Nuntakna Kammal
1 A kipat ciilin, Kammal na om khol zo hi; tua Kammal in Pathian taw om a, tua Kammal in Pathian ma ahi hi. 2 A kipat ciil lai mama panin Kammal in Pathian taw a om sa ahi hi. 3 Ama tungtawn in Pathian in na theampo piangsak hi; a kibitphua theampo ama ngawl taw a kipiangsak na khat beak a om bua hi. 4 Tua Kammal in nuntakna ii naak ahi hi. Tuaciang hi nuntakna in mihing a minpiang atu in khuavak hong puak hi. 5 Khuavak in khuazing sungah taang a, khuazing in sumit zo ngei ngawl hi. 6 Pathian in John min nei ama kamtaipa hong paisak a, 7 mihing theampo in za a, a up natu in, tua khuavak thu mihingte tungah a son tu hong pai ahi hi. 8 Ama tatak ahile khuavak hi ngawl hi; khuavak ii thu son tu in hong pai ahi hi. 9 Hi khuavak in khuavak tatak hi a — leitung ah hong pai in mihing sim tungah a taang hi. 10 Kammal in leitung ah om a, Pathian in leitung sia ama tungtawn in piangsak hi napi, leitung in ama a he bua hi. 11 Ama in ama ii ngamsung ma a hong pai ahihang a mite in ama a saang bua uh hi. 12 Ahizong pawlkhat in ama saangin um uh hi; tua ahikom ama in tuate tungah Pathian tate sua thei natu thu pia hi. 13 Amate leitung pianziate taw Pathian tate a suak hi ngawl hi, cinopna in, pa khat ii hin tate bangin a piang ahi bua hi; Pathian mama sia amate ii Pa ahi hi. 14 Kammal in mihing hong suak a, thuthiamna le thumaan thutak taw kidimin, ei sungah hong teang hi. Eite in ama vaangletna, Pa ii Tapa khat bek a hina taw a saan vaangletna ih mu zo hi. 15 John in ama huvau son hi. Ama in, “Hisia pa sia a thu ka sason pa hi a, ‘Kei nung pan hong pai hi, ahihang kei sangin lianzaw hi, banghangziam cile kei ii pian maa in ama om zo hi,’ ka ci sia ahi hi,” ci in au hi. 16 A kidim a om, ama thuthiamna sung panin, ei theampo thupha hong pia zo a, khat zawkciang khat hong piak ahi hi. 17 Pathian in Moses tungtawn in Thukham pia hi. Ahihang thuthiamna le thumaan thutak sia Jesus Christ tungtawn in hong pai hi. 18 Kuama in Pathian mu ngei ngawl hi. Pa kungah a om, Pathian ma ahi, Tapa khat bek in Pathian hong hesak hi.
Tuiphumpa John ii Thupuak
19 Jerusalem khua a om Jew thuneite in John kungah thiampite le Levite pawlkhat paisak a, “Nang akua ni ziam?” ci in donghsak uh hi. 20 John in a zo thada bua a, phualseal ngawlin hi bangin thiangson hi. “Kei Messiah hi ngawl khi hi,” ci hi. 21 “Tua ahile akua ni ziam? Elijah ni ziam?” ci in dongh uh hi. “Hi ngawl khi hi,” ci in John in zo hi. “Kamsangpa ni ziam?” ci in dongh uh hi. “Hi ngawl khi hi,” ci in ama in zokik hi. 22 “Tua ahile a kua ni ziam hong son tan” ci uh hi. “Ko hong sawlte munah thu ka puak kik uh kul hi. Nangma le nangma bang kici ni ziam?” ci uh hi. 23 Isaiah kamsangpa ii sonna teng doppha in, John in hi bangin zo hi: “Kei sia ‘Senneal ngam sungah a au khat ii aw ka hi hi: Topa ii khualhaw natu lampi tangsak vun!’ ” 24 Phariseete ii kamtaite in, 25 John munah, “Nang Messiah le hi ngawl, Elijah le hi ngawl, Kamsangpa le hi ngawl na hile, banghangin tuiphum ni ziam,” ci in dongh uh hi. 26 “Kei in tui taw tui kong phum hi, ahihang no sungah na heak ngawl uh khat om hi. 27 Ama kei nung panin hong pai ahihang ama peangdap suut tu zong ka kilawm bua hi,” ci in John in zo hi. 28 Hi thu theampo sia John ii tui a phumna Jordan Ngun ii nisuana sangah a om Bethany khua ah piang hi.
Pathian Tuuno
29 A zing ciangin John in ama kungah hong pai Jesus a mu ciangin, “Leitung buppi mawna a lakhia Pathian Tuuno, zialai ah om hi! 30 ‘Mihing khat kei nung panin hong pai tu a, ama in kei pian maa in om khol zo ahikom, kei sangin ama lianzaw hi,’ ci in ka sason sia pa ahi hi. 31 Ama sia akua hi tu ziam, ci in ka he bua hi, ahihang Israel mite ii ama a heak natu in kei sia tui taw tuiphum tu in kong pai hi,” ci hi. 32 Tuaciang in John in hi bangin tetti pang hi: “Thaa sia vantung panin ngam vakhu bangin hong tuaksuk a, ama tungah hong tu ka mu hi. 33 Ama ahi hunlam telcian tatak ngawlin ka om lai hi, ahihang tui taw tuiphum a hong sawl Pathian in, ‘Thaa sia hong paisuk in mihing khat ii tungah, hong tuaksuk na mu tu hi; ama sia Thaa Thiangtho taw hong baptize tu pa hi,’ ci in hong son zo hi. 34 Tuasia mu zo khi hi, tuaciangin ama sia Pathian Tapa hi ci in hong son khi hi,” John in ci hi.
Jesus ii Nungzui Phitbel teng
35 A zing ciangin John tua munah ama nungzuite nii taw a dinkhop kik laitak in, 36 Jesus hong pai mu hi. “Zia sia in Pathian Tuuno hi!” ci hi. 37 Nungzuite nii in tu a bangin a son za uh a, tuaciangin Jesus taw ton uh hi. 38 Jesus kiheak a, amate in a nung a zui a mu ciang, “Bang zong nu ziam?” ci in dongh hi. Amate in, “Koisung a teang ni ziam, Rabbi awng,” ("Syapa" a ci nopna) ci in dongh uh hi. 39 “Hong pai in hong en tavun,” ci in zo hi. (Tua hun sia nitak nai li bang hi) Tua ahikom amate in ama taw paikhawm a, a teenna a mu uh hi, ama taw tua ni hun om lai teng a zangh khawm uh hi. 40 Tuate sung pan khat in Simon Peter ii suapui Andrew ahi hi. 41 Thakhat in a suapuipa Simon mu in hi thu ko hi. “Ko Messiah mu zo khu hi,” (Hi kammal sia Christ a cinopna hi) ci in ko hi. 42 Tua zawkciang ama in Jesus kungah Simon paipui hi. Jesus in ama en in, “Na min sia Simon hi a, John ii tapa ni hi, ahihang nang sia Cephas hong kina tu hi,” ci hi. (Cephas ii khiakna sia Peter ma hi a, "suangpi khat"a ci nopna hi.)
Jesus in Philip le Nathanael Sam
43 A zing ciangin Jesus in, Galilee ngamah pai tu in, khensat hi. Ama in Philip mu a,“Hong zui tan,” ci hi. 44 (Philip sia Andrew le Peter te ii teenna Bethsaida khua pan ahi hi.) 45 Philip in Nathanael a mu ciang, “Moses ii thukham laibu sungah a thu a at pa le, kamsangte zongh ii a thu a at pa mu zo khu hi. Ama sia Nazareth pan Joseph tapa Jesus hi,” ci in ama munah son hi. 46 “Nazareth panin na pha khat papo piang thei thong tu ziam,” ci in Nathanael in dongh hi. “Hong pai in hong en tan,” ci in Philip in zo hi. 47 Jesus in ama kungah Nathanael hong pai a mu ciangin, ama thu hi bangin son hi. “Hi sungah, Israel mi tatak khat om hi; ama in paubanna nei ngawl hi!” ci hi. 48 Nathanael in, “Bangbangin hong he ni ziam,” ci in dongh hi. “Philip ii hong sam maa theikung nuai ah na om lai in, kong mu zo hi,” ci in Jesus in zo hi. 49 Nathanael in, “Syapa awng, nang sia Pathian Tapa na hi hi! Israel Kumpipa na hi hi!” ci hi. 50 Jesus in, “Theikung nuai ah na om lai in, kong mu zo hi kong ci hu bek in, um na hi bua ziam? Hisia sangin a lian zaw lai na tam mama na mu tu hi!” ci hi. 51 Tuaciang in amate tungah, “Thumaan hong son khi hi: vantung kihong na mu tu a, Mihing Tapa tungah Pathian ii vantung lalangte a tuaksuk a kaato kithalee in om na mu tu hi,” ci hi.
Cana khua ah Mopoai
1 Ni nii zawkciang Galilee ngam Cana khua ah mopoai khat om hi. Tua munah Jesus ii nu om a, 2 Jesus le a nungzuite zongh, tua mopoai siim tu in, khual kihil uh hi. 3 A sapittui teng a kihawm siat zawkciang, Jesus ii nu in ama munah, “Amate in sapittui nei nawn ngawl hi,” ci hi. 4 Jesus in, “Bang vawt tu khi ziam ci sia nang hong son kul bo, ka hun hong tung ngawl lai hi,” ci in zo kik hi. 5 Jesus ii nu in, naseamte munah, “Ama hong sawl babangin vawt vun,” ci hi. 6 Jewte sia a zeksa kithiansua ngeinate nei uh a, tuaciang tuasia atu in tui litre zakhat bang veu a ta, tui thambeal luk om hi. 7 Jesus in naseamte munah, “Hi thambealte tui dimh vun,” ci hi. Amate in thambeal ngong ciang in tui dimh uh a, 8 tua zawkciang ama in, “Tu in tui hong suak tavun a, poai ukpa kungah paipui tavun,” ci hi. Tua pa kungah tui a paipui uh le, 9 tu in tua tui sia sapittui suak zo a, ama in tep hi. Ama in hi sapittui koisung pan hong pai ci in a he bua hi (ahihang tui suakin a paipui naseamte in ahile he uh hi); tua ahikom zineipa sam a, 10 “Ngualdangte in, sapittui limbel teng veu hawm masa a, leangnate ii tam mama a neak zawkciang, sapittui dang thawthong teng hawm hi. Ahihang nang na hile sapittui limbel teng tu dongin na khealsia hi!” ci hi. 11 Jesus in hi a masabel nalamdang lakna sia Galilee ngam Cana khua ah vawt hi; tua munah ama minthanna kilanghsak a, a nungzuite in ama um uh hi. 12 Hisia zawkciang, Jesus le a nu, a suapuipate le nungzuite sia Capernaum khua ah pai uh a, tuak ah ni tawmvei sung taam uh hi.
Jesus Biakinnpi sungah Pai
13 Paisan Poai hun hong theng dektak ahikomin, Jesus Jerusalem ah pai hi. 14 Tuak Biakinnpi sungah khuite, tuute, inn vakhute, zuakin a om mite le sum theakte zongh sabuai ah to in a om mu hi. 15 Tua ahikom ama in kivelna khauhual vawtin, nganhing theampo, tuu le khuite zongh Biakinnpi panin notkeak hi; sum theakte ii sabuai sawnthalsak a, a dangkaatangte kithethaang hi; 16 tuaciangin inn vakhu zuakte munah, “Hite hiak pan heam vun! Ka Pa inn sia vanh zuakna mun suaksak heak vun!” ci hi. 17 A nungzuite in, Laithiangtho ii, “Na inn ka thangaina in, ka sungah mei bangin kuang hi, Pathian awng,” a ci teng phawk uh hi. 18 Jew thuneite in, “Hi bang ngamtat thei natu in, na thu ngana sia bang nalamdang lakna taw hong lak tu ni ziam?” ci in thudokna taw zo kik uh hi. 19 Jesus in, “Hi Biakinnpi baltham vun, ni thum sungin sa kik tu khi hi,” ci in zo hi. 20 “Ni thum sungah sa kik thei tu ni ziam? Hi Biakinnpi sak natu sia kum sawmli le kum luk hai hi,” ci uh hi. 21 Ahihang Jesus ii son biakinn sia ama ii pumpi ahi hi. 22 Tua ahikom thina panin ama a kithaw kiksak ciangin a nungzuite in, hi thu a son sia phawk kik uh a, amate in laithiangtho le Jesus ii a sonsate um uh hi.
Mihing Pianzia Jesus ii Heakna
23 Paisan Poai sungin Jerusalem ah Jesus a om laitakin, ama ii nalamdang laknate a mu uh hu in, mihing tam mamate in ama um uh hi. 24 Ahihang Jesus in muang ngawlin amate tungah ama le ama a ki aap ngam bua hi, banghangziam cile ama in amate he siat hi. 25 Ama tungah amate thu sia kuama ii son kul ngawl hi, banghangziam cile ama mama in amate ii thinsung teng a heaksa hi.
Jesus le Nicodemus
1 Nicodemus minnei Jewte lampui khat om a, Pharisee te ii pawlmi ahi hi. 2 Zan khat Jesus kungah ama pai in, “Rabbi awng, nang sia Pathian ii sawl sya khat hi ci in kong he uh hi. Pathian in hong ompui buale, na vawvawt nalamdang laknate, kuama in vawt thei ngawl tu hi,” ci hi. 3 Jesus in, “Thumaan hong son khi hi: nii vei a suak kik buale, kuama in Pathian Ngam mu thei ngawl tu hi,” ci in zo hi. 4 “Bangbangin mihing a khanthin sa khat sia nii vei suak kik thei tu ziam? A nu ngil sungah tumin nii vei suak kik thei ngawl het tu hi!” Nicodemus in ci hi. 5 Jesus in “Thumaan hong son khi hi. Tui le Thaa taw a suak buale, kuama Pathian Ngam sungah tum thei ngawl tu hi. 6 Nu le pate sung panin a suak mihing khat sia ci le sa mi hi a, ahihang Thaa sung panin a suak sia in thaa mi ahi hi. 7 Note theampo na sua kik uh kul tu hi kong cina hangin, lamdang na sa heak in. 8 Vui in a uukna po ah va hi; a vak ciang a nging na za hi, ahihang koisung pan hong pai a, koisung zuan ziam ci na he bua hi. Thaa taw a suak mihing simin, tuabang ma ahi hi,” ci in zokik hi. 9 Nicodemus in,“Bangbangin hi thu suak thei tu ziam,” ci in dongh hi. 10 Jesus in, “Nang sia Israel ngam sung sya thupi khat na hi hi, hi thu tel ngawl ni ziam? 11 Keima in nang tungah thumaan hong son khi hi: ka heak uh te kong son a, ka mu uhte hong ko khu hi, tua hi napi kuama in ko ii thupuak sia saang nuam ngawl nu hi. 12 Hi leitung nate ii thu kong son ciangin, hong um ngawl nu hi, tua ahile vantung nate ii thu kong son ciang, bangbangin hong um thei thong tu nu ziam? 13 Tuaciangin vantung pan a hong paisuk Mihing Tapa sim ngawl kuama vantung ah kaato ngei ngawl hi,” ci in zo hi. 14 Senneal ngamsung thingkhuam tungah Moses ii taungo ngul a khai bangmain Mihing Tapa zongh kikhai tu hi, 15 tuasia in ama a umte theampo ii tawntung nuntakna a nga thei natu ahi hi. 16 Pathian in leitung mite it mama ahikom, khat bek a nei a Tapa hong pia a, ama a um peuma in thi nawn ngawlin tawntung nuntakna a nga natu ahi hi. 17 Banghangziam cile Pathian in a Tapa sia leitung ii a thukhenpa tu hi ngawl a, a hunpa tu in leitung ah hong paisak hi. 18 Tapa a umte thukhenna thuak ngawl hi; a um ngawlte ahile thukhenna a thuaksa hi zo hi, banghangziam cile amate in, Pathian ii Tapa khat bek sia a um bua uh hi. 19 Hisia in thukhenzia hi: khuavak sia leitung ah hong pai zo hi, ahihang mihingte in, khuavak sangin khuazing deizaw uh hi, banghangziam cile amate ngamtatnate sia hi. 20 A sia a vawt theampo in khuavak ngaimaw a, khuavak sungah hong pai ngawl tu hi, banghangziam cile amate ii a tatsiatnate kilanghsak nuam ngawl hi. 21 Ahihang thumaan a seamte in, amate ii ngamtatna sia Pathian thunitna ahi hunlam tua khuavak in a lak thei natu in khuavak sungah a pai hi.
Jesus le John
22 Tua zawkciang, Jesus le a nungzuite in, Judea ngamkhen sungah hong pai uh a, tua munah amate taw hun zangh khawmin, tuiphumna pia hi. 23 Salim pan a kikhuala ngawlna Aenon ah tui tam ahikom John zongh in tui sungah tuiphumna pia hi. Mihingte in ama zuan uh a, tuaciang ama in, tuiphum hi. 24 (Hisia in thong sungah John a kikhum maa hun ahi hi.) 25 John ii nungzui pawlkhat in Jewte khat taw a zeksa kisilna huvau kam kinial uh hi. 26 Tua ahikom amate John kungah pai in, “Syapa awng, Jordan ngun nisuana sangah nang taw a om ngei ama thu na sason sia, na ciamtee lai ziam? Tu in ama zongh in, tuiphum a, a kuama po in, ama kung zuan tek uh hi!” ci hi. 27 John in, “Pathian in a pia buale kuama in, bangma nga thei ngawl hi. 28 ‘Kei Messiah hi ngawl khi hi, ahihang ama mai ah, kei hong kipaisak khol hi’ ka ci ciang noma tatak ma keima ii tettite na hi uh hi, 29 Mo ahile zineipa ii neisa hi. Ahihang a kungah a ding thungai in a om zineipa ii lawmpa in zineipa aw a zaak ciangin a lungdam hi. Hisia in keima lungdamna a pawlcinna ahi hi. 30 Ama hong thupi vaial tu a, kei sia thupi ngawl vaial tu khi hi,” ci in zo hi.
Vantung pan Hong pai Pa
31 Tungsang pan hong pai sia in, a kuama theampo sangin, lian zaw hi. Leitung pan hong pai sia in, leitung neisa hi a, leitung nate thuson in nei hi. Ahihang vantung pan hong pai sia in, a kuama theampo ii tungsia ahi hi. 32 Ama in a mu sate le a zaaksate son hi, ahihang ama ii thu hong puak sia kuama in saang ngawl hi. 33 Ahihang ama ii thupuak a saang pawpo in Pathian thumaan hi, ci thu kipsak hi. 34 Pathian ii sawlpa in, Pathian ii kammalte pau hi, banghangziam cile Pathian in ama Thaa taw kidimsak hi. 35 Pa in a Tapa it a, na theampo ama vaangletna sungah koi hi. 36 Tapa a um pawpo in, tawntung nuntakna nei hi; Tapa ii thu a ni ngawl po sia nuntakna a nei buatu a, Pathian ii daan piakna nuai ah om lai tu hi.
