The New Testament of our Lord and Saviour Jesus Christ
1 Jesuh Khrih chuahkehnak cu hitihin a si. Amah cu David tefa kha a si i David cu Abraham tefa kha a si. 2 Abraham cu Isak pa a si; Isak cu Jakob pa a si; Jakob cu Judah le a unau pawl pa a si; 3 Judah cu Perez le Zerah pa a si (an nu cu Tamar a si); Perez cu Hezron pa a si; Hezron cu Ram pa a si; 4 Ram cu Amminadab pa a si; Amminadab cu Nahshon pa a si; Nahshon cu Salmon pa a si; 5 Salmon cu Boaz pa a si (a nu cu Rahab a si); Boaz cu Obed pa a si (a nu cu Ruth a si); Obed cu Jesse pa a si, 6 Jesse cu Siangpahrang David pa a si. David cu Solomon pa a si (a nu cu Uriah nupi kha a si); 7 Solomon cu Rehoboam pa a si, Rehoboam cu Abijah pa a si; Abijah cu Asa pa a si; 8 Asa cu Jehoshafat pa a si; Jehoshafat cu Joram pa a si; Joram cu Uzziah pa a si; 9 Uzziah cu Jotham pa a si; Jotham cu Ahaz pa a si; Ahaz cu Hezekiah pa a si; 10 Hezekiah cu Manasseh pa a si; Manasseh cu Amon pa a si; Amon cu Josiah pa a si; 11 Josiah cu Jekhoniah le a naule hna i an pa a si; cu caan ah cun Israel mi cu Babilon ram ah sal ah an kalpi hna. 12 Babilon i sal i an kalpi hna hnuah: Jekhoniah cu Shealtiel pa a si; Shealtiel cu Zerubbabel pa a si; 13 Zerubbabel cu Abiud pa a si; Abiud cu Eliakim pa a si; Eliakim cu Azor pa a si; 14 Azor cu Zadok pa a si; Zadok cu Akhim pa a si; Akhim cu Eli-ud pa a si; 15 Eliud cu Eleazar pa a si; Eleazar cu Matthan pa a si; Matthan cu Jakob pa a si; 16 Jakob cu Josef pa a si; Josef cu Mary va a si, Mary cu Messiah timi Jesuh nu kha a si. 17 Cucaah Abraham in David tiangah chan hleili, David in Babilon i sal i an tan tiangah chan hleili, sal i an tan in Messiah chuah tiangah chan hleili a si. 18 Jesuh Khrih a chuahning cu hitihin a si: A nu Mary cu Josef he khan an i ham i asinain an i umh hlanah Thiang Thlarau in nau ka ngei lai ti kha a hngalh. 19 A hamtu Josef cu thil a hmaanning in tuah a duh zungzalmi a si; sihmanhsehlaw Mary cu zapi hmaiah ningzahter a duh lo caah an i hamnak kha a thli tein ka let lai, tiah khua a ruat lengmang. 20 Cu kong a ruah lengmang lioah khan, a mang ah Bawipa vancungmi pakhat kha a sinah a lang i, "David tefa Josef, Mary hi na nupi ca i lak awkah ṭih hlah. Zeicahtiah fa a pawimi hi Thiang Thlarau thawngin a si. 21 Fapa a hrin lai i a min ah Jesuh na sak lai — zeicahtiah a mi kha an sualnak chungin a khamh hna lai," tiah a ti. 22 - 23 Bawipa nih profet ka in, "Ngaknu cu fa a pawi lai i fapa a hrin lai i a min cu Emmanuel a si lai," tiah a chimmi a tlin nakhnga caah, hi thil vialte an hung um hi a si. (Emmanuel ti cu Pathian kan sinah a um, tinak a si.) 24 Cucaah Josef cu a hun i hlauh tikah Bawipa vancungmi nih a chimhmi kha a tuah i Mary kha a ṭhit. 25 Sihmanhsehlaw fa a hrin hlantiang, nu le va an si lo. Fapa a hrinmi cu Jesuh tiah Josef nih a sak.
1 Jesuh cu, Judea ram Bethlehem khua ah, Siangpahrang Herod bawi a si lioah khan a chuak. A chuah tlawmpal ah cun arfi zohthiammi hna kha nichuahlei in Jerusalem khua ah khan an ra i, 2 "Judah siangpahrang a si lai dingmi ngakchia a chuakmi cu khuazei ah dah a um? A arfi nichuahlei in a chuah kha kan hmuh i amah biak awkah cun atu hi kan ra," an ti. 3 Cu bia cu Siangpahrang Herod nih a theih tikah a awlok a chong ngaingai i cu bantuk cun Jerusalem khuami vialte hna zong kha an si ve. 4 Tlangbawi upa vialte hna le Phungbia cawnpiaktu saya hna kha a pumh hna i, "Khuazei ah dah Messiah cu a chuah lai?" tiah a hal hna. 5 Annih nih, "Judea ram Bethlehem khua ah," tiah an leh. "Cun Profet nih a rak ṭialmi cu hihi a si: 6 Judea ram ummi Bethlehem khua, Nangmah cu Judah ram khuapi hna lakah a hme bik na si naisai lo; Zeicahtiah nangmah chung hin hruaitu pakhat, ka mi Israel mi hna tuukhal a si dingmi cu a chuak lai," a ti. 7 Cucaah Herod nih cun nichuahlei mifim hna cu a thli tein a kawh hna i zeitik set ah dah arfi kha a chuah ti kha fiang tein a hal hna. 8 Cun Bethlehem khua ah khan a kalter hna i, "Va kal u law ngakchia kong kha ṭha tein va hlat u; cun nan hmuh tikah ra ka chim ṭhan u law kei zong amah cu ka va bia ve lai," tiah a ti hna. 9 Siangpahrang nih a ti hna bang cun an kal; cun nichuahlei ah an rak hmuh cangmi arfi kha a lang ṭhan i an hmaiah a kal i ngakchia umnak cungah cun a dir. 10 Arfi an hmuh ṭhan caah cun an i lawm tuk hringhran. 11 Inn chungah khan an vung lut i ngakchia kha a nu Mary sinah cun an vung hmuh. An khuk an i bil i an biak. Cun an zal chung khan laksawng an i chuah i an pek, cu an laksawng cu sui le frankinsen zihmui le mura zihmui an si. 12 Pathian nih an mang ah Herod sin i kir ti lo ding khan a chimh hna i cucaah lam dang in an ram ah khan an kir. 13 Annih an kal hnuah Bawipa vancungmi pakhat cu Josef sinah khan a mang ah a lang i, "Tho law, ngakchia le a nu kha i kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih ngakchia hi thah awkah a kawl lai," tiah a ti. 14 Josef cu a tho i ngakchia le a nu cu Izipt ram i zampi awkah zan ah khan a thawhpi hna. 15 Cuka ah cun Herod a thih tiang an um. Hi thil cu Bawipa nih profet ka in, "Ka Fapa cu Izipt ram in chuah awkah ka auh," a timi bia tlinnak caah khan a si. 16 Herod nih, nichuahlei mifim hna nih an ka hlen, ti kha a hngalh tikah, a thin a hung ngaingai. Arfi a chuahnak kong nichuahlei mifim hna nih an chimning khan a caan cu a tuak i Bethlehem khua le a pawngkam i a ummi khua hna chung i ngakchiapa kum hnih ri in a tanglei paoh kha thah dih hna awkah nawlbia a pek hna. 17 Cuticun profet Jeremiah nih a rak chimmi cu a hung tling. A chimmi cu: 18 "Ramah khua chungah thawng a thang, Cu thawng cu ṭahnak le ainak thawng a si. Rachel nih a fale cu a ṭah hna, An dihlak in an thih dih caah a ṭap lengmang ko i ngamh khawh a si lo," ti hi a si. 19 Herod a thih hnuah Izipt ram ah khan Josef sinah cun Bawipa vancungmi pakhat kha a lang i, 20 "Tho law, ngakchia le a nu kha Israel ram ah hun kirpi ṭhan cang hna; zeicahtiah ngakchia thah a timmi kha an thi cang," tiah a ti. 21 Cucaah Josef cu a tho i ngakchia le a nu cu Israel ram ah khan a hun kirpi hna. 22 Arkelau nih a pa Herod kha a hun chan i Judea ram ah siangpahrang a si ti kha Josef nih a theih tikah cuka i va um awk cu a ṭih. A mang ah an chimh bantukin Galilee ram ah khan a kal i 23 Nazareth khua ah khan umhmun a khuar. "Amah cu Nazareth khuami ti a si lai," tiah profet hna nih an rak chimmi tlinter awk caah, hiti in thil a hung um cu a si.
1 Cu caan ah cun Tipil petu Johan kha a hung chuak i Judea ram ramcar chungah khan phung a chim. 2 "Vancung Pennak cu a nai cang caah nan sualnak kha mertak cang hna u," tiah a ti hna. 3 Profet Isaiah nih, "Mipa pakhat cu ramlak ah a au i 'Bawipa cu a lam kha rak sialpiak u, A kalnak dingah lam kha ding tein rak tuahpiak u,' tiah a ti," a ti tikah khan a rak chimhnawhchan duhmi cu Johan hi a si. 4 Johan hnipuan cu kalauk hmul in tahmi an si; a tai ah saphaw taisawm aa sawmh i khaubawk le khuaihliti in aa cawm. 5 A sinah khan Jerusalem khua in le Judea ram khuazakip in le Jordan tiva pawngkam ram dihlak in mi cu an chuak i 6 an sualnak kha an i phuang i Jordan tiva ah khan tipilnak a pek hna. 7 Johan nih, Farasi mi hna le Sadusi mi hna kha, tipil in awkah a sin i an rat kha a hmuh tikah a thawh hna i, "Rul hna, Pathian thinhunnak a ra liomi chung cun nan luat kho lai, tiah aho nih dah aan chimh hna? 8 Nan sualnak nan i ngaihchihnak cu nan theitlai in langhter ngat u. 9 'Abraham cu a kan hringsortu a si,' tiin kan luat lai, tiah i ruat hlah u. Pathian nih hi lung hna hi Abraham tefa ah cun a ser khawh ko hna, ti hi kan chimh hna. 10 Hreitlung nih thingkung cu an hram in a hau dengmang cang hna; thei ṭha a tlai lomi paoh cu hau an si lai i mei chungah paih an si lai. 11 Nan sualnak nan i ngaihchih cang ti hngalhnak ah kei nih cun ti in tipilnak kan pek hna; sihmanhsehlaw ka hnu in a ra lai ding pa nih cun Thiang Thlarau le mei in tipilnak an pek hna lai. Amah cu keimah nakin tampi in a ngan deuh; kei cu a kedan putu hmanh ah kaa tlak lo. 12 A kut in facang zahnak sisiap cu aa put i rawl cu a zah dih hna lai; a fang cu buk ah a rawn hna lai i a hi cu a mit lomi mei in a khangh hna lai," tiah a ti. 13 Cu caan ah cun Jesuh cu Galilee ram in Jordan tiva ah khan Johan sin i tipil in awkah a va kal. 14 Sihmanhsehlaw Johan nih cun a rak al i, "Keimah pei nangmah nih tipil pek awk ka si cu, ka sin i nangmah lehtuk na rat," tiah a rak ti. 15 Sihmanhsehlaw Jesuh nih cun, "Atu cu hitihin si ko seh. Pathian nih tuah awk a si a timi paoh cu i tuah ko seh," tiah a leh. Cucaah Johan cu a hna a tla ve. 16 Tipilnak a in dih cangka cun Jesuh cu ti chung cun a chuak. Van kha aa hung i Pathian Thlarau cu ṭhuro bantukin a rung zuan i a cung i aa fut kha a hmuh. 17 Cun vancung in aw pakhat a rung thang i, "Amah hi ka dawtmi ka Fapa a si, Amah cungah hin ka lung a tling," tiah a ti.
1 Cun Thlarau nih Jesuh cu, Satan nih rak tukforh awkah, ramlak ah a kalpi. 2 Ni sawm li le zan sawm li rawl loin a um hnuah Jesuh cu a rawl a ṭam ngaingai. 3 Khuachia cu a sinah a ra i, "Nangmah cu Pathian Fapa na si ahcun, hi lung hi changreu ah canter hna ngat," tiah a ti. 4 Jesuh nih cun, "Cathiang nih pei, 'Minung hi rawl lawngin a nung kho lo, sihmanhsehlaw Pathian nih a chimmi bia paoh cu a nunnak a si lai,' a ti kha," tiah a ti. 5 Khuachia nih cun Jesuh cu khua thiang ah khan a kalpi i biakinn parpahlek ah khan a chiah. 6 Cun a thawh i, "Nangmah cu Pathian Fapa na si ahcun, vawlei ah khin vung zuang tuah; zeicahtiah Cathiang nih pei, 'Pathian nih nangmah kong ah a vancungmi kha nawl a pek hna i annih nih an kut in an in cawi lai i na ke cu lung ah naa khawng lai lo,' a ti kha," tiah a ti. 7 Jesuh nih a thawh i, "Cathiang nih pei, 'Bawipa na Pathian cu hneksak hlah,' a ti ve kha," tiah a leh. 8 Cun Khuachia nih cun Jesuh cu tlang sang ngaingaimi pakhat ah a kalpi i vawleicung ram vialte le an sunparnak vialte kha a hmuhsak i, 9 "Na khuk naa bil i na ka biak ahcun hi vialte hi kan pek dih lai," tiah a ti. 10 Cun Jesuh nih a leh i, "Satan, va kal cang, Cathiang nih pei, 'Bawipa na Pathian cu va bia law, amah rian lawnglawng va ṭuan,' a ti kha," tiah a ti. 11 Cun Khuachia nih cun a kaltak i vancungmi kha an ra i an rung hramh. 12 Jesuh nih Johan kha thong ah an thlak ti a theih tikah Galilee ram ah khan lo diam in a kal. 13 Nazareth khua ah khan um loin Kapernaum khua tu ah khan a um; Kapernaum khua cu Zebulun le Naftali phun hna ram chung i a ummi khua, Galilee Rili pawng i a ummi kha a si. 14 Cuti in a tuah cu profet Isaiah nih, "Jordan tiva khattelei ral, rili lei hoih ah a ummi, 15 Zebulun le Naftali ram hna, Jentail mi hna Galilee — 16 Muihnak chung i a ummi hna nih khan ceunak nganpi an hmuh lai. Thihnak ram mui chung i a ummi hna cungah ceunak a tlung lai," a rak timi kha tlinter awk caah a si. 17 Cu caan thawk cun Jesuh nih, "Vancung Pennak a nai cang caah, nan sualnak kha mertak cang hna u," tiah a chimh lengmang hna. 18 Jesuh cu Galilee Rili kam i aa chawh lengmang lioah khan ngatlaitu unau a hmuh hna i cu hna cu Simon (Peter timi kha) le a nau Andru kha an si; rili chungah cun sur in nga an rak chep len ko; 19 annih cu Jesuh nih cun a hei auh hna i, "Ka zul u, mi tlaitu si awk kan cawnpiak hna lai," tiah a ti hna, 20 An sur cu an kaltak zau i amah cu an zulh. 21 A hei kal deuh i unau Jeim le Johan, Zebedi fapa hna kha a hmuh hna. Annih cu an pa Zebedi he khan lawng chungah khan an rak um i an sur cu an rak timhtuah len ko. Jesuh nih cun a vun kawh hna i 22 chikkhatte ah an lawng le an pa cu an kaltak hna i Jesuh cu an zulh. 23 Jesuh cu Galilee ram dihlak ah khan aa chawk i pumhnak inn ah khan a cawnpiak hna i pennak Thawngṭha kha a chimh hna i zawtnak le fahnak a ingmi a phunphun kha a damter hna. 24 Amah thawng cu Siria ram zongah khan a thang dih i zawtnak a phunphun in a zawmi vialte hna le harnak a phunphun a ingmi hna kha amah sinah cun an ratpi hna: khuavang nih a tuahmi hna le mitlu a simi hna le a zengmi hna kha a damter dih hna. 25 Galilee ram le Khua Pahra timi peng khan le Jerusalem khua le Judea ram le Jordan tiva khattelei ral ram in mi tampi an ra i amah kha an zulh.
1 Jesuh nih mi zapi kha a hmuh hna tikah tlang cungah a kai i cuka ah cun a ṭhu. A zultu hna kha amah velchum ah cun an i pum 2 i a ka a pau i a cawnpiak hna: 3 Mi chambau kan si ti aa hngalmi cu, lunglawmmi nan va si dah! Vancung Pennak cu nanmah ta a si. 4 A ṭap a hrammi cu lunglawmmi nan va si dah! Pathian nih an hnemh hna lai. 5 Nun a nemmi cu lunglawmmi nan va si dah! Pathian nih an kamhmi hna kha nan co lai. 6 Pathian duhnak tuah kha nan duhnak ngan bik i a chiami cu lunglawmmi nan va si dah! Pathian nih nan duhnak cu a tlinter lai. 7 Midang cungah zaangfahnak a ngeimi cu lunglawmmi nan va si dah! Pathian nih an zaangfah hna lai. 8 Lungthin a thiangmi cu lunglawmmi nan va si dah! Pathian kha nan hmuh lai. 9 Mi le mi karah remnak a sertu cu lunglawmmi nan va si dah! Pathian nih, ka fa, tiah an ti hna lai. 10 Pathian nih tuah u, a timi tuah ruangah hremnak a ingmi cu lunglawmmi nan va si dah! Vancung Pennak cu nanmah ta a si. 11 "Nannih cu ka zultu nan si ruangah mi nih an in nihsawh hna i an in hrem hna i lih a phunphun an in puh hna tikah, nan caah lunglawmh awk a va si dah! 12 Nan lung i lawm u law nan thanuam ko u, zeicahtiah vancung khua ah laksawng tampi chiahpiak nan si ko. Cu bantuk cun pei nan hlan i a rak ummi profet hna kha an rak hrem hna cu," tiah a ti. 13 "Nannih cu vawlei cite nan si. Sihmanhsehlaw cite kha a alnak cu a loh ahcun, zeitindah alter khawh a si ṭhan ti lai? Santlaihnak kha a ngeih ti lo caah hlonh awk le lamh awk men a si ko cang. 14 "Nannih cu vawlei ceunak nan si. Tlang cungah an tlakmi khua cu zeihmanh nih a phen kho lo. 15 Ahohmanh nih meifar an van tikah kho an khuh bal lo, mei vannak tu ah khan an chiah tawn i inn chung i a ummi vialte kha a ceuh dih hna. 16 Cu bantukin nannih nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai. 17 "Moses Nawlbia hna le profet hna cawnpiaknak kha hrawh awkah a ra, tiah ka ruat hlah u. Annih kha hrawh awkah si loin, an cawnpiaknak kha tlinter awk tu ah ka ra. 18 Mah hihi philh hlah u! Van le vawlei an hmunh chung paohpaoh cu Phungbia hi a deh pakhatte hmanh siseh, a rin pakhatte hmanh siseh a rawk lai lo — zeizong vialte hi a donghnak an phak hlanah cun an rawk lai lo. 19 Cucaah cun ahohmanh nih nawlbia lak i a hme bik te hmanh kha zul loin a um i midang zong kha cu bantukin a cawnpiak hna ahcun, cu pa cu Vancung Pennak chungah a hme bik a si lai. Cun Nawlbia kha a zul i midang zong kha, cu bantukin zulh awk, tiah a cawnpiakmi hna cu, Vancung Pennak ah mi ngan a si lai. 20 Cucaah Pathian nih tuah hna seh, ti an duhmi hna tuahnak ah, Phungbia cawnpiaktu saya hna le Farasi mi hna nakin nan fel deuh lo ahcun, Vancung Pennak chungah cun nan lut kho lai lo. 21 " 'Lai va nawng hlah u, lai a nawngmi paoh cu biaceihtu hmaiah chuahpi a si lai, tiah hlanlio mi an rak ti tawn hna, ti kha nan theih. 22 Asinain kei nih cun, 'A u a nau cung i a thin a hungmi paoh cu biaceihtu hmaiah chuahpi nan si lai i a u siseh, a nau siseh, "Zei rua ram lo," a timi paoh cu biaceihtu bu sinah chuahpi nan si lai; cun ahohmanh, a u siseh, a nau siseh, "Mihrut" a timi paoh cu hell mei chung i tlak awkah aa tlakmi nan si lai,' kan ti hna. 23 Cucaah Pathian sinah nan laksawng cu biakṭheng cung i pekchanh na zalh tikah khan, na unau pakhatkhat kha na cungah thinhunnak a ngei ti na hun hngalh ahcun, 24 biakṭheng hmaiah cun na laksawng cu chia ta law khulrang in va kal law na unau he khan remnak va tuah, cu hnuah cun ra ṭhan law Pathian sinah na laksawng cu va pe. 25 "Mi pakhatkhat nih taza an cuai i zung ah an chuahpi ahcun, a caan a um rih lio, zung nan phak hlanah khan, amah he cun remnak tuah i zuam; cuka na phak hnuah cun biaceihtu sinah khan hluai na si lai i biaceihtu nih cun palik sinah an chanh chin lai i thong ah an in thlak lai. 26 Biangai tein kan chimh, dan an in tatmi a dongh tiang khitkhet na in hlantiang thong ah cun na um lai. 27 "Nu le pa sualnak va tuah hlah, an ti tawn cu nan theih. 28 Sihmanhsehlaw kei nih cun, ahohmanh nih nu kha sual duhnak lungthin he a zoh ahcun, cu pa cu a lung chungin a sual cang, tiah kan ti hna. 29 Cucaah na orhlei mit nih an sualter ahcun, khoih law hlonh ko. Na pum dihlak hell chung tlak nakcun na pum cung thil pakhatkhat na sungh cu a ṭha deuh. 30 Na orhlei kut nih an sualter ahcun tan law hlonh ko. Na pum a ningpi in hell chung i tlak nakcun na kutke pakhatkhat sungh cu a ṭha deuh vingvan. 31 "Ahohmanh nih a nupi kha a mak ahcun maknak ca kha pe seh, tiah ti a si fawn. 32 Sihmanhsehlaw kei nih cun, hitihin ka ti: Mipa nih a nupi kha, zumhawktlak loin a um ti ṭung lo i a mak ahcun, a nupi kha va a ngeih tikah vacung in pa a duhter a si, cucaah mipa kha a sual; cun amah a rak ṭhitu zong kha a sual ve ṭhiamṭhiam. 33 "Bia nan i kammi kha i let hlah u, Bawipa sinah chiatser in nan i kam cangmi cu nan tuah hrimhrim awk a si, tiah hlanlio mi hna an rak ti hna kha nan theih. 34 Sihmanhsehlaw atu cu hihi kan chimh hna: Biakamnak nan tuah tikah chiatser biahrennak zeihmanh tuah hlah u; vancung khua chalh in chiatser hlah u, zeicahtiah vancung khua cu Pathian ṭhutnak a si; 35 vawlei chalh zongin chiatser hlah u, zeicahtiah vawlei cu Pathian ke chiahnak a si; Jerusalem khua chalh zongin chiatser hlah u, zeicahtiah Jerusalem khua cu Siangpahrang ngan khua a si. 36 Nanmah lu chalh zongin chiatser hlah u, zeicahtiah nan samfa fa khat hmanh nan dumter kho in nan ranter kho lo. 37 'Asi,' 'Asilo,' ti lawng kha chim ko u, cu pin cu Mi Ṭhalopa sinin a rami thil an si. 38 "Mit caah mit ve, ha caah ha ve, tiin an rak ti tawn kha nan theih. 39 Sihmanhsehlaw kei nih cun, nan cung i ṭhat lonak a tuahtu hna kha lehrul hna hlah u, kan ti hna. Nan orhlei bel ah an in bengh hna ahcun khatlei zong kha i chit rih u. 40 Cun nan angki chungnawh lak awkah taza an in cuai hna ahcun nan angki leng zong kha va pe rih hna u. 41 Cun an uktu ralkap hna nih, an thil phorh kha, khan khat an in fial hna ahcun, khan hnih in va phorhpiak hna u. 42 Mi nih thil an in hal hna tikah va pe hna u, an in cawi hna tikah va cawih hna u. 43 "Nan hawi kha va daw hna u law nan ral kha va hua hna u, tiah an ti tawn kha nan theih. 44 Sihmanhsehlaw kei nih cun, hitihin kan ti hna: nan ral kha va daw hna u law an hremtu hna kha thla va campiak hna u, 45 Cuticun vancung khua i a ummi nan Pa fale cu nan si lai. Anih nih cun a ṭhami he a ṭha lomi he, an cungah a ni kha a tlanter i, ṭhatnak a tuahmi he ṭhat lonak a tuahmi he, an cungah a ruah kha a surter. 46 Zeicahdah an dawtu hna lawng nan dawt hna tikah, Pathian nih laksawng an pek hna lai? Ngunkhuai khawltu hna hmanh nih cucu an tuah ko ṭung. 47 Cun nan hawikom lawng kha nan chawnh hna ahcun, zeital a hlei in nan tuahmi a um maw? Pathian bia lo hmanh nih cucu an tuah ko ṭung. 48 Vancung khua i a ummi nan Pa a tlin bantukin nannih zong nan tlin awk a si.
1 "Thil ṭha nan tuahmi hi zapi nih ka hmu hna seh ti duhnak lungthin in mizapi hmaiah nan tuah nakhnga lo i ralring u. Cu ti nan tuah ahcun vancung khua i a ummi nan Pa sinin laksawng zeihmanh nan hmu lai lo. 2 "Cucaah mi kha thil an herhmi nan pek hna tikah, mi depde pawl nih pumhnak inn le zatlang lam ah an tuah bantukin nan tuahmi cu vaa uangthlar hlah u. Annih nih cun, mi nih kan thangṭhat hna seh, tiin an tuah. Hihi philh hlah u! An tuah man cu tling tein pei an hmuh cang cu! 3 Sihmanhsehlaw nannih nih cun mi kha an herhmi thil nan ṭhenh hna tikah, nan hawikom ṭha bik hmanh nih thei hlah seh, ti in va tuah u; 4 nanmah lawngte nih va hngal ko u. A thli tein nan tuahmi a hmutu nan Pa nih khan laksawng an pek hna lai. 5 "Thla nan cam tikah mi depde pawl nih an cam bantukin va cam hlah u. Annih nih cun, mi nih kan hmu hna seh, tiin pumhnak inn chung i dir riangmang i cam le zatlang lam tonnak i cam kha an duh. Hihi philh hlah u! Annih cu an laksawng kha tling tein an hmu cang. 6 Sihmanhsehlaw nannih cu thla nan cam tikah, nan inn khaan chungah va lut u law, innka vaa khar khumh u law, cuticun hmuh khawh lomi nan Pa sinah khan va cam u. Cun a thli tein nan tuahmi a hmutu nan Pa nih khan laksawng an pek hna lai. 7 "Thla nan cam tikah, Pathian bia lomi nih sullam a ngei set lomi bia tampi an hman bantukin va hmang ve hlah u, annih nih cun kan thlacam a sau ruangah hin Pathian nih a kan theihpiak deuh lai, tiah an ruah. 8 Annih bantuk cun va tuah hlah u, zeicahtiah nan Pa nih cun nan hal hlan in nan herhmi cu a hngalh cia ko. 9 Cucaah hi bantuk hin thla nan cam awk a si: 'Vancung khua i a um kan Pa, Na min thiang cu upat si ko seh; 10 Na pennak cu rung tlung ko seh, Vancung ah na duhnak an tuah bangin Vawlei cungah hin tuah si ve ko seh. 11 Ni fate kan herhmi rawl cu nihin zongah hin kan pe tuah. 12 Mi nih kan cungah ṭhat lonak an tuahmi kan ngaihthiam hna bangin Kan ṭhat lonak cu kan ngaithiam ve ko. 13 Tukforhnak chungah kan phakter hlah, Mi Ṭhalopa sin khan him tein kan khamh tuah. 14 "Mi nih nan cungah an tuahmi ṭhat lonak kha nan ngaihthiam hna ahcun, vancung i a ummi nan Pa zong nih an ngaihthiam ve hna lai. 15 Sihmanhsehlaw mi ṭhat lonak kha nan ngaihthiam hna lo ahcun vancung i a ummi nan Pa zong nih ṭhat lonak nan tuahmi kha an ngaithiam ve hna lai lo. 16 "Mi depde pawl nih rawl an ulh tikah hmaichia fiamfuam in an i umter bantukin nannih cu rawl nan ulh tikah i umter ve hlah u. Rawl an ul ti kan hngal hna seh tiin rawl ṭam hnianghnuang in an i chawk. Hihi philh hlah u! Annih nih cun an laksawng kha tling tein an hmuh cang. 17 Rawl nan ulh tikah nan hmai i phiah u law nan sam i hriat u, 18 cuticun midang nih rawl an ul ti awk kha an in hngal kho hna lai lo i hmuh khawh lomi nan Pa lawnglawng nih a hngalh lai. Cun a thli tein nan tuahmi a hmutu nan Pa nih laksawng an pek hna lai. 19 "Rungrul le cirik nih an ei khawh i mifir nih an baoh i an fir khawhnak vawlei ah hin nan chaw va khong hlah u. 20 Rungrul le cirik nih an ei khawh lonak le mifir nih an baoh i an fir khawh lonak vancung tu ah khin nan chaw cu va khong u. 21 Zeicahtiah nan chaw a umnak ah nan lung zong a um ve lai. 22 Mit hi pum caah meiinn a si. Nan mit a ṭhat ahcun nan pum cu a dihlak in ceunak in a khat lai; 23 sihmanhsehlaw nan mit kha a ṭhat lo ahcun, nan pum cu muihnak chungah a um lai. Cucaah nan chung i a ummi ceunak cu muihnak a si sual ahcun, cu muihnak cu a fak ngaingaimi muihnak a si lai. 24 "Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo. 25 "Cucaah cun nan nunnak ding ca i nan herhmi rawl le ti kong ah le nan pum ca i nan herhmi hnipuan kong ah lungrethei awlokchong in va um hlah u, kan ti hna. A ngaingai ti ahcun, nunnak hi rawl nakin a biapi deuh lo maw? Cun pum zong hi hnipuan nakin a biapi deuh lo maw? 26 A zuang lengmangmi va khi zoh tuah hna u: thlaici an tuh bal lo, rawl an ṭuan bal lo, buk zongah an rawn bal lo; sihmanhsehlaw vancung i a ummi nan Pa nih a zohkhenh ko hna. A si ah, nannih cu va nakin nan biapi deuh lo maw? 27 Nan lungre a theih le nan awlok a chon thawngin nan nunnak tlawmte tal a sauter kho deuh mi aho tal nan um maw? 28 "Cucaah zeicahdah hnipuan kong ah nan lungre a theih? Ramlak i a khomi lili pangpar khi zoh tuah hna ngat u: rian an ṭuan lo, hnipuan zong zeihmanh an i tah lo. 29 Sihmanhsehlaw hihi kan chimh hna: Siangpahrang Solomon hmanh kha, kha tluk khan a rum ko nain hi pangpar hna lak i pakhat tluk hmanh hin aa dawhmi hnipuan a ngei lo. 30 Sihmanhsehlaw ramlak ramkung, nihin ah a hring i thaizing ah meichung i an paihmi ramkung hna, a thuamhtu cu Pathian pei a si cu. Amah nih cun nannih chinchin cu thuamh loin an um hna hnga maw? Nan zumhnak a va hme hringhran dah! 31 Cucaah, 'Khuazei in dah ka ei awk ka rawl cu ka hmuh lai, ka din awk cu ka hmuh lai, ka hnipuan cu ka hmuh lai,' tiin lungrethei in um hlah ngat u. 32 (Hi thil hna cu Pathian bia lomi hna nih an lungre an i theihpi zungzalmi pei an si cu.) Vancung khua i a ummi nan Pa nih hi thil vialte cu nan herh dih hna ti kha a hngalh ko. 33 Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai. 34 Cucaah thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo.
1 "Pathian nih an soi nakhnga lo, mi va soi hna hlah — 2 midang na soi hna ning te khan Pathian nih an soi lai i midang cung i na hmanmi tahnak te kha Pathian nih na cungah a hman ve lai. 3 Na mit chung i a ummi thingtan kha ruat ṭung loin zeicahdah na unau mit chung i a ummi mithnawmte kha na zoh? 4 Na mit chung i thingtan a um ko buin zeitindah na unau cu, 'Na mit hnawm cu in coihpiak ning,' na ti ngam? 5 Mi depdepa, na mit chung i thingtan kha chuah hmasa law pei, na unau mithnawm cu fiang tein na hmuh lai i na coihpiak khawh lai cu! 6 "A thiangmi thil cu uico kha va pe hna hlah u — an i let lai i nanmah lehlam kha an in seh hna lai. Nan lungvar cu vok hmaiah va thla hlah u, vok nih cun a lamh in an lamh men ko lai. 7 "Hal u law an in pek hna lai, kawl u law nan hmuh lai, king u law innka cu an in hunpiak hna lai. 8 Zeicahtiah a halmi paoh cu pek an si lai i a kawlmi paoh nih cun an hmuh lai i a kingtu paoh cu innka kha hunpiak an si lai. 9 Nan fale nih changreu an in hal hna tikah lung a pemi nan um hnga maw? 10 Nga in hal hna seh law, rul nan pe hna hnga maw? 11 Hi tlukin nan ṭhalo ko nain, nanmah hmanh nih nan fale kha thil ṭha pek nan hngalh ahcun, vancung i a ummi nan Pa chinchin nih cun zeitluk in dah thil ṭha cu a halmi kha a pek chinchin hna lai! 12 "Mi nih kan cungah tuah hna seh ti nan duh bantuk khan midang cung zongah va tuah ve u; hihi Moses Nawlbia le profet hna cawnpiaknak an sullam cu a si. 13 "Kutka bi chungah cun lut tuah u, zeitintiah Hell ah a kalmi lam cu a kau i a fawi i mi tampi nih an zulh. 14 Nunnak a phanmi lam cu a har i a kutka cu a bi i a hmumi cu tlawmte lawng an si. 15 "Nal profet kha i ralring hna u, nan sin an rat ah cun tuu bantukin an i umter, sihmanhsehlaw an chunglei cu cenghngia hrang an si. 16 Annih cu an theitlai khan nan rak hngalh ko hna lai. Khohmung nih mitsur thei a tlai bal lo i saihmurhling nih theipi a tlai bal lo. 17 A ngan a dammi thingkung nih thei ṭha a tlai i kung chia nih thei ṭhalo a tlai tawn. 18 A ngan a dammi kung nih theichia a tlai kho lo i a kung a ṭha lomi nih thei ṭha a tlai kho ve lo. 19 Thei ṭha a tlai lomi cu hau i mei chung i paih an si tawn. 20 Cuticun nal profet hna cu an theitlai khan nan hngalh ko hna lai. 21 " 'Bawipa, Bawipa,' tiah a ka timi paoh in Vancung Pennak chungah an lut dih lai, tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai. 22 Cu Ni cu a phak tikah, mi tampi nih keimah cu, 'Bawipa, Bawipa! Na min in Pathian bia kha kan chim i na min in khuachia kha tampi kan ṭhawl hna i khuaruahharnak tampi kan tuah hna,' an ti lai. 23 Khi tikah annih cu ka thawh hna lai i, 'Nannih cu aho nan si kha kan hngal bal hna lo. Kal ko u, ṭhat lonak a tuahtu hna,' tiah ka ti hna lai. 24 "Cucaah hi ka bia a thei i a zulmi cu lung cungah a inn a sami mifimpa bantuk a si. 25 Ruah a sur, ti a lian, thlitu nih fak piin a hranh. Sihmanhsehlaw lung cung i sakmi a si caah khan a pur lo. 26 "Sihmanhsehlaw hi ka bia a thei i a zul lomi cu thetse cungah a inn a sami mihrutpa bantuk a si. 27 Ruah a sur, ti a lian, thlitu nih fak piin a hranh i a pur; rawk cikcek in a tlu," tiah a ti. 28 Jesuh nih hi bia vialte cu a chimh dih hna tikah mizapi cu a cawnpiak hna ning kha an khuaruah a har, 29 zeicahtiah phungbia cawnpiaktu saya hna bantuk khan si loin hmual ngei ngaiin a cawnpiak hna.
1 Jesuh cu tlang cung khan a rung ṭum i mi tampi nih an zulh. 2 Cun thinghmuipa pakhat kha a ra i a hmaiah khuk bil in a kun i, "Bawipa, na duh ahcun na ka damter khawh ko," tiah a ti. 3 Jesuh nih a hei banh i a tongh i, "Ka duh. Thiang ko cang," tiah a ti. Chikkhatte ah a zawtnak khan a thiang. 4 Cun Jesuh nih amah cu a thawh i, "Ka bia ngai, ahohmanh chim hna hlah, sihmanhsehlaw tlangbawi sinah khan ding teomao in va kal law rak in zoh seh. Cun mizapi sinah ka thiang cang, ti langhternak caah Moses nih tuah awk a timi raithawinak kha va tuah," tiah a ti. 5 Jesuh cu Kapernaum khua i a va luh ah khan Romans ralbawi pakhat nih a rak don i, 6 "Bawipa, ka sinumpa cu a zaw i inn ah a ril ko, a cawl zong a cawlcang kho lo i a zual ngaingai ko," tiah a ti. 7 Jesuh nih cun, "Ka ra lai i ka damter lai," tiah a ti. 8 Ralbawipa nih cun, "Aa, bawipa, si hlah! Nang ka inn i rat dingah hin kaa tlak lo. Nawl hei pe law ka sinumpa cu a dam ko lai. 9 Kei zong ka cunglei bawi nawl tang i a ummi ka si i ka tang zongah ralkap an um ve. Pakhat cu, 'Kal,' ka ti i a kal ve ko, cun a dang pakhat cu, 'Ra,' ka ti i a ra ve ko; cun ka sal cu, 'Hihi tuah,' ka ti i a tuah ve ko," tiah a leh. 10 Cu bia cu Jesuh nih a theih tikah a khuaruah a har i a zulmi mizapi hna cu, Hi pa bantukin zumhnak a ngeimi Israel mi hna lakah ahohmanh ka hmu rih hna lo. 11 Hihi va philh hlah u: Nichuahlei le nitlaklei in mi tampi an ra te lai i Vancung Pennak chungah cun rawldanghnak cabuai ah Abraham le Isak le Jakob hna he tiah an ṭhu ṭi lai. 12 Sihmanhsehlaw Vancung Pennak chung i a um ding a simi hna tu kha cu, khualeng muihnak ah hlonh an si lai i cuka ah cun an ṭap lai i an hacang an rial lai," tiah a ti. 13 Cun Jesuh nih ralbawipa cu a thawh i, "Inn ah va ṭin law na zumhmi cu tuahpiak na si lai," tiah a ti. Cun ralbawi sal cu, cu caan hrimhrim ah cun a rak dam. 14 Jesuh cu Peter inn ah khan a va kal i Peter nupi nu cu a rak zaw i ihkhun ah khan a rak ril ko. 15 A kut kha a vun tongh i a taklin cu a dai i a tho i annih kha a bultawl hna. 16 Zanlei sang a si tikah khuavang ngeimi tampi kha Jesuh sinah cun an ratpi hna. Bia kaa khat in thlarau ṭhalo kha a ṭhawl hna i a zawmi vialte kha a damter hna. 17 Hi a tuahmi hi, profet Isaiah nih, "Amah hrimhrim nih kan zawtnak kha a phorh i kan dam lonak kha a kalpi," tiin a rak chimmi tlinternak caah khan a si. 18 A pawngkam i a ummi mizapi cu Jesuh nih a hmuh hna tikah, a zultu hna cu rili khattelei ral i rak kal kha a fial hna. 19 Phungbia cawnpiaktu saya pakhat kha a sinah a ra i, "Saya, na kalnak paoh ah kan zulh lai," tiah a ti. 20 Jesuh nih cun, "Cenghngia nih kua an ngei i vate cu bu an ngei, sihmanhsehlaw Mi Fapa cu riahnak hmun hmanh a ngei lo," tiah a leh. 21 Amah zultu a simi, midang pakhat nih khan, "Bawipa, va kir ta ning law ka pa kha va vui ta ning," tiah a ti. 22 Jesuh nih cun, "Ka zul ko, mithi nih an mithi cu rak vui ko hna seh," tiah a leh. 23 Jesuh cu lawng chungah cun a lut i a zultu nih khan an zulh. 24 Chikkhatte ah khin thlichia a hrang ciammam i tilet nih lawng cu a khuh. Sihmanhsehlaw Jesuh cu aa hngilh. 25 A zultu cu a sinah khan an va kal i an ṭhangh i, "Bawipa, kan khamh tuah. Kan thi dih cang lai hi ta," an ti. 26 Jesuh nih cun, "Zeicahdah cu ti lawmmam cun nan thin a phan? Nan hei ka bochan lo hringhran dah!" tiah a leh hna. Cun a tho i thli le tilet cu nawl a pek hna i dai zirziar tein rili cu a um ṭhan. 27 An dihlak in an khuaruah a har i, "Hi pa hi zei bantuk minung dah a si? Thlichia le tilet hmanh nih dahngai a bia an ngaih ko hi," an ti. 28 Jesuh cu Rili khattelei ral Gadarin mi hna ram kha a va phan i, miruak vuinak lungkua chungin a ra chuakmi mi pahnih nih an rak ton. Hi hna hi an chung i khuachia a ngeimi an si i ṭih an nun tuk hringhran caah cu lam ah cun ahohmanh an kal ngam lo. 29 Hmakhatte ah khin an ai i, "Pathian Fapa, zeidah na kan duhnak a um? A caan a tlin hlanah kannih dantat awkah na ra maw?" tiah an ti. 30 Cuka in aa hlat lem lomi hmun ah khin vok kha an tlong lulhmalh ko. 31 Khuachia nih cun Jesuh cu, "Kannih cu na kan chuah ding a si ahcun, vok chung tal ah khin kan luhter," tiah an nawl. 32 Jesuh nih cun, "Va kal u," tiah a ti hna i cucaah an chuak i vok chungah cun an lut. Vok cu an run ningpi in lungpang cun an zuang ciammam i rili chungah cun an tla i an thi dih. 33 Vok zohkhenhtu hna cu khulrang in khua ah cun an va le i cu kong cu le khuachia nih a tuahmi hna kong kha an va chimh hna. 34 Cucaah khua chung mi vialte cu Jesuh ton awkah khan an i thawh i an hmuh tikah, kan ram hin kir ko, tiah an nawl.
1 Jesuh cu lawng chungah khan a lut i rili cung cun an kir ṭhan i amah a khua kha a phan. 2 A sinah khan mizengpa pakhat kha, a ihkhun in an rak zawnh. Jesuh nih an zumhnak kha a hmuh tikah mizeng pa cu, "Ka fapa, na lung dong hlah! Na sualnak cu ngaihthiam na si cang," tiah a ti. 3 Cu tikah Phungbia cawnpiaktu saya a cheukhat nih khan, "Hi pa hi Pathian serhsat in bia a chim," an ti. 4 Jesuh nih an ruahmi kha a hngalh i, "Zeicahdah cu bantuk thil ṭhalo cu nan ruah? 5 'Na sualnak cu ngaihthiam na si cang,' ti cu maw a fawi deuh, 'Tho law kal tuah,' ti dah a fawi deuh? 6 Mi Fapa nih vawlei cungah hin sual ngaihthiam khawhnak a ngei ti kha kan hngalhter hna lai," a ti i cucaah mizengpa cu, "Tho law, na ihkhun kha i put law inn ah va ṭin," tiah a ti. 7 Mipa cu a tho i inn ah cun a ṭin. 8 Cucu mi nih khan an hmuh tikah an thin a phang i cu bantuk nawlngeihnak cu Pathian nih minung kha a pek hna caah Pathian cu an thangṭhat. 9 Cuka hmun cun Jesuh cu a chuak i a kalpah ah khan ngunkhuai khawltu Matthai a zung i a rak ṭhut ko kha a hmuh. Amah cu, "Ka zul," tiah a ti. Matthai cu a tho i a zulh. 10 Jesuh cu Matthai inn i zanriah an ei lioah khan ngunkhuai khawltu tampi hna le misual mi hna nih khan amah le a zultu hna cu zanriah an dumpi hna. 11 Mah cucu Farasi mi nih khan an hmuh hna i cucaah a zultu cu an thawh hna i, "Zeicahdah nan sayapa hi ngunkhuai khawltu hna le misual hna he rawl an ei ṭi?" tiah an ti. 12 Jesuh nih cun a theih hna i, "A dammi nih cun sibawi an herh lo, a zawmi lawng nih khan an herh. 13 Va kal u law, 'Saram thawinak si loin ka duhmi cu zaangfahnak lungthin kha a si,' tiah Cathiang chungah aa ṭialmi hi a sullam va ruat tuah u. Miding mi pawl kawh awkah ka rat ṭung lo, misual mi hna kawh awkah pei ka rat ko cu," tiah a ti. 14 Khi hnuah Tipil petu Johan zultu pawl kha Jesuh sinah cun an ra i, "Zeicahdah kannih le Farasi mi hna cu atu le atu rawl kan ul i nang na zultu hna cu an ulh kun lo," tiah an hal. 15 Jesuh nih cun, "Nupi ṭhit rawl danghnak puai ah, nupi ṭhitu a um chungah cun zeitindah an sawmmi hna cu ngaihchia in an um lai? Sihmanhsehlaw nupi ṭhitu an sinin aa ṭhen caan kha a phan ve te lai i cu tikah cun rawl cu an ul te ko lai. 16 "Ahohmanh nih angki hnawh cia kha ti khat hmanh a tla rih lomi thil thar in an belh bal lo, zeicahtiah cu ti i an belh ahcun an belhnak puan nih khan a thleh chin lai i a awng kha a kau chin lai. 17 Cun a hlunmi saphawcua chungah mitsur hang thar an rawn bal lo, cu ti an tuah ahcun a saphaw kha a kek lai i a mitsur hang kha a chuak dih lai i a saphaw kha a rawk lai. Cucaah mitsur hang thar cu saphawcua a tharmi chung tu ah an rawn tawn i cuticun an pahnih in ṭha tein an um," tiah a ti. 18 Cu bia cu Jesuh nih a chimh lio hna ah khan, Judah mi lak i bawi pakhat a simi kha a sinah a ra i a hmaiah a khuk aa bil i, "Tunaite ah khan ka fanu a thi, sihmanhsehlaw ra law a cungah na kut ra chia law a nung ko lai," tiah a ti. 19 Cucaah Jesuh cu a tho i amah cu a zulh i a zultu hna zong kha a sinah cun an kal ve. 20 Cu lioah cun, nu pakhat, thi chuah zawtnak in kum hleihnih tiang a zaw cangmi kha a hnulei in a ra i a puan parte kha a tongh. 21 "A puan hmanh kha ka tongh khawh ahcun ka dam ko lai," tiah a lungchung in a ti. 22 Jesuh cu a hun i mer i minu cu a hmuh i, "Ka fanu, na thinphang hlah! Na ka zumhnak nih an damter cang," tiah a ti. Cu caan te ah cun minu cu a dam colh. 23 Cun Jesuh cu Judah mi bawi inn ah cun a lut. Mithi caah tingtang a tummi hna le a awn au mi kha a hmuh hna tikah, 24 "Nan dihlak in chuak tuah u! Ngakchia nute hi a thih ṭung lo, aa hngilh i pei a si ko cu," tiah a ti hna. Annih nih an nihsawh, 25 Mi kha an chuah dih cangka in Jesuh cu ngakchianu khaan chungah khan a vung lut i a kut in a vun tlaih i a tho. 26 Cu thawng cu cuka hrawng ram vialte ah cun a thang dih. 27 Cuka hmun cun Jesuh cu a chuak i a kalpah ah khan mitcaw pahnih nih an zulh. "David Fapa kan zaangfah tuah," tiah an au. 28 Jesuh cu inn chung i a luh tikah khan mitcaw pahnih hna cu a sinah cun an ra i annih cu, "Hihi ka tuah khawh tiah nan zum maw?" tiah a rak hal hna. Annih nih, "Asi, na tuah khawh tiah kan zumh bawipa," tiah an leh. 29 Cun Jesuh nih an mit kha a tongh hna i, "Nan zumhning te cun si ko seh," tiah a ti i 30 annih cu khua an hmu kho ṭhan. Annih cu Jesuh nih fak piin, "Hihi ahohmanh va chim hna hlah u," tiah a ti hna. 31 Sihmanhsehlaw an kal i Jesuh kong cu cuka hrawngah cun an thanh dih. 32 Mi kha an ṭian cuahmah lioah cun, khuachia nih a tuah ca i a holh kho lomipa pakhat kha Jesuh sinah cun an ratpi. 33 A khuachia cu a chuah cangka in mipa cu a holh kho i mi vialte cu an khuaruah a har dih. "Hi bantuk thil hi Israel mi lakah kan hmu bal lo," an ti. 34 Sihmanhsehlaw Farasi mi hna nih cun, "Khuachia ṭhawl khawhnak nawl a petu hi khuachia bawi a si," an ti. 35 Cuticun Jesuh cu khuapi he khuate he a tlawng duahmah hna. An pumhnak inn ah khan a cawnpiak hna i Vancung Pennak kong Thawngṭha kha a chimh hna i a zaw a fakmi kip kha a damter hna. 36 Mi zapi kha a hmuh hna tikah, khaltu a ngei lomi tuu bantukin lungrethei le awlokchong in an um kha a hmuh hna caah a zaang an fak ngaingai. 37 Cucaah a zultu kha a thawh hna i, "Rawl ṭuan awk cu tampi a um ko, sihmanhsehlaw a ṭuantu ding cu tlawmte lawnglawng an si. 38 Cucaah rawlṭuan uktu bawi sinah cun, rawl ṭuantu tam deuh a thlah hna nakhnga, thla va cam tuah u," a ti.
1 Jesuh nih lamkal ah a thimmi hleihnih kha a auh hna i khuachia ṭhawl khawhnak le zawtnak fahnak vialte damter khawhnak nawl kha a pek hna. 2 Hihi lamkal hleihnih hna an min cu a si: a hmasa bik ah Simon (Peter timi kha), cun a nau Andru; Zebedi fapa Jeim le a nau Johan; 3 Filip le Bartholomew; Thomas le ngunkhuai khawltu Matthai, Alfeas fapa Jeim, cun Tadias; 4 cun Phunṭanh Simon le Jesuh rawitu Judas Iskariot. 5 Jesuh nih mi pahleihnih kha a thlah hna i, "Jentail mi ram ah siseh, Samaria mi hna khua ah siseh, va kal hlah u. 6 Israel miphun chungin a tlaumi tuu hna sinah khan va kal u. 7 Cun, 'Vancung Pennak cu a nai cang,' tiah va chim hna u. 8 A zawmi kha va damter hna u, mithi kha va thawhter hna u, thinghmui kha va thianter hna u, khuachia kha va ṭhawl hna u. Nannih nih man pek loin nan hmuh i man pek loin va pe ve hna u. 9 Nan zal ah sui tangka siseh, ngun tangka siseh, dar tangka siseh, i sanh hlah u. 10 Nan khualtlawnnak dingah cun rawl halnak zal siseh, angki khethuan siseh, kedan siseh, ṭhiangṭhunh siseh, i phorh hlah u. Rianṭuantu nih cun a herhmi thil cu a hmuh awk aa tlakmi a si ko. 11 "Khuapi siseh, khuate siseh, nan phak tikah, tluninn an in awnhnak hna inn ah khan va kal u law cuka hmun in nan chuah hlantiang anmah cu va tlung ko hna u. 12 Cun inn pakhatkhat ah nan luh tikah, 'Nan cungah daihnak um ko seh,' nan ti lai. 13 Cuka inn i a ummi nih tluninn an in awnh hna ahcun daihnak in nan biakchawnh hnanak cu an cungah hmun ko seh; sihmanhsehlaw an in awnh hna lo ahcun nan biakchawnh hnanak cu i lak ṭhan u. 14 Cun innchungkhar pakhatkhat nih siseh, khua pakhatkhat nih siseh, an in tlunter duh hna lo ahcun, cuka hmun cu va kaltak u law nan ke i aa behmi leidip kha va thing u. 15 Mah hihi philh hlah u: Biaceih Ni ah Pathian nih, cu khuami nakcun Sodom le Gomorrah khuami kha a zaangfah deuh hna lai," tiah a ti. 16 "Ngai hmanh u! Cenghngia hrang rual lak i thlahmi tuu bantukin kan thlah hna. Cucaah rul bantukin vaa fim u law ṭhuro bantukin nan nun va nem u. 17 An in tlaih hna lai i zung ah an in chuahpi hna lai, pumhnak inn ah an in chuahpi hna lai i an in tuk hna lai cu caah vaa ralring u. 18 Uktu bawi hna hmai le siangpahrang hna hmaiah keimah ruangah an in chuahpi hna lai i annih cu le Jentail mi hna kha Thawngṭha kha nan chimh hna lai. 19 Nan bia an in ceih hna tikah zeidah ka chim lai, ti le zeitindah ka chim lai, ti kha nan khuaruah va har hlah u; a caan a phak tikah chim ding cu pek nan si te ko lai. 20 Zeicahtiah nan chimmi bia cu nanmah bia a si lai lo; nan chung i bia a chimtu nan Pa Thlarau nih an pekmi hna bia a si lai. 21 "Mi nih anmah unau lila kha thah awkah mi an tlaihter hna lai, cun pale zong nih cu bantuk ṭhiamṭhiam in an fale cungah an tuah lai; fale zong nih khan an nule le an pale kha an doh hna lai i mi kha an thahter hna lai. 22 Mi kip nih nannih cu keimah ruangah an in huat hna lai, sihmanhsehlaw a dongh tiangin aa tlaih pengmi cu khamhnak nan hmu lai. 23 Cun khua pakhat i an in hrem hna tikah, khua dang ah va zaam ko u. Hihi kan chimh hna: Mi Fapa a rat hlanah, Israel ram khua dihlak kha nan ṭol dih manh hna lai lo. 24 "Siangngakchia cu ahohmanh a saya nakin a ngan deuh lo; sal zong a bawipa nakin a ngan deuh fawn lo. 25 Cucaah siangngakchia caah a saya tluk si cu a za ko i sal caah a bawi tluk si kha a za ko. Innchungkhar i an lu cu Beelzebul ti a si ahcun, innchungkhar mi chinchin cu cu nak min chia deuh in pei auh an si lai cu," tiah a si. 26 "Cucaah mi cu va ṭih hna hlah u. Khuhmi thil paoh kha hun dih an si ko lai i biathli vialte kha hngalh dih an si ko lai. 27 Mui lak i kan chimhmi hna hi chun khua ceu ah va chim chin u, cun a thli in nan theihmi hi inn par in va au pi u. 28 Pum cu a that kho ko nain thlarau a that kho lomi cu va ṭih hlah u; hell chungah pum he thlarau he a that khotu Pathian tu kha va ṭih u. 29 Phaisa sen pakhat in pithlung pahnih nan cawk khawh, asinain khi pithlung pakhat hmanh kha nan Pa hngalh loin vawlei ah a tlong lo. 30 Nannih chinchin cu nan lu cung sam hmanh kha a rel dih. 31 Cucaah nan thinphang hlah u: nannih cu pithlung tampi nakin tampi in nan sung deuh," tiah a ti. 32 "Amah mi ka si, tiah zapi hmaiah a phuang ngammi cu vancung khua i ka Pa hmaiah kei zong nih cuticun amah cu ka ti ve lai. 33 Sihmanhsehlaw zapi hmaiah, amah mi ka si lo, tiah aa phehmi cu vancung khua i a ummi ka Pa hmaiah cuticun ka ti ve hna lai. 34 "Vawlei cungah daihnak tlunter awkah a ra, tiah ka ruat hlah u, daihnak tlunter awkah ka ra lo, vainam tlunter awk tu ah ka ra. 35 Ka ratnak chan cu fale hna le pale hna dohter awk, fanule hna le nule hna dohter awkah a si; 36 nan ral ṭhalo bik hna cu nanmah innchungkhar chung mi lila an si lai. 37 "Ahohmanh a nu siseh, a pa siseh, keimah nakin a daw deuhmi cu ka mi si awk aa tlak lo; ahohmanh a fapa siseh, a fanu siseh, keimah nakin a daw deuhmi cu ka mi si awk aa tlak lo. 38 Ahohmanh a vailam tahnak kha aa put i ka hnu in a ka zul lomi cu ka mi si awk aa tlak lo. 39 Ahohmanh a nunnak humhak a duhmi nih cun a nunnak cu a sung lai i keimah ruangah a nunnak a sungmi nih cun a nunnak cu a hmuh lai. 40 "Nannih an conglawmhtu hna paoh nih keimah an ka conglawmh a si i keimah a ka conglawmhtu paoh nih a ka thlahtu a conglawmh a si. 41 Pathian lamkaltu cu Pathian lamkaltu a si ruangah a rak conglawmhtu paoh cu a laksawng kha aa hrawm ve lai; cun miṭha cu miṭha an si ruangah a rak conglawmhtu paoh cu miṭhapa laksawng kha aa hrawm ve lai. 42 Cun hihi philh hlah u! A ka zultu hna hi a ka zultu an si ruangah anmah lak i a nauta bik hmanh kha tikik hrai khat a pemi cu, laksawng kha a hmu hrimhrim lai," tiah a ti.
1 Jesuh nih a zultu pahleihnih kha hi bia hi a chimh dih hna tikah, cuka hmun cun a chuak i cuka hrawng i a ummi khua ah khan a tlawng i a cawnpiak hna i phung a chimh hna. 2 Tipil petu Johan nih thong chungin Khrih rianṭuannak kong kha a rak theih tikah a zultu tlawmpal kha a sinah a hei thlah hna i, 3 " 'A ra dingmi cu nangmah hi na si maw, asiloah, midang dah kan hngah rih lai,' tiah va hal u," a ti hna. 4 Jesuh nih cun, "Nan hmuhmi le nan theihmi hi Johan cu va chim ko u: 5 mitcaw nih khua an hmuhnak le kebei an kal khawhnak le mithinghmui an thiannak le hnachet nih khua an theihnak le mithi thawhṭhan an sinak le misifak mi hna sinah Thawngṭha chim a sinak hi va chim ko u. 6 Keimah kong ah lung awṭawmnak zeihmanh a ngei lomi cu a caah lunglawmh awk a va si dah," tiah a leh hna. 7 Johan zultu pawl cu an kir tikah khan Jesuh nih Johan kong cu mizapi kha a chimh hna. "Thetse ram i Johan sin i nan va kal ah khan zeidah hmuh nan i ruah? Thli nih a kuiter lengmangmi ram hnah maw? 8 Zei ko dah zoh awkah nan va kal? Puan dawhdawh in aa thuammi hna zoh awkah maw? Puan dawhdawh in aa thuammi cu bawi inn ah pei an um tawn cu! 9 Zei set dah hmuh nan i ruahchihmi cu a si, ka chim tuah u. Profet maw? Profet nakin biapi deuh a simi pei nan hmuh cang hi! 10 Johan hi Cathiang nih, 'Hika ah hin ka lamkaltu cu a um ko; Amah cu nangmah lam sialtu dingah na hmaiah ka thlah lai, tiah Pathian nih a ti,' tiah a timi kha a si. 11 Hihi i cinken hmanh u: nu chungin a chuakmi lakah vawlei cungah hin Johan tlukin a nganmi ahohmanh an um lo; sihmanhsehlaw Vancung Pennak chung i a ummi hna lak i a hme bik hmanh Johan nakin a ngan deuh. 12 Johan nih a rat ri in nihin ni tiang Vancung Pennak hi tonghmang loin tuknak a ing i tonghmang loin khua a sami hna nih cun lak an timh. 13 Johan caan tiang khan profet vialte hna le Moses phungbia nih vancung Pennak kong hi an chim; 14 cun cu bia cu nan zumh duh a si ahcun John hi Elijah kha a si i a ra lai tiah rak timi kha a si. 15 Cucaah hna nan ngeih ahcun, thei ko u! 16 "Tuchan mi hi zei he dah ka tahchunh hna hnga? Chawdawr tlang i lente aa celhmi ngakchia ko khi an lo, ka ti. Phu khat nih phu dang kha 17 'Nupi ṭhitnak hla kha kan in tumpiak hna, asinain nan lam duh lo. Mithi ṭahnak hla kan in sakpiak hna, asinain nan ṭap duh fawn lo,' tiah an hauh hna. 18 Johan cu a ra i rawl a ul i zu zong a ding lo, asinain a mi kip nih, 'Khuavang a ngei,' an ti. 19 Mi Fapa cu a ra ve i a ei a ding i a mi kip nih, 'Hi pa hi zohhmanh u, misaram le mizuram, ngunkhuai khawltu hna le misual hna hawikom hi,' an ti. Sihmanhsehlaw Pathian fimnak cu ahmaan tiah a theitlai nih khan a langhter ko," a ti. 20 Cun Jesuh nih khuaruahharnak tam bik a tuahnak khua hna kha, an chung i a ummi hna nih an ziaza an thlen hlei lo caah a sik hna, 21 "Khorazin khua, na caah ngaihchia a va si dah. Bethsaida khua zong na caah ngaihchia a va si dah. Nan chung i khuaruahharnak ka tuahmi vialte hi Tair le Sidon khua ah rak tuah hna ning law, cu khua mi hna cu puanchia i aih le vutcam i phulh in an i ngaihchih diam cang hnga! 22 Cucaah hihi philh hlah u, Biaceih Ni ah cun Pathian nih Tair le Sidon khuami hna cu nanmah nakin a zaangfah deuh hna lai. 23 Cun nang Kapernaum khua. Van ah i hlorhning ti na duh. Sihmanhsehlaw hell chungah vun hlonh na si lai. Zeicahtiah na chungah ka tuahmi khuaruahharnak vialte hi Sodom khua chungah khan tuah rak si hna seh law, nihin ni tiang hin a hmun ve ko rih hnga. 24 Cucaah hihi philh hlah. Biaceih Ni ah cun Pathian nih Sodom khua cu nangmah nakin a zaangfah deuh lai," a ti. 25 Khi caan ah khan Jesuh nih aa thawh i, "Maw ka Pa, van le vawlei a uktu. A fimmi le cathiammi hna sinin na thuhmi kha cathiam lomi hna sinah na langhter caah na cungah ka lawm. 26 Asi, ka Pa, cucu nangmah nih siseh ti na duhningte a si. 27 Ka Pa nih zeizong vialte kha ka kut chungah a ka pek dih. Pa dah ti lo nih cun ahohmanh nih Fapa kha an ka hngal lo i Fapa le an sinah a phuanmi hna dah ti lo nih cun ahohmanh nih Pa kha an hngal lo. 28 "Rethei le thilrit mi vialte hna, ka sinah ra tuah u, dinhnak kan pek hna lai. 29 Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. 30 Ka seihnam cu a bei a nuam i ka thil cu a zaang," tiah a ti.
1 Cu hnu tlawmpal ah khin Jesuh cu Sabbath ni ah lo kha tanpah in a kal. A zultu hna cu an rawl a ṭam i cucaah favui kha an zun i a fang kha an ei. 2 Cucu Farasi mi nih an hmuh hna tikah Jesuh cu an thawh i, "Zohhmanh, Sabbath ni ah tuah lo ding timi kha na zultu hna nih an tuah," an ti. 3 Jesuh nih cun, "David le a mi hna cu an rawl a ṭam tikah khan, David nih zeidah a rak tuah, ti kha nan rel bal lo maw? 4 Pathian inn chungah pei a lut i changreu thiang cu a ei kha. Kha changreu kha amah nih siseh, a mi hna zong nih siseh, an ei awk a si ṭung lo. Tlangbawi lawnglawng nih pei an ei phung a si kha. 5 Cu pinah, Sabbath ni fate tlangbawi hna nih biakinn chungah Sabbath phunglam kha an buar lengmang nain an sual lo timi kha Moses Nawlbia chungah nan rel bal lo maw? 6 A ngaingai ti ahcun, biakinn nakin a ngan deuhmi pei hika ah hin a um cu. 7 Cathiang nih, 'Ka duhmi cu sa in tuahmi thawinak hi si loin zaangfahnak a si,' tiah a timi kha a sullam rak hngal u law cu, a sual lomi kha sual nan phaw hna hnga lo; 8 zeicahtiah Mi Fapa cu Sabbath cung bawi pei a si cu," tiah a ti. 9 Jesuh cu hmun dang ah a kal i an pumhnak inn ah khan a lut. 10 Cuka ah cun a kut a zengmipa pakhat a rak um. Khika i a ummi hna lakah khan Jesuh cu sualphawt a duhmi an um caah amah cu, "Sabbath ni ah hin mi damter phung a si maw si lo?" tiah an hal. 11 Jesuh nih annih cu, "Abiana ah nan tuu pakhatkhat khor chungah Sabbath ni ah tla sual seh law, chuah loin maw nan um ko hnga? 12 A ngaingai ti ahcun, mi cu tuu nakin a let tam piin a sung deuh! Cucaah Sabbath ni ah hin ṭhatnak cu tuah phung a si ko," tiah a ti. 13 Cun mipa leiah khan a hei i mer i, "Na kut kha samh tuah," tiah a ti. A samh i khattelei kut bantukte khan a dam ko. 14 Cun Farasi mi hna cu an kal i Jesuh thah khawhnak ding khua kha an khang. 15 Cucu Jesuh nih a theih tikah cuka hmun cun lo diam in a kal i mi tampi nih an zulh. A zawmi vialte kha a damter hna i 16 amah kong kha midang nan chim hna lai lo, tiah a thlauh hna. 17 Cuti in a tuah cu Pathian nih Isaiah kaa in: 18 "Hika i a ummi hi ka thimmi ka sal a si. Ka dawt i a cung i ka lung a tlingmi a si. Amah cungah cun ka Thlarau kha ka chiah lai i miphun vialte hna sinah ka biading kha a thanh hna lai. 19 Bia kha a al len hna lai lo i a au zong a au len lai lo. 20 Dinnak kha teinak ah a phakter hlantiang a kiakmi phaikung kha i hlang koin a khiak lai lo i a mit dengmangmi meiinn kha a hmit lai lo. 21 Amah cu miphun vialte nih an i bochan lai,' tiah a timi kha tlinternak caah a si. 22 Cun Jesuh sinah cun, mipa pakhat khuachia nih a tuah ruangah a mit a caw i a holh kho lomi kha an ratpi. Jesuh nih cun a rak damter i cucaah a holh kho i khua zong a hmu kho. 23 Mizapi cu an khuaruah a har i, "Hi pa hi David fapa a si sual hnga maw?" an ti. 24 Sihmanhsehlaw cu bia cu Farasi mi nih an theih tikah, annih tu nih cun, "Hi pa nih khuachia a ṭhawl khawh hna cu an bawipa Beelzebul nih a bawmh caah a si," an ti. 25 An lung chung i a ummi ruahnak cu Jesuh nih a hngalh caah annih cu, "Ram pakhat cu a chungah anmah le anmah aa domi bu an um ahcun cu ram cu saupi a hmun kho lai lo. Cun khua pakhatkhat zong a chungah anmah le anmah aa domi bu an um ahcun, a dir kho lai lo. 26 Cucaah Satan pennak chungah hin bu khat le bu khat an i doh ahcun cu pennak cu aa ṭhen dih cang a si ko caah tuan te ah a rawk ko lai. 27 Nannih nih nan ka thawh i khuachia ka ṭhawl khawh hna cu Beelzebul nih ṭhawl khawhnak nawl kha a pek caah a si, nan ka ti. Cucu va si seh law, nanmah zultu hna kha tah aho nih dah ṭhawl khawhnak kha an pek hna? Nanmah zultu lila hna i nan tuahnak nih pei nan palhnak cu an langhter ko hi. 28 Nan timi hi a si lo, khuachia ṭhawl khawhnak a ka petu hi Beelzebul si loin Pathian Thlarau a si i cu nih cun Pathian Pennak cu nan sin a phan cang ti kha a langhter. 29 "Cuhleiah, zeitindah miṭhawngpa inn cu amah kha an ṭem hmasa lo ah, aho nih dah an baoh khawh lai i a thilri cu an lak khawh lai? 30 "Keimah a ka ṭanh lomi cu a ka ralmi an si; pumhkhawmh a ka bawm lomi cu ṭhektu an si. 31 Cucaah hihi kan chimh hna: minung hi sualnak zeipaoh an tuahmi le thil ṭhalo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia ṭhalo a chimmi cu tu chan ah siseh, hmailei chan ah siseh, ngaihthiam khawh an si lai lo. 32 Mi Fapa ralchanh in bia ṭhalo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia ṭhalo a chimmi cu tu chan ah siseh, hmailei chan ah siseh, ngaihthiam khawh an si lai lo. 33 "Thingkung cu a kung na ṭhatter ahcun a thei a ṭha, a kung na chiatter ahcun a thei a chia. Thingkung cu a tlai in hngalh khawh a si. 34 Rul hna, zeitindah miṭhalo nan si ahcun nan kaa in bia ṭha cu a chuah khawh lai? Kaa nih cun lungchung i a khatmi kha pei a chim cu. 35 Miṭha nih cun thil ṭha aa khonmi chung khan thil ṭha a chuah hna i miṭhalo nih cun thil ṭhalo aa khonmi chung khan thil ṭhalo a chuah hna. 36 "Hihi kan chimh hna: Nan kaa in a chuakmi bia, ruah setsai loin nan chimmi bia vialte kha, zeicahdah kha ti khan ka rak chim, tiah Biaceih Ni ah cun nan ti a hau te lai. 37 Zeicahtiah nanmah bia lila in nan luatnak a si lai i nanmah bia lila in sualphawt nan si lai," tiah a ti. 38 Cu tikah Phungbia cawnpiaktu saya tlawmpal hna le Farasi mi tlawmpal hna nih khan an hun thawh i, "Saya, khuaruahharnak pakhat in kan tuahpiak law kan duh ko hnga," an ti. 39 Jesuh nih cun a thawh hna i, "Tu chan mi hi nan va ṭha loin Pathian zei ah nan hei rel lo hringhran dah. Khuaruahharnak pakhat in tuah, nan ka ti. Ka tuah lai lo. Profet Jonah khuaruahharnak dah ti lo kha cu khuaruahharnak zeihmanh kan tuahpiak hna lai lo. 40 Ngapi chungah Jonah cu ni thum le zan thum a um bantuk khan Mi Fapa zong cu vawlei chungah ni thum le zan thum a um ve lai. 41 Biaceih Ni ah cun Nineveh khua mi hna kha, annih cu Jonah nih phung a chimh hna tikah an sualnak kha an i ngaihchih caah, an dir lai i sual an in phawt hna lai; hihi kan chimh hna: Jonah nakin a ngan deuhmi pei hika ah hin a um cu! 42 Biaceih Ni ah cun Thlanglei Siangpahrangnu kha a dir lai i sual an phawt hna lai, zeicahtiah anih cu vanhramdeng in a ra riangmang i Solomon fimnak kha a hung zoh; atu hi Solomon nakin a ngan deuhmi hika ah hin a um," tiah a ti hna. 43 "Thlarau ṭhalo pakhat cu minung chungin a chuah tikah ram rocar ah khan dinhnak hmun kawl ah a vak lengmang. A hmuh khawh lo caah 44 aa thawh i, "Ka chuahtakmi ka inn ah khan ka va kir ṭhan tuah lai," tiah a ti. Cuticun a va kir ṭhan i inn cu lawng hirhiar tein a rak um i thiang tein a rak i phiah kha a hmuh. 45 Cu tikah a kal ṭhan i amah nakin a chia deuhmi thlarau pasarih kha a vaa sawm hna i an ra i cuka ah cun an um; a donghnak ah cun cu pa umtuning cu a hlan nakkhan a chia deuh. Cuticun atu chan, chan ṭhalo, umtuning ding hi a si lai," tiah a ti. 46 Jesuh cu mizapi sinah bia a chim lengmang lioah khan a nu le a naule kha an ra. Lengah khan an dir i chawnh kan duh, tiah an ti. 47 Cuka i a ummi aho nih dik, "Na nu le na naule cu lengah an dir ko i chawnh an in duh," tiah a hei chimh. 48 Jesuh nih cun, "Ahodah ka nu cu a si? Ahodah ka naule cu an si?" tiah a leh i 49 a zultu kha a hei sawh hna i, "Zohhmanh u, hi hna hi ka nu le ka naule cu an si! 50 Vancung i a ummi ka Pa nih tuah hna seh ti a duhmi a tuahmi paoh cu, ka nau le ka far le ka nu an si ko," tiah a ti.
1 Cu ni ṭhiamṭhiam ah cun Jesuh cu inn cun a chuak i rili kamah khan a va kal i a ṭhu i a cawnpiak hna. 2 A helhhumtu cu an tam tuk caah lawng chungah a lut i a ṭhu; mizapi cu rilikam ah khan an dir. 3 Thil tampi a cawnpiak hna i cu cawnpiaknak caah cun tahchunhnak bia a hman hna. 4 Aa thawh i, "Thlaici vorh ah mipa pakhat cu aa thawh. Lo chung i thlaici cu a vorh tikah a cheu cu lam hril ah an tla i cu hna cu vate nih an char hna. 5 Cun a cheu cu vawlei tlawmte lawng a umnak, lung tamnak hmun ah an tla. Vawlei kha a chah lo caah thlaici cu a kheu zau. 6 Ni a hung chuak i thlaikheu hme tete cu a hun emh hna tikah an hram kha a thuh lo caah an car zau. 7 Cun thlaici a cheu cu hling lakah an tla. Hling nih cun a zual hna i an ṭhang kho lo. 8 Sihmanhsehlaw thlaici a cheu cu vawlei ṭhatnak ah an tla i a let za khat, a let sawm ruk, a let sawm thum in an vui," a ti. 9 Cun Jesuh nih cun, "Hna nan ngeih ahcun thei ko uh," tiah a ti hna. 10 A zultu hna kha a sinah cun an hung kal i, "Bia na chimh hna tikah zeicahdah bianabia na hman?" an ti. 11 Annih cu a leh hna i, "Vancung Pennak kong biathli hngalhnak cu nannih cu pek nan si cang, sihmanhsehlaw hi hna cu pek an si lo. 12 Zeicahtiah a ngeimi cu hawi hleihvuanh awk a ngeih tiangin chap chin a si lai i a ngei lomi cu a ngeihmi hnihchunte hmanh kha lakpiak a si lai. 13 Annih sinah bianabia ka hmannak cu hihi a si: a zoh cu an zoh len ve ko, sihmanhsehlaw an hmu kho lo, a ngaih cu an ngaih len ve ko, sihmanhsehlaw an thei kho lo. 14 Cucaah cun profet Isaiah nih a rak chimmi kha an kong ah hin a tling. Zeitindah a ti ti ah cun: 'A ngaih cu nan ngaih len ko lai, sihmanhsehlaw a sullam nan hngal lai lo; A zoh cu nan i zoh sek ko lai, sihmanhsehlaw nan hmu kho lai lo. 15 Zeicahtiah cun, hi mi hna hi an lung a khong cang, an hna a pit i an mit kha an i chinh. Cuticun rak si hna hlah seh law cu an mit nih khua a hmuh hnga i an hna nih khua a theih hnga i an lung nih khua a hngalh ko hnga, Cun keimah leiah an i mer hnga i ka damter ko hna hnga, tiah Pathian nih a ti.' 16 "Nannih tu cu, nan van a va ṭha thiam dah. Nan mit nih a hmuh i nan hna nih a theih. 17 Hihi philh hlah u: Nan hmuhmi le nan theihmi hi profet tampi hna le Pathian mi tampi hna nih hmuh le theih an duh na in an hmuh khawh lomi le an theih khawh lomi a si," tiah a ti hna. 18 "Cucaah hi bianabia sullam hi ngai tuah u. 19 Lam hril i a tlami thlaici cu Vancung Pennak kong kha a theih cu a thei i a sullam a hngal ṭung lo mi kha an si. An chung i tuhmi thlaici cu Mi Ṭhalopa nih khan a chuah dih. 20 Lung tamnak hmun i a tlami thlaici cu Vancung Pennak kha a theih cangka i lungtho ngaiin a cohlangmi kha an si. 21 Sihmanhsehlaw an chungah hram a thlak lo caah saupi an rau lo. Cu kong i harnak le hremnak an hun ton tikah an i ngol zau. 22 Hling lak i a tlami thlaici cu Vancung Pennak kong kha a theih cu a thei i sihmanhsehlaw hi vawlei cung khuasak tintuknak kong i lungretheihnak le chaw le va duhnak nih cu bia cu a thah i thei a tlai lomi hna kha an si. 23 Cun vawlei ṭhatnak hmun i a tlami thlaici cu Vancung Pennak kong kha a thei i a sullam zong a hngalmi kha an si. Thei kha an tlai i a cheu cu a let za khat in, a cheu cu a let sawm ruk in, a cheu cu a let sawm thum in an karh," tiah a ti. 24 Jesuh nih tahchunhnak bia dang pakhat a chimh ṭhan hna. "Vancung Pennak cu a lo chung i thlaici ṭha a tuhmipa bantuk a si. 25 Zan khat cu ral pakhat kha a ra i mi an i hngilh karah rawl ci lakah cun belh ci a vorh i lo diam in a kal. 26 Rawl kung cu an hung ṭhang i rawl cu an hung vuih tikah belh zong cu an hung lang. 27 Cu pa salle hna cu an ra i, 'Bawipa, na lo chung i na tuhmi kha thlaici ṭha an si ṭung, khuazei in dah belh hi an rat kun?' an ti. 28 'Hi a tuahtu cu kan ral kha a si,' tiah a leh hna. Annih nih, 'Belh cu kan va bawt hna lai maw?' tiah an hal. 29 Anih nih, 'Bot hlah, zeicahtiah belh nan bawhpah ah khan rawl kung zong kha nan bawh chih sual hna lai. 30 Rawl kung le belh cu hmunkhat ah rawl ṭuan caan tiang ṭhang ṭi ko hna seh. Cun khi tikah rawl ṭuantu pawl cu ka thawh hna lai i: Belh kha bawt hmasa hna u law mei chung i paih awkah tom hna u; cun rawl kha ṭuan hna u law ka buk chungah rawn hna u, ka ti hna lai,' a ti," tiah a ti. 31 Jesuh nih tahchunhnak bia a dang pakhat a chimh ṭhan hna. "Vancung Pennak cu mipa nih aa lak i a lo i a tuhmi anṭam ci bantuk a si. 32 Thlaici vialte lakah a hme bik a si, sihmanhsehlaw a ṭhan tikah anhringso kung vialte lakah a ngan bik a si. Thingkung ah a hung cang i a nge ah khan va zong nih bu an ser," tiah a ti. 33 Jesuh nih tahchunhnak bia a dang a chimh hna. "Vancung Pennak cu thilnu he aa lo. Cu thilnu cu nu pakhat nih aa lak i changvut rel khat chungah a phulhmi nih cun changvut cu a ning piin a thawhter," tiah a ti. 34 Cu thil vialte cu mizapi kha a chimh hna tikah Jesuh nih cun tahchunhnak kha a hman hna; tahchunhnak hmang loin an sinah zeihmanh a chim duh lo. 35 Hiti in a chimh hna cu, profet nih a rak chimmi tlinternak caah khan a si. Profet nih a rak chimmi cu: 'An sin i bia ka chim tikah tahchunhnak bia ka hman lai; Vawlei ser hramthawk in hngalh bal lomi thil cu ka chimh hna lai,' ti hi a si. 36 Jesuh nih mizapi cu a kaltak hna i inn chungah a lut. A zultu cu a sinah khan an ra i, "Lo chung belh bianabia sullam kha kan chim tuah," an ti. 37 Jesuh nih cun a leh hna i, "Thlaici ṭha a tuhtu cu Mi Fapa hi a si, 38 lo cu vawlei hi a si; thlaici ṭha cu Vancung Pennak chung i a ummi hi an si; belh cu Mi Ṭhalopa minung kha an si. 39 Cun belh a tuhtu kan ral kha Khuachia a si. Rawl ṭuan caan hi, chan dongh caan a si i rawl ṭuantu hna cu vancungmi hi an si. 40 Belh cu an pumh hna i an khangh hna bantuk hin chan donghnak ah cun a si te lai: 41 Mi Fapa nih hin vancungmi kha a thlah hna lai i a Pennak chung i ṭhat lonak a tuahtu vialte hna le mi a sualtertu vialte hna kha an pumh hna lai i 42 meiphu chungah an paih hna lai, cuka ah cun an ṭap lai i an hacang an rial lai. 43 Cun Pathian mi hna cu an Pa Pennak chungah ni bangin an ceu lai. Cucaah hna nan ngeih ahcun, thei ko u," tiah a ti. 44 "Vancung pennak cu lo chung i thuhmi rothil bantuk a si. Mi pakhatkhat nih a vaa hmuh sual tikah a khuh ṭhan ta tawn. A lung aa lawmh tuk caah a ngeihmi thil vialte kha a zuarh hna i a va kal ṭhan i a lo ning in a va cawk," tiah a ti. 45 "Vancung Pennak cu lungvar a ṭha phun a kawlmipa bantuk a si fawn. 46 A ṭha ngaingaimi kha a hmuh tikah a kal i a ngeihmi thil vialte kha a zuar i cu lungvar cu a cawk." 47 "Vancung Pennak cu rili chung i chehmi sur, nga phun zakip a tlaitu bantuk a si. 48 A khah tikah ngatlaitu hna nih cun tikam ah an hnuh i an ṭhu i nga kha an ṭhen hna: a ṭhami cu an bawm chungah an sanh hna i a ṭha lomi cu an hlonh hna. 49 Chan donghnak ah cun cu bantuk cun a si lai: vancungmi kha an kal lai i miṭha mi hna lak khan miṭhalo mi kha an khawmh hna lai i 50 meiphu chungah an paih hna lai. Cuka ah cun an ṭap lai i an hacang an rial lai," tiah a ti. 51 Jesuh nih cun, "Hi vialte hi nan hngal kho maw?" tiah a hal hna i, "Kan hngalh hna," tiah an leh. 52 Cucaah a thawh hna i, "Phungbia cawnpiaktu saya, Vancung Pennak kong cawnpiaknak a cohlangmi cu, inn ngeitu, a thil khonnak chungin thil thar he thil hlun he a chuah lengmangtu bantuk a si," tiah a ti. 53 Jesuh nih tahchunhnak bia hna cu a chim dih in cuka hmun cun a chuak i 54 a rak umnak khua Nazareth khua ah khan a kal. An i pumhnak inn ah khan a cawnpiak hna i a bia a theimi cu an lung a suk ngaingai hna. "Hi bantuk fimnak hi khoika ah dah a vaa lak hnga? Hi bantuk khuaruahhar tuahnak zong hi khuazei in dah a hmuh hnga? 55 Lehtamapa fapa kha a si ko lo maw? A nu kha Mary hi a si ko lo maw? A naule kha Jeim le Josef le Simon le Judas hi an si lo maw? 56 A farle kha hika i a ummi hi an si lo maw? Khuazei in dah hi thil vialte hi a vaa lak hnga?" an ti i 57 cuticun an hlawt. Jesuh nih cun a thawh hna i, "Profet cu amah khua le a chungkhat hna sin ti lo ahcun, hmun dang ah cun upatnak hmu loin a um lo hen pei," tiah a ti hna. 58 Zumhnak an ngeih lo caah khika ah cun khuaruahharnak tampi a tuah lo.
1 Cu caan ah cun Galilee ram uktu Herod nih khan Jesuh kong cu a rak theih. 2 A bawi pawl kha a thawh hna i, "Amah hi tipil petu Johan kha a si hrimhrim ko lai: thihnak in a tho ṭhan i a si lai. Cucaah cun khuaruahhar tuah khawhnak ṭhawnnak a ngeih hi a si lai," tiah a ti. 3 Herod nih khan Johan cu a rak tlaihter hna i thong ah an thlak. Cu ti i a tuahnak cu a nau Filip nupi Herodias ruangah khan a si. 4 Tipil petu Johan nih khan Herod cu, "Herodias cu na ṭhit awk a si lo," tiah a chimh lengmang caah 5 Herod nih cun Johan cu thah a duh, sihmanhsehlaw Judah mi nih cun Johan kha profet a si tiah an ruah caah annih cu a ṭih hna. 6 Herod chuah ni ah Herodias fanute kha zapi hmaiah cun a lam i Herod cu a lung a ton hringhran. 7 Cucaah bia a kam i, "Na ka halmi paoh kan pek lai," tiah chiatser in a ti. 8 A nu nih a chimh bangin, "Hika hrimhrim ah hin Tipil petu Johan lu kha kheng in ka pe," tiah a hal. 9 Siangpahrang cu a ngaih a chia ko, sihmanhsehlaw chiat a sermi ruang le a sawmmi hna kha an hmai a khah hna lo ruangah, a duhmi cu tlinter si ko seh, tiin nawl a pek hna. 10 Cucaah Johan cu thong chungah khan a lu a va tanter hna. 11 A lu cu kheng cun an rak put i ngakchianute cu an pek i ngakchianute nih cun a nu sinah a hei kalpi. 12 Johan zultu cu an ra i a ruak kha an lak i an vui; cun Jesuh kha an va chimh. 13 Cu thawng cu Jesuh nih a theih tikah cuka cun lawng in hmunking ah amah lawng tein a kal. Cu thawng cu mizapi nih khan an theih i an khua cio khan Jesuh cu an ke in an fuh. 14 Jesuh cu lawng chung khan a hung chuak i mizapi kha a hmuh hna tikah a zaang an fak ngaingai. Cucaah cun an mizaw hna kha a damter hna. 15 Zanlei sang a hung si tikah a zultu kha a sinah an ra i, "Kan umnak hi pilking ngaingai a si i khua zong a tlai fawn cang. Cucaah mi hi kalter hna, kan pawngkam khua ah hin va kal hna seh law rawl vaa cawk hna seh," tiah an ti. 16 Jesuh nih cun, "An kal a herh lai lo, nanmah nih ei awk zeilo pe hna u," tiah a leh hna. 17 "Kan ngeihmi cu changreu hlum nga le nga pahnih lawng pei a si ko cu," an ti. 18 Cun Jesuh nih cun, "Rak pu hna u," tiah a ti hna. 19 Mi cu ram cungah khan a ṭhutter hna i changreu hlum nga le nga pahnih cu aa lak i van a cau i Pathian kha a thangṭhat. Changreu kha a cheu hna i a zultu kha a pek hna i a zultu hna nih khan mizapi cu an phawt hna. 20 An dihlak in an ei i an khim dih. Cun a zultu hna nih khan a ṭilṭawt rel hleihnih an char. 21 A eitu cu, nu le ngakchia rel loin, pa lawngte thong nga hrawng an si. 22 Jesuh nih mizapi kha a tlunter hna lioah khan, a zultu kha lawng in rili khattelei kamah khan, a hmaiah a rak kalter hna. 23 Mi kha a tlunter dih hna hnu in Jesuh cu thlacam awkah amah lawng tein tlang ah khan a kai. Khua a hung tlai i Jesuh cu amah lawng tein cuka ah cun a um lioah khan, 24 lawng cu rili cungah khan hlat nawn a phan cang i thli kha hmaitonh in a hran caah tilet nih khan a hlawh len ko. 25 Cun khuangter hrawngah khin Jesuh cu an sin leiah cun a ke in ti cung cun a ra. 26 A zultu nih ti cung i a ke in a kal kha an hmuh tikah an lau ngaingai i, "Mithla a si," tiah an ti i an ai. 27 Jesuh nih cun hmakhatte ah a hei chawnh hna i, "Nan thinphang hlah u. Keimah pei ka si ko cu. Hnangam in um ko u," tiah a ti hna. 28 Cun Peter nih khan a hun chawnh i, "Bawipa, nangmah na si taktak ahcun, na sinah ka ke in ti cungin ka ratter tuah," tiah a ti. 29 Jesuh nih cun, "Ra ngat," tiah a ti. Cucaah Peter cu lawng cun a vung ṭum i ti cungah cun a ke in Jesuh leiah cun a kal. 30 Sihmanhsehlaw thlitu a fah zia kha a vun hmuh tikah a thin a phang i ti chungah cun a pil cuahmah i, "Bawipa, ka khamh tuah," tiah a au. 31 Hmakhatte ah Jesuh nih a hei banh i a tlaih i, "Na zumhnak a va hme hringhran dah! Zeicahdah lungawṭawm in na um?" tiah a ti. 32 An pahnih in lawng chungah cun an lut i thlitu kha a dai. 33 Lawng chung i a ummi a zultu hna nih khan Jesuh cu an biak i, "Nangmah cu Pathian Fapa na si hrimhrim," tiah an ti. 34 Rili kha an hei tan i Genesaret ram kha an va phan; 35 cuka mi hna nih khan Jesuh cu an rak hngalh ko. Cucaah cuka pawng hrawng i a ummi mizaw kha an cah hna i Jesuh sinah cun an ratpi hna. 36 A zawmi cu na puan tlang tal kha tawnghter ko hna, tiah an nawl i a tawngmi paoh cu an dam dih.
1 Farasi mi hna le Phungbia Cawnpiaktu saya pawl kha Jerusalem khua in an ra i Jesuh cu, 2 "Zeicahdah na zultu hna nih kan pupa phung an buar? Rawl ei lai ah a phung bantukin an kut an i ṭawl lo," an ti. 3 Jesuh nih cun a thawh ve hna i, "A si ahcun zeicahdah nannih zong nih Pathian nawlbia kha nan buar ve i nanmah cawnpiaknak lawng kha nan zulh kun? 4 Pathian nih cun, 'Na nu le na pa kha va upat hna, a nu siseh a pa siseh a congoihmi cu thah si seh,' tiah a ti. 5 Sihmanhsehlaw nannih nih nan cawnpiak hna ning ah cun, mi pakhatkhat nih a nu maw a pa maw bawmhnak ding caah zeilo thil a ngeihmi cu, 'Hihi cu Pathian ta a si,' a ti ahcun, 6 a nu siseh, a pa siseh, a bawmh hna a herh ti lo, nan ti. Hihi Pathian bia zei i nan rel lo ning le nanmah cawnpiakning lawng zulh nan duhning cu a si. 7 Nannih mihrokhrawl hna. Nan kong Isaiah nih a rak chimmi hi a hmaan hringhran ko. 8 Hi mi hna nih hin an kaa lawngin an ka upat, sihmanhsehlaw an lungthin taktak cun an ka hlat ngaingai, tiah Pathian nih a ti. 9 Annih nih mi serchom nawlbia kha Pathian nawlbia bantukin an cawnpiak hna caah An ka biaknak hi zeihmanh a ṭhahnem lo,' tiah Pathian nih a ti, tiah a rak chim," tiah a ti. 10 Cun Jesuh nih mizapi cu a sinah a kawh hna i, "Ngai u law hngalh i zuam hmanh u. 11 Mi cu a kaa chung i a lutmi nih a thurter lo, sihmanhsehlaw a kaa chungin a chuakmi tu nih hin a thurter," a ti hna. 12 Cun a zultu hna kha a sinah an ra i, "Na chimmi nih Farasi mi an thin a hunter ngaingai hna kha na hngal maw?" an ti. 13 Jesuh nih cun, "Vancung khua i a ummi ka Pa nih a phun lomi kung paoh cu phawi an si ko lai. 14 Annih cu nan hna i hnawh hna hlah u. Hruaitu mitcaw an si ko; mitcaw nih mitcaw kha a hruai ahcun an pahnih in khor ah an tla tawn," tiah a ti. 15 Peter nih khan a hun i thawh i, "Hi tahchunhnak bia hi a sullam kan chim tuah," tiah a ti. 16 Jesuh nih cun a thawh hna i, "Mi dang nakin nan fim deuh hlei lo hi ta! 17 Nan hngal kho lo maw? Mi kaa chung i a lutmi thil paoh cu a paw ah a lan i a lengah a chuak ṭhan ko. 18 Sihmanhsehlaw kaa chungin a chuakmi thil cu lung chungin a chuakmi thil an si i cu hna nih cun mi cu an thurter. 19 Zeicahtiah lai a nawntertu, nu le pa sualnak a tuahtertu, thil ṭhalo dangdang a tuahtertu, a firtertu, lih a chimtertu, mi a congoihtertu ruahnak ṭhalo vialte cu a lung chungin a hung chuakmi an si. 20 Hihi mi a thurtertu cu an si. Sihmanhsehlaw rawl ei lai kut ṭawl lo nih cun mi a thurter lo," tiah a ti. 21 Jesuh cu cuka hmun cun a chuak i Tair le Sidon khua pawng ram ah khan a kal. 22 Cuka ram i a ummi Kanaan minu pakhat cu a sinah a ra i, "David Fapa, ka zaangfah tuah. Ka fanu cu khuavang nih a tuah i awlokchong in a um ko," tiah fak piin a au. 23 Sihmanhsehlaw Jesuh nih bia kaa khat hmanh a let lo. A zultu kha an ra i, "Hi nu hi kalter ko. A kan zul lengmang, a kan auhnawh lengmang i hna a kan hnawh," tiah an ti. 24 Cun Jesuh nih cun a vun leh i, "Israel mi lak i a tlaumi tuu hna sin lawngah pei thlah ka si ko cu," tiah a ti. 25 Cu tikah minu cu a ra i a hmaiah khuk bil in a kun i, "Bawipa, ka bawm ko," tiah a ti. 26 Jesuh nih cun, "Ngakchia rawl cu i lak riangmang i uico pek cu a hmaan lo," tiah a leh ṭhan. 27 Minu nih cun, "Cucu a si taktak ko, bawipa; sihmanhsehlaw bawi cabuai cungin a tlami rawl ṭilṭawt cu uico nih an ei ve tawn ko hen pei," tiah a leh. 28 Cucaah Jesuh nih cun, "Nangmah cu zumhnak ṭhawng ngaingai a ngeimi na si. Na duhmi cu kan tuahpiak ko lai," tiah a ti. Cu caan hrimhrim ah cun a fanu cu a rak dam. 29 Jesuh cu cuka hmun cun a chuak i Galilee Rili kam hrawngah khan aa chawk. Tlang cungah a kai i a ṭhu. 30 Mi tampi a sinah cun an ra i kebei le mitcaw le kutzeng le a holh kho lomi hna le mizaw dang tampi kha an ratpi hna i a kehram ah khan an chiah hna i a damter hna. 31 A holh kho lomi an holh khawh le a zengmi an dam le kebeimi an kal khawh le mitcawmi nih khua an hmuh ṭhan kha an hmuh hna tikah, mizapi cu an khuaruah a har i Israel Pathian kha an thangṭhat. 32 Jesuh nih a zultu kha a auh hna i, "Hi mi hna hi kan sinah ni thum an um cang i atu cu rawl ei awk an ngei ti lo i ka zaang an fak ngaingai. Rawl loin annih tlunter cu ka duh lo, lampi ah an va buhri sual lai," tiah a ti. 33 A zultu nih cun an thawh i, "Hi ramcar ah hin, zeitindah minung hi zat pek awk rawl cu kan hmuh khawh lai?" an ti. 34 Jesuh nih cun, "Changreu zeizat dah nan ngeih?" tiah a hal hna i, "Hlum sarih le nga hme tete tlawmte," tiah an leh. 35 Cucaah Jesuh nih mizapi cu vawlei ah khan a ṭhutter hna. 36 Cun changreu hlum sarih le nga kha aa lak hna i Pathian sinah thla a cam i a cheu hna i a zultu kha a pek hna i a zultu nih mizapi kha an pek hna. 37 An dihlak in an ei i an i khim. A zultu pawl nih khan a ṭilṭawt sei sarih an khawmh. 38 A eimi cu, nu le ngakchia chim loin, pa thong li an si. 39 Cun Jesuh nih mizapi kha a tlunter hna i lawng chungah a lut i Magadan ram leiah khan a kal.
1 Farasi mi le Sadusi mi tlawmpal kha Jesuh sinah cun an ra i amah kha foih an duh caah, vancung in a rungmi khuaruahhar kan hmuhsak tuah, an ti. 2 Cun Jesuh nih cun, "Zanlei ah cun, 'Van kam a sen, thaizing cu khua a ṭha lai,' nan ti i 3 zinglei ah cun, 'Van kam a sen i khua a dawm, nihin cu ruah a sur lai,' nan ti. Nikhua zeidah a lawh lai ti kha van nan zohnak in nan hngalh khawh, sihmanhsehlaw atu caan hmelchunhnak hi cu an sullam nan hngal kho hna lo. 4 Tuchan mi hi mi ṭhalo le Pathian zei i a rel lomi nan si. Khuaruahharnak tuah nan ka fial, sihmanhsehlaw ka tuah lai lo. Khuaruahharnak tuahpiak nan si dingmi cu Jonah khuaruahharnak lawnglawng kha a si lai," tiah a ti. Cun lo diam in a kaltak hna. 5 A zultu pawl cu rili khattelei kamah lawngin an va kal ah khan changreu phorh an philh. 6 Jesuh nih cun a thawh hna i, "Farasi mi hna le Sadusi mi hna thilnu kha i ralring u," tiah a ti hna. 7 Cu tikah anmah le anmah cu, "Hi bia a chim hi changreu kan i phorh lo caah a si," tiah an i ceih. 8 Jesuh nih an chimmi cu a hngalh i cucaah, "Changreu nan ngeih lo kong kha zeicahdah nan i ceih len ko? Nan zumhnak a va tlawm hringhran dah! 9 Nan hngal kho bal rih lo maw? Changreu hlum nga in minung thong nga ka dangh hna ah khan, sei zeizat dah nan char kha nan hngal ti maw? 10 Cun hlum sarih in thong li ka dangh hna ah khan tah sei zeizat dah nan char kha? 11 Nannih kan chimhmi hna hi changreu kong a si lo tiah zeitindah nan hngalh khawh lo ee? Farasi mi le Sadusi mi hna thilnu cu i ralring tuah u," tiah a ti hna. 12 Khi tikah a zultu pawl nih khan, i ralring u, a kan timi hi changreu rawhnak thilnu kha si loin, Farasi mi hna le Sadusi mi hna cawnpiaknak kha a si, ti kha an hngalh. 13 Jesuh cu Sisaria Filipi khua pawng ram ah khan a va kal i a zultu hna cu, "Mi nih Mi Fapa hi aho a si, an ka ti dah?" tiah a hal hna. 14 Annih nih, "A cheu nih Tipil petu Johan a si, an in ti. A cheu nih, Elijah a si, an in ti, a cheu nih Jeremiah maw profet pakhatkhat dik a si, an in ti," tiah an leh. 15 Cun a thawh hna i, "Nannih tah, aho a si nan ka ti dah?" tiah a hal hna. 16 Simon Peter nih a leh i, "A Nungmi Pathian Fapa, Messiah kha na si," tiah a ti. 17 Jesuh nih cun, "Johan fapa Simon, mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si. 18 Cucaah cun nang cu lung tum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo. 19 Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai," tiah a ti. 20 Cun Jesuh nih Messiah a si cu ahohmanh chim hna hlah u, tiah a thlauh hna. 21 Cu caan thawk cun Jesuh nih a zultu hna cu, "Jerusalem ah ka kal lai i upa hna le tlangbawi ngan upa pawl hna le Phungbia cawnpiaktu saya hna nih harnak tampi an ka pek lai. An ka thah lai i ni thum ni ah nunter ṭhan ka si lai," tiah fiang tein a chimh hna. 22 Peter nih a dang deuh ah khin a hei i kalpi i a mawhchiat. "Bawipa, hi thil cu Pathian nih na cungah tlunter sawh hlah seh," tiah a ti. 23 Jesuh cu a hun i mer i Peter cu, "Satan, ka sinah um hlah. Na ruahnak hi Pathian ruahnak si loin minung ruahnak a si caah ka caah dawntu na si," tiah a ti. 24 Cun Jesuh nih a zultu cu a thawh hna i, "Ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh. 25 Zeicahtiah ahohmanh, mah nunnak humhak a duhmi cu a nunnak kha a sung lai i keimah ruangah a nunnak a sungmi cu a nunnak a hmumi a si lai. 26 Mi nih hin vawlei pumpi hi co hmanh seh law, a nunnak a sungh ṭung ahcun zeital a miak hnga maw? A miak lai lo. A nunnak kha zeihmanh in a caw ṭhan kho lai lo. 27 Mi Fapa hi ka Pa sunparnak in tuan ah ka vancungmi hna he ka ra lai i mi vialte kha an rian ṭuan ning cio in laksawng ka pek hna lai. 28 Hihi philh hlah u. Mi Fapa cu Siangpahrang bantukin ka rat nan ka hmuh hlan cu a thi lo dingmi hika ah hin nan um," tiah a ti hna.
1 Cu hnu ni ruk ah Jesuh nih Peter le Jeim le a nau Johan kha tlang sangpi cungah anmah lawng tein aa kaipi hna. 2 An hmaiah cun a mui kha aa thleng i a hmai cu ni bangin a ceu i a hnipuan cu ceu bantukin an rang. 3 Cun a zultu pathum hna nih cun Jesuh cu Moses le Elijah he bia an i ruah kha an hmuh. 4 Cucaah Peter nih cun Jesuh cu a hun thawh i, "Bawipa, hika um hi a nuam; na duh ahcun thlam pathum in kan sakpiak hna lai, nang caah pakhat, Moses caah pakhat, Elijah caah pakhat," tiah a ti. 5 Cu ti i bia a chim lioah cun a ceumi minmei nih a run zelh hna i minmei chung cun aw nih, "Hi pa hi ka dawtmi ka Fapa, ka lung a ka tong ngaingaimi a si, amah bia kha ngai u," tiah a ti. 6 A zultu pawl nih aw kha an theih tikah an thin a phang tuk i vawlei ah an bawk. 7 Jesuh cu a ra i a tongh hna i, "Tho u, nan thin phang hlah u!" tiah a ti hna. 8 Cucaah van lei kha an hun zoh i Jesuh lawnglawng kha an hmuh. 9 Tlang cungin an ṭum pah ah khan, "Hi thil nan hmuhmi hi, Mi Fapa hi thihnak in thawhter ka si ṭhan hlanah cun ahohmanh chim hna hlah u," tiah a ti hna. 10 Cun a zultu pawl nih Jesuh cu, "Zeicahdah Phungbia cawnpiaktu saya pawl nih, Elijah cu a rat hmasa awk a si, an ti?" tiah an hal. 11 Jesuh nih cun, "Elijah cu a ra hmasa taktak i zeizong vialte kha timhtuah hram a thawk taktak. 12 Sihmanhsehlaw hihi kan chimh hna: Elijah cu a ra ko cang, sihmanhsehlaw mi nih an hngal lo i an duhduh in an tuah. Cu bantuk ṭhiamṭhiam in Mi Fapa zong hi an ka serhsat ve lai." tiah a ti hna. 13 Khi tikah a zultu pawl nih cun, a kan chimhmi hi tipil petu Johan kong a si, ti kha an hngalh. 14 Mizapi sin kha an phak ṭhan tikah Jesuh sinah cun mipa pakhat a ra i a hmaiah a khuk aa bil i 15 "Bawipa, ka fapa hi ka zaangfahpiak tuah. Amah cu mitlu a si i a tluk tikah hin mei chung le ti chung zongah a tlu tawn. 16 Na zultu pawl sinah ka ratpi nain an damter kho lo," tiah a ti. 17 Jesuh nih cun a leh i, "Nannih cu a zum kho lomi le a palhmi nan si hrimhrim ko. Zei can dah nan sinah ka um awk a herh lai? Zei can dah kan umpi hna a herh lai? Ngakchiapa cu ka sinah hin ratpi u," tiah a ti hna. 18 Jesuh nih khuachia cu, chuak, a ti i a chuak i cu caan thawk te cun ngakchiapa cu a dam colh. 19 Cun a zultu pawl kha Jesuh sinah cun anmah lawngin an ra i, "Zeicahdah khuachia kha kan ṭhawl khawh lo?" tiah an hal. 20 Jesuh nih cun, "Nan zumhnak a zat lo caah a si. Hihi va philh hlah u: Anṭam ci tiate hmanh zumhnak nan ngeih ahcun, hi tlang hi, 'I thawn,' ti u law aa thawn ko lai. Zei paohpaoh kha nan tuah khawh ko lai. 21 Sihmanhsehlaw hi bantuk cu thlacamnak le rawl ulhnak lawng nih a ṭhawl khawh; zei dang nih cun a ṭhawl kho lo," tiah a ti. 22 A zultu hna cu Galilee ah khan an i pumh dih ṭhan tikah, Jesuh nih khan a thawh hna i, "Mi Fapa hi mi kut chungah tuan ah pek a si cang lai, 23 annih nih an thah lai, sihmanhsehlaw ni thum ni ah nunter a si ṭhan lai," tiah a ti hna. A zultu cu an ngaih a chia ngaingai. 24 Jesuh le a zultu hna kha Kapernaum khua i an rat tikah biakinn ngunkhuai khawltu pawl nih khan Peter cu, "Nan sayapa nih biakinn ngunkhuai a pe bal maw?" tiah an hal. 25 Peter nih cun, "A pek ko," tiah a leh hna. Peter cu inn chung i a vung luh ah khan Jesuh nih cun a rak hlehkanh i, "Simon, zeitindah na ruah? Aho nih dah vawlei cung siangpahrang hna hi ram dang thil luh man le ngunkhuai an pek tawn hna? Cuka ram mi hna nih cun maw ramdangmi nih dah?" tiah a hal. 26 Peter nih cun, "Ramdangmi nih ta," tiah a leh. Cun Jesuh nih, "A ṭha ko, cu ti a si ahcun ramchungmi nih cun pek a herh lo. 27 Sihmanhsehlaw hi mi hna hi an thinhunter ka duh lo. Cucaah rili ah va kal law sio va thla, na sio hmasa bikmi nga kha a ka va keu law a ka chungah cun kan pahnih ca i a za ding tangka na hmuh lai; cun va kal law biakinn ngunkhuai cu va pe hna," tiah a ti.
1 Cu caan ah cun a zultu hna kha Jesuh sinah khan an ra i, "Vancung Pennak ah ahodah a ngan bik?" tiah an hal. 2 Jesuh nih ngakchiapate pakhat kha a auh i an hmaiah a dirter i, 3 "Nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo. 4 Vancung Pennak chung i a ngan bik cu mi toiah aa dor i hi ngakchia bantuk ah aa cangmi cu a si. 5 Cun ngakchia hi bantuk pakhatkhat kha ka min in nan conglawmh hna ahcun, keimah nan ka conglawmh a si." 6 "Hi ngakchia tete pakhatkhat hi keimah an ka zumhnak in a pialtertu hna cu, an hngawng ah facang rialnak lungtum nganpi i thlaih hna seh law, rili chungah paih si hna seh law an caah a ṭha deuh hnga. 7 Vawlei cungah hin cu bantuk tlukrilhnak a um caah a va poi hringhran dah! Cu bantuk cu a um ṭheoṭheo ko lai, sihmanhsehlaw cu bantuk a umtertu caah cun ṭihnung a si hringhran ko. 8 "Nan kut nih siseh, nan ke nih siseh, an pialter hna ahcun, tan u law hlonh ko hna u! Kut pahnih, ke pahnih he zungzal mei chung i tlak nakin kut le ke loin nunnak chung i luh cu nan caah a ṭha deuh. 9 Cun nan mit nih an pialter hna ahcun khoih u law hlonh ko hna u. Hell chungah mit pahnih he tlak nakcun mit pakhat he lawng nunnak chung i luh cu nan caah a ṭha deuh." 10 "Hi ngakchia tete hi pakhat hmanh zawmhtaih hna hlah u. Annih a vengtu hna an vancungmi kha vancung khua ah ka Pa hmaika ah an um zungzal ko. 11 Mi Fapa cu a tlaumi khamh awkah ka ra. 12 "Tuu za khat a ngeimipa nih, a tuu pakhat cu a tlau ahcun, zeidah a tuah hnga, tiah nan ruah? Tlang cungah a tlongmi sawm kua le pakua cu a kaltak hna lai i a tlaumi cu a kawl lai. 13 A hmuh tikah sawm kua le pakua a tlau bal lomi cung nakkhan hi tuu pakhat cungah hin aa lawm deuh. 14 Cu bantukte cun, vancung khua i a ummi nan Pa nih, hi ngakchia tete pakhatte hmanh hi tlauter a duh hna lo. 15 "Na unau pakhatkhat nih na cungah sualnak a tuah ahcun, amah sinah cun va kal law a sualnak cu va chim. Sihmanhsehlaw, a thli tein nanmah pahnih lawng theih in na va tuah lai. Na bia a ngaih ahcun, na unau ah na lak khawh ṭhan a si. 16 Sihmanhsehlaw na bia a ngaih duh lo ahcun, Cathiang nih, 'Sual puhnak paohpaoh cu ahmaan hmaanlo ti hngalhnak caah tehte pahnih maw pathum dik a hau,' a ti bang khan, mi dang pakhat maw pahnih dik naa kalpi hna lai. 17 Sihmanhsehlaw an bia zong kha a ngaih hlei lo ahcun, cu thil cu Khrihfabu kha na chimh hna lai. Cun Khrihfabu bia kha a ngaih duh ṭhiamṭhiam lo ahcun, lawkihmi maw, ngunkhuai khawltu maw, cu bantuk mi ah cun va zoh. 18 "Cucaah nan dihlak in kan chimh hna: vawlei cungah nan khapmi thil paoh cu vancung zongah khap a si lai i vawlei cungah nan onhmi thil paoh cu vancung zongah awnh a si lai. 19 Cun hi zong hi kan chimh hna: hi vawlei cungah hin, nan halmi thil kong ah, pahnih nan lung aa khah ahcun, nan halmi thil cu vancung i a ummi ka Pa nih an pek hna lai. 20 Zeicahtiah ka min in pahnih pathum nan i pumhnak ah kei zong nan sinah ka um ve," tiah a ti. 21 Cun Peter cu Jesuh sinah khan a ra i, "Bawipa, ka unau pakhatkhat nih ka cungah sualnak tuah seh law voi zeizat dah ka ngaihthiam lai? Voi sarih tiang maw?" tiah a hal. 22 Jesuh nih cun, "Sihlah, voi sarih si loin voi sawm sarih voi sarih, 23 zeicahtiah Vancung Pennak cu hi bantuk hi a si: Siangpahrang pakhat nih a sal hna rian ṭuanning kha zoh aa tim. 24 Aa thawk kate ah khin a salpa pakhat cu a sinah an ratpi i cu sal nih cun tangka talen thong hra a bat. 25 Cu sal nih cun a leiba chamnak a ngeih lo caah a bawipa nih cun cu pa cu a nupi he a fale he a ngeihmi thil vialte he leiba chamnak dingah cun sal ah zuar si hna seh, tiah a ti. 26 Cu salpa cu a bawipa hmaiah cun a khuk aa bil i, 'Zaangfahnak tein ka ngang rih tuah. Cham dih kan zuam ko lai,' tiah a nawl. 27 A bawipa nih a zaangfah i cucaah a leiba cu a ngaihthiam i a kalter. 28 "Mipa cu a va chuak i a sal hawi pakhat, tangka tlawmte a rak batu kha a va fuh. Amah cu a tlaih i a or in a dih i, 'Na ka batmi kha ka cham dih,' tiah a ti. 29 A sal hawi nih cun a khuk aa bil i, 'Ka ngang rih sawh. Cham dih kan zuam lai,' tiah a nawl. 30 Sihmanhsehlaw a duh lo. Thong ah khan a leiba a cham dih hlantiang a thlak. 31 Cu thil cu a sal hawi midang nih khan an hmuh tikah an ing a puang ngaingai i an bawipa sinah khan an va kal i an va chimh. 32 Cucaah an bawipa nih kha sal kha a kawh i, 'Sal ṭhalo, na ka nawl caah na ka batmi vialte kan ngaihthiam dih. 33 Na cung i zaangfahnak ka ngeih bantukin pei na sal hawi cungah na ngeih ve awk a si cu,' tiah a ti. 34 An bawipa cu a thin a hung ngaingai i a salpa cu a leiba a lim khawh dih hlantiang thong ah a thlak. 35 "Nannih nih nan u nan nau kha nan lungchung taktak in nan ngaihthiam hna lo ahcun cu bantuk cun vancung khua i a ummi ka Pa nih nannih zong cu an tuah ve hna lai," tiah a ti hna.
1 Jesuh nih cu kong cu a chim dih tikah Galilee ram khan a chuak i Jordan Tiva khattelei kam i a ummi Judea ram ah khan a kal. 2 Mi tampi nih an zulh i a damter hna. 3 Farasi mi tlawmpal kha a sinah cun an ra i amah kha bia in foih an duh caah, "Pa nih a nupi maknak caah kan Phung nih a awnhmi lam zeital a um maw?" tiah an hal. 4 Jesuh nih cun, "A hramthawk in Pathian nih nu le pa in a ser hna, 5 'cucaah pa nih a nu le a pa kha a kaltak hna lai i a nupi he an i fon lai i cu hna pahnih cu pum khat an si lai, tiah Sertu nih cun a ti,' timi Cathiang chung ṭialmi kha nan rel bal lo maw? 6 Cucaah pahnih an si ti lo i pakhat an si cang. Pathian nih a fonhmi hna cu ahohmanh nih ṭhen hna hlah seh," tiah a ti. 7 Cun Farasi mi hna nih cun, "A si kun ahcun, zeicahdah Moses nih, 'Pa nih a nupi kha maknak ca pe seh law kalter seh,' tiah nawl a kan pek kun?" tiah an hal. 8 Jesuh nih cun, "Moses nih nan nupile nan mak khawh hna tiah nawl an pek hna cu, chimh nan har tuk ruangah a si. Sihmanhsehlaw cuticun a hramthawknak caan ah cun a rak si lo. 9 Cucaah hihi kan chimh hna: Ahohmanh nih a nupi kha, zumh awktlak loin a um ti ṭung lo ahcun, a mak i nu dang a ṭhit ahcun, nu le pa sualnak a tuah a si," a ti. 10 Cun a zultu hna nih khan, "Nu le va kong ah, hitihin a si awk a si ahcun, i ṭhitumh lo a ṭha deuh," an ti. 11 Jesuh nih cun, "Hi cawnpiaknak hi a mi kip caah a si lo, Pathian nih a thimmi hna ca lawngah a si. 12 Mi nih nupi an ngeih khawh lonak sullam a dangdang a um cio: a cheu cu an i chuahpimi a si, a cheu cu mi nih cuticun an sermi an si; cun a cheu cu Vancung Pennak ruang hrimhrim i nupi ngei loin a ummi an si. Hi cawnpiaknak a zul khomi nih cun cuticun zul ko hna seh," a ti. 13 Mi zeimaw nih ngakchia kha Jesuh sinah khan an ratpi hna i, an cung i a kut chiah awk le thlacampiak hna awkah an nawl; sihmanhsehlaw a zultu nih khan an rak sik hna. 14 Jesuh nih cun aa thawh i, "Ngakchia cu ka sinah ra ko hna seh, dawn hna hlah u; zeicahtiah Vancung Pennak cu hi bantuk mi hna ta hi pei a si cu," tiah a ti. 15 An cungah a kut a chuan i a kal. 16 Voi khat ah mipa pakhat cu Jesuh sinah khan a ra i, "Saya, zungzal nunnak co awkah thil ṭha zeidah ka tuah awk a si?" tiah a hal. 17 Jesuh nih cun, "Zeicahdah 'zei thil ṭha dah,' timi cu na ka hal? A ṭhami cu pakhat lawng pei a um ko cu. Nunnak chung i luh na duh ahcun nawlbia kha tah na zulh ko hna," tiah a leh. 18 Tlangvalpa nih cun, "Zei nawlbia hna dah?" tiah a ti. Jesuh nih, "Lai va nawng hlah; nu le pa sualnak va tuah hlah; fir hlah; lih chim hlah; 19 na nu le na pa kha upat hna; na minung hawi kha nangmah bantukin va daw hna, ti hawi hna hi ta," tiah a leh. 20 "Hi nawlbia cu ka zulh dih cang hna. Zeidah zulh awk ka herh rih?" tiah a ti. 21 Jesuh nih cun a thawh i, "Mi tling si na duh ahcun, va kal law na ngeihmi thil vialte kha va zuar hna; cun tangka na hmuhmi cu misifak kha va pe hna; cuticun vancung khua ah chawva na ngei lai, cun ra law rak ka zul," tiah a ti. 22 Cu bia cu tlangval nih khan a theih tikah ngaihchia in a kal, zeicahtiah amah cu mirum ngaingai a si. 23 Jesuh nih a zultu cu a thawh hna i, "Vancung Pennak chung luh hi mirum caah cun a har ngaingai lai, tiah kan chimh hna. 24 Vun nolh ṭhan rih ko ning law, kalauk ca i ṭhim kaa chung luh kha mirum mi ca i Pathian Pennak chung luh nakin a fawi deuh," tiah a ti. 25 Cu bia cu a zultu hna nih khan an theih tikah an khuaruah a har i, "Ahodah khamhnak a hmu kho kun lai?" an ti. 26 Jesuh nih dengteo in a vun zoh hna i, "Hihi minung caah cun a si kho lo, sihmanhsehlaw Pathian caah cun zeizong vialte hi a si kho ko," tiah a leh hna. 27 Cun Peter nih khan a hun i thawh i, "Zeizong vialte kha kan kaltak i nangmah kha kan in zulh. Zeidah kan comi a si lai?" tiah a hal. 28 Jesuh nih cun, "Chan Thar chungah Mi Fapa hi ka bawi ṭhutdan cung i ka ṭhut tikah nannih a ka zultu hleihnih hna zong hi Israel mi phun hleihnih kha an biaceihpiak awkah bawi ṭhutdan cungah nan ṭhu ve lai. 29 Cun keimah ruangah a inn siseh, a lo siseh, a u siseh, a nau siseh, a farle si hna seh, a pa siseh, a nu siseh, a fale si hna seh, a kaltakmi hna cu a let za khat in a hmuh ṭhan lai i zungzal nunnak kha pek a si lai. 30 Sihmanhsehlaw atu i hmasa bik a simi tampi hi hmanung bik an si lai i atu i hmanung bik a simi tampi hi hmasa bik an si lai," tiah a ti.
1 "Vancung Pennak cu mitsur dum a ngei i zingkate in a dum chung i rianṭuantu ding kawl awkah aa thawhmipa he aa lo. 2 Ni khat ah hawi nih an hmuh cio tawnmi ngun tangka phar khat kan phalh hna lai, tiah a ti hna i mitsur dum chungah cun rianṭuan awkah khan a thlah hna. 3 Cun cu hnu suimilam pathum, zinglei suimilam pakua tluk ah khin chawdawr hrawngah khan a vaa chawk i zeihmanh a tuah lo mi tlawmpal kha a va hmuh hna. 4 Annih cu, 'Nannih zong ka dum ah rian va ṭuan u law a tawkzawn in kuli man cu kan pek hna lai,' a ti hna i 5 cucaah an kal. Cun cu bantuk ṭhiamṭhiam cun chun suimilam hleihnih le zanlei suimilam pathum ah khan a tuah ṭhan. 6 Cun chawdawr ah khan a va kal ṭhan i cuka ah cun mi a cheu an rak dir ko rih kha a hmuh hna, cu ah cun zanlei suimilam panga a si dengmang cang. 'Zeicahdah chun nitlak zei tuah loin nan um sawhsawh ko?' tiah a hal hna i, 7 'Ahohmanh nih rian an kan fial duh lo caah a si,' tiah an leh. 'A si ahcun, nannih zong ka dum ah va kal u law rian va ṭuan u,' tiah a ti hna. 8 "Zanlei a hung si tikah dum ngeitu nih cun a dum uktu kha a kawh i, 'Rian ṭuantu kha au hna law an ṭuan man kha pe cio hna, hmanung bik i fialmi kha a hmasa bik ah pe hna law hmasa bik i fial mi kha hmanung bik ah pe hna,' tiah a ti. 9 Suimilam panga ah ṭuan aa thawkmi pawl kha ngun tangka phar khat cio a pek hna. 10 Cucaah hmasa bik i rak fialmi pawl kha an ṭuan man lak awk i an rat tikah tam deuh kan hmu lai, tiah an i ruah; sihmanhsehlaw annih zong ngun tangka phar khat cio pek an si ve ko. 11 Phaisa cu an i lak i rian ṭuan a fialtu hna cungah khan an zai. 12 An i thawh i, 'A hmanung bik i na fialmi hna tham cu suimilam pakhat lawng pei an ṭuan ko cu, kannih cu chun nitlak pei ni lin lakah kan ṭuan cu, asinain kanmah na kan pek zat ṭhiamṭhiam na pek ve ko hna,' an ti. 13 Cun annih lak i pakhat cu dum ngeitu nih khan a thawh i, 'Ka kawi, kan hleng hna lo. Hawi hmuh cio tawnmi ngun tangka phar khat hmu dingin pei nan hna a tlak ve ko kha. 14 Cucaah nan tangka cu i lak u law inn ah va ṭin ko u. A hmanung bik i ka fialmi hna nanmah zat pek ve cu keimah nawl pei a si ko cu. 15 Keimah tangka cu keimah nih ka duhduh in hman awk a si ko lo maw? Zeicahdah mi ka zaangfah hna hi nan hnah a chuah?' tiah a ti. 16 Cuticun a hmanung bik kha a hmasa bik an si lai i a hmasa bik kha a hmanung bik an si lai," tiah Jesuh nih a ti. 17 Jesuh nih cun Jerusalem khua lei i an hung kal lioah khan, a zultu pahleihnih kha kaa dang ah aa kalpi hna i anmah lawngin bia a ruah hna. 18 A thawh hna i, "Jerusalem ah kan hung kal lai i Mi Fapa hi tlangbawi upa pawl le Phungbia cawnpiaktu saya pawl sinah khan an ka pek lai. Thah awk a si, tiin sual an ka phawt lai i 19 Jentail mi hna kut chungah an ka chanh lai. Annih nih cun nihchuak capo ah an rak ka ser lai i fung in an ka tuk lai i vailam thing cungah an ka khenhchih lai; cun a ni thumnak ni ah nunter ka si ṭhan lai," tiah a ti hna. 20 Cun Zebedi fapa hna nu kha Jesuh sinah cun a fapa hna he khan an ra i a hmaiah khan a kun i zaangfahnak a hal. 21 "Zeidah na duh?" tiah Jesuh nih cun a hal i, "Siangpahrang na si tikah ka fapa pahnih hna hi na orhlei le na kehlei ah an ṭhutnak hnga, bia ka kam law ka duh," tiah a leh. 22 Jesuh nih cun, a fapale hna cu, "Nan ka halmi hi nan hngal lo. Ka din lai dingmi hrai hi nan din khawh lai maw?" tiah a leh hna. Annih nih, "Kan din khawh lai," tiah an leh. 23 "Ka hrai cu a din zong nan din khawh taktak ve ko lai. Sihmanhsehlaw ka orhlei ah anih ṭhu seh, ka kehlei ah anih ṭhu seh, ti cu keimah thim khawhmi a si lo. Cuka hmun cu ka Pa nih a timhpiakmi hna caah a si," tiah a ti hna. 24 Cu kong cu a dang pahra hna nih khan an theih tikah unau pahnih hna cungah cun an thin a hung i 25 cucaah Jesuh nih cun an dihlak in a kawh hna i, "Vawlei cungah cun nan hngalh bantukin, bawi nih an ukmi hna cu a lal in an lalhnawh tawn hna i hruaitu hna nih khan an hruaimi hna cu a uk in an uk tawn hna. 26 Sihmanhsehlaw nannih cu cuticun nan si awk a si lai lo. Nan lak i pakhat khat nih ngan a duh ahcun nan sinum a si awk a si. 27 Ahohmanh pakhatnak si a duhmi cu nan sal a si awk a si. 28 Cuticun pei Mi Fapa hi a si cu, rian ṭuanpiak dingah ka rat ṭung lo, mi tampi an rian ṭuanpiak awk le annih tlanhnak ca i ka nunnak pek awkah pei ka rat cu," tiah a ti hna. 29 Jeriko khua in an i thawh ah khan Jesuh cu mi tampi nih an zulh. 30 Lam pawng i a ṭhumi mitcaw pahnih hna nih khan Jesuh a kal ti thawng cu an theih tikah, "Maw David Fapa! Kan zaangfah tuah, bawipa," tiah an au. 31 Mizapi nih cun an sik hna i dai u, tiah an ti hna. Sihmanhsehlaw thang chinchin in, "Maw David Fapa, kan zaangfah tuah, bawipa," tiah an au. 32 Jesuh cu a dir i a kawh hna i, "Zeidah kan tuahpiak seh, ti nan ka duh?" tiah a hal hna. 33 "Bawipa, kan mit hung kan damter law kan duh," tiah an leh. 34 Jesuh nih a zaangfah hna i an mit cu a tawnghpiak hna i hmakhatte ah khua an hmu kho. Cun amah cu an zulh.
1 Jerusalem khua kha an hei naih cang; Oliv Tlang i a ummi Bethfeih khua kha an phak in Jesuh nih a zultu pahnih kha hmaiah a hei thlah hna i, 2 "Nan hmai khua ah khan rak kal u law laa pakhat aa hrengmi nan hmuh lai i cu laa sinah cun a fate kha a um lai. Cun nan phawih hna lai i ka sinah nan ratpi hna lai. 3 Mi nih zeimaw tiin an in ti hna ahcun, 'Kan Bawipa nih a herh,' tiah nan ti ko hna lai i an in lakter ko hna lai," tiah a ti. 4 Hi thil hi profet nih: 5 "Zion fanu cu va chim u law, 'Na siangpahrang cu nangmah lei ah a ra lio, Amah cu mi nunnem a si i laa cu a hun i cit, Laa note a hun i cit,' va ti u," tiah a timi tlinternak caah khan a si. 6 Cucaah a zultu kha hmaiah cun an rak kal i Jesuh nih a chimh hna bang khan an tuah. 7 Laa le a fate kha an ratpi hna i an puan kha an danh hna i Jesuh cu aa cit. 8 Mi tampi nih an puan cu lam ah khan an phah hna i a cheu nih thingnge kha an sam hna i lam ah cun an phah ve hna. 9 A hmai i a kalmi hna le a hnu in a zulmi hna cu an bu ning piin an au i, "David Fapa cu thangṭhat ko u! Bawipa min in a rami cu Pathian nih thluachuah pe ko seh, Pathian cu thangṭhat ko u," tiah an ti. 10 Jerusalem khua chungah an va luh tikah a khuapi in an i tuai i, "Hi pa hi ahodah a si?" tiah mi nih khan an rak hal hna i, 11 "Hi pa hi Galilee ram Nazareth khuami profet Jesuh a si," tiah mibupi nih khan an leh hna. 12 Jesuh cu biakinn ah khan a va lut i biakinn chung i chaw a rak zuarmi le a rak cawmi kha a ṭhawl dih hna; tangka thlengtu pawl cabuai le laileng zuartu pawl ṭhutdan kha a leh dih hna i 13 annih cu, "Cathiang chungah, 'Pathian nih ka inn cu thlacamnak inn a si lai, a ti,' tiah aa ṭial. Sihmanhsehlaw nannih nih cun mifir kua ah nan ser cang," tiah a ti hna. 14 Mitcaw mi le kebei mi kha biakinn chungah cun a sinah khan an ra i a rak damter hna. 15 Tlangbawi upa le Phungbia cawnpiaktu saya hna nih khan khuaruahharmi thil a tuahmi kha an hmuh i ngakchia nih, "David Fapa cu thangṭhat u," tiin biakinn chungah an au kha an theih tikah an thin a hung i 16 cucaah Jesuh cu, "An chimmi cu na thei maw?" tiah an ti. Jesuh nih cun, "Thei dah e! 'Ngakchia tete hna le hnuktlai lio bawhte hna kha, na thangṭhatnak cu na chimter hna,' tiah Cathiang chungah aa ṭialmi kha nan rel bal lo maw?" tiah a ti hna. 17 Jesuh nih cun a chuahtak hna i khua chung khan Bethani khua ah a kal i cuka ah cun a va riak. 18 A thaizing cu zingkate in Jesuh cu Jerusalem khua ah khan a kal ṭhan i lampi ah a rawl a ṭam. 19 Lam pawngah khan theipi kung a hei hmuh i a hei fuh, asinain a hnah lawng a rak si ai. Cucaah thingkung cu aa thawh i, "Zeitikhmanh ah thei tlai ti hlah," tiah a ti. Hmakhatte ah theipi kung cu a car ko. 20 Cucu a zultu nih khan an hmuh tikah an hung ar i, "Zeitindah cu tluk khulrang in theipi kung cu a car manh?" an ti. 21 Jesuh nih cun, "Hihi philh hlah u: nan zumh i lung awṭawm lo tein nan um ahcun, hi theipi kung cung i ka tuahmi hi nan tuah khawh ve lai; cu lawng hmanh si loin hi tlang hmanh hi, 'I ṭhial law rili chungah i paih,' nan ti ahcun aa ṭhial lai i aa paih ko lai. 22 Nan zumh ahcun thlacamnak in nan halmi paoh kha nan hmuh lai," a ti. 23 Jesuh cu Biakinn ah khan a ra ṭhan i a cawnpiak hna lioah khan tlangbawi upa pawl le Judah mi hruaitu pawl kha an ra i, "Zei nawl in dah hi thil hi na tuah hna? Aho nih dah cu nawl cu an pek?" tiah an hal. 24 Jesuh nih cun, "Bia pakhatte kan hal ve hna lai i nan ka leh ahcun, zei nawl in dah hi thil cu ka tuah hna, ti kha kan chimh ve hna lai. 25 Johan tipil peknak kha: Pathian sinin maw a si, minung sinin dah?" tiah a leh hna. Zeitindah kan leh lai, tinak caah khan pakhat le pakhat an i al lengmang i "Pathian sinin kan ti ahcun, zeicahdah nan zumh kun lo? a kan ti lai; 26 minung sinin kan ti ahcun, Johan cu profet a si, tiah mi nih an dihlak in an zumh caah zeitindah kan cungah an tuah lai ti kha phan awk kan si fawn," an ti. 27 Cucaah, "Kan hngal lo," tiah an leh. Cun anih zong nih, "Kei zong nih zei nawl in dah hi thil hi ka tuah, ti kha kan chim ve hna lai lo," tiah a ti hna. 28 "Zeitindah nan ruah? Mipa pakhat a rak um i fapa pahnih a ngeih hna. A upa u sinah khan a va kal i, 'Ka fapa, nihin cu va kal law mitsur dum ah rian va ṭuan,' tiah a ti. 29 Anih nih, 'Ka duh lo,' tiah a leh. Sihmanhsehlaw a hnuah a lung a hun i thleng i mitsur dum ah cun a kal. 30 Cun an pa cu a fapa a dang pakhat sinah khan a kal i cu ti ṭhiamṭhiam cun a va ti. Anih nih cun, 'E, e, bawipa,' tiah a rak leh, sihmanhsehlaw a kal lo. 31 A si ahcun, cu hna pahnih lakah khan aho nih dah an pa duhnak kha a tuah?" tiah a hal hna. Annih nih, "Upa u nih khan," tiah an leh. Jesuh nih cun a thawh hna i, "Hihi kan chimh hna: Ngunkhuai khawltu hna le hlawhhlangnu hna nih Pathian Pennak chungah an in luhkanh cang hna lai hih. 32 Zeicahtiah Johan cu nan sinah a ra i ahmaanmi lam zulh awk kha an hmuhsak hna, sihmanhsehlaw nannih nih cun nan zum duh lo; ngunkhuai khawltu hna le hlawhhlangnu hna tu nih khan an zumh. Cucu nan hmuh hnu zongah nan lung nan i thleng duh ṭhiamṭhiam lo i amah kha nan zum duh hlei lo," tiah a ti. 33 Jesuh nih cun a thawh ṭhan hna i, "Tahchunhnak bia pakhat in ngai rih tuah u: Lo ngeitupa pakhat a rak um i mitsur dum pakhat a rak ser; hau in a kulh, mitsur nennak caah khor a cawh i parthlam pakhat a sak. Cun a lo cu a ṭuantu hna sinah khan a hlanh i amah cu khualtlawn ah aa thawh. 34 Mitsur thei lawh caan kha a phak tikah a hlanhmi hna sinah cun a sal kha a hei thlah hna i a hmuh awk hnga a simi kha an va hal hna. 35 Dum a hlanhmi hna nih cun a salle cu an rak tlaih hna i pakhat an velh, pakhat an thah i pakhat lung in an cheh. 36 Cun dum ngeitu nih cun hmasa nak tam deuh in sal dang a thlah ṭhan hna, sihmanhsehlaw hmasa bantuk ṭhiamṭhiam khan an rak tuah hna. 37 A donghnak ah a fapa kha a hei thlah. 'Ka fapa cu an rak hmaizah ṭheoṭheo lai,' tiah a ti. 38 Sihmanhsehlaw dum hlanhmi pawl nih khan a fapa cu an rak hmuh tikah an i thawh i, 'Hihi dum ngeitu fapa a si. Ra u, that u si law a thilri hi i lak u sih,' an ti. 39 Cucaah an tlaih i dum lengah khan an hlonh i an thah. 40 "A si ahcun, dum ngeitu kha a rat tikah zeitindah hi dum a hlanhmi hna cu a tuah hna lai?" tiah Jesuh nih cun a hal hna. 41 "Cu miṭhalo hna cu a thah hrimhrim hna lai i a theitlai a pe dingmi midang kha dum cu a hlanh hna lai," tiah an leh. 42 Jesuh nih khan annih cu, "Cathiang nih: 'Inn satu hna nih san a tlai lo tiin an hlawtmi lung cu lung santlai bik ah a cang; Cucu Bawipa tuahmi a si i khuaruahhar ngaingai a si tiah kan ruah,' tiah a timi kha nan rel bal lo maw? 43 Cucaah hitihin kan chimh hna: Nannih cu Pathian Pennak kha chuh nan si lai i thei ṭha tein a tlai dingmi kha pek an si lai. 44 Hi lung cung i a tlami cu a kuai cikcek lai, hi lung nih a rialmi cu leidip ah a cang lai," tiah a ti. 45 Tlangbawi upa pawl le Farasi mi hna nih khan Jesuh chimmi tahchunhnak bia cu an theih i kanmah a kan tihnawhchan ti kha an hngalh; 46 cucaah tlaih kha an i zuam. Asinain mizapi nih khan Jesuh cu profet a si tiah an zumh caah an ṭih hna.
1 Jesuh nih mizapi cu bianabia in a chimh ṭhan hna. 2 "Vancung Pennak cu, a fapa caah nupi ṭhit rawl danghnak a tuahtu siangpahrang he aa lo. 3 A sawmmi kha, ra cang u, tiah va chimh awkah a sinum kha a thlah hna tikah, an ra duh lo. 4 Cun a sinum a dang kha a thlah ṭhan hna i, 'Rawl danghnak cu timh a si dih cang. Ka cawtum hna le ka saṭil thauthau hna cu ka thah cang hna. Zeizong vialte timh a si dih ko. Cucaah khulrang in rawl danghnak ah cun ra cang u,' nan va ti hna lai, tiah a ti hna. 5 Sihmanhsehlaw a sawmmi hna nih khan zeihmanh ah an rak rel lo i a cheu cu an lo ah an kal, a cheu cu an chawdawr ah an kal, 6 a cheu nih cun a sinum hna kha an rak tlaih hna i an rak velh hna i an rak thah hna. 7 Siangpahrang cu a thin a hung i a ralkap kha a thlah hna i cu lainawngmi hna cu a thah hna i an khua kha a duah hna. 8 Cun a sinum kha a auh hna i, 'Nupi ṭhit rawl danghnak ka tuahmi cu timh dih a si cang; asinain ka sawmmi hna cu upatnak hmuh awkah an i tlak lo. 9 Cucaah zatlang lam ah khan va kal u law nan hmuhmi paoh vun sawm hna u,' tiah a ti. 10 Cucaah a sinum hna cu zatlang lampi ah khan an va kal i an hmuhmi hna paoh kha, a chia a ṭha thlu loin, an va pumh hna i rawl danghnak khaan cu mi an khat dih. 11 "An sawmmi hna va zoh awkah khan siangpahrang cu a vung lut i nupi ṭhitnak puan aa aih lo mi pakhat a hmuh. 12 Siangpahrang nih cun, 'Ka kawi, zeitindah hika ah hin nupi ṭhitnak puan loin na luh zia," tiah a hal. Mipa nih cun zeihmanh a chim lo. 13 Cun siangpahrang nih khan a sinum cu a thawh hna i, 'A kut le a ke kha ṭem u law, khua leng mui lakah hei hlonh u. Cuka ah cun va ṭap seh law a hacang va rial seh,' tiah a ti. 14 Zeicahtiah sawmmi cu an tam nain, thimmi cu an tlawm," tiah a ti. 15 Farasi mi pawl cu an kal i Jesuh foihnak ding caah khan bia an kawl. 16 anmah zultu tlawmpal hna le Herod paṭi mi tlawmpal hna kha a sinah cun an hei thlah hna. An vaa thawh i, "Saya, nang cu lih chim hmang lomi na si ti kha kan hngalh. Pathian nih, cuticun um hna seh, a tining kha biatak tein na cawnpiak tawn hna i ahohmanh an mithmai kha na zoh hlei hna lo. 17 Cucaah hihi kan chim tuah: Romans Siangpahrang ngunkhuai pek hi kan Phung he aa kalh maw kalh lo?" an ti. 18 Jesuh nih an lung chungin thil ṭhalo an i timh kha a hngalh ziar hna i cucaah cun, "Mihrokhrawl hna! Zeicahdah foih nan ka zalh? 19 Ngunkhuai pek ding tangka cu ka hmuhsak tuah ngat u," tiah a ti hna. Tangka cu an hun pek i, 20 "Aho mui le aho min dah a cuang?" tiah a hal hna. Annih nih "Siangpahrang mui le min," tiah an leh. 21 Cun Jesuh nih cun, "A si ahcun, Siangpahrang cu siangpahrang ta a simi thil kha va pe u law Pathian cu Pathian ta a simi thil kha va pe ko u," tiah a ti hna. 22 Cucu an theih tikah an khuaruah a har i an kaltak. 23 Cu ni ṭhiamṭhiam ah cun Sadusi mi tlawmpal kha a sinah khan an ra. (Annih cu mi hi thihnak in kan tho ṭhan lai lo a timi pawl kha an si). 24 An i thawh i, "Saya, Moses nih a kan cawnpiakning ah: 'Mipa pakhat khat cu fa ngei loin a thih ahcun, a unau nih a nupi ro cu a ṭhit hrimhrim awk a si lai i an fale cu mithipa fale kha an si lai,' tiah ti a si. 25 Unau pasarih an rak um i an upa bik cu nupi a ngei, sihmanhsehlaw fa ngei loin a thi i cucaah a nau nih cun a rohmi a nupi cu a ṭhit. 26 Cu bantuk ṭhiamṭhiam cun a pahnihnak pa zong cu a thi ve, cun a pathumnak pa zong cu a thi ṭhiamṭhiam i cuticun an pasarih ning cun an thi dih. 27 A donghnak ah nu zong cu a thi ve. 28 Cucaah an dihlak in an rak ṭhit caah khan, cu nu cu thawhṭhannak ni ah cun aho nupi bik dah a si kun lai?" an ti. 29 Jesuh nih cun, "Nan hei palh hringhran dah. Hi ti nan palhnak cu Cathiang kha siseh, Pathian ṭhawnnak kha siseh, nan hngalh lo caah a si. 30 Mithi cu nunter ṭhan an si tikah vancungmi bantuk an si lai i an i ṭhi in an i um ti lai lo. 31 Mithi thawhter ṭhan an sinak kong ah cun, Pathian nih nanmah hrimhrim an chimhmi hna kha nan rel bal lo maw? 32 'Kei cu Abraham Pathian, Isak Pathian, Jakob Pathian ka si,' tiah pei a ti kha. Cu a sullam cu Pathian cu minung mi Pathian a si, mithi Pathian a si lo, tinak a si," tiah a ti. 33 Cucu an theih tikah mizapi cu a cawnpiakmi hna kha an khuaruah a har. 34 Jesuh nih Sadusi mi kha holh awk hngal loin a tuah hna ti kha Farasi mi nih an theih tikah, hmun khat ah an i pum i 35 annih lak i pakhat, Phungbia cawnpiaktu saya a simi nih khan bia in foih a timh. 36 Aa thawh i, "Saya, Phungbia chungah hin zei nawlbia dah a ngan bikmi a si?" tiah a hal. 37 Jesuh nih cun, " ' Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,' 38 ti hi a ngan bik le a biapi bik nawlbia cu a si. 39 A hun changtu biapi bik nawlbia cu, cu bantuk ṭhiamṭhiam cu a si i, 'Na innpa cu nangmah naa dawt bantukin na dawt lai,' ti hi a si. 40 Moses Nawlbia vialte le profet hna cawnpiaknak vialte cu, hi nawlbia pahnih chungah hin an i khumh dih," tiah a ti. 41 Farasi mi hna cu hmunkhat i an i pumh tikah khan Jesuh nih a thawh hna i, 42 "Messiah kong hi zeitindah nan ruah? Aho hrinsor dah a si?" tiah a hal hna. Annih nih "David hrinsor a si," tiah an leh. 43 Khi tikah Jesuh nih cun, "A si ahcun, zeicahdah Thlarau nih David cu, Messiah cu ka Bawipa a si, tiah na ti lai, tiah a ti kun? David nih cun pei: 44 Bawipa nih ka Bawipa cu a thawh i, Na ral hna cu na ke tangah ka chiah hna hlantiang Ka orhlei kamah hin ṭhu tuah, tiah a ti, a ti cu. 45 David nih Messiah cu Bawipa, tiah a ti ahcun zeitindah amah cu David hrinsor cu a si khawh lai?" tiah a ti hna. 46 Jesuh cu ahohmanh nih bia kaa khat hmanh an let kho lo i cu ni thawk cun ahohmanh nih bia an hal ngam ti lo.
1 Cun Jesuh nih mizapi hna le a zultu hna kha a thawh hna i, 2 "Phungbia cawnpiaktu saya hna hi le Farasi mi hna hi, Moses Nawlbia hi a sullam cucu a si, tiah a ti tu an si. 3 Cucaah an in chimhmi hna paoh cu nan ngaih le nan zulh a herh. Asinain anmah nawl bel i cawn hlah u, zeicahtiah an chimmi kha an tuah lo. 4 Thil kha ritpi in an tom i mi keng cungah an chuan, sihmanhsehlaw annih vial nih cun an kutdong par hmanh in an tawng duh lo. 5 Zei paohpaoh kha mi hmuh rem lawngin an tuah. An cal i an i khih chihmi Cathiang bia khumhnak bawmte khi zeitluk in dah an ngan i an puanki khi zeitluk in dah an fual, zoh hna hmanh u! 6 Rawl danghnak hmun ah upatnak hmun i ṭhut kha an duh i pumhnak inn ah ṭhutnak hampiak kha an ngen. 7 Zatlang lam ah mi nih upatnak in upatnak kan pe hna seh ti kha an duh i, "Saya, saya," ti kha an tlaihchan. 8 Sihmanhsehlaw nannih cu "saya" ti kha va duh hlah u, zeicahtiah Saya cu pakhat lawng nan ngei i nan dihlak in u le nau nan si. 9 Cun vawlei cungah hin ahohmanh, "Ka Pa," tiah va ti hna hlah u, zeicahtiah Pa cu pakhat lawnglawng nan ngei i amah cu vancung khua i a ummi a si. 10 "Hruaitu" ti zong duh hlah u, zeicahtiah Messiah lawnglawng hi nan hruaitu cu a si ko. 11 Nan lak i a ngan bik cu nan sal a si awk a si. 12 Mah le mah aa ngantermi cu ṭhumh an si lai i mi toiah aa dormi cu mi ngan ah ser an si lai," tiah a ti. 13 "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna. Vancung Pennak cu mi kha nan kharkanh hna, asinain nanmah cu nan lut duh ṭung lo i luh a duhmi zong kha nan awnh fawn ṭung hna lo. 14 (Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna! Nuhmei kha nan hlen nan hlen hna i an inn kha nan chuh hna, cun zapi hmuh awkah thla kha sau pipi in nan i camter. Hi caah hin pei nan dantatnak kha a fah chinchin lai cu!) 15 Phungbia cawnpiaktu saya hna le Farasi mi hna, nan caah ngaihchia a va si dah! Midepde hna! Lungthleng pakhat umter awkah rili kip kha nan tan i ram kip ah nan kal i lungthleng pakhat nan umter tikah cu pa cu, nanmah hell fa nan simi a let hnih ah nan canter. 16 "Lamhruaitu mitcaw hna, nan caah ngaihchia a va si dah! Nan i thawh i, 'Mi nih Biakinn in chiat a ser ahcun a chiatsernak nih khan a tlai lo, sihmanhsehlaw Biakinn chung i a ummi sui khan chiat a ser ahcun a chiatsernak nih khan a tlaih,' tiah nan cawnpiak hna. 17 Mitcaw mihrut hna. A zei cu dah a biapi deuh? Sui cu maw asiloah sui a thiantertu Biakinn cu dah? 18 Nan i thawh hoi i, 'Mi nih biakṭheng in chiat a ser ahcun a chiatsernak nih khan a tlai lo, sihmanhsehlaw biakṭheng cung laksawng khan a ser ahcun a tlaih,' nan ti. 19 Nan mit a va caw hringhran dah! A zei cu dah a biapi deuh? Laksawng cu maw, asiloah laksawng a thiantertu biakṭheng cu dah? 20 Cucaah cun mi nih biakṭheng in chiat an ser tikah biakṭheng cu le a cung i a ummi thil vialte in chiat an ser a si; 21 cun Biakinn in chiat an ser tikah Biakinn cu le a chung i a ummi Pathian in chiat an ser a si. 22 Cun vancung in chiat an ser tikah Pathian bawiṭhutdan le a cung i a ṭhumi in chiat an ser a si. 23 "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna! Tihang ṭamhnak puṭinan tehna, hamhhuai tehna, aithing tehna hmanh kha cheu hra ah cheu khat Pathian sinah nan pek, sihmanhsehlaw Nawlbia nih biapi taktak a si a timi dinnak le mi zaangfahnak le zumhtlakmi sinak hna cu zeihmanh ah nan rel ṭung lo; hi hna hi pei nan tuah awk a si cu, a dang zong kha daithlanh hlei loin. 24 Lam hruaitu mitcaw hna. Fikfa kha kan i din chih sual lai tiah, heh tiah nan zet, asinain kalauk kha nan lemh ṭung! 25 "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna. Nan hrai le nan kheng cu a lenglei kha thiang hirhiar tein nan ṭawl hna, asinain a chung cu nan firmi thil le mah karkalak huih lungthin he mi nan va chuhmi hna thil in a khat ṭung. 26 Farasi mi mitcaw hna. Hrai chung i a ummi thil cu thianh hmasa hna u law, cucun pei a lenglei zong cu a thian ve lai cu! 27 "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna. Si rang an thuhmi thlan bantuk nan si. Lenglei cun aa dawh ko, sihmanhsehlaw a chung cu mithi ruh le a thumi pei a khat cu. 28 Cu bantuk cu nan si, a lenglei cun mi ṭha ko nan lo, sihmanhsehlaw nan chung cu lih le sualnak in a khat. 29 "Phungbia cawnpiaktu saya hna le Farasi mi hna, nan caah ngaihchia a va si dah! Mi depde hna! Profet kha thlan ṭhaṭha nan serpiak hna i mithiang mi hna lungphun kha nan ṭamh, 30 cun nan i thawh i, 'Kannih cun kan pupa hna chan ah hin rak um u si law, annih tuahmi hi cu kan tuah hnga lo i profet hna hi cu kan that hna hnga lo,' nan ti. 31 Cucaah nanmah hrimhrim nih profet a rak thattu hna tefa nan si kha nan fianter 32 i nan pupa hna nih an rak thawkmi cu lim lawlaw ko uh. 33 Rul hna, rul fale hna. Zeitindah hell chung tla ding i biaceihnak cu kan luat kho lai tiah nan i ruah? 34 Hihi kan chimh hna: Profet hna le mifim hna le cawnpiaktu hna kha kan pek hna lai; a cheu cu nan rak thah hna lai, a cheu cu vailam ah thir in nan rak khenh chih hna lai, a cheu cu nan pumhnak inn ah fung in nan tuk hna lai i khua khat hnu khua khat nan dawi hna lai. 35 Cucaah a sual lomi vialte hna thahnak ruang i dantatnak kha nan cungah a tla lai; a sual lomi Abel thawk in Biakinn le biakṭheng karlak ah nan thahmi Zekhariah, Berekhiah fapa, tiang khan. 36 Hihi kan chimh hna: hi mi vialte hna ruang i dantatnak cu tu chan mi cungah hin a tlung lai. 37 "Maw Jerusalem, Jerusalem, Profet kha na rak thah hna i nangmah sinah Pathian nih a run thlahmi lamkaltu hna kha lung in na rak den hna. Arpi nih a fale cu a thla tangah a huh hna bantukin na fale cu voi zeizat dik ka kut in huh ka timh hna i an duh lo. 38 Atu cu na inn cu kin taktak in a king cang lai. 39 Atu ri hin hmailei ah, 'Bawipa min in a rami cu Pathian nih thluachuah pe ko seh,' na ti hlan cu, na ka hmu hrimhrim ti lai lo," tiah a ti.
1 Jesuh cu Biakinn khan a chuak i a kalpah ah khan a zultu hna cu a sinah khan an ra i Biakinn le Biakinn he aa pehtlaimi inn hna kha an hmuhsak. 2 Aa thawh i, "Hihi nan hmuh cio ko hna a si lo mei? Sihmanhsehlaw hihi kan chimh hna: lung pakhat hmanh hi a umnak kel ah a ummi an um te lai lo, an dihlak tein chimh an si dih lai," tiah a ti. 3 Cun Jesuh cu Oliv Tlang i a ṭhut lioah khan a zultu hna kha anmah lawngte in an ra i, "Hihi zeitik ah dah a si lai? Cun na ratnak ding hmelchunhnak le atu chan donghnak ding hmelchunhnak ah zei thil dah a um hna lai?" tiah an hal. 4 Jesuh nih cun, "I ralring u law ahohmanh i hlenter hna hlah u. 5 Zeicahtiah ka min in mi tampi an ra lai i, 'Keimah hi Messiah cu ka si,' tiah an ti lai i mi tampi kha an hlen hna lai. 6 Lam nai i an i tuknak thawng le lam hla i an i tuknak thawngpang kha nan theih hna lai; sihmanhsehlaw nan awlokchong hlah u. Cu bantuk thil cu an um hrimhrim awk a si ko, asinain a donghnak a phan cang tinak a si lo. 7 Ram khat le ram khat an i do lai, peng khat le peng khat an i tu lai. A kenkip ah mangṭam le lihnin a tlung lai. 8 Hi thil vialte hi nau chuah lai nganfah a hmasa bik bantuk an si. 9 "Cun mi nih an in tlaih hna lai i dantat awkah an in chanh hna lai i an in thah hna lai. Keimah ruangah mi vialte nih an in huat hna lai. 10 Cu caan ah cun mi tampi nih an zumhnak kha an hlawt lai i pakhat le pakhat an i rawi lai i pakhat le pakhat an i hua lai. 11 Cun nal profet tampi an chuak lai i mi tampi an hlen hna lai. 12 Ṭhat lonak kha a karh tuk lai caah mi tampi cu an dawtnak kha a dai lai. 13 Sihmanhsehlaw a dongh tiangin a fekmi cu khamh an si lai. 14 Cun miphun vialte hna ca i tehte si awkah Vancung Pennak kong Thawng Ṭha hi khuazakip ah chim a si lai — cun cu hnu lawngah cun donghnak cu a si lai! 15 "Cun profet Daniel nih, 'Ṭhiotu Fihnung,' a timi kha hmunthiang i a dir cu nan hmuh lai. (A reltu hna, hi a sullam hi i hngalh u). 16 Cun Judea ram i a ummi kha tlang ah zam hna seh. 17 A inncung i a ummi cu a innchung i a ummi thilri lak awkah ṭum hlah seh. 18 Lo i a ummi cu a puan lak awkah tlung hlah seh. 19 Cu caan ah cun fapawi nu hna le nau no ngeimi nu hna caah a har hringhran lai. 20 Nan zam caan hi khuasik caan le Sabbath ni ah a si sual nakhnga lo, Pathian sinah thlacam u. 21 Zeicahtiah khi caan ah cun vawlei hramthawk in nihin ni tiangah a ummi harnak a zeihmanh nakin a let tampi in a fak deuhmi harnak kha a um lai. Cu bantuk harnak cu a um zong a um ti lai lo. 22 Cu caan cu Pathian nih rak tawiter hlah seh law ahohmanh a nungmi an um hnga lo. Asinain Pathian nih a mithim mi hna caah, cu caan cu a tawiter lai. 23 "Cun ahohmanh nih, 'Messiah cu hika ah a um, khika ah a um,' in ti ai kun hna, va zum hna hlah u. 24 Zeicahtiah nal messiah le nal profet kha an chuak lai i Pathian mithim hna hmanh kha a si khawh ahcun hlen khawhnak ding caah hmelchunhnak le khuaruahhar nganngan an ser hna lai. 25 Ngai hmanh u. A hlankan in hihi kan chimchung hna hih. 26 "Cun mi nih, 'Ramlak ah a um,' an in ti hna ahcun va kal hlah u; 'Hika ah aa thup ko,' an in ti hna zongah vaa lun hlah u. 27 Zeicahtiah Mi Fapa cu van ah nichuahlei in nitlaklei tiang aa lekmi nimtlau bantukin pei a rat lai cu. 28 "Saruak umnak hmun ah langta an i pum tawn." 29 "Cu caan harnak cu a dongh cangka in ni cu a mui lai i thlapa cu a ceu ti lai lo, arfi cu van in an tla lai i vancung ṭhawnnak cu an i hnin lai. 30 Cun Mi Fapa hmelchunhnak kha van ah a lang lai; khi tikah vawlei cung miphun vialte kha an ṭap lai i Mi Fapa cu lianhngannak le sunparnak he vancung in a rat kha an hmuh lai. 31 Muko nganpi cu an tum lai i a vancungmi kha vawlei kil li ah a thlah hna lai i vanrang toi khuazakip in a mithim hna kha a pumh hna lai. 32 "Theipi kung nih hin thil pakhat in cawnpiak hna seh: A nge cu an hung hrin i an hung no i a hnah an hung corh tikah ṭhal caan cu a nai cang, ti kha nan hngalh. 33 Cu bantukin hi thil vialte hi nan hmuh hna tikah, caan cu a nai cang, aa thawk dengmang cang, ti kha nan hngalh lai. 34 Mah hihi philh hlah u: Hi thil vialte hi atu i a nung lio mi an thih dih hlanah hin a tlung ko lai. 35 Van le vawlei cu an rawk lai; sihmanhsehlaw ka bia cu zeitikhmanh ah a rawk lai lo. 36 "Asinain, cu ni le cu caan cu zeitik ah dah a si lai, ti kha ahohmanh nih an hngal lo; vancung mi zong nih an hngal lo, Fapa zong nih a hngal hlei lo, Pa lawnglawng nih a hngalh. 37 Mi Fapa a rat cu Noah chan i thil umtuning bantuk kha a si lai. 38 Tilian a tlun hlan, Noah lawng chung i a luh ni tiang kha, an ei an ding an i ṭhi an i um i 39 tilian a hung tlun taktak i a fenh dih hna hlantiang kha cu, zeihmanh an hngal lo. Mi fapa a rat tikah cun cu bantuk cun a si lai. 40 Cu caan ah cun mi pahnih lo ah rian a ṭuanmi hna lakah pakhat cu kalpi a si lai i pakhat cu nganhta a si lai. 41 Nu pahnih sum a sumi hna lakah pakhat cu kalpi a si lai i pakhat cu nganhta a si lai. 42 Cucaah nan Bawipa a rat lai ni nan hngalh lo caah ralring tein um ko u. 43 Hihi philh hlah u: Inn ngeitu nih mifir a rat lai caan kha hngal seh law, hngilh lo tein a rak um hnga i mifir kha a inn chungah a luhter hnga lo. 44 Cu ruangah cun nannih zong timh cia tein nan um zungzal awk a si, zeicahtiah Mi Fapa cu nan i rin lo caan ah khin a ra ko lai. 45 "Cu a si caah aho cu dah zumh awk a tlakmi le a fimmi sal cu a si? Cu bantukin zumh awk a tlak i a fimmi sal cu, a Bawipa nih a sal hawi zohkhenhtu dingah, a caan hmaan tein an rawl a petu dingah, a chiahmi kha a si. 46 A bawipa nih a tlun tikah, a rian a rak ṭuan liote ah a run tanhmi sal caah cun lunglawmh awk a va si dah! 47 Cu sal cu a bawipa nih a ngeihmi thil vialte zohkhenhtu ah a chiah hrimhrim lai, tiah kan chimh hna. 48 Sihmanhsehlaw cu pa cu miṭhalo a si ahcun, 'Ka bawipa cu a ra chom rih lai lo,' tiah a lung chungin a ti lai i 49 a sal hawi kha a ṭhuat a den hna lai i zuri pawl hna he khan an ei an ding ṭi lai. 50 Cun a bawipa cu ni khatkhat cu aa rin lo caan le a hngalh lo caan ah a ra tlung lai i 51 a bawipa nih cun a sam cikcek lai i midepde pawl umnak hmun ah khan a umter ve lai. Cuka ah cun a ṭap lai i a hacang a rial lai.
1 "Cun Vancung Pennak cu hi bantuk hi a si lai, voi khat cu ngaknu pahra an um i nupi ṭhi tlangval kha don awkah an meiinn cio he an i thawh. 2 Panga cu an hrut i panga cu an fim. 3 A hrutmi nih cun an meiinn cu an i put ko nain zinan kha a hlei in an i ken lo. 4 A fimmi tu nih cun an meiinn he khan, zinan khat tein an rawnmi thawl kha an i ken chih cio. 5 Nupi ṭhi tlangval cu a rauh caah ngaknu hna cu an ngu i an i hngilh. 6 "Zanṭimpi ah khin mi an hung au i, 'Nupi ṭhi tlangval cu a ra cang. Ra chuak u law ra tong u,' tiah an ti. 7 Ngaknu pahra cu an hun i hlau i an meiinn cu an hun timhtuah hna. 8 Khi tikah a hrutmi hna nih khan a fimmi hna cu, 'Kan meiinn an mit cuahmah ai, nan zinan kan ṭhen ve tuah u,' an ti hna. 9 A fimmi hna nih cun, 'A si kho lai lo. Nanmah ca he kanmah ca he cun kan ngeihmi hi a za lai lo. Chawdawr ah va kal u law vaa cawk ko u; tiah an leh hna. 10 Cucaah a hrutmi ngaknu hna cu zinan cawk awkah khan chawdawr ah cun an va kal i cu karah nupi ṭhi tlangvalpa cu a rak phan. Timh cia tein a ummi ngaknu panga hna cu nupi ṭhit rawldanghnak chungah khan amah sinah cun an lut i innka kha an khar. 11 "Hnu deuh ah khin ngaknu dang zong kha an ra phan ve. 'Bawipa, bawipa, innka hung kan hunh tuah,' tiah an au. 12 Sihmanhsehlaw nupi ṭhi tlangvalpa nih cun, 'Kan hngal hrimhrim hna lo,' tiah a leh hna. 13 Cucaah cun, a ni siseh, a caan siseh, nan hngalh ṭung lo caah ralring tein um ko u. 14 "Vancung Pennak cu khualtlawn i aa thawhmipa bantuk a si. A salle kha a kawh hna i a thilri kha nan rak zohkhenh lai, tiah a ti hna. 15 Anmahle an thil ti khawh ning cio khan ngun tangka a pek hna: pakhat cu thong nga, pakhat cu thong hnih a pek i pakhat cu thong khat a pek. Cun khualtlawn ah cun aa thawh. 16 Thong nga a hmumi sal nih khan cu tangka cun chaw a let zau i a dang thong nga a miak a hmuh. 17 Cu bantuk ṭhiamṭhiam in thong hnih a hmu mipa zong nih khan a dang thong hnih a miak a hmuh ve. 18 Sihmanhsehlaw thong khat a hmutu pa nih khan cun, vawlei a cawh riangmang i a bawipa tangka kha a va thuh. 19 "Caan saupi hnuah khin an bawipa cu a ra tlung ṭhan i an tangka hmannak kong kha felfai in a tuahpi hna. 20 Thong nga a hmumi sal kha a ra lut i a dang thong nga a rung pek. Aa thawh i, 'Bawipa, tangka thong nga na rak ka pek. Atu cu zohhmanh, a dang thong nga zong ka rak chuahpi,' tiah a ti. 21 A bawipa nih cun, 'Sal ṭha, zumhawktlak sal, na tuahmi cu a ṭha ngaingai. Tangka tlawmte na lehthalnak ah zumhawktlak na si, cucaah tangka tampi tawngthamtu ah kan chiah lai. Ra lut law ka lunglawmhnak hi i hrawm ve,' tiah a ti. 22 Cun tangka thong hnih a pekmi kha a ra lut i, 'Bawipa, tangka thong hnih na rak ka pek. Atu cu zohhmanh, a dang thong hnih zong ka rak chuahpi,' tiah a ti. 23 A bawipa nih cun, 'Salṭha, sal zumhawktlak, tangka tlawmte lehthalnak ah zumhawktlak na si, cucaah tangka tampi tawngthamtu ah kan chiah lai. Ra lut law ka lunglawmhnak hi i hrawm ve,' tiah a ti. 24 Cun tangka thong khat a hmumipa kha a ra lut i, 'Bawipa, nang cu mikhepkha na si kha ka hngalh. Na cin lonak hmun ah khan theitlai na lawh tawn i na tuh lonak hmun ah khan tirawl na ṭuan tawn. 25 Cucaah kan ṭih i na tangka cu vawlei chungah ka va thuh. Zohhmanh na ta kha a ningte in, hihi a si ko,' tiah a ti. 26 A bawipa nih cun, 'Mi zaangthu, sal ṭhalo, ka phun lonak hmun ah theitlai ka lawh tawn le ka tuh lonak hmun ah tirawl ka ṭuan tawn cu na hngalh a si lo mei? 27 Cu ti na hngalh ṭung ahcun ka tangka cu beng ah pei na rak chiah awk a si cu, ka ra kir tikah hin ka tangka he a karh he ka hmu hnga lo maw? 28 Cucaah tangka cu a sin khan la u law tangka thong hra a ngeimipa kha pe u. 29 Zeicahtiah a ngeimi cu chap chin an si lai i a hleivuang an ngeih tiangin an ngei lai; sihmanhsehlaw zeihmanh a ngei lomi cu a ngeihmi hnihchunte hmanh kha chuh a si lai. 30 Cun hi sal santlai lopa hi a leng khuamui lakah va hlonh u; khika ah va ṭap seh law a hacang va rial len seh," tiah a ti. 31 "Mi Fapa cu Siangpahrang in vancungmi vialte hna he a rat tikah a bawiṭhutdan cungah cun a ṭhu lai i 32 vawleicung mi vialte cu a hmaiah pumh an si lai. Cun tuukhal nih tuu cu meheh sinin a ṭhen hna bantuk khan miphun vialte cu bu hnih ah a ṭhen hna lai; 33 tuu cu a orhlei ah a chiah hna lai i meheh cu a kehlei ah a chiah hna lai. 34 Cun a orhlei i a ummi cu Siangpahrang nih cun a thawh hna lai i, 'Nannih, ka Pa nih thluachuah a pekmi hna, ra tuah u. Ra u law vawlei ser ri in nan caah timh a simi pennak cu ra co tuah u. 35 Ka rawl a ṭam i rawl nan ka pek, ka ti a hal i ti nan ka pek; khual ka si i nan inn ah nan ka tlunter. 36 Puan aih awk ka ngei lo i puan nan ka pek; ka zaw i nan ka zohkhenh; thong ka tla i nan ka len,' tiah a ti hna lai. 37 Khi tikah miding mi hna nih cun, 'Bawipa, zeitik ah dah na rawl a ṭam i rawl kan in pek, na ti a hal i ti kan in pek, 38 khual na si i kan in tlunter, puan aih awk ngei loin na um i puan kan in pek, 39 na zawt i kan in zoh, thong ah na tlak i kan in len?' tiah an leh lai. 40 Cun Siangpahrang nih cun, 'Hihi kan chimh hna: Ka unau pakhatkhat cungah, zeitluk hmanh in sifak le nauta si seh law, nan tuahmi thil paoh hi ka cung i nan tuah a si,' tiah a leh hna lai. 41 "Cun a kehlei i a ummi hna cu, 'Nannih, Pathian nih chiat a serhmi hna, kal ko u, Khuachia le a vancungmi hna ca i timh a simi zungzal mit lo mei chungah cun va kal ko u. 42 Ka rawl a ṭam ah rawl nan ka pe lo, ka ti a hal ah ti nan ka pe duh lo, 43 khual ka si ah nan ka tlunter duh lo, puan aih awk ka ngeih lo ah puan nan ka pe duh lo, ka zawt i thong i ka tlak ah nan ka zohkhenh duh lo,' a ti hna lai. 44 Khi tikah annih nih, 'Zeitik te ah khan dah na rawl a ṭam, na ti a hal, puan aih awk ngei loin na um, khual na si, na zawt, thong ah na tlak i kan in hramh duh lo cu a si?' tiah an leh lai. 45 Cun Siangpahrang nih khan, 'Hihi kan chimh hna: misifak hramh nan duh hna lo paoh ah khan nan ka hramh duh lo a si,' tiah a leh ṭhan ve lai. 46 Hi hna cu zungzal hremhmun ah khan kalter an si lai: a dingmi cu zungzal nunnak ah khan an kal lai," tiah a ti.
1 Jesuh nih hi bia vialte cu a chimh dih hna tikah a zultu pawl kha a thawh hna i, 2 "Nan hngalh bantukin, hi hnu ni hnih ah, Lanhtak Puai kha a si cang lai, cun Mi Fapa cu vailam tahnak i khenhchih awkah tlaihter a si lai," tiah a ti hna. 3 Cun tlangbawi upa pawl le Judah mi upa hna kha Tlangbawi Ngan Kaiafas innpi ah cun an i pum i 4 a thli tein Jesuh kha tlaih i thah ding kha khua an khang. 5 "Puai chungah cun kan tuah lai lo, mizapi an i tuai sual lai," an ti. 6 Jesuh cu Bethani khua i thinghmui Simon inn i a um lioah khan, 7 nu pakhat a ra i lungrang thawl khatte in zihmui a man a fak ngaingaimi kha a rak i put i rawl a ei lioah khan a lu ah a toih. 8 A zultu hna nih khan cucu an hmuh tikah an thin a hung i, "Zeicahdah hi thil hi hitihin a sawksam ee? 9 Hi zihmui hi tangka tampi ah zuar i tangka cu misifak hna kha pek khawh ding a si ṭung," an ti. 10 Jesuh nih an i ceihmi cu a theih i, "Zeicahdah hi nu hi nan hnahnawh? A ka tuahpiakmi hi thil ṭha le thil dawh pei a si hi. 11 Misifak cu zungzal in pei nan sinah an um ko lai cu, kei cu zungzal in nan sinah ka um ṭung lai lo. 12 Zihmui ka pum i a ka toih hi vui awk ca i a ka timhtuah pei a si cu. 13 Hihi philh hlah u: hi thawngṭha hi vawlei cung khuazakip i an chimnak hmun paoh ah, a tuahmi thil hi amah philh lonak ah chim a si zungzal ve lai," tiah a ti hna. 14 Cun zultu pahleihnih lak i pakhat, Judas Iskariot timi kha, tlangbawi upa pawl sinah khan a va kal i 15 "Jesuh cu nan kut chung i kan chanh hna ahcun zeidah nan ka pek lai?" tiah a va ti hna. Cucaah ngun tangka sawm thum kha an rel i an pek. 16 Cu ri cun Judas nih khan Jesuh rawinak ding caan rem kha a bawh. 17 Thilnu Cawh Lo Changreu Puai a ni hmasa bik ah khan, a zultu kha Jesuh sinah cun an ra i, "Khuazei ah dah Lanhtak Puai Zanriah cu va tim u ti na kan duh?" tiah an ti. 18 Annih cu, "Khua chung i mipa pakhat sinah va kal u law, kan Sayapa nih, 'Ka caan a phan cang, ka zultu hna he na inn ah Lanhtak Zanriah ei kan duh,' a ti tiah va chim u," tiah a ti hna. 19 A zultu pawl nih khan Jesuh nih a chimh hna bang cun Lanhtak Zanriah cu an timh. 20 Zanlei sang a hung si tikah Jesuh le a zultu hleihnih hna cu rawl ei awkah khan an ṭhu 21 Rawl an ei lioah cun, "Nan lak i pakhat nih hin nan ka rawi lai," tiah a ti hna. 22 A zultu pawl cu an awlok a chong i pakhat hnu pakhat in, "Na ti duhmi cu kei cu ka si lo, a si lo mei?" tiah an ti duahmah cio. 23 Jesuh nih cun, "Ka changreu ka hnimnak kheng i a changreu a hnim vemi nih hin a ka lei lai. 24 Mi Fapa cu Cathiang nih a thi lai a tining khan a thi lai, sihmanhsehlaw Mi Fapa a rawitu caah cun ngaihchia a si ko. Cu pa cu chuak loin rak um seh law a caah a ṭha deuh hnga," tiah a ti. 25 Leitu Judas nih khan a hun i thawh i, "Saya, keimah na ka ti duhnak cu a si i mei?" tiah a hal. Jesuh nih cun, "Na chim ko cu ta," tiah a leh. 26 Zanriah an ei lioah cun Jesuh nih khan changreu kha a lak i thla a cam dih in a cheu i a zultu kha a pek hna. "I lak u law ei u; hihi ka pum a si," tiah a ti. 27 Cun hrai kha a lak i Pathian sinah lawmhnak bia a chim dih in, annih cu a pek hna i, "Nan dihlak in ding u. 28 Hihi ka thi a si, biakam fehternak thisen, sual ngaihthiamnak ca i mi tampi ca i thletmi cu a si. 29 Hihi kan chimh hna: Ka Pa Pennak chungah nanmah he a thar in ka din ṭhan hlantiang hi mitsur hang hi ka ding ti lai lo," tiah a ti. 30 Cun hla an sa i Oliv tlang ah khan an kal. 31 Jesuh nih annih cu a thawh hna i, "Cathiang nih, 'Pathian nih tuukhal kha a thah lai i tuurun chung tuu kha an i ṭhek dih lai,' a ti caah, tuzan hrimhrim ah hin nan dihlak in nan ka zamtak lai. 32 Sihmanhsehlaw nunter ṭhan ka si tikah nan hmaiah Galilee ah ka rak kal chung lai," tiah a ti hna. 33 Peter nih khan Jesuh cu a hun thawh i, "Midang vialte nih in zamtak hna hmanh seh law, kei cu kan zamtak bal lai lo," tiah a ti. 34 Jesuh nih Peter cu, "Hihi va philh hlah: Tuzan i ar a khuan hlan ah amah cu ka hngal lo, tiah voi thum na ka ti lai," tiah a ti. 35 Peter nih cun, "Na sin i ka thih ve ding a si hmanh ah, amah cu ka hngal lo, kan ti bal lai lo," tiah a leh. Cu bantuk cun zultu dang vialte zong nih khan an ti cio. 36 Cun Jesuh cu Gethsemane an timi hmun ah khan a zultu hna he khan an kal i annih cu, "Khika i thla ka va cam kar ah khin, hika ah hin rak ṭhu u," tiah a ti hna. 37 Peter le Zebedi fapa pahnih hna kha aa kalpi hna. A ngaih a chia i a awlok a chong. 38 Annih cu a thawh hna i, "Ka lungre a thei tuk hringhran i ka thi sual lai. Cucaah cun hika ah hin rak um u law hngilh lo tein rak ka hngak u," tiah a ti hna. 39 Hmailei ah khin tlawmpal a va kal i vawlei ah a bawk i, "Ka Pa, a si khawh ahcun hi hrai hi ka ṭhialpiak ko. Sihmanhsehlaw keimah duhmi cu si hlah seh, nangmah duhmi tu si ko seh," tiah thla a cam. 40 Cun a ra kir i a zultu pathum hna cu an rak i hngilh kha a hmuh hna; cun Peter kha, "Suimilam pakhat hmanh hngilh loin nan ka hngak kho lo maw? 41 Tukforhnak chungah nan luh nakhnga lo hngilh lo tein um u law thlacam tuah u. Thlarau nih cun a huam ko, sihmanhsehlaw titsa cu a der," tiah a ti. 42 Cun Jesuh cu a va kal ṭhan i, "Ka Pa, hi hrai hi din loin hrial khawh a si lo ahcun, nangmah duhnak bangin si ko seh," tiah thla a cam. 43 A zultu hna sinah khan a ra kir ṭhan i an rak i hngilh ṭhan; an mit a au in an au kho lo. 44 Jesuh nih cun a kaltak ṭhan hna i a voi thumnak thla a cam ṭhan, a chim cia kha a chim ṭhan. 45 Cun a zultu hna sinah khan a ra kir ṭhan i, "Nan i hngilh i nan i din ko rih maw? Zohhmanh u, Mi Fapa cu misual mi hna kut chung i chanhnak caan kha a phan cang. 46 Tho u law, kal u sih. A ka rawitu kan sin a phan cang," tiah a ti hna. 47 Bia a chim lengmang lioah cun a zultu hleihnih lak i a rak i tel vemi Judas kha a ra phan. Tlangbawi upa pawl le Judah upa hna nih an thlahmi mi runpi kha nam le thingtan i put in aa ratpi hna. 48 Rawitu nih cun mizapi cu hmelchunhnak a rak pek cia hna i, "Ka hnamhmi cu tlaih nan duhmi kha a si lai i nan tlaih colh lai," tiah a ti hna. 49 Judas nih cun a phak cangka tein Jesuh cu a hei fuh i, "Saya, na cungah daihnak um ko seh," tiah a ti i a hnamh colh. 50 Jesuh nih cun, "Ka kawi, khulrang in tuah ko kun," tiah a leh. Cun an hung chuak i Jesuh cu an tlaih i fek tein an khih. 51 Jesuh sin i a ummi pakhat nih khan a nam aa zuh i Tlangbawi Ngan sal hnakhaw kha pet lakin a tuk. 52 Jesuh nih anih cu, "Na nam cu a kawng ah sawh ṭhan ko, zeicahtiah hriamnam a lami cu hriamnam in an thi lai. 53 Ka pa kha bawmhnak ka hal khawh ko i khulrang in vancungmi ralkap bu hleihnih a run ka thlah khawh ko ti kha na hngal lo maw? 54 Sihmanhsehlaw cu ti a si ahcun, zeitindah hi bantukin a si lai, tiah a rak chimtu Cathiang bia cu a tlin khawh kun hnga?" tiah a ti. 55 Cun Jesuh nih mibupi cu a thawh hna i, "Kei cu damiah hei si ning law cu bang, zeicahdah tlaih awkah nam le thingtan he nan ka fuh? Nifate in pei Biakinn ah ka ṭhu i kan cawnpiak lengmang ko hna cu, nan ka tlaih ṭung lo. 56 Sihmanhsehlaw hi thil vialte hi bantukin a sinak cu profet nih Cathiang chungah an rak ṭialmi kha a tlinnak ding caah a si," a ti. Cun a zultu hna nih khan an dihlak in an zamtak i an le dih. 57 Jesuh cu a tlaitu hna nih khan Tlangbawi Ngan Kaiafas inn ah khan an kalpi i cuka ah cun Phungbia cawnpiaktu saya hna le upa hna kha an rak i pum. 58 Peter nih lamhlat nawn khin a zulh i Tlangbawi Ngan inntual tiang kha a va kal. Inntual chungah khan a va lut i zeitindah thil a hung umtuning a si lai ti hngalh duh ah ralveng pawl sinah khan a ṭhu. 59 Tlangbawi upa pawl le biaceihtu pawl nih khan an thah khawhnak hnga, an dihlak in a sual an kawl, 60 sihmanhsehlaw an hmu kho lo. Lihchimmi tehte tampi an hung chuak nain an hmu kho hlei lo. A donghnak ah pahnih an hung chuak i, 61 "Hi pa nih hin 'Pathian Biakinn hi ka ṭheh lai i ni thum chungah ka sak ṭhan dih lai,' a ti," tiah an ti. 62 Tlangbawi Ngan kha a hung dir i Jesuh cu, "Hi hna nih sual an in puhmi hi na let kho hna maw?" tiah a ti. 63 Sihmanhsehlaw Jesuh cu dai tein a um ko. Cun Tlangbawi Ngan cu a hun i nolh ṭhan i, "A nungmi Pathian min chalh in, na chim hrimhrim lai, kan ti: Pathian fapa Messiah cu na si maw si lo, chim," tiah a ti. 64 Jesuh nih cun, "Na chim ko cu ta. Sihmanhsehlaw nan dihlak in hihi kan chimh hna: Atu ri hin cun Mi Fapa hi, Cung Nung Bik orhlei i a ṭhut le khuadawm cungin a rat kha nan hmuh lai," tiah a leh hna. 65 Cu bia a theih tikah cun Tlangbawi Ngan nih khan a puan kha a thleh i, "Cucu Pathian thangchiat a si. Tehte dang ahohmanh kan herh ti hna lo. Pathian thangchiatnak bia a chimmi cu nanmah nih nan theih ko cang. 66 Zeitindah nan ruah?" tiah a ti. Annih nih, "A sual, thih awk a tlak," tiah an leh. 67 Cun a hmaiah cil an chak i an tuk; cun a bengtu hna nih khan an thawh i, 68 "Messiah cu pei na si fam cu, ahodah an beng, kan chim tuah ngat?" an ti. 69 Peter cu lengah, inntual ah khan a ṭhu. Tlangbawi Ngan salnu pakhat kha a ra i, "Nangmah zong hi Galilee ram mi Jesuh sin i a rak um tawnmi na si ve ko," tiah a ti. 70 Sihmanhsehlaw an dihlak hmaiah cun Peter nih khan aa pheh. "Na chimmi kong hi ka hngal lo," tiah a leh i 71 tual kutka leiah khan a va chuak. Sinum ngaknu dang pakhat nih a rak hmuh ṭhan i, "Hi pa zong hi Nazareth khuami Jesuh sin i a rak ummi a si ve," tiah cuka i a ummi kha a chimh hna. 72 Peter nih aa pheh ṭhan i, "Cu pa cu ka hngal lo tiah chiatser in ka chim," tiah a leh. 73 Cu hnu tlawmpal ah cuka i a dirmi hna nih khan Peter cu an hei fuh i, "Phehthuh hau loin nang cu an sin i a rak i tel vemi na si hrimhrim ko. Na aw cawi nih an phuan," tiah an ti. 74 Cun Peter nih cun chiatser in, "Biatak ka chim lo a si ahcun Pathian nih dan ka tat seh. Cu pa cu ka hngal hrim lo," tiah a ti. Cu caan te ah cun ar a hung khuang i 75 Peter nih cun Jesuh nih, "Ar a khuan hlanah 'Amah cu ka hngal lo,' tiah voi thum na ka ti lai," tiah a rak chimmi kha a lung ah a hung pem. A chuak i fak piin a ṭap.
1 Zingkate ah tlangbawi upa pawl vialte hna le Judah upa hna cu an i pum i Jesuh thahnak ding khua kha an khang. 2 Cikcin in an khih i an hei kalpi i Mangki bawi Pilat sinah khan an pek. 3 Jesuh a leitu Judas nih khan Jesuh cu thah awkah sual an phawt ti kha a hngalh tikah a sualnak kha aa ngaihchih i ngun tangka sawm thum kha aa lak i tlangbawi upa pawl le Judah upa hna kha a va pek ṭhan hna. 4 "A sual lomi thihnak ka phakter kha ka sual," tiah a ti. Sihmanhsehlaw annih nih cun an rak thawh i, "Cucu kan zeidah a poi? Nangmah nih naa tuahnak in vaa tuah ko," tiah an rak leh. 5 Judas nih tangka cu hmunthiang chungah khan a vun hlonh i a kaltak; cun a chuak i a vaa awk. 6 Tlangbawi upa hna nih cun tangka cu an char i, "Hi tangka hi thisen man tangka a si, cucaah Biakinn Tangka chiahnak i chiah ve cu kan Phung he aa ralchanh," tiah a ti. 7 An i ceih dih hnuah tangka cu Um Sertu Lo timi cawknak ah khan an hman i cu lo cu ramdang mi hna thlan mual ah a cang. 8 Cu nih cun Thisen Lo timi sullam kha a fianter i cu hmun cu nihin ni tiang hin Thisen Lo ti cun auh a si. 9 Cuticun profet Jeremiah nih a rak chimmi kha a hung tling. A chimmi cu: "Israel mi hna nih, cu pa man cu cu zat in si seh, tiah an khiahmi ngun tangka sawm thum kha an i lak i 10 um sertu lo cawknak ah khan, Bawipa nih a ka fial bangin, an hman," ti hi a si. 11 Mangki bawi hmaiah cun Jesuh cu a dir i mangki bawipa nih cun, "Judah siangpahrang cu na si maw? tiah a hal. "Na chim ko cu ta," tiah Jesuh nih a leh. 12 Tlangbawi upa pawl le Judah upa hna nih sual an puhmi tu cu zeihmanh a let hna lo. 13 Cucaah Pilat nih cun a thawh i, "Sual an in puhmi vialte hi na thei lo maw?" tiah a ti. 14 Sihmanhsehlaw Jesuh nih bia kaa khat hmanh a let duh lo i mangki bawipa cu a khuaruah a har ngaingai. 15 Lanhtak Puai caan ah hin Mangki bawipa nih cun, mi zapi nih chuak seh ti an duhmi thongtla pakhat kha a chuahpiak tawn hna. 16 Cu caan ah cun thongtla pakhat, zapi nih an hngalh ngaimi a um i a min cu Jesuh Bar-Abbas a si. 17 Cucaah mi zapi cu an hun i pumh tikah khan Pilat nih cun, "Jesuh Bar-Abbas le Jesuh Messiah ah hin, aho deuh hi dah in chuahpiak hna ning law nan duh?" tiah a hal hna. 18 Pilat nih khan Jesuh ka kut chung i an ka pek hi an nahchuah caah a si ti kha fiang tein a hngalh. 19 Pilat cu biaceihnak khaan chung i a ṭhut lioah khan a nupi nih bia a hun cah i, "Kha mipa, sualnak zeihmanh a tuah lomi kha zei ti hmanh in rak ti hlah; zeicahtiah zahan ah ka mang in kha pa ruangah khan sifahnak tampi ka in," tiah a ti. 20 Tlangbawi upa pawl le upa hna nih khan mizapi cu Pilat kha, Bar-Abbas kan thlahpiak, tiah nan hal lai i Jesuh kha that, tiah nan ti lai, tiah an lem khawh hna. 21 Sihmanhsehlaw mangki bawipa nih cun, "Hi hna pahnih lakah hin, aho hi dah kan thlahpiak seh, ti nan ka duh?" tiah a hal hna. Annih nih Bar-Abbas tiah an leh. 22 Cun Pilat nih cun, "Khrih timi Jesuh cu zeitindah ka tuah kun lai?" tiah a hal hna. Annih nih, "Vailam ah khenh chih ko," tiah an leh. 23 Sihmanhsehlaw Pilat nih cun, "Zei sualnak dah a tuah?" tiah a vun hal hna. Cu tikah fak piin an au ciammam i, "Vailam ah khenhchih ko," an ti. 24 Pilat nih cu ti i ti lengmang cu zeihmanh san a tlai ti lo i mizapi nih hnahnawhnak lam an chuahter lai ti kha a hmuh tikah, ti kha aa lak i mizapi hmaiah cun a kut aa ṭawl i, "Hi misual lopa thihnak kong ah hin kei cu ka thiang, nanmah tuahmi a si," tiah a ti. 25 Mizapi nih cun an dihlak in, "Hi pa thahnak ruang i dantatnak cu kanmah le kan tefa hna cungah tlung ko seh," an ti. 26 Cu tikah Pilat nih Bar-Abbas cu a thlahpiak hna i Jesuh cu fung in a tukter hna i vailam thing i thir in khenh awkah a pek hna. 27 Cun Pilat ralkap pawl nih khan Jesuh cu mangki bawi innpi chungah khan an luhpi i an kampani dihlak in an kulh. 28 A puan kha an phoih i puan sen an aih. 29 Cun hling nge in bawi luchin kha an phiar i a lu ah an chinh. A orhlei kut ah fung an putter. Cun a hmaiah an kun i an cawhdeh i, "Judah Siangpahrang cu saupi nung ko seh," tiah an au; 30 cil an chak i fung cu an chuh i a lu ah khan an tuk nak. 31 An cawhdeh dih hnuah puan sen kha an phoih i amah puan kha an aihter ṭhan i vailamtahnak i khenh chih dingah an chuahpi. 32 Cun lam ah khan Sairin khuami Simon kha an ton i a vailam tahnak thing kha hramhram in an putter. 33 Golgotha an timi hmun kha an va phan i (Golgotha ti a sullam cu Lu Ruh Hmun tinak a si), 34 mitsur hang, hnitkha he cawhmi, kha an pek; a vun teh i a ding duh lo. 35 Vailam ah cun an khenh chih i a thilpuan kha phe ah an i kah i an i ṭhen. 36 Cun an ṭhu i an cawngh. 37 A lu cungah cun sual an phawtnak bia an ṭialmi kha an benh. Cu bia cu: "Hihi Jesuh, Judah Siangpahrang cu a si," ti hi a si. 38 Cun Jesuh sinah cun mifir pahnih an tah ve hna; pakhat a orhlei ah pakhat a kehlei ah. 39 Cun aa chawkmi paoh nih khan an lu an thinhnawh i an bia-eng in, 40 "Biakinnpi hmanh pei ka ṭheh lai i ni thum ah ka sak ṭhan dih lai, na rak ti kha. Pathian Fapa na si ahcun nangmah cu i khamh kun ngat. Vailamtahnak cung khan ta, na rung ṭum kun," an ti. 41 Cu bantuk ṭhiamṭhiam cun tlangbawi upa hna le Phungbia cawnpiaktu saya hna le upa hna nih khan an cawhdeh ve i 42 "Midang cu a khamh ṭung hna, amah vial aa khamh kho ṭung lo. Israel Siangpahrang cu a si kun lo maw? Vailam tahnak cung khan atu te ah hin rung ṭum seh law pei kan zumh hnga cu. 43 Pathian kha aa bochan i Pathian Fapa ka si a ti. Pathian nih a khamh le khamh lo kan zoh fam lai ta!" an ti. 44 A sin i mifir an tah vemi hna hmanh nih khan cu bantuk cun an nihsawh ve. 45 Chun in zanlei suimilam pathum tiang cu ram cu a dihlak in muihnak nih a khuh i 46 suimilam pathum tluk ah khin Jesuh cu a au i, "Eli, Eli, lema sabakthani," a ti, a sullam cu, "Ka Pathian, ka Pathian, zeicahdah na ka kaltak," ti a si. 47 Cu ka i a dirmi a cheukhat nih khan an theih i, "Elijah a auh cuh," an ti. 48 Pakhatpa cu khulrang in a va tli i puanchia kha aa lak i mitsur hang ah a hnim i fung par ah a ṭemh i dawpter a hun zalh. 49 Sihmanhsehlaw a dang nih khan, "Um rih, amah kha khamh awkah Elijah cu a rat le rat lo kan zoh rih lai," an ti. 50 Jesuh cu fak piin a au ṭhan i a cat colh. 51 Khi tikah Biakinn chung puanzar kha a lu in a taw tiang aa cheu. Vawlei kha aa hnin, lung kha an i cheu i 52 thlan kha an i hung; Pathian mi a rak thi ciami tampi kha an tho ṭhan. 53 Thlan khan an chuak i Jesuh cu thihnak in a thawh ṭhan hnuah Khua Thiang chungah khan an lut i mi tampi nih an rak hmuh hna. 54 Jesuh a cawngtu ral bawi le a sin i a ummi ralkap hna nih khan lihnin le thil dang a ummi vialte kha an hmuh tikah an thla a hlauh hna i, "Hi mi hi Pathian Fapa a si hrimhrim ko," an ti. 55 Galilee ram mi Jesuh a rak zul tawnmi hna le a rak bawm tawntu nu tampi nih khan a langin an cuanh. 56 Cu hna lakah cun Mary Magdalin, Jeim le Josef nu Mary le Zebedi fapa hna i an nu kha an i tel. 57 Zanlei sang a si tikah khin Arimathea khua mirumpa pakhat a ra phan. A min cu Josef a si i amah zong cu Jesuh zultu pakhat a si ve. 58 Pilat sinah khan a vung lut i Jesuh ruak kha a hal. Pilat nih Jesuh ruak cu Josef kha pe u, tiah a ti hna. 59 Cucaah Josef nih cun a lak i khiangrang puan tharte in a tuam i 60 amah thlan ca i lungkua ah a cawhmi thlan tharte ah cun a vui. Cun lung nganpi kha thlan khar ah cun a khar i a kal. 61 Mary Magdalin le Mary dang pakhat kha, cuka ah cun, thlan lei hoih khan an ṭhu. 62 A thaizing ah, (cucu Cawnningani a hun changtu ni ah khan) tlangbawi upa pawl kha le Farasi mi hna nih khan Pilat kha an va ton i, 63 "Bawipa, hi milihchim pa nih hin a nun lioah, 'Ni thum hnuah thawhter ka si ṭhan lai,' a rak ti kha kan hngalh. 64 Cucaah cun thlan kha ni thum tiang ṭha tein cawng hna seh; cu ti a si lo ahcun, a zultu hna nih khan an va kal riangmang lai i a ruak kha an va fir lai i, thihnak in thawhter a si cang, tiah mi kha an chimh ko hna lai i a donghnak i a kan hlennak hi a hmasa i a kan hlennak nakkhan a chia deuh sual lai," an ti. 65 Pilat nih cun, "Ralvengtu nan ngeih ko hna kha ta. Va kal u law a him khawh chung him in va tuah ko ngat u," tiah a ti hna. 66 Cucaah an va kal i thlan cu him tein an cawnghter hna; lung kha ca an khenh i ralvengtu pawl kha, run veng u, an ti hna.
1 Sabbath ni cu aa lim cang i zarh khat chung ni hmasa bik ni khuadei kate ah khin, Mary Magdalin le a dang Mary kha thlan va zoh awkah cun an kal. 2 Chikkhatte ah khin li aa hnin i Bawipa vancungmi pakhat vancung in a rung ṭum i thlankhar kha a thawn i a cungah cun a ṭhu. 3 A mui cu nimtlau bantuk a si i a hnipuan cu hawhra bantukin an rang. 4 Ralveng pawl cu an thin a phang tuk hringhran i a therh hna i mithi bantukin an um. 5 Vancungmi nih khan nu cu a thawh hna i, "Nan thinphang hrimhrim hlah u. Vailam tahnak thing i khenhchihmi Jesuh nan kawl ti kha ka hngalh. 6 Amah cu hika ah hin a um ti lo, a chim bantukte khan, a tho cang. Ra u law an chiahnak hmun hi ra zoh hmanh u. 7 Cucaah khulrang in va kal u law a zultu hna kha, 'Thihnak in thawhter a si cang i atu cu nan hmaiah Galilee ram ah a rak kal chung cang; khika ah nan va hmuh lai,' tiah va chim hna u. Cun kan chimhmi hna hi philh hlah u," tiah a ti hna. 8 Cucaah i hnawnam ngaiin thlan khan an kir, an thin a phangpah, an i lawmpah i a zultu hna va chimh awkah khan an le. 9 Jesuh nih, duak tiah a vun ton hna i, "Nan sinah daihnak um ko seh," tiah a ti hna. Amah cu an hun zuanhnawh i a ke an i tlaih i an biak. 10 Jesuh nih cun, "Nan thinphang hlah u; ka unau pawl kha, Galilee ah va kal u, tiah va chim hna u, khika ah an ka hmuh lai," tiah a ti hna. 11 Nu pawl cu an kir lioah khan thlan cawngtu ralveng pawl a cheukhat kha khuapi chungah an va kal i tlangbawi upa pawl kha thil a cangmi vialte cu an va chimh hna. 12 Upa pawl he khan an i ton i khua an khan dih hnuah, tlangbawi upa pawl nih cun ralkap pawl kha ṭhalo tein zik an nawh hna i 13 "A zultu pawl kha zan ah an ra i kan i hngilh karah a ruak kha an ra fir, nan ti lai. 14 Cun hi kong hi mangki bawipa nih thei ai kun, kanmah nih a ṭhat khawhnak chungin kan tuah lai i nannih cu zeihmanh fahnak nan ing lai lo," tiah an ti hna. 15 Ralvengtu pawl nih khan tangka cu an i lak i cuticun nan tuah lai tiah an timi hna kha an tuah. Nihin ni tiang hin, Judah mi nih an vahtermi bia cu, hi bia hi a si. 16 A zultu pahleikhat hna cu Galilee ram ah khan an kal i Jesuh nih a chimhmi hna tlang ah khan an kai. 17 An hmuh tikah an biak, sihmanhsehlaw a cheu cu lung awṭawm in an um. 18 Jesuh nih cun a hun naih hna i, "Vancung le vawlei cung i a ummi nawl ngeihnak vialte cu pek ka si cang. 19 Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law, 20 kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai," tiah a ti hna.
