise ah na omkhawm ding hi,” ci-in a dawng hi. 44 Tua hun nai gukna pawl hi-a nai kuana dongin gam bupah ni tang lo ahi manin, 45 khim a zing hi. Tua ciangin biakinnpi puanzak phel nih a suak hi. 46 Jesu in, “Pa aw, ka kha nangma khut sungah kong ap hi,” ci-in nakpitakin a kiko hi. Tua banga a kiko khit ciangin, a huu a beisak hi. 47 Zakhat ukpa in thu piang teng a muh ciangin Pasian phat a, “Hih pa, mi thumaan hi takpi hi,” a ci hi. 48 Hih thute en dinga kikhawm mite khempeuh in thupiangte a muh uh ciangin, a awm uh tumin a paikhia uh hi. 49 Ahi hangin Galilee pana amah a zui numeite a kipan amah a theite khempeuh a kigamla simna munah dingin hih thute a galvil uh hi. 50 Tua laitakin Vaihawmte khat, mi hoih, mi thutang Joseph min nei khat a om hi. 51 Tuapa in amaute thukhen-satnate le a gamtatnate uh a thukim kei hi. Amah Judea gam khua lian khat, Arimathea mi hi-a Pasian gam a ngak gige mi khat ahi hi. 52 Amah Pilate kiangah pai-in Jesu luang a va ngen hi. 53 Tua ciangin amah in siluang lakhiasuk a, saihadial puanin a tun khit ciangin kuamah khat beek a kisial ngei nai lohna mun suangpi a kikhuak han sungah a sial hi. 54 Tua ni Kiginkholh Ni hi-a Sabbath ni a kipan ding hi ta hi. 55 Galilee pana Jesu tawh a paikhawm numeite in Joseph zui uh a, tua han le ama luang a kisial zia a mu uh hi. 56 Tua khit ciangin amaute inn ah ciah uh a gimnamtui le sathau namtui a kigingkhol uh hi. Ahi hangin amaute in thupiak a manna un Sabbath ni-in a tawlnga uh hi.

Luka 24

1 Nipikal ni masa pen ni, zingsang phalvak tungin tua numeite amau bawlkholhsa gimnamtuite kengin hanah a hawh uh hi. 2 Amaute in tua han pana suangtum kilikkhiasa a mu uh hi. 3 Ahi hangin a sungah a lut uh leh Topa Jesu luang a mu kei uh hi. 4 Hih thu ah amaute lungmangin a om laitakun, a puante uh khuaphialep banga tee zalzal pasal nih a gei uah thakhatin a ding hi. 5 Tua numeite lau lua mahmah uh ahi manin kunsukin amai uh lei-ah a phum uh hi. Ahi hangin tua mite in amaute kiangah, “Note in bang hangin misite lakah mihing zong na hi uh hiam? 6 Amah hih lai-ah om lo hi; amah tho kik zo hi! Amah note tawh Galilee gama a om lai-in note kiangah, 7 ‘Mihing Tapa mawhnei mite khut sungah kipia dinga, kikilhlumin a ni thumna ni-in kithokiksak ding hi,’ ci-a hong gen phawk gige un,” a ci uh hi. 8 Tua ciangin ama thugente a phawk kik uh hi. 9 Amaute han pan a ciah kik uh ciangin hih thute khempeuh, Sawm-le-khatte le adangte khempeuh a hilh uh hi. 10 Sawltakpite kiangah hih thu a gente: Mary Magdalene, Joanna, James nu Mary le amaute tawh a omkhawm midangte ahi uh hi. 11 Ahi hangin amaute in tua numeite thugente uptak lo sa uh ahi manin a um kei uh hi. 12 Ahi zongin Peter ding to-in hanah a tai hi. Amah kunsukin a et leh, saihadial puan bek a mu hi. Tua ciangin amah in tua thupiang-sate lamdang sa in a ciah kik hi. 13 Tua ni mah in amaute lakah nih, Jerusalem panin tai sagiha bang a gamlatna Emmaus kici khua neu ah a pai uh hi. 14 Amaute gel in tua thupiangsa khempeuh a kikum uh hi. 15 Hih thute kikumin a paupau laitakun Jesu mahmah paito in amaute tawh a tonkhawm hi. 16 Ahi hangin amaute lakah amah a kitheisak kei hi. 17 Amah in amaute kiangah, “Na pai kawmkawmun bang kikum na hi ua?” ci-in a dong hi. Amaute mai mialin a dinkhawl uh hi. 18 Amaute khat Cleopas min nei pen in, “Jerusalem a hawhte lakah tua lai-a tusawng tenga thupiangte a thei lo nang bek hi niteh maw?” a ci hi. 19 Amah in, “Bang piang a hia?” ci-in a dong hi. Amaute in, “Nazareth mi Jesu thu ahi hi. Amah kamsang khat hi-a Pasian mai le mi khempeuh mai-a, a pauna le a tatnate ah vang a nei hi. 20 I siampi makaite le ukpate in amah a si dingin thu khen uh a, kilhlum uh hi; 21 ahi hangin kote in Israel-te tankhia ding pa amah hi dinga ka lamet uh ahi hi. Tua tham loin hih thu a pian zawh a ni thumna hi ta hi. 22 Tua banah ka numeite uh pawlkhat in lamdang hong sasak mahmah uh hi. Tuni zingsang tungin amaute hanah va hawh uh a, 23 ahi hangin ama luang a mu kei uh hi. Amaute hong ciah kik uh a, amah nungta hi, ci-a amau tunga gen van sawltakte a muhna thu hong gen uh hi. 24 Tua ciangin ka pawlte uh kimkhat han ah va pai uh a, numeite gen bang tektek in mu uh hi; amah va mu lo takpi uh hi,” ci-in a dawng kik uh hi. 25 Amah in amaute kiangah, “Hai na lawmlawm uh cia! Kamsangte gen sate khempeuh uphak sa si uh cia! 26 Khristb in hihte khempeuh a thuak masak kul phot-a, tua khit ciangin ama minthanna sunga lut pan ding hi lo ahi hiam?” a ci hi. 27 Tua ciangin Moses a kipan Kamsangte khempeuh in amah tawh kisai-in Laisiangtho sunga a gensa khempeuh amah in amaute tungah a hilhcian hi. 28 Amaute a pai nading uh tua khuaneu a zuat laitakun Jesu a paisuak lai ding bangin a kineih hi. 29 Ahi hangin amaute in, “Ni kai lua ta-a, ni tum phial ta ahi ciangin ko kiangah hong tam in,” ci-in amah a kun uh hi. Tua ahi ciangin amah pai-in amaute kiangah a tam hi. 30 Amah in amaute tawh ankuang a um khawm ciangin, anlum la-a, lungdam ko-in, balkham a, amaute a pia hi. 31 Tua ciangin amaute a mit uh kihonga amah a theician uh hi; tua ciangin amau muhna panin amah a mang hi. 32 Amaute in, “Amah tawh lampi ah tonkhawmin, kiho-a, Laisiangtho hong hilh laitakin i lung hong lawng hi lo ahi hiam?” ci-in khat le khat a kidong uh hi. 33 Amaute ding khia uh a thakhatin Jerusalem ah a kilehkik uh hi. Amaute in tua lai-a Sawm-le-khatte le amau tawh a om, a na kikhawm khawmte in, 34 "Hi takpi! Topa tho kik zo a Simon kiangah kilang hi,” ci-in a gen laitak uh a tuak uh hi. 35 Tua ciangin tuate gel in lampi a thupiangte le Jesu in anlum a balkhap laitaka a meel a theihcian patna uh thute a gen uh hi. 36 Hih thu a gengen laitakun amaute laizangah Jesu mahmah va dinga, amaute kiangah, “Note tungah lemna om ta hen,” a ci hi. 37 Amaute sikha mu kisa uh a kigaihin a lau mahmah uh hi. 38 Amah in amaute kiangah, “Bang hangin note lungmang in lungka na hi uh hiam? 39 Ka khutte le ka khepekte en un. Kei mahmah hi buang ing! Hong lawng unla en un; sikha in tu-a na muh uh kei neih bangin satak le guh a nei kei hi,” a ci hi. 40 Amah in hih teng a cih khit ciangin a khutte le a khepekte amau a lak hi. 41 Amaute lungdamin lamdang sa lua uh ahi manin a up nai loh lailai uh ciangin, “Hih lai-ah nek theih ding khatpeuh na nei uh hiam?” ci-in a dong hi. 42 Amaute in amah ngasa haikeu khat a piak uh leh 43 la-a amaute muh in a ne hi. 44 Amah in amaute kiangah, “Hih in note tawh ka omkhawm lai-a ka gen: Kei thu, Moses Thukham, Kamsangte le Phatna-late sunga kigelhte khempeuh a tangtung pelmawh ding hi, ka cih hih thu ahi hi,” a ci hi. 45 Tua ciangin amaute lungsim amah in honsaka, amaute in Laisiangtho a theitel uh hi. 46 Amah in amaute kiangah, “A kigelhsa thu hih bang ahi hi: Khrist in thuak dinga a ni thumna ni-in misi pan tho in, 47 Jerusalem pan kipankhia in, ama minin minamte khempeuh tungah kisikna le mawh maisakna thu a kihilh ding hi. 48 Hih thute ah note teci na hi uh hi. 49 Keimah in ka Pa hong kamciamsa, note tungah kong sawl ding hi; ahi hangin asangna pana vangliatna note hong kisilhsak matengin tua khuapi ah na om tadih un,” ci-in a gen hi. 50 Amah in amaute Bethany kimnai-ah pai khiatpih-a, a khut lamto in amaute thupha a pia hi. 51 Amah in amaute thupha a piak laitakin amaute nusia in amah vantungah kila to hi. 52 Tua ciangin amaute in amah bia uh a, lungdam mahmah in Jerusalem ah a ciah uh hi. 53 Tua ciangin amaute, Pasian phatin biakinnpi ah a om suaksuak uh hi.

Johan 1

1 Atungin Thu om-a, tua Thu Pasian tawh omkhawmin, tua Thu Pasian ahi hi. 2 Atungin amah Pasian tawh a omkhawm hi. 3 Ama tungtawnin na khempeuh kibawl hi. A kibawlsate khempeuh ama bawlloh a om kei hi. 4 Ama sungah nuntakna om-a, tua nuntakna, mite khuavak ahi hi. 5 Khuamial sungah tua khuavak tanga, ahi hangin khuamial in amah a theitela kei hi. 6 Pasian kiang pana hong kisawl mi khat a om hi. Ama min Johan ahi hi. 7 Mi khempeuh in ama tungtawnin tua khuavak a up theih nadingin khuavak tawh kisai a theisak dingin teci-a hong pai ahi hi. 8 Amah ahileh tua khuavak ahi kei hi. Khuavak tawh kisai teci-a hong pai hi bek hi. 9 Mikim tungah a tang tua khuavak taktak leitungah hong pai hi.b 10 Amah leitungah om-a, leitung ama piansak hi napi leitung in amah a thei kei hi. 11 Ama aa mahmah ahi te kiangah hong pai ahi hangin ama aa te in amah a sang kei uh hi. 12 Ahi zongin amah a sangte khempeuh, ama min a umte khempeuh tungah Pasian tate suah nading thuneihna a pia hi. 13 Tuate pianngei tatec banga suak hi lo, mihing khensatna bang le pasal deihna pana suak zong hi lo, Pasian pana suak ahi uh hi. 14 Tua Thu, ci-le-sa suak a, eite lakah amah a teng hi. Eite in ama minthanna – Pa kiang pana hong pai thutak le hehpihna a dim Tapad neihsun minthanna i mu khin hi. 15 Amah tawh kisai Johan in teci a pang hi. Amah in, “‘Kei nunga hong pai pa, kei ma-a om khin ahi manin amah in kei hong khup zo hi,’ ci-a ka genpa hih pa ahi hi,” ci-in kiko hi. 16 A kicing ama hehpihna panin eite khempeuh in thupha khat khit khat i ngah hi. 17 Ahang in, Moses tungtawnin thukham kipia hi. Jesu Khrist tungtawnin hehpihna le thutak hong pai ahi hi. 18 Kuamah in Pasian a mu ngei kei hi. Ahi hangin Pa kianga om Tapa neihsun beke f in amah a kitheisak zo hi. 19 Tu-in Jerusalem a Jew-te in, Johan kua hiam cih a dong dingin siampite le Levi-te ama kiangah a sawl uh ciangin ama teci panna hih ahi hi. 20 Amah ki-im loin teltakin kipulak a, “Kei, Khrist ka hi kei hi,”g kici hi. 21 Amaute in, “Tua ahileh nang kua na hi hiam? Elijah na hi hiam?” ci-in a dong uh hi. Amah in, “Ka hi kei hi,” a ci hi. “Nang Kamsangpa pen na hi hiam?” ci-a a dot uh ciangin, Amah in, “Ka hi kei hi,” ci-in a dawng hi. 22 A tawpna ah amaute in, “Nang kua na hi hiam? Ko hong sawlte kianga ka gen kik ding uh dawnna khat hong nei in. Nang kua kici na hiam?” ci-in a dong uh hi. 23 Johan in Isaiah kammalte zangin dawng a, “‘Topa ading lampi na tangsak un,’ ci a gamlaka kiko pa aw, keimah ka hi hi,”h a ci hi. 24 Tua ciangin a kisawl Pharisee-te pawlkhat in, 25 "Khrist lah hi lo, Elijah lah hi lo, tua Kamsangpa lah hi lo na hileh bang hangin baptise na hi hiam?” ci-in a dong uh hi. 26 Johan in, “Keimah in tui ini ka baptize hi. Ahi hangin note lakah na theih loh uh mi khat a om hi. 27 Amah ka nunga hong pai pa ahi hi; ama khedapkhau sut ding nangawnin ka cin zo kei hi,” ci-in a dawng hi. 28 Hihte khempeuh Johan baptisena mun Jordan galkhat lam Bethany khua a thupiang ahi hi. 29 A zing ciangin ama lam manawh a Jesu hong pai Johan in a muh ciangin, “En un, leitung mawhna a puakhia Pasian Tuuno! 30 ‘Ka nunga hong pai pa, ka mai-a omsa ahi manin kei hong khup zo hi,’ ci-a ka kiko lai-a ka genpa hih pa ahi hi. 31 Kei zong amah ka thei kei hi. Ahi hangin baptise-a kong paina pen Israel-te tunga amah a kipulak nading ahi hi,” a ci hi. 32 Tua ciangin Johan in teci panga: “Vantung panin vakhu bangin Kha hong kumsuka, ama tunga khawlden ka mu hi. 33 Baptize dinga kei hong sawlpa, ‘Kha hong kumsukin ama tunga a khawlna pa pen Khasiangtho-a hong baptize ding pa ahi hi,’ ci-in kei hong hilh lo hileh amah ka thei kei ding hi. 34 Ken ka mu khin ta a, Pasian Tapa hi, cih teci ka pang hi,” ci-in a gen hi. 35 A zing ciangin Johan a nungzuite lakah nih tawh tua lai-ah a om kik uh hi. 36 Amah in Jesu hong pai a muh ciangin, “En un, Pasian’ Tuuno!” a ci hi. 37 A nungzuite in hih thu a zak uh ciangin Jesu nung a zui uh hi. 38 Jesu kihei-a, amaute in a nung a zuih uh a muh ciangin, “Bang deih na hi uh hiam?” ci-in a dong hi. Amaute in, “Rabbi, (Siapa cihna) nang koi-a taam na hi hiam?” a ci uh hi. 39 Amah in, “Hong pai le uh cin na mu ding uh hi,” ci-in a dawng hi. Amaute va pai uh a, a omna a mu uh hi. Amah tawh tua ni a taam khawm uh hi. Tua hun nai sawmna pawl ahi hi. 40 Johan thugen za-a Jesu nung a zui nihte lakah Simon, Peter sanggampa Andrew khat ahi hi. 41 Andrew in a hih masak pen a sanggampa Simon zonga, “Messiah (Khrist cihna) ka mu zo uh hi,” ci-in a va gen ahi hi. 42 Tua ciangin Jesu kiangah amah a paipih hi. Jesu in amah en a, “Nang Johan tapa Simon na hi hi, na min ‘Cephas’(a kileh ciang Peterj)kici ding hi,” a ci hi. 43 A zing ciangin Jesu in Galilee lamah pai a sawm hi. Philip mu-a, “Ka nung hong zui in,” a ci hi. 44 Andrew le Peter mah bangin Philip zong Bethsaida khuapi mi mah ahi hi. 45 Philip in Nathanael a muh ciangin, “Moses in Thukham sunga ama thu a gelh, kamsangte in zong amah tawh kisai a na gelh uh, Joseph tapa Nazareth mi Jesu ka mu zo uh hi,” a ci hi. 46 Nathanael in, “Nazareth e! Tua panin na hoih piang thei maw?” ci-in a dong hi. Philip in, “Hong pai inla hong en in,” a ci hi. 47 Nathanael ama kiang zuana pai Jesu in a muh ciangin, “Hih lai-ah a sunga khialhna khat beek a om lo Israel mi taktak khat a om hi,” ci-in a gen hi. 48 Nathanael in, “Kei bang hong ci theih na hi hiam?” ci-in a dong hi. Jesu in, “Philip in nang hong sap ma, theikung nuai-a na om lai-in kong thei zo hi,” a ci hi. 49 Tua ciangin Nathanael in, “Rabbi, nang Pasian Tapa na hi hi. Israel Kumpipa na hi hi,” ci-in a genkhia hi. 50 Jesu in, “Theikung nuai-ah nang kong mu zo hi, ci-a kong gen manin na umk hi. Tua sanga thupizaw nate na mu ding hi,” a ci hi. 51 Amah in, “Nangl thutak kong geninah: Van kihongin, Mihing Tapa tungah Pasian vansawltakte a kumsuk le a kahto nam mu ding hi,” ci-in a genbeh lai hi.

Johan 2

1 A ni thum ni-in Galilee gam Cana ah mopawi khat a om hi. Tua lai-ah Jesu nu om a, 2 Jesu le a nungzuite zong tua mopawi ah kisam hi. 3 Lenggahzu a bei ciangin Jesu nu in, “Amaute’n lenggahzu a nei nawn kei uh hi,” ci-in a gen hi. 4 Jesu in, “Kong it numei aw, bang hanga kei hong kaaipaan na hi hiam, ka hun a tung nai kei hi,” a ci hi. 5 A nu in a nasemte kiangah, “Ama hong gen bangbang na hih un,” a ci hi. 6 Tua kiang nai-ah gallona sawmnih pan sawmthum a ta suang tuibel guk om-a tuate Jew-te biakna ngeina-a kisilna a zatte nam ahi hi. 7 Nasemte kiangah Jesu in, “Tuibel sungah tui dim un,” ci a, amaute in agong ciang a dim uh hi. 8 Tua khit ciangin amah in amaute kiangah, “Bang zah hiam khat suakkhia unla, pawi thusapa kiangah va puak un,” a ci hi. Amaute in a cih bangin a hih uh hi. 9 Pawi thusapa in tui, lenggahzu a kisuaksak pen a ciam hi. Tui a dim nasemte in a theih uh hangin amah in lenggahzu koi pan kingah cih a thei zo kei hi. Tua ciangin zipipa sam tuama, 10 "Mi khempeuh in lenggahzu alim pente hawm masa a, lenglate in a kham khit ciangin a lim lote hawm hi. Nang na hileh tu dong alim pente na sit lai hi,” a ci hi. 11 Jesu nalamdang bawlte lakah a masa pen hih Galilee gam Cana-a a bawl ahi hi. Amah in a minthanna tua bangin kilaaka, a nungzuite in amah a um uh hi. 12 Hih khit ciangin a nu, a sanggamte le a nungzuite tawh Capernaum ah a paisuk uh hi. Tua lai-ah ni tawmkha a taam uh hi. 13 Jew-te Paisan pawi hun a tun dektak ciangin, Jerusalem ah Jesu a pai to hi. 14 Biakinnpi huang sungah bawngte, tuute le vakhu zuak-a omte le sum khek-a tu midangte a mu hi. 15 Amah in satna khauhual tep nei bawl-a, tuute, bawngte le mi khempeuh biakinnpi huang sung panin a hawlkhia hi. Sum khekte dangka-tangte thehthangsaka, a sabuaite uh a lumletsak hi. 16 Amah in vakhu zuakte kiangah, “Hihte hih mun panin lakhia un. Bang hangin ka Pa inn van zuakna mun suaksak ngam na hi uh hiam!” a ci hi. 17 A nungzuite in, “Na inn ading ka aam luatna in kei hong netum ding hi,”b ci-a kigelh thu a phawk uh hi. 18 Tua ciangin Jew-te in, “Hihte khempeuh na hih theih nading thuneihna na neih lam ka theih nadingun kote nalamdang khat hong lak in,” ci-in a kal uh hi. 19 Jesu in, “Hih biakinnpi susia un, ni thum sungin ka ding kiksak ding hi,” ci-in a dawng hi. 20 Jew-te in, “Hih biakinnpi lam nading kum sawmli le kum guk a sawt hi. Nang ni thum sungin dingsak zo ding na hi hiam?” a ci kik uh hi. 21 Ahi hangin Jesu gen biakinnpi pen, ama pumpi ahi hi. 22 Misi panin amah a kithawhsak ciangin a nungzuite in hih a gensa thute a phawk kik uh hi. Tua ciangin Laisiangtho le Jesu gensa thute a um uh hi. 23 Paisan Pawi sung Jerusalem a, a om laitakin, a lim lamdang bawlte mi tampi in mu uh a, ama min a um uh hi.c 24 Ahi hangin Jesu in mi khempeuh thei ahi manin amaute tungah a ki-ap kei hi. 25 Amah in mihing lungsim sunga omte thei khina, mihing in mihing thu a gen ding kisam lo hi.

Johan 3

1 Jew-te vaihawm pawlte lakah Nicodemus kici Pharisee-te khat a om hi. 2 Amah zanin Jesu kiangah va pai-a, “Rabbi aw, Pasian kiang pana hong pai siapa na hi cih ka thei uh hi. Ahang in, Pasian in a ompih kei leh kuamah in na bawl lim lamdangte a bawl thei kei ding hi,” a ci hi. 3 Jesu in a dawnna in, “Thutak kong geninah, ‘Mi khatpeuh a suah kika kei leh Pasian gam a mu thei kei hi,” a ci hi. 4 Nicodemus in, “A khangham khinsa mi khat bangci in suak kik thei ding ahi hiam?” ci-in dong a, “A nih veina a suak dingin a nu sungah lut kik thei lo takpi mah ding hi!” a ci hi. 5 Jesu in, “Thutak kong geninah, tui le Kha-a suak kik lote peuhmah Pasian gamah a lut thei kei hi. 6 Ci-le-sa in ci-le-sa mah piangsaka, Khab in kha mah a piangsak hi. 7 Nangc suahkiksak pelmawh ding na hi hi ‘kong cih lamdang sa kei in. 8 Huih, a utna peuhah a nung hi. Aging na za hi, ahi hangin koi pan hong nung a, koi lamah nung ding cih na thei kei hi. Kha pana piang mi peuhmah tua bang ahi hi,” a ci hi. 9 Nicodemus in, “Hih thu bangci pian theih ding hiam?” ci-in a dong hi. 10 Jesu in, “Nang Israel-te siapa hi napi hih nate thei lo na hi hiam? 11 Thutak kong geninah, kote in ka theih uh ka gen uh a, ka muhsa uh teci ka pang uh hi. 12 Note kiangah leitung nate thu ka gen hangin na um kei uh hi. Tua ahileh vantung nate thu ka gen hangin bangci up thei ding na hi uh hiam? 13 Vantung pana hong pai Mihing Tapad longal vantungah kuamah a pai ngei kei hi. 14 Moses in gamlakah gul a khai bang tektekin Mihing Tapa kikhai ding hi. 15 Amah a um mite khempeuh in, nuntak tawntungna a neih theih nading ahi hi.e 16 Pasian in leitung it lua ahi manin, a Tapa a um khempeuh mangthang lo-a nuntak tawntungna a neih nadingin a Tapa khat neihsunf a pia hi. 17 Ahang in, leitung mawhpaihsak dingin Pasian in a Tapa leitungah a sawl kei hi. Ama tung tawnin leitung a honkhia dingin a sawl hizaw hi. 18 Amah a um khempeuh a kimawhpaih kei hi. Ahi hangin amah a um lo mi peuhmah Pasian Tapag khat neihsun a min um lo ahi manin mawh paihsa ahi hi. 19 Thutanna hih ahi hi: Leitungah Khuavak hong tung zo hi, ahi hangin mihingte in a gamtatnate uh gilo ahi manin khuavak a it tangun khuamial a it uh hi. 20 Gitlohna a hih mi peuhmah in a gamtatnate a kipholak ding lau ahi manin khuavak mudah a, khuavak ah a lut kei ding hi. 21 Ahi hangin thutaka a nungta mi peuhmah, a gamtatna khempeuh Pasian tungtawna sem a hina teltaka a kilat nadingin khuavak ah a lut hi,”h a ci hi. 22 Hih teng khit ciangin Jesu le a nungzuite Judea gam sungah pai uh a, tua lai-ah amaute tawh tawlkhat sung taamin a baptise uh hi. 23 Tu-in Johan in zong Salim kiang Aenon munah a baptise hi. Bang hang hiam cih leh, tua munah tui tam ahi manin a kibaptise dingin mite va pai den uh hi. 24 (Hih pen thong sunga Johan a kikhum ma ahi hi). 25 Johan nungzuite le Jewi pawlkhat kikalah biakna ngeina zui-a kisilna tawh kisai-in kiselna a piang hi. 26 Amaute Johan kiangah pai uh a, “Rabbi aw, Jordan gala na ompihpa – ama thu na genpa in baptise-a mi khempeuh in amah zuan uh hi,” a ci uh hi. 27 Hih thu ah Johan in, “Mihingte in vantung pana kipiate bek ngah thei hi. 28 ‘Kei, Khristj ka hi kei hi. Ama mai-a hong kisawlpa ka hi hi,’ ci-a ka gen note mahmah in teci na pang thei uh hi. 29 Mo pen zineipa aa ahi hi. Zineipa lawmpa in zineipa kithuahpihin ngak-a, zineipa aw a ngai hi; zineipa aw a zak ciangin lungnopna tawh a kidim hi. Tua lung nopna kei aa hi-a tu-in kicing ta hi. 30 Amah lian semsem dinga, kei ka neu semsem ding hi. 31 "Tunglam pana hong paipa na khempeuh tungah a om hi. Leitung pana hong paipa leitung aa hi-a leitung mi bangin thu a gen hi. Van tung pana hong paipa ahileh mi khempeuh tungah a om hi. 32 Amah in a muhsa le a zaksa teci panga, ahi hangin a teci panna kuamah in a sang kei hi. 33 Ama teci panna a sang mi in Pasian thutak ahi hi, cih a thukimpih ahi hi. 34 Ahang in, Pasian sawlpa in Pasian thute a gen hi. Pasiank in ama tungah ciangtan loin Kha a pia hi. 35 Pa in Tapa it a; na khempeuh a khutah a koih hi. 36 Tapa a um mi peuhmah in nuntak tawntungna a nei hi; ahi hangin Tapa a nial peuhmah in nuntakna a mu kei ding hi; ahang in, Pasian thangpaihna ama tungah a om hi,”l a ci hi.

Johan 4

1 Johan sangin Jesu in nungzui tam ngahzaw, tam baptise zaw hi, ci-in Pharisee-te in a za uh hi. 2 A taktakin Jesu hi loin a nungzuite in a baptise uh hizaw hi. 3 Topa in hih thu a zak ciangin Judea gam nusia-a, Galilee gamah khat vei a pai kik hi. 4 Amah Samaria gam tawnin a pai kul hi. 5 Tua hi-a Jacob in a tapa Joseph adingin a piakna mun kiang Samaria a khuapi khat, Sychar kici ah a tung hi. 6 Tua lai-ah Jacob tuikhuk a om hi. Jesu a khualzinna-in gim a, tuikhuk kiangah a tu hi. Tua hun pen nai gukna pawl ahi hi. 7 Samaria numei khat tui tawi-in va pai a, Jesu in ama kiangah, “Ka dawn ding tui nong pia diam?” a ci hi. 8 (A nungzuite an lei dingin khuapi sungah paikhin uh hi.) 9 Samaria numei in, “Nang Jew mi hi-in, kei Samaria numei ka hi hi, bangci-a tui dawn ding hong ngen na hi hiam?” a ci hi. (Ahang in, Samaria mite tawh Jew-te kithuah lo uh hi.a) 10 Jesu in, “Pasian letsong thei-in, na kianga tui hong ngenpa thei hi lecin, ama kiangah na ngen zaw ding a, amah in a nungta tui hong pia khin zo ding hi,” ci-in a dawng hi. 11 Numei in, “Sia aw, tuikhuk lah thuka, na khai nading bangmah na neih loh pi hih a nungta tui koi pan ngah thei ding na hi hiam? 12 Amah mah le a tate, a tuuhonte, a ganhonte in a dawnna uh, hih tuikhuk hong piapa ka pa uh Jacob sangin lianzaw na hi hiam?” a ci hi. 13 Jesu in, “Hih tui a dawnte peuhmah a dangtak kik ding hi; 14 ahi hangin kei piak tui a dawn mi peuhmah a dangtak ngei nawn kei ding hi. Ken ka piak tui, ama sungah tuinak suakin nuntak tawntungna dongin a phulto taktak ding hi,” ci-in a dawng hi. 15 Numei in ama kiangah, “Sia aw, ka dangtak nawn loh nading le hih muna tui khai-a ka pai nawn loh nadingin, tua tui kei hong pia in,” a ci hi. 16 Amah in tuanu kiangah, “Pai-in na pasal va sam inla, hong pai kik in,” a ci hi. 17 Amah in, “Pasal ka nei kei hi,” ci-in a dawng hi. Jesu in, “Pasal ka nei kei hi, na cih amaan hi, 18 a taktakin pasal nga na nei zo a, tu-a na neih pa pen na pasal a hi kei hi. Tu-a na gen pak maan mahmah hi,” a ci hi. 19 Numei in, “Sia aw, kamsang khat na hilam ka thei thei hi. 20 Ka pate un hih mualtungah bia uh a, ahi hangin no Jew-te in: Jerusalem bekah kibia thei hi, na ci se uh hi,” a ci hi. 21 Jesu in, “Numei aw, kei hong um in. Hih mual tung ahi a, Jerusalem ah ahi zongin Pa na biak loh hun uh hong tung ding hi. 22 No Samaria mite in na theih lohpi uh na bia uh hi; kote in ka theih uh ka bia uh hi. Ahang in, hotkhiatna, Jew-te pan ahi hi. 23 Ahi hangin a bia taktakte in a kha le thutak a, Pa a biak hun uh hong tung ding tham loin tu-in a tung zo hi, ahang in, tua banga biate bek Pa in a zong hi. 24 Pasian in kha ahi hi. Amah a biate in kha le thutakin a bia pelmawh ding uh hi,” a ci hi. 25 Tua numei in, “Tua Messiah (Khrist kici) hong pai ding cih ka thei hi. Amah hong pai ciangin eite tungah na khempeuh hong telgen ding hi,” a ci hi. 26 Tua ciangin Jesu in, “Amah pen tu-a nang hong hopih pa ka hi hi,” a ci hi. 27 Tua khit phetin a nungzuite tung kik uh a, numei tawh a kiho a muh uh ciangin lamdang a sa uh hi. Ahi hangin khat beek in, “Bang deihna hiam?” ahikeh “Bang hang tuanu hopih na hi hiam?” ci-in a dong kei uh hi. 28 Tua ciangin tua numei in tuibel nusia in khuapi sungah pai kik a, mite kiangah, 29 "Hong pai un, ka hihsa khempeuh kei tunga hong genpa khat hong en un. Hih pa Khristb hi kha lo ding hiam?” a ci hi. 30 Amaute khuapi panin paikhia uh a, ama lam a zuan uh hi. 31 Tua kalin a nungzuite in, “Rabbi aw, bang khatpeuh ne in,” ci-in a sawl uh hi. 32 Ahi hangin amah in amaute kiang ah, “A thu bangmah na theih loh uh an nek ding ka nei hi,” a ci hi. 33 Tua ciangin a nungzuite in, “Mi khatpeuh in an na puak zo hi ve maw?” a kici uh hi. 34 Jesu in, “Kei hong sawlpa deihna bang sep ding le tua nasep ka zawh ding, ka an ahi hi,” a ci hi. 35 "Note in, ‘tu zawh kha li ciangin an lak hun ta ding hi,’ ci hi lo na hi uh hiam? Note kong hilh hi, khuadakin lote en dih un! Ante min khin in lak hun ta hi. 36 Tu nangawn in buh atpa in thaman a sang hi. A vawh pa le a at pa a lungdam khawm theih nadingin tu nangawnin tawntung nuntakna ading an a la hi. 37 ‘Mi khat in vawh a, midang khat in a at hi,’ kici in thumaan ahi hi. 38 Na sep loh uh at dingin note kong sawl hi. Midangte in nakpi-in na sem uh a, amau sep gah note in na at uh hi,” a ci hi. 39 Tua numei in, “Ka hih ngeisa khempeuh hong gen hi,” ci-a teci a panna hangin tua khuapi a Samaria mite tampi in amah a um uh hi. 40 Tua ciangin Samaria mite ama kiangah pai-in amaute kiangah a taam nadingin kho uh a, ni nih a taam hi. 41 Ama thugente hangin thu-um tampi a kibehlap hi. 42 Amaute in tua numei kiangah, “Nang hong genna hang bek-a um ka hi nawn kei uh a, ko mahmah in tu-in ka za uh a, hih mipa, leitung Honpa taktak hi, cih ka thei uh hi,” a ci uh hi. 43 A ninih ni khit ciangin Galilee zuanin a pai hi. 44 (Jesu mahmah in, kamsangpa in ama gamah pahtawina ngah lo hi, cih a kawkkhia khin hi.) 45 Galilee ah a tun ciangin Galilee mite in amah a na muak uh hi. Amaute, Jerusalem a Paisan Pawi hun sungin va om kha uh ahi manin a hihsate khempeuh a mu zo uh hi. 46 Tui, lenggahzu a suahsakna mun Galilee gam Cana ah khat vei va hawh kik hi. Tua lai-ah kumpi nasem ulian khat oma, a tapa Capernaum ah cina-in a lum hi. 47 Hih pa in, Judea panin Galilee ah Jesu tung zo cih a zak ciangin ama kiangah va pai a, a si dektak a tapa a va damsak nadingin a thum hi. 48 Jesu in ama kiangah, “No mihingte in na lamdang le a lamdangte na muh loh ngalun na um ngei kei ding uh hi,” ci-in a gen hi. 49 Tua kumpi nasem ulianpa in, “Sia aw, ka ta a sih ma-in hong paisuk in” a ci hi.” 50 Jesu in, “Pai lel in, na tapa nungta ding hi,” a ci hi. Tuapa in Jesu thugen muangpah a, a paikhia hi. 51 Amah lamkal ah a om laitakin a nasemte in a tapa nungta hi, cih thu tawh amah a na dawn uh hi. 52 Amah in a tapa noptuam hun a kan ciangin amaute in, “Zanni a nai sagihna hunin nattun a dam hi,” a ci uh hi. 53 Jesu in, “Na tapa a nungta ding hi,” a cih hun lian hi, cih a pa in a thei hi. Tua ciangin amah le a innkuanpihte in a um uh hi. 54 Hih pen Judea pan Galilee ah Jesu, tun zawh nalamdang a bawl a nihna ahi hi.

Johan 5

1 Tua nung a sawt loin Jew-te pawi sim dingin Jerusalem ah Jesu a paito hi. 2 Jerusalem a, Tuu kongpi kici kiangah Aram pau-a Bethsaidaa kici tuili khat a om hi. Tua tuili kimkotah talap nga a om hi. 3 Hih munah a lumden mittawte, khebaite, pumzawte, mipoi tampi a om uh hi.b 4 A hunhunin Topa vansawltak kumsukin tui va lok zelzel hi. Tua tui a tat ciangin a kidiah masa penpen a cinatna peuhpeuh a dam hi.c 5 Tuate lakah kum sawm-thum-le-giat sung a zawngkhal khat a om hi. 6 Jesu in tuapa mu-a, tua munah tua bangin sawtveipitak lum hi, cih thei-in a kiangah, “Na dam nuam hiam?” ci-in a dong hi. 7 Tua mi zawngkhalpa in, “Sia aw, tui a tat ciangin, tui sungah hong diah ding kuamah ka nei kei hi. Kidiah dinga ka kithawi ciangin kei ma-ah midang khat na kidiah khin zel hi,” a ci hi. 8 Tua ciangin Jesu in ama kiangah, “Ding in, na phek la inla pai in,” a ci hi. 9 Tuapa thakhatin dampah-a a phek la-in a pai hi. Hih thupiang Sabbath ni khat ahi hi. 10 Tua ahitak ciangin Jew-te in a kidam sakpa kiangah “Sabbath ni ahi hi, thukham in phek na puak ding kham hi,” a ci uh hi. 11 Ahi hangin amah in, “Kei hong damsakpa in ka kiangah, ‘Na phek la inla pai in,’ hong ci hi,” ci-in a dawng hi. 12 Tua ciangin amaute in, “‘Na phek la inla pai in,’ hong ci kua hiam?” ci-in a dong uh hi. 13 Tua lai-a om mihonte lakah Jesu lutmangpah ahi manin a cidampa in a damsakpa kua hiam, cih a thei kei hi. 14 Tua nung ciangin Jesu in amah biakinnpi ah mu a, “En in, na dam kik hi, mawhna na bawl nawn kei in, tua hikeileh nang tungah a siazaw hong tung kha ding hi,” a ci hi. 15 Tua mipa paikhia-a, Jew-te kiangah amah a damsakpa Jesu ahilam a gen hi. 16 Tua ciangin Jesu in hih nate Sabbath ni-a sem ahi manin Jew-te in amah a bawlsia uh hi. 17 Jesu in amaute kiangah, “Ka pa in tuni mahmah dongin na sem tawntunga, kei zong ka sem hi,” a ci hi. 18 Jesu in Sabbath ni a tan loh man bek hi loin Pasian nangawn ama Pa a cihna hang le Pasian tawh a kikim-a a kikoihna thute hangin Jew-te in amah thah ding a hanciam semsem uh hi. 19 Jesu in amaute hih in a dawng hi: “Thutak kong geninah, Tapa in amah guakin bangmah a hih thei kei hi; a Pa hih a muhsate bek hih thei hi. Bang hang hiam cih leh, Pa hih peuhpeuh Tapa in zong a hih hi. 20 Ahang in, Pa in Tapa it-a a hih khempeuh amah a lak hi. Himah hi, lamdang na sak dingun hihte sanga a lamdangzaw nangawn a lak lai ding hi. 21 Ahang in, Pa in misite nuntakna pia-in a thawhkiksak bangin Tapa in zong a piak nop mite tungah nuntakna a pia hi. 22 Tua banah, Pa in kuama tungah thu a khen kei hi, ahi hangin thukhenna khempeuh Tapa tungah a ap hi; 23 tua pen mi khempeuh in Pa a pahtawi bangin Tapa a pahtawi nading uh ahi hi. Tapa a pahtawi lote in amah a sawlpa, Pa pahtawi lo ahi hi. 24 "Thutak kong geninah, ka thugen za a, kei hong sawlpa a um peuh in nuntak tawntungna a nei hi; a kimawhpaih kei ding hi. Amah in sihna kantanin nuntakna ah tung zo hi. 25 Thutak kong geninah, misite in Pasian Tapa aw a zak hun hong tung dinga, tu-in zong hong tung zo hi; a zate a nungta ding hi. 26 Ahang in, Pa in amah mah-a nuntakna a neih bangin Tapa in zong amah mah-a nuntakna a neih nadingin a pia zo hi. 27 Amah Mihing Tapa ahi manin thukhen nading thuneihna amah in pia zo hi. 28 "Hih thu lamdang sa kei un, ahang in, amau han sunga omte in ama aw za in, 29 hong paikhiat hun hong tung dinga, a hoih a nasemte a nungta dingin tho ding uh hi. A tatsiate kimawhpaih dingin tho ding uh hi. 30 Kei thu guakin bangmah ka hih thei kei hi. Ka zak bangin thu ka khen hi.Tua ahi ciangin ka thukhenna atang hi. Ahang in, kei lungkim nading zong loin kei hong sawlpa lungkimna ka zong zaw hi. 31 "Kei thu ah kei le kei teci kipang leng, ka teci panna a kip kei ding hi. 32 Kei hong angvan teci pang midang khat om hi, kei thu teci panna a kip hi, cih ka thei hi. 33 "Note in Johan kiangah na kansak zo uh hi. Amah in thutak teci a pang hi. 34 Mihing teci panna ka sang hi, ka cihna hi loin note in hotkhiatna na ngah theih nadingun ka gen hizaw hi. 35 Johan pen meivak hi-a a kuang in khua a vaksak hi. Ama khuavak ah hun khat sung nopsak ding na teel uh hi. 36 "Johan teci panna sanga thugik zaw ka nei hi. Ahang in, Pa in zawh khit dinga hong piak tua ka nasep pen Pa in kei hong sawl ahina teci ahi hi. 37 Kei hong sawlpa Pa mahmah in kei tawh kisai teci a pang hi. Note in a aw na za ngei kei uh a, a mel zong na mu ngei kei uh hi. 38 Ama sawlpa um lo na hi manun a thu zong note sungah a teng kei hi. 39 Laisiangtho simna hangin nuntak tawntungna a kinei sa na hi manun limtakin na sind uh hi. Hih Laisiangtho, kei thu teci pang ahi hi. 40 Tua hi napi nuntakna ngah dingin kei kiangah nong pai nuam kei uh hi. 41 "Mite hong phatna ka sang kei hi. 42 Ahi hangin note kong thei hi. Note lungsungah Pasian itna na neih loh uh ka thei hi. 43 Ka Pa minin kong pai-a, note in nong sang kei uh hi. Ahi hangin midang khat ama minin hong pai leh, amah na sang ding uh hi. 44 Note khat le khat kiphatna kisangin, Pasian khat beke hong phatna ngah ding na sawm kei uh leh bangci up thei ding na hi uh hiam? 45 "Ahi hangin Pa mai-ah note hong mawhsak dingin hong ngaihsun kei un. Note hong mawhsak, na lametna uh a kingakna pa Moses ahi hi. 46 Moses in kei thu gelh zo ahi manin amah na up uh leh kei zong nong up ding uh ahi hi. 47 Ahi zongin ama gelhsate na up loh nung sangun kei gente bangci up thei ding na hi uh hiam?” a ci hi.

Johan 6

1 Tua nung ciangin Galilee Tuipi (tua pen Tiberias tuipi) galkhat lam pekah Jesu a galkah hi. 2 Mihon tampi in cinate tunga a hihsa lim lamdangte mu uh ahi manin amah a zui uh hi. 3 Tua ciangin mual pangah Jesu paito-a a nungzuite tawh a tu hi. 4 Jew-te Paisan Pawi hun a nai ta hi. 5 Jesu a daktoh leh ama lam zuana pai mihonpite a mu hi. Philip kiangah, “Hih mihonpite nek ding an koi-ah i lei ding hiam?” a ci hi. 6 Amah in a hih ding a lungsim sungah theikhol khin napi a zia-et nop manin a dot ahi hi. 7 Philip in, “Hih teng in kam khat ciat a nek ding uh kha giat thamana in zong a lei zo kei ding hi!” ci-in a dawng hi. 8 A nungzui dangte khat, Simon Peter sanggampa Andrew in, 9 "Hih lai-ah naupangno khat in mangbuh ham lum nga le ngasa neu nih a nei hi. Ahi zongin mihing hizah in bang tham a ne ding uh ahi hiam?” a ci hi. 10 Jesu in, “Mipite na tusak un,” a ci hi. Tua munah lopa a tam hi. A tu mi peuhmah tul nga bang a pha hi. 11 Tua ciangin Jesu in anlum la a, lungdam ko-in a tu mihonpite lakah a duh zahzah uh a luisak hi. Tua mah bangin ngasa zong a hih hi. 12 Amaute in a duh zahzah uh a nek khit pikpek uh ciangin a nungzuite kiangah, “Khamval themte khawm kik un. A thelthang khat beek omsak kei un,” a ci hi. 13 Tua ciangin mangbuh ham lum nga a nete in a khamval uh athem a khop uh leh bawmta sawm le nih a pha hi. 14 Jesu nalamdang bawl mite in a muh khit uh ciangin, “Hih pa, leitunga hong pai ding Kamsangpa hi takpi hi,” a ci pan uh hi. 15 Amaute in zawhthawh thu-in Jesu, kumpi-in koih nuam uh ahilam Jesu in a theih ciangin mual tungah a kihem khia hi. 16 Nitak ciangin a nungzuite tuilipi ah paisukin, 17 gunkuang ah tuang uh a, tuilipi kantanin, Capernaum lamah a galkah uh hi. Tua hunin khua mial ta-a, Jesu lah a mau kiang a tung nai kei hi. 18 Huih khauh nunga, tui nakpi-in a kilok hi. 19 Amaute in tai thum ahikeh tai thum le alangb a hot khit uh ciangin gunkuang lam manawh in Jesu tui tunga pai mu uh a, a lau mahmah uh hi. 20 Ahi hanign amaute kiangah, “Keimah ka hi hi, lau kei un,” a ci hi. 21 Tua ciangin amaute in gunkuang sungah amah tuangsak nuam uh a, tua khit phetin a manawhna uh tuigei-ah gunkuang a tung pah hi. 22 A zing ciangin tuilipi galkhat-a om mihonpite in, gunkuang khat bek tua lai-ah om a, Jesu lah a nungzuite tawh tuang khawm loin amauteng guak a pai uh a thei uh hi. 23 Tua ciangin Tiberias pan gunkuang pawlkhat va pai-a, Topa in lungdam a koh khit ciangin anlum a nekna mun kiang uh, mun khatah a khawlsak uh hi. 24 Mihonpite in Jesu le a nungzuite tua lai-ah a om loh lam a theih uh ciangin gunkuang tungah tuang leuleu uh a, Jesu zong dingin Capernaum ah a pai uh hi. 25 Tuilipi galkhatah amah a muh uh ciangin amaute in, “Rabbi aw, cik-a hihtak tung na hi hiam?” ci-in a dong uh hi. 26 Jesu in thutak kong geninah, lim lamdang na muh manun kei hong zong na hi kei uh a, anlum ne in na gilvah manun kei hong zong na hi uh hi. 27 A sia thei an ngah nadingin na na sep uh sangin Mihing Tapa hong piak ding, nuntak tawntungna donga kimang ding an ngah nadingin sem zaw un. Pa Pasian in amah a sanna ciamtehna ama tungah a koih zo hi,” ci-in a dawng hi. 28 Tua ciangin amaute in, “Pasian deih na ka sep nadingun bang hih kul ahi hiam?” ci-in a dong uh hi. 29 Jesu in, “Ama hong sawlpa up ding, Pasian’ na sepna ahi hi,” ci-in a dawng hi. 30 Tua ciangin amaute in, “Tua ahileh ka muh uh cianga nang kong up theih nadingun lim lamdang bang nong lak ding hiam? Bang hih ding na hi hiam? 31 ‘Amah in vantung panin amaute nek ding anlum a pia hi,’c ci-a kigelh bangin ka pute un gamlakah manna a ne uh hi,” a ci uh hi. 32 Jesu in amaute kiangah, “Thutak kong geninah, vantung pana anlum hong pia Moses hi lo hi. Vantung pana anlum taktak hong pia, ka Pa ahi hi. 33 Ahang in, Pasian anlum ahileh vantung pan hong paisuk in, leitung khempeuh nuntakna a piapa ahi hi,” a ci hi. 34 Amaute in, “Sia aw, tu-a kipan tua anlum ko hong pia in,” a ci uh hi. 35 Tua ciangin Jesu in telgen a, “Kei mah, nuntakna anlum ka hi hi. Kei kianga hong paite a gilkial ngei kei dinga, kei hong umte a dangtak ngei kei ding hi. 36 Ahi hangin kong gensa bangin note in hong mu khin napi nong um kei lai uh hi. 37 Ka Pa hong piakte khempeuh ka kiangah hong pai dinga, ka kianga hong pai khempeuh ka hawlkhia ngei kei ding hi. 38 Ahang in, kei deih bang sem ding hi loin kei hong sawlpa deih banga sem dingin vantung pan kong paisuk hi. 39 Kei hong sawlpa deih na ahileh, kei hong piak khempeuh khat zong mansuah lo a, nitawp ni ciangin amaute ka thawhsak ding ahi hi. 40 Ahang in, ka Pa deihna ahileh Tapa mu a, amah a um peuhpeuh in nuntak tawntungna nei-a, ni nunung ni ciangin amah ka thawhsak ding ahi hi,” a ci hi. 41 Amah in, “Vantung pana hong pai suk anlum ka hi hi,” a cihna hangin Jew-te in amah a phunsan uh hi. 42 Amaute in, “A nu le a pa i theih mahmah Joseph tapa Jesu hi lo hiam. Bangci a, ‘Vantung pana hong paisuk ka hi’ ci thei ahi hiam?” a ci uh hi. 43 Jesu in, “Note phun zelzul nawn kei un. 44 Kei hong sawlpa, Pa in a huai lohte khat beek kei kiangah hong pai thei lo dinga, hong paite lah ni nunung ni ciangin ka thosak ding hi. 45 Kamsangte laibu sungah, ‘Pasian in amaute khempeuh a hilh ding hi,’d ci-in kigelh hi. Ka Pa thu ngai-a ama kianga a sin khempeuh ka kiangah hong pai hi. 46 Pasian kiang pana hong pai mi khat longal Pa a mu ngei a om kei hi. Amah bek in Pa a mu zo hi. 47 Thutak kong geninah, a um mi in nuntak tawntungna a nei hi. 48 Keimah, nuntakna anlum ka hi hi. 49 Na pute na pate un gamlak ah manna a nek uh hangin a si thei lai veve uh hi. 50 Ahi hangin mite in ne-a, a sih theih nawn lohna uh vantung pana hong paisuk anlum hih lai-ah a om hi. 51 Keimah in vantung pana hong pai a nungta anlum ka hi hi. Mi khat in hih anlum a nek leh a nungta tawntung ding hi.Hih anlum in leitung buppi nuntak nadinga ka piak ding ka sa ahi hi,” a ci hi. 52 Tua ciangin Jew-te in, “Hih pa in i nek dingin a sa bang hong ci piak theih ding hiam?” ci-in nakpi-in a kinial uh hi. 53 Jesu in amaute kiangah, “Thutak kong geninah, Mihing Tapa a sa ne-a, a si na dawn kei uh leh note sungah nuntakna na nei kei ding uh hi. 54 Ka sa ne a, ka si a dawn peuhmah in nuntak tawntungna a nei hi. Ni nunung ni ciangin tua mi ka thokiksak ding hi. 55 Ahang in, ka sa, an taktak hi-a ka si dawn ding taktak ahi hi. 56 Ka sa ne a ka si a dawn peuhmah kei sungah tenga, ama sungah kei ka teng hi. 57 A nungta Pa in kei hong sawl-a, Pa hangin kei ka nuntak bangin kei-a kivak peuhmah kei hangin a nungta ding hi. 58 Hih in Vantung pana hong kumsuk anlum ahi hi. Na pute na pate un manna ne uh a, a si veve uh hi; ahi hangin hih anlum-a kivakte a nungta tawntung ding hi,” a ci hi. 59 Hih thu, Capernaum a synagogue ah thu a hilh laitaka a gen ahi hi. 60 A nungzuite tampi in hih thu a zak uh ciangin, “Hih in a khauh thuhilhna ahi hi. Kua in sang thei ding hiam?” a ci uh hi. 61 Hih thu ah a nungzuite phun uh cih a theih ciangin Jesu in amaute kiangah, “Hih thu in no hong dong ahi hiam? 62 Note in Mihing Tapa ama-a a omna munah a kahtoh mu le uh cin, bang na ci tazen uh tam! 63 Kha in nuntakna a pia hi, ci-le-sa bangmahin kimang lo hi. Note tunga kong gen thute khae hi-a amaute nuntakna ahi hi. 64 Ahi zongin note lakah a um lo na om lai uh hi,” a ci hi. Ahang in, Jesu in a kipatcilin amaute kua teng in um lo dinga, kua in lehhek ding cih a thei khol khin hi. 65 Amah in a gen ban zom lai-a, “Pa in a hihtheihsakte longal kuamah ka kiangah hong pai thei lo hi, ka cihna ahang hih ahi hi,” a ci hi. 66 Hih huna kipan a nungzui mi tampi nunghei-in amah a zui nawn kei uh hi. 67 Jesu in Sawm-le-nihte kiangah, “No zong kei nong taisan nuam uh hiam?” ci-in a dong hi. 68 Simon Peter in, “Topa ko kua kiang ah pai ding ka hi uh hiam? Nangmah in nuntak tawntungna thu na nei hi. 69 Pasian’ Mi Siangtho na hi cih kong um uh a, kong thei uh hi,” a ci hi. 70 Tua ciangin Jesu in, “No, Sawm-le-nihte hong teel khin hi lo ka hi hiam? Hi napi note lak nangawn ah khat, dawi mangpa ahi hi!” ci-in a dawng hi. 71 (Sawm-le-nihte lakah khat ahi hanga a nung cianga a lehhek ding pa Simon Isacariot tapa Judas a genna ahi hi.)

Johan 7

1 Hih teng khit ciangin Jew-te in Jesu thah sawmin tua munah a ngak uh ciangin Judea pan kihemkhia-in Galilee kim tengah a vak kawikawi hi. 2 Ahi hangin Jew-te Biakbuk Pawi hun nai ta a, 3 Jesu sanggamte in, “Na nungzuite in nalamdang na bawlte a muh theih nadingun hih mun nusia in Judea ah na pai ding kilawm hi. 4 Tangpi theih tham mi a hi nuam peuhmah in a simthamin na a sem ngei kei hi. Hih nate hih na hi nungsang, leitung mite mai-ah kilakkhia in,”a ci uh hi. 5 Ahang in, ama sanggamte nangawn in amah a um kei uh hi. 6 Tua ahi ciangin Jesu in amaute kiangah, “Kei ading hun hoih a tung nai kei hi. No adingin hun khempeuh a hun ahi hi. 7 Leitung in no hong mudah thei kei ding hi. Ahi hangin a gamtat hoih lote lakkhia ka hi manin kei hong mudah hi. 8 Tua Pawi va sim un. Kei hun tung nai lo ahi ciangin tua Pawi simin ka pai naia kei ding hi,” a ci hi. 9 Hihte a gen khit ciangin Galilee ah a taam lai hi. 10 Ahi zongin a sanggamte in pawi sim dinga a paisan khit uh ciangin mipite theih lohin amah zong va paisim hi. 11 Pawi bawlna phualah Jew-te in amah kan uh a, “Tua mipa koi-ah om hiam?” ci-in a dong uh hi. 12 Mihonpite lakah ama thu kihuausim uh a, a kizel thang hi. Pawlkhatte in, “Amah mi hoih hi,” a ci uh hi. Adangte in, “Hi kei, amah’n mite a khem hi,” a ci uh hi. 13 Ahi hangin Jew-te kihtakna hangin ama thu kuamah in mipi zakin a genkhia kei uh hi. 14 Pawi bawlna alang bang a kiman ciangin biakinnpi tualah Jesu paito in thuhilh a kipan hi. 15 Jew-te in lamdang sa in, “Hih mipa in sinna nei lo napi hih bang theihna sang koi pan ngah hi ding hiam?” ci-in a kidong uh hi. 16 Jesu in, “Ka thuhilhte kei aa ahi kei hi. Hong sawlpa kiang pana hong pai ahi hi. 17 Mi khatpeuh in Pasian deihna hih ding a teel leh, ka thuhilhna Pasian pan hiam, ahikeh keima thu a gen ka hi hiam, cih a mukhia ding hi. 18 Amah leh amah-a thugen peuhmah in ama minphat nading zongin a gen hi. Ahi hangin amah a sawlpa min phat nading thu gen pa ahileh mi thutak hi a, ama thu ah zuauthu bangmah a om kei hi. 19 Moses in note thukham hong pia zo hi lo ahi hiam? Hi napi note khat beek in thukham na zui kei uh hi. Bang hangin kei thah hong sawm na hi uh hiam?” a ci hi. 20 Mihonte in, “Nang dawi lut na hi hi; kua in nang thah hong sawm ahi hiam?” ci-in a dawng uh hi. 21 Jesu in amaute kiangah, “Nalamdang khat ka bawl-a, na vekun lamdang na sa uh hi. 22 Ahi zongin Moses in vun-at ding thu hong piak manin (A taktakin Moses pana hong kipia hi loin pupite pan peka hong kipia hizaw hi.) Sabbath ni-in nau-pangte vun na atsak uh hi. 23 Sabbath ni-a naupangte vun-at in Moses thukham palsat lo ahileh bang hangin Sabbath ni-a mi ka damsiangsak ciangin ka tungah heh na hi uh hiam? 24 A pualam-a kilangkhia bek enin thu na khen kei unla, amaantakin thu na khen un,” a ci hi. 25 Tua laitakin Jerusalem mite pawl khat, thu dot ding kipan uh a, “Amaute in thah a sawm uh hih pa hi lo hiam? 26 Amah hiah om a, tangpi zakin thu gen napi, amaute in kam khat beek a ci ngam kei uh hi. Thunei vaihawmte in amah Khristb taktak hi, ci ta uh hi inteh maw? 27 Ahi hangin hih mipa koi pan hong pai cih i thei hi. Khrist hong pai ciangin amah koi pana hong pai cih kuamah in a thei kei ding hi,” a ci uh hi. 28 Tua hun Jesu in biakinnpi tual ah thu a hilh laitak hi-a, “Himah hi, kei nong thei uh hi. Koi pana hong pai cih zong nong thei uh hi. Kei thu-a hih lai-a om ka hi kei hi. Ahi hangin kei hong sawlpa a thumaan hi. Note in amah na thei kei uh hi. 29 Ahi hangin kei, ama kiang pan ka hi-a, amah in kei hong sawl ahi manin, amah ka thei hi,” ci-in a kikokhia hi. 30 Amaute in hih thu ah mat a sawm uh hi. Ahi hangin a hun tung nai lo ahi manin kuamah in ama tungah khut a nga kei hi. 31 Tua hi napi mipite lakah tampi in amah a um lai uh hi. Amaute in, “Khrist hong pai ciangin hih mipa bawl sangin lim lamdang zaw a bawl ding hiam?” a kici uh hi. 32 Ama thu tua banga mipite a kihuau sim uh Pharisee-te in a za uh hi. Tua ciangin siampi makaite le Pharisee-te in amah man dingin biakinnpi cingte a sawl uh hi. 33 Jesu in, “Note tawh hun tawm no sung bek ka om a, tua khit ciangin kei hong sawlpa kiangah ka pai ding hi. 34 Kei nong zong ding uh a, ahi hangin nong mu kei ding uh hi; ka omna ah nong pai thei kei ding uh hi,” a ci hi. 35 Jew-te in, “Hih pa i muh theih lohna mun koi lai-ah pai sawm hiam? Greek-te laka kithehthang i mipihte lakah pai-in Greek-te hoh hilh ding ahi tam? 36 ‘Kei nong zong ding uh a, ahi hangin nong mu kei ding uh hi; ka omna ah nong pai thei kei ding uh hi,’ a cih ciangin bang a cihnopna hi ding hiam?” a kici uh hi. 37 Pawi, a ni nunungpen le a thupi pen ni-in Jesu dinga, “A dangtak mi khatpeuh a om leh kei kiangah hong pai-in dawn ta hen. 38 Laisiangtho gensa bangin, kei hong um mi peuhmahd sung pan a nungta tui lui-in a luang ding hi,” ci-in nakpi-in a kiko hi. 39 Hih in amah a umte in a nung ciangin a ngah ding uh Kha a genna ahi hi. Jesu kipahtawi nai lo ahi manin tua hun dong Kha a kipia nai kei hi. 40 Ama thute a zak uh ciangin mi kimkhat in, “Hih pa tua Kamsangpa hi takpi hi,” a ci uh hi. 41 Adangte in, “Amah Khrist ahi hi,” a ci uh hi. Adang pawlkhatte leuleu in, “Bang ci-a, Galilee pan Khrist hong pai thei ding hiam? 42 ‘Khrist pen David innkuane pan le David tenna khuapi Bethlehem pan hong pai ding hi,’ ci-in Laisiangtho in gen hi lo ahi hiam?” a ci uh hi. 43 Tua bangin Jesu hangin mihonpite a kikhen uh hi. 44 Pawlkhatte in amah a mat nop uh hangin ama tungah kuamah in khut a nga kei hi. 45 A tawpna ah, siampi makaite le Pharisee-te kiangah biakinnpi cingte ciah kik uh a, “Bang hangin amah hong paipih lo na hi uh hiam?” ci-in amaute in a dong uh hi. 46 A cingte in, “Hih mipa gen bangin kuamah in thu a gen ngei kei hi,” ci-in a pulak uh hi. 47 Pharisee-te in, “Note zong hong khem zo ta, na cihna uh maw?” ci-in a dongkhak uh hi. 48 Gam-ukte khempeuh ahikeh Pharisee-te khatpeuh in amah um uh ahi hiam? 49 Hi lo! Ahi hangin thukham neukha zong a thei lo hih mihonte – hamsiatna thuak ahi uh hi,” a ci uh hi. 50 A masa lai-a Jesu kianga a paingei amau mite Nicodemus in, 51 "I thukham sungah, ama thu za masa lo, a nasepna mu masa loin mi mawhpaih nading thu a om hiam?” ci-in a dong hi. 52 Amaute in, “Nang zong Galilee pan na hi hiam? En lecin Galilee panin kamsangf hong pai lo hi, cih na mu ding hi,” ci-in a dawng uh hi. 53 Tua ciangin amaute a inn tek uah a ciah uh hi.

Johan 8

1 Jesu ahileh Olive Vum ah a pai hi. 2 Ni suah tungin amah biakinnpi tualah a kilang kik hi. Mi khempeuh a kimah kikhawm uh a, amaute thuhilh dingin a tu hi. 3 Thukham siate le Pharisee-te in angkawm kimlai a mat uh numei khat a va puak uh hi. Amaute in mihonpite mai-ah amah dingsak uh a, 4 Jesu kiangah, “Sia aw, hih numei a angkawm laitaka kiman ahi hi. 5 Thukham sungah Moses in tua bang numeite suanga den dingin thu a pia hi. Tu-in nang bang na gen ding hiam?” a ci uh hi. 6 Amah mawhmat theih nadingin hih dotna tawh a thangsiah uh hi. Ahi hangin Jesu kunsuka, a khutme in leilak a gelh hi. 7 Amaute in a dot cinten uh ciangin Jesu tutang toin amaute kiangah, “Note mawh nei lo khatpeuh a om leh tuapa in amah suangin deng masa hen,” a ci hi. 8 Amah kunsuk kik-a leilak a gelh hi. 9 Tua laitakin hih thu a zate a tek pente masa in khatkhatin paikhia uh a, Jesu le a kianga ding numei bek a om lai hi. 10 Jesu tutang to kik-a, “Numei aw, amaute koi-ah om uh hiam? Kuamah in hong mawhpaih lo hiam?” ci-in a dong hi. 11 Numei in, “Kuamah in hong mawh paih kei, sia aw,” a ci hi. Jesu in, “Ken zong kong mawhpaih kei hi, tu-in pai inla, mawhna tawh na nuntakna pen na nusia in,” ci-in a thuhilh hi. 12 Jesu in mihonpi tungah thu a gen khit ciangin, “Keimah leitung khuavak ka hi hi. Kei hong zui peuhpeuh khuamial lakah pai loin nuntakna khuavak a nei ding hi,” a ci hi. 13 Pharisee-te in, “Hih thu ah nangma thu nangmah in teci na kipang hi. Na teci panna a kip kei hi,” ci-in a to uh hi. 14 Jesu in, “Keima thu keimah in teci ka pang zongin ka teci panna a kip hi. Ahang in, koi panin hong pai, koi lamah pai ding cih ka kithei hi. Ahi hangin note in kei, koi pana hong pai, koi-ah pai ding cih neukha zong na thei beek kei uh hi. 15 Note in mihing thukhen bangin na khen uh a, ken kuama tungah thu ka khen kei hi. 16 Ahi hangin ken thu ka khen leh kei guak-a khen hi lo ka hi manin ka thukhenna amaan hi. Kei hong sawlpa, Pa tawh ka ding khawm hi. 17 Note neih thukham sungah, ‘Mi nih in teci a pan nak leh kip hi,’ ci-in kigelh hi. 18 Keima thu kei le kei teci ka kipanga, ka teci dang khat, ka Pa kei hong sawlpa ahi hi,” ci-in a dawng hi. 19 Tua ciangin amaute in, “Na Pa koi-ah om hiam?” ci-in a dong uh hi. Jesu in, “Note in kei ka hi-a, ka Pa ahi zongin na thei kei uh hi. Kei hong thei le uh cin, ka Pa zong na thei ding uh hi,” ci-in a dawng hi. 20 Hih thute biakinnpi huang sung, biakna-a kipia nate koihna munah, a hilh lai-a a gen ahi hi. Ama hun tung nai lo ahi manin kuamah in a man kei hi. 21 Jesu in khat vei genbeh lai-a, “Kei ka paikhiamang dinga, nong zong ding uh hi; note na mawhnate uh sungah na si ding uh hi. Ka paina ah nong pai thei kei ding uh hi,” a ci hi. 22 Hih thu a gen ciangin Jew-te in, “Amah le amah kithat ding hi ding hiam? Bang dinga, ‘Ka paina munah nong pai thei kei ding uh hi ci hi ding hiam?” ci-in a kidong uh hi. 23 Jesu in a thugen ban zom lai-a, “Note nuai lam pan na hi uh a, kei, tung lam pan ka hi hi. Note hih leitung pana, na hi uh a kei, hih leitung pan ka hi kei hi. 24 Na mawhnate uh sungah na si ding uh hi, kong ci hi. Keimah tua ka cih paa ka hi cih na up kei uh leh na mawhnate uh sungah na si takpi ding uh hi,” a ci hi. 25 Amaute in, “Nang kua na hi hiam?” ci-in a dong uh hi. Jesu in, “Kong kipulak tawntung sa bang ka hi hi. 26 Note tungah thukhena gen ding tampi ka nei hi. Ahi hangin kei hong sawlpa muantham ahi manin ama tung pana ka zakte leitung buppi ka hilh hi,” ci-in a dawng hi. 27 A Pa thu a gen ahilam amaute in a phawk thei kei uh hi. 28 Tua ciangin Jesu in, “Mihing Tapa na khaitoh khit uh ciangin kei a tua ci ding mah ka hilam nong thei ding uh hi. Pa in kei hong hilh teng bek ka gena, kei thu-in bangmah ka sep loh lam zong na thei ding uh hi. 29 Ama lungkimna bek sem ka hi manin, kei hong sawlpa kei tawh omkhawma, kei guak hong nusia kei hi,” a ci hi. 30 Amah a pau laitak nangawnin mi tampi in amah a um uh hi. 31 Jesu in amah a um Jew-te kiangah, “Ka hilhna na let uh leh ka nungzuite taktak na hi uh hi. 32 Tua ciangin thutak na thei ding uh a, tua thutak in note hong suaktasak ding hi,” a ci hi. 33 Amaute in, “Kote Abraham suanteb ka hi uh a, kuama sila ka suak ngei kei uh hi. Bangci a hong kisuaktasak ding ci thei na hi hiam?” ci-in amah a dong uh hi. lk 3:8 34 Jesu in, “Thutak kong geninah, mawhna a bawl peuhmah mawhna sila ahi hi. 35 Silate in, innkuan sungah munkip a nei kei hi. Ahi hangin tapa in a tawntungin innkuan sung mi ahi hi. 36 Tua ahi ciangin Tapa in note hong suaktasak leh na suakta taktak ding uh hi. 37 Note Abraham suan na hi uh kong thei hi. Ahi zongin ka thu note sungah tasak zo lo na hi manun kei hong that dingin na kiging khin zo uh hi. 38 Pa omna muna ka muhsate no tungah kong gen hi. Note in na pac uh tung pana na zakte uh na hih uh hi,” a ci hi. 39 Amaute in, “Ka pa uh Abraham ahi hi,” ci-in a dawng uh hi. Jesu in, “Note Abraham tate hi le uh cind Abraham septe na sem ding uh hi. 40 Tua bang ahileh Pasian tung pana ka zaksa thumaan a gen pa kei, thah nong sawm zel uh hi. Abraham in tua bangte a hih kei hi. 41 Na pa uh hih bangin note in na hih uh hi,” a ci hi. Amaute in, “Kote zawlta ka hi kei uh hi. Pa khat bek ka neih uh, Pasian mahmah ahi hi,” ci-in a sel uh hi. 42 Jesu in amaute kiangah, “Na Pa uh Pasian ahileh note in kei nong it ding uh hi. Ahang in, kei Pasian kiang pana hong pai ka hi-a, tu-in hiah ka om hi. Keima thu-a hong pai hi loin hong sawlpa thu-a hong pai ka hi hi. 43 Bang hang ka thu gen thei siang lo na hi uh hiam? Ka thu gen na za thei kei uh hi. 44 Note, na pa uh dawimangpa suan na hi uh hi. Tua ahi manin na pa uh deihna na tangtungsak nuam uh hi. Amah a cil panin tualthatpa hi-a, ama sungah thutak om lo ahi manin thutak a len kei hi. Amah zuau thei-a, zuauphuakte pa ahi manin zuau a gen ciangin ama pianpih pau-a pau ahi hi. 45 Ahi zongin thutak kong gen manin kei nong um kei uh hi! 46 Note khatpeuh in ka mawhna nong man thei uh hiam? Ken thutak hong gen ka hileh bang dinga kei hong um lo na hi uh hiam? 47 Pasian aa ahite in Pasian gente a za hi. Pasian aa hi lo na hi manun na za thei kei uh hi,” a ci hi. 48 Jew-te in, “Nang, Samaria mi hi in, dawi lut hi, kong cih uh maan lo ka hi uh hiam?” ci-in a dawng uh hi. 49 Jesu in, “Kei sungah dawi a lut kei hi. Ahi hangin ken ka Pa ka pahtawi-a, no kei nong pahtawi kei uh hi. 50 Ken keima minthanna ka zong kei hi; ahi hangin a zong khat om-a, amah thukhenpa ahi hi. 51 Thutak kong geninah ka thu a zui mi in sihna a mu ngei kei ding hi,” a ci hi. 52 Jew-te in hih thu a zak uh ciangin, “Dawi lut na hilam tu-in ka thei ta uh hi! Abraham si-a tua mah bangin kamsangte zong a si uh hi. Tua hi napi mi khatpeuh in na thu a zuih leh sihna ciam kha lo ding, na ci hi. 53 Ka pa uh Abraham sangin lianzaw na hi hiam? Amah si-a tua mah bangin kamsangte zong a si uh hi. Nang kua-a kingaihsun na hi hiam?” a ci uh hi. 54 Jesu in, “Kei le kei ka kiminthansak leh ka minthanna a mawkna a suak hi. Ka Pasian uh hi, na cih uh ka Pa in kei hong pahtawipa ahi hi. 55 Note in amah na theih loh uh hangin ken amah ka thei hi. Amah ka thei kei hi, ci leng note mah bangin zuauphuak ka hi ding hi. Ahi hangin amah ka thei-a a thu ka zui hi. 56 Na pa uh Abraham in ka ni a muh ding a ngaihsut ciangin a nuam hi; a mu a, a lungdam hi,” a ci hi. 57 Jew-te in, “Kum sawmnga zong upa nai lo napi, Abraham maw na muh tazen!” a ci uh hi. 58 Jesu in, “Thutak kong geninah, Abraham suah ma-in kei ka om hi!” a ci hi. 59 Hih thu a gen a zak uh ciangin amah a den nading uh suang a tawm uh hi. Ahi hangin Jesu bu-a biakinnpi tual panin a kihemkhia hi.

Johan 9

1 Jesu a paipai laitakin mittawsa-a suak khat a mu hi. 2 A nungzuite in, “Rabbi aw, hih pa mittawsa-a a suah kua mawhna hang hiam, amah hiam, a nu-le-pa hizaw hiam?” ci-in a dong uh hi. 3 Jesu in, “Amah lah mawh kei, a nu-le-pa lah mawh kei, ahi hangin ama nuntakna ah Pasian nasepna a kilat nadinga piang ahi hi. 4 Sun ahi laiteng kei hong sawlpa na i sep pel mawh ding ahi hi. Kuamah in na a sep theih loh hun zan hong tung ding hi. 5 Leitunga ka om laiteng, leitung khuavak ka hi hi,” a ci hi. 6 Hih teng a cih khit ciangin lei lakah a cil phiha, a ciltui tawh buan bawlin mittaw pa mit a nuh hi. 7 Ama kiangah, “Pai inla Siloam (Hih Kammal Sawl cihna) bualah va sil in,” ci-in a sawl hi. Tua ciangin tuapa pai-in va sil-a khua musa-in innah a ciah hi. 8 A vengte le khut dawh-a a nget lai a musate in, “Hih pa, mun khatah tu-a a ngenpa pen hi lo hiam?” ci-in a kidong uh hi. 9 Pawlkhat in, “Hi mah hi,” a ci uh hi. Adangte in, “Hi kei tuapa tawh a kisun bek hi,” a ci uh hi. Ahi hangin amahmah in, “Tua mipa ka hi hi,” a ci hi. 10 Amaute in, “Tua ahileh na mitte bang hong ci vak hiam?” ci-in a dong tentan uh hi. 11 Amah in, “Jesu a cih uh mi khat in, buan bawlin ka mit nuha, ‘Siloam bual ah va pai inla va sil in,’ ci-a hong gen ciangin kei zong pai-a ka va sil leh khua ka mu thei hi,” ci-in a dawng hi. 12 Amaute in, “Tuapa koi-ah om ta hiam?” ci-in a dong uh hi. Amah in, “Thei keng,” a ci hi. 13 Amaute in Pharisee-te kiangah mittaw ngei pa a paipih uh hi. 14 Jesu in buan bawla mipa mit a vaksak ni, Sabbath ni khat ahi hi. 15 Tua ahi ciangin Pharisee-te in zong khua bangci muh kik hiam, cih amah a dong uh hi. Mipa in, “Ka mit ah buan hong nuhsaka ka sil leh tu-in khua ka mu thei hi,” ci-in a dawng hi. 16 Pharisee-te pawlkhat in, “Tua mipa in Sabbath ni tang lo ahi manin Pasian kiang pana hong pai ahi kei hi,” a ci uh hi. Adangte in, “Mawh nei mi khat in tua bang limlamdang bangci bawl theih ding ahi hiam?” a ci uh hi. Tua ciangin amaute a kipawlkhen uh hi. 17 A tawpna ah mittawpa kiangah kihei kik uh a, “Amah in na mitte vaksak ahi ciangin, ama thu gentheih bang na nei hiam?” a ci uh hi. Tua mipa in, “Kamsang khat hi,” ci-in a dawng hi. 18 Jew-te in amah mittaw ngei-a tu-in khua mu thei ahilam, a nu-le-pa a sapsak matengun a um kei teitei uh hi. 19 Amaute in, “Hih pa no tapa ahi hiam? A mittawsa-a suak na cih pa uh ahi hiam? Tu-a khua a muh theih kikna bangci bang ahi hiam?” ci-in a dong uh hi. 20 A nu-le-pa in, “Amah ka tapa uh hi, cih ka thei uh hi; mittawsa-a suak ahilam zong ka thei uh hi. 21 Ahi zongin bangci bangin tu-a khua mu thei-a, kua in a mit vaksak cih ka thei kei uh hi. Amah dong dih un. Amah picing ta hi; ama thu amahmah in gen hen,” a ci uh hi. 22 Jew-te in: Jesu pen Khrista hi, ci-a a sang peuhmah synagogue pan kihawlkhia ding hi, ci-a thukhensatna nei zo uh ahi ciangin a nu a pa-te in Jew-te a kihtak manun hih banga a gen uh ahi hi. 23 A nu-le-pa in, “Amah picing ta hi, amah dong un,” a cihna uh tua thu hang ahi hi. 24 Mittaw ngei pa a nihveina sam kik uh a, “Pasian min thangsak inb Kote in hih pa mawhnei hi, cih ka thei uh hi,” a ci uh hi. 25 Amah in, “Amah mawh nei ahi le ahi loh ka thei kei hi. Na khat ka thei hi, ka mit a tawsa hi-a ahi zongin tu-in khua ka mu hi!” ci-in a dawng hi. 26 Tua ciangin amaute in, “Nang tungah bang hong hih hiam? Na mit bang hong ci vaksak ahi hiam?” ci-in a dong uh hi. 27 Amah in, “Kong gen khin zo-a na ngai kei uh hi. Bang dinga za kikkik nuam se na hi uh hiam? No zong ama nungzui suak nuam na hi uh hiam?” ci-in a dawng hi. 28 Tua ciangin amaute in amah sim mawh bawlin tai gawpgawp uh a, “Hih mipa nungzui nang na hi mah ve! Ko bel Moses nungzui ka hi uh hi! 29 Pasian in Moses a hopih lam ka thei uh hi. Ahi hangin hih pa koi pana hong pai cih nangawn ka thei kei uh hi,” a ci uh hi. 30 Tuapa in, “Tua hi ve a ciamteh huai! Note in hong paina thei lo. Amah’n lah ka mit hong vaksak. 31 Pasian in mawh neite thu ngai lo hi, cih i thei hi. Amah in a deihna a hih a pasian-mite thu a ngai hi. 32 Mittawsa a suak, mit kivaksak thu kuamah in a za ngei kei hi. 33 Hih pa, Pasian kiang pan hi kei leh bangmah a hih thei kei ding hi,” a ci hi. 34 Hih thu ah amaute in, “Nang, suah tunga mawhna tawh a kidim pa, bang hangin ko thu hong hilh ngam tazen na hi hiam!” ci-a a dawn kik khit uh ciangin amah a hawlkhia uh hi. 35 Amaute in tuapa hawlkhia uh cih Jesu in za a, amah a muh ciangin, “Mihing Tapa na um hiam?” a ci hi. 36 Mipa in, “Sia aw, amah kua ahi hiam? Amah ka up theih nadingin hong gen in,” ci-in a dong hi. 37 Jesu in, “Tu-in amah na mu zo hi; tu laitaka nang tawh a kihopa ahi hi,” a ci hi. 38 Tua ciangin tuapa in, “Topa aw, ka um hi,” ci-in a bia hi. 39 Jesu in, “Mittawte in khua a muh nading le mitvakte a mit uh a tawt nading, thukhen dingin hih leitungah kong pai hi,” a ci hi. 40 Amah tawh a om khawm Pharisee-te pawlkhat in hih banga a gen a zak uh ciangin, “Bang e? Ko zong a mittaw maw?” ci-in a dong uh hi. 41 Jesu in, “Mittawsa hi le uh cin mawhna ah na khial kei ding uh hi. Ahi hangin tu-in ka mit uh a vak hi, ci na hi manun na mawhna uh a om lai hi.

Johan 10

1 "Thutak kong geninah, tuukhumna kongpi lam pan lut lo-a, mundang ah kahin a lut peuhmah, guta le misuam ahi hi. 2 Kongpi lam tawna lutpa ahileh ama tuute a cingpa ahi hi. 3 Kong cingpa in amah kong honin tuute in a aw a ngai uh hi. Ama tuute a minin sama a pikhia hi. 4 Ama aa khempeuh a pikhiat khit ciangin amaute mai-ah amah masa-a, a tuute in a aw thei uh ahi manin anung a zui uh hi. 5 Ahi hangin a theih loh uh mi nung a zui ngei kei uh hi. A taktakin, a mel a theih loh mite aw thei lo uh ahi manin, amah a taisan ding uh hi,” a ci hi. 6 Jesu in hih bang tehpihna zangin thu gena, ahi hangin amaute tungah bangci nuam hiam cih a theitel kei uh hi. 7 Tua ahi ciangin Jesu in, “Thutak kong geninah, keimah tuute adingin kongpi ka hi hi. 8 Ka mai-a hong pai ngei khempeuh gutate le misuamte hi uh a, ahi hangin tuute in amau thu a ngai kei uh hi. 9 Keimah, tua kongpi ka hi hi; kei hong tawna a lut mi peuhmah kihonkhiaa ding hi. Amah sungtumin pusuakkhia dinga lonona a mu ding hi. 10 Gutate ahileh, a gu ding, a that ding le a siasak ding beka pai ahi hi. Kei ka hileh amaute in nuntakna a neih nading, adim a neih nadingun hong pai ka hi hi. 11 "Keimah, tuucing hoihpa ka hi hi. Tuucing hoihpa in a tuute ading a nuntakna a pia hi. 12 A kicial tuucing pen tuu neipa hi lo hi. Tua ahi ciangin keivom pai a muh ciangin a tuute nusia in a taimangsan hi. Tua ciangin keivom in tuute mana, tuuhonte a kithehthangsak hi. 13 Tua mipa a kicial ahi manin a tuute don lo-a, a taimangsan ahi hi. 14 "Keimah, tuucing hoihpa ka hi hi; ka tuute ka thei-a, ka tuute in zong kei hong thei uh hi. 15 Pa in kei hong theih bang tektekin kei zong Pa ka thei hi – tua hi-a ka tuute ading ka nuntakna ka kham hi. 16 Hih tuu khumna inn sungah a om lo tuu dang zong ka nei hi. Amaute zong kong paipih pelmawh ding hi. Amaute in zong ka aw ngai ding uh a, tuuhon khat omin tuucingpa khat a om ding hi. 17 Ka Pa in kei hong itna pen, ka lakkik dinga ka nuntakna ka kham hang ahi hi. 18 Kei tung pan kuamah in hong lak khiatsak hi lo hi. Keima ut thu-a kikham ka hi hi. Keima ut thu-a kikham-theihna le lakkik-theihna thuneihna ka nei hi. Hih thupiak, ka Pa tung pana ka ngah ahi hi,” a ci hi. 19 Hih thute hangin Jew-te a kipawl khen leuleu uh hi. 20 Amaute tampi in, “Amah dawi lut-a a haipau ahi hi. Bang dinga ama thu ngai i hi hiam?” a ci uh hi. 21 Ahi hangin adangte in, “Dawi lut mi thugen hih bang hi lo hi. Dawi in mittawte mit vaksak thei ding hiam?” a ci uh hi. 22 Tua ciangin Jerusalem ah Apnab Pawi a tung hi. Phalbi lai hi a, 23 biakinnpi huang sunga om, Solomon Talap sungah Jesu a vak kawikawi hi. 24 Jew-te a kimah va kikhawm uh a, “Bang tan vei lungsim laklawha hong koih ding na hi hiam? Nang, Khristc na hileh siangtakin hong gen dih in,” a ci uh hi. 25 Jesu in, “Kong gen hangin na um kei uh hi. Ka Pa min a ka bawl nalamdangte in kei adingin gen khin zo hi. 26 Ahi hangin ka tuute hi lo na hi manun na um kei uh hi. 27 Ka tuute in ka aw a ngai uh hi; keimah in amaute ka thei-a amaute in kei hong zui uh hi. 28 Amaute nuntak tawntungna ka pia-a, a mangthang ngei kei ding uh hi; amaute ka khut sung pan kuamah in a lakhia thei kei ding hi. 29 Amaute hong pia ka Pa, na khempeuh sangin lianzaw a,d ka Pa khut panin kuamah in hong sutkhia thei kei ding hi. 30 Kei le ka pa, khat ka hi uh hi,” ci-in a dawng hi. 31 Jew-te in amah deng dingin suang a tawm leuleu uh hi. 32 Ahi hangin Jesu in amaute kiangah, “Pa kiang pana nalamdang a thupi tampite kong lak zo hi. Tuate lakah a koi pen hanga kei suang tawh hong deng ding na hi uh hiam?” a ci hi. 33 Jew-te in, “Tua thute khatpeuh hanga nang suang tawh hong deng ding ka hi kei uh hi. Pasian na gendaina hanga hong deng ding ka hi uh hi; bang hang hiam cih leh mihing leltak khat Pasian na kici hi,” ci-in a dawng uh hi. 34 Jesu in amaute kiangah, “Note’ Thukham sungah, ‘Note pasiante na hi uh hi, ka ci zo hi,’e ci-in kigelh hi lo hiam? 35 Amah in Pasian thu tunna amaute ‘pasiante’ ci ahileh, Laisiangtho thu lah kipelh thei lo dinga, 36 Pasian in ama aa mahmah a, a sehtuampa le leitunga, a sawlpa kua hi ding hiam? ‘Pasian Tapa ka hi hi’ ka cih mana bang hangin Pasian gendai a hong ngawh na hi uh hiam? 37 Ka Pa hih banga ka hih keileh hong um kei un. 38 Ahi hangin Pa hih banga ka hih leh kei nong um kei uh zongin, kei sungah Pa om a, Pa sungah kei om ka hilam thei in, na theihtel theih nadingun nalamdangte na um beek un,” a ci hi. 39 Amaute in amah mat sawm leuleu uh a, ahi hangin amaute khut panin a suakta hi. 40 Tua ciangin ni masa lai-a, Johan in a baptisena mun Jordan galah Jesu a pai kik hi. Hih lai-ah amah taam a, 41 a kiangah mi tampi a va pai uh hi. Amaute in, “Johan in na lamdang a bawl ngei loh hangin hih mipa thu a gen khempeuh amaan hi,” a ci uh hi. 42 Tua munah mi tampi in Jesu a um uh hi.

Johan 11

1 Amah Mary le a sanggamnu Martha tenna Bethany khua mi ahi Lazarus kici mi khat a ci na hi. 2 Hih a cina pa sanggamnu Mary pen, Topa tunga sathau namtui sunga a khepekte a sama a nulsaknu mah ahi hi. 3 Tua ciangin a sanggam numeite in Jesu kiangah, “Topa aw, na itpa cina hi,” ci-in kam a vaikhak uh hi. 4 Jesu in hih thu a zak ciangin, “Hih natna sih nading hi lo hi. Hi lo hi, hih tungtawnin Pasian Tapa kiminthangsaka Pasian in minthanna a ngah nading ahi hi,” a ci hi. 5 Jesu in Martha le a sanggamnu le Lazarus a it hi. 6 Ahi zongin amah in Lazarus cina hi cih za napi a omna mah ah ni nih a taam lai hi. 7 Tua ciangin ama nungzuite kiang ah, “Judea ah ciah kik ni,” a ci hi. 8 Ahi hangin amaute in, “Rabbi aw, Jew-te in suang tawh den hong sawm uh sawt nai lo hi, tuapi mah tua lai-ah pai kik ding na hi hiam?” a ci uh hi. 9 Jesu in, “Khuavak hun sung nai sawm-le-nih pha hi lo ahi hiam? Sun lai-a lampaite in hih leitung khuavak hangin khua mu ahi manin a kisuikha kei ding hi. 10 Zanin lam a pai ciangin khua vak lo ahi manin a kisuikha uh hi,” ci-in a dawng hi. 11 Hih teng a cih khit ciangin amaute tunga a thugen ban zomlai-a, “I lawmpa Lazarus ihmu hi, ahi hangin amah phong dingin tua lai-ah ka pai ding hi,” a ci hi. 12 A nungzuite in, “Topa, ihmu ahileh a nuamtuam ding hi,” ci-in a dawng uh hi. 13 Jesu in a si a genna hi napi, a nungzuite in ihmut ngei-a ihmu a sa uh hi. 14 Tua ciangin amaute kiangah, Lazarus si zo hi; 15 na up theih nadingun kei tua lai-a ka om loh note adingin ka nuam hi. Ahi zongin ama kiangah pai ni,” ci-in a telgen hi. 16 Tua ciangin Thomas (Didymus kici) in a nungzui dangte kiangah, “Amah tawh i sihkhawm theih nadingin ei zong va zui ni,” a ci hi. 17 Jesu a tun ciangin, Lazarus han sungah a om zawh ni li pha zo hi, cih a thei hi. 18 Jerusalem panin Bethany taia nih sangin naizaw a, 19 a sanggampa sihna hangin Mary le Martha hehnem dingin Jew-te tampi a pai uh hi. 20 Martha in Jesu tung ta cih a zak ciangin a dawn dingin paikhia-a, inn ah Mary a om lai hi. 21 Martha in Jesu kiangah, “Topa, hih lai-ah om lecin ka sanggampa a si kei ding hi. 22 Ahi hangin tu nangawnin na nget peuhpeuh Pasian in hong pia ding cih ka thei hi,” a ci hi. 23 Jesu in tuanu kiangah, “Na sanggam-pa a tho kik ding hi,” a ci hi. 24 Martha in, “Ni tawp ni-a thawhkik hun ciangin a thawh kik ding ka thei hi,” ci-in a dawng hi. 25 Jesu in tuanu kiangah, “Keimah in, thawhkikna le nuntakna ka hi hi. Kei hong um mi a sih hangin a nungta ding hi; 26 nungta-a kei hong um peuhmah a si ngei kei ding hi. Hih thu na um hiam?” ci-in a dong hi. 27 Tuanu in, “Ka um hi Topa aw, leitunga hong pai ding Pasian Tapa Khristb na hi, cih ka um hi,” ci-in a gen hi. 28 Hih teng a gen khit ciangin kileh kika, a sanggamnu Mary a va sam tuam hi. Amah in, “Siapa hih lai ah om-a, nang hong kan hi,” a ci hi. 29 Mary in hih thu a zak ciangin dingkhia vat-a a kiangah a va pai hi. 30 Tua hunin Jesu khua sungah lut nai lo a, Martha tawh a kituahna mun ah om lai hi. 31 Inn sunga Mary tawh a om, amah a hehnem Jew-te in, Mary thakhatin dinga a paikhiat a muh uh ciangin han ah pai-a a va kap ding sa in a zui uh hi. 32 Jesu omna mun ah Mary tunga, amah a muh ciangin a khephung ah bokin, “Topa, nang hih lai-ah om lecin ka sanggampa a si kei ding hi,” a ci hi. 33 Jesu in tuanu kah mu a, amah a zui Jew-te zong a kap uh a muh ciangin a lungsim ah na sa mahmah in a lunggim hi. 34 Amah in, “Amah koi-ah sial na hi uh hiam?” ci-in a dong hi. Amaute in, “Topa aw, hong pai inla hong en dih in,” a ci uh hi. 35 Jesu a kap hi. 36 Tua ciangin Jew-te in, “En sin uh, nak it mahmah si!” a ci uh hi. 37 Ahi hangin amaute pawlkhat in, “Mittawte khua a musak theipa in amah silosak thei lo hi ve maw?” a ci uh hi. 38 Jesu, a lungsim sunga na sa mah mah kawmin han lam zuanin a pai hi. Tua han, a vang suangpek a kikhak kawhawm khat ahi hi. 39 Jesu in, “A suang lakhia un,” a ci hi. Misipa sanggamnu Martha in, “Ahi zongin Topa, tua lai-a a om zawh ni li pha khin ta a tu-in namsia ta hi,” a ci hi. 40 Tua ciangin Jesu in, “Na up leh Pasian minthanna na mu ding hi, hong ci zo hi lo ka hi hiam?” a ci hi. 41 Tua ciangin suang a likkhia uh hi. Tua khit ciangin Jesu dakto a, “Pa aw, kong ngetna hong zazo na hi manin ka lung dam hi. 42 Ka thu nong sang tawntung cih ka thei hi. Ahi hangin hih lai-a ding mite phattuam nading, nang kei hong sawl na hilam a up nading uh deihna-in hih ka gen hi,” a ci hi. 43 Hih teng a cih khit ciangin Jesu in, “Lazarus, hong paikhia ou!” ci-in nakpi in a sam hi. 44 Misipa paikhia-a, a khut le a khete hanpuan tawh kitunin, a maitang puan khatin a kituam hi. Jesu in amaute kiangah, “Han puante phelkhia unla, amah paisak un,” a ci hi. 45 Tua ahi manin Mary inn-a a hawh, Jesu sepsa a mu Jew-te tampi in amah a um uh hi. 46 Ahi hangin pawlkhatte Pharisee-te kiangah pai uh a, Jesu hihsa teng a gen uh hi. 47 Tua ciangin siampi makaite le Pharisee-te in Sanhedrin kikhop a sam uh hi. Amaute in, “A bangci tazen i hi hiam? Hih mipa in limlamdangte bawlbawl a; 48 hih banga i hih saksak leh mi khempeuh in amah um ding uh a, tua ciangin Rome mite hong kuanin i munc le i minam a lamang ding uh hi,” a ci uh hi. 49 Tua ciangin amaute lakah tua kum a tulpi a sem Caiaphas kici pa paukhia a, “No bangmah thei kei uh teh! 50 Minam khat a bupa a manthan sangin mipite tangin mi khat si leh a hoihzawk lam na phawkkha kei uh hi,” a ci hi. 51 Amah in ama lungsim puaka hih thu a gen hi lo hi. Ahi hangin tua kuma tulpi ahi bangin Jew minam tangin Jesu si ding hi, cih a genkhol hizaw hi. 52 Tua minam tang ding bek hi loin a kitheh thang Pasian tate tang ding zong hi a, amaute kaikhawm kikin khat a suahsak nading ahi hi. 53 Tua ahi ciangin tua ni-a kipan amah thah nading a gelsim uh hi. 54 Tua ahi manin Jew-te lakah mipi theihin Jesu a pai nawn kei hi. Tua sangsikin sehnel-gam gei Ephraim khua omna kualah kileh kik zaw a, a nungzuite tawh tua lai-ah a om uh hi. 55 Jew-te Paisan-pawi hun a nai mahmah ciangin kisakkholhna, Paisan-pawi ma-a biakna ngeina-a kisiansuahna bawl dingin gamsung khua panin mi tampi Jerusalem ah a paito uh hi. 56 Amaute in Jesu zongzong uh a, biakinnpi huang-sung tengah dingin, “Nang bang na ci ngaihsut hiam? Pawi sungah amah hong pai lo ding hi ve maw?” a kici uh hi. 57 Ahi hangin siampi makaite le Pharisee-te in, amah a mat theih nadingun Jesu omna mun a mu a om leh amau kiangah a va gen nadingun thu a pia uh hi.

Johan 12

1 Paisan-pawi ma ni guk laitakin Jesu in misi pana a thawhsakpa Lazarus tenna Bethany ah Jesu a tung hi. 2 Hih lai-ah Jesu pahtawina in nitak-an kivak hi. Martha in an nek ding bawl-a sabuai-a kingamte lakah Lazarus a om hi. 3 Tua ciangin Mary in nard sathau citak a namtui, a manpha mahmah pinta khat tawi a, Jesu khepekte buakin a sam tawh a khepekte a nul hi. Tuateh sathau namtui gim in inn sung khempeuh a zel khin hi. 4 Ahi hangin a nungzuite khat, a nung cianga amah lehhek ding pa Judas Iscariot in, 5 "Bang hanga hih sathau namtui zuaka a sum mizawngte kipia zaw lo ahi hiam? Tua in kum khat thamanb zah man hi,” a ci hi. 6 Amah in mizawngte a khualna tawh a cih hi loin amah guta ahi man ahi hi; amah sum-ip kem hi-a tua sunga kikoihte ama adingin a la zelzel pa ahi hi. 7 Jesu in, “Amah bangmah cih dah un, ka kivui ni cianga dingin a sit sathau namtui zang ahi hi. 8 Note mizawngte tawh na om khawm lai ding uh hi. Ahi hangin kei tawh na omkhawm tawntung kei ding uh hi,” a ci hi. 9 Tua hun sungin Jesu tua lai-a a om lam Jew mihon tampi in a theih uh ciangin a va pai uh hi. Ama hang bek hi loin misi pana a thawhsakpa Lazarus zong a mu nuam uh hi. 10 Tua ahi ciangin siampi makaite in Lazarus zong thah a sawm uh hi. 11 Ahang in, ama hangin Jesu lamah Jew-te kihei uh a, amah a muang uh hi. uh hi. 12 A zing ciangin Pawi sima pai mihon tampi in, Jesu in Jerusalem zuan, cih thu a za uh hi. 13 Amaute nisuh hiang tawi-in amah dawn dingin paikhia uh a, “Hosanna!”c “Topa mina hong paipa in thupha a ngah hi!”d “Israel Kumpipa in thupha a ngah hi!” ci-in a awng uh hi. 14 Jesu in laano khat mu a, 15 "Zion Tanu aw, lau kei in; en in, na kumpipa laapi ta laano tungah tuangin hong pai hi,” ci-a kigelhsa bangin tua tungah a tuang hi.e 16 A tunglai teng a nungzuite in hihte khempeuh a theitel kei uh hi. Jesu a kipahtawi khit ciang bekin ama thu hih banga, a kigelh lam le amaute in hih banga hih uh ahilam a thei pan bek uh hi. 17 Tua laitakin amah tawh a om khawm mihonpite in, amah in han sung panin Lazarus sama, misi pan a thawh sakna thu a thangsak beh lailai uh hi. 18 Hih nalamdang a bawlna thu a zak manun mi tampite amah dawn dingin a kuankhia uh hi. 19 Tua ciangin Pharisee-te in, “Thei un, bangmah i lawh zo nawn kei hi. Leitung bupin ama nung zui khinmang uh hi!” a kici uh hi. 20 Pawi sunga Pasian bia dinga pai mite lakah Greek-te pawlkhat a om uh hi. 21 Amaute Galilee gama Bethsaida a teng Philip kiangah pai uh a, “Sia aw, Jesu ka mu nuam uh hi,” ci-in a thum uh hi. 22 Philip in Andrew ko-a Andrew le Philip in Jesu a ko sawn uh hi. 23 Jesu in, “Mihing Tapa a kimin-thansak hun tung zo hi. 24 Thutak kong geninah, mangbuh tang khat lei lakah kia-a, a sih phot kei leh a tang khat guak mah om niloh hi. Ahi hangin a sih leh tang tampi a suang hi. 25 Ama nuntakna a it mi in taan dinga, hih leitunga, a nuntakna a mudah mi in nuntak tawntungna adingin a kemcing ding hi. 26 Ka na a sem peuhmah in kei hong zuih pelmawh kul-a, kei omna ah ka nasempa zong a om ding hi. Ka na a sem mi peuhmah ka Pa in a pahtawi ding hi. 27 "Tu-in ka lungmang hi, bang ka ci gen ding hiam? ‘Pa aw, hih hun panin hong hon in,’ ka ci ding hiam? Ka ci kei ding hi, hih hang maha hih hun dong a tung ka hi hi. 28 Pa aw, na min thangsak in!” a ci hi. Tua ciangin, “Ka thangsak zo a, ka thangsak lai ding hi,” ci-in vantung pan aw khat a ging hi. 29 Tua lai-a om mihonpite in za uh a, vanging hi, a ci tawh, vansawltak in amah hopih hi, a ci tawh a om uh hi. 30 Jesu in, “Hih aw, kei phattuam nading hi loin note ading ahi hi,” a ci hi. 31 Hih leitunga thu khen ding tu hun ahi hi; hih leitung a kumpitapa tu-in kihawlkhia ding hi. 32 Ahi hangin kei ka hileh leitung pan hong kikhaitoh ciangin kei lamah mi khempeuh ka huai ding hi,” a ci hi. 33 Hih bang a cih ciangin a sih cianga a sihzia ding lak ahi hi. 34 Mihonpite in, “Thukham sungah, ‘Khrist,f a om tawntung ding hi,’ cih ka za uh hi. Tua hi napi bang dinga, ‘Mihing Tapa kikhaito ding,’ ci thei na hi hiam? Hih Mihing Tapa kua ahi hiam?” a ci uh hi. 35 Tua ciangin Jesu in amaute kiang ah, “Note in tawmvei sung bek khuavak na nei lai ding uh hi. Khuamial in hong lap ma-in khuavak na neih lai-un pai un. Khuamial laka paite in a pai nading uh a thei kei uh hi. 36 Khuavak tate na suah theih nadingun khuavak na neih lai-un khuavak muang un,” a ci hi. Thu a gen khit ciangin Jesu paikhia a, amaute lak pan a kisel hi. 37 Jesu in amaute om-a, hih lim lam dangte a bawl khit nangawnin amaute in a um tuan kei lailai uh hi. 38 Hih in kamsangpa Isaiah gen: “Topa aw, ka thugen kuan um-a, kua tungah Topa khut kilaak hiam?”g a cih thu a tangtunsak nading ahi hi. 39 Hih thu hangin amaute in a um thei kei uh hi. Bang hang hiam cih leh Isaiah in mun dangah: 40 "Amah in amaute mit tawsakin, a lungtangte uh sisak hi, tua ahi manin a mit uh tawh bangmah mu thei lo uh a, a lungtang uh tawh zong bangmah theitel thei loin a kihei thei kei uh hi – tua hi kei leh amaute ka damsak kha ding hi,”h ci hi. 41 Isaiah in Jesu minthanna mu zo ahi manin ama thu a na gen ahi hi. 42 Tua hi napi a makai tampite lak nangawn ah tua hun mahmah in tampi in amah a um uh hi. Ahi zongin Pharisee-te in synagogue pan a hawlkhiat ding a lau manun a upna uh a pulakkhia ngam kei uh hi. 43 Ahang in, amaute in Pasian phatna sangin, mihing phatna a itzaw uh hi. 44 Tua ciangin Jesu in, “Mi khat in kei hong up leh, kei bek hong um kei hi. Kei hong sawlpa zong a um hi. 45 Kei hong et ciangin kei hong sawlpa a mu hi. 46 Kei hong um khat beek khuamial ah a om loh nadingin khuavakin leitung ah hong pai ka hi hi. 47 "Ka thugente za napi a zui lo mi tungah thu ka khen kei ding hi. Ahang in, leitung thukhen dinga hong pai ka hi kei a, a honkhia dinga hong pai ka hizaw hi. 48 Kei hong nial a, ka thugente a sang lo mi ading thukhenpa khat a om hi. Ni nunung ni ciangin tua ka thu genkhiat tektek in amah a mawhpaih ding hi. 49 Ahang in, keima ut thu-a gen ka hi kei a, kei hong sawl Pa in bang thu gen dinga, bangci gen ding cih hong thu piaksa bek ka gen hi. 50 Hih thupiakna in nuntak tawntungna tun hi cih ka thei hi. Tua ahi ciangin ka gen peuhmah Pa in kei gen dinga hong hilh tektekte bek ka gen hi,” ci-in a kiko hi.

Johan 13

1 Tua hun, Paisan Pawi madiak ahi hi. Jesu in hih leitung nusia in, Pa kiangah a pai hun ta, cih a thei hi. Hih leitunga om ama mite it a, amaute a itnaa a vekpi-in tu-in a lak hi. 2 Nitak-an nek laitakin dawimangpa in Simon tapa Judas Iscariot tungah Jesu a lehhek nadingin tawsawn khin zo hi. 3 Pa in ama vangliatna nuai-ah na khempeuh koihin amah Pasian kiang pana hong pai hi-a, Pasian kiangah a ciah kik ding ahi hi, cih Jesu in a thei hi. 4 Tua ahi ciangin ankuang um kimlai dingkhia-a a puantungsilh suahkhia in mainulpi khat a kawngah a vial hi. 5 Tua khit ciangin kuang sungah tui sunga, a nungzuite khe silsakin, a kawnga a vialh mainulpi in a nulkeusak hi. 6 Simon Peter ciang tunga amah in, “Topa nang lawmlawm in ka khe hong silsak zawzen ding na hi hiam?” a ci hi. 7 Jesu in, “Tu-in bang hih ka hi hiam, cih na thei kei hi, ahi hangin nung ciangin na theihtel ding hi,” ci-in a dawng hi. 8 Peter in, “Hi kei, ka khe na sil ngei kei ding hi,” a ci hi. Jesu in, “Nang kong sil kei leh kei tawh a kipawl lo na hi hi,” ci-in a dawng hi. 9 Simon Peter in, “Tua ahileh Topa aw, ka khe bek hi loin ka khutte le ka lu zong hong silsak in!” a ci leuleu hi. 10 Jesu in, “A kipumsilsate, a khe bek sil kul hi; a pumpi khempeuh a siang hi. Note na siang uh hi, ahi hangin na vekpi un na siang kim kei uh hi,” ci-in a dawng hi. 11 Amah in a lehhek ding pa thei zo ahi manin, note na siang kim kei uh hi, a ci ahi hi. 12 Amaute khe a silsak a man ciangin a puan silha, a tutna munah a pai kik hi. Amaute kiangah, “Note adinga ka septe na theitel uh hiam?” ci-in a dong hi. 13 "Note in kei ‘Sia’ le ‘Topa’ nong ci uh a, amaan hi; kei zong tua mah ka hi hi. 14 Tu-in keimah na Topa le na Siapa un na khe uh hong silsak ka hileh, no zong khat le khat na khe uh na kisilsak ding uh hi. 15 Note tunga ka hih banga na hih dingun na etteh ding uh kong lak zo hi. 16 Thutak kong geninah, a pu sangin a nasemte a lianzaw kei hi. Tua mah bangin thupuapa in a sawlpa sangin a lianzaw kei hi. 17 Hihte thei khin na hi uh ciangin na sep uh leh thupha na ngah ding uh hi. 18 "Note na vekpi un kong ci khin kei hi; ka teelsate ka thei hi. Ahi zongin hih in, Laisiangtho sunga; ‘An ka nekkhawm pihpa in kei langah a khetul a liikto zo hi,’b a cih thu a tangtunsak nading ahi hi. 19 "Hih thu a pian ciangin kei amah ka hilam na up nadingun a pianma tu-in note tungah kong gen khol hi. 20 Thutak kong geninah, ka sawl mi khatpeuh a sang peuhmah, kei hong sang ahi hi; kei hong sang peuhmah, kei hong sawlpa a sang ahi hi,” a ci hi. 21 Jesu in hih teng a cih khit ciangin a lungsim buai mahmah a, “Thutak kong geninah, note lakah khat in kei nong lehhek ding uh hi,” ci-in a telgen hi. 22 Kua a cihna hiam cih thei zo loin a nungzuite khat le khat a ki-en uh hi. 23 Amaute lakah khat, Jesu in a it nung zuipa ama zomah a kingam hi. 24 Simon Peter in hih nungzuipa suphei a, “Kua gen hiam, na dong dih in,” a ci hi. 25 Amah Jesu lamah awnphei a, “Topa kua gen na hiam?” ci-in a dong hi. 26 Jesu in, “Hih anlum them khat kuang sungah diaha, ka piak ding pa ahi hi,” ci-in a dawng hi. Tua ciangin anlum them khat diah a Simon tapa Judas Iscariot a pia hi. 27 Judas in anlum a san phetin a sungah Satan a lut hi. Jesu in, “Na hih ding manlangin hih in,” a ci hi. 28 Ahi hangin ankuang umte khat beek in, Jesu in bang hanga hih banga ama kiangah ci hiam, cih a thei kei uh hi. 29 Pawlkhatte in, Judas sum kem ahi ciangin Pawi-a zat ding na kisam khatpeuh lei dinga sawl ahikeh mi zawngte na khatpeuh pia dinga sawl hi ding hi, ci-in a ngaihsun uh hi. 30 Anlum a san khit phetin Judas a paikhia hi. Tua hun zan laitak ahi hi. 31 Amah a paikhiat khit ciangin Jesu in, “Tu-in Mihing Tapa kipahtawi-a, ama sungah Pasian a kipahtawi hi. 32 Ama sungah Pasian a kiminthansakc leh Pasian in ama sungah Tapa minthangsak dinga, amah minthangsak pah ding hi. 33 "Ka tate aw, note tawh tawmvei sung bek ka omkhawm lai ding hi. Note in kei nong zong ding uh hi, Jew-te ka hilh bangin note kong hilh hi: Ka paina munah nong pai thei kei ding uh hi. 34 "Thupiak thak khat note kong pia hi: Khat le khat na ki-it un. Keimah in note kong it bangin note khat le khat na ki-it pelmawh un. 35 Note khat le khat na ki-it uh leh ka nungzuite na hilam uh mi khempeuh in a thei ding uh hi,” a ci hi. 36 Simon Peter in, “Topa koi-ah pai ding na hi hiam?” ci-in a dong hi. Jesu in, “Ka pai nading mun ah tu-in nong zui thei kei ding uh hi, ahi hangin tunung ciangin nong zui ding uh hi,” ci-in a dawng hi. 37 Peter in, “Topa, bang dingin tu-a hong zui thei lo ding ka hi uh hiam? Nang adingin ka nuntakna ka pai ding hi,” a ci hi. 38 Tua ciangin Jesu in dawnga, “Nang, kei adingin na nuntakna paitakpi ding na hi hiam? Thutak kong geninah, ak khuan ma-in kei thumvei nong kitheihmawhbawl ding hi!