Jesus le Samaria Numei
1 Jesus in John sangin, nungzui tamzaw nga a, tuiphum hi ci thu Phariseete in za uh hi. 2 (A tatakin Jesus in kuama tuiphum nei ngawl hi; ama nungzuite bek in tuiphum uh hi.) 3 Tua ahikom Jesus in tuabang a kisonna a zaak ciang, Judea ngam nusia in Galilee ah pai kik hi; 4 tua mun a paina lampi sia Samaria ngam a kantan tu kul hi. 5 Samaria ngam Sychar kici khuano khat ah ama theng hi, tua khua sia Jacob ii a tapa Joseph a piak lo sia taw kikhuala ngawl hi. 6 Jacob ii tuikhuk tua munah om a, Jesus sia a khualhawna pan toi in, tua tuikhuk hui ah to hi. Tua hun sia sunkim laitak khawng ahi hi. 7 Samaria numei khat tui toai tu in hong pai a, tuasia ciang Jesus in ama munah, “Tui neak khat hong pia tan,” ci hi. 8 (A nungzuite khua sungah an lei tu in pai uh hi.) 9 Tua numei in, “Nang Jew mi hi a, kei Samaria mi khi hi — tua hi a, banghangin tui hong ngen thei ni ziam,” ci in zo hi (Jewte in Samariate ii zak hai le kuangte zangh khawm ngawl hi.) 10 Jesus in, “Pathian in bang teng pia a, nang tungah tuineak tu hong ngen sia akua ziam, ci thu tel thong lete nangma in ama mun ah na ngen tu hi, tuaciang ama in nuntakna tui hong pia tu hi,” ci hi. 11 Tua numei in, “Syapa awng tuipheal nei ngawl ni hi, tuaciang tuikhuk sia thuk hi. Tua nuntakna tui, koisung pan nga tu ni ziam? 12 Hi tuikhuk hong pia sia in ih taangpupi Jacob hi; ama le a tapate le a nganno honte, a vekpi in hi tuikhuk panin dawn tek uh hi. Jacob sangin lianzaw kisa na hi ba na ziam,” ci hi. 13 Jesus in, “A kuama po hi tui a dawn sia in, a dangko kik tu hi, 14 ahihang kei ii ka piak tui a dawn peuma a dangko kik ngei nawn ngawl tu hi. Ka piak tu tui sia ama sung pan ciktui khat hong suak tu hi, tua in nuntakna a pia tui hi tu a, tuaciangin tawntung nuntakna pia tu hi,” ci in zo hi. 15 “Syapa awng, tua tui kei hong pia tan! Tua hile ka dangko kik ngei nawn ngawl tu a, tui toai tu in hi sungah ka pai a kul nawn buatu hi,” tua numei in ci hi. 16 “Pai in, na pasal sam tan, tuaciang hong pai kik tan,” Jesus in ci hi. 17 Ama in, “Kei pasal khat zongh ka nei bua hi,” ci in zo hi. Jesus in, “Pasal khat zongh nei bong na ci sia thumaan hi. 18 Pasal nga na teenpui ngei zo a, tu a na teenkhop puipa sia na pasal tatak hi ngawl hi. Thumaan hong son ni hi,” ci in zokik hi. 19 “Syapa, nang sia kamsang khat na hi hunlam kong he hi. 20 Ka Samaritan taangpupite in, hi mualtung ah Pathian bia hi, ahihang no Jewte in Jerusalem sia koma ii Pathian biakna tu mun hi, ci nu hi,” tua numei in ci hi. 21 Jesus in ama munah, “Hong um tan, numei awng, Pa sia hi mual tungah ahizong, Jerusalem ah ahizong mihingte ii biak ngawl tu hun hong tung tu hi. 22 No Samariate in na biak uh akua ziam, ci in he tatak ngawl nu hi; ahihang ko Jewte in, ka biak uh sia ka he uh hi, banghangziam cile ngupna sia Jewte tung panin hong pai hi. 23 Ahihang Pathian ii Thaa vaangletna taw Pa sia ahi bang tatakin ama ii dei biakna maan taw mihingte ii biak tu hun hong tung tu a, tu mama in hi sungah hong tutung zo hi. 24 Pathian sia Thaa hi a, mihingte in ama Thaa ii vaangletna bekma taw ama sia ahi bang tatakin bia thei hi,” ci hi. 25 Tua numei in, “Messiah hong pai tu a, ama hong pai ciangin, thu theampo hong son tu hi, ci in ka he hi,” ci hi. 26 “Nang taw a kipaupui keima in tuasia pa ka hi hi,” Jesus in ci hi. 27 Tua hun laitakin Jesus nungzuite hong heak kik a, Jesus sia numei khat taw thu sawson in om a mu uh ciang, amate in lamdang sa mama uh hi. Ahihang kuama in, “Nang bang nuam ni ziam,” ci in tua numei mun ahizong, “Banghangin hisia nu taw thuson ni ziam,” ci in ama mun ahizong a dongh bua uh hi. 28 Tuasia ciangin tua numei in a tuibeal nusia in, khua sungah heak kik a, tua lai mihingte munah, 29 “Keima ngamtat ngei theampo hong son sia pa en tu in hong pai tavun. Ama in Messiah ahi thei tu ziam?” ci hi. 30 Tua ahikom, amate in khua nusia in, Jesus kungah pai uh hi. 31 Tua hun sungin, a nungzuite in Jesus munah, “Syapa awng, bang khat pawpo ne in!” ci uh hi. 32 Ahihang ama in, “No ii heak ngawl anneak tu ka nei hi,” ci in zo hi. 33 Tua ahikom nungzuite amate teng kidongh a, “Khat po in ama an puak zo hi tu ziam?” ci uh hi. 34 Jesus in, “Kei ii an sia, kei hong sawlpa ii deina ka zui tu le hong piak nasep ka zaw tu ahi hi. 35 Noma in ‘Tha li zawkciang sia anlaak hun hi,’ ci thei khat nei nu hi. Ahihang lote pha tak en vun; tu in lo ante min zo a, laak hial tu bek in om zo hi, ci in kong son hi! 36 An la pa sia thaman kipia a, ama in tawntung nuntak natu ante kaikhawm hi; tua ahikom thaici poaipa le anlapa lungdam khawm tu hi. 37 ‘Mihing khat in thaici poai a, a dang khat in anla hi,’ a ci sia thumaan hi. 38 No ii thawna ahi ngawl lo khat sungah anla tu in hong paisak khi hi; ngualdangte in tua munah seam uh a, tuaciang in no sia amate sepna tung panin hamphatna na nga uh hi,” ci hi. 39 Tua numei ii “Keima ngamtat ngei theampo hong son hi,” a cina hangin tua Samaria khuami tam mama in Jesus um uh hi. 40 Tua hi a Samaria mite ama kungah hong pai ciangin, amate kungah a taam natu in kunh uh hi, Jesus in tua munah ni nii taam hi. 41 Ama thusonna hu in a tamzaw seseam in um uh hi; 42 tua numei munah amate in, “Tu in um khu hi, nang nong son sia hang hi ngawl a, koma mama in ama thuson ka zaak uh hang hi, ama leitung Hunpa ahi takpi sia ka he uh hi,” ci uh hi.
Jesus in Ulian khat ii Tapa Damsak
43 Tua munah ni nii a taam zawkciang Jesus vaidingin, Galilee ngam zuan hi. 44 Banghangziam cile ama mama in, “Kamsangpa khat sia ama ii ngam sungah kizakta ngawl hi,” ci hi. 45 Galilee ngam a thet ciangin, tua lai mihingte in muak uh hi, banghangziam cile amate Paisan Poai siimin Jerusalem ah pai a, poai sungah ama vawt theampo mu siat zo uh hi. 46 Tua zawkciang Jesus Galilee ngam Cana khua ah pai kik hi, tua mun sia ama in tui pan sapittui a suasakna mun ahi hi. Tua munah kumpi naseam ulian khat om a, a tapa sia Capernaum khua ah a cina hi. 47 Ama in Jesus Judea ngam panin Galilee ngam ah hong pai hunlam a zaak ciangin Jesus kungah pai a, Capernaum khua ah a thi dektak a tapa a damsak natu in ngen hi. 48 Jesus in,“No sungah nalamdang laknate le, a lamdangte na mu bua uhle, kuama in na um ngei bua tu uh hi,” ci hi. 49 Ulianpa in, “Syapa awng, ka tapa a thi maa in hong zui tan,” ci in zo kik hi. 50 Jesus in ama munah, “Pai tan, na tapa nungta tu zam!” ci hi. Tua pa in Jesus kammalte um in pai paih hi. 51 Inn ah a cia lamin a naseamte in, “Na tapa nungta tu hi!” ci thu taw ama muak uh hi. 52 A tapa a dam zawhiat sia banghun ziam ci in amate tungah a dok ciang, “Zeini nitak sang nai khat hun in, a ci suk hong thai hi,” ci in zo hi. 53 Tuasia ciang Jesus ii, “Na tapa nungta tu hi,” a ci hunlian ma ahi sia a pa in phawk hi. Tua ahikom ama le a innkuanpui theampo in um uh hi. 54 Hisia in Judea pan Galilee ah hong pai zawkciang Jesus ii vawt nalamdang lakna a niina ahi hi.
Tuili ah Cidamsakna
1 Tua zawkciang, Jerusalem khua Biakna poai ah Jesus pai hi. 2 Jerusalem Tuu Kongpi hui ah, talap nga taw kithua tuicing khat om hi; tua mun sia Hebrew kam in Bethzatha kici hi. 3 Mittaw peang bai langngaw cina honpui khat sia, tua talapte sungah lum uh hi. 4 Amate in tui a kilok tu ngak uh hi, banghangziam cile tu le tu in Topa ii vantung lalang khat in tua tui sungah tuaksuk a, tui sau hi. Tui kinok laitak a tuaksuk phit cina sia in, bang natna po a vei zong damthiang hi. 5 Kum sawmthum le kum liat cina sa pasal khat tuak ah om hi. 6 Jesus in tua pa a lup sia mu a, khua ngei mama a cinat hunlam he hi; tua ahikom, “Na dam nuam ziam?” ci in dongh hi. 7 Cinapa in, “Syapa awng, tui a kinok laitak kei hong khiasuk tu, hi sungah kuama ka nei bua hi; tuisung theng nuamin, ka hanciam hang, ngualdang veu tuaksuk masa hi,” ci in zo hi. 8 Jesus in “Tho in, na lupna phak luakin a, lampai in,” ci hi. 9 Thakhat thu in tua pasalpa dam hi; ama in a phak luakin, lampai kipan paih hi. Hi thu a pian ni sia Sabbath ni ahi hi. 10 Tua ahikom Jew thuneite in a kidamsakpa munah, “Tuni Sabbath ni hi, na phak na puak tu sia ih thukham taw kisi ngawl hi,” ci uh hi. 11 Ama in, “Hong damsakpa in ka phak ka lua tu le lampai tu in hong sawl hi,” ci in zo hi. 12 “Hi bang ngamta a hong sawlpa akua ziam,” ci in dongh uh hi. 13 Ahihang damsakna a ngapa in, Jesus akua cisia a he bua hi, banghangziam cile tua munah mihon khat om ahiciang Jesus kiheam hi. 14 Tuasia zawkciang Jesus in Biakinnpi sungah ama mu a, “Hong ngai tan, tu in dam zo ni hi; tua ahiciang, mawna vawt nawn heak in, tua ahibuale a nasia zaw thuak thei tu ni hi,” ci hi. 15 Tua zawkciang pasalpa in paisan a, ama a damsak sia Jesus ahi hunlam Jew thuneite kungah son hi. 16 Tua ahikom, amate in Jesus vawtsia tu kipan uh hi, banghangziam cile ama in hi cidamsakna Sabbath ni in seam hi. 17 Jesus in amate tungah, “Ka Pa a tawntungin naseam a, kei zongh ka sep kul hi,” ci in zo hi. 18 Hi bang a pauna in, Jew thuneite sia Jesus thalup tu sawmsak seseam hi; Sabbath thukham paltan bek domngawlin, Pathian sia ama ii aituam Pa hi a ci ciang, ama le ama Pathian taw a za kimsak hi.
Tapa ii Thuneina
19 Tua ahikom amate kungah Jesus in, “A tatak in kong ci hi: Tapa in ama thu taw bangma vawt thei ngawl hi; a Pa ii vawt a mu teng bekma vawt hi. Pa ii vawt teng Tapa zongh in vawt hi. 20 Pa in Tapa it ahikom ama ii vawt teng theampo ma lak hi. Hite sangin a lian zaw lai a vawtte ngawngawn lak tu a, note theampo in lamdang na sa tek tu uh hi. 21 Pa in mithite thosak a, nuntakna a piak bangma Tapa in a piak nopte tungah nuntakna pia hi. 22 Pa in kuama tungah thukhen ngawl hi. Ama in a Tapa tungah thukhen theina thu a cing pia hi, 23 tua thu sia mihing theampo in Pa a zatak bangma in, Tapa a zatak natu ahi hi. Tapa a zakta ngawl po in ama a sawl ahi Pa sia zakta ngawl hi. 24 “A tatak in kong ci hi: ka kammalte za a, kei hong sawlpa a um pawpo tawntung nuntakna nei hi. Amate tungah thu kikhen ngawl tu a, thina pan nuntakna sungah theng zo hi. 25 A tatak in kong ci hi: a hun hong tutung tu a — hong tung zo hi — tua hun ciang a thi sate in Pathian Tapa ii aw za tu a, tuaciangin a zate hong nungta tu uh hi. 26 Pa mama in nuntakna ii naak ahi bangma ama Tapa zongh nuntakna ii naak suaksak zo hi. 27 Tuaciang ama Tapa sia thukhen theina thu pia zo hi, banghangziam cile ama Mihing Tapa ahi hi. 28 Hi thu tungtaang ah lamdang sa heak vun; a thi sate theampo in ama aw za tu a, 29 thaankuul sung panin hong pusua tu hun hong thetheng tu hi; na pha a seamsate tho in nungta tu a, siatna vawtte tho in mawsakna thuak tu hi.
Jesus atu Tetti Pannate
30 “Keima aituam thuneina taw bangma ka vawt thei bua hi; Pathian hong son bang bekin thukhen ka hikom, ka thukhenna maan hi, banghangziam cile, keima dei bangin sep tu ka hanciam bua a, hong sawl pa dei bangin ka seam hi. 31 Keima le keima tetti in ka kipang le, ka son sia maan tatak hi, ci in kisaang ngawl tu hi. 32 Ahihang kei taangin tetti hong pang a dang khat om a, tuaciangin kei huvau ama sonte maan hi, ci in ka he hi. 33 John sia na kamtaite na paisakna uh pa hi a, tuaciang ama in thumaan thutak son hi. 34 Mihing khat ii tetti panna ka nei tu kul tuan ngawl hi; hisia noma ii na suatak thei natu ka ci bekma ahi hi. 35 John sia mei inn taw kibang a, kuangin taang hi, tuaciangin tawmvei sung teng ama ii khuavak sia na leaplaw nuam uh hi. 36 Ahihang John ii tetti panna sangin, a lianzaw kei taang a ding tu tetti khat ka nei hi: Pa ii sep tu hong piakte ka sepna po in kei tangin a pau hi a, kei sia Pa hong sawl ahi hunlam lak hi. 37 Kei hong sawlpa ahi Pa zongh in, keima tangin tetti pang hi. Note in ama aw na za ngei bua uh a, a maitang zongh na mu ngei bua uh hi, 38 tuaciangin ama ii thu hong puak sia na thin sungah na keam bua uh hi, banghangziam cile a ma ii hong puakpa na um bua uh hi. 39 Laithiangthote na entel uh hi, banghangziam cile tuate sungah tawntung nuntakna mu tu na ki um uh hi. Tuaciangin hi Laithiangthote mama in, keima ii thu son hi! 40 Tua hi napi nuntakna na nga natu in kei kungah nong pai nuam bua uh hi. 41 “Keima in mihingte ii pokna a zong hi ngawl khi hi. 42 Ahihang no bangbang mihing nam ci sia le na thin sunguh ah Pathian itna na nei ngawl uh kong he hi. 43 Pa ii thuneina tengma kengin kong pai hangin nong saang bua uh hi; ahihang in khat po in ama ii thuneina taw hong pai ciang na saang tu uh hi. 44 No khat le khat kipok tu na thangai uh hi, ahihang khat bek ahi Pathian tung pan pokna nga tu na hanciam bua uh hi; tua ahile bangbangin kei hong um thei tu nu ziam? 45 Ahihang ka Pa mai ah note maw hong pusak tu sia, kei hi tu in hong um heak vun. Na lam et uh pa Moses sia note hong mawsak tu pa ma ahi hi. 46 Moses na um takpi uh le kei nong up tu uh hi zo hi, banghangziam cile ama in keima thu at hi. 47 Ahihang ama at thute um ngawl na hi uh nungsang, kei kampau bangbangin um thei tu nu ziam?” ci in zo hi.
Jesus in Pasal Tulnga Anvaak
1 Tua zawkciang, Galilee tuili (Tiberias Tuili zongh kici) kantan Jesus pai hi. 2 Mi honpi khat in a nungzui hi, banghangziam cile cina damsakna taw ama ii nalamdang laknate mu uh hi. 3 Jesus sia mualno khat tungah kaato a, a nungzuite taw to khawm hi. 4 Paisan Poai hun hong nai hi. 5 Jesus in a kiimkot a et ciangin, mi honpi khat ama kungah hong zuan mu a, tua ahikom Philip munah, “Koisung pan hi mihingte theampo ih vaak khom natu an lei thei tu hi ziam,” ci hi. 6 (Hi bangin a ci sia Philip a ze etna hi; ama in a vawt tu tatak sia a heak khol sa hi.) 7 Philip in, “Mihing sim ii tawmno tek a neak khom tu bek zongh ngun dangka zanii vaal taw anluum lei kul tu hi,” ci in zo hi. 8 A nungzuite sung pan a dang khat Simon Peter ii suapuipa Andrew in, 9 “Hi sungah om patangno khat in, mangtaang anluum nga le ngasa nii nei hi. Ahihang tuateng sia hi mitheampo atu in, kicing ngawl het tu hi,” ci hi. 10 Jesus in amate tung ah “Mihingte tosak vun,” ci hi. (Tua munah lopa tam om hi.) Tua ahikom mihing theampo to siat uh hi; pasal 5 , 000 bang pha uh hi. 11 Jesus in anluumte la a, Pathian tungah lungdamko in, tua mun ah a to mihingteng hawm sak hi. Ama in tuabangma in ngasate zongh hawm a, amate a vekpi in a du zaza ne uh hi. 12 Amate kham siat zawk uh ciang, a nungzuite munah ama in, “A neak vaal lai teng kaikhawm vun; bangma pakvawt bua tawng,” ci hi. 13 Tua ahikom amate in a khopsiat uh ciangin, mihonte neak mangtaang anluum nga pan in, a bek neak vaal uh khum sawm le khum nii nga uh hi. 14 Hi nalamdang lakna Jesus ii vawt a mu uh ciangin, tua munah a om mihingte in, “Hi sia leitung a hong pai tu Kamsangpa hi takpi hi!” ci uh hi. 15 Amate hong pai in kumpi suaksak tu in zawthawk thu taw ama man tu kipan ahi sia Jesus in he hi; tua ahikom ama nguakin, mual tungah pai san kik hi.
Jesus Tui tungah Lampai
16 Nitak sang ciangin, Jesus ii nungzuite tua tuili ah paisuk uh a, 17 ngunkuang sungah to in, Capernaum ah tuili kantan in pai kik uh hi. Khua hong zan zo a, Jesus amate kung hong zuan ngawl lai hi. 18 Tua hun laitak, nasia takin vuiva a, tui kilok hi. 19 Nungzuite in kilometre 5 bang 6 bang ngunkuang a haw zawkciang, Jesus tui tungah lampai in, ngunkuang nai ah hong pai a mu uh ciang, amate lau uh hi. 20 “Lau heak vun, keima khi hi,” Jesus in ci hi. 21 Tuasia ciangin amate tha lawp tak in, Jesus ngunkuang tungah kaasak uh a, amate zot nopna mun tuivaal ah thakhat thu in theng uh hi.