1 Pathian Fapa Jesuh Khrih kong Thawngṭha cu hitihin aa thawkning a si. 2 Profet Isaiah nih, "Pathian nih, 'Ka tlangau cu na hmaiah ka thlah lai i na lam kha an sialpiak lai,' a ti bantuk le 3 Cun mi pakhat kha ramlak ah a au i, 'Bawipa lam kha rak remh tuah u, A kalnak ding lam kha ding tein rak ser u,' a ti," bantuk kha a si taktak. 4 Cucaah Johan cu ramlak ah khan a hung chuak i mi kha tipilnak a pek hna i phung kha a chimh hna. "Nan lung i thleng u law tipilnak kha ing tuah u; cun Pathian nih nan sualnak kha an ngaihthiam hna lai," tiah a ti hna. 5 Judea ram le Jerusalem khua i a ummi hna nih khan amah cu an fuh luaimai i an sualnak kha an i phuang i Jordan tiva ah khan tipilnak kha a pek hna. 6 Johan cu kalauk hmul in tahmi hnipuan kha aa hruk i a tai ah saphaw taisawm aa sawmh, khaubawk le khuaihliti in aa cawm. 7 Mizapi cu a thawh hna i, "Ka hnu in a ra lai ding pa hi keimah nakin tampi in a ngan deuhmi a si; a kedan hri a phoihtu ding hmanh ah kei cu kaa tlak lo. 8 Kei nih cun tiin tipilnak kha kan pek hna, sihmanhsehlaw anih nih cun Thiang Thlarau in tipilnak cu an pek hna lai," tiah a ti. 9 Cu hnu tlawmpal ah cun Jesuh cu Galilee ram Nazareth khua khan a ra i Johan nih khan Jordan tiva ah cun tipilnak kha a pek. 10 Ti chungin a hung thawh dih kate ah khan, van kha aa cheu i Thlarau cu ṭhuro bantukin a cung i a run i fut kha Jesuh nih cun a hmuh. 11 Cun van in aw pakhat kha a theih i, "Nangmah hi ka Fapa dawt cu na si. Na cungah ka lung a tling ngaingai," tiah aw nih cun a ti. 12 Hmakhatte ah Thlarau nih cun ramlak ah a kalter i 13 khika ah ni sawm li a va um i Satan nih khan a rak tukforh. Cuka ah cun saram zong kha an rak um ve, sihmanhsehlaw vancungmi kha an ra i an rung hramh. 14 Johan kha thong i thlak a si hnuah Jesuh cu Galilee ram ah khan khual a tlawng i Pathian sinin a rami Thawngṭha kha a chimh hna. 15 "A caan kha a phan cang. Pathian Pennak cu a phan dengmang cang. Nan sualnak kha kaltak hna u law Thawngṭha kha zum tuah u," tiah a ti hna. 16 Galilee Rili kam i aa chawh lengmang lioah khan Jesuh nih cun ngatlai pahnih, Simon le a nau Andru kha a hmuh hna i annih cu sur in nga kha an rak tlai len ko. 17 Jesuh nih cun a thawh hna i, "Ka zul tuah u, mi tlaitu ah kan ser hna lai," tiah a ti hna. 18 Chikkhatte ah an sur kha an kaltak i amah kha an zulh colh. 19 A va kal deuh i a dang unau pahnih zong kha a hmuh hna, annih cu Zebedi fapa Jeim le Johan kha an si. Annih cu an sur kha an rak tholh len ko. 20 A hei hmuh cangka hna khan Jesuh nih cun a auh hna i an pa Zebedi cu nihlawh phalhmi ngatlaitu hna he khan lawngah khan an kaltak i Jesuh cu an zulh. 21 Kapernaum khua kha a va phan i Sabbath ni ah cun Jesuh cu pumhnak inn ah khan a kal i a cawnpiak hna. 22 Phungbia cawnpiaktu saya pawl nih an cawnpiak hna bantuk khan si loin hmual ngei ngaiin a cawnpiak hna caah an khuaruah a har. 23 Cu liote ah cun khuavang nih a tuahmi mipa pakhat kha pumhnak inn chungah cun a rung lut i 24 "Nazareth khuami Jesuh, zeidah na kan duhnak a um? Kanmah hrawh duh ah maw na rat? Nangmah cu Pathian lamkaltu a thiangmi na si kha kan hngalh ko ṭung!" tiah a ti. 25 Jesuh nih khuavang cu, "Dai tein um, mipa chung khan chuak," tiah a ti. 26 Khuavang nih cun mipa cu fak piin a thin a thin tak i fak piin a au i mipa chung cun a chuak. 27 Mizapi cu an khuaruah a har tuk hringhran i, "Mah hihi zeidah a si ee? Cawnpiaknak thar phun khatkhat maw a si? Hi pa nih hin khuavang kha chuak u, a ti hna i an ngaih ko dah ngai" tiah an ti lengmang. 28 Cucaah Jesuh thawngpang cu Galilee ram hmun kip ah khan a thang. 29 Pumhnak inn khan khuazei hmanh ah pialpah loin Simon le Andru inn ah khan an kal i Jeim le Johan zong kha an sinah cun an kal ve. 30 Simon nupi nu kha a rak zaw i ihkhun ah a rak ril ko. Jesuh cu a phak cangka in an chimh. 31 Amah sinah cun a va kal i a kut in a va thawh. A tak linh cu a dai i annih kha a bultawl hna. 32 Zanlei, ni a tlak hnuah khan Jesuh sinah cun a zawmi vialte le khuavang nih a tuahmi vialte hna kha an ratpi hna i 33 inn hmaiah cun cu khua mi vialte cu an i pum. 34 Jesuh nih cun zawtnak a phunphun in a zawmi mi tampi kha a damter hna i khuavang tampi kha a ṭhawl hna. Khuavang nih khan Jesuh cu ahodah a si kha an hngalh caah Jesuh nih cun a holh in a holhter hna lo. 35 A thaizing cu zingkate in, ni a chuah hlanpi ah, Jesuh cu a tho i khua leng hmun king ah thlacam awkah a kal. 36 Sihmanhsehlaw Simon le a hawile hna nih cun amah kha an va kawl. 37 An va hmuh tikah, "Mi kip nih an in kawl lengmang dahkaw," tiah an ti. 38 Sihmanhsehlaw Jesuh nih cun a leh hna i, "Hika hrawng i a ummi khua dang hna zong hi ka tlawn awk an si. Annih zong kha phung ka chimh ve hna awk a si, zeicahtiah anmah phung chimh awkah cun pei ka rat cu," tiah a ti. 39 Cucaah Galilee peng kha a tlawn dih i pumhnak inn ah khan phung a chimh hna i khuavang kha a ṭhawl hna. 40 Jesuh sinah cun thinghmuimi pakhat kha a ra i a khuk aa bil i, "Na duh ahcun na ka thianter khawh," tiah bawmhnak kha a hal. 41 Jesuh nih cun a zaang a fak ngaingai i a hei banh i a hei tongh. "Nangmah thianter kha ka duh, va thiang cang," tiah a ti. 42 Chikkhatte ah thinghmui zawtnak nih khan cu pa cu a kaltak i a thiang. 43 Khi tikah Jesuh nih cun aw hrang ngaiin a thawh i, 44 "Ngai hmanh, hi kong hi ahohmanh va chim hna hlah. Tlangbawi sin tu ah khan ding teomao in va kal law rak in zoh seh. Cun mi nih a thiang cang ti kha an in hngalh nakhnga, Moses nih tuah awk a timi raithawinak kha va tuah," tiah a ti i a kalter. 45 Sihmanhsehlaw mipa nih cun a kalnak paoh ah khan cu kong cu a chimh hna i tam tuk in a chim caah Jesuh cu khua chungah khan langhngan in a lut kho ti lo. Hmunking tu ah khan a um i cuka ah cun a kenkip khan mi nih an rak fuh.
1 Cu hnu ni tlawmpal ah khan Jesuh cu Kapernaum khua ah khan a ra ṭhan i a inn ah a um ti thawng kha a thang. 2 Cucaah mi cu an ra chuak ciammam i a inn chungah cun a lawnnak pakhat hmanh um loin, innka hmai innleng zong khan an khat dih. Jesuh nih cun Pathian bia kha a chimh hna i 3 cu lioah cun mi pali nih a zengmipa pakhat kha an rak zawnh. 4 Asinain mi an tam tuk caah Jesuh sin kha an phakpi kho lo. Cucaah Jesuh cung zawn inncung kha an baoh i mipa cu a ihphah cung i a ih bu khan an vun thlak. 5 Jesuh nih an ka bochan hringhran ti kha a hmuh tikah, "Ka fa, na sualnak cu kan ngaihthiam," tiah mizengpa cu a ti. 6 Khika i a rak ṭhu vemi Phungbia saya a cheukhat hna nih cun, 7 "Zeitindah hitihin, Pathian ralchanh in bia chim a ngamh hnga? Pathian dah ti lo nih aho nih dah sualnak a ngaihthiam khawh?" tiah an lung chungin an ti. 8 A thli tein an lung chung i an ruahmi cu chikkhatte ah Jesuh nih a hngalh i cucaah cun, "Zeicahdah cu bantuk thil cu nan ruah? 9 Hi mizengpa sinah hin, 'Na sualnak kan ngaihthiam,' ti maw a fawi deuh, 'Tho tuah, na ihphah kha i put law kal,' ti dah a fawi deuh? 10 Cucaah hmuhsak kan duhmi hna cu, Mi Fapa nih hin vawlei cungah sual ngaihthiamnak nawl a ngei, ti hi a si," tiah a ti. Cucaah mizengpa cu a thawh i, 11 "Tho tuah, na ihphah kha i lak law va ṭin, kan ti," tiah a ti. 12 An dihlak in an zoh ko lioah khan mipa cu a tho i a ihphah cu aa lak i khulrang in a kal. An dihlak in khuaruahhar in ar koin an um i Pathian kha an thangṭhat i, "Hi bantuk thil hi zeitikhmanh ah kan hmu bal lo," tiah an ti. 13 Jesuh cu Galilee Rili kamah khan a va kal ṭhan. Mi nih khan an rak fuh i a rak cawnpiak hna. 14 Aa chawhpah ah khan ngunkhuai khawltu pakhat a zung i a rak ṭhut ko kha a hmuh. Cu pa cu Alfeas fapa Levi kha a si. Jesuh nih cun Levi cu, "Ka zul," tiah a ti i a tho i a zulh colh. 15 Jesuh cu Levi inn ah cun rawl a hrawng. Ngunkhuai khawltu hna le misual tampi hna nih khan amah cu an zulh i tlawmpal nih khan Jesuh le a zultu hna cu rawl kha an dumpi hna. 16 Phungbia saya a cheukhat, Farasi mi a simi hna nih khan Jesuh cu misual hna le ngunkhuai khawltu hna he rawl a ei kha an hmuh tikah, a zultu kha an thawh hna i, "Zeicahdah ngunkhuai khawltu hna le misual hna he rawl a ei?" an ti. 17 Jesuh nih a theih hna i, "A dammi nih cun sibawi an herh ṭung lo, a zawmi lawng nih pei an herh ko cu; miding mi hna kawh awkah ka ra lo, misual mi hna kawh awk tu ah ka ra," tiah a ti hna. 18 Voi khat cu Tipil petu Johan zultu hna le Farasi mi hna cu rawl an ul. Mi cheukhat kha Jesuh sinah khan an ra i. "Zeicahdah na zultu hna hi rawl an ulh lo?" Tipil petu Johan zultu hna le Farasi mi zultu hna nih cun an ulh ṭung?" an ti. 19 Jesuh nih cun a leh hna i, "Nupi ṭhit rawldanghnak ah an sawmmi hna cu rawl loin an um hnga, tiah nan ruat maw? Um hlah. Nupi ṭhitupa kha an sinah a um chung paoh cu rawl loin an um hrimhrim lai lo. 20 Sihmanhsehlaw nupi ṭhitu nih a kaltak hna caan a phan te lai i cu caan a phak tikah cun rawl cu an ul ve te ko lai. 21 "Angki hlun belhnak ah puanchia thar ahohmanh nih an hmang bal lo. An hman ahcun puanchia thar nih khan a hlunmi cu a thleh chin lai i a pemnak kha a kau chin lai. 22 Cun mitsur hang hriim kha a hlun mi saphaw cua chungah ahohmanh nih an rawn bal lo. An rawn ahcun mitsur hang nih khan saphaw cua cu a pah lai i a mitsur hang he a saphaw cua he an rawk dih lai. Mitsur hang hriim cu saphaw cua a tharmi ah rawn ding a si ko," tiah a ti. 23 Voi khat cu Jesuh le a zultu hna kha khual an tlawnnak ah sabbath ni ah facang lo kha an tan pah hna. An kalpah ah cun a zultu hna nih khan favui kha an sih pah lengmang hna. 24 Cucaah Farasi mi hna nih khan Jesuh cu an thawh i, "Zohhmanh, na zultu hna nih sabbath ni ah an tuahmi hi kan Phung he aa ralchanhmi a si," an ti. 25 Jesuh nih cun a leh hna i, "David le a mi hna nih khan, zeihmanh ei awk an ngeih lo i an rawl a ṭam tikah khan, zeidah an tuah, ti kha nan rel bal lo maw? 26 Abiathar tlangbawi a si lioah pei Pathian inn chungah khan a lut i Pathian hunhmi changreu a ei kha. Cu changreu cu tlangbawi dah ti lo nih cun ahohmanh nih ei phung a si ṭung lo. Cun pei, a mi hna hmanh kha a pek ve hna kha," tiah a ti hna. 27 Cun Jesuh nih cun, "Sabbath cu minung caah pei ser a si cu, minung cu sabbath caah ser an si ṭung lo, 28 cucaah Mi Fapa cu sabbath Bawi zong a si," tiah a ti.
1 Jesuh cu pumhnak inn ah khan a va kal ṭhan i cuka ah cun a kut a zengmipa pakhat a rak um. 2 Jesuh cu zeitindah sual kan phawt khawh lai ti a bawhmi kha an rak um i cu hna nih cun sabbath ni ah hin aho tal a damter hna lai maw ti kha ṭha tein an rak ngiat. 3 A kut a zengmipa cu Jesuh nih cun a thawh i, "Hmailei ah hin ra chuak tuah," tiah a ti. 4 Cun mizapi cu a thawh hna i, "Kan Phung nih sabbath ni ah zeidah tuah a kan onh? Ṭhatnak nan tuah lai, a ti maw ṭhat lonak nan tuah lai, a ti dah?" tiah a ti hna. Sihmanhsehlaw bia kaa khat hmanh an chim lo. 5 Cu tlukin an lung a hah le an palh kha a hmuh hna tikah a thin a hung a ngaih a chia i mipa cu a thawh i, "Na kut kha samh," a ti. A samh i a dam ai! 6 Cucaah Farasi mi hna cu pumhnak inn khan an chuak i Herod minung hna he khan zeitindah Jesuh hi kan thah khawh lai, tiah khua an khang. 7 Jesuh le a zultu hna cu Galilee Rili ah khan an va kal i mi tampi nih an zulh hna. Cu hna cu Galilee ram in, Judea ram in, 8 Jerusalem khua in, Idumea peng in, Jordan tiva ral ram in, le Tair le Sidon khua pawngkam i a ummi khua hna in a rami an si. Hi hna nih hin Jesuh nih a tuahmi thil kha an theih caah amah an fuhnak cu a si. 9 Mi cu an tam tuk hringhran i an ka naan sual lai ti kha a phan caah Jesuh nih cun a zultu hna kha lawng pakhat in ka timhpiak tuah u tiah a ti hna. 10 Mi tampi kha a damter hna i a zawmi paoh nih cun amah an tongh khawh nakhnga heh tiah an i zuam. 11 Cun khuavang a ngeimi paoh nih amah an hmuh tikah khan a hmaiah cun an tlu, "Pathian Fapa na si," tiah fak piin an au. 12 Jesuh nih thlarau ṭhalo hna cu, aho a si kha, ahohmanh nan chim hna lai lo, tiah fek tein a ti hna. 13 Cun Jesuh cu tlang cungah a kai i a duhmi kha a kawh hna. A sinah khan an ra i 14 hleihnih kha a rak thim hna i annih cu lamkaltu tiah min a rak sak hna. A thawh hna i, "Ka sin i um awkah kan thim hna. Cun phung chim awkah kan thlah hna lai i 15 khuavang ṭhawl khawhnak ṭhawnnak nan ngei lai," tiah a ti hna. 16 A thimmi hleihnih cu hi hna hi an si: Simon, (Jesuh nih a min ah Peter a sakmi); 17 Zebedi fapa Jeim le Johan, (Jesuh nih hi hna hi Boanerges tiah min a sak hna, a sullam cu Khuari Fa tinak a si); 18 Andru, Filip, Bartholomew, Matthai, Thomas, Alfeas fapa Jeim, Thaddaius le phunṭanh Simon le 19 Bawi Jesuh leitu Judas Iskariot kha an si. 20 Cun Jesuh cu inn ah a tlung. Mi nih khan a zual in an zual ṭhan hoi caah Jesuh le a zultu hna cu rawl einak caan hmanh an ngei lo. 21 Cucu le mi nih, "A hrut cang," an ti kha a chungle nih an theih tikah, kan va hnuh lai, tiah an i thawh. 22 Phungbia cawnpiaktu saya cheu khat Jerusalem in a rami hna nih khan, "A chungah Beelzebul aa hrolh, Khuavang ṭhawl khawhnak a petu hi khuachia bawi cu a si," an ti. 23 Cucaah Jesuh nih mi kha, ka sinah ra u, tiah a ti hna i tahchunhnak bia a chimh hna. A thawh hna i, "Zeitindah Satan nih Satan cu a ṭhawl khawh lai? 24 Ram pakhatkhat cu a bubu in aa ṭhen i anmah le anmah kha an i doh ahcun, zeitindah cu ram cu a dir khawh lai? 25 Innchungkhar khar khat cu a bubu in an i ṭhen i an i doh ahcun a dir kho lai lo. 26 Cu bantukin Satan pennak zong cu a bubu in aa ṭhen i an i doh ahcun a hmun kho ve lai lo, a dong ko lai. 27 "A ṭhawngmi pa kha a kut le a ke ṭem hmasat lo ahcun ahohmanh nih an luhhnawh kho in a thil an chut kho lai lo; cu ti ṭem hnu lawnglawng ah a inn cu an ramh khawh lai. 28 "Hihi va philh hlah u. Minung hi an sualnak vialte le thil ṭhalo an chimmi vialte ngaihthiam khawh an si ko lai, 29 sihmanhsehlaw Thiang Thlarau ralchanh in bia ṭha lo a chimmi cu zeitikhmanh ah ngaihthiam khawh an si lai lo, zeicahtiah zungzal in a hmunmi sualnak kha an tuah cang," tiah a ti. 30 (Jesuh kha, "Thlarau ṭhalo a chungah aa hrolh," tiah an ti caah khan Jesuh nih hi bia a chimnak cu a si). 31 Cun Jesuh a nu le a naule kha an ra. Inn lengah khan an dir i innchung ah cun bia an vun cah. 32 Jesuh cu mizapi nih khan an dum i, "Na nu le na naule kha inn lengah an um i ton an in duh," tiah an chimh. 33 Jesuh nih cun a leh hna i, "Ahodah ka nu cu a si? Ahodah ka naule cu an si?" tiah a ti hna. 34 A pawng i a ṭhumi kha a zoh hna i, "Zohhmanh u, hika ah hin ka nu le ka naule hna cu an um. 35 Zeicahtiah Pathian nih tuah hna seh, tiah, a duhmi thil a tuahmi paoh cu ka nau, ka far le ka nu an si," tiah a ti.
1 Jesuh nih Galilee Rili kamah khan a cawnpiak ṭhan hna. A velchum i aa pummi cu an tam tuk caah lawng chungah khan a lut i a ṭhu. Lawng cu ticung pi ah khan a va um i mi cu tikam ah cun ti ri le ri lo tiang khan an um. 2 Cun thil tampi kha bianabia in a cawnpiak hna. A thawh hna i, 3 "Ngai hmanh u. Thlaici vorh awkah mipa pakhat cu aa thawh. 4 Lo chung i thlaici a vorh ah khan a cheu cu lamhril ah an tla i va nih an char hna. 5 A cheu cu vawlei tlawmnak lung tamnak hmun ah khan an tla. Vawlei kha a chah lo caah thlaici kha khulrang in a keuh zau. 6 Sihmanhsehlaw ni a hung chuah i thlaici keuh ka tete cu a hun emh hna tikah an hram kha a thuh lo caah an car zau. 7 Thlaici a cheu cu hling lakah an tla, hling cu an ṭhang i an ṭem hna i theipar an ngei kho lo. 8 Asinain thlaici a cheu cu vawlei ṭhatnak ah an tla, an hung keu, an hung ṭhang i theipar an ngei: a cheu let sawm thum in an karh, a cheu let sawm ruk in an karh, a cheu let za khat in an karh," tiah a ti 9 Cun Jesuh nih cun, "Theihnak hna nan ngeih ahcun, i theih ko uh," tiah a ti hna. 10 Jesuh cu amah lawngin a um tikah khan, a bia a theimi hna le a zultu hleihnih hna kha a sinah an ra i bianabia sullam cu kan chim tuah, tiah an ti. 11 Jesuh nih cun a leh hna i, "Pathian Pennak biathli cu nannih cu pek nan si cang, sihmanhsehlaw lenglei i a ummi hna cu bianabia lawnglawng in cawnpiak an si. 12 Cucaah Cathiang nih a chim bantukin, an zoh lengmang ko lai nain zeihmanh an hmu lai lo; an thei lengmang ko lai nain zeihmanh an hngal lai lo, zeicahtiah an hmuh i an hngalh sual ahcun Pathian lei ah an i mer sual lai i an sualnak kha a ngaihthiam sual ai hna hnga," tiah a ti. 13 Cun Jesuh nih annih cu, "Hi bianabia hi nan hngal kho lo maw? Hi hmanh nan hngalh khawh lo ah zeitindah bianabia dang cu nan hngalh khawh kun lai? 14 Thlaici vorhtu nih a vorhmi cu Pathian bia a si. 15 Micheu cu lam kam i a tlami bantuk an si. Bia kha an theih cangka Satan kha a ra i an chung bia kha a kalpi. 16 A dang cu lung tamnak i a tlami bantuk an si. Bia cu an theih cangka lunglawm in an cohlan. 17 Asinain an chungah khan thuk a pil lo i cucaah sau an rau lo. Cu bia ruang i hremnak siseh, harnak siseh, an hung um tikah an i ngol zau. 18 Cun a dang cu hlingbur i a tlami thlaici bantuk a si. Hi hna hi Pathian bia kha a theih cu a thei i 19 asinain lungretheihnak le rum duhnak le duhnak dangdang kha an hung chuah tikah, kha hna nih khan Pathian bia cu an ṭemṭawn caah, theipar zeihmanh a ngei lomi kha an si. 20 Sihmanhsehlaw mi a cheu cu vawlei ṭha i a tlami thlaici bantuk an si. Pathian bia kha an theih i an cohlan i thei an tlai: a cheu cu a let sawm thum in, a cheu cu a let sawm ruk in, a cheu cu a let za khat in," tiah a ti. 21 Jesuh nih, "Aho tal nih meiinn kha nan i luhpi tikah kho tangah siseh, ihkhun tangah siseh, nan chia bal maw? Meifar vannak hmun ah khan nan chiah tawn a si lo maw? 22 A ken i thuh a simi vialte kha a langhnak hmun ah chuahpi an si dih lai, a chin khuh a simi thil vialte kha hun an si dih lai. 23 Cucaah theihnak hna nan ngeih ahcun thei ko u," tiah a ti. 24 Cun hi zong hi a chimh hna: "Nan theihmi kha ṭha tein ruat u. Nan tah hna ning tein tah nan si ve lai i tam deuh hmanh chap nan si lai. 25 A ngeimi kha chap an si lai i a ngei lomi cu a ngeih ciami hmanh kha chuh an si lai," tiah a ti. 26 Jesuh nih, "Pathian Pennak cu hi bantuk hi a si: Mipa pakhat nih thlaici kha a lo ah a tuh. 27 Zan ah a it, zing ah a tho i rian a ṭuan i cu chung vialte ah khan thlaici cu an rak keuh i an rak ṭhang, sihmanhsehlaw zeitindah cuticun an si ti kha cu a hngal lo. 28 Vawlei nih khan thlai kheu cu a ṭhanter hna i thei a tlaiter hna, a hmasa bik ah a hnah zimno tete kha an hung chuak, cun an hung vui i an hung zaa. 29 Cun an hung hmin tikah ṭuan caan a cut cang caah a ṭuantupa nih a facang hlehnak fa-ah in a hleh hna," tiah a ti. 30 "Pathian Pennak cu zei he dah aa lo, kan ti lai? A sullam langhternak dingah zei tahchunhnak dah kan hman lai? 31 Vawlei cung thlaici lak i a hme bikmi anṭam ci bantuk a si. Mi nih an i lak i vawlei ah an tuh; 32 cun tlawmpal hnuah a hung ṭhang i thlaihring kung lak i a ngan bik ah a cang. A nge kha a ngan pipi an si caah vate kha an ra i a thladem ah bu kha an ser," tiah a ti. 33 Hi bantuk bianabia tampi kha hmang in, Jesuh nih an hngalh khawh tawk in, Pathian bia kha a chimh hna. 34 Annih cu tahchunhnak hmang loin a chim hna lo, sihmanhsehlaw a zultu he lawng an um tikah cun zeizong vialte kha an sullam fiang tein a chimh hna. 35 Cu ni zanlei ah cun Jesuh nih a zultu hna kha, "Rili khattelei ral ah khin va kal u sih," tiah a ti hna. 36 Cucaah mizapi kha an kaltak hna. Jesuh a rak ṭhutnak lawng chungah khan an lut i Jesuh cu an kalpi. Cuka ah cun lawng dang zong kha an um ve. 37 Cun thlichia a tho ciammam i tilet cu lawng chungah khan an lut cuahmah ko i an lawng cu ti kha a khat dengmang. 38 Jesuh cu lawng hnulei ah khan a um i chantling cungah khan a rak i hngilh. A zultu hna nih khan an va hlauh i, "Saya, kan thih dengmang cang ṭung, zei poi loin maw na um ko?" an ti. 39 Jesuh cu a tho i thlitu cu, "Hrang ti hlah," tiah nawl a pek i tilet cu, "Dai tuah," tiah a ti. Thli cu a dai zuahmah i rili cu dai zirziar tein a um. 40 Cun Jesuh nih annih cu, "Zeicahdah cu ti hringhran in nan thin a phan? Zeicahdah zumhnak nan ngeih lo?" tiah a ti hna. 41 Sihmanhsehlaw annih cu an thin a phang tuk hringhran i pakhat le pakhat cu, "Hi pa hi mi zei ko dah a si hnga? Thlitu le tilet hmanh nih dahngai a bia an ngaih ko hi," an ti.
1 Cuticun Galilee Rili ral, Gerasa mi hna ram cu an va phan. 2 Jesuh cu lawng chungin a chuah cangka khan, mithi an vui hnanak lungkua i a um tawnmi mipa pakhat nih a rak ton. 3 Hi pa hi khuavang nih a molhter i thlan ah khan khua a sami a si. Ahohmanh nih thir cikcin zongin an hreng kho ti lo; 4 voi tampi cu a kut le a ke kha an ṭem tawn, sihmanhsehlaw an ṭem fate thir cikcin cu a chah dih hna i a ke hreng an khenhnak thir cu a khiah dih hna. Ahohmanh nih an tei kho lo. 5 Chun he zan he thlan lakah cun le tlang hna ah cun aa chawk lengmang i a au i lung khan aa cum aa deng lengmang. 6 Jesuh a hei hmuh ah khan lamhlat nawn ah khin a um, cucaah a va tli i a hmaika ah khan a khuk aa bil i 7 fak piin a au i, "Cung Nung Bik Pathian Fapa Jesuh, zeidah na ka duhnak a um? Zei kan ti hnga, dan cu ka tat sawh hlah," tiah a ti. 8 (Hi bia a chimnak cu, Jesuh nih khan, "Thlarau ṭhalo, hi pa chung hin chuak," tiah a rak ti caah a si.) 9 Cucaah Jesuh nih amah cu, "Na min zeidah a si?" tiah a hal. Mipa nih cun, "Tampi kan si caah ka min cu 'Bupi' a si," tiah a ti. 10 Cun thlarau ṭhalo hna cu cu ram chung cun thawl sawh hna hlah, tiah heh tiah Jesuh cu a nawl. 11 An pawngah cun vok run nganpi pakhat a um i tlang cungah khan an tlong. 12 Thlarau nih cun Jesuh cu, "Vok sinah khin kan kalter law an chungah khin kan luhter tuah," tiah an nawl. 13 Cucaah a kalter hna. Thlarau ṭhalo cu mipa chung khan an chuak i vok chungah khan an lut. Vok cu an dihlak in lungpang cung khan rili chungah an zuang ciammam i an thi dih, thong hnih tluk an si. 14 Vok a cawngtu hna cu an zam i cu thawng cu khua chungah le lo lakah khan an thanh hna. Cu ti thil a ummi zoh awkah cun mi kha an va kal. 15 Jesuh sin cu an va phan i a sinah cun a chung i thlarau ṭhalo bupi a um tawnmipa kha, hnipuan i hruk le lungfim in a rak ṭhut ko kha an va hmuh i an dihlak in an thla a hlauh hna. 16 Cu thil a hmutu hna nih cun mihrutpa cu zeitindah a dam i vok cungah khan zeidah a tlung ti kha mizapi cu an chimh hna. 17 Cucaah Jesuh cu, kan ram in chuak ko, tiah an nawl. 18 Jesuh cu lawng chung i a luh lioah khuavang a rak ngeimipa nih khan, "Na sinah kal ve ko ning," tiah a nawl. 19 Sihmanhsehlaw Jesuh nih a onh lo. "Inn tu ah va tlung law Bawipa nih zeizat riamruam dah na ca i a tuahmi kha a si le zeitluk in dah an zaangfah kha, na chungle kha va chim deuh hna," tiah a ti. 20 Cucaah mipa cu a kal i Khua Hra peng timi kha a tlawng i Jesuh nih a tuahpiakmi kha a chimh hna; cun a theimi vialte cu an khuaruah a har dih. 21 Jesuh cu Rili khattelei ral ah khan a ra kir than. Rilikam ah cun mi tampi nih a zual in an zual. 22 Pumhnak inn uktu a simipa pakhat a min Jairu a simi kha a hung i Jesuh kha a hmuh tikah a ke hramah a bawk i a si khawh chungin a nawl: 23 "Ka fanute cu a zaw i a zual ngaingai ko. Zaangfahnak tein ra law a cungah na kut ra chia ko sawh, cu ti na tuah ahcun a dam lai i a nung ko lai," tiah a ti. 24 Cun Jesuh cu amah sinah cun a kal. A zultu cu an tam tuk caah a kenkiplo in an hnursuan len ko. 25 Cu hna lakah cun nu pakhat, thichuahnak in kum hleihnih a zaw cangmi a um. 26 Sibawi tampi nih an thlop i cu thlopnak ahcun a ngeihchiah vialte zong a hmang dih cang nain a ṭha deuh hlei lo; a zual in a zual chin. 27 Mi nih Jesuh kong an chim lengmang cu a rak theih ve i 28 a puan ka tawngh hmanh ah ka dam lai, tiah a ti. Cucaah zapi lakah cun hnulei in a ra i a puan kha a tawngh. 29 Cu ka hmun le cu caan te ah cun a thi chuah cu a dam i ka zawtnak in ka dam cang, ti kha aa hngal. 30 Jesuh nih a chungin ṭhawnnak a chuah kha chikkhatte ah a hngalh i zapi lakah cun aa mer i, "Ahodah ka puan a tawng?" tiah a ti hna. 31 A zultu nih cun, "Mi hi zat nih an in hnursuan len cu na hngalh ko tung, zeicahdah ahodah a ka tawng? na ti?" an ti. 32 Sihmanhsehlaw Jesuh nih cun ahodah a ka tawngtu kha a si hnga, tiah a zoh lengmang ṭhiamṭhiam ko. 33 Minu nih khan a cung i a tlungmi cu a hngalh i cucaah ther lengmang le phang lengmang in a ra i a ke hramah a bawk i a kong kha a chimh dih. 34 Jesuh nih cun, "Ka fanu, na zumhnak nih an damter cang. Dai tein va kal law na zawtnak cun va dam ko cang," tiah a ti. 35 Cu bia cu Jesuh nih a chim lioah khan Jairu inn cun zualko an ra i, "Na fanu cu a thi cang, sayapa cu hnahnawh ti hlah," tiah an rak chimh. 36 Jesuh nih an chimmi cu zeihmanh ah rel duh loin a um i, "Na thinphang hlah, a zumh bel zum ko," tiah a ti. 37 Hi hnuah hin cun Peter le Jeim le a nau Johan dah ti lo kha cu, ahohmanh aa zulhter duh ti hna lo. 38 Pumhnak inn uktu inn kha an va phan i Jesuh nih cun an i tuai len ko le an ṭah le an ai kha a hmuh hna, 39 A vung lut i, "Zeicahdah hitihin nan i tuai len ko? Zeicahdah nan ṭah len ko? Ngakchia cu a thih ṭung lo, aa hngilh i pei a si ko cu," tiah a ti. 40 Annih nih cun a nih in an nih i cucaah an dihlak in a chuahter hna i ngakchianu a nu le a pa le a zultu pathum hna kha aa kalpi hna i ngakchianu an suannak khaan chungah cun an va lut. 41 A kut in a vun tlaih i, Talitha koum,'' tiah a ti; cu a sullam cu, "Ngakchianute, tho, kan ti," tinak a si. 42 Hmakhatte ah a tho i aa chawk colh. (Amah cu kum hleihnih mi a si). Cu thil an hmuh tikah an khuaruah a har tuk i a molh dengmang hna. 43 Sihmanhsehlaw Jesuh nih ahohmanh nan chim hna lai lo, tiah fek tein nawl a pek hna i, "Ei awk pe tuah u," tiah a ti hna.
1 Jesuh nih cuka hmun cun aa thawh i a chuahkehnak khua ah khan a zultu hna he an kal. 2 Sabbath ni ah khan pumhnak inn ah cun a cawnpiak hna. Aa pummi cu an tam ngaingai i a chimmi an theih tikah khan an khuaruah a har dih. "Hi vialte hi khuazei ah dah a va hmuh hnga? Hi bantuk fimnak hi zeitindah a va hmuh hnga? Zeitindah hi khuaruahharnak hna hi a tuah khawh hna hnga! 3 Mary fapa, lehtama kha a si lo maw? Jeim le Joses le Judas le Simon hna u kha a si lo maw? A farle zong kha hika ah an um ko lo maw?" an ti. Cucaah cun zei ah an rel lo. 4 Jesuh nih cun annih cu a thawh hna i, "Profet hi amah a chuahkehnak khua le a sahlawh a rualchan hna lakah dah ti lo ahcun hmaizahnak a hmu ve ko hen pei," tiah a ti. 5 Khika ah khan khuaruahhar zeihmanh a tuah kho lo, a zawmi tlawmte lawng an cungah a kut a chuan i a damter hna. 6 Zumhnak an ngeih lo caah a khuaruah a har ngaingai. Cun Jesuh cu, cuka hrawng khua kha a tlawng hna i mi kha a cawnpiak hna. 7 A zultu pahleihnih kha hmunkhat ah a kawh hna i pahnih pahnih in a thlah hna. Khuachia tei khawhnak nawl kha a pek hna i, 8 "Nan khualtlawnnak dingah hin, ṭhiangṭhunh dah ti lo cu zeihmanh i ken hlah u; riahcaw siseh, zal siseh i phorh hlah u, nan angki zal ah phaisa zong i sanh hlah u. 9 Phanah i danh u law angki a khethuan i hruk hlah u," a ti hna. 10 Cun annih cu, "Khua nan va phak tikah, 'Kan tlung u,' a rak in timi hna inn ah cuka khua in nan chuah hlantiang va um ko u. 11 Cun tluninn an in dawnh hna i nan bia an ngaih duh lo ahcun, cuka hmun cu nan kebeh va khawnhnawhtak u law va chuahtak u. Cucu an caah ralrin peknak a si lai," a ti. 12 Cucaah an chuak i, nan sualnak in i mer u, tiah mi kha an chimh hna. 13 Khuachia tampi an ṭhawl hna i a zawmi tampi kha chiti an thuh hna i an damter hna. 14 Jesuh thawngpang cu khuazakip ah a than caah Siangpahrang Herod zong nih cu kong cu a rak theih ve. Mi a cheu nih an i thawh i, "Tipil petu Johan kha a nung ṭhan. Cucaah cun pei hi ṭhawnnak a ngeih hi a si cu," an ti. 15 Sihmanhsehlaw a cheu nih cun, "Elijah a si," an ti. Cun a cheu nih cun, "Hlanlio profet ngan pakhatkhat hna bantuk khan profet a si ve ko," an ti. 16 Cucu Herod nih a theih tikah, "Hi pa hi Tipil petu Johan kha a si ko. A lu kha ka rak tanter hna. Sihmanhsehlaw a nung ṭhan ko hi ta!" tiah a ti. 17 Herod hrimhrim nih khan Johan cu nan tlaih lai i nan khih lai i thong ah nan thlak lai, tiah a rak ti hna. Herod nih hi thil a tuahnak cu Herodias kha a nau Filip nupi a si nain nupi ah aa ṭhit caah a si. 18 Tipil petu Johan nih khan, "Na nau nupi nangmah ca i ṭhit cu a ṭha lo," tiah a rak chimh lengmang i 19 cucaah cun Herodias nih khan Johan cu a lung chung tein a uam ziar i thah a duh; sihmanhsehlaw Herod nih a dawnh caah a that kho lo. 20 Herod nih cun Johan kha a ṭih ngaingai, zeicahtiah mi ṭha le mi thiang a si kha a hngalh i him tein a umter ko. A bia a theih fate lung sivang in a um tawn ko nain a chimmi ngaih kha cu a duh ko. 21 A hmanung bik ah Herodias nih caan rem kha a hmuh. Cu caan cu Herod chuah ni ah khan a si i Herod nih cun uknak lei a tlaitu bawi vialte hna le ralkap lei bawi hna le Galilee ram upa hna caah khan puai a tuah. 22 Herodias fanute kha a rung lut i a laam i Herod le a sawmmi bawi hna cu an lung a ton ngaingai hna. Cucaah siangpahrang nih cun ngakchianute cu a thawh i, "Zeidah na duh hnga? Na duhmi paoh kan pek lai," tiah a ti. 23 Cun bia tiangin aa kam i, "Na ka halmi paoh cu kan pek hrimhrim lai, ka ram hnarcheu tiang hmanh in kan pek lai," tiah chiatserh tein a chim. 24 Cucaah ngakchianu cu a chuak i a nu kha, "Zeidah ka hal lai?" tiah a va hal. A nu nih cun, "Tipil petu Johan lu," tiah a leh. 25 Ngakchianu cu siangpahrang sinah khan khulrang in a va kir ṭhan i, "Tipil petu Johan lu kha atu hrimhrim ah dar kheng in ka pe law ka duh," tiah a va ti. 26 Siangpahrang cu a awlok a chong ko, sihmanhsehlaw a sawmmi upa hna hmaiah khan, kha ti khan bia aa kam laklawh cang ṭung caah, a al kho lo. 27 Cucaah ralvengtu ralkap pakhat kha a hei thlah i Johan lu cu na rak put lai, tiah nawl a pek. Ralkappa cu a chuak i thonginn ah khan a va kal i Johan lu cu a va tan; 28 dar kheng cun a rak put i ngakchianu kha a pek i ngakchianu nih a nu kha a pek chin. 29 Johan thihnak kong cu a zultu hna nih khan an theih tikah an ra i a ruak kha an lak i thlan ah an vui. 30 Lamkaltu hna kha an ra tlung i Jesuh he khan an i tong i an tuahmi vialte le an cawnpiakmi hna vialte kha an chimh. 31 A tlung kal an tam tuk hringhran caah Jesuh le a zultu hna cu rawl einak caan hmanh an hmu lo. Cucaah annih cu a thawh hna i, "Kanmah lawng tein kan um khawh nakhnga le a dinh zong nan i dinh nakhnga, kanmah lawngin kaa khatkhat ah kal tuah u sih," tiah a ti hna. 32 Cucaah anmah lawng cun hmunking i kal awkah an i thawh. 33 Sihmanhsehlaw mi tampi nih an kal kha an hmuh ṭhiamṭhiam hna i hmakhatte ah ahodah an si kha an hngalh fawn caah a khua kip khan an chuak i tlang lam khan an rak kalkanh hna i Jesuh le a zultu hna an phak hlanah khan a hmun kha an rak phan. 34 Jesuh cu lawng chung khan a hung chuak i mi cu vialte a hmuh hna tikah khan a zaang an fak ngaingai, zeicahtiah khaltu a ngei lomi tuu bantuk an si. Cucaah thil tampi a cawnpiak hna. 35 Khua a hung tlai zualmal tikah a zultu hna cu a sinah khan an ra i, "Atu hi a tlai ngaingai cang i hi hmun hi mi um lonak hmun a si. 36 Cucaah mi hi kalter hna law kan pawngkam lo hna le khua hna ah hin ei awk vaa cawk hna seh," tiah an ti. 37 Jesuh nih cun a thawh hna i, "Nanmah nih ta ei awk cu nan pek hna," tiah a ti hna. Annih nih, "A si ahcun, ngun tangka za hnih in rawl va cawk i anmah kha pek maw, na kan duhmi cu a si?" an ti. 38 Cucaah Jesuh nih khan annih cu, "Changreu tlang zeizat dah nan ngeih? Va kal u law va zoh tuah u," tiah a ti hna. An va zoh dih in, "Tlang nga le nga pahnih," tiah an ti. 39 Khi tikah Jesuh nih cun a zultu hna cu, mi kha a bubu in ram hring cungah khan nan ṭhutter hna lai, tiah a ti hna. 40 Cucaah mi cu a tlangtlang in an ṭhu i bu khat ah za khat, bu khat ah sawm nga, tiin an um. 41 Cun Jesuh nih khan changreu tlang nga le nga pahnih cu a lak hna i van kha a zoh i Pathian sinah lunglawmhnak bia a chim. Changreu cu a cheu hna i a zultu kha a pek hna i mizapi kha pe hna u, tiah a ti hna. Cun nga pahnih zong kha an dihlak in a phawt hna. 42 An dihlak in an ei i an khim dih. 43 Cun a zultu hna nih khan changreu ṭiltlawt le nga ṭiltlawt cu sei hleihnih khat an char. 44 Changreu a eimi cu pa thong nga an si. 45 Cucu a dih cangka in Jesuh nih a zultu hna cu lawng chungah a luhter hna i rili khattelei ral i a ummi Bethsaida khua ah khan ka hlan ah rak kal u, tiah a ti hna; anih tu cu mizapi kha a run thlahtak hna. 46 A zultu kha a kalter dih hna hnuah anih cu thlacam awkah tlang cungah a kai. 47 Khua a muih tikah lawng cu rili laifang kha a phan i Jesuh tu cu amahte lawngin tlang ah khan a um ko. 48 Thli kha anmah lei hoih in a hran caah a zultu hna nih khan an lawng zah cu an i harh ngai, ti kha a hei hmuh hna. Cucaah zinglei suimilam pathum le paruk kar hrawngah khin an sinah ti cung cun a ra i lonh hnek khi a zalh hna. 49 Sihmanhsehlaw ti cung i a kal cu 50 an dihlak in an hmuh i an thin a phang i, mithla a si, tiah an ruah i an ai. Sihmanhsehlaw Jesuh nih cun khulrang tein a hei chawnh hna i, "Nan thin phang hlah u, keimah ka si," tiah a ti hna. 51 Cun lawng chungah cun an sinah khan a vung lut i thlitu cu a dai. A zultu hna cu an khuaruah a har tuk hringhran i an lung a ar ko, 52 zeicahtiah changreu sullam kha an rak hngal kho lo, an lung a rak pem kho lo. 53 Rili cu an tan i Genesaret ah lawng cun an ṭum i khika ah an lawng cu an hren. 54 Lawng chungin an chuah cangka khan Jesuh a um kha mi nih cun an hngalh colh. 55 Cucaah cuka ram ah cun khulrang in an kal i a um an theihnak paoh ah a zawmi kha lang in an hei put hna. 56 Cun Jesuh cu a kalnak kip ah khan, khuate ah siseh, khuapi ah siseh, lo ah siseh, mi nih an mizaw hna cu chawdawrnak hmun ah khan an rak chuahpi cio hna i, a zawmi hna nih hin na puanki tal in tawng hna seh, tiah an nawl; cun a tawngmi paoh cu an dam.
1 Farasi mi bu khat le Phungbia cawnpiaktu saya tlawmpal Jerusalem in a rami hna nih khan Jesuh cu an va leng. 2 A zultu cheukhat cu kut ṭawl loin rawl an ei kha an hmuh hna — a sullam cu Farasi mi hna nih cuticun nan kut nan i ṭawl awk a si, an tining in an i ṭawl lo tinak a si. 3 Farasi mi hna le Judah mi hna nih cun an pupa nih an cawnpiakmi hna phung kha ṭha tein an zulh: cuticun nan kut nan i ṭawlning a si lai, timi ning in an i ṭawl lo ahcun rawl an ei lo; 4 cun chawdawr i an va cawkmi thil zong kha a ningcang tein an ṭawl hna lo ahcun an ei fawn hna lo. Cuticun an pupa hna nih an chimhmi hna phung dangdang zong an zulhmi tampi a um, a biana ah hrai ṭawlning tehna, um ṭawlning tehna, darkheng ṭawlning tehna le ihkhun ṭawlning tehna an si. 5 Cucaah Farasi mi hna le Phungbia cawnpiaktu saya hna nih khan Jesuh cu an thawh i, "Zeicahdah na zultu hna nih hin kan pupa hna cawnpiaknak ningin zul loin kut ṭawl loin rawl an ei?" tiah an ti. 6 Jesuh nih cun a leh hna i, "Nannih kong a rak chim tikah hin Isaiah hi a va hmaan dah! A ṭial bantuk tein miziathiam nan si taktak ko. A ṭialmi cu hitihin a si: 'Pathian nih aa thawh i, Hi mi hna nih hin an bia cun an ka upat ko, Asinain an lung cun an ka hlat taktak. 7 Annih nih minung serchommi nawlbia kha Pathian nawlbia taktak bantukin mi an cawnpiak hna caah An ka biak hi an caah zeihmanh a ṭhahnem lo,' a ti. 8 "Nannih nih cun Pathian nawlbia kha nan chiah riangmang i minung cawnpiaknak tu kha nan zulh deuh," tiah a ti hna. 9 Cun Jesuh nih cun a thawh ṭhan hna i, "Nanmah cawnpiaknak tu kha fehter i Pathian nawlbia hlawt kha cu nan thiam ngai ko. 10 Zeitindah a si tiah, Moses nawl pekning ah khan, 'Na nu le na pa na upat hna lai i a nu siseh a pa siseh a vawlpammi cu thah a si lai,' ti a si. 11 Sihmanhsehlaw nannih nih cun nan i thawh zau i, 'Mi pakhatkhat nih a nu le a pa cu, "Nanmah bawmhnak caah ka timi ka thil kha Korban a si ai," a ti hna ahcun, 12 cu pa cu a nu le a pa bawmh kha a luat,' nan ti. (Korban ti a sullam cu Pathian ta a si, tinak a si). 13 Hi bantuk i nannih nih midang nan cawnpiak chin lengmangmi hna nih hin Pathian bia kha a vaivuanhter. Cun hi bantukin nan tuahmi thil a dang tampi a um rih," tiah a ti hna. 14 Cun Jesuh nih mizapi kha a auh ṭhan hna i, "Nan dihlak in ka bia hi ngai u law hngal tuah u. 15 Mi cu lenglei in chunglei ah a lutmi thil nih a thurter lo. A chungin a chuakmi thil tu nih a thurter. 16 Cucaah theihnak hna nan ngeih ahcun thei ko u," tiah a ti hna. 17 Mizapi kha a kaltak hna i inn chung i a luh tikah khan a zultu nih hi bianabia kong kha an hal. 18 Jesuh nih cun, "Midang nakin nan fim hlei lo hi ta! Nan hngal kho hrim lo maw? Minung cu lenglei in a chungah a lutmi thil nih cun a thurter lo. 19 Zeicahtiah a lung chungah lut loin a paw chung tu ah a lut i a pum lengah a chuak ṭhan ko" tiah a ti hna. (Hitihin Jesuh nih a ti tikah hin rawl zeipaoh hi ei awkah aa tlakmi an si ko a ti duhnak a si). 20 Cun aa thawh ṭhan i, "Minung a thurhnawmhtertu cu a chungin a chuakmi hi an si. 21 Zeicahtiah ṭhat lonak ziaza a tuahtertu ruahnak ṭhalo kha chunglei in a lung chungin a chuakmi an si: nu le pa sualnak tehna, fir tehna, mi thah tehna, 22 va cung pa duh tehna, hakkauh tehna, ṭhat lonak a phunphun tuah tehna, lihchim tehna, zuanzam tehna, mi nahchuah tehna, mi congoih tehna, lungpuam tehna, ningcang lo khuasak tehna — 23 hi thil ṭhalo vialte hi minung chunglei in a chuakmi an si i minung a thurtertu cu hi hna hi an si," tiah a ti. 24 Cun cuka cun Jesuh cu a chuak i Tair peng ah khan a kal. Inn pakhat chungah a lut i ahohmanh nih ka um hi hngal hna hlah seh ti a duh, sihmanhsehlaw aa thup kho lo. 25 Nu pakhat, a fanu khuavang nih a tuahmi nih khan Jesuh thawng cu a theih i khulrang tein a sinah cun a ra i a ke hramah a bawk. 26 Cu nu cu Jentail mi, Siria ram Foinisia khua i a chuakmi a si. Jesuh cu, ka fanu chung i a ummi khuachia cu ka ṭhawlpiak tuah, tiah a nawl. 27 Sihmanhsehlaw Jesuh nih cun a thawh i, "Rawl cu fale kha pe hmasa hna u sih, fale rawl cu i lak zau i uico pek cu a hmaan deuh lo," tiah a ti. 28 Cun minu nih cun, "A si ko, Bawipa, sihmanhsehlaw fale rawl ṭilṭawt cu cabuai tang i a ummi uico hmanh nih an ei ve tawn ko," tiah a leh. 29 Cucaah Jesuh nih cun, "Cu bantukin na ka leh caah na inn ah va ṭin ko, na fanu chungin khuachia kha a chuak cang," tiah a ti. 30 Cucaah inn ah cun a ṭin i a fanu cu ihkhun cung i a rak ih ko kha a va hmuh; khuachia nih cun a rak chuahtak taktak cang. 31 Jesuh cu Tair peng khan a chuak i Sidon pal pah in Galilee Rili ah khan a kal; Khua Pahra timi ram kha a tan. 32 A sinah mipa pakhat an ratpi i cu pa cu a hna a chet i a holh zong a holh kho set lo, Jesuh cu a cungah na kut chia ko, tiah an nawl. 33 Cucaah Jesuh nih cun zapi sin khan lamhla nawn ah khin amah lawngin aa kalpi i a hnakhaw chungah cun a kutdong a sawh i a cil a chak i mipa lei cu a tongh. 34 Cun Jesuh cu van a cau i fak piin a hrum i mipa cu, Effatha,'' tiah a ti, a sullam cu, "I hung tuah," tinak a si. 35 Chikkhatte ah mipa cu a hna kha an awng i a lei cu a luat i ṭha tein a holh kho. 36 Cun Jesuh nih khan, hi kong cu ahohmanh nan chim hna lai lo, tiah a thlauh hna; sihmanhsehlaw tam deuh in a thlauh hna paoh ah tam deuh in an chim chin. 37 Cun a theimi paohpaoh cu an khuaruah a har dih. "A tuahmi thil hi an va ṭha hringhran dah! Hnachet kha an hna a awnter hna i a holh kho lomi zong kha holh kho in a tuah hna," tiah an thangṭhat.
1 Cu hnu tlawmpal ah cun mi tampi an i pum ṭhan i ei awk zeihmanh an ngeih ti lo tikah Jesuh nih a zultu kha a kawh hna i, 2 "Hi hna hi ka sinah ni thum an um cang i atu cu ei awk zeihmanh an ngei ti lo, ka zaang an fak ko. 3 Rawl ei loin ka tlunter hna ahcun lampi ah an buhri lai, a cheu cu lamhla piin a rami an si fawn," tiah a ti. 4 A zultu nih cun an thawh i, "Hi ramlak ah hin aho nih dah minung hi zat cu rawl a pek khawh hna lai?" an ti. 5 "Changreu tlang zeizat dah nan ngeih?" tiah a hal hna i, "Tlang sarih," tiah an leh. 6 Mizapi cu vawlei ah khan ṭhu u, tiah a ti hna. Cun changreu tlang sarih kha aa lak i Pathian sinah lawmhnak bia a chim hnuah a beoh hna i mizapi kha phawt awkah a zultu kha a pek hna; cun a zultu hna nih cun mizapi cu an phawt hna. 7 Nga hme tete tlawmpal zong an ngei. Jesuh nih cun nga ca zongah cun lawmhnak bia kha Pathian sinah a chim i a zultu hna cu, phaw hna u, tiah a ti hna. 8 An dihlak in an ei i an khim dih, minung cu thong li tluk an si. 9 Cun a zultu hna nih khan a ṭiltlawt sei sarih an char. Jesuh nih mizapi cu a kalter hna i 10 khulrang in a zultu hna he lawng chungah an lut i Dalmanutha peng ah an kal. 11 Farasi mi kha an ra chuak i bia an i al. Amah kha hneksak an duh caah, "Pathian thlahmi na si si lo hngalhnak ah khuaruahhar pakhat in tuah tuah," an ti. 12 Jesuh cu fak piin a hrum i, "Zeicahdah tu chan mi nih hin khuaruahharnak tuah nan ka fial? Ka tuah lai lo, cu bantuk hmelchunhnak cu tu chan mi hi kan pe hrimhrim hna lai lo," tiah a ti. 13 Cuticun a kaltak hna i lawng chungah cun a lut ṭhan i rili khattelei kamah khan an kal. 14 A zultu hna nih khan changreu phorh an philh i lawng chungah cun tlang khat lawng an ngei. 15 Annih cu Jesuh nih khan a thawh hna i, "Farasi mi hna thilnu le Herod thilnu kha i ralring u," tiah a ti hna. 16 Cu tikah annih nih, "Changreu kan ngeih lo caah pei hitin a kan ti ko hi," tiah an i ceih. 17 Jesuh nih an i ceihmi cu a hngalh i cucaah, "Zeicahdah changreu nan ngeih lonak kong cu nan i ceih len ko? Nan thei kho in nan hngal kho rih hrim lo maw? 18 Cuticun maw nan lung a pin ko? Mit nan ngeih ko ṭung, nan hmu kho lo maw? Hna nan ngeih ko ṭung, nan thei kho lo maw? 19 Minung thong nga ca i changreu tlang nga ka cheu kha nan philh manh maw? A ṭiltlawt kha sei zeizat dah nan char kha?" tiah a ti hna. Annih nih, "Sei hleihnih," tiah an leh. 20 "Cun minung thong li ca i tlang sarih ka cheu ah khan tah sei zeizat dah a ṭiltlawt nan char kha?" tiah a ti i, "Sei sarih," tiah an leh. 21 Cun "Nan hngal kho bal rih hrim lo maw?" tiah a hal hna. 22 Bethsaida khua kha an phan i Jesuh sinah cun mitcawpa pakhat an ratpi i a rak tawngh nakhnga an nawl. 23 Jesuh nih cun mitcawpa cu a kut in aa hruai i khua lengah a chuahpi. Mipa mit cu a cil a chak hnuah Jesuh nih cun a cungah a kut a chuan i, "Zei tal na hmu kho maw?" tiah a hal. 24 Mipa cu van a hun cau i, "Mi ka hmuh khawh hna, sihmanhsehlaw thingkung khi i chawk hna seh law, cu ko cu an lo," tiah a ti. 25 Cun Jesuh nih mipa mit cu a kut in a tongh ṭhan i mipa nih cun fak piin a hun zoh i khua a hun hmu kho i zeizong vialte kha fiang tein a hmuh hna. 26 Jesuh nih inn ah a ṭinter i, "Nan khuachung mi ahohmanh va chim hna hlah," tiah a ti. 27 Jesuh le a zultu hna cu Sisaria Filipi peng khuate tlawn ah an i thawh. Lampi ah cun a thawh hna i, "Mi nih, aho a si, an ka ti dah, ka chim tuah u," tiah a ti hna. 28 Annih nih, "A cheu nih, Tipil petu Johan a si, an in ti. A cheu nih Elijah a si, an in ti. A cheu nolh nih, profet pakhatkhat a si, an in ti," tiah an leh. 29 Cun annih cu, "Nannih nih tah, aho a si, nan ka ti dah?" tiah a ti hna i Peter nih, "Messiah na si," tiah a leh. 30 Cun Jesuh nih, "Ka kong hi ahohmanh chim hna hlah u," tiah a ti hna. 31 Jesuh nih cun a zultu kha a cawnpiak hna i, "Mi Fapa nih hin temhinnak tampi ka huah lai, upa hna le tlangbawi upa pawl hna le Phungbia cawnpiaktu saya hna nih an ka hlawt lai. Thihnak ka huah lai i ni thum hnuah ka tho ṭhan lai," tiah a chimh hna. 32 Hihi fiang tein a chimh hna caah Peter nih kaa dang deuh ah khin a hei i kalpi i a mawhchiat. 33 Sihmanhsehlaw Jesuh cu aa mer i a zultu hna lei kha a zoh i Peter cu a mawhchiat ve i, "Ka sinin kal ko, Satan; zeicahtiah na ruahning hi minung ruahning a si, Pathian ruahning a si lo," tiah a ti. 34 Cun Jesuh nih mizapi le a zultu hna kha a auh hna i, "Zulh a ka duhmi paoh cu mah zawn aa ruat lomi nan si lai. Cun nan vailamtahnak kha nan i put lai i nan ka zulh lai. 35 Zeicaahtiah a nunnak khamh a duhmi cu a nunnak kha a sung lai i keimah ruang le thawngṭha bia ruang i a nunnak a sungmi nih a nunnak kha a khamh lai. 36 Mi pakhatkhat nih vawlei hi a ning piin co seh law, a nunnak sung ṭung seh law, zeital a miak hnga maw? Miak hlah! 37 Cun a nunnak cu zeital in a caw ṭhan kho hnga maw? Caw ṭhan kho hlah. 38 Atu chan, Pathian zei ah a rel lo i chan ṭhalo a simi chan ah hin, keimah le ka cawnpiaknak a ka zahpimi cu, Mi Fapa hi ka Pa sunparnak in vancung mithiang mi hna he ka rat tikah, ka zahpi ve hna lai," tiah a ti hna.
1 Cun a thawh hna i, "Biatak kan chimh hna, hika i a dirmi lakah hin, Pathian pennak a ṭhawnnak he a rat nan hmuh hlan cu, a thi lo dingmi tlawmpal nan um," tiah a ti hna. 2 Cun ni ruk hnuah Jesuh nih cun Peter le Jeim le Johan kha aa kalpi hna i anmah lawngin tlang sang pakhat ah aa kaipi hna. Annih nih an zoh ko lioah khan a hun i thleng i 3 a thilpuan cu a tleu in an tleu i an rang ngaingai; cu tluk rang cun vawlei cung mi ahohmanh nih an su kho lai lo. 4 Cun zultu pathum hna nih cun Elijah le Moses kha Jesuh he bia an i ruah len ko cu an hmuh hna. 5 Peter nih cun a hun thawh i Jesuh cu, "Saya, hika kan um hi thil ṭha a si. Deu pathum in kan sak lai, nang caah pakhat, Moses caah pakhat, Elijah caah pakhat," tiah a ti. 6 Peter le a hawile cu an thin a phang tuk hringhran i zeihmanh chim awk an hngal lo. 7 Minmei a hung zam i a hun zelh hna i minmei chung cun aw pakhat a hung chuak i, "Hihi ka dawtmi ka Fapa a si, a bia kha ngai u," tiah a ti hna. 8 Khulrang in an pawngkam cu an zoh i midang ahohmanh an hmu hna lo, Jesuh lawng kha an sinah cun a um ko. 9 Tlang cungin an ṭum pah ah khan Jesuh nih, "Mi Fapa hi thihnak in ka thawh hlanah cun nan hmuhmi kha ahohmanh chim hna hlah u," tiah a ti hna. 10 A nawl cu an zulh, sihmanhsehlaw anmah le anmah cu an i ceih i, " 'Thihnak in thawh' timi hi a sullam zeidah a si ee?" an ti. 11 Cun Jesuh cu, "Zeicahdah Phungbia cawnpiaktu saya pawl nih, 'Elijah a rat hmasa awk a si,' an ti?" tiah an hal. 12 Jesuh nih cun, "Zeizong vialte rak timh chung awkah Elijah cu a ra hmasa taktak ko. Asinain, zeicahdah Cathiang nih, Mi Fapa nih temhinnak tampi a huah lai i a hlawt zong hlawt a si lai, tiah a ti hnga? 13 A chimh cu kan chimh ko hna lai, Elijah cu a ra ko cang i Cathiang nih a chim bantukte khan mi nih an duh bantuk tein a cungah an ṭuan ko cang," tiah a leh hna. 14 A zultu dang hna sin kha an va phak tikah, mi tampi an rak um kha an hmuh hna. Phungbia cawnpiaktu saya a cheu khat kha a zultu hna he cun bia an rak i al len ko. 15 Mizapi nih khan Jesuh cu an hmuh cangka in an lau i an va tli i an va don. 16 Jesuh nih a zultu hna cu, "Zeidah nan i al?" tiah a ti hna. 17 Mizapi lak cun pakhat pa nih a hun leh i, "Saya, ka fapa cu khuavang nih a tuah i a holh khawh lo caah na sinah ka ratpi. 18 Khuavang nih a chuahhnawh fate vawlei ah khan a thluk i a buanbara a tawh i a hacang aa rial i a ṭhom dih. Na zultu kha khuavang ṭhawl cu ka fial hna nain an ṭhawl kho lo," tiah a ti. 19 Cun Jesuh nih cun, "Nan va zum lo hringhran dah! Zei can dah nan sinah hin ka um a herh rih lai? Zei can dah kaan in hna lai? Ngakchiapa cu ratpi u," tiah a ti hna. 20 Cun a sinah cun an ratpi. Khuachia nih khan Jesuh kha a hmuh cangka in ngakchiapa cu mah hngal loin a tuah i vawlei ah a hrilh i heh tiah aa let len i a buanbara zong a tawh dih. 21 "Hi ti a umnak hi zei can dah a si cang?" tiah Jesuh nih cun a pa kha a hal. "A ngakchiate in," tiah a pa nih cun a leh. 22 Cun a pa nih cun, "Mei chung hawi hna ah a paih, ti chung hawi hna ah a thlak i voi tampi a thah dengmang tawn. Zei kan ti hnga, na kan bawmh khawh ahcun kan bawm hram ko sawh," tiah a ti. 23 Jesuh nih, "Na kan bawmh khawh ahcun na ti maw? Asi, zumhnak a ngeimi caah cun zei paoh a si kho ko," tiah a ti. 24 Cun a pa cu a au i, "Ka zumh ko, sihmanhsehlaw a za lo, ka bawm tuah!" tiah a ti. 25 Jesuh nih cun zapi nih an naih chin lengmang hna kha a hmuh tikah, thlarau ṭhalo cu, "A hna zong a chet i a holh zong a holh kho lomi thlarau, ngakchiapa chung khan chuak law a luh zong lut ṭhan ti hlah, kan ti," tiah a ti. 26 Khuavang nih cun ngakchiapa cu mah hngal loin a vun tuahtak i cun a chuak. Ngakchiapa cu miruak bantuk a si ko, cucaah aho paoh nih, "A thi," an ti. 27 Sihmanhsehlaw Jesuh nih khan ngakchiapa cu a kut in a vun thawh i a hung dir. 28 Cun Jesuh cu inn chungah a luh hnuah a zultu hna nih khan a thli tein, "Zeicahdah kannih nih kha khuachia kha kan ṭhawl khawh lo?" tiah an hal. 29 Jesuh nih, "Hi bantuk phun hi cu thlacamnak dah ti lo nih cun zeihmanh nih a ṭhawl kho lo," tiah a leh hna. 30 Cuka hmun cun an chuak i Galilee ram ṭol pah thluahmah in an kal. Jesuh nih a zultu pawl kha a cawnpiak lio hna a si caah, a umnak kha ahohmanh nih hngal hna hlah seh ti a duh. 31 Zeitindah a cawnpiak hna tiah, "Mi Fapa hi mi kut chungah chanh ka si lai i cu hna nih cun an ka thah lai. Sihmanhsehlaw ni thum hnuah ka tho ṭhan lai," tiah a ti. 32 Cu cawnpiaknak cu a sullam an hngal lo, sihmanhsehlaw an hal ngam lo. 33 Kapernaum khua kha an phan i inn chung i an luh hnuah, Jesuh nih a zultu hna cu, "Lampi ah khan zeidah nan i al?" tiah a hal hna. 34 Lampi i an i almi cu, kan lakah hin ahodah a ngan bik, ti kha a si caah an let ngam lo. 35 Jesuh cu a ṭhu i zultu hleihnih hna cu a auh hna i, "A ngan bik si a duhmi cu nauta bik ah le mi vialte sal ah aa chiah hrimhrim awk a si lai," tiah a ti hna. 36 Ngakchia pakhat kha a lak i an hmaiah a dirter. Ngakchiapa cu a kuh i annih cu, 37 "Ka min in hi bantuk ngakchia pakhat khat a cohlangmi paoh cu keimah a ka cohlan a si; cun keimah a ka cohlangmi paoh cu keimah lawng kha a ka cohlan si loin a ka thlahtu zong kha a cohlan a si," tiah a ti hna. 38 Johan nih a thawh i, "Saya, na min in khuachia a ṭhawlmi pakhat kan hmuh i kan bu chungmi a si lo caah, tuah ti hlah, kan ti," tiah a chimh. 39 Jesuh nih cun, "Tuah ti hlah, ti hlah u, zeicahtiah ka min in khuaruahhar mi thil a tuahmi nih cun ka thang cu a ka chiat kho lai lo. 40 A kan doh lomi cu a kan bawmmi an si. 41 Nannih cu Messiah zultu nan si ruangah mi nih ti hrai khat zong an in pek hna ahcun, cu hna cu laksawng hmu loin an um hrimhrim lai lo, ti kha va philh hlah u," tiah a ti hna. 42 Keimah a ka zummi, hi ngakchia tete hna lak i pakhat hmanh hi, ka lam in a pialtertu cu, a hngawng ah facang rialnak lung tumpi thlaih i rili chung i thlak kha a caah a ṭha deuh. 43 Cucaah nan kut nih an pialter hna ahcun, tan ko u! Kut pahnih he a mit lomi hell chung i tlak nakin kut loin nunnak chung i luh kha nan caah a ṭha deuh. 44 Cuka ah cun an tholung kha an thi ti lo i mei kha a mit ti lo. 45 Cun nan ke nih an pialter hna ahcun, tan ko u! Ke pahnih he hell chung i tlak nakin ke loin nunnak chung i luh kha nan caah a ṭha deuh. 46 Cuka ah cun an tholung kha an thi ti lo i mei kha a mit ti lo. 47 Cun nan mit nih an pialter hna ahcun khoih ko u! Mit pahnih he hell chung i tlak nakin mit pakhat he lawng Pathian Pennak chung i luh kha nan caah a ṭha deuh. 48 Cuka ah cun an tho lung kha an thi ti lo i mei kha a mit ti lo. 49 "A mi kip kha mei in cite bantukin alter an si lai. 50 Cite hi a ṭha. Sihmanhsehlaw a alnak kha a loh ahcun zeitindah na alter ṭhan khawh ti lai? Nan chungah cite kha i ngeih u law pakhat le pakhat kha i rem tein um u," tiah a ti.
1 Jesuh cu cuka hmun cun a chuak i Judea ram ah khan a kal i Jordan tiva kha a tan. Cun mi tampi nih khan a zual in an zual hoi i a cawnpiak tawn zungzal hna bang khan a cawnpiak hna. 2 Farasi mi kha an ra i foih an ra timh. "Kan phung nih nupi mak hi a kan onh maw onh lo, kan chim tuah," tiah an ti. 3 Jesuh nih biahalnak in a leh hna i, "Moses nih zei phung dah an pek hna?" tiah a ti. 4 Annih nih, "Moses nih a kan pekmi ah cun, mipa nih a nupi kha maknak ca a pek ahcun a mak khawh ko, ti a si," tiah an leh. 5 Jesuh nih cun a thawh hna i, "Moses nih hi nawlbia an ṭialpiak hna cu, nannih kha cawnpiak nan har tuk hringhran caah a si. 6 Sihmanhsehlaw a hramthawk, thil ser lio caan ah khan cun, cathiang nih, 'Pathian nih nu le pa in a ser hna i 7 cu ruangah cun pa nih a nu le a pa kha a kaltak hna lai i a nupi he an i komh lai i, 8 an pahnih cun pakhat ah an cang lai,' a ti bang khan a si. Cucaah pahnih an si ti lo, pakhat lawng an si cang. 9 Pathian nih a fonhmi hna cu minung nih ṭhen awk a si lo," tiah a ti. 10 Inn chung i an luh ṭhan tikah khan Jesuh cu a zultu hna nih hi kong cu an hal. 11 Annih cu, "A nupi kha a ma i nu dang a ṭhimi cu a nupi cungin nu dang duh sualnak a tuah a si; 12 cu bantuk ṭhiamṭhiam in a va kha a kirtak i midang a vami cu va cungin pa aa duh a si ve," tiah a ti. 13 Jesuh sinah khan, a kut in rak tawng hna seh, tiah ngakchia tete kha an ratpi hna, sihmanhsehlaw a zultu hna nih khan cu hna cu an rak sik hna. 14 Cucu Jesuh nih a hmuh tikah a thin a hung i a zultu hna cu, "Ngakchia cu ka sinah ratter ko hna u. Pathian Pennak cu hi bantuk mi hna ta hi a si caah, annih cu kham hna hlah u. 15 Mah hi philh hlah u. Pathian Pennak kha ngakchia nih an cohlan bantukin a cohlang lomi cu, ahohmanh Pathian Pennak chungah cun an lut lai lo," tiah a ti. 16 Cun ngakchia cu a pom hna i an cungah a kut a chuan i thluachuahnak a pek hna. 17 Jesuh cu khual tlawn ah aa thawh ṭhan i cu lioah cun mipa pakhat a hung tli i a hmaiah a khuk aa bil i, "Saya, nangmah cu mi ṭha na si. Zungzal nunnak hmuh awkah zeidah ka tuah lai?" tiah a hal. 18 Jesuh nih cun, "Zeicahdah, saya ṭha, na ka ti? Pathian dah ti lo cu ahohmanh a ṭhami an um ṭung lo. 19 Nawlbia kha na hngalh ko ṭung hna: 'Lai va nawng hlah; nupi cung le va cungin midang cungah sual hlah, fir hlah, lih chim hlah, mi va hleng hna hlah, na nu le na pa va upat hna!' ti pei an si kha," tiah a ti. 20 Cu pa nih cun, "Saya, hi nawlbia vialte hi cu ka ngakchiat lio in ka zulh lengmang ko cang hna," tiah a ti. 21 Dawtnak lungthin he Jesuh nih dengteo in a vun zoh i, "Pakhat lawnglawng na bau, va kal law na ngeihmi thil vialte kha va zuar law tangka cu sifakmi kha va ṭhen hna, cun vancung ah rothil na ngei lai; cun ra law ka zul," tiah a ti. 22 Cu bia cu mipa nih khan a theih tikah a hmai a chia i ngaihchia ngaiin a kir; zeicahtiah a rum ngaingaimi a si. 23 Jesuh nih a zultu kha a zoh hna i, "Mirum mi caah cun Pathian Pennak chung luh hi a va har lai dah!" tiah a ti. 24 Cu a chimmi bia an theih tikah a zultu hna cu an khuaruah a har ko. Asinain Jesuh nih a thawh ṭhan hna i, "Ka fale hna, Pathian Pennak chung luh hi zeitluk in dah a har! 25 Kalauk ṭhim kaa chung luh hi mirum Pathian Pennak chung luh nakin a fawi deuh," tiah a ti. 26 Hi bia an theih tikah a zultu hna cu an khuaruah a har tuk hringhran i, "Ahodah khamhnak cu a hmu kho kun lai?" tiah pakhat le pakhat kha an i hal. 27 Jesuh nih cun dengteo in a zoh hna i, "Hihi minung caah cun a si kho lo, sihmanhsehlaw Pathian caah cun a si kho ko, zeicahtiah Pathian nih a tuah khawh lomi zeihmanh a um lo," tiah a ti hna. 28 Cun Peter nih, "A si ahcun, kannih hi tah? Zeizong vialte kaltak in kan in zulh ṭung," tiah a hun ti. 29 Cun Jesuh nih a thawh hna i, "A inn siseh, a lo siseh, a unau si hna seh, a farle si hna seh, a nu siseh, a pa siseh, a fale si hna seh, keimah le ṭhawngṭha ruangah a kaltakmi nih cun, 30 tam chinchin in atu chan ah hin a hmuh hrimhrim lai. Inn siseh, lo siseh unau si hna seh, far siseh, nu siseh, fa siseh; a let za khat in an hmuh lai; cun hremnak zong an hmuh lai; cun a ra dingmi chan ah hin zungzal nunnak an hmuh lai. 31 Sihmanhsehlaw atu i a hmasa bik a simi hi, mi tampi cu a hmanung bik an si lai i atu i hmanung bik a simi hi, mi tampi cu hmasa bik an si lai," tiah a ti. 32 Jerusalem khua leiah khan an hung kal i Jesuh cu an hmaiah khan a kal i a zultu hna kha an khuaruah a har; cun an hnu in a hun zul vemi midang hna kha an thin a phang. Jesuh nih cun zultu pahleihnih hna kha a dang ah aa kalpi ṭhan hna i a cung i a tlung dingmi thil kong kha a chimh hna. 33 A thawh hna i, "Jerusalem khua kan hung phan lai i Mi Fapa hi tlangbawi upa hna le Phungbia cawnpiaktu saya pawl hna kut chungah khan an chanh lai. Annih nih cun, thih awktlak a si, tiin sual an phawt lai i, cun Jentail mi hna kut ah an chanh chin lai. 34 Cu hna nih cun an cawhdeh lai, cil an chak lai, fung in an tuk lai i an thah lai. Cun ni thum hnuah a tho ṭhan lai," tiah a ti hna. 35 Khi tikah Zebedi fapa Jeim le Johan kha Jesuh sinah cun an ra i, "Saya, na kan tuahpiak awk kan duhmi thil a um," an ti. 36 Jesuh nih cun, "Zeidah kan tuahpiak seh ti nan ka duhmi cu a si?" tiah a ti hna. 37 Annih nih, "A sunglawimi na Pennak chung i na bawiṭhutdan cung i na ṭhut tikah na sinah kan ṭhutter ve law kan duh, pakhat na orhlei kamah, pakhat na kehlei kamah," tiah an ti. 38 Jesuh nih cun a thawh hna i, "Nan ka halmi hi nan hngal lo. Ka din dingmi hrai hi nan din khawh lai maw? Tipil ka in ding ning hin nan in khawh ve lai maw?" tiah a ti. 39 Annih nih, "Kan ti khawh ko lai," tiah an leh. Jesuh nih cun, "Ka din dingmi hrai hi nan din khawh ve taktak ko lai i ka in dingmi tipil inning hi nan in khawh ve taktak ko lai. 40 Sihmanhsehlaw ka orhlei kam i ṭhut le ka kehlei kam i ṭhut cu keimah pek khawhmi a si lo. Hi hmun cu Pathian nih a timhpiakmi hna kha a pek ko hna lai," tiah a leh hna. 41 Hi kong kha a dang zultu pahra hna nih khan an theih tikah Jeim le Johan cungah cun an thin a hung. 42 Cucaah Jesuh nih an dihlak in a auh hna i, "Vawlei cungah cun uktu bawi hna nih an ukmi michia hna cu, a lal in an lalhnawh tawn hna i hruaitu hna nih a uk in an uk tawn hna ti cu nan hngalh. 43 Sihmanhsehlaw nannih cu hi bantukin nan si awk a si lo. Mi ngan si a duhmi cu nan sinum a si awk a si, 44 bawi cem si a duhmi cu nan dihlak sal a si awk a si. 45 Zeicahtiah Mi Fapa hmanh hi, rian ṭuanpiakmi si awkah ka rat ṭung lo, midang rian ṭuanpiaktu si awk le mi tampi tlanhnak ding ca i ka nunnak pek awkah pei ka rat cu," tiah a ti hna. 46 Jesuh le a zultu hna le mibupi cu Jeriko khua kha an phan. Jeriko khua cun an i thawh lioah khin lam pawngah mitcaw Bartimu, Timau fapa kha a ṭhu i thil a hal hna. 47 Nazareth khuami Jesuh a si ti kha a theih tikah, "Jesuh, David Fapa, ka zaangfah tuah," tiah a au. 48 Mi tampi nih an sik i dai tein um ko, tiah an ti. Sihmanhsehlaw thang chinchin in, "David Fapa, ka zaangfah tuah," tiah a au chin. 49 Jesuh cu a dir i, "Hei au u," tiah a ti. Cucaah mitcawpa cu an hei auh i, "Na thanuam ko, tho, an kawh cuh," an ti. 50 A puan kha a hlonh duak i a pet i Jesuh sinah cun a ra. 51 Jesuh nih cun, "Zeidah in tuahpiakning law na duh?" tiah a hal. Mitcawpa nih cun, "Saya, khua hmuh ṭhan ka duh," tiah a leh. 52 Jesuh nih cun, "Va kal kun, na zumhnak nih an damter cang," tiah a ti. Chikkhatte ah khin khua cu a hun hmu i lam ah cun Jesuh cu a zulh.
1 Jerusalem khua kha an hei naih cang i Oliv Tlang i a ummi Bethfeih le Bethani khua kha an phak tikah, Jesuh nih a zultu pahnih kha a thlah hna i 2 "Nan hmai khua ah khin va kal u law nan va luh kate ah, ahohmanh nih an i cit bal lomi laa fate, hri in aa hreng komi kha nan hmuh lai. Va phoih u law hika ah hin ratpi u. 3 Cun mi nih, 'Zeicahdah mah khakha nan tuah?' tiah an in hal hna ahcun. 'Kan Bawipa nih a herh i kan rak in pek ṭhan zau hna lai,' tiah nan ti lai," a ti hna. 4 Cucaah an rak kal i khua chung zalam ah cun inn pakhat innka pawngah laa fate pakhat a rak i hren ko cu an va hmuh. An phoih lioah khan 5 an pawng i a dirmi micheu nih khan, "Zeidah nan tuah? Laa fate hri maw nan phoih?" tiah an hal hna. 6 Jesuh nih a chimh hna bantuk khan an leh hna i, i kalpi ko u, tiah an ti hna. 7 Laa cu Jesuh sinah khan an ratpi i an puan kha a keng ah an danh i Jesuh nih aa cit. 8 Mi tampi nih an puan kha lam ah khan an phah, cun a cheu nih lo lak i thingnge kha an va sam hna i lam ah cun an phah hna. 9 "Hosanna! Bawipa min in a rami cu Pathian nih thluachuahnak pe ko seh. 10 Kan pu David pennak a ra liomi cu thluachuahnak hmu ko seh! Hosanna! A sang bik van ah khin Pathian cu thangṭhat si ko seh," tiah an ti. 11 Jesuh cu Jerusalem khua ah khan a lut, Biakinn ah khan a va lut i zeizong vialte a va zoh dih. Sihmanhsehlaw cu ni cu a tlai cang caah Bethani khua ah khan a zultu hleihnih hna he khan an kir ṭhan. 12 A thaizing, Bethani khua in an ra kirpah ah khan, Jesuh cu a rawl a ṭam. 13 Lamhlat nawn khin a hnah a ṭha ngaimi theipi kung pakhat a hei hmuh i a tlai a um hnga maw tiah a hei fuh; sihmanhsehlaw a hei phak tikah, cu caan cu theipi tlai tik a si lo caah, a hnahpi lawng a rak si kha a va hmuh. 14 Jesuh nih cun theipi kung cu, "Na thei ahohmanh nih in ei ti hna hlah seh," tiah a ti. Cucu a zultu hna nih khan an theih. 15 Jerusalem kha a va phak tikah Jesuh cu Biakinn ah khan a va kal i Biakinn chung i chaw a dawrmi le chaw a cawmi kha a ṭhawl dih hna. Tangka thlengtu pawl cabuai le laileng zuartu pawl ṭhutdan kha a leh dih hna i 16 Biakinn tual kha thilri i chawhpinak ah hmang ti hlah u, tiah a thlauh hna. 17 Cun mizapi kha a cawnpiak hna i, "Ca Thiang chungah, Pathian nih, 'Ka inn cu miphun vialte hna thlacamnak inn a si lai,' a ti, tiah aa ṭial. Sihmanhsehlaw nannih nih cun mifir kua ah nan ser cang," tiah a ti hna. 18 Tlangbawi upa hna le Phungbia cawnpiaktu saya hna nih khan cucu an theih i cucaah amah thahnak dingah khan lam an kawl. Mizapi cu an dihlak in a cawnpiaknak nih khan an lung a ton tuk hna caah tlangbawi le saya pawl nih khan amah cu an ṭih. 19 Zanlei sang khuamui deng ah khin, Jesuh le a zultu hna cu khuapi chung khan an chuak. 20 A thaizing zingkate ah, an kal pah ah khin, theipi kung kha an hei zoh. A rak thi i a hram tiangin a car dih. 21 Peter cu thil a rak ummi kha a lung a hung pem i, "Saya, zohhmanh, chiat na serhmi theipi kung kha a thi diam ko," tiah a ti. 22 Jesuh nih a leh hna i, "Pathian kha zum ko u. 23 Biatak kan chimh hna, ahohmanh nih hi tlang hi, 'Tho law rili ah khin vaa paih,' tiah zumh lonak zeihmanh um loin nan ti i, kan chimmi hi a tling lai, tiah nan zumh ahcun, tuahpiak nan si ko lai. 24 Cucaah cun, thlacam in nan halmi thil paoh kha, kan hmuh cang, tiah zum u law nan halmi paoh cu nan hmuh ko lai. 25 Cun thlacam in nan dir tikah, an cung i thinhunnak nan ngeihmi paoh kha, ngaithiam hna u, vancung nan Pa zong nih nan sualnak kha an ngaihthiam khawh ve hna nakhnga," tiah a ti. 26 Midang kha an sualnak nan ngaihthiam hna lo ahcun vancung i a ummi nan Pa zong nih nan sualnak an ngaithiam ve hna lai lo," tiah a ti. 27 Cun Jerusalem khua ah khan an ra ṭhan. Jesuh cu Biakinn chung i aa chawh lioah khan tlangbawi upa hna le Phungbia cawnpiaktu saya hna le upa hna nih khan an fuh i, 28 "Aho nawl in dah hi thil hi na tuah hna? Aho nih dah hi thil tuahnak nawl hi an pek?" tiah an hal. 29 Jesuh nih cun an bia cu a leh hna i, "Bia pakhat tein kan hal ve tuah hna lai. Ka let u law, aho nawl in dah hi thil hi ka tuah hna ti kha kan chimh ve hna lai. 30 Johan nih tipil a pek hna kha, Pathian sinin maw nawl kha a hmuh, minung sinin dah?" tiah a ti hna. 31 Anmah le anmah cu an i al i, "Zeitindah kan ti lai? 'Pathian sinin,' kan ti ahcun, Zeicahdah Johan cu nan zumh kun lo? a kan ti lai. 32 'Minung sinin,' kan ti ahcun ...," an ti. (Mizapi nih khan Johan cu profet a si ti kha an zumh caah mizapi kha an ṭih fawn ṭung hna.) 33 Cucaah Jesuh cu, "Kan hngal lo," tiah an leh. Cun Jesuh nih annih cu, "Aho nawl in dah hi thil hi ka tuah hna, ti cu kei zong nih kan chim ve kun hna lai lo," tiah a ti hna.
1 Cun Jesuh nih tahchunhnak bia in a chimh hna. Aa thawh i, "Mipa pakhat a rak um i cu pa nih cun mitsur dum pakhat a rak ser; a kulh i mitsur nennak caah khor a cawh i ralvennak inn pakhat a sak. Cun a dum cu mi kha a hlanh hna i khualtlawn ah a kal. 2 Mitsur thei kha lawh a cut tikah a co hnga ding a simi va lak awkah a sal pakhat kha a thlah. 3 Dum a hlanhmi hna nih cun an rak tlaih i an rak velh i zeihmanh pe loin an kirter. 4 Cu tikah dum ngeitu nih khan sal dang pakhat a thlah ṭhan; a lu ah an rak tuk i ningzak ngaiin an rak tuah. 5 Dum ngeitu nih cun sal dang pakhat a thlah ṭhan i an rak thah; cun a dang tampi kha cu bantuk cun an rak tuah hna, a cheu cu an tuk an den hna i a cheu cu an thah hna. 6 Thlah dingah a taangmi cu dum ngeitu fapate a dawt ngaingaimi lawng kha a si cang. A hmanung bik ah a fapa cu dum a hlanhmi hna sinah cun a hei thlah i, 'Ka fapa hi cu an hmaizah ṭheo lai,' tiah a ti. 7 Sihmanhsehlaw dum a hlanhmi hna nih khan, 'Hi pa hi dum ngeitu fapa a si. That u sih, dum hi kanmah ta a si lai,' an ti. 8 Cucaah a fapa cu an tlaih i an thah i a ruak kha dum lengah an hlonh. 9 "A si ahcun, dum ngeitu nih khan zeitindah a tuah hna lai? A ra tlung lai i a thah hna lai i dum kha midang a hlanh hna lai. 10 Cathiang chungah: 'Inn satu hna nih, santlailo tiin an hlawtmi lung cu santlai bik ah a cang. 11 Cu a tuahtu cu Bawipa a si i khuaruahhar a si kha kan hmuh,' tiah aa ṭialmi hi nan rel bal lo maw?" tiah a ti hna. 12 Judah upa pawl nih khan, hi bianabia cu kanmah a kan chimhnawhchan ti kha an hngalh caah Jesuh cu tlaih an timh, sihmanhsehlaw mizapi kha an ṭih hna caah an kaltak. 13 Farasi mi tlawmpal le Herod mi tlawmpal kha, Jesuh cu a bia in tlaih i zuam awkah an hei thlah hna. 14 A sinah cun an ra i, "Saya, nang cu lihchim hmang lomi na si i mi hme mi ngan ahohmanh an mithmai na zoh hna lo. Sihmanhsehlaw Pathian duhnak tu kha a ning tein na cawnpiak hna, ti kha kan hngalh. Cucaah cun Romans Siangpahrang sin i ngunkhuai pek hi kan phung he aa ralchanh maw ralchanh lo kan chim tuah, ngunkhuai cu kan pe lai maw pe lo dah?" an ti. 15 Hlen an timh kha a hngalh i, "Zeicahdah foih nan ka timh len ko? Ngun tangka phar khat in rak pu u law ka zoh tuah lai," tiah a leh hna. 16 Pakhat an rak pek i, "Aho hmai le aho min dah mah hihi an si?" tiah a hal hna. Annih nih, "Siangpahrang hmai le min," tiah an leh. 17 Cun Jesuh nih, "A si ahcun, Siangpahrang ta a simi cu Siangpahrang cu va pe ko u, Pathian ta a simi cu Pathian kha va pe ko u," tiah a ti hna i an ar ṭhup ko. 18 Cun Sadusi mi kha an ra. (Annih cu thihnak in thawhṭhannak a um lo, a timi an si). 19 An i thawh i, "Saya, Moses nih phung a kan ṭialpiakmi ah: Mipa pakhatkhat cu fa ngei loin a thih ahcun fa a hrinpiak nakhnga a unau nih khan a rohmi a nupi cu a ṭhit awk a si lai, ti a si. 20 Voi khat cu unau pasarih an um i an upa bik nih cun nupi a ṭhit, sihmanhsehlaw fa ngei loin a thi. 21 Cucaah a hun changtu nih khan a rohmi cu a ṭhit, asinain amah zong cu fa ngei loin a thi ve. Cuticun a pathumnak zong kha a si i 22 a dang zong cu an si cio: an pasarihte cun cu nu cu an ṭhit i fa ngei loin an thi dih. Cun a hmanung bik ah cu nu zong cu a thi ve. 23 Cucaah thawh ṭhan ni ah mithi vialte kha thawhter an si ahcun, cu nu cu aho nupi dah a si kun lai? An pasarih tein an ṭhit cio ṭung?" an ti. 24 Jesuh nih cun a leh hna i, "Nan hei palh hringhran dah! Cun zeicahdah kan palh ti nan hngal maw? Cathiang siseh, Pathian ṭhawnnak siseh nan hngalh lo caah a si. 25 Mithi cu thawhter an si tikah vancungmi bantuk pei an si lai cu, an i ṭhi in an i um ti lai lo. 26 Mithi mi thihnak in thawhter ṭhan an si lai le si lai lonak kong cu, Moses cauk chungah khan, burbuk a kangmi kong kha nan rel bal lo maw? Khaka ah khan Pathian nih Moses cu a thawh i, 'Kei cu Abraham Pathian, Isak Pathian, Jakob Pathian ka si,' a ti, tiah aa ṭial ṭung. 27 Cucu a nungmi hna Pathian a si, a thimi hna Pathian a si lo, tinak a si. Nan palh cikcek!" tiah a ti hna. 28 Cuka ah cun bia an i almi a rak theitu Phungbia cawnpiaktu saya pakhat a rak um. Jesuh nih Sadusi mi hna cu ṭhalo tein a leh hna ti kha a hngalh tikah a ra i, "Nawlbia lakah hin zeidah a biapi bik?" tiah a hal. 29 Jesuh nih a leh i, " 'Israel mi hna ngai tuah u; Bawipa kan Pathian lawnglawng hi Bawipa a si. 30 Bawipa nan Pathian cu nan lungthin dihlak le nan nunnak dihlak le nan ruahnak dihlak le nan thazang dihlak in nan dawt lai,' ti hi a biapi bik cu a si. 31 Cun a pahnihnak cu, Na innpa kha nangmah naa dawt bantukin na dawt lai, ti hi a si. Hi hna pahnih nakin a biapi deuhmi nawlbia dang an um ti lo," tiah a ti. 32 Phungbia cawnpiaktu saya nih cun Jesuh cu a leh ve i, "A ṭha ngaingai, saya! Na chimmi cu a hmaan, Bawipa lawnglawng hi Pathian cu a si taktak i pathian dang zeihmanh an um ti lo. 33 Cucaah mi nih hin Pathian cu kan lungthin dihlak le kan ruahnak dihlak le kan thazang dihlak in kan dawt awk a si i kan innpa cu kanmah bantukin kan dawt awk hna a si. Hi nawlbia pahnih zulh hi Pathian sin i khangh raithawinak le raithawinak dangdang zong pekchanhnak nakin a ṭha deuh," tiah a ti. 34 Jesuh nih a bialehnak cu a ṭha ngai ti kha a hmuh i, "Pathian Pennak in naa hlat lo," tiah cu pa cu a ti. Hi hnuah hin cun ahohmanh nih Jesuh kha bia an hal ngam ti lo. 35 Jesuh nih Biakinn chung i a cawnpiak lio hna ah khan hi biahalnak hi a hal hna: A thawh hna i, "Zeitindah Messiah cu David hrinsormi a si te lai, tiah Phungbia cawnpiaktu saya nih an ti khawh? 36 Thiang Thlarau nih pei David cu: Bawipa nih ka Bawipa cu, Na ral hna kha na ke tangah ka chiah hna hlantiang ka orhlei kamah hin ṭhu ko, tiah a chimter cu. 37 David hrimhrim nih Messiah cu 'Bawipa' tiah a ti ahcun, zeitindah David hrinsor cu a si khawh lai?" tiah a ti hna. Mizapi nih cun Jesuh bia cu lunglawm ngaiin an ngaih. 38 A cawnpiak lio hna ah cun, "Phungbia cawnpiaktu saya pawl hi i ralring hna u. Annih cu an puan fual pipi he i chawh i chawdawr tlang ah mi nih upatnak in kan biachawn hna seh, ti a duhmi an si. 39 Pumhnak ah ṭhutdan a ṭha khunmi i ṭhut kha an duh i zapi rawl danghnak ah upatnak hmun i ṭhut kha an duh. 40 Nuhmei kha an ei an hmuar hna i an inn an lo kha an chuh hna. Cun zapi nih kan hmu hna seh tiin thla kha sau pipi in an cam. Hi hna hi cu an dantatnak kha a fak chinchin men ko lai," tiah a ti. 41 Jesuh cu Biakinn tangka chiahnak pawngah khan a ṭhu i tangka a sanhmi kha a zoh hna. Mirum tampi nih khan tangka tampi an sanh lengmang. 42 Khi lioah khan a si a fakmi nuhmei pakhat a ra ve i pia hra tluk a man a simi dar tangka pahnih a sanh ve. 43 Jesuh nih khan a zultu kha a kawh hna i, "Hi a si a fakmi nuhmeinu nih hin tangka kuang ah midang vialte nakin tam bik a sanh. 44 Zeicahtiah a dang nih cun an ngeih hlei kha an sanh, sihmanhsehlaw hi nu hi cu sifak ngai a si ko nain a ngeihmi vialte kha a sanh dih — a nunnak ca i a hman dingmi kha a thawh dih," tiah a ti.
1 Jesuh cu Biakinn in a kalpah ah khin a zultu pakhat nih a thawh i, "Saya, zohhmanh, hi lung ṭhaṭha hna le inn ṭhaṭha hna hi!" tiah a ti. 2 Jesuh nih, "Hi inn ngan pipi hi na hmuh hna a si lo mei? Pakhat hmanh an umnak hmun i a ummi an um te lai lo; an dihlak hin chimh an si dih lai," tiah a leh. 3 Biakinn hmai zawn i a ummi Oliv Tlang khan Jesuh cu a ṭhu i Biakinn kha a cuan i cu lioah cun Peter le Jeim le Johan le Andru kha a sinah a thli in an ra. 4 Amah cu an thawh i, "Hihi zeitik ah dah a si lai? Cun hi thil vialte hi a tlung cang lai, ti hngalhnak ah zei hmelchunhnak dah a um lai, kan chim tuah," tiah an ti. 5 Jesuh nih cun a cawnpiak hna i, "I ralring u. Ahohmanh i hlenter hna hlah u. 6 Ka min i put in mi tampi an ra lai i, 'Amah ka si,' an ti lai i mi tampi kha an hlen hna lai. 7 Cun lamnai i raltuknak thawng nan theih ah siseh, lamhla i nan theih ah siseh, nan awlok chong hlah u. Cu bantuk cu a um awk a si ko, sihmanhsehlaw a donghnak a phan cang, tinak a si lo. 8 Ram khat le ram khat an i do lai, peng khat le peng khat an i tu lai. A kenkip ah lihnin a um lai i mangṭam a tlung lai. Hi thil hna hi nau nganfah hramthawk bantuk khi an si. 9 "Nannih cu i ralring u. Zeicahtiah mi nih an in tlaih hna lai i zung ah an in chuahpi hna lai, pumhnak inn ah khan an in tuk hna lai i an in den hna lai, uktu bawi le siangpahrang hna hmaiah, annih cu Thawngṭha chimh awk le keimah ruangah an in chuahpi hna lai. 10 Sihmanhsehlaw caan donghnak a phak hlanah Thawngṭha Bia cu miphun kip sinah chim hmasa a si lai. 11 Cun an in tlaih hna i zung i an in chuahpi hna tikah, zeidah kan chim lai, tiah a hlankan in nan lungre rak thei hlah u; a caan a phak tikah chim awk ding cu pek nan si te ko lai, cucu chim te ko u. Zeicahtiah nan chimmi bia cu nanmah bia a si lai lo, Thiang Thlarau nih an pekmi hna bia a si lai. 12 U le nau kha thihnak phak tiangin an i rawi lai, pale nih an fale kha cu bantuk cun an tuah hna lai i an fale zong nih an nule an pale kha an doh hna lai i thahnak an inter hna lai. 13 Keimah ruangah mi kip nih an in huat hna lai. Sihmanhsehlaw a dongh tiang a hmunmi cu khamh nan si lai. 14 "Sihmanhsehlaw 'Ṭhiotu Fihnung' cu a dirnak ding a si lomi hmun ah a dir kha nan hmuh tikah (A reltu nih hi a sullam cu hngal u!) khi tikah Judea ram i a ummi cu tlang leiah nan zam awk a si lai. 15 Inncung i a ummi cu innchung ah i phorh ding thil lak awkah ṭum hlah seh; 16 cun lo i a ummi zong a angki vaa lak awkah inn ah tlung hlah seh. 17 Cu caan cu fapawi nu le ngakchia no a ngeimi nu hna caah cun a har hringhran ko lai. 18 Hi thil a tlun hi khuasik caan ah a si nakhnga lo, Pathian sinah thla va cam tuah u. 19 Zeicahtiah hi a tlung dingmi harnak hi Pathian nih vawlei a ser hramthawk in atu tiangah a um bal lomi thil, ṭih a nung bikmi harnak a si lai. Hmailei zongah cu bantuk cu a um ti lai lo. 20 Bawipa nih cu caan cu rak tawiter hlah seh law cu, khamhmi ahohmanh an um hnga lo. Sihmanhsehlaw a thimmi a mi hna caah cun, cu caan cu a tawiter. 21 "Cun nannih cu ahohmanh nih, 'Messiah cu hika ah a um,' an in ti hna ah siseh, 'Khika ah a um,' an in ti hna ah siseh, va zum hna hlah u. 22 Zeicahtiah Messiah deu le nal profet hna kha an chuak lai. Pathian thimmi hna hmanh kha, a si khawh chungin hlen khawhnak dingah hmelchunhnak le khuaruahharnak an ser hna lai. 23 Ralring tein um ko u. A hlankan in zeizong vialte kan chimh dih cang hna hih," tiah a ti. 24 "Cu harnak caan hnuah cun ni cu a mui lai i thlapa cu a vang ti lai lo, 25 van in arfi cu an tla lai i van ṭhawnnak cu an i hnin lai. 26 Mi Fapa cu a lang lai i khuadawm chung khin lianhngannak le sunparnak he a ra lai. 27 Vawlei kil li ah khan a vancungmi kha a thlah hna lai i vawlei khattelei deng in khattelei deng tiang Pathian thimmi minung kha an pumh hna lai. 28 "Theipi kung ah hin cawnpiaknak i lak u. A nge an hung hrin i an hung no i a hnah kha an hung corh tikah, ṭhal caan a nai cang, ti kha nan hngalh. 29 Cu bantukin hi thil hna an hung um kha nan hmuh tikah, a caan kha a nai cang, innka a phan cang, ti kha nan hngalh lai. 30 Mah hihi philh hlah u: Hi thil vialte hi, atu i a nungmi hna an thih dih hlanah hin a tlung lai. 31 Van le vawlei cu an rawk lai nain ka bia cu a rawk lai lo. 32 "Sihmanhsehlaw cu ni le suimilam caan cu ahohmanh nih an hngal lo, vancung i a ummi vanmi zong nih an hngal lo, Fapa zong nih ka hngal lo, Pa lawnglawng nih a hngalh. 33 Cu caan cu zeitik ah a si lai kha nan hngalh lo caah i ralring te le fimhring tein um ko u. 34 Zei he dah aa lawh lai ti ahcun, khualtlawn ah a kal i a sinum hna kha, nan rian cio kha ṭha tein rak ṭuan u, tiah a ti i innka cawngtupa kha, ṭha tein rak cawng, tiah bia a riah tatu inn bawi he aa lo lai. 35 Inn ngeitu kha zeitik i a kir lai nan hngalh lo caah ṭha tein hngak ko u. Zanlei ah a si kho, zanṭim ah a si kho, khuadei hlanah a si kho, nichuak ah a si kho. 36 Duak tiah a rat sual ahcun i hngilh hluahmah in, in tanh hna hlah seh. 37 Nan sin ka chimmi hi mi dihlak sin i ka chim a si: Hngilh loin hngak ko u," tiah a ti hna.
1 Atu cu Lanhtak Puai le Thilnu Cawh Lo Changreu Puai kha ni hnih lawng a duh cang. Tlangbawi upa hna le Phungbia cawnpiaktu saya pawl hna kha, Jesuh cu a thli tein tlaih i thah khawhnak ding lam kha an kawl. 2 "Puai lio i kan tuah ahcun a ṭha lai lo, mi an i tuai tuk sual lai," an ti. 3 Jesuh cu Bethani khua i Simon, thinghmuipa inn ah khan rawl a hrawng. Rawl an ei lioah khan minu pakhat a rung lut i lungrang thawl khat tein zihmui a ṭha bik phun kha a rak i put. Thawl kha a khuai i zihmui cu Jesuh lu ah khan a bungh. 4 Cuka i a ummi a cheu cu an thin a hung i, "Zeicahdah mah ti khin zihmui khi a hlohlak hnga? 5 Fawi tein tangka za thum ah zuar khawh a si ṭung hnga. Cun cu tangka cu misifak pe hna seh law a ṭha deuh hnga lo maw?" an ti i minu cu fak piin an mawhchiat. 6 Sihmanhsehlaw Jesuh nih a thawh hna i, "Ngol ko u! Amah nan ti lengmangnak zei um hlah. Ka ca i a tuahmi hi aa dawhmi le a ṭhami thil a si ko. 7 Sifak cu nan sinah pei an um zungzal ko lai cu, bawmh nan duh tik hna paoh ah nan bawmh khawh ko ṭung hna. Kei cu nan sinah ka um zungzal ṭung lai lo. 8 A tuah khawh tawk pei a tuah cu: ka pum zihmui in a ka toih cu vui awk ca i a hlankan in a rak ka timh chung pei a si cu. 9 Hihi philh hlah u: Vawlei cung khuazakip i thawngṭha an chimnak paoh ah hi nu nih a tuahmi hi amah philh lonak caah an chim camcin lai," tiah a ti. 10 Zultu pahleihnih hna lak i aa tel vemi Judas kha, tlangbawi upa hna sinah a va kal i Jesuh cu nan kut chungah kan pek hna lai, tiah a va ti hna. 11 A chimmi kha an theih tikah an lung aa lawm ngaingai i tangka kan in phalh lai, tiah bia an kam. Cucaah Judas cu Jesuh rawi khawhnak ding caah khan, caan rem a kawl. 12 Thilnu Telhlo Changreu Puai, a ni khat ni, Lanhtak Puai rawldanghnak ca i tuufa an thah hna ni ah khan, Jesuh cu a zultu hna nih khan, "Khuazei ah dah Lanhtak Puai Zanriah ka timhpiak u, ti na kan duh?" an ti. 13 Khi tikah an lak i pahnih kha a thlah hna i, "Khuapi chungah va lut u law ti-um aa putmipa pakhat nih a rak in ton hna lai. 14 A luhnak inn tiang khan hei zul u law, cu inn ngeitupa cu, 'Khuazei ah dah Sayapa nih, ka zultu hna he Lanhtak Zanriah kan einak ding khaan cu a si, a ti,' tiah nan va ti lai. 15 Cun cungdot ah thil tlingte le ṭha tein an timh cia dildelnak khaan kaupi pakhat an hmuhsak hna lai i cuka ah cun zanriah cu nan va timh lai," tiah a ti hna. 16 A zultu cu an kal i khuapi chungah cun an va lut i Jesuh nih a chimh hna ningte khan zeizong vialte cu an va hmuh; cun Lanhtak Puai Zanriah cu an va timh. 17 Ni a tlak hnuah Jesuh le zultu hleihnih cu an ra. 18 Cabuai i rawl an ei lioah khan Jesuh nih a thawh hna i, "Nan lak i pakhat nih hin nan ka rawi lai, ka sin i rawl a eimi nih hin," tiah a ti. 19 A zultu cu an awlok a chong i pakhat hnu pakhat in, "Kei cu ka si hnga i mei?" tiah an ti cio. 20 Jesuh nih cun a leh hna i, "Nannih hleihnih lak i pakhat hi nan si lai, kheng chung i keimah he a changreu a hnimṭitu hi nan si ko lai. 21 Cathiang nih a chimning in Mi Fapa cu a thi ko lai, sihmanhsehlaw Mi Fapa a rawitu ding cu, a caah a va poi hringhran dah! Cu pa cu chuak lo lawlaw in rak um seh law a caah a ṭha deuh hnga," tiah a ti. 22 Annih nih zanriah cu an ei lioah khan Jesuh nih changreu kha aa lak i lunglawmhnak in thla a cam hnuah a cheu i a zultu kha a pek hna. "Ei u, hihi ka pum a si," a ti hna. 23 Cun hrai kha aa lak i Pathian sinah lawmhnak a chim hnuah a zultu kha a pek hna i an dihlak in an din. 24 Jesuh nih cun, "Mi tampi ca i ka thletmi ka thi a si. Pathian biakamnak a fehtertu ka thi a si. 25 Pathian Pennak chungah a thar in ka din ṭhan hlan cu, hi mitsur hang hi ka ding ti lai lo," tiah a ti. 26 Cun hla fung khat an sak dih in Oliv Tlang ah khan an kal. 27 Jesuh nih cun annih cu, "Cathiang chungah, 'Pathian nih tuukhal cu a thah lai i tuu cu an i ṭhek dih lai,' tiah aa ṭial bangin, nan dihlak in nan ka zamtak lai. 28 Sihmanhsehlaw thihnak in thawh ṭhanter ka si hnuah, nan hmaiah Galilee ah ka rak kal lai," tiah a ti hna. 29 Peter nih, "A dang nih an dihlak in in zamtak hna hmanh seh law, kei cu kan zamtak hrimhrim lai lo," tiah a hun leh. 30 Jesuh nih Peter cu, "Hihi philh hlah, ar voi hnih a khuan hlanah, ka hngal lo, tiah voi thum tiang na ka ti lai," tiah a ti. 31 Peter nih cun ṭhawng chinchin in a leh i, "Nangmah sin i ka thih ve a herh zongah, nangmah cu, ka hngal lo, kan ti bal lai lo," tiah a ti. Cun zultu dang vialte zong nih khan cuticun an ti cio. 32 Gethsemane an timi hmun kha an phan i Jesuh nih a zultu hna cu, "Thla ka cam karah nannih cu hika ah hin rak ṭhu u," tiah a ti hna. 33 Cun Peter le Jeim le Johan kha aa kalpi hna. Khuaruahhar vansang au in a um i 34 annih cu a thawh hna i, "Ka lungre a thei tuk hringhran. Cucaah hika ah hin rak um u law hngilh loin rak ka hngak u," tiah a ti hna. 35 Hmailei ah tlawmpal a va kal i vawlei ah a bawk i, a si khawh ahcun harnak khan a luat khawh nakhnga, thla a cam. 36 "Ka Pa, ka Pa, nangmah nih cun zeizong vialte na tuah khawh dih ko. Hi hrai hi ka lakpiak ko. Sihmanhsehlaw keimah duhnak bantuk cun si hlah seh, nangmah duhnak bantukin si ko seh," tiah a ti. 37 Cun a ra kir i a zultu kha an pathum in an rak i hngilh. Cun Peter cu a thawh i, "Suimilam pakhat chung hmanh hngilh loin na um kho lo maw?" tiah a ti. 38 Cun annih cu, "Nan dihlak in hngilh loin um u law tukforhnak chungah nan tlak nakhnga lo, thla cam u, thlarau nih cun a duh ko, sihmanhsehlaw titsa cu a thazang a tlawm," tiah a ti. 39 A va kal ṭhan i thla a va cam ṭhan. 40 Cun a zultu hna sinah khan a ra ṭhan i an rak i hngilh ṭhan kha a hmuh hna; an mit kha a au in an au kho lo. Cun zeiti chawnh awk an hngal lo. 41 A voi thumnak a rat tikah khan a thawh hna i, "Nan i hngilh ko rih maw? Nan i din ko rih maw? A za cang! A caan a phan cang. Zohhmanh u, Mi Fapa cu misual mi hna kut chungah pek a si cang. 42 Tho u law, kal u sih. Zohhmanh u, keimah a ka rawitu cu hika a phan cang," tiah a ti. 43 Cu ti i bia a chim lengmang lioah cun zultu hleihnih hna chung i aa tel vemi Judas kha a ra phan. Tlangbawi upa hna le Phungbia cawnpiaktu saya hna le upa hna nih an fialmi hna mibu kha nam le thingtan i put in a sinah cun an ra. 44 A rawitu nih cun annih kha hmelchunhnak a pek cia hna i, "Ka hnamhmi cu tlaih nan duhmi kha a si lai. Amah cu nan tlaih lai i nan kalpi lai," tiah a ti hna. 45 Judas nih cun a ra phak cangka in Jesuh cu a hei fuh colh i, "Saya," a ti i a hnamh. 46 Cucaah Jesuh cu an tlaih i fek tein an khih. 47 Cuka i a dirmi pakhat nih a nam kha aa zuh i Tlangbawi Ngan salpa hnakhaw kha pet lakin a tuk. 48 Cun Jesuh nih annih cu a thawh hna i, "Kei cu mifir hei sining law cu bang, nam le thingtan he tlaih awkah nan ka fuh. 49 Nifate nan sinah ka um i Biakinn ah kan cawnpiak lengmang ko ṭung hna, nan ka tlaih ṭung lo. Sihmanhsehlaw Cathiang chung bia a tlin cu a herh ko," tiah a ti. 50 Khi tikah a zultu vialte nih khan an zamtak. 51 Cu lioah cun tlangval pakhat, puan lawng aa aihmi nih Jesuh cu a zulh. Amah cu tlaih an timh i 52 a puan cu a lektak i a taklawng in a tli. 53 Cun Jesuh cu Tlangbawi Ngan inn ah khan an kalpi i khika ah khan tlangbawi upa vialte hna le upa hna le Phungbia cawnpiaktu saya hna kha an rak i pum. 54 Peter nih khan lamhlatpi khin a zulh i Tlangbawi Ngan inntual ah cun a va lut. Cuka ah cun ralveng pawl sinah khan a ṭhu i mei a to. 55 Tlangbawi upa hna le biaceihtu hna nih cun Jesuh cu thihnak daan pek khawhnak ding caah a sual kawl an i zuam, sihmanhsehlaw zeihmanh an hmu kho lo. 56 Tehte tampi nih Jesuh kong ah khan lih an chim len cio, sihmanhsehlaw an bia kha an i kheng kho lo. 57 Cun mi tlawmpal khi an hung dir i, 58 " 'Minung sakmi Biakinn hi ka ṭheh lai i minung nih sakmi a si lomi biakinn ni thum chungah ka sak ṭhan lai,' tiah a chim kan theih," tiin lih an puh. 59 Sihmanhsehlaw anmah hmanh cu an bia aa khat kho lo. 60 An dihlak hmaiah cun Tlangbawi Ngan cu a dir i, "Sual an in phawtmi cu a lehnak zei tal na ngei lo maw?" tiah Jesuh cu a hal. 61 Sihmanhsehlaw Jesuh cu dai tein a um ko i zeihmanh a let lo. Cun Tlangbawi Ngan nih cun, "A Liannganmi Pathian Fapa Messiah cu na si maw?" tiah a hal ṭhan. 62 Jesuh nih, "Ka si. Cun Mi Fapa cu A Liannganmi Pathian orhlei kamah ka ṭhut i vancung khuadawm he ka rat kha na ka hmuh te lai," tiah a ti. 63 Tlangbawi Ngan nih cun a puan kha a thleh i, "Tehte dang kan herh ti maw? 64 Bia ṭhalo a chimmi cu nan theih cio ko. Zeitindah nan ruah?" tiah a ti. Jesuh cu a sual i thih awk a tlak, tiin an zapi an hna a tla. 65 Cun mi cheukhat nih Jesuh cu cil an chak i a mit an huh i an bengh. "Ahodah an beng, kan chim tuah," an ti. Cun ralvengtu pawl nih khan an kalpi i an bengh. 66 Peter cu inntual i a um lioah khan Tlangbawi Ngan sinumnu ngakchia pakhat kha a ra i amah cu a hmuh tikah, 67 "Nangmah zong hi, Nazareth khuami Jesuh he a rak um ṭimi na si ko," tiah a ti. 68 Sihmanhsehlaw Peter nih cun aa pheh i, "Ka hngal lo. Na chimmi hi a kong zeihmanh ka hngal lo," tiah a leh. Cun kutka lei kalnak lam ah khan a hei i thawn. Cu caan te ah cun ar a khuang. 69 Ngakchia nu nih khan cuka ah cun a va hmuh ṭhan i a pawng i a dirmi hna sinah cun, "Hi pa hi anmah lak i aa telmi a si," tiah a ti. 70 Sihmanhsehlaw Peter nih cun aa pheh ṭhan. Cun tlawmpal ah khin cuka i a dirmi hna nih khan Peter cu, "Anmah lak i aa telmi na si cu naa pheh kho bal lai lo, Galilee mi pei na si ko hi," an ti. 71 Cun Peter nih cun chiat a ser i, "Biatak ka chim lo ka chim lo ahcun Pathian nih dan ka tat seh. Nan chim lengmangmi pa hi ka hngal hrimhrim lo," tiah a ti. 72 Cu caan te ah cun ar kha a khuang ṭhan i Peter nih cun Jesuh i, "Ar voi hnih a khuan hlanah voi thum na ka hlawt lai," a rak timi kha a lung ah a hung chuak. Cun a ṭap.
1 A thaizing zingkate ah tlangbawi upa hna cu haotu upa hna le phungbia cawnpiaktu saya hna le biaceihtu vialte hna he khan hnawhsare in an i pum i khua an khang. Jesuh cu thir cikcin in an khih i an kalpi i Pilat kut chungah khan an pek. 2 Pilat nih, "Judah mi siangpahrang cu na si maw?" tiah a hal. Jesuh nih, "Na chim bangin ka si," tiah a leh. 3 Tlangbawi upa hna nih khan Jesuh cu bia tampi an puh. 4 Cucaah Pilat nih cun a hal ṭhan i, "Na let hna lai lo maw? An in puhmi hi a tam ṭung," tiah a ti. 5 Jesuh cu holh loin a um i Pilat cu a khuaruah a har. 6 An Lanhtak Puai paoh ah khan Pilat nih an duhmi thongtla pakhat kha a chuahpiak tawn hna. 7 Cu lioah cun ral a thomi, midang hna he ral an thawhnak i lai a nawngmipa Barabbas kha thong chungah cun a um. 8 Mizapi nih khan, voi dang i na kan tuahpiak tawnmi kha kan tuahpiak rih tuah, tiah an ra hal tikah, 9 Pilat nih cun a rak thawh hna i, "Judah mi siangpahrang hi kan chuahpiak seh, ti nan ka duhmi cu a si maw?" tiah a rak hal hna. 10 Jesuh ka kut chung i an ka pek hi, tlangbawi upa nih an nahchuah caah a si, ti kha Pilat nih ṭha tein a hngalh. 11 Sihmanhsehlaw tlangbawi upa pawl nih cun mizapi kha, Barabbas na kan chuahpiak lai, tiah Pilat kha nan hal lai, tiah an forh hna. 12 Pilat nih mizapi cu a thawh ṭhan hna i, "A si ahcun, Judah siangpahrang nan timi pa hi tah zeitindah ka tuah kun lai?" tiah a ti hna. 13 "Vailam ah tah ko," tiah an au. 14 Pilat nih cun, "Zei sualnak dah a tuah?" tiah a ti. Sihmanhsehlaw fak chinchin in an au i, "Vailam ah tah ko," an ti. 15 Mizapi kha Pilat nih an lung ton a duh hna caah Barabbas cu a thlahpiak hna. Cun Jesuh cu fung in a tukter hna i vailam i tah awkah a pek hna. 16 Ralkap nih Jesuh cu Mangki bawi inntual ah khan an luhpi i an hawidang zong kha an auh hna. 17 Jesuh cu puan sen kha an aih i hling in an phiarmi bawiluchin kha a lu ah an chinh. 18 Salaam kha an pek i, "Judah mi Siangpahrang hi saupi nung ko seh!" an ti. 19 A lu ah cun fung in an tuk i an cil an chak i an khuk an i bil i a hmaiah cun an kun. 20 Cu ti i an cawhdeh dih in puan sen kha an hawh i amah puan kha an aihter ṭhan. Cun vailam i tah awkah an chuahpi. 21 Lampi ah mipa pakhat a min Simon a simi, khuate lei in Jerusalem leiah a kalmi kha an ton. Amah cu Jesuh vailam tahnak thing kha an hnek i an putter. (Hi Simon hi Sairin khuami Alekzandar le Rufas pa kha a si). 22 Jesuh cu Golgotha hmun kha an phakpi, Golgotha a sullam cu Luruh Hmun tinak a si. 23 Mitsur zu, Mura an timi he an cawhmi kha an hun tuh i a ding duh lo. 24 Cuticun vailam ah cun an khenh chih i a puan kha an i phaw i aho nih dah a zei zawn hi a co lai tinak caah, camcawh fung in an zuh. 25 Vailam i an khenh chih kha zinglei suimilam pakua ah a si. 26 Sual an phawtnak ca cu, "Judah mi hna Siangpahrang," tiah an ṭial. 27 Jesuh sinah cun a orhlei kamah pakhat, a kehlei kamah pakhat, mifir pahnih an tah ve hna. 28 Cuticun Cathiang nih, "Misual hna sinah telh chih a si," a timi cu a tling. 29 Aa chawkmi hna nih khan Jesuh cu an lu an thinhnawh i an nihsawh: "Biakinn cu na ṭheh dih i ni thum chungah na sak dih ṭhan taktak hi ta! 30 Atu cu nangmah kha vailam cung khan rung ṭum law i khamh tuah ngat," an ti. 31 Cu bantuk ṭhiamṭhiam in tlangbawi upa hna le Phungbia cawnpiaktu saya hna nih khan Jesuh cu an nihsawh i, "Midang khamh ṭung in amah vial aa khamh kho ṭung lo hi ta! 32 Israel mi siangpahrang Messiah cu, atu hrimhrim ah hin vailam tahnak cung hin rung ṭum seh law pei kan hmuh hnga i kan zumh khawh hnga cu!" an ti. Cun a sin i vailam an tahmi pahnih hna zong nih khan an nihsawh ve. 33 Chun ah cu ram cu a dihlak in muihnak nih suimilam pathum chung a khuh. 34 Zanlei suimilam pathum ah Jesuh cu fak piin a au i, Eloi, Eloi, lema sabakthani,'' tiah a ti, a sullam cu, "Ka Pathian, ka Pathian, zeicahdah na ka kaltak," ti a si. 35 Cuka i a ummi a cheukhat nih cu ti i a au cu an theih i, "Ngai hmanh u, Elijah a auh cuh!" an ti. 36 Pakhat pa cu a va tli i puanchia kha mitsur zu thor chungah khan a hnim i fung par ah a ṭemh i Jesuh cu a hmur ah khan a hun tuh. "Amah kha vailamtahnak cungin ṭhumh awkah Elijah kha a rung ṭum hnga maw, zoh hnik u sih," tiah a ti. 37 Jesuh cu fak piin a au i a cat. 38 Biakinn chung i aa zarmi puan kha a lu in a taw tiang cheu hnih ah aa cheu. 39 Vailamtahnak hmai i a dirmi ralbawipa nih khan, Jesuh a au le a cah kha a hmuh tikah, "Hi pa cu Pathian Fapa a si hrimhrim ko," tiah a ti. 40 Cuka ah cun nu tlawmpal an um i lamhlat nawn in an cuanh. Cu hna lakah cun Salome le. Mary Magdalin le Jeim ngakchia deuh le Joses i an nu Mary kha an um ve. 41 Jesuh cu Galilee i an um lioah khan an rak zulh tawn i an rak bawmh tawn. Amah he Jerusalem ah a rami nu tampi zong cuka ah cun an um ve. 42 Zanlei sang tlai nawn a si cang i Arimathea khuami Josef kha a ra phan. 43 Amah cu biaceihtu bu chung i an upatmi pakhat a si ve i Pathian Pennak a rat lainak aa ruahchihmi a si. Cu ni cu cawnningani a si (cucu Sabbath ni a nizan kha a si). Cucaah Josef cu ralṭha ngaiin Pilat sinah khan a vung lut i Jesuh ruak kha a hal. 44 Pilat nih Jesuh cu a thi cang, ti kha a theih tikah a khuaruah a har ngai. Ralbawipa kha a auh i Jesuh cu a thi cang maw, tiah a hal. 45 Ralbawi chimmi bia kha a theih hnuah Pilat nih Josef cu, Jesuh ruak kha na lak khawh, tiah a ti. 46 Josef nih cun khiangrang puan pakhat a cawk i a ruak cu a ṭhumh hnuah puan cun a zual i lung an vihmi thlan chungah a vui. Cun thlanka ah cun lung nganpi a khar. 47 Mary Magdalin le Joses nu Mary nih khan cucu an zoh i Jesuh an phumnak hmun kha an hmuh.
1 Sabbath ni kha a dih tikah Mary Magdalin le Jeim nu Mary le Salome nih khan Jesuh ruak thuh awk caah cun zihmui kha an i cawk. 2 Zarhpi Ni zingkate, nichuah kate ah khin, thlan ah cun an va kal. 3 Lam ah cun pakhat le pakhat kha. "Thlan khar lung kha ahodah a kan thawnpiak te lai," tiah an i ceih. 4 (A khar cu lung nganpi a si). Cun an hun zoh i lung kha a rak i thawn cang. 5 Cucaah thlan chungah cun an lut i puan rang aa aih i orhlei kam i a rak ṭhumi tlangval pakhat an hmuh i an lau ngaingai. 6 Cu pa nih cun, "Nan thinphang hlah u. Vailam ah an tahmi Jesuh, Nazareth khua mi kha nan kawl ti kha ka hngalh. Sihmanhsehlaw hika ah hin a um ti lo — a tho cang! An vuinak hmun hi zoh hmanh u. 7 Cucaah cun va kal u law a zultu hna kha le Peter kha, 'Amah nih an chimh hna bantuk te khan nan hlanah Galilee ah a kal i cuka ah cun nan va hmuh lai,' a ti tiah va chim hna u," tiah a ti. 8 Cucaah an chuak i an thin a phang i an ning a ṭih caah thlan cun an le. An thin a lau tuk caah ahohmanh an chim hna lo. [ 9 Jesuh cu thihnak in a thawh hnuah Zarhpi ni zingkate ah khan Mary Magdalin sinah khan a lang hmasa bik. Cu nu cu a chungin khuachia pasarih a chuahpiakmi nu kha a si. 10 Mary cu a kal i a hawile kha a chimh hna. An ngaih a chia, an rak ṭap i, 11 Jesuh cu a nung i ka hmuh, tiah a chimh hna tikah khan an zum lo. 12 Hi hnuah hin zultu pahnih hna cu khuate lei i an kal lioah khan an sinah Jesuh cu a lang. 13 An kir i a dang kha an chimh hna, sihmanhsehlaw an zum hna lo. 14 A hmanung bik ah Jesuh cu a zultu pahleikhat hna sinah khan rawl an ei lioah a lang. Zumhnak an ngeih lo ruang le a nung in a hmumi hna chimmi kha an zumh khawh lo ruangah a sik hna. 15 A thawh hna i, "Vawlei cung khuazakip ah va kal u law miphun kip kha thawngṭhabia va chim hna u. 16 A zum i tipilnak a ingmi paoh nih khamhnak an hmuh lai, a zum lomi paoh nih sual phawtnak an hmuh lai. 17 A zummi pawl cu hi ṭhawnnak hmelchuhnak hi pek an si lai: ka min in khuachia an ṭhawl khawh hna lai, holh theih loin an holh lai, 18 rul kha an tlaih hna i sivai an din zongah zeiti hmanh in an um lai lo; mizaw cungah an kut an chuan lai i an dam lai," tiah a ti. 19 Jesuh nih bia a ruah dih hna cun vancung ah a kai i Pathian orhlei kamah khan a hung ṭhu. 20 A zultu kha khuazakip ah an kal i thawngṭhabia kha an chim; Pathian nih an sinin rian a ṭuan i an phungchimmi kha ahmaan, tiah ṭhawnnak hmelchunhnak a pekmi hna thawngin a langhter.
1 Theofilas Bawipa, Mi tampi nih kan lak i thil a cangmi kong hi an thiam khawh chungin ṭial an rak i zuam cio. 2 Cu an ṭialmi cu a hramthawk lio i an mit in a rak hmumi hna nih an kan chimhmi le hi bia a rak chimtu hna nih an rak chimning khan a si. 3 Cucaah Bawipa, kei zong nih hi thil vialte hi a hramthawk tein ṭha tein ka dothlat cikcek hnuah na sinah aa tlai thliahmah in ṭial ah a ṭha tiah ka ruah. 4 A chimh zong an in chimh len cangmi kong biatak kha a ningcang tein na hngalh khawh nakhnga, tiin hi ca hi kan kuat. 5 Herod kha Judea Siangpahrang a si lioah, Abijah tlangbawi phu chungah aa telmi tlangbawi pakhat a min Zekhariah an timi kha a rak um. A nupi min cu Elizabeth a si i amah zong cu tlangbawi hrinthlak a si ve. 6 An pahnih in Pathian hmaiah nuncan ṭha in a nung i Bawipa nawlbia vialte le phunglam vialte tlamtling tein a zulmi an si. 7 Elizabeth cu a cin caah fa pakhat hmanh an ngei lo. An pahnih in an tar ngaingai cang. 8 Ni khat cu Zekhariah kha, nifate an rianṭuannak ah a caan a hung phan ve i Pathian hmaiah khan tlangbawi rian cu a ṭuan. 9 Tlangbawi hna nih an zulhmi phungning in, biakṭheng cung i rimhmui khangh awkah khan amah cu camcawhfung zuh in an thim. Cucaah Bawipa Biakinn chungah khan a vung lut. 10 Cu caan cu rimhmui khangh lio i mi zapi Biakinn leng i thla an cam caan kha a si. 11 A sinah Bawipa vancungmi pakhat a rung lang i rimhmui an khanghnak biakṭheng orhlei kamah khan a dir. 12 Amah cu Zekhariah nih khan a hmuh tikah a lau i a thin a phang. 13 Sihmanhsehlaw vancungmi nih cun a thawh i, "Zekhariah, na thinphang hlah! Pathian nih na thlacamnak kha a theih i na nupi Elizabeth nih fapa an hrinpiak lai. A min ah Johan na sak lai. 14 Amah cu a chuah tikah naa lawm hringhran lai i midang tampi zong an i lawm ngaingai ve lai. 15 Zeicahtiah amah cu Bawipa hmaiah mi ngan a si lai. Zu siseh, zureu siseh, zeihmanh a ding lai lo. A chuahka hrimhrim in Thiang Thlarau in a khat lai; 16 Israel mi mi tampi kha Bawipa an Pathian sinah a kirpi ṭhan hna lai. 17 Amah cu Pathian thlahmi lamkaltu a si lai i profet Elijah bantukin a fekmi le a ṭhawngmi a si lai. Pale hna le fale hna kha hmunkhat ah a fonh ṭhan hna lai i nawl a ngai lomi hna kha miding mi hna ruahnak lam leiah a hruai ṭhan hna lai. Bawipa mi hna cu Bawipa ca i aa tlakmi minung si awkah a rak timh hna lai," tiah a ti. 18 Zekhariah nih vancungmi cu a thawh i, "Cucu a si kho lai tiah zeitindah ka zumh khawh lai? Zeicahtiah kei cu ka tar cang i ka nupi zong a tar ve fawn," tiah a ti. 19 Vancungmi nih cun a leh i, "Kei cu Gabriel, hi thawngṭha nangmah chimh awkah a ka thlahtu Pathian hmai i a dirmi cu ka si. 20 Ka bia cu na ka zum lo, asinain a caan a phak tikah cun a tling ṭhiamṭhiam te ko lai. Na zumh lo caah holh kho loin na um lai i kan chimhmi thil kha a tlin ni a phak hlantiang bia pakhat hmanh na chim kho lai lo," tiah a ti. 21 Cu chung cu zapi nih khan Zekhariah cu an rak hngah ko i zeicahdah Biakinn chungah cu cancan cu a rauh hnga, tiah an khuaruah a har. 22 A hung chuah tikah a chawn kho hna lo — cucaah Biakinn chungah langhnak a hmu ti kha an hngalh. A kut in hmelchunhnak kha a tuah i cuticun a chawnh hna, bia pakhat hmanh a chim kho lo. 23 Biakinn chung i a rianṭuannak caan kha a dih tikah Zekhariah cu inn ah a ṭin. 24 Cu hnu tlawmpal ah cun a nupi Elizabeth cu nau kha a hun pawi i thla nga chung leng chuak loin a um. 25 A thawh i, "Atu cu a donghnak ah Bawipa nih hi tlukin maw a ka bawmh! Zapi hmai i ka ningzahnak cu a ka lakpiak cang," tiah a ti. 26 Elizabeth pumlawnglo in a um thla ruknak ah, Pathian nih vancungmi Gabriel cu Galilee ram khua pakhat Nazareth timi ah cun a thlah. 27 Siangpahrang David hrinsor a simipa Josef an timi he kan i ṭhi lai tiah bia aa kammi ngaknu kha bia na va chimh lai tiah a fial. Cu ngaknu cu a min ah Mary a si. 28 Vancungmi kha a sinah cun a ra i. "Na cungah daihnak um ko seh. Bawipa cu na sinah a um i thluachuahnak tam piin an pek," tiah a ti. 29 Vancungmi bia kha a theih tikah Mary cu a lau ngaingai i a bia kha a sullam zeidah a si hnga tiah a khuaruah a har. 30 Vancungmi nih cun a thawh i, "Mary, na thinphang hlah. Zeicahtiah Pathian nih nangmah cu vel an ngeih. 31 Nau na pawi lai i fapa na hrin lai i a min ah Jesuh na sak lai. 32 Amah cu milian mingan a si lai i Cungnung Bik Pathian fapa tiah ti a si lai. Amah a hringsortu Siangpahrang David bawiṭhutdan kha Pathian nih amah cu a pek i 33 Jakob tefa hna siangpahrang zungzal in a si lai, a pennak cu zeitikhmanh ah a dong lai lo," tiah a ti. 34 Mary nih vancungmi cu a thawh i, "Ngaknu thiang ka si ṭung, zeitindah hihi cu a si khawh lai?" tiah a ti. 35 Vancungmi nih cun a leh i, "Thiang Thlarau kha na cungah a phan lai i Pathian ṭhawnnak cu na cungah aa fu lai. Hi ruangah hin a thiangmi fa cu Pathian Fapa tiah ti a si lai. 36 Hi hleiah na rualchan Elizabeth kha a tar leiah fa a pawi i a cing ti i rak ti tawnmi kha atu hi a thla ruknak a si cang, 37 zeicahtiah Pathian nih a tuah khawh lomi thil zeihmanh a um lo," tiah a ti. 38 Mary nih a thawh i, "Kei cu Bawipa salnu ka si ko, na chim bang cun ka cungah si ko seh," tiah a ti i vancungmi nih cun a kaltak. 39 Cu hnu tlawmpal ah Mary cu aa tim i Judah tlangram i a ummi khua pakhat ah khan khulrang in a hung kal. 40 Zekhariah inn ah khan a vung lut i Elizabeth cu a vun biak. 41 Elizabeth nih Mary i a vun chawnhnak bia kha a theih tikah a paw chung i a fate cu a rak cawl. Elizabeth cu Thiang Thlarau in a khat i, 42 aw thangpi in, "Nangmah cu nu vialte lakah thluachuak bik nu na si. Na hrin laimi na fa zong hi fa thluachuak a si. 43 Zeicahdah ka Bawipa nu nih hin kei tehna hi na hung ka tlawn? 44 Na ka biakchawnhnak ka theih cangka khan pei ka chung i ka fate cu lunglawmhnak in aa hlawh len cu. 45 Bawipa bia na sinah a rami kha a tling taktak lai ti zumh cu na caah lunglawmh awk a va si hringhran dah," tiah a ti. 46 Mary nih aa thawh i: "Thanh tuah, ka lungthin, Bawipa lianhngannak cu. 47 I lawm tuah, ka nunnak, Bawipa na khamhtu cungah; 48 A salnu hi hi tluk minauta ka si nain a ka philh lo. Nihin thawk in hmailei ah cun mi vialte nih thluachuaknu an ka ti lai; 49 Bawipa, a ṭhawngmi Pathian nih ka cungah khuaruahhar tuk in rian a ṭuan. A min cu a thiang; 50 Amah a ṭihmi vialte kha chan khat hnu chan khat in a zaangfah hna. 51 A ṭhawngmi a ban kha a samh i miruamkai hna kha an khuakhanmi he a ṭhek dih hna. 52 Siangpahrang ṭhawngṭhawng kha an bawiṭhutdan cungin a ṭhumh hna i Minauta kha a cawi hna. 53 Rawl a ṭammi kha thil ṭhaṭha in a khimter hna i Mirum kha kut lawngin a kalter hna. 54 Kan pupa hna sinah a rak sermi biakamnak kha a zulh hna; A sal Israel kha bawmh awkah a ra i 55 Abraham le a tefa vialte hna sinah zungzal in zaangfahnak langhter ding kha a philh lo," tiah a ti. 56 Mary cu thla thum tluk Elizabeth sinah khan a um i cun inn ah a tlung ṭhan. 57 Elizabeth cu a nithla a hung tling i fapate a hrin. 58 Bawipa cu zeitluk in dah a cungah a ṭhat ti kha a innpa hna le a rualchan hna nih an theih tikah amah tluk te cun an dihlak in an i lawm. 59 Ngakchiate cu zarh khat a hung ti ah khin a cuarpar tan awkah an kalpi; annih nih a pa min Zekhariah in kan auh lai, tiah an ti. 60 Sihmanhsehlaw a nu nih khan, "Asilo, a min cu Johan a si lai," tiah a ti. 61 Annih nih amah cu an thawh i, "Nan sahlawh nan rualchan lakah cu min a ngeimi pakhat hmanh an um ṭung lo," tiah an ti. 62 Cun a pa kha kut zaoh in an chawnh i ngakchiapa kha a min zeidah sak na duh, tiah an hal. 63 Zekhariah nih cun caṭialnak catlap a hal hna i, "A min cu Johan a si," tiah a ṭial. 64 Cu cangka cun Zekhariah cu a holh kho ṭhan i Pathian kha a hun thangṭhat. 65 A innpa hna cu an khuaruah a har i hi thil kong cu Judea ram tlang cung vialte ah khan a thang dih. 66 A theimi paoh kha an lung a suk hna i. "Hi fa hi zei ko dah a can te lai?" tiah an ti cio. Zeicahtiah Bawipa ṭhawnnak cu a cung i a um kha a fiang ko. 67 A pa Zekhariah cu Thiang Thlarau in a khat i, Pathian bia kha a chim: 68 "Bawipa, Israel Pathian cu thangṭhat u sih. A mi hna bawmh awkah a ra cang i a luatter cang hna. 69 Kan caah a ṭhawngmi Khamhtu kha a chuahter cang. Amah cu a sal David tefa kha a si. 70 Hlanliopi ah a profet thiang hna sinin, 71 'Kan ral hna kut chungin le kanmah a kan huatu vialte hna sin khan, khamh awkah bia a kan kam. 72 Kan pupa hna cu, nan cungah zaangfahnak ka ngei lai, a ti hna i a thiangmi a biakamnak kha ka philh lo,' tiah a ti hna. 73 - 74 Kan ral hna kut chungin luatter awkah le Amah cu ṭihnak um loin a rian kan ṭuan nakhnga, Kan pu Abraham sinah chiatser in bia aa kam i 75 cucu kan nunchung vialte, amah hmaiah thianghlim le ding tein kan um nakhnga caah a si. 76 Nang, ka fa, nangmah hi Cungnung Bik Pathian profet tiah ti na si lai; Amah lam kha rak sersiam chung awkah Bawipa hmaiah cun na rak kal chung lai. 77 A mi hna kha, nan sual ngaihthiam nan si thawngin khamhnak nan hmu lai, tiah na chimh hna lai. 78 Zeicahtiah, kan Pathian cu zaangfah thiammi le minunnem a si: Khamhnak khuaceu ṭha cu kan cungah a tlunter lai i 79 Thihnak thladem mui lak i a ummi hna kha vancung in a vun ceuh hna lai; Kannih cu daihnak lam ah a kan hruai lai," tiah a ti. 80 Ngakchia cu a hung ṭhang i thlarau in a ṭhawngmi a si; Israel mi zapi sinah a hun i langh hlantiang, thetse ram ah cun a um.
1 Khi caan ah Siangpahrang Awkastas nih nawlbia a chuah i, 'Ram chung i a ummi vialte nih milu relnak caah nan min nan i thla dih lai,' tiah a ti. 2 Hi milu relnak hmasa bik a hung um ah hin Kuirinias cu Siria ram uktu a rak si. 3 Cucaah min i thlak awkah a mi paohpaoh in anmahle an khua cio ah khan an kal. 4 Josef cu Galilee ram i Nazareth khua in Judea ram i Bethlehem khua an timi, Siangpahrang David chuahnak khua ah khan a kal. Josef kha khika i a kalnak cu amah kha David hrinsor a si caah a si. 5 Cun minthlak awk i a kal ah khan a hammi Mary kha a sinah aa kalpi. A nithla kha a tling dengmang i 6 Khika i an um lioah khan a hrin caan kha a phan, fapate kha a hrin i cucu a fater a si. 7 Puan in a zual i caw rawl einak kuang chungah khan a thlim — riahnak khualbuk ah khan an caah hmun a um lo. 8 Cuka hrawngah cun, an tuurun a zohkhenh i ramlak i a riakmi tuukhal hna kha an um. 9 Bawipa vancungmi cu an sinah a lang i Bawipa sunparnak cu an velchum in a ceu. Annih cu an thin a phang tuk hringhran, 10 sihmanhsehlaw vancungmi nih cun a thawh hna i, "Nan thinphang hlah u; zeicahtiah nan sin i ka ratnak cu nan ca i thawngṭha he a si, cu thawngṭha nih cun mi vialte sinah lunglawmhnak a tlunter lai. 11 Tu zan hrimhrim ah hin David khua chungah nan Khamhtu kha a chuak cang — Khrih Bawipa cu! 12 Cun hihi nan ca i hmelchunhnak cu a si lai: ngakchiate pakhat kha puan in an zual i caw rawl einak kuang chung i an thlim kha nan va hmuh lai," tiah a ti. 13 Cu cangka cun vancung ralkapbu nganpi cu vancungmi sinah khan an rung lang i Pathian kha hla in an thangṭhat: 14 "A sang bik van ah khin Pathian cu sunparnak hmu ko seh, Cun a dawtmi hna umnak vawlei ah hin remnak um ko seh," tiah an ti. 15 Cun vancungmi hna cu annih sinin vancung i an kir ṭhan tikah khan tuukhal hna cu pakhat le pakhat kha, "Bethlehem khua ah cun va kal u si law Bawipa nih a kan chimhmi thil cu va zoh tuah u sih," an i ti. 16 Cucaah khulrang in an kal i Mary le Josef cu an va ton hna i ngakchiate cu caw rawl einak kuang chung i a rak ih ko kha an va hmuh. 17 Tuukhal pawl nih ngakchia cu an hmuh tikah amah kong i vancungmi nih a chimmi kha an chimh hna 18 Tuukhal pawl nih an chimmi a theimi paoh cu an khuaruah a har dih. 19 Mary nih hi thil vialte hi aa cinken hna i thuk piin a ruah hna. 20 Tuukhal pawl cu an kir i an va hmuhmi le an theihmi ruangah khan Pathian cu an thangṭhat; vancungmi nih a chimh hna bantukte khan a si taktak ko. 21 Cu hnu zarh khat ah, ngakchia cu cuarpartan caan a phak tikah khan, a min ah Jesuh an sak — cu min cu a nu nih a pawi hlan i vancungmi nih a rak sak cangmi kha a si. 22 Moses Nawlbia nih nan tuah lai tiah a timi i thianh caan kha Josef le Mary caah cun a phan. Cucaah annih nih ngakchia cu Bawipa hmai i chanh awkah Jerusalem khua ah khan an i kalpi. 23 Bawipa nawlbia chungah cun, Nan fater, pa a simi hna paoh kha Bawipa sinah nan pekchanh hna lai, tiah aa ṭial. 24 Cun Bawipa nawlbia nih, Ṭhuro tuah khat, asiloah, laileng no pahnih, raithawinak ah nan pekchanh hna lai, a ti bantukin annih nih raithawinak kha an pekchanh. 25 Jerusalem khua ah khan mipa pakhat, a min Simeon a simi a rak um. Amah cu miṭha le Pathian a ṭihmi kha a si i Israel khamhnak ding a rak hngakmi kha a si. Thiang Thlarau nih khan a umpi i 26 Thiang Thlarau nih cun Bawipa biakamhmi Messiah na hmuh hlanah cun na thi lai lo, tiah a ti. 27 Thlarau nih a hruainak thawngin Simeon cu Biakinn chungah cun a lut. Ngakchia Jesuh cu a nu le a pa nih, phung nih tuah awk a si tiah a tining in, Biakinn chungah an run luhpi tikah, 28 Simeon nih cun a rak pom i Pathian cu a thangṭhat i: 29 "Nihin ah hin, maw Bawipa, nangmah nih na salpa cu dai tein ka rian na ka limter cang, Atu cu nangmah na biakamnak kha a tling cang. 30 - 31 Zeicahtiah miphun vialte zohchih in khamhnak ding na rak timhmi cu ka mit hrimhrim in ka hmuh cang; 32 Cucu Jentail mi hna caah na lam a langhtertu a simi ceunak le na mi Israel mi hna ca i sunparnak cu a si," tiah a ti. 33 Simeon nih ngakchiapa kong a chimmi nih cun a nu le a pa kha an lung a sukhai ngaingai hna. 34 Simeon nih cun thluachuahnak a pek hna i a nu Mary kha a thawh i, "Hi ngakchia cu Pathian nih Israel mi lakah mi tampi an rawk nakhnga le khamh an si nakhnga caah a thimmi a si. Amah hi Pathian sinin a rami hmelchunhnak, mi tampi nih an doh laimi a si i 35 an dohnak thawng cun mi tampi an lungthin chunglei kha a lang lai. Cun ngaihchiatnak nih vainam bantukin na lungthin kha a chunh lai," a ti. 36 Profet nu pakhat, a min Anna an timi zong kha a um ve, amah cu Asher phun chung mi Fanuel fanu kha a si. Amah cu a tar ngaingai cang, a va he kum sarih lawng an rak um ṭi manh i atu cu 37 kum sawm riat le kum li a si cang. Biakinn kha a kaltak bal lo i chun he zan he Pathian kha rawl ulh le thlacam in a biak. 38 Amah zong cu, cu caan te ah cun a ra ve i Pathian cu a thangṭhat i Pathian nih Jerusalem cu a tlanh ṭhan lai tiah a hngakmi vialte hna sinah khan ngakchiapa kong kha a chim. 39 Bawipa nawlbia nih nan tuah awk a si tiah a timi vialte kha an tuah dih in Galilee ram i an umnak khua Nazareth khua ah khan an kir ṭhan. 40 Ngakchia cu a hung ṭhang i a hung ṭhawng; fimnak in a khat i Pathian thluachuahnak kha a cungah a um. 41 Lanhtak Puai paoh ah khan, kum fate in, Jesuh nu le pa hna cu Jerusalem ah khan an kal lengmang. 42 Jesuh kha kum hleihnih a si tikah voi dang bantukin puai ah cun an kal ṭhan. 43 Puai ni kha a dih tikah inn lei tlun ah khan an i thawh, sihmanhsehlaw ngakchiapa Jesuh kha Jerusalem khua ah cun a tang. Cucu a nu le a pa nih an hngal lo; 44 annih ruahnak ah cun an hawile sinah khan a um rua, an ti i cucaah chun nitlak hlam loin an kal. An sahlawh pawl le an hawikom hna sin i an va kawl tikah khan an hmu ti lo. 45 Cucaah amah kawl awkah cun Jerusalem ah khan an kir ṭhan. 46 A ni thumnak ni ah Biakinn chungah khan an va hmuh i cawnpiaktu Judah mi hna sinah khan a rak ṭhu i an bia kha a rak ngai i bia a rak hal len ve ko hna. 47 A bia a theimi paoh cu a fimning le a bia lehning ah khan an khuahruah a har. 48 An va hmuh tikah a nu le a pa zong cu an khuaruah a har ve. A nu nih cun a thawh i, "Ka fa, zeicahdah hi bantukin na kan tuah? Na pa le na nu nih awlokchong in pei kan in kawl cu," tiah a ti. 49 Annih cu "Zeicahdah nan ka kawl? Ka Pa inn ah ka um awk a si ti kha nan hngal lo maw?" tiah a ti hna. 50 Sihmanhsehlaw annih nih a chimhmi hna kha a sullam an hngal lo. 51 Cuticun Jesuh cu an sinah Nazareth khua ah khan a kir i a nu le a pa kut tangah nawl ngai tein a um: Hi thil vialte hi a nu nih a lung chungah aa ken dih. 52 Cun Jesuh cu pum lei in siseh, fimnak lei in siseh, a hung ṭhang i Pathian hmai le minung hmaiah mithmai ṭha a hmu.
1 Siangpahrang Tiberius kha a bawi kum, kum hleinganak kum a si, Pontius Pilat kha Judah ram mangki a si, Herod kha Galilee uktu a si i a nau Filip cu Iturea le Trakhonitis peng uktu a si; Lisanias cu Abilen uktu a si i 2 Annas le Kaiafas cu tlangbawi ngan an si. Cu caan lioah cun Zekhariah fapa Johan sinah ramcar chungah khan Pathian bia cu a phan. 3 Cucaah Jordan tiva hrawn hrawngah khan Johan cu aa chawk i, "Nan nun ṭhin u law tipilnak ing u. Cun Pathian nih nan sualnak an ngaihthiam hna lai," a ti hna i 4 Profet Isaiah nih a cauk chungah a rak ṭial bang khan a hung si. A ṭialmi cu hitin a si: 5 A kuarhnak hmun vialte kha rak chilh hna u law Tlang sang le fing bo kip kha rak rawnhter hna u; Lam aa ngerhmi kha rak dinter hna u, Lam bingbo vialte kha rak tlorhnalh hna u; 6 Cun minung phun paohpaoh nih Pathian khamhnak kha an hmuh lai,' a ti," tiah aa ṭialmi kha a hung tling. 7 Johan sinah khan mi cu a bubu in tipil in awkah khan an hung chuak lulhmalh. A rak thawh hna i, "Rul hna, Pathian thinhunnak a ra liomi sin cun nan luat kho lai tiah aho nih dah aan chimh hna? 8 Nan nun nan ṭhinh cu nan thil timi ah khan langhter u. 'Abraham pei a kan hringsortu cu a si tiah,' ti len hlah u. Pathian nih cun a duh ahcun hi lung hi a lak hna lai i Abraham tefa ah cun a ser khawh ko hna. 9 Thingkung cu hau awkah a hram ah hreitlung kha chiah a si cang; thei ṭha a tlai lomi kung paoh cu hau an si lai i mei chungah paih an si lai," tiah a ti. 10 Mizapi nih cun an thawh i. "A si kun ahcun zeidah kan tuah kun lai?" an ti. 11 Anih nih, "Angki pahnih a ngeimi nih a ngei lomi kha pakhat ṭhen seh, cun rawl a ngeimi nih a ngei lomi kha hrawm seh," a ti. 12 Ngunkhuai khawltu pawl kha tipil in awkah an ra i, "Saya, kannih hi tah zeidah kan tuah awk a si lai?" tiah an hal. 13 A thawh hna i, "Khawlh awk timi nak tam in va khawl hna hlah u," tiah a ti hna. 14 Ralkap zong kha an ra i, "Kannih tah zeitin? Zeidah kan tuah awk cu a si ve lai?" an ti. Annih cu a thawh hna i, "Ahohmanh hramhram in tangka va chut hna hlah u; va tlerhkhonh fawn hna hlah u. Nan lahkhah ah khan nan lung va tling ko u," tiah a ti hna. 15 Mizapi cu an i ruahchannak kha a hung ṭhang i Johan hi aho ko dah a si hnga, amah hi Messiah cu a si sual hnga maw, tiah an ruat lengmang. 16 Cucaah Johan nih cun an dihlak in a thawh hna i, "Kei nih cun tiin tipilnak kan pek hna, sihmanhsehlaw keimah nakin a ngan deuh ngaingaimi a ra lio. A kedan hri phoihtu hmanh ah kei cu kaa tlak lo. Amah nih cun Thiang Thlarau le mei in tipilnak an pek hna lai. 17 Amah nih cun a ṭalawn kha aa put i rawl kha a zah hna lai; a fang ṭha cu buk chungah a rawn hna lai, sihmanhsehlaw a hi cu a mit lomi mei chungah a khangh hna lai," tiah a ti. 18 A phunphun in Johan nih cun mizapi cu Thawng Ṭha kha a chimh hna. 19 Sihmanhsehlaw uktu bawi Herod nih khan a nau nupi Herodias kha a ṭhit caah le thil dang a ṭha lomi tampi a tuah caah amah cu Johan nih khan a sik i 20 cu ruangah cun Herod nih cu nakin a ṭhalo chinchinmi kha a tuah: Johan cu thong ah a thlak. 21 Mi dang vialte kha tipil a pek dih hna in Jesuh zong kha tipil cu a pek ve. Thla a cam lioah khan van cu aa hung i 22 Thiang Thlarau cu a pum in ṭhuro bantukin a cungah cun a rung ṭum. Cun vancung in aw pakhat a rung thang i, "Nangmah cu kan dawtmi ka fapa na si. Na cungah ka lung a tling," tiah a ti. 23 Jesuh nih a rian ṭuan hram a thawk tikah amah cu kum sawm thum hrawng a si, amah cu Josef fapa a si tiah mi nih an ruah. Josef cu Heli fapa a si, 24 Heli cu Matthat fapa a si, Matthat cu Levi fapa a si, Levi cu Melkhi fapa a si, Melkhi cu Jannai fapa a si, Jannai cu Josef fapa a si, 25 Josef cu Mattathias fapa a si, Mattathias cu Amos fapa a si; Amos cu Nahum fapa a si, Nahum cu Esli fapa a si, Esli cu Naggai fapa a si, 26 Naggai cu Maath fapa a si, Maath cu Mattathias fapa a si, Mattathias cu Semein fapa a si, Semein cu Josek fapa a si, Josek cu Joda fapa a si, 27 Joda cu Joanan fapa a si, Joanan cu Resa fapa a si, Rhesa cu Zerubbabel fapa a si, Zerubbabel cu Shealtiel fapa a si; Shealtiel cu Neri fapa a si; 28 Neri cu Melkhi fapa a si; Melkhi cu Addi fapa a si. Addi cu Kosam fapa a si, Kosam cu Elmadam fapa a si, Elmadam cu Er fapa a si, 29 Er cu Joshua fapa a si, Joshua cu Eliezer fapa a si, Eliezer cu Jorim fapa a si, Jorim cu Matthat fapa a si, Matthat cu Levi fapa a si; 30 Levi cu Simeon fapa a si, Simeon cu Judah fapa a si. Judah cu Josef fapa a si, Josef cu Jonam fapa a si, Jonam cu Eliakim fapa a si, 31 Eliakim cu Melea fapa a si, Melia cu Menna fapa a si, Menna cu Mattatha fapa a si, Mattatha cu Nathan fapa a si, Nathan cu David fapa a si, 32 David cu Jesse fapa a si, Jesse cu Obed fapa a si, Obed cu Boaz fapa a si, Boaz cu Sala fapa a si, Sala cu Nahshon fapa a si, 33 Nahshon cu Amminadab fapa a si, Amminadab cu Admin fapa a si, Admin cu Arni fapa a si, Arni cu Hezron fapa a si, Hezron cu Perez fapa a si, Perez cu Judah fapa a si, 34 Judah cu Jakob fapa a si, Jakob cu Isak fapa a si, Isak cu Abraham fapa a si, Abraham cu Terah fapa a si, Terah cu Nahor fapa a si, 35 Nahor cu Serug fapa a si, Serug cu Reu fapa a si, Reu cu Peleg fapa a si, Peleg cu Eber fapa a si, Eber cu Shelah fapa a si, 36 Shelah cu Kainan fapa a si, Kainan cu Arpaksad fapa a si, Arpaksad cu Shem fapa a si, Shem cu Noah fapa a si, Noah cu Lamek fapa a si, 37 Lamek cu Methuselah fapa a si, Methuselah cu Enok fapa a si, Enok cu Jared fapa a si, Jared cu Mahalaleel fapa a si, Mahalaleel cu Kainan fapa a si, 38 Kainan cu Enosh fapa a si, Enosh cu Seth fapa a si, Seth cu Adam fapa a si, Adam cu Pathian fapa a si.
1 Jesuh cu Thiang Thlarau he khat in Jordan tiva khan a ra kir i Thlarau nih ramcar chungah khan a kalpi. 2 Khika ah Khuachia nih ni sawm li chung a rak tukforh. Cu chung vialte cu rawl a ei lo caah cu caan a dih tikah a rawl a ṭam ngaingai. 3 Khuachia nih cun a thawh i, "Nangmah cu Pathian Fapa na si ahcun, hi lung hi changreu ah i cang tiah ti tuah ngat," tiah a ti. 4 Jesuh nih cun a leh i, "Cathiang nih pei, 'Minung nunnak hi rawl lawngin a si lo,' a ti cu," tiah a ti. 5 Cun Khuachia nih cun a hun kaipi i chikkhatte ah khin vawleicung ram vialte kha a hmuhsak dih. 6 Khuachia nih cun a thawh i, "Hi lianhngannak vialte le hi chawva vialte hi kan pek lai. A dihlak hin keimah pek ka si cang i ka duhmi paoh ka pek khawh hna. 7 Cucaah ka hmaiah na khuk i bil law hi vialte hi na ta an si dih ko lai," tiah a ti. 8 Jesuh nih, "Cathiang nih pei, 'Bawipa na Pathian cu na biak lai i amah rian lawng kha na ṭuan lai,' a ti cu," tiah a leh. 9 Cun Khuachia nih cun Jerusalem ah khan a kalpi i Biakinn parpahlek ah khan a ṭhutter. Cun a thawh i, "Nangmah cu Pathian Fapa na si ahcun hika hin vung zuang tuah ngat. 10 Zeicahtiah Cathiang nih pei, 'Pathian nih nangmah kha ṭha tein zoh khenh awkah a vancungmi kha a fial hna lai,' tiah a ti kha. 11 Cu pinah, 'An kut in an in cawi lai i lung ah na ke hmanh an i khawng lai lo,' tiah a ti fawn," tiah a ti. 12 Jesuh nih aa thawh i, "Cathiang nih pei, 'Bawipa na Pathian cu va hneksak hlah,' a ti ve kha," tiah a leh. 13 Khuachia nih Jesuh cu a phunphun in a tukforh dih hnuah caan tlawmpal chung cu a kaltak. 14 Cun Jesuh cu Galilee ah khan a ra kir i Thiang Thlarau cu a sinah khan a um. Cuka hrawng vialte cu amah kong kha a thang dih. 15 An i pumhnak inn ah khan a cawnpiak hna i a mi kip nih an thangṭhat. 16 Jesuh cu a rak tlonlennak Nazareth khua ah khan a va kal i Sabbath ni ah cun hmasa i a rak tuah tawn bantuk khan pumhnak inn ah a kal. Cathiang rel awkah khan a hung dir i 17 profet Isaiah cazual kha an pek. Cazual cu a vun samh i, 18 "Bawipa Thlarau cu ka cungah a um. Sifakmi hna sin i Thawngṭha chim awkah chiti a ka thuh i Saltangmi hna sin i luatnak thanh awkah a ka thlah. Mitcaw mi hna sin i khuahmuh ṭhannak pek awk le Hremmi hna luatter dingah a ka thlah, 19 Bawipa nih a mi hna a khamh hna lai ding kum cu va thanh awkah a ka thlah!" tiah aa ṭialnak hmun kha a rel. 20 Jesuh nih cazual cu a zual ṭhan i a zohkhenhtu kha a pek ṭhan i a ṭhu. Pumhnak inn i a ummi vialte nih amah cu ṭhep loin an zoh dih. 21 Annih cu a thawh hna i, "Hika Cathiang cang hi, nannih nih ka rel tikah nan theih bantukin nihin ni ah hin a tling cang," tiah a ti. 22 An lung a hmuh ngaingai hna i bia dawhdawh a chimmi nih khan an khuaruah a harter dih hna. An i thawh i, "Amah hi Josef fapa kha a si lo hlah i?" an ti. 23 Cun anih nih a thawh hna i, " 'Sibawipa, nangmah le nangmah i damter,' timi phungthlukbia kha nan ka chimhnawh te lai, tiah fiang tein ka hngalh ko. Cun nan i thawh fawn lai i, 'Kapernaum khua ah na tuah tiah kan theihmi thil cu na chuahkehnak khua zongah hin tuah ve hna,' ti zongah nan ka ti fawn lai. 24 Cucaah hihi kan chimh hna: Profet cu amah chuahkehnak khua ah cun conglawmh a tong bal lo. 25 Cucaah ka bia hi ngai hmanh u. Elijah chan i kum thum le a cheu khua a khen i Israel ram chung dihlak ah pam a tlun ah khan, cu ram chungah nuhmei tampi an rak um taktak ko, 26 sihmanhsehlaw cu hna sinah cun Elijah kha thlah si loin Sidon ram Zarefath khua nuhmei sin tu ah khan thlah a si deuh. 27 Profet Elisha chan ah Israel ram ah thinghmuimi tampi an rak um ko, sihmanhsehlaw Siria mi Naaman dah ti lo cu ahohmanh damtermi an um lo," tiah a ti. 28 Hi bia an theih tikah pumhnak inn chung i a ummi vialte cu an thin a hung dih. 29 An tho i Jesuh cu khualeng ah an hnuh i lungpang cungin thlak awkah, khua a ṭhutnak tlang a par ah khan an kalpi. 30 Sihmanhsehlaw zapi lak khan aa zuk i a lan. 31 Cun Jesuh cu Galilee ram i khua pakhat, Kapernaum khua ah khan a kal i khika ah sabbath ni ah khan a cawnpiak hna. 32 A cawnpiakning hna kha an khuaruah a har, zeicahtiah a bia cu hmual a ngei ngaingai. 33 Cuka pumhnak inn ah cun khuachia thlarau a ngeimi pa pakhat a rak um; fak piin a au i, 34 "Nazareth khuami Jesuh, zeidah na kan duhnak a si? Kanmah hrawh awkah maw hika ah hin na rat? Nangmah cu aho na si kha kan hngalh ko — Pathian lamkaltu a thiangmi na si ko," tiah a ti. 35 Jesuh nih thlarau cu, "Dai tein um law, mipa chung khan chuak," tiah a ti. Khuachia nih cun mipa cu an dihlak hmaika ah khan a thluk i a cungah zeihmanh ṭhat lonak tuah loin a kaltak. 36 An dihlak in an khuaruah a har i pakhat le pakhat cu, "Hi bia hi zei bantuk bia dah a si? Hi mipa nih hin nawlngeihnak le ṭhawnnak in thlarau ṭhalo kha nawl a pek hna i an chuak ko," tiah an i ti. 37 Cun Jesuh kong cu cu ram chung khuazakip ah khan a thang. 38 Jesuh cu pumhnak inn khan a chuak i Simon inn ah a kal. Simon nupi nu cu a rak zaw i a tak a lin ngaingai i cu kong cu Jesuh kha an chimh. 39 Jesuh cu a va kal i a ihkhun pawngah khan a dir i a zawtnak cu a sik. A taklin nih cun a thlah i chikkhatte ah a tho i a bultawl hna. 40 Ni tlak hnuah, mizaw a ngeimi paoh nih khan, zawtnak a phunphun in a zawmi an mizaw hna kha Jesuh sinah cun an ratpi hna; an lu cungah khan a kut a chuan diahmah i an dihlak in a damter hna. 41 Mi tampi chungin khuachia zong kha an chuak i an chuahpah ah cun, "Nangmah cu Pathian Fapa na si," tiah an au. Sihmanhsehlaw annih cu a sik hna i holh a thlauh hna, zeicahtiah Messiah a si kha an hngalh. 42 Khuadei kate ah Jesuh cu khuachung khan a chuak i hmunking ah a kal. Sihmanhsehlaw mizapi nih khan an kawl i a umnak an va phak tikah khan, kan kaltak ti hlah, tiah an hnek. 43 Sihmanhsehlaw a thawh hna i, "Pathian Pennak kong Thawngṭha kha khua dang zongah ka chim hrimhrim awk a si, cu chim ah cun pei Pathian nih a ka thlah cu," tiah a ti. 44 Cucaah Judea ram chung i pumhnak inn hna ah khan Thawngṭha cu a chim hna.
1 Ni khat cu Genesaret Tilikam ah Jesuh cu a dir lioah khan mi tampi nih Pathian bia theih awkah amah cu an buthnawh. 2 Ti kam i an hrenmi lawng pahnih kha a hmuh hna; ngatlai pawl cu an lawng khan an chuak i titlang ah khan an sur cu an rak su len ko. 3 Cu ka i a ummi lawng pakhat, Simon ta ah cun Jesuh cu a lut i tikam cun tlawm tein hei nam deuh u tiah a ti. Jesuh cu lawng chungah cun a ṭhu i mizapi kha a cawnpiak hna. 4 Bia a chim dih in Simon cu a thawh i, "Ti thuhnak leiah khin na lawng hi hei thawn deuh law nangmah le na hawile nih khan nan sur khan nga kha chep hna u," tiah a ti. 5 Simon nih cun, "Bawipa, zan khuadei kan vorh ṭualmal ko nain zeihmanh kan tlai lo. Sihmanhsehlaw ti ko u, na ti ahcun sur cu kan cheh rih ko lai," tiah a ti. 6 Sur cu an vun cheh hna i nga cu tam tuk hringhran an tlaih hna caah an sur cu tleh dih hnek aa zal. 7 Cucaah lawng dang i a ummi an hawile kha, ra kan bawm u, tiah an kut an hei zaoh hna. An ra i lawngah cun a khat tein an sanh hna, an khah tuk caah lawng cu an pil dengmang. 8 Simon Peter nih cucu a hmuh tikah Jesuh hmaiah cun a khuk aa bil i, "Bawipa, ka kaltak ko, kei cu misual ka si," tiah a ti. 9 Amah le a sir i a ummi hna cu an tlaihmi nga kha a tam tuk caah an khuaruah a har. 10 Simon hawile hna Jeim le Johan, Zebedi fapa hna zong kha, cu bantuk ṭhiamṭhiam cun an um. Jesuh nih Simon cu a thawh i, "Na thinphang hlah, atu thawk in mi na tlai cang hna lai," tiah a ti. 11 Lawng cu tikam ah an hnuh i zeizong vialte kha an kaltak i Jesuh kha an zulh. 12 Voi khat cu khua pakhat ah hin Jesuh cu a um i cuka ah cun thinghmui zawtnak nih a tuam in a tuammipa pakhat a rak um. Jesuh kha a hmuh tikah a hmaiah khan a bawk i, "Bawipa, na duh ahcun na ka thianter khawh," tiah a nawl. 13 Jesuh nih cun a kut a hei samh i a hei tawngh. "Damter kan duh, thiang ko," tiah a ti. Chikkhatte ah thinghmui zawtnak nih cun a kaltak. 14 Jesuh nih cun, "Mah hihi ahohmanh chim hna hlah, tlangbawi sin bel ah khan va kal zau law rak in zoh seh; na thiang cang ti langhternak ah Moses nawlbia ningin raithawinak kha va tuah," tiah a fial. 15 Sihmanhsehlaw Jesuh thawng cu a thang chinchin i mirun tampi nih a bia ngaih awkah le an zawtnak in damter awkah an fuh. 16 Hnathiannak hmun ah khan a kaltak tawn hna i khika ah khan thla a va cam tawn. 17 Ni khat cu Jesuh nih a cawnpiak hna lioah khan Farasi mi tlawmpal hna le Phungbia cawnpiaktu saya hna, Galilee ram le Judea ram khuazakip in le Jerusalem khua in a rami hna kha a pawngah cun an ṭhu. A zawmi damternak ding caah khan Bawipa ṭhawnnak cu Jesuh sinah khan a um. 18 Mi tlawmpal nih khin a zengmipa pakhat kha a ihkhun in an hun zawnh i an ra. Inn chungah khan vun luhpi i Jesuh hmaika i vun chiah kha an i tim. 19 Sihmanhsehlaw mi an tam tuk caah zei ti hmanh in an luhpi kho lo. Cucaah inncung ah an kaipi i inn cihmi lungtlap kha an ṭhial hna hnuah a ihkhun cun mizapi laifang ah cun Jesuh hmaika ah khan an vun thlak. 20 Jesuh nih zeitluk in dah an zumh ti kha a hmuh tikah mipa cu a thawh i, "Ka kawi, na sualnak cu ngaihthiam na si cang," tiah a ti. 21 Cu tikah Phungbia cawnpiaktu saya hna le Farasi mi hna cu anmah le anmah kha, "Pathian a thangchiatmi pa hi ahodah a si? Ahohmanh nih sual thlahpiak khawh a si ṭung lo, Pathian lawng nih pei thlahpiak khawh a si ko cu," tiah an i ceih. 22 Jesuh nih an ruahnak cu a hngalh hna i, "Zeicahdah cu bantuk thil cu nan ruah? 23 'Na sualnak cu ngaihthiam na si cang,' ti maw a fawi deuh, 'Tho law kal tuah,' ti dah a fawi deuh? 24 Cucaah vawlei cungah hin Mi Fapa nih sual ngaihthiam khawhnak nawl a ngei ti kha nannih sinah ka langhter lai," tiah a ti hna. Cucaah mizengpa cu a thawh i, "Tho law na ihkhun kha i cawi law inn ah va ṭin," tiah a ti. 25 Cun an hmaika ah cun hmakhatte ah a tho i a ihnak ihkhun cu aa cawi i Pathian thangṭhat pah in inn ah a ṭin. 26 An dihlak in an khuaruah a har ko. Ṭihnak in an khat i Pathian cu an thangṭhat i, "Nihin i kan hmuhmi thil cu khuaruahhar an va si dah!" tiah an ti. 27 Cu hnuah cun Jesuh cu a va chuak i ngunkhuai khawltu Levi kha, a zung i a rak ṭhut ko cu a hmuh. Jesuh nih cun a thawh i, "Ra ka zul," tiah a ti. 28 Levi cu a tho i, zeizong vialte kha a kaltak i a zulh. 29 A hnuah Levi nih khan a inn ah cun Jesuh kha rawl danghnak nganpi a tuahpiak i ngunkhuai khawltu tampi hna le midang hna kha an sinah cun an ṭhu. 30 Cun Farasi mi tlawmpal hna le anmah bu chung um a simi Phungbia cawnpiaktu saya hna kha Jesuh zultu sinah cun an zai i, "Zeicahdah ngunkhuai khawltu hna le misual mi hna he rawl nan ei ṭi?" an ti. 31 Jesuh nih a thawh hna i, "A dammi nih sibawi an herh lo, a zawmi lawnglawng nih an herh. 32 Sualnak kan ngei lo tiah aa ruatmi hna kha i ngaihchih u ti awkah ka ra lo, misual mi tu kha, i ngaichih u tiin kawh awkah ka ra," tiah a ti. 33 Jesuh cu mi a cheukhat nih an thawh i, "Johan zultu pawl cu atu le atu rawl an ul i thla an cam, cun Farasi mi hna zultu pawl zong nih khan cu bantuk ṭhiamṭhiam cun an tuah; sihmanhsehlaw nang na zultu hna cu an ding an ei ko," tiah an ti. 34 Jesuh nih a leh hna i, "Nupi ṭhit rawl danghnak ah, nupi ṭhitupa cu an sin i a um chungah khan sawmmi hna cu rawl ulhter awk a si, tiah nan ruat maw? Nan ruat hrimhrim lai lo. 35 Sihmanhsehlaw nupi ṭhitupa an sin in a chuah caan kha a phan ko lai i cu tikah cun rawl cu an ul te ko lai," tiah a ti. 36 Jesuh nih hi bianabia zong hi a chimh hna: "Thil hlun kha thil thar thlehmi in ahohmanh nih an belh bal lo. Cu bantukin an tuah ahcun thil thar kha a tlek lai i a thar thlehmi thil pelpawi kha a hlun he khan aa tlak lai lo. 37 Cun ahohmanh nih mitsur hang rawnnak saphaw thawl a hlunmi chungah mitsur hang thar kha an rawn bal lo. Cuti an rawn ahcun, mitsur hang thar nih khan saphaw thawl kha a kheh lai i mitsur hang cu a tle dih lai i saphaw thawl kha a rawk lai. 38 Cuticun ahohmanh nih an tuah lai lo. Mitsur hang thar cu saphaw thawl a tharmi chungah rawn awk a si. 39 Cun mitsur hang a hlunmi din hnuah ahohmanh nih a thar kha an duh lo. 'A hlun kha a thar nakin a thaw deuh,' an ti," tiah a ti.
1 Voi khat cu Sabbath ni ah hin Jesuh cu khual a tlawng i changvut lo kha a palpah hna. A zultu hna nih khan changvut vui cu an sihpah hna i an kut in an hnuai hna i a fang kha an ei hna. 2 Farasi mi a cheukhat nih an i thawh i, "Zeicahdah kan Phung nih Sabbath ni ah nan tuah kho lo a timi nan tuah?" an ti. 3 Jesuh nih cun a leh hna i. "David le a hawile kha an rawl a ṭam tikah zeidah David nih a tuah; ti kha nan rel bal lo maw? 4 Pathian inn chungah pei a lut i Pathian hunhmi changreu kha a lak i a ei i a hawile zong a pek hna kha. Khati a tuahmi kha kan Phung he aa ralchanhmi a si ṭung, zeicahtiah cu changreu cu tlangbawi lawnglawng nih pei ei phung a si kha," tiah a ti hlei ah, 5 "Mi Fapa hi Sabbath Bawi pei a si cu," tiah a ti hna. 6 Sabbath ni dang pakhat ah khan Jesuh cu pumhnak inn ah a lut i a cawnpiak hna. Cuka ah cun a orhlei kut a zengmipa a rak um. 7 Phungbia cawnpiaktu saya hna le Farasi mi a cheu khat hna nih khan Jesuh cu thil ṭhalo a tuah tiah zeitindah sual kan phawt khawh lai ti kha an kawl; cucaah cun sabbath ni ah hin aho tal a damter hna lai maw, tiah ṭha tein an ngiat. 8 Sihmanhsehlaw Jesuh nih an ruahnak kha a hngalh i a kut a zengmipa cu a thawh i, "Dir law hmaiah hin ra chuak tuah," tiah a ti. Mipa cu a tho i a dir. 9 Cun Jesuh nih annih cu a thawh hna i. "Bia kan hal hna: kan Phung nih sabbath ni ah zei tuah dah a kan onh? Ṭhatnak tuah maw ṭhat lonak tuah dah? Mi nunnak khamh maw mi nunnak hrawh dah?" tiah a ti. 10 Annih cu a mit in a zoh duahmah hna i, cu hnuah mipa kha a thawh i, "Na kut kha samh," tiah a ti. A kut cu a samh i a dam. 11 Sihmanhsehlaw annih cu an thin a khenh hna i Jesuh hi zeitindah kan hrawh khawh lai ti kha an i ceih. 12 Cu caan lioah cun ni khat cu tlang cungah thlacam awkah a kal i zan khuadei Pathian sinah thla a cam. 13 Khua a dei tikah a zultu kha a kawh hna i hleihnih a thim hna i lamkaltu tiah a ti hna. 14 An min cu hihi an si: Simon (Peter ti zongah timi) le a nau Andru; Jeim le Johan, Filip le Bartholomew, 15 Matthai le Thomas, Alfeas fapa Jeim le phunṭanh tiah an kawhmi Simon, 16 Jeim fapa Judas le rawitu ah a cangmi Judas Iskariot. 17 Tlang cung cun an sinah a rung ṭum hnuah Jesuh cu hmunrawn pakhat ah a zultu mi tampi hna sinah khan a dir. Cuka ah cun mi tampi an um i cu hna cu Judea ram khuazakip le Jerusalem khua le rilikam khua a simi Tair le Sidon khua in a rami an si; 18 annih an ratnak cu a bia theih duh le an zawtnak damnak hmuh duh ah a si. Thlarau ṭhalo nih awlok a chonhmi hna zong kha an ra i a damter hna. 19 A chungin ṭhawnnak kha a chuah caah mi nih cun an dihlak in amah tawngh kha an i zuam i an dihlak in a damter hna. 20 Jesuh nih a zultu kha a zoh hna i a thawh hna i, "Nannih sifakmi hna i lawm u, Pathian Pennak cu nanmah ta a si. 21 Nannih atu i rawl a ṭammi hna i lawm u, Nan paw a khim lai. Nannih atu i a ṭapmi hna i lawm u, Nan ni lai. 22 Mi Fapa ruangah mi nih an in huat hna i an in hlawt hna i an in serhsat hna i miṭhalo an in ti hna tikah i lawm ko u. 23 Cu ni ah cun i lawm u law a lam in lam u, zeicahtiah nan caah vancung ah laksawng nganpi chiahpiak nan si. Cu bantuk te cun pei an pupa hna nih khan profet hna kha an rak tuah hna cu. 24 "Sihmanhsehlaw nannih atu i a rummi, nan caah cun ngaihchia a va si dah! Nan nun nuamhnak kha nan hmuh cang. 25 Atu i a paw a khimmi nan caah cun ngaihchia a va si dah! Rawlṭam in nan vak lai. Atu i a ni lengmangmi nan caah cun ngaihchia a va si dah! Ngaihchia in nan ṭap lai! 26 Mi vialte nih, an in chimthiam hna tikah nan caah ngaihchia a va si dah; zeicahtiah cuti te cun pei an pupa hna nih khan nal profet kha an rak ti hna cu," a ti. 27 "Nannih ka bia a theimi hna, nan ral kha va daw hna u, an huatu hna cungah khan ṭhatnak va tuah u, 28 chiat an serhtu hna kha thla va campiak hna u. 29 Mi pakhatkhat nih na bel ah an bengh ahcun khattelei bel zong i chit rih; pakhatkhat nih na angkileng an chuh ahcun na angki chungnawh zong va pe rih. 30 Thil zeimaw an halmi paohpaoh kha va pe hna, cun mi pakhatkhat nih na ta a simi kha aa lak ahcun va hal ṭhan ti hlah. 31 Ka tuahpiak hna seh ti na duhmi kha mi va tuahpiak hna. 32 "Nangmah an dawmi lawng kha na dawt hna ahcun zeicahdah thluachuah hmuh cu naa ruah? Misual mi hmanh nih anmah a dawtu hna cu an dawt ve ko ṭung hna. 33 - 34 Cun na cung i ṭhatnak a tuahmi cung lawng i ṭhatnak na tuah ve ahcun, zeicahdah thluachuah hmuh cu naa ruahchan? Misual mi hna zong nih misual vemi hna sinah khan an cawihmi hna zat hmuh ṭhan dingah cun an coih ve ko ṭung hna. 35 Cuticun nan tuah awk a si lo. Nan ral kha daw hna u, an cungah khan ṭhatnak tuah u, chaw kha mi va cawih hna u law ka hmuh ṭhan lai, tiah ruahchannak ngei hlah u. Laksawng tampi nan hmuh lai i Cung Nung Bik Pathian fa nan si lai, zeicahtiah amah cu miṭhalo mi hna le lawmh hmanh a duh lomi hna cung hmanh ah a ṭha. 36 Nan Pa cu mi zaangfah thiam a si bantukin nannih zong mi zaangfah thiammi si ve u," tiah a ti. 37 "Midang kha va soi hna hlah u law nannih zong Pathian nih an soi ve hna lai lo; midang kha sual va phaw hna hlah u law nannih zong Pathian nih sual an phaw ve hna lai lo; midang kha an sualnak va ngaithiam hna u law nannih zong Pathian nih nan sualnak an ngaihthiam ve hna lai. 38 Midang kha thil va ṭhen hna u, nannih zong Pathian nih an ṭhenh ve hna lai: liam thluahmah in, nan i chap khawh chungin, nan zawi khawh le khawh loin nan kut chungah an thlet hna lai. Midang ca i nan hmanmi tahnak rel kha Pathian nih nanmah ca zongah a hman ve lai," tiah a ti. 39 Cun hi tahchunhnak bia hi Jesuh nih a chimh hna: "Mitcaw nih mitcaw kha lam a ṭhi kho lai lo, a ṭhit a si ahcun an pahnih in hor ah an tla lai. 40 Siangngakchia cu a saya nakin a ngan deuh lo, sihmanhsehlaw siangngakchia nih a cawnnak kha a dih tikah cun a saya bantuk a si lai. 41 "Na mit chung i a ummi thingtan kha ruat ṭung loin zeicahdah na unau mit i mithnawm pelte a ummi cu zoh na duh? 42 Na mit chung i a ummi thingtan cu hmu ṭung loin zeitindah na unaupa cu, "Ka nau, na mithnawm kha in cawihpiakning," na ti khawh? Mi depde. Na mit chung i thingtan kha chuah hmasa law pei na unau hna mit chung i a ummi mithnawm hme tete cu na hmuh khawh lai i na cawih khawh lai cu," tiah a ti. 43 "A ngan a dammi thingkung nih thei chia a tlai lo, thingkung ṭhalo zong nih thei ṭha a tlai ve lo. 44 Thingkung paohpaoh cu an theitlai in hngalh khawh an si; hlingbur in theipi nan lo bal lo, theihmung bur in mitsur thei nan lo bal fawn lo. 45 Miṭha nih a lung chung i thil ṭha a khonmi chung khan ṭhatnak a chuahter; miṭhalo nih a lung chung i thil ṭhalo a khonmi chung khan chiatnak a chuahter. Zeicahtiah mi nih a kaa in a chimmi hi a lung chung i a khatmi kha a si," tiah a ti. 46 "Zeicahdah nannih nih, 'Bawipa, Bawipa,' nan ka ti len ko i kan chimhmi hna cu nan tuah ṭung lo? 47 Ka sinah a ra i ka bia a ngai i a zulmi cu zei he dah aa lawh ti kha kan hmuhsak hna lai. 48 Amah cu inn a sami bantuk a si: thuk piin a cawh i a hram kha lungpi cungah a bunh. Tiva cu a hung lian i inn cu a hun den, sihmanhsehlaw fek tein sak a rak si caah a hninh in a hnin kho lo. 49 Sihmanhsehlaw ka bia a thei i a zul ṭung lomi cu a hram ṭha tein ser hmasa loin inn a sa menmi bantuk a si; tilian nih cu inn cu a hun den tikah chikkhatte ah a pur i a tlu ruangmang ko," a ti.
1 Hi bia vialte hi mizapi kha a chimh dih hna in Jesuh cu Kapernaum khua ah khan a kal. 2 Cuka i a ummi Romans ralbawi pakhat nih sinum pakhat a ngei i a sinumpa cu a dawt ngaingai; cu pa cu a zaw i a thi dengmang. 3 Cu ral bawipa nih Jesuh thawng kha a theih tikah, a sinumpa kha a ra damter nakhnga amah cu va nawl awkah Judah mi upa kha a hei thlah hna. 4 Jesuh sin kha an va phan i biatak tein an va nawl. "Hi pa hi bawmh awk aa tlak taktakmi a si. 5 Kan miphun hi a kan dawt i amah hrimhrim nih pumhnak inn a kan sakpiak," an ti. 6 Cucaah Jesuh cu anmah he cun a va kal. Inn khin lamhla a si ti lonak hmun a phak tikah, ralbawipa nih cun a hawikom kha a hun thlah hna i, "Bawipa, na re i theih hlah, nangmah luhnak dingah ka inn hi aa tlak lo; 7 Keimah nih ka pum in ka hung in dong lai ka ti ah, cu an dong ding zongah cun aa tlak in kaa hmu fawn lo. Nangmah nih, 'Dam seh,' hei ti law ka salpa cu a dam ko lai. 8 Keimah zong hi bawi ngan deuh kut tang i a ummi ka si, cun keimah kut tang zongah cun ralkap an um ve. Hi pa cu, Kal, ka ti ah a kal ko i khi pa cu, Ra, ka ti ah a ra ko; cun ka sal zong cu, Hihi tuah, ka ti ah a tuah ko, a ti tiah va chim u," a ti hna. 9 Hi bia a theih tikah Jesuh cu a khuaruah a har i a hnulei ah aa mer i a zultu zapi hna cu, "Hi bantuk zumhnak hi dah ka hmuh bal lo, Israel mi hna lak hmanh ah," tiah a ti. 10 Lamkaltu hna cu ralbawipa inn ah khan an va kir i a sinumpa a rak dam kha an va hmuh. 11 A thaizing ah Jesuh cu Nain an timi khua ah a kal; a zultu hna le mi tampi nih khan an zulh. 12 Khua hauka a hei phak ah khin ruak vui awk i a kalmi mirun kha an hung chuak ve. A thimipa cu nuhmeinu fapa a si i amah lawngte cu a fa a si, mi tampi nih khuachung cun nuhmeinu cu an kalpi. 13 Bawipa nih cun amah cu a hmuh tikah a zaang a fak ngaingai i, "Ṭap hlah," tiah a ti. 14 Cun a va kal i ruak kuang kha a tawngh i a zawntu hna cu an dir. Jesuh nih cun, "Tlangvalpa, tho tuah, kan ti," tiah a ti. 15 Mithipa cu a hung ṭhu i bia a hun chim i Jesuh nih a nu sinah khan a pek ṭhan. 16 An dihlak in ṭihnak in an khat i Pathian kha an thangṭhat. "Kan lakah profet nganmi a chuak cang i Pathian nih a mi hna khamh awkah a ra cang," an ti. 17 Jesuh thawngpang cu Judea ram vialte le a pawngkam ram ah khan a thang dih. 18 Johan zong cu hi kong kha a zultu hna nih khan an chimh ve. Johan nih cun an lak i pahnih kha a auh hna i 19 Bawipa sinah cun a hei thlah hna i, ' "Nangmah hi a ra lai timi cu na si maw; asiloah a dang dah kan orh rih lai?' tiah va hal u," a ti hna. 20 Jesuh sin an phak tikah an i thawh i, "Tipil petu Johan nih a kan thlah i nangmah cu, 'A ra lai tiah timi cu na si maw, asiloah a dang dah kan orh rih lai,' tiah va hal u, a kan ti," an ti. 21 Cu caan lio thengte ah cun Jesuh nih mi tampi kha an zawtnak le an nganfahnak, thlarau ṭhalo nih a tuah hnanak khan a damter hna i mitcaw tampi kha khua a hmuhter hna. 22 Johan zultu pawl cu a leh hna i, "Va kir u law nan hmuhmi le nan theihmi: mitcaw nih khua an hmuhnak le, kebei nih an kal khawhnak le thinghmuimi nih thiannak an hmuhnak le hnachet nih khua an theihnak le a thimi hna nunter ṭhan an sinak le sifakmi hna sinah Thawngṭha chim a sinak kong kha Johan cu va chim u. 23 Keimah kong ah lung awṭawm in a um lomi cu an caah lunglawmh awk a va si dah," tiah a ti. 24 Lamkaltu hna kha an kal dih in Jesuh nih Johan kong kha mi zapi cu a chimh hna. Ramlak i Johan nan hei fuhpanh tikah khan zeidah kan hmuh lai tiah nan rak ruah? Phaikung thli nih a chem diahmahmi hna kha maw? 25 A si lai lo. Cucu a si ṭung lo ahcun zeidah zoh awkah nan chuahhnawh kun? Thilpuan ṭhaṭha aa hrukmi zoh awkah maw? A taktak ti ahcun cu bantukin aa thuam i nunnuam ngaingai in a ummi hna cu siangpahrang inn chungah pei an um tawn cu. 26 Sihmanhsehlaw zei ko cu dah zoh nan va duhmi cu a si kun? Profet maw? Asi, profet nakin a ngan deuhmi pei nan hmuh ko hi. 27 Zeicah ti ahcun Johan cu Cathiang nih, 'Hika ah hin ka tlangautu kha a um i amah cu na hmaiah ka thlah lai; amah nih cun na lam kha an sialpiak lai,' tiah Pathian nih a ti, a timi kha pei a si cu, 28 Kan chimh hna, nu hrinmi fa lakah Johan nakin a ngan deuhmi ahohmanh an um lo, sihmanhsehlaw Pathian Pennak chung i a ummi hna lak i a hme bik hmanh Johan nakcun a ngan deuh," tiah a ti. 29 Mi zapi le ngunkhuai khawltu hna nih khan a bia cu an theih; anmah cu Pathian bia kha a ngai i tipilnak a ingmi cu an si. 30 Sihmanhsehlaw Farasi mi le Phungbia cawnpiaktu saya hna nih khan cun an ca i Pathian nih a tinhmi kha an duh lo i Johan tipil peknak kha an cohlang duh lo. 31 Jesuh nih aa thawh i, "Tuchan mi hi zei he dah ka tahchunh hna hnga? Zei he dah an i lawh hnga? 32 Chawdawrnak hmun ah a ṭhu i bu khat le bu khat kha: Thonglawi kan in tumpiak hna, sihmanhsehlaw nan lam duh lo; Mithi hla kan in sakpiak hna, sihmanhsehlaw nan ṭap duh lo; tiah aa timi ngakchia bantuk an si. 33 Tipil petu Johan kha a hung chuak i rawl a ul i zu zeihmanh a ding lo, sihmanhsehlaw nan i thawh i, khuavang a ngei, nan ti. 34 Cun Mi Fapa kha a hung chuak ve i a ei a ding i nannih nih nan i thawh i, "Hi pa hi zohhmanh u, misaram le mizuram, ngunkhuai khawltu hna le misual hna kawi a si,' nan ti. 35 Sihmanhsehlaw Pathian fimnak cu ahmaan taktak ko ti kha a rak cohlangmi vialte nih an langhter," tiah a ti. 36 Farasi mi pakhat nih Jesuh cu zanriah ei ah a sawm. Jesuh cu a inn ah cun a va kal i rawl ei awkah khan an ṭhu. 37 Cu khua ah cun a sualminu pakhat a rak um. Farasi mipa inn ah Jesuh cu rawl a hrawng ti kha a theih i cucaah lungrang thawl pakhat a khat tein zihmui a ummi kha a rak i put i 38 Jesuh hnulei ah cun a kehram ah khan a dir, a ṭap i a mitthli in a ke kha a cinter. Cun a ke i a mitthli cu a sam khan a hnawh i a hnamh hna i zihmui kha a toih hna. 39 Jesuh rawlhrawn a sawmtu Farasi mi nih khan mah cucu a hmuh tikah a lung chungin, "Hi pa hi profet a si taktak ahcun amah a tawngtu nu hi ahodah a si i zeitluk a sualminu dah a si ti kha a hngalh lai," tiah a ti. 40 Jesuh nih a hun i thawh i, "Simon, zeilo thil pakhat chimh awk kan ngei," tiah a ti. Simon nih cun, "Asi, saya, ka chim tuah," tiah a ti. 41 Jesuh nih cun, "Tangka cawihtupa sinah lei a bami pahnih an um. Pakhat nih ngun tangka za nga a bat i a dang pakhat nih sawm nga a bat. 42 An pahnih tein an cham kho veve lo, cucaah a ngaihthiam hna. A si ahcun, aho nih khan dah amah cu a dawt deuh lai?" tiah a ti. 43 Simon nih cun a thawh i, "Ka ruahnak ah, tam deuh a ngaihthiammi nih khan ta a dawt deuh lai," tiah a leh. "Na hmaan," tiah Jesuh nih a ti. 44 Cun minu lei kha a hei hoih i Simon cu a thawh i, "Hi nu hi na hmu maw? Na inn chungah ka ra lut i sihmanhsehlaw ka ke ṭawlnak caah ti naa ka pe lo, sihmanhsehlaw amah nih hin cun ka ke kha a mitthli in a ṭawl hna i a sam in a hnawh hna. 45 Ka rat tikah na rak ka hnam lo, sihmanhsehlaw ka rat ri in atu tiang ka ke hnamh kha a ngol lo. 46 Ka lu i thuh awkah chiti zeihmanh na ka pe lo, sihmanhsehlaw anih nih cun ka ke kha zihmui in a culh. 47 Cucaah hihi kan chimh, dawtnak nganpi a langhtermi nih khan a sualnak tampi a simi cu ngaihthiam an si cang, ti kha a langhter. An sualnak tlawmte lawng ngaihthiam a simi hna nih cun dawtnak tlawmte lawng an langhter ve," tiah a ti. 48 Cun Jesuh nih minu cu a thawh i, "Na sualnak cu ngaihthiam na si," tiah a ti. 49 Cabuai i a ṭhu vemi hna nih khan, "Sualnak hmanh a ngaithiamtu hi ahodah a si?" tiah an i ceih. 50 Sihmanhsehlaw Jesuh nih minu cu a thawh i, "Na zumhnak nih khan an khamh cang, dai tein va kal ko," tiah a ti.
1 Cu hnu tlawmpal ah cun Jesuh cu khuapi he khuate he a tlawng duahmah hna i Pathian Pennak kong Thawngṭha kha a chimh hna. Lamkaltu pahleihnih hna nih khan an zulh i 2 an zawtnak le thlarau ṭhalo nih a tuah hnanak in a damtermi hna nih khan an zulh ve. Cu hna cu a chungin thlarau ṭhalo pasarih a chuahpiakmi Mary (Magdalin timi) le 3 Herod zung i bawi a simi Khuza nupi Joanna le Susanna le Jesuh le a zultu hna kha an ngeihmi thil in a rak bawmtu hna, nu dang tampi kha an si. 4 Jesuh sinah cun khua pakhat hnu pakhat in mi an ra chin luaimai i mi tampi an i pumh tikah Jesuh nih hi bianabia hi a chimh hna: 5 "Mipa pakhat cu thlaici vorh awkah aa thawh. Lo chung i thlaici a vorh tikah cun a cheu cu lam hril ah an tla i mi nih an lamh hna i vate nih an char hna. 6 A cheu cu lung lakah an tla, an hung keuh tikah vawlei a hnawn lo caah an car dih. 7 Thlaici a cheu cu hling lakah an tla, hling he cun an kho ṭi i hling nih cun a thah hna. 8 Cun thlaici a cheu cu vawlei ṭha ah an tla; an hung ṭhang i theifang let za khat cio an vui," tiah a ti. Hi bia a chim ah hin, "Theihnak hna nan ngeih ahcun thei ko u," tiah a auhnawh hna. 9 Jesuh cu a zultu hna nih khan, hi tahchunhnak bia hi a sullam zeidah a si, tiah an hal. 10 Jesuh nih a thawh hna i, "Pathian Pennak kong biathli hngalhnak cu nannih cu pek nan si cang; sihmanhsehlaw midang cu tahchunhnak bia lawngin chimh an si lai, cucaah cun an zoh len lai nain an hmu lai lo, an ngai len lai nain an hngal lai lo," tiah a ti. 11 "Hi tahchunhnak bia a sullam cu hihi a si: thlaici cu Pathian bia a si. 12 Lam i a tlami thlaici cu, a theih cu a theimi an si ko: asinain khuachia nih a rathnawh hna i an lung chungin thlaici kha a chuahpiak ṭhan hna caah a zum lo i khamhnak a hmu lomi kha an si. 13 Lung lakah a tlami thlaici cu bia kha a thei i lunglawm ngaiin a cohlang i sihmanhsehlaw an chung i thuk a pil lomi kha an si. Caan tlawmte chung lawng kha an zumh i tukforhnak a rat tikah an tlu ṭhan. 14 Hling lakah a tlami thlaici cu hi mi hna bantuk hi an si: Pathian bia cu an theih nain khuaruahhar vansannak le rumnak le nuamhnak nih a rialdip hna tikah an thei a hmin kho lomi kha an si. 15 Vawlei ṭha ah a tlami thlaici cu bia kha lungtho tein a thei i an lung chungah ṭha tein aa cinken i a thei a tlai tiangin aa zuammi cu an si," tiah a ti. 16 "Ahohmanh nih meiinn kha an van tikah kho an khuh bal lo, ihkhun tang zongah an chia bal lo. Mi nih inn chung i an rung luh tikah ceunak kha an hmuh nakhnga mei vannak cungah khan an van tawn. 17 Zeicahtiah thuhmi kha a lang lo dingmi zeihmanh a um lo i biathli zong hngalh lo dingmi le ceunak ah chuahpi lo dingmi zeihmanh a um lo. 18 "Cucaah nan ngaihning kha i ralring u; zeicahtiah a ngeimi kha chap chin an si lai i a ngei lomi kha ka ngeih tiah an i ruahmi thil tlawmte hmanh kha lakpiak an si lai," tiah a ti. 19 Jesuh a nu le a naule kha a sinah an ra, sihmanhsehlaw mi an tam tuk caah a sin an phan kho lo. 20 "Na nu le na naule kha lengah an dir ko, ton an in duh," tiah an chimh. 21 Annih cu Jesuh nih, "Ka nu le ka naule cu maw — ka nu le ka naule cu Pathian bia kha a thei i an theih bantukin a tuahmi paoh kha an si ko," tiah a leh hna. 22 Ni khat cu Jesuh kha a zultu hna he lawng chungah an lut i annih cu a thawh hna i, "Tili khattelei ral ah khin va kal u sih," tiah a ti hna. Cucaah an i thawh. 23 Lawng in an kal lioah cun Jesuh cu aa hngilh. Thlitu fak ngai tili cungah cun a rung hrang ciammam i lawng cu ti khah hnik aa zal i an thin a phang ngaingai. 24 A zultu hna cu Jesuh sinah khan an ra i an hlauh i, "Saya, saya, kan thi dengmang ko hih," an ti. Jesuh cu a hung tho i thlitu le tilet cu a caak hna. Thlichia cu a dai i zeizong vialte cu dai zirziar in a um. 25 Cun a zultu hna cu a thawh hna i, "Khuazei ah dah nan zumhnak cu a um kun?" tiah a ti. Sihmanhsehlaw annih cu an khuaruah a har i an thin a phang i pakhat le pakhat cu, "Hi pa hi aho hen a si? Thlichia le tilet kha nawl a pek hna i an ngaih ko dahngai," tiah an i ceih. 26 Galilee ram in tili ralchan i a ummi Gerasa mi hna ram ah khan lawng in an va kal. 27 Jesuh cu titlang a hei lamh ah khin cu ka khua i a ummi mipa pakhat, a chungah khuachia nih an luhhnawh mipa nih khan a rak ton. Caan saupi puan loin a um cang i inn ah um duh loin mithi vuinak lungkua ah khan a um: 28 Jesuh cu a hmuh tikah fak piin a ai i a hmaiah a bawk i aw thang piin, "Jesuh, Cung Nung Bik Pathian Fapa, ka cungah zeidah tuah na duh? Dan ka tat sawh hlah, tiah kan nawl," tiah a ti. 29 Jesuh nih thlarau ṭhalo kha a chungin chuak tiah nawl a pek caah hitihin a tinak cu a si. Thlarau ṭhalo nih khan voi tampi a tlaih tawn i kan tuahhmawh sual lai kaw tiah a kut le a ke kha thir cikcin in an ṭem tawn nain cikcin cu a chah dih hna i ramlak ah cun khuachia nih cun a lohpi tawn. 30 Jesuh nih cun a thawh i, "Na min ahodah a si?" tiah a ti. "Ka min cu Mi Bupi a si," tiah a leh — zeicahtiah a luhhnawhtu khuachia cu tampi an si. 31 Khuachia nih khan Jesuh cu dongh hngal lo khor thukpi chungah khan kan thla sawh hlah tiah an nawl. 32 An pawngah cun tlangpang ah khan vok a runpi in an tlong lulhmalh ko. Khuachia nih khan Jesuh cu vok chungah khin kan luhter ko tiah an nawl i a luhter hna. 33 Cucaah khuachia cu mipa chung cun an chuak i vok chungah cun an lut; an run ningpi in lungpang hrap cun tili chungah khan an zuang i an thi dih. 34 Vok a zohkhenhtu hna nih khan cu ti i thil a um cu an hmuh i cucaah an tli i khua chung le lo lakah khan thawng cu an thanh hna. 35 Cu ti i thil a hung ummi zoh awkah mi cu an va kal. Jesuh sinah khan an va phan i khuachia nih an chuahtak cangmi pa kha a kehram ah puan i aih le lungfim tein a ṭhut kha an va hmuh i an dihlak in an thin a phang. 36 Cu thil a rak hmu cangtu hna nih khan zeitindah mipa nih damnak a hmuh ti kha an rak chimh hna. 37 Cu tikah Gerasa ram i a ummi hna nih cun an ṭih ngaingai caah an zapi in Jesuh cu, kal ko tiah an nawl. Cucaah Jesuh cu lawng chungah khan a lut i a kal. 38 Khuachia nih an chuahtak cang mipa nih khan Jesuh cu a nawl i, "Na sinah kal ve ko ning," a ti. Sihmanhsehlaw Jesuh nih a donh i, 39 "Inn ah va tlung law Pathian nih na caah a tuahmi tu kha va chim hna," tiah a ti. Mipa cu khua chungah khan aa chawk i a caah Jesuh nih a tuahmi kha a chimh hna. 40 Jesuh cu tili khattelei kam i a va kir tikah khan mibu nih khan an rak lawmh, zeicahtiah amah cu an rak hngah ko. 41 Khi tikah mipa pakhat a min Jairu a simi kha a ra; amah cu cuka hrawng pumhnak inn i hruaitu pakhat a si. Jesuh ke hramah cun a bawk i ka inn ah ra ko sawh, tiah a nawl, 42 zeicahtiah fanu pakhat te lawng a ngeihmi, kum hleihnih a simi kha a cat lengmang. Jesuh cu a kal lioah khan mibu nih cun a zual in an zual. 43 Cuka ah cun nu pakhat thichuah zawtnak in kum hleihnih a zaw cangmi a um i a ngeihmi vialte kha sibawi phalh awkah a hmang dih cang nain ahohmanh nih an damter kho lo. 44 Zapi lak cun Jesuh hnulei khan a ra i a puan kite kha a hei tongh i chikkhatte ah a thi cu a pit. 45 Jesuh nih cun aa thawh i, "Ahodah a ka tawng?" tiah a ti. Ahohmanh nih kan in tawng lo, tiah an ti; cun Peter nih aa thawh i, "Saya, mi nih cun pei a zual in an in zual i a but in an in buthnawh cu," tiah a ti. 46 Sihmanhsehlaw Jesuh nih, "Aho nih dik an ka tawngh ko, zeicahtiah ka chungin ṭhawnnak a chuah pei ka hngalh ko cu," tiah a ti. 47 Minu nih cun a ka hngalh cang ti kha a hngalh tikah ther lengmang in a ra chuak i Jesuh ke hramah cun a bawk. Mi zapi hmaiah cun zeicahdah amah kha a tawngh i zeitindah chikkhatte ah damnak a hmuh kha a chimh. 48 Jesuh nih amah cu a thawh i, "Ka fanu, na zumhnak nih an damter, dai tein va kal ko," tiah a ti. 49 Cu bia cu Jesuh nih a chim lioah khan pumhnak inn zohkhenhtu inn cun zualko pakhat a ra i, "Na fanu cu a thi cang, saya cu hnahnawh ti duh hlah," tiah a chimh. 50 Cu bia cu Jesuh nih a theih i Jairu cu a thawh i, "Na thinphang hlah, zum ko law a dam ko lai," tiah a ti. 51 Inn kha an va phak tikah Peter le Jeim le Johan le ngakchianu a nu le a pa dah ti lo cu amah he inn chung i luh ding kha a dang ahohmanh a onh hna lo. 52 Khika i a ummi vialte nih ngakchia cu an ṭah. Jesuh nih a thawh hna i, "Ṭap hlah u, ngakchia hi a thi lo, aa hngilh i pei a si ko cu," tiah a ti hna. 53 A thi ko ti kha an hngalh caah an nih a chuak. 54 Sihmanhsehlaw Jesuh nih a kut khan a vun tlaih i, "Tho tuah, ka fanu," tiah a vun auh. 55 A nunnak cu a hung kir ṭhan i hmakhatte ah a tho; cun Jesuh nih ei awk pe u, tiah a ti hna. 56 A nu le a pa cu an khuaruah a har ngaingai, sihmanhsehlaw hi kong cu ahohmanh chim hna hlah u, tiah Jesuh nih a thlauh hna.