Johan 14

1 "Note kilungmangsak kei un. Pasian muang unla, a kei zong hong muang un. 2 Ka Pa inn sungah inndei tampi a om hi; om lo hileh kong gen zo ding hi. Note om nading mun bawlkhol dingin tua lai-ah ka pai ding hi. 3 Pai-in note om nading mun ka bawl khit ciangin ka omna munah note na om theih nadingun hong pai kikin note kong la ding hi. 4 Ka paina mun tunna lampi na thei uh hi,” a ci hi. 5 Thomas in, “Topa aw, na pai nading ka thei kei uh hi. Lampi bangci theih ding ka hi uh hiam?” a ci hi. 6 Jesu in, “Keimah in, lampi, thutak le nuntakna ka hi hi. Kei tawn loin kuamah Pa kiang a tung thei kei hi. 7 Kei nong theih takpi uh leh ka pa zong na theib ding uh hi. Tu-a kipan amah na thei zo uh a, na mu zo uh hi,” ci-in a dawng hi. 8 Philip in, “Topa aw, Pa hong lak lecin tua pen ko adingin phazo ding hi,” a ci hi. 9 Jesu in, “Philip aw, note tawh hih tanveitak ka omkhawm nangawnin kei hong thei nai lo na hi hiam? Kei hong mute peuhmah, Pa mu ahi hi. Bangci a, ‘Kote, Pa hong lak in,’ ci thei na hi hiam? 10 Pa sungah kei ka om a, kei sungah Pa a om cih um lo na hi hiam? Note kianga kong gen thute, kei thu beka, gen ka hi kei hi. Ka sunga a nungta Pa in ama na a sem hizaw hi. 11 Pa sungah kei ka om a, kei sungah Pa a om hi, ka cih ciangin kei hong um un. Tua ahikeh zong nalamdangte kitelsakna beek um un. 12 Thutak kong geninah, kei hong um mi peuhmah in ka sepsa pen mah a sem ding hi. Pa kiangah pai ding ka hi manin hihte sangin na lianzaw nangawn a sem ding hi. 13 Tapa in Pa tungah minthanna a puak theih nadingin kei min suanga na nget peuhpeuh uh ka na sepsak ding hi. 14 Note in kei min suanga na khatpeuh nong nget uh leh kong sepsak ding hi. 15 "Kei nong it uh leh kong thupiak na mang ding uh hi. 16 Pa kiangah ka ngen dinga, amah in note tawh a omkhawm tawntung dingin Thukuppihpa dang khat – 17 Thutak Kha note hong pia ding hi. Leitung in amah thei ngei lo, mu zong mu ngei lo ahi manin a sang thei kei hi. Ahi zongin amah note tawh omkhawm a, note sungah om dingc ahi manin amah na thei uh hi. 18 Tagahte bangin note kong nusia kei ding hi. No kiangah kong pai ding hi. 19 A sawt loin leitung in kei hong mu nawn kei ding hi. Ahi hangin no nong mu ding uh hi. Kei nungta ka hi manin note zong na nungta ding uh hi. 20 Tua ni ciangin kei ka Pa sungah om-in, kei sungah note na om uh a, note sungah kei ka om cih na theitel ding uh hi. 21 Ka thupiakte nei-a a mang peuhmah kei hong it ahi hi. Kei hong itte ka Pa in it dinga, kei zong amah it-in, ama tungah ka kilak ding hi,” a ci hi. 22 Tua ciangin Judas (Judas Iscariot lo pen) in, “Ahi hangin Topa aw, bang dinga kote kianga kilah sawm a, leitung mite kianga kilah sawm lo na hi hiam?” a ci hi. 23 Jesu in, “Mi khatpeuh in kei hong it leh ka hilhna a mang ding hi. Ka Pa in amah it dinga, ama kiangah ka pai ding uh a, amah tawh ka teng khawm ding uh hi. 24 Kei hong it lote in ka hilhna a mang kei ding uh hi. Hih na zak uh thute kei aa hi lo hi; kei hong sawlpa ka Pa aa ahi hi. 25 "Note tawh ka omkhawm lai-in hihte khempeuh kong gen khin zo hi. 26 Ahi hangin tua Thukuppihpa keima mina Pa in hong sawl ding tua Khasiangtho in na khempeuh hong hilh dinga, kong gensa khempeuh hong phawkkiksak ding hi. 27 Lemna note kong nusiat hi; ka lemna note kong pia hi. Leitung piak bangin note tungah kong pia kei hi. Na lungmang kei unla, na lau kei un. 28 "Note in, ‘Ka paimang dinga no kiangah kong pai kik ding hi,’ ka cih na za uh hi. Pa kiangah pai ding ka hi manin kei nong it uh leh na kipak ding uh hi. Ahang in, kei sangin Pa lianzaw hi. 29 Hih thu a pian cianga na up theih nadingun a pian ma-in no tungah tu-in kong gen hi. 30 Hih leitung kumpitapa hong pai ta ahi manin note tawh sawtveipi ka kiho nawn kei ding hi. Amah in kei bangmah hong cih zo kei hi. 31 Kei in Pa ka it a, ka Pa in kei hong thupiak bang tektekin ka sep lam leitung in a theih pelmawh kul hi. "Hong pai un; tu-in paikhia ni.

Johan 15

1 "Keimah lenggui taktak ka hi-a, ka Pa, tua lo neipa ahi hi. 2 Kei sungah oma, a gah lo hiang peuhmah a sattan hi; a gah hiang peuhmah tam a gah zawk nadingin heuhin a hahsianga hi. 3 Note tungah kong gensa thu hangin na siang khin ta uh hi. 4 Keima sungah om un, note sungah ka om ding hi. Amah beka gah thei hiang a om kei hi. A guipi-ah a om pelmawh kul hi. Note zong keima sunga na om kei uh leh na gah thei kei ding uh hi. 5 "Keimah, lengguipi ka hi hi. Note hiangte na hi uh hi. Mi khat kei sungah oma, ama sungah kei ka om leh gah tampi a gah ding hi. Kei loin bangmah na hih thei kei uh hi. 6 Mi khatpeuh kei sungah a om kei leh amah, a kipaimang a vul hiang tawh kibang hi. Tua bang hiangte kitawmin mei sungah kikhula, a kangtum hi. 7 Kei sungah na om uh a, ka thute no sungah a om leh na ut peuhpeuh uh na ngen un; hong kipia ding hi. 8 Note in gah tampi na gah uh a, ka nungzuite na hina uh na lahna uh, ka Pa minthanna ahi hi. 9 "Ka Pa in kei hong itsa bangin note kong it zo hi. Tu-in ka itna sungah om un. 10 Ka Pa thupiakte manga ama itna sungah ka om bang tektekin, kong thupiakte na man uh leh ka itna sungah na om ding uh hi. 11 Ka lungnopna note sungah om a, note lungnopna a kicin theih nadingin hih thu kong gen zo hi. 12 Kong thupiak hih ahi hi: Note kong it bangin note khat le khat na ki-it thuk un. 13 A lawmte tang dinga a nuntakna a paai itna sanga itna lianzaw a nei kuamah om lo hi. 14 Ka thupiak na zuih uh leh ka lawmte na hi uh hi. 15 Silate in a pu nasep thei lo uh ahi manin note silate kong ci nawn kei hi, tua sangsikin ka Pa tung pana ka theih khempeuh note hong theisak khin ka hi manin lawmte kong ci ta hi. 16 Note in kei nong teel kei uh a, keimah in pai-a gah a gah tawntung dingin note kong teel hi. Tua ciangin ka min suanga na nget peuhpeuh uh Pa in note hong pia ding hi. 17 Ka thupiak hih ahi hi: Khat le khat ki-it thuk un. 18 "Leitung in note hong muhdah leh, kei hong mudah masa hi, cih thei gige un. 19 Leitung aa na hi uh leh ama aa bangin note hong it ding hi. A taktak in leitung aa na hi kei uh hi. Keimah in leitung mite lak panin note kong teelkhia zo hi. Tua hangin leitung in note hong mudah hi. 20 Note tunga kong gensa thute ciamteh un: ‘A pu sanga lianzaw nasem kuamah a om kei hi.’b Amaute in kei hong bawlsia uh ahileh, no zong hong bawlsia ding uh hi. Amaute in ka hilhna a man’ uh leh no aa zong a mang ding uh hi. 21 Ka min hangin amaute in note hih bangin hong bawl ding uh hi. Ahang in, amaute in kei hong Sawlpa a thei kei uh hi. 22 Amaute kiangah hong pai-in thu gen lo hi leng khialhna hanga a mawh a suak kei ding uh hi. Ahi zongin tu-in ahileh a mawhna uh paulap ding a nei kei uh hi. 23 Kei hong mudahte in ka Pa zong a mudah uh hi. 24 Amaute lakah kuama bawl loh va bawl kei leng, amaute khialhna hangin a mawh suak lo ding uh hi. Ahi hangin tu-in hih nalamdangte mu zo uh a, tua hi napi amaute in kei le ka Pa hong mudah khawm uh hi. 25 Ahi hangin hih in amaute thukham sunga kigelhsa: ‘Amaute in ahang om lopi-in kei hong mudah uh hi,’c cih a tangtunna ahi hi. 26 "Pa kiang pana no kianga kong sawl ding, Pa kiang pana hong paikhia thutak Kha – Thukuppihpa hong pai ciangin kei tungtang thu teci a pang ding hi. 27 Note zong a cil a kipan kei tawh om khawm na hi uh ciangin teci na pang pelmawh ding uh hi.

Johan 16

1 "Note in lam na khialh loh nadingun hihte khempeuh kong gen zo hi. 2 Amaute in synagogue panin hong hawlkhia ding uh hi. A taktakin, note hong that peuhpeuh Pasian nasem-a a kingaihsut hun hong tung ding hi. 3 Kei ka hi a, ka Pa ahi zongin hong thei lo uh ahi manin amaute in tua bangin a hih ding uh hi. 4 Ahun hong tun ciangin kong vauhilhsa ahilam na phawk nadingun hih thu kong gen hi. A cil-in note tawh omkhawm ka hi manin hih thu note kong hilh kei hi. 5 "Tu-in kei hong sawlpa kiangah ka pai ta ding hi. Ahi hangin note khat beek in, ‘Koi-ah pai ding na hiam?’ ci-in nong dong kei uh hi. 6 Hih thute ka gen manin na dah lua uh hi. 7 Ahi hangin thutak kong geninah: Ka paikhiat note hoih nading ahi hi. Kei paikhia lo hileng Thukuppihpa no kiangah hong pai lo ding hi. Ahi zongin kei va paikhia leng, no kiangah amah kong sawl ding hi. 8 Amah hong pai ciangin mawhna, thumaanna le thukhenna thu ah, leitung a mawhnaa a laktel ding hi: 9 mawhna thu ah, mite in kei hong up loh hang uh ahi hi; 10 thumaanna thu ah, note in kei nong muh nawn loh nading uh mun Pa kiangah ka pai ding hang; 11 tua ciangin thukhenna thu ah, hih leitung kumpitapa tu-in a kimawhpaih laitak hang ahi hi. 12 "Tu-a na san zawh ding sangua tamzaw note kiangah gen ding ka nei hi. 13 Ahi hangin amah thutak Kha hong pai ciangin thutak khempeuh ah hong pi ding hi. Ama thu hong gen ding ahi kei hi. A zak thute bek gen dinga, hong piang lai ding thu note hong hilh ding hi. 14 Amah in kei kiang pan la-in note tungah hong theihsakna tawh kei hong minthangsak ding hi. 15 Pa aa khempeuh kei aa ahi hi. Kha in kei aa pan la-in note tungah hong theisak ding ka cih tua hang ahi hi. 16 "Hun tawm vei khit ciangin kei nong mukha nawn kei ding uh hi; tua khit a sawt loin nong mu ding uh hi,” a ci hi. 17 A nungzuite pawlkhat in, “‘Pa kiangah pai ding ka hi manin hun tawm vei khit ciangin kei nong mu nawn kei ding uh hi; tua khit a sawt loin nong mu ding uh hi,’ a cih bang a cih nopna hi ding hiam?” ci-in a kidong uh hi. 18 Amaute in, “‘Hun tawm vei,’ a cih bang a cihna hi ding hiam, a thugen lah i tel zo peuhmah kei a?” ci-in a kidong lailai uh hi. 19 Jesu in amaute in hih thu dong nuam uh cih a theih ciangin, “‘Hun tawm vei khit ciangin kei nong mukha nawn kei ding uh hi, tua khit ciangin a sawt loin nong mu ding uh hi,’ ka cih ciangin ka cihnopna bang hiam cih khat le khat kidong na hi uh hiam? 20 Thutak kong geninah, leitung a lungdam laitakin note kapin na dah ding uh hi. Na lungkham ding uh a, ahi hangin na lungkhamna uh lungnopna a suak ding hi. 21 "Numei tasuak in tasuah hun tung ahi manin a na a thuak hi. Ahi hangin ta a suah khit ciangin leitungah ta khat suak ahi manin lungdamin a thuaknate a mangngilh hi. 22 Tua mah bangin note zong tu lai-takin na dah uh hi. Ahi zongin note kong mu kik dinga, na lungdam ding uh hi. Note lungdamna kuamah in hong sutkhia kei ding hi. 23 Tua ni ciangin kei, bangmah nong dong nawn kei ding uh hi. Thutak kong geninah, kei min suanga na nget peuhpeuh uh ka Pa in hong pia ding hi. 24 Tu hun dong kei min suangin bangmah na ngen nai kei uh hi. Ngen le uh cin na ngah ding uh a, tua ciangin na lungdamna uh a kim ding hi. 25 "Tehpih zanga thu kong gen khit hangin hih bang pau namte zanga kong gen loh hun hong tung ta hi. Ahi hangin ka Pa thu siangtaka kong gen hun hong tung ding hi. 26 Tua ni ciangin note in kei min suangin na ngen ding uh hi. Note tangin Pa kiangah kong ngetsak ding a ci ka hi kei hi. 27 Hi lo hi, Pa mahmah in note hong it hi, bang hang hiam cih leh note in kei nong it uh a, Pa kiang pana hong pai ka hilam na um uh hi. 28 Pa kiang panin kong pai-a, leitung ah kong lut khin zo hi; tu-in leitung nusia in Pa kiangah ka ciah kik ding hi,” a ci hi. 29 Tua ciangin Jesu nungzuite in, “Tu-in tehpih zang loin kiteltakin na gen hi. 30 Tu-in ahileh na khempeuh na thei a, kuama hong dot nangawn a kul kei hi, cih ka thei ta uh hi. Nang, Pasian kiang pana hong pai na hilam hih in ko hong umsak ta hi,” a ci uh hi. 31 Jesu in, “Hong um ta buang uh teh maw!b 32 Ahi hangin note na inn ciatuah na kikhenthang hun uh hong tung ding tham loin hong tung zo hi. Note in kei guak nong nusia ding uh hi. Ahi zongin ka Pa tawh om khawm ka hi manin kei guak ka hi kei hi. 33 Note in kei sungah lungnopna na ngah nadingun hih thute kong gen khin ta hi. Hih leitung ah note na lungmang ding uh hi. Ahi hangin kilungkhauhsak un! Leitung ka zo zo hi,” a ci hi.

Johan 17

1 Jesu in hih teng a genkhit ciangin vantung lam entoin thu ngen a: “Pa aw, a hun tung zo hi. Na Tapa in nang hong minthansak theih nadingin, na Tapa minthangsak in. 2 Ahang in, amah na piaksa mi khempeuh tungah nuntak tawntungna a piak theih nadingin mi khempeuh tunga thuneihna amah na pia zo hi. 3 Tu-in hih in nuntak tawntungna ahi: nang bek a maan Pasian na hina le na sawlpa Jesu Khrist a theihna uh ahi hi. 4 Ka hih dinga nong piakte zawhsiangna tawh leitungah minthanna nang kong puak zo hi. 5 Tu-in ahileh Pa aw, leitung a om ma-a nang tawh ka neih minthanna-in kei hong minthangsak in. 6 "Leitung pana nong piakkhiatte tungah nanga na laakkhia zo hi. Amaute nang aa ahi uh hi; amaute kei nong pia zo-a na thu a mang uh hi. 7 Tu-in amaute in kei nong piak khempeuh nang kiang pana hong pai ahilam thei ta uh hi. 8 Ahang in, kei nong piak thute, amaute ka pia-a, tuate a sang uh hi. Amaute in nang kiang pana pai ka hilam theitel uh a, nang kei nong sawl zong a um uh hi. 9 Amaute ading thu kong ngetsak hi. Leitung ading kong ngen kei hi. Ahi hangin nong piaksate ading kong ngen hi. Ahang in, amaute nang aa ahi uh hi. 10 Kei neih khempeuh nang aa hi-a, nang neih khempeuh kei aa ahi hi. Tua hi-a, amau tungtawnin minthanna ka ngah hi. 11 Leitung ah sawt ka om nawn kei ding hi. Ahi hangin amaute leitung ah om lai ding uh a, nang kiangah kei kong pai ding hi. A Siangtho Pa aw, nang le kei khat i hi bangin, amaute khat ahi theih nading un kei nong piaksa min – nangma min vangliatna tawh amaute hu in. 12 Amaute tawh ka omkhawm laitakin, nong piaksa min tawh amaute bittakin ka hu zo hi. Laisiangtho a tangtun nadinga a mang thang pa pen simloh khat beek ka mansuah kei hi. 13 "Tu-in nang kiangah kong pai ta ding hi. Ahi hangin amaute in amau sungah ka lungnopna a dim a neih theih nadingun leitung a ka om laitakin hih thute ka gen hi. 14 Amaute tungah na thu ka pia khin a, kei leitung aa ka hi lo bangin amaute zong leitung aa hi nawn lo uh ahi manin leitung in amaute a mudah hi. 15 Amaute leitung pan na lakkhiat ding kong ngen kei hi. Ahi hangin gilopa panin na hut ding kong ngen hi. 16 Kei, leitung aa ka hi lo bangin, amaute zong leitung aa hi lo uh hi. 17 Amaute thutak tawh siangthosakb in; na thu thutak ahi hi. 18 Leitungah kei nong sawl bangin, amaute leitungah ka sawl zo hi. 19 Amaute zong a siantho takpi nadingun keimah le keimah ka kisiangthosak hi. 20 "Amaute ading kia kong ngen kei hi. Amaute thupuakte tungtawn a kei hong um ding mite adingin zong kong ngen hi. 21 Pa aw, nang kei sungah na om a, kei nang sungah ka om bang tektekin amaute khat a suah theih nadingun kong ngen hi. Nang, kei nong sawl ahilam leitung in a up nadingin amaute zong ei sungah om uh hen. 22 Eite khat i hi mah bangin amaute zong khat ahi theih nadingun nong piaksa minthanna amaute ka pia zo hi. 23 Amaute sungah kei ka oma kei sungah nang na om hi. Nang, kei nong sawl le kei nong it bangin amaute na it cih leitung in a theih nadingin amaute kiciantakin pumkhat suak uh hen. 24 "Pa aw, nong piaksa mite ka omna-ah kei tawh a om khawm ding le nong it mana leitung piansak ma-a minthanna nong piak keima minthanna a muh ding uh ka deih hi. 25 "A thumaan Pa aw, leitung in nang hong thei kei zongin, ken nang kong thei-a, nang, kei nong sawl amaute in a thei uh hi. 26 Amaute tungah nang kong pulak zo-a, nangmah in kei nong itna amaute aa ahi theih nading le kei mahmah amaute sungah ka om theih nadingin kong pulak lai hi,” a ci hi.

Johan 18

1 Jesu in thu a nget khit ciangin a nungzuite tawh tua mun nusia in Kidron Kuam a kantan uh hi. Tua kuam galkhatah Olive lo khat a om hi; tua lo sungah amah le a nungzuite a lut uh hi. 2 Jesu le a nungzuite tua lai-ah kituah pahpah uh ahi manin amah lehhekpa Judas in tua mun a thei hi. 3 Tua ahi ciangin Judas in, galkap pawlkhat le siampi makaite le Pharisee-te pana ulian pawlkhat makaih in lo sungah a va pai uh hi. Amaute in meisel, meivak le hiam a keng uh hi. 4 Jesu in ama tunga thu piang ding khempeuh thei khin a, paikhia-in amaute kiangah, “Kua deih na hi uh hiam?” ci-in a dong hi. 5 Amaute in, “Nazareth mi Jesu,” ci-in a dawng uh hi. Jesu in, “Kei, amah ka hi hi,” a ci hi. (Tua laitakin a lehhekpa Judas zong amaute lakah a ding hi.) 6 Jesu in, “Kei, amah ka hi hi,” a cih ciangin amaute nungkin in lei-ah a puk uh hi. 7 Jesu in, “Kua deih na hi uh hiam?” ci-in amaute a dong kik hi. Amaute in, “Nazareth mi Jesu,” a ci uh hi. 8 Jesu in, “Kei, amah ka hi hi, ci-in kong gen zo hi. Kei hong zong na hi uh leh hih mite paisak un,” ci-in a dawng hi. 9 "Nong piaksa mi khat beek ka mansuah kei hi,”a a cih thu a tangtun nadingin hih thu a piang ahi hi. 10 Tua ciangin namsau khat a nei Simon Peter in a namsau dokin tulpipa nasempa a sat leh a taklam bil a satkhia hi. (Tua nasempa min Malchus ahi hi.) 11 Jesu in Peter kiangah, “Na namsau paimang in. Pa hong piaksa hai dawn lo ding ka hi hiam?" ci-in thu a pia hi. 12 Tua ciangin galkap pawlkhatte le a makaipa uh tawh Jew-te uliante in Jesu a man uh hi. Amaute in amah hen uh a, 13 tua kuma tulpi a sem Caiaphas sungpa Anna kiangah a puak masa uh hi. 14 Caiaphas pen, mipite tangin mi khat si leh hoih ding hi, ci-a Jew-te tungah thuhilh pa ahi hi. 15 Simon Peter le nungzui dang khat in Jesu a nungzuih uh hi. Hih nungzuipa pen tulpipa meltheih ahi manin tulpipa huang sung dong Jesu tawh a tonkhawm hi. 16 Ahi zongin Peter in a pualam kongbiang ah a ngak hi. Tulpipa meltheih nungzuipa pai kika, nasem-a om nungak kiangah a gen ciangin huang sungah Peter a lutsak hi. 17 Kongkhak a nungaknu in Peter kiangah, “Nang hih mipa nungzui lakah khat hi lo na hia?” ci-in a dong hi. Amah in, “Hi keng,” ci-in a dawng hi. 18 Khuadam a, nasemte le uliante mei awi-in mei kimkotah a ding uh hi. Peter zong amaute lakah mei awi-in a ding hi. 19 Tua hun laitak, tulpipa in Jesu, a nungzuite le a hilh thute a dot laitak ahi hi. 20 Jesu in, “Leitung kiangah a lang tang in ka gen zo hi. Jew-te kikhopna ahi zongin synagogue-te le biakinnpi ah thu ka hilh tawntung hi. Ka sim gen bangmah a om kei hi. 21 Bang dinga kei hong dong na hi hiam? Ka thugen a zate dong in. Ka gensate thei mahmah uh hi,” ci-in a dawng hi. 22 Jesu in hih bang a cih ciangin a kianga om uliante laka khat in, “Tulpipa dawn nading hih bang maw?” ci-in a maitang a beng hi. 23 Jesu in, “Thu maan lo gen ka hileh ka khialhna hong gen in. Ahi hangin thutak gen ka hileh bang hanga hong beng na hi hiam?” ci-in a dawng hi. 24 Tua ciangin Annas in amah hensa mah in tulpi Caiaphas tungah a puak hi.b 25 Simon Peter mei awi-a a din laitakin, “Ama nungzui dang khat hi ngel ve teh aw?” ci-in amah kidong hi. Amah in, “Hi keng,” ci-in a nial hi. 26 Tulpipa nasemte laka Peter in a bil a satkhiatsak pa tanaute khat in, “Olive lo sungah amah le nang hong mu khawm hi lo ka hia?” ci-in a to hi. 27 Peter in nial kik leuleu a, tua hun laitakin ak a khuang hi. 28 Tua ciangin Jew-te in Caiaphas inn panin Rome-te ukpipa innpi ah Jesu a paipih uh hi. Tua hun zingsang tung ahi hi. Jew-te in Paisan Pawi ne thei nuam uh a, biakna ngeina palsat a, a nit loh nadingun kumpipa inn sungah a lut kei uh hi. 29 Tua ahi ciangin amaute kiangah Pilate paikhia a, “Hih mipa na mawh matna uh bang ahi hiam?” ci-in a dong hi. 30 Amaute in, “Amah in tatkhialh na lian nei kei leh nang khut sungah kong tun kei ding uh hi,” ci-in a dawng uh hi. 31 Pilate in, “Note mah in amah pai-pih unla, nomau thukham bangin thu khen un,” a ci hi. Jew-te in, “Ahi hangin mi khatpeuh tungah thu khena thah theih nading thu ka nei kei uh hi,” ci-in a nial uh hi. 32 Bangci banga sihna thuak ding cih, Jesu in ama sih nading thu a genkholhna, a tangtun nadingin hih thu a piang ahi hi. 33 Tua ciangin innpi sungah Pilate lut kik a, Jesu samin thu donga, “Nang, Jew-te kumpipa na hi hiam?” a ci hi. 34 Jesu in, “Tua pen nang ngaihsut mah ahi hiam, ahikeh kei thu midang khatpeuh hong gen ahi hiam?” ci-in a dong hi. 35 Pilate in, “Kei Jew mi ka hi hiam? Nang, kei khut sung hong tun na mipihte le na siampi makaite ahi hi. Nang bang hih na hi hiam?” ci-in a dong hi. 36 Jesu in, “Kei kumpi gam hih leitung hi lo hi. Hi hileh, Jew-te hong matin ka nasemte in kei hong hutna un a do ding uh hi. Ahi hangin kei kumpi-gam mundang pan ahi hi,” a ci hi. 37 Pilate in, “Nang, kumpi khat na hi maw leh!” a ci hi. Jesu in, “Kei kumpi nong cih na maan hi. A taktakin, hih thu hangin ka suaka, hih thu hang mahin leitung ah kong pai-a thutak ah teci ka pang hi. Thutak lama pang peuhmah in ka thu a ngai uh hi,” ci-in a dawng hi. 38 Pilate in, “Thutak bang ahi hiam?” ci-in a dong hi. Tua a cih kawmin Jew-te kiangah paikhia kik a, “Amah mawhsak nading thukho bangmah ka mu kei hi. 39 Ahi hangin Paisan-pawi hun ciangin note kiangah thongkia khat ka khah ding na ngeina uh ahi hi. ‘Jew-te kumpipa’ kong khah ding na deih uh hiam?” ci-in a dong hi. 40 Amaute in, “Hi lo, amah hi lo! Barabbas hong pia ou,” ci-in a kiko kik uh hi. Barabbas ahileh kumpi langdona-a kihel khat ahi hi.

Johan 19

1 Tua ciangin Pilate in Jesu a satsak hi. 2 Galkapte in ling phekkhawmin kumpi lukhu phan uh a, a lu-ah a khusak uh hi. Amaute in kumpi puan dupsan silhsak uh a, 3 ama kiangah pai thithe in, “Jew-te kumpipa, cidam ta in!” a ci uh hi. Tua ciangin amaute in a mai a beng uh hi. 4 Pilate khatvei paikhia kik a, Jew-te kiangah, “En un, amah mawhsak nading thukho bangmah ka mu kei hi, cih kong theihsakna-in amah note kiangah kong khahkhia hi,” a ci hi. 5 Jesu, kumpi puan dupsan silhin, ling lukhu khusa-in a paikhiat ciangin Pilate in amaute kiangah, “Mipa hiah om hi!” a ci hi. 6 Siampi makaite le uliante in amah a muh phetun, “Kilhlum in! Kilhlum in!” ci-in a kiko uh hi. Ahi hangin Pilate in, “Amah la unla, kilhlum un. Ken ahileh amah mawhsak nading thukho ka mu zo kei hi,” a ci hi. 7 Jew-te in, “Kote in thukham ka nei uh hi; tua thukham tawh kizui-in amah a sih pelmawh kul hi. Bang hang hiam cih leh, amah ‘Pasian Tapa ka hi hi,’ kici hi,” a ci teitei uh hi. 8 Pilate in hih thu a zak ciangin lau semsem zaw a, 9 innpi sungah a lut kik hi. Amah in, “Koi pana hong pai na hi hiam?” ci-in Jesu a dot ciangin Jesu in a dawng kei hi. 10 Pilate in, “Kei hong dawng nuam lo na hi hiam? Nang, kilhlup theihna le khahkhiat theihna thuneihna a nei ka hilam phawk lo na hi hiam?” a ci hi. 11 Jesu in, “Tunglam pana hong kipia ahikeh kei tungah bangmah vangliatna na nei kei hi. Tua ahi ciangin nang tunga kei hong puakpa in mawhna lianzaw a bawl hi,” ci-in a dawng hi. 12 Tua-a kipan Pilate in Jesu a khah nading a hanciam hangin Jew-te in, “Hih mipa na khahkhiat leh Caesar lawm na hi kei hi. Kumpipa ka hi hi, a kici peuhmah Caesar langpang ahi hi,” ci-in a kiko niloh uh hi. 13 Pilate in hih thu a zak ciangin Jesu a pualam ah paikhiatpih a, Suangphah (Aram pau in Gabbatha) kici mun-a thukhenna tokhom tungah a tu hi. 14 Tua hun, Paisan-pawi Nipikal Kiginkholh ni, nai gukna pawl ahi hi. Pilate in Jew-te kiangah, "Hih lai-ah na kumpipa uh om hi," a chi hi. 15 Ahi hangin amaute in, “Amah lakhiamang in! Amah lakhia mang in! Amah kilhlum in!” ci-in a kiko uh hi. Pilate in, “Na kumpipa uh kilhlum ding ka hi hiam?” ci-in a dong hi. Siampi makaite in, “Caesar longal kumpi dang kuamah ka nei kei uh hi,” ci-in a dawng uh hi. 16 A tawpna-ah Pilate in amah kilhlup dingin amaute tungah piakhia ta hi. Tua ciangin galkapte in Jesu cingin a paikhiatpih uh hi. 17 Ama singlamteh ding amah in pua-a, Luguh Mun (Aram pau-a Golgotha kici) lamah a paikhia hi. 18 Amaute in amah singlamteh tungah a kilh uh hi. Amah tawh midang nih – alang tuakah khat tuak kilhin a laizangah Jesu a kilh uh hi. 19 Pilate in theihsakna khat bawlsak a, singlamteh ah a suang hi. Tua ah, JEW-TE KUMPIPA, NAZARETH MI JESU, kici hi. 20 Jew-te tampi in hih lai kisuang a sim uh hi. Ahang in, Jesu singlamteh tunga a kikilhlupna mun khuapi kiang hi-a, tua theihsakna lai, Aram, Latin le Greek pau-in kigelh hi. 21 Jew-te siampi makaite in Pilate kiangah, “‘Jew-te’ Kumpipa’ ci-in gelh kei in, hih mipa’ Jew-te kumpipa ka hi hi’ kici hi, ci-in gelh in,” a va ci uh hi. 22 Pilate in, “Ka gelh khitsa, ka gelhkhitsa ahi hi,” ci-in a dawng hi. 23 Galkapte in singlamteh tungah Jesu a kilh uh ciangin a puansilhte la in phel li suah uh a phel khat ciatin tang uh a, a puan sungsilh a siit lai uh hi. A puan sungsilh pen a khuina om lo, alu pan ataw dong zang khata kiphan ahi hi. 24 Amaute in, “Balkek kei ni, a ngah ding pen aisan ni,” a kici uh hi. Hih banga a hihna uh, Laisiangtho sunga kigen, “Amaute in ka puante hawm uh a, ka puan-ak ading ai a san uh hi,”a cih thu a tangtun nading ahi hi. Tua hi-a, hih pen galkapte hih ahi hi. 25 Jesu singlamteh gei-ah a nu, a nu sanggamnu, Clopas zi Mary le Magdalane a Mary-te a ding uh hi. 26 Jesu in tua lai-a om a nu le a kianga ding, a it a nungzuipa khat a muh ciangin a nu kiangah, “Kong it numei aw, na tapa hih lai-ah om hi,” ci-in, 27 nungzuipa kiangah, “Na nu hih lai-ah om hi,” a ci hi. Tua hun a kipan hih nungzuipa in tuanu a inn ah a kem hi. 28 Tua khit, Jesu in na khempeuh cingkim khin ta, cih a theih ciangin Laisiangtho a tangtun nadingin, “Ka dangtaak hi,” a ci hi. 29 Tua lai-ah lenggahzu thuk bel khat a om hi. Amaute in tua sungah tuihup diah uh a, puknah hiang dawnah suangin Jesu mukah a tah uh hi. 30 Jesu in tua dawn ding a ngah khit ciangin, “Kizo zo hi,” a ci hi. Tua tawh a lukunsukin, a kha a khahkhia hi. 31 Tua ni pen Kiginkholh ni hi-a, a zingciang lah Sabbath ni thupi tuam ni ding ahi hi. Jew-te in Sabbath ni-a singlamtehte tungah a luangte uh a om ding a deih loh man un, Pilate kiangah a khete uh sutan-a, a luangte uh a lakkhiat ding a ngen uh hi. 32 Tua ahi ciangin galkapte va pai in, Jesu tawh kikhai khawm, a masa pa khete sutan uh a, tua ciangin adang khat aa a sutan uh hi. 33 Ahi hangin Jesu kiang a tun uh ciangin amah a sisa in mu uh a, a khete a sutan kei uh hi. 34 Tua tangin galkapte khat in Jesu teneem teipi khatin sun-a, sisan le tui kihel a luangkhia pah hi. 35 A mu pa in a muh thu teci panga, ama teci panna thutak ahi hi. Amah in thutak gen ahilam thei a, nang zong na up theih nadingin teci a pang hi. 36 Laisiangtho in: “Ama guh khat beek a kisutan kei ding hi,”b a cih le 37 Laisiangtho mundang khatah: “Amaute in a sutpa uh a en ding uh hi,”c a cih thu a tangtun nadingin hih banga piang ahi hi. 38 Tua nung ciangin Arimathea a teng Joseph in Pilate kiangah, Jesu luang a ngen hi. Joseph, Jesu nungzui khat ahi hangin Jew-te a kihtak manin a langtang in a zui kei hi. Amah pai-in Pilate phalna tawh a luang a la hi. 39 Amah tunung lama zana Jesu kianga hawhpa Nicodemus in a zui hi. Nicodemus in paknamtui kha le aloes kihel poundd sawm sagih le nga ding khawng a keng hi. 40 Amaute in Jesu luang lakhia uh a, saihadial puanin gim namtui tawh a tuam khawm uh hi. Hih pen Jew-te kivuina ngeina zuihna ahi hi. 41 Jesu kikilhlupna munah huan khat om a, tua huan sungah kuamah a kisial ngei nai lohna han thak khat a om hi. 42 Jew-te Kiginkholh ni ahi hang le a kiangah han om pah ahi manin amaute in tua lai-ah Jesu a sial uh hi.

Johan 20

1 Nipi kal a ni masa ni, zingsang tung khuamial laipi-in Mary Magdalene, hanah pai-a, han kongvang panin suang kilikkhiasa-a om a mu hi. 2 Tua ciangin Simon Peter le Jesu in a it nungzuipa kiangah amah va tai-a, “Amaute in han sung panin Topa a lakhia zo uh hi, amah koi-ah koih uh hiam, ka thei kei uh hi!” a ci hi. 3 Tua ciangin Peter le nungzui dang khat pen in han lam a manawh uh hi. 4 A nih un taikhawm uh a, ahi hangin tua nungzui dang khat pa in Peter makhelhin han a tung masa hi. 5 Amah kunsukin a sung ena, tua lai-a om a kitunna saihadial puante enin, a sungah a lut kei hi. 6 Tua ciangin a nunga om Simon Peter tunga, han sungah a lut hi. Tua lai ah a luang tunna saihadial puan mu a, 7 Jesu lutang kimkot-a han puan om zong a mu hi. Tua puante kizial tuamin saihadial puan tawh a tuamtuakin a om hi. 8 A tawpna ah han a tung masa nungzuipa zong a sungah a lut hi. Amah in mu-a a um hi. 9 (Amaute in tua hun dong, Laisiangtho in, Jesu misi pan kithosak ding hi, cih thu a theitel nai kei uh hi.) 10 Tua ciangin nungzuite a inn uah ciah kik uh a, 11 ahi hangin Mary han pua-ah dingin a kap hi. A kah kawmkawmin kunsukin han sung a et leh, 12 puanpak silh vansawltak nih, Jesu luang kisialna mun, a lukhungah khat, a khekhuantaw-ah khat a tu a mu hi. 13 Amaute in, “Numei aw, bang dinga kap na hi hiam?” ci-in a dong uh hi. Tuanu in, “Ka Topa lakhiamang uh a, koi-ah koih uh hiam, ka thei kei hi,” a ci hi. 14 Tua laitakin a nunghei leh a nunga ding Jesu a mu hi; ahi zongin Jesu ahilam a thei kei hi. 15 Amah in, “Numei aw, bang dinga kap na hi hiam? Kua zong na hi hiam?” a ci hi. Tuanu in huan neipa sa a, “Sia aw, amah na puakkhiat mang ahileh koi-ah koih na hi hiam, hong gen in, ken ka la kik nuam hi,” a ci hi. 16 Jesu in, “Mary” ci-in a sam hi. Ama lam nga-in amah kihei a Aram pau in, “Rabboni!” (Sia cihna) ci-in a awngkhia hi. 17 Jesu in, “Pa kiangah ciah nai lo ka hi manin hong lenlen kei in. Tua sangin ka sanggamte kiangah pai inla, ‘Ka Pa, na Pa uh, ka Pasian na Pasian uh kiangah a ciah kik dek ta ka hilam amaute va hilh in,’” a ci hi. 18 Tua thu tawh nungzuite kiangah Mary Magdalene pai-in, “Topa ka mu khin hi!”a ci hi. Jesu in ama tunga a gen khempeuh amaute a ko hi. 19 Tua nipikal, ni masa ni nitak in, Jew-te kihta-in kong kikalhkhum uh a, a kikhop laitakun, Jesu pai-in amaute lakah va dinga, “Lungmuanna, note tawh om ta hen!” a ci hi. 20 Hih a cih khit ciangin a khutte le a teneem amaute a lak hi. Nung-zuite in Topa a muh uh ciangin a nuam lua mahmah uh hi. 21 Jesu in, “Note tawh Lemna, om ta hen! Pa in kei hong sawl bangin note kong sawl hi,” a ci leuleu hi. 22 Tua tawh amaute tungah a huu khah a, “Khasiangtho na sang un. 23 Mi khatpeuh a mawhnate na maisak uh leh amau mawhnate a kimaisak hi a, amau mawhnate na maisak kei uh leh amau mawhnate a kimaisak lo ahi hi,” a ci hi. 24 Nungzuite kiangah Jesu a pai lai-in Sawm-le-nihte lakah khat Thomas (Didymus kici) a om kei hi. 25 Nungzui dangte in ama kiangah: “Topa ka mu khin uh hi,” ci-in a gen uh hi. Ahi hangin amah in, “A khut sunga siktukkilh ma mu-a, ka khutme-in siktukkilh omna munte lawng-a, a pang ka lawn tektek mateng ka um kei ding hi,” a ci bikbek hi. 26 Nipikal khat khit ciangin a nungzuite tua inn ah kikhawm kik uh a, Thomas zong amaute tawh a omkhawm hi. Kongkhakte a kikalh hi napi, Jesu pai-in amaute lakah dinga, “Lemna, note tawh om ta hen!” a ci hi. 27 Tua ciangin “Thomas kiangah, “Na khutme in hih lai lawng in; ka khutte en in. Na khut zan inla ka pang lawng in. Lunghei nawn kei inla um in,” a ci hi. 28 Thomas in, “Ka Topa le ka Pasian!” a ci hi. 29 Tua ciangin Jesu in ama kiangah, “Na muh khit manin nong um hi; mu lo napi-a umte thupha ngah ahi hi,” ci-in a gen hi. 30 Jesu in a nungzuite muhin hih laibu sunga kigelh lo lim lamdang tampi a bawl hi. 31 Ahi hangin Jesu, Khrist hi-a, Pasian Tapa hi, cih na up theiha nading uh le tua upna hangin ama minin nuntakna na neih theih nadingun hihte a kigelh ahi hi.

Johan 21

1 Tua nungin Tiberiasa tuipi gei-a a nungzuite kiangah Jesu a kilang kik hi. A kilahzia hih bang ahi hi: 2 Tua lai-ah Simon Peter, Thomas (Didymus kici) Galilee gam Cana pan Nathanael, Zebedee tapate le adang nungzuite nih a om uh hi. 3 Simon Peter in amaute kiangah, “Kei nga beng dingin ka kuan ding hi,” a cihleh amaute in, “Ko zong kong zui ding uh hi,” a ci uh hi. Tua ciangin amaute paikhia-in gunkuang sungah a tuang uh hi. Ahi hangin tua zanin bangmah a man kei uh hi. 4 Zingsang tungin gun gei-ah Jesu dinga, ahi hangin nungzuite in Jesu ahilam a thei kei uh hi. 5 Amah in amaute galsap a, “Lawmte, nga khat beek man lo maw?” a ci hi. Amaute in,“Man het lo,” ci-in a dawng uh hi. 6 Amah in, “Na len-un na gunkuang taklam pang uh khuh dih un; tua hileh pawlkhat na man ding uh hi,” a ci hi. Amaute in a khuh uh ciangin nga tam awk lua ahi manin a len uh gunkuang sung a tun zo kei uh hi. 7 Tua ciangin Jesu it nungzui pa in Peter kiangah, “Topa hi!” a ci hi. “Topa hi” a cih Simon Peter in a zak phetin a puan tungnung tengin (ahang in, amah puansilh loin a om hi) tui sungah a diangkhia pah hi. 8 Nungzui dangte tuigei pan a gamla lo tong zanihb bangah om uh a, amaute in len dima ngasa kai kawmin gunkuangin a zui uh hi. 9 Tui gei a tun uh ciangin amaute in tua lai-ah meihol-am tunga ngasa le anlum kihang a mu uh hi. 10 Jesu in amaute kiangah, “Tu-a na ngasa matte uh tawm hong la dih un,” a ci hi. 11 Simon Peter gunkuang tungah kah a, tui gei-ah len a kai hi. Ngasa a lian bekbek 153 tak a awk hi. Tua zahtak hi napi len a kek kei hi. 12 Jesu in amaute kiangah, “Hong pai unla zing-an ne un,” a ci hi. Nungzuite khat beek in, “Nang kua na hiam?” ci-in a dong ngam kei uh hi. Amaute in Topa ahilam a thei uh hi. 13 Jesu pai-in anlum la-a, amaute pia-in tua mah bangin ngasa zong a pia hi. 14 Hih in, Jesu misi pan a thawh kik zawh a nungzuite kiangah a kilah a thumveina ahi hi. 15 An a nek khit uh ciangin Jesu in Simon Peter kiangah, “Johan tapa Simon aw, hihte sangin kei nong it zaw taktak hiam?” a ci hi. Amah in, “Hihi Topa aw, nang kong it na thei hi,” a ci hi. Jesu in, “Ka tuunote na vak in,” a ci hi. 16 Jesu in, “Johan tapa Simon aw, kei nong it taktak hiam?” a ci kik hi. Amah in, “Hihi Topa aw, nang kong it na thei hi,” ci-in a dawng hi. Jesu in, “Ka tuute na cing in,” a ci hi. 17 Ama kiangah, “Johan Tapa Simon aw, kei nong it hiam?” ci-in a thumveina a dong hi. Jesu in, “Kei nong it hiam?” ci-a a thumveina a dot manin Peter lungsim a nasak hi. Amah in “Topa aw, na khempeuh na thei hi; nang kong it na thei hi,” a ci hi. Jesu in, “Ka tuute na vak in. 18 Thutak kong geninah, na khangno zawk lai-in nang le nang kizemin na utna peuhah na pai hi. Ahi hangin na khangham ciangin na khutte zanin midang khatpeuh in nang hong zem dinga, na pai nop lohna pi-ah hong paipih ding uh hi,” a ci hi. 19 Hih thu pen bangci bang sihna tawh Peter in Pasian a minthansak ding cih Jesu in a genna ahi hi. Tua ciangin amah in ama kiangah, “Kei hong zui in,” a ci hi. 20 Peter a nunghei leh Jesu it nungzui pa-in amaute a zuih laitak a mu hi. (Hih pa pen, nitak-an a nek khawm lai-ua Jesu tungah kingama “Topa, kua-in nang hong lehhek ding hiam?” ci-a a dong pa ahi hi.) 21 Peter in amah a muh ciangin, “Topa amah bangci ding?” ci-in a dong hi. 22 Jesu in, “Amah kong pai kik dong a nungta lai dingin deih leng zong nang tawh bang kisai hiam? Nang kei nong zuih pelmawh kul hi,” ci-in a dawng hi. 23 Hih thu hangin ‘Hih nungzui pa a si kei ding hi,’ ci-in sanggamte lakah kam lengsawn a kithang hi. Ahi hangin Jesu in amah si lo ding a cihna hi lo-a, “Kong pai kik dong amah a nungta lai dingin deih leng zong nang tawh bang kisai hiam,” a ci hi bek hi. 24 Hih nate ah teci panga a gelh pa hih nungzui pa ahi hi. Ama teci panna amaan hi, cih i thei hi. 25 Jesu in nadang tampi zong a sem lai hi. A vekpi in kigelh khin hileh leitung buppi nangawn in a kigelh ding laibute a koih nading mun a nei kei ding hi, ci-in ka um hi.

Nasepte 1

1 Theophilus aw, ka laibu masa sungah Jesu in a septe le a hilhte khempeuh a kipat tunga kipan 2 a teelsa sawltakpite tungah Khasiangtho tungtawna a lah khit ciangin vantungah a kilaktoh ni donga thute ka gelh ahi hi. 3 A thuak dingte a thuak khit nungin hih mite kiangah amah mah kilak-a, amah a nungta takpi ahina, a uptak kitelna tampitak a lak hi. Amaute kiangah amah kilak in, ni sawmli sung Pasian gam thu a gen hi. 4 Khatvei amaute tawh an a nek khawm laitakun amah in: “Jerusalem nusia kei un. Ahi zongin kong gen na zaksa uh ka Pa in letsong hong piak dinga hong ciam, na ngak un. 5 Ahang in, Johan in tui-ina hong baptise hi. Ahi hangin ni tawmkha khit ciangin Khasiangtho-in na kibaptisa ding uh hi,” ci-in thu a pia hi. 6 Tua ahi ciangin amaute a kisuktuah khawm laitakun, “Topa aw, Israel tungah tuhunin kumpi-gam ding kiksak ding na hi hiam?” ci-in dong uh hi. 7 Amah in amaute kiangah, “Pa in ama thuneihna tawh a seh ani ahi zongin ahun ahi zongin note theih ding hi lo hi. 8 Ahi hangin note tungah Khasiangtho hong tun ciangin vangliatna na ngah ding uh a, Jerusalem, Judea gam, Samaria gam khempeuh le leimong dongah ka tecite na hi ding uh hi,” a ci hi. 9 Tua teng a cih khit ciangin amaute muh mahmah in amah kilato a, amaute muhtawp ah meii in a liah hi. 10 Amah a paito amaute in a et zuizui laitakun, amaute gei-ah thakhatin puanpak silh mi nih a ding hi. 11 Amaute in, “Galilee mite aw, hih lai-ah vanlam enin bang hangin ding na hi uh hiam? Note kiang pan vantung ah kilato hih Jesu tektek mah vantung ah a pai na muh bangun hong pai kik ding hi,” a ci uh hi. 12 Tua ciangin khuapi pana Sabbath ni khat lamb a gamla Olive Vum kici mualno panin Jerusalem ah a ciah kik uh hi. 13 Amaute a tun uh ciangin amau omna ngei dei tungnung ah a pai uh hi. Tua lai-a omte: Peter, John, James le Andrew; Philip le Thomas, Bartholomew le Matthew; Alphaeus tapa James le Zealot pawla Simon le James tapa Judas-te ahi uh hi. 14 Amaute in numeite, Jesu sanggamte le a nu Mary tawh thu a ngen khawm tawntung uh hi. 15 Tua nite in, thu-umtec (za le sawm nih bang a pha ding mi hon khat) lak panin Peter ding to-a, 16 "Sanggamte aw, tanglai peka Khasiangtho in David kam tawna a na gen, Jesu a mante a makaih Judas tawh kisai Laisiangtho thu a tangtun ding kisam hi. 17 Tuapa eite lakah khat hi-a i naseppih ahi hi,” a ci hi. 18 (Judas in a gitlohna mana a ngah pahtakman tawh lo khat a lei hi. Tua munah bungbu kiatin a pumpi kitam a, a gilzangte buakhia hi. 19 Jerusalem a om mi peuhmah in hih thu a za uh hi. Tua ahi ciangin amaute in tua mun amau kamin, Sisan-lo cihna Akeldama, ci-in a phuak uh hi.) 20 Peter in, “Bang hang hiam na ci uh leh Phatna-late bu sungah, “‘Ama mun kinusia ta hen; tua sungah a teng ding kuamah om kei hen,’d tua ciangin, ‘Ama makaihna mun midang in laih ta hen’”e ci-in kigelh zo hi. 21 Tua ahi manin Topa Jesu eite lakah sungtum pusuak in a om sung khempeuh, 22 Johan baptise a kipan eite kiang pana Jesu a kilaktoh hun dong eite tawh a om khawmsa mite lak-a khat i teel ding kisam hi. Ahang in, tuate lakah khat in eite tawh ama thawhkikna teci a pan tektek ding kisam hi,” a ci hi. 23 Tua ciangin mi nih: Barsabbas kici Joseph (Justus zong a kici) le Mathias-te a sehkhia uh hi. 24 Tua khit ciangin thu ngen uh a, “Topa aw, mi khempeuh lungtang na thei hi. 25 Judas ama munah pai-a, a nusiat hih sawltakpi nasep a sem ding hih mi nihte kua zaw teel na hi hiam, kote hong lak in,” a ci uh hi. 26 Tua ciangin ai lawn uh a, Mathias tung a tu hi. Tua ahi ciangin amah sawltakpi sawm-le-khat lakah kigawm beh hi.

Nasepte 2

1 Pentecost ni a tun ciangin amaute a vekpi un mun khatah a om khawm uh hi. 2 Van pan thakhatin huihpi nung ging bangin ging a, amaute tutna inn sung khempeuh a dim hi. 3 Amaute in meileiite hileh a kilawm amah le amah kikhenin amaute tung tekah a khawl ciat a mu uh hi. 4 Amaute khempeuh Khasiangtho tawh kidim uh a, Kha hihsak theih bang, kam dangtea in a pau uh hi. 5 Tua lai-in van nuai-a minam khempeuh panin a pai Pasian kihta Jew-te, Jerusalem ah a tam lai uh hi. 6 Amaute in hih awging a zak uh ciangin mi hon khat lungmangin va kikhawm uh hi. Ahang in, amaute thugente amau pau ciatin a za uh hi. 7 Amaute in lamdang sa lua mahmah uh a, “Hih mite a vekpi-un Galilee-te pau-a pau mi hi lo uh ahi hiam? 8 Tua hi napi eite in amaute pau, ei pianpih pau tekin i zak theih bangci dan hiam? 9 Parthia-te Media-te Elam-te;Meso - potamia le, Judea le Cappadocia, Pontus le Asia, 10 Phrygia, le Pamphylia, Egypt le Cyrene kianga Libya gam khente a tengte; Rome pana a hawhte, 11 (Jew-te le Jew biakna a zuite tawh); Cret-te le Arab-te – eite khempeuh in, amaute in Pasian nalamdang bawlte a gen uh ei pau ciatin lah i za mawk a!” ci-in a kidong uh hi. 12 Lamdang sa mahmah in lungzing uh a, “Bang cihna hi peuhmah ding hiam?” a kici uh hi. 13 Ahi zongin mi pawlkhatte in amaute nuihsan in, “Lenggahzu tam dawn lua ta uh hi,”b a ci uh hi. 14 Tua ciangin Sawm-le-khatte tawh Peter ding to-a a aw sangsak in mihonte kiangah, “Ka mipih Jew-te le Jerusalem a om note khempeuh aw, hih thu note tungah kong telgen ding hi. Ka thugen limtakin na ngai un. 15 No upmawh bangin hih mite zukham hi lo uh hi. Tu-in zingsang nai kua sat pan bek hi! 16 Hi lo hi, hih in kamsangpa Joel in a na gen: 17 "Pasian in, ‘Ni nunungte ah mi khempeuh tungah ka Kha ka sungkhia ding hi. Na tanute na tapate un kamsang ding uh a, na tangvalte un mangmu in, na putekte un mang a man ding uh hi. 18 Tua ni ciangin, ka nasem numei le pasalte tung nangawn ah ka Kha ka sungkhia ding a, amaute in thu a genkhol ding uh hi. 19 Tunglam vanah a lamdangte le nuailam leitungah limte le sisan le mei le meikhu sahpite ka lak ding hi. 20 A lian a minthang Topa ni hong tun ma-in ni khuamial suak dinga khapi sisan a suak ding hi. 21 Tua ciangin Topa min a lote peuhmah kihonkhia ding hi,’c a cihsa ahi hi. 22 "Israel mite aw, hih thu ngai un: note in na theih mah bangun Nazareth mi Jesu pen Pasian in note lakah ama tungtawna a bawl nalamdangte, a lamdangte le limte tawh Pasian in a kipsak mi ahi hi. 23 Pasian in a tupsa le a theihkholhsa bangin note khutah hong kipia hi. Tua ciangin note in mitatsiated huhna tawh singlamteh tungah na kilhlum uh hi. 24 Ahi hangin sihna in amah lenden zo lo ahi manin, Pasian in misi pan thokiksak a, sih gentheihna pan a suaktasak hi. 25 David in ama thu a genna-ah: “ ‘Ka mai-ah Topa ka mu tawntung hi. Ka taklamah om ahi manin, kei ka ling kei ding hi. 26 Tua ahi manin ka lung nuam a; ka leii a kipak hi; ka pumpi zong lametna-in a nungta ding hi. 27 Ahang in, hankhuk ah kei nong nusia kei dinga, na Mi Siangthopa zong na muatsak kei ding hi. 28 Nuntakna lampi kei nong theisak zo hi; na omna munah lungnopna tawh kei nong dim ding hi,’e a na ci hi. 29 Sanggamte aw, pupi David si zo a, kivui zo-in, tuni mahmah in hih lai-ah a han om hi, cih kimuangtakin kong gen thei hi. 30 Ahi hangin amah kamsang khat hi-a, Pasian in kiciama, ama suante sung pan khat ama kumpi tokhoma, a tutsak ding a kamciamsa a thei hi. 31 Hong tung ding mukhol ahi manin hankhuk sungah kinusia lo-a, a pumpi zong muat lo ding, ci-in Khristf thawhkikna thu a na genkhol hi. 32 Pasian in hih Jesu thosakin nung tasaka, hih thu a taktak a hina kote khempeuh, teci ka hi uh hi. 33 Amah Pasian taklam ah kitawisang a, Pa kiang pana kamciamsa Khasiangtho ngahin ama hong buakkhiat tu-a na muh na zakte uh ahi hi. 34 Ahang in, David vantung ah kah lo napi: “‘Topa in ka Topa kiangah, 35 "Na galte khempeuh na khepekte ngak nading ka suahsak matengin ka taklam ah na tu in,”’g ci hi. 36 "Tua ahi manin Israel mi khempeuh in tel ta un: Na kilhluppa uh hih Jesu, Pasian in Topa le Khrist suaksak zo hi,” a ci hi. 37 Mite in hih thu a zak uh ciangin a lung uh vut a, Peter le sawltakpi dangte kiangah, ‘Sanggamte aw, bang hih ding ka hi uh hiam?” a ci uh hi. 38 Peter in, “Na mawhnate uh a kimai sak theih nadingin note, na vekpi un kisik unla Jesu Khrist minin na kibaptise un. Tua ciangin Khasiangtho letsong na ngah ding uh hi. 39 Tua kamciam pen note le na tate uh ading le gamlapi-a omte khempeuh ading – i Topa Pasian in a sap dingte khempeuh ading ahi hi,” ci-in a dawng hi. 40 Kammal dang tampi tawh amaute vauhilh a, “Hih a kisiasa khang mite panin note kihonkhia un,” ci-in amaute tungah a thum hi. 41 Ama thu gen a sangte kibaptise uh a, tua ni-in amau pawl sungah mi tul thum bang a kibehlap hi. 42 Sawltakpite thuhilhna le amau tawh kithuahna, anlum balkhapna le thu ngetnate ah, amau le amau a va kipumpiak uh hi. 43 Mi khempeuh in lamdang sa mahmah uh a, sawltakpite in alamdang tampi le apiandang limte a bawl uh hi. 44 Thu-umte khempeuh omkhawm uh a na khempeuh a nei khawm uh hi. 45 A neihsate uh le a vante uh zuakin mi khatpeuh a kisapna bangbangin a pia uh hi. 46 Nisimin biakinnpi huangte sungah a kithuah khawm ngitnget uh hi. Amaute innah anlum balkhamin lungdamna le itna lungsimtak tawh nekhawm uh a, 47 Pasian phatin, mi khempeuh in angvanna nuam a sa uh hi. Topa in nisimin amau pawl sungah a kihonkhia mi a kibehlapsak hi.

Nasepte 3

1 Ni khat, nitak lam nai thum laitak thunget hunin biakinnpi ah Peter le Johan paito uh hi. 2 Tua laitakin a suah tunga mipoi khat, biakinnpi huangte sunga paite tungah khutdawh-a ngen dingin nisima a kikoihna mun Kilawm kici biakinnpi kongpi ah kipuak hi. 3 Tuapa in Peter le Johan a lut dektak a muh ciangin amaute kiangah sum a ngen hi. 4 Peter in amah en gega a, Johan in zong a en hi. Tua ciangin Peter in “Ko hong en dih in!” a ci hi. 5 Tua ciangin tuapa in, amaute in bang khatpeuh a piak ding uh lamena, a law pet hi. 6 Tua ciangin Peter in, “Kham ahi-a ngun ahi zongin ka nei kei hi. Ahi hangin ka neih pen nang kong pia hi. Nazareth mi Jesu Khrist minin lam pai in,” a ci hi. 7 A khut taklam ah manin kaito a, tua mipa khepekte le siakmite thahatin a khauh hi. 8 Amah a khe-in diang to a, lam a pai hi. Tua ciangin amaute tawh biakinnpi huangte sungah paikhawma, pai-in dianga Pasian a phat hi. 9 Mite khempeuh in amah lam pai a Pasian a phat a muh uh ciangin, 10 Kilawm kici biakinn kongpi-a tu, khutdawh-a ngen pa mah hi cih thei tel uh a, amaute in tuapa tunga thupiangte lamdangsa in a lungmang uh hi. 11 Khutdawh-a ngenpa in Peter le Johan a zuihzuih laitakin, mi khempeuh in lamdang sa uh a, amaute omna Solomon Talap a kicihna mun ah a tai uh hi. 12 Peter in a muh ciangin amaute kiangah, “Israel mite aw, bang hangin hih in note lamdang hong sasak ahi hiam? Kote vang tawh ahikeh ka pasianmina uh hanga hih mipa lam a paisak thei bangin bang hangin kote hong hi ci et na hi uh hiam? 13 Abraham, Isaac le Jacob-te’ Pasian, i pate Pasian in ama nasem Jesu min thangsak zo hi. Note in amah thah dingin na piakhia uh a, Pilate in amah khah ding thukim napi ama mai-ah amah na nolh uh hi. 14 Note in a Siangtho le Thumaan Pa na nolh uh a, tualthat khat no kianga hong khah dingin na ngen uh hi. 15 Note in nuntakna a piapa na that uh a, ahi hangin Pasian in amah misi pan a thosak hi. Hih thuah kote teci ka hi uh hi. 16 Note in na muh uh le na theih uh hih mipa Jesu min upna hangin kihatsak hi. Note khempeuh in na muh uh bangin ama tunga damsiangna a pia pen Jesu min le ama tungtawna hong pai upna ahi hi. 17 "Tu-in sanggamte aw, na makaite uh hih bangin khuaphawk loin a gamtat uh ka thei hi. 18 Ahi hangin Pasian in kamsangte khempeuh tungtawn a, ‘Khrista in thuak ding hi,’ ci-a a gen kholhsate a tangtunsakna hih bang ahi hi. 19 Tua ahi ciangin kisikin Pasian lam nga kik un. Tua hileh na mawhnate uh kisiaksiangin Topa tung panin thathak ngahna hun hong tung thei dinga; 20 tua ciangin note adinga kisehsa tua Khrist – Jesu nangawn note kiangah hong sawl thei ding hi. 21 Sawt lai peka ama kamsang siangthote tungtawna a kamciam bangin Pasian in na khempeuh a bawlphat hun hong tun masiah amah ahileh pel loin vantung ah a om lai ding hi. 22 Ahang in, Moses in, ‘Topa na Pasian un nomau mite lak panin note adingin kei tawh kibang kamsang khat hong khangkhiasak ding hi; amah in note tungah hong gen peuhmah na man pelmawh uh kul hi. 23 Ama thu a ngai lo peuhpeuh ama mite lak panin kikhenkhia siang ding hi,’b ci hi. 24 "Hi takpi hi, Samuel a kipan, kamsangte khempeuh thu na gen zahzah in tu lai hunte a na genkhol zo hi. 25 Tua hi-a kamsangte le Pasian in, na pu na pa-te uh tawh thukhunna a na bawlsate a luahte na hi uh hi. Amah in Abraham tungah, ‘Na suan na khakte tungtawnin leitunga mi om khempeuh thupha kipia ding hi,’c ci hi. 26 Pasian in a nasempa a khankhiatsak ciangin note, na tatsiatna panun na vekun kikhelin thupha hong piak theih nadingin note kiangah hong sawl masa hi,” a ci hi.

Nasepte 4

1 Peter le Johan in mipite tungah thu a gengen laitakun siampite, biakinnpi cing makaipa le Sadducee-te va pai uh hi. 2 Sawltakpite in Jesu ah misite a thawhkikna mipite tungah hilhin a tangkona un, amaute a lungzingsak mahmah hi. 3 Amaute in Peter le Johan man uh a, nitaklam ahi manin a zingciang dong thong sungah a khum uh hi. 4 Ahi hangin amaute thupuak a za mi tampi in um uh a, pasal tulnga bang pha ta hi. 5 A zing ciangin gam-ukte, upate le thukham siate Jerusalem ah a kikhawm uh hi. 6 Tua lai-ah tulpi Annas om a, amah tawh Caiaphas, Johan Alexandar le adang tulpite innkuanpihte zong a om hi. 7 Amaute in Peter le Johan a mai-uah dingsak uh a: “Bang vangliatna le bang min tawh hih bawl na hi uh hiam?” ci-in a dong uh hi. 8 Tua ciangin Khasiangtho tawh Peter kidima, amaute kiangah, “No gam-ukte le upate aw, 9 mipoi khat tunga migitna nasep hangin amah bangci dam hiam cih thusitna thuak dingin tuni-in ko hong kisam ahileh, 10 note le Israel gama midangte khempeuh in hih thu thei ta un. A dam siang sinsensa a note mai-a ding hih mipa pen, note in na kilhlup uh, ahi hanga Pasian in misi pana a thawhkiksak pa Nazareth mi Jesu Khrist min hanga dam ahi hi. 11 Amah, “‘No innlamte nolh suang, inntungkhuma suang a suak ahi hi,’b 12 Midang khat beek sungah hotkhiatna a om kei hi. Ahang in, eite kihotkhiat nading van kikhupsin nuai-a mihing tungah a kipia, min dang a om kei hi,” a ci hi. 13 Amaute in Peter le Johan a hanna mu uh a, lai siam lo mi mawkmawk ahilam uh thei uh ahi ciangin lamdang sa-in hih mite Jesu tawh a om khawm uh hi, cih a phawk uh hi. 14 Ahi hangin cina a damsakpa uh amau tawh ding khawm a muh theih manun bangmah a gen thei kei uh hi. 15 Tua ahi ciangin Sanhedrin panin kihemkhia dinga thu a piak khit uh ciangin, amaute thu a kikum uh hi. 16 Amaute in, “Hih mite bang cih ding i hi hiam? Jerusalem a teng mi peuhmah in lah, nalamdang thupi khat a bawl uh thei uh a, i nial nading lah a om kei hi. 17 Ahi hangin tu-a ban, hih thute milakah a kizelhbeh nawn loh nadingin kham ni. Hih min tawh mi khatpeuh tungah thu a gen nawn loh nadingun i vauhilh kul hi,” a kici uh hi. 18 Tua khit ciangin amaute sam kik uh a, Jesu minin thu gena, a hilh nawn het loh nadingun thu a pia uh hi. 19 Ahi hangin Peter le Johan in “No le no kingaihsun dih un, Pasian mitmuhna ah Pasian thu sangin no thu kong man ding uh, koi maanzaw ding ahi hiam? 20 Ahang in, ka muhsa uh le ka zaksa uh thu gen loin ka om thei kei uh hi,” ci-in a dawng uh hi. 21 A nasia zaw in tawng’ uh a, tua khit ciangin amaute a paikhiasak uh hi. A piangsa thu hangin mi khempeuh in Pasian phat uh ahi manin, amaute in gawtna a piak nading uh a khensat thei kei uh hi. 22 Ahang in, a lamdangtaka kidamsak tua mipa kum sawmli val upa ta hi. 23 Peter le Johan a kikhah ciangin amau mite kiangah pai kik uh a, amaute tunga siampi makaite le upate thugen khempeuh a zasak uh hi. 24 Amaute in hih thu a zak uh ciangin a aw uh sangsakin Pasian kiangah thu a ngen khawm uh hi. Amaute in, “Thuneipipen Topa aw, vantung, leitung, tuipite le a sunga omte khempeuh na bawlsa ahi hi. 25 Na nasempa ka pa uh David kam tawnin Khasiangtho-in na gen a: “‘Bang hang minamte heh a, mite in a mawknapi sawmsim uh hiam? 26 Topa langa pang ding le a Sathau Nilh-pac langpang dingin, leitung kumpite panmun la-in, gam-ukte a kikhawm uh hi,’d ci hi. 27 Hi takpi hi. Herod le Pontia Pilate in Gentile-te le hih khuapi sunga Israel mitee tawh kimu khawmin na sathau nilhsa pa, na nasem siangtho Jesu langpang dingin kithuhual uh hi. 28 Amaute in nang vangliatna le nang deihna-in a piang dinga a khentat kholsa bangin sem uh hi. 29 Tu-in Topa aw, amaute hong tawnna ngaihsun inla, hangtaka na thu a gen dingin na nasemte hihtheihna lianpi hong guan in. 30 Na nasem siangtho Jesu min tungtawnin cina damsaka, a lamdang limte lak ding le a lamdang tuamtuamte hih dingin na khut hong zankhia in,” a ci uh hi. 31 Thu a nget khit uh ciangin amau te kikhopna mun a ling hi. Amaute khempeuh Khasiangtho tawh kidim uh a, Pasian thu hangtakin a gen uh hi. 32 Thu-umte khempeuh, lungsim le ngaihsutna kikhatin a om uh hi. Amau neihsate kuamah in aituamin nei lo uh a, ahi hangin a neih khempeuh uh a neikhawm uh hi. 33 Sawltakpite in, vangliatna lianpi tawh Topa Jesu thawhkikna teci pang uh a amaute khempeuh tungah hehpihna tampitak a tung hi. 34 Amaute lakah a kitasam a om kei hi. Ahang in, leitangte ahikeh inn neite in a hunhunin zuak uh a, a khot uh sumte, 35 sawltakpite khe phungah koihin a kitasam peuhpeuh tungah a hawm uh hi. 36 Cyprus pan, Joseph kici Levi mi khat, sawltakpite in Barnabas (Hanthawnna Tapa cihnopna) a cih uh mipa in 37 lo khat a neih zuak a, a sum paipihin sawltakpite khephungah a koih hi.

Nasepte 5

1 A min Ananias kici mi khat in zong a zi Sapphira tawh a neihsa leitang a zuak khawm uh hi. 2 A zi theihpih sinsenin amah mah in a sum khenkhat a im hi. Ahi hangin a ip loh teng sawltakpite khe phungah va puak hi. 3 Tua ciangin Peter in, “Ananias aw, Satan in na lungsim hong zo-in, Khasiangtho khema, na leitang zuak mana na ngah sum pawlkhat nang adingin na kep, bangci bang hiam? 4 A kizuak ma-in zong nang aa hi lo ahi hiam? A kizuak khit ciangin zong tua sumte nang thu-a na zat theih hi lo ahi hiam? Tua banga hih ding ngaihsutna bang in hong neisak hiam? Mihingte khem hi loin Pasian khem na hi hi,” a ci hi. 5 Ananias in hih thu a zak ciangin, puksukin a si hi. Tua thupiang a zate khempeuh nak lau mahmah uh hi. 6 Tua ciangin tangvalnote pai-in a luang tun uh a, amah puakhia-in a vui uh hi. 7 Tua khit nai thum bang ciangin, thupiangte bangmah thei loin a zi a va lut hi. 8 Peter in, “Nang le Ananias in na leitang man-ua na ngah uh hih zah mah ahi hiam? Hong gen dih in,” ci-in a dong hi. Amah in, “Himah, aman tua zah mah hi,” a ci hi. 9 Peter in, “Bangci-a Topa Kha zia-et ding kithukim na hi uh hiam? En dih in! Na pasal vuite khe kongkhak bulah om hi; nang zong hong puakhia ding uh hi,” a ci hi. 10 Tua hun laitakin ama khephung ah puksukin a si hi. Tua ciangin tangvalnote tumin amah a sisa a om mu uh a, puakhia in a pasal geiah a vui uh hi. 11 Pawlpi bup le hih thu a zakha mi khempeuh a nak lau mahmah uh hi. 12 Sawltakpite in mite lakah lim lam dang le a lamdang tampi a bawl uh hi. Thu-umte khempeuh Solomon Talap ah a kituahkhawm zel uh hi. 13 Mipite in amaute tunget mahmah tei napi, a pawlpih ngam kuamah a om kei hi. 14 Tua hi napi lah Topa a um numei pasal tam semsema amau pawlmi a kibehlap hi. 15 Tua thu hangin Peter in tua lai tawna a pai ciangin amaute pawlkhat alim in a liahkhak beek nadingin mite in a cinate uh lupna le phek in lampi-ah a na sial uh hi. 16 Jerusalem kima khuapite panin zong mihonpite va kikhawm uh a, a cinate uh le kha giloa in a gentheihsakte va puakin amaute khempeuh a dam uh hi. 17 Tua ciangin Sadducees pawlte sunga kihel tulpipa le ama kithuahpihte in a haza mahmah uh hi. 18 Amaute in sawl takpite man uh a, tangpi thong inn ah a khum uh hi. 19 Ahi hangin Topa vansawltak khat in zan laitakin thong kongkhakte hongin a paikhitpih hi. 20 Amah in, “Pai un, biakinnpi huangte ah ding unla, hih nuntak-thakna thupuak bucing mite tungah gen un,” a ci hi. 21 Amaute tunga kigensa bangin khuavak phetin biakinnpi huangte ah lut uh a, mite thu a hilh uh hi. Tulpipa le a kithuahpihte a tun uh ciangin Israel upate—Sanhedrin khempeuh kikhawmsakin, thonga sawltakpite a samsak uh hi. 22 Ahi hangin thong inn a tun uh ciangin makaite in tua lai-ah amaute a mu kei uh hi. Tua ciangin amaute ciah kik uh a, 23 "Thong inn muanhuai taka kikalh le kongkhakte ah a cingte a ding ka mu uh hi. Ahi hangin tuate ka hon uh ciangin a sungah kuamah ka mu kei uh hi,” ci-in a zasak uh hi. 24 Hih zaksakna a zak uh ciangin biakinnpi cingte makaipa le siampi makaite in, hih thu bang hong suak zen tam, ci-in a lungmang uh hi. 25 Tua ciangin mi khat va pai a, “En un, thong sunga na khum uh mite in, biakinnpi huangte sungah dingin mite thu hilh uh hi,” a ci hi. 26 Tua phetin biakinn cing makaipa a makaihpih teng tawh va pai uh a, sawltakpite hong tonpih uh hi. Mipite in suang tawh a den ding lau uh ahi manin thagum a suang kei uh hi. 27 Sawltakpite a tunpih khit uh ciangin tulpipa thusit dingin Sanhedrin mai-ah a dingsak uh hi. 28 Amah in, “Hih minin thu na hilh loh nadingun thukhauh kong pia zo uh hi. Ahi hangin na thuhilhna un Jerusalem khua sung teng zelkhin a, hih mipa sisan ah ko nong mawhkhusak uh hi,” a ci hi. 29 Peter le sawltakpi dangte in, “Mihing thu sangin Pasian thu ka man zawk pelmawh uh kul ding hi. 30 Amah sing tungah khai-a na thah pa uh Jesu, ka pate uh Pasian in misi pan thosak zo hi. 31 Amah in Israel-te tungah kisikna leh mawhmaisakna a piak theih nadingin Pasian in amah tawisanga ama taklamah koih in, Kumpitapa le Honpa in a tusak hi. 32 Hih thu ah kote teci ka hi uh a, Pasian in ama thu a mangte a piak Khasiangtho zong teci ahi hi,” a ci uh hi. 33 Amaute in hih thu a zak uh ciangin lungso uh a, amaute a that nuam uh hi. 34 Ahi hangin mi khempeuh in a zahtak uh Gamaliel kici thukham sia Pharisee khat Sanhedrin sungah ding to a, tua mite tawm vei sung a pua lamah omsak phot nading thu a pia hi. 35 Tua ciangin amaute tungah thu gen a, “Israel mite aw, hih mite na bawl nopna thu uh limtakin ngaihsun un. 36 A beisa hun khat lai-in Theudas hong kilang in, mi gina ngel khatin hong kigena mi zali bang in amah pawl uh hi. Amah kithat in, ama nungzuite maimang a, bangmah ahi kei hi. 37 Mi kisim hun laitakin ama nungah Galilee mi Judas kilang leuleu a, gam lehdo mi honkhat a makaih hi. Amah zong kithata, a nungzuite a kithehthang uh hi. 38 Tua ahi manin tu laitaka i thu tawh kisai-in ngaihsutna kong piak nopinah: hih mite hi ci omsak un! Khahkhong lel un! Ahang in, amau sawm le a nasepte uh mihing sawm lel ahileh lawhsam ding uh hi. 39 Ahi hangin Pasian pan ahileh mite na kho zo kei ding uh hi; Pasian langdo na hi lel kha ding uh hi,” a ci hi. 40 A thugen in amaute a thuzawh hi. Amaute in inn sungah sawltakpite sam in a sat uh hi. Tua ciangin amaute in Jesu mina thu a gen nawn loh nadingun thu pia uh a, amaute a khah uh hi. 41 Sawltakpite, tua Min hanga zah lakna a thuak tham dinga a om uh nuam uh a, Sanhedrin panin a paikhia uh hi. 42 Ni khat khit ni khat biakinnpi tual le inn khat pan inn khatah, Jesu in Khristb hi cih lungdamna thu tawlnga loin hilhin a tangko uh hi.

Nasepte 6

1 Tua hun lai-in nungzuite tam semsem uh a, nisim an hawmna tawh kisai-in Greek-Jew-te in amau meigongte kithu don lo hi, ci-in Hebrew-Jew-te a phunsan uh hi. 2 Tua ciangin Sawm-le-nihte in, nungzuite khempeuh kikhawmsak uh a, “Pasian thu gen ding thu don lo liangin annek tuidawn dingah kong tuanvai uh leh ko adingin man lo ding hi. 3 Sanggamte aw, note lakah Kha le pilna tawh kidim pasal sagih teel un. Tuate tungah hih nasep ka suan ding uh a, 4 kote in thungetna le nasepna kong hahbawl ding uh hi,” a ci uh hi. 5 Hih thusun in a pawl bup uh a lungkimsak hi. Amaute in upna le Khasiangtho tawh adim Stephen; tua banah Philip, Procorus, Nicanor, Timon, Parmenas le Jew biakna-a kikhel Antioch pana Nicolas zong a teel uh hi. 6 Amaute in hih mite sawltakpite tungah ap uh a, amaute in a lutung-uah a khut uh nga-in thu a ngetsak uh hi. 7 Tua bangin Pasian thu a kizel hi. Jerusalem ah nungzuite khang semsem a, siampite tampi in tua upna a zui uh hi. 8 Tu-in Stephen, Pasian hehpihna le vang tawh a dim mi khat hi-a, mite lakah a piandang mahmah le a lamdang limte a bawl hi. 9 Ahi zongin Synagogue-a Salsuaktate (amaute a kilawhna uh) pawlmite langpanna hong piang hi. Tuate Syrene le Alexandria, Cilicia le Asia gamkhente pana a pai Jew-te ahi uh hi. Hih mite in Stephen thu a sel uh hangin, 10 ama pilna le a thugenna-a pang, Kha langah a pang zo kei uh hi. 11 Tua ciangin mi pawlkhat zolsim uh a, “Stephen in Moses le Pasian langah daisakna thu a gen ka za uh hi,” a cisak uh hi. 12 Tuaci-in amaute in mipite le upate le thukham siate a hansuah uh hi. Amaute in Stephen man uh a Sanhedrin mai-ah a tun uh hi. 13 Teci zuau phuak-a teci pang amaute in, “Hihpa in mun siangtho le thukham a langgen niloh hi. 14 Kote in, ‘Hih Nazareth mi Jesu in hih mun susia dinga, Moses in eite khuta hong piaksawm i pupa ngeina a kheng ding hi,’ a cih ka za uh hi,” a ci uh hi. 15 Sanhedrin a tu mi khempeuh in Stephen limtakin entek uh a, amaute in a maitang, vansawltak maitang tawh kibangin a mu tek uh hi.

Nasepte 7

1 Tua ciangin tulpipa in ama kiangah, “Hihte hong matna a maan hiam?” ci-in a dong hi. 2 Hih thu a dawnna in amah in, “Sanggamte le pate aw, ka thugen na ngai un! I pa Abraham Haran-a a ten ma Mesopotamia a, a om lai-in ama kiangah minthanna Pasian a kilang hi. 3 Pasian in, 'Na gam le na mite nusia inla, kong lah nading gamah pai in,’a ci hi. 4 "Tua ahi ciangin Chaldea gam nusia in Haran ah a teng hi. A pa a sih khit ciangin tu-a note tenna mun hih leitang ah Pasian in amah sawl hi. 5 Amah in ama tungah a luah ding leitang khepek cia nangawn a pia kei hi. Ahi hangin Abraham in ta a neih loh lai nangawn in, amah le a nunga asuan akhakte in tua leitang a tang ding uh hi, cih Pasian in kamciam khin hi. 6 Pasian in ama tungah: ‘Na suan na khakte amau gam lo khatah mikhualin om ding uh a, amaute sila suakin, kum zali sung kibawlsia ding hi. 7 Ahi hangin amaute sal-a a khawi mite ka gawt ding hi, ci-in gen a, tua nung ciangin amaute tua mun pan paikhia ding uh a, hih munah kei hong bia ding uh hi,’b Pasian in ci hi. 8 Tua ciangin Abraham tungah vun at ding thukhun a pia hi. Tua hi-a Abraham, Isaac’ pa hong hi-in a suah khit ni giat ciangin a vun a at hi. Tua nung ciangin Isaac, Jacob’ pa hong hi-a James, pupi sawm le nihte pa hong suak hi. 9 Pupite in Joseph a hazat manun Egypt ah sila-in a zuak uh hi. Ahi hangin Pasian in amah ompih a, 10 ama lungkhamna khempeuh panin hukhia hi. Amah in Joseph tungah pilna le Egypt kumpi Pharaoh mai-ah maipha ngahna a pia hi. Tua ahi ciangin amah in Egypt gam khempeuh le a kumpi inn sung khempeuh a uksak hi. 11 "Tua ciangin Egypt le Canaan gam sung khempeuh ah kialpi tungin, gim thuakna lianpi tunga, i pate in an a mu zo kei uh hi. 12 Egypt ah an om hi cih Jacob in a zak ciangin i pate a khat veina hawh dingin a sawl hi. 13 A nih veina a hawh uh ciangin, Joseph in a sanggamte kiangah amah kua hi hiam cih kigen a, Pharaoh in Joseph innkuan sung thu a na thei hi. 14 Hihte khit ciangin Joseph in a pa Jacob a innkuan bup tawh samsaka, a vekun sawm sagih le nga a pha uh hi. 15 Tua ciangin amah le i pate sihna mun Egypt ah Jacob a paisuk hi. 16 Amaute luangte Shechem ah kipuak kika, Abraham in Shechem-a Harmor tate tung pana sum bangzah hiam khat tawh a leisa hankhuk sungah kisial hi. 17 Pasian in Abraham tunga a kam ciam a tangtunsak ding hun a nai ciangin Egypt a i mite kibehlapin tam mahmah uh hi. 18 Tua ciangin Joseph thu bangmah a thei kha lo kumpi dang khat in, Egypt gam uk hi. 19 Amah in i mipihte khembawl in, i pute nengcipa, a ta suakthakte uh, a sih nadingin thatang hat thu-in a paikhiasak hi. 20 "Tua hun laitakiin Moses suak a, amah naupang mawkmawk ahi kei hi.c Ahang in, a pa inn sungah kha thum sung kikem hi. 21 A pua-ah a kikoihkhiat ciangin Pharaoh tanu in amah la a, ama tapa bangin khoi hi. 22 Moses in Egypt pilna khempeuh sin a, thugenna le nasepna ah a vanglian hi. 23 "Moses kum sawmli a phak ciangin ama mipih Israel mite veh ding a khensat hi. 24 Ama mipihte khat, Egypt-te khatin a khelbawl laitak mu-a, a hu dingin va pai-in, a phulakna in Egypt pa a that hi. 25 Moses in, Pasian in amaute honkhia dingin amah zang hi, cih a phawk ding uh hi, ci-in a ngaihsun hi. Ahi hangin amaute in a phawk kei uh hi. 26 A zing ciangin Israel mite nih a kilai laitak Moses in a tuak hi. Amah in amaute lep sawmin, ‘Guaite aw, note sanggam khat hi napi, bang hanga khat le khat kisiasak nuam na hi uh hiam?’ ci hi. 27 "Ahi hangin a gilo-zawpa in Moses thalsawn a, ‘Kua in kote tungah uk a thukhenpa dingin nang hong koih ahi hiam?’ 28 Zan-a Egypt pa na thah bangin kei hong that nuam na hi hiam?’d ci hi. 29 Moses in hih thu a zak ciangin, Midian ah taimang sanin tua lai-ah mikhualin va tenga tapa nih a nei hi. 30 "Kum sawmli khit ciangin Sinai Vum kiang gamlakah vansawltak khat, sawl kawm meikuangin Moses kiangah kilang hi. 31 Amah in hih a muh ciangin a na muh lamdang a sa mahmah hi. A naizaw-a en dingin a pai leh amah in Topa aw za a: 32 ‘Na pate uh Pasian, Abraham, Isaac le Jacob-te’ Pasian ka hi hi,’e ci hi. Moses lau in linga, a en ngam kei hi. 33 "Tua ciangin Topa in ama kiangah, “Na dinna mun siangtho ahi manin na khedap suahkhia in. 34 Egypt a ka mite a kinencipna ka mu zo hi. Amaute tauna ka za zo-a, a suaktasak dingin hong paisuk ka hi hi. Tu-in hong pai in, Egypt ah kong sawl kik ding hi,’f ci hi. 35 "Amaute in, ‘Kua in kote tungah uk a thukhenpa dingin nang hong koih ahi hiam?’ ci-a, a thu a nialpa uh hih Moses mah ahi hi. Amaute ukpa le hukhia pa dingin Pasian mahmah in amah, sawl kawm meikuang sunga ama kianga kilang vansawltak tungtawna a sawl ahi hi, 36 Amah in amaute Egypt panin pai khiatpih a, Egypt gam, San Tuipig le sehnel-gam ah kum sawmli sung a lamdangte le lim lamdangte a bawl hi. 37 ‘Pasian in nomau mite lak panin keimah bang kamsang khat hong sawl ding hi,’h ci-a Israel-te tungah a na hilh pa tua Moses mah ahi hi. 38 Amah sehnel-gam a mihon kipawlkhawmte’ pate le Sinai Vum tunga amah a hopih van sawltak tawh a omkhawm hi; amah in eite tunga hong puaksawn ding a nungta thute a ngah hi. 39 "Ahi hangin i pate in ama thu a mang kei uh hi. A man’ sangsik un, amah nolh uh a, a lungtangte uh Egypt lam a nga kik uh hi. 40 Amaute in Aron kiangah, ‘Kote mai-a pai ding pasiante hong bawlsak in. Egypt pana hong pikhia hih mihing pa Moses lah bang suak ta hiam, ka thei kei uh hi!’i ci uh hi. 41 Amaute in bawngno suna lim a bawl uh tua hun lai ahi hi. Amaute in tua tungah kithoihnate puak uh a, a khut uh tawh a bawlsate uh pahtawi-in a lawm uh hi. 42 Ahi hangin Pasian in lehngatsana vantung nate biakna adingin amaute a ngawh piak hi. Hih kamsangte laibu sunga kigelhsa thu: “O Israel innkuante aw, gamlak ah kum sawmli sung, biakpiakna le biaknate kei nong puak uh hiam? 43 Moloch biakbukno le na pasian uh Rephan aksi, biak dinga na bawl uh milimte na tawisang uh hi. Tua ahi manin Babylon galkhatah salinj kong paisak ding hi,’ kici le hih thu kituak hi. 44 "I pu i pa-te in gamlak ah Teci panna biakbuk a nei uh hi. Tua pen, Pasian in Moses tunga a hilh, alim a muhsa banga kibawl ahi hi. 45 Biakbuk ngah khin in, Pasian in amaute mai-a a hawlkhiat minamte leitang a lak uh ciangin i pate in Joshua makaihna tawh tua biakbuk na pua uh a, tua biakbuk, David khanghun dong tua gamah a om hi. 46 Amah in Pasian angvanna nuamsa a, Jacobk Pasian ten nading a lamsak theih nading ngen hi. 47 Ahi hangin ama ading inn lam pa Solomon ahi hi. 48 "Bangbang ahi zongin a Sang Penpa ahileh mihing bawlsa innte ah a teng kei hi. Kamsangpa gen bangin: 49 "‘Vantung ka tokhom hi-a, leitung ka khe ngakna ahi hi. Kei ading bangci bang inn lam ding na hi hiam? Ahikeh ka khawl nading mun koi lai hi ding hiam? 50 Hih na khempeuh ka khuta ka bawlsa hi lo ahi hiam? Topa in ci hi.’l 51 "No a genhak mite, lungtang le bil vun-at lohte! Na pate uh tawh na kibang tektek uh hi. Note in Khasiangtho na nang ngitnget uh hi! 52 Na pate un a bawlsiat loh kamsang om ngei ahi hiam? Amaute in Thumaan Pa hong pai ding thu a genkholte nangawn a that uh hi. 53 Vansawltakte tungtawna kizang thu kham ngah napi a zui lo note in tu-in amah lehhekin na that uh hi,” a ci hi. 54 Amaute in hih thu a zak uh ciangin lungso uh a, a ha uh a gawisan uh hi. 55 Ahi hangin Khasiangtho tawh kidim Stephen in vantung lam ento-in, Pasian minthanna le Pasian taklam a ding Jesu a mu hi. 56 Amah in, “En un, van kihong le Pasian taklama Mihing Tapa a ding ka mu hi,” a ci hi. 57 Tua takteh, amaute in a bil uh hum uh a, a aw neih zah un kiko in amah a bawhhuan uh hi. 58 Khuapi sung panin talkaih gawp uh a, suangin a deng uh hi. Tua hun tektekin tecite in Saul kici tangvalno khat khephungah a puante uh a koih uh hi. 59 Amaute in amah suang tawh a den laitakun Stephen in, “Topa Jesu aw, ka kha na sang ta in,” ci-in thu a ngen hi. 60 Tua ciangin khukdin-a, “Topa aw, hih mawhna amaute tungah na phul kei in,” ci-in a kiko hi. Hih teng a cih khit ciangin a ihmu hi.

Nasepte 8

1 Saul zong tua lai-ah om a, ama sihna a thukimpih hi. Tua ni-in Jerusalem ah pawlpi kibawlsiatna lianpi om a, sawltakpite longal adangte khempeuh Judea le Samaria gam sung tengah a kithehhthang uh hi. 2 Pasian a zahtak mite in Stephen vui uh a, amah a kah ngutngut uh hi. 3 Ahi hangin Saul in pawlpite suksiat ding a kipan hi. Inn khat pan inn khatah pai-in numei hitaleh pasal hitaleh kaikhia gawpin amaute thong ah a khum hi. 4 A kithehthang mite in amau paina peuhpeuh ah thu a hilh uh hi. 5 Samaria gam khuapi khatah Philip paisuak a, tua lai-ah Khrista thu a tangko hi. 6 Mihonte in Philip thugen za uh a, a limlamdang bawlte a muh ciangun amaute khempeuh a kiangah va pai-in a thugen limtakin a ngai uh hi. 7 Mi tampi sung pan kha giloteb kiku vangvang in paikhia uh a, pumzawte le mipoite tampi a dam uh hi. 8 Tua ahi ciangin tua khuapi sungah lungdamna lianpi a tung hi. 9 Simon kici mi khat, khuapi sungah tawlkhat sung oma, ai sanin Samaria mi khempeuh in lamdang mahmah a sa uh hi. Amah mi lian khatin kingaihsun-a a kisial hi. 10 Mi lian mi neu, mi khempeuh in ama thu ngai-in, “Hih mipa, Vangliatna Lian kici Pasian vangliatna ahi hi,” ci-in a thangsak uh hi. 11 Amah in amaute sawtveipi a mitphial bawlna lamdang sasak mahmah ahi manin, amah a zui uh hi. 12 Ahi hangin Philip in Pasian gam thupha le Jesu Khrist min thute a hilh ciangin um uh a, a numei a pasalin a kibaptise uh hi. 13 Simon mahmah in zong uma a kibaptise hi. Amah in a lian lim lamdang le a nalamdang a muhte lamdang sa in Philip a zui kawikawi hi. 14 Jerusalem a sawltakpite in, Samaria ah Pasian thu kisang ta cih a zak uh ciangin amaute kiangah Peter leh Johan a sawl uh hi. 15 Amaute a tun uh ciangin Khasiangtho a ngah nadingun amaute thu a ngetsak uh hi. 16 Bang hang hiam cih leh amaute khat beek tungah Khasiangtho a tung nai kei hi; amaute Topa Jesu min sungahc a kibaptise pan bek uh hi. 17 Tua ahi ciangin Peter le Johan in amaute tungah a khut uh nga uh a, Khasiangtho a ngah uh hi. 18 Simon in sawltakpite khut ngakna tawh Kha kipia cih a muh ciangin amaute sum tah a, 19 "Ka khut ka ngaknate in Khasiangtho a ngah theih nadingin hih, hihtheihna kei zong hong pia un,” a ci hi. 20 Peter in, “Na sum tawh mangthang khawmta in! Bang hang hiam cih leh Pasian letsong sum tawh lei theih dingin na ngaihsut hi. 21 Pasian mai-ah na lungtang maan lo ahi manin hih nasepna sungah tanh ahi a, panna ahi zongin na nei kei hi. 22 Hih tatsiatna pan kisik inla, Topa tungah thu ngen in. Na lungsungah tua bang ngaihsutna na neih, amah in hong maisak kha thei ding hi. 23 Ahang in, khaatna tawh na kidim a, mawhna sila-in na om cih kong mu hi,” ci-in a dawng hi. 24 Tua ciangin Simon in, “Na gensate kei tungah bangmah hong tun loh nadingin Topa tungah thu hong ngetsak in,” ci-in a dawng hi. 25 Peter le Johan in Topa thu teci pangin a thansak khit uh ciangin Samaria gam khuaneu tampi ah lungdamna-thu a hilh kawmun Jerusalem ah a ciah kik uh hi. 26 Tu-in Topa vansawltak khain Philip tungah, "Jerusalem pana Gaza lama paisuk - gamlak lamneu ah leitaw-lam manawhin pai in," a ci hi. 27 Tua ciangin amah kipankhia a, lampi ah Ethiopia mid cil kigetpa, Ethiopia kumpinu Canda gou khempeuh a uk kumpi nasem ulian pa tawh a kituak hi. Hih mipa Jerusalem ah Pasian bia dinga va pai hi-a 28 inn lamah ciah kikin sakolleng tungah tu-a, kamsangpa Isaiah laibu a sim hi. 29 Philip kiangah Kha in, "Sakolleng va naih inla, a kiangah va om in," ci-in a gan hi. 30 Tua ciangin Philip in tua sakol leng a va delh leh tua mipa in kamsangpa Isaiah laibu a sim a za hi. Philip in, “Tu-a na lai sim na theitel hiam?” ci-in a dong hi. 31 Amah in, “Mi khatpeuh in hong hilhcian kei ngal leh bangci theih ding ka hi hiam?” a ci hi. Tua ciangin amah in Philip kahto-a amah tawh a tukhawm dingin a sam hi. 32 Tua cilgehpa in: “A gopa kianga kipaipih tuu bangin amah kipaipih a, a mul metpa mai-a a ham lo tuuno bangin a kamka kei hi. 33 Amah kizahlaksakin thutang ahina kisuhsak hi. Ama nuntakna leitang pan kilaksak ahi manin asuan a khakte thu kua in gen thei ding hiam?”e cih Laisiangtho mun a sim laitak ahi hi. 34 Cilgehpa in Philip kiangah, “Nong hehpihna in, hih kamsangpa amah le amah kigen ahi hiam, ahi keileh mi khatpeuh thu gen ahi hiam hong hilh dih in,” ci-in a dong hi. 35 Tua ciangin Philip in tua Laisiangtho mun tektek mah pansanin Jesu tawh kisai lungdamna thu a genpih hi. 36 A paipai laitakun tui omna mun khat tung uh a, cilgehpa in, “En in, hih lai-ah tui a om hi. Bang hangin kibaptise lo ding ka hi hiam?” a ci hi. 37 Philip in, “Na lungsim khempeuh tawh na up leh na kibaptise thei hi,” a ci hi. Kumpi nasempa in, “Jesu Khrist, Pasian Tapa hi, cih ka um hi,”f ci-in a dawng hi. 38 Tua ciangin sakolleng a khawl nading thu a pia hi. Philip le cilgehpa tui sungah paisuk khawm uh a, Philip in amah a baptise hi. 39 Tui sung pan a paikhiat toh uh ciangin Topa Kha in Philip lakhiamang pah a, cilgehpa in a mu kik nawn kei hi. Ahi hangin lam tawntungah lungnuamtakin a pai hi. 40 Philip ahileh Azotus ah kilang a, zin kawikawi-in Caesarea a tun dong khuapi khempeuh ah lungdamna-thu a hilh hi.

Nasepte 9

1 Tua hun sungin Saul in Topa nung zuite langbawla thahnopna huu a sangkhia lailai hi. Tulpipa kiangah va pai a, 2 Lampi thu a zui mi a muh nak leh numei ahi a pasal ahi zong in Jerusalem ah thong a khiat theih nadingin Damascus a synagogue-te a, a lah ding lai a ngen hi. 3 Amah zinkhia a, Damascus a tun dektak laitakin vantung panin khuavak khat in a kimkot a tanzal hi. 4 Amah lei lakah puka, aw khat in, “Saul, Saul, bang hangin kei hong bawlsia na hi hiam?” a cih a za hi. 5 Saul in, “Topa aw, kua na hi hiam?” ci-in a dong hi. Amah in, “Na bawlsiat Jesu ka hi hi. 6 Tu-in tho inla khuapi sungah lut in. Na hih pelmawh ding hong kigen ding hi,” ci-in a dawng hi. 7 Saul tonpih mite gen ding nei loin tua lai-ah a ding uh hi. Awging a zak uh hangin kuamah a mu kei uh hi. 8 Lei lak panin Saul thoto-a, a mit a hak hangin bangmah a mu thei kei hi. Tua ciangin amaute in amah a khutin len uh a, Damascus khua sungah a paipih uh hi. 9 Mittawsa in ni thum sung oma bangmah a ne a dawn kei hi. 10 Damascus ah Ananias kici nungzui khat a om hi. A mangmuhna sungah Topa in amah sama, Ananias aw,’” a ci hi. Amah in, “Topa aw, ka om hi,” ci-in a dawng hi. 11 Topa in ama kiangah, “Kongzing Tang a Judas inn ah va pai inla, Tarsus khua mi Saul va kan in. Amah in thu a nget laitak ahi hi. 12 Amah in a mangmuhna ah, Ananias kici mi khat pai-a, a mit in khua a muh kik nadingin a tungah a khut a nga hi,” ci-in a gen hi. 13 Ananias in, “Topa aw, hih mipa in Jerusalem a na misiangte a bawlsiatna thu tampi ka za zo hi. 14 Tua hi-a amah in siampi makaite thuneihna tawh na min a lote khempeuh man dinga hih lai-a hong pai ahi hi,” ci-in a dawng hi. 15 Ahi hangin Topa in Ananias kiangah, “Va pai in! Gentile-te le a kumpite uh le Israel mite mai-ah ka min a pua dinga ka vanzat dingin amah ka teelsa ahi hi. 16 Kei min hangin bangzah ta thuak ding cih amah ka lak ding hi,” a ci hi. 17 Tua ciangin Ananias tua inn ah pai-a, a lut hi. Saul tungah a khutte nga a, “Sanggampa Saul aw, hih lai-a nong pai laitak-a lampi ah nang tunga hong kilak Topa – Jesu in, khua na muh kik theih nading le Khasiangtho tawh na dim theih nadingin kei hong sawl zo hi,” a ci hi. 18 Saul’ mitte panin a lip bang khat, thakhat in kiakhia-a khua a mu thei kik hi. Amah tho-in kibaptise a, 19 an a nek khit ciangin a tha a hat kik hi. Damascus a om nungzuite tawh Saul ni tampi a omkhawm hi. 20 Amah in synagogue-te sungah Jesu, Pasian Tapa hi, cih thuhilh a kipan pah hi. 21 Ama thugen a zate khempeuh in lamdang sa lua in, “Jerusalem ah hih min a lote nakpi-a a siattutpa hih pa hi lo ahi hiam? Amaute thonga khum bangin siampi makaite khut sunga a khum dinga hong pai hi lo ahi hiam?” ci-in a dong uh hi. 22 Tua hi napi Saul khangin vanglian semsem a, tua Jesu, Khrista a hina kitelsakin Damascus a teng Jew-te khempeuh gen ding thei loin a kamkasak hi. 23 Ni tampi khit ciangin Jew-te in amah thah sawmsim uh a, 24 ahi hangin Saul in amaute geelsimna a thei hi. Amaute in amah a thah theih nadingun sun le zanin khuapi kongpite ah a pang uh hi. 25 Ahi hangin ama nungzuite in, zanin khuapi kulh vang panin bawm tawh amah a khaisuk uh hi. 26 Amah Jerusalem a tun ciangin nungzuite tawh kipawl a sawm hi. Ahi hangin amaute in amah, nungzui hi taktak dingin um zo lo uh a, a vekun amah a kihta uh hi. 27 Ahi hangin Barnabas in amah paipihin sawltakpite kiangah a pi hi. Amah in amaute kiangah Saul in a khualzinna-ah Topa a muh zia le Topa in amah a hopihna le Damascus ah lau loin Jesu mina thu a hilhnate a gen hi. 28 Tua ciangin amaute tawh Saul om khawm-in, adal om loin Jerusalem khuapi sungah vak kawikawi uh a, Topa minin hangtakin thu a gen hi. 29 Amah, Greek kampau Jew-te tawh kiho in thu a kinial hi. Ahi hangin amaute in thah a sawm uh hi. 30 Tua lai-a om sanggamte in hih thu a theih uh ciangin Caesarea ah tonpih suk uh a Tarsus ah a kha uh hi. 31 Tua ciangin Judea, Galilee le Samaria gam sunga om pawlpite in lungmuan hun a ngah uh hi. Khasiangtho in hanthawnin thakhauhsak a, tua bangin Topa kihta-a, a nungta mi khangin a tam semsem hi. 32 Tua gam sung tengah Peter a zin kawikawi lai-in Lydda a misiangte kiangah a va hawh hi. 33 Tua lai-ah Aeneas kici a pum zaw a, kum giat sung lupna ngaka om mi khat a mu hi. 34 Peter in, “Aeneas aw, Jesu Khrist in nang hong damsak hi. Tho inla na lupna phek zial in,” a ci hi. Aeneas a thoto pah hi. 35 Lidda le Sharon a teng mite khempeuh in amah mu uh a, Topa lamah a kihei uh hi. 36 Joppa ah (a khiatna Dorcasb ahi) Tabitha kici nungzui khat om a, amah in mizawngte huhin, na hoih sem tawntung khat ahi hi. 37 Tua hun pawlin amah cina-a a si hi. A luang a kisil khit ciangin inntung dei khatah kisial hi. 38 Lidda pen Joppa khua kiang ahi hi. Tua hi-a a nungzuite in Lidda ah Peter om cih a zak uh ciangin ama kiangah mi nih sawl uh a, “Hehpihna in hong paipak dih in!” ci-in a kun uh hi. 39 Peter in amaute zui-a, amah a tun ciangin inntung dei-ah a kahpih to uh hi. Meigongte khempeuh Peter kimkotah ding uh a, Dorcas amau tawh a om khawm lai-a, a bawlsa puantualte le puan dangte amah lakin a kapkap uh hi. 40 Peter in amaute khempeuh inndei pua lamah a sawlkhia hi. Tua ciangin khukdin sukin thu a ngen hi. A si numei lamah kihei a, “Tabitha, tho in,” a ci hi. Tuanu hakin Peter mu-a a tu to hi. 41 Peter in a khutah lenin a khe-in a dingsak hi. Tua ciangin thu-umte le meigongte sama, amaute tungah amah a nungta in a pia hi. 42 Hih thu Joppa khua sung khempeuh ah kithei khawka mi tampi in Topa a um uh hi. 43 Joppa a Simon min nei savun bawlpa tawh Peter tawmvei sung a om hi.

Nasepte 10

1 Caesarea ah Cornelius min nei, Italy galkap pawl a kici ah, zakhat-ukpa khat a om hi. 2 Amah le a innkuanpihte khempeuh biakna ah kipumpiakin Pasian kihta uh hi. Amah in a kitasamte phaltakin pia a, Pasian kiangah ahun simin thu a ngen hi. 3 Ni khat, nitak lam nai thum pawlin mang a mu hi. Topa vansawltak khat ama kianga pai kiciantakin mu a, amah in, “Cornelius!” a ci hi. 4 Cornelius lau-in amah en gega a, “Topa aw, bang ahi hiam?” ci-in a dong hi. Tua vansawltak in, “Na thungetnate le mizawngte na citpiaknate Pasian mai-ah a kiphawk den biakna dingin hong tungto zo hi. 5 Tu-in Joppa ah mi sawl inla, Simon min nei Peter kici pa va samsak kik in. 6 Amah savun bawl Simon tawh omkhawm a, ama inn tuipi gei ahi hi,” ci-in a dawng hi. 7 Amah a hopih vansawltak a ciah khit ciangin Cornelius in a nasemte nih le a galkapte lakah biakna-a kipumpiak khat a sam hi. 8 Amah in amaute tungah a piangsa thu khempeuh gena, Joppa ah a sawl hi. 9 A zingciang sun pawl, amaute khuapi zuana a pai laitakun, thungen dingin Peter inntungah a pai to hi. 10 Amah a gil kiala, bang khatpeuh duh in; a an ding a kihuan san laitakin mumang bangin a om hi. 11 Van kihonga, a pek lianpi khat a kiu li tek panin leitunga kikhaisuk a mu hi. 12 Tua sungah khe li nei ganhing nam khempeuh, leitunga, a bokvak ganhingte le huih lak vasate zong a om hi. 13 Tua ciangin aw khat in ama kiangah, “Peter aw, tho in. Go inla ne in,” ci-in a gen hi. 14 Peter in “Hi buang lo e, Topa! Ken a siangtho lo le a nin na khatpeuh ka ne ngei kei hi,” ci-in a dawng hi. 15 Tua aw in a nih veina hopih a, “Pasian in a sianga a bawlsa na khatpeuh, siang lo hi, ci kei in,” a ci hi. 16 Thum vei tua bangin hi-a tua khit ciangin tua a pek lianpi vantungah kila kik pah hi. 17 Peter in tua a mangmuh a khiatna a ngaihsutsut laitakin Cornelius sawl mite in Simon inn mu uh a, a kongpi ah a khawl uh hi. 18 Peter kici Simon tua munah a taam lai hiam, ci-in a galdot uh hi. 19 Peter in a mangmuhna a ngaihsutsut laitakin Kha in ama kiangah, “Simon aw, mi thuma in nang hong zong hi. 20 Tua ahi ciangin tho inla, kumsuk in. Amaute kong sawl ahi manin, na zuih ding lungsit kei in,” a ci hi. 21 Peter kumsuk a mite kiangah, “Na zonpa uh keimah ka hi hi. Bang dinga hong pai na hi uh hiam?” a ci hi. 22 Tua mite in, “Zakhat-ukpa Cornelius kiang pana hong pai ka hi uh hi. Amah thumaanin Pasian kihta mi hi a, Jew mi khempeuh in a zahtak khat ahi hi. Vansawltak siangtho khat in ama kiangah, nang thu gena, amah in a zak theih nadingin ama kiangah nang hong sap dingin a gen hi,” ci-in a dawng uh hi. 23 Tua ciangin Peter in tua mite inn sungah sama zin a tungsak hi. A zing ciangin amaute tawh Peter tonkhawma, Joppa a, sanggamte pawl khat in a zui uh hi. 24 A thai ciangin Caesarea a tung uh hi. Cornelius in amau tun ding lamena, a tanaute le a kinaipih a lawmte a na samkhol hi. 25 Inn sungah Peter luta, Cornelius in amah na dawn tuahin, amah zahtaka, a khephungah a bok hi. 26 Ahi hangin Peter in amah phong to-a, “Ding to in, kei zong mihing lel mah ka hi hi,” a ci hi. 27 Amah tawh a kiho kawmin Peter sungtuma, mi tampi a kikhawm a mu hi. 28 Amah in amaute kiangah, “Jew mi adingin Gentile mi tawh kikholh ahi zongin, amau kiangah va hawh ahi zongin, ka thukham uh tawh kituak lo hi, cih na theihsa uh ahi hi. Ahi hangin mi khatpeuh a siangtho lo ahikeh nin hi ka cih loh nadingin Pasian in hong lak zo hi. 29 Tua hi-a kei hong kisapsak ciangin nial loin kong pai hi. Bang hanga kei hong samsak na hi uh hiam?” a ci hi. 30 Cornelius in, “Nung ni li lai-in, ka inn sungah nitak lam nai thum, tu hunin thu ka ngen hi. Thakhatin ka mai-ah puan atang selsal a silh mi khat hong dinga, 31 ‘Cornelius aw, Pasian in na thungetna za zo a, mizawngte na piakte ciamteh zo hi. 32 Joppa a Peter kici Simon samsak in. Amah tuipi gei-a teng savun bawlpa Simon inn ah tung hi,’ ci hi. 33 Tua ciangin nang kong samsak pah a, nong pai a hoih mahmah hi. Tu-in kote nong hilh dinga Topa hong thupiak peuhmah a ngai dingin kote khempeuh hih lai Pasian mai-ah ka om uh hi,” a ci hi. 34 Tua ciangin Peter thugen kipan a, “Pasian in angvan tuam nei loin 35 minam khempeuh panin amah kihta-a, a dik-a gamta mite khempeuh a sanna thu, amaan a hina teltakin ka thei ta hi. 36 Pasian in Israel-te tunga a thupuak mite khempeuh Topa Jesu Khrist tungtawna kigen hih lemna hong tun lungdamna thute ahi hi. 37 Johan in baptise-na thu a gen khit nungin Galilee gama kipan Judea gamsung khempeuh ah bang thu piang hiam, cih na thei zo uh hi. 38 Pasian in Nazareth mi Jesu, Khasiangtho le vangliatna sathau a nilh zia le amah pai kawikawi in, Pasian in amah a ompihna hangin na hoih sema, dawimangpa vangliatna nuai-a mi khempeuh a dam saknate na thei zo uh hi. 39 Jew-te gam le Jerusalem a, a septe khempeuh ah kote teci ka hi uh hi. Amaute in amah sing tungah khai-in that uh a, 40 ahi hangin a ni thum ni-in Pasian in misi pan amah thokiksaka, a kimusak hi. 41 Amah mi khempeuh in mu lo a, Pasian in a teci dinga a teelkholhsa kote in mu in – misi pana a thawh khitin amah tawh a nekhawm a dawnkhawm kote ka om uh hi. 42 Amah in mite tunga thuhilh ding le mihingte le misite tunga thukhen ding pa in amah a sehna thu teci ahi dingin Pasian in kote thu hong pia hi. 43 Amah a umte khempeuh in ama min tungtawnin mawh maina a ngah nading uh thu, kamsangte khempeuh in teci a pang zo uh hi,” a ci hi. 44 Peter in hih thute a gengen laitakin hih thupuak a za mi khempeuh tungah Khasiangtho a tung hi. 45 Peter tawh a pai khawm vunatte lakah a um mite in, Gentile-te tung nangawna Khasiangtho a kisunkhiat ciangin lamdang a sa mahmah uh hi. 46 Ahang in, amaute pauteb in pau uh a, Pasian a phat uh a za uh hi. Tua ciangin Peter in, 47 "Hih mite tui-in a kibaptise ding kua in kham thei ding ahi hiam? Eite bang tektekin amaute in Khasiangtho a ngah zo uh hi,” a ci hi. 48 Tua ciangin amah in amaute Jesu Khrist min-a kibaptise dingin thu a pia hi. Tua ciangin amaute in ni tawmkha sung amaute kiangah Peter a taam lai nading a thum uh hi.