Mihingte in Jesus Zong
22 A zing ciangin, tuili langkhat ah a taam mihonpite in, tuamun ah ngunkuang khat bek a om hunlam phawk kik uh hi. Tua ngunkuang sungah, ama ii nungzuite taw Jesus pai khawm ngawlin amate nguak a pai hunlam phawk uh hi. 23 Topa ii lungdam a ko zawkciang mihon ii anluum neakna mun taw a kinaina tuili vaal ah, Tiberias pan hong pai ngunkuang dangte hong theng hi. 24 Mihonte in Jesus ahizong, ama ii nungzuite ahizong tua munah a mu ngawl uh ciang, ngunkuangte tungah kaa in, ama zong tu in Capernaum khua ah pai uh hi.
Jesus Nuntakna Anluum
25 Mihingte in Jesus tuili langkhat ah a mu uh ciangin, ama munah, “Syapa awng, hi sung bang hunin theng ni ziam,” ci uh hi. 26 Jesus in, “A tatak in kong ci ciang, kei nong zon uh sia, nalamdang ka laknate na tel uh hang hi ngawlin, anluum na du uh za a na neak uh hang ahi hi. 27 A sia thei an atu in, naseam heak vun; tua sangin a ki khomsuan tawntung nuntakna an atu in seam zaw vun. Hisia in Mihing Tapa ii no hong piak tu an ahi hi, banghangziam cile Pathian a Pa in, ama tungah lungkim tepteena koi zo hi,” ci in zo hi. 28 Tua ahikom, amate in, “Pathian in kote seam le hong oai te ka sep thei natu in bang vawt thei tu khu ziam,” ci in dongh uh hi. 29 Jesus in, “Pathian ii no septu a dei nasep sia, ama ii a sawlpa na up tu uh ahi hi,” ci in zo hi. 30 Amate in “Ko ii mu thei tu uh le nang kong up thei natu in, bang nalamdang lakna vawt tu ni ziam? Bang vawt tu ni ziam? 31 Laithianghto in ‘Ama in vantung panin amate neak tu anluum pia hi,’ a ci bangma in, ka taangpupite in senneal ngam sungah manna ne uh hi, ” ci in zokik uh hi. 32 Jesus in “A tatak in ka ci hi: Moses ii no hong piak anluum sia vantung pan hi ngawl hi. Vantung pan no atu anluum tatak hong pia pa sia ka Pa ahi hi. 33 Banghangziam cile, Pathian hong piak anluum sia in, hi leitung ah nuntakna a pia tu in, vantung pan hong paisuk pa ahi hi,” ci hi. 34 Amate in, “Topa awng, hi anluum hong pia tawntung tan,” ci in ngen uh hi. 35 Jesus in, “Keima in, nuntakna anluum ka hi hi. Kei kungah hong paite in, a ngilkial ngei nawn ngawl tu hi; kei hong umte in, a dangko ngei nawn ngawl tu hi. 36 Tu in note in kei hong mu zo napi nong um buatu uh hi, kong ci sa ahi hi. 37 Ka pa hong piak mihing theampo kei kungah hong pai tu hi. Kei kung hong zuan peuma ka nial ngei buatu hi, 38 banghangziam cile keima aituam deina a seam tu in vantung pan hong pai ka hi bua a, hong sawlpa deina a seam tu in, hong pai ka hi hi. 39 Tuaciang kei hong sawlpa ii deina sia, hong piak sa theampo sung pan khat zongh bosua ngawl het in, ni tawpkhak ni in, amate teng nuntakna sungah, ka thawsak siat tu sia ahi hi. 40 Banghangziam cile ka Pa ii deina sia, Tapa mu a, ama a umte theampo in tawntung nuntakna a nga natu ahi hi. Tuaciang ni tawpkhak bel ni in, amate nuntakna sungah ka thosak tu hi,” ci hi. 41 “Keima in vantung pan hong paisuk anluum ka hi hi,” a ci hu in, mihingte in ama phunsan siasua uh hi. 42 Tua ahikom, amate in “Hisia pa sia Joseph ii tapa Jesus hi kana ngawl ziam? A pa le a nu ih heak hi. Tua ahile bangbang, tu in vantung pan kong paisuk hi, ci thei ziam?” ci uh hi. 43 Jesus in, “Noma sung tengah phun teaptup nawn heak vun. 44 Kei hong sawl Pa in kei kungah hong puak buale, kuama kei kungah hong pai thei ngawl hi; tuaciang ni tawpkhak ni ciang nuntakna sungah ama ka thosak tu hi. 45 Kamsangte in, ‘Pathian in mihing sim hil tu hi,’ ci in at zo hi. A kuama po Pa thu za a, ama kung pan a hete bek kei kungah hong pai hi. 46 Hisia ka ci ciang, khat po in, Pa mu ngei hi, cinopna hi ngawl hi; Pathian kung panin, hong pai sia bek in Pa mu ngei hi. 47 A maan takin kong ci hi: a um sia in tawntung nuntakna nga hi. 48 Keima in nuntakna anluum ka hi hi. 49 Na taangpupite in senneal ngam sungah manna ne uh hi, ahihang amate thi hi. 50 Ahihang vantung pan hong paisuk anluum sia nam tuam khat hi a, a ne peuma thi ngawl tu hi. 51 Keima in vantung pan hong pai a nungta anluum ka hi hi. Khat po in hi anluum a ne le nungta tawntung tu hi. Ama ka piak tu anluum in, leitung mite nuntak thei natu a, ka piak ka taksa ahi hi,” ci in zo hi. 52 Hi thu in, amate sungah thin uuk a, kinialna kipansak hi. “Bangbangin hisia pa in, a taksa neak tu in, ei hong pia thei tu ziam?” ci uh hi. 53 Jesus in amate munah, “A maan takin kong ci hi: Mihing Tapa ii taksa na ne bua uh a, a chi na dawn bua uh le, note sungah nuntakna na nei buatu uh hi. 54 A kuama po ka taksa ne a, ka chi a dawnte in, tawntung nuntakna nga a, ni tawp khakbel ni ciangin nuntakna sungah ka thosak tu hi. 55 Banghangziam cile ka taksa sia an tatak hi a, ka chi sia dawn tu tatak ahi hi. 56 Ka taksa ne a, ka chi a dawn pawpo in kei sungah teang a, kei amate sungah ka teang hi. 57 A nungta Pa in kei hong sawl a, ama hangin, kei zongh ka nungta hi. Tuasia bangma in, kei hong ne peuma kei hangin nungta tu hi. 58 Tua hi a, hisia in vantung pan hong paisuk anluum ahi hi; na taangpupite neak anluum taw kibang ngawl hi. Amate in ne in thi veve hi, ahihang hi anluum a nete in, a tawntungin nungta tu uh hi,” ci hi. 59 Jesus in Capernaum khua synagogue ah hi teng hil hi.
Tawntung Nuntakna Kammalte
60 A nungzuite tam ma in hi thu za uh a, “Hi kihilcianna tel thei tu haksa lei hi. Akua in hi thu ngai zo thong tu ziam,” ci uh hi. 61 Kuama ii son ngawl bul in, Jesus in amate ii phunna thu he ahikom, amate munah, “Hisia in, na thin uh hong kiamsak nuam ahi ziam?” 62 “Tua le, sonteena, Mihing Tapa sia ama om maksakna munah a paito kik mu le uh te bang na ci tu uh ziam? 63 Nuntakna a pia sia Pathian ii Thaa ahi hi; mihing thahatna in mannung mama ngawl hi. No tung ah ka pau sa kammalte in nuntakna a pia Pathian ii Thaa hong tut ahi hi. 64 Ahihang no pawlkhat in um ngawl nu hi,” ci hi. (Jesus in a kipatcil pan ma, akua teng in um ngawl tu a, akua in ama leeheak tu cisia a heak sa ahi hi.) 65 Tuaciangin ama in “Ama ii tua bang ahi thei natu in, Pa in vawt buale, kuama kei kungah hong pai thei ngawl tu hi, kong cisia, hisia hang mama ahi hi,” ci thua lai hi. 66 Hisia hangin, Jesus ii nung a zuite tam mama heak kik uh a, ama taw tonkhawm nawn ngawl hi. 67 Tua ahiciang, nungzui sawm le niite munah ama in “No zongh, nong nusia nuam tu uh ziam?” ci in dongh hi. 68 Simon Peter in, “Topa, akua kung pai tu khu ziam? Tawntung nuntakna a pia kammalte nangma in na nei hi. 69 Tuaciangin nang sia Pathian kung pan hong pai, a Thiangtho Pa na hi hunlam tu in kong he uh a, kong um uh hi,” ci in zo hi. 70 Jesus in, “No sawm le nii teng, keima kong teal hi kana ngawl nu ziam? Tua hi napi, no sungah khat sia doai ahi hi,” ci hi. 71 Ama in Simon Iscariot ii tapa Judas huvau son ahi hi. Banghangziam cile Judas sia nungzui sawm le nii sungah khat hi napi ama a leeheak tu pa ahi hi.
Jesus le A suapuipate
1 Tua zawkciang, Jesus Galilee ngam sungah khualhaw hi; ama in Judea ngam sungah khualhaw nuam ngawl hi, banghangziam cile, tuasung a om Jew thuneite in ama thatlum nuam uh hi. 2 Buk Poai hun nai zo hi, 3 tua ahikom Jesus munah a suapuite in, “, Nang nung hong zuite in na vawvawt nate hong mu thei natu, hi mun nusia in Judea ah pai tan. 4 Ngual heak tu a nuam sia in, a sepna a sealcip bua hi. Hi bang nate seam na hi ciang na thu leitung bup in hesak lete pha hi!” ci uh hi. 5 (A suapuipate ngangawn in ama a um bua uh hi.) 6 Jesus in amate munah “Kei atu in a hun hong tung ngawl lai hi. Hun khat pawpo sia noma hun ahi hi. 7 Leitung in note hong ensan thei ngawl tu hi, ahihang kei hong ensan hi, banghangziam cile, ama lampite pha ngawl hi, ci in ka son tawntung hi. 8 Poai ah noma pai tavun. Hi poai ah kei pai ngawl tu khi hi, banghangziam cile kei atu in a hun hong tung ngawl lai hi,” ci hi. 9 Hi teng ci in Galilee ah taam thua hi.
Jesus Buk Poai ah
10 A suapuipate poai siim tu in a pai zawkciang, Jesus zongh pai hi; ahihang a kilangh ngawlin pai kuu hi. 11 Jew thuneite in, poai sungah ama zong uh hi. Amate in “Ama a koisung ah om ziam?” ci in dongh uh hi. 12 Mihon sungah ama huvau kihuau tek uh hi. Pawlkhat in “Ama mihing pha khat hi,” ci hi. Adangte in “Hi ngawl hi, ama in mihingte lamlak khial hi,” ci uh hi. 13 Ahihang kuama in ama thu a kilangh in a son ngam bua uh hi, banghangziam cile amate in Jew thuneite kiita uh hi. 14 Poai a lang bang a kiman zawkciang, Biakinn ah Jesus pai in hilcianna kipan hi. 15 Jew thuneite in lamdang sa mama uh a, “Bangbangin hisia pa in, sang ah sinna bangma nei ngei ngawl napi hiza in he ziam?” ci uh hi. 16 Jesus in, “Kei kong hil thu in keima aituam hilcianna hi ngawl a, kei hong sawlpa Pathian kung pan hong pai hi. 17 Pathian dei bang a ngamta nuamte peuma in, Pathian kung pan hong pai thu ziam, tua ahibuale keima aituam thuneina taw hil khi ziam, he tu hi. 18 Ama aituam thuneina taw a paupa sia, ama atu bek minthanna nga nuam a hanciam ahi hi. Ahihang a sawlpa ii minthan natu a deisakpa sia thumaan a, ama sungah leilot thu a om bua hi. 19 Moses in note Thukham hong pia hi ngawl ziam? Ahihang note kuama in tua Thukham na zui bua uh hi. Kei banghangin thalup hong sawm nu ziam?” ci in zokik hi. 20 Mihonte in “Na sungah doai khat om hi! Akua in nang hong thatlum nuamin hanciam na ziam?” ci in zo uh hi. 21 Jesus in, “Na lamdang lakna khat kong vawt a, lamdang mama nasa uh hi. 22 Moses in na tapate ii vunteap at natu in thu hong pia hi, (tua nasep a pan sia in Moses hi ngawl a, na taangpupite ahi hi), tua ahikom Sabbath ni in patang khat ii vunteap na at uh hi. 23 Patang khat Sabbath ni in vunteap na atsak uh ciangin, Moses Thukham paltan kisa ngawl na hi uhle, Sabbath ni in mihing khat ka dam thiangthosak hu in, banghangin kei tungah thin uuk nu ziam? 24 A puatham munate taw thukhennate kheal vun, thumaan munate taw thukhen vun,” ci in zo hi.
Ama Messiah ahi ziam?
25 Jerusalem a om mihing pawlkhat in, “Thuneite ii hanciamin a thalup nop uh sia, hisia pa hi ngawl ziam? 26 En vun! mipi mai ah a kilangh in a pau ciang zong, amate in ama langpanna kam bangma pau ngawl hi! Ama Messiah hi ci in amate in tel takpi ahi thei tu ziam? 27 Ahihang Messiah hong pai ciang ahile, ama koisung pan hong pai ci sia kuama in he ngawl tu hi. Hisia pa ahile hong paina ih he tek hi,” ci uh ih. 28 Jesus in Biakinnpi sungah a hil laitakin, awnging taw, “Kei hong he takpi nu ziam, tuaciang kei koisung pan hong pai ci in hong he nu ziam? Keima aituam thuneina taw hong pai ngawl khi hi. Ahizong kei hong sawlpa ahile thumaan hi. Note in ama na he bua uh hi, 29 ahihang keima in ka he hi, banghangziam cile, ama kung pan kong pai a, ama in hong sawl hi,” ci hi. 30 Tuasia ciangin amate in Jesus man tu in hanciam ahihang kuama in ama a thutha bua uh hi, banghangziam cile ama hun tung ngawl lai hi. 31 Ahihang mihon sung pan, mihing tam mama in ama um a, “Messiah hong pai ciang, ama in hisia pa ii vawtte sangin a tamzaw nalamdang laknate, a vawt tu ziam,” ci uh hi.
Jesus A Man tu in, Biakinn cingte Kipaisak
32 Pharisee te in Jesus huvau mihonte ii kihuauna uh a zaak uh ciang, amate le thiampite in, Jesus a man tu in, biakinn cingte paisak uh hi. 33 Jesus in, “No taw tawmvei sung kong omkhawm lai tu a, tua zawkciang, kei hong sawlpa kungah ka pai tu hi. 34 Kei nong zong tu uh a, ahihang nong mu buatu uh hi, banghangziam cile, kei om natu munah no na pai thei buatu uh hi,” ci hi. 35 Jew thuneite in, amate teng kikum uh a, “Ei mu ngawl tu in, ama koisung pai sawm ziam? Ih mihingte teenna Greek khuapite ah ama pai in, Greek mite hilcian tu ziam? 36 Eite in ama ih zon hang ama ih mu buatu a, ama om natu munah ei pai thei ngawl tu hong ci hi. Bang a ci nopna hi tu ziam?” ci uh hi.
Nuntakna A Pia Luituite
37 A thupibel ni poai khaam tawp ni in, Jesus dingto in awnging tak taw, “A kuama po a dangkote kei kungah hong pai in tui dawn tahen. 38 Laithiangtho ii ci bangma in, kei hong um peuma in ama sung pan nuntakna a pia luitui hong luang tu hi,” ci hi. 39 Jesus in hi bang a pau sia ama a umte ii saan tu Thaa thu son ahi hi. Tua hun laitakin Thaa kipia ngawllai hi, banghangziam cile minthanna sungah Jesus kithosak ngawl lai hi.
Mihingte sungah Kikhenna
40 Mihon sung pan, mihing pawlkhat in, hi thu a son za a, “Hisia pa in Kamsang tatak sia hi!” ci uh hi. 41 Adangte in, “Ama Messiah hi!” ci uh hi. Ahihang a dangte in, “Messiah sia Galilee pan hong pai ngawl tu hi. 42 Laithiangtho ii ci bangin Messiah sia David Kumpipa suan hi tu a, David teenna khua ahi Bethlehem ah suak tu hi,” ci uh hi. 43 Tua ahikom Jesus hangin, mihonte sungah kikhenna om hi. 44 Pawlkhat in Jesus man nuam ahihang kuama in ama a thutha bua hi.
Jew Thuneite ii Up ngawlzia
45 Biakinn cingte hong heak kik uhciang, thiampi liante le Phariseete in, “Banghangin ama hong paipui ngawl nu ziam,” ci in dongh uh hi. 46 Biakinn cingte in, “Hisia pa bangin, kuama kampau ngei om ngawl hi,” ci uh hi. 47 Pharisee te in “Ama in no zongh hong theam ahi ziam?” ci in dongh hi. 48 “Thuneite khat ahibuale Pharisee te khat in ama um hi ci in na he ngei uh ziam? 49 Hi mihonte in Moses Thukham he ngawl ahikom amate Pathian haamsiatna nuai a om hi!” ci uh hi. 50 Tua munah a om Pharisee te khat sia Jesus taw kimu tu in, a pai ngeipa Nicodemus ahi hi. Ama in a dangte munah, 51 “Ih Thukham bangin ci leang, mihing khat sia bang ngamtatna teng nei ci, ih sit ih mu mateng in, ih mawsak thei bua hi,” ci hi. 52 Amate in, “Tua ahile pha hi. Nang zongh Galilee pan ma na hi ziam? Laithiangtho pha takin sim lete, Galilee pan kamsang hong pai ngei ngawl hi, ci in na he tu hi,” ci uh hi.
Numei le pa Palngul khialna A vawt Numei khat Kimatna
1 Tua zawkciang ngual theampo cia siat ahihang Jesus in, Olive Mualtung ah pai hi. 2 A zing ciang zing tuungin ama Biakinnpi ah pai kik hi. Mihing theampo ama ii kiim ah kikhawmtua uh a, tuaciangin ama to in amate hilcian tu in kipan hi. 3 Thukham hil syate le Phariseete in, numei le pa palngul khialna a vawt laitak a mat uh numei khat hong paipui uh a, amate theampo ii mai ah, dingsak hi. 4 Amate in Jesus munah, “Syapa awng, hi numei nu sia numei le pa palngul khialna a vawt laitakin kiman hi. 5 Ih Thukham sungah Moses in tuabang numei khat sia suang taw denlup natu in thupia hi. Tu in bang na ci tu ziam?” ci uh hi. 6 Amate in hi bangin a ci uh sia Jesus a mawsiat thei natu in a aitaana hi. Ahihang ama kunin, a khutme taw lei ah lai at hi. 7 Amate in tuabangin thu a dok ciang, ama hong dingmaam a, amate tungah, “Note sungah akua po ahizong, mawna a vawt ngei ngawl het sia in ama suang taw deang masa tahen,” ci hi. 8 Tua zawkciang, kunsuk kikin lei ah lai at kik hi, 9 Amate in hi thu a zaak ciangin, nusia siat uh hi, khanghaam teng masa in, khat zawkciang khat a vekpi cia uh hi. Tua munah a ding lai numei le Jesus bek taang hi. 10 Jesus dingmaam in, ama munah, “Amate koi sung om siat ziam? Nang hong mawsak tu kuama om nawn ngawl ziam,” ci hi. 11 “Kuama om nawn ngawl hi, Topa awng,” ci in ama in zo hi. “Tua ahile pha hi, kei zongh in, kong mawsak bua hi. Pai tan, ahihang mawna vawt kik nawn heak in,” ci hi.