1 Jesuh nih pahleihnih hna kha hmunkhat ah a auh hna i khuachia ṭhawl khawhnak le zawtnak damter khawhnak ṭhawnnak le nawlngeihnak kha a pek hna. 2 Cun Pathian Pennak kong chim awk le mizaw damter awkah a thlah hna. 3 Annih cu a thawh hna i, "Atu khual nan tlawn lainak ding caah hin zeihmanh i phorh hlah u: ṭhiangṭhunh siseh, zal siseh, riahcaw siseh, tangka siseh, angki khethuan siseh, zeihmanh i phorh hlah u. 4 Tluninn an in onh hnanak inn paoh ah, cu khua in nan chuah hlan tiang va um ko u; 5 tluninn an in onh duh hna lonak khua paoh cu, nannih nih va kaltak ko u law annih kha ralrinnak peknak caah nan ke beh leidip kha va khawnhnawh hna u," tiah a ti. 6 Zultu hna cu an i thawh i khua kip kha an tlawng i hmun kip ah Thawngṭha kha an chim i a zawmi kha an damter hna. 7 Galilee ram a uktu Herod nih khan hi bantukin thil a ummi vialte kha a theih ve; hi kong ah hin a lung aa tuai ngaingai, zeicahtiah mi a cheu nih, "Tipil petu Johan kha a nung ṭhan," an ti. 8 Midang nih, Elijah kha a hung lang cang, an ti i a dang nih hlan lio pi i a rak ummi profet pakhatkhat a hung nung ṭhan, an ti. 9 Herod nih cun, "Johan cu a lu ka tanter ṭung hna, a thawng ka theih lengmangmi mipa hi ahodah a si kun?" tiah a ti. Cun Jesuh hmuh ding kha heh tiah aa zuam lengmang. 10 Lamkaltu hna cu an ra tlung i an tuahmi vialte kha Jesuh cu an chimh dih. A sinah aa kalpi hna i anmah lawng tein Bethsaida timi khua ah khan an kal. 11 Cu thawng cu mizapi nih khan an theih tikah an zulh. A rak lawmh hna i Pathian Pennak kong kha a rak chimh hna i damnak a herhmi kha a damter hna. 12 Nitlak aa timh tikah khin pahleihnih kha a sinah cun an ra i, "Mizapi hi kalter hna law hika hrawng khua hna le lo hna ah hin rawl le riahnak kawl awkah kal hna seh, zeicahtiah kan umnak hmun hi mi um lonak hmun a si ṭung," an ti. 13 Sihmanhsehlaw Jesuh nih a rak thawh hna i, "Nanmah nih ta ei awk cu nan pek ko hna," tiah a ti. Annih nih, "Kan ngeihmi cu dihlak ah changreu hlum nga le nga pahnih pei a si ko cu. Mizapi caah hin rawl cawk fial maw na kan duh?" an ti. 14 (Cuka i a ummi cu upa thong nga hrawng an si). Jesuh nih a zultu hna cu, "Mi kha sawm nga hrawng duahmah in a bu a bu in ṭhutter hna u," tiah a ti hna. 15 Cu bantuk cun a zultu hna nih cun an tuah i an dihlak in an ṭhutter hna. 16 Jesuh nih changreu hlum nga le nga pahnih cu a lak hna i van lei a zoh i Pathian kha a lawmh hnuah a cheu hna i mizapi phawt awkah khan a zultu kha a pek hna. 17 An dihlak in an ei i an khim dih; an nganhmi cu a zultu hna nih khan an khawmh hna i bawm hleihnih khat a si. 18 Voi khat cu Jesuh kha amah lawng tein thla a cam lioah a zultu hna kha a sinah an ra i, "Mi nih aho a si an ka ti dah?" tiah a hal hna. 19 "A cheu nih Tipilpetu Johan a si, an in ti. Cun a dang nih, Elijah a si, an in ti. Cun a dang nih hlanlio i a rak ummi profet pakhatkhat kha a nung ṭhan, an in ti," tiah an ti. 20 Cun annih cu a thawh hna i, "Nannih tah zeitin? Nannih nih tah aho a si nan ka ti dah?" tiah a hal hna. Peter nih a vun leh i, "Nangmah cu Pathian Messiah na si," tiah a ti. 21 Cun Jesuh nih ka kong cu ahohmanh nan chim hna lai lo tiah fek tein a ti hna i, 22 "Mi Fapa nih hin temhinnak tampi ka in hrimhrim lai; upa hna le tlangbawi upa hna le Phungbia cawnpiaktu saya hna nih an ka hlawt lai. An ka thah lai i ni thumnak ni ah thawhter ka si ṭhan lai," tiah a chimh hna. 23 Cun annih cu an dihlak in a thawh hna i: "Ahohmanh nih zulh nan ka duh ahcun mah zawnruahnak kha nan ngol lai i ni fa tein nan vailam kha nan i put lai i nan ka zulh lai. 24 Zeicahtiah mah himnak lawng a ruatmi cu a nunnak kha a sung lai sihmanhsehlaw keimah ruangah a nunnak a sungmi cu khamhnak kha a hmu lai. 25 Mi pakhatkhat nih vawlei hi a dihlak in co seh law amah cu lotlau ṭung seh law, asiloah rawkral ṭung seh law, zeital a miak hnga maw? Miak hlah. 26 Ahohmanh keimah le ka cawnpiaknak kha a kan zahpimi cu, Mi Fapa nih ka sunparnak le ka Pa le a thiangmi vancungmi hna sunparnak he ka rat tikah, ka zahpi ve hna lai. 27 Cun nannih nih hika ah hin, Pathian Pennak an hmuh hlan tiang a thi lo dingmi an um tiah kan chimhmi hna hi i cinken u," tiah a ti. 28 Hi bia a chim hnu zarh khat tluk ah Jesuh nih Peter le Johan le Jeim kha thlacam awkah tlang ah aa kaipi hna. 29 Thla a cam lioah khan a hmai cu aa thleng i a hnipuan cu rang cercur in an um. 30 Chikkhatte ah khan mi pahnih nih bia an hung ruah. Annih cu Moses le Elijah kha an si. 31 Vancung sunparnak in an i thuam i Jerusalem khua i a thihnak thawng in Pathian nih a timhmi a tlinter lainak kong kha Jesuh he cun an i ruah. 32 Peter le a hawile hna cu thu hluahmah in an rak i hngilh, sihmanhsehlaw an hun i hlau i Jesuh sunparnak le a sinah a dirmi pahnih kha an hmuh hna. 33 Mi nih khan Jesuh cu an kaltak lioah khin Peter nih a thawh i, "Saya, hika i kan um hi thil ṭha a si. Deu pathum in kan sak lai, pakhat nangmah caah, pakhat Moses caah, pakhat Elijah caah," tiah a ti. (Ka chimmi hi zei a si ti a hngal ngaingai lo). 34 Bia a chim lengmang lioah cun minmei a hung kai i a hun zelh hna, cun a zultu hna cu an ning a ṭi. 35 Minmei chung cun aw pakhat nih, "Amah hi ka thimmi ka Fapa a si, a bia kha ngai u," tiah a run chim. 36 Aw kha a daih tikah Jesuh cu amah lawng tein a um ko kha an hmuh. Dai tein an um i an hmuhmi kha ahohmanh an chim hna lo. 37 A thaizing ah tlang cung cun an vung ṭum i mi tampi nih Jesuh cu an rak ton. 38 Mizapi lak cun mipa pakhat a hung au i, "Saya, ka fapa hi ka zohpiak hmanh, amah lawnglawng hi fa ka ngeihmi a si. 39 Thlarau nih a luhhnawh ciammam tawn i a au a khuang i a ther thluahmah i a buanbara zong a tawh dih tawn; atu le atu cuticun a tuah i a kal in a kaltak duh lo. 40 Na zultu hna kha, hung ka ṭhawlpiak ko sawh u, tiah ka nawl hna i sihmanhsehlaw an ṭhawl kho fawn lo," tiah a ti. 41 Jesuh nih cun a leh i, "Nan hei zum loin nan hei palh thiam dah. Zei can riamruam hen kan umpi hna a herh lai? Zei can dah kan in hna lai?" tiah a ti. Cun mipa cu aa thawh i, "Hika ah hin na fapa cu ratpi tuah," tiah a ti. 42 Ngakchiapa cu a rat lioah khan khuachia nih cun vawlei ah a thluk ciammam i i let cukmak in a tuah. Jesuh nih thlarau ṭhalo cu a sik i ngakchiapa cu a damter i a pa sinah khan a pek ṭhan. 43 Pathian ṭhawnnak kha an hmuh tikah mi vialte cu an khuaruah a har dih. Jesuh nih a tuahmi thil kong ah mi hna cu khuaruah har in an um ko lioah khan a zultu hna cu a thawh hna i, 44 "Kan chimh dingmi hna hi philh hlah u. Mi Fapa hi minung ṭhawnnak ah chanh a si lai," tiah a ti. 45 Sihmanhsehlaw cucu a sullam zeidah a si ti kha an hngal lo. An hngalh nakhnga lo thuhkanh an si i cu kong cu amah hal kha an ngamh fawn lo. 46 A zultu hna lakah cun bia alnak pakhat a hung chuak i cucu an lakah ahodah a ngan bik ti kha a si. 47 Jesuh nih an ruahnak kha a hngalh i cucaah ngakchiate pakhat kha a lak i a pawngah a dirter i 48 annih cu, "Ka min in hi ngakchiate tluninn a onhtu nih keimah tluninn a ka onh a si, cun keimah tluninn a ka onhtu nih keimah a ka thlahtu tluninn a onh kha a si. Zeicahtiah nan lak i a hme bikmi cu a ngan bikmi a si," tiah a ti. 49 Johan nih a hun i thawh i, "Saya, nangmah min in khuachia a ṭhawlmipa pakhat kan hmuh i kanmah bu chungmi a si lo caah kan thlauh," tiah a ti. 50 Jesuh nih a thawh i, "Thlauh hna hlah u, zeicahtiah an dotu hna a si lomi paoh cu an bawmtu hna an si," tiah a ti. 51 Jesuh cu vancung i laknak caan kha a nai cuahmah tikah a lung aa thlek i Jerusalem khua lei kal awkah khan aa thawh. 52 A hmaiah khan lamkal a thlah hna i cu hna cu an rak kal i Samaria mi hna khua pakhat ah khan zeizong vialte rak timh chung awkah an rak lut. 53 Sihmanhsehlaw Jerusalem i a kal lai kha a fian ko caah cuka khuami hna nih cun tluninn kha onh an rak duh lo. 54 Cu thil cu a zultu hna Jeim le Johan nih khan an hmuh tikah, "Bawipa, hi mi hna hrawhnak ding caah hin vancung in mei au u tiah na kan duh maw?" an ti. 55 Jesuh cu aa mer i a sik hna i 56 khua dang ah khan an lan. 57 Annih nih an kal lengmang lioah khan pakhatpa nih a thawh i, "Na kalnak paoh ah kan zulh lai," tiah a ti. 58 Jesuh nih cun, "Cenghngia nih kua an ngei i vate nih bu an ngei, sihmanhsehlaw Mi Fapa cu riahnak hmun hmanh ka ngei lo," tiah a ti. 59 A dang pakhat tu cu a thawh i, "Ka zul," tiah a ti. Sihmanhsehlaw cu pa nih cun, "Bawipa, ka pa kha va vui ta ning," a ti. 60 Jesuh nih cun a leh i, "Mithi nih an mithi kha va vui ko hna seh. Nang tu cu va kal law Pathian Pennak kong kha va chim ko," tiah a ti. 61 A dang pakhat nih a thawh ve i, "Bawipa kan zulh lai, sihmanhsehlaw ka chungle kha dam tein, va ti ta hna ning," tiah a ti. 62 Jesuh nih a leh i, "Ahohmanh leithuan aa ot i hnulei a zoh peng ṭungmi cu Pathian Pennak caah santlaihnak a ngei lo," tiah a ti.
1 Cu hnuah cun Bawipa nih a dang sawm sarih le pahnih kha a thim hna i amah a kalnak ding khua le hmun paoh ah khan a hmaiah pahnih pahnih in a thlah hna. 2 Annih cu a thawh hna i, "Rawl ṭuan awk a tampi ko nain a ṭuantu tlawmte lawng an si. Cucaah rawl a ṭuantu dingah mi tam deuh a thlah hna nakhnga lo ngeitu sinah khan thla va cam tuah u. 3 Atu ah i thawh u law kal u. Nannih cu cenghngia lak i tuufa thlah bantukin kan thlah hna. 4 Phaisa bawm siseh, zal siseh, kedan siseh i phorh hlah u; lampi ah ahohmanh biakchawnh awkah dircon hlah u. 5 Inn pakhatkhat ah nan luh tikah a hmasa bik ah, "Hi inn chungah daihnak um ko seh," va ti u. 6 Daihnak a duhmipa a rak um a si ahcun, daihnak na cungah um seh, tiin nan biakchawnhnak cu a cungah hmun seh; sihmanhsehlaw cu ti a si lo ahcun daihnak in nan biakchawnhnak cu nan sinah kir ṭhan seh. 7 Cu inn ah cun um ko u law an in pekmi hna paoh kha va ding u law va ei ko u; zeicahtiah rianṭuantu cu a ṭuan man a hmuh awk a si. Inn khat hnu inn khat in i thawn lengmang hlah u. 8 Khua pakhatkhat ah nan luh i tluninn an rak in onh hna fate, an in hunhmi hna paoh kha va ei u law, 9 cuka khua i a ummi mizaw kha va damter hna u law, cuka khuami hna cu, 'Pathian Pennak cu nan pawngte a phan cang,' tiah va chim hna u. 10 Sihmanhsehlaw tluninn an rak in onh hna lonak khua paoh cu an khuachung lam ah khan i chawk u law lai i, 11 'Kan ke i aa behmi nan khua chung leidip hmanh hi kan in thinhnawh tak hna; sihmanhsehlaw hi tu hi cu run philh hlah u: Pathian Pennak nan pawngte a phan cang hih,' nan ti hna lai. 12 Mah hihi kan chimh hna, Biaceih Ni ah cun hi khua nak hin Pathian nih Sodom khua kha a zaangfah deuh lai," tiah a ti. 13 "Maw Khorazin khua, na caah zeitluk ṭihnung dah a si? Bethsaida zong, na caah zeitluk ṭihnung dah a si ve? Na chung i ka tuahmi khuaruahharnak hna hi Tair le Sidon khua ah khan rak tuah hna ning law khika i a ummi minung hna cu, an nunning an i thlen langhternak caah puanchia aih in le vutcam i phulh in an ṭhu diam cang hnga! 14 Biaceih Ni ah cun nanmah nakin Tair le Sidon kha Pathian nih a zaangfah deuh te hna lai. 15 Cun maw Kapernaum, vancung i hun i hlorh khi na duh mu? Hell chungah khin vun hlonh na si lai," a ti. 16 A zultu kha a thawh hna i, "Nan bia a ngaimi paoh nih ka bia an ngaih a si, an hlawmi hna paoh nih keimah an ka hlawt a si, keimah a ka hlawmi paoh nih a ka thlahtu kha an hlawt a si," tiah a ti. 17 Sawm sarih le pahnih kha thanuam ngaiin an ra kir i, "Bawipa, nangmah min in kan thawl hna tikah khuachia hmanh nih kan nawl an ngaih," an ti. 18 Jesuh nih a leh hna i, "Satan kha van in nimtlau bantukin a tlak kha ka hmuh. 19 Ngai hmanh u: rul le tlangngaikuang hmanh lamh khawhnak ṭhawnnak le nan Ral ṭhawnnak tei khawhnak kan pek hna caah zeihmanh nih an ti kho hna lai lo; 20 sihmanhsehlaw thlarau ṭhalo nih nan nawl an in ngaih hna caah khan i lawm hlah u, vancung i nan min ṭial a si ca tu ah khan i lawm tuah u," a ti hna. 21 Khi tikah khan Jesuh cu Thiang Thlarau nih lawmhnak in a khahter i, "Maw ka Pa, van Bawi le vawlei Bawi a simi, mifim le mithiam hna sinin na rak thuhmi kha fimnak le thiamnak a ngei lomi hna sinah na langhter caah hin nangmah cu kan lawmh. Asi, ka Pa, hi thil na tuahnak cu nangmah duh tein le nangmah nih naa thimning tein a si ko. 22 "Ka Pa nih zeizong vialte kha a ka pek cang: Pa nih dah ti lo nih cun ahohmanh nih Fapa kha ahodah a si, ti awk an hngal lo, Fapa le an sinah Fapa nih Pa a phuan duhmi hna dah ti lo nih cun Pa kha ahodah a si ti awk ahohmanh nih an hngal lo," tiah a ti. 23 Cun Jesuh cu a zultu hna leiah khan a hei i mer i anmah bing tein, "Nan hmuhmi thil nan hmuh caah hin zeitluk in dah nan caah lunglawmh awk a si. 24 Zeicahtiah fiang tein kan chimh hna, profet tampi hna le siangpahrang hna nih nan hmuhmi hi hmuh an rak duh ko nain an hmu kho lo, theih an rak duh ko nain an thei kho lo," tiah a ti hna. 25 Cun Phungbia cawnpiaktu saya pakhat a ra i amah kha foih a hung zalh, aa thawh i, "Saya, zungzal nunnak hmuh awkah zeidah ka tuah lai?" tiah a ti. 26 Jesuh nih a leh i, "Cathiang nih zeitindah an chim i an chimmi cu zeitindah a sullam naa lakning a si?" tiah a ti. 27 Mipa nih cun a leh i, " 'Bawipa na Pathian cu na lungthin dihlak le na nunnak dihlak le na thazang dihlak le na ruahnak dihlak in na dawt lai i na innpa zong kha nangmah naa dawt tlukin na dawt lai,' a ti," tiah a ti. 28 Jesuh nih cun, "Na bialehnak ahmaan; cucu va tuah law na nung lai," tiah a ti. 29 Sihmanhsehlaw Phungbia cawnpiaktu sayapa nih cun thiam hun i coh kha a duh i, "Ahodah ka innpa cu a si?" tiah Jesuh kha a hal. 30 Jesuh nih cun a leh i, "Voi khat cu mipa pakhat kha Jerusalem in Jeriko khua leiah a vung kal: Cu a vung kal lioah cun damiah nih an rak tlaih i a puan an phoih i an tuk i thilo nunglo in an kaltak. 31 Cu lioah cun tlangbawi pakhat hi cuka lei lam ah cun a vung kal ngelcel; mipa cu a hei hmuh tikah lam khattelei kam cun a hrial. 32 Cu bantuk ṭhiamṭhiam in Levi mi pakhat zong cuka ah cun a va kal ve, mipa cu a hei kalhnawh i a hei bih tak i khattelei kam cun a kaltak ve. 33 Sihmanhsehlaw Samaria mipa pakhat, cuka lei lam i khual a tlawngmi cu, cu pa umnak kha a va phan; amah kha a hmuh tikah a zaang a fak ngaingai. 34 A hei fuh i a hma ah cun chiti le mitsur hang kha a thuh hna i a men hna; cun mipa cu a saṭil cungah khan a chuan i khual riahnak inn pakhat ah a kalpi i cuka ah cun a zohkhenh. 35 A thaizing ah ngun tangka phar hnih aa chuah i riahnak inn hngaktupa cu a pek i, 'Amah hi ṭha tein rak zohkhenh law amah caah na liauheumi vialte cu hi lei ka ra kir ṭhan tikah kan pek ṭhan lai,' a ti," tiah a ti. 36 Cun Jesuh nih cun aa thawh i, "Hi mi pathum hna lakah hin aho hi dah damiah nih an tlaih mipa innpa kha a si tiah na ruah?" tiah a ti. 37 Phungbia cawnpiaktu saya nih cun, "Amah a zaangfahtu kha," tiah a leh. Jesuh nih, "Va kal law cu bantuk cun va tuah ve," tiah a ti. 38 Jesuh le a zultu hna cu khual an tlawn lioah khan khua pakhat an va phan i cuka ah cun minu pakhat a min Martha a simi nih a inn ah a rak tlunter hna. 39 Nau pakhat a ngei i a min cu Mary a si. Mary cu Bawipa ke hram ah cun a ṭhu i a cawnpiaknak kha a ngai. 40 Martha cu a rian a tam caah khan a ing a puang i, "Bawipa, ka nau nih keimah lawng rianṭuan a ka rinh hi na zei a poi lo maw? Va bawm tiah hun chim" tiah a ti. 41 Bawipa nih cun a leh i, "Martha, Martha, thil tam tuk kong ah na lungre a thei i na ing a puang, 42 sihmanhsehlaw a herh taktakmi cu pakhat lawng a si ko. Mary nih ahmaanmi thil cu aa thim cang i cucu ahohmanh nih an chut lai lo," tiah a ti.
1 Voi khat cu Jesuh kha kaa khat ah thla a cam. A thlacam cu a dih tikah a zultu pakhat nih aa thawh i, "Bawipa, Johan nih a zultu hna a cawnpiak hna bangin kannih zong thlacam kan cawnpiak ve," tiah a ti. 2 Jesuh nih cun, "Hitihin thla cu nan cam awk a si lai: 'Kan Pa, Na min thiang cu upat si ko seh, Na Pennak cu tlung ko seh. 3 Kan herhmi rawl ni fate in kan pe ko. 4 Kan cung i a sualmi hna kha kan ngaihthiam hna caah Kan sualnak kha kan ngaithiam. Cun a harmi hneksaknak kan phakter hlah,' nan ti lai," a ti. 5 Cun Jesuh nih a zultu cu a thawh hna i, "A biana ah nannih lak i pakhatkhat cu zanṭim ah a hawipa inn ah a va kal i, 'Ka kawi, changreu hlum thum in ka cawi ta ko. 6 Ka kawipa pakhat khual a tlawng i ka inn ah atute ah khan a ra chuak i pek awk zeihmanh ka ngei lo,' tiah a va ti. 7 Cun a hawipa nih cun a inn chung cun, 'Hna ka hnawh hlah, innka ka hrenh cang i ka fale he kan it cang, nangmah thil pek awkah ka tho kho ti lo,' a ti. 8 A si ahcun zeitindah a tuah kun lai? Amah cu na hawi a si ruangah a tho in na herhmi changreu kha an pe lai lo nain ningzak loin na hal peng hrat caah khan, na herhmi paoh cu an pek ko lai. 9 Cucaah hihi kan chimh hna: Hal u law pek nan si lai; kawl u law nan hmuh lai; king u law innka cu hunpiak nan si lai. 10 Zeicahtiah a halmi paoh cu pek an si lai i a kawlmi paoh nih an hmuh lai, a kingmi paoh cu innkhar kha hunpiak an si lai. 11 Nannih hringtu pa hna lakah, nan fale nih nga an in hal hna ah, rul a pemi nan um hnga maw? 12 Arti an in hal hna ah tah tlangngaikuang nan pe hna hnga maw? 13 Hi tluk i nan ṭhalo ko na hin nan fale kha thil ṭha pek cu nan hngalh ahcun, vancung i a ummi nan Pa nih cun amah kha Thiang Thlarau a halmi cu zeitluk in dah a pek chinchin hna lai," tiah a ti. 14 Jesuh nih a holh kho lomi khuachia kha a ṭhawl i cu khuachia cu a chuah tikah mipa cu holh hram aa thawk. Mizapi cu an khuaruah a har ko, 15 sihmanhsehlaw a cheu nih an i thawh i, "Khuachia ṭhawl khawhnak ṭhawnnak a petu cu khuachia hna lak i an bawi bik Beelzebul kha a si," an ti. 16 A dang nih amah kha foih an rak duh ve, cucaah na tuahmi hi Pathian hnatla a si le si lo hngalhnak ah khuaruahharnak pakhat in ser tuah, an ti. 17 Sihmanhsehlaw Jesuh nih an ruahnak kha a hngalh i, "Ram zeihmanh, anmah le anmah aa domi bu ah aa ṭhen ahcun sau a dir lai lo, anmah le anmah aa domi innchungkhar cu an i ṭhen. 18 Cucaah Satan pennak zong cu a chungah anmah le anmah aa domi bu an um ahcun zeitindah a dir khawh lai? Nannih nih nan i thawh i Beelzebul nih ṭhawnnak a pek caah khuachia kha a ṭhawl khawh hna, nan ka ti. 19 Ka ṭhawlning hna cu hitihin a si ahcun, nanmah nan zultu hna nih khan tah zeitindah an ṭhawl kun hna? Nanmah nan zultu hna lila nih pei nan palh diam ti kha an langhter ko cu. 20 Beelzebul ṭhawnnak in khuachia kha ka ṭhawl hna a si ṭung lo, Pathian ṭhawnnak in pei a si deuh cu, cu nih cun Pathian Pennak kha nan sin a phan cang ti kha a langhter. 21 "A ṭhawngmipa nih a hriamnam dihlak he a inn kha a ven tikah a ngeihmi thil vialte kha a him tawn. 22 Sihmanhsehlaw amah nakin a ṭhawng deuhmipa nih a hung doh i a hung tei tikah inn ngeitupa nih aa bochanmi hriamnam vialte kha aa kalpi dih hna i a firmi thil kha midang a phawt hna. 23 "Keimah a ka ṭanh lomi cu a ka dohtu an si; pumh a ka bawm lomi cu ṭhektu an si," tiah a ti. 24 "Thlarau ṭhalo pakhat kha minung chungin a chuah tikah dinhnak hmun kawl awkah ram rocar chungah khan a kenkip ah aa chawk. A hmuh khawh lo caah khan aa thawh i, 'Ka chuahtakmi inn ah khan ka kir ṭhan lai,' a ti. 25 Cucaah a va kir i inn cu thiangte le tlahirhiar tein a rak um ko kha a va hmuh. 26 Cun a va chuak i amah nakin a chia chinchinmi thlarau pasarih kha aa ratpi hna i cuka ah cun aa umpi hna. Cucaah a donghnak ah cun kha mipa kha a hramthawk i a sining nakkhan a umtuning a chia deuh," a ti. 27 Jesuh nih hi bia a chim dih tikah hin mizapi lak cun minu pakhat a hung au i, "Nangmah a rak in hring i a rak in cawmtu nu hi zeitluk in dik aa lawmh," tiah a ti. 28 Sihmanhsehlaw Jesuh nih a thawh i, "Pathian bia kha a thei i a ngaimi caah cun zeitluk in dik lunglawmhnak a si chinchin," tiah a leh. 29 Mi nih Jesuh kha an zual lulh ko lioah khan a thawh hna i, "Tuchan mi hi miṭhalo an va si hringhran dah. Pathian hnatlaknak a si ti hngalhnak caah khuaruahhar kan hmuhsak tuah, an ti, sihmanhsehlaw Jonah khuaruahharnak kha dah ti lo cu zeihmanh hmelchunhnak pek an si lai lo. 30 Profet Jonah cu Nineveh khuami hna caah hmelchunhnak a rak si bantuk khan Mi Fapa zong hi tuchan mi hna caah hin hmelchunhnak a si ve lai. 31 Biaceih Ni ah cun Chimlei Siangpahrangnu kha a dir te lai i atu chan mi hna hi sual a phawt te hna lai, zeicahtiah Solomon fimnak bia ngaih duh ah khan anih cu lamhla piin a ra i asinain hika ah hin Solomon nakin a ngan deuhmi a um ko ṭung. 32 Biaceih Ni ah cun Nineveh khuami cu an dir lai i nannih kha sual an in phawt hna lai, zeicahtiah annih cu Jonah bia chimmi an theih tikah khan an ziaza an i thleng, asinain hika ah hin Jonah nakin a ngan deuhmi a um ko ṭung," tiah a ti. 33 Ahohmanh nih meiinn a van tikah a thuh in a thup bal lo, kho zong a khuh bal lo, sihmanhsehlaw mei vannak tu ah khan a van i mi an rung luh tikah khua an hmu kho. 34 Nan mit cu nan pum caah meiinn bantuk a si; nan mit a fian tikah nan pum cu ceunak in a khat, sihmanhsehlaw nan mit a ṭhat lo tikah nan pum cu a dihlak in muihnak chungah a um. 35 Cucaah nan chung i ceunak a ummi cu muihnak a si nakhnga lo i ralring tuah u. 36 Cun nan pum cu a dihlak in ceunak in a khah i a zeika zawn hmanh kha muihnak chungah a um lo ahcun, meiinn nih a ceunak in an ceuh hna bantuk khin a ceu lai. 37 Bia a chim dih tikah Jesuh cu Farasi mi pakhat nih rawl hrawn a sawm; cucaah a va kal i rawl ei awkah khan a ṭhu. 38 Jesuh nih rawl ei hlanah a kut aa ṭawl lo kha Farasi mi nih cun a hmuh tikah a khuaruah a har. 39 Cucaah Bawipa nih cun amah cu a thawh i, "Nannih Farasi mi nih kheng le hrai kha a lenglei cu nan ṭawl tawn hna, sihmanhsehlaw a chunglei ah cun hakkauhnak le ṭhat lonak in nan khat. 40 Mihrut hna! A lenglei a sertu Pathian nih khan a chunglei zong cu a ser lo maw? 41 Sihmanhsehlaw nan hrai chung le nan kheng chung i a ummi thil kha misifak va pe hna u law nan caah zeizong vialte a thiang ko lai. 42 "Farasi mi hna, nan caah ṭihnung a va si dah! Pathian sinah, tihang ṭamhnak puṭinan tehna, khamhmuai tehna, anthor tehna le a dangdang kha cheu hra ah cheu khat lengmang nan pek ko, sihmanhsehlaw biading le Pathian dawtnak kha nan thlahdorh. A dang kha thlahdorh hlei loin pei hi hna hi nan tuah awk a si cu. 43 "Farasi mi hna, nan caah ṭihnung a va si dah! Pumhnak i ṭhutdan a dang tein chiahpiakmi i ṭhut cu nan duh i chawdawrnak hmun i upatnak in kuttlaih cu nan tlaihchan. 44 Nan caah ṭihnung a va si dah. Nannih cu hmelchunhnak tuah lomi thlan, a cung i mi nih hngalh loin an kal tawnnak bantuk cu nan si," a ti. 45 Phungbia cawnpiaktu saya pakhat nih a hun thawh i, "Saya, hi bantukin na chim tikah hin kannih zong na kan thangchiat a si ve," tiah a ti. 46 Jesuh nih cun a leh i, "Nannih Phungbia cawnpiaktu saya hna zong, nan caah ṭihnung a va si dah! Nanmah nih nan kutdong hmanh in nan tawngh duh ṭung lomi thilrit kha mi nan khinh hna. 47 Nan caah ṭihnung a va si dah. Profet hna caah khan thlan ṭhaṭha nan ser hna, cu profet hna cu nan pu le nan pa hna nih an rak nawnmi hna kha an si. 48 Cucaah nanmah hrimhrim nih nan pupa hna nih an rak tuahmi nan hnatlakpi hnanak kha nan langhter; annih nih profet kha an nawn hna i nannih nih an thlan kha nan ser hna. 49 Hi ruangah hin pei Pathian Fimnak nih, 'Annih cu profet le lamkaltu kha ka thlahhnawh hna lai, a cheu an thah hna lai i a cheu an hrem hna lai' a ti cu. 50 Cucaah tuchan mi hna hi vawlei ser hramthawknak in profet an thahmi vialte hna ruangah khan dantat an si lai, 51 Abel an nawnnak thawk in biakṭheng le hmunthiang karlak ah an thahmi Zekhariah tiangin. Asi, kan chimh hna, atu chan mi hi, cu mi vialte hna ruangah cun dantat an si lai. 52 "Nannih Phungbia cawnpiaktu saya hna, nan caah ṭihnung a va si dah. Hngalhnak innka hunnak tawh kha nannih nih nan ken, nanmah cu nan lut duh ṭung lo i luh aa zuammi hna zong kha nan dawnh fawn ṭung hna," tiah a ti. 53 Cuka hmun in a chuah tikah Phungbia cawnpiaktu saya hna le Farasi mi hna nih khan zeimaw ti tal in kan tlai kho hnga maw tiah thil tampi kongah biarap an chiah i ṭha tein an bawh; 54 zei maw ti tal in bia a chim sualmi a um kho in a chim sualmi lila ah cun kan tlai kho hnga maw tiin thil tampi kong ah bia an hal lengmang.
1 Mi cu a thongthong in an i pum i, i pah lulhmalh in an um tikah, Jesuh nih a hmasa bik ah a zultu kha a thawh hna i, "Farasi mi thilnu kha i ralring u, ka chim duhmi cu midepde an sinak hi a si. 2 Khuhmi thil paoh hi hun an si dih lai i biathli paohpaoh hi hngalh an si dih lai. 3 Cucaah mui lakah nan chimmi cu chun ceu ah theih an si lai, cun innka nan i khar khumhnak khaan chungah a thli tein nan chimmi cu inncung in aupi an si lai," tiah a ti. 4 "Kan chimh hna, ka duale, pum cu a that kho nain a hnuah cu nak ṭhalo deuh zeihmanh a tuah kho ti lomi cu ṭih hna hlah u. 5 Ṭih awk cu ahodah a si kha kan hmuhsak hna lai: Thah hnu i hell zong i thlak khawhnak nawl a ngeimi Pathian hi a si. Asi, amah cu va ṭih u, tiah kan chimh hna. 6 "Pithlung panga cu pia hnih ah an zuar hna a si lo maw? Asinain an lak i pakhat hmanh khi Pathian nih a philhmi hna an um lo. 7 Nan lu cung samfa hmanh kha a rel dih hna. Cucaah nan thinphang hlah u: pithlung tampi nakin pei nan sun deuh cu!" tiah a ti. 8 "Hihi kan chimh hna: mizapi hmaiah a ka ṭanhmi cu Mi Fapa nih, Pathian vancungmi hna hmaiah, a ṭanh ve hna lai. 9 Sihmanhsehlaw nangmah ta ka si lo tiah zapi hmaiah aa phehmi cu, Pathian vancungmi hna hmaiah Mi Fapa zong nih, ka ta nan si lo, tiah a ti ve hna lai. 10 Mi Fapa a thangchiattu cu ahohmanh ngaihthiam an si lai, sihmanh-sehlaw Thiang Thlarau a thangchiattu cu ngaihthiam an si lai lo. 11 "Pumhnak inn ah siseh, mangki bawi hmai le uktu bawi hmaiah tazacuai awkah an in chuahpi hna tikah, zeitindah kaa runven lai i zei bia dah ka chim lai, tiah nan khuaruah va har hlah u. 12 Zeicahtiah Thiang Thlarau nih khi caan ah nan chim awk cu an chimh ko hna lai," tiah a ti. 13 Zapi lakin mipa pakhat nih a hun thawh i, "Saya, ka pa nih a kan rohmi thilri kha a ka cheuh ve naklai ka unaupa kha ka chimhpiak tuah," tiah a ti. 14 Jesuh nih cun a vun leh i, "Mipa, aho nih dah nan pahnih karlak i biathlektu ding le ro ṭhentu dingah nawl a ka pek?" tiah a ti. 15 Cun annih cu an dihlak in a vun thawh hna i, "Ralring tein um u, hakkauhnak kha i veng u; zeicahtiah mi a nunnak taktak cu, zeitluk hmanh in rum seh law, a thilri hi a si lo," tiah a ti. 16 Cun Jesuh nih hi tahchunhnak bia hi a chimh hna. Aa thawh i, "Mirumpa pakhat nih hin, rawl a vui ngaimi lo pakhat a ngei. 17 Cu tikah a lungchung in, 'Ka rawl vialte chiahnak ding hmun ka ngeih ti ṭung lo. Zeidah ka tuah ah a ṭha hnga? 18 Aa, hihi ka tuah lai: Ka rawlruk kha ka ṭheh hna lai i anmah nakin a ngan deuhmi kha ka sak hna lai. Cuka ah cun ka rawl le ka thilri dang vialte kha ka chiah hna lai. 19 Cun keimah le keimah cu kaa thawh lai i, Mivanṭha pa! Kum tampi caah a za in thil ṭha vialte cu na ngeih cang. Cucaah nuam tein um ko cang, ei law ding law i nuam ko, ka ti lai,' a ti. 20 Sihmanhsehlaw Pathian nih a thawh i, 'Mihrutpa, tuzan hrimhrim ah hin na nunnak cu an in lakpiak a hau lai; cucaah nangmah ca i na khonmi thilri vialte hi aho nih dah a co kun lai?' a ti," tiah a ti. 21 Cun Jesuh nih cun a biadonghnak ah, "Hitihin pei anmah ca lawng i chawva a khong cuahmah i Pathian hmuhnak i a rum ṭung lomi cu an si cu," tiah a ti. 22 Cun Jesuh nih a zultu kha a thawh hna i, "Hi caah hin pei nunnak ca i nan herhmi rawl le nan pum ca i nan herhmi hnipuan kong ah nan lungrethei hlah u kan ti hna cu. 23 Zeicahtiah nunnak hi rawl nakin biapi deuh ngaingai a si i pum hi hnipuan nakin biapi deuh ngaingai a si. 24 Langak khi zoh hmanh hna ngat u, thlaici an tuh lo, rawl zong an ṭuan lo, rawl chiahnak buk zong an ngei lo, rawl khonnak ruk zong an ngei lo; asinain Pathian nih a cawm ko hna. Nannih cu va nakin a let tampi in pei nan sun deuh cu. 25 Nan lakah aho tal, a lungretheihnak thawngin a nunnak ah suimilam pakhat tal zong a chap khomi nan um maw? 26 Cu bantuk thil hmete hmanh nan tuah khawh ṭung lo ahcun zeicahdah thil dang kong ah cun lungrethei in nan um? 27 Ramlak pangpar khi zeitindah an ṭhan ti khi zoh hna ngat u: rian an ṭuan lo, hnipuan zong an i tah fawn lo. Sihmanhsehlaw hihi kan chimh hna: Solomon hmanh kha, kha tluk khan a rum nain hi pangpar hna pakhat tluk i aa dawhmi thilthuam a ngei lo. 28 A kho sawhsawhmi ram, nihin ah a nung i a thaizing ah meiphu i an paihmi ram a thuamhtu hi Pathian a si ahcun, nannih chinchin cu zeitluk in dah an thuamh hna lai — nannih zumhnak a hmemi hna! 29 Cucaah ei awk le din awk rumro kha ruat in lungrethei in um hlah u. 30 (Zeicahtiah hi thil hna hi cu vawlei mi nih an kawlhawl tawnmi hna an si ko). Nan Pa nih hi thil hi nan herh hna ti cu a hngalh ko. 31 Cucaah amah Pennak cu biapi bik ah ruat u law nan herhmi thil vialte hi an pek ko hna lai," tiah a ti. 32 "Tuurun hmete hna, nan thinphang hlah u! Zeicahtiah nan Pa nih Pennak cu nanmah kha pek an duh hna. 33 Nan ngeihmi thil kha zuar hna u law tangka cu mi kha ṭhen hna u. A ṭet kho lomi phaisa bawm kha i zalh u law vancung ah nan ro kha khong hna u, khika ah cun mifir nih an fir kho hna lo i rungrul nih an ei khawh hna lo caah a zor lei an panh bal lai lo. 34 Cun nan ro umnak ah nan lung zong a um zungzal ko lai," tiah a ti. 35 "Zei thil paoh tlung ai kun, tiin nan taisawm kha fek tein i sawmh le nan meiinn kha i van in ralring tein um u; 36 nupi ṭhitnak puai in a ra ṭinmi an bawipa a hngak i a hung phak i innka a hun kingh tikah hmakhatte ah hunpiak awkah timhcia tein a rak ummi a sal hna bantuk khan um u. 37 An bawipa nih inn a phak tikah i hlau le ralring tein a rak ummi a sal hna caah cun lunglawmh awk a va si dah! Hihi kan chimh hna: a taisawm kha aa sawmh lai i a ṭhutter hna lai i a bultawl hna lai. 38 Zanṭim i a ra ṭin a si ah, cu nak tlai deuh i a ra ṭin a si zongah, timhcia tein an um kha a ra hmuh hna cu, an caah zeitluk lawmh awk dah a si. 39 Cun nannih nih hihi i cinken u: Inn ngeitu nih mifir a rat lai caan kha a hngalh ahcun mifir kha a inn cu a bauhter lai lo. 40 Cucaah nannih zong i ralring ve u, zeicahtiah a ra lai tiah nan zumh lo caan ah khin Mi Fapa cu a ra ko lai," tiah a ti. 41 Peter nih a thawh i, "Bawipa, hi bianabia hi kanmah maw na kan chimh, asiloah mizapi caah dah na ti?" tiah a ti. 42 Bawipa nih a leh i, "A si ahcun, aho cu dah zumhawktlak le a fimmi sal cu a si? Zumhawktlak le a fimmi sal cu a bawipa nih a innchungkhar zohkhenhtu ah a chiah i sal dang kha anmah le an caan te cio ah an co awk hnga rawl a pemi hna cu a si. 43 A bawipa cu inn i a hung tlun tikah cu ti i a rak tuah a hmuhmi a sal caah cun zeitluk in dah lunglawmh awk a si. 44 Hihi kan chimh hna, cu pa cu a bawipa nih a thilri vialte zohkhenhtu ah a chiah hrimhrim lai. 45 Sihmanhsehlaw 'Ka bawipa cu saupi a rau ko rih lai,' a ti i sal dang pawl kha nu he pa he a tu a vel, a ei a ding i, rihai in a ummi sal cu, 46 a bawipa cu a ra phan lai ti i a ruah lo ni le a hngalh lo caan ah khan a ra phan lai i cu sal cu a bawipa nih cun a sam cikcek lai i nawl ngai lomi hna tinvo kha a coter ve lai. 47 "A bawipa duhnak a hngal ko na i cu a duhmi a tuah duh lomi sal cu a fakmi tuknak a in lai. 48 Sihmanhsehlaw a bawipa duhnak a hngal lo i asinain tuk awk tlak a simi thil a tuahmi cu a dinmi tuknak a in lai. Tampi pekmi cu tampi hal ṭhan a si ve lai; tam deuh pek a simi cu tam deuh hal ṭhan a si ve ko lai," tiah a ti. 49 "Vawlei hi mei in duah awkah pei ka rat cu, alh hluahmah cang seh law ka hei duh dah! 50 Tipil in awk pakhat ka ngei i cucu a dih hlanah cun ka lungre a va thei dah. 51 Vawlei cungah hin remnak tlunter awkah a ra ti ah dahra nan ka ruah? Remnak si loin ṭhennak tu tlunter awkah ka ra. 52 Atu ri hin cun innchungkhar pakhat chung i a ummi mi panga hna cu an i ṭhen lai i pathum nih pahnih an doh hna lai pahnih nih pathum an doh hna lai, 53 an pale nih an fapa hna kha an doh hna lai i an fapale nih an pale hna kha an doh lai; an nule nih an fanule kha an doh hna lai i an fanule nih an nule kha an doh hna lai; fapale nupi hna nih vale nule kha an doh hna lai i fapale nupi hna kha fapale nu hna nih an doh hna lai," tiah a ti. 54 Jesuh nih mizapi cu a thawh ṭhan hna i, "Nitlaklei in khuadawm a thawh kha nan hmuh tikah hmakhatte ah, 'Ruah a sur lai,' nan ti i a sur taktak. 55 Cun Chimlei thli a hung hran nan pum nih a theih tikah, 'Khua a sa lai,' nan ti i a lin taktak. 56 Midepde hna, van le vawlei kha nan zoh i an sullam zeidah an si ti kha nan hngalh khawh; a si kun ahcun zeicahdah caan sullam hi nan hngalh khawh kun lo?" a ti. 57 "Zeicahdah ahmaanmi thil tu kha tuah awkah nan lung nan i thlek ko lo? 58 Mi pakhatkhat nih tazacuai an duh i zung ah an chuahpi ahcun, lam i nan kal lioah khan nan bia cu na remter khawh nakhnga vaa zuam tuah; cu ti na tuah khawh lo ahcun biaceihtu bawi hmaiah khan an chuahpi lai i biaceihtu bawi nih khan palik sinah an chanh lai i palik zong nih khan thong ah an in thlak lai. 59 Na tlak vekvek a si ahcun, dan an in tatmi na liam dih cikcek hlan cu na chuak hrimhrim lai lo," tiah a ti.
1 Cu caan ah cun Jesuh cu, Pilat nih Galilee mi hna Pathian sinah raithawinak an pekchanh lio i a thahmi hna kong kha an rak chimh. 2 Jesuh nih a leh hna i, "Cu Galilee mi hna cu cu bantukin thihnak an in caah Galilee mi a dang hna nakin a sual deuhmi an si tiah nan ruah maw? 3 Asilo, nannih zong nan nunning nan ṭhinh lo ahcun anmah thih bantukin nan thi ve lai. 4 Siloam i innsang nih a nenhmi pahleiriat hna kha tah? Hiti an thihnak nih hin annih kha Jerusalem khua chung i a ummi midang vialte hna nakin an sual deuh tiah a langhter tiah nan ruah maw? 5 A si hrimhrim lo, nannih zong nan nun nan ṭhinh lo ahcun anmah thih bantukin nan thi ve lai," a ti. 6 Cun Jesuh nih hi bianabia hi a chimh hna: Aa thawh i, "Mipa pakhat nih a dum chungah theipi kung pakhat a cin. A tlai maw tlai lo ti a va zoh tikah zeihmanh a rak tlai lo. 7 Cucaah a dum zohkhenhtupa kha a thawh i, "Zohhmanh, kum thum chung theipi kung hi a tlai maw tlai lo, tiah zoh awkah ka ra lengmang i a tlai zeihmanh ka hmu rih lo. Cucaah hau ko. Zeicahhen vawlei dah tu kha a ei lengmang lai?' tiah a ti. 8 Sihmanhsehlaw dum cawngtu nih khan a leh i, "Bawipa, hi kum khatte hi cu zuah ko rih, a velchum in ka cawh lai i non ka toih lai. 9 Cun kumvoi ah a tlai ahcun a ṭha ko, a tlai lo le na hauter te ko hna lai,' a ti," tiah a ti. 10 Sabbath ni ah voi khat cu Jesuh nih pumhnak inn ah a cawnpiak hna. 11 Cuka ah cun minu pakhat a chungah thlarau ṭhalo a ngeimi a um i thlarau nih cun kum hleiriat chung a zawtter cang i a keng kha a kul dih i a ding kho ti lo. 12 Jesuh nih a hmuh tikah a hei auh i, "Minu, na zawtnak in na luat cang," tiah a ti. 13 A cungah khan a kut a chuan i cu cangka cun ding tein a dir kho i Pathian kha a thangṭhat. 14 Pumhnak inn zohkhenhtu cu Jesuh nih Sabbath ni ah mi a damter caah khan a thin a hung i, "Rianṭuannak dingah ni ruk pei a um ko cu; cucaah cun cu ni ruk chungah cun tah nan rat i nan rak i damter; Sabbath ni ah hin cun ti hlah ngat u," tiah mizapi cu a hun ti hna. 15 Bawipa nih cun a leh i, "Mi depde hna. Aho paoh nih Sabbath ni ah nan caw siseh nan la siseh an inn in nan thlah hna i ti dinh awkah nan kalpi ko ṭung hna. 16 Atu hika i a ummi nu Abraham fanu, Satan nih kum hleiriat chung a hrenmi hi Sabbath ni ah hin phoih awk a si hnga lo maw?" tiah a ti. 17 Bia a lehnak nih cun a ral vialte hna cu ningzak in a umter dih hna i khuaruahhar a tuahmi cungah khan mizapi cu an i lawm. 18 Jesuh nih aa thawh i, "Pathian Pennak hi zei he dah aa lawh? Zei he dah ka tahchunh khawh lai? 19 Mipa nih a lo ah a tuhmi anṭam ci he aa lo; anṭam cu a hung ṭhang i thingkung ah a cang i a nge ah khan vate nih bu an sak," tiah a ti. 20 Jesuh nih aa thawh ṭhan i, "Pathian Pennak cu zei he dah ka tahchunh lai? 21 Minu nih thilnu aa lak i changvut rel khat chungah a phulh i cu thilnu nih cun changvut cu a thawhter dih. Cu thilnu bantuk cu a si," tiah a ti. 22 Jesuh cu Jerusalem i a kalpah ah khan khua kha a pal duahmah hna i a cawnpiak pah lengmang hna. 23 Mi a cheukhat nih bia an hal i, "Bawipa, mi hi tlawmte lawng maw khamh an si lai?" an ti. 24 Jesuh nih a leh hna i, "Kutka bi chung khan lanh i zuam ko u, zeicahtiah hihi kan chimh hna: mi tampi cu luh an i zuam lai nain an lut kho lai lo. 25 "Inn ngeitu cu a tho lai i kutka cu a khar lai; cun nannih cu a leng i nan dir i kutka khar cu nan kingh i, 'Bawipa, innka kan hunh tuah,' nan ti tikah, 'Khuazei in dah nan rat kha ka hngal lo,' tiah an leh hna lai. 26 Cun nannih nih nan leh ve lai i, 'Na sinah pei rawl kan ei i ti kan din kha, kan khua ah pei na kan cawnpiak kha,' nan ti lai. 27 Anih nih an thawh hna lai i, 'Khuazei in nan rat kan hngal lo. Nannih ṭhat lonak a tuahmi vialte hna, ka sinin kal ko u,' a ti hna lai. 28 Nannih vial cu lengah nan um lai i Abraham le Isak le Jakob le profet vialte hna cu Pathian Pennak chungah khan nan hmuh hna lai, cu tikah nan ṭap len lai i nan hacang nan i rial sek te lai. 29 Nichuah, nitlak, chaklei, thlanglei, in mi kha an ra lai i Pathian Pennak cabuai ah khan an ṭhu lai. 30 Cu tikah cun atu i a hmanung bik hi a hmasa bik an si lai i atu i a hmasa bik hi a hmanung bik an si lai," tiah a ti. 31 Cu lioah cun Farasi mi tlawmpal kha Jesuh sinah khan an ra i, "Herod nih thah an duh caah hika hin na chuah a hau," tiah an chimh. 32 Jesuh nih cun a leh hna i, "Va kal u law, cu cenghngia cu, 'Nihin le thaizing ah khuachia kha ka ṭhawl hna lai i damnak kha ka tuah lai, cun a ni thum ni ah ka rian cu ka lim lai,' a ti, tiah va chim u. 33 Sihmanhsehlaw nihin le thaizing le kiptuh cu ka kal ko rih lai, zeicahtiah profet cu Jerusalem khuachung dah ti lo ahcun khuazei hmanh ah thah phung a si ṭung lo. 34 "Maw Jerusalem, Jerusalem, profet kha na thah hna i Pathian nih na sinah lamkaltu a rak thlahmi kha lung in na rak cheh hna. Arpi nih a fale cu a thla tangah a huh hna bantukin voi zeizat te dik na chung mi cu ka kut in huh kan timh hna i na duh lo. 35 Zohhmanh, na biakinn cu Pathian nih a hlawt cang. Cun hihi kan chimh, nangmah nih, 'Bawipa min in a rami cu a cungah thluachuahnak um ko seh,' na ti caan a phak hlan cu na ka hmu ti lai lo," tiah a ti.
1 Voi khat cu Sabbath ni ah hin Jesuh cu Farasi mi hna lak i haotu pakhat inn ah rawl a hrawng i mi nih khan fel tein an ngiat. 2 Mipa pakhat, a ke le a kut a phingmipa cu Jesuh sinah khan a ra i 3 Jesuh nih cun Phungbia cawnpiaktu saya hna le Farasi mi hna cu a thawh hna i, "Kan Phung nih Sabbath ni i mi damter hi a onh maw onh lo," tiah a hal hna. 4 Sihmanhsehlaw annih nih zeihmanh an chim lo. Jesuh nih mipa cu aa lak i a damter i a kalter. 5 Cun annih cu a thawh hna i, "Nan lak i pakhatkhat hi a fa maw, asiloah a caw maw Sabbath ni ah tikhor ah tla seh law, Sabbath ni a si ai tiah chuah loin maw nan um ko hnga," tiah a ti. 6 Hi kong ah hin zeihmanh an let kho lo. 7 Rawl hrawn kawh tikah mi a cheu cu ṭhutnak hmun ṭha bikbik an i thim tawn kha Jesuh nih a hmuh hna caah hi tahchunhnak bia hi an dihlak in a chimh hna: 8 "Nupi ṭhit rawldanghnak puai ah pakhatkhat nih an in sawm hna ahcun ṭhutnak ṭha bik kha i cuh hlah. Zeicahtiah nangmah nakin a biapi deuhmi midang kha an sawm khawh i 9 nan pahnih in an sawmtu hna nih khan, nangmah cu an thawh lai i, 'Hi hmun hi kian tuah,' tiah an ti sual lai. Cu tikah cun a niam bik hmun i na vung ṭhut tikah khan na ning a zak lai. 10 Cu nakin rawlhrawn an in sawm tikah va kal law a niam bik hmun ah khan va ṭhu deuh. Zeicahtiah an sawmtupa kha na sinah a ra lai i, 'Hung kai tuah, ka kawi, hmun ṭha deuh ah hin,' an ti lai. Hi nih hin sawmmi vialte hna hmaiah khan hmaihngalnak an pek lai. 11 Amah le amah a ngan ah aa chiami cu nauta ah chiah a si lai i mi tangah aa dormi cu mi ngan ah ser a si lai," tiah a ti. 12 Cun Jesuh nih rawlhrawn a sawmtu cu a thawh i, "Chuncaw ei siseh, zanriah ei siseh, na sawm hna tikah na hawi na kom le na unau hna le na sahlawh na rualchan hna le na innpa mi rumrum kha va sawm hna hlah. Zeicahtiah anmah zong nih an in sawm ve lai i na tuahmi kha cham na si ko lai. 13 Rawl danghnak na tuah tikah, misifak, kutzeng, kezeng le mitcaw kha va sawm hna law 14 annih nih an in cham khawh lai lo caah thluachuahnak na hmu lai. Miṭha mi kha thihnak in an thawh ṭhan tikah Pathian nih an cham lai," tiah a ti. 15 Cabuai i a ṭhu vemi pakhat nih cu bia cu a rak theih i, "Pathian Pennak chung rawl danghnak i aa tel vemi cu zeitluk in dik an i lawmh lai," tiah Jesuh cu a ti. 16 Jesuh nih amah cu a thawh i, "Voi khat ah hin mipa pakhat a rak um i cu pa nih cun rawl danghnak nganpi pakhat a rak tuah i cu rawl danghnak ah cun mi tampi a sawm hna. 17 Rawldanghnak caan cu a cut tikah a sinum kha, 'Ra cang u, zeizong vialte timh a si dih cang,' tiah a sawmmi hna cu va ti hna, tiah a thlah. 18 Sihmanhsehlaw an dihlak in pakhat hnu pakhat sonhtarhnak kha an rak kawl cio. A hmasa bik nih a sinumpa cu a rak thawh i, 'Ka ngaithiam ko, lo ka caw ngelcel i ka va kal i ka va zoh lo ahcun a si kho lo,' tiah a ti. 19 A pahnihnak nih aa thawh i, 'Cawtum tuah nga ka cawk hna i atu hi ka hneksak hna lai ka ti, cucaah cun ka ngaithiam ko,' a ti. 20 A pathumnak nih aa thawh i, 'Atute kha nupi ka ṭhi i ka ra thiam lai lo,' tiah a ti. 21 A sinumpa kha a bawipa sinah cun a va kir ṭhan i cu vialte cu a chimh dih. Inn ngeitupa cu a thin a hung i a sinum cu a thawh i, 'Khulrang in zatlang lam ah siseh, inn le inn karlak lam ah siseh, va kal law sifakmi si hna seh, kutzeng kezeng si hna seh, mitcaw si hna seh hunpi hna,' tiah a ti. 22 Cun tlawmpal ah khin a sinum nih cun a thawh i, 'Bawipa, na nawl bangin tuah a si cang, sihmanhsehlaw hmun a lawng ko rih,' tiah a ti. 23 Cucaah a bawipa nih khan a sinumpa cu a thawh i, 'Khua le khua kar i lam ngan ah siseh, lam hme ah siseh, va kal law ka inn a khah nakhnga mi kha ratter hna. 24 Hi hi kan chimh hna, ka sawmmi hna nih khan cun ahohmanh nih ka zanriah hi an tep lai lo,' a ti," tiah a ti. 25 Jesuh sinah cun mi tampi an kal ve. Aa mer i a thawh hna i 26 "Ahohmanh ka sinah a rami cu a pa siseh, a nu siseh, a nupi siseh, a fale si hna seh, a unau si hna seh, a farle si hna seh, amah le amah siseh, aa huat lo ahcun a ka zultu a si kho lo. 27 A vailam tahnak kha aa put i a ka zul lomi cu a ka zultu a si kho lo. 28 Nannih lak i pakhatkhat nih inn sak aa timh tikah, ka rian hi a dih tiangin ka phaisa nih a ka zo lai maw zo lai lo ti hngalhnak dingah a ṭhu hmasa i pei zeizat dah a dih lai ti kha a tuak hmasa cu. 29 Cu bantukin a tuak hmasa lo ahcun a inn cu a hram a thawk hnuah dih kho ṭung loin a um lai i a hmumi paoh nih nihchuak ah an saih lai. 30 'Hi pa nih hin sak a hei i ot i a dih khawh ṭung lo hen hi,' an ti lai. 31 Siangpahrang pakhatkhat nih, amah tuk awkah ralkap thong kul he a rami siangpahrang kha, a ralkap thong hra he rak doh awkah a hei chuahhnawh ahcun, a ṭhu hmasa lai i pei, kha siangpahrang kha ka do kho lai maw do kho lo tiah aa tuak hmasa lai cu. 32 Ka do kho lai lo tiah a hngalh ahcun, siangpahrang cu lamhlapi i a rat lioah khan va don i remnak ser awkah lamkal a thlah hna lai. 33 Cu bantuk ṭhiamṭhiam in nannih zong, nan ngeihmi vialte kha nan hlawt dih lo ahcun, ka zultu nan si kho lai lo," tiah a ti hna. 34 "Cite hi a ṭha, sihmanhsehlaw a alnak kha a loh ahcun zeitin hmanh in alter khawh a si ti lo. 35 Vawlei ṭhatternak caah a ṭhahnem lo, ek pon ca zongah a ṭhahnem lo; a hlonh in hlonh awk lawnglawng a si ko. Cucaah hna nan ngeih ahcun, thei ko u!" tiah a ti hna.
1 Voi khat cu ngunkhuai khawltu pawl le misual pawl kha a sinah tampi an ra i a bia kha an ngai. 2 Farasi mi hna le Phungbia cawnpiaktu saya hna cu an zai i, "Hi pa hi misual mi kha a rak pomhlawm hna i rawl zong a eipi hna," an ti. 3 Cucaah cun Jesuh nih hi tahchunhnak bia hi a chimh hna: 4 "A biana ah pakhatkhat nih tuu za khat hei ngei u law pakhat va tlau seh law, cu tikah zeitindah nan tuah lai? Tuu sawm kua le pakua kha an tlonnak hmun ah cun kaltak in a tlaumi cu a hmuh hlan loin a kawl lai lo maw? 5 A va hmuh tikah a lung aa lawm tuk i cucaah a liang ah aa khinh i 6 inn ah a tlunpi. Cun a hawikom hna le a innpa hna kha a auh hna i, 'Ra ka lawmhpi tuah u, zeicahtiah a tlaumi ka tuu kha ka hmuh ṭhan cang,' a ti. 7 Cu bantuk ṭhiamṭhiam in, ngaihchih a herh lomi miding sawm kua le pakua hna nakin aa ngaichihmi misual pakhat ruangah vancung khua ah lunglawmhnak tam deuh a um lai," tiah a ti. 8 "Asiloah, tangka phar hra a ngeiminu nih pakhat kha a thlau ahcun zeidah a tuah? Meiinn a van i pei a inn kha a phiah i a hmuh hlan tiang a ken le a kawi zong kha a kawl cikcek cu. 9 A hmuh tikah a hawikom hna le a innpa hna kha a auh hna i, 'Ka lawmhpi u, zeicahtiah ka thlaumi ka tangka kha ka hmuh ṭhan cang,' a ti. 10 Cu bantuk ṭhiamṭhiam in, aa ngaihchihmi misual pakhat ruangah Pathian vancungmi hna cu an i lawm," tiah a ti. 11 Jesuh nih cun a thawh ṭhan hna i, "Voi khat ah fapa pahnih a ngeimipa a rak um. 12 A ngakchia deuh pa nih khan a pa cu a thawh i, 'Ka pa, atu hin ka co hnga a simi ro cu ka pe ko,' a ti. Cucaah an pa nih an unau cun ro cu a cheuh hna. 13 Ni tlawmpal hnuah khin ngakchia deuh pa nih cun a thilri cu a zuarh i a man tangka cu aa lak i an inn cun a kal. A hla ngaingaimi ram ah a kal i khika ah khan duhduh in khua a va sa i a tangka cu a va sawksam dih. 14 A ngeihmi vialte cu a hloh dih. Cun cu ram ah cun mangṭam a tlung ciammam i a tawro in a ṭhu. 15 Cucaah cuka ram mipa pakhat sinah khan kuli va ṭuan awkah a kal i cu pa nih cun vok cawngh awkah a lo ah a rak kalter. 16 Vok nih an eimi bekawng hmanh kha ṭam lenning ti a duh, asinain ahohmanh nih ei awk zeihmanh an pe lo. 17 A donghnak ah cun a lung a hung fim i, 'Ka Pa kuli vialte hmanh nih ei cawk loin ei awk an ngei, kei vial hika ah hin rawlṭam in ka thi cuahmah. 18 Ka tho lai i ka pa sinah ka kal lai i, "Ka pa, Pathian sin le na sinah ka sual cang. 19 Na fa ti awk ka tlak ti lo; na kuli pakhat bantukin ka chia ve ko," ka ti lai,' a ti. 20 Cucaah a tho i a pa sinlei kir ah cun aa thawh. "Lamhlatpi i a rat lio kha a pa nih cun a rak hmuh; a zaang a fak ngaingai i a hei tlikhnawh i a kuh i a hnamh. 21 A fapa nih cun, 'Ka pa, Pathian sin le nangmah sinah ka sual cang. Na fapa ti awk ka tlak ti lo,' tiah a ti. 22 Sihmanhsehlaw a pa nih khan a sinum kha a auh hna i, 'Khulrang in puan ṭha bik kha rak pu u law aih u. A kutdong ah kutdonghrolh hrolh u law a ke ah kedan danh u. 23 Cun va kal u law cawfa a thau bik kha va la u law va that u, lunglawm ngaiin puai tuah u sih. 24 Zeicahtiah hi ka fapa hi a rak thi, sihmanhsehlaw atu cu a nung ṭhan; a rak tlau, sihmanhsehlaw atu cu ka hmuh ṭhan cang,' a ti. Cun cuticun puai tuah hram cu an thawk. 25 "Cu lioah cun a fapa upa u kha lo ah a um. A hung tlun i inn a hun naih tikah khin hlasak thawng le lam thawng cu a theih. 26 An sal pakhat kha a auh i, 'Zeidah an tuah?' tiah a hal. 27 An salpa nih cun, 'Na naupa kha inn ah a ra tlung ṭhan i dam te le him tein inn a phak ṭhan caah na pa nih caw thaute khan a thlathlauh,' tiah a ti. 28 Fapa upa u cu a thin a hung tuk i inn chungah khan a lut duh lo; cucaah a pa kha a va chuak i, ra lut ko, tiah a lem. 29 A pa cu a thawh i, 'Zohhmanh, kum hi zat riangruang, sal bantukin na rian ka ṭuan i voi khat hmanh na nawl ngai loin ka um bal lo. Zeidah na ka pek? Ka hawikom he i nuamhnak caah meheh pakhat hmanh na ka pe lo. 30 Sihmanhsehlaw hi na fapa, thilri vialte hlawhhlangnu sin i a hlolak dihtu hi inn i a hung tlun ṭhan tikah caw thaute kha na thahpiak!' tiah a ti. 31 Cun a pa nih cun a leh i, 'Ka fapa, nang cu inn ah a zungzal in na um i ka ngeihmi vialte cu na ta an si dih. 32 Sihmanhsehlaw na nau cu a rak thi i pei atu cu a nun ṭhan cu, a rak tlau i pei atu cu hmuh ṭhan a si cu, cucaah kan thlathlauh i kan i lawmh awk a si hrim ko,' tiah a leh," tiah a ti.
1 Jesuh nih a zultu kha a thawh hna i, "Mirumpa pakhat a rak um i cu mirumpa nih cun thil zohkhenhtu pakhat a ngei i a thil zohkhenhtu nih cun a tangka kha a duhduh in pakpalawng ah a hman tiah an chimh. 2 Amah cu a kawh i, 'Nangmah kong i ka theihmi hi zeidah a si? Ka thilri na tuahtonak cazin kha tlamtling tein ka pe tuah, zeicahtiah ka thil zohkhenhtu na si kho ti lo,' tiah a ti. 3 Mipa nih cun a lungthli in, 'Ka bawipa nih hin ka rian in a ka phuah ko lai, Zeidah ka tuah kun lai? Vawlei cawh le ka celh lo, mi thil hal le ka ning a zak fawn. 4 A! Atu cu zeidah ka tuah lai ti kha ka hngalh cang! Cu ti ka tuah ahcun ka rian a dih tikah an inn ah a ka umter duhtu hawikom ka ngei hna lai,' a ti. 5 Cucaah a bawipa lei a bami vialte kha a auh hna. A hmasa bikpa kha, 'Ka bawipa cu zeizat dah nang na bat?' tiah a ti. 6 Anih nih, 'Oliv chiti pung za khat,' tiah a leh. Thil zohkhenhtu pa nih cun, 'Hihi na cazin siseh, ṭhu law sawm nga in ṭial,' tiah a ti. 7 A dang pakhat cu, 'Nang tah zeizat dah na bat?' tiah a ti. 'Changvut rel thong khat,' tiah a leh. 'Hihi na cazin siseh, za riat in ṭial,' tiah a ti. 8 Cu thil zohkhenhtu mihrokhrawlpa cu a bawipa nih khan cu bantukin fim ngaiin thil a ti caah a thangṭhat; zeicahtiah hi vawlei cung mi hna hi an thil tining ah ceunak mi hna nakin an fim deuh," tiah a ti. 9 Cun Jesuh nih cun, "Cucaah hitin kan chimh hna: vawlei cung chawva in hawikom i ser hna u, zeicahtiah chawva cu a dih tikah zungzal inn ah an umter hna lai. 10 Thil hmete ah zumhawktlak a simi cu thil ngan zongah zumhawktlak an si tawn, thil hmete ah a hrokhrawlmi cu thil ngan zongah an hrokhrawl tawn. 11 Vawlei cung thil tuahtoning i zumhawktlak lo nan si ahcun zeitindah rumnak taktak cu pek khawh nan si lai? 12 Cun midang thil a simi ah zumhawktlak nan si lo ahcun aho nih dah nanmah ta a simi thil cu an in pek hna lai? 13 "Sinum pakhat cu bawi pahnih sal a si kho lo: pakhat kha a huat lai i pakhat kha a dawt lai; pakhat sinah zumh awktlak tein a um lai i pakhat kha zei ah a rel lai lo. Pathian le chawva cu nan bawi ah an pahnih in nan kemh kho hna lai lo," tiah a ti. 14 Farasi mi nih hi a chimmi vialte cu an theih tikah, annih cu tangka a duhmi an si caah, amah kha an nihsawh. 15 Jesuh nih a thawh hna i, "Nannih hi minung mithmuh i miding aa lawhtermi pawl nan si, sihmanhsehlaw Pathian nih cun nan lungthin cu a hngalh ko. Zeicahtiah minung nih man sung ngai i an ruahmi cu Pathian mithmuh ah cun pakpalawng a si ko. 16 "Moses Phungbia le profet ṭialmi ca hna cu Tipil petu Johan chan tiang caah khan an si; cu ri cun Pathian Pennak Thawngṭha cu chim a si i a mi kip cu heh tiah an lut. 17 Sihmanhsehlaw Phungbia chung i a deh hme bikte hmanh a loh nakin van le vawlei loh hmanh kha a fawi deuh lai. 18 "Ahohmanh a nupi a ma i nu dang a ṭhimi cu a nupi cungin sualnak a tuah a si; cun makmi nu a ṭhimi cu sualnak a tuah a si," tiah a ti. 19 Voi khat cu mirum pakhat hi a rak um i puan man sung bikbik in aa thuam i nifate in nuam ngaingai in khua a sa. 20 Cun misifak pakhat, a min Lazaruh an timi zong kha a um ve i hma nih a pumpuluk in a tlunh. 21 Mirumpa cabuai in a tlami rawl ṭiltlawt kha ka khim lai ti i ruahchan in mirumpa innka hram ah khan an ratpi tawn. Cun uico kha an ra i a hma kha an liahpiak tawn. 22 Misifakpa cu a thi i vancungmi nih vancung puai tuahnak ah khan an zuanpi i Abraham pawngah khan an ṭhutter. Mirumpa zong cu a thi ve i an vui. 23 Mirumpa cu Hell chungah a tla i nganfak ngaiin a um; cunglei hi a hun zoh i lamhlapi ah khin Abraham le a pawng i Lazaruh kha a hun hmuh hna. 24 Cucaah a hun kawh i, "Ka pa Abraham, ka zaangfah tuah. Lazaruh kha hei thlah law a kutdong kha ti ah va hnim seh law ka lei ah hin run ka thlerh seh, zeicahtiah hi mei chungah hin ka ngan a fak tuk hringhran," tiah a ti. 25 Sihmanhsehlaw Abraham nih a thawh i, "Ka fapa, na nun lioah khan thil ṭha phun kip kha pek na si i Lazaruh nih khan thil ṭhalo vialte a co kha philh hlah ngat; sihmanhsehlaw atu cu anih cu nuam tein a um i nang cu nganfak ngaiin na um. 26 Cu pinah; kan karlak ah horkuang thukpi a um i cucaah hikalei in nangmah leiah tan a duhmi nih khan an tan kho lo i cu bantuk ṭhiamṭhiam in nangmah lei in kanmah leiah rat a duhmi zong an ra kho ve lo," tiah a ti. 27 Cun mirumpa nih cun a thawh i, "Asi, ka pa, Lazaruh cu ka pa inn ah khan hun thlah ko, 28 cuka ah cun chuahpi unau panga ka ngei hna i hung kal seh law annih tal cu hi nganfah innak hmun ah hin an rat nakhnga lo ralrinnak hung pe hna seh," a ti. 29 Abraham nih cun aa thawh i, "Na unau hna ralrinnak petu dingah cun Moses le profet hna an um ko ṭung; an chimmi kha na unau hna nih cun ngai ko hna ngat seh," tiah a ti. 30 Mirumpa nih cun a hun leh i, "Ka pa, Abraham, cucu a za lo, mi pakhatkhat cu thihnak in a thawh i an sin i a va kal ahcun an nunning kha an ṭhinh ko lai," tiah a ti. 31 Sihmanhsehlaw Abraham nih, "Moses le profet kha an bia an ngaih hna lo ahcun, mi pakhatkhat cu thihnak in a thawh hmanh ah an zum hlei lai lo," a ti.
1 Jesuh nih a zultu kha a chimh hna i, "Sualnak chungah mi a tlaktertu thil cu an um ṭheo lai; sihmanhsehlaw cu thil hna a umtertu caah cun ṭihnung a va si dah! 2 Hi ngakchia tete hna lak i pakhat hmanh hi va sualter nakin cu pa cu a hngawng ah facang rialnak lungtumpi i thlaih seh law rilipi chungah hlonh si seh law a caah a ṭha deuh hnga. 3 I ralring ko u. "Na unau nih a sual ahcun va mawhchiat, aa ngaihchih ahcun va ngaithiam. 4 Ni khat ah na cungah voi sarih a sual i voi sarih ningin, 'Kaa ngaichih,' a ti ahcun na ngaihthiam hrimhrim lai," tiah a ti. 5 Lamkaltu hna nih khan Bawipa cu, "Kan zumhnak hi nganter deuh tuah," an ti. 6 Bawipa nih cun a leh hna i, "Nannih nih anṭam ci ngaw zumhnak nan ngeih ahcun, hi thingtheihmung kung hi, 'Na hram in i phawi law rili ah khin vaa phun,' nan ti ah nan nawl an ngaih ko hna lai," tiah a ti. 7 "Abiana ah sinum pakhat hei ngei u law, cu nan sinum cu lei hei thuang seh law, asiloah, tuu hei khal seh law, lo in inn i a hung tlun tikah, 'I rianranh law rawl kha ei,' nan ti lai maw? 8 Ti hlah. Nan i thawh lai i, 'Ka zanriah kha hei tim, cun rawl ka ei lio le ka din lioah na angki leng kha i hruk law ka bultawl, cu hnuah cun na ei ve te lai i na din ve te lai,' nan ti deuh lai. 9 Na tuah awk a si timi a tuah ruangah sinum nih cun, na tuahmi a ṭha, tiin lawmhnak hmuh awk a si i mei? 10 Nannih zong cu bantuk cu nan si ve ko, tuah u tiah fialmi rian kha nan tuah dih tikah, 'Kannih cu sal santlailo kan si, kan tuah awk hnga rian a simi lawng pei kan tuah ko cu,' va ti u," tiah a ti hna. 11 Jesuh cu Jerusalem khua lei i a kalpah ah khan Samaria le Galilee karlak in a kal. 12 Khua pakhat chungah hin a va lut i cuka ah cun thinghmuimi pahra an rak um i cu hna nih cun an rak ton. Lamhlatpi khin an dir i, 13 "Jesuh Bawipa, kan zaangfah tuah," tiah an au. 14 Jesuh nih cun a hmuh hna i, "Va kal u law tlangbawi nih khan rak in zoh hna seh," tiah a ti hna. An kalpah cun lampi ah cun an thiang. 15 An lak i pakhat cu ka dam cang ti a hngalh tikah khan a ra kir i Pathian kha fak piin a thangṭhat. 16 Jesuh ke hram ah khan vawlei ah a bawk i Jesuh cu a lawmh. Cu pa cu Samaria mi a si. 17 Jesuh nih aa thawh i, "An pahra ningin an dam lo maw? Pakua tah khuazei ah dah an si kun? 18 Annih zong ra kir in Pathian kha an thangṭhat kho lo maw? Hi ramdang mipa lawng hi maw a ra kho?" tiah a ti. 19 Cun Jesuh nih amah cu a thawh i, "Tho law kal tuah; na zumhnak nih an damter cang," tiah a ti. 20 Farasi mi a cheu nih Jesuh cu, zeitik ah dah Pathian Pennak cu a tlun lai, tiah an hal. Anih nih a leh hna i, "Pathian Pennak cu hmuh awkin a ra lo. 21 Ahohmanh nih, 'Zohhmanh, hika ah a um hih, khika ah a um khih,' an ti kho lo; zeicahtiah Pathian Pennak cu nan chungah pei a um cu," tiah a ti hna. 22 Cun a zultu kha a thawh hna i, "Nannih nih, Mi Fapa ni kha hmuh kan hei duh dah, nan ti caan a phan te lai; sihmanhsehlaw nan hmu lai lo. 23 'Khika lei khi zohhmanh u, hika lei hi zohhmanh u,' tiah aan timi hna an um lai. Sihmanhsehlaw cu zoh awkah cun va chuak hlah u. 24 Nimtlau cu vankam khattelei kam in khattelei kamah a lek i van cu a ceuh bantuk khin Mi Fapa cu amah ni ah cun a si ve lai. 25 Sihmanhsehlaw a intuar hmasat le tu chan mi hna nih an hlawt hmasa kha a herh lai. 26 Noah chan ah a rak si bantuk khan Mi Fapa chan zongah a si ve lai. 27 Noah nih lawng chungah a luh i buanchukcho kha a tlun i an thih dih ni tiang hrimhrim kha, an ei an ding an i ṭhi an i um ko. 28 Lot chan i a rak si bantuk khan a si ve lai. An ei, an ding, an i caw an i zuarh, thlaici an cing, inn an sa. 29 Lot cu Sodom in a chuah ni ah khan mei le kat cu vancung in a rung sur i a thah dih hna. 30 Cuticun Mi Fapa a langh ni ah cun a si ve lai. 31 "A inn cung i a ummipa cu a inn chung i a ummi thil lak awkah ṭum hlah seh; cu bantuk ṭhiamṭhiam in lo i a ummipa cu inn ah tlung hlah seh. 32 Lot nupi kha va philh hlah u. 33 Amah nunnak khamh aa zuammi cu a nunnak cu a sung lai; a nunnak a sungmi nih cun a nunnak cu a khamh lai. 34 Hihi kan chimh hna: cu zan ah cun mi pahnih ihkhun pakhat ah a rak itmi an um lai, pakhat cu lak a si lai i pakhat cu nganhtak a si lai. 35 Nu pahnih kha fang an su ṭi lai, pakhat cu lak a si lai i pakhat cu chiahtak a si lai. 36 Pa pahnih lo ah rian a ṭuanmi an um lai, pakhat lak a si lai i pakhat cu chiahtak a si lai," tiah a ti. 37 Amah cu a zultu nih cun, "Bawipa, khuazei ah dah?" tiah an hal i, "Saruak umnak ah langta an i pum tawn," tiah a leh hna.
1 Lungdong loin thla nan cam zungzal awk a si, ti cawnpiaknak caah Jesuh nih hi bianabia hi a chimh hna. 2 Aa thawh i, "Khua pakhat ah hin Pathian zong a ṭih lo i mi zong a hmaizah lomi biaceihtu bawi pakhat a rak um. 3 Cun cuka khua ah cun nuhmei pakhat a um ve i ka bia kha ka ceihpiak tuah, tiah atu le atu a ra ti lengmang. 4 Biaceihtu nih caan saupi chung cu a al lengmang, 5 sihmanhsehlaw a donghnak ah cun, 'Pathian cu ka ṭih lo i minung kha ka hmaizah hna lo nain, hi nuhmeinu nih hin hnahnawhnak a ka pek lengmang caah a bia cu ka ceihpiak ko lai; cu lo ahcun a ra lengmang ko lai i ka re lam a ka theihter chin lai,' a ti," tiah a ti. 6 Cun Bawipa nih cun a peh ṭhan i, "A ding lomi biaceihtu bawi nih a chimmi cu nan theih cang. 7 Pathian nih tah amah a mi hna chunzan hlan in a sinah bawmh hal awkah a au lengmangmi hna cu thiamcoh loin maw a um hna hnga? Anmah bawmh awkah cun a khul a nuar ko hnga maw? 8 Hihi kan chimh hna: anmah cu thiam a coh hna lai i cucu khulrang tein a tuah lai. Sihmanhsehlaw Mi Fapa nih a rat tikah vawlei ah hin zumhnak a hmu te hnga maw?" tiah a ti. 9 Anmah kha kan ṭha tiah aa ruat i midang vialte kha zei a rel lomi hna sinah Jesuh nih hi tahchunhnak bia hi a chim. 10 "Mi pahnih cu Biakinn i thlacam awkah an hung kal; pakhat pa cu Farasi mi a si i a dang cu ngunkhuai khawltu a si. 11 Farasi pa cu a dir i hi bantukin thla a cam: 'Maw Pathian, kei cu midang bantukin hak a kaumi, lih a chimmi, nu le pa sualnak a tuahmi, ka si lo caah nangmah cu kan lawmh; cun khi ngunkhuai khawltupa bantuk zong khi ka si lo caah kan lawmh fawn. 12 Zarh khat chungah voi hnih lengmang rawl ka ul i chawva ka hmuhmi vialte cheu hra cheu khat kan pek,' tiah a ti. 13 Sihmanhsehlaw ngunkhuai khawltupa cu lamhlatpi ah khin a dir i vanlei hmanh zoh ngam loin a ṭang aa cum i, 'Maw Pathian, kei misual cungah hin zaangfahnak ngei ko,' tiah a ti. 14 Hihi kan chimh hna: Farasi mipa kha si loin hi pa tu hi a sualnak ngaihthiam in inn ah a ṭinmi cu a si. Zeicahtiah amah le amah aa ngantermi cu ṭhumh an si lai i mi tangah aa dormi cu mi ngan ah ser an si lai," tiah a ti. 15 Mi cheu nih an fale kha an cung i a kut a chuanpiak hna nakhnga Jesuh sinah khan an ratpi hna. Sihmanhsehlaw a zultu hna nih khan an rak hmuh hna i an sik hna. 16 Sihmanhsehlaw Jesuh nih ngakchia cu a auh hna i, "Ngakchia kha ka sinah ratter ko hna u. Annih kha dawn hna hlah u, zeicahtiah Pathian Pennak cu hi bantuk mi hna ta hi pei a si cu. 17 Hihi philh hlah u: Pathian Pennak hi ngakchia nih a rak i cohlan bantukin a cohlang lomi cu, cu Pennak chungah cun an lut bal lai lo," tiah a ti. 18 Judah mi haotu pakhat nih a thawh i, "A ṭhami saya, zungzal nunnak hmuh awkah zeidah ka tuah lai?" tiah a ti. 19 Jesuh nih a thawh i, "Zeicahdah miṭha tiah na ka ti?" tiah a hal i, "Pathian dah ti lo cu ahohmanh miṭha an um ṭung lo. 20 Nawlbia kha na hngalh ko ṭung hna: Va cung in siseh, nupi cung in siseh, sual hlah, lainawng hlah, fir hlah, lih chim hlah, na nu le na pa upat hna, ti pei an si kha," tiah a ti. 21 Mipa nih cun aa thawh i, "Hi nawlbia vialte hi cu ka ngakchiat tein ka zulh lengmang cang hna," tiah a ti. 22 Hi bia cu Jesuh nih a theih tikah, "Pakhat te na bau kun. Na ngeihmi vialte kha va zuar law tangka cu sifakmi kha va ṭhen hna, cun vancung khua ah chawva na ngei lai; cun ra law ka zul," tiah a ti. 23 Sihmanhsehlaw hi bia cu mipa nih khan a theih tikah a ngaih a chia ngaingai, zeicahtiah amah cu mirum ngaingai a si. 24 Jesuh nih a ngaih a chiat kha a hmuh tikah aa thawh i, "Mirum caah cun Pathian Pennak chung i luh hi a va har hringhran dah. 25 Kalauk ṭhimka chung i luh nakin mirummi Pathian Pennak chung luh cu a har deuh suaumau," tiah a ti. 26 A bia a theimi nih cun an hal i, "Ahodah khamhnak cu a hmu kho kun lai," an ti. 27 Jesuh nih a leh hna i, "Minung tuah khawh lomi hi Pathian nih cun a tuah khawh ko," tiah a ti. 28 Cun Peter nih aa thawh i, "Zohhmanh, kannih cu nangmah zulh awkah kan inn kha kan chuahtak ko hna," tiah a ti. 29 Jesuh nih a leh i, "Asi, na chimmi cu ahmaan, cun hihi kan chimh hna: Pathian Pennak ruangah inn siseh, nupi siseh, unau siseh, nu le pa si hna seh, fale si hna seh, a kaltakmi cu 30 tu chan ah hin a let tampi in rulh an si lai i hmai chan ah zungzal nunnak an hmuh lai," tiah a ti. 31 Jesuh nih zultu pahleihnih kha a dang tein a kalpi hna i, "Ngai hmanh u, Jerusalem ah kan kal lai i khika ah profet hna nih Mi Fapa kong an ṭialmi paohpaoh kha a tling dih lai. 32 Jentail mi hna kut ah pek ka si lai i annih nih cun capo ah an ka saih lai i an ka nihsawh lai i cil an ka chak lai. 33 Fung in an ka tuk lai i an ka thah lai, sihmanhsehlaw ni thum ni ah nunnak ah ka tho ṭhan lai," tiah a ti hna. 34 A zultu hna nih khan hi thil kong hi zeihmanh an hngal lo; a bia sullam kha thuhkanh an si i Jesuh nih a chimmi a sullam kha an hngal lo. 35 Jesuh cu Jeriko khua kha a hei phan deng i awkhlawh pakhat a mit a cawmi hi lam pawngah a rak ṭhu i thil a hal hna. 36 Mizapi an kal lulhmalh kha a theih tikah "Hihi zeidah a si?" tiah a hal hna. 37 Annih nih, "Nazareth khuami Jesuh a lanh lio a si," tiah an leh. 38 Cun a au i, "Jesuh, David Fapa, ka zaangfah tuah," a ti. 39 Hmai i a ummi hna nih cun an sik i dai tein um ko, an ti. Sihmanhsehlaw thang chinchin in a au i, "David Fapa, ka zaangfah tuah," tiah a ti. 40 Cucaah Jesuh cu a dir i mitcawpa cu ka sinah ratpi u tiah a ti. A pawng a ra phak tikah Jesuh nih a thawh i, 41 "Zeidah ka tuahpiak seh ti na ka duh?" tiah a hal. "Bawipa, khua hmuh ṭhan ka duh," tiah a leh. 42 Cun Jesuh nih a thawh i, "Hmu tuah, na zumhnak nih an damter cang," tiah a ti. 43 Hmakhatte ah khua cu a hun hmu kho i Jesuh kha a zulh i Pathian kha a lawmh. Mizapi nih cucu an hmuh tikah Pathian kha an thangṭhat.
1 Jesuh cu Jeriko khua ah cun a vung lut i khua cu a hei tan. 2 Cuka ah cun ngunkhuai khawltu upa bik pakhat a min Zakia a simi a rak um i amah cu mirum a si. 3 Jesuh cu ahodah a si hnga ti kha hngalh a duh caah hmuh aa zuam i asinain amah cu miniamte a si caah le mizapi nih an phenh caah a hmu kho lo. 4 Cucaah cun hmaiah khan a rak tli i saikamor thingkung pakhat ah, cukalei i a kalmi Jesuh hmuh duh ah cun a rak kai. 5 Cuka hmun cu a phak tikah Jesuh nih cun cunglei kha a hun zoh i Zakia cu, "Zakia, khulrang in rung ṭum, na inn ah kan tlung lai," tiah a ti. 6 Zakia cu, khulrang in a ṭum i lunglawmhnak in a inn ah cun a tlunter. 7 Cu a hmumi vialte cu an zai i, "Hi pa hi misual mi inn i tlun awkah a kal," an ti. 8 Zakia cu a dir i Bawipa cu, "Bawipa, ngaihmanh, misifak caah ka ngeihmi thil hnarcheu ka pek lai; cun ka hlenmi hna an um ahcun a let li in ka cham hna lai," tiah a si. 9 Jesuh nih a thawh i, "Nihin ah hi inn ah khamhnak a phan; hi pa zong hi Abraham tefa a si ve. 10 Zeicahtiah Mi Fapa cu a tlaumi kawl awk le khamh awkah a ra," tiah a ti. 11 Hi bia a chimmi a theimi hna sinah khan hi tahchunhnak bia hi a chim. Jerusalem khua kha a hei phanh dengmang cang caah Pathian Pennak kha a lang hnik lengmang cang tiah an ruah. 12 Cucaah a thawh hna i, "Bawi pakhat cu ram hlapi pakhat ah a kal i cuka ram i siangpahrang a si hnuah inn ah ra tlun ṭhan aa tim. 13 A kal hlanah a sal pahra kha a kawh hna i sui tangka phar khat cio a pek hna. Cun a thawh hna i, 'Ka um lo karah hi hin chaw rak let u,' a ti hna. 14 A ram mi nih cun amah cu an huat i, 'Hi pa hi kan siangpahrang si awkah kan duh lo,' tiin lamkal a hnu in an hei thlah hna. 15 Cu bawi cu siangpahrang ah cun an rak ser i a ra kir. Tangka a pekmi sal hna kha hmakhatte ah a auh hna i, zeizat dah nan hmuh tiah a hal hna. 16 A hmasa bikpa kha a hung chuak i, 'Bawipa, na ka pekmi sui tangka phar khat khan sui tangka phar hra ka hmuh,' tiah a ti. 17 Aa thawh i, 'A ṭha, nangmah cu sal ṭha na si. Thil hmete ah zumhawktlak na si caah khua pahra uktu ah kan chiah lai,' a ti. 18 A pahnihnak sal kha a ra i, 'Bawipa, na ka pekmi sui tangka phar khat khan sui tangka phar nga ka hmuh,' tiah a ti. 19 Amah zong cu a thawh i, 'Khua panga uktu na si lai,' tiah a ti. 20 Cun a dang sal pakhat kha a ra i, 'Bawipa, na sui tangka kha a um ko; puanchia in ka fun i ka chiah ko. 21 Nangmah cu mikhepkha na si caah kan ṭih, Nangmah ta a si lomi kha na lak i thlaici na tuh lonak hmun ah na zun tawn,' tiah a ti. 22 Amah cu a thawh i, 'Sal ṭhalo. Nangmah bia lila cu nangmah biaceihnak ah ka hman lai. Nangmah nih keimah cu mikhepkha ka si le ka ta a si lomi a la tawn i ka tuh lonak hmun i a zun tawntu ka si cu na hngalh. 23 A si kun ahcun zeicahdah tangka cu tangka chiahnak beng ah na rak chiah lo? Rak chia law cu, ka kir tikah hin a miak he ka hmu hnga lo maw?' tiah a ti. 24 Cuka i a dirmi hna cu a thawh hna i, 'Amah cu sui tangka kha chut u law phar hra a ngeimi pa kha va pe u,' a ti hna. 25 Annih nih an thawh i, 'Bawipa, anih cu phar hra a ngeih cang ṭung,' an ti. 26 Annih cu a leh hna i, 'A ngeimi paoh kha tam chin chap an si lai i a ngei lomi kha a ngeihmi hnihchunte hmanh kha chuh an si lai. 27 Cun an siangpahrang si awkah a ka duh lotu ka ral hna kha cu, hika ah hin ratpi hna u law ka hmaiah that hna u, a ti,' " tiah a ti. 28 Jesuh nih hi bianabia a chim dih in an hmaiah cun Jerusalem khua lei ah khan a kal. 29 Oliv Tlang i Bethfeih le Bethani khua kha a phak deng tikah a zultu pahnih kha hmaiah a hei thlah hna i, 30 "Nan hmai khua ah khin rak kal u law nan va luhpah ah khin cit bal rih lomi laafa nan hmuh lai. Cucu a hri va phoih u law hika ah hin ratpi u. 31 Pakhatkhat nih, 'Zeicahdah mah khakha a hri nan phoih?' an in ti hna ahcun, 'Bawipa nih a herh,' tiah va ti ko u," tiah a ti hna. 32 An va kal i Jesuh nih a chimh hna ningte cun zeizong vialte kha an va hmuh. 33 Laafate cu an phoih lioah khan a ngeitu hna nih khan, "Zeicahdah nan phoih?" tiah an ti hna. 34 Annih nih, "Bawipa nih a herh," tiah an leh hna i 35 laafate cu Jesuh sinah khan an kalpi. Cun laa cungah khan an puan an danh i Jesuh cu an citter. 36 A kalnak ah khan lam ah puan kha an phah. 37 Jerusalem khua kha a hei naih i lam cu Oliv Tlang in chuk i a vung zuannak ah khan a zultu mibu nganpi nih cun, an hmuhmi thil lianngan vialte ruangah khan Pathian cu an lawmh i aw fak piin an thangṭhat. 38 "Bawipa min in a rami siangpahrang cu Pathian nih thluachuahnak pe ko seh. Vancung ah daihnak um seh law, Pathian cu sunparnak pek si ko seh," tiah an au. 39 Cun mizapi chung cun Farasi mi a cheukhat hna nih Jesuh cu an hun thawh i, "Saya, na zultu hna hi daihter hna," an ti. 40 Jesuh nih cun a leh hna i, "Hi hna hi an daih ahcun lung hrimhrim hi an au lai," tiah a ti. 41 Khuapi cu a hei naih chin lengmang i a hei hmuh tikah a ṭah i, 42 "Nihin ah hin daihnak caah zeidah a herh ti kha hei hngal law cu mu! Sihmanhsehlaw cucu na hmu kho ṭung lo. 43 Zeicahtiah na ral nih raltuknak chuntlung in an in kulh i an in hren i a kenkip in an in luhhnawh caan kha a phan lai. 44 Nangmah le na vampang kulh chung i a ummi minung hna cu an in hrawh dih cikcek hna lai: Pathian cu nangmah khamh awkah a rat caan kha na hngalh lo caah cuka hmun ah cun aa chonhmi lung pakhat hmanh leh loin an kaltakmi a um lai lo." 45 Jesuh cu Biakinn chungah khan a vung lut i chawdawr pawl kha a ṭhawl hna i, 46 "Cathiang chungah, 'Pathian nih ka inn cu thlacamnak inn a si lai,' a ti, tiah aa ṭial. Sihmanhsehlaw nannih nih cun mifir thuhnak kua ah nan ser cang," a ti hna. 47 Jesuh nih Biakinn ah khan nifate in a cawnpiak hna. Tlangbawi upa pawl hna le Phungbia cawnpiaktu saya hna le hruaitu pawl nih khan thah an duh, 48 sihmanhsehlaw mi vialte nih khan a bia cu an ngaih i pakhat hrelh hmanh kha an duh lo caah annih nih cu tuahnak ding caah cun lam an hmu kho lo.
1 Ni khat cu Jesuh cu Biakinn i mizapi a cawnpiak lio hna le Thawngṭha kong a chimh lio hna ah tlangbawi upa pawl le Phungbia cawnpiaktu saya hna le upa pawl kha an ra i, 2 "Hi thil tuah khawhnak dingah hin zei nawl dah na ngeih? Aho nih dah nawl an pek, kan chim?" an ti. 3 Jesuh nih a leh hna i, "Bia pakhat in hal ve hna ning. 4 Johan nih tipil pek khawhnak nawl a ngeihmi kha Pathian sin i a hmuhmi maw a si, minung sin i a hmuhmi dah a si, ka chim tuah u?" tiah a ti hna. 5 Annih cu pakhat le pakhat kha an i al i. "Zeitindah kan ti lai? 'Pathian sinin,' kan ti ahcun, 'A si ahcun zeicahdah Johan cu nan zumh kun lo?' a kan ti lai. 6 Minung sinin; kan ti ahcun, hika i a ummi vialte nih hin Johan cu profet a si hrimhrim tiah an zumh caah lung in an kan cheh lai," an ti. 7 Cucaah an i thawh i, "Khuazei in dik a hmuh kan hngal lo," an ti. 8 Cun Jesuh nih, "A si ahcun, kei zong nih zei nawl in dah hi thil hi ka tuah hna ti kha kan chim ve hna lai lo," tiah a ti hna. 9 Cun Jesuh nih mizapi cu hi tahchunhnak bia hi a chimh hna. Aa thawh i, "Mipa pakhat nih mitsur dum pakhat a tuah i rianṭuantu hna sinah khan a hlanh i khual a tlawng i saupi a rau. 10 Mitsur thei lawh caan kha a phak tikah rianṭuantu pawl sinah khan a sal pakhat a hei thlah i ka covo a si hngami kha ka pe ve u tiah a hei hal hna. Sihmanhsehlaw rianṭuantu hna nih khan a sal cu an rak velh i a lawng in an kirter. 11 Cucaah a dang a sal pakhat a hei thlah ṭhan, sihmanhsehlaw hi pa zong cu an rak velh i a lawngin an kirter ṭhiamṭhiam. 12 Cun a sal pathumnak kha a hei thlah ṭhan i amah zong cu an rak ṭhuat i an rak ṭhawl. 13 Cu tikah dum ngeitu nih cun aa thawh i, 'Zeitindah ka tuah lai? Ka dawtmi ka fapa thengte hi ka hei thlah lai; amah cu an rak hmaizah ṭheo lai,' tiah a ti. 14 Sihmanhsehlaw amah cu rianṭuantu pawl nih khan an rak hmuh tikah pakhat le pakhat cu an i ruah i, 'Hi pa hi dum ngeitu fapa a si. That u sih law dum hi kanmah ta ah a cang lai,' an ti. 15 Cucaah dum lengah khan an chuah i an thah. Cucaah dum ngeitu nih khan dum rianṭuantu hna kha zeitindah a ti hna lai? 16 Amah cu a ra lai i cu hna cu a thah hna lai i dum cu midang kha a zohter hna lai," tiah a ti. Cucu mizapi nih khan an theih tikah, "Si sawh hlah seh," an ti. 17 Jesuh nih annih cu a zoh hna i, " 'Inn satu nih san a tlai lo tiin an hlawtmi lung kha innkil lung ah a cang,' tiin Cathiang chungah a ummi bia hi tah a sullam zeidah a si kun?" tiah a hal hna. 18 Cun aa thawh ṭhan i, "Cu lung cung i a tlami paoh cu a kuai cikcek lai i cu lung nih a rialmi hna paoh cu leidip bantukin an dip lai," tiah a ti. 19 Phungbia cawnpiaktu saya hna le tlangbawi upa hna nih khan Jesuh cu tlaih colh an duh, zeicahtiah hi bianabia hi kanmah a kan chimhnawh ti kha an i hngalh, sihmanhsehlaw mizapi kha an ṭih hna. 20 Cucaah caan rem tu kha an bawh i mi ngiatu an thlah hna. "Zumh awktlakmi bantukin nan i umter lai i bia nan hal lai. A bia kha tlaih nan i zuam lai i cu a bia cu nawlngeitu mangki bawi sin i phakpinak ding ca i sonhtarhnak ah kan hman lai," an ti hna. 21 Cu mingiatu hna nih cun Jesuh cu an thawh i, "Saya, na chimmi le na cawnpiaknak hi ahmaan tiah kan hngalh. Ahohmanh an hmai na zoh hlei fawn hna lo, Pathian nih minung caah a herh a timi biatak kha na cawnpiak ko hna. 22 Cucaah cun kan chim tuah, Romans Siangpahrang sin i ngunkhuai pek hi kan Phung he aa ralchanhmi a si maw si lo?" tiah an ti. 23 Sihmanhsehlaw Jesuh nih an zernak cu tleng lakin a rak hmuh ṭung i cucaah cun a thawh hna i, 24 "Ngun tangka phar khat in ka hmuh sak tuah u. Aho hmai le min dah a cuang?" tiah a ti hna. 25 Annih nih, "Siangpahrang hmai le min a cuang," tiah an leh. Cucaah Jesuh nih a thawh hna i, "A si ahcun, Siangpahrang ta a simi cu Siangpahrang kha pe ko u, Pathian ta a simi cu Pathian kha pe ko u," tiah a ti hna. 26 Cuticun zapi lak i tlaih an i zuamnak cu pakpalawng ah a cang i a lehnak hna cu an khuaruah a har i dai tein an um. 27 Sadusi mi tlawmpal kha Jesuh sinah cun an ra. (Annih cu minung hi thihnak in an tho ṭhan lai lo tiah a timi an si). Annih nih amah cu an thawh i, 28 "Saya, Moses nih nawlbia a kan ṭialpiak i cu nawlbia chungah cun, 'Mipa pakhatkhat cu a thih i a nupi kha fa ngei loin a roh ahcun, cu pa a unau nih cun, cu nu cu a ṭhit lai, mithi mipa caah khan fa a hrinpiak khawh nakhnga,' a ti. 29 Voi khat cu unau pasarih an um; an upa bik cu nupi a ṭhi i fa ngei loin a thi. 30 Cu tikah apahnihnak pa nih khan a ṭhit i fa ngei loin a thihtak ve. 31 Cun apathumnak pa nih khan a ṭhit hoi i fa ngei loin a thihtak ṭhiamṭhiam. Cu bantuk cun an pasarih ningte cun a si — fa ngei loin an thi dih. 32 A hmanung bik ah minu zong cu a thi ve. 33 Mithi hna cu an thawh ṭhan ni ah, amah cu aho nupi cu dah a si lai? An pasarih tein an ṭhit ṭung?" an ti. 34 Jesuh nih a leh hna i, "Tu chan mi hna hi cu an i ṭhi i an i um; 35 sihmanhsehlaw thihnak in thawh ṭhanter awktlak a simi hna le a ra lai dingmi chan i um awkah aa tlakmi hna cu an i ṭhi an i um lo. 36 Annih cu vancungmi bantuk an si i an thi kho lo. Annih cu thihnak in thawh ṭhantermi an si cang caah Pathian fa an si. 37 Moses nih a thimi hna cu nunnak ah thawhter ṭhan an si lai ti cu fiang tein a chim ko. A alhmi burbuk kong a chimnak ah khan aa thawh i, 'Bawipa cu Abraham Pathian, Isak Pathian Jakob Pathian a si,' a ti. 38 Cu nih cun Pathian cu a nungmi hna Pathian a si i a thimi hna Pathian a si lo ti kha a fiang tein a langhter — zeicahtiah annih cu amah sinah cun an nung dih," tiah a ti. 39 Phungbia cawnpiaktu saya a cheu nih khan an hun i thawh i, "Saya, na lehnak hna cu a ṭha ngaingai," an ti. 40 Zeicahtiah amah cu bia an hal ngam lo. 41 Jesuh nih annih cu a thawh hna i, "Zeitindah Messiah cu David fapa a si lai, tiah an ti khawh? 42 Zeicahtiah David hrimhrim nih pei, 'Bawipa nih ka Bawipa cu, 43 Na ral vialte hna cu na ke tang i kelamh ah ka chiah hna hlantiang Ka orhlei kamah hin ṭhu tuah,' tiah Salm cauk chungah a ti cu. 44 David nih khan 'Bawipa' tiah a ti ṭung ahcun, zeitindah Messiah cu David fapa cu a si khawh lai?" tiah a ti. 45 Mizapi nih cun an dihlak in an ngaih ko lioah khan Jesuh nih a zultu kha a thawh hna i, 46 "Phungbia cawnpiaktu saya pawl kha i ralring hna u; annih cu angkifual pipi i hruk in chawh a duhmi, chawdawrnak hmun ah mi nih hmaizahnak in ka chawnbia hna seh ti a duhmi, pumhnak i ṭhutnak ṭha aa cuhmi, puai i hmun ṭha aa hammi an si; 47 mi nih ka hmu hna seh ti duh ah thla sau pipi in an cam, sihmanhsehlaw nuhmei kha an thilri le an inn tiangin an chuh ṭung hna. Dantatnak an hmuh ding cu a fak chinchinmi a si ko lai," tiah a ti.
1 Jesuh nih a pawngkam kha a hei zoh i Biakinn tangka chiahnak ah mirum mi nih an thawhlawm an thlak kha a hmuh hna; 2 cun a si a fak ngaingaimi nuhmeinu zong nih phaisa sen pahnihte a thlak ve kha a hmuh. 3 Cun aa thawh i, "Hihi kan chimh hna: Hi a si a fakmi nuhmeinu nih hin a taktak ti ahcun hawi dang vialte nakin tam deuh a sanh. 4 Zeicahtiah a dang tham nih cun an chawva a hleivuang kha pei an pek ko cu, sihmanhsehlaw hi nu nih hin cun, a si a fak na tein, a nunnak ding ca i aa chiahmi kha pei a dihlak in a pek cu," tiah a ti. 5 An lak i mi a cheu nih khan Biakinn kong kha an rak ceih i aa dawhnak kong le a lung ṭhaṭha hna le Pathian sin i laksawng an pekchanhmi kong kha an rak chim. 6 Jesuh nih aa thawh i, "Mah hi vialte hi nan hmuh, sihmanhsehlaw hika i lung vialte hi pakhat hmanh an umnak hmun cio i kaltak loin hlonh an si dih lai caan a tlung lai," tiah a ti. 7 "Saya, zeitik ah dah mah hihi a si lai? Cun a caan a phan cang ti a langhtertu dingah zei hmelchunhnak dah a um lai?" tiah an hal. 8 Jesuh nih a thawh hna i, "I ralring u; ahohmanh i hlenter hna hlah u. Zeicahtiah mi tampi keimah min put in an ra lai i, 'Keimah hi amah cu ka si,' an ti lai i 'A caan cu a phan cang,' an ti lai. Sihmanhsehlaw zul hna hlah u. 9 Raldohnak le ralthawhnak kong nan theih tikah nan thinphang hlah u; cu bantuk thil cu a um hmasa hrim awk a si, sihmanhsehlaw a donghnak a nai cang tinak a si theng lo," tiah a ti. 10 Cun aa thawh ṭhan i, "Ram pakhat le pakhat an i do lai, cozah pakhat le pakhat an i tu lai; 11 hmun kip ah ṭih a nungmi lihnin le mangṭam le ngal-eu zawtnak a tlung lai; thil ṭihnung le hmelchunhnak ngan pipi kha van in an lang lai. 12 "Hi thil vialte an tlun hlanah hin nannih cu tlaihkhih nan tong lai i hremnak nan ing lai; pumhnak inn ah khan biaceih awkah an in chuahpi hna lai i thong ah an in thlak hna lai; keimah ruangah siangpahrang hna hmaiah le uktu bawi hna hmaiah an in chuahpi hna lai. 13 Cucu nan ca i Thawngṭha chimnak caan ṭha a si lai. 14 Zeitindah kan i runvennak ding caah bia kan chim lai tiah a hlankan in nan lungre rak thei hlah u; 15 zeicahtiah nan ral ahohmanh nih an in tei hna i an in al khawh hna nakhnga lo, bia le fimnak kha kan pek hna lai. 16 Nan nu le nan pa, nan u nan nau, nan sahlawh nan rualchan, nan hawi nan kom hna nih khan an in rawi hna lai i nannih lak i a cheukhat cu thahnak nan ing lai. 17 Keimah ruangah mi kip nih an in huat hna lai. 18 Sihmanhsehlaw nan lu cung samfa fa khat hmanh a tlau lai lo. 19 Fek tein dir ko u, zeicahtiah hitihin pei nan nunnak cu nan khamh lai cu," tiah a ti. 20 Cun Jesuh nih cun, "Nannih nih Jerusalem khua kha ralkap i an kulh nan hmuh tikah a rauh hlanah a rawk cang lai ti kha hngalh u. 21 Khi tikah Judea ram i a ummi hna cu tlang ah zam hna seh law; khuapi chungah a ummi hna cu chuak hna seh law khualeng ramlak i a ummi hna cu khuapi chungah khan lut hna hlah seh. 22 Zeicahtiah mah hihi 'Dantatnak Ni' tiah timi kha a si i Cathiang nih a chimmi vialte cu a tlinnak ding caah umter dingmi an si. 23 Cu caan ah cun fapawi nu ca le hnuktlai lio nau a ngeimi hna caah zeitluk in dik a har lai. Hi ram chungah hin harnak ṭihnung a tlung lai i hi miphun cungah hin Pathian thinhunnak a tlung lai. 24 Annih cu vainam in thah an si lai i ram kip ah sal ah an hruai hna lai, Jentail mi nih Jerusalem khua cu an naan lai i an caan a dih hlantiang an ke tangah an chiah lai. 25 "Cun ni le thlapa le arfi ah khin hmelchunhnak an lang lai. Vawleicung ram hna cu rili tilet a thomi le a awnmi nih awlokchong in an tuah hna lai. 26 Vawlei cung pumpi i a tlung dingmi thil an ruah ah khan mi cu ṭihnak in a ther in an ther lai; zeicahtiah vancung ṭhawnnak cu an i hnin lai. 27 Cun Mi Fapa cu sunparnak le lianhngannak he khuadawm cung i a rat kha an hmuh lai. 28 Mah hi vialte hi um hram an hun i thawk tikah, dir u law cunglei kha zoh tuah u, zeicahtiah nan tlanhnak cu a nai cang," tiah a ti. 29 Cun Jesuh nih hi tahchunhnak bia hi a chimh hna i, "Theipi kung le thingkung dang hna kha ruat hna hmanh u. 30 Hnahte an hun lak nan hmuh tikah thal a chuak dengmang cang ti kha nan hngalh. 31 Cu bantukin hi thil hna an hung um kha nan hmuh tikah Pathian Pennak cu a nai cang ti kha nan hngalh lai. 32 "Mah hihi philh hlah u: Hi thil vialte hi atu i a nungmi hna an thih dih hlan ah hin a tlung lai. 33 Van le vawlei cu an rawk lai, sihmanhsehlaw ka bia cu an rawk lai lo," tiah a ti. 34 "I ralring tuah u. Zudin sa-einak le khuasak tintuk harnak lawng kha ruat hlah u, cu ti nan si ahcun cu Ni nih cun ruah lopi ah rap bantukin an foih sual hna lai. 35 Zeicahtiah cu Ni cu vawlei cung i a ummi vialte hna cungah a tlung dingmi a si. 36 Hi a tlung hnga dingmi thil vialte hi him tein chuak lakin nan tan khawh nakhnga, thazang nan ngeih nakhnga le Mi Fapa hmaiah nan dir khawh nakhnga, ralring tein um u law thla va cam zungzal ko u," tiah a ti. 37 Cu hrawng vialte cu Jesuh cu Biakinn ah khan mi kha a cawnpiak hna i zanlei paoh ah khan lengah a chuak i Oliv Tlang ah khan a va riak tawn. 38 Mi vialte cu amah bia ngaih awkah khan Biakinn ah khan zingka tein an kal tawn.
1 Lanhtak Puai timi Thilnu Telhlo Changreu Puai kha a nai cang. 2 Tlangbawi upa hna le Phungbia Cawnpiaktu saya hna nih khan mizapi kha an ṭih hna caah zeitindah Jesuh kha a thli in kan thah lai tiah lam an kawl. 3 Khi tikah zultu pahleihnih hna lak i aa tel vemi Judas Iskariot an timi chungah khan Satan cu a lut. 4 Cucaah Judas cu a va kal i tlangbawi upa hna le Biakinn cawngtu hna an bawile hna he khan zeitindah Jesuh cu an sinah a chanh khawh lainak ding kha an ceih. 5 An lung a si ngaingai i phaisa kan in pek lai, tiah an ti. 6 Cucu Judas zong kha a hna a tla i mizapi hngalh loin zeitindah Jesuh cu an sinah ka lei khawh lai tinak caan rem bawh hram kha a thawk. 7 Thilnu Telhlo Changreu Puai chung i Lanhtak rawl caah tuufa an thah hna ni kha a phan. 8 Jesuh nih Peter le Johan cu a thawh hna i, "Va kal u law Lanhtak zanriah kan ei ding kha va tim tuah u," tiah a ti hna. 9 "Khuazei ah dah va tim u tiah na kan duh?" tiah annih nih an ti. 10 Anih nih a thawh hna i. "Ngai hmanh u. Khuapi chung i nan vung luh ah khan ti-um in ti a thanmipa he nan i tong lai. A luhnak inn tiang khan nan hei zulh lai i 11 cu inn a ngeitu pa cu, 'Kan sayapa nih, "Khuazei ah dah a ka zultu hna he Lanhtak zanriah kan einak ding khaan cu a si?" a ti,' tiah nan va hal lai. 12 Cungdot ah khaan kaupi pakhat, ṭhutdan cabuai tlamtling tein an chiahnak an hmuhsak hna lai i cuka ah cun nan va timh lai," tiah a ti. 13 An va kal i Jesuh nih a chimh hna bantukte khan thil cu an va hmuh hna i annih nih Lanhtak zanriah cu an timh. 14 A caan a phak tikah Jesuh cu lamkaltu hna he khan cabuai ah cun an ṭhu. 15 Annih cu a thawh hna i, "Sifahnak ka in hlanah hin hi Lanhtak rawl nannih he ei ṭi hi ka duh hringhran. 16 Zeicahtiah Pathian Pennak chungah hi rawl hi a sullam taktak langhter a si hlan paoh cu ka ei ti lai lo," tiah a ti. 17 Cun Jesuh nih hrai kha a lak i Pathian sinah lawmhnak bia a chim hnuah, "Hihi i lak u law i hrawm u, 18 zeicahtiah Pathian Pennak a phanh hlan tiang cu, hi mitsur hang hi ka ding ti lai lo," tiah a ti. 19 Cun chang kha a lak i Pathian sinah lawmhnak bia a chim hnuah a cheu i annih cu a pek hna i, "Hihi ka pum a si, nan ca i ka pekmi cu. Keimah philh lonak ah run tuah u," tiah a ti. 20 Cu bantuk ṭhiamṭhiam in zanriah an ei dih hnuah hrai zong kha a pek hna i "Hi hrai hi nan caah ka thletmi ka thi in khenhchihmi Pathian biakamnak a si. 21 "Sihmanhsehlaw zohhmanh u. Keimah a ka rawitu cu ka sinah cabuai ah hin a um ko. 22 Pathian nih a khiah cia bantukin Mi Fapa cu a thi lai, sihmanhsehlaw a rawitu caah cun ṭihnung a va si hringhran dah!" tiah a ti. 23 Cun anmah le anmah cu, aho nih dah mah hihi a tuah lai, tiah pakhat le pakhat kha an i hal. 24 Cun a zultu hna lakah khan, ahodah a ngan bik ah ruah awk a si, ti bia alnak kha a chuak. 25 Jesuh nih a thawh hna i, "Jentail mi siangpahrang hna nih cun an michia kha a lal in an lalhnawh hna i nawl ngeitu hna kha ram ca 'Thil ṭha tuahtu' ti an si tawn. 26 Sihmanhsehlaw nannih cu hitihin nan si awk a si lo: nan lak i a ngan bik kha a ngakchia bik bantuk a si awk a si i hruaitu a simi kha sal bantuk a si awk a si. 27 Ahodah a ngan deuh? Rawl ei awkah a ṭhumi kha maw rawl a petu kha dah? Chim hau loin a ṭhumi kha a ngan deuh. Sihmanhsehlaw kei cu nan lakah rawl petu bantukin ka um. 28 "Harnak ka in caan a dihlak in a ka umpitu cu nanmah nan si; 29 cun ka Pa nih uknak nawl a ka pek bantukin kei zong nih nannih he biakamnak ka tuah lai. 30 Ka Pennak ah ka cabuai ah nan ding nan ei lai i Israel mi phun hleihnih kha biaceihpiak awkah bawi ṭhutdan cungah nan ṭhu lai," tiah a ti. 31 Jesuh nih, "Simon, Simon, ngai-hmanh. Lothlotupa nih facang cu a fang le a hi a thleidan bantukin Satan nih nannih cu nan dihlak in hneksaknak nawl kha a hmuh cang. 32 Sihmanhsehlaw Simon, na zumhnak a pur nakhnga lo nangmah caah thla ka cam. Cun keimah lei ah na hon i mer ṭhan tikah na unaule kha thazang na pek ve hna lai," tiah a ti. 33 Peter nih a leh i, "Bawipa, nangmah he thongtlak le thih kha ka ngamh ko," tiah a ti. 34 Jesuh nih a leh ve i, "Peter, tuzan ah, amah cu ka hngal lo, tiah voi thum tiang na ka ti hlan tiang ar a khuang lai lo," tiah a ti. 35 Cun Jesuh nih annih cu a thawh hna i, "Phaisa bawm siseh, zal siseh, kedan siseh i ken loin ka rak in thlah hna ah khan zeital nan bau maw?" tiah a ti. "Zeihmanh kan bau lo," tiah annih nih an leh. 36 Cun Jesuh nih, "Sihmanhsehlaw atu cu, phaisa bawm siseh, zal siseh a ngeimi paoh nih i phorh u; cun vainam a ngei lomi paoh nih a angkileng kha zuar seh law pakhat in i cawk seh. 37 Zeicahtiah Cathiang nih, 'Amah cu misual mi hna sinah rel chih a si cang,' tiah a timi kha ka kong ah hin a tlin awk a si. Ka kong an rak ṭialmi vialte kha a tling cuahmah cang," tiah a ti. 38 Cun annih nih, "Bawipa, zohhmanh, hika ah hin vainam pahnih an um ko," tiah an ti i, "Cucu a za," tiah a leh hna. 39 Cun Jesuh cu a chuak i a tuah tawn bantuk khan Oliv Tlang ah a kal i a zultu kha a sinah an kal ve. 40 A hmun kha a phak tikah annih cu a thawh hna i, "Tukforhnak chungah nan tlak sual nakhnga lo thlacam tuah u," a ti hna. 41 Cun an sin khan lungchep tluk a va kal i a khuk aa bil i thla a cam. 42 "Ka Pa, na hna a tlak ahcun hi hrai hi ka ṭhialpiak ko. Sihmanhsehlaw keimah nawl si loin nangmah nawl si ko seh," tiah a ti. ( 43 Vancung in vancungmi pakhat a sinah a rung lang i a rung hnemh. 44 Lungthin fak ngaingai in fak chinchin in thla a cam i a thlan cu vawlei ah thi dor bantukin a tla.) 45 A thlacamnak cun a tho i a zultu hna sinah khan a va kir i an rak i hngilh kha a hmuh hna, an lungre a theih tuk ah an ba dih. 46 Annih cu, "Zeicahdah nan i hngilh? Tukforhnak ah nan tlak nakhnga lo tho u law thlacam u," a ti hna. 47 Bia a chim lengmang lioah cun mibu kha an ra phan i zultu pahleihnih lak i aa tel vemi Judas nih khan a hun hruai hna. Jesuh cu hnamh awkah a hun fuh. 48 Sihmanhsehlaw Jesuh nih a rak thawh i, "Judas, Mi Fapa hi hnamh in maw na rawi ko lai?" tiah a ti. 49 Jesuh cu a sin i a ummi a zultu hna nih khan thil umtuning kha an hmuh tikah an thawh i, "Bawipa, kan vainam kan hmang hna lai maw?" an ti. 50 Cun an lak i pakhatpa nih khan Tlangbawi Ngan sal kha a orhlei hna pet lak in a tuk. 51 Sihmanhsehlaw, "Hihi cu a za cang," tiah Jesuh nih a ti. Mipa a hna kha a tawngh i a damter. 52 Cun amah tlaih awkah a rami tlangbawi upa pawl hna le Biakinn cawngtu hna i an bawi pawl hna le upa hna kha a thawh hna i, "Damiah hei si ning law cu bang, zeicahdah vainam le thingtan he nan ka rathnawh? 53 Nifate in pei nan sinah Biakinn ah ka um ko cu, tlaih nan ka zalh ṭung lo. Sihmanhsehlaw atu hi cu nanmah le muihnak ṭhawnnak nan caan a si," tiah a ti hna. 54 Jesuh cu an tlaih i Tlangbawi Ngan inn ah khan an kalpi; cun Peter nih lamhlatpi khin a zulh. 55 Tual laifang ah khan mei an kau i mei cu an to i a tomi hna sinah cun Peter cu a ṭhu ve. 56 Cun mei a toh lio cu sinumnu ngakchia pakhat nih a hmuh i dengteo in a zoh i, "Hi pa zong hi amah sinah aa telmi a si ve," tiah a ti. 57 Sihmanhsehlaw Peter nih aa pheh i, "Minu, a hngalh hmanh ka hngalh ṭung lo," a ti. 58 Cu hnu tlawmpal ah cun pa pakhat nih a hmuh i, "Nangmah zong hi anmah lak i aa telmi na si ve ko," tiah a ti. Sihmanhsehlaw Peter nih cun aa pheh ṭhan i, "Mipa, ka si lo," tiah a leh. 59 Cu hnu suimilam pakhat tluk ah khin midang pakhat nih ṭhawng chinchin in, "Hi pa hi amah sin i aa telmi a si hrimhrim ko, zeicahtiah Galilee mi pei a si ko hi!" tiah a ti. 60 Sihmanhsehlaw Peter nih cun, "Mipa, na chimmi hi zei a si ti awk hmanh ka hngal lo," tiah a leh. Bia a chim lioah cun, chikkhatte ah khin ar a hung khuang. 61 Bawipa cu a hun i mer i Peter kha a hei zoh i Peter nih cun Bawipa nih, "Tuzan ah ar a khuan hlanah, amah cu ka hngal lo, tiah voi thum tiang naa pheh lai," a timi kha a lung ah a hung pem. 62 Peter cu a chuak i lunghno ngaiin a ṭap. 63 Jesuh cu a cawngtu hna nih khan nihchuak ah an saih. An tuk, 64 a mit an huh i, "Ahodah an tu? Kan chim tuah," tiah an ti chih. 65 Cuticun nihsawhnak bia kha a cungah tampi an chim. 66 Khua a dei tikah Judah mi upa hna le tlangbawi upa pawl hna le Phungbia cawnpiaktu saya hna kha an i pum i an hmaiah cun Jesuh cu an chuahpi. 67 Annih nih an thawh i, "Messiah na si maw si lo kan chim tuah," an ti. Anih nih, "Kan chimh hna zongah nan ka zum lai lo, 68 cun bia kan hal hna zongah nan ka let duh fawn lai lo. 69 Sihmanhsehlaw atu hin cun Mi Fapa hi Lianngan Bik Pathian orhlei kamah ṭhutter ka si cang lai," tiah a ti. 70 Cun annih nih an dihlak in, "Pathian Fapa maw na si kun?" an ti. Anih nih a leh hna i, "Nan ka ti bangin ka si," tiah a ti. 71 Cun annih nih, "Tehte dang zeidah kan herh ti? Amah kaa hrimhrim in pei kan theih ko cang cu," an ti.
1 An bu ningpi khan an tho i Jesuh cu Pilat hmaiah khan an kalpi. 2 Anih cu sual kha an phawt i, "Hi pa nih hin kan mi hna a pingah a hruai hna kha kan tlaih, a thawh hna i Sizar Siangpahrang sinah ngunkhuai nan pe lai lo, a ti hna i, keimah hi siangpahrang Khrih cu ka si, a ti hna," an ti. 3 Cun Pilat nih cun, "Judah mi hna siangpahrang cu na si maw?" tiah a hal. Jesuh nih cun, "Na chim bangin ka si ko," tiah a leh. 4 Khi tikah Pilat nih cun tlangbawi upa pawl hna le mizapi cu, "Hi pa hi a sualnak zeihmanh ka hmu lo," tiah a ti hna. 5 Sihmanhsehlaw fak chinchin in an au i, "Hi pa nih hin a cawnpiaknak in mizapi lakah hnahnawhnak a chuahter. Galilee ram in aa thawk i Judea ram vialte kha a cul dih i atu cu hika hi a phan cang," an ti. 6 Cucu Pilat nih a theih tikah, "Hi pa hi Galilee mi maw a si?" tiah a hal hna. 7 Jesuh cu Herod nih a ukmi peng chungin a si ti kha a hngalh tikah amah cu Herod sinah cun a hei kuat; cu lioah cun Herod zong cu Jerusalem khua ah a um. 8 Herod cu Jesuh a hmuh tikah khan a lung aa lawm ngaingai, zeicahtiah amah kong kha a rak theih tawnmi a si i hmuh a duhnak kha a saupi cang; cun Jesuh nih cun khuaruahharnak pakhatkhat a tuah lai tiah a ruah. 9 Cucaah Herod nih cun Jesuh cu bia tampi a hal len, sihmanhsehlaw Jesuh nih kaa khat hmanh a let lo. 10 Tlangbawi upa pawl hna kha le Phungbia cawnpiaktu saya hna kha an chuak i Jesuh cu fak piin sual an puh. 11 Herod le a ralkap hna nih khan Jesuh cu capo ah an saih i zeirello ngaiin an ti. Puan ṭha ngaingai an aihter i Pilat sinah khan an kuat ṭhan. 12 Cu ni hrimhrim ah cun Pilat le Herod cu hawikom ah an cang; cu hlanah cun ral an rak si. 13 Pilat nih tlangbawi upa pawl kha le hruaitu hna le mi zapi kha a auh hna i, 14 "Hi pa hi ka sinah nan ratpi i mizapi kha a pingah a hruai hna, nan ti. Atu cu amah kha nan hmaiah ka kher i thil ṭhalo a tuah tiah nan puhmi vialte kha pakhat hmanh a tuah tiah ka hmu kho lo. 15 Herod zong nih a sualnak a hmu ve lo, cucaah ka sinah a rak thlah ṭhan: Hi pa nih hin thah awk tlak thil a tuahmi pakhat hmanh a um lo. 16 Cucaah ka tukter hna lai i ka thlah lai," tiah a ti. ( 17 Lanhtak puai paoh ah Pilat nih thongtla pakhat lengmang a thlahpiak hna awk a si.) 18 Mizapi cu an au ciammam i, "Amah cu that ko. Bar-Abbas tu kan thlahpiak," tiah an ti. 19 (Bar-Abbas cu khua chung i zapi buainak a ummi ruangah le lainawn ruangah thong ah cun an rak thlak.) 20 Pilat nih Jesuh cu luatter a duh caah zapi cu bia a chimh ṭhan hna, 21 sihmanhsehlaw an au ṭhan i, "Vailam ah khenh ko, vailam ah khenh ko," an ti. 22 Pilat nih cun a chimh ṭhan hoi hna i, "Zei sualnak dah a tuah? Thih awktlak thil a tuahmi pakhat hmanh ka hmu kho lo. Fung in ka tukter hna lai i ka thlah lai," a ti. 23 Sihmanhsehlaw an awreng chuak in, Jesuh cu vailam ah khenh chih ko, tiin an au lengmang i a donghnak ah cun an aunak nih cun a tei. 24 Cucaah an hal lengmangmi biakhiahnak kha Jesuh cungah cun a tuahpiak hna. 25 Chuak seh ti an duhmi pa, hnahnawhnak a chuahter ruang le lai a nawn ruang i thong i an thlakmipa kha, a chuahter i Jesuh cu anmah duh paoh in tuah awkah an kut chungah a pek hna. 26 Jesuh cu ralkap nih khan an kalpi i lampi ah khuate lei in khuapi ah a rami Sairin khuami Simon kha an ton. An tlaih i vailam tahnak kha an khinh i Jesuh hnulei khan an zulhter. 27 Mi tampi nih an zulh i cu hna lakah cun a ṭang aa cum i amah a rak ṭah lengmangmi nu tlawmpal zong an um. 28 Jesuh nih annih kha a merhnawh hna i, "Jerusalem minu hna, keimah caah ṭap hlah u; nanmah le nan fale ca tu ah ṭap deuh u. 29 Zeicahtiah mi nih, 'Fa a ngei bal lo i fa a hring bal lo i fa hnuk a din bal lomi nu hna cu an van a va ṭha dah,' an ti caan a phan lai. 30 Cu caan cu mi nih tlang hna cu, 'Kan tlak u,' an ti hna i, fing hna cu, 'Kan khuh u,' an ti caan a si lai. 31 Zeicahtiah thing cu a hrin lioah cu bantuk thil hna cu tuah a si ahcun a ro tik chinchin ahcun zeidah a lawh lai?" tiah a ti. 32 A dang pahnih, misual veve kha, Jesuh sin i thah awkah cun an kalpi ve hna. 33 Cun "Lu Ruh" an timi hmun kha an phak tikah Jesuh cu vailam ah an khenh chih i misual pahnih hna zong kha a orhlei ah pakhat a kehlei ah pakhat an khenh chih ve hna. 34 Jesuh nih aa thawh i, "Ka Pa, ngaithiam hna. An tuahmi hi zei a si ti awk an hngal lo," tiah a ti. Camcawhfung zuh in a hnipuan kha an i phaw. 35 Judah mi hruaitu pawl nih an nihsawh i, "Midang cu a khamh hna, amah cu Pathian nih a thimmi Messiah a si ahcun amah le amah kha i khamh kun ngat seh," tiin an ti lioah khan zapi nih cun an dir i an zoh ko. 36 Ralkap pawl zong nih khan an nihsawh i an hun hnawh i mitsur hang thor kha an pek i, 37 "Judah Siangpahrang na si ahcun i khamh kun ngat," an ti, 38 A lucung i an ṭialmi bia cu: "Hihi Judah Siangpahrang cu a si," ti hi a si. 39 Cuka i aa thlai vemi misual pakhat nih cun Jesuh cu a nihsawh i, "Messiah cu na si kun lo maw? Nangmah cu i khamh law kannih zong kan khamh ve ngat?" tiah a ti. 40 Sihmanhsehlaw a dang pakhat nih khan a mawhchiat i "Pathian na ṭih lo maw? Hika ah hin cun biakhiahnak aa khatmi toiah kan um. 41 Sihmanhsehlaw kannih ca i biakhiahnak an tuahmi cu ahmaanmi a si, zeicahtiah kan tuahmi ruangah kan hmuh awk a simi kha kan hmuh; sihmanhsehlaw anih hi cu ṭhat lonak zeihmanh a tuah lo," tiah a ti. 42 Cun Jesuh cu a thawh i, "Jesuh, Siangpahrang in na rat tikah ka philh te hlah," tiah a ti. 43 Cun Jesuh nih cun, "Mah hihi kan chimh: nihin ah Paradis ah keimah sinah na um lai," a ti. 44 Chun suimilam hleihnih tluk ah ni cu a mui i muihnak nih ram cu a pumpuluk in zanlei suimilam pathum tiang a khuh; 45 cun Biakinn chung puanzar kha cheu hnih ah aa cheu. 46 Jesuh cu aw thangpi in a au i, "Ka Pa, na kut chungah ka thlarau kha ka chiah," tiah a ti. Cucu a chim dih in a cat. 47 Cucu ralbawipa nih khan a hmuh i Pathian kha a thangṭhat i; "Hi pa hi a sual hrimhrim lo," tiah a ti. 48 Cu thil va zoh awkah cuka i aa pummi hna nih thil umtuning kha an hmuh tikah an ṭang i cum lengmang in inn ah an ṭin. 49 Jesuh kha pumpak in a rak hngalmi hna le Galilee ram in amah a rak zultu nu hna nih khan, hi thil cu a langin an cuanh. 50 - 51 Judea ram khua, Arimathea an timi ah hin mipa pakhat a min Josef a simi a um. Amah cu miṭha le hmaizah awktlakmi a si i Pathian Pennak a tlun lainak a hngakmi kha a si. Amah cu Khawngsil chungah khan aa telmi a si ve nain an biachahnak le an thil tinak kha a hna a tla lo. 52 Pilat hmaiah khan a vung lut i Jesuh ruak kha a hal. 53 A ruak kha a ṭhumh i puan rang in a zual i lungkua i an cawhmi thlan ah a vui. Cu thlan cu thlan thar a si i ahohmanh nih an hmang rih lo. 54 Cu caan cu Cawnningani a si i Sabbath ni kha aa thawk dengmang cang. 55 Galilee ram in Jesuh a zulmi nu hna kha Josef sinah cun an kal i thlan le a chungah zeitindah Jesuh ruak cu an chiah ti kha an hmuh. 56 Cun inn ah an ṭin i a ruak caah khan zihmui le sathau kha an timh. Sabbath ni ah cun Nawlbia bangin an i din.
1 Zarhpi ni zingkate ah nu hna cu zihmui an timhmi kha i put in thlan ah khan an va kal. 2 Thlankhar lung a rak i thawn kha an hmuh i 3 cucaah an vung lut colh, sihmanhsehlaw Jesuh ruak kha an hmu lo. 4 Cuka ah cun a zei ti ruah awk hngal loin an dir ko i cu lioah cun chikkhatte ah khin puan rang aa aihmi mi pahnih an pawngah cun an rung dir. 5 Nu hna cu ṭihnak in an khat i mi nih an chawnh hna tikah khan vawlei lei hoih in an kun. Mi nih cun an thawh hna i, "Zeicahdah a nungmi cu a thimi lakah nan kawl? 6 Hika ah a um lo, a tho cang. 7 'Mi Fapa cu misual mi hna kut ah chanh a si lai i vailam ah an khenhchih lai i ni thum ni ah nunnak ah a tho ṭhan lai,' tiah Galilee i a um lioah a rak in chimhmi hna kha philh hlah ngat u," tiah an ti hna. 8 Cu tikah nu hna cu a bia kha an lung ah a hung pem i, 9 thlan cun an kir i hi thil kong vialte cu zultu pahleikhat kha le a dang vialte kha an chimh hna. 10 Cu nu hna cu Mary Magdalin, Joanna le Jeim nu Mary kha an si; anmah le an sin i a kal vemi midang hna nih khan hi kong cu lamkaltu kha an chimh hna. 11 Sihmanhsehlaw lamkaltu pawl nih khan nu nih an chimmi cu pakpalawng ah an ruah i an zum hna lo. 12 Sihmanhsehlaw Peter cu a tho i thlan ah khan a va le, a vun bih i ruak zualnak puan kha a hmuh hna, a dang zeihmanh a hmu lo. Cun inn ah a kir i cu thil a cangmi kong cu khuaruahhar in a ruat lengmang. 13 Cu ni ṭhiamṭhiam ah cun an lak i pahnih hna cu Emmaus an timi khua leiah an kal i 14 thil umtuning kong vialte kha an i ruah. Emmaus cu Jerusalem in khan sarih tluk a si. 15 Cu ti i bia an i ruah lengmang i an i ceih lengmang lioah cun Jesuh hrimhrim nih khan a hei fuh hna i an sinah cun a kal ve. 16 A hmuh cu an hmuh ko, sihmanhsehlaw an hngal kho lo. 17 Jesuh nih cun a thawh hna i, "Nan kal pah in zeidah pakhat le pakhat nan i ceih len ko?" tiah a ti. Cun hmaichia ngaiin an dir. 18 Cun pakhatpa, a min Kleopas a simi nih khan a hun thawh i, "Tunaite i Jerusalem khua ah thil a cangmi hi Jerusalem khua chung i a ummi ah nangmah lawng hi maw a hngal lomi na si hnga?" tiah a hal. 19 Cun anih nih, "Zei thil hen dah?" tiah a ti. "Nazareth khuami Jesuh cung i a tlungmi thil cu hen ta," tiah an leh. "Hi pa cu profet a si i Pathian hmaiah mi vialte nih a chimmi le a tuahmi ah hmual ngeimi a si, tiah an ruah. 20 Kan tlangbawi upa pawl hna le a kan uktu bawi hna nih thah awkah an chanh i cun vailam ah khan an khenh chih. 21 Kannih nih cun amah cu Israel mi hna a luattertu a si rua lai tiah kan rak i ruahchan. Cu pinah cun, cu thil a umnak hi atu hi a ni thumnak a si. 22 Kanmah lak i a ummi nu a cheukhat nih kan khuaruah an kan harter. Zingkate ah thlan ah cun an va kal i 23 asinain a ruak kha an hmu lo. An ra kir i vancungmi an i langh kha kan hmuh hna i cu hna nih cun, a nung, tiah an kan chimh, an ti. 24 Cun kanmah bu chungmi a cheukhat cu thlan ah cun an va kal i nu nih an chimningte khan an va hmuh, sihmanhsehlaw amah cu an hmu lo," an ti. 25 Cun Jesuh nih cun a thawh hna i, "Nan va hrut thiam dah! Profet nih an chimmi zumh kha nan vaa harh hringhran dah. 26 Messiah nih hi thil vialte kha a sunparnak chung i a luh hlanah a in awk a herh a si lo maw?" tiah a ti. 27 Cun Jesuh nih Cathiang chungah, Moses cauk hna thawk in profet hna ṭialmi cauk hna tiang, amah kong aa ṭialmi vialte kha fiang tein a chimh hna. 28 An kalnak ding khua cu an hei phan deng i cu tikah Jesuh nih cun hmailei i a kal rih lai bantuk khin aa umter; 29 sihmanhsehlaw an tlaih i, "Kan sinah tlung ve ko, zanlei a si cang i a muih zong a mui dengmang cang," an ti. Cucaah anmah sinah cun a tlung. 30 Anmah sinah cabuai ah khan a ṭhu i changreu kha aa lak i thla a cam i changreu cu a beuh i a phawt hna. 31 An mit kha a hung fim i aho a si kha an hun hngalh; sihmanhsehlaw a lo ṭhan. 32 Annih nih cun, "Lampi i bia a kan ruah le Cathiang sullam a kan chimh ah khan kan chungah mei kang bang a si lo mei kha?" tiah pakhat le pakhat cu an i ti. 33 Hmakhatte ah an tho i Jerusalem ah an kir ṭhan. Zultu pahleikhat le a dang hna kha an rak i pum i, 34 "Bawipa cu a tho taktak ko. Simon nih a hmuh," tiah an rak i ceih len ko. 35 Cun pahnih hawl hna nih khan lampi i thil a hung ummi le Bawipa cu changreu a hun cheu tik i an hngalhnak kong kha an chimh hna. 36 Cucu an chimh lengmang hna lioah khan Bawipa hrimhrim cu an lakah a hung dir i, "Nan cungah daihnak um ko seh," tiah a ti hna. 37 An thin a phang an ning a ṭi i mithla kan hmu rua tiah an ruah. 38 Sihmanhsehlaw a thawh hna i, "Zeicahdah nan khuaruah a har? Zeicahdah nan lungawṭawm in nan um? 39 Ka kut le ka ke hi zoh hna ngat u, keimah kha pei ka si ko hi. Ka tawng u law nan hngalh ko lai, mithla nih cun ruh le sa a ngeih ṭung lo, kei cu ka ngeih pei nan ka hmuh ko hi," tiah a ti hna. 40 Cu bia a chim dih in a kut le a ke kha a hmuhsak hna. 41 An zum kho ngaingai rih lo, zeicahtiah cu thil cu si taktak awkah a ṭha tuk a lo i lungawṭawm in an um ko rih. Cucaah, "Hika ah hin zei tal ei awk nan ngei maw?" tiah a hal hna. 42 Annih nih ngasa em cia pakhat kha an pek i 43 aa lak i an hmaiah cun a ei. 44 Cun annih cu a thawh hna i, "Nan sin i ka rak um lio i kan chimhmi hna kha mah hi hrimhrim hi pei an si cu: Moses Phungbia chung le profet hna nih an ṭialmi chung le Salm chungah keimah kong an rak ṭialmi vialte cu a tlin dih awk a si," tiah a ti. 45 Cun an lungthin kha a hun pemh hna i Cathiang sullam kha an hun hngalh. 46 Annih cu a thawh hna i, " 'Messiah nih cun sifahnak kha a in lai i ni thumnak ni ah thihnak in a tho ṭhan lai, 47 cun amah min in sual ngaihchihnak le sual ngaihthiamnak kong kha Jerusalem khua in i thawk in miphun vialte hna sinah chim a si lai,' tiah aa ṭial. 48 Cun nannih cu hi thil vialte a hngaltu tehte nan si. 49 Cun keimah hrimhrim nih ka Pa nih bia aa kammi kha nan cungah ka run thlah lai. Sihmanhsehlaw cunglei in ṭhawnnak kha nan cung i a tlun hlantiang khuapi chung hin hngak ko u," tiah a ti hna. 50 Cun khuapi chung khan a chuahpi hna i Bethani khua tiang a kalpi hna. Khika ah a kut a hler i thluachuahnak a pek hna. 51 Thluachuah a pek lio hna ah cun an sinin aa ṭhen i vancung ah a kal. 52 Amah cu an biak i lunglawm ngaiin Jerusalem ah an kir i 53 an caan vialte cu Biakinn chungah khan Pathian thangṭhatnak caah an hman.
1 Vawlei hi ser a rak si hlanah Bia cu a rak um cang; cu Bia cu Pathian sinah a rak um i cu Bia cu Pathian a si. 2 A hramthawk tein Bia cu Pathian he cun an um ṭi. 3 Pathian nih zeizong vialte hi cu Bia thawng cun a ser hna i Bia thawng loin sermi zeihmanh an um lo. 4 Bia cu nunnak hram a si i cu nunnak nih cun minung kha ceunak a pek hna. 5 Ceunak cu mui lakah khan a ceu i muihnak nih khan zeitikhmanh ah a hmit bal lo. 6 Pathian nih a lamkaltu Johan kha a run thlah i 7 Johan nih cun mi kha ceunak kong cu a chimh hna. Mi vialte nih cu kong cu an theih i an zumh nakhnga annih chimh awk i a rat cu a si. 8 Amah cu ceunak cu a si lo, ceunak kong chim i a rami tu kha a si. 9 Ceunak taktak cu vawlei cungah a ra i mi vialte a ceuhtu ceunak kha a si. 10 Cu caan ah cun Bia cu vawlei ah hin a rak um ko. Amah thawngin Pathian nih vawlei hi a rak ser; sihmanhsehlaw vawlei nih khan amah cu a rak hngal lo. 11 Amah ram a simi ah khan a ra nain, amah mi ciacia nih khan an rak cohlang duh lo. 12 Asinain tlawmpal nih cun an rak cohlan i an rak zumh i cu hna cu Pathian fa cannak nawl kha a pek hna. 13 Pathian fa an can cu minung phung ningin a si lo; vawlei cung i hrinsor ningin a si lo, Pathian hrimhrim kha an Pa cu a si. 14 Bia cu minung ah a cang i kan lakah khua a rung sa. A sunparnak cu kan hun hmuh i vel le biatak in a khat. Cu sunparnak cu Pa nih a Fapa ngeihchunte lawnglawng a pekmi sunparnak phun kha a si. 15 Johan nih amah kong cu a rak chim i, " 'Amah cu ka hnu in a rami a si, sihmanhsehlaw ka chuah hlan in a rak um cangmi a si caah keimah nakin a ngan deuh,' tiah ka rak in chimhmi hna kha amah hi a si," tiah a au. 16 A liam in a liammi a vel chung cun thluachuahnak kha pakhat hnu pakhat a kan pek lengmang. 17 Pathian nih Phungbia cu Moses thawng khan a kan pek, sihmanhsehlaw vel le biatak cu Jesuh Khrih thawng khan a ra. 18 Ahohmanh nih Pathian cu an hmu bal lo; sihmanhsehlaw Pathian Fapa bel nih Pathian cu mi kha a hngalhter hna. Cu Fapa cu Pathian Fapa ngeihchun, a Pa ṭang chung i aa pommi kha a si. 19 Jerusalem khua Judah upa hna nih tlangbawi hna le Levi mi hna cu Johan sinah khan an hei thlah hna i, "Ahodah na si?" tiah an va hal. 20 Johan nih cun pheh lo tein, "Kei cu Messiah cu ka si lo," tiah langhngan te le fiang tein a rak chimh hna. 21 Cun annih nih cun, "Ahodah na si kun? Elijah tah na si maw?" tiah an hal. Johan nih cun, "Ka si lo," tiah a leh hna. Annih nih, "Profet cu tah na si maw?" an ti. Anih nih, "Ka si lo," tiah a ti hna. 22 "Ahodah na si kha kan chim kun, zeicahtiah a kan fialtu hna kha bialehnak kan hei phorh hna awk a herh. Cucaah cun aho ka si, ti ah dah naa ti?" an ti. 23 Johan nih cun a thawh hna i, "Kei cu, Profet Isaiah nih, 'Bawipa kalnak caah lam kha ding tein rak ser u,' tiah thetse ram ah a aumi aw, a timi kha ka si," tiah a ti hna. 24 An thlahmi hna lak i aa tel vemi Farasi mi hna nih khan, 25 "Nangmah cu Messiah zong na si lo, Elijah zong na si lo, profet zong cu na si fawn ṭung lo ahcun, zeicahdah tipilnak kha na pek len kun hna?" an ti. 26 Johan nih cun, "Kei nih cun ti in tipilnak kan pek hna, sihmanhsehlaw nan lakah hin nan hngalh lomi, 27 ka hnu in a ra dingmi cu a um ko. Kei hoi hna cu a kedan hri phoihtu hmanh ah kaa tlak lo," tiah a leh hna. 28 Hitihin bia an i halnak hmun cu Jordan tiva nichuahlei kam i a ummi Bethani khua, Johan nih tipil a pek hnanak ah khan a si. 29 A thaizing ah Johan nih cun Jesuh cu a sin i a rat kha a rak hmuh i, "Zohhmanh u, Pathian Tuufa, vawlei sualnak a kalpitu khi! 30 Amah hi pei, 'Ka hnu in mipa pakhat a ra lai, sihmanhsehlaw amah cu keimah nakin a ngan deuhmi a si, zeicahtiah ka chuah hlan in amah cu a rak um cang,' tiah ka rak chimmi kha a si cu. 31 Amah cu ahodah a si lai ti kha ka hngal lo, sihmanhsehlaw ti in tipilnak ka rak pek lengmang hna cu amah kha Israel mi nih an hngalh khawh nakhnga caah a si," tiah a ti. 32 Cun Johan nih cun, "Vancung in Thlarau cu ṭhuro bantukin a rung ṭum i a cung i aa fut kha ka hmuh. 33 Amah cu ka rak hngal ṭhiamṭhiam lo, sihmanhsehlaw ti in tipilnak va pe hna tiah a ka thlahtu nih khan, 'Mi pakhatkhat cungah Thiang Thlarau kha a rung ṭum i aa fut kha na hmuh tikah, cu pa cu Thiang thlarau in tipilnak a petu hna ding cu a si ti kha na hngalh lai,' a ka ti. 34 Cucu keimah hrimhrim nih ka hmuh i tehte ka khaan. Amah hi Pathian Fapa cu a si ko," tiah a ti. 35 A thaizing ah Jesuh cu aa chawk i cu lioah cun Johan le a zultu pahnih nih an dirnak khan an hmuh ṭhan. 36 Johan nih cun a hei zoh i, "Pathian Tuufa khi zohhmanh u," tiah a ti. 37 Cu bia a chim cu a zultu pahnih nih khan an theih i Jesuh cu an zulh. 38 Jesuh cu a hnulei ah a hun i mer i an zulh kha a hmuh hna tikah, "Zeidah nan kawl?" tiah a hal hna. Annih nih, "Rabbi, khuazei ah dah na um?" tiah an leh. (Rabbi a sullam cu cawnpiaktu saya tinak a si). 39 "Ra u law ra zoh tuah ngat u," tiah a leh ve hna. Cucaah amah sinah khan an kal i a umnak cu an va hmuh, cu ni cu amah sinah cun an cam. (Cu caan cu zanlei suimilam pali hrawng khi a si). 40 Johan bia a thei i Jesuh sinah a kalmi pahnih hna lak i pakhat cu Simon Peter nau Andru kha a si. 41 Andru nih a tuah hmasa bikmi thil cu a u Simon va kawl kha a si i, "Messiah cu kan hmuh cang," tiah a ti. (Messiah cu Khrih tinak a si). 42 Cun Simon cu Jesuh sinah khan a kalpi. Jesuh nih cun a rak zoh i, "Nangmah cu Johan Fapa Simon na si. Na min cu Sefas a si cang lai," tiah a ti. (Sefas ti cu Peter ti he khan aa khat i a sullam cu "lungpi" tinak a si). 43 A thaizing cu Jesuh cu Galilee ram kal kha aa tim. Filip kha a hei hmuhpah i, "Ka zul," tiah a ti. 44 (Filip cu Andru le Peter bantukin Bethsaida khuami kha a si ve). 45 Filip nih cun Nathanael kha a va hmuh i, "Phungbia cauk chungah a kong Moses nih a ṭialmi pa, profet hna zong nih a kong an ṭialmi pa kha kan hmuh cang. Amah cu Josef fapa Jesuh, Nazareth khuami kha a si," tiah a ti. 46 Nathanael nih cun a rak i thawh i, "Nazareth khua cun thil ṭha zeital a chuak kho hnga maw?" tiah a ti. Filip nih cun, "Ra law ra zoh hen aw," tiah a leh. 47 Jesuh nih cun Nathanael cu amah lei i a rat kha a rak hmuh i, "Israel mi taktak a simi khi zoh hmanh u; amah khi hlenthawinak lungthin zeihmanh a ngei lomi a si," tiah a ti. 48 Nathanael nih cun aa thawh i, "Zeitindah na ka hngalh?" tiah a ti. Jesuh nih cun, "Filip nih an kawh hlanah khan, theipi kung tangah ka rak in hmuh cang," tiah a leh. 49 Nathanael nih cun, "Saya, nangmah cu Pathian Fapa na si. Israel mi Siangpahrang na si," tiah a ti. 50 Jesuh nih cun, "Theipi kung tang i na um lio kha kan hmuh, ka ti caah cun maw na zumh? Hi nakin a ngan deuh ngaingaimi thil na hmuh len hna lai," tiah a ti. 51 Cun annih cu a thawh hna i, "Hi biatak hi kan chimh hna: Van kha aa hun i Pathian vancungmi hna cu Mi Fapa cung i an ṭum le an kai kha nan hmuh lai," tiah a ti.
1 Ni hnih hnuah khin Galilee ram Kana khua ah nupi ṭhitnak a um. Jesuh nu kha cuka ah cun a um i 2 Jesuh le a zultu hna zong kha nupi ṭhitnak puai ah khan an sawm hna. 3 Mitsur zu kha a dih tikah Jesuh cu a nu nih khan, "Mitsur zu an ngei ti lo," tiah a chimh. 4 Jesuh nih cun, "Ka nu, zeidah tuah awk ti kha, na ka chimh awk a si lo, ka caan pei a phan rih lo cu," tiah a ti. 5 Jesuh nu nih cun sinum pawl cu, "An chimhmi hna paoh kha tuah te u," tiah a ti hna. 6 Judah mi nih kut ṭawlnak kong ah phung an ngei i cu bantukin kut i ṭawlnak caah cun lung ralca paruk an chiah; ralca pakhat nih cun ti galan pakul le sawm thum karlak cio an tlum. 7 Jesuh nih sinum pawl cu a thawh hna i, "Hi ralca ah hin ti rawn hna u," tiah a ti. Liam thluahmah in an rawn hna i 8 annih cu, "Ti kha tlawmpal in hei than u law rawldanghnak tlangtlatu kha hei pe u," tiah a ti hna. An hei pek i, 9 mitsur zu ah aa cangmi ti cu a rak teh. Hi mitsur zu hi khuazei in dah a chuah ti kha a hngal lo. (Ti a thantu sinum nih khan cun an hngalh ko). Cucaah nupi ṭhitu pa kha a auh i, 10 "Midang nih cun an sawmmi hna kha mitsur zu a ṭha bik cu a hmasa ah an dinh tawn hna, cun an i zat hnuah cun a sawhsawh kha an pek hna. Sihmanhsehlaw nang nih cun a ṭha bik kha atu tiangin naa chiah rih," tiah a ti. 11 Galilee ram Kana khua i Jesuh nih a tuahmi hi hmelchunhnak a tuahmi lakah a hmasa bik a si; cu a tuahmi hmelchunhnak ah cun a sunparnak kha a langhter i a zultu nih khan amah cu an zumh. 12 Cu dih cun Jesuh le a nu le a naule le a zultu hna cu Kapernaum khua ah khan an kal i khika ah khan ni tlawmpal an cam. 13 Judah mi Lanhtak Puai kha a nai dengmang cang i cucaah Jesuh cu Jerusalem khua ah khan a hung kal. 14 Biakinn chungah khan caw le tuu le laileng a zuarmi hna le tangka thlengtu pawl an cabuai i an rak ṭhut ko kha a hmuh hna. 15 Hri kha tuknak caah aa hrual riangmang hna i an saṭil vialte cu biakinn chung cun a ṭhawl dih hna, tuu he caw he a ṭhawl dih hna; tangka thlengtu pawl an cabuai kha a leh dih hna i an phaisa sop kha a ṭhekpiak dih hna. 16 Laileng zuar pawl kha a thawh hna i, "Hika hmun hin nan laileng kha chuahpi hna u. Ka Pa inn cu chawdawrnak hmun ah ser hlah u," a ti hna 17 Cathiang nih, "Maw Pathian, na inn ka tlaihchannak hi ka chungah mei bangin a lin," tiah a timi kha a zultu hna cu an lung ah a hung pem. 18 Judah upa pawl nih khan amah cu an fuh ṭhan i, "Hi thil tuahnak nawl na ngeih hi na kan hmuhsak khawh nakhnga khuaruahnak zeidah na tuah khawh?" tiah an hal. 19 Jesuh nih cun, "Hi Pathian biakinn hi ṭhet u law ni thum chungah ka sak ṭhan ko lai," tiah a leh hna. 20 "Ni thum chungah na sak ṭhan ko hnga ti? Hi biakinn sak ah hin kum sawm li le kum ruk pei an rak rauh," an ti. 21 Sihmanhsehlaw Jesuh nih biakinn a timi cu amah a pum kha a si. 22 Cucaah thihnak in thawhter a si tikah a zultu hna nih khan, mah hihi a rak chimmi a si, ti kha an lung ah a hung pem; cun Cathiang nih a rak chimmi le Jesuh nih a chimmi kha an zumh. 23 Jesuh cu Lanhtak Puai chung i Jerusalem khua i a um ah khan mi tampi nih hmelchunhnak a tuahmi kha an hmuh caah amah cu an zulh. 24 Sihmanhsehlaw an kut chungah cun aa sanh duh lo, zeicahtiah mi kha ṭha tein a hngalh dih cikcek ko hna. 25 Minung kong ah hin aho chimh hmanh a herh lo, zeicahtiah an lung chungah zeidah a um ti kha a hngalh dih ko.
1 Judah mi hruaitu a simi pa pakhat a rak um i a min cu Nikodemu a si, amah cu Farasi phu chungmi a si. 2 Zan khat cu Jesuh sinah khan a va kal i, "Rabbi, nangmah cu Pathian thlahmi cawnpiaktu saya na si ti kha kan hngalh. Pathian nih a umpi hna lo ahcun, hmelchunhnak na tuahmi hi ahohmanh nih an tuah kho lai lo," tiah a ti. 3 Jesuh nih cun, "Biatak tein kan chimh: Ahohmanh hrin ṭhan a si lo ahcun Pathian Pennak kha a hmu kho lai lo," tiah a leh. 4 Nikodemu nih cun, "Zeitindah patling a si cangmi cu hrin ṭhan cu a si khawh lai? A nu paw chungah cun lut ṭhan in hrin ṭhan cu a si kho bal lai lo," tiah a leh. 5 Jesuh nih cun, "Biatak tein kan chimh: ahohmanh ti le thlarau in hrin a si lo ahcun Pathian Pennak chungah cun a lut kho lai lo. 6 Pumsa lei in ti ahcun mi cu a nu le a pa chungin a chuakmi a si, sihmanhsehlaw thlarau hrin si awkah cun Thlarau in a chuakmi a si awk a si. 7 'Hrin ṭhan nan si hrimhrim awk a si,' ka ti tikah na khuaruahhar hlah. 8 Thlitu cu a duhnak paoh ah a hrang ko; a thawng cu na theih, sihmanhsehlaw khuazei in dah a rat le khuazei ah dah a kal kha na hngal lo. Thlarau in hrin a simi cu, cu bantuk cun an si ve," tiah a ti. 9 Nikodemu nih cun, "Zeitindah cucu a si khawh lai?" tiah a ti. 10 Jesuh nih cun a thawh i, "Nang cu Israel mi cawnpiaktu saya ngan na si i hi hmanh na hngal lo maw? 11 Biatak tein kan chimh: kannih cu kan hngalhmi kha kan chim i kan hmuhmi kha tehte kan khan, sihmanhsehlaw kan chimmi cu ahohmanh nih cohlan nan duh lo. 12 Hi vawlei cung thil kong ka chim hmanh ah nan ka zumh lo ahcun zeitindah vancung thil kong ka chim tikah nan ka zumh khawh kun lai? 13 Vancung in a rung ṭummi Mi Fapa dah ti lo cu ahohmanh vancung i a kaimi an um bal lo." 14 Moses nih dar rul kha thetse ram lakah a tar bantuk khan Mi Fapa zong hi tar a si ve lai. 15 Cucaah cun amah a zummi paoh nih zungzal nunnak an ngei lai. 16 Cuticun Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai. 17 Zeicah ti ahcun Pathian nih a Fapa cu vawlei cungah hin vawlei biaceihtu si awkah a run thlah ṭung lo, vawlei khamhtu si awkah pei a run thlah cu. 18 "Fapa kha a zummi paoh cu sual biaceihnak a ing lo, sihmanhsehlaw a zum lomi cu sualphawt a si ko cang; zeicahtiah Pathian Fapa ngeihchun kha a zum lo. 19 Biaceihning cu hitihin a si: ceunak cu vawlei cung hi a rung phan ko cang, sihmanhsehlaw mi nih thil ṭhalo kha an tuah caah ceunak nakcun muihnak tu kha an duh deuh. 20 Thil ṭhalo a tuahmi paoh nih cun ceunak kha a huat i ceunak i rat kha a duh lo, zeicahtiah thil ṭhalo a tuahmi langh kha a duh lo. 21 Sihmanhsehlaw thil hmaan a tuahmi cu ceunak ah khan a ra i a tuahmi kha Pathian duhnak zulh in a si ti cu ceunak nih cun a langhter," tiah a ti. 22 Cu hnuah cun Jesuh le a zultu hna cu Judea ram ah khan an kal. Cuka ah cun tlawmpal a um i tipilnak kha a pek hna. 23 Johan zong kha Aenon ah khan tipilnak a pe ve hna, zeicahtiah cuka ah cun ti tampi a um. Aenon cu Salim in a hla lo. Mi cu amah sinah khan an va kal i tipilnak kha a rak pek hna. 24 (Johan cu thong ah khan an thla rih lo). 25 Johan zultu a cheukhat hna kha Judah mi he i thianhnak phung kong an i al. 26 Cucaah Johan sinah khan an va kal i, "Saya, Jordan tiva ral i na sin i a rak ummi pa kha na hngalh a si lo mei? A kong nangmah nih na rak chimmi pa kha. Kha pa kha atu hi tipilnak a pe ve hna i mi kip nih an fuh," tiah an chimh. 27 Johan nih cun a thawh hna i, "Pathian nih a pek hna dah ti lo ahcun ahohmanh nih zeihmanh an ngei kho lo. 28 'Kei cu Messiah cu ka si lo, a hmai i rak thlah chungmi lawng ka si,' tiah ka timi kha nanmah pei a hngaltu cu nan si kha. 29 Ṭhitmi ngaknu cu a ṭhitu tlangval ta pei a si cu. Nupi ṭhitu tlangval kawi cu a pawng khan a dir i nupi ṭhitu aw a theih tikah khan a lung aa lawm. Kei ka lunglawmhnak tlinter a sining zong cuticun a si ko. 30 Anih cu a ṭhangcho lai, kei cu ka ṭumchuk lai," a ti. 31 Cunglei in a rungmi cu a dang vialte nakin a ngan deuh, vawlei in a rami cu vawlei ta kha a si i vawlei cung thil kong kha a chim. Cunglei in a rami cu zeizong vialte cungah a um. 32 Amah nih cun a hmuhmi le a theihmi kha a chim, sihmanhsehlaw ahohmanh nih a chimmi kha an cohlang lo. 33 A bia a cohlangmi paoh nih cun kha an cohlannak thawng khan, Pathian chimmi cu a taktak a si ti kha an langhter. 34 Pathian nih a thlahmipa kha a Thlarau cu tling tein a pek caah, Pathian bia cu a chim. 35 Pa nih a Fapa kha a dawt i zeizong vialte kha amah kut tangah a chiah dih. 36 Fapa a zummi paoh cu zungzal nunnak an ngei, Fapa nawl a ngai lomi paoh cu nunnak an ngei bal lai lo i Pathian thinhunnak cu an cungah a um zungzal ko lai.
1 Farasi pawl nih khan Jesuh nih Johan nakin zultu tam deuh a lak hna i tipilnak a pek hna ti kha an theih. 2 (A ngaingai ti ahcun Jesuh nih khan tipilnak cu pakhat hmanh a pe hna lo, a zultu hna lawng nih khan an pek hna). 3 Cu bia cu Jesuh nih a theih tikah Judea ram khan aa thawh i Galilee ram ah a kir; 4 lampi ah Samaria ram kha a tan. 5 Samaria ram ah cun khua pakhat khi a hei phan i cu khua cu a min ah Saikhar a si. Saikhar cu Jakob nih a fapa Josef a pekmi lo khan a hla lo. 6 Cuka ah cun Jakob tikhor kha a um i Jesuh cu a khualtlawnnak ah cun a bat caah tikhor pawngah cun a ṭhu. Cu caan cu chun hrawng khi a si. 7 Samaria minu pakhat hi ti than awkah a ra i Jesuh nih cun, "Ti din khat in ka pe tuah," tiah a rak ti. 8 A zultu hna cu rawl cawk awkah khua chungah khan an kal. 9 Minu nih cun, "Nang cu Judah mi na si i kei cu Samaria mi ka si, zeitindah ti din awk na ka hal khawh?" tiah a leh. (Judah mi nih cun Samaria mi i an hmanmi khokheng kha hman an duh lo). 10 Jesuh nih cun, "Pathian nih pek an duhmi laksawng kha zeidah a si ti le, cun ti din awk an haltu hi ahodah a si ti kha hei hngal law cu, amah tu hi na hal hnga i nunnak ti kha an pek ko hnga," tiah a ti. 11 Minu nih cun, "Bawipa, ti thannak thawl na ngeih ṭung lo. Tikhor tiah a thuk fawn. Khuazei ah dah nunnak ti cu na hmuh lai? 12 Hi tikhor hi kan pu Jakob nih a kan pekmi a si; amah nih siseh, a fapale nih si hna seh, a saṭil run nih si hna seh, an rak dinmi tikhor cu hi tikhor hi a si. Jakob nak ngan deuh ah cun maw naa ruah?" tiah a leh. 13 Jesuh nih cun, "Hi ti a dingmi paoh cu an ti a hal ṭhan lai; 14 sihmanhsehlaw keimah nih ka pekmi ti a dingmi paoh cu zeitikhmanh ah an ti a hal ṭhan ti lai lo. Ka pekmi ti cu a chungah zungzal nunnak petu cerhtiput ah a cang lai," tiah a ti. 15 Minu nih cun, "Bawipa, cu ti cu ka pe law ti hal in um ti hlah ning, hika zongah hin ti than ah ra ti hlah ning," tiah a ti. 16 Jesuh nih, "Va kal law na va va ko, cun hika ah hin ra ṭhan," tiah a ti. 17 Minu nih cun, "Va ka ngei lo," tiah a ti. Jesuh nih cun, "Va ka ngei lo, na ti cu na hmaan. 18 Va panga na rak ngei cang i atu na va hi na va taktak a si lo. Biatak na ka chimh," tiah a ti. 19 Minu nih cun, "Bawipa, profet na si hi ta. 20 Kannih Samaria mi a kan hringsortu hna nih, hi tlang ah hin Pathian cu an rak biak, sihmanhsehlaw nannih Judah mi nih Pathian cu Jerusalem khua ah biak awk a si nan kan ti," a ti. 21 Jesuh nih cun a thawh i, "Minu, ka chimmi hi zum; mi nih Pa cu hi tlang ah siseh, Jerusalem ah siseh an biak lo caan a phan lai. 22 Nannih Samaria mi nih cun nan biakmi kha nan hngal taktak lo, kannih Judah mi tu nih cun, kan biakmi cu kan hngalh, zeicahtiah khamhnak cu Judah mi sinin a rami a si. 23 Sihmanhsehlaw Pathian a bia taktakmi nih cun thlarau le biatak in an biak caan kha a ra lio i hika hi a phan cang. Hi bantukin a biami hna hi Pa nih a duhmi cu an si. 24 Pathian cu thlarau a si i a biatu hna nih cun thlarau le biatak in an biak awk a si," tiah a ti. 25 Minu nih cun aa thawh i, "Khrih timi Messiah cu a ra lai ti kha kan hngalh. Amah a rat tikah zeizong vialte a kan chimh dih te ko lai," tiah a ti. 26 Jesuh nih cun a vun leh i, "Amah cu keimah hi pei ka si cu, nangmah he bia aa ruah lengmangmi hi," tiah a ti. 27 Cu liote ah cun Jesuh zultu pawl kha an hung kir; minu he bia an rak i ruah kha an hmuh hna tikah an khuaruah a har ngaingai. Sihmanhsehlaw ahohmanh nih minu cu, "Zeidah na herh?" tiah an ti lo i Jesuh zong cu, "Zeicahdah minu he khan bia nan i ruah," tiah an hal lo. 28 Cun minu nih cun a ti-um kha a kaltak i khua chungah khan a va kal i khuachung mi cu, 29 "Thil ka rak tuahmi paoh a ka chim kho dihtu mipa hi ra zoh hmanh u. Amah hi Messiah cu a si kho hnga maw?" tiah a ti hna. 30 Cucaah khuachung cun an va chuak i Jesuh sinah khan an va kal. 31 Cu lioah cun Jesuh kha a zultu hna nih khan, "Saya, rawl ei tuah," tiah an rak fial. 32 Sihmanhsehlaw Jesuh nih annih cu, "A konglam zeihmanh nan hngalh lomi ei awk rawl ka ngei," tiah a leh hna. 33 Cucaah a zultu pawl nih cun, "Mi nih rawl an rak pek i maw a si hnga," tiah pakhat le pakhat an i ceih. 34 Jesuh nih cun a thawh hna i, "Ka rawl cu a ka thlahtu duhnak zulh le a ka fialmi rian liim kha a si. 35 Nannih nih, 'Hi hnu thla li ah rawl ṭuan a cu lai,' nan ti a si lo mei? Sihmanhsehlaw lo khi ṭha tein hei zoh hna hmanh u; rawl cu an hmin dih cang i ṭuan an cu diam cang. 36 Rianṭuantu nih a ṭuan man kha a hmuh lio cang i zungzal nunnak caah khan rawl kha a pum lio hna, cucaah a tuhtu le a zuntu kha an pahnih in hmunkhat ah an i lawm ṭi lai. 37 'Pakhat nih a tuh i pakhat nih a zun,' timi bia cu ahmaan ngaingaimi bia a si. 38 Nan ṭuannak a si lomi lo ah khan rawl ṭuan awkah kan thlah hna; cuka ah cun midang nih khan rian cu an rak ṭuan i an rian ṭuanmi thawng cun nannih nih miaknak nan hmuh," tiah a ti. 39 Minu nih khan, "Ka rak tuahmi vialte a ka chimh dih," tiah a ti caah khan Samaria mi tampi nih Jesuh cu an zumh. 40 Cucaah Samaria mi hna cu Jesuh sin i an rat tikah khan, amah cu kan campi ko, tiah an nawl i cuka ah cun ni hnih a cam. 41 Amah kaa hrimhrim in an theihmi bia thawng khan mi tampi nih an zumh i 42 minu cu an thawh i, "Atu cu nangmah na chimmi ruangah khan si loin, kan mahte nih kan theihmi le amah cu vawlei Khamhtu a si hrimhrim ti kha kan hngalh caah kan zumh," an ti. 43 Cuka ah ni hnih a cam hnuah Jesuh cu Galilee ram ah khan a kal; 44 zeicahtiah amah Jesuh hrimhrim nih, "Profet cu amah ram ah cun hmaizahnak a hmu lo," tiah a rak ti. 45 Sihmanhsehlaw Galilee a va phak tikah cun mi nih khan an rak conglawmh ngaingai, zeicahtiah, Lanhtak Puai lioah Jerusalem khua ah khan an rak kal ve i puai chung i a tuahmi vialte kha an rak hmuh dih caah a si. 46 Cucaah Jesuh cu Galilee ram Kana khua, ti mitsur zu i a rak canternak ah khan a va kal. Cuka ah cun cozah bawi pakhat a rak um i Kapernaum khua i a ummi a fapa cu a zaw. 47 Jesuh cu Judea ram in Galilee ram ah a ra ti kha a theih tikah a sinah cun a va kal i, "Kapernaum khua ah va kal u si law khika ah a thi dengmangmi ka fapa cu ka damhpiak tuah," tiah a nawl. 48 Jesuh nih cun a thawh i, "Thil lianngan le khuaruahhar thil a simi nan hmuh lo paoh ahcun nannih nih cun nan zum bal lai lo," tiah a ti. 49 Cu bawi nih cun aa thawh i, "Bawipa, ka fa a thih hlanah ra ko," tiah a leh. 50 Jesuh nih cun, "Va kal ko, na fa cu a nung lai," tiah a ti. Mipa nih khan Jesuh nih a chimmi kha a zumh i a kal. 51 Lampi in a sinum nih khan an rak don i, "Na fapa cu a nung ko lai," tiah an rak chimh. 52 A fapa a dam deuh cu zeitik ah khan dah a si, tiah a hal hna tikah, "A taklinh a daih cu ni zan chun suimilam pakhat ah khan a si," tiah an ti. 53 Cu caan te cu Jesuh nih, na fa a nung lai, tiah a chim caan a si kha mipa nih cun a hngalh. Cucaah amah le a innchungkhar dihlak nih an zumh. 54 Jesuh nih Judea ram in Galilee ram i a rat hnuah hihi hmelchunhnak a tuahmi a pahnihnak a si.
1 Cu hnuah cun Jerusalem khua ah Judah mi biaknak puai pakhat a um i cu ah cun Jesuh cu a hung kal. 2 Tuu Kutka timi pawngah khan tidil pakhat a um i a kam ah cun deu deu nga an um. Cu tidil cu Hebru holh cun Beth-zatha an ti. 3 Cu deu chungah cun mizaw cu an ril liangluang ko, a cheu cu mitcaw an si, a cheu cu kebei an si, a cheu cu mizeng an si. ( 4 A zei maw caan ah Bawipa vancungmi kha a vung ṭum tawn i ti cu a vung cangh tawn. Ti a cangh tikah aa paih hmasa bik paoh cu an zawtnak khan an dam tawn, cucaah cun cu mizaw hna cu ti cangh cu an hngak ko.) 5 Cuka ah cun mipa pakhat, a zawtnak kum sawm thum le kum riat a si cangmi a um. 6 Cuka i a rilh ko cu Jesuh nih khan a hmuh i kha can riamruam a zawtnak a si cang kha a hngalh caah amah cu, "Dam na duh maw?" tiah a hal. 7 Mizaw pa nih cun, "Bawipa, ti a hung cangh tikah kei cu tili chungah paihtu ka ngei lo i vung luh kaa timh paoh ah khan pakhat khat nih an ka chawhkanh zungzal," tiah a leh. 8 Jesuh nih cun a thawh i, "Tho tuah, na ihphah kha i lak law kal tuah," tiah a ti. 9 Chikkhatte ah mipa cu a dam i a ihphah cu a lak i a kal. 10 Cu ni cu Sabbath ni a si ngelcel. Cucaah Judah upa hna nih khan damnak a hmu mipa cu an thawh i, "Nihin cu Sabbath ni a si i na ihphah i put cu kan Phung nih aan onh lo," tiah an ti. 11 Anih nih, "A ka damtertu nih pei, 'Na ihphah kha i put law kal,' a ka ti cu," tiah a leh hna. 12 Annih nih, "Na ihphah i put law kal aan titu cu ahodah a si?" tiah an ti. 13 Sihmanhsehlaw damnak a hmu mipa nih khan aho a si kha a hngal lo, zeicah ti ahcun cuka ah cun mi tampi an i pum i Jesuh cu a rak i zuk diam cang. 14 A hnuah khin Jesuh nih cu pa cu biakinn ah khan a hmuh i, "Zohhmanh, atu cu na dam cang. Na sualnak kha ngol hna, cu lo ahcun hi nak ṭhalo deuh nih an tlak sual lai," tiah a ti. 15 Cu tikah mipa cu a va kal i a damtertu kha Jesuh a si tiah Judah upa kha a va chimh hna. 16 Damnak kha Sabbath ni ah a tuah caah Jesuh nih cun Judah mi cu an thin a phawh hna i amah kha ral hram an thawk. 17 Jesuh nih cun annih cu a thawh hna i, "Ka Pa cu rian a ṭuan zungzal i cucaah kei zong nih ka ṭuan ve awk a si," tiah a ti. 18 Cu a chimmi ruangah cun Judah upa pawl cu amah thah kha a duhter chinchin hna; Sabbath ni a buar lawng kha si loin Pathian cu ka Pa tiah a kawh caah khan, Pathian tluk ah aa ser tiah an ti. 19 Cucaah Jesuh nih annih cu a leh hna i, "Biatak kan chimh hna: Fapa nih hin keimah nawl lawngin zeihmanh ka tuahmi a um lo; ka Pa nih a tuahmi ka hmuhmi lawng kha ka tuah hna. Ka Pa nih a tuahmi cu Fapa zong nih ka tuah ve hna. 20 Zeicahtiah ka Pa nih khan a ka dawt i a tuahmi vialte kha Fapa hi a ka hmuhsak dih. Hi nakin a ngan deuhmi hmanh hi tuah awkah a ka hmuhsak lai i nan khuaruah a har lai. 21 Ka Pa nih mithi kha a thawhter hna i a nunter hna bantukin, Fapa zong nih hin ka duhmi paoh kha ka nunter ve hna lai. 22 Cun ka Pa nih hin ahohmanh hi amah lawngin bia a ceih hna lo, a Fapa tu hi biaceihnak nawl tling kha a ka pek, 23 cucaah mi vialte nih ka Pa cu an upat bantukin Fapa zong hi an ka upat ve lai. Fapa a ka upat lomi paoh nih cun a ka thlahtu ka Pa an upat lo kha a si. 24 "Biatak kan chimh hna: ka bia a thei i a ka thlahtu kha a zummi paoh cu zungzal nunnak a ngei. Amah cu biaceihnak a ing lai lo, sihmanhsehlaw thihnak in nunnak ah a lan cang. 25 Biatak kan chimh hna: Mithi nih Pathian Fapa aw an theih i a thimi paoh an nun lainak caan kha a ra lio i a phan cang. 26 Ka Pa hrimhrim cu nunnak hram a si bantukin a Fapa hi nunnak hram ah a ka ser cang. 27 Cun a Fapa kha Mi Fapa ka si caah biaceihnak nawl kha a ka pek. 28 Hi kongah hin lau hlah u; thlan chung i a ummi mithi vialte nih a aw an theih lai caan kha a ra lio, 29 cun an thlan khan an chuak lai i ṭhatnak a tuahmi kha an tho lai i an nung lai; ṭhat lonak a tuahmi kha an tho ve lai i sualphawt an si lai," tiah a ti. 30 "Keimah lawngin zeihmanh ka tuah kho lo; Pathian nih a ka chimhmi ning lawngin bia ka ceih hna; keimah nih ka duhmi kha si loin a ka thlahtu nih a duhmi kha tuah kaa zuam caah ka biakhiahnak cu ahmaanmi a si. 31 "Keimah nih keimah kong kha kaa chim a si ahcun ka chimmi cu ahmaan taktak ti awk a si hnga lo. 32 Sihmanhsehlaw keimah kong chimtu hi midang pakhat a um i keimah kong a chimmi kha ahmaan tiah ka hngalh. 33 Nannih nih lamkaltu kha Johan sinah khan nan hei thlah hna i biatak kha a rak chimh hna. 34 Hiti ka timi hi minung tehte khaanpiak kha ka herh caah a si lo, sihmanhsehlaw khamh nan si nakhnga ca tu ah a si. 35 Johan cu meiinn bantuk a si; a alh i a ceu i caan khatte cu a ceunak nih cun nan tha an nuamter hna. 36 Sihmanhsehlaw kaa bochanmi cu Johan nih tehte a khaanmi nakkhan a ngan deuhmi a si; cucu ka ṭuanmi rian, ka Pa nih ṭuan awkah a ka pekmi rian hna hi an si. 37 Cun a ka thlahtu ka Pa zong nih cun keimah kong ah hin tehte a khaan ve. A aw kha nan thei bal lo, a hmai zong nan hmu bal lo, 38 cun a bia zong nan lung chungah nan i ken lo; cucu zeicahdah a si ti ahcun a thlahmi kha nan zumh lo caah a si. 39 Cathiang chung kha ṭha tein nan kawl, cu nan kawl cu, Cathiang chungah cun zungzal nunnak kan hmuh hmanh hnga maw tiah ruahnak nan ngeih caah a si; asinain Cathiang nih an dihlak in an chimmi cu, keimah kong a si ko. 40 Sihmanhsehlaw nunnak ngeih awkah keimah sin rat tu cu nan duh lo. 41 "Mi sinin thangṭhatnak hmuh ding kha ka kawl lo. 42 Sihmanhsehlaw nannih cu kan hngalh ko hna; nan lung chungin Pathian nan daw lo ti kha ka hngalh ko. 43 Ka Pa nawl in a rami ka si, sihmanhsehlaw nan ka cohlang lo; midang pakhatkhat amah nawl in a rat tikah nan rak cohlan te ko ṭung lai. 44 Nannih cu pakhat nih pakhat sinin thangṭhatnak hmuh nan duh, asinain Pathian sinin thangṭhatnak hmuh cu nan i zuam lo; cucaah cun zeitindah zumhnak cu nan ngeih khawh bal hnga. 45 A Pa sinah taza a kan cuai lai tiah ka ruat hlah u. Moses hi pei taza an cuaitu hna ding cu a si cu — nan i bochanmi Moses hi. 46 Moses kha rak zum taktak u law cu, keimah hi nan ka zumh ko hnga, zeicahtiah amah nih keimah kong hi pei a rak ṭial cu. 47 Sihmanhsehlaw a ṭialmi cu nan zumh lo caah, zeitindah ka chimmi cu nan zumh khawh fom hnga," tiah a ti.
1 Cu hnuah cun Jesuh cu Galilee Rili ral ah khan a kal, cu Rili cu Tiberias Rili ti zongah an ti fawn. 2 Jesuh nih mizaw a damter hna tikah hmelchunhnak a tuahmi kha an hmuh caah mi run tampi nih amah cu an zulh. 3 Jesuh cu tlang pakhat cung ah a kai i cuka ah cun a zultu hna he khan an ṭhu. 4 Judah mi Lanhtak Puai kha a nai cang. 5 Khua a hei zoh i mi an rat lulhmalh kha a hei hmuh hna tikah Filip kha a thawh i, "Hi mi vialte hna pek awk rawl hi khuazei ah dah kan cawk lai?" tiah a ti. 6 (Cuti in a ti cu Filip hneksaknak caah khan a si; zeidah ka tuah lai ti kha amah nih cun a hngalh ko). 7 Filip nih cun, "Tlawmte cio ei ding hmanh ah changreu tangka za hnih leng man a herh lai," tiah a leh. 8 A zultu a dang pakhat, Peter nau Andru nih khan, 9 "Hika ah hin barli changreu hlum nga le nga pahnih a ngeimi ngakchiapa pakhat a um, asinain cu tham cu mi hi vialte caah cun zei cang dah a kal hnga," tiah a ti. 10 "Mi kha ṭhutter hna u," tiah Jesuh nih cun a ti hna. (Cuka hmun ah cun ram hring aa hnuai dut ko). Cucaah mi vialte cu an ṭhu i thong nga tluk an si. 11 Jesuh nih cun changreu cu aa lak i Pathian sinah lawmhnak bia a chim i cuka i a ṭhumi cu a phawt hna. Cu bantuk ṭhiamṭhiam in nga zong cu a tuah hna i an dihlak in khim tein an ei. 12 An khim tikah a zultu kha, "An ei bang kha char dih hna u, pakhat hmanh hlolak hna hlah u sih," tiah a ti hna. 13 Cucaah an char dih hna i mi nih an eimi barli changreu hlum nga khan a ṭiltlawt sei hleihnih khat an char. 14 Cuka i a ummi hna nih cun hmelchunhnak a tuahmi kha an hmuh tikah, "Hi pa hi vawlei cungah a ra lai timi Profet kha a si hrimhrim ko," an ti. 15 Jesuh nih cun hramhram in siangpahrang i ser awkah hung hnuh an ka duh ti kha a hngalh caah tlang cungah khan amah lawngin a kal ṭhan. 16 Zanlei a hung si tikah a zultu hna cu rili ah khan an vung kal i 17 lawng kha an i cit i Kapernaum khua leiah khan rili cung cun an kal. Khua a hung mui i sihmanhsehlaw Jesuh cu an sinah khan a ra hlei lo. 18 Thlichia a hung hrang ciammam i tilet kha a tho. 19 Khan thum khan li tluk lawng cu an zah tikah khin Jesuh cu rili cungin a ke in a rat i an lawng a hun naih kha an hmuh. An thin a phang ngaingai, sihmanhsehlaw a hei auh hna i, 20 "Nan thinphang hlah u, keimah pei ka si cu," tiah a ti hna. 21 Cucu an theih tikah an lawng chungah cun an luhter i luklakte ah khin an i tinhnak hmun cu an phan colh. 22 A thaizing ah cun, rili khattelei ral i a ummi hna nih khan lawng pakhat lawng a tan kha an hmuh. Jesuh cu lawng chungah khan a lut lo ti le a zultu pawl kha amah tel loin an kal ti kha an hngalh fawn. 23 Cun Tiberias khua in a rami lawng a dang kha, Bawipa nih Pathian sinah lawmhnak bia a chim hnuah mizapi nih changreu an einak hmun ah khan an hung i din. 24 Mizapi nih cun khika ah Jesuh siseh a zultu si hna seh an um lo ti kha an hmuh tikah lawng khan Kapernaum khua ah cun an kal i amah cu an va kawl. 25 Mi nih khan rili khattelei ral i Jesuh cu an va hmuh tikah, "Saya, zeitik ah dah hika hi na phak?" tiah an ti. 26 Jesuh nih cun, "Biatak kan chimh hna: nan ka kawl hi ṭhawnnak in ka tuahmi thil nan hngalh caah khan a si lo; nan duh zat in changreu nan ei caah khan a si ko. 27 Hi a rawk khomi rawl caah hin ṭuan hlah ngat u, a hmunmi rawl, zungzal nunnak rawl caah ta nan ṭuan. Hi rawl cu Mi Fapa nih hin kan pek hna lai, zeicahtiah Pa a simi Pathian nih keimah cungah hin a lungsinak kha a khenh cang," tiah a ti. 28 Cucaah annih nih cun an thawh i, "Pathian nih ṭuan hna seh ti a kan duhning in kan ṭuan ahcun, zei hi dah kan ṭuan awk cu a si lai?" tiah an hal. 29 Jesuh nih cun a leh hna i, "Pathian nih tuah hna seh ti an duhmi hna rian cu hihi a si: a thlahmi zumh hi," tiah a ti hna. 30 Annih nih, "Kan in zumh khawh nakhnga, zei hmelchunhnak dah na tuah lai? Kannih nih kan hmuh i kan in zumh nakhnga ding caah zeidah na tuah lai? 31 Cathiang nih, 'Ei awk changreu van in a pek hna,' tiah a ti bantuk khan, kan pupa hna nih khan thetse ram ah manna kha an ei taktak," tiah an ti. 32 Jesuh nih cun, "Biatak kan chimh hna: Moses nih a rak in pekmi hna kha cu vancung changreu kha a si lo, vancung changreu taktak an petu hna cu ka Pa hi a si. 33 Zeicahtiah Pathian pekmi changreu cu vancung in a run thlahmi hi a si i amah nih cun vawlei hi nunnak kha a pek," tiah a ti hna. 34 "Bawipa, cu changreu cu kan pe zungzal tuah," tiah an hal. 35 Jesuh nih cun, "Nunnak changreu cu keimah hi ka si. Ka sin i a rami cu ahohmanh an rawl a ṭam lai lo i keimah a ka zummi cu ahohmanh an ti a hal lai lo. 36 Sihmanhsehlaw ka chim bang khan, a hmuh cu nan ka hmu cang ko nain nan ka zum duh lo. 37 Ka Pa i a ka pekmi paohpaoh cu ka sinah an ra lai i ka sin i a rami paohpaoh cu ahohmanh ka dawn hna lai lo. 38 Zeicahtiah vancung in ka rung ṭum cu keimah duhnak tuah awkah khan si loin a ka thlahtu duhnak tuah awkah khan a si deuh. 39 A ka thlahtu nih tuah seh ti a ka duhmi cu hihi a si: a ka pekmi vialte kha pakhat hmanh thlau loin, ni hmanung bik ni ah nunnak i an dihlak in thawhter dih kha a si. 40 Zeicahtiah Fapa kha a ka hmu i a ka zummi paohpaoh cu ni hmanung bik ni ah nunnak i thawhter kha ka Pa nih a duhmi cu a si," a ti. 41 "Vancung in a rung ṭummi changreu cu keimah hi ka si," tiah a ti caah khan Judah mi cu an zai. 42 Cucaah an i thawh i, "Hi pa hi Josef fapa Jesuh kha a si lo hlah i? A nu kan hngalh, a pa kan hngalh, zeitindah vancung in ka rung, tiah a ti kun?" an ti. 43 Jesuh nih cun a leh hna i, "Nan phunzai len cu ngol ko u. 44 A ka thlahtu ka Pa nih ka sinah a hnuh hna dah ti lo ahcun ahohmanh ka sinah an ra kho lo, cun cu hna cu ni hmanung bik ni ah nunnak ah ka thawhter te hna lai. 45 Profet nih pei, 'Mi vialte kha Pathian nih a cawnpiak hna lai,' tiah an ṭial kha. Ka Pa aw kha a thei i amah zia a cawngmi paoh cu ka sinah an ra. 46 Ka chim duhmi cu, Pathian a hmumi an um bal, ka ti duhnak a si lo. Pathian sinin a rung ṭum mi lawnglawng kha Pa a hmu balmi cu a si. 47 Biangai kan chimh hna: a zummi cu zungzal nunnak an ngei. 48 Nunnak changreu cu keimah hi ka si. 49 Nan pupa hna nih manna kha thetse ram ah khan an rak ei taktak, sihmanhsehlaw an thi. 50 Asinain vancung in a rungmi changreu a eimi paoh cu an thi lai lo. 51 Vancung in a rung ṭummi nunnak changreu cu keimah hi ka si. Hi changreu a eimi paoh cu zungzal in an nung lai. Ka pekmi hna changreu cu ka sa hi a si, cucu zeicahdah ka pek hna ti ahcun, vawlei hi a nun nakhnga caah a si," tiah a ti. 52 Cu nih cun Judah mi hna lakah khan bia alnak ṭhalo tein a chuahter ciammam i "Zeitindah hi pa nih hin a sa cu ei awkah a kan pek khawh lai?" an ti. 53 Jesuh nih khan annih cu, "Biatak kan chimh hna: Mi Fapa ka sa hi nan ei lo i ka thi hi nan din lo ahcun nan chungah nunnak nan ngei kho lai lo. 54 Ka sa a ei i ka thi a dingmi paoh nih zungzal nunnak an ngei i hmanung bik ni ah nunnak ah ka thawhter hna lai. 55 Zeicah ti ah cun, rawl taktak cu ka sa hi a si i din awk taktak cu ka thi hi a si. 56 Ka sa a ei i ka thi a dingmi paoh cu ka chungah an nung i kei zong an chungah ka nung ve. 57 A nungmi Pa nih keimah hi a ka thlah i ka nun hi Amah ruangah a si bantukin, keimah a ka eimi zong cu keimah ruangah a nung ve lai. 58 Cucaah vancung in a rungmi changreu cu hihi a si; nan pupa hna nih an rak eimi changreu bantuk kha a si lo, annih cu an thi, sihmanhsehlaw hi changreu a eimi cu zungzal in an nung lai," tiah a ti hna. 59 Cu bia cu Kapernaum khua pumhnak inn i a cawnpiak hna ah khan Jesuh nih a chim. 60 Cu bia cu a zultu mi tampi nih khan an theih i, "A cawnpiaknak hi a har tuk. Ahodah cu bantuk cu a ngai kho hnga?" an ti. 61 A zultu pawl kha cu kong ah cun an zai lengmang ti kha Jesuh nih a lungchung in a hngalh i cucaah a thawh hna i, "Hi bantukin kan cawnpiakmi hna nih hin nan thin an hunter hna maw? 62 Mi Fapa hi hmasa i ka rak umnak hmun i ka kai kha ka hmu u law tah zeitindah nan um kun hnga? 63 Nunnak petu cu Pathian Thlarau a si; minung ṭhawnnak hi cu zeihmanh a ṭhahnem lo. Nannih kan chimhmi hna bia hi Thlarau le nunnak cu an si. 64 Asinain a cheu nih cun nan zum lo," tiah a ti. (Jesuh nih khan a hramthawkte in ahodah a zumtu an si lai i ahodah a ka leitu a si lai ti kha a hngalh ko.) 65 Cun aa thawh ṭhan i, "Hi ruangah hin pei, ka Pa nih an caah lam a serpiak hna lo ahcun ahohmanh ka sinah an ra kho lo, tiah ka rak in chimh hna kha a si cu," tiah a ti. 66 Cu ruangah cun a zultu tampi cu an i let ṭhan i an zul ti lo. 67 Cucaah Jesuh nih zultu hleihnih kha a thawh hna i, "Nannih tah — nan kal ve lai maw?" tiah a ti hna. 68 Simon Peter nih a hun leh i, "Bawipa, aho sinah dah kan kal hnga? Zungzal nunnak bia a ngeitu cu nangmah pei na si cu. 69 Atu cu nangmah hi Pathian sinin a rami Mi Thiang na si kha kan zumh i kan hngalh cang," tiah a ti. 70 Jesuh nih cun a thawh hna i, "Nannih pahleihnih hi keimah nih kan thim hna lo mei? Asinain pakhat cu khuachia nan si ai!" a ti. 71 A chim duhmi cu Simon Iskariot fapa Judas kong kha a si. Zeicahtiah Judas cu zultu hleihnih lak i pakhat kha a si ve ko nain amah rawitu ding kha a rak si.