Nasepte 11

1 Sawltakpite le Judea gam sunga om sanggamte in, Gentile-te in zong Pasian thu sang khin ta uh cih a za uh hi. 2 Tua ahi ciangin Jerusalem ah Peter a pai toh ciangin vunatte laka thu-umte in amah mawhsak in, 3 "Nang, vunat-lote innah hawhin amaute tawh an na nekhawm hi,” a ci uh hi. 4 Peter in na khempeuh a pian bang bangin a cingin gen a: 5 Joppa khuapi ah thungen a ka om laitakin mumang bangin mang ka mu hi. Vantung panin a kiu li tek pana kikhaisuk, a pek lianpi bang khat ka omna-ah ka mu hi. 6 Asung ka et leh leitung a khe li nei ganhingte, gamsate, a bokvak ganhingte le huih lak vasate ka mu hi. 7 Tua ciangin kei kiangah, “Peter aw, tho in. Go inla ne in,” ci-a hong gen aw khat ka za hi. 8 "Ken, ‘Hi buang lo e, Topa! A siangtho lo le a nin na khat beek ka kam sungah tum ngei nai lo hi,’ ci-in ka dawng hi. 9 "Tua aw in vantung panin a nih veina hong gen a, ‘Pasian in a siang a, a bawlsa na khatpeuh, siangtho lo hi, ci kei in,’ ci hi. 10 Hih bangin thum vei dong hi-a, tua ciangin vantungah kikhai to kik hi. 11 "Tua hun laitak tektekin Caesarea pana kei kianga hong kisawl mi thum ka tunna inn ah hong tung lian uh hi. 12 Amaute tawh lungsit lo-a ka pai ding Kha in hong gen hi. Hih sanggamte guk in zong kei hong zui uh a, tua mipa inn ah ka lut uh hi. 13 Amah in kote kiangah, a inn sungah vansawltak kilang a, ‘Joppa a Peter kici Simon samsak in. 14 Amah in nang le na innkuanpihte khempeuh kihotkhiat nading thu puak khat hong puak ding hi,’ ci-in a genzia hong gen hi. 15 "Thu gen ka kipat takin, a cila eite tunga hong tung bangin amaute tungah Khasiangtho a tung hi. 16 Tua ciangin Topa in, Johan in tui ina hong baptise hi; ahi hangin note Khasiangtho in hong kibaptise ding hi,’ ci-a a gensa ka phawk hi. 17 Tua hi-a Topa Jesu a um, eite hong piak tawh a kibang letsong, Pasian in amaute pia ahileh Pasian a nial thei dinga kingaihsun kei kua ka hi hiam?” a ci hi. 18 Amaute in hih thu a zak uh ciangin bangmah nialna nei nawn tuan loin, “Tua ahi mawk leh Pasian in, nuntakna ngah nadingin kisikna Gentile-te tungah phal tazen hi lo maw!” ci-in Pasian a phat uh hi. 19 Stephen tawh kisai-a bawlsiat na hangin a kithehthang mite Phoenicia, Cyprus le Antioch dongah tung uh a, Jew-te tung bekah thupuak a gen uh hi. 20 Bangbang ahi zongin amaute pawlkhat Cyprus le Cyrene pana mite, Antioch ah pai-in Greek-te tungah zong Topa Jesu lungdamna thu gen ding a kipan uh hi. 21 Topa khut, amaute tawh omkhawm a, mi tampitakin um in, Topa lamah a kihei uh hi. 22 Hih thu Jerusalem a pawlpite in na za uh a, Antioch ah Barnabas a sawl uh hi. 23 Amah tungin, Pasian hehpihna a tunzia a muh ciangin a nuam mahmah hi. Amaute khempeuh in a lungsim khempeuh uh tawh Topa tungah a muanhuai nadingun a hanthawn hi. 24 Amah mi hoih hi-a Khasiangtho le upna tawh kidim in, Topa kiangah mi tampitak a tun hi. 25 Tua ciangin Saul zong dingin Tarsus ah Barnabas pai a, 26 amah a muh ciangin Antioch ah a paipih hi. Tua hi-a Barnabas le Saul tua lai-a pawlpi tawh kum khat vilvel kikhawl uh a, mi tampitak thu a hilh uh hi. Antioch ah nungzuite, Khristian-te a kici masa pen hi. 27 Hih hun sungin kamsangte pawlkhat Jerusalem pan Antioch ah a paisuk uh hi. 28 Amaute lakah Agabus min nei khat ding to a, “Kha tungtawnin, Rome gam sung khempeuh ah kialpi nasiatakin tung ding hi,” ci-in a genkhol hi. (Hih pen Claudius in a uk laitakin a tung hi.) 29 Nungzuite in amau hihtheihna ciat tawh Judea gama teng sanggamte huhna piak dingin thu a khensat uh hi. 30 Amaute in tua thu tangtungsak uh a, Barnabas le Saul tungah amau letsongte upate ngah dingin a khak uh hi.

Nasepte 12

1 Tua hunlai pawlin Kumpi Herod in pawlpi mite pawlkhat bawlsiat sawmin a man hi. 2 Amah in Johan sanggampa James namsau tawh that khin zo hi. 3 Hih thu in Jew-te lung kimsak cih a muh ciangin Peter zong mat beh a sawm lai hi. Hih in Silngo-sawhloh Anlum Pawi huna thupiang ahi hi. 4 Amah a mat khit ciangin thong sungah khuma, galkap li-a kipawl, pawl lite cin dingin a ap hi. Herod in, Paisan Pawi a ven cianga mipite mai-ah thukhen dingin lakkhiat a sawm hi. 5 Tua dinga Peter thong sunga a khum ahi hi. Ahi hangin pawlpite in ama ading cihtakna tawh Pasian tungah thu a ngen uh hi. 6 Herod in thukhen dinga lakkhiat a sawm ni ma zanin, galkap nih kikalah Peter luma, sikkhainiang nihin kikhihin, a cingte in kong a cing uh hi. 7 Thakhatin Topa vansawltak khat kilanga, thong inn sung teng khuavak in a tan hi. Amah in Peter a pang bengin a phawng hi. Amah in, “Manlang in, tho in!” ci-a Peter khutdawh pan sikkhainiangte a kitolkhia hi. 8 Tua ciangin vansawltak in a kiangah, “Na puante silh in, na khedapte bulh in,” a ci hi. A cih bangin Peter in a hih hi. Vansawltak in, “Na puantualpi silh inla kei hong zui in,” ci-in a gen hi. 9 Peter in amah thong pua ah a zuih hangin, vansawltak hihna a takpi mah hiam, cih thei loin mangmu-in kingaihsun hi. 10 Amaute in thong cingte a masa le a nihna khengin khuapi sung paina sik kongpi a tung uh hi. Tua kongpi ama thu-in na kihonga, amaute a paikhia uh hi. Kongzing khat a zuih suak khit uh ciangin vansawltak in amah thakhatin a nusia hi. 11 Tua ciangin Peter in khua phawk a, “Topa in ama vansawltak hong sawla, Herod khutlum pan le Jew mite in zong lamena, a ngak uh na khempeuh panin kei hong hukhia ahilam lungheina om loin tu-in ka thei ta hi,” a ci hi. 12 Amah in hih thu a phawkkhiat ciangin, mi tampi kikhawm a thu a ngetna mun Marka zong a kici Johan nu Mary inn ah a pai hi. 13 Peter in kongkhak puanung pen va kiu-a, a hon dingin Rhoda kici nasem numeino khat a pai hi. 14 Tuanu in Peter aw ahilam a theihcian ciangin nuam mahmah a, kong hon loin lehtai kika, “Kongkhak ah Peter om!” ci-in a kiko zak hi. 15 Amaute in ama kiangah, “A hai hi mai niteh!” a ci uh hi. Hi taktak hi, ci-in a nial teitei ciangin amaute in, “Ama vansawltak hi inteh,” a ci uh hi. 16 Ahi hangin Peter in kongkhak kiukiu a, kong a hon uh ciangin amah mu uh a, lamdang a sa mahmah uh hi. 17 Peter in amaute a daih nadingun a khut vana, thong sung panin Topa in amah a lakkhiatna zia teng a gen hi. Amah in, “James le sanggamte kiangah hih thu na ko un,” a cih khit ciangin mundang ah a pai hi. 18 A zingsang ciangin galkapte lakah patauhna lianpi khat a om hi. Amaute in, “Peter tungah bang thu piang ahi hiam?” a ci uh hi. 19 Herod in kiciantakin amah zonga, a muh loh ciangin thong cingte sittel a, amaute thah dingin thu a pia hi. Tua ciangin, Judea gam panin Caesarea ah Herod pai-a tua lai-ah tawmvei sung a om hi. 20 Amah Tyre le Sidon mite tawh a kitawng den ahi hi. Amaute kipawl khawmin amah tawh kihopih a sawm uh hi. Amaute in kumpipa nasem muan pa Blastus panpihna tawh lemna a ngen uh hi. Bang hang hiam cih leh amaute an ngahna ama kumpipa gam sung bek ahi hi. 21 A ni ciam ni ciangin Herod in a kumpi puantual silh-a a kumpi tokhom tungah tu-in, mipite tungah thu a gen hi. 22 Amaute in, “Hih aw, mihing aw hi loin Pasian aw ahi hi,” ci-in a awng uh hi. 23 Herod in, Pasian phatna pia lo ahi manin Topa vansawltak khat in, amah sattukin than in ne-a a si hi. 24 Ahi hangin Pasian thu khangin a kizel semsem hi. 25 Barnabas le Saul in a nasep uh a zawh khit uh ciangin Jerusalem panina ciah kik uh a, Marka zong a kici Johan a tonpih uh hi.

Nasepte 13

1 Antioch a pawlpi sungah kamsangte le thuhilhte: Barnabas, Niger kici Simeon, Cyrene mi Lucius, Manaen (Gam ukpa Herod tawh a khangkhawmpa) le Saul-te a om uh hi. 2 Amaute in Topa bia in an a tan laitakun Khasiangtho in, “Amaute ka sapna na a sem dingin Barnabas le Saul hong sehkhiatsak un,” a ci hi. 3 Amaute in an tangin thu a nget khit uh ciangin amaute gel tungah a khut uh nga uh a, a sawlkhia uh hi. 4 Amaute gel Khasiangtho sawlin Seleucia ah paisuk uh a, tua lai panin Cyprus manawhin tembaw in a tuang uh hi. 5 Amaute Salamis a tun uh ciangin, Jew-te synagogue-te ah Pasian thu a tangko uh hi. Johan zong amaute huh in amau tawh a omkhawm hi. 6 Amaute Paphos a tun dongun tua tuikulh tung khempeuh ah a zin kawikawi uh hi. Tua lai-ah dawi-ai tawi-a, kamsang zuau Bar-Jesus kici Jew mi khat om a, 7 amah pen gam ukpa Sergius Paulus nasempa ahi hi. Tua gam ukpa a pil mahmah mi khat hi-a Pasian thu za nuam ahi manin, Barnabas le Saul a samsak hi. 8 Ahi hangin Elymas dawi-ai tawi pa (tua pen a min khiatna) in amaute na nang a, tua upna panin gam ukpa heikhiat a sawm hi. 9 Tua ciangin Paul zong a kici Saul, Khasiangtho tawh kidim a, Elymas en gemgam in, 10 "Nang dawimangpa ta khat na hi-a amaan nate khempeuh gal na hi hi! Khemna nam khempeuh le zuautatna tawh na kidim hi. Topa lampi maan na lehheina, tawp ngei lo ding na hi hiam? 11 Tu-in Topa khut in nang hong langpan hi. Na mit a taw dinga, hun bang tan hiam khat nitang na mu thei kei ding hi,” a ci hi. Ama tungah thakhatin meiilum le khuamial in tuam a, amah in zawt kawikawi-in a khuta amah kai ding a zongzong hi. 12 Gam-ukpa in a piangsa thu a muh ciangin a um hi; ahang in, Topa tawh kisai tua thuhilhna lamdang a sa mahmah hi. 13 Paphos panin Pamphylia gama Perga lam manawhin Paul le a pawlte tembaw in tuang uh a, Johan in amaute tua khua ah nusia-in amah Jerusalem ah a kileh kik hi. 14 Perga panin amaute Pisidia gama Antioch ah a paisuak uh hi. Sabbath ni-in amaute synagogue ah lutin a tu uh hi. 15 Synagogue ukte in Thukham le Kamsangte laibu pan a sim khit uh ciangin amaute kiangah, “Sanggamte aw, mipite hanthawn nopna thupuak na neih uh leh hehpihna tawh hong gen un,” a ci uh hi. 16 Paul ding to-in a khut vana, “No, Pasian a bia Israel-te le Gentile-te aw, ka thugen na ngai un! 17 Israel mite’ Pasian in i pate na teeltuama, Egypt a, a om lai-un tua mite na lawhcingsakin ama vangliatna thupi tawh tua gam panin amaute na pikhia hi. 18 Kum sawmli sung sehnel-gam ah amau gamtatnaa a thuak keikai hi. 19 Amah in Canaan gam sunga minam sagihte lawnthal a, amaute leitang ama mite luah dingin a pia hi. 20 Hihte khempeuh a tun nading kum 450 bang sawt hi. “Tua nung ciangin kamsang Samuel hun dong, Pasian in amaute ading thukhente a pia hi. 21 Tua ciangin tua mite in kumpi khat ngen uh a, amah in Benjamin beh ahi Kish tapa Saul, amaute a pia hi. Amah in kum sawmli sung a uk hi. 22 Saul paikhiat khit ciangin amaute kumpi dingin David a koih hi. Amah tawh kisai-in teci panga, ‘Ka lungsim tawh kituak Jesse tapa David ka mu zo hi; amah in sep dinga ka deih peuhpeuh a sem ding hi,’ ci hi. 23 "Pasian in hih mipa suan le khakte panin Israel-te kianga a ciamsa bangin Honpa Jesu a puak hi. 24 Jesu a pai ma-in Johan in, Israel mite khempeuh tungah kisikna le baptisena a hilh hi. 25 Johan in a nasep a zawh kuan in, ‘Kei kua hi-in nong ngaihsun uh hiam? Tua na ngaihsut pa uh ka hi kei hi. Amah ka hi kei a, amah ka nungah hong pai dinga, ama khe dapkhau phel ding nangawnin ka cin kei hi,’ ci hi. 26 "Sanggamte, Abraham tate le no Pasian kihta Gentile-te aw, hih hot-khiatna thupuak eite tungah hong kipuak zo hi. 27 Jerusalem a mite le a gam-ukte un, Jesu theitel lo napi, Sabbath tenga kisim kamsangte thugente amah mawhpaihna tawh a tangtun uh hi. 28 Amaute in sihna ding zahin thukho mu zo lo napi Pilate in a thah nading a ngen uh hi. 29 Ama thu a kigelhsa khempeuh a hih kim khit uh ciangin singtung pan lakhia uh a, han sungah a sial uh hi. 30 Ahi hangin Pasian in amah misi pan thosak a, 31 Galilee pan Jerusalem a, a khual zinpihte in ni tampi sung a mu uh hi. Tu-in i mipihte tungah amaute teci ahi uh hi. 32 "Kote in note tunga kong gen uh lungdamna thu: Pasian in i pate tunga a kamciamsa, 33 ei amau tate adingin Jesu thawhsaktohna tawh tangtun zo hi. Phatna-late a nihna ah: “‘Nang ka Tapa na hi hi; tuni-in na Pab kong suak hi,’c ci-a kigelhsa bangin, 34 a muat ngei nawn lo dinga Pasian in misi pana a thawhsak takpina thu, hih thute: “‘David tunga kamciamsa, a siangtho le a kip thupha nang kong pia ding hi,’d ci-a, 35 tua ahi manin mundangah zong, “‘Nang in, nangma Misiangtho Pa na muatsak kei ding hi.’e ci-in kigelh hi. 36 "Ahang in, David in ama khan sungin Pasian deihna bangin na a sep khit ciangin a ihmu hi; a pate tawh kivui-a, a pumpi a muat hi. 37 Ahi hangin Pasian in misi pana a thawhsak pa ahileh a muat kei hi. 38 "Tua ahi manin ka sanggamte aw, Jesu tungtawnin mawhnate maisakna thu note tungah kitangko ahilam na theih ding uh ka deih hi. 39 Moses thukham pana dik na tan theih lohnate khempeuh uh, ama tungtawnin a um peuhpeuh in dik tang ta hi. 40 Kamsangte gensa no tunga a tun loh nadingin na kikem un; tua in: 41 "‘No mizahpih hatte aw en un lamdang sa unla mangthang un; ahang in, mi khatpeuh in hong gen taleh na up ngei loh ding uh na khat, na nuntak sungun ka hih ding hi,’f ci hi,” a ci hi. 42 Synagogue panin Paul le Barnabas a ciah uh leh mite in Sabbath ni kik ciangin hih nate thu a ban a genlai dingun a sam uh hi. 43 A kikhawm mipite a kikhen uh ciangin Jew mite le Jew-te biakna-a kikhelsa a kipumpiak mahmah mi tampite in Paul le Barnabas a zui uh hi. Amaute in na hopih uh a, Pasian hehpihna sungah kiptaka a om den nadingun a kun uh hi. 44 Sabbath ni kik ciangin khuapi bupa mi khempeuh phial Topa thu ngai dingin a kikhawm uh hi. 45 Jew-te in mihonpite a muh uh ciangin haza mahmah uh a, Paul thugente langbawlin a siatgen uh hi. 46 Tua ciangin Paul le Barnabas in: “Note kiangah Pasian thu kong gen masak ding mah uh ahi hi. Note in tua thu nial a, nuntak tawntungna ngah dingin cing kisa lo na hi nungsangun, tu-in Gentile-te lam ka nga ta uh hi. 47 Ahang in, Topa in eite hong thupiak hih ahi hi. “‘Nang in leitung mongte dongin hotkhiatna na puak theih nadingin keimah in nog Gentile-te tungah khuavak ahi dingin kong bawl zo hi,’h ci hi,”i ci-in amaute hangtakin a dawng uh hi. 48 Gentile-te in hih thu a zak uh ciangin lungdam mahmah in Topa thu pahtawi uh a, nuntak tawntungna ngah dinga kisehsate khempeuh in a um uh hi. 49 Tua kual bup tengah Topa thu a kizel hi. 50 Ahi hangin Jew-te in Pasian kihta numei zahtakhuaite le khuapi sunga tangpi makaite a holhthawh uh hi. Amaute in Paul le Barnabas langbawlin a bawlsia ding mi tawsawn uh a, amau kual panin a hawlkhia uh hi. 51 Tua ciangin amaute in tua mite a langpanna un a khepekua leivuite singkhia uh a, Iconium ah a pai uh hi. 52 Nungzuite, lungnopna le Khasiangtho tawh kidim uh hi. 1Th 2:16

Nasepte 14

1 Iconium a Jew-te synagogue ah Paul le Barnabas a paingei bang un a pai uh hi. Tua-a a thugenna un mi lungsim sukha lua ahi manin Jew-te le Gentile-te tampitak in a um uh hi. 2 Ahi hangin a um nuam lo Jew-te in Gentile-te tawsawn uh a, sanggamte langpang dingin a lungsim uh a hihsiatsak uh hi. 3 Tua lai-ah amah in Paul le Barnabas lim lamdangte le a lamdangte bawl theisakin ama hehpihna thupuakte a kipsak pa Topa adingin hangtakin thu genin hun sawt khop a zang uh hi. 4 Khuapi mite kipawl khen uh a, pawlkhatte Jew-te lamah pangin adangte sawltakpite lamah a pang uh hi. 5 Tua lai-ah Gentile-te le Jew-te lakah a makaite uh tawh amaute bawlsiat ding le suanga den ding a sawmsimna uh kipan hi. 6 Ahi hangin amaute in tua thu theikhia uh a, Lycaonia khuapite ahi Lystra, Derbe le a kima gamte ah tai-in, 7 tua lai-ah lungdamna thu a hilh veve uh hi. 8 Lystra ah a suah tunga kipan khebai, lam pai ngei lo khe poi khat a om hi. 9 Paul a paupau laitakin amah in thu va ngai hi. Paul in amah tangtakin enin, dam nading upna a neih lam mu a, 10 "Na khe in ding in!” a ci hi. Tuateh mipa diangto paha lam a pai hi. 11 Mihonte in Paul nasepsate a muh uh ciangin, “Eite kiangah pasiante mihing bangin hong paisuk hi!” ci-in Lycaonia pau-in a kiko uh hi. 12 Barnabas pen Zeus ci uh a, Paul pen a thugen makai ahi manin Hermes ci uh hi. 13 Khuapi pua mahmah a biakinn nei pa siampi Zeus in khuapi kongpite ah bawngtal le pak kualte a va puak hi. Bang hang hiam cih leh amah le mihonpite in amau tungah biakpiakna pia nuam uh hi. 14 Ahi hangin sawltakpi Barnabas le Paul-te in a zak uh ciangin a puansilh lai uh balkek uh a, mihonpite lakah tai-in a kiko uh hi. 15 "Mite aw, bang hangin hih bawl na hi uh hiam? Kote zong no mah bangin mihing lel ka hi uh hi. Kote in lungdamna thu no hong puakin, hih kimanna a nei lo nate panin, van le lei le tuipi le tuate sunga omte a bawl a nungta Pasian lama na kihei ding uh hong gen ka hi uh hi. 16 Amah in a beisa hunin, minam khempeuh amau ut bangbangin gamtasak hi. 17 Tua hi napi teci panna om loin amaute a mawk nusiat kei hi: vantung pana guah le amau hun ciata, a gah an pia-in a migitna hong lak hi. An tampi-in hong vaka, na lungtang uh lungnop na tawh a dimsak hi,” a ci uh hi. 18 Hih thute nangawn tawh amaute tunga kithoihna bawl ding mihonte a kham zo kei dektak uh hi. 19 Tua ciangin Antioch le Iconium panin Jew-te pawlkhat va pai uh a, mihonte a thu zawh uh hi. Amaute in suangin Paul deng uh a, a sisa in ngaihsunin khuapi pua-ah a talkaihkhia uh hi. 20 Ahi hangin ama kimkotah nungzuite a kikhop khit uh ciangin amah tho-a khuapi sungah a lut kik hi. A zing ciangin amah le Barnabas Derbe ah a pai uh hi. 21 Tua khuapi ah amaute in lungdamna thu hilh uh a, nungzui tampitak a ngah uh hi. Tua ciangin amaute Lystra, Iconium le Antioch ah ciah kikin 22 nung zuite thakhauhsak uh a, upna-ah thutakin a om den nading uh a hanthawn uh hi. Amaute in, “Pasian gam i lut nadingin haksatna tampi i thuak ding mah ahi hi,” a ci uh hi. 23 Amau pawlpi tekah Paul le Barnabas in upate sehsaka uh a, a muante uh thungetna le antanna tawh Topa tungah a ap uh hi. 24 Pisidia gam sung tawna a pai khit uh ciangin Pamphylia tung uh a, 25 Perga ah thu a gen khit uh ciangin Attalia ah paisuk uh hi. 26 Attalia panin a zawh khitsa uh nasepte sem dinga, Pasian hehpihna sunga a ki-apna uh Antioch ah tembaw in a ciah kik uh hi. 27 Tua lai a tun uh ciangin amaute in pawlpi teng kai khawm uh a, amaute tungtawna Pasian nasepnate khempeuh le Gentile-te tungah upna kong a kihon takpinate a zasak uh hi. 28 Tua lai ah nungzuite tawh sawt veipi a taam uh hi.

Nasepte 15

1 Judea gam panin Antioch ah mi pawlkhat paisuk uh a, “Moses hong hilh ngeina tawh kizui-in vun na at kei uh leh note hong kihonkhia thei lo ding hi,” ci-in sanggamte a hilh uh hi. 2 Hih thu in Paul le Barnabas tawh amaute nakpi-a kinialna le kiselna a piangsak hi. Tua ciangin Paul le Barnabas sehin adang thu-um pawlkhat tawh, hih thu tawh kisai-a sawltakpite le upate tawh kimu dingin Jerusalem ah a paitosak uh hi. 3 Pawlpite in lampi-ah kha uh a, Phoenicia le Samaria gamte tawna a zin kawmun Gentile-te kikhelna zia a gen uh hi. Hih thuthak in sanggamte khempeuh a nuamsak mahmah hi. 4 Amaute Jerusalem a tun uh ciangin pawlpite, sawltakpite le upate in na dawn uh a, amaute in amau tungtawna Pasian nasepnate a zasak uh hi. 5 Tua ciangin Pharisee-te pawl lakah thu-umte pawlkhat dingin, “Gentile-te, vun-atsakin Moses thukham pelloin zuihsak ding ahi hi,” a ci uh hi. 6 Sawltakpite le upate hih thute kikum dingin a kikhawm uh hi. 7 Tampitak a kikup khit uh ciangin Peter ding to a, “Sang gamte aw, a beisa tawlkhat lai-in Gentile-te in keima kam panin lungdamna thupuak za uh a, a up theih nadingun note lak panin Pasian in hong teelkhia cih na thei uh hi. 8 Mihing lungtang sung a thei, Pasian in amaute a sanna hong lahna-in eite hong piak bang tektek, amaute Khasiangtho a pia hi. 9 Amah in amau lungtangte, upna tawh siansuah khin ahi manin eite le amaute hong deidan lo hi. 10 Tua bang ahileh eite le i pate in i puak zawh loh hakkol nungzuite ngawngah suanin Pasian zia-et ding i hi hiam? 11 Hi lo! Amaute mah bangin eite zong i Topa Jesu hong hehpihna tungtawnin i suakta cih i um hi,” ci-in thu a gen hi. 12 Barnabas le Paul in amaute tung tawna Pasian in Gentile-te laka lim lamdang le a lamdang a bawlte a gen laitakun, a kikhawm khempeuh thungai-in a sip dide uh hi. 13 Amaute a man khit uh ciangin James in, “Sanggamte aw, ka thugen na ngai un. 14 Pasian in ama mi mahmah dingin Gentile-te lak pan pawlkhat a lakna in, amaute bangci awlmawh hiam cih a masa penin hong lak zo hi, cih eite kiangah Simona in hong telgen zo hi. 15 Kamsangte thugente hih tawh kituak hi: 16 “‘Tua khit ciangin kong kileh kik dinga a puksa David puanbuk ka lam kik ding hi. A kisiasa ka lam kik dinga, ka puahthak ding hi. 17 A mangthang baang’ mite le ka min a suang Gentile-te khempeuh in, Topa a zon theih nading ci-in hih nate khempeuh a hih pa Topa in a gen hi,’b 18 khanghunte khempeuhin tuate kithei khin zo hi, ‘c ci-in kigelh hi. 19 "Tua ahi manin Pasian lama hong kihei Gentile-te adingin haksatna i bawl loh ding ka thupukna ahi hi. 20 I bawl sangsikin amaute lai khakin, milim biakna in a nitsak ante, numei-pasal paktatna, ngawng heklupte sate le sisante a tan dingun hilh zaw ni. 21 Ahang in, amasapen hunlai-a kipan khuapi khempeuh ah Moses in a hilhsa hi-a Sabbath ni simin synagogue-te sungah a kisimsimsa ahi hi,” a ci hi. 22 Tua ciangin sawltakpite le upate in pawlpi bup tawh, amau mite pawlkhat teeltuam ding le Paul le Barnabas tawh Antioch ah sawl dingin thu a khensat uh hi. Amaute in sanggamte laka makai (Barsabbas kici) Judas le Silas mi nih a teel uh hi. 23 Amaute in a nuai-a bangin lai a puasak uh hi: Sawltakpite le upate, na sanggamte un, Antioch, Syria le Cilicia a om thu-um Gentile-te tungah: Kong hopih uh hi. 24 Kote in thuneihna ka piak loh pi un, ko kiang pan mi pawlkhat hong pai-in a thugen un na lungsim uh hong buaisaka, amau thugente in hong lungzingsak cih ka za uh hi. 25 Tua ahi ciangin kote khempeuh in mi pawlkhat teelkhia-in i lawm itte Barnabas le Paul tawh no kianga sawl khawm dingin ka thukim uh hi. 26 Amaute i Topa Jesu Khrist min hanga a nuntakna a pia ngamte ahi uh hi. 27 Tua ahi manin lai-a kong gelhte uh a kam uh tawh a kipsak dingin Judas le Silas kong sawl uh hi. 28 A kisam a nuai-a kigente simloh a dang bangmah no tungah kong suat loh ding uh, Khasiangtho le kote in hoih ka sa uh hi: 29 Milimte thoihna ante, sisan, ngawngheklup ganhingte sa, le numei-pasal paktatna na tang ding uh hi. Hih nate pelh le uh cin a hoiha gamta na hi ding uh hi. Mangpha. 30 Tua mite sawlkhia uh a, amaute Antioch ah paisukin, tua lai-a pawlpite kaikhawm uh a, laikhak a pia uh hi. 31 Mipite in sim uh a, hanthawnna thupuak hangin a nuam mahmah uh hi. 32 Amau mahmah zong kamsang ahi Judas le Silas-te in sanggamte tungah hanthawnna kam tampitak genin a thakhauhsak uh hi. 33 Tua lai-ah tawlkhat sung a taam khit uh ciangin sanggamte in, lemna thupha tawh amaute a sawlte kiangah a ciahkiksak uh hi. 34 Ahi hangin Silas in tua lai-a taam lai dingin a khensat hi.d 35 Ahi hangin Antioch ah Paul le Barnabas taam lai uh a, tua lai-ah amaute le midang tampi sinsakin Topa thu a hilh uh hi. 36 Tua zawh tawmvei khit ciangin Paul in Barnabas kiangah, “Topa thu i gennasa khuapi khempeuh ah pai kikin, sang gamte kiangah hawhin, amaute bang a ci uh hiam, va en ni” a ci hi. 37 Barnabas in Marka zong a kici Johan tonpih nuam a, 38 ahi hangin Paul in amah tonpih ding hoih a sa kei hi. Bang hang hiam cih leh amah in Pamphylia gamah amaute na taisan a, amaute tawh na a sem zom kei hi. 39 Amaute nasiatakin kithutuak lo uh a, a kipawlkhen uh hi. Barnabas in Marka tonpih a, tembaw tuangin Cyprus ah pai uh a, 40 ahi hangin Paul in Silas teela, sanggamte in Topa hehpihna ah a ap khit uh ciangin a kuankhia uh hi. 41 Pawlpite thakhauhsakin amah Syria le Cilicia tawnin a pai hi.

Nasepte 16

1 Derbe ah amah tunga, tua khit ciangin nungzui Timothy tenna Lystra a tung hi. Timothy nu, thu um Jew mi hi-a a pa Greek mi ahi hi. 2 Lystra le Iconium a sanggamte in amah phat mahmah uh hi. 3 Paul in a khualzinna ah amah tonpih nuam ahi manin a vun a atsak hi. Bang hang hiam cih leh tua huam a tengte Jew-te vive hi-a, a pa Greek mi ahilam a theih khitsa uh ahi hi. 4 Amaute khuapi khat pan khuapi khatah zin uh a, Jerusalem a sawltakpite le upate in mite zuih dinga thukhensatna a bawlsate uh a gen kawikawi uh hi. 5 Tua hi-a pawlpite upna ah kithakhauhsakin nisimin mi a kibehlap hi. 6 Paul le a lawmte Phrygia le Galatia kual khempeuh ah zin kawikawi uh a, Asia gama thu a hilh ding uh Khasiangtho in a phal kei hi. 7 Mysia tawh gamgi a tun uh ciangin amaute, Bithynia ah lut sawm uh a, ahi hangin Jesu’ Kha in amaute a pai ding uh a phal kei hi. 8 Tua ciangin Mysia khengin Troas ah a paisuk uh hi. 9 Zan laitakin Paul in Macedonia gam mi khat dingin, “Macedo-nia ah hong galkah unla, ko hong huh un,” ci-a gen khat a mangin a mu hi. 10 Paul in mang a muh khit ciangin Pasian in eite amau kianga lungdamna-thu hilh dingin hong deih hi, ci-a Macedonia a pai dingin a kithawi pah uh hi. 11 Troas panin tuipi tungah tembaw in Samothrace zuanin tangtakin ka pai uh a, a zing ciangin Neapolis ka tung uh hi. 12 Tua lai panin Macedonia khuapi khen sunga a lian pen Rome pemtate tenna khua ahi, Philippi ka tung uh hi. Tua lai ah sawt veipi ka taam uh hi. 13 Sabbath ni-in khuapi kongpi pualam ah paikhia-in thunget nading mun om a ka lametna uh gungei-ah ka pai uh hi. Tua lai-a a na kikhawmsa numeite tungah thu ka gen uh hi. 14 Tua thungaite lakah Lydia min nei, Thyatira khuapi pana puan dupsan zuak Pasian a bia numei khat a om hi. Topa in Paul thupuak sang dingin a lungsim a honsak hi. 15 Amah le a innkuanpihte a kibaptise khit uh ciangin a inn ah kote hong sam hi. Amah in, “Kei, Topa a um khat hi, ci-a nong sim uh leh hong pai-in ka inn ah hong taam un,” a ci hi. Tua ci-in kote hong zol zo ta hi. 16 Khat vei thungetna muna ka pai laitakun dawi lawmnei-a mailam thu a genkhol thei sila numeino khat ka tuak uh hi. Amah in mailam thu genkholin, amah a neite ading sum tampitak a thalawhsak hi. 17 Hih numeino in Paul le ko adangte hong zui a, “Na suahtak nading uh lampi hong gen hih mite Sang pen Pasian nasemte ahi uh hi,” ci-in a kiko hi. 18 Hih bangin amah in ni tampi sung a hih den hi. A tawpna ah Paul in nawngkai sa mahmah a kihei-in tua kha kiangah, “Ama sung pan paikhia dingin Jesu Khrist minin thu kong pia hi,” a ci hi. Tua hun lianin kha in tuanu a nusia hi. 19 Tua silanu a neite in a sum muhna uh bei ta cih a theih uh ciangin Paul le Silas man uh a, thuneite mai-a ding dingin vanzuakna mun sumbuk tualah a kaigawp uh hi. 20 Amaute in thukhen mangte mai-ah amaute puak uh a, “Hih mite Jew-te hi uh a, ka khuapi uh a tokbuai gawp uh hi. 21 Tua pen, ko Rome mite san le zuih dinga ngeina tawh kituak lo hong hilh hang uh ahi hi,” a ci uh hi. 22 Paul le Silas langah mihonpite pang uh a, thukhen mangte in amaute puan hawkkhiatsakin satsak dingin thu a pia uh hi. 23 Amaute nakpi-a, a kisat khit ciangin thong sungah kikhum a, limtaka a cin ding in thong cingpa thu a pia uh hi. 24 Tua bang thupiaknate a ngah bangin amaute thong sungnung pen ah khuma, a khete ah kol a bulh hi. 25 Zankim pawlin Paul le Silas in, Pasian kiangah thu ngenin biakna late sa uh a, thongkia dangte in a ngai uh hi. 26 Thakhatin zin nakpi-in linga, thong inn bulpi a kilok hi. Thakhatin thong kong khak khempeuh kihonga, mi khempeuh kikhihna sik khainiang khempeuh kitolkhia hi. 27 Thong cingpa khanglo a thong kongkhakte kihongsa a om a muh ciangin, thongkiate suakta khin hi ci-a ngaihsun ahi manin a namsau dokin amah le amah thah a kisawm hi, 28 Ahi hangin Paul in, “Bangmah kicih kei in! Kote ka vekun hiah ka om uh hi!” ci-in a kiko hi. 29 Thong cingpa in meivaksakin a sungah lut pah a, Paul le Silas-te mai-ah ling kawmin a bok hi. 30 Tua ciangin amah in amaute paikhiatpih a, “Pute aw, hong kihotkhiat nadingin bang ka hih ding kul hiam?” ci-in a dong hi. 31 Amaute in, “Topa Jesu um un, nang le na innkuanpihte hong kihonkhia ding hi,” a ci uh hi. 32 Tua ciangin amaute in amah le a inn sunga om adangte khempeuh tungah Topa thu a genpih uh hi. 33 Tua zan hunpi mah in thong cingpa in amaute paipih a, a liamnate uh silsakin amah le a innkuanpihte khempeuh a kibaptise uh hi. 34 Thong cingpa in a inn ah paipih a, amaute an lui-in, Pasian um ta uh ahi manin a innkuan bupun lungnopna tawh kidim uh hi. 35 Khuavak ciangin thukhen mangte in thong cingpa kiangah a bupate uh sawlin, “Tua mite khahkhia in,” cih thupiak tawh a paisak uh hi. 36 Thong cingpa in Paul kiangah, “Thukhen mangte in nang le Silas khahkhiat ding thu hong pia zo uh hi. Na pai thei ta uh hi. Lungnuamtakin pai ta un,” ci-in a gen hi. 37 Ahi hangin Paul in uliante kiangah, “Kote Rome mi hi napi thudotna om loin mipi mai-ah hong satin thong sungah hong khum uh hi. Tua hi napi tu-in sim khahkhiat hong sawm uh ahi hiam? Hi thei peuhmah lo ding hi! Amaute mahmah hong pai-in kote hong tonpihkhia ta uh hen,” a ci hi. 38 Uliante in hih thu thukhen mangte kiangah tun uh a, amaute in Paul le Silas, Rome mi ahilam a theih uh ciangin a patau uh hi. 39 Amaute lungkimsak dingin va pai uh a, thong sung pan tonpihkhia in khuapi a nusiat nadingun a ngen uh hi. 40 Paul le Silas thong sung pan a paikhiat khit uh ciangin Lydia inn ah a pai uh hi. Tua lai-ah sanggamte tawh kimu-in amaute a hanthawn uh hi. Tua ciangin a paikhia uh hi.

Nasepte 17

1 Amaute Amphipolis le Apollonia nawkin a pai uh ciangin Jew-te kikhopna innpi omna Thessalonica a tung uh hi. 2 Ama ngeina bangin synagogue sungah Paul pai a, Laisiangtho pansanin Sabbath ni thum sung amaute thu a kikuppih hi. 3 Khrista in thuak in, misi pan a thawh ding mah a hihna zia teltakin genin a lak hi. Amah in, “Note tunga kong tangko hih Jesu, Khristb ahi hi,” a ci hi. 4 Jew-te pawlkhat kithuzawha Paul le Silas a pawl uh hi; tua mah bangin Pasian kihta Greek-te tampitak le a kipi-et numei a tawm het lo in a pawl uh hi. 5 Ahi hangin Jew-te in haza uh a, vanzuakna muna migilo pawlkhat kaikhawmin khuapi sungah mipi khawm uh a, ngongtatna a pan uh hi. Amaute Jason innah lut henhan uh a, mihontec lak pan kaihkhiat dingin Paul le Silas a zong uh hi. 6 Ahi hangin amaute a muh loh uh ciangin Jason le sanggamte pawlkhat kaigawpin khuapi vaihawm uliante mai-ah tun uh a, “Leitung khempeuhah buaina bawl hih mite hih lai hong tung uh a, 7 Jason in amaute a innah a tungsak hi. Amaute khempeuh in Caesar thukipte thusim loin, ‘Jesu kici adang kumpi khat om hi,’ ci uh hi,” ci-in a kiko uh hi. 8 Mihonpite le khuapi vaihawm uliante in hih thu a zak uh ciangin a pumbuai gawp uh hi. 9 Tua ciangin Jason le adangte kitatna piasakin a khah uh hi. 10 Khuamial tungin sanggamte in Berea ah Paul le Silas a khakhia pah uh hi. Tua lai a tun uh ciangin Jew-te synagogue ah amaute a pai uh hi. 11 Thessalonica mite sangin Berea mite nampi tat zaw uh hi. Ahang in, lawptakiin thupuak sang uh a, Paul thugente amaan mah ahi hiam, ci-in nisimin Laisiangtho a encian uh hi. 12 Jew mi tampi in um uh a, tua mah bangin a kipi-et Greek numei honkhat le Greek pasal tampi in zong a um uh hi. 13 Thessalonica a Jew-te in Berea ah Paul in Pasian thu a hilh lam a theih uh ciangin tua lai-ah zong va pai uh a, mihonpite tawsawnin a kitomsak uh hi. 14 Sanggamte in tuipi gei-ah Paul sawlkhia pah uh a, ahi hangin Silas le Timothy Berea ah a tam lai uh hi. 15 Amaute in Athen dong va kha uh a, Paul in Silas le Timothy in a manlang theithei-a, a nungdelh nading uh thu puasak in a ciahsak kik hi. 16 Paul in amaute ngaka Athen a, a om sungin tua khuapi milimte tawh a kidim mu-a, a lungdong lua mahmah hi. 17 Tua ciangin synagogue sungah Jew-te le Pasian kihta Greek-te thu kuppih a, tua mah bangin vanzuakna munah nisima a omkha peuhpeuh a kikuppih hi. 18 Epicurea le Stoic thuguizuihte honkhat amah tawh a kisel uh hi. Amaute pawlkhat in, “Hih kam theipa in bang gen nuam ahi hiam?” ci-in a dong uh hi. Paul in lungdamna thu ahi Jesu thu le thawhkikna thu hilh ahi manin a dangte in, “Amah in gamdang pasiante a gum hileh kilawm,” a ci uh hi. 19 Tua ciangin amaute in amah Areopagus thu kikupna ah paipih uh a, tua lai-ah, “Tu-a na hilh thuhilhna thak ko ka thei thei ding uh hiam? 20 Zak ngei loh ngaihsutna pawlkhat nong zasak a, tuate bang cihnopna hiam, ka thei nuam uh hi,” a ci uh hi. 21 (Athen mite le tualai-a teng gamdang mi khempeuh in bangmah dang sem loin a nunung pen ngaihsutna thak peuhpeuh ngai-in tua thu bek genna in a hun uh a zang uh hi.) 22 Tua ciangin Areopagus thukikupna ah Paul ding to a, “No Athen mite’ lam khempeuh ah na biakna-mi uh cih ka mu hi. 23 Ahang in, pai kawikawi-a, na biak uh nate ka vel leh biakna-tau khat ah: THEIHLOH PASIAN ADING, ci-a kigelh ka mu hi. Tu-in note in na theih loh uh na biak uh, note tungah kong tangko ding hi. 24 "Leitung le a sunga om na khempeuh a bawl Pasian, van le lei Topa hi-a khut tawh kilam biakinnpite ah a teng kei hi. 25 Amah in kisapna khat peuhpeuh a nei bangin mihing khuta na a kisepsak hi lo hi. Bang hang hiam cih leh amah mah in mite khempeuh nuntakna le huu le adang khempeuh a pia hi. 26 Mi khat panin mihing nam kim bawla, amaute leitung bup a luahsak hi. Amaute ading hunte sehsaka, amaute ten nading mun ciat a sehsak hi. 27 Eite tek kiang panin Pasian gamla lo hi napi, mihingte in amah zonga, zama, a muh khak zenzen leh cih deihna in hihte a hih ahi hi. 28 ’Ahang in, ama sungah eite nungta-in, i tanga mihing hina i nei hi. Na la phuahte uh pawlkhat ah, ‘Eite ama suan ama khak i hi hi,’ ci hi. 29 "Tu ahi ciangin eite Pasian suan le khak i hi khit nungsang khutsiamte in a zep uh kham, ngun ahikeh suang tawh kibawl milim a bang dingin a pasian-hina i ngaihsut ding hi lo hi. 30 Pasian in a beisa hunin tua bang khuaphawklohna a kimuh-mawhbawl hangin tu-in amah in mun khempeuhah mi khempeuh a kisik dingin thu pia zo hi. 31 Ahang in, amah in a sehkholhsa mipa zangin thumaan tawh leitung mi khempeuh thu a khen ni ding sehkhol khin zo hi. Hih thu amaanna mi khempeuh tungah a lahna-in, amah misi pan a thokiksak hi,” a ci hi. 32 Amaute in misi thawhkikna thu a zak uh ciangin pawlkhat in zahpih uh a, ahi hangin adangte in, “Hih thu tungtang na gen ka za kik nuam uh hi,” a ci uh hi. 33 Tua laitakin Paul in tua kikhawmte a nusia hi. 34 Mi tawmkhat in Paul nung zuisuak uh a, a um uh hi. Amaute lakah Areopagus a pawl mi Dionysius le Damaris kici numei khat le adang tampi zong ahi uh hi.

Nasepte 18

1 Hih teng khit ciangin Athen nusia in Corinth ah Paul a pai hi. 2 Tua lai-ah Pontus gammi Aquila kici Jew mi khat tawh a kituak hi. Amah, Jew-te khempeuh in Rome nusia dinga Claudius in thu a piakna hanga Italy pana a zi Priscilla tawh hun sawt nai lo-a a tung uh ahi hi. Amaute tawh kimu dingin Paul a pai hi. 3 Bang hang hiam cih leh amah amaute banga puanbuk bawlpa ahi manin amaute kiangah taamin na semkhawm uh hi. 4 Sabbath ni simin Jew-te le Greek-te zol sawmin synagogue sungah thu a kikuppih hi. 5 Macedonia panin Silas le Timothy a tun uh ciangin Paul amahmah thuhilhna bekah kipumpiak a, Jew-te kiangah, “Jesu in Khrista hi,” ci-in a hilh hi. 6 Ahi hangin Jew-te in Paul sel uh a, a selpho uh ciangin amaute a langpan dingin a puante singkhia a, amaute kiangah, “Na sisan uh nomau lutungah tu ta hen! Ka tavuan ah ka siang zo hi. Tu-a kipan Gentile-te kiangah ka pai ta ding hi,” a ci hi. 7 Tua ciangin Paul in synagogue nusia a, tua inn zoma om Pasian bia pa khat Tita Justus inn ah a lut hi. 8 Synagogue ukpa Crispus le a innkuan pihte khempeuh in Topa um uh a, ama thu a za Corinth mite tampi in umin a kibaptise uh hi. 9 Zan khat Paul mangmuhna sungah Topa in hopih a: “Kihta kei in, na gen ban zom in, dai tuan kei in. 10 Nang tawh omkawm ka hi manin kuamah in nang hong doin hong liamsuah lo ding hi. Bang hang hiam cih leh hih khuapi sungah mi tampi ka nei hi,” a ci hi. 11 Tua ciangin Paul, kum khat le alang sung om a, amaute Pasian thu a hilh hi. 12 Gallio, Achaia-a gam-ukpa ahi laitakin Jew-te kipawlkhawmin Paul va busim uh a, thukhen zumah a tun uh hi. Amaute in, 13 "Hih mipa in thukham tawh kileh bulhin Pasian bia dingin mite a zol hi,” ci-in a ngawh uh hi. 14 Paul a pau dektak laitakin Gallio in Jew-te kiangah, “No Jew-te in a kilawm lo gamtatna ahikeh khialhna lian thu hong gen hi le uh cin na thu uh, thu-in kisang thei ding hi. 15 Ahi hangin nomau thukham tawh kisai kammalte le minte thu hanga piang ahi manin no le no mah in na siangsak un. Tua bang thute a khen in ka pang kei ding hi,” a ci hi. 16 Tua ciangin thukhen zum panin amaute a hawlkhiasak hi. 17 Tua ciangin amaute khempeuh in synagogue ukpa Sosthene bawhhuan uh a, thukhen zum mai-ah a sat uh hi. Ahi hangin Gallio in a awlmawh kei hi. 18 Corinth ah tawm vei sung Paul a taam lai hi. Tua ciangin sanggamte nusia in Priscilla le Aquila tonpih a Syria ah tembaw-in a pai uh hi. Amah in kiciam nasa khat a neih manin tembaw tung a tuan ma-in Cenchrea ah a sam a metmaisak hi. 19 Amaute Ephesus tung uh a, tua lai-ah Paul in Priscilla le Aquila a nusia hi. Amah ahileh synagogue ah pai-a Jew-te thu a kikuppih hi. 20 Hun tamzaw a zat ding a nget uh ciangin amah in a sel hi. 21 Ahi hangin a nusiat ding ciangin, “Pasian deihna ahileh kong pai kik ding hi,” ci-in a kamciam hi. Tua ciangin Ephesus panin tembaw tuangin a dingkhia hi. 22 Caesarea a tun uh ciangin paito-in pawlpite va hopih a, tua ciangin Antioch ah a paisuk hi. 23 Antioch ah hun sawtkhop a zat khit ciangin tua lai pan Paul kipankhia kik a, Galatia le Phrygia kual mun khat khit mun khatah zin kawikawi-in, nungzuite khempeuh a va thakhauhsak hi. 24 Tua hun sungin Alexandria khua mi Apollos kici Jew mi khat Ephesus ah a pai hi. Amah theihna sang khat hi-a, Laisiangtho theih mahmah tawh a thuah hi. 25 Amah Topa lampi lama kihilh ngiingeisa hi-a, Johan baptisena bek a thei hi napi, Jesu thu tawh kisai siangtakin hilha, lawptakinb thu a gen hi. 26 Amah, synagogue sungah hangtakin a pau ngam hi. Priscilla le Aquila in a thu gen a zak uh ciangin a innuah sam uh a, ama tungah Pasian lampi thu a kimzawin a hilh cian uh hi. 27 Achaia-a Apollos a pai nop ciangin sanggamte in amah hanthawn uh a, tua lai-a om nungzuite in amah a na muak nadingun lai a khak uh hi. Amah a tun ciangin hehpihna hanga a um mite adingin amah a phatuam pha mahmah hi. 28 Ahang in, mipi laka thu kinialnate ah amah in Jesu in Khrist hi, ci-in Laisiangtho panin Jew-te a dongkhak giapgiap hi.

Nasepte 19

1 Corinth ah Apollos a om laitakin gam sung lamzikpi zui in Paul zina, Ephesus a tung hi. Tua lai-ah nungzuite pawlkhat mu a, amaute kiangah, 2 "Na up uh ciangina Khasiangtho na ngah uh hiam?” ci-in a dong hi. Amaute in, “Ka ngah kei uh hi, Khasiangtho a om lam nangawn ka za ngei nai kei uh hi,” ci-in a dawng uh hi. 3 Tua ciangin Paul in, “Tua ahileh bang baptisena na ngah uh hiam?” a ci hi. Amaute in, “Johan baptisena” a ci uh hi. 4 Paul in, “Johan baptisena pen kisikna hanga baptisena ahi hi. Amah in mipite kiangah ama nunga paipa a up dingun hilha, tua pen Jesu um ding cihna ahi hi,” a ci hi. 5 Amaute in hih thu a zak uh ciangin Topa Jesu min sungahb a kibaptise uh hi. 6 Paul in amaute tungah a khut a ngak ciangin amaute tungah Khasiangtho tunga pautec in pau-in thu a gen uh hi. 7 Tua mite a vekpi un sawm-le-nih bang a pha uh hi. 8 Synagogue sungah Paul luta, mi lungsim a zo theithei dingin Pasian gam thu kiselin, hangtakin kha thum sung tua lai-ah thu a gen hi. 9 Ahi hangin amaute pawlkhat phengphi uh a, um nuam loin mipi mai-ah Lampi thu a gensia uh hi. Tua ciangin Paul in amaute a nusia hi. Amah in nungzuite paikhiatpih a, Tyrannus-te thugenna innpi sungah nisimin thu a kikuppih hi. 10 Asia gam sunga teng Jew-te le Greek-te khempeuh in Topa thu a zak nadingun hih bangin kum nih sung a hih hi. 11 Pasian in Paul tungtawnin a lam dang tuan nalamdangte a bawl hi. 12 Paul tawh a kisukhasa mainul neute le angtuamte, cinate kiangah a kitawi ciangin a natnate uh damin, kha gilote in amaute a nusia uh hi. 13 Kha gilote hawlkhia-a, a vak kawi kawi Jew-te pawlkhat in dawilut mite tungah Topa Jesu min zangin kha gilote hawlkhiat a sawm uh hi. Amaute in, “Paul in a thu a hilhpa Jesu minin na paikhiat ding thu kong pia hi,” khawng a ci uh hi. 14 Hih banga a hihte, Jew siampi makai khat Sceva tapa sagihte ahi uh hi. 15 Ni khat tua kha gilo in amaute tungah, “Jesu ka thei a, Paul thu zong ka thei hi, no kua na hi uh hiam?” a ci hi. 16 Tua ciangin kha gilo lutna mipa amaute tungah diang gawpa, a vekpi un a zogawp hi. Amah in amaute nakpi-in vua a, guaktangin sisan luang sa-in a taikhia uh hi. 17 Ephesus a teng Jew-te le Greek-te in hih thu a theih uh ciangin lau uh a, Topa Jesu min nakpitakin a zahtak uh hi. 18 A umte tampi hong pai uh a, a gitloh gamtatnate uh a pulakkhia khin uh hi. 19 Dawi-ai tawi mi honkhat in a laizialte uh kaikhawm uh a mipite muhin a haltum uh hi. Tua laizialte aman a seh uh ciangin a vekpi in drachmasd tul sawmnga man hi. 20 Hih bangin Topa thu zaipitakin kizela, a vangliatna a khang hi. 21 Hihte khempeuh a pian khit nungin Paul in Macedonia le Achaia-a nawkin Jerusalem ah pai ding a khensat hi. Amah in, “Tua lai ka tun khit ciangin Rome ah zong ka hawh kul hi,” ci hi. 22 Amah a huhte nih, Timothy le Erastus, Macedonia ah sawl a, amah tawmvei sung Asia gamah a taam lai hi. 23 Tua hun pawlin Lampi thu tawh kisai buaina lianpi khat a piang hi. 24 Ngun seek Demetrius min nei khat oma, tuapa in ngun tawh, Artemis biakbuknote bawla, khutsiamte adingin sumzuakna neu het lo khat a suaksak hi. 25 Amah in amau sep bang a semte le sumbawlna-a a neite khempeuh samkhawm in, “Guaite aw, hih sum bawlna panin sum tampitak hong tum hi, cih na thei uh hi. 26 Tua hi-a hih mipa Paul in Ephesus le Asia gam bupah mi tampitak thuzawha, a pimang zia mu-in na za zo uh hi. Amah in, ‘Mihing bawltawm pasiante Pasian hi peuhmah lo hi,’ ci hi. 27 I sumbawlna a minsiat ding a lauhuai bek tham loin alian numei Artemis biakinnpi zong kithusim loin Asia gam le leitung bup khempeuh-a kibia nusian mahmah kiminsiasaka a pasian thupina teng a kisuh ding lauhuai hi,” a ci hi. 28 Amaute in hih thu a zak uh ciangin lungso uh a, “Ephesus-te Artemis alian hi!” ci-in a kiko uh hi. 29 Khuapi sung bup a so pah henhan hi. Mipite in Macedonia pana Paul khualzinpihte, Gaius le Aristarchus man uh a, limlahna inn sungah khekhatkhai bangin a lut henhan uh hi. 30 Mihonpite mai-ah Paul kilaak nuama, ahi hangin a nungzuite in a phal kei uh hi. 31 Paul lawmte, tua gam uliante pawlkhat nangawn in tua limlahna inn sungah a va kilai-phum loh nadingin thumin thu a khak uh hi. 32 Tua-a kikhawmte pumbuai gawp uh a, pawlkhat in thu khat genin, adang pawlkhat in thu dang khat mah gen uh a, a kiko uh hi. Mi a tamzaw thamte, amau bang hanga tua lai-a om uh hiam, cih nangawn a kithei kei uh hi. 33 Jew-te in amai lamah Alexander sawn uh a, mihonpite pawlkhat amah lamlakin a kiko uh hi. Amah in mipite mai-ah a kiphelhna thu a gen theih nadingin a daih nading uh a khut a van hi. 34 Ahi hangin amah Jew mi hi, cih a theihcian uh ciangin amaute khempeuh kithukhat in, “Ephesus-te Artemis a lian hi!” ci-in nai nih sung bang a kiko uh hi. 35 Khuapi lai-atpa in mihonpite daisak a: “Ephesus mite aw, Ephesus khuapi in a lian Artemis biakinnpi le van pana hong kia tuanu lim a kem ahilam leitung bupin a theihsa hi lo ahi hiam? 36 Tua ahi manin hih thute nial theih nading a om lo ahi khit nungsang daitakin om a, na gamhtat loh ding uh ahi hi. 37 Hih mite in eite nusian gendai loin i biakinnpi lah luh lo napi hih lai-ah nong tun zo uh hi. 38 Demetrius le ama khutsiampihte in mi khatpeuh tungah lungkimlohna nei uh ahileh thukhenna innte honsa in om a, gam-ukte lah om uh hi. Amaute in ngawhna thu a bawl thei uh hi. 39 Tua lo adang thu puaktoh nop lai na neih uh leh a ngeina om bangin kikhopna ah a kisiansak kul ding hi. 40 Tuni-a thupiangte hangin a ngongtat a hong kingawh khak ding lauhuai hi. Hih thu tungtang ah siksan ding thukho i neih loh nungsang hih banga buaina bawl kei ni,” a ci hi. 41 Hih teng a gen khit ciangin tua-a kikhawm teng a kikhensak hi.

Nasepte 20

1 Tua buaina a ven ciangin Paul in nungzuite samsaka, amaute a hanthawn khit ciangin mangpha khaka, Macedonia a pai dingin a dingkhia hi. 2 Amah tua huam tengah zin kawikawi-a, mite kiangah hanthawnna thu tampi genin a tawpna-ah Greek a tung hi. 3 Tua lai-ah kha thum a taam hi. Syria gam zuana tembaw tawh pai a sawm hi napi Jew-te in thah a sawsim manin Macedonia tawna ciah kik dingin a khensat hi. 4 Berea panin Pyrrhus tapa Sopater, Thessalonica panin Aristarchus, Secundus, Derbe panin Gaius le Timothy zong, Asia gam panin Tychicus le Trophimus-te in a zui uh hi. 5 Hih mite na mapai uh a, Troas ah kote hong ngak uh hi. 6 Ahi hangin Silngo-sawhloh Anlum Pawi khit ciangin Philippi panin tembaw in ka tuang uh a, ni nga khit ciangin Troas ah ka lawmte uh pha in tua lai-ah ni sagih ka taam khawm uh hi. 7 Nipikal ni masa pen ni-in anlum balkham dingin ka kikhawm uh hi. Paul in mite kiangah thu gena, a zing ciangin paisan sawm ahi manin zankim dong thu a gen niloh hi. 8 Ka kikhopna mun uh inn tungnung dei sungah meivak tampi a om hi. 9 Paul in thu gengen mai ahi ciangin Eutychus kici tangvalno khat tawhlet ah tu-a, a ihmut suak mahmahin a lusu hi. Amah a kikhim ciangin inn dawl thumna panin lei-ah kiasuka, a sisa in kitawm hi. 10 Paul kumsuka, tua tangvalnopa tungah boksukin a kawi hi. Amah in, “Amah nungta hi, patau kei dih un!” a ci hi. 11 Tua ciangin inn tungah kahto kika anlum balkhamin a ne hi. Khuavak dong thu a gen khit ciangin a paisan hi. 12 Mite in tangvalnopa a nungta in a inn ah ciahpih uh a, amaute nakpi-in a kihehnem hi. 13 Tembawpi-in Assos lamah ka na ma pai uh a, tua lai-ah tembaw tawh Paul a la ding ka hi uh hi. Amah tua lai-ah khe-a, a na mapai ding ahi manin amah in hih banga a gel ahi hi. 14 Amah in Assos ah kote hong dawntuah a, tembaw ah ka tuansak khit uh ciangin Mitylene ah ka paisuak uh hi. 15 A zing ciangin tua lai panin ka paikhia leuleu uh a, Kios ka tung uh hi. A thai ciangin Samos ka kantan uh a, a zing ciangin Miletus ka tung uh hi. 16 Paul in a hi theih le Pentecost ni lap nuam ahi manin Asia gam sungah ahun zang khin loin, Ephesus khengsuakin a manlangin Jerusalem tun a sawm hi. 17 Miletus panin Paul in, Ephesus a pawlpi upate a samsak hi. 18 Hong tun uh ciangin amaute kiangah: “Asia gam kong tun a ni masa pen ni-a kipan no lakah ka om sung khempeuh ka nuntakzia na thei khin zo uh hi. 19 Jew-te in kei thah dingin hong sawmsimna un nakpi-in hong zia-et ta leh, nakpitakin kiniamkhiatin khitui tawh Topa na ka sem hi. 20 Note adingin a phatuam ding peuhmah kong hilh ding ka lungsit kei a, tangpi theih ahi zongin inn simah ahi zongin note kong hilh hi, cih na thei uh hi. 21 Jew-te le Greek-te tungah, i Topa Jesu upna nei-in kisik a, Pasian lamah a kihei pelmawh nadingun ka tangko zo hi. 22 "Tu-in Kha hong sawl teiteina mangin, ka tungah bang thu piang ding cih thei loin Jerusalem ah ka pai ding hi. 23 Khasiangtho in kei tungah, khuapi simah thong kiat ding le haksatna in hong maituah hi, cih vauhilhna bek ka thei hi. 24 Ahi zongin tai kidemna man thei in Topa Jesu in ka sep dinga hong piaksa Pasian hehpihna lungdamna-thu teci ka pan ding mansiang khin peuh leng kei adingin ka nuntakna bangmah man loin ka ngaihsun hi. 25 "Tu-in kumpi-gam thu gena a laka ka pai kawikawina mite khat beek in nong mu kik nawn kei ding uh cih ka thei hi. 26 Tua ahi manin mi khempeuh sisan tungah ka mawhpeng hi, cih tuni-in note tungah kong pulak hi. 27 Ahang in, Pasian deihna buppi no tungah kong tangko ding sit ka nei kei hi. 28 Khasiangtho in nomau mahmah a cinga mite hong suahsak, tua tuuhonte limtakin na kem un. Ama sisan tawh a leisa Pasianb pawlpi a cingte na hi un. 29 Ken kong nusiat khit ciangin note lakah ngia hangsante hong lutin tuuhonte a hawi loh ding uh ka thei hi. 30 Note lak nangawn ah nungzuite amau lamah a kaihmang zawh nadingun thumaan a lehkaih mi hong khangkhia ding hi. 31 Tua ahi ciangin kigalging un! Kum thum sung khawl lo-a, sun tawh zan tawh khitui luanga note a milip tunga kong vauhilhna ciamteh un. 32 "Tu-in Pasian tung le note hong picingsak thei-a, a sianthosak sate khempeuh lakah gouluahna a pia ama hehpihna thu tungah note kong ap hi. 33 Mi khatpeuh neihsa, ngun ahi a, kham ahi a, nikten puansilh ahi zongin ka deih gawh kei hi. 34 Hih ka khutte in kei kitang sapna le ka lawmte kitangsapna pia, cih note mahmah in na thei zo uh hi. 35 Ka sepnasa peuhmah ah Topa Jesu kammal mahmah in, ‘Ngahna sangin piakna ah thupha omzaw hi,’ a cih phawk kawmin, hih bang nasep hahkatna tawh a thanem mi i huh ding kul hi, cih kong lak hi,” a ci hi. 36 Hih teng a cih khit ciangin amaute khempeuh tawh khukdinin thu a ngen uh hi. 37 Amaute khempeuh in amah kawi-in, namin, a kap uh hi. 38 Ama mai mu kik ngei nawn lo ding a cih in amaute a dahsak pen hi. Tua ciangin amaute in amah tembaw tung dong a kha uh hi.

Nasepte 21

1 Amaute tawh ka kikhen khit uh ciangin tembaw in ka tuang uh a tangtakin Cos ka zuan pah vingveng uh hi. A zing ciangin Rhodes pai-in tua panin Patara ah ka pai uh hi. 2 Phoenicia ah a galkah ding tembaw khat ka mu uh a, tua ah tuangin ka pai uh hi. 3 Cyprus ka galmuh khit uh ciangin a khang lam nawkin Syria dong ka pai uh hi. Tyre ah ka kinga uh hi. Tua lai-ah ka tembaw un a vanpuakte a suahkhia ding ahi hi. 4 Tua lai-ah nungzuite ka muh uh ciangin ni sagih sung amau kiangah ka taam uh hi. Amaute in Jerusalem dong, Paul a pai loh nadingin Kha tungtawnin a kho uh hi. 5 Ahi hangin ka hun uh a bei ciangin ka ding khia uh a, ka zinna ban uh ka zom uh hi. Nungzuite khempeuh le a zi a tate un khuapi nawl ciang hong kha uh a, tua lai mun, tuipiau-ah khukdinin thu ka ngen uh hi. 6 Khat le khat mangpha ka kikhak khit uh ciangin tembaw tungah ka kah uh a, amau bel inn ah a ciah kik ta uh hi. 7 Tyre panin ka zinna ban uh ka zom uh a, Ptolemais ah ka kinga uh hi. Tua lai-a sanggamte ka hopih uh a, amau kiangah ni khat ka kulh uh hi. 8 A zing ciang pai leuleu in Caesarea ka tung uh a, tua Sagihte lakah khat, lungdamna thugen Philip inn ah ka tung uh hi. 9 Amah in pasal a nei nai lo kam a sang tanu li a nei hi. 10 Tua lai-ah ni tam khop ka tam khit uh ciangin Judea panin Agabus kici kamsang khat hong paisuk hi. 11 Kote kiangah hong pai-a, Paul kawnggak la-in ama khut le a khete kihenin, “Khasiangtho in, ‘Jerusalem ah hih kawng gak neipa, Jew-te in hih bangin hen ding uh a, Gentile-te khut sungah pia ding uh hi,’ ci hi,” a ci hi. 12 Kote in hih thu ka zak uh ciangin kote le tua lai-a om mipite in Jerusalem ah Paul a pai loh nadingin ka kho uh hi. 13 Tua ciangin Paul in, “Bang hangin note kapa, ka lungtang tamkhamsak na hi uh hiam? Hong kihen bek tham loin Topa Jesu min hangin Jerusalem a sih ding nangawn a kigingkholsa ka hi hi,” hong ci hi. 14 Ka khohna uh hong man nop loh ciangin ka kho nawn kei uh a, “Pasian deih bangin piang ta hen,” ka ci uh hi. 15 Hih teng khit ciangin ka kithawi uh a, Jerusalem ah ka paito uh hi. 16 Caesarea panin nungzuite pawlkhat in hong zui uh a, ka tun nading uh Manson inn ah hong kha uh hi. Amah Cyprus mi hi-a, nungzui masate lakah khat ahi hi. 17 Jerusalem ah ka tun uh ciangin sanggamte in lungtaitakin hong tungsak uh hi. 18 A zing ciangin Paul le ko adang teng James tawh kimu dingin ka pai uh a, tua lai-ah upate khempeuh a kim uh hi. 19 Paul in amaute hopih in, Gentile-te lakah ama nasepna tungtawna Pasian nasepna cingtakin a zasak hi. 20 Amaute in hih thu a zak uh ciangin Pasian a phat uh hi. Tua ciangin Paul kiangah, “Sanggam aw, Jew-te tul bangzah in um khin zo cih le amaute khempeuh thukham zuih hahkatte hi cih na mu hi. 21 Gentile-te laka teng Jew-te khempeuh in a tate uh vunat loh ding ahi zongin ngeina zui loin Moses pan kiheikhia dingin nang na hilh, ci-in amaute a kizasak uh hi. 22 Bang cih ding i hiam? Amaute in hihtak nong tun za ngel ding uh hi. 23 Tua ahi ciangin kong gen bangun hih in. Kote kiangah a kiciam khinsa mi li a om hi. 24 Hih mite va tonpih in amaute a ngeina-a a kisiansuahna ah va kihel inla, a sam uh a metmai theih nadingun a sam met man ding uh sik in. Tua ciangin mi khempeuh in nang thu a kigennate a maanlohna thei ding uh a, nang mahmah thukham thu manga a nungta na hina thei ding uh hi. 25 Thu um Gentile-te ahi uh leh ka thukhensatna uh lai amaute ka khak zo uh a, amaute in milimte thoihna ante, sisan, ngawnghek ganhing sate le numei-pasal paktatna a tan dingun ka gelh zo uh hi,” a ci uh hi. 26 A zing ciangin Paul in tua mite tonpih a, amaute tawh amah mah a kisiansuah hi. Tua ciangin kisiansuahna nite bei ni ding le amau ciat in biakna a bawl ni ding uh theisak dingin biakinnpi ah a pai hi. 27 Tua ni sagih a cin dektak ciangin Asia gam pana Jew-te pawlkhat in biakinnpi ah Paul a mu uh hi. Amaute in mihonpite khempeuh tawsawnin amah man uh a, 28 "Israel mite aw, ko hong huh un! I mite, i thukham le hih mun lang panga, mun khempeuh-a mi khempeuh tungah thu a hilhpa hih pa ahi hi. Tua tham loin biakinnpi huang sungah Greek-te hong paipih in hih munsiangtho a buahsak hi,” ci-in a kiko uh hi. 29 (Tua hun ma-in khuapi sungah Ephesus mi Trophimus le Paul a kithuah mu uh a, Paul in amah biakinnpi huang sungah lutpih khin zo ding hi, ci-a theihsa banga a koih uh ahi hi.) 30 Khuapi sung khempeuh linglawnga, mun khempeuh panin mi hong tai-in a kisutuah uh hi. Paul manin biakinnpi panin kaigawp uh a, kongpite kikhak pah lian hi. 31 Amah thah a sawm laitakun Jerusalem khuapi bup hehin a so hi, cih Rome galkap mangpa kiangah thu va tung hi. 32 Amah in bute hon khat le galkapte tonpih a mihonpite lamah a taisuk uh hi. Tua mi ngonghtatte in galkap mangpa le a galkapte a muh uh ciangin Paul a sat nawn kei uh hi. 33 Galkap mangpa paikhia a, amah manin sik khainiang nih tawh hen dingin thu a pia hi. Tua ciangin amah kua hi-a, bang hih hiam, cih a dong hi. 34 Mihonpi lakah pawlkhat in thu khat gena, adang pawlkhat in a thu dang khat mah genin a kiko uh hi. Galkap mangpa in mite buaina hangin thutak a muh theih loh ciangin galkap inn sungah Paul paipih dingin thu a pia hi. 35 Kahlei ah Paul a tun ciangin tua migilote uang lua uh ahi manin galkapte in Paul a puak uh kul hi. 36 A nungzui mihonpite in, “Amah thatmang un,” ci-in a kiko uh hi. 37 Galkapte in galkap inn sungah Paul a lutpih dektak laitakun amah in galkap mangpa kiangah, “Kam khat kong gen thei ding hiam?” ci-in a dong hi. Amah in, “Greek pau na thei hiam? 38 A beisa hunlai-a mi linthawn pawl, tulli makaih a kumpi langpang dinga kipan Egypt mipa hi lo na hia?” ci-in a dawng hi. 39 Paul in, “Kei Jew mi ka hi hi. Cilicia gam Tarsus pan ka hi-a khuapi mawk mawk a mi ka hi kei hi. Nong hehpihna in mipite tungah thu hong gensak in,” ci-in a dawng hi. 40 Galkap mangpa tung pan thu a ngah khit ciangin kahlei tungah Paul dingto a, mihonte lamah a khut a van hi. Amaute khempeuh a daih dide khit uh ciangin amaute kiangah Arama pau-in:

Nasepte 22

1 “Sanggamte le pate aw, tu-in kei kihutna thu na ngai un,” a ci hi. 2 Amaute in amah Aram pau-a, a pau a zak uh ciangin a daipah khipkhep uh hi. Tua ciangin Paul in: 3 "Kei Jew mi ka hi hi. Cilicia gam Tarsus ah ka suak a, ahi hangin hih khuapi-a khangkhia ka hi hi. Gamaliel khut nuai-ah i pate thukhamte khempeuh sina, a siamsa ka hi a, tuni-a note khat peuhpeuh zah a Pasian ading a hahkat ka hi hi. 4 Hih Lampi thu a zuite a sih dongun ka bawlsia a, numei hi ta leh pasal hi ta leh manin thong sungah ka khum hi. 5 Hih bang ka hihna tulpipa le Vaihawmte in zong teci hong pang thei ding uh hi. Keimah in Damascus a, a sanggamte uh a laikhak nangawn uh amaute tung pan ka ngah a, hih mite Jerusalem thonga khum ding le gawt dinga puak dingin ka va kuan hi. 6 Damascus kiang ka tun laitak sun pawlin thakhatin van pan a tangpha mahmah khuavak khat in ka kimkot hong tanzal hi. 7 Lei-ah ka puk a, aw khat in ka tungah, ‘Saul! Saul! Bang hangin kei hong bawlsia na hi hiam?’ hong cih ka za hi. 8 "‘Topa kua na hiam?’ ci-in ka dong hi. “Amah in, ‘Na bawlsiat Nazareth mi Jesu ka hi hi,’ ci-in hong dawng hi. 9 Ka tonpihte in tua khuavak mu uh a, ahi hangin kei tunga hong hopih aw a theitel kei uh hi. 10 " ‘Topa aw, bang hih ding ka hi hiam?’ ci-in ka dong hi. “Topa in, ‘Tho inla Damascus khua sungah pai in, tua lai-ah na sep dinga kisehsate hong kigen ding hi,’ hong ci hi. 11 Tua khuavakpi in ka mit tawsak ahi manin ka tonpihte in ka khutin hong kai uh a, Damascus khua sungah hong lutpih uh hi. 12 "Ananias kici mi khat kei hong veh dingin hong pai hi. Amah thukham tan a ngentel mahmah khat hi-a, tua lai-a teng Jew-te khempeuh in a zahtak mahmah khat ahi hi. 13 Amah ka kiangah hong dinga, ‘Sanggampa Saul aw, khua mu in!’ hong ci hi. Tua hun lianin amah ka mu thei pah hi. 14 "Tua ciangin amah in: ‘I pate Pasian in, ama deihna thei ding Thumaan Pa mu ding le ama kam pan thute za dingin nang hong teel zo hi. 15 Na muhsa le na zaksate mite khempeuh tungah ama teci na hi ding hi. 16 Tua hi-a tu-in nang bang ngak lai na hi hiam? Tho in; ama min lo inla, kibaptise-in na mawhnate silkhia in,’ hong ci hi. 17 "Jerusalem ah ka ciah kika, biakinnpi ah thu ka nget ciangin mumang bangin ka om a, 18 kei kiangah, ‘Kinawh in!’ Amaute in, kei thu teci na panna hong sang lo ding uh ahi manin, Jerusalem nusia pak in,’ hong ci Topa ka mu hi. 19 "Topa aw, synagogue-te ah a banbanin pai-a, nang hong umte thong sungah khumin ka sat lam hih mite in thei zo uh hi. 20 Nang hanga si paa Stephen sisan a luan lai-in ka thukimpihna lakin amah a thatte puante cingin tua lai-ah ka ding hi,’ ci-in ka dawng hi. 21 "Tua ciangin Topa in ka kiangah, ‘Pai peuh in; gamlapi a om Gentile-te kiangah kong sawl ding hi,’ hong ci hi,” ci-in a gen hi. 22 Hih a gen hun ciang dong mihon pite in Paul thugen a ngai uh hi. Tua ciangin nakpi-in kiko uh a, “Leitungah omsak kei un! Hing-khawi huai kei!” a ci uh hi. 23 Amaute in a kiko kawmun a puan tualpite uh suahkhia-in van lamah leivui a theh gawp uh ciangin 24 galkap mangpa in galkap inn sungah Paul a tumpihsak hi. Bang hang mihonpite in amah kikosan ahi hiam, cih a theihkhiat nadingin amah sata, thu dot dingin a gen hi. 25 Amaute in amah sat dinga a dawhsak laitakun, Paul in tua lai-a ding zakhat ukpa kiangah, “A mawhna kimu nai lopi in, Rome mi khat na sat ding thukham tawh kituak na sak mah hiam?” a ci hi. 26 Zakhat-ukpa in hih thu a zak ciangin galkap mangpa kiangah pai-in a va zasak hi. Amah in, “Hih mipa Rome mi ahi hi, bang cih ding na hi hiam?” ci-in a dong hi. 27 Paul kiangah galkap mangpa pai-in, “Nang Rome mi na hi hiam, hong gen in?” ci-in a dong hi. Amah in, “Ka hi hi,” ci-in a dawng hi. 28 Tua ciangin galkap mangpa in, “Rome gammi ka suah nadingin a man tampi ka pia hi,” a ci hi. Paul, in, “Ahi hanign kei ka suah a kipan gammi ka hi hi,” a ci hi. 29 Amah thu dong dinga kisate a tawp kik pah lian uh hi. Galkap mangpa mahmah zong Rome gammi khat ahi Paul, sik khainiang a khih ahilam a tel ciangin a patau hi. 30 A zing ciangin galkap mangpa in, bang pen hanga Jew-te in Paul hih banga mawhmat nuam uh ahi hiam, cih cian taka a theih khit nop manin, amah khahkhia a, siampi makaite le Sanhedrin-te khempeuh a kikup dingun thu a pia hi. Tua ciangin Paul paipiha amaute mai-ah a dingsak hi.

Nasepte 23

1 Paul in Sanhedrin-te tangtakin en a, “Ka sanggamte aw, tuni dongin Pasian tungah kisuantaakna om loin ka sep ding teng ka tangtun khin zo hi,” a ci hi. 2 Hih bang a cih ciangin tulpi Ananias in Paul kianga dingte kiangah a muk a satsak dingun thu a pia hi. 3 Tua ciangin Paul in, “Nang, a kanga kizut kawm aw, Pasian in nang hong sat na ve! Thukham tawh kituaka thukhen dingin tua lai-a tu hi napi kei sat dinga thu na piakna tawh thukham na palsat hi!” a ci hi. 4 Paul kianga dingte in, “Nang, Pasian tulpipa eng cih ngam maw?” a ci uh hi. 5 Paul in, “Sanggamte aw, ken amah tulpi ahilam ka thei kei hi, ‘Na mite ukpa gensiatna kam pau kei in,’a ci-in kigelh mah hi,” ci-in a dawng hi. 6 Tua ciangin Paul in amaute pawlkhat Sadducee hi-in, adangte Pharisee ahilam uh thei a, Sanhedrin mai-ah, “Ka sanggamte aw, kei Pharisee khat tapa Pharisee khat mah ka hi hi. Misite thawhkikna ka lamet manin thukhenna a thuak ka hi hi,” a cikhia hi. 7 Hih banga cih ciangin Pharisee-te le Sadducee-te kikalah kiselna pianga tua-a kikhawmte a kipawlkhen uh hi. 8 (Sadducee-te in thawhkikna om lo, vansawltak ahi a, kha ahi zongin om lo hi, ci uh a, ahi hangin Pharisee-te in, tuate khempeuh om hi, ci uh hi.) 9 Mihonpi buaina lianpi pianga, thu kham sia ahi Pharisee-te pawlkhat dingin nakpitakin sel uh a, “Hih mipa a tat khialhna bangmah ka mu kei uh hi. Vansawltak khatpeuh, kha khatpeuh in ama tungah thu gen hileh eite in bang lawh ding!” a ci uh hi. 10 Kiselna nasia lua mahmah a, amaute in Paul a balzan khak ding uh, galkap mangpa a lau hi. Amah in galkapte va paisuk a, thatang hat suanga amaute lak pan amah lakhia in galkap inn sungah a paipih dingun thu a pia hi. 11 A zing ciang zanin Paul kiangah Topa dinga, “Kilungkhauhsak in! Jerusalem a ka thu teci na pansa bangin Rome ah zong teci na pan teitei kul ding hi,” a ci hi. 12 A zing ciang zingsang in Jew-te in kisimzopna khat bawl uh a, Paul a thah khit matengun an ne tui dawn om lo ding, ci-in a kiciam uh hi. 13 Hih sawmsimna ah mi sawmli sanga tamzaw kihel uh hi. 14 Siampi makaite le upate kiangah amaute pai uh a, “Paul ka thah khit matengun, bangmah ne lo dingin khauh takin ka kiciam zo uh hi. 15 Tua ahi ciangin tu-in nang le Sanhedrin in Paul thu a cingzaw a thei nuam kineihin note mai-ah galkap mangpa in amah hong puak nadingin na ngen un. Amah hih lai hong tun ma-in a that dingin kigingsa-in ka om uh hi,” a ci uh hi. 16 Ahi hangin Paul sanggamnu tapa in hih sawmsimna a zak ciangin galkap inn sungah pai-in Paul a va hilh hi. 17 Tua ciangin Paul in zakhat-ukpa khat sam a, “Hih khangnopa galkap mangpa kiangah va paipih in, amah in thugen ding a nei hi,” a ci hi. 18 Tua ciangin amah in galkap mangpa kiangah a paipih hi. Zakhat ukpa in, “Thong kiapa Paul in kei hong samsak a, hih khangnopa in nang kiangah gen ding nei ahi manin nang kianga puak dingin hong sawl hi,” a ci hi. 19 Galkap mangpa in khangnopa a khutah lenin kai a, “Kei kianga nong gen nop bang ahi hiam?” ci-in a dong hi. 20 Amah in: “Jew-te in ama thu a cingzaw-a thei nuam kineih in, zing ciangin Sanhedrin mai-ah Paul na puak nading hong nget ding uh a thukim zo uh hi. 21 Amaute thu mang peuhmah kei in. Bang hang hiam cih leh amaute, mi sawmli sanga tamzaw in amah lamkalah na pangsim ding uh hi. Amaute in amah a thah khit matengun, an ne tui dawn om lo dingin kiciamna bawl zo uh hi. Amaute tu-in a kigingsa-in om uh a, a ngetna uh na phal ding bek ngakin om uh hi,” a ci hi. 22 Galkap mangpa in khangnopa ciahsak in, “Hih thu kei kiangah nong theihsak lam kuama kiangah gen kei in,” ci-in limtakin a vaikhak hi. 23 Tua khit ciangin amah in zakhat ukte nih sama, “Tu zan nai kua in Caesarea a pai ding, galkap zanih, sakol tuang galkap sawm sagih le teipi tawi galkapb zanih tawh na kithawikhol un. 24 Ukpipa Felix kiang bittaka a tun nadingin Paul tuan nading zong vai hawmsak un,” ci-in thu a pia hi. 25 Amah in a nuai-a bangin laikhak khat a gelh hi: 26 Claudius Lysias, A Hoihpipen Ukpipa, Felix tungah: Kong hopih hi. 27 Hih mipa Jew-te in man uh a, that dektak uh hi. Ahi hangin amah Rome mi hi, cih thei ka hi manin ka galkapte tawh pai-in amah ka va hukhia uh hi. 28 Amaute in bang hanga amah mawhsak uh hiam, cih ka thei nuama, amau Sanhedrin tungah amah ka puak uh hi. 29 Amaute ngawhna pen amau thukham tawh kisai hi-a, ahi hangin amah a kingawhna, sih nading ahi zongin thong a khiat nading ahi zongin thukho ka mu kei hi. 30 Hih mipa thah ding kisawmsim cih hong kizaksak ciangin thakhatin nang kiangah kong paisak pah hi. Amah a mawhsakte zong, nangma kiangah thulang dingin hong om nading thu ka pia zo hi. 31 Tua bangin galkapte in amaute thupiakte pua uh a, Paul tonpihin azan azanin Antipatris dong a paipih uh hi. 32 A zing ciangin amah sakol tuang galkapte tonpihsak uh a, amaute galkap innte ah a ciah kik uh hi. 33 Sakol tuang galkapte Caesarea a tun uh ciangin ukpipa tungah laikhak pia-in ama tungah Paul a ap uh hi. 34 Ukpipa in laikhak sim a, amah bang gam pan hiam, cih a dong hi. Amah Cilicia pan ahilam a theih ciangin, 35 "Na thulangte hih lai hong tun ciangin na thu ka za ding hi,” a ci hi. Tua ciangin Herod kumpi inn sungah Paul kem a, cin dingin thu a pia hi.

Nasepte 24

1 Ni nga khit ciangin tulpi Ananias in a upate pawlkhat le Tertullus kici taangding khat tonpihin Caesarea ah paisuk uh a, Paul a mawhsaknate uh ukpipa mai-ah a puak uh hi. 2 A sungah Paul a kisap ciangin Tertullus in Felix mai-ah a mawhsakna thu gen a: “Kote, nangma ukna nuai-ah lungmuangin sawtpi ka om uh hi. Na thumuhkholna tawh hih minam ah kipuahphatnate a om hi. 3 A hoihpipen Felix aw, mun khempeuh le lam khempeuh ah na hihnate lung damtakin ka sang uh hi. 4 Ahi hangin nang kong gimsak sawnsawn loh nadingun ka thu uh a tom theithei a kong gen nong ngaihsak ding kong thum hi. 5 "Kote in buaina a piangsak hih mipa, leitung khempeuh a Jew-te lakah mipi ngonghtatsakin a linglawngsakpa hi, cih ka mu uh hi. Amah Nazareth pawl tuam makaipa hi a, 6 biakinnpi nangawn buahsak a sawm hi; tua hi-a, amah ka man uh hi.a 7 Ahi hangin galkap mangpa Lysias hong pai-a, thatang hat thu-in kote khut sung pan amah dokkhia a, ama thulangte na mai-ah a pai dingin thu hong pia hi. 8 Nang mahmah in ama tungah dongin kan lecin amah ka mawhmatnate uh thutak ahina na theikhia thei ding hi,” a ci hi. 9 Jew-te in hih mawhmatna thumaan hi, ci-in a panpih uh hi. 10 Ukpipa in Paul a gen dingin a khut van ciangin amah in, “Hih minamte tungah kum tamkhop thukhenpa na hilam ka thei hi; tua ahi ciangin ka kihutna thu lungkim takin kong gen hi. 11 Jerusalem ah Pasian bia dinga ka paitoh, ni sawm-le-nih sawt nai lo, cih baihtakin na khentel thei ding hi. 12 Biakinnpi-ah mi khatpeuh tawh ka kiselna ahi zongin, synagogue-te sungah ahi zongin khuapi sung mun khat beekah ahi zongin mihonpite ka linglawngsakna ka thulangte in a mu kei ding uh hi. 13 Tua hi-a amaute in kei hong ngawhnate uh na mai-ah hong tellah thei kei ding uh hi. 14 Bangbang ahi zongin amaute in biakna pawltuam khat a cih uh Lampi nungzui ka hi bangin ka pate Pasian ka bia hi, cih kong pulak hi. Thukham tawh a kituak le Kamsangte lai sunga kigelhsa peuhmah ka um hi. 15 Hih mite bangin mi thumaante le mi tatsiate thawhkikna om tuak ding, ci-in Pasian sungah lametna ka nei hi. 16 Tua ahi ciangin Pasian le mite mai-ah kisuantakna a om lo dingin gamtat ka sawm tawntung hi. 17 "Kum tampitak ka om loh khit ciangin mizawngte ading letsong ka mipihte puak ding le biaknate pia dingin Jerusalem ah kong pai hi. 18 Biakinnpi huang sunga hihte hih a ka om amaute in hong muh lai-un, biakna ngeina tawh kisai-in ka siang hi. Kei tawh mihon kuamah om lo a, buaina khat beek ah zong ka kihel kei hi. 19 Ahi hangin Asia gam Jew-te pawlkhat a om uh hi. Tuate in kei langah mawhsak nading hong nei uh ahileh hih lai na mai-ah hong dingin hong mawhsak ding uh kilawm hi. 20 Ahikeh Sanhedrin mai-a ka din lai-in, kei tungah bang mawhsakna a mu uh hiam? Hih lai-a omte in gen uh hen. 21 Amaute mai-a ka din lai-a: ‘Misite thawhkikna thu tawh kisai-in tuni-in note mai-ah thusitna ka thuak hi,’ ka cih hoh ahi kei buang leh,” ci-in a gen hi. 22 Tua ciangin Lampi thu a thei mah mah Felix in thusit hun a sotto hi. Amah in, “Galkap mangpa Lysias hong pai ciangin na thu kong khensak ding hi,” a ci hi. 23 Amah in zakhat-ukpa tungah, “Paul limtakin cingsak inla, ahi zongin bang tan hiam khat kolsak in, a kisapnate a lawmte piasak in, ci-in thu a pia hi. 24 Ni tampi khit ciangin Jew numei ahi a zi Drusilla tawh Felix va pai uh hi. Amah in Paul samsak a, Khrist Jesu upna thu a gen a ngai uh hi. 25 Paul in, thumaanna, ei le ei pumpi ki-ukna le hong tung ding thukhenna thute a gen ciangin Felix lau a, “Pha zo! Ciah ta in. Hun hoih ka sak ciangin kong sam kik ding hi,” a ci hi. 26 Paul in amah golhguk a piak ding lamen kawmin, amah samsak pahpah a, amah tawh a kiho uh hi. 27 Kum nih a bei ciangin Porcius Festus in Felix za laih a, ahi hangin Felix in, Jew-te angvan nuam ahi manin thong kiasa in Paul a nusia hi.

Nasepte 25

1 Tua gam a tun zawh ni thum khit ciangin Caesarea panin Jerusalem ah Festus pai to a, 2 tua munah siampi makaite le Jew makaite ama mai-ah dingin Paul a mawhmatnate uh a gen uh hi. 3 Amaute in Festus kiangah amau a angvanna-in, a manlang theithei a Jerusalem ah Paul a puak nading a ngen uh hi. Ahang in, amaute in lamkal ah buksimin Paul thah nading a kigingkhol khin zo uh hi. 4 Festus in, “Caesarea ah Paul a kikhumsa hi a, kei mahmah zong tua lai-ah ka paipah ding hi. 5 Na makaite uh pawlkhat kei hong zuisak unla, tua mipa in hihkhialh nei ahileh tua lai-ah a mawhmatna uh gen uh hen,” ci-in a dawng hi. 6 Amaute tawh ni giat hiam, ni sawm hiam a omkhawm khit ciangin Caesarea ah paisuka, a zing ciangin thukhenna zum ah kahin a mai-ah Paul a puak nadingun thu a pia hi. 7 Paul a kilak ciangin Jerusalem pana paisuk Jew-te a kimkotah ding uh a, kiteltaka a lah theih loh uh mawhmatna nasia mahmah tampi tawh a mawhsak uh hi. 8 Tua ciangin Paul in a kihutna thu gen a: “Jew-te thukham tungah ahi zongin, biakinnpi tungah ahi zongin Caesar tungah ahi zongin khialhna bangmah ka bawl kei hi,” a ci hi. 9 Festus in Jew-te angvan-nopna khat nei a, Paul kiangah, “Hih mawh matna mah hong kisit dingin Jerusalem a paitoh ding na ut hiam?” ci-in a dong hi. 10 Paul in, “Kei hong kisit nading a kilawm mun Caesar thukhenna mai ah tu-in ka ding hi. Nang mahmah in zong siangtaka na theihsa bangin Jew-te tungah bangmah khialhna ka bawl kei hi. 11 Ahi ta zongin sihna thuak nading donga mawhna ka neih leh sih ding ka nial kei hi. Ahi hangin hih Jew-te hong mawhmatna a maan lopi ahileh amaute tungah kei a piak nading thuneihna kuamah in a nei kei hi. Caesar tunga ka thu ka tun hi,” ci-in a dawng hi. 12 Festus in ama vaihawm mite tawh a kikup khit uh ciangin, “Na thu Caesar tungah na tun zo hi. Caesar tungah na pai ding hi!” ci-in a thukhenna a pulakkhia hi. 13 Ni tawm vei khit ciangin Kumpi Agrippa le Bernice in, Festus zahtakna pia dingin Caesarea a tung uh hi. 14 Tua lai-ah ni tampi a taam khit uh ciangin Festus in Paul thu, kumpipa a kikuppih hi. Amah in, “Hih lai-ah Felix in thong kiasa-a a nusiat mi khat a om hi. 15 Jerusalem ah ka pai ciangin siampi makaite le Jew-te upate ama langah pangin amah mawhpaih dingin hong ngen uh hi, 16 "Ken amau kiangah, ‘Mi khatpeuh a kimawhmat ciangin amah a mawhmatte mai-ah dinga, a mawhmatna uh pan a kihut nading hun hoih a ngah khit mateng, piakkhiat ding Rome-te ngeina hi lo hi,’ ci-in ka hilh hi. 17 Hih mun kei kiang hong tut uh ciangin a thu uh zia-olsak loin a zing ciangin thukhen zum ah ka kah pah a, tua mipa hong paipih nadingun thu ka pia hi. 18 Amah a mawhmatte thugen dinga a din uh ciangin ka upmawh bangin gitlohna lian khat beek tawh a mawhmat kei uh hi. 19 Tua sangsik in, amau biakna thu le Jesu kici mi sisa khat, Paul in nungta hi, a cih thu tawmkhat kitotpih uh ahi hi. 20 Tua thu ka kantel nading ka thei zo kei a, ‘Jerusalem ah paito in hih mawhmatna thu mah tua mun ah hong kisit leh na ut hiam?’ ci-in amah ka dong hi. 21 Paul in a thu Rome-te kumpipa thukhen dinga a tut ciangin Caeisar tunga ka puak theih mateng thong sunga khum dingin thu ka pia hi,” a ci hi. 22 Tua ciangin Agrippa in Festus kiangah, “Hih mipa thugen kei mahmah in ka za nuam hi,” a ci hi. Amah in, “Ama thugen zing ciangin na za ding hi,” ci-in a dawng hi. 23 A zing ciangin Agrippa le Bernice thupitakin hong pai uh a, kumpipa nasem zaliante le khuapi uliante tawh kikhopna inndei lianpi sungah a lut uh hi. Festus in thu pia a, Paul kilutpih hi. 24 Festus in: “Kumpi Agrippa le kote tawh a om khawmte khempeuh aw, hih mipa na mu uh hi! Jew mite khempeuh in, Jerusalem le hih lai Caesarea a kei tungah a thu hong tun uh a, amah hingkhawi lai ding hi peuhmah lo hi, ci-in kiko uh hi. 25 Sihna thuak nading zahin ama gamtatna bangmah ka mu kei hi. Ahi hangin amah in Rome kumpipa tungah a thu tun ahi manin amah Rome ah puak dingin ka khensat hi. 26 Ahi hangin a Thupi Kumpipa tungah ama thu ka gelh ding thu kician bangmah ka nei kei hi. Tua ahi manin na thudotnate panun gelh ding khatpeuh ka neih nadingin noteng khempeuh le a diakdiak in nang Kumpipa Agrippa mai-ah amah kong paisak hi. 27 Ahang in, a kimawh matna om lopi a, thongkia khatpeuh a bana sawn ding, thu kicingtak hi thei lo hi, ci-in ka ngaihsun hi,” a ci hi.

Nasepte 26

1 Tua ciangin Agrippa in Paul kiangah, “Na thu nang mahmah gen dingin phalna kong pia hi,” a ci hi. Tua ciangin Paul in a khut van a, ama kihutna thu a gen hi: 2 "Kumpi Agrippa aw, Jew-te hong mawhmatnate khempeuh, tuni-in nang mai-ah dinga ka kihutna thu ka gen theih hampha ka kisa hi. 3 Jew mite ngeinate le a kikalhnate uh theician mahmah na hi manin ka hampha diak hi. Tua ahi manin ka thugente lungduaitakin nong ngaihsak ding kong thum hi. 4 "Ka tenna gam sung ahi a, Jerusalem ah ahi zongin ka neu tunga kipan ka nuntak zia Jew-te khempeuh in a theih khitsa uh ahi hi. 5 Amaute in sawt peka kei hong theihsa uh hi-a Pharisee-te bangin nungta in, ka biakna pawltuam-uah a ciikpen pawl ka hilam, a ut nak uh leh teci hong pang thei ding uh hi. 6 Tua in ka pate uh tunga Pasian in a kam ciamsa ka lametna hangin tuni-a thusit a thuak ka hi hi. 7 Ko beh sawm-le-nihte in hahkattaka sun le zanin Pasian na sema, a tangtunna mu dinga ka lamet uh hih thuciam ahi hi. Kumpipa aw, hih ka lametna uh hangin Jew-te in kei hong mawhmat uh hi. 8 Bang hangin note khatpeuh in, Pasian in misite thosak, cih uphuai lo a ngaihsun ding na hi uh hiam? 9 "Kei mahmah in zong Nazareth mi Jesu min langdo-a, a hi thei zahzah ka sep ding mah hi, ci-in ka kipsan hi. 10 Jerusalem khua sungah zong tua mah ka hih hi. Siampi makaite thuneihna tawh misiangte tampi thong sungah ka khuma, amaute a kithah ciangin amaute langah thukimna ka khut ka lam hi. 11 Amaute gawt dingin synagogue khat pan khatah tam veipi ka pai a, thatang hatthu-in amaute Pasian gendaisak ding ka hanciam hi. Amaute ka huat luat manin a bawlsia dingin gamdang khuapite nangawn ah ka pai hi. 12 "Hih banga ka khualzinna khatah siampi makaite thuneihna le thupiakna tawh Damascus zuatna lampi ah ka pai hi. 13 Sun pawlin Kumpipa aw, ka paipai laitakin van panin ni sanga tangzaw khuavak khat ka mu a, kei le ka tonpihte kimkot a tanzal hi. 14 Ka vekpi un lei-ah ka puk uh a, aw khat in Arama pau in kei kiangah, ‘Saul, Saul, bang hangin kei hong bawlsia na hi hiam? Na khe tawh tulzum na suih ding, nang adingin haksa hi,’ hong ci hi. 15 ‘Tua ciangin, ‘Topa aw, kua na hi hiam?” ci-in ka dong hi. “Topa in, ‘Nong bawlsiat Jesu ka hi hi; 16 tu-in tho inla, na khe-in ding in. Nang ka nasem ding le kei tawh kisai na muhsa teng le kong lah lai dingte ah teci dinga hong seh dingin na kiangah kong kilak hi. 17 Na mipihte lak le Gentile-te panin kong hukhia ding hi. 18 Keimah hong upna hangun mawhnate maisakna le sian thosaksate lakah mun a ngah theih nadingun, amaute mit honsak ding, khuamial pan khuavak ah a hei ding, Satan vangliatna pan Pasian lam a ngasak dingin nang kong sawl ding hi,’ hong ci hi. 19 "Tua bang ahi manin Kumpi Agrippa aw, van pana mangmuhna thu mang loin ka om kei hi. 20 Amaute kisik a Pasian lamah a kihei nading uh le a kisikna uh, a gamtatna uh tawh a lah nadingun a masa in Damascus-ate kiang, tua khit ciangin Jerusalem-ate kiang le Judea gam khempeuh le Gentile-te kiangah zong ka hilh hi. 21 Jew-te in biakinnpi huang sungah hong mana thah hong sawmna hih hang ahi hi. 22 Ahi hangin tuni mahmah ciang dong Pasian huhna ngahin hih lai-ah ka dinga, milian mineute tungah a kibangin teci ka pang hi. Kamsangte le Moses in hong piang dinga a gen uh, 23 Khristb in thuak dinga misi pana tho masa pen hi in, ama mite kiang le Gentile-te kiangah khuavak thu a tangko ding hi,’ a cih valkan ka gen kei hi,” a ci hi. 24 Hih thu tak a gen laitakin Festus in Paul kihutna na pauhelha, “Paul aw, a hai na hi hi! Na sinna tam lua in hong haisak hi,” ci-in a kiko hi. 25 Paul in, “A hoihpipen Festus aw, a hai ka hi kei hi. Ka gente maan a, thu-a santak ahi hi. 26 Kumpipa in hihte teltaka a theihsa hi-a, ama tungah ka ut bangbangin ka gen thei hi. Kong kawmlak peuha kihih hi lo ahi manin a theih loh om lo dingin ka kipsan hi. 27 Kumpi Agrippa aw, kamsangte na um hiam? Na up lam ka thei hi,” a ci hi. 28 Tua ciangin Agrippa in Paul kiang ah, “Hih hun tomno sungin Khristian suak dingin hong zol zo a ki-um na hi haim?” a ci hi. 29 Paul in, “Hun tom taleh sau ta leh, nang bek hi lo tuni-a ka thugen a ngaite khempeuh hih sik khainiangte bulhna lo buangah kei a bat theih nading uh Pasian tungah thu ka ngen hi,” a ci hi. 30 Kumpipa dinga, ukpipa le Bernice le amau tawh a tute zong a ding uh hi. 31 Khat le khat kiho kawmin inndei nusia uh a, “Hih mipa in sih nading le thong kiat nading zahin bangmah a hih kei hi,” a kici uh hi. 32 Agrippa in Festus kiangah, “Hih mipa in Caesar tungah a thu tun lo hileh kikhah thei mah hi ven,” a ci hi.

Nasepte 27

1 Italy gam zuana tembaw tawh ka pai ding uh a kikhensat khit ciang in Paul le thongkia dangte Kumpi Galkap a sem Julius kici zakhat-ukpa tungah ki-ap hi. 2 Adramyttium pana Asia gam tuipi dunga khuate a pai ding tembawpi ah tuangin tuipi tungah ka om uh hi. Thessalonica pana hong pai Macedonia mi khat Aristarchus, ko tawh hong tuang khawm hi. 3 A zing ciangin Sidon ah ka kinga uh a, Paul kisapnate a lawmte in a piak theih nadingun, Julius in Paul hehpih a, a lawmte kianga a pai ding a phal hi. 4 Tua lai panin tuipi tungah ka om kik leuleu uh hi. Huih hong lehnun ahi manin Cyprus kiliahsakin ka pai uh hi. 5 Cilicia le Pamphylia gam tuipi gei gala tuipi tungah ka pai khit uh ciangin Lycia gama Myra ah ka kinga uh hi. 6 Tua lai-ah zakhat ukpa in Italy a pai ding Alexandria tembaw khat mu a, tua tungah kote hong tuangsak hi. 7 Ni tampi sung damdamin mai ka nawt uh a, haksapi in Cnidus ka tung uh hi. Huih in ka pai nopna uh tangtakin hong paisak thei lo a, Crete kiliahsakin Salmone leidawk tawh kigalsai-ah ka pai uh hi. 8 Tuipi gei zui-in haksapi-in ka pai uh a, Lasea khuapi kiang Van Siang kici mun ka tung uh hi. 9 An tana khit hun ahi tawh, hun tampi lah beita a, tembaw-a pai lauhuai mahmah ta hi. Tua ahi ciangin Paul in amaute vauhilh khol a, 10 "Guaite aw, i khualzinna siathuai ta ding hi. Tuahsia lehang tembaw le a vanpuakte i sup banah, i nuntakna zong kisia ding cih ka thei hi,’ a ci hi. 11 Ahi hangin zakhat ukpa in Paul thugen a ngaih tangin tembaw hawlpa le tembaw neipa thu a ngaizaw hi. 12 Tua tembaw khawlna phalbi sunga om nadingin kituak lo ahi manin tua lai panin paikhia a, Phoenix tungin tua lai-ah phalbi sung om ding lamenin a tamzaw thukimna tawh ka paisuak uh hi. Tua pen khang-nitumna le sak-nitumna a maingat tuak Crete-a tembaw khawlna ahi hi. 13 Khang huihdam hong nun ciangin amaute in a deih uh a ngah in a kingaihsun uh hi. Tua ciangin sikkip khai-in Crete gei zui-in ka pai uh hi. 14 A sawt lua nai loin tua tuikulh lamah “Sak-nisuah” kici huihpi hat mahmah khat hong nung hi. 15 Huihpi in tembaw zialnelh a, mai a nawt thei kei hi. Tua ahi ciangin huih zui-in huih nunna lamlamah ka pai uh hi. 16 Cauda kici tuikulh neu khat kidalsakin kihutna gunkuang neute ka hu zo kei dektak uh hi. 17 A nasemte in tuate tembaw tungah a kaihtoh uh ciangin tembaw nuai dongah khauzen paisakin a henkhawm uh hi. Syrtis sehtakte a phut khak ding uh lau-in, tuipi sikkip khaisa in tembaw a pai bangbangin a hawl uh hi. 18 Huihpi nak thuak den lua ka hi manun, a zing ciangin tembaw puak vante a lawnkhia uh hi. 19 A nithumna ni-in amaute in tembaw khauzialna a paikhia uh hi. 20 Ni tampi sung ni le aksite hong dawk het loh ciang le huihpi in hong nuai denden ciangin suahtak zawh nading lametna ka nei nawn kei uh hi. 21 Tua mite an ne loin hun sawtpi a om khit nungun amaute mai-ah Paul ding a: “Guaite aw, Crete panin paikhia kei ni, ka cihin ka thu hong mang hoh le uh cin nomau mahmah supna le siatna pan a kihu na hi ding uh hi. 22 Ahi hangin tu-in kilungkhauhsak un; bang hang hiam cihleh note khat beek na mangthang kei ding uh hi. Tembaw bek kisia ding hi. 23 A beisa zanin ama aa hi-a, a na ka sep Pasian vansawltak khat ka kiangah dinga, 24 ‘Paul aw, lau kei in. Caesar mai-ah thu kisitin, na ding pelmawh ding hi. Pasian in a hehpihna-in nang tawh tembaw tunga tuangte khempeuh nuntak nading hong pia hi,’ hong ci hi. 25 Tua ahi ciangin guaite aw, na lungsim uh khauhsak lailai un. Ahang in, kei tunga hong gen bangbangin a piang ding hi, ci-in Pasian ka muang hi 26 Tua ahikeh zong tuikulhte khat teitei ah leilak i phukha pelmawh ding hi,” a ci hi. 27 A zan sawm-le-lina zanin Adriaticb Tuipi kantanin huih mutin ka om lailai uh a, zankim pawl ciangin tembaw nasemte in gam khat tung dek ta cih a thei uh hi. 28 Tui thukna teh uh a, pi zakhat sawmnihc a thuk lam a thei uh hi. Tomkha vei khit ciangin teh kik uh a, pi sawmkuad a thuk lam a thei uh hi. 29 Suangte tawh ka kitah khak ding uh lau uh a, tembaw nunglam pan sikkip li khia in zingsang khuavak nading thu ka ngen uh hi. 30 Tembaw nasemte taisim nuamin kihutna gun kuang neute tuipi sungah khia uh a, tembaw mailama sikkipte khai a kineih uh hi. 31 Tua ciangin Paul in zakhat-ukpa le a galkapte kiangah, “Hih mite tembaw ah om kei leh na suakta kei ding uh hi,” a ci hi. 32 Tua ciangin galkapte in kihutna gunkuang henna khauzente attat uh a, a khahkhia mang uh hi. 33 Khuavak ma diakin Paul in amaute khempeuh, an a nek ding uh a kun hi. Amah in, “A beisa ni sawm-le-li sung, bangmah ne loin an ngawlin lauthawngsa in na om den uh hi. 34 Tu-in an tawmkha beek ne teitei un. Na sih loh nading uh an kisam hi. Note lakah khat beek in a lutang pan a samzang khat zong mansuah lo ding hi,” a ci hi. 35 Hih teng a cih khit ciangin anlum honkhat la-a, amaute khempeuh mai-ah Pasian tungah lungdam a ko hi. Tua ciangin balkhama, a ne hi. 36 Amaute khempeuh zong lungkhauh kik uh a, an tawm tek a ne uh hi. 37 Tembaw tunga tuang mi a vekpi in 276 ka pha uh hi. 38 A duh zahzah uh a nek khit uh ciangin tembaw a zang tuam nadingin buhhumte tuipi sungah a lawmkhia uh hi. 39 Khua a vak ciangin a gam a theih loh uh hangin tuipi gei sehtak khat mu uh a, ahi theih liai leh tua lai-ah tembaw khawlsak a sawm uh hi. 40 A sikkipte attat in tuipi sungah nusia uh a, tua hun mah in tembaw heina khihna khaute zong a phel uh hi. Tua ciangin tembaw mailam puanzak huih mut dingin khai uh a, tui gei lam ka zuan uh hi. 41 Ahi hangin tembaw in sehtak kho khat phukha-a, leitungah a kingacip hi. A mailam in phukha a, tangkhia thei nawn loin a nunglam zong tui kilok in a sattam gawp hi. 42 Galkapte in thong kiate tui pekin a suahtak khak ding uh dalna in thah a sawm uh hi. 43 Ahi hangin zakhat ukpa in Paul suaktasak nuam ahi manin amau sawmna a hihsak kei hi. Amah in tui pek theite tembaw tung pan leitung ah a diangkhia masa dingin thu a pia hi. 44 A om lai teng singpek tung peuh, tembaw sia tung peuh ah tuangin a pai uh kul hi. Hici bangin mi khempeuh leitung ah a suakta uh hi.