Leitung Khuavak ahi Jesus
12 Jesus in Phariseete tungah, “Keima in leitung khuavak ka hi hi. Kei hong zuite peuma in nuntakna khuavak nei tu a, khuazing sungah a vak ngei buatu hi,” ci hi. 13 Pharisee te in, “Tu in nangma le nangma tetti a kipang hi bek ni hi; na sonte in bangma a maan thu lak tuan ngawl hi,” ci uh hi. 14 Jesus in, “Hi ngawl hi, keima le keima tetti kipang hi leng zong, ka thuson teng maan hi, banghangziam cile koisung pan kong pai a, koisung zuan tu khi ziam ka kihe hi. Kei koisung pan hong pai a, koisung zuan tu ci sia note in nong he bua uh hi. 15 Note in mihing pianzia taw bek thu na khen uh hi; kei in kuama tungah thu ka khen bua hi. 16 Ahihang tuabangin vawt tu hi leng zong, ka thukhenna maan tu hi, banghangziam cile hisia sungah kei nguak hi ngawl khi hi; kei hong sawl Pa in keima taw om khawm hi. 17 No thukham sungah tetti nii in a thukim ciang amate son sia maan hi, ci in ki at hi. 18 Keima le keima tetti in ka kipang a, hong sawl Pa zongh in kei luangin tetti hong pang hi,” ci in zo hi. 19 “Na pa koisung om ziam?” ci in amate in dongh uh hi. Jesus in, “Keima ahizong, ka Pa ahizong, na he bua uh hi. Keima hong he leute ka Pa zongh he tu nu hi,” ci in zo hi. 20 Jesus in hi thute theampo, Biakinn sung sumpi bungte koina inndoi sungah a hilcian laitakin a son ahi hi. Tuaciangin ama kuama in a man bua uh hi, banghangziam cile ama hun a tung bualai hi.
Ka Paina ah Note hong Pai thei ngawl tu
21 Tuaciang Jesus in, “Kei ka pai tu hi; nong zong tu uh a, ahizong na mawnate sungah na thi tu uh hi. Ka pai natu munah, na pai thei buatu uh hi,” ci hi. 22 Tua ahikom Jew thuneite in, “Ama paina ah ei pai thei ngawl tu hi ci hi. Ama le ama kithatlum tu a cinopna ziam,” ci uh hi. 23 “Note in hi leitung, hisung a nuai sang ii neisa na hi uh hi, ahihang kei sia tungsang pan hong pai ka hi hi. No sia hi leitung pan na hi uh a, ahihang kei sia hi leitung pan ka hi bua hi. 24 Na mawnate sungah thi tu nu hi, kong ci sia tua hang ahi hi. Tuaciangin, ‘Keima sia keima ka hi hi,’ ci in nong um bua uh le, na mawnate sungah na thi tu uh hi,” ci in Jesus in zo hi. 25 “Nang akua ni ziam,” ci in amate in dongh uh hi. Jesus in, “A kipatciil pan ma a, kong son sa sia ka hi hi. 26 No ii tungtaang ah ka pau tu tam mama, kong mawsak natu tam mama ka nei hi. Ahizong kei hong sawlpa thumaan a, tuaciangin, ama tung pan ka zaak sa teng bekma leitung ah ka son hi,” ci in zo hi. 27 Jesus in Pa thu sawson ahi hunlam amate in a tel bua uh hi. 28 Tua ahikom ama in amate tungah, “Mihing Tapa na lapto uh ciangin, ‘Keima sia Keima ka hi’ hunlam na he tu uh hi; tuasia ciangin, keima aituam thuneina taw bangma vawt ngawlin, Pa hong sawl bang bekin, pau ka hi sia nong he tu uh hi. 29 Tuaciangin kei hong sawlpa in kei hong ompui hi; kei nguak hong nusia bua hi. Banghangziam cile, ama diksakte ka vawt tawntung hi,” ci hi. 30 Jesus ii a son thu teng a za mihing tam mama in ama um uh hi.
Thumaanna in hong Suaktasak tu
31 Tua ahikom Jesus in, ama a umte munah, “Ka hilciannate na ni uh le, ka nungzui tatakte na hi uh hi; 32 thumaan thutak na he tu a, tua thumaan thutak in no hong suaktasak tu hi,” ci hi. 33 Amate in, “Ko in Abraham suante hi a, kuama ii sila hi ngei ngawl khu hi. Tua hi a, ‘Na suakta tu uh hi’ na ci sia bang na ci nopna ziam,” ci in zo hi. 34 Jesus in, “A maan takin kong ci ciang, a kuama po mawna a vawt theampo in mawna ii sila ahi hi. 35 Sila khat sia baangkua khat ii neisa hi tawntung ngawl hi, ahihang tapa khat ahile baangkua khat ii neisa hi tawntung hi. 36 Tapa in hong suaktasak le na suakta takpi tu uh hi, 37 Abraham suan le paalte na hi uh sia kong he hi. Tua hi ka sap kei hong thatlum nuamin hanciam nu hi, banghangziam cile ka hilcianna na saang thei bua tu uh hi. 38 Kei sia ka Pa ii hong lak bang teng ka pau a, no sia na pa uh hong sawl teng na seam uh hi,” ci hi. 39 Amate in, “Ko ii pa sia Abraham hi,” ci in zo uh hi. Jesus in, “Abraham ii tate hi takpi leute, ama ii vawt teng ma vawt tu nu hi. 40 Pathian tung pan ka zaak thumaan sia ma kong son hi bek napi, hong thatlum nuamin hanciam nu hi. Abraham sia hi bangin ngamta ngawl hi! 41 Note in, na pa sep teng naseam uh hi,” ci in zokik hi. “Pathian bekma, kote ii khat bek ka nei ka Pa uh hi a, tuaciangin ko sia ama tate tatak ka hi uh hi,” ci in amate in zo uh hi. 42 Jesus in, “Pathian sia na Pa uh ahi takpi le kei nong it natu ahi hi, banghangziam cile, Pathian kung panin kong pai a, tu in hi munah ka om hi. Keima aituam thuneina taw hong pai ka hi bua a, ama ii hong sawl ka hi hi. 43 Ka son teng banghangin tel ngawl nu ziam? Banghangziam cile kong thu puak sia na ngai zawk ngawl uh hang ahi hi. 44 No sia na pa uh doaimangpa ii tate na hi uh a, tuaciangin na pa uh deinate na zui nuam uh hi. A kipatciil pan kipan, ama sia mi thatpa hi a, thumaan sangah a pang ngei bua hi, banghangziam cile, ama sungah thumaan thutak a om bua hi. Ama in leilot thu a son ciangin, ama pianzia bangin pau ahi lel hi, banghangziam cile, ama sia leilot thei pa hi a, leilotna theampo ii a pa ahi hi.” ci hi. 45 Ahihang kei in thumaan kong son hi, tua hu in nong um bua uh hi. 46 No sungah akua in kei sia mawnei hi ci in hong lak thei tu nu ziam? Thumaan a son ka hi nale, banghangin hong um ngawl nu ziam? 47 Pathian kung pan hong pai pa in, Pathian kammalte ngai hi. Ahizong no sia Pathian kung pan na hi bua uh a, tua hu in hong ngai nuam ngawl tu nu hi,” ci hi.
Jesus le Abraham
48 Amate in Jesus munah, “Nang sia Samaria mi hi a, doai vei ni hi kong ci uh sia, maan hi ngawl khu ziam,” ci uh hi. 49 Jesus in, “Doai vei ngawl khi hi, ka Pa ka thasia hi, ahihang note in kei nong thasia bua uh hi. 50 Keima atu in patoaina ka zong bua hi. Ahihang tuabangin zong a, kei hong panpui in thu a khen khat om hi. 51 A maan takin kong ci hi: a kuama po ka hilcianna a nite, a thi ngei buatu hi,” ci in zo hi. 52 Amate in, “Tu in nang sia doai vei na hi hunlam kong telcian uh hi! Abraham thi a, kamsangte zongh thi hi, tua hi napi na hilcianna a nite peuma thi ngei ngawl tu hi, ci ni hi. 53 Ih pa Abraham thi zo hi; Abraham sangin lianzaw khi hi a ci nuam na hi bua na ziam? Tuaciangin kamsangte zongh thi zo hi. Nang akua kisa ni ziam,” ci uh hi. 54 Jesus in, “Keima le keima ki thupisak tu hi leng, tua ki thupisakna sia, bangma manh nei ngawl tu hi. Kei hong thupisak sia in ka Pa hi a, ka Pathian uh hi, na ci sia pa ma ahi hi. 55 No sia ama na he ngei bua uh hi, ahihang kei in ka he hi. Ama he ngawl khi hi, ci tu hi leng, noma bangma in a leilot ka suak tu hi. Ahihang ama ka heak hi a, tuaciangin ama ii thu ka ni hi. 56 Na pa uh Abraham in kong pai hun a mu tu sia lawp hi; ama in mu zo a, a lungdam hi,” ci in zo hi. 57 Amate in ama munah, “Nang kum sawmnga zongh pha ngawl lai ni hi — Abraham sia mu zo ni ziam?” ci uh hi. 58 A maan takin kong ci hi, “Abraham pian ma in, ‘Keima’ ka om zo hi,” ci in Jesus in zokik hi. 59 Tuasia ciangin, amate in a den natu suangte zam ahihang Jesus kiheam a, Biakinnpi nusia hi.
Jesus in Mittaw sa a Suak khat Damsak
1 Jesus in lam a papai laitakin, mittaw sa a, a suak, pasal khat mu hi. 2 A nungzuite in, “Syapa awng, akua mawna hangin, ama mittaw sa a suaksak ziam? Ama mawna hang ziam maw, a nu a pate ii mawna hang ziam,” ci in ama dongh uh hi. 3 “Ama mawnate hang ahizong, a nu a pa mawnate hang ahizong, a mittaw hi ngawl hi. Pathian vaangletna ii nasepna ama sungah a kimu thei natu in a mittaw hi. 4 Sun hun laiteng in kei hong sawlpa na ih sep kul tu hi; kuama ii na a sep thei ngawl zan hun hong theng tu hi. 5 Leitung ah ka om laiteng, leitung atu in khuavak ka hi hi,” ci in zo hi. 6 Hi bangin a ci zawkciang, Jesus in lei ah cilsia a, ciltee taw buan thau hi; ama in mittawpa ii mit buan noisak a, 7 tuaciang, “Pai tan a, Siloam Tuicing ah na mai phiat tan,” ci hi. (Siloam cisia “Kisawl” a ci nopna hi). Tua ahikom mittawpa pai in, a mai a phia zawkciang, khuamu thei sa in hong heak kik hi. 8 Tuasia ciangin a innpaamte le ama khutdaw ngenin a omlai a mu ngeite in, “Hisia pa sia khutdaw ngenin a to bul pa hi ngawl ziam?” ci uh hi. 9 Pawlkhat in, “Ama hi peu hi,” ci hi, ahihang a dangte in “Ama hi ngawl hi; a kibanpui khat hi bek hi,” ci uh hi. Tua ahikom pasalpa in, “Keima in tuasia pa khi hi,” ci hi. 10 “Tu in khua na mu thei sia bangbang tatak ziam?” ci in amate in dongh uh hi. 11 Ama in “Jesus a kici pa in buan tawm vawt a, ka mitte hong noisak zawkciang, Siloam ah na maiphiat tan, hong ci hi. Tua ahikom, pai a, ka mai ka phia zawk po ciangin, khua ka mu thei hi,” ci in zo hi. 12 Amate in “Ama koisung ah om ziam,” ci in dongh uh hi. Ama in “He ngawl khi hi,” ci hi.
Phariseete in A Damna Thu kan
13 Tuaciang amate in a mittaw ngeipa sia, Phariseete kungah paipui uh hi. 14 Jesus in buan vawt a mittawpa a damsak ni sia Sabbath ni ahi hi. 15 Tuasia ciang Phariseete in a mit khua a mu kik theina thu, pasalpa munah dongh kik uh hi. “Ama in ka mite buan hong noisak hi; ka mai ka phiat a, tu in khua ka mu thei hi,” ci in ama in zo hi. 16 Phariseete pawlkhat in, “Hi bang a vawt, mihing in, Pathian kung pan hi thei ngawl tu hi, banghangziam cile ama in Sabbath Thukham ni ngawl hi,” ci uh hi. Ahizong a dangte in, “Bangbangin mawnei mi khat in, hi bang nalamdang laknate vawt thei tu ziam,” ci uh hi. Tuaciangin amate sungah pawl kikhenna khat hong om hi. 17 Tua ahikom, Phariseete in pasalpa khatvei ma dongh kik uh hi. “Ama in na khuamu ngawlna pan hong damsak hi, ci ni hi — ama huvau bangbangin na ngaisun ziam?” “Ama kamsang khat hi,” ci in pasalpa in zokik hi. 18 Jew thuneite in, bang po ahizong hisia pa mittaw a, tu in khuamu thei hi ci thu, a pa le a nu samin a dok phot ngawl peuma in a um nuam bua uh hi; 19 tuaciangin,“Hisia na tapa ahi ziam? Ama mittaw sa in suak hi ci nu hi; tua ahile tu in bangbang khua mu thei ziam?” ci in dongh uh hi. 20 A pa le a nu in “Ama ka tapa uh hi a, tuaciangin mittaw sa in suak ci sia he khu hi. 21 Ahihang bangbangin tu in khua mu thei a, akua in damsak ziam ci zongh ka he bua uh hi. Ama dongh vun; a khan haam zo hi, ama ii thu ama in hong zo thei hi!” ci uh hi. 22 Jew biakna thuneite ii lungkimna sa khat om a, a kuama po Jesus sia Messiah hi ci in a um peuma, synagogue sung pan kihawlkhia tu hi, ci ahikom amate in Jew biakna thuneite a kiitak hu in, a nu le a pa hi bangin ci ahi hi. 23 Tua hangin, “Ama a khan haam zo hi, ama dongh vun!” a nu le a pa in ci hi. 24 Mittaw sa a suakpa sia, a nii veina sam kik uh a, ama tungah, “Thumaan ka son tu hi, ci in Pathian mai ah kiciam in! Nang hong damsak pa sia, mimaw khat hi ci in he khu hi,” ci uh hi. 25 “Ama mimaw ahile ahi ngawl he ngawl khi hi. Ka heak thu khat sia: ka mittaw ngei a, tu in khua ka mu hi,” ci in zokik hi. 26 “Ama in bang hong law ziam? Na khua mu ngawlna pan, bangbangin hong damsak ziam?” ci in dongh uh hi. 27 “Kong son zo a, noma in nong ngai bua uh hi. Banghangin za kikik nuam nu ziam? No zongh ama nungzuite suak nuam nu ziam?” ci in ama in zo hi. 28 Amate in ama lang a,“Tuasia pa nungzui sia nangma ni hi; ko sia Moses ii nungzuite khu hi. 29 Pathian in Moses paupui hi, ci in he khu hi; ahizong ziasia pa ahile koisung pan hong pai ziam, ci sia he beak ngawl khu hi!” ci uh hi. 30 Tua pa in, “Bangza in a lamdang thu ziam! Ama koisung pan hong pai ziam ci in he ngawl nu hi, ahihang ama in kei sia ka khua mu ngawlna pan hong damsak zo hi. 31 Pathian in mimawte ii ngetna ngai ngawl hi, ci in ih he hi; ama in ama zakta a, a sawlna bang a seamte ngetna bek ngai hi. 32 Simlei pianciil pan kipan, mittaw sa in a suak khat sia khua muna a pia kuama ii thu kiza ngei ngawl hi. 33 Hisia pa Pathian kung pan hong pai hi buale, bangma vawt thei ngawl tu hi,” ci in zo hi. 34 Amate in, “Nang sia mawna sungah suak a, mawna sung ma a khangto ni hi — ko hong hil tu in hanciam ni ziam?” ci in zo uh hi. Tuaciangin amate in ama synagogue panin hawlkhia uh hi.
Thaa Thu ah Mittaw
35 Jesus in bang thu teng piang ci in a zaak zawkciang, tuasia pa mu a, “Mihing Tapa na um ziam,” ci in dongh hi. 36 “Syapa awng, ka up thei natu in ama akua ziam hong son tan,” ci in zo hi. 37 Jesus in, “Ama mu zo ni hi, ama sia tu laitak nangma taw a kipaupui pa ma ahi hi,” ci hi. 38 “Ka um hi, Topa awng!” ci in Jesus mai ah ama khupdin hi. 39 Jesus in, “Mittawte khua a mu natu le khuamute mittaw a sua natu in, hi leitung ah thukhen tu in kong pai hi,” ci hi. 40 Ama kung a om Pharisee mi pawlkhat in, tu bang a pau za a, “Koma zongh mittaw hi hong ci nuam na hi bua na ziam?” ci in dongh uh hi. 41 Jesus in, “Mittaw hizaw le uh te, a maw ngawl hi tu nu hi; ahihang khuamu thei khu hi, ci na hi uh kom, a maw nginge hi lai nu hi,” ci hi.
Tuucingpa Thusonteena
1 Jesus in, “A tatak in kong ci hi: tuukhawk sungah a kongpi pan tum ngawlin leidang pan kaato a, a tum sia nguta le ngualsuam phalakte ahi hi. 2 Kongpi pan a tum sia in, tuucingpa ahi hi. 3 Kongkha cingpa in ama atu kongkha honsak hi; ama neisa tuute a min taw a sam ciangin a tuute in ama aw a za uh hi, tuaciang ama in, a tuute lampui in pusua pui hi. 4 A tuute a pusuasak zawkciang, ama in a mai ah pai in, tuute in a nung zui uh hi, banghangziam cile a tuute in a aw tel uh hi. 5 A tuute in ngualdang khat zui ngawl tu uh hi; tuabang mihing dang khat ii kung panin a tuute taikeak zaw tu hi, banghangziam cile tuute in tua pa aw a tel bua uh hi,” ci hi. 6 Jesus in hi thu sonteena son ahihang, amate in bang ci nuam ziam, a tel zo bua uh hi.