1 Cu hnuah cun Jesuh cu Galilee kha a tlawng. Judea ram chung i a ummi Judah upa hna nih khan amah cu thah an duh caah Judea tlawn cu a duh lo. 2 Judah mi Deu Puai kha a nai i 3 cucaah a naule nih khan Jesuh cu, "Hika hin Judea ah va kal law na zultu hna nih khan na thil tuahmi cu rak hmu ve hna seh. 4 Mi nih ka hngal hna seh ti a duhmi paoh nih cun an tuahmi kha an thup bal lo. Hi thil hi nangmah i na tuahmi pei an si cu, vawlei cung dihlak nih na kong hi thei hna ngat seh!" an ti. 5 (A naule hmanh nih khan an zum lo). 6 Jesuh nih cun, "Ka caah tuah caan a si deuh rih lo, nannih ca tu ah cun zei caan paoh hi a caan a si ko. 7 Nannih cu vawlei nih hin an hua kho hna lo, sihmanhsehlaw na umtu ningcang a ṭha lo tiah ka chimh lengmang caah kei cu a ka huat. 8 Puai ah cun nannih cu hung kal ko uh, kei tu cu ka kal lai lo, ka caan a si rih lo," tiah a ti i 9 Galilee ah khan a um ko. 10 Asinain a naule an kal hnuah Jesuh zong cu a hung kal ve, langhngan tu in kal loin a thli tein a hung kal. 11 Judah upa hna nih khan puai chungah cun an kawl i, "Khuazei ah dah a um hnga?" tiah an hal hna. 12 A kong kha a thli in an i ceih lulh ko i a cheu nih, "Mi ṭha a si," an ti; a cheu nih, "Sihlah, mi kha a hlen hna," an ti. 13 Sihmanhsehlaw ahohmanh nih langhngan in an chim ngam lo, zeicahtiah Judah upa kha an ṭih hna. 14 Cu puai cu a canceo tluk a dih dengmang tikah khin Jesuh cu biakinn ah khan a va kal i a cawnpiak hna. 15 Judah upa pawl cu an khuaruah a har i, "Hi pa hi sianginn ah a kai bal ṭung lo, zeitindah hi zatzat hi a hngalh hnga?" an ti. 16 Jesuh nih cun, "Kan cawnpiakmi hna hi keimah cawnpiakmi a si lo, a ka thlahtu ka Pa sinin a rami cawnpiaknak a si. 17 Pathian duhnak tuah a duhmi hna nih cun, kan cawnpiakmi hna hi Pathian sinin a rami maw a si keimah i ka hei in cawnpiak menmenmi hna dah a si, ti kha nan hngalh ko lai. 18 Mah duhning in mi a cawnpiak lengmangmi cu mah thangṭhatnak a kawlmi an si. Sihmanhsehlaw a thlahtu thangṭhatnak tu a duhmi cu lih chim lo tein a um i a chungah hrokhrawlnak zeihmanh a um lo. 19 Moses nih Nawlbia kha an pek hna a si lo mei? Sihmanhsehlaw ahohmanh nih nan zul lo. Zeicahdah keimah lehlam thah nan ka zalh?" tiah a ti hna. 20 Mizapi nih cun, "Khuachia na ngei i a si ko lai? Aho nih dah thah kan in zalh?" an ti. 21 Jesuh nih cun, "Thil lianngan pakhat ka vun tuah i nan dihlak in nan khuaruah a har. 22 Moses nih nan fale cu an cuarpar nan tan hna lai tiah nawl an pek hna caah Sabbath ni hmanh ah nan tan ko hna, (a thawktu cu Moses si loin nan pupa hna tu kha an rak si). 23 Cucaah Moses Nawl buar lonak ding caah Sabbath ni hmanh ah nan fale cu an cuarpar nan tan hna ahcun, zeicahdah kei nih Sabbath ni ah mi kha tlamtling tein ka damter caah ka cungah nan thin a hun? 24 Lenglei zoh lawngin biakhiak hlah ngat u, dingte tu in ta bia cu nan khiah," tiah a ti hna. 25 Jerusalem khua mi a cheukhat nih cun an i thawh i, "Thah an zalhmipa kha hi pa hi a si lo maw? 26 Asinain, zohhmanh u, langhngan in bia a chim len ko i ahohmanh nih zei an ti fawn ṭung lo. Kan upa pawl nih amah hi Messiah cu a si ko ti kha an hngalh taktak cang caah a si hnga maw? 27 Sihmanhsehlaw Messiah cu a rat tikah cun, khuazei in dah a rat kha ahohmanh nih an hngalh ṭung lai lo, hi pa cu khuazei in dah a rat ti kha kan dihlak in kan hngalh fawn ṭung," an ti. 28 Jesuh nih biakinn chung i a cawnpiak hna ah cun aw thang piin "Keimah cu nan ka hngalh taktak i khuazei in dah ka rat kha nan hngalh taktak. Sihmanhsehlaw kei cu keimah nawl in a rami ka si lo. A ka thlahtu cu ahmaan taktakmi kha a si i amah cu nan hngal lo. 29 Kei nih cun ka hngalh, zeicahtiah kei cu a sinin a rami ka si i a ka thlahtu cu amah kha a si," tiah a ti hna. 30 Cun annih nih tlaih kha an zalh, sihmanhsehlaw ahohmanh nih an tlai kho taktak lo, zeicahtiah caan kha a rem deuh rih lo. 31 Sihmanhsehlaw mizapi chung i mi tampi nih khan amah cu an zumh i, "Messiah cu a rat tikah hi pa tuahmi nak hin hmelchunhnak tam deuh a tuah hnga maw?" an ti. 32 Farasi mi hna nih khan mizapi, cu bantukin a thli in an i ceih kha an theih caah, anmah le tlangbawi upa pawl nih khan Jesuh va tlaih awkah cun biakinn vengtu palik kha an hei thlah hna. 33 Jesuh nih cun, "Caan tlawmpal chung cu nan sinah hin ka um rih lai i cu hnuah cun a ka thlahtu sinah ka kal lai. 34 Nan ka kawl lai, sihmanhsehlaw nan ka hmu lai lo, zeicahtiah ka umnak dingah cun nannih cu nan ra kho lai lo," tiah a ti hna. 35 Cucaah Judah upa hna cu pakhat le pakhat kha, "Khuazei ah dah kal aa timh hnga? Kan hmuh khawh lonak khuazei ah dah kal aa timh hnga? Grik mi khua pakhatkhat, Judah mi an umnak ah maw va kal i Grik mi hna cu va cawnpiak aa timh hnga? 36 'Nan ka kawl lai, sihmanhsehlaw nan ka hmu lai lo, ka umnak ding hmun ah cun nan ra kho lai lo,' a ti. Zeidah a sullam chim a duhmi a si hnga?" tiah an i ceih. 37 Puai donghnak ni kha a biapi bik ni a si. Cu ni ahcun Jesuh cu a dir i aw thang piin, "A ti a halmi paoh cu ka sinah ra u law ra ding u. 38 Cathiang nih, 'Keimah a ka zummi paoh cu a lung chungin tiva nung an put lai,' tiah a ti bantuk khan a si lai," tiah a ti. 39 Jesuh nih a chim duhmi cu Thlarau kong kha a si, cu Thlarau cu amah a zummi paoh nih an hmuh ding kha a si. Cu caan ah cun Thlarau cu pek an si rih lo, zeicahtiah Jesuh cu sunparnak in thawhter a si rih lo. 40 Cu bia cu an theih tikah mi a cheu nih, "Hi pa hi Profet kha a si hrimhrim ko," an ti. 41 A dang nih, "Messiah a si ko," an ti. Sihmanhsehlaw a dang ve nih cun, "Messiah cu Galilee in a chuah awk a si ṭung lo. 42 Cathiang nih pei Messiah cu David tefa a si lai i David khua Bethlehem ah a chuak lai, a ti kha," an ti. 43 Cuticun mizapi cu amah ruangah cun an i cheu dih i 44 a cheu nih tlaih an duh, asinain ahohmanh nih an tlai taktak lo. 45 Biakinn vengtu palik pawl kha an va kir i tlangbawi upa pawl le Farasi mi hna nih khan, "Zeicahdah nan ratpi lo?" tiah an rak hal hna. 46 "Hi pa bantuk hin ahohmanh nih bia an chim bal lo," tiah an leh hna. 47 "Nannih zong an hlen ve cang hna mu. 48 Kan upa si hna seh, Farasi mi si hna seh, a zummi pakhat tal nan hngalhmi hna an um maw? 49 Hi mizapi tham nih cun Moses Nawlbia kha an hngalh ṭung lo, cucaah pei Pathian nih chiat cu a serh fom hna cu," tiah Farasi mi nih cun an ti. 50 Cun an lak i a um vemi pakhat, Nikodemu nih khan, 51 "Kan phungning ah cun, ahohmanh a bia kan theih hlan le a tuahmi kan hmuh hlanah cun sual kan phaw kho hna lo," tiah a ti. Nikodemu cu voi khat Jesuh a va lengtu kha a si. 52 Annih nih cun, "Nangmah zong hi Galilee mi na si ve mu. Cathiang kha va rel tuah hmanh, Galilee in profet pakhat hmanh an chuak bal lo ti kha na hngalh ko lai," an ti.
1 (Cun mi vialte kha an inn ah an ṭin cio i Jesuh cu Oliv Tlang ah khan a hung kal. 2 A thaizing zingkate ah biakinn ah cun a kal ṭhan. Mizapi nih cun an pumhhnawh i a cawnpiak hna. 3 Phungbia cawnpiaktu saya hna le Farasi mi hna nih khan, minu pakhat va cungin pa aa duh lio i an tlaihmi kha an run luhpi i zapi hmaiah cun an dirter. 4 Jesuh cu an thawh i, "Saya, hi nu hi pa aa duh lio hrimhrim ah an tlaih. 5 Kan Phung ah Moses nih nawl a kan pekmi cu, cu bantuk minu cu lung in thi lakin cheh hrimhrim awk a si lai, ti a si. Nang, zeitindah na ruah?" an ti. 6 Hi ti in bia an hal cu amah kha hneksak i bia ngeihter khawh an duh caah a si. Sihmanhsehlaw Jesuh cu a kun i vawlei ah khan a kutdong in ca a ṭial. 7 An hal chih lengmang caah ding tein a hung ṭhu i, "Nan lak i sualnak a tuah bal lomi nih chep hmasa bik seh," tiah a hun ti. 8 Cun a kun ṭhan i vawlei ah ca cu a ṭial ṭhan. 9 Cu bia cu an theih tikah pakhat hnu pakhat in an i zukphiak dih, upa pawl kha an i zuk hmasa. Jesuh lawng cu a tang i a pawngah cun minu kha a dir ko. 10 Ding tein a hung ṭhu i, "Minu, khuazei ah dah an si dih? Nangmah sual phawtu dingah pakhat hmanh an tang kun lo maw?" tiah a ti. 11 Minu nih cun, "Bawipa, ahohmanh an tang lo," tiah a leh. Cu tikah Jesuh nih, "Kei zong nih sual kan phaw ve lo. Va kal law a sual bel va sual ti hlah," tiah a ti.) 12 Jesuh nih annih cu a thawh ṭhan hna i, "Kei cu vawlei ceunak ka si. Keimah a ka zummi paoh cu nunnak ceunak kha an ngei lai i mui lakah an vai lai lo," tiah a ti. 13 Farasi mi nih khan an thawh i, "Nangmah nih pei nangmah kong naa chim ko cu; cucaah na chimmi cu zeihmanh a si lo," an ti. 14 Jesuh nih cun, "Keimah kong cu keimah i kaa chim a si hmanh ah ka chimmi cu ahmaanmi a si, zeicahtiah khuazei in dah ka rat le khuazei ah dah ka kal lai kha ka hngalh. Nannih nih cun khuazei in dah ka rat kha nan hngal lo i khuazei ah dah ka kal lai zong kha nan hngal lo. 15 Nannih nih cun minung phungning lawnglawng in biakhiahnak nan tuah, kei tu nih cun aho cung hmanh ah biakhiahnak ka tuah lo. 16 Biakhiahnak cu ka tuah a si hmanh ah kei i ka tuahmi cu ahmaan ko lai, zeicahtiah cu biakhiahnak cu keimah lawngin ka tuahmi a si lo, a ka thlahtu ka Pa he kan tuahmi a si. 17 Nan Phung chungah pei, tehte pahnih an bia aa khen ahcun an chimmi cu ahmaan, tiah aa ṭial kha. 18 Hika ah cun atu hi keimah ca i tehte cu keimah hi ka si, cun ka tehte a dang cu a ka thlahtu ka Pa kha a si," tiah a ti. 19 "Na Pa cu khuazei ah dah a um?" tiah an ti. Jesuh nih cun, "Keimah zong nan ka hngal lo, ka Pa zong nan hngal fawn lo. Keimah kha ka hngal u law cu ka Pa zong cu nan hngalh ko hnga," tiah a leh hna. 20 Hi bia Jesuh nih a chimnak hi biakinn chung, thawhlawm kuang an hun hnanak hmun i a cawnpiak hna ah khan a si. A caan a tlin rih lo caah ahohmanh nih an tlai lo. 21 Jesuh nih annih cu a thawh ṭhan hna i, "Kei cu ka kal lai; nan ka kawl lai, sihmanhsehlaw nannih cu nan sualnak chungah nan thi lai. Ka kalnak hmun ah nannih cu nan ra kho lai lo," tiah a ti hna. 22 Cucaah Judah upa hna nih cun, " 'Ka kalnak hmun ah nan ra kho lai lo,' a ti. Keimah le keimah kaa that lai a ti duhnak maw a si hnga?" an ti. 23 Cucaah Jesuh nih cun, "Nannih cu hika tanglei vawlei mi hi nan si, kei cu cunglei in a rami ka si. Nannih cu hi vawlei hi nan umnak a si, kei cu a si lo. 24 Cucaah cun pei, nan sualnak chungah nan thi lai, kan ti hna kha a si cu. Cun Keimah cu Keimah Ka Si Ko timi ka si kha nan ka zumh lo ahcun nan sualnak chungah cun nan thi ko lai," tiah a ti hna. 25 Annih nih, "Aho ka si na ti dah cu?" tiah an hal. Jesuh nih cun, "A hramthawk tein kan chimh lengmangmi hna kha hen ta. 26 Nanmah kong ah hin bia chim awk tampi ka ngei — nanmah sual phawt zong hi. Sihmanhsehlaw a ka thlahtu nih cun biatak kha a chim i vawlei ka chimhmi hi amah sinin ka theihmi bia cu a si," tiah a leh hna. 27 A kan chimhmi hi Pa kong kha a si ti awk an hngal lo. 28 Cucaah Jesuh nih a thawh hna i, "Nannih nih Mi Fapa cu nan taar tikah, Keimah cu Keimah Ka Si Ko timi ka si kha nan hngalh lai; cun keimah nawl lawngin zeihmanh ka tuah lo le ka Pa nih a ka cawnpiakmi lawnglawng ka chim kha nan hngalh lai. 29 A ka thlahtu cu ka sinah a um i a duhmi kha ka tuah zungzal caah a ka kaltak bal lo," tiah a ti. 30 Hi bia a chimmi a theimi mi tampi nih Jesuh kha an zumh. 31 Cucaah Jesuh nih amah a zummi Judah mi hna kha, "Ka cawnpiaknak kha nan zulh ahcun a ka zultu taktak cu nan si; 32 biatak cu nan hngalh lai i biatak nih cun an luatter hna lai," tiah a ti hna. 33 Annih nih, "Kannih cu Abraham tefa kan si i aho sal hmanh kan si bal lo. Cucaah nan luat lai, na ti tikah hin a sullam zeidah a si," tiah an leh. 34 Jesuh nih cun a thawh hna i, "Biatak kan chimh hna: a sualmi paoh cu sualnak sal an si. 35 Sal cu innchungkhar chungah khan zungzal in a um lo, sihmanhsehlaw fapa kha cu zungzal in a um. 36 Fapa nih nannih kha an luatter hna ahcun nannih cu nan luat taktak lai. 37 Abraham tefa nan si cu ka hngalh ko. Asinain kan cawnpiakmi hna kha nan cohlan duh lo caah keimah cu thah nan ka zalh. 38 Ka Pa nih a ka hmuhsakmi kong kha ka chim, sihmanhsehlaw nannih cu nan pa nih an chimhmi hna kha nan tuah," tiah a ti hna. 39 Annih nih, "Kan pa cu Abraham kha pei a si cu," an ti. Jesuh nih cun, "Abraham tefa kha nan si taktak ahcun, amah tuahmi kha pei nan tuah ve hnga cu. 40 Chimh kan zuam lengmangmi hna cu Pathian sinin ka theihmi biatak kha a si. Asinain nannih nih cun thah tu nan ka zalh. Cu bantuk cu Abraham nih zeihmanh a tuah ṭung lo. 41 Nannih cu nan pa i a tuahmi kha nan tuah," tiah a leh hna, Annih nih cun an i thawh i, "Pathian lawnglawng pei kan Pa cu a si ko cu. Lakfa kan si ṭung lo, a fa taktak pei kan si cu," tiah an leh. 42 Annih cu Jesuh nih, "Pathian kha nan Pa rak si taktak seh law cu keimah hi nan ka dawt ko hnga, zeicahtiah kei cu Pathian sinin a rami ka si i atu hika ka phan. Keimah duh in a rami ka si lo, amah nih a ka thlahmi ka si. 43 Zeicahdah ka chimmi hi nan hngalh khawh lo? Ka bia kha nan theih khawh lo caah a si. 44 Nannih cu nan pa Khuachia fa kha nan si i tuah nan duhmi cu nan pa duhnak kha a si. Amah cu a hramthawk tein lainawng a rak si. Biatak kha zeitikhmanh ah a ṭanh bal lo, zeicahtiah a chungah biatak zeihmanh a um lo. Lih a chim tikah a tuah tawn zungzalmi kha a tuah a si ko, zeicahtiah anih cu milihchim a si i lih vialte pa a si. 45 Kei cu biatak kha ka chim, cucaah cun nan ka zumh lonak cu a si. 46 Nan lakah hin ka sualnak a ka hmu khotu aho tal nan um maw? Biatak kan chimh ko hna, zeicahdah nan ka zumh duh lo? 47 Pathian sinin a rami nih cun Pathian bia kha a ngaih, sihmanhsehlaw nannih cu Pathian sinin a rami nan si lo i cucaah cun nan ngaih duh lonak cu a si," tiah a ti hna. 48 Judah mi nih khan Jesuh cu an leh i, "Nang cu Samaria mi na si i, 'Na chungah khuachia aa hrolh,' kan rak in ti kha kan hmaan ngaingai a si lo mei?" an ti. 49 Jesuh nih cun, "Khuachia ka ngei lo. Kei nih ka Pa kha ka upat, sihmanhsehlaw nannih nih kei kha nan ka zawmhtaih. 50 Kei cu keimah lila sunparnak a kawlmi ka si lo, sihmanhsehlaw a ka kawlpiaktu pakhat a um i amah cu keimah ṭhatnak in bia a ceihtu kha a si. 51 Biatak kan chimh hna: Ka bia a zulmi cu zeitikhmanh ah an thi lai lo," tiah a leh hna. 52 Judah mi nih cun an thawh i, "Atu cu khuachia na ngei hrimhrim ti kha fiang tein kan hngalh cang. Abraham cu a thi diam cang, profet hna zong kha an thi cang, asinain naa thawh i, 'Ka bia a zulmi cu zeitikhmanh ah an thi lai lo,' na ti. 53 Kan pu Abraham cu a thi cang; Abraham nakin ka ngan deuh na ti ko lo maw cu? Cun profet hna zong cu an thi cang. Aho ah dah naa rel?" an ti. 54 Jesuh nih cun, "Keimah le keimah kaa upat a si ahcun kaa upatnak kha zeihmanh man a ngei lai lo. Keimah a ka upattu cu ka Pa kha a si — nanmah nih kan Pathian a si nan timi hrimhrim kha. 55 Nannih nih cun nan hngal bal lo, sihmanhsehlaw kei nih cun ka hngalh. Ka hngal lo ti ning law, nanmah bantuk milihchim ka si ve hnga. Sihmanhsehlaw ka hngalh taktak ko i a bia kha ka ngaih. 56 Nan pu Abraham nih khan kan i hmuh lai kha a rak i ngaih ngaingai, a hmuh taktak i a rak i lawm," tiah a leh hna. 57 Judah mi hna nih cun, "Kum sawm nga hmanh na tlin rih ṭung lo, zeitindah Abraham cu na hmuh khawh?" tiah an ti. 58 Jesuh nih cun, "Biatak kan chimh hna: Abraham hlanah ka um cang," tiah a leh hna. 59 Amah chehnak ah lung kha an i char, sihmanhsehlaw Jesuh cu aa thup i biakinn chung khan aa zuk.
1 Cun Jesuh cu biakinn khan a kal i lampi ah mitcaw cia in a chuakmi pakhat kha a hmuh. 2 A zultu hna nih khan, "Mitcaw in a chuahtertu hi aho sualnak dah a si? Amah sualnak maw a si a nu le a pa sualnak dah?" tiah an hal. 3 Jesuh nih cun, "A mitcawtnak hi amah sualnak ruangah siseh, a nu le a pa sualnak ruangah siseh a si lo. Pathian ṭhawnnak cu amah damnak thawng hin a langh nakhnga caah a mit a cawt hi a si. 4 Chun a si chung cu a ka thlahtu rian kha kan ṭuan zungzal awk a si; ahohmanh nih an ṭuan khawh lo caan, zan caan kha a ra lio. 5 Vawlei cung i ka um lioah hin cun, keimah hi vawlei ceunak cu ka si," tiah a leh hna. 6 Cu bia a chim dih hnuah Jesuh nih cun vawlei ah khan a cil a chak i tlak tlawmpal a ser, cu tlak cu mipa mit ah khan a nalh i 7 "Va kal law Siloam Tidil ah na hmai vaa phiah," tiah a ti. (Siloam sullam cu Thlah ti a si). Cucaah mipa cu a va kal i a hmai cu a va phiah i khua hmu in a rak kir. 8 A innpa hna le rawl a hal a rak hmu tawnmi hna nih khan, "Hi pa hi a ṭhu i rawl a hal tawnmi kha a si lo maw?" an ti. 9 A cheu nih, "A si ko," an ti, a cheu nih, "A si lo, amah he khan an i lo i a si," an ti. Cucaah mipa hrimhrim nih cun "Ka si ko," tiah a ti. 10 Annih nih, "Zeitindah na mit kha na au khawh kun hna?" tiah an hal. 11 Anih nih, "Mipa pakhat a min Jesuh an timi nih, tlak kha a ser i ka mit ah a ka nalh i, 'Siloam ah va kal law na hmai vaa phiah,' tiah a ka ti. Cucaah ka va kal i ka vun i phiah cangka khua ka hmu kho," tiah a leh hna. 12 "Amah cu khuazei ah dah a si," tiah an hal. "Ka hngal lo," tiah a leh hna. 13 A mit a rak cawmipa cu Farasi mi hna sinah khan an hei kalpi. 14 Jesuh nih tlak a ser i mipa mit a damter hna cu Sabbath ni ah a si. 15 Cucaah Farasi mi hna nih khan mipa cu, "Zeitindah na mit hi khua an hmuh ṭhan," tiah an hal. Annih cu a thawh hna i, "Tlak tlawmte kha ka mit ah a ka nalh i ka hmai ka va phiah i atu hi khua ka hmu kho," tiah a chimh hna. 16 Farasi mi a cheu nih cun, "Hi thil a tuahtu hi Pathian sinin a rami a si kho lai lo, zeicahtiah Sabbath ni phung kha a buar," an ti. Sihmanhsehlaw a cheu nih khan, "Zeitindah misual a simi nih cun cu bantuk hmelchunhnak cu a tuah khawh lai," an ti ve. Cucaah cun an i cheu. 17 Cucaah Farasi mi hna nih khan mipa cu an hal ṭhan i, "Na mit an damter va si kaw, zeitindah amah cu na ruah?" an ti. "Amah cu profet a si, tiah ka ruah," tiah a leh hna. 18 Sihmanhsehlaw Judah upa pawl nih khan, amah cu a mit a rak caw i atu cu khua a hmu kho ṭhan, ti kha an zum duh lo. Cucaah mipa i a nu le a pa kha an auh hna i 19 "Mah pa hi nan fapa a si maw? Mitcaw cia in a chuak nan ti, zeitindah atu hi khua a hmuh khawh kun?" tiah an hal hna. 20 A nu le a pa nih cun, "Amah hi kan fa a si cu kan hngalh i mitcaw cia in a rak chuah cu kan hngalh. 21 Asinain atu hi zeitindah khua a hmuh khawh ṭhan ti cu kan hngal lo. Amah hi hal ko uh, upa pei a si ve cang hi, amahte nih an leh khawh ve ko hna lai," tiah an leh hna. 22 Cu bantukin a nu le a pa nih an chim cu zeicahdah a si ti ahcun, Judah upa hna nih khan Jesuh cu Messiah a si tiah a titu paoh cu pumhnak inn khan kan chuah hna lai tiah hnatlaknak an rak tuah cang i cu hna cu an ṭih hna caah a si. 23 Cucaah cun, "Upa pei a si ve cang hi, amah kha hal ko u," tiah an ti hnanak cu a si. 24 Mitcaw cia in a chuakmipa cu an auh ṭhan i, "Biatak ka chim lai tiah Pathian hmaika ah bia i kam. Hi pa hi misual a si ti kha kan hngalh," an ti. 25 Mipa nih cun, "Misual a si le si lo cu ka hngal lo. Ka hngalhmi cu hi bel hi a si ko: hlanah cun ka mit a rak caw, atu cu khua ka hmu kho," tiah a leh hna. 26 Annih nih, "Zeitindah an tuah? Zeitindah na mit cu a auter hna?" an ti. 27 "Kan chimh cang ko hna hen cu, nan ngaih duh ṭung lo. Zeicahdah theih ṭhan cu nan duh? A zultu si dahra nan duh ve?" tiah mipa nih cun a leh hna. 28 An nihsawh i, "Cu pa zultu cu nangmah pei na si cu, kannih cu Moses zultu pei kan si. 29 Pathian nih Moses sinah bia a chim ti cu kan hngalh, sihmanhsehlaw kha pa kha cu, a ratnak khuazei in a si ti hmanh kan hngal lo," an ti. 30 Mipa nih cun, "Khuaruahhar a va si dah. A ratnak khuazei in a si cu nan hngal lo, sihmanhsehlaw ka mit cu a ka auterpiak hen cu! 31 Pathian nih misual cu an bia a ngai hna lo i amah a upatmi le a duhnak a tuahmi kha an bia a ngaihpiak hna ti cu kan hngalh. 32 Vawlei hramthawknak in, mitcaw cia in a chuakmi kha, aho tal nih an mit an auter hna ti cu kan theih bal lo cu ta. 33 Hi pa hi Pathian sinin a rat dah ti lo ahcun cu bantuk thil cu zeihmanh a tuah kho hnga maw?" tiah a leh hna. 34 "A nangmah sual in hrin i sual in cawmmi nih hin maw kanmah cu cawnpiak na hei kan timh," tiah an ti i pumhnak inn khan an ṭhawl. 35 Jesuh nih an ṭhawl kha a theih. Amah cu a va hmuh i, "Mi Fapa cu na zum maw?" tiah a ti. 36 Mipa nih cun, "Bawipa, amah cu ka zumh khawh nakhnga aho hi dah a si ka chim tuah?" tiah a leh. 37 Jesuh nih cun, "Amah cu na hmuh cangmi kha a si ko i atu i nangmah an chawn lengmangtu hi a si," tiah a ti. 38 "Bawipa ka zumh," tiah mipa nih cun a ti i Jesuh hmaiah cun a khuk aa bil. 39 Jesuh nih cun, "Hi vawlei cung i ka run hi, mitcawmi nih khua an hmuh i khuahmumi cu mitcaw ah an i can nakhnga, biathlehnak tuah awkah a si," tiah a ti. 40 Farasi mi tlawmpal, cuka i amah sin i a um vemi hna nih khan cu bia a chim cu an theih i, "Kannih zong hi, nan mit a caw ve na kan ti duhnak cu a si mei?" an ti. 41 Jesuh nih cun, "Nan mit cu rak caw seh law, sualphawt nan si hnga lo. Sihmanhsehlaw nanmah nih, 'Khua kan hmu kho,' nan ti ruangah hin sualphawt nan sinak cu a tang peng ko," tiah a leh hna.
1 "Biatak kan chimh hna: tuukawm chungah innka in a lut lo i kaa dang in a kaimi cu mifir le damiah an si. 2 Innka in a lutmi cu tuu a zohkhenhtu tuukhal kha a si. 3 Innka cawngtu nih khan innka cu a rak hunpiak i tuu nih khan a aw cu an theih; a tuu kha an min in a auh hna i lengah a chuahpi hna. 4 An dihlak in a chuah dih hna tikah an hmai in a kal i a aw kha an hngalh caah tuu nih cun an zulh. 5 Midang cu an zul duh hna lo, a zaam in an zaamtak lei hna, zeicahtiah an aw kha an hngal lo," tiah a ti. 6 Jesuh nih hi tahchunhnak cu a chimh hna, sihmanhsehlaw a kan chimhmi hi zei a si ti awk an hngal lo. 7 Cucaah Jesuh nih annih cu a thawh ṭhan hna i, "Biatak kan chimh hna: Tuu luhnak kutka cu keimah hi ka si. 8 Ka hlanah a rami paohpaoh cu mifir le damiah an si; sihmanhsehlaw tuu nih khan an aw an ngai duh hna lo. 9 Kei cu innka ka si. Keimah in a lutmi paoh cu khamh an si lai; an lut an chuak lai i ram hno kha an hmu lai. 10 Mifir cu fir duh le thah duh le hrawh duh lawngah an ra. Kei cu nunnak kha an ngeih i duhdim tein an ngeih nakhnga caah ka ra. 11 "Tuukhal ṭha cu keimah hi ka si. Tuukhal ṭha cu a tuu hna caah a lu hloh kha a sian. 12 Man phalh in hlan chommi kha cu, tuukhal a si lo ca le tuu kha a ta an si lo caah, cenghngia a rat kha a hmuh tikah a zam i tuu kha a lektak hna. Cu tikah cenghngia nih cun tuu cu a seh hna i a ṭhek dih hna. 13 Hlanchommi cu hlanchommi lawng a si caah le tuu kha an zawn a ruah hna lo caah a tli ko. 14 - 15 Tuukhal ṭha cu keimah hi ka si. Pa nih a ka hngalh i keimah nih Pa ka hngalh ve bantukin, ka tuu kha ka hngalh hna i annih nih an ka hngalh ve. Cun an ca i ka lu hloh kha ka sian. 16 Hi tuurun chung i a um lomi ka ta a simi tuu dang an um. Annih zong kha ka ratpi ve hrimhrim hna lai; ka aw kha an ngaih lai i tuukhal pakhat tangah tuurun run khat ah an cang lai. 17 "Ka Pa nih a ka dawt cu ka nunnak kha pek ka sian caah a si, cu pek ka sian cu ka nunnak kha ka hmuh ṭhan nakhnga caah a si. 18 Ka nunnak cu aho nih an ka chuh a si lo, keimah lungtho tein pek ka sianmi a si ko. Peknak nawl kha ka ngei i lak ṭhannak nawl zong ka ngei. Cucu ka Pa nih tuah seh ti a ka duhmi cu a si," tiah a ti. 19 Hi bia ruangah hin Judah mi lakah khan cheunak a um ṭhan. 20 Mi tampi nih, "Khuachia a ngei, a hrut cang, zeicahdah a bia nan ngaih?" an ti. 21 Sihmanhsehlaw a cheu nih, "Khuachia a ngeimipa nih cun hi bantukin bia a chim kho hnga lo. Zeitindah khuachia nih cun mitcawmi mit cu a deiter khawh lai," an ti ve. 22 Jerusalem khua i Biakinn Pekchanh Puai timi tuah caan kha a hung phan; cucu khuasik caan ah a si tawn. 23 Jesuh cu biakinn i Solomon Innleng timi ah khan aa chawk i cu lioah cun 24 Judah mi nih khan an fuh i, "Zei can dah lungawṭawm in na kan chiah lai? Biafiang kan chim: Messiah cu na si maw?" an ti. 25 Jesuh nih cun, "Kan chimh cang ko ṭung hna, sihmanhsehlaw nan ka zum duh lo. Ka Pa nih nawl a ka peknak thawngin ka tuahmi thil hna nih pei keimah chim hau loin an chim ko hi; 26 sihmanhsehlaw nannih cu ka tuu nan si lo caah nan zum lo. 27 Ka tuu nih cun ka aw kha an ngaih, annih kha ka hngalh hna i an ka zulh. 28 Annih cu zungzal nunnak kha ka pek hna i an thi bal lai lo; cun ahohmanh nih annih cu an ka chut kho fawn lai lo. 29 Anmah kha a ka petu ka Pa cu zeizong vialte nakin a ngan deuh i ka Pa zohkhenhnak chungin ahohmanh nih an ka chut kho hna lai lo. 30 Ka Pa le keimah cu pakhat kan si," tiah a ti. 31 Cun Judah mi hna nih cun amah chehnak ah lung an i char ṭhan. 32 Annih kha Jesuh nih cun a thawh hna i, "Ka Pa nih a ka fialmi thil ṭha tampi nan hmaiah ka tuah hna; hi thil hna lakah hin a zei ruangte ah hin dah lung in cheh nan ka duhnak cu a si?" tiah a ti hna. 33 Judah mi nih cun, "Lung in cheh kan in duhnak cu thil ṭha ruangah a si lo, Pathian na serhsat ruangah khan a si deuh. Nang cu minung menmen na si ko nain Pathian ah ser naa zal," an ti. 34 Jesuh nih a leh hna i, "Nan phungbia chungah, 'Pathian nih, "Nannih cu pathian nan si," kan ti hna,' a ti, tiah aa ṭial lo mei? 35 Pathian nih a bia a pekmi minung hna kha pathian ti an si ahcun — Cathiang cu a palh ti khawh a si lo va si kaw — 36 Pa nih a thim i vawlei ah a run thlahmi keimah nih, 'Pathian Fapa ka si,' ka ti ruangah Pathian na serhsat tiah zeitindah nan ka ti khawh? 37 Ka Pa rian ka ṭuan lo a si ahcun ka zum hlah u, 38 sihmanhsehlaw ka ṭuan a si ahcun, keimah nan ka zumh lo hmanh ah ka tuahmi tal hi nan zumh awk a si. Cun nannih nih ka Pa cu ka chungah a um i kei cu ka Pa chungah ka um kha nan hngalh lai," tiah a ti. 39 Tlaih an timh ṭhan, sihmanhsehlaw a zuhtak hna. 40 Jesuh cu Jordan Tiva khattelei ral, Johan nih tipil a peknak hna hmun ah khan a va kal i cuka ah cun a va um. A sinah khan mi tampi an ra i, 41 "Johan nih hmelchunhnak zeihmanh a tuah lo, sihmanhsehlaw hi pa kong a chimmi cu ahmaan dih," an ti. 42 Cun cuka ah cun mi tampi nih Jesuh kha an zumh.
1 Bethani khua i a ummi Lazaruh cu a zaw. Bethani cu Mary le a u Martha an umnak khua kha a si. 2 (Cu Mary cu Bawipa ke ah zihmui a toih i a sam in a hnawttu kha a si; a zawmi Lazaruh cu amah ṭa cu a si). 3 Cu unau pahnih hna nih cun Jesuh cu bia an hei cah i, "Bawipa, na dawtmi na hawi kha a zaw," an ti. 4 Cu bia cu Jesuh nih a theih tikah, "Hi zawtnak hi a donghnak cu thihnak a si lai lo, sihmanhsehlaw Pathian sunparnak langhternak caah a si lai i hi thawng hin Pathian Fapa zong nih sunparnak a hmuh lai," a ti. 5 Jesuh nih Martha le a naunu le Lazaruh kha a dawt hna. 6 Lazaruh a zaw ti thawng kha a thei nain a umnak hmun ah khan ni hnih a cam rih. 7 Cun a zultu kha a thawh hna i, "Judea peng ah kal ṭhan u sih," tiah a ti hna. 8 A zultu hna nih cun, "Saya, kan hnulei te ah khan Judah mi nih lung in cheh an in duh, cuka ah cun maw kal naa timh ṭhan ko lai?" an ti. 9 Jesuh nih, "Ni khat chungah suimilam hleihnih a um a si lo maw? Cucaah chun ceu ah mi cu aa chawh ahcun a ril lo, zeicahtiah hi vawlei ceunak kha a hmuh. 10 Sihmanhsehlaw zan i aa chawh ahcun a ril, zeicahtiah mipa chungah khan ceunak a um lo," tiah a ti hnuah a vun i thawh ṭhan i, 11 'Kan hawi Lazaruh kha aa hngilh cang, sihmanhsehlaw ka va kal lai i ka va thawh lai," a ti. 12 A zultu pawl nih cun, "Aa hngilh ahcun a dam lai," an ti. 13 Jesuh nih a chim duhmi tu cu Lazaruh kha a thi cang ti a si, annih nih cun hngilh sawhsawh ah an ruah. 14 Cucaah Jesuh nih cun fiang tein, "Lazaruh kha a thi; 15 sihmanhsehlaw a sin i ka rak um lo cu nanmah caah a ṭha, zeicahtiah nan zumh khawh deuh lai, amah sinah cun va kal u sih," tiah a ti. 16 Faphir timi Thomas nih khan, "Amah sin i va thih ve awkah kannih zong kal ve u sih," tiah a hawile kha a ti hna. 17 Jesuh cu a va phak tikah Lazaruh cu an vuinak ni li a rak si cang. 18 Bethani cu Jerusalem in khan hnih tling lo deuh a si i 19 Judah mi mi tampi kha an ṭa a thih ca i anmah ṭhutpi awkah khan an ra. 20 Jesuh a ra lio ti kha Martha nih a theih tikah lampi in va don awkah a kal; Mary tu cu inn ah khan a rak um. 21 Martha nih khan Jesuh cu, "Bawipa hika ah hin rak um law cu, ka ṭa hi a thi hnga lo. 22 Sihmanhsehlaw atu zongah hin na halmi paoh cu Pathian nih an pek lai ti kha ka hngalh,' tiah a ti. 23 "Na ṭa cu a tho ṭhan lai," tiah Jesuh nih a ti. 24 Martha nih cun, "Asi, a tho ṭhan lai ti cu ka hngalh ko, sihmanhsehlaw ni hmanung bik thawhṭhannak ah pei a si ko lai cu," tiah a leh. 25 Jesuh nih Martha cu, "Keimah hi thawhṭhannak le nunnak cu ka si. Keimah a ka zummi paoh cu a thih hmanh thi seh law a nung lai; 26 Cun ahohmanh a nung i keimah kha a ka zummi cu an thi bal lai lo. Hihi na zum maw?" a ti. 27 Martha nih, "Asi, ka zumh, Bawipa nangmah cu Pathian Fapa Messiah, vawlei cung i a rung ding cu na si ti kha ka zumh," tiah a leh. 28 Martha nih hi bia a chim dih khan a va kir i a nau Mary kha a thli tein a va auh. "Saya kha a ra cang i nangmah kha an hlam," tiah a chimh. 29 Cucu Mary nih a theih tikah a tho i amah ton awkah khan khulrang in a kal. 30 (Jesuh cu khuachung kha a phan rih lo, Martha i a va donnak hmun ah khan a um ko). 31 Mary a ṭhutpitu Judah mi hna nih khan Mary cu a thawh i khulrang in a chuah ah khan an zulh; thlan i va ṭah awkah a kal rua, tiah an ruah. 32 Jesuh umnak kha Mary cu a va phan i Jesuh kha a hmuh tikah a kehram ah khan a bawk i, "Bawipa, hika ah hin rak um law cu, ka ṭa hi a thi hnga lo," tiah a ti. 33 Jesuh nih Mary a ṭah le a sin i a rami Judah mi hna an ṭah kha a hmuh hna i a hnarno a ṭam i a lung a hno. 34 "Khuazei ah dah nan vui?" tiah a hal hna. "Ra law ra zoh tuah, Bawipa," tiah an leh. 35 Jesuh cu a ṭap. 36 Cucaah Judah mi nih cun, "Zeitluk in dah a dawt kha zohhmanh u," an ti. 37 Sihmanhsehlaw a cheu nih, "Mitcaw hmanh a mit a deiter a si lo maw? Lazaruh hi thi loin a umter kho kun lo maw?" an ti. 38 Jesuh cu a hrum ruangmang ṭhan i thlan ah cun a va kal. Cu thlan cu lungkua a si caah a khar ah lungpher an khar. 39 Jesuh nih, "Lungpher hi ṭhial tuah u," tiah a ti hna. Mithi pa far Martha nih cun, "Bawipa, a nam tuk cang lai, kan vuinak ni li a si cang," tiah a ti. 40 Jesuh nih Martha cu, "Na zumh ahcun Pathian sunparnak na hmuh lai, tiah ka rak in ti lo maw?" tiah a ti. 41 Lungpher cu an thawn i Jesuh cu van a cau i, "Ka Pa, ka bia na ka theihpiak caah na cungah ka lung aa lawm. 42 Ka bia na ka theihpiak zungzal ti cu ka hngalh ko, sihmanhsehlaw hi ka chimnak cu hika i a ummi hna caah hin a si, annih nih keimah cu nangmah thlahmi ka si kha an ka zumh khawh nakhnga caah a si," tiah a ti. 43 Cu bia a chim dih in aw thangpi in a vun kawh i, "Lazaruh, ra chuak tuah," tiah a ti. 44 Mithi pa cu a kut le a ke ruak puanzual bu le a hmai khuh puan he khan a hung chuak. Jesuh nih, "Phoih u law kal seh," tiah a ti hna. 45 Mary ṭhutpi awkah a rami Judah mi tampi nih khan Jesuh tuahmi cu an hmuh i amah kha an zumh. 46 Sihmanhsehlaw a cheu cu Farasi mi hna sinah khan an va kal ṭhan i Jesuh tuahmi kha an va chimh hna. 47 Cucaah Farasi mi hna le tlangbawi upa pawl kha Khawngsil pawl he khan an i pum i, "Zeitindah kan tuah lai? Hi pa nih hin hmelchunhnak tampi a tuah ṭung. 48 Hitihin kan thlahdorh ko ahcun mi vialte nih an zumh lai. Cun Romans pawl kha an ra lai i kan biakinn he kan miphun he an kan hloh dih lai," an ti. 49 Cun an lak i mi pakhat, a min Kaiafas a si i cu kum cu amah Tlangbawi Ngan a si kum a simi nih khan, "Zeihmanh nan hngal lo. 50 Kan miphun hi a ningpi i hrawh nakin kan miphun ca i pakhat thih cu a ṭha deuh ti kha nan hngal lo maw?" tiah a ti hna. 51 A ngaingai ti ahcun, hi bia hi amah lungchuak in a chimmi a si lo; cu kum cu amah kha Tlangbawi Ngan a si bantukin, Jesuh cu Judah mi hna caah a thi lai ti kha a rak chimchung bia a si; 52 anmah Judah mi ca lawngah si loin Pathian fale aa ṭhekmi vialte hmunkhat i pumh dih awk zongah khan a thih cu a si lai tinak a rak chimchung kha a si. 53 Cu ni thawk cun Judah upa hna nih khan Jesuh thahnak khua kha an khang lengmang. 54 Cucaah Jesuh cu Judea peng ah khan langhngan in a tlawng ti lo, kha peng khan a chuak i thetse ram hril i a ummi khua Efraim an timi ah khan a kal i cuka ah cun a zultu hna he khan an um. 55 Judah mi Lanhtak Puai kha a nai i khuate khan mi tampi cu, puai hlan i thianhnak rak tuah awkah, Jerusalem khua ah khan an kal. 56 Jesuh kha an kawl i biakinn i an i pumh ah khan pakhat le pakhat kha, "Zeitindah na ruah? Puai ah hin a ra hnga maw?" tiah an i hal. 57 Tlangbawi upa hna le Farasi mi hna nih khan, Jesuh umnak a hngalmi paoh nih nan kan chimh lai i kan tlaih lai, tiah an ti hna.
1 Lanhtak Puai hlan ni ruk ah Jesuh cu Bethani khua ah khan a kal; Bethani khua cu thihnak in a thawhtermi Lazaruh khua kha a si. 2 Cuka ah cun zanriah an serpiak i Martha nih khan a bultawl hna i Lazaruh cu Jesuh he a ṭhumi sawmmi hawi dang sinah khan a ṭhu. 3 Cun Mary nih a man a sung ngaingaimi zihmui phun ṭha ngaimi kha a rak i put i Jesuh ke ah khan a toih i a sam in a hnawh hna. Inn cu zihmui rim thaw cun a khat dih. 4 Jesuh zultu pakhat, Judas Iskariot, amah rawitu ding a simipa nih khan, 5 "Hi zihmui hi ziah tangka za thum ah zuar in misifak kha an pek deuh hna lo?" tiah a ti. 6 Hi bantukin bia a chim cu misifak kha an zawn a ruah hna caah si loin, mifir rak si kaw a kenmi tangka bawm chung khan a rak i lak lengmang tawn ca tu ah a rak si. 7 Sihmanhsehlaw Jesuh nih cun, "Amah cu hnahnawhnak pe hlah u. Ka ruak vui ni caah a ngeihmi cu i chiah ko seh. 8 Mi sifak cu nan sinah an um zungzal ko lai, kei cu nan sinah ka um zungzal lai lo," tiah a ti. 9 Judah mi mi tampi nih Jesuh cu Bethani khua ah a um ti kha an theih caah an va kal. Jesuh a um ruang lawngah khan si loin thihnak in a thawhmi Lazaruh va zoh duh zongah khan a si pah. 10 Cucaah tlangbawi upa pawl nih khan Lazaruh zong cu thah chih dingin khua an khan; 11 zeicahtiah, Lazaruh chimmi bia ruangah khan Judah mi tampi nih an hruaitu kha an chuahtak hna i Jesuh kha an zumh. 12 A thaizing ah cun Lanhtak Puai ca i a rami mi tampi nih khan Jesuh cu Jerusalem khua ah a ra lai ti kha an theih. 13 Cucaah kuhchuk hnah kha an i put i amah don awkah khan an kal i, "Pathian cu thangṭhat ko u! Bawipa min in a rami cu Pathian nih thluachuah pe ko seh. Pathian nih Israel Siangpahrang cu thluachuah pe ko seh," tiah an au. 14 - 15 Cathiang nih, Zion khuapi, na thinphang hlah! Na Siangpahrang cu a ra lio, Laa cungah i cit in a ra lio, tiah a rak ti bantukte khan Jesuh nih cun laa kha a hun i cit. 16 Cu caan ah cun a zultu hna nih khan cu thil a sullam cu an hngal lo, sihmanhsehlaw sunparnak ah thawhter a si tikah khan, amah kong ah hin, hi bantukin Cathiang nih a rak chim i an tuahmi kha amah an tuahpiak a rak si, ti kha an lung a hung pem. 17 Jesuh nih Lazaruh kha, thlan chungin hung chuak, tiah a vun kawh i thihnak in a thawhter tikah khan, Jesuh sinah a ummi hna nih khan cu kong cu an va chimh chin hna. 18 Cucaah cun mibupi nih amah an hung ton cu a si — cu hmelchunhnak a tuah ti an theih caah cun, an hung ton cu a si. 19 Cu tikah Farasi mi hna nih cun, "Kan ti ṭheo lo maw, kan ti kho ti lo hih. Vawlei pumpi nih an zulh cang hih," tiah pakhat le pakhat an i ti. 20 Puai caan lio i Pathian biak awkah Jerusalem i a hung kalmi hna lakah khan Grik mi tlawmpal an i tel ve. 21 Galilee peng Bethsaida khuami Filip sinah khan an ra i, "Bawipa, Jesuh hmuh kan duh," an ti. 22 Filip nih khan Andru kha a va chimh i an pahnih cun an va kal i Jesuh cu an va chimh. 23 Jesuh nih cun, "Mi Fapa hi sunparnak nganpi pek ka si caan a phan cang. 24 Biatak kan chimh hna: facang ci pakhat cu vawlei ah tuh a si i a thih ta lo ahcun pakhat lawng a si peng ko. A thih ta lawngah facang mu dang tampi a chuahter khawh. 25 Ahopaoh, a nunnak a dawmi nih cun a nunnak cu a thlau lai: hi vawlei cung i a nunnak a huami nih zungzal nunnak ah cun aa chiah lai. 26 Ahohmanh ka rian ṭuantu si nan duh ahcun keimah kha nan ka zulh hrimhrim lai, cucaah ka rian a ka ṭuanpiaktu cu ka umnak ah a um ve lai. Ka rian a ka ṭuanpiaktu cu ka Pa nih upatnak a pek hna lai," tiah a leh hna. 27 Jesuh nih cun aa thawh i, "Atu hi ka lungre a thei — zeidah ka chim lai? 'Ka Pa, hi caan hi ka cungah phakter hlah,' ka ti lai maw? Ka ti lai lo, hi nganfahnak innak caan ton dingah hin pei ka rat cu. 28 Ka Pa, na min cu upatnak pe ko," tiah a ti. Cun vancung in aw pakhat nih, "Upatnak cu ka pek cang i ka pek ko rih lai," tiah a run chim. 29 Cuka i a ummi mibupi nih khan cu aw cu an theih i, "Khua a ri," an ti. A cheu nih, "Vancungmi nih bia a chimh," an ti. 30 Sihmanhsehlaw annih cu Jesuh nih khan a thawh hna i "Hi aw nih bia a chimmi hi keimah caah a si lo, nanmah caah a si. 31 Atu cu vawlei hi a biaceih caan a si cang; atu cu hi vawlei uktu hi tei a si cang lai. 32 Vawlei hin hler ka si tikah mi vialte cu ka sinah ka hnuh dih hna lai," tiah a ti hna. 33 (Hitihin a chim tikah, zei bantuk thihnak dah a huah lai ti kha a langhter duhmi a si). 34 Mibupi nih cun an hei leh i, "Kan Phung nih Messiah cu zungzal in a nung lai, tiah a kan chimh. A si kun ah cun zeitindah Mi Fapa cu hler a si lai tiah na ti khawh? Mi Fapa timi cu ahodah a si?" an ti. 35 Jesuh nih cun, "Nan sinah hin ceunak cu tlawmpal chung cu a um ko rih lai. Ceunak nan sin i a um chung cu, muihnak nih an phanh hna nakhnga lo, hmailei ah kal lengmang ko u; zeicahtiah mui lak i khual a tlawngmi cu khuazei i an kal kha an i hngal tawn lo. 36 Ceunak nan ngeih lioah cun ceunak cu i bochan ko u, ceunak mi nan si khawh nakhnga," tiah a leh hna. Cu bia a chim dih in Jesuh cu lodiam in a kal i a va thup. 37 Cu bantukin hmelchunhnak tampi kha an mit hmuh hrimhrim ah a ser ko nain an zum lo, 38 cucu profet Isaiah nih, "Kan chimmi bia cu aho nih dah an zumh? Aho sinah dah Bawipa nih a lianhngannak cu a langhter?" tiah a rak chimmi kha a tlin nakhnga caah a si. 39 Cu ruangah cun an zumh khawh lonak kha a si; zeicahtiah Isaiah ṭhiamṭhiam nih cun, 40 "Pathian nih an mit a cawtter hna i an lung a pinter hna, 'Cu ti a si lo ahcun an mit nih khua a hmu sual hnga i an lung nih khua a hngal sual hnga i, Damnak hmuhnak ding caah keimah leiah an i mer sual hnga,' tiah Pathian nih a ti," tiah a ti fawn. 41 Isaiah nih hi bia a rak chimmi cu Jesuh sunparnak kha a rak hmuh caah a si i amah kong cu a rak chimmi kha a si. 42 Cuti a si na cun Judah mi upa tampi nih khan Jesuh cu an zumh; sihmanhsehlaw Farasi pawl hna ruangah khan langhngan in an chim ngam lo, pumhnak inn i ṭhawl lai kha an phang. 43 Minung sinin mithmai ṭha hmuh kha Pathian sin i hmuh nakkhan an duh deuh. 44 Jesuh nih aw thangpi in, "Keimah a ka zummi paoh nih cun keimah lawng kha a ka zumh si loin keimah a ka thlahtu kha a zumh ve a si. 45 Keimah a ka hmutu nih keimah a ka thlahtu zong kha a hmuh a si. 46 Hi vawlei cungah ceunak bantukin ka ratnak cu a ka zummi paoh kha khuamui chungah an um peng nakhnga lo caah a si. 47 Ka bia a thei nain a ngai lomi cu keimah nih cun bia ka ceih lai lo. Vawlei hi a bia ceih awkah ka ra lo, vawlei hi khamh awk tu ah ka ra. 48 Keimah kha a ka hlaw i ka bia a cohlang duh lomi cu a bia ceihtu ding a um ko. Ka chimmi ka bia hi ni hmanung bik ni ah cun a bia a ceihtu cu a si te lai. 49 Zeicahtiah, keimah nawl in ka chim lo, ka chimmi cu a ka thlahtu ka Pa nih na chim lai tiah a ka fialmi kha an si. 50 Na chim lai tiah a ka fialmi bia cu zungzal nunnak petu a si ti kha ka hngalh. Cucaah ka chimmi bia cu ka Pa nih na chim lai tiah a ka timi bia kha a si," tiah a ti.
1 Atu cu Lanhtak Puai lai ni kha a si cang. Jesuh nih hi vawlei hi kaltak i a Pa sin kal caan kha a phan cang tiah a hngalh. Hi vawlei cung i a ummi a mi kha a dawt zungzal hna i annih cu a dongh tiang hrimhrim in a dawt hna. 2 Jesuh le a zultu hna cu zanriah an dum i Khuachia nih khan Simon Iskariot fapa Judas lung chungah khan Jesuh rawinak ding ruahnak cu a rak khumh cang. 3 Jesuh nih cun ka Pa nih zeizong vialte kha ka kut chungah a ka pek dih i ka Pa sinin a rami ka si i ka Pa sinah ka kir ṭhan lai ti kha a hngalh caah 4 rawl an ei lioah cun cabuai khan a tho i a puan aa chiah hnuah kut hnawhnak puan kha a lak i a tai ah aa menh i 5 khengpi chungah ti kha a thlet i a zultu kha an ke a ṭawl hna i kut hnawhnak puan in a hnawh hna. 6 Simon Peter sin kha a hei phak tikah, Peter nih cun, "Bawipa, ka ke maw na ka ṭawl lai?" tiah a rak ti. 7 Jesuh nih cun, "Ka tuahmi hi atu ahcun a sullam na hngal lo, sihmanhsehlaw hnu deuh ah na hngalh te lai," tiah a leh. 8 Peter nih cun, "Ka ke cu na ka ṭawl bal hnga lo," tiah a ti. Jesuh nih cun, "Na ke kan ṭawl lo ahcun, a ka zultu na si ti hnga lo pei," tiah a leh. 9 Simon Peter nih cun, "Bawipa, a si ahcun, ka ke lawng ka ṭawl kun hlah, ka kut le ka lu zong ka ṭawl chih kun," tiah a leh ve. 10 Jesuh nih cun, "Aa kholh cangmi cu a pumpi tein a thian cang caah a ke dah ti lo cu i ṭawl ṭhan a herh ti lo. Nan dihlak in nan thiang dih — pakhat bel," tiah a ti. 11 (Jesuh nih ahodah a ka leitu a si lai ti kha a rak hngalh diam cang caah, "Nan dihlak in nan thiang ko, pakhat dah ti lo cu," tiah a rak tinak kha a si). 12 An ke a ṭawl dih hna cun Jesuh nih a puan kha aa aih ṭhan i cabuai i a ṭhutnak ah khan a ṭhu ṭhan. "Atu i kan tuahpiakmi hna kha a sullam nan hngal maw?" tiah a hal hna. 13 "Nannih nih kei cu, Saya le Bawipa nan ka ti i cucu ka si taktak caah nan ka ti cu ahmaan ko. 14 Kei nan Saya le nan Bawipa a simi nih nan ke kan ṭawl hna ahcun nannih zong pakhat le pakhat nan ke nan i ṭawlpiak awk a si. 15 Nan caah i zohchun awk kan tuahpiak cang hna: nan ca i ka tuah bantuk khan nannih zong nih nan tuah ve awk a si. 16 Biatak kan chimh hna: sal cu a bawipa nakin a ngan deuh bal lo; fialmi zong a fialtu nakin a ngan deuh bal lo. 17 Atu cu hi biatak hi nan hngalh cang; nan tuah taktak ahcun zeitluk in dik nan i lawmh lai! 18 "Hi ka chimmi hi nan dihlak in kan ti duh hnanak a si lo; ka thimmi cu ka hngalh ko hna. Sihmanhsehlaw 'Ka rawl a eimi kha ka ral ah a cang' tiah cathiang nih a timi kha a tlin awk a herh. 19 Thil cu a hung si taktak tikah keimah hi amah cu ka si ko, ti kha nan zumh khawh nakhnga, hi thil hi a si hlanah ka rak in chimh chung hna. 20 Biatak kan chimh hna: Rian ka fialmi tluninn a rak onhtu paoh nih keimah an ka onh a si, keimah tluninn a ka onhtu paoh nih a ka thlahtu tluninn a onh a si," tiah a ti. 21 Cu bia a chim dih in Jesuh nih cun lung sivang ngaingai in, "Biatak kan chimh hna: nanmah lak i pakhat nih nan ka rawi lai," tiah a ti hna. 22 A zultu hna cu pakhat le pakhat an i zoh i, ahodah a kan chimhnawhchan hnga tiah ar koin an um. 23 Zultu lak i pakhat, Jesuh nih a dawtmi kha, Jesuh chang ah cun a ṭhu i 24 Simon Peter nih khan a kut a zaoh i, "A chimmi hi ahodah a tihnawh duhchanmi kan si hnga, hei hal tuah," tiah a ti. 25 Cucaah Jesuh cu a zultu nih khan a hei naih deuh i, "Ahodah a si? Bawipa," tiah a hal. 26 Jesuh nih cun, "Mehhang ah changreu kha ka hnim lai i ka pekmipa cu a si lai," tiah a leh. Changreu dar khat kha a lak i a hnim hnuah Simon Iskariot fapa Judas kha a pek. 27 Judas nih aa lak cangka, Satan kha a chungah a lut. Jesuh nih cun amah cu a thawh i, "Na tuah ding cu khulrang in tuah ko kun," tiah a ti. 28 Jesuh nih cu bantukin a chimmi cu cabuai i a ṭhumi ahohmanh nih a sullam an hngal lo. 29 Judas cu tangka zal tlaitu kha a si caah, a zultu a cheukhat nih cun, Jesuh nih khan Judas cu, puai ca i a herh ding changreu va cawk a fial rua, asiloah sifakmi kha zeilo va ṭhen hna a ti rua, tiah an ruah. 30 Judas nih khan changreu cu aa lak i khulrang in a chuak. Cu caan cu zan a si. 31 Judas a chuah hnuah khan Jesuh nih, "Atu cu Mi Fapa hi sunparnak kha pek ka si cang; atu cu keimah thawngin Pathian nih khan sunparnak cu a hmuh cang. 32 Pathian nih keimah thawngin sunparnak cu a hmuh ahcun, Pathian zong nih Mi Fapa hi thangṭhatnak a ka pek ve lai i cucu rau lo tein a tuah lai. 33 Ka fale hna, nan sinah sau ka um ti lai lo. Nan ka kawl lai, sihmanhsehlaw 'Ka kalnak ah cun nan ra kho lai lo,' tiah Judah mi ka chimh hna bang khan nannih zong kan chimh hna. 34 Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. 35 Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai," tiah a ti hna. 36 Simon Peter nih, "Bawipa, khuazei ah dah na kal lai?" tiah a hal. Jesuh nih, "Ka kalnak dingah cun na ka zul kho lai lo, sihmanhsehlaw hnu deuh ah na ka zulh te lai," tiah a leh. 37 Peter nih, "Bawipa, zeicahdah atu ah cun kan zulh khawh lai lo? Na caah thih ka ngamh ko dahkaw?" tiah a ti. 38 Jesuh nih cun, "Ka caah thih cu na ngamh ngai hnga maw? Biatak kan chimh: ar a khuan hlanah voi thum, amah cu ka hngal lo, na ka ti lai," tiah a leh.
1 Khuaruahhar lungrethei in um hlah u. Pathian kha zum u, keimah zong kha ka zum ve u. 2 Ka Pa inn chungah khaan tampi a um ko i cuka i nan caah hmun va timh awkah ka rak kal lai. Cu bantukin si hlah seh law hitihin kan chim hna hnga lo. 3 Cun ka va kal lai i nan ca i ka va timh dih hnuah ka ra kir ṭhan lai i ka sinah kan lak hna lai, cun ka umnak ah nannih zong nan um ve lai. 4 Ka kalnak ding hmun phaknak lam cu nan hngalh ko," tiah a ti hna. 5 Thomas nih khan a thawh i, "Bawipa, khuazei i na kal lai kha kan hngalh ṭung lo, zeitindah cuka phaknak lam cu kan hngalh khawh lai?" tiah a ti. 6 Jesuh nih, "Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo. 7 Atu cu nan ka hngalh cang caah ka Pa zong kha nan hngalh lai; atu thawk hin nannih nih amah cu nan hngalh cang; nan hmuh cang," tiah a ti hna. 8 Filip nih khan, "Bawipa, na Pa cu kan hmuhsak law cu vial cu kan herhmi a si ko," tiah a ti. 9 Jesuh nih, "Nan sinah saupi ka um ko cang, asinain na ka hngal rih lo maw, Filip? Keimah a ka hmutu paoh nih cun ka Pa kha an hmuh ve ko, cucaah zeicahdah na Pa cu kan hmuhsak, na ka ti? 10 Keimah cu ka Pa chungah ka um i ka Pa cu keimah chungah a um kha na zum lo maw, Filip? Nannih kan chimhmi hna bia hi keimah chungin aa thawkmi an si ṭung lo, ka chung i a ummi ka Pa rianṭuannak pei an si cu. 11 Ka Pa chungah ka um i ka Pa cu ka chungah a um kha zum ko u. Cucu nan zumh khawh lo a si le hi thil ka tuahmi hna ruang tal ah hin zum ko u. 12 Biatak kan chimh hna: Keimah a ka zummi paoh nih ka tuahmi thil hi an tuah khawh ve lai — hi hna nakin a ngan deuhmi hmanh an tuah khawh hna lai, zeicah ti ahcun, ka Pa sinah ka kal lai caah a si. 13 Pa sunparnak cu Fapa thawngin a langh khawh nakhnga, ka min in nan halmi paoh cu kan tuahpiak hna lai. 14 Zeipaoh ka min in nan ka hal ahcun ka tuah lai," tiah a ti. 15 "Nan ka dawt ahcun ka nawlbia kha nan zulh hna lai. 16 Ka Pa kha ka hal lai i Bawmtu a dang, an pek hna lai i a zungzal in an umpi hna lai. 17 Amah cu biatak phuangtu thlarau a si; vawlei nih cun a hmuh lo ca le a hngalh lo caah a cohlang kho lo; sihmanhsehlaw amah cu nan sinah a um i nan chung i a nun caah nannih nih cun nan hngalh. 18 "Nanmahte lawngin kan kaltak hna lai lo; nan sinah ka ra kir ṭhan lai. 19 Hi hnu tlawmpal ah hin vawlei nih cun a ka hmu ti lai lo, sihmanhsehlaw nannih nih cun nan ka hmuh lai; cun keimah hi ka nun lai caah nannih zong nan nung ve lai. 20 Cu ni a phak tikah cun kei cu ka Pa chung i ka um le nan chung i ka um bantukin nannih zong ka chung i nan um kha nan hngalh lai. 21 "Ka nawlbia kha a cohlang i a zulmi paoh cu keimah a ka dawmi an si. A ka dawmi cu ka Pa nih a dawt ve hna lai; kei zong nih ka dawt ve hna lai i an sinah kaa phuang lai," tiah a ti. 22 Judas Iskariot a si lomi Judas nih khan, "Bawipa, zeitindah vawlei sinah i phuang loin kanmah sin lawngah naa phuan khawhning cu a si lai?" tiah a ti. 23 Jesuh nih cun, "A ka dawmi paoh nih cun ka bia kha an ngaih lai. Annih cu ka Pa nih a dawt hna lai i ka Pa le keimah cu kan ra lai i an sinah kan um lai. 24 A ka daw lomi paoh nih ka bia kha an ngai lo. Ka chimmi bia nan theihmi hi keimah bia a si lo, a ka thlahtu ka Pa bia a si. 25 "Hi vialte hi nan sin ka um lioah hin kan chimh hna, 26 sihmanhsehlaw ka Pa nih ka min in a run thlah laimi Bawmtu, Thiang Thlarau nih cun zeizong vialte kha an cawnpiak hna lai i kan chimhmi vialte hna kha nan lung an pemter hna lai. 27 "Daihnak kan chiahtak hna, keimah daihnak cu kan pek hna. Vawlei nih an pek hna bantukin kan pe hna lo. Lungrethei le vansang au in um hlah u: nan thin zong phang hlah u. 28 'Kan kaltak hna lai, sihmanhsehlaw nan sinah ka ra ṭhan lai,' ka ti pei nan theih ko kha. Nan ka dawt ahcun ka Pa sin i ka kal lai hi nan i lawm lai, zeicahtiah amah cu keimah nakin a ngan deuh. 29 Thil a hung si taktak tikah nan zumh khawh nakhnga, mah hihi a hlankan in ka rak in chimhchung hna. 30 Hi vawlei uktupa hi a rat dengmang cang caah bia saupi kan ruah kho ti hna lo. Ka cungah nawl ngeihnak cu zeihmanh a ngei lo, 31 a si nain vawlei nih hin ka Pa ka dawt kha a hngalh khawh nakhnga ka Pa nih a ka fial bantukin ka tuah dih. "Tho u, kal u sih," a ti hna.
1 "Mitsur ruang taktak cu keimah hi ka si i dum ngeitu cu ka Pa a si. 2 Thei a tlai lomi ka nge vialte kha a tan dih hna i thei a tlaimi nge vialte kha an tlai chinchin nakhnga a thianh hna. 3 Nannih cu kan chimhmi hna bia thawngin nan thiang cang. 4 Keimah ah hin i peh u law kei zong nanmah he kaa peh ve lai. Mitsur nge nih amahte in thei a tlai khawh lo i a ruang ah aa peh lawngah a tlai khawh bantukin nannih zong keimah chung i nan um lo ahcun nan tlai kho ve lai lo. 5 Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo. 6 Ka chungah a um lomi cu mitsur nge car bantukin lengah hlonh an si ko. Cu bantuk nge cu an pumh hna i mei ah an paih hna i cuka ah cun an kang dih. 7 Ka chung i nan um i ka bia kha nan chungah a hmunh ahcun, nan duhmi paoh kha nan ka hal lai i nan hmuh ko lai. 8 Nannih nih thei tampi nan tlai thawngin ka Pa sunparnak kha nan langhter i cuticun ka zultu i nan i canning cu a si. 9 Ka Pa nih a ka dawt bantukte in kei zong nih kan dawt ve hna; kan dawtnak hna chungah hin um ko uh. 10 Ka Pa nawlbia kha ka ngaih i a dawtnak chungah ka um bantukte hin ka nawlbia nan ngaih ahcun kan dawt hnanak chungah hin nan um ve lai. 11 "Ka lunglawmhnak kha nan chung-ah a um i nan i lawmhnak cu a tlin nakhnga, hi bia cu kan chimh hna. 12 Kei ka nawlbia cu hihi a si. Keimah nih kan dawt hna bantukte hin pakhat le pakhat i daw u. 13 Mi nih a hawile caah dawtnak ngan bik a ngeih khawhmi cu an ca i a nunnak pek hi a si. 14 Kan fialmi hna nan tuah ahcun nannih cu ka hawile nan si. 15 Nannih cu sinum kan ti ti hna lo, zeicahtiah sinum nih cun a bawipa tuahmi kha a hngal lo. Sihmanhsehlaw ka Pa sinin ka theihmi vialte kha kan chimh dih hna caah, ka hawile, ti tu ah kan ti cang hna. 16 Nannih nih cun nan ka thim lo, keimah nih kan thim hna i a hmun ding thei kha tampi in va tlai tuah u tiah kan fial hna. Cucaah ka min in nan halmi paoh cu ka Pa nih an pek hna lai. 17 Cucaah nawl kan pekmi hna cu hihi a si: pakhat le pakhat i daw u," a ti. 18 "Vawlei nih an huat hna ahcun, keimah a rak ka huat hmasa ti kha philh hlah u. 19 Vawlei ta rak si u law cu, vawlei nih cun amah ta bantukin an dawt ko hna hnga. Sihmanhsehlaw keimah nih hi vawlei chung hin kan thim hna i amah ta nan si ti lo caah an huat hnanak cu a si. 20 'Sal cu a bawipa nakin a ngan deuh bal lo,' tiah kan chimhmi hna kha philh hlah u. Keimah kha an ka hrem ahcun nannih zong an in hrem ve ko hna lai; ka bia kha an ngaih ahcun nan bia zong kha an ngaih ve lai. 21 Sihmanhsehlaw hi vialte cu keimah mi nan si ruangah nan cungah an tuah lai; zeicahtiah a ka thlahtu kha an hngal lo. 22 An sinah rak ra lo le biachim loin rak um ning law cu, an cungah sualnak a um hnga lo; sihmanhsehlaw atu cu an sualnak kha zeihmanh i silhnalh khawhnak an ngei ti lo. 23 Keimah a ka huami paoh nih ka Pa zong kha an huat. 24 Ahohmanh nih an tuah bal lomi ka tuahmi hi an lakah tuah loin rak um ning law cu an cungah sualnak a um hnga lo, asinain atu ning ah cun ka tuahmi kha an hmuh ko i keimah he ka Pa he an kan huat. 25 Cucu a si awk a si ko, zeicahtiah cuticun pei an Phung chung i, 'Zei ruang lo ah an ka huat,' tiah aa ṭialmi kha a tlin khawh ding a si cu. 26 "Ka Pa sinin a rami Bawmtu, biatak Phuangtu Thlarau cu a ra lai. Ka Pa sinin nan sinah ka rak thlah lai i keimah kong kha an chimh hna lai. 27 Cun nannih zong nih a hramthawk tein ka sin i a ummi nan si caah keimah kong kha nan chim ve lai.
1 "Nan tluk sual nakhnga lo hi bia cu kan chimh hna. 2 An pumhnak inn in an in ṭhawl hna lai. Cun nanmah thah hi Pathian rian ṭuan a si tiah mi nih an ruah caan a phan lai. 3 Ka Pa zong, keimah zong an kan hngalh lo caah hi bantukin nan cungah an tuah lai. 4 Hi bantukin nan cung i an tuah caan kha a phak tikah, nannih nih a rak kan chimh cang ti kha nan lung ah a hung pem nakhnga hi bia hi kan chimh hna," a ti. "Keimah kha nan sin i ka rak um ko caah hi bia hi a hramthawkte khan ka rak in chim hna lo. 5 Sihmanhsehlaw atu cu a ka thlahtu sinah khan ka kal cang lai; asinain aho zong nih, 'Khuazei ah dah na kal lai? tiah nan ka hal lo. 6 Cun atu cu kan chimh hna caah nan ngaih a chia. 7 Sihmanhsehlaw biatak kan chimh hna: ka kal hi nan caah a ṭha deuh, zeicahtiah keimah ka kal lo ahcun Bawmtu kha nan sinah a ra kho lai lo. Ka kal ahcun amah cu nan sinah ka ratter lai. 8 A rat tikah vawleicung mi kha sualnak an ruahning le zeidah a ding ti an ruahning le Pathian nih bia a kan ceih lai ti an ruahning i an palhnak kha fiang tein a hngalhter hna lai. 9 Keimah an ka zumh lo caah hin sualnak kong ah an palh; 10 cun kei cu ka Pa sinah ka kal lai i nan ka hmuh ti lai lo caah hin, zeidah a ding timi kong ah an palh; 11 cun hi vawlei uktupa hi a bia ceih a si cang caah hin biaceihnak kong ah an palh. 12 "Tampi chimh awk kan ngei ko rih hna, sihmanhsehlaw atu ah cun nan i cinken khawh cawk ding a si lo. 13 Asinain biatak phuangtu Thlarau cu a rat tikah biatak chungah cun an luhpi hna lai. 'Keimah nawl a si,' tiin zeihmanh a chim lai lo, a theihmi le a ra lai ding thil kong tu kha an chimh hna lai. 14 Keimah nih ka rak in chimhmi hna chung khan an chimhmi hna cu a lakmi a si lai caah keimah kha a ka thangṭhat lai. 15 Ka Pa ngeihmi vialte cu keimah ta an si ko, cucaah cun, 'Thlarau nih cun ka pekmi cu aa lak lai i nannih cu an chimh hna lai,' tiah ka rak in chimh hna kha a si," a ti. 16 "Hi hnu tlawmpalte ah nan ka hmu ti lai lo, cun tlawmpalte hnuah nan ka hmuh lai," tiah a ti. 17 A zultu cheukhat nih khan, "Hihi a sullam zeidah a si hnga? 'Hi hnu tlawmpalte ah nan ka hmu ti lai lo, cun tlawmpalte hnuah nan ka hmuh lai,' a kan ti; cun 'Cucu ka Pa sinah ka kal lai caah a si,' a ti fawn. 18 'Hi hnu tlawmpalte ah,' a timi hi a sullam zeidah a si hnga?" tiah a dang pawl kha an hal hna. Annih nih, "Zei kong dah a chim ti kha kan hngal kho lo," an ti. 19 Jesuh nih amah hal an duh kha a hngalh i cucaah annih cu a thawh hna i, " 'Hi hnu tlawmpalte ah nan ka hmu lai lo, cun hi hnu tlawmpalte ah nan ka hmuh lai,' ka timi cu maw nanmah le nanmah nan i ceih lenmi cu a si? 20 Biatak kan chimh hna: nannih cu nan ṭap nan ai len lai, sihmanhsehlaw vawlei cu aa lawm lai; nan ngaih a chia lai, sihmanhsehlaw nan ngaihchiatnak cu lunglawmhnak ah a cang te lai. 21 Nu nih nau a ngeih lai ah, nganfah in caan nih khan a phak caah a ngaih a chia, sihmanhsehlaw naute cu a hung chuah tikah nau thar pakhat vawlei cung i a hung chuah caah cun aa lawm i a nganfahnak cu a philh dih. 22 Cu bantuk cun nannih zong nan si lai: atu cu nan ngaih a chia, sihmanhsehlaw kan hmuh ṭhan hna lai i nan lung cu lunglawmhnak in a khat lai; cu lunglawmhnak cu ahohmanh nih an in chuh khawh lomi hna lunglawmhnak phun a si lai. 23 "Cu ni a phak tikah cun keimah cu zeihmanh nan ka hal lai lo. Biatak kan chimh hna: Ka Pa nih ka min in nan halmi paoh cu an pek hna lai. 24 Atu tiangah cun ka min in zeihmanh nan hal rih lo, hal u law nan hmuh lai, cu ti nan tuah ahcun nan i lawmhnak cu a tling lai," tiah a ti. 25 "Atu caan tiang cu tahchunhnak bia in kan cawnpiak lengmang hna, asinain ka Pa kong kha tahchunhnak hmang ti loin biapiang in kan chimh hna lai caan a phan lai. 26 Cu ni a phanh tikah cun amah kha ka min in nan hal lai; keimah nih kan halpiak hna lai ka ti lo, 27 zeicahtiah ka Pa nih cun amah hrimhrim nih an dawt hna. Nannih nih nan ka dawt caah le Pathian sinin a ra ti kha nan ka zumh caah an dawt hna. 28 Ka Pa sinin a rami ka si taktak i vawlei cungah hin ka ra; atu cu hi vawlei hin ka chuak lai i ka Pa sinah ka kal lai," tiah a ti. 29 Cun a zultu nih khan an thawh i, "Atu cu tahchunhnak hmang lo tein fiang tein na kan chimh. 30 Nangmah nih zeizong vialte kha na hngalh dih i kherhlai len na hau lo ti kha atu cu kan hngalh cang. Cu nih cun nangmah cu Pathian sinin a rami na si kha a kan zumhter," an ti. 31 Jesuh nih cun, "Atu cu nan ka zumh cang. 32 Asinain nan dihlak in ṭhek nan si i nanmahle nan inn cio ah nan kal i keimah lawngte nan ka nganh lai caan kha a ra lio i atu hi a phan cang. Sihmanhsehlaw keimah lawng ngaingai cu ka si lo, zeicahtiah ka Pa nih a ka umpi ko. 33 Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw ṭih hlah u. Vawlei cu ka tei cang," tiah a ti.
1 Jesuh nih bia a chim dih cun van lei kha a zoh i, "Ka Pa, a caan kha a cu cang. Na Fapa nih sunparnak kan pek ve nakhnga, na Fapa cu sunparnak ka pe ko. 2 Na ka pekmi vialte hna cu zungzal nunnak ka pek hna nakhnga mi vialte cung i nawl ngeihnak cu na ka pek cang. 3 Cun Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si. 4 Vawlei cungah na sunparnak cu ka langhter cang; na ka fialmi rian cu ka lim cang. 5 Cucaah Ka Pa, vawlei ser hlan i nangmah sin i ka rak ngeihmi sunparnak kha, atu ah hin na hmaika ah sunparnak ka pe tuah. 6 "Hi vawlei chungin na kawh hna i na ka pekmi hna sinah hin, na min cu ka langhter cang; nangmah ta an si i annih cu nangmah nih keimah na ka pekmi an si. Na bia kha an ngaih i 7 atu cu na ka pekmi laksawng paohpaoh hi nangmah sin chuakmi a si ti kha an hngalh. 8 Na ka pekmi bia kha ka chimh hna i annih nih an cohlan; nangmah sinin a rami ka si kha a si taktak tiah an hngalh i nangmah i na ka thlah kha an zumh. 9 "Annih caah thla ka cam. Vawlei caah cun ka cam lo; na ka pekmi hna cu nangmah mi an si caah an caah ka cam. 10 Ka ngeihmi vialte hi nangmah ta an si dih, na ngeihmi vialte hi keimah ta an si dih, ka sunparnak a langhnak cu anmah thawng hin a si. 11 Atu cu kei cu na sinah ka ra cang lai; vawlei ah hin ka um ti lai lo; sihmanhsehlaw annih cu an um rih lai. A Thiangmi ka Pa, nangmah le keimah cu pakhat kan si bantuk hin pakhat an si khawh ve nakhnga, na ka pekmi hna cu na min ṭhawnnak in huppheng ko hna. 12 Annih sin i ka um lioah hin cun, na ka pekmi hna cu na min ṭhawnnak in ka huhphenh hna i him tein ka chiah hna. A tlau ding a rak si hrimmi dah kha ti lo cu pakhat hmanh an tlau lo — kha zong kha Cathiang a tlin nakhnga caah a si ko. 13 Atu cu kei cu nangmah sinah ka ra lai; sihmanhsehlaw hi vawlei cung i ka um lioah hi bia ka chimnak cu ka lunglawmhnak kha an lung chungah tlamtling tein an ngeih nakhnga caah a si. 14 Kei cu hi vawlei ta ka si lo bantukin annih zong hi vawlei ta an si lo caah na bia kha ka chimh hna i vawlei nih cun a huat hna. 15 Vawlei cung hin la hna tiah kan nawl a si lo, sihmanhsehlaw Mi Ṭhalopa sin khan him tein chia ko hna ti kha kan nawl. 16 Vawlei ta ka si lo bantuk hin annih zong vawlei ta an si ve lo. 17 Annih cu biatak khan thianter hna: biatak cu nangmah bia kha a si. 18 Vawlei ah na ka thlah bantukin kei zong nih vawlei ah ka thlah ve hna. 19 Annih zong kha na biatak in thianh an si nakhnga kei zong hi anmah ruangah kaa thianh ve. 20 "Anmah ca lawngah hin thla ka cam lo, an chimmi bia thawngin a ka zum laimi hna ca zongah ka cam. 21 An dihlak in pakhat an si nakhnga thla ka cam. Ka Pa, keimah cu nangmah chungah ka um i nangmah cu keimah chungah na um bantuk hin annih zong kan chungah um ve hna seh. 22 Nangmah le keimah cu pakhat kan si bantuk hin pakhat an si khawh ve nakhnga, sunparnak na ka pekmi kha ka pek hna. 23 Kei an chungah um in nang ka chungah um law, annih cu pakhat taktak an si lai; cun pakhat an sinak thawng cun vawlei nih cun keimah cu nangmah thlahmi ka si le nangmah nih annih cu keimah na ka dawt bantukin na dawt hna kha a hngalh lai. 24 "Ka Pa, na ka pekmi hna hi ka umnak ah ka sin i umter i ka sunparnak, vawlei ser hlan in na ka dawt ca i na ka pekmi kha hmu hna seh ti ka duh. 25 A dingmi ka Pa, vawlei nih cun an hngal lo, sihmanhsehlaw kei nih cun kan hngalh i hi hna nih hin na ka thlah hi an hngalh. 26 Na ka dawtnak cu an chungah a um i kei zong an chungah ka um nakhnga, nangmah kong cu annih kha ka hngalhter hna i ka hngalhter ṭhan lengmang ko hna lai," tiah a ti.
1 Jesuh nih hi bangin thla a cam dih hnuah a zultu hna he khan Kidron varek ralchan ah khan an kal. Cuka ah cun dum pakhat a um i cu dum chungah cun Jesuh le a zultu hna cu an lut. 2 Cu dum a umnak hmun cu leitu Judas nih khan a hngalh, zeicahtiah Jesuh le a zultu hna cu khika hmun ah khan voi tampi an i tong tawn. 3 Judas cu dum ah cun a va kal i tlangbawi upa hna le Farasi mi hna nih an fialmi ralkap tlawmpal le biakinn cawngtu palik nih khan an zulh; hriamnam kha an i put i meiinn le meifar zong kha an i vanh. 4 A cung i a tlung ding kha Jesuh nih cun a rak hngalh dih ko i cucaah cun hmailei ah a va chuak i, "Ahodah nan kawl?" tiah a ti hna. 5 "Nazareth khuami Jesuh," tiah an leh. "Keimah hi amah cu ka si," tiah a ti hna. Leitu Judas kha an sinah cun a dir ko. 6 Jesuh nih, "Amah cu keimah hi ka si," tiah a ti hna tikah khan, hnulei ah an i tawn i vawlei ah an tlu. 7 Jesuh nih cun, "Ahodah nan kawl?" tiah a hal ṭhan hna. "Nazareth khuami Jesuh," tiah an ti. 8 "Amah cu keimah hi ka si, tiah pei kan chimh cang ko hna cu. Keimah nan ka kawl a si ahcun a dangtu hi cu kalter hna u," tiah a ti. 9 (Hitihin a chimmi cu, "Ka Pa, na ka pekmi hna cu pakhat hmanh ka thlau hna lo," tiah a rak timi a tlin naklai caah khan a si). 10 Simon Peter nih khan vainam pakhat aa ken i aa zuh i Tlangbawi Ngan salpa kha a orhlei hnakhaw pet lakin a tuk. Cu sal a min cu Malkhas a si. 11 Jesuh nih Peter cu a thawh i, "Na nam kha a kawng ah sawh ṭhan. Ka Pa nih a ka pekmi hrai, nganfah innak hrai cu ding loin a um hnga ti ah maw na ka ruah?" tiah a ti. 12 Ralkap hna le an bawipa le Judah palik hna nih cun Jesuh cu an tlaih i an khih i 13 a hmasa bik ah Annas sinah khan an kalpi. Annas cu Kaiafas nupi pa a si; Kaiafas cu, cu kum i Tlangbawi Ngan rian a ṭuanmi a si. 14 Mi vialte caah mi pakhat a thih cu a ṭha deuh tiin Judah mi ruahnak a petu hna kha Kaiafas cu a si. 15 Simon Peter le zultu dang pakhat nih Jesuh kha an zulh. Cu zultu dang cu Tlangbawi Ngan he khan aa theihngalmi an si caah Jesuh sinah khan Tlangbawi Ngan intual chungah cun a vung lut. 16 Peter cu lengah, kutka pawngah khan a rak um. Tlangbawi Ngan he aa theihngalmi zultu dang kha a va chuak i kutka i a ummi ngaknu kha a va chimh i Peter kha a chungah a luhter. 17 Kutka i a ummi ngaknu nih khan Peter cu a thawh i, "Khipa zultu khi na si ve ko lo maw?" tiah a ti. Peter nih, "Ka si lo," tiah a leh. 18 Khua a sih caah sinum pawl le palik pawl nih khan meihol an tih i dir buin an to. Peter zong cu an sinah khan a va kal i dir buin a va to ve. 19 Tlangbawi Ngan nih khan Jesuh cu a zultu hna kong le a cawnpiaknak kong kha a hal. 20 Jesuh nih cun, "Langhngan in mizapi kha ka chimh zungzal ko hna; ka cawnpiak hnanak cu a dihlak in Judah mi an i pumhnak inn le biakinn ah a si ko. A thli in zeihmanh ka chim bal lo. 21 Cucaah zeicahdah keimah cu na ka hal? Ka bia a theimi kha ta na hal ko hna. Anmah kha ka chimhmi hna cu hal ko hna — ka chimmi cu an hngalh ko khah," tiah a ti. 22 Cu bia a chim tikah cuka i a ummi palik pakhat nih Jesuh cu a bengh i, "Zeitindah Tlangbawi Ngan sinah cu bia cu na chim ngam?" tiah a ti. 23 Jesuh nih cun, "Ahmaan lomi bia ka chim a si ahcun, hika i a ummi hna hi cucu ahmaan lo tiah chim hna. Sihmanhsehlaw ka chimmi cu ahmaanmi a si ṭung ahcun, zeicahdah na ka bengh?" tiah a leh. 24 Cuticun, an khih bu cun, Annas nih khan Tlangbawi Ngan Kaiafas sinah khan a hei kuat. 25 Cuka i Peter cu a dir buin mei a toh lioah khan a dang nih, "Khipa zultu kha na si ve ko lo maw?" tiah an ti. Sihmanhsehlaw Peter nih cun aa pheh i, "Ka si lo," tiah a ti. 26 Tlangbawi Ngan salpa pakhat, Peter nih a hna pet lakin a tukmipa rualchan nih khan a hun i thawh i, "Amah sinah dum ah khan kan hmuh ve pei ka ti?" tiah a ti. 27 Peter nih aa pheh ṭhan i cun ar a hung khuang colh. 28 Jesuh cu Kaiafas inn khan an chuahpi i Mangki bawi inn ah an kalpi. Cu caan cu zingkate a si. Judah mi cu mangki bawi inn chungah khan an lut lo, zeicahtiah phunglam lei in thian i cheh i Lanhtak Puai rawl ei khawh kha an duh. 29 Cucaah Pilat cu a va chuak i annih cu, "Hi pa hi zei a sual nan ti dah?" a ti hna. 30 Annih nih, "Zei a sual lo ah maw na sinah cun kan ratpi hnga," tiah an leh. 31 Pilat nih cun a thawh hna i, "I kalpi u law nan phung ningin va ceih ko ngat u," tiah a ti hna. Judah mi hna nih cun, "Ahohmanh thah khawhnak nawl kan ngeih lo cu ta," tiah an leh. 32 (Jesuh nih zei bantuk thihnak dah ka in lai tiah a rak chimchungmi a tlinnak ding caah hi bangin thil a hung um cu a si). 33 Pilat cu inn chungah khan a vung lut ṭhan i Jesuh kha a auh. "Judah mi hna siangpahrang cu na si maw?" tiah a hal. 34 Jesuh nih cun, "Hi ti na ka hal hi nangmah lungtho in maw a si, midang nih dah ka kong kha an in chimh?" tiah a hal. 35 Pilat nih cun, "Kei cu Judah mi ah maw na ka ruah? Nangmah na phun hawile an tlangbawi upa hna nih pei ka sin an in phakter ko cu. Na tuahmi cu zeidah a si?" tiah a leh. 36 Jesuh nih cun, "Kei ka pennak cu hi vawlei ta hi a si lo; ka pennak cu hi vawlei ta hi rak si seh law cu, Judah mi nih an ka tlaih khawh nakhnga lo, ka zultu hna hi heh tiah an cawl ve hnga. Kei ka pennak cu hi vawlei ta hi a si lo," tiah a ti. 37 Cucaah Pilat nih cun, "Siangpahrang cu tah na si kun maw?" tiah a hal. Jesuh nih, "Siangpahrang na si tiah na ka ti. Hi vawlei ah ka chuah chan le ka rat chan cu biatak kong chim hi a si. Biatak kha a hna a phihkanh lomi paoh nih cun ka bia kha an ngaih," tiah a ti. 38 "Zei cu dah biatak cu a si?" tiah Pilat nih a hal. Cun Pilat cu lengah a va chuak ṭhan i, Judah mi hna cu, "Kei nih cun a sualnak zeihmanh ka hmu lo. 39 Sihmanhsehlaw nan phung tawn bantukin Lanhtak Puai ah cun thongtla pakhat cu kan chuahpiak zungzal hna, Judah siangpahrang cu in thlahpiak hna ning law nan duh maw?" tiah a ti hna. 40 An au i, "Amah cu kan duh lo. Bar-abbas kan duh," an ti. (Bar-abbas cu damiah a si).
1 Cun Pilat nih Jesuh kha a lak i ralkap kha a tukter hna. 2 Ralkap nih cun hlingnge in luchin pakhat an phiar i an chinh; puan sen kha an aih i 3 an hun hnawh i, "Judah Siangpahrang cu saupi nung ko seh," an ti i a hmai ah an bengh. 4 Pilat cu a va chuak ṭhan i Judah mi hna cu, "Zohhmanh u, amah hi! Amah cu a sualnak zeihmanh ka hmu lo ti kha hngalhter kan duh hna caah ka rak chuahpi hih," tiah a ti hna. 5 Cucaah Jesuh cu lengah a va chuak i hling luchin cu aa chinh i puansen kha aa aih. Pilat nih cun a thawh hna i, "Zohhmanh u, mipa hi!" a ti. 6 Tlangbawi upa hna le palik pawl nih khan Jesuh cu an hmuh tikah, "Vailam ah khenh chih ko! Vailam ah khenh chih ko!" tiah an au. Pilat nih cun annih cu, "Nanmah nih kalpi u law vailam ah cun va khenh chih u. Kei cu a sualnak ka hmu lo," tiah a ti hna. 7 Judah mi nih cun, "Amah nih Pathian Fapa ka si tiah a ti caah kan phung bantukin thih awk a si," an ti. 8 Cu bia an chim cu Pilat nih a theih tikah a thin a phang chinchin. 9 Inn chungah a vung lut ṭhan i Jesuh cu, "Khuazei in dah na rat?" tiah a hal. Sihmanhsehlaw Jesuh nih a let lo. 10 Pilat nih cun a thawh i, "Na ka chawn duh lai lo maw? Nangmah cu thlah khawhnak nawl le vailam i khenh chih khawhnak nawl ka ngei dah kaw?" tiah a ti. 11 Jesuh nih cun, "Ka cung i nawl na ngeih hi Pathian nih an pek ca lawngah a si. Cucaah nangmah kut i a ka chantupa hi a sual deuh," tiah a ti. 12 Cu bia cu Pilat nih a theih tikah Jesuh cu zeitindah ka luatter khawh lai tinak lam kha a kawl. Sihmanhsehlaw Judah mi cu a au in an au i, "Na thlah a si ahcun nang cu Sizar hawi na si lo. Siangpahrang ka si tiah aa timi paoh cu Sizar ral an si," an ti. 13 Cu bia cu Pilat nih a theih tikah Jesuh cu lengah a hei chuahpi i "Lung Ṭuang" timi hmun i biaceihnak ṭhutdan cungah khan a ṭhu (Hebru holh cun Gabbatha an ti)' 14 Lanhtak Puai lai ni chun kha a si dengmang cang. Pilat nih Judah mi cu a thawh hna i, "Nan siangpahrang hi zohhmanh u," a ti hna. 15 An au i, "That ko! That ko! Vailam ah khenh chih ko!" an ti. Pilat nih cun, "Nan siangpahrang cu vailam ah ka khenh chih ko lai maw?" tiah a hal hna. Tlangbawi upa hna nih cun, "Sizar dah ti lo cu ahohmanh siangpahrang dang kan ngei lo," tiah an leh. 16 Cun Pilat nih Jesuh cu vailam i khenh awkah annih kha a pek hna. Cuticun Jesuh cu an kalpi, 17 A vailamtahnak kha amah nih aa put i "Luruh Hmun" an timi kha an phan. (Hebru holh cun Golgotha an ti). 18 Cuka ah cun vailam cungah khan an khenh chih; midang pahnih zong a kehlei ah pakhat a orhlei ah pakhat, an tah ve hna i Jesuh cu an karlak ah a um. 19 Pilat nih ca pakhat a ṭial i vailam tahnak cungah cun a tar. A ṭialmi cu "Nazareth khuami Jesuh Judah Siangpahrang" ti a si. 20 Jesuh vailam i an tahnak hmun cu khuapi khan a hlat lo caah cu ca cu Judah mi tampi nih an rel. A ca cu Hebru holh le Latin holh le Grik holh in aa ṭial. 21 Judah mi tlangbawi upa hna nih khan Pilat cu, " 'Judah Siangpahrang' tiin ṭial hlah, 'Hi pa nih hin Judah Siangpahrang ka si a ti,' tiin ṭial," an ti. 22 Pilat nih cun, "Ka ṭialmi cu ka ṭialning in um ko seh," tiah a leh hna. 23 Ralkap nih Jesuh kha vailam i an khenhchih dih in, a hnipuan kha an i lak i ralkap pakhat nih pakhat cio ting dingin ṭhen li ah an ṭhen hna. Cun a angki cu hliah ngei loin tahmi a si i cu zong cu an i lak. 24 Ralkap nih cun, "Hi hi cu thlek hlah u sih, camcawhfung tu in zuk u sih," tiah an i ti i cuticun Cathiang nih, "Ka hnipuan cu an i ṭhen i Ka angki caah camcawhfung an zuh," tiah a timi kha a hung tling. Cuticun ralkap nih cun an tuah. 25 Jesuh vailam pawngte ah khan a nu le a nu naule Klopas nupi Mary le Mary Magdalin kha an dir. 26 Cuka i a nu le a dawtmi a zultu an dir ko kha a vun hmuh hna i a nu cu, "Ka nu, khaka ah khan na fapa a um khah," tiah a vun ti, 27 a dawtmi a zultu zong cu, "Khaka ah khan na nu a um khah," tiah a vun ti ve. Cu caan thawk cun cu zultu nih cun Jesuh nu cu a inn ah a umter. 28 Atu cu zeizong vialte kha a tling dih cang ti kha Jesuh nih cun a hngalh i Cathiang nih a rak chimmi tlinternak caah khan, "Ka ti a hal," tiah a ti. 29 Cuka ah cun mitsur zu thor an chiahnak umpu pakhat a um i zu thor chungah cun puanchia kha an vun hnim i feipar ah an ṭemh i Jesuh cu an hun tuh. 30 Jesuh nih mitsur zu thor cu a vun dawp i, "Aa lim cang," tiah a ti. Cun a lu a khun i a thi. 31 Cu ni cu Cawnningani a si. Judah mi nih cun an thahmi hna cu Sabbath ni i vailam tahnak i an i thlai ko kha an duh lo, cu Sabbath cu a thiang khunmi sabbath a si fawn. Cucaah Pilat sinah khan an va kal i hi hna hi an ke ruh kan den hna lai i vailam cungin kan ṭhumh hna lai, tiah a nawl an va hal. 32 Cucaah ralkap kha an va kal i amah sinah an thahmi hna lak i tonter deuhpa kha a ke ruh cu an vun den ve, cun pakhat pa zong an den ve. 33 Sihmanhsehlaw Jesuh sin an phak tikah cun a rak thih cang kha an hmuh i cucaah a ke ruh kha an deng hna lo. 34 Asinain ralkap pakhat nih a hnak kha fei in a hun chunh i thi le ti kha an chuak. 35 (Hi thil a hmutu nih hi kong a chimnak cu nannih zong nih nan zumh khawh ve nakhnga caah a si. A chimmi cu biatak a si i biatak ka chim tiah a hngalh). 36 Cathiang nih, "A ruh pakhat hmanh khiah a si lai lo," tiah a rak timi tlinnak caah khan a si. 37 Cun, "An chunhmi cu mi nih an zoh lai," tiah a chimtu Cathiang bia zong a um fawn. 38 Cu hnuah cun Arimathea khuami Josef nih khan Jesuh ruak cu ka la kho hnga maw tiah Pilat kha a hal. (Josef cu Jesuh zultu a si ve, sihmanhsehlaw Judah upa pawl kha a ṭih hna caah a thlite lawngin a si). Pilat nih cun, na lak khawh, tiah a ti i cucaah cun a va kal i a va lak. 39 Jesuh ton awkah zan i a rak kalmipa Nikodemu zong kha Josef sinah cun a kal i zihmui pawng za khat tluk, mura le aloes cawhmi kha aa ken. 40 Cu hna pahnih nih cun Jesuh ruak cu an lak i zihmui he khan khiangrang puan in an zual; cucu Judah mi nih vui awk i ruak an timhtuahning a si. 41 Jesuh an thahnak hmun ah khan dum pakhat a um i cu dum chungah cun ahohmanh an vui rih hna lonak thlan thar pakhat a um. 42 Cu ni cu Judah mi hna Sabbath lai ni a si ca le thlan cu a naih zong a naih caah cuka ah cun Jesuh cu an chiah.
1 Zarhpi ni zingkate ah, khuadei hlanah khin, Mary Magdalin cu thlan ah khan a va kal i thlankhar lung a rak i thawn cang kha a hmuh. 2 Mary cu a tli i Simon Peter le zultu dang pakhat, Jesuh nih a dawtmi kha, "Bawipa cu thlan chung khan an lak cang i khuazei i an chiah kan hngal lo," tiah a chimh hna. 3 Cun Peter le zultu dang cu an i thawh i thlan ah cun an va kal. 4 An pahnih cun an le, zultu dang kha Peter nakcun a ṭhawng deuh i thlan kha a phan hmasa. 5 A vun bih i khiangrang puan kha cu a hmuh hna, sihmanhsehlaw a lut lo. 6 A hnu in Simon Peter cu a ra le cutmat i thlan ah khan a lut colh. Cuka i a ummi khiangrang puan le 7 Jesuh lu an mennak puan kha a hmuh hna. Cu puan cu khiangrang puan hna sinah khan a um lo, amah dang tein aa zual. 8 Cun thlan a phan hmasami zultu zong kha a lut ve i a hmuh i a zumh. 9 (Cathiang nih thihnak in a tho ṭhan lai tiah a timi kha an hngal ṭhiamṭhiam rih lo.) 10 Cun zultu hna cu inn ah an kir. 11 Mary cu thlan lengah cun a dir i a ṭap. A ṭah pah cun a vung kun i thlan chung kha a vun bih. 12 Thil rang in aa thuammi vanmi pahnih a hmuh hna i Jesuh ruak a rak umnak ah khan pakhat a lu leiah, pakhat a ke leiah an ṭhu. 13 "Zeicahdah na ṭah len ko?" tiah an hal. Anih nih, "Ka Bawipa kha an kalpi i khuazei i an chiah ka hngal lo," tiah a leh hna. 14 Cu bia a vun chim dih ah khan a hnulei ah a hun i mer i Jesuh a dir ko kha a hmuh; sihmanhsehlaw Jesuh a si ti awk a hngal lo. 15 Jesuh nih cun, "Zeicahdah na ṭah len ko? Ahodah na kawl?" tiah a hal. Mary nih cun dum cawngtu pa kha a si rua tiah a ruah i, "Bawipa, nangmah nih na lak a si ahcun na chiahnak kha ka chim tuah, ka va kal lai i ka va lak lai," tiah a ti. 16 Jesuh nih cun, "Mary," tiah a vun ti i amah leiah cun a vun i mer i Hebru holh in Rabboni,'' tiah a ti. (A sullam cu, saya tinak a si.) 17 Jesuh nih cun, "Ka tlai peng ko tuah hlah, zeicahtiah ka Pa sinah ka kir rih lo. Sihmanhsehlaw ka unau pawl sinah khan va kal law, 'Ka Pa le nan Pa, ka Pathian le nan Pathian a simi sinah khan ka kal lai,' a ti tiah va chim hna," tiah a ti. 18 Cucaah Mary Magdalin cu a kal i Bawipa cu ka hmuh i hi bia hi a ka chimh tiah a zultu kha a va chimh hna. 19 Zarhpi ni zanlei sang tlai nawn ah khin a zultu hna cu an i pum i Judah upa kha an ṭih hna caah inn an i hrenhkhumh. Cun Jesuh kha a ra i an lakah cun a hung dir. "Nan cungah daihnak um ko seh," tiah a ti hna. 20 Cu bia a chim dih cun a kut le a hnak kha a hmuhsak hna. Bawipa an hmuh ṭhan caah a zultu hna cu lunglawmhnak in an khat. 21 Cun Jesuh nih cun, "Nan cungah daihnak um ko seh, Ka Pa nih a ka thlah bantukin kei zong nih kan thlah ve hna," tiah a ti ṭhan hna. 22 Cu bia cu a chim dih in a thaw a chuahhnawh hna i, "Thiang Thlarau kha hmu ko u. 23 Mi kha an sualnak nan ngaihthiam hna ahcun ngaihthiam an si ko, nan ngaihthiam hna lo ahcun ngaihthiam lo an si ko," tiah a ti. 24 Zultu hleihnih lak i aa telmi Thomas (Faphir timi) kha Jesuh a rat ah khan an sinah a rak um lo. 25 Cucaah zultu dang nih khan, "Bawipa kha kan hmuh," tiah an chimh. Thomas nih cun a thawh hna i, "A kut i thir hmaneh kha ka hmuh hna i cu thir hmaneh le a hnak kha ka kut in ka tawngh hna lo ahcun ka zum lai lo," tiah a ti hna. 26 Cu hnu zarh khat ah khin a zultu hna cu inn chungah khan an um ṭhan i Thomas zong kha a um ve. Innka cu an hrenh dih hna, sihmanhsehlaw Jesuh cu a rung lut i an lakah khan a dir, "Nan cungah daihnak um ko seh," tiah a ti. 27 Cun Thomas cu a thawh i, "Hika ah hin ra law ka kut hi zoh tuah hna; cun ka hnak kha ka tawng tuah. Zum loin um ti hlah, zum cang ko," tiah a ti. 28 Thomas nih cun, "Ka Bawipa le ka Pathian," tiah a ti. 29 Jesuh nih cun, "Na ka hmuh caah na ka zumh. Sihmanhsehlaw keimah hmu loin a ka zummi hna caah cun lunglawmh awk a va si dah," tiah a ti. 30 Hi cauk chung i ṭial lomi hmelchunhnak tampi, Jesuh nih a zultu hna hmai i a tuahmi an um ko rih. 31 Hi thil lianngan a tuahmi hna ka ṭialnak chan cu, nannih nih Jesuh cu Messiah, Pathian Fapa a si ti kha nan zumh i cu nan zumhnak thawngin amah min in nunnak nan hmuh nakhnga caah a si.
1 Cu hnuah Jesuh cu a zultu hna sinah khan Tiberias Rili ah voi khat a lang ṭhan. A langhning cu hitihin a si: 2 Simon Peter le Faphir timi Thomas le Galilee peng Kana khuami Nathanael le Zebedi fapa hna kha le Jesuh zultu a dang pahnih hna kha hmunkhat ah an um i 3 Peter nih a hawile cu a thawh hna i, "Kei cu ngatlaih ah ka kal lai," a ti hna. Annih nih, "Na sinah kan kal ve lai," an ti i lawng chungah khan an lut. Sihmanhsehlaw zan khuadei zeihmanh an tlai lo. 4 Ni a hung chuah ah khin Jesuh cu tikam ah khan a dir i asinain a zultu hna nih khan Jesuh a si ti awk an hngal lo. 5 Jesuh nih cun a thawh hna i, "Tlangval hna, zeihmanh nan tlai lo maw?" tiah a ti hna. Annih nih, "Zeihmanh kan tlai lo," tiah an leh. 6 Annih cu a thawh hna i, "Nan sur kha nan lawng orhlei kamah khan vun chep u law tlawmpal cu nan tlaih hmanh maw," tiah a ti. Cucaah an sur cu an vun cheh i nga cu tam tuk hringhran an tlaih caah a hnuh hmanh an hnuk kho lo. 7 Jesuh dawtmi zultu nih khan Peter cu, "Bawipa dahkaw a si," tiah a chimh. Bawipa a si ti kha Peter nih cun a theih tikah a puan kha aa menh i ti chungah a zuang (a puan kha a rak i phoih caah a si). 8 Zultu dang pawl kha lawng cun tikam ah khan an kal i nga a khatmi sur kha tikam leiah cun an hnuh. Tikam in lamhlapi ah an um lo, Pe za thum hrawng lawng a si. 9 Tikam i an va chuah ah khan meiṭil i nga an rak emmi le changreu tlawmte kha an hmuh. 10 Cun Jesuh nih khan annih cu, "Atu i nan tlaihmi nga cu tlawmpal in rak pu hna u," tiah a ti. 11 Simon Peter kha lawngah cun a va kai i nga ngan pipi a khat in a ummi sur cu tikam ah khan a hun hnuh, an dihlak ah za le sawm nga le pathum a si, cu tluk cun an tam nain sur cu a tlek lo. 12 Jesuh nih cun, "Ra u law ra ei u," tiah a ti hna. A zultu ahohmanh nih khan, "Ahodah na si?" tiah an hal ngam lo, zeicahtiah Bawipa a si kha an hngalh. 13 Cun Jesuh cu a va kal i changreu kha a lak i annih kha a pek hna; nga zong kha a pek hna. 14 Thihnak in thawhter a si hnuah, atu hi Jesuh nih a zultu hna sinah a langh a voi thumnak a si. 15 Rawl an ei dih hnuah Jesuh nih Simon Peter cu a thawh i, "Johan fapa Simon, hi hna nih an ka dawtnak hin nang nih na ka daw deuh maw?" tiah a ti. "Asi, Bawipa, kan dawt kha na hngalh," tiah a leh. Jesuh nih, "Ka tuufa tete kha cawm hna," tiah a ti. 16 Jesuh nih cun a thawh ṭhan i, "Johan fapa Simon, na ka daw maw?" tiah a ti ṭhan. "Asi, Bawipa, kan dawt cu na hngalh," tiah a leh. Jesuh nih, "Ka tuu kha cawm hna," tiah a ti. 17 Cun Jesuh nih cun, "Johan fapa Simon, na ka daw maw?" tiah a ti ṭhan hoi. Jesuh nih, voi thum tiang, na ka daw maw, tiah a hal caah khan Peter cu a ngaih a chia i, "Bawipa, nangmah nih zeizong vialte na hngalh dih, kan dawt cu na hngalh ko hen cu," a ti. Jesuh nih cun, "Ka tuu kha zohkhenh hna. 18 Biatak kan chimh: na no lioah cun nangmah nih na taisawm kha naa sawmh i na duhnak paoh ah na kal tawn; sihmanhsehlaw na tar tikah cun na kut na zao hna lai i midang nih na kut cu an ṭem hna lai i na duh lonak hmun ah khan an in kalpi lai," tiah a ti. 19 (Hi bantukin Jesuh nih a chim tikah khan Peter cu zei bantuk thihnak in dah a thih lai i zeitindah Pathian kha sunparnak a pek lai ti kha a hmuhsak duh caah a si). Cun Jesuh nih, "Ka zul," tiah a ti. 20 Peter cu a hun i mer i Jesuh dawtmi zultu nih a zulh hna kha a hmuh — cu pa cu rawl an ei lio i Jesuh hngauh in a um i, "Bawipa, ahodah nangmah rawitu cu a si lai," tiah a haltu kha a si. 21 Cu pa cu Peter nih khan a hmuh tikah, "Hi pa hi tah zeitindah a si lai?" tiah Jesuh kha a hal. 22 Jesuh nih cun, "Ka rat ṭhan tiang a nun kha ka duh a si ah, cucu nang caah zeidah a poinak a um? A zulh tu ka zul ko," tiah a leh. 23 Cu bia cu Jesuh zultu pawl sinah khan a thang i kha zultu kha a thi lai lo a ti duhnak a si, tiin a sullam an i lak. Sihmanhsehlaw Jesuh nih khan, a thi lai lo, tiah a chim lo; a chimmi cu, "Ka rat tiang a nun ka duh a si ah, cucu nang caah zeidah a poinak a um," ti tu hi a si. 24 Hi pa cu zultu a si i hi thil hna a chimtu le a ṭialtu zong a si; a chimmi cu ahmaan ti kha kan hngalh. 25 Jesuh nih a tuahmi a dang tampi a um ko rih. An dihlak in pakhat hnu pakhat in ṭial si hna seh law, an ṭialnak cauk cu vawlei nih hin a tlum hna hnga lo, tiah ka ruah.
1 Ka dawtmi Theofilas: Ka cauk hmasa u ah khan Jesuh nih rianṭuan hram aa thawk ri in vancung i lak a si ni tiang 2 a tuahmi thil vialte le a cawnpiaknak vialte kha ka ṭial. Vancung i a kal hlanah khan a lamkaltu caah a thimmi hna kha Thiang Thlarau thawngin a cawnpiak hna. 3 A thih hnuah ni sawm li chung an sinah voi tampi a lang i a nung ṭhan hrimhrim ti kha zumh lo awk zeihmanh um loin lam tam piin a langhter: annih nih amah cu an hmuh i anih nih Pathian Pennak kong kha a ruah hna. 4 Cun an sin i a um lioah khan hi nawlbia hi a pek hna i, "Jerusalem khua hi chuahtak hlah u, ka Pa nih a rak in kamhmi hna laksawng ka rak in chimhmi hna tu kha hngak ko u. 5 Johan nih cun ti in tipilnak a pek hna, sihmanhsehlaw kan hmailei ni tlawmte chungah hin Thiang Thlarau in tipilpek nan si lai," tiah a ti. 6 Jesuh le a lamkaltu hna cu hmunkhat i an um tikah khan, a lamkaltu hna nih cun an thawh i, "Bawipa, atu caan ah hin maw Israel mi cu uknak kha na pek ṭhan hna lai?" tiah an hal. 7 Jesuh nih cun a thawh hna i, "Ka Pa nih amah nawlngeihnak chungah a chiahmi caan le nithla kong cu nannih hngalh awk a herh lo. 8 Asinain Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai," tiah a ti hna. 9 Hi bia a chim dih in an hmuh hngan te ah cun vancung ah a kai; cun minmei nih a hun phenh i an hmu kho ti lo. 10 Annih nih a liam riahmah kha an cuanh ko lioah cun, puan rang aih in minung pahnih an pawngah cun chikkhatte ah khin an rung dir i, 11 "Galilee mi hna, zeicahdah van lei zoh in nan dir ko? Nan sinin van ah a kaimi Jesuh hi, van ah a kai nan hmuh bantukte hin a ra kir ṭhan lai," tiah an ti hna. 12 Cun lamkaltu hna cu Oliv Tlang khan Jerusalem khua ah khan an kir; cucu Jerusalem khua in meng cheu tluk a si. 13 Jerusalem khua chungah khan an lut i an rak umnak khaan chungah khan an va kal: Peter, Johan, Jeim le Andru, Filip le Thomas, Bartholomew le Matthai, Alfeas fapa Jeim, Phunṭanh Simon le Jeim fapa Judas an si. 14 Thlacam awkah atu le atu a bu tein an i pum i an sinah cun nu hna le Jesuh nu Mary le Jesuh naule kha an um ve. 15 Cu hnu ni tlawmpal ah khan Jesuh a zummi hna kha an i pum i an dihlak ah za khat le kul tluk an si; cu pumhnak ah cun Peter cu a tho i, 16 "Ka u le ka nau hna, Jesuh a tlaitu hna lam hruaitu Judas kong ah, Thiang Thlarau nih David ka in a chimchungmi bia, Cathiang chung i aa ṭialmi kha a tlin awk a herh. 17 Judas cu kan rian ah hin i tel ve awkah thim a rak si caah khan kan bu chungah hin a rak i tel ve," tiah a ti. 18 (Judas nih khan thil ṭhalo a tuahmi man ah tangka a hmuhmi khan lo pakhat a cawk i cuka ah cun thi lakin a tlu i a kek dih i a chungril vialte a chuak dih. 19 Jerusalem khua i a ummi vialte nih cucu an theih i cu lo cu a min ah anmah holh in Akeldama an sak i, a sullam cu Thisen Chuahnak Lo ti a si). Peter nih cun, "Salm cauk chungah khan, 20 'A inn cu lawng seh law a chungah ahohmanh um hna hlah seh,' tiin le 'A rianṭuannak hmun zong kha pakhatkhat nih rawlh hna seh,' tiin aa ṭial i 21 cucaah Bawipa Jesuh a thawh-ṭhannak a hngaltu tehte si ve awk caah pakhatkhat nih cun a kan chap a hau. 22 Amah cu Bawipa Jesuh nih kanmah he khual a tlawn lengmang lio i kan sin i aa tel lengmang vemi, Johan nih tipil innak kong a chim ri in Jesuh nih van ah a kan kaitak tiang kan sinah aa tel lengmang vemi a si awk a si," tiah a ti. 23 Cucaah mi pahnih min kha an chuahpi: cu hna cu Josef, Barsabbas an timi, (Justas ti zongah an ti fawnmi) le Matthias kha an si. 24 Cun thla an cam i, "Bawipa, nangmah nih minung lungthin vialte cu na hngalh dih. 25 Cucaah Judas nih amah hmun a simi i kal awkah a chuahtakmi rian, lamkaltu hna rian rawlh awkah, hi pahnih hna lakah hin aho deuh hi dah na thimmi an si, kan hmuhsak tuah," tiah an ti. 26 Cun cu hna pahnih lakah aho deuh cu dah kan thim lai tinak caah camcawhfung an zuh i an thimmi cu Matthias kha a si; cun amah cu lamkaltu pahleikhat hna bu chungah khan a lut.
1 Pentekos ni kha a phak tikah zumtu vialte cu hmunkhat ah an i pum. 2 Chikkhatte ah khin van in aw pakhat a rung i a thawng cu thlitu fak piin a hrangmi thawng bantuk a si i an ṭhutnak inn kha a khat dih. 3 Cun meizik he aa lomi leiṭe an hung chuah kha an hmuh hna i cuka i a ummi hna an dihlak cungah khan lei cu pakhat cio ah an i fu. 4 Annih cu Thiang Thlarau in an khat i Thlarau nih chim khawhnak a pek hna bantuk cio khan, holh dang in an holh. 5 Cun Jerusalem khua chungah vawleicung khuazakip in a rami Judah mi an um liote kha a si; cu hna cu biaknak lei i aa zuam ngaingaimi pawl kha an si. 6 Cu thawng cu an theih tikah mi tampi an i pum. A zummi hna an holh tikah khan midang aa pum vemi hna nih khan kanmah holh in an holh, tiin an rak theih cio tikah khan an khuaruah a har ngaingai. 7 An lung a suk ngaingai hna i, "Hiti in bia a chimmi hna hi Galilee mi an si ko ṭung! 8 Zeitindah kan i chuahkehpimi holh cio holh in kan dihlak in kan theih kun hna? 9 Kannih cu Parthia ram hna, Media ram hna, Elam ram hna, Mesopotamia ram hna, Judea ram hna, Kappadosia ram hna, Pontas ram hna, Asia ram hna, 10 Frizia ram hna, Pamfilia ram hna, Izipt ram hna le Libia ram chung i a ummi Sairin khua pawng ram hna in a rami kan si; cun a cheu cu Romans khua in a rami kan si, 11 Judah mi kan si ah, Judah phun aa hrawmmi Jentail mi kan si ah, cun a cheu cu Krit tikulh le Arabia ram in a rami kan si fawn — asinain Pathian nih thil lianngan a tuahmi hna kha an chim tikah an chimmi cu kan holh in an chim tiin kan theih cio hna," tiah an ti. 12 Khuaruahhar le lung-ar in, "Mah hihi a sullam zeidah a si hnga?" tiah pakhat le pakhat an i hal lengmang. 13 Sihmanhsehlaw midang nih cun an nihsawh hna i, "Hi hna hi zu an ri," tiah an ti hna. 14 Khi tikah Peter cu lamkaltu hleikhat hna he khan a hung dir i, aw thang ngaiin a thawh hna i, "Ka phun hawi Judah mi hna le Jerusalem khua ah a ummi vialte hna, hiti in thil a hung ummi sullam hi zeidah a si tiah kan chimhmi hna hi ṭha tein ngai tuah u. 15 Hi mi hna hi nannih nih nan ruahnak ah zu an ri, nan ti; cucu a si lo, zu an ri lo; atu cu zinglei suimilam pakua lawng pei a si ko rih hi. 16 Zeidah a si deuh ti ahcun, Pathian nih profet Joel kaa in a rak chimmi kong kha a si. Zeitindah a ti tiah: 17 'Ni hmanung bik ah cun mi vialte kha ka Thlarau ka toih hna lai. Nan fapa hna le nan fanu hna nih bia an chim lai; Nan tlangval hna nih langhnak an hmuh lai i Nan tar hna nih mang an manh lai. 18 Asi, ka salnu hna le ka salpa hna cung hmanh ah khan cu ni ah cun ka Thlarau kha ka bungh lai i bia an chim lai. 19 Cunglei van ah khin khuaruahharmi thil ka tuah hna lai i Tanglei vawlei ah hin hmelchunhnak ka umter hna lai — thisen le mei le a chahmi meikhu an si lai. 20 Bawipa Ni, a sunglawimi ni le a liannganmi ni a phak hlanah khan Ni cu a mui lai i thlapa cu thisen bantukin a sen lai. 21 Cu tikah Bawipa min a aumi paoh cu khamhnak an hmu lai,' a ti. 22 "Israel mi hna, hi ka bia hi ngai tuah u. Nazareth khuami Jesuh cu Pathian nih rian a fialmi a si ti kha, Pathian nih amah thawngin a tuahmi khuaruahharnak tehna, hmelchunhnak tehna le thil lianngan hna nih khan an langhter ko; hi ka chimmi hi nanmah hrimhrim nih nan hngalhmi an si, zeicahtiah nanmah lak hrimhrim ah a rak tuahmi thil an si. 23 Pathian nih Jesuh cu nan sin i pek awkah khan a rak ruah ciami le a rak khiah ciami a si bangin nannih nih amah cu nan thah, misual mi hna kha amah cu vailamtahnak thing cungah thir in nan khenhter hna. 24 Sihmanhsehlaw Pathian nih amah cu mithi hna sin khan a thawhter ṭhan, thihnak nih amah cu a tlaih peng khawhnak ding zeihmanh a um lo. 25 David nih amah kong hi hi bantukin a rak chim i, 'Bawipa cu ka hmaiah ka hmuh zungzal ko; Ka orhlei kam i a um caah khan ka awlok a chong lai lo, 26 Hi ruangah hin ka lung cu aa lawm i ka bia cu thanuamnak in a khat; Kei cu a thi ko dingmi minung si hmanh ning law 27 Mithikhua ah khan ka thlarau cu na kaltak lai lo caah Ruahchannak ngei in hnangam tein ka um ko lai. Nangmah an tlaihchanmi na sal cu ṭhutnak kha na hmuhter lai lo. 28 Nunnak lei kalpitu lam kha na ka hmuhsak i Nangmah cu ka sinah na um caah lawmhnak in ka khat,' a rak ti. 29 "U le nau hna, kan pu David kong kha fiang tein in chim tuah hna ning. Anih cu a thi i an vui i nihin ni tiang hin a thlan zong kan sinah a um ko rih. 30 Amah cu profet a rak si i Pathian nih a sinah biakamnak a tuahmi kha a hngalh. Pathian nih bia a rak kammi cu, David tefa pakhat khat cu amah David bantuk khan siangpahrang ah a canter te lai, ti hi a si. 31 David nih cun Pathian nih zeidah a tuah lai ti kha a rak hmuh i cu caah, 'Amah cu mithikhua ah a kaltak lo, a titsa cu thutnak a hmu lo,' tiah a rak ti tikah hin, Messiah a thawh ṭhan lainak kong kha a chimmi cu a si. 32 Pathian nih hi Jesuh hrimhrim hi mithi hna sin cun a thawhter i hi thil tehte a khangtu cu kanmah hi kan si. 33 Pathian orhlei kamah khan ṭhutter a si i a Pa nih bia a kam bantuk khan Thiang Thlarau cu a Pa sin khan a hmuh; cun atu i nan hmuhmi le nan theihmi hi kannih a kan toihmi a laksawng kha a si. 34 Zeicah kan ti ahcun amah David cu vancung ah a kai ṭung lo, aa thawh i pei: 'Bawipa nih ka Bawipa cu, "Ka orhlei kamah hin ṭhu tuah, 35 Na ke tangah na ral hna cu na kelamh ah ka chiah hna hlan tiangin," a ti cu,' tiah a ti kha. 36 "Israel mi vialte hna, nannih nih vailam tahnak thing cungah nan khenh chihmi Jesuh hrimhrim hi Pathian nih Bawipa ah le Messiah ah a ser cang, ti kha fiang tein hngal u," tiah a ti. 37 Hi kong kha an theih tikah an lungthin a hriah ngaingai hna i Peter le lamkaltu dang kha an thawh hna i, "U le nau hna, zeidah kan tuah kun lai?" an ti. 38 Peter nih annih cu a thawh hna i, "Nan dihlak in, pakhat hmanh bau loin, nan sualnak khan i mer tuah u, nan sualnak kha, ngaihthiam nan si nakhnga nan sualnak khan i mer u law Jesuh Khrih min in tipilnak ing tuah u; cun Pathian laksawng Thiang Thlarau kha nan hmuh lai. 39 Zeicahtiah Pathian nih bia a kamhmi hna cu nanmah hi le nan fale hna hi le lam hlat pipi i a ummi hna zong nan si — Bawipa kan Pathian nih an kawhmi hna paoh caah hin a si," tiah a ti. 40 Peter nih cun bia dang zong tampi a chimh hna i, "Hi chan ṭhalo cungah a tlung dingmi dantatnak hin luat i zuam ko u," tiah a forh hna. 41 Mi tampi nih a bia cu an zumh i tipil kha an in; cu ni ah cun an bu ah mi thong thum tluk an i chap. 42 Lamkaltu hna cawnpiaknak ngaih awkah khan atu le atu an i pum i hawikomhnak ah khan an i tel i hawikomhnak rawl an dum ṭi i thla an cam ṭi lengmang. 43 Lamkaltu hna kha Pathian nih khuaruahharnak le hmelchunhnak tampi a tuahter hna i cu nih cun mizapi kha ṭihnak in a khahter hna. 44 A zummi vialte hna cu i kom ṭhipṭhep tein khua an sa i an thil kha pakhat le pakhat an i hrawm. 45 An thil le an ngeihmi kha an zuar hna i tangka an hmuhmi kha a dihlak in an herhning cio paoh in an i phaw. 46 Ni fate in a bute in biakinn chungah khan an i pum i an inn ah khan rawl an i hrawng cio hna i lunglawmhnak lungthin le toidornak lungthin he rawl cu an ei. 47 Pathian kha an thangṭhat i mi vialte nih an hmaizah hna. Cun khamh a si liomi hna cu Bawipa nih ni fate in an bu chungah khan a luhter lengmang hna.
1 Ni khat cu, zanlei suimilam pathum, thlacam caan ah khin, Peter le Johan cu biaknak inn ah khan an hung kal. 2 Khika ah, Kutka Dawh timi ah khan a chuah kate in a ke a beimi pakhat kha a rak um. Biakinn i a kalmi hna kha tangka a hal khawh hna nakhnga amah cu ni fate in cu kutka ah cun a puak in an hei puak tawn. 3 Peter le Johan cu an luh kha a hmuh hna tikah, thil ṭhenh a hal hna. 4 Amah cu dengteo in an vun zoh i Peter nih a vun thawh i, "Hun kan zoh," tiah a ti. 5 Cucaah zeimaw an ka pek rua lai ti kha a hun i ruahchan i ṭhep loin a hun zoh hna. 6 Cun Peter nih a thawh i, "Sui le ngun zeihmanh ka ngei lo, sihmanhsehlaw ka ngeihmi cu kan pek lai: Nazareth khuami Jesuh Khrih min in, tho law kal, kan ti," tiah a ti. 7 Cun a orhlei kut khan a vun thawh i a dirter. Chikkhatte ah khin mipa cu a ke le a fengbeo hna cu an hung ṭhawng i 8 a tho duak i a dir i aa chawk. Cun an sinah cun biakinn chungah khan a lut i aa chawk i a per a choi i Pathian kha a thangṭhat. 9 Mizapi nih khan aa chawh i Pathian a thangṭhat kha an hmuh; 10 cun amah cu Kutka Dawh i a ṭhu tawnmi awkhlawhpa a si kha an hngalh tikah a cung i a tlungmi kongah khan an khuaruah a har i an lung zong a ar dih. 11 Mipa cu Peter le Johan sin lawngah khan aa hel caah mizapi cu an khuaruah a har i Solomon Innleng timi ah khan an sinah cun an va le i, 12 Peter nih a rak hmuh hna tikah khan a rak thawh hna i, "Ka phun hawi Israel mi hna, zeicahdah hi thil kongah nan khuaruah a har i kanmah lehlam cu ngang koin nan kan zoh? Hi pa kan kalter khawh hi kanmah ṭhawnnak in le Pathian hmai i kan ṭhatnak thawngin maw a si tiah nan ruah? 13 Abraham, Isak le Jakob Pathian, kan pupa hna Pathian nih khan a sal Jesuh cu Pathian sunparnak kha a pek cang. Amah cu nawl ngeitu hna sinah khan nan chanh i Pilat nih ka luatter ko lai a ti hmanh ah khan, Pilat hmai hrimhrim ah, nan hlawt ṭhiamṭhiam. 14 Amah cu mithiang le miṭha a si nain nannih nih cun nan duh lo i Pilat cu lainawng lehlam kha kan thlahpiak ko, nan ti. 15 Cucaah nunnak lam ah mi a hruaitu cu nan thah. Sihmanhsehlaw amah cu Pathian nih mithi hna sinin a thawhter i cu a thawhternak tehte cu kanmah hi kan si. 16 Hi kebeipa thazang a petu hi amah min ṭhawnnak cu a si i atu i nan hmuhmi le nan hngalhmi hi amah min zumhnak thawngin tuahmi a si; hi bantukin nan hmaika ah a damtertu hi Jesuh min zumh hi a si. 17 "Ka u le ka nau hna, Jesuh cung i nanmah le nan haotu hna nih nan rak tuahmi kha zei a si ti awk nan rak hngalh lo ruangah a si ti kha fiang tein ka hngalh. 18 Pathian nih hlan lio pi in a profet vialte hna sin khan, ka Messiah nih cun fahnak a in lai, ti kha a rak thanh chung cang i cu a bia cu hiti ning hin a tlinter. 19 Cucaah nan sualnak cu an hnawhpiak hna nakhnga, i ngaihchih u law Pathian leiah khan i mer tuah u. 20 Cun Bawipa nih thlarau thazang thar hmuhnak caan ṭha an pek hna lai i amah nih nan caah a thim cangmi Messiah, Jesuh kha nan sinah a run thlah lai. 21 Pathian nih a thiangmi a profet hna sinin hlan liopi ah a rak thanh cang bantukin, zei zong vialte a thar in ser caan a phak hlantiang vancung ah cun a um ko lai. 22 Moses nih zeitindah a rak ti tiah, 'Bawipa Pathian nih keimah a ka thlah bantuk hin, nan mi a simi profet pakhat kha aan thlah hna lai. Amah nih an chimhmi hna kha a dihlak in nan ngaih lai. 23 Cu profet nih a chimmi bia a ngai lomi paoh cu Pathian mi hna sinin ṭhen a si lai i hrawh a si lai,' a ti. 24 Cun Samuel thawk in a hnu i a ummi profet vialte hna nih, hi atu caan kong hi an dihlak in an bia i khat tein an rak chimchung cio. 25 Pathian nih a profet hna sinin biakamnak a sermi cu nanmah caah a si i nan pupa hna sinah Pathian nih biakamnak a sermi chung i aa telmi cu nan si. Kha biakamnak a ser tikah khan Abraham sinah cun a thawh i, 'Nangmah na tefa hna thawngin vawleicung mi vialte cu thluachuahnak ka pek hna lai,' tiah a rak ti. 26 Cucaah Pathian nih a Sal cu a thim i nan sinah a hmasa bik ah a rak thlah, cuti in a rak thlahnak cu, nan ziaza ṭhalo kha nan mertak hna i thluachuahnak an pek hna nakhnga caah a si," tiah a ti.
1 Peter le Johan cu mizapi kha bia an chimh lengmang hna lioah khan, tlangbawi hna le biakinn cawngtu pawl bawi le Sadusi mi hna kha an sinah cun an rak phan, 2 Lamkaltu pahnih hna nih khan mizapi cu, mithi mi kha thihnak in an tho ṭhan lai, zeicahtiah Jesuh kha thihnak in a tho ṭhan cang i cu nih cun mithi mi kha nunnak ah an tho ṭhan lai ti kha a fianter tiin an cawnpiak hna caah, an cungah khan an thin a hung ngaingai. 3 Cucaah an tlaih hna i cu ni cu a tlai nawn cang caah a thaizing tiang thong ah an thlak hna. 4 Sihmanhsehlaw an chimmi a theimi mi tampi nih khan an zumh i an dihlak ah thong nga hrawng an hung si. 5 A thaizing ah cun Judah mi hruitu hna le upa hna le Phungbia cawnpiaktu saya hna kha Jerusalem ah khan an i pum. 6 Cuka ah cun Tlangbawi Ngan Annas le Kaiafas le Johan le Alekzandar le Tlangbawi Ngan innchungkhar chungmi mi dangdang zong kha an i tel. 7 Lamkaltu hna kha an hmaiah an dirter hna i, "Mah hihi zeitindah nan tuah? Zei ṭhawnnak dah nan ngeih? Aho min dah nan hman?" tiah an hal hna. 8 Cun Thiang Thlarau in a khatmi Peter nih cun a leh hna i, "Mizapi hruitu hna le upa hna: 9 A beimipa cungah thil ṭha tuah a sinak kong le zeitindah damter a sinak kha nihin ah hin nan kan hal duhmi cu a si ahcun, 10 nannih nan dihlak le Israel mi vialte dihlak nih nan hngalh awk cu, hi pa dam hirhiar tein nan hmaiah a dir khawhnak cu Nazareth khuami Jesuh Khrih, nannih nih nan thah i Pathian nih thihnak in a thawhter ṭhanmi a min ṭhawnnak thawngin a si. 11 Cathiang nih, 'Inn satu hna nih zei ah nan rel lomi lung cu, Lung santlai bik ah a cang,' tiah a timi kha Jesuh hi a si. 12 Amah thawng lawnglawng in khamhnak hi hmuh khawh a si. Zeicahtiah vawlei cung dihlak ah hin a kan khamh khotu ding min dang zeihmanh a um lo," tiah a ti. 13 Biaceihtu hna nih Peter le Johan cu an ralṭhatning kha an hmuh i fimthiamnak zeihmanh a ngei lomi, mi sawhsawh an si ko ti kha an hngalh tikah an khuaruah a har. Khi tikah annih cu Jesuh hawikom an rak si ti kha an hun hngalh. 14 Peter le Johan nih an damtermipa kha an sinah cun a dir kha an hmuh ko caah, annih nih zeihmanh an chim kho lo. 15 Cucaah, biaceihnak hmun khan chuak u, an ti hna i anmah lawngin an run i ceih. 16 "Zeitindah hi mi hna hi kan tuah hna lai? Jerusalem khua chung i a ummi vialte nih, hi thil theihtlei khuaruahhar hi, hi mi hna nih hin an tuah ti cu an hngalh dihmi a si ko i kannih nih, a si lo, kan ti kho fawn ṭung lo. 17 Sihmanhsehlaw hi thil hi mizapi sinah a karh chin lengmang nakhnga lo, hi mi hna hi Jesuh min in aho sin hmanh ah bia chim ti hlah u, tiah kan thlauh hna lai," tiah an ti. 18 Cucaah inn chungah khan an kawh ṭhan hna i, thil umtuning zei bantuk a si hmanh ah, Jesuh min in ahohmanh nan cawnpiak hrimhrim hna lai lo i aho sin hmanh ah bia zong nan chim hrimhrim lai lo, tiah an ti hna. 19 Sihmanhsehlaw Peter le Johan nih khan an leh hna i, "Pathian mithmuh ah nanmah bia ngaih cu maw a ṭha deuh Pathian bia ngaih dah a ṭha deuh, ti cu nanmah nih ruat ko u. 20 Zei ti si hmanh ah kannih nih cun kanmah hrimhrim nih kan hmuh komi le kan theih komi cu chim lo cun kan um kho bal lai lo," an ti hna. 21 Biaceihtu hna nih cun fak chinchin in an hro hna i an thlah hna. Mizapi nih thil a hung ummi kongah khan Pathian cu an thangṭhat lulhmalh caah dantat khawhnak lam kha an hmu kho lo. 22 Hi damnak khuaruahhar an tuahpiakmipa hi kum sawm li lengmi a si. 23 An thlah cangka hna in Peter le Johan cu an bu sinah khan an va kir i tlangbawi upa pawl le upa hna nih an chimmi kha an va chimh hna. 24 Annih nih an theih tikah hmunkhatte ah Pathian sinah thla an cam i, "Bawipa, van le vawlei le rili le an chung i a ummi thil vialte a Sertu, 25 na Thiang Thlarau in kan pu David na sal sinah bia na rak chim i, 'Zeicahdah Jentail mi hna cu an thin a hun i miphun dang hna nih cun pakpalawng khua an khan? 26 Bawipa le a Messiah cu doh awkah vawleicung siangpahrang hna cu an i tim i uktu hna cu an i pum,' na rak ti. 27 Cuticun Herod le Pontius Pilat cu hi khua chungah hin Jentail mi hna le Israel mi hna he khan, a thiangmi na sal Jesuh, Messiah i na sermi cu doh awkah an i pum taktak. 28 Nangmah nih a hung um te lai ding na rak ruah ciami le na rak khah ciami vialte kha tlinter awkah an i pum. 29 Cucaah atu cu Bawipa, an kan hronak hi kan hngalhpiak law kannih na sal rual nih hin na bia cu ralṭha chinchin in kan chim nakhnga a nawl kan pe ko. 30 Mi nih damnak an hmuh nakhnga na kut cu samh law a thiangmi na Sal Jesuh min in khuaruahharnak le hmelchunhnak cu umter ko hna," tiah an ti. 31 Annih nih thla an cam dih tikah an i pumhnak hmun cu aa hnin. Thiang Thlarau in an khat i Pathian bia cu ralṭha ngaiin an chim. 32 Cun zumtu hna cu an bu ningte in an ruahnak le an lungthin aa khat dih. Ahohmanh nih an thil kha, keimah ta, an ti lo i an ngeihmi paoh kha an i hrawm dih. 33 Lamkaltu hna nih khan Bawipa Jesuh thihnak in a thawhṭhannak kong kha fak piin an chim i Pathian nih an dihlak in thluachuahnak tampi a pek hna. 34 An lakah herh baunak a ngeimi ahohmanh an um lo. Lo a ngeimi nih si hna seh, inn a ngeimi nih si hna seh, an thilri cu an zuarh hna tikah a man tangka an hmuhmi cu 35 lamkaltu hna sinah khan an rak put hna i tangka cu a herhmi paoh kha an herh baunak ning cio ah an phawt hna. 36 Cu bantuk cun Saipras tikulh i a chuakmi Levi mi Josef nih 37 a lo kha a zuarh i tangka kha a rak put i lamkaltu hna kha a pek hna; Josef cu lamkaltu hna nih khan Barnabas tiah an kawh, a sullam cu Thazang Petu tinak a si.
1 Sihmanhsehlaw midang pakhat a um ve i a min cu Ananias a si, a nupi min cu Safira a si. An thil ngeihmi pakhat kha an zuarh i 2 a nupi theih tein a man tangka a cheu cu an i chiah i a cheu cu lamkaltu hna sinah khan an rak put. 3 Peter nih anih cu a rak thawh i, "Ananias, zeicahdah Satan cu na lung kha na ukter i na lo man ah na hmuhmi tangka a cheu kha naa chiah i Thiang Thlarau sinah lih na chim? 4 Na thil cu na zuarh hlanah khan nangmah ta a si, cun na zuarh hnu zongah khan a man cu nangmah ta a si ṭhiamṭhiam ko. A si kun ahcun, zeicahdah cu bantuk thil tuah awkah cun na lung chungin na rak ruah? Minung sinah lih na chim a si ṭung lo, Pathian sinah pei lih na chim a si cu," tiah a ti. 5 Cu bia cu Ananias nih a theih tikah aa teng bak ko i cu thawng a theimi paoh cu ṭihnak in an khat dih. 6 Tlangval kha an rung lut i a ruak kha an zual i an chuahpi i an vui. 7 Cu hnu suimilam pathum tluk ah khin a nupi kha a rung lut ve, thil umtuning kha zeihmanh a hngal lo. 8 Peter nih amah cu a thawh i, "Hi zat taktak hi maw nan lo man ah khan an in pek hna?" tiah a ti i anih nih, "Asi, hi zat hi a si ko," tiah a leh. Cun Peter nih cun a thawh i, 9 "Zeicahdah na va he nan pahnih in Bawipa Thlarau cu hneksak del awkah khua nan rak khan? Na va a va vuitu hna kha innka hram ah an um ko rih khih, nangmah zong an in kalpi ve lai," tiah a ti. 10 Chikkhatte ah a kehram ah khan a tlu i a thi. Tlangval hna cu an rung lut i a thih ve kha an hmuh i an chuahpi i a va kiangah khan an va vui. 11 Khrihfabu le cu thawng a theimi paoh cungah khan ṭihnak nganpi a tlung. 12 Khuaruahharnak tampi le hmelchunhnak tampi kha lamkaltu hna nih cun mizapi lakah khan an tuah. 13 Zumtu hna cu Solomon Innleng timi ah khan an i pum tawn, an bu a lengmi cu ahohmanh an i tel ngam lo nain mi zapi tu nih cun an thangṭhat ko hna. 14 Cuhleiah mi kha an bu ah cun an i chap chin lengmang i Bawipa a zummi hna cu nu he pa he bu nganpi ah an i cang. 15 Lamkaltu hna rianṭuannak thawng cun, mizaw hna cu khuachung lam ah khan an chuahpi hna i Peter aa chawh tikah khan pakhat pahnih tal kha a thla nih tawng hna seh tiin ihkhun cung le pher cungah khan an chiah hna. 16 Cun Jerusalem khua pawngkam khua hna khan mi cu an ra ciammam i an mizaw hna le khuachia nih a tuahmi hna kha an ratpi hna; cun annih cu an dihlak in an dam dih. 17 Cun Tlangbawi Ngan le a hawile hna, cuka hmun i a ummi Sadusi pawl chungmi a simi hna nih khan lamkaltu pawl cu an nahchuah ngaingai hna i cucaah an cungah rian kan ṭuan cang lai, tiah an ti. 18 Lamkaltu kha an tlaih hna i zapi thong ah an thlak hna. 19 Sihmanhsehlaw cu zan ah cun Bawipa vancungmi nih thonginn kutka kha a hun hna i lamkaltu kha a chuahpi hna i, 20 "Va kal u law biakinn chungah khan va dir tuah u, cun mizapi kha hi nunnak thar kong kha va chim hna u," tiah a ti hna. 21 A bia cu lamkaltu hna nih khan an ngaih i khua a dei cangka tein biakinn chungah khan an lut i mizapi cu an cawnpiak hna. Tlangbawi Ngan le a hawile hna kha an ra i Sanhedrin khawngsil pumhnak kha an tuah, cucu Israel miphun khawngsil a ningpi in i pumhnak kha a si; cun lamkaltu hna kha kan hmaiah rak chuahpi hna u, tiin thonginn ah khan mi an hei thlah hna. 22 Sihmanhsehlaw an hei thlahmi hna kha an va phak tikah, thong chungah cun lamkaltu pawl kha an hmu hna lo i cucaah cun khawngsil pawl sinah khan an ra kir i an chimh hna, 23 "Thonginn kan va phak ah cun ṭha tein a rak i hrenh ko i a cawngtu hna kha kutka ah cun an um dih ko; sihmanhsehlaw kutka cu kan vun hun hna tikah a chungah ahohmanh kan hmu hna lo," an ti. 24 Cu thawng cu biakinn cawngtu bawi le tlangbawi upa hna nih khan an theih tikah, lamkaltu hna cungah cun zei ko dah a tlung hnga, tiah an khuaruah a har. 25 Cun mipa pakhat a rung lut i, "Ngai hmanh u, thong i nan thlakmi hna kha biakinn chungah an dir ko i mi an cawnpiak len ko hna," tiah a ti. 26 Cucaah biakinn cawngtu hna bawi cu a mi hna he khan an va kal i lamkaltu cu an ratpi ṭhan hna. Annih nih mizapi nih lung in an kan cheh sual lai ti kha an phan caah thazang cu an hmang ngam lo. 27 Lamkaltu hna kha an run luhpi hna i khawngsil hmaiah khan an dirter hna i Tlangbawi Ngan nih khan kherhlai hram a thawk hna. 28 A thawh hna i, "Hi pa min hin cawnpiak hna hlah u tiah fek tein nawl kan in pek hna, sihmanhsehlaw nan tuahmi hi zohhmanh u! Jerusalem khua hi nan cawnpiaknak in nan khahter i hi pa thihnak hi kanmah tuahmi siter nan duh," tiah a ti. 29 Peter le lamkaltu dang hna nih cun an leh i, "Minung nakin Pathian nawl kan ngaih deuh awk a si. 30 Nannih nih Jesuh cu vailamtahnak i nan thah hnuah kan pupa hna Pathian nih thihnak in a thawhter ṭhan. 31 Israel mi kha i ngaihchihnak caan ṭha le sual ngaihthiamnak pek awkah amah cu Pathian nih a orhlei kamah khan Hruaitu le Khamhtu in a ṭhutter cang. 32 Hi thil vialte hna tehte hi kanmah hi kan si — kanmah lawng si loin Pathian nih amah nawl a ngaimi hna sinah a pekmi Thiang Thlarau zong hi tehte cu a si ve," an ti. 33 Khawngsil pawl nih hi bia kha an theih tikah an thin a hung tuk hringhran i lamkaltu kha thah an duh ko hna. 34 Sihmanhsehlaw an lak i mi pakhat, Farasi a simi a min Gamaliel, Phungbia cawnpiaktu saya, mi vialte nih an hmaizahmi kha khawngsil pawl aa pummi hna lakah cun a hung dir i, lamkaltu hna kha chuahpi hna u, tiah a ti hna. 35 Cun khawngsil pawl cu a thawh hna i, "Israel mi hna, hi mi hna cung i nan tuah duhmi thil kong ah hin i ralring ngaingai u. 36 Kan hnu lei caan tlawmpal ah khan Theudas an timi kha a hung chuak i pa pakhat ka si ve tiah a hun i ti i minung za li tluk nih an zulh. Sihmanhsehlaw amah cu an thah i a zultu hna cu an i ṭhek dih i a rianṭuanmi cu a thi ko. 37 Cun cu pa hnuah cun Galilee mi Judas kha milurel caan ah khan a hung chuak ve; amah zong nih zultu kha a hun ngei tungmang ve, sihmanhsehlaw amah an thah khan a zultu hna cu an i ṭhek dih ṭhan ve ko. 38 Cucaah atu thil zongah hin, nannih nih hi mi hna hi zeihmanh ti hna hlah u. Anmah um in umter ko hna u, zeicahtiah hi khuakhannak le rianṭuannak hi minung sermi men a si ahcun a lo dai ko lai, 39 sihmanhsehlaw Pathian sinin a rami a si ahcun, nan tei kho hlei lai lo. Pathian dotu lehlam ah nan cang sual lai," tiah a ti hna. Khawngsil pawl nih cun Gamaliel ruah-nak cheuhmi kha an zulh. 40 Lamkaltu kha an auh hna i fung in an tuk hna i Jesuh min in bia chim hrimhrim ti hlah u, tiah an ti hna i an thlah hna. 41 Khawngsil pumhnak cun lamkaltu pawl cu an chuak i Jesuh min ruangah Pathian nih ningzah in awk nan i tlak tiah a ruah hna caah an i lawm ngaingai. 42 Cun nifate in biakinn chung le mi inn kip ah Messiah a simi Jesuh kong Thawngṭha kha an cawnpiak hna i an chimh lengmang hna.
1 Cu hnu tlawmpal ah cun, zumtu kha an karh chin lengmang tikah, Grik holh a hmangmi Judah mi hna le Judah holh a hmangmi Judah mi hna karlak ah khan siknak a um. Grik holh a hmangmi Judah mi hna nih khan kannih kan nuhmei hna cu ni fate thil i phawtnak ah hrelh deuh an si tiah an zai. 2 Cucaah lamkaltu pahleihnih hna nih khan zultu dihlak kha an ningpi in an kawh hna i, "Kannih nih Pathian bia chim kha thlahdorh riangmang i tangka i phawtnak kong lawng kha kan tuah ahcun ahmaan hnga lo. 3 Cucaah u le nau hna, nan lakah Thiang Thlarau le fimnak in a khat tiah nan hngalhmi pasarih in thim hna u law, cu hna cu hi thil a tawlreltu ah kan thiah hna lai. 4 Kannih tu cu thlacam le Pathian Bia chimnak ah khan kan caan cu a dihlak in kan hmang ko lai," tiah an ti. 5 Lamkaltu hna nih an chimmi cu an dihlak in an lung a si i cucaah zumhnak le Thiang Thlarau in a khatmi Steven, Filip, Prokhoras, Nikanor, Timon, Parmenas le Antiok khuami Jentail mi Nikolas, Judah phung a zulmi kha an thim hna. 6 Cu hna cu lamkaltu hna sinah khan an hei chuahpi hna i thla an campiak hna i an lu cungah an kut an chuan. 7 Cuticun Pathian bia cu a karh chin lengmang. Jerusalem khua chungah khan a zummi cu an tam chin lengmang i tlangbawi tampi zong nih cu zumhnak cu an pom ve. 8 Pathian nih thluachuahnak tampi a pekmi le ṭhawnnak in a khatmi Steven nih khan mizapi lakah khan a liannganmi khuaruahharnak le hmelchunhnak kha a ser hna. 9 Sihmanhsehlaw mi cheukhat nih amah cu an al; cu hna cu Sal Luat hna pumhnak inn tiah timi i aa pum tawnmi kha an si i cu hna lakah cun Sairin le Alekzandria in a rami Judah mi kha an i tel. Cu hna le Silisia le Asia in a rami Judah mi hna nih khan Steven cu bia an hun al. 10 Sihmanhsehlaw Thlarau nih Steven cu fimnak kha a pek caah bia a chim tikah an tei kho lo. 11 Cucaah mi a cheu kha, "Moses le Pathian a thangchiat hna," tiah ti dingin biaruk an nawh hna. 12 Cuticun mizapi le upa hna le Phungbia cawnpiaktu saya hna kha an tuai hna. Steven cu an fuh i an tlaih i khawngsil hmaiah an chuahpi. 13 Cun amah kong i lih a ṭawntu dingah mi kha an luhpi hna. Cu hna nih cun an i thawh i, "Hi pa nih hin a thiangmi kan biakinn le Moses phung kha a thangchiat zungzal hna. 14 Cun hi Nazareth khuami Jesuh nih hin biakinn hi a ṭheh dih lai i Moses nih a kan pekmi kan phunglam vialte hi a thlen dih lai, a ti kha kan theih," tiah an ti. 15 Khawngsil chung i a ṭhumi vialte hna nih khan Steven cu dengteo in an zoh i a hmai cu vancungmi hmai bantuk a si kha an hmuh.
1 Tlangbawi Ngan nih Steven cu a thawh i, "Hihi a si taktak maw?" tiah a hal. 2 Steven nih cun a leh i, "U le nau le pale hna, ka bia hi ngai tuah u! Kan pu Abraham cu Haran khua i va um awkah a rak i thawh hlan, Mesopotamia ram i a rak um lioah khan sunparnak Pathian cu a sinah a rak lang i, 3 'Na innchungkhar le na ram kha chuahtak hna law kan hmuhsak laimi ram ah kal tuah,' tiah a rak ti. 4 Cucaah Khaldia ram khan a chuak i Haran khua ah khan a um. Cun Abraham cu a pa a thih hnuah atu i nan umnak ram ah hin Pathian nih a rak thawnter. 5 Cu lioah cun hi ram hi a pelpawite hmanh Abraham cu a rak pe lo, pe khat taktak hmanh a rak pe lo; sihmanhsehlaw Pathian nih bia a kam i hi ram hi nangmah kan pek lai i nangmah le na hnu i a rung um ding na tefa hna ta a si lai, tiah a ti. Cu biakamnak Pathian nih a rak pek lioah hin Abraham cu fa zeihmanh a ngei lo. 6 Pathian nih a rak chimhmi cu, 'Na tefa hna cu miphun dang ram ah an um lai i khika ah sal an si lai i kum za li chung hremnak an ing lai. 7 Sihmanhsehlaw an rianhmi hna miphun cu bia ka ceih hna lai,' ti hi a si i, 'Cun a hnuah cu ram cun an chuak lai i hi hmun ah hin an ka biak lai,' ti zongah Pathian nih cun a ti fawn. 8 Cun Pathian nih Abraham cu cuarpartannak phunglam kha biakamnak hmelchunhnak caah a pek i cucaah Abraham nih cun Isak kha a chuah hnu zarh khat ah a cuarpar kha a tan. Isak nih Jakob kha a tan ve i Jakob nih kan pupa hleihnih hna kha a vun tan ve hna. 9 "Kan pupa hna nih cun Josef kha an nahchuah i Izipt ram i sal vung si awkah an zuarh. Sihmanhsehlaw Pathian nih a umpi i 10 harnak a inmi dihlak chungin him tein a chuahter. Josef cu Izipt siangpahrang Faro hmaiah a chuah tikah khan nuncan dawh le fimnak kha a pek. Faro nih cun Josef cu ram uktu bawi le siangpahrang innchungkhar uktu bawi ah a ser. 11 Cun Izipt ram chung a dihlak le Kanaan ram ah khan mangṭam a tlung i harnak tampi a um. Kan pupa hna nih rawl kha an hmu kho ti lo. 12 Cucaah Jakob nih Izipt ram ah rawl a um ti kha a theih tikah, a kan hringsortu kan pupa a fapa hna kha a vun thlah hna i cucu an vung kal hmasa bik kha a si. 13 An vung tlawn a voi hnihnak ah Josef nih cun a unau hna sinah khan a rak i hngalhter i Faro nih cun Josef innchungkhar kong cu a hun hngalh. 14 Cucaah Josef nih a pa Jakob cu bia a hun cah i amah le a innchungkhar vialte cu Izipt ram ah ra dih u, tiah a ti hna; an dihlak in minung sawm sarih le panga an si. 15 Cun Jakob cu Izipt ram ah cun a vung kal i khika ah khan amah le kan pupa a kan hringsortu hna cu an thi. 16 An ruh cu Shekhem ah khan an kalpi hna i khika ah Abraham nih Hamor miphun sinin tangka in a cawkmi thlan ah khan an vui hna. 17 "Pathian nih Abraham sinah bia-kamnak a sermi a tlin caan kha a nai tikah Izipt ram i a ummi kan mi hna cu fak piin an karh. 18 A hnu a hnuah cun siangpahrang dang, Josef a hngal lomi nih Izipt ram cu a hun uk. 19 Kan miphun kha a rak hlen hna i a kan hringsortu hna kha a rak hrem hna, an fale kha an thih nakhnga an inn chungin lengah a rak chiahter hna. 20 Hi caan lioah hin Moses kha a rak chuak i fa dawh ngai a si. Inn ah thla thum an zohkhenh i 21 inn cun an chuah tikah Faro fanu nih khan a fa ah a rak i ser i a fapa bantukin a zohkhenh. 22 Moses cu Izipt fimnak vialte kha an cawnter i bia ah siseh, thil tinak ah siseh, mingan ngaingai ah a hung cang. 23 "Moses cu kum sawm li a ti tikah a phunhawi Israel mi kha a va leng hna. 24 Pakhat pa cu Izipt mipa nih a rak hrem lio kha a hmuh i cucaah a phunhawi a simipa cu a bawmh i Izipt mipa cu teirul cham in a thah. 25 (Pathian nih keimah cu anmah luattertu dingah a ka hman lai ti kha an hngalh lai tiah a ruah, sihmanhsehlaw an hngal lo). 26 A thaizing ah Israel mi pahnih an i velh kha a hmuh hna i an karlak i remnak ser kha aa zuam. A thawh hna i, "Ka duale hna, ka bia hi ngai tuah u, nannih cu u le nau pei nan si cu, zeicahdah pakhat le pakhat nan i velh?" tiah a ti hna. 27 Sihmanhsehlaw a sual deuhpa nih khan Moses cu a nam i, "Aho nih dah nangmah cu kan cung i uktu bawi ah an in ser? 28 Nizan i Izipt mipa na thah bantuk khan maw keimah zong thah na ka duh?" tiah a ti. 29 Hi bia kha Moses nih a theih tikah Izipt ram khan a zam i Midian ram ah a va um. Khika ah fapa pahnih a ngeih hna. 30 "Cun kum sawm li a dih hnuah, Moses sinah cun vancungmi kha Sinai Tlang pawng thetse ram i burbuk a kangmi meizik in a lang. 31 Moses cu a hmuhmi kha a khuaruah a har i cucaah naih tein va zoh awkah burbuk pawngah cun a va kal. Sihmanhsehlaw Bawipa aw tu kha a theih i, 32 'Keimah cu nan pupa hna Pathian, Abraham le Isak le Jakob Pathian kha ka si,' tiah a rak ti. Moses cu a ṭih tuk ah a ther in a ther i a zoh hmanh a zoh ngam lo. 33 Bawipa nih cun a thawh i, 'Na kedan kha i phawih, zeicahtiah na dirnak hmun kha hmun thiang a si. 34 Izipt ram chungah ka mi hna nih an inmi le an tuarmi kha ka zoh i ka hmuh. An aihramnak kha ka theih i anmah khamh awkah ka rung ṭum. Ra tuah, Izipt ram ah kan thlah lai,' tiah a ti. 35 "Moses kha Israel mi nih an rak hlawtmipa a si. 'Kan cung i uktu bawi le biaceihtu ah aho nih dah aan chiah?' tiah an rak ti, sihmanhsehlaw amah cu a alh hluahmahmi burbuk chungin a sinah a hung langmi vancungmi bawmhnak thawngin, Pathian nih uktu si ding le khamhtu si dingah a rak thlah mipa a si. 36 A miphun kha Izipt ram in a chuahpi hna i Izipt ram le Rili Sen le thetse ram ah khan kum sawm li chung khuaruahhar le hmelchunhnak thil kha a tuah hna. 37 Israel mi sinah, 'Pathian nih keimah a ka thlah bantukte hin profet pakhat an thlahhnawh te hna lai i amah cu nanmah chungmi a si lai,' a ti, tiah a rak titu kha Moses cu a si. 38 Amah cu thetse ram i a rak i pummi Israel mi hna sin i a ummi kha a si, amah cu a kan hringsortu hna sin i khua a rak sami le Sinai Tlang ah a sin i bia a rak chimtu vancungmi sin i a ummi kha a si; amah cu Pathian bia zungzal in a nungmi kan sin i phakter awkah a rak latu kha a si. 39 "Sihmanhsehlaw kan pu le kan pa hna nih khan an hlawt i Izipt ram i vung kir ṭhan tu kha an duh deuh. 40 Cucaah Aaron kha an thawh i, 'Kan hmai i a kal hnga ding pathian kan serpiak tuah hna. Izipt ram in a kan chuahpitu Moses kha zeitin a um kan hngal ti lo,' an ti. 41 Khi tikah khan pei cawfa mui in siasal pakhat an ser i raithawinak an pek i anmah lila nih an sermi conglawmhnak ca i puai an ser kha a si cu. 42 Sihmanhsehlaw annih cu Pathian nih a mertak hna i profet hna cauk chungah aa ṭial bang khan vancung arfi kha a biakter hna. Cu cauk chungah cun: 'Israel mi hna, thetse ram chungah kum sawm li sa nan thah i raithawinak nan tuahmi kha keimah biaknak caah a si lo. 43 Nannih nih nan i phorhmi thlam cu Molok pathian thlam kha a si i Nan i kalpimi milem cu nan pathian Refan arfi siasal kha a si; Annih cu nanmah nih biak awk caah nan ser chommi siasal an si. Cucaah nannih cu Babilon pinah kan kalter hna lai,' tiin aa ṭial. 44 "Kan pupa hna nih khan, Pathian kan sinah a um ti hngalhnak thlam kha thetse ram ah khan an rak i ngeih ko. Pathian nih Moses a chimh bantuk khan sermi a si i Moses nih a hmuhmi pungsan ning khan tuah a si. 45 Cun a hnu deuh ah a kan hringsortu hna nih kan thlam cu an pupa hna sin khan an lak i Joshua sin i an kal ah khan an i kalpi; an hmai in Pathian nih a dawimi hna ram kha an va lak tikah, thlam kha an i kalpi lengmang i cuka ah cun David chan tiang kha a um. 46 David nih cun Pathian duhdawtnak kha a hmuh i Jakob Pathian caah inn pakhat sak awkah Pathian kha a hal. 47 Sihmanhsehlaw inn a vun sakpiaktu taktak cu Solomon a si. 48 "Sihmanhsehlaw Cung Nung Bik Pathian cu, profet nih, 49 'Vancung hi ka ṭhutnak a si i vawlei hi ka kelamh a si. Zei bantuk inn dah na ka sakpiak lai? Khuazei ah dah kaa dinhnak ding hmun cu a si? 50 Hi thil vialte hna a sertu hi keimah ka si lo maw? tiah Bawipa nih a ti,' a rak ti bangin, minung nih an sakmi inn ah cun a um lo. 51 "Zeitluk lung hakmi dah nan si rih? Zeitluk in dah lungchung in cuarpar aa tan lomi le Pathian bia theihnak leiah a hna aa chehmi nan si rih! Nannih cu nan pupa hna hlikhlekte kha nan si ko, nannih zong nih Thiang Thlarau kha nan donh zungzal ko! 52 Nan pupa hna nih an rak hrem lomi profet an um maw? Pathian Sal a rat lainak hlanpi in a rak chim chungtu Pathian lamkaltu hna kha an rak thah hna. Cun atu cu nannih nih amah kha nan rawi i nan nawn. 53 Vancungmi nih an in pekmi hna Pathian phungbia a rak latu cu nanmah nan si i asinain cu phungbia a zul lotu cu nanmah ṭhiamṭhiam nan si," tiah a ti. 54 Steven bia kha khawngsil pawl nih cun an theih tikah a henh in a henh hna i an hacang lawng kha an rial ko. 55 Sihmanhsehlaw Thiang Thlarau in a khatmi Steven nih khan van lei khi a hun zoh i Pathian sunparnak kha a hmuh i Jesuh cu Pathian orhlei kamah a dir kha a hmuh. 56 Aa thawh i, "Zohhmanh u, vancung aa hun i Pathian orhlei kamah Mi Fapa a dir kha ka hmuh," tiah a ti. 57 Cu bia an theih tikah fak piin an au i an kut in an hna kha an i phih i an hei zuanhnawh i 58 khua chung khan lengah an hnuh i lung in an va cheh. Cuti in lung in a cheptu hna nih cun an puan kha, tlangval pakhat a min Saul a simi kehram ah khan an i chiah. 59 Lung in an cheh chih lengmang lioah cun Steven nih, "Bawipa Jesuh, ka thlarau cu nangmah nih cohlang ko," tiin a au. 60 A khuk aa bil i fak piin a au i "Bawipa, hi sualnak hi an cungah khing hlah," tiah a ti i a thi colh. Cun Steven an nawn kha Saul zong cu a hna a tla ve.
1 Cu ni hrimhrim cun Jerusalem khua khrihfabu nih hremnak in hram aa thawk. Lamkaltu pawl kha dah ti lo cu, a zummi vialte kha Judea ram le Samaria ram ah an i ṭhek dih. 2 Steven kha biaknak lei i aa biatakmi a cheu nih an vui i fak piin an ṭah. 3 Sihmanhsehlaw Saul nih khan khrihfabu cu hrawh aa zuam; inn khat hnu inn khat in a kal i a zummi hna kha nu thlulo pa thlulo in a hnuh hna i thong ah a thlak hna. 4 Zumtu aa ṭhekmi kha a kenkiplo ah an kal i an kalnak paoh ah thawngṭha kha an chim. 5 Filip cu Samaria ram khua ah khan a va kal i Messiah kong kha a va chimh hna. 6 Filip nih a chimmi kha mizapi nih ṭha tein an ngaih. A chimmi kha an ngaih i khuaruahharnak a tuahmi kha an hmuh. 7 Mi tampi chungin khuachia kha aupah in an chuak i a zengmi le a beimi mi tampi kha damnak an hmu. 8 Cucaah Samaria ah cun lawmhnak nganpi a um. 9 Cuka ah cun Simon timi kha a um i amah cu Samaria mi hna, a camh thiamnak in sau nawn an khuaruah a hartertu kha a si. Mingan pakhat ka si aa ti i 10 cu khua chungmi vialte hna nih cun, a hme bik in a ngan bik tiang, amah bia cu an ngaih. Amah cu Pathian ṭhawnnak "Ṭhawnnak Ngan" timi kha a si, an ti. 11 A camh thiamnak in saupi an khuaruah a rak harter hna caah amah cu an zulh. 12 Sihmanhsehlaw Filip chimmi Thawngṭha, Pathian Pennak kong le Jesuh Khrih min kong kha an zumh tikah nu he pa he tipilnak kha an ing. 13 Simon hrimhrim zong nih cun a zumh ve i tipilnak a in dih hnuah Filip sinah cun aa helhum lengmang ve; a nganmi hmelchunhnak hna le khuaruahharnak hna kha a hmuh hna tikah a khuaruah a har ngaingai. 14 Samaria mi nih Pathian bia kha an hmuh ve ti kha Jerusalem khua i a ummi lamkaltu pawl nih khan an theih tikah an sinah cun Peter le Johan kha an hei thlah hna. 15 An va phak tikah zumtu hna nih khan Thiang Thlarau an hmuh nakhnga thla an campiak hna. 16 Zeicahtiah Thiang Thlarau cu annih lakah khan aho cung hmanh ah a tlung rih lo; Bawipa Jesuh min in tipil lawng an rak ing rih. 17 Cun Peter le Johan nih an cungah an kut an chuan i Thiang Thlarau kha an hmuh. 18 Lamkaltu hna nih an cungah an kut an chuan tikah Thiang Thlarau an hmu ti kha Simon nih a hmuh tikah Peter le Johan kha a thawh hna i, 19 "Ka kut ka chuanpiakmi hna paoh nih Thiang Thlarau kha an hmuh ve nakhnga hi ṭhawnnak hi ka pe ve u," tiin phaisa kha pek a zalh hna. 20 Sihmanhsehlaw Peter nih cun a leh i, "Pathian laksawng cu phaisa in ka cawk khawh lai tiah na ruah ruangah hin nangmah le na phaisa cu hell ah va tla ko u! 21 Pathian mithmuh ah na lung kha ahmaan lo caah kan rian ṭuannak ah hin zeihmanh naa tel venak a um lo. 22 Cucaah cun hi thil ṭhalo na ruahmi hi i ngaihchih law hi bantuk thil ṭhalo na ruahmi hi an ngaihthiam khawh nakhnga Bawipa sinah thla cam. 23 Zeicahtiah fiang tein ka hmuhmi cu nahchuahnak in na khat i sual thongtla na si," tiah a ti. 24 Simon nih Peter cu a thawh i, "Na chimmi vialte hi pakhat hmanh ka cungah a tlun nakhnga lo Bawipa sinah thla ka campiak tuah," tiah a ti. 25 An hmuhmi le an theihmi kong an chim dih hnu le Bawipa bia kha an chim dih hnuah Peter le Johan cu Jerusalem khua ah an tlung ṭhan. Lampi ah Thawngṭha kha Samaria ram khua tampi ah an chimpah. 26 Bawipa vancungmi pakhat nih Filip cu a thawh i, "I tim law thlanglei ah vung kal law Jerusalem in Gaza ah a kalmi lam ah khan vung kal tuah," a ti (Cu lam cu an hmang ti lo). 27 - 28 Cucaah Filip cu aa tim i a kal. Cu lioah cun Ethiopia mi tilditmi pakhat an khua lei i a tlungmi a rak um. Cu pa cu bawi upa pakhat a si i Kandeis ti zongah ti a simi Ethiopia Siangpahrangnu tangka bawi kha a si. Amah cu Pathian biak awkah khan Jerusalem khua ah a va kal i a rangleng in a tlun lei a si. Rangleng aa citpah cun Isaiah cauk kha a rel. 29 Thiang Thlarau nih Filip cu a thawh i, "Va kal law khi rangleng khi va naih tuah," tiah a ti. 30 Filip cu a va tli i a relmi cu Isaiah cauk chung bia a si kha a theih i, "Na relmi cu a sullam na hngal maw?" tiah a hal. 31 Cu bawi nih cun a thawh i, "Aho tal nih a sullam chimh lo cun zeitindah ka hngalh khawh hnga," tiah a ti. Cun Filip kha rangleng cungah hin hung kai law ka sinah ṭhu tuah, tiah a sawm. 32 A rak rel lengmangmi caang cu hihi a si: "Amah cu thah awkah hruaimi tuu bantuk a si, amah cu a hmul an meh tikah a awn-au lomi tuufa bantuk a si; bia kaa khat hmanh chim lo tein a um ko. 33 Ningzahnak kha a in, chanhtu ahohmanh a ngei lo. Hi vawlei cung a nunnak cu a dongh cang caah a tefa hna kong kha ahohmanh nih an chim kho lai lo." 34 Kha bawi nih khan Filip cu a thawh i, "Profet nih hin aho kong dah a chim, ka chim tuah; amah kong maw aa chim, midang kong dah a chim?" tiah a ti. 35 Filip nih cun a vun i thawh i, hi Baibal cang hin i thawk in Jesuh kong Thawngṭha kha a chimh. 36 An vung zuan lengmang lioah khin ti tlawmpal a rak umnak hmun pakhat kha an phan i cu tikah cu bawi nih cun aa thawh i, "Hika ah hin pei ti a um hi, zei nih dah tipil in a ka donh lai?" tiah a ti. ( 37 Filip nih aa thawh i, "Na lung dihlak in na zumh ahcun tipilnak cu na in ko lai," tiah a ti. "Ka zumh, Jesuh Khrih cu Pathian Fapa a si ti kha ka zumh ko," tiah a ti.) 38 Cu bawi nih cun rangleng cu a dirter i an pahnih cun ti chungah khan an vung kal i Filip nih tipilnak cu a pek. 39 Ti chungin an hung chuah tikah Bawipa Thlarau nih Filip cu lo diam in a lak. Kha bawi nih khan a hmu ṭhan ti lo, sihmanhsehlaw lunglawm ngaiin a kal. 40 Filip cu Ashdod ah khan a hung chuak i Sisaria khua tiang khua kip ah aa chawk i Thawngṭha kha a chimh hna.
1 Cu lio hrawngah cun Bawipa zultu pawl kha Saul nih thah awkin a tlerh cuahmah lengmang ko hna. Tlangbawi Ngan sinah a hung kal i 2 Damaskas khua Judah pumhnak inn haotu pawl sin i theihhngalhnak ca kha a hung hal. A duhnak cu khi khua ah khan Bawipa Lam a zulmi ka hmuh hna ahcun nu thlulo pa thlulo in ka tlaih hna lai i Jerusalem ah ka kalpi hna lai, ti a si. 3 Damaskas khua a hei fuh lio, khua pawng a phak ah khin, chikkhatte ah van in ceu pakhat nih a velchum in a run ceuh. 4 Vawlei ah a tlu i aw pakhat nih, "Saul, Saul, zeicahdah na ka hrem?" tiah a ti thawng kha a theih. 5 "Ahodah na si, Bawipa?" tiah a leh. Aw nih cun, "Keimah cu na hremmi Jesuh ka si. 6 Tho law khua chungah khan va lut tuah, khika ah na tuah awk hnga kha an rak in chimh lai," tiah a ti. 7 Saul he a kal ṭimi hna cu cipkhap ti loin an dir ko; aw cu an theih, sihmanhsehlaw ahohmanh an hmu hna lo. 8 Saul cu vawlei cun a hung tho i a mit a hun au, sihmanhsehlaw zeihmanh a hmu kho lo. Cucaah a kut in an hruai i Damaskas khua chungah cun an luhpi. 9 Ni thum chung khua hmu kho loin a um, cu chung vialte cu rawl zong a ei lo, ti zong a ding lo. 10 Damaskas khua ah cun zultu pakhat Ananias an timi a rak um. Cu pa nih cun langhnak a hmuh i cu langhnak a hmuhmi ah cun Bawipa nih, "Ananias," tiah a ti i anih nih, "Hika ah ka um, Bawipa," tiah a leh. 11 Bawipa nih cun a thawh i, "I tim law Lam Ding timi ah khan va kal law Judas inn ah khan Tarsas khuami pakhat Saul an timi cu a um maw um lo tiah va hal hna. Amah cu thla a cam lio a si i 12 langhnak in mipa pakhat Ananias timi a rung luh i khua a hmuh ṭhan nakhnga a cung i a kut a chuan kha a hmuh," tiah a ti. 13 Ananias nih cun a leh i, "Bawipa, mi tampi nih hi pa kong hi an ka chimh; Jerusalem khua i na mi hna cungah thil ṭhalo a tuahmi vialte kha ka theih. 14 Cun Damaskas khua i a rat zongah hin na min an komi hna paoh kha tlaih awkah tlangbawi upa hna sin in nawlngeihnak ca a run i phorh fawn," tiah a ti. 15 Sihmanhsehlaw Bawipa nih cun a leh i, "Va kal ko, zeicahtiah amah cu keimah rian ṭuantu dingah, Jentail mi hna le siangpahrang hna le Israel mi hna sinah ka min hngalhter awkah ka thim cang. 16 Cun keimah hrimhrim nih keimah ruangah a in lai dingmi thil vialte kha ka hmuhsak lai," tiah a ti. 17 Cucaah Ananias cu a va kal i inn ah khan a va lut i Saul cungah cun a kut a va chuan. "Ka nau Saul, hika lei i na rat lio i na sinah a langmi Bawipa — Jesuh hrimhrim — nih khan keimah cu a ka fial. A ka fialnak cu nangmah nih khua na hmuh ṭhan i Thiang Thlarau in na khah nakhnga caah a si," tiah a ti. 18 Chikkhatte ah khin Saul mit cun nga phokphawher bantuk khi a tla i khua a hmu kho ṭhan. A dir i tipilnak kha a in; 19 cun rawl a ei dih hnuah a thazang kha a tlung ṭhan. Saul cu Damaskas khua i a ummi zultu hna sinah khan ni tlawmpal a cam. 20 Pumhnak inn ah khan i cungcang loin a va kal i, "Jesuh cu Pathian Fapa a si," tiah a chimh hna. 21 A bia a theimi paoh cu an khuaruah a har i, "Hi pa hi Jerusalem khua i Bawi Jesuh min a komi paoh a that i hika zongah hin cu bantuk ṭhiamṭhiam in annih kha tlaih i tlangbawi upa hna sinah kalpi awkah a ramipa kha a si lo maw?" an ti. 22 Sihmanhsehlaw Saul phungchimmi cu a ṭhawng chin lengmang i Jesuh cu Messiah a si tiah a chim khawhnak kha mi lung a fianter tuk caah Damaskas khua i a ummi Judah mi hna nih khan an let kho lo. 23 Ni tam nawn hnuah khin Judah mi cu an i pum i Saul thahnak dingah khua an khang; 24 sihmanhsehlaw tuah an i timhmi kha a chimtu an rak um. Amah kha thah an duh caah cun chunzan in khua kutka kha an cawngh hna. 25 Sihmanhsehlaw zan khat cu Saul kha a hawile nih khua kulhnak vampang a pemnak awng in lengah bawm in an thlak. 26 Saul cu Jerusalem khua ah khan a hung kal i zultu pawl kha komh a hung timh hna. Sihmanhsehlaw annih nih zultu a si ve cang ti kha an rak zum lo i cucaah amah cu an ṭih ngaingai. 27 Khi tikah Barnabas nih khan amah cu a bawmh i lamkaltu pawl sinah khan a kalpi. Zeitindah Saul nih lampi ah Bawipa a hmuhnak kong le Bawipa nih a sinah bia a chimnak kong tehna kha a chimh hna. Damaskas khua i Saul nih ralṭha ngaiin Jesuh min in phung a chimnak zong kha a chimh hna. 28 Cucaah Saul cu an sinah khan a um i Jerusalem khua kha a cul dih i Bawipa min in ralṭha ngaiin phung a chimh hna. 29 Grik holh in a holhmi Judah mi hna he zong khan bia an i ruah i a al zong an i al len, sihmanhsehlaw annih nih cun thah kha an timh. 30 Hi kong kha zultu unau rual hna nih khan an theih tikah Saul kha Sisaria khua ah an kalpi i Tarsas khua ah khan an kalter. 31 Cuticun Judea ram le Galilee ram le Samaria ram i a ummi khrihfabu vialte nih khan daihnak caan an hmu. Bawipa kha ṭihzah ngaiin an um i Thiang Thlarau bawmhnak thawngin an ṭhang i an karh. 32 Peter cu khuazakip ah khan a kal i voi khat cu Lidda khua i a ummi Pathian mi hna kha a va tlawng hna. 33 Khika ah mipa pakhat Ainias an timi kha a va hmuh i cu pa cu mizeng a si i a ihkhun in kum riat chung a tho ti lo. 34 Peter nih cun a thawh i, "Ainias, Jesuh Khrih nih an damter cang. Tho law na ihphah kha zual," tiah a ti. Chikkhatte ah khin Ainias cu a tho. 35 Amah cu Lidda le Sharon i a ummi vialte nih khan an hmuh i Bawipa leiah an i mer. 36 Cun Joppa khua ah hin Jesuh zummi nu pakhat a min Tabitha a simi a um, (amah cu Grik holh cun Dorkas ti a si i a sullam cu sazuk tinak a si.) ṭhatnak tuah le sifak bawmh ah khan a caan vialte cu a hman dih tawn. 37 Cu caan ah cun a rak zaw i a thi. A ruak cu an ṭawl i cunglei dot ah khan an suan. 38 Joppa khua cu Lidda khua khan a hla tuk lo i zultu pawl nih khan Peter cu Lidda ah a um ti an theih tikah mi pahnih an hei thlah hna i, "Khulrang in kan sinah ra ta tuah," tiah bia an cah. 39 Cucaah Peter cu aa tim i an sinah cun a kal. A va phak tikah cungdot ah khan an kaipi. Nuhmei vialte nih khan a zual in an zual i an ṭahpah khan, Dorkas nih a nun lioah a rak serpiakmi hna angki hna le puan hna kha an hmuhsak. 40 Peter nih an dihlak in a chuahter hna i a khuk aa bil i thla a cam; cun miruak leiah khan a hei i mer i, "Tabitha, tho tuah," tiah a ti. A mit kha a hun au i Peter kha a hmuh tikah a hung ṭhu. 41 Peter nih a kut a hei chanh i a thawh. Cun a zummi hna le nuhmei hna kha a auh hna i a nung in an sinah cun a pek hna. 42 Hi thawng nih cun Joppa khua kha a cul dih i mi tampi nih Bawipa kha an zumh. 43 Peter cu Joppa khua ah khan saphaw sertu Simon sinah saupi a cam.
1 Sisaria khua ah hin mipa pakhat a rak um i a min cu Kornelias a si; amah cu Romans ralkapbu pakhat, "Itali Ralkap Bu" timi a haotu kha a si. 2 Amah cu biaknak leiah aa zuam ngaingaimipa a si i amah le a innchungkhar nih khan an dihlak in Pathian kha an biak. Amah nih khan Judah mi hna lak i misifak hna kha siang ngaiin a bawmh hna i Pathian sinah thla zong a cam zungzal. 3 Ni khat cu zanlei suimilam pathum tluk ah khin langhnak a hmu i cu langhnak a hmuhmi ah cun Pathian vancungmi pakhat a rung luh i, "Kornelias," tiah a rung chawnh kha fiang tein a hmuh. 4 Vancungmi kha thinphang ngaiin dengteo in a zoh i, "Zeidah, bawipa?" tiah a ti. Vancungmi nih cun a hun leh i, "Pathian nih na thlacamnak le misifak na bawmh hnanak kha an cohlanpiak i nangmah cu an philh lo. 5 Cucaah atu ah Joppa khua ah mi hei thlah hna law a min Simon Peter a simi pa kha va auhter hna. 6 Amah cu rilikam i a ummi saphaw sertu Simon inn ah a tlung," tiah a ti. 7 Cun amah sinah bia a chimtu vancungmi kha a kal i Kornelias nih cun a inn chung i a sinum pahnih hna le ralkap pakhat kha a auh hna; ralkappa cu biaknak lei i lungthin a ngei ngaingaimi a si i amah Kornelias a zohkhenhtu hna lak i aa tel vemi pakhat kha a si. 8 Thil umtuning vialte kha a chimh hna i Joppa khua ah cun a thlah hna. 9 A thaizing chun hrawng Joppa khua an hei phak deng ah khan, Peter cu thlacam awkah inn cungah a kai. 10 A rawl a ṭam i rawl ei kha a duh; cun rawl an ser lioah khan langhnak a hmu. 11 Van kha aa hung i puan he aa lomi thil a ki ki li in vawlei i an run thlakmi kha a hmuh. 12 A chungah cun saram a phunphun le a lawn in a lawnmi thilnung a phunphun le ramlak va a phunphun kha an um. 13 Aw pakhat nih a hun thawh i, "Tho tuah, Peter, that hna law ei tuah hna," tiah a ti. 14 Sihmanhsehlaw Peter nih a thawh i, "Ka ei lai lo, Bawipa. Thurhhnawmhmi thil le a thiang lomi thil cu zeihmanh ka ei bal lo," tiah a ti. 15 Cun aw nih cun a vun chawnh ṭhan i, "Pathian nih a thiang a timi cu zeihmanh nang nih a thianglo ah ruat hlah," a ti. 16 Cu thil cu cuticun voi thum tiang a um i cu hnuah van leiah lak ṭhan a si. 17 Peter cu a hmuhmi langhnak kha a sullam zeidah a si hnga tiah khuaruahhar in a ruah lengmang lioah khan Kornelias nih a thlahmi hna cu Simon inn kha an phan i a kutka hmaiah khan an rak dir cang. 18 An hei auh hna i, "Hika ah hin Simon Peter timi khualpa a um maw?" tiah an hei hal hna. 19 Peter cu langhnak a hmuhmi a sullam kha zeidah a si hnga tiah hngalh aa zuam lengmang lioah khin Thlarau nih a vun thawh i, "Ngaihmanh, minung pathum nih an in kawl len ko. 20 Cucaah i tim law vung ṭum law annih cu keimah nih ka thlahmi hna an si caah an sin i kal kha i thuahthah hlah," tiah a ti. 21 Cucaah Peter cu a vung ṭum i mi cu a thawh hna i, "Nan kawl lengmangmi cu keimah hi ka si. Zei herh ah dah nan rat?" tiah a ti hna. 22 Annih nih cun an leh i, "Kepṭen Kornelias nih a kan thlahmi kan si. Amah cu miṭha le Pathian a biami a si i Judah mi vialte nih an hmaizah ngaingaimi a si. Amah nih cun na bia kha a theih ve nakhnga Pathian vancungmi pakhat nih nangmah cu a inn rat va sawm awkah amah cu a chimh," tiah an ti. 23 Peter nih cun mi hna cu, inn chungah rung lut u, tiah a ti hna i cu zan cu khika ah cun an riak. A thaizing cu aa tim i an sinah khan a kal i Joppa khua i unau cheukhat zong kha an kal ve. 24 A kiptuh ah cun Sisaria cu an va phan i cuka ah cun Kornelias le a sahlawh a rualchan hna le a hawikom a rak sawmmi hna nih khan an rak hngah ko. 25 Peter cu a vung luh hnik ah khin Kornelias nih cun a rak don i a hmaiah a rak bawk. 26 Peter nih cun a vun thawh i, "Dir tuah, keimah zong minung pei ka si ve ko cu," tiah a ti. 27 Inn chung an luhpah cun Peter nih khan Kornelias cu bia a ruah lengmang i cuka ah cun mi tampi an rak i pumh kha a hmuh hna. 28 Annih cu a thawh hna i, "Judah mi cu Jentail mi he i len i kai awk le i komh i hawi awk kha an biaknak phung nih a onh hna lo ti cu nannih nih fiang tein nan hngalh. Sihmanhsehlaw mi zeihmanh kha a thur le a thianglo i ka ruah hna nakhnga lo Pathian nih a ka hmuhsak cang. 29 Cucaah nan ka auh tikah zeihmanh alnak um lo tein ka ra ko. Cucaah zeicahdah nan ka auh ka chim tuah u," tiah a ti hna. 30 Kornelias nih aa thawh i, "Tihni hmasa hmasa chin ah khan atu tikah hin ka inn ah zanlei suimilam pathum ah thla ka cam. Chikkhatte ah khin puan vaar aa aihmi pakhat ka hmaiah khin a hung dir i 31 a ka thawh i, 'Kornelias, Pathian nih na thlacamnak kha a theih i sifak na bawmhnak hna kha a philh lo. 32 Joppa khua ah mi hei thlah hna law a min Simon Peter a simi kha va kawhter hna. Amah cu rili kam i a ummi saphaw sertu Simon inn ah a tlung khah,' tiah a ka ti. 33 Cucaah nangmah cu khulrang in kan kawh i na ra. Atu cu kan dihlak in hika ah hin Pathian hmaika ah kan um i Pathian nih chim awkah an fialmi paoh cu kan chim tuah," tiah a ti. 34 Peter nih cun aa thawh i, "Atu cu Pathian nih mi vialte kha aa ruang tein a zoh hna ti kha ka hngalh. 35 Mi zei miphun chungmi hmanh a si ah, amah a ṭihmi paoh le dinnak a tuahmi paoh cu a cohlan hna. 36 Mi vialte Bawipa a simi Jesuh Khrih thawngin Pathian nih remnak Thawngṭha Israel mi a pek hna cu nan hngalh. 37 Johan nih tipilnak kong a chim hnuah khan, Galilee in i thawk in Israel ram dihlak ah thil lianngan a hung ummi kong kha nan hngalh fawn. 38 Cu thil lianngan cu, zeitindah Pathian nih Nazareth khuami Jesuh kha Thiang Thlarau le ṭhawnnak a toih i Pathian nih a umpi caah zeitindah khuazakip ah aa chawh i khuachia ṭhawnnak tangah a ummi vialte a damter hna kha a si. 39 Judah mi hna ram chung le Jerusalem khua i a tuahmi vialte a hngaltu tehte cu kanmah kha kan si. Vailamtahnak ah thir an khenh chih i an thah. 40 Sihmanhsehlaw ni thumnak ni ah Pathian nih thihnak in a thawhter i mi kip sinah si loin, 41 Pathian nih tehte caah a kan thimmi kanmah sin lawngah khan Pathian nih cun a langhter. Thihnak in a thawh hnuah amah he cun kan ei ṭi kan ding ṭi. 42 Cun mi sinah Thawngṭha chim awk le amah cu Pathian nih a nungmi he a thimi he an biaceihtu ah a ser cang ti tehte khaangtu ah a kan fial. 43 Profet vialte nih amah kong cu an rak chim i amah a zummi paoh cu a min ṭhawnnak thawngin an sualnak kha ngaihthiam an si lai, tiah an ti," tiah a ti. 44 Peter nih bia a chim lengmang lioah cun a bia a ngaimi hna cungah khan Thiang Thlarau a ṭum. 45 Judah mi lakah zumtu, Joppa khua in Peter a run zul vemi hna nih khan Jentail mi cung zongah Pathian nih a Thiang Thlarau laksawng kha a toih ve ko ti an hmuh tikah an khuaruah a har. 46 Zeicah ti ahcun, holhtheihlo in an holh le Pathian lianhngannak an thangṭhat kha an theih hna caah a si. Cun Peter nih cun, 47 "Hi mi hna nih hin Thiang Thlarau cu kanmah nih kan rak hmuh bantukte khan an hmuh ve. Cucaah ti in tipilnak in awkah aho nih an dawn kho hna hnga maw?" tiah a ti. 48 Cucaah Jesuh Khrih min in tipil in awk kha a fial hna. Cun kan sinah tlawmpal in cam ko rih, tiah an nawl.
1 Judah peng chung i a ummi lamkaltu hna le unaule hna nih khan Jentail mi zong nih Pathian bia kha an cohlan ve ti kha an theih. 2 Cun Peter cu Jerusalem khua i a hung kal ah khan, Jentail mi hna cu an cuarpar i tan hna seh, ti a duhmi hna nih khan an rak soi i, 3 "Cuarpar tan lomi Jentail mi hna inn ah na tlung i rawl zong na ei," tiah an rak ti. 4 Cucaah Peter nih cun thil umtuning vialte kha tling tein a hramthawk tein a chimh hna. 5 Aa thawh i, "Joppa khua ah khan thla ka cam i langhnak kha ka hmuh. Puan nganpi pakhat, a ki pali in van in an run thlakmi he aa lomi thil khi ka hmuh i ka pawngah khan a rung dir. 6 A chung kha ṭha tein ka vun zoh i inn zuat saṭil le ramsa le a lawn in a lawnmi thilnung hna le va kha ka hmuh hna. 7 Cun aw pakhat kha ka theih i, 'Peter, tho law that hna law ei hna,' tiah a ti. 8 Sihmanhsehlaw kei nih khan kaa thawh i, 'Sihlah, Bawipa. Thurhhnawmhmi rawl siseh, a thiang lomi rawl siseh, ka kaa chungah a lut bal lo,' tiah ka ti. 9 Cun aw nih cun vancung cun a run ka chawnh ṭhan i, 'Pathian nih a thiang a timi thil paohpaoh cu a thianglo ah rel hna hlah,' tiah a ti. 10 Hi thil hi voi thum tiang a um i a donghnak ah cun a ningpi in vancung ah khan an run hnuh ṭhan. 11 Cu lio caan thengte ah cun Sisaria khua in ka sinah an rak thlahmi mi pathum hna kha ka tlunnak inn cu an ra phan. 12 Thlarau nih i thuahthah loin an sin i kal awk kha a ka fial. Hi kan unau paruk hna, Joppa khuami hna zong hi ka sinah cun Sisaria khua ah khan an kal ve i kan dihlak in Kornelias inn ah khan kan i ṭhum. 13 Amah nih cun a inn chungah vancungmi pakhat a rung dir i, 'Joppa khua ah mi hei thlah hna law a min tling Simon Peter a simi mipa pakhat kha va au hna seh. 14 Amah nih cun bia an chimh hna lai i cu bia thawng cun khamhnak nan hmuh lai,' tiah a chimtu a hmuhnak kha a kan chimh. 15 Cun an sinah bia ka chim tikah khan, a hramthawk i kan cungah a rak tlun bantukte khan, an cungah cun Thiang Thlarau kha a tlung ve. 16 Khi tikah kan Bawipa nih, 'Johan nih cun ti in tipilnak a pek hna, sihmanhsehlaw nannih cu Thlarau in tipilnak pek nan si lai,' tiah a rak timi kha ka lung ah a hung pem. 17 Kannih nih Bawipa Jesuh Khrih kan zumh tikah Pathian nih laksawng a kan pekmi bantukte kha Jentail mi hna zong Pathian nih cun a pek ve hna ti kha a fiang ko; cucaah, a hi kei nih hin maw, Pathian cu ka donh hnga?" tiah a ti. 18 Cu bia cu an theih tikah an soinak cu an ngol i Pathian kha an thangṭhat i, "Pathian nih Jentail mi hna zong, i ngaihchih i nun awkah caan ṭha kha a pek ve hna," tiah an ti. 19 Steven an thah hnu i hremnak a hung chuakmi nih khan zumtu hna cu a kenkiplo ah a ṭhek dih hna. A cheu cu Foinisia le Saipras le Antiok tiang khan an kal i bia cu Judah mi lawng kha an chimh hna. 20 Sihmanhsehlaw zumtu a cheu, Saipras rammi le Sairin mi hna cu Antiok khua ah khan an kal i Jentail mi zong kha thawng cu an thanh hna i Bawipa Jesuh kong Thawngṭha kha an chimh hna. 21 Bawipa ṭhawnnak kha an sinah a um i mi tampi nih an zumh i Bawipa leiah khan an i mer. 22 Cu thawng cu Jerusalem khua i a ummi Khrihfabu sinah a hung phan i cucaah Barnabas cu Antiok khua ah khan an hei thlah. 23 A va phak i zeitluk in dah Pathian nih annih kha thluachuahnak a pek hna ti kha a hmuh tikah a lung aa lawm i annih cu an dihlak tein Bawipa cu an lungthin a dihumnak in i tlaih awk le a sinah zumhawktlak tein um awk kha a forh hna. 24 Barnabas cu miṭha a si, Thiang Thlarau le zumhnak in a khatmi a si. Cun mi tampi nih Bawipa cu an zumh. 25 Cun Barnabas cu Tarsas khua ah khan a va kal i Saul kha a va kawl. 26 A hmuh tikah Antiok khua ah khan a ratpi i kum khat chung kha Khrihfabu chungmi hna he khan an i pum i mi tampi kha an cawnpiak hna. Antiok khua ah hin pei Jesuh zultu hna kha, "Khrihfa," tiah an rak ti hmasa bik hna cu. 27 Cu lio hrawngah cun Jerusalem in Antiok ah khan profet tlawmpal an va kal i 28 an lak i pakhat a min Agabas an timi kha a dir i vawleicung dihlak ah mangṭam a fak ngaimi a tlung lai, tiah Thlarau ṭhawnnak thawngin, a rak chimchung. (Cu mangṭam cu Klaudias siangpahrang a si lioah khan a tlung). 29 Zultu pawl nih khan anmah le an ti khawh tawk cio ah Judah ram i a ummi unau pawl bawmhnak pek awkah khan an i ceih. 30 Cuticun an tuah i tangka cu khrihfa upa hna sinah khan Barnabas le Saul kut in an kuat.
1 Hi caan lio hrawngah hin Siangpahrang Herod nih khrihfabu chungmi cheukhat kha a hrem hna. 2 Johan unau Jeim kha vainam in a thahter hna i 3 hi nih hin Judah mi kha an lung a lawmhter hna ti kha a hmuh tikah Peter zong kha a tlaihter fawn hna. (Mah hihi Thilnu Phulh Lo Changreu Puai lioah khan a si). 4 Peter cu an tlaih hnuah thong ah khan an thlak i ralkapbu bu li nih an cawngh; bu khat ah cun ralkap pali lengmang an um. Herod nih aa timhning ah cun Lanhtak Puai dih in zapi hmaiah bia ka ceih te lai, ti a si. 5 Cucaah Peter cu thong chungah khan an chiah ko, asinain khrihfabu chungmi hna nih cun a caah khan thla fak piin an cam. 6 Herod nih zapi hmaiah ka chuahpi cang lai tiah a timi caan a phak lai zan ah khan, Peter cu ralvengtu ralkap pahnih hna karlak ah khan a it. Thirhri pahnih in an hren i thonginn kutka cu ralvengtu nih an cawngh. 7 Chikkhatte ah khin Bawipa vancungmi pakhat kha khika ah cun a hung dir i thonginn chung cu a ceu. Vancungmi nih cun Peter cu a liang in a hninh i a ṭhangh, "Khulrang in tho tuah!" tiah a ti. Hmakhatte ah Peter kut cun thirhri cu an tla. 8 Cun vancungmi nih cun a thawh i, "Na taisawm i sawmh law na kedan i danh tuah," tiah a ti. Peter nih cu bantuk cun a tuah i vancungmi nih cun, "Na puan kha i aih law hung ka zul," tiah a ti i, 9 Peter nih cun thonginn lengah khan a hei zulh. Asinain vancungmi nih a tuahmi cu a taktak a si rua ti awk a hngal lo, langhnak ka hmu rua tiah a ruah. 10 Ralvengtu hna umnak hmasa bik le a pahnihnak kha an hei lonh i khua chung vung lanhnak thir kutka kha an phan. Kutka cu amah tein a rak i hung i annih cu an chuak. Lam kha an vun zul i vancungmi nih khan Peter cu, duak tiah a kaltak. 11 Khi tikah Peter cu a lung a hung fim i, "Atu cu hihi ahmaan tiah ka hngalh cang! Bawipa nih a vancungmi kha a run thlah i Herod kut chung le Judah mi nih ka cungah an i ruahchihmi vialte chungin a ka khamh," tiah a ti. 12 Thil umtuning kha a hung fian tikah Johan Marka nu Mary inn ah khan a va kal. Khika ah cun mi tampi kha an rak i pum i thla an rak cam. 13 Peter nih innleng lei innka kha a vun kingh i an sinumnu Roda an timi nih hun awkah a va kal. 14 Peter aw a si ti kha a hngalh tikah a lung aa lawm tuk i innka cu hung loin a kir i, Peter kha lengah a dir ko, tiah a chimh hna. 15 "Na molh," tiah an rak ti, sihmanhsehlaw a si hrimhrim ko, tiah a ti peng hna tikah khan, "A vancungmi a si lai," an ti. 16 Cu lioah cun Peter nih cun innka cu a kingh lengmang ko. Annih nih an va hun i amah cu an hmuh tikah an khuaruah a har. 17 "Dai tein um u," tiah a kut in a hmuhsak hna i Bawipa nih zeitindah thonginn chungin a chuahnak kha a chimh hna. "Mah hihi Jeim le kan unau dang hna kha va chim hna u," tiah a ti hna i kaa dang ah a kaltak hna. 18 Cun zinglei a hung si tikah khan Peter hi zei nih dah a ti hnga tiin ralvengtu hna cu awlokchong in an i tuai. 19 Herod nih, kawl u, tiah a ti hna, sihmanhsehlaw an hmu kho lo. Cucaah ralvengtu pawl cu bia nan hal hna lai i nan thah hna lai, tiah a ti. Cu hnuah cun Herod cu Judea ram khan a vung kal i Sisaria khua ah khan caan tlawmpal a vung um. 20 Herod cu Tair le Sidon mi hna cungah khan a thin a hun ngaingai caah, cu hna nih cun a bu in amah cu ton awkah a sinah khan an va kal. A hmasa bik ah siangpahrang inn uktu Blastas kha anmah lei ṭang dingin an i sawm. Cun Herod sinah cun an va kal i i rem ko u sih, tiah an va nawl. Zeicahdah tiah an rawl laknak cu Herod siangpahrang ram hin a si. 21 An ni tinh ni ah Herod cu a siangpahrang thuam khan aa thuam i a bawiṭhutdan cungah khan a ṭhu i mizapi sinah cun bia a chim. 22 "Bia a chimtu hi minung a si lo, pathian a si," tiah an au. 23 Herod nih Pathian kha upatnak a pek lo caah Bawipa vancungmi nih chikkhatte ah a vun tuk. Amah cu tholung nih an ei i a thi. 24 Pathian bia cu a karh i a ṭhang chin lengmang. 25 Barnabas le Saul nih khan an rian cu an lim i Jerusalem in an ra kir i Marka kha an i ratpi.