Nasepte 28

1 Tui gei-ah ka suahtak tak uh ciangin tua tuikulh Malta ahilam ka thei pan uh hi. 2 Ko tungah tuikulh mite, lamet loh zahin hong migi uh hi. Guah zu a khua dam ahi manin mei hong cihsakin hong muak uh hi. 3 Paul in singkang lom khat tomin meikhuk ah a khul hi. Meisa sa-in ngan khat taikhia-a, a khutah a kivial hi. 4 Tuikulh mite in a khuta gul kikhai a muh uh ciangin, “Hih pa tualthat hi ngel incin, tuipi sung pan a suahtak hangin Thutang in amah a nuntak ding phal lo hi,” a ci uh hi. 5 Ahi hangin Paul in mei sungah gul singkhia-a, a na a thuak kha kei hi. 6 Mite in hong bawk kei leh si-in hong puksuk ding hi, ci-in a muangmawh uh hi. Sawt veipi ngak uh a, amah bangmah a cih loh ciangin a ngaihsutna uh laih in, “Amah pasian khat hi,” a ci uh hi. 7 Tua lai tawh kigamla lo-ah tuikulh-a kumpi nasem ulianpa Publius neihsa huang a om hi. Amah in kote a inn ah hong tungsaka, ni thum sung limtakin zin hong do hi. 8 A pa gilsan le nattun thuahin cina-a lupna ah lum hi. Amah vehin inn sungah Paul va tum a, thu a ngetsak khit ciangin ama tungah a khut nga-a, a damsak hi. 9 Hih banga a damsak ciangin tuikulh-a cina dang teng hong pai-in a dam uh hi. 10 Amaute in lam tampi ah kote hong pahtawi uh a ka dinkhiat kuan uh ciangin ka taksapnate uh hong guan uh hi. 11 Kha thum khit ciangin tua tuikulh a, phalbi sung a na khawlsa tembaw khatah tuangin ka pai uh hi. Alexandria-te tembaw hi-a a mai-ah pasian pengte, Castor le Pollux lim a kisuang hi. 12 Syracuse ah ka lut uh a, tua lai-ah nithum ka taam uh hi. 13 Tua panin ka dingkhia leuleu uh a, Rhegium ka tung uh hi. A zing ciangin khanglam huih hong nunga, a thai ciangin Puteoli ka tung uh hi. 14 Tua lai-ah sanggamte pawlkhat na om uh a, amaute in nipikal khat hong taampih un, ci-in hong kho uh hi. 15 Tua lai-a om sanggamte in ka pai uh a zak uh ciangin Appius sumbuk-zawn le Buzung Thumte dong hong zinin na dawn uh hi. Hih mite muh in Paul in, Pasian tungah lungdam ko-in a hanthawn hi. 16 Rome ka tun uh ciangin a cing galkap khat tawh, Paul ama thu-a a om ding a kiphal hi. 17 Ni thum khit ciangin amah in Jew makaite a samkhawm hi. Amaute a kikhop khit uh ciangin Paul in, “Ka sanggamte aw, i minamte tung ahi a, i pupa ngeina tungah ahi zongin bangmah siatna bawl lo napi Jerusalem ah kei hong kimanin Rome mite tungah hong ki-ap hi. 18 Amaute in kei hong sittel uh a, sih dan thuak ding zahin ka mawhna om lo ahi manin hong khah kik nuam uh hi. 19 Ahi hangin Jew-te in a nial uh ciangin kei ma mite tungah ka thu ka tut nop man hi loin, Caesar tungah ka thu hong kitunsak teitei ahi hi. 20 Tua thu hangin note tawh maitang kimu a, kiho nuamin kong sapsak ahi hi. Israel-te lametna hanga hih sik khainiang tawh hong kikhih ahi hi,” a ci hi. 21 Amaute in, “Kote in nang thu tawh kisai-in Judea gam panin lai khatpeuh lah ka ngah kei uh a, tua pana hong pai sanggamte kuamah lah nang thu hong ko-a asia-a gen a om kei hi. 22 Ahi hangin mun khempeuh ah mite in, hih biakna pawltuam thu a langpan uh thei ka hi manun nang bang na ci muh hiam, ka za nuam uh hi,” ci-in a dawng uh hi. 23 Amaute in Paul tawh kimuh kik ding ni khat seh uh a, a omna munah mi a tamzaw tham a va pai uh hi. Amaute kiangah zingsang a kipan nitak dong, amah in Pasian gam thu hilhcianin pulak a, Moses Thukham le Kamsangte panin Jesu thu ah amaute thuzawh a sawm hi. 24 Pawlkhatte ama thugen in thuzawh a, ahi hangin, adangte in a um kei uh hi. 25 Amau sung le amau sung kithutuak lo uh a, Paul in hih a tawpkhakna a gen khit ciangin a paikhia hi: “Na pu na pa-te uh kiangah Khasiangtho in kamsangpa Isiah tungtawna a gen a man hi. Amah in, 26 ‘Hih mite kiangah pai inla, “Note in na zak ngitnget uh hangin na theitel ngei kei ding uh hi; na muh ngitnget uh hangin na mutel ngei kei ding uh hi,” 27 ‘Hih mite lungtang sak lua ahi manin a bil uh tawh za mel lo uh a, mitsi uh hi. Tua hikeileh a mit uh tawh mu thei-in a bil uh tawh za a, a lungtang uh tawh theitel in kihei ding uh a, amaute ka damsak kha ding hi,’a ci hi. 28 "Tua ahi manin Pasian hotkhiatna Gentile-te tungah kipuak ta ding hi; amaute in a ngai ding uh hi, cih na theih ding uh ka deih hi,” a ci hi.b 29 Hih teng a gen khit ciangin Jew-te in ciahsan uh a, amau le amau sungah kiselna lianpi a om hi. 30 Ahang in, tua lai-ah kum nih hul, ama sapsa inn sungah Paul om a, amah tawh a kimu nuam khempeuh a sang hi. 31 A dal om loin hangtakin Pasian gam thu hilh a, Topa Jesu Khrist thu a sinsak hi.

Rom-Te 1

1 Sawltakpi dinga kisam Pasian lungdamna-thu hilh dinga kisehtuama, Khrist Jesu nasem keimah Paul in – 2 Pasian in a kamsangte tungtawnin Laisiangtho sungah a ciamkholhsa, 3 a Tapa tawh kisai lungdamna-thu, amah mihing pianngei-a David suan, 4 sianthona Khaa tungtawna misi pana a thawhkikna hanga Pasian Tapa ahina vangliatna tawh a kipulakkhia pab i Topa Jesu Khrist ahi hi. 5 Ama tungtawn le ama min hangin upna pana piang thumanna-ah Gentile-te khempeuh lakpanin mite sam dingin kote in hehpihna le sawltakpi za ka ngah uh hi. 6 Jesu Khrist adinga kisam mite lakah note zong na kihel uh hi. 7 Pasian in it-a misiang dinga a sap Rome a omte khempeuh tungah: I Pa Pasian le Topa Jesu Khrist tung pana hehpihna le lemna note tungah om ta hen. 8 Amasa penin na upna uh leitung khempeuh ah kithang ahi manin note khempeuh hangin Jesu Khrist tungtawnin ka Pasian tungah ka lungdam hi. 9 Hun khempeuh a ka thungetna ah note kong phawk tawntung lam, ama Tapa lungdamna-thu ka lungsim khempeuh tawh hilh a, a na ka sep Pasian ka teci ahi hi. 10 Tua ciangin tu-in Pasian deihna banga note kianga kong pai theih nadingin lampi kihong ta buang hen, ci-in thu ka ngen hi. 11 Note hong thakhauhsak ding khalam letsong kong piak theih nadingin note kong muh ding ka lunggulh hi. 12 Tua pen, kei le note upna tawh khat le khat i kihanthawn tuah theih nading ahi hi. 13 Sanggamte aw, Gentile dangte lakah an ka lak bangin note lakah zong ka lak theih nadingin note kianga pai ding tamveipi ka geel (hangin tu ciang dong hong kidaltan ahilam) na phawk loh khak ding uh ka deih kei hi. 14 Greek-te le Greek lote tawh ahi zongin, a pilte le a haite tungah bat ka nei tuak hi. 15 Rome a om note kiangah zong lungdamna-thu hilh ding ka lawp mahmah na tua hang ahi hi. 16 Tua lungdamna-thu a um mite peuhmah hotkhiat nadinga Pasian vangliatna ahi manin ka maizumpih kei hi; a masa in Jew mite, tua khit ciangin Gentile-te ading ahi hi. 17 Ahang in, “A thumaante upna hangin a nungta ding uh hi,”c ci-a kigelhsa bang tektek in lungdamna-thu ah Pasian tung pan thumaanna kilaakkhia a, tua thumaana a masa pen pan a nunung pend dong upna hang ahi hi. 18 Amau tatsiatna tawh thutak neng cipa, pasian-milohna le tatsiatna khempeuh tungah Pasian thangpaihna van panin hong kilaak hi. 19 Pasian tawh kisai theihtel ding khempeuh Pasian in amau tungah kitelsak khin hi. 20 Ahang in, leitung piancil a kipan a kimu thei lo Pasian pianziate, a tawntung vangliatna le a Pasian pianngei a kipiangsaksa nate panin kitheitelin kimu ta ahi manin mihingte in pauhlam ding a nei kei uh hi. 21 Tua hi-a amaute in Pasian thei napi Pasian bangin minthangsak lo in ama tungah lungdamna a ko kei uh hi. Ahi hangin amaute ngaisutte thu ginalo suakin a lungtang haite uh a mialcip hi. 22 Amaute pil kisa napi mihai suak uh a, 23 a si thei mihing, vasate, ganhingte le a bokvak ganhingte tawh kisuna kibawl, limte tawh a si thei lo Pasian minthanna a kheng uh hi. 24 Tua ahi manin amaute khat le khat a zumhuaipi-a a pumpi uh kizang dingin mawhdim a lunggulhna uh tawh kizui-a, numei-pasal paktat dingin Pasian in a ngawhngatsan hi. 25 Amaute in Pasian thutak zuauthu tawh kheng uh a, a Piangsakpa sangin a piansak nate bia-in a na sem uh hi. Amah ahileh a kiphat tawntung hi. Amen. 26 Hih thu hangin Pasian in amaute a zumhuai kilunggulhnate ah a ngawh ngatsan hi. A numeite nangawn un, pasal tawh lupkhawmna ngeina uh a ngeina lo tawh a kheng uh hi. 27 Tua mah bangin pasalte in zong numei tawh lupkhawmna ngeina nusia in pasal le pasal a kilung gulh mahmah uh hi. Pasalte, pasal dangte tawh a muh thadahhuai-in gamta uh a, amau lehtatna tawh kituak gawtna a thuak uh hi. 28 Tua banah Pasian theihna kepcing ding thaman sa lo uh ahi manin hih dinga kilawm lo pipi a hih nadingun lungsim siat dimdem na-ah amaute a ngawhngatsan hi. 29 Amaute tatsiatna, gitlohna, duhhopna le lungsim siat dimdemna tawh kidim uh hi. Amaute enna, tualthahna, kitotna, khemna le etsatna tawh a kidim uh hi. Amaute, gensiathatte, 30 gendai hatte, Pasian muhdahte, kimisakte, kisatheite le kihisakte ahi uh hi. Amaute in gitlohna zia a thakthak phuan uh hi; amaute in a nu-le-pate uh thu a mang kei uh hi; 31 amaute, ngaihsutna neilo, upna nei lo, itna nei lo, hehpihna nei lo mi a suak uh hi. 32 Tua bang a hihte sih ding kilawm hi cih thukip Pasian thukhenna maan amaute in thei napi, hih nate tektek mah hih zom tham loin tua banga gamtate a thukimpih zawsop uh hi.

Rom-Te 2

1 Tua ahi ciangin midangte tunga na thukhenna mun mah ah nangmah a kimawhpaih na hih manin midang khatpeuh tunga thukhen nang in paulap ding na nei kei hi. Bang hang hiam cih leh nang a thukhenpa mah in tuate mah in tua mah na hih hi. 2 Tua banga hihte tunga Pasian thukhenna in thutak pansan hi, cih i thei ciat hi. 3 Tua ahi ciangin mihing lel ahi nang in amaute tungah thu khen napi amau hihte mah na hih ciangin Pasian thukhenna pan a suakta dingin na kingaisun hiam? 4 Ahikeh Pasian migitna in kisikna lamah nang hong pi lam phawk loin a kicing ama migitna, a thuakzawhna le a lungduainate simmawh na hi hiam? 5 Ahi hangin na lungkhauhna le na kisik theihlohna lungtang hangin Pasian thukhenna maan a kilaak hun ahi Pasian’ thangpaihna ni adingin nang le nang tungah thangpaihna a khol na hi hi. 6 Pasian in “Mi khempeuh amau gamtatsa bangin a pia ciat ding hi.”a 7 A hoih gamtat denna tawh minthanna pahtawina le sihtheih nawnlohna a zongte tungah, amah in nuntak tawntungna a pia ding hi. 8 Ahi hangin ama angsung bek khuala, thutak nialin gitlohna a zuite adingin thangpaihna le hehna a om ding hi. 9 Gilo a gamta mihing khempeuh, a masa in Jew-te tua ciangin Gentile-te tungah lungmanna le lungdonna a tung ding hi. 10 Ahi hangin a hoiha gamtate khempeuh, a masa in Jew-te tua ciangin Gentile-te tungah minthanna pahtawina le lemna a tung ding hi. 11 Ahang in, Pasian in angvan tuam nei lo hi. 12 Thukham pualama mawhte khempeuh, thukham pua mah ah mangthang ding uh a, thukham nuai-a mawhte khempeuh thukham pansan in thu a khen ding hi. 13 Ahang in, Pasian muhna ah thukham a zate a thumaan hi loin thukham a mangte a thumaanin kipulak ding hi. 14 (A taktak in thukham nei Gentile-te in amau pianngei, ngeina pana thukham in a kalh nate a hih uh ciangin amaute in thukham nei lo napi, amau adingin tuate thukham suak ahi khit nungsang, 15 thukham in a kalhte amau lungtang ah kigelh hi, cih amau mah in kilangsak uh a, amau kitheihna lungsim in teci pang ahi manin a ngaisutnate un amaute a mawhsak a diksak thei zel hi.) 16 Keima hilh lungdamna-thu in a pulakkhiat mah bangin Pasian in Jesu Khrist tungtawna mi hingte’ thusimte a khen ni ciangin hih thu a tung ding hi. 17 Tu-in nang le nang Jew mi kici na hileh; thukham tungah kinga a, Pasian tawh na kizopna kisialhpih na hileh; 18 thukham in nang lam hong lah manin ama deihna thei-a a thupizaw nate a paktapa na hileh; 19 mittaw lampipa, khuamial sunga omte adinga khuavakpa 20 mihaite lamlakpa le naupangnote a hilhpa, theihna le thutak kiguanna thukham nei kici na hileh; 21 nang, midangte a hilhpa, nang le nang kihilh lo maw? Midangte guta lo dinga a hilh nang guta maw? 22 Nang mite angkawm lo dinga a hilhpa nang angkawm maw? Nang milim a kihpa nang biakinnpi luh maw? 23 Thukham kisialhpihpa aw, nang, thukham palsatna tawh Pasian daisak maw? 24 A kigelhsa mah bangin: “Note hangin Gentile-te lakah Pasian min kigendai hi.”b 25 Thukham na zuih uh leh vunat in man a nei hi. Ahi hangin thukham na palsat uh leh vunat loh mah na suak uh hi. 26 Vunat lo mite in thukham in a kalhte a zuih uh leh amaute vunat bangin kisim lo ding ahi hiam? 27 Taksa-a vunat lo napi, thukham a zui mi in, ngeina-bucing gelhsa neic a, vunat napi thukham palsatpa nang, hong mawhpaih ding hi. 28 A pualam Jew mi hihna bek tawh mi khatpeuh Jew mi a suak hi lo hi. Pualam le taksa-a vunatna lel tawh, vunat a kisuak tuan kei hi. 29 Ahi peuhmah kei hi. A sunglam Jew mi hihna bek tawh mi khatpeuh Jew mi a suak hi-a tua mah bangin vunatna in gelhsa ngeina bucing tawh hi lo, Kha tawh lungtanga vunatna ahi hi. Tua bang mipa, mite in a phat loh uh hangin Pasian in a phat hi.

Rom-Te 3

1 Tua a hileh Jew mi hina hangin bang phattuamna oma, vunat mi suahna in bang man nei ahi hiam? 2 Lam khempeuh ah phattuamna a nei kim hi. A masa penin amaute tungah Pasian kammalte tektek a kikemsak khinsa ahi hi. 3 Mi kimkhat in upna nei kei leh bangci ding? Amau uplahna in Pasian muan huaina a guaksuaksak ding hiam? A guaksuaksak peuhmah kei hi! 4 Mi khempeuh zuau gen hi henla, Pasian a thutak hi ta hen. “Na thukhenna-a na zawhna le na kammal-a na thumaanna a kilat theih nading ahi hi,”a ci-a kigelhsa bang ahi hi. 5 Ahi hangin eite thumaanlohna in Pasian thumaanna siangtakin kilangsak zaw ahileh bang i gen ding hiam? Eite tungah Pasian thangpaihna hong tun manin Pasian thutang lo hi, i ci ding hiam? (Mihing pansante mah zanga sel ka hi hi.) 6 Ahi peuhmah kei hi! Tua bang hi mawk leh Pasian in leitung mite tungah thu bangci khen theih ding hiam? 7 "Keima zuau theihna in Pasian thutakna liansak zaw a, ama minthanna khangsak ahileh bang hangin kei mawh nei mi khat bangin hong kimawhpaih lai ahi hiam,” mi khatpeuh in ci kha thei ding hi. 8 Mi kimkhat in, “‘A hoih pian nadingin a sia bawl ni,’ ci uh hi,” ci-in hong gendai a, hong mawhmat uh bangin, bang hanga ci lel lo i hi hiam? Amaute in a kilawm bang mawhpaihna a thuak ding uh hi. 9 Tua ahileh thu bangci khup ding i hi hiam? Eite i hoihzaw tuan hiam?b I hoihzaw tuan peuhmah kei hi! Jew-te le Gentile-te khempeuh mawhna nuai-ah a kibangin om khin uh hi, i ci khin hi. 10 "Mi thumaan khat beek a om kei hi, khat nangawn a om kei hi; 11 a theitel kuamah om lo a, Pasian a zong khat beek a om kei hi. 12 A vekpi un lampial khin uh a, amaute a vekpi un kimanna a nei kei uh hi: a hoiha gamta kuamah om lo a, khat nangawn om lo hi,”c 13 "Amau gawlte hahkhuk kihongsa hi-a, amaute leii in zuauthu a gen hi."d Amaute muk ah mualtan gu a om hi."e 14 "Amaute kam, hamsia le kamkha tawh a dim hi.”f 15 Amaute khe sisan luangsak dingin manlang hi. 16 Amaute paina peuhpeuh siatna le gentheihna dima, 17 amaute in kilemna lampi a thei kei uh hi.”g 18 "Amaute mit ah Pasian kihtakna a om kei hi.”h ci-a kigelhsa bang ahi hi. 19 Kam khatpeuh a kisipsak nading le leitung mi khempeuh in Pasian mai-ah sittelna a thuak nadingin thukham in a gen khempeuh thukham nuai-a omte tunga a gen ahilam tu-in eite in i thei hi. 20 Tua ahi manin ama muhna ah thukham zuihna hangin kuamah thumaanin a kiseh kei ding hi; tua hi lo zaw in thukham tungtawnin mawhna i phawk hi. 21 Ahi hangin tu-in thukham tawh kisai kha lo, Thukham le Kamsangte in teci a pansa uh Pasian kiang pana hong pai thumaanna, kitheisak khin ta hi. 22 Pasian kiang pana hong pai hih thumaanna Jesu Khrist upna tungtawnin a umte khempeuh tungah a tung hi. A kilamdanna a om kei hi. 23 Ahang in, mi khempeuh mawh khin a, Pasian minthanna ngah zo loin, 24 Khrist Jesu hanga hong pai tatkhiatna tungtawnin, ama hehpihna hangin a khawnkhonga diktansak ahi uh hi. 25 Ama sisan upna tungtawnin thoihdamna-a biakpiakna-in Pasian in amah hong pia hi.i Amah thutanna a lahkhiat nadingin hih banga a hih ahi hi. Bang hang hiam cih leh amah in a thuakzawhna hangin nidang lai-a mawhnate gawt loin hawi lai-a, 26 tu-in amah thutang ahi ding le Jesu sunga upna a ngah mitdik a tangsakpa ahi lai dingin a thutangna hih bangin a lak hi. 27 Tua ahileh kisialhna koi-ah a om hiam? A kipuaseh zo hi. Bang thu siksan in? Thukham zuihna hang maw? Hi lo hi. Upna hang ahi hi. 28 Ahang in, mi khatin thukham zuihna hang hi lo upna hangin dik a tang hi cih i kiplet hi. 29 Pasian, Jew-te bek Pasian ahi hiam? Gentile-te Pasian zong hi lo hiam? Hi mah hi. 30 Vunatte amau upna hangin midik tangsak dinga, tua upna mah tungtawnin vunat lote, dik a tangsak ding Pasian khat bek om ahi nungsang amah, Gentile-te Pasian zong ahi hi. 31 Tua hileh hih upna tawh eite in thukham guaksuaksak i hi hiam? A hi peuhmah kei hi! Tua hi lo zaw in eite in thukham i kipsak hi.

Rom-Te 4

1 Tua ahileh i pu Abraham in hih thu ah bang mukhia ci ding i hi hiam? 2 A taktak in, Abraham in a sepsa hangin diktang hileh amah in kisialh nading a nei hi – ahi hangin Pasian mai-ah ahi kei hi. 3 Laisiangtho in bang ci ahi hiam? “Abraham in Pasian na uma, tua ama upna thumaanna in kisimsak hi,”a ci hi. 4 Mi khat in na a sep ciangin tua ama nasep thaman pen letsong in kisim lo-a, thalawhsa in kisim hi. 5 Ahi hang in na sem lo a, mi tatsiate dik a tangsak Pasian a muang mipa ama upna pen thumaanna-in kisim hi. 6 Sepnate tawh kisai lo, Pasian in thumaan hi, ci-a a sim mipa thupha ngahna thu David in a gen lai-in tua mah a na gen ahi hi. A gen na ah: 7 "A tatkhialhnate uh kimaisak a, a mawhnate uh a kikhuhsakte, thupha ngah ahi uh hi. 8 Topa in ama langah a mawhna mawhna-a a simsak lopa thupha ngah ahi hi.”b a na ci hi. 9 Hih thupha vunatte ading bek ahi hiam? Vunat lote ading zong hi lo ahi hiam? Abraham upna ama adingin thumaanna in kisim khin hi, cih i gengen lai hi. 10 A bangci dana kisim ahi hiam? A vunat khit ciang ahi hiam? A at ma ahi hiam? A at khit hi lo, a at ma ahi hi! 11 Vunat ahi nai loh lai-a upna hanga a ngah thumaanna ciamteh nadingin vunat ciamtehna a ngah hizaw hi. Tua ahi ciangin amau adinga thumaanna-a a kisimsak theih nadingin vunat lo napi-a a umte khempeuh pa hong suak hi. 12 Amah vunat bek hi lo, i pa Abraham in a vunat ma-a, a neih upna khekhap a zui vunatte pa zong ahi hi. 13 Leitung luahpa ahi nadingin kam ciam, Abraham le a suan a khakte in a ngahna uh thukham tungtawn hi loin upna hanga hong piang thumaanna tungtawn hizaw hi. 14 Ahang in, thukham suanga nungtate gouluahte hi ahi uh leh upna in man nei lo a, tua kamciam in zong kimanna a nei kei hi. 15 Bang hang hiam cih leh thukham in thangpaihna a tun hi. Tua hi-a thukham om lohna ah tatkhialhna zong a om kei hi. 16 Tua ahi manin tua kamciam hehpihna hang ahi theih nading le thukham suangte hi loin Abraham upna bang upna a suangte ahi ama suan le khakte khempeuh tungah thukho ahi theih nadingin upna hanga hong tung ahi hi. Amah, eite khempeuh pa ahi hi. 17 "Nang minam tampite pa kong suaksak khin zo hi.”c ci-a ki gelhsa bang ahi hi. Amah a site nuntakna pia-a a om lopi nangawn a omsa banga a genpa, a uppa Pasian muhna ah eite pa ahi hi. 18 "Tua mah bangin na suan na khakte zong ahi ding hi,”d ci-a ama tunga kigensa bangin Abraham in lamet nading om lo napi lamen in um ahi manin minam tampite pa a suak hi. 19 Amah a khan kum zakhat bang pha ta a, ama pumpi a si tawh kibang ahina le Sarah sul zong a keu ahina thu upna kiam tuan loin a maituah hi. 20 Tua hi napi Pasian kamciam tawh kisai-in uplahna hangin hoi lo, a upna khauhzawin Pasian minthanna apia zo hi. 21 Pasian in a kamciam banga a tang tunsak theih nading vang a neihna thu, kiptakin a sang hi. 22 "Ama adingin thumaanna in kisim hi,” cih hih thu hang ahi hi. 23 "Ama adingin kisim hi,” cih kammalte amah guak ading bek hi lo a, 24 i Topa Jesu misi pana a thosakpa Pasian in thumaanna-a a simsak ding a um eite adingin zong a kigelh ahi hi. 25 Eite mawhna hangin amah sihna sungah kipiakhia a, diktansakna i ngah nadingin kihing kiksak hi.

Rom-Te 5

1 Tua ahi manin upna tungtawnin diktansak i hi khit nungsang eitea Topa Jesu Khrist tungtawnin Pasian tawh i kilem hi. 2 Ama tungtawnin upna hangin tu-a i omna hehpihna sungah lut theihna i ngah hi. Tua hi a, Pasian minthanna lametna sungah eite i nuam hi.b 3 Tua bek tham lo i thuakna ah zong i nuam hi.c Bang hang hiam cih leh thuakna in thuakzawhna a piangsak hi; 4 thuak zawhna in nundan piangsak a, nundan in lametna piangsak ahilam eite in i thei hi. 5 Pasian in eite hong piak Khasiangtho tawh i lungsungah ama hong itna hong sungkhia khinta ahi manin lametna in eite hong lungkiasak kei hi. 6 Vangliatna i neih loh lai, a hun laitak lianin pasian-milote ading Khrist hong si hi, cih na thei hi. 7 Mi hoih adingin a singam a om kha mawh kei ding hi; ahi zongin mi thumaan khat adingin a singam kuamah a om khol kei ding hi. 8 Ahi hangin Pasian in eite hong it takpina hih bangin hong lak hi: Eite mawhnei i hi laitakin eite adingin Khrist a si hi. 9 Tu-in ama sisan hangin diktansak i hi khit nungsang, ama tungtawnin Pasian thangpaihna pan honkhiat in i om zawsem ding hi! 10 Pasian gal i hi laitakin, ama Tapa sihna tungtawnin eite amah tawh hong kilemkiksak ahileh tua banga kilem khinsate ama hinna tungtawnin hotkhiat in i om zawsem ding hi! 11 Tua bek tham loin ama tungtawna kilemkikna i ngahna pa i Topa Jesu Khrist tungtawnin Pasian sungah i nuam hi. 12 Tua ahi manin mi khat tungtawnin leitungah mawhna a lut bang tektekin mawhna tungtawnin sihna lut-a mi khempeuh mawh khin zo ahi manin mi khempeuh tungah sihna a tung hi. 13 Ahang in, thukham a kipiak ma-in leitungah mawhna na om zo hi. Ahi hangin thukham a om loh ciangin mawhna pen mawhna-in a kisim kei hi. 14 Tua hi napi, Adam hun pan Moses hun dong Adam palsat banga thupiak palsatna hanga a khial tektek lote nangawn tungah sihna in a uk hi. Adam pen hong tung ding pa lahna ahi hi. 15 Ahi hangin letsong pen thupalsatna tawh a kibang kei hi. Ahang in, tua mi khat thupalsatna hangin mi tampi si ahileh, Pasian hehpihna le mi khat mah ahi Jesu Khrist hehpihna hanga hong tung tua letsong, mi tampi tungah dimlet zawsem hi! 16 Tua ciang leuleu in Pasian letsong le tua mi khat mawhna hanga thupiang a kibang kei hi: Thukhenna in mawhna khat zui-in mawhpaihna tun a, ahi hangin letsong in thupalsatna tampi zui-in diktansakna a tun hi. 17 Ahang in, tua mi khat thupalsatna hangin tua mi tungtawnin sihna in hong uk ahileh Pasian hong piak a kicing hehpihna le thumaanna letsong a sangte in mikhat Jesu Khrist tungtawnin amau nuntakna sungah uk zawtham ding hi lo ahi hiam? 18 Tua bang diudeu in, thupalsatna khat in mawhpaihna piangsak ahileh thumaan khat bawlna in zong mi khempeuh nuntakna a tun diktansakna a piangsak hi. 19 Ahang in, tua mi khat thumanlohna tungtawnin mi tampi mawhnei a suah bang tektek in mi khat thumanna tungtawnin zong mi tampi mi thumaan kisuaksak ding hi. 20 Thupalsatna a khan nadingin thu kham hong kipiak beh hi. Ahi hangin mawhna a khanna munah hehpihna a khang semsem zaw hi. 21 Tua pen, sihna sungah mawhna in a uk bang tektek in i Topa Jesu Khrist tungtawnin nuntak tawntungna a tun dingin hehpihna in thumaanna tungtawna a uk theih nading ahi hi.

Rom-Te 6

1 Tua ahileh bang i gen ding hiam? Hehpihna a khan nadingin mawhna bawl denden ding i hi hiam? 2 Mawh denden peuhmah lo e! Mawhna i sihsan zo hi; tua mawhna sungah bangci nuntak thei lai ding i hi hiam? 3 Khrist Jesu sunga kibaptise eite khempeuh ama sihna sungah zong a kibaptise zo i hilam thei lo na hi uh hiam? 4 Tua ahi manin Pa minthanna tungtawnin misi pan Khrist a thawh kik mah bangin eite zong nuntakna thak sungah i nuntak theih nadingin ama sihna sungah i kibaptisena tungtawnin amah tawh i kivuikhawm hi. 5 Ama sihna sungah eite kigawm khawm khin i hileh ama thawhkikna sungah zong amah tawh i kigawm khawm taktak ding hi. 6 Ahang in, mawhna pumpi’ thahatna a beia a suah nading le mawhna sila i suah nawn loh nadingin i pianlui pumpi amah tawh a kilhlum khin zo hi, cih i thei hi. 7 Bang hang hiam cih leh a si khinsa mi peuhmah mawhna pan a suakta hi. 8 Tu-in Jesu tawh i sihkhawm leh amah tawh i nungta khawm ding hi, cih zong i um hi. 9 Ahang in, misi pan Khrist kithosak khin ahi nungsang a si kik thei nawn kei ding hi, cih i thei hi; sihna in amah a uk zo nawn kei hi. 10 Ama sih sihna pen khatvei-a cing dingin mawhna sihsanna ahi hi; ahi hangin ama nuntak nuntakna pen Pasian ah a nungta ahi hi. 11 Tua mah bangin note, mawhna sihsan khinin kingaihsun unla, Pasian ah Jesu sunga a nungta in na kingaihsun un. 12 Tua ahi manin mawhna kihhuai lunggulhnate na zuih khak loh nadingun a si thei na pumpi uh mawhna na uksak kei un. 13 Tatsiatna vanzat dingin na pumpi nate uh mawhna tungah na pia kei un. Ahi hangin sihna pan nuntakna a kitunsate bangin Pasian tungah nomau na kipia zaw unla na pumpi nate uh thumaanna vanzat dingin amah na pia zaw un. 14 Ahang in, note thukham nuai-a om hi loin hehpihna nuai-a om na hi manun mawhna in note hong uk teitei lo ding hi. 15 Tua ahileh bang? Eite thukham nuai-ah om hi loin hehpihna nuai-a om i hi manin mawhna i bawl ding hiam? A hi peuhmah kei hi! 16 Mi khatpeuh tungah ama thu mang dingin na kipiak uh ciangin ama thu na man pa uh sila na hi uh bangin, sihna ah hong tun mawhna sila na hi uh zongin, thumaanna ah hong tun thuman'na sila na hi uh zongin a thu na man pa uh sila na hilam uh thei lo na hi uh hiam? 17 Ahi hangin mawhna sila na hi ngei uh hangin no hong ki-apsa thuhilhna, na lungsim khempeuh uh tawh mang na hi manun Pasian tungah lungdamna om ta hen. 18 Mawhna panin note hong kisuaktasak khin zo a, thumaanna sila na suak khin ta uh hi. 19 Na pianngei pumpi uh ah thanem na hi manun mihing kammal tawh hong gen ka hi hi. Na pumpi nate uh, sian tholohna le a khang semsem tatsiatna-ah sila dingin na piak ngei bang tektek un, sianthona hong tun ding thumaanna-ah sila dingin na pumpi nate uh tu-in na pia un. 20 Mawhna sila na hi laitakun thumaanna in hong ukna pan na suakta zo uh hi. 21 Tua hun laitakin tu laitaka na maizumpih uh nate panin bang phat tuamna gah at na hi uh hiam? Tua nate in sihna a tun hi. 22 Ahi hangin tu-in mawhna panin note hong khahkhia a, Pasian lamah sila suak khin zo na hi manun na at uh phattuamna in sianthona ah hong tuna, tua in nuntak tawntungna hong tun hi. 23 Ahang in, mawhna thaman sihna hi-a, ahi hangin Pasian letsong ahileh i Topa Jesu Khrist sungab nuntak tawntungna ahi hi.

Rom-Te 7

1 Sanggamte aw, thukham theite tunga thugen ka hi hi. Mi khat a nuntak sung teng bek thukham in ama tungah thu nei hi, cih thei hi lo na hi hiam? 2 Gentehna in pasal nei numei khat, a pasal a nuntak laiteng thukham hangin a pasal tawh ki-awhcip hi. Ahi hangin a pasal a sih leh kitenna tawh kisai thukham panin amah a kikhahkhia ahi hi. 3 Tua ahi ciangin a pasal a nuntak lai-in midang khat a tenpih leh amah angkawmnu a suak hi. Ahi hangin a pasal a sih leh tua thukham panin amah a kikhahkhia hi-a, midang khat a tenpih zongin amah angkawmnu a suak kei hi. 4 Tua ahi ciangin sanggamte aw, misi pana tho kik midang khat tawh ki-awh a, Pasian ah gah na gah theih nadingun Khrist pumpi tungtawnin note in zong thukham na sihsan uh hi. 5 Pianngeia mawhna in eite hong uk laitakin, sihna ading gah i gah nadingin thukham in a khanlawhsak lunggulh mawhnate in i pumpi sungah na a sem hi. 6 Ahi hangin tu-in ahileh hun khat lai-a eite hong hencip pen i sihsan zo-a a kigelhsa ngeina-bucinga nuntakna lui sung hi lo Kha a nuntakna thak sungah na i sep theih nadingin tua thukham panin eite hong kikhahkhia zo hi. 7 Tua hileh bang i gen ding hiam? Thukham pen mawhna ahi hiam? Hi zenzen lo hi! Thukham tungtawn hi kei leh mawhna bang hiam, cih ka thei kei takpi ding hi. Ahang in, thukham in “Deihgawh kei in”b na ci lo hileh deihgawh kici bang cihna hiam, cih ka thei kei ding hi. 8 Ahi hangin thupiak in a piankhiatsak hun hoih, mawhna in na bawh lian-a, keima sungah deihgawhna namkim gahkhiasak hi. Ahang in, thukham pualam ah mawhna a si hi 9 Hun khat lai-in thukham pua-ah ka nungta hi; ahi hangin thupiak hong tun khit ciangin mawhna nungta a kei ka si hi. 10 Nuntakna a tun ding thupiak tektek in a taktakin sihna a tun zawsop hi, cih ka theikhia hi. 11 Ahang in, thupiak in a piankhiatsak hun hoih na bawh lian-a, kei hong khemin thupiak tungtawnin kei hong sisak hi. 12 Tua hi-a thukham siangtho a, thupiak zong siangtho-in maanin a hoih hi. 13 Tua ahileh hoih a kici penin kei adingin sihna suak ahi hiam? Ahi peuhmah kei hi. Mawhna pen mawhna banga a kitheihtel theih nadingin a hoih tungtawnin keima sungah sihna a piangsak hi; tua in thupiak tungtawnin mawhna pen mawhna taktak a suah takpi nading ahi hi. 14 Thukham ahileh khalam thu ahilam i thei hi; ahi hangin keimah ka khami kei a, mawhna ah sila banga hong kizuak ahi hi. 15 Ka hih nop pen ka hih kei a, ahi hangin ka muhdah pen hih ka hi manin, ka hih pen ka theitel kei hi. 16 Ka hih nop loh pen hih ka hileh thukham hoih hi, ci-a thukimpih ka hi hi. 17 Tua hi-a tua banga a gamtang pen kei mahmah hi nawn loin ka sunga nungta mawhna ahi hi. 18 A hoih bawl ding ka lunggulh hangin bawl thei lo ka hi manin mawhna a dim keima pianngei pumpic sungah a hoih bangmah nungta lo hi, cih ka thei hi. 19 Ahang in, kei hihte a hoih ka hih nopte ahi kei hi; hi lo hi, ka hih nop loh a siate ka hih den zaw hi. 20 Tu-in ka hih nop lohte hih ka hileh, a hih pen kei hi nawn loin ka sunga nungta mawhna hih ahi hi. 21 Tua ahi ciangin hih thukham in na sem ahilam ka phawkkhia hi: A hoih ka hih nop laitakin kei tawh a omkhawm den a gilo a om na hi mawk hi. 22 Ahang in, ka mihinna laigil ah Pasian thukham ka lungkimpih hi. 23 Ahi hangin ka pumpi nate sungah thukham dang khat nasem ka mu hi. Tua thukham in ka lungsim thukham do a, kei pumpi nate sunga mawhnate sungah hong koltangsak hi. 24 Hinggim na zen ing e! Hih sihna pumpi panin kua in kei hong honkhia ding ahi hiam? 25 I Topa Jesu Khrist tungtawnin Pasian tungah lungdamna om ta hen! Tua hi-a kei mahmah ka lungsim sungah Pasian thukham sila ka hi-a ahi hangin mawhdim ka piangngei sungah mawhna thukham sila ka hi hi.

Rom-Te 8

1 Tua ahi manin Khrist Jesu sunga omte adingina tu-in mawhpaihna a om kei hi. 2 Bang hang hiam cih leh Khrist Jesu tungtawnin nuntakna Kha thukham in mawhna le sihna thukham panin kei hong suaktasak zo hi. 3 Ahang in, mawhdim pianngeib in a thanemsak thukham, a thahatna bei-a, a sep theih loh pen, Pasian in mawhna hanga biaknac a kizang dingin mawhdim mihing bangind ama Tapa mahmah hong sawlna tawh a sem zo hi. 4 Tua ahi ciangin mawhdim pianngei banga nungta hi lo, Kha deihna banga nungta eite sungah thukham in a kalh thumaan a tun theih nadingin amah in mawhdim mihing sungah mawhna a mawhpaih hi. 5 Pianngei mawhna banga nungtate in, tua pianngei deihna bekbek a lunggulh uh hi. Ahi hangin Kha deihna banga nungtate in Kha deihna bekbek a lunggulh uh hi. 6 Mawhdim mie lungsim sihna hi-a ahi hangin Kha in a uk lungsim, nuntakna le lemna ahi hi. 7 Mawhdim lungsimf in Pasian a langneih hi. Tua in Pasian thukham a mang kei hi; zong a mang thei kei hi. 8 Mawhdim pianngei in a uksa mite in Pasian a lungkimsak thei kei uh hi. 9 Ahi zongin Pasian Kha note sungah a ten nak leh mawhdim pianngei in note hong uk nawn loin Kha in note hong uk hi zaw hi. Mi khatpeuh in Khrist Kha a neih kei leh Khrist aa ahi kei hi. 10 Ahi hangin note sungah Khrist a om leh mawhna hangin note pumpi si taleh thumaanna hangin na kha uh a nungta hi. 11 Misi pana Jesu a thosakpa Kha note sungah hong teng ahileh misi pana Khrist a thosakpa in no sunga teng ama Kha tawnin a si thei na pumpite uh zong nuntakna a pia ding hi. 12 Tua ahi ciangin sanggamte aw, tu-in bat khat i nei hi. Tua in mawhdim pianngei deihna banga a nungta dingin pianngei tungah i ba kei hi. 13 Ahang in, mawhdim pianngei deihna banga na nuntak uh leh na si ding uh hi; ahi hangin Kha hangin na pumpi uh gamtatsiate na sihsak uh leh na nungta ding uh hi. 14 Bang hang hiam cihleh Pasian Kha in a makaihte Pasian tapate ahi uh hi. 15 Ahang in, note launa sila hong suaksak kik kha a sangte na hi kei uh hi; ahi hangin tapa-suahnag Kha na sang zo uh hi. Tua hi a, ama hangin eite in, “Abba,h Pa,” i ci hi. 16 Pasian tate i hina eimau kha tawh tua Kha mahmah in teci a pang hi. 17 Tu-in tate i hileh gouluahte i hi hi. Khrist minthanna eite in zong i tanhpih theih nadingin ama thuaknate i thuakpih takpi leh Khrist tawh gouluah khawm Pasian gouluahte i hi hi. 18 Tu laitaka i thuak gimnate le eite sunga hong kilang ding minthannate tehkak tham ka sa kei hi. 19 A kipiangsak na khempeuh in Pasian tapate a kilaak nading lawptakin lamenin a ngak uh hi. 20 Ahang in, a kipiangsak nate khempeuh amau deihtel hang hi lo, amau a nuai siahpa deihna bangin bucinlohna nuai-ah kihen hi. 21 Tua in a kipiangsak khempeuh muatna sila pan kisuaktasaka, a minthang Pasian tate suahtakna sungah a tun nading lametna hang ahi hi. 22 A kipiangsak khempeuh in tu hun mahmah dong nausuahnat thuak bangin tau lai uh hi, cih i thei hi. 23 Tua bek hi lo Kha gahmasa a nei eite mahmah zong eite pumpi tatkhiat nading tapa i suah ding lawptakin ngakin i sungah tau-in i om hi. 24 Ahang in, hih lametna sungah eite hotkhiat i hi hi. Ahi hangin a kimusa lametna pen lametna ahi peuhmah kei hi. Kua in a muhsate lamen ahi hiam? 25 Ahi hangin i muh nai lohte i lamet leh tuate i ngak keeikai hi. 26 Tua mah bangin i thanemnate ah Kha in eite hong huh hi. Eite in thu bangci nget ding cih i thei kei hi, ahi hangin Kha mahmah in kammala lawhkhiat theih loh tuanate tawh eite adingin hong thumsak hi. 27 Tua hi a, eite lungsim a zongpa in Kha lungsim a thei hi. Bang hang hiam cihleh Pasian deihna tawh kizui-in Kha in misiangte ading a thumsak hi. 28 Tua ciangin Pasian in ama ngimna tawh kizui-a, a sapsa mitei ahi, amah a itte a hoih nadingin na khempeuh a sepsak hi,j cih i thei hi. 29 Ahang in, Tapa pen sanggam tampite lakah tacil a suah theih nadingin Pasian in a theihkholhsa mite ama Tapa tawh a kibang dingin a laitansa ahi hi. 30 Tua hi-a a laitansate zong a sam hi; a sapsate zong dik a tangsak hi; dik a tansaksate zong a minthangsak hi. 31 Tua ahileh hih thu dawn nadingin bang i gen ding hiam? Pasian eite lamah a pan leh ei langah kua pang zo ding ahi hiam? 32 Ama Tapa neihsun sit loin eite khempeuh ading hong pia pa in amah tawh na khempeuh hong citpiak khawm loin om ding ahi hiam? 33 Pasian in a telsate kua in mawhmat ding ahi hiam? Dik a tangsak Pasian ahi hi. 34 A mawhpaihpa kua ahi hiam? Si bek tham loin nungta-a, a tho kik pa Khrist Jesu, tu-in Pasian taklamah tu-a eite adingin hong thumsak hi. 35 Khrist hong itna panin eite kua in hong khenkhia zo ding hiam? Lungmanna, haksatna, bawlsiatna, kialna, silh ding kisapna, lauhuaina, namsaute in hong khenkhia zo ding ahi hiam? 36 "Nangma hangin kote in ni thapai-in sihna ka maituah uh hi; gawh ding tuute bangin kote hong kiseh hi,”k ci-a kigelhsa bangin, 37 hong khenkhia zo kei ding hi. Hihte khempeuh ah eite hong it ama tungtawnin gualzote sang i gualzo zaw hi. 38 Ahang in, sihna le hinna ahi zong in, vansawltakte le dawitel ahi zongin, tu hun le tu nung ciang ahi zongin, vangliatna khatpeuh ahi zongin, 39 a thukna le a sanna ahi zongin, a kipiangsak nate khat beek in i Topa Khrist Jesu sunga om Pasian hong itna panin hong khenkhia zo kei ding hi, cih ka kipsan takpi hi.

Rom-Te 9

1 Khrist sunga om tua thutak ka gen hi – ka zuau hi loin Khasiangtho sunga ka kitheihna lungsim in tua kipsakna, 2 ka lung sungah dahna lianpi le lunggim ngitngetna nei-in ka om hi. 3 Ahang in, Israel-te keima mipih ka sanggamte hangin kei mahmah Khrist pan kikhen khia-in samsiatna thuak maileng ka ut hi. 4 Tapa suahsakna amau aa hi-a Pasian minthanna ahi zongin, thukhunte ahi zongin, thukham ngahna ahi zongin biakinnpi-a biakna le kamciamte khempeuh amau aa ahi hi. 5 Pubulte amau aa hi a, amaute panin Khrist leitung pu le pate kiguisut hi. Tua Khrist in na khempeuh tunga Pasian hi-a a tawntungin kiphat hi!a Amen. 6 Pasian thu a hawmsuak bang ahi kei hi. Ahang in, Israel-te pana piangte khempeuh Israel ahi kim kei uh hi. 7 Amaute ama suan le khak ahi uh hangin Abraham tate ahi kim kei uh hi. Tua sangsikin: “Na suan na khakte Isaac tungtawnin kiseh ding hi.”b ci hi. 8 Kammal dangin gen lehang pianngei tate Pasian tate ahi kei uh hi. Ahi hangin kamciamna tate, Abraham suan le khakte in kisim hi. 9 Ahang in, tua kamciam in: “A kisehsa hun a tun ciangin kong kileh kik dinga, Sarah in tapa khat a nei ding hi”c a na ci hi. 10 Tua bek tham loin Rebecca tate in pa kikhat eite pa Isaac a nei uh hi. 11 Tua hi napi tua a peng tate gel a suah ma uh asia apha a bawl theih mapek un, Pasian teelkhiatna tawh kisai ama ngimna: 12 sepna hang hi lo hong sampa hangin, cih thu a kip nadingin tuanu kiangah, “A uzaw in a naupa nasem a suak ding hi”d ci-in na kigen hi. Tua bang tektek in: 13 "Jacob ka it a, ahi hangin Esau ka mudah hi.”e ci-in kigelh zo hi. 14 Tua ahileh bang gen ding i hi hiam? Pasian a thutang lo ahi hiam? Hi peuhmah lo hi! 15 Ahang in, amah in Moses kiangah “Ka lainatte ka lainat dinga, ka khuatuahte ka khuatuah ding hi”f a na ci hi. 16 Tua ahi ciangin mihing lunggulhna tung ahi zongin, a hanciamna tungah ahi zongin kinga loin Pasian lainatna tung bekah kinga hi. 17 Ahang in, Laisiangtho in Pharaoh kiangah: Ka vangliatna nangma sungah ka lah theih nading le leitang tung khempeuh ah ka min a kitangko theih nading ngimna tawh nang kong laamto zo hi.”g ci hi. 18 Tua ahi manin Pasian in a lainat nopte tungah lainatna nei-a, a lungkhauhsak nopte a lung khauhsak hi. 19 Note khatpeuh in ka kiangah: “Tua ahileh bang hangin Pasian in eite hong mawhsak lai ahi hiam? Kua in ama deihna nang ahi hiam?” nong ci kha ding uh hi. 20 Ahi hangin mihing aw, Pasian a sel kik dingin nang kua na hi hiam? A kibawl na in a bawlpa kiangah, ‘Bang hangin kei hih bangin hong bawl na hi hiam?’ ci thei ding hiam”h 21 Beelseekpa in beellei lom khat panin a thupi-a zat ding beel le zattaang ding beel, bawl theihna thu nei hi lo ahi hiam? 22 Pasian in a thangpaihna lak ding le ama vang kitheikhawksak dingin suksiat dinga a koihsa ama thangpaihna a tun nadingte lungduaitakin thuak keikai ahileh bang gen nawn tuan ding i hi hiam? 23 A minthang dinga a bawlkholhsa, ama lainatna a ngahte tungah a kicing ama minthanna a lahkhiat ding 24 Jew-te pan bek hilo Gentile-te laka eite nangawn hong sam ahileh bang gen nawn ding i hi hiam? 25 Amah in Hosea sungah: “Keima mi ahi lo amaute, ‘keima mite’ ka ci ding hi; ka it loh nu zong, ‘ka it nu’i ka ci ding hi, 26 le “ ‘Note, keima mite na hi kei uh hi,’ ci-a amau tunga ka genna mun tekek ah amaute, ‘a nungta Pasian tapate,’j kici ding hi, cih thu a tung ding hi.” ci-in a gen hi. 27 Israel tawh kisai-in Isaiah in: “Israel mite tuipi gei-a sehnel zahin a tam uh hangin a baanglaite bek kihonkhia ding hi. 28 Ahang in, Topa in leitang tungah ama thukhenna a kip den dingin a manlangin tungsak ding hi,”k ci-in a kiko hi. 29 Nidang lai-a Isaiah in: “Thahatpen Topa in eite ading suan le khak hong nusiat lo hileh eite, Sodom bang i hi khin zo dinga, eite Gomorrah bang i hi khin zo ding hi,”l ci-a a gen bang tektek ahi hi. 30 Tua ahileh bang i gen ding hiam? Thumaanna a deih lo Gentile-te in upna hanga kingah tua thumaanna a ngah zo uh hi; 31 ahi hangin Israel-te in a delh uh tua thumaanna thukham a ngah kei uh hi. 32 Bang hanga ngah lo? Amaute in upna tawh zong loin sepna tawh a zon hang uh ahi hi. Amaute kimuktukna suang tungah a muktu uh hi. Hih bangin kigelh hi: 33 "En in, mi a muktusak ding suangtum khat le amaute a puksak ding suangtumpi khat Zion ah ka nga a, amah amuangte a maizum ngei kei ding uh hi,”m

Rom-Te 10

1 Sanggamte aw, Israel mite adinga ka lunggulhna le Pasian tunga ka thungetna pen amaute a kihotkhiat theih nading ahi hi. 2 Ahang in, Pasian adingin amaute nakpi-a a hanciamna uh teci ka pang thei hi. Ahi hangin amaute hahkatna in theihna pansan ahi kei hi. 3 Amaute in Pasian kiang pana hong pai thumaanna thei lo uh a, amau thu-a phuaktawm nuam uh ahi manin Pasian thumaanna ah a ki-ap kei uh hi. 4 A um peuhmah in thumaanna a ngah theih nadingin thukham tawpna Khrist ahi hi. 5 Moses in thukham hanga kingah thumaanna a genna ah: “Hih nate a sem mi in hihte hangin a nungta ding hi.”a ci hi. 6 Ahi hangin upna hanga kingah thumaanna in: “Na lungsim sungah, ‘Vantung ah kua kahto ding hiam?’ ci kei in.”b (tua pan Khrist lasuk ding cihnopna) 7 cih ahi zongin, “ ‘A thuk sungah kua kumsuk ding hiam?c (tua pen misi panin Khrist lato ding cihnopna)” ci kei in. 8 Ahi hangin tua in bang gen ahi hiam? “Na kiangah thu om hi. Tua thu na kam sung le na lungtang sungah a om hi,"d ci hi. Kote tangko upnathu ahih le: 9 "Note in na kam uh tawh, ‘Jesu in Topa hi,’ ci-in pulaka, Pasian in amah misi pan thokiksak zo hi, ci-a na lungtang sung uhah na up uh leh note hong kihonkhia ding hi, cih upna thu ahi hi. 10 Ahang in, na lungtang uh tawh umin dik na tang uh a, na kam uh tawh pulakin note hong kihonkhia hi. 11 Laisiangtho in: “Amah a muang peuh mah a kimaizumsak ngei kei ding hi,”e ci hi. 12 Ahang in, Jew-te le Gentile-te kikal ah kilamdanna bangmah a om kei hi. Tua Topa mah mite khempeuh Topa hi-a ama tungah a kote khempeuh kicingtakin thupha a pia hi. 13 Ahang in, “Topa min a sam peuhmah kihonkhia ding hi,”f ci hi. 14 Tua ahileh amaute in amau uplohpa bangci sap theih ding uh hiam? Tua ciangin amaute in a thu a zak ngei lohpa uh bangci up thei ding uh ahi hiam? Amaute kiangah a hilh khatpeuh om kei leh bangci zak theih ding uh ahi hiam? 15 A kisawl kei leh amaute in bangci hilh theih ding uh ahi hiam? A kigelhsa bangin: “Lungdamna thu a puakte khe etlawm mahmah si e!”g 16 Ahi hangin Israel mite khempeuh in lungdamna thuthak a sang kim kei uh hi. Tua hangin, Isaiah in, “Topa aw, kote thupuak a um kua om ahi hiam?”h a na ci hi. 17 Tua bang ditdetin, tua thupuak zakna panin upna pianga, Khrist thu tungtawnin tua thupuak a kiza hi. 18 Ahi hangin amaute in za lo uh ahi hiam, cih kong dong hi. Za tham uh hi: “Amaute aw in leitung khempeuh zel khin zo-a, a kammalte un leimongte ban khin zo hi.”i 19 Israel-te in thei lo uh ahi hiam, cih kong dong leuleu hi. A masa penin Moses in: “Minam ahi lote eng dingin note kong bawl ding hi; theihna a nei lo minamte in note hong hehsak dingin ka bawl ding hi.”j na ci hi. 20 Tua ciangin Isaiah in hangtakin, “Keimah hong zong lote in hong mu zo uh hi; keimah hong kan lote tungah kei le kei ka kilaak zo hi.”k na ci hi. 21 Ahi hangin amah in Israel tawh kisai-in, “Thumang lo le paupeng mite lamah sun nilohin ka khut ka zan hi”l na ci hi.

Rom-Te 11

1 Tua ahileh, Pasian in ama mite nolh ahi hiam, cih kong dong hi. A nolh peuhmah kei hi! Kei mahmah zong Abraham suan ahi Benjamin beh pana Israel mi khat mah ka hi hi. 2 Pasian in a theihkholhsa ama mite a nolh kei hi. Elijah in Israel-te langpanin Pasian tungah a hekna Laisiangtho gen thei ngei lo na hi uh hiam? 3 "Topa aw, amaute in na kamsangte that zo uh a, na biakna-taute a phelkhia zo uh hi. Kei kia bek ka om lai-a, amaute in kei thah hong sawm uh hi,”a ci hi. 4 Tua ciangin ama tungah Pasian dawnna bang ahi hiam? “Keima ading Baal mai-ah a khukdin lo mi tul sagih ka siit khin zo hi,”b 5 Tua hunmah bangin tuhun laitakin zong hehpihna hanga teelsa a baanglaite a om hi. 6 Tua hi-a hehpihna hang ahileh sepna hang hi nawn lo hi; sepna hang hi, hileh hepihna pen hehpihnac ahi nawn kei ding hi. 7 Tua ahileh bang ahi hiam? Israel-te in kuhkaltaka a zon uh mu lo uh a, ahi hangin a teelte in a ngah zo uh hi. Adangte kisak sak lai-a, 8 hih-a kigelh bang ahi hi: “Pasian in tuni tektek dong, amawk lungsim ahi zongin, a mu thei lo mittang ahi zongin a za thei lo bil ahi zongin, amaute a pia hi.”d 9 David in zong: “Amaute adingin a sabuai uh thangzak le tehlop suak henla, muktukna le gawina suak ta hen. 10 Amaute in a muh theih loh nadingun a mitte uh mial henla, a nungte uh kul tawntungta hen.”e a na ci hi. 11 Amaute a tho kik zo nawn lo dingin muktu uh ahi hiam, cih kong dong kik leuleu hi. Ahi peuhmah kei hi! Amaute tatkhialhna hangin Israel-te in Gentile-te a en nadingun hotkhiatna thu Gentile-te tungah tung zawsop hi. 12 Ahi hangin amaute tatkhialhna hangin leitung mite adingin hauhna suaka, amaute supna Gentile-te adingin hauhna suak ahileh amaute kicinna in bangzah a lianzaw hauhna a tunzaw tazen tam! 13 No Gentile-te tunga thugen ka hi hi. Gentile-te adinga keimah sawltakpi ka hina tawh, 14 ka mipihte in note hong eng-a pawlkhat ka hotkhiat theih nading lametna tawh keima mipihte a phawng dingin nakpi-in na ka sem hi. 15 Ahang in, amaute a kinolhna leitung mite kilemkikna hi ahileh amaute a kisanna, sihna panin hinna lo bang dang hi ding hiam? 16 Gahmasa banga kipia buhnel mekman them khat siangtho ahileh a lom bitin zong a siangtho hi; azung a siantho leh ahiangte zong a siangtho hi. 17 Tua hiangte pawlkhat kitankhia-in gamlak olive dawng khat ahi nang, tuate tungah hong kipeh a, olive tung pan hong pai khanna tui dawn khawm na hileh, 18 tua a kitankhiasa hiangte tungah na kisial kei in. Tua banga na kisialh leh hih thu na ngaihsun in: Nang in azung na vak kei-a azung in nang hong vak zaw hi. 19 Tua ahileh, “Kei hong kipeh theih nadingin hiangte kitankhia hi,” na ci kha ding hi. 20 Himah hi. Ahi hangin amaute uplahna hangin amaute a kitankhia hizaw a, nang na upna hanga ding na hi hi. Kisathei kei inla lau zaw in. 21 Tua hi-a Pasian in pianngei hiangte hawi lo ahileh nang zong hong hawi tuan kei ding hi. 22 Tua ahi manin Pasian migitna le ama thukhauhna; a pukte tungah a thukhauhna le ama migitna sunga na kip den nak leh nang tunga a migitnate ngaihsun in. Ama migitna sunga na kip den kei leh nang zong hong kisattan ding hi. 23 Amaute amau uplahna sungah a kohkan kei nak uh leh Pasian in amaute peh kik thei ahi manin amaute zong a kipeh ding hi. 24 A tawpna ah, pianngei-a gamlak olive kung ahi nang, hong satkhia-in pianngei tawh kilehbulhin a kicing olive kung tungah hong kipeh ahileh, hih pianngei hianga amau menkhiatna olive kung tunga peh ding baihzaw tham lo ding ahi hiam? 25 Sanggamte aw, note na kimisak loh nadingun; a lut ding zah a lut kim khit mateng Israel-te khenkhat lungkhauh tadih ding uh hi, cih thuthuk na theih loh ding uh ka deih kei hi. 26 Tua hi-a: “Zion panin tanpa hong pai ding hi; amah in Jacob panin pasian-milohna a hemkhia ding hi. 27 Tuateh amaute mawhnate a kilakkhiat ciangin amaute tawh ka thukhun hih ahif hi.”g ci-a kigelh bangin Israel-te khempeuh kihonkhia ding hi. 28 Lungdamna-thu tawh kisai-in ahileh note hangin amaute gal ahi uh hi. Ahi hangin teelna tawh kisai-in ahileh pubulte hangin amaute, itte ahi uh hi. 29 Ahang in, Pasian letsongte le ama hong sapnate a kidok kik thei kei hi. 30 Amaute thu manlohna hangin hun khat lai-a Pasian thu a mang lo note in, tu-in lainatna na ngah uh mah bangin 31 Pasian in note hong lainat bangin amaute in zong tu-inh lainatna a ngah theih nadingun amaute zong tu-in thumang lote a suak uh hi. 32 Ahang in, Pasian in mi khempeuh tungah lainatna a neih theih nadingin thumanlohna ah mi khempeuh a hencip hi. 33 Aw, Pasian in pilna le theihna a hauhi zia thuk na mahmah e! Ama thukhennate telzawh hi lo a, ama lampite sulkan zawh ding hi peuhmah lo hi! 34 "Topa lungsim kua in thei a, ahikeh a thudotpa kua hiam?j 35 "Pasian thukkik dingin Pasian tungah kua’n pia ngei ahi hiam?”k 36 Ahang in, nate khempeuh, ama kiang pan le ama tung pan le ama aa ahi hi. Amah in minthanna ngah tawntung ta hen! Amen.

Rom-Te 12

1 Tua ahi manin sanggamte aw, a siangtho le Pasian lungkimna ahi a nungta biakpiakna ahi dingin na pumpi uh na piak nadingun Pasian lainatna hangin kong kun hi. Tuamah lah na khalama biakna uh ahi hi. 2 Hih leitung deihna tawh kizui-in na gamta nawn kei unla, na lungsim uh thaksuaksakin na kipumkhel un. Tua hileh a hoih, a lungkimhuai, a hoihkim Pasian deihna bang ahi hiam, cih khentel thei-in na pakta thei ding uh hi. 3 Ahang in, nangma hina tan sanga a sangzaw-in nang le nang kingaihsun kei in. Ahi hangin Pasian in nang hong piaksa upna za tawh kizui-in amaan thukhenna tawh nang le nang na kingaihsut nadingin ka ngahsa hehpihna hangin note tungah kong gen hi. 4 I pumpi in pumpi na tampi nei ciat a, tua pumpi nate khempeuh a nasep a kibat loh mah bangin, 5 a tampi eite in zong Khrist sungah pumpi i suaka, eite khempeuh khat le khat a kizom dimdiam i hi hi. 6 Eite in hong kipiasa hehpihna tawh kizui-in letsong a tuamtuam i ngah hi. Mi khat letsong thugen theihna ahileh amah in amab upna tawh kituakin zang ta hen. 7 Nasepna a ngah leh sem ta hen; Laihilhna a ngah leh limtakin hilh ta hen; 8 hansuah theihna a ngah leh hansuah ta hen; midang kitasamte huh theihna a ngah leh cinghtakin huh ta hen; makaihna a ngah leh kiciantakin uk ta hen; lainatna lahtheihna a ngah leh lungtaitakin lak ta hen. 9 Itna, a taktak hi pelmawh ding hi. Gitlohna na mudah un, a hoih na pom cinten un. 10 Note khat le khat unau ki-itna kho tawh na ki-it thuk un. No sangin midangte a sangzaw-in na kipahtawi thuk un. 11 Hahkat lo ngei kei unla, khalam hanciamna ah lenkipin Topa na sem un. 12 Lametna ah lungnuam unla, thuaksiatna ah lungduai-in, thungetna ah muanhuai un. 13 Pasian mi a kitasamte na hawm un. Zindo na siam un. 14 No hong bawlsiate thupha na pia un; thupha na pia unla, na hamsiat kei un. 15 A lungdamte tawh na lungdam khawm un. a dahte tawh na dah khawm un. 16 Note khat le khat na kithuhual un. Kisathei kei unla, dinmun niamtec tawh na kikhawl khawm nuam un. Na kimisak kei un. 17 Khatpeuh gitlohna, gitlohna-in na thuk kik kei un. Mikim muhna-ah amaana gamtat ding na hanciam un. 18 Ahih theih leh nang tunga a kingak laiteng mikim tawh na kilem un. 19 Ka lawmte aw, phu na la kei un; Pasian thangpaihna adingin na awnzaw un. Ahang in, Topa in: “Phulakna keima aa ahi hi. Keimah in ka thuk kik ding hi.”d ci hi. 20 Tua sangsik in: “Na galpa a gil a kial leh na vak in; adangtak leh a dawn ding bang khatpeuh na pia in. Hih bangin na hih leh amau lutungah mei-am vumsak na hi ding hi.,”e ci-in kigelh hi. 21 Gitlohna kizosak kei unla, a hoih tawh gitlohna na zo un.

Rom-Te 13

1 Pasian piaksate longal in thuneihna nei lo uh ahi manin mi khempeuh in a ukte thu a mang pelmawh ding uh hi. Tu laitaka thuneite thuneihna Pasian piaksa ahi hi. 2 Tua bang diudeu-in thuneite a langdote, Pasian phuh kipsate a langdo ahi hi. Tua banga a langdote thukhenna kithuaksak ding hi. 3 Ahang in, a khiala gamtate adingin, gam-ukte lauhuai bek a, amaan-a gamtate adingin a lauhuai kei hi. Thunei mi khat na kihtakna panin na suakta nuam hiam? Na suahtak nop leh amaanin gamta lecin amah in nang hong phat ding hi. 4 Ahang in, nang tunga a hoih sem dingin amah Pasian nasempa ahi hi. Ahi hangin asia-a na gamtat leh lauthawng in; amah in a mawkna-in namsau a tawi kei hi. Amah, Pasian nasem hi-a, asia-a gamtate tungah thangpaihna ahi gawtna a tungsak dinga kisawlsawn ahi hi. 5 Tua ahi manin gawtna thuak khak ding hang bek hi loin, sia le pha khentheihna hangin zong thuneite thu man ding ahi hi. 6 Thuneite, hunbit a gam-uk Pasian ading nasemte ahi manin hih thu hangin zong siah na pia uh hi. 7 Mi khempeuh tungah na bat bangun na pia un. Siah piak dingte siah na pia un; mangmu piak dingte mangmu na pia un; zahtak dingte na zahtak un; pahtawi dingte na pahtawi un. 8 Khat le khat ki-it den ding leiba pen longal kuamah na kibasak kei un, ahang in, ama mipih a it mi in thukham tangtun ahi hi. 9 "Angkawm kei in” “Tual that kei in” “Gu kei in” “Deihgawh kei in”a kici thupiakte le thupiak dang a om peuhpeuh “Nang le nang na ki-it bangin na vengpa it in,”b kici zuihtawm ngeina in huam khin hi. 10 Itna in a vengpa a nasak kei hi. Tua ahi manin itna pen thukham tangtunna ahi hi. 11 Tu lai hun theitelin hih na nasem un. A tunga i up sangin eite hotkhiatna tu-in naizaw ahi manin na ihmutna panun khanlawh hun tung ta hi. 12 Zan bei dektak hi; sun hong tung dektak hi. Tua ahi ciangin khuamial gamtatnate paikhia-in khuavak galvante silh ni. 13 Zu uang dawnna, zukhamna, numei-pasal pak tatna le hukna lanna, kilungkimlohna le hazatnate sem loin sun huna i tat bangin eite a kilawmin gamta ni. 14 Mawh dim pianngeic lunggulhnate ngaihsun kei unla Topa Jesu Khrist na silh zaw un.

Rom-Te 14

1 Kisel theihna thute tawh kisai-in upna thanemte mawhpaih pah kei unla, na sang zaw un. 2 Mi khat in a upna tawh kituakin an khempeuh ne thei hi. Ahi hangin upna thanem midang khat in anteh singgah bek a ne hi. Pasian in amah sang khin ahi manin, 3 nek theih khempeuh a nepa in a ne lopa neu-et kei hen. Nek theih khempeuh a ne kim lopa in a nepa mawhpaih kei hen. 4 Midang khatpeuh nasempa tungah thu khen dingin nang kua na hi hiam? Tua nasempa a pu thu-in a ding thei a puk thei hi. Topa in amah dingsak thei ahi manin amah a ding ding hi. 5 Mi khat in ni khat sangin ni dang khat a siangtho zaw in ngaihsun hi. Adang khat in ni khempeuh a kibangin ngaihsun hi. Mi khempeuh in ama lungsima a kipsan bang hi ding hi. 6 Ni khatpeuh a thupi tuan a sapa in Topa hangin thupi a sa hi. Sa nepa in Pasian tungah lungdam ko ahi manin Topa hangin a ne ahi hi. Sa tangpa in Pasian tungah lungdam ko ahi manin Topa hangin a tang ahi hi. 7 Ahang in, mi kuamah ama ading beka nungta hi loin, a si kuamah in ama ading bekin a si kei hi. 8 Eite i nuntak leh Topa adinga nungta i hi hi; eite i sih leh Topa adinga si i hi hi. tua ahi ciangin eite i si-a i hing zongin Topa aa i hi hi. 9 Ahang in, hih thu hang mahmahin a site le a hingte Topa aa ahikhawm theih nadingin Khrist si-a tua ciangin nungta kik hi. 10 Tua ahileh bang hangin na sanggampa tungah thu khen na hi hiam? Ahikeh bang hangin na sanggampa neu-et na hi hiam? Ahang in, eite khempeuh Pasian thukhenna tokhom mai-ah i ding kim ding hi. 11 "Topa in,'Ka nuntakna ka lo hi, ka mai-ah mi khempeuh khukdin ding uh a, Pasian tungah leii khempeuh in a pulak ding uh hi,’ ci hi,”a ci-in kigelh hi. 12 Tua ahi tak ciangin eite khempeuh in Pasian tungah eima thu tek i gen ciat ding hi. 13 Tua ahi manin eite khat le khat thu kikhen nawn kei ni. Tua sangsikin na sanggampa lampi ah muktukna suang, a dongkholh na ahi zongin a koih lo dingin na lungsim uh khensat un. 14 Topa Jesu sunga om mi khat ka hina tawh anb peuhmah asiang lo khat beek a om kei hi, cih ka kipsan mahmah hi. Ahi hangin mi khatpeuh in na pawlkhat siang lo a sak leh ama adingin a siang lo ahi hi. 15 Na nek khatpeuh hangin na sanggampa a lungdon leh itna sunga gamta na hi nawn kei hi. Ama adinga zong Khrist a si na sanggampa a lungdon leh itna sungah gamta na hi nawn kei hi. Na nekna hangin ama adingin zong Khrist a si na sanggampa, siasak kei in. 16 A hoiha na ngaihsutte a sia banga a kigen ding phal kei in. 17 Ahang in, Pasian gam pen nekna le dawnna thu hi loin, Khasiangtho sunga thumaanna, lemna le lungnopna ahi hi. 18 Bang hang hiam cihleh hih banga Khrist na a sem peuhmah in Pasian lungkimsak a, mite in zong a thukimpih uh hi. 19 Tua ahi manin kilemna le khat le khat kihansuahna sungah hong tun ding na i sep nadingin hanciam theih tawpin hanciam ni. 20 An hangin Pasian nasepna susia kei un. An khempeuh asiang ahi hi. Ahi hangin mi khatpeuh a muktusak dinga na khatpeuh a ne mi a khial ahi hi. 21 Na sanggampa pukna a piangsak ding sa nek loh ding ahi zongin, zu dawn loh ding ahi zongin, khat peuhpeuh hih loh ding ahi zongin hoihzaw hi. 22 Tua ahi ciangin hih nate tawh kisai-in na up peuhpeuh nang le Pasian kikal thu hisak in. Amah in maan a sak nate hangin amah le amah a kimawhpaih lo mipa, thupha ngah ahi hi. 23 Ahi hangin lunghei neihna a neipa in a nek leh amah a kimawhpaih ahi hi. Ahang in, ama nekna upna pan ahi kei hi. Tua hi-a upna pana hong pai lo khempeuh mawhna ahi hi.

Rom-Te 15

1 A thahat eite in a thanemte’ hihzawhlohnate i thuakzawh ding hi-a, eimah le eimah i kilungkimsak ding hi lo hi. 2 Eite khempeuh in i vengte hoih nadingin amaute lungkimsaka, i khan suahtoh ding ahi hi. 3 Ahang in, “Note hong engkote engkona kei tung hong tu hi.”a ci-a kigelh bangin Khrist nangawn zong amah le amah a kilungkimsak kei hi. 4 Ahang in, eite in lametna i neih theih nadingin eite thuakzawhna le Laisiangtho hansuahnate tungtawnin a beisa huna kigelhte khempeuh eite hong hilh nadinga kigelh ahi hi. 5 Thuakzawhna le tha hong pia Pasian in Khrist Jesu na zuih bangun note lakah kipumkhatna kha hong pia ta hen. 6 Tua hileh lunsim khat le kam khat tawh i Topa Jesu Khrist Pasian le Pa na minthangsak thei ding uh hi. 7 Tua ahi ciangin Pasian na phat theih nadingun Khrist in note hong san bang tektekin note khat le khat na kisang un. 8 Ahang in, pubulte tungah kamciamsate a kipsak dingin Pasian thutak hangin Khrist, Jew-teb nasempa hong suak hi, cih note kong hilh hi. 9 Gentile-te in Pasian lainatna hanga amah a minthansak theih nadingin hih bangin kigelh zo hi: “Tua ahi manin Gentile-te lakah nang kong phat ding hi; biakna late sa-in na min ka phat ding hi.,”c 10 "Gentile-te aw, ama mite tawh kipakkhawm un,"d na ci kik a, 11 "No Gentile-te khempeuh aw, Topa phat unla, no mite khempeuh aw, lasa in amah phat un,”e na ci leuleu in. 12 Tua ciangin Isaiah in, “Jesse zungpi hong meng dinga, minamte a uk dingin khat hong khang ding hi; Gentile-te in ama sungah lametna a nei ding uh hi.”f na ci kik leuleu hi. 13 Khasiangtho vangliatna hangin lametna tawh na kidimlet theih nadingun amah na muan bangun lametna Pasian in lungdamna le lemna tawh note hong dim ta hen. 14 Ka sanggamte aw, note mahmah hoihna tawh kidimin, theihna kicing nei-in, khat le khat lam kilak dingin na cin uh cih kei mahmah in ka kipsan hi. 15 Note kiangah hangtakin thumal pawlkhat kong gelh zo hi; tua kong phawkkiksakna-in Pasian hong piak hehpihna hangin 16 Khasiangtho in Gentile-te a siangthosak Pasian santheih biakna a suah nadingun Gentile-te tungah siampi sepna tawh Pasian lungdamna-thu tangko dinga Khrist Jesu nasem khat ka hi hi. 17 Tua ahi manin Pasian na ka sepnate ah Khrist Jesu sungah ka minthang hi. 18 Ka gensate, ka sepsate hanga Gentile-te, Pasian thu a mangsak ding Khrist in kei tungtawn a, a sep khitsate longal bangmah kong gen ngam kei ding hi – 19 amah in Kha vangliatna tungtawnin lim le nalamdangte, vangliatna tawh a sem hi. Tua ahi ciangin Jerusalem a kipan Illyricum kimkot khempeuh ah Khrist lungdamna-thu ka tangko khin dipdep hi. 20 Mi khatpeuh bulkip tunga lam ka suah loh nadingin Khrist a kitheih nai lohna munte ah lungdamna-thu va hilh ding ka tup ngitnget ahi hi. 21 Hih bangin kigelh zaw hi: “Ama thu a kihilh lote in mu ding uh a, a za nai lo mite in a theitel ding uh hi,”g 22 Tua hangin note kianga kong pai ding a kikhaktan zelzel hi. 23 Ahi hangin tu-in hih kual tengah ka sep nading mun om nawn lo ahina le note kong muh kal ka ngaklah zawh kum tampi pha ta ahi manin, 24 Spain a ka pai ciangin no kiang phak dingin ka geel hi. No kiang kong nawk ciangin kong hawh ding le no tawh tawlkhat sung i kikholh khit cianga ka zin nading lam ka manawh ciangin nong huh ding uh ka lamen hi. 25 Ahi zongin tu tadihin Jerusalem a misiangte nasem dingin tua khua lam ka manawh laitak ahi hi. 26 Ahang in, Maccedonia le Achaia mite in Jerusalem a misiangte laka mizawngte citpiak a piak ding uh a lungkim uh hi. Amaute in sep ding lungkim uh a, amau tunga a bat uh zong ahi hi. 27 Ahang in, Gentile-te in Jew-te khalam thuphate tanhpih uh ahileh amau leitung thuphate zong a tanhpih ding uh Jew-te tungah a ba uh hi. 28 Tua ahi ciangin hih nasep ka zawh khit ciang le amaute in hih gah ngah uh hi, cih ka tel khit ciangin Spain gamah ka pai dinga, tua kawmin no kiangah kong bang ding hi. 29 Note kiangah kong pai ciangin Khrist thupha a dimtak tawh kong pai ding ka thei hi. 30 Sanggamte aw, kei ading Pasian kiangah nong thungetsakna uh tawh ka do, nong dopih dingun eite Topa Jesu Khrist itna hang le Kha itna hangin note kong kun hi. 31 Judea gama om thu um lote khut sung pana ka suahtak theih nading le Jerusalem a ka sep nate tua lai-a om misiangte in hong san theih nadingun thu na ngetsak un. 32 Tua pen Pasian deihna hangin note kiangah lungdamna tawh hong pai-a note tawh thathak i ngah khawm theih nading ahi hi. 33 Lemna Pasian note khempeuh tawh om ta hen. Amen.

Rom-Te 16

1 Cenchrea pawlpi a nasema i sanggamnu Phoebe note tungah apin ka phat hi. 2 Amah, kei-a kipan mi tampi a huh mahmah khat ahi manin huhna a kisap peuhpeuh na piak ding uh le misiangte hih dinga kilawm bangin amah Topa sungah na san dingun kong thum hi. 3 Khrist Jesu sunga ka naseppihte Priscillab le Aquila, na hohpihsak un. 4 Amaute in kei adingin a luang uh a kham ngam khin uh hi. Kei bek hi loin Gentile-te pawlpi khempeuh zong amau tungah a lungdam uh hi. 5 Amau inn a kikhawm pawlpi teng zong na hopihsak un. Asia gama Khrist ah a kikhel masapen, ka lawm it Epenetus, na hopihsak un. 6 Note adingin na a sem Mary, na hopihsak un. 7 Kei tawh thong kiakhawm ka tanau Andronicus le Junias, na hopihsak un. Amaute sawltakpi lakah kikhaituam uh a, tua ciangin amaute Khrist sunga ka om ma-in a na om khinte ahi uh hi. 8 Topa sunga ka it Ampliatus, na hopihsak un. 9 Khrist sunga ka naseppih uh Urbanus le ka lawm it Stachys, na hopihsak un. 10 Khrist sungah kizia-eta, a kisang Apelles, na hopihsak un. Aristobulus bangkua sunga om teng, na hopihsak un. 11 Ka tanau Herodion, na hopihsak un. Topa sunga om Narcissus bangkua sunga omte, na hopihsak un. 12 Topa sunga nasep hakat numeite Tryphena le Tryphosa, na hopihsak un. Topa sunga nasep a na hahkat mahmah numei dang khat ka lawm it Persis, na hopihsak un. 13 Topa sunga teltuamsa Rufus le kei zong nu-a ka neih ama nu zong na hopihsak un. 14 Asyncritus, Phlegon, Hermes, Patrobas, Hermes le amau tawh a omkhawm sanggamte, na hopihsak un. 15 Philologus, Julia, Nereus le a sanggamnu, le Olympas le amaute tawh a omkhawm misiangte khempeuh na hopihsak un. 16 A siangtho kinapna tawh note khat le khat na kihopih un. Khrist pawlpite khempeuh in hong hopih uh hi. 17 Sanggamte aw, na sansa uh thuhilhna tawh kilehbulh, na lampi uh hong dongkhaksakin na kipawl khen nading uh a bawlte panin na kidawm un, ci-in kong kun hi. Amaute kiang pan na kihemkhia un. 18 Ahang in, tua bang mite i Topa Khrist nasem hi loin amau ankam lim nading bek a sem ahi uh hi. Amaute in kamzolna le mi maitang phatna tawh mi melmawlte lungsim a khem uh hi. 19 Mi khempeuh in na thumannate uh a za zo uh hi. Tua ahi ciangin note tungah lungdamna tawh ka kidim hi. Ahi hangin thu hoih lamsangah note na pilvang unla, asia lamsangah mawhpengin na om un. 20 Lemna Pasian in note khepek nuai-ah Satan a sikpek hak nawn kei ding hi. Eite Topa Jesu hehpihna note tawh om ta hen. 21 Ka naseppih Timothy in hong ho pihna note hong khak hi. Tua mah bangin ka tanaute, Lucius, Jason le Sosipater-te in zong hong khak uh hi. 22 Hih laikhak a gelhkhia keimah Tertius in Topa sungah note kong hopih hi. 23 Hih lai-a om pawlpi bup le keimah in a zindona nuam ka sak uh Gaius in note hong hopihna hong khak hi. Khuapi sung tang nasep ukpa, Erastus le i sanggampa Quartus-te in hong hopihna uh hong khak uh hi.c 24 Eite Topa Jesu Khrist hehpihna note khempeuh tawh omkhawm ta hen. Amen. 25 Tu-in khanghun sawtpi sung a kiselcip thuthuk kilaakkhiatna tawh kizui-a ka hilh lungdamna-thu le Jesu Khrist kitangkona tawh note hong kipsak zopa – 26 tua thuthuk tu-in kilaak khin a, minam khempeuh in um-a a thu a man theih nadingun tawntung Pasian thupiakna tawh kamsangte’ laigelhte tungtawnin kitheisak khin hi – 27 Jesu Khrist tungtawnin tua a pil Pasian khat bek tungah minthanna om tawntung ta hen. Amen.

1 Korin-Te 1

1 Pasian deihna hanga Khrist Jesu sawltakpi khat dinga kisam Paul le i sanggampa Sosthenes in, 2 Corinth a om Khrist Jesu sunga sianthosaksa Pasian pawlpite le a siangtho dinga sapte, koimah peuh a om amaute le eite Topa – Topa Jesu Khrist min a lote khempeuh tungah: 3 I Pa Pasian le Topa Jesu Khrist tung pana hehpihna le lemna note tungah om ta hen. 4 Khrist Jesu sungah note hong piak hehpihna hangin note adingin Pasian tungah lungdam ka ko tawntung hi. 5 Ahang in, ama sungah note na thugenna uh le na theihna khempeuh uh lam citengah hong kihausak zo hi; 6 bang hang hiam cih leh Khrist thu teci ka panna uh note sungah kikipsak zo hi. 7 Tua ahi ciangin eite Topa Jesu Khrist hong kilaak ding lawptaka na ngak kawmun khalam letsong kisap na nei kei uh hi. 8 I Topa Jesu Khrist ni ciangin kawk na baan loh nadingun amah in a tawp dongin hong thakhauhsak ding hi. 9 A Tapa i Topa Jesu Khrist tawh kipawlna sunga note hong sampa Pasian a muanhuai hi. 10 Sangamte aw, note khempeuh khat le khat kithutuakin note lakah kipawl khenna a om loh nading le lungsim le ngaihsutna-a kicingtaka na kigawm theih nadingun i Topa Jesu Khrist minin kong thum hi. 11 Ka sanggamte aw, Chloe innkuanpihte pawlkhat in note lakah kitotna om ci-in hong zasak zo uh hi. 12 Ka cihnopna hih ahi hi. Note khat in,”Ken Paul ka zui hia,” adang khat in,”Ken Apolos ka zui hi,” adang khat leuleu in, Ken Cephasa ka zui hi,” adang khat lai in, “Ken Khrist ka zui hi,” na ci ciat uh hi. 13 Khrist kisehkhen ahi hiam? No adingin Paul kikilhlum ahi hiam? Paul min sungahb note kibaptise na hi uh hiam? 14 Crispus le Gaius longal note kong baptize khak loh ka nuam mahmah hi. 15 Tua ahi ciangin kuamah in kei min sungah na kibaptise uh, ci-in a ci thei kei hi. 16 (Himah hi, Stephanas-te innkuan zong ka baptise lai hi. Tua lo adang ka baptise lam ka phawk kei hi.) 17 Ahang in, Khrist in baptize dingin hong sawl lo a, lungdamna-thu hilh dingin hong sawl hi. Tua pen mihing pilna kammalte tawh gen ding hilo hi. Hi hileh Khrist singlamteh vangliatna a hawmsuaksak kha ding hi. 18 Ahang in, a mangthang mite adingin singlamteh thupuak, haina ahi hi. Ahi hangin hong kihonkhia eite adingin Pasian vangliatna ahi hi. 19 Ahang in, “A pilte pilna ka susia ding hi; a tei mite teina ka hawmsuaksak ding hi,”c ci-in kigelh zo hi. 20 Mipil koi-ah om hiam? Lai siam koi-ah om hiam? Hih khanghun ah thuguizuih mi koi-ah om hiam? Pasian in leitung pilna, haina suaksak hi lo ahi hiam? 21 Ahang in, Pasian pilna sungah leitung in ama pilna tungtawnin amah thei lo ahi nungsang a kihilh haihuaina tungtawnin a um mite a hotkhiat ding Pasian lungkimna ahi hi. 22 Jew-te in lim lamdang ngen uh a, Greek-te in pilna a zong uh hi. 23 Ahi hangin kote in Jew-te adingin kisuih khakna suang, Gentile-te adingin haina ahi, a kikilhlum Khrist thu ka hilh uh hi. 24 Ahi hangin Pasian sap Jew-te le Greek-te tungah Khrist, Pasian vangliatna le Pasian pilna ahi hi. 25 Ahang in, Pasian haina in mihing pilna sangin pilzaw a, Pasian thanemna in mihing hatna sangin thakhauhzaw hi. 26 Sanggamte aw, note hong kisap lai-in, bang na hi uh hiam, ngaihsun un. Hong sap mite lakah mihing tehnate-a apil na tam kei uh hi; mihing a thuzawh zong na tam kei uh hi; pianpih nampi zong tampi na om kei uh hi. 27 Ahi hangin Pasian in a pilte a maizumsak nadingin leitunga a hai nate a teel hi; Pasian in a thahatte a maizumsak nadingin leitunga a thanemte a teel hi; 28 Amah in a om nate a guak suaksak nadingin hih leitung na niamte, a simmawhhuai nate le a om lo nate a teel hi. 29 Tua pen ama mai-ah kuamah a kisaktheih theih loh nading ahi hi. 30 Ama hangin eite adinga Pasian tung pana pilna a hong suakpa Khrist Jesu sungah note na om uh a, tua in eite thumaanna, sianthona le tatkhiatna ahi hi. 31 Tua ahi manin “A kisial peuhmah Topa sungah kisial ta hen,”d ci-in kigelh hi.

1 Korin-Te 2

1 Sanggamte aw, note kiangah Pasian thu teci pang dingaa kong pai lai-in dangnalna ahi zongin pilna thupizaw tawh ahi zongin kong pai kei hi. 2 Ahang in, note tawh ka om khawm sung teng Jesu Khrist le a kikilh lum amah longal bangmah theih ka tum kei bikbek hi. 3 Note kiangah thanemna, launa le linna tampi tawh kong pai hi. 4 Ka thupuak le ka thuhilhnate pilna le zolna kammalte tawh hi lo a, Kha vangliatna lahkhiatna tawh hizaw hi. 5 Tua-in na upna uh mite pilna tungah kinga loin Pasian vangliatna tungah a kingak zawk nading ahi hi. 6 Ahi ta zongin a picingsate lakah pilna thupuak ka gen uh a, ahi hangin hih khanghun ahikeh bangmah ahi lo ding hih khanghun gam-ukte pilna ahi kei hi. 7 Hi lo hi, kote in a kiselcip pilna le hun kipat ma-a eite minthan nadinga Pasian sehkholhsa Pasian pilna thusim ka gen uh hi. 8 Tu khanghun a gam-ukte khat beek in hih thu a theitel kei uh hi. Bang hang hiam cih leh thei uh hileh minthanna Topa a kilhlum kei ding uh hi. 9 Ahi zong in: “Amah a itte adingin Pasian bawlkholhsate mitin mu ngei nai lo, bilin za ngei nai lo lungsimin ngaihsun ngei nai lo”b ci-a kigelhsa bang hi a, 10 ahi hangin Pasian in a Kha in eite tungah hong laak zo hi. Tua Kha in na khempeuh zonga, Pasian thuthukpite nangawn a zongkha hi. 11 Ahang in, mite lakah mi khat ngaihsutna a thei thei a sunga om mihing kha longal kua ahi hiam? Tua mah tawh kibangin Pasian Kha longal kuamah in Pasian ngaihsutnate a thei thei kei hi. 12 Pasian in eite man nei lo a hong piak i theihtel theih nadingin leitung kha i ngah kei a, Pasian tung pana Kha i ngah hi. 13 Kote in ka gen uh hih thu mah ahi hi, mihimc pilna in eite hong hilh kammalte hi lo a, ahi hangin Kha hong hilh kammaltea zangin khalam thutakte khalam kammalte-in ka genkhia zaw uh hi. 14 Tua Kha a nei lo mite adingin Pasian Kha pana hong pai nate haina suak ahi manin a sang kei uh hi. Ahang in, khalam tawh kikhentel thei bek ahi manin amah in tuate a theitel thei kei hi. 15 Khami bek in nate khempeuh thu khena, ahi hangin amah kuama thukhena mai-ah a om kei hi. 16 "Ahang in, Topa a hilh thei dingin kua in ama lungsim thei ahi hiam?”d Ahi hangin eite in Khrist lungsim i nei hi.

1 Korin-Te 3

1 Sanggamte aw, khamite kianga gen bangin note kiangah kong gen thei kei hi. Ahi hangin samite – Khrist sunga naupangnote kianga gen bangin kong gen hi. 2 Note in antak ne zo nai lo na hi manun antak hong pia loin nawizu kong pia hi. Hitakpi hi, tu dongin na ne zo nai kei uh hi. 3 Note na sami lai uh hi. Note sungah kihazatna le kitotna a om lai nungsang, note sami lai hi lo na hi uh hiam? Note mihing lel banga gamta hi lo na hi uh hiam? 4 Ahang in, khat in, “Ken Paul ka zui hi,” ci a, adang khat in,”Ken Apolos ka zui hi,” a cih ciangin note mihing lel mah hi lo na hi uh hiam? 5 Bangbang hi ta leh Apolos bang hi peuhmah hiam? Paul zong bang hi mawk hiam? Amaute tungtawna na up theih nadingun amaute sep dinga Topa in a guat ciat nasemte hi bek uh hi. 6 Keimah in a ci ka tuh a, Apolos in tui buak hi, ahi hangin Pasian in a khangsak hi. 7 Tua ahi ciangin a khangsakpa Pasian bek longal a tuhpa ahi-a tui buakpa ahi zongin bangmah ahi kei hi. 8 A tuhpa le tuibuakpa a tup uh a kibang hi a, a sepna uh tawh kizui-in pahtakman kipia tuak ding hi. 9 Ahi hangin kote Pasian tawh nasem khawmte ka hi uh a, note Pasian inn Pasian lo na hi uh hi. 10 Pasian in hong piaksa hehpihna zangin inn lam siampa bangin bulkip khat ka phut zo a, midang khatpeuh in tua tungah a lam hi. Ahi hangin mikim in a lamdan pilvang uh hen. 11 Ahang in, khat a kiphutsa Jesu Khrist longal bulkip dang peuhmah kuamah in a phut thei kei hi. 12 Mi khatpeuh in hih bulkip tungah kham, ngun, suang manphate, sing, lopa keu ahikeh buhtu zangin a lam leh, 13 tua Ni in tua nasep khuavak ah pholak ding ahi manin ama nasep bang ahi hiam cih a kilakkhia ding hi. Mei tawh tua nasep kilakkhia dinga, mei in mikim nasep ahina bangbang a zia-et ciat ding hi. 14 A lamsate bangmah a cih kei leh ama pahtakman a ngah ding hi. 15 A kattum leh a sum ding hi; amah bek mah suakta dinga, ahi hangin meikuang laka suakta bang lelin a suakta ding hi. 16 Note mahmah Pasian biakinnpi hi-in, note sungah Pasian Kha a ten lam thei lo na hi uh hiam? 17 Pasian biakinnpi siangtho a, note tua biakinnpi na hi manun, mi khatpeuh in Pasian biakinnpi a suksiat leh Pasian in amah a susia ding hi. 18 No le no kikhem kei un. Note lakah mi khatpeuh in tu khanghun tawh kituaka pil a kisak leh a pil a suah theih nadingin a “hai” suak hen. 19 Ahang in, hih leitung pilna Pasian mitmuh ah haina ahi hi. “Amah in a pilte amau zuau siamnaa ah a man hi” a cihleh 20 "Topa in a pilte ngaihsutna a mawkna hi, cih a thei hi”b ci-a kigelh bang ahi hi. 21 Tua ahi tak ciangin mihingte kisaktheihpih ding ahi nawn kei hi. Na khempeuh no aa hi a, 22 Paul ahi-a, Apolos ahi-a, Cephasc ahikeh kei tung ahi-a, nuntakna ahi-a, sihna ahi-a, tu hun ahi a, mailam hun ahi zongin – a vekpi-in no aa hi-a, 23 note Khrist aa hi-in, Khrist Pasian aa ahi hi.

1 Korin-Te 4

1 Tua ahi ciangin mite in kote Khrist nasemte le Pasian thusim a kemte bangin hong ngaihsut ding uh ahi hi. 2 Kep ding a kipiakna mite a muanhuai pelmawh ding uh kisam hi. 3 Note na hi uh a, leitung thukhen zum khatpeuh ahi zongin kei tungah thu nong khen uh hangin phamawh ka sa kei hi; a taktakin kei le kei nangawn thu ka kikhen kei hi. 4 Kisuantakna ka nei kei hi, ahi hangin tua in kei mawhpeng hong suaksak tuan lo hi. Kei tunga thukhenpa Topa ahi hi. 5 Tua ahi ciangin a kisehsa hun a tun matengin bangmah thu na khen kei un; Topa hong pai ding ngak un. Amah in khuamial sunga kiselsimte khuavak ah pusuahkhia dinga, mihing lungtang tupnate a pholakkhia ding hi. Tua hun ciangin mikim in Pasian tung pan phatna a ngah ciat ding uh hi. 6 Sanggamte aw, tu-in no phattuam nadingin “Akigelhsa khengin pai kei in” cih thu a khiatna kote panin na sin theih zawk nadingun hih thute kei mahmah le Apolos tungah ka bulh hi. Tua hi-a mi khat sangin midang khat na kisaktheihpih zaw kei ding uh hi. 7 Ahang in, kua in note midang khatpeuh tawh a kibang loin hong bawl ahi hiam? Na ngah loh uh bang nei na hi uh hiam? A ngah na hi uh leh bang hangin a ngah lo bang kekin kisathei na hi uh hiam? 8 Na deih khempeuh uh na nei khin uh hi! A hau khin na hi uh hi! Kote tawh loin kumpi na suak khin uh hi! Note tawh kumpi ka suahkhawm theih nadingin kumpi suak takpi le uh cin ka ut mahmah hi! 9 Pasian in ko sawltakpite, kidemna muna mihonpite meizoma thah dinga kimawh paihsa mite tawh kibanga hong koih tawh kibang ka sa hi. Kote, khuavannuai buppi-a om vansawltakte le mihingte etnop lelin hong kinei hi. 10 Khrist adingin kote a hai ka hi uh a, ahi hangin note Khrist sungah na pil mahmah uh hi! Kote ka thanem uh a, note na thakhauh uh hi! Note hong kipahtawi-a, kote hong kisimmawh hi! 11 Tu hun laitak mahmah in ka gil uh kialin ka dang uh taka, puansiapi silhin, mi ngongtatna ka thuak uh a, inn loin ka om uh hi. 12 Ka khut uh tawh nakpi-in na ka sem uh hi. Hong kihamsiat ciangin thupha ka pia uh hi; hong kibawlsiat ciangin ka thuak keikai uh hi. 13 Hong kigensiat ciangin kamkhumin ka thuk uh hi. Tu hun mahmah ciang dong leitung deih loh leitang tunga ninpathem bang ka suak uh hi. 14 Hih lai note maizumsak nadinga ka gelh hi loin ka it ka tate banga kong vauhilhna hizaw hi. 15 Khrist sungah hong kem tulsawm bang na nei zawzen uh zongin pa tampi na nei kei uh hi. Ahang in, lungdamna-thu tungtawnin Khrist Jesu sungah note pa ka suak hi. 16 Tua ahi manin note in kei nong etteh ding uh kong thum hi. 17 Hih thu hangin Topa sungah a muanhuai ka it ka tapa Timothy no kiangah kong sawl hi. Amah in mun khempeuh a, pawlpi khempeuh ah ka thu hilh tawh kituaka, Khrist Jesu sunga ka nuntak zia note hong phawksak ding hi. 18 Note kiangah kei hong pai nawn lo ding bangin note pawlkhat na ki-uangsak uh hi. 19 Ahi hangin Topa in hong awi leh no kiangah kong pai baih dinga, tua ciangin hih a ki-uangsak mite kampauzia bek hi lo, bang vangliatna nei uh hiam, cih ka mukhia ding hi. 20 Ahang in, Pasian gam pen genzawh thu hi loin, vangliatna hizaw hi. 21 Note kiangah satna ciang tawh hong pai ding ka hi hiam? Itna le lungnemna tawh hong paizaw ding ka hi hiam? Bang teelzaw na hi uh hiam?

1 Korin-Te 5

1 Note lakah numei-pasal paktatna om a, lawkite lak nangawna a om ngei lo: Mi khat in a pa zi tenpih hi, cih thu hong kithang takpi hi. 2 Na kisathei laidep uh hi! Na dah mahmah ding uh hizaw a, tua banga gamta mipa na kipawlna panun na puaseh ding uh hi lo ahi hiam? 3 Ka pumpi in kong om loh hangin kha-in no tawh ka omkhawm hi. Kei om mah tawh kibangin tua bang a hih mite tungah thu ka khen zo hi. 4 Note i Topa Jesu mina na kikhop uh ciangin kha in note tawh hong omkhawma, i Topa Jesu vangliatna zong a om hi. 5 Ama mawhdim pianngeia a kisiat theih nading le Topa ni ciang ama kha a kihotkhiat theih nadingin hih mipa Satan khut ah pia un. 6 Na kisaktheihna uh a hoih kei hi. Silngo tawnkha in buhnel mekman lom sung teng khempeuh tawkzo cih thei lo na hi uh hiam? 7 Silngo sawh loh buhnel mekman thak na hi takpi bangun tua mah na suah nadingun silngo lui paimang un. Ahang in, Khrist eite Paisan Tuuno in biakna i pia zo hi. 8 Tua ahi manin etsatna le tatsiatna silngo lui tawh hi loin, silngo kisawh lo, a taktak le thutak anlumin Pawi bawl ni. 9 Kong laikhaknasa sungah numei pasal paktatte tawh kipawl loh ding kong gelh zo hi. 10 Hih leitunga a paktatte, huaiham le sum nesimte ahikeh milim biate ka cihna ahi peuhmah kei hi. Tuate hi hileh hih leitung na nusiat uh kul ding hi. 11 Ahi hangin amah le amah na sanggam uh ka hi kici napi numei pasal-a paktat ahikeh a huaiham, milim bia khat ahikeh mi gensiat hat khat, zukham khat ahikeh sum nesim khatpeuh tawh na kipawl peuhmah loh nadingun kong gelh ahi hi. Tua bang mi khatpeuh tawh an nangawn na nekhawm kei un. 12 Pawlpi pua lamate tungah bang nuammawh in thu va khen ding ka hiam? A sunga omte tungah thu na khen ding uh hi lo hiam? 13 A pua-a omte tungah Pasian in thu a khen ding hi. “Tua tatsiapa note lak pan hawlkhia un”b

1 Korin-Te 6

1 Note lakah khatpeuh midang tawh a kisiat leh a thu a khensak dingin misiangte mai a tut tangin pasian-milote mai tun ngam ding uh ahi hiam? 2 Misiang te in leitung thu khen ding ahilam thei lo na hi uh hiam? Note in leitung thu khen ding na hi uh leh thuneute khen dingin cin buang lo ding na hi uh hiam? 3 Eite in vansawltakte thu i khen ding thei lo na hi uh hiam? Tua ahileh tu i nuntak sunga nate thu khen zawsem lo ding i hi hiam? 4 Tua ahi manin tua bang kisiatna na neih uh leh pawlpi sunga a kineu koih mite nangawn thukhen dingin seh lel un!a 5 Na maizum nadingun hih thu kong gen hi. Thu-umte kikalah thusiate khen ding zaha pilna nei note lakah om buang lo na hi uh hiam? 6 Ahi hangin tua sangsikin sanggam khat in adang khat thukhente tungah hekin tua nangawn thu um lote tung hi sawnsawn hi! 7 Tua banga note lakah thusia na kineihna uh no mahmah a guallel dimdemsa na hina uh a kilatna ahi hi. Bang dinga khial tangzaw mai lo na hi uh hiam? Bang dinga mi khemsa hizaw mai lo na hi uh hiam? 8 Tua sangsikin no le no kikhemin khialhna na bawl uh a, tua pen mah na sanggamte uh tungah na hih uh hi. 9 Mi tatsiate in Pasian gam a luah loh ding lam thei lo na hi uh hiam? Mi khemsa-in om kei un: Numei pasal paktatte, milim biate, angkawmte, pasal kizuakte, pasal le pasal paktatte, 10 gutate, duhhopte, zu khamkhamte, mi gensiate, sum ne simte khempeuh in Pasian gam a luah kei ding hi. 11 Note pawlkhat tua bang na hi uh hi. Ahi hangin i Topa Jesu Khrist min le i Pa Pasian Kha tawh note hong kisawp zo, hong kisiangthosak zoin, dik hong kitangsak zo hi. 12 Na khempeuh hih ding a kiphal hi – ahi hangin na khempeuh phattuamna a hi kim kei hi. “Kei adingin na khempeuh a kiphal hi” – ahi hangin na khat beek ka ki-uksak nuam kei hi. 13 An in gilpi ading ahi mah bangin gilpi zong an ading mah ahi hi – ahi hangin Pasian in tuate gel a susia ding hi. Pumpi pen numei pasal paktatna-a zat ding hi loin Topa ading hi-a Topa zong pumpi ading ahi hi. 14 Pasian in ama vangliatna tawh misi panin Topa thosak-a, eite zong hong thosak ding hi. 15 Note pumpi Khrist mahmah pumpi nate ahilam thei lo na hi uh hiam? Tua ahileh Khrist pumpi nate la-in a kizuakte tawh gawmkhawm ding ka hi hiam? Ka gawnkhawm ngei peuhmah kei ding hi! 16 A kizuaknu tawh a kigawmpa tuanu tawh pumpi ah khat suak ahilam thei lo na hi uh hiam? Ahang in, “Tua nihte cikhat sakhat a suak uh hi”b ci hi. 17 Ahi hangin amahmah Topa tawh a kigawmte kha-in amah tawh khat ahi hi. 18 Numei pasal paktatna na taisan un. Mihing in a bawl mawhna dangte khempeuh a pumpi pualam hi-a, ahi hangin numei pasal mawhna-a a mawhte ama pumpi tungah a mawh ahi hi. 19 Note pumpi Pasian tung pana na ngah uh no sunga om Khasiangtho biakinnpi ahilam thei lo na hi uh hiam? Note nomau aa na hi kei uh hi; 20 note man kipia-a leisa na hi uh hi. Tua ahi manin na pumpi uh tawh Pasian na pahtawi un.

1 Korin-Te 7

1 Tu-in lai-a nong gelh uh thute tawh kisai-in pasal in zi nei kei leh a hoih hi.a 2 Ahi hangin paktatna hihzahta a om nungsang pasal in ama zi, numei in ama pasal ciat a nei tek ding uh hi. 3 Pasal in a zi tungah nupa hihna a tangcingsak ding hi. Tua mah bangin zi in zong a pasal tungah a tangcingsak ding hi. 4 Zi pumpi amah kia aa hi loin a pasal aa zong ahi hi. Tua mah bangin pasal pumpi zong amah kia aa hi loin a zi aa zong ahi hi. 5 Thungen dinga na kipumpiak theih nadingun na kithukimna uh hun tomkha kal simloh kuamah na kideek kei un. Note pumpi na ki-uk zawh lohna uh hanga Satan in hong khem zawh loh nadingin tua bang hun khit ciangin na kigawm kik un. 6 Hih pen thupiak bang hi loin a hi thei liailiai-a kong gen ahi hi. 7 Mi khempeuh kei tawh kibang leh ka ut hi. Ahi hangin mikim in Pasian tung panin letsong a tuamtuam nei ciat uh hi. Mi khat in hih letsong ngah a, midang khat in adang khat a ngah hi. 8 Kitenpih nei nai lote le meigongte tunga ka cihinah amaute in kei bangin tenpih nei kei le uh a hoih hi. 9 Ahi hangin amau le amau ki-uk zo loin huklua lanlua-a a om uh sangin tenpih neih hoihzaw ahi manin tenpih zaw uh hen. 10 Tenpih neisate tungah hih thupiak ka pia hi. (Kei piak hi lo, Topa piak): Zi, a pasal tawh kikhen peuhmah kei hen. 11 Ahi hangin a kikhen leh pasal nei loin om pelmawh hen. Ahikeh a pasal tawh kilemkik hen. Pasal in zong a zi ma peuhmah kei ta hen. 12 Adangte tungah hih ka gen hi. (Topa hi lo, kei gen): sanggampa khatpeuh in thu um lo mi zi-a a neih a, tuanu amah tawh a omkhawm nop nakleh ma kei hen. 13 Numei khat in zong thu um lo mi khat pasalin nei a, tuapa amah tawh a omkhawm nop nakleh ma kei hen. 14 Ahang in, a um lo pasal a zi tungtawnin sianthosaksa hi-a, a um lo zi zong a um a pasal tungtawnin sianthosaksa ahi hi. Tua hi kei leh na tate uh a siang lo hi dinga, ahi hangin tua mah bangin amaute a siangtho uh hi. 15 Ahi hangin thu um lo mi in a ciahsan leh ciah ta hen. Thu umpa ahikeh thu umnu tua bang thu in a khih kei hi. Pasian in kilema nungta dingin eite hong sapsa ahi hi. 16 Zi aw, na pasal na hotkhiat theih ding, na hotkhiat theih loh ding bang thei na hi hiam? Ahikeh pasal aw, na zi na hotkhiat theih ding le na hotkhiat theih loh ding bang thei na hi hiam? 17 Hi tase leh mi khatpeuh in Topa in a nuntak nadinga a sehna le tua dinga Pasian in a sapna kembit ta hen. Hih in pawlpi khempeuh tunga ka piak ngeina ahi hi. 18 Mi khat a kisap lai-in vunatsa ahi hiam? Amah vunat loh suak kei hen. Mi khat a kisap lai-in vun at loh ahi hiam? Amah in vunat kei hen. 19 Vunatna bangmah ahi kei hi. Vunat loh zong bangmah a hi tuan kei hi. Pasian thupiakte zuihna bek a thupi ahi hi. 20 Pasian in a sap laitak huna a om bangbangin mikim om ta hen. 21 Nang hong kisap laitak sila na hi hiam? Tua kilunghimawhsak kei in. Na suahtakna a ngah thei ding na hi zongin na om ngei bangin om in. 22 Topa in a sap laitakin sila a om mi, Topa suahtaksak mi hi a; tua mah bangin amah a kisap laitaka suakta mi, Khrist sila ahi hi. 23 Note man kipia-a leisa na hi uh hi. Mihingte sila na suak kei un. 24 Sanggamte aw, Pasian tunga hih dinga Pasian in a sapna ah mikim om ciat uh hen. 25 Tu-in nungak bitte tawh kisai-in: Topa tung pana thupiak ka nei kei hi; ahi hangin Topa lainatna hanga a muantak mi khat bangin thu ka khen hi. 26 Tu laitaka haksatna hangin na om bangbangua na om ding uh a hoihin ka ngaihsun hi. 27 Zi na nei ta hiam? Mak sawm kei in. Zi nei nai lo na hi hiam? Zi zong kei in. 28 Ahi hangin zi na neih khit leh na mawh kei hi, nungak bit khat in pasal a neih leh a mawh kei hi. Ahi hangin kitenpih a nei peuhmah in hih a nuntak sungin lung khamna tampi a tuak ding hi; tua hi-a tua pan in nang kong awngsut nuam hi. 29 Sanggamte aw, hun tom ta ka cihnopna ahi hi. Tu-a kipan zi neite a nei lo bangin om uh hen. 30 A kapte a kap lo bangin om uh hen. A lungdamte a lungdam lo bangin om uh hen; na khatpeuh a leite amau ading ahi lo bangin om uh hen. 31 Leitung na a zangte in uangzat lua kei uh hen. Ahang in, hih leitung tu-a a om bang lah a beibei ta ahi hi. 32 Lunghimawhna na neih loh ding uh ka deih hi. Zi nei lopa in Topa a lungkimsak theih nadingin Topa nate mah a lung himawhpih hi. 33 Ahi hangin zi neipa in a zi bangci lungkimsak ding cihna-in hih leitung nate lunghimawh a, 34 ama lung lutnate a kikhenthang hi. Pasal a nei lo numei ahikeh nungak bit in Topa nate a lunghimawh hi; tuanu tupna, a pumpi le a kha Topa tungah a pumpiak ding ahi hi. Ahi hangin pasal neisa numei in ahileh a pasal a lungkimsak thei ding cihna-in hih leitung nate a lunghimawh hi. 35 Note hoih nadingin hih thu kong gen hi; note kong ukcip nopna hi loin Topa tungah thumaana ki-apna bukimin na nuntak theih nading uh hizaw hi. 36 Mi khatpeuh in nungak bit khat a dot manin a kilawm loin gamta-in a kingaih sut-a, ahi hangin tuanu kulta-in nialna a neih kei-a, a lawmpa in tenpih loh theih lohin a ngaihsut leh ama lungkimna bangin tenpih ta hen. Amah a mawh kei hi. Amaute kiteng uh hen. 37 Ahi hangin tuapa in hi lo thei lo ahi man hi loin ama lungsim ah tenpih loh dingin kizo a, tua nungak bit tenpih loh nadingin a lungsim a khentat leh hih mipa a mana gamta ahi hi. 38 Tua ahi ciangin nungak bit a tenpihpa thumaana gamta ahi hi. Ahi hangin a tenpih lopa a hoihzaw a gamta ahi hi. b 39 Numei, a pasal nuntak sung teng a pasal ah kikhih hi. Ahi zongin a pasal a sih leh a deih peuhpeuh tenpih thei hi. Ahi hangin a lawmpa Topa aa hi pelmawh ding hi. 40 Kei khentatna ah tuanu a tuaci-in om leh a lungnuam zaw ding hi. Tua hi-a kei zong Pasian Kha nei-in ka kingaihsun hi.

1 Korin-Te 8

1 Tu-in milim thoihna an tawh kisai-in: Eite khempeuh in theihna i neih lam i thei tek hi.a Theihna in mi kisatheisak a, itna in a khansuah hi. 2 Ka thei hi ci-a a kingaihsun mi in ama theih ding zah a thei nai kei hi. 3 Ahi hangin Pasian a it mi Pasian in a thei hi. 4 Tua tak ciangin milim thoihna an nekna thu panin milim pen, leitung ah bangmah a hi lopi hi-a Pasian khat longal adang om lo cih i thei hi. 5 Ahang in, vantung ahi-a leitung ahi zongin pasian a kicite om taleh zong (“pasiante” tampi le “topate” tampi om takpi hi.) 6 eite adingin Pasian khat bek om a, amah Pa hi-in, na khempeuh amah panin pianga eite ama adingin i nungta hi; tua ciangin Topa khat bek om a, amah Jesu Khrist ahi hi; ama tungtawnin na khempeuh pianga, ama tungtawnin eite i nungta hi. 7 Ahi hangin mi khempeuh in hih thu a thei kim kei hi. Mi pawlkhatte milim biak zongsang khin lua uh ahi manin tua bang ante a nek uh ciangin milim thoihna-a kizangsa ci-a ngaihsunsa-in a ne uh hi. Amau kitheihna lungsim thanem ahi manin a buah a suak uh hi. 8 Ahi hangin an in Pasian tawh hong kinaisak tuan kei hi. I nek loh hangin i siazaw tuan kei a, i nek hangin zong i hoihzaw tuan kei hi. 9 Bangbang ahi zongin na suahtakna uh na zatna uhah a thanemte adingin kimuktukna a suah loh nadingin kidawm un. 10 Ahang in a kitheihna lungsim thanem mi khatpeuh in theihna a nei nang milim biakna inn sungah an na nek hong mu leh milim thoihna-a kipiate a nek ding uh maingal kha lo ding uh ahi hiam? 11 Tua ciangin ama adinga Khrist a si, a thanem sanggampa nang theihna in a siasak ahi hi. 12 Hih bangin na sanggamte uh tunga na mawh uh a, a thanem amau kitheihna lungsim na liamsak beh uh ciangin Khrist tunga mawh na hi uh hi. 13 Tua ahi manin ka annek in mawhna sungah ka sang gampa a puksak leh amah ka puksak loh nadingin sa ka ne nawn peuhmah kei ding hi.