Tuucing Pha Jesus
7 Tua ahikom Jesus in hi bangin ci kik hi. “A tatak in kong ci hi: Kei sia tuute ii kongpi ka hi hi. 8 Kei mai a hong pai sa theampo sia ngutate le phalakte ahi uh hi, ahihang tuute in, amate aw a ngai bua uh hi. 9 Keima in kongpi ka hi hi. A kuama po kei hong tawnin a tumte kingum tu hi; amate sungtang si, pusuak si tu a, nganthana mun mu tu hi. 10 Ngutapa ahile a ngu tu, a that tu le a susia tu bekma hong pai hi. Kei kong paina sia, nuntakna na nga natu uh le a kicing nuntakna na nga thei natu uh ahi hi. 11 “Keima in tuute atu in a nuntakna a pia ngam tuucing pha ka hi hi. 12 Tuu neipa a hi ngawl, a kicial tawm tuucingpa ahile ngiapui hong pai a mu ciangin, a tuute nusia in taisan hi; tua ahikom ngiapui in a tuute man a, kithethaangsak hi. 13 A kicial tawm pa banghangin tai ziam cile, ama sia a kicialtawm hi bek a, tuute a awlmawk bua hi. 14-15 Keima in tuucing pha ka hi hi. Pa in kei hong heak bangma in kei zongh in Pa ka he hi, tuasia bangma in ka tuute ka he a, amate in kei hong he uh hi. Amate atu in ka nuntakna ka pia ngam hi. 16 Hi tuukhawk sung a om ngawl keima neisa tuu dangte zongh omlai hi. Tuate zongh ka paipui kul hi; amate in ka aw hong ngai tu a, tuucingpa khat ii a cin tuuhon khat suak tu uh hi. 17 “Ka nuntakna ka nga kik natu in, keima nuntakna pia ngam ka hikomin, Pa in kei hong it hi. 18 Kuama in kei kung pan ka nuntakna hong laaksak bua hi. Keima uuk thu in ka piak ahi hi. Ka piak tu le ka laak kik tu sia keima thu ahi hi. Hisia in ka Pa ii ka sep tu hong thupiak ahi hi,” ci hi. 19 Tuaciang hi kammalte hu in mihingte sungah kikhenna om leleau hi. 20 Amate sung pan tam mama in, “Ama doaivei hi! Ama a thin am hi! Banghangin a thuson ngangai nu ziam?” ci uh hi. 21 Ahihang a dangte in, “Doaivei pa khat in hi bangin thuson thei ngawl hi! Banghang doai khat in mittawte khua mu kiksak thei tu ziam,” ci uh hi.
Jesus Kisaang ngawl
22 Phalbi hun hi a, Biakinnpi Aapna Poai Jerusalem ah kivawt sung ahi hi. 23 Jesus sia Biakinn huang sung Solomon Talap sungah a vavak laitakin, 24 mihingte a kiim ah hong kikhawm uh a, amate in, “Bangtan vei thinngim hong pia tu ni ziam? Thumaan tatak sia hong son tan: nangma sia Messiah na hi ziam,” ci uh hi. 25 Jesus in “Hong son zo khi hi, ahihang kei hong um nuam ngawl hi tu nu hi. Ka Pa thuneina taw ka septe in keima luangin pau hi; 26 ahihang nong um bua tu uh hi, banghangziam cile note in ka tuute na hi bua uh hi, 27 Ka tuute in ka aw hong ngai hi; amate ka he a, amate in ka nung hong zui uh hi. 28 Amate tawntung nuntakna ka pia a, tuaciangin amate a thi ngei nawn buatu hi. Kuama in ka kung pan amate hong sut zo buatu hi. 29 Ka Pa hong piak sia na theampo sangin thupi zaw a, kuama in Pa ii kepcingna sung panin a sut zo buatu hi. 30 “Pa le keima in pumkhat ka hi uh hi,” ci in zo hi. 31 Tuaciang mihingte in ama a den natu suang tawm kik uh hi. 32 “Ka Pa ii sep tu hong piak na pha tam mama noma mai ah kong seam zo hi; tuate sung pan koi sia ka sep hu in, suang taw den hong sawm nu ziam?” Jesus in ci hi. 33 Amate in “Na pha khat pawpo nasep hu in, hong deang nuam hi ngawl khu hi. Ahihang Pathian min na daisak hu in suang taw hong deang nuam khu hi! Nang sia mihing ma hi napi nangma le nangma Pathian in kivawt tu na hanciam hi,” ci in zo kik uh hi. 34 Jesus in “Na Thukham sungah ki at a, Pathian in ‘Note sia pathiante hi nu hi’, hong ci hi. 35 Laithiangtho ii ci sia a tawntungin maan hi, ci in ih he hi; tuaciang Pathian ii thupuak a nga tua mite sia 'pathiante' ci hi. 36 Kei ka hile Pa in hong teal a, leitung ah hong paisak hi. Tua ahile, Pathian Tapa khi hi ka ci ciang, bangbangin Pathian min daisak hi hong ci thei nu ziam? 37 Pa ii seam a hong oaite seam ngawl ka hile, tuasia ciangin hong um heak vun. 38 Ahihang tuate ma ka seam nale, Pa sia kei sung om a, kei sia Pa sungah om ka hina thu na up thei natu in, kei nong um bua uh zong, ka septe beak na up tu uh ahi hi,” ci in zo hi. 39 Khat vei ma amate in Jesus man tu in hanciam ahihang, amate khut taw kipeal hi. 40 Tua zawkciang Jesus in, Jordan ngun kantan in John ii tuiphumna munah pai kik a, tua munah taam hi. 41 Mihing tam mama ama kungah hong pai uh hi. Amate in, “John in nalamdang laknate vawt ngawl hi. Ahihang hisia pa thu ama son theampo maan hi,” ci uh hi. 42 Tuaciang in, tua munah a om mihing tam mama in ama um uh hi.
Lazarus Thina
1 Bethany ah a teang Lazarus a kici pa a cina hi. Tua Bethany sia Mary le a suapuinu Martha ii teenna khua ahi hi. 2 (Hi Mary sia Topa ii peang tungah sathau namtui buak a, a sam taw a nawlsak sia nu ahi hi. A cina Lazarus sia ama ii suapuipa ahi hi.) 3 Unau numeite nii in Jesus tungah zasak a, “Topa awng, na it na lawmpa a cina hi,” ci uh hi. 4 Jesus in a zaak ciangin, “Hi natna sia Lazarus ii thi natu natna hi ngawl hi; hi thu in Pathian minthan natu a piang hi a, tuaciang, tua tungtawnin Pathian Tapa ii minthanna a nga natu ahi hi,” ci hi. 5 Martha, a suapuinu le Lazarus te sia Jesus in it hi. 6 Tua hi napi Lazarus ii natna thu a zaak zawk zong, ama omna tua munah ni nii taam lai hi. 7 Tua zawkciang a nungzuite munah, “Judea ngamah pai kik tawng,” ci hi. 8 A nungzuite in, “Syapa awng, tu nung hiat ma in, tua munah mihingte in suang taw hong deang nuam zo hi; pai kik sawm lai ni ziam?” ci in zo uh hi. 9 Jesus in, “Ni khat sungin, nai sawm le nai nii om hi kana ngawl ziam? Tua ahikom, a kuama po sun tangin a vak peuma in lutu ngawl hi, banghangziam cile ama in hi leitung khuavak mu hi. 10 Ahihang ama in zan in a vak le lutu tu hi, banghangziam cile ama in khuavak nei ngawl hi,” ci hi. 11 Jesus in hi teng ci a, tua zawkciang, “Ih lawmpa Lazarus mutthip zo hi, ahihang pai in ka phong tu hi,” ci lai hi. 12 Nungzuite in, “Topa awng, ama mutthip ahile a cidam tu hi,” ci in zo uh hi. 13 Jesus in Lazarus thi zo hi a ci nopna ahihang amate in mut ngeina bang sia son sa uh hi. 14 Tua ahikom, Jesus in thiang takin, “Lazarus thi zo hi, 15 ahihang, no atu ka ngaisut ciang, na up thei natu in, ama taw ka omkhop ngawl sia ka lungdam hi. Ama kungah ih pai tu hi,” ci hi. 16 Thomas (Apeang cina) in, nungzui pui te munah, “Ama taw ih thi khop thei natu in Syapa taw tek tawng!” ci hi.
Thawkikna le Nuntakna ahi Jesus
17 Jesus hong thet ciang, Lazarus a kivui zawk ni li pha zo, ci in mu hi. 18 Bethany sia Jerusalem panin kilometre 3 zongh a pha bua hi, 19 tuaciangin, Judea mi tam mama Martha le Mary taw kimu tu in pai a, amate ii suapuipa thi hu in heeneam tu in pai uh hi. 20 Martha in Jesus hong pai hi ci in a zaak ciang, ama muak tu in pusuak hi, Mary ahile inn sungah om hi. 21 Martha in Jesus munah, “Topa awng, hi sungah hong om hile te, ka suapuipa thi ngawl tu hi!” ci hi. 22 “Ahizong tu mama zongin, Pathian tungah na nget pawpo hong pia tu, ci in ka he hi,” ci hi. 23 “Na suapuipa sia nuntakna sungah tho tu hi,” Jesus in ci hi. 24 “Ni tawpkhak ni ciang ama nuntakna sungah tho tu hi, ci in ka he hi,” Martha in ci hi. 25 Tua nu munah Jesus in, “Keima in thawkikna le nuntakna ka hi hi. Kei hong um peuma a thi zongin a nungta tu hi; 26 tuaciang kei hong um a, a nungta theampo a thi ngei buatu hi. Hi thu na um ziam,” ci hi. 27 Ama in, “Um khi hi, Topa awng! Leitung ah hong pai tu, Pathian Tapa Messiah na hi sia hong um khi hi,” ci in zo hi.
Jesus Kap
28 Martha in hi teng a ci zawkciang heak kik in, a suapuinu Mary sam tuam hi. “Syapa hi sungah om hi, ama in nang hong kan hi,” ci in son hi. 29 Mary in hi thu a zaak ciang dingto a, ama taw kisi tu in manlang tak pai hi. 30 (Jesus khua sung hong theng ngawl lai a, Martha taw a kimuna munah omlai hi.) 31 Mary heneam a innsung a omte in ama dingin manlang tak pusuak a mu uh ciang ama zui uh hi. Thaan ah a kap tu in pai tu hi vak ci in ngaisun uh hi. 32 Jesus omna ah Mary theng hi, ama a mu po ciangin, a peang ah bok hi. Ama in “Topa awng, hi sungah hong om hile te ka suapuipa thi ngawl tu hi!” ci hi. 33 Jesus in ama kakap a, ama taw a om mihingte zongh, kakap in a om mu hi; a thin hong suu a, khuangai mama hi. 34 “Ama koisung ah phum nu ziam?” ci in dongh hi. Amate in “Topa awng, hong pai in hong en tan,” ci in zo uh hi. 35 Jesus kap hi. 36 Mihingte in, “En vun, bangza in ama it ziam!” ci uh hi. 37 Ahihang amate sung pan pawlkhat in, “Mittawpa zongh khuamusak hi ngawl ziam? Lazarus sia a thi natu pan keam thei ngawl ziam?” ci uh hi.
Lazarus Nungtasak
38 Jesus hong khuangai kik mama a, suanghawng khat ii kongvang ah suangtum khat taw a kikhak thaan khat ah pai hi. 39 “A suang lakeak vun!” ci in Jesus in thu pia hi. Mithipa suapuinu Martha in “Topa awng, uih zo tu hi. Ama a kiphum zawk ni li pha zo hi,” ci in zo hi. 40 Jesus in ama munah, “Na um le Pathian vminthanna na mu tu hi ci in hong son hi ngawl khi ziam?” ci hi. 41 Amate in suangtum lakeak uh hi. Jesus in khuadak to a, “Pa awng, ka thu nong ngai hu in lungdam kong ko hi. 42 Nong ngai tawntung hi, ci in kong he hi, ahizong tu bangin ka ci sia hi sungah om mihingte atu in kei nong sawl ahi hunlam a up thei natu ka deina ahi hi,” ci hi. 43 Hi bang teng a ci zawkciang, awnging tatak taw au in, “Lazarus awng, hong pusuak tan!” ci hi. 44 Ama hong pusuak a, a khut le a peangte thaanpuan taw kitun in, a maitang puan khat taw kituam hi. “Phelsak vun, ama paisak vun,” ci in Jesus in sawl hi.
Jesus Thalup A kisawmna
45 Mary kungah haw tu a pai mihing tam mama in Jesus vawt teng mu uh a, ama um uh hi. 46 Ahihang pawlkhat Phariseete kungah heak kikin, Jesus sep teng ko uh hi. 47 Tua ahikom Pharisee te le thiampi liante Council taw kisitua in, “Bang law tu hi ziam? Hisia pa ii nalamdang lakna a vawt theampo en vun! 48 Hi bangin ama ih tha thong le, mihing theampo in ama um tu a, Rome thuneite in ih Biakinn le ih minam hong susia tu hi,” ci uh hi. 49 Amate sung pan tua kumin Thiampi Lianbel ahi Caiaphas kici sia in “Bang mawmawt nu ziam! 50 Minam bup ii lal tu taangin, pasal khat sia mihingte atu thi le note atu phazaw ahi hunlam phawk ngawl nu ziam?” ci hi. 51 A tatak sia ama uuk thu taw, hi bangin pau ahi bua hi; tua taangin, ama tua kum sung Thiampi Lianbel ahi bangma, Jesus sia Jew mite atu in thi tu ci sia a son khol ahi zaw hi, 52 tuaciang, amate atu bek hi ngawlin, Pathian mihing a kithethaang theampo pumkhat suak tu in kaikhop natu zongh a sonkhol ahi hi. 53 Tua ni pan kipan Jew thuneite in Jesus a thalup natu, ngealnate nei uh hi. 54 Tua ahikom Jesus, Judea ngam ah a kilangh takin, khualhaw nawn ngawl hi, ahihang tua mun nusia a, senneal ngam nai Ephraim a kici khua khat ah pai in, a nungzuite taw taam hi. 55 Paisan Poai hun hong nai a, poai hun maa in ngamsung pan mihing tam mama kithiansua zeksa vawt tu in, Jerusalem ah pai uh hi. 56 Amate in Jesus zawzong uh hi, tuaciang, Biakinnpi sungah a kikhoptua uh laitakin khat le khat, “Bang na ngaisun uh ziam? Poai sungah hong pai ngawl het tu hi ngawl ziam?” ci in kidongh uh hi. 57 Thiampi liante le Phariseete in Jesus a kimat thei natu in ama omna a he a om le thu hong puak nanak tu nu hi, ci in thupia uh hi.
Jesus Bethany ah Sathau Kinoai
1 Paisan Poai tu ni luk a kisap ciangin, Bethany ah Jesus pai a, thina pan a thawsak Lazarus ii inn ah tung hi. 2 Amate in ama atu nitak an tua munah huansak uh hi. Martha in anhuan hu hi; Lazarus sia Jesus taw sabuai kiim ah a tokhawmte sungah khat hi. 3 Tua zawkciang Mary in a manham mama nard sathau namtui litre lang hong paipui a, Jesus peang tungah buakin, a sam taw nawlsak hi. Sathau namtui in innsung bup zel hi. 4 Jesus nungzuite khat ahi Judas Iscariot — ama a leeheak tu pa — in, 5 “Banghang in sathau namtui sia ngun dangka zathum taw zuakin mizawngte kipia ngawl ziam?” ci in dongh hi. 6 Ama hi bang a pau sia a zawngte awlmaw takpi hi ngawl a, ngutapa khat ahihang ahi hi. Ama in sumip keam a, sumte ama atu in a laku tawntung pa ahi hi. 7 Ahihang Jesus in, “Ama koi po vun! Ka kiphum ni ciang atu in, ama ii neisunte keamsak po vun. 8 Mizawngte sia no taw omkhawm tawntung tu hi, ahihang no taw kei omkhawm tawntung ngawl tu khi hi,” ci hi.
Lazarus A Kithasawmna
9 Bethany ah Jesus om hi ci in a za mihing tam mama te in tua munah hong pai uh sia Jesus hang bek zongh hi ngawlin, thina pan Jesus ii a thawsak Lazarus mu nuam a, hong pai ahi uh hi. 10 Tua ahikom thiampi liante in Lazarus zongh thalup natu vaihawmna nei uh hi, 11 banghangziam cile ama tung thupiang hu in Jew mi tam mama te in amate nial a, Jesus um uh hi.
Jerusalem ah Mualsuana taw Tumna
12 A zing ciangin Paisan Poai siim tu hong pai mihonpi in, Jerusalem khua ah Jesus hong pai tu thu za uh hi. 13 Tua ahikom amate in palm thingbaakte la in, ama muak tu in pai uh a, “Pathian pok vun! Topa min taw hong paipa, Pathian in thupha pia tahen! Pathian in Israel Kumpipa thupha pia tahen!” ci in au uh hi. 14 Jesus in laa khat mu in a tungah to hi, Laithiangtho in hibang in a at sia a tangtun natu ahi hi. 15 “Zion khuapi awng lau heak in! Hi sungah na kumpipa hong pai a, laano tungah to hi.” 16 A nungzuite in hi thu sia tua hun laitakin a tel bua uh hi; ahihang Jesus minthanna sungah a thawtosak ciangin, Laithiangtho in ama huvau, hi bangin at a, amate in hi bangin ama atu in vawt hi, ci sia phawk kik uh hi. 17 Lazarus thaan sung pan sam a, thina pan a thawsak lai in, Jesus taw a omkhawm mihingte in bang thu piang ci thu kiko tek uh hi. 18 Tuasia hu in mihon in ama muak uh hi — banghangziam cile hi nalamdang a vawt sia amate in za zo uh hi. 19 Phariseete in khat le khat, “Na mu bang hi, eite in ih zo zo peuma bua hi! En vun, leitung bup in ama zuzui zo hi!” ci uh hi.
Greek te Pawlkhat in Jesus Zong
20 Jerusalem ah poai sung teng biakpiakna nei tu in a paite sungah Greek te pawlkhat om hi. 21 Amate in Philip (Galilee ngam Bethsaida khua mi) kungah pai in, “Syapa awng, ko Jesus mu nuam khu hi,” ci uh hi. 22 Philip pai in Andrew kungah a son zawkciang, a nii in pai a Jesus munah son uh hi. 23 Jesus in, “Tu in Mihing Tapa ii a lian minthanna a saan tu hun hong tung zo hi. 24 A tatakin kong ci hi: zungtaang tang khat lei ah taak a, a thi phot buale tang khat nguak hi top hi. A thi le a tang tam piangsak hi. 25 A kuama po ama ii nuntakna a it sia in taan tu hi; ama ii nuntakna hi leitung ah a ngaimaw peuma in, tawntung nuntakna a keam ahi tu hi. 26 Ka naseam pa sia keima omna po ah keima taw a om tu in, kei atu hong sepsak nuam peuma in kei hong zui kul tu hi. Tuaciang kei atu a seam khat pawpo sia ka Pa in patoai tu hi.
Jesus in A Thi natu Son
27 “Tu in ka thinngim hi — tua hi a, bang son tu khi ziam? ‘Pa awng, hi hun sia kei tungah hong tungsak heak in,’ ci tu khi ziam? Ahihang kong paina thu in hi thuakna hun a nawk tu ma in hong pai ka hi hi. 28 Pa awng, nangma min thangsak in!” ci hi. Tuaciang vantung pan aw nging khat in, “Minthangsak zo khi hi, tuaciang in minthangsak lai tu khi hi,” ci hi. 29 Tua munah ding mihonte in tua awnging za a, amate sung pan pawlkhat in vanto hi ci a, a dangte in, “Vantung lalang khat in ama paupui hi!” ci uh hi. 30 Ahihang Jesus in, “Hi aw sia kei atu hi ngawlin no atu in hong nging ahi hi. 31 Tu hun sia hi leitung ii thukhen thuak tu hun ahi hi; tu in hi leitung a ukpa kisuanthal tu hi. 32 Leitung pan hong kilapto ciangin mihing theampo ka kungah ka kai tu hi,” ci hi. 33 (Hi bangin a pau sia ama thuak tu thina zia a sonna ahi hi.) 34 Mihonpi in “Ih Thukham in Messiah nungta tawntung tu in hong son hi. Tua ahile bangbang in Mihing Tapa kilaamto tu hi, ci thei ni ziam? Hi Mihing Tapa sia akua ziam?” ci in zo uh hi. 35 Jesus in zokik a, “Khuavak sia no sungah tawmvei hong om lai tu hi. Khuazing sia no tungah hong thet man ngawl natu in, khuavak na nei uh laitakin, na paina lampi ah paisuak tavun; banghangziam cile khuazing sungah a pai khat in a zot natu mun a he bua hi. 36 Tuaciang khuavak na nei uh laitak, khuavak ii mihingte na sua natu in, khuavak na um vun,” ci hi.