1 Antiok khua khrihfabu chungah khan profet hna le cawnpiaktu saya hna tlawmpal an um, cu hna cu Barnabas, Simeon (Simeon cu Pa Nak ti zongah an ti), Sairin mi Lusias, Mangki bawi Herod khukṭhi Manaen le Saul kha an si. 2 Annih nih Bawipa kha an biak i rawl an ulh lioah khan, Thiang Thlarau nih a thawh hna i, "Barnabas le Saul hi, ka thiahmi hna rian kha an ṭuan nakhnga, a dang tein ka chiahpiak hna u," tiah a ti. 3 Rawl an ulh i thla an cam dih in an cungah an kut an chuan i an thlah hna. 4 Barnabas le Saul cu Thiang Thlarau nih a fial hna bang khan Seleusia khua ah khan an vung kal i cuka cun Saipras tikulh ah tilawng in an kal. 5 Salamis khua an phak tikah khika ah Judah mi hna pumhnak inn ah khan Pathian bia kha an chim. An rian a bawmtu hna caah Johan Marka kha an i kalpi. 6 Cu tikulh cu Pafos khua tiangin an hei ṭol i khika ah khan camhthiam a min Bar-Jesuh a simi kha an va ton, amah cu Judah mi a si i profet ka si tiah aa timi a si. 7 Amah cu cu tikulh a uktu bawi Sergius Paulus an timi, mifim ngaingaimipa i a hawikom a si. Uktu bawi nih cun Pathian bia kha theih a duh caah Barnabas le Saul kha a auh hna. 8 Sihmanhsehlaw annih cu camhthiam Elimas (cucu a Grik min a si) nih khan a rak al hna i uktu bawi kha Pathian cu zum hlah seh tiah kham aa zuam. 9 Khi tikah Paul ti zongah ti a simi Saul, Thiang Thlarau in a khatmi nih khan camhthiampa cu dengteo in a zoh i, 10 "Khuachia fa! Nangmah hi a ṭhami thil paohpaoh dohtu na si; nangmah hi hlennak ṭhalo a phunphun in na khat, Bawipa biatak hi lih i canter naa zuam zungzal. 11 Bawipa kut cu atu ah na cungah a tlung lai, na mit a caw lai i caan tlawmpal chung cu chun ceu na hmu lai lo," tiah a ti. Chikkhatte ah khin Elimas mit cu minmei nak nih a zelh i a kut in a hruaitu dingmi kawl ah i dap lengmang in aa chawk. 12 Thil a hung ummi kha a hmuh tikah uktu bawi cu a zummi ah a cang i Bawipa kong an cawnpiakmi nih khan a lung a sukhai ngaingai. 13 Paul le a hawile hna cu Pafos khua khan tilawng in an kal i Pamfilia ram Perga khua kha an phan; khika khan Johan Marka nih a kirtak hna i Jerusalem khua ah a tluntak hna. 14 Perga cun an hei kal i Pisidia ram Antiok khua kha an phan; cun Sabbath ni ah pumhnak inn ah khan an kal i an ṭhu. 15 Cuka mi hna nih Moses Nawlbia Cauk chungin le profet hna caṭialmi chungin an rel hnuah pumhnak inn uktu hna nih cun an i thawh i, "U le nau hna, mizapi caah forhnak bia chim awk nan ngeih ahcun chim tuah hna u," tiah an ti hna, 16 Paul cu a dir i a kut in dai u tiah a hmuhsak hna i biachim hram aa thawk: "Ka phunhawi Israel mi hna le Pathian a biami Jentail mi hna, ka bia hi ngai tuah u. 17 Hi Israel miphun Pathian nih hin, kan pupa hna kha a rak thim hna i Izipt ram chung i ramdangmi bantukin khua an vung sak lioah khan miphun nganpi ah a ser hna. Pathian nih a liannganmi a ṭhawnnak in Izipt ram in a chuahter hna i 18 kum sawm li chung thetse ram ah khan a in hna. 19 Kanaan ram chungah miphun phun sarih kha a hrawh hna i a mi hna cu ram ngeitu ah khan a ser hna. 20 cucu kum za li le kum sawm nga lio hrawngah khan a rak si. "Cun cu hnuah cun profet Samuel chan tiang khan biaceihtu kha a pek hna. 21 Cun annih nih siangpahrang kan pe tiah an hal tikah Pathian nih Saul, Benjamin phun chungmi Kish fapa kha, kum sawm li chung an siangpahrang si awkah a pek hna. 22 Amah cu a phuah hnuah Pathian nih cun David kha an siangpahrang ah a ser. Amah kongah Pathian nih a chimmi cu, 'Jesse fapa David hi ka duhmi phun a si, amah hi tuah tiah ka fialmi a tuah duh dingmi a si,' ti hi a rak si. 23 Hi pa tefa chung hin, Pathian nih bia a rak kam cang hna bangin, Israel mi cu khamhtu Jesuh kha a pek hna. 24 A rat lainak kha Johan nih a rak timhtuah chung i a timhtuahnak ah cun Israel mi vialte kha nan sualnak i ngaihchih u law tipilnak ing u, a ti hna. 25 Cun Johan nih a rian cu a lim dengmang tikah mizapi cu a thawh hna i, 'Aho a si ti ah dah nan ka ruah? Keimah cu nan hngahmi hi ka si lo. Sihmanhsehlaw zohhmanh u, amah cu ka hnu in a ra lio i kei cu a kedan phoihtu hmanh ah kaa tlak lo,' tiah a ti hna. 26 "Ka u le ka nau hna, Abraham tefa hna le hika i a ummi Jentail mi vialte, Pathian a biami hna: hi khamhnak bia hi kanmah hi pei pek kan si cu. 27 Zeicahtiah Jerusalem i a ummi hna le an hruaitu hna nih khan amah cu Khamhtu a si kha an hngal lo i cuhleiah Sabbath fate an rel lengmangmi profet bia hna zong kha a sullam an hngal hna lo. Sihmanhsehlaw Jesuh an thahnak thawng khan profet bia kha an tlinter hna. 28 Annih nih thah awkah aa tlak tinak caah bia an hmu kho lo nain Pilat kha kan thahpiak ko tiah an nawl. 29 Amah kongah Cathiang nih a chimmi vialte an tuah dih hnuah vailam cung khan an ṭhumh i thlan ah an vui. 30 Sihmanhsehlaw Pathian nih mithi hna sin khan a thawhter i 31 amah sin i Galilee in Jerusalem tiang khual a tlawng tawnmi hna sinah khan voi tampi a lang. Annih cu Israel mi sin i a tehte an si. 32 - 33 Cun atu hi, hi Thawngṭha hi nannih sin phakpi awkah hika i kan ratnak cu a si. Kan pupa hna sinah, ka tuah lai, tiah Pathian nih bia a rak kammi kha, kannih an tefa hna sinah hin atu cu a tuah cang, cucu Jesuh a nunter ṭhan hi a si. Cucu Salm fung hnihnak chung i 'Nangmah cu ka Fapa na si, nihin ah na Pa ka si cang,' tiah aa ṭial bantuk khan a si. 34 "Cun mithi hna sinin a thawhnak kong, thutnak i zeitikhmanh ah a kir ṭhan ti lai lonak kong ah Pathian nih a chimmi cu, 'A thiangmi le zumh awk a tlakmi thluachuahnak, David ka rak kamhmi kha, nangmah kan pek lai,' ti hi a si. 35 "Cun hmun dang ah, 'Nangmah an tlaihchanmi na sal cu thutnak na inter lai lo,' tiah a chim bantuk khan a si taktak fawn. 36 David nih khan amah a caan ah khan Pathian rian cu a rak ṭuan; cun a thi i a hringsortu hna sinah khan vui a si i thutnak kha a in. 37 Sihmanhsehlaw mithi hna sinin Pathian nih a thawhtermi cu thutnak kha a ing lo. 38 - 39 Ka u le ka nau hna, nan dihlak in nan hngalh awk cu, Jesuh thawng hin pei sual ngaihthiamnak bia nan sin i chim hi a si cu; Moses Nawlbia nih an luatter khawh lomi hna sualnak khan pei amah a zummi paohpaoh cu a luatter hna cu. 40 Cucaah i ralring u law profet nih, 41 'Nannih mi nihsawh hmangmi hna, Zohhmanh u, nan khuaruahhar u law thi ko u. Zeicahtiah nanmah nan chan hrimhrim ah ka tuahmi rian hi Nannih nih nan zumh lai lomi thil, midang nih a sullam an in chimh hna hmanh ah nan zumh duh lai lomi a si,' tiah an chimmi bia hi nan cungah tlunter hlah u," tiah a ti hna. 42 Paul le Barnabas cu pumhnak inn in an ṭin pah ah khan, hmai Sabbath ni ah ra ṭhan u law hi thil kong hi tam deuh in kan chim ṭhan rih u, tiah an sawm hna. 43 Zapi cu pumhnak khan an ṭian hnuah Judah mi a tampi le Judah phung a zulmi Jentail mi mi tampi hna nih khan an zulh hna. Lamkaltu hna nih khan annih cu an chimh hna i Pathian vel chung i um camcin awk kha an forh hna. 44 A hmai Sabbath ni ah cun khua chung i a ummi kha an dihlak dengmang in Bawipa kong bia theih awkah cun an ra chuak. 45 Judah mi nih mizapi kha an hmuh hna tikah nahchuahnak in an khat; Paul nih a chimmi kha an al i amah kha an nihsawh. 46 Sihmanhsehlaw Paul le Barnabas nih khan ralṭha chinchin in an chimh hna i, "Nannih sin i Pathian bia chim hmasa hi a herh taktakmi a si. Sihmanhsehlaw nannih nih nan duh lo ca le zungzal nunnak hmu dingah aa tlak in nan i ruah lo caah, nannih cu kan in kaltak hna lai i Jentail mi sinah kan kal cang lai. 47 Zeicahtiah Bawipa nih a kan pekmi nawlbia cu: 'Nannih cu Jentail mi ca i ceunak si awk le Vawlei cung dihlak ca i khamhnak lam si awkah kan chiah hna,' ti hi a si," tiah a ti. 48 Jentail mi hna nih cu bia cu an theih tikah an i lawm i Bawipa cu, cu bia ruangah cun an thangṭhat; cun zungzal nunnak hmu dingah thim a simi hna nih khan an zumh i 49 khika hrawngah khan Bawipa bia cu a kenkip ah aa ṭhek. 50 Sihmanhsehlaw Judah mi hna nih khan, cu khua chung i hruaitu deuhdeuh a simi hna le Pathian a biaminu, upat hmaizah awk deuh a simi kha an forh hna i Paul le Barnabas cu hrem hram an thawk hna; cun cuka ram cun an dawi hna. 51 Lamkaltu hna nih khan an kebeh cu an khawnhnawhtak hna i Ikonium ah an kal. 52 Antiok khua i a ummi zultu hna cu lunglawmhnak le Thiang Thlarau in an khat.
1 Cu bantuk ṭhiamṭhiam cun Ikonium khua zongah a si: Paul le Barnabas cu Judah mi pumhnak inn ah khan an va kal i bia kha an chimh hna i Judah mi le Jentail mi mi tampi kha zumtu ah an i cang. 2 Sihmanhsehlaw a zum duh lomi Judah mi hna nih khan Jentail mi kha an forh hna i unau pawl kha an huatter hna. 3 Khika ah lamkaltu hna kha saupi an cam. Bawipa kong kha ralṭha ngaingai in an chim i a velngeihnak kong an chimmi kha ahmaan ti hmuhsaknak caah khuaruahharnak tuah khawhnak kha a pek hna. 4 Khuachungmi cu an i cheu: a cheu nih Judah mi kha an ṭanh hna i a cheu nih lamkaltu kha an ṭanh hna. 5 Cun Jentail mi hna le Judah mi hna nih khan, an hruaitu hna he, lamkaltu hna kha nihsawh le lung in cheh awk kha an i tim. 6 Cu kong cu lamkaltu hna nih an theih tikah Likaonia ram i a ummi Listra le Derbe khua le cu khua hna pawngkam ram ah khan an zam. 7 Cuka ah cun Thawngṭha kha an va chim. 8 Listra khua ah cun kebeimipa pakhat a rak um; amah cu a chuah kate in a beimi a si i a kal kho bal lo. 9 Khika ah cun a ṭhu ve i Paul bia kha a ngai ve. Paul nih cun, hi pa nih hin ka chimmi hi a zumh i damh khawh a si lai, ti kha a hmuh caah amah cu dengteo in a vun zoh i 10 aw thangpi in, "Na ke in ding tein dir tuah," tiah a ti. Mipa cu a hun i hlawk i aa chawk kho ai. 11 Paul nih a tuahmi kha mibupi nih cun an hmuh tikah an Likaonian holh in an au i, "Minung bantuk ah pathian cu an i cang i kan sinah an rung ṭum," tiah an ti. 12 Barnabas kha Zeus pathian tiah an ti i Paul kha a holh lengmangtu a si caah Hermes tiah an ti. 13 Khua lengte ah biakinn a ummi Zeus pathian tlangbawi nih khan cawtum hna le pangpar ṭhirual hna kha kutka ah khan a rak put hna. Amah le mizapi hna nih cun lamkaltu hna kha raithawinak pekchanh an timh hna. 14 Barnabas le Paul nih tuah an i zalhmi kha an theih tikah an puan kha an thleh i mibupi chungah cun an zuang cutmat i 15 "Zeicahdah mah hihi nan tuah? Kannih zong minung sawhsawhte kan si ve ko, nanmah bantuk minung kan si ve ko. Hika i kan ratnak cu nannih kha hi santlailo thil hna hi hlawt i van le vawlei le rili le a chung i a ummi thil vialte a sertu Pathian lei i mer awkah Thawngṭha ra chim kha a si. 16 Hlanah cun mi vialte kha anmah duhning cio lam zulh kha a onh ko hna. 17 Sihmanhsehlaw amah a um kha thil ṭha a tuahmi in a langhter zungzal ko: van in ruah an pek hna i a caan hmaan te ah thlaiti an pek hna; rawl kha an pek hna i lunglawmhnak in an khahter hna," tiah a ti. 18 Lamkaltu hna nih hiti in bia an chim na hmanh hin, mibupi cu har le fe in an sin i raithawinak pekchanh kha an kham khawh hna. 19 Pisidia ram Antiok khua le Ikonium khua in Judah mi tlawmpal kha an ra i mizapi cu anmah leiah an ṭanter khawh hna, Paul kha lung in an cheh i a thi cang rua tiah an ruah caah khua lengah khan an hnuh. 20 Sihmanhsehlaw zumtu hna nih khan an hun pumhhnawh tikah a tho i khua chungah khan a lut ṭhan. A thaizing ah Barnabas he Derbe khua ah an kal. 21 Paul le Barnabas nih Derbe khua ah cun Thawngṭha kha an chim i zultu tampi an hmuh hna. Cun Listra ah khan an kir i cuka cun Ikonium le Pisidia ram Antiok khua ah khan an kal. 22 Zumtu hna kha thazang an pek hna i nan zumhnak ah khan fek tein hmun ko u, tiah an forh hna. "Pathian Pennak chung luh awkah hin harnak tampi kan ton a hau," tiah an cawnpiak hna. 23 Khrihfabu kip ah khan khrihfa upa an chiah hna i thlacamnak le rawl ulhnak he, an i bochanmi Bawipa kut chungah khan, an chiah hna. 24 Pisidia ram kha an ṭol dih in Pamfilia ram kha an phan. 25 Perga khua ah khan bia cu an chim i Attalia ah khan an vung kal, 26 cuka cun Antiok khua ah khan lawng in an kir ṭhan; Antiok khua cu, atu ah an limmi an rianṭuan awk caah Pathian velngeihnak chung i an rak sanh hnanak hmun kha a si. 27 Antiok khua an phak tikah khrihfabu kha an pumh hna i Pathian nih anmah thawngin a tuahmi thil vialte kha an chimh hna i Jentail mi zong nih an zumh ve nakhnga an caah lam a hun ti kha an theihter hna. 28 Cuka ah cun zumtu hna sinah khan caan saupi an um.
1 Judea ram in mi cheukhat kha Antiok khua ah khan an ra i, "Moses Nawlbia nih a kan cawnpiak bangin, nan cuarpar nan i tan lo ahcun khamhnak nan hmu kho lai lo," tiah unau pawl kha an cawnpiak hna. 2 Paul le Barnabas nih khan cu kong cu fak piin an al hna; cucaah Paul le Barnabas le Antiok khuami cheukhat kha Jerusalem khua ah hung kal hna seh law hi kongah lamkaltu pawl le upa hna kha hung tong hna seh, tiah bia an khiah. 3 Khrihfabu nih khan an hei thlah hna i Foinisia le Samaria an hei tanpah ah khan zeitluk in dah Jentail mi hna nih Pathian leiah an i mer tinak kong kha an chimh hna; cu thawng nih cun unau vialte kha a lawmhter ngaingai hna. 4 Jerusalem khua an va phak tikah khrihfabu le lamkaltu hna le upa hna nih khan an rak conglawmh hna i anmah thawngin Pathian nih a tuahmi vialte kha an chimh hna. 5 Sihmanhsehlaw zumtu hna lakah khan, Farasi bu chung i a simi an rak um i cu hna nih cun an i thawh i, "Annih cu, cuarpar nan i tan lai i Moses Nawlbia kha nan zulh lai, tiah ti awk an si," tiah an ti. 6 Hi bia ruah ṭi awkah hin lamkaltu hna le upa hna kha an i pum. 7 Saupi an ceih hnuah Peter a dir i, "Ka u le ka nau hna, nannih nih nan hngalh bantukin, Jentail mi hna nih Thawng Ṭha kha an theih i an zumh khawh ve nakhnga, an sin i cu Thawng cu va chim awkah hlan deuhpi ah khan Pathian nih keimah cu nanmah lakin a rak ka thim. 8 Cun minung lungthin a hngaltu Pathian nih Jentail mi a cohlan hnanak cu, kanmah a rak kan pekmi bantuk tein Thiang Thlarau a pek ve hnanak ah hin a lang. 9 Kannih le annih karlak ah zeihmanh thleidannak a tuah lo; annih nih an zumh caah an lungthin kha a thianter ve ko hna. 10 Cucaah zeicahdah kan pupa nih si hna seh, kannih nih si u sih, kan phorh khawh lomi thilrit cu an liang cung i chonh nan timhnak thawng hin Pathian cu hneksak del nan duh? 11 Asilo, kannih zong kha kan zumh i pei Bawipa Jesuh vel thawng cun khamhnak kan hmuh kha, annih zong cu cu bantukte cun pei an si ve ko cu," tiah a ti. 12 Barnabas le Paul nih, Pathian nih Jentail mi hna lakah a hman hna i anmah thawngin khuaruahharnak a tuahmi vialte kha an chim tikah, annih cu an ningpi in dai tein an um. 13 Bia an chim dih tikah khan Jeim nih khan aa thawh i, "U le nau hna, ka bia hi ngai tuah u. 14 Simon nih, zeitluk in dah Pathian nih Jentail mi kha an zawn a ruah hna ti cu a kan chimh cang i cu a langhnak cu anmah lakin amah min putu dingah mi aa thimmi hna hi a si. 15 Profet nih an rak chimmi bia cu hi bia he hin aa kheng ngaingai. Cathiang chungah zeitindah a um tiah: 16 'Hi hnuah hin ka ra kir ṭhan lai i David inn a tlumi kha ka tun ṭhan lai. A rawhnak kha ka remh lai i ka sak ṭhan lai. 17 Cucaah miphun dang vialte, ka mi si awk ca i ka auhmi Jentail mi vialte hna nih khan Bawipa cu an ka kawl lai. 18 Cuticun Bawipa, hlanlio piin thil a rak chimtu nih cun a ti.' 19 "Cucaah kei ka ruahnak ah cun Pathian leiah a hun i mermi Jentail mi hna hi harnak kan pek hna awk a si lo. 20 Cu nakin kan tuah awk deuh a si tiah ka ruahmi cu, ca kan kuat hna lai i siasal sinah pekchanh ciami sa cu thurhnawmh cangmi sa a si caah ei nan i sum lai, nu le pa sualnak khan an i sum lai, hngawngdih sa ei nan i sum lai, zei thi hmanh ei nan i sum lai, tiah kan ti hna lai. 21 Zeitintiah Moses Nawlbia kha Sabbath ni fate pumhnak inn kip ah caan saupi rel lengmang a si ko cang i khua kip ah a bia kha chim a si ko cang," tiah a ti. 22 Cun lamkaltu hna le upa hna nih khan khrihfabu an dihlak he, an bu chungin mi i thim i Paul le Barnabas sinah Antiok khua i thlah kha an hna a tla. Barsabbas ti zongah timi Judas le Silas kha an thim hna; annih cu an pahnih in unau pawl hna nih khan an upat ngaingaimi an si. 23 A tanglei ca hi an kut cun an kuat hna: "Kannih, lamkaltu hna le upa hna, nan unau hna nih, Antiok, Siria le Silisia i a ummi unau vialte, chuahkehnak lei in Jentail mi a simi nan kut kan in tlaih hna. 24 Kannih kan bu chungin mi a cheukhat nih nan sinah an ra i an chimmi nih nan lung an tuai hna i hna an hnawh hna ti kha kan theih; sihmanhsehlaw hi hna hi, hi bantukin va tuah u, tiah kannih nih kan ti hna lo. 25 Cucaah kannih cu kan i pum i nan sin i thlah ding lamkaltu hna thim awkah khan kan hna a tla. Annih cu kan dawtmi kan unau hna Barnabas le Paul, 26 kan Bawipa Jesuh Khrih rian ca i thih ngamh in a cawlmi hna sinah hin an ra lai. 27 Cucaah ca in kan in kuatmi hna an pum in nannih sinah a hung chimtu dingah Judas le Silas hi nan sinah kan rak thlah hna. 28 Hi a herhmi nawlbia hlei in a dang zeihmanh nan cungah khin lo ding kha Thiang Thlarau le kannih kan hnatlaknak a si: 29 siasal pekchanhmi rawl kha ei i sum u, thi ei kha i sum u, hngawngdih sa ei i sum u, cun nu le pa sualnak kha i sum u. Hi thil hna tuah hi nan i sum ahcun nan caah a ṭha lai. Dam tein," tiah an ti. 30 Lamkaltu hna cu an thlah hna i Antiok khua ah cun an va kal; khika ah zumtu vialte kha an pumh hna i ca kha an pek hna. 31 Ca kha an rel tikah thazang peknak bia nih khan an lung a lawmhter ngaingai hna. 32 Profet a simi Judas le Silas nih khan unau pawl cu saupi bia an chimh hna i ralṭhatnak le thazang an pek hna. 33 Cuka ah cun sau nawn an um hnuah daihnak in unau pawl nih cun an kalter ṭhan hna i a thlahtu hna sinah khan an kir ṭhan. ( 34 Asinain Silas cu khika um ding khan aa khiak.) 35 Paul le Barnabas cu Antiok ah khan sau nawn an cam. A dang mi tampi hna he, Bawipa bia kha an cawnpiak hna i an chimh hna. 36 Cu hnu caan tlawmpal ah khin Paul nih Barnabas cu a thawh i, "Va kal ṭhan u si law Bawipa kong kan chimnak khua paoh ah khan kan unau hna kha va tlawng ṭhan hna u si law zeitindah an um ti kha va zoh hna u sih," tiah a ti. 37 Barnabas nih khan Johan Marka kha i kalpi ṭhan a duh; 38 sihmanhsehlaw an khual tlawnnak a dongh tiang a rak zulh hna lo i Pamfilia in a rak kirtak hna caah khan Paul nih i kalpi awk cu a ṭha tiah a ruat lo. 39 Fak piin an i al i pakhat le pakhat an i ṭhen. Barnabas nih Marka kha aa lak i Saipras tikulh leiah lawng in an kal; 40 cun Paul nih Silas kha aa thim i unau pawl nih khan Bawipa velngeihnak chungah an sanh hna hnuah an kal. 41 Siria le Silisia ram kha an ṭol hna i khrihfabu kha an thazang an fehter hna.
1 Paul cu Derbe khua le Listra khua ah khan a lan chin. Khika ah Khrihfa pakhat a min Timote a simi kha a rak um; a nu zong cu zumtu a si ve i Judah mi a si, sihmanhsehlaw a pa cu Grik mi a si. 2 Listra le Ikonium i a ummi unau pawl vialte nih Timote cu an thangṭhatmi a si. 3 Paul nih cun Timote kha i ṭhit a duh caah a cuarpar kha a tan. Cu bantukin a tuah cu khika hrawng i a ummi Judah mi vialte nih Timote a pa cu Grik mi a si ti kha an hngalh caah a si. 4 Khua khat hnu khua khat an tlawng i an tlawnpah cun zumtu hna cu Jerusalem khua i a ummi lamkaltu hna le upa hna nih an khiahmi phung kha an chimh hna i cu phung cu nan zulh lai tiah an ti hna. 5 Cucaah khrihfabu cu zumhnak ah an ṭhawng chinchin i ni fate in an karh chin lengmang. 6 Asia ram chungah Thiang Thlarau nih Thawngṭha kha chim awkah a onh hna lo caah Frizia le Galatia ram chungah khan khual cu an tlawng. 7 Misia ramri an va phak ah khan Bithinia ram chungah luh an i zal i sihmanhsehlaw Jesuh Thlarau nih khan a onh hna lo, 8 cucaah Misia ram kha an tan i Troas khua ah khan an vung kal. 9 Cu zan ah cun Paul nih langhnak pakhat a hmuh i cu ah cun mipa pakhat, Masidonia mi a simi kha a dir i, "Masidonia leiah hin ra law ra kan bawm," tiah a ti lengmangmi kha a hmuh. 10 Paul nih hi langhnak a hmuh cangkate in Masidonia lei kal awkah khan kan i tim, zeicahtiah cuka i a ummi hna sin i Thawngṭha chim awkah khan Pathian nih a kan auh tiah kan ruah. 11 Troas in tilawng in kan chuak i ding tein Samothrasia ah khan kan kal i a thaizing ah Neapolis kan phan. 12 Cuka cun ram chungah khan kan lut i Filipi khua kan phan, Filipi khua cu Masidonia ram chung i a um vemi peng peng khat a khualipi a si; cun Romans mi hna ram thar zong a si fawn. Cu khua ah cun ni thum li kan cam. 13 Sabbath ni ah khua chung cun kan chuak i tiva kamah kan kal, cuka ah cun Judah mi hna thlacamnak hmun a um lai tiah kan ruah. Kan ṭhu i aa pummi nu kha bia kan ruah hna. 14 Cu hna lak i kan bia a theimi pakhat cu Lidia a si, amah cu Thiatira khuami a si i maimaw puan a zuarmi a si. Amah cu Pathian a biami nu a si i Paul nih a chimmi bia ngaih awk caah khan Pathian nih a lungthin kha a hunpiak. 15 Amah le a innchung i a ummi hna nih khan tipilnak an in. Cun a kan thawh i, "Keimah cu Bawipa zumtu taktak ah nan ka ruah a si ahcun, ra u law ka inn ah ra ka tlung u," tiah a kan sawm. 16 Ni khat cu thlacamnak hmun i kan va kal ṭhan tikah khan lim khuavang a ngeimi sal ngaknu pakhat nih a kan ton i cu a lim khuavang nih cun hmailei thil um ding kha a chimter khawh. Cu bantukin hmailei thil kong a chimnak cun a bawile kha tangka tampi a hmuhter hna. 17 Amah nih cun Paul le kannih kha a kan zulh i, "Hi hna hi Cung Nung Bik Pathian sal an si i anmah nih hin zeitindah khamh nan si khawh lainak kha an in thanh hna," tiah a au. 18 Cuticun ni tampi a au lengmang hnuah Paul cu a ing a puanh i a hnulei ah aa mer i khuavang cu, "Jesuh Khrih min in amah chung khan chuak kan ti," tiah a ti. Cu cangka cun khuachia cu a chung khan a chuak. 19 A bawile nih kan tangka hmuhnak caan ṭha a dih cang ti kha an hmuh tikah Paul le Silas kha an tlaih hna i zapi pumhnak ah bawi hmaiah an chuahpi hna. 20 Romans mi a simi biaceih bawi hna hmaiah khan an chuahpi hna i, "Hi mi hna hi Judah mi an si i kan khua chungah hnahnawhnak an tuah. 21 Kan upadi he aa ralchanhmi phung kha mi an cawnpiak hna; kannih cu Romans mi kan si i cu phung hna cu a co zong kan cohlang kho hna lai lo i a zulh zong kan zul kho hna lai lo," an ti. 22 Cu bantukin velh an zalh hnanak ah khan mizapi kha an i ṭom ve i bawi hna nih khan Paul le Silas cu an puan kha an phoih hna i tu hna u tiah ralkap kha an fial hna. 23 Fak piin an tuk hna hnuah thong ah an thlak hna i thonginn bawi cu fek tein na hrenh hna lai tiah nawl an pek. 24 Cu bantukin thonginn bawi nih nawl a hmuh caah thonginn chung chungchin ah khan a chiah hna i an ke ah khan a ritmi hreng a khenh hna. 25 Zanṭim hrawngah khin Paul le Silas cu thla an cam i Pathian sinah thangṭhatnak hla an sa i thongtla dang nih khan an ngaih hna. 26 Chikkhatte ah khin li a hun i hnin i thonginn cu a hram tiangin a hninh dih. Hmakhatte ah innka vialte kha an i hung dih i thongtla pawl thir cikcin vialte kha an i phoih dih. 27 Thonginn bawi kha a hun i hlau i thong innka an i hun kha a hmuh tikah thongtla vialte kha an chuak dih cang tiah a ruah caah a nam kha aa zuh i amahle amah kha thah aa zal. 28 Sihmanhsehlaw Paul cu fak piin a au i, "Nangmah le nangmah fahnak i pe hlah, kan dihlak in kan um ko," tiah a ti. 29 Thonginn bawi nih khan mei rak pu u tiah a ti hna i khulrang in a lut i Paul le Silas kehram ah cun ther lengmang in a bawk. 30 Cun annih cu a thawh hna i, "Ka bawipale hna, khamhnak hmuhnak dingah zeidah ka tuah lai?" tiah a ti. 31 "Bawipa Jesuh kha zum law, nangmah he na innchungkhar he khamh nan si lai," tiah an ti. 32 Cun Bawipa bia cu amah le a innchung i a ummi vialte kha an chimh hna. 33 Cun cu zan ṭhiamṭhiam ah cun thonginn bawi nih khan a kalpi hna i an hma kha a ṭawlpiak hna; chikkhatte ah amah le a innchungkhar dihlak in tipilnak an ing colh. 34 Paul le Silas cu a inn ah a hun kalpi hna i rawl a pek hna. Amah nih Pathian kha a zumh caah amah le a innchungkhar cu lunglawmhnak in an khat. 35 A thaizing ah Romans nawlngeitu bawi hna nih khan palik bawi an hei thlah hna i, "Kha hna kha rak thlah hna seh," an ti. 36 Cucaah thonginn bawi nih khan Paul cu a chimh i, "Bawi pawl nih nawl an rak ka pek i nangmah le Silas kha rak thlah hna, an ka ti. Cucaah chuak u law dai tein nan khual tlawnnak dingah khan va kal u," tiah a ti hna. 37 Sihmanhsehlaw Paul nih palik bawi pawl kha a thawh hna i, "Kannih cu kan sualnak zeihmanh an kan hmu lo, asinain zapi hmaiah fung in an kan tuk — Romans mi kan si ve ṭung! Cun thong chungah an kan thlak. Cun atu cu a thli tein kalter an kan duh. A si kho lai lo. Romans bawi pawl cu anmah hrimhrim ra hna seh law ra kan chuah hna seh," tiah a ti. 38 Cu bia cu palik bawi pawl nih khan Romans bawi pawl cu an va chimh hna; cun annih nih Paul le Silas kha Romans mi an si ti an theih tikah an thin a phang. 39 Cucaah an va kal i ngaihthiam an va hal hna; thong chung cun an chuah hna i kan khua hin kaa dang ah kal u, tiah an nawl hna. 40 Paul le Silas cu thonginn khan Lidia inn ah khan an kal. Khika ah unau pawl kha an ton hna i lungṭhawnnak bia an chimh hna hnuah an kal.
1 Amfipolis khua le Apollonia khua kha an hei palpah hna i Thesalonika khua kha an phan; khika ah Judah mi pumhnak inn pakhat a rak um. 2 Paul nih a tuah tawn bantukin pumhnak inn ah khan a va kal. Khika ah Sabbath ni ni thum chung, mi hna he khan Cathiang chung bia kha an i al i 3 Messiah cu thihnak a in awk le a thawh ṭhan awk a sinak kong kha Cathiang cun a langhter i a fianter. Paul nih cun a thawh hna i, "Hi kan chimhmi hna Jesuh hi Messiah cu a si," tiah a ti hna. 4 A cheu cu an lung a pem i Paul le Silas sinah khan an i fon; cun Pathian a biami Grik mi mi tampi hna le nu upa tampi hna zong kha an i fon ve. 5 Sihmanhsehlaw Judah mi kha an nah a chuak i khualak i a vak sawhsawhmi zeiruaramlo minung pawl kha an pumh hna i cu hna cu an au an khuang i khua kha a ning piin hnahnawhnak an tuah. Jason inn kha an va nam i an i ruahnak ah cun khika ah khan Paul le Silas kha an rak um lai i mizapi hmaiah kan chuahpi hna lai an ti. 6 Sihmanhsehlaw annih kha an va hmuh hna lo tikah Jason le unau pawl a cheukhat kha khua uktu bawi hna sinah an hnuh hna i, "Khua kip ah hnahnawhnak a chuahtertu hna kha atu cu kan khua zong an ra phan ve cang i 7 Jason nih hin a inn ah a tlunter hna. Siangpahrang dang a min Jesuh a simi a um an tinak thawng hin Sizar Siangpahrang nawl a buarmi an dihlak hin an si," tiah an au. 8 Cuti an au caah cun mibu hna le khua uktu bawi hna cu awlokchong ngaiin an tuah hna. 9 Uktu bawi pawl nih cun Jason le a hawi dang hna cu aamahkhannak tangka an pekter hna hnuah an thlah hna. 10 Zan a si cangka tein unau pawl nih khan Paul le Silas cu Berea khua ah an kalter hna. Khika an va phak tikah Judah mi pumhnak inn ah khan an kal. 11 Khika mi hna cu Thesalonika khuami nakkhan an lung a kau deuh. An chimmi kha lungtho ngaiin an ngaih i Paul nih a chimmi kha a si taktak maw si taktak lo ti hngalhnak caah nifate in Cathiang chung kha an kawl. 12 Annih lak i mi tampi nih khan an zumh; cun Grik mi nu tampi mirum le upa a simi hna le Grik mi pa tampi zong nih khan an zumh ve. 13 Sihmanhsehlaw Thesalonika khua i a ummi Judah mi hna nih khan Paul nih Berea khua zongah Pathian bia a chim hoi ti an theih tikah an ra i mi cu an hung forh hna i an hung tuai hna. 14 Khulrang in unau pawl nih khan Paul cu rilikam leiah an kalter; sihmanhsehlaw Silas le Timote kha cu Berea khua ah khan an rung cam. 15 Paul a kalpitu hna kha a sinah cun Athens khua tiangin an va kal. Cun Berea khua ah cun an kir ṭhan i Paul nih khan Silas le Timote cu a ran khawh chungin ka sinah ra hna seh, tiah bia a cah hna. 16 Paul cu Athens khua i Silas le Timote a rak hngah lio hna ah khan cu khua cu siasal in a khah kha a hmuh i a awlok a chong. 17 Cucaah pumhnak inn ah khan Pathian a biami Judah mi hna le Grik mi hna he khan bia an i al lengmang i zapi tonnak hmun zongah khan khika i a rami paoh he ni fate an i al lengmang. 18 Epikurian cawnpiaktu saya a cheukhat le Stoik cawnpiaktu saya a cheukhat he zong an i al. A cheu nih an thawh i, "Hi mihrutpa, langh a duh ngai ṭungmi hi zeidah a chim len ko hnga?" an ti. A cheu nih, "Ramdangmi hna pathian kong chim dawh a si," an ti. Hitihin zeicah dah an ti ti ahcun, Paul nih khan Jesuh kong le thawhṭhannak kong a chim caah khan a si. 19 Cucaah Paul cu Areopagas an timi pumhnak hmun ah khan an sawm i an chuahpi. An i thawh i, "Na chim lengmangmi cawnpiaknak thar kong hi hngalh kan duh. 20 Na chimmi kan theihmi a cheukhat hi kan caah khuaruahhar a si i an sullam zeidah a si ti kha kan hngalhter law kan duh hnga," an ti. 21 (Athens khuami hna le khika i a ummi ramdangmi vialte hna cu thil thar bik kong paoh, i chimh i ruah le va ngaihnak ah an caan vialte a hmang dihmi an si). 22 Areopagas i aa pummi hna hmaiah cun Paul cu a dir i, "Athens khuami hna! Nannih cu biaknak lei thil paohpaoh ah zuamnak lungthin a ngei ngaingaimi nan si kha ka hmuh. 23 Zeicahtiah nan khua chung i kaa chawh i nan biaknak hmun kha ka zoh hna tikah biakṭheng pakhat cu a cungah "Hngalh lomi Pathian Caah" tiin aa ṭial kha ka hmuh. Cu nan biakmi cu, a hngalh cu hngal hmanh hlah u law, nan sin i kan thanhmi hna hi a si. 24 Vawlei le a cung i a ummi thil vialte a sertu Pathian hi vancung le vawlei Bawi a si i minung sermi biakinn chungah a ummi a si lo. 25 Cuhleiah Pathian cu minung kha nunnak le thaw le zeizong vialte a petu a si caah minung nih an tuahpiak khawhmi kha a herhmi pakhat hmanh a um lo. 26 Minung pakhat chungin miphun vialte kha a ser hna i vawlei cungah hin khua a sakter hna. A hlankan in an caan le an umnak hmun kha a khiahpiak hna. 27 Hihi zeicahdah a tuah ti ahcun, amah kha an kawl i an dah lengmang tikah khan a hmuh tal an hmu phum hnga maw ti caah a si. Asinain Pathian cu aho kan sin hmanh hin aa hlat lo; 28 mi a cheukhat nih, "Amah chungah kan nung, kan cawl kan cang i khua kan sa,' an ti bantuk le, nan hla phuahtu hna nih, 'Kanmah zong a tefa kan si ve,' an ti bantuk khan a si. 29 Kannih cu Pathian fa kan si caah, minung nih an fimnak le an thiamnak in an sermi sui milem maw, ngun milem maw, lung milem maw ah khan, Pathian cu kan ruah awk a si lo. 30 Pathian nih hin, minung nih an rak hngalh lo lio caan kha cu hmu duh loin a rak umpiak ko hna, sihmanhsehlaw atu cu khuazeika i a ummi minung hmanh, nan nuncan ṭhalo kha mertak cang hna u, tiah a ti hna. 31 Zeicahtiah a thimmipa thawngin vawlei cung dihlak hi dinnak in biaceih awkah ni a khiah cang. Cucu a si ṭheo lai ti kha mi vialte sin i langhternak caah cu mipa cu thihnak in a thawhter," tiah a ti. 32 Paul nih thihnak in thawhternak kong a chimmi kha an hun theih tikah a cheu nih an nihsawh i a cheu nih, "Hi kong hi theih ṭhan kan duh," an ti. 33 Cuticun pumhnak khan Paul cu a chuak. 34 Asinain mi cheu cu amah sinah khan an i fon i a chimmi kha an zumh; cu hna cu Areopagas i biaceih bawi a simi Dionisias tehna, nu pakhat a min Damaris a simi tehna, mi dang tlawmpal kha an si.
1 Cu hnuah cun Paul kha Athens khua khan a chuak i Korinth khua ah a kal. 2 Khika ah khan Pontas ram i a chuakmi Akuila kha a va ton, amah cu a nupi Prisilla he khan cu laite ah cun Romans khua in an rak zaam, zeicahtiah Siangpahrang Klaudias nih khan Judah mi vialte kha Romans khua in chuak dih u tiah a ṭhawl hna. Paul nih cun a va leng hna i 3 an sinah cun a um i an sinah cun rian a ṭuan; amah zong cu anmah bantuk khan saphaw thlam ser in a paw aa cawmmi a si ve. 4 Sabbath fate pumhnak inn ah khan Judah mi he Grik mi he, an lung pemter awkah bia a chimh lengmang hna. 5 Silas le Timote kha Masidonia ram in an rak phanh tikah Paul nih a caan kha a dihlak in phungchimnak ah khan a hman i Jesuh cu Messiah kha a si ti kha Judah mi kha a chimh lengmang hna. 6 Annih nih amah cu an doh i a thang an chiat tikah a puan i leidip kha a thinhnawh hna i, "Nan loh ahcun nanmah mawhchiat awk nan si ko cang lai. Kei cu mawhchiat awk ka si ti lai lo. Atu thawk hin cun Jentail mi sinah ka kal cang lai," tiah a ti hna. 7 Cucaah annih cu a chuahtak hna i Jentail mi a min Titius Justas a simi inn ah khan a um; amah cu Pathian a biami a si i a inn cu pumhnak inn pawngah khan a si. 8 Pumhnak inn i haotu a simi Krispas le a chungkhar dihlak nih khan an zumh; cun Korinth khua chung i mi tampi hna nih khan bia cu an theih i an zumh i tipilnak an in. 9 Zan khat cu Paul nih cun langhnak a hmuh i cu ah cun Bawipa nih a thawh i, "Na thinphang hlah; chim lengmang ko, ngol lai cih, 10 zeicahtiah keimah nih kan umpi ko. Hi khua chung i a ummi hna lakah hin mi tampi ka minung an si caah ahohmanh nih harnak an in pe kho lai lo," tiah a ti. 11 Cucaah Paul cu cuka ah cun kum khat le a cheu a um i Pathian bia kha a cawnpiak hna. 12 Sihmanhsehlaw Gallio cu Romans cozah nih Grik ram uktu bawi ah an ser tikah Judah mi kha an i pum i Paul kha an tlaih i biaceihnak zung ah an chuahpi. 13 An i thawh i, "Hi pa nih hin phung ning in si loin Pathian biak awkah khan mi a lem lengmang hna," an ti. 14 Paul nih bia chim a hun i zalh hnek lioah khin Gallio nih cun Judah mi cu a thawh hna i, "Judah mi hna, hi thil hi ṭhat lonak le sualnak tuahnak kongah a si ahcun, nan cungah hin lungsaunak ka ngeih awk cu aa dawhmi zong a si ko hnga. 15 Sihmanhsehlaw hi thil cu bia le min le nanmah phung nan i almi kong a si caah nanmahte nih vaa ceih ko u. Cu bantuk thil kong men biaceihtu si cu ka duh lo!" tiah a ti i 16 zung chung khan a ṭhawl hna. 17 An dihlak cun pumhnak inn haotu a simi Sosthenes kha an tlaih i zung hmaiah cun an velh. Sihmanhsehlaw Gallio nih khan zeihmanh ah a relpiak hna lo. 18 Paul cu Korinth khua ah khan ni tam nawn a um hnuah a kaltak hna i Prisilla le Akuila he khan Siria leiah lawng in an kal. Lawng i an kal hlanah cun Kenkhria khua ah biakamnak a tuah i a lu kha aa met. 19 Efesa khua kha an phan i khika ah Paul nih khan Prisilla le Akuila kha a kaltak hna. Pumhnak inn chungah khan a lut i Judah mi kha bia a chimh hna. 20 Annih nih sau piin kan umpi ko an ti nain a si thiam lai lo, tiah a al hna. 21 Efesa khua in a chuahpah ah cun a thawh hna i, "Pathian hnatla a si ahcun, nan sinah ka ra kir ṭhan lai," tiah a ti hna. 22 Sisaria a phak tikah Jerusalem ah khan a hung kal i khrihfabu kha a hung chawnhbiak hna i cu dih cun Antiok khua ah khan a lan. 23 Cuka ah caan tlawmpal a um hnuah aa thawh ṭhan i Galatia le Frizia ram kha a tlawng hna i zumtu vialte kha thazang a pek hna. 24 Alekzandria khuami Judah mi pakhat a min Apollo a simi kha Efesa khua ah a ra. Amah cu biachim a thiam ngaingaimi a si i Cathiang kha ṭha tein a hngalmi a si. 25 Bawipa Lam kong kha hngal cikcek tein cawnpiakmi a si i Jesuh kong kha lungtho ngaiin a chim i hmaan tein mi kha a cawnpiak hna. Sihmanhsehlaw Johan tipilnak lawnglawng kha a hngalh. 26 Pumhnak inn ah khan ralṭha ngaiin a cawnpiak hna. Cun amah cu Prisilla le Akuila nih khan an theih tikah an inn ah an kalpi i Pathian Lam kong kha hmaan deuh chin in an cawnpiak. 27 Apollo nih cun Grik ram kal kha aa tim, cucaah Efesa khua chung i a ummi a zummi hna nih khan Grik ram i a ummi an unau hna cu ca an kuat hna i amah cu rak conglawmh u tiah an forh hna. Khika ah a phak tikah Pathian velngeihnak thawngin zumtu a simi hna caah khan bawmtu ngaingai a si. 28 Zeicahtiah bia al lei i a ṭhawn caah khan Judah mi cu zapi hmai i bia i al tikah a tei lengmang hna i Cathiang chung khan Jesuh cu Messiah kha a si, ti kha a langhter.
1 Apollo kha Korinth khua i a um lioah Paul cu kha peng chungah khan khual a tlawng i Efesa khua kha a phan. Khika ah zultu tlawmpal kha a va hmuh hna i 2 annih cu a thawh hna i, "Nan zumh ah khan Thiang Thlarau nan rak hmu maw?" tiah a hal hna. Annih nih, "Thiang Thlarau cu a um le um lo hmanh kan hngalh ṭung lo," tiah an leh. 3 "A si kun ahcun, zei bantuk tipilnak dah nan in kun?" tiah Paul nih cun a hal hna. Annih nih, "Johan tipilnak," tiah an leh. 4 Cun Paul nih cun a thawh hna i, "Johan tipilnak cu lungthlen hmelchunhnak caah a si, asinain Johan nih khan, 'Ka hnu in a ra liomi hi nan zumh awk cu a si,' tiah a ti zungzal hna i cu a hnu in a rami cu Jesuh hi a si," tiah a ti hna. 5 Cucu an theih tikah annih cu Bawipa Jesuh min in tipilnak kha an ing. 6 Paul nih an cungah a kut a chuan i Thiang Thlarau kha an cungah a tlung; holh theih loin an holh i Pathian bia zong kha an chim. 7 Annih cu an dihlak in pa pahleihnih tluk an si. 8 Paul cu pumhnak inn chungah khan a lut i thla thum chung mizapi kha ralṭha ngaiin a chimh hna, annih kha heh tiah a al hna i Pathian Pennak kong i an lung a pem nakhnga aa zuam. 9 Sihmanhsehlaw annih lak i a cheukhat cu an lung a khong i an zum duh lo; Bawipa Lam kong kha zapi hmaiah a ṭhalo tiah an ti. Cucaah Paul nih khan a chuahtak hna i zultu pawl kha aa kalpi hna; ni fate in Tirannas biachimnak inn timi ah khan mi kha a cawnpiak hna. 10 Cuticun kum hnih chung a tuah i Asia ram chung i a ummi vialte nih, Judah mi si hna seh, Grik mi si hna seh, Bawipa bia kha an theih. 11 Pathian nih voi dang i a um tawn lomi khuaruahharnak kha Paul kut in a tuah. 12 A pavuah le a hngawngngerh hna hmanh kha mizaw sin i an hei kalpi hna tikah an zawtnak kha a dam i an chungin khuachia kha an chuak. 13 Judah mi a cheu khuachia ṭhawl i aa chawk lengmangmi hna nih khan cu khuachia ṭhawlnak ah cun Bawipa Jesuh min kha an hman ve. Khuachia cu an thawh hna i, "Paul nih a chimmi Jesuh min in chuak kaan ti," an ti hna. 14 Cu bantukin a tuahmi cu, Judah mi Tlangbawi Ngan Skeva fapa pasarih an si. 15 Sihmanhsehlaw khuachia nih cun a thawh hna i, "Jesuh cu ka hngalh i Paul zong cu ka hngalh, sihmanhsehlaw nannih cu ahodah nan si?" tiah a ti hna. 16 Khuachia a ngeimipa nih cun a ṭhuat ciammam hna i a tei hna i hmapu le an puan tlek dihlak in a inn cun an zaam. 17 Efesa khua i a ummi Judah mi le Grik mi vialte hna nih cu kong cu an theih i an thin a phang i Bawipa Jesuh min cu an upat chinchin. 18 A zummi lak i mi tampi kha an ra i zapi hmaiah an tuahmi vialte kha an phuan. 19 Camh a rak hmang tawnmi hna nih khan an cauk kha hmunkhat ah an pumh hna i zapi hmaiah khan an khangh hna. Cauk man cu an tuak tikah tangka thong sawm nga tluk a si. 20 Cuticun Bawipa bia cu a karh chin lengmang i a ṭhang i a ṭhawng chin lengmang. 21 Hi bantukin thil a um hnuah Paul nih Masidonia ram le Grik ram kha ka tlawng lai i Jerusalem ah ka lan colh te lai, tiah a ruah. "Cun cuka ka phak hnuah Romans zong hmuh hrimhrim kaa zuam lai," tiah a ti. 22 Cucaah amah a bawmtu pahnih Timote le Erastas kha Masidonia leiah a thlah hna i amah tu cu Asia ram chungah khan caan tam deuh a run hmang. 23 Hi caan lioah hin Bawipa Lam kong ah Efesa khua chungah hnahnawhnak a um. 24 Ngun sosertu pakhat, a min Demetrius a simi nih khan Artemis khuazingnu biakinn lem tete kha ngun in a ser hna i cu rian nih cun a rianṭuantu pawl kha tampi miaknak a pek hna. 25 Cucaah annih cu hmunkhat ah a auh dih hna i, anmah rian bantuk an rian a si vemi zong kha a auh chih hna i, "Ka duale hna, nannih nih nan hngalh bantukin kan chaw hmuhnak cu hi rian hi a si. 26 Cun hipa Paul nih hin zeidah a tuah ti cu nanmahte nih nan i hmuh khawh i nan i theih khawh fawn ko. Aa thawh i, 'Mi sermi pathian cu pathian an si lo,' a ti i Efesa khua ah hin siseh, cun Asia ram chung zongah hin a dihlak dengmang in, mi tampi kha an lung a pemter hna. 27 Cucaah cun hi kan rian hi a min a chia cang lai tiah thinphan awk a si ko. Cu lawng hmanh cu si loin, a liannganmi khuazingnu Artemis, Asia ram chung le vawleicung dihlak ah mi kip nih an biakmi hi a lianhngannak hi a lo lai i a biakinn zong hi sullam ngei lo a si lai ti phan awk a si fawn," tiah a ti hna. 28 Aa pummi hna nih cun cu bia cu an theih tikah an thin a hung ciammam i an au i, "Efesa i a ummi Artemis cu a lianngan ko," an ti. 29 Cuti i an i tuainak cu khuachung kha a khat dih. Mibu nih cun Paul sin i khual a tlawng vemi Masidonia mi pahnih, Gaius le Aristarkas kha an tlaih hna i bual ah khan an tlikpi hna. 30 Paul nih amah pum in mizapi hmai i va kal kha a duh, sihmanhsehlaw zumtu hna nih khan an thlauh. 31 Cun ram uktu bawi a cheukhat, a hawikom a simi hna zong nih khan, bual ah cun rak chuak hlah seh tiin bia an cah. 32 Cun an i pumhnak cu a ningpi in hnahnawk luri ngaiin a um: mi a cheu an aumi cu thil pakhat a si i a dang an rak aumi cu thil dang a si ve; a tam deuh nih cun zeicahdah kan i pumh ti hmanh kha an hngal lo. 33 Judah mi nih Alekzandar kha hmailei ah an hei chuahter caah khan, hi thil a chuahtertu hi Alekzandar cu a si rua tiah an ruah. Alekzandar nih cun mizapi cu, dai u, tiah a kut a hun zaoh hna i an hmaiah cun aa runvennak bia kha chim hram a hun thawk. 34 Sihmanhsehlaw Judah mi a si kha an hngalh tikah an dihlak cun an au bon khan suimilam pahnih chung an au i, "Efesa khua i a ummi Artemis cu a lianngan ko," an ti. 35 A donghnak ah khua cazi nih khan mizapi cu a daihter khawh hna. A thawh hna i, "Efesa khuami hna, Efesa khua hi a liannganmi Artemis biakinn a umnak le vancung in a rung tlami lung thiang a umnak a si ti kha ahodah a hngal lomi a um? 36 Ahohmanh nih, hihi a si lo tiah an ti kho lai lo. Cucaah cun nannih cu nan daih awk a si; ruat setsai loin zeihmanh nan tuah awk a si lo. 37 Hi mi hna nih hin biaknak inn thil kha zeihmanh an fir lo i kan khuazingnu kha zeihmanh a thang an chiat lo nain, hika ah hin nan chuahpi hna. 38 Demetrius le a rianṭuantu hna nih taza an cuai duhmi an um ahcun biaceihnak zung chuah ni a um ko i biaceihtu zong an um fawn ko; cuka ah cun pakhat le pakhat taza i cuai khawh a si ko. 39 Cun cu nak biapi deuh kha nan duh a si ahcun khuami zapi pumhnak ah khiah awk a si fawn ko. 40 Nihin i hi thil a ummi ruangah hin kannih cu hnahnawhnak nan chuahter tiin mawhchiatnak pek kan fawite. Hi hnahnawhnak kongah hin i sonhtarh awk zeihmanh a um lo i hihi zeicahdah hi bantukin a si ti hi ṭha tein chim awk bia kan ngei fawn lo," tiah a ti. 41 Cu bia a chim dih in pumhnak khan a ṭianter hna.
1 Hnahnawhnak kha a daih tikah Paul nih khan a zummi kha a kawh hna i thazang peknak bia a chimh hna hnuah, dam tein rung um u, tiah a ti hna i Masidonia ram leiah khan a kal. 2 Cuka ram chung khua kha a ṭolpah duahmah hna i thazang peknak bia kha a chimh hna. Cun Grik ram kha a phan i 3 cuka ah cun thla thum a um. Siria i kal dingah a tlam a tlin nawnpah tikah khan Judah mi nih rawi an ka zalh ti kha a hngalh i cucaah Masidonia lei tu khan kal aa tim ṭhan. 4 Berea khuami Pirhas fapa Sopater le Thesalonika khuami Aristarkas le Sekandas le Derbe khuami Gaius le Asia ram mi Timote, Tikhikas le Trofimas kha a sinah cun an kal. 5 An rak kal chung i Troas khua khan an rak kan hngah. 6 Thilnu Phulh Lo Changreu Puai dih in Filipi khua in lawng in kan chuak i ni nga hnuah Troas khua ah kan phak hna; khika ah zarh khat kan cam. 7 Zarh chung hmasa bik ni ah hawikomhnak rawl dum ṭi awkah kan i pum. Paul cu a thaizing a kal ding a si cang caah, mi kha bia a chimh lengmang hna i zanṭim tiang a chimh hna. 8 Kan i pumhnak khaan, cungdot khaan ah cun meiinn tampi an van. 9 Tlangval pakhat a min Zutikhas an timi kha thlalangawng ah khan a ṭhu i Paul nih ngol loin a chim lengmang caah cun a ngu chin lengmang ve i a donghnak ah cun hngilh taktak tein aa hngilh i inncung dot thumnak cun vawlei ah a tla. An vung char i a thi ko. 10 Sihmanhsehlaw Paul cu a vung ṭum i a bawhhnawh i a ṭang ah aa behchih. "Nan thinphang hlah u, a nung ko rih!" tiah a ti. 11 Cun inncung ah khan a hung kai ṭhan i changreu kha a cheu i an ei. Annih cu saupi, khuadei tiang, a chimh hna hnuah aa thawh. 12 Tlangvalpa cu inn ah an kalpi i an hna a ngam. 13 Lawng ah khan kan rak kal chung i Assos lei kha kan panh; cuka ah cun Paul cu kan lawng ah khan a hun i cit ve ding a si. Anih cu tlanglam in a kal caah cuticun nan tuah lai tiah a kan ti tak. 14 Assos i kan sin i a ra phak tikah lawng ah cun aa cit ve i Mitilene ah kan kal. 15 Cuka cun kan chuak i a thaizing ah Khios tikulh zawn kha kan phan. Cun a thaizing nolh ah cun Samos kha kan phan i a kiptuh ah Miletas kha kan phan. 16 Asia ram chungah kan rauh nakhnga lo lawng in Paul nih Efesa khua kha lanhtak aa zal. Jerusalem khua kha khulrang in phak a duh i a si khawh ahcun Pentekos ni tanh manh kha a duh. 17 Paul nih Miletas khua khan mi a thlah hna i Efesa khua khrihfa upa kha rak ka tong hna seh tiah bia a cah hna. 18 Annih cu an ra phanh tikah a thawh hna i, "Nan sin i ka um chung vialte, Asia ram chung i ka ra phakka tein zeitindah nan sinah ka umtuning a si kha nan hngalh. 19 Toidorte le mitthli he Bawipa sal ka si bangin, Judah mi nih an ka rawiphiar ruangah harnak ing lengmang in ka rian kha ka ṭuan. 20 Nannih kha zapi lakah siseh, nan inn cio ah siseh, phung kan chimh hna i kan cawnpiak hna tikah nan ca i a ṭha dingmi kha zeihmanh ka nganhtakmi a um lo ti kha nan hngalh. 21 Judah mi nan si ah, Jentail mi nan si ah, Pathian hmaiah nan sualnak kha i ngaihchih i kan Bawipa Jesuh zumh ding kha, nan dihlak in kan forh hna. 22 Atu cu Thiang Thlarau hruainak zulh in Jerusalem khua ah ka kal lai, khika ah ka cungah zeidah a tlung lai ti ka hngal lo. 23 Ka hngalhmi cu Thiang Thlarau nih a ka chimh bantukin, khua kip ah thongtlaknak le harnak nih an ka orh ko ti hi a si. 24 Sihmanhsehlaw Bawi Jesuh nih a ka fialmi rian, Pathian velngeihnak Thawngṭha chim hi ka lim khawh paoh ahcun ka nunnak hi cu zeihmanh ah ka rel lo. 25 "Nan dihlak in kan vahhnawh hna i Pathian Pennak kong kha kan chimh hna. Cun atu cu ahohmanh nih nan ka hmu ṭhan ti lai lo ti kha ka hngalh. 26 Cucaah nihin ah fel tein kan chimh duhmi hna cu, nannih lakah hin pakhatkhat nan tlau ahcun, keimah cu mawhchiat awk ka si hnga lo, ti hi a si. 27 Zeicahtiah Pathian nih aa tinhmi kha a dihumnak in kan chimh dih cikcek hna i ka nganhmi zeihmanh a um lo. 28 Nanmah lila kha i veng u law nan zohkhenh awkah Thiang Thlarau nih an pekmi hna tuurun kha ṭha tein va zohkhenh hna u. Pathian nih amah Fapa thihnak thawngin amah ta ah aa sermi khrihfabu tuukhal kha si ko u. 29 Ka kal hnuah ṭih a nungmi cenghngia kha an ra lai i tuurun kha an ngan hna lai lo ti kha ka hngalh. 30 Cun nanmah bu chung lila zong hin mi a cheu nih a zummi hna kha anmah lei i hruai awkah lih an chim lai caan kha a phan lai. 31 Cucaah ralring tein um ko u, mitthli he chun zan in kum thum chung nan dihlak in kan cawnpiak hna kha philh hlah u. 32 "Atu cu Pathian velngeihnak chung le zohkhenhnak chungah nannih kha kan sanh hna. Amah nih cun an ṭhanter khawh hna i a mi vialte caah a chiahmi thluachuahnak kha an pek khawh hna. 33 Ahohmanh an ngun zong ka hngar hna lo, an sui zong ka hngar hna lo, an hnipuan zong ka mit an thi bal lo. 34 Hi ka kutte hin rian ka ṭuan i keimah le ka hawile nih kan herhmi vialte kha keimahte nih ka chuahpi ti cu nanmah hrimhrim nih nan hngalh ko. 35 Zeizong vialte ah hi bantukin fak piin rianṭuannak thawngin a dermi kha kan bawmh hna awk a si ti cu kan hmuhsak cang hna i Bawipa Jesuh zong nih khan zeitindah a rak ti ti ahcun, 'Pek leiah hin hmuh lei nakin lunglawmhnak a um deuh,' a rak ti; cucu kan philh lo awk a si," tiah a ti. 36 Paul nih bia a chim dih in an dihlak in an khuk an i bil i thla a cam. 37 An ṭahpah in an kuh an hnamh i, dam tein vaa kal ko cang kun, an ti. 38 Nan ka hmu ṭhan ti lai lo, tiah a ti hna caah khan an ngaih a chiat khunnak cu a si. Cun lawng tiang khan an hei thlah.
1 Dam tein rung um u, tiah kannih zong nih kan ti hna i kan kal. Ding tein lawng cun kan kal i Kos tikulh kha kan phan; a thaizing ah Rods tikulh kha kan phan i cuka cun Patara ah kan lan. 2 Khika ah khan Foinisia i a kal dingmi lawng kha kan hmuh i kan i cit i cu lawng cun kan kal. 3 Saipras tikulh a langhnak tiang kan va phan i cuka cun thlanglei ah kan vung kal i Siria ah kan lan. Tair khua ah tikam ah kan ṭum i cuka ah cun lawng nih a thil phorhmi kha a ṭhumh. 4 Cuka ah cun a zummi tlawmte kan va hmuh hna i an sinah zarh khat kan cam. Thlarau nih a chimh hna bangin, Paul cu Jerusalem khua ah khan kal hlah tiah an thlauh. 5 Sihmanhsehlaw anmah sin kan camnak caan cu a dongh tikah kan i thawh i kan kal ṭhan. An dihlak in, an nupile le an fale hna he khua leng tiang an kan thlah. Rilikam ah cun kan dihlak in kan khuk kan i bil i thla kan cam. 6 Cun pakhat le pakhat kha, dam tein, kan i ti hna i kannih cu lawng cungah khan kan kai i annih cu inn leiah an tlung. 7 Tair cun kan kal lengmang i Ptolemai kan phan, khika ah unau pawl kha kan hun biakchawnh pah hna i an sinah ni khat kan cam. 8 A thaizing ah kan i thawh ṭhan i Sisaria kan phan, khika ah Thawngṭha chimtu Filip inn ah khan kan tlung. Amah cu Jerusalem khua i mi pasarih an thimmi hna lak i pakhat kha a si. 9 Amah nih cun va a ngei lomi fanu pali a ngeih hna i annih nih cun Pathian bia kha an chim. 10 Cuka i sau nawn kan cam hnuah Judea ram in profet pakhat a min Agabas a simi a ra phan. 11 Kan sinah cun a ra i Paul taisawm kha aa lak i a kut le a ke kha taisawm cun aa tem i, "Hihi Thiang Thlarau chimmi a si: Hi taisawm a ngeitupa hi hi bantukin Jerusalem khua ah Judah mi nih an ṭem lai i Jentail mi hna kut ah an chanh lai," tiah a ti. 12 Hi bia cu kan theih tikah khika i a ummi hna le kanmah pawl nih cun Paul cu Jerusalem khua i kal lo awkah kan nawl. 13 Sihmanhsehlaw a kan thawh i, "Zeidah nan tuah? Hi bantukin nan ṭah ahcun ka lung nan ka hnoter. Jerusalem ah hin Bawi Jesuh caah ṭemnak huah lawng hi kaa tinhmi a si ṭung lo, thihnak tiang hmanh ka in lai tiah pei kaa timh cu," tiah a kan ti. 14 Kannih nih a lung kha kan ṭhial khawh lo caah, "Pathian nawl si ko kun seh," ti tu ah kan ti. 15 Cuka ah caan tlawmpal kan cam hnuah kan thil cu kan i tim i Jerusalem leiah khan kan kal. 16 Sisaria khua i a ummi zultu cheukhat zong kan sinah an kal ve i kan tlunnak dingmi pa inn ah khan an kan hruai — cu pa cu Saipras mi Mnason a si i amah cu hlan lio tein a zummi a rak si. 17 Jerusalem kan phak tikah cun unau pawl nih khan an rak kan conglawmh ngaingai. 18 A thaizing ah Jeim kha va ton awkah Paul le ti cun kan kal i khrihfa upa vialte zong kha an rak tling. 19 Paul nih khan a biakchawnh dih hna in Jentail mi hna sinah Pathian nih amah rianṭuannak thawngin a tuahmi vialte kha tling tein a chimh hna. 20 A chimmi cu an theih tikah Pathian kha an thangṭhat. Cun Paul cu an thawh i, "Unaupa, zeitindah thil umtuning a si cu na hngalh ko. Judah mi lakah hin thong tampi a zumtu an um cang i cu hna cu Phung a ṭanh ngaingaimi an si. 21 Jentail mi ram chung i a ummi Judah mi vialte kha Moses Nawlbia kha hlaw u law nan fale kha an cuarpar tan hna hlah u law Judah phung kha zul hlah u, a ti hna, tiah nangmah kongah khan bia an theih. 22 Annih nih hika na phak kha an hngalh ding ṭheo a si. Cucaah cun zeidah tuah awk a si lai? 23 Kan in chimhmi hi tuah ko. Hika ah hin biakamnak a tuahmi mi pali an um. 24 Anmah he cun va kal u law thianhnak phungphai an tuahmi kha va tuah ve law liam awk kha va liampiak hna; cun an lu kha an i met kho lai. Cuticun aho paoh nih na kong an rak chimhmi hna kha biatak aa tel lo tiah an hngalh lai i Moses Nawlbia ning tein khua a sami na si tu kha an hngalh lai. 25 Jentail mi zumtu i a simi hna kong tu ah cun, kannih nih ca kan kuat cang hna i siasal sinah pekchanh ciami rawl nan ei lai lo, thi nan ei lai lo, hngawngdih sa paohpaoh nan ei lai lo, pumsa sualnak kha nan tuah lai lo tiah kan biakhiahnak a si tiin kan ti cang hna," tiah an ti. 26 Cucaah Paul nih khan mi kha a kalpi hna i a thaizing ah i thianhnak phungphai kha a tuahpi hna. Cun biakinn chungah khan a va lut i an i thianhnak caan a dongh tiangah ni zeizat dah a si lai i cu a dongh tikah an caah raithawinak tuah a herh cio lainak kong kha tlangbawi cu a va chimh. 27 Ni sarih kha a dongh deng nawn tikah khin Asia ram in a rami Judah mi tlawmpal hna nih Paul kha biakinn chungah cun an hmuh. Mizapi kha an tuai ciammam hna i Paul kha an tlaih. 28 "Israel mi hna, kan bawm tuah u. Hi pa hi pei a kenkiplo ah a kal i Israel mi ralchanh le Moses Phungbia ralchanh le hi biakinn ralchanh in mi a cawnpiak lengmangtu hna cu a si cu. Cun atu hi hi biakinn chungah hin Jentail mi hna hmanh kha a luhpi hna i a thurhhnawmhter cang," tiah an au. 29 (Hiti an ti cu, Efesa khuami Trofimas kha Paul he khua chungah an hmuh hna i Paul nih biakinn chungah a luhpi, tiah an ruah caah a si). 30 I tuainak cu khuapi chungah cun a khat i mi vialte kha an tli an le i Paul kha an tlaih i biakinn chung khan an chuah. Khulrang in innka kha an hrenh. 31 Mibupi nih khan Paul cu thah an timh lioah khin Jerusalem khua cu a ningpi in a buai cang tiin Romans ralkap a haotu hna bawi kha thawng an thanh. 32 Chikkhatte ah cu haotupa nih cun ralbawi tlawmpal le ralkap kha aa kalpi hna i zapi leiah cun an va le. Ralkap he an rat kha an rak hmuh hna tikah Paul an tuk kha an ngol. 33 Ralkap haotu nih cun Paul cu a tlaih i thir cikcin a thuah in nan khih lai tiah a ti. Cun aa thawh i, "Hi pa hi ahodah a si? Zeidah a tuahmi a si?" tiah a hal hna. 34 Zapi lak cun a cheu nih thil pakhat in an rak au, a cheu nih a dang in an rak au. An i tuai tuk caah cun ralkap haotu nih cun thil a rak ummi kha zei set dah a si ti kha a hngal kho lo i cucaah a mi hna kha Paul cu ralhruang chungah hun luhpi u tiah a fial hna. 35 Hleihlak kha an hei phakpi i mibu kha an puarhran tuk caah ralkap nih cun a zawnh in an zawnh. 36 An hnu cun an dawi lulhmalh hna i, "That u," tiah an au. 37 Ralhruang chungah khan Paul cu an hei luhpi dengmang tikah khin Paul nih ralkapbu haotu kha a chawnh i, "Bia tlawm tein kan chim kho hnga maw?" tiah a ti. "Grik holh na thiam tih?" tiah ralkapbu haotu nih cun a ti i, 38 "A si ahcun, kan hnulei deuh i ralthawhnak a thawk i mi thong li hriam he nam he ramlak i a kalpitu hna Izipt mipa kha cu na si lo ti law?" tiah a ti. 39 Paul nih cun, "Kei cu Judah mi, Silisia ram Tarsas khua i a chuakmi ka si; khuapi minthang fapa pei ka si ve tiah. Zaangfahnak tein mizapi sinah hin bia ka chimter ko," tiah a leh. 40 Ralkapbu haotu nih cun a nawl a pek i hleihlak ah cun Paul cu a dir i mizapi kha a kut a zaoh hna. Dai tein an hung um tikah Paul nih cun Hebru holh in bia kha a chimh hna.
1 Paul nih cun a thawh hna i, "U le nau hna le pale hna, nan hmai i kaa humhaknak bia ka chim tikah hin ka bia hi ka ngaihpiak tuah u," tiah a ti. 2 Annih nih Hebru holh in a chim kha an theih tikah an dai chinchin i cun Paul nih cun a bia cu a vun peh i, 3 "Kei cu Judah mi, Silisia ram Tarsas khua i a chuakmi ka si, sihmanhsehlaw ka ca cawnnak cu hika Jerusalem khua ah hin Gamaliel kut tangah khan a si. Kan pupa hna Phungbia kha fel tein cawnpiak ka rak si i nihin i nanmah vialte tlukte hin Pathian leiah aa pumpemi ka rak si. 4 Hi Lam a zulmi hna hi ka rak hrem hna i ka rak thah hna. Nu he pa he ka rak tlaih hna i thong ah ka rak thlak hna. 5 Tlangbawi Ngan le khawngsil upa hna nih khan ka chimmi hi biatak a si kha tehte an khaan khawh. Anmah sin cun Damaskas khua i a ummi Judah mi hna pek awk ca kha kaa lak i cuticun hi mi hna hi tlaih i thir cikcin in khih i Jerusalem khua i hunpi i dantat awkah khan ka kal," tiah a ti. 6 "Damaskas khua leiah cun kan kal i kan hei phak deng ah khin, chun hrawng a si lai, ka velchum ah ceunak pakhat a hung ceu zuk ko. 7 Vawlei ah ka tlu i aw pakhat nih a ka chawnh kha ka theih i, 'Saul, Saul, zeicahdah na ka hrem?' tiah a ti. 8 Kei nih ka thawh i, 'Ahodah na si, Bawipa?' tiah ka ti i, 'Keimah cu na hremmi Nazareth khuami Jesuh ka si,' tiah a ka ti. 9 Ka sin i a ummi hna nih khan ceu cu an hmuh, sihmanhsehlaw bia a ka chimtu aw kha cu an thei lo. 10 'Zeidah ka tuah lai, Bawipa?' tiah ka hal i Bawipa nih cun 'Tho law Damaskas khua chungah va lut tuah; khika ah Pathian nih na tuah awkah a ruahmi vialte cu an rak in chimh lai,' tiah a ka ti. 11 Ceunak cu a ceu tuk caah cun ka mit a caw i cucaah ka hawile nih khan ka kut in an ka hruai i Damaskas khua chungah cun an ka luhpi. 12 "Cuka ah cun mipa pakhat a min Ananias a simi kha a rak um, amah cu biaknak lei i lungthin a ngeimi le kan Phunglam a zulmi le Damaskas khua i a ummi Judah mi vialte nih an hmaizahmi a si. 13 Ka sinah khan a ra i ka pawngin a dir i, 'Ka nau Saul, hmu ṭhan tuah,' tiah a ka ti. Cu cangkate cun ka vun hmuh colh i amah cu ka hun zoh. 14 Aa thawh i, 'Kan pupa hna Pathian nih nangmah cu a duhnak kha hngalhter awk le a dingmi a Sal kha hmuh awkah, amah aw hrim in a chimmi bia kha theih awkah an thim. 15 Zeicahtiah na hmuhmi le na theihmi kha mi vialte a chimtu amah tehte na si lai. 16 Cucaah zeicahdah sau deuh ngan a herh? Tho law tipilnak ing ko, amah min na auhnak thawngin na sualnak vialte kha i thianh ko,' tiah a ka ti. 17 "Jerusalem ah ka kir ṭhan i biakinn chung i thla ka cam lioah langhnak ka hmuh. 18 Cu langhnak ah cun Bawipa kha ka hmuh i a ka thawh i, 'Khulrang tein Jerusalem khua hi chuahtak tuah, zeicahtiah hika i a ummi hna nih hin keimah kong i na chimmi bia hi an cohlang lai lo,' a ka ti. 19 Cun kei nih, 'Bawipa, pumhnak inn kip ah ka kal i nangmah an zummi kha ka tlaih hna i ka tuk hna cu ṭha tein an hngalh ko. 20 Cun na tehte a simi Steven kha an thah tikah keimah hrimhrim zong kaa tel ve i amah thah kha ka hnatlakpi ve hna i a thattu hna an puan a rak fimhlawmtu kha ka rak si,' ka ti. 21 Sihmanhsehlaw Bawipa nih cun a ka thawh i, 'Kal ko, zeicahtiah ram hlapi i a ummi Jentail mi hna sinah kan thlah lai,' a ka ti," tiah a ti. 22 Hi tiang a chim ah hin cun mizapi nih khan Paul kha an ngaih ko; sihmanhsehlaw an aw reng chuak khan an au ṭhan i, "Kha pa kha hlo ko u. That ko u. A nung ding tlak a si lo," an ti. 23 An ai an kiao, an puan kha an hlorh i vuidip kha van ah an vorh. 24 Romans ralkapbu haotu nih cun a mi hna kha Paul cu ralhruang chungah kalpi u law zeicahdah Judah mi nih hi ti hin an auhnawh hnga ti hngalh khawhnak ding caah fungfek in va tu u, tiah nawl a pek hna. 25 Sihmanhsehlaw tuk ding i an hun hren ah khin Paul nih cuka i a dirmi bawi cu a thawh i, "Romans mi a simi, zeidah a sual ti hmanh ceih rih lomi tuk hi, na caah upadi ning a si lai maw?" tiah a ti. 26 Cu bawi nih cucu a theih tikah ralkapbu haotu sinah cun a va kal i, "Na tuahmi hi zeidah a si ti awk na hngal maw? Hi pa hi Romans mi fawh a si hi!" tiah a ti. 27 Cucaah ralkapbu haotu bawipa cu Paul sinah khan a va kal i, "Romans mi na si maw, ka chim tuah," tiah a va ti. Paul nih, "Ka si ko," tiah a leh. 28 Ralkapbu haotu nih cun, "Tangka tampi pek in kei cu ka si," tiah a ti. Paul nih, "Kei cu a chuah in aa chuahpimi ka si," tiah a leh. 29 Paul cu bia kan hal lai tiah a timi hna kha hmakhatte ah an i let ṭhan i ralkapbu haotu cu Paul kha Romans mi a si ti a hun hngalh tikah, thir cikcin in a rak khih kha a thin a phang. 30 Ralkapbu haotu nih cun Judah mi nih Paul hi zei sette dah an puh ti kha hngalh a duh caah a thaizing ah cun Paul cu a thir cikcin kha a phoih i tlangbawi upa hna le khawngsil pawl kha i pum u tiah nawl a pek hna. Cun Paul cu a kalpi i an hmaiah khan a dirter.
1 Khawngsil pawl cu Paul nih dengteo in a zoh hna i, "Ka u le ka nau hna, nihin ni hrimhrim tiangin Pathian hmaika i ka nunning ah ka chiaṭha thleidannak lungthin a thiang," tiah a ti. 2 Paul pawng i a dirmi hna kha Paul cu a ka ah vun beng u, tiah Tlangbawi Ngan Ananias nih khan a ti hna. 3 Amah cu Paul nih a thawh i, "Si rang thuhmi vampang, nangmah cu Pathian nih an bengh lai. Zeitindah keimah cu Phung ningin ka bia ceih awkah khaka ah khan na ṭhut i Phung he aa ralchanh in, hei beng u, na ti fawn ṭung hna?" tiah a ti. 4 Paul pawng i a dirmi hna nih cun, "Pathian Tlangbawi Ngan na serhsat," an ti. 5 Paul nih a leh hna i, "Ka u le ka nau hna, amah cu Tlangbawi Ngan a si kha ka hngalh lo caah a si. Cathiang chungah, 'Na mi a uktu hna cu na thangchiat lai lo,' ti bia a um," tiah a ti. 6 Paul nih cuka bu chungmi cu a cheu Sadusi mi an si i a cheu Farasi mi an si kha a hmuh hna tikah khawngsil chungah cun a au i, "Ka u le ka nau hna, kei cu Farasi mi, Farasi mi hna fa ka si. Hika i biaceih i ka um hi a thimi kha nunnak ah an tho ṭhan lai ti ruahchannak ka ngeih ruangah a si," tiah a ti. 7 Cu bia a chim cangka in Farasi mi hna le Sadusi mi hna cu an i si i an kuai. 8 (Zeicahtiah Sadusi mi nih cun mi hi thihnak in an tho ṭhan lai lo, vancungmi an um lo, thlarau zong a um lo, an ti; sihmanhsehlaw Farasi mi nih cun a pathum te hin an zumh dih). 9 An aukhuan cu a thang deuh lengmang i Phungbia cawnpiaktu saya cheukhat, Farasi mi pawl a simi kha an dir i fak piin an al hna i, "Hi pa hi a palhnak zeihmanh kan hmu kho lo. Thlarau nih maw vancungmi nih dik a chawnh taktak ko lai," an ti. 10 An i alnak cu a fak tuk hringhran i ralkapbu haotu nih khan Paul cu an thleh an baoh dih sual lai ti kha a phan caah a ralkap hna kha, mibu chungah cun vung kal u law Paul kha vung la u law ralhruang chungah khan hun luhpi u, tiah a fial hna. 11 Cu zan ah Bawipa cu Paul pawngah khan a dir i, "Na lung ṭhul hlah. Jerusalem khua ah keimah tehte na sinak kha na chim cang, cu bantuk ṭhiamṭhiam in Romans khua zongah na tuah hrimhrim lai," tiah a ti. 12 A thaizing ah Judah mi a cheukhat kha hmunkhat ah an i tong i khua an khang. Paul kan thah hlanah cun rawl zong kan ei lai lo, ti zong kan ding lai lo, tiah biakamnak an tuah. 13 Cu bantukin khua a khang ṭimi hna cu sawm linak tam an si. 14 Cun tlangbawi upa hna le upa dang hna sinah khan an va kal i, "Paul kan thah hlan paohpaoh zeihmanh kan ei lai lo tiin biakamnak kan tuah cang. 15 Cucaah nanmah le khawngsil pawl nih khan Romans ralkap haotu kha bia hei cah u law, Paul kongah bia fiang deuh in theih a duh bantukin i umter u law, Paul kha kan sinah run thlah tuah tiah ti u law, kannih nih hika a phak hlanah rak that dingin timhcia tein kan rak um lai," an ti. 16 Sihmanhsehlaw cu an khuakhanmi cu Paul far fapa nih a theih i cucaah ralhruang chungah khan a va lut i Paul kha a chimh. 17 Cun Paul nih ralbawi pakhat kha a kawh i, "Ralkapbu haotu sinah hi tlangvalpa hi hei kalpi tuah, zeilo chimh awk a ngei," tiah a ti. 18 Ralbawipa nih cun a kalpi i ralkapbu haotu sinah cun a hei chuahpi i, "Thongtla Paul nih a ka auh i hi tlangvalpa hi zeilo chim awk a ngeih caah nangmah sinah ratpi awk a ka fial," tiah a ti. 19 Ralkapbu haotu nih cun a kut in a hruai i amah lawngin aa kalpi i, "Zeidah chimh awk na ka ngeih?" tiah a hal. 20 Tlangvalpa nih cun a thawh i, "Judah mi lak i nawl ngeitu hna nih khan, Paul kongah bia fiang deuh in hngalh a duh bantukin kan i umter lai i nangmah kha biaceihnak khawngsil ah Paul cu thaizing ah hun chuahpi tuah tiah kan nawl lai tiah hnatlaknak an tuah cang. 21 Sihmanhsehlaw an bia cu ngai hna hlah, zeicahtiah minung sawm li a thli tein amah a bawhmi kha an um. Kan thah hlanah cun rawl zong kan ei lai lo, ti zong kan ding lai lo, tiah chiat an i serh. Cu tuah dingah cun atu ah hin timhcia tein an um ko i nangmah biakhiahnak kha an in hngak ko," tiah a ti. 22 Ralkapbu haotu nih cun a thawh i, "Hi kong na ka chimh hi ahohmanh va chim hna hlah," tiah a ti i tlangvalpa cu a kalter. 23 Cun ralkapbu haotu nih khan ralbawi pahnih kha a auh hna i, "Sisaria i kal awkah ralkap za hnih in va tim hna u; cun rangcung ralkap sawm sarih le feipu za hnih zong va timhter chih hna u law tuzan suimilam pakua ah i thawh dingin i tim u. 24 Paul caah khan cit awk rang tim ve hna u law him tein Mangki bawi Feliks sinah phakpi u," tiah a ti. 25 Cun ralkapbu haotu nih cun ca a ṭial i hi bantuk hi a ṭialmi cu a si: 26 "Klaudias Lisias nih Mangki Bawipa Feliks sinah ca kan kuat. Na cungah daihnak um ko seh. 27 Judah mi nih hi pa hi an tlaih i an thah dengmang. Amah cu Romans mi a si ti kha ka hngalh i cucaah ka ralkap hna he kan hung kal i kan hung khamh. 28 Sual an puhmi hi zeidah a si hnga ti hngalh ka duh caah khawngsil pawl sinah khan ka vun kalpi. 29 A tuahmi ah thah awk tlak a simi siseh, thong thlak awk tlak a simi siseh, zeihmanh ka hmu lo; sual an puhmi cu anmah phung kong men kha a si ko. 30 Cun Judah mi a cheukhat nih amah thah khawhnak ding khua an khang ti kha ka theih tikah nangmah sinah ka rak kuat ahcun a ṭha lai tiah ka ruah. Cun sual a phawtu hna cu ka thawh hna i amah cu nangmah hmaika ah taza va cuai u, tiah ka ti hna," tiah a ti. 31 Ralkap pawl nih cun a fial hna ning khan an tuah. Paul cu an va lak i cu zan ah cun Antipatris tiang an kalpi. 32 A thaizing ah ke ralkap pawl cu ralhruang ah khan an kir i rangcung ralkap pawl nih khan an lanhpi. 33 Sisaria tiang kha an kalpi. Mangki bawi kha ca cu an pek i Paul cu amah kut chungah khan an chiah. 34 Mangki bawi nih cun ca kha a rel i Paul cu khuazei peng mi dah na si, tiah a hal. Silisia peng mi a si kha a hngalh tikah, 35 "Taza an cuaitu hna an rat tikah na bia cu kan ceihpiak te lai," tiah a ti. Cun Paul cu Herod Siangpahrang inn ah khan va cawng u, tiah ralkap kha a fial hna.
1 Ni nga hnuah Tlangbawi Ngan Ananias cu upa tlawmpal le sihni Tertullas he Sisaria ah khan an kal. Mangki bawi Feliks hmaiah khan an chuak i Paul sual an phawtnak bia cu an chim. 2 Tertullas cu bia cu chim tuah ti a si i Paul cu hitihin sual cu a phawt: "Bawipa, nangmah nih fimnak in na kan hruainak thawngin daihnak caan saupi kan hmu i kan ram ṭhatnak caah a herhmi remhnak tampi kha tuah a si. 3 Hi kong ah hin kan lung aa lawm ngaingai ko, bawipa. 4 Na caan kha sau tuk lakpiak kan duh lo, cucaah kan chimmi a tawite cu zaangfahnak tein na kan ngaihpiak nakhnga kan in nawl. 5 Hi pa hi hnahnawhnak a tuah lengmangtu, mi ṭihnung a si tiah kan hmuh; vawleicung khuazakip ah Judah mi hna lakah khan hnahnawhnak a thawhter lengmang i amah hi mibu bu khat Nazareth khuami mibu timi a hruitu hna a si. 6 Biakinn zong kha thurhnawmh a zalh i sihmanhsehlaw kan tlaih manh. (Kanmah nih kan phung ningin biaceih kan timh, 7 sihmanhsehlaw ralkapbu haotu Lisias kha a ra i hramhram in a kan chuh. 8 Cun Lisias nih cun nawlbia a chuah i tazacuai a duhmi nih nangmah hmaiah hin va cuai u, a ti.) Hi pa hi bia na hal tikah sual kan phawtmi vialte hi ahmaanmi lawngte an si ti kha na hngalh ko lai," tiah a ti. 9 Judah mi hna cu, cu bantukin sual a phawtnak ah cun an hun i ṭom ve i a chimmi cu ahmaan dih tiah an hun ti. 10 Mangki bawipa nih khan Paul cu bia chim ve tuah tiah a kut a hei zaoh i Paul nih cun, "Nangmah cu hi miphun hna cungah kum tampi biaceihtu na si cang ti kha ka hngalh i cucaah nangmah hmai i humhaknak bia chim hi ka saduhthah ngaingaimi a si. 11 Nangmah nih na hngalh khawh ko bantukin, Jerusalem khua i Pathian biak awkah ka hung kal cu ni hleihnih nakin a tam rih lo. 12 Judah mi hna nih hin biakinn chungah aho he bia kan i al an ka hmu lo, pumhnak inn ah siseh, khuachung khuazeihmanh ah siseh, mizapi kha hnahnawhnak tuah awkah ka forh hna zong kha an ka hmu lo. 13 Cu pinah sual an ka phawtmi zong hi ahmaan tiah an ti khawhnak zeihmanh a um lo. 14 Hi bel hi ka tuah tiah nangmah hmaiah ka ti khawh: Kei cu Lam thar a zulmi ka si (annih nih cun bu thar tiah an ti) i cu ti ning cun kan pupa hna Pathian cu ka biak; zeicahtiah Moses Phungbia chung i aa ṭialmi vialte le profet hna cauk chung i aa ṭialmi vialte kha ka zumh i Pathian i bochan in 15 hi sual a ka phawtu hna zong nih an i ruahchan vemi, minung hi mi ṭha he mi ṭhalo he thihnak in kan tho ṭhan dih lai, ti hi kaa ruahchanmi a si ve. 16 Cucaah Pathian hmai le minung hmaiah chiaṭha thleidannak thiang ka ngeih khawh nakhnga kaa zuam khawh chungin kaa zuam. 17 "Jerusalem khua in kum tam nawn ka chuah hnuah, ka mi hna cu tangka tlawmpal va pek awk le raithawinak va tuah awkah cuka ah cun ka hung kal. 18 Cu thil Ka tuah lioah cun biaknak inn chung i an ka hmuh hi a si i cu ah cun kan biaknak lei in i thianhnak phung kha ka tuah dih cang. Cu lioah cun ka sinah mibu zeihmanh an um lo i hnahnawhnak zeihmanh a um fawn lo. 19 Sihmanhsehlaw cuka ah cun Asia ram in a rami Judah mi tlawmpal bel an um; annih nih sualphawt awk an ka ngeih a si ahcun bia chimtu dingah anmah cu pei zung ah hin ra chuah awk an si cu. 20 Asiloah hika i a ummi hna nih hin biaceihnak khawngsil hmai i ka dir lioah khan zeital sualnak ka tuah maw chim tuah hna seh, 21 an hmai i ka dir lio i ka chimmi cu hi bel hi a si: Mithi hna cu nunnak ah an tho ṭhan lai, ti ka zumh ruangah nannih nih nihin ah hin taza nan ka cuai hih, ka ti hna," tiah a ti. 22 Cu Lam kong fiang tein a hngalmi Feliks nih cun an bia cu a donghter i, "Nan bia cu ralkapbu haotu Lisias a rat tikah ka khiah te lai," tiah a ti hna. 23 Paul a cawngtu ralbawipa cu Paul kha luat deuh in na umter lai i a hawile nih a duh herhmi tuahpiak ding kha na thlauh hna lai lo, tiah a ti. 24 Ni tlawmpal hnuah khin Feliks cu a nupi Drusilla he an ra; a nupi cu Judah mi a si. Paul cu ra seh tiah an hei cah i Paul nih Khrih Jesuh zumhnak kong a chimmi kha a ngaih. 25 Sihmanhsehlaw Paul nih ṭhatnak kong tehna, mah le mah i sumnak kong tehna, a ra lai dingmi Biaceihnak Ni kong tehna a vun chim tikah Feliks cu a thin a phang i, "Atu cu va kal ko rih; caan ka ngeih tikah kan auh ṭhan te lai," tiah a ti. 26 Cu hleiah Paul sinin tangka ka hmu lai ti zong kha aa ruahchih pah i cucaah atu le atu a auh lengmang i bia a ruah lengmangnak cu a si. 27 Kum hnih a luan tikah Feliks cu Porsias Festas nih a hun thlen. Feliks nih Judah mi nih ka duh hna seh ti kha a duh caah Paul kha thong chungah khan a chiahtak.
1 Cu peng chungah Festas cu a ra phak hnu ni thum ah Sisaria in Jerusalem khua ah a kal. 2 Cuka ah cun tlangbawi upa pawl hna le Judah mi hruitu hna nih khan Paul sual an phawtnak cu an rak chimh. 3 Paul cu lam ṭim i rak thah awk kha khua an khan caah Festas cu zaangfahnak tein Paul cu Jerusalem ah ratter ko tiah an nawl. 4 Cun Festas nih cun a leh hna i, "Paul cu Sisaria ah thong chungah a um ko i keimah zong khika ah tuan ah ka kir lai. 5 Mipa nih hin palhnak a tuah a si ahcun, nan haotu hna kha ka sinah kal hna seh law taza cuai hna seh," tiah a ti. 6 Festas cu an sinah ni riat, ni hra tluk a cam i cun Sisaria khua ah khan a kal. A thaizing ah biaceihnak zung ah khan a ṭhu i Paul cu rak chuahpi u tiah nawl a pek hna. 7 Paul cu a hung phanh tikah Jerusalem in a rami Judah mi hna kha a velchum cun an dir i hi pa nih hin sual fak tampi a tuah tiin sualphawt hram kha an thawk, sihmanhsehlaw an puhmi kha ahmaan tiah an ti khawhmi a um lo. 8 Cun Paul nih khan aa thawh i, "Judah mi Phung kongah siseh, biaknak inn kongah siseh, Romans siangpahrang kongah siseh, zeihmanh sualnak ka tuah lo," tiah a ti. 9 Festas nih khan Judah mi nih hung ka daw hna seh ti a duh caah Paul cu a thawh i, "Hi sual an in puhmi ruangah hin Jerusalem khua ah kal i ka hmaiah biaceih na duh maw?" tiah a hal. 10 Paul nih aa thawh i, "Siangpahrang biaceihnak zung hrimhrim ah ka chuak lai, khika ah bia cu ka ceih hna seh. Nangmah nih fiang tein na hngalh bantukin Judah mi cungah zeihmanh ṭhat lonak ka tuah lo. 11 Nawlbia kha buar i thihnak tlak thil ka tuah a si ahcun, cu chungin luatternak cu kan hal lo. Sihmanhsehlaw an ka puhmi ah hin biatak zeihmanh a um ṭung lo ahcun ahohmanh nih an kut chungah nan ka chan kho lai lo. Siangpahrang sinah azu ka khan," tiah a ti. 12 Cun Festas nih cun, fimchimtu aa chiahmi pawl kha ruahnak a hal hna hnuah, "Siangpahrang sinah azu na khan caah siangpahrang sinah na kal lai," tiah a leh. 13 Cu hnu tlawmpal ah cun Agrippa Siangpahrang le Bernis cu Festas kha hung chawnh ta awkah Sisaria khua ah khan an ra. 14 Ni hnih ni thum an cam hnuah khin, Festas nih Paul umtuning kong kha Siangpahrang cu a chimh i, "Hika ah hin mipa pakhat, Feliks nih thong i a rak thlakmi a um ko; 15 cun Jerusalem i ka hung kal tikah Judah mi tlangbawi upa hna le an upa hna nih khan taza an rak cuai i sual na phawt lai, tiah an ka ti. 16 Sihmanhsehlaw Romans mi nih cun ahohmanh an si ah taza a cuaitu hna kha hmaitonh tein an ton hna i sual an puhmi kha i chim khawh venak dingah a caan pek lo cun sual an puhmi kha an sinah pek phung a si lo, tiah ka ti hna. 17 Hika i an rat tikah a caan zeihmanh rauhter loin a thaizing hrimhrim ah biaceihnak zung ah ka ṭhu i mipa cu rak chuahpi u tiah nawl ka pek hna. 18 Sihmanhsehlaw sual a phawtu hna cu an hung dir i an chim tikah an puh rua lai timi sualnak kha pakhat hmanh an puh lo. 19 Annih nih an puhmi cu anmah biaknak kong i an i alnak le mipa pakhat a thi cangmi a min Jesuh an timi, Paul nih a nung ṭhan pei tiah a timi kong a rak si. 20 Hi kong ah hin zeitindah fiang deuh in hngalhnak ka hmuh khawh lai ti kha a ruah awk ka hngal lo i cucaah cun Paul cu Jerusalem khua i hung kal i sual an in puhmi hi khika ah ceihpiak na duh maw tiah ka hal. 21 Sihmanhsehlaw Paul nih khan azu a khaan; thong chungah ka chia ko law Siangpahrang nih ka bia cu chat te ko seh, a ti. Cucaah Siangpahrang sin i ka kuat khawh hlantiang, amah cu thong chung i um dingin nawlbia ka chuah," tiah a ti. 22 Agrippa nih Festas cu a thawh i, "Hi pa hi keimah hrim nih theih ka duh ve," tiah a ti. Cun Festas nih cun, "Thaizing ah na theih lai," tiah a leh. 23 A thaizing ah Agrippa le Bernis cu sunparnak le rumra ngei ngaiin an ra i ralbawi upapa hna le khuachung mi lak i upa deuhdeuh hna he khan pumhnak ah khan khaan chungah cun an ra lut. Festas nih khan nawl a hei pek hna i Paul kha an run luhpi ve. 24 Cun Festas nih cun aa thawh i, "Agrippa Siangpahrang le hika i a ummi vialte hna: Nannih nih hi pa hi nan hmuh. Amah hi Judah mi vialte nih, Jerusalem i a ummi he hika i a ummi he, ka sin i taza an cuaimi cu a si. Amah hi nun awkah aa tlak ti lo tiah an au. 25 Sihmanhsehlaw thah awk tlak sinak caah zeihmanh thil ṭhalo a tuahmi ka hmu kho fawn ṭung lo. Cucaah cun amah zong nih Siangpahrang sin i azu a khan caah kei zong nih Siangpahrang sin i kuat dingah cun ka ruah cang. 26 Sihmanhsehlaw a kong ah hin Siangpahrang sin i ṭial awk set ka ngei lo. Cucaah anih cu nan hmaiah kan hun chuahpi — Agrippa Siangpahrang, nangmah hmai thengtheng ah ka hun chuahpi — zeicahtiah a bia cu kan dothlat hnuah ṭial awk ka ngei deuh lai tiah ka ruah. 27 Keimah ca zongah thongtla pakhat, sualnak an puhmi fiang tein ṭial khawh ṭung loin hei kuat cu aa dawhcah deuh fawn lo," tiah a ti.
1 Agrippa nih cun Paul cu a thawh i, "Na kong kha nangmah nih i chim tuah," tiah a ti. Paul nih cun a kut kha a hun zao i a sual lonak kong kha hitihin a chim: 2 "Agrippa Siangpahrang, nihin i nangmah hmaiah Judah mi nih an ka puhmi vialte lehnak ka hmuh hi vanṭhat ngai ah kaa rel. 3 Cun hi bantukin kaa rel khunnak cu nangmah cu Judah phung le lam vialte le kan i almi kong ṭha tein a hngalmi na si caah a si. Cucaah lungsau thinfual in na ka ngaihpiak nakhnga kan nawl. 4 "Judah mi vialte hna nih hin, ka ngakchiat tein zeitindah ka nuncanning a si kha an hngalh dih. A hramthawk tein kei cu ka ram chung le Jerusalem khua chung i khua a sami ka si kha an hngalh. 5 Cun annih nih hin an chim duh ahcun an hngalh zungzalmi a si ko, a hramthawk tein kan biaknak chung i a fel bikmi Farasi mi phu i aa tel zungzalmi ka rak si. 6 Cun hika i biaceih awk i ka dir zong hi Pathian nih kan pupa hna sinah biakamnak a rak tuahmi chung i ruahchannak ka ngeih ve ruangah hin a si — 7 cu ka ruahchanmi cu kan miphun phu hleihnih hna nih Pathian kha chun he zan he an rak biak tikah kan hmuh te lai tiin an rak i ruahchanmi ṭhiamṭhiam kha a si ko. Cu ruahchannak ruangah cun, Bawipa, Judah mi nih sual an ka puh hi a si. 8 Zeicahdah nannih Judah mi nih Pathian nih mithi a thawhter hna, ti cu nan zumh khawh lo? 9 "Nazareth khuami Jesuh min dohnak caah hin ka tuah khawh chungin ka tuah lai tiah keimah hrimhrim nih hin ka rak ruah i 10 cucu Jerusalem i ka rak tuahmi kha a si. Tlangbawi upa hna sin khan nawl peknak ca ka lak i Pathian mi tampi kha thong ah ka thlak hna; cun annih kha thah awk tlak an si tiah bia khiah a si tikah kei zong nih ka hna a rak tlakpi ve hna. 11 Pumhnak inn kip ah khan voi tampi hremnak ka inter hna i an zumhnak kha hlawtter kaa zuam hna. An cungah khan ka thin a hun tuk caah anmah hrem awkah cun ramdang khua hmanh ah ka fuh hna. 12 "Cu bantukin annih hrem awkah cun tlangbawi upa hna sinin nawl peknak ca kha kaa lak i Damaskas khua i ka kal kha a si. 13 Lam i kan kal lioah cun, chunlai ah khin, maw Bawipa, vancung in keimah le keimah he a kal ṭimi hna velchum i ni nakin a ceu deuhmi ceu a rung ceu cu ka hmuh. 14 Kan dihlak in vawlei ah kan tlu i Hebru holh in aw pakhat nih a ka chawnh kha ka theih i, 'Saul, Saul, zeicahdah na ka hrem? Fungzum chuih hi nangmah caah dah kaw a fah ko,' tiah a ka ti. 15 Cun kei nih, 'Ahodah na si, Bawipa?' tiah ka ti i, 'Keimah cu na hremmi Jesuh ka si. 16 Sihmanhsehlaw tho law na ke in dir tuah. Nangmah cu ka sal i ser kan duh caah na sin i ka langh hi a si; nihin i keimah kong na hmuhmi le hmailei i kan hmuhsak dingmi thil kha, nangmah nih midang kha na chimh hna lai. 17 Nangmah cu kan thlah lainak miphun Israel mi hna le Jentail mi hna sinin kan khamh lai. 18 Nangmah nih an mit kha na deiter hna lai i muihnak in ceunak ah, Satan pennak in Pathian pennak chungah na nunter hna lai; cun keimah an ka zumhnak thawngin an sual ngaihthiamnak kha an hmuh lai i Pathian thimmi hna lakah an i tel ve lai, tiah Bawipa nih cun a ti," tiah a ti. 19 "Cucaah Agrippa Siangpahrang, vancung in ka hmuhmi langhnak cu al ka duh lo. 20 A hmasa bik ah Damaskas khua le Jerusalem khua ah, cun Judah mi hna umnak ram dihlak ah, cun Jentail mi hna sinah, 'Nannih nih nan sualnak kha i ngaichih u law Pathian leiah khan i mer u law nan i ngaihchihnak a langhtertu thil kha tuah hna u,' tiah ka ti. 21 Hi ruangah hin pei Judah mi nih biakinn chung ka um lio i an ka tlaih i thah an ka zalh kha a si ko cu. 22 Sihmanhsehlaw nihin ni tiangah hin Pathian nih a ka bawmh i cucaah cun hika zongah hin a hme sin he a ngan sin he ka hngalhnak bia ka chim khawhnak hi a si. Ka chimmi hi profet hna le Moses nih a si te lai tiah an rak chimmi hrimhrim kha a si: 23 cucu zeidah a si tiah, Judah mi hna le Jentail mi hna sinah khamhnak ceunak thanh awk caah, Messiah nih cun fahnak kha a in a hau lai i thihnak in a tho ṭhan hmasa bikmi a si lai, ti hi a si ko," tiah a ti. 24 Cu bantukin Paul nih a sual lonak kong a chim lioah khan Festas nih cun a hei auh chih i, "Paul, na hrut cang! Na cawn sannak nih an hruhter cang," tiah a hei ti. 25 Paul nih cun a hun leh ve i, "Ka hrut lo, Bawipa. Ka chimmi bia hi bia hmaan le fimhrin biate an si ko. 26 Siangpahrang Agrippa, na sinah hi bantukin ralṭha ngaiin bia ka chim khawhnak cu, hi thil cu na hngalh dihmi an si caah a si. Hi thil hi a thlithup in a kenne ah tuahmi an si lo caah hngal loin na um lai tiah ka zum lo. 27 Agrippa Siangpahrang, profet cu na zum hna maw? Na zumh hna tiah ka hngalh," a ti. 28 Agrippa nih Paul cu a thawh i, "Fawi tuk in hen pei Khrihfa ah canter na ka zalh cu," tiah a ti. 29 Paul nih cun, "A fawi ah siseh, a har ah siseh, Pathian sinah ka thlacamnak cu nangmah le nihin i ka bia a theimi vialte hi keimah bantuk si ve u law ti hi a si — hi thir cincik bel chim lo hin," tiah a ti. 30 Cun Siangpahrang cu le Mangki bawi le Bernis cu an tho i a dang vialte zong kha an tho ve; 31 an i ṭhial hnuah khin pakhat le pakhat cu, "Hi pa hi thah awk tlak thil siseh, thong thlak awk tlak thil siseh, zeihmanh a tuahmi a um lo," tiah an ti. 32 Cun Agrippa nih khan Festas cu, "Siangpahrang sinah azu rak khang hlah seh law cu, thlah awk a si ko hnga," tiah a ti.
1 Itali ram ah tilawng in nan kal lai tiah bia an kan khiahpiak tikah, Paul le a dang thongtla tlawmpal hna kha Romans ralkap chung i "Siangpahrang Ralkapbu" timi haotu Julias sinah khan an pek hna. 2 Asia ram tilawng dinhnak khua hna pal aa timmi tilawng pakhat, Adramittium khua tilawng kha, kan i cit i kan kal. Masidonia ram Thesalonika khuami Aristarkas kha kan sinah cun a kal ve. 3 A thaizing ah cun Sidon khua kha kan phan. Julias cu Paul cungah khan a ṭha ngaingai i va kal i a hawikom hna va hmuhtak kha a onh i a herhmi rak pekchanh zong kha a onh hna. 4 Cuka cun kan chuak i thli kha kanmah lei hoih in a hran caah Saipras tikulh thlidaihnak lei phen khan kan kal. 5 Rili cu Silisia le Pamfilia zawn khan kan tan i Lisia peng i Mira khua kha kan phan. 6 Cuka ah cun ralbawipa nih khan Alekzandria khua in Itali ram ah a kal dingmi lawng pakhat a hmuh i cu lawng ah cun a kan citter. 7 Ni tam nawn khulnuar ngaiin kan kal i har lengmang in Nidas khua pawng kha kan phan kho. Thli nih khan cuka lei kal cu a kan donh cang i cucaah Krit tikulh thli daihnak lei phen khan kan vung kal i Salmon vawlei fonghlei pawng khan kan lan. 8 Rilikam naih te khan kan kal thliahmah i har ngaiin Lawng Dinhnak Hnangam timi kha kan phan i cu lawng dinhnak cu Lasia khua in a hla lo. 9 Cuka ah cun saupi kan cam i Tlanhnak Ni zong kha a luan cang caah hmailei i kal ding cu ṭihnung a si cang. Cucaah Paul nih cun ruahnak a pek hna i, 10 "U le nau hna, hika in hmailei kan kalnak ding hi ṭihnung ngaimi a si lai tiah ka hngalh; nan thil phorhmi le lawng zong nih hin rawhralnak an hmu sual lai i nunnak hlohnak zong a um ko lai," tiah a ti hna. 11 Sihmanhsehlaw ralbawipa kha lawng cawngtu bawile a ngeitu hna nih an chimmi bia tu kha a lung ah a lut deuh i Paul chimmi bia kha cu a lut kho lo. 12 Cuka lawngdinhnak cu khuasik chung umnak ah a ṭha lo i cucaah tam deuh nih kal i a si khawh ahcun Finiks phak kha an duh. Cu hmun cu Krit tikulh i lawng dinhnak nitlak-thlanglei le nitlak-chaklei a hoihmi kha a si i cuka ah cun khuasik chung kan um lai tiah an ruah. 13 Thlanglei in thlizil kha a hung hrang siahmah i kan khuakhannak cu kan tlinter khawh lai, tiah an ruah; cucaah thir cangai kha an hnuh i Krit tikulh kam cun titlang hnur thluahmah in kan kal. 14 Sihmanhsehlaw a rauh hlanah khin thli ṭhawng ngai, "Nichuah-chaklei Thli" timi cu tikulh lei cun a rung hrang. 15 Lawng cu a run den ciammam i lawng cu thlichia lei cu hoihter khawh a si ti lo caah cu ti i hoihter kan i zuamnak cu kan ngol i thlitu nih cun a duhnak paoh ah a kalpi thluahmah ko. 16 Kauda tikulh fate a thlanglei i kan kal lioah khan thlitu cu tlawmpal a kan phenh. Khika ah khan har lengmang in lawng i a ummi vokkuang lawng kha hnangam deuh in kan sersiam khawh. 17 Lawng cungah khan an hun khin i lawng cu a velchum in hri in fek tein an ṭem. Libia rilikam lei i rili tang thetse tlang ah khan kan i su sual lai ti an phang i cucaah puanzar kha an ṭhumh i lawng cu thlitu kha an choihter. 18 Thlichia cu a hrang lengmang ko i cucaah a thaizing ah cun lawng chung thil phorhmi kha an hlonh hna i 19 a kiptuh ah cun an kut in lawng thilri kha an hlonh hna. 20 Ni tampi, ni siseh, arfi si hna seh, hmu kho loin kan um i thlitu cu fak piin a hrang lengmang ko. A donghnak ah cun nun lai hmanh kha kan i ruah ngam ti lo. 21 Cuticun mi cu rawl loin saupi an um tikah Paul cu an hmaiah a dir i, "U le nau hna, ka bia rak ka ngaiin Krit tikulh khan chuak loin rak um u si law, hi harnak le sunghnak vialte hi kan tong hnga lo. 22 Sihmanhsehlaw atu cu nan lungdong hlah u, tiah kan nawl hna. Pakhat hmanh kan thi lai lo, lawng bel hi a rawk lai. 23 Zeicahtiah ka biak i a ta ka simi Pathian vancungmi kha zahan ah ka sinah a ra i, 24 'Paul, na thinphang hlah. Siangpahrang hmaika ah cun na dir ṭhiamṭhiam ko lai; cun Pathian nih amah ṭhatnak thawngin nangmah sinah a kalmi vialte an nunnak hi nangmah kha an pek,' a ka ti. 25 Cucaah u le nau hna, nan lungdong hlah u. Zeicahtiah a ka chimh bantukte cun a si ko lai tiah Pathian kha ka zumh. 26 Tikulh pakhatkhat ah titlang ah a kan cheh te ko lai," tiah a ti. 27 A zan hleinganak a si cang i Mediterranean rili ah cun thlichia nih cun a kan choih cuahmah ko. Zanṭim hrawngah khin lawngcawng pawl nih cun tlang kan naih rua tiin an lung a hring nawn. 28 Cucaah hri ah lung an thlaih i an vun thlak i ti cu pe za khat le pe kul a si; tlawmte hnu deuh ah khin an vun tah ṭhan i pe sawm kua a si. 29 Kan lawng cu lung ah aa su sual lai ti an phan caah a hnulei in thir cangai pali kha ti chungah an thlak hna i khuadei lainak caah thla lawng kan cam ko. 30 Lawngcawng pawl nih khan vokkuanglawng kha ti ah khan an vun thlak i hmailei kamah thir cangai kan thla lai ti bantuk khin an i umter i zam an i tim. 31 Sihmanhsehlaw ralbawipa le ralkap hna cu Paul nih khan, "Hi lawngcawng pawl hi lawng cung i an um peng lo ahcun nan nung lai lo," tiah a ti hna. 32 Cucaah ralkap pawl nih khan lawng a tlaitu hri kha an pheh hna i lawng cu an thlah. 33 Khua a hung dei dengmang i Paul nih an dihlak in rawl ei u tiah a nawl hna. "Ni hleili chung awlokchong in nan um i hi chung vialte rawl zeihmanh nan ei lo. 34 Cucaah nan nunnak ding caah hin nan herh caah rawl ei u tiah kan nawl hna. Nan lu cung samfa fa khat hmanh a lo lai lo," tiah a ti. 35 Hi bia a chim dih in Paul nih cun rawl kha aa lak i an hmaika ah cun Pathian sinah thla a cam hnuah a ei. 36 Midang zong kha an lung a hung ṭhawng i an dihlak in tlawmpal cio an ei. 37 Lawng cung i a ummi cu kan dihlak in za hnih sawm sarih le paruk kan si. 38 An dihlak in khim tein an ei dih hnuah lawng kha zaang deuh seh tiah changvut kha rili ah an thlak. 39 Khua a hung dei tikah lawngcawng hna nih khan titlang cu khuazei a si kha an hngal kho lo, sihmanhsehlaw ti fonghlei pakhat kha an hei hmuh i a si khawh ahcun khika ah khan lawng cu kan dinhter lai an ti. 40 Cucaah thircangai kha a hri an chah hna i rili chungah an thlak hna, cun lawng zahnak fung ṭemnak hri kha an phoih hna. Cun lawng kha thli nih hmailei ah kalpi seh tiah a hmailei ah khan puanzar kha an zar i tikam lei cu kan panh. 41 Sihmanhsehlaw lawng cu thetse tlang ah aa su khut i a tap ai. Lawng cu a hmailei kha thetse chungah cun aa bunh i cawlcang kho ti loin a taan lioah khan a hnulei tu cu tilet nih khan kuai cuahmah in a den ṭualmal ko. 42 Ralkap nih khan thongtla vialte hi kan thah dih hna lai, pakhat hmanh i leuh in luat hna hlah seh, an ti. 43 Sihmanhsehlaw ralbawipa nih khan Paul kha khamh a duh caah a thlauh hna. Cucaah aa leuh khomi paoh tikam leiah i leuh u, tiah nawl a pek hna; 44 cun a taangmi pawl nih cun thingpheng zeilo ṭukṭak le lawng kuaimi pelpawi kha an i tlaih cio i an zulh hna. Cuticun kan dihlak in him tein titlang ah kan chuak.
1 Titlang i him tein kan chuah dih tikah cu tikulh cu Malta tikulh a si ti kha kan hngalh. 2 Cuka rammi hna cu kan cungah an ṭha ngaingai. Ruahpi a sur i khua a sik, cucaah meiphu an kan tihpiak i hung to u tiah an kan ti. 3 Paul cu thinghreu kha a khawmh i mei ah khan a tih hna. Mei nih cun a hun linh caah thing chung cun rul a hung chuak i Paul cu a kut ah a cuk i aa thlai ko. 4 Cuka rammi hna nih rul kha Paul kut i aa thlai ko cu an hmuh tikah pakhat le pakhat kha, "Hi pa hi lainawng a si ṭheo lai, rili in luat hmanh seh law khuazing nih nunter a duh lo i a si ko," an ti. 5 Sihmanhsehlaw Paul nih khan rul cu mei chungah khan a vun thin i amah cu zei ti hmanh in a um lo. 6 Zeitik ah dah a hung phin unman lai, asilole zeitik ah dah a tluk lai i a thih lai ti lawng kha an rak zoh ko. Sihmanhsehlaw caan saupi an ngan hnu i zeiti hmanh in a um lo tikah an lung an i let i, "Hi pa hi pathian a si ko lai," an ti. 7 Cuka hmun in lamnai nawn ah khin cuka tikulh a uktu bawi Publius lo kha an um. Ṭha tein a kan tlunter i ni thum chung cu a khual kan si. 8 Publius pa cu raifanh le thisen chungtlik in a zaw i a ril ko; Paul nih khan a khaan chungah khan a vung luhhnawh i thla a campiak i a cungah a kut a chuan i a damter. 9 Hi thil thawng hin cuka tikulh i a ummi mizaw vialte kha an ra i damnak kha an hmuh. 10 Laksawng tampi an kan ṭhenh i kan kal tik zongah kan herh ding kha tilawng chungah cun an kan chiahpiak. 11 Thla thum hnuah Alekzandria khua in a rami tilawng a min "Pathian Faphir" timi, cuka tikulh i khuasik chung a rak ummi khan kan kal. 12 Sirakus an timi khua kan phan i cu khua ah cun ni thum kan cam. 13 Cuka cun kan kal i Rekium khua kha kan phan. A thaizing ah thlanglei in thli a hung hrang i ni hnih ah Puteoli khua kha kan phan. 14 Cuka ah cun zumtu tlawmte an rak um i zarh khat chung cu kan umpi ko u, tiah an kan nawl. Cun cuka cun Romans khua kha kan phan. 15 Romans khua i a ummi unau pawl nih kan thawng kha an rak theih i Appius Chawdawrnak Hmun timi hmun le Khual Buk Pathum tiang khan an rak kan don. Paul nih a hmuh hna tikah Pathian kha a lawmh i a thazang a tlung. 16 Romans khua kan phak tikah Paul kha amah tein um i ralkap pakhat i cawngh kha a nawl an pek. 17 Ni thum hnuah cuka i a ummi Judah mi hruaitu hna kha Paul nih cun pumh a sawm hna. An i pumh tikah a thawh hna i, "Ka u le ka nau hna, kan miphun cungah siseh, kan pupa hna sinin kan hmuhmi kan phunglam cungah siseh ṭhat lonak zeihmanh ka tuah lo nain Jerusalem ah thong ah an ka thlak i Romans mi hna kut chungah an ka chanh. 18 Bia an ka hal tikah, thihnak tlak ṭhat lonak zeihmanh ka tuah lo kha an hmuh caah thlah an ka duh. 19 Sihmanhsehlaw cucu Judah mi nih an duh lo tikah khan, ka mi hna cungah zeihmanh sual phawtnak ka ngei lo nain, Siangpahrang sinah khan azu ka khaan a hau. 20 Cucaah cun nannih hmuh le biaruah kan duhnak hna cu a si; hi thir cikcin in an ka khihnak hi Israel mi nih an rak i ruahchan zungzalmi pa ruangah a si," tiah a ti hna. 21 Annih nih an thawh i, "Nangmah kongah Judea ram in ca zeihmanh kan hmu lo; cun cuka hmun in thawngpang a hun phormi kan unau ahohmanh an um fawn lo; nangmah kong cu a chia lei in an chimmi zong zeihmanh a um fawn lo. 22 Sihmanhsehlaw na ruahnak cu theih kan duh ko, zeicahtiah hi nan phu hi khuazakip ah mi nih an thangchiat lengmangmi a si," an ti. 23 Cucaah ni an i tuk i cu ni ah cun Paul umnak ah khan tampi an ra. Zinglei in zan tiang Pathian Pennak kong kha a chimh hna i a fianter hna. Jesuh kong ah an lung a pem khawh nakhnga Moses Phungbia chungin le profet hna ṭialmi chungin bia kha a lak hna. 24 A cheu cu an lung a pem, sihmanhsehlaw a cheu nih cun an zum lo. 25 Paul nih hi thil pakhat hi a chim hnuah anmah lakah khan lung i rual lo ngaiin an ṭian. Cu a chimmi cu hihi a si: "Thiang Thlarau nih profet Isaiah thawngin nan pupa hna sinah a chimmi bia cu a va hmaan thiam dah. 26 A chimmi cu: Va kal law hi mi hi va chim hna, A ngaih cu nan i ngaih sek ko lai, sihmanhsehlaw nan hngal lai lo; A zoh cu nan i zoh sek ko lai, sihmanhsehlaw nan hmu lai lo. 27 Zeicahtiah hi mi hna lung cu a pit i an hna cu a chet i an mit cu a caw. Cuticun si hna hlah seh law cu an mit nih khan khua a hmuh hnga i an hna nih khan a theih hnga i an lung nih khan a hngalh hnga i Ka sinah khan an ra kir hnga i ka damter hna hnga, tiah Pathian nih a ti, ti hi a si," tiah a ti. 28 Cun Paul nih cun a donghnak ah, "A si ahcun Pathian khamhnak bia cu Jentail mi hna sinah thlah a si cang. Annih nih cun an ngaih lai," tiah a ti hna. ( 29 Paul nih hi bia a chim dih hnuah Judah mi hna cu anmah le anmah fak piin i alpah lengmang in an chuak.) 30 Kum hnih chung Paul cu khika ah inn aa hlan i a um; amah chawnhbiak awkah a rami vialte kha a rak lawmh hna. 31 Pathian Pennak kong kha a chimh hna i Bawipa Jesuh Khrih kong kha a cawnpiak hna i ralṭha ngai le zeihmanh dawntu um loin a chimh hna.
1 Khrih Jesuh sal le Pathian nih a Thawngṭha chim awkah a thim i a auhmi lamkaltu keimah Paul nih ca kan kuat hna. 2 Cu Thawngṭha cu Pathian nih hlanpi in a profet hna sinin a rak kan kamh i Cathiang chung i a rak i ṭialmi kha a si i 3 cucu a Fapa kan Bawipa Jesuh Khrih kong kha a si. Minung lei in ti ahcun David hrinsor a si, 4 thlarau lei in le a thiannak kong in ti ahcun, ṭhawnnak nganpi in thihnak in thawhter a sinak nih khan Pathian Fapa a si kha a langhter. 5 Amah thawngin Pathian nih lamkaltu sinak kha a ka pek i miphun kip chungmi kha zumhnak le Pathian nawlngaihnak i phakter awkah a ka fial; 6 cu hna lakah cun nannih, Romans khua ah a um i Pathian nih Jesuh Khrih ta si dingin an kawhmi hna zong nan i tel ve. 7 Cucaah Pathian nih a dawt i amah mi si dingah an kawhmi hna, Romans khua i a ummi nan dihlak in ca kan kuat hna: Pathian kan Pa le Bawipa Jesuh Khrih nih vel le daihnak cu in pe ko hna seh. 8 A hmasa bik ah, nan dihlak ruangah ka Pathian cu Jesuh Khrih thawngin ka lawmh; zeicahtiah vawlei khuazakip ah nan zumhnak thawng hi an rak theih dih cang. 9 Ka chimmi bia hi ahmaan tiah Pathian cu tehte ah kaa lak ngam — cu Pathian rian, a Fapa kong Thawngṭha chim hi ka lungthin dihlak in ka ṭuanmi cu a si. 10 Thla ka cam fate nannih kan hngalh zungzal hna cu Pathian nih a hngalh ko. Cun Pathian sinah cun, annih cu zei maw ti tal in ka hmuhter ko hna, tiin thla ka cam lengmang. 11 Zeicahtiah nanmah hmuh cu kaa ngaih hringhran i nanmah he thlarau thluachuahnak i hrawm i nanmah thazang pek cu ka duh ngaingaimi a si. 12 Ka chim duhmi cu, pakhat le pakhat kan i bawm cio hnga; ka zumhnak nih nannih an bawmh hna hnga i nan zumhnak nih kei zong a ka bawmh ve hnga, ti hi a si. 13 Ka u le ka nau hna, hihi rak ka hngalhpiak u ti kan duh hna: nanmah tlawn hi voi tampi kaa tim tawn, sihmanhsehlaw zei nih dik a ka donh zungzal. Jentail mi a dang hna lak i lungthlengmi ka umter hna bantukin nannih lak zong i lungthlengmi umter ve cu ka duh hringhranmi a si. 14 Miphun vialte hna sinah leiba ka ngei, a fimmi si hna seh, a hrutmi si hna seh, cathiammi si hna seh, cathiam lomi si hna seh, an dihlak cungah leiba ka ngei. 15 Cucaah cun nannih Romans khua i a ummi sin zong i Thawngṭha chim ka duhnak cu a si. 16 Thawngṭha hi ka zahpi lo, zeicahtiah a zummi vialte hna caah Pathian khamhnak hmual a si, Judah mi hna caah a si hmasa i cun Jentail mi hna ca zongah a hung si. 17 Cucu zeitindah a hung si ti ahcun, Thawngṭha nih cun Pathian nih zeitindah minung kha Amah he aa remter hna ti kha a langhter i Cathiang nih, "Zumhnak thawngin Pathian he aa remmi cu an nung lai," a ti bang khan, Pathian he i remnak cu a hram in a dong tiang zumhnak thawngin a si. 18 Sihmanhsehlaw Pathian thinhunnak cu vancung in a rung lang i minung sualnak le ṭhat lonak dihlak cungah khan a rung tlung; cu an ṭhat lonak cu biatak kha lang kho loin a dawntu an ṭhat lonak kha a si. 19 Minung cu Pathian kong hngalh khawh a simi thil hna kha Pathian hrimhrim nih fiang tein a hmuhsak ko hna nain 20 an hmu duh lo, cucaah dan a tat hna. Vawlei a ser hramthawkte khan Pathian nih cun, hmuh khawh a si lomi a sining, zungzal hmunmi a ṭhawnnak le a Pathian sinak kha, fiang tein a langhter ko. Cucaah i silhnalh khawhnak zeihmanh an ngei lo! 21 Pathian cu hngalh cu an hngalh ko, sihmanhsehlaw pek awk a simi upatnak kha an pe duh lo; a lawmh zong an lawm duh fawn lo. An ruahnak kha pakpalawng tu ah a cang i an lungthin kawlawngpi cu muihnak in a khat. 22 Annih nih cun, kan fim, an ti, sihmanhsehlaw mihrut an si; 23 thih a thiam lomi Pathian tu kha bia loin thih a thiammi minung le va le saram le a lawn in a lawnmi thilnung he aa loin sermi milem tu kha an biak hna. 24 Cuticun minung cu, cu bantuk mihrut cu an si caah, Pathian nih khan, an lungthin nih tuah a duhmi thil fihnung kha a tuahter ko hna i pakhat le pakhat cungah ningzak thil kha an tuah. 25 Pathian kong i biatak kha lih ah an thlen; Sertu kha bia loin sermi thil tu kha an biak hna, Sertu cu pei zungzal in thangṭhat awk a simi cu a si cu! Amen. 26 Cuti an tuah caah cun, minung cu Pathian nih ningzak a simi pumsa duhnak ah khan a thlah hna. Nu hmanh nih khan ningcang tein hman awk a simi an nu sinak cu ningcang lo piin an hman i pakhat le pakhat kha an sual. 27 Cu bantuk ṭhiamṭhiam in pa zong nih khan ningcang tein nu he um awk cu an hlawt riangmang i anmah le anmah kha an sual. Cu bantuk ningzah awk thil cu pa nih khan an tuah caah cu bantuk thil ṭhalo nih hmuh awk a tlakmi dantatnak cu an hmuh. 28 Pathian kong hngalh taktak cu minung nih khan an lung chung i chiah an duh lo caah a thurhnawmmi lungthin ngeih awkah khan a thlah hna i cucaah cun tuah awk a si lomi thil kha an tuah. 29 Annih cu ṭhat lonak a phunphun le duhfahnak le puarnak le nahchuahnak in an khat i an lungthin cu lainawnnak le i dohnak le i hlennak le ziarngeihnak in a liam in a liam. Pakhat le pakhat an i congoih, 30 an i thangchiat, Pathian kha zei ah an rel lo, an lung a puam, tla ngialngual in an um, an i porhlaw, ṭhat lo tuahnak lam kha an ruat, nu le pa nawl an ngai lo; 31 an ziaza a ṭhalo, an biakam kha an let lengmang, midang cungah zaangfahnak le zawnruahnak zeihmanh an ngei lo. 32 Hi bantukin a nunning a simi cu thih awk a tlakmi a si, tiah Pathian nawlbia nih a timi kha an hngalh ko. Asinain hi bantuk thil cu anmah nih an tuah lengmang lawng si loin midang a tuah vemi zong kha an hnatlakpi hna.
1 Cucaah aho na si hmanh ah silhnalh khawhnak lam zeihmanh na ngei lo, zeicahtiah midang kha sual na phawt hna tikah, an tuahmi kha na tuah ve ko ṭung caah, nangmah lila sual naa phawt a si ko. 2 "Hi bantuk thil a tuahmi hna cu Pathian nih sual a phawt hna tikah Pathian cu ahmaan ko ti kha kan hngalh," na ti. 3 Sihmanhsehlaw nangmah nih, cu sual na phawtmi hna thil hrimhrim kha na tuah ve ko hna caah, Pathian sualphawtnak cu ka luat lai, tiah i ruat hlah. 4 A zaangfahnak a nganmi le a lungsaunak le a thinfualnak zong zeirello in um hlah. Pathian nih na cung i zaangfahnak a ngeih cu, i ngaichih seh ti aan duh caah a si ti cu na hngalh ko ṭung. 5 Asinain na lung cu a hak i a ṭhawng. Cucaah Pathian nih a thinhunnak le ding tein bia a ceihnak a phuan ni i na in laimi dantatnak cu na nganter chin men ko. 6 Pathian nih cun aho paoh kha an tuahmi ningin a rulh hna lai. 7 Micheu nih thil ṭha kha an tuah lengmang i sunparnak le upatnak le zungzal nunnak kha an kawl; cu hna cu Pathian nih zungzal nunnak kha a pek ko hna lai. 8 Cun mi a cheu cu anmah zawn lawng kha an i ruat i ahmaanmi kha an duh lo i ahmaan lomi tu kha an zulh; cu hna cu Pathian nih a thinhunnak le a thinlinhnak kha a toih hna lai. 9 Ṭhat lonak a tuahmi nih an dihlak in nganfahnak le temhinnak kha an hmuh lai, a ing hmasatu cu Judah mi an si lai i cun Jentail mi an si ve lai. 10 Sihmanhsehlaw ṭhatnak a tuahmi vialte cu Pathian nih sunparnak, upatnak le daihnak kha a pek hna lai; pek hmasami cu Judah mi kha an si lai i cun Jentail mi kha an si ve lai. 11 Pathian nih cun ahopaoh kha duhdanh lo tein an bia a ceih hna lai. 12 Jentail mi nih Moses nawlbia kha an ngei lo, cucaah an sual tikah Nawlbia loin an tlau; Judah mi nih cun Nawlbia kha an ngei, cucaah an sual tikah Nawlbia ningin sualphawt an si. 13 Zeicahtiah cun minung cu Pathian he remter a sinak cu Nawlbia theih thawngin si loin Nawlbia nih tuah u a timi tuah thawngin a si. 14 Jentail mi nih Nawlbia cu an ngei lo, sihmanhsehlaw Nawlbia nih, tuah u, a timi kha anmah lungtho tein an tuah chel paoh ah, Moses Nawlbia cu ngei hmanh hna hlah seh law, cu hna cu an caah nawlbia an si ko. 15 Nawlbia nih, tuah u, a timi cu an lung chungah aa ṭial ko ti kha an ziaza in an langhter. Cun anmah lungthin lila nih a zeimaw caan ah sual a phawt hna i a zeimaw caan ah thiam a coh hna caah, an lung chungah aa ṭial ko ti cu an chiaṭha thleidannak nih khan a langhter ko. 16 Cucaah Pathian nih Jesuh Khrih thawngin minung lungthli ruahnak kha bia a ceih Ni ah cun hi bantuk hin a si te lai ti hi ka chimmi Thawngṭha nih a chimning cu a si. 17 A si ah nannih Judah mi tah? Judah mi nan i ti; Nawlbia kha nan i bochan i nan Pathian kha nan i uang; 18 Pathian nih tuah hna seh ti an duhmi hna kha nan hngalh i ahmaanmi thil i thim awk kha Nawlbia thawngin nan hngalh; 19 mitcaw lam hruaitu kan si i mui lak i a ummi hna caah ceunak kan si nan ti; 20 a hrutmi cawnpiaktu le a nomi hna saya kan si nan ti; cun Nawlbia chungah hin hngalhnak le biatak cu tling tein kan hmuh nan ti. 21 Nannih midang a cawnpiaktu saya hna, zeicahdah nanmah cu nan i cawnpiak kun lo? "Fir hlah u," tiah phung a chimtu hna, zeicahdah nan fir kun? 22 "Va cungin pa i duh hlah u," a titu hna, zeicahdah nan i duh kun? Siasal a fihmi hna, zeicahdah siasal biakinn cu nan ramh kun hna? 23 Pathian nawlbia a chor in aa chormi hna, zeicahdah a nawlbia cu nan buar i Pathian cungah ningzahnak nan tlunter kun? 24 Cathiang nih, "Nanmah Judah mi ruangah Jentail mi nih Pathian kha an thangchiat," a ti. 25 Nawlbia cu nan ngaih ahcun, nan cuarpar tannak cu san a tlai, sihmanhsehlaw nan ngaih ṭung lo ahcun i tan lo lawlaw in rak um u law a ṭha deuh hnga. 26 Cuarpar aa tan lomi Jentail mi nih Nawlbia kha a zulh ahcun, Pathian nih aa tan tluk ah a rel hnga lo maw? 27 Cucaah nannih Judah mi cu, Nawlbia kha nan i ṭial i nan cuarpar nan i tan nain, nawlbia kha nan buar caah Jentail mi nih, an pum in cuarpar tannak an ngei lo nain, Nawlbia kha an zulh caah, sual an in phawt hna lai. 28 A ngaingai ti ahcun, ahodah Judah mi taktak, a cuarpar aa tan taktakmi cu a si? Lenglei in Judah mi a si i a cuarpar aa tannak cu pumsa in a simi si loin 29 chunglei in Judah mi a si i a lung chungin cuarpar aa tanmi kha Judah mi taktak cu a si. Cucu ṭialmi Nawlbia rian ṭuannak kha si loin Pathian Thlarau rianṭuannak kha a si. Cu bantuk mipa cu minung sinin si loin Pathian sinin thangṭhatnak kha a hmu.
1 A si ahcun Judah mi nih cun Jentail mi hna nakin ṭhatnak zeital an hmu deuh kun maw? Cuarpartan cu santlaihnak zeital a ngei kun maw? 2 A phunphun in tampi a um ko! Cu hna lak i a hmasa bik cu, Pathian nih a bia Judah mi a kenter hna kha a si. 3 Asinain a cheu kha zumh awk tlak lo an rak si si kaw, zeitindah a si kun lai? Cu ruangah cun Pathian zong cu zumh awk tlak lo a si ve lai tinak a si maw? 4 Si hrimhrim hlah. Minung hi kan dihlak in lihchim si hmanh u sih law Pathian cu zumh awk tlak a si ṭhiamṭhiam ko. Cathiang nih, "Bia na chim tikah na chimmi cu ahmaan ti kha a lang lai i tazacuai na si tikah na bia cu na tei lai," tiah a ti bang khan a si. 5 Ahmaan lomi thil kan tuahmi nih ahmaanmi thil Pathian nih a tuahnak fiang chinchin in a langhter ah tah, zeitin? Zeidah kan chim khawh lai? Pathian nih kannih cu dan a kan tat tikah a palh a si maw? (Minung biachim in hei chim ko ning law.) 6 Si hrimhrim hlah. Pathian cu a din lo ahcun, zeitindah vawlei cu bia a ceih khawh lai? 7 Asinain ka lihchimnak nih Pathian biatak cu fiang chinchin in a langhternak thawngin Pathian cu sunparnak ngan deuh a pek ahcun, zeicahdah kei cu misual na si tiah sualphawt ka si kun? 8 "Ṭhatnak a chuah nakhnga ṭhat lonak kha tuah u sih," tiah zeicaah kan ti ko kun lo? Cu hrimhrim cu a chimmi a si, tiin mi cheukhat nih an ka thangchiat. Cu bantuk mi pawl cu sualphawt awk tlak an si bantukin sualphawt an si ko lai. 9 A si ahcun, kannih Judah mi hi tah, Jentail mi hna nakin kan dirhmun a ṭha deuh hlei kun maw? Ṭha deuh hlei nemmam hlah. Ka langhter cang bang khan Judah mi he Jentail mi he kan dihlak in sualnak ṭhawnnak tang i a ummi kan si. 10 Cathiang nih, "A dingmi ahohmanh an um lo, 11 Pathian a hngalmi ahohmanh an um lo, Pathian a kawlmi ahohmanh an um lo. 12 Minung nih an dihlak in Pathian kha an pialtak i a pingah an kal dih; Ṭhatnak a tuahmi ahohmanh an um lo, pakhat hmanh an um lo, 13 An kaa cu khar lomi thlan bantuk a si, An hmur in thihnak bia, rul sivai bantuk kha cat loin a chuak; 14 An kaa cu bia chiakha in a khat. 15 Mi va tuk le va thah ah cun an khul a rang ko; 16 An kalnak paoh ah rawhnak le nganfahnak kha an va tuah lengmang. 17 Daihnak lam kha an hngal lo i 18 Pathian hmaizah zong kha an hngal lo," tiah a ti bang khan a si. 19 Nawlbia chung bia cu Nawlbia tang i a ummi hna caah khan a si ti kha kan hngalh; cu tiin a sinak cu mi nih silhnalh khawhnak zeihmanh an ngeih khawh nakhnga lo le vawlei cu a ningpi in Pathian biaceihnak hmai i a dir ding a si kha a langh nakhnga caah a si. 20 Nawlbia zulhnak thawngin ahohmanh Pathian hmai i thiam a co khomi an um lo. Nawlbia nih a tuahmi cu, an sualnak hngalhter kha a si ko. 21 Sihmanhsehlaw atu cu nawlbia he i pehtlaihnak thawngin si hleng lo tein Pathian he i pehtlaihnak lam kha kan caah a hung awng i cu lam cu nawlbia le profet hna nih ahmaan tiin tehte an khaanmi lam kha a si. 22 Cu lam, Pathian he i remnak lam cu Jesuh Khrih zumhnak thawngin a si i Jesuh Khrih a zummi ca paoh ah a si dih. Ahohmanh i thleidan ding a si lo, 23 zeicahtiah mi vialte cu kan sual dih cio ko i Pathian sunparnak kha kan bau dih cio ko. 24 Sihmanhsehlaw kannih a kan tlantu Jesuh Khrih thawngin Pathian nih a vel cu a lak tein a kan pek i amah Pathian he cun a kan remter. 25 Jesuh Khrih cu Pathian nih a thi in ngaihthiamnak sertu ah a tinhmi a si i cu ngaihthiamnak cu Jesuh Khrih zumhnak thawngin hmuh ding a si. Pathian nih cu bantukin minung he remnak a tuah cu a dinnak kha langhter a duh caah a si. Cu a langhterning cu hitihin a si: hlan lioah cun a lung a sau caah mi nih an tuahmi sualnak kha i hmuhter duh loin a um; 26 cun atu caan ah cun Pathian ding a si kha aa langhter i Jesuh Khrih a zummi paoh kha a luatter hna. 27 A si kun ahcun, kan i uan khawh awk zeital a um maw? Um hlah. Zei ruangah dah? Nawlbia kan zulh ruangah maw? Si hlah. Sihmanhsehlaw kan zumh ruangah a si. 28 Zeicahtiah minung cu Pathian he remter a sinak cu zumhnak thawng lawnglawng in a si, Nawlbia nih, tuah u, a timi tuahnak thawngin a si lo, tiah pei kan ti cang kha. 29 Asiloah, Pathian cu Judah mi hna Pathian lawng maw a si? Jentail mi hna Pathian tah a si ve lo maw? Si hen ta! 30 Pathian cu pakhat pei a si cu, Judah mi cu an zumhnak thawngin amah he cun a remter hna lai i Jentail mi zong cu an zumhnak thawng in a si ṭhiamṭhiam ve ko lai. 31 Cu ti kan ti tikah cun Nawlbia kha zumhnak in kan hlawt tinak a si maw? Si hrimhrim hlah, Nawlbia cu kan dirhṭhoh lehlam a si.
1 A kan hringsortu kan pu Abraham kong kha tah zeitindah kan ti kun lai. Zeitindah a rak si kha? 2 A tuahmi thil hna thawngin Pathian he remnak a hmuh a si ahcun, i porhlawt awk a ngei hnga. Sihmanhsehlaw Pathian hmaiah cun zeihmanh i uan awk a ngei lo. 3 Cathiang nih, "Abraham nih khan Pathian a zumh i cu a zumhnak ruangah cun Pathian nih miding bantukin a cohlan," tiah a ti. 4 Rian a ṭuanmi cu ṭuan man pek a si tawn; a nihlawh cu laksawng a si tiah tipiak a si bal lo, a ṭuan man i a hmuhmi a si. 5 Sihmanhsehlaw rianṭuannak si loin zumhnak tu a ngeimi nih cun, Pathian nih a sualmi cu a sual lo ah a chiah hna tiah a zumh i cu a zumhnak cu Pathian nih amah he remternak caah a lakpiakmi cu a si. 6 Pathian nih rianṭuannak tel loin, miding bantuk ah a cohlanmipa aa lawmhnak kong David nih a chim tikah, hihi pei a sullam a chim duhmi cu a rak si cu: 7 "Pathian nih an ṭhat lonak a ngaihthiam i an sualnak a khuhpiakmi hna cu an vaa lawm dah! 8 Pathian nih sualnak a tuahmipa, a sualnak sual i a relpiak lomipa cu a vaa lawm dah!" 9 David nih a chimmi lunglawmhnak hi cuarpar tanmi hna ca lawngah maw a si? Si hlah. Cuarpar tan lomi hna ca zongah a si ko. "Abraham nih Pathian a zumh i cu a zumhnak ruangah cun Pathian nih miding bantukin a cohlan," ka timi kha ka nolh rih lai. 10 Cucu zeitik ah dah a rak si? Abraham kha cuarpar aa tan hlanah maw aa tan hnuah dah? Aa tan hlanah a si, aa tan hnuah a si lo. 11 A cuarpar aa tan cu a hnuah a si, Abraham nih a cuarpar aa tannak cu a zumhnak ruangah Pathian nih cuarpar aa tan hlan in miding in a cohlan cang ti hmelchunhnak caah a si. Cucaah Abraham cu, Pathian a zum i an cuarpar an i tan lo nain Pathian nih miding in a cohlanmi vialte hna, thlarau lei an pa a si. 12 Cun cuarpar tanmi hna pa zong a si ve ko, cuarpar an i tan ruangah si loin kan pu Abraham nih cuarpar aa tan hlan i a zulhmi nunning, zumhnak nunning khan an nun ve caah a si. 13 Pathian nih Abraham le a tefa hna cu, vawlei hi Abraham ta a si lai, tiin bia a kamh hna. Hiti in bia a kamh hna cu Abraham nih khan Nawlbia kha a rak zulh caah a si lo, sihmanhsehlaw Pathian kha a zumh i Pathian nih miding in a cohlan ca tu ah khan a si. 14 Zeicahtiah Nawlbia a zulmi lawng kha rocotu cu an si ahcun zumhnak cu pakpalawng a si ko hnga i biakamhmi thil cu pakpalawng men a si ko hnga, 15 Nawlbia nih cun Pathian thinhunnak lawng kha a chuahpi ko; nawlbia a um lonak hmun ah cun nawlbia buar zong a um ve lo. 16 Cu biakamnak cu velngeihnak thawng lawnglawng in a si i Abraham tefa vialte hna caah khan a si, Nawlbia a zulmi hna ca lawngah khan si loin Abraham zumh bantukin a zummi hna dihlak caah khan a si ti hngalhnak caah zumhnak cungah khan a hram cu bunh a si. 17 Zeicahtiah Cathiang nih, " 'Nangmah cu miphun tampi hna pa ah kan ser cang,' a ti," tiah a ti bantuk khan, Abraham cu kan dihlak pa a si. Cucaah hi biakamnak cu Pathian hmaiah khan a fek i cu Pathian cu a zumhmi Pathian cu a si; mithi kha a nunter i a um lomi thil a bia in a umtertu kha a si. 18 Ruahchan ding zeihmanh a um lo zongah hnabeisei ngaiin a rak zumh ṭhiamṭhiam caah khan Cathiang nih, "Na tefa hna cu arfi zat an si lai," tiah a ti bang khan "Miphun tampi hna pa" ah khan a cang. 19 Abraham cu kum za khat dengmang a si cang, sihmanhsehlaw mithi bantuk a si ko cangmi a pum le Sarah nih fa a hrin khawh lonak kha a ruah tikah a zumhnak cu a der hlei lo. 20 Pathian biakamhmi kha zum loin a um hlei lo, a zumhnak nih cun ṭhawnnak in a khahter i Pathian kha a thangṭhat ko. 21 Pathian nih bia a ka kamhmi cu a tuah khawh hrimhrim lai ti kha fiang tein a zumh. 22 Cucaah cun Abraham cu zumhnak thawngin "Pathian nih miding in a cohlan". 23 "Miding in a cohlan" ti bia hi Abraham ca lawngah ṭial a si lo. 24 Jesuh kan Bawipa thihnak in a thawhtertu a zummi, miding in cohlan ding kanmah ca zongah hin ṭial a si ve. 25 Amah cu kan sual ruangah thihnak phakter a si i Pathian he kan i remnak hnga dingah nunnak ah thawhter a si.
1 Atu cu zumhnak thawngin thiamcoter kan si caah kan Bawipa Jesuh Khrih thawngin Pathian he kan i rem. 2 Jesuh Khrih nih cun kan zumhnak thawngin Pathian velngeihnak chungah cun a kan luhpi i cu chungah cun atu hi kan um. Cucaah Pathian sunparnak kan i hrawm ve lai ti kan i ruahchan i kan tha a nuam. 3 Cun harnak kan inmi zongah hin kan i lawm ko, zeicahtiah harnak nih cun in khawhnak kha a kan ngeihter i 4 in khawhnak nih cun ziaza a kan ngeihter i ziaza nih cun ruahchannak kha a kan ngeihter; ruahchannak nih cun a kan deuh lo, 5 zeicahtiah a kan pekmi Thiang Thlarau thawngin kan lung chungah Pathian nih a dawtnak cu a toih in a kan toih. 6 Zeihmanh a tuah kho lomi kan si ko lioah khan, cu caan thengte ah cun mi ṭha lomi kan caah Khrih kha a thi. 7 Mi ṭha caah cun thih ngamh zong an um phum hnga nain a dingmi ca i thih cu a harmi thil a si. 8 Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi. 9 A thihnak hmanh nih Pathian he a kan remter ahcun zeitluk in dah Pathian thinhunnak chung cun amah nih cun a kan khamh chinchin lai. 10 Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang. Atu cu Pathian hawikom kan si cang caah Khrih nunnak nih cun zeitluk in dah a kan khamh chinchin lai. 11 Cu lawng cu a si rih lo, kannih cu Pathian hawikom i a kan sertu kan Bawipa Jesuh Khrih thawngin Pathian ah cun kan i lawm. 12 Sualnak cu mipa pakhat thawngin vawlei cungah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna. 13 Nawlbia a um hlanah khan vawlei cungah hin sualnak a rak um ko, sihmanhsehlaw nawlbia a rak um lonak hmun ah khan cun sualnak cu sual ah relpiak an si lo. 14 Asinain Adam caan in Moses caan tiang thihnak nih mi vialte kha a uk dih hna; Adam nih Pathian nawlbia a buarnak thawngin a tuahmi sualnak bantuk a tuah lomi zong kha a uk ko hna. Adam cu a ra lai dingmi hmanthlak a rak si. 15 Sihmanhsehlaw cu hna pahnih cu an i khat lo, zeicahtiah Pathian laksawng cu Adam sualnak bantuk kha a si lo. Kha mipa pakhat sualnak ruangah khan mi tampi an thi taktak ko. Sihmanhsehlaw kha pa ṭhat lonak nakkhan Pathian vel cu tam piin a ngan deuh i cu bantuk ṭhiamṭhiam cun mipa pakhat Jesuh Khrih vel thawngin mi tampi cungah a tlungmi Pathian laksawng cu a ngan deuh. 16 Cun Pathian laksawng le mipa pakhat sualnak kha an i lo lo. Kha sualnak a hun zultu kha cu, "Na sual," ti biakhiahnak a si; sihmanhsehlaw sualnak hi zat riamruam a hun zultu cu, kan phu kan tawk lopi a simi laksawng, "Na sual lo," ti biakhiahnak hi a si. 17 Mipa pakhat sualnak thawngin, cu mipa ruangah cun, thihnak nih khan minung cu uk hram a hun thawk hna. Sihmanhsehlaw mipa pakhat, Jesuh Khrih tuahmi chungin a chuakmi cu zeitluk in dah a ngan deuh! Mipa pakhat thawngin thihnak cu a um a si ahcun, Pathian velngeihnak duhdim le dinnak a laksawng a hmumi vialte hna cu, mipa pakhat Jesuh Khrih thawngin thlarau nunnak a ṭhawng chinchinmi an ngei lai. 18 Cucaah cun sualnak pakhat tuahmi nih mi vialte kha sual a phawt hna bantukin dinnak pakhat tuahmi nih mi vialte kha a luatter hna i nunnak a pek hna. 19 Mipa pakhat nawlngaih lo ruangah mi tampi kha misual i ser an si bantukin mipa pakhat nawlngaih ruangah mi tampi cu miding ah ser an si lai. 20 Nawlbia cu a rung um i palhnak kha a karh chinchin, sihmanhsehlaw sualnak a karhnak hmun ah khan Pathian vel cu a karh chinchin ve. 21 Cucaah sualnak nih cun thihnak kha hmang in a kan uk bantukin Pathian vel nih cun dinnak kha hmang in a kan uk i Jesuh Khrih kan Bawipa thawngin zungzal nunnak ah a kan kalpi.
1 A si ahcun zeitindah kan ti lai? Pathian vel cu karh chinchin seh tiah sualnak cu kan tuah chin lengmang lai maw? 2 Tuah naisai hlah. Sualnak ah cun kan thi cang, zeitindah cu chungah cun kan um peng khawh lai? 3 Khrih Jesuh he pehtlaihnak chung i tipil kan in ah khan a thihnak he i pehtlaihnak chungah kan i hnim ti kha nan philh dahra? 4 Cucaah tichung i tipilnak kan vung in ah khan amah he vui ṭi kan si i a thihnak ah khan kan thi ve; cu bantuk ṭhiamṭhiam in Khrih cu Pa sunparnak ṭhawnnak nih a thawhter bang khan kannih zong nunnak thar ah kan nung ve lai. 5 A thihnak ah amah he kan thih ṭi ahcun, nunnak i thawhter a sinak ah kannih zong thawh ṭiter kan si ve lai. 6 Kan minung hlun cu Khrih he vailam cungah thah a si cang ti kha kan hngalh. A sualmi kan minung hlun cu zeicahdah thah a si ti ahcun, sualnak sal kan si tinak hnga lo caah a si. 7 Cucu zeitindah a si ti ahcun minung cu a thih tikah cun sual ṭhawnnak chung khan a luat. 8 Kannih cu Khrih he kan thih ṭi cang ahcun, amah he kan nung ṭi lai ti zong kha kan zumh. 9 Zeicahtiah Khrih cu thihnak in thawhter a si cang i a thi ti lai lo ti kha kan hngalh — thihnak nih a cungah nawl ngeihnak zeihmanh a ngei ti lo. 10 A inmi thihnak cu voi khat ah za lakin sualnak ruang i a thih kha a si; cun atu i a nunmi nunnak cu Pathian ca nunnak a si. 11 Cu bantukin nannih zong nih, kannih cu sualnak ah kan thi cang i asinain Khrih Jesuh he i pehtlaihnak thawngin Pathian ah kan nung tiah nan i ruah awk a si. 12 Cucaah thih a hmangmi nan pum kha sualnak nih uk ti hlah seh law, pumsa duhnak kha in zulhter ti hna hlah seh. 13 Cun nan pum a zeihmanh kha thil ṭhalo tuahnak ding caah sualnak kha pe ti hlah u. Thihnak in nunnak ah thawhter ṭhanmi bantukin Pathian sin tu ah i pe u law dinnak tuahnak ding caah nan pum cu a ningpi in Pathian cu pe ko u. 14 Sualnak nih cun in uk hrimhrim ti hna hlah seh, zeicahtiah nawlbia tangah nan um ti ṭung lo, Pathian vel tangah pei nan um cang cu. 15 A si kun ahcun zeitin? Nawlbia tangah um ti loin Pathian vel tangah kan um cang caah kan sual awk a si lai maw? Si hrimhrim hlah. 16 Bawi pakhatkhat sinah na nawl kan ngaih lai, tiin nan i pek ahcun nannih cu cu bawi a nawl nan zulhmi sal cu nan si — cu bantukin sualnak cu a nawl nan zulh ahcun, sualnak sal cu nan si i sualnak nih a chuahpimi cu thihnak a si; cun cu bantuk ṭhiamṭhiam cun Pathian cu a nawl nan zulh ahcun, cu nawlngaihnak nih a chuahpimi cu Pathian he i remnak kha a si. 17 Sihmanhsehlaw Pathian cu lawm cio ko u sih. Zeicahtiah nannih cu sualnak sal nan rak si nain cawnpiaknak nan hmuhmi chung i a ummi biatak kha nan lungthin dihlak in nan zulh cang. 18 Sualnak chungin luatter nan si cang i dinnak sal ah khan nan i cang cang. 19 Hi bantukin tahchunhnak bia ka hman hi, nannih nih nan hngalh khawh deuh nakhnga ka duh caah a si. Hlanah cun a ṭha lomi thil tuah awkah thurhnawmhnak le ṭhat lonak sal nan rak si. Cu bantuk ṭhiamṭhiam in atu cu a thiangmi thil tuah awkah dinnak sal nan si awk a si. 20 Sualnak sal nan rak si ah khan dinnak chungin nan rak luat; 21 asinain zeital a miak nan hmu maw? Atu i nan i zahpimi thil hna dah ti lo hi cu, zeihmanh nan hmu lo. Cu hna an donghnak cu thihnak a si. 22 Sihmanhsehlaw atu cu sualnak chung khan luatter nan si cang i Pathian sal nan si cang; nan miakmi cu Pathian sinah pekchanhmi nunning a si i cu nih a chuahpimi cu zungzal nunnak a si. 23 Zeicahtiah sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.
1 Ka u le ka nau hna, nannih nih phung kha nan dihlak in nan hngalh ko caah chim ka duhmi hi nan hngalh khawh ko lai. Phung nih hin minung cu a nun chung lawngah a uk. 2 Tahchunhnak ah, va a ngeimi nu cu a va a nun chung lawngah phung nih cun a uk, a va a thih ahcun a va sin i a ṭem chihtu phung khan a luat. 3 Cucaah a va a nun lioah pa dang he an um ahcun va cung pa duh a si, sihmanhsehlaw a va a thih ahcun amah cu a luat i pa dang he an i ṭhit ahcun va cung pa duh a si ti lo. 4 Cu bantuk cu nannih zong nan si ve, ka naule hna. Nawlbia lei in ti ahcun nannih cu a thimi nan si cang, zeicahtiah Khrih pum chungah nan i tel cang; cun Pathian rian ah santlaimi kan si nakhnga, atu cu thihnak in thawhtermipa ta kha nan si cang. 5 Kan minung sining in kan rak nun lioah khan Nawlbia nih a cawlcanghtermi kan pumsa duhnak hna kha kan pum chungah hin rian an rak ṭuan i an theitlai cu thihnak a si. 6 Sihmanhsehlaw thong chungah a rak kan hrengtu Nawlbia ah khan kan thih cang caah Nawlbia khan kan luat cang. Cucaah ning hlun, ṭialmi nawlbia lam zulh khan Pathian rian cu ṭuan ti loin ning thar, Thlarau lam zulh in kan ṭuan cang. 7 A si ah zeitindah kan ti lai? Nawlbia cu a sual hnga maw? Sual hlah. Sihmanhsehlaw sualnak cu sual a si kha a kan hngalhtertu cu Nawlbia cu a si. Nawlbia nih, "Mi thil na mit va thi hlah," tiah ti hlah seh law, mi thil mitthit cu zeidah a si ti kha ka hngal hnga lo. 8 Nawlbia kha hmang riangmang in sualnak nih cun ka chungah mi thil mitthitnak a phunphun kha a chuahter. Zeicahtiah nawlbia um lo ahcun sualnak cu a thi ko. 9 Keimah hrimhrim zong hi hlanah cun nawlbia loin ka rak nung, sihmanhsehlaw nawlbia kha a rat tikah sualnak cu a tho i ka thi. 10 Cun nunnak chuahpitu ding i ruahmi nawlbia cu ka caah thihnak chuahpitu lehlam a si. 11 Sualnak nih ṭuannak caan ṭha kha aa hmuh i nawlbia cu i hman riangmang in a ka hlen; nawlbia thawng cun sualnak nih cun a ka thah. 12 Cucaah Nawlbia cu a thiang i tuah awk timi cu a thiang ahmaan i a ṭha ko. 13 Cuti ti tikah cun a ṭhami nih ka thihnak a tlunter ti a si hnga maw? Si hlah. Thihnak a tluntertu cu sualnak a si. Sualnak nih cun, sualnak a sining taktak kha a langh nakhnga ṭhatnak kha i hman riangmang in ka cungah thihnak kha a tlunter. Cucaah nawlbia thawng khan sualnak a sual zia cu a lang chinchin. 14 Nawlbia cu thlarau lei thil a si, cucu kan hngalh ko. Sihmanhsehlaw kei cu titsa mi ka si, sualnak sal ah a zuarh in zuarhmi ka si. 15 Ka tuahmi hi a sullam ka hngal kho hna lo, zeicahtiah tuah ka duhmi kha ka tuah hna lo i tuah ka duh lomi tu kha ka tuah hna. 16 Tuah ka duh lomi ka tuah tikah hin, cu nih cun Nawlbia cu ahmaan ko ka ti ve, ti kha ka langhter. 17 Cucaah cu thil a tuahtu ngaingai cu keimah kha si loin ka chung i a ummi sualnak tu kha a si. 18 Ka chungah hin — ka minung sining ah hin — ṭhatnak a um lo ti kha ka hngalh. Zeicahtiah ṭhatnak tuah duhnak kha ka chungah um hmanh seh law ṭhatnak cu ka tuah kho lo. 19 Tuah ka duhmi ṭhatnak kha tuah loin tuah ka duh lomi ṭhat lonak tu kha ka tuah tawn. 20 Tuah ka duh lomi kha ka tuah ahcun, cu nih cun cu thil a tuahtu cu keimah kha si loin ka chung i a ummi sualnak tu kha a si, ti kha a langhter. 21 Cucaah thil umtuning cu hitihin a si ti kha ka hngah: a ṭhami thil tuah ka duh tikah khan ṭhat lonak kha ka pawngte ah a rak um ko. 22 Ka chunglei mi cu Pathian phung ah khan aa lawm; 23 sihmanhsehlaw ka chung i phung dang a rak um ve kha ka hngalh — cu phung cu ka lung nih a ṭha a timi phung a rak dohtu kha a si. Cu phung nih cun, ka pum chung i rian a ṭuanmi sualnak phung sal ah khan a ka ser. 24 Mi lungrethei ka va si dah! Thihnak i a ka kalpitu pum chung hin aho nih dah a ka khamh lai? Pathian lawnglawng nih kan Bawipa Jesuh Khrih thawngin a ka khamh lai; 25 Pathian cu lawm ko u sih. Cucaah ka sining cu hihi a si ko: keimah lawngin ti ahcun, ka lung lawng in Pathian nawl cu ka zulh khawh, ka minung sining tu cu sualnak phung kha a zul ko.
1 Atu cu Khrih Jesuh he i pehtlai in a nungmi hna caah cun sualphawtnak a um ti lo. 2 Zeicahtiah Khrih Jesuh he aa pehtlaimi nunnak a kan petu Thlarau phung nih cun sualnak le thihnak phung chung khan a ka luatter cang. 3 Minung kan sining kha a der ruang i Nawlbia nih a tuah khawh lomi kha Pathian nih a tuah. Minung kan sining chung i a ummi sualnak cu Pathian nih a Fapa a run thlahnak thawng khan sual a phawt cang. Sualnak teinak ding caah cun minung kan sining a sualmi bantuk sining he hin a ra. 4 Pathian nih hihi zeicahdah a tuah ti ahcun, minung kan sining zulh in si loin Thlarau hruainak zulh in a nungmi kan nunning ah hin Nawlbia cu; tuah u, tiah a timi vialte ah khan a lungawih a si nakhnga caah a si. 5 An minung sining nih tuah u a ti hna ning paoh in a nungmi cu minung sining nih a duhmi nih khan an lungthin cu a uk hna. Thlarau nih a chimh hna ningin a nungmi cu Thlarau nih a duhmi nih khan an lungthin cu a uk hna. 6 Nan lungthin cu minung sining nih a uk ahcun a phichuak cu thihnak a si; nan lungthin cu Thlarau nih a uk ahcun a phichuak cu nunnak le daihnak a si. 7 Cucaah minung cu a lungthin kha minung sining nih a uk ahcun Pathian ral a si; zeicahtiah Pathian nawl kha a zul lo, a ngaingai ti ahcun a zulh in a zul kho lo. 8 An minung sining duhnak a zulmi nih cun Pathian kha an lawmhter kho lo. 9 Sihmanhsehlaw nannih cu cuticun nan nung lo; Thlarau hruaining tu in nan nung deuh — Pathian Thlarau a ngei lomi cu Khrih ta an si lo. 10 Sihmanhsehlaw Khrih cu nan chung i a nun ahcun sualnak ruangah nan pum cu thi hmanh hna seh law nannih cu Pathian he nan i rem cang caah Thlarau cu nan caah nunnak a si. 11 Jesuh kha thihnak in a thotu Pathian Thlarau cu nan chungah a um ahcun, Khrih cu thihnak in a thawhtertu Pathian nih khan a Thlarau cu nan chungah a umter caah nannih zong thih hmangmi nan pum kha nunnak an pekpiak ve hna lai. 12 Cucaah ka u le ka nau hna, kan mihring sining in kan nun awk a si lo. 13 Nan mihring sining in nan nun ahcun nan thi ko lai; sihmanhsehlaw sualnak nan tuahmi kha Thlarau in nan thah ahcun nan nung lai. 14 Pathian Thlarau nih a hruaimi hna cu Pathian fale an si. 15 Pathian nih an pekmi hna Thlarau cu sal i an canter ṭhantu hna ding thlarau a si lo, ther lengmang le phang lengmang i nan rak nunning ah an kalpi ṭhantu hna ding zong a si fawn lo. Pathian fa ah a kan sertu ding tu kha a si i amah nih cun Pathian kha, "Ka Pa, ka Pa," tiah a kan auhter khawh. 16 Cu ti kan aunak ah cun Pathian Thlarau le kan thlarau cu hmunkhat ah an i fon i Pathian fa kan si kha tehte an khan; fa kan si ahcun rocotu zong kan si colh. 17 Kannih cu Pathian rocotu kan si, Khrih roco-hawi kan si; zeicahtiah Khrih temhinnak kha kan i hrawm ahcun a sunparnak zong kan i hrawm ve lai. 18 Atu caan i kan inmi temhinnak hi cu hmailei i kan sin i phuan a si te laimi sunparnak he cun tahchunh awk tlak ah ka rel lo. 19 Pathian nih a fale a phuan hna lai cu sermi thil vialte nih ngangngan ngaiin an hngak ko. 20 Sermi thil vialte cu anmah duh caah si loin Pathian nih si u a ti hna thawngin santlailo pakpalawng ah an cang dih, a si nain ruahchannak cu a um zungzal ve ko. 21 Cu ruahchannak cu zeidah a si tiah, ni khatkhat cu sermi thil vialte hi thutnak sal sinak khan luatter an si lai i Pathian fale hna luatnak a sunglawimi kha an i hrawm te lai. 22 Atu caan tiangah hin cun sermi thil vialte cu nau nganfah bantukin an hrum an ai. 23 Cu ti a hrum a aimi cu sermi thil lawng an si lo, Thlarau cu Pathian laksawng hmasater caah a hmumi kanmah zong hi, Pathian nih a fa ah ser i kan pum hi a ning piin luatter ding kan hngah lioah hin kan hrum kan ai ve ko. 24 Zeicahtiah ruahchannak in pei khamh kan si cu; sihmanhsehlaw kan i ruahchanmi cu kan mit in kan hmuh ahcun, cucu ruahchannak taktak cu a si hnga lo. Mit in hmuh komi cu aho nih dah an i ruahchan bal? 25 Sihmanhsehlaw kan mit in kan hmuh lomi kha kan i ruahchan ahcun, cucu lungsau in kan hngah a langhnak a si. 26 Cu bantuk ṭhiamṭhiam cun, a der ngaingaimi kan si caah, Thlarau zong cu kanmah bawmh awkah khan a ra. Zeiti hin dah thla kan cam awk a si ti hmanh kan hngalh lo caah bia in chim khawh lomi hram-ainak in Thlarau nih Pathian cu a kan nawlpiak. 27 Thlarau nih cun Pathian cu a mi hna aiawh le amah Pathian duhning khan a nawl caah, minung lungchung a hmutu Pathian nih cun Thlarau ruahnak cu zeidah a si ti kha a hngalh. 28 Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh. 29 Pathian nih a thim ciami hna cu a Fapa bantuk kha an si naklai, a dang tein a thleidan hna, cucu unau rual tampi lakah a Fapa cu an upa bik a si nakhnga caah a si. 30 Cucaah a thleidanmi hna cu Pathian nih a kawh hna i a kawhmi hna cu Amah he khan a remter hna; cun amah he a remtermi hna cu a sunparnak zong kha a hrawmh hna. 31 Hi vialte hi kan lung chungah i chiah in zeitindah kan ti lai? Pathian cu kanmah lei i a ṭan ahcun aho nih dah an kan doh khawh lai? 32 A Fapa hrimhrim hmanh kha a zuah ṭung lo, kan dihlak caah pei a pek kha! A Fapa kha a kan pek — thil vialte zong hi a lak in a kan pe hnga lo maw? 33 Pathian thimmi cu aho nih dah sual an puh khawh hna lai? Amah Pathian hrimhrim nih pei, nan sual lo, tiah a ti hna cu. 34 Cucaah annih cu aho tal nih sual an phaw kho hna lai maw? Khrih hmanh nih sual a phaw hna hnga lo; zeicahtiah an ca i a thimi kha Khrih Jesuh kha pei a si cu, cu nak hmanh cun, thihnak in thawhter a si i Pathian orhlei kamah a um i kan ca i a kan nawlpiaktu cu amah cu pei a si cu. 35 Cucaah aho nih dah Khrih dawtnak he cun a kan ṭhen khawh lai? Harnak nih maw, temhinnak nih maw, hremnak nih maw, rawlṭamnak nih maw, pamnak nih maw thil ṭihnung nih maw, thihnak nih maw, zeital nih an kan ṭhen kho hnga maw? 36 Cathiang nih, "Nangmah ruangah chun nitlak thah hrulh lengmang in kan um; thah awk i kalpimi tuu bantukin an kan tuah," 37 Zeihmanh nih an kan ṭhen kho lai lo, hi thil vialte hna chung hin a kan dawtu thawngin kannih cu teitu hna nakin teitu kan si deuh. 38 Zeicahtiah a kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh, 39 cunglei vawlei nih siseh, tanglei vawlei nih hin siseh, an kan ṭhen kho lai lo — kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo.
1 Ka chimmi hi ahmaanmi bia a si: Khrih ta ka si i ka lih ka chim lo. Thiang Thlarau nih a ukmi ka chiaṭha thleidannak zong nih lih ka chim lo kha a hngalh. 2 Ka miphun, ka thi le ka sa a simi hna caah ka ngaih a chia hringhran ko i ka lung chung fahnak cu a dong lo. 3 Anmah ca i a ṭha ding a si ahcun keimah hi Pathian chiatserhnak in i Khrih he i ṭhen hmanh kha ka duh deuh. 4 Annih cu Pathian thimmi an si: a fa ah a ser hna i sunparnak kha a hrawmh hna. Anmah sinah a biakamnak kha a tuah hna i Nawlbia kha a pek hna, biaknak taktak cu anmah nih khan an ngeih, Pathian biakamnak kha an hmuh, 5 Hebru mi a kan hringsortu hna tefa kha an si, cun Khrih zong kha minung lei cun anmah phun a si. Zeizong vialte a uktu Pathian cu zungzal in thangṭhat si ko seh! Amen. 6 Israel mi kha an dihlak in Pathian thimmi an si dih lem lo caah Pathian biakamnak cu pakpalawng ah a cang ka ti duhnak a si lo. Zeicahtiah Israel mi vialte kha Israel tefa an si lem lo, 7 Abraham fale hna zong an dihlak in Abraham tefa an si dih lem lo. Pathian nih Abraham cu a thawh i, "Isak tefa hna cu nangmah tefa ah rel an si lai," a ti. 8 Cu a sullam cu, minung sining phung sawhsawh in hrinmi cu Pathian fa an si lem lo, Pathian biakamning in hrinmi lawng tefa taktak i ruahmi cu an si, tinak a si. 9 Zeicahtiah Pathian biakam cu hitihin, "A caan a cut tikah ka ra kir ṭhan lai i Sarah nih fapa a hrin lai," ti kha a si. 10 Cun cu lawng cu a si lo. Rebekka fapa pahnih hna zong nih khan pa pakhat lawng an ngei ko; a hringtu hna Isak kha an pa cu a si ko. 11 - 12 Sihmanhsehlaw pakhat u a thim kha Pathian tinhning lawnglawng in a si nakhnga caah Pathian nih Rebekka cu, "A u nih a nau kha a rianh lai," tiah a chimh. Hi bia a chim hi an chuah hlanah a si, a ṭha siseh, a ṭhalo siseh, zeihmanh an tuah hlan ah a si; cucaah Pathian nih pakhat a thim cu anmah an tuahmi ruangah khan a si lo, amah nih a kawh ruang tu ah khan a si ko. 13 Cathiang nih, "Jakob cu ka dawt i Esau cu ka huat," a ti bang khan a si. 14 A si ahcun Pathian cu a ding lo kan ti kho lai maw? Ti kho hlah. 15 Zeicahtiah Moses sinah pei, "Zaangfah ka duhmi cu ka zaangfah ko hna lai i zawnruah ka duhmi cu ka zawnruah ko hna lai," a ti kha. 16 Cucaah mi nih an duhmi thawng le an tuahmi thawngin si loin Pathian zaangfahnak thawng lawngin a si ko. 17 Cathiang nih Faro kong ah a thawh i, " 'Ka ṭhawnnak langhnak caah le ka min cu vawlei cung dihlak i thanternak caah, hi ca hrimhrim ah hin, nangmah cu siangpahrang ah kan ser,' tiah Pathian nih a ti," tiah a ti. 18 Cucaah Pathian nih cun zaangfah a duhmi kha a zaangfah ko hna i an lung ṭhawnter a duhmi kha an lung cu a ṭhawnter ko hna. 19 Nan lak i pakhatkhat nih nan ka thawh lai i, "Hi bantukin thil a si kun ahcun, zeitindah Pathian nih minung cu sual a phawt khawh kun? Pathian duhnak cu aho nih dah a donh khawh?" nan ti lai. 20 Sihmanhsehlaw ka kawi, nangmah cu Pathian bia a let lakmaktu dingah ahodah na si? Tlak um nih a sertu cu, "Zeicahdah hi bantuk hin na rak ka ser," tiah a hal lo. 21 A ngaingai ti ahcun um a sertu nih khan tlak cu a duhduh in hmannak nawl a ngei ko, tlak hlum hlum khat chung khan um pahnih a ser khawh ko hna, pakhat cu sawhsawh men i hman lo dingah a ser i pakhat cu sawhsawh men i hman awkah a ser ko. 22 Cu bantuk ṭhiamṭhiam in Pathian tuahmi zong cu a si ko. A thinhunnak le a ṭhawnnak kha langhter a duh. Sihmanhsehlaw a thin a huntertu hna, hrawh awk a simi hna cungah khan lungsaunak a ngei. 23 Cun a sunglawimi a sunparnak zong kha langhter a duh i a kan zaangfahmi kannih cungah khan cu a sunparnak cu a kan toih, kannih cu a sunparnak hmu dingin a kan timhmi cu kan si. 24 - 25 Cucu Hosea cauk chung i rak chimmi kha a si. Zeitindah a ti tiah: "Ka mi a rak si lomi kha, 'Ka mi,' ka ti hna lai. Ka rak dawt lomi miphun kha, 'Ka dawtmi,' ka ti hna lai. 26 'Nannih cu ka mi nan si lo,' tiah an rak tinak hna hmun thengte ah khan Annih cu a nungmi Pathian fa, ti an si lai." 27 Cun Isaiah nih Israel kong ah, "Israel mi cu rili kam thetse zat in tam hmanh hna seh law tlawmte lawnglawng khamh an si lai, 28 zeicahtiah Bawipa nih vawlei cu a dihlak in bia a ceih lai," a rak ti. 29 Isaiah ṭhiamṭhiam nih, "Bawipa, a Lianngan Bik Pathian nih tefa tlawmpal kan nganh hlah seh law cu, Sodom bantuk kan si diam cang hnga i Gomorrah bantukin kan um diam cang hnga," a rak ti bantuk khan a si. 30 A si ahcun zeitindah kan chim kun lai? Hitihin kan ti lai: Pathian he rem a rak i zuam lomi Jentail mi kha an zumhnak thawngin Pathian he an i rem cang; 31 sihmanhsehlaw thimmi miphun, Pathian he remnak ding caah phung a kawlmi hna nih khan cucu an hmu lo. 32 Zeicahdah an hmuh lo? Zumhnak kha i bochan loin tuahnak tu kha an i bochan caah a si. Cucaah "rilhnak lung" ah khan a ril i 33 Cathiang nih, "Zohhmanh, Zion ah mi a tluktertu ding lung pakhat ka chiah, Cu lung nih cun a rilhter hna lai. Sihmanhsehlaw amah a zummi cu ningzahnak an phan lai lo," tiah a rak chimmi bang khan a si.
1 Ka u le ka nau hna, ka phun hawi mi hi khamh si hna seh ti cu ka lungthin dihlak in ka duh hringhran ko. An caah Pathian sinah thla ka cam lengmang. 2 Pathian a ṭanh ngaingaimi an si cu tehte ka khan khawh, sihmanhsehlaw cu an ṭanhning cu palh ṭanh a rak si. 3 Pathian nih zei lam in dah minung cu Amah he a remter hna ti kha an hngal lo i anmah tu nih khan cu lam cu an i ser; cucaah Pathian nih minung cu Amah he a remter hnanak lam kha an cohlang duh lo. 4 Zeicahtiah Khrih nih Nawlbia cu a donghnak a phakter cang i cucaah a zummi paoh nih cun Pathian he remnak kha an hmuh. 5 Moses nih Nawlbia zulhnak thawngin Pathian he remnak hmuhnak kong ah a chimmi cu hitihin a si: "Nawlbia nih tuah u a timi a tuahmi paoh cu, cu an tuahnak thawng cun an nung lai," a ti. 6 Asinain zumhnak thawngin Pathian he i remnak kong ah cun hitihin ti a si: "Nangmah le nangmah cu, Ahodah vancung ah khin a hung kai lai?" i ti hlah (cu a sullam cu Khrih kha run ṭumpi awkah ti a si). 7 Cun, "Ahodah mithi khua ah a vung ṭum lai," ti zongah i ti fawn hlah (cu sullam cu Khrih kha mithi hna sinin hun kaipi awkah ti a si). 8 Zumhnak thawngin Pathian he i remnak kong ah chimmi cu hiti tu hin a si. "Pathian bia cu nan pawngte ah a um ko, nan lei cung le nan lung chungah a um ko," — hi bia hi zumhnak bia a si kan timi bia cu a si. 9 Nan kaa in, "Jesuh cu Bawipa a si," tiah nan ti i "amah cu Pathian nih mithi hna sinin a thawhter" tiah nan lung in nan zumh ahcun, khamh nan si lai. 10 Zeicahtiah kan lung in kan zumh i Pathian he i remnak kan hmuh; kan kaa in kan chim i khamh kan si. 11 Cathiang nih, "Amah a zummi paoh cu ningzahnak an ing lai lo," tiah a ti. 12 A zummi paoh, a ti, zeicahtiah Judah mi le Jentail mi tiin i thleidannak zeihmanh a um lo; Pathian cu kan dihlak Bawipa a si i amah a zummi paoh cu thluachuahnak tampi in a pek ko hna. 13 Cathiang nih, "Bawipa min a aumi paoh cu khamh an si lai," a ti bangin a si taktak ko. 14 Asinain, an zumh lo ahcun zeitindah a min cu an auh khawh lai? Cun bia kha an theih lo ahcun zeitindah an zumh khawh lai? Cun bia cu chimh an si lo ahcun zeitindah an theih khawh lai? 15 Cun lamkaltu kha an thlah hna lo ahcun zeitindah bia cu thanh a si khawh lai? Cathiang nih, "Thawngṭha a chimtu hna ke cu a vaa dawh dah," a ti bantuk khan a si taktak. 16 Sihmanhsehlaw annih nih an dihlak cun Thawngṭha cu an pom lo. Isaiah hrimhrim nih khan, "Bawipa, ahodah kan bia cu a zum?" a rak ti. 17 Cucaah zumhnak cu bia theihnak thawng khan a um i bia cu Khrih kong chimnak thawng khan a um. 18 Sihmanhsehlaw biahalnak tuah ka duhmi cu: Bia cu an thei bal taktak lo maw, ti hi a si. A theih cu an theih ko — Cathiang nih a chim bantuk tu khan a si i a si ko. Zeitindah a chim tiah: "An aw thawng cu vawleicung khuazakip ah a thang dih; An bia cu vanhramdeng tiang a phan," a ti. 19 Biahalnak tuah ka duh rihmi cu: Israel mi nih an hngal lo maw, ti hi a si. A let hmasa biktu ding cu Moses kha a si. Zeitindah a chim tiah: "Nannih cu miphun taktak a tling lomi kha kaan nahchuahter hna lai; Nannih cu mihrut miphun cungah khan nan thin kan hunter hna lai," a ti. 20 Cun Isaiah nih ralṭha deuh vak in: "A ka kawl lomi nih khan an ka hmuh, A ka hlam lomi sinah khan ka lang," a ti fawn. 21 Sihmanhsehlaw Israel kong ah cun, "Nawl ngai lomi le ral ser hmangmi kha, chunnitlak in ka za ka chanh hna," a ti.
1 A si kun ahcun, Pathian nih a mi cu a hlawt hna a si maw? Si hrimhrim hlah. Keimah zong hi Israel mi, Abraham tefa, Benjamin phun chungmi ka si. 2 Pathian nih cun a hramthawk tein a rak thimmi a mi cu a hlaw hna lo. Cathiang chungah a ummi, Israel kong ah Elijah nih Pathian sinah, 3 "Bawipa, na profet kha an thah hna i na biakṭheng kha an hrawh hna; keimah lawnglawng hi ka tang i cu hmanh cu thah an ka zalh," tiah a timi kha nan hngalh a si lo mei? 4 Pathian nih zeitindah a leh kha? "Keimah caah mi thong sarih, Pathian deu Baal a bia lomi kaa chiah ko hna," tiah a ti a si lo mei? 5 Cu bantuk ṭhiamṭhiam cun atu zongah hin a si: Pathian nih a zaangfah hna ruang i a thimmi tlawmte cu an um ve ko. 6 A thim hna cu a zaangfah hna ruangah a si ko, anmah tuahmi ruangah a si lo. Zeicahtiah Pathian nih a thimmi hna cu anmah tuahmi ruangah a si ahcun a zaangfahnak cu zaangfahnak taktak a tling lomi pei a si hnga cu. 7 Cun tah zeitin? Israel mi nih an kawlmi kha an hmu lo, sihmanhsehlaw Pathian thimmi mi tlawmte tu nih khan an hmuh; a dang nih khan cun Pathian auhnak kha an hna an i cheh i 8 Cathiang nih, "Pathian nih an lung a pinter hna; nihin ni tiang hrimhrim hin an mit in an hmu kho lo i an hna in an thei kho lo," a ti bang khan a si taktak. 9 Cun David zong nih: "An puai ah rap ah i foih hna seh law tlu hna seh law dantatnak ing hna seh. 10 Khua an hmuh khawh nakhnga lo an mit cu caw seh law Harnak an inmi thilrit tangah kun thluangthluan ko hna seh," a ti fawn. 11 Judah mi cu an rilh tikah an rawk taktak maw? Rawk taktak hlah. An sual caah cun pei khamhnak cu Jentail mi sin a phak cu, Judah mi nahchuahter awkah cun. 12 Judah mi sualnak nih hin vawlei cungah thluachuahnak tampi a tlunter i thlarau lei in mipam an sinak nih Jentail mi cu thluachuahnak tampi a phorh hna ahcun Judah mi cu tling tein an i tel ve tikah cun thluachuahnak cu zeitluk in dik a ngan chinchin lai! 13 Atu cu nannih Jentail mi kha kan chimh hna: Jentail mi sin lamkaltu ka si chung paoh cu ka rian cu kaa chor ko lai. 14 Ka phun hawimi kha an nahchuahter kaa zuam i cuticun tlawmpal tal ka khamh kho phum hna hnga maw ka ti. 15 Zeicahtiah annih cu hlawt an si hmanh ah pei vawlei cu Pathian hawikom i ser a si cu. Cucaah cun annih cu cohlan an si tikah cun zeidah a si chinchin lai? Mithi hna caah nunnak a si lai. 16 Changreu hlum chung i a dar hmasa bik cu Pathian sinah pek a si ahcun, changreu cu a hlum ningin amah ta a si; cun thingkung a hram hna cu Pathian sinah pek an si ahcun a nge zong amah ta an si. 17 Cinmi oliv kung a nge cheukhat cu tan an si i ramlak oliv kung a nge kha cinmi kung ah cun peh a si. Cu bantuk cu nannih Jentail mi hi nan si; atu cu oliv kung a hrampi kha nan i hrawm ve cang. 18 Cucaah khiahmi nge bantuk a simi kha porhlawthnawh hna hlah u. Zeitindah nan lung a puam ngam? A nge pei nan si ko cu; a hram cu nanmah nih nan cawm ṭung lo, a hram nih pei an cawm hna cu. 19 Sihmanhsehlaw nan i thawh hnga i, "Kanmah umnak serpiak awkah pei a nge cu khiah an si fom cu," nan ti hnga. 20 Cucu ahmaan ko. Annih cu an zumh lo ruangah khiah an si, nannih cu nan zumh ruangah nan umnak hmun ah nan um. Sihmanhsehlaw cu kong ah nan lung puam sual hlah u; a ṭih in ṭih lehlam u. 21 Thingkung nge taktak bantuk a simi Judah mi cu Pathian nih a zuah hna lo ahcun nannih tah a kan zuah hlei hnga tiah nan i ruat maw? 22 Hika ah hin zeitluk in dah Pathian nih mi a zaangfah hna ti le zeitluk in dah Pathian cu ṭih a nun ti kha kan hmuh. A tlumi hna caah cun ṭih a nung ngaingai ko, sihmanhsehlaw nannih cungah cun zaangfahnak a ngei — a zaangfahnak chung i nan um paoh ahcun an zaangfah ko hna lai, sihmanhsehlaw nan um lo ahcun nannih zong khiah nan si ve ko lai. 23 Cun Judah mi hna cu, an zumh lonak kha an chuahtak ahcun hmasa i an rak umnak hmun ah khan a chiah ṭhan ko hna lai, zeicahtiah Pathian nih cun a chiah ṭhan khawh ko hna. 24 Nannih Jentail mi cu ramlak oliv kung, a nge khiah i cu nge cu a phung a si lo nain cinmi oliv kung i pehmi bantuk cu nan si ahcun a kungpi nge taktak a rak simi peh ṭhan kha cu Pathian caah a fawi deuh ngaingai lai. 25 Ka u le ka nau hna, biathli pakhat nan hngalh awk i ka duhmi a um. Cu nih cun ka fim tiah i ruat loin an umter hna lai. Cu biathli cu hihi a si: Israel mi lung khohkhal i an um hi zungzal ca in a si lo, Jentail mi an dihlak in Pathian sin i an rat caan tiang ca lawng a si lai. 26 Cun Israel mi vialte khamh an si lai cu hitihin a si lai: Cathiang nih, "Zion in Khamhtu cu a ra lai i Jakob tefa hna chungin ṭhat lonak vialte kha a hloh lai. 27 An sualnak kha ka lakpiak hna tikah Hi biakamnak hi anmah he ka tuah lai," tiah a ti bang khan a si lai. 28 Thawngṭha kong in ti ahcun, annih cu Pathian ral an si; Thawngṭha an cohlan duh lo caah — cucu nanmah Jentail mi ṭhatnak caah a si. Sihmanhsehlaw thimnak lei in ti ahcun annih cu an pupa hna ruangah khan Pathian hawikom an si, 29 zeicahtiah Pathian nih cun a auhnak hna le laksawng a pekmi hna kongah a lung a let ṭhan bal lo. 30 Nannih Jentail mi nih a hlanah cun Pathian kha a nawl nan rak zul lo; sihmanhsehlaw atu ah cun Judah mi nih khan a nawl kha an zulh lo caah nannih nih a zaangfahnak kha nan hmuh. 31 Cu bantuk ṭhiamṭhiam in nannih nih nan hmuhmi a zaangfahnak kha annih zong nih an hmuh ve nakhnga atu ahcun a nawl kha zul loin an um. 32 Pathian nih mi vialte kha nawlngaih lonak chung thongtla i a ser hna cu an dihlak in zaangfah a duh hna caah a si. 33 Pathian hi a va rum hringhran dah! A fimnak le a hngalhnak hi an va thuk hringhran dah! Biakhiahnak a tuahmi hi aho nih dah a sullam an purh khawh lai? A thil tining hi aho nih dah an hngalh khawh lai? 34 Cathiang nih, "Bawipa cu aho nih dah a lungthin an hngalh? Aho nih khin dah ruahnak an cheuh khawh? 35 Cham ṭhan dingin aho nih dah zeital an pek bal?" tiah a ti bang khan a si. 36 Zeicahtiah zeizong vialte hi amah nih a sermi an si i zeizong vialte hi amah thawngin a ummi an si, amah caah an si dih. Pathian cungah sunparnak cu zungzal in um ko seh! Amen.
1 Cucaah ka u le ka nau hna, Pathian nih a kan zaangfahnak a nganmi ruangah hin, Pathian sinah a nung in pekchanhmi raithawinak bantukin i pe tuah u; a rian ah aa pumpemi le cohlan awk tlakmi si tuah u; cucu biaknak taktak Pathian nan pek awk biaknak cu a si. 2 Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha nan hngalh khawh lai, cucu Pathian duhmi an si. 3 Pathian nih vel a ka ngeih caah a ka pekmi laksawng ka hmuhmi thawngin hi bia hi nan dihlak sinah ka chim: Nanmah le nanmah kha a sang tuk ah i ruat hlah u. Nan siningte tu kha i hngal u law Pathian nih zumhnak an pekmi hna ning cio ah nanmah le nanmah nan i ruah cio ning cu si seh. 4 Kan pum cungah hin nge tampi kan ngei i hi nge vialte hi rian dangdang an ngei cio. 5 Cu bantuk cun, kannih zong hi mi tampi kan si nain Khrih he kan i pehtlaihnak thawngin pum khat kan si i pum nge dangdang cu pakhat le pakhat an i pehtlaih dih bantukin kannih zong pakhat le pakhat kan i pehtlai dih ve. 6 Cucaah laksawng phun dangdang kan hmuh ciomi cu Pathian nih a kan pekmi vel kan hmuh ning cio ah hmang hna u sih. Laksawng kan hmuhmi cu Pathian bia chim thiamnak a si ahcun, zumhnak kan ngeihmi ning khan kan hman awk a si; 7 midang ca rianṭuan kha a si ahcun, cuticun kan ṭuan awk a si; cawnpiak kha a si ahcun kan cawnpiak hna awk a si; 8 midang thazang pek kha a si ahcun kan pek hna awk a si, kan ngeihmi thil midang hrawm ve kha a si ahcun siang tein kan hrawm hna awk a si, nawl ngeihnak kha kan laksawng hmuhmi a si ahcun, fak piin rian kan ṭuan awk a si; midang zaangfah kha a si ahcun lunglawm tein kan zaangfah hna awk a si. 9 Kan i dawtnak hi lungthin taktak in si awk a si. Thil ṭhalo kha hua hna u law thil ṭha kha i tlaih peng hna u. 10 Pakhat le pakhat kha Khrih ah u le nau bantukin i daw cikcek u law pakhat le pakhat kha i hmaizah u. 11 Fak piin rian ṭuan u, nan thathu hlah u. Bawipa cu nan lungthin taktak tein a rian ṭuan u. 12 Nan i ruahchanmi thawng khan nan tha nuam ko u; harnak nan in tikah lungsau thinfual in um u law thla cam zungzal u. 13 Nan u nan nau a si a fakmi kha nan thil hrawm hna u law khual kha tluninn onh hna u. 14 Nanmah an hremtu hna kha Pathian sinah thluachuah halpiak hna u; asi, thluachuahnak kha halpiak hna u, chiatserhnak si loin. 15 Aa lawmmi sinah vaa lawm ve u, a ṭapmi sinah va ṭap ve u. 16 Pakhat le pakhat nan zawn i ruat dih u. Lungpuam in um hlah u, rian hme tete ṭuan duhnak lungthin kha ngei u. Ka fim tiah vaa ruat hlah u. 17 Mi nih nan cungah ṭhat lonak an tuah ahcun ṭhat lonak in va lehrul hna hlah u. Mi vialte nih a ṭha tiah an ruahmi kha tuah i zuam u. 18 Mi vialte he i rem awk kha nan i zuam khawh chungin i zuam u. 19 Phuhlam hmang hlah u, ka naule hna; Pathian thinhunnak tu nih khan cucu tuah deuh ko seh. Zeicahtiah Cathiang nih pei, "Phuhlam cu keimah rian a si, keimah nih ka lehrulh hna lai, tiah Bawipa nih a ti," a ti kha. 20 Cucaah Cathiang nih, "Na ral cu a rawl a ṭam ahcun rawl va pe, A ti a hal ahcun ti va pe, Cu ti na tuahnak nih cun a lu cungah meiṭil na chonh a si lai," a ti bang khan va tuah u. 21 Ṭhat lonak kha i teiter hlah u, ṭhatnak tu in ṭhat lonak kha tei i zuam u.
1 Ram uktu bawi kha an nawl va ngai hna u, zeicahtiah Pa-thian hnatlaknak tel loin nawl ngeitu ahohmanh an um lo i nawl ngei liomi hna hi Pathian nih a chiahmi hna an si. 2 Nawl a ngei liomi hna a dohtu cu Pathian nih si seh tiah a timi a dotu an si i cu bantukin a tuahmi nih cun an cungah biaceihnak an i tlunter lai. 3 Uktu bawi hi ṭhatnak a tuahmi nih cun ṭih awk an si lo i ṭhat lonak a tuahmi lawng nih ṭih awk an si. Nawl ngeitu ṭih loin um na duh ahcun, ṭhatnak tuah law an thangṭhat ko lai. 4 Zeicahtiah amah cu Pathian sal, na ca ṭhatnak a tuahtu a si. Sihmanhsehlaw ṭhat lonak na tuah ahcun amah cu ṭih ko, zeicahtiah dantat khawhnak a ngeihmi cu a si taktakmi a si. Amah cu Pathian sal a si i ṭhat lonak a tuahtu cungah khan Pathian thinhunnak cu a phakter. 5 Hi caah hin nawl ngeimi cu an nawl va ngai hna u — Pathian thinhunnak ruang lawngah khan si loin nan chiaṭha thleidannak ruang zongah khan an nawl cu va ngai hna u. 6 Ngunkhuai nan thawhnak cu hi ruang zongah hin a si: nawl ngeitu hna nih khan an rian an ṭuan tikah Pathian ca rian an ṭuan a si. 7 Cucaah nan pek awk a simi kha va pe hna u, nan pumpak ngunkhuai siseh, nan thilri ngunkhuai siseh, pe hna u; hmaizah awk cu hmaizah hna u, upat awk cu upat hna u. 8 Ahohmanh lei i ba hlah u — nan i batmi cu pakhat le pakhat i dawt lawng kha si ko seh. A minung hawi a dawmi paoh nih cun Nawlbia kha a zulh a si ko. 9 Nawlbia nih cun, "Va cungin pa i duh hlah, lai nawng hlah, fir hlah, mi thil na mit va thi hlah," a ti. Hi vialte le hi hlei i a dang a um rihmi nawlbia hna cu, "Na innpa kha nangmah naa dawt bangin va daw," timi nawlbia ah hin an i fun dih. 10 A innpa a dawmi nih cun a innpa cungah ṭhat lonak a tuah bal lo. Cucaah Nawlbia tling tein zulh cu dawt hi a si ko. 11 Atu caan hi zei caan dah a si cang ti kha nan hngalh caah hihi nan tuah awk a si. Atu cu nan i hlauh awk caan a si cang, zeicahtiah khamh kan si lai caan cu kan rak zumh ka nakkhan atu ah cun kan naih deuh cang. 12 Zan cu a dih dengmang cang, khua a ceu dengmang cang. Muihnak thil a simi tuah kha ngol cang u si law ceunak chung i raldoh awkah hriamnam kha i lak u sih. 13 Chun ceu i a ummi bantukin nuncan dawh in nung u sih, aukhuang cercur in um hlah u sih, rihai in um hlah u sih, nu le pa sualnak tuah hlah u sih, zah hngal loin um hlah u sih, i si hlah u sih, i nahchuah hlah u sih. 14 Bawi Jesuh ziaza tu kha i lak u law pumsa duhnak tuah kha ngol u.
1 Zumhnak lei i thazang a dermi kha nan bu chungah rak cohlang ko hna u, an pumpak ruahnak kha rak al len hna hlah u. 2 Mipa pakhat cu a zumhnak nih zei ei paoh a onh ko, sihmanhsehlaw zumhnak a dermi nih cun anhringso lawng kha a ei. 3 Zeipaoh a eimi nih khan cu bantukin a ei ve lomi kha a zawmhtaih awk a si lo, cun zeipaoh a eimi kha anhringso lawng a eimi nih a soi awk a si ve lo, zeicahtiah Pathian nih cun a cohlan veve ko hna cu ta. 4 Midang sal biaceihtu dingah nangmah cu ahodah na si? A tuah khawh le khawh lo cu a Bawipa nih pei a khiah ko lai cu. Cun a tuah zong a tuah khawh ko lai, zeicahtiah Bawipa nih cun tlamtling lakin a tuahter khawh ko. 5 Mi pakhat nih, ni pakhat cu ni dang nakin a biapi deuh tiah a ruah, cun a dang pakhat nih, ni cu an i khat cio ko, tiah a ruah ve. Anmah le an ruahning cio kha fiang tein an ruah awk a si ko. 6 Ni pakhat cu sung khun in a ruatmi nih khan cu ti i a ruah cu Bawipa upatnak in a ruah caah a si; zeipaoh a eimi nih khan cu ti i a ei cu Bawipa upatnak in a si ve ko, zeicahtiah a eimi rawl caah khan Pathian pei a lawmh cu. 7 Ahohmanh mah ca lawngah kan nung lo, ahohmanh mah ca lawngah kan thi lo; 8 kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si. 9 Zeicahtiah Khrih a thih i a thawh ṭhan cu a nungmi he a thimi he an Bawi si awkah a si. 10 A si ahcun, nannih anhringso lawng a eimi nih zeicahdah nan unau hna cu nan soi kun hna? Cun nannih anhringso ei lo pawl zong nih zeicahdah nan unau cu nan zawmhtaih ve hna? Kan dihlak in Pathian hmaiah biaceih awkah kan chuak cio ko lai. 11 Zeicahtiah Cathiang nih, "Ka nun bangin, mi vialte nih ka hmaiah an khuk an i bil lai i Mi vialte nih keimah cu Pathian a si an ka ti lai, tiah Bawipa nih a ti," a ti bang khan a si lai. 12 Cucaah kan dihlak hin Pathian hmaiah kan kong kan i chim cio a herh lai. 13 Cucaah pakhat le pakhat i soi lengmang kha ngol u sih. Nan unau tlukrilhternak le sualnak chung i tlakternak ding caah zeihmanh tuah lo ding tu kha i zuam u. 14 Bawipa Jesuh he kan i pehtlaihnak nih fiang tein a ka hngalhtermi cu hihi a si: zei thil hmanh hi anmahte in a thurhnawmmi an si lo, sihmanhsehlaw pakhatkhat nih thil pakhatkhat cu a thurhnawm in a ruah ahcun cu thil cu a caah cun a thurhnawm ah a cang taktak ko. 15 Zeilo na ei ruangah na unau kha a lung na fahter ahcun, cu na tuahmi cu dawtnak chungin a chuakmi tuahnak a si ti lo. Na eimi rawl cu Khrih nih a thihhnawhmipa rawhnak ah canter hlah. 16 Na ca i a ṭhami thil kha congoihnak phortu ah canter hlah. 17 Zeicahtiah Pathian Pennak cu ei le din menmen hi a si lo, Thiang Thlarau pekmi dinnak le daihnak le lawmhnak tu hi a si deuh. 18 Cu bantukin Khrih rian a ṭuanmi paoh cu Pathian nih a lawmh hna i minung nih an thangṭhat hna. 19 Cucaah daihnak a chuahtertu thil le pakhat le pakhat thazang i peknak a bawmtu thil kha kan i tinh awk an si. 20 Rawl ruang menmen ah Pathian thil tuahmi kha rawk hlah u. Rawl vialte hi ei awk an si ko lai, sihmanhsehlaw midang kha sualnak chungah a tlukrilhtertu rawl ei cu zei rawl a si hmanh ah sual a si. 21 Cucaah sa ei i sum tehna, zu din i sum tehna, nan unau a tlukrilhtertu a si ding paohpaoh tuah i sum tehna kha ahmaanmi thil a si. 22 Cu kong ah cun nangmah nih na ruahning tein va ruat ko, Pathian le nangmah lawnglawng nih va hngal ko uh. Tuah awk a si ti i a ruahmi thil a tuah tikah a lung nih sual a phawt lomi cu lunglawmmi a si. 23 Sihmanhsehlaw a eimi kha a ei tikah lungawṭawm in a ummi cu Pathian nih sual a phawt, zeicah tiah a tuahmi cu zumhnak thawngin a si lo. Cun thil zeipaoh zumhnak thawngin tuah a si lomi cu sual a si.