1 Korin-Te 9

1 Kei suakta hi lo ka hi hiam? Sawltakpi khat hi lo ka hi hiam? I Topa Jesu mu khin hi lo ka hi hiam? Topa sunga ka nasepna gah note hi lo na hi uh hiam? 2 Adangte tungah sawltakpi ka hi kei kha zongin note adingin ka hi taktak hi! Ahang in, Topa sungah sawltakpi ka hina ciamtehna, note na hi uh hi. 3 Kei tunga thukhena tute tungah ka kihutna hih ahi hi. 4 A ne a dawn dingin thuneihna nei lo ka hi uh hiam? 5 Sawltakpi dangte Topa sanggamte le Cephasa-te bangin thu um mi zi neih theihna thuneihna nei lo ka hi uh hiam? 6 Ahikeh kivakna nasem ding Barnabas le kei bek ka hi uh hiam? 7 Ama sum zanga galkap na a sem kua ahi hiam? Lenggui suan napi lenggah ne lo kua ahi hiam? Ganhon khawi napi a nawi dawn lo kua ahi hiam? 8 Mihing muhna lel ah hih thu a gen ka hi hiam? Thukham in zong tua mah gen hi lo ahi hiam? 9 Ahang in, Moses thukham sungah “Bawngtal in buh a cil laitakin a muk hencip kei in”b ci-in kigelh hi. Pasian lunghimawh bawngtalte ahi hiam? 10 Amah in eite adingin hih thu gen takpi hi lo ahi hiam? Himah hi, eite adinga kigelh ahi hi. Bang hang hiam cih leh lokhopa in lo a khawh a, ancilpa in an a cil ciangin a gah ngah ding lamena a sep ding mah ahi hi. 11 Kote in note lakah khalam khaici vawhin note pan leitung nate ka at uh val lua ahi hiam? 12 Midangte in note panin hih huhna thuneihna ngah uh ahileh kote in a tamzaw san ngah lo ding ka hi uh hiam? Ahi hangin hih thuneihna ka zang kei uh hi. Tua tangin Khrist lungdamna-thu a khaktan ka suah loh nadingun na khempeuh ka thuak zaw uh hi. 13 Biakinnpi sunga nasemte in biakinnpi panin an ngah uh a, biakna-tau a nasemte in biakna-tau tunga kiluite a ngah lam thei lo na hi uh hiam? 14 Tua mah tawh kibangin Topa in: Lungdamna-thu a hilhte in, lungdamna-thu panin kivakna a ngah ding uh hi, ci-in thu a pia hi. 15 Ahi hangin hih thuneihnate khat beek ka zang kei uh hi. Kei adingin tua bang nong hih ding uh lamenin lai hong khak ka hi kei hi. Mi khatpeuh in hih kisialhna hong suhkhiat sangin ka si zaw ding hi. 16 Tua hi napi hih teitei dinga phut ka hi manin lungdamna-thu ka hilh ciangin ka kisial thei kei hi. Lungdamna-thu ka hilh kei leh gimna ka thuak hi! 17 Keima utthu-a hilh ka hileh pahtakman ka nei hi. Keima utthu-a hilh ka hi kei leh muanga sep dinga hong kipia a semkhia bek ka hi hi. 18 Tua hileh ka pahtakman ding bang ahi hiam? Lungdamna thu ka hilhna ah ka thuneihna zang lo a, man nei loin ka piak theih nading bek mah ahi hi. 19 Kei suakta-in kuama aa ka hi lo hangin mi a tam theithei ka ngah zawh nadingin mi khempeuh sila ka kisuaksak hi. 20 Jew-te ngah nadingin Jew-te tungah Jew-te bang ka suak hi. Thukham nuai-a omte ka ngah theih nadingin(kei mahmah thukham nuai-ah om lo napi) thukham nuai-a omte khat bangin ka om hi. 21 Thukham nei lote ka ngah zawh nadingin (Pasian thukham pan suakta hi loin Khrist thukham nuai-ah omzaw in)thukham nei lote kiangah thukham nei lote khat bangin ka om hi. 22 A thanemte ka ngah theih nadingin a thanemte kiangah a thanem ka suak hi. Mi pawlkhat ka hotkhiat theih nadingin a hih theihna lamlam ah mi khempeuh tungah na khempeuh ka suak hi. 23 Lungdamna thuphate ah tanh ka neih theih nadingin lungdamna-thu hangin hihte khempeuh ka sem hi. 24 Tai kidemna ah a taite khempeuh tai uh a, ahi hangin khat bek in pahtakman a san lam thei lo na hi uh hiam? Pahtakman na san theih nading lam lamun tai un. 25 Kidemna-a kihel dingte peuhmah nakpitakin a kisin uh hi. Amaute a kisia thei lukhu ngah dingin a kidem uh hi. Ahi hangin eite in a kisia thei lo ding lukhu ngah dingin i kidem hi. 26 Tua ahi manin tupna mel a nei lo mite a tai bangun ka tai kei hi. Huih lak a tum mi bangin ka do kei uh hi. 27 Tua bang lel bek hi loin midangte tungah thu ka hilh khit ciangin pahtakman sang dingin ka cinlah phing loh nadingin ka pumpi tumin sila in ka bawl hi.

1 Korin-Te 10

1 Bang hang hiam cih leh sanggamte aw, i pu i pate meiipi nuai-ah omin amaute khempeuh tuipi sung tawna a paisuakna thu na theih loh ding uh ka deih kei hi. 2 Amaute khempeuh Moses sungah meii le tuipi-in a kibaptise uh hi. 3 Amaute khempeuh in khalam an a kibang ne uh a, 4 khalam dawn a kibang a dawn uh hi; ahang in, amaute a tonpih khalam Suangpi panin dawn uh a, tua Suangpi Khrist ahi hi. 5 Ahi hangin amaute a tamzaw tungah Pasian lungkim lo a, amaute pumpi gamlakah a kithehthang hi. 6 Amaute bangin a gilo nate lunggulhin i om loh nadingin eite etteha dinga hihte a tungkhol ahi hi. 7 "Tua mite a ne a dawn dingin tusuk uh a, lawkite noptatna haihuai sunga bual dingin a dingto uh hi.”b ci-a kigelhsa amaute pawlkhat bangin milim biate suak kei ni. 8 Amaute pawlkhat in numei pasal paktatna a bawlna uh hangin ni khatin tul sawmnih le tulthum si uh hi – eite in tua bang mawhna bawl kei ni. 9 Amaute pawlkhat in Topa zia-et uh a, gul in a tuklup bangin eite in i Topa zia-et kei ni. 10 Amaute pawlkhat phun uh a, a thatgam thei vansawltak in amaute a thah bangin eite phun kei ni. 11 Amaute tungah hih thute etteh dingin na pianga, khanghunte a bukimna hong tunna, eite kivauhilh nadingin a kigelh hi. 12 Tua ahi ciangin kiptakin dinga na kingaihsut leh na puk loh nadingin kidawm in! 13 Note in mihingte tuah ngei zia-etna longal na tuak kei uh hi. Pasian a muanhuai hi; na thuak zawh loh ding zahval zia-etna hong tungsak kei ding hi. Ahi hangin note hong kizia-et ciangin na thuakzawh nadingun suahtakna lampi hong bawlsak ding hi. 14 Tua ahi manin ka lawm itte aw, milim biakna na taisan un. 15 Thu ngaihsun thei mite kianga thugen ka hi hi. Ka thugente nomau mahmah adingin na khentel un. 16 Eite in lungdam i koh tua lungdamkohna hai in, Khrist sisan a i kihelna hi lo ahi hiam? Eite in i balkhap anlum zong Khrist pumpi-a i kihelna mah hi lo ahi hiam? 17 Bang hang hiam cih leh anlum khat om a, lum khat panin ne tek i hi manin a tampi eite pum khat i hi hi. 18 Israel mite ngaihsun dih un: kithoihna sa a nete in biaknatau ah kihelna nei uh hi lo ahi hiam? 19 Tua ahileh milim tunga kipia kithoihna na khatpeuh ahi zongin, milim ahi zongin thupi hi, ka cihnopna ahi hiam? 20 Hilo hi. Ahi hangin lawkite kithoihna pen dawite tungah thoihna-a kipia hi-a, Pasian tunga kipia ahi kei hi. Tua hi-a dawite tawh na kikop khawm ding uh ka deih kei hi. 21 Topa hai dawnin dawite hai zong na dawn khawm thei kei ding uh hi. Topa sabuai le dawite sabuai ah a nihin na umkhawm thei kei ding uh hi. 22 Eite in Topa hazatna sosak dingin hanciam i hi hiam? Eite amah sangin thahat zaw i hi hiam? 23 Na khempeuh hih ding a kiphal hi. Ahi hangin na khempeuh phattuamna ahi kim kei hi. Na khempeuh hih ding a kiphal hi – ahi hangin na khempeuh in a hoihsak kim kei hi. 24 Kuamah in ama hoih nading bek zong loin midangte hoih nading zong zaw hen. 25 Na kitheihna lungsim dong loin sa zuakna-a kizuak sa khatpeuh na ne in. 26 Ahang in, “Leitung le a sunga om khempeuh Topa aa ahi hi.”c 27 Thu um lo mi khatpeuh in an ne dingin hong sapa na va hawh nop leh na kitheihna lungsim dong loin na mai-a kilui peuhpeuh ne in. 28 Ahi hangin mi khatpeuh in, “Hih in kithoihna-a kipia sa ahi hi,” hong cih leh tua hong genpa hang le na lungsim kisuantakna hangin ne kei in.d 29 Nang aa hi lo midang lungsim kitheihna gen ka hi hi. Ahang in, bang hangin kei suahtakna, midangte lungsim kisuantakna in thu kikhen ding ahi hiam? 30 Lungdamtaka tua an ka nek leh bang hanga na khatpeuh tungtanga Pasian tung lungdam ka kohna hangin kei hong kimawhsak ahi hiam? 31 Tua ahi ciangin na ne, na dawn uh zongin na hihna peuhpeuhuah na hihna khempeuh uh Topa minthan nadingin na hih un. 32 Jew-te le Greek-te ahikeh Pasian pawlpi khat peuhpeuh ahi zongin kimuktusak kei unla, 33 lam khempeuh ah mi khempeuh lungkimsak ka sawm bangin na hih un. Bang hang hiam cih leh amaute a kihotkhiat theih nadingin keimah kia hoih nading zong loin mi tampi hoih nading ka zong hi.

1 Korin-Te 11

1 Keimah in Khrist ka etteh bangin kei hong etteh un. 2 Na khempeuh ah kei nong phawk gige man uh leh kong piaksawn hilhnatea bang tektekin lenkipa na sep manun note kong phat hi. 3 Tu-in pasalte khempeuh lutang Khrist hi-a, numei lutang pasal hi-in, Khrist lutang Pasian ahilam na theihtel ding uh ka deih hi. 4 Pasal peuhmah in thu a ngen a, thu a gen zongin a lutang a khuh leh a lutang simmawh ahi hi. 5 Tua mah bangin numei peuhmah in thu a ngen a, thu a gen zongin a lutang a khuh kei leh a lutang simmawh ahi hi – tua pen a sam a metmai tawh kibang tektek hi. 6 Numei in a lutang a khuh kei leh a sam a tan ding hi Numei adingin sam tan ahikeh sam metmai a zumhuai ding leh a lutang a khuh ding hi. 7 Pasal pen Pasian lim le a minthanna ahi nungsang a lutang a khuh kei ding hi.b Ahi hangin numei pen pasal minthanna ahi hi. 8 Ahang in, numei pana pasal kibawl hi loin, numei pen pasal pan hizaw hi. 9 Numei adingin pasal kibawl hi lo a, pasal adingin numei kibawl hizaw hi. 10 Hih thu hang le vansawltakte hangin numei in a lutang tungah thu a kineihna lim a neih ding kilawm hi. 11 Bangbang ahi zongin Topa sungah pasal loin numei a tangdin kei a, numei loin pasal a tangdin tuan kei hi. 12 Ahang in, pasal panin numei a kibawl bangin pasal zong numei pana suak ahi hi. Ahi hangin na khempeuh Pasian pana piang ahi hi. 13 No le no in khentel un: Numei in a lutang khuh loin Pasian tungah thu a nget ding a kilawm hiam? 14 A pianzia mahmah in zong pasal a sam a sau leh zumhuai-a, 15 ahi hangin numei a sam a sau leh ama minthanna ahi hi, ci-in hong hilh hi lo ka hi hiam? Ahang in, samsau pen numei lutang khuh nadinga kipia ahi hi. 16 Hih thu tawh kisai-in mi khatpeuh a selkhah nop leh eite in zat ngeina adang i nei kei a, Pasian pawlpite in zong a nei kei uh hi. 17 Na kikhopnate un hoihna sangin siatna piangsak zaw ahi manin a nuai-a kong lahte ah note kong phat kei hi: 18 A masa penin pawlpi hina tawh note na kikhop uh ciangin note lakah kipawl khenna om cih ka za a, upna ciang zong ka nei hi. 19 Note lakah kuate Pasian san hiam, cih a kilat nadingin ngaihsutna kibang lo zong a om ding mah ahi hi. 20 Note na kikhop uh cianga na nek pen uh Topa nitak-an ahi kei hi. 21 Ahang in, na nek uh ciangin kuamah kingak loin na ne tek pah uh hi. Khat gilkialin om a, adang khat in zu a kham hi. 22 Na nek na dawn nading uh inn nei lo na hi uh hiam? Ahikeh Pasian pawlpi simmawhin bangmah a nei lote zahlaaksak na hi uh hiam? Note kiangah bang kong gen ding hiam? Hih thu hangin note kong phat ding hiam! Kong phat peuhmah kei hi! 23 Ahang in, note kong piaksawn pen Topa tung pana ka ngah ahi hi: Topa Jesu a kilehhek ni zanin anlum la a, 24 lungdam a koh khit ciangin balkham a, “Hih in note adinga kipia ka pumpi ahi hi, kei nong phawk nadingun na hih un,” a ci hi. 25 Tua mah bangin nitak-an a nek khit uh ciangin hai la a, “Hih hai in ka sisana thukhunna thak ahi hi. Na dawn simun kei nong phawk nadingun na hih un,” a ci hi. 26 Ahang in, hih anlum ne a, hih hai na dawn simun Topa sihna ama hong pai dong a tangko na hi uh hi. 27 Tua ahi manin a kilawm loin anlum ne a, Topa hai a dawn peuhmah Topa pumpi le ama sisan tungah a mawh hi. 28 Mi khatpeuh in anlum a nek ma le hai a dawn ma-in amah a kisittel ding kisam hi. 29 Ahang in, Topa pumpi theician lopi-a, a ne a dawn mi peuhmah ama tungah thukhenna a tun nadingin a ne a dawn ahi hi. 30 Tua thu hangin note lakah tampi zawngkhalin cina uh a, mi tampi a ihmu zo uh hi. 31 Ahi hangin eite, ei le ei thu i kikhen khit leh thukhenna i thuak kei ding hi. 32 Topa in eite thu hong khen ciangin leitung tawh hong kimawhpaih khawm loh nadingin eite hong sekna ahi hi. 33 Tua ahi tak ciangin sanggamte aw, a ne dinga na kikhop uh ciangin khat le khat na kingak un. 34 Na kikhopna un thukhenna hong tut loh nadingin a gilkial khatpeuh a om leh a inn ah ne ta hen. Tua banah kong pai ciangin thudangte kong lak lai ding hi.

1 Korin-Te 12

1 Sangamte aw, tu-in khalam letsongte thu na theih loh ding uh ka deih kei hi. 2 Note lawki na hih lai-un, a pau thei lo milimte lamah midangte thuzawh le pimangin na om lam uh na thei uh hi. 3 Tua ahi manin Pasian Kha pansana thugen mi peuhmah in, “Jesu kihamsiat hen” ci thei lo a, Khasiangtho pansan longal kuamah in, “Jesu in Topa hi,” a ci thei kei hi, cih kong gen hi. 4 Letsong a tuamtuam a om hangin Kha a kibang ahi hi. 5 Nasepna a tuamtuam a om hangin Topa a kibang hi. 6 Sepsakna nam tuamtuam a om hangin mi khempeuh sungah tua Pasian mah in a sem hi. 7 Tu-in mi khempeuh i hoihkim nading mikim tungah Kha kilatkhiatna kipia ciat hi. 8 Mi khat tungah Kha tungtawnin pilna thupuak kipia hi. Midang khat tungah tua Kha mah in theihna thupuak, 9 midang khat tungah a kibang Kha in upna kipia a, tua Kha khat mah in cina damsakna letsongte, 10 midang khat tungah nalam dang bawl theihna vangte, midang khat tungah thu magen theihna, midang khat tungah khate khentel theihna, midang khat tungah pau nam tuamtuama pau theihna, midang khat lai tungah paute khiat theihnab kipia hi. 11 Hihte khempeuh a kibang Kha khat nasep hi-a, amah in a sehsa bangin amaute a pia ciat hi. 12 Pumpi in na tampi tawh kibawl hi napi pumkhat ahi hi. A nate tampi ahi hangin pumpi khat a piangsak uh hi. Khrist zong tua mah bang ahi hi. 13 Ahang in, eite Jew-te i hi-a, Greek-te i hi zongin sila i hi-a, sila lo i hi zongin Kha khat inc pumpi khat sungah i vekpi-in hong baptise a, eite i vekpi in i dawn ding Kha khat mah hong kipia hi. 14 Na khat bek tawh pumpi kibawl hi loin na tampi tawh kibawl ahi hi. 15 Khe in,”Khut hi lo ka hi manin pumpi aa ka hi kei hi,” cileh tua a cihna lel tawh pumpi na a hina a bei tuan kei hi. 16 Tua ciangin bil in, “Kei mit hilo ka hi manin pumpi aa ka hi kei hi,” cileh tua a cihna lel tawh pumpi aa a hihna a bei tuan kei hi. 17 Pumpi a vekpi in mittang khat hi mawk leh khuazak theih nading koi-ah om ding ahi hiam? Pumpi a vekpi-in bil khat hi mawk leh a gimnam zak theih nading koi-ah om ding ahi hiam? 18 Ahi hangin Pasian in amaute, ama deihna bang tektekin pumpi tungah a guang kim hi. 19 Amaute khempeuh pumpi na khat bek hileh pumpi koi-ah om ding ahi hiam? 20 Tu in ahileh pumpi na tampi om a, ahi hangin pumpi khat ahi hi. 21 Mit in khut kiangah,”Nang kong kisam kei hi,” a ci thei kei hi. Lutang in zong khepek kiangah, “Nang kong kisam kei hi,” a ci thei kei hi. 22 Tua sangsikin pumpi na a gina lo hileh a kilawmte a kisampente hizaw hi. 23 Tua hi-a i thupisim loh pumpi nate i nak pahtawite hi thei zaw hi. A kithusim tham lo pumpi nate nakpi-in dop kulzaw hi. 24 I thusimzawk pumpi nate, tua banga limbawl tuan a kul kei hi. Ahi hangin Pasian in pumpi nate ki-awhsaka a kisamzaw pumpi nate tungah nakpitakin pahtawina pia-in, 25 pumpi sungah tua bangin kituam khenna om loin, a nate khat le khat a kibanga a kithusim tuah ciat nading uh ahi hi. 26 Khat in a thuak leh adang khempeuh in a thuakpih hi. A nate khat a kipahtawi leh adang khempeuh in a lungdampih uh hi. 27 Tu-in note Khrist pumpi na hi uh a, a pumpi nate na hikim uh hi. 28 Tua hi-a Pasian pawlpi sungah a masapenin Pasian in sawltakpite, a nihna-in kamsangte, a thumna ah lai hilhte, tua ciangin nalamdang bawlte, cina damsak theihna letsong ngahte, midang a huh theite, ki-ukna letsong ngahte le pau nam tuam tuam a paute zong a seh hi. 29 Mi khempeuh sawltakpi ahi uh hiam? Mi khempeuh kamsangte ahi uh hiam? Mi khempeuh lai hilhte ahi uh hiam? Mi khempeuh in nalamdangte a bawl uh hiam? 30 Mi khempeuh in cina damsakna letsong a nei uh hiam? Mi khempeuh pauted in a pau uh hiam? Mi khempeuh in a khiatna a gen uh hiam? 31 Ahi hangin letsong lianzawte lawpin na lunggulh zaw un.e

1 Korin-Te 13

1 Mihingte pau le vansawltakte pau-ina ka pau theih hangin itna ka neih kei leh zam ahikeh daltuah ging bang lel ka hi hi. 2 Thugentheihna letsong nei-in thuthuk khempeuh le theihna khempeuh thei-in mual a kinsak zo upna ka neih hangin itna ka neih kei leh a mawkna ka hi hi. 3 Ka neihsa khempeuh mizawngte pia-in ka pumpi mei-a halb dingin ka pumpiak hangin itna ka neih kei leh bangmah ka lawhtak kei hi. 4 Itna lungduai a, itna a migi hi. Eng loin a kisial kei a, a kisathei kei hi. 5 Gamhtat loin ama angsung ding bek zong lo a, heh baih loin gamtatkhialhnate a ciamteh kei hi. 6 Itna in gitlohna pakta lo a, ahi hangin thutak ah a lungdam hi. 7 Itna in hu tawntungin, muang dena; lamen den in, a tawntungin a thuak keikai hi. 8 Itna a bei ngei kei hi. Kamsanga thugennate a om hangin a bei ding hi; paute a om hangin a dai ding hi; theihna a om hangin a beimang ding hi. 9 Ahang in, eite in a kim loin i thei a, a kim loin thu i gen hi. 10 Ahi hangin kicinna hong tun ciangin kicinlohna a maimang ding hi. 11 Naupang ka hi laitakin naupang bangin ka pau hi; naupang bangin ka ngaihsun a, naupang bangin ka khaikak hi. Ka khan khit ciangin naupang vaite ka nusia hi. 12 Tu-in limlang ah ahi milmial a muh bangin i muh hangin tua hun ciangin kimaituahin i mu ding hi. Tu-in a kim loin ka thei hi; tua hun ciangin a kicinga kei hong kitheih khit bangin a kicingin ka thei ding hi. 13 Tu-in upna, lametna le itna hih thumte a om den hi. Ahi hangin hih thumte lakah itna a lianpen hi.

1 Korin-Te 14

1 Itna lampi tawnin khalam letsongte lawptakin na lunggulh un; adiakdiakin kamsanga thu gentheihna letsong na deih un. 2 Ahang in, pau khata a thugente mi tawh kiho hi loin Pasian tawh kiho ahi hi. A taktakin kuamah in amah a theitel kei hi; ama khab tawh thuthukte a gen ahi hi. 3 Kam sanga thugente peuhmah in, amaute tha khauhsak ding, hanthawn ding le hehnem dingin mihing tungah thu a gen hi. 4 Pautuam khata thugente ama phattuam nading hi-a; kam sanga thugente in pawlpi a phatuamsak hi. 5 Note khempeuh pautec zangin thugen thei hi le uh cin ka ut hi. Ahi hangin kam sanga thugen thei hi le uhcin ka utzaw lai hi. Pauted zanga thugen mi in pawlpi phattuam nadingin a thugen a khiatna a gen kei leh amah sangin kam sanga thugenpa a lianzaw hi. 6 Tu-in sanggamte aw, note kiangah hong pai-in paute zanga thu ka gen hangin kilaakna ahi a, theihna ahi zongin, kamsanga thugenna ahi a, thuhilhna kammal ahi zongin kong puak kei leh no adingin ka phattuamna bang om ahi hiam? 7 Nuntakna nei lo a ging thei bek nate nangawn: tamngai ahi zongin, harp ahi zongin, a bite ah khentelna om loin kiteltaka a gin kei leh bang aw in kitum hiam, cih kua in bangci theih ding ahi hiam? 8 Tua banah pengkul kiteltakin ging lo-a, a cihnopna a kitheih kei leh galsim dingin kua kithawi ding ahi hiam? 9 Note zong tua mah bang na hi uh hi. Na leii uh tawh a kitheithei kammalte na gen loh ngalun, kua in na thugen uh thei ding ahi hiam? Note huih laka thugen na suak lel ding uh hi. 10 Leitungah pau nam khempeuh a om takpi hi-a, ahi hangin khiatna nei lo khat beek a om kei hi. 11 Tua ahileh mi khatpeuh thugen bang a cihnopna hiam, cih ka theihtel theih kei leh tua thugenpa adingin gamdang mi ka suak a, kei adingin amah gamdang mi a suak hi. 12 Note zong tua mah bang na hi uh hi. Note in khalam letsongte neih ding lawp na hih nungsangun pawlpi a khangsak a ginazaw letsongte neih ding na hanciam un. 13 Hih thu hangin pautuam khat zanga thugen mi in, a thugen a khiatna a theih nadingin ngen ta hen. 14 Ahang in, pautuam khat zanga thu ka nget leh ka kha-in thu ka ngen a, ahi hangin ka lungsim in gah a gah kei hi. 15 Tua ahileh bang ka cih ding hiam? Ka kha-in thu ka ngen dinga ka lungsimin zong thu ka ngen ding hi. Ka kha-in la ka sa dinga ka lungsimin zong la ka sa ding hi. 16 Na kha-in Pasian na phat leh amaute lakah na thugen, a theitel lo-a kitheitee in na lungdamkohna-a na gen a theih loh nungsang bangci-in “Ámen” ci thei ding ahi hiam? 17 Nang pen lungdam a ko takpi na hi kha ding hi. Ahi hangin midangte a phatuamsak tuan kei hi. 18 Note khempeuh sangin paute zanga thu ka gen theih zawk manin Pasian tungah ka lungdam hi. 19 Ahi hangin midangte lamlak dingin pawlpi sungah pautuam khat zangin kammal tulsawm ka gen sangin a kithei kammal nga ka genzaw ding hi. 20 Sanggamte aw, naupang banga na ngaihsutnate uh tawp ta un. Gitlohna lamah naungeekte hi un; ahi hangin lungsim ngaihsutna lamah a khang hamsate na hi un. 21 Thukham sungah: “Pau theih loh mite tungtawn le gamdang mite muk tungtawnin hih mite tungah thu ka gen dinga ahi hangin tua ciang nangawnin amaute in ka thu a ngai kei ding uh hi, Topa in ci hi,”f ci-in kigelh hi. 22 Tua ahi ciangin paute pen a umte ading hi loin a um lote adingin lim ahi hi. Kamsanga thugenna ahileh a um lote ading hi loin a umte ading ahi hi. 23 Tua ahi ciangin pawlpi mite a vekun hong kikhawmin, a vekun paute zangin pau le uh, a theitelg nai lo pawlkhat ahi zongin, a um lo mi pawlkhat ahi zongin hong lut leh note mihai hong sa lo ding uh ahi hiam? 24 Ahi hangin mi khempeuh in kamsangin thu a gen laitakin a um lote ahi zongin, a theitelh nai lote ahi zongin va lut leh amah mimawh ahilam mi khempeuh in phawksakin thu khen ding uh a, 25 tua ciangin a lungtang sunga thusimte a kilang ding hi. Tua ciangin kiko-in,” Note lakah Pasian om takpi hi!” ci-in bokin Pasian a bia ding hi. 26 Tua ahileh sanggamte aw, bang gen ding i hi hiam? Na kikhop uh ciangin biakna la hiam, lamlahna hiam, kilaakna hiam, pautuam khat hiam, a khiatna genna hiam, khat ciat na nei tek uh hi. Hihte khempeuh pawlpi thahatsak nadinga zat pelmawh ding ahi hi. 27 Mi khatpeuh in pautuam khat a zat leh nih ahikeh a tampen thum in genin, khatkhatin kigenkhelin khat peuhmah in kam a phen pelmawh kul ding hi. 28 Kamphen ding a om kei leh biakinn sungah thugenpa daitakin om henla amah le Pasian tungah thu gen hen. 29 Kamsangte nih ahikeh thum in thu genin adangte in a thugen limtakin khaikak uh hen. 30 A tu mite khatpeuh tungah kilaakna a tun leh thugen masa pen khawl hen. 31 Ahang in, mi khempeuh lam kilakin a kihanthawn ahi theih nadingin note khempeuh in kikhelin thu na gen thei uh hi. 32 Kamsangte’ khate kamsangte ukna nuai-ah a om hi. 33 Ahang in, Pasian pen buaina Pasian hi loin lemna Pasian ahi hi. Misiangte kikhopna khempeuh bangin 34 pawlpi sungah zong numeite dai dide-in om uh hen. Amaute pau ding a kiphal kei hi; ahi hangin Thukham in a gen bangin amaute ukna nuai-ah om uh hen. 35 Amaute in thu khatpeuh a kan nop uh leh a inn ah a pasalte uh dong uh hen. Ahang in, numeite adingin pawlpi sunga thugen zumhuai hi. 36 Pasian thu note pana kipankhia ahi hiam? Ahikeh Pasian thu tunna note bek na hi uh hiam? 37 Mi khatpeuh, kamsangpa khat ahikeh khalam letsong nei mi khatin a kingaihsut leh note kianga kong gelhte Topa thupiakin sang ta hen. 38 Amah in hih thu a thusim keileh amah a kithusima kei ding hi.i 39 Tua ahi manin ka sanggamte aw, kamsanga thugen ding na lawp unla, paute a thugen ding zong na kham kei un. 40 Ahi hangin na khempeuh a kilawm a kituaka hih ding ahi hi.

1 Korin-Te 15

1 Sanggamte aw, tu-in note in na sansa uh le dinmuna na neihsa uh kong hilh lungdamna-thu kong phawksak kik nuam hi. 2 Note kianga kong hilhsa thu kiptaka na let nak uh leh hih lungdamna-thu pansanin hotkhiat na hi ding uh hi. Tua hi kei leh a mawkna-a um na hi uh hi. 3 Ahang in, a thupia masa penin ka sansa kong piaksawn ahi: Laisiangtho gen bangin eite mawhna adingin Khrist si a, 4 amah kivui-in, Laisiangtho gen bangin a nithum ni-in tho kika, 5 Peterb kiangah kilangin tua khit ciangin Sawm-le-nihte kiangah a kilang hi. 6 Tua khit ciangin hun kibangin sanggam zanga sanga tamzawte kiangah a kilang hi. Amaute pawlkhat a ihmut khit uh hangin a tamzaw a nungta lai uh hi. 7 Tua ciangin James tungah kilang a, tua khit ciangin sawltakpite khempeuh kiang le 8 a nunung penin mi suah ngei banga suak lo kei tungah zong hong kilang hi. 9 Ahang in, sawltakpite lakah kei a neupen ka hi-a, Pasian pawlpi bawlsia ka hi manin sawltakpi cih ding nangawnin ka kilawm kei hi. 10 Ahi hangin Pasian hehpihna hangin ka hi bangbang ka hi-a, kei tungah ama hehpihna a mawkna-in a bei kei hi. A bei kei takpi hi, amaute khempeuh sangin na ka nak sepzaw a, tua nangawn kei sep hi loin kei tawh a omkhawm Pasian hehpihna sep ahi hi. 11 Tua ahi ciangin kei ka hi-a, amaute ahi zongin ka hilh uh thu hih thu hi-a, note up zong hih thu mah ahi hi. 12 Ahi hangin misi panin Khrist kithosak hi, ci-in kihilh ahileh bangci bangin note pawlkhat in misi thawhkikna om lo hi, ci thei ahi hiam? 13 Misi thawhkikna om lo hileh Khrist nangawn kithosak lo hi ding hi. 14 Khrist tho kik lo hileh kote thuhilhna kimanna nei lo hi dinga note upna zong kimanna nei lo hi ding hi. 15 Tua tham loin Pasian in Khrist misi pan thosak hi, cih thu teci ka pan manun kote Pasian thu ah zuau teci pang hong suaksak ding hi. Ahi hangin misi kithokiksak lo takpi hileh Pasian in amah a thokiksak lo hi ding hi. 16 Ahang in, misi kithokiksak lo hileh Khrist zong a kithokiksak nai lo lai hi ding hi. 17 Tua hi-a, Khrist kithokiksak lo hileh na upna uh a mawkna hi-a na mawhnate uh sungah a om lai na hi ding uh hi. 18 Tua ciangin Jesu sunga a ihmu masate zong a mangthang ahi ding uh hi. 19 Tu i nuntak sunga ding bekin Khrist sunga lametna nei i hileh mi khempeuh sangin a hehpih huaizaw i hi ding hi. 20 Ahi hangin misi pan Khrist kithokiksak zo takpi-a a ihmusate lak pan gahmasa ahi hi. 21 Ahang in, mi khat tungtawnin sihna hong tun mah bangin misi thawhkikna zong mi khat mah tungtawnin hong tung hi. 22 Ahang in, Adam sungah mi khempeuh a sih bangin Khrist sungah mi khempeuh a kinungtasak ding hi. 23 Ahi hangin mi khempeuh amau hun ciat hi ding uh hi. A gahmasa Khrist ahi hi; tua ciangin ama hong pai ciangin ama mite a tho kik ding uh hi. 24 Tua ciangin amah in ukna thuneihna le vangliatna khempeuh a suksiat khit, Pa Pasian tungah kumpi-gam a piakkhiat ciangin beina a tung ding hi. 25 Ahang in, amah in a galte khempeuh a khepek nuai-ah a koih mateng a uk ding hi. 26 A kisusia ding gal nunung pen sihna ahi hi. 27 Ahang in, amah in, “A khepek nuai-ah na khempeuh koih zo hi”c Ama nuai-ah “Na khempeuh” a cih ciangin Khrist nuai-ah na khempeuh a koihpa Pasian a gen khak loh lam kitel hi. 28 Amah in hih a sep khit ciangin Pasian pen na khempeuh ah na khempeuh ahi theih nadingin ama nuai-ah na khempeuh a koihnapa Tapa mahmah zong ama nuai-ah a koih ding hi. 29 Tua hi-a thawhkikna om lo hileh misi adinga kibaptise-te in bang hih ding uh ahi hiam? Misi kithosak lo hileh bang hanga amaute adingin mite kibaptise uh ahi hiam? 30 Kote adingin bang dinga a nai simin ko le ko kilausak ka hi uh hiam? 31 Sanggamte aw, nisimin ka si hi – ka cih pen i Topa Khrist Jesu sungah note kong minthanpih bang tektek hi, ka cihnopna ahi hi. 32 Mihing ngaihsutnate hang lelin Ephesus a gamsa gilote tawh ka kilai leh bang lawhtak ka hi hiam? Misi kithosak lo ahileh, “Zing cianga si ding i hi manin ne-in dawn lel ni”d 33 Mi khemsa-in om kei un: Kikholhpih hoih lo in tatzia hoih siasak hi.” 34 Note ahi ding bangin kiphawk kik unla, mawh nawn kei un; Pasian phawk lo pawlkhat om na hi manun na maizum nadingun hih thu kong gen hi. 35 Ahi hangin mi pawlkhat in, “Misite bang kici thawhkiksak hiam? Amaute bangci pumpi hong hi ding hiam?” ci-in dong thei kha ding hi. 36 Haihuai na zen e! Na tuh pen a sih phot kei leh a hing thei kei hi. 37 Na tuh ciangin a kungpi ding pen na suan kei hi; mangbuh ci ahikeh adang khatpeuh na tuh hi. 38 Ahi hangin Pasian in ama geelsa bangin kung guana, khaici nam tekah amau kung ciat a guan hi. 39 Sa khempeuh a kibang kim kei hi. Mihing in sa nam khat i nei hi. Gamsate in atuam, vasate in atuam, ngasate in atuam a nei hi. 40 Van pumpite zong om-a lei pumpite zong a om hi; ahi hangin van pumpite a thupina nam khat hi a, lei pumpite a thupina a namtuam khat ahi hi. 41 Ni in thupina nam khat nei a, kha in adang khat nei-in, aksite in zong adang khatmah a nei uh hi. Aksi ciatciat zong a thupina a kibang kei hi. 42 Misite thawhkikna zong tua tawh a kibang ding hi. A kituh pumpi a sia thei ahi hi. A sia thei loin a kithokiksak hi; 43 a simmawh huai-in kituh a, minthanna in kithokiksak hi. A thanemin kituh a, a vanglianin kithokiksak hi; 44 pianpih pumpi-in kituh a, kha pumpi in kithokiksak hi. Pianpih pumpi om ahileh kha pumpi zong a om hi. 45 Tua ahi ciangin “Mi masa Adam, a nungta mi suak hi.”e ci-in kigelh hi. A nunung Adam, nuntakna a pia kha ahi hi. 46 Ahi hangin khalam a om masa kei a, pianngei om masa-in tua khit ciangin khalam a om pan hi. 47 Mi masapen leitang vui tawh kibawl hi a, a nihna mi vantung pan ahi hi. 48 Lei mipa bangin lei mite a om uh hi. Vantung pana mipa bangin vantung a te a om uh hi. 49 Lei mipa tawh kibatna i neih bangin eitef in vantung pana mipa tawh kibatna i nei ding hi. 50 Sanggamte aw, si le sa in Pasian gam a luah thei kei hi, a kisia thei na in a kisia thei lo na a luah thei kei hi, cih note tungah kong pulak hi. 51 Ngai un, thuthuk khat kong gen ding hi: Eite khempeuh i ihmu kim kei ding hi. 52 Ahi hangin a nunung pengkul a mut ciangin thakhat thu mitphiat khat sungin i vekpi-in i kikhel ding hi. Ahang in, pengkul hong ging dinga, misite a sia thei lo dingin kithosak dinga eite i kikhel ding hi. 53 Ahang in, a siatheite in siat theihlohna silhin, a si theite in sihtheihlohna a silh ding hi. 54 A sia theite in siat theihlohna silh-a a si theite in sih theihlohna a silh ciangin: “Gualzawhna sungah sihna kivalhtum zo hi.”g 55 "Sihna aw, na gualzawhna koi-ah om hiam! Sihna aw, na gu koi-ah om hiam?”h ci-a kigelh thu a tung ding hi. 56 Sihna gu in mawhna hi-a mawhna vangliatna in thukham ahi hi. 57 Ahi hangin Pasian tungah lungdamna om ta hen! Amah in eite Topa Jesu Khrist tungtawnin gualzawhna hong pia hi. 58 Tua ahi manin kong it sanggamte aw, kiptakin ding un. Bangmah kilokzosak kei un. Topa sungah na nasepna uh a mawkna ahi loh lam thei na hi uh ciangin Topa nasem dingin nomau mahmah na kipum piak tawntung un.

1 Korin-Te 16

1 Tu-in Pasian mite ading kaihkhopna thu: Galatia pawlpite hih dinga ka gen bangin na hih un. 2 Kong pai cianga kaihkhop a kul nawn lo dingin nipi kalkhat a ni masapen simin na sum ngahzah uh tawh kizui-in sehkhia ciat unla, na koih un. 3 Kong tun ciangin no hoihsak mite thu ka pulakna lai ka gelh dinga, na letsongte uh tawh Jerusalem ah amaute ka puasak ding hi. 4 Kei zong ka va pai ding a kul leh amaute ka tonpih ding hi. 5 Macedonia gam tawna pai ding ka hi manin Macedonia ka nawk khit ciangin no kiangah kong pai ding hi. 6 Note kiangah tomkha sung bang kong taam thei kha ding hi. Ahi kei leh ka paina peuhpeuha ka khualzinna nong huh theih nadingun phalbi sung nangawn ka taam kha ding hi. 7 Tu laitakin ban pak ding bek ka ut kei hi. Topa in hong phal leh no kiangah tawmvei sung kong taam ding ka lamen hi. 8 Ahi hangin Pentecost ni dong Ephesus ah ka taam ding hi. 9 Bang hang hiam cih leh kei adingin a lawhcin huai nasep theihna kong lianpi khat hong kihon zo hi. Ahi zongin kei hong langpan tampi a om hi. 10 Timothy hong pai leh no kiangah a om sung bangmah a kihtak loh nadingin na bilpil un. Ahang in, amah zong keimah banga Topa na a sem den ahi hi. 11 Tua ahi ciangin amah san ding kuamah in nial kei hen. Kei kiangah hong ciah kik theih nadingin a khualzinna ah lungmuangtakin na kha un. Amah sanggamte tawh hong tonkhawm dingin ka lamen hi. 12 I sanggampa Apolos tawh kisai-in: Sanggamte tawh no kiangah pai dingin nakpitakin ka kun hi. Tu-in hong pai nop het loh hangin hun hoih a neih peuhpeuh ciangin hong pai ding hi. 13 Note kikem un, upna-ah kiptakin ding un; pasal hangte hi un, thahat un. 14 Na khempeuh itna tawh sem un. 15 Stephanas-te innkuan Achaia ah a piangthak masapente hi uh a, amaute mahmah zong misiangte nasepna ah a kipumpiak zo mahmah uh ahilam na thei uh hi. 16 Sanggamte aw, hih bang mite le amau naseppihte khempeuh le tua lai-a nasem mite tungah na kiniamkhiat ding uh kong thum hi. 17 Stephanas, Fortunatus le Achaicus-te hong tun uh ciangin ka nuam hi. Bang hang hiam cih leh note tung pan a kisam laiteng amaute in hong puak uh hi. 18 Ahang in, amaute in kei lungsim le no aa zong hong thakhauhsak uh hi. Tua bang mite a phawktak hi. 19 Asia gam sunga pawlpite in hong hopih uh hi. Aquila le Priscillaa te in Topa sungah lungsimtak tawh hong hopih uh a, amau inn a kikhawm pawlpi mite in zong hong hopih uh hi. 20 Hih lai-a om sanggamte khempeuh in zong hong hopih uh hi. Kinapna siangtho tawh khat le khat na kihopih un. 21 Keimah Paul in hih hopihna keima khut tekteka ka gelh ahi hi. 22 Mi khatpeuh in Topa a it kei leh hamsiatna thuak ta hen. Topa aw, hong pai ta in!b 23 Topa Jesu hehpihna note tawh om ta hen. 24 Khrist Jesu sunga om note khempeuh tawh ka itna om ta hen. Amen.c

2 Korin-Te 1

1 Pasian deihna hanga Khrist Jesu sawltakpi Paul le i sanggampa Timothy in, Corinth a Pasian pawlpi tung le Achaia gam sung tenga misiangte khempeuh tungah: 2 I Pa Pasian le Topa Jesu Khrist tung pana hehpihna le lemna no tungah om ta hen. 3 Eite Topa Jesu Pasian le Pa, khuatuahna Pa le hehnepna khempeuh Pasian kiphat ta hen. 4 Pasian tung pana ka ngah uh hehnepna tawh gim thuakte ka hehnep theih nadingun amah in kote ka gim thuakna khempeuh panun hong hehnem hi. 5 Ahang in, kote nuntakna sunga hong luang Khrist thuaknate bang tektekin Khrist tungtawna hong pai kote hehnepna a dimlet hi. 6 Kote ka lungdon uh leh note hehnepna le hotkhiat nading ahi hi; kote hong kihehnem leh tua in kote thuak bangbang na thuak zawh nading uh note thuakzawhhatna hong guan hehnepna ahi hi. 7 Ko thuakte bang tektek na thuakna uh le kote hehnepna na ngah manun note adinga ka lametna uh a kip hi. 8 Sanggamte aw, Asia gama ka thuak uh haksatnate thu theihsak lo-a na om ding uh ka deih kei hi. Nuntakna nangawn khahsuah nading zahin kote thuak zawhzah valin hong kinehcih hi. 9 Hitakpi hi, ka lungsimun sihna thu khenna a thuak khinin ka kingaihsun uh hi. Ahi zongin ko le ko kimuang loin misite a thosak Pasian ka muan nadingun hih thu a piang ahi hi. 10 Amah in kote tua banga lauhuai sihtheihna panin hong hukhia khin a, hong hukhia lai ding hi. Na thungetna uh tawh nong huhna uh hangin amah in hong hukhia lai ding ci-in amah ka lamen uh hi. 11 Tua ciangin mi tampite thungetna dawnga, hehpih angvanna ko tungah hong kipia ahi manin kotea tangin mi tampite in lungdamna a ko kik ding uh hi. 12 Kote kisialhna hih ahi hi: Leitunga ka gamtatnate uh le a diakdiakin note tawh i kizopna thu ah kote ngaihsutna zang loin Pasian tung pana sianthona le cihtakpina tawh ka gamtatna uh ka lungsim kitheihna un teci a pang hi. Kote in leitung pilna tawh kizui-in hih loin Pasian hehpihna tawh kizui-in tua bangin ka hih uh hi. 13 Ahang in, note in na sim theih loh ding uh le na theihtel loh dingun bangmah kong gelh kei uh hi. 14 Tua ciangin note in kote a kim lo-a nong theihsa uh bangin Topa Jesu ni ciangin kote in note kong kisialhpih ding bangun note in zong kote hong kisialhpih thei ding ci-in a cingtaka na theihtel takpi ding uh ka lamen hi. 15 Hih mah ka muan manin nihvei na hamphat theih nadingun note kianga hawh masak dingin ka geel hi. 16 Macedonia a ka pai kawmin no kiangah hong hawhin, Macedonia pan kong ciah ciangin hong bang leuleu lenga, Judea ka manawh ciangin hong kha le uhcin ci-in ka geel hi. 17 Hici-a ka geel ciangin baihtaka geelziau ka hi hiam? Ahikeh lei mite hih bangin, Hihi, hihi,” le “Hikei, hikei,” cih a thuah lel ka hi hiam? 18 Ahi hangin Pasian a muanhuai takpi bangin kote in note tunga kong thupuak uh, “Hihi,” le “Hikei,” a hikhawm kei hi. 19 Ahang in, note lakah kei le Silasb le Timothy in kong hilh uh Pasian Tapa Jesu Khrist thu ah, “Hihi” le “Hikei,” cih a hikhawm kei hi. Ahi hangin ama sungah, “Hihi,” cih a hiden hi. 20 Ahang in, Pasian in bangzah ta in thuciam a bawl khin zongin tuate Khrist sungah,"Hihi," cih ahi khin hi. Tua ahi ciangin ama tungtawnin Pasian minthan nadingin eite in, “Amen,” i ci hi. 21 Tu-in Khrist sungah note le kote kiptaka hong ding khawmsakpa Pasian ahi hi. 22 Amah in eite sathau hong nilh zo a, ama hong neihna seal eite tungah hong khenin, hong tung ding ciamna-in khamkholhna ama Kha eite lungsungah hong koihsak hi. 23 Corinth ah kong kileh kik lohna note kong dopna ahilam ka teci ding Pasian ka ko hi. 24 Note upna tunga kiliansak hi loin, note na upna hangun kiptaka ding na hi manun, na lungnop nadingun no tawh a semkhawm ka hizaw hi.

2 Korin-Te 2

1 Tua ciangin note a dahsaka kong hawh nawn loh nadingin ka lungsim ka khensat hi. 2 Ahang in, note hong dahsak leng kong dahsak note longal kei hong nuamsak ding kua dang om ahi hiam? 3 Kong pai ciangin kei hong lungnuamsak dinga kilawmte in hong lungkhamsak loh nadingin hih bangin lai kong gelh hi. Kei lungnopna hong lungnoppih dingin note khempeuh tungah muanna ka nei hi. 4 Ahang in, note kong lungkhamsak nopna hi loin kong itna athukzia kong theihsak nopna-in lungdonna lianpi, lungsung natna le khitui tampi tawh lai hong gelh ka hizaw hi. 5 Ka uanggenna hi loin mi khatpeuh in lungkhamna a piansak leh note khempeuh hong lungkhamsakna zahin kei hong lungkhamsak lua kei hi. 6 Mi a tamzawte in ama tungah gawtna a piak uh ama adingin kicing khin hi. 7 Tu-in ahileh tua sangsikin amah a khengvala dahna in a vukcip loh nadingin maisakin na hehnep zawk ding uh kisam hi. 8 Tua ahi manin amah na itna uh kipsak kik dingin note kong kun hi. 9 Lai kong gelhna pen note in zia-etna thuak zo-in na khempeuh ah na thumang uh hiam, cih kong zia-etna ahi hi. 10 Note in mi khatpeuh na maisak uh leh kei zong amah ka maisak hi. A mawhna ka maisak khitin maisak ding dang a om lai leh note tangin Khrist muhna ah 11 Satan in eite hong nopneh loh nadingin amah ka maisak hi. Ahang in, ama hong sawmnate i haih kei hi. 12 Troas ah Khrist lungdamna-thu gen dingin ka pai lai-in Topa in kei ading kong khat hong honsak hi, cih thei napi, 13 tua lai-ah ka sanggampa Tita mu lo ka hi manin ka lung a nuam kei lailai hi. Tua ciangin amaute mangpha ka khaka, Macedonia ah ka paisuak hi. 14 Ahi zongin Khrist hanga gualzawhna ah hong makaih den kote tungtawna ama theihna namtui mun khempeuh ah a kizelsakpa Pasian tungah lungdamna om ta hen. 15 Ahang in, a kihonkhiate le a mangthangte lakah kote, Pasian tungah gimnamtui ka hi uh hi. 16 Khat tungah sihna gimnam ka hi uh a, adang khat tungah nuntakna gimnamtui ka hi uh hi. Tua bang nasem dingin kua kicing ahi hiam? 17 Mi tampite tawh kibang loin met nadingin Pasian thu ka thangbawl kei uh hi. Tua sangsikin Pasian kiang pana kisawl mite bangin Pasian mai-ah cihtakna tawh Khrist sungah thu ka gen uh hi.

2 Korin-Te 3

1 Kote, ko le ko kiphat kik dinga kipan ka hi uh hiam? Ahikeh mi pawlkhatte bangin note tungah ahikeh note tung panin panpihna laite kisam ka hi uh hiam? 2 Note mahmah kote lungtang tunga kigelhsa, mi khempeuh in thei-a a sim uh lai na hi uh hi. 3 Note Khrist tung pana lai na hi uh a, kote nasep gah, laitui tawh kigelh hi lo, a nungta Pasian Kha tawh a kigelh, suangpekte tungah hi lo, mihing lungtang pekte tunga kigelh lai na hina uh na lak uh hi. 4 Khrist tungtawnin kote in Pasian mai-ah tua zahta kimuanna ka nei uh hi. 5 Na khatpeuh ko pana piang hi, ci-a ngaihsun dingin ko mahmah in kicinna ka nei kei uh hi. Kote kicinna Pasian tung pan hizaw hi. 6 Amah in kote lai-a gelh hi loin Kha in thukhun thak nasemte bangin hong kicingsak zo hi. Ahang in, lai gelh in that a, ahi hangin Kha in nuntakna a pia hi. 7 Tu-in sihna hong tun nasepna, tua suang tunga kigelhkuak laimalte a mual thei minthanna hi napi-in Israel-te in Moses maitang tangtaka a et theihloh zah a, minthanna tawh hong tung ahileh 8 Kha nasepna minthang zawtham lo ding ahi hiam? 9 Mihingte a mawhpaih nasepna minthang ahileh thumaanna hong tun nasepna nak minthan zaw ngel ve! 10 Ahang in, a minthang ngeisa in a minthang zaw tham tawh tehin tu-in minthanna a nei nawn kei hi, 11 A mual thei nangawn minthanna tawh hong tung ahileh a om den minthanna bangzahin a lianzaw tham tam! 12 Tua ahi manin tua bang lametna ka neih khit nungsangun ka hang mahmah uh hi. 13 Kote ka hi uh leh a maitanga a vangtannate a mual hiaihiai lam Israel-te in a muh loh nadinga a maitang puan a khuhpa Moses bang ka hi kei uh hi 14 Ahi hangin amaute lungsim kimawlsaka tuni dongin thukhun lui a kisim ciangin tua khuhna puan mah a om lai hi. Khrist tungtawnin kilakhia thei bek ahi manin a kihawkkhiatsak nai kei lai hi. 15 Tuni dong nangawnin Moses laite a kisim ciangin khuhna puan in amaute lungtang a khuh lai hi. 16 Ahi hangin mi khatpeuh Topa lamah a kihei peupeuh ciangin khuhna puan a kihawkkhia ahi hi. 17 Tua Topa pen tua Kha hi-a, Topa Kha a omna ah suahtakna a om hi. 18 Maitang kikhuh lo-a Topa minthanna a tang sawnsaka kote pen Kha ahi Topa tung pana hong tung, a lian semsem minthanna tawh amah bang dingin hong kibawlpha den hi.

2 Korin-Te 4

1 Tua ahi manin kote in Pasian lainatna tungtawna hih nasep ka neih khit nungsangun ka lungkia kei uh hi. 2 Tua sangin a simtham le a zumhuai-a gamtatnate ka tawpsan uh hi. Khem bawlnate zang loin Pasian thu zong ka lehkaih kei uh hi. Tua sangsikin tua thutak teltakin ka pholak uh a, Pasian mitmuh ah mi khempeuh lungsim tawh kituakin ka om zaw uh hi. 3 Tua ciangin ko gen lungdamna-thu a kikhuh leh zong a mangtangte adinga kikhuh hi lel hi. 4 Pasian lim a hipa Khrist minthanna lungdamna-thu khuavak a muh theih loh nadingun a um lote lungsim mit hih khanghun pasian in a tawsak hi. 5 Ahang in, kote in ko thu ka gen kei uh a, Jesu Khrist Topa a hina le Jesu hanga note nasem ka hina uh ka genzaw uh hi. 6 Ahang in, “Khuamial lak panin khuavak tang hen,”a a cipa Pasian in Khrist maitang a om Pasian minthanna, tua theihna khuavak hong piak nadingin kote lungsim sungah khuavak hong tangsak hi. 7 Ahi hangin na khempeuh sanga lianzaw, a vangliatna kote tung pan hi lo Pasian tung pan a hina a kilat nadingin hih gou, leibeelte sungah ka nei uh hi. 8 Kote ka kimkot panun nakpi-in hong kinehcih hangin netkhapin ka om kei uh hi; amkhamin ka om uh hangin lung mangin ka om kei uh hi; 9 bawlsiatin ka om uh hangin taihsatin ka om kei uh hi; hong kisattuk hangin hong kisusia kei hi. 10 Kote pum tungah Jesu nuntakna zong a kilaak theih nadingin kote pumpi ah Jesu sihna ka pua kawikawi uh hi. 11 Ahang in, a si thei kote pumpi tungah ama nuntakna a kilat theih nadingin a nungta kote, Jesu hanga si dingin piakkhiatsa in ka om tawntung uh hi. 12 Tua ahi tak ciangin kote sungah sihna in na sem a, ahi hangin note sungah nuntakna in na a sem hi. 13 "Ka um hi; tua ahi manin ka gen zo hi”b ci-in kigelh zo hi. Tua upna kha mah tawh kote in zong ka um uh a, tua ahi manin ka gen uh hi. 14 Bang hang hiam cih leh misi pana Topa Jesu a thosakpa in Jesu tawh kote hong thosak khawm dinga, ama omna ah kote tawh note hong tunkhawm ding hi, cih ka thei uh hi. 15 Hihte khempeuh note phattuam nading hi-a, mi a tam semsemte kianga tung, tua hehpihna in Pasian minthan nading lungdamkohna a dimlet a piansak theih nading ahi hi. 16 Tua ahi manin ka lungkia kei uh hi. Ka pualam uh a kiamkiam hangin ka sunglam uh a ni a ni-in hong kithak suaksak hi. 17 Ahang in, a cihtak lo le hun tomno sunga ka thuak uh lungkhamnate in tuate khempeuh a khup tawntung minthanna kote hong ngahsak hi. 18 Tua ahi ciangin a kimu theite mitsuan loin a kimu thei lote ka mitsuanzaw uh hi. Ahang in, a kimu theite tomkha kal sung bek om a, a kimu thei lo pen ahileh a om tawntung ahi hi.

2 Korin-Te 5

1 Tu-in eite tenna leibuk a kisiat leh mihing khut tawh kibawl lo, Pasian bawlsa tawntung inn khat vantungah i neih lam i thei hi. 2 Tu laitakin vantunga ten nading hong kisilhsak ding lunggulhin i thum i tau hi. 3 Bang hang hiam cih leh eite hong kisilhsak ciangin guaktangin i om kei ding hi; 4 ahang in, eite hih buk sungah i om laitakin hong kigimsaka i tau hi; tua pen silh loh ding i ut man hi loin i vantung tenna hong kisilhsak ding i ut man le a sithei pen nuntakna in a valh ding i ut man hizaw hi. 5 Tua hi-a hih ding mah a eite hong bawl Pasian in hong tung ding khamkholhna-in Kha hong piakhol zo hi. 6 Tua ahi manin eite muangtakin i om den a, i pumpi-a i om laitengin Topa kiang tawh i kigamlat lam lah i thei hi. 7 Eite muhna tawh nungta loin upna tawh i nungta hi. 8 Eite lungmuangtakin i om a, pumpi nusia-in Topa tawh inn a omkhawm ding i utzaw lai hi, ka ci hi. 9 Tua hi-a i pumpi inn ah i om a, i om kei zongin amah i lungdamsak ding i tuppi pen ahi hi. 10 Ahang in, eite khempeuh Khrist thukhenna tokhom mai-ah i ding pelmawh ding hi. Tua ciangin mi khempeuh in asia ahi zongin apha ahi zongin, pumpi-a a om sunga a hihsate hangin amau ngah dinga kituakte a sang ding uh hi. 11 Tua ahi ciangin kote in Topa kihtakzia ding thei ka hi manun mite zol ding ka hahkat uh hi. Kote ka hi bangun Pasian mai-ah a kiteltakin ka kilang uh a, tua pen mah note in zong na lungsim uh tawh na theihtel ding uh ka lamen hi. 12 Lung sunga om pen hi lo, a kimu thei pen a kisaktheihpihte na dawn theih nadingun note tungah hong kisial kik ka hi kei uh a, kote nong kisaktheihpih nadingun hun hoih hong bawlsak ka hizaw uh hi. 13 Kote ka hai uh leh Pasian hang ahi hi; ka hai kei uh leh note ading ahi hi. 14 Ahang in, mi khempeuh adingin mi khat si-a, tua ahi manin mi khempeuh si hi, cih taksang takpi ka hi manun Khrist itna in kote hong sawl teitei hi. 15 Tua hi-a ama hangin a nungtate amau adingin nungta nawn loin amau adingin si-a, a tho kiksakpa adingin a nuntak theih nadingun amah mi khempeuh tangin a si hi. 16 Tua ahi ciangin tu-a kipan kote in leitung mite muh bangin kuamah ka mu kei uh hi. Khatvei lai-in hih bangin Khrist ka na mu uh a, tu-in ka mu nawn kei uh hi. 17 Tua ahi ciangin mi khatpeuh Khrist ah a om leh amah piansak thak ahi hi; alui pen beimanga, athak a tung zo hi! 18 Hihte khempeuh Khrist tungtawna kote amah tawh hong kilemkiksaka kilemna nasep hong piapa Pasian tung pan ahi hi: 19 Pasian in Khrist tungtawnin leitung amah tawh kilemsaka, mihingte mawhna amaute mawhna-in a simsak kei hi. Tua hi-a, tua kilemkiksakna thupuak kote hong kemsak hi. 20 Tua ahi manin kote tungtawnin Pasian in hih ngetna hong bawl bangin kote Khrist palaite ka hi uh hi. Kote in Khrist tangin: Pasian tawh kilemkik un, ci-in kong thum uh hi. 21 Eite ama tungtawnin Pasian thumaanna i suah theih nadingin Pasian in mawhna a nei lo amah eite adingin mawhnaa a suaksak hi.

2 Korin-Te 6

1 Pasian tawh na semkhawm ka hi uh bangin Pasian hehpihna kimanna a nei lo-a ngah na suah loh nadingun kong thum uh hi. 2 “Kong angvan hunin note kong za a, hotkhiatna ni-in note kong huh hi,”a ci hi. Pasian angvan hun tuhun hi-a, hotkhiatna ni tuni ahi hi, cih kong gen hi. 3 Kote nasep a kiminsiatsak loh nadingin kuama lamlai-ah kimuktuk nading ka koih kei uh hi. 4 Pasian nasemte ka hi mah bangun lam khempeuh ah ko le ko a phathuai-in ka kilangsakzaw uh a: bawlsiatna thuakna ah; lungmanna ah, haksatna le lungdonna ah; 5 satnate ah, koltanna le ngongtatna ah; naham sepna, zana ihmut theihlohna le gilkialna ah; 6 siangthona, theihtelna, lungduaina le migitna ah; Khasiangtho le it takpina in; 7 thutaka genna le Pasian vangliatna tawh; veilam le taklama thumaanna galhiam tawh; 8 minthanna le simmawhna lakah, siatgenna le phatgenna lakah; a taktak hi napi a khema kingawhna bangin, 9 kithei napi a kithei lo bangin; sidekdek napi ka nungta uh hi; hong kisatgawp napi hong kithat liang lo a; 10 dah napi ka lungnuam tawntung uh a; zawng napi mi tampi ka hausak uh a; bangmah nei lo napi, na khempeuh ka nei uh hi. 11 Corinth-te aw, note kiangah siit nei loin thu kong gen uh a, ka lungtang uh zapi kong hon uh hi. 12 Kote in note tungah ngaihna ka kidaam het kei uh a, kote tungah note na kidaam zaw uh hi. 13 Ko aa bangin a kilawma nong thukna-un note in zong na lungtang uh zapi in hong hon un, ci-in tate tunga thugen bangin kong gen uh hi. 14 Thu um lote tawh hakkol na zawng khawm kei un. Ahang in, thumaanna le gitlohna in bang kikop khawm ahi hiam? Ahikeh khuamial le khuavak in bang kipawl khawmna nei thei ahi hiam? 15 Khrist le Belialb kikal ah bang kithutuahna om ahi hiam? A umte le a um lote in bang neikhawm ahi hiam? 16 Pasian biakinnpi le milimte kikal ah bang kithukimna om ahi hiam? Ahang in, eite a nungta Pasian biakinnpi i hi hi. Pasian in: "Amaute tawh ka teng dinga amaute lakah gamtangin, amaute Pasian ka hi dinga amaute keima mi ahi ding uh hi,”c 17 "Tua ahi manin amaute lak panin paikhia unla, a tuamin om un. Topa in ci hi. A siang lo peumah lawng kei le uhcin note kong sang ding hi.”d 18 "Keimah note Pa ka hi dinga, note ka tanu ka tapate na hi ding uh hi. Thahatpen Topa in ci hi.”e a cihsa ahi hi.

2 Korin-Te 7

1 Kong it lawmte aw, hih kamciamte i neih khit nungsang, pumpi le kha a buahsakte khempeuh panin ei le ei kisiangthosakin Pasian zahtakna tawh siangthona ah bukimin om ni. 2 Note lungtang sungah kote mun hong awn un. Kote kuama tungah ka khial kei uh a, kuamah siasak loin, kuamah ka zawhthawhbawl kei uh hi. 3 Note mawhpaih nadinga hih thu hong gen ka hi kei hi. Note tawh sihkhawm ahi zongin nuntak khawm nading zah dongin kote lungsim sungah note na teng uh hi, cih kong genkhol khin zo hi. 4 Note kong muang mahmah hi; note kong kisaktheihpih mahmah hi. Keimah nakpi-in kihan thawnin, kote lungmanna khempeuh ah ka lungnopna uh a dimlet hi. 5 Ahang in, kote Macedonia a kong lut lai-un hih ka pumpi uh a tawlnga ngei kei hi. Ahi hangin kote kiheina peuhpeuh ah pualam ah kidona, sunglam ah launate ka tuak den uh hi. 6 Ahi hangin a kinengniamte a hehnempa Pasian in, Tita hong tunna tawh hong hehnemin, 7 ama hong tunna hang bek hi loin note in amah na hehnemna hang uh zong ahi hi. Amah in kote kiangah kei nong lunggulh uh, na dahluatna uh, kei nong lunghi mawh luatna uh thute hong gena ka lungnopna a lianzaw sem hi. 8 Lai kong khak hanga note hong dahsak ka hileh zong ka kisik kei hi. Ka kisik ta zongin kong laikhak in na lungsim uh a natsak lam ka thei a, ahi hangin tomcik sung bek ahi hi. 9 Note kong dahsak hang hi loin, na dahna un note hong kisiksakna hangin tu-in ka lung a dam hi. Ahang in, Pasian geel banga dah na hi uh hi; banglam banglam ah kote hong natsak hi lo hi. 10 Pasian lama dahna in hotkhiatna a tun kisikna piangsak a, a kisuanlah huai kei hi. Ahi hangin leitung dahna in sihna a tun hi. 11 En dih un hih Pasian lama dahna in note sungah bang cihtakna, no le no kihahsiang nop nading bang lawpna, bang ngaihdahna, bang patauhna, bang lunggulhna, bang lunghi mawhna, amaana thukhen ding a tunsak lam mu un. Hih thu tawh kisai-in bangmah peuhah na mawhpen' lam uh na kiciansak zo uh hi. 12 Tua hi-a note kiangah ken kong gelh ta zongin a khiala gamtapa hang hi lo a, a thuakte pawl hang zong ahi tuan kei hi, ahi hangin kote tungah note na kipiak zawhna uh nomau le nomau in Pasian mai-ah na muh theih nading uh hizaw hi. 13 Hihte khempeuh hangin kote hong kihanthawn hi. Kote hong kihanthawn banah note khempeuh hanga Tita in lungsim thathak a ngah mana a lungdam luatna ka muh uh ciangin ka nuam diak uh hi. 14 Ama tungah note kong kisaktheihpih a, tua thu ah nong zahlaksak kei uh hi. Ahi hangin note tunga kong gente khempeuh uh a maan ahi bangin Tita tunga note kong kisaktheihpihna uh zong a maanna hong lak hi. 15 Note khempeuh in a thu mangin lau le ling kawmin amah na san uh, a ngaihsut kik ciangin amah in note hong itna a lian semsem hi. 16 Note tungah muanna a kim kong neih theih manin ka nuam hi.

2 Korin-Te 8

1 Sanggamte aw, tu-in Macedonia pawlpite tunga Pasian piak hehpih na thu na theih ding uh ka deih hi. 2 Amaute nakpi-a zia-et bawlsiatna lak pan, a lungnopna uh a dimletna le a zawn luat mahmahna panun nakpi-a citna nak nei-in a phulto hi. 3 Ahang in, amaute in a piak theih zahzah uh le a piak theihzah val nangawn uh a piak lam uh ka theihpih hi. Amau utthu-in, 4 misiangte ading nasepsakna amau zong hamphatna a tanh theih pah nadingun kote kiangah hong ngen uh hi. 5 Ko lamet bangin hih loin Topa tungah amau mahmah kipia masa-in tua khit ciangin Topa deihna tawh kituakin ko tungah hong kipia uh hi. 6 Tua ahi ciangin Tita in a masa lai-a a na patkhitsa ahi manin hih note hehphna nasep hong zawhpih vet dingin amah ka na kun uh hi. 7 Ahi hangin note upna, thugenna, theihna, cihtakna khempeuh le kotea nong itna uhah midangte sangin na tungnun zawk uh bangin hih piakna tawh kisai hehpihna ah zong na tungnung zaw un. 8 Note thu kong pia kei hi. Ahi hangin midangte cihtakna tawh tehin note itna a taktak ahina kong theih nop man ahi hi. 9 Ahang in, i Topa Jesu Khrist hehpihna na thei uh hi; ama zawnna tungtawna na hauh theih nadingun amah a hau hi napi note hangin a zawng hi. 10 Hih thu tawh kisai-in note ading a hoih pen kong thuhilhna in: Nikum in note a pia masa bek hi loin tua banga piak ding a ut masa na hi uh hi. 11 Hih dinga utna tawh lawptaka sep na sawm bangun na neih bangbang uh tawh kituak pia-in hih nasep na zosiang un. 12 Ahang in, utna a om nak leh a neih loh tawh kizui hi loin a neih tawh kizui-a a piak letsong a santak ahi hi. 13 Midangte vanzansak nadingin note vangik suat hong sawm ka hi kei uh a, a kikim ciat nading a deih ka hizaw uh hi. 14 Amaute hauhna in note tangsapna hong huk kik theih nadingin tu laitaka note hauhna in amaute sapna a hu ding hi. 15 "Tampi a khawmpa in tam lua nei lo a, tawmkha a khawmpa inlah tawm lua a nei kei hi”b ci-a kigelhsa bangin tua ciangin kikim dimdiamna a om ding hi. 16 Keimah in note kong lunghimawh bang lunghimawhna Tita lungsim sunga a guanpa Pasian tungah lungdam ka ko hi. 17 Ahang in, Tita in ka ngetna uh hong thukimpih bek hi loin ama lungsim tup tawmna bangin note kiangah lawptakin hong pai ding ahi hi. 18 Tuateh lungdamna-thu nasepna ah pawlpi mi khempeuh in a pahtak uh sanggampa amah kong zuisak uh hi. 19 Tua banah amah pen sumpi puaka ka pai lai-un kote hong zui dinga pawlpite in a teelpa uh ahi hi. Topa mahmah pahtawi nading le huh nuam ka hina uh lahna-in tua sum piak ka hawm uh hi. 20 Citna tawh a kipia hih letsongte ka zek uh ciangin gensiatna ka pelh nuam uh hi. 21 Ahang in, Topa muh bek hi lo mihingte muh mahmah in zong amaan na sem dingin ka hih theih tawpun ka kidawm uh hi. 22 Tua banah ka sanggampa un lam tampi ah ama lawpna hong latsak tham loin note hong muanna lianpi hangin amau tawh kong sawl uh hi. 23 Tita ahileh note laka ka naseppih le ka kikoppih hi-a, ka sang gam dangte uh ahileh pawlpi palaite le Khrist pahtawina ahi uh hi. 24 Tua ahi manin note in kong itna uh le kong kisaktheihpihna uh ahang pawlpi in a muhtel theih nadingun hih mite tungah na lak un.

2 Korin-Te 9

1 Misiangte tunga hih nasepna thu no tungah lai-a gelh ding kisam ka sa kei hi. 2 Ahang in, midangte huh nading na lawpna uh ka thei zo a, nikum nungsang no Achaia gama omte a pia dingin a kithawisa-a om cih thu Macedonia gama omte tungah ka kisialhpih densa ahi hi. Tua ciangin note thalawpna in amaute a tamzaw nasep thanuamsak hi. 3 Ahi hangin, note kong kisaktheihpihna uh a hawmsuak loh nadingin amaute a kithawisa uh ahi hi, ka cih bangin a kithawisa na hih theih nadingun sang gamte kong sawl hi. 4 Ahang in, Macedonia-te khatpeuh in kei hong zuih a, note a kithawisa-in hong muh kei leh note kong muan gen mahmahsa ahi manin note gen loh kote zong ka maizum ding uh hi. 5 Tua ahi ciangin citpiak dinga na ciamsate uh pia dingin kithawikholsa-a na om theih nadingun hong ma hawh dingin sanggamte kut ding kisamin ka um hi. Tua hileh itsa pipi-a piak hi loin phaltaka kipiasa citpiak ahina hong kilang ding hi. 6 Hih thu ciamteh un: A cil vawh peuhmah in tawmcik at dinga, phaltaka a vawh ziahziah peuhmah in tampi a at ding hi. 7 Mi khempeuh in piak dinga a lungsima a khensatsa bangin pia uh hen; lungsit pipi ahikeh piak loh phamawh cihna-in pia kei uh hen, ahang in, Pasian in lungtaitaka piate a it hi. 8 Na kisap khempeuh uh Pasian in nei-a, hun khempeuh ah na khempeuh na hauh theih nadingun nasep hoih tawh note tungah hehpihna khempeuh kicingsak thei hi. 9 "Amah in a zawngte tungah ama letsongte mun khempeuh ah a hawmthang zo hi; ama thumaanna a tawntungin kipden hi.”a ci-in kigelh zo hi. 10 Khaici vawhpa tungah khaici pia a, a an ding anlum a piapa in, na sal ah antang khangsakin note thumaanna gah na khopte uh zong a tamsak semsem ding hi. 11 Note hun khempeuh ah na cit theih nadingun hauhna namcinin hong kihausak dinga, tua ciangin kote tung tawnin na citna uh Pasian tungah lungdamkohna suak ding hi. 12 Hih na nasepna uh Topa mite huhna bek hi loin Pasian tungah lungdam thu genna tampi a dimletna lahna hi lailai hi. 13 Na kilatkhiatna uh ahi tua nasepna hangin, Khrist lungdamna-thu na pulakna uh a zui thuman’na le amaute le mi khempeuh tawh na tanh khop uh na citna uh hangin mite in Pasian a phat ding uh hi. 14 Pasian in a hehpihna a dimletin note hong piakna hangin amaute in note hong lunggulhin thu hong ngetsak ding uh hi. 15 A kigen khin zo lo ama letsong hangin Pasian tungah lungdamna om ta hen.

2 Korin-Te 10

1 Note tawh i kimaituah cianga “zahkai” a, i kigamlat cianga “hang san” pa keimah Paul in Khrist lungnemna le migitna pansanin kong ngen hi! 2 Hih leitung mite gamtat bangin gamta-a hong ngaihsun mi pawlkhat tungah, kong pai ciangin hangtaka cih ka sawm bangin cih a kul loh nadingin kong thum hi. 3 Ahang in, leitunga teng ka hi uh hangin leitung mi bangin gal ka do kei uh hi. 4 Kote galdona galvante leitung galvante ahi kei hi. Tuate tawh kilehbukhin, akip mahmah kulhte phel nading Pasian vangliatna a neizaw hi. Kitotnate le 5 Pasian theihna langdo-in, kipilsaknate khempeuh ka phelkhia uh a, Khrist thu a mang dingin ngaihsutna khempeuh salin ka kai uh hi. 6 Note thuman’na khatvei-a a kicin siang nak leh thuman’lohna nasep peuhmah gawtna pia dingin kigingsa in ka om ding uh hi. 7 Note in nate a pualama kilangkhia bekin na en uh hi.a Mi khatpeuh in: Khrist aa ka hi hi, ci-a a kimuan leh amah tawh kibang zahin kote zong Khrist aa ka hilam uh ngaihsun kik hen. 8 Ahang in, note hong phelgawp ding hi lo, hong laamto dinga Topa hong piak thuneihna kidaam lo-a a suang ka hileh zong ka zumpih kei ding hi. 9 Ka laikhakte tawh note hong linthawn ka bat ding ka ut kei hi. 10 Ahang in, mi pawlkhat in, “A laikhakte gikin khauh naven, amah taktakin mi lungsim kuai zo kei, a thugen zong bangmahpi hi kei,” hong ci uh hi. 11 Tua bang mite in no kiangah om lo-a, ka laikhakte uh sunga ka gelh bangbangun note kianga ka om ciangin zong ka hih ding uh ahilam phawk uh hen. 12 Amau le amau a kiphat mi pawlkhatte laka kihel ahikeh a kitehkak ngam ka hi kei uh hi. Amau le amau mah kitehin, amau le amau mah a kitehkak uh ciangin amau a pil ahi kei uh hi. 13 Kote ka hi uh leh a kilawm zah valin ka kisial kei uh a, bangbang ahi zongin Pasian in kote adinga hong sehsaksa zah note nangawn hong huamkha ciangah ka kisial ding uh hi. 14 Note kiang hong tung khin lo bangin aval akanin ka kisial kei ding uh hi. Ahang in, Khrist lungdamna-thu tawh no ciangciang kong ban khin ta uh hi. 15 Ko adinga kisehsa valin midangte nasepsa a kisialhpih zong ka hisam kei uh hi.b Kote lametna ahileh na upna uh a khantohna bangbangin note laka ka nasepna uh nakpi-a a zai semsem nading ahi hi. 16 Tua banga note khena gamte ah zong lungdamna-thu ka gen theih nading uh ahi hi. Ahang in, midangte gamhuam sunga na kisemsa ka kisialhpih nuam kei uh hi. 17 Ahi hangin, “A kisial mi, Pasian sungah kisial ta hen,”c 18 Ahang in, amah le amah a kiphatte kuamah in sang lo-a Topa in a phat mi kisang hi.

2 Korin-Te 11

1 Note in ka haina tawmkha beek nong thuak zawh ding uh ka lamen hi; ahi hangin nong thuak zo khin uh hi. 2 Keimah in Pasian aamna-in note kong aam hi. Pasal khat tua Khrist tungah note nungak bit banga piak dingin kong kamciam zo hi. 3 Ahi hangin gulpi zuau siamna tawh Eve a khem zawh bangin Khrist tunga atak le a siangtho-a na kipiakna pan un na lungsim uh na pialsak khak ding uh ka lau hi. 4 Ahang in, no kiangah mi khatpeuh hong pai-in ko gen Jesu lo, Jesu dang khat thu hong genin, na ngahsa uh kha lo kha dang khat na ngah uh a, na sansa uh lungdamna-thu lo a kilamdang khat na san uh leh na nang zo kei baih lua uh hi. 5 Ahi hangin tua “sawltakpipente” sangin neukha zong a niamzaw in ka kingaihsun kei hi. 6 Thugen kisinna, a siam mi ka hi kholloh hangin theihna ka nei hi. Note tungah hih bang ka hina lam khempeuh ah kitel sinsenin ka langsak zo uh hi. 7 Note tungah man ngen loin Pasian lungdamna-thu ka genna tung tawnin a sangzaw munah note kong tut theih nadingin ka kiniamkhiatna kei adingin mawhna ahi hiam? 8 Note na ka sep nadingin pawlpi dangte pan huhna ngahin amaute aa ka sut hi. 9 Note kiangah ka om lai-in kisapna khatpeuh ka neih ciangin kuama vangik ka suak kei hi. Ahang in, Macedonia pana hong pai sanggamte in ka sapna teng hong pia uh hi. Note vangik ka suah loh nadingin lam khempeuh ah ka kikem a, tua bangin ka kikem lai ding hi. 10 Keima sungah Khrist thutak a om takpi bangin Achaia kuala omte khempeuh in hih ka kisialhna a beisak kei ding uh hi. 11 Bang hangin? Ken note kong it loh hang ahi hiam? Kong it lam Pasian in a thei hi! 12 A kisialhpih uh nate tawh kisai-a kote tawh kikima, a kingaihsut theih nading uh hun hoih a deih mite panmun ka bulkalh theih nadingun ka hih pen ka hih lailai ding hi. 13 Ahang in, tua bang mite sawltakpi zuau hi-a, zuauphuak nasemte, Khrist sawltakpi banga kineih tawmte ahi uh hi. 14 A lamdang hi lo hi. Satan zong amah le amah khuavak vansawltak khatin a kineih tawm hi. 15 Tua ahi ciangin ama nasemte thumaanna na sema, a kineihtawm uh leh lamdang sak ding ahi kei hi. Amaute beina in amau gamtatna tawh kituak ahi ding hi. 16 Kong gen kik inah: Kua mah in kei ahai-in hong ngaihsun kei hen. Ahi hangin nong ngaihsut uh leh tawm beek ka kisialhpih nadingin a haite na san bangun hong sang un. 17 Kei mahmah kimuanga ka kisialhna hih thu ah, Topa gen ding banga gen hi loin ahai banga gen ka hizaw hi. 18 Mi tampite leitung kisialh-a a kisialh nungsang kei zong ka kisial sam ding hi. 19 Pil lua na hi manun lungdam takin mihaite na thuak zo uh hi. 20 A taktakin note sal-a hong kai mi, note metna-a hong nei mi, hong zawh thawhbawl mi, amah le amah a kisangkoih mi, hong pangbet mite nangawn na thuak zo uh hi. 21 Tua bang dingin kote ka gina kei lua uh hi, cih maizumpipi-in kong gen hi. Mihai banga thu ka geninah: Mi khatpeuh in a kisialhpih ngam pen kei zong ka kisialhpih ngam hi. 22 Amaute Hebrew mi ahi uh hiam? Kei zong ka hi hi. Amaute Israel mi ahi uh hiam? Kei zong ka hi hi. Amaute Abraham suante ahi uh hiam? Kei zong ka hi hi. 23 Amaute Khrist nasem ahi uh hiam? (Mihai banga hih bang thu a gen ka hi hi) Kei ka hi zawsem hi. Na ka nak sepzaw hi; thong ah ka kia munzaw hi. A nasia zaw-in hong kisat hi. Sih theihna ah hong kitun pahpah hi. 24 Jew-te satna sawmli ah khatvei kiam, ngaveitak ka thuak hi. 25 Ciangpum in thumvei hong kisat hi. Suang in khatvei hong kideng hi. Tembaw kisiatna thumvei ka tuak hi. Sun khat le zan khat tuipi laizangah ka om ngei-a, 26 tawlnga loin mai ka nawt hi. Gunte ah lauhuaina, misuamte lauhuaina, keima gam mite kihtakhuaina, Gentile-te kihtakhuaina, khuapi sungah lauhuaina, gamlaka lauhuaina, tuipi tunga lauhuaina le sanggam-zuaute kihtak-huainate ka tuak zo hi. 27 Nakpitakin na semin ka gima, ihmu man lo liangin ka om thithe hi. Gilkial dangtakna ka thuak a, an ngawla ka om hun a tam hi. Ka guaktangin khuadam ka thuak hi. 28 Nadang khempeuh banah pawlpite khempeuh lunghimawhin nisimin ka lunggimpih lai hi. 29 Ken ka thanempih loh a thanem kua ahi hiam? Ka sunga ka thuakpih loh mawhna sunga om kua ahi hiam? 30 Kisial lo thei lo hileng ka ginatlohna hong lak nate ka sial ding hi. 31 A tawntunga kiphat ding Topa Jesu Pasian le Pa in ka zuau loh lam a thei hi. 32 Damascus a Kumpi Aretas khut nuai-a om ukpipa in kei hong matsak nadingin Damascus khuapi a cingsak hi. 33 Ahi hangin kulh tawhlet panin bawmin hong kikhaisuk a, amau khut panin ka suakta hi.

2 Korin-Te 12

1 Ka kisial lailai ding hi. Met nading bangmah a om kei zongin Topa tung pana mangmuhnate le kilaaknate ka gen lai ding hi; 2 a kilato Khrist sunga mi khat ka thei hi. A beisa kum sawm le li lai-in van thumna-a kila to, a pumpi-in maw, a pumpi loin maw, cih ka thei kei a, Pasian in a thei hi. 3 Hih mipa ka thei-a a pumpi-in hiam, a pumpi tawh kikhen hiam, ka thei kei hi; ahi hangin Pasian in thei-a, 4 paradise ah kilato hi. Amah in genkhiat theih loh nate, mihing gen dinga kiphal lo nate a za hi. 5 Tua bang mipa ka kisialhpih dinga ahi hangin kei tungtang ah ka thanemnate longal ka kisialhpih kei ding hi. 6 Thutak gen ding ka hi manin kisial nuam leng zong mihai ka hi kei ding hi. Ahi hangin ka thugen le ka nasepna in a kilatsak zah vala kuamah in hong ngaihsut loh nadingin ka kidawm hi. 7 Hih a lian pha mahmah kilaaknate hanga ka ki-uatsak luat loh nadingin kei hong gimsak ding, ka ci-le-sa sungah ling khat – Satan thupuapa khat kei hong kipia hi. 8 Kei tung panin tua hong kilakkhiatsak nadingin Topa tungah thumvei ka ngen zo hi. 9 Ahi hangin amah in, “Ka hehpihna nang adingin kicing hi; ahang in, thanemna sungah ka vangliatna kicing hi,” hong ci hi. Tua ahi manin Khrist vangliatna kei tungah a om theih nadingin lungdam semsemin ka thanemna ka kisialhpih ding hi. 10 Tua hi a, thanemnate, simmawhnate, thuaksiatnate, bawl-siatnate, haksatnate sunga ka lung-nopna Khrist hang ahi hi. Ahang in, ka thanem ciangin ka tha a khauh hi. 11 Keimah le keimah mihai kong kisuah a, ahi hangin note in tua banga nong bawl uh ahi hi. Note in kei nong phat ding uh ahi hi. Ahang in, bangmah ka hi lo hangin “sawltakpi-pente” sangin neucik zong ka niamzaw peuhmah kei hi. 12 Sawltakpi khat kiciamtehna limte alamdangte le nalamdangte note lakah lungduaitakin kibawl zo hi. 13 Note adingin vangik ka suah lohna lobuang pawlpi dangte sanga na niam zawkna uh bang om ahi hiam? Hih ka tatkhialhna hong maisak un. 14 Tu-in a thumveina note kiangah hong hawh dingin ka kithawi zo hi. Na neihsate uh deih ka hi kei hi, kei deih note hizaw na hi manun note adingin vangik ka suak kei ding hi. A taktakin, tate in nu le pate ading a khol ding uh hi loin nu le pate in tate ading a khol ding uh hizaw hi. 15 Tua ahi ciangin note adingin ka neihsa khempeuh lungdamtakin pia-in kei mahmah nangawn ka kizang nuam hi. Ken note kong it semsem leh note in kei hong it lo semsem ding na hi uh hiam? 16 Tua pen ahi hi, himai ta hen, note adingin vangik ka suak kei hi. Tua hi napi khemsiamin note khembawlin note hong man ka hi ve maw! 17 No kianga kong sawlte khatpeuh zangin a met lakna-in hong zang ka hi hiam? 18 No kianga pai dingin Tita ka kun-a, i sanggampa kong zuisak hi. Tita in note a met lakna-in hong nei lo hi, hong nei ahi hiam? Ka lungsim uh kibangin lam khat zuikhawm lo ka hi uh hiam? 19 Note tungah kote a kihu nilohin hong ngaihsun lai na hi uh hiam? Khrist sunga omte bangin Pasian mitmuh a thu gengen ka hi uh hi. Tua hi-a kong it lawmte aw, ka hih khempeuh uh note thakhauhsak nading ahi hi. 20 Ahang in, kong pai cianga note na hi ding uh kong deih banga kong muh loh khak ding le note in kei ka hi dinga nong deih bangua nong muh loh khak ding uh ka lau hi. Kitotna, kihazatna, heh-a kiselnate, kipawlkhennate, kidaisakna, kigensiatna, ki-uatsakna le buaina a om khak ding zong ka lau hi. 21 Note kiangah kong pai kik ciangin ka Pasian un note mai-ah hong niamkhiatin nidanga na khialhnasa uh: kihuai-gamtatna, numei-pasal mawhna, huk luatna lanluatnate hangin mawh napi a kisik lo mi tampite hangin ka dah khak ding ka lau hi.

2 Korin-Te 13

1 Hih in note kianga kong hawh a thumveina ding ahi hi. “Thu khempeuh teci nih ahikeh thum theihpihna tawh kipsak ding ahi hi”a 2 Note kianga a nihveina kong hawh lai-in vauhilhna kong pia khin zo hi. Ka om loh kala mah, tu-in kong gen kikinah: Kong kileh kik ciangin a beisa huna a mawhte ahikeh adangte kuamah ka dawm kei ding hi. 3 Tua in, Khrist in kei tungtawnin thu gen ahi hiam, cih a kitelna na kalh sese hang uh ahi hi. Note hong thazawh dingin amah thanem lo a, note lakah vanglian hi. 4 Ahang in, a taktakin ama thenemna ah kikilhlum napi Pasian vangliatna hangin a nungta hi. Tua mah tawh kibangin ama sungah kote thanem napi note nasem dingin Pasian vangliatna hangin amah tawh ka nungta ding uh hi. 5 Upna sungah na om uh hiam, no le no kisittel ciat un; no le no kizia-et un. Na kizia-et uh ciangin cing zo lo na hi kei buang uh leh Khrist no sungah a ten lam thei lo na hi uh hiam? 6 Kote tua zia-etna ah cing zo ka hilam uh hong thei dingin kong muang hi. 7 Khialhna bangmah na bawl loh nadingun, tu-in Pasian tungah thu ka ngen uh hi. Zia-etna ah kote cing ka hina uh mite theih ding deihna hi loin, zia-etna ah cing zo lo banga ka kilat uh hangin note amaan-a na gamtat ding uh deihna hizaw hi. 8 Ahang in, kote in thutak langdoin bangmah ka hih thei kei uh hi; thumaan lam bekah ka pang uh hi. 9 Kote ka thanem laitakun note na thakhauh manun ka nuam uh hi; na kicinkim nadingun thu ka ngen uh hi. 10 Kong pai cianga phelkhiat nading hi lo, note lamtoh nadinga Topa hong piak thuneihna ka khauh zat luat loh nadingin ka om loh kala hih bang teng hong gelh ka hi hi. 11 A nunung penin sanggamte aw, mangpha na man un. Kicinkimna na tum unla, kong ngetna na ngai un. Lungsim kikhatin na kilem un. Itna le lemna Pasian in note hong ompih ding hi. 12 Kinapna siangtho tawh khat le khat na kihopih un. 13 Misiangte khempeuh in hong hopih uh hi.

Galatia-Te 1

1 Mihing pan hi lo, mite sawl zong hi lo, ahi hangin Jesu Khrist le misi pana amah a thosak Pa Pasian sawltakpi Paul le 2 kei tawh a omkhawm sang gamte khempeuh in, Galatia a om pawlpite tungah: 3 I Pa Pasian le Topa Jesu Khrist tung pana hehpihna le lemna note tungah om ta hen. 4 I Pasian le Pa deihna bangin tu a gilo khanghun pana eite hong hu dingin i mawh nate adingin amah le amah hong kipia Pa 5 Pasian tungah a tawntung in minthanna om den ta hen. Amen. Lungdamna-thu Adang Om Lo 6 Khrist hehpihna hanga note hong sampa tawh hizahta a manlangin ki khena, lungdamna-thu adang na sanpah uh lamdang ka sa hi; 7 tua na san uh lah lungdamna-thu a hi peuhmah kei hi. Mi pawlkhatte in Jesu Khrist lungdamna-thu lehkaihin note hong lungbuaisak nuam uh ahi hi. 8 Ahi hangin kote ka hi uh zongin vantung pana vansawltak khat ahi zongin note kianga kong gen uh ahi lo, lungdamna-thu dang hong hilh a om leh tawntung mawhpaih hi ta hen! 9 Kote in kong gensa bangun tu-in kong gen kikinah: Mi khatpeuh in na sansa uh lungdamna-thu lo adang hong hilh leh a tawntungin kimawhpaih ta hen! 10 Tu-in mihingte maipha ahikeh Pasian maipha a zong ka hi hiam? Ahikeh mihingte lungdamsak a sawm ka hi hiam? Mihingte lungdamsak a sawm lailai ka hileh Khrist nasem ka hi kei ding hi. Pasian in Paul Sam 11 Sanggamte aw, ka hilh lungdamna-thu, mihing bawltawm ahi loh lam na theih ding uh ka deih hi. 12 Mi khatpeuh tung pana ka ngah hi lo a, hong hilhsak zong ahi kei hi; Jesu Khrist tung pan kilaakna-a ka ngah ahi hi. 13 Ahang in, nidang lai-in Jew biakna ngeina sunga ka nuntak zia, Pasian pawlpi nakpi-a ka bawlsiat zia le suksiat gawp ka sawmzia na za zo uh hi. 14 Ka khangual Jew mi tampi sung panin ka madawk a, ka pate ngeina gumin nakpi-in ka hahkat hi. 15 Ahi hangin ka pian tunga kei hong sehtuampa le a hehpihna hanga kei hong sampa Pasian in, 16 Gentile-te laka ka gen theih nadingin lungkimtaka a Tapa kei sunga hong kilaaksak lai-in mi khatpeuh ka dong kei hi. 17 Kei ma-a sawltakpi ahi masate tawh kimu dingin Jerusalem ah zong ka paito kei a, ahi hangin Arabia ah paipah in tua khit ciangin Damascus ah ka ciah kik hi. 18 Tua zawh kum thum khit ciangin Peter tawh kimeltheih dingin Jerusalem ah paito-in ama kiangah ni sawm-le-nga ka taam hi. 19 Topa sanggampa James bek longal sawltakpi dang kuamah ka mu kei hi. 20 Note tunga kong gelh thu, zuau ahi loh lam Pasian mai-ah kong theitelsak hi. 21 Tua khit ciangin Syria le Cilicia ah ka pai hi. 22 Khrist sunga om Judea gam pawlpite kuamah in kei hong meltheih kei uh hi. 23 Amaute in: “Tunung lai-a eite hong bawlsia pa in, khatvei lai-a a suksiat a sawm tua upna thu tu-in a hilh ta hi,” ci-a kigen bek a za uh hi. 24 Keima hangin amaute in Pasian a phat uh hi.

Galatia-Te 2

1 Tua nung kum sawm-le-li ciangin Jerusalem ah ka paito kik hi; tua tungin Barnabas tawh ka hi hi. Tita zong ka tonpih hi. 2 Kilaakna thu manga pai ka hi-a, Gentile-te laka ka gen lungdamna-thu mah amaute mai-ah ka lui hi. Ahi hangin ka kitaitehna uh ahi zongin ka tainasa ah ahi zongin, a mawkna a suah ding ka lau manin makai hileh a kilawmte kiangah ka hilh sim hi. 3 Tua hi napi ka tonpih Tita nangawn Greek mi ahi hangin vunat dingin a kisawl teitei kei hi. 4 Khrist Jesu sunga i suahtakna hong ensimin sila hong suaksak dingin eite lakah sanggam zuau pawlkhat hong lutsim ahi manin hih thu hong piang ahi hi. 5 Note sungah lungdamna-thu, thutak a om theih nadingin tawmvei sung zong amaute thu ka mang kei uh hi. 6 Bangzahta in mi thupi hi le uh kilawm ta leh kei adingin amaute kilamdanna a om tuan kei hi. Pasian in a pualam kilatna in thu a khen kei hi—tua mite in ka thupuak bangmah a behlap kei uh hi. 7 Tua tawh kilehbulh in, Jew-te tungah lungdamna-thu hilh dingin Peter a kipiak bang tektek in, kei zong Gentile-te tungah a hilh dingin hong kipia hi, cih a mu uh hi. 8 Ahang in, Jew-te tunga sawltakpi Peter nasepna-a a sempa Pasian mah in Gentile-te tunga sawltakpi keima nasepna ah zong na a sem hi. Khuampite dinga a minthang 9 James, Peter le John-te in kei tungah hehpihna hong kipia cih a theih uh ciangin kei le Barnabas kilawmtakna khut taklam hong khak uh hi. Amaute in kote Gentile-te tungah pai-a, amaute Jew-te tungah a pai dung uh a thukim uh hi. 10 Amaute khempeuh in mizawngte phawk gige ding hong deih uh, kei zong ka lawp penpen mah ahi hi. Paul in Peter Sel 11 Antioch ah Peter hong pai ciangin amah khial khin ta ahi manin a mai-tangah amah ka sel hi. 12 James kiang pan kuate hiam a pai ma-in, amah in Gentile-te tawh an a ne khawmkhawm hi. Ahi hangin amaute hong tun uh ciangin vunatte pawl-a pangte a kihtak manun Gentile-te panin kikang koihin amah le amah a kituam koih hi. 13 Jew dangte in zong ama kineihsiamna zui uh a, tua ama kineihsiamna in Barnabas nangawn a pialmangsak hi. 14 Lungdamna-thu amaan bangin amaute in sem lo uh cih ka muh ciangin amaute khempeuh mai-ah Peter kiangah, “Nang Jew mi hi napi, Jew mi bang loin Gentile mi bangin na nungta hi. Tua hi napi Jew ngeina zui dinga Gentile-te na kalh teitei bangci bang hiam? 15 "Mawh nei Gentile-te bang hi lo pianpih a Jew mi ahi eite in 16 thukham zuihzawhna hang hi lo, Jesu Khrist upna hangin mi in diktansakna ngah hi cih i thei hi. Tua ahi ciangin eite in zong thukham zuihna hang hi lo, Khrist upna hangin dik tansak-a i om theih nadingin Khrist Jesu sungah i upna i nga hi; bang hang hiam cih leh thukham zuihna hangin kuamah dik a kitangsak kei ding hi. 17 "Eite in Khrist sungah dik kitansak ding i zon laitakin eite mahmah mawh neite i hina hong kilang ahi ciangin Khrist in mawhna khangsak cihna ahi hiam? Hi peuhmah lo hi: 18 Ka suksiat gawpsa ka lam kik leh thukham palsat mi ka hilam ka kitelsak hi. 19 Ahang in, Pasian adinga ka nuntak theih nadingin thukham tungtawnin thukham ka sihsan hi. 20 Jesu tawh ka kikilhlum zo a, kei ka nungta nawn kei hi; ahi hangin ka sungah Khrist a nungta hi. Ka pumpi sunga ka nuntakna pen, kei hong it-in, kei ading amahmah a kipia pa Pasian Tapa upna-in a nungta ka hi hi. 21 Thukham tungtawnin thumaanna kingah thei hileh Khrist a mawkna-a si hi ding ahi manin, Pasian hehpihna ka pampaih kei hi!” ka ci hi.

Galatia-Te 3

1 No Galatia mihaite! No kua in hong bumhai ahi hiam? Jesu Khrist a kilhlup bangin a kiteltakin note mitmuh tektek ah hong kilak hi. 2 Note tung pan na khat bek ka thei nuam hi. Thukham zuihna hangin Kha na ngah uh hiam, ahikeh na zakte uh na upna uh hangin na ngah uh hiam? 3 Tua zahta a hai lawmlawm na hi uh hiam? Kha tawh na pat khit nungun mihing nasepna tawh na ngim na tup uh tangtun sawm na hi uh hiam? 4 A mawkna-in tua zahta thuak na hi uh hiam, a mawkna taktak himawk ding hiam? 5 Pasian in thukham na zuihna uh hangin note, ama Kha hong pia in note lakah nalamdangte hong bawl ahi hiam, ahikeh na zaksa uh na up hang uh hizaw hiam? 6 Abraham ngaihsun un: “Amah in Pasian uma, ama adingin tua mah thumaanna in kisimsak hi,” 7 Tua ciangin a umte Abraham tate suak cih theitel un. 8 Pasian in upna hangin Gentile-te dik tangsak nuam cih Laisiangtho in mukhol a, Abraham kiangah, “Nang tungtawnin minam khempeuh thupha kipia ding hi,” ci-in lungdamna-thu na magen hi. 9 Tua ahi ciangin a umte khempeuh, upna nei mipa Abraham tawh thupha kipiakhawm hi. 10 Thukham zuihna-a kingate khempeuh hamsiatna nuai-a om lai uh ahi hi. Ahang in: “Thukham Laibu sunga kigelhte khempeuh a zuikim suak zolote peuh mah hamsiat ahi uh hi,” ci-in kigelh zo hi. 11 A teltakin thukham hangin Pasian mai-ah kuamah diktansak ahi kei hi. Bang hang hiam cih leh, “Mi thumaante upna hangin a nungta ding hi,” 12 Upna tungah thukham kibulphuh lo hi; tua tawh kilehbulh in, “Tuate a hih mi, tuate hang mahin a nungta ding hi.” 13 Eite tang dingin Khrist hamsia hong suakin thukham hamsiatna panin hong tan zo hi. Ahang in, “Sing tunga kikhai peuhpeuh hamsiat ahi hi,” ci-in kigelh hi. 14 Eite in upna hangin a kiciamsa Kha i ngah theih nadingin Abraham tunga kipia tua thupha, Khrist Jesu tungtawnin Gentile-te tungah hong tun theih nadingin amah in eite hong tan zo hi. Thukham le Thuciam 15 Sanggamte aw, nisim nuntakna panin gentehna khat kong gen ding hi. A kikipsaksa mihing thukhun pen, kuamah in paikhia thei loin a behlap thei kei hi. Hih thu ah zong tua mah bang ahi hi. 16 Abraham le a suan a khak tungah thuciamnate kipia hi. Laisiangtho in mi tampi a gennopna-in “na suan na khakte tungah zong” ci loin Khrist ahi mi khat genna in, “na suan na khak tungah” ci zaw hi. 17 Ka gennop hih ahi hi: A beisa huna Pasian in a kipsaksa thukhun pen tua khit kum 430 a kipia thukham in tua thuciam a phiat tuan kei hi. 18 Ahang in, thukham tungah gouluahza kinga hileh thuciam tunga kinga ahi kei ding hi. Ahi hangin Pasian in a hehpihna hangin thuciam tungtawnin gouluahna Abraham a pia hi. 19 Tua hi mawk leh, thukham bang ngimna ahi hiam? Thukham pen thuciam in a na gen tua Ci-le-sa hong tun mateng adingin khialhnate hanga kipia thuah ahi hi. Tua thukham pen vansawltakte tungtawn in palai khat zanga kikipsak ahi hi. 20 Ahi zongin mi pawlkhat bek tangin palai a ding kei hi; ahi hangin Pasian khat ahi hi. 21 Tua ahi manin thukham in Pasian thuciamte a langpan hiam? Langpan peuhmah lo hi! Ahang in, nuntakna a pia thei thukham kipia hileh thukham hangin thumaanna hong tung khin takpi ding hi. 22 Ahi hangin a kikamciam pen Jesu Khrist upna tungtawna kipiasa, a um mite tungah a kipiak thei nadingin Laisiangtho in leitung buppi mawhna thong kiapa ahi hi, ci-in genkhia hi. 23 Hih upna hong tun ma-in thukham in eite khempeuh thongah hong khia a, upna hong kilat mateng hong khumcip hi. 24 Tua ahi ciangin upna hangin dik tansak i hi thei nadingin Khrist kiangah eite hong pi ding in tua thukham hong ki-uksak hi. 25 Tu-in tua upna tungta ahi manin thukham in hong uk kha nawn kei hi. Pasian Tapate 26 Khrist Jesu upna tungtawnin note khempeuh Pasian tapate na hi uh hi; 27 ahang in, Khrist sunga kibaptise note khempeuh Khrist a silh na hi ta uh hi. Jew mi, 28 Greek mi a om kei hi; sila, sila lo a om kei hi; numei pasal a om kei hi. Ahang in, note khempeuh Khrist Jesu sungah khat na hi uh hi. 29 Note Khrist aa na hi uh leh Abraham suan na hi uh a, thuciam bangin gouluahte na hi uh hi.

Galatia-Te 4

1 Ka gen thu in, gouluahpa in a neu lai-in a luah ding khempeuh a neipa ahi hangin sila tawh a kilamdanna a om kei hi. 2 Apa hun seh hun a tun mateng a donte le a kemte ukna nuai-ah a om hi. 3 Tua mah bangin eite i neu lai-in leitung ngeina bulpite nuaiah sila i suak hi. 4 Ahi hangin a hun hong tun kim ciangin Pasian in a Tapa hong sawla, thukham nuai-ah numei sung panin hong suak hi. 5 Thukham nuai-a omte tapa hina, thuneihna a kimin i ngah theih nadingin hong tan hi. 6 Note tapate na hi manun “Abba, Pa” a ci khia tua Kha, ama Tapa Kha eite lungsungah Pasian in hong sawl hi. 7 Tua ahi ciangin note sila hi nawn loin tapa na hi uh hi; tapa na hi nungsangun Pasian in note zong gouluahpa in hong koih zo hi. Paul in Galatia-te Lunghimawh 8 Tunung lai, Pasian na theih ma un pianngei-a pasian a hi lote sila-in na om uh hi. 9 Ahi hangin tu-in note in Pasian thei tham loin, Pasian hong theih na hi nungsangun a thanem le bangmah a man lo thubulpite ah na kihei kik uh bangci bang ahi hiam? Tuate nuai-ah sila suak kikkik nuam na hi uh hiam? 10 Note in a kisehtuam nite, khate, khuahunte le kumte na tang uh hi! 11 Note adingin bang tan hiam khat a mawkna-a hahkat ka hi khak ding kong laupih hi. 12 Sanggamte aw, kong kun hi: note tawh a kibanga kong om bangin note zong kei bangin hong hi un. Kei tungah nong khial kei uh hi. 13 Na theihsa bangun, note tungah lungdamna-thu kong gen masakna ka ci natna hang ahi hi. 14 Ka dam loh no adingin zia-etna a suah hangin simmawhna peuh kihna peuhin nong nei tuan kei uh hi. Tua sangsikin Pasian vansawltak mahmah, Khrist Jesu mahmah bangin nong muak uh hi. 15 Note lungnopna khempeuh bang suak ta ahi hiam? Hih thei liai hi le uh cin na mittang nangawn uh khelkhia-in tuate kei nong piak nop lam uh ka thei hi. 16 Tu-in note thutak kong hilh mana na gal uh suak ka hi hiam? 17 Tua mite in note hong zogawp nuam uh hi; ahi hangin a hoih nading lam ahi kei hi. Amaute in kote pan note hong khenkhia in amau adingin nakpi-a na hahkat ding uh a deih uh hi. 18 Ngimna a hoih nak leh hahkat ding hoih hi; note tawh kong om sung bek hi loin a tawntungin na hahkat den un. 19 Note sungah Khrist lim a kilat matenga nausuahnat thuak banga kong thuak kik kong it tate aw, 20 note hangin amkham ka hi manin tu-in note tawh omkhawm hileng, ka aw suah khel nuam na zen ing e! Hagar le Sarah 21 Thukham nuai-a om nuam note in, thukham in a gen bang hiam, cih za lo na hi uh hiam, hong gen dih un? 22 Ahang in, Abraham in tapa nih nei a, khat sila numei tawh a neih hi-in, a khat pen a suakta numei tawh a neih ahi hi, ci-in kigelh hi. 23 Sila numei tawh a neih a tapa pen a ngeina banga suak hi-a, ahi hangin a suakta numei tawh a neih a tapa pen kamciamna khat tangtunna ahi hi. 24 Tua numeite thukhun nih tanga ding ahi manin, hihte tehkakna-a lak theih ding ahi hi. Thukhun khat Sinai Vum pan hi a, sila a suak ding tate a nei hi. Tua pen Hagar ahi hi. 25 Tu-in Hagar pen Arabia a om Sinai Vum tangin ding a, tu huna Jerusalem khuapi tawh a kibang ahi hi; bang hang hiam cihleh tuanu a tate tawh sila-in a om uh hi. 26 Ahi hangin tunglama om Jerusalem pen sila hi lo a, amah eite nu ahi hi. 27 Ahang in, “Ta nei lo tasel numei aw, nuam in; nang, nausuahnat a thuak kha lo nu aw, nuamin ngaihtakin kikokhia in; bang hang hiam cihleh pasal nei numei sangin a kipampaih numei khat in ta tam a nei zaw hi,” hi ci-in kigelh hi. 28 Tu-in sanggamte aw, note Isaac bangin kamciamna tate na hi uh hi. 29 Tua hunlai-in suah ngei-a suak tapa in Kha vangliatna pana suak tapa a bawlsia hi. Tu-in zong tua mah bang ahi hi. 30 Ahi hangin Laisiangtho in bang gen ahi hiam? “Sila numei tapa in a suakta numei tapa tawh gouluah khawm ngei lo ding ahi manin sila numei le a tapa hawlmang un.” ci hi. 31 Tua ahi manin sanggamte aw, eite sila numei tate hi loin sila lo numei tate i hi hi.

Galatia-Te 5

1 Khrist in a suakta dingin eite hong khahkhia hi. Tua ahi ciangin kiptakin ding unla, sila hakkol tawh no le no vangik kisuan kik nawn kei un. 2 Ka kammalte ciamteh un! Keimah Paul in kong hilh hi; vun na atsak uh leh no adingin Khrist in kimanna a nei peuhmah kei ding hi. 3 Vunatsak mi peuhmah in thukham a vekin a zuih kim kul hi, kong ci lai hi. 4 Thukham zuihna hangin diktansakna ngah a sawm note, Khrist panin khenkhiatsa na hi uh a, hehpihna panin na pukmang khin uh hi. 5 Ahi hangin kote in ka lamet uh thumaanna pen upna hangin Kha tungtawnin lawptakin ka ngak uh hi. 6 Ahang in, Khrist Jesu sungah vunat, ahi zongin, vunat loh ahi zongin kimanna a nei kei hi. Itna tungtawna kipulak tua upna bek in kimanna a nei hi. 7 Note kitaitehna hoihtakin na tai uh hi. Thutak na zuih loh nadingun kua in hong dal ahi hiam? 8 Tua bang kizolna ahileh note hong sampa kiang pan hi lo hi. 9 "Silngo tawmkha in annel mekman lompi khat sung khempeuh a tawksak thei hi.” 10 Note, lungsim tuamdang a nei lo dingin Topa sungah kong muang hi. Note hong lungbuaisak peuhpeuh in kuakua ahi zongin gawtna thutanna a thuak ding hi. 11 Sanggamte aw, vunat thu mah a hilh lailai hi leng bang hangin bawlsiatna thuak lai ding ka hi hiam? Tua bang hileh singlamteh hanga ngaihdahna a beisak ka hi ding hi. 12 Note hong buaisakte amau le amau kiget vet le uh hi lo ding hiam? 13 No ka sanggamte aw, a suakta dinga hong kisam na hi uh hi. Ahi zongin na suahtakna uh mawhdim pianngei deihna-a bualna in zang kei unla, tua sangin ki-itna tawh khat le khat na kisepsak thuk un. 14 "Nang le nang na ki-it bangin na vengte it in,” a cih thupiak khatah thukham khempeuh a kigawm khin hi. 15 Note khat le khat kikei-in na kinek thuk uh leh kikem un, khat le khat na kihihsia gawp ding uh hi. Kha-a Nuntakna 16 Tua ahi ciangin Kha-in na nungta un, tua hileh mawhdim pianngei deihna na tangtun kei ding uh hi, kong ci hi. 17 Ahang in, mawhdim pianngei lunggulhna pen Kha deihna tawh kilehbulh a, Kha lunggulhna pen mawhdim pianngei lunggulhna tawh kilehbulh hi. Tuate gel khat le khat kido ahi ciangin na hih nop uh na hih thei kei uh hi. 18 Ahi hangin Kha in nang hong pi leh thukham nuai-ah na om kei hi. 19 Mawhdim pianngei gamtatna telnop mahmah hi: numei-pasal paktatna, siantho-lohna le hukna-lanna; 20 milim biakna le bumna; muhdahna, kilemlohna, hazatna, hehluatna, angsung khualna, kilungkim lohna, kipawlkhennate le 21 en-na, zukhamna, uangtatna le tua bang nam khempeuh ahi hi. Tua banga nungtate in Pasian gam a luah kei ding hi, ci-a kong vauhilhsa bangin kong hilhkhol hi. 22 Ahi hangin Kha gah in: itna, lung nopna, kilemna, thuakzawhna, citna, hoihna, muanhuaina, 23 migitna le pumpi ukzawhnate ahi hi. Hihte a langpang ding thukham a om kei hi. 24 Khrist Jesu aa ahite in tua mawhdim pianngei deihna le a lunggulhna teng tawh a kilhlum zo uh hi. 25 Kha hanga nungta i hi nungsangin Kha tawh kalsuan khawm ni. 26 Eite khat le khat kimisak, kihehsakin ki-eng kei ni.