Mihingte Thu Up thei ngawlzia
Jesus in hi teng a ci zawkciang amate paisan in kiheam hi. 37 Nalamdang lakna hi zaata amate mai ah vawt zo hi napi amate in ama a um bua uh hi, 38 Tua in kamsangpa Isaiah ii sonna teng a tun natu ahi hi: “Topa awng, ko ii son thu sia akua in um na ziam? Topa in a kuate tungah a vaangletna pualaak ziam?” 39 Tua ahikom amate in um zo ngawl hi, banghangziam cile Isaiah in hi bangin ci lai hi, 40 “Pathian in amate ii mit tawsak a, a thinsung khacipsak hi, tua in a mit khua amu ngawl natu, a thinsung taw a tel ngawl natu, tuaciang amate in kei kungah hong heak kik in, keima ii amate kadam sakna tu ahi hi, Pathian in ci hi.” 41 Isaiah ii hi bangin a ci sia Jesus ii vaangletna mu a, ama huvau a son hang ahi hi. 42 Tua zawk ngawngawn ciang zong Jew thuneite tam mama in Jesus um uh hi; ahihang Phariseete ii synagogue pan amate a hawlkeak ngawl natu in, a kilangh taakin a upna thu a son ngam bua uh hi. 43 Amate in, Pathian ii lungkimna sangin, mihingte lungkimna dei zaw uh hi.
Jesus Kammal taw Thukhenna
44 Jesus in awnging takin, “A kuama po kei hong umte in kei bek hong um hi ngawl a, kei hong sawlpa zongh um ahi hi. 45 A kuama po kei hong mu te in kei hong sawlpa zongh a mu ahi hi. 46 Kei hong um peuma khuazing sungah a omcip ngawl natu in leitung ah khuavak bangin kong pai zo hi. 47 Kong thupuak sia za napi a ni ngawlte tungah thu ka khen buatu hi. Leitung ngum tu in kong pai a, a tungah thukhen tu in kong pai bua hi. 48 Kei hong nial a, kong thupuak a saang ngawl peuma ama tungah thukhen tu khat a nei hi. Ka pau sa kammal te in ni tawpkhak ni ciangin ama ii thukhenpa hi tu hi! 49 Hi thu in thumaan hi, banghangziam cile keima aituam thu neina taw ka pau bua hi, ahihang kei hongsawl Pa in ka son tu le ka pau tu thu hong pia hi. 50 Tuaciangin ama ii thupiakna in tawntung nuntakna hong puak hunlam ka he hi. Tua ahiciang ka thuson teng sia Pa ii son a hong sawl teng ahi hi,” ci hi.
Jesus in Ama Nungzuite Peang Silsak
1 Tu in Paisan Poai vawt tu ni khat samh lai hi. Jesus in leitung nusia in, Pa kung a pai natu hun hong thet sia he hi. Ama neisa leitung mihingte it tawntung a, a tawp dongin it hi. 2 Jesus le a nungzuite nitak an nekhawm uh hi. Simon Iscariot ii tapa Judas thin sungah Jesus leeheak tu ngaisutna Doaimangpa in khum zo hi. 3 Jesus in Pa ii vaangletna a cingin ama tungah a piak sia he hi; ama in Pathian kung pan hong pai a, Pathian kung a zot kik tu hunlam he hi. 4 Tua ahikom sabuai pan dingin a puan tungsilh a suut zawkciang a kawng ah dial khat vet hi. 5 Tua zawkciang kuang khat sungah tui a khomkhat sung a, nungzuite peang silsak tu le, a kawng a dial sia taw nawlsak tu in kipan hi. 6 Simon Peter kung hong thet ciangin, “Kei peang hong silsak tu ni ziam? Topa awng,” ci hi. 7 Jesus in “Tu a ka sep sia tu laitakin tel ngawl na hi uh hang nidang ciangin na tel tu uh hi,” ci in zo hi. 8 Peter in “Bang hun po ahizong kei peang hong silsak ngei ngawl tu ni hi!” ci hi. “Na peang ka sil buale ka nungzui na hi nawn buatu hi,” ci in Jesus in zokik hi. 9 Simon Peter in, “Tua ahile Topa awng, ka peang bek hong silsak heak in! Ka khut le ka lu zongh hong silsak tan!” ci hi. 10 Jesus in, “A kibual sa pawpo sia thiang siat a, a peang sim ngawl sil a kul bua hi. No teng sungah khat sim ngawl thiangtho nu hi,” ci hi. 11 (Jesus in ama a leeheak tu pa sia he zo hi; tua hu in, “Khat sim ngawl thiangtho nu hi” ci hi.) 12 Jesus in a peang uh a silsak zawkciang a puantungsilh silh kikin a tona ngei sabuai ah to kik hi, “Tu a, no tung a kong vawt teng na tel uh ziam?” ci in dongh hi. 13 “Sya awng, Topa awng, hong ci nu hi, tuabang nong ci uh sia maan hi, banghangziam cile keima tuasia ka hi hi. 14 Kei na Topa le na Syapa in na peang uh kong silsak zawk bek ahi hi. Noma khat le khat tuabangin, na kisilsak vun. 15 No ii ettee tu ngamtatna khat kong koisak hi, tua hi a kei ii no tungah kong hi bang tatakin, no zongh khat le khat tungah na ngamta tavun. 16 A tatak in kong ci hi: sila khat sia a topa sangin lianzaw ngawl a, kamtaipa khat sia a sawlpa sangin lianzaw ngawl hi. 17 Tu in thumaan he zo na hi uhkom, seam paih le uh te bangza in a lungdamte hi tu nu ziam! 18 “Na vekpi atu ka sonna hi ngawl hi; ka teal sate keima in ka he hi. Ahihang Laithiangtho sungah, ‘Kei taw ankuang uumkhawmpa in kei hong langpan hi,’ a ci sia a tun kul tu hi. 19 ‘Keima sia Keima ka hi’ hunlam hi thu a pian ciang nong up natu in hi thu a pian maa, tu in kong son hi. 20 A tatak in kong ci hi: ka sawlpa a saang pawpo in, kei zongh hong saang ahi hi; kei hong saang pawpo in kei hong sawlpa a saang ahi hi,>> ci hi.
Jesus in A kileeheak natu Sonkhol
21 Jesus in hi teng a ci zawkciang ama a thin ngim mama a, a langh taakin hi bang pau hi, “A maan tak kong ci hi: no sung pan khat in kei hong leeheak tu hi,” ci hi. 22 A nungzuite khat le khat ki en a, ama ci nop sia akua ziam ci in lungmang mama uh hi. 23 Jesus ii it nungzui khat sia Jesus taw a kicial in to hi. 24 Simon Peter in tua pa neak phei a, “Akua ci nuam ziam dongh in,” ci hi. 25 Tua ahikom tua nungzuipa in Jesus kung neak zaw in, “Akua ziam? Topa awng,” ci in dongh hi. 26 Jesus in, “Anluum bekkhat sia metui sungah papin ka piak tu sia pa hi,” ci in zo hi. Tua ahikom ama in anluum bekkhat la a, metui sungah a pap zawkciang, Simon Iscariot ii tapa Judas pia hi. 27 Judas in anluum a saan po ciangin, ama sungah Satan tum hi. Jesus in ama munah, “Na vawt tu po vawt memeang tan!” ci hi. 28 Jesus in banghangin hi bangin ci ziam ci sia sabuai ah a to teng in a tel bua uh hi. 29 Judas sia sumip keampa ahikom poai sungah amate kisap tu vanhte lei a sawl ziam, tua ahibuale a zawngte bang khat po piasak ziam, hi tu hi ci in nungzuite pawlkhat in ngaisun uh hi. 30 Judas in anluum saang a, thakhat in pusuak paih hi. Tua hun sia zan hun ahi hi.
Thukham Thak
31 Judas ii paisan zawkciang Jesus in, “Tu in Mihing Tapa ii minthanna kilangh hi; tu in Pathian minthanna ama tungtawn in kilangh hi. 32 Tuaciang ama tungtawn in Pathian minthanna kilangh ahile, Pathian in Mihing Tapa minthanna ama mama sungah kilanghsak tu a, thakhat thu in tuabangin vawt tu hi. 33 Ka tate awng, kei sia no taw ngei hong omkhawm nawn ngawl tu khi hi. Note in kei nong zong tu uh hi; ahihang, Jew thunei mihingte munah ka ci sa bangin, ‘Kei pai natu munah note nong pai thei buatu hi,’ ci sia tu in kong son hi. 34 Tuaciang, tu in thukham thak khat kong pia hi: Khat le khat na ki it vun. Note kong it bangma in, khat le khat na ki it tu uh kul hi. 35 Khat le khat na ki it uh le mihing theampo in, no sia ka nungzuite na hina uh hong he tu hi,” ci hi.
Peter ii Nial tu Jesus in Sonkhol
36 “Koisung pai tu ni ziam Topa?” ci in Simon Peter in dongh hi. “Tu in kei pai natu ah nong zui thei buatu hi, ahihang nidang ciangin hong zui tu ni hi,” ci in Jesus in zo hi. 37 “Topa awng, banghangin, tu laitak nang hong zui thei ngawl tu khi ziam? Nang atu thi tu in ka kinging hi!” Peter in ci hi. 38 Jesus in, “Kei atu thi tu in kinging tatak ni ziam? A maan tak kong ci hi: ak khuan maa in ka he bua hi ci in thum vei hong nial tu ni hi,” ci in zo hi.
Pa kung Thet natu Lampi Jesus
1 Jesus in, “Thinngim in thin kiam heak vun,” ci hi. “Pathian um vun a, kei zongh hong um tavun. 2 Ka Pa inn sungah inndoi tuam tam mama om hi, no atu omna pua khol tu in, ka na pai tu hi. Tuabang hi buale hi bangin kong son buatu hi. 3 No atu pai in, omna ka pua khol zawkciang kong heak kik tu a, keima omna ah na om thei natu in ka kungah kong la tu hi. 4 Ka pai natu mun hong then thei lampi sia na he uh hi,” ci hi. 5 Thomas in, “Topa awng, koisung zuan tu ni ziam ci in hong he ngawl khu hi; tua ahiciang tua mun thet thei natu lampi sia koibangin he thei tu khu ziam?” ci in dongh hi. 6 Jesus in, “Keima in lampi ka hi hi, thumaan thutak ka hi hi, nuntakna ka hi hi; kei taw ngawlin kuama in Pa kung a theng buatu hi. 7 Tu in kei hong he zo na hi uh ciang, ka Pa zongh na he tu uh hi, tuaciang tu pan kipan ama na he uh a, na mu zo uh hi,” ci hi. 8 Philip in, “Topa awng, Pa hong lak tan; tuasia ka kisap uh a vekpi hi,” ci hi. 9 Jesus in, “No teng taw khuangei mama omkhawm zo khi hi; tua hi napi Philip awng, hong he ngawl lai ni ziam? Kei hong mu po in Pa a mu zo hi. Tua ahile banghangin ‘Ko, Pa hong lak tan’ ci ni ziam? 10 Philip awng, Pa sungah kei ka om a, kei sungah Pa a om hunlam um ngawl ni ziam?” ci hi. Tua zawkciang Jesus in a nungzuite munah, “No tung a kong son kammalte keima sung pan hong pusuak ahi bua hi. Ka sungah a om Pa in ama nasep a seam hi. 11 Pa sungah kei ka om a, kei sungah Pa a om hi kong ci ciangin, hong um tavun. Tua ahibuale zong ka sep ka vawtte hangin kei hong um tavun. 12 A maan takin kong ci hi; kei hong um peuma in, ka vawt teng a vawt tu hi — hi hi, a thupi zaw zongh vawt tu hi, banghangziam cile kei Pa kung ka zuan tu hi. 13 Tuaciangin keima min suang a nong nget pawpo, Tapa tungtawn in Pa minthan natu in kong vawtsak tu hi. 14 Na khat pawpo kei min suangin nong ngen uh le kong vawtsak tu hi.
Thaa Thiangtho Piak tu Kamciam
15 “Nong it uh le ka thupiakte na ni tu uh hi. 16 Pa munah ka ngen tu a, ama in Hupa a dangkhat hong pia tu hi, ama in no taw a tawntungin hong omkhawm tu hi. 17 Ama in Pathian ii thumaan thutak hong pualaak Thaa ahi hi. Leitung in ama saang thei ngawl hi, banghangziam cile ama mu thei ngawl a, he ngawl hi. Ahihang no in ama na he uh hi, banghangziam cile ama note taw omkhawm in, note sungah hong om hi. 18 “Ka pai ciangin, no nguak kong nusia buatu hi; note kungah kong heak kik tu hi. 19 Tawmvei zawkciangin, leitung in kei hong mu nawn ngawl tu hi, ahizong note in nong mu tu uh hi; tuaciang keima nungta ka hikom no zongh na nungta tu uh hi. 20 Tua ni hong thet ciang, kei Pa sungah om a, no sungah kei ka om bangma in, kei sungah no na om uh hunlam na he tu uh hi. 21 “A kuama po ka thupiakte saangin, thu a nite sia kei hong it ahi hi. Ka Pa in kei hong it pawpo a it tu hi; kei zongh in ama ka it tu a, ama tungah keima le keima ka kilaak tu hi,” ci hi. 22 Judas (Judas Iscariot ahi ngawl sia) in, “Topa awng, bangbangin leitung ah kilaak ngawlin ko kungah hong kilaak tuam thei tu ni ziam?” ci hi. 23 Jesus in, “A kuama po kei hong it sia in ka hilcianna a zui tu hi. Ka Pa in tua pa it tu a, ka Pa le keima in ama kungah pai in, ama taw ka teang tu uh hi. 24 A kuama po kei hong it ngawl sia in ka hilcianna a zui buatu hi. Na zaak sa uh hi hilcianna sia kei aa hi ngawl a, kei hong sawlpa Pa kung pan hong pai ahi hi. 25 “No taw kong omkhop lai ma in, hi thu hong son zo khi hi. 26 Pa ii keima min taw hong paisak tu Thaa Thiangtho ahi Hupa in na theampo hong hil tu a, kong son teng zongh hong phawk kiksak tu hi. 27 “Thin nopna kong nusiat hi; keima aituam neisa thinnopna kong pia hi. Leitung ii piak bangin kong pia bua hi. Thinngim in thinkiam heak vun; lau heak vun. 28 ‘Hong nusia tu khi hi, ahihang no kung hong pai kik tu khi hi, ka ci sia na za zo uh hi.’ Nong it uh le Pa kung ka zot tu sia na lungdam tu uh hi; banghangziam cile ama kei sangin lianzaw hi. 29 Hite theampo a pian maa tu laitakin hong son khol zo khi hi, hong pian takpi ciangin, na up thei natu uh ahi hi. 30 No taw hun sauzaw thuson thei nawn ngawl tu khi hi, banghangziam cile hi leitung a ukpa hong pai hi. Ama in kei tungah bangma vaang hong nei bua hi, 31 ahihang Pa ka itna sia, leitung in a heak kul tu hi; tua hu in ama ii thu hong piak babang in, na theampo ka vawt hi. “Hong pai tavun, hi mun panin pai tawng.
Jesus Sapitngui Tatak
1 “Keima in Sapitngui tatak ka hi a, ka Pa in huan neipa ahi hi. 2 Ama in kei tungah a nga ngawl baak theampo sattan tu hi, sapit nga a ngana baak pawpo a thiantho natu le tamzaw a nga thei natu ho in heu tu hi. 3 Note sia hilcianna kong piakte hangin hong kithiangthosak zo hi. 4 Kei sungah hong om po tavun, no sungah kong om tu hi. A baak khat nguak bek a nga thei bua hi; a ngui taw a kizop ciang bekin nga thei hi. Tuasia bangma in kei sungah nong om bua uh le a nga na nga thei buatu uh hi. 5 Keima in sapitngui hi a, note in a baakte na hi uh hi. A kuama po in kei sungah hong om a, ama sungah kei ka om le ama in nga tam mama nga tu hi; banghangziam cile kei ngawl taw bangma na vawt thei buatu uh hi. 6 A kuama po kei sungah hong om ngawlte thingbaak bangin kivawk in, kocip hi; tuabang a baakte kitawm in meimang sungah kibum a, kaangtum hi. 7 Kei sungah nong om uh a, ka kammalte note sungah a om le tuasia ciang na uuk pawpo nong ngen tu a, na nga tu uh hi. 8 A nga tam na nga uh ciang ka Pa minthanna kilanghsak hi; tuabangin keima nungzuite na suak uh hi. 9 Pa ii kei hong it bangma in note kong it hi; kong itna sungah kip vun. 10 Ka Pa thupiakte ni a, ama itna sungah ka kip bangma in, kong thupiakte na ni uh le kong itna sungah na kip tu uh hi. 11 “Note sungah ka lungnopna a om natu le na lungnopna uh a kicin natu in hi thu kong son hi. 12 Kong thupiak in hi thu ahi hi: keima ii kong it bangma in, khat le khat na ki it vun. 13 Mihing khat ii a lawmte atu a nei thei a lianbel itna in amate atu ama ii nuntakna a piakna ahi hi. 14 Tuaciangin, ka thupiak bangin na seam uh le, ka lawmte na hi uh hi. 15 Naseamte awng, kong ci nawn bua hi, banghangziam cile naseampa in a topa in bangteng vawt ziam, ci in a he bua hi. Tuasia taangin lawmte awng kong ci hi, banghangziam cile Pa kung pan ka zaak thu theampo kong son zo hi. 16 Note in kei nong teal bua uh hi; keima in note a kikhomsuan a nga namte tam mama na nga natu in, kong teal a, nasep kong pia hi. Tua ahikom Pa in kei min taw, ama tungah na nget uh po, hong pia tu hi. 17 Tua hi a, hi thu in note tungah kong thupiak ahi hi: khat le khat na ki it tavun.
Leitung ii Etsatna
18 “Leitung in note hong ensan le keima hong ensan masa ahi sia phawk tavun. 19 Note leitung neisa hi le uh te leitung in ama aituam bangin hong it tu hi. Ahihang hi leitung panin note kong teal zo a, note leitung neisa na hi nawn bua uh hi; tua hu in leitung in note hong ensan hi 20 Kong son sa thu phawk tavun: ‘Silapa in a topa sangin lianzaw ngawl hi.’ Amate in kei hong vawtsia le no zongh hong vawtsia tu hi; amate in ka hilna a mang uhle no hilna zongh zui tu hi. 21 Ahihang amate in hite theampo note tungah hong vawt tu hi, banghangziam cile note keima neisa na hi uh hi; banghangziam cile amate in kei hong sawlpa he ngawl hi. 22 Amate kungah pai in thuson ngawl hi leng amate in mawna a nei buatu uh hi; tu in ahile amate a mawna huvau in kamzon natu a nei nawn bua uh hi. 23 Kei hong ensan sia in ka Pa zongh ensan ahi hi. 24 Ngualdang ii vawt ngei ngawlte amate sungah vawt ngawl hi leng amate in mawna a nei buatu uh hi; tu in ahile amate in ka sep teng hong mu zo a, kei le ka Pa hong ensan khawm hi. 25 Ahizong, amate Thukham sungah, ‘Amate in thu om ngawlpi in, kei hong ensan hi,’ ci in a ki at sia, a tangtun natu hi bang teng a pian kul hi. 26 “Thaa ahi Hupa hong pai tu a — Pathian ii thumaan thutak le Pa kung pan hong paipa sia hong pualaak tu hi. Pa kung panin ama kong puak tu a, ama in kei thu hong son tu hi. 27 Tuaciang note zongh in kei thu na son tu uh hi, banghangziam cile a kipatciil panin note kei taw nong omkhawm zo uh hi.