1 Zumhnak ah thazang a ṭhawngmi kannih nih a dermi kha an thilrit phorh kan bawmh hna awk a si. Kanmah duhnak kha kan kawl awk a si lo. 2 Kan unau hna cu an ṭhatnak ding kha kan tuah awk a si, zumhnak ah an ṭhan khawh nakhnga kan ruah awk a si. 3 Zeicahtiah Khrih zong nih khan amah zawn lawng a rak i ruat lo. Cathiang nih, "Nangmah an vawlpamtu hna biachia cu keimah cungah a tla," a ti bantuk khan a si lehlam. 4 Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si. 5 Khrih Jesuh lam hmuhsakmi nan zulhnak thawngin nannih lakah lungthin khahnak a um khawh nakhnga, lungsaunak le lungthin ṭhawnnak hram Pathian nih in bawm ko hna seh. 6 Cuticun lungkhat tein kan Bawipa Jesuh Khrih i a Pa Pathian cu nan thangṭhat khawh lai. 7 Khrih nih an cohlan hna bangin, Pathian nih sunparnak a hmuh nakhnga pakhat le pakhat i cohlang cio u. 8 Ka chim duhmi cu hihi a si: Khrih kha Judah mi hna ṭuankan i a can cu, Pathian nih an pupa hna sinah a tuahmi biakamnak kha fehter a si nakhnga caah a si i cu nih cun Pathian nih a bia a let lo ti kha a langhter. 9 Cu lawng si loin, Pathian cu mi cungah zaangfahnak a ngeih caah Jentail mi hna nih an thangṭhat lai ti duhnak a si fawn. Cucu Cathiang nih, "Jentail mi hna lak hmanh ah nangmah cu kan lawmh lai i Na min cu hla in ka thangṭhat lai," a ti bantuk le 10 "Jentail mi hna, Pathian thimmi miphun he cun i lawm u," a ti bantuk le 11 "Bawipa cu thangṭhat u, Jentail mi vialte hna, Mi vialte hna, Bawipa cu thangṭhat u," a ti bang khan a si. 12 Isaiah nih khan aa thawh ṭhan i, "Jesse tefa pakhat a ra lai i Jentail mi hna uktu ah ser a si lai, Cun annih nih amah cu an i bochan lai," a ti bang khan a si. 13 Thiang Thlarau ṭhawnnak thawngin nan i ruahchannak cu a ṭhan lengmang nakhnga, ruahchannak hram Pathian nih cun, amah nan zumhnak thawngin lunglawmhnak le daihnak he in khahter ko hna seh. 14 Ka u le ka nau hna, Keimah hrimhrim nih ṭhatnak le hngalhnak in nan khat i nan i cawnpiak kho ko ti kha fiang tein ka hngalh. 15 Sihmanhsehlaw hi cakuat i kan theihter ṭhanmi hna ah hin, ka ral a ṭha nawn ko. Ka ralṭhatnak cu Pathian nih Jentail mi hna ca rian ṭuan awk i 16 Khrih Jesuh sal sinak nawl a ka pekmi ruangah hin a si. Jentail mi cu Pathian cohlan awk tlakmi raithawinak an si nakhnga le Thiang Thlarau thawngin Pathian sin pekmi an si nakhnga, Pathian sin i a rami Thawngṭha ka chimnak ah hin tlangbawi bantuk ka si. 17 Cucaah cun Khrih Jesuh he kan i pehtlaihnak thawngin Pathian rian ka ṭuanmi cu ka hmai a hngal. 18 Pathian nawl ngaihnak i Jentail mi hna cu kalpi awkah, bia in siseh, tuahnak in siseh, hmelchunhnak le khuaruahhar ṭhawnnak in siseh, 19 Thiang Thlarau ṭhawnnak in siseh, Khrih nih keimah hi hmang in a tuahmi lawng cu ka chim ko lai. Cucaah Jerusalem in Illirikum tiang khual ka rak tlawn tawn ah khan Khrih kong Thawngṭha kha tlamtling tein ka chim. 20 Ka saduhthah cu Khrih an theih bal lonak hmun i Thawngṭha chim kha a si zungzal, zeicahtiah midang i a hram an rak thawk cianak hmun i va sak cu ka duh lo; 21 Cathiang nih, "Amah kong an chimh hna lomi nih khan an hmuh lai i a hngal lomi nih khan an hngalh lai," a ti bang khan a si. 22 Hi ruangah hin nan sin i rat voi tampi dawnh ka sinak cu a si. 23 Sihmanhsehlaw hika hrawng ram i ka rian cu ka lim cang i nanmah hmuh ka duhnak kha kum tampi a si cang caah 24 atu cu kan tlawng kho cang rua hna lai tiah ruahchannak ka ngei. Spain ram i ka kalpah ah hin in hmu hna ning law ti cu ka duh i nan sinah tlawmpal ka cam hnuah cuka kal cu ka bawm te u law ka ti. 25 Sihmanhsehlaw atu hi cu Jerusalem khua ah ka va ka ta lai, khika i a ummi Pathian mi hna rian ka va ṭuanpiak ta hna lai. 26 Cucu zeidah a si tiah, Masidonia ram le Grik ram i a ummi Khrihfabu hna nih Jerusalem khua i a ummi Pathian mi hna lak i sifakmi hna bawmhnak ah anmah lungtho tein an thawhmi thawhlawm a um. 27 Cucu anmah hrimhrim nih kan tuah lai an timi te a si. Asinain, a ngaingai ti ahcun, cu misifak hna bawmh cu an rian zong a si ve ko; Judah mi nih hin thlarau lei in an hmuhmi thluachuahnak cu Jentail mi kha an hrawm ve hna bantukin Jentail mi zong nih Judah mi cu thilri lei i thluachuahnak an hmuhmi kha an hrawm ve hna awk a si ko. 28 Cu rian cu ka dih i anmah caah an thawhmi phaisa cu a dihlak in anmah sin i ka chiah dih hnuah, Spain ram kal ahcun kaa thawh lai i kan tlawngpah hna lai. 29 Nan sin ka rat tikah Khrih thluachuahnak kha tlamtling tein kan phorh hna lai ti kha ka hngalh. 30 Kan Bawipa Jesuh Khrih le Thiang Thlarau pekmi dawtnak in kan nawl hna: keimah caah Pathian sinah thla rak cam lengmang ve u. 31 Judea ram i a ummi, Khrih a zum lomi hna kut chungin ka him nakhnga le Jerusalem khua i ka rian ṭuan dingmi hi Pathian mi hna caah cohlan awk tlak a si nakhnga thla rak cam u. 32 Cuticun, Pathian duhnak a si ahcun, lawmhnak he nan sin ka phan lai i nanmah tlawn cu ka caah thazang thar laknak a si lai. 33 Cun kan daihnak tihna Pathian cu nan dihlak sinah um ko seh. Amen.
1 Kenkhria khua Khrihfabu chung i rian a ṭuanmi kan far Fibi hi nan sinah theihhngalhter ka duh. 2 Pathian mi cu pakhat le pakhat nan i cohlan awk a si bantukin nannih nih amah cu Bawipa min in rak cohlang u law bawmhnak a herhmi paoh ah khan rak bawm u; amah cu mi tampi caah hawikom ṭha a si, keimah ca zongah a si ve. 3 Prisilla le Akuila kha nan kut kan tlaih hna. Annih cu Khrih Jesuh rian ah ka ṭuan hawi an si i 4 ka ca i thih hmanh a ngamhmi an si. An cungah ka lung aa lawm — keimah lawng si loin Jentail Khrihfabu zong an i lawm. 5 An inn i aa pummi Khrihfabu zong nan kut kan tlaih hna. Ka hawikom dawtmi Epenetas zong na kut kan tlaih, amah cu Asia ram ah Khrih a zum hmasa bikmi a si. 6 Nan ca i rian fak piin a ṭuanmi Mary kha na kut kan tlaih. 7 Andronikas le Junias kha an kut ka tlaih hna, annih cu kan Judah phun hawi keimah he thongtla ṭimi an si. Anmah cu lamkaltu pawl nih khan ṭha tein an theihmi hna an si i ka hlan i Khrihfa a cangmi an si. 8 Bawipa he i hawikomhnak chungah a ummi ka hawi dawt Ampliatas kha na kut kan tlaih. 9 Khrih rianṭuannak ah ka rian ṭuan hawi Urbanas le ka dawtmi ka hawi Stakhis zong kha nan kut kan tlaih hna. 10 Khrih zumhnak ah a fel ngaingaimi Apelles kha na kut kan tlaih. Aristobulus innchungkhar kha nan kut kan tlaih hna. 11 Judah mi a simi ka phun hawi Herodion le Narsissas innchungkhar Khrihfa kan unau hna kha nan kut kan tlaih hna. 12 Bawipa rian a ṭuanmi Trifana le Trifosa le Bawipa caah rian tampi a ṭuanmi ka dawtmi ka hawi Persis kha nan kut kan tlaih hna. 13 Bawipa rian ah hawi hlei in a ṭuanmi Rufas le a fa bantukin a ka zoh zungzaltu a nu kha nan kut kan tlaih hna. 14 Asinkritas, Flegon, Hermes, Patrobas, Hermas le an sin i a ummi Khrihfa unau vialte kha nan kut kan tlaih hna. 15 Filologas le Julia, cun Nereus le a far le Olimpas le an sinah a ummi Pathian mi vialte kha nan kut kan tlaih hna. 16 Nannih cu unau dawtnak in pakhat le pakhat i biachawn u. Khrih ta a simi Khrihfabu vialte nih nan kut an in tlaih hna. 17 Cheunak a chuahtertu hna le zumhnak a tuaitertu, nannih nih nan hmuh ciami cawnpiaknak a ralchanhmi hna kha i ralring hna u tiah kan forh hna; annih cu hrial ko hna u. 18 Zeicahtiah cu bantuk rian a ṭuanmi cu kan Bawipa Khrih rian an ṭuan kha a si lo i anmah duhnak tu an tuah kha a si deuh. An hmurka ṭha le an mi hloi thiamnak in lungmawng zaran vialte kha an hlen hna. 19 Thawngṭha kong i zumhawktlak nan si kha a mi kip nih an theih i cucaah cun nan kongah hin ka lung aa lawm. Ṭhatnak leiah cun mifim si u ti kan duh hna, sihmanhsehlaw chiatnak leiah cun ngakchia cuampual si ko u ti kan duh hna. 20 Cun Pathian, kan daihnak tihna nih cun, Satan kha nan ke tangah a rial tuan lai. Kan Bawipa Jesuh vel cu nan sinah um ko seh. 21 Ka rianṭuan hawi Timote nih nan kut an tlaih hna; cun Judah mi ka phun hawi Lusias, Jason le Sosipater zong nih nan kut an in tlaih hna. 22 Hi cakuat a ṭialtu keimah Tertias nih Khrihfa kuttlaihnak in nan kut kan tlaih hna. 23 Ka tluninn pa Gaius, Khrihfabu an i pumhnak inn a ngeitu nih hin nan kut an tlaih hna. Hi khua tangka kengtu Erastas le kan unau Kuartas nih nan kut an in tlaih hna. 24 Kan Bawipa Jesuh vel cu nan dihlak sinah um ko seh. 25 Pathian cu sunparnak pe u sih. Ka chimmi Khrih kong Thawngṭha le kan hnulei chan tampi chung aa thupmi biathli kha phuan a sining in, Pathian nih cun nan zumhnak ah fek tein an dirter khawh hna lai. 26 Atu cu kha biatak kha profet hna ṭial bang khan phuan a si cang i zungzal hmunmi Pathian nawl bangin, mi vialte nih an zumh i a nawl cu an ngaih nakhnga, miphun dihlak sinah chim a si cang. 27 Amah lawnglawng Pathian a si i Amah lawnglawng zeizong vialte a hngal dihtu a simi cu, Jesuh Khrih thawngin zungzal in zungzal tiang thangṭhat si ko seh. Amen.
1 Pathian duhnak in Khrih Jesuh lamkaltu si dingah kawhmi keimah Paul le kan unau Sosthenes nih, Korin khua i a ummi Pathian khrihfabu kha ca kan in kuat hna. 2 Nannih cu Pathian mithiang si awkah kawh nan si i Khrih Jesuh he nan i pehtlaihnak thawngin Pathian ta nan si. Cun Jesuh Khrih cu kan Bawi zong a si i an Bawi zong a si ve bantukin kan Bawipa Jesuh Khrih min in thla a cammi paoh cu khuazeika i a ummi an si hmanh ah Pathian ta cu an si ve. 3 Pathian kan Pa le Bawipa Jesuh Khrih nih vel le daihnak in pe ko hna seh. 4 Khrih Jesuh thawngin an pekmi hna a vel ruangah hin ka Pathian cu ka lawmh zungzal. 5 Zeicahtiah Khrih thawngin zeizong vialte ah nan rum cang, holh lei le hngalhnak lei zongah nan rum cang. 6 Cu a langhnak cu Khrih kong kan chimmi biatak kha nan chung i fek tein a umnak ah hin a si i kan Bawipa Jesuh Khrih a langh lainak nan hngahnak ah hin 7 thluachuahnak nan hmuh lomi pakhatte hmanh a um lo. 8 Amah nih cun a dongh tiangin fek tein an umter hna lai i kan Bawipa Jesuh Khrih Ni ah cun ahohmanh nih sual an in phaw kho hna lai lo. 9 A Fapa Jesuh Khrih kan Bawipa he hawikomhnak ngeih awkah an kotu hna Pathian cu zumhawktlak a si ko. 10 Ka u le ka nau hna, kan Bawipa Jesuh Khrih min in kan nawl hna: nan dihlak in pakhat le pakhat lungnge tein um tuah u, i ṭhen hlah u. Lungthin khat, ruahnak khat in um u. 11 Ka u le ka nau hna, Khalawi innchungkhar chungmi nih an ka chimh i an i si lengmang an in ti hna. 12 Ka chim duhmi cu: a cheu nih, "Kannih cu Paul a ṭanhmi kan si," nan timi le, a cheu nih, "Kannih cu Apollo a ṭanhmi kan si," nan timi le a cheu nih, "Kannih cu Peter a ṭanhmi kan si," nan timi le, a cheu nih, "Kannih cu Khrih a ṭanhmi kan si," nan timi hi a si. 13 Khrih cu a cheuh in nan i cheu dih. Nan ca i vailamtahnak ah a thimi kha Paul dahra a si? Tipil nan in kha Paul zultu si awkah dahra a si? 14 Vanṭhat ah, Krispas le Gaius dah ti lo cu ahohmanh tipilnak kan pekmi hna nan um lo. 15 Cucaah cun, Paul zultu si awkah tipilnak kan ing, tiah ahohmanh nih nan ti kho lai lo. 16 (A, Stefanas le a innchungkhar kha tipilnak ka rak pek taktak hna, midang cu ka pek hna le pek hna lo ka cing ti lo). 17 Khrih nih hin, tipil va pe hna, tiah a ka thlah lo, Thawngṭha kha va chim hna, tiah a ka thlah i cucu minung fimnak bia i bochan dingin a si lo. Zeicahtiah vailamtahnak i Khrih a thih kha minung fimnak bia in chim ahcun a hmual a lolak sual hnga. 18 Vailamtahnak i Khrih a thihnak kong hi a tlau lio lengmangmi hna caah cun pakpalawng bia a si ko, sihmanhsehlaw khamh lio lengmangmi hna kannih caah cun Pathian hmual a si. 19 Cathiang nih, "Mifim mi hna fimnak cu ka hrawh lai i Cathiammi hna hngalhnak cu ka hnon lai," a ti. 20 Cucaah cu nih cun nan mifim hna cu khuazei ah dah a chiah hna? Nan cathiam hna zong cu tah? Vawlei fimnak in bia al a thiammi hna kha tah? Vawlei fimnak hi cu hruhnak a si ti kha Pathian nih a langhter. 21 Minung nih anmah fimnak in Pathian hngalh khawh lo ding kha Pathian nih a fimnak in a rak tuahmi a si. Kan chimmi "hruh bia" tu hin Pathian nih zumhnak a ngeimi cu khamh a duh hna. 22 Judah mi nih cun, ahmaan maw hmaan lo ti hngalh khawhnak ding caah khuaruahharnak um kha an duh, cun Grik mi hna nih cun fimnak kha an kawl, 23 sihmanhsehlaw kannih nih cun vailamtahnak cung i thahmi Khrih kong kha kan chim i cu kong cu Judah mi caah cun tluknak lung a si i Grik mi hna caah cun hruhnak bia a si. 24 Sihmanhsehlaw Pathian nih a kawhmi hna caah cun, Judah mi an si zongah Jentail mi an si zongah, cu bia cu Khrih kha a si i Khrih cu Pathian hmual le Pathian fimnak kha a si. 25 Zeicahtiah Pathian hruhnak a si rua timi cu minung fimnak nakin a fim deuh ṭhiamṭhiam i Pathian dernak a si rua timi cu minung ṭhawnnak nakin a ṭhawng deuh ṭhiamṭhiam. 26 Ka u le ka naule hna, Pathian nih a rak in auh hna ah khan, zei bantuk mi nan si kha i philh hlah u. Minung hmuhning lei in ti ahcun, a fimmi le thil a ti khomi le upat hmaizah awk tlak a simi cu tlawmte lawnglawng nan rak si. 27 Vawlei nih zeihmanh ah a rel lomi thil Pathian nih a thim thengnak cu, mifim mi kha an ningzak seh tinak caah a si i vawlei nih a der tiah a timi thil a thim thengnak cu miṭhawng mi le thil ti khomi hna kha an ningzak seh ti caah a si. 28 Vawlei nih thil pipa i a ruahmi kha hrawh awkah vawlei nih a nautatmi le zei i a rel lomi le pakpalawng i a ruahmi hna a thim hnanak cu a si. 29 Cu nih cun a fiantermi cu, Pathian hmaiah cun ahohmanh an i porhlaw kho lo, ti hi a si. 30 Sihmanhsehlaw Pathian nih cun kannih cu Khrih Jesuh he a kan pehtlaihter cang i Pathian nih Khrih cu kannih fimnak caah a ser cang; amah thawng cun kannih cu Pathian he kan i rem i Pathian mithiang ah kan cang i a luatmi kan si. 31 Cucaah cun Cathiang nih, "Porhlawt a duhmi cu Bawipa nih a tuahmi kha i porhlawtpi ko hna seh," a ti bang khan, porhlawt a duhmi nih cun Bawipa nih a tuahmi tu kha an i porhlawt awk a si.
1 Ka u le ka nau hna, nan sin i Pathian biathli chim awk i ka rat ah khan, biathluan sausau le cathiam sang pawl nih an hmanmi bia kha ka hmang hna lo. 2 Zeicahtiah nan sin i ka um lioah khan Jesuh Khrih le vailam i an thahnak kong dah ti lo cu a dang zeihmanh ruah le khah kaa timhmi a um lo. 3 Cucaah nan sin i ka rat ah khan tla hnimhniamte le therphang lengmang in ka um i 4 kan cawnpiaknak hna le ka phungchimmi ah khan nan lung an pemtu hna cu minung fimthiamnak holh dawhdawh kha si loin Pathian Thlarau ṭhawnnak tu kha a si deuh. 5 Cucaah cun nan zumhnak cu minung fimnak ah aa bunhmi si loin Pathian ṭhawnnak i aa bunhmi tu a si deuh. 6 Asinain nutling patling a si cangmi hna sinah cun fimnak bia kha ka chim ko. Sihmanhsehlaw cu ka chimmi fimnak bia cu, hi a liam lio lengmangmi chan fimnak hi a si lo, hi a liam lio lengmangmi chan a uktu hna ṭhawnnak fimnak zong a si lo; 7 ka chimmi fimnak cu Pathian biathli fimnak, minung hngalh lomi, vawlei ser hlan hrimhrim in Pathian nih kan sunparnak ding ca i a rak timhmi fimnak tu kha a si. 8 Hi vawlei a uktu hna nih hin, cu fimnak cu an rak hngal lo. Rak hngal hna seh law cu, sunparnak Bawi kha vailam ah an rak khenh hnga lo. 9 Sihmanhsehlaw Cathiang nih, "Ahohmanh nih an hmuh bal lomi le an theih bal lomi, A si kho lai, tiah ahohmanh nih a ruah in an ruah bal lomi, Kha thengte kha Pathian nih amah a dawtu hna ca i a timhmi cu a si," a ti bang khan a si taktak. 10 Cu biathli cu Pathian nih a Thlarau in kannih sinah khan a phuan. Thlarau nih cun zeizong vialte kha a dah a hriah dih, Pathian nih aa tinhmi a thukmi hmanh kha a coih dih hna. 11 Minung cu a chung i a ummi amah a thlarau nih khan a konglam cu a dihumnak in a hngalh; cu bantukin Pathian zong cu Pathian Thlarau lawnglawng nih a konglam kha a dihumnak in a hngalh ve. 12 Kannih kan hmuhmi thlarau cu hi vawlei thlarau hi a si lo, Pathian nih a kan pekmi vialte cu kan hngalh khawh nakhnga, Pathian nih a run thlahmi Thlarau cu kan hmuh cang. 13 Cucaah Thlarau a ngeimi hna sinah thlarau lei biatak kha a sullam kan chim tikah minung cawnpiakmi bia kha hmang loin Thlarau cawnpiakmi bia tu kha kan hman. 14 Sihmanhsehlaw Thlarau a ngei lomi nih cun Pathian Thlarau sinin a rami laksawng cu an hmu kho lo. Fiang in an hngal kho ngaingai hna lo; laksawng a sunning kha thlarau lei lawngin hngalh khawh a si caah annih caah cun pakpalawng men a si ko. 15 Thlarau a ngeimi nih cun zeizong vialte kha an ṭhat an chiat an khing an thlai khawh, sihmanhsehlaw anmah tu cu ahohmanh nih sual an phaw kho hna lo. 16 Cathiang nih, "Bawipa cu aho nih dah a lungthin an hngalh? Amah cu aho nih dah ruahnak an cheuh khawh?" a ti bangin a si taktak. Sihmanhsehlaw kannih cu Khrih lungthin a ngeimi kan si.
1 A ngaingai ti ahcun, ka u le ka nau hna, nannih sinah cun Thlarau a ngeimi hna sin i bia ka chim bantukin ka chim kho lo; hi vawleicung mi bantuk le Khrihfa zumhnak i bawhte a si rihmi hna bantuk lawngin bia kan chimh khawh hna. 2 Nannih cu hnuk in kan cawm hna a herh ko rih, rawl hak pek nan cut rih lo caah rawl hak kan pe kho rih hna lo. Cun atu tiang hmanh ah hin nan cu rih lo, 3 hi vawleicung mi bantukin pei nan um ko rih cu. Pakhat le pakhat nan i nahchuah i pakhat le pakhat nan i sik tikah hin nannih cu hi vawleimi nan si le hi vawlei ning in nan nunning a si kha a lang ko lo maw? 4 Pakhat nih nan i thawh i, "Kei cu Paul lei ṭang ka si," nan ti; a dang pakhat nih, "Kei cu Apollo lei ṭang ka si," nan ti; hiti nan ti ah hin, nan umtuning cu hi vawleicung umtuning bantuk a si ti nan langhter a si ko lo maw? 5 A ngaingai ti ahcun, Apollo cu ahodah a si? Paul cu ahodah a si? Pathian sal pei kan va si ko cu, Pathian an zumhtertu hna kha. Bawipa nih a kan pekmi rian cio kha pei kan hei ṭuan ko cu: 6 Kei nih a ci ka tuh, Apollo nih a kung kha ti a toih, sihmanhsehlaw a ṭhantertu cu Pathian a si. 7 A ci a tuhtu le ti a toihtu thamtham cu biapi an si ṭung lo. Pathian kha pei biapi cu a si cu, zeicahtiah amah nih khan pei a ṭhanter cu. 8 A tuhtu le a toihtu kha cu zeihmanh an i dannak a um lo; an ṭuanning cio khan Pathian nih laksawng a pek ko hna lai. 9 Zeicahtiah kannih cu Pathian ca i hmunkhat ah rian a ṭuan ṭimi kan si i nannih cu Pathian lo nan si. Nannih cu Pathian inn zong nan si fawn. 10 Pathian nih pahrang a ka pekmi kha ka hman i inn sak a thiam ngaingaimi bantukin inn saknak ding a hram kha ka bunh, cun a dang pakhat nih a cungah khan a run sak. Sihmanhsehlaw zeitindah kan sak ti kha ahohmanh kan i ralrin awk cio a si, 11 zeicahtiah Pathian nih Jesuh Khrih lawnglawng cu a hram caah khan a chiah cang i hram dang zeihmanh chiah awk ding a um ti lo. 12 Cu hram cung i saknak thilri caah cun a cheu nih sui maw, ngun maw, lungvar mansung maw, an hman hna lai; cun a cheu nih thing maw, di maw, capawl maw, an hman hna lai. 13 Cun an sakmi cio cu zeidah an lawh taktak ti kha Khrih Ni nih a langhter te hna lai. Zeicahtiah cu Ni mei nih cun an rianṭuanmi kha a hneksak cio hna lai i zeidah an lawh taktak ti cu mei nih cun a langhter lai. 14 Inn saknak hram cungah pakhatpa nih inn a sak i cu a sakmi cu mei nih khan a hrawh khawh lo ahcun, cu pa nih cun laksawng a hmuh lai. 15 Asinain ahohmanh a sakmi inn cu a kangh dih ahcun, cu inn cu a sung ko lai; mei chungin luat bantuk khi a si lai nain amah cu khamh a si ko lai. 16 Pathian biakinn nan si kha nan hngalh i Pathian Thlarau nan chung i a um zong kha nan hngalh. 17 Cucaah ahohmanh nih Pathian biakinn cu a hrawh ahcun, amah cu Pathian nih a hrawh ve lai. Zeicahtiah Pathian biakinn cu a thiangmi a si i nanmah hrimhrim cu biakinn cu nan si. 18 Hi kong ah hin palh sual hrimhrim hlah u: nan lakah ka fim ti aa ruatmi nan um ahcun, — ka chim duhmi cu hi vawlei cung fimning in ka fim ti aa ruatmi nan um ahcun ka ti duhnak a si — mifim ngaingai a si khawh nakhnga mihrut ah i cang seh. 19 Zeicahtiah hi vawlei nih fimnak i a ruahmi cu Pathian hmaiah cun pakpalawng a si. Cathiang nih, "Pathian nih mifim hna cu an zernak lila ah khan a foihter hna," tiah a ti bang hin a si taktak. 20 Cathiang nih cun, "Bawipa nih mifim mi hna ruahnak cu pakpalawng a si ti kha a hngalh," tiah a ti rih. 21 Cucaah cun ahohmanh nih minung tuah khawhmi thil kha kan i porhlawt awk a si lo. A ngaingai ti ahcun zeizong vialte hi nanmah ta tu an si dih: 22 Paul siseh, Apollo siseh, Peter siseh, hi vawlei hi siseh, nunnak siseh, thihnak siseh, atu caan hi siseh, hmailei caan khi siseh, hi vialte hi an dihlak in nanmah ta an si i 23 nannih cu Khrih ta nan si i Khrih cu Pathian ta a si.
1 Kannih cu Khrih sal, Pathian biathli kengtu ah khan nan kan ruah awk a si. 2 Cu bantukin thil ken fialmi a rian biapi bik cu a bawipa sin i zumh awk tlak te i um kha a si. 3 Cucaah cun nannih nih ka kong nan rak ka ceih len ah khan ka zei a poi lo, vawleicung biaceihnak zung zong nih ka ceih hna seh law ka zei a poi lai lo; keimah hmanh nih keimah kong hi kaa ceih kho lo. 4 Ka chiaṭha thleidannak hi a thiang ko, asinain cuti in a thiang ko ti tikah hin ka sual lo tinak a si lo. Ka cung i bia a khiaktu cu Bawipa kha a si. 5 Cu a si caah a caan a phak hlanah ahohmanh na sual, na thiam va ti hna hlah u. Donghnak biaceihnak cu Bawipa a rat tik lawnglawng ah a si te lai, zeicahtiah mi nih an lungthli tein an rak i tinhmi le a muihnak ah an thuhmi an biathliruk vialte kha amah nih cun a phuan dih hna lai i cu tikah cun mi vialte nih hmuh awk an i tlakmi thangṭhatnak kha Pathian sinin an hmuh cio te lai. 6 Ka u le ka nau hna, nanmah ṭhatnak ding caah hi thil vialte hi Apollo le keimah kong in kan chimh hna. Hi bantukin kanmah pahnih kong tahchunhnak ah kan lakpiak hna cu, "Phung leng lonh hlah u," ti tawnmi kha a sullam nan hngalh khawh nakhnga caah a si. Ahohmanh thangṭhat hlei hna hlah u, ahohmanh namh hlei hna hlah u. 7 Midang nakin cungnung deuh ah aho nih dah an ser? Pathian pek a si lomi na ngeihmi zeital a um maw? Cucaah cun nan hmuhmi cu a lakin hei hmu hlah u law cu bang, zeitindah nan i porhlawt khawh? 8 Nan herhmi paohpaoh cu nan ngeih dih ko cang. Nannih cu nan lian in nan rum ko cang. Nannih cu siangpahrang nan si cang, kannih bel kan si lo. Siangpahrang hei si taktak u law ka hei duh dah, kannih zong nan sinah siangpahrang kan si ve hnga! 9 Kannih lamkaltu pawl hi Pathian nih nauta bik ah a kan ser ko rua tiah ka ruah. Zapi hmai i thah awkah sual phawtmi, van le vawlei le vancungmi le minung nih zoh nuam men i hei hman awk khi kan si ko rua. 10 Kannih cu Khrih ruangah mihrut kan si; nannih tu cu Khrih chungah mifim nan si! Kannih cu kan der, nannih cu nan ṭhawng, kannih cu nautatnak kan hmu, nannih cu upatnak nan hmu. 11 Nihin tiang hrimhrim hin rawlṭam le tihal in kan vak; hni le puan tlek fiamfuam in kan um; an kan tuk an kan velh; khua khat hnu khua khat kan vak lengmang; 12 kan paw i cawmnak dingah kan kut in fak piin rian kan ṭuan. 13 Chiat an kan serh tikah thluachuah le vanluh kan pek hna; an kan hrem tikah kan in, biaziar in an kan ti tikah bia nem in kan leh hna. Kannih cu kuthnawm hnawhnak puanchia kan si ko; nihin ni tiang hrimhrim hin vawlei cung hnawmtinphor kan si ko. 14 Hi tiin ca kan kuat hna hi nan ningzak seh ti ka duh caah a si lo, ka dawtmi ka fale taktak bantukin cawnpiak kan duh hna caah a si. 15 Zeicahtiah Khrih chung i nan nunning ah hin zohkhenhtu cu thong hra hmanh ngei hna u law pa cu pakhat lawnglawng nan ngei. Thawngṭha nan sin i ka ratpi thawngin Khrih Jesuh chung i nan nunnak ah hin keimah hi nan pa cu ka si ko. 16 Cucaah ka zia ka cawng u tiah kan nawl hna. 17 Hi ruangah hin nan sin i Timote ka rak thlah hi a si. Amah cu Bawipa chungah ka dawtmi le ka zumhmi ka fapa a si. Amah nih cun, Khrih Jesuh chung i nunnak thar in nunning ah zeitindah ka umtu a si ti kha le khuazakip ah khrihfabu kha zeitindah ka cawnpiak hna ti kha an chimh hna lai. 18 A kan tlawng lem lai lo nan ti i a cheu cu lung puam in nan i la. 19 Bawipa duhnak a si ahcun, tuan ah kan tlawng hna lai i hi milungpuam pawl nih hin zeidah an tuah khawhmi taktak a si kha keimah hrimhrim nih ka ra zoh lai, zeidah an chim khawh timi lawng kha si lo in. 20 Zeicahtiah Pathian Pennak cu holh sawhsawh le bia sawhsawh men hi a si lo, Pathian Pennak cu thil ti khawhnak ṭhawnnak pei a si cu. 21 Zeidah nan i thim lai? Fungfek he maw ka rat lai dawtnak le nemnak lungthin he dah ka rat lai?
1 Nan lakah nu le pa sualnak, lawkihmi hmanh nih an i zahpi dingmi sualnak a um ti kha ka theih. Mipa pakhat cu a pa nupi he an um ṭi, an ti. 2 Zeitindah nan i porhlawt khawh ṭheo rih ee? Ngaihchiatnak in nan khah awk tu a si nain; cu bantuk thil a tuahmi cu nan bu chungin nan chuah awk a si. 3 Kei cu pum cun nan sinin lamhlatpi ah ka um nain lungthin cun nanmah sinah ka um ko. Cucaah cun cu bantuk thilṭhalo a tuahtu cungah cun, nanmah sin i a um vemi bantukin kan Bawipa Jesuh min in, biachahnak ka tuah cang. 4 Nannih nan i pumh tikah, kei zong kan sinah a ummi kan Bawipa Jesuh ṭhawnnak thawngin ka lungthin in nan sinah kaa pumh ve caah, 5 hi pa cu a thlarau kha Bawipa Ni ah khamh a si nakhnga a pum cu hrawh awkah amah cu Satan sinah khan pek awk a si, ka ti. 6 Nan i porhlawt hi ahmaan lo. Phungthluk ah, "Thilnu tlawmte nih chang nawnmi cu a ning piin a thawhter," timi bia cu nan hngalh. 7 Sualnak thilnu hlun cu nan chungah rian a ṭuan. Nannih cu a thar tein rawhmi changreu nan si nakhnga cu thilnu hlun cu hlonh u. Khrihfa nan si bantukin nannih cu thilnu telh lomi Lanhtak puai changreu cu nan si; zeicahtiah kan Lanhtak puai tuufa Khrih cu raithawinak ah pek a si cang caah kan Lanhtak puai cu aa thawk taktak cang. 8 Cucaah kan puai cu thilnu hlun, sualnak le ṭhat lonak thilnu hlun he cawhmi changreu he khan si loin thilnu aa tel lomi changreu, thiannak le biatak changreu he khan tuah u sih. 9 Ca kan kuatmi hna chungah khan, misual mi hna he i kom hlah u, tiah ka ti. 10 Chimh ka rak in duhmi hna cu, a sualmi, hak a kaumi, a firmi, siasal a biami lawkihmi hna kha nan kom hna lai lo, ti a si lo, zeicahtiah annih kha komh lo nan duh ahcun hi vawleicung hin nan chuah a hau hnga; 11 ka rak in chimh duhmi hna cu, Khrihfa ka si ve aa ti ṭung i sualnak a tuahmi, a hak a kaumi, siasal a biami, mi congoih a hmangmi, zu a rimi, mifir a simi, hi hna he hin nan i kom lai lo ka ti duhnak a si; cu bantuk mi hna he cun rawl hmanh hmunkhat ah ei ṭi hlah u. 12 - 13 A ngaingai ti ahcun a lengmi cu kei nih an bia ka ceihpiak hna awk a si lo. Pathian nih a ceih ko hna lai. Asinain nan bu chung i a ummi cu an bia nan ceihpiak hna awk a si hnga lo maw? Cathiang nih pei, "Nan bu chungin mi ṭhalo kha va chuah u," a ti kha.
1 Nannih pakhat le pakhat nan i sik tikah, nan bia cu Pathian mi hna tu kha ceihter loin, zeitindah lawkihmi biaceihtu bawi hna sin tu ah nan chuah ngam? 2 Vawlei hi Pathian mi hna nih bia an ceih lai ti kha nan hngal lo hlah maw? Vawlei hmanh hi a bia a ceihtu ding nan si ahcun, thil hme tete cu nan ceih kho lo maw? 3 Vancungmi khi kanmah nih an bia kan ceih hna lai ti hi nan hngal lo dahra? Hi vawlei cung kan nun lio thil chinchin cu kan ceih awk pei an si cu. 4 Cucaah cu bantuk thil cu a hung chuah tikah khrihfabu chung i aa tel ve lomi cu nan ceihter ko hna lai maw? 5 Nan caah ningzah awk a va si dah. Unau aa simi hna karlak i bia a thlek khotu mifim pakhat tal cu nan um ṭheo lai. 6 Nannih nih cuticun tuah loin, unau le unau cu taza nan i cuai i a zum lomi tu kha nan biathlektu ah nan hman hna. 7 Pakhat le pakhat taza nan i cuainak nih hin nan si awk hnga ding nan si lo kha fiang tein a langhter. Na palh, ti nan si zongah nan caah a ṭha deuh ko lo maw? Nan thil an in chuh hna zongah nan caah a ṭha deuh ko lo maw? 8 Cu ti si loin nannih cu, u le nau a si hrimhrim komi kha, pakhat le pakhat nan i tawng i pakhat le pakhat thil nan i chut. 9 Miṭha lomi nih cun Pathian Pennak cu an co lai lo ti kha fiang tein nan hngalh ko. Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le, 10 mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian Pennak cu an co lai lo. 11 A cheu cu cu bantuk cu nan rak si. Asinain sualnak in thianh nan si cang; Pathian sinah pekchanh nan si cang; Bawipa Jesuh Khrih min le kan Pathian Thlarau thawngin Pathian he remter nan si cang. 12 Mi cheu nih nan i thawh lai i, "Kei cu zeipaoh tuah onh ka si ko," nan ti. Asi, zeipaoh tuah onh na si ko lai, sihmanhsehlaw zeipaoh kha na caah a ṭha dih lo. Kei zong nih, "Zeipaoh tuah onh ka si," ka ti khawh ve, sihmanhsehlaw zeihmanh kaa salter lai lo. 13 Cun a cheu nih nan i thawh ṭhan i, "Rawl cu paw caah a si, paw cu rawl caah a si," nan ti; a si taktak, sihmanhsehlaw Pathian nih a donghter veve hna lai. Minung pum hi sual tuahnak caah hman ding a si lo, Bawipa rianṭuannak ca tu ah hman ding a si deuh, Bawipa zong nih pum caah rian a ṭuan ve. 14 Pathian nih Bawipa cu thihnak in a thawhter i kannih zong a ṭhawnnak cun a kan thawhter ve lai. 15 Nan pum cu Khrih pum a ṭengnge a si kha nan hngalh. Khrih pum a ṭengnge cu i lak riangmang in hlawhhlangnu pum a ṭengnge ah cun ka ser hnga maw? Naisai hlah! 16 Hlawhhlangnu pum ah a pum a va fonhmipa kha, hlawhhlangnu he cun titsa khat an si ti kha nan hngal rua lo. Cathiang nih fiang tein a chimmi cu, "Cu hna pahnih cu pum khat an si lai," ti hi a si. 17 Sihmanhsehlaw Bawipa he aa pehmi cu Bawipa he thlarau in pakhat an si. 18 Nu le pa sualnak kha hrial ko u. Sualnak dang nih cun mi hi a pum kha a hnorsuang lo, asinain nu le pa sualnak a tuahmi nih cun amah pum cung hrimhrim ah khan sualnak a tuah a si. 19 Nan pum cu Thiang Thlarau biakinn a si kha nan hngal lo maw? Cu Thlarau cu nan chungah a um i Pathian nih an pekmi hna a si kha nan hngal lo maw? Nannih cu nanmah ta nan si lo, Pathian ta nan si; 20 a man in cawkmi nan si. Cucaah nan pum cu Pathian sunparnak caah hmang u.
1 Atu cu cakuat in nan ka halmi kong kha kan chim hna lai. Pa hi nupi ṭhi loin a um ahcun a ṭha ko. 2 Sihmanhsehlaw sualpalhnak a tam tuk hringhran caah hin, pa nih mah nupite i ngeih seh law nu nih mah vate i ngeih seh. 3 Pa nih a nupi cungah a tuah awk a simi rian kha tlamtling tein tuah seh law nu zong nih a va cungah tuah ve seh; an herhnak ah khan an lung i riamhter ciocio hna seh. 4 Nu hi amah pum bawi a si lo, a pum bawi cu a va kha a si; cu bantuk ṭhiamṭhiam in pa zong cu amah pum bawi a si ve lo, a pum bawi cu a nupi kha a si. 5 Kan caan cu thlacamnak ah hman kan duh tiin pakhat le pakhat kha i reem hlah u; nan pahnih in caan khatkhat chung kha cuticun kan um lai tiah hnatlaknak nan ngeih hmasa ṭung lo ahcun; cu hmanh ah nan i sum khawh lo sual i Satan tukforhnak chungah nan tlak nakhnga lo, nu le va sinak kha thawk ṭhan ko u. 6 Hi kan chimhmi hna hi nawlbia bantukin kan ti hna lo, a onh in kan onh hna tu a si deuh. 7 A taktak ti ahcun, keimah bantuk hin um dih u law ka duh deuh; sihmanhsehlaw Pathian nih a kan pekmi laksawng kan hmuhmi cu an i dang dih cio. 8 Cun atu cu nupi ngei rih lo le va ngei rih lo le hmeinu hmeipa nan sinah ka chim: keimah bantuk hin nanmah lawng cio ah nan um ah a ṭha deuh ko lai, 9 sihmanhsehlaw nan duhnak kha nan i sum khawh lo ahcun vaa ṭhi vaa um ko u, duhnak in a kangh in kangh nakin i ṭhit-um cu a ṭha deuh. 10 Aa ṭhi-um ciami caah hi bia hi chim awk ka ngei, keimah bia hmanh a si lo, Bawipa bia tu a si: nu nih a va kha a kirtak hrimhrim lai lo; 11 a kirtak ahcun va ngei loin um lan ko seh, asilole a va he cun i rem ṭhan ko hna seh; cun pa nih a nupi kha ma hrimhrim hlah seh. 12 Cun a dang pawl caah khan Bawipa nih si loin keimah nih hitihin ka ti: Khrihfa mipa pakhatkhat nih zumtu a si lomi nupi a ngeih i a nupi nih um ṭi kha a lung a si ko ahcun, ma hlah seh. 13 Cun khrihfa nu pakhatkhat nih zumtu a si lomi va a ngeih i a va nih um ṭi kha a lung a si ko ahcun, kirtak hlah seh. 14 Zeicahtiah a zummi a si lomipa cu a nupi he an i pehtlaihnak thawng khan Pathian cohlan awk tlak ah a cang i zumtu a si lomi nu cu a va Khrihfa a simi he an i pehtlaihnak thawngin Pathian cohlan awk tlak ah a cang. Hitihin rak si hlah seh law an fale cu lawkih fale bantuk an rak si hnga; asinain atu cu Pathian cohlan awk tlakmi an si. 15 Sihmanhsehlaw zumtu a si lomi nih khan, ṭhen a duh ahcun i ṭhen ko hna seh. Cu bantuk thil ahcun Khrihfami kha nupi a si ah pasal a si ah hnek awk a si lo. Pathian nih daihnak in um awkah nannih cu an auh hna. 16 Khrihfa nu, ka va cu ka khamh kho hrimhrim lai lo tiah zeitindah na ti khawh lai? Khrihfa pa, ka nupi cu ka khamh kho hrimhrim lai lo, tiah zeitindah na ti khawh lai? 17 Ahohmanh Pathian nih laksawng an pek hna ning le Pathian nih an auh hna i nan sining cio khan um ko u. Hihi khrihfabu kip ah ka cawnpiakmi hna a si. 18 Cuarpar aa tanmi nih Pathian auhnak kha a cohlan ahcun, cuarpartannak kha hloh tim hlah seh; cun cuarpartan lomi nih a cohlan ahcun cuarpar i tan duh hlah seh. 19 Zeicahtiah cuarpartan le tan lo cu zeihmanh an si lo. Biapi a simi cu Pathian nawl zulh kha a si. 20 Ahohmanh Pathian auhnak nan rak cohlan lio i nan sining khan um ko u. 21 Pathian nih an kawh ah khan sal na rak si maw? Na si zongah na zei poi hlah; luatnak caan na hmuh ahcun luat i zuam. 22 Zeicahtiah Bawipa nih a kawhmi sal cu Bawipa miluat a si cang; cu bantuk ṭhiamṭhiam in miluat a rak simi, Khrih nih a kawhmi, cu Khrih sal a si ve. 23 Pathian nih man in an cawkmi nan si; cucaah minung sal ah cun i cang hlah u. 24 U le nau hna, Pathian nih an kawh hna i nan siningte khan Pathian he i hawikomhnak chungah cun um ko u. 25 Aa ṭhi-um rih lomi hna kongah hin, Bawipa sinin hmuhmi bia zei ka ngei lo nain Bawipa vel thawngin zumhawktlak a si vemi bantukin ka ruahnak ka chim lai: 26 Atu caan harnak ruah tikah hin pa nih a umning in um ko seh law a ṭha deuh tiah ka ruah. 27 Nupi ngeimi na si ahcun na nupi he i ṭhen cu va zal hlah. Nupi ngei lo na si ahcun, va kawl theng hlah. 28 Asinain nupi nan ṭhit ahcun nan sual tinak a si lo, va nan ngeih ahcun nan sual tinak a si lo, ka duhmi cu cu bantuk mi hna nih nifate in a chuak lengmangmi harnak an ton laimi hi luat hna seh ti tu hi a si. 29 Ka u le ka nau hna, ka chim duhmi cu hihi a si: caan hi tampi a tang ti lo i cucaah cun atu ri hin cun nupi ngeimi nih a ngei lo bantukin um hna seh; 30 a ṭapmi cu ngaihchia lomi bantukin um hna seh; a nimi cu lunglawm lomi bantukin um hna seh; thil a cawmi nih an cawkmi kha kan ta a si lo ti bantukin um hna seh law 31 vawleicung thil a tawngthammi hna nih khan vawleicung thil hi tlamtling in kan tawngtham manh hna lai lo ti bantukin um hna seh. Zeicahtiah vawlei hi atu bang hin cun saupi a um ti lai lo. 32 Nan lungrethei hlah u ti kan duh hna. Nupi ngei lo pa cu Bawipa duhnak tuah kha aa zuam caah Bawipa rian ah khan lungrethei tein a ṭuan, 33 sihmanhsehlaw nupi ngeimipa cu a nupi duhnak kha tuah aa zuam caah vawleicung thilri kha a lungre aa theihpi hna i 34 cucaah cun kap hnih in hnuh a si. Va a ngei lomi an si ah, ngaknu thiang an si ah, pum he thlarau he Bawipa sinah khan i pek an duh caah Bawipa rian cu lungthin tak tein an ṭuan; sihmanhsehlaw va a ngeimi nu cu a va duhnak kha tuah a duh caah vawlei cung thilri ah khan a lung a um. 35 Hi ti bia ka chim hi bawmh kan duh hna caah a si, tuah hlah u timi nan cung i khin ka duh ruangah a si lo. Ahmaanmi le a ṭhami kha tuah u law Bawipa rian ah hin nan lungthin a dihumnak in i pe u, ti kan duh hna. 36 Aa hammi kan i ṭhi ṭhan lai lo a timi hna cu hitihin um hna seh: pa nih khan ngaknu cungah khan dawhcah in ka um deuh lo tiah a ruah i a duhnak kha a ṭhawn i kan i umh awk a si ko tiah a ruah ahcun, a duhning cun i um ko hna seh. Cu ah cun sualnak zeihmanh a um lo. 37 Asinain cuticun na tuah hrimhrim lai tiah hnek si loin pa nih nupi ka ṭhi hrimhrim lai lo tiah a lung aa thleh i a duhnak kha a tei khawh i cuticun khatikhan ka tuah awk a si tiah a lung in aa ruah ahcun — ngaknu cu a ṭhit lo ah a ṭha ko. 38 Cucaah cun a hammi a ngaknu a ṭhimi nih thil ṭha a tuah ko, asinain a hammi a ngaknu a ṭhi lomi nih khan thil ṭha chinchin a tuah. 39 Minu cu a va a nun chungah cun a luat lo, sihmanhsehlaw a va a thih ahcun a duhmi pa he i ṭhit awk kha a luat, amah belte an i ṭhitnak cu Khrihfa ṭhitumnak a si awk a si. 40 Asinain a umning in a um ko ahcun aa lawm deuh lai. Cucu ka ruahnak a si i kei zong Pathian Thlarau ka ngei tiah kaa ruat ko.
1 Bawlnak sa kong ah hitihin ka ruah: "Kan hngalh cio ko," an ti bang khan hngalhnak kan ngei cio taktak ko. Sihmanhsehlaw cu bantuk hngalhnak nih cun mi kha an lung a puamter tawn hna; dawtnak bel nih a sersiam hna. 2 Zeizong ka hngal ve ko, tiin aa ruatmipa nih hin a hngalh awk tlukin a hngal tawn lo. 3 Sihmanhsehlaw Pathian a dawmipa kha Pathian nih a hngalh. 4 Cucaah bawlnak sa ei kong ah cun hitihin ka ruah: siasal cu pakpalawng men an si ko, pathian an si lo, Pathian cu pakhat lawnglawng a si ti kha kan hngalh. 5 Vancung ah siseh vawleicung ah siseh pathian timi cu a um zong an um ko lai, cun pathian timi hna hi le bawipa timi hna hi tampi zong an si ko lai, 6 sihmanhsehlaw kannih caah cun Pathian cu pakhat lawnglawng a um i amah cu kan Pa, zeizong vialte Sertu kha a si i kannih hi amah ca i a nungmi kan si; cun Bawipa cu pakhat lawnglawng a um i cucu Jesuh Khrih kha a si i amah thawng cun zeizong vialte kha ser an si i amah thawng cun kannih zong hi kan nung. 7 Sihmanhsehlaw mi kip nih hi biatak hi hngalh a si lo. Mi a cheu cu siasal he an rak i ciahnak kha a sau tuk cang caah nihin ni tiang hrimhrim hin bawlnak sa an ei tikah cu sa cu siasal ta a si tiin an ruah; an chiaṭha thleidannak kha a der i sa nih cun a kan thurter tiin an ruah. 8 Rawl nih cun Pathian he kan i pehtlaihnak cu a ṭhatter deuh hlei lai lo; kan ei lo ah zeihmanh kan sung hlei lai lo, kan ei zongah zeihmanh kan miak hlei lai lo. 9 Asinain ralring te tu in um u law nan luatnak kha zumhnak a dermi sualnak chung i a tlaktertu siter sual hlah u. 10 A biana ah, mipa pakhat, a chiaṭha thleidannak a dermipa nih, siasal biaknak inn i nannih "hngalhnak a ngeimi hna" rawl nan ei cu an hmuh hna; cu nih cun bawlnak sa cu ei awk a si ko tiah a forh lai lo maw? 11 Cucaah hi miderthawmpa, Khrih nih a thihhnawh vemi nan unaupa hi, nanmah "hngalhnak" ruangah cun a rawk lai! 12 Cuticun nan unau hna cung i sualnak nan tuahnak thawng le a derthawmmi an chiaṭha thleidannak nan hliam hna ruangah cun Khrih cungah sualnak nan tuah a si. 13 Cucaah rawl nih ka unau kha a sualter nakcha cun sa zeihmanh ka ei ti lai lo, ka unaupa ca i tluknak a chuahtertu si cu ka duh lo.
1 Kei cu ka luat lo dahra? Lamkaltu ka si lo dahra? Kan Bawipa Jesuh cu ka hmu lo dahra? 2 Midang nih cun lamkaltu ah ka rel hmanh hna hlah seh law nannih nih cun nan ka rel awk a si, zeicahtiah Bawipa chung i nunnak nan hmuhmi thawng hin lamkaltu ka si cu fiang tein a langhtertu nan si. 3 Mi nih an ka soi tikah keimah kong kaa chimning cu hitihin a si: 4 Ka rianṭuanmi caah hin ti le rawl ka hmuh ve awk a si lo maw? 5 Lamkaltu dang hna le kan Bawipa naule hna le Peter nih, khualtlawnnak ah an nupile kha an i ṭhit hna bantukin kei zong nih Khrihfa nupi kaa tlawnpi ve awk a si lo maw? 6 Barnabas le keimah lawng hi maw mah nunnak caah mahte in rian aa ṭuanpah ding cu kan si? 7 Ralkap aho nih dah ralkap chung i an um lioah anmah tein an paw an i cawm bal? Lothlopa ahodah a lo chungin a chuakmi mitsur thei ei loin a um bal? Tuukhal ahodah a tuurun chungin a hmuhmi tuu hnuk ding loin a um bal? 8 Hi bantukin mi nih ni fate an ton lengmangmi thil chungin ka lakmi tahchunhnak hi aa bochan tiah ka ruat hlah u. 9 Nawlbia zong nih cu ti ṭhiamṭhiam cun a chim ko. Zeitindah a ti tiah, "Facang a cilmi cawtum cu a hmur va ṭem hlah," a ti. Pathian nih a tihnawh duhchanmi cu cawtum cu maw a si hnga tiah nan ruah? 10 Asiloah a ti duh taktakmi cu kanmah dah kan si hnga? Chim hau loin, kanmah hi kan si ko. Lei a thuangtu nih siseh, rawl a ṭuantu nih siseh, kan co awk a um ve lai ti ruahchan in an ṭuan. 11 Nan lakah thlarau thlaici kha kan tuh, nan sinin vawlei cung thil kan zun ahcun cucu a tam tuk maw? 12 Midang nih nan sinin cu bantuk hmuh awk kha an i ruahchan ahcun, kannih nih cun kan i ruahchan chinchin awk a si hnga lo maw? Sihmanhsehlaw kannih nih cun, cuticun kan in ti duh hna lo. Khrih kong thawngṭha hi, zeilo nih maw dawn sual lai tiin zeizong vialte kha a in tu in kan in. 13 Biakinn chung i rian a ṭuanmi hna nih Biakinn in an rawl kha an hmuh ti le biakṭheng cung i raithawinak a pechanmi hna nih raithawinak sa kha an co ve ti cu nan hngalh. 14 Cu bantuk ṭhiamṭhiam in thawngṭha a chimtu hna nih thawngṭha chim in an paw an i cawm awk a si ti cu Bawipa cawnpiakning a si. 15 Sihmanhsehlaw hi bantuk thil hi pakhat hmanh nan cungah ka hmang lo, hi ca kan kuat hna zong hi cu bantuk ka duh caah a si lo. A thih hmanh ka thi deuh hnga! Kaa porhlawt lenmi hi ahohmanh pakpalawng ah serter ka duh hna lo. 16 Thawngṭha ka chim ruang menmen ah hin kaa porhlawt awk a si lo. A ngaite ti ahcun, va chim, tiah fial pei ka si cu. Thawngṭha cu chim loin rak um ning law zeitluk in dik ka caah a poi hnga! 17 Ka rian hi keimahte nih kaa thim i ka tuahmi a si ahcun, ṭuan man ka hmuh lai ti zong cu kaa ruahchan hnga, sihmanhsehlaw ka rian hrimhrim a si tiin ka ṭuan hi Pathian nih hi rian hi ka kut chungah a ka pek caah a si. 18 A si ahcun ṭuan man zeidah ka hmuh? Ka hmuhmi cu, thawngṭha ka chimnak ka rian ah hin, cucu ka hmuh awk, khakha ka hmuh awk ti loin, alak tein ka chim i cu ka chimnak thawngin lungriamhnak ka hmuhmi hi a si. 19 Kei cu miluat ka si, aho sal hmanh ka si lo, asinain mi tam deuh ka lak khawh hna nakhnga ti in mi kip sal ah kaa ser. 20 Judah mi lak i ka ṭuan tikah Judah mi cu ka lak khawh hna nakhnga Judah mi bantukin ka um; cun Moses Nawlbia tang i a ummi hna sin ka ṭuan tikah, anmah cu ka lak khawh hna nakhnga, Nawlbia tangah cun ka um lo nain a um bantukin ka um. 21 Cu bantuk ṭhiamṭhiam in Judah mi hna phung leng i a ummi Jentail mi hna sin i ka ṭuan tikah Jentail mi cu ka lak khawh hna nakhnga Jentail mi bantukin ka um. Cuti ti tikah Pathian nawlbia kha ka zul lo tinak a si lo, a ngaingai ti ahcun Khrih nawlbia tangah pei ka um cu. 22 Zumhnak lei i a dermi hna sinah, anmah cu ka lak khawh hna nakhnga anmah bantuk i a dermi ah kaa cang. Cucaah zeimaw ti tal in ka khamh kho hna hnga maw tiin mi kip sinah an sining paoh in ka um ve. 23 Hi vialte hi tiin ka tuah cu thawngṭha ruangah khan a si, cu thawngṭha cu mi vialte ka hrawm khawh hna nakhnga ka duh caah a si. 24 Tlik zuamnak ah an dihlak in tlik cu an i zuam nain laksawng a hmumi cu pakhat lawng a si ti kha nan hngalh. Cucaah laksawng hmu ding tein tli u. 25 Zuamnak ah tel a duh vemi nih cun timhtuahnak ah khan fel tein an um tawn. Cuti i an um cu a uai khomi pangpar lukhimh hmuh awk caah khan a si; asinain kannih tu cu zeitikhmanh i a uai lomi pangpar lukhimh hmuh awk caah khan a si. 26 Kei cu ka tlik tikah tinhmi kawl fiang tein ka ngei; kaa thongh tikah a ping a pang a thongmi bantuk ka si lo. 27 Zuamnak hmun ah rak i zuam u tiah midang kha sawm lengmang ṭung in a sawmtu keimah kha hlawtmi si sual lai ing ti phang in ka pum cu ka hrem i fek tein ka uk.
1 Ka u le ka nau hna, Moses a zulmi kan pupa hna cung i a tlungmi thil kha philh hlah u ti kan duh hna. Annih cu an dihlak in minmei nih khan a runven hna i Rili Sen kha him tein an tan. 2 Annih nih Moses zultu si awkah minmei chung le rili chungah khan tipilnak an in. 3 An dihlak in thlarau changreu kha an ei i 4 an dihlak in thlarau ti kha an din. An sin i a kal lengmangmi thlarau lungpi chung khan ti cu an din i cu lungpi cu Khrih kha a si. 5 Asinain a tam deuh nih cun Pathian kha an lawmhter lo i an ruak cu thetse ram hmun kip ah khan aa ṭhek dih. 6 Hi hna vialte hi kan i zohchunh awk caah an si, thil ṭhalo an rak duh bantukin duh ve lo awkah ralrin a kan petu le 7 an lak i a cheu nih siasal an rak biak bangin biak ve lo awkah ralrin a kan petu ding an si. Cathiang nih a ti bantukin, "Cu mi hna cu ei awk le din awkah an ṭhu i laam awkah an tho." 8 An lak i a cheu nih an rak tuah bang khan nu le pa sualnak kha kan tuah awk a si lo, cu ruangah cun ni khat ah thong kul le thong thum an rak thi. 9 A cheu nih Bawipa an rak hneksak bantuk khan kan hneksak ve awk a si lo, cu ti an tuah caah khan rul nih a rak cuk hna. 10 A cheu an rak phunzai bantuk khan nan phunzai awk a si lo, cu ti an tuah caah cun Thihnak Vancungmi nih a rak thah hna. 11 Hi vialte an cung i a tlungmi hi midang nih i zohchunh awk caah a si i kan i ralrinnak ding caah ṭial an si. Zeicahtiah kannih kan caan hi donghnak a phak dengmangnak caan a si. 12 Ka dir kho ko tiah aa ruatmi cu a tluk sualnak hnga lo i ralring seh. 13 Tukforhnak nan cung i a tlungmi hi midang zong nih an in cio tawnmi an si ko. Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak thazang an pek hna lai i chuah khawhnak lam zong an serpiak hna lai. 14 Cucaah ka dawtmi ka hawile hna, siasal kha bia hna hlah u. 15 Ruahnak a ngeimi sin biachim bantukin nan sinah ka chim; ka chimmi cu nanmah nih ṭha tein ruat ko u. 16 Thluachuahnak hrai ca i Pathian kan lawmh tikah, hi hrai kan din tikah hin Khrih thi kha kan i hrawm a si lo maw? Cun changreu kan ei ṭimi hi tah: hi changreu kan ei ah hin Khrih pum kan i hrawm a si lo maw? 17 Changreu kan i phawtmi cu hlum khat a si bantukin kannih cu kan tampi nain pum khat kan si; zeicahtiah kan dihlak in cu changreu hlum khat cu kan i hrawm. 18 Hebru mi kha ruat hna hmanh u, raithawinak ah pekchanhmi sa a eimi paoh cu Pathian biakṭheng rianṭuannak ah khan an i tel ve. 19 Ka chim duhmi cu zeidah a si? Siasal a si ah, an pekchanhmi rawl a si ah, zei an si tinak a si maw? 20 Si hlah! Ka chim duhmi cu hihi a si: Lawkihmi nih an biakṭheng cungah an i bawlnak sa cu khuachia dohdanghnak sa an si i Pathian pekchanhmi an si lo. Khuachia he hawikom si cu kan duh hna lo. 21 Bawipa hrai le khuachia hrai cu nan din kep kho hna lai lo; Bawipa cabuai le khuachia cabuai zong nan hman kep kho hna lai lo. 22 Bawipa cu a nahchuak seh ti maw kan duh? Amah nakin kan ṭhawng deuh tiah maw kan i ruah? 23 "Zeipaoh kan tuah khawh ko," an ti. Asi, an tuah khawh ko, sihmanhsehlaw zeipaoh hi an ṭha dih lo. "Zeipaoh kan tuah khawh ko," asinain zeipaoh hi kan caah an ṭhahnem dih lo. 24 Ahohmanh nih kanmah ca ṭha ding lawng kha kan zoh awk a si lo, midang ca ṭha ding tu kha kan zoh awk deuh a si. 25 Sa zuarnak i an zuarmi cu zeipaoh va ei ko, na chiaṭha thleidannak ruangah bia bel zeihmanh va hal hna hlah. 26 Zeicahtiah Cathiang zong nih pei, "Vawlei le a cung i a ummi thil vialte cu Bawipa ta an si," a ti cu. 27 Pathian a zum lomi nih rawlhrawn an in sawm ahcun an in hunhmi paoh kha va ei ko, na chiaṭha thleidannak ruangah zeihmanh bia va hal hna hlah. 28 Sihmanhsehlaw pakhatkhat nih, "Hi rawl hi siasal dohdanghnak rawl a si," tiah an chimh ahcun, an chimtupa ruangah le chiaṭha thleidannak ruangah, cu rawl cu va ei hlah. 29 Cu chiaṭha thleidannak ka timi cu, nangmah lungthin kha si loin an kotupa lungthin kha ka ti duhnak a si. Mi a cheu nih nan i thawh i, "Zeicahdah midang chiaṭha thleidannak nih cun ka luatnak cu a ka dawnhkhanh lai? 30 Ka eimi ka rawl ca i Pathian cu ka thangṭhat ahcun zeicahdah thla ka cam nenhmi rawl kongah cun mi nih an ka soi khawh lai?" nan ti. 31 A si ko, sihmanhsehlaw zei nan tuah hmanh ah, nan ei ah siseh, nan din ah siseh, nan tuahmi cu a dihlak in Pathian thangṭhatnak caah siter ko u. 32 Judah mi si hna seh, Jentail mi si hna seh, Pathian Khrihfabu si hna seh, ahohmanh harnak nan pek hna nakhnga lo, cuticun nan nuncanning cu siter ko u. 33 Ka tuahningte khan tuah ve u; ka tuahmi thil paohpaoh ah hin midang lawmhtertu si kha kaa zuam tawn; keimah ca ṭhatnak ding kha ruat loin mi vialte ṭhatnak ding tu kha ka ruat deuh; cu ti ka ruah cu khamhnak an hmuh khawh nakhnga caah a si.
1 Cucaah cun kei zong nih Khrih nawl ka cawn bantukin nannih zong nih ka nawl kha i cawn ve u. 2 Keimah kha philh lo tein nan ka um i kan pek chinmi hna cawnpiaknak kha nan zulh caah kan thangṭhat hna. 3 Sihmanhsehlaw hngalhter kan duhmi hna cu Pathian cu Khrih lu a si bantukin pa cu nu lu a si i Khrih cu mi vialte lu a si. 4 Cucaah zapi hmai i thlacam tik le biachim tik i a lu aa khuhmi pa nih cun Khrih cungah khan ningzahnak a tlunter a si i 5 nu an si ahcun thlacam tik le biachim tik i a lu aa khuh lomi nih cun a va cungah ningzahnak a tlunter a si ve; cu nu cu a lu aa kolhmi nu he khan zeihmanh an i dang lo. 6 Nu nih a lu aa khuh lo ahcun i met lawlaw ko seh. Lukongh le lumeh cu nu caah cun ningzah awk a si caah a lu kha i khuh ko seh. 7 Pa cu a lu i khuh a herh lo, zeicahtiah pa cu Pathian mui a kengmi a si i Pathian sunparnak thlalang a si. Nu tu cu pa sunparnak thlalang men a si. 8 Zeicahtiah pa cu, nu chungin ser a si lo, nu tu kha pa chungin sermi cu a si. 9 Cun pa cu, nu caah ser a si fawn lo, nu tu kha pa ca i sermi cu a si. 10 Vancungmi hna ruangah nu nih a lu cu aa khuh awk a si i cuticun a va tang i a ummi a si kha a langhter awk a si. 11 Bawipa chung i kan nunning tu ah hin cun, nu hi pa caah a herh bantukin pa zong nu caah a herh ve. 12 Nu cu pa chungin ser a si bantukin pa zong cu nu chungin a chuakmi a si ve; zeizong vialte hram cu Pathian a si. 13 Cucaah nanmah nih a ṭha ṭhalo khiak ko u: nu nih zapi hmai i lu khuh loin Pathian sin i thlacam cu a ṭha nan ti maw ti lo dik. 14 Thil umtuning ah hin, sam sau cu pa caah cun ningzak a si, 15 sihmanhsehlaw nu caah cun i chawr awk thil a si. A sam sau cu i khuhnak ding ca i pekmi pei a si cu. 16 Asinain hi kong ah al a ka duhmi nan um ahcun, chim ka duhmi cu hihi a si ko: kanmah nih siseh, Pathian khrihfabu dang nih si hna seh, phung dang hlei kan ngei lo. 17 Hi ti kan chimhmi hna lakah hin kan thangṭhat khawh hna lonak pakhat a um: nan i pumhnak nih hin ṭhatnak nakin chiatnak a chuahter deuh. 18 A hmasa bik ah, nan i pumhnak ah a bubu in nan i ṭhen ti ka theih i cucu ahmaan pah ṭheo lai tiah ka zumh. 19 (Aho hi dah ahmaan ti hngalhnak caah a si ahcun, i ṭhen zong cu a ṭha ve sawk.) 20 Hmunkhat i nan i pumh ah khan Bawipa Zanriah ei awk i nan i pumh a si ṭung lo. 21 Zeicahtiah nanmahle nan rawl cio pei nan ei i a cheu cu rawlṭam in nan um i a cheu cu nan rit ko kha. 22 Einak ding le dinnak ding caah mahle inn nan ngei cio lo maw? Asiloah, cuti nan um cu Pathian khrihfabu kha nautat nan duh ca le a herh a baumi nan unau pawl kha ningzahter nan duh hna caah a si maw? Hi kong ah hin zeitindah bia a chim lai tiah nan ka ruah? Hi kongah hin kan thangṭhat kho hna hnga maw? Thangṭhat kho hlah. 23 Zeicahtiah kan pek chinmi hna cawnpiaknak hi Bawipa sinin ka hmuhmi a si: kan Bawipa Jesuh cu an rawi zan ah khan chang kha aa lak i 24 Pathian sinah thla a cam hnuah a cheu i, "Hihi ka pum a si, nanmah caah a si. Keimah philh lonak ah tuah u," a ti. 25 Cu bantuk ṭhiamṭhiam in zanriah ei dih in hrai kha aa lak i, "Hi hrai hi Pathian biakamnak thar, ka thi in ka fehtermi a si. Hi hrai nan din fate keimah philh lonak caah ding u," a ti. 26 Cucaah hi chang nan ei i hi hrai nan din fate, Bawipa a rat hlantiang a thihnak kong kha nan chim a si. 27 Cu bantuk ve in Bawipa thangchiatnak dingin a chang cu nan ei i a hrai cu nan din ahcun, cu bantukin a tuahmi paoh cu Bawipa pum le thi cung i sualnak a tuahmi nan si. 28 Cucaah ahohmanh nih amah le amah kha a lungthin i dap cikcek seh law cu hnuah chang cu ei seh law hrai cun ding seh. 29 Zeicahtiah chang kha a ei i hrai in a din tikah Bawipa pum sullam kha a hngalh lo ahcun a ei a din ah khan biaceihnak aa ei aa din chih. 30 Cucaah cun pei mi tampi nan zawt nan fah i a thih zong tlawmpal cu nan thihphah kha a si cu. 31 Kanmah le kanmah kha ṭha tein kan i dah hmasa ahcun Pathian biaceihnak kha kan huat lai lo. 32 Sihmanhsehlaw Bawipa nih bia a kan ceih i dan a kan tat cu vawlei sinah sualphawt chih kan si nakhnga lo caah a si. 33 Cucaah ka u le ka nau hna, Bawipa Zanriah ei awk i nan i pumh tikah pakhat le pakhat i hngak u. 34 Cun nan rawl a ṭam ahcun inn ah i ei ta u, cuticun nan i pumh tikah Pathian biaceihnak nan huat lai lo. Cun thil dang tu cu ka rat tikah kan remhchun te lai.
1 Thiang Thlarau sinin kan hmuhmi laksawng kong ah hngalhter kan duhmi hna a um. 2 Nannih cu lawkihmi nan si lioah khan nunnak a ngei lomi siasal nih a rak in uk hna kha nan hngalh i cu siasal nih cun a ping ah an hruai zungzal hna. 3 Cucaah cun Pathian Thlarau i a hruaimi hna nih cun, "Jesuh cu chiat ko seh," an ti kho bal lo i, Thiang Thlarau i a hruai hna dah ti lo ahcun, "Jesuh cu Bawipa a si," an ti kho bal pek lo. 4 Thlarau laksawng hi a phunphun in a um, sihmanhsehlaw cu laksawng vialte a petu hna cu Thlarau ṭhiamṭhiam kha a si. 5 Rian ṭuan hi a ning tampi a um, sihmanhsehlaw a rian kan ṭuanmi cu Bawipa ṭhiamṭhiam kha a si ko. 6 Rian ṭuan khawhnak hi a phunphun in a um, sihmanhsehlaw cu bantuk ṭuan khawhnak a petu hna cu Pathian ṭhiamṭhiam kha a si ko. 7 Thlarau kan chung i a um kha phun khatkhat in a lang cio i cucu kan dihlak ca i ṭhatnak ding caah khan a si. 8 Thlarau nih cun pakhat cu fimnak bia chim thiamnak a pek i pakhat cu hngalhnak biathuk fiang lak in chim thiamnak a pek. 9 Cu Thlarau ṭhiamṭhiam nih cun pakhat cu zumhnak a pek i pakhat cu damter khawhnak ṭhawnnak a pek. 10 Pakhat cu khuaruahhar tuah khawhnak a pek; cun pakhat cu Pathian bia chim thiamnak a pek i pakhat cu Thlarau sinin a rami laksawng a si maw si lo ti thleidan khawhnak a pek. Cun pakhat cu holhtheihlo in holh khawhnak kha a pek i pakhat cu cu holhtheihlo in chimmi leh khawhnak a pek. 11 Hi thil vialte a tuahtu hi Thlarau pakhat a si, a duhning bantukin mi kha laksawng phun dangdang cio a pek hna. 12 Khrih hi nge tampi a ngeimi pum bantuk a si; nge cu tampi an si ko nain pum cu pakhat a si ko. 13 Cu bantukin kannih vialte zong hi, Judah mi kan si ah, Jentail mi kan si ah, sal kan si ah, miluat kan si ah, kan dihlak in pum pakhat chungah khan Thlarau pakhat nih tipil a kan pek i kan dihlak in Thlarau pakhat kha din awkah pek kan si. 14 Pum hi nge pakhat lawng a ngei lo, nge tampi a ngei. 15 Ke nih i thawh seh law, "Kei cu kut ka si lo caah pum chungah kaa tel lo," ti seh law, cu nih cun pum nge a si cu a ngolter hnga maw? Ngolter hlah. 16 Hna nih, "Kei cu mit ka si lo caah pum chungah kaa tel lo," ti seh law, cu nih cun pum nge a si cu a ngolter hnga maw? Ngolter hlah. 17 Pum hi a dihlak in mit va si tuah seh law, zeitindah khua a theih khawh lai? Hna va si dih seh law, zeitindah rim a theih khawh lai? 18 Sihmanhsehlaw atu i a sining bantukte hin, Pathian nih amah duhning tein, anmahle an um nakhnga ding cio ah khan a chiah hna. 19 Pum hi nge pakhat lawng si seh law pum a tling hnga lo, 20 sihmanhsehlaw a sining bantukte hin nge tampi an um i pum cu pakhat a si. 21 Cucaah mit nih khan kut cu, "Nang cu kan herh lo," a ti kho lo. Cun lu zong nih ke kha, "Kan herh lo," a ti kho ve lo. 22 A ngaingai ti ahcun, kan pum chung i a santlai deuh lo kan timi hna tel loin kan si khawh ṭung lo; 23 hmaizah awk tlak i kan ruah set lomi hna pei ṭha khun in kan hmaizah hna i 24 aa dawh set lomi kha pei ṭha khun in kan thuamh hna cu. Kan pum aa dawhnak zawn nih cun ṭamh zong cu an herh ṭung lo. Pum cung i hmaizahnak kan baunak zawn nih khan hmaizahnak a hmuh khun nakhnga Pathian nih cuticun a tuah. 25 Cucaah pum chungah cun i ṭhennak a um lo, a nge dangdang hna nih khan pakhat le pakhat zawn i ruahnak an ngei cio. 26 Pum chung nge pakhatkhat nih fahnak a in ahcun a dang nge vialte zong nih khan an rak inpi ve; cun pakhatkhat nih khan thangṭhatnak a hmuh ahcun a dang vialte zong nih khan aa lawmhnak cu an rak i hrawm ve. 27 Cucaah nannih cu nan dihlak in Khrih pum kha nan si i pumpak cio ah a nge kha nan si. 28 Cu bantukin khrihfabu chungah hin Pathian nih mi cu an um nakhnga ding cio ah khan a chiah hna: a hmasa bik ah lamkaltu pawl, a pahnihnak ah profet pawl, a pathumnak ah cawnpiaktu pawl, cun cu hna a hun zultu ah khuaruahhar a tuahtu pawl, cun cu hna a hun changtu ah damter khawhnak pek a simi pawl, asiloah mi bawmh khawhnak pek a simi pawl, asiloah mi hruai khawhnak pek a simi pawl, asiloah holhtheihlo in holh khawhnak pek a simi pawl, 29 An dihlak in lamkaltu lawnglawng an si dih lo, profet lawnglawng an si dih lo, cawnpiaktu lawnglawng an si dih lo. An dihlak in khuaruahhar tuah khawhnak kha an ngei dih lo, 30 an dihlak in zawtnak damter khawhnak kha an ngei dih lo, an dihlak in holhtheihlo in holh khawhnak kha an ngei dih lo, an dihlak in holhtheihlo in chimmi leh khawhnak kha an ngei dih lo. 31 Cucaah laksawng biapi deuh a simi hna tu kha nan i tinh awk a si. Cun cu hna lak hmanh ah a ṭha bik cu atu i ka hun chim dingmi hi a si:
1 Minung holh a phunphun in ka hei holh kho ko hnga i vanmi holh hmanh ka hei thiam ko hnga, sihmanhsehlaw dawtnak ka ngeih lo ahcun ka holh cu darkhuang hnachet thawng le sumsel tum thawng bantuk men a si ko. 2 Phungchim thiamnak laksawng ka hei ngei ko hnga i hngalhnak phun tling ka hei ngei ko hnga i biathuk vialte ka hei hngalh dih ko hna hnga; cun tlang ṭhial khawhnak zumhnak zong ka hei ngei ko hnga, sihmanhsehlaw dawtnak ka ngeih lo ahcun zeihmanh ka si lo. 3 Ka ngeihmi thil vialte, mi ka hei ṭhenh dih ko hna hnga, cun ka pum hmanh khangh awkah ka vaa pe ko hnga, sihmanhsehlaw dawtnak ka ngeih lo ahcun ka caah ṭhathnemnak zeihmanh a um lo. 4 Dawtnak cu thlachiat a ruat i mi cungah zaangfahnak a ngei. Dawtnak cu a nah a chuak lo, a lung a puam lo i aa porhlaw lo. 5 Dawtnak cu tlabulbal in khua a sa lo i amah zawn lawng aa ruat lo; a thin a tawi lo, palhnak kha aa cinken peng lo. 6 Dawtnak cu midang sualnak cungah khan diriam in a um lo, biatak tu ah khan aa lawm. 7 Dawtnak cu a lung a dong bal lo, zumhnak a ngei, ruahchannak a ngei, a lung a sau i a thin a fual. 8 Dawtnak cu dongh a thiam lo. Profet biachimnak cu um hmanh seh law cucu a dih lai. Holhtheihlo a um maw? Cucu a dong lai. Hngalhnak kan ngeihmi zong a dih lai. 9 Zeicahtiah kan ngeihmi hngalhnak cu siseh, midang chimh thiamnak kan ngeihmi zong cu siseh, a cheuchum lawnglawng an si i 10 a cheuchum lawnglawng a simi cu a tlingmi a phak tikah cun an loh phung a si ko. 11 Ngakchia ka rak si lioah ka biachim le ka thil hmuhning le ka ruahnak cu an rak ngakchia ngai. Atu cu upa ka hung si cang i ngakchia ruahning in thil ruah kha cu ka duh ti lo. 12 Atu i kan hmuhmi hi cu, thlalang fiang lo chung i kan mui maw chialchual in kan hmuhmi bantuk khi a si, sihmanhsehlaw cu tikah cun hmaitonh tein kan hmuh lai. Atu i ka hngalhmi hi cu a cheuchum lawnglawng a si, sihmanhsehlaw cu tikah cun Pathian nih a ka hngalhnak a tlin bantukin ka hngalhnak zong a tling ve lai. 13 A hmun zungzalmi thil pathum an um, cu hna cu zumhnak le ruahchannak le dawtnak an si, cu hna lak i a ngan bik cu dawtnak a si.
1 Cucaah dawtnak hi biapi bik ah chia u. Thlarau laksawng hmuh awk kha i zuam hna u law cu hna lakah cun Pathian bia chimnak laksawng kha hmuh i zuam khun u. 2 Holhtheihlo in a holhmi cu minung sinah si loin Pathian sinah bia a chim a si, zeicahtiah ahohmanh nih a chimmi kha a sullam an hngal lo. Thlarau nih khan cu ti bia chim khawhnak cu a pek cu a pek ko lai, sihmanhsehlaw a chimmi cu hngalh lomi thil a si. 3 Asinain Pathian bia a chimtu nih cun minung sin tu ah khan a chim i bawmhnak le lungṭhawnnak le hnangamnak kha a pek hna. 4 Holhtheihlo in a holhmipa cu amah le amah lawng kha aa bawm, sihmanhsehlaw Pathian bia a chimmi nih cun khrihfabu kha a ning piin a bawmh. 5 Nan dihlak in holhtheihlo i holh cu kan duhpiakmi hna zong a si ko hnga, sihmanhsehlaw kan duhpiak deuhmi hna cu Pathian bia chim khawhnak laksawng kha ngei u ti hi a si. Zeicahtiah Pathian bia a chimmi cu holhtheihlo in a holhmi nakcun a ṭhahnem deuh suaumau. Khrihfabu nih an ṭhathnempi khawh nakhnga caah a let khotu an um ṭung lo ahcun holh theih lo cu zeihmanh a ṭhahnem lo. 6 Cucaah ka u le ka nau hna, nan sin i ka rat tikah holhtheihlo cun bia in chim hna ning law nan caah ka ṭhathnemnak zeital a um hnga maw? Um hlah. Pathian nih a phuanmi bia siseh, hngalhnak bia siseh, biatak fianter khawhnak siseh, cawnpiaknak siseh, kan chimhmi hna chungah khan aa tel ṭung lo ahcun zeihmanh kan ṭhathnem hnanak a um lai lo. 7 Nunnak a ngei lomi aw dawh tumnak thilri hmanh nih khin fiang tein an aw cu an chuahter lo ahcun zei aw dah an tum ti kha hngalh khawh a si lo. Tingtang a si zongah, thonglawi a si zongah, cuticun an si ko. 8 Cun muko tumtu zong nih fiang tein a tum lo ahcun, ahodah raltuknak hmun ah cun a chuak lai? 9 Cu bantuk cun holhtheihlo in nan holhmi cu sullam fiang zeihmanh a ngeih lo ahcun aho nih dah nan chimmi cu an hngalh lai? Thlitu lak biachim bantuk men pei a si ko lai cu. 10 Vawlei cungah hin holh phun dangdang tampi an um ko i sullam ngei lomi pakhat hmanh an um lo. 11 Asinain a chimtupa nih a hmanmi holh kha ka hngalh lo ahcun amah cu ka caah holh theih lo mipa a si i kei zong a caah holh theih lo mipa ka si ve. 12 Thlarau laksawng hmuh a duh ngaingaimi nan si kha ka hngalh, cucaah zeidang zeidang nakin khrihfabupi a ṭhanchotertu ding laksawng kha duh khun u tiah kan duh hna. 13 Holhtheihlo in a holhmi nih khan a chimmi cu leh khawhnak a ngeihnak hnga thlacam seh. 14 Cu bantuk holh cu ka thlacamnak i ka hman ahcun ka thlarau nih cun thla cu a cam taktak ko, sihmanhsehlaw ka lungthin cu, cu thlacamnak ah cun aa tel lo. 15 Cucaah zeitindah ka tuah awk a si lai? Ka thlarau in thla ka cam lai i ka lungthin zongin ka cam fawn lai; ka thlarau in hla ka sa lai i ka lungthin zongin ka sak fawn lai. 16 Pathian sinah thlarau lawngin lawmhnak bia cu na chim ahcun, zeitindah pumhnak i a um vemi mi sawhsawh hna nih khan lawmhnak bia na chimnak ah cun Amen an rak in tipi khawh lai? Na chimmi cu a sullam zeihmanh an hngalh ṭung lo. 17 Cucaah Pathian sin i lawmhnak in thla na cam cu a ṭha ko lai nain midang cu zeihmanh a ṭhathnem hna lo cu ta! 18 Nanmah nakin holhtheihlo in tampi ka holh deuh caah Pathian cu ka lawmh ko. 19 Sihmanhsehlaw pumhnak ah cun midang cawnpiaknak ding caah, holhtheihlo in bia thong hra chim nakin theihmi holh in bia fang nga ka chim deuh lai. 20 Ka u le ka nau hna, khua nan ruahning ah hin ngakchia bantuk si hlah u; ṭhat lonak kongah cun ngakchia bantuk si u, sihmanhsehlaw khuaruahning ah cun nutling patling si u. 21 Cathiang chungah, "Hi mi hna sinah hin holh phun dang in a holhmi hna kha hmang in bia ka chim lai i Ramdangmi hna hmur kha hmang in an sinah bia ka chim lai, Asinain cu hmanh ah cun ka bia an ngai lai lo, tiah Bawipa nih a ti," tiin aa ṭial. 22 Cucaah cun holhtheihlo in holh cu Pathian a zummi hna caah si loin a zum lomi hna ca i hmelchunhnak a si i Pathian bia holhtheih in chim cu a zum lomi hna caah si loin a zummi hna ca i hmelchunhnak a si. 23 Cucaah khrihfabu cu hei i pum u law, cu nan i pumhnak ah cun nan dihlak in holhtheihlo in hei holh u law — mi pakhatkhat maw, asiloah Pathian bia lomi maw rung lut seh law, mihrut an i ti hna hnga lo maw? 24 Asinain nan dihlak in Pathian bia tu nan chim ahcun, a zum lomi maw asiloah mi pakhatkhat maw a rung luh tikah a theihmi bia nih cun a lungthin kha a vun dahter lai i a sualnak kha a hngalhter lai. 25 A lungchung in a thli tein a ruahmi thil kha an hung lang lai i kun in Pathian kha a biak lai i, "Nan sinah hin Pathian a um taktak," a ti lai. 26 Cucaah ka u le ka nau hna, ka chim duhmi cu hihi a si: Pathian biak awk i nan i pumh tikah pakhat nih hla thawh awk nan ngei ko lai, pakhat nih cawnpiak awk nan ngei ko lai, pakhat nih Pathian nih a sinah a phuanmi bia chim awk nan ngei ko lai, pakhat nih holhtheihlo in phung chim ding nan ngei ko lai i pakhat nih cu holhtheihlo a sullam leh khawhnak cu nan ngei ko lai. Cu vialte cu a zeipaoh hmanh kha, khrihfabu ṭhathnemnak ding caah tuah si hna seh. 27 Holhtheihlo in holh a duhmi an um ahcun, a tam bik ah pahnih pathum tiang nih chim hna seh law a chaan in i chaang hna seh, cun a lettu an um hrimhrim lai. 28 Sihmanhsehlaw a let khotu ahohmanh an um lo ahcun holhtheihlo in a holhmipa cu pumhnak chungah cun dai tein um ko seh, amah le amah lawng kha i chawn ko seh law Pathian zong cu chawn ko seh. 29 Cun Pathian bia chim awk a ngeimi, pahnih pathum nih chim hna seh law a dang nih khan an chimmi cu a ṭhat ṭhat lo tuaktan hna seh. 30 Cun pumhnak i a ṭhu vemi pakhatkhat nih khan bia chim awk Pathian sinin a hmuhmi a um ahcun, a chim liomi nih khan a chimmi cu a ngol lai. 31 Nan dihlak in cawnpiaknak le thazang ṭhawnnak kha nan hmuh khawh nakhnga Pathian bia cu aa chaang lengmang in nan dihlak in nan chim cio ko lai. 32 Pathian bia chimnak caah Pathian nih an pekmi hna laksawng cu a chimtu nih khan a uk awk a si, 33 zeicahtiah Pathian nih a kan auh cu ningcang lo piin um awkah si loin daite le rem tein um awk tu ah a si. 34 Pathian mi aa pummi hna an i pumh tikah a si cio tawn bantukin, pumhnak ah cun nu cu dai tein um awk an si ko. Bia kha chimter awk an si lai lo. Judah mi Phung nih a ti bangin, pumh uktu an si lai lo. 35 Hngalh an duhmi thil a um ahcun inn ah an vale kha hal ko hna seh. Pumhnak i nu bia chim len cu ningzak a si. 36 Pathian bia cu nanmah in dahra a hram aa thawk? Cu bia nih a phakmi hna cu nanmah lawng dahra nan si? 37 Ahohmanh nih Pathian lamkaltu ka si tiin aa ruah ah siseh, thlarau laksawng ngeimi ka si tiin aa ruah ah siseh, a hngalh awk cu, nan sin i ka ṭialmi hi Bawipa nawlbia a si, ti kha a si. 38 Asinain hihi zei i a rel lo ahcun, amah zong kha zei ah rel ve hlah u. 39 A tawinak in, ka u le ka nau hna, Pathian bia chim kha duh u; holhtheihlo holh kha thlauh hna hlah u, 40 asinain zei paohpaoh kha dawhte le ningcang tein tuah hna u.
1 Atu cu ka u le ka nau hna, nannih kan chimhmi hna Thawngṭha kha hngalhter ṭhan kan duh hna; cucu nannih nih nan rak cohlan cangmi Thawngṭha, nan zumhnak nan bunhnak Thawngṭha kha a si i cu nih cun khamhnak kha an pek hna. 2 Thawngṭha cu kan chimh hna ning khan fek tein nan i tlaih ko lo maw? Nan i tlaih lo ahcun nan lungthlennak cu pakpalawng a si ko hnga. 3 Ka rak hmuhmi kha nannih kan pek chin hna i cucu a biapi ngaingaimi a si. Cucu zeidah a si tiah, Cathiang chungah a rak i ṭial bang khan Khrih cu kan sualnak caah a thi; 4 cun Cathiang chung ṭhiamṭhiam ah a ṭial rih bantukin, an vui i ni thumnak ni ah thawhter a si; 5 cun Peter sinah khan a lang i lamkaltu hleihnih an dihlak sinah khan a lang fawn, 6 cun a zultu za nga ringlo sinah khan voi khatte ah a lang i a cheu cu an thi cang nain a tam deuh cu an nung rih; 7 cun Jeim sinah khan a lang i lamkaltu dihlak sinah khan a lang. 8 A hmanung bik ah ka sinah a lang ve. Cu ti a langh cu hawi hrin kel ningin hrin si lo khi a lo, 9 zeicahtiah Pathian khrihfabu kha ka rak hrem hna i cucaah cun lamkaltu vialte hna lakah nauta bik ka si — a ngaingai ti ahcun lamkaltu ti awk hmanh ka tlak hrimhrim lo. 10 Sihmanhsehlaw Pathian vel thawngin atu i ka sining hi ka si, cun ka cung i vel a ka ngeihmi cu alak ka siter ve lo. Lamkaltu a dang hna nakkhan fak deuh in rian ka ṭuan, asinain a ngaingai ti ahcun keimah nih ka ṭuan ti awk a si lo, Pathian vel ka chung i rian a ṭuanmi ṭuannak tu kha a si deuh. 11 Keimah i kan chimh hna a si zongah, annih i an in chimh hna a si zongah zeihmanh a poi lo. Kan dihlak in kan chim ciomi cu hihi a si ko i nannih nih nan zumhmi cu hihi a si ko. 12 Kan chimmi cu Khrih cu thihnak in thawhter a si ti kha a si caah, zeitindah nannih a cheu nih, mithi cu nunnak ah thawhter an si lai lo, tiah nan ti khawh? 13 Cu nan chimmi cu ahmaan a si ahcun, Khrih kha thawhter a si lo, ti a si hnga; 14 cun Khrih cu thihnak in thawhter a si lo ahcun, kannih cu chim awk zeihmanh kan ngei hnga lo i nannih zong zumh awk zeihmanh nan ngei hnga lo. 15 Cuhleiah Pathian cu lih kan chimter a si hnga, zeicahtiah Pathian nih Khrih cu thihnak in a thawhter kan ti ṭung i mithi cu thihnak in an thawh ṭung lo ahcun, Khrih cu Pathian nih thihnak in a thawhter lo a si hnga. 16 Mithi cu thawhter an si lo ahcun Khrih zong cu thawhter a rak si lo a si hnga. 17 Cun Khrih cu thawhter a si lo ahcun, nan zumhnak cu hlennak men a si hnga i nan sualnak chung i nan tlau ko rih a si hnga. 18 Cuhleiah Khrih a zummi a thi cangmi zong kha an lotlau dih ti a si fawn hnga. 19 Khrih nih a kan pekmi ruahchannak hi atu kan nunchung ca lawng hi a si ahcun, mi vialte lakah zaangfah awk tlak bik cu kanmah hi kan si hnga. 20 Sihmanhsehlaw biatak cu hihi a si: Khrih cu thihnak in thawhter a si i cucu thihnak chung i aa hngilhmi hna zong kha thawhter an si ve lai tinak aamahkhan a si. 21 Thihnak cu mi pakhat thawngin a tlun bantukin thihnak in thawhṭhannak zong cu mi pakhat thawngin a tlung ve. 22 Adam he an i pehtlaihnak thawngin mi vialte cu an thih bantukin, Khrih he an i pehtlaihnak thawngin mi vialte cu nunnak ah thawhter an si lai. 23 Asinain a ningcang tein a si lai: a hmasa bik ah Khrih, cun a rat caan ah Khrih ta a simi. 24 Cu tikah donghnak cu a phan lai; Khrih nih khan thlarau lei uktu hna le nawl ngeitu hna le ṭhawnnak vialte kha a tei dih hna lai i Pennak cu Pa Pathian sinah khan a pek lai. 25 Pathian nih ral vialte cu a tei dih hna i a ke tangah a chiah hna hlantiang Khrih nih cun a uk hna lai. 26 Tei hmanung bik ding ral cu thihnak a si, 27 zeicahtiah Cathiang nih, "Pathian nih zeizong vialte cu a ke tangah a chiah dih hna," a ti. "Zeizong vialte" timi chungah hin Pathian cu aa tel lo ti kha a fiang, Pathian cu pei Khrih tang i zeizong vialte a chia dihtu cu a si cu. 28 Zeizong vialte cu Khrih uknak tang i chiah an si dih tikah Fapa zong nih cun zeizong vialte a tang i a chia dihtu Pathian tangah cun aa chia lai i Pathian nih cun zeizong vialte kha a uk dih cikcek hna lai. 29 A si ah mithi hna can i tipil pekmi hna kha tah, zeitin? Zei tuah khawh dah an i ruahchan? Annih nih an ti bantukin mithi cu nunnak ah thawhter an si ṭung lo ahcun, zeicahdah mithi hna can ah cun tipil cu pek an si kun? 30 Cun kannih zong tah, zeicahdah harnak hi kan in lengmang kun? 31 Ka u le ka nau hna, nifate in pei ka thih deng lengmang ko hi. Ka u le ka nau hna, nanmah cu kan Bawipa Khrih Jesuh chungah kaa porhlawtmi nan si caah hitihin bia ka chim hi a si. 32 Cun Efesa khua i "sahrang" he kan rak i sual kha minung ruahnak lawnglawng in rak si seh law zeital ka miakmi a um hnga maw? Mithi cu nunnak i thawhter an si lo tham ah cun, phungthlukbia bangin, "thaizing ah pei kan thih ko lai cu, ei in ding ko ngat u sih." 33 Ahohmanh i hlenter hna hlah u. "Hawi ṭhalo nih ziaza ṭha a hrawh," ti pei a si kha. 34 Nan lung i fim ṭhan u law nan sualnak kha ngol hna u. A cheu cu Pathian nan hngal lo, hi ti ka chim hi nan ningzak seh ti ka duh caah a si. 35 A cheu nih nan i thawh lai i, "Zeitindah mithi cu nunnak ah thawhter a si khawh lai? Zei bantuk pum dah a ngeih lai?" nan ti lai. 36 Mihrut. Vawlei i thlaici na tuh tikah a thih hmasa lo ahcun a keuh ṭung lo. 37 Cun changvut ci a si zongah, thlaici dang a si zongah, vawlei i na tuhmi cu a cite cu pei a si ko cu, pum tling a si cangmi kung, a ṭhang ding kha a si ṭung lo. 38 Pathian nih cu cite cu a duhmi pum kha a pek ko; thlaici kha anmahle an pum cio a pek ko hna. 39 Thilnung kip nih an ngeih ciomi titsa hi an i khat dih lo, minung nih titsa phun khat an ngeih, saram nih phun dang, va nih phun dang, nga nih phun dang, an ngeih. 40 Cun van pum an um i vawlei pum an um fawn; van pum hna nih dawhnak phun khat an ngei i vawlei pum hna nih dawhnak phun dang an ngei ve. 41 Ni nih amah dawhnak te a ngei i thlapa zong nih amah dawhnak te a ngei ve; cun arfi nih khin dawhnak dang tete an ngei i arfi lak hmanh ahcun dawhnak a phunphun an um. 42 Mithi cu nunnak i thawhter an si tikah cun hitihin a si lai: Pum cu vui a si tikah a thi khomi a si; thawhter a si tikah cun a thi kho ti lomi a si lai. 43 Vui a si tikah a mui a chiami le a dermi a si, thawhter a si tikah aa dawhmi le a ṭhawngmi a si lai. 44 Vui tikah vawlei pum a si, thawhter tikah thlarau pum a si lai. 45 Zeicahtiah Cathiang nih, "Mi hmasa bik Adam cu minung ah ser a si," a rak ti, sihmanhsehlaw Adam hmanung bik cu nunnak petu Thlarau a si. 46 A um hmasami cu thlarau pum kha si loin vawlei pum kha a si deuh, vawlei pum hnuah khan thlarau pum cu a ra. 47 Adam pakhatnak cu vawlei dip in sermi a si, Adam pahnihnak tu cu vancung in a rami a si. 48 Vawlei ta a simi cu vawlei in sermi bantuk cu an si i vancung in a rami bantuk cu vancung ta a simi cu an si. 49 Vawlei in sermi mui kha kan i hruk bantukin vancung in a ra Mi cu kan i hruk lai. 50 Ka u le ka nau hna, ka chim duhmi cu hihi a si: thi le sa nih cun Pathian Pennak cu a co kho lai lo, cun a thi khomi nih hin thih khawh lonak cu a co kho ve lai lo. 51 Biathli pakhat kan chimh hna hmanh lai: kan dihlak hin kan thi dih lai lo, sihmanhsehlaw chikkhatte ah kan i thleng dih lai, 52 muko hmanung bik tum caan ah cun mit ṭhep ah kan i thleng dih lai. Zeicahtiah cu muko cu a hung than tikah a thimi hna cu a thi kho ti lomi ah thawhter an si lai i kan dihlak in kan i thleng dih lai. 53 A rawk khomi hi a rawk kho lomi in thuamh a si lai i a thi khomi hi thih khawh lonak in thuamh a si lai. 54 Cun a rawk khomi nih a rawk kho lomi aa hruk i a thi khomi nih thih khawh lonak aa hruk tikah cun, Cathiang nih, "Thihnak cu hrawh a si cang, teinak cu a tling cang," a timi kha a tling lai. 55 "Thihnak, na mi teinak cu khuazei ah dah a um? Thihnak, mi fahnak na pek khawhnak hmual cu khuazei ah dah a um?" 56 Thihnak nih fahnak pek khawhnak hmual a ngeihmi cu sualnak in aa lakmi a si i sualnak nih a ṭhawnnak cu Nawlbia in aa lakmi a si. 57 Asinain kan Bawipa Jesuh Khrih thawngin teinak a kan petu Pathian cu thangṭhat si ko seh. 58 Cucaah ka u le ka nau hna, fek tein dir u law zeihmanh nih in ṭhial kho hna hlah seh. Bawipa rian teimak tein nan ṭuannak ah cun i manh lo ngaiin um zungzal ko u, Bawipa rian nan ṭuanmi cu alak a si bal lo ti kha nan hngalh.
1 Judea ram i a ummi Pathian mi hna bawmhnak ca i phaisa thawh awk timi kong ah khan, Galatia khrihfabu ka chimhmi hna kha rak tuah ve u. 2 Zarhpi ni fate in, nan hmuhmi a tlawm a tam ning cio khan phaisa nan rak thawh lai i nan rak khon lai, ka rat tikah phaisa khawlh herh ti lo dingin, 3 ka rat tikah nanmah hnatlami kha Jerusalem khua i nan laksawng cu hei phorh awkah ca he ka thlah hna lai. 4 Cun keimah kal zong a ṭha lai ti a si ahcun, keimah he cun hmunkhat ah kan kal hna lai. 5 Masidonia ram kha ka tanpah lai caah Masidonia ram ka tlawn dih cun nan sinah ka ra lai. 6 Sau nawn nan sinah ka cam kho hmanh maw, khuasik chung cu ka cam men lai, cu hnuah cun ka tlawnnak cu khuazei lei a si hmanh ah, ka tlawnnak ah cun nan ka bawmh te lai. 7 In palpah hna men cu kaa lungsi hnga lo. Bawipa nih a ka onh ahcun nan sin i sau nawnpi cam ka duh. 8 Asinain Efesa khua ah hin Pentekos ni tiang ka um lai. 9 A ka dohtu tampi an um nain hika ah hin rianṭuannak caan ṭha ngai a um. 10 Timote kha nanmah lei i a rat sual ahcun ṭha tein rak conglawmh u, amah cu keimah bantukin Bawipa ca i rian a ṭuanmi a si. 11 Ahohmanh nih rak zohchuk hlah u. Kan hawile hna he amah cu kan rak hngah ko caah lunglawm tein ka sinah run thlah u. 12 Cun kan unau Apollo cu, kan hawi dang hna le nanmah tlawn kha ka forh lengmang, asinain atu ah cun a si thiam rih lai lo tiah a ruah. Caan rem a hmuh tikah a ra te lai. 13 Lungfim tein um u, nan zumhnak ah khan fek tein dir u, ralṭha in um u law thazang ṭhawng in um u. 14 Nan tuahmi thil paohpaoh kha dawtnak in va tuah u. 15 Stefanas le a innchungkhar kha nan hngalh hna; anmah cu Grik ram chungah Khrihfa a cang hmasa bik an si i Pathian mi hna ca rianṭuan awkah aa pemi an si. Ka u le ka nau hna, 16 hi bantuk mi hna le anmah he rian a ṭuan ṭimi hna hruainak kha va zul u. 17 Stefenas le Fortunatus le Akhaiku an rat caah ka lung aa lawm, nan um lo hmanh an ka philhter. 18 Nanmah nan tha an in nuamter hna bantukin kei zong ka tha an ka nuamter ve. Anmah bantuk minung hi kan thangṭhat hna awk a si. 19 Asia ram chung i a ummi khrihfabu nih nan kut an in tlaih hna; Akuila le Prisilla le an inn i aa pummi khrihfabu nih nan kut an in tlaih hna. 20 Hika i a ummi unau vialte nih nan kut an in tlaih hna. Pakhat le pakhat a thiangmi kuttlaihnak in i biachawn u. 21 Paul nih nan kut kan tlaih hna ti hi ka kut hrimhrim in ka ṭial hih. 22 Bawipa a daw lomi cu an cungah chiat si ko seh. Maranatha — Kan Bawipa, ra cang ko! 23 Bawipa Jesuh vel cu nan cungah um ko seh. 24 Khrih Jesuh thawngin kan dawt hnanak cu, nan dihlak cungah um ko seh. Amen.
1 Pathian duhnak in Khrih lamkaltu a simi keimah Paul le kan nau Timote nih, Korinth khua chung i a ummi Pathian Khrihfabu le Grik ram chung i a ummi Pathian mi vialte nan sinah ca kan in kuat hna. 2 Pathian kan Pa le Bawipa Jesuh Khrih nih vel le daihnak in pe ko hna seh. 3 Kan Bawipa Jesuh Khrih i a Pa le a Pathian, zaangfahnak in a khatmi kan Pa, zeizong vialte ah a kan bawmtu Pathian cu lawm u sih! 4 Harnak kan innak kip ah a kan hnemh caah kannih zong nih harnak a phunphun in a ingmi kha kan hnemh khawh ve hna i kan hnemh hnanak ah cun Pathian sinin hnemhnak kan hmuhmi kha kan hman. 5 Khrih nih a inmi temhinnak tampi cu kannih zong kan i hrawm ve bantukin Khrih hnangamnak zong cu kan i hrawm ve. 6 Temhnak kan in ahcun nanmah hnangamnak le khamhnak caah a si; cun hnangamnak kan hmuh ahcun nannih zong nih nan hmuh ve i kan inmi temhnak kha lungsau in nan in khawh ve nakhnga thazang pek nan si. 7 Cucaah nan cung i ruahchannak kan ngeihmi cu zeitikhmanh ah aa hnin bal lo. Temhnak kan inmi nan kan inpi bantukte khan hnangamnak kan hmuhmi cu annih zong nih nan hmuh ve. 8 U le nau hna, Asia peng chung i harnak kan tonmi kha hngalhter ṭhan kan in duh hna. Kan cung i an kan khinhmi thil kha rak rit tuk, rak ngan tuk kaw, nun lai hmanh kan i ruah lo. 9 Kannih cu thi dingin biakhiah kan si ko cang tiin kan i ruah. Asinain hi ti thil a rak um cu kanmah le kanmah kha i bochan loin, mithi a thawhtertu Pathian kha kan i bochan deuhnak hnga caah a rak si. 10 Cu tlukin ṭih a nungmi thihnak chungin a kan khamh i hmailei zongah a kan khamh ko lai. 11 Nannih nih nan thlacamnak in nan kan bawmh caah, a kan khamh ṭhan ko lai ti zong kha kan i ruahchan. Cucaah cun kan ca i thla tampi nan cammi cu Pathian nih an leh hna lai i thluachuahnak a kan pek lai; cun kanmah ruangah mi tampi nih Pathian cu lawmhnak in an thangṭhat lai. 12 Kan i uanmi cu hihi a si: hi vawlei cung kan nunning ah hin le nanmah he kan i pehtlaihnak ning ah hin kan umtu ziaza cu vawlei cung fimnak nih si loin Pathian vel a ṭhawnnak nih a uk i hlangfang le lungthin tak tein nan sinah khua kan sa, hihi kan chiaṭha thleidannak nih fiang tein a kan hngalhpimi a si. 13 Ca kan in kuatmi hna cu nan rel khawhmi vial le nan hngalh khawhmi vial kha a si ko. 14 Atu cu nan kan hngalhnak hi a tlam a tling lo ngai, sihmanhsehlaw tlamtling tein nan hun kan hngalh te lai ti kha ka zumh i Bawipa Jesuh ni ah cun kan i chawrmi cu nanmah nan si lai bantukin nan i chawrmi zong kanmah kan si ve te lai. 15 Hi vialte hi fek tein ka zumh caah nanmah tlawn hmasa kha ka rak i tim, nannih nih thluachuahnak a voi hnih in nan hmuh khawh nakhnga. 16 Ka rak i timhning cu, Masidonia lei ka kalpah ah nannih kha tlawn i ka kir leiah hun tlawnpah ṭhan kha a si. Cuticun Judea lei ka hung kal tikah nannih nih nan ka bawmh khawh hnga tiah ka ruah. 17 Hiti ka rak i timh tikah hin lungthin reprai ngei loin aa let lelekmi ka rak si maw? Ka rak i timhnak ah hin mah zawn lawng ruahnak lungthin a ngeimi bantukin, "E, e," ti ṭung in "Ai, ai," a ti fawnmi ka si maw? 18 Pathian cu zumh awk tlak a si bantukin nan sin i ka biakam cu "E, e," le "Ai, ai," aa cawhmi a si lo. 19 Zeicahtiah Silas le Timote le keimah nih kan in chimhmi hna Jesuh Khrih, Pathian Fapa cu, "E,e," "Ai,ai," aa cawhmi a si lo. Amah cu Pathian "E" a si ko; 20 zeicahtiah amah cu Pathian biakamnak dihlak ah khan "E" a si. Cu ruangah cun kannih nih Jesuh Khrih thawngin Pathian thangṭhatnak ah khan, "Amen," kan ti tawn kha a si. 21 Nanmah he kanmah he Khrih ta kan si ti fiang tein a kan hngalhtertu cu Pathian hrimhrim kha a si; amah ca i a kan thleidangtu cu Pathian ṭhiamṭhiam kha a si, 22 Pathian nih cun amah ta kan sinak hmelchunhnak kha kan cungah a khenh i kan ca i a kan chiahpiakmi a dihlak aamahkhan caah khan kan lung chungah Thiang Thlarau kha a kan pek. 23 Pathian cu ka tehte a si — amah nih ka lungthin a hngalh. Korinth khua i ka rat lo cu nanmah zawn kan ruah hna caah a si. 24 Cucu nan zumh awk, khakha nan zumh awk, ti kha ca auh bantukin in auh duahmah hna kha ka duh lo, zeicahtiah zumhnak ah khan fek tein nan dir ti kha ka hngalh ko. Kannih nih tuah kan duhmi cu nanmah lawmhnak tu kha a si deuh.
1 Cucaah nanmah lungfahter awkah cun ra ti lo dingin ka lung kaa thlek cang. 2 Zeicahtiah an lung ka fahtermi cu nanmah nan si ahcun, aho nih dah an ka lawmhter kun lai? Nan ngaih kan chiattermi hna nanmah lawng hi pei a ka lawmhter khotu cu nan si ko cu. 3 Cucaah cun kha ca nan sin i ka rak ṭial kha a si. Nan sin rat i a ka lawmhtertu ding va si nalak i ka ngaihchiattertu si ding cu kaan duh ti hna lo. Zeicahtiah kaa lawmh tikah nannih zong nan dihlak in nan i lawm ti kha ka hngalh. 4 Ca kan kuat hna ah khan lungthin fak ngai le awlokchong ngai le mitthli tla bu in ka ṭial, cu ka ṭialmi cu nanmah ngaihchiatter dingah khan si loin, zeitluk in dah kan dawt hna, ti kha nan hngalh khawhnak hnga ka duh caah a si. 5 Ngaihchiatnak a chuahtertu nih ngaihchiatnak a chuahter tikah, keimah cungah a chuahter si loin nanmah cungah a chuahter a si deuh — perh lo tein, nanmah lak i tlawmpal cu nan ngaih an chiatter ko hna khah — hiti ka chim hi amah kha fak tuk in ti ka duh lo caah a si. 6 Mi tam deuh nih hi bantukin dan nan tat cang hi amah caah a za cang. 7 Atu cu nannih nih nan ngaihthiam awk le thazang nan pek awk a si, a ngaih a chiat tuk ahcun a lung a dong sual lai. 8 Amah nan dawt taktak kha va hngalhter u tiah kan nawl hna. 9 Kha ca kan kuat hna kha, zeitluk fang dah hneksak innak ah hin nan si ti le kan chimhmi hna kha nan zul maw zul lo ti hngalh ka duh caah a si. 10 Nannih nih mi pakhat cu a sualnak nan ngaihthiam tikah kei zong nih ka ngaihthiam ve. Cun ka ngaihthiam tikah, ngaihthiam hau thil kha a cungah ka ngeih taktak a si ahcun, cu ka ngaihthiam cu nanmah ruangah, Khrih hmaika ah a si, 11 cuti ka ngaihthiam cu Satan nih khan kan tei sual hlah seh ti ka duh caah a si, zeicahtiah Satan thil tining cu fiang tein kan hngalh ko. 12 Khrih kong Thawng Ṭha kha chim awkah Troas khua ka phak tikah, Bawipa nih cu rian ṭuannak caah lam a ka onh ti kha ka hmuh. 13 Sihmanhsehlaw kan nau Titas kha ka hmuh lo caah ka lungre a thei ngaingai. Cucaah cu ka mi cu, dam tein rung um u, tiah ka titak hna i Masidonia ram ah khan ka lan. 14 Sihmanhsehlaw Pathian cu lawm ko u sih. Zeicahtiah Khrih teinak puai i a kal nuahmahmi mibu chungah khan kannih cu Khrih he kan i pehtlaihnak thawngin Pathian nih thongtla bantukin a kan hruai zungzal. Khrih kong hngalhnak cu khuazakip ah zihmui bantukin karhter awkah Pathian nih kannih cu a kan hman. 15 Cucaah kannih cu Khrih nih Pathian sinah a pekchanhmi rimthaw zihmui bantuk kan si, cu zihmui cu khamh lio lengmangmi hna sin zong a phan i a tlau lio lengmangmi hna sin zong a phan. 16 A tlau lio lengmangmi hna caah cun thihnak rimchia a si i khamh a si lio lengmangmi hna caah cun nunnak petu rimhmui a si. Cu bantuk rian cu aho nih dah a tuah khawh lai? 17 Kannih cu Pathian bia kha, thil man fawi bantuk men in a tawngthammi hna bantuk kan si lo; kannih cu Pathian nih khan a kan thlah caah, amah hmaiah Khrih sal bantukin lungthin tak tein bia kan chim.
1 Hiti kan ti tikah hin mah thangṭhat kan lo hoi hnga maw? Midang bantukin kannih zong nanmah ṭialpiakmi siseh, nanmah sin kuatmi siseh, thangṭhatnak ca i ken kan herh ve dahra? 2 Kan ca kenmi cu nanmah kha pei nan si cu, kan lungthin cungah mi vialte hngalh awk le rel awkin ṭialmi cu. 3 Hi ca a ṭialtu cu Khrih kha a si i kannih hi a phortu ah a kan hmanmi kan si. Cu ca cu lung cungah cahang in ṭial si loin minung lungthin cungah a nungmi Pathian Thlarau nih a ṭialmi a si. 4 Hi bia kan chim ngamnak cu Pathian cu hngatchan tlak a si ti kha Khrih thawngin kan hngalh caah a si. 5 Hi rian hi kan ṭuan khawh vun i ti awkah kanmah ah hin zeihmanh i chim awk kan ngei lo. Kan ṭuan khawhnak cu Pathian sinin a rami a si i 6 biakam thar rian a kan ṭuanter khotu cu, cu Pathian cu a si. Cu biakam thar chung i a ummi cu ṭialmi nawlbia kha si loin Thlarau tu a si. Ṭialmi nawlbia nih cun thihnak kha a chuahpi, sihmanhsehlaw Thlarau nih cun nunnak kha a chuahpi. 7 Nawlbia cu lungtlap cungah khan cafang in ṭial a rak si i cu nawlbia cu annih kha pek a si lioah khan Pathian sunparnak cu a lang. Moses hmai i a rak ummi ceunak cu a lang. Moses hmai i a rak ummi ceunak cu a ziam zau ko nain cu ceunak cu a rak ṭhawn tuk caah khan Israel mi nih Moses kha dengteo in an rak zoh ngam lo. Thihnak tluntertu a simi Nawlbia hmanh, cu bantuk sunparnak he a rat a si ahcun, 8 Thlarau rianṭuannak a sunparnak cu zeitluk in dah a ngan chinchin. 9 Minung sual vun phawtnak rian hmanh cu tlukin a sunlawi ahcun, minung thian vun chehnak rian cu zeitluk in dah a sunlawi chinchin. 10 Hlan lio i a rak ceu hringhran ve komi sunparnak kha cu, atu sunparnak nih hin a ceu hleih tuk hringhran caah, kha kha cu a lo cang, kan ti ko lai. 11 Zeicahtiah caan tawite lawng a nguhmi hmanh nih cu tluk sunparnak a ngeih ahcun, zungzal nguhmi nih cun zeitluk sunparnak dah a ngeih chinchin lai. 12 Hi ruahchannak kan ngeih caah hin kan ral a ṭha ngam. 13 Israel mi nih maw ka hmai i ceunak a ziamh le a loh hi hmu hna lai tiah Moses nih a hmai puan in a rak i khuh bantuk kha kannih cu kan si lo. 14 An lungthin cu a rak i khar hrimhrim ko i nihin ni tiang zong hin biakam hlun cauk an rel caan paoh ah an lungthin kha, cu puan nih cun a huh ṭhiamṭhiam ko hna. Cu puan cu mi nih Khrih he an i pehtlaih tik lawngah aa hawk. 15 Nihin ni tiang hmanh ah hin Moses Nawlbia an rel fate, kha puan nih khan a huh ko hna. 16 Sihmanhsehlaw Cathiang nih, "Moses cu Bawipa lei i a hun i mer ah khan puan cu aa hawk," a ti bang khan cu puan cu aa hawk cang. 17 Hi zawn i "Bawipa," a timi hi Thlarau a si i Bawipa Thlarau a umnak hmun paoh ah luatnak a um. 18 Kannih caah hmai khuhnak puan kha a um ti lo caah kan dihlak in Bawipa sunparnak cu thlalang chung i kan mui a langh bang khin kan langhter; cuticun sungpar chin lengmang in amah lo chin lengmang ah thlen kan si i cucu Thlarau a simi Bawipa rianṭuannak cu a si.
1 Pathian nih a kan zaangfah caah cu rian cu a kan ṭuanter i kan hnabei a dong bal lo. 2 Ningzak a simi thil, a thli tein tuahmi thil vialte kha kan hlawt hna i ahohmanh hleng lo tein kan um, Pathian bia zong kha hlennak ah kan hmang bal lo. Biatak kha hlangfang tein kan chim i cuticun Pathian hmaika ah kan minung hawi cu nanmah nih nan chiaṭha thleidannak ningin kan chiat le kan ṭhat cu ruat ko u, kan ti hna. 3 Kan chimmi Thawngṭha cu aa thuh a si ahcun, a tlau liomi hna ca lawngah aa thup a si lai. 4 Annih nih zeicahdah an zumh lo ti ahcun, hi vawlei khuazing ṭhalo nih hin an lungthin cu mui lakah a chiah peng hna caah a si. An cung i a ceumi ceunak cu hmu loin a umter hna, cu ceunak cu Khrih sunparnak kong Thawngṭha in a rami a si i Khrih cu Pathian bantuk taktak a si. 5 Kanmah kong kha kan chimmi a si lo, kan chimmi cu Jesuh Khrih kha Bawipa a si i kannih hi Jesuh ruangah nan sal kan si, ti hi a si. 6 "Muihnak chungin ceunak hung ceu seh," tiah a titu Pathian ṭhiamṭhiam kha kan lung chungah amah ceunak a ceutertu cu a si; Khrih hmai cungah a ceumi Pathian sunparnak hngalhnak ceunak kha a kan pek. 7 Asinain hi thlarau rothil a kengtu kannih hi tlak um bantuk men kan si, cu nih cun thil ti khawhnak ṭhawnnak hi kanmah ta si loin Pathian ta a si ti kha a langhter. 8 Khatlei khatlei in an kan rial dip lengmang, sihmanhsehlaw kan kek ngaingai bal lo; lungawṭawm in kan um tawn, sihmanhsehlaw kan hnabei a dong bal lo; 9 ral tampi kan ngei, sihmanhsehlaw hawi pakhat loin kan um bal lo; cei tein an kan ṭhuat tawn, sihmanhsehlaw kan thi taktak bal lo. 10 Thih a thiammi kan tak cungah hin Jesuh thihnak kha kan i ken zungzal, zeicahtiah hi kan tak ṭhiamṭhiam ah hin Jesuh nunnak zong cu a langh ve nakhnga. 11 Thih a thiammi kan pum ah hin Jesuh nunnak cu a langh khawh nakhnga Jesuh ruangah thihnak huat dengmang lengmang in khua kan sa. 12 Cu a sullam cu zeidah a si tiah, kannih chungah cun thihnak nih khan rian a ṭuan i nannih chung tu ah cun nunnak nih khan rian a ṭuan. 13 Cathiang nih, "Ka zumh caah ka chim," a ti. Cu bantuk zumhnak lungthin ṭhiamṭhiam cun, kannih zong nih kan zumh caah kan chim ve. 14 Bawipa Jesuh nunnak ah a thawhtertu Pathian nih khan kannih zong Jesuh sinah cun a kan thawhter lai i nanmah he a hmaika ah cun a kan luhpi lai, ti kha kan hngalh. 15 Hi vialte hi nanmah caah a si dih; Pathian vel nih mi tam chin lengmang a phak hna bantukin mi tam chin lengmang nih Pathian sunparnak cu an lawmh lai i an thangṭhat lai. 16 Hi ruangah hin pei kan lung a dongh bal lonak cu a si cu. Kan mihring sinak cu duhsah tein zor chin lengmang hmanh seh law kan thlarau sinak cu ni khat hnu ni khat a thar chin lengmang. 17 Cun harnak hmete caan tawite kan inmi nih hin, hi harnak nakin a let tampi in a ngan deuhmi zungzal sunparnak cu a kan pek lai. 18 Kannih nih kan i zohchihmi cu hmuh khawhmi thil hi si loin hmuh khawh lomi thil khi an si. Hmuh khawhmi thil cu caan tawite lawng a nguh, sihmanhsehlaw hmuh khawh lomi thil cu zungzal in a hmun.
1 Kannih kan umnak thlam, vawlei cung kan pum hi, ṭheh a si tikah, vancung ah khin kan umnak ding caah Pathian nih inn a kan pek lai ti kha kan hngalh — cu inn cu amah Pathian nih a sakmi inn, zungzal hmun dingmi inn cu a si. 2 Atu cu hi kan pum hin kan hrum lengmang i vancung i a ummi kan inn cu kan cungah hin run kan khuh hna seh ti cu kan duh hringhran; 3 cu inn in thuamh kan si tikah pum loin kan um lai lo. 4 Hi vawlei cung thlam chung i kan um lioah hin cun hremnak ing lengmang in kan hrum kan ai; hi vawlei cung pum hi hlawt kan duh ti a si lo, sihmanhsehlaw vancung pum kha hun kan hruk hna seh law ti kha kan duh i thih thiammi hi nunnak nih dolh seh law ti kha kan duh. 5 Cu bantukin i thlennak ding ca i a kan timtu cu Pathian a si i kan ca i a kan chiahpiakmi thil vialte aamahkhan caah a Thlarau cu a kan pek. 6 Cucaah cun lung ṭhawng in kan um zungzal. Hi pum inn chung i kan um chung paoh ah hin cun Bawipa inn cun kan i hlaat ti kha kan hngalh; 7 zeicahtiah mit hmuh in si loin zumhnak tu in kan kal. 8 Cucaah ralṭha ngaiin kan um i hi pum kan inn hi kaltak i Bawipa sin i um cu kan i thim deuh suaumau hnga. 9 Cucaah hika kan inn i kan um a si zongah, khika kan inn i kan um a si zongah, zeidang nakin kan duh bikmi cu amah duhnak tuah kha a si. 10 Kannih cu kan dihlak in Khrih hmaiah kan chuak lai i amah nih bia a kan ceih lai. Kan pum in kan nun chung i a ṭha siseh, a chia siseh kan tuahning cio ah kannih nih kan hmuh lai. 11 Bawipa ṭih cu zeidah a sullam a si ti kha kan hngalh i cucaah mi kha lem kan i zuam lengmang hna. Pathian nih tling cikcek tein a kan hngalh; cu bantukin nannih zong nih nan lung chungte cun nan ka hngalh ve tiah ka ruah. 12 Kanmah le kanmah kha nanmah sin i i thangṭhat kan i zuam ṭhan a si lo, nanmah tu nih kan thangṭhat u tiah caan ṭha kan in pek hna a si. Cuticun lenglei thil lawng a duh i lungchung thil a ruat set ṭung lomi pawl kha an bia nan leh khawh hna lai. 13 Mihrut cu kan si taktak ko maw? Kan si ahcun Pathian ruangah a si ko lai. Kan fim a si ahcun nanmah ca dingah a si. 14 Mi vialte caah mi pakhat a thi i a thihnak ah cun mi vialte an thi ve ti kha kan hngalh caah Khrih nih kan ca i a ngeihmi dawtnak nih cun a kan uk. 15 Mi vialte caah a thihnak chan cu minung nih hin an nun chungah anmah ca lawngah nung ti loin, anmah ruang i thihnak a ing i a tho ṭhanmipa ca i an nun nakhnga caah a si. 16 Cucaah ahohmanh hi, minung rel in kan tah ti hna lo. Voi khat cu Khrih kha minung rel in kan rak tah ve, sihmanhsehlaw atu cu cu bantuk cun kan tah ti lo. 17 Mi zeihmanh hi Khrih he an i pehtlaih tikah cun mi thar a si; a nunning hlun kha a lo cang, nunning thar kha aa thawk cang. 18 Hi thil vialte a tuahtu cu Pathian a si i Pathian nih cun Khrih thawngin kannih a ral a simi cu a hawi ah a kan thlen i midang zong a hawi i ser ve awk rian cu a kan pek. 19 Cucaah kannih kan biapi cu, Pathian nih mi vialte kha Khrih thawngin hawi ah a ser hna, ti hi a si. Pathian nih an sualnak kha anmah sual phawtnak ding caah cazin chungah a khumhpiak hna lo i kannih cu a hawi i a ser hnanak bia chim kha a kan fial. 20 Cucaah Khrih lamkaltu bantukin kannih cu kan ra. Kannih nih kan in nawl hna hi Pathian nih an nawl hna bantuk a si: Pathian he i rem ko u, tiah Khrih min in kan in nawl hna. 21 Khrih cu sualnak zeihmanh a ngei lo, sihmanhsehlaw kanmah ruangah Pathian nih kan sualnak kha a hrawmter i cucaah amah he kan i peh ahcun Pathian dinnak kha kan i hrawm ve lai.
1 Hi rian ah hin Pathian he a ṭuan ṭimi kan si caah hitihin kan in nawl hna: Pathian vel cu nan hmuh cang i cu vel cu pakpalawng ah canter hram hlah u. 2 Pathian nih, "Nanmah cu zaangfah kan duh hna caah kha caan ah khan nan bia cu ka rak in theihpiak hna i Khamh kan duh hna caah kha ni ah khan ka rak in bawmh hna," tiah a rak chim. Ngaihmanh u! Pathian zaangfahnak hmuh caan cu atu hi a si i khamhnak hmuh ni cu nihin hi a si! 3 Kan rianṭuannak ah ahohmanh nih an kan soi nakhnga lo, ahohmanh an lam ah dawntu chiah kan duh lo. 4 Kan i zuammi tu cu zei kan tuahnak hmanh ah Pathian sal kan si ti langhter kha a si i hnahnawhnak le harnak le retheihnak kha lungsau thinfual in kan in hna. 5 An kan tuk, thong ah an kan thlak, zapi bawmh in an kan bawmh; kan thazang celh lo tiangin an kan ṭuanter, hngilh lo le rawl loin kan um. 6 Kan ziaza a thiannak le biatak kan hngalhnak le lungsaunak le mi cung i zaangfahnak kan ngeihmi nih Pathian sal kan si kha an langhter. Cun Thiang Thlarau laksawng kan hmuhmi le dawtnak taktak kan ngeihmi le 7 biatak kan chimnak le Pathian ṭhawnnak nih khan Pathian sal kan sinak cu an langhter fawn. Raldohnak caah siseh, kanmah ralvennak caah siseh kan hmanmi cu dinnak a si. 8 An kan upat pah, an kan thangchiat pah, an kan nihsawh pah an kan thangṭhat pah. Lihchim bantukin an kan zoh, sihmanhsehlaw kan chimmi cu biatak a si ṭung, 9 hngalh bal lomi bantukin an kan ti, sihmanhsehlaw mi vialte hngalh kan si ṭung, a thi cia bantuk ah an kan rel, sihmanhsehlaw nan hngalh bantukin kan nung rih ṭung, hremnak cu kan ing nain a thih cu kan thi lo, 10 kan ngaihchiatnak cu an tuah nain kan lung aa lawm zungzal, sifak ngai kan lo sihmanhsehlaw mi tampi kan rumter hna, zeihmanh a ngei lomi ko kan lo, asinain a taktak ti ahcun kan ngeih lomi a um lo. 11 Korinth khua i a ummi ka hawi dawtle hna! Hlangfang tein bia kan in chimh hna i kan lung kha kaupi in kan in hunpiak hna. 12 Kan lung kan in kharkanh hna lo, nanmah bel nih nan lung nan kan kharkanh. 13 Fale sin biachim bantukin nan sinah ka chim. Nan cung i lungthin kan ngeihmi bantuk hi kan cungah ngei ve u. Nan lung cu kaupi in kan hunpiak u. 14 A zum lomi hna he i fon cetcut tuk in rian ṭuan ṭi hlah u; cucu a si kho lomi thil a si. Zeitindah a dingmi thil le a ding lomi thil cu hawikom an si khawh lai? Zeitindah ceunak le muihnak cu hmunkhat ah an um ṭi khawh lai? 15 Zeitindah Khrih le Khuachia cu an lung aa khah khawh lai? Zumtu le zumlotu nih zeidah an ngeih ṭi khawhmi a um? 16 Zeitindah Pathian biakinn cu lawkihmi siasal he an i tlak khawh lai? Zeicahtiah kanmah cu pei a nungmi Pathian biakinn cu kan si cu. Pathian hrimhrim nih, "Ka mi hna sinah ka umnak inn cu ka sak lai i an sinah ka um lai; Keimah cu an Pathian ka si lai i annih cu ka mi an si lai," a ti bantuk khan a si taktak. 17 Cucaah Bawipa nih, "Annih cu nan kaltak hrimhrim hna lai i an sin cun nan i ṭhen hrimhrim lai. A thiang lomi kha zeihmanh tawng hlah u law kan cohlan hna lai. 18 Keimah cu nan pa ka si lai i nannih cu ka fapale le ka fanule nan si lai, tiah Bawipa Lianngan Bik nih a ti," tiah a ti.
1 Ka dawtmi ka hawile hna, hi biakamnak vialte hi kanmah pei pek kan si cu. Cucaah pum siseh, thlarau siseh, a thurhnawmhtertu paohpaoh kha i thianh u sih law Pathian ṭih bu tein um u sih. 2 Nan lungthin chungah hmun rak kan serpiak ve u. Aho nan cung hmanh ah sualnak kan tuah lo, ahohmanh kan in hrawk hna lo, ahohmanh kan in ei kan in hmuar hna lo. 3 Hi bantukin ka chim hi nanmah kha sualphawt kan duh hna caah a si lo; ka chim cang bang khan nannih cu kan lungthin chungah nan um tuk hringhran caah a si i kan nun ah nun ṭi, kan thih ah thih ṭi kan si ko lai. 4 Kaan zumh tuk hringhran hna. Kaan chawr tuk hringhran hna. Harnak kan inmi vialte ah hin lung ṭhawng ngaiin ka um ko rih, lawmhnak in a liam in ka liam ko. 5 Masidonia kan phak hnu hmanh ah dinh mui kan hmu hlei lo. A kenkip ah harnak a um, pakhat le pakhat an i si, kan lung chungah phannak a um. 6 Sihmanhsehlaw lung a dongmi lung ṭhawnnak a pe tawntu Pathian nih cun, Titas a ratnak thawng khan lung ṭhawnnak a kan pek ṭhan. 7 Titas nih cun, zeitluk in dah hmuh nan kan duh le, zeitluk in dah nan ngaih a chiat le zeitluk in dah nan kan ṭanpi kha a kan chimh i atu cu hlan nak hmanh khan kaa lawm deuh. 8 Zeicahtiah kha ka ca nih khan nan ngaih an chiatter hna hmanh ah ka ṭial kha kaa ngaihchih lo. Nan ngaih an chiatter hna ti ka theih ah khan cun ka ngaih a chia. 9 Sihmanhsehlaw atu cu kaa lawm ko — nan ngaih an chiatter hna ruangah khan si loin nan ngaihchiatnak nih nan ziaza an thlen hna caah khan kaa lawmhnak cu a si. Nan ngaihchiatnak cu Pathian nih a hman i cucaah kan tuahmi ruangah zeihmanh nan sung lo. 10 Pathian nih a hmanmi ngaihchiatnak nih cun khamhnak lei kalpitu lungthlennak a chuahpi i cu bantuk ngaihchiatnak cu i ngaihchih awk zeihmanh a um lo. Asinain vawlei cung phung ningin ngaihchiatnak kha kan in ahcun cu nih cun thihnak kha a chuahpi. 11 Nan ngaihchiatnak hi zeitindah Pathian nih a hman kha zohhmanh u: zeitluk in dah an biatakter hna, nan sual lonak kha zeitluk in dah a langhter. Nan thin an phawh hna, an lauter hna, nan ka ngaihnak kha a ṭhanter, dinnak tuah awkah an ṭanter hna i thil ṭhalo kha dantat zau an duhter hna. Hi thil hi a ning piin zoh tikah palhnak nan ngeih lo kha nan langhter. 12 Cucaah kha ca kha kan kua ko hna nain, sualnak a tuahtupa le a cungah sualnak tuah a simipa kong kha biapi bik in ka ruahmi an si lo. Kaa tinhmi cu, zeitluk in dah nan ka ṭanh ti kha Pathian mithmuh i nan sin i fianter kha a si. 13 Cucaah cun pei kan hna a ngam cu. Kan hnangam lawng a si lo. Titas nan rak lawmhternak nih khan a kan lawmhter ve. 14 Amah sinah khan nanmah kongah ka vaa porhlaw i nannih zong nih nan ka deuh ve lo. Nannih cu biatak kha kan in chimh zungzal ko hna. Cu bantukin nanmah kong ah Titas sin i kan i porhlawtnak cu bia hmaan ah a cang. 15 An fialmi hna tuah nan duhning le ther le phang lengmang in nan rak don kha a ruah tikah nanmah an dawt hnanak kha a ṭhawng chinchin. 16 Nanmah cu kan bochan khawh hna caah zeitluk in dah kaa lawmh.
1 U le nau hna, Pathian vel nih zeitindah Masidonia ram Khrihfabu chungah rian a ṭuan ti kha hngalhter kan in duh hna. 2 Harnak an innak nih khan fak piin a hneksak hna; asinain an i lawmhnak cu a ngan tuk caah an si a fak ngaingai ko nain thawhlawm ah an siang ngaingai. 3 An pek khawh chungin an pek ti kha hngalhter kan duh hna, an pekmi hi an pek khawh leng hmanh a si. 4 Pathian mi Judea ram i a ummi hna bawmh awkah khan anmah lungtho tein tinvo kan phaw ve u tiah an kan nawl. 5 An tuahmi cu ka rak i ruah ngam lengpi a si, A hmasa bik ah anmah kha Pathian sinah an i pe, cun Pathian hnatlaknak in kan sin zongah an i pe. 6 Cucaah nannih lak i hi rian a thawktu Titas kha hi dawtnak rian hi va lim awkah kan fial. 7 Zumhnak ah siseh, biachimnak ah siseh, hngalhnak ah siseh, midang bawmh duhnak ah siseh, kanmah nan kan dawtnak ah siseh, nan rum ngaingai ko. Cucaah cun hi dawtnak rian zongah hin a siangmi nan si awk kha kan in duh hna. 8 Phung zeihmanh kaan chiahpiak hna lo. Sihmanhsehlaw midang nih zeitluk in dah bawmhnak lei ah an lung a thawh ti ka langhternak nih hin, nan dawtnak hi a tak maw tak lo ti kha fianter seh ti ka duh. 9 Nannih nih kan Bawipa Jesuh Khrih vel kha nan hngalh ko: a rum nain nanmah ruangah sifak ah a cang, cuti a can cu a sifahnak khan nannih kha rumter an duh hna caah a si. 10 Hi rian kong ah hin ka ruahnak cu hi bantuk hin a si: Nikum i nan rak thawk cangmi kha atu cu nan lim ahcun a ṭha deuh ka ti. A ṭuannak lawngah si loin ṭuan thawk duhnak zongah khan lungthin a ngei hmasa bik cu nanmah kha nan rak si. 11 Cucaah cun rak pehzulh u law rian cu rak lim u. Nan rak thawk lio bantuk khan a lim lei zongah lungthawhnak rak ngei peng u law nan ngeihmi ning cio ah pek rak i zuam u. 12 Pek duhnak lungthin nan ngeih ahcun nan ngeih lomi thil zoh in si loin nan ngeihmi thil zoh in Pathian nih nan laksawng cu an cohlanpiak hna lai. 13 - 14 Midang bawmhnak ah nan cung i thilrit khinh kha kaa timhmi a si lo; asinain atu cu thil tampi nan ngeih lio a si caah a herh baumi cu nan bawmh ve hrimhrim awk hna a si. Cuticun nannih zong nan herh bau ve tikah an ngeih lio a si ahcun an in bawmh ve hna lai. Cun nan phun hnih in nan i ruang kho lai i 15 Cathiang nih, "Tampi a charmi nih tam tuk an ngei hlei lo, Tlawmte a charmi nih tlawm tuk an ngei lem lo." a ti bang khan a si lai. 16 Nanmah bawmhnak ah kanmah tlukin Titas lung a thawhtertu Pathian cu lawm ko u sih. 17 Kan fialmi kha a kan cohlan lawng si loin nanmah bawmh kha a lung a thawh tuk caah amah lungtho tein nan sin rat kha aa tim. 18 Cun amah he hin kan unau pakhat, thawngṭha chim rian a ṭuannak ah khrihfabu kip nih an hmaizah ngaimi kha kan rak thlah. 19 Cun cu pinah Pathian sunparnak ding ca i kannih nih hi dawtnak rian kan ṭuannak ah hin, kan sin i tlawng ve dingin le bawmh kan in duh hna kha langhtertu dingah, khrihfabu hna nih khan amah cu an thim i an thiah. 20 Hi siang ngaiin pekmi laksawng kan hmannak ah hin ahohmanh nih an kan soi khawh nakhnga lo ralring tein kan ṭuan. 21 Kan i tinhmi cu, Bawipa hmuh lawngah si loin, minung mit hmuh zongah a dingmi thil tuah kha a si. 22 Cucaah cun hi hna sinah hin kan unau a dang pakhat zong kan thlah fawn rih. Amah cu voi tampi kan hneksak cangmi a si i bawmh duhnak lungthin a ngei zungzal ti kha kan hmuh. 23 Titas hi nanmah bawmhnak rian i kan rian ṭuan hawi a si; amah sin i a rami kan unau hna hi khrihfabu aiawh an si i Khrih thangṭhattu an si. 24 An cungah nan dawtnak kha rak langhter u law khrihfabu vialte nih cucu fiang tein an hngalh lai i nanmah kong i kan i porhlawtnak kha ahmaan tiah an hmuh lai.
1 Judea ram i a ummi Pathian mi hna sinah kan kuatmi bawmhnak kong hi, a ngaingai ti ahcun, keimah nih nan sinah ka ṭial a herh lem lo. 2 Bawmh nan duh hna ti kha ka hngalh ko i cucaah cun Masidonia ram mi hna sin zongah cun nanmah kong cu ka vaa porhlaw. "Grik ram i a ummi kan unau pawl cu nikum khan bawmh an i timhnak cu a si cang," tiah ka ti hna. Nan lungṭhawhnak nih khan a tam deuh cu an lung a canghter ve hna. 3 Atu cu kan unau pawl hi nanmah sinah ka hun thlah hna, zeicahtiah hi kong i kan i porhlawtnak bia kha pakpalawng si sual hlah seh ti kan duh. Cucaah ka chimh hna bantuk tein, bawmhnak pek ding nan i timhmi he khan timhcia tein rak um u. 4 Cu ti si loin Masidonia mi kha kaa ratpi hna i timhnak zeihmanh ngei loin nan rak um ṭung ahcun, nan i tim ṭheo lai ti ruahnak kan ngeih ṭung caah khan, kan ning a zak tuk lai, nanmah cu vun chim lo kanmah hrimte kan ning a zak tuk lai. 5 Cucaah hi kan unau hna hi ka hlanah nan sin i ratter i nan i kammi laksawng kha timhcia tein rak chiah cu a herh tiah ka ruah. Cun kei ka hung phak tikah timhcia te cun a rak um cang lai i hnekchommi si loin pek nan duh hrimhrim ca i nan pekmi a si kha a lang lai. 6 Hihi philh hlah u: thlaici tlawmte a tuhmi nih cun theipar tlawmte a zun tawn, tampi a tuhmi nih cun tampi a zun tawn. 7 Cucaah nanmahle nan lungthin nan i thlehning cio ah rak tho u, nan thawh tikah i ngaihchih bu le hnekchom in si hlah seh, lunglawm tein a thomi kha Pathian nih a dawt hna. 8 Pathian nih cun nan herh leng tiangin an pek khawh ko hna, cucaah nanmah ca i nan herhmi caah khan nan i zat tiangin nan ngei zungzal ko lai i thil ṭha tuah nan duhmi ca i nan herhmi caah khan a zat leng tiang hmanh nan ngei ko lai. 9 Cathiang nih, "Siang ngaiin sifakmi kha a pek hna, a zaangfahnak cu zungzal in a hmun," a ti bang khan a si lai, 10 Cun thlaici tuhtu thlaici a petu le ei awk rawl a petu Pathian nih cun nan herhmi thlaici vialte kha an pek hna lai, nan siannak chung khan theipar tampi chuahter awkah amah nih cun a ṭhanter lai. 11 Zeitik caan paoh ah minunsiang nan si khawh nakhnga Pathian nih cun a za in an rumter zungzal hna lai i kan sinin an hmuhmi nan laksawng ruangah khan Pathian cu mi tampi nih an lawmh lai. 12 Zeicahtiah nan tuahmi nih hin Pathian mi hna an herhbaunak lawng kha a bawmh si loin Pathian sin i chimmi lunglawmhnak bia tampi zong kha a chuahter. 13 Hi nan tuahmi nih a langhtermi thawng hin, toidor tein a bia nan rak ngaih le Khrih Thawngṭha nan rak i tlaihnak kongah zumh awk tlak tein nan rak um kha an hmuh tikah, Pathian kha an upat lai; cun an herhbaunak bawmhnak ca le zapi ṭhatnak ca i siang ngaiin nan rak thawhmi ruangah khan Pathian cu an lawmh lai. 14 Cucaah Pathian nih tam khun in an pekmi hna a vel ruangah khan nan ca i thla an cam tikah nanmah ngaih buin an cam lai. 15 A sung tukmi a laksawng caah hin Pathian cu lawm ko u sih.
1 Hmunkhat um vial ah zeihmanh chim ngam ṭung lo, a langhlat vial in a ral a ṭha ngai ṭung, nan ka timipa keimah Paul nih, Khrih lungnemnak le a zaangfahnak lungthin in kan nawl hna. 2 Nan sin ka rat tikah ralṭha ngaiin ka um nan herhternak hnga lo thla ka cam lengmang, zeicahtiah an rian ṭuanmi hi, vawlei cung duhnak in pei a si ko cu, a kan timi hna sinah khan ralṭha ngaiin ka um kho ko. 3 Vawleicung ah cun kan um taktak, sihmanhsehlaw vawlei cung thil tinhmi ngei in ral kan do lo. 4 Raldohnak i kan hmanmi hriamnam cu vawlei cung hriamnam an si lo, ralhruang fekfek a hrawk khotu Pathian hriamnam tu kha an si. A hmaan loin bia i alnak kha kan hrawh, 5 Pathian hngal kho hna hlah seh tinak ca i chonmi vampang porhlawtnak vialte kha kan baoh dih; minung lungthin kha sal ah kan va tlaih hna i Khrih nawl kha kan ngaihter hna. 6 Cun zumhawktlak taktak nan si kha nan langhter hnuah zumhawktlak lo a simi tuahnak kha dan kan tat lai. 7 Thil cu a sining taktak in zohhmanh u sih: Pakhat nih aa thawh i Khrih ta ka si, a ti. Cu pa nih cun amah kha ṭha tein i ruat ta rih tuah seh, zeicahtiah amah cu Khrih ta a si tluk te khan kannih zong kan si ve ko. 8 Bawipa nih a ka pekmi nawlngeihnak cu a hlei deuh in ka hman a si zong hmanh ah ka ning a zak lo, cu nawlngeihnak ka hmuhmi cu nanmah ṭhehnak nawlngeihnak si loin nanmah saknak nawlngeihnak tu a si. 9 Ca in an hro hna bantuk lawh cu ka duh lo. 10 Micheu nih nan i thawh i, "Paul cu ca kuat ciammam ah cun a ti ti awk a ṭha lo, sihmanhsehlaw hmunkhat um taktak ahcun zei pipa a si lo, bia chim zongah zei ṭhai a si lo," nan ti. 11 Cu bantukin a timi hna nih cun, a langhlat in ka ṭialmi ca le nan sin ka um tik i ka tuah ding hi zeihmanh dannak an ngei lai lo ti hi nan rak hngalh awk a si. 12 Cu tluk sang i aa chiami hna he cun kan i tahchunh ngam in kan i rel chih ngam taktak lai lo! An va hrut thiam dah. Anmah tahnak dingah khan anmah lila nih pei tahnak tlangrel cu an i ser ko cu. 13 Kannih tu cu kan i porhlawtnak kha a hlei a hluat a phanh sual lai kha kan duh lo caah Pathian nih a kan chiahpiakmi rian ramri chung lawngah khan kan um lai i cu rian chungah cun nanmah lak i kan ṭuanmi zong hi aa tel. 14 Cu ramri chungah cun nan rak um caah Khrih kong Thawngṭha chim awk i kan rat ah khan, cu ramri lengah cun kan kal lo. 15 Cucaah Pathian nih a kan chiahpiakmi rian ramri leng i midang nih an ṭuanmi kha kannih cu kan i uang lo. Kan i ruahchanmi tu cu, nan zumhnak kha a ṭhang lai i Pathian nih a kan chiahpiakmi ramri chungah khan nan lakah rian ngan deuh chinchin kan ṭuan khawh lai, ti hi a si. 16 Cun nanmah ram pinah Thawngṭha kha kan chim khawh lai i midang lo chung i rak ṭuan ciami rian kha kan i porhlawt awk a herh lai lo. 17 Sihmanhsehlaw Cathiang nih a chim bang khan, "Porhlawt a duhmi nih cun Bawipa nih a tuahmi kha i porhlaw ko hna seh," 18 Zeicahtiah mi cu amah le amah kha ka ṭha tiin aa ruah tikah hin Pathian nih a cohlan a si lo i Bawipa nih a ṭha ti in a ruah lawngah hin a cohlan a si.
1 Ka hruh deuh hmanh ah rak ka ing hram ko u! 2 Pathian nih an sian hna lo bantukin kei zong nih kan siang ve hna lo. Nannih cu Khrih he i um dingin ka ham cangmi ngaknu thiang bantuk nan si. 3 Evi cu rul nih a zernak le lih in a hlen bantuk khan nannih zong nan lungthin kha a thu sual lai i thiang tein Khrih nan tlaihchannak kha nan ngol sual lai ti ka phang. 4 Zeicahtiah nan sinah a ra i kannih chimmi si loin Jesuh dang a hung chimmi zong kha nan rak pomhlawm duahmah ko hna i kannih nih kan in chimhmi hna Thlarau le Thawngṭha he aa dang rumro komi thlarau le thawngṭha zong kha nan rak cohlan duahmah fawn ko. 5 Hi hna ko hi pei lamkaltu taktak cu an si cu, nan timi hna nakkhan tlawmte hmanh kan niam deuhnak a um tiah ka ruat lo. 6 Phungchim cu a thiam lo zong ka si ko lai, sihmanhsehlaw hngalhnak ah cun ka niam deuh hrimhrim lo; zeitik caan paoh ah biatak cu tlingte le fiang tein kan in theihter ko hna. 7 Pathian Thawngṭha cu kan chimh hna tikah khan a man zeihmanh kan la hna lo; nanmah kha hlorh kan duh hna caah keimah tu kha kaa namh. Cucu ka palh maw? 8 Nan sin i rian ka ṭuan lioah khan khrihfabu dang nih an ka cawm. Nanmah bawmhnak ah annih cu ka chuh hna ka ti ko lai. 9 Nan sin i ka um lioah khan, phaisa ka herh tikah nanmah cu hna kan hnawh hna lo, Masidonia in a rami kan unau pawl nih ka herhmi vialte cu tlamtling tein an rak ka phorh. Kan hnulei i a si cang bantukin kan hmailei zongah siseh ti ka duh: nan caah thilrit ka si bal lai lo. 10 Hi kaa porhlawtnak hi Grik ram chung khuazeihmanh ah ahohmanh nih an daihter kho lai lo tiah Khrih biatak ka chung i a ummi hin kaa kam. 11 Zeicahdah hitihin bia ka chim? Kan dawt hna lo caah a si maw? Pathian nih kan dawt hna cu a hngalh. 12 Lamkaltu kan si ve, aa timi hna nih khan, anmah bantukin kan ṭuan ve, an ti khawh nakhnga lo, atu i ka tuahmi hi ka tuah lengmang ko lai 13 Cu hna cu lamkaltu taktak an si lo — annih cu a deu an si, an rian ṭuannak kongah khan lih an chim i Khrih lamkaltu taktak an i lawhter. 14 Cucu khuaruahhar awk a si lo, zeicahtiah Satan hmanh nih pei ceunak vancungmi bantuk aa siter khawh cu. 15 Cucaah a sal hna nih ṭhatnak sal bantuk an i siter cu thil fawilangte a si ko. A donghnak ah cun an tuahmi thil ruangah khan hmuh awk an i tlakmite kha an hmuh ko lai. 16 Ka nolh ṭhan rih ko lai: ahohmanh nih mihrut ah ka ruat hna hlah seh. Asinain nannih nih cun, na si, nan ka ti ahcun, mihrut bantuk tal in ka cohlang u, i porhlawt awk tlawmte tal ka ngeih nakhnga. 17 Atu i ka chim lengmangmi hi Bawipa nih chim seh ti a ka duhmi cu a si hrim lai lo, hiti kaa porhlawt lengmang ah hin mihrut bantukin bia ka chim lengmang taktak ko. 18 Asinain minung sining kong ah aa porhlawmi tam tuk an um caah kei zong kaa porhlaw ve ko lai. 19 Nannih cu fim tuk u cikaw, mihrut cu nan in khawh zungzal ko hna cu ta. 20 A uk in an in uk hna tikah, an in hlen hna tikah, an in foih hna tikah, an in zohchuk hna tikah, nan hmai i an in bengh hna tikah, nan in ko hna. 21 Cu bantuk kan tuah ngam ve lo cu, ningzak kan si taktak ko! Asinain aa porhlaw ngammi an um ahcun, kaa porhlaw ngam ve ko — mihrut biachim in hei chim ko ning law. 22 Annih cu Hebru mi an si maw? Ka si ve. Israel mi an si maw? Ka si ve. Abraham tefa an si maw? Ka si ve. 23 Khrih sal an si maw? Annih nakin sal ṭha deuh ka si — mihrut ka lo ai ne. Anmah nakin fak deuh piin rian ka ṭuan, thong voi tam deuh ka tla, tuknak voi tam deuh ka ing, thihnak ing dengmang in voi tam deuh ka um. 24 Voi sawm thum le voi kua tuk timi kha Judah mi sinin voi nga ka in, 25 Romans mi nih voi thum an ka tuk, voi khat lungcheh ka ing; tilawng rawhnak voi thum ka tong i voi khat cu suimilam pakul le pali chung ti ah ka taang. 26 Ka khualtlawnnak ah hin voi tampi tilian ṭihnung ka ton, mifir ṭihnung ka ton hna, ka phunhawi Judah mi hna sinin le Jentail mi hna sinin harnak ka hmuh, khuapi chungah khuapi chung ummi thil ṭihnung ka ton hna, ramlak ah ramlak i a ummi thil ṭihnung ka ton hna, rili cungah rili cung i a ummi thil ṭihnung ka ton hna i ka hawikom taktak a rak si lo, mi hlennak kha ka huah tawn. 27 Rian hrang ṭuan awk a um tawn, zan it loin voi tampi ka um a herh tawn, tihal le rawlṭam voi tampi ka in; rawl ei awk ngei lo le i dornak ngei lo le puan ngei loin ka um tawn. 28 Cun a dang cu zeihmanh chim loin, khrihfabu zawn ka ruahnak nih hin nifate in a nenh in a ka nenh. 29 Pakhatkhat an derthawm ah, kei zong ka derthawm ve, pakhat khat sualnak chung i an tlak ah lungretheih in ka thi. 30 Kaa porhlawt awk a herh a si ahcun zeitluk in dah a derthawmmi ka si a langhtertu kha kaa porhlaw lai. 31 Bawipa Jesuh i a Pathian le a Pa nih lih ka chim lo cu a hngalh — a min cu zungzal in thangṭhat si ko seh. 32 Damaskas khua i ka um lioah Aretas siangpahrang kut tang i rian a ṭuanmi mangki bawi nih keimah tlaih awkah khua kulhnak vampang kutka kha a conghter hna. 33 Sihmanhsehlaw vampang a kuainak hmun pakhat in bawm in lengah an vun ka thlak i ka luat.
1 A ṭhathnemnak zeihmanh a um lo hmanh ah kaa porhlawt a hau ko. Atu cu Bawipa nih a ka pekmi langhnak le biathlam kong kha ka chim cang hna lai. 2 Kan hnulei kum hleili ah khan Khrihfa mipa pakhat cu a van thumnak ah khin an cawi (langhnak a hmuh maw a si, a si taktak dik a si ka hngal lo, Pathian lawng nih a hngalh). 3 - 4 Ka vun nolh ṭhan rih lai, hi pa cu Paradis ah an hun cawi (hihi langhnak a hmuh maw a si, a si taktak dik a si ka hngal ṭhiamṭhiam lo, Pathian lawng nih a hngalh). Cuka ah cun bia in chim khawh lomi kha a theih hna, minung hmur nih a chim thiam lomi thil kha a theih hna. 5 Cucaah cu pa cu kaa porhlaw tuah lai — keimah kong tu cu kaa porhlaw lai lo, zeitluk in dah a derthawmmi ka si a langhtertu thil hna kha dah ti lo cu, zeihmanh kaa porhlaw lai lo. 6 Porhlawt ka duh vekvek a si ahcun mihrut porhlawt in kaa porhlaw lai lo, zeicahtiah biatak pei ka chim lai cu. Sihmanhsehlaw kaa porhlaw lai lo, zeicahtiah ka tuahmi in mi nih an ka hmuhnak le ka chimmi in mi nih an ka theihnak nak sang in ka cungah ahohmanh nih ruahnak an ngeih ding kha ka duh lo. 7 Sihmanhsehlaw ka hmuhmi thil khuaruahhar a tam ruangah porhlaw ruamkai in ka um sualnak hnga lo ka pum ah hin hling pakhat a ka chiah i cu hling Satan lamkaltu cu porhlaw in ka um sualnak hnga lo a ka dawntu dingah a hman. 8 Hi kong ah hin voi thum thliahmah Bawipa sinah thla ka cam i, ka lakpiak ko tiah ka nawl. 9 A ka lehnak cu, "Ka vel hi na caah a za ko, zeicahtiah ka ṭhawnnak cu derthawmnak ah hin a lang," ti a si. Cucaah cun Khrih ṭhawnnak nih a ka huhphenh ti kha ka hngalh nakhnga, ka derthawmnak ah hin lunglawm tein kaa porhlaw cang. 10 Ka derthawmnak ah siseh, nihsawhnak le harnak le hremnak le temhinnak ka hmuhmi ah siseh, Khrih ruangah kaa lawm ko; zeicahtiah ka derthawm tikah hin ka ṭhawn a rak si. 11 Mihrut rianṭuan in rian ka ṭuan ai — nanmah nih cun pei nan ka hruhter ai cu. Nanmah hi a ka thangṭhattu ding nan si nain a ka hruhtertu nan si. Zeihmanh ka si lo nain "lamkaltu" ṭha khun, nan timi hna kha ka tluk lonak hna zeihmanh a um lo. 12 Nanmah sin i lungsau thinfual in rian ka ṭuannak ah khan lamkaltu ngaingai ka sinak cu a lang ko, cucu hmelchunhnak hna le khuaruahharmi thil le thil lianngan tuahmi hna nih khan an fianter ko. 13 Khrihfabu dang nakin zeitindah chia hlei in kan ti hna? Bawmhnak ka pe u tiin hna kan hnawh hna lo lawng hi chia hlei in kan tinak hna a si ko lo maw? Nan cungah a tlari deuh in ka um rua lo caah ka ngaithiam u. 14 Atu hi nanmah tlawn kan timh hna a voi thumnak a si — zeihmanh kan hal hna lai lo. Ka duhmi cu nanmah nan si, nan tangka a si lo. A ngaingai ti ahcun, fale nih pale cu an cawm hna awk a si ṭung lo, pale nih pei fale cu an cawm hna awk a si deuh cu. 15 Nanmah bawmhnak dingah hin ka ngeihmi vialte le ka pum zong hi hman dih ka duh ko. Cu tlukin kan dawt hringhran hna caah cun, daw lo deuh in nan ka um awk a si maw? 16 Nan caah thilrit ka si lo cu nannih zong nih ahmaan nan ti ko lai. Asinain a cheu nih cun nan i thawh i, "A kan hlen, lih in a kan foih," nan ti. 17 Zeitindah a si? Nan sin i ka rak thlahmi lamkaltu hna kha nanmah hlennak caah ka hmanmi hna an si maw? 18 Nan sin rat awk kha Titas cu ka nawl i a sinah khan Khrihfa kan unau pakhat ka rak thlah. Titas nih a kan hlen nan ti lai maw? Amah le keimah cu kan i tinhmi kha i khat in kan ṭuanning kha aa khat lo maw? 19 Kan hmaiah anmah le anmah humhak an i zuam tiah ruah zong nan kan ruah sual ko lai. Cucu a si lo. Khrih nih chim hna seh ti a kan duhning in Pathian hmaiah kan chim i ka dawtmi ka hawile hna, kan tuahmi thil vialte hi nanmah bawmhnak caah si seh ti kan duh. 20 Nan sin ka phak tikah, si hna seh ti kan duhmi hna kha rak si loin kan hmuh sual hna lai ti kha ka phang i, si seh ti nan ka duhmi kha ka si lo sual lai ti zong kha ka phang ve. Pakhat le pakhat i si le i nahchuah le thintawi le mah zawn lawng ruat le i thangchiat i congoih le i porhlaw le ningcanglo khuasa in kan hmuh sual hna lai ti kha ka phang. 21 Nan sin ka rat nolh tik cu, ka Pathian nih nan hmaiah ningzak in a ka umter sual lai ti ka phang. Nun thur in a rak nung i nu le pa sualnak pumsa duhnak an tuahmi aa ngaihchih lomi hna ruangah khan ka ṭap lai.
1 Atu hi kan tlawn hna a voi thumnak a si lai. Cathiang nih a ti bantukin, "Sual i puhnak cu tehte pahnih nih maw pathum nih maw, ahmaan an ti awk a si." 2 Kan hnulei i sualnak a tuahmi hna le midang vialte zong, hihi chimh kan duh hna. Cu chimh kan duhmi hna cu, kan tlawn hna a voi hnihnak i kan chimhmi hna kha a si i atu cu nan sin i ka um lo caah a langin ka hun in chimh hna lai: ka rat nolh cu ahohmanh kaan dinhdorh hna lai lo. 3 Khrih nih biachimtu ah a hmang maw hmang lo hngalh kan duh, nan timi vialte kha nan hmuh lai. Khrih nih nan sin i rian a ṭuan tikah a derthawm lo, a ṭhawnnak tu kha nan lakah a langhter. 4 Asi, a derthawm caah vailam ah an tah taktak, sihmanhsehlaw Pathian ṭhawnnak in a nung. Kannih zong amah derthawmnak i hrawm in kan der, asinain nanmah he kan i pehtlaihnak ah a nunnak Pathian ṭhawnnak cu kan in hrawm hna. 5 Nanmah le nanmah kha ṭha tein i hneksak tuah u: zumhnak nunning khan a nungmi nan si maw? I hneksak tuah u. Hneksaknak nan innak ah khan nan tluk sual dah ti lo ahcun, Khrih Jesuh cu kan chungah a um ti kha nan hngalh ko a si lo mei? 6 Hneksaknak i kan rak tluk lo kha nan hngalh ko lai, tiah ka ruah. 7 Kanmah kha a hlawhtlingmi kan si ti langhnak ding caah si loin, santlailo kan si ko hmanh ah nannih nih cun ahmaan lomi thil kha tuah loin ahmaanmi thil kha nan tuah nakhnga Pathian sinah thla kan cam. 8 Biatak cu a ṭanh in dah kan ṭanh ko ti lo ahcun, a doh cun kan do kho hrimhrim lo a si ko. 9 Kannih der hmanh u si law nannih nan ṭhawn ah khan kan i lawm. Cucaah mitling nan si khawh nakhnga nan caah kannih zong nih thla kan cam. 10 Hi ruangah hin a langhlat in ca kan kuat hna hi a si. Ka duhnak cu nan sin ka phak tikah Bawipa nih a ka pekmi nawlngeihnak kha hraang ngaiin hman herh hlah ning ti hi a si — cu nawlngeihnak cu nanmah ṭhehnak nawlngeihnak si loin nanmah saknak nawlngeihnak tu a si deuh. 11 Atu cu ka u le ka nau hna, dam tein rak um u. Nan umtuning kha rak i remh u. Kan nawlnak hna hi rak ngai u; pakhat le pakhat i rem u law dai tein rak um u. Cun dawtnak le remnak Pathian cu nan sinah a um lai. 12 A thiangmi kuttlaihnak in pakhat le pakhat i biachawn u. Pathian mi vialte nih nan kut an in tlaih hna. 13 Bawipa Jesuh Khrih vel le Pathian dawtnak le Thiang Thlarau he i hawikomhnak cu nan dihlak sinah um ko seh.
1 Galati peng Khrihfabu hna, Paul nih ca kan kuat hna. Keimah cu lamkaltu si dingah hin minung nih fialmi le minung nih thlahmi si loin, Jesuh Khrih le Jesuh Khrih thihnak in a thawhtertu Pathian kan Pa nih an ka kawhmi ka si. 2 Hika i a ummi kan unau vialte hna le-tin nan kut kan tlaih hna. 3 Pathian kan Pa le Bawipa Jesuh Khrih nih vel le daihnak in pe ko hna seh. 4 Atu chan, chan ṭhalo chung hin kannih cu luatter awkah, Pathian kan Pa duhnak zulh in, Khrih cu kan sualnak caah aa pe. 5 Pathian cu zungzal donglo in sunparnak pek si ko seh! Amen. 6 Ka khuaruah nan har ko. Luklak ah Khrih velngeihnak in an autu hna kha nan hlawt i thawngṭha dang kha nan zuan. 7 A ngaingai ti ahcun, "thawngṭha dang," timi hi a um lo, asinain hitin ka chimnak cu, nan lung an tuaitamtu hna le Khrih thawngṭha kha thlen aa zuammi an um caah a si. 8 Kanmah kan si zongah, vancungmi a si zongah, kan in chimhmi hna thawngṭha he aa dangmi thawngṭha an chimtu hna cu, hell ah tla ko seh. 9 Hmasa zongah kan rak chim cang i atu zongah kan chim ṭhan: nan rak cohlan cangmi thawngṭha he aa dangmi thawngṭha an chimtu hna paoh cu hell ah tla ko seh! 10 Hiti ka chim tikah hin minung lungtlinnak kawl ning law cu ko cu ka lo maw? Cucu ka kawlmi a si lo. Pathian lungtlinnak tu kha ka duhmi cu a si. Zapi sinin thangṭhatnak kha hmuh kaa zuammi cu a si maw? Cucu a si ahcun, Khrih sal cu ka si hnga lo. 11 Ka u le ka nau hna, nan sin i ka chimmi thawngṭha kha minung serchommi a si lo ti kha chimh kan duh hna. 12 Cu thawngṭha cu minung sinin ka hmuhmi a si lo i minung nih an ka cawnpiakmi zong a si lo. Ka sinah a phuangtu cu Jesuh Khrih hrimhrim kha a si. 13 Judah biaknak ka rak ṭanh lioah khan, zeitindah ka umtuning a rak si kha nan theih cangmi a si ko, Pathian Khrihfabu kha ka rak hrem hna i hrawh awkah fak piin ka rak i zuam. 14 Judah phung ka zulhnak ah khan ka ṭhirual Judah mi kha tampi ka lonh hna. Anmah nakin kan pupa phung kha fak piin ka ṭanh deuh. 15 Sihmanhsehlaw Pathian nih a ka zaangfah caah, ka chuah hlan khan a ka thim i amah rian ṭuantu dingah khan a ka auh. Cun Jentail mi hna sinah Thawngṭha cu ka chim nakhnga, 16 a Fapa cu ka sin i a phuan tikah, ahohmanh ruahnak hal awkah ka fuh hna lo, 17 keimah hlan i lamkaltu a rak simi hna ton awk zongah khan Jerusalem ah ka va kal lo. Arabia ram tu ah khan ka kal zau i cuka cun Damaskas khua ah ka ra kir. 18 Kum thum hnuah Peter sinin thawngpang theih duh ah Jerusalem ah ka hung kal i amah sinah cun zarh hnih ka cam. 19 Kan Bawipa nau Jeim dah ti lo cu, lamkaltu dang ahohmanh kha ka chawn hna lo. 20 Ka ṭialmi hi biatak a si. Ka lih ka chim lo kha Pathian nih a hngalh. 21 Cu hnuah cun Siria ram le Silisia ram ah khan ka kal. 22 Cucaah cun Judea ram i a ummi Khrihfabu chungmi hna nih khan pumpak in an ka hngal lo. 23 Midang nih, "A rak kan hremtu nih khan atu cu hrawh a rak i zuammi phung kha a ṭanh i a chim lengmang," an ti lawng kha an theih i 24 keimah ruangah cun Pathian kha an thangṭhat.
1 Kum hleili hnuah Barnabas he Jerusalem ah kan kal ṭhan; Titas zong kan i kalpi. 2 Zeicahdah ka kal ti ahcun Pathian nih na kal awk a si tiah ka sinah a phuan caah a si. Hruaitu pawl he kanmah lawng kan i tonnak ah Jentail mi sin i thawngṭha bia ka chimnak kong kha ka chimh hna. Kan hnulei i ka rak tuahmi rian kha siseh, atu i ka tuahmi rian hi siseh, pakpalawng siter kha ka duh lo. 3 Ka hawi Titas cu Grik mi a si nain ahohmanh nih cuarpar tan an fial lo; 4 a cheu nan unau ka si ve aa titermi hna, kan bu chung i aa fon vemi hna bel nih i tan seh ti an duh. Hi hna hi kan bu chungah a thli in a rung lutmi an si i annih nih dothlat an duhmi cu Khrih Jesuh he kan i pehtlaihnak thawngin kan hmuhmi luatnak kong kha a si. Kannih cu sal i ser kha an kan duh. 5 Asinain thawngṭha kha nan ca i him tein chiah ka duh caah minit pakhat hmanh kan i teiter hna lo. 6 Hruaitu pawl nih khan zeihmanh ruahnak thar an kan pek khawhmi a um lo — hruaitu pawl ka ti hna hi hruaitu an sinak nih hin zeihmanh ka caah dannak a umter hlei lo caah a si; Pathian nih cun lenglei thil zoh in bia a thlek lo. 7 Cuti ruahnak pek khawh cu vun chim lo, Pathian nih Jentail mi hna sin i thawngṭha chim a ka fial kha a si tak ti tu ah an ti lehlam, Pathian nih Peter cu Judah mi hna sin i thawngṭha chim a fial bantuk khan. 8 Peter cu Pathian nih Judah mi hna sin lamkaltu ah a ser bantukin keimah zong Pathian ṭhawnnak nih Jentail mi hna sin lamkaltu ah a ka ser ve. 9 Hruaitu pawl Jeim, Peter le Johan nih khan Pathian nih hi rian a ka pek kha an hngalh i cucaah Barnabas le keimah kha kan kut an kan tlaih. Rianṭuan ṭi cio bantukin, kannih nih Jentail mi hna sin i rian ṭuan i annih nih Judah mi hna sin i rianṭuan kha kan hna a tla. 10 An kan halmi cu, an lak i a ummi sifak retheimi philhpiak lo lawng kha a si ko i cucu fak piin kan ṭuan lengmangmi hi a si. 11 Peter cu Antiok khua i a rat ah khan zapi hmaiah ka mawhchiat, zeicahtiah fiang tein a rak palh. 12 Jeim nih a hun thlahmi pawl an rat hlanah khan cun Peter cu Jentail unau pawl sinah khan rawl a ei lengmang ko. Sihmanhsehlaw an rat hnuah cun a ei duh ti lo, zeicahtiah Jentail mi cu cuarpar tan awk an si a timi pawl kha a ṭih hna. 13 Peter le Judah mi kan unau dang hna cu an i zuk i Barnabas hmanh kha an i zuhpi ve. 14 Thawngṭha biatak lam ding kha an zul ti lo ti ka hmuh tikah, an dihlak hmaiah Peter cu ka thawh i, "Nang cu Judah mi na si, sihmanhsehlaw Jentail mi bantukin na um, Judah mi um in na um lo. Cucaah zeitindah Jentail mi cu Judah mi bantukin nan um lai tiah na hnek khawh hna lai?" ka ti. 15 Kannih cu kan chuahkehnak in Judah mi kan si taktak, Jentail misual phun cu kan si taktak lo. 16 Asinain minung hi Pathian he an i remnak cu Jesuh Khrih an zumhnak thawngin a si i Nawlbia nih tuah u a timi tuahnak thawngin a si bal lo ti kha kan hngalh. Kannih zong, Nawlbia nih tuah u, a timi tuahnak thawngin si loin Khrih kan zumhnak thawngin Pathian he remnak kan hmu lai ti caah Jesuh Khrih kha kan zumh. Zeicahtiah Nawlbia nih tuah u, a ti mi tuahnak thawngin ahohmanh nih Pathian he i remnak an hmu lo. 17 Cu bantukin, Khrih he kan i pehtlaihnak thawngin Pathian he i rem awk kan i zuam tikah, Jentail mi tlukin misual kan rak si ve ti kha a lang — cu ti chimmi nih cun Khrih zong kha sualnak tuah ah aa tel ve a ti duhnak a si maw? Si hrimhrim hlah! 18 Ka ṭhehmi phung kha sak ṭhan ka timh ahcun, Nawlbia buartu ka si ti kha keimah lila nih ka langhter. 19 Asinain Nawlbia kong ti ahcun, kei cu a thimi ka si ko cang — Nawlbia nih khan a rak ka thah cang — cucu zeicahdah a si ti ahcun Pathian ca i ka nun khawh nakhnga caah a rak si. Kei cu Khrih he a vailam tahnak ah khan thah ka si cang 20 cucaah a nungmi cu keimah kha ka si ti lo, ka chung i a ummi Khrih tu hi a si deuh. Atu i ka nunmi nunning hi, a ka daw i ka ca i a nunnak a pemi Pathian Fapa zumhnak thawngin ka nung. 21 Pathian vel cu pakpalawng ah ka ser lai lo. Minung le Pathian i remnak cu Nawlbia thawngin a si ahcun, Khrih cu pakpalawng ah a thi tinak a si hnga.
1 Galati mi mihrut hna! Aho nih dah an in hamh hna? Jesuh Khrih vailam cung i a thihnak cu fiang tein kan in hmuhter ko ṭung hna! 2 Hi thil pakhat te hi ka chim hnek u, "Pathian Thlarau kha, Nawlbia nih tuah u timi nan tuahnak thawngin maw nan rak hmuh, asiloah thawngṭha nan theih le nan zumhnak thawngin dah nan hmuh?" 3 Zeitindah hi tluk lawmmam in nan hruh khawh ee! Nan i thawk ah khan Pathian Thlarau in nan i thawk; nan i lim leiah hin tah nanmah ṭhawnnak in maw i lim nan duh? 4 Thil nan rak hmuhtheihmi vialte kha pakpalawng maw an rak si kun? Sihlah! Nan caah santlai an rak si ko khah. 5 Pathian nih Thlarau an pek hna i nan lak i khuaruahharnak a tuah kha, Nawlbia nan zulh ruangah maw a si, asiloah, thawngṭha nan theih i nan zumh ruangah dah a si? 6 Abraham kong kha Cathiang nih, "Abraham nih Pathian a zumh i cu a zumhnak ruangah cun Pathian nih miding ah a cohlan," a ti bantuk kha nanmah kong zongah hin a si. 7 Cucaah cun Abraham tefa taktak cu zumhnak a ngeimi kha an si ti hi nan hngalh awk a si. 8 Pathian nih Jentail mi cu zumhnak thawngin amah he a remter hna lai ti kha Cathiang nih a rak chimchung cang. Cucaah Cathiang nih Thawngṭha cu Abraham kha a rak chimh chung cang i, "Nangmah thawng hin Pathian nih vawleicung mi vialte kha thluachuah a pek hna lai," a rak ti. 9 Abraham nih Pathian kha a rak zumh i thluachuahnak a hmuh; cu bantukin Pathian a zummi paoh cu Abraham bantukin thluachuah an hmu ve. 10 Nawlbia zulh aa bochanmi cu chiatserhnak tangah an um. Zeicahtiah Cathiang nih, "Nawlbia cauk chungah aa ṭialmi a dihlak in a zul zungzal lomi cu Pathian nih chiat a serh hna," a ti. 11 Atu cu, Nawlbia zulh thawngin ahohmanh nih Pathian he remnak an hmu kho lo ti kha a fiang; zeicahtiah Cathiang nih, "Zumhnak thawngin Pathian he aa remmi lawng an nung lai," a ti. 12 Sihmanhsehlaw Nawlbia le zumhnak cu an kalning aa dang ko; Cathiang nih, "Nawlbia nih tuah awk a si a timi paohpaoh a tuah dihmi cu, cu a tuahnak thawng cun a nung lai," a ti ve taktak. 13 Sihmanhsehlaw Nawlbia nih a chuahpimi chiatsernak chung khan Khrih nih a kan tlanh cang, cu a kan tlanhnak cu kan ca i chiatserhmi i a cannak thawng khan a si i chiatserhmi a hung i can cu, Cathiang nih, "Thingkung cung i thlaimi paoh cu Pathian chiatserhmi an si," a ti caah khan a si. 14 Hi thil vialte nih aa tinhmi cu, Pathian nih Abraham sinah a kammi thluachuahnak kha Khrih Jesuh thawngin Jentail mi sinah pek si seh ti kha a si i cucaah kannih zong nih zumhnak thawngin Pathian kamhmi Thlarau cu kan hmuh ve nakhnga caah a si. 15 Ka u le ka nau hna, nifate i kan ton lengmangmi thil pakhat tahchunhnak ah ka hman tuah lai: mi pahnih nih biakamnak an tuah tikah cu biakamnak cu pakhat lawng nih an hrawk kho in an chap kho lo. 16 Pathian nih bia a kamhmi cu Abraham le a tefa pakhat kha an si. Cathiang nih, mi tampi ti duhnak caah, "na tefa hna," tiin a ti lo. A timi cu, "na tefa," ti lawng a si i cucu mi pakhat a ti duhnak a si i cu mi pakhat cu Khrih kha a si. 17 Ka chim duhmi cu hihi a si: Pathian nih biakamnak cu a tuah i cu biakam cu zulh awkah bia aa kam. Cu hnu kum za li le sawm thum ah Nawlbia kha a hung um i cu nih cun biakamnak cu a hrawk kho lo; Pathian biakamhmi cu pakpalawng zongah a canter kho lo. 18 Zeicahtiah, Pathian, pekmi rothil cu Nawlbia thawngin a rat a si ahcun, cu a sullam cu Pathian pekmi rothil cu a biakam thawngin a si lo tinak a si hnga. Sihmanhsehlaw Pathian nih Abraham cu laksawng a pek kha, cu bia a kamh ca tu ah khan a si deuh. 19 A si ahcun, Nawlbia cu zei sullam ah dah pek a si kun? Zei hi dah palhnak a si ti langhtertu caah khan pek a si i cucu Pathian nih bia aa kammi Abraham tefa a phak hlantiang caah khan a si. Nawlbia cu vancungmi nih khan pek chin a si i a karlak ah lamkaltu minung pakhat kha a rak um. 20 Asinain mi cu pakhat lawng a si ahcun, karlak lamkaltu a herh lo, Pathian cu pakhat lawng a si. 21 A si ahcun Nawlbia cu Pathian biakam he an i ralchanh kun maw? Ralchanh hlah. Zeicahtiah minung hi nunnak a pe khotu nawlbia pek rak si seh law, minung nih hin nawlbia thawngin Pathian he remnak kha hmuh khawh a si hnga. 22 Sihmanhsehlaw nunnak pe khotu cu Nawlbia cu a si lo, Cathiang nih, vawleicung hi a dihlak in sual ṭhawnnak tangah a um, a ti; cucaah Jesuh Khrih zumhnak thawng lawngin kamhmi laksawng cu a zummi paoh kha pek an si lai. 23 Asinain zumhnak caan kha a phak hlan cu Nawlbia nih khan thongtla bantukin a kan hren, cucu zumhnak a langh hlantiang kha a si. 24 Cucaah Khrih a rat hlan cu Nawlbia nih khan a kan uk, Khrih a rat cu zumhnak thawngin Pathian he remnak kan hmuhnak hnga caah a si. 25 Atu cu zumhnak caan kha hika hi a phak cang caah Nawlbia nih a kan uk ti lo. 26 Khrih Jesuh pehtlaihnak thawngin Pathian fa nan dihlak in nan si cu zumhnak thawngin a si. 27 Khrih chungah tipil nan ing i Khrih nunnak in nan i thuam. 28 Cucaah Judah mi le Jentail mi, sal le luatmi, nu le pa karah zeihmanh thleidannak a um ti lo, Khrih Jesuh he nan i pehtlaihnak thawngin pakhat nan si dih cang. 29 Cucaah Khrih ta nan si ahcun Abraham tefa nan si i Pathian biakamning in rocotu nan si.
1 Ka chim duhmi cu hihi a si: rocotu ding kha ngakchia a si chung cu thil vialte a ngeitu si ko hmanh seh law sal bantukin tuah a si. 2 A pa nih a tinhpiakmi caan a phak hlan cu zohkhenhtu hna kut tangah khan a um i cu hna nih cun a thilri zong kha an zohkhenhpiak. 3 Cu bantukin kannih zong hi thlarau lei in nutling patling sinak kan phak hlan cu vawlei le van a uktu thlarau hna sal kan si. 4 Sihmanhsehlaw caan cu a hung phak tikah, Pathian nih A Fapa kha a run thlah. Nu chung khan a hung chuak i Judah mi Nawlbia tangah khan a um, 5 cucu Nawlbia tang i a ummi hna kha luatter awk le kannih kha Pathian fa i canter awk caah a si. 6 Pathian fa nan si caah khan Pathian nih, a Fapa Thlarau cu nan lung chungah a run thlah i cu Thlarau nih cun, "Ka Pa, ka Pa," tiin a au. 7 Cucaah sal nan si ti lo, fa nan si cang. Cun Pathian fa nan si cang caah Pathian thawngin rocotu zong nan si. 8 Hlanah cun Pathian kha nan rak hngal lo, cucaah Pathian a si lomi thil sal kha nan rak si. 9 Sihmanhsehlaw atu cu Pathian cu nan hngalh cang — atu cu Pathian nih an hngalh hna ka ti deuh awk tu a si — cucaah zeitindah kha a derthawmmi le san a tlai lomi thlarau hna leiah khan i mer ṭhan nan duh? Zeicahdah an sal si, i nolh ṭhan cu nan duh? 10 Ni thiang khun, thla thiang khun, caan thiang khun, kum thiang khun ti ulh kha nan hmang. 11 Nan ca i har lengmang in ka ṭuanmi vialte kha pakpalawng ah nan canter sual lai ti ka phang ko. 12 Ka u le ka nau hna, keimah bantuk kha si u, tiah kan nawl hna. Kei zong nanmah bantuk pei ka si ve cu. Ka cungah ṭhat lonak nan tuahmi zeihmanh a um lo. 13 Zei ruangah dah thawngṭha kha ka rak in chimh hna ti cu nan hngalh: ka zawt caah pei a si kha. 14 Sihmanhsehlaw zeirello in nan rak ka um lo i a dawnh zong nan rak ka dawn lo. Ka pumsa umtuning kha nan caah thil har a rak si nain Pathian vancungmi bantukin nan rak ka cohlan; Khrih Jesuh bantukin nan rak ka cohlan. 15 Nan rak i lawm tuk ko kha ta. Atu hi nan zeidah a ti? Si kho seh law cu, nan mitmu hmanh nan rak i khoih hnga i nan rak ka pek hnga. Cucu keimah hrimhrim nih ka chim ngam. 16 Atu cu biatak kan chimh hna ruangah nan ral ka si cang maw? 17 Midang hi nan caah an ṭang ngai ko, asinain an i tinhmi cu a ṭha lo; keimah le nanmah kha ṭhen i nanmah kha anmah lei lawng i ṭanter kha an duh. 18 Ṭan ngai hi, tinhmi a ṭhat ahcun a ṭha, nan sin i ka um lawngah si loin a zungzal in a ṭha. 19 Ka dawtmi ka fale hna, naunganfah nan caah ka ing ṭhan hoi; nan chung i Khrih sining a um hlan paoh cu ka ing zungzal ko lai. 20 Atute ah hin nan sinah hei um in nan cung i ka lungput hi thlen khawh hei si seh law ka hei duh dah! Nan kongah hin ka lungre a thei ko! 21 Nawlbia tang i um a duhmi kha, hi bia hi in hal hnik hna ning: Nawlbia nih a chimmi kha nan thei lo dahra? 22 Abraham nih fapa pahnih a ngeih hna i pakhat cu salnu nih a hrinpiakmi a si i pakhat cu a luatmi nu nih a hrinpiakmi a si, tiah aa ṭial. 23 Salnu nih a hrinpiakmi fapa cu hawi phungning cio ah hrinmi a si, sihmanhsehlaw a luatmi nu nih a hrinpiakmi cu Pathian biakamnak thawngin hrinmi a si. 24 Mah hihi tahchunhnak ah lak khawh a si lai: nu pahnih hi biakamnak pahnih an si. Biakamnak pakhat, Hagar kha, Sinai Tlang in a rami a si i a fale cu sal in hrinmi an si. 25 Hagar cu Arabia ram Sinai Tlang kha a si i atu Jerusalem le a chung i a ummi a fale vialte, sal sinak chung i khua a sami hna aiawhtu hi a si. 26 Sihmanhsehlaw vancung Jerusalem cu a luatmi nu kha a si i amah cu kan nu cu a si. 27 Zeicahtiah cathiang nih, "Fa a ngei bal lomi nu, i lawm tuah! Naunganfah a ing bal lomi nu, lunglawmhnak in au tuah! Zeicahtiah, kaltakmi nu nih, a va he khua a sa komi nu nakin fa tam deuh a ngeih hna lai," a ti. 28 Ka u le ka nau hna, Isak cu Pathian biakam thawngin Pathian fapa a si bantukin nannih zong Pathian biakam thawngin Pathian fa nan si ve. 29 Hawi phung kel in hrinmi fapa nih Pathian Thlarau thawngin hrin a simi fapa kha a serhsat bantukin atu zongah hin a si ve. 30 Sihmanhsehlaw Cathiang nih zeitindah a ti kha? "Sal nu le a fa kha ṭhawl hna, zeicahtiah salnu fapa nih a luatmi nu fapa he an pa ro kha i hrawm hlah seh," a ti a si lo mei? 31 Ka u le ka nau hna, kannih cu sal nu fa kha kan si lo, a luatmi nu fa kha kan si.
1 A luatmi kan si cang. Khrih nih a kan luatter cang. Cucaah fek tein dir u law sal ah khan i ser ṭhan ti hlah u. 2 Ka bia hi ngai u, Keimah Paul nih hihi kan chimh hna: Nan cuarpar tan khan nan i lunghmuih a si ahcun, Khrih cu nan caah zeihmanh a si lo tinak a si. 3 Cuarpar aa tanmi nih cun Nawlbia kha a ning piin a zulh lawlaw awk a si ti kha aho nan si hmanh ah hngalhter ṭhan kan duh hna. 4 Nawlbia zulhnak thawngin Pathian he remnak hmuh aa zuammi cu Khrih sinin nanmah le nanmah nan i ṭhen ko. Nannih cu Pathian vel leng i a ummi nan si ko. 5 Kannih kan i ruahchanmi cu Pathian nih kannih cu amah he a kan remter lai ti hi a si i cucu Pathian Thlarau nih zumhnak thawngin a tuahmi thil kannih nih ngangngan ngaiin kan hngahmi hi a si. 6 Khrih Jesuh he kan i pehtlaih ahcun cuarpartan cu kan caah sullam zeihmanh a ngei lo, tan lo zong zeihmanh a ngei hlei lo; biapi a simi cu, dawtnak in rian a ṭuanmi zumhnak kha a si. 7 Ṭha tein nan rak kal ko. Aho nih dah biatak zulh kha an in ngolter hna? 8 An ngoltertu hna cu nanmah an kotu hna Pathian kha cu a si hrimhrim lo. 9 "Thilnu tlawmte nih changvut nawnmi cu a thawhter," an ti tawn bang khan a si taktak hi ta. 10 Asinain nan kongah ka lung a hmun ko rih. Bawipa chung i kan i pehtlaihnak nih hin, ruahnak dang an ngei bal lai lo, tiah a ka zumhter i an tuaitamtu hna hi, aho a va si zongah, Pathian nih dan a tat ko lai. 11 Ka u le ka nau hna, cuarpartan hi a herh ko ti i ka chim rih a si ahcun, zeicahdah hremnak hi ka in lengmang kun? Cuticun rak chim ning law cu, Khrih vailam tahnak kong ka chimmi nih hin harnak zeihmanh a chuahter hnga lo. 12 An tuaitamtu hna nih hin a dongh tiang lawlaw in tuah hna seh law ka hei duh hnga dah — an til i dit lawlaw hna seh! 13 Ka u le ka nau hna, nannih cu luat dingin kawhmi nan si. Asinain cu luatnak cu nan pumsa duhnak ca i caan ṭha men ah khan hmang hlah u. Pakhat le pakhat kha dawtnak in nan rian tu i bawm u. 14 Zeicahtiah Nawlbia cu a ningpi in hi nawlbia pakhat, "Na innpa cu nangmah bantukin na dawt lai," timi ah hin aa fun dih. 15 Asinain saram bantukin nan um i pakhat le pakhat nan i seh nan i kaoh ahcun, i ralring tuah u, nan i ralrin lo ahcun pakhat le pakhat nan i hlo dih ko lai. 16 Ka chim duhmi cu hihi a si: Thlarau nih nan nunning kha lamhruai seh law nan minung sinak duhning kha zul hlah u. 17 Zeicahtiah kan minung sining nih a duhmi cu Thlarau nih a duhmi he khan aa ralchanh i Thlarau nih a duhmi cu kan minung sining nih a duhmi he khan aa ralchan. Annih pahnih cu ral an si, cu a sullam cu, tuah na duhmi kha na tuah kho lo, tinak a si. 18 Thlarau nih an hruai a si ahcun Nawlbia tangah na um lo. 19 Minung sining nih a tuah tawnmi cu a fiang ko: nu le pa sualnak tehna, a thurhnawmmi thil tehna, aa dawhcah lomi thil tehna, 20 siasal biak tehna le dawih le eih tehna hi an si. Pakhat le pakhat an i ral, an i do, an i nahchuah, an thin a hung anmah zawn cio lawng an ruat, an i ṭhen, 21 ziar an i ngeih, zu an ri, an au an khuang i cu bantuk thil a dang tampi kha an tuah lengmang hna. Hmasa ah ralrin bia ka rak in chimh cang hna bantuk khan atu ah kan chimh ṭhan hna: cu bantuk thil a tuahmi cu Pathian Pennak an hmu lai lo. 22 Sihmanhsehlaw Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, 23 toidornak le mah le mah i tei khawhnak tehna hi an si. Cu bantuk thil hna caah cun nawlbia zeihmanh a herh lo. 24 Cun Khrih Jesuh ta a simi nih cun a minung sinak kha tuah a duh tawnmi thil le a pumsa duhnak he khan a thah. 25 Thlarau nih nunnak a kan pek cang caah kan nunnak zong hi amah nih a uk awk a si. 26 Kan ruam a kai awk a si lo, Pakhat le pakhat kan thin kan i hunter awk a si lo, pakhat le pakhat kan i nahchuah awk a si lo.
1 Ka u le ka nau hna, pakhatkhat nih sualnak nan tuah sual tikah, a thlarau deuh pawl nih khan, lam dingah nan chiah ṭhan awk a si; cun cu ti nan tuah tikah nemnak tein nan tuah lai. Cun nanmah zong tukforhnak cu nan in sual venak hnga lo nan i ralring lai. 2 Pakhat le pakhat nan thilrit kha i chawng u law cuticun Khrih nawlbia kha nan zulh a si lai. 3 Ahohmanh nih, zeihmanh si set ṭung loin, pa ka si ve tiin aa ruah ahcun amah le amah aa hlen a si. 4 Kan rian ṭuanmi cu kanmah cio nih a ṭhat a chiat a cuaithlaining kan thiam awk a si; cucaah tuah awk aa tlakmi thil kan tuah tikah, midang nih a ṭha a ṭhalo ti hau loin, kan lung aa lawm kho lai. 5 Zeicahtiah kanmah le kan thil cio cu kanmahte nih kan i phorh awk a si. 6 Khrihfa phung cawnpiak a simipa nih khan, thil ṭha a hmuhmi vialte cu a saya kha a hrawm awk a si. 7 Nanmah le nanmah i hleng hlah u; ahohmanh nih Pathian cu an deh kho lo. Mi nih a tuhmi cu a zun ko lai. 8 A pumsa duhnak lo ah a tuh ahcun, thihnak kha a zun lai; Thlarau lo ah a tuh ahcun, Thlarau nih zungzal nunnak kha a pek lai. 9 Cucaah ṭhatnak tuah kha baa hlah u sih; kan ngol lo ahcun a theitlai kan zun caan kha a phan ve ko lai. 10 Cucaah a caan kan ngeih fate, mi cungah ṭhatnak tuah kha i zuam u si law zumhnak lei i kan rualchan a simi hna cungah khan i zuam khun u sih. 11 Hi ca kan kuatmi hna hi ka kut hrimhrim in ka ṭial i cafang lian pipi in ka ṭial hi rak zoh hmanh u. 12 Lenglei thil aa porhlawmi le aa uangthlarmi hna hi nanmah cuarpar tan hnek aan duhmi hna kha an si. Cu an duh cu Khrih vailamtahnak kongah hremnak an innak hnga lo ca men ah a si. 13 Cuarpar tannak phung a zulmi hna hmanh nih Nawlbia cu an zulh ve hlei ṭung lo; an cuarpar i tan hna seh ti an in duh hna cu, pumsa phung kan chimhmi hna hi an zul tiin i thangṭhat an duh caah pei a si ko cu. 14 Kei tu cu Bawipa Jesuh Khrih vailam lawng hi kaa porhlawtpi ko lai, zeicahtiah Khrih vailam thawng hin vawlei hi ka caah a thimi thil a si cang i kei zong hi vawlei caah cun a thimi ka si ve. 15 Cuarpartan le tan lo cu biapi a si lo, biapi a simi cu, ser tharmi si hi a si. 16 Hi phung an nunning ah a zulmi hna cu daihnak le zaangfahnak kha an cungah um ko seh — Pathian mi dihlak cungah cun um ko seh. 17 Ka bia donghnak ah: ahohmanh nih harnak ka pe ti hlah u. Ka pum cung i a ummi hmape nih hin Jesuh sal ka si cu a langhter ko. 18 Ka u le ka nau hna, kan Bawipa Jesuh Khrih vel cu nan dihlak cungah um ko seh. Amen.
1 Pathian duhnak in Khrih Jesuh lamkaltu a simi keimah Paul nih, Efesa khua i a ummi Pathian mi hna, Khrih Jesuh chung i nan nunnak ah zumh awk tlak in khua a sami hna, ca kan kuat hna. 2 Pathian kan Pa le Bawipa Jesuh Khrih nih vel le daihnak in pe ko hna seh. 3 Kan Bawipa Jesuh Khrih i a Pa le a Pathian cu lawm ko u sih. Zeicahtiah Khrih he kan i pehtlaihnak thawngin kannih cu vancung ram ah hin thlarau laksawng phun kip kha a kan pek. 4 Vawlei a ser hlan in Pathian nih kannih cu Khrih chung i amah ta si dingin a kan thim cang, cucaah a hmaiah a thiangmi le soi awk um lomi kan si awk a si. 5 Pathian nih cun kannih cu Jesuh Khrih thawngin a fa i cohlan awk kha a rak timh cangmi le a duhmi a si. 6 Pathian cu a sunglawimi a laksawng ruangah hin thang?hat ko u sih, a dawtmi a Fapa in a kan pekmi a laksawng caah hin thang?hat ko u sih. 7 Khrih thihnak nih kannih cu a kan luatter, cucu kan sualnak kha ngaihthiam kan si tinak a si. Pathian vel cu a va lianngan hringhran dah. 8 Cu tluk tam in a kan pekmi a vel cu a va lianngan hringhran dah! 9 Pathian nih a fimnak le a thil hmuh khawhnak in a rak i timhmi cu a hun tuah i Khrih thawngin tlinter a timhmi a khuakhannak a rak i thupmi kha kannih cu a kan hngalhter cang. 10 Caan a cut tikah Pathian nih tlinter a timhmi cu hihi a si: van i a ummi thil vialte le vawlei i a ummi thil vialte kha hmunkhat ah a pumh dih hna lai i Khrih cu an lu ah a ser lai. 11 Zeizong vialte hi Pathian khuakhanning le tinhning in an kal ko; Khrih he kan i pehtlaihnak thawngin Pathian nih amah mi si ding i a kan thim cu amah nih a rak i tinhmi a si ko i a hramthawk tein tuah awkah a rak i khiah ciami a si. 12 Cucaah Khrih chung i ruahchannak a bunh hmasa bik pawl kannih nih hin Pathian sunparnak cu thang?hat ko u sih. 13 Nannih zong cuticun nan si ve: khamhnak an phorhtu hna Thawng?ha biatak kha nan theih tikah Khrih kha nan zumh i Pathian nih a ta nan si hmelchunhnak cu nan cungah a khenh; cu hmelchunhnak cu bia an kamhmi hna Thlarau an pek hna hi a si. 14 Pathian nih a mi hna bia a kan kamhmi kha kan hmuh hrimhrim lai tinak aamahkhan cu Thlarau hi a si i Pathian nih a ta a simi hna cu luatnak tling a pek hna lai ti a kan hngalhtertu zong a si. A sunparnak cu thang?hat ko u sih! 15 Bawipa Jesuh nan zumhnak le Pathian mi hna nan dawtnak ka rak theih thawkte khan, 16 nanmah ruang i Pathian lawmh cu a ngol in ka ngol lo. Ka thlacamnak ah kan philh hna lo. 17 Kan Bawipa Jesuh Khrih i a Pathian, a liannganmi kan Pa cu, nanmah kha Thlarau pek awkah ka hal lengmang, thlarau nih cun an fimter hna lai i Pathian kha nan sinah a phuan lai i Pathian cu nan hngalh lai. 18 Zei ruahchannak hmuh awkah dah an kawh hna ti le, a mi a kamhmi hna a thluachuahnak khuaruahhar cu zeitluk in dah a tam i 19 a zummi hna chung i rian a ?uantu a ?hawnnak cu zeitluk in dah a ngan ti kha nan hngalh khawh nakhnga caah a ceunak cu nan hmuh khawhnak hnga, nan lung kha in hunpiak ko hna seh. Hi kan chung i a ummi ?hawnnak hi, 20 thihnak in Khrih a thawhtertu le vancung khua i Pathian orhlei kamah a ?huttertu Pathian ?hawnnak he khan aa khatmi a si. 21 Khika ah khan vancung uktu vialte hna le nawlngeitu vialte hna le ?hawnnak vialte hna le bawi vialte hna cungah Khrih cu uktu a si; hi vawlei le hmailei vawlei zongah khin Khrih cu ?hawnnak a ngeimi bawi vialte cung bawi a si. 22 Pathian nih zeizong vialte cu Khrih ke tangah khan a chiah dih hna i Khrih cu Khrihfabu lu ah a ser i zeizong vialte uktu Bawi ngan bik ah a chiah. 23 Khrihfabu hi Khrih pum cu a si, Khrih nih zeizong vialte kha a tlinter i amah Khrih hrimhrim a tlinnak cu a pum ah cun a si.