Galatia-Te 6

1 Sanggamte aw, mawhna a bawl mi khat a kimat leh a khami note in migitakin na phong ding uh hi. Ahi hangin no le no na kikem un; tua hi kei leh note in zong zia-etna na thuak kha ding uh hi. 2 Khat le khat na vangik uh kidawn tek un. Hih bangin gamta le uh cin Khrist thukham na tangtun ding uh hi. 3 Mi khatpeuh bangmah hi lo napi a thupi-a a kingaihsut leh amah le amah kikhem ahi hi. 4 Mi khempeuh in amau gamtatna encian ciat uh hen. Tua ciangin, midangte khatpeuh tawh kitehkak se loin amah le amah a kihisak thei pan ding hi. 5 Ahang in, mi khempeuh in amau van tek a pua ciat ding uh hi. 6 Thu-a kipantah peuhmah in, a pantah pa tawh a hoih khempeuh a tangkhawm pelmawh hi. 7 Khem zawhin na om kei un: Pasian pen ciamnuih bawl theih hi lo hi. Mi in ama vawh bangin a at ding hi. 8 Ama mawhdim pianngei lungkim nading a vawh mi in, tua pianngei panin siatna a at ding hi; Kha lungkim nading a vawh mi in, tua Kha panin nuntak tawntungna a at ding hi. 9 Eite in i tawpsan kei nakleh a hun a tun ciangin a gah at ding i hi manin na hoih sep cimtak kei ni. 10 Tua ahi manin hun hoih i neih sungin mi khempeuh tungah na hoih sem ni, a diakdiak in thu-um innkuante tungah sem ni. Vunat hilo Piansak Thakna 11 Keima khut mahmah in laimal golpipi-a no tunga kong gelhte en dih un! 12 A tungthama maipha ngah nuam mi pawlkhat in, vun hong atsak nuam teitei uh hi. Hih banga a hihna uh a thu, Khrist singlamteh thu hanga bawlsiatna tawh a kipelh nop man bek uh ahi hi. 13 Vunatte nangawn in thukham a zui kei uh hi. Tua hi ta leh note hong kisialhpih nuam uh ahi manin, vun hong atsak teitei uh ahi hi. 14 Kei adingin leitung kikilhcip a, kei zong leitung adingin hong kilhcipna ahi tua Topa Jesu singlamteh longal ka kisialhpih kei ding hi. 15 Vunat le vunat loh in phattuamna a nei kei hi. A thaka piansakna bekin phattuamna a nei hi. 16 Hih zuih ding ngeina a zuite khempeuh le Pasian Isreal-te tung dongah lemna le lainatnate om ta hen. 17 A nunung penin, ka pumpi tungah Jesu ciamtehnate pua ka hi manin, kuamah in kei hong buaisak kei ta hen. 18 Sanggamte aw, Topa Jesu Khrist hehpihna, note kha tawh om ta hen. Amen.

Efesate 1

1 Pasian deihna hanga Jesu Khrist sawltakpi Paul in, Ephesus a om misiangte, Khrist Jesu sunga a muanhuaite tungah: 2 I Pa Pasian le Topa Jesu Khrist tung pana hehpihna le lemna no tungah om ta hen. 3 Vanlam gama, Khrist sunga khalam thuphate khempeuh eite thupha hong pia i Topa Jesu Khrist Pasian le Pa kiphat ta hen. 4 Ahang in, ama mitmuh ah ‘siangtho-a pau i ban loh nadingin leitung piansak ma-in ama sungah eite hong teel zo hi. 5 Ama nopsakna le deihna tawh kizui-in Jesu Khrist tungtawnin tate a hong san theih nadingin – 6 amah in a Itpa sungah eite hong piakkhong a minthang ama heh pihna pahtawi nadingin itna-in hong laitan kholhsa ahi hi. 7 Pasian hehpihna kicing tawh kizui-in ama sisan hangin ama sungah tatkhiatna le mawh maisakna i ngah a, 8 amah in pilna le theihcianna khempeuh tawh tua hehpihna kicingtakin eite hong pia zo hi. 9 Tua ciangin amah in Khrist sunga a ngimsa ama deihna thuthuk, a lungkimna hoih tawh kizui-in eite hong theisak hi. 10 A hun a cin ciangin a tangtung dingin vantung le leitunga na khempeuh lutang khat, Khrist mahmah nuai-a gawmkhawm ding ama tup ahi hi. 11 Ama deihna banga a ngimna tawh kituakin na khempeuh a semkhia pa in a deihna tawh kizui-in a laitansa bangin ama sungah kote hong kiteelsa hi-a, 12 Khrist sunga lametna a nei masa kote ama minthanna pahtawina ka suah theih nading uh ahi hi. 13 Note hong hotkhiatna lungdamna-thu, tua thutak thu na zak khit uh ciangin note zong Khrist sungah hong kihuai khawm hi. Na up khit uh ciangin ciamtehna khat, hong kikamciamsa Khasiangtho-a kiciamtehsa na hi uh hi. 14 Tua pen ama minthanna pahtawi nadingin Pasian neihsate tatkhiatna dongin i luah ding hong kamciamna ahi, khamkholhna ahi hi. 15 Hih thu hangin Topa Jesu na up na uh le misiangte khempeuh na itna uh ka zaka kipan, 16 ka thungetnate ah note hong phawk gige in no ading lung damkohna ka tawlnga nai kei hi. 17 Eite Topa Jesu Khrist’ Pasian a minthang Pa in, amah na theihcian zawk nadingun pilna le kilaakna Kha note hong piak theih nadingin thu ka ngen den hi. 18 Note hong sapna ahi lametna, misiangte sunga a minthang ama gouluah a kicinna le 19 a um mi eite adinga tehpih bei ama vangliatna thupi na theih nadingun na lungsim mitte uh a kivaksak nadingin zong thu ka ngen hi. 20 Misi pan amah a thawhkiksak lai-a vanlam gamah a taklam-a a tutsak lai-a 21 ukna le thuneihna, vangliatna le gam-ukna khempeuh, tu khanghun bek hilo hong tung ding khanghun ah zong a kipia thei za khempeuh tungpek ah Khrist a, a zatsa thahatna mah ahi hi. 22 Pasian in na khempeuh ama khepek nuai ah koih a, pawlpi adingin amah na khempeuh tungah lutang in seh khinin, 23 tua pawlpi pen ama pumpi hi-a, na khempeuh, lam khempeuh-a, a cingsakpa’ kicinna ahi hi.

Efesate 2

1 Note na hi uh leh na mawhnate uh le na khialhnate uh sungah na si khin uh a, 2 hih leitung thu, tu laitaka thumang lote sunga na a sem kha tua huihgam ukpa na zuih lai-un, tuate sungah na nungta uh hi. 3 Hun khat lai-in eite khempeuh zong amaute lakah i nungta a, i mawhdim pianngei ukluatna tangtun in pumpi lunggulhnate le ngaihsutnate zui-in i om hi. Midangte bangin pianngeia in, thangpaihna nuai-a omte i hi hi. 4 Ahi hangin lainatna a hau Pasian in a lian mahmah eite hong itna hangin 5 khialhna sungah si-a i om laitak nangawnin Khrist tawh eite hong nungtasak khawm – hehpihna hangin hotkhiat na hi uh hi. 6 Pasian in Khrist tawh eite hong thosak khawma, vanlam gamah Khrist Jesu sungah amah tawh hong tukhawmsak hi. 7 Khrist Jesu sunga a migitna hanga eite tunga hong kigenkhia tehpih bei ama hehpihna kicinna, hong tung ding khanghunte ah eite tunga hong kilatsak nading ahi hi. 8 Ahang in, hehpihna hangin upna tungtawnin hotkhiat na hi uh hi. No le no a na ngah uh hi loin Pasian letsong ahi hi – 9 kuamah a kisialh theih loh nadingin sepna hang ahi kei hi. 10 Ahang in, eite sep dinga Pasian geelkholh, nasep hoih sem dinga Khrist Jesu sunga kipiangsak Pasian khutsiam i hi hi. 11 Tua ahi manin nidang lai-in pianngei in Gentile-te na hi uh a, amau le amau “vunat” (mihing khut tawh pumpi tunga ki-at) a kicite in note “vunat loh” hong cih uh phawk unla, 12 tua hunlai-in note Khrist tawh kikhenin Israel mi hina pan kipuaseh in, kam ciamna thukhunte-a tan nei lo gamdang mi hi-in, lametna a om lo le Pasian lo-a leitunga om na hilam uh phawk gige un. 13 Ahi hangin khatvei lai-a gamlapi-a om note, tu-in Khrist sisan tungtawnin Khrist Jesu sungah hong kinaisak ta hi. 14 Ahang in, nihte khat hong suaksak a, kikal dalna ahi kilemlohna kulhte a phelkhia pa a mahmah eite lemna hi-in, 15 amah in ama ci-le-sa ah tua thukham le thukham’ thupiakte le ngeinate a beisak hi. Mi nihte panin mi thak khat a mahmah sunga piansak ding a ngimna hi-a, tua hangin kilemna bawlin 16 hih pumpi khat sungah amaute gel sing lamteh tungtawnin Pasian ah kilemkiksaka tua tawh amaute kilang neihna a lamang hi. 17 Amah hong pai-in no a gamlapi-a omsate tungah kilemna thu, a nai-a omsate tungah zong kilemna thu mah hong gen zo hi. 18 Ahang in, ama tungtawnin eite in Kha khat tawh Pasian mai-ah luttheihna i nei tuak hi. 19 Tua thu hangin note mikhual le gamdang mi hi nawn loin, Pasian mite tawh tualsung mi na hikhawm uh a Pasian innkuan sung mite na hi uh hi, 20 innkiu suangpi Khrist Jesu mahmah tawh sawltakpite le kamsangte bulkip tunga hong kilam na hi uh hi. 21 Ama sungah tua inn buppi kizomkhawm a, Topa sungah a siangtho biakinnpi a suak dingin a khang hi. 22 Tua hi-a note zong Pasian ama Kha-in a tenna a suak dingin a kilamkhawm toto na hi uh hi.

Efesate 3

1 Hih thu hangin, no Gentile-te tanga Khrist Jesu’ hanga thongkia keimah Paul in – 2 Note adinga kei tunga hong kipia Pasian hehpihna in na a sepkhiatna thu na za zo tham uh hi. 3 Tua in, a toma ka gelhsa bangin kilaakna tawh kei tunga hong kitheisak thuthuk ahi hi. 4 Tua ahi teh hih thu na sim uh ciangin Khrist thuthuk ka theihzia na thei ding uh hi. 5 Tua pen Pasian sawltakpi siangthote le kamsangte tunga tua Kha tawh tu huna a kilaak bangin khang dang mite tungah a kitheisak kei hi. 6 Hih thuthuk i cih in, lungdamna-thu tungtawnin Gentile-te in Israel-te tawh luah khawmin, pumpi nate suakkhawm uh a, Khrist Jesu sunga kamciam a tangkhawm a suahna uh ahi hi. 7 Ama vangliatna nasepna tungtawna kei tungah tua Pasian hehpihna letsong hong kipiak hanga hih lungdamna-thu nasempa a suak ka hi hi. 8 Pasian mi a neupente sanga a neuzaw hi napi hih hehpihna a kizongkhia zo lo Khrist hauhna thu Gentile-te tunga hilh ding 9 le a beisa khanghunte a, na khempeuh a piangsak Pasian sunga a kiselcip hih thuthuk nasepna mikim tungah teltaka lakkhia dingin kei hong kipia hi. 10 Ama ngimna in Pasian pilna thuap tampite pawlpi tungtawnin vanlam gam sunga thuneihna neite le ukna a neite tunga theihsak ding deihna hi a, 11 tua pen ama tawntung ngimna tawh kizui-in i Topa Khrist Jesu sunga a bukimsak pen ahi hi. 12 Ama sung le, ama sunga upna tungtawnin suahtakna le kimuanna tawh Pasian i nai thei ta hi. 13 Tua ahi manin note adinga ka thuaknate hangin a lungkia lo dingin kong ngen hi, tuate note minthanna ahi hi. 14 Hih thu hangin Pa mai-ah ka khukdin hi, 15 amah panin vantung le leitung ama innkuanbupa min a kilo hi. 16 Amah in a minthang ama hauhna panin, Kha tungtawnin vangliatna tawh na sunglam mi uh hong thakhauhsak nadingin thu ka ngen hi. 17 Tua pen upna tungtawnin note lungsungah Khrist a ten theih nading ahi hi. Tua ciangin note ading kong ngetsakna in itna ah zungkha-in, kipin, 18 misiangte khempeuh tawh vangliatna nei khawmin Khrist hong itna, a zaina, a sauna, a sanna, le a thukna na theih zawh nading uh, 19 le theihbatloh ahi itna thei-in, Pasian kicinna khempeuh ah note na dim theih nading uh ahi hi. 20 Tu-in i nget khempeuh le i lunggeel khempeuh sanga nakpi-a thupi zawtham le, eite sunga a sem a vangliatna tawh kizui-a a hih thei pa tungah 21 pawlpi le Khrist Jesu tungtawnin akhang akhang a tawntungin minthanna omden ta hen. Amen.

Efesate 4

1 Tua ahi ciangin Topa adingin thongkia keimah in na ngahsa uh hong sapna tawh kilawm-a na nuntak ding uh kong kun hi. 2 Kiniamkhiat le migitakin om un; lungduai-in itna tawh khat le khat na kithuak keeikai un. 3 Kilemna in hong khihkhawmna tungtawnin, tua Kha a na kipumkhatna uh na letkip nadingun na hih theih tawpun hih un. 4 Pumpi khat le Kha khat – note hong kisap lai-a lametna khata hong kisap bangin – 5 Topa khat, upna khat, baptise-na khat, 6 na khempeuh tunga om, na khempeuh tungtawna, na khempeuh sunga ompa, mite khempeuh Pasian le Pa khat a om hi. 7 Ahi hangin Khrist sehsaknasa bangin eite tungah hehpihna hong kipia ciat hi. 8 Hih thu hangin: “A sangah amah a kahtoh ciangin, amatte pi-in tonpih to a, mite tungah letsongte a pia hi.” a na ci hi. 9 (Leilam gam, a niamna ah amah kumsuk lo hileh, “amah kahto” a cih, bang a cihnopna hi ding hiam? 10 Khuavannuai bup na khempeuh a kicingsak dingin a kumsukpa tektek vante khempeuh sanga sangzawin a kahto pa ahi hi.) 11 Amah, mi pawlkhat sawltakpi, pawlkhat kamsang, pawlkhat lungdamna thugen, pawlkhatte thuhilh sia le laihilh sia sem dingin a pia pa hi-a, 12 tuate in Khrist pumpi a khansuah theih nadingun Pasian mite na sem dinga a bawlkholh nading ahi hi. 13 Tua in eite khempeuh, tua upna le Pasian Tapa theihna ah khat suaka, Khrist kicinna zahzah a i picin mateng ading ahi hi. 14 Tua ciangin mite in zuau siamna le khelpilna tawh a geel uh amau khemna ah, tuihual in a lapsuk a laptoh, thuhilhna huih citeng in amut kawikawi naungekte i hi nawn kei ding hi. 15 Tua sangsik in, itna tawh thutak genin, Lutang ahi pa Khrist sungah, na khempeuh ah ama sungah i khangto ding hi. 16 Amah panin pumpi na khempeuh thagui tekah kihuh kizom khawmin, amau sep ding tek a sep ciangin tua pumpi, itna sungah khangin amah le amah a kikhansuah hi. 17 Tua ahi ciangin note, Gentile-te ngaihsutna gina lo-a, a nuntak bangun na nuntak nawn loh nadingun hih thu Topa sungah kong gena, kong kun tangtang hi. 18 Amaute lungtang kikhauh sakna hanga bangmah a theih loh manun, Pasiana nuntakna panin amaute kikhenkhia-a, a theihtelna uh kimialsak hi! 19 Amaute in zumna mel thei nawn loin a siang lo namkima bual dingin a uangzaw kilunggulhna nei tawntung uh a, amau hukna le lanna ah a kipiakhia khin zo uh hi. 20 Bangbang hi ta leh note in tua bang lamin Khrist na thei kei uh hi. 21 Jesu sunga om thutak tawh kizui-in ama sungah hong kihilh zo ahi ciangin note in amah thu na zaksa uh hi takpi hi. 22 Tuma lai-a na nuntakna uh tawh kisai-in khemhat lunggulhna in a siatsaksa na milui uh suahkhia ding, 23 na lungsim puakzia uh kibawl thak ding, 24 amaan thumaanna le sianthona taktak sungah Pasian tawh kibang dinga kipiangsak mithak na silh ding uh note hong kihilh hi. 25 Tua ahi manin eite khempeuh pumpi khat sunga a nate i hi manin note a kuamapeuh in zuauphuahna suahkhia-in a vengte tungah maantakin thu a gen pelmawh ding hi. 26 "Na heh sungin na mawh kei in,” na heh dam loin ni na tumsak kei in, 27 dawimangpa siksan na awn kei in. 28 A guta densa pa in gu nawn peuhmah loin a kitangsamte na khatpeuh a hop theih nadingin ama khut tawh, kimanna a nei na khatpeuh sem pelmawh hen. 29 Na kam panun kam hoih lo pusuak sak kei un, ahi zongin a zate in phat tuampih in amau tangsapna tawh kizui-a, amaute bawlpha in, a huh thei ding kammal bek pusuaksak zaw un. 30 Tatkhiat ni adinga note hong kiciamtehna Pasian Khasiangtho na dahsak kei un. 31 Khaat-na, ngonghehna le hehna, kitotzakna le gensiatnate khempeuh etsatna nam khempeuh tawh na paikhia un. 32 Note migi in khat le khat na kikhuatuah unla Pasian in Khrist sunga note mawhna hong maisak bang tektek in, na mawhna uh na kimaisak ciat un.

Efesate 5

1 Tua ahi manin itluat tate bangin Pasian a ettehte hi unla, 2 Khrist in eite hong it a, eite adingin Pasian tungah a namtui-a biakna ding le biakpiakna dingin amah le amah a kipiakkhiat bangin itna nuntakna tawh na nungta un. 3 Ahi hangin note lakah numei pasal paktatna lim ahi a, siantho lohna nam khat peuhpeuh le huaihamna ahi zongin a om peuhmah kei ding hi. Bang hang hiam cih leh Pasian misiangthote adingin hihte kilawm lo hi. 4 Note kam panin zahmawhpau le haipauna, ciamnuih thanghuaite, tua banga kilawm lote omsak loin lungdam na ko zaw un. 5 Ahang in, a thangtat, a siangtho lo ahikeh a huaiham, tua banga hihte milim bia hi-a, Khrist le Pasian gam ah luah ding bangmah a nei kei hi, cih na theitel uh hi. 6 Thu mawkmawk tawh kuamah na kikhem zosak kei un. Bang hang hiam cihleh tua bang thute hangin thumang lote tungah Pasian thangpaihna a tung hi. 7 Tua ahi manin amaute tawh kithuah kei un. 8 Ahang in, hun khat lai-in note khuamial na hi uh a, ahi hangin tu-in Topa sungah khuavak na hi uh hi. Khuavak tate bangin na nungta un; 9 Ahang in, khuavak gah in, hoihna khempeuh, thumaanna le thutak ahi hi. 10 Topa lungkimna bang hiam, cih na zong un. 11 Gah a gah lo khuamial gamtatna tawh na kisawhkha kei unla amau gamtatnate na pholak zaw un. 12 Ahang in, thumang lote in a simthama a septe uh a kigenkhiat bek zong maizumhuai hi. 13 Ahi hangin khuavak in a pholak na peuhmah a kimu thei hi. 14 Ahang in, na khempeuh a kimu theisak khuavak ahi hi. Hih thu hangin: “Ihmu mi aw, khanglo in, misi panin tho in, tua hileh nang tungah Khrist a tang ding hi,”a na ci hi. 15 Tua hi-a na nuntak zia uh, apil lote bang hi loin apilte bangin limtakin kidawm unla, 16 nite hoih lo ahi manin hun hoih na neih peuhpeuh uh a hoih penin na zang un. 17 Tua ahi ciangin hai kei unla, Topa deihna bang ahi hiam, cih theitel zaw un. 18 Zu kham kei un, uangtat luatna mun hong tun thei hi. Tua sangsikin, Kha tawh na kidim zaw un. 19 Phatna-late, biakna late le khalam late in khat le khat na kihopih un. Na lung sung uhah phat kawmin Topa tungah la sa un, 20 Topa Jesu Khrist minin na khempeuh hangin Pa Pasian tungah lungdam na ko tawntung un. 21 Khrist zahtakna tawh khat le khat na kiniamkhiat tuah un. 22 Zite aw, Topa tunga ki-ap bangin na pasalte uh tungah ki-ap un. 23 Ahang in, Khrist in ama pumpi ahi pawlpi lutang le a Honpa ahi bangin zi lutang in a pasal ahi hi. 24 Khrist tungah pawlpi a ki-ap bangin zite zong na khempeuh ah a pasalte uh tungah a ki-ap ding uh hi. 25 Khrist in a pawlpi it a, ama adingin amah mah a kipumpiak khiat bang tektek in, pasalte aw, na zite uh it un. 26 Amah in pawlpi siangtho dingin thu tungtawnin tui in sawp a, singthosak hi, 27 tua pen a nin baang lo, a vun tonna om lo, a melhemna khatpeuh om lo tham loin siangtho le kawkbaang lo-a, a tangkhia pawlpi-in amah le amah a kipiakkhiat theih nading ahi hi. 28 Tua tawh kibangin, pasalte in amau pumpi bangin a zite uh a it uh kul hi. A zi it pa amah le amah ki-it ahi hi. 29 Tuate khempeuh khit ah, ama pumpi mudah kuamah om ngei lo a, Khrist in a pawlpi cingin a vak bang tektekin ama pumpi cingin a vak zaw hi. 30 Ahang in, eite ama pumpi nate i hi hi. 31 "Hih thu hangin pasal in a nu le a pa nusia-in a zi tawh kigawm dinga, tua nihte sakhat a suak ding uh hi.” 32 Hih in thuthukpi khat hi-a, ahi hangin kei gen ahileh Khrist le pawlpi thu ahi hi. 33 Bangbang ahi zongin, note a kua mapeuh amah leh amah a ki-it bangin na zite uh na it pelmawh un. Zi in zong a pasal a zahtak pelmawh ding hi.

Efesate 6

1 Tate aw, Topa sungah na nu na pate uh thu na mang un, ahang in, hih in thumaan ahi hi. 2 "Na nu na pa pahtawi in.” Hih in thuciam tawh kizui thupiak masa pen ahi hi. 3 Tua bang na hileh na khan nuam dinga, leitungah sawtpi nuntak nuam na sa ding hi. 4 Pate aw, na tate uh mawk hehsak kei un, tua sangsikin, pattahna le Topa lamlahna ah khangtosak un. 5 Silate aw, Khrist thu na man ding bang tektek un, na lungsim sung uhah thutak cihtakna tawh zahtakna le kihtakna tawh na leitung pute thu na mang un. 6 Amaute hong muh sunga hong pahtak nading bek hi loin Khrist sila bangin na lungtang sung uhah Pasian deih bangin amaute thu na mang un. 7 Mihing nasem bang hi loin Pasian nasem bangin na lungtang khempeuh uh tawh na sem un. 8 Bang hang hiam cih leh Pasian in sila ahi a, sila lo ahi zongin na hoih a sem peuhpeuh pahtakman a piak ding na thei uh hi. 9 Tua ciangin pute aw, tuamah tawh kibangin na silate uh na hih un. Van tungah note le amaute Pu ahi khawmpa om a, amah in gup le paih a neih loh lam thei na hi manun amaute na tawng kei un. 10 A nunung penin, Topa sung le ama thahat vangliatna sungah thakhauh un. 11 Dawimangpa hong sawmnate na nan zawh nadingun Pasian galvan a kimin silh un. 12 Ahang in, eite do ahileh si le sa hi loin vanlam gama gam-ukte, thuneihnate, hih leitung khuamial vangliatnate le kha gilo galkapte ahi hi. 13 Tua ahi manin ni hoih lo hong tun cianga na pan theih nading uh le hih ding khempeuh na hih khit uh cianga na din zawh lai nadingun Pasian galvan a kimin silh un. 14 Tua ciangin na kawnguah thutak kawnggak gaksa, na awmuah thumaanna awmdal bulhsa le 15 na khe-uhah kilemna lung damna-thu pana hong pai kigin kholhna bulhsa-in kiptakin ding un. 16 Hihte khempeuh banah gilopa mei kuang thaltangte na sukmit theih nadingun upna lum tawi un. 17 Hotkhiatna sik lukhu le Pasian thu ahi Kha namsau la un. 18 Tua ciangin hun khempeuh ah thungetna nam khempeuh le ngetna tawh Kha-in thu na ngen un. Hih thu ngaihsun kawmin pilvang unla misiangte khempeuh ading thu na ngetsak den un. 19 Thu ka hilh peuhpeuh cianga thu hong kipiak theih nading le lungdamna thuthuk lau lo-a ka theihsak theih nadingin zong thu na ngetsak un. 20 Ahang in, tua thu hangin sikkhainiang bulh kawma palai ka hi hi. Ka hih ding bangin lau peumah loin ka pulakkhiat theih nading thu na ngetsak un. 21 Topa sunga nasem muanhuai ka it sanggampa Tychicus in kei bangci om a, na bangci sep cih na theih nadingun na khempeuh hong gen ding hi. 22 Kote bangci cih na theih nading uh le amah in note hong hanthawn theih nading mahmah deihna-in amah note kiangah kong sawl hi. 23 Pa Pasian le Topa Jesu Khrist panin upna tawh kigawmkhawm itna le lemna, sanggamte tungah om ta hen. 24 A si theilo itna tawh eite Topa Jesu Khrist a itte khempeuh tungah hehpihna om ta hen.

Filipite 1

1 Khrist Jesu nasem Paul le Timothy in, Philippi a om Khrist Jesu sunga misiangte khempeuh le saptuam kemte le saptuam upa teng tungah: 2 Eite Pa Pasian le Topa Jesu Khrist tung pana hehpihna le lemna no tungah om ta hen. 3 Note kong phawk simin ka Pasian tungah lungdam ka ko hi. 4 Note khempeuh ading thu ka nget simin lungnopna tawh ka ngen tawntung hi, 5 bang hang hiam cih leh ni masa pen ni-a kipan tu dong lungdamna-thu sungah na kihel den uh hi. 6 Note sunga nasep hoih a panpa in Khrist Jesu ni dongin a bucing dingin semsuak ding cih ka muang hi. 7 Ka lungsunga note kong neih nungsangin hih bang zia a lungsim a kong neih ding a man ahi hi; kolbulhin ka om a, lungdamna-thu hu-in ka kipsak zongin note khempeuh in Pasian hehpihna kei tawh na tangkhawm uh hi. 8 Note khempeuh Khrist Jesu itna tawh kong lunggulh lam Pasian in a thei ding hi. 9 Ka thungetna in: note itna theihna le a sung thu khenteltheihna ah khang semsema, 10 a hoihpen telsiang thei-in Khrist ni dong siangtho-in, kawkbanna om loin, 11 Pasian minthan nading le a kiphat nadingin Jesu Khrist tungtawna hong pai thumaan gah tawh na dim nading uh ahi hi. 12 Tu-in sanggamte aw, kei tunga hong tungsa thu in lungdamna-thu khangsak takpi cih na theih ding uh ka deih hi. 13 Tua hangin Khrist hanga kol bulh a om ka hilam kumpi inn cingte khempeuh le mi khempeuh in theikhawk ta uh hi. 14 Kol hong kibulhna hangin Topa sunga sanggamte a tamzaw in Pasian thute hangtak le lau het loin gen ding hanthawnna a ngah zaw uh hi. 15 Mi kimkhatte in enna le kilungsim demna tawh Khrist thu hilh uh a, ahi hangin adangte in amau ngimna hoih nei in, a hilh uh hi, cih thumaan ahi hi. 16 Hih a nunungte mah in lungdamna-thu a hu dinga om lai ka hilam thei-in itna tawh a hilh uh hi. 17 A masa pawl in thutak paii loin, kol bulha ka om sungin buaina tawh kei hong linglawngsak thei ding uh kisa in huaiham sawmin Khrist thu a hilh uh hi. 18 Ahi hangin bang phamawh ahi hiam? A thupi penin, ngimna hoih ahi-a ngimna hoih lo ahi zongin bangbang lamah Khrist thu a kihilh nak leh pha zo hi. Hih thu hangin ka nuam hi. Hihi, ka nuam lailai ding hi. 19 Ahang in, note thungetna tung tawn le Jesu Khrist Kha in kei hong huhna bangin kei tunga piang thu pen ka suahtakna hong suak ding cih ka thei hi. 20 Ka pumpi ah nuntakna ahikeh sihna in ahi densa bangin tu-in Khrist a kipahtawi theih nadingin a kicing hanna ka nei ding cih maizum loin lawptakin kihehnemna le lametna ka nei hi. 21 Kei adingin nuntak, Khrist hi-a, sih lah metna ahi hi. 22 Pumpi-in nungta lai leng, ka nasepna gah, gah lai ding hi. Tua hi napi bang teelzaw ding ka hi hiam? Ka thei zo kei hi! 23 Tua nih saikakin ka om a, paikhia-in Khrist tawh omkhawm ding ka lunggulh hi; tua mah nakpi in hoihzaw tham hi. 24 Ahi hangin note adingin pumpi-a ka nuntak lai ding kisamzaw hi. 25 Hih thu theitel ka hi manin ka nungta lai dinga, upna sunga na khan nading uh le na lungnop nadingun note khempeuh tawh ka omkhawm lai ding hi. 26 Tua ciangin note tawh ka omkhawm kikna tungtawnin Khrist Jesu sunga na lungnopna uh kei hangin a dimlet ding hi. 27 Bang khatpeuh piang ta leh, Khrist lungdamna-thu tawh a kilawm in, ki-ukin na gamta un. Tua hileh hong hawhin note kong mu a, ka om loh kalin note thu ka galzak zongin lungdamna-thu upna hu in, lungsim kikhatin na dingkip uh cih ka thei ding hi; 28 note hong langpangte in bangmah lamah hong lausak zo lo cih zong ka thei ding hi. Hih in Pasian in amaute susia dinga note hong hon ding ahi na amaute tungah lim hi ding hi. 29 Ahang in, amah um ding bek hi lo, ama ading thuak dingin zong, Khrist tang dingin note hong kiphal hi. 30 Ka thuaksa bang note in na thuak uh cih na muh nung sangun tu-in thuak ding nei lai ka hilam thei ta un.

Filipite 2

1 Khrist tawh note kigawmna hangin kihanthawnna khatpeuh na neih uh a, a itna panin kihehnepna khatpeuh na neih uh a, Kha tawh kipawlna khatpeuh na neih uh a, kikhuatuahna le kilainatna khatpeuh na neih uh leh 2 lungsim kibangin om a, itna kibang nei in, lungsim le tupna kikhatin na omna uh tawh ka lungnopna na kimsak un. 3 Huaihamna le kihisakna tawh bangmah hih loin kiniamkhiatin no sangin midangte a hoihzaw-in na ngaih sun un. 4 Note khempeuh in no angsung ding bek khual loin midangte angsung ding zong na khualsak ciat un. 5 Note in Khrist Jesu lungsim bang na nei un: 6 Amah Pasian pianngei taktak hi napi Pasian tawh kikima om ding khiatlahna a letcip ding ngaihsun loin, 7 bangmah kihisak loin nasem pianngei tektek hong nei-a mihing tawh hong kibang zaw hi. 8 Mihing mel taktak hong pua a, amah le amah kiniamkhiatin, singlamteh tungah a sih dongin thu a mang tazen hi! 9 Tua ahi manin Pasian in amah a sang pen munah tawisanga, min khempeuh sanga min tungnung zaw pia-in, 10 tua Jesu min ah vantung, leitung le leinuai-a om khempeuh khukdinin, 11 leii peuhmah in, “Jesu Khrist, Topa hi,” ci-in pulak dinga, Pa Pasian minthanna ahi ding hi. 12 Tua ahi manin kong it lawmte aw, thu na man densa bangun ka om sung bek hi lo, ka om loh sungin zong ka thu hong mangzaw in, lau kawm ling kawmin note hotkhiatna na semkhia den un. 13 Ahang in, a hoih ama deihna bang a deih ding le a sem dingin note sunga a sempa, Pasian ahi hi. 14 Na khempeuh phun lo sel loin sem un; 15 a lungsim kawi le lungsim mawk khangmite lakah no Pasian tate, mawh nei lo, kawkbaang lo, siangtho in, khuavannuai-a aksite bangin na tan theih nadingun 16 nuntakna thu na letkip uh tawh kizui-in ka taina le ka nasepna a mawkna hi lo hi, cih Khrist ni-a ka kisialh nading ahi hi. 17 Ahi zongin note upna pana piang kithoihna leh nasepna tungah dawntheih-a biakna bangin, biaknain kei hong kisungkhia taleh note khempeuh tawh nuamin ka lungdam khawm veve hi. 18 Tua mah bangin note zong nuamin kei tawh na lungdam khawm ding uh hi. 19 Note thu ka zak ciangin kei zong ka kipak theih nadingin a sawt loin, note kiangah Timothy kong sawl pah ding Topa Jesu sungah ka lamen hi. 20 Note hoih nadinga hong khual taktak ding amah lo midang ka nei kei hi. 21 Ahang in, mi khempeuh in Jesu Khrist khual loin amau angsung bek a khual uh hi. 22 Ahi zongin tapa in a pa tawh a sepkhawm bangin Timothy in kei tawh lungdamna-thu a sepkhawmna ah amah le amah in a omzia a kilangsak hi, cih na thei uh hi. 23 Tua ahi manin kei tunga a piang ding thu a kitel phetin amah kong sawlpah ding ka lamen hi. 24 Kei mahmah zong kong paipah ding Topa sungah ka muang ngam hi. 25 Ahi hangin ka sanggampa, ka naseppih pa le ka galkappih le note thupuakpa zong ahi, ka kisapna teng hong huh dinga nong sawlpa uh Epaphroditus note kianga kong sawl kik ding kisam ka sa hi. 26 Ahang in, na zaksa bangun amah cina-a, note khempeuh hong ngai-in a lungdong hi. 27 Amah cina takpi-a, a si dektak hi. Ahi zongin Pasian in amah bek hi loin kei zong hong lainat a, dahna a kisuangsawnin hong tuaksak kei hi. 28 Tua ahi manin, note in amah na muh uh ciangin na nuam theih nading uh le keimah zong ka lunghimawhna a tawm tuam nadingin amah kong paisak ding ka lawpzawsan hi. 29 Topa sungah nuamna lianpi tawh amah na muak unla, amah bang mite na pahtawi un. 30 Bang hang hiam cih leh note in kei nong huh theih lohte uh hong huh dingin a nuntakna khaamin Khrist na semin a si dektak hi.

Filipite 3

1 A nunung penin ka sanggamte aw, Topa sungah lungdam un! Note tungah a kibangmah gelh kik ding buaihuai lo a, note adingin bitna ahi hi. 2 Tua uite, tua gilo-a gamta mite tua misa a atgawpte lakah na pilvang un. 3 Ahang in, ei vunatte ei Kha-a Pasian biate, Khrist Jesu sunga a minthangte in, ci-le-sa ah muanna i nei kei hi. 4 Tua bangin suang nuam hi leng, kei mahmah in zong suan theih ding tampi ka nei hi. Midang khatpeuh in ci-le-sa suan ding nei a, a kingaihsut leh ken ka hauzaw sem hi; 5 a nigiat ni-a vunat Israel mi, Benjamin beh, Hebrew-te laka a Hebrew, thukham zuihna ah Pharisee, 6 hahkatna lamah pawlpi bawlsia; thukham tawh kisai thumaanna ah a genbaang lo ka hi hi. 7 Ahi hangin kei adinga metna ahi peuhmah tu-in Khrist hangin supna-in ka sim hi. 8 Tua tham loin ka Topa Khrist Jesu theihna a thupi luatna tawh tehin na khempeuh supna-in ka sima, ama hangin na khempeuh ka taan zo hi. Tuate khempeuh ninneng bangin ka ngaihsun hi, Khrist ka ngah nading le 9 ama sungah ka om theih nading hi-a, thukham pana hong pai keima thumaanna hi loin Pasian pana upna tawh hong pai Khrist upna tungtawna kingah thumaanna pen hizaw hi. 10 Khrist le ama thawhkikna’ vangliatna le a thuaknate thuakpihna, a sihna ah amah tawh kibatna ka thei nuam hi. 11 Tua pen misi pana thawhkikna ka ngah theih nading ahi hi. 12 Hih khempeuh a ngah khin ta, hong kicingsak khin zo, ka cihna hi loin Khrist Jesu in kei hong matna mah ken zong ka mat zawh nadingin mai ka nawt tentan hi. 13 Sanggamte aw, a mankha khin ta in ka kisim kei hi. Ahi hangin ka hih na khat in: nunglama omte ka mangngilh-a mailama om nate ka delh tentan hi. 14 Khrist Jesu sunga vanlam-a letsong ngah dinga Pasian in hong sapna kung lam manawh in ka nawt teitei hi. 15 A picing khinsa eite khempeuh in tua bang lungsim i neih ding ahi hi. Note in a kilamdang thu tuam khat na ngaihsut uh leh tua zong Pasian in hong theitelsak ding hi. 16 I ngahsa ciangciang bek tawh kikhom in eite nungta ni. 17 Sanggamte aw, kei omdan zui-in midangte tawh kipawl unla, note gamtat zia dinga kong piak bang uh zui-a a nungtate ciamteh un. 18 Ahang in, a beisa hunah mi tampite Khrist singlamteh galin a nungta uh hi, ci-a kong gensa bangin tu-in zong khitui nangawn tawh kong gen kik lai hi. 19 Amaute tupna, siatna hi-a, a pasian uh amau gilpi hi-in, a minthanna uh amau maizumna ahi hi. Amaute in leitung nate bek a ngaihsun uh hi. 20 Ahi hangin eite gammi i hina vantung ahi hi. Eite in tua mun panin Honpa Khat – Topa Jesu Khrist lawptakin i ngak hi. 21 Na khempeuh a ukna nuai-ah a koihsak thei tua vangliatna in a simmawh huai i pumpite, a minthang ama pumpi tawh kibang dingin a khel ding pa amah ahi hi.

Filipite 4

1 Tua ahi manin ka sanggam, kong it, kong ngaih luat, ka lungnopna le ka pahtakman lukhute aw, Topa sungah na dinkip zia ding uh tua bang ahi hi, kong it lawmte aw! 2 Euodia le Sintyche-te, Topa sung-ah khat le khat a kilem nadingun ka thum hi. 3 Hihi, ka hakkol puakpih muanhuai aw, lungdamna-thu ka genna-a hong panpih hih numeite, Clement le ka naseppihte, nuntakna laibu sunga a min omte khempeuh na huh un. 4 Topa sungah lungnuam tawntung un. Kong genkik ding hi: Lungnuam un! 5 Mi khempeuh tungah na migitna uh na kitelsak un. Topa hong nai hi. 6 Na khatpeuhah lunghimawh in patau kei unla, na khempeuh ah lungdamkohna tawh thuahin, thungetna le ngetna Pasian tungah na tun un. 7 Tua hileh theihtelnate khempeuh a khup Pasian lemna in, Khrist Jesu sungah na lungsimte uh le na lungtangte uh hong cing ding hi. 8 A nunung penin sanggamte aw, a maan peuhmah, a zahtakhuai peuhmah, a dik peuhmah, a siang peuhmah, a ithuai peuhmah, a pahtakhuai peuhmah, na khatpeuh a hoih pen hi-a, a phattak nak leh tua bang nate na ngaihsun un. 9 Kei tung pana na sinsa, na ngahsa, na zaksa uh ahi zongin, kei sunga na muhsate uh ahi zongin na taksuaksak un. Tua hileh lemna Pasian, note tawh a omkhawm ding hi. 10 Kei nong deihsakna uh na thak suaksak takpi manun, tu petpetin Topa sungah nakpitakin ka lungnuam hi. Nong lunghimawh takpi uh a, ahi hangin nong lah nading uh hun hoih na nei kei uh hi. 11 A piang bangbang ka lungkim nadingin a kisin khinsa ka hi manin, kisapna nei-a hih thu a gen ka hi kei hi. 12 Taksap kici bang hi-a, kicing a kici bang hiam cih ka thei hi. Gilkialna hiam gilvahna, zawnna hiam hauhna – omzia namkim ah lungkimna thusim ka sin zo hi. 13 Kei thahatna hong pia pa tungtawnin na khempeuh ka hih thei hi. 14 Tua hi napi gimna ka thuak laitakin, kei nong thuakpih uh hoih mahmah hi. 15 Tua tham loin, no Philippi-te in na theihsa bangun, lungdamna-thu na theih cil lai nite ua, Macedonia pana ka zinkhiat lai-in, piakna le ngahna ah note longal hong huh pawlpi khat beek a om kei hi; 16 ahang in, Thessalonica a ka om sung nangawn in, kisapna ka neih ciangin huhna nong khakkhak uh hi. 17 Letsong ka zonna hi loin, note hamphat nading ka deihna hizaw hi. 18 Ken ka ngah ding zah ka ngah banah a tamzaw nangawn ka ngah zo hi; nong huhna uh kicing khengvala, Epaphroditus nong khak uh letsong zong ka ngah hi. Tuate, Pasian a lungdamsak, biakpiakna santham biakna namtui ahi hi. 19 Khrist Jesu sunga hauhna minthang tawh ka Pasian in note kisapna khempeuh hong guan ding hi. 20 Eite Pasian le Pa tungah a tawntung in minthanna om den ta hen. Amen. 21 Khrist Jesu sunga om mi siangte khempeuh na hopihsak un. Kei tawh a omkhawm i sanggamte in hong hopih uh hi. 22 Misiangte khempeuh, a diakdiak in Caesar innkuante in note hong hopih uh hi. 23 Topa Jesu Khrist hehpihna in note kha hong ompih ta hen. Amen.

Kolosate 1

1 Pasian deihna hanga Khrist Jesu sawltakpi Paul le i sanggampa Timothy in, 2 Colosse a, Khrist sunga a siangtho le a muanhuai sanggamte tungah: Eite Pa Pasian tung pana hehpihna le lemna note tungah om ta hen. 3 Note ading thu ka nget uh ciangin Pasian, eite Topa Jesu Khrist’ Pa tungah lungdam ka ko tawntung uh hi. 4 Bang hang hiam cih leh Khrist Jesu sunga na upna uh le misiangte khempeuh na itna uh ka za zo uh hi. 5 Tua upna le itna note adinga vantunga kikoihkholsa tua lametna pana piang hi-a, note tunga hong tung na zaksa uh tua lungdamna-thu – thumaan pen mah ahi hi. 6 Tua lungdamna-thu za-in Pasian hehpihna thutak khempeuh ah na theihtel ni-ua kipan note lakah a gah mah bangin, leitung mun khempeuh ah hih lungdamna thu in gah gahin a khang semsem hi. 7 Note in ka it uh, ka naseppih uh kote tanga Khrist nasem muanhuai Epaphras tung panin na za uh a, 8 amah in Kha sunga note itna zong kote hong hilh hi. 9 Hih thu hangin note thu ka zak ni-ua kipan, note ading khalam pilna le theihtelna khempeuh tungtawna, ama deih bang theihna tawh note hong dimsak nadingin Pasian tungah thunget ka tawp kei uh hi. 10 Hih banga ka thunget uh Topa adingin note a mannei-in nungta a, lam khempeuh ah amah lungkimsakin, na hoih khempeuh ah gah na gah ding uh, Pasian theihna lamah na khan nading uh, 11 le a lianpi sikdona le lungduaina lungnuamtaka ama thahatna minthang tawh kituaka vang liatna khempeuh tawh na thakhauh nading uh ahi hi. 12 Khuavak gama misiangte tawh gouluah khawm dingin note hong cingsak pa tungah lungdamna ka ko uh hi. 13 Ahang in, amah in khuamial ukna gam pan eite hong hukhia in, a it a Tapa gam sung hong tun zo a, 14 eite in ama sungah tatkhiatna le mawhnate maisakna i ngah hi. 15 Amah a kimu thei lo Pasian lim hi a, a kipiangsak nate khempeuh tunga a suak masa pen ahi hi. 16 Ahang in, na khempeuh ama piansak hi a: vantug le leitunga om nate, muh theih le muh theih lohte, kumpi tokhomte ahi zongin, vangliatna ahi zongin, ukte ahi zongin, thuneite ahi zongin, na khempeuh amah in ama adingin a piansak ahi hi. 17 Na khempeuh a om ma-in amah om a, ama sungah na khempeuh a kizom khawm hi. 18 Amah tua pumpi – pawlpi lutang ahi hi; na khempeuh ah amah a tung nungpen ahi theih nadingin, amah a kipatcilna le misite pana suak masa pen ahi hi. 19 Ahang in, ama sungah Pasian kicinna teng a om nading, 20 singlamteh tunga luang sisan tungtawnin kilemna piangsakin, leitunga om nate hitaleh vantunga om nate hitaleh na khempeuh ama tungtawnin amah tawh a kilemkik-sakna in Pasian lungkimna ahi hi. 21 Khatvei lai-in Pasian kiang panin gamdang mi na hi uh a, na gitloh gamtatnate uh hangin lungsim-a galte na hi uh hi. 22 Ahi hangin tu-in kawkbaanna om loin mawhsakna panin suakta a, ama muhna ah a siangtho-a hong piak theih nadingin Khrist in note ama pumpi-a sihna tawh hong kilemkiksak zo hi. 23 Tua pen lungdamna-thu pana piangkhia lametna pan kihei lo-a, kiptakin kilam a, note upna ah na omsuak uh leh cihna ahi hi. Hih lungdamna-thu, van nuai-a nungta khempeuh tungah a kitangko na zaksa uh hi-a, keimah Paul tua lungdamna thu nasempa ka suak zo hi. 24 Tu-in note adingin ka thuakna ah ka lung nuama, Khrist thuaknate tawh kisai-a pawlpi ahi ama pumpi hanga a sam lai thuaknate ka ci-le-sa in ka hudim hi. 25 Pasian thu a kicingtakin note tungah kong piak nadingin Pasian hong sawlna hangin nasempa ka suak hi. 26 Tua thuthuk, akhang akhang khanghunte ah a kiselcip hi-a ahi hangin tu-in misiangte tungah hong kipholak ta hi. 27 Pasian in a minthang hih thuthuk hauhnate, Gentile-te lak amau kianga a theisak dinga hong teel ahi hi. Note sunga om Khrist pen tua thuthuk a minthang lametna ahi hi. 28 Mi khempeuh Khrist sunga a kicing kim-a ka piak theih nadingun mi khempeuh tungah pilna namkim tawh taihilhin, hilhin amah ka tangko uh hi. 29 Tua ngimin kei sunga vangliantaka a sem ama thahatna khempeuh tawh pang tentanin a na ka sem hi.

Kolosate 2

1 No ading le Laodicia a omte ading le ka mel hong mu ngei nai lote adingin bangzahtakin na sem ka hi hiam, cih na theih ding uh ka deih hi. 2 Ka deihna in, amaute lungsungah kihanthawnin itna ah kigawm a, hauhna kicing theihtelna bukim nei-in Pasian thuthuk – tua Khrist a theih theih nading uh ahi hi. 3 Ama sungah pilna le theihna goute khempeuh a kisel hi. 4 Kuamah in note paulam nei-a kamsiam thu tawh hong khem zawh loh nadingin hih thute kong gen hi. 5 Tua hi-a note tawh ka pumpi a om khawm loh hangin note tawh kha-in ka om khawm a, Khrist sunga na upna uh a kipzia le hoihtaka na nuntakzia uh ka muh manin ka nuam hi. 6 Tua ahi ciangin Khrist Jesu, Topa a na sansa bang tektekun ama sungah nungta suakin, 7 note hong kihilh bangin ama sungah zungkha-in, kilamin upna ah thakhauhin om unla lungdamna tawh kidimlet tawntung un. 8 Khrist tunga kingak sangin mihingte tang ngeinate tung le hih leitung thubulte tunga kinga-a a hawmpi le a khem thei thuguizuihna tungtawnin kuamah in sal-a hong mat loh nadingun kikem un. 9 Ahang in, Khrist sunga Pasian-hina bucing pumpi nei-in a vekpi in om a, 10 vangliatna le thuneihna khempeuh tunga lutang ahipa, Khrist sungah kicinna note hong kipia hi. 11 Note zong mawhdim pianngei suahkhia-in ama sungah vunat na hi uh a, mihing khut-a at hilo Khrist hong at, vunatsa na hi uh hi. 12 Baptisena sungah amah tawh na kivui khawm uh a, amah misi pana a thosak Pasian vangliatna ah upna tungtawnin amah tawh na thokhawm zo uh hi. 13 Note na mawhnate uh le na mawh dim pianngei vunat lohna sung uhah na sih laitakun Pasian in note Khrist tawh hong nungta khawmsak hi. Amah in i mawhnate khempeuh hong maisaka, 14 eite langa pang eite hong do, a kigelhsa ngeina-bucing le a zuih ding ngeinate phiat-a, singlamteh ah kilhin a lakhiamang hi. 15 A vangliatnate le a thuneihnate suahkhiatsakin, singlamteh tawh tuate tungah gualzo-a, amah in tuate mipi muhnop a suaksak hi. 16 Tua ahi manin annek tuidawn ahi a, biakna pawikham ni, Kha Det pawi ahikeh Sabbath ni tawh kisai-in note tungah kuamah thu na khensak kei un. 17 Hihte in hong tung ding nate liim ahi hi; a taktak pen ahileh Khrist sungah a om hi. 18 Kiniam khiatna man lo le vansawltakte biakna a pakta mi khatpeuh, tua pah takman ngah zo lo dingin kibawlsak kei un. Tua bang mite in a muhsa uh thute a neng a tawngin gen a, ama khami lo lungsim in thadah ngaihsutnate tawh amah a kisatheisak hi. 19 Amah in, sazang le thagui-in vaka kizomkhawmsakin Pasian in a khansak banga a khang pumpi buppi pan, Lutang tawh a kizopna pa a mansuah hi. 20 Note in hih leitunga ngeina bulpite Khrist tawh na sihsan nungsangun, bang hangin hih leitung aa ahi lai banga, hih ngeinate: 21 "Len kei in! Ciam kei in! Lawng kei in!” a cihte nuai-a kipia lai na hi uh hiam? 22 Hihte khempeuh zatna tawh, leitung mite thupiakte le hilhnate kibulphuh ahi manin a kisia khin dinga laitansa ahi hi. 23 Tua bang ngeinate, amau bawltawm biakna, amau kiniamkhiatna man lo pumpi bawlsiatnate pilna takpi tawh kibang napi ci-le-sa deihluatna-a bualna kham nadingin kimanna taktak a nei kei hi.

Kolosate 3

1 Tua ahi ciangin, note Khrist tawh thokhawm khin na hi nungsang un Pasian taklama a om Khrist tutna mun, tunglam nate ah na lungsim uh na nga un. 2 Na lungsimte uh, leitung nate ahi lo tunglam nate tungah na nga un. 3 Ahang in, note na si zo uh a, tu-in na nuntakna uh, Khrist tawh Pasian sungah a kisel zo hi. 4 Note nuntakna ahi Khrist hong kilat ciangin note zong ama minthanna tawh na kilangkhawm ding uh hi. 5 Tua ahi manin na leitung pianngei uh ahi: numei-pasal paktatna siantholohna, kilunggulhluatna, gitlohnate le milim biakna ahi huaihamna na sisak un. 6 Hihte hangin Pasian thangpaihna hong tung ding hi. 7 Khatvei lai-in hih bang nuntakna tawh na nungta uh hi. 8 Ahi hangin tu-in ahileh tua nate khempeuh: hehna, ngonghehna, etsatna, gendaihatna le a kihhuai kampau, na muk panun na paikhia pelmawh un. 9 Na milui hinna uh le na gamtatna teng uh na suahkhiat khit nungsangun khat le khat na kikhem kei un. 10 A piangsak-Pa lim sunin theihna lama a kibawlthak mithak na silh un. 11 Hih thu ah Greek mi, Jew mi, vunat, vunat lo, mi melmawl, Scythia mi, sila, sila lo, a om kei hi; ahi hangin Khrist, na khempeuh hi-a, na khempeuh sungah a om hi. 12 Tua ahi manin note, Pasian teelsa a siangtho le a ithuai mi na hi bangun no le no in, kikhuatuahna, migitna, kiniam khiatna lungnemna le thuakzawhna na silh un. 13 Khat le khat kilungnoplohna na neih uh ciangin kithuak zo un. Topa in note hong maisak bangin na kimaisak tek un. 14 Hih a hoih pente khempeuh tungah, tuate khempeuh kicingtakin khata henkhawm itna na silhthuah un. 15 Pum khat a suak dingin lemna ah hong sap nungsangin na lungtangte uh Khrist lemna na uksak un. Na lungdam un. 16 Pilna khempeuh tawh note khat le khat kihilhin kithuhilh unla, na sunguah lungdamna tawh Phatna-late, biakna late le khalam-late Pasian tungah na sak kawmun na lungsim sunguhah Khrist thu na tengsak phitphet un. 17 Tua ciangin na hih peuhpeuh uh thu-in ahi-a, sepna-in ahi zongin Pa Pasian tungah ama tungtawnin lungdam na ko unla, Topa Jesu minin tuate na hih un. 18 Zite aw, Topa sungah a kilawm bangin na pasalte uh tungah na ki-ap un. 19 Pasalte aw, na zite uh it unla, amau tungah na ngongtat kei un. 20 Tate aw, na khempeuh ah na nu na pa-te uh thu na mang un, hih in Topa a lungkimsak hi. 21 Pate aw, na tate uh hehsak kei un, tua hi kei leh lungkia kha ding uh hi. 22 Silate aw, na khempeuh ah na leitung pute uh thu na mang un; amaute hong muh laitak le amau hong angvan nading deihna hi loin lungsim cihtakna le Topa zahtakna tawh na sem un. 23 Na khat peuhpeuh na hih uh ciangin mihing nasem bang hi lo, Topa nasem bangin na lungsim khempeuh uh tawh sem un. 24 Topa tung pan pahtakmanin gouluahna na ngah ding uh hi, cih na thei uh hi. A na nasep uh Topa Khrist ahi hi. 25 Khialhna a bawl mi peuhmah, angvantuamna om loin a khialhna man kipia kik ding hi.

Kolosate 4

1 Pute aw, note in zong vantung ah pu khat na neih lam uh phawk kawmin na nasemte uh a kilawm a kituak in vak un. 2 Lungdamtak le kikem gige kawmin thunget na hahkat un. 3 Tua ciangin sikkhainiang buna ka omna, Khrist thuthukte ka tangko theih nadingin kote ading zong thu na ngetsak un. 4 Ka tangko ding banga siangtaka ka tangko theih nadingin thu na ngetsak un. 5 A pualam mite tungah na gamtatzia uh na pilvang un; hun khempeuh a hoih penpenin zang un. _ 6 Mi khatpeuh na dawn nading zia uh na theih nadingun, mi tawh na kihona uah hehpihna tawh kidim, ci sawhsa hi tawntung hen. 7 Tychicus in kei tunga thuthakte khempeuh hong gen ding hi. Amah i it sanggampa, nasem muanhuai le Topa sunga i naseppih khat ahi hi. 8 Kote omzia na theih theih nadingun hong gen ding le na lungsim uh hong hanthawn thei dingin amah note kiangah kong sawl hi. 9 Note lakah khat, a muanhuai, i it sanggampa Onesimus tawh hong ton uh hi. Amaute in hih lai-a thupiang khempeuh hong gen ding uh hi. 10 Barnabas tupa Marka hong hopih bangin ka thong kiatpih Aristarchus in zong hong hopih hi. (A thu kong gen na zaksa uh ahi hi; amah hong pai leh na muak un,) 11 Justus kici Jesu in zong hong hopih hi. Pasian gam adinga ka naseppih Jew mi om sun, hihte hi-a, amaute kei kihehnepna ahi uh hi. 12 Note lakah Khrist Jesu nasem khat ahi Epaphras in hong hopih hi. Amah in note, Pasian deihna khempeuh ah na dinkip nadingun, na picin nading uh le kitelcianna ciantak na neih nading-un nakpi-in thu a ngen den hi. 13 Note ading le, Laodicea le Hierpolis a omte adingin nakpi-in a sepna ka theihpih hi. 14 I lawm it siavuanpa Luka le Demas in hong hopih uh hi. 15 Laodicea a om sanggamte le Nympha le tuanu inn a pawlpi na hopihsak un. 16 Hih laikhak no kiangah a kisim khit ciangin Laodicea mi pawlpi ah zong na simsak unla, Laodicea pana laikhak zong na sim leuleu un. 17 Archippus kiangah, “Topa sunga na ngahsa nasep zosiang in,” ci-in na gen un. 18 Keimah Paul in hih hopihna laite keima khuta ka gelh ahi hi. Ka sik khainiangte na phawk un. Note tawh hehpihna om ta hen.

1 Thesalonikate 1

1 Paul, Silas le Timothy in, Pa Pasian le Topa Jesu Khrist sunga om Thessalonica Pawlpi tungah: Hehpihna le lemna no tungah om ta hen. 2 Kote thungetna sungah na min uh loin note khempeuh hangin lungdam ka ko tawntung uh hi. 3 Kote in, upna in a gahsak na sepna uh itna in a sepsak na nasep gimna uh le i Topa Jesu Khrist sunga lametna in a guat na thuak zawhnate uh Pa Pasian mai ah ka na phawk den uh hi. 4 Pasian hong it sanggamte aw, amah in note hong teelsa ahilam ka thei uh hi; 5 bang hang hiam cih leh kote gen lungdamna-thu, a thu bekin hong tung loin vangliatna, Khasiangtho le kitheih telsakna thukpi tawh no tungah hong tung hi. Note adingin no laka ka nuntak zia uh na thei uh hi. 6 Kote le Topa etteh-a gamtate na suak uh a, nakpitakin thuak napi Khasiangtho hong piak lungnopna tawh tua thupuak na sang uh hi. 7 Tua hi-a Macedonia le Achaia a thu-umte khempeuh adingin etteh na suak uh hi. 8 Macedonia le Achaia bek hi lo, note tung panin Topa thupuak kithangkhia ta a, Pasian na upna uh mun khempeuh ah kithei zo hi. Tua ahi manin tua thu kong gen uh a kul nawn kei hi. 9 Ahang in, amaute mah in kote nong sanna zia uh hong zasak sawn uh hi. Milimte na biakna uh pan, a nungta a maan Pasian nasem dingin Pasian lama na kihei zia uh le 10 misi pana a thawhsak pa, hong tung ding thangpaihna pana eite hong suaktasak ding pa a Tapa Jesu vantung pana hong pai ding ngaka na om zia uh amaute in hong ko uh hi.

1 Thesalonikate 2

1 Sanggamte aw, no kianga kong hawhna uh, a guaksuak loh lam na thei uh hi. 2 Na theihsa bangun tunung in Philippi ah hong kiselphona ka thuak uh a, langbawlna khauhtak om napi, i Pasian huhna tawh ama lungdamna-thu no tungah ka gen ngam uh hi. 3 Ahang in, kote hong ngetna pen zuauthu le ngimna siang lo pan hi loin, khembawla zol hong sawm zong ka hi kei uh hi. 4 Tua sangsikin Pasian in lungdamna-thu kem dinga a sansa mite bangin ka gen uh hi. Kote in mihing lungkimsak sawm loin kote lungtang hong entel pa Pasian lungkimsak ka sawmzaw uh hi. 5 Kote in mi maitang phatna ahi zongin, huaihamna selna in maikhuhna ahi zongin ka zat ngei loh lam uh nong thei uh a, hong theihpih Pasian ahi hi. 6 Kote in, note le mi khatpeuh pan mihing phat ding ka zong kei uh hi. Khrist sawltakpi ka hi mah bangun note adingin vangik a suak thei ding mah ka hi uh hi. 7 Ahi hangin nu in taneute a khoi bangin note lakah kong lungnem uh hi. 8 Note hong it lua ka hi manun, no tungah Pasian lungdamna-thu bek hi lo, ka nuntakna nangawn uh zong kong hawm nuam uh hi. Bang hang hiam cih leh note, kote it mahmah na suak uh hi. 9 Sanggamte aw, ka haksatna uh le ka nasep gimnate uh na thei lai takpi uh hi. Note kiangah Pasian lungdamna-thu ka hilh laitakun mi khatpeuh vangik ka suah loh nadingun sun le zanin na ka sem uh hi. 10 Thu um mite note lakah bangzah-a siangtho, thumaan le kawkbaang lo ka hi uh cih, note le Pasian ka tecite na hi uh hi. 11 Ahang in, pa in a tate a bawl bangin note kong bawl kim lam uh na thei uh hi; 12 ama gam le a minthanna sunga hong sampa Pasian tawh kilawma nungta dingin note kong hanthawn uh a, hong hehnem in kong kun uh hi. 13 Kote pana na zaksa uh Pasian thu na ngah uh ciangin, mihing thu bangin sang loin Pasian thu a hinatak bangin na sangpah uh a, tua thu in a um note sungah na sem ahi manin Pasian tungah ka lungdam tawntung uh hi. 14 Ahang in, no ka sanggamte aw, Khrist Jesu sunga om, Judea gam sunga Pasian pawlpite etteh-a gamtate na suak uh hi. Tua pawlpite in Jew-te khut a thuak uh bangin note in zong nomau gam mite khut na thuak uh hi. 15 Tua Jew mite in Topa Jesu le kamsangte that uh a, kote zong hong hawlkhia uh hi. Amaute in Pasian lungkimsak lo uh a mite khempeuh langah pangin, 16 Gentile-te a kihotkhiat theih nadingin amaute kianga thu ka hilh ding uh hong kham uh hi. Hih bangin a hih theih zahzah un mawhnate in amaute a kivuk uh hi. A tawpna ah amau tungah Pasian thangpaihna a tung petmah hi. 17 Ahi hangin sanggamte aw, tomvei sung note tawh hong kikhen ciangin (ngaihsutna hi lo, pumpi in) naseppih uh; adang khutgelhte ah ka sanggampa uh le Pasian’ nasem note kong ngaih luat manun, muh teitei kong sawm uh hi. 18 Ahang in, no kianga pai ding ka ut mahmah uh a, keimah Paul mahmah in .ka sawm thithe hangin Satan in hong khaktan hi. 19 Ahang in, eite Topa Jesu Khrist hong pai cianga ama mai-a ka minthanpih dingua ka lamet uh, ka lungnopna uh, ka pahtakna lukhu ding uh bang ahi hiam? Note hi lo na hi uh hiam? 20 Hi lua hi, note ka minthanna uh le ka lungnopna uh na hi uh hi.

1 Thesalonikate 3

1 Tua ciangin ka thuak zawh nawn het loh uh ciangin Athen ah ko kia hong kinusiat ding a hoih pen dingin ka ngaihsun uh hi. 2 Na upna uh hong thakhauhsak ding le hong hanthawn dingin Khrist lungdamna-thu zelhsakna ah Pasian na i seppih, i sanggampa Timothy kong sawl uh hi. 3 Tua in hih zia-etnate hanga kuamah a linglawn loh ding deihna ahi hi. Kote zia-etna thuak dinga laitansa ka hilam uh na theih luatsa uh ahi hi. 4 A taktakin no tawh i omkhawm lai-in kote hong kibawlsiat ding kong gengen zo uh hi. Na theih khitsa bangun a piang petmah hi. 5 Hih thu hangin ka thuak zawh nawn loh ciangin note upna thu kan dingin kong sawl hi. Mikhempa in bang lam hiam khatin hong khema, ka nasepna uh a mawkna a suah khak ding ka lauthawng hi. 6 Ahi hangin tumah in no kiang pan Timothy hong tung khinphet hi-a note upna itna le lungdamna thuthak hong puak hi. Amah in ko kiangah a lungdamhuai nong phawk tawntungna uh le kote no tawh i kimuh ding ka ut bang tektek un kote nong muhnopnate uh hong gen hi. 7 Tua ahi manin sanggamte aw, kote ka lungdonna uh le hong kibawlsiatna khempeuh ah note upna thu in hong hanthawn hi. 8 Ahang in, tu-in Topa sungah kiptaka na din khit manun ka nungta takpi ta uh hi. 9 Pasian mai-ah note hanga ka lungnopna khempeuh uh thuk kik nadingin Pasian tungah bangci in a kicing lungdamna a kimin ko kik thei ding ka hi uh hiam? 10 Note tawh kimu kika na upna uh a kisam laite kong huh theih nadingun sun le zanin hahkat theih tawpin hahkatin thu ka ngen uh hi. 11 Tu-in Pasian le Pa mahmah le i Topa Jesu in no kianga kong hawh theih nading uh lampi hong honsak ta hen. 12 No kong itna uh a khan semsem bangin note khat-le-khat le midang khatpeuh na itna uh Pasian in khangsak in dimletsak ta hen. 13 I Topa Jesu a misiangthote khempeuh tawh hong pai ciangin eite Pasian le Pa mai-ah siangtho-a kawkbaanna a om loh nadingin amah in na lungtang uh hong thakhauhsak ta hen.

1 Thesalonikate 4

1 A nunung penin sanggamte aw, Pasian na lungkimsak nadingun tu a na nuntaksa bangua na nuntak nadingun lam kong lak uh hi. Tu-in note, a tam semsem a sem dingin Topa Jesu sungah ngenin kong kun uh hi. 2 Topa Jesu thu neihna tawh lamlahna kong piakte uh na thei uh hi. 3 Pasian deihna ahi: na siantho ding uh, numei pasal paktatna na pelh ding uh, 4 a kuamah peuh in ama – pumpi siangtho-in a pahtawihuai-a, a uk tek ding a kisin ding uh; 5 Pasian a thei lo lawkite banga numei pasal kilunggulhluatna neih loh ding; 6 hih thu-ah kuamah in a sanggam tungah khialin ama tungah hamphatna zong kei hen. Kote in kong vauhilhsa uh le kong gensa bangun hih mawhnate khempeuh hangin Topa in mihingte a gawt ding hi. 7 Ahang in, Pasian in a nina nungta dingin hong sam lo-a, a siangtho-a nungta dingin hong samzaw hi. 8 Tua ahi manin hih lamlahna a nialte, mihing nial hi loin note ama Khasiangtho hong pia Pasian nial ahi hi. 9 Sanggam ki-itna thu tawh kisai ahileh nomau mahmah khat le khat na ki-it ding uh Pasian in hong hilhsa ahi manin lai-a kong gelh ding uh a kisam kei hi. 10 Tua hi-a Macedonia gam khempeuh a sanggamte na it takpi uh hi. Tua hi khin napi sanggamte aw, na it semsem ding uh kong kun lai uh hi. 11 Kong gensa bang tektekun daitakin nungta hithiat a, nomau nasep mah semin nomau khut mah tawh na sep ding na tum pen un. 12 Tua pen a pualam mite in na nisim nuntakna uh a zahtak theih nading uh le kuama tunga kingasawn na hi loh nading uh ahi hi. 13 Sanggamte aw, a ihmusa mite thu thei lo-a na om ding uh le lametna a nei lo midangte dah banga na dah ding uh ka deih kei uh hi. 14 Eite in Jesu si a, tho kik zo hi, ci-in i um hi. Tua ahi ciangin ama sunga a ihmu khinsate Pasian in Jesu tawh hong tonpih ding hi, ci-in i um hi. 15 Topa hong pai dong a om lai-a a nungta lai eite, a ihmusate sangin i masazaw peuhmah kei ding cih Topa kammal tawh kituakin note kong hilh uh hi. 16 Ahang in, Topa mahmah vantung panin, a ngaih mahmah thupiakna tawh, vansawltak lian aw le Pasian sapna pengkul ging tawh hong kumsuk dinga, tua ciangin Khrist sunga a sisate tho masa ding uh hi. 17 Tua khit ciangin a om lai a nungta lai-a om eite, huih lakah Topa dawn dingin amaute tawh meii lakah hong kilato khawm ding hi. Tua tak ciangin Topa tawh i om khawm tawntung ding hi. 18 Tua ahi manin hih thute in na kihanthawn ciat un.

1 Thesalonikate 5

1 Sanggamte aw, tu-in a ni le a hun thu kong gelh ding uh kisam lo hi. 2 Ahang in, zana guta bangin Topa ni, hong tung ding cih teltaka na theihsa uh ahi hi. 3 Mite in, “Lemna le muanna” a cih laitakun, naupaii numei, nausuahnat in a tut bangin amau tungah thakhatin siatna tung dinga, amaute a suakta kei ding uh hi. 4 Ahi hangin sanggamte aw, no na hi uh leh guta in a phawn banga, hih ni in hong phawn dingin khuamial laka om na hi kei uh hi. 5 Note na vekpi-un tua khuavak tapate le sunlai tapate na hi uh hi. Eite tua zan ahikeh tua khuamial aa i hi kei hi. 6 Tua ahitak ciangin a ihmu midangte tawh kibang loin a kigingsa le ei le ei ki-uk zo-in om ni. 7 Ahang in, a ihmute zanin ihmu a, zukhamte in zanin a kham uh hi. 8 Ahi hangin eite sunlai aa i hi nungsangin eimah le eimah ki-uk zoin, upna le itna awmdal in bulhin, lametna sik lukhu in hotkhiatna khu ni. 9 Ahang in, Pasian in eite ama thangpaihna thuak dingin hong seh lo a, ahi hangin i Topa Jesu Khrist tungtawnin hotkhiatna ngah dinga hong seh ahi hi. 10 Eite i ihmu zongin i hak zongin amah tawh i nuntak khawm theih nadingin eite adingin amah a si hi. 11 Tua ahi manin tu-a na hihsa bangun khat le khat kihanthawnin na kikhantohpih ciat un. 12 Tu-in sanggamte aw, note lakah nasep hahkatte, Topa sunga no hong ukte le no hong thuhilhte na zahtak ding uh kong sawl uh hi. 13 Amau nasepna hangin itna tawh a sangpenin na koih un. Khat le khat na kilem un. 14 Sanggamte aw, a thadahte vauhilh ding, a zahkaite hansuah ding, a thanemte huh ding le mi khempeuh tunga lungduai dingin kong kun uh hi. 15 Kuamah in khialhna, khialhna-in thuk kik loin note khat le khat ahi zongin, mi khempeuh tungah ahi zongin migit na sawm tawntung un. 16 Na lungnuam tawntung un; 17 thu na ngen den un; 18 hih in Khrist Jesu sungah note ading Pasian deihna ahi manin a piang khempeuh ah lungdam na ko un. 19 Tua Kha’ meikuang na mitsak kei un; 20 genkholhna thute na simmawhbawl kei un. 21 Na khempeuh sittel un. A hoihte kiplet un. 22 Siatna namte peuhmah na peel un. 23 Pasian mahmah, lemna Pasian in note hong siangthosak sinsen ta hen. Eite Topa Jesu Khrist hong pai cianga kawkbaanna a om lo dingin na kha, na lungsim le na pumpite uh a bupin hong kepsak ta hen. 24 Note hong sampa a muanhuai hi; amah in tuate a hih ding hi. 25 Sanggamte aw, kote ading thu na ngetsak un. 26 Kinapna siangtho tawh sanggamte khempeuh na kihopih un. 27 Hih laikhak sanggamte khempeuh tungah na sim nading uh Topa mai-ah thu kong pia hi. 28 Eite Topa Jesu Khrist hehpihna note tawh om ta hen.

2 Thesalonikate 1

1 Paul, Silas le Timothy in, Eite Pa Pasian le Topa Jesu Khrist sunga om Thessalonica pawlpi tungah: 2 Pa Pasian le Topa Jesu Khrist tung pana hehpihna le lemna note tungah om ta hen. 3 Note hangin Pasian tungah lungdam ka koh den ding uh kilawm hi. Sanggamte aw, amantakpi mah ahi hi, bang hang hiam cih leh na upna uh khangto semsem a, note khempeuh khat le khat na ki-itna uh a khangkhang hi. 4 Tua ahi manin bawlsiatnate le zia-etnate na thuakna uhah na sikdona uh le na upna uh Pasian pawlpite lakah ka kisialhpih uh hi. 5 Hihte khempeuh Pasian thukhenna man hi, cih a kilatna hi-a hih thu tawh kizui-in Pasian-gam adinga a santham ding na hina uh hanga a thuak na hi uh hi. 6 Pasian thutang hi; no hong buaisakte amah in buaisak dinga, 7 hong kibuaisak note buaina hong vengsakin, kote aa zong hong vengsak ding hi. Topa Jesu ama vansawltak vangliante tawh vantung pan meikuang tawh hong kilat ciangin hih thu a piang ding hi. 8 Amah in Pasian a thei lote le i Topa Jesu lungdamna-thu a mang lote a gawt ding hi. 9 Topa ompihna pan le a vangliatna thupina panin amaute kikhenkhia dinga, tawntung siatna-in kigawt ding hi. 10 Amah hong pai ni-in a misiangthote sungah kiminthangsak dinga amah a um mite khempeuh lakah piandang a kisa ding hi. Note kianga ka teci panna uh na upna un note zong a umte lakah hong kihelsak hi. 11 Hihte khempeuh phawk kawmin i Pasian in hong sapna tawh kilawm hong sak theih nading le na tup uh a hoih peuhmah le na upna uh hanga piang nasep khempeuh, ama vangliatna tawh a tangtunsak nadingin note ading thu ka ngen niloh uh hi. 12 Eite Pasian le Topa Jesu Khrist hehpihna tawh kizui-in, note sungah i Topa Jesu min a kithansak nading le ama sungah note hong min thansak nadingin hih bangin thu ka ngen uh hi.

2 Thesalonikate 2

1 Sanggamte aw, i Topa Jesu Khrist hong pai nading le ama kianga eite hong khop nading tawh kisai-in 2 Topa ni hong tung khin zo hi, ci-a a kigenkholhna pawlkhat ahi zongin, thu kigensawn ahikeh ko kiang pan hi a kici laikhakte hang ahi zongin, na linglawng, na patuah loh nadingun kong thum hi. 3 Lam khat peuhpeuh ah kuamah na kikhemsak kei un, ahang in, lehdona piangin, siatna-a kisehsa thukham palsatna mipa hong kilak mateng in tua ni hong tung lo ding hi. 4 Amah in Pasian a kici na khempeuh ahikeh a kibia khempeuh langdo dinga, Pasian biakinnpi sungah kikoihin, amah le amah kitawisangin amah le amah Pasian kici-in a kitangko hi. 5 Note tawh i omkhawm lai-a kong gen zel hih thute phawk nawn lo na hi uh hiam? 6 A hun liana, a kilaak theih nadingin amah bang in dal hiam, cih tu-in na thei uh hi. 7 Ahang in, thukham neihlohna in a simtham-a a neih vangliatna in a nasep pan zo hi; ahi hangin tu-a amah a dalpa a kilakkhiat masiah amah in tua bangin a kham lailai ding hi. 8 Tua tak ciangin thukham nei lo pa hong kilang dinga, Topa Jesu in a kam pana a hu tawh amah zothal-in ama hong paina a thupina in amah a susia ding hi. 9 Thukham nei lo pa hong paina ahileh nalamdang, lim le a lamdang khemte tawh a kilak Satan nasepna tawh kizui hi-a, 10 a mangthang dingte a khem gitlohna namkimin hong pai ding hi. Amaute in thutak it ding le a kihotkhiat ding a nial manun a mangthang uh hi. 11 Hih thu hangin amaute in zuauthu a up nadingun Pasian in a vanglian lam pialsakna a puak hi, 12 tua in, thutak um lo a, gitlohna nuam a sate khempeuh a mawhpaih nading ahi hi. 13 Ahi hangin Topa in hong it sanggamte aw, a cilin Pasian in Kha siansuahna nasepna tungtawn le thutak upna tungtawna hotkhiat nadingin note hong teel manin Pasian tungah lungdam ka koh den ding mah uh ahi hi. 14 I Topa Jesu Khrist minthanna na ngah theih nadingun amah in note, hih ka gen uh lungdamna-thu tungtawnin hong sam zo hi. 15 Tua ahitak ciangin sanggamte aw, kammal tawh ahi zongin, laikhak tawh ahi zongin no tunga kong puaksawn uh thuhilhnate lenin kiptakin ding un. 16 Eite hong itin ama hehpihna hanga tawntung hanthawnna le lametna pha hong pia i Topa Jesu Khrist mahmah le i Pa Pasian in, 17 na lungtang uh hong hanthawnin a hoih na gamtatnate uh le a hoih na pauna tenguhah hong tha khauhsak ta hen.

2 Thesalonikate 3

1 A nunung penin sanggamte aw, note laka ahi khinsa bang tektek in, Topa thupuak a manlangin kizel a, a kipahtawi theih nadingin kote ading thu na ngetsak un. 2 Mi khempeuh in upna nei kim lo ahi manin, a gilo a tatkhelte pan hong kihut theih nadingin thu na ngetsak un. 3 Ahi hangin Topa a muanhuai hi, na tha uh hong khauhsak dinga, gilopa panin hong hu ding hi. 4 Kong thupiakte uh na zui uh a, a zui lai dingin Topa sungah kong muang uh hi. 5 Pasian itna sung le Khrist thuakzawhna sungah a tung dingin Topa in lam hong lak ta hen. 6 Sanggamte aw, a thadahte le ko tung pana na ngah uh thuhilhna tawh kituaka nungta lo sanggamte peuhmah tawh na kithuah kei un, ci-in Topa Jesu Khrist minin thu kong pia uh hi. 7 Ahang in, kote etteh a nong neih ding uh ahi zia, no mahmah in na thei uh hi. No tawh ka om khawm lai-un ka thadah kei uh a, 8 a man piak lohin kuama an ka ne kei uh hi. Tua sangsikin, note khatpeuh adingin vangik ka suah loh nadingun gim pipi tawl pipi-in sun le zanin na ka sem uh hi. 9 Kote in hih banga ka hih uh ciangin, huhna ngah dinga thuneihna ka neih loh man uh hi loin ko le ko mahmah na zuih ding uh limlak ka suah nadingun ka sep uh hizaw hi. 10 Ahang in, no tawh ka omkhawm nangawnun zong: “Mi khat in na a sep kei leh an ne kei hen,” ci-in zuihtawm ngeina kong pia uh hi. 11 Note lakah pawlkhat thadah ci-in ka za uh hi. Amaute nasemin mahlah lo uh a, midangte thu va kumin a manlah uh hi. 12 Tua bang mite in na khatpeuh semin amau nektawm ding beek a thalawh nadingun Topa Jesu Khrist sungah thu pia-in ka kun uh hi. 13 Sanggamte aw, note na hi uh leh amaan note nasepna na cimtak ngei kei un. 14 Mi khatpeuh in hi lai sunga kong lah bangun a man nop kei leh amah na tuam ciamteh un. A maizum theih nadingin amah tawh na kikhawl kei un. 15 Ahi ta zongin na galbawl kei unla, sanggam bangin na vauhilh un. 16 Lemna Topa mahmah in, hun khempeuh a, lam khempeuh ah lungmuanna hong pia ta hen. Note khempeuh tawh Topa hong om khawm ta hen. 17 Keimah Paul in, hih hopihnate ka khutin ka gelh hi-a, ka laikhak khempeuh sungah ciamtehna tuam a suak hi. Hih in ka gelhzia ahi hi. 18 Eite Topa Jesu Khrist hehpihna note khempeuh tawh om ta hen.

1 Timothi 1

1 Eite Honpa Pasian le i lamet Khrist Jesu thupiakna hangin Khrist Jesu sawktakpi keimah Paul in, 2 Upna sunga ka tapa taktak Timothy tungah: Pa Pasian le i Topa Khrist Jesu tung pana hehpihna, lainatna le lemna om ta hen. 3 Macedonia ah ka pai lai-a kong kut bangin Ephesus mah ah na tam lai in. Tua pen mi pawlkhat in thu upna maan lo hilh nawn lo a, 4 tangthu phuahtawm le a bei thei lo khang ciamtehna peuh kana, a kipumpiak nawn loh nadingun thu na piak theih nading ahi hi. Hihte in upna hanga piang Pasian nasepna sangin kinialna a piangsak zaw hi. 5 Hih thupiakna ngim kung in, lungsim siangtho, eima kitheihna hoih le upna taktak pana piang itna ahi hi. 6 Mi pawlkhatte, hihte panin gamlapi gam mang zo uh a, a khiatna nei lo holimna ah a pial uh hi. 7 Thukham sia suak nuam uh a, ahi hangin a thugen uh a theih loh banuah hi taktak sa-a, kipsana a gente uh zong bang hiam cih a thei kei uh hi. 8 Mi khat in thukham ahi banga a zat nak leh hoih hi, cih i thei hi. 9 Eite theihna ah thukhama pen mi hoihte adinga kibawl hi loin; thukham palsatte, a langdote, a pasian-milote le mawhdimte, a siangtho lote le biakna nei lote; a nu a pa a thatte, tualthatte, 10 angkawmte le a lehtatte, sila zuaka summet bawlte le zuautheite, zuauthu-a a kiciamte le thu-up maantak tawh kilehbulh peuhmahte adinga kibawl hizaw a, 11 tua thu-up maantak pen, amah in kei hong kepsak thupha Pasian aa ahi, a minthang lungdamna-thu tawh kituak ahi hi. 12 Muanhuai hong sa a, ama nasem dinga hong koih, tha hong guan i Topa Khrist Jesu tungah ka lungdam hi. 13 Khatvei lai-in Pasian daisakpa, mi bawlsiapa, a ngongtatpa ka hi napi in, theihlah man le uplah mana gamta ka hi manin lainatna kei hong kipia hi. 14 Khrist Jesu sunga om upna le itna zui-in i Topa hehpihna a dimletin kei tungah hong kisungkhia hi. 15 Hih lai-ah a bupa santham thugen muanhuai khat om a, tua in: mawhneite hon dingin Khrist Jesu leitungah hong pai hi, ci hi. Tua mawhneite lakah kei a sia pen ka hi hi. 16 Ahi hangin tua thu hang tektekin Khrist Jesu in, amah um a, nuntak tawntungna a sang dingte etteh dingin mawhneite khempeuh laka a sia pen keima tungah a bei thei lo ama lungduaina a latsak theih nadingin lainatna kei hong kilak zo hi. 17 Tu-in tawntung Kumpipa, a si thei lo, a kimu thei lo, amah bek Pasian tungah, a tawntungin pahtawina le minthanna om den ta hen. 18 Ka tapa Timothy aw, nang thu tawh kisai, khatvei lai-a genkholhnate tawh kituakin hih lamlahnate kong pia hi. Tua lamlahnate zui-a, upna le lungsim kitheihna hoih lenin galdona hoih na do theih nading ahi hi. 19 Mi pawlkhat in hihte nolh uh a, a upna uh a siasak ngi-ingei uh hi. 20 Amaute lakah, Pasian a gendai loh nadingun a kihilh dinga Satan tunga ka ap Hymenaeus le Alexander zong a kihel uh hi.

1 Timothi 2

1 Tua ciangin, a masa penin mi khempeuh ading ngetnate, thungetnate ngetsakna le lungdamkohnate nei dingin kong kun hi. 2 Tua pen eite i pasian-mina le sianthona ah lungmuang tak le kilemtaka i nuntak theih nadingin, kumpite le thuneite khempeuh ading thungen ding cihna ahi hi. 3 Hih in hoih a, eite Honpa Pasian a lungkimsak hi. 4 Amah, mi khempeuh a kihotkhiat ding le thutak a theih ding uh a deih pa ahi hi. 5 Ahang in, Pasian khat om a, Pasian le mite kikalah palai khat omin tua mipa Khrist Jesu ahi hi. 6 Mi khempeuh tat nadingin amah kipia a, tua teci panna thu a hun lianin kipia hi. 7 Tua hi-a hih thu ah kei tangko pa le sawltakpi-in hong kiseh hi; ka zuau hi loin ka takpi hi-a, Gentile-te tungah upna mantak a hilh dingin sia in hong kiseh hi. 8 Mun khempeuh ah pasal khempeuh in hehna le kitotna om loin a khut siangthote uh lamto a thu a nget ding uh ka deih hi. 9 Numeite zong a zahtak baang dingin, a kilawm a kituaka a kizep ding uh ka deih hi. Samphek ahi zongin, kham, kep manpha le puan mantamte tawh hi loin, 10 Pasian bia numeite adinga kilawm ciang gamtat hoih tawh a kizep ding uh hizaw hi. 11 Numei in dai hithiat in, kiniamkhiatna kim tawh sin ta hen. 12 Numei in pasal tungah thu a hilh ding ahikeh thu a neih ding ka phal kei hi; amah a sip dide kul hi. 13 Ahang in, Adam kibawl masa a, tua ciangin Eve kibawl hi. 14 A kikhem zo pen Adam ahi kei hi; a kikhem zo pen tua numei hi-a mawhnei a suak hi. 15 Ahi hangin numeite in a kilawm a kituakin upna, itna le siangthona a neih suak nak uh leh nausuahna tungtawnin kihonkhia ding hi.

1 Timothi 3

1 Hih lai-ah thugen muantak khat a om hi: Mi khatpeuh in saptuam kem suah ding a ut leh nasep thupi sem nuam ahi hi. 2 Saptuam kem ahileh: ngawh bei, zi khat bek a nei, a kidaam thei, amah ki-uk zo, a zahtak baang, zindo a siam, a hilh thei, 3 lenggahzu a kham lo, a ngongtat lo, a lungnem, kitot a hat lo, sum iplah lo hi pelmawh ding hi. 4 Ama innkuan sung ukzo a a tate in zahtakna takpi tawh a thu a mante hi pelmawh ding hi. 5 (Mi khatpeuh in ama innkuan sung a uk nading zia a theih kei leh Pasian pawlpi bangci kep thei ding ahi hiam?) 6 A piangthak tung hi lo ding hi. Tua hi kei leh kimisak dinga, dawimangpa thuak bang thukhenna a thuak kha ding hi. 7 A maimawl loh nading le dawimangpa thanga a awk loh nadingin pualam mite in hoihtaka a zahtak hi pelmawh ding hi. 8 Tua mah bangin saptuam upate zong, zahtak a baang mi, a thutak, lenggahzu a hai lo, a maan lo metna a zong lo mi hi ding hi. 9 Amaute lungsim kitheihna siangtak tawh a thuk upna thutakte a lenkipte hi pelmawh ding hi. 10 A pel loin amaute kizia-et masa dinga, paubaanna a om kei leh upa kisemsak pan ding hi. 11 Tua mah tawh kibangin a zite uh zong zahtak a baang numei hi dinga, migensiat hat loin na khempeuh a kidaam thei, a muantak mi hi ding hi. 12 Saptuam upate, zi khat bek a nei hi pelmawh ding a, ama innkuan sung le a tate hoihtaka a uk zo hi pelmawh ding hi. 13 Limtaka na a semte in ama ading a hoih pen mun le Khrist Jesu sunga a upna uh kitelcianna lianpi a ngah uh hi. 14 No kianga kong paipah ding ka lamet hi napi, hih lamlahnate kong gelh hi. 15 Kong ziakai khak leh Pasian innkuan sunga mite in amau le amau bangci gamtat ding cih na theih nading uh ka deihna ahi hi. Tua Pasian innkuan, a nungta Pasian pawlpi hi-a thutak khuampi le bulkip ahi hi. 16 A lian mahmah nial nading a om lo pasian-mina thuthuk ahi: Amah pumpi-in hong kilang a, Kha in dik tangsakin vantung mite in mu uh a, minamte lakah a thu kihilhin leitungah ki-um a, minthanna tawh kilato hi.

1 Timothi 4

1 Hun nunung ciangin mi pawlkhat in upna nusia ding uh a, zuau a phuak khate le dawite hilhnate a zui ding uh hi, ci-in Kha in kiteltakin a gen hi. 2 Tua bang hilhnate kineihsiam mi zuaute tungtawna hong pai hi-a, amau lungsim kitheihna siksa-a bikton tawh kibang ahi hi. 3 Amaute in mi a kiten ding kham uh a, thumaan thei a, a um mite in, lungdam ko-a, a san dingun Pasian in a piansak an pawlkhat a tan dingun thu a pia uh hi. 4 Ahang in, Pasian piansak na khempeuh a hoih hi-a lungdam ko-a, a kisan khit nak leh nial ding khat beek a om kei hi. 5 Bang hang hiam cih leh Pasian thu le thungetna tawh siansaksa ahi hi. 6 Nang in hih nate, sanggamte kianga na hilhkhiat leh upna le na zuihsa thuhilhna hoih thutakte sunga khangto Khrist Jesu nasem hoih khat na hi ding hi. 7 A kiphuaktawm pasian-neilote tangthute le pitekte tangthu gente tawh kisawhkha kei inla, tua tangin na pasian-mi nadingin nang le nang kisin in. 8 Ahang in, pumpi kisinna in manphatna pawlkhat nei a, ahi hangin pasian-mina ahileh tu huna nuntak nading le hong tung ding nuntakna ah thuciam nei khawm ahi manin na khempeuh ah a manpha hi. 9 Hih in a bupa santham thugen muantak khat hi-a, 10 (hih hangin na semin nakpi-in i hanciam hi,) tua in mite khempeuh a diakdiakin a um mite ading, Honpa, a nungta Pasian sungah lametna i neihna ahi hi. 11 Hih nate thupiakna-in hilh in. 12 Na khangnona hangin kuamah kisimmawhsak kei in; ahi hangin thugenna, nun takna, itna, upna le sianthona ah thu-umte etteh dingin na om in. 13 Kong pai matengin mipite mai-ah Laisiangtho simin, thu hilhin lai hilhin hahkat in. 14 Upate in na tungah a khut uh a ngak laitak uh a thu genkholhna thupuak tungtawna hong kipia na letsong thudon loin om kei in. 15 Hih thute ah thanuam in; mi khempeuh in na khantoh zia a muh theih nadingin hihte ah kipumpiak in. 16 Na nuntakna le na thu-upna limtakin kemcing in. Tuate ah kuhkal lecin nang le na thugen a zate na honkhia ding hi.

1 Timothi 5

1 A upazawpa tungah kamkhauh zangin tai kei inla, na pa bangin thudam tawh hansuah in. A khangnozawte na sang gampa bangin na bawl in; 2 a upazaw numeite, nute bang le a khangnozaw numeite siangthotakin sanggamnute bangin na bawl in. 3 A tasam takpi meigongnu limtakin na phawk in. 4 Ahi hangin meigongnu khat in tu le ta a neih leh amaute in a nu a pa, a pi a pu-te a thukkikna un, a biakna uh sepkhiat ding a masa penin sinin a innkuan sung uh kem uh hen; ahang in, hih in Pasian a lungkimsak hi. 5 Amah bek a kinusia a tasam takpi meigongnu in a lametna Pasian tungah nga-a, Pasian huh ding sun le zanin a ngen niloh hi. 6 Ahi hangin ama noptatna-a nungta meigongnu, a nuntak lai nangawnin a si ahi hi. 7 Kuamah a kimawhsak theih loh nadingin hih lamlahna mite tungah zong theisak in. 8 Mi khatpeuh in ama tanaute a diakdiak in a innkuanpih taktakte kisapna a huh kei leh upna a nial hi-a a um lo mi sangin a siazaw ahi hi. 9 Meigongnu khatpeuh a khan kum sawmguk a val khita, a pasal tunga a muanhuai ahi kei ngal leh meigongte lakah na ciamteh kei in. 10 Ahi zongin a gamtat hoihin, a tate khansuah zo a, zindo a siam, misiangte khe a silsak, gim ngahte huh tawntunga, gamtat hoih namkimte ah kipia zo mahmah in a kipahtak leh meigong lakah ciamteh in. 11 A khangno zaw meigong numeite ahileh tuate minlakah na hel kei in. Ahang in, a pumpi lunggulh nate in Khrist tunga a ki-apna uh a zawh ciangin pasal a deih uh hi. 12 Amaute in a kamciam masa uh a palsat manun amau le amau thukhenna a kitun uh hi. 13 Tua banah thadahna zongsang uh a, inn simah a banvak uh hi. A thadah bek uh hi loin mi gensiat hatin, na khempeuh ah kum zo uh a, amau gen loh ding pipi a gen uh hi. 14 Tua ahi ciangin a khangno lai meigong numeite in, pasal nei in, ta nei in, a inn sung uh kem uh henla, gensiat nading hun hoih galpa pia kei le uh, cih ka thuhilhna ahi hi. 15 Pawlkhatte Satan nung a zui dingin lam a pial khin takpi ta uh hi. 16 Thu um numei khat ama innkuan sungah meigong numei a nei a om leh amau hangin pawlpi vangiksak loin amah in amaute huh ta hen. Tua hileh a kitasam takpi meigongte pawlpi in huh thei ding hi. 17 Pawlpi sung hoihtaka a makaih upate, a diakdiak in thuhilh le laihilh na a semte a zahnih in pahtawi ding kilawm hi. 18 Ahang in, Laisiangtho in: “Bawngtal in buh a cil laitakin a muk hencip kei in,” ci a, tua ciangin, “Nasempa in a thaman a ngah ding kilawm hi,” ci hi. 19 Upa khat a kimawhsakna teci nih ahikeh thum a om kei leh thu-in na sang kei in. 20 Midangte vauhilhna a suah theih nadingin a mawhte mipite lakah na tai in. 21 Hih kong lamlahnate kuamah deidan lo, kuamah angvan tuan het loin na zat dingin Pasian le Khrist Jesu le a kiteltuam vansawltakte mitmuhin nang kong suan hi. 22 Mi tungah khutngak ding man langlua kei inla, midang mawhna ah va kikum kei in. Nang le nang a siangtho-in kikem in. 23 Na gilpi le na cinat pahpahna hangin tuisik bek na dawndawn tawp inla, lenggahzu tawmtawm na zang in. 24 Mi pawlkhatte mawhna a kilang sise hi-a, amau ma ah thukhenna mun a na tung zo hi; adangte mawhnate in amaute a sulzuih hi. 25 Tua mah bangin gamtatna hoihte kilang sise a, a kilang sise lote zong a kiselcip thei kei hi.

1 Timothi 6

1 Pasian min le eite hilhna a kigen siat loh nadingin sila hakkol nuai-a omte khempeuh in, a pute uh na khempeuh ah a zahtak tham cingin ngaihsun uh hen. 2 Thu um mi pu-a, a neite in zong, amaute sanggamta ahi uh zongin zahtak lo tuan kei hen. Tua sangsikin, amaute nasepna hanga hamphatna a ngahte in, thu-umte le amau a itte ahi manin a na uh a hoihzaw a, a sepsak ding uh hizaw hi. Hihte na hilh ding le amaute tunga na kut ding ahi hi. 3 Mi khatpeuh in thu-upna maan lo hilh a, i Topa Jesu Khrist lamlahna bucing le Pasian thu lama hilhna a lungkim kei leh, 4 amah a kimisak hi a, bangmah a theitel lo ahi hi. Amah in kikalhna leh kiselna ah ukna maan lo a nei hi a, tuate in enna, kitotna, kigensiatna, a hoih lo lama kimuanmawhnate, 5 le lungsim sia mite kikalah kinawt ngitngetna a piangsak hi; amah thutak paii lo le pasian-mina, summet bawl nading beka a ngaihsun pa ahi hi. 6 Ahi hangin lungkimtaka pasian-mina in metna lianpi ahi hi. 7 Ahang in, eite in leitung ah bangmah i keng kei a, bangmah i puakhia thei kei hi. 8 Ahi hangin annek ding le puansilh ding i neih nak leh tua tawh i lungkim ding ahi hi. 9 Ahau nuam mite ahileh khemna le thang, a haihuai le a nasak thei lunggulh-luatnate hangin siatna le manthanna sungah a puk uh hi. 10 Ahang in, sum itna in siatna namkim bulpi ahi hi. Mi kimkhatte in sum deih lua-in tua upna pan pialkhia uh a, dahna tampi-in amau le amau a kisunlet uh hi. 11 Ahi hangin nang Pasian mipa aw, hihte khempeuh taisan inla, thumaanna, pasian-mina, upna, itna, sikdona le lungnemna na delh in. 12 Upna galdona hoih na do in. Hong theihpih tampite mai-ah kipulakna hoih na neihsa, hong sapna, tua nuntak tawntungna limtakin lenkip in. 13 Na khempeuh tungah nun takna a pia pa Pasian le Pontius Pilate mai-a pulakna hoih a pulak Khrist Jesu mitmuh in: 14 Topa Jesu Khrist hong kilat ni matengin a melhemna omlo, a kawk baang loin hih thupiakte na kep ding kong suan hi. 15 Tua hun pen Pasian thupha ngah amah bek Ukpa, kumpite’ Kumpi, tote’ Topa in ama hun lianin hong piangsak ding hi; 16 amah bek a si thei lo, a kineh thei lo khuavak sunga nungtapa, kuama muh ngei loh le a muh theih loh pa ahi hi. Ama tungah pahtawina le thahatna om tawntung ta hen. Amen. 17 Tu huna hih leitung sumhaute kiang ah, a ki-uatsak loh nading uh le a kician lo hauhna muang lo a, eite i lungnop nadingin na khempeuh kicingtaka hong piapa Pasian, a muan zawk nadingun thu pia in. 18 A hoih semin, gamtat hoih tampi a gamtat nading uh le cingh in mi a hop nop nadingun thu pia in. 19 Amaute in nuntakna taktak a letkip theih nadingun hong tung ding khanghun ah bulkip ahi dingin hih bangin gou a khol ding uh hi. 20 Timothy aw, na kep dinga hong kipia, limtakin cing in. Pasian nei lo thu mawk genna le a maan lopi-a theihna a kici, ngaihsutna kituak lote kiheimang san in. 21 Mi pawlkhatte tua bang nei a kicih hangun upna panin a pialmang uh hi. Hehpihna nang tawh om ta hen.

2 Timothi 1

1 Khrist Jesu sunga om nuntakna kamciamsa tawh kizui-a Pasian deihna hanga Khrist Jesu sawltakpi Paul in. 2 Ka tapa it Timothy tungah: Pa Pasian le i Topa Khrist Jesu tung pana hehpihna, lainatna le lemna om ta hen. 3 Ka thungetnate ah sun le zanin nang kong phawk tawntung a, ka pu ka pa-te hihsa bangin lungsim kitheihna siang tawh a na ka sep Pasian tungah lungdam ka ko hi. 4 Lungnopna tawh ka kidim theih nadingin na khituite phawk kikin nang kong muh ding ka lunggulh mahmah hi. 5 Na up taktakna ka phawka, tua thu-upna, na pi Lois sungah nungta masa-in, tua khitteh na nu Eunic sungah nungta a, tu-in nang sungah zong nungta hi cih teltakin ka taksang hi. 6 Hih thu hangin nang tunga ka khut kong ngakna tungtawna, nang sunga om Pasian letsong pen na zapkuang den ding kong phawksak kik hi. 7 Ahang in, Pasian in eite, zahkaina kha hong pia loin, vangliatna, itna le ei le ei ki-ukzawhna kha hong piazaw hi. 8 Tua ahi ciangin i Topa thu na genkhiat ding maizum kei inla, ama thongkia ka hina zong maizumpih tuan kei in. Ahi hangin Pasian vangliatna tawh lungdamna-thu hanga ka thuak, hong thuakpih in. 9 Eite sepsa khatpeuh hang hi loin ama ngimna le hehpihna hangin hong honkhia a, nuntakna siangtho-a nungta dingin hong sam hi. Hun kipat ma-in hih hehpihna Khrist Jesu sungah eite hong kipia zo hi. 10 Ahi hangin tua hehpihna, eite’ Honpa Khrist Jesu hong kilatna tungtawnin tu-in hong kilaakkhia hi. Amah in sihna susia a, lungdamna-thu tung tawnin nuntakna le sih theihlohna hong puak hi. 11 Tua hi-a hih lungdamna-thu tawh kisai-in a tangkopa sawltakpipa le siapa dingin kei hong kiseh hi. 12 Tua thu hangin hih banga a thuak ka hi hi. Tua hi napi ka maizum kei hi; bang hang hiam cih leh ken ka up pa ka thei a, amah ka kepsakte tua ni adingin kem zo ding cih teltakin ka thei hi. 13 Kei tung pana na zaksate, Khrist Jesu sunga om upna le itna tawh, hilhna kician lahna-in lenkip in. 14 Nang hong kikemsak na hoih kemin, eite sunga teng a Khasiangtho huhna tawh na cing in. 15 Phygelus le Hermogenes-te zong kihel in, Asia gama omte khempeuh in kei hong taihsat lam na thei hi. 16 Topa in Onesiphorus-te innkuan tungah a lainatna na lak ta hen. Bang hang hiam cih leh amah in ka kolbulh maizumpih loin thathak hong ngahsak ngitnget hi. 17 Hong maizumpih gen loh Rome ah a om lai-in kei hong muh matengin haksapi in hong zong hi. 18 Tua ni teh Topa kiang pana lainatna mu dingin Topa in seh ta hen! Amah in Ephesus ah lam tampi in kei hong huh lam teltakin na thei hi.

2 Timothi 2

1 Tua ahi ciangin nang ka tapa aw, Khrist Jesu sunga om hehpihna hangin thahat in. 2 Teci mi tampi mai-ah ka gen na zaksa nate midangte zong a hilh thei dinga a cin, a muanhuai mite na kemsak in. 3 Khrist Jesu galkap hoih bangin haksatna kote hong thuakpih in. 4 Galkap nasem mi kuamah in tangpi vai vasaipih loin amah a makaih mangpa a lungkimsak nuam hi. 5 Tua mah tawh kibangin kidemna sunga kihel mi khat peuh in kidemna ngeinate zui a, a dem kei leh a gualzote ngah lukhu a ngah kei hi. 6 Hahkattaka nasem, lokhopa in a gahte tang masa pen hi. 7 Topa in hihte khempeuh a sungthu hong theisak ding ahi manin, kong thugen ngaihsun kik in. 8 David suan le khak misi pana a kithosak Jesu Khrist phawk gige in. 9 Tualthat mawhna a nei khat banga kolbulhna ciang dong ka thuakna hih ka lungdamna-thu hang mah ahi hi. Ahi hangin Pasian thu kol a kibulh kei hi. 10 Tua ahi manin Khrist Jesu sunga om hot khiatna a tawntung minthanna tawh a ngah khawm nadingun tua a teelsate hangin na khempeuh ka thuak hi. 11 Hih lai-ah a muantak thugen khat a om hi: Amah tawh i sih khawm leh, amah tawh i nungta khawm ding hi; 12 eite in i thuak leh, amah tawh i uk khawm ding hi. Amah leh amah kinial thei lo ahi manin amah i nial leh, amah in zong eite hong nial ding hi; 13 eite i muanhuai kei zongin, amah a muanhuai den ding hi, ahang in, amah le amah a kinial thei kei hi. 14 Hih thute amaute phawksak kik den in. Thumalte peuh tawh kisai-a a kitot loh nadingun Pasian mai-ah amaute vauhilh in; tua in kimanna nei loin a ngai mite a siasak bek hi. 15 Maizumna om lo thutak thu diktakin a zang a santak nasempa bangin, Pasian tunga na kipiak theih nadingin na hih theih tawpin hih in. 16 Pasian thusimlohna, thu mawk gengen nate pel in. Bang hang hiam cih leh tua bang thu-a a uangte a pasian-mi kei semsem ding hi. 17 Amau thuhilhna, a banmuat meima bangin kizel hi. Amaute lakah Hymenaeus le Philetus, 18 thutak pana pialmangte kihel uh hi. Amaute in, “Thawhkikna tung khin ta hi,” ci uh a, pawlkhatte upna a siasak uh hi. 19 Ahi zongin Pasian bulkippi kiptakin dinga, “Topa in ama aate a thei hi,” cih le “Topa min a pulakte peuhmah in tatsiatna a taisan pelmawh ding uh hi,” ci-a kigelh tawh a tungah kiciamteh hi. 20 Inn lianpi sungah ngun le kham tawh kibawl nate bek om lo a, sing le bellei tawh kibawl zong a om hi; pawlkhat a zatna thupi a, pawlkhatte a gina kei hi. 21 Tua a nunung pen pana mi khat amah le amah a kisiansak leh a zatna a thupi-a vanzat siangtho suaka, a Pu adingin kimanna a nei na hoih peuhpeuh sem dinga kimang thei a suak hi. 22 Khangno gitloh lunggulhnate taisan inla, lungsim singtho-a Topa a sam mite tawh thumaanna, upna, itna le lemna na delh in. 23 A haihuai le thugina lo kiselnate in kitotna piangsak cih thei na hi manin tuate ah kikum kha kei in. 24 Topa nasemte kuamah tawh kitawng peuhmah lo ding uh hi; tua sangsikin mikim tungah migi-in, thu hilh thei dinga, zakdah hau lo ding hi. 25 Amah a langdote lungnemtakin lamlak pelmawh hen, Pasian in amaute kisiksakin kiheisak dinga thutak theihna ah a pi ding hi. 26 Tua ciangin khua hong phawk ding uh a, ama deihna bang sem dinga sal-a a khawi dawimangpa thang pan a suakta ding uh hi. 1Ti 1:5

2 Timothi 3

1 Ahi hangin hih thu ciamteh in: ni nunungte ah a lauhuai hunte hong piang ding hi. 2 Mite in, amau le amau ki-itte, sum deihluate, kisialhhatte, kisa theite, siatgenhatte, nu-le-pa thu amang lote, lungdamna mel thei lote, a siangtho lote, 3 itna nei lote, a maisak nuam lote, gensiat-hatte, amah le amah ki-uk zo lote, a ngongtatte, a hoih deih lote, 4 a zuautatte, a gamhtatte, a kimisakte, Pasian it ding sanga nopsakna a itzawte, 5 pasian-mina lim nei napi a, a vangliatna a nialte hi ding uh hi. Amaute tawh kisawhkha kei in. 6 Amaute, kinelnelin mi innah va lut uh a, mawhnate tawh kidim lunggulhna namkim in a suknawk a tonawk, 7 a sinsin hanga thutak a thei lo numei zulhzaute a va zothawh gawpte ahi uh hi. 8 Jannes le Jambres-te in Moses a langdo bang tektekun, hih mite in zong thutak langdo uh a, amaute lungsim kisia gawpsa ahi manun upna thu tawh kisai-in a kinilkhiate ahi uh hi. 9 Ahi hangin amaute in ama uh a sot kei ding uh hi; bang hang hiam cih leh tua mite thu tungtang mah bangin amaute haina zong mikim tungah a kitheitelsak ding hi. 10 Bangbang ahi zongin nang, ka thuhilhna thu khempeuh, ka nuntak zia, ka ngim ka tup, upna, lungduaina, itna, sikdona, 11 bawlsiatna, thuaknate – Antioch, Iconium le Lystra-te ah kei tungah bang teng pianga, bang bawl siatnate thuak ka hi hiam, cih a vekpi in na thei khin hi. Tua hi napi Topa in tuate khempeuh panin hong hukhia hi. 12 A taktakin Khrist Jesu sunga pasian-mina tawh a nungta nuam mi peuhmah kibawlsia dinga, 13 migilo le mi kheltatte, mi khem le khemna thuakin a siat semsem laitak uh hi ding hi. 14 Ahi hangin nang na hileh na sinsa le na kipsansa ah kip den in. Bang hang hiam cih leh nang in tuate na sinna pa na thei-a, 15 Khrist Jesu sunga upna tungtawnin hotkhiatna ngah nadingin hong pilsak thei a siangtho Laisiangtho na neu tunga kipan na theihsa ahilam zong na thei hi. 16 Laisiangtho khempeuh Pasian humuap hi-a, thuhilh nading, tai nading, bawlphat nading, thumaan lama pattah nadingin phatuamin manpha hi. 17 Tua in Pasian mipa pen na hoih khempeuh sem dingin kimtaka a kithuam theih nading ahi hi.