1 “Na upna uh na thasua ngawl natu in, hi teng hong son khi hi. 2 Note synagogue pan hong kihawlkhia tu a, tuaciang note hong thatlum khat po in tuabang a ngamtat sia Pathian atu naseam in a kingaisut hun hong theng tu hi. 3 Mihingte in note tungah hi bang a ngamtat natu te sia amate in Pa ahizong kei ka hizong hong heak ngawl hang ahi hi. 4 Ahihang hi bang kong sonna in, amate atu hite a sep tu hun hong thet ciang kong son sa teng na phaw thei natu uh ahi hi.
Thaa Thiangtho Nasepna
“A kipatciil in hite kong son bua hi, banghangziam cile keima in note taw ka omkhawm hi. 5 Ahihang tu in hong sawlpa kung zuan tu khi hi, tua hi napi kuama in ka pai natu mun nong dongh bua uh hi. 6 Tuaciang tu in hi thu kong son zawkciang na thinsung uh heena taw kidim hi. 7 Ahihang thumaan thutak hong son khi hi: kei va pai leng no atu phazaw hi, banghangziam cile kei ka pai bua le Hupa note kungah hong pai ngawl tu hi. Ahihang kei ka pai le ama no kungah kong paisak tu hi. 8 Tuaciangin ama hong pai ciangin, mawna thu, a maan thu le Pathian thukhenna huvau a ngaisutna uh te maan ngawl hi ci in leitung mihingte tungah kilanghsak tu hi. 9 Amate in mawna huvau ngaisun khial hi, banghangziam cile amate in kei hong um ngawl hi. 10 Amate in a maan thu zongh ngaisun khial hi, banghangziam cile kei Pa kung ka zuan tu a, note in nong mu nawn buatu uh hi; 11 tuaciang amate in, thukhenna thu telkhial hi, banghangziam cile hi leitung a ukpa tungah thu kikhen zo hi. 12 “Thu son tu tam ma ka nei lai hi, ahihang tu laitak ahile note thuciin tu in tam lei tu hi. 13 Ahizong Thaa hong pai ciangin, Pathian thumaan thutak hong pualaak pa in thumaan thutak theampo sungah lam hong pui tu hi. Ama in ama aituam thuneina taw hong son ngawl tu hi, ahizong ama zaak teng hong son tu a, hong piang tu thute hong son tu hi. 14 Ama in kei minthanna hong pia tu hi, banghangziam cile ka sonte la tu a, tuateng note tungah hong son tu hi. 15 Ka Pa neisa theampo keima neisa hi; tua hu in Thaa in ka piakte la in no tungah hong son tu hi,” kong ci hi.
Heena le Lungdamna
16 “Tawmvei no sungin kei nong mu nawn buatu uh a, tuaciang tawmvei zawkciangin nong mu tu uh hi,” ci hi. 17 A nungzuite pawlkhat in amate sungah kidongh uh a, “Bang ci nuam hi tu ziam? Tawmvei sung eite in ama mu nawn ngawl tu a, tawmvei zawkciang ih mu tu hi; tuaciang ama in, ‘Banghangziam cile Pa kungah ka pai tu hi’ ci si hi. 18 ‘Tawmvei sung’ a ci sia bang a ci nopna ziam? Ama in bang thu teng son ci sia ih he bua hi!” ci uh hi. 19 Jesus in ama thu dongh nuam ahi sia tel ahikom amate tungah, “ ‘Tawmvei sungin nong mu buatu uh a, tuaciang tawmvei zawkciang in nong mu tu uh hi,’ hong ci khi hi. Noma sung a na kidok thu in tu sia ahi ziam? 20 A tatak in kong ci hi: note au in kap tu nu hi, ahihang leitung lungdam tu hi; note hee tu nu hi, ahihang na heena uh sia lungdamna hong suak tu hi. 21 Numei khat nau a sua tu ciangin, hee hi, banghangziam cile a ngim natu hun hong theng ahi hi; ahihang nau hong sua ciang ama in a ngimna teng mangil hi, banghangziam cile leitung ah nausen khat hong suak ahi hu in, ama lungdam hi. 22 Tuasia bangma na hi tu uh hi: tu in hee nu hi, ahizong kei in note kong mu kik tu a, na thinsung uh lungdamna taw kidim tu hi, tua lungdamna in kuama ii hong laaksak thei ngawl nam ahi hi. 23 “Tua ni hong thet ciangin, kei tungah bangma nong ngen buatu uh hi. A maan tatak kong ci hi: Pa in kei min suangin na nget pawpo hong pia tu hi. 24 Tuciang dong kei minsuangin, bangma na ngen balai uh hi; na lungdamna uh a pawlcin thei natu in, ngen vun na nga tu uh hi.
Leitung Zawna
25 “Sonteena kammalte zangh in, hi thute kong son zo hi. Ahihang sonteena kammalte zangh ngawlin, Pa ii thu thiang takin kong son tu hun hong theng tu hi. 26 Tua ni hong thet ciangin kei min suangin na ngen tu uh hi; tuaciang no luangin kong ngetsak tu hi kong ci bua hi, 27 banghangziam cile Pa, ama mama in note hong it hi. Ama in banghang note hong it ziam cile noma in kei nong it uh a, tuaciang Pathian kung pan kong pai nong um uh hi. 28 Pa kung panin kong pai takpi a, leitung ah kong pai zo hi; tu in leitung nusia in, Pa kungah ka pai tu hi,” ci hi. 29 Tuasia ciang nungzuite in, “Tu ahile sonteena kamte zangh ngawlin a thiangin na son hi. 30 Na theampo na heak sia tu in kong he uh hi; kuama ii thu hong dok tu na kulsak bua hi. Hi thu in Pathian kung pan nong paina hong umsak hi,” ci uh hi. 31 Jesus in, “Tu in na um uh ziam? 32 Note theampo kithethaang in, na inn tek zuanin, kei nguak nong nusiat tu uh hun hong theng tu hi, hi sung hong theng zo hi. Ahihang keima nguak ka hi bua hi, banghangziam cile Pa in kei taw omkhawm hi. 33 Kei taw ih kikopna hangin thinnopna na nga natu hi thu kong son sa hi. Leitung in ngim le kham hong thuaksak tu hi. Ahihang na thin uh liansak vun! Leitung ka zo zo hi,” ci in zo hi.
A Nungzuite atu Jesus Thungen
1 Jesus in hi teng a son zawkciang van ento in, “Pa awng, a hun hong theng zo hi. Tapa in nang tungah minthanna hong piak thei natu in, na Tapa tungah minthanna hong pia tan. 2 Banghangziam cile ama tungah na piaksa mi teng tawntung nuntakna a piak thei natu in, mihing theampo tungah thuneina ama tungah na pia zo hi. 3 Tuaciang in tawntung nuntakna ci sia in nangma Pathian maan ahi bek sia heakna le na sawlpa Jesus Christ heakna ahi hi. 4 Na minthanna leitung ah ka lak zo hi; sep tu a nong piak nasep sia ka man zo hi. 5 Pa awng! simlei pian maa a nangma taw a kibangin ih nei khop tua minthanna sia, tu in na mai ah kei hong pia tan. 6 “Leitung pan a nong piaksa mite kungah nangma kong hesak zo hi. Amate nangma neisa hi a, amate kei nong pia zo hi. Amate in na kammal hong ni hi, 7 tuaciang tu in, nong piak sa theampo nangma kung pan hong pai hi ci in amate in he uh hi. 8 Nong piak thu teng amate tungah ka pia a, amate in saang uh hi; amate in keima nang kung pan hong pai ka hi sia maan hi ci in he uh hi, tuaciangin nong sawl ka hi hunlam um uh hi. 9 “Amate atu in, thu kong ngen hi. Leitung atu thu ka ngen bua hi, nangma neisa ahi nong piakte atu in kong ngen hi. 10 Keima neisa theampo nangma aa hi a, nang neisa theampo keima aa ahi hi; ka minthanna amate tungtawnin kilak hi. 11 Tu in kei nangma kung kong zuan hi; kei leitung ah ka om nawn bua a, ahihang amate leitung ah om hi. A Thiangtho Pa awng! Nang le kei khat ih hi bangma in, amate pumkhat ahi thei natu in, nong piak sa min ahi na min vaanglian taw amate keamcing ta in. 12 Amate taw ka om khop lai in, nong piak sa min ahi na min vaanglian taw, amate ka keamcing zo hi, laithiangtho a tun thei natu, a mangthang tu in a kilaitan sa khat simngawl amate ka keam a, ka bosua bua hi. 13 Tu in nang kungah kong zuan a, hi bang teng leitung ah ka sonna sia in a thin sung uh ah ka lungnopna a cingin a nei thei natu ahi hi. 14 Na thupuak amate ka pia a, tuasia ciang leitung in amate ensan hi, banghangziam cile keima leitung ii neisa ka hi ngawl bangma, amate leitung ii neisa ahi bua hi. 15 Hi leitung panin amate na laak natu in, kong ngen bua hi, ahihang Ngilo Pa khut sung pan na kepcing natu in kong ngen hi. 16 Keima leitung ii neisa ka hi ngawl bangma in, amate leitung ii neisa ahi bua uh hi. 17 Thumaan thutak taw nangma atu in amate na keamtuam in; na kammal in thumaan thutak hi. 18 Nangma in leitung ah kei nong sawl bangma in, amate leitung ah ka sawl hi. 19 Amate zongh maan tak a, nang tungah hong ki aap thei natu, amate atu ka ngaisutsakna in, keima le keima nang tungah kong ki aap hi. 20 “Amate atu bek ngen ngawlin, amate ii thupuak hangin, kei hong um teng atu zongh kong ngen hi. 21 Amate a vekpi in pumkhat ahi thei natu in kong ngen hi. Pa awng! Nangma in keima sungah nong om a, keima in nangma sungah kong om bangma in, amate in eima sungah hong om tahen. Leitung in nong sawl ka hi hunlam hong up natu amate pumkhat suak thei tahen. 22 Nang le kei pumkhat ih hi bangma, amate pumkhat ahi thei natu in, kei nong piak minthanna sia ma amate ka pia hi: 23 Leitung in nong sawlna thu le, keima nong it bangma amate na itna thu a heak thei natu, amate pumkhat a sua bup thei natu in, keima in amate sungah om in, nangma in keima sungah nong om hi. 24 “Pa awng! Amate nong piak sa hi a, nong piak sa ka minthanna sia a mu thei natu in, ka omna munah hong om tek tu ka dei hi; banghangziam cile, simlei a kipiansak maa in, nong it zo hi. 25 Thumaan thutang Pa awng! Leitung in nang hong he bua hi, ahihang keima in kong he hi, tuaciang hite in nong sawl ahi hunlam he uh hi. 26 Kei nong itna amate sungah a om thei natu le amate sungah kei zongh ka om thei natu in, nang sia amate in ka hesak zo a, tuabangma in ka seam suak lai tu hi,” ci hi.
Jesus Kimatna
1 Jesus in hi thungetna teng a nget zawkciang a nungzuite taw Kidron luam a kici sia kantan in pai hi. Tua munah huan khat om hi. Jesus le a nungzuite huan sungah tum uh hi. 2 Leeheakpa Judas in hi huan ii omna he hi, banghangziam cile, Jesus in a nungzuite taw tam vei mama tua munah kisi ngei zo uh hi. 3 Tua ahikom Judas in huan sungah pai a, Rome ngalkap honkhat Thiampi liante le Phariseete ii sawl biakinn cing pawlkhat keng hi, amate ngalhiam toai a, meiinn le meila lom keng uh hi. 4 Jesus in ama tungah a piang tu na theampo he ahikom ama, mai ah pai in, “Na zon uh sia akua ziam?,” ci in dongh hi. 5 “Nazareth khua mi Jesus hi,” ci in amate in zo uh hi. “Keima khi hi,” ama in ci hi. Leeheakpa Judas sia amate taw tua munah ding hi. 6 Jesus in, “Keima khi hi,” a ci ciangin, amate nungkin uh a, lei ah puk uh hi. 7 Jesus in khat vei ma, “Na zon uh sia akua ziam?” ci in dongh hi. Amate in, “Nazareth khua mi Jesus hi,” ci uh hi. 8 Jesus in “Keima khi hi, kong ci zo hi. Kei hong zong na hi uh le hi a dang teng ciasak vun,” ci hi. 9 (“Pa awng, nong piak sate khat zongh ka bo sua bua hi,” a ci teng a tangtun thei natu in hi bang teng ci ahi hi.) 10 Namsau khat a nei Simon Peter in a namsau dokin, Thiampi Lianbelpa ii silapa bil ziatsang satansak hi. Tua silapa ii min Malchus ahi hi. 11 Jesus in Peter munah, “Na namsau a pai sungah thun kik in! Ka Pa ii ka dawn tu a hong piak thuakna hai sia, dawn ngawl tu in hong um ni ziam?” ci hi.
Annas mai ah Jesus
12 Tua zawkciang Rome ngalkapte, ngalkap hon ukpa le Jew biakinn cingte in Jesus man uh a, khau khii in, 13 Annas kungah paipui masa uh hi. Ama sia tua kum a Thiampi Lianbel ahi Caiaphas ii sunghpa ahi hi. 14 Mihing theampo atu in mihing khat thi le phazaw hi ci in Jew thuneite tungah ngaisutna a pia pa sia Caiaphas ahi hi.
Peter in Jesus Nial
15 Simon Peter le a dang nungzui khat in Jesus zui uh hi. Tua nungzui dang khat sia in Thiampi Lianbelpa ii heak mama pa hi a, tua ahikom ama in Jesus taw Thiampi Lianbelpa huangsung dong pai hi, 16 tua laitakin Peter kongpi puasia ah om hi. Tuaciang nungzui dangkhat sia pusuak kik a, kongpi ah a om numei sia a paupui zawkciang Peter tumpui hi. 17 Kongpi a om numei sia in Peter munah, “Nang zongh ziasia pa ii nungzui khat hi kana ngawl ni ziam,” ci hi. “Kei ka hi bua hi,” Peter in ci hi. 18 Khuasik ahikom silate le biakinn cingte in meihol thut in, a kiim ah mei oai in ding uh hi. Tua ahikom Peter zongh pai in amate taw dingin mei oai khawm hi.
Thiampi Lianbelpa in Jesus Thu dongh
19 Thiampi Lianbel in Jesus munah a nungzuite thu le ama hilcianna huvau thu dongh hi. 20 “Mihingte mai ah ka son sa hi; ka hilcianna theampote sia mihing theampo hong paina mun synagogue te le Biakinnpi sungah kivawt hi. A thimtham in bangma ka son ngei bua hi. 21 Tua hi kasap banghangin, thu hong dongh ni ziam? Ka pau hong zate dongh tan. Ka son thute amate munah dongh tan — amate in ka son thu teng he uh hi,” ci in Jesus in zo hi. 22 Jesus in hi bangin a ci ciang, tua munah biakinn cingte khat in Jesus beang a, “Bangbangin Thiampi Lianbel tungah tu bangin pau ngam ni ziam!” ci hi. 23 “Pau khial nei ka hile hi sungah omte theampo munah ka pau khialna son in. Ahihang ka pauna sia a maan thu ahile banghangin hong vua ni ziam?” ci in Jesus in zo hi. 24 Tuasia ciang Annas in Jesus heencip sa ma in Thiampi Lianbel Caiaphas kungah puak hi.
Peter in Jesus Nial kik
25 Peter tua mun ma ah mei oai in om lai hi. Tua ahikom a dangte in, “Nang zongh ziasia pa ii nungzui khat hi ngawl ni ziam?” ci uh hi. Ahihang Peter in nial hi. “Kei ka hi bua hi,” ama in ci hi. 26 Peter ii a bil a satansak pa ii beete khat ahi Thiampi Lianbel ii sila khat in, “Ama taw huan sungah na om lai hong mu hi ngawl khi ziam?” ci in dongh hi. 27 Peter in, “Kei ka hi bua hi,” a ci leleau laitak — thakhat in aklui khat hong khuang hi.
Pilate mai ah Jesus
28 Zing tuungin Jesus sia Caiaphas ii inn pan ngamuk mangpa kumpi inn ah kipaipui hi. Jew thuneite in kumpi inn sungsang ah a tum bua uh hi, banghangziam cile Paisan Poai anneak thei natu in amate zeksa vai in a thiangtho in om nuam uh hi. 29 Tua ahikom Pilate sia amate omna sangah pusuak in, “Hisia pa bang teng taw mawsak nu ziam?” ci in dongh hi. 30 Amate in, “Ama in khialna lian vawt buale nang kungah hong paipui ngawl tu khu hi,” ci in zo uh hi. 31 “Tua ahile noma in, ama la vun a noma thukham taw kizui in thusit tavun,” Pilate in ci hi. Amate in, “Kote in kuama tungah thidaan dong piak thei natu thu nei ngawl khu hi,” ci uh hi. 32 (Jesus in a thi natu zia a sonna kammalte a tun natu hi bangin piang ahi hi.) 33 Pilate in kumpi inn sungah tum kikin Jesus sam hi, “Nang Jew mite ii Kumpipa na hi ziam?” ci in dongh hi. 34 Jesus in, “Hi thu dokna sia nangma thin sung pan hong piang ziam, ahibuale kei thu ngual in nang tungah hong son ziam?” ci hi. 35 Pilate in zokik a, “Jew mi khat hong sa ni ziam? Nangma kei tungah hong aapte sia nangma mipuite le thiampi liante ahi hi. Bang vawt nei ni ziam,” ci hi. 36 Jesus in, “Ka ngam sia hi leitung ah a om bua hi; ka ngam sia hi leitung ah om hile, Jew thuneite tungah hong ki aap ngawl natu in, ka nung hong zuite in do in hong hung tu hi. Hi ngawl hi, ka ngam sia hi sung hi ngawl hi!” ci hi. 37 Pilate in, “Tua ahile kumpipa khat na hi ziam?” ci in dongh hi. Jesus in, “Kumpipa hong ci sia nangma na hi hi. Hi leitung ah suak a, thumaan thutak sia ii thu son tu tupna khat taw in kong pai hi. Thumaan thutak ii neisa ahite peuma in kei thu hong ngai hi,” ci in zo hi. 38 “Tua ahile thumaan thutak sia bang ziam?” Pilate in dongh hi.
Jesus Thidaan Kipia
Tua zawkciang Pilate doipua ah pai kik a, mihingte tungah, “Hisia pa mawsak natu thu bangma ka mu zo bua hi,” ci hi. 39 “Ahihang noma ngeina khat na nei uh bangin, Paisan Poai sungah thongtaak khat ka suaktasak tawntung hi. Note atu Jewte Kumpipa suakta sak leng nong oai uh ziam,” ci hi. 40 Amate au khat sua in, “Hi ngawl hi, ama hi ngawl hi! Barabbas dei khu hi!” ci in zo uh hi. (Barabbas sia ngual suampa ahi hi.)