1 Hlanah cun nawl nan ngaih lo ruang le nan sual ruangah thlarau lei in nan rak thi. 2 Cu lioah cun vawleicung phunglam ?halo kha nan rak zul; van le vawlei kar i a ummi thlarau ?hawnnak uktu nawl kha nan rak zul; cu thlarau nih cun Pathian nawl a ngai lomi kha atu cu a uk hna. 3 A ngaingai ti ahcun, kan dihlak hin anmah bantuk cu kan rak si i kan i chuahkehpimi kan pumsa duhnak zulh khan khua kan rak sa i kan pum le kan lungthin duhnak he aa tlakmi paoh kha kan rak tuah. Midang cio bantukin kannih zong Pathian thinhunnak ing ding kan rak si. 4 Sihmanhsehlaw Pathian nih a kan zaangfahnak cu a tam tuk i a kan dawtnak cu a ngan tuk hringhran caah 5 a nawl kan ngaih lo ruang i thlarau lei in kan thih ko lioah khan Khrih sinah cun a kan nunter. Khamh nan sinak cu Pathian vel thawngin a si. 6 Khrih Jesuh he kan i pehtlaihnak thawngin vancung khua i amah sin i uktu si ve dingah, amah he cun a kan thawhter. 7 Khrih Jesuh thawngin a langmi a dawtnak chung i a ummi a vel cu zeitluk in dah a ngan ti kha a zungzal in hmu hna seh ti a kan duh caah, hi cu a tuah. 8 Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si. 9 Hi kongah hin nan i porhlawt khawhmi zeihmanh a um lo, zeicahtiah nanmah ?uannak thawngin nan hmuhmi a si lo. 10 Kannih cu Pathian kutchuak kan si i Pathian nih thil ?ha tuah dingah a rak kan tinh bantukin Khrih he kan i pehtlaihnak thawngin thil ?ha cu kan tuah khawhnak hnga a kan ser ?hanmi kan si. 11 Chuahkehnak lei in Jentail mi a simi hna, hlanah zei nan rak si kha i philh hlah u — nannih cu Judah mi nih cuarpartanlo an rak in ti hna, anmah cu cuarpartan an rak i ti; cuarpartan ti nih a sawh duhmi cu mi nih an pum cung i an tuahmi kha a si. 12 Kha lioah khan cun Khrih he nan rak i ?hen. Ramdang mi nan rak si i Pathian thimmi hna chungah khan nan rak i tel lo. Pathian nih a mi hna sinah a tuahmi biakamnak cungah bunhmi biakamhmi chungah khan tinvo zeihmanh nan rak ngei lo. Hi vawleicung ah hin ruahchannak ngei lo le Pathian ngei loin khua nan rak sa. 13 Sihmanhsehlaw atu cu Khrih Jesuh he nan i pehtlaihnak thawngin lamhlatpi i a rak um tawnmi kha Khrih thihnak nih lamnaite ah an chiah cang hna. 14 Judah mi le Jentail mi kha miphun phunkhat ah a ser hna thawngin Khrih nih kannih cu daihnak a kan pek. Anmah a ?hentu hna vampang, ral a siter pengtu hna kha, a pum hrimhrim in a chimh. 15 Judah Phung kha a nawlbia vialte le a phunglam vialte he khan a hrawh; cu ti a tuah cu, hi miphun pahnih hna chung hin amah he aa pehtlaimi miphun pakhat a thar ser i cuticun daihnak umter kha a duh caah a si. 16 Vailam cung i a thihnak in Khrih nih an i ralnak kha a hrawh; vailamtahnak cun cu miphun pahnih hna cu pum khat ah a fonh hna i Pathian sinah a kirpi ?han hna. 17 Cuticun Khrih cu a ra i mi vialte sinah Thawng?ha cu a chim — Pathian he aa hlatmi nannih Jentail mi zong an chimh hna i Pathian he aa naihmi nannih Judah mi zong an chimh hna. 18 Cucaah kan dihlak in, Judah mi he Jentail mi he, cu Thlarau pakhat thawng cun Pathian hmaika ah kan lut kho. 19 Cucaah nannih Jentail mi hna, ramdang mi le khual nan si ti lo; Pathian mi hna he cun laikhat nan si cang i Pathian innchungkhar chung mi nan si cang. 20 Nannih zong lamkaltu hna le profet hna nih a hram an rak bunhmi cung i sakmi inn nan si ve cang i a kil lung cu Khrih Jesuh kha a si. 21 Inn cu a ningpi in i ?hen liangluang loin hmunkhat ah a dirtertu cu amah kha a si i Bawipa biakinn tling ah a chuahcanhtu cu amah ?hiam?hiam kha a si. 22 Amah he nan i pehtlaihnak thawngin nannih zong hawi dang vialte he, Pathian nih a Thlarau in a umhnawhmi inn ah ser nan si cang.
1 Hi thil vialte hi ka lung chungah i chiah in, nanmah Jentail mi hna ruang i Khrih Jesuh ca thongtla a simi keimah Paul nih, Pathian sinah thla ka cam. 2 Nanmah ?hatnak dingah Pathian nih a vel thawngin hi rian hi ?uan a ka fial ti kha nan theih cang ?heo lai. 3 Pathian nih a thuhmi a khuakhannak cu ka sinah a phuan i a ka hngalhter. (Hi kong hi tawi tein nan sinah ka rak ?ial cang, 4 ka ?ialmi kha nan rel ahcun Khrih biathli ka hngalhnak kha nan hngalh khawh lai.) 5 Hi biathli hi hlanah cun mi kha theihter an rak si lo, sihmanhsehlaw atu cu Pathian nih a Thlarau in a lamkaltu mithiang hna le a profet mithiang hna sinah khan a phuan cang. 6 Cu biathli cu hihi a si: Thawng?ha thawngin Jentail mi hna nih Judah mi hna sinah khan Pathian thluachuahnak an hmuh ve cang; annih cu pum khat chung nge kha an si cang i Khrih Jesuh in Pathian nih biakamnak a tuahmi ah khan tinvo an ngei ve cang. 7 Thawng?ha rian ?uantu ka si hi Pathian laksawng a si i cu laksawng cu Pathian nih a ?hawnnak rian a ?uannak ah hin hmuh awk aa tlakmi ka si lo nain a ka pek. 8 Pathian mi hna lak i a hme bik nak hmanh in a hme deuhmi ka si ko nain, Khrih a rumnak a dong kho lomi Thawng?ha cu Jentail mi hna sinah chim awk le 9 Pathian nih a thli tein khua a rak khanmi ah khan zeitindah rian a ?uan ti kha, mi vialte hngalhternak rian cu Pathian nih a ka fial. Zeizong vialte Sertu Pathian nih cun kan hnulei chan chung vialte kha a biathli cu a rak thuh, 10 cu ti a rak thuh cu, khrihfabu thawng hin vancung khua uktu vanmi hna nih hin, Pathian fimnak a phunphun cu, atu caan ah hin hngal hna seh ti a duh caah a si. 11 Pathian nih a tuahmi hi, zungzal a rak i tinhmi ning khan a si i cucu kan Bawipa Jesuh Khrih thawngin a tlinter. 12 Amah he kan i pehtlaih caah le amah kan zumhnak thawngin Pathian umnak chungah ?ih lo tein luh ngamnak luatnak kan ngei. 13 Cucaah nan ca i harnak ka in caah hin nan lung dong hlah u, nanmah ca ?hatnak lawngte ah a si ko. 14 Hi ruangah hin kan Pa hmaiah khuk bil in ka kun tawn, 15 amah hi vawlei cung i khua a sami innchungkhar vialte nih an min an i laknak hram a si. 16 - 17 Nan chunglei minung sinak ah a ?hawngmi nan si nakhnga le zumhnak thawngin Khrih cu nan lungthin chungah khua a sak nakhnga, cun a sunparnak ro bukbau chungin A Thlarau thawngin ?hawnnak an pek hna nakhnga, Pathian cu ka nawl. Nan hrih nan hram cu dawtnak chungah fek tein nan bunh nakhnga le 18 Pathian mi vialte hna he Khrih dawtnak a kauhning le a sauning le a sanning le a thuhning kha nan hngalh khawh nakhnga, nan caah thla ka cam. 19 A dawtnak hi tling lak ngaingai cun hngalh khawh a si lo nain nan hngalh te ko lai. Cucaah Pathian tlinnak a tlingmi cun khat ko u. 20 Kan chungah rian a ?uantu a ?hawnnak thawngin kan hal khawh leng le kan ruah khawh lengin thil a tuah khotu Pathian cu, 21 khrihfabu chungah Khrih Jesuh thawngin, zungzal in zungzal tiang sunglawi ko seh! Amen.
1 Cucaah Bawipa rian ?uan ruang i thong i a tlami keimah nih, Pathian nih an auhnak hna he aa tlakmi nunning khan nung u tiah kan forh hna. 2 Toidornak lungthin ngei u, lungnem le lungsau in um zungzal u. Pakhat le pakhat i bawm u law cuticun nan i dawtnak kha langhter u. 3 Pum khat sinak, Thlarau nih an pekmi hna kha, ngeih peng awkah an funtu hna daihnak hri khan fek tein i ?em u. 4 Pathian nih an kawh hna tikah ruahchannak pakhat a um a ti bantukte khan pum cu pakhat lawng a um i Thlarau pakhat lawng a um. 5 Bawipa pakhat lawng a um, zumhnak pakhat lawng a um, tipil innak pakhat lawng a um; 6 Pathian cu pakhat lawng a si i amah cu mi vialte Pa, zeizong vialte Bawi, zeizong vialte chungah rian a ?uan i zeizong vialte chungah a ummi a si. 7 Khrih nih a kan pekmi laksawng tampi chungin kan dihlak in kan i tlakning cio in laksawng pek kan si. 8 Cucaah Cathiang nih, "A sannak bik hmun ah a hung kai tikah sal tlaihmi tampi kha aa kalpi hna; mi kha laksawng a pek hna," a timi kha ahmaan taktak. 9 "A hung kai," ti cu a sullam zeidah a si? A hmasa bik ah, "A rung ?um," tinak a si — cucu vawlei tangah khin a vung ?um tinak a si. 10 Cucaah cun a ?ummi cu vancung le van pin i a kaimi kha a si i cu a kai cu van le vawlei vialte nih amah in an khah dih kha i hngal hna seh, tinak caah a si. 11 "Mi kha laksawng a petu hna" cu amah kha a si; a cheu cu lamkaltu ah a ser hna i a cheu cu profet ah a ser hna, a cheu cu Thawng?ha chimtu ah a ser hna i a cheu cu pastor le cawnpiaktu ah a ser hna. 12 Khrih pum kha ?hanter awkah Pathian mi vialte cu hi bantukin Khrihfa rian?uan awkah a timh hna. 13 Cucaah kan zumhnak le Pathian Fapa kan hngalhnak i pakhat kan sinak ah khan kan i fon dih lai; nutling patling kan si lai i Khrih tlinnak a sanning taktak zong kha kan phan ve lai. 14 Midang a palhter tawntu hlenthiammi hna cawnpiaknak tilet le thlichia bantuk a simi nih a kenkip ah a choihmi ngakchia bantuk hna si ti loin, 15 kannih cu dawtnak lungthin in biatak kha kan chim deuh awk a si i kan lu a simi Khrih leiah khan a lam kip in kan ?han awk a si. 16 Khrih cu lu a si i amah cungah cun pum cu a ningpi in aa khing. Pum chung i a ummi hliah le cang vialte nih pum cu kekkuai loin an ?em an ?awn i pum chung i a ummi nge hna nih anmah le an tuah awk cio an rak tuahnak thawng khan, pum cu a ningpi in dawtnak in a ?hang. 17 Bawipa min in hi bia hi ka chim i ralrinnak kan pek hna: lawkihmi bantukin um ti hlah u. Annih cu an ruahnak kha pakpalawng a si. 18 An lungthin kha a mui. Annih cu zeihmanh an hngalh lo ca le an lung a ?hawn caah Pathian pekmi nunnak chungah khan an i tel kho lo. 19 Ningzah zeihmanh an hngal lo i sualnak kha an tuah lengmang, cun i sum loin aa dawhcah lomi thil phun zakip kha an tuah. 20 Khrih kong i nan theihmi cu cu bantuk cu an si lo. 21 Amah kong cu nan theih i amah zultu nan si bantukin Jesuh chung i a ummi biatak cu cawnpiak nan si. 22 Cucaah nan rak nun tawnning in an nuntertu hna nan mihring hlun kha hlaw u, cu mihring hlun cu pumsa duhnak hlenhmang nih a hrawh lengmang tawnmi kha a si. 23 Nan lungthin le nan ruahnak ah ser tharmi nan si awk a si. 24 Pathian he aa lo in sermi nan mihring thar kha i hruk u law cucu a dingmi le a thiangmi nunning i a langmi nunnak taktak kha a si. 25 Cucaah lihchim um ti hlah seh. Aho cio paoh nih a unau cu biatak chim seh, zeicahtiah kan dihlak in hmunkhat ah Khrih pum chung nge kan si cio. 26 Na thin a hun ahcun na thinhunnak kha sualnak chung i an luhpitu siter hlah; cun na thinhunnak cu ni tlakter hlah. 27 Khuachia cu caan ?ha pe hlah. 28 Fir a hmangmi kha fir ti hlah seh, amah ca i ding tein pawcawmnak caah le sifakmi bawmhnak caah rian?uan seh. 29 Bia nan i ruah tikah mi ca ?hat lonak bia hmang hlah u. Mi ca i san a tlaimi, a herhmi zawn i ?hatnak a chuahpitu le a theimi thluachuah vanluh a petu ding bia lawng kha hmang u. 30 Cun Pathian Thiang Thlarau kha a ngaihchiatter hlah u; zeicahtiah Pathian ta nan si hmelchunhnak le Pathian nih an luatter hna Ni cu a phan lai ti aamahkhan cu Thlarau cu a si. 31 Lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u. Huatnak lungthin ngei ti hlah u. 32 Pakhat le pakhat cungah zaangfahnak lungthin le nemnak lungthin ngei u law Pathian nih Khrih thawngin an ngaihthiam hna bantukin pakhat le pakhat i ngaithiam u.
1 Nannih cu Pathian dawtmi fa nan si caah amah bantuk kha si i zuam u. 2 Khrih nih a kan dawt i a nunnak kha kan caah a pek bantukin, kannih zong kan nunnak cu dawtnak nih a uk ve awk a si. Khrih nih kan ca i a pekmi a nunnak cu Pathian duhmi raithawinak le pekchanhmi rimhmui cu a si. 3 Nannih cu Pathian mi nan si caah nu le pa sualnak le dawhcah loin khuasaknak le hakkauhnak cu a chim hmanh nan chim awk a si lo. 4 Cun a thurhnawmmi holh le hruh bia le bia dawhcah lo zong kha nan hman awkah aa tlakmi an si lo. Pathian lawmhnak bia tu kha nan chim awk a si. 5 Hihi fiang tein i theih u: nu le pa sualnak a tuahmi le dawhcah loin khua a sami le a hak a kaumi cu Khrih Pennak chung le Pathian Pennak chungah covo zeihmanh an ngei lai lo (hakkauh hi siasal biak phun khat a si). 6 Ahohmanh pakpalawng bia in i hlenter hna hlah u; hi thil ruangah hin Pathian thinhunnak cu a nawl a ngai lomi hna cungah khan a tlung lai. 7 Cu bantuk mi cu a komh in kom hna hlah u. 8 Nanmah hrimhrim zong kha muihnak chungah khua nan rak sa, sihmanhsehlaw Bawipa mi nan si cang caah ceunak chungah nan um. Cucaah ceunak mi a simi bantukin nan um awk a si. 9 Zeicah ti ahcun ?hatnak a phunphun le dinnak a phunphun le biatak a phunphun a chuahtertu cu, ceunak cu a si. 10 Bawipa a lawmhtertu thil kha kawl i zuam u. 11 Santlai lomi thil, khuamui thil, mi nih an tuah tawnmi kha tuah ve hna hlah u. 12 (A thli in an tuahmi thil cu a chim hmanh chim ngam ding an si lo). 13 Zeizong vialte kha ceunak ah chuahpi an si tikah an sining taktak te kha a lang lai. 14 Fiang tein langhtermi cu ceunak ah cun an i cang. Cucaah, "Aa hngilhmi i hlau tuah, thihnak in tho tuah, Cun Khrih cu na cungah a ceu lai," an ti kha a si taktak. 15 Zeitindah kan nuncan a si ti kha ?ha tein i zoh u. Mihrut bantukin um hlah u, mifim bantukin um u. 16 Atu kan nikhua hi caan chia a si caah, caan ?ha nan hmuhmi paohpaoh kha ?ha tein hman i zuam u. 17 Mihrut si ti hlah u, Bawipa nih tuah hna seh ti an duhmi hna tu kha tuah i zuam u. 18 Zu ri hlah u, zu cu nanmah hrawktu lawnglawng a si ko, Thlarau tu khan khat deuh u. 19 Hla dawh in pakhat le pakhat i chawn u; Bawipa cu hla le aw dawh in nan lung taktak in thang?hat u. 20 Kan Bawipa Jesuh Khrih min in zeizong kip caah Pathian cu lawm u. 21 Khrih nan upat ruangah pakhat le pakhat i nawl thiam u. 22 Nupi hna, Bawipa tang i nan i dor bantukin nan vale tangah i dor u. 23 Khrih nih khrihfabu cungah nawl a ngeih bantukin vale zong nih an nupile cungah nawl an ngei ve. Khrih hrimhrim cu khrihfabu Khamhtu a si i khrihfabu cu a pum kha a si. 24 Cucaah khrihfabu nih Khrih tangah aa dor bantukin nupile zong nih nan vale tangah tling tein nan i dor awk a si. 25 Vale hna, Khrih nih khrihfabu cu a dawt i a nunnak a pek bantukin, nannih zong nih nan nupile kha nan dawt hna awk a si. 26 Khrihfabu cu ti in thiang tein a ?awl hnuah Pathian sinah a bia in a pek. 27 Cu ti a tuah cu khrihfabu kha i dawhte le thiangte le soi awk zeihmanh um lo le dawh lonak le sawngkornak zeihmanh um lo le tlin lonak dang zeihmanh um loin amah sin lila ah khan pek a duh caah a si. 28 Pa nih an nupile cu anmah pum an i dawt bantukin an dawt hna awk a si. A nupi a dawmipa cu amah le amah aa dawt a si ko. 29 (Ahohmanh nih mah pum kha an hua bal lo. Khrih nih khrihfabu kha a cawm a zoh a khenh bantukin, ahohmanh nih a pum cu a zoh a khenh i a cawm ve; 30 kannih cu a pum nge cu kan si). 31 Cathiang nih a ti bangin, "Hi ruangah hin pa nih a nu le a pa kha a kaltak hna lai i a nupi he khan an i komh lai i an pahnih in pum khat an si cang lai." 32 Hi Cathiang bia nih hin a langhtermi biatak a um i cucu Khrih le khrihfabu kong kha a si tiah ka hngalh. 33 Asinain nanmah kong zongah hman khawh a si ve: vale nih nan nupile cu nan pum nan i dawt bantukin nan dawt hna lai i nupile nih nan vale cu nan hmaizah hna lai.
1 Ngakchia hna, nan nule nan pa bia ngai hna u, cucu khrihfa rian a si i ahmaanmi thil zong a si caah nan tuah awk a si. 2 "Na nu le na pa upat hna," ti hi nawlbia hmasa bik a si i, 3 "cu ti na tuah ahcun na caah a ?ha lai i ram chungah saupi na nung lai," tiah chap chih a si. 4 Nu le pa hna, nan fale kha an thin hung seh tiin ti hna hlah u. Khrihfa ziaza le cawnpiaknak he tu khan ?hanter hna u. 5 Sal hna, nan bawile cu ther le phang bu tein an nawl ngai hna u; Bawi Khrih rian nan ?uan i lungthin tak tein nan ?uan bantuk khan, an nawl nan ngaih hna zongah cun lungthin tak tein ngai hna u. 6 An in zoh hna lio lawngah an lung tong dingin um hlah u, sihmanhsehlaw Khrih sal bantukin Pathian duhmi kha nan lungthin tak tein tuah u. 7 Cun rian nan ?uan tikah minung rian men kan ?uan ti loin, Bawipa rian ?uan bantukin thanuam tein ?uan u. 8 Bawipa nih mi vialte kha, sal an si zongah, miluat an si zongah, thil ?ha an tuahmi ruangah khan laksawng a pek cio hna lai, ti kha va hngal zungzal u. 9 Nannih bawi pawl, cu bantuk ?hiam?hiam in nan salle cungah khan um ve u, tlerh le khawnh kha hmang ti hlah u. Nanmah he nan salle he vancung i a ummi Bawi pakhat ta nan si kha hngal zungzal u, cu Bawi nih cun ahohmanh duhdanh loin bia a ceih hna ti kha philh hlah u. 10 A donghnak ah, Bawipa he nan i pehtlaihnak thawng le a ?hawnnak a nganmi thawngin nan thazang cu, ?hawnter chin ko u. 11 Khuachia hlennak kha nan doh khawh nakhnga Pathian nih an pekmi hna ralthuam vialte kha i hruk u. 12 Zeicahtiah kan dohmi hna cu minung kha si loin, vancung khua i a ummi thlarau sual ?hawnnak hna le uktu hna le nawl ngeitu hna le hi a muimi chan lianhngannak hna hi an si. 13 Cucaah atu hin Pathian ralthuam kha i hruk u. Cun ni ?halo kha a hung phanh tikah nan ral cu nan rak doh khawh lai i a donghnak tiang nan i tuk hnu zongah nan hmun ah cun fek tein nan dir kho lai. 14 Cucaah timhcia tein dir u: nan taisawm caah biatak kha fek tein i sawmh u; nan ?angphaw caah dinnak kha i benh u; 15 nan kedan caah daihnak Thawng?ha chim thathawhnak kha i danh u. 16 Zumhnak kha phaw caah i ken zungzal u law cu phaw cun Khuachia nih mei bantuk a simi thal in an kah hna tikah nan rak hmih khawh hna lai. 17 Cun luchin caah khamhnak kha i chinh u law Thlarau nih an pekmi hna vainam caah Pathian bia kha i lak u. 18 Hi vialte hi thlacam buin tuah u law Pathian kha bawmhnak hal u. Thlarau nih an hruai hna ningin zeitik caan paoh ah thlacam u. Hi caah timhcia tein um zungzal u law nan hnabei zeitikhmanh ah dong hlah u; Pathian mi hna caah thlacam zungzal u. 19 Cun thla rak ka campiak ve u, bia ka chim tikah Pathian nih chim awk bia a ka pek nakhnga le ral?ha in ka chim nakhnga le thawng?ha biathli cu ka langhter khawh nakhnga, ka caah thla rak cam u. 20 Cu thawng?ha lamkaltu cu — thir cikcin he ka si. Cu kong ka chim tikah ka ral a ?hat nakhnga thla rak cam u. 21 Taikhikas, kan dawtmi kan nau le Bawipa rian ah zumh awk tlak a simi nih ka konglam kha a dihlak in an chimh hna lai i ka ningcang kha nan rak theih lai. 22 Kan umtu ningcang kha theih nan duh ?heo lai ka ti caah nan sin i ka rak thlah hi a si i amah bia nih cun lung ?hawnnak an pek hna lai tiah ka zumh. 23 Daihnak le dawtnak cu zumhnak he, Bawipa Jesuh Khrih i a Pa le a Pathian nih in pe ko hna seh. 24 A thi kho lomi dawtnak in kan Bawipa Jesuh Khrih a dawmi nan dihlak cungah Pathian vel cu um ko seh.
1 Khrih Jesuh sal Paul le Timote nih, Filipi khua i a ummi Pathian mi nan dihlak, Khrih Jesuh a zummi hna cu, nan pastor hna le Khrihfa upa hna he, ca kan in kuat hna. 2 Pathian kan Pa le Bawipa Jesuh Khrih nih vel le daihnak in pe ko hna seh. 3 Nan kong ka ruah fate, nan dihlak ruangah ka Pathian cu ka lawmh zungzal; 4 cun nan ca i thla ka cam fate lunglawmhnak in ka cam, 5 zeicahtiah a hramthawk tein nihin ni tiang, hi Thawngṭha rian ka ṭuannak ah hin nan ka bawmh zungzal. 6 Cucaah cun, nan chungah hi rian ṭha a thawktu Pathian nih, Khrih Jesuh Ni ah hi rian cu a lim tiangin, a ṭuan zungzal lai. 7 Ka hnakkar ah nan i tenh zungzal ko. Hi bantukin nan cungah lungthin ka ngeih hi ka ngeih hrim awk a si ko, zeicahtiah nan ka dawt tuk hringhran i thong i ka tlak ah siseh, leng i ka luat ah siseh, Thawngṭha kha ahmaan i biatak a si tiin ka chimnak rian ah khan nan ka bawmh zungzal. 8 Khrih Jesuh lungthin chungin a chuakmi ngaihnak in kan ngai hna, hi ti ka ti tikah hin ka lih a si lo ti cu Pathian nih a hngalh. 9 Nan ca i thla ka cam tawnmi cu, nan dawtnak ngeihmi cu hngalhnak ahmaanmi le a chia a ṭha thleidan khawhnak fimnak he ṭhang seh law, 10 cuticun a ṭha bik i thim awk kha nan hngalh lai, ti hi a si. Cun thurhhnawmhnak vialte le mawhchiatnak in Khrih Ni ah cun nan luat lai. 11 Jesuh Khrih lawng nih a kan pek khawhmi ziaza ṭha taktak in nan nunnak cu a khat lai i cucu Pathian sunparnak le thangṭhatnak caah a si lai. 12 Ka u le ka nau hna, ka cung i thil a tlungmi kha Thawngṭha karhtertu a si lehlam ti kha hngalhter kan duh hna. 13 Kha ti ka cung i thil a tlungmi ruangah khan siangpahrang inn a cawngtu vialte hna le a dang vialte hna zong nih Khrih sal ka si ruang i thong tlaknak ka in hi an hngalh. 14 Cun thong ka tlaknak nih hin kan unau pawl a tam deuh kha Bawipa an zumhnak ah lungfehnak a pek hna i cucaah an ral a ṭha chinchin i ṭih lo tein Thawngṭha bia kha an chim. 15 A cheu cu nahchuahnak an ngeih ca le mi he i al duhnak lungthin an ngeih ruangah Thawngṭha bia a chimmi an si taktak, sihmanhsehlaw a cheu cu lungthin ṭha te he a chimmi an si. 16 Pathian nih Thawngṭha ṭanh awk rian cu a ka thiah kha an hngalh caah, cu bantuk lungthin thiangte he a chimmi hna nih cun, keimah an ka dawtnak lungthin chung khan an chimmi bia cu an chim. 17 Sihmanhsehlaw a dang hna nih khan cun, keimah entai ruangah lungthin thianglo in Khrih kong kha an chim i thong i a um chungah hin harnak nih chuahhnawh chin lengmang seh ti duhnak in an chim. 18 Zeihmanh a poi lo! Khrih kong chim a si paoh ahcun kaa lawm ko — tinhmi ṭha in a si zongah, tinhmi chia in a si zongah — kaa lawm lengmang ko lai. 19 Zeicah ti ahcun, nan thlacamnak thawng le Jesuh Khrih sinin a rami thlarau bawmhnak thawngin luatter ka si lai, ti kha ka hngalh. 20 Ka duhnak ngan bik le si kho seh ti ka duh bikmi cu, ka rian hi a tlam tlinh kho ning ti hi a si i a zungzal in, cun atu thengte chinchin ah hin, ka nun zongah ka thih zongah, ralṭhatnak in khah i ka pum hrimhrim in Khrih cu upatnak pek kha a si. 21 Nunnak hi ka caah zeidah a si? Kei ka caah cun nunnak cu Khrih a si ko. Cucaah thihnak nih hin a ṭha deuh chinchinmi thil hmanh a chuahpi lai. 22 Asinain ka nun ko rih i cu ka nun ruang i thil ṭha tam deuh ka tuah khawh ding a si ahcun, a zei cu dik kaa thim deuh hnga, ka hngal lo. 23 Thil pahnih karlak ah kaa tenh: hi nunnak hi kaltak i Khrih he um cu ka duh hringhran, cucu a ṭha deuh suaumaumi a si; 24 asinain ka nun rih cu nanmah ruangah a herh deuh rih fawn. 25 Cucu nan caah a ṭha deuh ti kha fiang tein ka hngalh caah nung ko rih ning. Zumhnak i nan ṭhannak le nan i lawmhnak kha chap awkah nan sinah ka nung ko rih lai. 26 Cucaah nan sin i ka um ṭhan tikah, keimah ruang i Khrih Jesuh chung i nan i lawmhnak kha a karh chinchin lai. 27 A biapimi cu hi tu hi a si: Khrih Thawngṭha nih si hna seh ti an duhmi hna kha nan nuncan a si awk a si. Cucaah kan hmuh khawh hna ah siseh, kan hmuh khawh hna lo ah siseh, tinhmi pakhat he fek tein nan dir i Thawngṭha zumhnak ah hmunkhat i ral a do ṭimi nan si kha theih ka duhmi cu a si. 28 Nan ral kha ṭih hna hlah u; ralṭha ngaiin um zungzal u law cu nih cun annih an sungh i nannih teitu nan si lai kha a langhter lai — teinak petu cu Pathian a si. 29 Khrih ca rianṭuan thiah nan si tikah, a zumh lei lawng hi si loin a ca i temhinnak hmuh ding zong hi a si chih. 30 Cucaah i dohnak chungah hin ka sinah nan i tel ve kho lai; hi i dohnak cu, hlan i ka rak dohmi nan rak hmuh cangmi le atu zong i ka doh lengmangmi nan rak theihmi ṭhiamṭhiam hi a si ko.
1 Khrih chung i nan nunnak nih khan an ṭhawnter hna maw? A dawtnak nih khan nan hna an ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zaangfah maw? 2 Kan fial duhmi hna cu hihi a si: lungthin ah i khat u, pakhat le pakhat i daw u, lungrual tein um u law kaa lawmhnak hi tlinter u. 3 Pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u. 4 Cun midang duhning kha hmuh thiam i zuam u law nanmah duhnak lawng kha ruat hlah u. 5 Nan lungput cu Khrih nih a rak ngeihmi lungput kha si seh; cucu hihi a si: 6 Pathian sinak kha a ngeih zungzalmi a si ko nain hramhram in Pathian tluk si awk kha cuh awkah a rel lo. 7 Amah lungtho te tu in cu vial cu a hlawt dih i sal sinak tu kha aa lak; Minung bantuk ah a cang i minung mui in a lang; 8 Mi toiah aa dor i nawlngaihnak lam kha thih tiangin a zulh— vailam cung thihnak kha. 9 Hi ruangah hin cunglei a sannak bik hmun ah khin Pathian nih a cawi i min vialte lak i min cungnung bik kha a pek; 10 Cucaah Jesuh min upatnak caah cun vancung i a ummi vialte nih si hna seh, vawlei i a ummi vialte nih si hna seh, vawlei tang i a ummi vialte nih si hna seh, an khuk an i bil lai i 11 Pathian kan Pa sunparnak caah cun lei vialte nih Jesuh cu Bawipa a si, an ti lai. 12 Cucaah ka dawtmi ka hawile hna, nan sin ka um i ka bia nan ngaih zungzal bantuk khan lamhlat i ka um zongah hin ka nawl ngai chinchin ko u ti kan duh hna. Nan khamhnak a tlin khawh nakhnga, ther le phang lengmang in ṭuan ko u. 13 Pathian tinhmi kha nan zulh khawh nakhnga le cu tuah duhnak lungthin nan ngeih nakhnga, Pathian cu nan chungah rian a ṭuan zungzal ko. 14 Zei rian nan ṭuan hmanh ah, phunzai lengmang lo le bia i al lengmang loin ṭuan u. 15 Hrokhrawlnak le ṭhat lonak in a khatmi chan ah hin sualnak ngei lo le a thiangmi si u law Pathian fale bantukin nung u. Nunnak bia nan pek hnanak ah hin 16 an lakah arfi bangin ceu u. Cu ti nan si ahcun Khrih Ni ah nanmah ruangah ka hmai a hngal ngaingai lai i ka ṭuanmi vialte le kaa zuammi vialte kha pakpalawng an si lo ti kha a lang lai. 17 Ka nunnak thisen hi nan zumhnak nih Pathian a pekmi raithawinak sa cungah toih a si hmanh ah cucu ka lawmhmi a si ko lai i cu kaa lawmhnak cu nan dihlak in kan hrawm hna. 18 Cu bantuk ṭhiamṭhiam in nannih zong nan i lawmh awk a si i nan i lawmhnak cu nan ka hrawm ve awk a si. 19 Nan thawngpang nih lungṭhatnak a ka pek lai ti ruahchannak ka ngeih caah Timote kha nan sinah tuan i ratter kha a si kho lai tiah Bawi Jesuh cu ka zumh ko. 20 Amah lawnglawng hi keimah lungthin bantuk a ngei i nan zawn an ruat taktak mi hna cu a si. 21 Midang cu anmah rian lawng kha an ruat cio i Jesuh Khrih kong kha an ruat lo. 22 Cu bantuk mi a si taktak ti cu nanmah hrimhrim nih nan hngalh ko i zeitindah keimah le amah cu pa le fa bantukin Thawngṭha rian kan ṭuan ti kha nan hmuh. 23 Zeitindah ka konglam ah thil umtuning a si lai ti kha a fian cangka, nan sinah ka rak thlah lai i 24 keimah hrimhrim zong tuan ah nan sinah ka ra kho lai tiah Bawipa kha ka bochan. 25 Cun kan nau Epafroditas hi nan sin i rak thlah a herh tiah ka ruah, amah cu ka ṭuannak i a ṭuan vemi, ral ka dohnak i a do vemi a si i keimah bawmh awkah nan hun thlahmi a si. 26 Amah nih an ngai ngaingai hna i a zaw ti nan rak theih caah khan a lung a ṭha lo. 27 A zaw taktak i a thih zong a thi dengmang, sihmanhsehlaw Pathian nih a zaangfah, amah lawng kha a zaangfah si loin keimah hrimhrim zong kha a ka zaangfah i ka cung i ngaihchiatnak ngan chinchin a tlung dingmi khan a ka luatter. 28 Cucaah nan sin i hun kuat cu ka duh chinchin i nan hmuh tikah nan i lawm lai i ka ngaihchiatnak kha a lo lai. 29 Cucaah Bawipa chung i unau pakhat bantukin lunglawmhnak in rak cohlang u. Amah bantuk mi kha hmaizah hna u; 30 nanmah nih nan ka pek khawh lomi bawmhnak kha keimah cu hung pek awkah Khrih rian caah cun thih le thih ti in a ṭuan i a nunnak zong a sung dengmang.
1 A donghnak ah, ka u le ka nau hna, Bawipa ah cun i lawm ko u. Hmasa i ka rak ṭial cangmi nolh ṭhan kha ka zeeng lo i nanmah an humhaktu hna a si. 2 Thil ṭhalo a tuahmi hna kha i ralring hna u, nan cuarpar nan i tan awk a si a ti pengmi uico hna kha i ralring hna u. 3 Cuarpartan taktakmi cu anmah kha si loin, kanmah hi pei kan si cu; Pathian Thlarau thawngin Pathian a bia i Khrih Jesuh he aa pehtlaimi nunnak ah aa lawm i lenglei phunglam aa bochan lomi hi pei kan si cu. 4 A ngaingai ti ahcun cu bantuk thil hna aa bochan khomi ka si ve ko. Lenglei phunglam kaa bochan khawh a timi an um ahcun, cu bantuk ti khawhnak cu tam deuh chinchin ka ngei: 5 zarh khat ka si ah cuarpartan ka si, chuahkehnak lei in Israel mi, Benjamin phun, Hebru mithiang ka si; Judah mi Nawlbia zulhnak leiah Farasi ka si i 6 ka ṭan tuk leiah khrihfabu kha ka hrem. Nawlbia chung thil zulh in din ti ahcun soi awk um lo ka si. 7 Sihmanhsehlaw cu thil vialte, ka ca i miaknak ah rel khawhmi hna cu, Khrih ruangah sungh ah ka rel dih hna. 8 Cu lawng cu an si lo, a dang vialte zong kha sungh cikcek ah ka rel hna, cu thil hna nakin a sung deuh tukmi ka Bawipa Khrih Jesuh hngalhnak ruangah cun sungh cikcek ah ka rel hna. Khrih cu ka co khawh nakhnga le amah he cun kan i pehtlaih khawh nakhnga, Amah ruangah cun zeizong vialte hi ka hlonh dih hna, an dihlak in hnawmtam ah ka rel hna. 9 Keimah dinnak timi, Nawlbia zulhnak thawngin hmuhmi phun kha, ka ngei ti lo, atu cu Khrih zumhnak thawngin pekmi dinnak, Pathian sinin a ra i zumhnak chungah aa bunhmi dinnak lawng kha ka ngei cang. 10 Ka duhmi cu amah Khrih hngalh le a thawhṭhan ṭhawnnak hmuh ve le temhinnak a inmi in ve le amah thih bantukin thih ve lawng hi a si cang, 11 cun kaa ruahchanmi cu thihnak in nunnak ah thawhter ka si lai. 12 Hi thil ah hin ka tlam a tling cang ti a si lo i ka tling cang ti zong a si fawn lo. Sihmanhsehlaw a ka ngeitu cu Khrih kha a si cang caah cu thil cu ka ta a si khawh nakhnga kaa zuam lengmang. 13 Ka u le ka nau hna, cu thil cu ka phan cang tiah ka ruat hrimhrim lo; sihmanhsehlaw thil pakhat ka tuahmi cu, hnulei thil kha philh i hmailei thil banh i zuam kha a si. 14 Cucaah kawltung leiah cun laksawng hmuh awkah khan ka tli i cu laksawng cu Pathian nih Khrih Jesuh thawngin cunglei nunnak i a kan kawh hi a si. 15 Kannih thlarau lei in nutling patling a si cangmi hna nih cun, hitihin kan lungputning cu a si awk a si. Asinain ruahning phun dang a ngeimi nan um ahcun, Pathian nih cucu an fianterpiak ko hna lai. 16 A zei a si hmanh ah, atu tiang kan zulhmi phung ningin hmailei ah kal ko u sih. 17 Ka u le ka nau hna, ka nawl cawn hi i zuam ko u. Zohchun awk ṭha nan caah kan in chiahpiakmi hna; a zulmi kha i zohchunh hna u. 18 Hihi hlanah voi tampi kan chimh cang hna i atu ah mitthli he ka nolh rih, mi tampi cu an nuncan nih Khrih vailamtahnak ral ah a canter hna. 19 Annih cu hell ah an tla ko lai, zeicahtiah an Pathian cu an pumsa duhnak kha an si ko i ningzah awk a simi thil kha an i porhlaw i hi vawlei cung thil lawnglawng kha an ruat. 20 Sihmanhsehlaw kannih cu vancung ram mi kan si i kan Khamhtu Bawipa Jesuh Khrih vancung in a rat lai kha ngangngan ngaiin kan hngak ko. 21 A der i a thi khomi kan pum cu a sunglawimi amah pum bantuk ah khan a kan thlen lai i cu tuahnak ah cun zeizong vialte amah uknak tang i a chiah hnanak ṭhawnnak kha a hman lai.
1 Cucaah cun ka dawt i ka ngaihmi ka unaule hna, Bawipa chung i nan nunnak ah khan, cu bantuk cun fek tein dir ko u, nannih cu kaa lawmhnak le ka suiluchin nan si, ka dawtle hna. 2 Euodia le Sintikhe, zaangfahnak in kan nawl hna, Bawipa chungah unau bantuk tein lungkhat in um i zuam u. 3 Cun ka ṭuanhawi, nangmah zong, kha nu hna kha rak bawm hna ti kan duh. Zeicahtiah Klement le ka ṭuanhawi dang vialte, nunnak cauk chungah an min aa ṭialmi vialte he, Thawngṭha karhter kha fak piin an ka bawmh. 4 Bawipa chung i nan nunnak ah khan i lawm zungzal ko u ti kan duh hna. I lawm ko u, tiah ka nolh ṭhan rih ko lai. 5 Mi vialte sinah nemnak tein va um u. Bawipa cu tuan ah a ra lai. 6 Zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. 7 Cun Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai. 8 A donghnak ah ka u le ka nau hna, nan lungthin kha a ṭha le thangṭhat awk a tlakmi thil in khahter hna u: a taktak a simi thil, a sunglawimi thil, a hmaanmi thil, aa dawhmi thil le upat awk a tlakmi thil in khahter hna u. 9 Keimah sinin nan hngalhmi le nan hmuhmi kha tuah i zuam hna u, ka chimmi nan theihmi si hna seh, ka tuahmi nan hmuhmi si hna seh, tuah i zuam hna u. Daihnak a kan petu Pathian nih cun an umpi hna lai. 10 Ka zawn nan ka ruahnak kha nan hun parter ṭhan caah Bawipa chungah hin kaa lawm hringhran. Ka zawnruah kha nan rak ngol ka ti duhnak a si lo, langhternak caan nan rak ngeih lo ca lawnglawng ah khan a rak si. 11 Cun cu pinah, an ka hramkau lo, ti ruahnak ka ngeih caah hihi ka chimmi a si fawn lo, zeicahtiah ka ngeihmi paoh ah lungsi tein um ding kha ka thiam cang. 12 Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang. 13 Ṭhawnnak a ka petu Khrih thawngin thil zeipaoh ka tuah khawh ko hna. 14 Asinain harnak ka tonmi ah nan ka bawmh caah kaa lawm ngaingai. 15 Nannih Filipi khuami nih nan hngalh ko kha ta, Thawngṭha ka rak chim ka hrawng i Masidonia ram in ka kal ah khan a rak si; nanmah lawnglawng kha bawmhnak a ka petu khrihfabu nan rak si; nanmah lawnglawng kha ka sunghnak siseh, ka miaknak siseh a ka hrawmpitu nan si. 16 Thesalonika khua i bawmhnak ka herh ah khan voi khatnak tam bawmhnak nan ka kuat. 17 Nan laksawng hmuh ka duh lawng cu a si lo, nan cazin zongah miaknak i ṭial chap ve seh ti ka duh. 18 Cucaah hi ca kan kuatmi hna hi, bawmhnak nan ka kuatmi vialte ka hmuh dih hna tinak ca a si — kaa zat leng tiangin nan ka kuat. Epafroditas nih nan laksawng cu a rak ka phorh i ka herhmi vialte cu ka ngei dih ko cang. Hi nan laksawng hi Pathian nih a duh i a cohlanmi raithawinak, rimhmui pekchanhmi bantuk an si. 19 Cun Khrih Jesuh chungah zeizong vialte tlamtling tein a ngeimi ka Pathian nih nan herhmi vialte cu an pek hna lai. 20 Kan Pa Pathian cu zungzal in thangṭhat si ko seh! Amen. 21 Khrih Jesuh ta a simi Pathian mi kha an dihlak in an kut rak ka tlaihpiak hna u. Ka sin i a ummi u le nau hna nih nan kut an in tlaih hna. 22 Siangpahrang inn cawngtu pawl le hika i a ummi Pathian mi vialte hna zong nih nan kut an in tlaih hna. 23 Bawipa Jesuh Khrih vel cu nan dihlak cungah um ko seh.
1 Kolose khua i a um Pathian mi, Khrih chungah zumh awk tlak a simi kan u le kan nau hna, 2 Pathian duhnak in Khrih Jesuh lamkaltu a simi keimah Paul le kan nau Timote nih ca kan in kuat hna. Pathian kan Pa nih vel le daihnak in pe ko hna seh. 3 Nan ca i thla kan cam tikah, kan Bawipa Jesuh Khrih i a Pa kan Pathian sinah lawmhnak bia kan chim zungzal. 4 Zeicahtiah Khrih Jesuh nan zumhnak le Pathian mi nan dawtnak hna kong kha kan rak theih. 5 Biahmaan taktak, Thawngṭha Bia kha, nan sin a phak terte ah khan, ruahchannak zeidah an pek hna ti cu nanmah nih nan hngalh. Cuticun nan zumhnak le dawtnak nan ngeihmi cu vancung i nan ca i chiahmi ruahchannak cungah an hram cu a dir. 6 Thawngṭha nih hin Pathian vel nan theih kate le cucu zeidah a si taktak ti nan hngalh ri in nan cungah rian a ṭuan bantuk khan, vawlei cung dihlak zongah a karh i thluachuahnak kha a pek hna. 7 Cucu Epafras sin khan nan theih; amah cu kan rianṭuanhawi, kanmah aiawh in Khrih ca i rian a ṭuanmi, zumh awk tlak ngaimi a si. 8 Thlarau nih an pekmi hna dawtnak kong kha a kan chimh. 9 Nan kong kan theih ri in nan caah thla kan cam lengmang. Pathian nih nannih cu amah hngalhnak le a Thlarau nih an pekmi hna fimnak le hngalhnak in in khahter hna seh tiah Pathian cu kan nawl. 10 Cuticun Bawipa duhning in nan nung kho lai i amah duhnak kha nan tuah zungzal khawh lai. Thil ṭha tuahnak kip ah nan nunning cu zumh awk tlak a si lai i Pathian nan hngalhnak ah khan nan ṭhang lai. 11 Zeizong vialte kha lungsau thinfual in nan in khawh nakhnga, amah thazang chungin a chuakmi thazang nih in ṭhawnter ko hna seh. 12 Cun ceunak ram chungah Pathian nih a mi hna ca i a chiahmi thil i hrawm ve awkah aa tlak dingin an sertu hna kan Pa cu, lawmhnak he thangṭhat ko u. 13 Zeicahtiah amah nih cun muihnak ṭhawnnak chung khan a kan chuah i a dawtmi a Fapa pennak chungah khan him tein a kan luhpi i 14 a Fapa thawng cun luatnak kan hmu i kan sualnak cu ngaihthiam kan si. 15 Khrih cu hmuh khawh lomi Pathian mui a si. Khrih cu Pathian fater, sermi thil vialte hna nakin a cungnung deuhmi a si. 16 Pathian nih Khrih thawng cun van le vawlei i a ummi thil vialte kha a ser hna, hmuh khawhmi thil si hna seh, hmuh khawh lomi thil si hna seh, amah thawng cun a ser hna; cun nawlngeitu thlarau hna le uknak thlarau hna le ṭhawnnak thlarau hna zong kha amah thawng cun a ser hna. Pathian nih vanle vawlei hi a dihlak in Khrih thawng cun a ser hna i Khrih caah cun a ser hna. 17 Zeizong vialte hlanah a rak um cang i amah nih cun zeizong vialte hi i ṭhenṭhek dih loin a funtom dih hna. 18 Khrih cu a pum a simi Khrihfabu lu kha a si; Khrih cu fater, thihnak in thawhter hmasa bikmi kha a si, thihnak in thawhter a si cu zeizong vialte ah hin pakhatnak a si zungzal nakhnga caah a si. 19 Fapa nih Pathian sinak tlamtling tein a chungah a ngeih cu Pathian biakhiahnak thawngin a si. 20 Cucaah a Fapa thawng cun Pathian nih van le vawlei cu a dihlak in amah sin i kirter ṭhan kha a timh. Pathian nih a Fapa vailamtahnak cung i a thihnak thawng khan remnak a ser i cuticun van le vawlei i a ummi thil vialte kha amah sinah cun a kirpi ṭhan hna. 21 Hlan ah cun thil ṭhalo nan tuahmi le nan ruahmi ruangah khan Pathian he nan rak i hlat i a ral ah nan rak i ser. 22 Sihmanhsehlaw atu cu a Fapa, a pum le a titsa in a thihnak thawng khan Pathian nih a hawi ah aan ser cang hna i cu ti a tuah cu a hmaika ah thiangte le dotla le sualnak ngei loin luhter aan duh hna caah a si. 23 Cucaah nan zumhnak kha fek tein nan i tlaih zungzal lai i nan dirhmun ah khan fek tein nan dir zungzal lai; nan theihmi Thawngṭha nih an phorhmi hna ruahchannak kha thlau hrimhrim hlah u. Hi Thawngṭha hi vanrang tang khuazakip ah sermi thil vialte sinah chimmi Thawngṭha kha a si i keimah Paul hi cu Thawngṭha sal cu ka si. 24 Nan ca i temhinnak ka huahmi ah hin kaa lawm ko. Zeicahtiah ka pum in ka inmi temhinnak ah hin, Khrih nih a pum a simi khrihfabu ca i a inmi temhinnak a baumi kha ka tlinter. 25 Cun Khrihfabu sal ah cun Pathian nih khan a ka ser i Pathian nih hi rian cu nanmah ṭhatnak ding caah a ka pek. Cu rian cu Pathian bia tlamtling tein chim kha a si i 26 cu a bia cu, kan hnulei chan chung vialte Pathian nih a thuh i atu i a mi hna sin i a phuanmi hi a si. 27 Pathian nih aa tinhmi cu, mi vialte caah si seh tiah a rak ruahmi biathli, a sunglawi i a lianngan ngaingaimi biathli, a mi hna sin i a phuanmi cu a si. Cu biathli cu, Khrih cu nan chungah a um i cucaah nannih cu Pathian sunparnak kha nan i hrawm lai, timi hi a si. 28 Cucaah Khrih kong cu mi vialte kha ka chimh hna. Cucaah a mi kip kha kan fimnak nih a phanh khawh chungin ralrinnak kha kan pek hna i kan cawnpiak hna, cucu zeicahdah kan tuah ti ahcun Khrih he i pehtlai in ahopaoh kha nutling patling in Pathian hmaika ah chuahpi hna u sih ti kan duh caah a si. 29 Khrih ṭhawnnak le thazang ka chung i rian a ṭuanmi vialte kha hmang in, hi thil hi a can khawh nakhnga, heh tiah kaa zuam i ka ṭuan.
1 Nanmah caah siseh, Laodisia mi hna caah siseh, cun pumpak in a ka hngal lomi hna caah siseh, zeitluk fak in dah ka ṭuan ti kha kan theihter tuah hna lai. 2 Cu bantukin ka ṭuan cu, an lungthin kha ralṭhatnak in a khah i dawtnak in pakhat le pakhat an i komh i hngalhnak hmaan nih a chuahpimi hnangamnak tampi kha an ngeihnak hnga ka duh caah a si. Cun annih nih Pathian biathli cu an hngalh lai i cu biathli cu Khrih kha a si ko. 3 Khrih cu Pathian fimnak le hngalhnak aa thupmi hunnak tawh a si. 4 Cucaah hihi kan chimh hna: ahmaan lomi bia in ahohmanh i hlenter hna hlah u, an bia cu zeitluk hmanh in a ṭhami lo ko hmanh seh law i hlenter hna hlah u; 5 zeicahtiah ka pum in a dang ah um hmanh ning law ka thlarau cun nan sinah ka um ko i Khrih chung i a ummi nan zumhnak ah fek tein hmunkhat ah nan dir ti kha ka hmuh caah ka lung aa lawm. 6 Khrih Jesuh cu nan Bawipa ah nan i lak cang caah, amah he i pehtlai in nung u. 7 Amah chungah hram thukpi in thla u law amah cungah nan nuncan cu inn bantukin sa u law an rak in cawnpiak hna bang khan nan zumhnak ah ṭhawng chin lengmang ko u. Cun lunglawmhnak in khat u. 8 Khrih chungin si loin, van le vawlei uktu thlarau hna sinin le minung nih pakhat le pakhat an i cawnpiak chin lengmangmi chungin a chuakmi minung fimnak, santlaihnak zeihmanh a ngei lomi fimnak, hlennak menmen a simi cu hmang in, ahohmanh nih sal ah in ser hna hlah seh. 9 Zeicahtiah Pathian sining cu tling khitkhet tein Khrih a minung sinak ah khan a um i 10 amah he nan i pehtlaihnak thawngin nannih cu nunnak tlamtling kha pek nan si. Khrih cu thlarau uktu vialte le nawlngeitu vialte hna cung bawi a si. 11 Amah he nan i pehtlaihnak ah hin nannih cu cuarpartannak kha nan hmu, minung tuahmi cuarpartannak kha si loin Khrih cuarpartannak hrimhrim kha nan hmu i cucu hi a sualmi kan pum chungin luatnak kha a si. 12 Zeicahtiah tipil nan in tikah Khrih sinah nan i vui, cun tipil nan innak ah cun, thihnak in a thawhtertu Pathian ṭhawnnak nan zumhnak thawngin Khrih sinah cun a thawh zong nan tho fawn. 13 Hlan ah cun nannih cu phung leng um Jentail mi nan si ca le nan sualnak ruangah, thlarau lei in a thimi nan rak si. Sihmanhsehlaw atu cu Khrih sinah Pathian nih an nunter cang hna. Pathian nih kan sualnak vialte cu a kan ngaihthiam. 14 Kan leiba ṭialnak ca cu a chung i a ummi upadi vialte hna he khan a hrawh dih cang i vailamtahnak cung i a khenhchihnak thawng khan kanmah dawntu si ti lo dingin a hlonh. 15 Cun vailam cungah khan Khrih nih thlarau uktu hna le nawlngeitu hna ṭhawnnak khan aa hlitphuak i zapi zoh awk men ah khan a ser hna i teinak in a kalnak ah khan sal tlaihmi bantukin a hruai hna. 16 Cucaah cun ahohmanh nih nan ei nan dinmi thil kong ah siseh, ni thiang le Thla Thar Puai le Sabbath kong ah siseh, phung in serpiak hna hlah seh. 17 Kha bantuk thil hna kha cu hmailei thil a ra lai ding an muithlam men an rak si, a taktak cu Khrih hi a si. 18 Langhnak a sang khunmi kan hmu i cucaah hawi nakin kan cungnung deuh, tiah aa ruat i kanmah le kanmah nih kan pum hi kan hrem awk a si, tiah a ti i vancungmi kha kan biak hna awk a si, a timi hna nih khan, sual zeihmanh in phaw hna hlah seh. Cu bantuk mi nih cun, sullam zei set um ṭung loin, minung ruahning in thil an ruahmi kha an i porhlaw i 19 lu a simi Khrih i tlaih kha an ngol. Lu a simi Khrih sin khan pum nih cun cawmnak a hmuh i pum cu a hliahcang le a thahri hna nih khan an fun an ṭem i Pathian nih ṭhang seh ti a duhning khan a ṭhang. 20 Khrih he nan thi ṭi cang, cucaah van le vawlei a uktu thlarau hna sin khan nan luat. Cucaah zeicahdah hi vawlei ta a simi nun bantukin nan nun? 21 Zeicahdah, "Tawngtham hlah," "Tep hlah," "Tawng hlah," timi kha nan ngeih? 22 Hi phung hna hi cu, voi khat hman an si cang hnuah cun santlaihnak an ngei ti lo. Annih cu minung ser chommi phunglam le cawnpiaknak menmen an si. 23 Vanmi nan biak hna lai, nan pum nan i hrem lai, an ti i mi toi aa dormi ko an lawh tikah hin, hi phunglam hna hi fimnak chungchuak thilṭha a si ding ko khi an lo; asinain pumsa duhnak tei khawhnak ding taktak ah cun zeihmanh santlaihnak an ngei lo.
1 Nannih cu Khrih sinah nunnak ah thawh nan si cang. Cucaah Pathian orhlei kam i Khrih nih a bawi ṭhutdan cung i a ṭhutnak vancung khua chung i a ummi thil tu kha nan lung in i seh chih hna u. 2 Hi vawlei cung thil hi si loin khika thil tu kha ruat hna u. 3 Zeicahtiah nan thi cang i nan nunnak cu Khrih he Pathian chungah aa thup. 4 Nan nunnak taktak cu Khrih kha a si i amah cu a langh tikah nannih zong amah sinah cun nan lang ve lai i a sunparnak cu nan i hrawm lai. 5 Nan chung i rian a ṭuanmi vawlei pum duhnak: nu le pa sualnak tehna, dawhcah loin umtu khuasak tehna, hornak tehna, thin ṭhat lo tehna le hakkauhnak tehna hi nan thah hrimhrim awk an si (hakkauhnak hi siasal biakning phun khat a si). 6 Cu bantuk thil hna ruangah cun Pathian nawl a ngai lomi cungah Pathian thinhunnak kha a phan lai. 7 Cun nannih zong kha, cu bantuk pumsa duhnak nih a rak in uk lio hna ah khan, cu hna lak i khua a sami nan rak si. 8 Sihmanhsehlaw atu cu thinhunnak tehna, ingchiat tehna, huatnak lungthin tehna, cu nan hlonh hrimhrim hna lai. Mi va nihsawhnak bia siseh, holh thurhnawm siseh, nan kaa chungin nan chuahter hrimhrim lai lo. 9 Nan mi hlun cu a hman tawnmi a ziaza he khan nan i phoih cang i 10 mi thar cu nan i hruk cang caah pakhat le pakhat i hleng hlah u. Hi mi thar hi a sertu Pathian nih amah mui lo chin lengmang in a tharchuah lengmangmi cu a si i cucu amah hngalhnak kha tlamtling tein nan ngeih khawhnak caah a si. 11 Cu a phichuak cu hihi a si: Jentail mi ti a um ti lo, Judah mi ti a um ti lo, cuarpartan ti a um ti lo, tan lomi ti a um ti lo, mihrut, Sithian mi, miluat, sal, ti a um ti lo, zeizong vialte cu Khrih a si ko i zeizong vialte chungah Khrih cu a um ko. 12 Nannih cu Pathian mi nan si; amah nih an dawt hna i an thim hna. Cucaah mi zawnruahnak, zaangfahnak, toidornak, nemnak le lungsaunak kha nan i aih awk a si. 13 Pakhat le pakhat lungsi lonak nan i ngeih tikah pakhat le pakhat i ngaithiam u law i bawm u. Bawipa nih an ngaihthiam hna bantukin pakhat le pakhat nan i ngaithiam lai. 14 Cun hi thil vialte cungah hin dawtnak kha chap u law dawtnak cu zeizong vialte, i rem ṭhipṭhep tein a funtomtu cu a si. 15 Khrih nih an pekmi hna daihnak kha nan lung chung i biaceihtu ah ser u; zeicahtiah hi daihnak hmuh awkah hin Pathian nih pum khat chung i um awkah an kawh hna. Cun lunglawmhnak in khat u. 16 Khrih bia cu nan chungah tam piin a fimnak he khan um seh. Fimnak in pakhat le pakhat i chim u law i cawnpiak u. Thangṭhatnak hla, Pathian biaknak hla le hla thiang kha sa hna u; Pathian kha lawmhnak in hla in thangṭhat u. 17 Pathian kan Pa cu Khrih thawngin nan lawmh caah, nan tuahmi thil si hna seh, nan chimmi bia si hna seh, Bawipa Jesuh min in si dih ko hna seh. 18 Nupi hna, nan vale nawl kha ngai hna u, cucu Khrihfa nan si bantukin nan tuah awk a si. 19 Vale hna, nan nupi le kha daw hna u law bia hrang in ti hna hlah u. 20 Ngakchia hna, Khrihfa nan si caah nan nu le nan pa kha upat hna u, cucu Pathian lawmhmi thil a si. 21 Nu le pa hna, nan fale kha an ingpuanter hna hlah u, an lung a dong sual lai. 22 Salle hna, nan bawile kha zeizong ah an nawl ngai hna u. An mit hmuh lawngah an lungton i zuam loin Bawipa nan hmaizah caah lungthin tak tein an nawl ngai hna u. 23 Zei thil nan tuah paoh ah, minung caah si loin Bawipa caah ka ṭuan ti lungput ngei in, nan lungthin dihlak in ṭuan u. 24 Bawipa nih nan ṭuan man an pek hna lai kha philh hlah u; a mi ca i a chiahmi laksawng kha an pek hna lai. A rian nan ṭuanmi Bawi taktak cu Khrih kha a si. 25 Cun thil ṭhalo a tuahtu cu thil ṭhalo a tuahmi ruangah khan aho a si hmanh ah a tuah man cu a hmuh ko lai. Pathian nih cun ahohmanh a duhdanh hna lo.
1 Bawile hna, nan sal pawl cungah ding te le dawh tein khuasa u. Vancung ah nannih zong Bawi nan ngeih ve kha philh hlah u. 2 Thlacam ah ṭang u law, lawmhnak in Pathian sinah thla nan cam tikah lungfim tein um u. 3 Cun Pathian nih a bia chimnak caan, Khrih biathli phuannak caan cu a kan pek nakhnga kannih ca zongah thla rak cam lengmang ve u. Atu thong i ka tlaknak chan hi cucu pei a si cu. 4 Fiang tein ka chim awk a si bantukin ka chim khawh nakhnga thla rak ka campiak u. 5 A zummi a si lomi hna cung i rian nan ṭuan tikah fimnak in ṭuan u law caan ṭha nan hmuhmi paoh kha ṭha tein hman i zuam u. 6 Nan biachim nan holhrel cu a zungzal in ngaih a nuammi le a ṭhami a si awk a si i ahopaoh kha zeitindah ka chawnh ah a ṭhat bik lai ti hngalh kha nan i zuam lai. 7 Kan dawtmi kan nau Taikhikas nih keimah kong kha an chimh hna lai. Amah cu zumh awk tlakmi, Bawipa rian ṭuannak i kan ṭuanhawi a si. 8 Cucaah nannih cu kanmah kong kha chimh awk le nan lung in ṭhatter hna seh ti ka duh caah amah cu nan sinah ka rak thlah. 9 Amah sinah cun Onesimas kha a ra ve lai, amah cu kan dawtmi, zumh awk a tlakmi kan nau, nanmah chung mi kha a si. Hika lei thil umtuning vialte kha an in chimh hna lai. 10 Ka thongtlahawi i a simi Aristarkas nih nan kut an tlaih hna; cun Barnabas tupa Marka zong nih an tlaih ve hna. (Nan khua lei i a rat sual ahcun ṭha tein rak conglawmh u tiah tinak bia kha nan hmuh cang). 11 Justas ti zongah timi Joshua zong nih nan kut an tlaih hna. Anmah pathum lawnglawng hi Judah mi Khrihfa i a cangmi keimah sin i Pathian Pennak rian a ṭuanmi an si; ka caah bawmtu ṭhahnem ngaingai an si. 12 Nanmah mi a simi Epafras zong nih nan kut an tlaih hna, amah cu Khrih Jesuh sal a si. Nan caah thla a cam zungzal i fek tein nan dir nakhnga le nutling patling nan si nakhnga le nan zumhmi kha fiang tein nan hngalh nakhnga le a nawl kha tling tein nan zulh khawhnak hnga Pathian cu a hal zungzal. 13 Amah nih nan ca i rian har ngaingai a ṭuanmi le Laodisia le Heirapolis khuami hna ca zong i a ṭuanmi cu keimah hrimhrim nih tehte ka khaan khawh. 14 Kan dawtmi sibawi Luka le Demas nih nan kut an in tlaih hna. 15 Laodisia khua i a ummi Khrihfa kan unau hna kha rak kan biakchawnhpiak hna u, cun Nimfa le a inn i aa pummi Khrihfabu zong kha rak kan biakchawnhpiak hna u. 16 Hi ca hi nan rel dih tikah Laodisia Khrihfabu zong nih an rel ve hrimhrim nakhnga rak kua chin hna u. Cun Laodisia mi hna nih cun nannih zong ca kha an in kuat chin ve hna lai i cucu nannih zong nih rak rel ve u. 17 Cun Arkhipas kha, "Bawipa rian chungah ṭuan ding an in fialmi kha rak lim hrimhrim seh an in ti," tiah rak chim u. 18 Paul nih nan kut kan tlaih hna timi bia hi keimah hrimhrim nih ka kut in ka ṭial. Ka thir cikcin hi rak philh hlah u. Pathian vel cu nan cungah um ko seh.
1 Paul, Silas le Timote nih, Thesalonika khua i a ummi Khrih-fabu, Pathian kan Pa le Bawipa Jesuh Khrih ta a simi kha, ca kan in kuat hna. Vel le daihnak cu nan ta si ko seh. 2 Nanmah kong ah Pathian kha kan lawmh zungzal i thla kan cam fate nanmah kha kan in campiak zungzal hna. 3 Nan zumhnak cu rianṭuannak ah nan langhterning le dawtnak nan ngeihmi nih fak piin rian an ṭuanter hna ning le kan Bawipa Jesuh Khrih chung i ruahchannak nan ngeihmi a fehning kha Pathian kan Pa hmaiah kan philh lo. 4 U le nau hna, Pathian nih an dawt hna i amah mi si awkah an thim hna kha kan hngalh. 5 Thawngṭha kha nan sin kan phakpi tikah bia lawnglawng in si loin, ṭhawnnak le Thiang Thlarau le biatak a si fiang tein kan hngalhnak he khan a si. Nan sin kan um ah khan zeitindah kan umtuzia a si cu nan hngalh; nanmah ca ṭhatnak ding caah kha ti kan um kha a si. 6 Kanmah le Bawipa kha kan nawl nan kan cawn i temhinnak tampi nan huah nain Thiang Thlarau sinin a rami bia kha lawm tein nan cohlan. 7 Cucaah Masidonia le Grik ram i a ummi Khrihfa hna caah nannih cu zohchun awk nan rak si. 8 Zeicahtiah nanmah sinin a chuakmi thawngpang Bawipa kong kha Masidonia le Grik ram leng a phan i Pathian nan zumhnak thawng nih khan khuazakip a cul. Cucaah kan khualtlawnnak kong cu kanmah nih chim a herh ti lo, 9 anmah tu nih khan nanmah kan in tlawn hna ah khan zeitindah nan kan conglawmh ti kha an chim ko. 10 Pathian taktak a simi Pathian nung biak awk le vancung in a ra laimi a Fapa hngah awkah siasal biaknak in Pathian leiah nan i mer kha an chim i cu a fapa Jesuh cu thihnak in a thawhtermi le a ra liomi Pathian thinhunnak in a kan chanhtu kha a si.
1 U le nau hna, kan in tlawn hna kha pakpalawng a si lo ti cu nanmah hrimhrim nih nan hngalh. 2 Thesalonika khua i nan sin kan phak hlanah zeitindah Filipi khua ah an kan serhsat i an kan nihsawh ti cu nan hngalh. Asinain, Pathian nih a Thawngṭha kha nannih chimh awkah ralṭhatnak a kan pek i harnak tampi a um nain kan chim. 3 Kan in chimhmi hna cu ahmaan lomi thil a si lo, tinhmi a thurmi he zong a si lo, cun ahohmanh hlen zong kan in tim hna lo. 4 Pathian nih cuticun chim hna seh ti a kan duhning tu khan kan chim zungzal i cuti kan chim cu Pathian nih khan kanmah hman kha a hna a tla i Thawngṭha cu kan kut ah a kan pek caah a si. Minung lungton kha i zuam loin kan i tinhmi a hngaltu Pathian lungton tu kha kan i zuam. 5 Kan hmanmi bia kha nanmah nih nan hngalh bantukin, mi hei faknak bia men an si lo i Pathian zong nih a hngalh bantukin duhfahnak lungthin khuhnak bia men an si lo. 6 - 7 Khrih lamkaltu kan si bantukin a hnek zong kan in hnek kho ko hna hnga nain, ahohmanh nanmah zong midang zong, nan sinin thangṭhatnak hmuh kan i zuam lo. Nu nih a fale a zohkhenh hna bantuk tu in nan sinah khan nem tein kan um. 8 Kannih nih kan in dawt hna caah Pathian sinin a rami Thawngṭha lawng hmanh kha si loin kan nunnak tiang hmanh kha hrawm kan in duh hna. Kan dawt ngaingaimi nan si cang. 9 U le nau hna, har lengmang in rian kan ṭuan kha nan hngalh ko. Pathian sinin a rami Thawngṭha kan in chimh hna tikah khan, kannih cu nan caah thilrit kan sinak hnga lo, chun he zan he rian kan ṭuan. 10 Kan tehte cu nanmah kha nan si i cu bantukin Pathian zong a si ve. Nannih a zummi hna cung i kan ziaza cu a thiangmi le ahmaanmi le palhnak zeihmanh a um lomi a si. 11 Pa nih a fale a ti hna bantukin kan in ti hna kha nan hngalh. 12 Thazang kan in pek hna, hnangamnak kan in pek hna, a Pennak le a sunparnak i hrawm dingah an autu hna Pathian duhning in nan nun khawhnak hnga kan in forh lengmang hna. 13 Cun kan Pathian sin i kan i lawmhnak zong a dang a um rih: Pathian bia nan sin kan phakpi tikah khan minung bia bantukin si loin Pathian bia bantukin nan rak cohlan --- Pathian bia cu a si taktak, nan sin kan phakpimi cu. Cuticun zeitindah a si khawh tiah, Pathian nih a zummi nan lakah rian a ṭuan caah a si. 14 U le nau hna, Judea ram chung i a ummi Pathian Khrihfabu, cuka ram i a ummi Khrih Jesuh mi a simi hna cung i a tlungmi thil bantuk nih nannih zong an tlunhnawh ve hna. Judah mi nih hremnak an pek hna bantukin nannih zong nanmah rammi lila nih hremnak an in pek ve hna, 15 Judah mi cu Bawipa Jesuh le profet hna a rak thattu le kanmah hremnak a kan petu kha an si. Zeitluk in dik Pathian a ngaih an hei chiatter! Annih cu an minung hawi ral an si. 16 Khamhnak a petu hna ding bia kha Jentail mi cu chim hna hlah u, an kan ti. Annih nih an sualnak cu an tamter chin luaimai i atu cu Pathian thinhunnak nih khan a tlakhnawh hna. 17 U le nau hna, kan lung cun kan i ṭhen lo nain, kan pum in tlawmpal kan hun i ṭhen tikah hin kan in ngai ngaingai hna i nanmah hmuh ṭhan kha kan duh hringhran. 18 Nanmah rak in tlawn ṭhan hna kha kan duh i keimah Paul zong hi nanmah tlawn ṭhan cu kaa tim lengmang, asinain Satan nih a ka onh lo. 19 A ngaingai ti ahcun, midang ahohmanh si loin, nanmah hrimhrim hi, kan Bawipa Jesuh a rat tik i a hmaika i kan dir tikah kan ca i ruahchannak le lawmhnak le thangṭhatnak cu nan si lai. 20 Nanmah cu kan hmaihngalnak le kan i lawmhnak nan si taktak ko.
1 A donghnak ah cun kan celh ti lo i kanmah lawngin Athens khua ah khan um ko u si law 2 Timote kha nan sinah rak thlah u sih kan ti. Amah cu Khrih kong Thawngṭha a chim vemi kan sin i rian a ṭuanmi a si. 3 Nan cung i a tlungmi hremnak nan in mi ruangah hin ahohmanh nan i letnak hnga lo nanmah cu thazang pek awkah le nan zumhnak ah fek tein nan dir khawh nakhnga nanmah bawmh awkah amah cu kan hun thlah. Kha bantuk hremnak kha Pathian nih nan cungah tlung seh a timi a si ve ko ti kha nanmah hrimhrim nih nan hngalh. 4 Nan sin i kan um lioah khan a hlankan piin hremnak kan ing te lai tiah kan rak in chimhchung hna i nan hngalh bantukin cu bantuk te cun nan cungah a hung tlung taktak. 5 Cucaah Timote cu nan sinah ka hun thlah. Um sawhsawh cu ka ing kho ti lo i nan zumhnak zeidah a lawh hnga ti hngalh duh ah amah cu ka ratter. Khuachia nih an tukforh hna zong a si kho ko i kan rian ṭuanmi kha pakpalawng ah a cang dih sual lai ti zong ka phang. 6 Sihmanhsehlaw Timote cu naite ah khan nan sinin a ra phan i nan zumhnak kong le dawtnak nan ngeihmi kong thawngṭha kha a rak phorh. Kanmah kha ṭha lei in nan kan ruah zungzalnak le hmuh kan in duh tluk hna in nannih zong nih hmuh nan kan duh venak kha a kan chimh. 7 Cucaah cun u le nau hna, harnak le temhnak kan huahmi ah hin nanmah kongah kan lung a ṭhawng ko. 8 Bawipa chungah fek tein nan dir ti theih cu kan caah nunnak thaw a si. 9 Atu cu nanmah kongah Pathian cu kan lawmh khawh taktak cang. Nanmah kong i kan Pathian hmaiah kan hmuhmi lawmhnak ruangah hin Pathian cu kan thangṭhat. 10 Nanmah cu kan pum in kan in hmuh khawh hna nakhnga le zumhnak lei i nan herhmi kha kan in pek khawh hna nakhnga chun le zan in kan hal lengmang. 11 Pathian kan Pa le kan Bawipa Jesuh nih cun nanmah sin i kan rat khawh nakhnga lam kan serpiak ko hna seh. 12 Bawipa nih pakhat le pakhat nan i dawtnak le mi vialte nan dawtnak hna kha ṭhanter seh law kanmah nih kan in dawtnak hna tlukin nganter seh. 13 Cuticun nan lung kha in ṭhawnter hna seh law kan Bawipa Jesuh cu a mi vialte hna he a rat tikah Bawipa kan Pathian hmaiah mitling le mithiang nan si lai.
1 A donghnak ah ka u le ka nau hna, zeitindah Pathian duhning in kan nun awk a si lai ti kha nannih nih kan sinin nan hmuh cang. Hitihin nan rak nun awk a si i atu hi Bawipa Jesuh min in tam chinchin in nan nun nakhnga kan in nawl hna. 2 Bawipa Jesuh nawl pekning in kan in cawnpiakmi hna cu nan hngalh. 3 Pathian nih nannih cu a thiangmi le nu le pa sualnak aa summi si hna seh ti kha an duh hna. 4 Nan dihlak in nan pum uk kha nan thiam awk a si, nan pum cu nan thianter awk le nan upat awk a si, 5 Pathian a hngal lomi Lawkihmi bantukin hornak ah khan a duhduh in nan umter awk a si lo. 6 Ahohmanh nih nan u nan nau kha an pawcawmnak rian ah hleng in deh hna hlah u, ningcang loin lemsoi hna hlah u; cu bantuk ṭhat lonak a tuahmi cu Pathian nih dan a tat hna lai tiah kan in chimh cang hna i fak piin ralrinnak kan in pek cang hna. 7 Pathian nih sualnak tuah lengmang dingin a kan au lo, mithiang si ding tu ah a kan auh. 8 Cucaah hi cawnpiaknak zulh a duh lomi cu, minung cawnpiaknak zulh a duh lo si loin, Thiang Thlarau an petu hna Pathian cawnpiaknak zulh a duh lo kha a si deuh. 9 Zumhnak lei i nan unau hna dawtnak kongah caṭial a herh ti lo. Zeicahtiah nanmah hrimhrim kha Pathian nih pakhat le pakhat nan i dawt awk a si tiah an cawnpiak hna i 10 Masidonia ram chung i a ummi nan unau hna cungah khan cu bantuk cun nan rak um. Cucaah cun u le nau hna, cu nak tam deuh in tuah rih awkah kan in nawl hna. 11 Hmasa ah kan in chimh hna bantuk khan, dai tein khuasak kha i tinh u law nanmah nan riante kha ṭuan u law nanmah tein nan paw i cawm u. 12 Cuticun a zum lomi hna hmaizah kha nan tong lai i nan herhbaunak ah khan ahohmanh i rinh nan hau lai lo. 13 U le nau hna, ruahchannak a ngei lomi hna an ngaih a chiat bantukin nan ngaih a chiat nakhnga lo, nannih cu a thi ciami hna kong i biatak kha hngalhter kan in duh hna. 14 Jesuh cu a thi i a tho ṭhan ti kha kan zumh; cucaah amah zumh buin a thimi hna cu Pathian nih amah sinah cun a ratpi hna lai ti kha kan zumh. 15 Zeicahtiah kan in chimhmi hna hi Bawipa nih a kan cawnpiakmi a si: Bawipa a rat ni ah kannih a nungmi hna nih hin a thimi kha kan chawhkanh hna lai lo. 16 Au thawng, vancungmi bawi bik au thawng, Pathian muko aw thawng cu a hung thang lai i Bawipa hrimhrim cu vancung khin a rung ṭum lai. Khrih zumh buin a rak thimi kha nunnak ah thawhter an si hmasa lai i 17 cu caan i a nung rihmi kannih pawl cu khuadawm lakah khin Bawipa cu van i hung ton awkah pumh kan si dih lai. Cun Bawipa sinah cun zungzal in kan um lai. 18 Cucaah pakhat le pakhat hi bia hin nan tha i nuamter cio u.
1 Bawipa rat lainak ni le caan hi ca in kan in kuat hna a herh lo tiah u le nau hna kan ruah. 2 Zeicahtiah zan ah mifir an rat bantuk khin Bawipa Ni cu a ra lai ti kha nanmah hrimhrim nih nan hngalh ko. 3 Mi nih, zeizong vialte a dai dih ko i a him dih ko, an ti liote ah khin rawhnak nih cun a den hna lai. An luat kho lai lo --- nu cungah a tlungmi nau nganfah bantuk khi a si lai. 4 Sihmanhsehlaw u le nau hna, nannih cu mui padap chung i khua a sami nan si lo i mifir bantukin cu Ni nih cun a hlauh in an hlauh hna awk a si lo. 5 Nannih cu nan dihlak in ceunak mi nan si, chun mi nan si, zan mi kan si lo, muihnak mi zong kan si lo. 6 Cucaah midang bantukin kan i hngilh awk a si ti lo; kan i ṭhangh awk le lungfim tein kan um awk a si. 7 Mi an i hngilh cu zan ah a si, mi zu an rit cu zan ah a si. 8 Sihmanhsehlaw kannih cu chun mi kan si caah lung fim tein kan um awk a si. Zumhnak le dawtnak cu kan phaw ah kan i hruk awk a si i khamh kan i ruahchannak cu luchin ah kan i chinh awk a si. 9 Pathian nih a thinhunnak in awkah khan a kan thim lo, sihmanhsehlaw kan Bawipa Jesuh Khrih thawngin khamhnak hmuh awkah a kan thim; 10 a rat tikah kan nun zong kan thih zongah amah sinah kan um khawhnak hnga kannih caah a thi cang. 11 Cucaah cun atu i nan tuah lengmang bantuk hin pakhat le pakhat thazang i pe u law i bawm u. 12 U le nau hna, Pathian nih nanmah hruaitu ding le cawnpiaktu dingah a thimmi nan lak i rian a ṭuanmi hna kha upat hna u. 13 An rian an ṭuan ruangah khan hmaizahnak a sang bik le dawtnak a ngan bik kha pe hna u. Cun pakhat le pakhat i rem niahmah tein khuasa u. 14 U le nau hna, a tha a thumi kha chimhring hna u, a ral a chiami kha ralṭhatnak pe hna u, thazang a dermi kha bawm hna u, pakhat le pakhat lungsau thinfual in um u. 15 Ṭhat lonak kha ahohmanh nih ṭhat lonak in lehrul hlah u, sihmanhsehlaw pakhat le pakhat cungah siseh, mi vialte cungah siseh, ṭhatnak tuah tu kha i tinh u. 16 A zungzal in i lawm u, 17 a zungzal in thlacam u, 18 zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna. 19 Thiang Thlarau kha dawn hlah u; 20 phungchim kha zeirello in um hlah u. 21 Zeizong vialte kha hneksak dih hna u: a ṭhami kha i chiah u law 22 thil ṭhalo paohpaoh kha hrial hna u. 23 Daihnak a kan petu Pathian nih cun amah ta ah in ser hna seh law nan sining piin, nan thlarau he nan nunnak he nan pum he, kan Bawipa Jesuh rat ni ah cun, palhnak um loin, in chia hna seh. 24 Nanmah an autu hna cu zumh awk tlak a si caah cucu a tuah lai. 25 U le nau hna, kannih zong thla rak kan campiak ve u. 26 Kan unau pawl kha Khrihfa daihnak kuttlaihnak in rak biachawn hna u. 27 Bawipa nawl in, hi ca cu kan unau pawl vialte kha rak relpiak hna u tiah kan nawl hna. 28 Kan Bawipa Jesuh Khrih vel cu nan sinah um ko seh.
1 Paul, Silas le Timote nih, Thesalonika khuachung Khrihfabu chung i a ummi, Pathian kan Pa le Bawipa Jesuh Khrih ta a simi Khrihfami kha ca kan in kuat hna. 2 Pathian kan Pa le Bawipa Jesuh Khrih nih vel le daihnak in pe ko hna seh. 3 U le nau hna, nanmah ruangah Pathian cu a zungzal in kan lawmh. Nannih nan zumhnak kha a ṭhan i pakhat le pakhat nan i dawtnak le midang nan dawt hnanak kha a ngan chinchin caah, cu ti Pathian kan lawmh cu ahmaanmi thil a si. 4 Cucaah Pathian Khrihfabu hna sinah nanmah kong cu kan i porhlaw i hremnak le temhnak nan inmi vialte chungah fel tein nan um i nan zumhnak a dorh lo caah kan in thangṭhat hna. 5 Hi nih hin Pathian biakhiahnak a dinning cu a langhter. Sifahnak nan in hnawhchanmi Pathian Pennak he khan aa tlakmi an siter hna lai. 6 Pathian nih a hmaanmi thil kha a tuah lai. Sifahnak nan cungah a tluntertu hna cungah khan sifahnak a tlunter ve lai i 7 sifah a ingmi nan cung le kanmah cung zongah damnak a tlunter lai. Bawipa Jesuh nih a vancungmi miṭhawng hna le 8 meizik he, Pathian a hngal lomi hna le Bawipa Jesuh kong Thawngṭha a ngai duh lomi hna dantat awkah, a rung ṭum tikah ding tein a tuah lai. 9 - 10 Bawipa cu a mi hna lakah sunparnak hmuh awkah a rat i a zummi vialte nih an hlorh ni, cu Ni lianngan ah cun, annih cu zungzal rawhralnak dantatnak kha an huah lai, Bawipa hmaika khan dawi an si lai i a liannganmi a ṭhawnnak kha an hmu lai lo. Sihmanhsehlaw nannih cu kan in chimhmi hna bia kha nan zumh caah sunparnak a pe i a hlorhtu hna lakah cun nan i tel ve lai. 11 Hi ruangah hin nan ca i thla kan cam zungzal cu a si. Pathian nih an kawhnak hna he aa tlakmi nunning in nan nun nakhnga kan Pathian cu kan hal lengmang. Amah nih cun nan duhmi vialte cu ṭhatnak caah tlinter seh law nan zumhnak rianṭuannak cu tlamtlinter ko seh. 12 Hitihin kan Bawipa Jesuh min nih nan sinin thangṭhatnak a hmuh lai i kan Pathian le Bawipa Jesuh velngeihnak thawngin nannih zong nih amah sinin sunparnak nan hmuh ve lai.
1 Kan Bawipa Jesuh Khrih a ratnak kong le hmunkhat i pumh kan si lainak kongah, ka u le ka nau hna, 2 fawi tuk in lungtuai in um hlah u law Bawipa Ni cu a phan cang, a titu hna zong nih cun fawi tuk in in tuaitam hna hlah seh. Mah hihi mi pakhat khat nih profet bia in ka chim a timi zong a si ko lai, phungchim in ka chim a timi zong a si ko lai. Asiloah anmah cakuat ah a um ti zongah kanmah zong an kan ti ko lai. 3 Ahohmanh i hlenter hna hlah u. Zeicahtiah cu Ni cu donghnak ral thawhnak a phanh hlan le hell kal ding a simi Miṭhalo Pa a chuah hlanah cun, a phan lai lo. 4 Mi nih an biakmi paohpaoh le Pathian thil i an ruahmi paohpaoh kha a doh lai. Amah cu Pathian timi hna paohpaoh le biakmi hna paohpaoh hna cungah khan aa chia lai i Pathian biakinn chung hmanh ah khan a lut lai i Pathian ka si a ti lai. 5 Hi vialte hi nan hngal ti lo maw? Nan sin ka um lioah kan chimh dih cang ko ṭung hna. 6 Asinain atu i hung chuah cu a khamtu pakhat a um i cucu zeidah a si kha nan hngalh. A caan a phak tikah Miṭhalo Pa cu a hung chuak lai. 7 Miṭhalo Pa ṭhawnnak cu a thli in rian a ṭuan lengmang cang, sihmanhsehlaw a khamtu kha ṭhial a si hlanah cun a chuak kho rih lai lo. 8 Khi tikah Miṭhalo Pa kha a hung chuak lai i Bawipa Jesuh nih a kaa in a chuakmi thaw in a thah lai i Bawipa Jesuh a rat tikah a ceumi a sunparnak in amah cu a hrawh lai. 9 Miṭhalo Pa cu Satan ṭhawnnak in a ra lai i khuaruahharnak a phunphun le hlennak hmelchunhnak a phunphun kha a tuah hna lai i 10 a rawk dingmi hna cungah cun hlennak a phunphun kha a hman lai. Cu hna cu an rawk lai, zeicahtiah khamhnak an hmuh nakhnga ding ca i biatak kha an rak cohlang duh lo. 11 Cucaah Pathian nih palhnak ṭhawnnak kha a thlahhnawh hna i ahmaan lomi thil kha an zumh. 12 A phichuak cu: biatak a zum lo i sualnak tuah a duhmi vialte kha sualphawt an si lai. 13 U le nau hna, nanmah an dawtu hna Pathian kha zungzal in lawm ko u sih. Zeicahtiah nannih cu Pathian nih Thlarau ṭhawnnak thawngin Pathian mi ah an canter hna thawng le biatak nan zumhnak thawng khan, khamhnak hmuh awkah a rak in thim hna. 14 Pathian nih an kawhnak hna cu kan in chimhmi hna Thawngṭha kha hmang in a si; cun an kawh hna cu kan Bawipa Jesuh sunparnak i hrawm ve awkah a si. 15 Cucaah cun u le nau hna, kan phungchimnak ah siseh, kan cakuatmi in siseh, kan in cawnpiakmi hna biatak chungah khan fek tein dir u law fek tein biatak cu i tlaih ko u. 16 Kannih a kan daw i vel a kan ngeih caah hnangamnak le ruahchannak a ṭhami a kan pe zungzaltu Bawipa Jesuh Khrih le Pathian kan Pa nih cun 17 a ṭhami kha nan tuah ngam nakhnga le nan chim ngam nakhnga ralṭhatnak in pe ko hna seh.
1 U le nau hna, a donghnak ah, Bawipa bia cu nan lakah a rak karhter bantuk khan, khulrang in a karh chin lengmang i sunparnak kha a hmuh nakhnga, thla kan campiak u. 2 Cun Pathian bia hi mi vialte nih an zumh rih lo caah, Pathian nih miṭhalo mi hna le misual mi hna kut chungin a kan luatter nakhnga zongah thla kan campiak fawn u. 3 Bawipa cu zumh awk tlak a si ko. An ṭhawnter hna lai i Miṭhalo Pa sin khan him tein an umter ko hna lai. 4 Cun Bawipa nih nanmah zumhnak lungthin kha a kan pek caah kan in zumh ko hna; kan in chimhmi hna kha nan tuah lengmang ko i hmailei zongah nan tuah ṭheo lai tiah kan zumh fawn. 5 Pathian dawtnak lei le Khrih nih an pekmi hna intuar khawhnak leiah khan Bawipa nih nan lung cu hruai ko seh. 6 U le nau hna, Bawi Jesuh Khrih min in, mi thathu le kan in cawnpiakmi hna a zul duh lomi cu kom hna hlah u, tiah kan in fial hna. 7 Nanmah hrimhrim nih, kanmah kan tuah bantuk te khan nan tuah ve awk a si cu nan hngalh. Nan sin kan um ah khan kan tha a thu lo. 8 Ahohmanh nih alak in nan kan cawm lo. Kanmah te nih rian kan ṭuan, aho nan ca hmanh ah thilrit kan si nakhnga lo chunzan in kan ṭuan. 9 Mah ti kan tuah kha, nan kan cawm ve awk a si tinak nawl kan ngeih lo caah a si lo, nanmah zohchun dingah kan tuahmi a si. 10 Nan sin kan um lioah kan in chimhmi hna cu, "Ahohmanh rianṭuan a duh lomi cu ei awk zeihmanh pe hna hlah u," ti a si. 11 Hiti kan rak in chimh hna cu, nanmah lakah a tha a thumi, zeidang zeihmanh ṭuan zuam loin midang hnahnawh lurit a pe men in a ummi an um ti kan theih caah khan a si. 12 Bawipa Jesuh Khrih min in, kha ti a um pawl kha, ningcang tein khua rak sa u law nan pawcawmnak ah rian ṭha tein rak ṭuan u, tiah chimh le ralrin pek kan duh hna. 13 U le nau hna, ṭhatnak tuah kha ba hlah u. 14 Hi ca kan in kuatmi hna chung bia a zul duh lomi hi an um ko lai. Cu bantuk mi hna cu an ning a zah nakhnga kom hna hlah u. 15 Asinain ral bantukin zoh hna hlah u, unau bantukin chimhring hna u. 16 Daihnak hram a simi Bawipa nih lam phunphun in daihnak kha in pe ko hna seh. Bawipa cu nan dihlak sinah um ko seh. 17 Paul nih nan kut kan tlaih hna, hi bia hi ka kut hrimhrim in ka ṭial. Hi ti ka ṭial hi ka ca cung i ka min ka thutning a si i ka ṭialning a si. 18 Bawipa Jesuh Khrih vel cu nan dihlak sinah um ko seh.
1 Kan Khamhtu Pathian le kan i ruahchanmi Khrih Jesuh nawl in lamkaltu a simi keimah Paul nih. 2 Zumhnak i ka fa taktak a simi Timote, ca kan kuat. Pathian kan Pa le Khrih Jesuh kan Bawipa nih vel le zaangfahnak le daihnak in pe ko seh. 3 Masidonia ram lei ka rak kalpah i ka rak in fial bantuk khan, Efesa khua ah um law ti ka duh. Efesa khua ah khan, cawnpiaknak hmaanlo a cawnpiaktu hna an um i kha hna kha ngolter kho hna law ti ka duh. 4 Kha bantuk tuanbia menmen hna le chuahkehnak min sau pipi in an ṭialmi cazin menmen hna kha cu, zeihmanh an si lo caah, hlaw hna u, tiah na rak chimh hna lai; zeicahtiah kha bantuk thil nih khan bia alnak lawnglawng a chuahpi i zumhnak in hngalh khawh a simi Pathian khuakhannak kha zeihmanh a langhter lo. 5 Hi bantukin bia kan cah tikah kaa tinhmi cu, a thiangmi lungthin le a thiangmi chiaṭha thleidannak le zumhnak taktak a simi chungin a chuakmi dawtnak kha a si. 6 Hi bantuk thil tu hi mi a cheu nih an hlawt riangmang hna i bia i al lengmangnak hruhnak burbuk chungah khan an lut. 7 Pathian nawlbia cawnpiaktu saya si cu an duh, sihmanhsehlaw anmah chimmi bia lila kha a sullam an hngal lo i a hngal ngai bantukin an chim lengmangmi thil kong zong kha an hngal taktak fawn lo. 8 Nawlbia hi a sining ding bantukin hman a si ahcun a ṭha ko ti kha kan hngalh. 9 Sihmanhsehlaw kan hngalh awk cu, nawlbia cu miṭha mi hna caah ser a si lo i nawlbia a buarmi hna le bia ngai duh lomi hna le Pathian zei i a rel lomi hna le misual mi hna le biaknak zei i a rel lomi hna le thlarau lei thil zei i a rel lomi hna le an nu an pa a nawngmi hna le 10 nu le pa sualnak a tuahmi hna le nu le pa kong ah ningcanglo in khua a sami hna le minung fir a hmangmi hna le lihchim a hmangmi hna le tehte dinglo a simi hna le cawnpiaknak ahmaanmi he aa tlak lomi thil a tuahmi hna ca tu ah khan tuah a si. 11 Ahmaanmi cawnpiaknak cu thanh fial ka simi Thawngṭha chungah khan a um i cu Thawngṭha cu sunparnak le thangṭhatnak in a khatmi Pathian sinin a rami kha a si. 12 Ka rianṭuannak ah thazang a ka petu kan Bawipa Khrih Jesuh cu ka lawmh. Amah rianṭuantu ah ser awk tlak i a ka ruah caah a cungah kaa lawm. 13 Hlanah cun ka rak thangchiat i ka rak hrem i ka rak serhsat, asinain Pathian cu ka cungah zaangfahnak a ngei; cu bantukin ka rak tuah cu amah kha ka rak zumh lo i ka tuahmi cu zeidah a si ti awk ka rak hngalh lo caah a si. 14 Cun kan Bawipa nih cun a tam ngaingaimi a vel kha a toih in a ka toih i Khrih Jesuh he kan i pehtlaihnak thawngin zumhnak le dawtnak kha a ka pek i cu hna cu kanmah ta an si cang. 15 Khrih Jesuh cu misual mi hna khamh awkah vawlei ah a rung ṭum, timi hi ahmaanmi le cohlan awk a tlakmi le zumh awk bia a si. Keimah cu an lakah a sual bik ka si ko, 16 sihmanhsehlaw hi ruang thengte ah hin Pathian nih ka cung i zaangfahnak a ngeih cu a si. Cu bantukin Pathian nih a ka zaangfah i misual mi hna lak i a sual bikmi keimah cungah Khrih Jesuh nih a lungsaunak le a thinfualnak a langhter cu, hmailei ah a hun zum i cu zumhnak thawngin zungzal nunnak a hmumi hna caah zohchunh awk siseh ti kha a duh caah a si. 17 Zungzal in a hmunmi Siangpahrang, thih a thiam lomi le mit in hmuh khawh a si lomi Pathian, Amah lawnglawng Pathian a simi cu, zungzal in zungzal tiang, upatnak le sunparnak, pek si ko seh! Amen. 18 Ka fa, Timote, hi bantukin mi va chimhhrinnak ding rian hi na kut chungah ka chiah. Hi ka chiahmi cu nangmah kongah rak chimchungmi bia ning khan a si. Kha bia kha raldohnak hriam ah i hman hna law na zumhnak le na lungthin kha fek tein umter hna. 19 Mi a cheu cu an chiaṭha thleidannak kha zeirello in an um tawn caah an zumhnak kha an rawhter tawn. 20 Cu hna lakah cun Hymenaias le Alekzandar kha an i tel i annih cu Satan kut chungah ka pek cang hna. Cu nih cun Pathian thangchiat ngol kha a cawnpiak hna lai.
1 Cucaah a hmasa bik ah fial kan duhmi cu, nawlnak le thlacamnak le halnak le lawmhnak biachimnak kha mi vialte caah, kan Pathian sinah tuah u sih. Siangpahrang hna le nawlngeitu hna caah 2 daite le remte le Pathian ṭihzah le ziaza ṭha in kan nun khawh nakhnga, thlacam u sih. 3 - 4 Mi vialte nih khamhnak hmu hna seh ti le biatak kha hngal hna seh ti a duhmi Pathian kan Khamhtu nih, hi thil ṭha hi a duhmi a si. 5 Pathian cu pakhat lawng a si i Pathian le minung kar ah remnak sertu cu minung Khrih Jesuh lawng a si, 6 amah cu mi vialte tlanhnak caah a lu aa pemi a si. Cu nih cun, caan a tlin tikah Pathian nih mi vialte kha khamh a duh hna ti kha a langhter i 7 cu ruangah cun Jentail mi hna sinah lamkaltu le cawnpiaktu ah thlah ka si i zumhnak le biatak kong cu ka chim. Lih ka chim lo, biatak ka chim! 8 Pa paohpaoh nih hmun kip ah thlacam hna seh ti ka duh, Pathian sinah i pe in thinhunnak zeihmanh um lo le bia alnak zeihmanh um loin Pathian sinah cun an kut hler hna seh. 9 Nu zong aa za tawk le aa dawh tawk in i thuam hna seh ti ka duh. An sam kha a hlei a hluat in i tom hna hlah seh, sui hlawn le lungvar hlawn le hnipuan man sang tuktuk in i ṭamh tuk hna hlah seh. 10 Biaknak a ṭanhmi nu nih an tuah tawn bantukin ziaza ṭha tu in i thuam hna seh. 11 Nu cu cawnpiaktu si loin a cawngtu an si awk a si, cun an cawn tikah daite le toidornak lungthin ngei in an cawn awk a si. 12 Cawnpiaktu si awkah ka duh hna lo, pa cung i nawl ngeitu si ding zongah ka duh hna lo; dai tein an um awk a si ko. 13 Adam pei ser hmasa a si kha, amah hnuah pei Evi cu ser a si kha. 14 Hlen khawhmi cu Adam kha a si ṭung lo, nu kha pei a si i Pathian nawl zong a buar kha. 15 Sihmanhsehlaw nu cu fa an ngeih ruangah hin khamh an si lai — toidornak lungthin in zumhnak le dawtnak le thiannak chungah an um ahcun khamh an si lai.
1 Mi pakhatkhat cu Khrihfabu hruaitu si a duh ahcun rian ṭha ngai a duh a si, timi bia hi ahmaanmi a si. 2 Khrihfabu hruaitu cu soisel awk um lomi, nupi pakhat lawng a ngeimi, zu rit hmang lomi, mah le mah aa uk khomi, ningcang tein khua a sami, khualtlung a dawmi, cawnpiak a thiammi a si lai; 3 zu rit hmangmi a si lai lo, mitlokciar a si lai lo, milungnem le daihnak a duhmi a si lai; tangka mitthimi a si lai lo; 4 a innchungkhar ṭha tein a zohkhenh khomi a si lai i a fale nih a nawl an ngaihmi le an upatmi a si lai. 5 Mah innchungkhar hmanh ṭha tein a zohkhenh kho lomi nih cun zeitindah Pathian khrihfabu cu a zohkhenh khawh lai? 6 Khrihfa a cannak a naimi a si lai lo, zeicahtiah a hnar a puar sual lai i Khuachia kha sualphawt a rak si bantuk khan sualphawt a si ve sual lai. 7 Khrihfabu lengah a ummi nih an hmaizahmi a si lai, cu bantuk mi a si lo ahcun a thang a chia lai i Satan rap ah aa foih sual lai. 8 Khrihfa upa hna zong ziaza a ṭhami le lungthin a thiangmi an si lai; zu tam tuk a dingmi an si lai lo i hakkaumi zong an si lai lo. 9 Phuanmi zumhnak biatak cu chiaṭha thleidannak thiang in fek tein aa tlaihmi an si lai. 10 Annih cu hneksak hmasa an si lai i an awn ahcun an ṭuan lai. 11 An nupile zong ziaza ṭhami an si lai i mi congoih hmangmi an si lai lo; zurit hmang lomi an si lai i zeizong kip ah miding an si lai. 12 Khrihfa upa cu nupi pakhat lawng a ngeimi an si lai i an fale hna le an innchungkhar kha ṭha tein a zohkhenh khomi an si lai. 13 Rian ṭha a ṭuanmi khrihfa upa cu hmaizahnak an hmu i Khrih Jesuh an zumhnak kong kha ralṭha in an chim ngam. 14 Hi ca na sin i ka ṭial lioah hin, ka saduhthah cu tuan i na sin i rat i nangmah hmuh kha a si. 15 Sihmanhsehlaw ka tlai sual a si ahcun hi ca nih hin zeitindah Pathian innchungkhar chungah kan umtu kan ziaza a si awk a si ti kha an chimh lai; Pathian innchungkhar cu a nungmi Pathian Khrihfabu, biatak a dirkamhtu le biatak i a tungpi kha a si. 16 Kan biaknak phung chung i aa thupmi biathli hi zeitluk in dah a ngan ti kha ahohmanh nih an al kho lo: Minung pum in a lang i ahmaan tiah Thlarau nih tehte a khaan, Vancungmi zong nih an hmuh. Miphun kip sinah a kong cu chim a si, Vawlei cung khuazakip ah mi nih an zumh i vancung ah a kai.
1 Hmailei ah cun mi a cheu nih zumhnak kha an hlawt lai i lih a chimmi thlarau tu kha an bia an ngaih hna lai i khuachia cawnpiaknak kha an zulh lai, tiah Thlarau nih fiang tein a chim. 2 Hi cawnpiaknak hi lihchim hmangmi hna nih lih in mi an cawnpiak hnanak chungin a chuakmi a si; annih cu an chiaṭha thleidannak a thimi, thir lin nih a kangh ca i a ngongmi an si. 3 Cu hna pawl nih cun i ṭhit i umh hi thil ṭhalo a si, tiah an ti i ei chia an timi rawl phun zong a um. Sihmanhsehlaw hi rawl cu Pathian nih ei awk ding i a sermi an si i zumtu a simi hna le biatak a hngalmi hna nih cun lunglawmhnak in thlacam hnuah ei awk an si ko. 4 Pathian nih a sermi thil cu zei thil paoh an ṭha dih; zeihmanh hlawt awk an si lo, lunglawmh thlacamnak he cohlan awk an si ko. 5 Zeicahtiah Pathian bia le thlacamnak nih khan Pathian cohlan awk tlak thil ah a tuah hna. 6 Kan u le kan nau pawl kha, hi cawnpiaknak hi na chimh hna ahcun nangmah cu Khrih Jesuh sal ṭha na si lai, thlarau lei i naa cawmnak ah zumhnak bia le na zulhmi cawnpiaknak ahmaan taktakmi kha, va hmang hna. 7 Pathian kong a si lomi tuanbia menmen kha cu hrial hna, kha hna kha cu nutar ca lawngah an i tlak. Pathian he aa tlakmi nunnak kha ngeih i zuam zungzal. 8 Pum in thiam lakin cawnmi kha santlaihnak a ngei, asinain cu bantuk santlaihnak cu donghnak a ngei; sihmanhsehlaw biaknak ṭhathnemnak cu donghnak a ngei lo, zeicahtiah cu biaknak chungah cun Pathian nih atu kan nunnak ca he hmailei kan nunnak ca he bia a kan kamh. 9 Hika bia hi zumh awk tlakmi le cohlan awk tlakmi bia an si. 10 Cu ruangah cun sifahnak kan in le fak piin rian kan ṭuan hi a si. Kannih nih kan i ruahchannak cu mi vialte khamhtu a si i a nungmi Pathian cungah khan kan bunh i cu a nungmi Pathian cu a zummi hna khamhtu kha a si khun. 11 Hi cawnpiaknak hi cawnpiak chin hna law nan zulh awk a si tiah ti hna. 12 Na kum a no ruangah ahohmanh nih in zawmhtaih hna hlah seh, sihmanhsehlaw na biachim na holhrel ah siseh, na zia na za ah siseh, dawtnak, zumhnak le thiannak na ngeihmi ah siseh, zumtu hna caah tahchunh awk tlak va si tuah. 13 Mizapi cu ka rat hlantiang Cathiang kha rak relpiak lengmang hna, phung kha rak chim lengmang hna law rak cawnpiak lengmang hna. 14 Profet hna nih bia an chim i upa hna nih na cung i an kut an chuan tikah na hmuhmi thlarau laksawng kha hlothlau hlah. 15 Na ṭhannak kha mi vialte nih an hmuh nakhnga cu thil cu teimak tein tuah lengmang ko hna. 16 Nangmah kha ṭha tein i ralring law na cawnpiaknak zong kha i ralring fawn. Cun nangmah naa khamh hleiah na bia a theimi kha na khamh khawh hna nakhnga hi thil hi ngol loin tuah lengmang ko hna.
1 Tar deuh cu va sica hna hlah. Na pa bantukin a lem tu in va lem hna. A no deuhmi kha na unau bantuk ah rel hna, 2 a tar deuhmi nu kha na nu bantuk ah rel hna law a no deuhmi nu kha thiannak in na far ah rel hna. 3 Nuhmei a si taktakmi cu hmaizah hna. 4 Sihmanhsehlaw nuhmei nih cun fa si hna seh, tu si hna seh a ngeih hna ahcun, cu hna nih zumh awk tlak tein an innchungkhar zohkhenh le an pa si hna seh, an pi an pu si hna seh, cawm ṭhan ve cu an rian pakhatnak ah an chiah awk a si i cucu biaknak lei in an rian Pathian nih tuah hna seh ti a duhmi cu a si. 5 Ahohmanh bawmtu a ngei lomi nuhmei, Pathian lawng aa bochan i chunzan in a sinah thla a cammi cu nuhmei taktak a si. 6 Asinain nuamhnak lei i aa pemi nuhmei cu a nung nain a thi cangmi a si. 7 Annih cu ahohmanh nih an mawhchiat hna nakhnga lo hi nawlbia hi pe hna. 8 Mi pakhatkhat nih a rualchan kha a zohkhenh hna lo ahcun, cun cu nak hmanh in biapi deuh a simi cu, a innchungkhar kha a zohkhenh hna lo ahcun, amah cu zumhnak a hlawmi, Pathian a zum lomi nak hmanh in a ṭha lo deuhmi a si. 9 Nuhmei cazin chungah khan kum sawm ruk a ti lomi cu khumh ti hna hlah. Cuhleiah amah cu voi khat lawng va a ngeimi a si lai i 10 rian ṭha ṭuannak leiah min ṭhami a si lai: amah cu a fale ṭha tein a cawmkengmi, khualtlung a dawmi, Pathian mi an ke a ṭawlpiakmi, harnak a tongmi hna a bawm tawnmi le thil ṭha tuahnak ah aa hmangmi a si lai. 11 Cun nuhmei kum no deuh pawl cu nuhmei cazin chungah khan khumh hna hlah. Zeicahtiah va ngeih an duh ṭhan tikah Khrih kha an chuahtak i 12 Khrih sin i bia an i kammi kha an hrawh. 13 Inn khat hnu inn khat an vak lengmang i an caan kha pakpalawng men ah an hman. Cun cu nak hmanh in a ṭhalo chinmi cu, mi congoih kha an thiam i a kenkip ah khan an vaa sawh i chim awk a si lomi zong kha an chim lengmang. 14 Cucaah cun nuhmei kum no deuh pawl cu va ngei ṭhan ko hna seh law, tefa zong ngei hna seh law an inn an lo kha zohkhenh hna seh law cuticun kan ral pawl kha kanmah thangchiatnak caan ngei kho hna hlah seh, ti ka duh. 15 Nuhmei cheukhat cu Satan zulh awkah khan an i mer ṭhan cang. 16 Sihmanhsehlaw a zummi pakhatkhat nih an innchungkhar ah nuhmei an ngeih hna ahcun, ṭha tein an zohkhenh hna awk a si; Khrihfabu cungah kha rian kha an chiah men awk a si lo, Khrihfabu nih cun zohkhenhtu a ngei lo taktakmi nuhmei kha a zohkhenh khawh hna nakhnga, kha rian kha an chawn awk a si. 17 Khrihfabu ṭha tein a hruaitu Khrihfa upa hna cu, an hmuh awk a simi kha a let hnih in hmuh awkah an i tlak; cu hna lak zongah cun phungchim le cawnpiak i a ṭangmi kha hmuh awkah an i tlak khun. 18 Cathiang nih, "Cawtum cu facang a cil lioah a hmur ṭem hlah u," a ti i, "Rianṭuantu nih a ṭuan man hmuh awk a tlak," a ti fawn. 19 Khrihfa upa cu thil ṭhalo pakhatkhat an puh tikah cu kong a hngaltu tehte pahnih tal an um lo ahcun, zei ah relpiak duh hna hlah. 20 Sualnak a tuahmi kha zapi hmaiah chimhring hna law a dang nih khan an ṭih lai. 21 Pathian le Khrih Jesuh le a thiangmi vancungmi hmaika ah, zei thil paoh na tuah tikah aho cung hmanh ah duhdanhnak zeihmanh um loin na tuah nakhnga hi cawnpiaknak hi va zul ko tiah kan nawl. 22 Bawipa rianṭuantu ding caah ahohmanh khulrang tuk in kutchuannak va pe hna hlah. Midang tuahmi sualnak ah i tel loin thiang tein um i zuam ko. 23 Ti lawng kha ding ti loin, na paw a fak lengmangmi kha an bawmh nakhnga, zu kha tlawmpal in rak ding. 24 Micheu cu an sualnak kha fiang tein a lang ko i an sualnak cu anmah hlanah biaceihnak kha a phan ko; sihmanhsehlaw a cheu cu an sualnak kha a hnu lawngah a lang. 25 Cu bantukin thil ṭha tuahmi hi fiang tein an lang ve ko i a lang kho rih lomi zong thuh khawh an si lo.
1 Sal nih nan bawile cu hmaizah awktlak ah nan rel hna awk a si. Cuti nan tuah lo ahcun kan Pathian min le kan in cawnpiakmi hna kha thangchiatnak nan hmuhter sual hna lai. 2 Nan bawile cu a zummi an si ahcun, atu cu unau kan si cang sawk tiin nan serhsat hna lai lo. An rian kha ṭha chinchin tu in nan ṭuanpiak hna lai, zeicahtiah nan ṭuannak thawngin thil ṭha a hmumi hna cu, zumhnak le dawtnak ah nan u le nan nau an si. 3 Hihi na cawnpiak hna awk le na chimh hna awk a si. Kan Bawi Jesuh Khrih bia le kan biaknak phung nih a kan cawnpiakmi he aa khat lomi cawnpiaknak phun dang a cawnpiaktu hna paoh cu 4 porhlawtnak in a khat i zeihmanh a hngal ṭung lomi an si. Biafang tete i al duhnak lungthin, a ngan a dam lomi duhnak a ngeimi kha an si i cu nih cun nahchuahnak, lung i khah lonak, pakhat le pakhat i nihsawhnak, pakhat le pakhat i lunghrinhnak 5 le dong loin bia i al lengmangnak kha a chuahter: biatak a ngei ti lomi cu hi bantuk hi an si ko. Biaknak hi rumnak lam pakhat ah an ruah. 6 Biaknak nih hin rumnak a chuahpi taktak, sihmanhsehlaw cu rumnak a ngeimi cu mah tinvo i a lung hna a ngammi kha an si. 7 Zeidah vawlei ah hin kan hun i chuahpi? Zeihmanh kan i chuahpi lo. 8 Cu bantukin hi vawlei in kan kal tik zongah zeihmanh kan i kalpi kho lai lo. Cucaah cun rawl le fenh-aih kan ngeih ahcun cucu kan i zat awk a si ko. 9 Sihmanhsehlaw rum a duhmi hna cu tukforhnak chungah khan an tla i ṭih a nungmi le ṭhat lonak a chuahter khotu duhnak nih khan rap foih in a foih hna i cu nih cun rawhralnak ah khan a kalpi hna. 10 Tangka duhnak hi ṭhat lonak phun kip chuahnak hram a si. Mi a cheu cu tangka ngeih an duh tuk caah zumhnak kha an kaltak i ngaihchiatnak a phunphun an tong. 11 Sihmanhsehlaw nang cu Pathian mi na si caah hi thil vialte hi hrial hna. Dinnak le Pathian hmaizahnak le zumhnak le dawtnak le in-khawhnak le lungnemnak kha tuah i zuam hna. 12 Zumhnak tlik zuamnak ah hin na tha ngeihmi dihlak in i zuam law zungzal nunnak kha co i zuam. Tehte tampi hmaiah na zumhnak na rak phuan ah khan Pathian nih an kawhnak cu hi nunnak hmuh awk caah hin a rak si. 13 Zeizong vialte nunnak a petu Pathian le Pontius Pilat hmaika ah aa phuangmi Khrih Jesuh hmaiah nangmah cu hitihin nawl kan pek. 14 Kan Bawipa Khrih Jesuh Ni a chuah hlantiang a nawlbia cu thiangte le palhnak zeihmanh um loin zulh i zuam. 15 Cu Ni cu Pathian nih a caan a rem a ti tikah a tlunter ko lai; zeicahtiah Pathian lawnglawng cu thangṭhat awk tlak Uktu le siangpahrang hna Siangpahrang le bawi vialte hna Bawi a si. 16 Amah lawnglawng cu thih a thiam lomi, a naih in naih ngam lomi ceunak chung i a ummi a si. Amah cu ahohmanh nih an hmu bal lo, ahohmanh nih an hmu kho lai lo. Amah cungah cun upatnak le thil ti khawhnak zungzal in um ko seh! Amen. 17 Vawleicung thil i a rummi kha, nan i porhlawt awk a si lo, cun bochan awk a tlak lomi nan rumnak hi a bo zong nan i bochan awk a si lo, tiah na cawnpiak hna lai. Sihmanhsehlaw kan ca i a ṭha dingah zeizong vialte siang ngaiin a kan petu Pathian kha nan i bochan awk a si, tiah na chimh hna lai. 18 Ṭhatnak tuah le thil ṭha tuahnak i rum le nunsian le thil ṭhenh sian kha na chimh hna lai. 19 Cu bantukin an tuahmi cu hmailei an hram fehnak ding ca i ro an i khon a si. Cun nunnak taktak a simi nunnak cu an hmuh khawh lai. 20 Timote, ken awk an in fialmi thil cu him tein na ken hna lai. Pathian hmaizah loin biachim lengmang le hruhnak bia alnak, mi a cheu nih hmaan lopi in "Fimnak" tiah an timi cu hrial naa zuam hna lai. 21 Mi a cheu nih cu fimnak cu kan ngei an ti i zumhnak kha an nganh diam! Pathian vel cu nan dihlak cungah um ko seh.
1 Khrih Jesuh he kan i pehtlaihnak thawngin Pathian nih a kan kamhmi nunnak kan hmuhmi kong chim awkah thlahmi keimah Paul, Pathian duhning in Khrih Jesuh lamkaltu a simi nih, 2 ka dawtmi ka fa Timote, ca kan kuat. Pathian kan Pa le kan Bawipa Khrih Jesuh nih vel le zaangfahnak le daihnak in pe ko seh. 3 Kan pupa hna nih an rak biak bantukin kei zong nih lungthiang tein ka biakmi Pathian cu, chun he zan he ka thlacamnak i nangmah kan theih fate, ka lawmh zungzal. 4 Na mitthli kha ka philh lo i lunglawmhnak in ka khah nakhnga nangmah hmuh cu ka duh hringhran. 5 Na pi Lois le na nu Zunis nih an ngeihmi zumhnak bantuk, zumhnak taktak na ngeih kha ka hngalh i atu zongah hin na ngei ko tiah ka zumh. 6 Cucaah na cung i ka kut ka rak chuan tik i Pathian nih an pekmi laksawng kha na nunter peng nakhnga chimh ṭhan kan duh. 7 Pathian nih a kan pekmi Thlarau nih cun mi ralchia ah a kan ser lo, ṭhawnnak le dawtnak le mah le mah i uk khawhnak tu khan a kan khahter. 8 Cucaah kan Bawipa kong chim cu na ningzak hlah, a ca i thongtlapa keimah zong hi ka zahpi hlah. Pathian nih thazang an pekning in Thawngṭha ca i temhnak in kha ngamh lehlam ko. 9 Pathian nih cun amah mi hrimhrim si awkah a kan khamh i a kan auh; cucu kanmah tuahmi ruangah si loin amah nih aa tinhmi le vel a kan ngeih ca ruang tu ah khan a si. Hi a vel cu caan hramthawk hlan in Jesuh Khrih in a kan pek cang, 10 sihmanhsehlaw atu ceo ah hin kan Khamhtu Khrih Jesuh a ratnak thawngin cucu kan sinah phuan a si. Thihnak ṭhawnnak kha a donghter cang i thih thiam ti lo nunnak cu Thawngṭha in kan sinah a phuan cang. 11 Cu Thawngṭha thanhtu dingah Pathian nih lamkaltu le cawnpiaktu ah a ka ser i 12 hi bantukin sifahnak ka inmi vialte hna hi, hi ruangah hin a si. Asinain ka lung a dong naisai lo, zeicahtiah kaa bochanmi cu ahodah a si kha ka hngalh i ka kut chungah a ka pekmi thil kha khi Ni tiang him tein a ken khawh ti kha fiang tein ka zumh. 13 Kan cawnpiakmi biatak kha fek tein i tlaih hna law na zulh awkah i chiah hna, cun Khrih Jesuh he kan i pehtlaihnak thawngin kan ta a simi zumhnak le dawtnak chungah khan um peng ko. 14 Kan chungah a ummi Thiang Thlarau ṭhawnnak thawngin na kut chungah chiahmi thil ṭha kha him tein keng hna. 15 Asia ram chung i a ummi nih an dihlak in an ka zamtak ti kha na hngalh, cu hna lakah cun Figelas le Hermogenes zong an i tel. 16 Onesiforas nih voi tampi ka lung a ka lawmhter caah Pathian nih a innchungkhar cu zaangfahnak pe ko hna seh. Thong ka tlak kha a ka zahpi lo, 17 Romans khua a phak cangka, a ka hmuh hlan lo a ka kawl. 18 Khi Ni ah Bawipa sin in zaangfahnak a hmuh nakhnga a caah thla ka cam. Cun ka caah zeitluk in dah Efesa khua ah rian a ṭuan ti kha na hngalh.
1 Ka fapa, Khrih Jesuh he kan i pehtlaihnak thawngin kan hmuhmi Pathian vel nih ṭhawnnak in pek ko seh. 2 Tehte tampi hna theih ah ka chimmi bia kha i lak law, midang a cawnpiak kho ve dingmi, na zumhmi hna kha va kenter hna. 3 Khrih Jesuh ralkap zumh awk tlak bantukin sifah innak ah khan ing ve ko. 4 Ralkap a ṭuan liomi nih cun a cung bawi lungton kha a duh caah ralkap a si lomi hna rian ah khan aa sawhkalh len lo. 5 Tlik zuamnak ah a tlimipa nih tlik zuamnak phung kha a zulh lo ahcun laksawng kha a hmu kho lo. 6 Rian a hran a thattu lothlopa nih khan, rawl cu ṭuan a cut tikah, a hmuh awk a simi cu a hmuh hmasa bik awk a si. 7 Bawipa nih zeizong vialte hngalh khawhnak an pek lai caah ka chimmi hi ruat hna hmanh. 8 Thawngṭha ka chimmi chungah a um bang khan, thihnak in thawhtermi Jesuh Khrih, David tefa a simi kha, philh hlah. 9 Thawngṭha ka chim ruangah temhinnak ka huah i misual bantukin thir cikcin in an ka khih. Sihmanhsehlaw Pathian bia cu thir cikcin in hren khawh a si lo. 10 Cun hi vialte ka innak hi Pathian nih a thimmi hna zawn ka ruah caah a si i Khrih Jesuh thawngin hmuhmi a sunglawimi le zungzal in a hmunmi khamhnak kha hmu hna seh ti ka duh caah a si. 11 Hi a tanglei bia hi ahmaanmi bia a si: "Amah he kan thih ṭi ahcun, amah he a nun zong kan nung ṭi lai. 12 Kan in khawh peng ahcun, a uk zong amah he kan uk ṭi lai. Kan hlawt ahcun, amah zong nih a kan hlawt ve lai. 13 Zumh awk tlak loin kan um hmanh ah, anih cu zumh awk tlak a si ko. Zeicahtiah amah le amah cu aa hleng kho lo." 14 Biafang i al lengmang kha ngol u, tiah Pathian hmaiah ralrinnak pe hna law, na mi pawl kha, cucu chim ṭhan lengmang hna. Cu nih cun ṭhatnak zeihmanh a chuahpi lo, a ngaitu kha a hrawh lam a hrawh men hna. 15 A rian a zahpi lomi, Pathian biatak hmaan tein mi a cawnpiaktu saya bantukin Pathian hnatlaknak kha na hmuh khawh nakhnga fak piin i zuam. 16 Pakpalawng a simi le hruhnak men a simi, i al lengmangnak kha hrial i zuam. Cu nih cun Pathian he lam a hlatter chinchin hna. 17 Annih cawnpiaknak cu hma a porter chintu men bantuk a si. Hi cawnpiaktu hna lak i pahnih cu Hymenaias le Felitas an si. 18 Biatak lam khan an pial i, "Thawhṭhannak cu atu ah hin a si diam cang," tiin Khrihfa mi a cheu kha an lung an tuai hna. 19 Sihmanhsehlaw Pathian nih a bunhmi hram fek cu hninh khawh a si lo, cu hram cungah cun "Bawipa nih amah ta a simi cu a hngalh ko hna," ti le, "Bawipa ta ka si a timi paoh nih cun palhnak a tuahmi kha a ngol awk a si," ti kha an i ṭial. 20 Inn nganpi chungah hin umkheng a phunphun an um tawn, a cheu cu ngun in sermi an si, a cheu cu thing in sermi an si i a cheu cu tlak in sermi an si; cun a cheu cu caan sung khun i hman awk caah an si i a cheu cu a menmen i hman awk caah an si. 21 Ahohmanh a man a sungmi le a thiangmi thil lak i aa tel kho ve ding, inn Bawi nih a hman awkah aa tlakmi si ve dingah cun, cawnpiaktu ṭhalo vialte kha a kal tak hna awk a si; cun hmaizah awk tlak a simi rian zei rian paoh caah khan aa tlakmi a si lai. 22 Tlanval lio pumsa duhnak kha zamtak i zuam hna law, kan bawm ko tiah Bawipa sinah thla a cam lengmangmi hna he dinnak le zumhnak le dawtnak le daihnak kha kawl i zuam u. 23 Bia i al lengmangnak, hruhnak men le zeihmanh hngalh set ṭung loin i al lengmangnak hi hrial i zuam, zeicahtiah hi bantuk bia i al lengmangnak cu i siknak ah a dong ti kha na hngalh. 24 Bawipa sal cu, aa si lengmangmi a si awk a si lo. Mi vialte cungah zaangfahnak a ngeimi, lung a saumi cawnpiaktu ṭha, 25 amah a dohtu hna a chimhhrin tik hna i nem tein a chimhringmi a si awk a si. Annih cu Pathian nih an lung a thlen khawh ko hna i biatak kha a hngalhter ṭhan khawh ko hna. 26 Cun an lung a hung fim lai i amah duhnak tuah awkah a foih i sal ah a hrengtu hna Khuachia rap khan an luat lai.
1 Ni hmanung bik kha an phak tikah harnak caan a si lai ti kha philh hlah. 2 Mi cu anmah zawn lawng aa ruatmi, a hak a kaumi, aa porhlawmi le lung a puammi an si lai; an nu le an pa kha an zawmhtaih hna lai i an nawl an ngai duh hna lai lo; lawmh a hngal lomi le biaknak zeihmanh i a rel lomi an si lai; 3 zaangfahnak an ngei lai lo, mi zawnruahnak an ngei lai lo, mi thangchiat duhmi an si lai, ruru-hranghrang in khua a sami an si lai i ṭih a nungmi an si lai; ṭhatnak kha an huat lai; 4 hawi rawi a hmangmi an si lai, duhpaoh khuasa an si lai i porhlawtnak in an khat lai; Pathian nakin nuamhnak kha an duh deuh lai; 5 kan biaknak phung hi a lenglei in an i tlaih lai, sihmanhsehlaw a chung i a ummi ṭhawnnak taktak kha cu an duh lai lo, cu hna cu hrial i zuam hna. 6 Hi hna pawl a cheukhat cu mi inn chungah khan an va lut i nu derthawm pawl, an sual thilrit nih a rak nenhmi hna le an duhnak nih a kenkip i a rak vahpi lengmangmi hna kha an va lak khawh hna, 7 hi nu hna hi cawn le hngalh a duh zungzal ve ṭung, biatak a hngal kho bal ṭung lomi an si. 8 Jannes le Jambres nih Moses an rak doh bantuk khan hi mi hna hi biatak a dotu an si; annih cu an ruahnak ṭha tein rian a ṭuan ti lomi, zumhnak lei i zeihmanh a si ti lomi an si. 9 Sihmanhsehlaw an hlawhtlin chung cu tawite lawng a si ko lai. Moses a rak dohtu hna Jannes le Jambres an hruh a langh zau bantuk khan, an hruhnak cu mi nih an hmuh zau ko lai. 10 Sihmanhsehlaw nang nih cun kaan cawnpiaknak le ka ziaza le ka nunnak i kaa tinhmi kha na zulh hna; zumhnak ka ngeihmi le ka lungsaunak le ka dawtnak ngeihmi le ka in khawhnak ngeihmi le 11 hremnak ka huahmi le fahnak ka inmi kha na hmuh hna. Antiok, Ikonium le Listra i hremnak fakpi ka inmi vialte kha na hngalh dih hna. Sihmanhsehlaw Bawipa nih cu vialte chung cun a ka chanh. 12 Khrih Jesuh he i pehtlai i Pathian nunning in nun a duhmi paoh cu hremnak an ing ko lai; 13 sihmanhsehlaw miṭhalo le chungthu lengnal pawl cu a ṭhalo chin lengmang khan an um lai i midang kha an hlen lengmang hna lai i anmah le anmah zong kha an i hleng lengmang lai. 14 Sihmanhsehlaw nang cu biatak kan cawnpiakmi ah khan dir law fek tein zum peng ko. Nangmah cawnpiaktu saya cu ahodah kan si kha na kan hngalh i 15 na ngakchiat lio tein Cathiang kha a hngalmi na si; na hngalh bangin cu Cathiang hna nih cun Khrih Jesuh zumhnak thawngin hmuhmi khamhnak i an kalpi khotu fimnak kha an pek. 16 Cathiang hi a dihlak in Pathian thaw chuahhnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a ṭhahnemmi a si. 17 Cucaah cun Pathian rianṭuantu a simi cu zeizong zeizong ah tlamtlingmi a si awk le thil ṭha phun zakip tuah khawh awkah thilthuam tling tein a ngeimi a si awk a si.
1 Pathian hmai le, mi vialte a nungmi he a thimi he, bia a ceihtu ding Khrih Jesuh hmaiah, fak piin kan nawl; cun a rat lainak le a pennak in kan nawl fawn; 2 phung kha chim hna, a caan a rem zongah a rem lo zongah chim hna; al a herh ahcun al hna, chimhhrin a herh ahcun chimhring hna, a nawl in nawl a herh ahcun nawl hna law lungsau thinfual in cawnpiak hna. 3 Cawnpiaknak a hmaanmi kha mi nih an ngaih duh lo i anmah duhnak tu kha an zulh i anmah theih duhmi chimtu dingah cawnpiaktu an lak hna lai caan kha a phan lai. 4 Biatak kha an kaltak lai i minung tuanbia tu kha ngaih an duh deuh lai. 5 Sihmanhsehlaw nang cu zeitik caan paoh ah daite le khualu khuataw khak tein um ko; harnak kha in i zuam, Thawngṭha karhter kha fak piin i zuam, Pathian nih an kawh chan rian vialte kha ṭuan. 6 Kei tu cu raithawinak biakṭheng cung i an ka chiah caan a phan cang; hi vawlei cung nunnak hi ka chuahtak lai caan a phan cang. 7 Tlik zuamnak ah khan ka tha a dihumnak in ka chuah cang, a dongh tiang khitkhet in ka tli cang, zumhnak kha fek tein kaa tlaih zungzal. 8 Atu cu teinak laksawng nih khan a ka hngah ko cang, cu laksawng cu ka Bawipa, dinnak Bawi nih, cu Ni i a ka pek laimi dinnak suiluchin cu a si — keimah lawng cu a ka pekmi ka si lai lo, amah a langh lainak dawtnak in a hngaktu vialte zong kha a pek ve hna lai. 9 Khulrang in ka sinah ra law ka duh. 10 Demas cu tu chan vawlei he an i duh i a ka zamtak ai; Thesalonika khua ah a kal cang. Kresen cu Galati ram ah a kal i Titas cu Dalmatia ram ah a kal. 11 Luka lawng ka sinah a um. Marka kha rak i ratpi, zeicahtiah ka rianṭuannak ah misantlai ngai a si. 12 Taikhikas kha Efesa khua ah ka kalter. 13 Cun na rat tikah Troas khua i Karpas inn i ka chiahtakmi ka angkileng kha rak phor te, cun cauk zong kha rak phor hna law saphaw cauk ko kha rak philh sual hna hlah. 14 Dar soser Alekzandar nih khan ka cungah harnak nganpi a tuah. Bawipa nih a rianṭuanning in a cham ve te ko lai. 15 Cun nangmah zong amah cu i ralring, zeicahtiah kan bia kha fak piin a do zungzalmi a si. 16 Biaceihnak i ka chuah hmasa bik ah cun ahohmanh nih an ka dirpi lo; an dihlak in an ka zamtak. Pathian nih sual ah relpiak sawh hna hlah seh. 17 Sihmanhsehlaw Bawipa nih a ka umpi i Jentail mi vialte nih an theih khawh nakhnga Thawngṭha cu tling cikcek tein chim khawhnak thazang a ka pek; cun chiandeih kaa chung khan a ka chanh. 18 Cun Bawipa nih ṭhat lonak vialte chungin a ka chuah lai i him tein a vancung Pennak ah cun a ka luhpi lai. Amah cu zungzal in zungzal tiang thangṭhat si ko seh. Amen. 19 Prisilla le Akuila le Onesiforas innchungkhar kha an kut ka tlaih hna. 20 Erastas cu Korin khua ah a um i Trofimas cu a zawt caah Miletas ah ka kaltak. 21 Khuasik tlak hlanah rat rak i zuam. Zubulas, Pudens, Linas le Klaudia nih an in biakchawnhnak na kut an in tlaih i a dang kan unau pawl zong nih an in tlaih ve. 22 Bawipa cu na thlarau sinah um ko seh. Nan dihlak sinah Pathian vel cu um ko seh.
1 Zumhnak kan i hrawmmi chung i ka fa taktak a simi Tias, hi ca hi kan kuat. Pathian kan Pa le Khrih Jesuh kan Khamhtu nih vel le daihnak in pe ko hna seh. 2 - 4 Pathian sal le Khrih Jesuh sal ka sinak a langhtertu cu zumhnak le hngalhnak le ruahchannak an si, zumhnak cu Pathian nih a thimmi hna chung i a hung thomi zumhnak, hngalhnak cu kan biaknak phung nih a kan cawnpiakmi biatak hngalhnak, ruahchannak cu zungzal nunnak i ruahchannak. Cu zungzal nunnak cu lih a chim kho lomi Pathian nih caan hramthawk hlan in a kan kamh cangmi nunnak kha a si i atu ah amah nih a caan a rem a timi caan ah a phuan cang. Cu bia a phuanmi rian cu keimah kha ṭuan awkah a ka fial i kan Khamhtu Pathian nawl in cu bia cu ka chim. 5 Krit tikulh i kan chiahtak ah khan ka rak i tinhmi cu, kan ṭuannak i kan nganh tami kha a ningcang tein na hun sersiam hna lai i khua kip ah Khrihfa upa kha na hun chiah hna lai, ti a si. Na hun zulh awkah tiin cawnpiaknak kan chiahtami kha philh hna hlah. 6 Cu hna cu: Khrihfa upa cu mawhchiat awk a um lomi an si lai, nupi pakhat lawng a ngeimi an si lai, an fale kha a zumtu a simi an si lai i puarhran lei le nawlngaih lo leiah minthang lomi an si lai, ti kha an si. 7 Khrihfabu hruaitu cu Pathian rian ṭuantu a si caah mawhchiat awk a um lomi a si lai. Miruamkai a si lai lo, mithintawi a si lai lo, zurit hmang a si lai lo, mi-aukhuan hmang a si lai lo, mihakkau a si lai lo. 8 Khualtlung a dawmi a si lai i thil ṭha a duhmi a si lai. Amah le amah aa uk khomi, a dingmi, a thiangmi le aa sum khomi a si lai. 9 Cawnpiaknak ahmaanmi aa tlaih pengmi a si lai, cuticun a bia a ngaitu pawl kha cawnpiaknak ṭha in an lung a thawhter khawh hna lai i cawnpiaknak ṭha a altu pawl kha an palhnak a langhter khawh lai. 10 Uk khawh lomi tam tuk an um i Judah phung in Khrihfa phung i a hung lutmi hna lakah hin an tam khun; an duhduh in bia an chim i mi ruahnak kha a ping a pang ah an kalter. 11 Kha hna pawl kha kham an hau, zeicahtiah an chim awk a si lomi thil an chimmi nih khan innchungkhar hna an dihlak in a tuaiter hna i cu zong cu ningzah awk tlak a simi thil, tangka hmuh duh men caah khan a si. 12 "Krit mi cu milihchim, saram bantuk, mithathu, mi-orkhu," tiah anmah Krit mi lila nih a rak ti hna i 13 a chimmi cu a hmaanmi a si. Cucaah cun fak piin na chimhhrin hna lai. Cuticun a ngan a dammi zumhnak kha an ngei kho lai i 14 Judah mi hna tuanbia ṭukṭak le biatak a hlawmi hna nih an chuahpimi minung nawlbia kha zeihmanh ah an rel ti hna lai lo. 15 A thiangmi caah cun zeizong vialte hi a thiang dih ko, sihmanhsehlaw a hnawmtammi hna le a zum duh lomi hna caah cun, an lungthin le an chiaṭha thleidannak kha a thur caah, zeihmanh a thiangmi a um lo. 16 Pathian kan hngalh ti cu an ti, sihmanhsehlaw an tuahnak nih an chimmi cu a si lo ti kha a langhter. Mi huat awkin an um, nawl ngai loin khua an sa i thil ṭha tuah dingah an i tlak lo.
1 Sihmanhsehlaw nang nih cun cawnpiaknak a ṭhami kha na cawnpiak hna lai. 2 Tar deuh pawl kha, rihai hlah u, lungfim in um u, mah le mah aa uk khomi si u; zumhnak le dawtnak le in khawhnak fek a ngeimi si u, tiah na chimh hna lai. 3 Nutar deuh pawl kha, nan umtuning ah mi hmaizah a thiammi nan si awk a si, na ti hna lai. Mi congoih hmangmi le mizuram an si awk a si lo. 4 Nu no deuh pawl kha, an vale le an fale dawt an thiam nakhnga le, 5 mah le mah aa uk khomi an si nakhnga le a thiangmi an si nakhnga le innchungkhar khuasak ṭha tein a zohkhenh khomi an si nakhnga le an vale bia a ngaimi an si nakhnga, thil ṭha nan cawnpiak hna lai, tiah nutar deuh pawl cu na chimh hna lai. Cuti an tuah ahcun Thawngṭha cu mi nih an thangchiat kho lai lo. 6 Cu bantuk ṭhiamṭhiam in, tlangval pawl zong kha, mah le mah aa uk khomi si u, tiah forh hna. 7 Cun nangmah hrimhrim zong, thil ṭha tuahnak lei paohpaoh ah, an i zohchun awk tlak na si lai. Na cawnpiak hna tikah lungtak te le biatak tein cawnpiak hna. 8 Soi khawh lo ding bia ṭha kha hmang hna law, na ral pawl kha kan thangchiatnak zeihmanh chim awk an ngeih lai lo caah an ning tu zak seh. 9 Sal hna kha, nan bawile cu an nawl ngai hna u law an lung lawmhter hna u, tiah chim hna. An bia an leh lakmak hna awk a si lo i an thil zong an fir awk a si lo. 10 Thil zeipaoh an tuahnak ah khan kan Khamhtu Pathian kha a thang an ṭhat nakhnga ṭha te le zumh awk tlak tein an tuah awk a si. 11 Zeicahtiah Pathian nih a vel cu mi vialte khamhnak caah a phuan cang. 12 Cu Pathian vel nih cun pathian zeirello in kan nun tawnnak le hi vawlei cung pumsa duhnak hlawt kha a kan cawnpiak i hi vawlei cungah hin mah le mah aa uk khomi si awk le ding tein nun le Pathian ṭihzah in um kha a kan forh. 13 A liannganmi kan Pathian le kan Khamhtu Khrih Jesuh sunparnak kha a langh tikah kan i ruahchanmi cu a tling lai, cu a tlin lai Ni cu ngangngan ngaiin kan hngak ko. 14 Kannih cu ṭhat lonak chungin chanh awkah le amah ta a simi mithiang si awkah le ṭhatnak tuah a duhmi siter awkah, kan caah a nunnak kha a pek. 15 Hihi cawnpiak hna law thazang na pek hna le na chimhhrin hna tikah na nawlngeihnak kha fak piin hmang. Ahohmanh i zohchukter hna hlah.
1 Bawi le nawl ngeitu pawl kha, an nawl nan ngaih hna lai i thil ṭha tuah kha nan i tim zungzal lai, tiah na mi pawl kha chim ṭhan hna. 2 Ahohmanh i congoih hlah u, pakhat le pakhat i rem le i daw le lungnem cio tu in nan um lai, tiah na chimh hna lai. 3 Zeitintiah kanmah hrimhrim zong kha kan rak hrut, nawl ngai loin khua kan rak sa i kan rak palh. Pumsa duhnak le nuamhnak sal kan rak si. Mi kha kan rak nahchuah hna i ziar kan rak ngeih hna; mi nih an rak kan huat i kannih zong nih kan rak huat hna. 4 Sihmanhsehlaw kan Khamhtu Pathian dawtnak le zaangfahnak cu vawlei cungah a hung langh tikah, thil ṭha kan tuahmi ruangah si hin loin amah nih a kan zaangfah ca lawnglawng ah kannih cu a kan khamh i 5 cu a kan khamhnak cu hrinṭhannak ti thawng le Thiang Thlarau nih mi tharter khawhnak a ngeihmi ṭhawnnak thawngin a si. 6 Jesuh Khrih kan khamhtu thawngin Pathian nih Thiang Thlarau cu tampi in a kan toih i 7 cucaah a vel ruangah Pathian he cun kan i rem i kan i ruahchanmi zungzal nunnak kha kan hmuh. 8 Hi bia hi biatak a si. Hi bia hi biapi in na rak lak hna awkah ka duh. Pathian a biami nih cun hmaizah awk tlak a simi rian kha ṭuan hna seh law, cu rian cu anmah caah hmaizah awk tlakmi rian a si ti lawng si loin an minung hawi ca zong i a ṭhahnemmi rian a simi kha si hna seh. 9 Asinain bia i al lengmangnak le thawhkehnak min ṭialnak cazin sau pipi le i sik le Phungbia kong i alnak kha cu hrial i zuam ko hna. Cu bantuk cu santlai lomi thil, pakpalawng men an si. 10 Bu chung ṭhennak a chuahtertu kha, a tlawm bik ah voi hnih tal ralrinnak pe hna, cu hnuah cun chuah ko hna. 11 Cu bantuk mi cu an ruahnak ahmaan ti lo ti kha na hngalh i an palh ti cu an sualnak nih khan fiang tein a langhter ko. 12 Na sinah Artemas maw asiloah Atikhikas maw ka ratter hna tikah, ka sinah Nikapolis ah ra te law ka duh, zeicahtiah khika ah khuasik chung um kaa tim. 13 Sihni Zenas le Apollos kha an khual tlawnnak dingah na bawmh khawh chungin rak bawm hna law an herhmi paoh kha rak damhpiak hna. 14 Kan mi hna cu rian ṭha ṭuan kha cawnpiak hna; an nunnak ca i a herh taktakmi hmuh khawhnak kha chim hna; pakpalawng in um men hna hlah seh. 15 Ka sin i a ummi vialte nih na kut an in tlaih. Zumhnak i kan hawi hna kha, kan biakchawnhnak kut kan tlaihpiak hna. Nannih dihlak sinah Pathian vel cu um ko seh.
1 Khrih Jesuh ruangah thong i a tlami keimah Paul le kan nau Timote nih, kan hawikom le kan rianṭuan hawi a simi Filemon le 2 na inn ah aa pum tawnmi Khrihfabu le kan far le kan ralkap hawi Arkhipas kha ca kan in kuat hna. 3 Pathian kan Pa le Bawipa Jesuh Khrih nih vel le daihnak in pe ko hna seh. 4 Ka nau Filemon, thla ka cam fate nangmah kong kha ka chim i ka Pathian kha ka lawmh. 5 Hi kaa lawmhnak cu Pathian mi vialte na dawtnak hna le Bawipa Jesuh na zumhnak kong ka rak theih caah khan a si. 6 Khrih chung i kan nunnak ah thluachuahnak kan hmuhmi vialte hna hi, a zummi kan si ca i kan i hawikomhnak nih hin thuk deuh in a sullam kan hngalhter seh, ti hi ka thlacamnak a si tawn. 7 Ka dawtmi ka nau, dawtnak na ngeihmi nih ka lung a ka lawmhter ngaingai i lungṭhawnnak tampi a ka pek. Pathian mi vialte cu an lung na lawmhter dih ko hna. 8 Hi bantuk mi na si ti kha ka hngalh caah na tuah awk rian a si ti i ka ruahmi ah cun, ralṭha ngaiin kan fial ngam ko hnga i Khrih chung i na unau pakhat bantukin nawl zong kan pek ngam ko hnga, 9 asinain dawtnak lei in ka ruah tikah a nawl tu in kan nawl ahcun a ṭha deuh, ka ti. Atu ah keimah tarpa, Khrih Jesuh ruang i thong i a tlami nih nawl kan duhmi cu, 10 thonginn chungah ka fa i a cangmi Onesimas kong hi a si. 11 Hlanah cun na caah santlaihnak zeihmanh a rak ngei taktak lo, sihmanhsehlaw atu cu nangmah ca he keimah ca he santlaimi a si cang. 12 Amah cu na sinah ka rak in kuat ṭhan i hi kan kuat ah hin ka lung kha kan kuat chih. 13 Thawngṭha ruang i thong chung i ka um lioah hin, nangmah can i a ka bawmtu dingah amah hi ka sinah um seh ti cu ka duh ko. 14 Sihmanhsehlaw hnekchom in i bawmhter cu kan duh lo, nangmah nih nangmah lungtho tein na ka bawmh kha ka duh deuh. Cucaah cun nangmah hnatlak lomi cu zeihmanh ka tuah lai lo. 15 Onesimas he caan tlawmpal nan i ṭhen hi zungzal in hmunkhat i nan um ṭi nakhnga ding ca tu ah a rak si deuh ko lai. 16 Atu cu sal menmen a si ti lo, sal nak let tampi ṭha, Khrihfa chung i dawtmi unau a si cang. Kei nih cun ka dawt hringhran, nang nih zeitluk in dik na dawt chinchin lai — na caah sal lawng si ti loin Bawipa chung i unau a si cang. 17 Cucaah kei cu na hawi i na ka ruah a si ahcun, keimah na ka lawmh lai bantuk tein amah hi rak lawm law ka duh. 18 Na cungah ṭhat lonak a tuahmi a um le lei an bat a si ahcun, keimah cham awkah rak chia. 19 Ka kut hrimhrim in Keimah Paul nih kan cham lai, tiin ka ṭial hih. (Na nunnak hrimhrim na ka bat kha cu, kan chimh ṭhan awk a herh lem lo.) 20 Cucaah ka nau, Bawipa ruangah, hi thilte hi cu rak ka tuahpiak ko; Khrih chung i unau pakhat bantukin ka lung ka lawmhter ko. 21 Hi ca ka ṭial pah ah hin, kan fialmi cu na tuah lai, ti cu ka hngalh ko, kan fialmi nak tam deuh hmanh na tuah lai ti kha ka hngalh ko. 22 Cun inn zong rak ka damhpiak law ka duh hnga. Pathian nih nan thlacamnak kha an leh ṭheo hna lai i nanmah sinah a ka ratter ṭhan lai ti kha ka zumh. 23 Khrih Jesuh ruangah keimah sin i thong a tla vemi Epafras nih nan kut an tlaih hna. 24 Cun ka rianṭuan hawi Marka le Aristarkas le Demas le Luka nih nan kut an in tlaih ve hna. 25 Bawipa Jesuh Khrih vel cu nan dihlak sinah um ko seh.
1 Hlan ah cun Pathian nih kan pupa hna sin i bia a chim tikah profet kha a rak hman hna i a cheuchum tete le phun dangdang in a chimning cu a rak si. 2 Sihmanhsehlaw atu kan chan, chan hmanung bik a simi chan ah hin cun, kan sinah a Fapa in a bia cu a chim. Amah thawng cun Pathian nih van le vawlei vialte kha a ser hna i amah cu Pathian nih a donghnak i zeizong vialte uktu ding i a thimmi cu a si. 3 Amah cu Pathian sunparnak in a ceu i Pathian he aa lo taktakmi kha a si; cun van le vawlei kha, ṭhawnnak a ngeimi a bia in a domhtlaih hna. Minung cu an sualnak kha a thianhpiak dih hna hnu in vancung ah khin Lianngan Bik Pathian orhlei kamah a ṭhu. 4 Pathian nih a Fapa cu vancungmi hna a pekmi nakin a ngan deuhmi min a pek bantukin, vancungmi hna nak ngan deuh ah a ser. 5 Pathian nih a vancungmi pawl cu ahohmanh, "Nangmah cu ka Fapa na si, nihin ah na Pa ah ka cang," a ti bal hna lo. Cu hleiah, "Keimah cu a Pa ka si lai i amah cu ka Fapa a si lai," ti zongah a ti bal fawn hna lo. 6 Pathian nih a fater cu vawlei cung i a thlah tikah, "Pathian vancungmi vialte nih amah cu an biak awk a si," a ti. 7 Cun Pathian nih vancungmi pawl kong ah cun, "Pathian nih a vancungmi hna cu thlitu ah a ser hna i a rianṭuantu hna cu meizik ah a ser hna," tiah a chim. 8 Sihmanhsehlaw a Fapa tu cu, "Maw Pathian, na bawiṭhutdan cu zungzal in zungzal tiang a hmun lai: Na pennak cu dinnak in na uk. 9 Ahmaanmi thil cu na duh i ahmaan lomi thil cu na huat; Cucaah cun Pathian, na Pathian nih cun an thim i, Na hawile hna nih an hmuhmi nakin a ngan deuh suaumaumi upatnak lunglawmhnak kha aan pek," tiah a ti. 10 Cun, "Bawipa, nangmah nih vawlei cu ser hram na thawk i van khi nangmah kut nih a sermi an si. 11 Annih cu an lo dih lai, sihmanhsehlaw nang cu na hmun lai; puan bangin an hnawh dih lai. 12 Angki bangin na bil hna lai i puan bangin an i thleng dih lai. Sihmanhsehlaw nang cu a zungzal in nangmah ningte na si ko i na tar bal lo," tiah a ti rih fawn. 13 Pathian nih a vancungmi kha, "Na ral cu na ke tangah ka chiah hna hlan tiang, Ka orhlei kamah hin ṭhu tuah," tiah ahohmanh a ti bal hna lo. 14 A si ahcun vancungmi cu ahodah an si kun? Vancungmi cu Pathian rian a ṭuantu thlarau, khamhnak a hmu hngami bawmh awkah Pathian nih a thlahmi kha an si.
1 Cucaah a ping i kan kal sual nakhnga lo kan theihmi biatak kha fek chinchin in kan i tlaih awk a si. 2 Vancungmi hna pekmi bia hmanh kha ahmaan ti a si i a zul lomi le a ngai lomi cu dantatnak hmuh awk an i tlakmi kha pek an si ahcun, 3 kannih nih khamhnak hi tluk a nganmi hi zeirello in kan um ahcun, zeitluk in dah dantatnak cu kan luat lo chinchin lai? Hi khamhnak cu a hmasa bik ah Bawipa hrimhrim nih khan a thanh i a theimi hna nih khan a thanhmi cu ahmaan tiah an kan chimh. 4 Cu pinah annih nih tehte an khaanmi kha ahmaan tinak ah Pathian nih hmelchunhnak le khuaruahharnak le a ṭhawnnak in tuahmi thil phunphun kha a tuah i Thiang Thlarau laksawng kha a duhning in a phawt hna. 5 Pathian nih ser a rak i timhmi vawlei uktu dingah khan vancungmi cu a chia hna lo, atu i kan chimmi hi, cu vawlei kong cu a si. 6 Sihmanhsehlaw Cathiang hmun khat ka ah, "Pathian, minung hi zeidah a si i a kong hi na ruah? Minung hi zeidah a si i na hnakkar ah na tenh? 7 Caan tawite chung cu vancungmi hna nak niam deuh ah na ser taktak; sunparnak le upatnak kha na chinh i, 8 Zeizong vialte uktu ah na ser," tiin a um bang khan, a si lehlam. Pathian nih, minung cu, "zeizong vialte uktu" ah a ser ti a si; zeizong vialte timi chungah hin thil vialte an i tel dih. Sihmanhsehlaw minung nih zeizong vialte a uk lo ti cu kan hmuh ko. Cucaah cun a sullam zeidah a si hnga? 9 A sullam cu Jesuh ah khan kan hmuh. Caan tawite chung cu vancungmi nak niam deuh ah khan a ser taktak i cucu Pathian vel thawngin mi vialte kan ca i a thihnak ding caah khan a si. Cun thihnak a inmi ruangah khan atu cu sunparnak le upatnak kha luchin ah chinh a si cang ti kha kan hmuh. 10 Zeizong vialte a ser i a zohkhenhtu Pathian nih, a sunparnak i fa tampi phakter awkah, Jesuh cu harnak innak in mi tling ah a ser cu aa tlakmi thil hrimhrim a si, zeicahtiah Jesuh cu khamhnak ah a phakpitu hna a si. 11 Minung cu an sualnak kha a thianhpiak hna; minung sualnak a thianhtu le an sualnak a thianhpiakmi hna minung cu, an bu hnih in, an Pa cu aa khat ko. Cu ruangah cun Jesuh nih ka unau hna ti i kawh kha a ning a zak lo. 12 Amah nih, "Pathian, ka unau hna sinah na kong cu ka chim lai, Aa pummi an dihlak hmaiah nangmah cu kan thangṭhat lai," a ti bang khan a si. 13 Cun, "Pathian cu kaa bochan," tiah a ti i, "Pathian nih a ka pekmi ngakchia hna sinah hika ah ka um," ti zongah a ti fawn. 14 Cun ngakchia tiah a timi hna cu, thi le sa in a nungmi minung an si bantukin, Jesuh zong cu anmah bantuk ah a run i cang i an sining kha aa hrawm ve. Cu bantukin a si cu, thihnak cung i nawl a ngeitu Khuachia kha, a thihnak thawng cun a hrawh nakhnga le 15 thihnak an ṭih ruang i an nun chung vialte sal bantukin khua a sami hna kha a luatter hna nakhnga caah a si. 16 A bawmhmi hna cu vancungmi kha an si lo ti kha a fiang. Cathiang nih, "Abraham tefa kha a bawmh hna," a ti bantuk khan, a bawmhmi hna cu Abraham tefa tu kha an si. 17 Cucaah zeizong kip ah a unau hna bantuk kha a si awk hrim a si i cu bantukin a si cu, annih nih sual ngaihthiamnak an hmuh khawh nakhnga ding caah, zumh awk a tlakmi le zaangfah a thiammi an Tlangbawi Ngan a si nakhnga caah a si. 18 Amah hrimhrim nih khan tukforhnak le temhinnak kha a rak in cang caah tukforhnak a ingmi kha a bawmh khawh hna.
1 Pathian nih a kawh vemi Khrihfa u le nau hna, kan i lakmi phung ca i Tlangbawi Ngan si awkah Pathian nih a thlahmi Jesuh kong kha ruat hmanh u. 2 Moses cu Pathian innchungkhar rian ah a fel bantukin Jesuh zong cu hi rianṭuantu dingah a thimtu Pathian sinah khan zumh awk tlak tein a um ve. 3 Inn satu nih inn nakin upatnak a hmuh deuh bantukin Jesuh zong cu Moses nakin sunparnak hmuh awkah tam piin aa tlak deuh. 4 Nan hngalh cio bangin inn cu mi nih an sak taktak — zeizong vialte a satu bel Pathian a si. 5 Moses cu Pathian inn chungah khan rianṭuantu zumh awk tlak a rak si i Pathian nih hmailei ah a rak chim lai dingmi zong kha a rak chim. 6 Sihmanhsehlaw Khrih zumh awk tlak a sining cu, Pathian inn a zohkhenhtu Fapa ningin a si. Cu inn cu kanmah hi kan si i cu kan simi cu kan i ruahchanmi kha fek te le ṭih lo tein kan i tlaih peng lawngah kan si zungzal lai. 7 Cucaah Thiang Thlarau nih a ti bantukin, "Nihin ah Pathian aw kha nan theih ahcun lungkhong in um hlah u; 8 Nan pupa hna nih Pathian kha an rak doh i thetse ram i an rak hneksak bantuk khan um hlah u; 9 Pathian nih, 'Kum sawm li chung ka tuahmi kha an hmu ko nain, khika ah khan an ka doh i an ka hneksak.' 10 Cucaah an cungah ka thin a hun i annih cu ka caah zumhtlak an si bal lo i ka nawlbia kha an al zungzal i an cung i 11 ka thin a hun caah cun chiatser tein, 'An i dinhnak ca i ka pekmi hna ram ah cun an lut hrimhrim lai lo,' ka ti, tiah Pathian nih a rak ti." 12 Ka u le ka nau hna, a nungmi Pathian zamtak a duhmi lungthin ṭhalo le Pathian bochan duh lonak lungthin a ngeimi nan um sual nakhnga lo i ralring u. 13 Nannih cu sualnak nih an hlen hna nakhnga lo le lungṭhawng in nan um sual nakhnga lo, Cathiang nih, "Nihin," a timi kha nan caah nihin a si chung paoh cu, nifate in pakhat le pakhat i bawm lengmang u. 14 Zeicahtiah a hramthawk tein ralṭha ngaiin kan rak zumhmi kha fek tein a dongh tiang kan i tlaih ahcun, kan dihlak in Khrih hawi kan si dih zungzal lai. 15 Cathiang nih a chimmi cu hihi a si: "Nihin ah Pathian aw kha nan theih ahcun Nan pupa hna nih Pathian an rak doh i an lung an rak ṭhawn bantuk khan, lung ṭhawng in um hlah u." 16 Ahodah Pathian aw cu a rak thei i Pathian a rak dohmi cu an si? Moses nih Izipt ram in a chuahpimi vialte kha an si ko. 17 Aho cungah dah Pathian kha kum sawm li chung a thin a hun? Sualnak a tuahmi, thetse ram i a thimi hna cungah khan a si. 18 Pathian nih, "Ka dinhnak chungah an lut lai lo," a ti ah khan, ahodah a tihnawh duhchan hna? Amah a dohtu kha a tihnawhchan hna. 19 Cucaah cun an zumh lo caah an rak luh khawh lonak kha a si, ti cu kan hmuh cang.
1 Atu cu Pathian nih dinnak a rak chimmi kha kan hmuh nakhnga, a biakam kha a kan pek i cu kamhmi dinhnak chungah cun a lut lomi nan um sual nakhnga lo, ralring tein um u sih. 2 Annih nih an rak theih bantuk khan, Thawngṭha cu kan theih cang. Sihmanhsehlaw an theihmi bia kha zumhnak in an cohlan duh lo caah an caah zeihmanh a ṭhahnem lo. 3 Cucaah, "Ka thin a hung i biakam tein, 'Kaa dinhnak chungah an lut hrimhrim lai lo,' ka ti," timi bia nih a sawh duhmi dinhnak chungah a lut i Pathian sinah aa dinmi cu zumtu kanmah tu hi kan si. 4 Vawlei a rak ser ri khan a rian cu lim a si ko cang nain hi bia cu a chim; zeicahtiah Cathiang nih pei hmunkhat ah ni sarihnak ni kong ah, "Ni sarih ni ah Pathian cu a rian vialte in aa din," tiah a ti kha. 5 Cun a cunglei i kan rel cangmi ah khan, "Ka dinhnak chungah an lut hrimhrim lai lo," tiah a um fawn. 6 Pathian dinhnak chungah a lutmi an um awk a si ti cu a fiang, sihmanhsehlaw Thawngṭha a thei hmasami hna nih khan an zumh lo ruangah an luh khawh lo caah Pathian nih ni dang pakhat kha a chiah ṭhan. 7 Cu hnu kum tampi ah kan chim cangmi, "Nihin cu Pathian aw kha nan theih ahcun, lungkhong in um hlah u," timi bia kha David kaa in a chim ṭhan. 8 Joshua nih Pathian dinhnak chungah khan a rak luhpi hna ahcun, cu hnuah cun Pathian nih, ni dang, timi kha a chim ti hnga lo. 9 Cucaah Pathian mi hna cu, sabbath dinhnak nih khan a hngah ko rih hna, 10 zeicahtiah Pathian cu a rian in aa dinh bantukin Pathian dinhnak chungah a lutmi cu an rian in an i din ve. 11 Cucaah Pathian dinhnak chung i kan luh khawh nakhnga fak piin i zuam u sih. Annih nih Pathian nawl kha an rak ngaih lo i an luh khawh lo bantuk khan kannih cu pakhat hmanh um sual hlah u sih. 12 Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih. 13 Pathian sinin thuh khawhmi thil zeihmanh a um lo. Sermi thil vialte hi an dihlak in a hmaika ah an lang dih hirhiar i amah sinah cun kan kong cu kan i chim cio lai. 14 Cucaah kan zumhnak hi fek tein i tlaih ko u sih. Pathian umnak hrimhrim ah a hung lutmi Tlangbawi Ngan kan ngei i amah cu Pathian Fapa Jesuh kha a si. 15 Kan Tlangbawi Ngan hi kan santlaih lonak ah kan cung i zaangfahnak a ngei kho lomi tlangbawi a si lo. Kan Tlangbawi Ngan hi kanmah bantuk tein tukforhnak a ing vemi a si, sihmanhsehlaw sualnak zeihmanh a tuah lomi a si. 16 Cucaah cun ralṭhat in hmaiah fong u sih law, vel a umnak Pathian bawiṭhutdan cu fuh u sih. Khika ah kan herh lio caan te ah Pathian zaangfahnak le vel cu kan hmuh lai.
1 Tlangbawi Ngan paohpaoh hi a mi hna chung khan thim a si i anmah aiawh in Pathian rianṭuantu ah chiah a si i sualnak ca i laksawng pek le raithawinak tuah kha a rian a si. 2 Amah zong cu phun tam piin tlin lonak a ngeimi a si ve caah khan a hrutmi le a palhmi cungah khan lungnemnak a ngei kho. 3 Cun amah zong cu tlin lonak a ngeimi a si ve caah cun, midang sualnak ca hrimhrim zongah khan raithawinak a tuah a hau. 4 Ahohmanh anmah le anmah Tlangbawi Ngan ah an i thim kho lo. Aaron cu Pathian nih a kawh i Tlangbawi Ngan ah a can bantuk khan, Pathian kawhnak lawnglawng in Tlangbawi Ngan ah an cang kho. 5 Cu bantuk ṭhiamṭhiam in Khrih zong nih khan amah nawl in Tlangbawi Ngan ah aa canter lo. Pathian tu nih, "Nangmah cu ka Fapa na si, Nihin ah na Pa ah ka cang," tiah a ti. 6 Cun hmun dang zongah, "Nangmah cu zungzal in tlangbawi na si lai, Melkhizedek tlangbawi sining bantukin na si lai," tiah a ti fawn. 7 Vawlei cung a um lioah, Jesuh nih thihnak in a khamh khotu Pathian sinah aihramnak le mitthli he thlacamnak le nawlnak kha a tuah. Amah cu a lung a nemmi le Pathian sinah aa pemi a si caah Pathian nih a theih. 8 Sihmanhsehlaw Pathian Fapa a si ko nain Pathian nawl ngaih kha harnak innak chungin a thiam. 9 A tlingmi ah ser a si tikah amah nawl a ngaimi vialte hna caah zungzal khamhnak hram ah a cang i 10 Pathian nih Melkhizedek tlangbawi sining in Tlangbawi Ngan na si, tiah a ti. 11 Melkhizedek kongah hin chim awk tampi kan ngei ko, sihmanhsehlaw a hngalh nan i harh tuk caah nan sin i fianter cu a har ko. 12 Nannih cu saya hmanh si awk nan si cang nain, Pathian bia cawnnak hmasa bik chimtu saya kha nan herh rih. Rawl taktak ei kha nan cu cang, sihmanhsehlaw caw hnuk ṭheo nan ding ko rih. 13 Caw hnuk ṭheo aa rinh ko rihmi cu ngakchia an si ko rih i ahmaan le ahmaan lo kongah hngalhnak a ngei rih lomi an si. 14 Sihmanhsehlaw rawl taktak cu upa nih khan an ei khawh; annih cu chia le ṭha thleidan khawhnak a ngei cangmi an si.
1 Cucaah hmailei ah fong u sih, Khrihfa cawnpiaknak a hram kan i domhnak kha hnulei ah kaltak u sih law a tlam a tlingmi cawnpiaknak kha fuh u sih. Santlai lomi rian kaltak kha a hram in i domh ṭhan lengmang ti hlah u sih, cun Pathian zumh zong kha a hram in i thawk ṭhan lengmang ti hlah u sih; 2 tipil innak kong tehna, kutchuannak kong tehna, mithi thawhṭhannak kong tehna le zungzal biaceihnak kong tehna hi, an hram ah i hel lengmang ti hlah u sih. 3 Hmailei ah kal u sih, Pathian a hna a tlak ahcun, kan kal kho hrim ko lai. 4 Zeitindah a tlu ṭhanmi hna cu ngaihchihnak an ngeih ṭhan khawh ti lai? Annih cu Pathian ceunak chungah a rak um cangmi an si, vancung laksawng kha a tep i Thiang Thlarau a co ve cangmi an si. 5 Pathian bia cu a ṭha ti a hngalmi le a ra lai dingmi chan ṭhawnnak cu zei bantuk dah a si lai ti a theimi an si. 6 Cun annih cu an tlu. Annih cu ngaihchihnak ah kirpi ṭhan khawh an si ti lo. Pathian Fapa kha vailam ah an khenh ṭhan ca le zapi hmaiah ningzak ngaingai in an tuah ṭhan caah ngaihchihnak ah kirpi ṭhan khawh an si ti lo. 7 Ruah a surmi a rak dawptu le a thlotu hna caah a ṭhahnemmi rawl kung a khohtertu vawlei cu Pathian nih thluachuah a pekmi vawlei a si. 8 Sihmanhsehlaw cu vawlei nih cun hling le belh lawng kha a khohter hna ahcun zeihmanh santlaihnak a ngei lo; Pathian nih chiat a serh men lai i mei nih a kangh men lai. 9 Kan dawtmi kan hawile hna, hi bantukin bia chim hmanh u sih law, nannih kong tu ah cun kan hna a ngam ko. Nannih cu, thluachuahnak a ṭha deuhmi, khamhnak a ngeimi nan si ti kha kan hngalh. 10 Pathian cu miding lo a si lo. Rian nan rak ṭuanmi le nan Khrihfa hawi nan rak bawmh tawn hna i atu zongah nan bawmh ko rih hna thawngin nan langhtermi amah nan dawtnak kha a philh lai lo. 11 Nan i ruahchanmi cu a tlin nakhnga, bawmh duhnak lungthin nan ngeih tawnmi kha a dongh tiangin ngei cio ko u, ti kan in duh hna. 12 Mi thathu si awk kha kan in duh hna lo, sihmanhsehlaw an zumhnak le an lungsaunak thawngin Pathian nih bia a kamhmi hna a hmumi hna bantuk si awk kha kan in duh hna. 13 Pathian nih Abraham bia a rak kamh ah khan, aa kammi cu ka tuah hrimhrim lai tinak ah khan chiat a rak ser. Cun amah nakin a ngan deuhmi an um lo caah cu chiatsernak ah cun amah min kha a hman i, 14 "Nangmah cu thluachuahnak kan pek lai i tefa tampi kan pek lai tiah bia kan kam," tiah a ti. 15 Abraham cu a lung a sau i cucaah Pathian nih bia a kamhmi kha a hmuh khawh. 16 Minung nih chiatsernak an tuah tikah minung nakin a ngan deuhmi min kha an hman i cu chiatsernak nih cun pakhat le pakhat bia an i alnak kha a chah tawn. 17 Cu bantukin Pathian zong nih, bia a kamhmi hna nih khan a biakam cu a let hrimhrim lai lo, ti kha fiang tein hngal hna seh ti a duh caah, cu a biakamnak cu chiatsernak in a fehter. 18 Hi thil pahnih, biakamnak le chiatsernak hna hi thlen khawh a si lomi thil an si i hi hna kongah hin Pathian nih a lih a chim kho lo. Cucaah a sin i him tein a ummi kannih nih cun kan hmai i a kan chiahpiakmi ruahchannak kha ralṭha ngaingai in fek tein kan i tlaih. 19 Hi ruahchannak hi kan nunnak caah a fekmi le a ṭhawngmi thir cangai bantuk a si. Vancung biakinn puanzar kha lonh in chungchin hmunthiang ah khan kan ruahchannak cu a lut. 20 Cuka ah cun kanmah aiawh in Jesuh kha kan hlanah a rak lut cang i Melkhizedek tlangbawi sining in zungzal Tlangbawi Ngan ah a cang.
1 Melkhizedek cu Salem siangpahrang a rak si i Cung Nung Bik Pathian tlangbawi a rak si. Abraham cu siangpahrang hna a tei hnanak raltuknak hmun khan a hung kir tikah Melkhizedek nih cun a rak don i thluachuahnak a rak pek. 2 Abraham nih hranchaw a lakmi cheu hra cheu khat kha a pek. (Melkhizedek min a sullam pakhatnak cu "Dinnak Siangpahrang" ti a si. Cun amah cu Salem siangpahrang a si caah a min sullam cu "Daihnak Siangpahrang" ti zong a si fawn.) 3 Melkhizedek cu a nu siseh, a pa siseh, an konglam an ṭialmi zeihmanh a um lo, a hringsortu hna zong an konglam ṭialmi zeihmanh a um lo; a chuahnak kong ṭialmi zong a um lo i a thihnak kong ṭialmi zong a um lo. Amah cu Pathian Fapa bantuk hi a si i zungzal in tlangbawi a si ko. 4 Cucaah zeitluk mingan dah a si kha nan hngalh. A kan hringsortu Abraham hmanh nih hranchaw a lakmi dihlak cheu hra cheu khat kha a pek. 5 Cun Levi tefa tlangbawi a simi hna kha Nawlbia nih Israel mi hna sinin cheu hra cheu khat nan khawlh hna lai, tiah a ti hna. Israel mi cu Abraham tefa an si ve ko nain le an phunhawi an si ko nain thawhlawm cu an kholh ko hna. 6 Sihmanhsehlaw Melkhizedek cu Levi hrinsor a si lo nain cheu hra cheu khat kha Abraham sin hmanh cun a khawlh i Pathian thluachuahnak a hmumi Abraham kha thluachuahnak a pek. 7 Thluachuah petu cu thluachuah pekmi nakin a ngan deuh ti cu a fiangmi a si. 8 Tlangbawi hna kongah cun, cheu hra cheu khat kha a thi khomi minung nih an khawlh hna, sihmanhsehlaw Melkhizedek kong ah cun, a nungmi minung nih. Cathiang chimning in, cheu hra cheu khat cu a khawlh. 9 Cucaah Abraham nih Melkhizedek cu cheu hra cheu khat a pek tikah khan, cheu hra cheu khat a co tawntu Levi nih khan a pek tinak a si. 10 Zeitintiah Levi cu a chuak rih lo nain Melkhizedek nih a hringsortu Abraham a ton tikah khan, Abraham paw chungah cun a rak um cang. 11 Levi mi tlangbawi sining in Israel mi cu Nawlbia kha pek va si hna kaw, Levi tlangbawi pawl an rian ṭuannak kha a tlingmi rak si seh law, tlangbawi phun dang, Aaron tlangbawi sining si lo i Melkhizedek tlangbawi sining in a simi chuah kha a herh hnga lo. 12 Tlangbawi sining kha aa thlen tikah Nawlbia zong kha thlen a herh ve. 13 Cun hi kong i an rak chimchungmi bia vialte nih a sawhmi kan Bawipa kha Levi miphun si loin phun dang a si i a phun chungmi cu biakṭheng ah tlangbawi rian a ṭuanmi ahohmanh an um bal lo. 14 Judah phun chungin a chuakmi a si ti kha fiang tein hngalh a si i Moses nih tlangbawi kong a chim tikah hi phun kong hi a telh lo. 15 Hi kong cu a fiang chin lengmang; tlangbawi phun dang, Melkhizedek bantuk kha a hung chuak. 16 Amah cu minung sermi phung le lam in tlangbawi cangmi a si lo, hrawh khawh lomi nunnak ṭhawnnak thawngin tlangbawi a cangmi a si. 17 Cathiang nih, "Melkhizedek tlangbawi sining zulh in nang cu tlangbawi na si zungzal lai," a ti. 18 Cucaah phung hlun cu san a tlai lo i thil ti khawhnak a ngeih lo caah hlawt a si; 19 Moses Nawlbia nih khan zeihmanh thil tlamtling ah a ser khawhmi a um lo. Sihmanhsehlaw atu cu ruahchannak ṭha deuh kha a hung phan i cu thawng cun Pathian kha kan naih khawh cang. 20 Cuhleiah Pathian chiatsernak zong kha a um rih. Midang cu tlangbawi i an ser hna tikah cu bantuk chiatsernak cu zeihmanh a um lo. 21 Sihmanhsehlaw Jesuh cu chiatser tein tlangbawi ah ser a si i Cathiang nih amah kong ah cun, "Bawipa nih chiatser tein bia a chim cang i a bia cu a let lai lo: 'Nangmah cu zungzal in tlangbawi na si lai,' a ti," tiah a ti. 22 Hi an i dannak nih hin Jesuh cu a ṭha deuhmi biakamnak a fehtertu ah khan a ser fawn. 23 Cun an i dannak dang a um rih: tlangbawi dang hna kha cu a thi lengmangmi an si caah an rian kha aa pehtlai kho lo i a tam zong an tam a herh. 24 Sihmanhsehlaw Jesuh cu zungzal in a nungmi a si caah zungzal in tlangbawi a si. 25 Cucaah cun amah thawngin Pathian a fuhmi hna paoh cu a khamh khawh zungzal ko hna; zeicahtiah zungzal in a nun caah Pathian kha a nawlpiak khawh zungzal hna. 26 Cucaah Jesuh cu kan duhnak a tlinter khotu Tlangbawi Ngan cu a si; palhnak a ngei lo, sualnak a ngei lo; misual mi hna lak khan ṭhen a si i vancung ah khin cawi a si. 27 Amah cu tlangbawi dang hna bantuk kha a si lo, amah sualnak caah siseh, midang sualnak caah siseh, ni fate in raithawinak tuah kha a herh lo. Amah le amah raithawinak i aa pek ah khan zungzal ca za in raithawinak pakhat a tuah. 28 Moses Nawlbia nih cun a tling lomi minung kha tlangbawi ngan ah a ser hna, sihmanhsehlaw chiatser tein tuahmi biakamnak, Moses Nawlbia hnu deuh ah a rami nih cun zungzal in a tlingmi tlangbawi ah Fapa kha a ser.
1 Ka chimmi chungah a biapi bik cu hihi a si: cu bantuk Tlangbawi Ngan thengte cu kan ngei i amah cu vancung i a Lian Ngan Bik orhlei kam i a ṭhumi a si. 2 Hmun Thiang Bik chungah khan Tlangbawi Ngan rian kha a ṭuan i cu a ṭuannak cu minung sakmi si loin Pathian sakmi biaknak thlam taktak chungah khan a si. 3 Tlangbawi Ngan cu Pathian sin i pekmi laksawng pek le saram raithawinak pekchanh kha an rian a si bantukin, kannih kan Tlangbawi Ngan zong nih cun pekchanh awk a ngeih ve kha a herh. 4 Vawlei cungah hin cun Tlangbawi Ngan a rak si hnga lo, zeicahtiah Judah phung ningin laksawng a pechantu tlangbawi kha an um ko. 5 Asinain cu tlangbawi hna nih rian an ṭuannak biakinn cu vancung i a ummi biakinn a mui le a thlam sawhsawh men a si. Puan biakinn kha Moses nih a ser lai tikah Pathian nih, "Tlang cung i a muisam kan hmuhsakmi bantukte khan zeizong vialte na tuah dih lai," tiah a chimhmi bia nih khan a sawhmi cu hihi a si. 6 Cucaah anmah rian nakin tampi in a ngan deuhmi rian kha Jesuh cu pek a si. Pathian le minung kar ah a sermi biakamnak cu thil ṭha deuh kamhmi ruangah a ngan deuhmi a si bantukin, a tlangbawi rian zong cu, a ngan deuhmi a si ve. 7 Biakamnak hmasa deuh nih khan tlin lonak zeihmanh rak ngei hlah seh law, biakamnak dang a herhnak zeihmanh a um hnga lo. 8 Sihmanhsehlaw Pathian nih a mi hna cu a mawhchiat hna i, "Bawipa nih aa thawh i, 'Israel mi hna le Judah mi hna he biakamnak ka tuah lai ni cu a ra lio. 9 Izipt ram chungin an pupa hna cu chuahpi awkah an kut in ka rak hruai hna ni i an sin i ka tuahmi biakamnak bantuk kha cu, a si lai lo. Anmah he ka tuahmi biakamnak kha zei ah an rel lo caah annih cu zei ah ka rel ve hna lo,' tiah Bawipa nih a ti. 10 Hmailei ah Israel mi hna sin i ka tuah dingmi biakamnak cu hihi a si lai, tiah Bawipa nih a ti. Ka nawlbia cu an hngalhnak chungah ka chiah hna lai i an lung chungah ka ṭial hna lai. Keimah cu an Pathian ka si lai i annih cu ka mi an si lai. 11 Ahohmanh nih an hawile kha cawnpiak a herh lai lo i 'Bawipa kha hngal tuah,' ti chimh zong a hau lai lo, A hme bik in a ngan bik tiang nih an ka hngalh ko lai. 12 An palhnak cu ka zaangfah hna lai i an sualnak cu ka hngal camcin ti lai lo," tiah a ti. 13 Pathian nih biakamnak thar kong a chim caah hin a hmasa deuh kha cu a hlun ah a cang i a hlunmi le a ṭetmi paoh cu an lo zau ko lai.
1 Biakamnak hmasa bik nih khan Pathian biaknak caah phunglam a ngei i biakinn zong a ngei, a biakinn cu minung sermi a si. 2 Biaknak puan thlam kha an ser, a lenglei cu Hmun Thiang ti a si. Cu chungah cun meiinn, cabuai le Pathian sin hunhmi changreu kha an um. 3 Puanzar pahnihnak hnulei ah khan Hmun Thiang Bik timi hmun kha a um. 4 Cu chungah cun rimhmui khanghnak sui biakṭheng le sui hutmi kuang, biakamnak an chiahnak kuang kha an um. Cu kuang cungah cun manna an chiahnak sui um, Aaron ṭhiangṭhunh a corhmi le nawlbia an ṭialnak lungtlap pahnih kha an chiah hna. 5 Cu kuang cungah cun Pathian sunparnak cherub kha an um i sual ngaihthiamnak hmun kha an thla an zarh. Hi thil kong hi a dihlak in chim caan atu hi a si lo. 6 Thil umtuning cu hitihin a si: Lenglei thlam chungah khan tlangbawi hna cu an rian ṭuan awkah ni fate in an lut lengmang; 7 asinain chungchin thlam ah khan cun Tlangbawi Ngan lawng a lut kho i cu zong cu kum khat ah voi khat lawng a si. Thisen kha aa put i amah caah le mi nih hngalh loin an tuahmi sualnak caah Pathian sinah khan a pek. 8 Hi bantukin thil umtuning a simi kong hin Thiang Thlarau nih fiang tein a kan cawnpiakmi cu, lenglei thlam a um chung paoh kha cu Hmun Thiang Bik chung i va luhnak lam kha a awng rih lo, ti a si. 9 Hi tahchunhnak hi atu kan caan i a ummi thil kong ah a si. Pathian sin i pekchanhmi laksawng le saram raithawinak nih khan Pathian a biatu lungthin kha tling lakin a ṭhatter kho lo. 10 Cu laksawng le raithawinak hna nih an tuah khawhmi cu rawl kong le din awk kongkau le i thianhnak phunglam a phunphun lawng kha an si. Hi thil vialte hi lenglei phunglam lawng an si i, Pathian nih zeizong vialte a remh ṭhan caan ca tiang lawng an si. 11 Sihmanhsehlaw a um lai ding a rak simi, hika i a um cangmi thil ṭha hna Tlangbawi Ngan Khrih kha a ra cang. Rian a ṭuannak thlam cu a ngan deuh i a tling deuh; minung sermi a si lo, cu a sullam cu sermi vawlei cung thil i aa telmi a si lo tinak a si. 12 Khrih nih thlam chung khan a va kal i voi khat ah zungzal ca za dingin Hmun Thiang Bik chungah a va luh tikah, raithawinak i pekchanh awkah cawfa thi siseh, meheh thi siseh, aa put lo, amah thi thengte kha aa put i khamhnak kha a kan serpiak. 13 Phunglei in a thiang lomi cu meheh thi le cawtum thi le khanghmi cawfa vutcam kha an theh hna i cu bantukin phunglei in an thian lonak kha thianhpiak an si tikah mithiang ah an cang. 14 Cu hmanh nih cu bantukin a tuah khawh ahcun, Khrih thisen nih cun, zeitluk in dah a tuah khawh chinchin lai! Zungzal hmunmi Thlarau in a tlingmi raithawinak bantukin Pathian sinah amah le amah cu aa pe. Kannih nih Pathian nung kha kan biak khawh nakhnga santlai lomi rian kan tuah tawnmi kan chiaṭha thleidannak chung i a cammi kha a thi in a kan thianhpiak lai. 15 Pathian kawhmi hna nih Pathian kamhmi zungzal thluachuahnak kha an hmuh khawh nakhnga, biakamnak thar cu Khrih nih khan a ser. Sihmanhsehlaw cu biakamnak cu thihnak a um hnu lawngah a si kho i cu thihnak nih aa tinhmi cu biakamnak hmasa tang i a rak ummi hna nih cu biakamnak tang i an um lio i an rak tuahmi palhnak chung khan luatter kha a si. 16 - 17 Zeicahtiah rovuih bia cu rovuitu a nun lioah cun sullam a ngei lo. Cucaah ro a vuitu kha a thi tiah fiang tein hngalh a hau i cu rovuih bia cu a thih hnu lawnglawng ah hman khawh a si. 18 Cu ruangah cun pei biakamnak hmasa u hmanh kha thisen hman lawnglawng in ser khawh a rak si cu. 19 A hmasa bik ah Nawlbia nih a ti bantukin, Moses nih mizapi kha nawlbia vialte cu a relpiak hna. Cun cawfa thi kha aa lak i ti he a cawh hnuah, Nawlbia cauk le mizapi kha, hisop le tuuhmul sen in a theh hna i 20 "Pathian nih nan zulh lai tiah an fialmi hna nawlbia a fehtertu cu hi thisen hi a si," a ti. 21 Cu bantuk ṭhiamṭhiam in biaknak thlam le biaknak i hmanmi thilri vialte kha Moses nih cun a theh ve hna. 22 Nawlbia ning ah cun zei paohpaoh hi thisen in thianh a si i sualnak hi thisen luanh lawnglawng in ngaihthiam a si. 23 Atu i kan chimmi thil, vancung thil mui le thlam a simi hna nih hi bantukin thianhnak an herh ahcun, vancung thil hrimhrim, a taktak le a ngaingai a simi hna zong nih khan raithawinak a ṭha deuhmi an herh ve ko. 24 Khrih a luhnak hmun thiang kha minung nih an sermi hmun thiang hi a si lo, a taktak le a ngaingai hna mui le thlam men ah khan si loin vancung hrimhrim ah khan a hung lut i kanmah aiawh in Pathian hmaiah khan, atu tiang hi a chuak lengmang ko. 25 Judah mi Tlang Bawi Ngan cu kum fate in Hmun Thiang Bik chungah khan sa thi he a lut lengmang. Sihmanhsehlaw Khrih cu amah le amah i thawi awkah voi tampi a luh a herh lo, 26 cu ti tuah a herh a si ahcun, vawlei ser hramthawk in voi tam tuk a in cang hnga. Amah le amah raithawinak i aa hmannak thawngin sualnak kha a hloh khawh nakhnga chan vialte nih donghnak an phak dengmang caan ah hin voi khat ah za lak in a hung lang. 27 Minung hi voi khat kan thi lai i cu hnuah cun Pathian nih bia a kan ceih lai. 28 Cu bantuk ṭhiamṭhiam in mi tampi sualnak lakpiak awkah Khrih cu voi khat raithawinak ah pek a si. Cun a hung lang ṭhan lai i cu a hung langh ṭhan cu sualnak kongah si ti loin amah a hngakmi hna khamh awkah a si lai.
1 A taktak le a ngaingai a simi thil kha Judah phung nih hin tling ngaingai le hmaan ngaingai in a langhter kho lo. A ra dingmi thil ṭha muithlam ceo a rak si. An tuah tawnmi raithawinak kha kum fate in tuah lengmang a si ko. Cucaah cun zeitindah hi Nawlbia nih hin, Pathian a biami hna cu, cu raithawinak an tuahmi thawng cun mithiang ah a ser khawh hna lai? 2 Pathian a biami hna kha an sualnak thianhpiak rak si taktak hna seh law, kan sual tiah i phuhrunnak an ngei ti hnga lo i raithawinak vialte kha an rak ngol cang hnga. 3 Sihmanhsehlaw raithawinak nih khan, an sualnak tu kha, kum fate in a hngalhter lengmang hna. 4 Zeitintiah cawtum thi le meheh thi nih cun sualnak kha a hlo kho taktak bal lo. 5 Cucaah Khrih nih vawlei i a rung ṭum lai ah khan Pathian cu a thawh i, "Raithawinak le pekchanhmi thil cu na duhmi an si lo, Sihmanhsehlaw keimah caah taksa pum kha na ka timhpiak cang. 6 Biakṭheng cungah a pumning in khanghmi sa cu na lawmhmi a si lo, Sual thianhnak ca i thawimi sa zong na lawmhmi a si lo. 7 Cucaah kaa thawh i, 'Nawlbia cauk chungah aa ṭial bantukin, Pathian, nangmah nih tuah seh ti na ka duhmi tuah awkah ka ra,' ka ti," a ti. 8 A hmasa bik ah, "Raithawinak siseh, pekchanhmi thil siseh, biakṭheng cungah khanghmi saram si hna seh, sual thianhnak caah tuahmi raithawinak si hna seh, na duhmi an si lo i na lawmhmi zong an si lo," a ti. Hi raithawinak vialte hi Nawlbia ningin tuah an si ko nain hitihin a ti. 9 Cun aa thawh ṭhan i, "Pathian, nangmah nih tuah seh ti na ka duhmi tuah awkah ka ra," a ti. Cuticun Pathian nih raithawinak hlun vialte kha a hlawt hna i Khrih raithawinak khan a thlen hna. 10 Jesuh Khrih nih Pathian duhmi kha a tuah caah, voi khat ah za lak in amah a pum aa pekchanhnak thawng khan kannih cu kan sualnak in a kan thianh cang. 11 Judah tlangbawi hna nih cun, dirhmun in an rian kha ni fate an ṭuan lengmang i raithawinak an pekchanh tawnmi kha voi tampi an pekchanh lengmang. Sihmanhsehlaw hi raithawinak nih hin sualnak kha a thianh kho taktak bal lo. 12 Asinain Khrih nih cun raithawinak kha sualnak caah voi khat a ser i cucu zungzal ca in a za ko, cu hnuah Pathian orhlei kamah khan a ṭhu. 13 Cuka ah cun Pathian nih a ral kha a kelamh i a ser hna ding caan kha a hngak. 14 Voi khat raithawinak in an sualnak thianhpiak a simi hna cu zungzal ca in a tlingmi ah a ser hna. 15 Cun Thiang Thlarau zong nih tehte a khaannak kha a kan hngalhter. A hmasa bik ah, 16 "Hmailei caan ah annih he ka tuah laimi biakamnak cu hihi a si: An lung chungah ka nawlbia kha ka chiah hna lai i An ruahnak chungah ka ṭial hna lai," a ti. 17 Cun aa thawh ṭhan i, "An sualnak le an ṭhat lonak kha kaa cinken ti lai lo," a ti fawn. 18 Cucaah annih cu ngaihthiam an si hnuah cun an sualnak thianhnak ding ca i raithawinak kha a herh ti lo. 19 Cucaah ka u le ka nau hna, Jesuh thihnak thawngin Hmun Thiang Bik chungah khan luhnak nawl kan ngei cang. 20 Cu luhnak ah cun puanzar kha a thleh i lam thar nunnak lam kha a kan hunpiak — puanzar cu a pum kha a si. 21 Cuhleiah Pathian inn a zohkhenhtu Tlangbawi Ngan kha kan ngei fawn. 22 Cucaah cun lungthin tak le zumhnak fek he Pathian cu naih u sih. Sual aa phuhrungmi kan lungthin le kan pum kha ti thiang in i thianh u sih law amah cu naih u sih. 23 Bia a kan kamhtu Pathian cu zumh awk tlak a si bantukin kan i ruahchanmi cu fek tein i tlaih peng ko u sih. 24 Pakhat le pakhat kan i dawt khawh nakhnga le thil ṭha kan i tuahpiak khawh nakhnga, i bawm tliahmah u sih. 25 Pakhat le pakhat hmun khat i i pumh lengmang kha ngol hlah u sih; a cheu nih cun ngol hmanh hna seh law, kannih cu i forh chin u sih, zeicahtiah Bawipa Ni cu a nai deuh chin lengmang ti kha kan hngalh caah i forh chin lengmang ko u sih. 26 Biatak kha hngalhter kan si hnu i kan sual lengmang peng ko ahcun, sualnak thianhnak caah raithawinak zeihmanh a um ti lo. 27 Kan ca i a tangmi cu biaceihnak le Pathian a dohmi hna a hrawktu ding mei ṭihnung lawng kha a si ko cang. 28 Moses Nawlbia a zul lomi cu, tehte pahnih chimnak in, a sual tiah hmuh a si ahcun, zaangfahnak um loin thah a si. 29 Cu hmanh cu ti a si ahcun, Pathian Fapa zei i a rel lomi cu zeitindah tuah a si lai? Sualnak in a thianhtu Pathian biakamnak thisen zei i a rel lomi cu zeitindah tuah a si lai? Vel a ngeimi Thlarau a nihsawhtu cu zeitindah tuah a si lai? A in laimi dantatnak cu zeitluk in dah a ngan chinchin lai, ruat ko hmanh. 30 "Keimah nih phu cu ka hlam lai, keimah nih ka cham lai," tiah a ti i, "Bawipa nih a mi cu bia a ceih hna lai," ti zongah a ti fawntu kha ahodah a si ti cu kan hngalh. 31 Pathian nung kut chung i tlak cu thil ṭihnung ngaingai a si! 32 Hlan deuh thil umtuning kha ruat hmanh u. Ceunak nan hmuh kate kha va si kaw, kha caan ah khan harnak tampi nan ing, asinain harnak nih khan an tei hna lo. 33 A cheu cu an in nihsawh hna i zapi hmuh awkah an in hrem hna, sihmanhsehlaw kha lioah khan a cheu nih an in dirkamh peng ve hna. 34 Thongtlami kha an thongtlak nan inpi hna i nan thil an in chuh hna tikah lunglawm tein nan pek hna, hi thil hna nakin a ṭha deuhmi thil le a hmun kho deuhmi thil nan ngeih kha nan hngalh. 35 Cucaah nan ralṭhatnak kha thlau sual hlah u, nan ralṭhatnak nih cun laksawng nganpi an phorh hna lai. 36 Pathian duhnak nan tuah khawh nakhnga le bia an kamhmi hna nan co khawh nakhnga lungsau thinfual in um u. 37 Zeicahtiah Cathiang nih, "Tlawmpalte lawnglawng hnuah a ra dingmi cu a ra lai, a rau lai lo. 38 Ka miding mi hna nih cun an zumh lai i an nung lai; Sihmanhsehlaw ahohmanh aa letmi cu an cungah ka lung aa lawm lai lo," tiah a ti bang khan a si lai. 39 Kannih cu aa let i a tlaumi kha kan si lo. Zumhnak a ngei i khamhnak a hmumi tu kha kan si.
1 Zumhnak ngeih kan ti hi, kan i ruahchanmi kan hmuh ṭheo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si. 2 Zumhnak an rak ngeih caah hlanlio mi hna nih khan Pathian cu a lung an rak ton. 3 Van le vawlei cu Pathian bia nih a ser hna ti kha zumhnak in kan hngalh i cucaah hmuh khawhmi thil cu hmuh khawh lomi thil chungin ser a si ti kha a lang. 4 Kain nih a pekmi raithawinak nakin a ṭha deuhmi raithawinak Abel nih Pathian a pekmi cu zumhnak in a si. Zumhnak thawngin amah cu Pathian nih miding ah a cohlan i cucu Pathian nih a laksawng a cohlanpiaknak ah khan a lang; cun a thih hnu zongah, zumhnak cu bia a chim ṭhiamṭhiam ko rih. 5 Enok kha thi loin Pathian sinah a kaitertu cu zumhnak a si; Pathian nih a lak caah khan ahohmanh nih an hmu ti lo. Cathiang nih a chimmi cu, Enok nih khan van i a kai hlanah Pathian lung kha a ton, ti a si. 6 Ahohmanh nih zumhnak loin Pathian lung ton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh. 7 Noah kha, a hmuh khawh lomi hmailei thil kongah, Pathian nih ralrinnak a pek tikah, cu ralrinnak bia a theihtertu cu zumhnak a si. Pathian bia kha a ngaih i lawng pakhat a ser i cu chungah cun amah le a innchungkhar kha him tein an um. Cuticun a zumhnak khan vawleicung mi vialte cu, an palh, ti kha a langhter i zumhnak thawngin a rami dinnak kha Pathian sinin a hmuh. 8 Pathian nih Abraham kha a auh tikah, a bia a ngaihtertu le, kan pek lai, tiah a kamhmi ram i a kaltertu kha zumhnak a si. Khuazei ah ka kal ti hngal loin a ram kha a chuahtak. 9 Pathian nih a kamhmi ram chungah khan zumhnak in ramdangmi bantukin khua a sa. Isak le Jakob he tiah thlam chungah khan khua an sa i cu hna zong cu Pathian biakamnak a hmumi an si ve. 10 Zungzal in a hmunmi khuapi, Pathian sermi cu, Abraham nih cun a hngah. 11 Abraham kha a tar tuk cang i Sarah kha fa ngei kho lo a si nain, Abraham cu hringtu pa ah a sertu cu zumhnak a si. Pathian nih khan a biakamnak cu a tuah ṭheo lai, ti kha a zumh. 12 Mithi bantuk a si ko cang nain, hi mipa pakhat chung hin, van i arfi zat a simi le rili kam i rel cawk lo thetse zat tefa kha an chuak. 13 Hi mi vialte hna hi zumhnak ngei in an thi. Pathian nih a kamhmi hna cu an hmu lo, sihmanhsehlaw lamhlatpi in an rak hmuh i an rak i lawm i vawlei cungah hin khual le a vakvai menmi kan si, an rak ti. 14 Cu bantukin bia a chimmi hna nih cun, anmah ta a simi ram an kawl kha an langhter. 15 An kaltak ciami ram kha an ruat ṭhan ti lo, rak ruat ṭhan hna seh law cuka ram i kir ṭhannak caan ṭha an rak ngei ko hnga. 16 Annih nih an ngaihmi ram cu, ram ṭha deuh vancung ram tu kha a si. Pathian nih an caah khua pakhat a timhpiak hna i cucaah annih nih Pathian cu, kan Pathian, tiin an kawh tikah, Pathian cu a ning a zak lo. 17 Pathian nih Abraham cu a hneksak tikah, a fapa Isak kha raithawinak ah a pekchanhtertu cu zumhnak a si. Pathian nih bia a kamhmi cu Abraham kha a si, sihmanhsehlaw a fapa ngeihchunte pakhat kha raithawinak i pekchanh awkah aa tim kho ko. 18 Pathian nih Abraham cu a rak thawh i, "Tefa na ngeih laimi cu Isak chung chuak hi an si lai," a rak ti. 19 Abraham nih khan, Pathian nih Isak cu thihnak in a thawhter khawh ko, tiah a rak zumh i cu bantuk cun Pathian nih Isak cu thihnak in a thawhter ti awk a si taktak. 20 Jakob le Esau cu, hmailei ah thluachuahnak nan hmu lai, tiah Isak nih zumhnak in bia a kamh hna. 21 Josef fapa kha an dihlak in Jakob nih a thih laite ah zumhnak in thluachuahnak a pek hna; a ṭhiangṭhunh kha aa hngauh i Pathian kha a biak. 22 Josef nih khan a thih lai ah, Israel mi cu Izipt ram in an chuak te lai, tiah zumhnak in a chim. Cun a pum kha, zeitindah run tuah awk a si lai tiah bia a chiahtaktertu zong kha zumhnak ṭhiamṭhiam a si. 23 Moses kha a chuah hnu thla thum tiang a nu le a pa nih an thuh i cu a thuhtertu hna cu zumhnak a si. Fa chuak thiam ngai a si kha an hmuh i siangpahrang nawlbia al kha an ṭih lo. 24 Cun Moses kha a hung upat tikah Faro fanu fapa si a duhter lotu kha zumhnak a si. 25 Sualnak chung i caan tawite chung i nuamh nakin Pathian mi hna sin sifah in kha aa thim deuh. 26 Messiah ruang i nihsawhnak in cu Izipt ram chawhlawn vialte nakin a sung deuh ah a rel i cucu zeicahdah a si tiah, hmailei hmuh laimi laksawng kha a rak i ruah chih caah a si. 27 Siangpahrang thinhunnak kha ṭih loin Moses cu Izipt ram khan a chuak i cu a chuahtertu cu zumhnak a si; hmuh khawh lomi Pathian kha hmu seh law cu bang, a kir in a kir duh ti lo. 28 Lanhtak Puai a sertertu le innka ah thisen nan thuh lai, a titertu kha zumhnak a si; kha an tuahmi kha Thihnak Vancungmi nih Israel mi hna fater kha that hna hlah seh ti caah a si. 29 Rili Sen, vawlei ro cung bantukin Israel mi a tantertu hna kha zumhnak a si; Izipt mi nih tan an timh ve tikah ti nih khan a dolh hna. 30 Israel mi nih ni sarih chung an vel hnuah Jeriko khua kulhnak vampang a cimhtertu kha zumhnak a si. 31 Pathian nawl a ngai lomi hna sinah khan hlawhhlangnu Rahab cu a thi lo, kha a luattertu kha zumhnak a si i cucu mingiatu pawl a rak thuhphenh hna caah khan a si. 32 Ka chim lengmang ko rih hnga maw? Gideon tehna, Barak tehna, Samson tehna, Jefthah tehna, David tehna, Samuel tehna, le profet hna kong chim awk tampi a um ko nain a chimnak caan ka ngei ti lo. 33 Zumhnak in ram ngan pipi kha an tuk hna i an tei hna. A dingmi thil kha an tuah i Pathian nih bia a kamhmi hna kha an hmuh. Chiandeih kha an ka an phih hna, 34 mei ṭihnung kha an hmih i vainam thahnak in an luat. Annih cu an rak der, sihmanhsehlaw miṭhawng ah an cang, raltuknak hmun ah khan a ṭhawngmi an si i ramdangmi ralkap kha an tei hna. 35 Zumhnak in nu hna cu an mithi kha nun ṭhanterpiak an si. A dang cu a ṭha deuhmi nunnak i thawhter si kha an duh deuh caah, luatnak kha i lak duh loin hremnak in an thi. 36 A cheu cu nihsawhnak le fung tuknak kha an ing i a cheu cu ṭemnak le thongthlaknak kha an ing. 37 Lung in an cheh hna, hluah in cheu hnih ah an chuah hna, vainam in an thah hna. Tuu phaw le meheh phaw i aih in an vak hniapmap i hremnak le serhsatnak kha an ing. 38 Vawlei hi an caah umnak ah a ṭha theng lem lo. Ralzam bantukin ramlak le tlang ah an zam i vawlei tang lungkua le khor ah khua an sa. 39 Hi mi vialte hna hi an zumhnak ruangah hin zeitluk in dah thangṭhat awk an tlak? Asinain Pathian nih a kamhmi hna thil kha a hmuh hmanh an hmu lo, 40 zeicahtiah kan caah Pathian nih khuakhannak ṭha deuh a ngeih caah a si; annih kha kanmah he lawngin tlinnak a hmu kho ding an rak si.