2 Timothi 4

1 Pasian mai le misite le mihingte thukhen ding pa Khrist Jesu mai-ah, hong kilat nading le a gam paulamin hih nasep kong guan hi: 2 Thu hilh in; ahun ahi-a, ahun ahi kei zongin kigingsa-in om in; kuhkaltak le kidawm mahmah kawmin lam lakin, bawlpha in, tai-in, hanthawn in. 3 Ahang in, mite in thu-up bucing a cimtak hun hong tung ding hi. Tua sangsikin, amaute lunggulhna tawh kituakin, a bil thakna uh tawh kituak, a zaknophuai lel thu a gen dingin amau kiangah sia tampitak a kaikhawm ding uh hi. 4 Amaute in thutak lehngatsan ding uh a, phuahtawm tangthu lamah a nga ding uh hi. 5 Ahi hangin nang na hileh bangmah peuhah pilvang inla, haksatna thuakin sawltak na sem inla, na Pasian nasepna ah na nasep khempeuh zo in. 6 Ahang in, dawntheih-a biakna banga sun dingin a mansa in ka om a, ka pai hun hong tung zo hi. 7 Galdona hoih do khin in, tai kidemna ka tai zo a, upna ka kemcing zo hi. 8 Tu-in thumaana thukhenpa Topa in tua ni cinga kei hong piak ding thumaanna lukhu kei ading a om zo hi. Kei bek hong kipia loin ama kilat ding lawpa a ngakte khempeuh zong a pia ding hi. 9 A manlang theithei-in ka kiangah hong pai dih in. 10 Ahang in, Demas in hih leitung a it manin kei hong taisan a, Thessalonica ah a pai hi. Galatia ah Crescens pai zo a, Dalmatia ah Tita a pai hi. 11 Kei kiangah Luka bek a om hi. Marka hong zawn inla hong tonpih in. Bang hang hiam cih leh ka nasepna ah amah ka phattuampih mahmah hi. 12 Ephesus ah Tychicus ka sawl hi. 13 Nong pai ciangin Troas a Carpus kianga ka nusiat ka puantualpi le ka laizialte a diakdiak in ka savun laizialte hong puak in. 14 Sum sungpa Alexander in nakpi in kei hong bawlsia hi. Ama hihsa tawh kituakin Topa in a thukkik ding hi. 15 Amah in ka thupuak uh langdo lua mahmah ahi manin, nang zong kidawm mahmah in. 16 Ka kihutna thu ka gen masak lai-in kuamah in kei hong panpih lo-a, a kuamahpeuh in hong taisan uh hi. Amaute kimawhsak kei ta hen. 17 Ahi hangin ka gei-ah Topa dinga, kei tungtawnin Gentile-te khempeuh in tua thupuak a zak nadingun kicingtaka ka tangko theih nading tha hong guan hi. Tua hi-a, humpinelkai kam panin kei hong hukhia hi. 18 Gitlohna tawh hong kisukna citeng panin Topa in kei hong hu dinga, ama vantung gamah bittakin hong tunpih ding hi. Ama tungah a tawntungin minthanna om den ta hen. Amen. 19 Priscilla le Aquila le Onesiphorus-te innkuan na hopihsak in. 20 Korinth ah Erastus taam-a, Miletus ah Trophimus cinasa in ka nusia hi. 21 Phalbi ma-in hih lai tun hong sawm teitei in. Eubulus in nang hong hopih a Pudens, Linus, Claudia le sanggamte khempeuh in zong hong hopih uh hi. 22 Topa in na kha hong ompih ta hen. Hehpihna in nang hong ompih ta hen.

Tita 1

1 Pasian teelte, upna le pasian-mina – a tun thutak theih nadinga – 2 tua upna le theihna pen zuau a gen lo Pasian in hun kipat ma-a a ciamsa, nuntak tawntung nading lametna tungah kinga a, 3 eite Honpa Pasian thupiakna tawh hun a sak hun lianin, thuhilhna tungtawna ama thu hong kilatsakna Pasian nasem le Jesu Khrist sawltakpi keimah Paul in, 4 Eite in i upkhawm upna sunga ka tapa taktak Tita tungah: Pa Pasian le eite Honpa Khrist Jesu pana hehpihna le lemna hong tung ta hen. 5 Crete a nang kong nusiatna pen, a kizo nai lo a kinusiate na zawhsiang theih nading le nang kong lamlah bangin khuapi kima upate a seh ding na hi hi. 6 Upa dingte: a pel loin kawkbaanna om lo ding, zi khat bek a nei, a tate zong thu um mi hi ding a, phengphi-a a thumang lo mi a hi kei ding hi. 7 Saptuam kem pen, Pasian na a kikemsak ahi khit nung sangin pel loin kawkbaanna a om lo, a kiliansak lua lo, a heh baih lo, zu a kham lo, a gamhtat lo, met nading zonga a zuautat lo mi hi ding hi. 8 Tua sangsikin, a pel loin zindo siam mi, a hoih deih mi, ama pumpi ki-uk zo mi, a thutang mi, a siangtho le a kisek zo mi hi ding hi. 9 Amah in midangte thu-upna maan tawh han thawna a langpante a nial theih nadingin a kihilhsa a muantak, thupuak kiptakin a len pelmawh ding hi. 10 Bang hang hiam cih leh a diakdiakin vunat pawlte sungah a lehdo thei mi, a kamsi le a zuauphuak mi tampi a om hi. 11 Amaute kamhum ding uh hi. Ahang in, a hilh loh ding pipi uh hillhin innkuan sung buppi a siasak uh hi; tua zong a maan lo-a metna zonna ahi hi. 12 Amau kamsangte khat nangawn in, “Crete mite zuauphuak dente, gilo ngongtatte, thadah a anhaite ahi hi,” na ci hi. 13 Hih teci panna a maan ahi hi. Tua ahi manin amaute upna ah a kip theih nading uh le 14 Jew-te phuahtawm tang thute ahikeh thutak a nial mite thupiakte a thudon loh nadingun khauh takin tai in. 15 A siangthote aa in na khempeuh siangtho a, ahi hangin a kisiate le a um lo mite aa in a siangtho khat beek a om kei hi. A taktakin amaute lungsim le a lungsim kitheihna uh a siakhawm hi. 16 Pasian thei kineih uh a, ahi hangin a gamtatna uh tawh a nial uh hi. Amaute mi huathuai, a thumang lo, na hoih sem dinga a cin lo uh ahi hi.

Tita 2

1 Thu-up maan tawh kituakin hilh pelmawh in. 2 Pasal khanghamte a kidaam thei ding, zahtak baang ding, amau le amau ki-uk zo ding, upna, itna le thuakzawhna ah a kip nadingun hilh in. 3 Tua tawh kibangin numei khang hamte, amaute nuntakna ah zahtak baang ding, mi gensiat hat loin, zu hai lo ding, ahi hangin a hoih khempeuh a sinsak dingun hilh in. 4 Kuamah in Pasian thu a gensiat loh nading in, amaute in, nupilate in a pasalte uh le a tate uh a it ding, 5 amau le amau ki-uk thei ding uh a, siangthoin, innah manlahin, migi-in, a pasalte uh thu a man ding uh a hilh thei ding uh hi. 6 Tua mah bangin pasal khangno laite amau le amau a ki-uk zawh nadingun hanthawn in. 7 Na khempeuhah na hoih semin amaute etteh na suak in. Thu na hilh ciangin thutakna, cihtakna, 8 le a kimawhpaih thei lo kampau siangtho lak in. Tua hileh hong langpante in, eite tungah thusia bangmah mu loin a maizum ding uh hi. 9 Silate in na khempeuhah a pute uh thu manga, amaute a lungkimsak ding uh hahkatin, amaute kam sel loin, 10 a na uh guksak loin a muanhuai zaw dingin hilh in. Tua hileh i Honpa Pasian tawh kisai hilhnate a deihhuai a suaksak ding uh hi. 11 Ahang in, hotkhiatna hong puak Pasian hehpihna, mi khempeuh tungah a kilang zo hi. 12 Tua hehpihna in pasian-milohna le leitung vaite deihna tawh kisai-a, “Ut lo,” ci ding le pumpi ki-uk zo-a nungta ding, diktat ding le tu khanghunah pasian-mitakin nungta dinga hong hilh lai mah in, 13 a lian a minthang eite Pasian le Honpa Jesu Khrist hong kilat nading-lametna thupha i ngak hi. 14 Amah, tatsiatna khempeuh pana eite hong tankhia ding le ama hong neihtuam dingin amahmah in hong siansuaha, a hoih a gamtat ding a lawp dingin eite ading amahmah hong kipia pa ahi hi. 15 Tua ahi ciangin hihte khempeuh hilh in; thuneihna khempeuh tawh hansuah inla tai in. Kuamah kisimmawhsak kei in.

Tita 3

1 Tua mite in gam-ukte le thuneite thu nial lo-a, a thu uh mangin, a hoih peuhpeuh sem dingin kiging kholin, 2 kuamah gensia loin mi tawh kilemin, mi ading khualin mi khempeuh tungah kiniamkhiatna taktak a lah dingun phawksak kik in. 3 Hun khat lai-in eite zong ahai, a thumang lo, mi khemsa le pumpi lung gulhna namkim le noptatna sila i hi hi. Gitlohna le hazatna tawh kidim in, mite muhdah le khat le khat kimuhdahna tawh i nungta hi. 4 Ahi hangin eite Honpa Pasian migitna le itna hong kilat ciangin, 5 amah in thu maana na i sep hang hi lo, ama lainatna hangin eite hong hon hi. Amah in eite suahkikna-a silsiangna le a Khasiangtho bawlphat thakna tungtawnin hong hon hi. 6 Amah in eite Honpa Jesu Khrist tung tawnin tua Kha Siangtho cingtakin eite tungah hong sungkhia hi. 7 Tua pen ama hehpihna hanga diktansak, nuntak tawntungna lametna a nei gouluahte i suah theih nading ahi hi. 8 Hih in a muantak thugen ahi hi: Pasian a muangte in a hoih peuhmah hih dinga, amau le amau a kipiak zawh nadingun hih thute na uang gen ding kong deih hi. Hihte in mi khempeuh adingin a hoih pen le a phatuam pen ahi hi. 9 Ahi hangin a haihuai kikalhnate, khang tangthute, thukham thu a kiselnate le kitotnate peel in. Bang hang hiam cih leh hihte, phattuamna nei lo le a kimanna bei ahi hi. 10 Pawl khen nuam mipa khatvei vauhilh inla, tua khitin a nihveina vauhilh lai in. Tua khit ciangin amah thudon nawn kei in. 11 Tua bang mite a tuampian le mawhdim hi-a, amah le amah kimawhpaih hi cih ciantakin na thei ding hi. 12 Artemas ahikeh Tychicus no kiangah kong sawl phetin Nicopolis ah ka kiangah pai hong sawm teitei in. Bang hang hiam cih leh tua lai-ah phalbi sung va om dingin ka khentat khin hi. 13 Tangdingpa Zenas le Apollos na huh theih bangbangun na huh unla, a kisap khempeuh uh na thei un. 14 I mite mawk nuntak loin a nisim kisapnate uh a kisiktawm zawh nadingun na hoih sem dingin amau le amau a kipiak nadingun kisin pelmawh uh hen. 15 Kei tawh a omkhawm teng in hong hopih kim uh hi. Upna sunga ei hong itte na hopihsak in. Hehpihna in note khempeuh hong ompih ta hen.

Filemon 1

1 Khrist hanga thongkia pa Paul le i sanggampa Timothy in, Ka lawm it uh le ka naseppih uh Philemon, 2 ka sanggamnu uh Apphia, ka galkappih uh Archippus le na inna kikhawm pawlpi tungah: 3 I Pa Pasian le Topa Jesu Khrist tung pana hehpihna le lemna note tungah om ta hen. 4 Ka thungetna ah note kong phawk simin ka Pasian tungah lungdam ka ko tawntung hi. 5 Bang hang hiam cih leh Topa Jesu sunga na upna le misiangte khempeuh na itna thu ka za zo uh hi. 6 Na upna midangte na kuppihna ah thanuam-a, Khrist sunga i neih na hoih khempeuh theihtelna kim na neih theih nadingin thu ka ngen hi. 7 Sanggampa aw nang, misiangte lungsim thaksuaksak zo na hi manin na itna in kei hong lung nuamsakin hong hanthawn hi. 8 Tua ahi manin Khrist sungah na nasep ding hangtakin thu hong pia thei napi, 9 itna tawh kong thum zaw hi. Tua ciangin keimah Paul ka tek banah Khrist Jesu hanga thongkia zong ka hi lai-a, 10 kol ka bulh laitaka ka tapa hong suak Onesimus ading kong ngen hi. 11 Tunung lamin amah nang adingin kimanna a nei lo ahi hi. Ahi hangin tu-in nang le kei adingin mi manpha mahmah a suak hi. 1Co 1:10; 1Th 2:11 12 Kei pumpi zahin ngaihsunin am ah nang kiangah kong sawl kik hi. 13 Lungdamna-thu hanga sikkhainiang buna ka om sung teng, nang tanga kei hong huh dingin ka kiangah ka omsak nuam mahmah hi. 14 Ahi hangin nang hong deihsakna khempeuh nang utthu-a nong hihsa suaka, hong kihihsak teitei a suah loh nadingin nang thu loin bangmah ka hih nuam kei hi. 15 Nang tawh tawmvei sung na kikhenna uh pen amah a hoih a na neih kik theih nading hi kha ding hi – 16 tua nangawn zong sila hi nawn lo, sila sanga a hoihzaw sanggam it ahi zaw lai ding hi. Amah kei tungah a ithuai mahmah hi; ahi hangin mihing hina le Topa sunga sanggam khat hina tawh nang tungah hong ithuai zaw lai ding hi. 17 Tua ahi ciangin kei, na naseppih a nong sim leh kei nong muak ding bangin amah na muak in. 18 Amah in nang tungah khialhna khatpeuh a neiha, bat khatpeuh a neih leh kei tungah hong siik in. 19 Hih lai, keimah Paul in ka khut tekteka ka gelh ahi hi. Kei tungah nang mahmah nong kibat gen vet kei ni – keimah in a vekpi in kong din kik ding hi. 20 Sanggam aw, Topa sungah nang tung panin phattuamna ngah thei leng ka ut hi; Khrist sungah ka lungsim hong thaksuaksak in. 21 Hong mang dingin kong muanga, kong nget sanga lianzawin, na hih ding thei kawmin lai kong gelh ahi hi. 22 A kisam lai khatah: na thungetnate uh hong kidawnna-in, kei no tawh hong om khawm thei kik dingin kilamen ka hi manin zintunna inndei khat a baihsa-in na koih khol in. 23 Khrist hanga ka thong kiatpih Epaphras in nang hong hopih hi. 24 Ka naseppih Mark, Aristarchus, Demas le Luke-te in zong nang hong hopih uh hi 25 Topa Jesu Khrist hehpihna in na kha hong ompih ta hen.

Hebrute 1

1 A beisa hunin Pasian in kamsangte tungtawnin i pu i pa-te tungah lam tuamtuamin thu na gen a, 2 ahi hangin hih ni nunungte ah khuavannuai a bawlpa na khempeuh a luah dinga a sehpa, ama Tapa zangin eite tungah thu hong gen zo hi. 3 Tua Tapa in Pasian ahina taktak a kilatkhiatna le a minthanna tankhiatna hi-a, ama kammal vangliatna tawh na khempeuh a lenkip hi. Mawhnate siansak nading a bawl khit ciangin vantung Thupina taklam ah a tu hi. 4 Tua ahi ciangin vansawltakte sangin min thupi zawtham a luah mah bangin vansawltakte sangin a thupi zawtham hi. 5 Ahang in, Pasian in vansawltakte kua kiangah, “Nang ka Tapa na hi hi; tu ni-in na Pa ka suak zo hi, ” ci ngei ahi hiam? Ahikeh “Kei ama Pa ka hi dinga, amah ka Tapa ahi ding hi,” ci-in gen ngei ahi hiam? 6 Tua banah, Pasian in a ta masa pen leitungah hong paisak ciangin amah in, “Pasian vansawltakte khempeuh in amah bia uh hen,” ci hi. 7 Amah in vansawltakte a gen lai-in, “Amah in a vansawltakte huihte suaksakin, ama nasemte, meikungte a suaksak hi,” ci hi. 8 Ahi hangin Tapa thu ah amah in, “Pasian aw, na kumpi tokhom, a tawntungin om den dinga, a kumpi-gam ukna sik ciangkhut, thumaanna hi ding hi. 9 Thumaanna it-in, tatsiatna na mudah hi; tua ahi manin Pasian, na Pasian lungnopna sathau nilhna tawh na pawlte khempeuh sangin, nang hong tawisang zaw hi,” 10 Tua banah zong, “Topa aw, a tungin leitung bulpite na phut a, vantungte na khutin na bawl ahi hi. 11 Tuate a kisia ding uh a, nang na om den hi; tuate khempeuh puan bangin a patkhia ding uh hi. 12 Puantualpi bangin tuate na zialkhia dinga, puansilh bangin kikheng ding hi. Ahi hangin nang na kikhel kei a, kumte a bei ngei kei hi,” ci hi. 13 Pasian in, vansawltakte kua tungah: “Na galte khempeuh na khepekte ngak nadinga ka bawl khit matengin ka taklam ah na tu-in,” ci-in gen ngei ahi hiam? 14 Vansawltakte khempeuh, hotkhiatna luah dingte nasem dinga, kisawl khate hi lo ahi hiam?

Hebrute 2

1 Tua ahi manin eite i tolhmang loh nadingin i zaksa thute limtakin i thudon semsem kul ding hi. 2 Ahang in, vansawltakte gen thupuak kip zo a; tua thu zui loin a palsatte in gawtna diktak thuak tektek uh ahileh, 3 tua zahtaka thupi hotkhiatna thudon kei lehang bang i ci suahtak zawh ding hiam? Hih hotkhiatna a masa penin Topa in a genkhiat, ama gen a zate in ei tunga a kipsak ahi hi. 4 Pasian in zong limte, a lamdangte le nalamdang tuamtuamte le ama deih banga a hawm Khasiangtho letsongte tawh tua thu teci a pang hi. 5 Eite gen mailam huna hong om ding leitung pen vansawltakte nuai ah a koih kei hi. 6 Ahi hangin mi khat in teci a pannasa mun khat ah: “Nang ngaihsut tham dingin mihing bang hi-a, na thudon dingin mihing tapa bang ahi hiam? 7 Vansawltak sangin a niam zawzek in na bawl a; minthanna le pahtawina khusak in, 8 ama khepek nuai-ah na khempeuh na koih hi,” ci hi. Na khempeuh ama nuai ah koih a, Pasian in ama nuai ah a koih loh bangmah a om kei hi. Tua hi napi tu tadihin na khempeuh ama nuai-a omin i mu kei hi. 9 Ahi hangin vansawltakte sangin a niam zawdeuh a kikoih phot Jesu in, Pasian hehpihna hangin mi khempeuh adinga sihna a ciap theih nadingin sihna a thuak manin tu-in minthanna le pahtawina a kikhusak eite in i mu hi. 10 Tapa tampi minthanna ngahsakna ah ama ading le ama tungtawna na khempeuh a omna pa Pasian in, amaute hotkhiatna a piangsak pa thuakna tungtawna, a bukimsak ding mah kilawm hi. 11 Mite a siangthosak pa le a kisiang thosakte innkuan khat hi khawm hi. Tua ahi ciangin amaute sanggamte cih ding, Jesu a maizum kei hi. 12 Amah in, “Ka sanggamte tungah na min ka pulak ding hi; mihonte kikhopna ah nang phatna la ka sa ding hi,” 13 Tua ciangin, “Amah ka muang ding hi,” ci kik hi. Amah in, “Pasian in kei hong piaksa tate tawh, hiah ka om hi,” ci leuleu hi. 14 Tate in si le sa nei ahi nungsang amah in zong a sihna tungtawn a, sihna vangliatna a nei dawimangpa, a suksiat theih nading 15 le a nuntak sung teng sih ding launa sila-a omte a suahtak theih nadingin amaute mihing hina hong tang hi. 16 Ahang in, a taktakin ama huh vansawltakte hi loin Abraham suan le khakte hizaw hi. 17 Hih thu hangin Pasian na a sepna sungah mi lainat siam le a muanhuai tulpi a suah nading le mite mawhnate thoihdamna a bawl theih nadingin lam khempeuh ah a sanggamte mah bangin hong suah ding mah ahi hi. 18 Bang hang hiam cih leh zia-etna a thuakte a huh theih nadingin amah zong kizia-etin a thuak hi.

Hebrute 3

1 Tua ahi manin vantung-lam sapna a ngah a siangtho sanggamte aw, eite in i pulak tua sawltakpi le tulpi Jesu tungah na ngaihsutnate uh kipsak un. 2 Pasian inn sung khempeuh ah Moses a muanhuai bang tektekin amah a sehpa tungah amah a muanhuai hi. 3 Inn sangin a lampa in pahtawina a ngah zawk bang tektek in Moses sangin Jesu in pah tawina thupizaw a ngah ding kilawm hi. 4 Ahang in, inn peuhmah a lam mi khat om a, ahi hangin na khempeuh a lam Pasian ahi hi. 5 Moses pen mailam a kigen ding thute teci a pang, Pasian innkuan sung khempeuh ah nasem muanhuai ahi hi. 6 Ahi hangin Pasian innkuan tungah Khrist tapa muanhuai ahi hi. Eite in i hanna le i kisialhpih tua lametna i letkip suak leh ama innkuan i hi hi. 7 Tua hi-a, Khasiangtho in: “Tu ni-in ama aw na zak uh leh, 8 gamlak a zia-etna hun sungin na lehdo lai bangun, na lungtang uh khauhsak kei un. 9 Tua lai-ah na pate un kei hong zia-et in hong sin uh a kum sawmli sung ka hihte a mu uh hi. 10 Tua khang tungah ka heh a, tua ciangin, ‘Amaute lungtang lam pial tawntung a, ka lampite a thei kei uh hi,’ ka cihna tua hang ahi hi. 11 Tua ciangin ka heh a, ‘Amaute ka khawlna-ah a lut ngei kei ding uh hi,’ ci-in kiciamin ka genkhia hi,” a ci hi. 12 Sanggamte aw, note a kuamah peuh lungtang ah mawhdim le umlah in, a nungta Pasian kiang pan na pialmang loh nadingun kikem un. 13 Ahi hangin tuni a kici sungin mawhna’ khemhatna hangin kuamah in a lungsim a khauhsak loh nadingin nisimin khat le khat na kihan thawn un. 14 Eite in a masa-a i neih kimuanna, a tawp dongin kiptaka i letkip leh Khrist sungah tanh a nei i hi hi. 15 Amah in, “Tu ni-in ama aw na zak uh leh, na lehdo lai bangun na lungsim uh khauhsak kei un,” na ci khin phet hi. 16 Za napi-a, a lehdo kuate ahi hiam? Egypt pana Moses in a pikhiatte hi lo uh ahi hiam? 17 Amah kum sawmli sung a hehna kuate tung ahi hiam? Mawhna bawla, a pumpi uh gamlaka, a pukte tung hi lo ahi hiam? 18 Pasian in ama khawlna ah amaute a tung ngei kei ding uh hi, ci a, a tomlawh, a thumang lote tung lo kua tung hi ding hiam? 19 Tua ahi ciangin amaute uplahna hangin a lut thei kei uh hi, cih i thei hi.

Hebrute 4

1 Tua ahi ciangin ama khawlna sunga lut nading kamciam om lai ahi manin khatpeuh tua sunga lut dingin a cin zawh loh khak ding kidawm ni. 2 Ahang in, amaute zak bang tektekin eite kianga hong kihilh lungdamna-thu i za hi; ahi hangin a zate in upna tawh a gawmkhawm loh manin, amaute zaksa thupuak, amau adingin kimanna a nei kei hi. 3 Pasian in, “Tua ciangin ka heh a, ‘Amaute ka khawlna ah a lut ngei kei ding uh hi,’ ci-in kiciamin ka genkhia hi,” a cih bang tektek in, tu-in a umsa eite tua khawlna ah i lut hi. Tua hi-a leitung a kipiansak khit nungsang a nasep a zawhsa ahi hi. 4 Ahang in, mun khatah: “A ni sagihna ni-in a nasepna khempeuh panin Pasain a khawl hi,” ci-in tua kammalte tawh ni sagihna thu a gen hi. 5 A tunga thumal sung mah ah, “Amaute ka khawlna sungah a lut ngei kei ding uh hi,” ci kik hi. 6 Pawlkhatte tua khawlna ah lut thei lai ding uh a, a beisa hun sunga a kiangua lungdamna-thu kigen a zasate, amau thumanlohna hangin a lut thei kei uh hi. 7 Tua ahi manin Pasian in ni dang khat seh kikin, tu-ni, ci-a tua a cih khit a sawtpi ciangin a ma-a a gensa bangin David tungtawnin, “Tu ni-in ama aw na zak uh leh, na lungtangte uh khauhsak kei un,” na ci hi. 8 Ahang in, Joshua in amaute khawlna pia khin hileh, Pasian in tua khitin ni tuam khat thu gen nawn lo ding hi. 9 Tua ahi ciangin Pasian mite adingin Sabbath khawlna khat om lai hi. 10 Ahang in, Pasian khawlna sunga a lutte khempeuh in Pasian ama nasepna pan a khawl bang tektekin amau nasepna panin khawl ciat ding uh hi. 11 Tua ahi manin amaute hong lah thumanlohna zui-in kuamah puk lo-a, tua khawlna-ah i lut nadingin i hih theih zahzah in hahkat ni. 12 Pasian thu nungta in hihtheihna a nei hi. Langnih a hiam namsau sangin hiamzaw a, nuntakna le kha, tang le guhngekte nangawn pailetin khen thei a, lungsim ngaihsutnate le lungtang tupnate khentel thei hi. 13 A kipiangsak khempeuh Pasian muhna pan a kisel bangmah a om kei hi. I thu i tut nading mitmuhin a kisin bangmah om loin kitel sinsen in a om hi. 14 Tua ahi manin eite in, vantungte khengin a pai tulpi Pasian Tapa Jesu i neih khit nungsang i pulak tua upna kiptakin len ni. 15 Ahang in, eite zawn khalna hong thuakpih thei lo tulpi nei i hi kei hi; ahi hangin eite thuak mah bangin zia-etna a pawlpawl a thuak ngei, ahi hanga mawhna a nei lo tulpi khat i nei hi. 16 Tua ahi ciangin eite in lainatna i ngah a, i kisap hunhuna hong huh ding hehpihna i ngah nadingin kimuangtakin hehpihna tokhom zuan ni.

Hebrute 5

1 Tulpi peuhmah mihing lak pana kiteel hi a, Pasian tunga nasep khempeuh amau tanga sem ding mawhnate hanga biakpiakna le letsongte a pia dinga kiseh ahi hi. 2 Amahmah zong thanemna ah om ngei zo ahi manin a thei lo mite le a gammangte lungnemtakin kem thei hi. 3 Hih thu hangin, amah in ama mawhnate le mite mawhnate tang dingin biakpiakna a piak ding kul hi. 4 Pasian in Aaron a sap bang tektekin a sap mite longal kuamah in ama thu-in hih pahtawina a la kei hi. 5 Tua hi-a Khrist in zong tulpi suahna minthanna ama tungah amahmah in a la kei hi. Ahi hangin Pasian in ama tungah, “Nang ka Tapa na hi hi; tu ni-in na Pa ka suak zo hi,” ci hi. 6 Tua ciangin mundang khatah, “Nang, Melchizedek gui zui-in siampi khat na hi tawntung hi,” a ci hi. 7 Jesu leitungah a nuntak hunlai-in amah sihna pan a honkhia thei pa tungah nakpi in kahna le khitui luanna tawh thu ngetnate le ngetnate ngena zahtakna tawh a ki-ap manin kisang hi. 8 Amah tapa hi napi a thuaknate panin thuman’na sin a, 9 khatvei hoihkim khinin, ama thu a mangte khempeuh adingin hotkhiatna nak hong suak zo a, 10 Melchizedek gui zui-in Pasian in tulpi za pia zo hi. 11 Hih thu tawh kisai gen ding tampi om a, ahi hangin theihna ah tuantual na hi manun teltaka gen ding haksa hi. 12 A taktak in, siate suakin mite na hilh ding uh hun ta hi napi Pasian thu thutak bulpite hong hilh kik ding mi khat na kisam uh hi. Antak hi lo nawizu na kisam uh hi. 13 Nawizu-a kivak peuhmah naungek hi lai ahi manin, thumaanna tawh kisai thuhilhnate na thei nai kei uh hi. 14 Ahi hangin antak pen, a sia le a pha khen thei a, zangin zongsang a, amau le amau a kisek sa, a picing sate ading ahi hi.

Hebrute 6

1 Tua ahi manin Khrist tawh kisai ah picin lam manawh ni. Sihna hong tun nasepnate pan kisikna bulkipte phut kik loin Pasian upna, 2 baptisenate tawh kisai lamlahnate, khutngaknate, misite thawhkiknate, le tawntung thukhennate tawh kisai, thuhilhna bulpite nusia ni. 3 Pasian in hong phal leh tua bangin i hih ding hi. 4 Khatvei khuavak mu khin a, vantung letsong a ciam khin, Khasiangtho sunga tanh a nei khin, 5 Pasian thu hoihna le hong tung ding khanghun vangliatnate a ciam khin mite, 6 a pukmang uh leh kisik theih ahi kei hi. Bang hang hiam cih leh amau man nadingin Pasian Tapa a kilhlum kik uh hi-a, mipi mai-ah sim mawhna a thuaksak kik uh ahi hi. 7 A hunhunin guah a dawl, a kikhawh sakpa adingin a manpha gah a gahsak tua lo, Pasian thupha ngah ahi hi. 8 Ahi hangin ling le thanglingte a pona lo in kimanna nei lo-a, a kihamsiat ding lauhuai hi. A tawpna-ah a kihaltum ding hi. 9 Hih bang i cih tei hangin kong it lawmte aw, no tawh kisai-in hotkhiatna tawh kipawl a hoihzaw nate no aa hi, ci-in lungmuangin ka om hi. 10 Pasian thutang lo ahi kei hi; amah in na nasep uh le ama mite na huhnasa uh le na huh lai nadingte uhah amah na itna uh na lahnasa uh a mangngilh kei ding hi. 11 Na lametna uh a kip nadingin na vekun a tawpkhak dong tua bangin na thanuam ding uh kong deih uh hi. 12 Note na thadah ding uh kong deih kei uh a, upna le sikdona tungtawna kam ciamsa a luahte na etteh ding uh kong deih uh hi. 13 Pasian in Abraham tungah kamciam a piakin amah sanga lianzaw kiciam nading om lo ahi manin amahmah kilo in kiciam a, 14 "Thupha kong pia taktak ding a, suan le khak tampi kong pia ding hi,” a ci hi. 15 Tua mah bangin lungduaitaka a ngak khit ciangin Abraham in tua a kikamciamsa a ngah hi. 16 Mihingte, amau sanga lianzaw khat lo-in kiciam uh a, tua kiciamna in thu kigen pen kipsakin kiselna khempeuh a beisak hi. 17 Bang hang hiam cih leh Pasian in a kamciamsa a luahte tungah, ama tupna bang a khellohna theisak nuam ahi manin tomlawhna tawh a kipsak hi. 18 Eite in hong kipia lametna len-a i delh laitakin nakpi-a i kihanthawn theih nadingin Pasian zuautheihlohna thu nih tawh Pasian in a hih zo hi. 19 Eite in tua lametna kha adingin sikkipin i nei a, kip mahmah in muanhuai hi. Tua in, puanzak nung mun siangtho sungnung ah lut-a, 20 tua munah Jesu eite ma-ah eite tangin a na lut khinzo hi. Amah Melchizedek gui zui-in tawntung tulpi hong suak hi.

Hebrute 7

1 Hih Melchizedek pen Salem kumpipa hi-a a Sang Pen Pasian siampi ahi hi. Amah in, kumpite zo khina hong ciah, Abraham na dawnin thupha pia-a, 2 tua ciangin Abraham in, amah na khempeuh ah sawm ah khat a pia hi. A masa penin a min khiatna “thumaanna kumpipa” hi a, tua ciangin “lemna kumpipa” cihna “Salem kumpipa” zong ahi hi. 3 Nu nei lo, pa nei lo, khangsimna nei lo, kipat ni le nuntakna bei ni a nei lo, Pasian Tapa bangin, a tawntungin siampi-in a om den hi. 4 Amah bangzah takin lian hiam, ngaihsun dih ni. Pupi Abraham nangawn in a galvan matte panin sawm ah khat pia tanghial hi! 5 Tu-in Levi suan le khak siampi a suakte in a sanggamte uh ahi Abraham suan le khakte hi taleh amaute tung panin sawmah khat a kaih ding uh thukham in a kal hi. 6 Bangbang ahi zongin hih mipa in a pianna Levi pan sut lo napi, Abraham tung pan sawmah khat na kai-a, kamciamte a ngahpa thupha na pia hi. 7 Tua hi-a a lianzawpa in a neuzawpa thupha a piak pen theihkhialh nading a om kei hi. 8 Thukhat ah, a si thei mihingte in sawmah khat kai uh a, a thudang khatah a nungta hi a kici pa in a kai hi. 9 Sawmah khat a kai Levi in Abraham tungtawnin sawmah khat pia hi, nangawn kici thei ding hi. 10 Bang hang hiam cih leh Melchizedek in Abraham a na dawn hun laitakin Levi in a pubul pumpi sungah a om lai hi. 11 Levi-te siampi nasepna tungtawnin kicinna kingah hileh (ahang in, tua hihna kibulphuh in mite tungah thukham a kipia ahi hi.) bang hanga Aaron gui ahi lo, Melchizedek gui siampi dang hong pai kul lai ding ahi hiam? 12 Ahang in, siampi hina kilaihna a om bangin thukham zong laih pelmawh a kul hi. 13 Hih nate a kigenna pa ahileh beh tuam mi khat hi-a, tua beh panin kuamah biakna-tau ah nasem ngei a om kei hi. 14 Ahang in, eite Topa lah Judah suan le khak ahilam kitel zo a, tua beh tawh kisai-in Moses in siampite thu bangmah a gen kei hi. 15 Melchizedek bang siampi dang khat hong kilang ahi ciangin thugen hong kitelzaw semsem a, 16 tua siampi hong suakpa pen a pu a pa ua ngeina tawh hong suak hi loin, a kisia thei lo nuntakna’ vangliatna pansanin siampi hong suak ahi hi. 17 Ahang in, “Nang, Melchizedek gui zui-in tawntung siampi na hi hi,” ci-in kipulak hi. 18 Ngeina masa pen thanemin kiman na nei lo ahi manin kinawlkhin a, 19 (ahang in, thukham in bangmah a hoih kimsak kei hi.) a hoihzaw lametna hong kipia in, tua tungtawnin Pasian kiang i nai hi. 20 Tua nangawn zong kiciamna lo tawh hi peuhmah lo hi! Adangte kiciamna khat beek om loin siampi a suak uh hi. 21 Ahi hangin Pasian in kiciamna tawh ama tungah thu a gen khit ciangin siampi hong suak a: “Topa kiciam in, a lungsim a khel kei ding hi: “Nang tawntung siampi na hi hi,” ci hi, 22 Hih kiciamna hangin, Jesu a hoihzaw thukhun kipsakpa hong suak hi. 23 Tu-in sihna in amaute nasep a khaktan nungsangin siampi tampi a om hi. 24 Ahi hangin Jesu nungta tawntung ahi manin amah a kipden siampi ahi hi. 25 Tua ahi manin ama tungtawnin Pasian kianga a paite khempeuh kicingtakin honkhia thei hi; bang hang hiam cih leh amaute tanga a thumsak dingin a nungta tawntung hi. 26 Tua bang tulpi khat – a siangtho, a kawkbaang lo, a siang, mawhneite pana kikhenkhia, vante tunglama a kitawisang pa khat in, eite kitaksapna hong pia zo mahmah hi. 27 Tulpi dangte tawh kibang lo a, a masa in ama mawhna, tua ciangin mite mawhnate, biakpiakna ni khat khit ni khatin piak a kul kei hi. Amah in amaute mawhna ading amahmah biakpiakna-a a kipiak ciangin khatvei in cin khin hi. 28 Ahang in, thukham in a thanem mite’ tulpi in seh-a, ahi hangin thukham nunga hong pai kiciamna in a tawntunga hoihkim-a kibawl, Tapa a seh zo hi.

Hebrute 8

1 I thu gen, hih ahi hi; vantung ah Thupina kumpi tokhom taklam-a tu tua bang tulpi i nei a, 2 amah mihing bawl ahi lo, Topa bawl biakbuk taktaka munsiangtho-a sempa ahi hi. 3 Tulpi peuhmah biakpiakna le letsongte pia dinga kiseh ahi hi; tua ahi ciangin hih pa in zong piak ding na khat a neih ding kisam hi. 4 Thukham in a kalh letsongte a pia ding mi na om zo a hi manin, amah leitunga om hileh siampi a hi kei ding hi. 5 Amaute in munsiangtho khat sungah na sem uh a tua pen vantunga om pen liim leh kibatpih ahi hi. Hih thu hangin Moses in biakbuk lam dinga a kipat ciangin, “Mual tunga nang hong kilaksa bangin na khempeuh na bawl ding thei in,” ci-in a vauhilh hi. 6 Ahi hangin Jesu hong palaina thukhun bel, thukhun lui sanga thupizaw hoihzaw kamciamte tunga kibulphuh ahi manin amaute nasepna sangin Jesu nasepna a thupizaw hi. 7 Ahang in, a masa pen thukhun a khialhna khat beek om lo hileh thukhun dang ading mun a kizong kei ding hi. 8 Ahi hangin Pasian in tua mite mawhsak nading mu a, “Israel innkuante le Judah innkuante tawh thukhun thak ka bawl hun hong tung ding hi, Topa in cikhia hi. 9 A pu a pa-te a khut uah lenin Egypt pana ka paikhiatpih lai-in amaute tawh ka thukhun bang ahi kei ding hi; bang hang hiam cih leh ka thukhun ah amaute muanhuai tawntung lo uh a, amaute ka nungngatsan ta hi, Topa in cikhia hi. 10 Hih in Israel innkuante tawh, tua hun khit cianga ka thukhun ding ahi hi, Topa in cikhia hi. Ka thukhamte amaute lungsim ah ka guang dinga, amau lungtang tungah ka gelh ding hi. Amaute Pasian ka hi dinga, amaute ka mite ahi ding uh hi. 11 Kuamah in a vengte ahikeh ama sanggampa tungah hilhin, ‘Topa thei in,’ cih a kul nawn kei ding hi; bang hang hiam cih leh amaute khempeuh in a neu pen pan a lian pen dongin kei hong thei ta ding uh hi. 12 Ahang in, amaute gitlohna ka maisak dinga, a mawhnate uh ka ciamteh nawn kei ding hi,” ci khin hi. 13 Hih thukhun “athak” cihna in thukhun a masa zatmawh a suaksak hi, zatmawh a suaksa a lui pen a mangthang pah ding hi.

Hebrute 9

1 Thukhun masa in biakna-a zat ding zuihtawm ngeina le leitung mun siangtho zong a nei hi. 2 Biakbuk khat a kilam hi. Tua buk dei masa ah meivak tunna, sabuai le a ki-apsa anlum om a, Mun Siangtho kici hi. 3 Puanzak nihna nungah Mun Siangtho Pen kici inndei khat a om hi. 4 Tua mun ah gim namtui halna kham biakna-tau le kham a kizut thukhun singkuang a om hi. Hih sing kuang sungah manna koihna kham bel, asel Aron ciangkhut le thukhun kigelhna suangpekte a om hi. 5 Singkuang tungsan ah thoihdamna mun limsunin Minthanna cherub-te a om hi. Ahi hangin hih nate tu-in i sut ditdet zo kei ding hi. 6 Hih bangin na khempeuh a kigualh diudeu khit ciangin siampite a nasepna uh sem dingin dei puanung sungah a hunhunin a lut den uh hi. 7 Ahi hangin inndei sung nung pen sungah tulpipa bek lut-a, kum khatin khatvei bek lutin amahmah ading le mite in a theih loh man-ua a bawl uh mawhnate tang dingin sisan a tawi lo ngei kei hi. 8 Hih thu hangin biakbuk masa pen a om laiteng Mun Siangtho paina lampi kilak nai lo tadih hi, cih Khasiangtho in hong lak hi. 9 Hih pen tu hun ading etsakna hi-a, letsongte le biakpiakna-a kipiate in hih biakna a piate kitheihna lungsim a siangsak thei kei hi, cih lahna ahi hi. 10 Tuate nek le dawn a kisitna ngeina tuamtuam lel hi-a, biakna ngeina thak hong tun mateng-a zat ding zuihtawm ngeina bek ahi hi. 11 Hih lai-a omsa a na hoihte tawh tulpi dinga Khrist hong pai lai-in piansak na laka kihel lo, mihing khuta kibawl lo, a lianzaw le a kicianzaw biakbuk sungah a lutsuak hi. 12 Amah, keelte le bawngnote sisan tawh lut lo-a, ama sisan mahmah tawh khatvei-a cin ding, tawntung tatkhiatna ngahsa in Mun Siangtho Pen ah a lut hi. 13 Biakna ngeina-a a sianglote tungah keelte, bawngtalte sisan le bawngla-vute kithehin amaute kisian suah a, tua bangin a puatham uh a siang hi. 14 Tua ahileh tawntung Kha tungtawnin amahmah kawk baang lo a; Pasian tunga kipia Khrist sisan in sihna hong tun nasepna panin a nungta Pasian na i sep theih nadingin i lungsim kitheihna hong siangsak zawtham lo ding ahi hiam! 15 Hih thu hang mahin thukhun thak palai Khrist hong hi-a, a kisam mite in a kiciamsa tawntung gouluahna a ngah theih nadingun, thukhun masa nuai-a a bawlsa uh mawhnate pan a suaktasak dingin tu-in tatman dingin amah hong si zo hi. 16 Thusiah tawh kisai peuhmah ah, a thusiahpa a sihna theihcian ding kisam hi; 17 bang hang hiam cih leh a thusiahpa a sih khit ciang bekin a thusiah kizang thei pan hi; a thusiahpa a nuntak sungin a kizang thei ngei kei hi. 18 Thukhun masa na ngawn zong sisan lo-a a na hih theih lohna hih thu hang mah ahi hi. 19 Moses in mite khempeuh tungah thukham in a piak thu teng a tangko lai-in, bawngnote sisan le tui, samul dupsan le puknah hiangte in laizial le mite khempeuh theh khawm hi. 20 Amah in, “Hih in Pasian in note zuih dinga hong piak thukhun sisan ahi hi,” ci hi. 21 Tua mah tawh kibangin, biakbuk le biakna ngeina-a kizang na khempeuh sisanin a theh hi. 22 A taktakin thukham in na khempeuh phial sisan tawh siansak dingin kal-a, sisan kibua loin mawh maisakna a om kei hi. 23 Tua ciangin hih biakpiaknate zangin vantunglam nate kibatpihte siansuah a kul ahi hi. Ahi hangin vantunglam nate mahmah, hihte sanga biakpiakna hoihzaw ahi hi. 24 Ahang in, Khrist ahileh a taktak tawh a kisun bek, mihing bawl a siangtho mun ah a lut kei hi; Pasian mai-ah eite tanga a va kilang dingin vantung mahmah ah a lut khin zo hi. 25 Tulpi in ama sisan ahi lo sisan tawisa in Mun Siangtho Pen ah kum simin a lut bangin vantungah Khrist a lut kikkik kei hi. 26 Tua bang hi hileh leitung kipiansak nungsang Khrist in tamveipi a na thuak kul ding hi. Ahi hangin tu-in khanghunte bei hunin khatvei-a kimang den mawh maisak nadingin amahmah biakpiakna-in hong kilang zo hi. 27 Mihing adingin khatvei sih ding laitansa hi-a, tua khit ciangin thukhenna a thuak ding hi. 28 Tua bang tektek in Khrist zong mi tampi mawhnate lakhiamang dingin khatvei biakpiakna in kipia zo hi; tua hi-a mawhna a pua ding hi nawn lo, amah a ngak mite hotkhiatna puak dingin a nihveina hong kilang ding hi.

Hebrute 10

1 Thukham pen hong tung ding na hoihte liim bek hi-a a taktakte hi lo hi. Hih thu hangin thukham in kum khat khit kum khat a kipia kikkik biakpiaknate zangin, a bia dinga a kianga a va naihte a hoihkimsak thei ngei kei hi. 2 Hoihkimsak thei hileh tua piaknate kitawpsak khin lo ding ahi hiam? Ahang in, a biate khatvei a kimangden siansaksa hi dinga amau mawhnate hangin mawh kisakna a nei nawn kei ding uh hi. 3 Ahi hangin tua biakpiaknate kum sima mawhna phawksak kikna ahi hi, 4 bang hang hiam cih leh bawngtalte le keelte sisan in mawhna a lakkhiamang thei kei hi. 5 Tua ahi manin Khrist leitungah hong pai lai in: “Biakpiakna le biakna na lunggulh kei hi, ahi hangin kei ading pumpi khat nong bawlkholhsak zo hi. 6 Meihal biakna le mawhna hanga biaknate in hong lungkimsak lo hi. 7 Tua ciangin ken, ‘Kei hih lai-ah ka om hi – laizial sungah kei thu a kigelh zo hi — Pasian aw, na deih bang a sem dingin kong pai hi,’ ka ci hi,” a ci hi. 8 Amah in a masa penin, “Biakpiaknate le biaknate, meihal biakna le mawhna hanga biaknate na lunggulh kei a, tuate tawh zong na lungkim tuan kei hi,” (thukham in tuate bawl ding na kal napi) a ci hi. 9 Tua ciangin amah in, “Kei hih lai-ah ka om hi, na deihna sem dingin kong pai hi,” ci khin zo hi. A nihna a kipsak nadingin a masa pen a nawlkhin hi. 10 Tua thuseh hangin khatvei-a manden dingin Jesu Khrist pumpi-a biakpiakna tungtawnin eite hong kisiangthosak zo hi. 11 Siampi peuhmah in ni khat khit ni khat dingin ama biakna nasepte a sem hi; mawhnate a lakhiamang thei lo kithoihnate mah a pia kikkik hi. 12 Ahi hangin hih siampipa in hun khempeuh ading mawhnate biakpiakna khat a piak khit ciangin Pasian taklamah a tu hi. 13 Tua khit nungsang ama galte a khepek ngakna a kisuahsak ding a ngak hi; 14 ahang in, a kisangthosak mite, khatvei biakpiakna tawh a tawntungin a hoihkimsak hi. 15 Hih thu Khasiangtho in eite tungah teci a pang hi. A masa in, 16 "Tua hun khit ciangin amaute tawh ka bawl ding, thukhun hih ahi hi, Topa in ci hi. Amaute lungtang sungah ka thukhamte ka koih dinga, amaute lungsim sungah tuate ka gelh ding hi,” ci hi, 17 Tua khit ciangin: “Amaute mawhnate le thukham palsat-a a gamtatnate uh ka phawk nawn kei ding hi,” a cihbeh lai hi. 18 Tua ahi ciangin hihte a kimaisak nasa mun ah mawhna hanga biakpiakna khat beek a om nawn peuhmah kei hi. 19 Tua ahi manin sanggamte aw, Jesu sisan hangin Mun Siangtho Pen ah lut ding kimuanna i neih nungsang, 20 eite adingin tua puanzak kantanin a nungta le a thak lampi khat kihong zo a; tua pen ama pumpi ahi hi. 21 Tua hi-a Pasian innkuan tungah eite in siampilian khat i neih nungsang, 22 eite lungsim kisuantakna panin i lungtangte thehsiangsa le i pumpi tuisiang tawh silsa in, upna hanga kitheihtelna kim tawh Pasian kiang zuan ni. 23 Eite hong kamciampa muanhuai ahi manin i sansa lametna hoihtakin lenkip ni. 24 Tua bangin eite khat le khat itna le gamtat hoih lama i kithanopsuah theih nadingin ngaihsun ni. 25 Pawlkhatte a kingeinaseh bang uh hi loin kikhop khawmna nusia kei ni. Ahi hangin, tua Ni in hong naih ta cih na theih bangun khat le khat kihanthawn semsem ni. 26 Thutak theihna i ngah nungin thei gegu pi mahin mawhna i bawl lai leh mawhnate biakpiak nading om nawn lo a, 27 ahi hangin thukhenna le Pasian galte a valhtum ding meikuang zuahzuah a lauhuai lametna bek a om lai hi. 28 Moses thukham a nial peuhmah teci nih hiam, thum hiam om nak leh lainatna om loin a si hi. 29 Amah a siangsak thukhun sisan, a siangtho lo na bangin simmawh a, hehpihna Kha engko-in, Pasian Tapa a khenuai-a a tuancil mi, bangzah ta-a, a nasiazaw-in gawttakin na ngaihsun hiam? 30 Ahang in, “Phulakna kei aa hi-a, ken ka thuk ding hi,” cih le “Topa in a mite thu a khen ding hi,” a ci kik pa i thei hi. 31 A nungta Pasian khut sunga puk ding mulkimhuai mahmah hi. 32 Note in khuavak na ngah khit nungua haksatna mai-ah panmun la a, nasiataka na do lai uh ni masate phawk un. 33 Khat veivei note, mi tampi mai-ah engko ding le bawlsiat dingin hong kipholaka, a hun dangte ah a kibawlsiate tawh na ding khawm uh hi. 34 Thong sunga kiate na khasiat uh a, na neih na lamte uh hong laksakna uh zong lungnuamtakin na sang uh hi, bang hang hiam cih leh note mahmah in no adingin a hoihzaw le a tozaw neihsa na nei uh cih na thei uh hi. 35 Tua ahi ciangin na kimuanna lungsim uh na paikhia kei un; pahtakman tampi hong kipia ding hi. 36 Pasian deihna na sep uh ciangin ama hong ciamsa na ngah nadingun na sikdo ding uh kisam hi. 37 Ahang in, hun tomno khat sungah, “Hong pai ding pa amah hong pai dinga a ziakai kei ding hi. 38 Ahi hangin ka mi thumaanpa upna tawh a nungta ding hi. Amah a nungtolh leh ama tungah ka lungkim kei ding hi,” 39 Eite i hileh nungtolh-a kisiate laka i hi kei a, ahi hangin uma kihonkhiate i hizaw hi.

Hebrute 11

1 Tu-in upna pen, i lamette tel cianna le i muh lohte theihtelna ahi hi. 2 Tanglai mite a kiphatna hihte hang ahi hi. 3 A kimu theite a kimu thei pana kibawl hi loin, khuavannuai, Pasian thupiaka piang ahi hi, cih upna-in i theitel hi. 4 Abel in upna hangin Cain sangin biakpiakna hoihzaw Pasian tungah a pia hi. Pasian in ama biaknate a phatgen lai-in upna hangin mi thumaan a hina a phat hi. Amah a sih khit hangin upna hangin thu gen lailai hi. 5 Enok in upna hangin sihna a thuak khak loh nadingin hih nuntakna pan a kilakhia hi; Pasian in amah lakhiamang zo ahi manin a kimu zo nawn kei hi. Ahang in, amah a kilak ma in, Pasian a lungkimsak pa khat hi, ci-a kiphatsa khat ahi hi. 6 Tua hi-a upna loin Pasian a kilungkimsak thei kei hi. Bang hang hiam cih leh ama kianga hong pai peuhmah in amah a om takpi mah hi, amah citaka a zongte pahtakman a pia hi, ci-a up ding a kul hi. 7 Noah in upna hangin a kimu nai lo nate ah a kivauhilh ciangin kihtakna siangtho tawh, a innkuanpihte hotkhiat nading gunkuangpi a lem hi. Ama upna hangin leitung mawhpaih a, upna hanga thumaanna a luahpa a suak hi. 8 Abraham in upna hangin a nung cianga, a luah dinga a ngahna muna pai dingin a kisap lai-in koi lamah pai ding cih nangawn a theih loh hangin mangin a pai hi. 9 Amah in a upna hangin gamdang a kiciamna gamah mikhual bangin inn a lam hi. Amah tawh a kibanga ciamna a luahpih Isaac le Jacob mah bangin tuipuan bukte ah a teng hi. 10 Ahang in, bulpite a nei khuapi lian khat a lamen hi. Tua khuapi a geelpa le a lampa Pasian ahi hi. 11 Abraham in upna hangin, amah tek lua ta-in Sara mahmah lah tasel hi napi ama tunga thu a ciampa muanhuai a sak manin amah pa khat a suah theihna kipia hi. 12 Tua hi-a hih a si tawh a kibang mi khat panin vantunga om aksite zaha tam le tuipi sehtak-a sehnel kisim zo lote zah, suan le khakte zong a piang hi. 13 Hih mite khempeuh upna tawh a nuntak lai mah un a si uh hi. Amaute in a kiciamsa nate ngah lo uh a, tuate gamlapi panin galmuh in a galmuak bek uh hi. Tua hi-a amaute leitungah gamdang mi le mikhual ahilam uh a kiphawk uh hi. 14 Tua bang a ci mite in amau ading gam khat a zong uh hi, cih a kilangsak hi. 15 Amaute in a nusiatsa uh gam na lunggulh den uh hileh ciah kik nading hun hoih nei khin tham ding uh hi, 16 Tua sangsikin, amaute in gam hoihzaw khat vantung gam a lunggulh uh hi. Pasian in amaute ading khuapi lian khat bawlkhol zo ahi manin, amau Pasian a kicih ding a maizum kei hi. 17 Pasian in a zia-et ciangin Abraham in upna hangin biakpiak nadingin Isaac a pia hi. Tua kam ciamna a ngahpa in a tapa khat neihsun biakpiakna-a pia dingin a kithawi hi. 18 Tua mah lah Pasian in, “Isaac tungtawnin na suan na khak a kiminlawh ding hi,” a cihna pa hi lai hi. 19 Abraham in, Pasian in misisate thosak thei, ci-in ngaihsun a tehpih in gen leng, amah in Isaac misi pan a ngah kik ahi hi. 20 Isaac in upna hangin Jacob le Esau mailam ding ngaihsunin thupha na pia hi. 21 Jacob in a sih kuanin upna hangin Joseph tapate thupha pia ciat-a a ciangkhut tungah kingamin na bia hi. 22 Joseph a sih kuanin upna hangin Israel mite Egypt pan a paikhiat nading le ama guhte tawh kisai lamlahna na pia hi. 23 Moses nu le pa-te in upna hangin, amah a suah khit kha thum sung sel uh hi. Bang hang hiam cih leh amaute in amah naupang mawkmawk hi lo cih mu uh ahi manin kumpipa thupiak a kihta kei uh hi. 24 Moses in a khan khit ciangin upna hangin Pharaoh tanu’ tapa a kicih ding a nial hi. 25 Mawhna nopsakna-a tomvei sung gualnop sangin Pasian mite tawh bawlsiatna a thuak khawm ding teelzaw hi. 26 Mailam ah pahtakman a san ding a etkholh manin Khrist hanga maimawkna pen Egypt gam goute sangin manphazaw a sa hi. 27 Amah in upna hangin kumpipa hehna kihta loin Egypt nusia hi; amah in muh theih loh mipa a muh manin a thuak keeikai hi. 28 Amah in, upna hangin ta masa a thatpa in Israel ta masa a sukkhak loh nadingin Paisan-pawi le sisan thehna a na bawl hi. 29 Tua mite in upna hangin leihul a pai bangin San Tuipi a kantan uh hi; ahi hangin Egypt mite in tua bangin hih a sawm uh leh amaute tui ah kialum uh hi. 30 Mite in upna hangin, Jericho ni sagih sung a kimkot khit uh ciangin khulhte a cim hi. 31 Numei kizuak Rahab in, upna hangin thukansimte a tunsak manin thumang lote tawh a kithat khawm kei hi. 32 Bang genbeh lai ding ka hi hiam? Gideon Barak, Samson, Jephtha, David, Samuel le kamsangte thu gen nading ka hun a kicing kei hi. 33 Amaute in upna tungtawnin kumpi gamte zo uh a, thutang tawh ukin, a kiciamsate a ngah uh hi; amaute in humpinelkai kamte khak uh a 34 meikuangpi phelhmitin namsau ma pan suakta uh hi. Amaute thanemna thakhauhna suakin galdona ah vanglian uh a, gamdang galte zo mang uh hi. 35 Numeite in amau misite, a nungtasa-in ngah kik uh hi. Adangte kigawt-a, thawhkikna hoihzaw ngah dingin a kikhah khiat ding a nial uh hi. 36 Adangte sikkhainiang tawh kikhihin thong sungah a kikhum laitakin pawlkhatte in ciamnuih bawlna le sat gawpna a thuak uh hi. 37 Amaute suang in kideng, amaute singat tawh tumnih kisuah; amaute namsau tawh kithat hi. Amaute in tuu vun, keel vunte silhin vakvai uh a, gentheih bawlna, bawlsiatna le khel bawlna kithuaksak hi. 38 Amaute adingin leitung tenna taak hi lo hi. Amaute gamlak mualsang, suanghawm le kaw hawm sungah a tai kawikawi uh hi. 39 Amaute in a upna uh hangin phatna a ngah uh hi. Tua hi napi amaute kuamah in tua ciamsa pen a ngah kei uh hi. 40 Pasian in eite ading a hoihzaw khat geel khin zo ahi manin eite tawh i kimkhawm ciang bekin amaute kihoihkimsak ding hi.

Hebrute 12

1 Tua ahi manin hihzah taka a tam teci meiipite in i kimkot ah hong um ahi ciangin eite hong dal na khempeuh le baihtaka hong awksak ziau thei mawhna paikhia-in eite adingin i mai-a kiciamtehsa tai kidemna zui-in sikdotakin tai ni. 2 Ama mai-a kikoih lungnopna a ngah nadinga singlamteh ah simmawh bawlsiatnate a thuak keeikai khit ciangin Pasian taklamah a tu, i upna a piang sakpa le a hoihkimsakpa Jesu mitsuan gige ni. 3 Note lungkia a, thanemin na om loh nadingun mawhdim mite in amah a langbawlna a thuakpa na ngaihsun un. 4 Mawhna do-a na panna-uhah na sisan uh a luan dongin na do nai kei uh hi. 5 Tapate banga note kianga hong gen, “Ka tapa aw, Topa hong sekna neu ngaihsut kei in; amah in nang hong tai ciangin na lung kiasak kei in; 6 bang hang hiam cih leh Topa in a itte sek-a, tapa-a a sante peuhmah dan a tuaksak hi” 7 Haksatnate sekna hi, ci-in thuak keeikai un; Pasian in tapa bangin hong bawl hi. Ahang in, a pa in a sek loh ta bangci ta ahi hiam? 8 Note hong kisek kei leh (mi peuhmah in sekna a thuak hi.) tapate taktak hi loin zawlta na hi-ua hi ding hi. 9 Tua tham loin eite khempeuh in pianna pa i nei teka amaute in ei hong sekin tua hangin amaute i zahtak hi. I khate’ Pa tungah ki-ap zawthamin nungta lo ding i hi hiam? 10 I pate in tomcik sunga dingin, amau in hoih pen a sak uh bangin eite hong sek uh a, ahi hangin Pasian in ama sianthona i tanhpih theih nadinga i hoih nadingin hong sek ahi hi. 11 Hong kisek laitakin sekna a nuam om loin na velval hi. A kisin khinsate in a nung ciangin thumaanna le lemna gah gahkhia uh hi. 12 Tua ahi manin a zawngkhal na bante uh le a thanem na khukte uh hatsak un! 13 Khebaite kilawi loin a dam zawk nadingin, “Na khete uh ading lamphei sial un.” 14 Mi khempeuh tawh kilemin nungta a, na siantho nadingun nakpi-in hanciam un; sianthona lo tawh kuamah in Topa a mu kei ding hi. 15 Kuamah in Pasian hehpihna ngah lo-a, a om loh nading le a khaatna zung po toin buaina piangsaka, mi tampi a ninsak ding tua zung a sel loh nadingin kikem un. 16 Kuamah in numei-pasal paktatna bawl kei hen, ahikeh an nek khat tawh tapa upa luahna za a zuak pasian-milo Esau bangin om kei hen. 17 Na theihsa bangun tua khit ciangin hih thupha a luah nop hangin amah kinial ta hi. Khitui luangin tua thupha a zon kik hangin lungsim kikhelna a suah zo kei hi. 18 Note a kilawng thei, mei-a a kang thei, khuamialpi, khuazing le huihpi; 19 pengkul mutna ahikeh thu kigen a zate in amau tunga tua bang thu a kigen nawn loh nadinga a nget zawzen uh aw a ginna mual a tung na hi kei uh hi. 20 Bang hang hiam cih leh, “Ganhing nangawn in tua mualpi a sukkhak leh suangin kidenglum pelmawh ding hi,” ci-a thu kipia amaute in a thuak zo kei uh hi. 21 Tua a muh pen lipkhaphuai lua ahi manin Moses in, “Lau in ka ling hi,” na ci hi. 22 Ahi hangin note hong tunna mual pen Zion Vum hi-a, a nungta Pasian khuapi ahi vantung Jerusalem ahi hi. Note, vansawltak tul tampi mun tul tampite lungnuama a kikhopna, 23 van tungah a min uh a kigelhsa, ta masa pawlpi kiang hong tung ta na hi uh hi. Mi khempeuh tunga thukhenpa: mi thumaante kha a hoihkimsakpa Pasian kiang, 24 thukhun thak palai pa Jesu kiang le Abel sisan sanga thu hoihzaw a gen sisan kitheh kiang tung zo na hi uh hi. 25 Tua thu a genpa na nial loh nading un kikem un. Leitung ah amaute a vauhilhpa a nial uh ciangin suakta lo uh ahileh vantung pana eite hong vauhilhpa nungngatsan lehang i suahtak nading baih lo semsem ding hi lo ahi hiam? 26 Tua hun laitakin a aw ging in lei lingsaka ahi hangin tu-in, “Khatvei lai, lei bek hi lo vante zong ka lingsak ding hi,” ci-in thu a ciam zo hi. 27 Tua kammal “khatvei lai” cih in a kipiangsak nate, a kiling thei khempeuh paikhiat nading le a kiling lote om den theih nading cihnopna ahi hi. 28 Tua ahi manin eite, a kiling thei lo gam a ngah i hi nungsangin lungdam ni. Tua ciangin zahtakna le launa tawh san theih dingin Pasian bia ni. 29 Ahang in, eite Pasian pen a haltum mei ahi hi.

Hebrute 13

1 Sanggam bangin khat le khat ki-it tawntung un. 2 Mikhualte zindo ding mangngilh kei un; tua banga a hih pawlkhatte in a theih loh kalun van sawltakte a zindo uh ahi hi. 3 Thongkiate tawh a kiakhawm bang le bawlsiatna a thuakte tawh nang mahmah a thuak khawm bangin amaute na phawk den un. 4 Numei-pasal paktatnate khempeuh le angkawmte tungah Pasian in thu khen ding ahi manin, mi khempeuh in, kitenna pahtawi-in nupa lupna siangthosak uh hen. 5 Pasian in, “Nang kong nusia kei dinga nang kong taisan ngei kei ding hi,” ci ahi manin sum iplahluatna panin kikem unla, na neih zahzah uh tawh lungkim un. 6 Tua ciangin eite in kimuangtakin, “Topa in kei hong huhpa hi; ka lau kei ding hi, mihing in kei bang hong cih thei ding ahi hiam? ci hi. 7 Note tunga Pasian thu hong gen na makaite uh phawk gige un. Amaute nuntakzia pana hong piangkhiate ngaihsun unla, amau upna etteh un. 8 Jesu Khrist zanni tuni le a tawntungin kibang den hi. 9 Thuhilhna tuamdangte khempeuh na kipimangsak kei un. A nete adingin kimanna a nei lo biakna ngeina ante sangin, hehpihna hanga a kithakhauhsak i lungtangte adingin a hoih hi. 10 Eite in biakbuk sunga nasemte in a nek theih lohna biakna-tau khat i nei hi. 11 Tulpi in, mawhna hanga biakna-in Mun Siangtho Pen ah gante sisan paipih hi; ahi hangin a luangte giahphual pualamah kihal hi. 12 Tua mah tawh kibangin Jesu in, ama sisan tungtawnin mite a siangthosak nadingin khuapi pualam ah thuak khin zo hi. 13 Tua ahi ciangin ama thuak maimawkna thuak dingin giahphual pua ama kiangah pai ni. 14 Ahang in, hih lai-ah a om den ding khuapi i nei kei a, ahi hangin hong tung ding khuapi i zong hi. 15 Tua ahi manin Pasian tungah Jesu tungtawna phatna biakpiakna-a ama min a lo mukte gah pia tawntung ni. 16 A hoih sep ding le midangte hop ding mangngilh kei ni; tua bang biakpiaknate tawh Pasian kilungkimsak hi. 17 Na makaite uh thu mangin amau thuneihna ah ki-ap un. Amaute nasepna a pulak pelmawh ding mi bangin note hong vil uh ahi hi. Amau nasepnate ah vangik suak lo a, lungnopna a suah nadingin amaute thu na mang un; tua hi kei leh no adingin phatuam lo ding hi. 18 Ko ading thu hong ngetsak un. Lungsim kisuantakna nei lo le lam khempeuh ah pahtawitaka nuntak ding ka lunggulh lam uh ka telcian uh hi. 19 A diakdiakin note kianga kong pai kik theih baih nading thu nong ngetsak ding uh kong thum hi. 20 Tawntung thukhun sisan tungtawn in a lian Tuu cingpa i Topa Jesu misi pana a thosak tua lemna Pasian in, 21 ama deihna sep nadingin a hoih na khempeuh note hong guanin Jesu Khrist tungtawnin eite sungah ama lungkimna bangbangin hong sem henla ama tungah a tawntungin minthanna om den ta hen. Amen. 22 Sanggamte aw, laikhak tomno khata kong gelh ahi manin kong hanthawnnate nong thuakzawh ding uh kong thum hi. 23 I sanggampa Timothy kikhah khia zo, cih na theih ding uh ka deih hi. Amah hong tun baih leh no tawh kimu dingin kong paikhawm ding uh hi. 24 Na makaite khempeuh uh le Pasian mite khempeuh na hopihsak un. Italy pana mite in hong hopihna uh hong khak uh hi. 25 Note khempeuh tawh hehpih na om ta hen.

Jakob 1

1 Pasian le Topa Jesu Khrist nasem keimah James in, Minamte lakah kithehthang beh sawm-le-nihte: Kong hopih hi. 2 Ka sanggamte aw, zia-etna a tuam tuam na thuak uh ciangin nuamna takpi-in na ngaihsun un. 3 Bang hang hiam cih leh upna hong kizia-et ciangin sikdona khangsak zaw hi, cih na thei uh hi. 4 Bangmah kisam loin picingin na kicin nadingun sikdona in no tungah na a sep khit pelmawh kul hi, cih na thei uh hi. 5 Note lakah pilna kisam khatpeuh a om leh, kuamah tai lo-a cingh taka a pia pa Pasian kiangah ngen leh amah kipia ding hi. 6 Ahi hangin a nget ciangin lunghei nei loin a up pelmawh kisam hi. Bang hang hiam cih leh a lunghei neite, huih muta kilok tuipi hual tawh kibang hi. 7 Tua bang mi in Topa tung pan na khatpeuh ngah dingin kingaihsun kei hen. 8 Amah lungka mi hi-a, a hihna khempeuh ah kipna mel a nei lo mi ahi hi. 9 A nuntakna a niam sanggamte in a dinmun sang uh kisaktheihpih uh hen. 10 Ahi hangin a hau mi khatin, a dinmun niamna kisaktheihpih hen, bang hang hiam cih leh amah gamlak pakte bangin a mangthang ding hi. 11 Ahang in, ni suakin nakpi-in sa-a singno a kungkeu hi; a pakte pulh-a; a mel hoihna teng kisusia hi. Tua mah bangin a haute a sumbawl laitak nangawnun a vuaimang ding uh hi. 12 Zia-etna thuaka, a sikdo mi thupha ngah ahi hi. Bang hang hiam ci leh zia-etna a thuak zawh khit ciangin Pasian in amah a itte a kamciamsa nuntakna lukhu a ngah ding hi. 13 Amah a kizia-et ciangin kuamah in, “Pasian in kei hong zia-et hi,” ci kei hen. Gitlohna-in Pasian kizia-et thei lo-a, amah in zong gitlohna tawh kuamah a zia-et kei hi; 14 ahi hangin mi khatpeuh ama gitloh lunggulhna in kai-a a zol ciangin zia-etna a thuak ahi hi. 15 Tua lunggulhna a gaii khit ciangin mawhna a suakkhia hi; mawhna a picin khit ciangin sihna a suak hi. 16 Kong it sanggamte aw, mi khemsa-in om kei un. 17 A hoih le a bukim letsong peuhmah tunglam pan hi-a, vantung khuavakte’ Pa pana hong kipia ahi hi. Amah, niliimte banga a kilaihlaih hi lo hi. 18 Ama piansak khempeuh lakah a gahmasate i suah theih nadingin thutak thu tawh a suak dingin eite hong teel hi. 19 Kong it sanggamte aw, hih thu ciamteh un: A kuamah peuh thuzak ding manlang hen. Kampau ding le heh ding manlang kei hen. 20 Ahang in, mihing hehna in Pasian deih, a thumaan nuntakna a tun kei hi. 21 Tua ahi manin a kithangzat a kihhuai gamtatna khempeuh na tang un; note hong honkhia thei, note sunga kisuan thu lungnemin na sang un. 22 No le no kikhemin thu ngai lelte hi kei un. Thu banga a gamtate na hi un. 23 Mi khatpeuh in thu za napi in thu bangin a gamtat kei leh, a maitang limlangin en a, 24 a ki-et khit ciangin paikhia a, amah bang tawh kibang hiam cih a mang ngilhpahte tawh kibang ahi hi. 25 Ahi hangin suahtakna a pia thei a hoihkim thukham limtakin en-a, thu bangin gamta-a a zaksate mangngilh loin a sempah mi, ama sepna ah thupha kipia ding hi. 26 Mi khatpeuh, amah le amah biakna uukmi in kingaihsun napi, a leii a kep zawh kei leh amah le amah a kikhem suaka, ama biakna kimanna a om kei hi. 27 Eite Pa Pasian in khialhna nei lo le a sianga a san biakna in: tagahte le meigong numeite a lungdon ciangin don-a leitung nitsakna pana kikepna ahi hi.

Jakob 2

1 Ka sanggamte aw, a minthang i Topa Jesu Khrist sunga thu-umte na hi uh bangin angvan tuam nei kei un. 2 Gentehna in note kikhopna sungah kham zungbuh bunin puan hoih silh khat hong lut a, mizawng puansia nemnam silh khat zong hong lut hi. 3 Note in puan hoih silh pa tuam bawlin, “Hih lai-ah tutphah nuam om hi,” na ci uh a, ahi hangin mizawng pa tungah, “Hua lai-ah na ding in,” ahikeh, “Ka khephung sual tungah na tu in,” ci-a thudon tuam na neih uh leh 4 mi deidan tuamin no le no sungah ngaihsutna hoih lo tawh thu a khen suak lo ding na hi uh hiam? 5 Kong it ka sanggamte aw, ngai un: Pasian in upna ah ahau ding le amah a itte a kamciam, ama gam a luah dingin leitung mite muhna-a a zawngte teel hi lo ahi hiam? 6 Ahi hangin note in a zawngte na zahlaksak uh hi. Note hong netum mihaute hi lo uh ahi hiam? Thukhenna mun hong tun amaute hi lo uh ahi hiam? 7 Note hong nei, ama min thupi a gensia amaute hi lo uh ahi hiam? 8 Laisiangtho sunga om: “Nang le nang na ki-it bangin na vengte it in,” a cih kumpi thukham na letkip takpi uh leh amaana gamta na hi uh hi. 9 Ahi hangin angvantuam na neih uh leh a mawh na hi uh a, thukham palsatte mah bangin thukham in mawh hong tangsak hi. 10 Ahang in, thukham a buppi-in zui napi, thu khat kia-a, a muktute a vekin a palsat khin a suak hi. 11 Ahang in, “Angkawm kei in,” hong ci pa in, “Tual that kei in,” zong hong ci lai hi. Ang na kawm loh hangin, tual na thah leh, thukham a palsat mah na hi hi. 12 Suahtakna a pia thukham in thu a khen ding mite bangin thugenin gamta un. 13 Bang hang hiam cih leh lainatna a nei lo mi peuhmah tungah lainatna om loin thu a kikhen ding hi. Thukhenna tungah lainatna a gualzo hi. 14 Ka sanggamte aw, mi khat in upna ka nei hi, a cih hangin gamtatkhiatna a neih kei leh bang phatuam ahi hiam? Tua bang upna in amah honkhia thei ahi hiam? 15 Gentehna in sanggampa khat ahikeh sanggamnu khat in puansilh le a nisim an nei loin om hi. 16 Note khat in ama kiangah, “Nuamtakin om in, khualum inla, an kham in,” ci-in ahi hangin a kisapnate bangmah na hihsak kei leh bang phatuam ahi hiam? 17 Tua mah tawh kibangin gamtatkhiatna in a zuih kei leh upna kia bek a si ahi hi. 18 Ahi hangin mi khatpeuh in, “Nang upna na nei hi; ken gamtatna ka nei hi,” ci ding hi. Gamtatnate loin na upna hong lak in. Ken ka sepna-in ka upna kong lak ding hi. 19 Pasian khat om hi, cih na um hi. Pha hi! Dawite nangawn in tua mah umin lau-in a ling uh hi. 20 Nang mihaipa aw, gamtatna loin upna a kimanna om lo hi cih a kitelna na thei nuam hiam? 21 I pu Abraham in a tapa Isaac biakna-tau tungah a piak ciangin ama nasepsa thumaanin kisimsak hi lo ahi hiam? 22 Ama upna le a gamtatnate in semkhawm a, ama sepna in a upna bucingsak hi cih na thei hi. 23 Tua hi a, Laisiangtho in, “Abraham in Pasian um a, tua ama upna ama thumaanna-in kisimsak hi,” a cih tangtunga, amah Pasian lawmpa kici hi. 24 Mi khat a upna guak hi loin ama sepna in dik tangsak ahilam na thei hi. 25 Tua mah tawh kibangin numei kizuak Rahab nangawn in thukansimte zin tungsak a, lampi tuam ah a khakkhiat ciangin ama gamtatnasa hangin thu maan suak hi lo ahi hiam? 26 Kha a om lo pumpi a si ahi bangin gamtatna om lo upna a si ahi hi.

Jakob 3

1 Ka sanggamte aw, sia a sem kote in a khauhzaw thukhenna thuak ding ka hi manun note a tampi sia suah na sawm kei un. 2 Eite i vekpi in lam tampi-ah i muktu hi. Mi khatpeuh in a kam pauna ah khialhna a neih kei leh amah mi picing khat hi-a, ama pumpi bup a kemcing thei mi zong ahi hi. 3 Sakolte in thu a man nadingin a kam sungah kamkaih i bulh khit ciangin tua ganhing a buppi-in i hei thei hi. 4 Ahi kei leh tembawpi gentehna in nei ni. Tuate lian mahmah a huih khauh mah mah in a mut hangin a hawlpa in a pai nopna peuhpeuh ah a heina neuno-in a hei hi. 5 Tua mah tawh kibangin leii pen pumpi na a neuno khat ahi hangin nakpitakin a kisial hi. Mei-ekno khat in gamsung lianpipi a katsak na ngaihsun in. 6 Leii zong mei khat mah hi-a, pumpi nate lakah gitlohna lompi ahi hi. A mihinna pumpi siasaka, a nuntak sung bup kangsakin, amah le amah zong meilipi in a kihal kuang ahi hi. 7 Mihing in ganhing nam khempeuh, vasate, a bokvak ganhingte zualsak zo-a, a khawi uh hi. 8 Ahi hangin kuamah in leii a zualsak zo kei hi. Leii pen a om mawkmawk thei lo, a gilo, sihtheihna gu tawh a dim khat ahi hi. 9 Tua leii-in i Topa le i Pa i phat a, tua mah-in Pasian a suna kibawl mihingte i hamsiat hi. 10 Tua kam khat mah panin phatna le hamsiatna pusuakkhia khawm hi. Ka sanggamte aw, hih bang ding hi lo hi. 11 Tuinak khat panin tuisiang le citui luangkhia khawm thei ahi hiam? 12 Ka sanggamte aw, theikung in olive gah, gah thei ahi hiam, ahikeh lenggui in theigah, gah thei ahi hiam? Citui nak ah tuisiang a luangkhia thei tuan kei hi. 13 Note lakah kua pil a, kua in theitel ahi hiam? Ama nuntak hoihna le a pilna pana hong piangkhia kiniamkhiatna sungah a gamtatna-in lak ta hen. 14 Ahi hangin note lungtang sungah enna khaa le huaiham tupna na selsiah uh leh tua hangin kisialh ding hi lo a, thutak a nial na hizaw uh hi. 15 Tua bang “pilna” vantung pana hong paisuk hi loin leitung pilna, khamilohna le gilopa aa hizaw hi. 16 Ahang in, enna le huaiham tupna a omna peuhah kilemlohna le gitloh gamtatna vive a om hi. 17 Ahi hangin vantung pana pilna ahileh a masa penin siangtho a, lemna deih in, midangte khual a, kiniamkhiat in, lainatna le gah hoih tawh dima, khentuam nei loin citak hi. 18 Lemna a vawh lemgente in thumaanna a at uh hi.

Jakob 4

1 Note lakah kitotna le kidona bang in piangsak ahi hiam? Nomau sunga kido den lunggulhna pana piang hi lo ahi hiam? 2 Na khatpeuh na deih uh a, ahi hangin na ngah kei uh hi. Tual na that uh a, na deihgawh uh a, ahi hangin na deih uh na ngah tuan kei uh hi. Na kitawng uh a, na kilai uh hi. Pasian tungah ngen lo na hi manun na deih uh na ngah tuan kei uh hi. 3 Na nget uh ciangin na ngah kei uh hi, bang hang hiam cih leh na ngahte uh nomau nopsak nadinga na zat theih nading uh tupna man lo tawh na ngen uh hi. 4 No angkawm hat mite aw, leitung tawh kilawmtakna in Pasian lama muhdahna ahilam thei lo na hi uh hiam? A lawm dinga leitung a teelte peuhmah Pasian gal a suak hi. 5 Ahi kei leh Laisiangtho in, eite sungah a nuntaksak kha in eng hi, a cih a thu om lopi-a a cih in ngaihsun na hi uh hiam? 6 Ahi hangin amah in eite hehpihna a tamzaw hong pia hi. Tua hangin Laisiangtho in: “Pasian in a kisatheite do a, a kiniamkhiatte a hehpih hi,” ci hi. 7 Tua ahi ciangin Pasian tungah no le no kipia un. Dawimangpa do un, amah taimang ding hi. 8 Pasian naih un; amah in zong hong naih ding hi. No mawhneite aw, na khut uh sil un; no lungkate aw, na lungtang uh hahsiang un. 9 Lunggimin, thumin, kapkap un. Na nuihna uh thumna suaksak unla, na nuamna uh maigumna suaksak un. 10 Topa mai-ah no le no kiniamkhiat un; amah in hong lamto ding hi. 11 Sanggamte aw, khat le khat ki gensia kei un. Ama sanggampa a langgena, a tunga thu a khen peuhmah, thukham langgen-a, thukham tunga thukhen ahi hi. Thukham thu na khen ciangin thukham thu a mang lo na hi-a, thukham tunga thukhena a tutu na hi hi. 12 Thukham a pia pa le Thukhen pa khat bek om-a, a honkhia thei le a susia thei pa ahi hi. Ahi hangin na vengte thu a khen vial pa nang kua na hi hiam? 13 "Tuni hiam zingciang hiam in hih khuapi, tua khuapi-ah pai-in tua lai-ah kum khat taamin sum bawlin sum va zong ning,” a ci note aw, tu-in ngai un. 14 Zingciangin bang piang ding cih nangawn na thei kei uh hi. Na nuntakna uh bang ahi hiam? Note, tomcik sung a kilat khit ciangin a mangthang pah tuikhu na hi uh hi. 15 Tua sangsik in, “Pasian deihna ahileh i ci dam dinga, hihte, huate i sem ding hi,” na cih zawk ding uh ahi hi. 16 Note tua bangin kihisakin kisialhna kam na pau uh hi. Tua bang kisialhnate khempeuh gitlohna ahi hi. 17 Tua ahi ciangin ama sep dinga kilawm a hoih thei napi, a sem lo mi peuhmah a mawh ahi hi. Ph 39:5; Lk 12:47

Jakob 5

1 No a hau mite aw, tu-in ngai un, no tungah gentheihna hong tung ding ahi manin kap unla kapkap un. 2 Na hauhna uh muat khina, na puante uh nget in gai khin hi. 3 Na ngun na khamte uh kekseu hi. Tuate kekseuna in note langah teci pang dinga, mei bangin na sa uh a ne ding hi. A beisa hun sung teng hauhna na khol zo ta uh hi. 4 En sin! A thaman na piak loh, na lo uh hong khawhsakte no langah kiko uh hi. An late kikona, a Thahatpen Topa bilah a tung zo hi. 5 Note, leitung ah noptatna zulhzauna-in na nungta uh hi. Hong kigawh ni-a dingin na kithausak uh hi. 6 No hong langbawl lo mawhpeng mite na mawhpaih uh a, na that zo uh hi. 7 Tua ciangin sanggamte aw, Topa hong pai mateng na thuak keeikai un. Lokhopa in sikhiau guah le tuk guahte ngak a, leitung in a manpha gah a gah ding lungduaitaka a ngak thei ta un. 8 Note zong lungduai in, kiptakin ding un. Bang hang hiam cih leh Topa hong pai ding nai ta hi. 9 Sanggamte aw, khat le khat na kiphunsan kei un, na kiphunsan uh leh thukhenna na thuak ding uh hi. Thukhenpa kongkhakah ding hi! 10 Sanggamte aw, gimna na thuak uh ciangin Topa mina thugen kamsangte lungduaina ettehin na nei un. 11 Na theihsa bangun a sikdote thupha ngahin ka ngaihsun uh hi. Job sikdona na za zo uh a, a tawpna-ah Topa in a piakte na mu zo uh hi. Khuatuahna le lainatna tawh Topa a dim hi. 12 Ka sanggamte aw, hih teng khempeuh banah vantung tawh ahi zongin, leitung tawh ahi zongin, na khat peuh peuh tawh ahi zongin na tomlo kei un. Hi na cih pen “Hi,” hi henla, hilo na cih pen “Hilo,” hi hen; tua hi kei leh nang hong kimawhpaih ding hi. 13 Note khatpeuh a lungmang a om hiam? Amah in thu ngen ta hen. A lungdam khatpeuh a om hiam? Phatna-late sa ta hen. 14 Note a cina khatpeuh na om uh hiam? Pawlpi upate samin amaute in thu ngetsak uh henla, ama tungah Topa minin sathau zut uh hen. 15 Upna tawh thungetna in cina mi damsak dinga, Topa in amah a phongto ding hi. Amah in mawhna a neih leh ama mawhna kimaisak ding hi. 16 Tua ahi manin na ci uh a dam theih nadingin na mawhnate uh kipulak tuahin thu na kingetsak ciat un. A thumaan mi thungetna vanglian in deihna a ngah hi. 17 Elijah zong eite mah bangin mihing khat mah hi lel hi. Amah in guah a zuk loh nadingin citakin a ngen hi. Tua ciangin kum thum le alang sung tua leitang tungah guah a zu kei hi. 18 Thu ngen kik a, vantungte in guah zusakin leitung in a gahte gahsak hi. 19 Ka sanggamte aw, note khatpeuh thutak panin piala, mi khatpeuh in a kiheikiksak leh, 20 hih thu phawk un: Mawhnei khat ama lampialna pan a kiheisak peuhpeuh in, amah sihna panin a honkhia hi-a, mawhna tampite a khuhsak ahi hi.

1 Peter 1

1 Jesu Khrist Sawltakpi Peter in, Pontus, Galatia, Cappadocia, Asia le Bithynia gamte khempeuh a ki thenthanga hih leitunga mikhual-a om Pasian teelte, 2 Jesu Khrist thumang ding le a sisan thehna ngah dingin Pa Pasian theihkholhna tawh kizui-a Kha in a siansak nasepna hanga a kiteelsa mite tungah: Hehpihna le lemna note aa hi ta hen. 3 Eite Topa Jesu Khrist Pasian le Pa kiphat ta hen! Amah in hong lainatna lianpi-in misi pana Jesu thawhkikna tungtawnin ahing lametna, 4 note adinga vantunga kikoihkhol, a sia ngei lo, a nin baang lo, a tul thei lo gouluahna sungah eite suahthakna hong pia zo a, 5 hun beina-a hong kilang ding a baihsa-a om tua hotkhiatna hong tun mateng Pasian vangliatna tawh upna tungtawnin note hong kiliah ahi hi. 6 Tu laitak hun tomcik sung zia-etna namkim thuakin na lungkham uh zongin hih thu ah nakpitakin na lungnuam uh hi. 7 Mei-a a kihalsiang khit ciang nangawna a kisia thei kham sangin note upna a manphazaw ahina, a maanna a kiciat theih nadingin hihte hong piang hi; tuate in Jesu Khrist hong kilaak ciangin phatna minthanna le pahtawina a suah theih nading ahi hi. 8 Amah mu ngei lo napi na it uh hi; tu-in amah mu lo napi na um uh a, a kigenkhia thei lo a minthang lungnopna tawh na kidim uh hi. 9 Ahang in, na upna un a tup note kihotkhiatna a ngah na hi uh hi. 10 Hih hotkhiatna tawh kisai-in note tunga hong tung ding hehpihna thu a gen kamsangte in, ngenteltakin a theih tawpun zongin 11 amaute sunga a om Khrist Kha in Khrist thuaknate le tua nunga a zui ding minthannate tawh kisai a genkholh lai-in, a hun le a pianzia ding bangci banga gen hiam, cih muhkhiat ding a hanciam uh hi. 12 Vantung pana kisawl Khasiangtho tawh note tunga lungdamna-thu hong hilhte in, tu-a no tunga hong kigensate hong gen lai-un, amaute na a sem hi loin no na a sem uh ahilam amaute tungah a kilaak hi. Vansawltakte nangawn in tua nate a encian nuam uh hi. 13 Tua ahi manin a gamtang dingin na lungsim uh kisakhol un; na pumpi uh ki-uk zo un; Jesu a kilat cianga note hong kipia ding hehpihna tungah na lametna khempeuh uh nga un. 14 A thumang tate bangin bangmah thei lo-a na nuntak lai-ua na neih uh lunggulhna gilote deihna zui-in gamta kei un. 15 Note hong sampa a siantho mah bangin na hihna khempeuh uhah na siangtho un; 16 ahang in, “Kei siangtho ka hi manin siangtho un,” ci-in kigelh zo hi. 17 Mikim nasepna tungah guptuam nei lo-a thukhenpa, Pa khat min a lo khawm na hi nungsangun kihtakna siangtho tawh hih lai-ah mikhualte bangin nungta un. 18 Ahang in, na pate uh pana na luahsuk uh a mawkna nuntakna pana a kisia thei na: ngun ahikeh kham tawh hong kitan hi loin, 19 kawkbaanna le melhemna om lo tuuno – Khrist sisan manpha tawh note hong kitan ahilam na thei uh hi. 20 Leitung kipiansak ma-in amah kiteel zo a, ahi hangin note khualna-in hih hun nunungte a hong kilaaksak pan ahi hi. 21 Ama tungtawnin misi panin amah thosaka, a minthangsak pa Pasian na um uh a, tua na up uh le na lamet uh Pasian ahi hi. 22 Tu-in na sanggamte uh itna takpi na neih nading uh le khat le khat na lungsim tawng uh tawh na ki-it tek nadingun thutak thu mangin no le no na kisiansuah khin zo uh hi. 23 Ahang in, a sia thei khaici pan hi lo, a sia thei lo khaici – a nungta a om tawntung Pasian thu tungtawnin note a suak kik na hi uh hi. 24 Ahang in, “Mite khempeuh lopa bang hi-a, amaute minthanna khempeuh gamlaka pakte bang ahi hi; lopa vulin, pakte pulh a, 25 ahi hangin Topa kammal kip tawntung hi,” Note tunga hong kihilh thu, hih ahi hi.

1 Peter 2

1 Tua ahi manin etsatna khempeuh, khemna khempeuh, kineih-siamna, enna le mindaisakna namkimte na paikhia un. 2 Note hotkhiatna ah na khantoh theih nadingun naungek suak tungte bangin khalam nawizu siangtho na lunggulh un; 3 tu-in Pasian hoihna na ciam khin zo uh hi. 4 Mite in a nial, ahi hanga Pasian in a teelsa, ama adingin a manpha a nungta Suang kiangah nong pai bangun, 5 note zong Pasian san theih dingin Jesu Khrist tungtawna khalam biakpiakna a bawl siampi siangtho dingin khalam inn-a kilam a nungta suangte bang na hi uh hi. 6 Ahang in, Laisiangtho in: “En in, a kiteeltuam a manpha innkiubul suang khat Zion ah ka koih zo hi; amah a muang mi, a zahlak ngei kei ding hi,” ci hi. 7 Tu-in a um note adingin hih suang a manpha hi, ahi hangin a um lote adingin, “Inn lamte nilkhiat tua suang inntungkhum suang a suak zo hi,” ci a, 8 tua ciangin, “Mite a kimuktusak ding suang le, amaute puk nading suangpi,” ci hi. Amaute in thupuak mang lo uh ahi manin a kimuktu uh hi – tua zong amaute a tuaci ding mah a laitansa ahi hi. 9 Ahi hangin note na hi uh leh khuamial sung pan hong samkhia-a, ama khuavak lamdang sunga hong tunpa phatna na tangko theih nadingun hong teeltuam mi pawl, kumpi nam, siampi, minam siangtho, Pasian mite na hi uh hi. 10 Khatvei lai-in minam na hi lo uh hangin tu-in Pasian mite na hi uh hi; khatvei lai-in lainatna na ngah loh uh hangin, tu-in lainatna na ngah uh hi. 11 Kong it lawmte aw, na kha uh hong do den, mawhdim lunggulhnate pana kidek dingin leitung ah gamdang mite le mikhualte bangin kong kun hi. 12 Lawkite lakah tua bang nuntakna hoih na nungta un. Amaute in a khiala hong ngawh uh hangin, na gamtatna hoihte uh mu thei ding uh a, Pasian in eite hong veh ni ciangin amah a minthangsak ding uh hi. 13 Mite lakah a kiguang thuneihna khempeuh: thuneipipen kumpipa ahi zongin, 14 a khialte gawtna a pia ding le a maana gamtate a phat dinga a sawl ukpite thu khempeuh Topa hangin na mang un. 15 Ahang in, a hoih na sep uh hanga mihaite haipaunate na daihsak ding uh Pasian deihna ahi hi. 16 A suakta mi bangin na nungta un; ahi hangin na suahtakna uh gitlohna khuhna-in na zang kei unla, Pasian nasemte bangin na nungta un. 17 Mi khempeuh a kilawmin na zahtak un. Thu-um te unau khat suahna na it unla, Pasian kihta in kumpipa na pahtawi un. 18 Silate aw, no hong khuala no tunga hong migite bek hi lo, no tunga hong gamhtat na pute uh tungah zong zahtakna kim tawh na kiniamkhiat un. 19 Ahang in, mi khat in Pasian a phawk manin a man lopi in natna a thuaka a thuak zawh leh a phattak ahi hi. 20 Ahi hangin a man lo nasepna hangin satna na thuak uh a, na thuak zawh uh hangin a hoih bang lawhtak na hi uh hiam? Ahi hangin na hoih na sepna uh hangin na thuak uh a, na thuak zawh uh leh Pasian mai-ah a phattak na hi uh hi. 21 Hih ding mah a note hong kisam ahi hi, bang hang hiam cih leh Khrist in note adingin thuak khin zo a, ama khekhap na zuih dingun etteh dingin hong nusiat hi. 22 "Amah in mawhna bawl lo a, ama kam sungah zong khemna a kimu kei hi,” 23 Amaute in amah a zahko uh ciangin thukkik lo a, a thuak laitakin a tawng thuk kei hi. Tua sangsikin tangtaka thukhenpa tungah amah le amah a ki-ap zaw hi. 24 Mawhnate i sihsan theih nading le thumaanna i nuntakpih theih nadingin ama pumpi mahmah in i mawhnate sing tungah pua zo hi. Ama liammate hangin note hong kidamsak zo hi. 25 Ahang in, note a pialmang tuu tawh na kibang uh a, ahi hangin tu-in na khate uh a Cingpa le a Kempa kiangah na ciah kik zo uh hi.

1 Peter 3

1 Tua mah bangin zite aw, na pasalte uh tungah kiniamkhiat un. Tua hileh amaute khatpeuh thu um lo a om leh, pau kul loin a zite uh gamtatzia, 2 a nuntakna siangtho le a zahtakbaanna uh a muh uh ciangin kizo thei ding hi. 3 Na mel kilawmna uh pualam kizepna: samphekte le ngun le kham le puan hoihte tawh kizepna pan hi kei hen. 4 Tua sangsikin, Pasian muhna ah nakpitaka a manphazaw, a tul thei lo hoihna, sunglam hinna, lungnemna le cinghkamna tawh na kizem zaw un. 5 Ahang in, tang lai-a Pasian sunga lametna a nei numei siangthote hih bangin amau le amau a kilawmin om uh hi. 6 Sara in Abraham thu mangin “topa” a na cih bangin amaute a pasalte uh tungah kiniamkhiat uh hi. Note zong lau loin amaana na gamtat uh leh ama tanute na hi uh hi. 7 Tua mah bangin pasalte aw na thungetnate uh bangmah in hong dal loh nadingin na zite uh tawh na nuntak khawmna uhah no sanga a thahat lo zaw pankhawmpih ahilam phawk kawmin zahtak unla, hehpihna letsong ahi, nuntakna a luahpihte bangin amaute na khual un. 8 A tawpna-ah note khempeuh, khat le khat kithuhual un; kithuakpih un, sanggam bangin ki-it unla, kikhuatuah in, kiniamkhiat tuah ciat un. 9 Gitlohna, gitlohna in na thuk kei un; hong engkote engko thuk loin thupha na pia zaw un. Bang hang hiam cih leh thupha khat na luah theih nadingun hih thu dinga note hong kisam ahi hi. 10 Ahang in, “Nuntakna it a, ni hoihte a mu nuam peuhmah in gitlohna pan a leii le zuauphuahna pan a mukte kem pelmawh ding hi. 11 Gitlohna pan kihei-in a hoih gamta pelmawh ding hi; lemna zongin delh pelmawh ding hi. 12 Ahang in, Topa mit in mithumaante mitsuan-a, a bil in amaute thungetna ngai hi; ahi hangin gitlohna a hihte Topa in a lang-et hi.” 13 A hoih sep ding lawp peuh lecin kua in nang hong nasak ding ahi hiam? 14 Ahi hangin thumaan khatpeuh hanga na thuak leh zong thupha ngah na hi hi. “Amau kihtakte na kihta kei un, linthawn zawhin na om kei un,” 15 Ahi hangin note lungsungah Khrist Topa-in tuam koih un. Tua na neih uh lametna ahang hong dong peuhpeuh tungah migitna le zahtakna tawh na hilh theih dingin kigingsa in om gige un. 16 Khrist sunga om na gamtatna hoih uh langpang a, a simmawhte in a gensiatna uh a maizumpih theih nadingun na lungsim kitheihna uh siangthotakin kem un. 17 Pasian deihna ahi nak leh a sia bawla thuakna sangin hoihzaw hi. 18 Ahang in, Pasian kiangah note hong tut theih nadingin Khrist – tua mi thumaan, mi thumaan lote ading khatvei-a cinkim dingin a si zo hi. A pumpi-in sihna kithuaksak a, ahi hangin Kha-in kinung tasak hi. 19 Tua Kha mah tungtawnin thong-a khate kiangah pai-in thu va hilh hi. 20 Tua khate pen nidang lai pek, Noah hunlai-a Pasian in thuak keeikai-in a ngak, Noah in gunkuangpi a bawl lai-a thumang lote ahi uh hi. Tua gunkuangpi sungah mi tawmcik bek, a vekun giat, tui tungtawnin kihonkhia hi. 21 Hih tui in tu huna note zong hong honkhia baptise na a lak hi; pumpi tung ninte sawpkhiatna hi loin Pasian lamah lungsim kitheihna hoih-a kiciamna ahi hi. Tua in Jesu thawhkikna hangin note hong honkhia hi. 22 Amah vantungah kahto khina tu-in Pasian taklamah om-a, vansawltakte, thuneihna le vangliatnate ama khutnuai-ah a om hi.

1 Peter 4

1 Tua ahi ciangin Khrist in ama pumpi-in a thuak khit zawh nungsang no le no zong tua bang lungsim tawh na kigalging un. Bang hang hiam cih leh a pumpi-a a thuakpa mawhna tawh kikhen khia zo hi. 2 Tua hangin ama leitung nuntakna a om laiteng mihing lunggulhna gilote ah nungta nawn loin Pasian deihna ah a nungta zaw hi. 3 Ahi hangin, lawkite in hih dinga a teel uh hukna lanna ah note nungta-in, kilunggulhna, zukhamna, zu-uangdawnna, zu-nopdawnna le a kihhuai milim biaknate hihin hun beisa, a hunkhop na zang khin uh hi. 4 Amaute tawh kibanga uangtat-luatna sunga na va kihel nawn loh uh ciangin lamdang sa-in hong siat gen uh hi. 5 Ahi hangin a si mite le a hing mite thukhen dinga kigingsa pa mai-ah amaute thu amau mah in a gen ding uh hi. 6 Ahang in, tu huna a sisate tung nangawnah lungdamna-thu a kigenna hih thu hang ahi hi. Tua in amaute pumpi-a om mihing hihna tawh kizui-in thu a kikhen theih nading le kha tawh kisai-a Pasian deih banga a nuntak theih nading uh ahi hi. 7 Na khempeuh a beina nai ta hi. Tua ahi manin thu na nget theih nadingun lungsim siangtho le no le no ki-uk zoin om un. 8 Tuate khempeuh banah, itna thukpi-in khat le khat na ki-it un, bang hang hiam cih leh itna in mawhna tampitak a khuh hi. 9 Phun loin khat le khat zin na kido un. 10 Mikim in midangte na a sep nadinga a ngah letsong peuhmah, Pasian hehpihna a nam tuamtuam ah, muanhuaitakin zang ding hi. 11 Mi khatpeuh in thu a gen leh Pasian kammalte mahmah a gen bangin gen ta hen. Mi khatpeuh in mi na a sep leh, na khempeuh ah Jesu Khrist tungtawna Pasian a kiphat theih nadingin Pasian piak thahatna tawh sem ta hen. Ama tungah minthanna le vangliatna a tawntungin om den ta hen. Amen. 12 Kong it lawmte aw, na thuak uh gentheihbawlnate no tungah a lamdang pi-a tung bangin lamdang sa kei un. 13 Ahi hangin ama minthanna hong kilaak ciangin na lungnopna uh a dimlet theih nadingin Khrist thuaknate a thuakpih na hina uh hangin na lungdam un. 14 Pasian le a minthanna Kha note tungah om ahi manin, Jesu min hangin note hong ki-engko leh thupha ngah na hi uh hi. 15 Na thuak uh leh zong tualthat hiam, guta hiam, mawhna lian khatpeuh ahikeh mi thusia va kum kha-a thuak bang nangawn hi kei hen. 16 Ahi ta zongin Khristian hina hanga na thuak uh leh maizum loin, tua min na puakna uh hangin Pasian na phat zaw un. 17 Ahang in, Pasian innkuan sungah thukhenna a kipat hun ahi hi. Eite tungah hong kipan ahileh Pasian lungdamna-thu a mang lote bang suak tazen ding uh ahi hiam? 18 Tua hi a, “Midikte adingin kihotkhiat nading haksa ahileh, a pasian-milo le mawhnei mi bang suak tazen ding hiam?” 19 Tua ahi tak ciangin, Pasian deihna zui-a a thuakte, a muanhuai amaute a bawlpa tungah amau le amau kipia-in, a hoih a bawl uh zom suak uh hen.

1 Peter 5

1 No laka upate tungah, na upatpih uh Khrist thuakna a theihpih khat le hong kilang ding minthanna zong a tang ding pa khat bangin kong thum nopinah: 2 Saptuam kemte nasep bangin note kep dinga hong kipia Pasian tuuhonte, a kemte na hi un – na hih pelmawh ding uh cihna hi lo Pasian in note hong deih bangin utna tawh, sum deihluatna hang hi lo sep ding lawpna hangin na cing un; 3 note hong kikemsakte tungah kiliansak kei un; tuuhonte etteh na hi uh hi. 4 Tua hileh Tuucing Lianpenpa hong kilat ciangin a tul ngei lo minthanna lukhu na ngah ding uh hi. 5 Tua mah bangin khangnote aw, na uzawte uh tungah kiniamkhiat un. Note khempeuh, nomau le nomau in kiniam khiatna na kisilh thuk un, bang hang hiam cih leh, “Pasian in a kisatheite do a, a kiniamkhiatte a hehpih hi,” 6 A hun a tun ciangin amah in note hong tawisang theih nadingin a thahat Pasian khutnuai-ah no le no na kiniamkhiat un. 7 Amah in note hong lunghimawh ahi manin na lunghimawhnate khempeuh uh ama tungah suan un. 8 No le no ki-uk zo unla pilvang un. Na gal uh – dawimangpa, a nawmvalh ding zong humpinelkai bangin humhamin thamvak kawikawi hi. 9 Leitung bupa na sanggamte un zong no thuak banga a thuak lam uh thei na hi manun, amah do unla upna-ah kip un. 10 Khrist sunga a tawntung minthanna ngah dinga hong sampa, hehpihna khempeuh Pasian in, tomcik sung na thuak khit uh ciangin amahmah in na ngei uh hong bangsak dinga, hong hatsak in, hong kipsak hong khosak ding hi. 11 Ama tungah a tawntungin vangliatna om den ta hen. Amen. 12 Sanggam muanhuai banga ka neih Silas huhna tawh lai tawmno kong gelh a, note hong hanthawnin, hih in Pasian hehpihna taktak ahina teci ka pang hi. Hih thu ah kip un. 13 Note tawh kiteel khawm Babylon a om nu in, note hong hopih hi; ka tapa Marka in zong hong hopih hi. 14 Khat le khat itna tawh kinamin na kihopih un. Khrist sunga om note khempeuh tungah lemna om ta hen.

2 Peter 1

1 Jesu Khrist nasem le sawltakpi Simon Peter in, Eite Pasian le i Honpa Jesu Khrist thumaanna tungtawnin kote aa banga a manpha upna a ngahte tungah: 2 Pasian le i Topa Jesu theihna tungtawnin hehpihna le lemna adimin note aa hi ta hen. 3 Ama minthanna le a hoihna tawh hong sampa, amah i theihna tungtawnin nuntak nading le i pasianmi theih nadinga kisam khempeuh ama Pasian vangliatna in hong pia zo hi. 4 Hihte tungtawnin pasian pianngei ah tanh na neih theih nading uh leh lunggulhna gilo in a piansak leitung siatna pan note na suahtak theih nadingun amah in tuate tungtawnin alian pha mahmah le a manpha a kamciamte eite hong pia zo hi. 5 Hih thu hang mahmah in, na theih tawpun na upna uh tungah hoihna, hoihna tungah theihna; 6 theihna tungah pumpi ki-ukzawhna; pumpi ki-ukzawhna tungah sikdona; sikdona tungah pasian-mina 7 le pasian-mina tungah sanggam kikhualna le sanggam kikhualna tungah itna na behlap un. 8 Ahang in, hih hoihnate ah na khan semsem uh leh i Topa Jesu Khrist na theihna uhah muibut lohna le gahsuah lohna panin hong hu ding hi. 9 Ahi hangin mi khatpeuh in tuate a neih kei leh muhna tom le mittaw hi-a, ama mawh nasate a kisiansak khit lam a mangngilh zo ahi hi. 10 Tua ahi manin sanggamte aw, note hong kisapna le hong kiteelna a ki ciansak dingin na lawp semsem un. Ahang in, hih nate na hih uh leh na puk ngei kei ding uh a, 11 eite Topa le Honpa Jesu Khrist tawntung kumpi-gamah note thupitakin hong kimuak ding hi. 12 Tua ahi ciangin tu laitaka na theih uh thutak ah, a kipsa a khosa le tuate a theisa na hi uh zongin hih nate kong phawksak kik tawntung ding hi. 13 Hih pumpi puanbuk sunga ka ten laiteng na theihtheihna uh kong thaksuaksak ding amaan hi, ci-in ka ngaihsun hi. 14 Bang hang hiam cih leh i Topa Jesu Khrist in teltaka kei hong theihsak bangin hih puanbuk ka koihkhiat pah ding ka thei hi. 15 Kong paisan khit ciangin hih nate phawk den thei na nuteh cih thei-in ka hih theih tawpin ka hih ding hi. 16 Note tungah i Topa Jesu Khrist vangliatna le hong pai kik nading thu kong hilh lai-un, piltaka kiphuak tawm tangthute peuh zui hi loin ama thupina mita a mute ka hi zaw uh hi. 17 Ahang in, a Thupi Minthanna pana aw in ama kiangah, “Hih in ka lung hong kimsak mahmah ka it ka Tapa ahi hi,” ci-a a gen lai-in, Pa Pasian tung pana pahtawina le minthanna a ngah hi. 18 Tua mual siangtho tunga amah tawh ka om laitakun kote mahmah in vantung pana hong ging hih aw ka za uh hi. 19 Khuamialna mun khatah khuavak a tan bangin note lungsungah phalvak tung zingsol a suah mateng in, eite in a kicianzaw kamsangte thugen i nei hi; note in, tuate na thusim uh leh na hoih sem na hi ding uh hi. 20 Tuate khempeuh banah, Laisiangtho sunga genkholhna peuhmah kamsangpa in a khiatna a gentawm mawk ahi loh lam na theitel pelmawh un. 21 Ahang in, genkholhna peuhmah mihing deihna pan hi ngei lo-a, Khasiangtho hihsakna bangbangin mite in Pasian tung pana a gen uh hizaw hi.

2 Peter 2

1 Ahi hangin mihingte lakah kamsang zuaute a na om bang tektek in note lakah zong sia zuau a om ding hi. Amaute in siatna a piangsak thei thu-upna maan lote a simthamin hong lutpihin amaute a lei – thuneipipa Topa nangawn nial ding uh a, amau le amau siatna a kitun pah ding uh hi. 2 Mi tampi in a zumhuai amau makaihna lam zui ding uh a, thutak lampi minsiasak ding uh hi. 3 Hih siate in huaihamin ama phuahtawm tangthute tawh note sumzonna in hong nei ding uh hi. Amaute a kimawhpaihna sawtvei zo a, amau kisiatna a ihsip kei hi. 4 Ahang in, vantung mite a mawh uh ciangin Pasian in zah lo a, hell ah khia in thukhenna thuak dingin kawhawm mialpi sungah koih ahileh; 5 amah in tanglai leitung zah tuan loin a pasian-milote tungah tuicin tungsak a, ahi hangin thumaan a hilh Noah le adang sagihte hu ahileh; 6 Sodom le Gomorah khuapite mawhpaih in vut a suah dong haltum a, a pasian-milote tungah a piang dingte lahna suaksak ahileh; 7 thukham nei lo-a, a nin mahmah mite nuntakna in a lungdonsak a thumaan Lot a suaktasak ding le; 8 (ahang in, tua a thumaan mipa amaute lakah nisimin om a, thukham nei lote gamtatna a muh le a zakte in a thumaan ama lungsim a gimsak mahmah hi) – 9 hih bang teng hi ahileh Topa in a pasian-mite, zia-etna pan a suahtaksak nading ahi zongin a thumaan lote thukhen ni adingin a gawt kawmkawma, a koih nading zia a thei hi. 10 A diakdiakin a mawhdim pianngei lunggulhna in a siatsakna a zuite le thuneihna a sim mawhte tungah amaan phadiak hi. Hih mite mawk hansanin ki-uangsak uh a, van mite nangawn gensia ngam uh hi. 11 Tua hi napi vansawltakte nangawn in, hatzaw in vanglianzaw ta le uh, tua bang mite langpangin Topa mai-ah kosiatna mawhsaknate a tun kei uh hi. 12 Ahi hangin hih mite in a theihtel loh uh thute tawh a daisak uh hi. Amaute, man-a siatsak ding bek-a, suak a ngongtat gamsate bangin ganhing lungsim neite hi uh a, gamsate mah bang in amaute zong a mangthang ding uh hi. 13 Amaute hihsa siatna hangin tua siatna mahin amaute kithukkik ding hi. Amaute ngaihsut nopsakna ahileh suntangpipi-a uangtat ahi hi. Note tawh an na nek khawm laitakun nop a sak luatna uh hangin melhemna le nitna a suak uh hi. 14 Angkawm nopna mit bekbek tawh kidim uh a, mawhna a bawl den uh hi; a kip lo mite mawhna bawl dingin a zol uh hi; huaihamna lamah siam mahmah uh a, hamsiatna suante hi tazen uh hi! 15 Amaute in atang lampi nusia in pial uh a, gitlohna thaman a deih Beor tapa Balaam lampi a zui uh hi. 16 Ahi hangin pau a nei lo laa khat mihing aw in pau-a, ama gamtat khialhna tai-in tua kamsangpa haina a khokhaam hi. 17 Hih mite, a kangsa tuinak le huihpi mutleng meiilum bang ahi uh hi. Amaute ading amial pha pen khuamial a kikoih khol zo hi. 18 Ahang in, amaute in kisaktheihna mawkna kamte zangin, khialhna tawh a nungta mite lak pana a suakta lai liailiaite, pianpih mawhdim kilunggulhna-in a zol uh hi. 19 Amaute mahmah zong siatna sila-in om lai napi, amaute suahtakna a kamciam tazen uh hi – mi khatpeuh amah a kizosak zo na khatpeuh sila ahi hi. 20 Eite Topa le Honpa Jesu Khrist a theihna uh hangin leitung siatna pan suakta khin napi, tua lai mah ah awk kikin a pianzia nunung, a masa sangin a sia zawtham hi. 21 Thumaan lampi thei khin a, amau tunga kipiasawn thupiak siangtho a nungngatsan kik uh sangin a theikha vet lo uh hileh amau adingin hoihzaw ding hi. 22 Amau tungah, “Ui in a luak ne kik,” cih le, “A kisil khinsa vokpi buan lakah bual kik,” cih paunak a man hi.