1 Tua zawkciangin, Pilate in Jesus pusua a, velsak hi. 2 Ngalkapte in lingnguite taw kumpi lukhu khat vawtin, a lu tungah khusak uh hi; tua zawkciang puantual sannuum khat silhsak uh hi, 3 tua zawkciang ama kungah hong pai uh a, “Jewte Kumpipa a khansau tahen!” ci hi. Tuaciang amate vapai in beang uh hi. 4 Pilate khatvei ma pusuak kikin mihon tung ah, “En vun, ama mawsak natu bangma ka mu ngawlna thu na mu natu in, ama hi sungah hong paipui tu khi hi,” ci hi. 5 Tua ahikom Jesus sia kumpi ling lukhu khu in, puantual sannuum silh in hong pusuak hi. Pilate in, “En vun! Hi sungah ama om hi!” ci hi. 6 Thiampi liante le biakinn cingte in amu uh ciang, “Thinglamte tungah that vun! Thinglamte tungah that vun!” ci in au uh hi. Pilate in amate munah, “Tua ahile noma in ama la in, thinglamte tungah that vun. Ama ka mawsak natu bangma thu mu ngawl khi hi,” ci hi. 7 Mihon in zokik a, “Ama in Pathian Tapa ka hi ci ahikom a thidaan piak tu kilawm hi aci thukhaam khat nei khu hi,” ci uh hi. 8 Pilate in hi thu a zaak ciangin, lau vaial hi. 9 Ama kumpi inn sungah tum kik a, Jesus munah, “Nang koisung pan hong pai ni ziam,” ci in dongh hi. Ahihang Jesus in zo ngawl hi. 10 Pilate in ama tungah, “Ka kam hong zo ngawl tu ni ziam? Phawk in, na suatak natu le thinglamte tungah hong kithalup natu thu nei khawm khi hi,” ci hi. 11 Jesus in, “Pathian hong piak hu bek in, kei tungah thu na nei hi. Tua ahiciang nang tungah kei hong aap pa in, mawna nasia zaw vawt ahi hi,” ci in zo hi. 12 Pilate in hi thu a zaak ciangin, Jesus a suatak natu in lam zong hi. Ahihang mihon au kik a, “Ama na suatak le Kumpi lianpa ii lawm na hi bua hi! Kumpi khat ka hi a ci pawpo in, Kumpi lianpa a leedo pa ahi hi,” ci uh hi. 13 Pilate in hi thute a zaak ciangin ama in Jesus doipua ah paipuisak a, “Suangpheak Kiphana” a kici thukhente tona ah (Hebrew kam in Gabbatha kici hi) to hi. 14 Tua hun sia Paisan Poai a thet ma ni khat sunkim dektak hun ahi hi. Pilate in, “Hi sungah na Kumpipa uh om hi,” ci hi. 15 Amate in, “Ama that vun! Ama that vun! Thinglamte tungah that vun!” ci in au uh hi. Pilate in “Na kumpipa uh thinglamte tungah ka thalupsak tu dei nu ziam,” ci in dongh hi. Thiampi liante in, “Kumpipa khat bek ka nei uh sia Kumpi lianpa sia hi!” ci in zo hi. 16 Tuasia ciang Pilate in Jesus thinglamte tungah thalup tu in, amate tungah aap hi.
Jesus Kithat
Tua ahikom amate in Jesus la uh hi. 17 A thinglamte pua in ama hong pusuak a, “Lungu Mun” a kici na hong theng hi. (Hebrew kam in Golgotha kici hi) 18 Tua munah amate in thinglamte tungah khai uh hi; pasal nii zongh Jesus lang le lang ah thinglamte tung khai uh hi. 19 Pilate in heaksakna laino khat at in, thinglamte tungah taak hi. “Jewte Kumpipa Nazareth khua mi Jesus,” ci in a at hi. 20 Jew mite tam ma in sim uh hi, banghangziam cile, Jesus a kikhaina mun sia khuapi taw a ki khuala bua hi. A lai taak sia Hebrew kam, Latin kam, le Greek kam in ki at hi. 21 Thiampi liante in Pilate mun ah, “ ‘Jewte ii Kumpipa,’ ci in at heak in, ‘Hisia pa in, Jewte Kumpipa ka hi hi, ci hi,’ ci in at zaw in,” ci uh hi. 22 Pilate in, “Ka at sa sia ka at sa bangma in kip tahen,” ci in zo hi. 23 Jesus thinglamte tungah a kilh zawkciang ngalkapte in ama puansilh te suutin, ngalkap khat sim in, khenkhat tek a cin tu in, khen li sua in hawm uh hi. Amate in puantual a silhsak sia zongh la uh hi, tua puantual sia khuina om ngawl a tuantung khat ahi hi. 24 Ngalkapte khat le khat kikum a “Hi sia balkeak bua tawng; akua in ih nga ziam, meesawk tawng,” ci uh hi. Laithiangtho sungah hi bang a ci sia a tangtun natu ahi hi: “Amate in ka puante hawm a, ka Puantual a tu in kikhaam uh hi,” Hisia in ngalkapte ngamtatna ahi hi. 25 Jesus ii thinglamte taw a kinaina ah, a nu, a nu ii suapuinu, Clopas ii zi Mary le Mary Magdalene te ding uh hi. 26 Jesus in a nu le ama ii it nungzuipa a ding khawm mu hi; tua ahikom a nu munah “Ama sia na tapa hi,” ci hi. 27 Tua zawkciang a nungzuipa munah, “Ama sia na nu hi,” ci hi. Tua hun pan kipan nungzuipa in, a inn ah teang tu in, ama la in ciapui hi.
Jesus Thina
28 Tu in na theampo khuangkhim siat zo hi, ci in Jesus in he hi; tuaciang laithiangtho kammal a tun natu in, Jesus in, “Ka dangko hi,” ci hi. 29 Tua munah kuang khat sungah sapittui haau om hi, tui hupna khat pap sukin, Hyssop thingbaak dawn ah a thua zawkciang, Jesus muk ah taa uh hi. 30 Jesus in tua sapittui a neak zawkciang, “Kizo zo hi!” ci hi. Tua zawkciang a lu kunsuk in thi hi.
Jesus Pangh Kisun
31 Jew thuneite in, Pilate munah a kithatte ii peang a thiatan natu le, thinglamte tung pan a luangte a laaksuk thei natu in ngen uh hi. Hi bang a nget theina uh sia banghangziam cile tua ni sia nipi zawk Ninga ni hi a, hong pai tu Sabbath sia a thiangtho tuam a kingaisun ahikom Sabbath ni in a luangte thinglamte tungah a om tu a dei bua uh hi. 32 Tua ahikom a ngalkapte in, Jesus taw a kikhai khawmte a masa sia pa ii peangte thiaktan a, tua zawkciang a dang khat sia ii peangte zongh thiaktan uh hi. 33 Ahihang Jesus kung hong thet uhciang, ama a thi sa in mu ahikom, a peang a thiaktan bua uh hi. 34 Ahizong ngalkapte khat in, a tei taw Jesus pang a sut ciangin thakhat in chi le tui hong kee hi. 35 (Hi thu na up thei natu in, hi thupiang a mu pa in ama muna bangin hong son ahi hi. Ama thusonte a maan hi a, thumaan son ahi hunlam zongh a son pa in he hi.) 36 Hi bangin a kivawt sia Laithiangtho kammal a tun natu ahi hi: “Ama ii ngute khat zongh taltan ngawl tu hi,” ci hi. 37 Laithiangtho mundang khat ah, “Mihingte in amate ii holletpa sia a en tu uh hi,” ci si hi.
Jesus Kiphumna
38 Hisia zawkciang Arimathea khua mi Joseph in Pilate munah, Jesus luang a laak thei natu in ngen hi. (Joseph sia Jesus nungzui khat hi a, ahizong Jew thuneite a kiitakna taw a thimtham in a zuipa khat ahi hi.) Pilate in a luang phaam thei natu thupia ahikom Joseph in a luang la in paipui hi. 39 Zan lai in Jesus taw kimu tu in, a pai masa pa, Nicodemus sia Joseph taw ton hi, ama in thing namtui myrrh le aloe te a kihel toai khat bang hong paipui hi. 40 Tua pasalte nii in, Jewte ii kiphum tu ciang, a luang a pua kholna ngeina om bangin, Jesus luang la in, hel namtui thau taw zutin, puanneal taw tun uh hi. 41 Jesus a kithalupna mun ah huan khat om a, tua munah kuama a kiphum ngei ngawl thaankuul thak khat om hi. 42 Sabbath hun tun maa ni khat ni ahi hu le, a thaankuul taw kinai si ahikom, amate in Jesus luang tua lai ah sial uh hi.
Thaankuul Hawm
1 Nipi ni zingsang tuung khuavak maa in, Mary Magdalene thaan vil tu a pai ciang, a kongvang pan suangtumpui sia kilakeak sa in a om mu hi. 2 Ama in Simon Peter le a dang nungzui, Jesus ii itpa kung zuan in tai a, “Amate in Topa sia thaan pan la zo hi, ama koi sungah koi ziam ci sia he ngawl khu hi!” ci hi. 3 Tuasia ciang Peter le a dang nungzui pa sia thaan ah pai uh hi. 4 Amate nii in delh khawm ahihang nungzui dangkhat sia Peter sangin a ngang zaw tai ahikom thaan theng masa hi. 5 Ama kun in thaankuul sung a et suk ciang a kitunna puannealte mu hi, ahihang a sungah tum ngawl hi. 6 Ama nung pan Simon Peter hong pai a, thaankuul sung thakhat in tum paih hi. Ama in a kitunna puannealte lei ah om mu hi, 7 tuaciang in Jesus lutang tunna puan zongh mu hi. Tua lutang kitunna puan sia puanneal dangte taw om khawm ngawl a, a kizial sa in om tuam hi. 8 Tua zawkciang thaan a theng masa nungzui dang khat sia zongh tum hi; ama in mu a um hi. 9 (Amate in, “Laithiangtho ii ama thina pan tho kik nanak tu hi,” a ci sia a tel bualai uh hi.) 10 Tua zawkciang nung zuite inn ah cia kik uh hi.
Mary Magdalene kungah Jesus Kilangh
11 Mary thaan pua sangah dingin kap hi. A kaa kawmin kun a thaankuul sung en hi, 12 tuaciang vantung lalangte nii puanpaak silh in, Jesus luang sialna ah, khat a luthung, khat a khawdop ah to in a om sia mu hi. 13 “Numei awng, banghangin kap ni ziam?” ci in amate in dongh hi. Ama in, “Amate in ka Topa la a, koisung ah koi ziam, ci in ka he bua hi!” ci in zo hi. 14 Tuaciangin ama a kiheak le, ama kungah a ding Jesus mu hi; ahihang ama in Jesus ahi hunlam he ngawl hi. 15 “Numei awng, banghangin kap ni ziam? Na zon sia akua ziam?” ci in Jesus in dongh hi. Ama in huan neipa sa ahikom in, “Ama la zo na hi le, syapa awng, na koina hong son tan. Pai in ka la tu hi,” ci hi. 16 Jesus in, “Mary awng!” ci hi. Numeinu ama sangah nga in, Hebrew kam in, “Rabboni!” ci hi. (Hi kammal sia Syapa a ci nopna hi.) 17 “Hong len top heak in, banghangziam cile Pa kungah paito ngawl lai khi hi. Ahihang ka suapuipate kungah pai in vason tan. Ka Pa le amate ii Pa, ka Pathian le amate ii Pathian kungah heak kik tu khi hi,” Jesus in ci hi. 18 Tua ahikom Mary Magdalene pai in nungzuite tungah, Topa a muna thu le ama ii son in a sawl teng son hi.
A Nungzuite Kungah Jesus Kilangh
19 Nipi nitak khua niam sang hi a, nungzuite in inn kikalh in kikhawm tua uh hi, banghangziam cile amate in Jew thuneite kiita uh hi. Tuasia ciang Jesus hong tum a, amate sung ah hong ding hi. Ama in“Note sungah thinnopna om tahen,” ci hi. 20 Hi teng a ci zawkciang ama in a khutte le a pang teng amate tungah lak hi. Nungzuite in Topa a mu uh hu in, lungnopna taw kidim uh hi. 21 Jesus in, “Note sungah thinnopna om tahen,” “Pa ii kei hong sawl bangma in, kei in note kong sawl hi,” ci kik hi. 22 Tua zawkciang amate tungah, a hu muutin, “Thaa Thiangtho saang vun.” 23 “Mihingte tungah mawmaisakna na pia uh le amate kimaisak tu hi; amate mawna na maisak bua uhle amate a kimaisak buatu hi,” ci hi.
Jesus le Thomas
24 Jesus hong pai lai in, nungzui sawm le niite sung pan khat ahi, Thomas (Apeang a kici) sia amate taw a omkhawm bua hi. 25 Tua ahikom nungzui dangte in, "Topa ka mu zo uh hi," ci in ama tungah son uh hi. Thomas in, “A khut tung thikpim mapawnte mu a, ka khutme taw pawnte tham in ka khut taw a pangh ka tham buale ka um buatu hi,” ci hi. 26 Nipi khat zawkciang nungzuite inn sungsang ah omkhawm kik uh a, Thomas zongh om hi. Kongkhate kikalh ahihang, Jesus hong pai a, amate sungah dingin, “Note sungah thinnopna om tahen,” ci hi. 27 Tua zawkciang, Thomas tungah, “Na khutme taw hi sung hong tham tan, ka khutte hong en tan; tuaciang na khut vaan in ka pangh hong tham tan. Um khial heak in, um takpi in!” ci hi. 28 Thomas in, “Ka Topa le ka Pathian awng!” ci in zo hi. 29 Jesus in, “Nong mu hu in hong um ni ziam? Hong mu ngawl napi a hong umte bangza in lungdam tu ziam!” ci hi.
Hi Laibu ii Deina
30 A nungzuite ii mutang in, Jesus in hi laibu sungah a kikhum ngawl, nalamdang lakna dang tam mama vawt hi. 31 Ahihang hite hong ki atna sia Jesus in Pathian Tapa Messiah a hina thu, na up natu uh le ama na upna uh tungtawn in, nuntakna na nga thei natu uh ahi hi.
Jesus Nungzui Salite kungah Kilangh
1 Hisia zawkciang Jesus khatvei ma Tiberias Tuili ah nungzuite kungah kilaak hi. A kilaakzia hi bang ahi hi. 2 Simon Peter, Thomas (apeang a kici), Nathanael (Galilee ngam Cana khua mi) Zebedee ii tapate, Jesus ii nungzui dangte nii sia kikhawmtua uh hi. 3 Simon Peter in, “Kei ngasa paai in ka pai tu hi,” a dangte tungah ci hi. “Ko zong kong zui tu uh hi,” ci in a dangte in son uh hi. Tua ahikom amate in ngunkuang khat taw pai uh hi, ahihang tua ni zan bup bangma a man bua uh hi. 4 Ni hong sua ciangin, Jesus tuivaal ah ding hi, ahihang nungzuite in Jesus ahi hunlam a he bua uh hi. 5 “Tangvalte awng, bangma man ngawl nu ziam?” ci in Jesus in dongh hi. “Bangma man ngawl khu hi,” ci in zo uh hi. 6 Ama in, “Na ngen uh ngun kuang ziat sangah paai leute pawlkhat man tu nu hi,” ci hi. Tua ahikom amate in ngen a paai uh ciang, a dawk kik zo nawn bua hi, banghangziam cile amate in ngasa tam mama man uh hi. 7 Jesus ii it nungzuipa in, Peter munah, “Tu a sia Topa hi!” ci hi. Peter in Topa hi ci in a zaak ciang, a a puantung silh taw kitun hi, (Banghangziam cile ama in a puante suut hi) tuaciangin tui sungah leangsuk hi. 8 Nungzui dangte in ngasa a dim ngeen sia kaikawm a, ngunkuang taw vaalbo ah hong pai uh hi. Amate omna sia lei taw a kikhuala lei ngawl, metre za khat na bang ahi hi. 9 Amate in vaalbo ah hong kaa uh ciangin, meihol kithut khat mu uh a, a tungah ngasa le anluum pawlkhat om hi. 10 Jesus in, “Na mat tawm uh ngasa pawlkhat zongh hong paipui tavun,” ci hi. 11 Simon Peter ngunkuang sungah tuakin, ngasa lian a dim ngen sia vaalbo ah kai hi, a vekpi in 153 pha hi; taza in tam ahihang a ngen ektham ngawl hi. 12 Jesus in, “Hong pai tavun a ne vun,” ci hi. A nungzuite kuama in, “Nang kua ni ziam?” ci in a dongh ngam bua uh hi, banghangziam cile amate in Topa ahi sia he uh hi. 13 Tua ahikom amate kung zuan in, anluum la in amate pia hi, ngasa zongh tuabang ma in pia hi. 14 Hisia in Jesus ii thina pan a kithaw kiksak zawk, a nungzuite mun a kilaak a thum veina ahi hi.
Jesus le Peter
15 An a neak zawk uh ciang Jesus in Peter mun ah, “John ii tapa Simon awng, hi ngualdangte ii hong it sangin, kei nong itzaw ziam,” ci hi. “Hi hi, Topa awng, nang kong it sia nangma in na he hi,” ci in ama in zo hi. Jesus in, “Ka tuunote na keam in,” ci hi. 16 A nii veina Jesus in, “John ii tapa Simon awng, kei nong it ziam?” ci hi. Ama in, “Hi hi, Topa awng, nang kong it sia nangma in na he hi,” ci in zo hi. “Ka tuute na keam in,” Jesus in ci hi. 17 A thum veina Jesus in, “John ii tapa Simon awng, kei nong it ziam?” ci hi. Peter sia Jesus ii, “Kei nong it ziam,” ci in thum vei dong a dok hu in, hee hi, tua ahikom ama munah, “Topa awng na theampo na he hi; nang kong it hunlam na he hi,” ci hi. Jesus in, ama munah “Ka tuute na keam in. 18 A maan takin kong ci hi: na khanmoi lai in, a kinging sa in na om bul a, na uukna theampo ah na pai bul hi, ahihang na khanhaam ciangin, na khutte na vaan tu a, tuaciang khat in khau hong khii in, na uuk ngawlna ah hong paipui tu hi,” ci hi. 19 (Hi bang a Jesus ii a ci sia Pathian minthan natu in Peter ii a thi natu teng a sonna hi. Tua zawkciang Jesus in, “Kei hong zui tan,” ci hi.
Jesus le Nungzui Dangkhat
20 Peter in, a kiheak ciang a nung ah Jesus ii it nungzui dang khat sia mu hi — An a neak uh lai Topa kung to a, neal kawm in, “Topa awng nang akua in hong leeheak tu ziam?” ci in a dongh sia pa ahi hi. 21 Peter in a mu ciang, Jesus mun ah, “Topa awng, hisia pa bang bangin om tu ziam?” ci in dongh hi. 22 Jesus in zokik a, “Kong pai kik dong ama nungta in ka oai le zong nang bang nuam maw ni ziam, kei hong zui tan!” ci hi. 23 Tua ahikom tua nungzuipa thi ngawl tu hi, ci in Jesus nungzuite sungah thu kizel hi. Ahihang Jesus in ama a thi buatu hi, a ci hi ngawl hi; ama in “Kong pai kik dong nungta in ka oai le zong bang nuam maw ni ziam?” a ci ahi hi. 24 Ama sia hi thute a son nungzuipa hi a, lai taw zongh a atpa ahi hi; tuaciang ama ii sonte sia thumaan hi, ci in ih he hi.
Thukhupna
25 Tu in Jesus ii a sep nadang tam mama om hi. Tuate theampo khat zawk ciang khat ki aat sak siat le leitung bup ah tua laibute ta zo ngawl tu hi ci in ka um maw hi.