1 Hi tlukin vanrang zat in a tammi tehte bu nih khan kannih cu an kan kulh. Cucaah cun lam a kan dawntu thil paohpaoh le kan tlaihchan pengmi sualnak vialte kha hlaw hna u sih law kan hmai i chiahmi tlikzuamnak ah khan i zuam u sih. 2 Jesuh kha fek tein i zoh chih u sih, amah cungah cun kan zumhnak cu a hramthawk in a dongh tiang a um. Hmailei lunglawmhnak aa ruahchanmi ruangah khan vailam cung i thih ningzahnak cu zeihmanh ah a rel lo i atu cu Pathian bawiṭhutdan orhlei kamah khan a hung ṭhu cang. 3 A inmi thil kha ruat hna hmanh u, misual mi nih kha tlukin an huatnak a in peng ko kha ruat hmanh u. Cucaah cun lungdong in maw ngol sual lai u ci. 4 Zeicahtiah sualnak nan dohnak ah hin thihnak tiang ngaingai cu nan ing rih lo. 5 Pathian nih a fale bantukin an chawnhnak hna, lung ṭhawnnak bia kha nan philh cang dahra? "Ka fapa, Bawipa nih an chimhhrin tikah zeirello in um hlah, an sik tikah na lung dong hlah. 6 Zeicahtiah Bawipa nih a dawtmi hna cu dan a tat tawn hna i fa i a cohlanmi hna cu a chimhhrin tawn hna," tiah pei a um kha. 7 Harnak nan inmi cu nan pa nih an pekmi hna harnak a si ti bantukin ing ko u, zeicahtiah nan innak nih khan, Pathian nih a fale bantukin an ti hna, ti kha a langhter. Fa a simi paoh cu a pa nih a velh bal lomi aho tal an um maw? 8 A fale dang vialte kha dan a tat hna i nannih cu dan an tat ṭung hna lo ahcun, nannih cu fa taktak si loin lakfa nan si ti sullam tu a si hnga. 9 Minung kan pale kong hi ruat hmanh u, an kan chimhhrin i kan upat hna, cucaah cun nunnak kan hmuh nakhnga, thlarau lei kan Pa chinchin cu zeitluk in dah a bia kan ngaih chinchin awk a si. 10 Minung kan pale nih cun anmah nih ahmaan ti i an hmuhning in an kan chimhhrin i caan tawite ca lawng a si tawn; sihmanhsehlaw Pathian nih a kan chimhhrin cu kanmah ca ṭha dingah le a thiannak kha kan i hrawm khawh ve nakhnga caah a si. 11 Dantatnak kan in tikah kan in lioah cun kan lung a kan lawmhtertu si loin kan ngaih a kan chiattertu a si. Sihmanhsehlaw cu bantuk dantatnak innak nih a chimhhrinmi hna cu daihnak laksawng dinnak nunnak kha an hmu. 12 Cucaah a thlepmi nan ban kha hler hna u law a dermi nan khuk kha fehter hna u, 13 cun a ping a pang ah nan ke hlang sual lo tein um u. Cu ti nan tuah ahcun a beimi nan ke kha a rawk lan lai lo i hmasa i ṭhawnnak a rak ngeihmi kha a ngei ṭhan kho lai. 14 Midang he rem i zuam u law nunnak thiang in nun i zuam u, zeicahtiah nunnak thiang ngeih loin ahohmanh nih Pathian cu an hmu kho lai lo. 15 Pathian vel kha ahohmanh nih nan mertak sual nakhnga lo i ralring u. A khami thingkung, a hung ṭhang i mi tampi harnak a petu bantuk kha ahohmanh si sual hlah u. 16 Ahohmanh nu le pa sualnak tuah hlah u, thlarau lei thil zeihmanh i a rel lomi Esau bantuk zong si hlah u, anih nih cun rocotu sinak kha rawl voi khat ei men ah a zuar ko. 17 Nan hngalh bantukin, a hnuah cun a pa thluachuahnak kha hmuh ṭhan duh hmanh seh law a hmu ṭhan kho ti lo; mitthli tla in ṭahhnawh len hmanh seh law a tuah ciami kha a thleng kho ti lo. 18 Nannih nih nan phakmi tlang cu Israel mi nih an phakmi tlang, tawngh khawhmi tlang Sinai Tlang kha a si lo; kha tlang ah khan cun a alh hluahmahmi mei le minmei nak pipi le muihnak le ṭotho le 19 muko tum thawng le aw thawng kha an hmuh an theih hna. Aw kha an theih tikah, thei ti sawh hlah u sih, tiin mizapi nih khan an nawl, 20 zeicahtiah saṭil a si hmanh ah tlang a tawngtu paoh cu thi lak in lung in cheh a si lai, timi nawlbia kha a celh in an celh lo. 21 An hmuhmi cu ṭih a nun tuk caah Moses nih, "A ther in ka ther i ka thin a phang," a ti. 22 Sihmanhsehlaw nannih nih nan phakmi tlang cu Zion Tlang le Pathian nung khualipi van Jerusalem, vanmi a thongthong in an umnak kha a si. 23 Pathian fapa upa bikbik, vancung ah an min aa ṭial cangmi hna lunglawm in an i pumhnak kha nan phan cang. Mi vialte biaceihtu a simi Pathian le mitling i sermi hna miding mi thlarau hna sin kha nan phan cang. 24 Biakamnak thar a sertu Jesuh sin le Abel thisen nih a chimmi thil nakin a let tam piin a ṭha deuhmi thil kong a chimtu a thletmi a thisen sin kha nan phan cang. 25 Cucaah cun ralring tein um u law nan sin i bia a chimtu bia kha al sual hlah u. Vawlei ah Pathian bia a chimtu bia theih a duh lomi cu an luat lo. Cucaah cun vancung in bia a run chimtu bia cu kan ngaih lo ahcun zeitluk in dah kan luat lo chinchin lai. 26 Kha lioah khan a aw nih vawlei cu a hninh, sihmanhsehlaw atu i bia a kan kammi cu, "Vawlei lawng hi si ti loin van zong voi khat cu ka hninh ṭhan lai," ti hi a si. 27 "Voi khat cu ka hninh ṭhan lai," ti bia nih hin, sermi thil cu hninh le ṭhial an si lai ti kha fiang tein a langhter i hninh khawh lomi thil kha a hmun lai. 28 Cucaah cun kannih nih hninh khawh lomi pennak kha kan hmuh caah i lawm u sih. 29 Kannih kan Pathian cu mi kangh a hmangmi mei a si caah upatnak le ṭihnak in amah duhning tein bia u sih law amah cungah cun i lawm u sih.
1 Khrih chungah unau nan si bantukin pakhat le pakhat i daw zungzal u. 2 Khualtlung kha daw hna u. Khualtlung a dawmi cu an hngalh loin vancungmi nih khan an tlun tawn hna. 3 Thong a tlami kha, an sin i thong a tla vemi bantukin philh hna hlah u. Hremnak a ingmi kha, an sin i hremnak a ing vemi bantukin philh hna hlah u. 4 Ṭhitumnak hi mi vialte nih kan hmaizah awk a si i nu le va hi zumh awk tlak an si veve awk a si. Nu le pa sualnak a tuahmi hna le va cungin pa aa duhmi hna cu Pathian nih an bia a ceih hna lai. 5 Tangka hi duh tuk hlah u, nan ngeihmi ah khan nan lung awi ko u. Zeicahtiah Pathian nih, "Kan kaltak bal hna lai lo i kan hlaw bal fawn hna lai lo," a ti. 6 Cucaah kannih cu kan ralṭha u si law, "Bawipa cu a ka bawmtu a si, zeihmanh ka ṭih lai lo. Minung nih ka cungah zeidah an tuah khawh lai?" tiah ti u sih. 7 Pathian bia a rak in chimtu hna nan hruaitu hmasa hna kha philh hna hlah u. Zeitindah an nuncan kha a si i zeitindah an thihning a si kha ruat ṭhan u law an zumhnak kha cawng hna u. 8 Jesuh Khrih cu nizan le nihin le zungzal in amah ning a si ko. 9 Cawnpiaknak hmaan lo a phunphun kha a pingah i hruaiter hna hlah u. Pathian vel nih nan lung kha a ṭhawnter ahcun a ṭha, rawl kong phunglam zulh nih cun zeihmanh ṭhathnemnak a chuahpi lo; hi bantuk phunglam a zulmi hna cu an zulhmi phunglam nih khan zeihmanh a bawm hna lo. 10 Judah mi biaknak thlam chung i rian a ṭuanmi hna tlangbawi hna nih khan kannih biakṭheng cung i thawimi raithawinak sa einak nawl kha an ngei lo. 11 Judah mi Tlangbawi Ngan nih khan Hmun Thiang Bik chungah sual thawinak caah saram thisen kha a luhpi tawn; sihmanhsehlaw saram pum kha cu, riahhmun lengah an khangh hna. 12 Hi ruangah hin Jesuh zong kha, hau lengah a thih kha a si i cucu a thi in mi kha kan sualnak thianhpiak a kan duh caah a si. 13 Cucaah cun amah sinah khan riah hmun lengah cun kal u si law a inmi ningzahnak kha va ing ve u sih. 14 Hi vawlei ah hin kannih caah zungzal hmun ding khua a um lo, a ra laimi khua tu kha kan cuan. 15 Cucaah Pathian cu thangṭhat zungzal ko u sih. Cu thangṭhatnak cu Jesuh min kan kaa in kan phuan kha a si i cucu Jesuh thawngin Pathian sinah kan pekchanhmi kan raithawinak a si. 16 Pakhat le pakhat i bawmh le pakhat le pakhat cung i ṭhatnak tuah kha philh hlah u; hihi Pathian lung a tongmi raithawinak a si. 17 Nan hruaitu pawl kha an bia ngai hna u law an nawl zul hna u. An rianṭuan ningcang kha Pathian hmaiah chim an duh te lai caah, i din loin nannih kha an in zohkhenh hna. An nawl nan ngaih hna ahcun an rian kha lunglawm tein an ṭuan lai, nan ngaih hna lo ahcun ngaihchia in an um lai i cucu nan caah a ṭhahnem lai lo. 18 Thla kan campiak lengmang ko u. A hmaanmi thil kha tuah kan duhmi a si zungzal caah kan chiaṭha thleidannak kha a thiang ko. 19 Cun Pathian nih, nan sinah tuan chinchin ah a ka ratter nakhnga thla rak ka campiak u tiah kan nawl fawn hna. 20 Pathian nih kan Bawipa Jesuh cu thihnak in a thawhter i Jesuh cu a thihnak thawng khan Tuukhal Ngan le zungzal biakamnak a fehtertu a si. 21 Cun Jesuh thihnak in a thawhtertu daihnak Pathian nih cun amah duhnak nan tuah khawhnak dingah a herhmi thil vialte cu in pe hna seh law Jesuh Khrih thawngin kan chungah a duhmi paoh cu tuah ko seh. Cun Khrih cungah zungzal in zungzal tiang sunparnak cu um ko seh. Amen. 22 Ka u le ka nau hna, ca kan kuatmi hna hi a sau zong a sau lem lo i cucaah cun lung ṭhawnnak bia kan chimhmi hna hi lungsau ngaiin rak zul u tiah kan nawl hna. 23 Kan unau Timote kha thong chungin a chuak cang ti theihter kha kan duh hna. A rat manh ahcun, nanmah tlawn i ka rat tikah ka rak i ratpi lai. 24 Nan hruaitu vialte hna le Pathian mi vialte hna kha rak ka biakchawnhpiak hna u. Kan unau pawl nih Itali ram in an in biakchawnh hna. 25 Pathian vel cu nan dihlak cungah um ko seh.
1 Pathian le Bawipa Jesuh Khrih sal a simi Jeim nih, vawlei cung khuazakip i aa ṭhekmi Pathian mi kha kan biakchawnh hna. 2 Ka u le ka nau hna, nan cungah hneksaknak a phunphun a tlun tikah vanṭha ah i rel u, 3 zeicahtiah cu bantuk hneksaknak cu nan zumhnak in nan tei tikah in khawhnak nan ngei. 4 Zeihmanh bau loin a tlingmi nan si nakhnga, a karlak ah ing kho loin um sual loin a dongh tiangin ing ko u. 5 Sihmanhsehlaw fimnak a baumi nan um ahcun, Pathian sinah thlacam seh law Pathian nih a pek ko lai; Pathian nih cun ahopaoh kha zaangfah ngai le siang ngaiin a pek ko hna. 6 Asinain thla nan cam tikah lung awṭawm lo tein nan zumh hrimhrim lai. Lung awṭawm in a ummi cu thlichia nih a choihmi rili tilet bantuk a si. 7 - 8 Cu bantuk mi nih cun, ka halmi kha Pathian nih a ka pek lai, tiah a ruah awk a si lo; lung awṭawm in a ummi cu an i tinhmi ah khan an kal ciahmah kho bal lo. 9 Zumtu sifak cu Pathian nih ṭhanchonak a pek tikah i lawm seh law 10 zumtu mirum cu Pathian nih ṭumchuknak a pek tikah i lawm seh. Zeicahtiah mirum cu ramlak pangpar a par a ṭilh bangin an ṭil lai. 11 Ni cu a hung chuak i a linhnak nih pangpar kung kha a emh; a par cu a ṭil i aa dawhnak cu a lo. Cu bantukte cun mirummi cu hnahnawk luri ngaiin an rian an ṭuan cuahmah lioah khan an lo ko lai. 12 Hneksaknak a in tikah fek tein a ummi cu a lung aa lawm, zeicahtiah cu bantuk hneksaknak kha a tei khawh caah Pathian nih amah a dawtu hna a kamhmi nunnak kha laksawng ah a hmuh lai. 13 Cu bantuk hneksaknak kha mi nih an in tikah, "Tukforhnak hi Pathian sinin a ra," an ti awk a si lo; zeicahtiah Pathian cu ṭhat lonak nih a tukforh kho lo i amah zong nih ahohmanh a tukforh bal hna lo. 14 Sihmanhsehlaw mi nih tukforhnak kan in cu, kan duhnak a ṭha lomi nih khan a kan pialpi i rap ah a kan foih caah a si tawn. 15 Cu tikah thil ṭhalo duhnak nih cun sualnak kha a pawi i a hrin; cun sualnak cu a ṭhang i patling a si tikah thihnak kha a hrin. 16 Ka dawtmi ka u le ka nau hna, i palh sual hlah u. 17 Laksawng ṭha le laksawng tlamtling paohpaoh hi vancung in a rami an si; vancung i a ceumi thil a Sertu Pathian sinin a rami an si. Amah cu aa thleng lo, vancung thil ceu hna le cu thil ceu hna thladem cu an i thleng lengmang nain anih cu aa thleng bal lo. 18 Amah nih amah duh tein a kan ser i a kan sernak ah cun biatak kha a hman, cucaah kannih cu a sermi thil vialte lakah cungnung bik kan si. 19 Ka dawtmi u le nau hna, mah hihi philh hlah u: ahohmanh bia theih duhnak leiah cun a khul a rangmi si u law biachimnak lei le thinhunnak lei ah cun a khul a nuarmi si u. 20 Minung thinhunnak nih Pathian tinhmi dinnak kha a chuahter lo. 21 Cucaah cun a thurhnawmmi ziaza vialte le a ṭha lomi ziar le zar vialte kha hlaw ko hna u. Pathian sinah khan i pe u law khamhnak an pe khotu hna bia, nan lungchung i a tuhmi kha, i cohlan ko u. 22 A bia kan theih paoh ahcun a za, tiah nanmah le nanmah kha i hleng len hlah u. A bia cu a tuah tu in tuah deuh u. 23 A bia a thei nain a tuah ṭung lomi cu hi bantuk mi hi a si: mipa pakhat nih thlalang aa bih i amah le amah cu aa hmu. 24 Ṭha tein aa zoh i a kal i zei ka lo ti kha a philh colh. 25 Sihmanhsehlaw mi a luattertu nawlbia tling chungah ṭha tein aa bih i cucu a ruat peng i, a theihmi kha philh loin a tuahmipa cu Pathian nih a tuahnak ah lawmhnak a pek. 26 Mi pakhatkhat nih, kei cu biaknak leiah aa zuammi ka si, tiah aa ruat ko lai, sihmanhsehlaw a lei kha a uk khawh lo ahcun a biaknak cu pakpalawng a si i amah le amah aa hlengmi a si. 27 Sihmanhsehlaw nuhmei ngakṭah ṭha tein zohkhenh le vawlei cungah thurhnawm lo tein um tu hi Pathian kan Pa nih biaknak thiang le biaknak taktak i a ruahmi cu a si.
1 Ka u le ka nau hna, sunparnak Bawi, Bawipa Jesuh Khrih a zummi nan si bantukin mi thleidannak lungthin zeihmanh ngei hlah u. 2 Tahchunhnak ah, mirumpa pakhat cu sui kutdong hrolh le hnipuan ṭhaṭha in nan i pumhnak ah a ra, cun misifak pakhat cu hnipuan ṭet fiapfuap he a ra ve. 3 Hnipuan ṭha he a ramipa cu upatnak nan pek i, "Hika ṭhutnak ṭha bik ah hin ṭhu tuah," nan ti i misifakpa tu cu, "A dir in dir ko, asilole ṭuang ah hin kan ke hramah hin ṭhu," nan ti ahcun, 4 nanmah lakah thleidannak nan tuah a si i ahmaan lomi lungthin in biakhiahnak nan tuah a si. 5 Ka dawtmi ka u le ka nau hna, ngai hmanh u. Pathian nih hi vawlei cung i misifak hna hi, zumhnak i a rummi si awk le amah a dawtu a kamhmi hna Pennak kha a comi si awkah a thim hna. 6 Asinain nannih nih cun sifakmi cu nan zawmhtaih hna. Ahodah hremnak an petu hna le biaceihtu hmaiah an chuahpi tawntu hna kha an si? Mirummi an si lo maw? 7 Pathian nih an pekmi hna min ṭha a thangchiattu kha anmah cu an si. 8 Cathiang chungah a ummi Pennak nawlbia kha nan zulh ahcun ahmaanmi thil nan tuah a si. Cu nawlbia cu, "Na innpa kha nangmah naa dawt bantukin na dawt lai," ti a si. 9 Sihmanhsehlaw mi cu a lenglei i an langhning lawngin na ti hna ahcun na sual cang, Nawlbia nih khan nawlbia buartu ah an hmuh cang. 10 Nawlbia chung bia pakhat a buarmi cu nawlbia a dihlak in a buar a si ko. 11 Zeicahtiah "Vacung in pa i duh hlah," a ti tu ṭhiamṭhiam nih cun pei, "Lainawng hlah," a ti cu. Vacung in pa naa duh lo hmanh ah lai na nawn ahcun nawlbia buartu na si ṭhiamṭhiam ko. 12 Zalonnak an petu nawlbia nih bia a ceih laimi hna bantukin nan biachim le nan thil ti ah um u. 13 Zeicahtiah zaangfahnak a ngei lomi cu Pathian nih a bia a ceih tikah a zaangfah ve lai lo; zeicahtiah zaangfahnak cu biaceihnak nih a tei. 14 Ka u le ka nau hna, pakhat khat nih, "Zumhnak ka ngei," ti seh law, cu zumhnak cu a tuahnak nih a langhter ṭung lo ahcun, zeidah a ṭhathnem? Cu zumhnak nih cun a khamh khawh lai maw? 15 A biana ah, hnipuan a herhmi le rawl ei awk a ngei lomi nan unau an um hnga. 16 Cu hna cu i thawh riangmang i, "Pathian nih thluachuah in pe ko hna seh. Lum tein um u law khim tein ei u," ti cu, an herhmi nan pek ṭung hna lo ahcun zeidah a ṭhathnem? 17 Cu bantukte cu zumhnak zong cu a si ve, tuahnak zeihmanh a chuahter lo ahcun a thimi thil a si ko. 18 Sihmanhsehlaw a cheu nih nan i thawh hnga i, "Pakhat nih zumhnak a ngeih, a dang pakhat nih tuahnak a ngeih," nan ti hnga. Cu tikah kan lehnak hna cu, "Zeitindah tuahnak um loin mi nih zumhnak a ngeih khawhning a si ka hmuhsak tuah. Kei nih cun ka zumhnak cu ka tuahnak in kan hmuhsak hna lai," ti hi a si hnga. 19 Pathian cu pakhat lawng a si ti nan zumh. A ṭha ko. Khuachia zong nih cucu an zumh ve ko — an zumh ve ko i an ṭih caah a ther in an ther. 20 Maw mihrut hna, tuahnak um loin zumhnak cu san a tlai lo ti kha in hmuhsak hna ning law maw nan duh? 21 Zeitindah kan pu Abraham kha Pathian he remnak a rak hmuh? Isak cu biakṭheng cung i a pekchanh tik i a tuahnak thawngin pei a si kha. 22 Nan hngal kho lo maw? A zumhnak le a tuahnak cu hmunkhat ah pei rian an ṭuan kha; a zumhnak cu a tuahnak thawngin pei a tlin kha. 23 Cucaah cun, "Abraham nih Pathian a zumh i cu a zumhnak thawng cun Pathian nih miding ah a cohlan," tiah a titu Cathiang bia cu a tling. Cucaah Abraham cu, "Pathian hawi," tiah ti a si. 24 Cucaah minung cu an zumhnak thawng lawnglawng khan si loin, an tuahmi thawng khan Pathian he i remnak an hmu ti cu nan hngalh. 25 Hlawhhlangnu Rahab zong kha, cu bantuk ṭhiamṭhiam cun a si. Pathian he i remnak a hmuhnak cu a tuahnak thawngin a si; Judah mi mingiatu pawl kha a rak luhter hna i lam dang in a chuahter hna. 26 Cucaah cun pum cu thlarau loin a thih bantukin zumhnak zong tuahnak loin a thi ve.
1 Ka u le ka nau hna, tam tuk cu saya nan si awk a si lo, zeicahtiah kannih saya pawl hi hawi nak fak deuh in biaceihnak kan hmu lai ti kha nan hngalh. 2 Kan dihlak hin palhnak kan tuah cio tawn. A biachim ah palhnak a tuah lomi cu mitling a si i a pum aa uk khomi a si. 3 Kan nawl kan ngai seh tiah rang cu chak kan hlomh i kan duhnak ah kan kalter. 4 Cun sangphawlawng khi ruat rih hmanh u: thil nganpi a si i a ṭhawng ngaingaimi thli nih a kalter, sihmanhsehlaw lawng meizahnak hmete nih a uk i a cawngtupa nih a duhduhnak ah a kalter. 5 Cu bantukte cu lei hi a si: thil hmete a si nain ngan pipi in aa porhlaw tawn. Meici hmete nih ram kaupi a khangh tawn kha ruat hmanh u. 6 Lei cu mei bantuk a si. Thil ṭhalo aa hlumnak kha a si i kan pum chungah hin a dihlak khan ṭhat lonak cu a vahter. Kan nunnak hi a dihlak in mei in a khangh i cu mei cu hell in a thomi mei a si. 7 Minung nih thilnung dang vialte hi hrem khawh lomi an ngei lo — ramlak saram si hna seh, va si hna seh, a lawn in a lawnmi si hna seh, nga si hna seh, an hrem khawh dih hna. 8 Sihmanhsehlaw lei cu a hrem khotu ahohmanh an um lo. Lei cu thil ṭha lo, uk khawh lomi, thihnak sivai in a khatmi a si. 9 Kan Bawipa le kan Pa a simi Pathian thangṭhatnak caah kan hman i Pathian mui in sermi kan minung hawi chiatserhnak ah kan hman fawn. 10 Thangṭhatnak bia le chiatserhnak bia kha kan kaa pakhat chung cun an chuak. Ka u le ka nau hna, hitihin cun a si awk a si lo. 11 Cerh pakhat chungin ti thlum le ti kha an chuak ṭi bal lo. 12 Ka u le ka nau hna, theipi kung nih oliv thei a tlai bal lo, mitsur ruang nih theipi a tlai bal fawn lo; ti al zong nih ti thlum a chuahter kho ve lo. 13 Nan lakah a fim i hngalhnak a ngeimi nan um maw? Cu hna nih cun a fimmi le hngalhnak a ngeimi an si kha a ṭhami an nunning le toidornak lungthin le fimnak in an tuahmi thil ah khan an langhter awk a si. 14 Sihmanhsehlaw nan lung chungin mi nahchuahnak nan ngeih i mi cungah nan thin a hun peng i mah zawn lawng aa ruatmi nan si ahcun, mifim kan si tiin i porhlaw hlah u law, biatak dohnak ah lih kha chim lengmang hlah u. 15 Cu bantuk fimnak cu vancung in a rami a si lo; cu bantuk fimnak cu hi vawlei cung fimnak hi a si i thlarau aa tel lomi fimnak, khuachia fimnak tu a si. 16 Nahchuahnak le mah zawn lawng ruahnak a umnak paoh ah i rem lonak le ṭhat lonak a phunphun kha a um zungzal. 17 Sihmanhsehlaw cunglei in a rami fimnak cu a hmasa bik ah a thiang i cun daite le nem tein a um i hawikom cungah a ṭha; midang zaangfahnak khan a khat i thil ṭha kha tampi a tlai; thleidannak zeihmanh a ngei lo i a zer zong a zer lo. 18 Cun daihnak sertu pawl nih daihnak in an tuhmi thlaici nih a thei a tlaimi cu ṭhatnak a si.
1 Nan i siknak le nan i velhnak vialte hi khuazei in dah an rat? Nuamhnak nan duhnak in an ra i cu nan duhnak cu nan pum chungah khan anmah le anmah aa do lengmangmi an si. 2 Thil nan duh, sihmanhsehlaw nan ngei kho ṭung lo, cu tikah mi thah nan ngamh; thil ngeih kha nan duh, sihmanhsehlaw nan hmu kho ṭung lo, cu tikah nan i si i nan i vel. Nan duhmi kha Pathian nan hal lo caah nan hmu lo. 3 Cun nan hal tikah nan hmu kho lo, zeicahtiah nan i tinhmi kha a ṭha lo; nanmah nuamhnak ca lawng i hman awkah khan thil cu nan hal. 4 Zumh awk tlak lo minung hna! Vawlei he i hawikomh hi Pathian he i ral a si ti kha nan hngal lo maw? Vawlei hawikom si a duhmi paoh nih cun Pathian ral ah an i ser ko. 5 "Pathian nih kan chungah a chiahmi thlarau cu duhnak ṭihnung in a khat," tiah Cathiang nih a timi kha sullam ngei lo a si tiah ruat sual hlah u. 6 Sihmanhsehlaw Pathian pekmi vel cu cu nak hmanh cun a ṭhawng deuh chinchin. Cathiang nih a ti bangin, "Pathian nih aa porhlawmi cu a doh hna i mi toi i aa dormi kha vel a ngeih hna." 7 Cucaah Pathian nawl kha ngai ko u. Khuachia kha doh u law an zam tak ko hna lai. 8 Pathian cu naih u law an naih ve hna lai. Misual mi hna, nan kut kha i ṭawl u. Miziathiam hna, nan lung kha i thianh u. 9 Ngaihchia in um u, ṭap u law ai u; nan nihnak kha ṭahnak in thleng u, nan i lawmhnak kha ngaihchiatnak in thleng u. 10 Bawipa hmaiah toidor tein um u law amah nih an hlorh hna lai. 11 Ka u le ka nau hna, pakhat le pakhat i soi hlah u. Ahohmanh a u a nau kha a soi i sual a phaw lengmangmi cu Nawlbia kha a soi i sual a phawmi a si. Nawlbia cu sual na phawt a si ahcun nang cu nawlbia a zulmi kha na si ti lo, Nawlbia sual a phawtu kha na si lehlam. 12 Pathian lawnglawng hi nawlbia a kan petu le nawlbia cung i bia a khiak khotu cu a si. Amah lawnglawng nih hin a kan khamh khawh i a kan hrawh khawh. Cucaah cun, na minung hawi bia a ceihtu dingah khan, aho ka si ti ah dah naa ruah? 13 "Nihin ah maw thaizing ah dik khual kan tlawng lai i khika ah kum khat kum hnih tluk kan um lai i chaw kan tuah lai i tangka tampi kan hmu lai," tiah a timi hna, ka bia hi ngai tuah u. 14 Thaizing ah na nunnak cu zei a lawh lai hmanh na hngalh ṭung lo. Nang cu minmei zaammi bantuk, atute a hung um i a lo zaumi bantuk pei na si ko cu. 15 "Bawipa a hna a tlak ahcun, kan nung lai i cucu khakha kan tuah lai," ti tu ah nan ti awk deuh a si. 16 Sihmanhsehlaw na lung a puam i naa porhlaw; cu bantuk porhlawtnak vialte cu ahmaan lomi thil a si. 17 Cucaah cun hi a ṭhami thil hi ka tuah awk a si tiah a hngal ko ṭung i a tuah lomi cu misual a si.
1 Nannih mirum hna, ka bia hi ngai tuah u. Nan cung i harnak a tlung ding ruangah hin ṭap u law ai len tuah u. 2 Nan chawhlawn cu a thu dih cang i nan thilthuam cu rungrul nih a ei dih cang hna. 3 Nan sui le nan ngun cu cirik nih a ei hna i hi cirik hi nanmah sual an phawtu hna tehte a si lai i nan sa kha mei bantukin an eitu hna a si lai. Hi a dong dengmangmi caan ah hin chaw le va kha nan i khon hna. 4 Nan lo chung i rian a ṭuanmi, an nihlawh nan pek hna lomi an aunak thawng kha a thang i nan rawlṭuantu hna an aunak thawng kha Pathian Lianngan Bik Bawi i a hna chung a phan cang. 5 Hi vawlei cungah cun nuam ngai le duhtling ngaiin nan nung. Sa thah ni caah nanmah le nanmah nan rak i thauter. 6 A sual lomi kha sual nan phawt hna i nan thah hna i an in doh hna lo. 7 Cucaah cun ka u le ka nau hna, Bawipa a rat hlantiang lungsau in um ko u. Lothlopa nih a lo in a sunglawimi rawl a chuah lai kha lungsau in a hngah tawn. Fur tlak lai le faruahthawh rat lai kha lungsau in a ngan. 8 Nannih zong nan lung a sau awk a si. Ruahchannak sangpi ngei ko u. Bawipa cu a ra dengmang cang. 9 Harnak nan ton tikah pakhat le pakhat i mawhchiat hlah u. Cu ti nan um ahcun Pathian nih bia an ceih sual hna lai. Biaceihtu cu lamnai te ah a um ko i a rung lut zau ko lai. 10 Bawipa min in bia a rak chimmi profet hna kha, ka u le ka nau hna, philh hna hlah u. Harnak chung i lungsau in sifahnak a ingmi an si caah i zohchun hna u. 11 Annih nih an in khawh cah, lunglawmmi kan ti hna. Job lungsaunak kha nan theih i Pathian nih a donghnak ah a pek ṭhannak kong kha nan theih. Bawipa cu zaangfahnak le zawnruahnak in a khatmi a si. 12 Cun cu pinah biakamnak nan tuah tikah chiatsernak hmang hlah u; vancung cemchih in siseh, vawlei cemchih in siseh, zei thil paoh cemchih in siseh, chiatser hlah u. A si ti nan duh ahcun, a si, ti ko; a si lo, ti na duh ahcun, a si lo, ti ko; cu ti na tuah lo ahcun Pathian biaceihnak na ing sual lai. 13 Nan lakah harnak a tongmi nan um ahcun, thla cam hna seh. A lung aa lawmmi nan um ahcun, thangṭhatnak hla sa hna seh. 14 A zawmi nan um ahcun, Khrihfa upa kha au hna u law thla in campiak hna seh law Bawipa min in chiti kha in thuh hna seh. 15 Zumhnak in thla an camnak nih khan a zawmi kha a damter lai; Bawipa nih damnak kha a pek ṭhan lai i sualnak a tuahmi kha ngaihthiam a si lai. 16 Cucaah cun nan sualnak kha pakhat le pakhat i chim u law pakhat le pakhat thla i campiak u, cu ti nan tuah ahcun damnak nan hmuh lai. Miṭha mi thlacamnak cu hmual a ngei. 17 Elijah kha kanmah bantuk minung a si ve ko. Ruah sur hlah seh tiah biatak tein thla a cam i kum thum le a cheu ruah sur loin a um. 18 Cun thla a cam ṭhan i ruah a sur i vawlei nih tirawl a vuiter. 19 Ka u le na nau hna, pakhatkhat biatak in nan tlau sual i a dang pakhatkhat nih nan kirpi ṭhan tikah, 20 misual kha aa palhmi lam in a kirpi ṭhantu nih, cu misual mi thlarau cu thihnak in a khamh lai i sualnak tampi ngaihthiamnak a umter lai, ti kha va philh hlah u.
1 Jesuh Khrih lamkaltu a simi Peter nih, Pontas, Galatia, Kappadosia, Asia le Bithinia peng i ralzam bangin aa ṭhekmi, Pathian thimmi hna, nan sinah ca kan kuat hna. 2 Jesuh Khrih kha a nawl ngaih awk le a thi in nannih cu tlengh awkah Pathian kan Pa tinhning in thim nan si i a Thlarau nih miphun thiang ah an ser hna. Vel le daihnak cu tling khitkhet in nan ta si ko seh. 3 Kan Bawipa Jesuh Khrih i a Pathian le a Pa cu lawm ko u sih. Zeicahtiah a zaangfahnak a nganmi ruangah kannih cu Jesuh Khrih thihnak in a thawhternak khan, nunnak thar a kan pek. Cucaah kannih cu zumhnak nung in kan khat i 4 Pathian nih a mi hna caah a chiahmi thluachuah vanluhnak tampi cu co awkah kan i ruahchan. Cu thluachuahnak cu a thu a man kho lomi le a ziam kho lomi an si i Pathian nih vancung ah khin an chiahpiak hna. 5 Cu an chiahpiak hna cu Pathian kha nan zumh caah le khamhnak a phak hlantiang amah ṭhawnnak nih an huhphenh hna caah a si — cu a ra dingmi khamhnak cu atu zongah hin timhcia a si ko cang i caan dongh tikah phuan a si te lai. 6 Hi ruangah hin nan lung i lawm ko u, hneksaknak tampi nan in ruangah hin atu ahcun nan ngaih chia hmanh seh law i lawm ko u. 7 Hneksaknak nan inmi cu nan zumhnak kha a tak maw tak lo ti hngalhnak caah a si lai. Hrawh khawh a simi thil cu, sui hmanh hi hneksak a hau, cucaah sui nakin let tam piin a sung deuhmi nan zumhnak cu, hneksaknak kha chuak lakin a in khawh nakhnga, hneksak a hau ve. Cun Jesuh Khrih a langh Ni ah cun thangṭhatnak le upatnak le sunparnak kha nan hmuh lai. 8 Jesuh cu nan hmu naloin nan dawt, cun nan hmu ṭhiamṭhiam lo nain amah cu nan zumh. 9 Cucaah nan zumhnak nih aa tinhmi nan thlarau khamhnak cu nan hmuh caah, holh in chim khawh lomi lawmhnak, a nganmi le a sunglawimi lawmhnak kha nan ngei. 10 Hi khamhnak kong hi profet hna nih an ruah an khahmi le an kawlmi a rak si; Pathian nih pek an duhmi hna laksawng kong hi an rak chim chungmi kha a si. 11 Zeitik ah dah cu caan cu a si lai ti le zeitindah cu caan cu a rat lai ti kha kawl an rak i zuam i atu caan hi an chungah a ummi Khrih Thlarau nih a rak sawhmi caan cu a si. Thlarau nih cun Khrih nih a in laimi temhinnak le temhnak a in ruangah a hmuh laimi sunparnak kha a rak chimchung cang. 12 Pathian nih hi profet hna cu, an rianṭuanmi kha anmah ca ṭhathnemnak caah si loin, nanmah ca ṭhathnemnak caah a si ti kha a chimh hna. Vancung in a rung ṭummi Thiang Thlarau ṭhawnnak thawngin, Thawngṭha chimtu lamkaltu pawl nih an in chimhmi hna cu, hi profet hna nih hin an rak chim cangmi a si. Hi thil hi vancungmi hmanh nih hngalh an rak duhmi a si. 13 Cucaah nan lung in rianṭuan awkah timhcia tein um u. Ralring tein um u law, Jesuh Khrih a langh tikah nan hmuh laimi velngeihnak laksawng cungah khan nan i ruahchannak cu bunh ko u. 14 Pathian nawl kha ngai u, nan rak hruh lio i nan rak ngeihmi duhnak nih khan nan ziaza cu in uk ti hna hlah seh. 15 Nannih an kotu hna Pathian cu a thian bantukin nannih zong thiang ve u. 16 Cathiang nih, "Keimah ka thian caah nannih zong nan thian ve awk a si," a ti. 17 Pathian sin i thla nan cam tikah, amah cu kan Pa tiah nan kawh; amah nih cun mi vialte kha an tuahning cio ah duhdanh zeihmanh um loin bia a ceih hna. Cu Pathian cu a sin i thla nan cam tikah, kan Pa, tiin nan kawh ṭung ahcun, hi vawleicung nan nun lioah hin amah upat bu tein nan um awk a si. 18 Nan pupa nih an in rohmi hna santlailo phunglam hna chungin an luattertu hna cu zeidah a si kha nan hngalh, a rawk khomi thil sui le ngun bantuk si loin 19 nanmah luatnak man cu a sungmi thi, dotlak lonak zeihmanh a ngei lomi tuufa thi bantuk, Khrih thi kha a si. 20 Amah cu Pathian nih vawlei a ser hlan khan a thim cang i nanmah caah hi ni hmanung bik hna caan ah hin a hun langhter. 21 Amah thawngin Pathian cu nan zumh i Pathian nih cun thihnak in a thawhter i sunparnak a pek; cucaah nan zumhnak le ruahchannak cu Pathian cungah aa bunhmi an si. 22 Biatak nih an fialmi hna nan zulhnak thawngin nanmah cu nan i thianh cang i zumhnak ah nan unau a simi hna cungah khan dawtnak taktak nan ngeih caah, pakhat le pakhat i daw tuah u. 23 Pathian bia, a nungmi le zungzal in a hmunmi thawngin, hrintharmi nan si cang, thih a thiammi nu le pa fa si loin thih a thiam lomi pa fa nan si cang. 24 Cathiang nih a ti bangin, "Mi vialte cu ram bantuk an si, An sunparnak vialte cu ramlak pangpar bantuk a si; Ram cu a thi i pangpar cu a ṭil, 25 Sihmanhsehlaw Bawipa bia cu zungzal in a hmun." Thawngṭha nih an chimhmi hna bia cu hi bia hi a si.
1 Ṭhat lonak vialte kha hlaw cang hna u; ziar ngei ti hlah u, lih chim ti hlah u; hrawkhrol in um ti hlah u, nahchuahnak ngei ti hlah u, zawmhtaihnak bia hmang ti hlah u. 2 Ngakchia chuakka bantuk si u law thlarau hnuk kha duh u, cu thlarau hnuk nan din thawngin nan ṭhang lai i khamhnak nan hmuh lai. 3 Cathiang nih a ti bangin, "Bawipa zaangfahnak kha nan teh cang." 4 Cucaah Bawipa sinah khan ra tuah u; amah cu a nungmi Lung, minung nih hlaw hmanh hna seh law Pathian nih a sungmi ah a relmi kha a si. 5 Nanmah zong kha, lung nung bantukin ra tuah u law, thlarau biakinn saknak caah cun i hmang tuah u. Cuka ah cun a thiangmi tlangbawi bantukin cohlan awk a tlakmi thlarau raithawinak kha Jesuh Khrih thawngin Pathian cu nan pekchanh lai. 6 Zeicahtiah Cathiang nih, "A sungmi lung pakhat kha ka thim cang i cu lung cu Zion khua i sakmi inn a hram lung caah ka chiah; Amah a zummi cu zeitikhmanh ah an lung a dong lai lo," a ti. 7 Hi lung hi, a zummi nannih caah cun lung man sung ngaingai a si, sihmanhsehlaw a zum lomi hna caah cun, "Inn satu pawl nih an hlawtmi lung kha lung santlai bik ah a cang," timi kha a si. 8 Cun Cathiang chung hmun dang pakhat ah, "Hi lung hi mi a rilhtertu lung a si lai, a tluktertu hna lungpi a si lai," tiin a um fawn. Annih an rilh cu an zumh lo caah a si; cuticun um hna seh ti kha Pathian duhning a si. 9 Sihmanhsehlaw nannih cu thimmi miphun, Siangpahrang tlangbawi, miphun thiang, Pathian miphun hrimhrim nan si. Muihnak chungin amah ceunak chungah an kotu hna Pathian nih khuaruahharmi thil a tuahmi thanh awkah nannih cu an thimmi hna nan si. 10 Hlanah cun nannih cu Pathian mi nan rak si lo, sihmanhsehlaw atu cu nan si cang; hlanah cun Pathian zaangfahnak kha nan rak hngal lo, sihmanhsehlaw a tu cu zaangfahnak kha nan hmuh cang. 11 Ka dawtmi ka hawile hna, hi vawlei cungah khual le ralzam nan si bantukin thlarau he aa do zungzalmi pumsa duhnak kha i teiter hna hlah u, tiah kan nawl hna. 12 Nan ziaza kha lawkihmi hmanh nih a ṭha an timi si seh law, atu ah cun miṭhalo tiah an in ti ko hna lai nain, nuncan ṭha in nan nun kha anmah hrimhrim nih an hmuh lai i Pathian cu mi vialte biaceih awk i a rat Ni ah cun an thangṭhat lai. 13 Bawipa ruangah, nawl a ngeimi hna kha, an nawl ngai ko hna u, nawl ngeihnak sang bik a ngeimi Siangpahrang kha a nawl ngai u law 14 ṭhat lonak a tuahtu hna dantat awkah le ṭhatnak a tuahtu hna thangṭhatnak pek awkah a thlahmi bawi hna zong kha an nawl ngai ko hna u. 15 Zeicahtiah a duhduh in bia a chimmi mihrut kha, thilṭha nan tuahmi in, chim awk hngal loin tuah hna u, ti kha Pathian duhnak a si. 16 A luatmi bantukin um u, sihmanhsehlaw nan luatnak kha ṭhat lonak khuhnak ah hmang hlah u, Pathian sal bantuk tu in nung u. 17 Mi vialte kha upat hna u, zumhnak i nan unau a simi kha daw hna u, Pathian kha ṭih u law Siangpahrang kha hmaizah u. 18 Sal hna, nan bawile kha an nawl ngai hna u law upat hna u, zaangfahnak a ngeimi le mi zawnruahnak a ngeimi lawng kha si loin, a puar a hrangmi zong kha an nawl ngai hna u. 19 Pathian nan thlasak ruangah nan hmuh awk a si lomi temhinnak kha nan hmuh i a in in nan i in ahcun Pathian nih cu nan inmi ruangah cun thluachuahnak an pek hna lai. 20 Palhnak nan tuahmi ruangah, nan in awk a simi tuknak nan huah ahcun, cucu thangṭhat awk tlak a si maw? Asinain ahmaanmi thil nan tuahmi ruangah, hremnak nan in ahcun Pathian nih thluachuahnak an pek hna lai. 21 Cu bantuk mi si awkah cun Pathian nih an kawh hna cu a si; zeicahtiah Khrih hrimhrim nih nan caah khan a in cang i ka keneh ka zul hna seh tiah i zohchun awk an chiahpiak cang hna. 22 Sualnak zeihmanh a tuah lo, lih a chim bal lo. 23 Serhsatnak bia in an ti tikah serhsatnak bia in a let hna lo, temhnak a in tikah a tlerh hna lo, ding tein bia a ceihtu Pathian tu kha aa bochan. 24 Khrih nih a pum hrimhrim in kan sualnak cu vailam tahnak ah khan a kalpi i cucaah kannih cu sualnak ah khan kan thi cang i dinnak ah kan nung cang. A hma in nan dam cang. 25 Tuu a tlaumi bantukin nan tlau cang, sihmanhsehlaw atu cu nan nunnak Khaltu a simi le nan nunnak Cawngtu a simi leiah khan nan kir cang.
1 Cu bantuk ṭhiamṭhiam in nu nih nan vale kha an nawl nan ngaih hna awk a si. Cu ti nan tuah ahcun, nan vale lak i Pathian bia a zum lomi hna nih khan, nan ziaza a ṭhami thawng cun Pathian bia cu an zumh lai. Nan caah bia kaa khat chim zong a herh lai lo, 2 zeicahtiah zeitluk nun thiang in dah nan nun ti le zeitluk in dah nan upat hna kha anmah nih an hmuh ko lai. 3 Lenglei ṭamhnak, nan sam phiarning tehna, nan ṭhi nan hlawn tehna, nan thil nan thuam tehna ah khan nan i dawhnak cu a um awk a si lo, 4 nan i dawhnak cu nan chung muru ah a um awk a si i cu nan i dawhnak cu a tar kho lomi nemnak le daihnak lungthin, Pathian mithmuh i a sung bikmi thil a simi kha a si. 5 Pathian a rak i bochanmi nu hna cu, cu bantukin an i dawhnak a simi an si — an vale nawl an ngaihnak ah khan an i dawhnak cu a si. 6 Sarah kha cu bantuk cu a si; Abraham kha a nawl a ngaih i, "Ka bawipa," tiah a auh. Ṭhatnak nan tuah i zeihmanh ṭihnak nan ngeih lo ahcun, a fanule cu nanmah hi nan si. 7 Nannih patung hna zong nan nupile he nan um tikah, annih cu a der deuhmi an si kha philh hlah u. Cucaah bia nan chimh hna tikah hmaizah tein nan chimh hna lai i Pathian pekmi laksawng nunnak cu annih zong nih an co khawh ve lai. Hi bantuk hin um u law zeihmanh nih nan thlacamnak kha hna a hnawh kho lai lo. 8 A donghnak ah ka chim duhmi cu, ruahnak khat le lungthin khat in um u, u le nau bantukin i daw u law pakhat le pakhat i zaangfah u law toidor tein um u. 9 Ṭhat lonak kha ṭhat lonak in lehrul hlah u, vawlhpamhnak kha vawlhpamhnak in lehrul fawn hlah u; thluachuah peknak tu in lehrul hna u, zeicahtiah Pathian nih an kawh hna tikah bia an kamhmi hna cu, thluachuahnak kan pek hna lai, ti a si. 10 Cathiang nih a ti bangin. "Nuam tein nung ve ning ti a duhmi le caan ṭha hmu ve ning ti a duhmi nih cun, ṭhat lonak bia chim kha aa sum lai i lihchim kha a ngol lai. 11 Chiatnak kha a mer tak lai i ṭhatnak kha a tuah lai; daihnak kha a kawl lai i a zulh lai. 12 Zeicahtiah Bawipa nih a dingmi cu a mit in a ven hna i an thlacamnak kha a ngaih zungzal; Sihmanhsehlaw ṭhat lonak a tuahmi cu a doh hna." 13 Ṭhatnak tuah kha a duhmi nan si ahcun aho nih dah harnak an in pek hna lai? 14 Cun a dingmi thil tuah ruangah temhnak nan in ahcun, nan caah lunglawmh awk a va si thiam dah! Minung kha ṭih hna hlah u, hmailei thil ruah ah nan khuaruah zong har fawn hlah u. 15 Sihmanhsehlaw nan lungthin chungin Khrih kha upat u law nan Bawi ah ser u. Ruahchannak nan ngeihmi kong kha, kan chim tuah u, an timi hna an um ahcun, zeitik caan paoh i chim kho dingin timhcia tein um zungzal u. 16 Cun cu bantukin nan chim tikah nemnak le hmaizahnak in chim u. Nan chiaṭha thleidannak kha thiang tein umter u, cu ti nan um ahcun, Khrih zultu nan si ruang i nan ziaza ṭha a soimi hna nih khan nan ziaza cu an hmuh tikah anmah tu an ning a zak lai. 17 Chiatnak tuah ruang i innak hmuh nakin ṭhatnak tuah ruang i innak huah cu a ṭha deuh, cucu Pathian duhnak a si, 18 zeicahtiah Khrih hrimhrim zong kha nanmah caah a thi i sualnak ruangah khan voi khat ah za lakin a thi; nannih cu Pathian sin i kalpi awk caah khan, miṭha cu miṭhalo mi hna ruangah a thi. Pum cun thihnak a huat, sihmanhsehlaw thlarau cun a nung i 19 thlarau in a nunnak cun thong i thlakmi thlarau hna sinah khan a va kal i phung a chim. 20 Cu thlarau hna nih cun, Noah nih tilawng a ser lio i lungsau in Pathian nih a ngan hna lioah khan, Pathian nawl cu an ngai duh lo. Lawng chungah a lutmi mi tlawmte — minung an dihlak ah pariat hna kha — ti chung cun khamh an si i 21 cucu atu i nanmah an khamhtu hna tipil innak a rak sawhtu hi a si. Tipil innak cu pum hnawm kholh hi a si lo, chiaṭha thleidannak thiang nih Pathian sin i biakamnak a tuahmi tu hi a si. Tipil innak nih cun Jesuh Khrih thihnak in a thawh ṭhannak thawngin an khamh hna i 22 amah cu vancung ah a kai i Pathian orhlei kamah a um i vancungmi vialte le vancung nawl ngeihnak vialte le ṭhawnnak vialte kha a uk dih hna.
1 Khrih zong nih khan a pum in a rak in caah nannih zong nih cu bantuk thinlung le lungput cun nan tha nan i ṭhawnter ve awk a si. Cu bantukin temhinnak a ingmi hna cu sualnak chungah khan an i tel ti lo. 2 Cucaah atu thawk in, hi vawlei cung i nan nun chung cu, minung duhnak kha si ti loin Pathian duhnak tu kha i ukter cang u. 3 Lawkihmi nih an rak tuah tawnmi kha a za ceo nan rak tuah ve ko cang. Pumsa duhnak tehna, hornak tehna, zu ritnak tehna, zu hmun i nuamhnak tehna, bawilamnak tehna le fihnung a simi siasal biaknak tehna kha nan rak tuah hna. 4 Cun atu cu Lawkihmi hna kha, cu bantuk nunning ah cun nan telpi duh ti hna lo caah an khuaruah a har i nannih kha an in serhsat hna. 5 Sihmanhsehlaw a nungmi he a thimi he bia a ceihtu ding Pathian hmaiah cun an chuak ve lai i an bia cu an i chim ve te ko lai. 6 Cu ruangah cun mithi mi hna sin zong i Thawngṭha chim a si venak cu a si. Annih cu midang cio bantuk khan an pum in an nun lioah khan biaceih cu an si ve ko cang; sihmanhsehlaw annih sin i Thawngṭha chim a sinak cu thlarau in an nunnak ah hin Pathian a nun bantukin an nun khawh ve nakhnga ding caah a si. 7 Zeizong vialte donghnak caan hi a nai ko cang. Cucaah cun thla nan cam khawh nakhnga, mah le mah aa uk khomi le ralring tein a ummi nan si lai. 8 Zeidang vialte nakin, pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh. 9 Phunzai loin pakhat le pakhat tlun inn i onh u. 10 Pathian laksawng kengtu ṭha bantukin Pathian sinin nan hmuhmi laksawng kha midang ca ṭhatnak ah hmang cio u. 11 Zeizong kip ah Jesuh Khrih thawngin Pathian nih thangṭhatnak a hmuh nakhnga, phung a chimmi nih Pathian bia kha chim u, rian a ṭuanmi nih Pathian pekmi thazang khan ṭuan u, sunparnak le lianhngannak cu zungzal in zungzal tiang amah ta a si. Amen. 12 Ka dawtmi ka hawile hna, a fakmi temhinnak nan in caah hin, nan khuaruahhar hlah u, kan cungah a um bal theng lomi thil a tlung tiin ruat hlah u. 13 Khrih inmi temhnak kha nan in ve caah a lawmh tu in i lawm u, zeicahtiah a sunparnak cu a langh tikah lunglawmhnak in nan khat lai. 14 Khrih zultu nan si ruang i serhsatnak nan in ahcun, nan caah lunglawmh awk a va si dah; cu nih cun sunparnak a ngeimi Thlarau, Pathian Thlarau kha nan cungah a um, ti kha a langhter. 15 Lainawng si ruang le mifir si ruang le miṭhalo si ruang le midang rian i vaa sawhkalh ruang bel ah ahohmanh temhnak ing hlah u. 16 Khrihfa nan si ruang i temhnak nan in tu ahcun, nan ning zak hlah u; Khrih min kha nan i put caah Pathian tu kha lawm u. 17 Biaceihnak thawk caan cu a phan cang i biaceih hmasa bik ding cu Pathian mi hna kha an si lai. Kanmah in thawh a si ahcun, Pathian sinin a rami Thawngṭha a zum lomi hna kha, zeitindik an donghnak a va si te ual lai? 18 Cathiang nih a chim bangin, "Mi ṭha ca hmanh ah khamhnak hmuh a har, Cucaah Pathian zei i a rel lomi hna le sualnak a tuahmi hna cu, zeidik an hei lawh te lai." 19 Cucaah Pathian duhning a si ruang i temhnak a ingmi hna nih cun thil ṭha an tuahmi thawng khan Pathian sinah i pe ko hna seh — Pathian cu anmah a Sertu hna kha a si i a biakam kha a tlolh bal lo.
1 Khrihfa upa hna, kei zong Khrihfa upa ka si ve bantukin kan nawl hna. Khrih nih temhnak a inmi tehte pakhat ka si ve i a lang laimi sunparnak zongah kaa tel ve lai. 2 Pathian nih an pekmi hna tuurun a khaltu kha si u law Pathian nih zohkhenh hna seh ti an duh hna bantukin lungtho lo si loin lungtho tein zohkhenh hna u. Ṭuan man hmuh ding men ah si loin ṭuan nan duh taktak ruang tu ah nan rian kha ṭuan u. 3 Nanmah zohkhenh awkah chiahmi hna kha a uk in uk hna hlah u, sihmanhsehlaw an i zohchun ding tu si i zuam u, tiah kan nawl hna. 4 Cucaah Tuukhal Bawi Bik kha a rat tikah a ziam kho lomi sunparnak bawi luchin cu nan hmuh lai. 5 Cu bantuk ṭhiamṭhiam in, nannih a no deuh pawl zong nih upa deuh pawl kha an nawl nan zulh hna lai. Nan dihlak in toidornak puan kha i aih u law pakhat le pakhat i bawm u, zeicahtiah Cathiang nih "Pathian nih milungpuam cu a doh hna i mitoidor cu a vel kha a pek hna," a ti. 6 Cucaah cun a ṭhawngmi Pathian kut toiah toidor tein khuasa u law amah nih a caan a rem a ti tikah an hlorh te hna lai. 7 Amah nih an zohkhenh hna caah nan lungretheihnak vialte kha amah cungah chia dih ko u. 8 Fimhring tein um u, ralring tein um u! Nan ral Khuachia cu, seh awk kawl ah, chiandeih bangin a vak cuahmah ko. 9 Nan zumhnak ah khan fek tein um u law amah cu rak doh u, zeicahtiah vawleicung khuazakip i a ummi zumhnak lei in nan unau a simi hna kha, cu bantuk temhnak cu an ing ve ti kha nan hngalh. 10 Sihmanhsehlaw caan tlawmpal nan in hnuah cun, velngeihnak in a khatmi Pathian, Khrih he nan i pehtlaihnak thawngin zungzal a hmunmi a sunparnak i hrawm dingin aan kotu hna nih cun tlinnak an pek hna lai i fehnak le thazang le a fekmi hram bunhnak an pek hna lai. 11 Lianhngannak cu zungzal in amah ta si ko seh! Amen. 12 Hi ca hi Silas nih a ka bawmhnak thawngin nannih kha kan kuat hna. Amah cu zumhawktlak a si tiah ka ruahmi kan unau a si. Hihi Pathian vel ahmaanmi taktak a si ti kha tehte khan ka duh i a chungah fek tein dir u, tiah forh kan duh hna. 13 Babilon i a ummi Khrihfabu nih nan kut an in tlaih hna. Hi Khrihfabu zong cu Pathian thimmi a si ve. Cun ka fapa Marka zong nih biakchawnhnak an kuat ve hna. 14 Pakhat le pakhat Khrihfa dawt kuttlaihnak in i biachawn u. Khrih ta a simi nan dihlak sinah daihnak um ko seh.
1 Jesuh Khrih sal le lamkaltu a simi Simon Peter nih, Kan Pathian a dinnak thawng le kan Khamhtu Jesuh Khrih thawngin kan zumhnak tlukin a sunglawimi zumhnak a hmu vemi nan sinah ca kan kuat hna. 2 Pathian nan hngalhnak thawng le kan Bawipa Jesuh nan hngalhnak thawngin vel le daihnak cu tlamtling tein nan ta si ko hna seh. 3 Pathian sunparnak le ṭhatnak i hrawm ve awkah a kan kotu kan hngalhnak thawngin Pathian ṭihzah in nun awkah kan herhmi thil vialte cu amah Pathian ṭhawnnak lila nih cun a kan pek. 4 Cuticun a ngan ngaingaimi le a sung ngaingaimi laksawng a kan kamhmi cu a kan pek i cu laksawng a kan pekmi thawng cun a kan hrawkhral khotu vawlei pumsa duhnak chung hin nan luat kho lai i Pathian sining cu nan i hrawm kho lai. 5 Hi ruang hrimhrim ah hin, nan zumhnak i ṭhatnak chap kha fak piin i zuam u; cun nan ṭhatnak ah khan hngalhnak i chap u; 6 nan hngalhnak ah khan mah le mah i uk khawhnak i chap u; mah le mah i uk khawhnak ah khan in khawhnak i chap u; in khawhnak ah khan Pathian ṭihzahnak i chap u; 7 Pathian ṭihzahnak ah khan unau bantukin i dawtnak i chap u law unau bantukin i dawtnak ah khan zawnruahnak i chap u. 8 Hi thil hi nan herhmi an si i tam piin nan ngeih hna ahcun Bawipa Jesuh Khrih nan hngalhnak ah khan ṭhawnnak an pek hna lai i rian tampi an ṭuanter khawh hna lai. 9 Sihmanhsehlaw cu thil a ngei lomi cu lamnaite lawng a hmu khomi a si i thil dang zeihmanh a hmu kho lomi bantuk a si, amah nih cun ka sualnak kha ṭawlpiak ka si cang, ti kha a philh. 10 Cucaah cun ka u le ka nau hna, Pathian nih an thimnak hna le an kawhnak hna cu nan chungah fehter chinchin ko u; cu ti nan tuah ahcun nan tlu bal lai lo. 11 Cuticun kan Bawipa le kan Khamhtu Jesuh Khrih Pennak, zungzal in a hmunmi chungah khan luhnak nawl nan hmu lai. 12 Hi thil hi nan hngal ko cang nain le biatak nan hmuhmi chungah fek tein nan dir cang ko nain kan chimh ṭhan lengmang ko rih hna lai. 13 Ka nun chung paoh cu, hi kong kan hngalhter ṭhan lengmang hna hi a herh hrimhrimmi a si, tiah ka ruah. 14 Kan Bawipa Jesuh Khrih nih fiang tein a kan chimh bantukin, hi a thi khomi pum hi cu, tuan ah kaa phoih ko lai. 15 Cucaah cun ka thih hnuah hi thil hi nan run philh hna nakhnga lo nan ca i lam serpiak kha kaa zuam khawh chungin kaa zuam lai. 16 Kan Bawipa Jesuh Khrih ṭhawnnak in a rat kha, kannih nih kan in chimh hna tikah, mi phuahchommi tuanbia ṭukṭak kha kan i rinhmi an si lo. A lianhngannak kha kan mit hrimhrim in kan hmuh. 17 Sunparnak Cung Nung Bik nih, "Hi hi ka dawtmi ka Fapa a si, ka lung a ka tongtu a si," tiah a ti i Pathian kan Pa nih upatnak le sunparnak a pek tikah khan, cuka hmun ah cun kannih kha kan um. 18 Tlang thiang cung i amah sin kan um lioah, hi aw cu vancung in a run kha kanmah hrimhrim nih kan theih. 19 Cucaah cun profet hna nih an rak chimmi bia kha kan zumh chinchin. Cu bia cu nannih zong nih ṭha tein nan ngaih ahcun a ṭha lai, zeicahtiah khua a hung dei i deirel arfi nan lung chung i a hung ceu hlantiang, muihnak hmun i a ceumi mei-inn bantuk khi, cu bia cu a si. 20 Cun cu pinah hihi philh hlah u. Cathiang chung i a ummi profet bia kha ahohmanh nih anmah tein a sullam an i hngalh kho lo. 21 Zeicahtiah profet bia cu minung duhnak chung menmen in a chuakmi a si lo, sihmanhsehlaw Pathian sinin a rami bia kha mi nih an chim tikah, Thiang Thlarau nih a fial hna caah a si.
1 Hlan lioah Israel mi hna lakah nal profet an rak chuah tawn bangin, nanmah lak zongah hin cawnpiaktu hmaanlo an chuak ve lai. Thil hrawktu a simi le ahmaan lomi zumhning kha an chuahpi lai i anmah a tlantu hna kan Bawipa kha an hlawt lai i cucaah an cungah a rian a rangmi rawhralnak kha an i tlunter lai. 2 An ziaza ṭhalo kha mi tampi nih an i cawn lai i cu hna ruangah cun biatak Lam kha thangchiatnak a hmu lai. 3 Cawnpiaktu hmaanlo hna cu, hakkaumi an si caah, an phuahchommi tuanbia kha an in chimhmi hna cu, nanmah kha zeitindah kan miak khawh hna lai tinak caah a si lai. Sihmanhsehlaw anmah bia a ceihtu hna ding Bawi aa timhnak cu caan saupi a si cang i anmah a Hrawktu hna ding cu aa hlau cang. 4 A sualmi vancungmi kha Pathian nih a zuah hna lo i hell ah a thlak hna, khika mui lakah thir cikcin in an hren hna i Biaceih Ni kha an hngak ko. 5 Hlanlio vawlei zong kha Pathian nih a rak zuah lo. Buanchukcho kha a tlunter i Pathian zei i a rel lomi kha an thi dih; a nungmi cu, dinnak kong a chimtu Noah le midang pasarih lawng kha an si. 6 Pathian nih Sodom le Gomorrah khua cu dan a tat hna i mei in a hrawh hna; Pathian zei i a rel lomi hna caah zohchun awkah a ser hna. 7 Nawlbia zeihmanh i a rel lomi hna nih awlok an chonhmi, mi ṭha Lot kha a khamh. 8 Cu miṭhapa cu an sinah khan khua a sa i ni khat hnu ni khat an tuahsernak a ṭha lomi nih cun a lungthin a ṭhami cu a fahter. 9 Cuticun Pathian nih harnak an inmi chungin Pathian a ṭihmi hna khamh cu a thiam i miṭhalo pawl cu Biaceih Ni tiang dantatnak tang i chiah cu a thiam. 10 Cu hna cu an pumsa duhnak fihnung a zul i Pathian zei i a rel lomi kha an si khun. Hi cawnpiaktu hmaanlo hna hi an ral a ṭha i an i porhlaw; cunglei van i a ummi hna kha zei ah an rel hna lo; an serhsat lehlam hna. 11 Anmah nakin a ṭhawng deuh i a ngan deuhmi vancungmi hna hmanh nih khan Pathian hmaika i sual an phawt hna tikah nehsawh zawmhtaih in an ti hna lo. 12 Asinain hi hna cu, hei tlaih i hei thah awk men a simi saram bantukin, chuahpimi pumsa duhnak men in thil a timi an si; an hngalh lomi thil kha zeirello in an um hna. Annih cu saram bantukin thah an si lai; 13 fahnak an tluntermi caah khan fahnak in lehrulh an si lai. Annih nih nuamhnak an timi cu chun ceupi i pumsa duhnak zeipaoh tuah kha a si ko; hlennak ah an hmanmi lam kha an zulh peng ko caah nan sin i rawl an ei tik zongah ningzahnak le hmaichiatnak chuahpitu an si. 14 Nu hor pawl zoh dah ti lo kha cu zoh an duhmi zeihmanh a um lo; an sual duhnak kha a riam kho bal lo. Thazang a dermi kha rap ah an foihter hna. An lungthin kha hakkauhnak in a khat. Annih cu Pathian nih chiat a serhmi hna an si. 15 Lam ding kha an pialtak i an tlau cang; Beor fapa Balaam lam kha an zul, Balaam cu ṭhat lonak tuahnak ca i phalhmi tangka a duhmi kha a si i 16 sualnak a tuahmi ruangah cun mawhchiatnak a hmu. Holh a thiam lomi laa nih khan minung aw in bia a chim i profetpa cu a hruhnak kha a ngolter. 17 Hi mi hna cu a hna a reu cangmi cerh bantuk an si; thli nih a choihmi khuadawm bantuk an si; a thuk bik muihnak chungah khin Pathian nih umnak hmun a chiahpiak ko hna. 18 An holh tikah an bia a puam, an i porhlaw i lawkih mi hna lak i khua a sami hna, an umnak hmun in a chuakka tete pawl foihnak ah khan pumsa duhnak kha an hman. 19 Luatnak nan hmu lai, tiah bia an kamh hna, sihmanhsehlaw anmah hmanh kha, rawhralnak a phakpitu hna an ziaza sal kha an si — minung hi a teitu paoh sal a si ko. 20 Kan Bawipa le kan Khamhtu Jesuh Khrih an hngalhnak thawngin hi vawlei cung thurhnawmhnak in a luatmi hna cu, hi vawlei cung thurhnawmhnak nih khan a tlaih ṭhan hna i a tei ṭhan ahcun, a hramthawk i an rak umning nakkhan an donghnak cu a chia deuh. 21 Dinnak lam kha hngalh ṭung i nawlbia thiang kha mertak ṭhan nakcha cun, dinnak lam kha hngal lo lawlaw in rak um ah an caah a ṭha deuh suaumau hnga. 22 An tuahsernak nih hin, "Uico nih cun a luak a ei ṭhan," ti le, "Vok cu kholh hnuah nawncek ah aa bual ṭhan," timi phungthlukbia kha an hmaanter ngaingai.
1 Ka dawtmi ka hawile hna, atu i ca kan kuatmi hna hi a pahnihnak a si. Ka ca chungah, an pahnih tein, tuah kaa zuammi cu, nan lung chung i ruahnak thiang ṭhanghter kha a si i cucaah cun hi thil hi kan chimh ṭhan lengmang hna. 2 Hlan liopi ah profet mithiang hna nih an rak chimmi bia le kan Bawipa le kan Khamhtu nih nawl an pekmi hna, a lamkaltu pawl nih an in chimhmi hna kha, philh hlah u ti kan duh hna. 3 A hmasa bik ah nan hngalh awk i ka duhmi cu, caan donghnak caan ah cun, an pumsa duhnak nih a ukmi hna kha an hung chuak lai. Nannih cu an in nihsawh hna lai i 4 " 'Ka ra ṭhan lai,' tiah bia aa kam a si lo mei? Atu khuazei ah dah a um kun? Kan pupa hna cu an thi diam cang, sihmanhsehlaw thil cu vawlei ser ri in a si bantukin pei a si peng ko hi," an ti lai. 5 Pathian nih hlan liopi ah hin bia a rak chim i van le vawlei kha a rak ser hna ti kha an i hngalhter duh lo. Vawlei cu ti chungin le ti in ser a si i 6 vawlei hlun a hrawktu cu ti ṭhiamṭhiam, buanchukcho ti kha a si. 7 Sihmanhsehlaw Pathian bia ṭhiamṭhiam nih cun atu i a ummi van le vawlei hi mei in hrawh awkah a zuah rih hna. Pathian zei i a rel lomi hna an biaceih a si ni le hrawh an si ni caah cun zuah an si. 8 Sihmanhsehlaw ka dawtmi ka hawile hna, hi bia hi philh hlah u. Pathian caah cun ni khat hi kum thong khat bantuk a si i kum thong khat hi ni khat bantuk a si. 9 Bawipa cu a biakam tlinter awkah a khul a nuar ko tiin mi a cheu nih an ruah bang hin a si lo, nanmah cung i lungsaunak a ngeih ca tu ah hin a si deuh. Zeitintiah pakhat tlau hmanh hi a duh lo i mi vialte hi sual ngaihchihnak ngei hna seh ti tu hi a duhmi a si. 10 Sihmanhsehlaw Bawipa Ni cu ruah lopi ah mifir bantukin a ra lai. Cu Ni ah cun van cu awn cukmak in an lo lai i vancung arfi, nika le thlapa hna cu an kang lai i an rawk dih lai. Vawlei cu a cung i a ummi thil vialte he an lo dih lai. 11 Van le vawlei cu hi bantukin hrawh an si lai caah, zei bantuk mi dah kan si awk a si ti cu ruat tuah u. Nan nunning cu a thiangmi le Pathian sin i pekmi an si awk a si. 12 Pathian Ni nan hngah lioah hin cu bantuk cu nan si awk a si i cu Ni cu tuan deuh ah a phak khawh nakhnga fak piin nan i zuam awk a si. Cu Ni ah cun van vialte cu an kang dih lai i nika thlapa le arfi vialte hna cu, cu Ni linhnak thawng cun an ti dih lai. 13 Sihmanhsehlaw kannih cu Pathian nih a kan kamhmi van thar le vawlei thar, dinnak a umnak inn kha kan hngak. 14 Cucaah cun ka u le ka nau hna, cu Ni nan hngah lioah hin Pathian hmaiah a thiangmi le soi awk um lomi nan si nakhnga fak piin i zuam u law amah he cun rem tein um u. 15 Kan hawi le kan unau a simi Paul nih ca an kuat hna tikah, Pathian nih a pekmi fimnak in a chim bantukin, Bawipa nih kan cungah lungsaunak a ngeih cu kannih kha khamh a kan duh caah a si. 16 Hi kong a ṭial tik paoh ah hin a cakuat dihlak chungah a chimmi cu hihi a si ko. Asinain a cakuat chungah khan hngalh awk a harmi thil an um i cu thil hna cu a hrutmi le lungthin reprai a ngei set lomi pawl nih cun, Cathiang chung biadang zong an rak tuah tawn bantuk khan, a si lo ning in a sullam kha an chuahter. Cucaah anmah rawhralnak kha anmah lila nih an tlunter. 17 Sihmanhsehlaw ka hawile hna, nannih nih cun hihi cu nan hngalh cang. Cucaah cun nawlbia zeihmanh ah a rel lomi pawl an palhnak nih khan a pingah an hruai sual hna nakhnga lo le him tein nan umnak hmun ah khan nan um i nan tlak sual nakhnga lo, ralring tein um ko u. 18 Kan Bawipa le kan Khamhtu Jesuh Khrih vel le hngalhnak ah khan ṭhang ko u. Atu le zungzal tiang khin sunparnak cu amah ta si ko seh! Amen.
1 A hramthawk tein a rak um cangmi nunnak Bia kong kha ca in kan in kuat hna: cucu kan hna in kan theihmi le kan mit in kan hmuhmi kha a si; asi, kan mit in kan rak hmuh i kan kut in kan rak tawngh. 2 Cu nunnak cu hmuh khawhmi i a hung can tikah kannih nih khan kan rak hmuh; cucaah cu kong cu kannih nih kan chim i Pa he a rak um ṭimi zungzal nunnak, kannih sinah langhter a simi kong kha kan in chimh hna. 3 Kannih nih kan hmuhmi le kan theihmi cu nannih zong kha kan in chimh hna, zeicahtiah Pa le a Fapa Jesuh Khrih he hawikomhnak kan ngeihmi chungah khan nan i tel khawh ve nakhnga kan duh. 4 Hi ca kan in kuat hna cu kan i lawmhnak kha a tlin nakhnga caah a si. 5 Fapa sinin kan theih i nannih kan in thanhmi hna bia cu hihi a si: Pathian cu ceunak a si i a chungah muihnak zeihmanh a um lo. 6 Cucaah kannih nih amah he hawikomhnak kan ngei kan ti i muihnak chung i kan um ko ṭung ahcun, kan bia in siseh, kan tuahnak in siseh, lih kan chim a si. 7 Sihmanhsehlaw ceunak chung i a um bantukin kannih zong ceunak chung i kan um ahcun pakhat le pakhat hawikomhnak kan ngei i a Fapa Jesuh thi nih khan kan sualnak vialte in a kan thianh. 8 Kannih nih, sualnak kan ngei lo, kan ti ahcun kanmah le kanmah kan i hlen a si i kan chungah biatak a um lo. 9 Sihmanhsehlaw Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai. 10 Asinain kan sual lo kan ti ahcun Pathian cu lihchim ah kan ser i a bia cu kan chungah a um lo.
1 Ka fale hna, hi ca kan kuat hna cu sualnak kha nan tuah nakhnga lo caah a si; sihmanhsehlaw pakhatkhat nih sualnak nan tuah ahcun, a dingmi Jesuh Khrih, Pa sin i bia a kan chimpiaktu, kan ngei ko. 2 Cun kan sualnak ngaihthiam kan sinak cu Khrih thawng cun a si i kanmah sualnak lawng si loin mi vialte zong an sualnak kha ngaihthiam an si lai. 3 Pathian kha a nawl kan ngaih ahcun, amah kha kan hngalh tiah fiang tein kan hngalh. 4 Pakhatkhat nih, "Amah cu ka hngalh hrimhrim," tiah a ti i a nawl a ngaih ṭung lo ahcun, cu pa cu milihchim a si i a chungah biatak zeihmanh a um lo. 5 Sihmanhsehlaw a bia a ngaimi kha Pathian a dawtnak a tlingmi cu a si. Pathian chungah kan um ti fiang tein kan hngalhnak ding cu hihi a si: 6 Pathian chungah kan um, a timi paoh nih cun Jesuh Khrih bantukin kan um awk a si. 7 Ka dawtle hna, nan sin i ka hun ṭialmi hi nawlbia thar a si lo; a hramthawkte i nan rak theih lengmangmi nawlbia hlun kha a si ko. Cu nawlbia hlun cu nan rak theih cangmi bia kha a si. 8 Asinain, nan sin i ka hun ṭialmi nawlbia hi a thar a si; zeitindah a thar a si tiah muihnak cu a lo cang i ceunak taktak cu a tlang cang. Cucu Khrih nih khan a langhter i nanmah zong nih nan langhter ve. 9 Ahohmanh ceunak chungah ka um a ti i a unau a hua ṭungmi cu, atu tiang hrimhrim hin, muihnak chungah a ummi a si ko. 10 Ahohmanh a unau a dawmi cu ceunak chungah a um i cucaah midang a sualtertu ding zeihmanh a chungah a um lo. 11 Sihmanhsehlaw a unau a huami cu muihnak chungah a um i muihnak nih cun a mit a cawtter caah cuka chung i aa chawh ah khuazei ah ka kal ti awk hmanh a hngal lo. 12 Ka dawtle hna, nan sualnak cu Khrih min ruangah ngaihthiam nan si caah hi ca hi kan kuat hna. 13 Pale hna, a hramthawk tein a ummi kha nan hngalh caah nan sinah hi ca hi ka ṭial. Tlangval hna, nannih nih Miṭhalopa kha nan tei caah hi ca hi kan kuat hna. 14 Ka dawtle hna, Pa kha nan hngalh caah hi ca hi kan kuat hna. Pale hna, a hramthawk tein a ummi kha nan hngalh caah kan kuat hna. Tlangval hna, nan ṭhawn caah kan kuat hna; Pathian bia cu nan chungah a um i Miṭhalopa kha nan tei cang. 15 Vawlei hi siseh, a chung thilri hi si hna seh, tlaihchan hna hlah u. Vawlei hi nan tlaihchan ahcun, Pathian dawtnak kha nan chungah a um lo. 16 Vawlei ta a simi thil paohpaoh — pumsa duhnak tehna, mi nih zoh an duhmi thil hna, mi nih porhlawtnak ah an hmanmi thil tehna hi Pa sinin a rami an si lo; vawlei in a rami lawngte an si dih. 17 Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung. 18 Ka dawtmi ka fale hna, caan donghnak cu atu hi a si. Khrih Ral kha a ra lio, tiah nan theih i atu ah hin Khrih ral tampi an hung chuak cang; cucaah cun caan donghnak cu atu hi a si cang ti kha kan hngalh. 19 Hi hna hi kan bu chungmi ngaingai an rak si bal lo, cucaah an kan chuahtaknak cu a si; kan bu chung mi ngaingai kha rak si hna seh law cu, kan sinah hin an um peng ko hnga. Annih cu pakhat hmanh kan bu chung mi ngaingai an rak si lo ti kha a fian nakhnga annih nih khan an kan chuahtak. 20 Sihmanhsehlaw nannih cu Khrih nih Thiang Thlarau kha an toih hna caah nan dihlak in biatak kha nan hngalh. 21 Cucaah nan sin i ca ka ṭial hi biatak kha nan hngalh lo caah si loin biatak kha nan hngalh ca le biatak chungin lih bia a chuah bal lo ca tu ah khan a si. 22 A si ahcun, aho cu dah lihchimpa cu a si kun? Jesuh cu Khrih a si lo, a titu kha a si. Hi pa hi Khrih Ral cu a si — Pa he Fapa he a hlawt hna. 23 Fapa a hlawmi nih cun Pa zong kha an hlawt, Fapa a cohlangmi nih cun Pa zong kha an cohlan. 24 Cucaah a hramthawk tein nan theihmi bia kha nan lung chungah i cinken u. A hramthawk tein nan theihmi bia kha nan lung chungah nan i cinken ahcun, Fapa le Pa he i pehtlai in nan nung zungzal lai. 25 Cun cucu Khrih hrimhrim nih kan pek hna lai tiah bia a kan kammi kha a si — zungzal nunnak cu. 26 Nanmah hlen an zuammi hna kong hi kan chimh hna. 27 Sihmanhsehlaw nannih cu Khrih nih a Thlarau kha an toih cang hna. A Thlarau nan chung i a um paoh ahcun ahohmanh cawnpiaktu nan herh hna lo. Zeicahtiah a Thlarau nih cun zeizong vialte kha an cawnpiak hna i an cawnpiakmi hna cu biatak a simi kha a si, ahmaan lomi a si lo. Cucaah Thlarau cawnpiaknak kha zul u law Khrih chungah cun um camcin ko u. 28 Asi, ka fale hna, amah chungah cun um ko u, nan um ahcun amah a hung langh tikah ralṭhatnak in nan khat lai i a rat Ni ah khan ningzak in i thuh nan herh lai lo. 29 Khrih cu a ding ti kha nan hngalh; cucaah ahmaanmi thil a tuahmi paoh cu Pathian fa an si ti kha nan hngalh awk a si.
1 Pathian nih zeitluk in dah a kan dawt hi ruat hmanh u! A kan dawtnak kha a ngan tuk caah Pathian fa tiah ti kan si — Pathian fa ti lawng hmanh si loin, a si in kan si hrimhrim. Hi ruangah hin vawlei nih a kan hngalh lonak cu a si, Pathian zong kha a hngal lo. 2 Ka dawtmi ka fale hna, atu hin kannih cu Pathian fa kan si cang, asinain zei kan lawh lai cu a fiang rih lo. Sihmanhsehlaw Khrih a langh tikah, amah Khrih bantuk cu kan si lai ti kha kan hngalh, zeicahtiah a sining taktak tein kan hmuh lai. 3 Khrih zohchih in, cu ruahchannak a ngeimi paoh cu, Khrih kha a thianhlim bantukin thianghlim tein a um ve. 4 Sualnak a tuahmi paoh nih Pathian nawl a buar a si; zeicahtiah sual cu nawl buar a si. 5 Khrih cu minung sualnak lakpiak awkah a ra i a chungah sualnak zeihmanh a um lo ti kha nan hngalh. 6 Cucaah Khrih chungah a ummi paoh cu sualnak chungah khan an um peng lo; sihmanhsehlaw sualnak a tuah pengmi nih cun Khrih kha a hmuh zong an hmu bal lo i a hngalh zong an hngal bal lo. 7 Ka fale hna, ahohmanh i hlenter hna hlah u. A dingmi thil a tuahmi paoh cu miding a si ko, Khrih a din bantuk khan; 8 cun sualnak a tuahmi paoh cu Khuachia fa a si ko, zeicahtiah Khuachia cu a hramthawk tein a rak sualmi a si. Pathian Fapa a hung langhnak cu Khuachia rianṭuannak hrawh awkah hin a si. 9 Pathian fa a simi paoh nih cun sualnak an tuah peng lo, zeicahtiah Pathian thlaici kha an chungah a um; cun Pathian cu an Pa a si caah an sual kho peng lo. 10 Pathian fale hna le Khuachia fale hna an i dannak cu hihi a si: ahmaanmi thil a tuah lomi cu Pathian fa an si lo; cun a unau a daw lomi zong an si ṭhiamṭhiam lo. 11 A hramthawk tein nan rak theih lengmangmi bia cu hihi a si: pakhat le pakhat kan i daw lai, ti hi. 12 Miṭhalopa ta a simi Kain, a nau a thattu bantuk kha kan si awk a si lo. Zeicahdah Kain nih khan a thah? Amah tuahmi thil kha a ding lo i a nau tuahmi thil kha a din caah a si. 13 Cucaah vawleicung mi nih an in huat hna ahcun nan khuaruahhar hlah u. 14 Thihnak kha kan kaltak cang i nunnak chungah kan lut cang ti kan hngalhnak cu pakhat le pakhat kan i dawt hna caah hin a si. A unau a daw hna lomi paoh cu thihnak chungah a um ko rih. 15 A unau a huami paoh cu lainawng a si i lainawngmi nih cun an chungah zungzal nunnak an ngei lo ti kha nan hngalh. 16 Dawtnak hi zeidah a si ti kan hngalhning cu hitihin a si: Khrih nih kan caah a nunnak kha a hloh. Cucaah kannih zong nih kan unau hna caah kan nunnak cu kan hloh ve awk a si. 17 Mipa pakhat cu mirum a si nain a unau herhbaunak kha a hmuh tikah a lung innka a khar ahcun, zeitindah Pathian ka dawt tiah a ti khawh lai? 18 Ka fale hna, kan i dawtnak hi hmur le kaa lawngin a si awk a si lo, dawtnak taktak, thil tinak ah a langmi dawtnak in a si awk a si. 19 Cucaah biatak zulmi kan si kan i hngalhnak ding cu hihi a si. Cun zeitindah Pathian hmaiah lungphanglo tein kan um cu hitihin a si; 20 kan lung nih sual kan phaw kun kaw Pathian cu kan lung nakin a ngan deuh i zeizong vialte kha a hngalh dih. 21 Cucaah cun ka fale hna, kan lung nih sual a kan phawt lo ahcun, Pathian cu lungphanglo tein kan fuh ngam i 22 amah nawl kha kan ngaih ca le a duhmi kha kan tuah caah kan halmi paoh kha kan hmuh. 23 Cun nawl a kan pekmi cu: A Fapa Jesuh Khrih min zumh le Khrih nih nawl a kan pek bantukin pakhat le pakhat i dawt hi a si. 24 Pathian nawl a ngaimi paoh cu Pathian chungah an um i an chungah Pathian kha a um. Cun Pathian kan chungah a um ti kan hngalhnak cu hihi a si: Thlarau a kan pekmi thawngin kannih nih kan hngalh.
1 Ka fale hna, Thlarau kan ngei, aa timi paoh khan va zum hna hlah u. An ngeihmi Thlarau cu Pathian sinin a rami a si maw si lo ti kha va hlathlai hmasa u. Zeicahtiah profet deu kha vawlei cung a kenkip ah an kal cang. 2 Pathian Thlarau a si le si lo cu hitihin nan hngalh khawh lai: Jesuh Khrih cu minung in a ra, tiah a timi paoh kha Pathian sinin a rami Thlarau a ngeimi cu an si. 3 Sihmanhsehlaw Jesuh kong ah, cucu a si lo, a timi paoh cu Pathian sinin a rami Thlarau a ngei lomi an si. Cu Thlarau cu Khrih Ral sin in a rami a si; a ra lai ti kha nan rak theih cang i atu hi vawlei ah hin a um diam cang. 4 Sihmanhsehlaw ka fale hna, nannih cu Pathian ta nan si i nal profet kha nan tei cang hna; zeicahtiah nan chung i a ummi Thlarau kha vawlei mi a simi hna chung i a ummi thlarau nakin a ṭhawng deuh. 5 Annih nih cun vawlei cung thil kong kha an chim i vawlei mi an si caah an bia kha vawlei nih a ngaih. 6 Sihmanhsehlaw kannih cu Pathian mi kan si. Pathian a hngalmi paoh nih cun kan bia kha an ngaih, Pathian mi a si lomi paoh nih cun an ngai lo. Cucaah hihi biatak Thlarau le palhnak thlarau kan thleidan khawhnak lam cu a si. 7 Ka fale hna, dawtnak hi Pathian sinin a rami a si caah pakhat le pakhat i daw u sih. Pakhat le pakhat aa dawmi cu Pathian fa an si i Pathian kha an hngalh. 8 Pakhat le pakhat aa daw lomi nih cun Pathian kha an hngal lo, zeicahtiah Pathian cu dawtnak a si. 9 Pathian nih a kan dawtnak a langhterning cu hitihin a si: a Fapa ngeihchun kha vawlei ah hin a run thlah i amah thawngin nunnak kan ngei lai. 10 Dawtnak cu, Pathian kan rak dawt hi a si lo, amah nih a kan dawt i kan sual ngaihthiamnak caah a Fapa kan sinah a run thlah hi a si. 11 Ka fale hna, hihi Pathian nih a kan dawtning a si ahcun, kannih zong pakhat le pakhat kan i dawt ve awk a si. 12 Ahohmanh nih Pathian an hmu bal lo; sihmanhsehlaw pakhat le pakhat kan i dawt ahcun Pathian cu kan chungah a um i kan chungah a dawtnak cu a tling. 13 Kannih cu Pathian chungah kan um i Pathian cu kan chungah a um ti fiang tein kan hngalhnak cu Thlarau a kan pekmi ah hin a si. 14 Pa nih a Fapa kha vawlei khamhtu ah a run thlah, ti a hmutu le midang a chimtu hna cu kanmah hi kan si. 15 Jesuh cu Pathian Fapa a si tiah a titu paoh cu, a chungah Pathian a um i Pathian chungah a ummi a si. 16 Cun kanmah hrimhrim nih Pathian nih a kan dawtnak cu kan hngalh i kan zumh. Pathian cu dawtnak a si i dawtnak chungah a ummi paoh cu Pathian chungah a um i a chungah Pathian a ummi a si. 17 Kannih kan chungah dawtnak kha tlinter a sinak cu, Biaceih Ni ah ṭihnak zeihmanh kan ngeihnak hnga lo caah a si; cun cu bantukin ṭihnak ngei loin kan um khawhnak ding cu hi vawlei cungah hin Khrih bantukin kan nun caah a si. 18 Dawtnak chungah cun ṭihnak a um lo. Dawtnak tling nih cun ṭihnak vialte kha a chuah dih hna. Cucaah ṭihnak a ngeimi cu dawtnak tling a ngei rih lo, zeicahtiah ṭihnak cu dantatnak he aa pehtlaimi a si. 19 Kannih nih Pathian kan dawt cu Pathian nih a kan dawt hmasa caah a si. 20 Mi zeimaw nih, "Pathian ka dawt," a ti i a unau a huat ṭung ahcun, amah cu mi lihchim a si. Zeicahtiah a hmuhmi a unau hmanh a dawt khawh lo ahcun a hmuh lomi Pathian cu a daw kho lai lo. 21 Cucaah Khrih nih a kan fialmi cu hihi a si: Pathian a dawmi nih cun nan unau kha nan dawt hrimhrim hna lai.
1 Jesuh cu Messiah a si tiah a zummi paoh cu Pathian fa an si; pa a dawmi paoh nih cun a fa zong kha an dawt tawn. 2 Pathian fa kan dawt hna ti kan hngalhnak cu hihi a si: Pathian kha dawt i a nawl zulh kha a si. 3 Zeicahtiah, Pathian kan dawt ti cu a nawl kan zul tinak a si ko. Cun a nawlbia cu kan caah a har tuk lo, 4 zeicahtiah Pathian fa a simi paoh nih cun vawlei kha a tei khawh. Vawlei kan tei khawhnak cu kan zumhnak hin a si. 5 Vawlei cu ahodah a tei kho? Jesuh cu Pathian Fapa a si tiah a zummi lawng nih an tei khawh. 6 A rami cu Jesuh Khrih hi a si, tipil a innak ti le a thihnak thi he a rami a si. Ti he lawng a ra lo, ti he thi he a ra. Cun cucu biatak a si ti kha Thlarau hrimhrim nih tehte a khaan, zeicahtiah biatak cu Thlarau kha a si. 7 Tehte a khaangtu pathum an um: 8 cu hna cu Thlarau le ti le thi kha an si i an pathum tein an bia aa khat. 9 Minung nih tehte an khaanmi kha kan zumh tawn; Pathian nih tehte a khaanmi cu cu nakcun tam piin a ngan deuh i Pathian nih a Fapa kongah tehte a khaanmi cu atu i kan chimmi hi a si. 10 Cucaah Pathian Fapa a zummi paoh nih cun a lung chungah Pathian i tehte a khaannak bia kha a ngei; sihmanhsehlaw Pathian a zum lomi nih cun Pathian kha lihchim ah a canter i cucu zeicahdah a si ti ahcun, Pathian nih a Fapa kong i tehte a khaanmi kha a zumh lo caah a si. 11 Cu tehte cu hihi a si: Pathian nih zungzal nunnak a kan pek cang i cu nunnak cu a Fapa chungah a um. 12 Pathian Fapa a ngeimi paoh nih cun nunnak cu an ngeih i Pathian Fapa a ngei lomi paoh nih cu nunnak cu an ngei lo. 13 Pathian Fapa a zummi nih zungzal nunnak kan ngei ti kha nan i hngalh khawhnak hnga hi ca hi kan kuat hna. 14 Amah duhning in kan hal ahcun, kan halmi paoh kha a kan pek hrimhrim lai ti kan zumh caah Pathian cu ṭihnak zeihmanh um loin kan fuh ngam; 15 cun kan halmi kha a kan theihpiak ti kan hngalh ahcun kan halmi kha a kan pek ko cang ti zong kha kan hngalh fawn. 16 Mi pakhatkhat nih, a unau pakhatkhat kha, thihnak tiang a phanmi a si lomi sualnak a tuah kha a hmuh ahcun, nunnak a petu ding Pathian sinah khan thla a campiak lai — cucu thihnak tiang a phanmi sualnak a tuah lomi hna caah khan a si. Sihmanhsehlaw thihnak tiang a phanmi sualnak a um i cu kong ahcun Pathian sinah thla nan cam lai ka ti lo. 17 Palh in tuahmi thil vialte hi sual an si ko, sihmanhsehlaw sualnak vialte hi thihnak phanmi sualnak an si dih lo. 18 Pathian fa a simi cu a sual peng lo ti kha kan hngalh, zeicahtiah Pathian Fapa nih khan him tein a umter i Miṭhalopa nih khan a tawng kho lo. 19 Vawlei hi a pumpi in Miṭhalopa kut tangah a um nain kannih cu Pathian mi kan si ti kha kan hngalh. 20 Pathian Fapa cu a ra cang i hngalhnak a kan pek caah Pathian taktak kha kan hngalh. Kan nunnak cu Pathian taktak a simi a Fapa Jesuh Khrih chungah khan a um; amah cu Pathian taktak le zungzal nunnak cu a si. 21 Ka fale hna, pathian deu kha va hrial hna u.
1 Khrihfa Upa nih, Ka dawtmi Bawinu le a fale hna kha ca kan kuat hna. Keimah lawnglawng hi an dawtu hna ka si lo, biatak kha a hngalmi vialte nih cun an in dawt hna, 2 zeicahtiah biatak cu kan chungah a hmun i kan sinah a um zungzal lai. 3 Pa Pathian le a Fapa Jesuh Khrih nih velngeihnak le zaangfahnak le daihnak cu an kan pek lai i biatak le dawtnak in kan ta an si zungzal lai. 4 Kan Pa nih a kan fial bantukin na fale cheukhat cu biatak in an nung ti kha ka theih tikah ka lung aa lawm tuk hringhran. 5 Cucaah cun ka dawtmi Bawinu, pakhat le pakhat i daw hna u sih. Hihi nawlbia thar kan kuatmi a si lo, a hramthawk tein kan rak ngeih cangmi nawlbia kha a si ko. 6 Atu i ka chimmi dawtnak a sullam cu Pathian nawl zul in kan nun awk a si ti hi a si ko. Cu nawlbia cu, a hramthawk tein nan dihlak in nan rak theihmi kha, i daw niakmak tein kan um dih awk a si, ti hi a si. 7 Hlengtu tampi, Jesuh Khrih cu minung in a ra lo pei, a titu hna kha vawlei cungah an i chawk. Cu bantuk mi cu mihlengtu kha an si i Khrih Ral kha an si. 8 Cucaah nan ṭuan lengmang hnawhchanmi kha nan sungh sual nakhnga lo le nan laksawng kha tling tein nan hmuh nakhnga, ralring tein um ko u. 9 Khrih cawnpiaknak chungah um peng loin kar hlei a lammi nih cun Pathian kha an ngei lo. Cawnpiaknak chungah khan a um pengmi nih cun Pa he Fapa he an ngeih hna. 10 Ahohmanh nan sin i an rat tikah hi cawnpiaknak hi an rak i ratpi lo ahcun, tluninn rak onh hna hlah u; "Na cungah daihnak um ko seh," ti zongah rak ti hna hlah u. 11 Zeicahtiah cu bantukin a cungah daihnak um seh, ti a duhpiaktu kha a thil ṭhalo tuahmi ah khan aa tel vemi ah a cang. 12 Chimh awk tampi kan ngei ko hna, sihmanhsehlaw ca le cahang in si loin a tlawn tu in ka rak in tlawn hna lai i kan i lawmhnak kha a tlin naklai kan pum in bia kan i ruah lai. 13 Na dawtmi na Unaunu fale hna nih daihnak an in kuat.
1 Khrihfa Upa nih, Ka dawt taktakmi Gaius, ca kan kuat. 2 Ka dawtmi ka hawi, ngandam tein khua na sak i zeizong vialte na caah rem tein a um nakhnga thla kan campiak — thlarau leiah siarem in khua na sa ti kha ka hngalh. 3 Biatak leiah zeitluk in dah zumhawktlak in na um ti kha kan unau cheukhat nih an ra ka chimh tikah ka lung aa lawm tuk hringhran — nang cu biatak chungah na um zungzal tawn ko bantuk khan. 4 Ka fale biatak chungah khua an sa, ti thawng hlei in a ka lawmhter deuhtu zeihmanh a um ti lo. 5 Ka dawtmi ka hawi, kan unau hna kha na theihhngalh bal lomi an si nain an ca i nan rak tuahmi kha rian ṭha le zumhawktlak ngaingai a si. 6 Na rak dawt hnanak kha hika Khrihfabu sinah hin an chim. Hmailei an kalnak ding zongah Pathian duhnak he aa tlak dingin rak bawm ko rih hna. 7 Zeicahtiah Khrih rian ṭuan awk khualtlawn ah khan, a zum lomi sinin bawmhnak zeihmanh la loin, an i thawh. 8 Cucaah biatak rian kha a ṭuanpitu kan si nakhnga, kannih Khrihfami nih hi hna cu kan bawmh awk an si. 9 Khrihfabu sinah ca tawite hi ka ṭial, sihmanhsehlaw an hruaitu si a duhmi Diotrefes nih khan cun ka chimmi hi zeihmanh ah a rel lai lo. 10 Ka rat tikah a tuahmi vialte kha ka phuan dih lai; kan konglam i thil ṭhalo tampi a chimmi le lih a chimmi tehna vialte kha. Cun cu lawng cu aa za rih lo, kan unau pawl kha an rat tikah a rak dawnh hna i kan tlung hna seh tiah a titu hna kha i tlunter hna hlah u, tiah a thlauh hna i Khrihfabu chung khan chuah a timh hna. 11 Ka dawtmi ka hawi, a ṭha lomi nawl cu i cawn hlah, a ṭhami nawl tu i cawn ko. Thil ṭha a tuahmi paoh cu Pathian mi an si, thil ṭhalo a tuahmi paoh nih cun Pathian kha an hmu lo. 12 A mi kip nih Demetrius cu an thangṭhat i biatak hrimhrim zong nih a thangṭhat. Cun kannih zong nih kan thangṭhat ve i kan chimmi cu biatak a si ti kha na hngalh. 13 Chimh awk tampi kan ngei ko hna, asinain ca le cahang in chimh cu ka duh lo. 14 Tuan ah ka rak in hmuh hna lai i cu tikah kan pum tu in kan i ruah hna lai. 15 Nan cungah daihnak um ko seh. Na hawile vialte nih daihnak an in kuat. Kan hawile vialte kha pumpak cio ah an kut rak kan tlaihpiak hna.
1 Jesuh Khrih sal le Jeim nau a simi Judas nih, Pathian kawhmi, Pathian kan Pa dawtnak chung le Jesuh Khrih huhphenhnak chungah a ummi kha, ca kan kuat hna. 2 Zaangfahnak le daihnak le dawtnak cu tlamtling tein nan ta si ko hna seh. 3 Ka dawtmi ka hawile hna, kan dihlak in kan i hrawmmi khamhnak kong kha ca in, in chim hna ning ti cu ka duh zungzalmi a si. Sihmanhsehlaw atu ah hin, Pathian nih voi khat ah za lak in a mi a pekmi hna zumhnak kha rak ṭanh u, tiah in chimh hna kha a herh hringhran in ka hngalh caah cu kong cu ca in kua loin kan um kho hna lo. 4 Zeicahtiah kan lakah hin Pathian zei i a rel lomi kha kan hngalh loin an lut i anmah ziaza ṭhalo thuhphenhnak caah khan Pathian vel kong kha ahmaan loning in an chim i kan Uktu le kan Bawipa a simi Jesuh Khrih kha an hlawt. Hi bantuk mi hna cu sualphawt an si lai ti kha Cathiang nih hlanpi in a rak chimchung cang. 5 Cucaah cun nan hngalh dihmi a si ko nain, Bawipa nih Israel mi cu Izipt ram chungin a chuahter hna i sihmanhsehlaw a hnuah a zum lomi cu a thah hnanak kong kha theihter ṭhan kan duh hna. 6 Cun Pathian nih, hi vial hi nan nawl ngeihmi a si lai, tiah a ti i cu chung i a um duh lomi vancungmi hna kong kha philh hlah u. Vawlei tang muihnak ah khin thir cikcin in zungzal an hren hna i sualphawt an si lai ni, ni lianngan a phak tiang cuka ah cun Pathian nih a chiah hna lai. 7 Cun Sodom le Gomorrah le an pawngkam i a ummi khua hna kha philh hna hlah u. Cu khua mi hna nih cun, kha vancungmi hna bantuk khan, nu le pa sualnak kha an tuah i hawi ningkel hmanh in an tuah lo. Annih nih mei hremnak kha zungzal in an huah i cucu mi vialte ca in ralrin peknak a fiang komi thil a si. 8 Atu kan caan i a ummi hna zong cu, cu bantuk cu an si ve. An mang nih khan anmah pum lila cungah a sualter hna; Pathian nawlbia kha zei ah rel loin a umter hna i vancungmi kha a serhsatter hna. 9 Vancungmi lak i upa bik Mikhael hmanh, cu bantuk cun a um lo. Moses ruak cu aho nih dah a co lai, ti i Khuachia he an i al lioah khan, Mikhael nih cun Khuachia kha serhsat in sual a phaw ngam lo. "Bawipa nih an sik," ti tu in a ti. 10 Sihmanhsehlaw hi mi hna nih hin cun an hngalh lomi thil paoh kha zeirello in an um; cun saram bantukin chuahpimi pumsa duhnak in an hngalhmi kha anmah a hrawktu hna thil cu an si. 11 An caah ṭihnung a va si dah! Kain lam kha an zul. Tangka an duh ruangah Balaam nih palhnak a rak tuahmi leiah khan an kal ve. Korah nih Moses a rak doh bantuk khan mi doh an duh ve i amah bantuk khan hrawh an si ve. 12 Annih cu hawikomhnak rawl nan dum ṭi tik i rawl lak i hnawm a ummi bantuk khi an si, ningzah zeihmanh hngal loin an ei i an ding. Anmah zawn lawng an i ruat. Ruah a chungah a um lomi khuadawm, thli nih a choih lengmangmi bantuk khi an si. Fur caan hmanh i thei a tlai lomi thingkung bantuk an si; a hram bongh i a thi taktakmi thingkung bantuk an si. 13 Rili tilet ṭihnung bantuk an si, ningzak a simi an tuahsernak cu tilet buanbara bantukin an lang. A vak a vaimi arfi bantuk an si, cu arfi hna cu Pathian nih muihnak a thuk bik chungah khin hmun a chiahpiak ko hna. 14 Cun Adam thawk in vun rel i paruknak a simi Enok nih khan hi hna kong cu hlanpi ah hitin a rak chim, 15 "Zohhmanh, mi vialte kha an bia ceih awk le Pathian zei i a rel lomi misual vialte kha Pathian zeirello in an um ruang i an tuahmi sualnak vialte le Pathian kha zeirello in an thangchiatnak vialte ruang i sualphawt awkah, Bawipa cu a vancungmi mithiang rel cawk lo hna he an ra lai," a ti. 16 Hi mi hna hi a zungzal in an phun an zai i midang kha an mawhchiat zungzal hna; a sualmi an duhnak kha an zulh; anmah le anmah kha an i thangṭhat i anmah duhning paoh in thil a kal khawh nakhnga midang kha heh tiah an fak hna. 17 Sihmanhsehlaw ka hawile hna, kan Bawipa Jesuh Khrih lamkaltu hna nih an rak chimchungmi kha philh hlah u. 18 An in chimhmi hna cu, "Donghnak ni a phak tikah cun, nanmah an nihsawhtu hna le a ṭha lomi an pumsa duhnak lawng a zulmi hna kha an chuak lai," ti pei a si kha. 19 Hi hna cu ṭhennak a chuahtertu, an pumsa duhnak nih a ukmi, Thlarau a ngei lomi an si. 20 Sihmanhsehlaw ka hawile hna, nannih cu a thiang bikmi nan zumhnak cungah khan fek chin lengmang in i sa chin lengmang ko u. Thiang Thlarau ṭhawnnak thawng khan thlacam u law 21 Pathian dawtnak chungah khan um ko u. Cun kan Bawipa Jesuh Khrih nih zaang an fah hna ruang i zungzal nunnak an pek hna lai ni cu hngak ko u. 22 Lung awṭawm in a ummi kha an cungah zaangfahnak ngei u; 23 mei chung khan chuah hna u law khamh hna u. Cun midang zong kha ṭih le hmaizah kemh hna u, sihmanhsehlaw an pumsa duhnak an nehmi puan hrimhrim kha cu hua hna u. 24 Tlu loin an umter khotu hna le a hmaika ah soi awk zeihmanh um lo le lunglawm tein an chuahpi khotu hna — 25 kan Pathian le kan Khamhtu cungah cun, a liam ciami caan vialte in atu caan in zungzal caan tiang, kan Bawipa Jesuh Khrih thawngin, lianhngannak le sunparnak le ṭhawnnak le nawlngeihnak cu, um zungzal ko seh! Amen.
1 Hi cauk hi Jesuh Khrih nih a phuanmi thil kong a si. Cu a phuanmi cu a um zau dingmi thil, Pathian nih a sal hna hmuhsak awkah a pekmi kha a si. Cu thil hna cu Khrih nih a sal Johan kha a hngalhter i cu hngalhtertu ah cun a vancungmi kha a thlah i 2 Johan nih cun a hmuhmi thil vialte cu a chim dih. Pathian sinin hmuhmi bia le Jesuh Khrih nih a phuanmi biatak Johan nih a chim chinmi cu hihi a si. 3 Hi cauk a relmi le hi profet bia a ngai i hi cauk chung i aa ṭialmi a zulmi cu lunglawmmi an si. Zeicahtiah hi thil vialte a tlin lai caan cu a naite cang. 4 Asia peng chung i a ummi Khrihfabu pasarih kha Johan nih bia kan cah hna: Atu i a um liomi le a rak um cangmi le a um lai ding a simi Pathian le a bawiṭhutdan hmai i a ummi thlarau pasarih le Jesuh Khrih nih vel le daihnak in pe ko hna seh. 5 Jesuh Khrih cu zumh awk a tlakmi tehte, hrin hmasa bikmi Fapa, thihnak in thawhter a simi a si i vawlei cung siangpahrang hna a uktu zong a si fawn. Kannih cu a kan dawt i a thihnak thawngin kan sualnak chung khan a kan chuah i 6 a Pathian le a Pa rian kha tlangbawi bantukin a ṭuantu dingah siangpahrang phun ah a kan ser. Cu Jesuh cungah cun sunparnak le ṭhawnnak kha zungzal in zungzal tiang um camcin ko seh! Amen. 7 Zohhmanh u, khuadawm sin khin a ra lio! Mi kip nih an hmuh lai, a rak chuntu hna zong nih khan an hmuh lai. Cun vawlei cung mi vialte cu a cung i an rak tuahmi kha i ngaichih in an ṭap lai. Cu ti hrimhrim cun a si lai! Amen. 8 Lianngan Bik Bawipa Pathian nih cun, "Kei cu Alfa le Omega ka si," a ti, cu Pathian a um liomi le a um cangmi le a um laimi cu, zeizong vialte siangpahrang Bawipa a si. 9 Kei cu nan unau Johan kha ka si. Jesuh ah kan i pehtlaihnak thawngin hremnak nan innak ah ka ing ve, nan umnak a Pennak chungah khan ka um ve i temhinnak nan inmi kha ka ing ve. Pathian bia ka chim ca le Jesuh nih a phuanmi biatak ka phuan ruangah, Patmos tikulh ah khan an ka chiah. 10 Bawipa Ni ah Thlarau nih a ka tlak i ka hnulei in aw thangpi pakhat kha ka theih, cu aw cu muko aw thawng bantuk a si. 11 A ka thawh i, "Na hmuhmi kha ṭial law na ṭialnak cauk cu Khrihfabu pasarih kha kua hna: cu Khrihfabu hna cu Efesa khua le Smyrna khua le Pergamum khua le Thiatira khua le Sardis khua le Filadelfia khua le Laodisia khua i a ummi kha an si," tiah a ti. 12 A ka chawntu cu ahodah a si hnga tiah ka hun i mer i cuka ah cun sui mei vannak pasarih ka hmuh hna. 13 Cu mei vannak hna lakah cun minung a lomi pakhat a dir i a kemit phiak in angki fual aa hruk i a ṭang ah sui taisawm pakhat aa sawmh. 14 A sam cu tuuhmul bantuk a si i hawhra bantukin a rang i a mit cu mei bantukin a alh; 15 a ke cu somei chungah an tit i tleu tein an hnormi dar bantukin a tleu i a aw cu tisor nganpi thawng bantuk a si. 16 A orhlei kut in arfi pasarih aa put hna i a ka chungin kap hnih in a harmi nam a chuak. A hmai cu chunlai ni ceu bantukin a ceu. 17 Amah cu ka hmuh tikah mithi bantukin a ke hramah ka tlu. A orhlei kut in a vun ka tawngh i, "Na thinphang hlah! Kei cu hmasa bik le hmanung bik kha ka si. 18 Kei cu a nungmi kha ka si. Ka rak thi, sihmanhsehlaw zohhmanh, zungzal in zungzal tiang ka nung cang. Thihnak cung le mithikhua cungah nawl ka ngei. 19 Cucaah cun na hmuhmi thil, atu i a um liomi thil hna le hmailei ah a um lai dingmi thil hna kha ṭial hna. 20 Ka orhlei kut i na hmuhmi arfi pasarih hna le sui mei vannak pasarih hna an sullam biathli cu hihi a si: arfi pasarih hi Khrihfabu hna i an vancungmi kha an si i mei vannak pasarih hna hi Khrihfabu pasarih hna kha an si," tiah a ti.
1 "Efesa khua i a ummi Khrihfabu vancungmi sinah hitihin va ṭial tuah: A orhlei kut in arfi pasarih aa put i sui mei vannak pasarih hna lakah aa chawkmi bia cu hihi a si: 2 Na tuahmi kha ka hngalh ko; zeitluk in dah naa zuam le zeitluk in dah lungsau in na um kha ka hngalh. Mi ṭhalo na in khawh hna lo kha ka hngalh i lamkaltu an si na loin lamkaltu kan si aa timi hna na hneksak hna le milip an si na hliah khawh kha ka hngalh. 3 Na lung a sau, keimah ruangah harnak na in i na lung a dong lo. 4 Sihmanhsehlaw ka lung na si lonak a um: cucu hmasa i na rak ka dawt bantuk khan na ka daw ti lo. 5 Zeitluk niam i na tlak cang kha philh hlah. Na sualnak kha mertak hna law hmasa i na rak tuah tawnmi kha tuah ṭhan hna. Na sualnak kha na mertak hna lo ahcun, ka ra lai i na mei vannak kha a umnak hmun in ka ṭhial lai. 6 Sihmanhsehlaw hi ṭhatnak hi na ngei, cucu Nikolas zultu pawl nih an tuahmi kha keimah nih ka huat tlukin na huat ve. 7 "Hna nan ngeih ahcun, Thlarau nih Khrihfabu hna sinah a chimmi bia cu ngai ko u! Teitu a simi cu, Pathian Dum chung i a ummi nunnak thingkung theitlai einak nawl kha ka pek hna lai," a ti. 8 "Smyrna khua i a ummi Khrihfabu vancungmi sinah hitihin va ṭial tuah: Hi bia hi a hmasa bik le a hmanung bik a simi, a thi i a nung ṭhanmi bia a si. 9 Na harnak kha ka hngalh ko hna; sifak na si kha ka hngalh — sihmanhsehlaw a ngaingai ti ahcun a rummi na si. Judah mi a si lo nain Judah mi ka si aa timi hna nih an in thangchiatnak kha ka hngalh; annih cu Satan ta a simi bu an si! 10 Sifahnak na in dingmi kha zeihmanh ṭih hna hlah. Hi bia hi ngai hmanh. Khuachia nih khan nangmah hneksaknak caah nanmah lak i a cheu cu thong ah a thlak hna lai; harnak na inmi cu ni hra chung a si lai. Thih tiangin ka cungah zumhawktlak tein um ko; cun nunnak suiluchin kha kan pek lai. 11 "Hna nan ngeih ahcun, Thlarau nih Khrihfabu hna sinah a chimmi bia kha ngai ko u! "Teitu a simi cu thih hnihnak nih harnak a pe kho hna lai lo," a ti. 12 "Pergamum khua i a ummi Khrihfabu vancungmi sinah hitihin va ṭial tuah: "Hi bia hi vainam kap hnih har a ngeimi bia kha a si. 13 Na umnak hmun kha ka hngalh; Satan nih a bawiṭhutdan a chiahnak hmun a si kha ka hngalh. Ka cungah zumhawktlak in na um i keimah ca i zumhawktlak a simi tehte Antipas kha Satan umnak hmun i an thah ah khan, na zumhnak cu na ṭhial tak hlei lo. 14 Asinain na cungah ka lungtlin lonak tlawmpalte a um: cucu Balaam cawnpiaknak a zulmi nan lakah tlawmpal an um kha a si; Balaam nih cun Balak kha, Israel mi cu siasal pekmi rawl einak thawng le nu le pa sualnak thawngin an sual nakhnga, na cawnpiak hna lai, tiah a cawnpiak. 15 Cun nan lakah Nikolas zultu pawl cawnpiaknak a zulmi zong nan um fawn. 16 Nan i mer lo ahcun nan sinah ka ra zau lai i ka kaa chungin a chuakmi vainam khan kha mi hna kha ka tuk sual hna lai. 17 "Hna nan ngeih ahcun Thlarau nih Khrihfabu sinah a chimmi bia cu ngai tuah u. "Teitu a simi hna cu thuhmi manna changreu kha tlawmpal in ka pek hna lai. Cun lung rang zong pakhat cio in ka pek hna lai i cu lung cungah cun a cotu cio lawng nih a sullam an hngalhmi min thar kha an i ṭial cio," tiah a ti. 18 "Thiatira khua i a ummi Khrihfabu vancungmi sinah hi bangin va ṭial tuah: Hi bia hi Pathian Fapa, a mit mei alh bantukin a alhmi le a ke dar tleu bantukin a tleumi bia a si. 19 Na tuahmi kha ka hngalh. Dawtnak na ngeihmi le zumhawktlak na sinak le na rianṭuanmi le na lungsaunak kha ka hngalh hna. A hramthawk ah na rak tuahmi nakin atu ah tam deuh na tuah ti kha ka hngalh. 20 Sihmanhsehlaw na cung i ka lungtlin lonak cu hihi a si. Pathian lamkaltu ka si, aa timi Jezebel kha na dawn lo. Amah nih cun ka salle kha a cawnpiak hna i a ping ah a hruai hna i nu le pa sualnak kha an tuah i siasal pekchanhmi rawl kha an ei. 21 Lungthlennak caan kha ka pek ko, sihmanhsehlaw a horduhcuainak lam khan i let ṭhan a duh lo. 22 Cucaah ihkhun cungah ka hlonh lai i cu ihkhun cungah cun amah le amah he nu le pa sualnak a tuahmi kha fak piin temhnak an ing lai. Amah he ṭhat lonak an tuahmi kha an i ngaihchih lo ahcun, atu ah hi temhnak hi an cungah ka tlunter ko lai. 23 Cun a zultu hna zong kha ka thah hna lai i Khrihfabu vialte nih khan keimah cu minung lungthin le duhnak a hngal dihtu ka si kha an hngalh lai. Nannih cu nan tuahmi ning cio ah kan cham hna lai. 24 Sihmanhsehlaw Thiatira khua i a ummi a dang nih cun hi cawnpiaknak ṭhalo cu nan zul lo i midang nih, "Satan biathli thuk," an timi cu nan hngal lo. Nannih cungah cun thilrit khinh kan duh hna lo. 25 Sihmanhsehlaw atu i nan ngeihmi kha ka rat tiang fek tein rak i tlaih ko u. 26 - 28 Teitu a simi hna le tuah hna seh ti ka duhmi a dongh tiangin a tuahmi hna cu, ka Pa sinin ka hmuhmi nawl ngeihnak kha annih zong ka pek ve hna lai. Miphun dang uknak nawl kha ka pek hna lai i annih cu thirfung in uknak nawl le tlak-um bangin khuainak nawl kha ka pek hna lai. Cun deirel arfi zong kha ka pek hna lai. 29 "Hna nan ngeih ahcun, Thlarau nih Khrihfabu hna sinah a chimmi bia kha ngai tuah u," tiah a ti.
1 "Sardis khua i a ummi Khrihfabu vancungmi sinah hi bangin va ṭial tuah: Hi bia hi Pathian thlarau pasarih le arfi pasarih a ngeimi bia kha a si. Na tuahmi kha ka hngalh, a nungmi a si tiah na min a thang nain na thi ko. 2 Cucaah cun i hlau law na ngeih rihmi kha a thih taktak hlanah thazang thar la tuah. Zeicahtiah na tuahmi thil kha Pathian mit hmuh ah a tlingmi an si rih lo ti kha ka hmuh. 3 Cucaah cun zeidah an in cawnpiakmi kha a si ti le zeitindah na rak theih ti kha philh hlah, cucu zul law na sualnak kha mertak hna. Naa hlauh lo ahcun mifir bantukin kaan rathnawh lai i ka rat caan kha a hngalh hmanh na hngal lai lo. 4 Asinain Sardis khua i a ummi tlawmpal nih cun nan puan kha thiang tein nan chiah ko. Puan rang aih in keimah sinah nan i chawk lai, zeicahtiah cu bantukin aa chawk dingah cun aa tlakmi nan si. 5 Teitu a simi hna cu hi bantukin puan rang an i aih lai i a nungmi hna cauk chung khan an min cu ka hlo lai lo. Ka Pa le a vancungmi hna hmaiah langhngan in, hi hna cu ka mi an si, ka ti lai. 6 "Hna nan ngeih ahcun, Thlarau nih Khrihfabu hna sinah a chimmi cu ngai tuah u," a ti. 7 "Filadelfia khua i a ummi Khrihfabu vancungmi sinah hi bangin va ṭial tuah: Hi bia hi a thiangmi le a taktak a simi, David tawh a tlaitu, innka a hun tikah ahohmanh nih an khar khawh ti lomi, a khar tikah ahohmanh nih an hun khawh ti lomi bia kha a si. 8 Na tuahmi kha ka hngalh; na thazang a tlawm nain kan cawnpiakmi na zulh le ka cungah zumh awk tlak na si kha ka hngalh. Innka pakhat kaan hunpiak i ahohmanh nih an khar kho lai lo. 9 Ngai hmanh! Judah mi kan si tiah aa ti i a si ṭung lomi, milihchim pawl, Satan ta a simi kha, na hmaiah ka ratter hna lai i na ke hramah ka kunter hna lai. Annih nih an dihlak in, kan dawt kha, an hngalh lai. 10 Lungsau in um tuah, tiah kan timi kha na zulh caah, vawleicung mi vialte hneksaknak ding caah vawlei cung dihlak ah a tlung laimi harnak caan kha tong loin kan luatter lai. 11 Ka ra zau lai. Na ngeihmi kha ṭha tein i chiah, teinak laksawng na hmuh ding cu ahohmanh nih in chut hna hlah seh. 12 Teitu a simi cu ka Pathian biaknak inn chungah khan tungpi ah ka ser lai i cu biakinn cu zeitikhmanh ah a chuahtak lai lo. Amah cungah cun ka Pathian min kha ka ṭial lai i ka Pathian khualipi, a min Jerusalem thar a simi zong kha a cungah cun ka ṭial lai. Cu khualipi cu ka Pathian sinin vancung khin a rung ṭum lai. Cun a cungah cun ka min thar zong ka ṭial fawn lai. 13 "Hna nan ngeih ahcun, Thlarau nih Khrihfabu hna sinah a chimmi bia cu ngai tuah u," a ti. 14 "Laodisia khua i a ummi Khrihfabu vancungmi sinah hi bangin va ṭial tuah: Hi bia hi zumhawktlak le ahmaan taktakmi tehte Amen bia kha a si; amah cu Pathian nih a sermi vialte hram a si. 15 Na tuahmi kha ka hngalh ko; a kih zong na kik lo, a lum zong na lum lo. A kih zong kik lawlaw, a lum zong lum lawlaw law ka duh. 16 A lum menmen na si i a lum zong na lum lawlaw lo i a kih zong na kih lawlaw fawn lo caah, ka kaa chungin kan chak lai. 17 Ka rum ko, kaa za ko, zeihmanh ka bau lo, na ti. Asinain zeitluk sifak le zaangfah awk tlak dah na si kha naa hngal lo. Na si a fak, puan aih awk hmanh na ngei lo i na mit a caw. 18 Cucaah ruahnak kan cheuh duhmi cu, keimah sinin sui thiang taktak kha ka caw law na rum lai. Cun naa thuamhnak ding le taklawng in na umnak ningzahnak khuhnak ding caah, thil rang i cawk fawn. Cun na mit thuh awkah si zong i cawk law cuticun khua na hmu kho lai. 19 Ka dawtmi cu ka chimhhrin hna i dan ka tat tawn hna. Cucaah cun i biatak law na sualnak kha mertak hna. 20 Ngaihmanh! innka ah ka dir i ka kingh. Ahohmanh an si ah, ka aw a thei i innka a ka hunhmi cu, a inn chungah cun ka lut lai i a sinah rawl ka dum lai i amah zong ka sinah a dum ve lai. 21 Keimah kha teitu ka si i ka Pa pawngah a bawiṭhutdan cungah ka ṭhut bantuk hin, teitu a simi cu ka bawiṭhutdan cung i ka pawngah ṭhutnak nawl kha ka pek hna lai. 22 "Hna nan ngeih ahcun, Thlarau nih Khrihfabu hna sinah a chimmi bia cu ngai tuah u," a ti.
1 Hi dih hin langhnak a dang pakhat ka hmuh ṭhan i vancung ah khin innka pakhat aa hungmi kha ka hmuh. Cun hlan deuh ah ka rak theihmi aw, muko aw bantuk a simi kha, a hung thang i, "Hika ah hin hung kai law, hi dih hin zeidah a um lai ti kha kan hmuhsak lai," a ti. 2 Thlarau nih cun khulrang in a ka tlaih. Cun vancung ah cun bawiṭhutdan pakhat a ummi a cungah cun mi pakhat a ṭhut kha ka hmuh. 3 A hmai cu jasper lungvar le karnelian lungvar bantukin a tleu i bawiṭhutdan velchum ah cun emeral lungvar mui a kengmi chuncha kha, aa zel. 4 Bawiṭhutdan cu a velchum in bawiṭhutdan dang kul le pali nih an kulh i cu bawiṭhutdan hna cungah cun, puan rang aa aih i sui luchin aa chinhmi upa kul le pali an ṭhu. 5 Bawiṭhutdan cun nimtlau aa lek i khuari thawng kha a thang. Bawiṭhutdan hmaiah cun meifar vanmi pasarih an um i cu hna cu Pathian thlarau pasarih kha an si. 6 Bawiṭhutdan hmaiah cun thlalang fim bantuk a simi rili a um. Bawiṭhutdan cu a hnulei, a hmailei le a sirlei veve in saram nung pali nih an kulh i cu saram hna cu hmailei he hnulei he mit in an khat. 7 Saram nung pakhatnak cu chiandeih he an i lo, pahnihnak cu cawfa he an i lo, pathumnak cu a hmai minung hmai bantuk a si, palinak cu a zuang liomi mupi bantuk a si. 8 Saram nung pali hna nih cun thla paruk cio an ngei i an chunglei he an lenglei he mit in an khat. Chunzan in hlasak an ngol lo i: "A thiang, a thiang, a thiang, Lianngan Bik Bawipa Pathian cu, Amah cu a um cangmi le a um liomi le a um laimi a si," an ti. 9 A nungmi saram pali nih cun bawiṭhutdan cung i a ṭhumi, zungzal in zungzal tiang a nungmi cu, sunparnak le upatnak le lawmhnak hla in an thangṭhat. 10 Cu bantukin an thangṭhat tikah upa kul le pali kha bawiṭhutdan cung i a ummi hmaiah cun an kun i zungzal in zungzal tiang a nungmi cu an biak. An suiluchin kha bawiṭhutdan hmaiah cun an chiah hna i, 11 "Kan Bawipa le kan Pathian, Nangmah cu sunparnak le upatnak le lianhngannak kha hmuh awkah aa tlakmi na si. Zeicahtiah zeizong vialte kha nangmah nih na ser hna i Nangmah duhnak bangin annih cu ser an si i nunnak an ngei," tiah an ti.
1 Bawiṭhutdan cung i a ṭhumi nih cun cazual pakhat a orhlei kut in aa put kha ka hmuh i cu cazual cu a chunglei he a lenglei he aa ṭial dih i cakhenh pasarih in an khenh chih. 2 Cun vancungmi pakhat a ṭhawng ngaimi kha ka hmuh i cu vancungmi nih cun, "Ahodah cakhenhnak phoih awk le cazual samh awkah aa tlak hnga," tiah fak piin a ti. 3 Sihmanhsehlaw cu cazual a phoih i a chung a zoh khotu cu vancung ah siseh, vawleicung ah siseh, vawlei toiah siseh, ahohmanh an hmu kho hna lo. 4 Cu cazual cu phoih i a chung kha a zoh khotu dingah aa tlakmi ahohmanh an hmuh khawh hna lo caah fak piin ka ṭap. 5 Cu tikah upa pakhat nih khan a hun ka chawnh i, "Ṭap hlah! Zohhmanh, Judah phun chungin a chuakmi Chiandeih, David tefa milianngan nih khan, teinak a hmuh cang i cakhenhnak pasarih kha a phoih khawh hna i cazual kha a kau khawh," tiah a ti. 6 Cun Tuufa pakhat, bawiṭhutdan laifang ah a dir i saram nung pali hna le upa hna nih an kulh kha ka hmuh. Tuufa cu an rak thahmi si dawh a si. Ki pasarih le mit pasarih a ngei i a mit pasarih cu Pathian nih vawlei cung khuazakip ah a thlahmi Pathian thlarau pasarih kha an si. 7 Tuufa cu a va kal i bawiṭhutdan cung i a ṭhumi orhlei kut i cazual kha a va lak. 8 Cu ti a va lak ahcun saram nung pali hna le upa kul le pali hna kha Tuufa hmaiah cun an kun. Pakhat nih tingtang pakhat cio le zihmui a khatmi sui kheng pakhat cio an i put, sui kheng chung zihmui cu Pathian mi hna thlacamnak kha a si. 9 Hla thar kha an sa i: "Nangmah cu cazual kha lak awk le a khuhnak kha phoih awkah naa tlak. Zeicahtiah an in thah i na thihnak thawngin, Hrin kip le chung kip le holh kip le phun kip chungin, Minung cu Pathian sinah na phakpi hna. 10 Kan Pathian rian tlangbawi bantukin a ṭuantu dingah siangpahrang phun ah na ser hna i Annih nih vawlei cu an uk lai," an ti. 11 Ka hun zoh ṭhan i vancungmi a rel in rel cawk lomi aw thawng kha ka theih. Annih cu bawiṭhutdan le saram nung pali hna le upa hna velchum ah khan an dir i 12 fak piin hla an sa i, "An thahmi Tuufa kha, Lianhngannak le rumnak le fimnak le ṭhawnnak le upatnak le sunparnak le thangṭhatnak hmuh awkah aa tlak," an ti. 13 Cun vancung i a ummi le vawlei cung i a ummi le vawlei toi i a ummi le rili chung i a ummi thilnung vialte nih, "Bawiṭhutdan cung i a ṭhumi le Tuufa cu, thangṭhatnak, upatnak, sunparnak le ṭhawnnak kha, An cungah zungzal in zungzal tiang um ko seh," tiin hla an sak kha ka theih. 14 Saram nung pali hna nih khan, "Amen," tiin an rak leh hna i upa hna cu an kun i an biak.
1 Cun Tuufa nih cakhenh pasarih chung i pakhatnak a phoih kha ka hmuh. Cun saram nung pali hna lak i pakhat nih khan khuari thawng bantuk a simi aw in, "Ra," a ti kha ka theih. 2 Ka hun zoh i rang rang pakhat ka hmuh. A cung i aa citmi nih cun likuk pakhat aa put i amah cu bawiluchin pakhat an pek. Teitu nih tei awkah aa thawh bantukin aa thawh. 3 Cun Tuufa nih cun cakhenh pahnihnak kha a phoih i saram nung pahnihnak nih, "Ra," a ti kha ka theih. 4 Rang dang pakhat a hung chuak i rang sen a si. A cung i aa citmi cu, vawlei cung i ral thawhternak ṭhawnnak kha an pek, cucu zeicahdah a si tiah, mi kha pakhat le pakhat i that hna seh, ti caah a si; amah cu vainam nganpi an pek. 5 Cun Tuufa nih cun cakhenh pathumnak kha a phoih; cun saram nung pathumnak nih, "Ra," a ti kha ka theih. Ka hun zoh i rang nak pakhat ka hmuh. A cung i aa citmi nih cun cuaithlainak pakhat aa put. 6 Saram nung pali hna lakin a chuakmi aw a lomi aw pakhat ka theih i cu aw nih cun, "Ni khat ni hlawh caah changvut cu khiat khat, barli cu khiat thum. Sihmanhsehlaw oliv chiti le mitsur hang cu hrawk hna hlah," a ti. 7 Cun Tuufa nih cun cakhenh palinak kha a phoih i saram nung palinak nih, "Ra," a ti kha ka theih. 8 Ka hun zoh i rangrau diapduap pakhat ka hmuh. A cung i aa citmi cu a min ah Thihnak a si i Hell nih a hnulei in a zulh. Vawlei cung cheu li cheu khat uknak nawl kha pek an si i ral in siseh, mangṭam in siseh, rai in siseh, sahrang in siseh, mi thah khawhnak nawl kha pek an si. 9 Cun Tuufa nih cun cakhenh panga-nak kha a phoih. Pathian bia an chim ruangah le Pathian tehte an sinak ah zumhawktlak in an um ruangah an thahmi hna thlarau kha biakṭheng toiah cun ka hmuh hna. 10 Fak piin an au i, "A lianngan bik Pathian, a thiang i a taktak a simi Pathian, vawleicung mi, a kan thattu hna hi zei can dah kan phuhlam loin na um hna lai i an biaceih loin na um hna lai," an ti. 11 Annih cu puan rang pakhat cio an pek hna i, "Tlawm tein i din ko rih u. Nanmah bantukin thihnak a ing ve ding nan salhawi le nan unau hna an tling rih lo," tiah an ti hna. 12 Cun Tuufa nih cakhenh paruknak a phoih kha ka hmuh. A fak ngaimi lihnin a um i ni cu puanchia nak bantukin a nak i thlapa cu thisen bantukin a sen dih. 13 Cun thli fak nih a kung a hninh tik i theipi kuh a ṭilmi bantuk khin arfi cu vancung in vawlei ah an rung tla. 14 Cazual an zual bantuk khin van cu a lo i tlang le tikulh vialte cu an umnak hmun in an ṭhial dih hna. 15 Cun vawlei cung siangpahrang hna le uktu hna le ralbawi hna le mirum hna le miṭhawng hna le midang vialte cu sal he a luatmi he, tlang cung lungkua le lungpi toiah an i thup dih. 16 Tlang le lungpi cu an auh hna i, "Kan nenh u law bawiṭhutdan cungah a ṭhumi hmai le Tuufa thinhunnak cun kan phen tuah u! 17 An thinlinh ni ni lianngan cu an phan cang i aho nih dah a celh lai," a ti.
1 Cu hnuah cun vancungmi pali vawlei kil li cung i an dir kha ka hmuh i vawlei cung thlitu pali hna kha, vawlei cungah siseh, rili cungah siseh, thingkung cungah siseh, an hrannak hnga lo an thlauh hna. 2 Cun nichuahlei in vancungmi a dang pakhat a nungmi Pathian cakhenhnak he a rat kha ka hmuh. Pathian nih vawlei le rili hrawh khawhnak nawl a pekmi vancungmi pali kha aw fak piin a auh hna. 3 Vancungmi nih cun, "Kan Pathian sal hna kha an cal ah hmelchunhnak kan khenh hna hlan cu vawlei le rili le thingkung kha hrawk hna hlah u," tiah a ti. 4 Cun an cal ah Pathian cakhenhnak in hmelchunhnak an khenhmi hna cu thong za khat le thong sawm li le thong li an si, Israel phun dihlak chungin an si, tiah an ka chimh. 5 Judah phun in thong hleihnih, Reuben phun in thong hleihnih, Gad phun in thong hleihnih, 6 Asher phun in thong hleihnih, Naftali phun in thong hleihnih, Manasseh phun in thong hleihnih, 7 Simeon phun in thong hleihnih, Levi phun in thong hleihnih, Issakhar phun in thong hleihnih, 8 Zebulun phun in thong hleihnih, Josef phun in thong hleihnih, Benjamin phun in thong hleihnih an si. 9 Cu hnuah cun khua ka hun zoh i mibu nganpi, ahohmanh nih a rel in an rel cawk lomi khi ka hmuh. Annih cu phun kip, ram kip, holh kip le hrin kip chungin a rami an si i bawiṭhutdan hmai le Tuufa hmaiah cun an dir i puan rang an i aih i tum hnah kha an i put. 10 Fak piin an au i, "Kan khamhnak cu bawiṭhutdan cungah a ṭhumi Pathian le Tuufa sinin a rami a si," an ti. 11 Vancungmi vialte cu bawiṭhutdan le upa hna le saram nung pali hna vel chum ah khan an dir. Cun bawiṭhutdan hmaiah cun an kun i Pathian kha an biak i 12 "Amen! Thangṭhatnak le sunparnak le fimnak le lunglawmhnak le upatnak le ṭhawnnak le thil ti khawhnak cu zungzal in zungzal tiang kan Pathian ta a si! Amen!" an ti. 13 Upa pakhat nih khan a ka hal i, "Puan rang aa aihmi hna hi ahodah an si i khuazei in a rami dah an si?" tiah a ka ti. 14 "Ka hngal lo, bawipa, Nangmah nih ta na hngalh deuh lai," tiah ka leh. Cun a ka thawh i, "Hi mi hna hi hremnak nganpi a ingmi kha an si; Tuufa thi chungah an puan kha an suk i an puan cu an vaar cang. 15 Cucaah cun Pathian bawiṭhutdan hmaiah an dir i chunzan in biakinn chungah a rian kha an ṭuan. Bawiṭhutdan cung i a ṭhumi nih khan a umpi hna i a ven hna. 16 Annih cu an ti a hal in an rawl a ṭam ti lai lo; ni nih a linh ti hna lai lo i thlanhri puak in zeihmanh nih a umter ti hna lai lo. 17 Zeicahtiah bawiṭhutdan laifang i a ummi Tuufa kha an tuukhal a si lai i nunnak tiput cerhkam ah a kalpi hna lai. Cun Pathian nih an mitthli vialte kha a hnawhpiak dih hna lai," a ti.
1 Tuufa nih cakhenh pasarihnak kha a phoih i vancung cu suimilam a cheu chung dai ṭhup in a um. 2 Cun Pathian hmaiah a dirmi vancungmi pasarih kha ka hmuh hna i muko pasarih an pek hna. 3 A dang vancungmi pakhat, zihmui khanghnak umte pakhat aa putmi kha a ra i biakṭheng pawngah cun a ra dir. Pathian mi hna an thlacamnak i toih awkah le bawiṭhutdan hmai i a ummi sui biakṭheng cung i khangh awkah zihmui tampi an pek. 4 Pathian hmai i a dirmi vancungmi kut cun zihmui khu cu Pathian mi hna thlacamnak he khan an kai ṭi. 5 Cun vancungmi nih khan zihmui um cu aa lak i biakṭheng cung i a ummi mei kha a chungah cun a rawn i vawlei cungah a hlonh. Khua a ri; ṭek a tla, nimtlau a lek i li aa hnin. 6 Cun vancungmi pasarih hna nih khan an muko pasarih cu tum awkah an i tim. 7 Vancungmi pakhatnak nih khan a muko cu a vun tum, rial le mei, thisen he aa cawhmi a sur in vawlei cungah an sur. Vawlei cheu thum cheu khat kha a kang dih, thingkung cheu thum cheu khat kha an kang i ram hring vialte kha an kang dih. 8 Vancungmi pahnihnak nih khan a muko cu a vun tum, tlang nganpi a alh hluahmahmi bantuk khi rili chungah a tla. Rili cheu thum cheu khat kha thisen ah a cang i 9 rili chung i a ummi thilnung cheu thum cheu khat kha an thi, cun sangphawlawng cheu thum cheu khat kha an rawk. 10 Vancungmi pathumnak nih khan a muko cu a vun tum, meifar alh bantuk a simi arfi nganpi pakhat cu van in, tiva cheu thum cheu khat le cerh cheu thum cheu khat cungah, a rung tla. 11 (Cu arfi cu a min ah 'A kha' ti a si). Ti cu cheu thum cheu khat a kha i, ti cu a khaat caah cu ti a dingmi cu mi tampi an thi. 12 Cun vancungmi palinak nih a muko cu a vun tum, nika cu cheu thum ah cheu khat a beuh i thlapa zong cheu thum ah cheu khat a beuh ve, arfi zong cheu thum ah cheu khat an lo fawn. Cucaah cun an ceunak cu cheu thum ah cheu khat a zor i chun ah ṭhen thum ṭhen khat chung a mui i zan zongah ṭhen thum ṭhen khat chung ceunak a um lo. 13 Cun khua ka hun zoh i vanlai ah sang piin a zuangmi mupi pakhat nih aw fakpi i, "Ṭih a va nung thiam dah! Ṭih a va nung thiam dah! A dang vanmi pathum hna nih an muko an tum ve tikah vawlei mi vialte hna caah zeitluk riamruam in dik ṭih a nun lai!" a ti.
1 Cun vancungmi panganak nih khan a muko cu a vun tum, van in vawlei ah arfi pakhat a tlami ka hmuh; dongh hngal lo khor tawh kha amah cu an pek. 2 Dongh hngal lo khor cu arfi nih cun a vun hun i somei nganpi chung i meikhu a chuakmi bantuk meikhu kha a hung chuak hluahmah; cu dongh hngal lo khor in a chuakmi meikhu nih cun ni ceunak le thli kha a muihter dih hna. 3 Meikhu chung cun khaubawk an chuak i vawlei cungah an rung ṭum; tlangngaikuang ṭhawnnak bantuk kha khaubawk cu an pek hna. 4 Ram hring siseh, thingkung siseh, ramkung siseh, hrawk hna hlah u, tiah an ti hna; an cal ah Pathian hmelchunhnak a ngei lomi lawnglawng kha nan hrawh khawh hna, ti an si. 5 Hi mi hna thah cu khaubawk kha onh an si lo, a hrem lawng thla nga chung nan hrem hna lai, ti an si. Cu an hrem hnanak fahning cu tlangngaikuang mi henh bantuk khi a si lai. 6 Cu thla nga chung cu kha mi hna nih khan thih an i duh deuh lai, sihmanhsehlaw an thi kho ṭung lai lo; thih kha an i kawh lai, sihmanhsehlaw thihnak nih a zamtak ṭung hna lai. 7 Khaubawk cu ral tuknak rangtum he an i lo; an lu ah suiluchin bantuk an i chinh i an hmai cu minung hmai bantuk a si. 8 An sam cu nu sam bantuk a si i an ha cu chiandeih ha bantuk a si. 9 An ṭang ah thir angki bantuk an i aih i an thla khawn thawng cu, raltuknak hmun ah a le cutmatmi rangleng tampi thawng bantuk a si. 10 Tlangngaikuang bantukin mei le mi henhnak zum an ngei i an mei cun minung cu thla nga chung fahnak an pek khawh hna. 11 An uktu ah siangpahrang pakhat an ngei i dongh hngal lo khor a uktu vancungmi kha a si. A min cu Hebru holh in Abaddon ti a si; Grik holh cun Apollyon ti a si i a sullam cu "Hrawktu" tinak a si. 12 Thil ṭihnung hmasa bik cu a dih; hi hnuah hin a dang pahnih a ra ding an um rih. 13 Cun vancungmi paruknak nih khan a muko cu a vun tum, Pathian hmai i a dirmi sui biakṭheng kap khan aw pakhat ka theih. 14 Muko aa putmi vancungmi paruknak kha aw nih cun a thawh i, "Tiva nganpi Zufrates ah hrenmi vancungmi pali kha thlah hna," tiah a ti. 15 Vancungmi pali cu a thlah hna, annih cu hi suimilam thengte le hi ni thengte le hi thla thengte le hi kum thengte i minung vialte cheu thum cheu khat a thattu ding i rak timhlamhmi kha an si. 16 An rangcung ralkap hna cu nuai za hnih an si tiah an ka chimh. 17 Cun langhnak ka hmuhmi ah cun rangtum hna le an cung i aa citmi cu ka hmuh hna: an ṭangphaw cu mei bantukin a sen, safaiar lungvar bantukin a dum i kat bantukin a eng. Rangtum cu an lu chiandeih lu bantuk an si i an kaa chungin mei le meikhu le kat kha an chuak. 18 Rangtum hna kaa chungin a chuakmi hremnak pathum, mei le meikhu le kat nih cun, minung cheu thum cheu khat an thah hna. 19 Rangtum cu an ṭhawnnak kha an kaa le an mei ah a um. An mei cu lu an ngei i rul bantuk an si, an mei cun mi kha an hrem hna. 20 Hi hremnak pathum nih a thah lomi, a taangmi minung hna nih khan, anmah nih an ser chommi thil kha an mertak hlei hna lo. Khuachia biak kha an ngol lo i sui le ngun le dar le lung le thing in sermi siasal, khua zong a hmu kho lomi, a theih zong a thei kho lomi, a kal zong a kal kho lo mi biak kha an ngol hlei fawn lo. 21 Cun an lainawn le an pumsa camh le an pumsa sualnak le an fir zong kha an i ngaihchih hlei fawn lo.
1 Cun vancung in a ṭhawngmi vanmi a dang pakhat a rung ṭum kha ka hmuh. Khuadawm in aa thuam i a lu ah chuncha aa khimh; a hmai cu nika bantuk a si i a ke cu mei tung pipi bantuk an si. 2 A kut in aa samhmi cazual hmete pakhat aa put. A orhlei ke in rili kha a lamh i a kehlei ke in vawlei kha a lamh, 3 cun a au ciammam i a aw cu chiandeih run aw bantuk a si. Cu ti a au dih cun, khuari pasarih nih an hun leh. 4 Bia an chim dih cangka cun ṭial kaa tim i sihmanhsehlaw vancung in aw pakhat nih, "Khuari pasarih nih an chimmi kha biathli ah chia, ṭial rih hlah," tiah a run ka ti kha ka theih. 5 Cun rili cung le vawlei cungah a dirmi vancungmi ka hmuhmi nih khan van leiah a orhlei kut a hler i 6 zungzal in zungzal tiang a nungmi Pathian, van le a chung i a ummi thil vialte a sertu, vawlei le a chung i a ummi thil vialte a sertu, rili le a chung i a ummi thil vialte a sertu min khan biakamnak a ser. Vancungmi nih cun aa thawh i, "A rau ti lai lo. 7 Vancungmi pasarihnak nih a muko a tum tikah Pathian nih, a sal profet hna sinah a rak chim bang khan, a rak timh thlimi kha a tlinter lai," a ti. 8 Cun vancung in aw ka theihmi nih khan a run ka chawnh ṭhan i, "Rili cung le vawlei cungah a dirmi vancungmi nih aa putmi cazual aa samhmi kha va la tuah," a ti. 9 Vancungmi sinah cun ka va kal i cazual hmete cu ka pe, tiah ka va ti. A ka thawh i, "I lak law ei tuah; na pawpi chungah cun a kha lai, sihmanhsehlaw na ka chungah cun khuaihliti bantukin a thlum lai," a ti. 10 A kut i cazual hmete cu ka lak i ka ei, ka ka chungah cun khuaihliti bantukin a thlum. Sihmanhsehlaw ka vun dolh tikah ka paw chungah cun a kha. 11 Cun, "Pathian nih miphun dangdang hna le ram dangdang hna le holh phun dangdang hna le siangpahrang tampi hna kong i a chimmi bia kha na chim ṭhan awk a herh lai," an ka ti.
1 Tahnak fung caah phaikung pakhat an ka pek i, "Hung kal law Pathian biakinn le biakṭheng kha hung tah hna, cun biakinn chung i Pathian a biami kha hung rel hna. 2 Asinain biakinn lenglei tual kha cu va ngaan rih hna. Va tah rih hna hlah, zeicahtiah kha tual kha cu Pathian a bia lomi, thla sawm li le thla hnih chung, Khua Thiang a naang ding hna ca i chiahmi an si. 3 Ka tehte pahnih kha ka thlah hna lai, annih cu buri an i aih lai i ni thong khat le za hnih le sawm ruk chung Pathian bia kha an chim lai. 4 Cu tehte pahnih hna cu oliv kung pahnih hna le mei-inn pahnih hna, vawlei Bawipa hmai i a dirmi kha an si. 5 Harnak pek a zalmi hna paoh kha an kaa chungin a chuakmi mei in an thah hna; hi bantukin harnak pek a timtu hna paoh cu thah an si lai. 6 Van kharnak nawl kha an ngei i cucaah cun Pathian bia an chim chung cu ruah a sur lai lo. Cerhti put zong kha thi i canternak nawl an ngei fawn. Cun vawlei zong kha an duh tik caan paoh ah hremnak a phunphun in hremnak nawl an ngei. 7 Cun bia chim awk an ngeihmi an chim dih tikah, dongh hngal lo khor thukpi chungin a hung chuakmi sahrang nih khan a doh hna lai. A tei hna lai i a thah hna lai; 8 an ruak cu khuapi chung lamkalai ah khan an ril lai, cu khua cu an Bawipa vailam i an khenh chihnak khua kha a si. Cu khua cu a min ah minhleng in Sodom, ti asiloah, Izipt ti a si. 9 Phun kip, ram kip, le holh kip chungin a rami hna nih khan an ruak cu ni thum le a cheu chung an zoh hna lai i vui kha onh an si lai lo. 10 Hi profet pahnih hna nih hin vawleicung mi kha temhnak tampi an pek hna caah, hi hna pahnih an thihnak ah hin vawlei cung mi cu an i lawm lai i an thihnak cu an tuk an aih lai i pakhat le pakhat laksawng an i ṭhen lai. 11 Ni thum le a cheu hnuah Pathian sinin nunnak petu thaw kha a ra i an chungah a lut i annih cu an dir; a hmumi vialte hna cu an thlakawk a bar hna. 12 Cun cu profet pahnih hna nih cun, vancung in, "Hika ah hin hung kai u," tiah aw thang piin a run titu hna aw kha an theih. An ral nih an zoh ko hna lioah cun, vancung ah khuadawm in an kai. 13 Cu caan te ah cun lihnin fak ngaingai pakhat a um; khuapi cu cheu hra cheukhat a rawk i minung thong sarih lihnin nih cun a thah hna. A tangmi pawl cu an thin a phang i vancung Pathian a lianhngannak kha an thangṭhat. 14 Thil ṭihnung pahnihnak cu a dih cang; sihmanhsehlaw zohhmanh, thil ṭihnung pathumnak a ra zau lai. 15 Cun vancungmi pasarihnak nih khan a muko cu a vun tum i aw thawng fakpi vancung ah cun a thang i, "Vawlei cung uknak nawl cu kan Bawipa le a Messiah ta a si cang," an ti. 16 Cun Pathian hmaiah bawiṭhutdan cung i a ṭhumi upa kul le pali hna kha an kun i Pathian cu an biak. 17 "A Lianngan Bik Bawipa Pathian, Nang cu atu i a ummi le hlan i a rak ummi na si. A liannganmi na ṭhawnnak kha na hman cang i Uknak hram naa thawk cang caah, Na cungah kan i lawm. 18 Atu caan hi na thinhunnak a rat caan le Mithi hna biaceih caan a si caah, Pathian bia lomi cu an thin a hung ngaingai. Cun atu caan hi na sal na profet hna le na mi vialte hna le nangmah an ṭihtu vialte hna kha, A hme a ngan thlu loin laksawng pek caan a si fawn. Cun vawlei a hrawktu hna hrawh caan kha a si," an ti. 19 Vancung i a ummi Pathian biakinn cu a hun i a chung i biakamnak an chiahnak kuang kha a lang. Cun nimtlau a lek, ṭek a tla, khua a ri, li aa hnin i fak piin rial a tla.
1 Cun van ah khin khuaruahhar a simi hmelchunhnak nganpi pakhat a lang. Minu pakhat a lang i a thuam ah nika a si; thlapa kha a ke in aa lamh i a lu ah arfi hleihnih bawiluchin aa chinh. 2 Nau a hring dengmang i nau nganfah in a ai. 3 Cun van ah cun khuaruahhar a simi hmelchunhnak a dang pakhat a lang ṭhan. A ngan ngaingaimi limkeng senpi, lu pasarih le ki pahra a ngeimi kha a hung lang i a lu ah cun bawiluchin pakhat cio an um. 4 A mei in arfi cheu thum cheu khat kha vancung cun a run kuaih ciammam hna i vawlei ah a thlak hna. Nau a hring dengmangmi nu hmaiah cun a dir i cu a dir cu a fa kha a chuah cangka in ka ei lai ti a duh caah a si. 5 Cun miphun vialte thirfung in a uktu ding fapa kha minu nih cun a hrin. Sihmanhsehlaw ngakchia cu an lak zau i Pathian le a bawiṭhutdan sinah an kalpi. 6 Minu cu Pathian nih a rak timhpiak cangmi hmun ah thetse ram ah khan a zam i khika ah ni thong khat le ni za hnih le ni sawm ruk an rak zohkhenh. 7 Cun van ah khin raldohnak a um. Mikhael le a vancungmi hna nih khan limkeng cu an doh i limkeng nih cun a vancungmi hna he a rak doh ve hna. 8 Sihmanhsehlaw limkeng cu a sung i amah le a vancungmi hna cu van ah umnak nawl an ngei ti lo. 9 Limkeng nganpi cu lengah an hlonh. Cu limkeng cu rulpi tar, Khuachia, asiloah, Satan timi, vawleicung mi vialte a hleng dihtu hna kha a si. Amah cu a vancungmi vialte hna he vawlei ah an thlak hna. 10 Cun vancung ah cun aw thangpi pakhat ka theih i, "Atu cu Pathian khamhnak a phan cang! Atu cu Pathian nih a ṭhawnnak kha siangpahrang bantukin a langhter cang. Atu cu a Messiah nih khan a nawlngeihnak kha a langhter cang. Kannih kan unau hna sual a puhtu, Pathian hmaiah dir riangmang in chunzan in sual a puh zungzaltu hna kha, vancung in lengah hlonh a si cang. 11 Kan unau hna nih amah cu Tuufa thi thawngin le an chimmi bia biatak a simi thawngin an tei cang; an nunnak pek kha an rak sian i thih zong an rak ngamh. 12 Cucaah cun nannih van hna le khika i a ummi vialte hna, i lawm tuah u. Sihmanhsehlaw vawlei le rili caah cun ṭihnung a va si hringhran dah! Zeicahtiah Khuachia cu nan sinah a rung ṭum cang i cu pinah caan tawite lawnglawng ka ngei ti kha a hngalh fawn caah a thin a linh in a lin ko," tiah a ti. 13 Limkeng nih vawlei cungah thlak ka si cang ti kha a hngalh tikah, fapa a hringtu nu kha a dawi colh. 14 Thetse ram chung i aa thuhnak ding hmun i va zuannak ding caah khan minu cu mupi nganpi thla pahnih an pek i cuka hmun ah cun kum thum le a cheu an rak zohkhenh lai caah rulpi nih khan zeihmanh a ti kho lai lo. 15 Cun minu cu fenh seh tiah limkeng nih khan a kaa chungin tilian a chuahter. 16 Sihmanhsehlaw vawlei nih minu cu a rak bawmh; a kaa kha a an i limkeng kaa chungin a chuakmi tilian kha a rak dolh. 17 Limkeng cu minu cungah khan a thin a hung ngaingai i minu tefa a tang rihmi vialte hna doh awkah khan aa thawh; cu hna cu Pathian nawlbia a ngai i Jesuh nih a phuanmi biatak, zumh awk tlak tein aa tlaihmi kha an si. 18 Cun limkengpi cu rilikam ah khan a dir.
1 Cun sahrang pakhat rili chungin a hung chuah kha ka hmuh. Ki pahra le lu pasarih a ngei, a ki cungah cun bawiluchin pakhat cio an um i a lu cungah cun Pathian thangchiatnak min pakhat cio an i ṭial. 2 Ka hmuhmi sahrang cu a mui ah pawlai a lo, a ke cu vom ke bantuk a si i a kaa cu chiandeih kaa bantuk a si. Limkeng nih khan sahrang cu, a ṭhawnnak le a bawi ṭhutdan le a nawlngeihnak a kau ngaingaimi kha a pek. 3 Sahrang lu pakhat cu, voi khat cu rak that cang hna seh law a lo, sihmanhsehlaw cu thihpi awk tlak a hma cu a dam cang. Vawleicung mi vialte cu an khuaruah a har i sahrang cu an zulh. 4 Limkeng nih khan a nawlngeihnak cu sahrang kha a pek caah mi vialte nih limkeng cu an biak. Sahrang zong cu an biak i, "Sahrang bantuk hi ahodah a um hnga? Aho nih dah an doh khawh lai?" an ti. 5 Sahrang cu a ṭhalo tuk hringhranmi thil kha chim onh a si i thla sawm li le thla hnih chung nawlngeihnak ngeih onh a si. 6 Pathian le Pathian min le Pathian a umnak hmun vancung khua i a ummi vialte kha a vawlh a pamh hna. 7 Pathian mi kha doh awk le tei awkah onh a si i phun kip ram kip holh kip le mi kip cungah nawlngeihnak nawl pek a si. 8 Vawlei cung i a ummi vialte hna nih amah cu an biak lai, sihmanhsehlaw vawlei ser hlan in nunnak cauk chung i an min ṭial a simi hna nih cun an bia lai lo, cu nunnak cauk cu thahmi Tuufa ta kha a si. 9 "Cucaah cun theihnak hna nan ngeih ahcun thei ko u! 10 Tlaih awk a simi cu tlaih a si hrimhrim ko lai; vainam in thah awk a simi cu vainam in thah a si hrimhrim ko lai. Hi ah hin Pathian mi hna nih in khawhnak an ngeih le zumhawktlak an si kha an langhter awk a hau," a ti. 11 Cun sahrang a dang pakhat vawlei chungin a hung chuah kha ka hmuh. Tuufa ki bantuk ki pahnih a ngei i limkeng bantukin bia a chim. 12 Sahrang pakhatnak nih a ngeihmi nawlngeihnak kaupi kha amah hmai hrimhrim ah cun a hman. Thihpi awk tlak a simi hma a ing i a dam ṭhanmi sahrang pakhatnak kha, nan biak hrimhrim lai tiah vawlei le a cung i a ummi vialte cu a hnek hna. 13 Sahrang pahnihnak nih cun khuaruahhar ngan pipi kha a tuah hna; mi vialte mit hmuh ah vancung in mei kha vawlei ah a tlakter. 14 Cun vawleicung i khua a sami vialte cu, khuaruahharnak a tuahmi khan a hlen hna; cu khuaruahharnak hna cu sahrang pakhatnak hmaika i tuahnak nawl pek a simi khuaruahharnak kha an si. Vainam in thahhrulhmi a si nain a nungmi sahrang upatnak caah khan milem pakhat nan ser lai, tiah vawlei cung mi vialte kha sahrang nih cun a ti hna. 15 Sahrang pakhatnak milem chungah khan sahrang pahnihnak cu nunnak thaw khumhnak nawl pek a si i cucaah milem cu a holh kho i amah a bia lomi cu a thah hna. 16 Sahrang nih cun mi vialte, a hme si hna seh, a ngan si hna seh, a rum si hna seh, sifak si hna seh, sal si hna seh, a luatmi si hna seh, an dihlak in an orhlei kut asiloah an cal ah hmelchunhnak hramhram in a ngeihter hna. 17 Cu hmelchunhnak an ngeih lo ahcun ahohmanh nih thil kha a cawk zong an caw kho lo i a zuar zong an zuar kho lo, cu hmelchunhnak cu sahrang min, asiloah, sahrang min ca i hmanmi nambar kha a si. 18 Hika ah hin fimnak hman a hau. A fimmi paoh nih cun sahrang nambar cu an tuak khawh ko lai, zeicahtiah cu nambar cu mi pakhat min ca i hmanmi a si. Cu min nambar cu za ruk sawm ruk paruk a si.
1 Khua ka hun zoh i Zion Tlang i Tuufa a dir ko kha ka hmuh; a sinah cun mi sing khat sang li le thong li an um i cu hna cu an cal i amah min le a Pa min khenhmi kha an si. 2 Cun tisor nganpi thawng bantuk le khuari thawng bantuk a simi aw pakhat kha vancung in ka theih. Cu ka theihmi aw cu tingtang tum thiammi nih tingtang in aw dawh an tummi bantuk a si. 3 Sing khat sang li le thong li hna cu bawiṭhutdan le saram nung pali hna le upa hna lei hoih khan an dir. Vawlei cungin tlanh a simi hna lawng nih an thiam khawhmi hla thar kha an sa. 4 Annih cu nu he um ṭi loin thiang tein a ummi an si; nu le pa sinak a hngal lomi an si. Tuufa kha a kalnak kip ah an zulh. A tang rihmi minung hna lakin tlanhmi an si i Pathian sin le Tuufa sinah pekchanh hmasa bikmi an si. 5 Lih an chim bal lo, palhnak zeihmanh an tuah lo. 6 Vawlei cung mi vialte, phun kip, ram kip, holh kip le mi kip sin i thanh awk a simi, zungzal Thawngṭha aa phorh i vanlai i a zuangmi vancungmi pakhat kha ka hmuh. 7 Aw thang piin, "Pathian kha ṭih u law a lianhngannak kha thangṭhat u. Zeicahtiah amah nih minung vialte bia a ceih hna lai caan kha a phan cang. Van le vawlei le rili le tiput a sertu kha bia u," a ti. 8 Vancungmi pahnihnak nih pakhatnak kha a hun zulh i, "Minu cu a ril cang! Babilon khuapi cu a ril cang. A zu cu mi vialte kha a pek hna i a dinter hna — cu a zu cu a hornak zu ṭhawng kha a si," a ti. 9 Vancungmi pathumnak nih hmasa pahnih hna kha a hun zulh hna i aw fak piin, "Sahrang le a milem a bia i a hmelchunhnak kha a cal ah siseh a kut ah siseh a ngeimi paoh nih cun, 10 Pathian zu, a thinhunnak zu, a thinhunnak hrai chung i ti cawh hrimhrim loin thletmi kha an din lai. Cu a dingmi vialte cu vancungmi mithiang hna le Tuufa hmaiah, mei chung le kat chungah, hrem an si lai. 11 A hremtu hna mei a khu cu zungzal in a kai zungzal ko. Sahrang le a milem a biami le sahrang hmelchunhnak a ngeimi hna caah cun, chun zongah zan zongah lungdaih hnangamnak zeihmanh a um ti lo. 12 Pathian mi hna, Pathian nawl a ngai i Jesuh cungah zumh awk tlak in khua a sami hna nih cun, hi zawn ah hin in khawhnak an ngeih awk a hau. 13 Cun vancung in aw pakhat ka theih i, "Hihi ṭial tuah: Khrih zumh bu tein a thimi cu lunglawmmi an si," a ti. Cun Thlarau nih, "A si hrimhrim lai. An rianṭuanmi nih khan a zulh hna lai i rian an ṭuannak cun an i din cang lai," tiah a leh. 14 Cun khua ka hun zoh i khuadawm rang pakhat ka hmuh, cu cungah cun minung he aa lomi kha a ṭhu, a lu ah sui bawiluchin aa chinh i a kut in a harmi faah pakhat aa put. 15 Biakinn khan a dang vancungmi pakhat a chuak i khuadawm cung i a ṭhumi cu fak piin a auh i, "A caan a cut cang caah na faah kha hmang law facang kha at tuah; vawlei cung rawl cu ṭuan a cu cang," a ti. 16 Cun khuadawm cung i a ṭhumi nih khan vawlei ah a faah cu a vun hei i rawl cu a ṭuan. 17 Cun vancung biakinn chung khan vancungmi a dang pakhat a chuah kha ka hmuh ṭhan i amah zong nih cun a har ngaingaimi faah aa put ve. 18 Cun vancungmi dang pakhat, mei uktu a simi kha biakṭheng khan a ra. A har ngaimi faah aa putmi vancungmi kha fak piin a hei auh i, "Na faah kha hmang law mitsur kha an hmin cang caah mitsur lo i a ummi mitsur kha ṭuan hna," a ti. 19 Cucaah vancungmi nih khan a faah cu vawlei ah a vun hei i mitsur ruang mitsur thei kha a ṭuan hna i Pathian thinhunnak mitsur nennak chungah khan a thlak hna. 20 Mitsur thei cu khuapi leng i a ummi mitsur nennak ah khan an nen hna i mitsur nennak chung cun thisen a chuak i khan za hnih a luang i pe nga tluk a thuk.
1 Cun van ah khin khuaruahhar le lianngan ngai a simi hmelchunhnak a dang pakhat ka hmuh ṭhan. Vancungmi pasarih, hremnak pasarih aa putmi kha ka hmuh hna i cu hremnak cu a hmanung bik an si cang, zeicahtiah Pathian thinhun phuannak a donghnak an si. 2 Khua ka hei zoh i mei he cawhmi thlalang rili he, aa lomi kha ka hmuh. Cun a min, nambar in chimmi sahrang le a milem a teitu hna kha ka hmuh hna. Annih cu thlalang rilikam ah khan an dir i Pathian nih a pekmi hna tingtang kha an i put. 3 Annih cu Pathian sal Moses hla kha le Tuufa hla kha an sa i, "Bawipa, a lianngan bik Pathian, Zeitluk in dah na thil tuahmi hi an lianhngan i khuaruahhar an si. Miphun vialte Siangpahrang, Na lam cu zeitluk in dah a dikmi le a hmaanmi a si! 4 Bawipa, ahodah nangmah ṭih loin a um ngam lai? Na lianngannak chim duh loin ahodah a um lai? Nangmah lawng a thiangmi na si. Miphun vialte nih na hmaiah an ra lai i an in biak lai, Thil ding na tuahmi kha mi vialte nih hmuh a si caah," an ti. 5 Cu hnuah cun vancung i biakinn aa hun kha ka hmuh i a chungah cun Biakamnak Thlam kha a um. 6 Hremnak pasarih aa putmi vancungmi biakinn chungin an chuah kha ka hmuh; puan rang thiang an i aih i an ṭang ah sui ṭangmenh kha an i menh. 7 Cun saram nung pali hna lak i pakhat nih khan vancungmi pasarih hna cu, zungzal in zungzal tiang a nungmi Pathian thinhunnak in a khatmi sui kanto pasarih kha a pek hna. 8 Biakinn cu Pathian sunparnak le lianhngannak meikhu in a khat i vancungmi pasarih nih hremnak pasarih an tlunpimi a dih hlantiang ahohmanh biakinn chungah cun an lut kho lo.
1 Cun biakinn khan aw thangpi pakhat nih vancungmi pasarih hna cu, "Va kal u law Pathian thinhunnak kanto pasarih kha vawlei ah va thle hna u," tiah a ti thawng kha ka theih. 2 Vancungmi pakhat cu a kal i a kanto cu vawlei ah khan a bungh. Sahrang hmelchunhnak a ngeimi hna le a milem a biami hna kha ṭih a nung ngaingaimi le a fak ngaingaimi hmachia nih a tlunh hna. 3 Cun vancungmi pahnihnak nih a kanto cu rili ah a bungh. Ti cu mithi mi chungin a chuakmi thisen bantuk ah a cang i rili chung thilnung vialte cu an thi dih. 4 Cun vancungmi pathumnak nih a kanto cu tiva le tiput cungah khan a bungh i thisen ah an cang dih. 5 Ti a uktu vancungmi nih cun, "Hi na tuahmi biaceihnak ah hin na ding ko, maw a Thiang Mi, atu i a um liomi le hlan i a rak um cangmi Pathian! 6 Pathian mi hna le profet hna kha an thi an rak chuah hna caah nangmah nih annih cu din awkah thi kha na pek ve hna. Annih nih hmuh awk i an i tlakmi kha an hmuh ko," a ti. 7 Cun biakṭheng khan aw pakhat a rak chuak i "Bawipa, Lian Ngan Bik Pathian, na biakhiahnak cu a dingmi le a hmaanmi an si taktak," tiah a ti thawng kha ka theih. 8 Cun vancungmi palinak nih a kanto kha ni cungah a bungh i ni cu mi kha khanghnak nawl a hmu. 9 Ni lin nih cun mi kha a kangh hna i hi hremnak cung i nawl a ngeitu Pathian min kha an thang chiat. Asinain an sualnak kha an mertak duh lo i Pathian lianhngannak kha an thangṭhat duh lo. 10 Cun vancungmi panganak nih a kanto cu sahrang bawiṭhutdan cungah khan a bungh. Sahrang pennak ram cungah khan muihnak a tlung ciammam i fahnak an inmi kha a fah tuk caah an lei kha an i seh, 11 cun fahnak le hmachia an in ruangah khan vancung Pathian cu an thangchiat. Asinain an lam ṭhalo kha an kaltak hlei lo. 12 Cun vancungmi paruknak nih a kanto cu Zufrates tivapi cungah a bungh. Tiva cu a kao i nichuahlei in a rami siangpahrang hna caah khan lam a rak awnter. 13 Cun thlarau thur pathum, utlak a lomi kha ka hmuh hna; limkeng kaa chung le sahrang kaa chung le nal profet kaa chungin an hung chuak. 14 Annih cu khuachia thlarau, khuaruahharnak a tuah khomi kha an si. Cu thlarau pathum hna cu vawleicung khuazakip ah khan an kal i vawleicung siangpahrang vialte kha an pumh hna. Cu bantukin hmunkhat ah an pumh hna cu, Lianngan Bik Pathian ni lianngan ni ah pakhat le pakhat i do hna seh ti caah a si. 15 "Ngai hmanh, mifir bantukin ka ra lai. Zapi lakah taklawng in an vah nakhnga lo le ningzak in an um nakhnga lo, hngilh lo tein a rak um i a hnipuan ṭha tein a rak i fimhlawmmi cu, lunglawmmi an si," a ti. 16 Cun thlarau hna nih khan siangpahrang cu hmunkhat ah an pumh hna i cu hmun cu Hebru holh in Armageddon ti a si. 17 Cun vancungmi pasarihnak nih khan a kanto cu thlitu lakah a bungh. Biakinn chung bawiṭhutdan khan aw thangpi pakhat a ra chuak i, "A dih cang!" tiah a ti. 18 Nimtlau a lek, khua a ri, ṭek a tla i ṭihnung ngaingai in li aa hnin. Minung ser hramthawk in cu bantuk lihnin cu a um bal lo; lihnin vialte lakah lihnin fak bik a si. 19 Khualipi cu cheu thum ah a kuai i ram vialte cu an khua kha an rawk dih. Pathian nih a liannganmi Babilon kha a philh lo i a hrai chung zu kha a dinter — a thinhunnak zu kha. 20 Tikulh vialte kha an lo dih i tlang vialte zong kha an lo dih. 21 Rial ngan pipi, pawng za khat tiang a ritmi kha van in minung cungah an tla. Cun mi nih rial in hremnak an in ruangah cun Pathian kha an thangchiat, an inmi hremnak cu a fak hringhranmi a si ko.
1 Cun vancungmi pasarih lak i pakhat, kanto aa putmi kha ka sinah a ra i, "Ra law, rilipi cungah bawinu ṭhut in a ṭhumi hlawhhlangnu milianngan nu kha, zeitindah dantat a si lai, ti kha kan hmuhsak lai. 2 Vawlei cung siangpahrang hna nih hlawhhlangnu milianngan nu he cun sualnak an tuah i a sualnak zu an dinnak cun vawlei cung mi cu an ri dih," a ti. 3 Thlarau nih khan a ka tlaih i vancungmi nih khan thetse ram ah a ka kalpi. Cuka ah cun nu pakhat, sahrang sen cung i aa citmi kha ka hmuh i cu sahrang cu a tak khat in min ṭhalo aa ṭial; cu sahrang nih cun lu pasarih le ki pahra a ngei. 4 Nu cu maimaw le puansen in aa thuam i sui hlawn le lungvar le pale lungvar in aa ṭamh. A kut in sui hrai pakhat aa put i cu sui hrai cu fihnung le ṭeifiak in a khat, cu fihnung le ṭeifiak cu a sualnak theitlai kha an si. 5 A cal ah min pakhat aa ṭial i cu min cu sullam hleng a ngei. Cu min cu, "A liannganmi Babilon, vawlei cung hlawhhlangnu vialte le sual thurnak vialte nu," ti a si. 6 Cun cu nu cu, Pathian mi hna thisen le Jesuh cungah zumhawktlak in an um ruangah thahmi hna thisen a rit kha ka hmuh. Amah ka hmuh tikah ka khuaruah a har tuk hringhran. 7 Vancungmi nih cun, "Zeicahdah na khuaruah a har? Minu sullam le aa citmi sahrang, lu pasarih le ki pahra a ngeimi sullam cu kan chimh lai. 8 Na hmuhmi sahrang kha hlanah cun a rak nung, asinain atu cu a nung ti lo, rawhralnak a phak hlanah dongh hngal lo khor chung khan a hung chuak lai. Vawlei cung i khua a sami, vawlei ser hlan in nunnak cauk chungah an min a rak i ṭial lomi hna nih khan, sahrang cu an hmuh tikah an khuaruah a har lai, zeicahtiah voi khat cu a rak nung, atu cu a nung ti lo, asinain a hung chuak ṭhan lai. 9 "Fim le hngalhthiam a hau. Lu pasarih hi tlang pasarih, nu a ṭhutnak tlang pasarih kha an si. Cun siangpahrang pasarih zong kha an si fawn. 10 Panga cu an ril cang, pakhat cu atu hi siangpahrang a si lio a si i a dang pakhat cu a ra rih lo; a rat tikah caan tlawmte lawng a um lai. 11 Cun hlan i a rak nung i atu i a nung ti lomi sahrang kha, siangpahrang pariatnak a hmasa pasarih bu chung i aa tel vemi kha a si i rawhralnak phak awkah a hung chuak. 12 "Ki pahra na hmuhmi kha siangpahrang pahra, uknak hram aa thawk rih lomi, sihmanhsehlaw sahrang he suimilam pakhat chung uk ṭi dingin nawl pekmi an si. 13 Hi pahra hna nih hin an dihlak in tinhmi pakhat an ngei i an ṭhawnnak le an nawl ngeihnak cu sahrang kha an pek. 14 Annih nih Tuufa kha an doh lai; sihmanhsehlaw Tuufa le Tuufa nih a kawh hna i a thim hna i zumhawktlak zultu a simi hna nih khan an tei hna lai, zeicahtiah Tuufa cu bawi vialte Bawipa le siangpahrang vialte Siangpahrang a si," a ti. 15 Vancungmi nih cun a ka thawh ṭhan i, "Hlawhhlangnu a ṭhutnak rilipi na hmuhmi kha miphun hna le ram hna le holh hna le mi hna an si. 16 Ki pahra na hmuhmi le sahrang nih khan hlawhhlangnu kha an huat lai i a ngeihmi vialte kha an chuh dih lai i taklawng in an chiah lai; a sa kha an ei lai i amah cu mei in an khangh lai. 17 Zeicahtiah Pathian nih a chimmi bia kha a tlin hlantiang cu, Pathian nih aa tinhmi tuah duhnak kha an lungthin chungah a chiah i cucaah lungnge tein rian an ṭuan i uknak nawl an ngeihmi kha sahrang cu an pek. 18 "Nu na hmuhmi cu vawlei cung siangpahrang hna a uktu khualipi kha a si," a ti.
1 Khi hnuah vancung in vanmi dang pakhat a run kha ka hmuh. Nawlngeihnak a ngan ngaingaimi a ngei i a sunparnak nih vawlei cu a ceuh dih. 2 Fak piin a au i, "Nu kha a ril cang! Babilon Khualipi kha a tlu cang. Khuachia le thlarau thur nih an umhnawh cang i a thurhnawmmi le fihnung a simi vate a phunphun in a khat cang. 3 Zeicahtiah a zu kha mi vialte a pek hna i a dinter hna — a hornak zu ṭhawng kha a dinter hna. Vawlei cung siangpahrang hna nih amah he cun nu le pa sualnak an tuah i aa sum lomi a hornak nih cun vawlei cung khuazakip chawlet pawl kha a rumter hna," a ti. 4 Cun vancung in aw pakhat ka theih ṭhan i, "Ka mi hna, chuak tuah u, Amah chung khan chuak tuah u! Sualnak a tuahmi ah khan i tel hlah u, Dantatnak a hmuh ding zong kha i hrawm hlah u. 5 Zeicahtiah a sualnak cu van tawng in aa pong i Ṭhat lonak a tuahmi kha Pathian nih a philh lo. 6 Amah nih a rak in tuah hna bantukte khan amah cu tuah ṭhan ve u; a let hnih in cham u, Nanmah din awkah a rak tuahmi a let hnih ṭhawng khan, Amah din awk cu a hrai chungah khan serpiak u. 7 Sunparnak le nuamhnak amah le amah a rak i pek zat te khan, Temhinnak le ngaihchiatnak pe ve u. Zeicahtiah aa thawh i, Keimah cu bawiṭhutdan cung i a ṭhumi siangpahrang bawinu ka si. Nuhmei ka si lo, ngaihchiatnak cu ka ing bal lai lo, a ti. 8 Hi ruangah hin hremnak nih khan ni khatte ah an tlakphuat lai, rai le ngaihchiatnak le mangṭam nih khan a tlakphuat lai. Amah bia a ceihtu Bawipa Pathian cu a ṭhawngmi a si caah Amah cu mei in khangh a si lai," a ti. 9 A sualnak le a hornak chungah aa bual vemi vawlei cung siangpahrang hna nih khan a kanghnak meikhu cu an hmuh tikah khuapi cu an ṭah lai. 10 Temhnak a inmi kha an ṭih caah a langhlat piin an dir i cuka cun an i thawh i, "Ṭih a hei nung hringhran dah! Mi tuksa a hei pur hringhran dah! Babilon khualipi, khua lianngan le khua ṭhawng! Suimilam pakhat chungah na rawk dih ko!" an ti lai. 11 Vawlei cung chawlet pawl zong amah a rawh ruangah cun an ṭap i an ngaih a chia, zeicahtiah an thilri kha ahohmanh nih an caw ti hna lo; 12 an sui, an ngun, an lungvar, an rili lungvar, le la hmangṭhia in tahmi thilri puan sen, pu, maimaw; cun thingrua theihtlei in sermi thil phun zakip, vui ho le thing man sung in sermi thil phun kip, 13 nakzik le musala le zihmui le mura zihmui le frankinsen zihmui le zu le chiti le changvut le facang le caw le tuu le rang le rangleng le sal le minung hmanh kha ahohmanh nih an caw ti hna lo. 14 Chawlet pawl nih cun an thawh i, "Ngei ning ti i saduh na rak thahmi vialte kha an lo dih cang i na rumnak le na sunparnak vialte cu an liam cang; zeitikhmanh ah na hmu ṭhan ti hna lai lo," an ti. 15 Cu khuapi chung i chaw a rak dawr tawnmi mirum hna nih khan, a temhinnak cu an ṭih caah a langhlat piin a cuanh in an cuanh lai. An ṭap an ai lai i 16 "Khua lianngan kha zeitluk in dah ṭih a nun cang. Zeitluk in dah mi tuksapur a si cang. Puan hmangṭhia le puan sen le maimaw in a rak i thuam tawn i sui hlawn le lung mansung le rili lungvar in a rak i ṭamh tawn. 17 Sihmanhsehlaw suimilam pakhat chungah a chawva vialte cu an lo dih ai!" an ti lai. Rili lawngcawng bawi vialte hna le khual tlawngmi vialte hna le tilawng rianṭuantu vialte hna le rili cung rianṭuannak in a paw a cawmmi vialte hna cu lamhlatpi in an dir i 18 a kanghnak meikhu kha an hmuh tikah, "Hi khualipi bantukin a liannganmi khua a um bal lo," an ti. 19 An lu ah lei dip an i phulh, an ṭap an ai i, "Khua lianngan kha zeitluk in dah ṭih a nun cang. Zeitluk in dah tuksapur a si cang. Rili cungah lawng in chaw a letmi vialte hna nih amah rumnak thawngin mirum an rak si dih. Asinain suimilam pakhat chungah a chaw vialte cu an lo dih ko ee," an ti. 20 Sihmanhsehlaw amah a rawh ruangah van cu i lawm ko seh. Pathian mi hna le lamkaltu hna le profet hna, i lawm ko u! Zeicahtiah nan cung i a tuahmi ruangah khan Pathian nih amah cu dan a tat cang! 21 Cun a ṭhawngmi vancungmi pakhat nih facang rialnak lung nganpi tia a simi lung pakhat kha aa cawi i rili chungah a hlonh, "Hi bantuk hin Babilon khualipi hi i let luahmah in hlonh a si lai i zeitikhmanh ah hmuh ṭhan a si ti lai lo. 22 A chung i a rak um tawnmi tingtang tum thiam hna le aw dawh tum thiam hna le thonglawi tum thiam hna le muko tum thiam hna nih an tum tawnmi aw kha zeitikhmanh ah theih ṭhan a um ti lai lo. A chungah rianṭuantu an um ti lai lo i facang rialnak thawng kha theih a um ti lai lo. 23 A chungah meiinn ceu a um ti lai lo; nupi ṭhi tlangval le va ngeimi ngaknu conglawmhnak thawng zong a um ti lai lo. A chung i a rak ummi chawlet pawl cu vawlei cung ah a ṭhawng bik an rak si i hlennak mitleh thiamnak in vawlei cung mi vialte kha an hlen dih hna," a ti. 24 Profet hna le Pathian mi hna kha a chungah an thisen an chuah hna caah Babilon cu dantat a si cang; asi, vawlei cungah thah a simi vialte hna an thisen cu amah chungah cun hmuh an si dih!
1 Cu hnuah cun vancung i a ummi mibu nganpi aw thawng bantuk ka theih i, "Pathian cu thangṭhat ko u. Khamhnak le sunparnak le lianhngannak cu kan Pathian ta an si. 2 A biaceihmi cu dingte le hmaan tein a ceih. Vawlei a hornak in a thurhnawmhtertu hlawhhlangnu milianngan nu kha sual a phawt cang. Pathian sal kha a thah hna caah Pathian nih dan a tat cang," a ti. 3 Cun an au ṭhan i, "Pathian cu thangṭhat ko u. Khualipi khanghnak mei a khu cu zungzal in zungzal tiang a kai ko," an ti. 4 Upa kul le pali hna le saram nung pali hna nih khan an kun i bawiṭhutdan cungah a ṭhumi Pathian kha an biak i, "A men! Pathian cu thangṭhat ko u," an ti. 5 Cun bawiṭhutdan khan aw pakhat a rung thang i, "Kan Pathian sal vialte hna le a mi vialte hna le amah a ṭihmi vialte hna, a hme a ngan in, kan Pathian cu thangṭhat tuah u," a ti. 6 Cun mibu nganpi aw bantuk, tisor nganpi thawng bantuk, khuari thawng bantuk a simi aw pakhat kha ka theih. "Bawipa, Lianngan Bik, kan Pathian cu Siangpahrang a si caah, thangṭhat ko u! 7 I lawm u si law i nuam u sih; a lianngannak cu thangṭhat u sih! Zeicahtiah Tuufa nupi ṭhit caan cu a phan cang i a ṭhit laimi ngaknu cu aa tim cang. 8 Aa thuamhnak dingah, puan hmang ṭhia a thiang i a cer in a cermi kha pek a si cang," an ti. (Puan hmangṭhia cu Pathian mi hna nih ding tein rian an ṭuanmi kha a si). 9 Cun vancungmi nih cun a ka thawh i, "Mah hihi ṭial tuah: Tuufa nupi ṭhitnak puai i sawmmi hna cu milunglawm an va si dah!" a ti. Cun vancungmi nih cun, "Hi bia hi Pathian bia ngaingai an si," a ti fawn. 10 Amah biak awkah a ke hramah ka bawk, sihmanhsehlaw a ka thawh i, "Bawk hlah. Keimah zong nangmah bantukin Pathian sal ka si ve, Jesuh nih a phuanmi biatak aa tlaihmi nan unau hna lak i pakhat ka si ve. Pathian tu bia tuah," a ti. Profet hna kha lungthawhnak a petu cu Jesuh nih a phuanmi biatak kha a si. 11 Cun van kha aa hung i rang rang pakhat ka hmuh. A cung i aa citmi cu a min ah Zumhawktlak le Ahmaanmi ti a si; bia a ceih tik le ral a doh tikah dinnak in a ceih i a doh. 12 A mit cu meizik bantuk an si i a lu ah bawiluchin tampi aa chinh. A cungah min pakhat aa ṭial, asinain amah dah ti lo nih cun zei a si ti kha ahohmanh nih an hngal lo. 13 Aa aihmi puan cu thi aa neh dih. An auhnak a min cu "Pathian Bia" ti a si. 14 Vancung ralkap bu nih khan rang rang cungin an zulh i puan rang in an i thuam. 15 A har ngaingaimi nam pakhat a kaa chungin a hung chuak i cu nam cun miphun vialte kha a tei dih hna lai. Annih cu thirfung in a uk hna lai i Lianngan Bik Pathian thinhunnak mitsur nennak chung mitsur kha a nen hna lai. 16 A puan le a ke ah, "siangpahrang vialte Siangpahrang le bawi vialte Bawi," tiin aa ṭial. 17 Cun nika chungah vanmi pakhat a dir kha ka hmuh. Van i a zuangmi va vialte kha aw fak piin a auh hna i, "Ra tuah u, Pathian nih rawl danghnak nganpi a ser laimi ah cun i pum tuah u. 18 Siangpahrang hna le ralbawi hna le ralkap hna le rang hna le rangcung ralkap hna le sal hna le miluat hna le mingan hna le mihme hna, an dihlak in, an sa cu rak ei tuah hna u," a ti. 19 Rang cung i aa citmi le a ralkapbu kha doh awkah sahrang le vawlei cung siangpahrang hna cu an i pum. 20 Sahrang cu an tlaih i thong ah an thlak, cun a hmaika i khuaruahharnak a tuah tawntu nal profet zong kha an tlaih chih. (Sahrang hmelchunhnak a ngeimi hna le sahrang milem a biami hna kha, khuaruahharnak a tuahmi khan a hlen hna). Cun sahrang le nal profet cu an pahnih in kat meialh tili ah a nung in an paih hna. 21 Rang aa citmi kaa chungin a chuakmi vainam nih an ralkap vialte cu a thah dih hna i an sa cu va vialte nih an i serh.
1 Cun vanmi pakhat vancung in a rung ṭum i dongh hngal lo khor tawh le cikcin nganpi aa put kha ka hmuh. 2 Rulhreu, limkeng kha a tlaih i kum thong khat a hren — cu limkeng cu Khuachia, asiloah, Satan kha a si. 3 Vanmi nih cun dongh hngal lo khor chungah khan a thlak i kum thong khat kha a dih hlantiang, mi kha a hlen khawh ti hna nakhnga lo, a hrenh i ca a khenh chih. Cu hnuah cun tlawmpal chuah a si te lai. 4 Cun bawiṭhutdan hna le a cung i a ṭhumi hna kha ka hmuh hna; annih cu biaceihnak nawl kha pek an si. Jesuh nih a phuanmi biatak le Pathian bia an chim ruangah thahnak a ingmi thlarau hna zong kha ka hmuh hna. Sahrang kha an bia lo, a milem zong an bia lo, an cal le an ban zongah sahrang hmelchunhnak kha an ngei lo. An hung nung i Khrih he cun siangpahrang bantukin kum thong khat chung uktu bawi an si. 5 (Mithi mi a dang cu kum thong khat a dih hlan kha cu an nung lo). Mah hihi mithi thawhter an si a hmasa u cu a si. 6 Hi mithi thawhter an si a pakhatnak i aa telmi hi cu lunglawmmi le thluachuak hringhranmi an si ko. Thih voi hnihnak nih an cungah nawl zeihmanh a ngei lo; annih cu Pathian le Khrih tlangbawi an si lai i Khrih he cun kum thong khat chung uktu bawi an si lai. 7 Kum thong khat kha a dih tikah Satan cu thong chung khan chuah a si lai i 8 vawlei kil li ah aa ṭhekmi miphun vialte kha hlen awkah aa thawh lai, cu hna cu Gog le Magog kha an si. Satan nih cun i tuk awkah a pumh ciammam hna lai i rili kam thetse zat an si lai. 9 Vawleicung khuazakip ah khan an i ṭhek i Pathian mi hna umnak hmun le Pathian nih a dawtmi khua kha an kulh. Sihmanhsehlaw van in mei a rung tla i a thah dih hna. 10 Cun annih a hlengtu hna, Khuachia kha, mei le kat tili chungah khan an paih, cuka cu sahrang le nal profet an rak thlaknak hna kha a si; cuka ah cun chunzan in zungzal hrem an si zungzal ko lai. 11 Cun bawiṭhutdan raangpi le a cung i a ṭhumi kha ka hmuh hna. A cung i a ṭhumi hmaika cun vawlei le van kha an zaam i an um ti lo. 12 Cun mithi mi kha, a ngan he a hme he, bawiṭhutdan hmai i an ṭhut kha ka hmuh. Cauk kha an kau hna, cun cauk a dang pakhat, nunnak cauk zong kha an kau ve. Mithi cu an rak tuahmi cauk chung i aa ṭialning khan an bia an ceih hna. 13 Cun rili nih a chung i a thimi kha a hun chuah hna. Thihnak le mithi khua zong nih khan, an hrenmi mithi kha an hun chuah ve hna. An dihlak in an tuahning cio khan an bia an ceih hna. 14 Cun thihnak le mithi khua cu mei tili chungah khan an paih hna. (Hi mei tili hi thih voi hnihnak cu a si). 15 Nunnak cauk chungah an min aa ṭial lomi paoh cu mei tili chungah cun an paih hna.
1 Khi hnuah van thar le vawlei thar kha ka hmuh hna. Van hmasa le vawlei hmasa kha an lo cang i rili kha a um ti lo. 2 Cun Khua Thiang, Jerusalem thar kha Pathian sinin vancung in a rung ṭum cu ka hmuh, va ngei lai ngaknu nih a va ding ton awkah aa ṭamh bantuk khin aa ṭamh. 3 Bawiṭhutdan in aw thangpi pakhat ka theih i, "Pathian umnak inn cu minung hna sinah a um cang. Anmah sinah cun a um lai i annih cu a mi an si lai. Pathian hrimhrim cu an sinah a um lai i amah cu an Pathian a si lai. 4 An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang," a ti. 5 Cun bawiṭhutdan i a ṭhumi nih cun, "Atu cu thil vialte kha a thar in ka ser dih cang hna," a ti. A ka thawh i, "Hi bia hi ṭial hna, zeicahtiah ahmaanmi le zumhawktlak a simi bia an si," a ti. 6 Cun aa thawh i, "Rian ka lim dih cang. Kei cu Alfa le Omega, hramthawknak le donghnak ka si. Tihal paoh nunnak tiput ti kha man loin ka dinter hna lai. 7 Teitu a simi paoh nih hihi ka sinin an hmuh lai: Keimah cu an Pathian ka si lai i annih cu ka fa an si lai. 8 Sihmanhsehlaw miralchia le mirawi hmang le fih awk lungthin a ngeimi le lainawngmi le horduhcuaimi le camh hmangmi le siasal biami le lihchimmi vialte hna an umnak ding cu, mei le kat in a alhmi tili, thih voi hnihnak kha a si," a ti. 9 Vancungmi pasarih hna lak i pakhat, hremnak hmanung bik pasarih in a khatmi kanto pasarih aa putmi kha ka sinah a ra i, "Ra hmanh, Tuufa nupi, va ngei lai ngaknu cu kan hmuhsak lai," a ti. 10 Thlarau nih cun a ka tlaih i vancungmi nih khan tlang sangpi pakhat par ah a ka kaipi. Cun Jerusalem, Khua Thiang kha Pathian sinin vancung in a rung ṭum kha a ka hmuhsak. 11 Cu khua cu Pathian sunparnak in a cer. Khualipi cu lung man sung, jasper lungvar bantukin a tleu i thlalang bantukin a fiim. 12 Kulhnak vampang nganpi a sang ngaimi pakhat a ngei i cu kulhnak vampang ah cun kutka hleihnih an um i cu kutka hleihnih cu vancungmi hleihnih nih an cawngh hna. Cu kutka ah cun Israel mi phun hleihnih min kha an i ṭial. 13 Kam khat ah kutka pathum cio an um: nichuahlei ah pathum, thlanglei ah pathum, chaklei ah pathum, nitlaklei ah pathum an si. 14 Khua kulhnak vampang cu lung pahleihnih cungah bunh a si i cu lung pahleihnih cungah cun Tuufa lamkaltu pahleihnih hna min kha an i ṭial. 15 A ka chawntu vanmi nih cun khuapi le a kutka hna le a vampang tahnak ah sui in sermi tahnak fung pakhat aa put. 16 Khuapi cu tungvangpalh a si, a tung le a vang aa can ceote a si. Vanmi nih khan khuapi cu tahnak fung khan a tah i a tung khan thong khat le za nga a si, a vang zong a tung can cu a si i a san zong a tung can ṭhiamṭhiam cu a si. 17 Vanmi nih khan vampang zong cu a tah i amah nih a hmanmi tahnak ningin dong za sawm li pali a sang. 18 Vampang cu jasper lungvar in ser a si i khuapi cu sui thiang in ser a si i thlalang fim in a fim. 19 Khua kulhnak vampang hram cu lung man sung a phunphun in an ṭamh. A tang nung bik lung cu jasper lungvar a si, a pahnihnak cu safaiar lungvar a si, a pathumnak cu agate lungvar a si, a palinak cu emeral lungvar a si, 20 a panganak cu oniks lungvar a si, a paruknak cu karnelian lungvar a si, a pasarihnak cu khrisolaih lungvar a si, a pariatnak cu beril lungvar a si, a pakuanak cu topaz lungvar a si, a pahranak cu khalsedon lungvar a si, a hlei khatnak cu tarkhua lungvar a si, a hleihnihnak cu amethist lungvar a si. 21 Kutka hleihnih cu rili lungvar hlum pipi hleihnih an si, kutka pakhat ah lungvar hlum pakhat a si ko. Khuapi chung lam cu sui thiang a si i thlalang bantukin a tleu. 22 Khuapi chungah cun biakinn ka hmu lo, zeicahtiah a biakinn cu Lianngan Bik Bawipa Pathian le Tuufa kha a si. 23 Khuapi nih cun ni ceunak siseh, thlapa ceunak siseh a herh lo, zeicahtiah Pathian sunparnak nih cun a ceuh i Tuufa cu a meiinn a si. 24 Vawleicung miphun zakip nih a ceunak thawng cun kalnak an hmuh lai i vawlei cung siangpahrang hna nih cu khuapi chungah cun an chawhlawn kha an ratpi hna lai. 25 Khuapi kutka cu chunnitlak in an i hung zungzal ko, zeitikhmanh ah an i khar lo, zeicahtiah khika ah zan a um ti lo. 26 Miphun vialte nih an lianhngannak le rumnak cu, cu khuapi ah cun an rak put lai. 27 Sihmanhsehlaw a thurhnawmmi cu khi khua chungah ahohmanh an lut kho lai lo; ningzah awk thil a tuahmi hna le lih a chimmi hna zong ahohmanh an lut kho lai lo. Tuufa nunnak cauk chung i an min aa ṭialmi lawnglawng cu khuapi chungah cun an lut kho lai.
1 Vancungmi nih cun nunnak tiva zong a ka hmuhsak, cu tiva cu Pathian le Tuufa bawiṭhutdan hram in khuapi laifang ah a rung luangmi a si i thlalang bantukin a fiim. 2 Cu tivakam ah cun nunnak thingkung cu a um i kum khat ah voi hleihnih, thla khat ah voi khat lengmang thei a tlai; cun a hnah cu miphun vialte hna caah damnak a si. 3 Pathian nih chiat a serhmi thil paohpaoh cu cu khua chungah cun an um kho lai lo. Pathian bawiṭhutdan le Tuufa bawiṭhutdan cu khuapi chungah cun a um lai i a rianṭuantu hna nih khan an biak lai. 4 Annih nih a hmai an hmuh lai i a min cu an cal ah aa ṭial lai. 5 Zan a um ti lai lo i meiinn siseh, ni ceunak siseh, an herh ti lai lo, zeicahtiah Bawipa Pathian cu an ceunak a si lai i annih cu siangpahrang bantukin uktu zungzal in zungzal tiang an si lai. 6 Cun vancungmi nih khan a ka thawh i, "Hi bia hi biatak an si i zumhawktlak an si. A Thlarau kha profet hna a petu Bawipa Pathian nih, tuante ah a tlung zau ding thil kha a sal hna hmuhsak awkah, a vanmi kha a run ka thlah," a ti. 7 Cun Jesuh nih, "Ngai hmanh, ka ra zau lai. Hi cauk chung i aa ṭialmi profet bia a zulmi cu lunglawmmi an si," a ti. 8 Keimah Johan nih hi thil vialte hi ka theih hna i ka hmuh hna. Cun ka theih hna i ka hmuh dih hna tikah, hi thil vialte a ka hmuhsaktu vancungmi ke hram ah cun ka bawk i biak ka zalh. 9 Sihmanhsehlaw a ka thawh i, "Tuah hlah. Kei zong nangmah bantukin sal ka si ve ko; na unau profet hna le hi cauk chung i aa ṭialmi bia a zulmi na unau hna bantukin sal ka si ve ko. Pathian tu bia ko," a ti. 10 Cun hitihin a ka ti, "Hi cauk chung i aa ṭialmi profet chimchung bia hi a thli in i chiah ko hlah. Zeitintiah hi thil vialte cu a tlin lainak caan a nai cang. 11 Miṭhalo cu ṭhat lonak kha tuah lengmang ko seh, fihnung a simi cu fihnung kha tuah lengmang ko seh, miṭha a simi cu ṭhatnak kha tuah lengmang ko seh, mithiang a simi cu thiannak kha tuah lengmang ko seh," a ti. 12 Jesuh nih cun, "Ngaihmanh, ka ra zau lai. Mi kip an rianṭuanning cio ah pek awkah ka laksawng cu ka rak i put lai. 13 Kei cu Alfa le Omega kha ka si, hmasa bik le hmanung bik, hramthawknak le donghnak ka si," a ti. 14 An puan kha thiang tein a su i nunnak thingkung theitlai ei khawhnak nawl le khuapi kutka chung luhnak nawl a ngeimi cu lunglawmmi an si. 15 Sihmanhsehlaw uico bantuk a simi hna le eih thiammi hna le horduhcuaimi hna le lainawngmi hna le siasal biami hna le bia in siseh tuahnak in siseh lih a chimmi hna kha cu, khuapi lengah cun an um lai. 16 "Keimah, Jesuh nih, Khrihfabu chung i a ummi nannih sinah hi bia cu thanh awkah ka vancungmi kha ka run thlah. Kei cu David tefa kha ka si, kei cu deirel arfi ceu cu ka si," a ti. 17 Thlarau le va ngei laimi ngaknu nih khan, "Ra u," an ti. Hi bia a theimi paoh nih khan, "Ra u," ti ve hna seh. Ti a halmi paoh cu ra u, nunnak ti hi a duhmi paoh nih man loin i lak u. 18 Keimah Johan nih hi cauk chung i aa ṭialmi profet bia a theimi paoh kha ralrinnak kan pek hna: hi bia ah ahohmanh nih bia dang a chap ahcun, hi cauk chungah aa ṭialmi hremnak kha a dantatnak ah Pathian nih a chap lai. 19 Cun hi cauk chung i aa ṭialmi profet bia kha azeihmanh a hlawmi cu, hi cauk chungah aa ṭialmi nunnak thingkung theitlai a co hnga ding le Khua Thiang chung i um venak a co hnga ding cu Pathian nih a lakpiak lai. 20 Hi thil vialte hi ahmaan dih tiah tehte a khaangtu nih, "Tuan ah ka ra hrimhrim lai," a ti. Cu bantuk cun si ko seh. Bawipa Jesuh, ra ko cang! 21 Nan dihlak cungah Bawipa Jesuh vel cu um ko seh. Amen.