2 Peter 3

1 Kong it lawmte aw, tu-in hih kong laikhak a nihveina ahi hi. A nih in ngaihsutna siangthotak tawh hong lawpsak kik dingin kong phawksakna ahi hi. 2 A beisa huna kamsang siangthote thugente le na sawltakpite uh tungtawna, i Honpa le Topa in a thupiakte na phawk kik ding uh ka deih hi. 3 A masa penin ni nunungte ah mi zahpihhatte hong pai dinga, mite zahpih in amau gilo lunggulhnate zui ding uh hi, cih na theitel pelmawh un. 4 Amaute in, “Hong pai kik nading ama hong kamciam koi-ah om hiam? I pate sih a kipan na khempeuh lah a kipiansak tunga bangbangin hi toto lai hi,” ci ding uh hi. 5 Ahi hangin tanglai pekin Pasian thuin vantungte om a, tui panin tui tawh leitung kibawl ahilam thei napi, a kitheihmawhbawl uh hi. 6 Tua tuite mah tawh tua hun lai-a leitung, tuicin tungsakin kisusia hi. 7 Tua thu mahin thukhen ni le a pasian-milote kisiat ni cianga mei-a hal dingin tu-a vantungte le leitung a kisit lai ahi hi. 8 Ahi hangin kong it lawmte aw, hih thu khat na mangngilh kei un. Topa aa in ni khat pen kum tulkhat bang a, kum tulkhat pen ni khat bang hi. 9 Mi pawlkhatte in a ziakaina a theih uh bangin a thuciamna ah Topa a ziakai kei hi. Amah in kuama kisiat ding deih lo a, mi khempeuh a kisik ding uh a deih manin note hong thuak keeikai hi. 10 Ahi hangin Topa ni, guta bangin hong tung ding hi. Aw ngaihpi tawh vantungte mangin, a bulpite mei-in kisiasak dinga, leitung le a sunga om na khempeuh kitol mangsak ding hi. 11 Hih bang zia in na khempeuh kisusia ding ahi khit nung sang, bangci mi na hi ding uh kilawm ahi hiam? 12 Pasian ni hong tunpah ding na ngaklah kawmun a siangtho le a pasianmi-a na nuntak ding uh kilawm hi. Tua ni in vantungte mei-a halsiatna tun dinga, a satna sungah a bulpite a tuisuak ding hi. 13 Ahi hangin a thuciam bangin thumaanna inn omna van thak le lei thak ngakin i om hi. 14 Tua ahi tak ciangin kong it lawmte aw, hih a ngak na hi nungsangun a nin baang lo, kawkbanna om lo le amah tawh kilema hong muh theih nadingin na hih theih tawpun hahkatin hih un. 15 I sang gam it Paul in zong Pasian in amah a piak pilna tawh note kianga hong gelhsa bang tektek in, i Topa lungduaina – hotkhiatna ahilam note lungsim sungah phawk gige un. 16 A laikhak khempeuh ah a kibangmah gelhin hih thute mah a gen hi. A laikhakte sungah a theihhak pawlkhat om-a, a thei lote le a kip lo mite in amau mah siat nadingin Laisiangtho dangte a hih bangun tuate a lehkaih uh hi. 17 Tua ahi manin kong it lawmte aw, hih thu na theih khit nungsangun thukham a zui lo mite khialhna in hong manthanpih a, note bitna mun pan na puk khak loh nadingun kikem un. 18 Ahi hangin i Topa le Honpa Jesu Khrist hehpihna le theihna-ah na khangto un. Ama tungah tu le a tawntungin minthanna om ta hen! Amen.

1 Johan 1

1 A tunga omsa, kote in ka zaksa uh, ka mit uh tawh ka muhsa uh, en-a ka khut uh tawh ka lawnsa uh, hih nuntakna Thu tawh kisai kong tangko uh hi. 2 Tua nuntakna hong kilang zo a, kote in mu khinin teci ka pang uh a, Pa tawh a om khawm ko kianga hong kilak tua nuntak tawntungna no tungah kong tangko uh hi. 3 Note zong kote tawh na kipawl theih nadingun, ka muhsa uh le ka zaksate uh no tungah kong tangko uh hi. Kote kipawlna ahileh Pa le ama Tapa Jesu Khrist tawh kipawlna ahi hi. 4 Ka lungnopna uh a kicin nadingin hih lai kong gelh uh hi. 5 Ama tung panin za-a, no tungah kote hong pulak thupuak in: Pasian, khuavak hi-a; ama sungah khuamial a om peuhmah kei hi. 6 Eite amah tawh i kipawl hi, ci napi in khuamial sungah i kalsuan lai leh zuauphuak i suaka, thutaka nungta lo i hi hi. 7 Ahi hangin khuavak sungah i kalsuan leh amah khuavak ahi mah bangin eite khat le khat i kipawla, ama Tapa Jesu sisan in i mawhna khempeuh panin hong siansuah hi. 8 Mawhna ka nei kei hi, i kicih leh ei le ei kikhem i hi a, eite sungah thutak a om kei hi. 9 Eite in i mawhnate i pulak leh i mawhnate hong maisakin i thumaanlohna khempeuh hong siangsak dingin amah muanhuai-in a thutang hi. 10 Eite in mawhna ka bawl kei hi, i cihleh amah zuauphuak i suaksak a, i nuntakna sungah ama thu a om kei hi.

1 Johan 2

1 Kong it ka tate aw, na mawh loh nadingun hih thu kong gelh hi. Ahi hangin mi khatpeuh in mawhna a bawl khak leh eite hong guma Pa kiangah hong gensak ding mi khat – Thumaan Pa Jesu Khrist i nei hi. 2 Amah, eite mawhnate thoihdamna dingin biakpiakna hi-a, eite ading bek hi lo leitung buppi mawhnate thoihdam nadinga biakpiakna zong ahi hi. 3 Ama thupiakte i zuih leh amah i thei zo cih i thei hi. 4 "Amah ka thei hi,” a ci mi in ama thupiakte a zuih kei leh zuauphuak hi-a, ama sungah thutak a om kei hi. 5 Ahi hangin mi khatpeuh in ama thu a mang leh Pasian itna ama sungah a kicing takpi hi. Hih in ama sunga i om lam a kitheihna ahi hi: 6 ‘Ama sungah ka nungta hi,’ a ci peuhmah, Jesu gamtat bangin a gamta pelmawh ding hi. 7 Kong it lawmte aw, note kiangah thupiak thak kong gelh kei-a, a cil pana na neihsa uh a lui pen mah ahi hi. Hih thupiak lui, na zaksa uh thupuak mah ahi hi. 8 Tua hi napi thupiak thak khat hong gelh ka hi hi; khuamial bei zo a, thumaan khuavak tang khin zo ahi manin amah le note sungah a thutak kimu zo hi. 9 Mi khatpeuh in khuavak sungah ka om hi, ci napi in a sanggampa a muhdah leh khuamial sunga om lai ahi hi. 10 Ama sanggampa a it mi peuhmah khuavak sunga a nungta hi a, ama sungah a muktusak ding bangmah a om kei hi. 11 Ahi hangin a sanggampa a mudah peuhmah khuamial sunga om hi-a khuamial sunga vak kawikawi ahi hi. Khuamial in a mit tawsak ahi manin a pai nading mel a thei kei hi. 12 Kong it tate aw, ama min hangin na mawhnate uh kimaisak khin zo ahi manin note lai kong khak hi. 13 Pate aw, a tunga kipan a omsa pa, thei zo na hi manun note lai kong khak hi. Khangnote aw, a gilopa zo khin zo na hi manun note lai kong khak hi. Kong it tate aw, Pa thei khin na hi manun note lai kong khak hi. 14 Pate aw, a tunga kipan a omdensa pa thei zo na hi manun, note lai kong khak hi. Khangnote aw, note thakhauhin note sungah Pasian thu teng a, a gilopa zo khin na hi manin note lai kong khak hi. 15 Leitung ahikeh a sunga om nate khatpeuh it kei un. Mi khatpeuh in leitung a it leh ama sungah Pa itna a om kei hi. 16 Ahang in, leitunga om na khempeuh: mawhdim mi lunggulh-luatnate, mittang etlahnate, neihsa le sepsa kisialhpihnate, Pa tung pana hong pai hi loin leitung pan ahi hi. 17 Leitung le ama deihna mangthang lel a, ahi hangin Pasian deihna bangin a gamta mi a nungta tawntung hi. 18 Kong it tate aw, hih hun, hun nunung ahi hi. Hong pai ding ci-a na zaksa uh antichrist bangin tu nangawnin antichrist tampi hong pai zo uh hi. Hih bangin hun nunung ahilam i thei hi. 19 Amaute, eite lak pana paikhia ahi uh hi. Ahi hangin eite aa taktak ahi kei uh hi. Ahang in, eite aa taktak hi uh hileh eite lak mah ah omden ding uh hi. Ahi hangin amaute paikhiatna in, amaute khat beek eite aa ahi lohna uh hong lak hi. 20 Ahi hangin note, Siangtho Pa sathau nilhsa na hi uh a, na vekun thutak na thei uh hi. 21 Thutak na theih loh manun note lai hong khak ka hi kei a, thutak na theih hang uh le tua thutak pana zuauthu a pian loh hanga hong khak ka hizaw hi. 22 A zuaupa kua ahi hiam? Jesu in Khrist ahi hi, cih thu a nial mi a zuaupa ahi hi. Tua bang mi antichrist hi-a, amah in Pa le Tapa a nial hi. 23 Tapa a nial peuhmah in Pa a nei kei hi. Tapa a sang peuhmah in Pa zong a nei hi. 24 A tunga na zaksa mah uh note sungah omden hiam, cih na ki-entel un. A om leh Tapa sung le Pa sungah note zong na omden ding uh hi. 25 Amah in eite hong kamciam, hih nuntak tawntungna mah ahi hi. 26 Note lam pialsak hong sawmte tawh kisai-in hih thute kong gelh hi. 27 Note na hi uh leh ama sathau nilhna na ngah uh, no sungah omden a, note hong hilh ding kuamah na kisam kei uh hi. Ahi hangin ama hong sathau nilhna in na khempeuh thu hong hilh bangin tua sathau nilhna a lim bek hi lo hi, a taktak ahi hi, note hong hilhsa bang tektekin ama sungah na omden un. 28 Tu-in kong it tate aw, amah hong pai-a hong kilat ciangin ama mai-ah maizumna om lo-a, kimuangtaka i om theih nadingin ama sungah omden un. 29 Amah a thumaan hi, cih na theih uh leh thumaan a hih peuhmah ama sunga suak ahi hi, cih na thei uh hi.

1 Johan 3

1 Eite, Pasian tate cih-a i om nadingin Pa in eite tunga hong sunleet itna lian mahmah si! Ei lah tua mah i hi hi! Leitung in eite hong theih lohna amah a theih loh hang ahi hi. 2 Kong it lawmte aw, tu-in eite, Pasian tate i hi a, mailamah bang i hi lai ding hiam, hong kitheisak nai lo hi. Ahi hangin amah hong kilat ciangin amah ahi banga mu ding i hi manin amah i bang ding hi cih i thei hi. 3 Ama sunga hih lametna a nei peuhmah, amah a siantho bang tektekin amah le amah a kisiangthosak hi. 4 A mawh peuhmah thukham palsat ahi hi; a taktakin mawhna pen thukham palsatna ahi hi. 5 Ahi hangin i mawhnate a lakmang theih nadingin amah hong kilang ahilam na thei uh hi. Ama sungah ahileh mawhna a om kei hi. 6 Ama sunga nungta mi khatpeuh, mawhna a zongsang kei hi. Mawhna a zongsang mi peuhmah amah a mu nai lo, a thei nai lo ahi hi. 7 Kong it tate aw, mi khatpeuh na kipimangsak kei un. Amah a thumaan bang tektekin amaana gamta mi peuh mah a thumaan ahi hi. 8 A kipatcil-a kipan dawimangpa a mawhden ahi manin mawhna a bawl mi peuhmah dawimangpa pana piang ahi hi. Pasian Tapa hong kilatna ahang pen dawimangpa nasepna a susia ding ahi hi. 9 Pasian pana piang peuhmah, Pasian cii ama sungah omden ahi manin mawhna a zongsang kei ding hi; bang hang hiam cih leh amah Pasian pana piang ahi manin mawhna a zong sang kei hi. 10 Hih in Pasian tate le dawimangpa tate i theihkak theih nading ahi hi. Mi khatpeuh amaana a gamtat kei a, ama sanggampa a it kei leh Pasian ta ahi kei hi. 11 A cil-a kipan na zak uh thupuak in: Eite khat le khat i ki-it ding ahi hi. 12 Gilopa aa ahi, a sanggampa a that pa Cain na bang kei un. Tua ahileh bang hangin amah that ahi hiam? Bang hang hiam cih leh ama gamtatnate gilo-a, a sanggampa gamtatnate amaan hang ahi hi. 13 Ka sanggamte aw, leitung mite in note hong muhdah leh lamdang sa kei un. 14 Eite in i sanggamte i it manin sihna pan paikhia-in nuntakna sungah i lut zo cih i thei hi. A it lo mi peuhmah sihna sungah a om lai hi. 15 A sanggam a it lo mi peuhmah tualthat hi-a, tualthat kuamah in ama sungah nuntak tawntungna a neih loh lam na thei uh hi. 16 Itna bang ahi hiam cih i theihna hih ahi hi: Jesu Khrist in eite adingin a nuntakna hong khaam hi. Tua bangin eite in i sanggamte adingin i nuntakna i khaam ding kul hi. 17 Mi khatpeuh in neih le lam nei-in a sanggampa kisap lam thei napi amah a hehpih kei leh bangci bangin ama sungah Pasian itna om thei ding ahi hiam? 18 Kong it tate aw, a thu le kamsiam bek tawh ki-it loin gamtatna le thutakin ki-it ni. 19 Tua in, thutak aa i hina i theihna le eite i lungtang in hong mawhpaih peuhpeuh ciangin ama mai-ah i lungsim tawlngakna i theihna ahi hi. 20 Ahang in, i lungtang sangin Pasian lianzaw a, na khempeuh a thei hi. 21 Kong it lawmte aw, i lungtang in eite hong mawhpaih kei leh Pasian mai-ah kimuanna nei-in, 22 ama thupiakte manga, amah lungkimsak i hi manin ama tungah i nget khatpeuh i ngah thei hi. 23 Ama thupiak hih ahi hi: Ama Tapa Jesu Khrist min up ding le amah in eite hong thupiak bangin khat le khat i ki-it ding ahi hi. 24 Ama thupiakte a mangte ama sungah nungta a, amaute sungah amah a nungta hi. Hih in amah eite sungah a nuntak lam i theihna ahi hi: Eite in ama hong piak Kha-in tua i thei hi.

1 Johan 4

1 Kong it lawmte aw, kha khatpeuh um kei un; ahi hangin leitung ah kamsang zuau tampi paikhia khin ahi manin amaute kha Pasian pan hi hiam, hi lo hiam cih sittel un. 2 Pasian Kha na khentel theih nading uh hih bang ahi hi: Jesu Khrist mihingin hong pai hi, ci-a a sang kha peuhmah Pasian pan hi-a, 3 ahi hangin tua banga Jesu a sang lo kha peuhmah Pasian pan hi lo hi. Hih in antichrist kha hi-a, hong pai ding ci-a na zaksa uh, tu nangawnin leitunga a om khin zo ahi hi. 4 No, kong it ka tate Pasian pan na hi uh a, leitunga om pa sangin no sunga om pa lianzaw ahi manin amaute na zawhsa uh ahi hi. 5 Amaute leitung pan hi uh a, tua ahi manin leitung ngaihsutna tawh thu genin leitung in amau thu a ngai hi. 6 Eite Pasian pan i hi-a, Pasian a thei peuhmah in i thu a ngai uh hi. Ahi hangin Pasian pan ahi lo peuhmah in i thu a ngai kei uh hi. Thutak Kha le zuauna kha i khentel theihna hih bang ahi hi. 7 Kong it lawmte aw, Pasian pana itna hong pai ahi manin eite khat le khat ki-it ni. A it thei mi peuhpeuh, Pasian pana suak hi-a Pasian a thei hi. 8 A it thei lo mi peuhmah in Pasian a thei kei hi; bang hang hiam cih leh Pasian in itna ahi hi. 9 Pasian in ama itna eite lakah hong lahna hih bang ahi hi: Ama tungtawna eite i nuntak theih nadingin amah in a Tapa neihsun leitungah hong sawl hi. 10 Itna hih ahi hi: Eite in Pasian i it cihna hi lo, amah in eite hong it-a, i mawhnate thoihdamna dingin biakna-in a Tapa hong sawlna ahi hi. 11 Kong it lawmte aw, Pasian in eite hi zaha hong it khit nungsangin eite zong khat le khat i ki-it ding kisam hi. 12 Mi khat beek in Pasian a mu ngei kei hi; ahi hangin eite khat le khat i ki-it leh, Pasian eite sungah hong tengin i sungah a itna kicingsak hi. 13 Amah in eite ama Kha hong pia khin ahi manin eite ama sungah i nungta a, amah eite sungah a nungta cih i thei hi. 14 Tua hi-a Pa in leitung Honpa dingin ama Tapa hong sawl zo hi, cih eite in i mu khin a, teci i pang hi. 15 Mi khatpeuh in, Jesu, Pasian Tapa hi, ci-a a san leh ama sungah Pasian tenga, Pasian sungah amah a teng hi. 16 Tuaci bangin Pasian in eite hong it lam i thei a, tua itna tungah i kinga hi. Pasian in itna ahi hi. Itna sungah a nungta mi peuhmah Pasian sunga nungta hi-a, ama sungah zong Pasian a nungta hi. 17 Thukhen ni cianga muang taka i om nadingin hih bangin eite lakah itna hong kicingsak hi. Bang hang hiam cih leh hih leitung ah amah tawh i kibang hi. 18 Itna sungah launa a om kei hi. Ahi hangin a kicing itna in launa a hawlkhia hi; bang hang hiam cih leh launa pen gawt ding kihtakna ahi hi. A lau mite, itna sungah kicinsak nai loh ahi hi. 19 Amah in eite hong it masa ahi manin eite in i it hi. 20 Mi khatpeuh in, “Pasian ka it hi,” ci napi a sanggampa a muhdah lai leh zuauphuak pa ahi hi. Ahang in, a muh gige a sanggampa a it lo mi in, a muh nai loh Pasian a it thei kei hi. 21 Amah in eite hih thupiak hong pia zo hi. Pasian a it peuhmah in pel loin a sanggampa zong it hen.

1 Johan 5

1 Jesu in Khrist ahi hi, ci-a a umte peuhmah Pasian pana suak hi-a a pa a it peuhmah in a ta zong a it hi. 2 Pasian tate i it lam i theihna in: Pasian itna le ama thupiakte sepkhiatna ahi hi. 3 Pasian i itna in: ama thupiakte manna ahi hi. Ama thupiakte lah a haksa lua kei hi; 4 ahang in, Pasian pana piang peuhmah in leitung a zawhsa ahi hi. Leitung a zo gualzawhna zong tua eite upna mah ahi hi. 5 Kuate in leitung zo uh ahi hiam? Jesu, Pasian Tapa hi, ci-a umte bek ahi hi. 6 Tui le sisana hong pai pa, Jesu Khrist ahi hi. Amah tui bekin hong pai lo a, tui le sisanin hong pai hi. Tua thu teci pangpa Kha ahi hi; bang hang hiam cih leh tua Kha, thutak ahi hi. 7 Ahang in, tua thu teci a pang thum om a: 8 Kha, tui le sisan ahi hi; tua thumte a kithutuak uh hi. 9 Eite in mihing teci panna i sang hi. Ahi hangin Pasian in ama Tapa thu teci a panna ahi manin Pasian teci panna a lianzaw hi. 10 Pasian Tapa a um mi peuhmah in a lungtang sungah hih teci panna a nei hi. Pasian a um lo mi peuhmah in Pasian in a Tapa thu teci a panna um lo ahi manin amah zuauphuak a suaksak hi. 11 Tua hi-a hih in teci panna ahi hi: Pasian in eite nuntak tawntungna hong pia a, tua nuntakna Tapa sungah a om hi. 12 Tapa a nei mi in nuntakna a nei hi; Pasian Tapa a nei lo mi in nuntakna a nei kei hi. 13 Pasian Tapa min a um note in nuntak tawntungna na neih lam uh na theih nadingun no tungah hihte kong gelh hi. 14 Pasian i zuat cianga i kimuanna in: ama deihna tawh kituak a na khatpeuh i nget leh amah in hong za hi. 15 Amah in i ngetna hong za hi, ci-a i theih leh ama kianga i nget peuhpeuh i ngah hi, cih i theihna ahi hi. 16 Mi khatpeuh in, a sanggampa in sihna a tun lo mawhna khatpeuh a bawl a muh leh thu ngen ta hen; Pasian in amah nuntakna pia ding hi. Sihna a tun lo mawhna a hihte gen ka hi hi. Sihna a tun mawhna khat a om hi. Tua thu-a thu ngetsak ding ka ci kei hi. 17 Gamtat khialhna khempeuh mawhna hi-a ahi hangin sihna a tun lo mawhna a om hi. 18 Pasian pana suak mi khatpeuh mawhna ah a zongsang kei cih i thei a, Pasian pana suakpa amah bittakin kikemcing a, gilopa in amah a lawng thei kei hi. 19 Eite Pasian tate i hilam le leitung buppi gilopa ukna nuai-a om ahilam i thei hi. 20 Amah a thumaanpa a hina i theih nadingin Pasian Tapa hong pai zo cihleh theihtelna hong pia hi cih zong i thei hi. Eite tua ama Tapa Jesu Khrist thu maanna sungah i om hi. Amah a thumaan Pasian le nuntak tawntungna ahi hi. 21 Kong it tate aw, milimte panin no le no na kikem un.

2 Johan 1

1 Upapa in, Thutak sunga ka it, kei bek hi lo thutak a theite khempeuh in zong a it uh – 2 kote sunga om, kote tawh a omkhawm tawntung ding tua thutak hanga teelsa upanu le a tate tungah: 3 Pa Pasian le Pa’ Tapa Jesu Khrist tung panin hehpihna, lainatna le lemna in thutakna le itna tawh eite hong ompih ding hi. 4 Pa in eite hong thupiak bang tektek in, na tate uh pawlkhat thutakin a kalsuan uh ka muh in nakpi-in hong nuamsak hi. 5 Kong it upanu aw, tu-in thupiak a thak kong gelh kei-a, a kipatcil-a i neihsa pen mah ahi hi. Eite khat le khat i ki-it thuk ding kong thum hi. 6 Ama thupiak manga kalsuanna in: itna ahi hi. A cil-a kipan na zaksa bangun ama thupiak in: itna sungah na gamta un, ci hi. 7 Jesu Khrist ci-le-sa in hong pai hi, ci-a a sang lo, mikhem tampi leitung ah paikhia khin zo uh hi. Tua bang mi peuhmah mikhem le antichrist ahi hi. 8 Ngah sawma na sep uh pahtakman, mansuah loin a kima na ngah nadingun kigalging un. 9 Mi khatpeuh a khengvalin pai a, Khrist thuhilhna-a a om den lo pa in Pasian a nei kei hi; tua hilhna-a a om den peuhmah in Pa le Tapa a nei khawm hi. 10 Mi khatpeuh no kiangah hong pai a, hih thuhilhna mah a hilh kei leh na muak kei unla, na inn uah zong na tungsak kei un. 11 Amah a muak peuhmah ama gilo nasepna ah a kihel ahi hi. 12 Note tungah kong gelh nop a tam mahmah hangin laidal le laitui ka zang nuam kei hi. Tua sangsik in, i lungnopna a kim theih nadingin hong hawh a, maitang kituah in, thu i kikup ding ka lamen hi. 13 A kiteel na sanggamnu uh tate in hong hopih nate uh hong khak uh hi.

3 Johan 1

1 Upapa in, Thutak sunga ka it ka lawm ngaih Gaius tungah: 2 Kong it lawm aw, na kha a cidam bangin na pumpi zong cidama, na khempeuh ah na lawhcin nadingin thu ka ngen hi. 3 Sanggamte pawlkhat hong pai-in, thutaka na muanhuaina thu le tua thutaka na kalsuan, na zopsuakna thu hong ko uh a, ka lungdam mahmah hi. 4 Thutaka ka tate a kalsuan ka zaka ka lungdamna sangin lungdamna lianzaw ka nei kei hi. 5 Kong it lawm aw, sanggamte na theih ngei loh mi hi napi, amaute tunga na gamtatna ah na muanhuai hi. 6 Amaute in na itna thu pawlpi tungah ko uh hi. Pasian tunga gamtat dinga kilawm zahin a lampi-uah amaute na kha lecin na hoih sem na hi ding hi. 7 Amaute in lawkite tung panin huhna ngah lo uh a, tua Min hang bekin a kuankhia uh ahi hi. 8 Tua ahi manin thutak na i sepkhawm theih nadingin tua mite tungah zindo i siamna i lah ding kisam hi. 9 Pawlpi tungah lai ka khaka, ahi hangin tungnuntuhpa Diotrephes in kote hong thudon nuam lo hi. 10 Tua ahi ciangin kong pai leh ama gamtatna le kote hong gensiatnate kong pholak ding hi. Amah tuate tawh lungkim zo nai loin sanggamte a na muak nuam kei hi. Tua banga a hih nuamte khamin pawlpi panin a hawlkhia hi. 11 Kong it lawm aw, a hoih lo lam na etteh kei inla, a hoih lam na etteh zaw in. A hoiha gamta mi peuhmah Pasian pan ahi hi. A sia-a gamta mi peuhmah in Pasian a mu nai kei hi. 12 Mi khempeuh in Demetrius phat uh a, thutak nangawn in amah a phat hi. Kote in zong amah ka phat uh a, kote teci panna a man ahilam na thei hi. 13 Nang tungah kong gelhnop tam mahmah a, ahi hangin laidal le laitui-in ka gelh nuam kei hi. 14 Nang tawh kimuh baih ding ka lamen hi, tua ciangin maitang kituah in i kiho ding hi. Nang tungah lemna om ta hen. Hih lai-a i lawmte in hong hopihna uh hong khak uh hi. Tua lai-a i lawmte a milipin na hopihsak in.

Juda 1

1 Jesu Khrist nasem James sanggampa Juda in, Pa Pasian in it a, Jesu Khrist in a kep a kisamsate tungah: 2 Lainatna, lemna le itna a dimin note aa hi ta hen. 3 Kong it lawmte aw, note tawh i tanh khawm hotkhiatna thu no tungah kong gelh ding lawp mahmah napi misiangte tungah khatvei-a cinkim dinga hong kikemsak tua upna na hut theih nading uh kutna lai-a gelh ding kul ka sa hi. 4 Ahang in, sawtpi-a amaute a kimawh paihna thu a kigelh khin zo mi bangzah hiam khat note lakah hong lutsim zo uh hi. Amaute pasian-neilo mite hi uh a, eite Pasian hehpihna, a kihhuai paktat theihna suaksakin eite in Thuneipipa le Topa a, amah bek i neih Jesu Khrist a nial uh hi. 5 Hihte khempeuh na theihsa uh ahi ta zongin “Topa in Egypt panin ama mite gumkhia a, ahi hangin a nunung lam ciangin a um lote a suksiatna thu kong phawkkiksak nuam hi. 6 Tua ciangin, a thuneihna dinmun uh kemcing lo a, a inn uh a taisan vansawltakte khuamial sungah khumcipin ni thupi Ni-a thukhen dingin tawntung sikkhainiang tawh a khih hi. 7 Tua bang zia in Sodom le Gomorrah le a kima khuapite in numei-pasal paktatna le lehtatna ah amau le amau kipia uh hi. Amaute, tawntung meikuang sunga gawtna thuak dingte etsakna a suak uh hi. 8 Tua tawh kibang tektek in, hih bang hih dinga a ngaihsunte in amau pumpi ninsak uh a, thuneihna nialin van mite a gensia uh hi. 9 Ahi hangin vansawltak a lianpen Michael nangawn, dawimangpa tawh Moses luang a kituh lai-un kosia in mawhsak ngam loin, “Topa in nang hong tai hen,” ci bek hi. 10 Tua hi napi hih mite in a theihtel loh peuhpeuh uh gensia-in, a theihtelsate uah lah, a ngaihsun thei lo gamsate bangin hih uh a, hih nate mahmah in amaute a susia hi. 11 Amaute in gimna nak thuak na un cia! Cain lampi zui uh a, Balaam khialhna sungah a met delh in, Korah lehdona ah a kisia zo uh hi. 12 Hih mite in na itna pawite uh melhemsak in, zumna nei loin no tawh an ne uh a – amau kia bek a kivakkhop tuucingte ahi uh hi. Amaute huih in a mutleng kawikawi guah a paii lo meii; gah a gah lo, a kibulkalh – nihvei a si sikhiau singkung ahi uh hi; 13 a zumhuaina uh a phuankhiasak zuahzuah tuipihual huai siate, a leng kawikawi aksite, amau adingin a mial pen khuamial, a tawntung a kisitsakte ahi uh hi. 14 Hih mite thu, Adam pana a sagihna pa Enoch in a na genkholhna-ah: “En un Topa, a misiangthote tul mun tul tampi tawh hong pai in, 15 mi khempeuh tungah thu khen dinga, amaute in a pasian-milohna uh a, a hihsa uh pasian-milohna khempeuh le a pasian-milo mawhneite in amah langpanga a gensa uh kam khaate-in a mawhsak ding hi,” ci hi. 16 Hih mite, phunhatte le mi ngawhhatte ahi uh hi; amaute, amau gitloh lunggulhna bangin gamta uh a, amau le amau kisialin, amau hamphat nadingin mi dangte a maitang phat uh hi. 17 Ahi hangin kong it lawmte aw, i Topa Jesu Khrist sawltakpite in a gen kholhsa phawk gige un. 18 Amaute in note tungah, “Hun nunung ciangin amau pasian-milo deihna a zui zahkohatte hong om ding uh hi,” ci uh hi. 19 Tua mite in Kha nei lo uh a, pumpi deihna bek zui-in note hong khenkhamte ahi uh hi. 20 Ahi hangin no kong it lawmte aw, a siangtho pen note upna ah no le no kilam unla Khasiangtho-in thu na ngen un. 21 Nuntak tawntungna ah note hong tun dingin i Topa Jesu Khrist lainatna na ngak kawmun Pasian itna sungah no le no na kikem un. 22 A lunghei neite na lainat un 23 mei sung pan midangte bawhkhia unla, honkhia un; adangte tungah a sa thanghuai banna puansilh nangawn kihin lau kawmin lainat siamna na nei un. 24 A puk lo dinga note hong kem thei, khialhna om lo-a, lungnopna lianpi tawh a minthanna ama om na-a note hong puak theipa – 25 eite Honpa Pasian khat bek tungah i Topa Jesu Khrist tungtawnin minthanna, thupina, vangliatna le thuneihna, khang hun khempeuh ma, tu laitak le a tawntung in om ta hen! Amen.

Kilaanka 1

1 Pasian in a sawt lo-a tung pah dingte a nasemte tungah lak dingin amah a piak Jesu Khrist kilaakna ahi hi. Amah in ama vansawltakte sawlin ama nasem Johan tungah theisak a, 2 Johan in Pasian thu le Jesu Khrist thu teci panna a muh khempeuh teci a pang hi. 3 Hih genkholhna thute a sim mi thupha ngah hi-a, a sunga kigelhte za-a, a lungtanga a kemte thupha ngah ahi hi; bang hang hiam cih leh a hun hong nai ta hi. 4 Johan in, Asia gama pawlpi sagihte tungah: Tu laitaka om, a omsa le hong pai ding pa le ama kumpi tokhom mai-a kha sagihte pan, 5 le a muanhuai teci pa, misi pana a suak masa pen, le leitung kumpite a ukpa, Jesu Khrist tung panin hehpihna le lemna no tungah om ta hen. Eite hong it a, ama sisan hanga i mawhnate pan hong suaktasak, 6 ama Pasian le Pa nasem dinga kumpi-gam le siampi hong hisak ama tungah minthanna le vangliatna a tawntungin om den ta hen! Amen. 7 En un, meiipi tawh amah hong pai hi, mit khempeuh in amah mu dinga amah a sunlette nangawn in a mu ding uh hi; leitung a mite khempeuh ama hangin thum ding uh hi. Tua bang hi takpi ding hi! Amen. 8 Topa Pasian in, “Keimah, Alpha le Omega, tu laitak a om, a omsa le hong pai ding pa, Thahatpen ka hi hi,” a ci hi. 9 Jesu sunga eite tanh thuakna, kumpi-gam le sikdotaka na thuakpih pa uh, na sanggampa uh le na pawlpa uh keimah John, Pasian thu hang le Jesu thu teci panna hangin Patmos tuikulh ah ka om hi. 10 Topa’ Ni-in Kha sungah ka om hi, ka nunglam ah pengkul bangin aw ngaih mahmah khat ka za a: 11 "Na muh teng laizial tung khatah gelh inla pawlpi sagih: Ephesus, Smyrna, Pergamum, Thyatira, Sardis, Philadelphia le Laodicea-te tungah khak in,” hong ci hi. 12 Tua kei hong hopih aw en dingin ka kihei hi. Ka kihei khit ciangin kham meivak tunna sagihte ka mu-a, 13 tua meivak tunnate lakah “mihing tapa tawh kibang khat” a khepek ciang a bansuk puantualpi khat silhin a awm ah kham awmgak a gak mi khat ka mu hi. 14 A lu le a samte samul bangin ngo in, vuk bangin pak a, a mitte meikuanglai bang hi. 15 A khepekte pummei sunga sumsan hal-am tawh kibang a, a aw tuizeupi ging tawh kibang hi. 16 A taklam khutah aksi sagihte tawi-a, a kam panin a langniha hiam tuak namsau khat hong dawkkhia hi. A maitang, ni a tan pen laitak tawh kibang hi. 17 Amah ka muh ciangin a khephung ah a si bangin ka puk hi. Tua ciangin aman a taklam khut ka tungah nga a: “Lau kei in, keimah, a Masa pen le a Nunung pen ka hi hi. 18 Keimah a Nungta Pa ka hi hi. Ka si zo a, en in a tawntungin ka nungta den hi! Keimah in sihna leh Gawtmun tawhtangte zong ka tawi hi. 19 "Tua ahi manin na muhsate, tu laitak a om le tu nung cianga hong om dingte gelh in. 20 Ka taklam a na muh aksi sagihte le kham meivak sagihte’ thuthuk hih ahi hi: Aksi sagihte pen pawlpi sagihte’ a kem vansawltakte hi-a, meivak tunna sagihte pen pawlpi sagihte ahi hi.

Kilaanka 2

1 "Ephesus a pawlpi vansawltak tungah gelh in: Hihte in a khut taklam-a aksi sagihte tawi-a, kham meivak tunna sagih laka a vakpa kammal ahi hi: 2 Na nasepte na hahkatna le na sikdonate ka thei hi. A tatkhel mite na thuak thei kei-a a hi lopi sawltakpi banga kibawlte na sittel a, amaute a zuau ahilam na mu cih ka thei hi. 3 Na sikdo a, ka min hangin haksatna na thuaka na cimtak kei hi. 4 Tua hi napi kong mawhsakna om veve hi: Na itna masa pen na nusia hi. 5 Na kiatna a sannazia phawk in! Kisik inla na hih masak nate hih kik in. Na kisik kei leh na kiangah kong pai dinga, na meivak tunna a omna pan ka khinkhia ding hi. 6 Ahi hangin na pahtakhuaina khat a om hi: Kei zong ka muhdah Nicolas pawlte gamtatna, na mudah hi. 7 Pawlpite tunga Kha thugen bil nei peuh in za ta hen. A gualzo pa tungah Pasian paradise-a om nuntakna singkung pan a nek theih nading thu ka pia ding hi. 8 "Smyrna a pawlpi vansawltak tungah gelh in: Hihte, a Masa pen le a Nunung pen, si-a a nungta kik pa kammalte ahi hi. 9 Na zawnna le na thuaksiat nate ka thei hi; tua hi napi na hau hi! Hi lo napi Jew mi a kici mi gensiate ahi hanga lah Satan synagogue a hite ka thei hi. 10 Na thuak dingte kihta kei in. Nang hong zia-et dingin dawimangpa in kimkhat thong sungah hong khum dinga, ni sawm sung bawlsiatna na thuak ding uh kong hilh hi. Sih dongin muanhuai un, tua hileh nuntakna lukhu kong pia ding hi. 11 Pawlpite tunga Kha thugen bil nei peuh in za ta hen. A gualzo mi, a nihna sihna in a nasak kei ding hi. 12 "Pergamum a pawlpi vansawltak tungah gelh in: Hihte in a langnih-a, hiam tuak namsau nei pa kammalte ahi hi: 13 Satan in a tokhom a koihna mun – na tenna mun ka thei hi. Tua hi napi ka min tungah na muanhuai lai hi. Satan tenna mun na khuapi sunga ka teci muanhuai a kithatpa Antipas nite nangawnin kei nong upna na tawpsan kei hi. 14 Ahi hangin kong mawhsakna tawm no a om hi: Milim thoihna ante nek ding ahi zongin numei-pasal paktat ding ahi zongin, a hih dinga Israel-te khem dingin Balak in a hilh Balaam thuhilhna a zui mi pawlkhat na nei hi. 15 Tua mah tawh kibangin Nicolas pawlte thuhilhna a zuite zong na nei hi. 16 Tua ahi manin kisik in! Ahi kei leh nang kiangah kong paipah dinga, ka kama namsau tawh amaute ka do ding hi. 17 Pawlpite tunga Kha thugen bil nei peuh in za ta hen. A gualzopa tungah a kisel manna pawlkhat ka pia ding hi. Amah a tunga minthak om suangkang khat zong ka pia ding a, tua min a ngah pa bekin a thei ding hi. 18 "Thyatira a pawlpi vansawltak tungah gelh in: Hihte, a mitte meikuanglai a bang, a khepekte sumngo nawtngilsa a bang, Pasian Tapa kammalte ahi hi: 19 Na nasepte, na itna le na upna, na nasepnate le na sikdonate ka thei-a na sep masa sangin tam na semzaw hi. 20 Ahi zongin nang tungah hih mawh sakna kong nei hi: Amah le amah kamsang a kici numei Jezebel na thuak zo uh hi. Ama hilhna in ka nasemte, numei-pasal paktatna le milim thoihna anneknate ah a makaih khial hi. 21 Tuanu a paktatna pan a kisik nading hun ka piak hangin a ut kei hi. 22 Tua ahi ciangin amaute tuanu gamtatnate pan a kisik kei uh leh gimthuakna lupna tungah amah lawnin ama angkawmpihte nakpitakin ka thuaksak ding hi. 23 A tate ka satlum ding hi. Tua ciangin pawlpi khempeuh in lungtang le lungsim zong a phelekpa ka hilam hong thei ding uh a, note khempeuh na gamtatna bangun kong thuk ding hi. 24 Tu-in Thyatira a tuanu hilhna a zui lote le thuthuk kici Satan thusimte a sin lote tungah: (vangik dang peuhmah kong suan kei ding hi.) 25 Kong pai matengin na neihsa uh lenkip den un kong ci hi. 26 A tawp donga ka deihna ahi gualzo pa tungah minamte tunga thuneihna ka pia dinga,– 27 “‘Amah in amaute tungah sikciang tawh uk dinga; leibeel bangin amaute a satzan ding hi’ – tua in ka Pa tung pana thuneihna ka ngah bang tektek ahi hi. 28 Tua zingsol zong amah ka pia ding hi. 29 Pawlpite tunga Kha thugen bil nei peuh in za ta hen.

Kilaanka 3

1 "Sardis a pawlpi vansawltak tungah gelh in: Hihte, Pasian kha sagihte le aksi sagihte a tawipa kammalte ahi hi: Na nasepte ka thei-a, a nungta-a na than hangin a sisa na hi hi. 2 Ka Pasian mitmuh ah na nasepte a mansiangin mu nai lo ka hi manin, khanglo in! A om lai a si dekdekte thahatsak in. 3 Tua ahi manin na ngahsa le na zaksate ciamteh in; a thu mang inla kisik in. Ahi hangin na khanlawh kei leh guta bangin kong pai dinga, nang kianga kong pai ding a hun na thei kei ding hi. 4 A puansilh uh a buahsak lo, Sardis ah mi tawm no na nei lai hi. Amaute santham ahi manin puanpak silhin kei tawh a tonkhawm ding uh hi. 5 A gualzopa in amaute tawh kibangin puanpak a silh ding hi. Nuntakna laibu panin a min ka phiat ngei kei dinga, ka Pa le ama vansawltakte mai-ah a min ka pulak zaw ding hi. 6 Pawlpite tungah Kha thugen bil nei peuh in za ta hen. 7 "Philadelphia a pawlpi vansawltak tungah gelh in: Hihte, a siangtho le a thumaan-pa, David tawhtang tawipa kammalte ahi hi. Ama honsa kuamah in khak thei lo a, ama khaksa kuamah in a hong thei kei hi. 8 Na nasepte ka thei hi. En in, na mai ah kuama khak theih loh kong honsa khat ka koih hi. Thahatna tawmkha bek na neih lam ka thei hi. Tua hi napi ka thu na kembita ka min na nial kei hi. 9 Satan synagogue ahite, Jew mi hi lo napi Jew mi a kici, ahi hanga zuauphuakte, hong paisakin na khephungah ka puksak dinga nang kong it lam ka theisak ding hi. 10 Lungduaitaka thuak dingin kong thupiak na man nungsangin, leitang tunga tengte zia-et nadingin leitung bupa hong tung ding bawlsiatna hun panin, ken zong nang kong peng khiasak ding hi. 11 Kong paipah ding hi. Na kumpi lukhu kuamah in hong suh loh nadingin na neihsa lenkip den in. 12 A gualzopa, ka Pasian biakinnpi sungah khuampi ka suaksak ding hi. Amah in tua a nusia ngei nawn kei ding hi. Ama tungah ka Pasian min le ka Pasian pana vantung a hong kumsuk ka Pasian khuapi, tua Jerusalem thak min ka gelh ding hi. Ama tungah ka min thak zong ka gelh ding hi. 13 Pawlpite tunga Kha thugen bil nei peuh in za ta hen. 14 "Laodicea a pawlpi vansawltak tungah gelh in: Hihte, Pasian piansakte a ukpa, a muanhuai le a thutak Amen kam malte ahi hi. 15 Na nasepte ka thei hi, vot lah vot loin sa lah na sa kei hi. Khat zawsang na hi ding kong deih hi! 16 Tua ahi ciangin vot lah vot lo, sa lah sa loin lum milmial na hi manin ka kam panin kong siakhia dektak hi. 17 ‘Ka hau a, neih le lam ka cin hi, khat beek ka sam kei hi,’ na ci hi. Ahi hangin a genthei, a hehpihhuai, azawng, a mittaw le guaktang na hilam a phawk lo na hi hi. 18 Na hauh theih nadingin kei kiang panin mei-a halsiangsa kham; guaktang zumhuaina na sel nadingin na silh ding puanpak; khua na muh theih nadingin na nuh ding mitza, na lei ding kong thuhilh hi. 19 Ka it mite tai-in ka sek hi. Tua ahi ciangin citak inla kisik in. 20 Hih lai-ah ka om hi! Kongkhak ah dingin ka kiu hi. Mi khatpeuh in ka aw za a, kongkhak hong hon leh ka lut dinga, amah tawh an nekhawm in, amah in kei tawh a nekhawm ding hi. 21 Kei gualzo-in ka Pa tawh ama kumpi tokhom tungah ka tut bang tektek in, a gualzopa, kei tawh ka kumpi tokhom tungah a tut theih na ding thu ka pia ding hi. 22 Pawlpite tunga Kha thugen bil nei peuh in za ta hen,” a ci hi.

Kilaanka 4

1 Hih teng khit ciangin ka et leh vantung ah kong kihongsa khat ka mai-ah ka mu hi. Ka aw zak masak pen in pengkul bangin kei tungah, “Hih lai-ah hong paito in, hih khit cianga a tung pelmawh ding kong lak ding hi,” hong ci hi. 2 Thakhatin Kha-in ka om pah a, ka mai-ah a tunga kua hiam khat a tu kumpi tokhom khat vantung a om ka mu hi. 3 Tua lai-a tupa in jaspar le carnelian mel a sun hi. Emeral mel tawh a kibang sakhituihup khat in kumpi tokhom a kualkhum hi. 4 Tua kumpi tokhom, a dang kumpi tokhom sawmnih le li in umcih a, tuate tungah upate sawmnih le li a tu uh hi. Amaute a pakin kizem uh a, amau lutung ah kham kumpi lukhu a khu ciat uh hi. 5 Tua kumpi tokhom panin khua phia zalzal a, kek kia daldal in van a ging damdam hi. Tua kumpi tokhom mai-ah meivak sagih a kuang hi. Hihte Pasian kha sagihte ahi hi. 6 Kumpi tokhom mai-ah crystal banga siang, limlang tuipi tawh a kibang khat zong a om hi. A laizang takah kumpi tokhom kimkotin a nung le a mai-ah mitin a tuam, a nungta ganhing lite a om uh hi. 7 A nungta ganhing masa pen humpinelkai tawh kibanga, a nihna bawngtal tawh kibangin, a thumna in mi bangin maitang nei-a, a lina, muvanlai lenglai a bang hi. 8 Tua a nungta ganhing lite in kha guk nei ciat uh a, a pumtangun a kha nuai nangawn mit-in a tuam hi. Amaute in sun le zan khawl loin: “A omdensa, tu laitaka om le hong pai ding, Thahatpen Topa Pasian, Siangtho, Siangtho, Siangtho hi,” a ci uh hi. 9 Tua a nungta ganhingte in tua kumpi tokhom-a tu, a tawntung a nungta den pa tungah minthanna, pahtawina le lungdam thu a puak peuhpeuh uh ciangin 10 tua upa sawmnih le lite, kumpi tokhom tunga tupa mai-ah bok uh a, a tawntunga nungta den pa a bia uh hi. Tua kumpi tokhom mai-ah a kumpi lukhute uh nga uh a: 11 "Kote Topa le Pasian aw, nangin na khempeuh na piangsak-a nangma deih bangin amaute kipiangsakin nungta uh ahi manin, minthanna, pahtawina le vangliatnate a ngah dingin na kilawm hi,” a ci uh hi.

Kilaanka 5

1 Tua ciangin kumpi tokhom tunga tupa taklam ah a langniha kigelh ciamtehna sagiha kiciamteh laizial khat ka mu hi. 2 Tuateh a thahat vansawltak khat in, “Ciamtehna phela, laizial zal dingin kua cing ahi hiam?” ci-a ngaihtaka kitangko ka mu hi. 3 Ahi hangin vantung ahi zongin, leitung ahi zongin, leinuai ahi zongin, laizial a zal gen loh a sung nangawn a en thei kuamah a om kei hi. 4 Laizial a zal ding ahikeh a sung en dinga a cing nangawn kuamah a kimuh loh manin kah cihtakin ka kap hi. 5 Tua ciangin tua upate khat in kei kiangah, “Kap kei in! En in, Judah beh a Humpinelkai, David Zungpi gualzo ta hi. Amah in tua laizial le a ciamtehna sagihte a hong thei hi,” hong ci hi. 6 Tua ciangin a kigosa hileh kilawm Tuuno khat, tua kumpi tokhom laizangah dinga, a nungta ganhing lite le upate in a kualkhum uh ka mu hi. Amah in ki sagih le mit sagih nei a, tuate, leitung khempeuh a kisawlkhia Pasian kha sagihte ahi hi. 7 Amah pai-in kumpi tokhom tunga tupa taklama laizial a la hi. 8 A lak khit ciangin tua a nungta ganhing lite le upa sawmnih le lite, Tuuno mai-ah a boksuk uh hi. Amaute in harp khat ciat nei uh a, misiangte thungetna ahi, gimnamtui tawh a dim kham kuangkumte a tawi uh hi. 9 Amaute in lathak khat, “Nang hong kigo zo a, na sisan tawh Pasian ading mi, beh kim, pau kim, mi kim, nam kim pan lei khin zo na hi manin tua laizial la a, a ciamtehna phel dingin na kilawm hi. 10 Nangmah in amaute kumpi-gam khat le kote Pasian nasem ding siampi-in na bawl khin zo a, amaute in leitung a uk ding uh hi,” ci-in a sa uh hi. 11 Tua ciangin ka en a, vansawltak tampi, tul mun tul tampi le tulsawm mun tulsawm tampite aw ka za hi. Amaute in tua kumpi tokhom le a nungta ganhingte le upate a umcih uh hi. 12 Amaute in, “A kigosa Tuuno, vangliatna, hauhna, pilna, hatna, pahtawina, minthanna le phatna ngah dingin kilawm hi,” ci-in ngaihtakin a sa uh hi. 13 Tua ciangin vantung, leitung, leinuai, tuipi tung le tuate sunga om a kipiang sakte khempeuh in: “Kumpi tokhom tunga tupa le Tuuno tungah phatna, pahtawina, minthanna le vangliatna a tawntungin om den ta hen!” ci-in la a sak uh ka za hi. 14 A nungta ganhing lite in, “Amen,” ci uh a upate in bokin a bia uh hi.

Kilaanka 6

1 Tuuno in ciamtehna sagihte a masa pen a hon laitak ka en hi. Tua ciangin a nungta ganhing lite khat in kek kia ging bangin, “Hong pai in!” a cih ka za hi. 2 Ka en-a, ka mai-ah sakol kang khat a na om hi! A tunga tuangpa in thal khat tawi a, amah kumpi lukhu khat kipia in, gual zawh a sawm gualzopa bangin a kuan khia hi. 3 Tuuno in ciamtehna nihna a hon ciangin a nungta ganhing nihna in, “Hong pai in!” a cih uh ka za hi. 4 Tua ciangin meikuang banga san sakol khat hong pusuakkhia hi. A tunga tuangpa, leitung pan lemna lakkhiat theihna le mite khat le khat kithahsak theihna vang kipia hi. Amah namsau lianpi khat kipia hi. 5 Tuuno in ciamtehna a thumna a hon ciangin, a nungta ganhing a thumna in, “Hong pai in!” a cih ka za hi. Ka en a, ka mai-ah sakol vom khat a na om hi! A tunga tuangpa in, tawi tehna kop khat a khutah a tawi hi. 6 Tua ciangin a nungta ganhing lite lakah aw khat tawh a kibang khat in, “Ni khat thaman dingin mangbuh quart khat le ni khat thaman dingin mangbuh-ham quart thum hi; ahi zongin lenggahzu le sathau siasak kei in!” a cih ka za hi. 7 Tuuno in ciamtehna lina a hon ciangin a nungta ganhing a lina in, “Hong pai in!” a cih aw ka za hi. 8 Ka en a, ka mai-ah sakol daang khat a na om hi! A tunga tuangpa min Sihna kici hi-a, Gawtmun in a nung mahmah ah a zui hi. Amaute in leitung seh li suah seh khat, namsau, kialpi, pulpi le leitung gamsate-a a thah theih nadingin vang liatna kipia hi. 9 Amah in ciamtehna ngana a hon ciangin, Pasian thu hang le citaka teci a pannasate uh hanga kithatte khate biakna-tau nuai-ah ka mu hi. 10 Amaute in, “A siangtho le a thumaan Thuneipipen Topa aw, leitunga tengte thu na khen ding le kote sisan phu na lak ma bang tan sawt lai ding hiam?” ci-in nakpi in a kiko uh hi. 11 Tua ciangin amaute puantual pak khat ciat kipia-a, amaute in a naseppih a sanggamte uh a kithat lai dingte a kim masiah a na ngak lai zek dingun kigen hi. 12 Amah in ciamtehna a gukna a hon laitak ka en hi. Tua laitak, nakpitakin zin a ling hi. Ni, kelmul kigan ippi vom bangin vom a, khapi a bupin sisan bangin san hi. 13 Thei a gah nunungte huihkhauh in a mutpulh bangin vana aksite lei-ah a kia hi. 14 Laizial zial bangin vanpi kizial a, mualpi le tuikulh khempeuh a omna mun pan kikhinkhia uh hi. 15 Tua ciangin leitunga kumpite, kumpi tapate, galkap mangte, mihaute, thahatte, sila le sila lote khempeuh leihawm sung le mualtung suangpi lakah a bu uh hi. 16 Amaute in mualpi le suangpite kiangah, “Hong vuknelh unla, kumpi tokhom tunga tupa maitang pan le Tuuno thangpaihna panin hong sel un! 17 Bang hang hiam cih leh amaute thangpaihna ni thupi hong tung hi, kua in thuak zo ding hiam?” ci-in a sam uh hi.

Kilaanka 7

1 Hih teng khit ciangin lei kiu li-a ding vansawltak li ka mu a, amaute in leitung ahi zongin, tuipi tung ahi zongin, singkung khatpeuh tung ahi zongin a nung lo dingin leitung huih lite a lencip uh hi. 2 Tua ciangin a nungta Pasian ciamtehna a nei vansawltak adang khat nisuahna lam pan a paito ka mu hi. Amah in leitung le tuipi a suksiat theih nading vangliatna a kipiasa vansawltak lite tungah: 3 "Kote Pasian’ na a semte taltang tungah ciamtehna ka koih khit matengun, leitung ahi zongin, tuipi ahi zongin, singkungte ahi zongin susia kei un,” ci-in nakpi-in a kikokhia hi. 4 Tua ciangin a ciamtehsate a phazah ka za a Israel behte khempeuh panin 144,000 ahi hi. 5 Judah beh panin 12,000, Reuben beh panin 12,000, Gad beh panin 12,000, 6 Asher beh panin 12,000, Naphtali beh panin 12,000, Manasseh beh panin 12,000, 7 Simeon beh panin 12,000, Levi beh panin 12,000, Issachar beh panin 12,000, 8 Zebulun beh panin 12,000, Joseph beh panin 12,000, Benjamin beh panin 12,000, ciamtehsa ahi hi. 9 Hih teng khit ciangin ka en a, ka mai-ah kuama sim theih loh minam khempeuh pan, beh khempeuh pan, micih pan le pau khempeuh panin mihon tampitak, kumpi tokhom le Tuuno mai-ah a om uh hi. Amaute in puantual pak silh uh a, a khutuah nisuh hiangte a tawi uh hi. 10 Amaute nakpi in awng uh a, “Hotkhiatna, kumpi tokhom tunga tupa I Pasian le Tuuno pan ahi hi,” a ci uh hi. 11 Vansawltak khempeuh, kumpi tokhom le upate, a nungta ganhing lite kimkotah ding uh hi. Kumpi tokhom mai-ah kunsuk uh a, Pasian bia-in: 12 "Amen! I Pasian tungah phatna, minthanna, pilna, lungdamna, pahtawina, vangliatna le hatna a tawntungin om den ta hen. Amen!” a ci uh hi. 13 Tua ciangin upate khat in kei kiangah, “Hih puantual pak silhte kua hi-a, koi pana hong pai uh ahi hiam!” ci-in hong dong hi. 14 "Pu aw, nang na thei hi,” ci-in ka dawng hi. Tua ciangin amah in, “Hihte gimna lianpi pana hong pusuakkhiate ahi uh hi. Amaute in a puantualte uh Tuuno sisan ah sawpin a paksakte ahi uh hi. 15 Tua ahi manin, “Amaute Pasian kumpi tokhom mai-ah omin sun le zanin ama biakinnpi sungah ama na a sem uh hi; tua hi-a, kumpi tokhom tunga tupa in, amau tungah a puanbuk a zak ding hi. 16 Amaute gilkial kik ngei nawn lo ding uh a, a dangtak kik ngei nawn kei ding uh hi. Amaute nisa in sal kha nawn lo dinga, nisapi in zong a kangkha kei ding hi. 17 Ahang in, kumpi tokhom laizanga Tuuno, amaute cingpa hi ding hi; amah in amaute a nungta tuinakte ah paipih ding hi. Tua ciangin Pasian in amaute mit pan, khitui khempeuh a nulkeu ding hi,”hong ci hi.

Kilaanka 8

1 Amah in ciamtehna sagihna a hon laitakin nai lang sung ding khawng vantung a sip dide hi. 2 Tua ciangin Pasian mai-a ding van sawltak sagihte ka mu-a, amaute pengkul sagih kipia hi. 3 Gimnamtui halna kham kuang tawi vansawltak dang khat hong pai-in biakna-tau ah a ding hi. Misiangte khempeuh thungetna tawh kumpi tokhom mai-a kham biakna-tau tunga piak dingin gimnamtui tampitak kipia hi. 4 Vansawltak khut panin misiangte thungetna tawh gimnamtui khu Pasian mai-ah a tungto hi. 5 Tua ciangin vansawltak in gimnamtui kuang la a, biakna-tau pana mei-am tawh a dip khit ciangin leitung a denna suk leh khua phia zalzalin, kek kia-a van ging damdam in zin a ling hi. 6 Tua ciangin pengkul sagih tawi vansawltak sagihte pengkul mut dingin a kithawi uh hi. 7 Vansawltak a khatna in a pengkul mut a, sisan tawh kihel gial le mei hong omin leitung ah kibuasuk hi. Leitung seh thum suah seh khat kangtum a, sing kungte seh thum suah seh khat kang tumin lopa hing khempeuh a kangtum hi. 8 Vansawltak a nihna in a pengkul mut a, a nak liat mahmah a pumkuan zuaizuai mualpi bang khat tuipi sungah kilawnsuk hi. Tuipi seh thum suah seh khat sisan suak-a, 9 tuipi sunga a nungta ganhingte seh thum suah seh khat si-in, tembawpite seh thum suah seh khat a kisia hi. 10 Vansawltak a thumna in a pengkul mut a, meilah kuanglai tawh kibang aski lianpi khat van panin kiasuk-a, gunte, tuinakte, seh thum suah seh khat tungah a tu hi. 11 Tua aksi min Gamsaia ahi hi. Tuite seh thum suah seh khat tuikha suak-a, tua tuikhaa hangin mi tampi a si uh hi. 12 Vansawltak a lina in a pengkul mut a, ni seh thum suah seh khat, kha seh thum suah seh khat le aksi seh thum suah seh khat tuate seh thum suah seh khat a mial tek nadingin a satkhia hi. Sun seh thum suah seh khat le zan seh thum suah seh khat khua a vak kei hi. 13 Ka et laitakin vankimlai-a leng muvanlai khat in: “Adang vansawltak thumte mut ding pelkul gingte hangin: leitung a tengte tungah Gimna! Gimna! Gimna!” ci-a nakpi-a a ham ka za hi.

Kilaanka 9

1 Vansawltak a ngana in a pengkul mut-a, van pan leitung ah a kia aksi khat ka mu hi. Tua aksi Kawhawmpi vang honna tawhtang kipia hi. 2 Amah in Kawhawmpi a hon ciangin tua sung panin pummei phualpi khu bangin meikhu a suakkhia hi. Tua Kawhawmpi pana meikhu in ni le van a mialsak hi. 3 Tua ciangin meikhu lak panin kauphete leitung ah tuaksuk uh a, leitunga aikam vangliatna bang vangliatna amaute kipia hi. 4 Tuate tungah, leitunga lopate, ankung khatpeuh ahikeh singkung susia loin, a taltang tunga Pasian ciamtehna a nei lote bek a suksiat dingun kihilh hi. 5 Amaute in a thah nading uh vangliatna kipia lo-a, ahi hangin kha nga sung gawt thei bek ding uh hi. Tua a thuak uh gimna in, aikam in mi a deh cianga a nat bang ahi hi. 6 Tua hun laitakin mite in sihna zong ding uh a, ahi hangin a mu kei ding uh hi; amaute a si nuam ding uh a, ahi hangin sihna in amaute a pel ding hi. 7 Tua kauphete, galsim dinga kithawi sa sakolte tawh kibang hi. Amaute lutungah kham kumpi lukhu tawh kibang khu uh a, a maitang un mihing maitang a sun hi. 8 A sam uh numeite sam banga, a hate uh humpinelkai ha a bang hi. 9 Sik awmdal bang awmdal nei uh a, a kha ging uh, galsimna-a sakolleng tampi tai henhan ging a bang hi. 10 Mei nei uh a, aikam bangin a deh uh hi. A mei-uah mite kha nga sung a thuaksiatsak theih nading uh vangliatna a nei uh hi. 11 Amaute in Kawhawmpi vansawltak, kumpi-in a nei uh hi. Ama min Hebrew pau in Abaddon hi a, Greek pau in Apollyon ahi hi. 12 A masa pen gimna bei zo a, gimna adang nih tung lai ding hi. 13 Vansawltak a gukna in a pengkul mut a, Pasian mai-a kham biakna-tau kite panin awging khat ka za hi. 14 Tua in pengkul tawi vansawltak a gukna kiang ah, “Euphrates gunpi-a kihen vansawltak lite khahkhia un,” a ci hi. 15 Hih nai, hih ni, hih kha, hih kum lian adingin a kigingsa-a kikoih tua vansawltak lite, leitung mi seh thum suah seh khat a that dingin kikhahkhia hi. 16 Sakol tungtuang galkapte awn zanih a pha hi. Amaute a phazah ka za hi. 17 Ka mangmuhna-a ka muh sakolte le a tuangte hih bang ahi hi: A awmdalte uh meikung bangin a san, a ciipdum le kaat banga eng tawh ahi hi. Sakolte lutangte humpinelkai lutang tawh kibang a, a kam panun mei, meikhu le kaat a suakkhia hi. 18 Amaute kam pana suak khia mei, meikhu le kaat gimna nam thumte in, mihingte seh thum suah seh khat a thatlum hi. 19 Tua sakolte a kam sung uh le a mei uhah vangliatna a om hi; a meite uh gul bang, lutang nei-in tua tawh mi a liamsuah uh hi. 20 Hih pulpite in a thah baang a om lai leitung mite, a khut uh tawh a sep uh nate panin a kisik nai kei uh hi; amaute in dawite, kham, ngun, sumngo, sing le suang milimte – khua mu thei lo, khua za thei lo, lam pai thei lo milimte a biak uh a tawp tuan kei uh hi. 21 Amaute in tualthahnate, aisannate, numei-pasal paktatnate le a guktaknate uh zong a kisik tuan beek kei uh hi.

Kilaanka 10

1 Tua ciangin a thahat vansawltak dang khat vantung pan a kumsuk ka mu hi. Meiipi, puantualin silh-a, a lutung san ah sakhituihup khat a om hi; a maitang ni tawh kibanga, a khete meikuang khuampi a bang hi. 2 Amah in a khut sunga kizalsa laizial neu khat a tawi hi. A taklam khe-in tuipi tung sik-a, a veilam khe-in leitung a sik hi. 3 Humpi nelkai hawk bangin ngaihtakin a kiko hi. Amah a kiko ciangin kek kia ging sagihte in thu a gen uh hi. 4 Kek kia ging sagihte in thu a gen uh ciangin a gelh dingin ka kithawi hi; ahi hangin vantung panin aw khat in, “Kek kia ging sagihte thugen gelh kei inla imcip in,” hong cih ka za hi. 5 Tua ciangin ka muhsa tuipi tung le leitunga ding vansawltak in a taklam khut vantung lamah a lamto hi. 6 Amah a tawntung a nungta den pa, vantungte le a sunga omte khempeuh lei le a tunga omte khempeuh le tuipi le a sunga omte khempeuh a piangsakpa lo-in kiciam a, “A ziakai nawn kei ding hi! 7 Ahi hangin vansawltak a sagihna in a pengkul a mut kuan laitakin, ama nasemte ahi kamsangte tunga a zaksak bang tektek in, Pasian thuthukte a tungkim ta ding hi,” a ci hi. 8 Tua ciangin vantung pan a ka zak tua aw in khat vei hong genbeh lai a: “Pai inla, tuipi tung le leitung ading vansawltak khut sunga zalsa a om laizial la in,” hong ci hi. 9 Tua ciangin vansawltak kiangah pai-in tua laizial neu hong piak dingin ka ngen hi. Amah in, “La inla ne in. Na gilpi thuksak dinga, ahi hangin na kam ah khuaizu bangin a khum ding hi,” hong ci hi. 10 Vansawltak khut panin tua laizial neu la in ka ne hi. Ka kam sungah khuaizu khum bangin khuma, ahi hangin ka nek khit ciangin ka gilpi a thuksak hi. 11 Tua ciangin kei tungah, “Nang in mi tampite, minamte, pau tuamtuamte le kumpite tawh kisai, genkholhnate na gen kik pelmawh ding hi,” hong kici hi.

Kilaanka 11

1 Tehna ciang tawh kibang pumpeng khat kei hong kipia a, “Pai inla Pasian biakinnpi le biakna-tau tehin, tua lai-a om a biate sim in. 2 Ahi hangin a tual puanung pen Gentile-te tunga kipiasa ahi manin teh lohin nusia in. Amaute in tua khuapi siangtho kha 42 sung a tuancil ding uh hi. 3 Ka teci nihte vangliatna ka pia dinga, amaute in ippi puan silhin, ni 1,260 sung gen kholhna a gen ding uh hi,” ci-in hong kigen hi. 4 Hihte, leitung Topa mai-a a ding olive kung nihte le meivak tunna nihte ahi hi. 5 Mi khatpeuh in tuate natsak a sawm leh amaute kam panun meikuang pusuakkhia-in a galte uh valhtum hi. Hih in amaute a nasak nuam peuhpeuh sih pelmawh nading zia ahi hi. 6 Hih mite in amaute thugenkholh hun sung teng guah a zuk loh nadingin van khakcip theih nading vangliatna a nei uh hi. Tua banah amaute in tui sisan suaksak theihna le amaute deih hunhun-a pulpi tawh leitung a thuaksak theih nading uh vangliatna a nei uh hi. 7 Amaute in a teci panna uh a man khit uh ciangin Kawhawmpi pana hong paito gamsa in amaute do ding a, zo-in a that ding hi. 8 Amaute luang, a Topa uh zong a kilhlupna mun Sodom le Egypt ci-a tehpih a kinei khuapi lian sung, lam lian lai-ah a lum ding hi. 9 Ni thum le alang sung mite, beh, pau le minam khempeuh pana mite in tua misi luangte vuisak loin a enen ding uh hi. 10 Hih kamsang nihte in leitunga teng mite thuaksiasak ngei zo uh ahi manin leitung a teng mite kigual zosakin ai ding uh a, khat le khat letsong a kipia ding uh hi. 11 Ahi hangin ni thum le ni lang sungin amaute sungah Pasian tung pana nuntakna huu lutin, a khe un ding ding uh a, amaute lau mahmah ding uh hi. 12 Tua ciangin amaute in vantung panin, “Hih lai ah hong paito un,” a ci aw khat a za uh hi. A galte un amaute a et zuizui lai mah un meii kawm lakah a paito uh hi. 13 Tua laitak tektekin zin nakpi-in linga, khuapi seh sawm suah seh khat a kicim hi. Tua zinling ah mi tul sagih si-a, a nungta lai mite lau lua mahmah in van a Pasian a minthangsak uh hi. 14 Gimna a nihna bei khin zo-a, gimna thumna a tung pah ding hi. 15 Vansawltak a sagihna in a pengkul muta, vantung ah aw ngaih mahmah in: “Leitung gam teng i Topa gam le ama Khrist gam suak zo a, amah in a tawntung in uk den ding hi,”a ci hi. 16 Tua ciangin Pasian mai-a amau kumpi tokhoma tu upa sawmnih le lite in bokin bia uh a: 17 "A om densa, tu laitaka om, Thahatpen Topa Pasian aw, a lian mahmah na vangliatna na la zo a, gam uk dingin kipan khin na himanin nang tungah lungdamna kong puak uh hi. 18 Minamte heh uh a; Misite tunga thukhen ding hun le na nasem kamsangte, na min a zahtak na misiangte aneu alian - in pahtakman piak ding hun le leitung a susiate suksiat ding hun, hong tung zo hi,”a ci uh hi. 19 Tua ciangin vantunga Pasian biakinnpi kihong a, ama biakinnpi sungah ama thukhun singkuangpi kimu hi. Tua mun ah kek kia in khua phia zalzala, van ging damdam in zin linga, gialpi a kia hi.

Kilaanka 12

1 Vantungah a lian a lamdang limte kilang a: numei khat in ni silhin a khepek nuai-ah khapi sik-a, aksi sawm le nih lukhu in a nei hi. 2 Amah a gai hi-a, nau suak dektak bangin nasa-in a kiko hi. 3 Tua ciangin vantung ah lim lamdang khat kilang a: agol pha mahmah gulpi-sikhiam san khat in, lutang sagih nei-a, ki sawm nei-in, a lutungah kumpi lukhu sagih a khu hi. 4 A mei in aksite seh thum suah seh khat van pan vatkhia a, tuate lei ah a kia hi. A suak dektak numei mai-ah a suah pheta, a ta a nawmvalh theih pah nadingin gulpi-sikhiam a ding hi. 5 Numei in minam khempeuh sikciang tawh a uk ding tapa pasalno khat a nei hi. A ta kibawhpah in Pasian kianga kumpi tokhom ah kikoihto pah hi. 6 A numei pen Pasian in ama adinga a bawlsaksa gamlak ah ni 1,260 kikem dingin a tai hi. 7 Tua ciangin vantung ah gal kidona a om hi. Michael le a vansawltakte in tua gulpi-sikhiam do uh a, gulpi-sikhiam le a vansawltakte in a do thuk uh hi. 8 Ahi hangin a do zo dingin thakhauh lo ahi manin vantunga a mun uh a tan uh hi. 9 Gulpi-sikhiam kilawmsuk a – tua dawimangpa ahikeh Satan kici leitung buppi lampialsakpa tua tanglai gulpi ahi hi. Amah ama vansawltakte tawh lei-ah kilawnkhia suk hi. 10 Tua ciangin vantung ah aw ngaih taka kiko khat ka za a: “Tu-in eite Pasian hotkhiatna, a vangliatna, a gam le ama Khrist thuneihna hong tung zo hi. Ahang in, eite Pasian mai-ah sun le zanin i sanggamte ngawhin a mawhsakpa kilawnkhia zo hi. 11 Amaute in, Tuuno sisan hang le amaute teci panna thu hangin amah a zo uh hi; amaute in sihna thuak ngam zahin a nuntakna uh a it kei uh hi. 12 Tua ahi manin no vantungte le tuate sunga tengte khempeuh aw, nuam un! Ahi hangin leitung le tuipi aw, nang tungah dawimangpa hong tuaksuk zo ahi manin gimna nak thuak na nicia! Amah in ama hun a tom lam thei ahi manin, lungsona tawh kidim hi,”a ci hi. 13 Gulpi-sikhiam in amah leitung ah kilawnkhia ahilam a theih ciangin, tua tapa nei numei a delh hi. 14 Tua numei gulpi phak zawh lohna gam ah, hun khat, hunte le hun khat lang a kikep nadinga kibawlsa mun ah a len theih nadingin a lian mahmah muvanlai kha nihte kipia hi. 15 Tua ciangin gulpi in, tua numei pha-a tuizeupi taisak dingin a kam panin gun bangin tui a phitkhia hi. 16 Ahi hangin leitung in tua numei huh a, gulpi-sikhiam in a kam pana a phitkhiat gun, a kamka in a na valhtum hi. 17 Tua ciangin tua numei tungah gulpi-sikhiam thangpai a, Pasian thupiak mangin, Jesu teci panna a len a om lai tua numei tate sim dingin a kuankhia hi.

Kilaanka 13

1 Tua ciangin gulpi-sikhiam tuipi gei sehtak tungah a ding hi. Tua ciangin tuipi pana pusuakkhia gamsa khat ka mu hi. Amah in ki sawm, lutang sagih, a ki tungah kumpi lukhu sawm, a lutunga Pasian gendaina min a tuang ciat a nei hi. 2 Ka muh gamsa pen kamkei tawh kisun-a, ahi hangin a khepekte vompi aa tawh kibangin, a kam, humpinelkai kam a bang hi. Gulpi-sikhiam in ama vang liatna, a kumpi tokhom le a lian a thuneihna tua gamsa a pia hi. 3 Tua gamsate lutangte khat ah sihna khop zah liamma nei a, ahi hangin tua liamma a dam ta hi. Leitung bup in lamdang sa in tua gamsa a zui uh hi. 4 Gulpi-sikhiam in tua gamsa tungah thu-neihna pia ahi manin mite in gulpi-sikhiam a bia uh hi. Amaute in tua gamsa zong bia uh a, “Tua gamsa bang kua om hiam? Amah kua in langdo thei ding hiam?” a ci uh hi. 5 Tua gamsa tungah a kiphatsakna kam pau nading le gendai nading kam khat kipia-a, a thuneihna a zat hun ding kha sawmli le nih sung kipia hi. 6 Amah in Pasian gendai ding, a min, a tenna mun le vantung a tengte gendaina-in a kam a ka hi. 7 Amah in, misiangte doin a zawh nading vangliatna kipia hi. Ama tungah beh peuhmah, mite, paute le minamte tunga thuneihna kipia lai hi. 8 Leitung kipiansaka kipan a kigosa Tuuno nuntakna laibu sunga a min a kigelh lote khempeuh – leitunga a tengte khempeuh in tua gamsa bia ding uh hi. 9 Bil nei peuh in za ta hen. 10 Mi khatpeuh saltaang ding ahileh sal taang ding hi. Mi khatpeuh namsau a thah ding ahileh namsau in kithat ding hi. Hih in misiangte lungduai-a thuakna le muanhuaina a kal hi. 11 Tua ciangin lei pana pusuakkhia gamsa adang khat ka mu hi. Tua in tuuno bangin ki nih nei-a, ahi hangin gulpi-sikhiam bangin a pau hi. 12 Amah in a masa gamsa tangin ama thuneihna khempeuh zanga, leitung le a sunga tengte, tua sihna khopa liamma a nei a damsa gamsa masa pen a biasak hi. 13 Amah in alian a lamdang limte bawla, mi khempeuh muhin vantung pan lei-ah mei nangawn a kiasak hi. 14 Tua limte hangin a masa gamsa tangin vangliatna kipia-a, leitunga tengte a khem hi. Amah in amaute tungah namsau ma tawh liam napi-a, a nungta lai gamsa pahtawina milim khat a bawl ding uh thu a pia hi. 15 Tua a masa gamsa lim tungah huu kipia a, pau thei-in tua milim a bia nuam lote a thah theih nadingin ama tungah vang liatna kipia hi. 16 Amah in mi khempeuh, aneu alian, azawng ahau, sila le sila lote in a taklam khut ahikeh a taltang ah thatang hatthu-in ciamtehna a neisak hi. 17 Tua ciamtehna, gamsa min ahikeh a min nambat ahi ciamtehna a nei lote in lei thei loin, zuak thei lo ding uh hi. 18 Hih in pilna a kal hi. Tua in mihing nambat ahi manin, theihna a nei peuh in tua gamsa nambat tuat ta hen. Ama nambat 666 ahi hi.

Kilaanka 14

1 Tua ciangin ka et leh ka mai ah a taltang tung-ua ama min le a Pa min a kigelhsa 144,000-te tawh Zion Vum tunga ding Tuuno a na om hi. 2 Tua ciangin vantung pan a ngaih mahmah kekbaak kia ging le tuizeu hawk tawh a kibang aw khat ka za hi. Ka zak aw pen harp tumte tumging tawh kibang hi. 3 Amaute in kumpi tokhom mai le a nungta ganhing lite le upate mai-ah lathak khat a sa uh hi. Lei pana kitankhiasa tua 144,000-te longal kuamah in tua la a sin thei kei hi. 4 Hihte in amau le amau a sianga a kikep manun, amau le amau numei tawh a kibuahsak lote ahi uh hi. Amaute in Tuuno paina peuhpeuh ah a zui uh hi. Amaute, mite lak pana kileisa hi uh a, Pasian le Tuuno tungah gahmasa banga piakte ahi uh hi. 5 Amaute kam panin zuauthu kimu loin kawk baang lo uh hi. 6 Tua khit ciangin vansawltak dang khat van kimlai-a leng ka mu-a amah in, minam khempeuh, beh khempeuh, pau khempeuh le mi khempeuh tunga tangko ding, tawntung lungdamna-thu a nei hi. 7 Amah in, “Ama thukhen ding hun hong tung zo ahi manin Pasian kihta unla, amah minthanna pia ta un. Vantungte, leitung, tuipi le tuinakte a bawlpa amah bia un,” ci-in aw ngaihtakin a gen hi. 8 Vansawltak a nihna in a nung zui-a, “A angkawmnate, a haisakna leng gahzu minamte khempeuh a dawnsaknu puk ta! A Lian Babylon puk ta!” a ci hi. 9 Vansawltak a thumna in amaute nung zui-a, aw ngaihtakin, “Mi khatpeuh in gamsa le ama lim bia a, ama ciam tehna a taltang tung ahikeh a khut tungah a ngah leh 10 amah in zong Pasian thangpaihna hai sunga kisungsa a lungsona a khauh mahmah lenggahzu a dawn ding hi. Amah a siangtho van sawltakte le Tuuno mai-ah kaat kuang tawh kigawt ding hi. 11 Amaute kigawtna meikhu a tawntungin khu den hi. Tua lai-ah gamsa le a lim a biate, ahikeh ama min ciamtehna a ngah peuhmah asun azan tawlngak hun a om kei hi,” a ci hi. 12 Hih in Pasian thupiakte a mangte le Jesu tunga a muanhuai lai misiangte lungduai-a thuakna a kal hi. 13 Tua ciangin vantung panin aw, khat in, “Gelh in: Tu-a kipan Topa sunga site thupha ngah ahi hi,” a ci hi. Kha in, “Hihi, a sepnate un, amaute zui ding ahi manin, amau nasep gimna pan a tawlnga ta ding uh hi,” a cih ka za hi. 14 Ka et leh ka mai-ah meiipi kang khat na kaii-a, meiipi tunga tupa “mihing tapa banga” a lutung ah kham lukhu khat khu-in a khut ah phiaukawi hiam khat a tawi hi. 15 Tua ciangin biakinnpi sung pan vansawltak dang khat hong paikhia in, meiipi tunga tupa nakpi in sama, “Leitunga ante min khin ta ahi manin, an lak hun tung zo hi, na phiaukawi la inla at in,” a ci hi. 16 Tua ciangin tua meiipi tunga tupa in, a phiaukawi leitung ah van kawikawi a, leitung an laksa a suak hi. 17 Vantung a biakinnpi sung pan vansawltak adang khat hong paikhia a, amah in zong phiaukawi hiam khat mah a tawi hi. 18 Mei a uk vansawltak dang khat biakna-tau panin hong paikhia lai-a, phiaukawi hiam tawipa nakpi in sama, “Lenggahte min khin ahi manin na phiaukawi hiam la inla, leitung lenggah gui panin lenggah bawkte khawm in,” a ci hi. 19 Tua vansawltak in leitung ah phiaukawi van kawikawi-a, lenggahte khawmin Pasian thangpaihna lenggah suknapi sungah a lawn hi. 20 Amaute khuapi pua-a lenggah-sukna sungah kicil-a, tua lenggah-sukna pan sisan luangin stadia 1,600 gamla dong sakol kamkaih ciang banin a luangkhia hi.

Kilaanka 15

1 Vantung ah alian a piandang lim khat ka mu a: vansawltak sagih in a nunung gimna sagihte a tawi uh hi – a nunung ahi hi; bang hang hiam cih leh Pasian thangpaihna a kimna hi ta hi. 2 Limlang tuipi le mei kigawm tawh kibang khat le gamsa le ama min le ama min nambat tunga gualzote, tuipi kianga ding ka mu hi. Amaute in Pasian piak harpte tawi uh a, 3 Tuuno la le Pasian nasem Moses la sa in: “Thahatpen Topa Pasian, nangma nasepte lian in, piandang hi. Khanghunte kumpipa aw, na lampite thumaanin thutang hi. 4 Topa aw, kua’n nang hong kihta loin, na min thangsak lo ding hiam? Ahang in, nangmah bek na siangtho hi. Amaan nangma sepnate, kilaak khin zo ahi manin, minam khempeuh hong pai-in, na mai-ah hong bia ding uh hi,” a ci uh hi. 5 Hih teng khit ciangin ka et leh, vantungah teci panna biakbuk ahi, biakinnpi honsa in a om hi. 6 Vansawltak sagihte biakinnpi pua-ah gimna sagih tawh hong paikhia uh hi. Amaute in puansiang le a tang saihadial puan silh uh a, a awm uhah kham dialpek a baat uh hi. 7 Tua ciangin a nungta ganhing lite khat in, vansawltak sagihte tungah a tawntunga nungta den pa, Pasian thangpaihna tawh a dim kham kuangkum sagih a pia hi. 8 Tua ciangin Pasian minthanna le ama vangliatna pana meikhu, biakinnpi sung tengah dim a, gimna sagihte a kim khit matengin vansawltak sagihte tua biakinnpi ah khatbeek a lut thei kei uh hi.

Kilaanka 16

1 Tua ciangin biakinnpi pan vansawltak sagihte tungah, “Pai unla Pasian thangpaihna kuangkum sagihte leitung ah sung ta un,” a ci aw ngaih khat ka za hi. 2 A masa pen vansawltak pai-in leitang tungah a kuangkum sunga, gamsa ciamtehna a nei le ama lim a bia mite tungah a cikziathuai a na mahmah meimate a tung hi. 3 Vansawltak a nihna in tuipi tungah a kuangkum sunga, misite’ sisan tawh kibangin, tuipi sunga nuntakna a nei na khempeuh a si hi. 4 Vansawltak a thumna in, gunte le tuinakte tungah a kuangkum sunga, tuate sisan a suak hi. 5 Tua ciangin tuite a uk vansawltak in: “Nang, tu laitaka om, a om densa, a Siangtho Pa aw, hih banga thu khen na hi manin na thukhennate ah na thutang hi; 6 Ahang in, amaute in na misiangte le na kamsangte sisan luangsak zo uh a, amaute thuak dinga kilawm bangin amau dawn ding sisan na pia zo hi,” a ci hi. 7 Tuateh biakna-tau in na dawnga: “Hihi, a Thahatpen Topa Pasian aw, na thukhennate thumaanin thutang hi,” a cih ka za hi. 8 Vansawltak a lina in ni tungah a kuangkum sunga, mite mei tawh haldulh nading, ni tungah vangliatna kipia hi. 9 Amaute a sa mahmahin kihal-a, amaute in hih gimnate a uk Pasian min samsia uh a, ahi hangin kisik nuam loin amah a minthansak ding a nial uh hi. 10 Vansawltak a ngana in gamsa kumpi tokhom tungah a kuangkum sunga, ama gam teng khuamial in a tuamcip hi. Mite in na sa lua-in a leii uh cip tentan uh a, 11 a meimate uh na a sak manun vantunga Pasian a hamsiat uh hi; ahi hangin a hihnasate uh hangin a kisik nuam kei uh hi. 12 Vansawltak a gukna in, Euphrates gun lianpi tungah a kuangkum sung a, Nisuahna pana kumpite lampi sial dingin tua tui a kang hi. 13 Tua ciangin ukeng tawh a kibang kha gilo thum ka mu hi. Amaute, gulpi-sikhiam kam pan, gamsa kam pan le kamsang-zuau kam sung pana pusuakkhiate ahi uh hi. 14 Amaute, a lamdang limte a lak thei dawite kha hi uh a, leitung bupa kumpite kiangah pai-in, Thahatpen Pasian ni lian ni-a galdo dingin amaute a kaikhawm dinga kuan khia uh ahi hi. 15 "Ngai in, guta bangin kong pai hi! Amah guaktang le zumhuaitakin pholaka a om loh theih nadingin hak gige sa-in puansilh-a om pa thupha ngah ahi hi.” 16 Tua ciangin amaute in Hebrew pau a Armageddon a cihna munah kumpite a khawm uh hi. 17 Vansawltak a sagihna in huih lakah a kuangkum sunga, kumpi tokhom panin, aw ngaih mahmah khat in biakinnpi pualam ah, “Kizo ta hi!” a ci hi. 18 Tua ciangin tua munah kek kia in, khua phia zalzal a, van ging damdam in nakpi-in zin a ling hi. Tua zinling nasia lua mahmah a, leitung a mi a om nungsang tua banga zinling a om ngei nai kei hi. 19 Tua khuapi lian phel thumin kiphelkhap a, minamte khuapite a kicim hi. Pasian in a Lian Babylon phawk gige a, ama lungsona lenggahzu tawh a dim ama thangpaihna hai a pia hi. 20 Tuikulh peuhmah mangthang a mualpite a kimu zo nawn kei hi. 21 Van panin mite tungah a lian mahmah gialtangte, tang khat pound za khat bang a gik a kia hi. Tua ciangin tua gimna lauhuai lua mahmah ahi manin gial gimna hangin amaute in Pasian a samsia uh hi.

Kilaanka 17

1 Kuangkum sagih a tawi vansawltak sagihte laka khat hong pai-in ka kiangah, “Hong pai in, tui tampi tunga tu a lian numei kizuaknu gawtna kong lak ding hi. 2 Leitung kumpite in amah tawh angkawm uh a, leitunga tengte in ama angkawmna zu a kham uh hi,” hong ci hi. 3 Tua khit ciangin vansawltak in Kha-in kei gamlakah hong puamang hi. Tua lai-ah lu sagih le ki sawm nei a, gendaina minte in a pumtuam a dupsan gamsa tungah numei khat a tu ka mu hi. 4 Tua numei in adupsan le a-ausan puante silh-a kham, suang manpha, le kep manphate tawh kizemin a tee siasua hi. Tuanu in a kihhuai nate le a angkawmna nin tawh a kidim kham hai khat a khut sungah a tawi hi. 5 A taltang ah: THUTHUK ALIAN BABYLON NUMEI KIZUAKTE LE LEITUNG KIHHUAINATE' NU ci-in a min kigelh hi. 6 Tua numei in, misiangte le Jesu thu teci a pang mite sisan khamgawp-a om ka mu hi. Tuanu ka muh ciangin lamdang ka sa lua mahmah hi. 7 Tua ciangin tua vansawltak in ka kiangah, “Bang dinga lamdang sa lua na hiam? Tua numei le lu sagih le ki sawm a nei ama tuanna gamsa, a thuthuk kong hilhcian ding hi. 8 Khat vei lai-a na muhsa tua gamsa, tu-in a om nawn kei hi. Kawhawmpi sung pan hong pusuakkhia-in ama kisiatna ah a pai ding hi. Lei kipiansak cila kipan, nuntakna laibu sunga a min kigelh nai lo leitunga teng mi khempeuh in, tua gamsa a muh uh ciangin, khat vei a om khin, tu-in om nawn lo napi hong pai ding ahi manin lamdang a sa mahmah ding uh hi. 9 "Hih thu in lungsim pilna a kal hi. Lutang sagihte in numeinu tutna mual sagihte ahi hi. Amaute kumpi sagihte zong ahi uh hi. 10 Nga puk zo a, khat a om laitak hi-in, adang khat a om nai kei hi; ahi hangin hong pai ciangin tawm vei sung bek a om ding hi. 11 Khat vei a omsa tu-a om lo gamsa pen, kumpi a giatna ahi hi. Amah tua sagihte aa ahi manin a kisia ding hi. 12 "Na muh ki sawmte, kumpi gam a ngah nai lo kumpi sawmte hi-a, ahi hangin amaute tua gamsa tawh nai khat sung kumpi banga thuneihna a ngah dingte ahi uh hi. 13 Amaute in ngimnasa khat nei uh a, a vangliatna uh le a thuneihnate uh gamsa tungah a pia ding uh hi. 14 Amaute in Tuuno va do ding uh hi, ahi hangin kumpite’ Kumpipa le tote’ Topa tua Tuuno in amaute zo dinga, a sapsa a teelsa le a muanhuai ama nungzuite tawh a omkhawm ding uh hi,” hong ci hi. 15 Tua ciangin vansawltak in, “Tua na muh numei kizuaknu tutna tui pen, mite, mihonpite, minamte le kampaute ahi hi. 16 Tua na muh gamsa le ki sawmte in tua numei kizuaknu a mudah ding uh hi. Amaute in tuanu a siatsak khit uh ciangin, a guaktangin nusia ding uh a, a sa ne in mei-in a hal ding uh hi. 17 Ahang in, Pasian kammalte a tangtun masiah amaute vangliatna tua gamsa tungah a uk dingin a piak ding uh thukimna tawh Pasian in ama ngimna a zawhsiang nading amau lungtang sungah koih khin zo hi. 18 Tua na muh numei in leitunga kumpite a uk khuapi lian ahi hi,” ci-in hong gen hi.

Kilaanka 18

1 Hih teng khit ciangin vansawltak adang khat, vantung pan hong paisuk ka mu hi. Amah in thuneihna lianpi nei-a, a thupina in leitung a tangsak hi. 2 Amah in nakpi takin: “Puk ta! A Lian Babylon puk ta! Tuanu dawite kua suaka, kha gilote le a nin, a huathuai vasate zualna mun, suak zo hi. 3 Ahang in, minamte khempeuh in a angkawmnate-a mi a haisak zu dawnin kham ta uh hi. Leitung kumpite in amah tawh angkawm uh a, leitung sumbawlte in ama noptatluatna a hauhlawh uh hi,”a ci hi. 4 Tua ciangin vantung panin aw dang khat in: “Ka mite aw, ama mawhnate ah na kihel khak loh nadingun, ama gimnate na thuak khak loh nadingun tuanu sung pan hong paikhia un; 5 ahang in, a mawhnate, van banin kicianga, Pasian in a gamtat khialhnate ciamteh zo hi, 6 Ama piaksa bangin amah pia kik un; ama hihsa zah nih amah pia kik un. Ama hai pan mah in a zah nih leihbeh un. 7 Noptatna le minthanna amah le amah a kipiak zahzah, gawtna le dahna amah pia un. A lungtang ah amah kisathei a, ‘Kumpinu-in ka tu hi; meigong ka hi kei a, ka thum ngei kei ding hi,’ ci hi. 8 Tua ahi manin ni khat sungin ama gimnate ahi: sihna, thumna le kialpi-te in tuanu a khuplet ding hi. Ama tunga thukhen Topa Pasian thahat ahi manin tuanu, mei-ah kikhultum ding hi. 9 "Amah tawh angkawm-a, ama nop tatna a zangkhawm leitung kumpite in tuanu kihalna meikhu a muh uh ciangin amah kah in a thum ding uh hi. 10 Ama thuaksiatna kihta in a gamlapi ah ding ding uh a: “‘Gimna! Gimna! O khuapi lian, O vangliatna khuapi Babylon! Nai khat sungin na siatna hong tung veh!’ci-in kap ding uh hi. 11 "Leitung sumbawlte kapin a thum ding uh hi. Bang hang hiam cih leh amau sumbuk van: 12 kham, ngun, suang manpha le kep manphate; saihadial hoih, a-ausan, nai le a dupsan puante, sing namtui namkim le saiha tawh kibawl na namkim, sing manpha, sumngo, sik le suangngo; 13 sumbuk van, singzungthak, masala, gim namtui paknamtui kha le sathau namtui, lenggahzu le olive thau, annel limci le mangbuh; ganhon le tuuhon; sakolte le lengte le mihingte pumpite le khate, kuamah in a lei nawn kei hi. 14 "Amaute in, ‘Na lunggulh mahmah gah in nang hong nusia ta hi. Na hauhna le na thupina khempeuh in mual khum-a, a kimu kik nawn kei ding hi,’ ci ding uh hi. 15 Tuanu tungah hih nate zuaka, a hauhna uh a ngah sumbawlte, ama thuaksiatna kihta in a gamla pekah a ding ding uh hi. Amaute thumin kap ding uh a: 16 "‘Gimna! Gimna, O khuapi lian, saihadial hoih, a-ausan le adupsan tawh kizem a, kham, suang manpha le kep manpha tawh a tee siasua! 17 Nai khat sungin tua bang hauhna lianpi kisia tazen maw!’ ci-in a kapkhia ding uh hi. “Tembaw ukte khempeuh, tembaw-a khualzinte khempeuh, tembaw nasemte le tuipi pana kivak nading a zongte khempeuh a gamlapi pekah a ding ding uh hi. 18 Tuanu a katna meikhu a muh uh ciangin amaute in, ‘Hih khuapi lian bang, khuapi om ngei hiam?’ cikhia ding uh hi. 19 Amaute in a lutung uhah leivui lawn ding uh a, thumin kapin: “‘Gimna! Gimna, O khuapi lian, tuipi tunga tembaw nei khempeuh in a hauh lawh! Tuanu hauhna nai khat sungin kisia zo tah! 20 Vantung aw, ama hangin nuam in! Misiangte, sawltakpite le kamsangte aw, nuam un! Amah in note hong bawlsiatna hangin Pasian in ama tungah thu khen zo hi,’ ci ding uh hi,” a ci hi. 21 Tua ciangin a thahat vansawltak khat in an gawina suang lian cia a pha suangmai khat tawma tuipi sungah lawn in: “Babylon khuapi lian hih bangin ngong bawlin kisusia dinga, a kimu kik nawn kei ding hi. 22 Harp tumte le lasiamte, tamngai mutte le pengkul mutte awging nang sungah kiza kik ngei nawn lo ding hi. Nang sungah khutsiam kuamah kimu kik ngei nawn lo ding hi. Nang sungah angawina suang ging a kiza kik ngei nawn kei ding hi. 23 Nang sungah meivak khat zong kivak kik ngei nawn lo ding hi. Nang sungah mopipa le mo aw kiza kik ngei nawn lo ding hi. Na sumbawlte, leitung miliante vive ahi hi. Nang bumna in leitung minam khempeuh lam pialsak khin hi 24 Ama sungah kamsangte, misiangte le leitang tunga kithatsate khempeuh sisan kimu zo hi,” a ci hi.

Kilaanka 19

1 Hih teng khit ciangin vantungah mihon tampi awng tawh kibang aw khat in: “Hallelujah! Hotkhiatna, minthanna le vangliatna eite Pasian aa ahi hi, 2 ahang in, a thukhenna thumaanin thutang hi. Amah in angkawmna tawh leitung a siasak numei kizuaknu, mawhpaih zo hi. Ama nasemte sisan phu tuanu tungah la zo hi,” ci-in a kiko hi. 3 Tua khit teh: “Hallelujah! Tuanu kangkhu a tawntungin a khuto den hi,” ci-in a awng kik leuleu uh hi. 4 Tua upa sawmnih le lite le a nungta ganhing lite in bokin tokhom tunga tu Pasian a bia uh hi. Amaute in: “Amen, Hallelujah!” ci-in a awng uh hi. 5 Tua ciangin kumpi tokhom pan: “No ama nasem khempeuh, no amah a kihtate aw, aneu alian in, i Pasian phat un!” ci-in aw khat hong ging hi. 6 Tua khit ciangin mihonpite in, tuizeu ging le angaih mahmah kek kia ging tawh kibangin: “Hallelujah! A Thahatpen i Topa Pasian in uk ta hi. 7 Eite nuamin, lungdamin, ama min thangsak ni! Ahang in, Tuuno mopi hun tung zo a, a lawmnu kigingsa-in om zo hi. 8 Ama silh dingin saihadial puan hoih asiang apak mahmah kipia hi,”ci-in a awng uh hi. (Saihadial puan hoih pen a thumaan misiangte gamtatna tang ahi hi.) 9 Tua ciangin vansawltak in kei kiang ah, “Gelh in: ‘Tuuno mopawi sim dinga kisamte thupha ngah ahi hi!’ hong ci a, “Hihte amaan Pasian kammalte ahi hi,” hong cih beh lai hi. 10 Hih thu ah amah bia dingin a khe phungah ka bok hi. Ahi hangin amah in, “Hih kei in! Kei zong Jesu ading teci a pang, nang le na sanggamte tawh nasem khawm khat mah ka hi hi. Pasian bia in! Ahang in, Jesu teci panna in kamsanna kha ahi hi,” hong ci hi. 11 Van kihonga om ka mu-a, ka mai-ah sakol kang khat a na om hi. A tunga tuangpa, Muanhuai le Thumaan kici hi. Amah in thutangin thukhena gal a do hi. 12 Ama mitte meikuanglai tawh kibanga, a lutung ah kumpi lukhu tampi a khu hi. Tuate tungah kuama theihpih theih loh amah bek in a theih min kigelh hi. 13 Sisan sunga kidiahsa puantual khatin kizem a, ama min, Pasian Thu ahi hi. 14 Vantung galkapte sakol kang tungah tuangin, asiang apak mahmah saihadial puan hoih silh uh a, amah a zui kawikawi uh hi. 15 A kam panin minamte sattuk nading namsau hiam khat hong dawkkhia hi. “Amah in amaute sikciang tawh a uk ding hi.” Amah in a Thahatpa Pasian thangpai-a, a lungsona lenggah sukna a tuancil hi. 16 Ama puantual tung le a phei tungah: KUMPITE’ KUMPIPA, TOTE’ TOPA ci-in hih min kigelh hi. 17 Tua ciangin ni sunga ding van sawltak khat ka mu hi. Vankimlai-a leng vasa khempeuh kiangah amah ngaihtakin kiko a “Hong pai un, Pasian nitak-an thupi ne dingin hong kikhawm un. 18 Note in kumpite, galkap mangpite, mi thahatte, sakol le a tunga tuangte, le sila le sila lote, aneu alian, mi khempeuh sa na ne thei ding uh hi,” a ci hi. 19 Tua ciangin tua sakol tunga tuang pa le a galkapte do dingin tua gamsa le leitung kumpite le a galkap honte uh hong kikaikhawm ka mu hi. 20 Ahi hangin tua gamsa kiman ta a, amah tawh ama tunga lim lamdang a bawl zuau kam sangpa kiman hi. Amah in hih limte tawh gamsa ciamtehna ngahsate le a lim a biate a khem hi. Amaute lakah tua nihte a hingtangin a kihtakhuai kaat kuanglai lipi sungah kipai hi. 21 A om lai teng, sakol tunga tuang pa kam pana pusuakkhia namsau tawh kithat a, vasa khempeuh in amaute sa a ne phiauphiau uh hi.

Kilaanka 20

1 Tua ciangin vansawltak khat vantung pana hong paikhiasuk ka mu a, amah in Kawhawmpi honna tawhtang nei-in, a khut ah sikkhainiang lianpi khat a tawi hi. 2 Amah in tua tanglai gulpi, Satan ahikeh dawimangpa, gulpi-sikhiam mana, kum tulkhat sung a khih hi. 3 Amah in Kawhawmpi sungah lawn a, minamte a khem nawn loh nadingin kum tulkhat a bei mateng, tawh kalh khuma, a tungah seal in a ciamteh hi. Tua hun khit ciangin amah tomkha sung a kikhahkhia pelmawh ding hi. 4 Thukhen za a kipiasate tutna, kumpi tokhomte ka mu hi. Tua ciangin Jesu adinga teci pangte le Pasian thu teci a panna uh hanga a ngawng uh a kitante kha ka mu hi. Amaute in gamsa ahikeh a lim bia loin ama ciamtehna a tal tung ahikeh a khut tunguah a ngah kei uh hi. Amaute nungta uh a, Khrist tawh kum tulkhat sung a uk uh hi. 5 (Kum tulkhat a bei mateng a om lai mi sisate a nungta nai kei hi.) Hih in a masa thawhkikna ahi hi. 6 A masa thawhkikna sunga kihelte a siangtho le thupha ngahte ahi uh hi. Amaute tungah sihna nihna in vangliatna a nei nawn kei hi. Ahi hangin amaute, Pasian le Khrist siampite hi ding uh a, kum tulkhat sung amah tawh a uk khawm ding uh hi. 7 Kum tulkhat a bei khit ciangin, Satan a thongkiatna pan kikhahkhia-in, 8 leitung kiuli-a minamte khem dingin kuankhia dinga Gog le Magog kidona adingin amaute a kaikhawm ding hi. Amaute tuipi gei-a sehnel zah pha uh hi. 9 Amaute leitung maitang dimin pai uh a, Pasian mite giahphual, a it a khuapi a umcih uh hi. Ahi hangin van panin meikuang hong tuaksuk a, amaute kangtummang hi. 10 Amaute a khem tua dawimangpa gamsa le kamsang zuaute a kipaihna kaat kuang lipi sungah a kilawn hi. Amaute sun le zanin a tawntung gawtna kithuaksak den ding hi. 11 Tua ciangin alian akang kumpi tokhom le a tunga tupa ka mu hi. Ama mai-ah van le lei om nading mun om lo ahi manin a taimang hi. 12 Tua ciangin misite, aneu alianin kumpi tokhom mai-a ding le laibute kilem ka mu hi. Nuntakna laibu ahi laibu dang khat a kilem hi. Misite tungah a hihsate uh laibute sunga kigelhsa tawh kizui-in thu kikhen hi. 13 Tuipi in a sunga om misite puakkhia a, sihna le Gawtmun in amau sunga om misite puakkhia-in, mi khempeuh amau nasepna tawh kizui-in thu kikhen ciat hi. 14 Tua ciangin meili sungah sihna le Gawtmun kipai hi. Tua meili sihna nihna ahi hi. 15 Nuntakna laibu sunga a min kigelh lo peuhmah meili sungah kipai hi.

Kilaanka 21

1 Tua ciangin a masa van le a masa lei mangthang a, tuipi lah om nawn lo ahi manin van thak le lei thak ka mu hi. 2 Pasian kiang vantung panin Jerusalem thak, Khuapi Siangtho, a pasal kianga mothak ding, kilawm taka kizem mo bangin hong paisuk ka mu hi. 3 Kumpi tokhom panin aw ngaih mahmah khat ka za a, “Tu-in Pasian tenna mite tawh om khawm ta dinga, amah amaute tawh a teng khawm ding hi. Amaute ama mi hi ding uh a, Pasian mahmah amau tawh om khawmin, amaute Pasian hi ding hi. 4 Amah in amaute mit-a khitui khempeuh a nulsak ding hi. Alui nate paizia mangthang zo ahi manin tua lai-ah natna, sihna, thumna, kahnate a om nawn kei ding hi,” a ci hi. 5 Kumpi tokhom tunga tupa in, “Na khempeuh athakin ka bawl hi!” a ci hi. Tua ciangin amah in, “Hih thute muan takin thumaan ahi manin gelh in,” hong ci hi. 6 Amah in kei kiangah, “Kizo ta hi! Keimah Alpha le Omega, a Patna le a Tawpna ka hi hi. A dangtak mi tungah man nei loin nuntakna tuinak panin tui ka pia ding hi. 7 A gualzo mi in hihte khempeuh luahin, ama Pasian ka hi dinga, amah ka tapa ahi ding hi. 8 Ahi hangin a meidawite, a umlote, a tatsiate, tualthatte, numei le pasal paktatte, mi bumte, milim biate le zuauphuakte khempeuh – amaute mun ding, kaat kuang meilipi sung hi ding hi. Hih pen sihna nihna ahi hi,” hong ci hi. 9 A nunung gimna sagihte tawh ki dim kuangkum sagihte a tawi vansawltak sagihte lakah khat ka kiangah hong pai-a, “Hong pai in, Tuuno zi ahi, mo, kong lak ding hi,” hong ci hi. 10 Amah in Kha-in hong puamangin alian asang mualtungah hong tuna, Pasian kiang vantung pan hong paisuk, Khuapi Siangtho, Jerusalem hong lak hi. 11 Pasian minthanna in tua khuapi tana, a tanphatna, a manpha mahmah suang le jaspar tawh kibangin crystal bangin a siang hi. 12 Kulh lianpi sangpitak nei a, kongpi sawm le nih nei in, a kongpite ah vansawltak sawm le nih mah a om hi. A kongpite tungah, Israel beh sawm le nihte min kigelh hi. 13 Nisuahna lamah kongpi thum, leilu lamah thum, leitaw lamah thum le nitumna lamah thum a om hi. 14 Khuapi kulh in bulkip sawm le nih nei-a, tuate tungah Tuuno sawltakpi sawm le nihte’ min a tuang hi. 15 Kei hong hopih vansawltak in tua khuapi, a kongpite le a kulhte teh nading kham kibawl tehna ciang khat a tawi hi. 16 Tua khuapi pen kiu li nei, adung avai kikima kilam ahi hi. Amah in tua ciang tawh khuapi teh a, adung, avai le a sanna stadia 12,000 a pha kim hi. 17 Amah in a kulh teh a, tua vansawltak in, mihing tehna banga a teh hi-a, tong 144 a sah hi. 18 A kulh jaspar kiciang hi-a, a khuapi limlang siang tawh kibang kham citak ahi hi. 19 Khuapi kulh bulkipte, suang man pha namkim tawh kizem hi. A khatna bulkip jaspar hi-a a nihna saphire, a thumna chalcedony, a lina emerald, 20 a ngana sardonyx, a gukna carnelian, a sagihna chrysolite, a giatna beryal, a kuana topaz, a sawmna chrysophrace, a sawm le khatna Jacinth, le a sawm le nihna amethyst ahi hi. 21 Kongpi sawm le nihte kep manpha sawm le nih hi-a, kongpi khat kep manpha khata kibawl ahi hi. Tua khuapi kongzingpite kham citak hi-a, limlang paisuak a bang hi. 22 Khuapi sungah biakinnpi ka mu kei hi. Bang hang hiam cih leh Thahat pen Topa Pasian le Tuuno, a khuapi biakinnpi ahi hi. 23 Pasian minthanna in tua khuapi taana, a meivak Tuuno ahi manin ni ahi a, khapi ahi zongin a taan ding kisam lo hi. 24 Minamte, tua khuavak ah lam pai ding uh a, leitung kumpite in a thupinate uh a sungah a puak ding uh hi. 25 Tua lai-ah zan hun om ngei nawn lo ding ahi manin a kongpite kikhak ni a om ngei kei ding hi. 26 Minamte minthanna le pahtawinate a sungah kipuak ding hi. 27 Tua sungah a siang lo bangmah lut thei lo dinga, a zumhuai, zuauphuakte khatpeuh zong a lut ngei kei ding hi; ahi hangin Tuuno nuntakna laibu sunga min kigelhsate bek a lut thei ding hi.

Kilaanka 22

1 Tua ciangin vansawltak in nuntakna guntui hong laka, crystal bangin cim sitset a, Pasian le Tuuno tokhom pan luangkhia-in, 2 khuapi kongzing lian laizangah a luangsuk hi. Tua gunpang tuakah nuntakna singkung po-in, kha simin gah a, kum khatin sawm le nih vei a gah hi. Tua singkung a tehte minamte damsak nading ahi hi. 3 Kihamsiatna a om nawn kei ding hi. Tua khuapi sungah Pasian le Tuuno tokhom om dinga, a nasemte in ama na a sem ding uh hi. 4 Amaute in ama maitang mu ding uh a, amaute taltangah ama min a tuang ding hi. 5 Tua mun ah zan a om nawn kei ding hi. Topa Pasian vang in amaute taan ding ahi manin meivak tang le ni tang a kisam nawn kei ding hi. Amaute in a tawntung in uk den ding uh hi. 6 Tua vansawltak in, “Hih thute muan takin thutak ahi hi. Topa kamsangte khate’ Pasian in a pel lo-a, hong tungpah ding nate a nasemte a lak dingin ama vansawltak hong sawl ahi hi,” hong ci hi. 7 "Ngai in, kong paipah ding hi! Hih laibu sunga genkholhna thute a kem cingte thupha ngah ahi hi.” 8 Keimah Johan in hih nate mu-a, a za pa ka hi hi. Hihte mu-a ka zak khit ciangin hih thute hong lak vansawltak khe phungah a bia dingin ka boksuk hi. 9 Ahi hangin amah in kei kiangah, “Hih kei in! Kei zong nang le na sanggam kamsangte le hih laibu sunga thute a kemcingte khempeuh tawh nasem khawm khat mah ka hi hi. Pasian bia in!” hong ci hi. 10 Tua ciangin ka kiangah “Ahun nai ta ahi manin hih laibu-a genkholhna thute bilhcip kei in, 11 mawh bawlte in bawl lailai henla, a tatsiate tatsia lailai uh hen la, amaana gamtate gamta lailai hen; a siangthote siangtho lailai ta hen,” ci-in hong gen hi. 12 "Ngai in, kong pai pah ding hi! Ka pahtakman ka kiangah om hi; mi khempeuh tungah ama hihsa tawh kizui-in ka pia ding hi. 13 Keimah, Alpha le Omega, a Masapen le a Nunungpen, a Patna le a Tawpna ka hi hi. 14 "Nuntakna singkung neih theih nading le kongpite tawna khuapi sunga lut nading thu neih theih nadinga a puantual uh a sawpsiangte thupha ngah ahi uh hi. 15 A pualam ah ahileh, uite, dawi-ai tawite, numei le pasal paktatte, tualthatte, milim biate, le zuauphuah nuamsa-a, zuauthu gente peuhmah a om ding uh hi. 16 "Keimah Jesu in, pawlpite ading in hih teci panna nang tunga gen dingin ka vansawltak kong sawl zo hi. Kei in David Zungpi le ama Suan le a tangpha Zingsol ka hi hi.” 17 Tua Kha le tua mo in, “Hong pai in!” ci uh hi. A za peuh in, “Hong pai in!” ci ta hen. A dangtak peuhmah hong pai ta hen. A ut peuhmah in letsonga kipia nuntakna tui sang ta hen. 18 Hih laibu sunga genkholhna thute a za peuhmah ka vauhilh hi: Mi khatpeuh in tuate banah bang khatpeuh a behlap leh Pasian in ama tungah hih laibu sunga kigentel gimnate a behlap ding hi. 19 Mi khatpeuh in hih genkholhna laibu sung pana thute a paihkhiat leh Pasian in ama tung panin hih laibu sunga kigentel nuntakna singkung pan le khuapi siangtho pana a tanh ding a lakkhiatsak ding hi. 20 Hih nate teci a pangpa in, “Hihi, kong paipah ding hi,” a ci hi. Amen. Topa Jesu aw, hong pai ta in. 21 Topa Jesu hehpihna Pasian mite tawh omkhawm ta hen. Amen.